A kipat cil-in Pasian in vantung le leitung a piangsak hi. Leitung in limlemel nei loin a awngthawlpi ahi hi. Tuipi tung tengah khua mial bikbek a, tua tui tungah Pasian’ Kha in na a sem hi. Pasian in, “Khuavak om hen,” ci hi; tua ciangin khuavak om pah hi. Pasian in tua khuavak hoih hi, ci-in a mu hi. Pasian in khuamial panin khuavak khenkhia hi. Pasian in khuavak pen “Sun” ci a, khuamial pen “Zan” ci hi. Nitak hong bei-in, zingsang hong tung a, ni khat ni ahi hi. Pasian in, “Tuite’ laizangah van kuumpi om hen la, tua van kuumpi in tui le tui kikhensak hen,” ci hi. Pasian in van kuumpi bawl a, van kuumpi tunga om tuite le van kuumpi nuai-a om tuite a khen hi. Tua mah bangin a piang pah hi. Pasian in van kuumpi pen “Vantung” ci hi. Nitak hong bei-in zingsang hong tung a, ni nih ni ahi hi. Pasian in, “Vantungte nuai-a om tuite mun khatah kikhawm hen la, lei keu kidawk hen,” ci hi. Tua mah bangin a piang pah hi. Pasian in lei keu pen “Leitung” ci a, a kikaikhawm tuite pen “Tuipi” ci hi. Pasian in tua pen hoih hi, ci-in a mu hi. Pasian in, “Leitung in kung tuamtuamte piangsak hen la, tang a nei kungnote, a gah sungah tang a om singgah kungte, amau’ nam ciatin leitungah piangsak hen,” ci hi. Tua mah bangin a piang pah hi. Leitung in kung tuamtuamte piangkhiasak a, kungnote in amau’ nam ciatin tang piangsakin, singkung in a sungah tang a om gahte piangsakin, amau’ nam ciatciatin piangsak hi. Pasian in tua pen hoih hi, ci-in a mu hi. Nitak hong bei-in zingsang hong tung a, ni thum ni ahi hi. Pasian in, “Sun le zan a khen dingin vantungah khuavakte om hen; tuate pen pawi hun le khuahun, ni le kumte khen nading hi hen la, leitung khua a vaksak dingin vantungah khuavak hi uh hen,” ci hi. Tua mah bangin a piang pah hi. Pasian in khuavak lian nih bawl a, khuavak lianzaw pen sun a uk ding, khuavak neuzaw pen zan a uk dingin bawl a, amah in aksite zong a bawl hi. Nitak hong bei-in zingsang hong tung a, ni li ni ahi hi. Pasian in, “Tuite in a nungta ganhing honpite piangsak hen la, vantung kantanin leitungah vasate leeng ta hen,” ci hi. Tua ahih ciangin Pasian in tuipi ganhing golpite le amau nam ciatin tuipi sungah tampi a pha, nuntakna a nei a gamtang thei ganhing namkim le kha a nei vasa khempeuh amau nam ciatin a piangsak hi. Pasian in tua pen hoih hi, ci-in a mu hi. Pasian in amaute thupha pia a, “Ci pha-in tampi pha-in, tuipi sung dim unla, leitungah vasate tampi pha un,” ci hi. Nitak hong bei-in zingsang hong tung a, a ni nga ni ahi hi. Pasian in, “Nuntakna a nei ganhingte amau nam ciatin leitung in piangsak hen: Innsa, gamsa, le a bokvak ganhingte amau nam ciatin piang ta hen,” a ci hi. Tua mah bangin a piang pah hi. Innsa, gamsa, le a bokvak ganhing khempeuh amau nam ciatin Pasian in a piangsak hi. Pasian in tua pen hoih hi, ci-in a mu hi. Tua ciangin Pasian in, “Eima lim, eimah hong sunin mihing bawl ni. Tuipi ngasate tung, huihlak vasate tung, ganhingte tung, le leitung a a bokvakte khempeuh tungah ukna neisak ni,” a ci hi. Tua ahih ciangin Pasian in ama lim bangin mihing piangsakin, Pasian’ lim bangin amah a piangsak hi. Amah in pasal le numei a piangsak hi. Pasian in amaute thupha pia a, Pasian in amaute tungah, “Ci pha-in tampi pha unla, leitung dimin zo un. Tuipi ngasate tung, leitungah a gamtang, a nungtate khempeuh tungah ukna nei ta un,” a ci hi. Pasian in, “En un, leitung maitang khempeuhah a om, tang a piangsak kungnote khempeuh le a gah sungah tang a om singkung khempeuh note tungah kong pia khinta hi. Tuate an-in na nei ding uh hi. Leitung ganhing khempeuhte tung, huih lak vasate khempeuh tung, leitungah a bokvakte khempeuh tung, nuntakna hu a neite khempeuh tungah an dingin kung hing khempeuh ka hong pia khinta hi,” a ci hi. Tua mah bangin a piang pah hi. Pasian in a bawlsate khempeuh en a, hoih sa mahmah hi. Nitak hong bei-in zingsang hong tung a, a ni guk ni ahi hi. Tua ahih ciangin vantung, leitung, le a sunga omte khempeuh kiman khin hi. Ni sagih ma-in Pasian in a nasepte zo khinta a, ama hihsa nasep khempeuh panin ni sagih ni-in a tawlnga hi. Tua ahih ciangin Pasian in ni sagih ni thupha pia-in siangthosak hi. Bang hang hiam cih leh piansak nasepna ama nasep khempeuh panin tua ni-in Pasian a tawlnga hi. Hihte pen, a kipiansak lai-a vantung le leitung tangthu ahi hi. Topa Pasian in leitung le vantungte a bawl hi. Topa Pasian in leitungah guah zusak nai lo a, leitang a kho ding mi om lo ahih manin gam sung kungnote lei sungah om nai lo a, lo sung ankungte pokhia lo hi. Tua ciangin leitung panin meiilum kaaito-in, lei maitang khempeuh a buah hunin Topa Pasian in leilak pana leivui tawh mihing bawl a, a nak sungah nuntakna hu sang suk hi. Tua mi pen leitung nuntakna a nei mihing hong suak pah hi. Topa Pasian in nisuahna lamah Eden huan khat bawl hi. Tua lai munah ama bawlsa mipa koih hi. A deihhuai, nek dinga a hoih singkung nam khempeuh, huan laizangah nuntakna singkung, le a pha le a sia theihna singkung, lei sung panin Topa Pasian in posak hi. Huan sung a kawtsak dingin Eden nawkin gun khat hong luang a, tua mun panin gun hong kikhenin li hong pha hi. A masa pen gun a min Pishon hi a, kham a omna, Havilah gambup kimkotah a luang pen ahi hi. Tua gam a khamte hoih hi. Tua munah bedolak singnai le onik suang om hi. A nihna gun min Gihon hi a, Kush gam kimkotah a luang pen ahi hi. Assiria gam nisuahna lamah a luang a thumna gun min Hiddekel ahi hi. A lina gun pen Eufratis gun ahi hi. Topa Pasian in mipa la-in, Eden huan kho-in a kem dingin a koih hi. Topa Pasian in mipa thu pia a, “Na ut utin huan sung singkung gah khempeuh na ne thei ding hi. Ahih hangin a pha le a sia theihna singkung gah pen na ne kei ding hi. Bang hang hiam cih leh tua na nek ni-in na si ding hi,” a ci hi. Tua ciangin Topa Pasian in, “Mipa amah guak a om ding hoih lo hi. Ama a’ ding a kituak a huh ding ka bawlsak ding hi,” ci hi. Tua ahih ciangin Topa Pasian in gam sung ganhing khempeuh le huih lak vasa khempeuh lei tawh bawl a, mipa in tuate bang a ci hiam ci-in a theihna dingin mipa kiangah tuate a paipih hi. Nuntakna a nei khempeuhte pen mipa’ cih bangbang a min hi pahpah hi. Mipa in ganhing namte khempeuh, huihlak vasate khempeuh le gam sung ganhing khempeuh min a vawh hi. Ahih hangin mipa a’ dinga a kilawm, amah a huh ding khat zong om lo hi. Tua ahih ciangin Topa Pasian in mipa ihmut suak mahmah sak a, ama ihmut kalin a nakguhte khat la-in tua mun pen satak tawh a dimsak hi. Topa Pasian in mipa’ tung panin a lakkhiat nakguh pen numei khatin bawl a, mipa kiangah tua nu a paipih hi. Tua ciangin mipa in, “Tu petpetin hih pen keima guhte le keima sate ahi hi. Amah pen mipa sung panin a kilakhia ahih manin ‘Numei’ kici ding hi,” a ci hi. Tua thu hangin pasal in a nu le a pa nusia-in a zi tawh kigawm a, amau tegel pum khat a bang uh hi. Mipa le a zi a guaktangin om uh a, maizum lo uh hi. Tu-in gulpi pen, Topa Pasian’ bawlsa gamlak ganhing dangte khempeuh sangin ngiansiam zaw hi. Amah in numei kiangah, “Pasian in, ‘Huan sung singgah khat peuhpeuh ne lo ding,’ hong ci ahi hiam?” ci hi. Numei in gulpi kiangah, “Huan sung singgahte ka ne thei ding uh hi. Ahih hangin Pasian in, ‘Huan laizang a om singgah na ne kei ding uh hi, zong na lawng kei ding uh hi. Tua bang hih le-uhcin na si ding uh hi,’ hong ci hi,” a ci hi. Ahih hangin gulpi in numei kiangah, “Na si kei ding uh hi. Bang hang hiam cih leh tua singgah na nek ciangun na mitte uh hong vak ding a, a pha le a sia thei-in, Pasian tawh na kibat ding lamtak uh Pasian in thei hi,” a ci hi. Tua ahih ciangin singkung a hoihna, mi a pilsak dingin tua a gah a deihhuaina a muh ciangin, a singgah loin a ne hi. Amah in singgah kimkhat a pasal pia a, a pasal in zong a ne hi. A nek khit phetun amau tegel in khua phawk uh a, a guaktangin a omlam uh kithei uh hi. Amaute in theitehte khui tuahin puansilh dingin a bawl uh hi. A nitak ciangin huan sungah Topa Pasian a hong paina ging amaute in za uh a, Topa Pasian’ muh loh dingin mipa le a zi, huan sung singte lakah a bu uh hi. Ahih hangin Topa Pasian in mipa samin ama kiangah, “Koi lai-ah om na hi hiam?” a ci hi. Amah in, “Nangma gin na huan sungah ka za a, ka lau hi. Bang hang hiam cih leh ka guaktangin om ka hih manin ka bucip hi,” a ci hi. Amah in, “Na guaktanga na omna kua in hong gen ahi hiam? Na nek loh dinga kong thupiak singgah ne kha na hi hiam?” ci hi. Mipa in, “Kei tawh a om dinga nong piak numei in singgah hong pia a, ke’n ka ne hi,” ci hi. Tua ciangin Topa Pasian in numei kiangah, “Bangci a hici gamtat na hi hiam?” a ci hi. Numei in, “Gulpi in kei hong khem a, ka ne hi,” ci hi. Tua ciangin Topa Pasian in gulpi kiangah, “Nang, hih bangin gamta khin na hih manin, ganhing khempeuhte le gamlak ganhing khempeuhte sangin samsiatna na ngahzaw hi. Na gilpi-in lam na pai ding a, na nuntak sung tawntungin leivui na ne ding hi. Nang le numei kikal na suanlekhakte le ama suanlekhakte kikalah kilangneihna ka omsak ding hi. Amah in na lutang hong sunim ding a, nang in ama khetul na sunim ding hi,” a ci hi. Tua ciangin numei kiangah, “Naupaiina-ah na gimna nakpitakin ka khangsak ding a, na a sapipi-in nau na nei ding hi. Ahi zongin na pasal mah na deih ding a, amah in nang tungah hong uk ding hi,” a ci hi. Tua ciangin mipa kiangah, “Nang in na zi’ thu mangin, ‘Nang in na ne kei ding hi,’ ci-in nang kong thupiak singgah ne na hih ciangin, nangma hangin leitang in samsiatna ngah hi. Na nuntak tawntung gimpi-in na semin na annek ding na zong ding hi. Ling le kiakte, nang a dingin hong pokhiasak ding a, nang in gamlak kungte na ne ding hi. Lei-ah na ciahkik matengin khua-ul kai-in na na sep ciang bekin an na ne ding hi. Bang hang hiam cih leh lei sung panin nang hong kipiangsak a, nang, leivui na hih manin, leivui mah na suakkik ding hi,” a ci hi. Mipa in a zi’ min pen Eve, ci hi. Bang hang hiam cih leh amah pen mihing khempeuh’ nu ahi hi. Topa Pasian in mipa le a zi a dingin savun puan bawl a, amaute silhsak hi. Tua ciangin Topa Pasian in, “En un, mipa pen eite khat tawh kibang a, a pha le a sia thei hi. Amah in nuntakna singgah ne-in a hin tawntung khak loh nadingin i vaihawm ding hi,” ci hi. Tua ahih ciangin Topa Pasian in, amah a kipiansakna leitang a kho dingin Eden Huan panin mipa a sawlkhia hi. Amah in mipa hawlkhia hi. Kherub-te le mun khempeuh a nga thei meikuang namsau pen nuntakna singkung lampi a cing dingin Eden Huan nisuahna lamah a koih hi. Tu-in mipa in ama zi Eve luppih a, amah gai-in Kain nei a, “ Topa’ huhna tawh mi khat ka ngah khin hi,” ci hi. Tua ciangin a sanggampa Abel nei leuleu hi. Tu-in Abel, tuu kem pa hi a, Kain, lo khopa ahi hi. Tua hun sungin Kain in lei pana piang gah piakna Topa’ tungah paipih a, Abel in a tuuhon tacilte le a sa limcite paipih hi. Topa in Abel le ama piakna thusim a, ahih hangin Kain le ama piakna thusim lo hi. Tua ahih ciangin Kain heh mahmah a, a mai sia hi. Topa in Kain tungah, “Bang hangin nang heh a, bang hangin na mai sia ahi hiam? Limtakin hih lecin, nang hong kisang lo ding ahi hiam? Limtakin na hih kei le nang hong hih nuamin mawhna in hong buk a, nang hong uk nuam hi. Ahih hangin nang in tua mawhna na zawh ding ahi hi,” a ci hi. Kain in a sanggampa Abel kiangah, “Gamlakah vak ni,” ci hi. Amaute gamlakah a om ciangin Kain in a sanggampa Abel a that hi. Tua ciangin Topa in Kain tungah, “Na sanggampa Abel koi-ah om ahi hiam?” a ci hi. Amah in, “Ka thei kei hi. Kei, ka sanggam a kem pa ka hi hiam?” ci hi. Topa in, “Bang hangin hici gamtat na hi hiam? Na sanggampa’ sisan, leilak panin kei tungah hong kiko hi. Na sanggampa’ sisan a hup dingin a kam a ka leitang tungah tu-in nang hong kisamsiat hi. Lo na khawh ciangin nang a dingin an hong piangsak nawn lo ding hi. Nang pen a galtai, leitung a a vakvai na hi ding hi,” a ci hi. Kain in Topa’ tungah, “Keimah gim hong kipiakna, ka thuak zawh ding hi lo hi. En in, tuni-in nangmah in leitung panin kei nong hawlkhia a, nang kiang panin kei nong notkhia hi. Kei pen a galtai, leitungah a vakvai ka hi ding a, kei hong mu peuhmah in hong that ding hi,” a ci hi. Tua ciangin Topa in ama kiangah, “Tua bang hi lo ding hi. Khatpeuh in Kain a thah le tua pa tungah a zah sagihin kithuk ding hi,” a ci hi. Amah a tuakpeuh in a thahkhak loh nadingin Topa in Kain’ tungah ciaptehna khat a koih hi. Tua ciangin Topa’ omna panin Kain paikhia-in Eden nisuahna lam Nod gam sungah a teng hi. Kain in a zi luppih a, amah gai-in Enok a nei hi. Kain in khuapi khat sat a, tua khuapi min dingin ama tapa’ min tamin Enok a phuak hi. Enok sung panin Irad suak a, Irad pen Mehujael’ pa ahi hi. Mehujael pen Methushael’ pa hi a, Methushael pen Lamek’ pa ahi hi. Lamek in zi nih nei hi. A khat’ min Adah hi a, adang khat’ min Zillah ahi hi. Adah in tapa Jabal nei hi. Amah pen puanbukte sungah tengin ganhing a neite’ pianna pupi ahi hi. A sanggampa’ min Jubal hi a, laiza lasakna le tamngai tumte khempeuh’ pianna pupi ahi hi. Zillah in Tubalkain nei a, sumngo le sik nazat khempeuh a bawlte’ pianna pupi ahi hi. Tubalkain’ sanggamnu pen Naamah ahi hi. Lamek in a zite kiangah, “Adah le Zillah aw, ka aw ngai un. Lamek’ zite aw, ka thugen ngai un. Kei hong liamsak manin mi khat, kei hong sat manin khanglai mi khat ka that khin hi. Kain a kithah manin a zah sagihin kithukkik ahihleh, Lamek a kithah manin a zah sawmsagihin kithukkik taktak ding hi,” a ci hi. Adam in a zi luppih leuleu hi. Amah in tapa khat nei a, a min Seth ci hi. Bang hang hiam cih leh, “Kain in Abel that ahih manin Abel’ tangin Pasian in kei a dingin naupang khat hong sehsak hi,” amah in ci hi. Seth in zong tapa khat nei a, ama min Enosh ci hi. Tua hun a kipanin mite in Topa bia-in a min lawh ding kipan ta uh hi. Hih pen Adam’ suanlekhakte’ laibu ahi hi. Pasian in mi a piansakin, amah in Pasian tawh a kisunin a bawl hi. Amah in numei le pasal a piangsak hi. Amaute a kipiansakin amah in amaute, “Mi,” ci a, amaute thupha a pia hi. Adam kum za le kum sawmthum a phak khit ciangin, amah a sun tapa khat nei a, Seth ci-in a min a phuak hi. Seth a suah khit ciangin Adam kum zagiat sung nungta lai hi. Amah in tanu le tapa dang zong a nei hi. Tua ahih ciangin Adam’ nuntak hun sungteng pen kum zakua le kum sawmthum hi a, tua ciangin amah si hi. Seth kum za le kum nga a phak ciangin Enosh kici tapa khat a nei hi. Enosh a suah khit ciangin Seth kum zagiat le kum sawmthum nungta a, tanu le tapa dang nei lai hi. Tua ahih ciangin Seth’ khan sungteng pen kum zakua le kum sawm le nih hi a, tua ciangin amah si hi. Enosh kum sawmkua a phak ciangin, amah in Kenan kici tapa khat nei hi. Kenan a suah khit ciangin Enosh kum zagiat le kum sawm le nga nungta a, tanu le tapa dang nei lai hi. Tua ahih ciangin Enosh’ khan sungteng pen kum zakua le kum nga hi a, tua ciangin amah si hi. Kenan kum sawmsagih a phak ciangin, Mahalalel kici tapa khat nei hi. Mahalalel’ suah khit ciangin Kenan kum zagiat le kum sawmli nungta a, tanu le tapa dang nei lai hi. Tua ahih ciangin Kenan’ khan sungteng pen kum zakua le kum sawm hi a, tua ciangin amah si hi. Mahalalel kum sawmguk le kum nga a phak ciangin Jared kici tapa khat nei hi. Jared’ suah khit ciangin Mahalalel kum zagiat le kum sawmthum nungta a, tanu le tapa dang nei lai hi. Tua ahih ciangin Mahalalel’ khan sungteng pen kum zagiat le kum sawmkua le nga hi a, tua ciangin amah si hi. Jared kum za le kum sawmguk le nih a phak ciangin Enok kici tapa khat nei hi. Enok’ suah khit ciangin Jared kum zagiat nungta a, tanu le tapa dang nei lai hi. Tua ahih ciangin Jared’ khan sungteng pen kum zakua le kum sawmguk le nih hi a, tua ciangin amah si hi. Enok kum sawmguk le kum nga a phak ciangin, Methuselah kici tapa khat nei hi. Methuselah’ suah khit ciangin kum zathum sung Enok le Pasian kikhawl a, tanu le tapa dang nei lai hi. Tua ahih ciangin Enok’ khan sungteng pen kum zathum le kum sawmguk le kum nga ahi hi. Enok pen Pasian tawh kikhawl hi. Enok kimu nawn lo hi; bang hang hiam cih leh Pasian in amah la hi. Methuselah kum za le kum sawmgiat le kum sagih a phak ciangin Lamek kici tapa khat nei hi. Lamek’ suah khit ciangin Methuselah kum zasagih le kum sawmgiat le nih nungta a, tanu le tapa dang nei lai hi. Tua ahih ciangin Methuselah’ khan sungteng pen kum zakua le kum sawmguk le kua hi a, tua ciangin amah si hi. Lamek kum za le kum sawmgiat le nih a phak ciangin tapa khat nei a, ama min Noah phuakin, “ Topa in a samsiatsa leitang panin hih pa in i nasepna le i gimnate-ah eite hong khahkhia ding hi,” a ci hi. Noah’ suah khit ciangin Lamek kum zanga le kum sawmkua le nga nungta a, tanu le tapa dang nei lai hi. Tua ahih ciangin Lamek’ khan sungteng pen kum zasagih le kum sawmsagih le sagih hi a, tua ciangin amah si hi. Noah kum zanga a phak khit ciangin Shem, Ham, le Jafeth, tapa thum a nei hi. Leitungah mite tam dingin hong kipanin, amau’ sung panin tanute hong suah ciangin, vana om mite in leitung mite’ tanute hoihsa uh ahih manin a deih bangun amaute zi-in a la uh hi. Tua ciangin Topa in, “Mihingte sungah ka Kha om paisuak nawn lo ding hi. Bang hang hiam cih leh mihingte a mawh hi khinta a, kum za le kum sawmnih sung kisik nading hun kipia lai bek ding hi,” a ci hi. Vana om mite in leitung mihing tanute luppihin, amaute in ta a neih hun laitak hitaleh tua khit hitaleh, amau’ suanlekhak Nefilim a kici mite leitungah om hi. Hih mite pen tang lai-a mi thahat, mi minthangte ahi uh hi. Leitungah mihing a gitlohna a liatna le mihing lungsim ngaihsutna peuhmah a sia ahih ngitngetna thu Topa in mu hi. Leitungah mihing a bawl pen Topa khial kisa a, tua thu in ama lungsim dahsak hi. Tua ahih ciangin Topa in, “Ka piansaksa mihing, ganhing, a bokvak ganhingte le huih lak vasate, leitung panin ka phiatkhia ding hi. Bang hang hiam cih le amaute ka bawl ka khial hi,” a ci hi. Ahih hangin Noah in Topa’ maipha mu hi. Noah’ tangthu hih bang ahi hi. Noah a thuman mi khat hi a, ama khangah paubaang lo hi. Noah pen Pasian tawh kikhawl hi. Noah in tapa thum, Shem, Ham, le Jafeth a nei hi. Tu-in Pasian’ muhna-ah leitung sia a, leitungah ngongtatna kidim hi. Pasian in leitung en a, a kisiagawp mu hi. Bang hang hiam cih leh leitungah mi khempeuh a sia-in a gamta lo kuamah om lo hi. Pasian in Noah’ kiangah, “Mi khempeuh beisak ding ka khentat zo hi; bang hang hiam cih leh amau’ hangin leitungah ngongtatna kidim hi. En in, leitung tawh amaute ka susia khawm ding hi. Nang a dingin noah-taak sing tawh teembaw khat bawl in. Teembaw sungah a deite bawl inla, a sung le a pua kultal tui tawh zut in. Na bawl nading dan hih bang ahi hi: Teembaw a sauna pi zali sawmnga, a zaina pi sawmsagih le nga, a sanna pi sawmli le nga hi ding hi. Teembaw a dingin kongkhak khat bawl inla, tua tung pi khat le alang ciangah zawh bawl in. A pangah teembaw kongkhak bulh in. A dawl nuainung, a dawl nihna le a dawl thumnate bawl in. Bang hang hiam cih leh, en in, leitungah a om nuntak husanna a nei khempeuh a susia dingin leitungah tuiciin ka tungsak ding hi. Leitung a om khempeuh si ding hi. Ahih hangin nang tawh ka thuciamna ka kipsak ding hi. Teembaw sungah nang na hong pai ding hi. Nang, na tapate, na zi le na tapate’ zite tawh na paikhawm ding uh hi. Nuntakna a nei khempeuh nang tawh a nungta dingin nam khatah nih ciat teembaw sungah na paipih ding hi. Tuate pen a nu le a pa hi ding hi. Vasate amau’ nam ciatin, ganhingte amau’ nam ciatin, leilakah a bokvak ganhingte peuhmah amau’ nam ciatin, a suakta dingin nam khatah nih ciat nang kiangah hong pai ding uh hi. A kine an nam khempeuh zong la inla khol in. Tuate pen nang le amaute a dingin an ding ahi hi,” a ci hi. Noah zong tua bangmahin gamta a, Pasian’ thupiak khempeuh a hih hi. Tua ciangin Topa in Noah kiangah, “Nang le na innkuanpih mi khempeuh teembaw sungah pai un. Bang hang hiam cih leh hih khang mite sung panin nang bek a thuman na hihna ka hong thei hi. Ganhing siangtho nupa kop sagih, ganhing a siang lo nupa kop khat, huih lak vasate zong nupa kop sagih, leitungah amau’ nam a manthan loh nadingin la in. Bang hang hiam cih leh ni sagih sungin sun sawmli le zan sawmli sung leitungah guah ka zusak ding hi. Ka bawlsa nuntakna a nei peuhmah leitung panin ka phiatkhia ding hi,” a ci hi. Noah in zong Topa’ thupiak khempeuh a hih hi. Leitungah tuiciin a tun lai-in Noah kum zaguk pha hi. Tuiciin a pelh dingin Noah, a tapate, a zi le a tapate’ zite teembaw sungah pai uh hi. Ganhing siangthote, a siang lo ganhingte, vasate, leitung a a bokvak peuhmah, a nupa kopin Pasian in Noah a thupiaksa bangin teembaw sungah Noah tawh pai uh hi. A ni sagih ni-in leitungah tuiciin tung hi. Noah’ nuntak kum zaguk kum, a kha nihna, tua kha ni sawm le sagih ni-in vana om a thuk mahmah tuikhukte puakkhamin, vantung tawlette kihong hi. Sun sawmli le zan sawmli sung leitungah guah zu hi. Tua ni teekteekin Noah le a tapate Shem, Ham, Jafeth, le Noah’ zi le a tapate’ zi thumte, amau tawh teembaw sungah a tum uh hi. Amaute le gamsa peuhmah amau’ nam ciat, innsa khempeuh amau’ nam ciat, leitungah a bokvak peuhmah amau’ nam ciat, le vasa peuhmah amau’ nam ciat, vasa namkim amau’ nam ciatin a tum uh hi. Nuntak husanna a nei khempeuh a nupa kop ciatin Noah tawh teembaw sungah a pai uh hi. Pasian in Noah tungah a thupiakna bangin nuntakna a nei khempeuh teembaw sungah a lut khit ciangin Topa in Noah kong a khaknelh hi. Leitungah tuiciin ni sawmli sung omden hi. Tui tam semsem a, teembaw laamto-in, leitung’ tungah khangin sangto lai hi. Tui khangto-in leitungah tam mahmah hi. Tui tungah teembaw laam hi. Leitungah tui khangkhang ahih manin mual lian a sangte khempeuh tuumcip hi. Mual liante tungah tui omto lai a, tuate tungah pi sawmnih le nih thuk-in tuumcip hi. Leitungah a nungta khempeuh, vasate, innsate, gamsate, a hon honin leitungah a hon om ganhingte khempeuh le mi khempeuh a si uh hi. Leitungah a om, nuntakna hu a nei peuhmah a si uh hi. Mihing, ganhing, a bokvakte le huih lak vasate, leitung a om nuntakna a nei peuhmah amah in phiatkhia hi. Leitung panin amaute kiphiatkhia hi. Noah le amah tawh teembaw sunga a omteng bek a suakta uh hi. Ni za le ni sawmnga sung leitungah tui om hi. Ahih hangin Pasian in Noah le amah tawh teembaw sungah a om gamsate le innsate khempeuh a phawk hi. Pasian in leitungah huih nungsak a, tui a kiam hi. Tui thukte le vantung tawlette kikhak a, vantung pana guahte kikhawlsak hi. Leitung panin tuite kiamkiam hi. Ni za le ni sawmnga a phak ciangin tuite kiam khinta hi. Kha sagihna, tua kha ni sawm le sagih ni-in Ararat mualtungah teembaw kinga hi. A kha sawmna ciang dong tuite kiamkiam lai hi. Kha sawmna, tua kha ni khat ni-in mual dawnte kidawk hi. Ni sawmli a cin ni ciangin Noah in ama bawlsa teembaw tawlet hong a, va-ak khat khah hi. Leitung panin tuite a keu mateng leeng kawikawi hi. Tua ciangin, leitungah tuite a kiam khin nai hiam cih a theihna dingin amah in vakhu khat khah hi. Ahih hangin, leitung khempeuhah tuite omlai-in, a khawl nading mu lo ahih manin teembaw-ah hong ciahkik hi. Tua ahih ciangin amah in a khut zanin a vakhu man a, teembaw sungah paipih hi. Amah in ni sagih sung ngakin, teembaw panin a vakhu khah leuleu hi. Nitak ciangin ama kiangah a vakhu hong ciahkik a, oliv teh a tukkhiat thak khat a mukah petin hong tunpih hi. Tua ahih ciangin leitung panin tuite kiam khinta hi, ci-in Noah in a thei hi. Tua ciangin ni sagih sung ngak leuleu-in a vakhu khah hi. Tua vakhu pen ama kiangah hong ciahkik nawn lo hi. Noah a khan kum zaguk le a kum khatna, a kha masa, tua kha ni masa ni-in leitung panin tuite keu hi. Noah in teembaw khuhna lakhia a, khuadak hi. Lei maitang na keu ta hi. A kha nihna, tua kha ni sawmnih le sagih ni-in leitung keu hi. Tua ciangin Pasian in Noah kiangah, “Nang le na zi, na tapate le na tapate’ zite, teembaw sung panin paikhia un. Nang tawh a omkhawm nuntakna a nei khempeuh - vasate, ganhingte le leitung a a bokvak peuhmah - leitungah tampi suakin, pungin leitungah a tam theih nadingin paikhiatpih in,” a ci hi. Tua ahih ciangin Noah paikhia a, a tapate le ama zi le a tapate’ zite mah tawh paikhia khawm hi. Ganhing khempeuh, a bokvak khempeuh, vasa khempeuh, leitung a a gamtang khempeuh a innkuan kuanin teembaw panin a paikhia uh hi. Tua ciangin Noah in Topa a’ ding biakna tau khat lam a, a siangtho ganhing khempeuh le a siangtho vasa khempeuh lak pan khat ciat la-in, biakna tau tungah meihal biakna a pia hi. Topa in a namtui gimnam a zak ciangin, a lungsim sungah, “Mihing’ gamtatna hangin leitang ka samsia kik ngei nawn kei ding hi. Bang hang hiam cih leh mihing’ lungsim ngaihsutna pen a tangval lai panin a gi lo hi mawk hi. Tu-a ka hih bangin nuntakna a nei khempeuh zong ka susia ngei nawn kei ding hi. Leitung a omlai tengin, lo pawi hun le anlak hun, a vot le a sa, khuakhal le phalbi, sun le zan bei lo ding hi,” a ci hi. Pasian in Noah le a tapate thupha pia a, amaute tungah, “Pung unla, tampi pha-in, leitung dim un. Note pen leitung ganhing khempeuh, huih lak vasa khempeuh, leilakah a bokvak khempeuh le tuipi ngasa khempeuh in hong kihta-in hong zahtak ding uh hi. Note’ khut sungah tuate hong kipia hi. A nungta a gamtang peuhmah, note a dingin an hi ding hi. Kung hing khempeuh ka hong piak bangin na khempeuh zong note ka hong pia hi. A nuntakna ahi a sisan pen a sa tawh na ne khawm kei bek ding uh hi. Mi khatpeuh in hong thah le ama tungah sihna dan ka pia ding hi. A hong that ganhing peuhmah ka that ding a, a mipihte a that mi peuhmah gim ka pia ding hi. Mi a that peuhmahte pen, midangte in amah that ding hi. Bang hang hiam cih leh Pasian in ama lim bangin mi bawl hi. “Note, pungin khang unla, leitungah tampi tak piangkhia-in, tampi pha-in khang un,” a ci hi. Tua ciangin Pasian in Noah le amah tawh a om a tapate kiangah, “En un, note le note’ khit a na suanlekhakte uh le, note tawh a om nuntakna a nei peuhmah, vasate, innsate, note tawh a om leitung gamsa peuhmah, teembaw sung panin a paikhia zahzah peuhmah tawh ka thuciamna ka kipsak hi. Nuntakna a nei khempeuh, tuiciin tawh susia kik ngei nawn loin, leitung a susia dingin tuiciin ka tunsakkik ngei nawn loh nadingin note tawh ka thuciamna ka kipsak hi,” a ci hi. Tua ciangin Pasian in, “Hih pen, kei le note le note tawh a om nuntakna a nei khempeuh kikalah mailam khang tawntung ah thuciamna lim ahi hi. Meii sungah ka sakhituihup ka kaisak a, tua pen kei le leitung kikalah thuciamna lim hi ding hi. Vantungah meii kong kaisak ciangin meii sungah sakhituihup a kimuh leh, kei le note le nuntakna a nei khempeuh tawh ka thuciamna ka phawk ding hi. Tuite pen, nuntakna a nei khempeuh a susia ding tuiciin suakkik ngei nawn lo ding hi. Meii sungah sakhituihup a om ciangin keimah in ka en ding a, kei le leitung a a om nuntakna a nei khempeuh tawh tawntung thuciamna ka phawk ding hi,” a ci hi. Pasian in Noah kiangah, “Hih pen, kei le leitung a a om nuntakna a nei khempeuh tawh ka kipsaksa thuciamna lim ahi hi,” a ci hi. Teembaw sung panin a paikhia Noah’ tapate, Shem, Ham, le Jafeth ahi hi. Ham pen Kanaan’ pa ahi hi. Hih Noah’ tapa thumte panin leitung buppi mi tawh hong kidim hi. Noah pen lo kho masa pa hi a, amah in leenggui lo khat a bawl hi. Amah in leenggahzu ne-in kham a, a puanbuk sungah bangmah silh loin a lum hi. Kanaan’ pa Ham in a pa guaktangin a omna mu a, a pualama om a sanggam nihte kiangah a gen hi. Tua ciangin Shem le Jafeth in puan khat la-in amau tegel’ liangko tuakah baang uh a, a nung leh lamun pai-in a pa uh’ guaktang omna a khuh uh hi. Amaute in maingat lo uh ahih manin a pa uh guaktang omna mu lo uh hi. Noah a zukhamna panin a pilvan’ ciangin ama tungah a tapa Ham’ gamtatna thei a, amah in, “Kanaan in samsiatna ngah ta hen la, a sanggamte’ sila hi tahen. Topa ka Pasian in Shem thupha pia hen la, Kanaan, ama sila hisak hen. Pasian in Jafeth pungsak hen la, Shem’ puanbukte sungah amah tengsak hen. Kanaan ama sila hisak hen,” a ci hi. Tuiciin a tun khit ciangin Noah kum zathum le kum sawmnga nungta hi. Noah’ khan sungteng pen kum zakua le kum sawmnga hi a, tua ciangin amah a si hi. Hihte pen Noah’ tapa Shem, Ham, le Jafeth-te’ suanlekhakte ahi hi. Tuiciin tun khit ciangin amau sung panin tapate hong piang hi. Jafeth’ tapate: Gomer, Magog, Madai, Javan, le Tiras ahi hi. Gomer’ tapate: Ashkenaz, Rifath, le Togarmah ahi hi. Javan’ tapate: Elishah, Tarshish, Kittim, le Dodanim ahi hi. Hihte pen tuipi gei-a teng mite’ pulepa ahi uh hi. Amaute’ leitangah amau’ kam pau ciat zangin, a beh, a minamin a om uh hi. Ham’ tapate: Kush, Egypt, Put, le Kanaan ahi hi. Kush’ tapate: Seba, Havilah, Sabtah, Raamah, le Sabteka ahi hi. Raamah’ tapate: Sheba le Dedan ahi hi. Kush in Nimrod kici tapa khat nei a, amah pen leitungah a vanglian masa mi ahi hi. Amah pen Topa’ mai-ah a minthang sabengpa zong ahi hi. Tua ahih ciangin, “ Topa in Nimrod bangin a minthang sabengpa hong suaksak ta hen,” kici hi. Ama kumpi gam kipatna Babel, Erek, le Akkad hi a, tuate khempeuh Shinar gam sungah om hi. Tua gam panin Assiria gam sungah amah pai-in Nineveh, Rehoboth-Ir, Kalah, le Nineveh le Kalah kikal-a om Resen khuapite a sat hi. Tua Kalah khuapi pen khuapi lian ahi hi. Egypt pen Lud mite, Anam mite, Lehab mite, Naftuh mite, Pathru mite, Kasluh mite (Filistia mite’ pianna), le Kaftor mite’ pianna pupi ahi hi. Kanaan pen ama sung pan a suak masa Sidon, Heth, le Jebus mite, Amor mite, Girgash mite, Hiv mite, Arki mite, Sin mite, Arvad mite, Zemari mite, le Hamath mite’ pianna pupi ahi hi. Tua khit ciangin Kanaan mite kizelthang hi. Kanaan mite’ gam pen Sidon panin kipanin Gerar lam manawhin Gaza ciang dong ban a, Sodom lam panin Gomorrah, Admah, le Lasha gei-a Zeboiim ciang dong ban hi. Hihte pen a innkuan, a kam pau, a leitang, a minamin Ham’ suanlekhakte ahi hi. Eber mi khempeuh’ pianna pupi, Jafeth’ u, Shem’ sung panin zong tate hong piang hi. Shem’ tapate: Elam, Asshur, Arpakshad, Lud, le Aram ahi hi. Aram’ tapate: Uz, Hul, Gether, le Mash ahi hi. Arpakshad in Shelah kici tapa khat nei a, Shelah in Eber kici tapa khat mah nei hi. Eber’ sung panin tapa nih suak a, khat’ min pen Peleg ahi hi. Bang hang hiam cih leh ama hunin leitung kikhen hi. A sanggampa’ min pen Joktan ahi hi. Joktan pen Almodad, Shelef, Hazarmaveth, Jerah, Hadoram, Uzal, Diklah, Obal, Abimael, Sheba, Ofir, Havilah, le Jobab’ pianna pa ahi hi. Hihte khempeuh Joktan’ tapate ahi hi. Amau’ tenna gam pen Mesha panin kipanin Sefar lamah nisuahna gam mualtung dong ban hi. Hihte pen a innkuan, a kam pau, a leitang, a minamin Shem’ suanlekhakte ahi hi. Hihte pen Noah’ tapate innkuan, a khangsimna tawh kizui-in amau’ minam ahi hi. Tuiciin tun khit ciangin hihte tung panin leitungah minamte kizelthang hi. Tua laitakin leitung buppi in kampau khat le kammal tawmno bek nei hi. Amaute, nisuahna lamah lal uh a, Shinar gam sungah zanglei mun khat mu-in tua lai-ah a teng uh hi. Amaute khatlekhat kiangah, “Hong pai un, leiseek seekin limtakin hal ni,” kici uh hi. Amaute in suang dingin leiseek nei uh a, a buan dingin kultal tui nei uh hi. Tua ciangin amaute in, “Hong pai un, leitung buppi-ah eite i kithehthang gawp loh nadingin ei a dingin khuapi khat bawlin, a dawn in vantung a ban ding tausang khat lamin, eite’ minthan nading khat bawl ni,” ci uh hi. Tua ciangin mihingte’ lamsa khuapi le tausangpi a en dingin Topa hong paisuk hi. Topa in, “En un, amaute minam khat hi uh a, amaute khempeuh in kampau khat nei uh hi. Hih pen amau’ sep ding a kipatna bek ahi hi. Tu-in sep dinga amau’ vaihawmte amau a dingin hi thei nawn lo ding hi. Hong pai un, amaute khatlekhat’ thugen a kitheih loh nadingun eite paisukin amau’ kampau va kitukalhsak ni,” a ci hi. Tua ahih ciangin Topa in tua lai panin leitung khempeuhah amaute thehthang a, a khuapi bawl uh a tawp uh hi. Tua ahih ciangin a min Babel kici hi. Bang hang hiam cih leh Topa in tua munah leitung khempeuh’ kampau kitukalhsak hi. Tua lai mun panin Topa in leitung khempeuhah amaute a thehthang hi. Hihte pen Shem’ suanlekhakte ahi hi. Shem kum zakhat a phak, tuiciin tun khit kum nih ciangin, amah in Arpakshad kici tapa khat nei hi. Arpakshad a suah khit ciangin Shem kum zakhat nungta lai a, tanu le tapa dang nei lai hi. Arpakshad kum sawmthum le nga a phak khit ciangin, amah in Shelah kici tapa khat nei hi. Shelah a suah khit ciangin Arpakshad kum zali le kum sawmthum nungta lai a, tanu le tapa dang nei lai hi. Shelah kum sawmthum a phak khit ciangin Eber kici tapa khat nei hi. Eber’ suah khit ciangin Shelah kum zali le kum sawmthum nungta lai a, tanu le tapa dang nei lai hi. Eber kum sawmthum le li a phak khit ciangin amah in Peleg kici tapa khat nei hi. Peleg a suah khit ciangin Eber kum zali le kum sawmthum nungta lai a, tanu le tapa dang nei lai hi. Peleg kum sawmthum a phak khit ciangin amah in Reu kici tapa khat nei hi. Reu a suah khit ciangin Peleg kum zanih le kum kua nungta lai a, tanu le tapa dang nei lai hi. Reu kum sawmthum le nih a phak khit ciangin amah in Serug kici tapa khat nei hi. Serug a suah khit ciangin Reu kum zanih le kum sagih nungta lai a, tanu le tapa dang nei lai hi. Serug kum sawmthum a phak khit ciangin amah in Nahor kici tapa khat nei hi. Nahor a suah khit ciangin Serug kum zanih nungta lai a, tanu le tapa dang nei lai hi. Nahor kum sawmnih le kua a phak khit ciangin amah in Terah kici tapa khat nei hi. Terah a suah khit ciangin Nahor kum za le sawm le kua nungta lai a, tanu le tapa dang neilai hi. Terah kum sawmsagih a phak khit ciangin amah in Abram, Nahor, le Haran a nei hi. Tu-in Terah’ suanlekhakte hih bang ahi hi. Terah pen Abram, Nahor, le Haran’ pa hi a, Haran pen Lot’ pa ahi hi. Ama pa Terah a sih ma-in ama suahna gam ahi, Khaldea gam Ur khua-ah Haran si hi. Abram le Nahor in zi nei uh hi. Abram’ zi min Sarai hi a, Nahor’ zi min Milkah hi a, Milkah pen Iskah’ pa Haran’ tanu ahi hi. Tu-in Sarai ciing a, ta nei lo hi. Terah in ama tapa Abram le Haran’ tapa, ama tupa ahi Lot, le a tapa Abram’ zi ahi a monu Sarai samin, Kanaan gam sungah a pai dingin Khaldea gam Ur khua panin amaute a paikhia khawm uh hi. Ahi zongin amaute Haran a tun uh ciangin tua munah a teng uh hi. Terah’ khansung kum zanih le kum nga hi a, Haran-ah Terah a si hi. Topa in Abram kiangah, “Na gam, na beh, le na pa’ inn panin nang kong lah ding gamah pai in. Thupha a ngah dingin minam lian khatin nang hong bawlin, thupha hong pia-in, na min kong liansak ding hi. Nang thupha hong piate thupha ka pia ding a, nang hong samsiate ka samsia ding hi. Nang’ thupha ngah bangin thupha a ngah nadingun leitung midang khempeuh in hong ngen ding uh hi,” a ci hi. Tua ciangin Topa’ gensa bangin Abram pai a, Lot in zong a zui hi. Haran panin a paikhiatin Abram kum sawmsagih le nga a pha hi. Abram in ama zi Sarai, a sanggampa’ tapa Lot, amau’ kaihkhopsa neihsa khempeuh, le Haran-a amau’ neih sila khempeuh samin, Kanaan gamah a pai dingin amaute ding khia uh a, tua gam a tung uh hi. Abram in tua gam sung nawkin Shekhem mun, Moreh tawsaw phung dong a tung hi. Tua hunin tua lai-ah Kanaan mite teng lai hi. Tua ciangin Abram’ tungah Topa kilang a, “Na suanlekhakte tungah hih leitang ka pia ding hi,” a ci hi. Tua ahih ciangin amah in ama tunga kilang Topa a dingin biakna tau khat a bawl hi. Tua ciangin Bethel panin nisuahna lam mualah amah kin kikin a puanbuk lam a, nitumna lamah Bethel, nisuahna lamah Ai om hi. Tua lai munah zong amah in Topa a dingin biakna tau khat bawl a, Topa’ tungah thu a ngen hi. Abram in a khualzin zom lai a, Negeb gam lam manawhin a pai lai hi. Kanaan gam sungah kialpi tung hi. Tua kialpi nasia ahih manin tawlkhat sung a om dingin Egypt-ah Abram a paisuk hi. Egypt gam a tum ding ciangin amah in a zi Sarai’ kiangah, “Nang pen nupi melhoih khat na hihna ka thei hi. Egypt mite in nang hong muh ciangin amaute in, ‘Hih nu ama zi hi,’ ci ding uh hi. Tua ciangin amaute in kei hong that ding uh a, ahi zongin amaute in nang hong nungtasak ding uh hi. Nang pen ka sanggamnu ci lehang, nangma hangin kei a dingin thu hong hoihzaw ding a, nangma hangin ka suakta thei kha ding hi,” a ci hi. Egypt gam sungah Abram a tun ciangin Egypt mite in tua nupi a mel hoihsa mahmah uh hi. Faro’ uliante in amah a muh uh ciangin Faro’ kiangah amah phat uh hi. Faro’ inn sungah tua nupi kila hi. Tua nu’ hangin amah in Abram limbawl mahmah hi. Amah in tuu, bawngtal, latal, pasal nasem, numei nasem, lanu, le kalaohte a pia hi. Ahih hangin Topa in Abram’ zi Sarai’ huhau-in Faro le a innkuanpihte gimna lianpi thuaksak hi. Tua ahih ciangin Faro in Abram samin, “Bang hangin hih bangin kei hong bawl na hi hiam? Amah na zi ahihna bang hangin kei kiangah hong gen lo na hi hiam? Ka zi dingin amah ka lak theih nadingin, ‘Amah ka sanggamnu hi,’ bang hangin hong ci na hi hiam? Tu-in hih lai-ah na zi om hi. Amah la in la pai un,” a ci hi. Faro in amah tawh kisai-in a mite tungah thu a pia hi. Amaute in a zi le ama neih khempeuh tawh lampi-ah a khakhia uh hi. Tua ahih ciangin Egypt panin Abram, a zi, ama neih khempeuh, le Lot zong tawh, Negeb gam lamah a paito hi. Abram in ganhing, ngun, le kham hau mahmah hi. Amah Negeb gam pan kipanin Bethel ciang dong, a kipat cil-in a puanbuk omnasa mun Bethel le Ai kikal, a masa-a biakna tau khat a bawlnasa munah khualzinin a paisuak hi. Tua lai munah Abram in Topa’ tungah thu a ngen hi. Abram tawh a paikhawm Lot in zong tuuhon, ganhon, le puanbukte nei hi. Tua ahih manin mun khatah a tengkhawm dingin leitang in amau tegel vak zo lo hi. Bang hang hiam cih leh amau’ gan neihsate tam mahmah ahih manin amau tegel tengkhawm thei lo uh a, Abram’ gancingte le Lot’ gancingte kitawng thei zel hi. Tua hun laitakin Kanaan mite le Perez mite tua gamah teng lai uh hi. Tua ciangin Abram in Lot’ kiangah, “Nang le kei’ kikal, nang’ gancingte le kei’ gancingte’ kikalah kitotna omsak kei ni. Bang hang hiam cih leh eite beh khat ihi hi. Na mai-ah gam buppi om hi lo ahi hiam? Kei’ kiang panin nangmah paikhia tawm in. Nang in veilam na lak leh, kei taklamah ka pai ding hi. Tua ahih kei leh zong, nang in taklam na lak leh, kei veilamah ka pai ding hi,” a ci hi. Lot zong khuadak a, Jordan gun kuam mun khempeuh in limtakin tui ngahin Topa’ huan hitaleh, Zoar lama Egypt gam tawh hitaleh kibang hi, ci-in mu hi. Hih pen Topa in Sodom le Gomorrah a suksiat hun ma ahi hi. Tua ahih ciangin Lot in ama a dingin Jordan gun kuam khempeuh teel a, nisuahna lamah a pai hi. Tua ahih manin amaute kikhen tuak uh hi. Kuam sunga khuapite’ lakah Lot tengin, a puanbukte Sodom ciang dongah khinin a om laitakin Kanaan gam sungah Abram teng hi. Tua laitakin Sodom mite migi lo hi a, Topa’ tungah nakpitakin a khialte ahi hi. Ama kiang panin Lot a paikhiat khit ciangin Topa in Abram’ kiangah, “Khuadak to inla, nangma omna panin leilu lam, leitaw lam, nisuahna lam, le nitumna lam en in. Bang hang hiam cih leh na muh gam khempeuh nang le na suanlekhakte kong pia paisuak ding hi. Na suanlekhakte, leitung leivui zahin tampi ka phasak ding hi. Mi khatpeuh in leitung leivui a sim theih leh na suanlekhakte zong kisim thei ding hi. Ding inla, gamdung gamvai kantanin pai in. Bang hang hiam cih leh nang’ tungah kong pia ding hi,” a ci hi. Tua ahih ciangin Abram in a puanbuk khinin, Hebron gam sung, Mamre tawsawte gei-ah hong pai-in a teng hi. Tua lai munah Topa a dingin biakna tau khat a bawl hi. Shinar kumpipa Amrafel, Ellasar kumpipa Ariok, Elam kumpipa Khedorlaomer, le Goiim kumpipa Tidal-te’ hun lai-in, hih kumpite in Sodom kumpipa Bera, Gomorrah kumpipa Birsha, Admah kumpipa Shinab, Zeboiim kumpipa Shemeber, le Bela (Zoar) kumpipa, kumpi ngate va sim uh hi. Hih kumpi ngate in kipawlna bawlin Siddim Kuam (Ci Tuipi)-ah a galkapte uh gawm uh hi. Amaute, kum sawm le nih sung Khedorlaomer’ khutnuai-ah om uh a, ahih hangin a kum sawm le thumna ciangin amaute in lehdo uh hi. A kum sawm le lina ciangin Khedorlaomer le amah tawh a kipawl kumpite hong pai-in sehnel gamgi Elparan ciang dongah Ashteroth Karnaim gam a Refaim, Ham gam a Zuzim, Shavehkiriathaim gam a Emim, le amau’ gam Seir Mual tunga Hori mite hong zo uh hi. Tua ciangin amaute kihei kikin Enmishpat (Kadesh) ah hong pai uh a, Amalek mite’ gam khempeuh le Hazazontamar gam a teng Amor mite zong zo uh hi. Tua ciangin Sodom kumpipa, Gomorrah kumpipa, Admah kumpipa, Zeboiim kumpipa, le Bela (Zoar) kumpipa kuankhia uh a, amaute kipawlin Siddim Kuam ah Ela kumpipa Khedorlaomer, Goiim kumpipa Tidal, Shinar kumpipa Amrafel, le Ellasar kumpipa Ariok tawh kido uh a, kumpi li kigawm le kumpi nga kigawm kido uh hi. Siddim Kuam pen kultal khukte tawh kidim a, Sodom le Gomorrah kumpite a tai uh ciangin pawlkhat tua khukte sungah kia uh a, a omlai teng mualtungah tai uh hi. Tua ahih ciangin galte in Sodom le Gomorrah-te’ na khempeuh le a an khempeuh uh la-in a ciah uh hi. Amaute in Sodom a, a teng Lot (Abram’ sanggampa’ tapa) le a na khempeuh zong la-in a paikhia uh hi. Tua ciangin a suakta mi khat hong pai-in, Hebru mi Abram’ kiangah hong gen hi. Amah pen Eshkol le Aner’ sanggampa ahi hi. Amor mi hi a, Mamre tawsawte gei-ah teng hi. Hih mite pen Abram’ kipawlpihte ahi hi. Ama behpa salin a kimatna Abram in a zak ciangin, ama inn sunga a suak, a kihilhsa ama mi zathum le sawm le giatte makaihin Dan ciang dong a delhin a pai uh hi. Amah in zan hunin ama pawlte, amah le a nasemte, amaute a do dingin khenin amaute zo a, Damaskas leilu lam Hobah ciang dong a delh uh hi. Tua ciangin amah in Lot le ama na khempeuh, numeite le a galmatte tawh a ciahpih kik hi. Abram in Khedorlaomer kumpipa le a pawlte a zawhna panin a ciahkik ciangin amah a dawn dingin Sodom kumpipa Shaveh Kuam (Kumpipa’ Kuam)-ah na pai hi. Tua ciangin Jerusalem kumpipa Melkhizedek in an le leenggahzu hong pusuah hi. Amah pen Sang Pen Pasian’ siampi zong ahi hi. Amah in thupha pia a, “Vantung le leitung a bawl, Sang Pen Pasian in Abram thupha pia hen! Na galte na khut sungah a hong pia Sang Pen Pasian in thupha ngah hen,” a ci hi. Abram in na khempeuh sawm-ah-khat ama tungah a pia hi. Sodom kumpipa in Abram’ kiangah, “A mite hong pia inla, ahih hangin a nate nang a dingin la in,” a ci hi. Ahih hangin Abram in Sodom kumpipa kiangah, “Vantung le leitung a bawl Sang Pen Topa Pasian tungah ka kiciam khinzo hi. Nangmah in, ‘Abram ka hausak hi,’ ci kha ding na hih manin mimkhau ahi a, khedap khau ahi a, nangma a’ ahi na khat peuhpeuh ahi zongin ka la kei ding hi. Tangvalte’ neksate le kei tawh hong kuan mite’ tanh dingte lobuang bangmah ka la kei ding hi. Aner, Eshkol, le Mamre-te amau’ tanh ding pia in,” a ci hi. Hih thute khit ciangin mang sungah Topa’ thu Abram’ tungah hong tung a, “Abram aw, lau kei in. Keimah in lauhuaina panin nang ka hong hu ding a, na thaman lian mahmah ding hi,” a ci hi. Ahih hangin Abram in, “ Topa Pasian aw, bang hong pia ding na hi hiam? Ta nei loin ka omlai hi. Ka inn a luah ding pa pen Damaskas mi Eliezer ahi hi. Ta nong pia kei a, ka inn sunga a suak sila in keima gamh a luah ding hi ta hi,” a ci hi. Tua ciangin ama tungah Topa’ thu hong tung a, “Hih mipa pen nangma gamhluah pa hi lo ding hi. Nangma tapa mahmah na gamhluah pa hi ding hi,” a ci hi. Amah in a pualamah paipih a, “Vantung lam enin aksite sim in; na sim thei hiam?” a ci hi. Tua ciangin amah in, “Na suanlekhakte, tua mah bang ding hi,” a ci hi. Amah in Topa muang hi. Tua ahih manin ahi ding bangin Abram gamta hi, ci-in Topa in a ciamteh hi. Tua ciangin ama kiangah, “Hih leitang na neih nadingin nangma tungah a hong pia dingin Khaldea gam Ur khua panin a hong paikhiatpih pa pen keimah na Topa ka hi hi,” a ci hi. Ahih hangin amah in, “Topa Pasian aw, keimah in tua leitang ka neih nading bangci theih ding ka hi hiam?” a ci hi. Amah in, “Kum thum a pha bawngla khat, kum thum a pha keelnu khat, kum thum a pha tuutal khat, vakhu khat le kawl vakhu khanglai khat hong paipih in,” a ci hi. Amah in Pasian kiangah hihte khempeuh paipih a, tuate phel nih ciat suahin, phel khat pen a phel dang khat tungah a koih ciat hi. Ahih hangin vasate phelnih suah lo hi. Sasialne vasate tua sate tungah hong tuk suk ciangin Abram in tuate a hawlkhia hi. Ni a tum ciangin Abram a ihmut nak suah mahmah a, khua mial bekbak a, lau mahmah hi. Tua ciangin Topa in Abram kiangah, “Na suanlekhakte amau’ leitang ahi lo munah tawlkhat sung omin, tua lai-ah amaute sila hi ding uh a, amaute kum zali sung kinengniam ding ahihna thu a kitel theihna thei in. Ahi zongin na a sepsak uh minamte’ tungah thukhenna ka tungsak ding a, tua khit ciangin neihsa tampi tawh amaute paikhia ding uh hi. Nang na hih leh, nuamtakin na pu na pate kiang na zuan ding a, khan kicingin hong kivui ding hi. Khang lina ciangin hih lai munah amaute hong paikik ding uh hi. Bang hang hiam cih leh Amor mite’ mawhna kicing nai lo hi,” a ci hi. Ni tumin khua a mial khit ciangin, en in, hih sate kikalah mei beel khu le a kuang meivak a pai hi. Tua ni-in Topa in Abram tawh thuciamna khat bawl a, “Na suanlekhakte tungah hih leitang, Egypt gun panin a lian gunpi ahi Eufratis gun ciang dong, Ken mite, Kenaz mite, Kadmon mite, Hit mite, Perez mite, Refaim mite, Amor mite, Kanaan mite, Girgash mite, le Jebus mite’ leitang ka hong pia hi,” a ci hi. Tua hunin Abram’ zi Sarai in ta nei nai lo hi. Amah in Hagar min nei Egypt mi sila numei khat nei hi. Sarai in Abram’ kiangah, “Tu-in en in, Topa in ka ta neih ding hong khaktan hi. Ka sila numei’ kiangah lum in. Ama sung panin keimah in ta a nei ding ka hi kha ding hi,” a ci hi. Abram in Sarai’ thu mang hi. Tua ahih ciangin, Kanaan leitangah Abram kum sawm a ten khit ciangin Abram’ zi Sarai in Egypt mi a sila numei Hagar la-in a pasal Abram’ tungah zi-in a pia hi. Amah in Hagar luppih a, Hagar gai hi. Amah a gai lam a kitheih ciangin kiphasakin a tonu simmawh bawl hi. Tua ciangin Sarai in Abram’ kiangah, “Keima tungah a man lo a hong kibawlna nangma tungah hong tung ta hen! Nangma kawi dingin ka sila numei kong pia a, amah a gai khitna a kitheih ciangin kei hong simmawh bawl hi. Topa in nang le kei’ kikalah thu hong khen ta hen,” a ci hi. Ahih hangin Abram in Sarai’ kiangah, “En in, na sila numei, nangma khut sungah om hi. Na ut bangin ama tungah bawl in,” a ci hi. Tua ciangin Sarai in amah gawt bawl a, Hagar zong a taikhia hi. Topa’ vantungmi in Shur paina lampi-a cik ahi, sehnel gam a ciktui gei khatah amah a mu hi. Amah in, “Sarai’ sila numei Hagar aw, koi pan hong pai a, koi-ah pai ding na hi hiam?” a ci hi. Amah in, “Ka tonu Sarai’ kiang panin a taikhia ka hi hi,” a ci hi. Tua ciangin Topa’ vantungmi in ama kiangah, “Na tonu’ kiangah ciahkik inla, ama tungah ki-ap in,” a ci hi. Topa’ vantungmi in ama kiangah, “Na suanlekhakte nakpitakin tamsak ding ka hih manin amaute kisim zo lo ding hi,” zong ci lai hi. Tua ciangin Topa’ vantungmi in ama kiangah, “En in, nau na paii a, tapa khat na nei ding hi. Ama min Ishmael na phuak ding hi. Bang hang hiam cih leh Topa in nangma thuakna hong mu khin hi. Amah pen la a zual nai lo bang ding a, amah in mi khempeuh langpangin mi khempeuh in amah langpang ding hi. Ama behte khempeuh a langpangin om ding hi,” a ci hi. Tua ahih ciangin ama tungah thu a gen Topa pen, “Nang, a mu thei Pasian khat na hi hi,” a ci hi. Bang hang hiam cih leh amah in, “Keimah in Pasian mu khin taktakin, amah ka muh khit ciangin hing lai hi lo ka hi hiam?” a ci hi. Tua ahih ciangin tua tuikhuk pen Beerlahairoi kici a, Kadesh le Bered kikalah om hi. Hagar in Abram tawh tapa khat nei hi. Abram in Hagar’ sung panin a suak ama tapa’ min dingin Ishmael a phuak hi. Hagar in Abram tawh a neih Ishmael a suah ciangin Abram kum sawmgiat le guk a pha ta hi. Abram kum sawmkua le kua a phak ciangin ama tungah Topa kilang a, “Kei, Vanglian Pasian ka hi hi. Hoihtakin gamta inla, paubaang kei in. Nang tawh thuciamna ka bawl ding a, nang tampi tak kong phasak ding hi,” a ci hi. Tua ciangin Abram mai kunsuk hi. Pasian in ama kiangah, “En in, nang tungah hih thuciamna kong bawl hi: Nang pen minam honpite’ pa na hi ding hi. Na min Abram hi nawn lo ding a, Abraham hi ding hi. Bang hang hiam cih leh minam honpite’ pa-in nang kong bawl khin hi. Keimah in suanlekhak tampi kong neisak ding hi. Nang sung panin minamte ka piangsak ding a, nang sung panin kumpite hong piangkhia ding hi. “Nang le nang’ khit cianga na suanlekhakte tungah Pasian hihna ding tawntung thuciam nadingin kei le nang’ khit cianga na suanlekhakte’ tungah amau’ khang tawntungin ka thuciamna ka kipsak ding hi. Nangma tung le nang’ khit cianga na suanlekhakte tungah tawlkhat na omna Kanaan leitang khempeuh na neih tawntung dingun kong pia ding a, kei pen amaute’ Pasian ka hi ding hi,” a ci hi. Pasian in Abraham’ kiangah, “Nang le nang’ khit cianga na suanlekhakte in zong ka thuciamna na zuih ding uh nong thukim ding uh ahi hi. Hih pen nang le nang’ khit cianga na suanlekhakte’ zuih ding keima thuciamna ahi hi: Note’ lak panin pasal peuhmah a vun ki-at ding hi. Note’ vun dawn ki-at ding a, tua pen kei le note’ kikalah thuciamna lim khat hi ding hi. Note’ lak panin ni giat a pha peuhmah pa a vun ki-at ding hi. Note’ khang tawntungin pasal peuhmah, note’ inn sunga suak hitaleh, note’ ta ahi lo, gamdang mi khatpeuh kiang panin na sum uh tawh na lei uh hitaleh na inn sunga suak hitaleh, na sum tawh a kileipa hitaleh a vun ki-at tuak ding hi. Tua ahih ciangin tawntung thuciamna ahi keima thuciamna pen nomau’ satak sungah om ding hi. A vun dawn a ki-at lo pasal peuhmah a mipihte kiang panin kihawlkhia ding hi. Bang hang hiam cih leh amah in keima thuciamna palsat hi,” a ci hi. Tua ciangin Pasian in Abraham’ kiangah, “Na zi Sarai ahihleh, ama min Sarai na ci nawn kei ding a, ama min Sarah hi ding hi. Amah thupha ka pia ding a, amah tawh tapa khat kong pia ding hi. Amah thupha ka pia ding a, amah, minamte’ nu hi ding hi. Mihingte’ kumpite ama sung pan hong piangkhia ding hi,” a ci hi. Tua ciangin Abraham mai kun sukin nui a, amahmah tungah, “Kum za a pha pasal khat in ta nei ding ahi hiam? Kum sawmkua a pha Sarah in ta nei ding ahi hiam?” kici hi. Abraham in Pasian’ kiangah, “Ishmael hong nungtasak peuh lecin,” a ci hi. Pasian in, “Hi lo hi. Na zi Sarah in nang a dingin tapa khat nei ding a, ama min Isaac na phuak ding hi. Ama khit cianga a suanlekhakte a dingin tawntung thuciam nadingin ka thuciamna amah tawh ka kipsak ding hi. Ishmael a’ ding na ngetna ahihleh ka za khin hi. En in, amah thupha pia-in ka pungsak ding a, tampi tak ka phasak ding hi. Amah pen ulian sawm le nihte’ pa hi ding a, minam lian khatin ka bawl ding hi. Ahih hangin, kumkik tuhun ciangin Sarah’ sung panin nang a’ dinga hong suak ding Isaac tawh ka thuciamna ka kipsak ding hi,” a ci hi. Amah tawh a kiho a man khit ciangin Abraham’ kiang panin Pasian paikhia to hi. Tua ciangin Abraham in a tapa Ishmael le ama sum tawh a lei hitaleh ama inn sunga suak hitaleh a sila, ama inn sunga om mite’ lak panin pasal khempeuh samin, Pasian in ama tunga a gensa bangin tua ni mahmahin amaute’ vun dawn a atsak hi. Ama vun dawn a ki-atin Abraham kum sawmkua le kua pha ta hi. Ama vun dawn a ki-atin a tapa Ishmael kum sawm le thum a pha hi. Tua ni mahmahin Abraham le a tapa Ishmael a vun uh ki-at hi. Ama inn sunga pasal khempeuh, inn sunga suak hitaleh gamdang mite’ tung panin sum tawh a kilei mite hitaleh, amah tawh a vun uh ki-at khawm hi. Mamre tawsaw gei-a Abraham a omna-ah Topa hong kilang hi. Abraham a puanbuk kong gei-ah sun nisat laitakin tu-in a om laitakin a khuadaktoh leh, ama mai-ah mi thum na ding hi. Amah in amaute a muh ciangin amaute a dawn dingin puanbuk kong panin va tai a, leilakah kunsukin, “Ka tote aw, nong hehpihna-un na sempa hong kheng kei un. Tua ciangin puanbuk sunga Sarah kiangah Abraham pai mengmeng a, “Annel hoihte lawh thum hong bawl mengmeng inla, meek manin mohin hong bawl in,” a ci hi. Abraham zong bawnghon lakah tai-in bawngno a dawng a hoih khat la a, manlang taka a na bawlpah a nasempa tungah a pia hi. Tua ciangin amah in, bawngnawi-thaukhal, bawngnawi, le a minsa bawngsa la-in amau’ mai-ah a lui hi. Amaute in a nek laitakun sing nuai-ah amau’ kiangah amah a ding hi. Amaute in ama kiangah, “Na zi Sarah koi-ah om ahi hiam?” a ci uh hi. Amah in, “Puanbuk sungah om hi,” a ci hi. Amaute khat in, “Tuzawh kha kua khit ciangin kong paikik taktak ding a, na zi Sarah in tapa khat nei ding hi,” a ci hi. Sarah in ama nung puanbuk kongah na ngai hi. Tu-in Abraham le Sarah teek ta uh a, a kum uh ham hi. Sarah a numei ngeina teng tawpta hi. Tua ahih ciangin Sarah amahmah nui-in, “Kei ka teek khit, ka topa zong a teek khitin tua bang hi thei nawn ding ahi hiam?” a ci hi. Topa in Abraham’ tungah, “Bang hangin Sarah nui-in, ‘Tu-in kei teek ka hih ciangin ta nei takpi ding ka hi hiam?’ ci ahi hiam? Na khat peuhpeuh Topa a dingin haksa lua ahi hiam? A kisehsa tuzawh kha kua ciangin nang kiangah kong paikik ding a, Sarah in tapa khat nei ding hi,” a ci hi. Ahih hangin Sarah in nialin, “Ka nui kei hi,” ci hi. Bang hang hiam cih leh amah lau hi. Amah in, “Hi lo hi, na nui mah hi,” a ci hi. Tua ciangin tua mun panin mite paikhia a, amaute in Sodom lam en uh hi. Amau’ pai nading lampi-ah a kha dingin Abraham in amaute va zui hi. Im kei ning. Bang hang hiam cih leh Topa in Abraham’ tunga a ciamsa thu a tunsak theih nadingin ama khita a tate le a innkuanpihte in thuman le thutangin nasepna tawh Topa’ thupiakte a zuih theih nadingun a hilh dingin amah ka teel khin hi,” a ci hi. Tua ciangin Topa in, “Sodom le Gomorrah a kimawhsakna lianin, amaute’ khialhna nasia mahmah kici ahih manin, kei tunga hong kigen bangin amaute gamta takpi uh hiam, ci-in a thei dingin ka paisuk ding hi. Tua bang ahih kei leh zong ke’n ka va thei ding hi,” a ci hi. Tua ahih ciangin tua panin mite kihei-in Sodom lamah pai uh a, ahi zongin Topa’ mai-ah Abraham ding lai hi. Tua ciangin Abraham in hong naihin, “Thuman mite, migilote tawh susia khawm takpi ding na hi hiam? Tua khuapi sungah thuman mi sawmnga bang om leh, tua sunga om thuman mi sawmngate’ hangin khah loin tua khua susia teitei ding na hi hiam? Thuman mite, migilote tawh a kibat nadingin migilote tawh thuman mite thahkhawm ding, hi thei ding ahi hiam? Tua pen hi thei lo ding hi. Leitung khempeuh Thukhen pa a manin gamta lo ding ahi hiam?” a ci hi. Topa in, “Sodom khuapi sungah thuman mi sawmnga ka muh leh, amaute’ hangin tua khua buppi ka khah ding hi,” a ci hi. Abraham in thu gen leuleu a, “En in, leivui le vut bang ahi lel keimah in Topa’ tungah thu kong gen ngamna hong maisak in. Thuman mi sawmnga sung panin nga om kei leh? Tua nga a om loh manin khuapi buppi na susia veve ding hiam?” a ci hi. Amah in, “Tua sungah sawmli le nga ka muh nakleh ka susia kei ding hi,” a ci hi. Ama kiangah thu gen kikin, “Tua sungah sawmli bang kimu leh,” a ci hi. Amah in dawngin, “Sawmlite’ hangin ka hih kei ding hi,” a ci hi. Tua ciangin amah in, “Topa heh kei in, thu kong gen lai ding hi. Tua lai-ah sawmthum bang kimu leh,” ci hi. Amah in dawngin, “Sawmthum ka muh leh ka hih kei ding hi,” a ci hi. Amah in, “En in, Topa tungah thu kong gen ngam lailaina hong maisak in. Tua lai-ah sawmnih bang kimu leh,” a ci hi. Amah in dawngin, “Sawmnihte’ hangin ka susia kei ding hi,” a ci hi. Tua ciangin amah in, “Topa heh kei in, hih khatvei bek thu hong gensak lai in. Tua lai-ah sawm bang kimu leh,” a ci hi. Amah in dawngin, “Sawmte’ hangin ka susia kei ding hi,” a ci hi. Abraham’ tungah a thugen ding a man khit ciangin ama pai nadingah Topa pai a, Abraham zong ama inn-ah a ciahkik hi. Vantung mi nihte Sodom ah nitakin hong tung a, Sodom khua kulhkongpi-ah Lot na tu hi. Lot in amaute a muh ciangin, amaute a dawn dingin ding a, leilakah a mai ngatin kun a, “Ka tote aw, kong thum hi. Na nasempa’ inn lamah hong kihei-in hong giak unla, na khete uh sil un. Tua ciangin zingsangin tho baihin na pai nading lam uhah pai pan un,” a ci hi. Amaute in, “Hi lo hi; khua lakah ka giak ding uh hi,” a ci uh hi. Ahih hangin amah in amaute nakpitakin kun ahih manin ama lamah kihei uh a, ama inn-ah a lut uh hi. Amah in amaute a dingin an bawl a, silngo sawh loh anlum emsak a, amaute in a ne uh hi. Ahih hangin amaute’ lup ma-in Sodom khua mite, a moi a hamin mi khempeuh in a inn umcih uh hi. Amaute in Lot sam uh a, “Tu nitak a nang kiangah hong tung mite koi-ah om ahi hiam? Amau’ taw ka luk theih nadingun ko kiangah amaute hong paikhiatpih in,” a ci uh hi. Lot, kongkhak pua-ah mite kiangah pai-in kong lehkhak a, “Ka sanggamte aw, tua banga na gitloh gamtat loh nading uh kong thum hi. En un, ta nungak nih ka nei hi. No kiangah amaute hong paikhiatpihsak unla, na ut bangun amaute tungah gamta un. Hih mite’ tungah bangmah gamta kei bek un. Bang hang hiam cih leh amaute, keima innsung hong tungkhin uh ahih manin ka hut ding kisam hi,” a ci hi. Ahih hangin amaute in, “Taikhia in. Kote kiangah hong peem pak a, tu-in nang thukhen hong kineih ding na hi hiam? Tu-in amaute sangin nang kong siatbawl zaw ding uh hi,” a ci uh hi. Tua ciangin amaute in nakpitakin Lot’ lam hong neh uh a, kongkhak a phukham zah dongin hong neh uh hi. Ahih hangin mi nihte in amau’ khut hong zanin innsung amau’ kiangah Lot paipihin kong khak uh hi. Inn kongkhakah a om mi a lian a neute, amaute in a mit uh tawsak uh hi. Tua ahih ciangin kongkhak a zawtzawt hangun mu zo lo uh hi. Tua ciangin mi nihte in Lot kiangah, “Hih lai-ah tanau dang na nei hiam? Makte, tapate, ahih kei leh khua sunga nang’ mi peuhpeuh hih mun panin paikhiatpih in. Bang hang hiam cih leh hih mite a kimawhsakna thu Topa’ tungah tung khin a, a susia dingin Topa in hong sawl khin ahih ciangin hih khua a susia ta ding ka hi uh hi,” a ci uh hi. Tua ahih ciangin Lot paikhia-in a tanute a tenpih dingte kiangah, “Manlangin hih khua panin paikhia un. Bang hang hiam cih leh Topa in hih khuapi a susia ding hi ta hi,” a ci hi. Ahih hangin amah pen a mak dingte tungah a ciamnui bang lel hi. Zingsang khuavak ciangin vantung mite in, “Khuapi gimpiakna sungah kangtum kha ding na hih uh ciangin kinawh inla, hih lai-a om na zi le na tanute la in,” ci-in Lot sawl hamtang uh hi. Ahih hangin amah lungka-in omlai veve hi. Ahi zongin Topa in ama tungah hehpihna nei ahih manin, mite in amah le a zi le a tanu nihte a khut uh tawh manin, amaute in amah paikhiatpihin khua pualamah koih uh hi. Amaute in a paikhiatpih khit uh ciangin, “Na nuntak nadingun tai un. Nunghei kei unla, kuam sungah zong khawl kei un. Note hong kangtum kha ding ahih manin mualtungah taito un,” a ci uh hi. Ahi zongin Lot in amaute tungah, “Hi lo hi, ka tote aw; en un, note’ muhna-ah na nasempa in maipha muzo a, ka nuntakna nong hutna uhah migitna lianpi kei tungah nong lak khin uh hi. Ahih hangin mualtung gamla ahih manin ka tun ma-in siatna in kei hong pha-in ka si ding hi. En un, gal-a om khuapi, tai nadingin nai a, khuapi neu khat ahi hi. Tua lai-ah hong taisak un - khuapi neu khat hi lo ahi hiam? tua hileh ka suakta ding hi,” a ci hi. Amah in ama kiangah, “En in, na gensa khuapi ka lumlet loh nading, hih maipha zong nang kong pia hi. Kinawh inla, tua lai-ah tai in. Bang hang hiam cih leh tua lai-ah nang na tun mateng ke’n bangmah ka hih thei kei hi,” a ci hi. Tua ahih ciangin tua khuapi min Zoar kici hi. Zoar-ah Lot a tun ciangin tua lai-ah ni suak khinta hi. Tua ciangin Topa in vantung panin Sodom le Gomorrah khuate tungah kaat le meikuang zusak hi. Amah in tua khuapite, kuamte khempeuh, khuapite sunga mi tengte khempeuh le leitung a a po khempeuh a susia hi. Ahih hangin a nunga om Lot’ zi nunghei a, amah ci khuam a suak hi. Topa’ mai-a a dinnasa munah zingsang tungin Abraham va pai hi. Sodom le Gomorrah le kuamte khempeuh lam nga sukin khuadak a, leitang khu pen, meiphualpi khu bangin a kah to a mu hi. Pasian in kuam sunga khuapite a suksiat lai-in, amah in Abraham phawk a, amah in Lot’ tenna khuapite a suksiat ciangin tua bang a suksiatna sung panin Lot sawlkhia ahih manin a suakta ahi hi. Tu-in Zoar panin Lot paikhia to-in a tanu nihte tawh mualtungah a teng hi. Bang hang hiam cih leh Zoar-ah a ten ding lau hi. Tua ahih ciangin a tanu nihte tawh suanghawm sung khatah a teng uh hi. A u pen in a nau tungah, “I pa lah teek ta a, leitung ngeina bangin eite hong luppih ding pasal khat zong om lo hi. Hong pai in; i pa leenggahzu khamsak ni; i pa tawh suanlekhak i kizopsak theih nadingin amah tawh lumkhawm ni,” a ci hi. Tua ahih ciangin amaute in tua nitakin a pa uh leenggahzu khamsak uh hi. A unu pai-in a pa tawh lum hi. A tanu a luplam hitaleh a thawhlam hitaleh amah in phawk lo hi. A zing ciangin a u in a nau tungah, “En in, zan zanin i pa tawh ka lum hi. Tu nitakin zong amah leenggahzu khamsak leuleu ni. Tua ciangin nang pai inla, i pa tawh suanlekhak i kizopsak theih nadingin amah tawh lumkhawm in,” a ci hi. Tua ahih ciangin amaute in tua nitakin zong a pa uh leenggahzu khamsak uh hi. A nau pai-in amah tawh lum hi. A tanu a luplam hitaleh a thawhlam hitaleh amah in phawk lo hi. Tua ahih ciangin Lot’ tanu tegel in a pa uh tawh naupaii uh hi. A u in tapa khat nei-in a min Moab phuak a, amah pen tuhuna Moab mite’ pianna pupi ahi hi. A nau in zong tapa khat nei-in a min Benammi phuak a, amah pen tu donga Ammon mite’ pianna pupi ahi hi. Mamre panin Negeb gamah Abraham paisuk a, Kadesh le Shur kikal Gerar-ah tawlkhat sung a teng hi. Abraham in a zi Sarah pen, “Ka sanggamnu hi,” ci hi. Gerar kumpipa Abimelek in mi sawlin Sarah samsak hi. Ahih hangin zanin mang sungah Abimelek kiangah Pasian pai a, ama kiangah, “En in, na laksa numei’ hangin nang a si ding na hi hi. Bang hang hiam cih leh amah, mi khat’ zi ahi hi,” a ci hi. Ahi zongin Abimelek in amah zuan nai lo hi. Tua ahih ciangin amah in, “Topa aw, nang in midik pa that ding na hi hiam? Amahmah in kei kiangah, ‘Amah, ka sanggamnu ahi hi,’ hong ci hi lo ahi hiam? A numei mahmah in zong, ‘Amah, ka sanggampa ahi hi,’ hong ci hi. Tua ahih ciangin lungsim kisuang hetloin a gamta ka hi a, khial ka kisa kei hi,” a ci hi. Tua ciangin Pasian in a mang sungin ama kiangah, “Hi hi, lungsim kisuanna om loin hih bangin na gamtatna thu ka thei a, kei tungah na khialh loh nadingin a hong kem pa kei mahmah ka hi hi. Tua ahih ciangin nang, amah kong lawngsak kei hi. Tua ahih ciangin tu-in mipa’ zi piakik in. Bang hang hiam cih leh amah, kamsang khat hi a, amah in nang a dingin thu hong ngetsak ding a, nang na nungta ding hi. Ahih hangin nang in tua numei na piakkik kei le nang le na mi khempeuh na sih taktak ding uh thei in,” a ci hi. Tua ahih ciangin zingsangin Abimelek tho baih a, a nasemte samin hih thute khempeuh amaute kiangah a gen hi. Amaute nak lau mahmah uh hi. Tua ciangin Abimelek in Abraham samin ama kiangah, “Bang hangin ko tungah hong hici gamtat na hi hiam? Kei le ka kumpi gam sungah khialhna lianpi khat nong tut nadingin nang’ tungah bang khialhna nei ka hi uh hiam? Hih dinga kilawm lo nate kei’ tungah nong hih hi,” a ci hi. Tua ciangin Abimelek in Abraham’ kiangah, “Hih banga na gamtat nadingin bang ngaihsun na hi hiam?” ci lai hi. Abraham in, “Hih lai munah Pasian zahtakna om het lo hi. Ka zi’ hangin amaute in kei hong that ding hi, ci-in ngaihsun kha ka hih manin hih bangin a gamta ka hi hi. Tua tham loin a taktakin amah ka sanggamnu mah ahi hi. Pa kikhat, nu tuam ka hi uh a, amah ka tenpih ahi hi. Pasian in ka pa’ inn panin hong paikhiatsak ciangin ama kiangah, ‘Hih pen kei’ tunga nong hih ding na migitna ahi hi: I paina peuhpeuhah kei pen ka sanggampa hi, hong ci in,’ ka ci hi,” a ci hi. Tua ciangin Abimelek in tuu le bawngtalte, sila numei le sila pasalte la-in Abraham pia a, ama tungah a zi Sarah a pia kik hi. Abimelek in, “En in, ka leitang, na mai-ah om hi. Nangmah in hoih na sakna munah teng in,” a ci hi. Sarah’ kiangah, “En in, na sanggampa tungah ngun tang tulkhat ka pia khin hi. Nang tawh a om mite khempeuh’ mai-ah nangma dikna a kilatna ahi hi. Mi khempeuh’ mai-ah nang a manin hong kibawl hi,” a ci hi. Tua ciangin Abraham in Pasian’ tungah thu ngen a, Pasian in Abimelek a damsak hi. Amaute in ta a neih theih nadingin a zi le a sila numeite zong a damsak hi. Bang hang hiam cih leh Topa in Abraham’ zi Sarah’ hangin Abimelek’ innkuan’ naubu khempeuh khakcipsak khin hi. A gensa bangin Topa in Sarah’ tungah thupha pia a, a gensa bangin Sarah’ tungah Topa in hih hi. Sarah gai a, ama tunga Pasian in a gensa hunin a teek zawhin Abraham tawh tapa khat nei hi. Abraham in Sarah tawh a neih ama tapa’ min dingin Isaac a phuak hi. Pasian in ama tunga a thu piaksa bangin amah in ni giat a phak ciangin a tapa Isaac a vun a at hi. A tapa Isaac a suah ciangin Abraham kum za pha hi. Sarah in, “Pasian in kei a dingin nuamin nuihzak nading hong bawlsak khin hi. A za peuhmah in nuamin hong nuihpih ding uh hi,” a ci hi. Amah in, “Sarah in nau nawi pia ding ci-in kua in Abraham’ tungah gen ngei ding ahi hiam? Ahi zongin a teek khitin amah tawh tapa khat ka nei hi,” a ci hi. Naupang khang a, nawi tawh hong kikhen ta hi. Isaac nawi tawh a kikhen ni ciangin Abraham in pawi lianpi khat bawl hi. Ahih hangin, Abraham tawh a neih Egypt mi Hagar’ tapa in ama tapa Isaac a ciamnuih bawlna Sarah in a mu hi. Tua ahih ciangin amah in Abraham’ kiangah, “Hih sila numei a tapa tawh lawnkhia in; bang hang hiam cih leh sila numei’ tapa in ka tapa Isaac tawh gamh luahkhawm thei lo ding uh hi,” a ci hi. Ama tapa’ hangin Abraham’ tungah thu nuam het lo hi. Ahih hangin Pasian in Abraham’ tungah, “Tangvalpa le na sila numei’ hangin lungkim loin om kei in. Sarah in nang’ tunga hong gen peuhmah ama hong gen bangin gamta in. Bang hang hiam cih leh Isaac tawh na suanlekhakte’ min ki lo ding hi. Sila numei’ tapa zong nangma ta mah ahih manin, minam khatin ka bawl ding hi,” a ci hi. Tua ahih ciangin zingsangin Abraham tho baihin an le tuithawl la-in Hagar pia a, ama liangko tungah naupang tawh suanin a sawlkhia hi. Amah paikhia a, Beersheba gam sungah a vak kawikawi hi. Thawl sunga tui a bei ciangin amah in sawlbawk nuai khatah naupang lawn hi. Tua ciangin amah pai-in a hoihkhop khat a gamla, thallot khat tan bangah a ta nungngatin a tusuk hi. Bang hang hiam cih leh amah in, “Naupang’ sih hong musak kei in,” a ci hi. Amah nungngatin a tut laitakin naupang nakpi-in a kap hi. Pasian in naupang’ kahna aw a za hi. Pasian’ vantungmi in vantung panin Hagar sam a, ama kiangah, “Hagar aw, bang in hong lungkhamsak ahi hiam? Lau kei in. Bang hang hiam cih leh naupang a omna munah a kahna awging Pasian in za hi. Dingin naupang la inla, na khut tawh kip takin len in. Bang hang hiam cih leh minam lian khatin amah ka bawl ding hi,” a ci hi. Tua ciangin Pasian in ama mit haksak a, amah in tuikhuk khat a mu hi. Amah pai-in tui tawh tuithawl dimin naupang a dawnsak hi. Pasian in tua naupang ompih a, amah khangto hi. Amah gamlakah teng a, thallot siampa khat hong suak hi. Paran gam sungah amah teng hi. A nu in Egypt gam panin ama a’ ding zi khat a la hi. Tua hun laitakin Abimelek le a galkap mangpa Fikol in Abraham’ kiangah, “Na sepna khempeuhah Pasian in nang hong ompih hi. Tua ahih ciangin tu-in kei hitaleh ka tate hitaleh ka suanlekhakte hitaleh tungah a man lopi-in hong bawl loin, nang tungah thuman tak tawh kong gamtat bangin keima tung le tawlkhat na omna leitang tungah nong gamtat nadingin Pasian tawh kei tungah hong kiciam in,” a ci hi. Abraham in, “Ka kiciam ding hi,” a ci hi. Abimelek’ nasemte in a suhsa tuikhuk tawh kisai thu Abraham in a lungkim lohna Abimelek’ kiangah a gen ciangin, Abimelek in, “Kua in hih hiam ka thei kei hi. Nang nong gen kei a, keimah in tuni dong ka za nai kei hi,” a ci hi. Tua ahih ciangin Abraham in tuu le bawngtalte la-in Abimelek pia a, tua mi nihte in thuciamna khat a bawl uh hi. Abraham in a tuuhon sung panin tuununo sagih tuam koih hi. Abimelek in Abraham’ kiangah, “Hih na koihtuam tuununo sagihte bang a cihnopna ahi hiam?” a ci hi. Amah in, “Keimah in hih tuikhuk ka tawhna thu-ah nang in keima a dingin teci na hih theih nadingin nangmah in ka khutsung panin hih tuununo sagihte na la ding hi,” a ci hi. Tua ahih ciangin tua mun Beersheba kici hi. Bang hang hiam cih leh amau tegel tua munah thu kiciam uh hi. Tua ahih ciangin amaute in Beersheba-ah thuciamna khat a bawl uh hi. Tua khit ciangin Abimelek le a galkap mangpa Fikol, Filistia mite’ leitangah ciahkik uh hi. Abraham in Beersheba-ah makeng kung khat suan a, tua lai munah Tawntung Pasian, Topa a bia hi. Filistia mite’ leitangah Abraham, sauveipi sung peemta-in a om hi. Hih thute khit ciangin Pasian in Abraham ze-et a, ama kiangah, “Abraham,” a ci hi. Amah in, “Hiah om ing,” a ci hi. Amah in, “Na it, na tapa neihsun Isaac, la inla Moriah gamah pai in. Tua lai mun a nang kiangah kong gen ding mual khat tungah meihal biakpiakna-in amah hong pia in,” a ci hi. Tua ahih ciangin zingsangin Abraham tho baih a, a la tutphah vawhin, ama nasem tangval nih le a tapa Isaac a paipih hi. Amah in meihal biakpiak nadingin sing ek a, ama tunga Pasian’ gensa munah a pai hi. A ni thum ni ciangin Abraham khuadak to-in a gamla-ah tua mun a mu hi. Tua ciangin Abraham in a nasemte kiangah, “Hih lai-ah la tawh na om un. Kei le tangvalpa hua lamah pai-in Pasian ka va bia ding uh a, note kiangah ka hong paikik ding uh hi,” a ci hi. Abraham in meihal biak nading sing la-in a tapa Isaac’ tungah suan a, amah in a khut sungah mei le temta a tawi hi. Tua bangin amau tegel paikhawm uh hi. Isaac in a pa Abraham’ kiangah, “Pa aw,” a ci hi. Amah in, “Hiah om ing, ka ta,” a ci hi. Amah in, “En in, mei le sing om hi. Ahih hangin meihal biakpiak nading tuuno koi-ah om ahi hiam?” a ci hi. Abraham in, “Pasian in meihal biakpiak nadingin ama a’ ding tuuno hong pia ding hi, ka ta aw,” a ci hi. Tua bangin amau tegel paikhawm uh hi. Ama kiangah Pasian’ gensa mun a tun uh ciangin, Abraham in tua lai-ah biakna tau khat bawlin, a ngeina ding bangin sing koihin, a tapa Isaac henin biakna tau tunga sing tungah a koih hi. Tua ciangin Abraham in a tapa a that dingin tem la hi. Ahih hangin Topa’ vantungmi in vantung panin, “Abraham, Abraham!” ci-in a sam hi. Amah in, “Hiah om ing,” a ci hi. Amah in, “Tangvalpa su kei in. Ama tungah bangmah hih kei in. Bang hang hiam cih leh nang in Pasian na zahtakna tu-in ka thei a, na tapa khat neihsun keima a dingin na humcip lohna ka mu hi,” a ci hi. Tua ciangin Abraham khuadak kawikawi a, khaumang lakah a ki-a a awk tuutal khat a nungah na om hi. Abraham pai-in tua tuutal kai a, ama tapa’ tangin meihal biakna-in a pia hi. Tua ahih ciangin Abraham in tua mun pen, “ Topa in hong sik hi,” ci-in min phuak a, tuni dongin Topa’ mual tungah hong kisik hi, a kici hi. Topa’ vantungmi in vantung panin Abraham a nih veina sam a, “Kei mahmah ka kiciam hi, Topa in ci hi. Bang hang hiam cih leh nang in hih thu na bawl khin a, na tapa neihsun na humcip kei hi. Nang thupha kong pia taktak ding a, na suanlekhakte vana aksite le tuipi gei-a sehnel bangin tampi ka phasak ding hi. Na suanlekhakte in amau’ galte’ khuapite luah ding uh a, na suanlekhakte thupha ka piak bangin, leitung minam khempeuh in thupha a ngah nadingun hong ngen ding uh hi. Bang hang hiam cih leh nang in ka thu na mang hi,” a ci hi. Tua ciangin a nasemte’ kiangah Abraham ciahkik a, Beersheba-ah paikhawm uh hi. Abraham Beersheba-ah a teng hi. Hih thute’ khit ciangin Abraham’ kiangah, “En in, Milkah in zong na sanggampa Nahor tawh tate nei hi: Uz a u pen hi. A sanggamte pen Buz, Aram’ pa Kemuel, Khesed, Hazo, Pildash, Jidlaf, le Bethuel ahi hi,” kici hi. Bethuel pen Rebekah’ pa ahi hi. Milkah in Abraham’ sanggam Nahor tawh tapa giat nei hi. Tua tham loin Reumah min nei a zineu in ta Tebah, Gaham, Tahash, le Maakah a nei hi. Sarah kum za le kum sawmnih le sagih nungta a, Kanaan mite’ gam sung Kiriatharba (Hebron)-ah a si hi. Abraham dahin kap a, a vui nading vaihawm hi. Abraham in a misi nusia-in Hit mite kiangah va pai a, “Kei pen note lakah khualmi hi-in peemta ka hi hi. Ka zi ka vui theih nadingin note’ lakah vui nading mun leitang hong pia un,” a ci hi. Hit mite in Abraham dawngin, “Topa aw, kote’ thu hong ngai in. Nang pen kote’ lakah a vanglian ulian khat na hi hi. Kote’ han na deih pen munah na zi vui in. Kote kuamah in nang a dingin a han it lo ding a, na zi vui ding hong khaktan lo ding hi,” a ci uh hi. Abraham dingin tua gammi ahi Hit mite’ lamah a kun hi. Amah in amaute’ kiangah, “Hih gamah ka zi ka vui ding nong deih uhleh, ka thu hong ngai un. Zohar’ tapa Efron in ama neih Makpelah leihawm kei tungah hong piak theih nadingin hong thumsak un. Tua pen ama lo nawlah om hi. Vui nading munin ka neihna dingin a man ding cing takin piakna tawh note’ muhna-ah kei tungah amah hong piasak un,” a ci hi. Tua laitakin Hit mite’ lakah Efron zong a om ahi hi. Khuapi kulhkongpi-ah a hong pai Hit mite khempeuh’ zakna-ah Hit mi Efron in Abraham dawng a, “Hi lo hi, ka topa aw, hong ngai in. Nang’ tungah lo kong pia hi. Tua sunga leihawm zong nang’ tungah kong pia hi. Ka mipihte’ muhna-ah nang’ tungah kong pia hi. Na misi vui in,” a ci hi. Tua ciangin tua gam mite’ mai-ah Abraham a kun hi. Tua gam mite’ zakna-ah amah in Efron’ kiangah, “Lungsim takpi tawh na cih ahihleh hong ngai in. Lo man ding kong pia ding hi. Tua lai-ah ka misi ka vui theih nadingin kei’ tung panin a man hong sang in,” a ci hi. Efron in Abraham dawngin, “Ka topa aw, ka thu hong ngai in. Leitang bek khat in ngun shekel zali man hi. Nang le kei’ kikalah bang thudang omnawn ahi hiam? Na misi vui in,” a ci hi. Efron’ cih bangin Abraham thukim hi. Abraham in Efron a dingin, Hit mite’ zakna-ah a min lawh zah, tua hun laitak a sumbukte’ lakah a kizang a gikzah tawh kizui-in ngun shekel zali a tehkhia hi. Tua ahih ciangin Makpelah a Efron’ lo, Mamre nisuahna lamah a om, a sunga om leihawm le a lo, le tua mun khempeuhah a om lo sunga singte pen khuapi kulhkongpi-ah a kikhawm mite khempeuh’ mai, Hit mite’ omna-ah Abraham’ neih dingin kipia hi. Hih bangin a kihih khit ciangin, Kanaan gam sunga om Mamre (Hebron) nisuahna lamah a om Makpelah lo sunga leihawm sungah Abraham in a zi Sarah a vui hi. Lo le a sunga om leihawmte si vui nading munin a neih dingin Abraham’ tungah Hit mite in a pia uh hi. Tu-in Abraham teekin a kum tam mahmah ta hi. Topa in na khempeuhah Abraham thupha pia hi. Abraham in ama neih khempeuh a uk, a inn sungah a upa pen a nasempa kiangah, “Ka phei nuai-ah na khut hong koih in. Nasempa in ama kiangah, “A numei in hih gamah kei hong zui nuam kei khaleh nangma nong paikhiatna gamah na tapa ka paipih kik ding hiam?” a ci hi. Abraham in ama kiangah, “Tua lai-ah ka tapa na paipih kik loh ding thei in. Ka pa’ inn le ka suahna leitang panin kei hong la-in, kei kiangah thu hong genin kei tungah hong kiciam a, ‘Na suanlekhakte’ tungah hih leitang ka pia ding hi,’ a hong ci vantung Pasian, Topa in nangma mai-ah a vantungmi sawl ding a, tua lai mun panin nangmah in ka tapa a’ ding zi khat na la ding hi. Ahih hangin a numei in nang hong zuih nop kei leh keima thuciamna panin nang na suakta ding hi. Bangbang hileh tua lai-ah ka tapa na paipih kik kei ding hi,” a ci hi. Tua ahih ciangin a nasempa in a topa Abraham’ phei nuai-ah a khut koih a, hih thu tawh kisai-in ama tungah a kiciam hi. Tua ciangin a nasempa in a topa’ kalaohte sawm la-in paikhia a, a topa’ tung panin letsong hoihnono a namkim la hi. Amah dingin Mesopotamia gam Nahor’ khuapi-ah a pai hi. Numeite’ nitak tuitawi hun laitakin khuapi pualam tuikhuk gei-ah amah in a kalaohte boksak hi. Amah in, “Ka topa Abraham’ Pasian, Topa aw, tuni-in ka maa hong vangsak in. Nang tungah thu kong ngen hi, ka topa Abraham’ tungah itna kip hong lak in. En in, tuikhuk gei-ah kei ka ding a, khuapi nungakte tuitawi dingin hong pai uh hi. Keimah in, ‘Tui ka dawn theih nadingin na beel hong nga suk in,’ ka cih ciangin, ‘Dawn in; na kalaohte zong tui ka pia ding hi,’ hong ci nu pen na nasempa Isaac a dingin na sehsa numei hisak in. Nangmah in ka topa tungah itna kip na lahna hih thu tawh ka thei ding hi,” a ci hi. Tua bangin a thunget a khit ma-in, Abraham’ sanggampa Nahor in a zi Milkah tawh a neih a tapa Bethuel’ tanu Rebekah a liangko tungah a tuibeel pua-in hong paikhia hi. Tua nu pen kuamah tawh a lumkhawm nai lo, nungak, a ngaihbaang mahmah khat ahi hi. Amah tuikhukah paisukin a beel dim a, hong paito hi. Tua ciangin amah a dawntuah dingin nasempa tai a, “Dawn ding tui tawmkhat na beel sung panin hong pia dih in,” a ci hi. Amah in, “Dawn in, ka topa,” a ci hi. Tua nu in a khut tungah a beel niamsuksakin amah a dawnsak hi. Amah in tua mipa tui a dawnsak khit ciangin, “Na kalaohte in a kham matengun a dawn ding zong tui kong tawisak ding hi,” a ci hi. Tua ahih ciangin amah in a tuikuang sungah a tui bungsuk pak a, tuitawi dingin tuikhukah tai-in a kalaohte khempeuh a dingin tui a tawi hi. Topa in ama khualzinna mavangsak ding hiam, vangsak lo ding hiam, cih a theih nadingin mipa in daptakin tua nu na en hi. Kalaohte in tui a dawn khit ciangin mipa in shekel lang a gik kham nakbah khat le shekel sawm a gik kham tau nih tua nu a dingin la-in pia a, “Kua’ tanu na hi hiam, hong gen in. Na pa’ inn-ah kote’ giah nading a awng ding hiam?” a ci hi. Tua nu in ama kiangah, “Nahor le a zi Milkah’ tapa Bethuel’ tanu ka hi hi,” a ci hi. Amah in, “Buhkung le gan-an a kicing ka nei uh a, giah nading mun zong ka nei uh hi,” ci thuah lai hi. Mipa a lu kunin Topa bia a, “Ka topa’ tungah a itna kip le a thumanna a pelh lo, ka topa Abraham’ Pasian, Topa in thupha ngah tahen. Kei ka hih leh, ka topa’ behte’ inn zuatna lampi-ah Topa in hong paipih hi,” a ci hi. Tua ciangin nungaknu a inn-ah tai-in hih thute khempeuh a innkuanpihte tungah a gen hi. Rebekah in Laban min nei sanggam pasal khat nei hi. Laban zong tuikhuka mipa kiangah a tai hi. Amah in nakbah le a sanggamnu’ khut tunga taaute a muh ciang le, “Mipa in hih bangin kei tungah hong gen,” ci-in a sanggamnu Rebekah’ kam gen a zak ciangin, mipa kiangah a pai ahi hi. Tuikhuka kalaohte kiangah amah na ding hi. Amah in, “Hong pai in, Topa’ thupha piakpa aw; bang hangin a pua-ah ding na hi hiam? Bang hang hiam cih leh inn-ah na om nading mun ka bawl khin a, kalaohte a’ ding mun zong om hi,” a ci hi. Tua ahih ciangin inn sungah mipa hong pai hi. Laban in kalaoh vante suah a, kalaohte a dingin buhkung le gan-an pia a, amah le a kikholhpih mite’ khe sil nadingin tui zong a pia hi. Tua ciangin nek dingin a mai-ah an kilui hi. Ahih hangin amah in, “Ka thu ka gen khit matengin an ka ne kei ding hi,” a cih ciangin amah in, “Gen in,” a ci hi. Tua ahih ciangin amah in, “Kei pen Abraham’ nasem ka hi hi. Topa in ka topa nakpitakin thupha pia a, amah a lian mahmah suak khin hi. Amah in ama tungah tuuhon, bawnghon, ngun le kham, nasem pasal le nasem numei, kalaoh le late tampi pia hi. Ka topa’ zi Sarah in a teek khitin ka topa tawh tapa khat nei hi. Amah in a neihsa khempeuh ama tungah pia hi. Ka topa in kei hong kiciamsak a, ‘Nangmah in amau’ gamah ka tenna Kanaan numeite lak panin ka tapa’ zi ding la kei inla, ka pa’ innkuan mi le ka behte kiangah pai-in ka tapa a’ ding zi khat na la ding hi,’ hong ci hi. Keimah in ka topa kiangah, ‘A numei in kei hong zui nuam kei kha leh,’ ka ci hi. Ahih hangin amah in kei tungah, ‘A thu ka man’ Topa in nang tawh a vantungmi hong sawlin na maa hong vangsak ding hi. Nang in ka behte le ka pa’ inn panin ka tapa a’ ding zi khat na la ding hi. Ka behte kiangah na pai ciangin amaute in nang hong piak kei leh ka thuciamna panin nang na suakta ding hi,’ hong ci hi. “Tuni-in tuikhukah pai-in, ‘Ka topa Abraham’ Pasian, Topa aw, tu-a ka paina ka maa nong vansak ding le, en in, tuikhuk gei-ah kei ka ding hi. Tuitawi dinga hong paikhia nungak tungah, “Na beel panin tui dawn ding tawmkhat hong pia in,” ka cih ciangin, “Dawn in, na kalaohte a’ ding zong kong tawisak ding hi,” hong ci nu pen, ka topa’ tapa a dingin Topa in a sehsa numei hisak in,’ ka ci hi. “Ka lungsim sungah thu ka nget khit ma-in, a liangko tungah a tuibeel pua-in Rebekah hong paikhia ka mu hi. Amah tuikhukah paisukin tui hong tawi hi. Keimah in ama kiangah, ‘Tui hong dawnsak in,’ ka ci hi. Amah in a liangko panin a beel hong khiasuk pahin, ‘Dawn in, na kalaohte zong tui ka pia ding hi,’ hong ci hi. Tua ahih ciangin keimah in ka dawn a, amah in kalaohte zong tui a pia hi. Tua ciangin, ‘Kua’ tanu na hi hiam?’ ci-in ka dong hi. Amah in, ‘Nahor le a zi Milkah’ tapa Bethuel’ tanu ka hi hi,’ hong ci hi. Tua ahih ciangin a nak tungah nakbah ka batsak a, a khut tungah taaute ka butsak hi. Tua ciangin ka lu kunin Topa ka bia a, a tapa a dingin ka topa’ behpa’ tanu a la dingin lampi manah kei a hong paipih, ka topa Abraham’ Pasian, Topa ka phat hi. Tua ahih ciangin tu-in, ka gamtat nading zia ka theih nadingin ka topa’ tungah hoihtak le thuman takin na gamtat ding uh le na gamtat loh ding uh hong gen un,” a ci hi. Tua ciangin Laban le Bethuel in dawng a, “Hih thu pen Topa’ kiang panin hong pai thu ahi hi. A sia ahi zongin a pha ahi zongin nang tungah kong gen ding dang uh om lo hi. En in, Rebekah na mai-ah om hi. Amah la inla pai un. Topa’ gensa bangin na topa’ tapa’ zi hisak un,” a ci uh hi. Abraham’ nasempa in amau’ kammalte a zak ciangin Topa’ mai leilakah a kunsuk hi. Nasempa in ngun le kham kizepnate le puante hong suahkhia-in Rebekah a pia hi. A sanggampa le a nu zong a manpha kizepnate a pia hi. Tua ciangin amah le a nungzuite in an ne tui dawnin, tua lai-ah tua zan a giak uh hi. Amaute zingsangin a thawh uh ciangin amah in, “Ka topa’ kiangah hong ciahsakkik un,” a ci hi. Ahi zongin a sanggampa le a nu in, “A tawm penin ni sawm bang, ko tawh numei hong omsak lai in; tua khit ciangin amah hong pai thei ding hi,” a ci uh hi. Ahih hangin amah in amaute kiangah, “ Topa in ka maa hong vangsak khin ahih nungsang kei hong zekaisak nawn kei un. Ka topa kiangah ka ciah theih nadingin hong paisak un,” a ci hi. Amaute in, “A numei samin amah i dong ding hi,” a ci uh hi. Amaute in Rebekah samin ama kiangah, “Hih mipa na zui pah ding hiam?” a ci uh hi. Amah in, “Ka zui ding hi,” ci pah hi. Tua ahih ciangin amaute in a sanggamnu uh Rebekah le a cingnu, Abraham’ nasempa le a nungzuite tawh ciahkhiasak uh hi. Amaute in Rebekah thupha pia-in ama kiangah, “Kote’ sanggamnu aw, a tultul a thenthente’ nu hi ta in. Na suanlekhakte in amau a mudahte’ khuapite luah ta uh hen!” a ci uh hi. Tua ciangin Rebekah le a numeite dingin, kalaohte tungah tuangin mipa a zui uh hi. Tua bangin nasempa in Rebekah la-in a pai nading lamah a pai hi. Tua kikalin, Isaac, Beerlahairoi panin hong pai-in Negeb gamah na teng hi. Isaac, thu a lungngaingai dingin nitakin gamlakah a paikhia hi. Amah a khuadak le kalaohte hong pai a mu hi. Rebekah in Isaac a muh ciangin, kalaoh tung panin kumin nasempa kiangah, “Hua lai-a mipa, eite hong dawn dingin gamlak a hong pai kua ahi hiam?” a ci hi. Nasempa in, “Ka topa hi,” a ci hi. Tua ahih ciangin amah in a kikhuhna puan la-in a kikhuh hi. Nasempa in Isaac kiangah a gamtatnasa khempeuh a gen hi. Tua ciangin Isaac in a puanbuk sungah Rebekah paipih a, amah pen a zi a suak hi. Amah in tua nu a it hi. Tua ahih manin a nu’ sih khit ciangin Isaac in hehnepna a ngah hi. Abraham in Keturah min nei zi dang khat la hi. Amah in tua nu tawh ta Zimran, Jokshan, Medan, Midian, Ishbak, le Shuah nei hi. Jokshan pen Sheba le Dedan’ pa ahi hi. Dedan’ tate: Asshurim, Lethusim, le Leummim ahi hi. Midian’ tate: Efah, Efer, Hanok, Abida, le Eldaah ahi hi. Hihte khempeuh, Keturah’ suanlekhakte ahi hi. Abraham in a neih khempeuh Isaac a pia hi. Ahih hangin Abraham in a zi dang tawh a tate tungah zong letsong pia a, ama nuntak lai mahin ama tapa Isaac kiang panin nisuahna lam gamah amaute a sawlkhia hi. Abraham, kum za le kum sawmsagih le nga a phak ciangin, a hu tawpna sang a, a teek, kum tampi a pha, a khanghamin si a, ama mite tawh kivui khawm hi. Abraham’ sih khit ciangin Pasian in a tapa Isaac thupha pia hi. Isaac, Beerlahairoi-ah a teng hi. Hihte pen, Abraham in Sarah’ sila numei ahi Egypt mi Hagar tawh a neih, Abraham’ tapa Ishmael’ suanlekhakte ahi hi. Hihte pen a suahna tawh kizui-in Ishmael’ tate’ min ahi hi: Ishmael’ ta upa pen Nebaioth hi a, tua ciangin Kedar, Adbeel, Mibsam, Mishma, Dumah, Massa, Hadad, Tema, Jetur, Nafish, le Kedemah ahi hi. Hihte pen a khua, a phual, a behin ulian sawm le nihte ahi Ishmael’ tate le amaute’ min ahi hi. (Ishmael kum za le kum sawmthum le sagih a phak ciangin a hu tawpna sang-in si a, a behte tawh kivui khawm hi.) Amaute, Egypt nisuahna, Assiria lam Havilah panin Shur dongah teng uh a, amau’ sanggamte khempeuh panin amau tuam ten uh hi. Hihte pen Abraham’ tapa Isaac’ suanlekhakte ahi hi. Abraham pen Isaac’ pa hi a, Aram mi Laban’ sanggamnu, Paddanaram gam a Aram mi Bethuel’ tanu Rebekah zi-in a lak lai-in Isaac kum sawmli pha hi. Isaac in Topa’ tungah a zi a dingin thu ngen hi. Bang hang hiam cih leh amah ciing hi. Topa in ama thungetna pia a, a zi Rebekah gai hi. Ama sungah a naute kilaigawp hi. Amah in, “Hih bang ahihleh bang hangin nungta se ka hi hiam?” a ci hi. Tua ahih ciangin Topa kiangah thukan dingin amah pai hi. Topa in ama kiangah, “Na gil sungah mi nam nih om a, nang’ sung pan a suak mihing nihte kikhen ding hi. Khat pen a khat sangin hat zaw ding a, a uzaw in a nauzaw’ na sem ding hi,” a ci hi. Amah a suah hun a tun ciangin, a gil sungah tapeeng om hi. A masa pen a sanin hong suak a, a pumpi khempeuh mul a nei puan tawh kibang hi. Tua ahih ciangin ama min dingin Esau phuak uh hi. Tua khit ciangin a sanggampa hong suakkhia a, ama khut in Esau’ khetul len hi. Tua ahih ciangin ama min dingin Jakob kiphuak hi. Amau’ suah ciangin Isaac kum sawmguk a pha hi. Tua naupangte a khan ciangin, Esau pen gam sung mi sabet siam khat hi a, Jakob ahihleh inn-ah om hithiatin a cingkam khat ahi hi. Isaac in Esau’ sa matsa nene ahih manin Esau mah itzaw a, ahi zongin Rebekah in Jakob itzaw hi. Khatvei Jakob in meh huanin a om laitakin gamlak a sa betna panin phukhong vei-in Esau hong ciah hi. Esau in Jakob kiangah, “Gilkialin phukhong vei ka hih manin tua na meh san tawmkhat hong nesak in,” a ci hi. (Tua ahih manin ama min Edom kici hi.) Jakob in, “Na innluahza hong pia lecin ka meh kong pia ding hi,” a ci hi. Esau in, “A si ding ka hita hi; kei a dingin innluahza bangin kimang ding ahi hiam?” a ci hi. Jakob in, “Kei’ tungah hong kiciam masa in,” a ci hi. Tua ahih ciangin ama tungah Esau kiciam a, Jakob’ tungah a innluahza a zuak hi. Tua ciangin Jakob in an le bemeh Esau a pia hi. Esau in zong an ne-in tui a dawn khit ciangin a pai nading a zuan hi. Tua ahih manin Esau in a innluahza tua ciang bang bekin a ngaihsun ahi hi. Abraham’ hun lai-a kialpi banah, tu-in tua gam sungah kialpi dang khat tung hi. Filistia mite’ kumpipa Abimelek’ omna Gerar-ah Isaac pai hi. Ama tungah Topa kilang a, “Egypt-ah paisuk kei inla, kong gen ding leitangah teng in. Hih leitangah tawlkhat om in. Nang tawh kong omkhawm ding a, thupha kong pia ding hi. Bang hang hiam cih leh nang le na suanlekhakte tungah hih leitangte kong pia ding a, na pa Abraham’ tungah ka thuciam ka tungsak ding hi. Na suanlekhakte vana aksi bangin tampi ka phasak ding a, na suanlekhakte tungah hih leitang khempeuh ka pia ding hi. Na suanlekhakte thupha ka piak bangin leitung minam khempeuh in thupha a ngah nadingun hong ngen ding uh hi. Bang hang hiam cih leh Abraham in ka thu mangin, ka sawlna, ka thupiakna, ka ngeina kip le ka thu zui hi,” a ci hi. Tua ahih ciangin Isaac, Gerar-ah teng hi. Tua mun mite in ama zi tawh kisai thu a dot uh ciangin amah in, “Ka sanggamnu hi,” a ci hi. Bang hang hiam cih leh, “Rebekah’ hangin tua gam mite in hong that kha ding ahih ciangin,” ci-in ngaihsun ahih manin, “Ka zi hi,” a cih ding lau hi. Bang hang hiam cih leh amah ngaihbaang hi. Tua lai-ah amah sauveipi a om khit ciangin, Filistia mite’ kumpipa Abimelek a tawlet panin khuadak a, Isaac in a zi Rebekah a noh laitak mu kha hi. Tua ahih manin Abimelek in Isaac samin, “En in, amah na zi ahi hi. Tua ahih ciangin bangci-in nang in, ‘Amah ka sanggamnu hi,’ ci thei na hi hiam?” a ci hi. Isaac in ama kiangah, ”‘Ama hangin si kha ding ka hih ciangin,’ ci-in ngaihsun ka hihna hang hi,” a ci hi. Abimelek in, “Ko tungah bangci-a hih bangin hong gamta na hi hiam? Mite khat peuhpeuh na zi tawh lumkhawm pak kha thei ding a, kote’ tungah mawhna hong tun na hi ding hi,” a ci hi. Tua ahih ciangin Abimelek in mi khempeuh thu zasak a, “Hih mipa ahi zongin a zi ahi zongin a sukha peuhmah kithat ding hi,” a ci hi. Isaac in tua leitangah khai tuh a, tua kum mahin a zah zakhat la hi. Topa in amah thupha pia a, a neihsa kibehlaplap ahih manin a hau mahmah khat a suak hi. Amah in tuuhon le bawnghon, le innkuan mi tampi nei a, Filistia mite in amah eng uh hi. (Ama pa Abraham’ hun lai-a a pa’ nasemte in a tawh tuikhuk khempeuh tu-in Filistia mite in hucipin lei vuk uh hi.) Abimelek in Isaac kiangah, “Kote’ kiang panin paikhia in. Bang hang hiam cih leh kote sangin nang na vanglian zaw hi,” a ci hi. Tua ahih ciangin tua mun panin Isaac paikhia a, Gerar kuam sungah phual satin tua munah a teng hi. Isaac in a pa Abraham’ hun lai-a a kitosa tuikhukte to pha kik hi. Bang hang hiam cih leh Abraham’ sih khit ciangin Filistia mite in tuate vukcip uh hi. Amah in a pa’ phuahsa minte mah phuak kik hi. Ahih hangin Isaac’ nasemte in tua kuam sung to-in tuikhuk a muh uh ciangin, Gerar gancingte le Isaac’ gancingte kitawng uh a, “Tui, ko a’ hi,” ci uh hi. Tua ahih ciangin amah in tua tuikhuk Esek ci-in min a phuak hi. Bang hang hiam cih leh amaute le amah kitawng uh hi. Tua ciangin amaute in tuikhuk dang khat to uh a, tua tungtangah zong amaute kitawng leuleu uh hi. Tua ahih ciangin amah in tua pen Sitnah ci-in min a phuak hi. Tua mun panin amah kinin tuikhuk dang khat to leuleu hi. Tua tungtangah amaute kitawng nawn lo uh hi. Tua ahih ciangin amah in Rehoboth ci-in min a phuak hi. “Bang hang hiam cih leh tu-in Topa in eite a dingin omna hong bawlsak khin a, eite hih gamah i pung ding hi,” a ci hi. Tua lai mun panin amah Beersheba-ah paito hi. Tua zan mahin ama tungah Topa kilang a, “Kei pen na pa Abraham’ Pasian ka hi hi. Lau kei in; bang hang hiam cih leh ka nasempa Abraham’ huhau-in nang tawh kong om a, nang le na suanlekhakte thupha hong pia-in kong pungsak ding hi,” a ci hi. Tua ahih ciangin amah in tua lai munah biakna tau khat lamin Topa bia a, tua munah puanbuk a lam hi. Tua lai-ah Isaac’ nasemte in tuikhuk khat a to uh hi. Tua ciangin Gerar panin Abimelek a thu lamlak pa Ahuzzath le a galkap mangpa Fikol tawh Isaac kiangah hong pai hi. Isaac in amaute’ kiangah, “Note in kei hong mudahin note’ kiang panin hong hawlkhia na hih uh ciangin bang hangin kei’ kiangah hong hawh na hi uh hiam?” a ci hi. Tua ahih ciangin amah in amaute a dingin pawi khat bawl a, amaute in pawi an ne-in a dawn uh hi. Zingsangin amaute tho baih uh a, khatlekhat kiciamna a bawl uh hi. Isaac in amaute a lampi ding uhah kha a, ama kiang panin amaute lungnuam takin a paikhia uh hi. Tua ni mahin Isaac’ nasemte hong pai-in amau’ tawhsa tuikhuk thu ama kiangah hong gen uh a, “Tui ka muzo uh hi,” hong ci uh hi. Amah in tua pen Shibah ci-in min phuak hi. Tua ahih ciangin tua khuapi min pen tuni dongin Beersheba kici hi. Esau kum sawmli a phak ciangin, Hit mi Beeri’ tanu Judith le Hit mi Elon’ tanu Basemath zi-in la hi. A zi tegel in Isaac le Rebekah’ nuntakna haksasak uh hi. Isaac teekin a mitte maangin khua a muh theih nawn loh ciangin a ta upa zaw Esau samin ama kiangah, “Ka tapa aw,” a ci hi. Amah in dawngin, “Hiah om ing,” a ci hi. Amah in, “En in, kei ka teek hi. Ka sih ding hun ka thei kei hi. Tua ahih ciangin tu-in, na hiamte ahi na thallawng le na thal la inla, gamlakah pai-in kei a dingin sa va beng in. Ka sih ma-in nang thupha kong piak theih nadingin kei’ duh bangin an lim hong bawl inla, ka nek dingin hong paipih in,” a ci hi. Isaac in a tapa Esau a hopih laitakin Rebekah in na ngaisim hi. Sa bengin a ciahpih dingin Esau gamlakah a kuan ciangin, Rebekah in a tapa Jakob kiangah, “Na sanggampa Esau’ tungah na pa’ thugen ka za a, ‘Ka sih ma-in Topa’ mai-ah nang thupha kong piak theih nadingin ka nek dingin na sa matsa hong paipih inla, kei a dingin an lim hong bawl in,’ ci hi. Tua ahih ciangin tu-in ka ta aw, kong thupiak bangin gamta in. Ama duh bangin na pa a dingin an lim ka bawl theih nadingin keelhon lakah va pai inla keelno a hoih nih hong paipih in. Na pa in a sih ma-in nang thupha hong piak theih nadingin a nek dingin na pa kiangah na va paipih ding hi,” a ci hi. Ahih hangin Jakob in a nu Rebekah kiangah, “En in, ka sanggampa Esau pen mulnei mi hi a, kei pen cineel mi ka hi hi. Ka pa in kei hong lawngkha leh, amah in ka khemna hong thei ding a, kei’ tungah thupha hi loin samsiatna hong tung zawsop ding hi,” a ci hi. A nu in ama kiangah, “Nangma thuak ding samsiatna kei tungah hong tung ta hen, ka ta aw; ka thu hong mang peuh inla, pai-in keelnote kei’ kiangah hong puak in,” a ci hi. Tua ahih ciangin amah pai-in keelnote va la-in a nu kiangah paipih a, a pa’ duh bangin a nu in an lim a bawl hi. Tua ciangin Rebekah in inn-a a kep, ama ta upa zaw Esau’ puan hoihpente la-in a ta nauzaw Jakob a silhsak hi. Amah in keelnote’ vun ama khut tung le a neelna mun a ngawng sanah silhsak a, a bawlsa meh lim le an a tapa Jakob a pia hi. Tua ahih ciangin a pa’ kiangah amah pai a, “Ka pa aw,” a ci hi. Amah in, “Hiah om ing, ka ta aw; kua na hi hiam?” a ci hi. Jakob in a pa kiangah, “Na ta upa zaw Esau ka hi hi. Nong gen bangin ka hih khin hi. Kei thupha nong piak theih nadingin tu-in tuto inla, ka sa matsa ne in,” a ci hi. Ahih hangin Isaac in a tapa’ kiangah, “Ka ta aw, bangci-a hong hici manlan pak na hi hiam?” a ci hi. Amah in dawngin, “ Topa nangma Pasian in kei hong tuahphasak hi,” a ci hi. Tua ciangin Isaac in Jakob kiangah, “Ka ta aw, ka ta Esau taktak na hi hiam, na hi kei hiam kong lawn theih nadingin ka nai-ah hong pai in,” a ci hi. Tua ciangin a pa Isaac’ kiangah Jakob pai a, amah lawngin, “A aw, Jakob’ aw hi, ahih hangin a khutte, Esau’ khut hi,” a ci hi. A khutte in a sanggampa Esau’ khut bangin mul nei ahih manin amah in thei lo hi. Tua ahih ciangin amah in thupha pia dingin kithawi a, “Ka ta Esau taktak na hi hiam?” ci-in dongkik hi. Amah in dawngin, “Ka hi hi,” a ci hi. Tua ciangin amah in, “Ka tapa nangma sa matsa ne-in thupha kong piak theih nadingin ka kiangah hong paipih in,” a ci hi. Tua ahih ciangin amah in a kiangah paipih a, amah in a ne hi. Amah in leenggahzu paipihin, amah in a dawn hi. Tua ciangin a pa Isaac in ama kiangah, “Ka kiangah hong pai inla hong nam in, ka ta aw,” a ci hi. Tua ahih ciangin amah a nai-ah hong pai-in a pa a nam hi. Amah in a puan gimnamte nam a, amah thupha pia-in, “En in, ka tapa’ gimnam pen Topa in thupha a piak gamlak gimnam tawh kibang! Pasian in na tungah vantung daitui hong pia hen la, na lote hoihsak tahen. An le leenggahzu tampi hong pia tahen. Mite in nangma na hong sem hen la, minamte na mai-ah hong kun ta uh hen. Na sanggamte’ tungah topa hi inla, na sanggamte’ suanlekhakte, na mai-ah hong kun uh hen. Nang hong samsia peuhmah in samsiatna ngah hen la, thupha hong pia peuhmah in thupha ngah ta hen,” a ci hi. Isaac in Jakob thupha a piak a man khit, a pa Isaac’ omna panin Jakob a paikhiat khit phetin, a sa betna panin a sanggampa Esau hong tung hi. Amah in zong an lim bawlin a pa’ kiangah hong paipih hi. Amah in a pa’ kiangah, “Thupha nong piak theih nadingin na tapa’ sa matsa a ne dingin ka pa hong tho in,” a ci hi. A pa Isaac in ama kiangah, “Kua na hi hiam?” a ci hi. Amah in dawngin, “Kei pen na tapa, a suak masa Esau ka hi hi,” a ci hi. Tua ciangin Isaac nakpitakin lingin, “Tua ahihleh, nang’ hong pai ma-in sa matsa hong paipihin, a vekin ka nek khit, amah thupha ka piakpa kua ahi hiam? Thupha pia khin ka hih manin amah in thupha ngah ding hi” a ci hi. Esau in a pa’ kammalte a zak ciangin nakpi tak le nasia takin kikokhia-in a pa’ kiangah, “Kei thupha hong pia in, kei zong, aw ka pa!” a ci hi. Ahih hangin amah in, “Khemna tawh na sanggampa hong pai-in amah in na thupha lakhia khinta hi,” a ci hi. Esau in, “Amah Jakob kici mah hi lo ahi hiam? Amah in kei nihvei hong suankhia khin hi. Amah in ka innluahza hong sut hi. En in, tu-in amah in ka thupha hong sut leuleu hi,” a ci hi. Tua ciangin amah in, “Kei a dingin thupha siit lo na hi hiam?” a ci hi. Isaac in Esau dawngin, “En in, amah nangma’ topa-in ka bawl khin a, a sanggamte khempeuh ama tungah nasemin ka pia khin a, an le leenggahzu tawh amah ka hingsak hi. Tua ahih ciangin ka ta aw, nang a dingin bang hih thei nawn ding ka hi hiam?” a ci hi. Esau in a pa’ kiangah, “Pa aw, thupha khat beek nei nawn lo na hi hiam? Kei thupha hong pia in, kei zong, ka pa aw,” a ci hi. Tua ciangin Esau a kap hi. Tua ciangin a pa Isaac in, “En in, leitung pana piang an le leenggahzu na nei kei ding a, na lo a dingin vantung daituite na ngah kei ding hi. Na namsau tawh na nungta ding a, na sanggampa’ na na sem ding hi. Ahih hangin amah na langpan’ ciangin ama khutnuai panin na leengkhia ding hi,” a ci hi. A pa in amah thupha pia khin ahih manin tua thupha hangin tu-in Esau in Jakob mudah a, Esau in, “Ka pa’ sihna hangin dah nading hun hong nai ta hi. Tua khit ciangin ka sanggampa Jakob ka that ding hi,” ci-in ngaihsun hi. Ahih hangin a tapa upa zaw Esau’ ngimna, Rebekah’ tungah kigen hi. Tua ahih ciangin amah in a ta nauzaw Jakob samin ama kiangah, “En in, na sanggampa Esau in nangmah thah ding vaihawmna tawh amah kihehnem hi. Tua ahih ciangin tu-in ka ta aw, ka thu hong mang in. Haran-a ka sanggampa Laban’ kiangah va tai inla, na sanggampa’ hehna a dam mateng tua lai ama kiangah tawlkhat sung va om in. Na sanggampa’ sinsona a daih mateng, ama tunga na gamtatna a mangngilh mateng va om in. Tua ciangin mi hong sawlin hih lai munah nang kong lasak ding hi. Bang hangin no tegel tawh nikhat thu-in kei kikhen ding ka hi hiam?” a ci hi. Tua ciangin Rebekah in Isaac kiangah, “Esau’ zi Hit numeite’ hangin ka lung gimin ka cimtak hi. Jakob in hih gam numeite khat ahi Hit numeite khat tenpih leh kei a dingin bang nuntak tham nawn ding ahi hiam?” a ci hi. Tua ahih ciangin Isaac in Jakob sam a, amah thupha pia-in thuhilh a, “Nang in Kanaan numeite na tenpih kei ding hi. Kithawi inla, na nu’ pa Bethuel’ inn, Paddanaram-ah pai in. Tua lai munah na nu’ sanggampa Laban’ tanute khat na zi dingin la in. Nang, mihonpi khat na suah theih nadingin Vanglian Pasian in nang thupha hong pia-in, hong pungsakin, tampi hong phasak hen. Pasian in Abraham’ tunga a piak, tawlkhat sung na omna leitang na neih theih nadingin nang le na suanlekhakte tungah amah in Abraham’ thupha hong pia ta hen!” a ci hi. Tua bangin Isaac in Jakob sawlkhia hi. Jakob le Esau’ nu Rebekah’ sanggampa, Aram mi Bethuel’ tapa Laban’ omna Paddanaram-ah amah a pai hi. Isaac in Jakob thupha pia-in, zi la dingin Paddanaram-ah sawl a, thupha a piak kawmin amah thuhilhin, “Kanaan numeite na tenpih kei ding hi,” a cihna le, Jakob in a nu le a pa’ thu mangin Paddanaram-ah a paina thu tu-in Esau in thei hi. Tua ahih ciangin Kanaan numeite in a pa lungkimsak lo cih Esau in a theih ciangin, Ishmael’ kiangah Esau pai-in, ama zi neihsa banah, Nebaioth’ sanggamnu, Abraham’ tapa Ishmael’ tanu Mahalath zi-in a la hi. Jakob in Beersheba khua nusia-in Haran lamah a pai hi. Amah mun khat tungin, ni tum khin ahih manin tua lai-ah tua zan a giak hi. Tua mun a suangte khat la-in, amah in lukhamin zang a, a ihmu dingin tua munah a lumsuk hi. Amah in mang man a, leitungah kahlei khat kiphutin, a kahlei dawn in van ban hi. Pasian’ vantung mite tua kahlei tungah kah to-in a kum suk a mu hi. En in, tua sanah Topa ding a, “Kei pen na pa Abraham’ Pasian le Isaac’ Pasian, Topa ka hi hi. Nang le na suanlekhakte’ tungah tu-a na lupna leitang kong pia ding hi. Na suanlekhakte leilak leivui zah pha ding a, nitumna lam le nisuahna lam, leilu lam le leitaw lamah na kizelthang ding uh hi. Nang le na suanlekhakte thupha kong piak bangin leitung minam khempeuh in thupha a ngah nadingun hong ngen ding uh hi. En in, keimah in nang hong ompihin na paina peuhah kong kem ding a, hih leitangah nang kong paipih kik ding hi. Bang hang hiam cih leh nang’ tunga kong gensa thute ka hih khit matengin nang kong nusia kei ding hi,” a ci hi. Tua ciangin a ihmutna panin Jakob khang lo a, “Hih lai munah Topa om taktak hi; keimah in tua thu ka thei kei hi,” a ci hi. Amah lau a, “Hih mun bangzahin lauhuai ahi hiam! Hih pen Pasian’ inn lo adang hi lo a, hih pen vantung lutna kongpi ahi hi,” a ci hi. Tua ahih ciangin zingsangin Jakob tho baih a, amah in lukhamin a zat suang la-in khuamin phut a, a tungah sathau a sung hi. Amah in tua mun Bethel ci hi. Ahih hangin a masa-in tua khua min pen Luz ahi hi. Tua ciangin Jakob in thuciamna khat bawlin, “Pasian in kei hong ompih a, hih ka paina lampi-ah kei hong kep a, nek ding an le silh ding puan hong piak a, lungnuam takin ka pa’ inn-ah ka ciahkik leh, Topa pen keima Pasian hi ding a, khuamin ka phuhsa hih suang pen Pasian’ inn hi ding hi. Keima tungah nangmah in nong piak khempeuh sawm-ah-khat nang’ tungah kong pia kik ding hi,” a ci hi. Tua ciangin Jakob in a khualzinna zom a, nisuahna lam mite’ gam a tung hi. A khuadak leh gamlakah tuikhuk khat a mu hi. Tua gei-ah tuuhon thum na lum hi. Bang hang hiam cih leh tua tuikhuk panin tuuhonte tui kipia hi. Tuikhuk gong hukna suang lian hi. Tua lai munah tuuhonte khempeuh a kikaihkhop khit ciangin, tuucingte in tuikhuk gong panin a suang khukkhia uh a, tuute tui pia-in, tuikhuk gong ama omna ngei-ah a suang koih kik uh hi. Jakob in amaute kiangah, “Sanggamte aw, koi pana hong pai na hi uh hiam?” a ci hi. Amaute in, “Haran pan hi ung,” ci uh hi. Amah in amaute kiangah, “Nahor’ tapa Laban na thei uh hiam?” a ci hi. Amaute in, “Thei mah ung,” a ci uh hi. Amah in amaute kiangah, “Amah a cidam hiam?” a ci hi. Amaute in, “Dam hi; en in, a tanu Rachel zong a tuuhon tawh hong pai!” a ci uh hi. Amah in, “En un, ni sang lai a, gan kaihkhop hun nai lo hi. Tuute tui pia unla, pai-in an nesak lai un,” a ci hi. Ahih hangin amaute in, “Tuute kikaikhawm a, tuikhuk gong panin a suang a kikhuk khiat mateng tui ka pia thei kei uh hi. A kikhuk khiat khit ciang bekin tuute tui ka pia thei pan uh hi,” a ci uh hi. Tua bangin amaute tawh a kiho laitakin, Rachel a pa’ tuute tawh hong tung hi. Bang hang hiam cih leh amah in tuate kem hi. Tu-in Jakob in a nu’ sanggampa Laban’ tanu Rachel le a nu’ sanggampa Laban’ tuute a muh ciangin paito-in tuikhuk gong panin a suang khukkhia a, a nu’ sanggampa Laban’ tuute tui a pia hi. Tua ciangin Jakob in Rachel nam a, a gingin kapkhia hi. Jakob in Rachel’ kiangah amah pen a pa’ behte hi a, Rebekah’ tapa ahihna zong a kigen hi. Tua ciangin Rachel tai-in a pa’ kiangah a gen hi. Laban in a sanggamnu’ tapa Jakob’ thu a zak ciangin amah a dawn dingin hong tai a, amah kawi-in nam a, a inn-ah a ciahpih hi. Jakob in Laban’ tungah a thute khempeuh gen a, Laban in ama kiangah, “Nang pen keima si keima sa na hi takpi hi,” a ci hi. Tua hi a, amah tawh kha khat a omkhawm hi. Tua ciangin Laban in Jakob’ kiangah, “Nang pen keima beh na hih ciangin, a man nei lopi-in kei’ na hong sem ding na hi hiam? Hong gen in; na thaman ding bang hi ding hiam?” a ci hi. Tu-in Laban in tanu nih nei hi. A uzaw’ min Leah hi a, a nauzaw’ min Rachel ahi hi. Leah’ mit-hah nem a, ahih hangin Rachel melhoihin ngaihbaang hi. Jakob in Rachel ngai hi. Amah in, “Na tanu a nauzaw Rachel thalawh nadingin nangma na kum sagih kong sem ding hi,” a ci hi. Laban in, “Midang tungah amah ka piak ding sangin nang’ tungah amah kong piak ding hoihzaw hi; kei kiangah om in,” a ci hi. Tua ahih ciangin Jakob in Rachel a ngah nadingin kum sagih sung na sem a, amah a itna hangin tua hunte ni tawmno khat tawh kibang a sa hi. Tua ciangin Jakob in Laban kiangah, “Ka hun cingta ahih ciangin amah tawh ka lupkhawm theih nadingin ka zi hong pia in,” a ci hi. Tua ahih ciangin Laban in tua mun a mi khempeuh kaikhawmin pawi khat a bawl hi. Ahih hangin a nitak ciangin amah in a tanu Leah la-in Jakob kiangah paipih hi. Amah in tua nu luppih hi. (Laban in ama numei nasem Zilpah a tanu Leah tungah a nasem numei dingin a pia hi.) A zingsang ciangin, Leah na hi mawk hi. Jakob in Laban kiangah, “Bangci a kei hong hici bawl na hi hiam? Rachel ngah nadingin na na hong sem hi lo ka hi hiam? Tua ahihleh bang hangin kei hong khem na hi hiam?” a ci hi. Laban in, “A u’ ma-in a nauzaw piak ding ko’ gamah ngeina hi lo hi. Hih nu a dingin nipikal khat sung pawi beisak phot inla, adang kum sagih ka na nong sepsak thamanin a khat pen zong kong pia ding hi,” a ci hi. Jakob zong tua bangmahin gamta a, tua nu’ pawi hun sung beisak phot hi. Tua ciangin Laban in a tanu Rachel zong a zi dingin a pia hi. (Laban in ama nasem numei Bilhah a tanu Rachel’ tungah a nasem numei dingin a pia hi.) Tua ahih ciangin Jakob in Rachel zong luppih a, amah in Leah sangin Rachel itzaw hi. Laban’ na adang kum sagih sung a semlai hi. Topa in Leah a kimuhdahna a theih ciangin, amah in a naubu honsak hi; ahih hangin Rachel ciing hi. Leah gai-in tapa khat nei a, amah in a min Reuben a phuak hi. Bang hang hiam cih leh amah in, “ Topa in ka thuakna hong muzo hi; tu-in ka pasal in kei hong it taktak ding hi,” a ci hi. Amah gai kikin tapa khat nei a, amah in, “Keimah hong kimuhdahna thu Topa in za khin ahih manin, amah in hih tapa zong hong pia hi,” ci hi. Amah in a min Simeon a phuak hi. Amah gai leuleu-in tapa khat nei a, “Amah tawh tapa thum nei ta ka hih manin tu-in ka pasal in kei hong pawl ding hi,” ci hi. Tua ahih ciangin ama min Levi a phuak hi. Amah gai leuleu-in tapa khat nei a, “Tuhunin Topa ka phat ding hi,” ci hi. Tua ahih ciangin amah in a min Judah a phuak hi. Tua ciangin a ta neih a tawp hi. Rachel in Jakob tawh ta a neih lohna a kimuh ciangin, amah in a sanggamnu eng hi. Amah in Jakob kiangah, “Ta hong pia in, tua ahih kei leh si ning!” a ci hi. Rachel’ tungah Jakob heh mahmah a, amah in, “Nang’ tungah ta hong pia lo Pasian’ munah om ka hi hiam?” a ci hi. Tua ciangin amah in, “Hih lai-ah ka nasem numei Bilhah om hi. Ka phei tungah ka tawi ding ta hong neih nading, le ama sung panin suanlekhak ka neih theih nadingin amah tawh lumkhawm in,” a ci hi. Tua ahih ciangin a nasem numei Bilhah ama tungah zi-in a pia hi. Jakob in tua nu luppih hi. Bilhah gai-in Jakob tawh tapa khat nei hi. Tua ciangin Rachel in, “Pasian in kei’ thu a hoihin hong khen zo a, amah in ka aw zong za zo-in tapa khat hong pia hi,” a ci hi. Tua ahih ciangin amah in a min Dan a phuak hi. Rachel’ nasem numei Bilhah gai kikin Jakob tawh tapa a nihna nei hi. Tua ciangin Rachel in, “Nakpi takin hanciamna tawh ka sanggamnu ka zo hi,” a ci hi. Tua ahih ciangin ama min Naftali a phuak hi. Leah in ta neih a tawplam a kimuh ciangin, amah in a nasem numei Zilpah la-in Jakob’ tungah zi-in a pia hi. Tua ciangin Leah’ nasem numei Zilpah in Jakob tawh tapa khat nei hi. Leah in, “Kaam pha!” ci hi. Tua ahih ciangin ama min Gad a phuak hi. Leah’ nasem numei Zilpah in Jakob tawh tapa a nihna nei hi. Leah in, “Kei lungdam ing! Bang hang hiam cih leh numei dangte in kei a lungdam hong ci ding uh hi,” a ci hi. Tua ahih ciangin ama min Asher a phuak hi. Mangbuh lak hun laitakin gamlakah Reuben pai-in zawl-ai kungte va mu a, tuate a nu Leah’ kiangah a ciahpih hi. Tua ciangin Rachel in Leah kiangah, “Na tapa’ zawl-ai kungte kimkhat kei hong hawm in, hong thum ing,” a ci hi. Ahih hangin Leah in, “Ka pasal nong suh thuneu sa na hi hiam? Ka tapa’ zawl-ai kungte zong hong sut lai ding na hi hiam?” a ci hi. Rachel in, “Tua ahihleh na tapa’ zawl-ai man dingin tuzanin amah, nang tawh hong lumkhawm thei ding hi,” a ci hi. Nitakin lo panin Jakob hong ciah ciangin, amah a dawn dingin Leah paikhia a, “Kei’ kiangah hong lum in. Bang hang hiam cih leh ka tapa’ zawl-ai kungte tawh nang kong cial zo hi,” a ci hi. Tua ahih ciangin tua zan amah tawh a lumkhawm hi. Pasian in Leah’ thu ngai a, amah gai-in Jakob tawh tapa a ngana a nei hi. Leah in, “Ka nasem numei ka pasal tungah pia ka hih manin Pasian in ka thacial hong pia hi,” a ci hi. Tua ahih ciangin ama min Issakhar a phuak hi. Leah gai kik a, Jakob tawh tapa a gukna a nei hi. Tua ciangin Leah in, “Pasian in moken’ hoih kei hong guan hi. Tu-in ka pasal in kei hong pahtawi ding hi. Bang hang hiam cih leh amah tawh tapa guk ka nei khin hi,” a ci hi. Tua ahih ciangin ama min Zebulun a phuak hi. Tua khit ciangin amah in tanu khat nei a, a min Dinah a phuak hi. Tua ciangin Pasian in Rachel phawk a, Pasian in ama thu ngai-in a naubu honsak hi. Amah gai-in tapa khat nei a, “Pasian in kei hong kikona teng lakhia khinta hi,” a ci hi. Amah in a min Josef phuak a, “ Topa in tapa khat hong pia beh hen!” a ci hi. Rachel in Josef a neih khit ciangin, Jakob in Laban’ kiangah, “Keima inn le ka gamah ka ciahkik theih nadingin kei hong sawl in. Nang’ tunga kong thalawhsa ka zite le ka tate hong pia inla, hong paisak in. Bang hang hiam cih leh nangma na kong sepsaksa na thei hi,” a ci hi. Ahih hangin Laban in ama kiangah, “Kei, thu hong gensak dih in. Topa in nangma hangin kei thupha hong piakna ka thei hi. Na thaman ding hong gen lecin kong pia ding hi,” a ci hi. Jakob in ama kiangah, “Nangma na kong sepsak khitna le keima kep sungin na ganhingte tampi a phakna nangmahmah in na thei hi. Bang hang hiam cih leh kei kong pai ma-in nang in tawm bek na nei a, tu-in tampi takin a khang hi. Ka sepna peuhah Topa in nang thupha hong pia hi. Ahih hangin tu-in keima innkuan a’ ding cik ciangin ke’n vaihawm ding ka hi hiam?” a ci hi. Amah in, “Nang bang hong pia ding ka hi hiam?” a ci hi. Jakob in, “Bangmah dang nong pia kei ding hi. Hih bangin nong hih nakleh na tuuhonte vak kikin ka kem ding hi. Tuni-in na tuuhonte khempeuh lakah hong paisak inla, tua sung panin tuu a puang le a gial khempeuh, le tuuno a vom khempeuh le keel lak panin a gial le a puang khempeuh hong khenkhiasak in; tuate keima thaman hi ding hi. Tua ahih ciangin nang’ tung pana ka thaman a en dingin nong pai ciangin ka thumanna na hong nung muh ding hi. Keel lakah a puang lo le a gial lo peuhmah le tuuno lakah a vom lo peuhmah, kei kiangah a kimuh zenzen leh, guk-in kiseh pah ding hi,” a ci hi. Laban in, “Hoih hi! Na cihsa bangin hisak ni,” a ci hi. Ahih hangin Laban in tua ni-in keeltal a dung gial le a bem gialte, keelpi a puang le a gialte, a tungah a kang mun a om khempeuh le tuuno a vom khempeuh la khia-in, ama tapate’ kep dingin tuate a koih hi. Jakob’ kiang panin ni thum paina gamlapi-ah tua ganhonte a paipih hi. Jakob in Laban’ ganhon a omlai teng an a vak hi. Tua ciangin Jakob in poplar kung, almond kung, le hiangpa kungte tung pan ciangkhut ding a thak satin la a, a ciangkhutte a kang mun a om dingin kheh a, a ciangkang kangte kidawksak hi. Amah in a khehsa ciangkangte tuiluang, tuipiakna tuikuang, tuuhonte tui dawn dingin a hong paina mun, tuuhonte’ mai-ah a koih hi. Amaute tui dawn dingin hong pai uh ciangin a nu le a pa omkhawm uh ahih manin, tuuhonte tua ciangkangte’ mai-ah omkhawm uh hi. Tua ahih ciangin tuuhonte in a dung gial, a puang le a gial ta nei uh hi. Jakob in tuunote khenkhia a, tuuhonte’ maitang pen a dung gialte le Laban’ tuuhon sunga a vomte khempeuh’ lam ngasak hi. Amah in ama a’ honte a tuamin koihkhia-in, Laban’ tuuhonte tawh koihkhawm lo hi. Tuuhon sung panin a thahat zawte a huk ciangin, amaute tua ciangkangte lakah a gai theih nadingin Jakob in tuuhonte’ muhna, tuiluang sungah a ciangkangte a koih hi. Ahih hangin tuuhon a ginalote’ mai-ah tua ciangkangte koih lo hi. Tua ahih ciangin a ginalo zawte Laban a’ hi a, a thahat zawte Jakob-a’ ahi hi. Tua ahih ciangin Jakob a hauhna nakpitakin khang a, tuuhon lianpi, nasem numei, nasem pasal, kalaoh, le late a nei hi. Laban’ tapate in, “Jakob in i pa-a’ khempeuh la khin a, i pa’ neihsa tung panin amah in hih hauhna ngah hi,” a cihna thu tu-in Jakob in za hi. Laban in nidang bangin maipha tawh amah a don lohna Jakob in mu hi. Tua ciangin Topa in Jakob’ kiangah, “Na pate le na behte’ gamah ciahkik in, nang kong ompih ding hi,” a ci hi. Tua ahih ciangin Jakob in mi sawlin ama tuuhon a omna gamlakah Rachel le Leah samsakin amaute kiangah, “Na pa un nidang bangin maipha tawh kei hong don lohna ka mu hi. Ahih hangin ka pa’ Pasian in kei hong ompih hi. Ka tha neih khempeuh tawh na pa’ na ka sepna na thei uh hi. Ahi zongin na pa un kei hong khemin, ka thaman sawmvei khelkhin a, ahih hangin kei hong gimsak ding Pasian in phal lo hi. Amah in, ‘A gialte na thaman hi ding hi,’ ci leh tua ciangin tuuhon khempeuh in a gial ta hong nei hi. Amah in, ‘A dung gialte na thaman hi ding hi,’ ci leh tua ciangin tuuhon khempeuh in a dung gial ta hong nei hi. Tua ahih ciangin Pasian in na pa’ ganhing khempeuh la khia-in tuate keima tungah hong piazo hi. “Ganhonte ta nei dingin a kikholh hunin ka khuadak to a, a honte’ tunga a diang keeltal khempeuh a dung gial, a bem gial, a puangin a omna ka mangin ka mu hi. Tua ciangin Pasian’ vantungmi in ka mang sungah, ‘Jakob,’ hong ci a, ke’n, ‘Hiah om ing!’ ka ci hi. Amah in, ‘Khuadak to inla en in, a honte’ tunga a diang keelte khempeuh dung gial, bem gialin puang uh hi. Bang hang hiam cih leh Laban in nang’ tunga hong bawlna ka mu khin hi. Kei pen, nang in khuam khat sathau nuhin kei’ tungah thuciamna nong bawlna mun Bethel Pasian ka hi hi. Tu-in kithawi inla, hih gam panin paikhia-in, na suahna gamah ciahkik in,’ hong ci hi,” a ci hi. Tua ciangin Rachel le Leah in amah dawngin, “I pa’ inn sungah ei’ tanh ding ahi a, ei’ luah ding ahi zongin bang om ahi hiam? Amah in eite gamdangmi bangin hong ngaihsun hi lo ahi hiam? Bang hang hiam cih leh amah in eite hong zuak khin a, eite a’ ding hong kipia sum amah in zang mang khin hi. I pa’ tung panin Pasian in a lakkhiatsa neihsa khempeuh eite le i tate a’ ahi hi. Tua ahih ciangin tu-in, nang’ tunga Pasian’ hong cih peuhpeuh hih in,” a ci uh hi. Tua ahih ciangin Jakob kithawi-in a tapate le a zite kalaohte tungah a tuangsak hi. Amah in a ganhing khempeuh, a ngahsa a bawng khempeuh, Paddanaram gam sunga a ngah ama neihsa ganhing khempeuh, a pa Isaac’ omna Kanaan gamah a paipih dingin a hawlkhia hi. Laban a tuumul met dingin a paikhia hi a, Rachel in a pa’ innsung pasian-te na gu hi. Jakob in Aram mi Laban khem a, tai ding a sawmna amah in gen lo hi. Amah a neihsa khempeuh tawh tai-in, Eufratis gun kantan a, Gilead gam mualtung lam a manawh hi. Jakob tai hi, ci-in a ni thum ni-in Laban’ tungah a kigen ciangin, amah in a behte zawnin ni sagih sung amah delh a, Gilead gam mualtungah amah pha dekdek uh hi. Ahih hangin Aram mi Laban kiangah zanin mang sungah Pasian hong pai-in ama kiangah, “Jakob’ tungah a pha hitaleh a sia hitaleh kam khat beek na pau loh nadingin kidawm in,” a ci hi. Tua ciangin Laban in Jakob pha hi. Tu-in Jakob in mualtung khatah a puanbuk na lam a, Laban le a behte in Gilead gam mualtungah phual a sat uh hi. Laban in Jakob kiangah, “Nang in kei hong khemin, galmat bangin ka tanute bang hangin paikhiatpih na hi hiam? Bang hangin tai simin kei hong khem a, hong gen lo na hi hiam? Tuaci gamtat kei lecin, lungdamna le lasakna, khuang le laiza tawh kong kha ding hi. Bang hangin ka tapate le ka tanute mangpha khakna hong namsak lo na hi hiam? Tu-in na hai gamtat khin hi. Nang kong siatsak ding keima thu ahi hi. Ahih hangin na pa’ Pasian in zan zanin kei kiangah thu hong gen a, ‘Jakob tungah a pha hitaleh a sia hitaleh na gen ding kidawm in,’ hong ci hi. Tu-in nang in na pa’ inn nakpitakin lunggulh na hih manin na paikhia khinta hi. Ahih hangin bang hangin ka pasian-te gu na hi hiam?” a ci hi. Jakob in Laban dawngin, “Kei’ kiang panin na tanute thahat thu-in nong suh khak ding ka launa hang ahi hi. Na pasian-te na muhna mi peuhpeuh kithat tahen! I behte’ muhna-ah nang a’ ahi na khat peuhpeuh kei’ neihsa lakah a om leh kawkkhia-in la in,” a ci hi. Rachel in Laban’ pasian-te a na guklam Jakob in thei kha lo hi. Tua ahih ciangin Laban, Jakob’ puanbuk, Leah’ puanbuk, le nasem numei nihte’ puanbuk sungah pai a, ahih hangin amah in tuate mu lo hi. Leah’ puanbuk panin amah paikhia-in Rachel’ puanbuk sungah a lut hi. Rachel in innsung pasian-te na gu a, kalaoh tutphah sungah koihin, tuate’ tungah na tu hi. Laban in puanbuk sungteng khempeuh zawt a, ahih hangin tuate mu lo hi. Amah in a pa kiangah, “Nang’ mai-ah hong ding thei lo ka hih manin ka topa heh kei in; bang hang hiam cih leh numei ngeina nin ka nei hi,” a ci hi. Tua ahih ciangin amah in mundang khempeuh zong a, ahih hangin a innsung pasian-te mu zo lo hi. Tua ciangin Jakob a heh suak a, Laban mawhsakin, “Ka mawhna bang ahi hiam? Nasia takin kei nong delh nadingin ka khialhna bang ahi hiam? Ka van khempeuh na thawi khit hangin na innsung nate mu na hi hiam? Ei tegel kikalah amaute in thu a khen theih nadingin keima behte le nangma behte’ mai-ah, na muh a om leh hong koihkhia in. Hih kum sawmnih sung nang kiangah kong om khin hi. Na tuupi le na keelpite tatolh nai lo a, na tuuhonte’ sung pan tuutal sa ka ne kei hi. Gamlak ganhingte’ balzante, nang’ kiangah kong puak kei hi. Tua banga supnate kei mahmah in ka thuak hi. Sun-a kigu hitaleh zan a kigu hitaleh kei nong lohsak hi. Kei pen tu-a bang ka hi hi. Sunin a sa in hong kang a, zanin a vot in hong tawp a, ka ihmu ngei kei hi. Hih kum sawmnih sung na inn sungah kong om khin hi. Na tanu nihte, kum sawm le li sung kong thalawh a, na tuuhonte, kum guk sung kong thalawh a, nangmah in ka thaman sawmvei na kheel hi. Ka pa’ Pasian, Abraham’ Pasian, le Isaac’ Zahtak pa in kei hong ompih lo hileh, tu-in nangmah in khut hawmguakin kei nong sawlkhia taktak ding hi. Pasian in ka thuakna le ka nasepna mu a, zan zanin nang hong thuhilh hi,” a ci hi. Tua ciangin Laban in dawngin Jakob kiangah, “Tanute pen keima tanu hi; naupangte zong keima naupang hi; tuuhonte, keima tuuhon hi a, na muh khempeuh keima-a’ ahi hi. Ahih hangin tuni-in hih ka tanute hitaleh amau’ sung pana piang naupangte’ tung hitaleh ke’n bang cih thei ding ka hi hiam? Tu-in hong pai in, nang le kei in thuciamna khat bawl ni; suangcian khat bawlin nang le kei’ kikalah teci hisak ni,” a ci hi. Tua ahih ciangin Jakob in suang khat la-in khuamin a phut hi. Jakob in a behte kiangah, “Suang khawm un,” ci a, amaute in suang la-in suangcian khat a bawl uh hi. Tua suangcian gei-ah amaute in an a ne khawm uh hi. Laban in, Jegarsahadutha, ci hi. Ahih hangin Jakob in, Galeed, ci hi. Laban in, “Hih suangcian pen tuni-in nang le kei’ kikalah teci ahi hi,” a ci hi. Tua ahih ciangin amah in, Galeed, ci-in min phuak a, a khuam pen Mizpah, ci hi. Bang hang hiam cih leh Laban in, “Eite khatlekhat i tuam om ciangin Topa in nang le kei’ kikalah hong encik tahen. Ka tanute na bawl siat a, ka tanute’ banah zi na lak beh leh, eite tawh kuamah a om loh hangin nang le kei’ kikalah, Pasian, teci ahihna phawk in,” a ci hi. Tua ciangin Laban in Jakob’ kiangah, “Nang le kei’ kikalah ka phuhsa hih suangcian mu in. Siatna a bawl dingin keimah in hih suangcian khengin nang kiangah kong pai loh nading, nang zong hih suangcian le khuam khengin kei kiangah nong pai loh nadingin hih suangcian le suangkhuam, teci ahi hi. Abraham’ Pasian le Nahor’ Pasian, amau’ pate’ Pasian in eite’ kikalah thu khen ta hen,” a ci hi. Tua ahih ciangin Jakob in ama pa Isaac’ Zahtak pa tawh a kiciam hi. Jakob in mualtungah biakpiakna pia-in an ne dingin a behte a sam hi. Amaute in an ne uh a, zan tawntung mualtungah a om uh hi. Zingsang tungin Laban tho-in, a tute le a tanute namin amaute thupha a piak khit ciangin paikhia-in a inn-ah a ciahkik hi. Jakob zong ama lampi-ah paisuak a, Pasian’ vantung mite in amah na dawn hi. Jakob in amaute a muh ciangin amah in, “Hihte, Pasian’ galkapte!,” a ci hi. Tua ahih ciangin tua mun pen Mahanaim, ci-in min a phuak hi. Jakob in Edom gam, Seir leitangah a om a sanggampa Esau kiangah kamtaite ma sawl a, amaute hilhin, “Note in ka topa Esau kiangah hih bangin na ci ding uh hi: Na nasempa Jakob in, ‘Laban’ kiangah peemta-in tu ciang dong ka om hi. Keimah in bawngtal, la, tuuhon, nasem pasal, le nasem numeite ka nei hi. Na mai-ah maipha ka muh theih nadingin ka topa tungah a gen dingin kong sawl hi, ci hi’, ci un,” a ci hi. Kamtaite, Jakob kiangah hong ciahkik uh a, “Na sanggampa Esau kiangah ka va pai uh hi. Nangmah a dawn dingin amah hong pai a, amah tawh mihing zali om hi,” ci-in hong gen uh hi. Tua ciangin Jakob nakpitakin lau-in lungkham hi. Amah in ama kianga om mite, tuuhonte, bawnghonte, le kalaohte pawl nihin khen a, “Pawlkhatah Esau pai-in a suksiat leh a pawlkhat suakta ding hi,” ci-in a ngaihsun hi. Jakob in, “Ka pu Abraham’ Pasian le ka pa Isaac’ Pasian, keima kiangah, ‘Na gam le na behte kiangah ciahkik in; nang’ tungah hoihna kong bawl ding hi,’ hong ci Topa aw, kei pen na itna kip khempeuh lak pan a neupen le na nasempa tunga nong lahsa na thumannate khempeuh tawh ka kilawm kei hi. Bang hang hiam cih leh ka ciangkhut guak tawh hih Jordan ka kantan a, ahi zongin tu-in pawl nih ka cing khinta hi. Ka sanggampa Esau’ khutsung pan kei hong khahkhia in, kong thum hi. Bang hang hiam cih leh amah hong pai-in kote khempeuh, nute, naupangte tawh hong thah khit khak ding ka lau hi. Ahih hangin nangmah in, ‘Na tungah hoihna kong bawl ding a, na suanlekhakte tuipi sehnel zahin a honpi a kisim thei loin ka bawl ding hi,’ nong ci hi,” a ci hi. Tua ahih ciangin amah tua zanin tua lai-ah giak a, ama neih sung panin a sanggampa Esau a’ ding letsong keelpi zanih le keeltal sawmnih, tuupi zanih le tuutal sawmnih, kalaoh nawisuk sawmthum le a note, bawngpi sawmli le bawngtal sawm, lapi sawmnih le latal sawm a la hi. Amah in hihte a nasemte’ khut sungah amau’ hon ciatin pia a, ama nasemte kiangah, “Ka mai-ah na paisuak unla, hon khat le hon khat kikal kihalsak un,” a ci hi. Amah in a masa pente tungah thu hilh a, “Ka sanggampa Esau in note hong dawnin, ‘Kua-a’ na hi uh hiam? Koi pana hong pai na hi uh hiam? Na mai uha om hihte kua-a’ ahi hiam?’ ci-in hong dot ciangin note in, ‘Na nasempa Jakob-a’ ahi hi. Hihte pen ka topa Esau’ tungah letsongin hong kipuak ahi hi. Tua tham loin amah ka nung uhah om hi,’ ci un,” a ci hi. Amah in tua mah bangin a nihna, a thumna, le ganhing honte a zuite khempeuh kiangah, “Amah tawh na kituah uh ciangin Esau’ kiangah a kibangmahin na gen ding uh hi. Note in, ‘Tua tham loin na nasempa Jakob ka nung uhah om hi,’ na ci ding uh hi,” a ci hi. Bang hang hiam cih leh amah in, “Ka mai-ah a pai letsong tawh amah ka lungdamsak zo kha ding a, tua khit ciangin ama maipha ka mu ding hi. Amah in kei hong sang kha ding hi,” ci-in a ngaihsun hi. Tua ahih ciangin letsong a piak dingte, ama mai-ah paisak a, amah ahihleh tua zanin giahphual ah a giak lai hi. Tua zan mahin amah tho-in a zi nihte, a nasem numei nihte, le a ta sawm le khatte la-in, Jabbok ngahmun a kantan hi. Amah in amaute la-in lui galkhatah puak a, tua mah bangin a neih khempeuh zong a galkahsak hi. Jakob amah guak bek omlai a, zingsang khuavak dong mi khat in amah a lai hi. Tua mipa in Jakob a zawh lohna a theih ciangin amah in a khelkom sung suksak hi. Tua bangin amah tawh a kilaina-in Jakob’ khelguh a kilawi hi. Tua ciangin amah in, “Khua vak ta ahih ciangin hong khah in,” a ci hi. Ahih hangin Jakob in, “Kei, thupha nong piak kei leh kong khah kei ding hi,” a ci hi. Amah in, “Na min bang ahi hiam?” a ci hi. Amah in, “Jakob,” ci hi. Tua ciangin amah in, “Na min Jakob, kici nawn loin Israel, kici ding hi. Bang hang hiam cih leh Pasian le mite tawh na kilai khinzo a, na zo hi,” a ci hi. Tua ciangin Jakob in amah dongin, “Na min hong gen in, hong thum ing,” a ci hi. Ahih hangin amah in, “Bang hanga ka min hong dong na hi hiam?” a ci hi. Tua lai-ah amah in Jakob thupha a pia hi. Tua ahih ciangin Jakob in tua mun pen Peniel, ci-in min a phuak hi. “Bang hang hiam cih leh maitang kituahin Pasian ka mu khin a, ahi zongin kei hong kihing khawi lai hi,” a ci hi. A khelpi’ hangin amah bai kawmin Peniel a kantan laitakin ni hong suak hi. Tua ahih ciangin tuni dongin Israel mite in khelkom tunga a om khel thagui ne lo uh hi. Amah in Jakob’ khelkom, a khel thagui tung a sukna hang ahi hi. Jakob khuadak a, Esau tawh mihing zali hong pai a mu hi. Tua ahih ciangin amah in Leah, Rachel, le nasem numei nihte’ lakah a naupangte a khen hi. Amah in nasem numeite le a tate a masa penin, tua ciangin Leah le a tate, tua ciangin Rachel le Josef a nunung penin a koih hi. Amah ahihleh amaute’ mai-ah pai-in, a sanggampa’ kiang nai a tun matengin leilak lamah sagihvei a kun hi. Ahih hangin amah a dawn dingin Esau hong tai-in, amah ngawng kawi a, pomcipin nam a, amaute a kap uh hi. Esau khuadak to-in nupite le naupangte a muh ciangin amah in, “Nang tawh a om hihte kua ahi hiam?” a ci hi. Jakob in, “Pasian in hehpihna tawh na nasempa a piak tate ahi hi,” a ci hi. Tua ciangin nasem numeite in hong naih uh a, amau le a tate hong kun uh hi. Leah le a tate in zong tua bangmahin hong naihin a kun uh hi. A nunung penin Josef le Rachel in hong naihin a kun uh hi. Esau in, “Ka kituahpih hih a honte khempeuh bang na cihnopna ahi hiam?” a ci hi. Jakob in dawngin, “Ka topa’ maipha zon nading,” a ci hi. Ahih hangin Esau in, “A kicing nei ing, sanggam aw; nang’ neihte nangma a dingin kem in,” a ci hi. Jakob in, “Hi lo hi, nang’ tungah hong thum ing. Na muhna-ah maipha ngah ka hih leh ka khutsung panin ka letsongte hong sang in. Bang hang hiam cih leh hih banga maipha tawh kei nong sanna, na maitang ka muh ding pen Pasian’ maitang muh tawh kibang taktak hi. Nang’ kianga hong kipaipih ka letsong nong san nadingin hong thum ing. Bang hang hiam cih leh Pasian in kei hong hehpih mahmah a, a kicing ka nei hi,” a ci hi. Tua bangin amah in kun teitei ahih manin Esau in zong a sang hi. Tua ciangin Esau in, “Tu-in paikhawm ni. Na mai-ah kei ka pai ding hi,” a ci hi. Ahih hangin Jakob in ama kiangah, “Naupangte a hat lohna ka topa in na thei hi. Tuuhonte le bawngte, a nongek neite ka lungphamawh hi. Ni khat sung kinak hawl lua leh ganhonte khempeuh si ding uh hi. Na nasempa’ mai-ah ka topa na pai inla, Seir-ah ka topa’ kiang kong tun matengin ka mai-a om ganhingte’ thahatna le naupangte’ hatna tawh kituakin damdamin kong makaih ding hi,” a ci hi. Tua ahih ciangin Esau in, “Kei tawh a om mite pawlkhat, nang’ kiangah hong nusia ning,” a ci hi. Ahih hangin amah in, “A kisapna bang om ahi hiam? Ka topa’ muhna-ah kei maipha hong ngahsak in,” a ci hi. Tua ahih ciangin Esau in tua ni-in ama lampi zui-in Seir-ah a ciahkik hi. Ahih hangin Jakob, Sukkoth lamah pai a, ama a’ ding inn le a ganhingte a’ ding hampheng a lam hi. Tua ahih ciangin tua mun a min Sukkoth, kici hi. Paddanaram panin hong pai lampi, Kanaan gam sunga om Shekhem khuapi-ah lungmuang takin Jakob hong tung a, a khuapi kiangah phual a sat hi. Amah in Shekhem’ pa Hamor’ innkuante’ tung panin a puanbuk lamnasa leitang dangka zakhat tawh a lei hi. Tua lai-ah amah in biakna tau khat bawl a, El-Elohe-Israel, ci-in min a phuak hi. Ni khat, Jakob le Leah’ tanu Dinah tua gam numeite kiangah va hawh hi. Hiv mi Hamor’ tapa Shekhem, tua gam ulianpa in amah a muh ciangin, amah manin luppih a, amah siasak hi. Amah in Jakob’ tanu Dinah hoihsa mahmah ahih manin itin kamkhum takin hopih hi. Tua ahih ciangin Shekhem in a pa Hamor’ kiangah, “Hih numei ka zi dingin hong laksak in,” a ci hi. Tu-in Jakob in a tanu Dinah a kisiatsakna za hi. Ahih hangin a tate, a ganhingte tawh gamlakah om ahih manin amaute hong tun matengin Jakob in bangmah gen loin om hi. Shekhem’ pa Hamor, Jakob tawh a kimu dingin ama kiangah va pai hi. Jakob’ tapate in tua thu a zak uh ciangin gamlak panin hong ciah uh hi. Amaute lungkim loin heh mahmah uh hi. Bang hang hiam cih leh Jakob’ tanu tawh a lupkhop manin amah in Israel mite’ sungah a kilawm lo hai gamtatna hong tun hi. Ahih hangin Hamor in amaute tawh thu gen a, “Ka tapa Shekhem in na tanu ngai mahmah hi. A tenpih dingin nong piak nadingin kong thum hi. Kote tawh kitenna hong bawl un. Na tanute uh kote’ tungah hong pia unla, no a dingin ka tanute uh la un. Kote’ lakah nong teng ding uh hi. No a dingin leitang hong kipia ding hi. Ka gam sung uhah tengin sum bawl unla, neihsa lam un,” a ci hi. Shekhem in a numei’ pa le a numei’ sanggamte’ kiangah, “Note’ mai-ah maipha hong musak unla, kei’ tunga nong cih peuhpeuh uh kong pia ding hi. Kei kiang panin moman le letsong tampi hong ngen un. Kei’ tunga nong nget zahzah uh kong pia ding hi. Zi dingin a numei hong pia hoh un,” ci thuah lai hi. Shekhem in a sanggamnu uh Dinah siasak khin ahih manin Jakob’ tapate in Shekhem le a pa Hamor khemna tawh dawng uh hi. Amaute in amau kiangah, “Vun ki-at lopa’ tungah ka sanggamnu uh ka piak ding uh ka ngaihsun thei kei uh hi. Tua bangin pia le ung ko a dingin mindaina hi ding hi. Hih bangin nong gamtat uhleh ka thukim bek ding uh hi: Note’ sung panin pasal khempeuh vun ki-at le-uhcin kote mah bang na suak ding uh hi. Tua ciangin ka tanute uh note’ tungah hong pia-in, na tanute uh kote a dingin kong la ding uh a, note tawh kote hong tengin mikhat i suak ding hi. Ahih hangin note in ka thu uh hong ngai loin, vun na ki-at kei uh le, ka tanu uh ka la ding uh a, kote ka paikhia ding uh hi,” a ci uh hi. Amau’ thugente in Hamor le Hamor’ tapa Shekhem lungdamsak hi. Tangvalpa in Jakob’ tanu deih ahih manin tua banga a gamtat ding zekai lo hi. Amah pen, a kipahtawi a thupi pen khat ahi hi. Tua ahih ciangin Hamor le a tapa Shekhem, amau’ khua kulhpi kongpi-ah hong pai-in a khuapih mite uh kiangah thu gen a, “Hih mite, eite’ tungah hong nop mahmah uh hi. I gam sungah tengsakin sum bawlsak ni. Bang hang hiam cih leh en un, amau a’ ding a kicing dingin i leitang a zai hi. Amau’ tanute zi-in tenpih ni. Eite’ tanute zong amau pia ni. Hih thu khat bek tawh eite tawh tenkhop ding, mikhat suah ding amau thukim uh hi. Amaute vun a ki-at bangin eite’ lakah pasal khempeuh vun ki-at ding ahi hi. Amau’ bawngte, amaute’ neihsate, le amau’ ganhingte khempeuh ei a’ ding hi lo ahi hiam? Amaute tawh eite thukim hoh ni. Tua hileh amaute, eite tawh hong tengkhawm ding uh hi,” a ci uh hi. Khuapi kulhkongpi-ah a pai mi khempeuh in Hamor le a tapa Shekhem’ thu a mang uh hi. Khuapi kulhkongpi-ah a hong pai pasal khempeuh a vun ki-at uh hi. A ni thum ni, amaute meima vei-in a om laitakun Jakob’ tapa nihte Simeon le Levi, Dinah’ sanggamte in amau’ namsau la-in theihkholh lohin khuapi va sim uh a, pasal khempeuh a that uh hi. Amaute in Hamor le a tapa Shekhem, namsau tawh that uh a, Shekhem’ innsung panin Dinah lakhia-in a paikhia uh hi. Jakob tapa dangte in a kithat mite’ tungtawnin khuapi susia uh hi. Bang hang hiam cih leh a sanggamnu uh kisiasak hi. Amaute in a tuuhonte le a bawnghonte, a late le khuapi sunga om peuhmah, le lo sunga om peuhmah a laksak uh hi. Amau’ neihsa khempeuh, a naupangte khempeuh, a zite khempeuh, le inn sunga om na khempeuh laksak uh a, amau’ neihsa a suaksak uh hi. Tua ciangin Jakob in Simeon le Levi’ kiangah, “Hih leitangah a teng, Kanaan mite le Perez mite tungah kei a muhdahhuai-in nong bawlna uh tawh kei’ tungah haksatna nong tun uh hi. Kei’ pawl mite tawm hi. Amaute kei’ langah hong kikaikhawmin kei hong sim leh, kei le ka innkuanpihte hong susia ding uh hi,” a ci hi. Ahih hangin amaute in, “Amah in ka sanggamnu uh numei paktat bangin a bawl ding kilawm ahi hiam?” a ci uh hi. Pasian in Jakob kiangah, “Kithawi-in Bethel-ah paito inla, tua lai-ah teng in. Na sanggampa Esau’ kiang panin na tai hun lai-a nang’ tungah a hong kilang Pasian a dingin biakna tau khat bawl in,” a ci hi. Tua ahih ciangin Jakob in a innkuanpihte le amah tawh a omte khempeuh kiangah, “Note lakah a om gamdang pasian-te koihkhia unla, nomau kisiansuahin, na puante uh khek un. Ka lungkham hunin hong huhin, ka paina khempeuhah a hong ompih Pasian a dingin biakna tau khat ka bawl theih nadingin eite kipanin Bethel-ah paito ni,” a ci hi. Tua ahih ciangin amaute in Jakob’ tungah amau’ neih gamdang pasian khempeuh le a bil uha om bilbahte a pia uh hi. Jakob in Shekhem khua gei-a tawsaw nuai-ah tuate a seel hi. Jakob le a tapate khualzinin a pai laitakun amau’ kiima om khuapite’ tungah Pasian’ kiang panin lauhuaina lianpi khat tung ahih manin amaute in Jakob le a tapate delh lo uh hi. Kanaan gam sunga om Luz (Bethel)-ah Jakob le amah tawh a om mi khempeuh tung uh a, tua lai-ah amah in biakna tau khat lamin, tua mun Elbethel, ci-in min a phuak hi. Bang hang hiam cih leh a sanggampa kiang panin a tai lai-in tua munah ama tungah Pasian mahmah kilang hi. Tua ciangin Rebekah a cingnu Deborah si a, Bethel khang tawsaw nuai-ah amah kivui hi. Tua ahih ciangin tua mun min pen Allonbakuth, kici hi. Paddanaram panin amah hong pai ciangin Jakob’ tungah Pasian kilang kik a, amah thupha a pia hi. Pasian in ama kiangah, “Na min Jakob ahi hi. Ahi zongin tu-a kipanin nangma min pen Jakob kici nawn lo ding a, Israel, hong kici ding hi,” a ci hi. Tua ahih ciangin ama min Israel, kici hi. Pasian in ama kiangah, “Kei pen Vanglian Pasian ka hi hi: Pung inla, tampi pha in. Minam khat le minamte honkhat nang’ sung panin piang ding a, nang’ sung panin kumpite zong piang ding hi. Abraham le Isaac tunga ka piak leitang nangma tungah kong pia ding a, nang’ khit cianga na suanlekhakte’ tungah tua leitang ka pia ding hi,” a ci hi. Tua ciangin amah tawh a kihona mun ama kiang panin Pasian paikhia to hi. Jakob in amah tawh a kihona munah suang khuam khat phut a, amah in tua tungah leenggahzu tawh biakpiakna a sungkhia hi. Tua tungah sathau zong a sung hi. Tua ahih ciangin Jakob in, Pasian in amah a hopihna mun a min Bethel, a ci hi. Tua ciangin Bethel panin amaute ding khia uh a, Efrath panin a gamla sim lai mun a tun laitakun Rachel a nausuah hun tung a, amah nakpi takin a gim hi. Amah a gim mahmah laitakin naudom nu in ama kiangah, “Lunghimawh kei in. Tu-in tapa dang khat na nei ding hi,” a ci hi. Amah a bei laitakin amah in a min dingin Benoni, a ci hi. Ahih hangin a pa in ama min Benjamin, ci-in a phuak hi. Tua ahih ciangin Rachel si-in, Efrath (Bethlehem) paina lampi-ah kivui a, Jakob in ama han tungah mualsuang khat a phut hi. Tua pen tuni dongin tua lai mahah a om Rachel’ han mualsuang khuam ahi hi. Israel in a khualzin zomlai a, Eder tausang galkhatah a puanbuk a lam hi. Tua gamah Israel a ten laitakin Reuben in a pa’ zineu Bilhah luppih hi. Israel in tua thu za-in heh mahmah hi. Tu-in Jakob’ tapate, sawm le nih ahi hi. Leah’ tapate: Reuben (Jakob’ ta u pen), Simeon, Levi, Judah, Issakhar, le Zebulun ahi hi. Rachel’ tapate: Josef le Benjamin ahi hi. Rachel’ nasem numei Bilhah’ tapate: Dan le Naftali ahi hi. Leah’ nasem numei Zilpah’ tapate: Gad le Asher ahi hi. Hihte pen Paddanaram gamah ama sunga suak Jakob’ tapa sawm le nihte ahi hi. Abraham le Isaac tawlkhat a omna Mamre, ahih kei leh Kiriatharba (Hebron)-a a pa Isaac a omna-ah Jakob hong pai hi. Tu-in Isaac’ khansung, kum za le kum sawmgiat ahi hi. Isaac in a nunung pen a hu sang hi. Amah a teek, kum tampi a pha-in si a, ama mite’ kiangah kigawm hi. Ama tapa Esau le Jakob in amah a vui uh hi. Hihte pen Esau (Edom) suanlekhakte ahi hi. Esau in Kanaan numeite zi-in la hi. Hit mi Elon’ tanu Adah, Hiv mi Zibeon’ tapa Anah’ tanu Oholibamah, le Nebaioth’ sanggamnu, Ishmael’ tanu Basemath ahi hi. Adah in Esau tawh Elifaz nei a, Basemath in Reuel nei hi. Oholibamah in Jeush, Jalam, le Korah nei hi. Hihte pen Kanaan gam sunga a neih Esau’ tapate ahi hi. Tua ciangin Esau in a zite, a tapate, a tanute, le ama innkuan sunga mi khempeuh; a bawngte, a ganhingte khempeuh; le Kanaan gam sunga a lam a neihsa khempeuh la-in a sanggampa Jakob kiang panin gamdang khatah paikhia hi. Bang hang hiam cih leh ten khop theih dingin amau’ neihsate tam lua a, a ganhingte uh hangin tawlkhat a omna uh leitang in amaute vak zo lo hi. Tua ahih ciangin Seir mualtung gamah Esau teng hi. Esau’ min dang khat pen Edom ahi hi. Hihte pen Seir mualtung gam a Edom mite’ pupi Esau’ suanlekhakte ahi hi. Esau’ tapate: Esau’ zi Adah’ tapa Elifaz, Esau’ zi Basemath’ tapa Reuel ahi hi. Elifaz’ tapate: Teman, Omar, Zefo, Gatam, le Kenaz ahi hi. (Timna pen Esau’ tapa Elifaz’ zineu hi a, amah in Elifaz tawh Amalek nei hi.) Hihte pen Esau’ zi Adah’ tapate ahi hi. Reuel’ tapate: Nahath, Zerah, Shammah, le Mizzah ahi hi. Hihte pen Esau’ zi Basemath’ tapate ahi hi. Esau’ zi, Zibeon’ tapa Anah’ tanu Oholibamah tapate: Jeush, Jalam, le Korah ahi hi. Esau’ suante hih bang ahi hi. Esau’ ta masa Elifaz’ tate: Teman, Omar, Zefo, Kenaz, Korah, Gatam, le Amalek ahi hi. Hihte pen Edom gam sungah Elifaz’ suante hi a, Esau’ zi Adah’ sunga piangte ahi hi. Esau’ tapa Reuel’ tapate: Nahath, Zerah, Shammah, le Mizzah hi a, Edom gam sungah a om Reuel’ suante ahi hi. Amaute pen Esau’ zi Basemath’ sung panin a piangte ahi hi. Esau’ zi Oholibamah’ tapate: Jeush, Jalam, le Korah ahi hi. Hihte pen Esau’ zi, Anah’ tanu Oholibamah’ sung panin a piangte ahi hi. Hihte pen Esau (Edom) suante hi a, amaute’ sung pan beh lutangte ahi uh hi. Tua gam a teng Hori mi Seir’ tapate: Lotan, Shobal, Zibeon, Anah, Dishon, Ezer, le Dishan hi a, Edom gam sunga Seir’ suante ahi Hori mite’ sung pan beh lutang ahi uh hi. Lotan’ tapate: Hori le Heman ahi hi. Lotan’ sanggamnu Timna ahi hi. Shobal’ tapate: Alvan, Manahath, Ebal, Shefo, le Onam ahi hi. Zibeon’ tapate: Ai-ah le Anah ahi hi. Amah pen a pa Zibeon’ late a cin laitakin gamlakah a sa ciktui a mu pa Anah ahi hi. Anah’ tate: Dishon le Anah’ tanu Oholibamah ahi hi. Dishon’ tapate: Hemdan, Eshban, Ithran, le Kheran ahi hi. Ezer’ tapate: Bilhan, Zaavan, le Akan ahi hi. Dishan’ tapate: Uz le Aran ahi hi. Hori mite’ beh lutangte: Lotan, Shobal, Zibeon, Anah, Dishon, Ezer, le Dishan ahi hi. Hihte pen Seir gam sungah amau’ beh ciatin Hori mite’ sung pan beh lutang ahi uh hi. Hihte pen Israel mite tungah kumpi khat beek in a uk ma-in Edom gam sunga kumpite ahi hi. Beor’ tapa Bela in Edom gam sung uk a, ama khuapi min Dinhabah ahi hi. Bela si a, Bozrah khua mi Zerah’ tapa Jobab in ama tangin a uk hi. Jobab si a, Teman mite’ gammi Husham in ama tangin a uk hi. Husham si a, Moab gam sungah Midian mite a zo Bedad’ tapa Hadad in ama tangin uk a, ama khuapi min Avith ahi hi. Hadad si a, Masrekah khua mi Samlah in ama tangin uk hi. Samlah si a, Eufratis gun gei-a Rehoboth khua mi Shaul in ama tangin a uk hi. Shaul si a, Akbor’ tapa Baalhanan in ama tangin a uk hi. Akbor’ tapa Baalhanan si a, Hadar in ama tangin uk a, ama khuapi min Pau ahi hi. Ama zi’ min Mehetabel hi a, Mezahab’ tanu Matred, Matred tanu Mehetabel ahi hi. Amau’ innkuan le a tenna, amau’ min tawh kizui-in, Esau’ suan sung pan minamte’ min: Timna, Alvah, Jetheth, Oholibamah, Elah, Pinon, Kenaz, Teman, Mibzar, Magdiel, le Iram ahi hi. Hihte in amau’ neih, amau’ tenna leitang min dingin amau’ min mah vawh pah uh a, Esau’ suan, Edom mi a kicite ahi uh hi. A pa tawlkhat a tenna Kanaan gamah Jakob teng hi. Jakob innkuante’ tangthu hih bang ahi hi. Josef kum sawm le sagih pha ahih manin a sanggamte tawh tuuhon cing hi. A pa’ zite Bilhah le Zilpah’ tapate tawh tangval ahi uh hi. Josef in a pa uh kiangah amaute’ siat gamtatnate a gen hi. Tu-in Israel in a ta dangte khat peuhpeuh sangin Josef itzaw hi. Bang hang hiam cih leh a teek khitin a neih a tapa ahi hi. Amah in ama a dingin puantualpi bansau khat a bawlsak hi. Ahih hangin a pa un a sanggamte khempeuh sangin amah a itzawkna a sanggamte in a muh uh ciangin, amaute in Josef mudah uh a, nuamtakin amah hopih thei lo uh hi. Tu-in Josef in mang khat man a, amah in a sanggamte’ lakah a gen ciangin amaute in amah muhdah semsemna-in nei uh hi. Amah in amaute kiangah, “Keima mat hih mang ngai un: Eite in lo lai-ah buhlom i hen a, keima buhlom tho-in ding tang hi. Tua kiimah note’ buhlom kikhawm a, keima buhlom mai-ah kun uh hi,” a ci hi. A sanggamte in ama kiangah, “Kote’ tungah nang in hong uk ding a, kote’ tungah ukna aana nei ding na hi hiam?” a ci uh hi. Tua ahih ciangin amaute in a mangte le a thugente’ hangin amah mudah semsem uh hi. Tua ciangin amah in mang dang khat man a, tua mang a sanggamte kiangah genin, “Mang dang khat ka man hi. Ni, kha, le aksi sawm le khatte kei’ mai-ah hong kun uh hi,” a ci hi. Ahih hangin amah in a pa le a sanggamte’ kiangah a gen ciangin a pa in amah taii-in, “Nangma mat hih mang a bangci mang ahi hiam? Kei le na nu le na sanggamte, nangma mai leilakah a kun dingin hong pai ding ka hi uh hiam?” a ci hi. A sanggamte in amah haza uh a, ahih hangin a pa in hih thute a ciamteh hi. Khatvei a pa uh’ tuuhonte a cing dingin Shekhem gei-ah a sanggamte a pai hi. Israel in Josef kiangah, “Na sanggamte in Shekhem-ah tuuhon cing uh hi lo ahi hiam? Hong pai in, amau’ kiangah hong sawl ning,” a ci hi. Amah in a kiangah, “Hiah om ing,” a ci hi. Tua ahih ciangin amah in, “Tu-in va pai inla, na sanggamte le tuuhonte a cidam hiam va thei inla, kei kiangah thu hong zasakkik in,” a ci hi. Tua ahih ciangin amah in Hebron kuam panin Josef sawl a, Shekhem-ah amah va tung hi. Gamlakah a vak kawikawina mi khat in mu a, “Bang zongzong na hi hiam?” ci-in a dong hi. “Ka sanggamte a zong ka hi hi. Amaute in koi lai-ah tuuhon cing uh hiam, hong gen in, hong thum ing,” amah in ci hi. Mipa in, “Amaute paikhia zo uh hi. Bang hang hiam cih leh, ‘Dothan-ah pai ni,’ a cih uh ka za hi,” a ci hi. Tua ahih ciangin a sanggamte’ nungah Josef pai a, Dothan-ah amaute a mu hi. Amaute in gamlapi-ah amah na mu uh a, amaute’ nai-ah amah hong tun ma-in amaute in amah thah ding na vaihawm uh hi. Amaute khatlekhat in, “Hih lai-ah mangman pa hong pai hi. Tu-in hong pai un. Amah thatin dum sung khatah lawn ni. Tua ciangin gamsa khat in amah netum khin hi, i ci ding hi. A mangte bang a suak hiam i mu ding hi,” a kici uh hi. Ahih hangin Reuben in tua thu a zak ciangin, “Amah that kei ni,” ci-in, amau’ khutsung panin amah honkhia hi. A pa’ kiang a tunpihkik theih nadingin amau’ khutsung pan a hotkhiat theih nadingin Reuben in amaute’ kiangah, “Amah that kei un. Hih gamlak dum sungah amah lawn un. Ahih hangin amah bangmah cih kei un,” a ci hi. Tua ahih ciangin, a sanggamte’ kiangah Josef hong tun ciangin, ama silh lai a puantualpi bansau a hawkkhiatsak uh hi. Amaute in Josef la-in dum sung khatah a lawn uh hi. A dum pen a hawm hi a, a sungah tui om lo hi. Tua ciangin amaute an ne dingin tu uh hi. A khuadak uhleh Gilead panin Ishmael mite a kalaohte uh tawh singnai, lingsi, le myrrh paknamtui pua-in Egypt-ah puaksuk dingin a pai mu uh hi. Tua ciangin Judah in a sanggamte kiangah, “I sanggampa thatin amah i thahna im lehang bang meetna om ahi hiam? Hong pai un, Ishmael mite kiangah amah zuak ni. Amah bangmah cih kei ni. Bang hang hiam cih leh amah i sanggampa, eima cilesa ahi hi,” a ci hi. A sanggamte in ama thu mang hi. Tua ciangin Midian mi sumbawlte in hong nawk hi. Amaute in Josef kai to-in dum sung panin domkhia to uh a, Ishmael mite tungah ngun shekel sawmnihin amah zuak uh a, amaute in Egypt-ah Josef a paipih uh hi. Reuben dumah paikikin dum sungah Josef a om lohna a muh ciangin amah in a puan balkek a, a sanggamte kiangah ciahkikin, “Tangvalpa om nawn lo hi. Kei bangci ding ka hi hiam?” a ci hi. Tua ciangin amaute in Josef’ puan la-in, keel khat go uh a, a sisan sungah a puan diah uh hi. Amaute in a puantualpi bansau a pa uh kiangah puak uh a, “Hih puan ka mu uh hi. Na tapa’ puan hi hiam, hi lo hiam tu-in thei in,” a ci uh hi. Amah in Josef’ puan ahihlam thei a, “Ka tapa’ puan ahi hi. Gamsa khatpeuh in amah netum khinzo hi ding hi. Josef kibalnen gawp ahihna up loh nading om lo hi,” a ci hi. Tua ciangin Jakob in ama puan balkekin, a kawngah puanhampi teng a, a tapa’ hangin ni tampi sung a kap hi. A tapate le a tanute khempeuh in amah hehnem uh a, ahih hangin amah hehnep zawhin om lo a, “Hi lo hi. A kapsa-in ka tapa kiang Leinuai-ah ka pai ding hi,” a ci hi. Tua bangin ama hangin a pa kap hi. Tua kikal sungin Midian mite in Egypt gam sunga inncing mang, Faro’ nuai-ah ulian ahi Potifar’ tungah Josef na zuak uh hi. Tua hun laitakin Judah a sanggamte kiang panin paisukin, Adullam mi Hirah min nei mi khat tawh omkhawm hi. Tua lai-ah Judah in Kanaan mi Shua’ tanu mu hi. Amah in tua nu tenpihin luppih a, tua nu gai-in tapa khat nei a, amah in a min Er a phuak hi. Tua nu gai leuleu-in tapa khat nei a, tua nu in a min Onan a phuak hi. Tua nu in tapa khat nei leuleu-in a min Shelah a phuak hi. Tua nu in amah tawh Shelah a neih laitakin Khezib-ah amah a om hi. Judah in a tapa masa Er a dingin zi khat la a, tua nu’ min Tamar ahi hi. Ahih hangin Judah’ ta masa Er pen Topa’ muhna-ah hoih lo a, Topa in amah that hi. Tua ciangin Judah in Onan kiangah, “Na sanggampa’ zi tawh lumkhawm inla, tua nu’ tungah pasal’ sanggamte’ tavuan sem inla, na sanggampa a dingin ta nei in,” a ci hi. Ahih hangin Onan in tate pen ama a’ ahih loh ding thei hi. Tua ahih ciangin a sanggampa’ zi tawh a lupkhawm ciangin a sanggampa’ tungah ta pia kha ding ahih manin a natui leilakah buasak hi. Ama gamtatna Topa’ muhna-ah lungkimhuai lo a, Topa in amah zong a that hi. Tua ciangin Judah in a monu Tamar’ tungah, “Ka tapa Shelah a gol mateng na pa’ inn-ah meigongnu-in va om in,” a ci hi. Bang hang hiam cih leh a sanggamte mah bangin amah zong si kha ding ci-in lau hi. Tua ahih ciangin Tamar pai-in a pa’ inn-ah a om hi. Tua hun sungin Judah’ zi, Shua’ tanu si hi. Judah a dahna hun a ven’ ciangin a lawm Hirah tawh Timnah-a ama tuumul a mette kiangah paito hi. “Na teekpa a tuute mul met dingin Timnah-ah paito hi,” ci-in Tamar’ kiangah a kigen ciangin, a meigong numei puan suahkhia-in, a kituamna silhin amah kituam a, Timnah paina lampi gei-a Enaim paina munah na tu hi. Bang hang hiam cih leh Shelah a khang cing khin ahihna amah in thei a, ahi zongin amah tawh kitengsak nai lo hi. Judah in tua nu a muh ciangin amah in a mai tuam ahih manin numei paktat dingin ngaihsun hi. Lampi gei-a tua nu’ kiangah amah pai a, “Hong pai in, lumkhawm ni,” a ci hi. Bang hang hiam cih leh tua nu pen a monu ahihlam thei lo hi. Tua nu in, “I lupkhop man dingin kei bang hong pia ding na hi hiam?” a ci hi. Amah in dawngin, “Keelhon panin keelno khat hong puak ning,” a ci hi. Tua nu in, “Nong puak mateng khapna khat nong pia ding hiam?” a ci hi. Amah in, “Bang khapna nang hong pia ding ka hi hiam?” a ci hi. Tua nu in dawngin, “Na min gelhna le na khauhual le na khutsunga om na ciangkhut,” a ci hi. Tua ahih ciangin amah in tua nu tungah tuate pia-in, amah luppih a, amah tawh tua nu a gai hi. Tua ciangin amah dingin paikhia a, a kikhuhna puan suahkhia-in meigong numei ahihna puan a silh hi. Numei’ khutsung panin a khapna a lakik dingin Judah in Adullam mi a lawmpa a ganno tawh a sawl ciangin, amah in tua nu mu zo lo hi. Amah in tua lai mun mite dong a, “Lam gei Enaim a om numei paktat nu koi-ah om ahi hiam?” a ci hi. Amaute in, “Hih lai-ah numei paktat om ngei lo hi,” na ci uh hi. Tua ahih ciangin Judah kiangah amah ciahkikin, “Amah ka mu kei hi. Tua lai mun mite in, ‘Hih lai-ah numei paktat om ngei lo hi,’ zong hong ci uh hi,” a ci hi. Judah in dawngin, “Eite hong kinuihsan kha ding ahih ciangin a nate ama a dingin kem mai hen. Hih ganno ka puak a, nang in tua nu na muh lohna na thei hi,” a ci hi. Tua zawh kha thum ciangin Judah tungah, “Na monu Tamar paktatin gamta hi. Tua tham loin paktatna tawh naupaii hi,” ci-in kigen hi. Judah in, “Amah paikhiatpih un; amah kihaltum hen,” a ci hi. Amah a kipaikhiatpih laitakin amah in a teekpa kiangah kam khak a, “Hih nate a nei pa tawh nau ka nei hi,” a ci hi. Tua nu in, “Ciamteh in, hong thum ing, min gelhna le khauhual le ciangkhut, hih nate kua-a’ ahi hiam?” a ci hi. Tua ciangin Judah in tua nate thei a, “Ka tapa Shelah tawh gawm lo ka hih ciangin, tua numei, kei sangin thuman zaw hi,” a ci hi. Tua nu tawh amah lumkhawm kik nawn lo hi. Tua nu a suah hun a tun ciangin a naubu sungah nih om hi. Nausuak dingin a nat ciangin, khat in a khut dawksak hi. Naudom nu in khausan khat la-in a khut tungah khih a, “Hih pen hong pai masa,” ci pah hi. Ahih hangin a khut a dawh tum kik laitakin, en in, a sanggampa hong suakkhia hi. Amah in, “Nang a dingin a vang nangmahmah in bawltawm!” a ci hi. Tua ahih ciangin ama min Perez kiphuak hi. Tua khit ciangin a khut tunga khausan tawh a sanggampa hong suakkhia a, ama min Zerah kiphuak hi. Tu-in Egypt-ah Josef kipaipih suk a, tua lai-a a paipih Ishmael mite tung panin Egypt mi, inncing mangpa, Faro’ nuai-a mangpa Potifar in amah na lei hi. Topa in Josef ompih a, amah nasep a zo mi khat suak hi. Amah, Egypt mi a topa’ inn sungah om a, Topa in amah a ompihna le Topa in ama khut sungah a hih khempeuh a mavansakna a topa in mu hi. Tua ahih ciangin Josef in ama mai-ah maipha ngahin ama na sem a, amah in a innsung ukpa-in bawlin a neih khempeuh a uk dingin a koih hi. Amah in a innsung uk leh a neih khempeuh a ukin a bawl a kipan Topa in Josef’ hangin Egypt mipa’ innkuan thupha pia hi. Innsung hitaleh lo sung hitaleh a neih khempeuh tungah Topa’ thupha om hi. Tua ahih ciangin amah in a neih khempeuh Josef’ khut sungah ap hi. Josef nei khin ahih manin amau nupa sungthu lobuang thudangte lunghihmawh dingin ngaihsun lo hi. Tu-in Josef ngaihbaangin a mel hoih hi. Tawlkhat khit ciangin a topa’ zi in Josef zawl mit a, “Kei tawh hong lumkhawm in,” a ci hi. Ahih hangin amah in nialin a topa’ zi kiangah, “En in, kei hong nei ahih manin ka topa in inn sungah bangmah lunghihmawhna nei lo a, ama neih khempeuh ka khut sungah hong koih khin hi. Hih inn sungah kei sangin amah lianzaw lo hi. Nang, ama zi na hih manin, nang lobuang kei kiang panin amah in a kep tuam bangmah om lo hi. Tua ahih ciangin bangci-in hih gitlohna lianpi bawlin Pasian’ tungah khial ding ka hi hiam?” a ci hi. Amah in ni khat khit ni khat Josef a zol hangin, amah tawh lupkhop ding hitaleh omkhop ding hitaleh amah in tua nu’ thu ngai lo hi. Ahih hangin ni khat, amah a nasep sem dingin inn sungah pai a, inn sungah innsung mite khat zong a om loh laitakin, tua nu in a puan-in amah man a, “Kei tawh hong lumkhawm hoh in,” a ci hi. Ahih hangin amah in tua nu’ khut sungah a puan nusia-in tai-in tua inn panin a paikhia hi. Tua nu in, amah in a khut sungah puan nusia-in inn panin a taikhiatna a muh ciangin, ama innsung mite samin amaute kiangah, “En un, amah in eite hong no dingin Hebru mi khat eite’ lakah hong paipih hi. Kei tawh a lumkhawm dingin amah hong sungtang a, nakpitakin kei ka kiko hi. Ka aw sangsakin ka kikona a zak ciangin amah in ka kiangah a puan nusia a, tai-in inn panin paikhia hi,” a ci hi. Tua ciangin Josef’ topa inn-ah hong ciah mateng amah in a kiangah a puan koih hi. Tua nu in ama kiangah tua thu mah gen a, “Kote kianga nong paipih Hebru mi nasempa keimah a no dingin hong sungtang hi. Ahih hangin ka aw sangsakin ka kiko phetin amah in a puan kei kiangah nusia-in inn panin taikhia hi,” a ci hi. “Na nasempa in kei hong bawlna dan hih bang hi,” ci-in a zi in ama kianga a genna a topa in a zak ciangin nak heh mahmah hi. Josef’ topa in amah manin kumpipa’ thongkiate a kikhumna thong sungah amah koih a, tua thong sungah amah om hi. Ahih hangin Topa in Josef ompihin ama tungah itna kip lak a, thong kem pa’ muhna-ah amah maipha a pia hi. Thong kem pa in thong sunga thongkia mi khempeuh Josef’ et dingin ap a, tua lai-a a kisem khempeuh ama hih ahi hi. Topa in amah ompih ahih manin Josef’ etna sunga om peuhmah thong kem pa in don lo hi. Ama hih peuhmah Topa in daupaisak hi. Tua zawh tawlkhat khit ciangin, Egypt kumpipa’ an piapa le a anhuan pa in Egypt kumpipa ahi amau’ topa hehsak uh hi. An piapi pa le anhuan pipa ahi, ama nuai-a mangte nih tungah Faro heh a, Josef a kikhumna thong sung, inncing mangpa’ inn sungah amah in amaute a koih hi. Inncing mangpa in amaute Josef kemsak a, amah in amaute’ na sem hi. Kikhumna sungah amaute tawlkhat om uh hi. Zan khat amau tegel in mang man uh hi. Thong sunga a om an piapa le anhuan pa, amau’ mang a tuam tuak, a mang khiatna zong a tuam tuak mah ahi hi. Zingsang ciangin amaute kiangah Josef pai-in amaute a muh ciangin, amaute na lungkham uh hi. Tua ahih ciangin a topa’ inn sunga amah tawh a kikhumin a om Faro’ nuai-a mangte amah in dong a, “Bang hangin tuni-in maimial na hi uh hiam?” a ci hi. Amaute in ama kiangah, “Mang ka man uh a, tuate a khiathei ding om lo hi,” na ci uh hi. Josef in amaute kiangah, “Mang khiat theihnate Pasian’ hong piak hi lo ahi hiam? Kei kiangah hong gen un, hong thum ing,” a ci hi. Tua ahih ciangin an piapi pa in Josef kiangah a mang gen a, “Ka mangin ka mai-ah leenggui khat om a, tua leenggui tungah hiang thum om hi. A sel phetin pakkhia pah a, a bomte leenggah suakin min pah hi. Ka khut sungah Faro’ hai ka tawi hi. Keimah in leenggahte loin Faro’ hai sungah ka suk a, Faro’ khut tungah a hai ka pia hi,” a ci hi. Tua ciangin Josef in ama kiangah, “A khiatna hih bang ahi hi. Hiang thumte, ni thum ahi hi. Ni thum sungin Faro in nang hong khah ding a, na za-ah nang hong koih kik ding hi. Ama an piapa na hih lai-a mah bangin ama khut tungah Faro’ hai na pia ding hi. Ahih hangin kei hong phawk in. Nang tungah thu hong hoih ciangin kei tungah hehpihna hong bawl in, kong thum hi. Faro’ tungah kei’ thu genin, hih inn panin kei hong lakhia in. Bang hang hiam cih leh Hebru mite’ gam panin kei hong kigukhia a, hih lai-ah zong amaute in thong mial sungah kei hong koih nadingin bangmah ka gamta kei hi,” a ci hi. An huanpipa in a khiatna a hoihlam hi, ci-in a muh ciangin, amah in Josef kiangah, “Kei zong mang khat ka man hi: Ka lu tungah mohlawh thum om a, a lawh tungnung pen sungah an huansa namkim Faro a dingin om hi. Ahih hangin ka lu tunga lawh sung panin vasate in ne uh hi,” a ci hi. Josef in dawngin, “A khiatna hih bang ahi hi: Lawh thumte, ni thum ahi hi. Ni thum sungin Faro in nang hong lakhia-in na lu hong tan ding a, sing tung khatah nang hong khai ding hi. Vasate in na sa ne ding uh hi,” a ci hi. A ni thum ni, Faro’ suah ni hunin, amah in a nasemte khempeuh a dingin pawi khat kham a, an piapi pa le an huanpipa lakhia hi. Amah in an piapi pa an piak nasepah koihkik a, amah in Faro’ khut sungah a hai pia hi. Ahih hangin Josef’ khiat mah bangin an huanpipa a khailum hi. Ahi zongin an piapi pa in Josef phawk nawn lo a, amah mangngilh ta hi. Tua zawh kum nih bit khit ciangin Faro in mang man a, amah Nail gun gei-ah ding hi. Nail gun sung panin bawngpi a zol a thau sagih hong paikhia a, amaute in phai lopate ne uh hi. Amaute’ khit ciangin Nail gun sung pan mahin a gulhgawng a gawng bawngpi dang sagih hong paikhia a, Nail gun gei-a bawngpi dangte kiangah ding uh hi. Tua ciangin a gulhgawng bawngpi gawng sagihte in a zol a thau bawngpi sagihte netum uh hi. Tua ciangin Faro khang lo hi. Tua ciangin ihmu-in a nih veina mang man hi. A taksa a hoih buhvui sagih kung khat tungah vui hi. Tuate’ khit ciangin nisuahna huih in a theemsak a hawm vui sagih hong pokhia hi. A vui hawmte in a taksa a dim vui sagihte valhtum uh hi. Tua ciangin Faro khang lo a, tua pen a mang na hi hi. Tua ahih ciangin zingsangin a lungkham hi. Amah in mi sawlin Egypt mitphial siamte khempeuh le a mipil khempeuh samsak hi. Faro in amaute’ kiangah a mang gen a, ahih hangin Faro’ tungah a khiatna a gen thei kuamah om lo hi. Tua ciangin an piapi pa in Faro’ kiangah, “Tuni-in ka khialhnate ka phawkkik hi. Faro, ama nasemte tungah heh a, kei le an huanpipa, inncing mangpa’ inn sungah hong khum lai-in amah le keimah in zan khat sungin mang ka man uh a, a mangte in a khiatna tuam ciat nei hi. Inncing mangpa’ nasem ahi Hebru mi tangval khat tua lai-ah kote tawh om hi. Ama kiangah ka gen uh ciangin, amah in ka mangte uh hong khiatsak a, ka mang uh tawh a kizui tuakin a khiatna hong gen hi. Amah in kote tungah a khiatna hong gen bangin hong tung hi. Kei pen ka za-ah hong kikoih kik a, anhuan pa kikhailum hi,” a ci hi. Tua ciangin Faro in mi sawlin Josef samsak a, amaute in manlang takin thongmial sung panin amah a paikhiatpih uh hi. Amah in a mul kiatin a puan a khek khit ciangin, Faro’ mai-ah hong pai hi. Faro in Josef kiangah, “Mang khat ka man a, a khiatna a gen thei kuamah om lo hi. Nang in mang na zak ciangin a khiatna gen thei, ci-in hong kigenna ka za hi,” a ci hi. Josef in Faro dawngin, “Kei’ pilna tawh mang a khiathei ka hi kei hi. Pasian in Faro’ tungah a hoihlamin dawnna hong pia ding hi,” a ci hi. Tua ciangin Faro in Josef kiangah, “Ka mangin Nail gun gei-ah ka ding hi. A thau a zol bawngpi sagih Nail gun panin hong paikhia a, phai lopate ne uh hi. Tuate’ khit ciangin a hehpihhuai a gulhgawng, Egypt gam sung khempeuhah tua bang ka muh ngei loh bawngpi dang sagih hong pai hi. A gawng a gulhgawng bawngpite in a masa a thau bawngpi sagihte netum uh hi. Ahih hangin amaute in tuate a nek khit uh ciangin, a nek khitlam uh kuamah in thei lo hi. Bang hang hiam cih leh amaute pen a tunga mah bangin gulhgawng lai veve uh hi. Tua ciangin ka khang lo hi. Tua ciangin ka mang mahin kung khat tungah a dim a hoih buhvui sagih a vuikhia zong ka mu hi. Tuate’ khit ciangin nisuahna huihpi in a keusak a hawm, a theem vui sagih hong po a, a vui hawmte in a vui hoih sagihte valhtum uh hi. Mitphial siamte kiangah ka gen a, ahih hangin kei kiangah hong gentel thei khat beek om lo hi,” a ci hi. Tua ciangin Josef in Faro’ kiangah, “Faro’ mang tegel pen khat ahi hi. Pasian in ama bawl ding, Faro’ tungah hong kilangsak khin hi. A hoih bawngpi sagihte, kum sagih hi a, a hoih buhvui sagihte zong kum sagih mah ahi hi. A mang khiatna a kibang ahi hi. Tuate’ khit ciangin a hong paikhia, a gawng a gulhgawng bawngpi sagihte, kum sagih hi a, nisuahna huihpi in a theemsak buhvui sagihte zong kialpi kum sagih mah ahi hi. Faro’ kianga kong gen bangin Pasian in ama hih ding, Faro’ tungah hong lak khin ahi hi. Egypt gam sung khempeuhah kum sagih sung hauhna hong tung ding a, ahih hangin tua khit ciangin kialpi kum sagih sung hong tungin, hauhna ngeisa khempeuh Egypt gam sungah kimangngilh ding hi. Kialpi in gam sung netum ding a, nasia mahmah ding ahih manin, tua hong tung ding kialpi’ huhau-in gam sungah hauhna kithei lo ding hi. Faro’ mang nih a phakna pen tua thu Pasian’ sehsa hi, a cihnopna hi a, Pasian in tomno sungin hong tungsak ding hi. Tua ahih ciangin tu-in Faro in thu ngaihsun siam mipil khat tengkhia inla, Egypt gam sung a uk dingin amah koih in. Faro in gam sungah vaihawm ulian seh inla, a kihauh kum sagih sungin Egypt gam leitang pana piang sung panin nga-ah khat la in. Hong tung ding kum hoih sunga an khempeuh amaute khawmsak inla, khuapite sungah an nek dingin Faro’ ukna nuai-ah antangte kholin, amaute kemsak in. Kialpi hangin gam sung a siatloh nadingin Egypt gam sungah a hong tung ding kum sagih kialpi dal nadingin a kikoihcing an hi ding hi,” a ci hi. Hih a thugen pen Faro le a nasemte khempeuh in hoihsa uh hi. Faro in a nasemte kiangah, “Ama sungah Pasian Kha a omna, hih bang midang mu ding ihi hiam?” a ci hi. Tua ahih ciangin Faro in Josef kiangah, “Pasian in hihte khempeuh nang hong lak khin ahih manin, nang bangin thu ngaihsun siam le a pil midang om lo hi. Nang pen ka inn sungah ulian na hi ding a, nangma thupiak bangin ka mite khempeuh gamta ding uh hi. Kumpi tokhom tawh kisai-in kei pen nang sangin ka lian zaw ding hi,” a ci hi. Faro in Josef’ kiangah, “Egypt gam khempeuh a uk dingin nang kong koih khinzo hi,” a ci hi. Tua ciangin Faro in a min gelhna zungbuh ama khut tung panin suahkhia-in Josef’ khutah bulh a, puan hoih mahmah tawh amah zemin, a ngawngah kham khainiang khat oksak hi. Ama leeng nihna tungah Josef tuangsak a, ama mai-ah uliante kiko a, “Khukdin’ un!” ci hi. Tua ahih ciangin Egypt gam khempeuh a ukin amah koih hi. Tua tham loin Faro in Josef kiangah, “Kei pen Faro ka hi hi. Nangma thukim lohin Egypt gam sung khempeuhah kuamah in a khut a khe nangawn uh liik lo ding uh hi,” a ci hi. Faro in Josef’ min Zafenath-paneah a phuak hi. Amah in On khua siampipa Potifera’ tanu Asenath tawh kitengsak hi. Tua ahih ciangin Egypt gam sungah Josef zin kawikawi hi. Egypt kumpipa Faro’ nasemin a tum hunin Josef kum sawmthum pha hi. Faro’ omna panin Josef paikhia a, Egypt gam sung khempeuhah zin hi. A kihauh kum sagih sungin leitang in tampi piangsak a, Egypt gamah tampi a om laitakin amah in tua kum sagih sunga ante khempeuh khawm a, khuapite sungah an khol hi. A kiima lote panin khuapi simah amah in an khol hi. A teh ding a khawl dong zahin Josef in tuipi gei sehnel zahin antang tampi khol hi. Bang hang hiam cih leh kiteh khin zo lo hi. Kialpi kum hong tun ma-in Josef in On khua siampipa Potifera’ tanu Asenath tawh tapa nih nei hi. Josef in a ta masa Manasseh a phuak hi. Amah in, “Pasian in ka haksatna khempeuh le ka pa’ innkuan khempeuh a mangngilhin hong bawl hi,” ci hi. A nihna pen amah in Efraim a phuak hi. “Ka thuakna gam sungah kei a pungin hong bawl hi,” ci hi. Egypt gam sunga a om kum sagih sung hauhna hun bei ta hi. Josef’ gensa bangin kum sagih kialpi hong kipan hi. Gamdang khempeuhah kialpi tung a, ahih hangin Egypt gam sung tengah an om hi. Egypt gam khempeuh a kial ciangin, an ngenin mite Faro’ tungah kiko uh hi. Faro in Egypt mite khempeuh tungah, “Josef’ kiangah pai un. Note’ tunga ama hong cih bangin gamta un,” a ci hi. Tua ahih ciangin gam khempeuhah kialpi a tunkim ciangin Josef in ankholna innte khempeuh hongin, Egypt mite tungah a zuak hi. Bang hang hiam cih leh Egypt gamah kialpi nasia mahmah hi. Tua tham loin, leitung khempeuhah kialpi nasia ahih manin, antang lei dingin Josef’ kiangah leitung mi khempeuh hong pai uh hi. Egypt-ah an a omna thu Jakob in a theih ciangin a tate kiangah, “Bang hangin khatlekhat ki-enen mawk na hi uh hiam? Egypt-ah an om hi, ci-in ka za hi. Eite si loin i nuntak nadingin paisuk unla, ei a’ ding an va lei un,” a ci hi. Tua ahih ciangin Egypt-ah an lei dingin Josef’ sanggamte sawm paisuk uh hi. Ahih hangin Jakob in Josef’ sanggampa Benjamin, a sanggamte tawh paisak lo hi. Bang hang hiam cih leh ama tungah siatna tung kha ding, ci-in lau hi. Kanaan gam sungah kial tung ahih manin a hong pai dangte tawh Israel’ tapate an lei dingin hong paikhawm uh hi. Tu-in Josef pen tua gam a ukpa hi a, gammi khempeuh tungah an a zuakpa amah ahi hi. Josef’ sanggamte hong pai-in, a maitang uh leilam ngatin ama mai-ah hong kun uh hi. Josef in a sanggamte a muh ciangin thei a, ahih hangin amah in midang bangin bawlin amaute tungah khauh pau hi. “Koi pana hong pai na hi uh hiam?” a ci hi. Amaute in, “An lei dingin Kanaan gam panin hong pai hi ung,” ci uh hi. Josef in a sanggamte thei a, ahih hangin a sanggamte in amah thei lo uh hi. Josef in a mangin amaute a mat khitna a phawk hi. Amah in amaute kiangah, “Note, thukan na hi uh a, hih gam thaneemna a en dingin hong pai na hi uh hi,” a ci hi. Amaute in Josef kiangah, “Hi lo hi, topa aw; an lei dingin na nasemte a hong pai hi ung. Kote khempeuh mi khat’ ta ka hi uh hi. Kote, a thutak ka hi uh a, na nasemte thukan hi lo uh hi,” a ci uh hi. Amah in amaute kiangah, “Hi lo hi, hih gam ginat lohna a en dingin hong pai na hi uh hi,” a ci hi. Amaute in, “Ko, nangma nasemte, sanggam pasal sawm le nih ka hi uh a, Kanaan gam sungah mi khat’ ta ka hi uh hi. A moi pen tu laitakin ka pa uh tawh om a, khat pen om nawn lo hi,” a ci uh hi. Ahih hangin Josef in amaute kiangah, “Note’ tunga kong gen bangin a man mah ahi hi. Note, thukan na hi uh hi. Hih thu tawh note hong kithei ding hi: Faro a nungta ahih mah bangin na sanggam moi pen uh hih lai-ah hong pai kei leh hih lai mun panin note na paikhia thei nawn kei ding uh hi. Note’ sungah thuman om hiam, ci-in a kimuh nading, na thugente uh a kitel nadingin note thong sungah na om laitakun note khat kisawl unla, na sanggampa uh hong paipihsak un. Tua ahih kei leh Faro a nungta ahih mah bangin note, thukan na hi taktak uh hi,” a ci hi. Amah in thong sungah ni thum sung amaute a koih hi. A ni thum ni-in Josef in amaute kiangah, “Keimah in Pasian zahtak ka hih manin hih bangin gamta un. Tua hileh na nungta ding uh hi. Note, thuman mi na hih uhleh thong sungah na sanggamte uh khat omsak lai unla, a dangte pai-in na innkuan uh a gilkialte a dingin an pua unla, na sanggam moi pen uh kei kiangah hong paipih un. Tua ciangin na kam gente uh kitel ding a, note na si kei ding uh hi,” a ci hi. Amaute tua bangmahin gamta uh hi. Tua ciangin amaute khatlekhat in, “A taktakin i sanggampa tawh kisai-in eite i mawh hi. Amah in eite kiangah hong thum napi-in eite in a thu i ngaih loh ciangin amah a lungkhamna i mu hi. Tua thu hangin hih bang lungkhamna eite tungah hong tung hi,” kici uh hi. Reuben in amaute dawng a, “Tangvalpa tungah khial kei un, ci-in note tungah hong gen hi lo ka hi hiam? Ahih hangin ka thu nong mang kei uh hi. Tua ahih ciangin tu-in ama sihna thaman eite’ tungah hong tung ahi hi,” a ci hi. Amaute’ kikalah kamphen khat om ahih manin Josef in amau’ paute a tellam amaute in thei lo uh hi. Tua ciangin amaute’ kiang panin Josef kihei-in a kap sim hi. Tua ciangin amaute kiangah hong paikikin amaute hopih hi. Amah in amau’ kiang panin Simeon la-in amau’ muhna-ah amah a hen hi. Amau’ ipte antang tawh dipsakin, a van sung uhah amau’ sum ciat koih kikin, lampi-a a nek ding uh an a piak nading Josef in thu a pia hi. Tua bangmahin amau a dingin kihihsak hi. Tua ciangin amaute in a late uh antang suanin a paikhia uh hi. Amaute khat in a giahna panun a la gan-an pia dingin a van a suah le, a van gongah a sum mu hi. Amah in a sanggamte kiangah, “Ka sum kikoih kik hi. Hih lai-ah ka van gongah na om!” a ci hi. Hih thu hangin amaute lungsi uh a, lingin amaute khatlekhat ki-en uh a, “Pasian in eite hih bangin hong bawl a bangci thu ahi hiam?” a ci uh hi. Kanaan gamah a pa uh Jakob kiang a tun uh ciangin, amaute’ tunga thupiang khempeuh gen uh a, “Mipa, tua gam topa kote’ tungah hong khauh pau-in, tua gam thukanin kote hong ngaihsun hi. Ahih hangin kote in ama kiangah, ‘Kote thuman mi ka hi uh a, kote thukan ka hi kei uh hi. Kote pen ka pa uh’ tapa, sanggam pasal sawm le nih ka hi uh hi. Khat pen om nawn lo a, tu laitakin a moipen Kanaan gamah ka pa uh tawh om hi,’ ka ci uh hi. Tua ciangin tua gam topa in kote kiangah, ‘Note thuman mi na hihna uh hih tawh ka thei ding hi: Na sanggamte uh khat kei kiangah nusia unla, na innkuan gilkialte a dingin antang la unla, ciahkik un. Na sanggam moi pen uh kei kiangah hong paipih un. Tua hileh note thukan hi loin thuman mi na hihna uh ka thei ding a, note kiangah na sanggampa uh hong khahin, hih gam sungah omin na na sem thei ding uh hi,’ hong ci hi,” ci-in a gen uh hi. Amau’ vante a suah ciangun, a milipun a sumte uh a van sung ciat uhah na om hi. Amaute le a pa un amaute’ sum kihente a muh uh ciangin, lungkham uh hi. A pa uh Jakob in amaute kiangah, “Ka tate tawh kei nong kikhensak zo uh hi: Josef om nawn lo, Simeon om nawn lo, tu-in note in Benjamin na la ding uh hi. Hihte khempeuh kei’ tungah hong tung khin hi,” a ci hi. Tua ciangin Reuben in a pa kiangah, “Na kiangah amah kong paipih kik kei leh ka tapa nihte that in. Kei hong ap in, nang kiangah amah kong ciahpih kik ding hi,” a ci hi. Ahih hangin amah in, “A sanggampa si a, amah bek om ahih manin ka tapa in note hong zuisuk lo ding hi. Note’ pai nading na khualzinna uhah ama tungah siatna tung kha zenzen le, khangham khit nungin dahlua-in ka si ding hi,” a ci hi. Tu-in gam sungah kialpi hong nasia semsem hi. Egypt gam panin a puak uh antang amaute in a gaih khit uh ciangin, a pa un amaute kiangah, “Paikik unla, eite a’ ding an tawmkhat va lei un,” a ci hi. Ahih hangin Judah in ama kiangah, “Mipa in thupi takin kote hong hilhkhol a, ‘Na sanggampa uh tawh nong ton kei uhleh ka mai na mu kei ding uh hi,’ hong ci hi. Ka sanggampa uh hong zuisak lecin kote paisukin nang a’ ding an ka va lei ding uh hi. Ahih hangin amah nong zuihsak kei leh kote ka paisuk kei ding uh hi. Bang hang hiam cih leh mipa in kote kiangah, ‘Na sanggampa uh tawh nong ton kei uhleh ka mai na mu kei ding uh hi,’ hong ci hi,” a ci hi. Israel in, “Mipa kiangah sanggam dang khat nei ung, ci-in genin bang hangin kei hong hici bawlsiat na hi uh hiam?” a ci hi. Amaute in dawngin, “Mipa in kote’ thu le ka sanggamte uh thu limtakin hong dong a, ‘Na pa uh a nungta lai hiam? Sanggam dang na nei uh hiam?’ hong ci hi. Hong dotnate ka dawnna-un ama kiangah a gen ka hi uh hi. ‘Na sanggampa uh hong tonpih suk un,’ amah in hong cih ding lam kote in bangci theihkholh ding ka hi uh hiam?” a ci uh hi. Judah in a pa Israel kiangah, “Tangvalpa hong zuisak in; nang le kote le i tate si loin i nuntak theih nadingin kote ka va pai ding uh hi. Kei pen ama a dingin a kikham ka hi ding a, kei’ khutsung panin amah nong kal ding hi. Keimah in nang kiangah amah hong ciahpihkik loin na mai-ah kong koihkik kei leh, tua mawhna kei hong thuaksak tawntung in. Bang hang hiam cih leh zekai lo hi lehang tu-in nihvei i tungkik khinta ding hi,” a ci hi. Tua ciangin a pa uh Israel in amaute kiangah, “A tuaci bang ding ahihleh hih bangin gamta un: Gam sunga singgah limci pente pua unla, mipa’ tungah letsongin lingsi tawm, khuaizu tawm, singnai, myrrh paknamtui, pistakhio gah, le almond gahte puak suk un. Na sum uh a zah nih pua un. Na van gong uhah a kikoihkik sumte puakik un, a kikhial hi kha ding hi. Na sanggampa uh zong samin ding unla, mipa kiangah paikik un. Amah in na sanggampa uh le Benjamin hong ciahsakkik theihna dingin Vanglian Pasian in mipa’ mai-ah note hehpihna hong pia tahen. Ka tate tawh ka kikhen leh a kikhen ka hi ding hi,” a ci hi. Tua ahih ciangin amaute in letsong la-in, sum a zah nih pua-in, Benjamin zong tonpih uh hi. Amaute dingin Egypt-ah paisuk uh a, Josef’ mai-ah a ding uh hi. Josef in amaute tawh Benjamin a muh ciangin, amah in a innsung nasempa’ kiangah, “Mite inn sungah paipih inla, gan khat go-in bawl in. Bang hang hiam cih leh hih mite in sun ciangin kei tawh an ne ding uh hi,” a ci hi. Josef’ sawl bangin mipa in sem a, Josef’ inn-ah mite paipih hi. Josef’ inn-ah kipaipih ahih manin lau uh a, amaute in, “Eite sila-in hong bawlin i late a mat theih nading, eite’ tungah thu hong zongin eite hong hih theih nadingin, a masa lai-a i van sunga sum kikoihte’ hangin eite hong kipaipih hi,” a ci uh hi. Tua ahih ciangin Josef’ innsung nasempa’ kiangah amaute paito uh a, inn kongkhakah amah tawh kiho-in, “Aw, topa aw, an lei dingin khatvei kong pai uh hi. Ka giahna mun uh ka tun uh ciangin ka vante uh ka hong uh a, ka sumte uh a cingin ka van sung ciat uhah na omkik hi. Tua ahih ciangin kote in tua sumte kong puakik uh a, an lei nadingin sum dang zong kong pua thuah uh hi. Ka van sung uhah kua in sum koih ahi hiam ka thei kei uh hi,” a ci uh hi. Amah in dawng a, “Nuam takin om unla lau kei un. Na Pasian uh, note’ pa’ Pasian in note a dingin na van sung uhah sum koih hi ding hi. Keimah in note’ sum a cingin ka ngah khin hi,” a ci hi. Tua ciangin amah in amaute’ kiangah Simeon paikhiatpih hi. Mipa in Josef’ inn-ah amaute paipihin, amaute tui pia-in, amaute in a khe uh sil khinin, amah in amaute’ late gan-an a piak khit ciangin, amaute in tua lai-ah Josef tawh an ne ding uh ci-in za uh ahih manin sunin Josef hong pai ciangin a piak ding uh letsong bawlkhol uh hi. Inn-ah Josef hong pai ciangin amau’ puak letsongte innsung ama kiangah paipih uh a, ama mai leilakah kun uh hi. Amah in amau’ omzia dong a, “Na gen uh puteek, na pa uh a dam hiam? Amah a nungta lai hiam?” a ci hi. Amaute in, “Nangma nasem ka pa uh dam hi. Amah nungta lai hi,” a ci uh hi. Amaute in a lu uh kun uh a, zahtakna a bawl uh hi. Amah khuadak to a, a nu’ tapa Benjamin mu a, “Hih pa, kei kianga nong gen uh na sanggam moi pen uh ahi hiam? Pasian in nang hong hehpih hen, ka ta!” a ci hi. Tua ciangin a lungsimah a sanggampa ngai lua ahih manin Josef manlangin paikhia a, a kah nading mun a zong hi. Amah a inndei sungah pai-in tua lai-ah va kap sim hi. Tua ciangin amah in a mai phiatin hong paikhia hi. Amah ki-ip tawmin, “An hong pia un,” a ci hi. Amaute in Josef amah guakin nesakin, amaute a tuam mahin nesak a, amah tawh a ne Egypt mite in a tuam mahin ne uh hi. Bang hang hiam cih le Egypt mite in Hebru mite tawh an nekhawm lo uh hi. Tua banga nekkhawm ding pen Egypt mite a dingin a kihhuai ahi hi. Ama mai-ah amaute a suakmasa a suah hun tawh kizui leh a moipen a khangnona tawh kizui-in tu uh hi. Lamdangsakna tawh amaute khatlekhat ki-en uh hi. Josef’ sabuai tung panin amau’ tanh ciat kipia-in, ahih hangin Benjamin’ tanh pen amaute-a’ zah nga pha hi. Tua ahih ciangin amaute in an ne tui dawnin amah tawh lungdam uh hi. Tua ciangin amah in a innsung nasempa thu pia a, “Hih mite’ van sungah amau’ puakzawh zahzah an guang inla, amau’ sum ciat a van gong ciat uhah koih in. Ka ngun hai pen an lei nadinga a sum tawh a moipen’ van gongah koihsak in,” a ci hi. Amah in Josef’ gen bangin a hih hi. Zingsang khuavak phetin a late uh tawh mite kisawlkhia hi. Amaute a pai khit, ahih hangin khuapi panin a nai lai-in, Josef in ama innsung nasempa kiangah, “Kithawi inla, mite va delh in. Amaute na phak ciangin amaute kiangah, ‘Bang hangin a hoih pen a sia tawh hong thuk na hi uh hiam? Bang hangin ka topa’ ngun hai gu na hi uh hiam? Ka topa in hih hai sung panin dawnin, hih tawh amah in thu thei hi lo ahi hiam? Hih bangin na gamtat manun na khial uh hi,’ va ci in,” a ci hi. Amah in amaute a phak ciangin amaute kiangah hih thute a gen hi. Amaute in ama kiangah, “Bang hangin ka topa in thu hih bang hong gen na hi hiam? Na nasemte, tua banga gamta ding hi dek peuhmah lo hi. En in, ka van gong uha ka muh uh sumte, Kanaan gam panin nang kiangah kong puak kik uh hi. Tua ahih teh na topa’ inn panin ngun hitaleh kham hitaleh bangci guk ding ka hi uh hiam? Na nasemte’ sung pan tua hai a kimuhna penpen kithat hen; kote zong ka topa’ sila ka hi ding uh hi,” a ci uh hi. Amah in, “Na cih bang uh hi ta hen: A kimuhna penpen pa ka sila hi ding a, no a dangteng mawh na baang kei ding uh hi,” a ci hi. Tua ciangin a milipin a van uh leilakah ngasuk uh a, a milipin a van uh suah hi. Amah in zong a, a hampen panin kipanin a moipen tawh tawp a, Benjamin’ van sungah a hai kimu hi. Tua ciangin amaute in a puan uh balkekin, a late uh a van suan ciatin, khuapi-ah hong kileh kik uh hi. Judah le a sanggamte, Josef’ inn-ah a tun ciangin, amah tua lai mahah na omlai hi. Ama mai leilakah amaute kun uh hi. Josef in amaute kiangah, “Note’ gamtatna a bangci gamtat ahi hiam? Kei bang ahi mi in thu ka theihna thei lo na hi uh hiam?” a ci hi. Judah in, “Ka topa tungah hong bangci gen ding ka hi uh hiam? Bang thu gen ding ka hi uh hiam? Tua ahih kei leh ko bangci kiphel theih ding ka hi uh hiam? Pasian in na nasemte’ mawhna mukhia hi. En in, kote le hai a kimuhna pa zong, ka topa’ sila ka hi uh hi,” a ci hi. Ahih hangin amah in, “Tua bangin hi dek lo ding hi. Hai a kimuhna mipa bek ka sila hi ding hi. No a dangte ahihleh, na pa’ kiang uhah nuamtakin ciah un,” a ci hi. Tua ciangin ama kiangah Judah hong paito-in, “Ka topa aw, hong thum ing. Na nasempa, nang tungah kam khat thu hong gensak inla, na nasempa tungah na hehna hong sosak kei in. Bang hang hiam cih leh nang pen Faro mahmah tawh a kibang na hi hi. Ka topa in a nasemte nong dong a, ‘Pa hitaleh sanggam pasal dang hitaleh na nei uh hiam?’ nong ci hi. Kote in ka topa uh kiangah, ‘Kote in a teek pa khat le a teek zawhin a neih sanggam pasal moilai khat ka nei uh hi. Ama sanggampa si a, a nu’ tate sung pan amah bek omlai hi. A pa in amah it mahmah hi,’ kong ci uh hi. Tua ciangin nangmah in na nasemte kiangah, ‘Ka mit tawh amah ka muh theih nadingin kei kiangah amah hong tonpih suk un,’ nong ci hi. Kote in ka topa uh kiangah, ‘Tangvalpa in a pa nusia thei lo ding hi. Bang hang hiam cih leh a pa nusia leh a pa si ding hi,’ kong ci uh hi. Tua ciangin nangmah in na nasemte kiangah, ‘Note tawh na sanggam uh a moipen hong paisuk khop kei leh ka mai nong mu nawn kei ding uh hi,’ nong ci hi. “Tua ahih ciangin na nasem ka pa uh kiangah ka ciahkik uh ciangin ka topa’ thugente ama kiangah ka gen uh hi. Ka pa un, ‘Paikikin eite a’ ding an tawm va lei un,’ hong cih ciangin kote in, ‘Ka paisuk kei ding uh hi. Ka sanggam moipen uh ko tawh hong paikhawm leh ka paisuk bek ding uh hi. Bang hang hiam cih leh ka sanggam moipen uh ko tawh hong pai kei leh mipa’ mai ka mu kei ding uh hi,’ ka ci uh hi. Tua ciangin na nasem ka pa un kote kiangah, ‘Ka zi in kei tawh tapa nih a neih na thei uh hi. Khat in kei hong nusia khin a, amah kibalzan khin taktak hi, ka ci hi. Tua hun a kipan amah ka mu nawn kei hi. Hih a khat zong kei kiang panin na lak uh a, ama tungah siatna a tun leh, dahna tawh ka sam kangte Leinuai-ah na paipih suk ding uh hi,’ hong ci hi. “Tua ahih ciangin tu-in, na nasem ka pa uh kiangah ka ciah uh ciangin, tangvalpa kote tawh hong ciah kei leh, ama lungsim khempeuh tangvalpa’ tungah om ahih manin, kote tawh tangvalpa a ciah lohna a muh ciangin amah si ding hi. Na nasemte in na nasem ka pa uh’ sam kangte dahna tawh Leinuai-ah ka paipih ding uh hi. Bang hang hiam cih leh na nasem keimah pen tangvalpa a dingin ka pa’ tungah a kikham ka hi a, ‘Nang kiangah amah kong ciahpih kik kei leh tua mawhsakna nangma muhna-ah ka nuntak tawntungin ka thuak ding hi,’ ka ci hi. Tua ahih ciangin tu-in kong thum hi. Ka topa’ sila dingin tangvalpa’ tangin na nasempa hong omsak inla, a sanggamte tawh tangvalpa ciahkiksak in. Bang hang hiam cih leh tangvalpa kei tawh hong ton kei leh ka pa kiangah bangci ciahkik thei ding ka hi hiam? Ka pa’ tungah a tung ding siatna ka thuakzo kei ding hi,” a ci hi. Tua ciangin ama kianga dingte khempeuh’ mai-ah Josef ki-ipzo nawn lo a, “Ka kiang panin mi khempeuh paikhia un,” ci-in a kiko hi. Tua ahih manin Josef a sanggamte tungah amah a kipulak ciangin kuamah dang om lo hi. Amah a gingin kapkhia ahih manin Egypt mite in za a, Faro’ innkuante in zong za uh hi. Josef in a sanggamte kiangah, “Kei, Josef ka hi hi. I pa a nungta lai hiam?” a ci hi. Ahih hangin a sanggamte maizum uh ahih manin amah dawng thei lo uh hi. Tua ahih ciangin Josef in a sanggamte kiangah, “Ka nai-ah hong pai un, hong thum ing,” a ci hi. Amaute a nai-ah hong pai uh hi. Amah in, “Kei pen Egypt-ah nong zuak uh na sanggampa uh Josef ka hi hi. Hih lai-ah kei nong zuak manun tu-in lungkham kei un. Nomau tungah kiheh tawm kei un. Bang hang hiam cih leh nuntakna a hu dingin note’ mai-ah Pasian in kei hong sawl hi. Bang hang hiam cih leh gam sungah kum nih sung kialpi tungzo hi. Lo khawh loh, an lak loh ding kum nga omlai hi. Note a dingin leitungah a omlai mi a hingsak ding le note a dingin a suakta mi tampi a kem dingin note’ mai-ah Pasian in kei hong sawl hi. Tua ahih ciangin hih lai-ah a hong sawl mi pen note na hi kei uh a, Pasian ahi hi. Amah in Faro’ khutnuai-ah a ulian penin kei hong bawlin, ama innsung khempeuh’ topa le Egypt gam khempeuh a ukpa-in kei hong bawlkhin hi. “Manlangin i pa kiangah va ciahto unla ama kiangah, ‘Na tapa Josef in hih bangin ci hi: Pasian in Egypt gam khempeuh’ topa-in kei hong bawl khin hi. Ka kiangah hong paisuk hen, zekai kei hen. Goshen leitangah na teng ding a, nang le na tate’ tate le na tuuhonte le na bawnghonte le na neih khempeuh tawh, nang pen kei tawh a kinai-in na om ding hi. Hong tung ding kialpi kum nga omlai ahih manin tua lai-ah nang kong vak ding hi. Tua hi kei le nang le na innkuanpihte le na neih khempeuh in zawnna na ngah ding uh hi, ci hi,’ va ci un. “Note’ kianga thu hong gen pen keima kam ahihna tu-in note’ mitin nong mu uh a, ka sanggampa Benjamin’ mit in zong hong mu hi. Egypt-ah keima liatna khempeuh le note’ muhsa khempeuh, i pa’ kiangah na gen ding uh hi. Manlang unla, hih lai-ah i pa hong paisukpih un,” a ci hi. Tua ciangin a sanggampa Benjamin ngawng kawi-in a kap hi. Benjamin in zong amah ngawng kawi-in a kap hi. Tua ciangin a kah kawmin a sanggamte khempeuh ngawng kawi-in a nam hi. Tua khit ciangin a sanggamte in amah hopih uh hi. “Josef’ sanggamte hong pai,” cihna thu Faro’ inn sungah a kizak ciangin, tua thu in Faro le a nasemte lungdamsak mahmah hi. Faro in Josef kiangah, “Na sanggamte kiangah, ‘Hih bangin gamta un: Na ganhingte uh van suan unla, Kanaan gamah ciahkik un. I pa le na innkuanpihte uh va la unla, kei kiangah hong pai un. Egypt gam a hoihpen mun note kong pia ding a, note in gam hoih sunga piangte na ne ding uh hi,’ ci in. Amaute zong thu pia inla, ‘Hih bangin gamta un: Na tate le na zite uh a dingin Egypt panin leeng la unla, i pa hong paipih un. Egypt gam khempeuh a hoih penna nomau-a’ ahih ciangin na vante uh ngaihsutin nei kei un,’ ci in,” a ci hi. Israel’ tapate tua bangmahin gamta uh hi. Josef in Faro’ thupiak mah bangin amaute leeng pia a, lampi-a a nek ding uh an zong a pia hi. Amah in amaute khempeuh tungah puan hoih silh khat ciat a pia hi. Ahih hangin Benjamin’ tungah ngun shekel zathum le puan hoih silh nga a pia hi. Amah in a pa kiangah a nuai-ate a khak hi: Egypt na hoihte a pua la sawm; antang, anlum, le lampi-a a pa’ nek ding an a pua lapi sawm a puak hi. Tua ciangin amah in a sanggamte sawlkhia a, amaute a paikhiat ciangin amah in amaute kiangah, “Lampi-ah kitawng kei un,” a ci hi. Tua ahih ciangin amaute Egypt panin paito uh a, a pa uh Jakob kiang Kanaan gamah ciah uh hi. Amaute in ama kiangah, “Josef nungta lai a, amah pen Egypt gam khempeuh a ukpa na hi hi,” hong ci uh hi. Amah in amaute’ thugen um lo ahih ciangin a lung si hi. Ahih hangin amaute’ tunga Josef’ gen kammalte ama kiangah a gen ciang leh Josef in amah puak nadinga a khak leengte a muh ciangin, a pa uh Jakob’ lungsim hingkik hi. Israel in, “Phazo hi. Ka tapa Josef nungta lai hi. Ka sih ma-in pai-in amah ka mu ding hi,” a ci hi. Tua ahih ciangin Israel, a neih khempeuh tawh a khualzin kipanin Beersheba tung a, a pa Isaac’ Pasian tungah biakpiakna a bawl hi. Pasian in Israel tungah zanin thu gen a, “Jakob, Jakob,” ci hi. Amah in, “Hiah om ing,” ci hi. Tua ciangin amah in, “Kei pen na pa’ Pasian ahi, Pasian ka hi hi. Egypt-ah paisuk ding lau kei in. Bang hang hiam cih leh minam lian khatin tua lai-ah nang kong bawl ding hi. Egypt-ah nang tawh kong paisuk ding a, tua ciangin zong keimah in nang kong paipihto kik ding hi. Josef’ khut sungah na si ding hi,” a ci hi. Tua ciangin Beersheba panin Jakob ding khia hi. Israel’ tapate in a pa uh Jakob, a tate uh, le a zite uh, amah puak nadinga Faro in a khak leeng sungah a pua uh hi. Amaute in zong Kanaan gam sunga a lam uh a ganhingte uh le a nate uh la-in, Jakob le ama suanlekhakte ahi, a tapate, ama tapate’ tapate, a tanute, a tapate’ tanute tawh Egypt-ah a pai uh hi. Amah in a suanlekhakte khempeuh Egypt-ah a paipih hi. Tu-in hihte pen Israel’ suanlekhak, Egypt-ah a pai Jakob le a tate’ min ahi hi. Jakob’ ta u pen Reuben le Reuben’ tapate: Hanok, Pallu, Hezron, le Karmi ahi hi. Simeon’ tapate: Jemuel, Jamin, Ohad, Jakhin, Zohar, le Kanaan numei’ tapa Shaul ahi hi. Levi’ tapate: Gershon, Kohath, le Merari ahi hi. Judah’ tapate: Er, Onan, Shelah, Perez, le Zerah ahi hi. (Ahih hangin Er le Onan Kanaan gamah si hi.) Perez’ tapate: Hezron le Hamul ahi hi. Issakhar’ tapate: Tola, Puvah, Job, le Shimron ahi hi. Zebulun’ tapate: Sered, Elon, le Jahleel ahi hi. (Hihte pen Paddanaram-ah Leah tawh a neih Jakob’ suante hi a, a tanu Dinah tawh zong ahi hi. Numei le pasal a vekpi-in sawmthum le thum ahi hi.) Gad’ tapate: Zifion, Haggi, Shuni, Ezbon, Eri, Arodi, le Areli ahi hi. Asher’ tapate: Imnah, Ishvah, Ishvi, Beriah, le a sanggamnu uh Serah ahi hi. Beriah’ tapate: Heber le Malkhiel ahi hi. (Hihte pen Laban in a tanu Leah tungah a piak Zilpah’ tapate ahi hi. Amah in Jakob tawh hihte nei a, mi sawm le guk ahi hi.) Jakob’ zi Rachel’ tapate: Josef le Benjamin ahi hi. Josef in Egypt gamah On khua siampipa Potifera’ tanu Asenath tawh Manasseh le Efraim nei hi. Benjamin’ tapate: Bela, Bekher, Ashbel, Gera, Naaman, Ehi, Rosh, Muppim, Huppim, le Ard ahi hi. (Hihte pen Rachel tawh a neih Jakob’ suante hi a, a vekpi-in mi sawm le li ahi hi.) Dan’ tapa Hushim ahi hi. Naftali’ tapate: Jahzeel, Guni, Jezer, le Shillem ahi hi. (Hihte pen Laban in a tanu Rachel’ tungah a piak Bilhah in Jakob tawh a neih tapate hi a, a vekpi-in mi sagih ahi hi.) Egypt gamah a pai Jakob-a’ ahi ama suanlekhak, Jakob’ tate’ zite a kisim loin, a vekpi-in mi sawmguk le guk ahi hi. Josef in Egypt gamah a neih a tapate nih ahi hi. Egypt gamah a pai Jakob’ innkuan khempeuh sawmsagih ahi hi. Jakob in ama mai Goshen-ah amah lam a lak dingin Josef kiangah Judah ma sawl hi. Amaute Goshen gamah hong pai uh hi. Tua ciangin Josef in a leengte kithawisakin Goshen-ah a pa Israel a dawn dingin a paito hi. A pa a muh phetin ngawng kawi-in tawlkhat sung a kap hi. Israel in Josef kiangah, “Na maitang mu khinin nang na nuntak lai thei ka hih manin tu-in ka si zongin phamawh nawn lo hi,” a ci hi. Josef in a sanggamte le a pa’ innkuanpihte kiangah, “Kei paito-in Faro’ kiangah ka va gen ding a, ama tungah, ‘Kanaan gam a om ka sanggamte le ka pa’ innkuanpihte kei kiangah hong pai hi. Amaute pen tuucing ahih manin gan kemte ahi uh hi. Amaute in a tuuhonte uh le a bawnghonte uh le a neih khempeuh uh hong paipih uh hi,’ ka va ci ding hi. Faro in note hong samin note kiangah, ‘Na nasep uh bang ahi hiam?’ hong cih ciangin, Goshen leitangah na ten theih nadingun note in, ‘Kote hitaleh ka pate uh hitaleh ko na nasemte pen ka neu lai uh a kipan tuhun dongin gankemte ka hi uh hi,’ na ci ding uh hi. Bang hang hiam cih leh Egypt mite a dingin tuucing peuhmah a kihhuai ahi hi,” a ci hi. Tua ahih ciangin Josef pai-in Faro’ kiangah, “Ka pa le ka sanggamte a tuuhon uh le a bawnghon uh le a neih khempeuh uh tawh Kanaan gam panin hong pai uh a, amaute tu-in Goshen gamah om uh hi,” ci-in a gen hi. A sanggamte’ lak panin amah in mi nga la-in Faro’ kiangah va paipih hi. Faro in a sanggamte kiangah, “Na nasep uh bang ahi hiam?” a ci hi. Amaute in Faro’ kiangah, “Ka pate uh mah bangin na nasem kote pen gankemte ka hi uh hi,” a ci uh hi. Amaute in Faro kiangah, “Hih gamah tawlkhat a om dingin kong pai uh hi. Bang hang hiam cih leh Kanaan gamah kialpi nasia lua ahih manin tua lai-ah na nasemte’ tuuhonte a’ ding lonona om nawn lo hi. Tu-in kong thum uh hi. Goshen gamah na nasemte hong tengsak in,” a ci uh hi. Tua ciangin Faro in Josef kiangah, “Na pa le na sanggamte na kiangah hong tung khin hi. Egypt leitang khempeuh nangma thu ahi hi. Na pa le na sanggamte lei hoihna penah tengsak in. Goshen leitangah amaute tengsak in. Amaute’ lakah a hih thei mi na muh leh ka ganhingte a kem dingin koih in,” a ci hi. Tua ciangin Josef in a pa Jakob tumpihin Faro’ mai-ah koih a, Jakob in Faro thupha a pia hi. Faro in Jakob kiangah, “Na nuntak kum bangzah pha ta ahi hiam?” a ci hi. Jakob in Faro kiangah, “Tawlkhat sung ka nuntak hun pen kum za le kum sawmthum ahi hi. Ka nuntak hun tom sungah siatna bekbek om a, ka pate tawlkhat a omsung uh a nuntak hunte ban nai lo hi,” a ci hi. Jakob in Faro thupha pia-in tua lai panin a paikhia hi. Tua ciangin Faro’ thupiaksa bangin Josef in leitang a hoihpen, Rameses leitang, Egypt gam sungah neihsa pia-in a pa le a sanggamte a tengsak hi. Josef in a pa, a sanggamte, le a pa’ innkuante khempeuh a ne ding zah tawh kizui-in an a pia hi. Tu-in kialpi nasia mahmah ahih manin gam khempeuhah an om nawn lo a, kialpi hangin Egypt mite le Kanaan mite vulgawp uh hi. Amaute in antang a leina hangin, Egypt gam sung le Kanaan gam sunga sum khempeuh Josef in ngah khin hi. Josef in Faro’ inn-ah tua sumte paipih hi. Egypt gam sung le Kanaan gam sunga sum a bei khit ciangin Egypt mite khempeuh Josef kiangah hong pai-in, “Kote an hong pia in. Bang hangin na muhna-ah si ding ka hi uh hiam? Bang hang hiam cih leh ka sum uh beita hi,” a ci uh hi. Josef in dawngin, “Na ganhingte uh hong pia un. Na sum uh bei ahihleh na ganhingte uh khekna-in an kong pia ding hi,” a ci hi. Tua ahih ciangin amaute in Josef kiangah a ganhingte uh paipih uh hi. Josef in sakolte, tuuhonte, bawnghonte, le late a khekna-in amaute an a pia hi. A ganhingte uh khekna-in Josef in tua kum sung amaute an a pia hi. Tua kum a bei, a kum kik ciangin amaute Josef kiangah hong pai-in, “Ka sum uh a bei khitna ka topa uh tungah kong im kei ding uh hi. Ganhing honte ka topa a’ ahi hi. Ka pumpi uh le ka leitang uh cih simloh ka topa’ muhna-ah bangmah dang om nawn lo hi. Bang hangin kote si-in ka leitang uh nangma muhna-ah maimawk ding ahi hiam? Kote le ka leitang uh an tawh hong lei in. Kote, Faro’ sila ka hi ding uh a, ka leitang uh zong ama a’ hi ding hi. Leitang mawkval loin, kote si loin ka hin theih nadingun khaici hong pia in,” a ci uh hi. Tua ahih ciangin Josef in Egypt gam khempeuh Faro a dingin a lei hi. Kialpi nasia lua ahih manin Egypt mi khempeuh in a lote uh a zuak uh hi. Leitang khempeuh Faro-a’ suak khin hi. Mihingte ahihleh, Egypt mongkhat panin a mongkhat dongin amah in sila-in bawl hi. Siampite’ leitang bek amah in lei lo hi. Bang hang hiam cih leh siampite in Faro’ tung panin a kiciangtan zah an ngah uh a, amaute tungah Faro in a piak tawh amaute nungtazo uh ahih ciangin amaute in a leitang uh zuak lo uh hi. Tua ciangin Josef in mite kiangah, “En un, tuni-in note le na leitang uh Faro a dingin kong lei hi. Tu-in hih lai-ah no a dingin khaici om a, note in leitang tungah na vawh ding uh hi. Anlak ciangin Faro’ tungah nga-ah khat na pia ding uh a, nga-ah li pen lo-ah khaici ding, note le na innkuanpihte uh le na tate uh’ an dingin na tang ding uh hi,” a ci hi. Amaute in, “Nang in ka nuntakna uh nong honkhia khinzo hi. Ka topa uh lungdam hen; kote pen Faro’ sila ka hi ding uh hi,” a ci uh hi. Tua ahih ciangin Faro in nga-ah khat nei ding hi cihna, tuni donga a om, Egypt leitang tawh kisai-in Josef in ngeina kip khatin a bawl hi. Siampite’ leitang bek Faro-a’ suak lo hi. Tua ahih ciangin Egypt gam sung Goshen leitangah Israel-te teng uh hi. Tua lai-ah amaute in neihsa ngah uh a, pungin tampi tak pha uh hi. Egypt gamah Jakob kum sawm le sagih nungta lai ahih manin ama khan kum za le kum sawmli le sagih ahi hi. Israel a sih ding hun a nai ciangin, amah in a tapa Josef samin ama kiangah, “Tu-in na muhna-ah maipha ka ngah leh, ka phei nuai-ah na khut hong koih inla, thumantak le citakin kei nong bawl ding thu hong ciam in. Egypt-ah kei hong vui kei inla, ka pate tawh hong sial khawm in. Egypt panin kei hong puakhia in la, amau’ kivuina munah kei hong vui in,” a ci hi. Amah in dawngin, “Na gen bangin ka gamta ding hi,” a ci hi. Amah in, “Kei’ tungah hong kiciam in,” a ci hi. Amah zong a pa’ tungah a kiciam hi. Tua ciangin Israel lungdamin a lupna lukhungah amahmah a kunsuk hi. Tua zawh a sawt loin, “Na pa a ci na hi,” ci-in Josef kiangah kigen ahih ciangin amah in a tapa nihte Manasseh le Efraim a paipih hi. Jakob kiangah, “Na tapa Josef na kiangah hong pai hi,” ci-in kigen hi. Tua ciangin Israel in a tha sanin a lupna tungah a tu hi. Jakob in Josef kiangah, “Kanaan gam Luz-ah Vanglian Pasian kei tungah hong kilangin kei thupha hong pia a, kei kiangah, ‘En in, nang hong pungsakin, mihing hon khatin hong bawlin, nang’ khit cianga na suanlekhakte’ tungah a neih tawntung dingun hih leitang ka pia ding hi,’ hong ci hi. “Tu-in, Egypt-ah nang kiangah kong pai ma-in Egypt gam sungah nang’ sung panin a suak na tapa nihte keima-a’ ahi hi. Reuben le Simeon-te mah bangin Efraim le Manasseh zong keima a’ hi ding hi. Amaute’ khit cianga nang sung panin a suak tate pen nangma a’ hi ding hi. Amau’ gamh luahna-ah amau’ sanggamte’ min tawh amaute ki lo khawm ding hi. Bang hang hiam cih leh Paddan panin ka pai lai-in, Efrath tun ma diak, Kanaan gam lamkalah ka dah nadingin ka zi Rachel hong si hi. Efrath (Bethlehem) paina lampi-ah amah ka vui hi,” a ci hi. Israel in Josef’ tapate a muh ciangin amah in, “Hihte kua ahi hiam?” a ci hi. Josef in a pa’ kiangah, “Pasian in hih lai-ah kei hong piak ka tapate ahi hi,” a ci hi. Amah in, “Kong thum hi; amaute thupha ka piak theih nadingin ka kiangah hong paipih in,” a ci hi. Tu-in Israel’ mitte a khanghamna hangin maang a, amah in khua mu thei lo hi. Tua ahih ciangin Josef in ama kiangah amaute paipih hi. Amah in amaute namin a kawi hi. Israel in Josef kiangah, “Na maitang a hong mu kik dingin ka kingaihsun kei hi. Tua hi napi, Pasian in na tate zong kei hong musak hi,” a ci hi. Tua ciangin Josef in amaute a khuk panin lakhia-in amahmah lei lam nga-in a kun hi. Josef in amau tegel la-in, Efraim’ taklam khut, Israel’ veilam khutah, Manasseh’ veilam khut, Israel’ taklam khutah a paipih hi. Israel in a taklam khut zanin a nauzaw Efraim’ lu tungah nga a, Manasseh a ta upa ahih manin, a khut kipaihpehsakin Manasseh’ lu tungah a veilam khut a nga hi. Amah in Josef thupha pia-in, “Ka pate Abraham le Isaac in a na a sep Pasian, tuni dongin ka nuntak tawntung ah lam hong pi Pasian, siatna khempeuh panin kei hong tankhia vantungmi in hih tangvalte thupha pia hen la, amaute sungah keima min le ka pa Abraham le Isaac’ min kizomsak hen la, leitungah amaute mi honpi khatin khangsak ta hen!” a ci hi. A pa in a taklam khut Efraim’ lu tungah a koih Josef in a muh ciangin, tua in amah lungkim lo sak hi. Efraim’ lu panin Manasseh’ lu tungah koih dingin amah in a pa’ khut a la hi. Josef in a pa kiangah, “Hi lo hi, pa aw; hih pen a suak masa ahi hi. Na taklam khut ama lu tungah koih in,” a ci hi. Ahih hangin a pa in nial a, “Ka thei hi, ka ta aw; ka thei hi. Amah zong mi khat suak ding a, amah zong lian ding hi. Ahi zongin amah sangin a naupa lianzaw ding a, a suanlekhakte, minam lianpi khat suak ding hi,” a ci hi. Tua ahih ciangin amah in tua ni-in amaute thupha pia a, “Note, Israel sungah thupha na hi ding uh a, ‘Pasian in Efraim le Manasseh bangin note hong bawl hen,’ kici ding hi,” a ci hi. Tua bangin Jakob in Manasseh’ mai-ah Efraim a koih hi. Tua ciangin Israel in Josef kiangah, “En in, kei a si ding ka hi ta hi. Ahih hangin Pasian in nang hong ompih ding a, na pate’ leitangah nang hong paipih kik ding hi. Tua tham loin, ka namsau le ka thal tawh Amor mite’ khut tung panin ka lak mualpang khat, na sanggamte’ tung sangin nang’ tungah kong piazaw hi,” a ci hi. Tua ciangin Jakob in a tapate sam a, “A hong tung ding hunte-ah note’ tunga hong tung ding thu kong gen theih nadingin note hong kikhawm un. “Jakob’ tapate aw, hong kikhawmin za unla, na pa Israel’ thugen ngai un. “Reuben, nang pen ka ta upa, ka vangliatna le ka tacil na hi a, a kiphasak pen, a vanglian pen na hi hi. Tuihual bangin na kip kei ding a, na tungtuang kei ding hi. Bang hang hiam cih leh ka zi na luppih a, ka lupna na mindaisak hi. “Simeon le Levi, unau hi a, a hiam uh ngongtat nadingin a zang uh hi. Amau’ kikhopna-ah ka kihel kei ding a, amau’ pawl tawh ka kizom kei ding hi. Bang hang hiam cih leh a heh manun mi that uh a, kiphatsakna lungsim tawh amaute in mawlpih dingin bawngtalte’ zagui a sattat uh hi. Amau’ sinsona lauhuai a, amau’ hehna kihtakhuai hi. Samsiatna ngah ta uh hen! Jakob suante sungah amaute ka khenthang ding a, Israel sungah amaute ka thehthang ding hi. “Judah aw, na sanggamte in nang hong phat ding hi. Na galte’ gawl na meek ding a, na sanggamte na mai-ah hong kun ding uh hi. Judah pen humpinelkai tawh kibang a, a sa matsa a nek khit ciangin a kua-ah a ciahkik tawh kibang hi. Humpinelkai bangin kizia-in a lumsuk hi. Kua in amah phawng ngam ding hiam? Judah in kumpi ciangkhut len tawntung ding a, a suan a khakte in zong ukna aana nei tawntung ding hi. Minam dangte in ama tungah siah puak ding a, zahtakna tawh ama mai-ah kun ding uh hi. A sakolno leenggui-ah khih a, a lano leenggui limci penah khih hi. Amah in a puante leenggahzu sungah sawp a, a puansilhte leenggahtui san sungah a sawp hi. Leenggahzu a neknekna-in a mit san gega a, bawngnawi a neknekna-in a ha pak hi. “Zebulun, tuipi gei-ah teng ding hi. Amah, teembaw khawlna mun suak ding a, Sidon ciang dongah a gamgi om ding hi. “Issakhar, a hat la tawh kibang a, vangik nih kikalah a lum hi. A tawlngakna mun hoihsa a, a leitang noptuak sa hi. Tua ahih ciangin van pua dingin a liangko niamsak a, sila bangin na kisemsak hi. “Dan in Israel minam dangte mah bangin a mite thu khen ding hi. Dan pen lampi-ah gulpi hi ding a, sul gei-ah gulgu nei hi ding hi. Sakol’ khetul petin a tuang pa a nungkiat hi. “Nong hotkhiat ding ka ngak hi, Topa. “Gad pen a buluhte in buluh ding a, ahih hangin amah in amaute sulzuih kik ding hi. “Asher’ lo-ah an tampi piang ding a, amah in kumpi anlimte bawl ding hi. “Naftali, a kikhah sakhipi hi a, sakhino suakkhiasak hi. “Josef, a gah pha hiang ahi hi. Ciktui gei-a om a gah pha hiang hi a, a hiangte kulh tungah zaam hi. Thal tawite in nakpitakin amah simin, amah thal tawh kap uh a, nasia takin gimsak uh hi. Ahih hangin ama thal ling loin om a, a khutte kizaptelsak hi. Jakob’ Vanglian Pa’ khut (Israel Suangpi, Tuucingpa’ min), nang hong huh ding na pa’ Pasian in tunga om vantung thuphate, nuai-a tuithukna sunga om thuphate, khawilevulh le tuletate, nangma tungah hong pia hi. Na pa’ thuphate pen tawntung mual liante’ thupha, tawntung mual neute sangin vanglian zaw hi. Tua thuphate Josef’ lu tungah hong tung hen la, a sanggamte’ kiang panin a kituam koihpa’ tungah hong tung tahen. “Benjamin, a ne bakbak keivom hi a, zingsangin a sa matsa ne-in, nitakin a ngahsa teng hawm hi,” a ci hi. Hihte khempeuh pen Israel minam sawm le nihte ahi hi. Hih thute pen amau tawh a kituak ciatin a pa in amaute thupha pia-in a gente ahi hi. Tua lai munah amaute in Abraham le a zi Sarah vui uh hi. Tua lai munah amaute in Isaac le a zi Rebekah vui uh hi. Tua lai munah keimah in Leah ka vui hi. Lo le tua sunga om leihawm Hit mite’ tung panin a kilei ahi hi,” a ci hi. Jakob in a tapate thuhilh a man khit ciangin, a lupna tungah laitat a, a nunung pen a hu sang-in ama mipihte kiang a zuan ta hi. Tua ciangin Josef a pa’ tungah pukin, ama tungah kap a, amah a nam hi. A pa a muat loh nadingin a bawl dingin Josef in a nasem zatui siamte thu pia hi. Tua ahih ciangin zatui siamte in zatui tawh Israel a bawl uh hi. Zatui tawh bawlna nasep hun tampi kisam a, ni sawmli sung sep ding kisam hi. Egypt mite ama hangin ni sawmsagih sung a kap uh hi. Ama hangin kahna hun a bei ciangin Josef in Faro’ innkuante kiangah, “Tu-in note’ mai-ah maipha ka ngah leh Faro’ kiangah thu nong va gensak ding uh kong thum hi. Ka pa in kei hong kiciamsak a, ‘Kei a si ding ka hi ta hi. Kanaan leitangah kei a dingin ka khuatsa han sungah kei nong vui ding hi,’ hong ci hi. Tua ahih ciangin tu-in kei hong paitosak inla, ka pa hong vuisak in, ci-in kong thum hi. Tua ciangin kei kong ciahkik ding hi, ci hi, va cihsak un,” a ci hi. Faro in dawngin, “Paito inla, nang hong kiciamsak bangin na pa va vui in,” a ci hi. Tua ahih ciangin a pa a vui dingin Josef paito hi. Amah tawh Faro’ nasemte khempeuh, a innsung upate, Egypt gam upate khempeuh zong, Josef’ innkuante khempeuh, a sanggamte, a pa’ innkuante bangmahin paito uh hi. A tate uh, a tuuhonte uh le a ganhing honte bek uh Goshen gamah kinusia hi. Tua lai munah amah tawh leengte le sakol tuangte zong paikhawm to uh hi. Tua lai-a paite tam mahmah hi. Amaute Jordan gun galkhat, Atad’ buhcilna phual a tun uh ciangin, nakpitakin dahna tawh a thuum uh hi. Amah in a pa’ hangin ni sagih sung dahna hun a bawl hi. Tua gam a teng Kanaan mite in, Atad’ buhcilna-ah tua banga kahna a muh ciangin amaute in, “Hih pen Egypt mite a dingin a nasia mahmah thuumna ahi hi,” a ci uh hi. Tua ahih ciangin tua mun pen Abelmizraim, kici hi. Tua mun pen Jordan gun galkhat ahi hi. Tua ahih ciangin amah in amaute a thupiak bangin ama tapate in ama a dingin bawlsak uh hi. Bang hang hiam cih leh ama tapate in Kanaan gamah amah pua-in, kivui nading mun a neih dingin Abraham in Hit mi Efron’ tung panin a lo tawh a leikhop, Mamre nisuahna lamah a om, Makpelah mun lo sunga leihawm sungah a vui uh hi. Josef in a pa a vui khit ciangin, a sanggamte le a pa a vui dingin amah a zui khempeuhte tawh Egypt-ah a ciahkik hi. Josef’ sanggamte in a pa uh a sih khit ciangin, “Josef in eite hong mudahin ama tunga siatna i bawl khempeuh hong thukkik kha ding hi,” ci uh hi. Tua ahih ciangin amaute in Josef kiangah thu puak uh a, “I pa in a sih ma-in thu hong pia a, ‘Josef kiangah hih bangin ci un: Na sanggamte’ thupalsatna le a khialhna na maisak in, kong thum hi. Bang hang hiam cih leh nang’ tungah amaute in siatna hong bawl uh hi,’ ci hi. Tua ahih ciangin tu-in nang’ tungah kong thum uh hi. I pa’ Pasian’ nasemte’ thupalsatna hong maisak in,” a ci uh hi. Amaute in ama kiangah tua bangin thu a gen ciangun Josef a kap hi. A sanggamte zong pai-in ama mai-ah puk uh a, “En in, kote, nangma nasemte ka hi uh hi,” a ci uh hi. Ahih hangin Josef in amaute kiangah, “Lau kei un. Kei, Pasian’ za-ah om ka hi hiam? Note in ahihleh, kei’ tungah a sia dingin na ngaihsun uh hi. Ahih hangin Pasian in tuhuna mah bangin mi tampite a nuntak theihna a pian nadingin a hoih dingin a ngaihsut ahi hi. Tua ahih ciangin lau kei un. Note le na tate uh a dingin an kong pia ding hi,” a ci hi. Amah in tua bangin kip gen pha kikin amaute a hehnem hi. Tua ahih ciangin Josef, amah le a pa’ innkuante tawh Egypt-ah teng uh a, Josef kum za le kum sawm nungta hi. Josef in khang thumna ahi Efraim’ tate mu hi. Manasseh’ tapa Makhir’ tate zong Josef’ innsung mahah suak uh hi. Josef in a sanggamte kiangah, “Kei a si ding ka hi ta hi. Ahih hangin Pasian in note hong kem ding a, hih leitang panin amah in Abraham, Isaac, le Jakob tunga a ciamsa leitangah note hong paikhiatpih to ding hi,” a ci hi. Tua ciangin Josef in Israel tapate’ kiciamna bawlin, “Pasian in note hong kem ding a, note in hih lai panin ka guhte na pua to ding uh hi,” a ci hi. Tua ahih ciangin kum za le kum sawm a pha-in Josef a si hi. Amaute in a muat loh nadingin zatui tawh amah bawl uh a, Egypt-ah hankuang sung khatah amah kikoih hi. Jakob tawh Egypt-ah a hong pai, amau’ innkuan ciat tawh ahi Israel’ tapate’ minte: Reuben, Simeon, Levi, le Judah, Issakhar, Zebulun, le Benjamin, Dan le Naftali, Gad le Asher ahi hi. Jakob’ suanlekhakte khempeuh mi sawmsagih hi a, Josef pen Egypt-ah na om khinzo hi. Tua ciangin Josef le a sanggamte le tua khangmi khempeuh si uh hi. Ahih hangin Israel’ suanlekhakte pungin nakpitakin khang uh hi. Amaute tampi pha-in nakpitakin khang uh ahih manin Egypt gamah dim uh hi. Tu-in Josef a thei lo kumpi thak khat Egypt gamah hong khang hi. Amah in a mipihte kiangah, “En un, Israel mite eite a dingin tam lua-in thahat lua uh hi. Amaute hong tam kha ding uh ahih manin ngaihsut siamna tawh amaute hih ni. Eite tungah gal hong om leh amaute in i galte pawlin eite hong do-in hih gam panin taikhia kha ding uh hi,” a ci hi. Tua ahih ciangin nasepna tawh amaute a gimsak dingin amaute tungah nasem ukte koih uh hi. Israel mite in Faro a dingin van koihna Pithom le Rameses khuapite lam uh hi. Ahih hangin amaute a kinenniam ciangin amaute tampi phazaw-in kizelthang zaw uh hi. Egypt mite in Israel mite kihta uh hi. Tua ahih ciangin amaute in Israel mite a gim mahmahin na semsak uh a, buan le leiseek tawh nasepna le lo sungah nasep namkim khempeuh tawh amau’ nuntakna haksasak uh hi. Israel mite’ sepna khempeuhah amaute in a gim mahmahin semsak uh hi. Tua ciangin Egypt kumpipa in Hebru mi nau a domsakte, khat’ min Shifrah, adang khat’ min Puah a kicite kiangah, “Hebru numeite nau domin, nausuahna tutphah tungah a tut ciangun, tapa ahihleh a naungek na that ding uh a, ahi zongin tanu ahih leh na nungtasak ding uh hi,” a ci hi. Ahih hangin naudomte in Pasian zahtak uh hi. Egypt kumpipa in amaute a thupiak bangin gamta lo uh a, nau pasalte nungtasak uh hi. Tua ahih ciangin Egypt kumpipa in naudomte samin amaute kiangah, “Bang hangin hih bangin gamta a, nau pasalte nungtasak na hi uh hiam?” a ci hi. Naudomte in Faro’ kiangah, “Hebru numeite le Egypt numeite a kibatlohna hang ahi hi. Bang hang hiam cih leh amaute thadim uh a, amau’ kiangah naudomte a tun ma-in amaute na suak khin pahpah uh hi,” na ci uh hi. Tua ahih ciangin Pasian in naudomte limbawl hi. Mite khangin pawlcing semsem uh hi. Naudomte in Pasian zahtak uh ahih manin amah in amaute tungah suanlekhak a pia hi. Tua ciangin Faro in a mipihte khempeuh thu pia a, “Hebru mite sung panin tapa a suak khempeuh Nail gun sungah na khia ding uh a, ahi zongin tanu khempeuh na nungtasak ding uh hi,” a ci hi. Tu-in Levi’ suante khat in Levi numei khat mah zi-in la hi. Tua numei gai-in tapa khat nei a, nau hoih khat hi, ci-in a muh ciangin, kha thum sung a seel hi. Amah in naungek a seel zawh nawn loh ciangin ama a dingin pumpeeng tawh kibawl lawh khat phansak a, tua lawh pen buan le kultal tui tawh a zut hi. Tua sungah naungek sialin gun gei-a phaikungte lakah a koih hi. Amah bang a kicih hiam cih a thei dingin a gamla panin mun khatah a sanggamnu a ding hi. Tu-in Faro’ tanu a kisil dingin gun-ah hong pai a, a nasem numeite gun gei-ah a vak lai takun amah in phaikungte lakah a lawh mu a, tua lawh a la dingin a nasem numei khat a sawl hi. Amah in a hon ciangin naungek mu hi. Naungek kap ahih manin tua nu in hehpihhuai sa a, “Hih naungek, Hebru mite’ ta khat ahi hi,” a ci hi. Tua ciangin a sanggamnu in Faro tanu kiangah, “Keimah pai-in Hebru numeite lak panin nang a dingin naupang hong khoisak dingin naucing khat ka va sapsak ding hiam?” a ci hi. Faro’ tanu in ama kiangah, “Va pai in,” a ci hi. Tua ahih ciangin numeino pai-in naupang’ nu va sam hi. Faro’ tanu in ama kiangah, “Hih naupang la inla, kei a dingin hong khoisak in; na thaman kong pia ding hi,” a ci hi. Tua ahih ciangin nupi in naupang la-in a khoi hi. Naupang khang a, amah in Faro tanu’ kiangah paipih a, amah pen tua nu’ tapa a suak hi. Amah in a min Moses a phuak hi. Bang hang hiam cih leh amah in, “Tui sung panin amah ka kai khia hi,” a ci hi. Ni khat, Moses a khan khit ciangin, ama mipihte kiangah pai-in amau’ gimnate va mu hi. Egypt mi khat in ama mipih Hebru mi khat a sat zong a mu hi. Amah khuadak kawikawi a, kuamah mu lo ahih manin Egypt mipa thatin sehnel sungah a seel hi. A zing ciangin amah paikik a, Hebru mi nih na kilai uh hi. Amah in a gamta khial mipa kiangah, “Bang hangin na lawm sat na hi hiam?” a ci hi. Amah in dawngin, “Kote’ tungah ulian ding le thukhen dingin kua in nang hong koih ahi hiam? Egypt mipa na thah bangin kei thah ding hong sawm na hi hiam?” a ci hi. Tua ciangin Moses lau a, “A thu hong kithei taktak hi,” ci-in ngaihsun hi. Faro in tua thu a zak ciangin Moses thah dingin a zong hi. Ahih hangin Faro kiang panin Moses tai-in Midian gam a tung hi. Ni khat amah tuikhuk gei khatah tu hi. Tua laitakin Midian siampi Jethro in tanu sagih nei hi. Amaute hong pai-in tui tawi uh a, a pa uh’ tuuhonte tui pia dingin kuangzawn dim uh hi. Tuucing dangte hong pai-in amaute hawlkhia hi. Ahih hangin Moses dingto-in amaute huh a, a tuuhonte uh tui piaksak hi. A pa uh kiangah amaute a tun ciangun amah in, “A bangci-a tuni-a hong hici ciah baih na hi uh hiam?” a ci hi. Amaute in, “Egypt mi khat in tuucing dangte’ khutsung panin kote hong honkhia a, ko a dingin tui nangawn hong tawisakin tuuhonte tui pia hi,” ci uh hi. Amah in a tanute kiangah, “Amah koi lai-ah om ahi hiam? Bang hangin tua mipa nusia na hi uh hiam? Amah in an hong nek theih nadingin va sam un,” a ci hi. Moses zong tua mipa kiangah om ding lungkim a, amah in Moses tungah a tanu Zipporah a pia hi. Tua nu in tapa khat nei a, amah in a min Gershom a phuak hi. Bang hang hiam cih leh amah in, “Gam dangah peemta ka hi hi,” a ci hi. Tua zawh kum tampi khit ciangin Egypt kumpipa si hi. Israel mite a salsuahna sung uhah amau’ kikona Pasian kiang tung hi. Pasian in amau’ thumna za hi. Pasian in Abraham, Isaac, le Jakob tawh a thuciamna a phawk hi. Pasian in Israel mite mu a, amaute’ omzia zong a thei hi. Tu-in Moses in Midian siampi ahi, a sungpa Jethro’ tuuhon kem hi. Amah in gamlak nisuahna lamah a tuuhon paipih a, Pasian’ mual ahi Horeb a tung hi. Topa’ vantungmi sawlpang kawm, meikuang sung panin ama tungah hong kilang hi. Amah khuadak a, sawlpang a kuang a mu hi. Ahi zongin kangtum lo hi. Moses in, “Bang hangin sawlpang kangtum lo hiam, kei pai-in hih a lamdang ka muh va en dih ning,” ci hi. Tua thu a thei dingin amah a paina Topa in a muh ciangin, sawlpang kawm panin Pasian in amah sam a, “Moses, Moses!” a ci hi. Amah in, “Hiah om ing,” ci hi. Tua ciangin amah in, “A nai-ah hong pai kei in. Na khe panin na khedapte suahkhia in. Bang hang hiam cih leh nangma dinna mun, leitang siangtho ahi hi,” a ci hi. Tua ciangin amah in, “Kei pen na pa’ Pasian, Abraham’ Pasian, Isaac’ Pasian, le Jakob’ Pasian ka hi hi,” a ci hi. Tua ciangin Moses in Pasian a muh ding lau ahih manin a maitang a hum hi. Tua ciangin Topa in, “Egypt-ah a om ka mite’ gimna mu khinin, amaute a uk nasem ukte’ hangin amau’ kikona ka za khin hi. Amau’ thuaknate ka thei a, Egypt mite’ khutsung panin amaute khahkhia-in, tua leitang panin amaute la khia-in a hoih a tanzau leitang, bawngnawi le khuaizu a luanna leitang, Kanaan mite, Hit mite, Amor mite, Perez mite, Hiv mite, le Jebus mite’ omna-ah amaute a paipih dingin kong paisuk hi. Tu-in, en in, Israel mite’ kikona kei kiang hong tung khin a, Egypt mite in amaute a netniamna ka mu khin hi. Hong pai in, nang in Egypt panin ka mi Israel-te na paikhiatpih theih nadingin Faro’ kiangah nang kong sawl ding hi,” a ci hi. Ahih hangin Moses in Pasian kiangah, “Faro’ kiangah pai-in Egypt panin Israel mite a paikhiatpih dingin kei, kua ka hi hiam?” ci hi. Amah in, “Nang tawh kong om taktak ding hi. Hih pen nangma a dingin nangmah kong sawlna lim hi ding hi: Nangmah in Egypt panin mihingte na paikhiatpih khit ciangin, nang in hih mualtungah Pasian na bia ding hi,” a ci hi. Tua ciangin Moses in Pasian kiangah, “Israel mite kiangah kei va pai-in amaute kiangah, ‘Na pate uh’ Pasian in note’ kiangah kei hong sawl hi,’ va ci leng, amaute in, ‘Ama min bang ahi hiam?’ ci-in hong dong leh, amaute’ tungah bang ci ding ka hi hiam?” a ci hi. Pasian in Moses kiangah, “ Keimah ka hi hi,” ci hi. Tua ciangin Pasian in, “Israel mite tungah hih thu genin, ‘ Keimah a kici pa in note kiangah kei hong sawl hi,’ ci in,” a ci hi. Pasian in Moses kiangah, “Hih thu Israel mite tungah gen in: ‘ Topa, na pate uh’ Pasian, Abraham’ Pasian, Isaac’ Pasian, le Jakob’ Pasian in note kiangah kei hong sawl hi,’ ci in. Hih pen keima min hi tawntung ahih manin kei pen khang tawntungin phawk ding ka hi hi. Pai in, Israel upate kaikhawmin amaute kiangah, ‘ Topa, na pate uh’ Pasian, Abraham, Isaac, le Jakob’ Pasian keima tungah hong kilang khinin, “Note le Egypt gam sungah note’ tungah hong kibawlna ka mu khin hi. Egypt gam panin note hong lakhia-in Kanaan mite, Hit mite, Amor mite, Perez mite, Hiv mite, le Jebus mite’ leitang, bawngnawi le khuaizu a luanna leitangah note kong paipih ding ka kiciam hi,” ci hi,’ va ci in. “Amaute in nangma thu hong ngai ding uh hi. Nang le Israel upate, Egypt kumpipa kiangah pai-in ama tungah, ‘ Topa ahi Hebru mite’ Pasian, kote’ kiangah hong kilangzo hi. Tu-in kong thum uh hi, Topa ka Pasian uh’ tungah biakna ka piak theih nadingun ni thum paina gamlakah kote hong paisak in,’ va ci un. Thatanghat thu tawh a kisawlgawp kei buang leh Egypt kumpipa in note hong paisak loh ding zong ka thei hi. Tua ahih ciangin keimah in ka khut zanin na lamdangte tawh Egypt ka vatgawp ding hi. “Keimah in Egypt mite’ muhna-ah hih mihingte maipha ka pia ding hi. Note na paikhiat uh ciangin, a hawm guakin na pai kei ding uh hi. Numei peuhmah in a vengte le ama inn sunga ompak mite’ kiang panin ngun le kham tawh kibawl kizepnate leh puante ngen ding uh a, na tapate uh le na tanute uh tungah tuate na koih ding uh hi. Tua bangin note in Egypt mite’ na na sut ding uh hi,” a ci hi. Tua ciangin Moses in dawngin, “Ahih hangin amaute in kei hong um loin ka thu hong ngai lo ding uh hi. Bang hang hiam cih leh amaute in, ‘Nang tungah Topa hong kilang lo hi,’ hong ci ding uh hi,” a ci hi. Topa in ama kiangah, “Na khut sungah bang om ahi hiam?” a ci hi. Amah in, “Ciangkhut,” ci hi. Tua ciangin amah in, “Lei-ah lawn in,” a ci hi. Tua ahih ciangin amah in leilakah lawn a, gulpi khat a suak hi. Tua gulpi kiang panin Moses tai hi. Ahih hangin Topa in Moses kiangah, “Na khut zan inla a mei-in man in,” ci hi. Tua ahih ciangin amah in a khut zanin man a, ama khut sungah ciangkhut a suakkik hi. Tua ciangin amah in, “Amaute in a up theih nadingun Topa, amaute’ Pasian, Abraham’ Pasian, Isaac’ Pasian, le Jakob’ Pasian, nang’ tungah hong kilang khinzo hi,” a ci hi. Tua ciangin Topa in ama kiangah, “Na khut, na ang sungah koih in,” ci kik hi. Amah in a khut a ang sungah koih hi. Amah in a lak khiat kik ciangin, a khut phak a, vuk bangin a pak hi. Tua ciangin Pasian in, “Na khut na ang sungah koih kik in,” ci hi. Tua ahih ciangin amah in a khut a ang sungah koih kik hi. Amah in a lak khiat kik ciangin ama cilesa dangte mah bangin dam kik hi. Pasian in, “Amaute in nang hong up kei a, lim masa a thudon kei uhleh zong, amaute in lim nunung um kha ding uh hi. Amaute in hih lim nihte nangawn um loin na thu hong thudon kei le, nangmah in Nail gun panin tui pawlkhat la-in lei keu tungah na sung ding a, Nail gun panin na lak tui pen lei keu tungah sisan suak ding hi,” a ci hi. Ahih hangin Moses in Topa kiangah, “Oh, ka Topa aw, tumasiah hitaleh na nasempa tungah thu na gen a kipan hitaleh, kei thugen a siam ka hi kei hi. Ka kam pau ol-in, ka pau awk hi,” a ci hi. Tua ciangin Topa in ama kiangah, “Kua in mipa’ kam bawl ahi hiam? Kua in amah pau thei losak, bilngongsak, musak, mittawsak ahi hiam? Topa ahi keimah hi lo ka hi hiam? Tua ahih ciangin tu-in pai in. Keimah in na thugenna-ah kong huh ding a, na thugen ding nang kong hilh ding hi,” a ci hi. Ahih hangin amah in, “Oh, ka Topa aw, hong thum ing; midang khat sawl zaw in,” a ci hi. Tua ciangin Moses tungah Topa heh a, amah in, “Levi mi na sanggampa Aaron om hi lo ahi hiam? Amah in hoihtakin thu a gen theihna ka cian theih hi. En in, nangmah a dawn dingin amah hong paikhia a, amah in nang hong muh ciangin a lungsim sungah amah kipak ding hi. Nangmah in ama kiangah thu na gen ding a, thute amah na theisak ding hi. Keimah in na thugenna uhah kong huh ding a, na hih ding uh kong hilh ding hi. Amah in nang’ tangin mite tungah thu gen ding hi. Amah in nang a dingin thu hong gensak ding a, nang in Pasian bangin na gen ding teng amah na sawl ding hi. Nangmah in limte na bawl nading ahi hih ciangkhut na khut sungah na tawi ding hi,” a ci hi. Tua ciangin a sungpa Jethro’ kiangah Moses pai-in ama kiangah, “Hong thum ing; Egypt-ah ka sanggamte kiangah kei hong ciahkiksakin amaute a nungta lai uh hiam hong musak in,” a ci hi. Jethro in Moses kiangah, “Cidam takin va ciahkik in,” a ci hi. Midian gam sungah Topa in Moses kiangah, “Egypt-ah ciahkik in. Bang hang hiam cih leh nang a hong that nuam mi khempeuh si khinta uh hi,” a ci hi. Tua ahih ciangin Moses in a zi le a tapate la a, la khat tungah amaute tuangsakin, Egypt gamah ciah kik hi. Pasian in a tawi dingin a gen ciangkhut, Moses in ama khut sungah a tawi hi. Topa in Moses kiangah, “Egypt-ah na ciahkik ciangin, nangma hih theih dingin vangliatna kong piaksa na lamdangte khempeuh Faro’ mai-ah na hih ding thei in. Ahih hangin keimah in ama lungsim ka khauhsak ding a, amah in mite paisak lo ding hi. Nangmah in Faro’ kiangah, ‘ Topa in hih bangin ci hi: Israel pen ka tapa a suak masa hi a, nangma kiangah, “Amah in kei hong biak theih nadingin ka tapa paisak in,” kong ci hi. Amah paisak ding na nial leh, en in, na tapa a suak masa ka that ding hi, ci hi,’ ci in,” a ci hi. Lampi-ah a giahna khatah Topa in Moses dawntuahin thah a sawm hi. Tua ciangin Zipporah in meisuang khat la-in a tapa’ vun dawn at khiatsak a, tua tawh Moses lawngin, “Nang pen kei’ tungah sisan tawh ka pasal na hi taktak hi!” a ci hi. Tua ahih ciangin Topa in Moses that lo hi. Tua ciangin tua nu in, vun atna hangin “Sisan tawh ka pasal na hi hi,” a ci hi. Tua laitakin Topa in Aaron kiangah, “Moses a dawn dingin sehnel gamah pai in,” ci hi. Tua ahih ciangin amah pai-in, Pasian’ mualah Moses dawnin a nam hi. Topa in amah a sawlna thute khempeuh le ama sep dinga a sawl limte khempeuh Moses in Aaron’ tungah a gen hi. Tua ciangin Moses le Aaron pai-in Israel upate khempeuh a kaikhawm uh hi. Topa in Moses kianga a gensa thute khempeuh Aaron in gen a, Moses in mite’ muhna-ah na lamdangte a lak hi. Mite in um uh hi. Israel mite kiangah Topa hawhin, amau’ thuaknate amah in a muh khitna thu amaute in a zak uh ciangin, amaute in a lu uh kunin Pasian a bia uh hi. Tua khit ciangin Faro’ kiangah Moses le Aaron pai-in, “Israel Pasian Topa in hih bangin ci hi: ‘Amaute in sehnel gamah kei a dingin pawi khat a kham theih nadingun ka mite paisak in,’ ci hi,” a ci uh hi. Ahih hangin Faro in, “Ama thu mangin Israel mite ka paisakna dingin Topa na cih uh kua ahi hiam? Topa na cih uh ka thei kei hi. Tua tham loin Israel-te ka paisak kei ding hi,” a ci hi. Tua ciangin amaute in, “Hebru-te’ Pasian ko kiangah hong kilangzo hi. Hong thum ung; amah in natna ahih kei leh namsau tawh kote hong hihkha ding ahih manin, ni thum paina sehnel gamah kote hong paisakin, Topa ka Pasian uh’ tungah biakna hong piasak in,” a ci uh hi. Ahih hangin Egypt kumpipa in amaute kiangah, “Moses le Aaron aw, bang hangin amau’ nasepna panin mite paikhiasak ding na hi uh hiam? Na nasepnate uhah pai un,” a ci hi. Tua ciangin Faro in, “En un, tu-in hih mite tam mahmah a, amau’ nasepnate panin amaute na tawlngasak uh hi,” ci lai hi. Tua ni mahin Faro in nasem ukte le a nasem mapite thu pia a, “Tumasiah-a bangin, leiseek bawl nadingin mite tungah buhtu na pia nawn kei ding uh hi. Amaute paisak unla, amau mah buhtu khawmsak tawm un. Ahih hangin tumasiah-a a leiseek bawlzah mah uh amaute na bawlsak ding uh hi. Bangbang hitaleh na khiam kei ding uh hi. Bang hang hiam cih leh amaute thadah uh hi. Tua ahih manin amaute kiko-in, ‘Kote hong paisakin ka Pasian uh tungah biakna hong piasak un’ ci uh hi. Amaute in na semin zuau thute a don loh nadingin mihingte tungah nasep haksa zaw suan un,” a ci hi. Tua ahih ciangin nasem ukte le nasem mapite paikhia-in mite tungah, “Faro in hih bangin ci hi: ‘Note buhtu kong pia kei ding hi. Note pai unla, na muhna peuhpeuh uhah na buhtu ding uh va zong tawm un. Ahih hangin na nasep ngeizah uh themkhat zong hong kikhiam lo ding hi,’ ci hi,” a ci uh hi. Tua ahih ciangin a buhtu dingun buhkung a kaikhawm dingin Egypt gam khempeuhah mite kikhenthang uh hi. Nasem ukte in kin ngaihsut uh a, “Buhtu hong kipiak hun mah bangin na nisim nasep zah uh zo un,” ci uh hi. Israel mi nasem mapi, Faro’ nasem ukte in amaute a uk dingin a koih sawn mite kisatin, “Bang hangin tu ciang dong, leiseek bawl ding na nasep khempeuh uh hih khin nai lo na hi uh hiam?” ci-in kidong hi. Tua ciangin Israel mi nasem mapite hong pai-in Faro’ kiangah, “Bang hangin na nasemte hih bangin hong bawl na hi hiam? Na nasemte tungah buhtu hong kipia lo hi. Ahi zongin amaute in ko tungah, ‘Leiseek bawl un!’ hong ci hi. En in, na nasem kote hong kisat hi. Hih thu-ah nangma mite khialzaw hi,” a ci uh hi. Ahih hangin amah in, “Note na thadah uh hi, note na thadah uh hi. Tua ahih ciangin note in, ‘Hong paisak unla, Topa’ tungah biakna hong piasak un,’ na ci uh hi. Tu-in pai unla na sem un. Bang hang hiam cih leh note buhtu hong kipia lo ding a, ahi zongin leiseek a mal ngeina zah mah na piakhia ding uh hi,” a ci hi. Amaute in, “Bangbang hitaleh nisimin leiseek na seek zah uh khiam lo ding,” a cih ciangin, amaute thu haksapi sungah om ahihlam uh Israel mi nasem mapite in mu uh hi. Amaute Faro kiang panin a paikhiat ciangun, amaute a na ngak Moses le Aaron tawh kituak uh hi. Amaute in, “ Topa in note hong enin thu hong khen hen. Bang hang hiam cih leh Faro le a nasemte’ muhna-ah kote a khial nong suaksak uh a, kote hong kithah theih nadingin thu a zong na hi uh hi,” a ci uh hi. Tua ciangin Topa’ lamah Moses kihei kikin, “ Topa aw, bang hangin nangmah in hih mite tungah siatna bawl na hi hiam? Bang hangin kei hong sawl peuhmah na hi hiam? Bang hang hiam cih leh nangma min suangin Faro’ kiangah thugen dingin ka pai khit a kipan, amah in hih mite tungah siatna bawl napi-in nangmah in na mite na honkhia het kei hi,” a ci hi. Ahih hangin Topa in Moses kiangah, “Tu-in Faro’ tungah ka bawl ding na mu ding hi. Bang hang hiam cih leh amah in ut lopipi-in amaute sawlkhia ding hi. Amah in ut lopipi-in ama leitang panin amaute hawlkhia taktak ding hi,” a ci hi. Pasian in Moses kiangah, “Kei pen Topa ka hi hi. Abraham, Isaac, le Jakob-te’ tungah Vanglian Pasian-in ka kilang a, ahih hangin Topa ahi keima min tawh amaute’ tungah kei ka kitheisak kei hi. Amaute tawlkhat sung a tenna leitang ahi Kanaan gam amaute’ tungah piak dingin amaute tawh ka thuciamna zong ka kipsak hi. Tua tham loin Egypt mite in salin a neih Israel mite’ thumna ka zazo a, ka thuciamna ka phawkzo hi. Tua ahih ciangin Israel mite’ tungah, ‘Kei pen Topa ka hi hi. Egypt mite’ na na sepna uh panin note kong paikhiatpih ding hi. Amau’ sal hihna panin note kong khahkhia ding a, a thahat ka khut zanin thukhenna nasep lian tawh note kong honkhia ding hi. Keima mi dingin note kong la ding a, kei pen note’ Pasian ka hi ding hi. Egypt mite’ sila hihna panin note a hong paikhiatpih pa, Topa na Pasian uh ka hihna note in na thei ding uh hi. Abraham, Isaac, le Jakob-te’ tunga ka ciam leitangah note kong paipih ding hi. Tua leitang na neih dingun note’ tungah kong pia ding hi. Kei pen Topa ka hi hi, ci hi,’ ci in,” a ci hi. Moses in tua bangmahin Israel mite tungah a gen hi. Ahih hangin amau’ lungsim kitapna le a salsuahna sung uhah a gimna uh hangin amaute in Moses’ thu ngai lo uh hi. Tua ciangin Topa in Moses kiangah, “Pai-in va tum inla, ama leitang panin Israel mite a paikhiatsak nading Egypt kumpipa Faro’ kiangah va gen in,” a ci hi. Ahih hangin Moses in Topa kiangah, “En in, Israel mite nangawn in ka thu hong ngai lo uh hi. Tua ahih ciangin bangci-in thugen siam lo keima thu, Faro in hong ngai ding ahi hiam?” a ci hi. Ahih hangin Topa in Moses le Aaron tungah thu gen a, Egypt gam panin Israel mite a paikhiatpih dingin note ka hong sawlna thu, Israel mite le Egypt kumpipa Faro’ tungah va gen un, ci-in a hanthawn hi. Hihte pen amau’ beh lutangte ahi hi: Israel’ ta a suak masa Reuben’ tapate: Hanok, Pallu, Hezron, le Karmi ahi hi. Hihte pen Reuben-te beh ahi hi. Simeon’ tapate: Jemuel, Jamin, Ohad, Jakhin, Zohar, le Kanaan numei’ tapa Shaul ahi hi. Hihte pen Simeon-te beh ahi hi. Hihte pen amau’ khang tawh kizui-in Levi’ tapate’ min ahi hi: Gershon, Kohath, le Merari hi a, Levi kum za le kum sawmthum le sagih nungta hi. Gershon’ tapate: Amau’ innkuan tawh kizui-in Libni le Shimei ahi hi. Kohath’ tapate: Amram, Izhar, Hebron, le Uzziel hi a, Kohath kum za le kum sawmthum le thum nungta hi. Merari’ tapate: Mahli le Mushi ahi hi. Hihte pen amau’ khang tawh kizui-in Levi-te beh ahi hi. Amram in ama pa’ sanggamnu Jokhebed zi-in la a, tua nu in amah tawh Aaron le Moses nei hi. Amram kum za le kum sawmthum le sagih nungta hi. Izhar’ tapate: Korah, Nefeg, le Zikri ahi hi. Uzziel’ tapate: Mishael, Elzafan, le Sithri ahi hi. Aaron in Amminadab’ tanu, Nahshon’ sanggamnu Elisheba zi-in la hi. Tua nu in amah tawh Nadab, Abihu, Eleazar, le Ithamar nei hi. Korah’ tapate: Assir, Elkanah, le Abiasaf hi a, hihte pen Korah-te beh ahi hi. Aaron’ tapa Eleazer in Putiel’ tanute khat zi-in la hi. Tua nu in amah tawh Finehas nei hi. Hihte pen a innkuan kuanin Levi mite’ beh lutangte ahi hi. “Egypt gam panin Israel mite a honpi-in paikhiatpih in,” Topa in a cihna mite pen hih Aaron le Moses ahi uh hi. Egypt gam panin Israel mite paikhiatpih nading thu Egypt kumpipa Faro’ tunga thu a gente pen hih Moses le Aaron ahi uh hi. Egypt gamah Moses kiangah Topa in thu a gen ni-in, Topa in Moses kiangah, “Kei pen Topa ka hi hi. Na tunga kong gen khempeuh Egypt kumpipa Faro’ tungah gen in,” a ci hi. Ahih hangin Moses in Topa kiangah, “En in, kei pen thugen a siam lo mi ka hi hi. Tua ahih ciangin bangci-in Faro in ka thu hong ngai ding ahi hiam?” a ci hi. Topa in Moses kiangah, “Thei in, Faro’ tungah Pasian bangin nang kong bawl hi. Na sanggampa Aaron pen na kamsangpa hi ding hi. Nang kong thupiak khempeuh na gen ding hi. Ama leitang panin Israel mite a paikhiatsak nadingin Faro’ tungah na sanggampa Aaron in gen ding hi. Ahih hangin keimah in Faro’ lungsim ka khauhsak ding a, Egypt gamah ka limte le ka na lamdangte tampi ka bawl khit hangin Faro in nang’ thu hong ngai lo ding hi. Tua ciangin keimah in Egypt tungah gimna ka tungsak ding a, thukhen nasepna lianpite tawh Egypt gam panin Israel mi ahi ka mihonte ka paikhiatpih ding hi. Keimah in Egypt tungah gimna tungsakin amaute’ lak panin Israel mite ka paikhiatpih ciangin Egypt mite in Topa ka hihna hong thei ding uh hi,” a ci hi. Moses le Aaron zong Topa’ sawl bangmahin gamta uh a, Topa in amaute a thupiak bangin amaute in sem uh hi. Tu-in amaute in Faro’ tungah thu a gen laitakun Moses kum sawmgiat pha a, Aaron kum sawmgiat le thum a pha hi. Topa in Moses le Aaron’ kiangah, “Faro in note kiangah, ‘Note a thutak na hihna uh nalamdang khat tawh hong lak un,’ hong cih ciangin nangmah in Aaron kiangah, ‘Gulpi khat a suah theih nadingin na ciangkhut la inla, Faro’ mai-ah khia suk in,’ ci in,” a ci hi. Tua ahih ciangin Faro’ kiangah Moses le Aaron pai-in Topa’ thupiak bangin gamta uh hi. Aaron in Faro le a uliante’ mai-ah a ciangkhut lawn suk a, gulpi khat a suak hi. Tua ciangin Faro in a mipilte le a aisan siamte a sam hi. Egypt mitphial siamte in zong amau’ siamna tawh tua bang teek mahin a bawl thei uh hi. Bang hang hiam cih leh a milip in a ciangkhut uh khia suk ciat uh a, tuate gulpi vive a suak hi. Ahih hangin Aaron’ ciangkhut in amau’ ciangkhutte a valhtum hi. Topa’ gensa bangin Faro’ lungsim khauh lai a, amah in amaute’ thu ngai lo hi. Tua ciangin Topa in Moses kiangah, “Faro’ lungsim khauh mahmah a, amah in mite paisak nuam lo hi. Tua ahih manin zingsangin Nail gun-ah a pai ciangin amah tawh a kimu dingin nang zong pai in. Gulpi a suak na ciangkhut pen mah tawi in la, gun gei-ah amah ngak in. Amah tawh na kimuh ciangin ama kiangah, ‘Sehnel gam sungah ama mite in amah a biak theih nadingin a mite na paisak nading a gen dingin Hebru-te’ Pasian, Topa in nang’ kiangah kei hong sawl khin hi. Ahi zongin tu ciang dong ama thu na mang kei hi. Tua ahih manin Topa in, “Keima sep ding thute a muh ciangin kei kua ka hi hiam cih hong thei ding hi,” ci hi. En in, hih ka ciangkhut tawh gun tui ka sat ding a, tuite, sisan hong suak ding hi. Ngasate si ding a, gun tui uihgawp ding ahih manin Egypt mite in dawn thei lo ding uh hi,’ ci in,” a ci hi. Topa in Moses kiangah, “Aaron kiangah hih bangin gen in: ‘Na ciangkhut la inla, sisan a suah theih nadingin Egypt tuite, amau’ gunte, amau’ luite, amau’ bualte’ tung le amau’ tuili khempeuhte’ tungah na khut zan in. Egypt gam sunga sing beel le suang beel khempeuh sung nangawnah sisan om ding hi,’ ci in,” a ci hi. Moses le Aaron in Topa’ thupiak bangin hih uh hi. Faro le ama uliante’ muhin amah in ciangkhut vik to-in Nail gun sunga om tui sat a, Nail gun sunga om tui khempeuh sisan a suak hi. Nail gun sunga ngasate si hi. Nail gun uih a, Egypt mite in Nail gun pana tui dawn thei lo uh hi. Egypt gam sung khempeuhah sisan om hi. Ahih hangin Egypt mitphial siamte in amau’ siamna tawh tua bangmah bawl thei uh hi. Tua ahih ciangin Faro’ lungsim a khauh ngei mahin khauh a, Topa’ gensa bangin amah in amaute’ thu ngai lo hi. Faro kihei-in a inn sungah pai a, amah in a lungsim nangawnah tua thu ngaihsutin nei nawn lo hi. Amaute in Nail gun tui dawn thei lo uh ahih manin Egypt mite khempeuh in Nail gun kiim tengah tui dawn ding a to uh hi. Topa in gun a sat zawh ni sagih pha ta hi. Tua ciangin Topa in Moses tungah, “Faro’ kiangah pai-in ama tungah, Topa in hih bangin ci hi: “Amaute in keimah hong biak theih nadingin ka mite paisak in. Ahih hangin amaute na paisak kei leh, en in, na gam khempeuh uiphukte tawh ka gimsak ding hi. Nail gun pen uiphukte tawh kidim ding a, tuate pen na innsung, na lupna inndei sung, na lupna tung, na nasemte le na mipihte’ innsung, na meikhukte le na annel mekna kuang sung uhah hong pai ding uh hi. Uiphukte, nang’ tung le na nasemte khempeuh tungah hong pai ding hi,” ci hi,’ ci-in gen in,” a ci hi. Topa in Moses tungah, “Aaron kiangah hih bangin gen in: ‘Gunte, luite, le tuilite tungah na ciangkhut zan inla, Egypt leitang tungah uiphukte paisak in,’ ci-in gen in,” a ci hi. Tua ahih ciangin Aaron in Egypt tuite tungah a khut zan a, uiphukte hong pai-in Egypt leitang a tuam hi. Ahih hangin mitphial siamte in amau’ siamna tawh tua bangmah bawl thei uh a, Egypt leitang tungah uiphukte omsak uh hi. Tua ciangin Faro in Moses le Aaron samin, “Kei le ka mite’ kiang panin uiphukte a lakkhiat nadingin Topa’ tungah thum in. Topa’ tungah biakna a pia dingin mite ka paisak ding hi,” a ci hi. Tua ciangin Moses in Faro’ kiangah, “Nail gun sung cih simloh, nangma kiang le na innte panin uiphukte a bei nadingin nang le na nasemte le na mite a dingin ka thum theih nadingin a hun khat seh in,” a ci hi. Amah in, “Zing ciang,” ci hi. Moses in, “ Topa ahi kote’ Pasian tawh a kibang kuamah om lo hi, ci-in na theih nadingin nangma cih bang hi tahen. Nang le na innte le na nasemte le na mite’ kiang panin uiphukte paikhia ding uh a, Nail gun sung bekah omlai ding hi,” a ci hi. Tua ahih ciangin Faro’ kiang panin Moses le Aaron a paikhia uh hi. Faro’ tungah a tunsak uiphukte a beisak nadingin Topa’ tungah Moses in thu a ngen hi. Topa in Moses’ nget bangin hih a, innte le huang sung le lote panin uiphukte a si hi. Amaute in a lomlomin tuate khawm uh a, gam sung teng uih hi. Ahih hangin nopna a omkik lam Faro in a muh ciangin, amah in a lungsim khauhsak a, Topa’ gensa bangin amau’ thu ngai lo hi. Tua ciangin Topa in Moses tungah, “Aaron’ kiangah hih bangin gen in: ‘Egypt gam sung khempeuhah thokang a om nadingin na ciangkhut zanin leivui sat in,’ ci in,” a ci hi. Amaute in tua bangmahin hih uh hi. Aaron in a ciangkhut tawh leivui sat a, mihing tung le ganhing tungah thokang hong om hi. Egypt gam sung khempeuhah leivui teng thokang suak hi. Mitphial siamte in amau’ siamna tawh thokang piansak ding sin uh a, ahih hangin amaute in hih thei lo uh hi. Tua ahih ciangin mihing le ganhing tungah thokangte om hi. Mitphial siamte in Faro’ kiangah, “Hih pen Pasian’ nasepna ahi hi,” ci uh hi. Ahih hangin Faro’ lungsim khauh a, Topa’ gensa bangin amah in amaute’ thu ngai lo hi. Tua ciangin Topa in Moses kiangah, “Zingsangin tho baihin gun-ah Faro hong pai ding ngakin ama kiangah, ‘ Topa in hih bangin ci hi: “Amaute in keimah hong biak theih nadingun ka mite paisak in. Tua bang hi loin, ka mite na paisak kei leh, en in, nang le na nasemte le na mite’ tung le na innte sungah tho honpite kong sawl ding hi. Egypt mite’ innte le tuate’ dinna leitang zong tho honpite tawh kidim ding hi. Ahih hangin tua ni ciangin kei pen hih leitang tungah Topa ka hihna na theih nadingin tho honpite a om loh nadingin ka mite a tenna Goshen leitang keimah in ka tuam koih ding hi. Tua bangin keima mite le nangma mite a kilamdanna khat ka bawl ding hi. Zing ciangin hih lim hong om ding hi,” ci hi,’ ci-in gen in,” a ci hi. Topa in tua bangmahin hih ahih manin Faro’ innsung le ama nasemte’ inn sungah tho honpi hong pai a, thote’ hangin Egypt gam sung khempeuh leitang kisia hi. Tua ciangin Faro in Moses le Aaron sam a, “Pai un; hih gam sungah na Pasian tung uhah biakna pia un,” a ci hi. Ahih hangin Moses in, “Tua bangin hih ding kituak lo hi. Bang hang hiam cih leh Egypt mite a dingin a deihhuai lo biaknate kote in Topa ka Pasian uh tungah ka pia ding uh hi. Egypt mite a dingin a deihhuai lo biaknate amau’ muhna-ah pia le ung, amaute in suang tawh kote hong deng ding uh hi lo ahi hiam? Kote, ni thum paina sehnel gamah pai-in ama hong thupiak ding bangin Topa ka Pasian uh tungah biakna ka va pia ding uh hi,” a ci hi. Tua ahih ciangin Faro in, “Sehnel gamah Topa na Pasian uh tungah biakna a pia dingin note kong paisak ding hi. Ahi zongin gamlapi-ah na pai kei ding uh hi. Kei a dingin zong hong thumsak un,” a ci hi. Tua ciangin Moses in, “En in, nang kiang panin kei paikhia-in Faro’ kiang pan, a nasemte’ kiang pan, le a mite’ kiang panin tho honpite zing ciangin a paikhiat theih nadingin Topa’ tungah thu ka ngen ding hi. Ahi zongin Topa’ tungah biakna a pia dingin mite paisak lohna tawh Faro hong zuautat kik nawn kei in,” a ci hi. Tua ahih ciangin Faro’ kiang panin Moses paikhia-in Topa’ tungah thu a ngen hi. Topa in Moses’ nget bangin pia a, Faro’ kiang, a nasemte’ kiang, le a mite’ kiang panin tho honpite lakhia a, khat zong om nawn lo hi. Ahi zongin Faro in hih hunin zong a lungsim khauhsak lai a, mite paisak lo hi. Tua ciangin Topa in Moses tungah, “Faro’ kiangah pai-in ama kiangah, ‘ Topa, Hebru-te’ Pasian in hih bangin ci hi: “Amaute in keimah hong biak theih nadingin ka mite paisak in. Bang hang hiam cih leh nang in amaute paisak ding nialin amaute na let lai leh, lo sunga om ganhing, sakolte, late, kalaohte, bawnghonte, le tuuhonte tungah a nasia mahmah gimna ka tungsak ding hi. Israel mite a’ khempeuh khat beek a sih loh nadingin Israel-te’ ganhingte le Egypt-te’ ganhingte’ kikalah Topa in a kilamdanna khat ka bawl ding hi,” ci hi,’ ci-in gen in,” a ci hi. Topa in a hun khat seh a, “Zing ciangin Topa in hih gam sungah hih na hong sem ding hi,” a ci hi. A zing ciangin Topa in hih na sem hi. Egypt mite’ ganhing khempeuh si a, ahih hangin Israel mite’ ganhing khat zong si lo hi. Faro in a en dingin mi sawl a, Israel-te’ ganhing khat zong na si lo hi. Ahih hangin Faro’ lungsim khauh lai a, amah in mite paisak lo hi. Topa in Moses le Aaron’ kiangah, “Meiphualpi panin khut dimin vut la unla, Faro’ muhin vantung lamah Moses in lawn hen. Tua vutte, Egypt gam khempeuhah leivui neel bangin kithehthang ding a, Egypt gam sung khempeuhah mihing le ganhing tungah meimatum suakin kilawhgawp ding hi,” a ci hi. Tua ahih ciangin amaute in meiphualpi panin vutte la-in Faro’ mai-ah ding uh a, Moses in vantung lamah tuate lawn a, tuate in mihing le ganhing tungah meimatum piangsakin kilawhgawp hi. Mitphial siamte in meimatum veina hangin Moses demzo nawn lo uh hi. Bang hang hiam cih leh mitphial siamte le Egypt mite khempeuh in meimatum vei uh hi. Ahih hangin Topa in Faro’ lungsim khauhsak a, Topa in Moses’ tunga a gensa bangin amah in amaute’ thu ngai lo hi. Tua ciangin Topa in Moses kiangah, “Zingsangin tho baih inla, Faro’ mai-ah dingin ama kiangah, ‘Hebru mite’ Pasian, Topa in hih bangin ci hi: “Amaute in keimah hong biak theih nadingun ka mite paisak in. Bang hang hiam cih leh leitung khempeuhah kei tawh a kibang khat beek om lo hi, ci-in na theih nadingin hih hunin na inn sungtawng dong le na nasemte le na mite’ tungah ka gimnate khempeuh kong tungsak ding hi. Bang hang hiam cih leh tu-in keimah in ka khut zanin natna tawh nang le na mite hong vatgawpin, leitung panin note hong kibeisak thei hi. Ahi zongin leitung khempeuhah keima min a kipulak theih nadingin note tungah ka vangliatna lah ding deihna-in kong nungtasak lai hi. Ka mite tungah nang kiliansak lai-in amaute na paisak kei hi. En in, zing ciang tubang hunin Egypt gam a kisat a kipanin tuhun dongin tua bang a kimu ngei lo, a tam mahmah gialpi ka kiasak ding hi. Tua ahih ciangin tu-in mi sawl inla, na ganhingte le gamlak a na neihte khempeuh a muanhuai bukna-ah koih in. Bang hang hiam cih leh inn-ah a kipaipih lo, gamlak a om mihing le ganhing tungah gialpi kia ding a, amaute si ding uh hi,” ci hi,’ ci-in gen in,” a ci hi. Tua ciangin Faro’ nasemte’ lak panin Topa’ thu a zahtak mi in ama silate le a ganhingte inn-ah taisak hi. Ahi zongin Topa’ thu a don lo mi in ama silate le a ganhingte gamlakah nusia hi. Topa in Moses kiangah, “Egypt gam sung khempeuh a mihing le ganhing le gamlak kungte khempeuh tungah gialpi a kiat theih nadingin vantung lamah na khut zan in,” a ci hi. Tua ciangin Moses in vantung lamah a ciangkhut a zan hi. Topa in van gingsakin gialpi kiasak a, leitungah keek kia suk hi. Topa in Egypt gam sungah gialpi zusak hi. Egypt gam minam khat a suah khit a kipanin tua bang a om ngei lo, a tam mahmah gialpi le gialpi lakah khua phia-in keek ging om tawntung hi. Gialpi in Egypt gam sunga a om mihing le ganhing, na khempeuh denggawp hi. Gialpi in gamlak kung khempeuh denggawp a, gamlak singkung khempeuh dengtan hi. Israel mite a omna Goshen gam bekah gialpi kia lo hi. Tua ciangin Faro in mi sawlin Moses le Aaron samsakin amaute kiangah, “Tutungin ka khial hi. Topa man hi. Kei le ka mite ka khial uh hi. Topa’ tungah thum un. Bang hang hiam cih leh hih vanging le gialpi kicingzo hi. Note kong paisak ding a, note na khawl nawn kei ding uh hi,” a ci hi. Moses in ama kiangah, “Khuapi panin ka paikhiat khit phetin Topa’ lamah ka khut ka zan ding hi. Leitung pen Topa a’ hi, ci-in na theih nadingin vanging tawpin gialpi om nawn lo ding hi. Ahih hangin nang le na nasemte in ahihleh, Topa Pasian na zahtak nai lohna uh ka thei hi,” a ci hi. (Anthul kungte le mangbuhham kisia hi. Bang hang hiam cih leh mangbuhhamte a vuih laitak hi a, anthul kungte a pak laitak ahi hi. Ahih hangin mangbuh le mangbuhmante sia lo hi. Bang hang hiam cih leh tuate khangham nai lo hi.) Tua ahih ciangin Faro’ kiang pan khuapi pualamah Moses paikhia a, Topa’ lamah a khut zanin thu a ngen hi. Vanging le gialpi tawp pah a, leitungah guah bua nawn lo hi. Ahih hangin guah le gialpi le vanging a khawlna Faro in a muh ciangin amah khial lai a, amah le a nasemte in a lungsim uh khauhsak uh hi. Tua ahih ciangin Topa in Moses tungtawnin a gensa bangin Faro’ lungsim khauh lai a, amah in Israel mite paisak lo hi. Tua ahih ciangin Faro’ kiangah Moses le Aaron pai-in ama kiangah, “Hebru mite’ Pasian, Topa in hih bangin ci hi: ‘Ka mai-ah nang na kiniamkhiat nading bang tanvei nial ding na hi hiam? Amaute in keimah hong biak theih nadingin ka mite paisak in. Bang hang hiam cih leh ka mite paisak ding na nial leh, zing ciangin na gam sungah kauphete kong paipih ding a, kuamah in leitang a muh theih loh nadingin tuate in lei maitang khempeuh tuam ding uh hi. Gialpi khit cianga nang a’ dinga a omlai sunte amaute in ne ding uh hi. Tuate in gamlak a a po nangma singkung khempeuh ne ding uh a, nangma innte le na nasemte khempeuh le Egypt mite’ inn khempeuhah dim ding uh hi. Na pu na pate uh leitang tungah a pian’ uh a kipan tuni donga tua bang a muh ngei lohte uh hi ding hi,’ ci hi,” ci-in a gen hi. Tua ciangin amah kihei-in Faro’ kiang panin a paikhia hi. Faro’ nasemte in ama kiangah, “Eite tungah hih mipa bang tanvei thangzak hong hi niloh ding ahi hiam? Amaute in amau’ Pasian, Topa a biak theih nadingun mite paisak in. Egypt a siatna theitel nai lo na hi hiam?” a ci uh hi. Tua ahih ciangin Faro kiangah Moses le Aaron kipaipih kik hi. Faro in amaute kiangah, “Pai un; Topa, na Pasian uh va bia un. Ahi zongin kua teng pai ding na hi uh hiam?” a ci hi. Moses in, “Ka khangnote uh le ka khanghamte uh tawh ka paikhawm ding uh hi. Ka tapate uh, ka tanute uh, ka tuuhonte uh, le ka bawnghonte uh tawh ka pai ding uh hi. Bang hang hiam cih leh Topa a dingin pawi khat ka kham ding uh hi,” a ci hi. Faro in amaute kiangah, “Note tawh na naupangte uh kong paisak taak leh note tawh Topa hong om ta ve! En un, note in ngimna hoih lo na nei uh hi. Tua bang hi lo ding! Note’ lak panin pasalte pai unla, Topa va bia un. Bang hang hiam cih leh tua pen nomau’ ut ahi hi,” a ci hi. Faro’ omna panin amaute kihawlkhia hi. Tua ciangin Topa in Moses kiangah, “Egypt leitang tungah amaute hong omin, gialpi in a den baang kung khempeuh a ne ding kauphete sapna-in Egypt leitang tungah na khut zan khia in,” a ci hi. Tua ahih ciangin Moses in Egypt leitang tungah a ciangkhut zan a, Topa in tua sun tawntung le tua zan tawntung leitang tungah nisuahna huih a nungsak hi. Zingsang ciangin nisuahna huih in kauphete hong tun khin hi. Tua masiah kauphe hon tua banga a tam a om ngei lo, cikmah ciangin zong a omkik ngei lo ding, Egypt leitang tung khempeuhah kauphe hong om a, Egypt gam buppi-ah a dim uh hi. Bang hang hiam cih leh tuate in lei maitang khempeuh tuam uh a, leitang mial hi. Tuate in leitang tunga kung khempeuh le gialpi’ den baang singkung gah khempeuh ne uh hi. Egypt leitang tung khempeuhah gamlak singkung hitaleh kungno hitaleh a hing khat beek om nawn lo hi. Tua ciangin Faro in Moses le Aaron nawh sap a, “ Topa na Pasian’ tung le nangma tungah ka khial khin hi. Tua ahih ciangin tu-in ka khialhna hong maisak in. Tu-a khatvei bek, kong thum hi; keima tung panin hih sihna a lakkhiat ding Topa na Pasian’ tungah thum in,” a ci hi. Tua ahih ciangin Faro kiang panin amah paikhia-in Topa’ tungah a thum hi. Topa in nitumna huihpi hat mahmah khat nungsak a, tua huih in kauphete laamto-in San Tuipi sung a denna hi. Egypt gam sungah kauphe khat zong om nawn lo hi. Ahih hangin Topa in Faro’ lungsim khauhsak a, amah in Israel mite paisak lo hi. Tua ciangin Topa in Moses kiangah, “Mite in khuamial sung a zawt nading, Egypt leitang tungah khuamial a om theih nadingin vantung lamah na khut zan in,” a ci hi. Tua ahih ciangin Moses in vantung lamah a khut zan a, Egypt leitang tung khempeuh ni thum sung khua mial bikbek hi. Ni thum sung amau khatlekhat kimu thei lo uh a, ama omna panin kuamah paikhia thei lo hi. Ahih hangin Israel mite in amau’ tenna-ah khuavak nei uh hi. Tua ciangin Faro in Moses samin, “Pai un, Topa va bia un; na tate uh zong note tawh hong pai thei ding hi. Na tuuhonte uh le na bawnghonte uh omsak lai un,” a ci hi. Ahih hangin Moses in, “ Topa ka Pasian uh tungah ka piak theih nadingun biakpiakna le meihal biakna kote nong neihsak kul hi. Ka ganhingte uh zong kote tawh a pai kul hi. Ganno khat zong kinusia lo ding hi. Bang hang hiam cih leh Topa ka Pasian uh ka biak nadingun tuate ka paipih ding uh hi. A mun ka tun matengun bang pen tawh Topa bia ding cih ka thei kei uh hi,” a ci hi. Ahih hangin Topa in Faro’ lungsim khauhsak a, amah in amaute paisak lo hi. Tua ciangin Faro in ama kiangah, “Kei kiang panin kihem in. Nang kidawm in. Ka maitang hong mu kik nawn kei in. Bang hang hiam cih leh ka maitang nong muh ni-in nang na si ding hi,” a ci hi. Moses in, “Na cih bang hita hen! Na maitang kong mu kik nawn kei ding hi,” a ci hi. Topa in Moses kiangah, “Faro le Egypt tungah gimna khat ka tungsak lai ding a, tua khit ciangin hih lai mun panin amah in note hong paisak ding hi. Amah in note hong paisak ciangin note hong hawlkhia mang khin ding hi. Pasal peuhmah in a vengte kiang pan, numei peuhmah in zong a vengte’ kiang mah panin ngun le kham kizepnate a nget theih nadingun mite’ zakin thu gen in,” a ci hi. Topa in Egypt mite’ muhna-ah mite maipha pia hi. Tua tham loin, mipa Moses pen Egypt leitang tung, Faro’ nasemte’ muhna, le mite’ muhna-ah lian mahmah hi. Moses in Faro’ kiangah, “ Topa in hih bangin ci hi: Zankim pawlin Egypt mite’ lakah ka pai ding hi. Kumpi tokhom tunga tu Faro’ tacil a kipanin an gawina nunga a om nasem numei tacil dong le ganhing tacil khempeuh, Egypt gam sungah tacil khempeuh si ding hi. Cikmahin tua bang a om ngei lo, cikmah ciangin zong a omkik ngei lo ding kahna lianpi Egypt leitang tung khempeuhah om ding hi. Ahih hangin Egypt mite le Israel mite a kilamdangin Topa in bawl hi, ci-in na theih nadingun Israel mite, mihing hitaleh ganhing hitaleh, ui khat nangawn zong tau lo ding hi, ci hi” a ci hi. Tua ciangin Moses in Faro’ kiangah, “Na uliante khempeuh keima kiangah hong paisukin, keima kiangah hong kun ding uh a, ‘Nang le nangmah hong zui khempeuh paikhia un,’ hong ci ding uh hi. Tua khit ciangin kei ka paikhia ding hi,” ci thuah lai hi. Tua ciangin Faro’ kiang panin amah a heh mahmahsa-in a paikhia hi. Tua ciangin Topa in Moses kiangah, “Egypt tungah nalamdang tam ka bawl theih nadingin Faro in na thu hong ngai lo lai ding hi,” a ci hi. Moses le Aaron in hih na lamdangte khempeuh Faro’ mai-ah a bawl uh hi. Topa in Faro’ lungsim khauhsak a, amah in Israel mite a leitang panin paikhiasak lo hi. Egypt gam sungah Topa in Moses le Aaron kiangah, “Tu kha pen note a dingin kum kipatna hi ding a, note a dingin kum khat sungah a kha masa hi ding hi. Israel mihon khempeuhte tungah gen in. Tu kha ni sawm ni-in innkuan khat a dingin tuuno ahih kei leh keelno khat, amau’ innkuan phazah tawh kituakin amaute in ganno khat ciat go ding uh hi. Ganno khat a ne ding innkuanmi a tawmluat leh amau’ innzom a vengte tawh a mi tawh kituakin a sa hawm ding uh hi. A mi tamna le a nekzah uh tawh kizui-in ganno man pia ding uh hi. Na ganno uh a sitbaang lo hi ding a, kum khat a pha a pa hi ding hi. Tua pen tuu ahi a, keel ahi zongin, khat peuhpeuh hi thei ding hi. Tua gannote pen Israel mihonte khempeuh in a gawh ding hun nitak khuamui, tua kha ni sawm le li dong na kem ding uh hi. Tua ciangin amaute in a si kimkhat la-in a nekna uh inn kongkhak khuam nihte le a bangtungzawl nuh ding uh hi. Amaute in tua zanin a sa hangkeu-in ne ding uh a, silngo sawh loh anlum le a kha mehteh tawh amaute in ne ding uh hi. A sate mun khat peuhpeuh a sial ahi a, tui tawh huanin ahi zongin ne loin, a lu le a khete le a sungkuate tawh hangkeu-in, na ne ding uh hi. Zingsang dong a khing na omsak kei ding uh a, zingsang cianga a khing omlai peuhmah na haltum ding uh hi. Hih bang zia-in na ne ding uh hi: Na kawng uh gakin, na khedap uh na khe uhah bulhin, na ciangkhut uh na khut uhah na tawi ding uh a, na nawh nek ding uh hi. Tua pen Topa’ Paisan Pawi ahi hi. “Bang hang hiam cih leh keimah in tua zanin Egypt gam ka nawk ding a, Egypt leitang tungah mihing hitaleh ganhing hitaleh tacil khempeuh ka vatlum ding a, Egypt pasian-te khempeuh tungah thu ka khen ding hi. Kei pen Topa ka hi hi. Note’ omna inn tunga sisan pen note a dingin lim hi ding hi. Sisan ka muh ciangin note kong paisan ding a, Egypt leitang ka vatgawp ciangin note hong susia ding gimna note’ tungah hong tung lo ding hi. “Hih pen note a dingin phawkna ni hi ding a, note in Topa’ tungah pawi bawlna ni-in na nei ding uh hi. Na khang tawntungun note in biakna ngeina kip khatin na nei tawntung ding uh hi,” a ci hi. Topa in, “Note in ni sagih sung silngo sawh loh anlum na ne ding uh hi. A ni masa ni-in note in na inn panun silngo na hemkhia ding uh hi. Bang hang hiam cih leh khatpeuh in a ni masa ni panin a ni sagih ni dong silngo sawh a nek leh, Israel mi-in tua mipa kiseh nawn lo ding hi. A ni masa ni le a ni sagih ni-in a siangtho biak kikhopna khat na nei ding uh a, tua ni nih sung na bangmah na sem kei ding uh hi. Ahi zongin na milipun an huanin na ne thei ding uh hi. Note in silngo sawh loh anlum pawi na bawl ding uh hi. Bang hang hiam cih leh hih ni teekteekin Egypt leitang panin na mihonte uh ka paikhiatpih hi. Tua ahih ciangin note in na khan tawntungun hih ni pen biakna ngeina kip khatin na nei tawntung ding uh hi. Kha masa, tua kha sawm le li nitakin note in silngo sawh loh anlum na ne ding uh a, tua kha ni sawmnih le khat nitak dong na ne ding uh hi. Bang hang hiam cih leh ni sagih sung na innsung uhah silngo kimu lo ding hi. Mi khatpeuh, peemta hitaleh gammi hitaleh in silngo sawh a nek leh Israel mi-in tua mipa kiseh nawn lo ding hi. Silngo a kisawh peuhmah na ne kei ding uh hi. Na omna khempeuh uhah silngo sawh loh anlum na ne ding uh hi,” a ci hi. Tua ciangin Moses in Israel upate khempeuh samin amaute kiangah, “Nomau a dingin na innkuan uh tawh a kituakin tuunote teel unla, Paisan Pawi bawl nading tuuno go un. Puknah lomkhat la unla, kuang sunga om sisan sungah diahin, kuang sunga om sisan tawh bangtungzawl le kongkhak khuam nihte nuh un. Zingsang matengin a inn kongkhak pua-ah kuamah paikhia lo ding hi. Bang hang hiam cih leh Egypt mite a that dingin Topa in hong nawk ding hi. Bangtungzawl le kongkhak khuam nih tunga sisan a muh ciangin Topa in kongkhak paisan ding a, a susia dingte pen note that dingin na innsung uhah tumsak lo ding hi. Note le na tapate un hih pen biakna ngeina kipin na nei tawntung ding uh hi. Amah in hong ciamsa bangin Topa in note hong piak ding leitang na tun uh ciangin hih ngeina na zui ding uh hi. Na tate un note kiangah, ‘Hih banga hihna pen bang a cih nopna ahi hiam?’ hong cih ciangin, note in, ‘ Topa’ Paisanna hangin biakpiakna ahi hi. Amah in eite’ innkuante hong khawi-in Egypt mite a thah lai-in Egypt gam sungah Israel innkuante paisan hi,’ na ci ding uh hi,” a ci hi. Mite in a lu uh kunin Pasian a bia uh hi. Tua ciangin Topa in Moses le Aaron a thupiak bangin mite a gamta uh hi. Ama kumpi tokhom tunga a tu Faro’ tacil a kipanin thongmial sunga a om a kiman mite’ tacil le ganhing tacil khempeuh, zankim laitakin Topa in vatgawp hi. Tua zanin Faro le a nasemte khempeuh le Egypt mite khempeuh tho uh a, Egypt gam sungah kahna lianpi a om hi. Bang hang hiam cih leh khat beek a sihlohna inn khat zong om lo hi. Faro in Moses le Aaron zan sap a, “Ding un; keima mite’ lak panin note le Israel mite paikhia unla, na gensa bangun Topa va bia un. Na gensa bangun na tuuhonte uh le na bawnghonte uh la unla, pai un. Kei zong thupha hong pia un,” a ci hi. Tua gam panin mite manlangin a sawlkhiat nading uhah Egypt mite nawh tat mahmah uh hi. Bang hang hiam cih leh amaute in, “Eite khempeuh i si khin ding hi,” a ci uh hi. Tua ahih ciangin mite in silngo sawh nai loh a annel lom uh la-in, annel mekna amau’ kuangte puan tawh tunin a liangko uhah pua uh hi. Moses in amaute tunga a gen bangin Israel mite zong gamta uh hi. Bang hang hiam cih leh amaute in Egypt mite’ tung panin ngun le kham kizepnate le puante ngen uh hi. Amau’ ngette a piak nadingun Topa in Egypt mite’ muhna-ah Israel mite maipha a pia hi. Tua bangin amaute in Egypt mite’ na a sut uh hi. Israel mite numei le naupang kisim loin pasal tul zaguk Rameses panin Sukkoth-ah khe-in pai uh hi. Minamdang tampi le tuuhon le bawnghon, ganhing tampi zong amau tawh pai uh hi. Egypt panin a ken uh annel lom panin amaute in silngo sawh loh moh em uh hi. Tuate silngo a kisawh lohna pen Egypt gam panin amaute kinotkhia a, ze-ol tat thei loin amau’ annek ding zong kiging man lo uh hi. Israel mite Egypt-ah kum zali le kum sawmthum sung om uh hi. Kum zali le kum sawmthum a cin ni teekteekin Egypt leitang panin Topa’ mihonpite paikhia uh hi. Egypt leitang panin amaute a paikhiatpih nadingin hih pen Topa’ zan vilna ahi hi. Tua mah bangin Israel mite khempeuh in zong amau’ khang tawntungin Topa a dingin hih zan mah zan vilna-in a nei uh hi. Topa in Moses le Aaron kiangah, “Hih Paisan Pawi pen biakna ngeina kip khat hi ding a, gamdangmi kuamah in ne lo ding hi. Ahih hangin sum tawh a kilei sila peuhmah in a vun na at khit uh ciangin ne thei ding hi. Peemta hitaleh a kicial nasem hitaleh in ne thei lo ding hi. Inn sungah kine ding a, inn pua-ah a sa na paikhiatpih kei ding uh hi. A guh na kuaitan kei ding uh hi. Israel mihon khempeuh in hih ding uh hi. Khualmi khat note kiangah hong peem a, Topa a dingin Paisan Pawi a bawl leh, ama mipih pasal khempeuh a vun ki-atsak un. Tua khit ciangin amah a nai-ah hong pai-in bawl thei ding a, amah pen gammi khat tawh kibang ding hi. Ahih hangin vun ki-at lo mi kuamah in ne lo ding hi. Gammi le note’ lakah hong peem khualmi a dingin ngeina khat bek om ding hi,” a ci hi. Tua bangin Israel mite khempeuh gamta uh a, Topa in Moses le Aaron a thupiak bangin amaute in hih uh hi. Tua ni teekteekin Topa in Israel mite a honpi-un Egypt gam panin a paikhiatpih hi. Topa in Moses kiangah, “Keima tungah tacil khempeuh hong ap in. Israel mite’ lakah, mihing hitaleh ganhing hitaleh, naubu a hong masa pen peuhpeuh keima-a’ ahi hi,” a ci hi. Moses in mite tungah, “Salsuahna Egypt gam panin na paikhiat uh hih ni phawk un. Bang hang hiam cih leh Topa in vangliatna tawh hih mun panin note hong paikhiatpih hi. Silngo sawh anlum kine lo ding hi. Abib kha, tuni-in note a paikhia na hi uh hi. Amah in note tungah piak dinga na pate’ tungah a ciam, bawngnawi le khuaizu a luanna leitang, Kanaan mite, Hit mite, Amor mite, Hiv mite, le Jebus mite’ leitangah Topa in note hong paipih ciangin hih kha sungin hih bangin na hih ding uh hi. Note in silngo sawh loh anlum ni sagih sung na ne ding uh a, a ni sagih ni-in Topa pahtawina pawi khat om ding hi. Silngo sawh loh anlum ni sagih sung kine ding hi. Note’ tungah silngo sawh anlum kimu lo ding a, note’ huang sung khempeuhah silngo kimu lo ding hi. Tua ni-in na tate uh kiangah, ‘Egypt panin ka paikhiat lai-un Topa in ko a’ dinga hong hihsakna hang hi,’ ci-in na gen ding uh hi. Na kam un Topa’ Thukham a gen tawntung theih nadingin hih pen na khut tung uhah lim, na taltang tung uhah phawkna khat hi ding hi. Bang hang hiam cih leh Topa in a vangliatna tawh hih mun panin note hong paikhiatpih hi. Tua ahih ciangin note in a kiseh hunin kum khat pan kum khat, hih biakna ngeina kip na zui ding uh hi. “Amah in note le na pate uh tungah a ciam bangin, Topa in Kanaan leitangah note hong paipih hun ciang le note tungah tua gam hong piak ciangin, note in naubu a hong masa khempeuh Topa a dingin na tuam koih ding uh hi. Na ganhing uh a tacil a pa khempeuh zong Topa a’ hi ding hi. La a tacil peuhmah tuuno khat tawh na tanh ding uh hi. Na tat kei ding uhleh a ngawng na kuaitan ding uh hi. Note’ tapate’ lak panin tacil peuhmah na tanh ding uh hi. Hong pai ding hunah na tapa in, ‘Hih pen bang a cihnopna ahi hiam?’ ci-in nang hong dot ciangin, nangmah in ama kiangah, ‘Salsuahna, Egypt panin Topa in vangliatna tawh kote hong paikhiatpih hi. Bang hang hiam cih leh Faro in kote paisak ding a nial tentan ciangin Egypt gam sunga tacil khempeuh, mihing tacil le ganhing tacil khempeuh Topa in that hi. Tua ahih ciangin naubu a hong masa a pa khempeuh Topa’ tungah biakna-in ka pia uh hi. Ahih hangin ka tapate uh sung pan tacil khempeuh ka tanh uh hi,’ na ci ding hi. Tua pen na khut tunga om ciaptehna lim ahih kei leh na mitte’ kikal-a talsuante bang hi ding hi. Bang hang hiam cih leh Topa in a vangliatna tawh Egypt panin eite hong paikhiatpih hi,” a ci hi. Faro in mite a paisak ciangin, lampi tom pen hitaseleh, Pasian in Filistia gam tawnin amaute paipih lo hi. Bang hang hiam cih leh Pasian in, “Amaute in gal a tuah ciangin mite kisikin Egypt-ah ciahkik kha ding hi,” a ci hi. Ahih hangin Pasian in San Tuipi lam manawhin sehnel gam lamah mite kot paipih hi. Israel mite gal a do dingin a kithawisa-in Egypt leitang panin a paito uh ahi hi. Moses in Josef’ guhte paipih hi. Bang hang hiam cih leh ama guhte a puak ding uh Josef in Israel mite thupi takin kiciamna bawlsak khin hi. “Pasian in note hong hotkhiat ciangin note in hih lai panin keima guhte na pua ding uh hi,” na ci khin hi. Sukkoth panin amaute pai lai uh a, sehnel gam nawl, Etham-ah giahphual sat uh hi. Amaute, sun hitaleh zan hitaleh khualzinin a pai theih nadingun sunin amaute lam a lak dingin meii khuam khat tawh, zanin amaute khuavak a pia dingin mei khuam khat tawh, amaute’ mai-ah Topa a pai hi. Sunin meii khuam le zanin mei khuamte, mite’ mai-ah om tawntung hi. Tua ciangin Topa in Moses kiangah, “Israel mite kihei kikin Migdol le tuipi kikal, Pihahiroth mai, Baalzefon nisuahna lamah giahphual a sat ding gen in. Tuipi gei, tua galkhatah giahphual na sat ding uh hi. Bang hang hiam cih leh Faro in Israel mite’ thu tawh kisai genin, ‘Sehnel gam sungah amaute tangciak uh hi. Sehnel gam in amaute khuhcip khin hi,’ ci ding hi. Keimah in Faro’ lungsim khauhsakin, amah in Israel-te hong delh ding a, Faro le a mihonpite khempeuh ka zawhna hangin minthanna ka ngah ding hi. Kei, Topa ka hihna thu Egypt mite in thei ding uh hi,” a ci hi. Amaute zong tua bangmahin gamta uh hi. Mite tai khinzo hi, ci-in Egypt kumpipa kiangah a kigen ciangin, Faro le ama nasemte’ ngaihsutna kikheel a, amaute in, “Eite’ na hong sep nading panin Israel mite i paikhiatsak, hih banga i gamtat bang hi mawk ahi hiam?” ci uh hi. Tua ahih ciangin amah in a leeng kithawisakin ama galkapte la-in, a kitengkhia leeng zaguk le Egypt leeng khempeuh a ukte tawh kuan khawm hi. Topa in Egypt kumpipa Faro’ lungsim khauhsak a, Israel mite kithamuanna tawh a paikhiat lai takun a delh hi. Egypt mite ahi, Faro’ sakolte, leengte, ama sakol tung tuangte le a galkapte in amaute delh uh a, amaute giahphual satin tuipi gei-a a omna uh, Pihahiroth gei, Baalzefon nisuahna lam munah a pha uh hi. Faro hong nai ciangin Israel mite khuadak to uh hi. En in, amaute’ nungah Egypt mite hong kuan hi. Amaute lau mahmah uh hi. Topa’ tungah Israel mite kiko uh hi. Amaute in Moses kiangah, “Egypt-ah han a om loh manin sehnel gam sungah a si dingin kote hong paikhiatpih na hi hiam? Egypt panin paikhiatpihna tawh kote’ tungah bang hong bawl na hi hiam? ‘Kote hong hici omsak inla, Egypt mite’ na hong semsak in,’ ci-in Egypt-ah nang’ tungah hong gen hi lo ka hi uh hiam? Bang hang hiam cih leh sehnel gamah sih sangin Egypt mite’ na sep ding kote a dingin hoihzaw ding hi,” a ci uh hi. Moses in mite tungah, “Lau kei un, kiptakin om un. Note-a’ dingin tuni-a hong sep ding Topa’ hotkhiatna mu un. Bang hang hiam cih leh tuni-a na muh uh Egypt mite, note in na mukik nawn kei ding uh hi. Topa in note a dingin hong dosak ding a, note ahihleh na om hithiat ding uh hi bek hi,” a ci hi. Topa in Moses kiangah, “Bang hangin kei’ tungah hong kiko na hi uh hiam? Israel mite mai nawtin a pai ding uh gen in. Israel mite in lei keu tungtawnin tuipi a kantan theih nadingin na ciangkhut laamto inla, tuipi tungah na khut zanin tuipi khenkham in. Amau’ nungah Egypt mite hong pai-in, keimah in Faro le a mihonpite khempeuh, a leengte, le a sakol tung tuangte ka zawhna hangin minthanna ka ngah nadingin keimah in Egypt mite’ lungsim ka khauhsak ding hi. Faro le ama leengte le ama sakol tung tuangte ka zawhna hangin minthanna ka ngah khit ciangin Topa ka hihna thu Egypt mite in hong thei ding uh hi,” a ci hi. Tua ciangin Israel mihonpite’ mai-ah a pai Pasian’ vantungmi kikhinin amaute’ nungah a pai hi. Amaute’ mai panin meii khuam kikhinin amaute’ nungah ding a, Egypt honpite le Israel honpite’ kikalah a pai hi. Tua lai-ah meii le khuamial om a, zan tawntung khatlekhat kinai kha loin zingsang khua hong vak hi. Tua ciangin Moses in tuipi tungah a khut zan hi. Topa in zan tawntung nisuahna huihpi hat tawh tuipi mutgawpin, tuipi pen lei keu-in bawl a, tuite a kikhen hi. Israel mite, tuipi laizang lei keu tungah pai uh a, amau’ taklam le veilamah kawm bangin tuite om hi. Egypt mite ahi, Faro’ sakol khempeuh, ama leengte, le ama sakol tung tuangte in delhin tuipi laizang amaute’ nungah pai uh hi. Zingsang ciangin Topa in mei le meii khuam sung panin Egypt mihonpite en sukin, Egypt mihonpite phialgawp a, amau’ leengpeite gumsak ahih manin man bekbakin hawl uh hi. Egypt mite in, “Israel mite’ kiang panin tai ni. Bang hang hiam cih leh Egypt mite hong langpangin Topa in amau a dingin hong do hi,” a ci uh hi. Tua ciangin Topa in Moses kiangah, “Egypt mite’ tung, amau’ leengte tung, le amau’ sakol tung tuangte’ tungah tui hong luankik theih nadingin tuipi tungah na khut zan in,” a ci hi. Tua ahih ciangin Moses in tuipi tungah a khut zan a, a zingsang khuavak ciangin a luan ngei bangin tuipi hong luangkik hi. Tua tui sung panin Egypt mite taikhiat sawm uh a, ahi zongin Topa in tuipi laizangah Egypt mite zogawp hi. Tui hong paikikin leengte le sakol tung tuangte le tuipi sungah amaute a delh Faro’ mihonpite khempeuh tuum a, amaute khat zong suakta lo hi. Ahih hangin tuipi kantanin lei keu tungah Israel mite pai uh a, amau’ taklam le veilamah kawm bangin tuite a om hi. Topa in tua bangin Egypt mite’ khutsung panin tua ni-in Israel-te honkhia a, tuipi gei-ah Egypt mi a site, Israel mite in mu uh hi. Israel mite in Egypt mite’ tungah Topa’ bawl nasepna lianpi mu uh a, mite in Topa a zahtak uh hi. Amaute in Topa le ama nasem Moses a um uh hi. Tua ciangin Moses le Israel mite in Topa’ tungah hih la sa uh a, “ Topa phatna la ka sa ding hi. Amah in minthangin zo khin a, amah in sakol le a tuang pa tuipi sungah a lawn hi. Topa, kei a hong hupa hi a, keimah hong honkhia pa ahi hi. Amah, keima Pasian hi a, amah ka phat ding hi. Ka pa’ Pasian hi a, amah ka liansak ding hi. Topa, galhang pa hi a, Topa, ama min ahi hi. “Faro’ leengte le a mihonpite tuipi sungah lawn a, a kitengkhia ama uliante San Tuipi sungah tum hi. Tui in amaute tuum a, suangtum bangin a thukna sungah amaute kia suk uh hi. “ Topa aw, na taklam khut, thahatin minthang a, Topa aw, na taklam khut in galte a thehthang hi. Na vangliatna tawh nangmah in na langte na lawnthal hi. Na hehna na khahkhia a, tua in amaute buhkung bangin a kangtum hi. Na nak ging tawh tuite kiciangto-in, tuite a lomin dingto a, tuipi sungah tui thukpi a khal hi. Galte in, ‘Ka delh ding a, ka pha ding hi. A nate uh ka hawm ding a, ka deih zahzahin, tuate ka tang ding hi. Ka namsau ka dok ding a, ka khut in amaute susia ding hi,’ ci hi. Nang in na huih tawh na mut a, tuipi in amaute tuum hi. A kihtakhuai tui sungah haknaw bangin amaute tum uh hi. “ Topa aw, pasian-te’ lakah kua, nang tawh kibang ahi hiam? Kua, nang tawh kibangin, sianthona-ah lianin, minthang nasepna-ah kihtakhuai-in, nalamdang sem ahi hiam? Na taklam khut na zan a, leitung in amaute nawmvalh hi. Nangmah in na ciamsa zui-in na tatkhiatsa mite na paipih a, na hatna tawh a siangtho na omna-ah amaute lam na lak hi. Midangte in hih thu za khin uh a, amaute ling uh hi. Filistia-ah a teng mite lau-in lingcip uh hi. Tu-in Edom ukpite lungkia uh a, Moab makaite, lingcip uh hi. Kanaan-ah a teng mi khempeuh a hanna uh beita hi. Launa le kihtakna amaute’ tungah tung a, a thahat na vangliatna hangin amaute suangtum bangin taang loin om uh hi. Topa aw, nangma mite in a khen’ mateng, na leisa mite in a khen’ mateng amaute khikcip uh hi. Nang in amaute hong paipihin nangma mual tungah amaute na suan ding hi. Topa aw, na om nading munin na bawlsa munah, Topa aw, na khutte in a phuhsa na biakinn-ah na koih ding hi. Topa in uk tawntung ding hi,” a ci uh hi. Faro’ sakolte ama leengte tawh, a sakol tung tuangte tuipi sungah a pai ciangin, Topa in tuipi tuite amaute tuumsakkik a, ahi zongin Israel mite tuipi laizang lei keu tungah a pai uh hi. Tua ahih manin Aaron’ sanggamnu Miriam in a khutah khuang khat tawi hi. Ama nungah numeite khempeuh laamin khuang tawh a zui uh hi. Miriam in amaute lasak hi: “ Topa la sak un. Amah in minthangin zo khin a, amah in sakol le a tung tuangte, tuipi sungah a lawn hi,” a ci hi. Tua ciangin Moses in San Tuipi panin Israel mite paipih suak a, Shur sehnel gamah a pai uh hi. Sehnel gamah ni thum sung pai uh a, tui mu lo uh hi. Marah a tun uh ciangin a tui kha ahih manin Marah tui dawn thei lo uh hi. Tua ahih manin Marah ci-in min kiphuak hi. Moses tungah mite phun uh a, “Bang dawn ding ihi hiam?” ci uh hi. Topa’ tungah amah kiko hi. Topa in singkung khat amah lak a, amah in tui sungah tua sing lawn a, tui lim hong suak pah hi. Topa in tua lai munah amaute a dingin thukham khat le ngeina kip khat bawl a, tua lai munah amah in amaute’ tungah laktel a, “Note in Topa na Pasian uh thu limtakin na ngaih uh a, ama mai-ah a man nate hihin, ama thupiakte don a, ama ngeina kipte khempeuh na zuih uhleh, Egypt mite’ tungah ka tunsak natnate khat beek note’ tungah kong tungsak kei ding hi. Bang hang hiam cih leh kei pen Topa, note hong damsak pa ka hi hi,” a ci hi. Tua ciangin amaute ciktui sawm le nih le nisuh kung sawmsagih a omna mun Elim tung uh a, tui gei tua munah amaute in giahphual a sat uh hi. Elim panin amaute ding khia uh a, Egypt leitang panin a paikhiat zawh uh a kha nihna ni sawm le nga ni-in Elim le Sinai kikal-a om Sin sehnel gamah Israel mihonte khempeuh tung uh hi. Sehnel gamah Moses le Aaron’ tungah Israel mihon buppi phun uh a, amaute tungah, “Kote, sabeel phungah tu-in ka kham takun an ka nek lai-un Egypt leitangah Topa in hong that khin hizaw taleh maw! Bang hang hiam cih leh mihon buppi a puksisak dingin note in sehnel gamah nong paikhiatpih uh hi,” a ci uh hi. Tua ciangin Topa in Moses kiangah, “En in, note a dingin vantung panin an kong zusak ding hi. Keima thu a zuih uhleh a zuih loh uh ka theihtel nadingin mite paikhia-in nisimin ni khat khamkhop ding kaikhawm ding uh hi. A ni guk ni-in mite in ni simin a khop ngei zah nih uh khawmin bawl ding hi,” a ci hi. Tua ahih ciangin Moses le Aaron in Israel mite tungah, “Nitak ciangin, Egypt gam panin note hong pai khiatpih pa pen Topa ahihna na thei ding uh hi. Topa’ tungah na phunna uh amah in za khin ahih manin zingsang ciangin Topa’ vangliatna na mu ding uh hi. Bang hang hiam cih leh kote’ tungah na phun uh, kote a bang hi mawk ka hi uh hiam?” a ci hi. Moses in, “Ama tungah na phunnate uh Topa in a zakna hangin, Topa in note’ tungah nitak an nek ding sa, zingsangin na kham tak uha na nek ding uh an hong piak ciangin - kote pen a bang hi mawk ka hi uh hiam? Note’ phunnate pen kote’ tung hi loin Topa’ tung ahi hi,” a ci hi. Moses in Aaron’ kiangah, “Israel mihon buppi tungah, ‘Amah in note’ phunnate za khin ahih manin Topa’ mai a nai-ah hong pai un,’ ci in,” a ci hi. Israel mihon buppi tungah Aaron in thu a gen laitakin, amaute in sehnel gam lam en uh a, tua laitakin meii sungah Topa’ vangliatna hong kilang hi. Topa in Moses kiangah, “Israel mite’ phunnate ka za khin hi. Amaute kiangah, ‘Khuamui ciangin note in sa na ne ding uh a, zingsang ciangin an na kham ding uh hi. Tua ciangin kei pen Topa na Pasian uh ka hihna na thei ding uh hi,’ ci in,” a ci hi. Nitak ciangin vamimte hong leengin giahphual hong tuam hi. Zingsang ciangin giahphual kiimah daitui kia hi. Daitui a kap ciangin gamlak lei maitang tungah a pum ciltel, a khal, vukkhal bangin a pak dikdek leitungah om hi. Israel mite in a muh uh ciangin amaute khatlekhat in, “Bang ahi hiam?” kici uh hi. Bang hang hiam cih leh amaute in tua pen bang hiam cih thei lo uh hi. Moses in amaute’ kiangah, “ Topa in nek dinga note’ tungah hong piak an ahi hi. Topa’ thupiak hih bang ahi hi: ‘Note in na milipun na khamzah ding uh khawm un. Na puanbuk sung uhah mi omzah tawh kituakin mi khat lawhta khat ciat na la ding uh hi,’ ci hi,” ci-in a gen hi. Tua mah bangin Israel mite gamta uh hi. Amaute in kaikhawm uh a, pawlkhat in tam, pawlkhat in tawm, kaikhawm uh hi. Ahih hangin amaute in lawhta khat tawh a teh uh ciangin a tam a kaikhawmte-a’ dimval lo a, a tawm a kaikhawmte-a’ dimlah tuan lo hi. A milipin a khamzah ding khawm uh hi. Moses in amaute’ kiangah, “Kuamah in zingsang dong koih kei un,” a ci hi. Ahih hangin amaute in Moses’ thu ngai lo uh hi. Mi pawlkhat in zingsang dong koih uh a, than omin ning hi. Amaute tungah Moses heh hi. Zingsang simin amaute in a khamzah ding ciat uh khawm uh hi. Ahi zongin ni a sat ciangin leilak a omte tuisuak hi. A ni guk ni-in amaute in an a zah nih, lawhta nih ciat, khawm uh hi. Mihon makaite khempeuh hong pai-in Moses kiangah a gen uh ciangin amah in amaute kiangah, “ Topa’ hong thupiak hih bang ahi hi: ‘Zing ciang pen a thupi-a tawlngak ni, Topa a dingin sabbath siangtho ni ahi hi. Na em dingte uh emin, na huan dingte uh huan unla, a omlai teng zingsang ciang dong koih un,’ ci hi,” ci-in a gen hi. Tua ahih ciangin amaute in Moses’ sawl bangin zingsang dong koih uh hi. Ning lo a, than zong tu lo hi. Moses in, “Tuni-in ne un; tuni pen Topa a dingin Sabbath ahi hi. Tuni-in a pualamah na mu kei ding uh hi. Note in ni guk sung na khawm ding uh a, ahi zongin sabbath ni ahi a ni sagih ni-in bangmah om lo ding hi,” a ci hi. A ni sagih ni-in a kaikhawm dingin mi pawlkhat kuankhia uh a, ahi zongin amaute in bangmah mu lo uh hi. Topa in Moses kiangah, “Ka thupiakte le ka thute zuih ding bang tanvei nial ding na hi uh hiam? Thei un! Topa in note’ tungah sabbath hong piazo hi. Tua ahih ciangin ni guk ni-in amah in note tungah ni nih khom ding an hong pia hi. Note na milipun nomau’ omna ciatah om un. A ni sagih ni-in ama omna panin kuamah paikhia kei hen,” a ci hi. Tua ahih ciangin a ni sagih ni-in mite tawlnga uh hi. Tu-in Israel mite in a min manna ci uh hi. Tua pen nannan tang tawh kibangin a mel kang a, a limna pen khuaizu tawh a kibawl mohpheng tawh kibang hi. Moses in, “ Topa’ thupiak hih bang ahi hi: ‘Egypt leitang panin note kong paikhiatpih lai-in sehnel gamah note kong vakna an na suanlekhakte un a muh theih nadingun na khang tawntungun lawhta dim khat kem un,’ ci hi,” ci-in a gen hi. Moses in Aaron kiangah, “Beel khat la inla, tua sungah manna lawhta dim khat koih inla, na khang tawntungun a kikem dingin Topa’ mai-ah koih in,” a ci hi. Topa in Moses a thupiak bangin Aaron in kep dingin Thuciamna Singkuang mai-ah a koih hi. Amaute a ten theih nading uh leitang a tun mateng, kum sawmli sung Israel mite in manna ne uh a, Kanaan gamgi a tun matengun manna bek a ne uh ahi hi. (Lawhta khat pen seu khat seh sawm suah seh khat ahi hi.) Topa’ thupiak bangin Israel mihon khempeuh Sin sehnel gam panin giahphual a ban banin sat uh a, Refidim-ah phual sat uh hi. Ahih hangin mite’ dawn ding tui om lo hi. Tua ahih ciangin mite in Moses’ tungah mawhna zong uh a, “Tui dawn ding hong pia in,” ci uh hi. Moses in amaute kiangah, “Bang hangin kei’ tungah mawhna hong zong na hi uh hiam? Bang hangin Topa ze-et na hi uh hiam?” a ci hi. Ahi zongin tua munah tui duhin mite dangtak uh a, Moses’ tungah mite phunin, “Kote le ka tate uh le ka ganhingte uh dangtakin a si dingin bang hangin Egypt panin hong paipih to na hi hiam?” a ci uh hi. Tua ahih ciangin Topa’ tungah Moses kiko a, “Hih mite bang cih ding ka hi hiam? Suang tawh kei hong deng dingin amaute kithawi uh hi,” a ci hi. Topa in Moses kiangah, “Israel upate pawlkhat samin mite’ mai-ah pai in. Nail na satna ciangkhut na khutin tawi-in pai in. En in, Horeb-a suangpi-ah nangma mai-ah ka ding ding hi. Nang in suangpi na sat ding a, mite in tui a dawn theih nadingin tua suang sung panin tui hong phulkhia ding hi,” a ci hi. Israel upate’ muhna-ah tua bangmahin Moses gamta hi. Israel mite’ mawhzonna le amaute in Topa ze-etin, “Eite’ lakah Topa a om mah ahi hiam?” a cihna hangun, tua mun pen Massah le Meribah, ci-in min kiphuak hi. Tua ciangin Amalek mite hong pai-in Israel mite tawh Refidim-ah kido uh hi. Moses in Joshua kiangah, “Eite a dingin mi teel inla, pai-in Amalek mite tawh kido in. Zing ciangin, Pasian in ka tawi dingin a hong sawl ciangkhut tawi-in mual dawnah ka ding ding hi,” a ci hi. Tua ahih ciangin Moses in ama tungah a gen bangin Joshua gamta a, Amalek mite tawh kido uh hi. Moses, Aaron, le Hur-te mual dawnah paito uh hi. Moses in a khut a sansak lai teng Israel mite in neh a, a khut a niamsak ciangin Amalek mite in neh hi. Ahih hangin Moses a khut kham hi. Tua ahih ciangin amaute in suangtum khat la-in ama nuai-ah koih uh a, tua suang tungah amah tu a, Aaron le Hur in a pang khat tuak panin ama khutte len uh hi. Tua ahih ciangin nitum mateng ama khutte kip hi. Joshua in Amalek le ama mite namsau tawh vatmai hi. Topa in Moses kiangah, “Keimah in mun khempeuh panin Amalek mite ka phiat siangtho nading thu phawk nadingin hih thu laibu sung khatah gelh inla, Joshua kiangah hih thu gen kik in,” a ci hi. Moses in biakna tau khat lamin a min dingin, “ Topa, keima zawhna lim ahi hi,” ci-in phuak a, “ Topa’ dial sang tawi un! Topa in a khang khangin Amalek mite do ding hi,” a ci hi. Moses’ sungpa, Midian siampi Jethro in Moses le ama mi Israel-te a dingin Pasian’ sepna, Topa in Egypt panin Israel mite a paikhiatpihna thu khempeuh a za hi. Adang khat min Eliezer ahi hi. (Bang hang hiam cih leh amah in, “Ka pa’ Pasian pen keimah hong huhpa hi a, Faro’ thah nading panin kei hong honkhia hi,” ci hi.) Pasian’ mual tungah giahphual a satna sehnel gam Moses kiangah Jethro in Moses’ tapate le a zi hong puak hi. Mi khat in Moses kiangah, “En in, na zi le a tapa nihte tawh nang kiangah na sungpa Jethro hong pai hi,” a cih ciangin Moses zong a sungpa a dawn dingin paikhia a, zahtakna pia-in amah a nam hi. Amaute khatlekhat omzia kidong tuak uh a, puanbuk sungah a pai uh hi. Tua ciangin Moses in a sungpa kiangah Topa in Israel mite’ hangin Faro’ tung le Egypt mite’ tungah a bawlte khempeuh, lampi-ah amau’ tungah a tung haksatna khempeuh le Topa in amaute a hotkhiatna thu a gen hi. Egypt mite’ khutsung panin amah in amaute a khahkhiatna, Israel mite tungah Topa in a hoih a bawlte khempeuh hangin Jethro lungdam hi. Jethro in, “Egypt mite le Faro’ khutsung panin note hong khahkhia Topa in thupha ngah tahen. Topa pen pasian dang khempeuh sangin a liatzawkna tu-in ka thei hi. Bang hang hiam cih leh mite tungah kiphatsakna tawh Egypt mite a gamtat lai takin amah in Egypt mite’ khutnuai panin mite khahkhia hi,” a ci hi. Moses’ sungpa Jethro in Pasian’ tungah meihal biakna le biakpiakna a bawl hi. Pasian’ mai-ah Moses’ sungpa tawh an a ne khawm dingin Israel upate khempeuh le Aaron hong pai uh hi. A zing ciangin mite’ thu a khen dingin Moses tu a, zingsang a kipan nitak dongin Moses’ kiimah mite a ding uh hi. Mite a dingin ama hihte khempeuh Moses’ sungpa in a muh ciangin amah in, “Mite a’ dinga nang’ sep hih pen a bangci ahi hiam? Bang hangin nang bek tu a, zingsang a kipan nitak dongin na kiimah mite khempeuh ding ahi uh hiam?” a ci hi. Moses in a sungpa kiangah, “Pasian’ thu a kan dingin kei’ kiangah mite hong pai uh hi. Amaute in thu a neih uh ciangin kei kiangah hong pai uh a, mi khat le a vengpa’ kikalah thu ka khen a, Pasian’ ngeina kipte le ama thukhennate amaute ka theisak hi,” a ci hi. Tua ciangin Moses’ sungpa Jethro in ama kiangah, “Nangma hihzia hoih lo hi. Nang le na kianga om mite in na zawngkhal lawh ding uh hi. Bang hang hiam cih leh tua nasep nang a dingin gik lua hi. Nang bek in na sem khinzo kei hi. Tu-in ka thu hong ngai in; thu kong lak ding hi. Pasian in nang hong ompih tahen. Nang pen Pasian’ mai-ah mite’ tangin pai-in, amau’ thute Pasian’ kiangah na gen ding hi. Nangmah in ngeina kipte le thukhennate amaute na hilh ding a, amau’ lam pai nading le amau’ sep dingte amaute na theisak ding hi. Tua tham loin, mi khempeuh lak panin Pasian a zahtak mi, a muanhuai mi le sumgolh a mudah mi, mi siamte na teelkhia ding hi. Tua bang mite pen a tul, a za, a sawmnga, a sawmte tungah a uk dingin na koih ding hi. Mite’ thu amaute khensak tawntung in. Amaute in thu liante bek nang kiangah hong puak ding uh a, ahi zongin thu neute amau mah in khen tawm ding uh hi. Tua hileh nang a dingin baih zaw ding a, amaute in na vangik hong puakpih ding uh hi. Hih bangin hih lecin Pasian in thahatna hong pia ding a, nangmah in na sem paisuakzo ding hi. Tua tham loin hih mite khempeuh zong amau’ omna-ah lungnuam takin ciah thei ding uh hi,” a ci hi. Tua ahih ciangin Moses in a sungpa’ thu ngai-in ama gen khempeuh a hih hi. Israel mi khempeuh sung panin Moses in mipil mi siamte teel a, mite a tul, a za, a sawmnga, a sawmte tungah a ukin mite’ lutangin amaute a bawl hi. Amaute in mite tungah a tawntungin thu khen uh hi. Amaute in thu haksate bek Moses tungah puak uh a, ahi zongin thuneute amaute in khen tawm uh hi. Tua ciangin Moses in a sungpa ciahkhiasak a, Jethro zong ama gamah a ciahkik hi. Egypt gam panin Israel mite a paikhiat zawh kha thumna a ni masa ni-in amaute Sinai sehnel gam tung uh hi. Refidim panin amaute ding khia-in Sinai gam a tun uh ciangin, amaute in sehnel gam tua mual mai-ah giahphual a sat uh hi. Pasian kiangah Moses paito hi. Topa in mual panin amah sam a, “Jakob’ suanlekhak Israel mite tungah hih bangin na gen ding hi: Egypt mite tungah ka bawlna le muvanlai in a kha tawh a note a puak bangin note hong pua-in keima kiangah kong paipihna na mu khin uh hi. Tua ahih ciangin tu-in note in ka thu mangin ka thuciamna na zuih uhleh mite khempeuh lak panin note pen keima mi na hi ding uh hi. Bang hang hiam cih leh leitung khempeuh keima a’ hi a, note pen keima siampi nasep a sem minam, le minam siangtho na hi ding uh hi. Israel mite tungah hih thute na gen ding ahi hi,” a ci hi. Tua ahih ciangin Moses hong pai-in upate sam a, Topa in amah a thupiak hih thute khempeuh amaute’ mai-ah a sung hi. Mi khempeuh in, “ Topa’ gensa khempeuh ka hih ding uh hi,” ci-in dawng khawm uh hi. Moses in mite’ thugente Topa’ tungah a gen hi. Topa in Moses tungah, “En in, nang kong hopih ciangin mite in a zak theih nading le nang zong hong up theih nadingun meii sahpi sungah nang kiangah kong pai ding hi,” a ci hi. Tua ciangin Moses in mite’ thugente Topa’ tungah a gen hi. Topa in Moses kiangah, “Mite kiangah pai inla, tuni le zingciang sungteng amaute siangthosakin, amau’ puante amau mah sawpsakin, a ni thum ni-in a baihsa-in om un. Bang hang hiam cih leh a ni thum ni-in Sinai Mual tungah mite khempeuh’ muhna-ah Topa hong paisuk ding hi. Nangmah in mite a dingin dalna khat a kimkotah na koih ding a, ‘Mualtungah pai loin, a gamgi na lawnkhak loh nadingun kidawm un; mual a lawng peuhpeuh kithat ding hi. Khut peuhmah in tua mi kithat ding pa lawngkha lo ding a, suang tawh kidenglum ahih kei leh kikaplum ding hi. Ganhing hitaleh mihing hitaleh kihing khawi lo ding hi,’ na ci ding hi. Peengkul sauveipi hong kitum ciangin amaute mualtungah hong paito ding uh hi,” a ci hi. Tua ahih ciangin mualtung panin mite kiangah Moses paisuk a, mite siangthosak hi. Amaute in a puante uh sawp uh hi. Amah in mite kiangah, “Ni thum ni ciangin a baihsa-in om un; numei tawh lumkhawm kei un,” a ci hi. A ni thum ni zingsang ciangin van gingin khua phia a, mualtungah meii sahpi kai a, nakpitakin a ging peengkul kitum ahih manin giahphual a om mi khempeuh ling uh hi. Tua ciangin Moses in giahphual panin Pasian a dawn dingin mite paikhiatpih a, amaute a om nading mual bulah om uh hi. Meikhu in Sinai Mual tuamcip hi. Bang hang hiam cih leh mei sung tua mualtungah Topa a kumsuk hi. A khu, meiphualpi khu bangin kahto a, a mual buppi nakpitakin kiling hi. Peengkul aw a nak gin’ semsem laitakin Moses pau a, Pasian in vanging sungah amah dawng hi. Sinai Mual dawnah Topa hong paisuk hi. Topa in tua mual dawnah Moses sam a, Moses zong paito hi. Topa in Moses kiangah, “Amaute in Topa a en dingin hong kantanin amaute tampi tak si kha ding uh ahih manin paisuk inla, mite hilhkhol in. Amaute’ tungah Topa hehlua kha ding ahih manin, Topa’ kiangah hong pai siampite zong amau mah kisiangthosak tawm hen,” a ci hi. Moses in Topa’ tungah, “Sinai Mual dongah mite hong pai thei lo hi. Bang hang hiam cih leh nangmahmah in kote nong thuhilh a, ‘Mual kimkotah dalnate bawl inla, siangthosak in,’ nong ci hi,” a ci hi. Topa in ama kiangah, “Paisuk inla, Aaron hong paipihto in. Ahih hangin amaute’ tungah amah hehlua kha ding ahih manin Topa kiang dongah a pai dingin siampite le mite paisuaksak kei in,” a ci hi. Tua ahih ciangin mite kiangah Moses paisukin amaute kiangah a gen hi. Pasian in hih thute khempeuh gen a, “Kei pen salsuahna Egypt gam panin note a hong paikhiatpih Topa na Pasian uh ka hi hi. “Keimah longal pasian dang na bia kei ding uh hi. “A kiseek milim hitaleh, tunga vantung hitaleh, nuai-a leisung hitaleh, leinuai-a om tui sungah hitaleh a om na khat peuhpeuh a sun khat peuhpeuh note a dingin na bawl kei ding uh hi. Tuate’ mai-ah na kun kei ding uh a, tuate na bia kei ding uh hi. Bang hang hiam cih leh keimah note’ Topa Pasian, a aam Pasian ka hi a, kei hong mudahte’ tungah pate’ mawhna tate’ tungah khang thum khang lina dongin thuk-in, ahih hangin kei hong itin ka thupiakte a zui mi a tul tampite tungah itna kip a lak pa ka hi hi. “ Topa note’ Pasian’ min a sia lamin na zang kei ding uh hi. Bang hang hiam cih leh Topa in ama min a zang khialte gim pia ding hi. “Sabbath ni a siangtho-a zat ding phawk un. Ni guk sung nomau’ na semin na nasep ding khempeuh uh na hih ding uh hi. Ahi zongin a ni sagih ni pen Topa note’ Pasian’ Sabbath ni ahi hi. Tua ni-in note, na tapate, na tanute, na nasempate, na nasemnute, na ganhing uh ahi a, peemtate in ahi zongin na bangmah na sem kei ding uh hi. Bang hang hiam cih leh a ni guk sung tengin Topa in van le lei, tuipi le tuate sunga om khempeuh bawl a, a ni sagih ni tawlnga hi. Tua ahih ciangin Topa in Sabbath ni thupha pia-in siangthosak hi. “ Topa na Pasian un note hong piak leitang tungah na khan uh a sau theih nadingin na nu le na pa uh zahtak un. “Mi na that kei ding uh hi. “Nulepa mawhna na bawl kei ding uh hi. “Na na gu kei ding uh hi. “Na vengte uh langkhatah a man loin teci na pang kei ding uh hi. “Na vengte uh inn na deihgawh kei ding uh hi. Na vengte uh zi hitaleh, ama nasempa hitaleh, ama nasemnu hitaleh, ama bawngtal hitaleh, ama la hitaleh, na vengte a’ ahi na khat peuhpeuh na deihgawh kei ding uh hi,” a ci hi. Tu-in mite khempeuh in vangingte, peengkul aw, le mual meikhu thu a theihtel uh ciangin, lau-in a ling uh hi. Amaute a gamla-ah ding uh a, Moses kiangah, “Nangmah in kote kiangah thu hong gen in; kote in ka ngai ding uh hi. Ahi zongin kote si kha ding ka hih uh ciangin ko tungah Pasian hong gensak kei in,” a ci uh hi. Moses in mite kiangah, “Lau kei un; bang hang hiam cih leh note khialkha loin amah na kihtak theih nadingun note’ tungah a laktel dingin Pasian hong pai ahi hi,” a ci hi. Pasian’ omna meii sah nai-ah Moses a pai laitakin mite a gamla-ah a ding uh hi. Topa in Moses kiangah, “Nangmah in Israel mite tungah hih bangin na gen ding hi: ‘Vantung panin note kong hopihna note mahmah in na thei khin uh hi. Note in kei tawh nong biakkhop dingun ngun pasian-te le kham pasian-te na bawl kei ding uh hi. Note in keima a dingin lei tawh biakna tau khat bawl unla, tua tungah na meihal biaknate uh le thunuama na biaknate uh, na tuute uh le na bawngtalte uh pia un. Keima min a kiphawk nading munin ka bawlna peuhmahah note kiangah keimah hong pai-in note thupha kong pia ding hi. Note in keima a dingin suang tawh biakna tau na bawl uhleh, a kiseek suang tawh na bawl kei ding uh hi. Bang hang hiam cih leh na nazatte uh tawh na va suk uhleh a ninsak na hi uh hi. Tua tungah na seelsim uh a kidawk khak loh nadingin ka biakna tau tung kahtoh nading kahlei a kulin na sang bawl kei ding uh hi,’ ci in. “Tu-in hihte pen amaute’ tungah na piak ding biakna ngeina kipte ahi hi. Hebru mi sila khat na lei uh ciangin, amah in kum guk sung na hong sepsak ding a, a kum sagihna ciangin bangmah hong pia loin a suakta-in paikhia ding hi. Amah guakin hong pai ahihleh amah guak mahin paikhia ding a, zi neisa-in hong pai ahihleh amah tawh a zi zong paikhia ding hi. A topa in amah zi guan a, tua nu in amah tawh tapate ahi a, tanute ahi zongin a neih leh, a zi le a tate pen a topa a’ hi ding a, amah guakin paikhia ding hi. Ahih hangin sila in a kitel takin genin, ‘Ka topa, ka zi, le ka tate ka it hi; a suakta-in ka paikhia kei ding hi,’ a cih leh, tua ciangin a topa in thukhente kiangah amah paipih ding hi. Amah in kongkhakah ahi a, kongkhak khuam-ah ahi zongin amah paipih ding hi. A topa in phimpi khat tawh ama bil vuhsak ding a, amah in a nuntak tawntung ama na sepsak ding hi. “Mi khat in a tanu sila-in a zuak ciangin, tua nu pen sila pasalte bangin paikhia lo ding hi. A topa in ama zi dingin a sehsa tua numei in amah a lungkimsak kei leh, amah in tua nu a pa kiang mahah zuakkik ding hi. Amah, tua nu tungah citakin gamta lo ahih manin, gamdang mi khat tungah tua nu a zuak theih nading thu nei lo ding hi. Mi khat in a tapa a dingin sila numei a lei leh, amah in tanu bangin tua nu bawl ding hi. Amah in zi dang khat a lakthuah leh, a zi masa’ annek, a puansilh, ahih kei leh lupkhop nading thuneihna khiam lo ding hi. Amah in hih thu thumte tuanu a dingin a bawl kei leh, sum hong piak kul lo, bangmah a kul loin tua nu paikhia thei ding hi. “Mi khat satin a sisak mi peuhpeuh kithat ding hi. Ahih hangin amah in a thah sawm hi lo a, a thah khak ahihleh, amah a tai theih nadingin note a’ ding mun khat ka seh ding hi. Ahih hangin mi khat in midang khat thah ding tumin a thah leh, amah na thah theih nadingun note in ka biakna tau a belhna nangawn panin amah na la teitei ding uh hi. “Ama pa hitaleh ama nu hitaleh a sat peuhmah kithat ding hi. “Zuak ding ahi a, sila-in neih ding ahi zongin mi a gu mi peuhmah kithat ding hi. “Ama pa hitaleh ama nu hitaleh a samsia mi peuhmah kithat ding hi. “Mite kitawng a, a khat in adang khat suangtum khat tawh ahi a, ama khuttum tawh ahi zongin tumin, mipa a sih loh hangin lupna ngakin, tua ciangin mipa thozo-in ama ciangkhut tawh a vakkhiatkik zawh nakleh, amah a tum pa siang ding hi. Amah in ama hun bei sungteng tang ding bek ama tungah loh ding a, amah damsiangsak ding hi. “Mi khat in molhtum khat tawh ama sila ahi pasal hitaleh numei hitaleh satin a phualah a sih pah leh, amah gim kipia ding hi. Ahih hangin ni khat ahi a, ni nih ahi zongin sila a nuntak leh, amah gim piak ding hi lo hi. Bang hang hiam cih leh sila pen ama neihsa ahih manin sila a sih ciangin amah a sumh khin ahi hi. “Mite kitawngin numei naupaii khat liamsak a, tatolhin; ahi zongin siatna in a zuihbeh kei nakleh, tua nu’ pasal in ama tunga a cihzah tawh kituakin tua numei a liamsak mi kigam ding a, thukhente’ khenna bangin amah liau ding hi. Siatna khatpeuh in a zuihbeh leh, tua ciangin nuntakna tang ding nuntakna, mit tang ding mit, ha tang ding ha, khut tang ding khut, khe tang ding khe, meikang tang ding meikang, liamna tang ding liamna, siatna tang ding siatna pia ding hi. “Mi khat in ama sila ahi pasal hitaleh numei hitaleh a mit satin a suksiatkhak leh amah in tua mit’ hangin sila suaktasakin paikhiasak ding hi. Amah in a sila ahi pasal hitaleh numei hitaleh a ha a tupkhiat leh, amah in tua ha’ hangin sila suaktasakin paikhiasak ding hi. “Bawngtal khat in pasal hitaleh numei hitaleh a ki tawh a piklup ciangin, a bawngtal kidenglum ding a, a sa kine lo ding hi. Ahih hangin bawngtal nei pa siang ding hi. Ahih hangin a hun beisa-ah bawngtal in mi si thei a, a nei pa kihilh napi-in a khumcip kei a, tua bawngtal in pasal ahi a, numei ahi zongin a thah leh, bawngtal kidenglum ding a, a nei pa zong kithat ding hi. Ama tung pan tatkhiatna sum a kinget leh, ama nuntakna tatkhiat nadingin ama tungah a kingen zahzah amah in pia ding hi. Tua bawngtal in mi’ tapa ahi a, tanu ahi zongin a ki tawh a pik leh hih ngeina tawh kizui-in kigamta ding hi. Bawngtal in sila ahi pasal hitaleh numei hitaleh khat peuhpeuh a ki tawh a pik leh, a nei pa in amau’ topa’ tungah ngun shekel sawmthum pia ding a, bawngtal kidenglum ding hi. “Mi khat in dum honsa-in a nusia ahi a, mi khat in dum a tawh ciangin siin loin om ahi zongin, bawngtal hitaleh la hitaleh dum sungah a kiat leh, dum nei pa in loh ding hi. Amah in a nei pa tungah sum pia ding a, ganhing luang pen ama a’ hi pah ding hi. “Mi khat’ bawngtal in adang khat’ bawngtal liamsakin a sih leh, amaute in a hing pen zuak ding uh a, tua man hawm ding uh hi. A ganhing si pen zong amaute in hawm ding uh hi. Tua bang hi lo a, bawngtal in mi si ngei hi, ci-in kithei napi a nei pa in a khumcip kei leh, amah in bawngtal tang ding bawngtal pia ding a, a si ganhing pen amah in tang ding hi. “Mi khat in lo khatah ahi a, leenggui lo-ah ahi zongin gan tasak a, a ganhing khahin midang khat’ lo-ah a tat leh, amah in ama lo le ama leenggah lo panin a piangte tawh loh ding hi. “Mei kuangin gam kang a, a kikhol an ahi a, a ding lai an ahi a, lo ahi zongin a kat leh, mei a kangsak pa in a cing takin loh ding hi. “Mi khat in a vengte kiangah sum ahi a, van ahi zongin kep ding ap a, tua mipa’ inn panin a kiguk leh, a gu pa a kimuh leh amah in a zah nih pia ding hi. A gu pa a kimuh kei leh a vengpa’ vante amah in gu hiam, gu lo hiam cih a kitel nadingin thukhente kiangah inn nei pa in kiciamna bawl ding hi. “Thu neihna khat peuhpeuh, bawngtal ahi a, la ahi a, tuu ahi a, puansilh ahi zongin, a mang na khat peuhpeuh, mi khat in, ‘Hih pen kei a’ hi,’ a cihna thu-ah, alang nihte’ thu pen thukhente’ mai-ah tung ding hi. Thukhente in a mawhsak mipa in a vengpa tungah a zah nih pia ding hi. “Mi khat in ama vengte tungah la ahi a, bawngtal ahi a, tuu ahi zongin, ganhing khat peuhpeuh kep dingin a piak a, kuama muh lohin tua ganhing a si a, a liam a, a kihawlkhia ahi zongin ahihleh, amah in a veng pa’ neihsa a gu kha hiam cih a kitheih nadingin amau tegel’ kikalah Topa tawh kiciamna om ding hi. A nei pa in tua kiciamna sang ding a, amah in loh lo ding hi. Ahih hangin ama tung panin a kigu ahihleh, a nei pa tungah amah in loh ding hi. Gamsa in a balzan ahihleh, lahtel nadingin tua ganhing paipihsak in. A kibalzan ganhing amah in loh lo ding hi. “Mi khat in a vengte’ gan khat peuhpeuh kawm a, a nei pa om loin a liam a, a si zongin, amah in a kicingin loh ding hi. A nei pa tawh a omkhawm ahihleh amah in loh lo ding hi. A kikawm ahihleh a kikawm bangin pai ding hi. “Mi khat in a kidong nai lo nungak khat zolin amah tawh a lupkhop leh, amah in tua nu’ man ding moman letsong pia ding a, ama zi suak ding hi. A numei’ pa in ama tungah tua nu a piak nop kei leh zong, tua mipa in nungak moman letsong zah numei’ pa’ tungah sum pia veve ding hi. “Numei aisan nu na hingkhawi kei ding uh hi. “Ganhing tawh a mawh peuhmah kithat ding hi. “ Topa bek simloh pasian dang khat peuhpeuh tungah biakna a pia mi peuhmah kithat ding hi. “Khualmi khatpeuh na bawlsia kei ding uh a, na nengniam kei ding uh hi. Bang hang hiam cih leh note zong Egypt leitangah khual mite na hi ngei uh hi. Meigong numei ahi a, tagah ahi zongin na gimsak kei ding uh hi. Note in amaute na gimsak uh a, amaute keima tungah hong kiko leh, keimah in amau’ kikona ka za taktak ding hi. Ka hehna so-in namsau tawh note kong that ding a, na zite uh meigong suakin, na tate uh tagah suak ding hi. “Note tawh a om, a zawng keima mite khat peuhpeuh tungah sum leitawi na piak uhleh, ama tungah sum leitawi a piapa bangin na om kei ding uh a, ama tung panin a meet na dok kei ding uh hi. Khapna ahi na vengpa’ puan silh lai na lak ngei khak leh nitum ma-in ama tungah na pia kik ding hi. Bang hang hiam cih leh ama silh ding tua bek hi a, tua pen ama pumpi a dingin a puan neihsun ahi hi. Amah bang dang tawh lum ding ahi hiam? Amah kei tungah hong kiko leh ke’n ka za ding hi. Bang hang hiam cih leh keimah in hehpihna ka nei hi. “Thukhente na simmawh kei ding uh a, na mite uh a ukpa zong na samsia kei ding uh hi. “Na anlakna pan uh le sathau le leenggah na suknate uh panin a leetkhiate piak khiat ding na zekai kei ding uh hi. “Na tapa cilte uh keima tungah nong pia ding uh hi. Na bawngtalte uh le na tuute uh panin zong tua bangmahin nong pia ding uh hi. Ni sagih sung a pi tawh om ding a, a ni giat ni-in kei tungah nong pia ding uh hi. “Note pen kei’ tungah hong ki-ap mite na hi ding uh hi. Tua ahih ciangin gamlakah gamsate in a balzan sa peuhmah note in na ne kei ding uh a, tua bang sate uite na lot ding uh hi. “Thuman lo na genkhia kei ding uh hi. Elna tawh teci pang dingin migilo pa tawh na kipawl kei ding uh hi. Siatna a bawl dingin mihon na zui kei ding uh hi. Thutang a hei khia dingin mihonpi nung zui-in thu neihna-ah teci na pang kei ding uh hi. Ama thu neihna-ah mizawng pa na langneih kei ding uh hi. “Na langneih mite’ bawngtal ahi a, a la ahi zongin a gammang na tuah uhleh ama kiangah na hawlkik ding uh hi. Nangmah a hong mudah pa’ la a van tawh a puk na muh leh a la tawh amah na nusia kei ding a, tua la phot toh ding na huh ding hi. “Ama thu neihna-ah mizawng pa a thutang kimlai na lelsak kei ding uh hi. A man lopi a mi mawhsak ding panin kikem unla, a dikpa le thuman pa that kei un. Bang hang hiam cih leh a gilo mi ka khah kei ding hi. Sumgolh na la kei ding uh hi. Bang hang hiam cih leh sumgolh in uliante’ mit tawsak a, thuman mite’ thu heikhiatsak hi. “Khualmi na nengniam kei ding uh hi. Khualmi’ lungsim na thei uh hi. Bang hang hiam cih leh note zong Egypt gamah khualmi na hi ngei uh hi. “Note in na leitang uhah kum guk sung khai tuhin a piangte na kaikhawm ding uh hi. Ahih hangin a kum sagihna ciangin, nomau’ mi a zawngte in a nek theih nadingin leitang tawlngasakin, lokhulin na omsak ding uh a, gamlak ganhingte in mizawngte’ nek loh teng ne thei ding uh hi. Na leenggui lote uh le na oliv lote uh zong tua bangmahin na hih ding uh hi. “Ni guk sung na nasep uh na sem ding uh hi. Ahih hangin na bawngtal le na la in tawlngakna a neih theih nading le, na nasem numei’ tapa le khual mite in thathak a ngah theih nadingin a ni sagih ni-in na tawlnga ding uh hi. Note’ tunga kong gente khempeuh thudon un; pasian dangte’ min genin nei kei unla, na kam sung panun zong tua bangte kizasak kei un. “Kum khatin thumvei, keima a dingin pawi na bawl ding uh hi. Silngo sawh loh anlum pawi na bawl ding uh hi. Keimah in note kong thupiak bangin Abib kha sung a kisehsa hun ciangin ni sagih sung silngo sawh loh anlum na ne ding uh hi. Bang hang hiam cih leh tua kha sungin Egypt panin note na paikhia uh hi. Khut hawmguak tawh keima mai-ah kuamah hong kilak lo ding hi. “Note in lo-a na tuh uh, na nasepna uh a gah masa, anlak pawi na bawl ding uh hi. Note in lo panin na nasepna uh a gah na kaihkhop uh kum bei ciangin an kaihkhopna pawi na bawl ding uh hi. Topa Pasian ’ mai-ah pasal khempeuh kum khatin thumvei kilaak ding uh hi. “Note in silngo sawh anlum tawh keimah biakpiakna si na pia khawm kei ding uh a, a ganhing thau zong zingsang dong na omsak kei ding uh hi. “Note in na anpalte uh lakah a tung masa pen Topa na Pasian uh inn-ah na paipih ding uh hi. “Note in a pi’ nawizu tawh keelno na huan kei ding uh hi. “En un, keimah in ka bawlsa munah note hong paipih ding le lamkalah note hong cing dingin note’ mai-ah vantungmi khat ka sawl hi. Amah thudonin ama aw ngai unla, amah lehdo kei un. Bang hang hiam cih leh amah in note’ thu palsatna hong maisak lo ding hi. Bang hang hiam cih leh keima min tawh nasem ahi hi. “Ahih hangin note in ama aw limtakin ngai-in keima gen bangin na gamtat uhleh na galte uh’ tungah gal ka hi ding a, na langte uh’ tungah lang ka hi ding hi. “Note’ mai-ah ka vantungmi pai-in Amor mite, Hit mite, Perez mite, Kanaan mite, Hiv mite, le Jebus mite kiangah note hong paipihin, keimah in amaute ka phiat khiat ciangin, amau’ pasian-te’ mai-ah note kun loin, tuate bia loin, amau’ gamtat bangin na gamta kei ding uh a, note in amaute lawnthal mang kiuhkeuhin amau’ milim suang khuampite na satnen gawp ding uh hi. Note in Topa na Pasian uh nong bia ding uh a, keimah in na an uh le na tui uh thupha ka pia ding hi. Keimah in note’ lak panin cinatna ka la khia ding hi. Note’ leitangah kuamah nausia om lo ding a, a ciing zong om lo ding hi. Note kong teeksihsak ding hi. “Keimah hong kikihtakna note’ mai-ah paisakin note’ phutkhak ding mi khempeuh ka kitokgawpsak ding a, na galte khempeuh uh lehhei-in note’ kiang panin ka taisak ding hi. Note’ mai panin Hiv mite, Kanaan mite, le Hit mite a hawlkhia dingin note’ mai-ah tunpi ka sawlkhia ding hi. Leitung gamkhing suakin gamlak ganhingte note’ langkhatah tampi pha kha ding ahih manin note’ mai panin kum khat sungin amaute ka hawlkhia kei ding hi. Note khangin tampi pha-in leitang na luah matengun note’ mai panin tawm tawmin amaute ka hawlkhia ding hi. Keimah in San Tuipi panin Filistia mite’ tuipi ciang le sehnel gam panin Eufratis gun ciang dongah na gamgite uh ka phut ding hi. Bang hang hiam cih leh tua gam a teng mite note’ khut sungah kong pia ding a, note in na mai uh panin amaute na hawlkhia ding uh hi. Amaute ahi a, amau’ pasian-te tawh ahi zongin thuciamna na bawl kei ding uh hi. Amaute in kei’ tungah note hong khialsak kha ding ahih ciangin note’ leitang tungah amaute teng lo ding uh hi. Bang hang hiam cih leh note in amau’ pasian-te na biak uhleh note’ tungah thangzak khat hong hi taktak ding hi,” a ci hi. Tua ciangin Topa in Moses kiangah, “Nang le Aaron, Nadab, Abihu le Israel upate sung pan sawmsagih tawh keima kiangah hong paito unla, a gamla panin kunin hong bia un. Topa’ nai-ah Moses bek hong pai ding hi. A dangte a nai-ah hong pai lo ding a, mihonte in mual ciang dong hong neh lo ding uh hi,” a ci hi. Moses hong pai-in Topa’ thugente khempeuh le biakna ngeinate khempeuh mite kiangah a gen hi. Mi khempeuh in aw kikhatin dawng uh a, “ Topa’ gensa thute khempeuh ka hih ding uh hi,” a ci uh hi. Moses in Topa’ thugente khempeuh a gelh hi. Zingsangin amah tho baih a, mual bulah biakna tau khat lamin, Israel minam sawm le nihte tawh kituakin khuam sawm le nih a phut hi. Amah in Israel mi tangvalte sawlin, tuate in meihal biakna le thunuama biakna bawngtalte Topa’ tungah pia uh hi. Moses in a sisan kimkhat la-in, kuangte sungah koih a, sisan kimkhat biakna tau tungah a theh hi. Tua ciangin amah in thuciamna laibu la-in, mite’ zakin tua laibu a sim hi. Amaute in, “ Topa’ gensa khempeuh kote in ka hih ding uh a, kote ka thumang ding uh hi,” a ci uh hi. Tua ciangin Moses in sisan la-in mite’ tungah theh a, “Hih thute khempeuh tawh kizui-in Topa in note tawh a bawlsa thuciamna sisan en un,” a ci hi. Tua ciangin Moses le Aaron, Nadab, Abihu le Israel upate sung pan sawmsagih paito uh a, amaute in Israel Pasian mu uh hi. Ama khe nuai-ah a sianthona van mel tawh a kibang, sapfaia suangmanpha tawh a kibawl suangphahpek bangpian om hi. Amah in Israel mi makaite gimna ngahsak lo hi. Amaute in Pasian mu uh a, tua ciangin an ne-in tui dawn uh hi. Topa in Moses kiangah, “Keima kiang mualtungah hong paito inla, tua lai-ah ngak in. Amaute a kihilh nadingin keima gelhsa, thukham le thupiakna tawh, suangpek nang tungah kong pia ding hi,” a ci hi. Tua ahih ciangin ama nasempa Joshua tawh Moses kithawi uh a, Pasian’ mual tungah paito uh hi. Amah in upate kiangah, “Note’ kiangah kong paikik matengun hih lai-ah kote hong ngak un. En un, note tawh Aaron le Hur om hi. Thu nei peuhpeuh amaute’ kiangah paisak un,” a ci hi. Tua ciangin mualtungah Moses paito a, meii in mual a tuam hi. Topa’ minthanna vang pen Sinai Mual tungah kinga a, meii in ni guk sung tua mual a tuam hi. A ni sagih ni-in amah in meii lak panin Moses a sam hi. Tu-in Topa’ vangliatna vang pen Israel mite’ muhna-ah mualvum dawn a kangtum meikuang tawh kibang hi. Meii sungah Moses tum a, mualtungah paito hi. Moses sun sawmli le zan sawmli sung mualtungah a om hi. Topa in Moses kiangah, “Amaute in kei a dingin biakna hong paipih nadingin Israel mite’ kiangah gen in. A pia nuam mi peuhmah tung panin kei a dingin biakna na sang ding hi. Amaute’ tung panin na san ding biakna hih bang ahi hi: Kham, ngun, sumngo, a dum, a dupsan, a ausan puante le a kopin a kikhuk khau tawh a kigan puan hoih, keelmul, a kisansak tuutal vunte, keelvunte, singkha sing, meivakte a’ ding sathau, nilh sathau ding le paknamtui dingin a namtui nate, siampipuan le awmdal a bulh dingin onik suangte ahi hi. Amaute’ lakah kei ka om theih nadingin kei a dingin biakbuk khat amaute bawlsak in. Biakbuk le a nazatte’ lim ding tawh kisai-in nang’ tungah kong lahte khempeuh tawh kituakin nangmah in na bawl ding hi. “Amaute in singkha sing tawh singkuang khat bawl ding uh hi. A dung pi thum le letmat kua, a vai pi nih le letmat thum, a sanna pi nih le letmat thum hi ding hi. Nangmah in kham citak tawh tua singkuang na zut ding a, a sung le a pua na zut ding hi. A tung kimkotah a geihual kham tawh na bawl ding hi. Nangmah in tua singkuang a dingin kham kual li sungin a singkuang khe li tungah tuate na bulh ding a, a pang khatah kual nih, a pang langkhatah a kual nih mah na bulh ding hi. Nangmah in singkha singzawl na sui ding a, tuate kham tawh na zut ding hi. Singkuang puak nadingin singkuang panga kualte sungah a zawlte na khum ding hi. Singkuang’ kualte sungah a zawlte omsuak ding a, tuate kilakhia lo ding hi. Nang’ tunga kong piak ding thuciamna nangmah in singkuang sungah na koih ding hi. “Tua ciangin kham citak tawh hehpihna tokhom khat na bawl ding a, a dung pi thum le letmat kua, a vai pi nih le letmat thum hi ding hi. Nangmah in kham tawh kherub nih na bawl ding a, hehpihna tokhom mong tuakah a kiseek tua kherub-te na omsak ding hi. Mong khatah kherub khat, a mong langkhatah kherub khat mah bawl in. Hehpihna tokhom tawh a kizomin a mong tuakah kherub na bawl ding hi. Kherub-te in a khate uh a tungah zal ding uh a, amau’ khate tawh hehpihna tokhom liimsunin amaute khatlekhat kimaingat ding uh hi. Hehpihna tokhom lamah kherub-te’ mai nga ding uh hi. Singkuang tungah hehpihna tokhom na koih ding a, singkuang sungah nang kong piak ding thuciamna na koih ding hi. Hehpihna tokhom tung, thuciamna singkuang tunga om kherub nihte kikal panin nang kong hopih ding a, Israel mite a dingin nang’ tungah kong piak ding thute khempeuh nang’ tungah kong gen ding hi. “Nangmah in singkha sing tawh sabuai khat na bawl ding a, a dung pi thum, a vai pi khat le alang, a sanna pi nih le letmat thum hi ding hi. Kham citak tawh na zut ding a, a kimkotah a geihual kham tawh na bawl ding hi. Nangmah in khutpeek cia a zai zawl peek khat a kimkotah na bawl ding a, tua zawl peek kimkotah a geihual na bawl ding hi. Nangmah in tua sabuai a dingin kham kual li na bawl ding a, tuate pen a kiu li, a khe lite-ah na gak ding hi. Sabuai puak nading zawlte a len dingin a zawl peek gei-ah a kualte om ding hi. Nangmah in singkha sing zawlte bawlin kham tawh na zut ding a, hihte tawh sabuai kipua ding hi. Paknamtui a dingin a kuangdaite le a pakante, tui phih nadingin a thawl gongbakte, le a kuang-ukte na bawl ding hi. Kham citak tawh tuate na bawl ding hi. Keima mai sabuai tungah Ompihna Anlum na koih tawntung ding hi. “Kham citak tawh meivakkhuam khat na bawl ding hi. Meivakkhuam bul leh a kungte pen a kiseek nate tawh kibawl ding hi. A haite, a nunte le a paakte, tua tawh sakhat hi khawm ding uh hi. A pang panin hiang guk meengkhia ding a, a pang khatah meivakkhuam hiang thum meengkhia-in, a pang langkhatah meivakkhuam hiang thum mah meengkhia ding hi. Hiang khat ciat tungah a nun le a pak a om, almond gah tawh a kibang hai thum le adang hiang khat ciat tungah a nun le a pak a om, almond gah tawh a kibang hai thum mah kibawl ding hi. Tua ahih ciangin hiang gukte meivakkhuam panin meengkhia ding hi. A meivakkhuam tung mahmahah a nunte le a paakte tawh a om, almond bangin a kibawl hai li omin, meivakkhuam panin hiang guk a kopte’ bulah tua tawh sakhat ahi nun khat om ding hi. Amau’ nunte le a hiangte, sakhat hi ding a, a vekpi-in kham citak a kiseek sakhat hi ding hi. Nangmah in ama a dingin meivak sagihte na bawl ding a, ama omna mai teng khua a vaksak dingin meivakte kikoih ding hi. A taitehte le a kuangte kham citak hi ding hi. Kham citak tawi sawmnih le tawi khat val a gik tawh hih nazatte khempeuh kibawl ding hi. Mualtungah nang’ tunga hong kilak hih nate pen amau’ lim ding bangin na bawl ding thei in. “Tua tham loin a kopin a kikhuk khau hoih tawh a kigan dalna puan sawm le a dum, a dupsan, le a ausan khau a kigan puan tawh biakbuk na bawl ding hi. Hoihtakin a kibawl kherub-te tawh tuate na bawl ding hi. Dalna puan a dung pi sawmli le pi nih hi ding a, dalna puan a vai pi guk hi ding hi. Dalna puan khempeuh kikim ciat ding hi. Dalna puan ngate khatlekhat kikhuituah ding hi. A kikhuituah a masa dalna puan a nawlnung pen’ nawl dung sukah khaudum tawh a bilvangte na bawl ding hi. Tua bangmahin a kikhuituah a nihna dalna puan a nawlnung pen’ nawl dung suk mahah a bilvangte na bawl ding hi. Dalna puan khat tungah bilvang sawmnga bawlin, a kikhuituah a nihna dalna puan nawlah bilvang sawmnga mah na bawl ding a, a bilvangte khatlekhat kitang ding uh hi. Biakbuk pen bup khat a suah theih nadingin nangmah in kham kilhna sawmnga bawlin, tua kilhnate tawh dalna puan khatlekhat na kimatsak ding hi. “Biakbuk a tung khuh nadingin keelmul tawh puante zong na bawl ding a, puan sawm le khat na bawl ding hi. Tua puan a dung pi sawmli le nga, a vai pi guk ciat hi ding a, puan sawm le khatte kikim ding hi. Tua puan ngate amau le amau khuituahin, puan gukte zong amau le amau mah na khuituah ding a, a gukna puan pen puanbuk mai-ah na khep ding hi. A kikhuituah puan khat nawlah a bilvang sawmnga bawlin, a kikhuituah a nihna puan nawlnung pen nawlah a bilvang sawmnga mah na bawl ding hi. Tua pen bup khat a suah theih nadingin nangmah in sumngo kilhna sawmnga bawlin, a bilvangte’ sungah tua kilhnate guangin, puanbuk na kimatsak ding hi. Puanbuk puan a val khia, puan alang a val pen, biakbuk nungah kaisuk ding hi. Puanbuk puan a dunglam, pangkhatah pi khat le alang, a pang langkhatah pi khat le alang a val pen biakbuk a khuh dingin hih lampang le hua lampangte-ah kaisuk ding hi. “A kisansak tuutal vunte le keelvunte tawh puanbuk khuhna khat na bawl ding hi. “Biakbuk a dingin a po to ding khuampeekte singkha sing na bawl ding hi. A khuampeek khat a tun pi sawm le nga hi ding a, a vai pi nih le letmat thum vive hi ding hi. A bulh nadingin a khuampeek khatah a zang nih ciat om ding hi. Biakbuk khuampeek khempeuh tua bangin na bawl ding hi. Biakbuk khuampeekte na bawl ding hi: Leitaw lam panga dingin khuampeek sawmnih hi ding hi. A khuampeek sawmnihte’ bulah bullen sawmli ngun tawh na bawl ding a, a zang nihte a dingin khuampeek khat bulah bullen nih, a khuampeek dang khat bulah adang nihte a dingin bullen nih mah hi ding hi. Biakbuk a pang nihna lam, leilu lam panga a khuampeek sawmnihte le ngun tawh kibawl a bullen sawmlite a dingin, khuampeek khatah bullen nih, adang khuampeek khat bulah bullen nih mah hi ding hi. Nitumna lam, biakbuk nung lama dingin khuampeek guk na bawl ding hi. Biakbuk nunglam kiute a dingin khuampeek nih na bawl ding hi. Tuate a bul lamah kikak ding a, ahih hangin a kual masa ah a dawn kimat ding hi. A nihin tua bang hi ding a, tuate in a kiu nihte piangsak ding uh hi. Ngun tawh kibawl amau’ bullen sawm le gukte a’ ding a khuampeek giat pha ding a, khuampeek khatah bullen nih ciat om ding hi. “Singkha sing, zawlin na bawl ding hi. Biakbuk pangkhat a khuampeek a’ ding zawl nga, biakbuk a pang langkhat a khuampeek a dingin zawl nga, nitumna lam biakbuk nung lam panga a khuampeekte a dingin zawl nga hi ding hi. A zawl laita, a khuampeek kimciang a banto pen mong khat pan mong khat paisuak ding hi. A khuampeekte kham tawh zutin, a zawlte a len dingin amau’ kualte kham tawh na bawl ding a, a zawlte kham tawh na zut ding hi. A lim ding geelna, mualtungah nang tungah hong kilak mah tawh kizui-in biakbuk na lam ding hi. “A dum, a dupsan, a ausan, a kopin a kikhuk khau hoih kigan tawh dalna puan khat na bawl ding a, hoihtakin a kibawl kherub-te tawh kizem ding hi. Ngun tawh kibawl bullen lite tungah a om, kham kibawl vankhaina nei-in, kham tawh a kizut singkha khuampi lite tungah na khai ding hi. A kilhnate-ah dalna puan khai sukin, dalna puan sung tua lai munah thuciamna singkuang na koih ding a, dalna puan in siangtho pen mun panin siangtho mun khen ding hi. Siangtho pen mun sunga om thuciamna singkuang tungah hehpihna tokhom na koih ding hi. Dalna puan pualamah sabuai koihin, sabuai tawh a kisan biakbuk leitaw lampangah meivakkhuam na koih ding a, leilu lampangah sabuai na koih ding hi. “Puanbuk kongkhak dingin a dum, a dupsan, a ausan, a kopin a kikhuk khau hoih tawh a kigan, phim tawh kikhui-in a kizem kongpuankhai khat na bawl ding hi. Kongpuankhai a dingin singkha khuampi nga bawlin kham tawh na zut ding hi. A vankhainate kham hi ding a, tuate a dingin sumngo bullen nga na bawl ding hi. “Biakna tau ding singkha sing tawh bawl in. Pi sagih le alang sau-in pi sagih le alang mah na zaisak ding hi. Biakna tau a ning kikim ding a, a tun pi li le alang hi ding hi. A kiu lite-ah ki na bawl ding hi. A kite pen a biakna tau tawh sakhat hi ding a, sumngo tawh na zut ding hi. Ama a dingin vut koih nading beelte le kawbiate, kuangte, sikkate le vutluahna peekte na bawl ding a, a nazat khempeuh sumngo tawh na bawl ding hi. Ama a dingin siklen, a vang simsiam zong sumngo tawh na bawl ding hi. Siklen tung, a kiu lite-ah sumngo kual li na bawl ding hi. Siklen in biakna tau kimciang a batsuk theih nadingin biakna tau zawl nuai panin na bulh ding hi. Biakna tau a dingin singkha sing zawlte bawlin sumngo tawh tuate na zut ding hi. A kipuak ciangin biakna tau pang nihte-ah a zawlte a om theihna dingin a kualte’ vang sungah a zawlte kikhum ding hi. Singpekte tawh kuak nei-in biakna tau na bawl ding a, mualtung a nang tungah hong kilaksa bangin kibawl ding hi. “Biakbuk tual na bawl ding hi. A tual in leitaw lam pangah pang khat a dingin pi za le sawmnga a sau, a kopin a kikhuk khau hoih tawh a kigan a kikhai suk dalna puan nei ding hi. A khuam sawmnih le a bullen sawmnih pen sumngo tawh a kibawl hi ding a, ahih hangin khuampi tunga vankhainate le a gaknate pen ngun tawh a kibawl hi ding hi. Leilu lampang a ding zong a sauna tua bangmah hi-in, a kikhai suk dalna puan pi za le sawmnga sau ding a, a khuam sawmnih le a bullen sawmnih pen sumngo tawh a kibawl hi ding hi. Ahi zongin khuampi tunga vankhainate le a gaknate pen ngun tawh a kibawl hi ding hi. Nitumna lam pangah buktual a vailam a dingin khuampi sawm le bullen sawmte tawh pi sawmsagih le nga a sau a kikhai suk dalna puan om ding hi. A mailam, nisuahna lam buktual a vailam pi sawmsagih le nga hi ding hi. Kongpi pang khat-a ding a kikhaisuk dalna puan pi sawmnih le nih le alang hi ding a, khuampi thum le bullen thumte tawh hi ding hi. A pang langkhatah a kikhaisuk dalna puan pen pi sawmnih le nih le alang hi ding a, khuampi thum le bullen thumte tawh hi ding hi. Buktual a kongpi dingin a dum, a dupsan, a ausan khau a kopin a kikhuk khau hoihte tawh a kigan, phim tawh kikhui-in a kizem, pi sawmthum a sau kongpuankhai khat om ding a, tua in khuampi li le bullen li nei ding hi. Buktual kiima khuampi khempeuh ngun tawh kibawl gakna tawh kigak ding a, a vankhainate ngun hi-in a bullente sumngo hi ding hi. Buktual a dung pi za le sawmnga, a vai pi sawmsagih le nga, a sanna pi sagih le alang hi-in, a kopin a kikhuk khau hoih tawh a kigan a kikhaisuk dalna puan le sumngo bullente tawh hi ding hi. Biakbuk nazat ding peuhmahte le a khetphimte khempeuh le buktual a khetphimte khempeuh sumngo tawh a kibawl hi ding hi. “Meivak a kuangin a om tawntung theih nadingin mei a vak ding oliv gah a kisuzan, sathau siangtho, Israel mite in nang kiangah hong paipih nadingun thu na pia ding hi. Kikhopna buk sung, thuciamna singkuang mai-a dalna puan pualamah, Aaron le ama tapate in nitak a kipan zingsang dong Topa’ mai-ah vil ding uh hi. Tua pen Israel mite in amau’ khang tawntungin a zuih ding uh ngeina kip khat hi ding hi. “Tua ciangin keima tungah siampi na a sem dingin Israel mite lak panin na sanggampa Aaron le a tapate Nadab le Abihu, Eleazar le Ithamar, nangma kiangah la in. Minthanna le hoihna tawh a kidim nadingin na sanggampa Aaron a’ ding biakna puan siangtho na bawl ding hi. Keima siampi nasepna-ah amah a ap theih nadingun amaute in Aaron’ puante a bawl nading, hih theihna lungsim ka guatsa, siamna a nei mite khempeuh tungah gen in. Amaute’ bawl ding puante: Awmdal khat, siampipuan khat, puantualpi khat, sikli nei-a a gial puantungsilh khat, dialpi khat le kawnggak khat ahi hi. Keima tungah siampi na a sem ding na sanggampa Aaron le ama tapate a dingin amaute in biakna puan siangthote bawl ding uh hi. Amaute in kham, a dum, a dupsan, a ausan khaute le a kopin a kikhuk tawh a kigan puan hoihte sang ding uh hi. “Amaute in siampipuan pen, kham, a dum, a dupsan, a ausan tuumul khaute le a kopin a kikhuk a kigan puan hoihte tawh bawl ding uh a, hoihtakin a kibawl hi ding hi. A kizop khawm theih nadingin a mong nihte-ah a kimat liangkaihna puan nih nei ding hi. Amah a gak dingin hoihtakin a kigan tua tunga puan om pen, kham, a dum, a dupsan, a ausan tuumul khaute le a kopin a kikhuk puan hoihte tawh kibawlin, a sepna zia le a nate a kibang hi ding hi. Nangmah in onik suang nih la-in tuate’ tungah Israel tapate’ min na gelh ding a, amau’ suahna tawh kizui-in amau’ min gukte suang khat tungah gelhin, a omlai gukte’ min a suang dang khat tungah na gelh ding hi. Kizepna a bawlpa in min gelhna a bawl bangin Israel tapa sawm le nihte’ minte suang nihte tungah na gelh ding hi. Tuate pen kham a zepna tawh na um ding hi. Israel tapate phawkna suang dingin siampipuan’ liangkaih puan tungah tua suang nihte na bulh ding hi. Aaron in ama liangko nihte tungah phawkphawk dingin Topa’ mai-ah amaute’ min pua ding hi. Kham tawh kibawl a kiphut kizepna le khau bangin a kihual, kham citak khainiang nih na bawl ding a, a kihual khainiangte pen a kiphutte’ tungah na bulh ding hi. “Hoihtakin a kibawl thukhenna awmdal khat na bawl ding hi. Siampipuan a kibawl bangmahin na bawl ding hi. Kham, a dum, a dupsan, a ausan tuumul khaute le a kopin a kikhuk puan hoih tawh na bawl ding hi. A ning kikimin thuap nih hi ding a, a dung letmat kua, a vai letmat kua mah hi ding hi. Tua sungah suang gual li-in na bulh ding hi. Sardis suang, topaz suang, le karbankal suang gual khat pen a gual masa hi ding hi. A gual nihna-ah emerald suang, sapfaia suang, le diamond suang hi ding hi. A gual thumna-ah jakinth suang, agate suang, le amethyst suang hi ding hi. A gual lina-ah beryl suang, onik suang, le jasper suang hi ding a, kham tawh zepna sungah tuate kibulh ding hi. Israel tapate’ min tawh kituakin amaute’ min a omna suang sawm le nih om ding hi. Tuate pen minam sawm le nihte a dingin amau’ min ciat kigelhin, min gelhna tawh kibang ding hi. Awmdal a dingin khau tawh a kibang, a kihual kham citak khainiang na bawl ding hi. Awmdal a dingin kham kual nih na bawl ding a, awmdal mongah tua kualte na bulh ding hi. Awmdal mong a kual nihte sungah kham khau nihte na khum ding hi. Khau mong nihte zepna tawh na zom ding a, siampipuan’ liangkaih puan mai lamah tua bangin na zom ding hi. Kham kual nih na bawl ding a, awmdal mong nih, siampipuan tawh a kizom a sunglamah na bulh ding hi. Kham kual nih na bawl ding a, siampipuan liangkaih nihte’ nuai a mailam, hoihtakin a kigan siampi puankhau a kizopna tung sanah na bulh ding hi. Hoihtakin a kigan siampipuan’ khau tungah a om theih nading le siampipuan tung panin awmdal a kol theih loh nadingin amaute in siampipuan’ kualah khaudum khatin a kual tawh gakkhawm ding uh hi. “Tua ahih ciangin Topa’ mai-ah phawk tawntung nadingin amaute a paipih dingin siangtho munah amah a pai ciangin, Aaron in ama lungtang tunga om thukhenna awmdal sungah Israel tapate’ min pua ding hi. Thukhenna awmdal sungah Urim le Thummim na koih ding a, Topa’ mai-ah a pai ciangin Aaron’ lungtang tungah tuate om ding hi. Tua bangin Aaron in ama lungtang tungah Israel mite’ thukhenna Topa’ mai-ah pua tawntung ding hi. “Siampi puantualpi, puan dum bek tawh na bawl ding hi. Puan ngawng bangin a kikeek loh nadingin a ngawng kimkotah a kigan tawh a kizim, lutang thawl a vang nei ding hi. A mongah a dum, a dupsan, a ausan khaute tawh a kizem mang kawlsing gah bawlin, a mong kiimah amaute’ kikalah kham siklong bawlin, puantualpi mong kimkotah kham long le mang kawlsing gah, kham long le mang kawlsing gah cih bangin na kihelhsak ding hi. Aaron in biakna na a sep ciangin tua puan silh ding a, amah a sih khak loh nadingin Topa’ mai a siangtho munah a tum ciang le a pusuah ciangin a gingte kiza ding hi. “Nangmah in kham citak tawh a peek khat na bawl ding a, min gelhna a kibawlte mah bangin tua tungah, ‘ Topa a’ ding siangtho,’ ci-in na gelh ding hi. Tua pen, khaudum khat tawh dialpi tungah na gak ding a, dialpi mai lamah om ding hi. Tua pen Aaron’ taltangah om ding a, Israel mite in letsong siangtho a piakna uh ahi, a siangtho biakpiakna-ah mawhna a om peuhmah Aaron in ama tungah pua ding hi. Topa’ mai-ah amaute a kisan’ theih nadingin ama taltang tungah tua a peek om tawntung ding hi. “A puantungsilh ding pen khau hoih tawh siik li nei, a gialin na gan ding hi. Khau hoih tawh dialpi khat na bawl ding a, phim tawh kikhui-in a kizem kawnggak khat na bawl ding hi. “Aaron’ tapate a dingin puantungsilhte, kawnggakte, le lukhute na bawl ding a, minthanna le hoihna tawh a kidim nadingin tuate na bawl ding hi. Amaute in keima tungah siampi na a sep theih nadingun na sanggampa Aaron le a tapate na silhsak ding a, amaute sathau nilhin, nasem dingin kipsakin, na siangthosak ding hi. A ci guakin a omna uh a tuam dingin amau a dingin puan hoihte tawh pheituamte na bawlsak ding a, tuate in kawng panin phei ciang ban ding hi. Kikhopna bukah amaute a pai ciang uh ahi a, siangtho munah nasem dingin biakna tau nai-ah a pai ciang uh ahi zongin, Aaron le ama tapate in tuate a silh ding uh hi. Tua hikeileh amaute in amau tung mahah mawhna a kisuan tawm suakin si ding uh hi. Hih pen amah le ama khit ciangin a suanlekhakte a dingin a om tawntung ngeina kip khat hi ding hi. “Amaute in keima tungah siampi na a sep theih nadingun amaute na sianthosak nadingin amaute’ tungah na hih ding thute: Bawngtalno khat le a sitbaang lo tuutal nih, le silngo sawh loh anlum, sathau a kihel silngo sawh loh mohte, sathau tawh a kizut silngo sawh loh mohphengte la in. Tuate pen mangbuhnel tawh na bawl ding hi. Lawh khat sungah tuate koihin tuate a lawhin paipihin, a bawngtal le a tuutal nih zong na paipih ding hi. “Kikhopna buk kongkhakah Aaron le a tapate na paipih ding a, tui tawh amaute na sil ding hi. Nangmah in puante la-in, puantungsilh le siampi puantualpi, siampipuan le awmdal, Aaron silhsakin, hoihtakin a kigan siampipuan gakna tawh amah na gak ding hi. Ama lu tungah dialpi khim sakin, dialpi tungah kumpi lukhu siangtho na khusak ding hi. Nangmah in nilh sathau la-in, ama lu tungah sungin amah na nilh ding hi. “Tua ciangin nangmah in ama tapate paipihin, amaute, puantungsilh na silhsak ding a, kawnggakte tawh amaute gakin, amau’ lu tungah a lukhute uh na gak ding hi. Siampi nasepna pen a kip tawntung ngeina ahih manin amau a’ hi ding hi. Tua bangin Aaron le a tapate na kipsak ding hi. “Tua ciangin kikhopna buk mai-ah bawngtal na paipih ding hi. Aaron le a tapate in bawngtal lu tungah amau’ khut nga ding uh a, Topa’ mai, kikhopna buk kongkhakah nangmah in a bawngtal na go ding hi. Bawngtal sisan tawmkhat la-in na khutme tawh biakna tau kite na nuh ding a, si a omlai teng biakna tau bulah na sungkhia ding hi. A gilpi tuam a thau khempeuh le a sin tunga a utok le a kal nihte le a kal tuam a thau na la ding a, biakna tau tungah tuate na hal ding hi. Ahih hangin bawngtal sa le a vun le a ekte, giahphual pua lamah mei tawh na hal ding hi. Tua pen khialhna hanga biakna ahi hi. “Tua ciangin nangmah in tuutalte khat la-in, Aaron le a tapate in tuutal lu tungah amau’ khut nga ding uh a, nangmah in tuutal go-in, a si la-in biakna tau kimkotah na theh ding hi. Tua ciangin tuutal semnenin, a sungkua le a khete silin, a sabakte le a lu tawh tuate koihin, biakna tau tungah tuutal a bupin na hal ding hi. Tua pen Topa’ tungah meihal biakna hi a, a gim namtui, Topa’ tungah mei tawh kihal biakna ahi hi. “Nangmah in tuutal adang khat na la ding hi. Aaron le a tapate in tua tuutal lu tungah amau’ khut nga ding uh a, nangmah in tuutal go-in, a si tawmkhat la-in Aaron’ taklam bil dawn le ama tapate’ taklam bil dawnte le amau’ taklam khutpi dawnte le amau’ taklam khepi dawnte nuhin, si a omlai teng biakna tau kiimah na theh ding hi. Tua ciangin biakna tau tunga a om si tawmkhat le nilh sathau la-in Aaron le ama puante tung le a tapate le a puante tungah na theh ding hi. Tua ciangin amah le a puante le a tapate le a puante a siangtho hi ding hi. “Nangmah in tuutal thau, a mei, a gilpi tuam a thau, a sin pan a utok, a kal nihte, a kal tuam a thau, le a taklam phei (bang hang hiam cih leh tuate pen kipsakna tuutal ahi hi) le Topa’ mai-ah a om silngo sawh loh anlum lawh sung panin anlum khat, sathau tawh a kibawl anlum bek khat, le moh pheng khat na la ding hi. Hihte khempeuh Aaron’ khutsung le a tapate’ khut sungah na koih ding a, Topa’ mai-ah vei-a piak dingin na vei ding hi. Tua ciangin amau’ khutsung panin tuate na la ding a, Topa’ mai-ah a gim namtui dingin biakna tau tungah mei tawh kihal biakna banah na hal ding hi. Tua pen Topa’ tungah mei tawh kihal biakna ahi hi. “Nangmah in Aaron a kikipsakna tuutal sa-iik la-in Topa’ mai-ah vei-a piak dingin na vei ding hi. Tua pen nangma tanh hi ding hi. “Kipsakna sa pen Aaron le ama tapate a’ ding ahih ciangin, kipsakna tuutal panin a kipia, a kivei siampite’ tanh a phei le vei-a piak sa-iikte na siangthosak ding hi. Tua pen Aaron le ama tapate a dingin Israel mite’ tung panin a kaih tawntung ding uh ahi hi. Bang hang hiam cih leh thunuama amau’ biakna panin Israel mite in a piak ding siampite’ tanh ahi hi. Tua pen Topa’ tungah amau’ piak ahi hi. “Aaron’ biakna puan siangthote pen ama sih khit ciangin a tapate’ tungah kipia ding a, amaute sathau kinilhin a kikipsak nading ahi hi. Ama za luahin siampi na a sem a tapa in siangtho munah nasem dingin kikhopna bukah a pai ciangin ni sagih sung tuate silh ding hi. “Nangmah in kipsakna tuutal la-in a siangtho biakna mun khatah a sa na huan ding hi. Aaron le a tapate in kikhopna buk kongkhakah tuutal sa le lawh sunga om anlum ne ding uh hi. Amaute in amaute a kikipsak nading le a siangthosak dingin kilemna a kibawlna tua ante ne ding uh a, ahih hangin a pualam mi in tuate ne thei lo ding hi. Bang hang hiam cih leh tuate pen a siangtho biakna an ahi hi. Kipsakna sate khat peuhpeuh ahi a, anlum ahi zongin, zingsang ciang dong a omlai leh nangmah in a omlaite mei tawh na hal ding hi. Tuate pen biakna an siangtho ahih manin kine lo ding hi. “Tua bangin nang kong thupiakte khempeuh tawh kituakin Aaron le ama tapate’ tungah na hih ding a, ni sagih sung tawntung amaute ki-apna na bawl ding hi. Kilem nadingin mawhna hanga biakna-in ni simin bawngtal khat na pia ding hi. Siangthosak nadingin sathau na nilh ciang le kilemna na bawl ciangin biakna tau a dingin khialhna hanga biakna khat zong na pia ding hi. Biakna tau a dingin ni sagih sung kilemna bawlin na siangthosak ding hi. Tua ciangin biakna tau a siangtho pen suak ding a, tua biakna tau a lawng peuhpeuh a siangtho suak ding hi. “Tu-in biakna tau tungah na piak tawntung dingte hih bang ahi hi: Nisimin a kizomin kum khat a pha tuuno nihta hi ding hi. Tuuno khat zingsang lamin na pia ding a, adang tuuno khat nitak lamin na pia ding hi. Tuuno a masa tawh annel lawh khat le a oliv thau hai khat tawh a kihel leh tuibuah dingin leenggahzu hai khat hi ding hi. Tuuno adang khat nitakin na pia ding a, zingsang a mah bangin a gim namtui ding, Topa’ mai-ah mei tawh kihal biakna-in an tawh biakna le tuibuah tawh na pia khawm ding hi. Nang tunga thu kong gen nading, nang tawh ka kituah nading mun, Topa’ mai kikhopna buk kongkhakah na khang tawntungun a kipia tawntung ding meihal biakna hi ding hi. Tua lai-ah Israel mite tawh ka kituah ding a, keima vang in tua mun siangthosak ding hi. Keimah in kikhopna buk le biakna tau ka siangthosak ding a, keima siampi na a sem dingin Aaron le a tapate zong ka siangthosak ding hi. Israel mite lakah keimah tengin amau’ Pasian ka hi ding hi. Amaute’ lakah keimah ka tenna hangin Egypt leitang panin amaute a paikhiatpih Topa amau’ Pasian ka hihna amaute in hong thei ding uh hi. Kei pen Topa amau’ Pasian ka hi hi. “Nangmah in paknamtui hal nading biakna tau khat, singkha sing tawh na bawl ding hi. A dung pi khat le alang, a vai zong pi khat le alang mah hi ding hi. A kikim sikli nei hi ding a, a sanna pi thum hi ding hi. A kite a tak tawh sakhat hi ding hi. Nangmah in kham citak tawh a tung le a pang kimkot le a kite na zut ding a, a kimkotah kham tawh a geihual na bawl ding hi. Tua biakna tau a dingin kham kual nih na bawl ding hi. A geihual nuai a kigal sai a pang tuakah tuate na bawl ding a, a puak nading zawlte a khum nading hi ding uh hi. Nangmah in singkha sing tawh a zawlte na bawl ding a, kham tawh tuate na zut ding hi. Nangmah tawh ka kituah nading mun, thuciamna tunga a om hehpihna tokhom mai, thuciamna singkuang kiangah a om dalna puan mai-ah biakna tau na koih ding hi. Aaron in tua tungah a namtui paknamtui hal ding hi. Amah in zingsang simin meivakte a puah ciangin hal ding hi. Aaron in nitakin zong meivakte a koih ciangin tuate hal ding a, na khang tawntungun Topa’ mai-ah a namtui hi tawntung ding hi. Tua tungah a siangtho lo paknamtui hitaleh, meihal biakna hitaleh, an tawh biakna hitaleh na pia kei ding hi. Tua tungah tuibuah na sung kei ding hi. Aaron in kilem nadingin khialhna hanga biakna si a kite tungah kum khatin khatvei zut ding hi. Amah in na khang tawntungun kum khatin khatvei kilemna bawl ding hi. Tua pen Topa’ tungah a siangtho pen ahi hi,” a ci hi. Topa in Moses kiangah, “Israel mite a phazah na sim ciangin amau’ lakah gimna a tun loh nadingin, a milip in a kitatkhiatna uh Topa’ tungah pia ding uh hi. Mi simna-ah a kihel mi peuhmah in biakinn shekel tawh kituakin shekel lang (shekel khatah gerah sawmnih om hi), Topa’ tungah biakna-in pia ding hi. Mi simna-ah a kihel, kum sawmnih panin a tungsiah peuhmah in Topa’ tungah biakna pia ding hi. Note a’ ding kilemna bawl nadingin Topa biakna na piak uh ciangin a haute in shekel lang sangin a tamzaw pia lo ding a, a zawngte in a tawmzaw pia lo ding hi. Nomau a dingin kilemna bawl nading, Topa’ mai-ah Israel mite ka phawkna a hisak dingin Israel mite tung panin kilemna sum na la ding a, kikhopna buk nasep nadingin na zang ding hi,” a ci hi. Topa in Moses kiangah, “Kisil nadingin sumngo kuang khat, le a ngak nading zong sumngo mah tawh bawl in. Nangmah in kikhopna buk le biakna tau kikalah na koih ding a, tua sungah tui na koih ding hi. Aaron le a tapate in a khut uh le a khe uh tua tui tawh sil ding uh hi. Kikhopna bukah amaute a pai ciang uh ahi a, Topa’ tungah mei tawh kihal biakna hal dingin biakna tau nai-ah a pai ciang uh ahi zongin, amaute a sih loh nadingun amaute tui tawh kisil ding uh hi. A sih khak loh nadingun a khut uh le a khe uh sil ding uh hi. Tua pen na khang tawntungun amaute tung a kipanin amau’ suanlekhakte tungah ngeina kip khat hi ding hi,” a ci hi. Tua tham loin, Topa in Moses kiangah, “A hoihpen a namtui nate la in. Myrrh paknamtui shekel zanga le a namtui thaksing tuazah lang, shekel zanih le sawmnga a gik, le a khum a namtui paknamtui zanih le sawmnga, biakinn shekel tawh kituakin thaksing nam khat zanga, le oliv thau bung khat, nangmah in paknamtui bawlte’ bawl mah bangin a siangtho sathau nilh dingin hihte na gawm ding a, tua pen a siangtho sathau nilh hi ding hi. Nangmah in tua tawh kikhopna buk le thuciamna singkuang, sabuai le a nazat khempeuh, meivakkhuam le a nazatte le paknamtui biakna tau, meihal biakna tau a nazat khempeuh tawh, kuang le a ngakna na zut ding hi. Tuate a siangtho pen ahih theih nadingin na siangthosak ding a, tuate a lawng peuhmah a siangtho suak ding hi. Amaute in keima tungah siampi na hong sep theih nadingun Aaron le a tapate nangmah in sathau nilhin amaute na siangthosak ding hi. Nangmah in Israel mite kiangah, ‘Hih pen na khang tawntungun a siangtho keima sathau nilh hi ding hi. Mi mawkmawkte’ pumpi tungah tua sathau kisung lo ding a, tua bangin a kigawm sathau dang na bawl kei ding uh hi. Tua pen a siangtho hi a, note a dingin a siangtho hi ding hi. Tua tawh a kibangin a bawl mi peuhmah ahi a, a pualam mi khatpeuh tuate a nilhsak mi peuhmah ahi zongin ama mite’ kiang panin kikhenkhia ding hi, Topa in ci hi,’ ci in,” a ci hi. Topa in Moses kiangah, “A namtui nate, stakte, onikha, le galbanum, paknamtui citak tawh a namtui nate (a tamna a kikim ciatin) la inla, paknamtui bawlte’ hih bangin ci sawhin a nin baang lo, biakna paknamtui bawl in. Nangmah in kimkhat a neu mahmahin na satnen ding a, nang tawh ka kituah nading kikhopna buk sunga thuciamna mai-ah pawlkhat na koih ding hi. Tua pen nangma a dingin a siangtho pen hi ding hi. A kigawmpih ngei teng tawh na bawl ding paknamtui pen note a dingin na bawl kei ding uh hi. Tua pen note a dingin Topa’ tungah a siangtho hi ding hi. Tua tawh a kibangin paknamtui a bawl mi peuhmah ama mite’ kiang panin kikhenkhia ding hi,” a ci hi. Topa in Moses kiangah, “Thei in; Judah minam Hur’ tapa ahi Uri’ tapa Bezalel a minin ka sam khin hi. En in, amah tawh, Dan minam, Ahisamak’ tapa Oholiab ka seh khinzo hi. Amaute in nang kong thupiak khempeuh a bawl theih nadingun a hih thei mi khempeuh tungah siamna ka pia khinzo hi. Amau’ sep dingte hih bang ahi hi: Kikhopna buk, le thuciamna singkuang le a tunga om hehpihna tokhom le buk sung na khempeuh, sabuai le a nazatte le a siangtho meivakkhuam le a nazatte khempeuh, paknamtui biakna tau, le meihal biakna tau a nazatte khempeuh tawh, kuang le a ngakna, le amau’ siampi nasep nadingin siampi Aaron’ puan siangthote le ama tapate’ puante ahi, hoihtakin a kigan puante, le siangtho mun a dingin nilh sathau le a namtui paknamtui ahi hi. Ka thupiakte khempeuh tawh kituakin nangmah in na bawl ding hi,” a ci hi. Topa in Moses kiangah, “Israel mite tungah hih bangin gen in: ‘Keima Sabbath ni-in note na tawlnga ding uh hi. Bang hang hiam cih leh hih pen Topa ahi keimah in note a hong siangthosak ka hihna na theih nadingun na khang tawntungun keimah le note’ kikalah lim khat hi ding hi. Sabbath ni-in note na tawlnga ding uh hi. Bang hang hiam cih leh note a dingin a siangtho ahi hi. Tua ni-in a tawlnga lo mi peuhmah kithat ding a, tua ni-in na a sem mi peuhmah ama mite’ kiang panin kikhenkhia ding hi. Ni guk sungin nasep kizo ding hi. Ahih hangin a ni sagih ni pen a thupi-a tawlngakna Sabbath ni hi a, Topa’ tungah siangtho hi. Sabbath ni-in nasep khat peuhpeuh a sem mi peuhmah kithat ding hi. Tua ahih ciangin a tawntung thuciamna-in amau’ khang tawntungin Sabbath tangin, Israel mite in Sabbath kem ding uh hi. Ni guk sung teng Topa in van le lei bawlin, a ni sagih ni-in amah tawlnga a, a tha dimsakkik hi. Keimah le Israel mite’ kikalah hih Sabbath ni pen lim khat hi tawntung ding hi, ci hi,’ ci in,” a ci hi. Sinai Mual tungah thugenna a man khit ciangin Pasian’ khut tawh a kigelh suangpek ahi thuciamna suangpek nihte, amah in Moses a pia hi. Mualtung panin Moses hong tunsuk hakna mite in a theih uh ciangin, Aaron kiangah mite amau mah kikaikhawm tawmin ama kiangah, “Kithawi in; kote’ mai-ah a pai ding pasian hong bawlsak in. Egypt leitang panin eite hong paikhiatpih to Moses ahihleh bang suak khin cih i thei kei hi,” a ci uh hi. Aaron in amaute kiangah, “Na zite, na tapate, le na tanute uh bil tungah a om kham bilbahte sutkhia unla, kei kiangah tuate hong paipih un,” a ci hi. Tua ahih ciangin mi khempeuh in amau’ bil-a om kham bilbahte sutkhia-in Aaron’ kiangah tuate a paipih uh hi. Amah in amaute’ tung panin kham saangin, sumtui sunna sungah sungin, a kisung bawngno khat bawlsak a, tua ciangin mite in, “Israel mite aw, hih pen Egypt leitang panin note hong paikhiatpih to na pasian uh!” a ci uh hi. Aaron in hih thu a muh ciangin, amah in tua mai-ah biakna tau khat lam a, “Zing ciang pen Topa a’ ding pawi bawl ni hi ding hi,” ci-in zaksakna a bawl hi. Amaute zingsangin tho baih uh a, meihal biakna pia-in thunuama biakna zong a paipih uh hi. Pawi an ne-in mite tu uh a, zu khamin numei pasal kisawk ngeingai uh hi. Topa in Moses kiangah, “Paisuk in; bang hang hiam cih leh Egypt leitang panin nangmah in na paikhiatpih toh mite amau kisiasak uh hi. Ka thupiakna lampi panin amaute kiheikhia pak uh hi. Amau a dingin amaute in a kisung bawngno khat bawlin, tua bia-in a tungah biakna pia uh a, ‘Israel mite aw, hih pen Egypt leitang panin note hong paikhiatpih to na pasian uh ahi hi!’ ci uh hi,” a ci hi. Topa in Moses kiangah, “Hih mite ka mu zo hi. En in, a lungkhauh mite ahi uh hi. Tua ahih ciangin tu-in amaute tungah ka sinso-in amaute ka beisak theih nadingin kei guak hong omsak in. Ahi zongin nang ahihleh minam lian khatin kong bawl ding hi,” a ci hi. Ahih hangin Moses in Topa ama Pasian tungah thum a, “ Topa aw, na vangliatna le na thahatna tawh Egypt leitang panin na paikhiatpih ahi nangma mite tungah bang hangin sinso ding na hi hiam? Bang hangin Egypt mite in, ‘Mualtungah amaute a that ding le leitung panin amaute a beisak dingin siatna ngaihsutna tawh amah in amaute paikhiatpih hi,’ ci ding uh ahi hiam? A kihtakhuai na hehna daisak inla, na lungsim kheelin na mite tungah hih siatna tungsak kei in. Amaute’ tungah nangmahmah kiciamin, ‘Na suanlekhakte uh vantung aksi bangin tamsakin, keimah in ka ciamsa hih leitang khempeuh na suanlekhakte uh tungah ka pia ding a, amaute in luah tawntung ding uh hi,’ na cihna na nasemte Abraham, Isaac, le Israel phawk in,” a ci hi. Tua ciangin Topa in a lungsim kheel a, ama mite’ tungah a tunsak ding siatna tungsak nawn lo hi. Tua ciangin Moses kihei-in, a khutsunga om thuciamna suangpek nih, a pang langnih tuakah a kigelh suangpeekte tawh mualtung panin a paisuk hi. A peekte pen Pasian’ bawl hi a, a kigelh thute pen suangpek tungah Pasian’ gelh ahi hi. Joshua in amaute’ kiko gamlumna a zak ciangin Moses kiangah, “Giahphual ah kido-a gamlumna om hi,” a ci hi. Ahih hangin Moses in, “Tu-a gamlumna pen zawhna kikona aw ahi a, lelhna kikona aw ahi zongin, tua bang pawl hi lo hi. Ahih hangin tu-a ka zak pen lasakna awging ahi hi,” a ci hi. Giahphual nai-ah amah tungin bawngno le lamna a muh phetin, Moses heh mahmah a, amah in ama khutsung panin suangpeekte lawn a, mual bulah tuate a sukham hi. Amah in amaute’ bawlsa bawngno la-in mei tawh hal a, gawivui-in tui tungah theh a, Israel mite a tui dawnsak hi. Moses in Aaron kiangah, “Amaute’ tungah khialhna lianpi khat na tunpih nadingin hih mite in nang’ tungah bang hong gen uh ahi hiam?” a ci hi. Aaron in, “Ka topa aw, heh lua kei in. Mite’ lungsim na theihsa ahih mah bangin amaute in siatna ngaihsun uh hi. Bang hang hiam cih leh amaute in keima kiangah, ‘Kote’ mai-ah a pai ding pasian hong bawlsak in. Egypt leitang panin eite hong paikhiatpih to Moses ahihleh, bang suak khin cih i thei kei hi,’ ci uh hi. Keimah in amaute kiangah, ‘Kham a nei peuhpeuh in sutkhia un,’ ka ci hi. Tua ahih ciangin amaute in kei’ tungah hong pia uh a, keimah in mei sungah tuate ka lawn a, hih bawngno hong suak hi,” a ci hi. Mite a tatkhialhna Moses in a muh ciangin (bang hang hiam cih leh Aaron in amau’ maizum nadingin amau’ galte’ lakah amaute takhialsak hi), giahphual kongpi sungah Moses ding a, “ Topa’ lamah kua teng om na hi uh hiam? Kei’ kiangah hong pai un,” a ci hi. Levi mite khempeuh ama kiangah hong kikaikhawm uh hi. Amah in amaute kiangah, “Israel-te’ Topa Pasian in hih bangin ci hi: ‘A milip in a namsau a pangah tawi-in kongpi khat pan kongpi khat, giahphual khempeuhah pai kawikawi-in, a milip in a sanggampa, a milip in a kikholhpih pa, a milip in a vengpa that hen,’ ci hi,” ci-in a gen hi. Moses’ thugen bangin Levi mite gamta uh a, tua ni-in mihing tulthum bang si hi. Moses in, “Note’ tungah thupha hong tun theih nadingin ama tapa le a sanggamte ciat supna thuakin Topa’ na sep nadingah tuni-in note na kikipsak tawm uh hi,” a ci hi. A zingsang ciangin Moses in mite kiangah, “Note in khialhna lianpi khat na bawl khin uh hi. Tu-in Topa’ kiangah kei ka pai ding a, note’ khialhna thu-ah kilemna ka va bawl thei kha ding hi,” a ci hi. Tua ahih ciangin Topa’ kiangah Moses paikikin, “Ala, hih mite in khialhna lianpi khat bawl khin uh a, amaute in amau a dingin kham pasian khat bawl khin uh hi. Ahih hangin nangmah in tu-in amau’ khialhna maisak in. Na maisak kei ding leh, hong thum ing, nangma gelhsa laibu panin keimah hong phiatmai in,” a ci hi. Ahih hangin Topa in Moses kiangah, “Kei’ tungah hong khial peuhmah, ka laibu panin ka phiat ding hi. Ahih hangin tu-in pai in; nang’ tunga kong gensa munah mite paipih in. En in, na mai-ah ka vantungmi pai ding hi. Ahi zongin ka thukkik ni ciangin amau’ khialhna amau’ tungah ka thuk ding hi,” a ci hi. Amaute in Aaron’ bawlsa bawngno bia uh ahih manin Topa in mite’ tungah gimna a tungsak hi. Topa in Moses kiangah, “Hih mun nusia un; Abraham, Isaac, le Jakob tungah, ‘Na suanlekhakte uh tungah ka pia ding hi,’ ci-a ka ciam leitangah nangmah le Egypt leitang panin na paikhiatpih toh mite tawh hih lai panin paito un. Note’ mai-ah vantungmi khat ka sawl ding a, Kanaan mite, Amor mite, Hit mite, Perez mite, Hiv mite, le Jebus mite ka hawlkhia ding hi. Bawngnawi le khuaizu a luanna leitangah paito un. Ahi zongin note hong sisak kha ding ka hih ciangin note’ lakah kei kong paito kei ding hi. Bang hang hiam cih leh note mi lungkhauh na hi uh hi,” a ci hi. Mite in hih thusiate a zak uh ciangin amaute thuum uh a, kuamah kizem lo uh hi. Bang hang hiam cih leh Topa in Moses kiangah, “Israel mite’ tungah hih bangin gen in: ‘Note mi lungkhauh na hi uh hi. Note’ lakah tomno khat sung hong paito leng, note kong beisak ding hi. Tua ahih ciangin note kong bawl nading ka theih nadingin note’ tung panin na kizepnate uh suahkhia un,’ ci in,” ci-in gen khinzo hi. Tua ahih ciangin Israel mite in Horeb Mual pan a kipanin amau’ kizepnate suahkhia uh hi. Israel mite in giahphual a sat simin Moses in puanbuk la-in giahphual panin a gamla pekah lam thei zel hi. Amah in tua pen kikhopna buk, ci hi. Topa’ tungah thu a dong nuam mi peuhmah giahphual pualama om kikhopna bukah paikhia uh hi. Puanbukah Moses a pai peuhpeuh ciangin mi khempeuh ding to-in, a milipin a puanbuk kong ciat uhah ding uh a, puanbuk sungah a tum khit mateng Moses’ nung en uh hi. Puanbukah Moses a tum ciangin meii khuam hong kum sukin puanbuk kongkhakah ding a, Topa in Moses hopih hi. Puanbuk kongkhakah meii khuam a ding a muh uh ciangin a milipin a puanbuk kong ciat uhah mi khempeuh dingto-in kun uh hi. Tua bangin, mi khat in a lawmpa a hopih bangin maitang kituahin Topa in Moses hopih zel hi. Giahphual ah Moses a ciahkik ciangin, Nun’ tapa, ama nasem tangval Joshua, puanbukah omlai hi. Moses in Topa’ kiangah, “Thei in; nangmah in keima kiangah, ‘Hih mite paipihto in,’ nong ci hi. Ahih hangin kei tawh nong sawlkhop ding mi kei nong theisak nai kei hi. Ahi zongin nangmah in, ‘Na minin nang kong thei a, ka mai-ah maipha zong na mu khin hi,’ nong ci khin hi. Tua ahih ciangin tu-in nang tungah kong thum hi; na muhna-ah maipha ka ngah leh keimah in nang hong thei-in, na muhna-ah maipha ka ngah theih nadingin tu-in nangma geelnate kei hong lak in. Hih minam pen nangma mite ahihna zong ngaihsun in,” a ci hi. Topa in Moses kiangah, “Nang tawh kong pai ding a, lungsim tawlngakna hun nang kong pia ding hi,” a ci hi. Moses in ama kiangah, “Nang nong paipih kei ding leh, hih lai panin kote hong paikhiatosak kei in. Bang hang hiam cih leh keimah le nangma mite in nangma muhna-ah maipha ka ngahna uh bang ci-in kithei ding ahi hiam? Leitung a om mi khempeuh tungah keimah le nangma mite ka tungnunna uh pen kote tawh nang nong paikhopna hi lo ahi hiam?” a ci hi. Topa in Moses kiangah, “Nangma gensa hih thu mahmah keimah in ka hih ding hi. Bang hang hiam cih leh ka muhna-ah nang in maipha na ngahzo a, na minin nang kong thei hi,” a ci hi. Moses in, “Kong thum hi; na vangliatna kei hong lak in,” a ci hi. Amah in, “Keima hoihna khempeuh na mai-ah ka paisak ding a, na mai-ah keima min, ‘ Topa ’ cihna ka pulak ding hi. Ka diknopna mite tungah ka dik ding a, ka hehpihnop mite ka hehpih ding hi. Ahih hangin nangmah in ka maitang na mu thei kei ding hi. Bang hang hiam cih leh mi in kei hong mu leh tuami nungta lo ding hi,” a ci hi. Tua banah Topa in, “En in; suang tungah na din nading keima kiangah mun khat om hi. Keima minthanna vang a pai laitakin suanghawm sungah nang kong koih ding a, kei ka paikhiat mateng ka khut tawh nang kong hum ding hi. Tua ciangin keimah in ka khut ka lakhia ding hi. Nangmah in ka nung na mu ding a, ahih hangin ka maitang na mu kei ding hi,” a ci hi. Topa in Moses kiangah, “A masa tawh a kibangin suangpek nih sui in. Na sukkhap a masa suangpeekte sunga om thute tuate tungah ka gelh kik ding hi. Kithawi-in Sinai Mual tungah zingsangin hong paito inla, mual dawn tua munah keima kiangah hong kilak in. Nang tawh kuamah hong paito khawmsak kei inla, mualtung tengah kuamah omsak kei in. Tua mual mai-ah tuuhon ahi a, bawnghon ahi zongin gamtasak kei in,” a ci hi. Tua ahih ciangin Moses in a masa bangin suangpek nih a sui hi. Zingsang ciangin amah tho baihin, Topa in amah a thupiaksa bangin Sinai Mual tungah paito a, a khut sungah suangpek nih a tawi hi. Meii sungah Topa kum sukin tua lai-ah Moses tawh ding a, Topa in ama min a pulak hi. Ama mai-ah Topa pai-in, “Topa, Topa, hehpihna nei-in a dik Pasian; lungduai-in itna kip le thutakna tawh a dim; mi tul tampite a dingin itna kip a nei; mawhna, thu palsatna le khialhna maisakin; ahih hangin bangbang hitaleh mawhna a khahkhong ngei lo; pate’ mawhna tate’ tung le tute’ tung, khang thum khang lina dongin a thukpa,” ci-in a pulak hi. Moses in leilak lamah a lu kunin a bia hi. Amah in, “Tu-in na muhna-ah maipha ka muh leh, Topa aw, kong thum hi; lungkhauh mite ka hita uh zongin kote’ kiangah Topa hong pai in. Kote’ mawhna le kote’ khialhna hong maisak inla, nangma mi dingin kote hong sang in,” a ci hi. Topa in Moses kiangah, “En in, keimah in thuciamna khat ka bawl hi. Nangma mi khempeuh’ muhna-ah, leitung khempeuh hitaleh minam khatpeuh sungah hitaleh cikmahin tua bang a kibawl ngei lo na lamdangte ka bawl ding a, note’ lakah a om mite khempeuh in Topa’ nasepna mu ding uh hi. Bang hang hiam cih leh note’ tungah kong bawl ding na pen a kihtakhuai thu ahi hi. “Tuni-a kong thupiak zui in. En in, na mai-ah Amor mite, Kanaan mite, Hit mite, Perez mite, Hiv mite, le Jebus mite ka hawlkhia ding hi. Na paina leitangah a teng mite tawh thuciamna bawlkha kei inla, tua pen note a dingin thangzak a suahkhak loh nadingin nangmahmah kidawm in. Nangmah in amau’ biakna taute phelin, amau’ biakna khuamte kuaitanin, amau’ Asherah milimte na phukpai ding hi. ”(Pasian dang na bia kei ding hi. Bang hang hiam cih leh Topa, ama min Aam a hi pa pen a aam Pasian ahi hi.) Nangmah in tua leitangah a teng mite tawh thuciamna bawlkha kei in. Amaute in amau’ pasian-te tawh paktatna bawlin amau’ pasian-te’ tungah biakna pia-in, khatpeuh in note hong sap ciangin, note in ama biakpiakna na ne kha ding uh a, note in amau’ tanute na tapate uh a dingin la-in, amau’ pasian-te tawh paktatna a bawl a tanute in amau’ pasian-te tawh na tapate uh paktatsak kha ding uh hi. “A kisung pasian-te note a dingin bawlin na bia kei ding uh hi. “Silngo sawh loh anlum pawi na bawl ding uh hi. Abib kha, a kisehsa hun sungteng, nang kong thupiak mah bangin ni sagih sung silngo sawh loh anlum na ne ding uh hi. Bang hang hiam cih leh Abib kha sungin Egypt panin note na paikhia uh hi. “Mihing le ganhing tacil a pa khempeuh keima-a’ ahi hi. La a tacilte tuuno khat tawh na tanh ding uh hi. Na tat kei uhleh a ngawng na kuaitan ding uh hi. Na tapa cilte khempeuh uh na tanh ding uh hi. Keima mai-ah a guakin kuamah hong kilak lo ding hi. “Ni guk sung na na sem ding uh a, ahi zongin a ni sagih ni-in na tawlnga ding uh hi. Lokhawh hun le anlak hun sungin zong na tawlnga ding uh hi. “Nipikalte’ pawi, mangbuh a tung masa pawi, le kum bei ciangin an kaihkhop pawi na bawl ding uh hi. “Pasal khempeuh Israel Pasian, Topa Pasian’ mai-ah kum khatin thumvei kilak ding uh hi. Bang hang hiam cih leh note’ mai-ah minam dangte ka hawlkhia ding a, na gamgite uh nomau a dingin ka keek ding hi. Topa na Pasian uh’ mai-ah kum khatin thumvei a kilak dingin na paitoh sungun na leitang uh mi khat peuhpeuh in a hong deihgawh khak ding lunghihmawhna om lo ding hi. “Note in silngo tawh keimah biakpiakna si na pia khawm kei ding uh a, Paisan Pawi biakpiakna zong zingsang dong na omsak kei ding uh hi. “Note in na anpalte uh lakah a tung masa pen Topa na Pasian uh’ inn-ah na paipih ding uh hi. “Note in keelno a pi’ nawizu tawh na huan kei ding uh hi,” a ci hi. Topa in Moses kiangah, “Hih thute gelh in. Hih thute tawh kizui-in nang le Israel tawh thuciamna khat ka bawlzo hi,” a ci hi. Tua lai-ah sun sawmli le zan sawmli sung Topa tawh Moses om a, tua hun sungteng anletui a ne kei hi. Amah in suangpek tungah thuciamna kammalte ahi thupiak sawmte a gelh hi. A khut sungah thuciamna suangpek nih tawh Sinai Mual tung panin Moses hong paisuk ciangin, Pasian tawh amah kiho khin ahih manin a maitang vun a taan lamtak Moses in thei lo hi. Aaron le Israel mite khempeuh in Moses a muh ciangin, a maitang vun na taang a, ama mai-ah a pai ding uh amaute lau uh hi. Ahih hangin amaute kiangah Moses pai hi. Aaron le mihon makaite khempeuh ama kiangah hong paikik uh a, Moses in amaute hopih hi. Tua khit ciangin Israel mi khempeuh a nai-ah hong pai uh a, Topa in Sinai Mual-ah ama tunga a gen khempeuh thupiakna-in amaute tungah a pia hi. Moses in amaute tawh thugen a man khit ciangin, amah in a maitangah kiliahna puan khat a koih hi. Ahih hangin Topa tawh a kiho dingin ama mai-ah Moses a tum peuhpeuh ciangin, amah a pusuah kik mateng a kiliahna puan la khia hi. Amah hong paikhia-in ama tungah a kipia thute Israel mite kiangah a gen ciangin, Israel mite in Moses’ maitang vun a taang mu uh hi. Amah tawh a kiho dingin a pai matengin Moses in kiliahna puan tawh a maitang a khuh kik hi. Moses in Israel mihonpi khempeuh khawmin amaute kiangah, “Hihte pen note’ hih ding Topa’ hong thupiak ahi hi. Ni guk sungin nasep kiman ding a, ahih hangin a ni sagih ni-in thupi-a tawlngakna Sabbath siangtho Topa’ tungah na nei ding uh hi. Tua ni-in na khat peuhpeuh a sem peuhmah kithat ding hi. Sabbath ni-in na tenna khempeuh uhah mei na cih kei ding uh hi,” a ci hi. Moses in Israel mihonpite khempeuh tungah, “ Topa’ hong thupiak hih bang ahi hi: Note in Topa’ tungah biakna na pia ding uh hi. A pia nuam peuhmah in Topa’ tungah biakna paipih un. Tuate in: Kham, ngun le sumngo, a dum, a dupsan, a ausan khaute le a kopin a kikhuk puan hoihte, keelmul, a kisansak tuutal vunte le savunte; singkha sing, meivak a’ ding sathau, nilh sathau le a paknamtui dingin a namtui nate, siampipuan le awmdalah bulh dingin onik suang le suang dangte ahi hi. “Note’ lak panin siamna a nei mi peuhmah hong paisak unla, Topa’ thupiaksa khempeuh bawlsak un. Tua a bawl dingte pen biakbuk, a puanbuk le a khuhna, a vankhainate le a khuampeekte, a zawlte, a khuampite, a bullente; singkuang a zawlte tawh, hehpihna tokhom le kongkhak dalna puan; sabuai a zawlte le a nazatte khempeuh tawh, Ompihna Anlum; khuavak dingin meivakkhuam zong, a nazatte le a meivakte tawh, meivak dingin sathau; paknamtui biakna tau, a zawlte tawh, nilh sathau le a namtui paknamtui le biakbuk kongah kongkhak a’ ding puankhai; meihal biakna tau, a sumngo siklen, a zawlte, a nazatte khempeuh, kuang le a ngakna tawh; buktual a a puankhaite, a khuampite le a bullente tawh, tual kongpi a’ ding puankhai; biakbuk khetphimte le huang khetphimte, le a khaute; siangtho munah zat dingin limtakin a kigan puante, amau’ siampi nasep nadingin siampi Aaron a’ ding puan siangtho le ama tapate’ puante ahi hi,” a ci hi. Tua ciangin Israel mihonpi khempeuh Moses’ omna panin paikhia uh hi. Piak nopna lungsim a nei mi peuhmah hong pai tawm uh a, kikhopna buk le a nasep nading khempeuh le puan siangthote a zat dingin Topa a’ ding a piakte uh hong puak uh hi. Tua ahih ciangin numei, pasal hong pai uh hi. Piak nopna lungsim a neite khempeuh in tukkilhte, bilbahte, min gelhna zungbuhte, le banbulhte ahi kham tawh a kibawl na namkim hong paipih uh a, a milip in Topa’ tungah kham tawh piakna ap uh hi. A dum, a dupsan, a ausan khaute, puan hoih, keelmul, a kisansak tuutal vunte, ahih kei leh savun hoihte ahi zongin a nei mi peuhmah in tuate hong paipih uh hi. Ngun ahi a, sumngo ahi zongin a pia thei peuhmah in Topa’ tungah tua nate paipih uh a, nasep nadinga kimang thei ding singkha sing a nei mi peuhmah in zong hong paipih hi. A hih thei numei khempeuh in a khut uh tawh khau khuk uh a, amau’ khuksa a dum, a dupsan, a ausan khaute le a kopin a kikhuk khaute hong paipih uh hi. Hih theih siamna a nei numei khempeuh in zong keelmul khuk uh hi. Makaite in siampipuan le awmdal a bulh dingin onik suang le suang dangte, meivak ding, nilh sathau ding, le paknamtui dingin a namtui nate le sathau hong paipih uh hi. Topa in Moses tunga a thupiaksa nasep nadingin na khat peuhpeuh a pia nuam numei pasal Israel mi khempeuh in utthu-a biakna-in Topa’ tungah hong paipih uh hi. Moses in Israel mite kiangah, “Thei un; Topa in a minin Judah minam, Hur’ tapa Uri, Uri’ tapa Bezalel sam khin hi. Topa in amah le Dan minam Ahisamak’ tapa Oholiab tungah midangte hilh siamna pia khin hi. Amah in khutsiam nasep, geelsiam nasep; a dum, a dupsan, a ausan khaute le a kopin a kikhuk puanzep siam nasep; siamgat siamna, le geelsiam nasep ahi zongin nasep namkim a sem dingin amaute tungah siamna a guan hi. “Bezalel le Oholiab le biakbuk lamna-ah nasep khat peuhpeuh sep nading zia a thei dingin Topa in siamna le pilna a guat mi peuhmah in Topa’ thupiaksa khempeuh tawh kituakin sem ding uh hi,” a ci hi. Moses in Bezalel le Oholiab le Topa in nasep siamna a guat mi, nasem a pai dingin a ut mi peuhmah a sam hi. Israel mite in biakbuk sep nadingin utthu-a a piak uh nate a paipih khempeuh uh amaute in Moses’ tung panin a sang uh hi. Amaute in zingsang simin utthu-a piakna ama tungah paipih uh ahih manin, biakbuk nasep a namkim a sem mi khempeuh amau’ nasepna ciat panin hong pai uh a, Moses kiangah, “ Topa in eite’ sep dingin a hong sawl nasep nadingin a kicing ding zahval, mite in tampi hong paipih uh hi,” a ci uh hi. Tua ahih ciangin Moses in thu pia-in giahphual khempeuhah thu kizasak a, “Numei hitaleh pasal hitaleh kuamah in biakbuk-a dingin pia thuah nawn kei un,” kici hi. Tua ahih ciangin a piak ding uh mite kikho hi. Bang hang hiam cih leh amau’ piaksa nate pen nasepna khempeuh hih nadingin kicing a, valzaw lai hi. Nasem mite’ lak panin a hih thei mi khempeuh in puan dal sawm tawh biakbuk bawl uh hi. Tuate pen a kopin a kikhuk a kigan puan hoih le a dum, a dupsan, a ausan khaute tawh kibawlin hoihtakin a kibawl kherub-te tawh zem uh hi. Tua puan a dung pi sawmli le nih, a vai pi guk ciat hi a, a puan khempeuh kikim hi. Amaute in puan dal ngate khatlekhat khuituahin, puan adang ngate zong khatlekhat mah khuituah uh hi. Amaute in a kikhuituah masa puan a nawlnung pen nawl dung sukah khau dum tawh a bilvangte bawl uh a, tua mah bangin a kikhuituah nihna puan a nawlnung pen nawl dung sukah zong tuate mah a bawl uh hi. Amaute in puan khat tungah bilvang sawmnga bawlin, a kikhuituah a nihna puan nawlah bilvang sawmnga mah bawl uh a, a bilvangte khatlekhat kitang hi. Amaute in kham kilhna sawmnga bawlin, tua kilhnate tawh a puan khatlekhat kimatsak uh hi. Tua ahih ciangin biakbuk puan bupkhat a suak hi. Amaute in biakbuk a tung khuh nadingin keelmul tawh puan dal sawm le khat a bawl uh hi. Tua puante a dung pi sawmli le nga, a vai pi guk ciat hi a, tua puan sawm le khatte kikim hi. Amaute in puan dal ngate khatlekhat khuituahin, a puan dang gukte zong khatlekhat mah a khuituah uh hi. Amaute in a kikhuituah puan khat a nawlnung pen nawlah a bilvang sawmnga bawlin, puan dal a zom nawlah a bilvang sawmnga mah a bawl uh hi. Tuate bup khat a suah theih nading, puanbuk a kimatsak dingin amaute in kilhna sawmnga sumngo tawh a bawl uh hi. Amaute in puanbuk-a dingin a kisansak tuutal vunte le keel vunte tawh khuhna khat a bawl uh hi. Tua ciangin amaute in biakbuk-a dingin singkha sing tawh a po to khawm ding khuampeekte a bawl uh hi. A khuampeekte khat a tun pi sawm le pi nga hi a, a vai pi nih le letmat thum ciat ahi hi. A bulh nadingin khuampeek khat in zang nih ciat nei a, amaute in biakbuk khuam khempeuh a dingin a bawl uh hi. Amaute in biakbuk-a dingin khuampeekte hih bangin bawl uh hi: Leitaw lampang a dingin khuam sawmnih; a khuampeek sawmnihte’ bulah bullen sawmli ngun tawh, a zang nihte a dingin khuampeek khat bulah bullen nih, le a khuampeek dang khat bulah a zang nihte a dingin bullen nih mah a bawl uh hi. Biakbuk a pang nihna lam, leilu lampang a dingin amaute in khuampeek sawmnih le ngun tawh kibawl a bullen sawmli, khuampeek khat bulah bullen nih, adang khuampeek khat bulah bullen nih mah a bawl uh hi. Nitumna lam, biakbuk nung lama dingin amaute in khuampeek guk a bawl uh hi. Biakbuk nung lam kiute a dingin a khuampeek nih zong a bawl uh hi. Tuate a bul lamah kikak a, ahih hangin a kual masa ah a dawn kimat hi. A kiu nihte-a dingin tua bangin nih a bawl uh hi. Ngun tawh kibawl amau’ bullente tawh khuampeek giat om hi: Bullen sawm le guk om a, khuampeek khat bulah bullen nih ciat a om hi. Amaute in singkha singzawl, biakbuk pang khat-a khuampeekte-a’ dingin nga, biakbuk a pang langkhat a khuampeekte a dingin zawl nga, nitumna lam biakbuk nung lampang a khuampeekte a dingin zawl nga mah a bawl uh hi. A khuampeekte’ kimciang takah mong khat panin mong khat dongin a zawl laita paisuaksak uh hi. Amaute in kham tawh khuampeekte zutin, zawlte a len dingin kham tawh a kualte bawl uh a, kham tawh a zawlte a zut uh hi. Amaute in a dum, a dupsan, a ausan khaute le a kopin a kikhuk a kigan puan hoih tawh dalna puan a bawl uh hi. Hoihtakin a kibawl kherub-te tawh amaute in tua dalna puan a zem uh hi. Tua puan a dingin amaute in singkha khuampi li bawl uh a, kham tawh tua khuampite a zut uh hi. A vankhainate pen kham hi a, tua khuamte a dingin ngun bullen li a sung uh hi. Amaute in puanbuk kongkhak-a dingin a dum, a dupsan, a ausan khaute le phim tawh kikhui-in a kizem, a kopin a kikhuk a kigan puan hoih tawh kongpuankhai khat le, a khuampi ngate a vankhainate tawh a bawl uh hi. Amaute in tuate’ luzepnate kham tawh zutin, a gaknate kham hi a, ahih hangin a bullen ngate pen sumngo ahi hi. Bezalel in singkha sing tawh singkuang bawl a, a dung pi thum le letmat kua, a vai pi nih le letmat thum, a sanna pi nih le letmat thum mah ahi hi. Kham citak tawh a sung le a pua zutin, a kimkotah kham geihual khat a bawl hi. A kiu lite a dingin kham kual li, a pang khatah kual nih, a pang langkhat a dingin kual nih mah a sung hi. Singkha singzawlte zong bawl a, kham tawh tuate zutin, singkuang puak nadingin singkuang panga kualte sungah a zawlte a khum hi. Kham citak tawh hehpihna tokhom khat bawl a, a dung pi thum le letmat kua, a vai pi nih le letmat thum ahi hi. Amah in sek tawh a kiseek kham tawh kherub nih, hehpihna tokhom mong tuakah a bawl hi. Kherub khat mong khatah, kherub khat a mong langkhatah om a, a mong nihte-ah hehpihna tokhom tawh sakhatin kherub-te a bawl hi. Kherub-te in a khate uh tua tokhom tungah zalin, amau’ khate tawh hehpihna tokhom liimsun uh a, amaute khatlekhat kimaingat uh hi. Hehpihna tokhom lamah kherub-te’ mai a nga hi. Amah in singkha sing tawh sabuai zong bawl a, a dung pi thum, a vai pi khat le alang, a sanna pi nih le letmat thum ahi hi. Kham citak tawh zut a, a kimkotah kham tawh a geihual khat a bawl hi. Khut peek cia a pha zawl khat a kimkotah bawl a, a zawl kimkotah kham geihual khat a bawl hi. Tua sabuai a dingin kham kual li sungin, a kiu li, a khe lite-ah a kualte a gak hi. Sabuai puak nading zawlte a len dingin a zawl gei-ah a kualte om hi. Sabuai puak nadingin singkha singzawlte bawl a, kham tawh tuate a zut hi. Amah in sabuai tunga om ding beellekuangte, paknamtui a dingin kuangdaite le pakante, tui buah nadingin kuang-ukte le thawl gongbakte, kham citak tawh a bawl hi. Amah in kham citak tawh meivakkhuam zong a bawl hi. Meivakkhuam a bul le a kungte pen a kiseek nate tawh kibawl hi. A haite, a nunte, le a paakte, meivakkhuam tawh sakhat ahi hi. A pangte panin hiang guk meengkhia a, a pang khatah meivakkhuam hiang thum omin, a pang langkhatah meivakkhuam hiang thum mah a om hi. Hiang khat tungah a nun le a pak a om, almond gah tawh a kibang hai thum, le adang hiang khat ciat tungah a nun le a pak a om, almond gah tawh a kibang hai thum mah kibawl hi. Tua ahih ciangin meivakkhuam panin a hiang gukte a meengkhia ahi hi. A meivakkhuam tung mahmahah a nun le a pak tawh a om, almond gah bangin a kibawl hai li omin, meivakkhuam panin hiang guk a kopte’ bulah tua tawh sakhat ahi nun khat om hi. Amau’ nunte le a hiangte pen tua tawh sakhat hi a, a buppi-in kham citak a kiseek sakhat ahi hi. A meivak sagihte le a taitehte le a kuangte kham citak a bawl ahi hi. Amah in kham citak tawi sawmnih le tawi khat a gik tawh tua meivakkhuam le a nazatte khempeuh a bawl hi. Amah in singkha sing tawh paknamtui biakna tau bawl a, a dung pi khat le alang, a vai pi khat le alang mah ahi hi. Tua pen a ning kikim a, a sanna pi thum hi a, a kite pen tua biakna tau tawh sakhat ahi hi. Amah in a tungzang, a kimkota a pangte le a kite kham citak tawh a zut hi. A kimkotah kham geihual khat le a puak nading zawlte a len dingin a pang tuak a geihual nuai takah kham kual nih a bawl hi. Amah in singkha sing tawh a zawlte bawlin, kham tawh tuate a zut hi. Amah in paknamtui bawlte’ gawm bangin a siangtho nilh sathau le a siangtho a namtui paknamtui zong a bawl hi. Amah in meihal biakna tau zong singkha sing tawh bawl a, a dung pi sagih le alang, a vai pi sagih le alang mah ahi hi. A ning kikim a, a sanna pi li le alang ahi hi. Amah in tua tau a dingin a kiu lite-ah a kite a bawl hi. A kite, a tau tawh sakhat hi a, sumngo tawh a zut hi. Biakna tau nazat khempeuh, beelte, kawbiate, kuangte, sikkate le vutluahna peekte a bawl hi. A nazat khempeuh sumngo tawh a bawl hi. Biakna tau a dingin a zawl nuai-ah, a kimciang a ban suk, a vang simsiam, sumngo siklen khat a bawl hi. A zawlte a len dingin sumngo siklen kiu lite’ tunga ding a kual li a sung hi. Singkha sing tawh a zawlte bawl a, sumngo tawh tuate a zut hi. A puak nadingin biakna tau pangte a om a kualte sungah a zawlte khum a, singpekte tawh biakna tau a kuakin a bawl hi. Amah in kikhopna buk kongkhakah na a sem numeite’ limlangte panin sumngo tawh kisilna kuang le a ngakna a bawl hi. Amah in buktual a bawl hi. Leitaw lampang buktual a puan kikhaite pen a kopin a kikhuk a kigan puan hoih hi a, pi za le pi sawmnga a sau hi. A khuampite sawmnih hi a, a bullente zong sawmnih mah ahi hi. Sumngo tawh kibawl a, ahih hangin a vankhainate le a gaknate ngun ahi hi. Leilu lampang a ding zong tua bangmah ahi hi. Nitumna lampang a dingin puan kikhai sukte pi sawmsagih le pi nga hi a, a khuampite sawm hi-in, a bullente sawm mah hi a, a vankhainate le a gaknate ngun ahi hi. A mailam, nisuahna lama dingin pi sawmsagih le pi nga mah ahi hi. Kongpi pang khat-a ding puan kikhai sukte pen pi sawmnih le nih le alang hi a, khuampi thum le bullen thum tawh ahi hi. A pang langkhat ading zong tua bangmah ahi hi. Buktual kongpi hih lam le hua lamah khuampi thum le bullen thum tawh a puan khaisukte pi sawmnih le nih le alang ahi hi. Buktual kimkota puan kikhai sukte khempeuh pen a kopin a kikhuk a kigan puan hoih ahi hi. Khuampite a’ ding a bullente pen sumngo hi a, ahih hangin a vankhainate le a gaknate ngun ahi hi. A khuamluzepnate a kizutna zong ngun hi a, buktual a khuamte khempeuh ngun kibawl gakna tawh kigak hi. Buktual kongpi puankhai pen a dum, a dupsan, a ausan khaute le a kopin a kikhuk a kigan puan hoihte phim tawh kikhui-in a kizem ahi hi. Buktual a kikhai sukte tawh kizui-in pi sawmthum sau-in, a vailam pi sagih le alang sang hi. A khuampite li hi a, a bullen lite sumngo hi a, a vankhainate ngun hi a, a khuamluzepnate le a gaknate a kizutna ngun mah ahi hi. Biakbuk le buktual kimkota ding khetphimte khempeuh sumngo ahi hi. Hihte pen siampi Aaron’ tapa Ithamar’ vaihawmna nuai-ah Levi mite’ sep ding Topa’ omna ahi biakbuk-a dingin Moses’ thupiakna tawh a kisim van malte ahi hi. Judah minam Hur’ tapa ahi Uri’ tapa Bezalel in Topa in Moses a thupiak khempeuh a bawl hi. A khut siam, a geel siam, a dum, a dupsan, a ausan khaute le a kopin a kikhuk a kigan puan hoihte a zem, Dan minam, Ahisamak’ tapa Oholiab in zong amah a huh hi. Nasep nadinga a kizang kham khempeuh, biakbuk lamna-a a kizang, a kipia khamte, biakinn shekel-in talen sawmnih le kua le shekel zasagih sawmthum ahi hi. Mi simna sungah a kihel mihonte tung panin a kingah ngunte, biakinn shekel-in talen zakhat le shekel tulkhat zasagih sawmsagih le nga ahi hi. Mi khat ciangin beka khat (biakinn shekel-in shekel lang) pai pia a, a pia mi, kum sawmnih a pha panin a tungsiah mi kisimna a a kisim peuhmah tul zaguk le tulthum le zanga le sawmnga ahi hi. Ngun talen za khatte pen biakbuk khuam bullente le dalna puan khuam bullente dingin sun’ ding ahi hi. Talen za khatte bullen zakhat, bullen khat ciangin talen khat ahi hi. Amah in shekel tulkhat zasagih sawmsagih le nga pen khuampi tunga vankhai nadingin bawl a, a khuamluzepnate zutin tuate a’ ding gakna a bawl hi. A kipia sumngo khempeuh, talen sawmsagih le shekel tulnih le zali ahi hi. Amah in tua tawh kikhopna buk kongkhakte a dingin khuam bullente, sumngo biakna tau le a sumngo siklen le biaknatau nazat khempeuh, buktual kimkota khuam bullente, buktual kongpi khuam bullente, biakbuk khetphimte khempeuh le buktual kimkota khetphim khempeuh a bawl hi. Topa in Moses a thupiaksa bangin, siangtho munah nasep nadingin amaute in a dum, a dupsan, a ausan khaute tawh limtakin a kigan puan a bawl uh hi. Amaute in Aaron a dingin biakna puan siangtho a bawl uh hi. Amaute in siampipuan pen kham, a dum, a dupsan, a ausan tuumul khaute le a kopin a kikhuk a kigan puan hoihte tawh a bawl uh hi. Hoihtakin a kigeel, a dum, a dupsan, a ausan tuumul khaute le a kopin a kikhuk a kigan puan hoihte-ah zat dingin kham peek kiseekin khau-in kizen hi. Amaute in siampipuan a dingin liangkaih puan bawl uh a, a mong nih tegel ah zom uh hi. Topa in Moses a thupiaksa bangin, amah a gak dingin hoihtakin a kigan tua tunga puan om pen kham, a dum, a dupsan, a ausan tuumul khaute le a kopin a kikhuk a kigan puan hoihte tawh kibawlin, a nate le a sepna zia a kibang ahi hi. Israel tapate a phazah tawh kizui-in, onik suangte kitat a, kham tawh a kizepna sungah a minte kigelhin, min gelh siamte’ gelh bangin kibawl hi. Topa in Moses a thupiaksa bangin Israel tapate phawkna suang dingin siampipuan’ liangkaih puan tungah a bulh uh hi. Amaute in kham, a dum, a dupsan, a ausan tuumul khaute le a kopin a kikhuk a kigan puan hoihte tawh, siampipuan a kibawl puan bangin hoihtakin awmdal a bawl uh hi. Tua awmdal a ning kikim a, thuap nihin kibawl a, a kikhep ciangin a dung letmat kua, a vai letmat kua mah a pha hi. Amaute in tua sungah suang gual li bulh uh a, Sardis suang, topaz suang, le karbankal suang gual khat pen a gual masa ahi hi. A gual nihna-ah emerald suang, sapfaia suang, le diamond suang ahi hi. A gual thumna-ah jakinth suang, agate suang, le amethyst suang ahi hi. A gual lina-ah beryl suang, onik suang, le jasper suang ahi hi. Kham tawh zepna sungah tua suangte khempeuh kikoih hi. Israel tapate a phazah tawh kituakin amaute’ min a kigelhna suang sawm le nih om hi. Tua min gelhnate pen minam sawm le nih a huamin a kigelh ahi hi. Amaute in awmdal tungah khau tawh a kibang, a kihual kham citak khainiang a bawl uh hi. Kham tawh a kibawl zepna nih le kham kual nih bawl uh a, awmdal mong nihte-ah kham kual nihte a koih uh hi. Amaute in awmdal mongte-ah a om kual nihte pen kham khau nihte tawh a khih uh hi. Amaute in zepna nihte tungah khau mong nihte zom uh a, tua bangin amaute in siampipuan’ liangkaih puan tung a mai lamah a bulh uh hi. Tua ciangin amaute in kham kual nih bawl uh a, siampipuan tawh a kizom a sunglam nawl, awmdal mong nihte-ah a bulh uh hi. Amaute in kham kual nih bawl uh a, siampipuan’ liangkaih puan nihte’ nuai a mailam, hoihtakin a kigan siampipuante’ puankhau a kizopna tung takah a bulh uh hi. Topa in Moses a thupiaksa bangin, hoihtakin a kigan siampipuan khau tungah a om theih nading le siampipuan tung panin awmdal a kol theih loh nadingin amaute in siampipuan’ kualte-ah khau dum khatin a kualte tawh awmdal a gak uh hi. Amaute in khau dum bek tawh a kigan siampi puantualpi zong a bawl uh hi. A kikeek loh nadingin puantualpi ngawng pen puan ngawng vang bangin a ngawng kimkotah a zimna om hi. Puantualpi mongte-ah amaute in a dum, a dupsan, a ausan tuumul khaute le a kopin a kikhuk a kigan puan hoih tawh mang kawlsing gahte a bawl uh hi. Topa in Moses a thupiaksa bangin, amaute in kham citak siklongte zong bawl uh a, puantualpi mong kimkot tunga mang kawlsing gahte’ kikalah siklongte a koih uh hi. Biak nasep nadinga puantualpi mong kimkot tungah siklong khat, mang kawlsing gah khat, siklong khat, mang kawlsing gah khat, cih bangin kihelh hi. Topa in Moses a thupiaksa bangin, amaute in Aaron le a tapate a dingin khau hoih tawh a kigan puantungsilhte le khau hoih tawh a kigan dialpi le khau hoih tawh a kigan lukhute, a kopin a kikhuk a kigan puan hoihte tawh a kibawl pheituam hoihte, le a kopin a kikhuk a kigan puan hoihte tawh a kibawl puan kawnggak le phim tawh kikhui-in a kizem a dum, a dupsan, a ausan tuumul puante zong a bawl uh hi. Amaute in kham citak tawh a siangtho kizepna peek khat bawl uh a, min gelhna a kibawl mah bangin tua tungah thu gelhin, “ Topa’ tungah siangtho,” ci uh hi. Topa in Moses a thupiaksa bangin, amaute in a tunga dialpi tungah a gak dingin tua tungah khau dum khat a vawh uh hi. Tua bangin kikhopna buk ahi biakbuk nasep khempeuh kiman hi. Topa in Moses a thupiaksa khempeuh bangin Israel mite in sem khin uh hi. Tua ahih ciangin amaute man khin uh hi. Amaute in biakbuk, a puanbuk le a nazat khempeuh, a vankhainate, khuampeekte, a zawlte, a khuampite le a bullente; a kisansak tuutal vunte le savun dangte tawh a kibawl khuhna le kong puankhai dalna puan; thuciamna singkuang, a zawlte le hehpihna tokhom tawh; sabuai le a nazat khempeuhte le Ompihna Anlum; kham citak meivakkhuam le meivak a kibulhsa tawh a meivakte le a nazatte khempeuh le meivak a ding sathau; kham biakna tau, nilh sathau le a namtui paknamtui le puanbuk kongkhak-a ding kongpuankhai; sumngo biakna tau le a sumngo siklen, a zawlte le a nazat khempeuh; kisilna kuang le a ngakna; buktual a puan kikhaite, a khuampite, a bullente le buktual kongpi-a ding kongpuankhai, a khaute le a khetphimte; le kikhopna buk ahi biakbuk nasepna-ah a nazat khempeuh; siampi nasep nadingin siangtho mun a zat ding hoihtakin a kibawl puante, siampi Aaron a’ ding biakna puan siangthote le ama tapate’ puante, Moses kiangah a paipih uh hi. Topa in Moses a thupiaksa khempeuh tawh kituakin Israel mite in nasep khempeuh hih uh hi. Moses in nasep khempeuh vel a, amaute in Topa’ thupiaksa bangin a bawl khitna a mu hi. Tua ciangin Moses in amaute thupha a pia hi. Topa in Moses kiangah, “Kha masa a ni masa ni-in nangmah in kikhopna buk ahi biakbuk na lam ding hi. Tua buk sungah thuciamna singkuang na koih ding a, dalna puan tawh singkuang na dal ding hi. Tua ciangin sabuai tumpihin a om ding bangin na koih ding hi. Meivakkhuam zong tumpihin a meivakte na bulh ding hi. Thuciamna singkuang mai-ah paknamtui hal nadingin kham biakna tau na koih ding a, biakbuk kongkhak dingin kongpuankhai na khai ding hi. Kikhopna buk ahi biakbuk kongkhak mai-ah meihal biakna tau koihin, kikhopna buk le biakna tau kikalah kisilna kuang na koih ding a, a sungah tui zong na koih ding hi. A kimkotah buktual na bawl ding a, buktual kongpi dingin kongpuankhai na khaito ding hi. “Tua ciangin sathau la-in, biakbuk le a sunga om khempeuh na nuh ding a, biakbuk le a inn sungvan khempeuh na ap ding hi. Tua ciangin a siangtho biakna van a suak ding hi. Nangmah in meihal biakna tau le a nazat khempeuh zong sathau nuhin biakna tau na ap ding a, tua biakna tau a siangtho pen hi ding hi. Kisilna kuang le a ngakna zong sathau nuhin na ap ding hi. “Tua ciangin kikhopna buk kongkhakah Aaron le ama tapate paipihin, tui tawh amaute na sil ding a, amah in keima tungah siampi na a sep theih nadingin puan siangthote Aaron silhsakin, amah sathau nilhin na ap ding hi. Tua ciangin ama tapate zong paipihin puantungsilhte na silhsak ding a, amaute in keima tungah siampi na a sep theih nadingun amaute’ pa sathau na nilh bangin amaute zong sathau na nilh ding hi. Amau’ sathau kinilhna in amau’ khang tawntungin siampi hi paisuaksak ding hi,” a ci hi. Moses in zong Topa in amah a thupiaksa khempeuh tawh kituakin a hih hi. A kum nihna a kha masa, a ni masa ni-in biakbuk kilam hi. Moses in biakbuk lam hi. Amah in a bullente koihin, a khuampeekte phut a, a zawlte khumin, a khuampite a phut hi. Biakbuk tungah a tungkhuhna zal a, Topa in Moses a thupiaksa bangin puanbuk a tung a khuh hi. Topa in Moses a thupiaksa bangin amah in thuciamna suangpek la-in singkuang sungah koih a, singkuang tungah a zawlte koihin, singkuang tung sanah hehpihna tokhom a nga hi. Biakbuk sungah singkuang paipihin, kongpuankhai dalna puan khai a, thuciamna singkuang a dal hi. Topa in Moses a thupiaksa bangin, amah in biakbuk leilu lam pang, dalna puan pualam, kikhopna buk sungah sabuai koih a, Topa’ mai tua sabuai tungah a om ding bangin anlum a koih hi. Topa in Moses a thupiaksa bangin, amah in biakbuk leitaw lam pang, sabuai tawh a kigalsai-in, kikhopna buk sungah meivakkhuam koih a, Topa’ mai-ah meivakte a koih hi. Topa in Moses a thupiaksa bangin, amah in kikhopna buk sung, dalna puan mai-ah kham biakna tau koih a, tua tungah a namtui paknamtui a hal hi. Amah in biakbuk kongkhak ding kongpuankhai a mun dingah a khai hi. Topa in Moses a thupiaksa bangin amah in kikhopna buk ahi biakbuk kongkhakah meihal biakna tau koih a, tua tungah meihal biakna le an tawh biakna a pia hi. Kikhopna buk le biakna tau kikalah kisilna kuang koih a, tua sungah kisil nading tui zong a koih hi. Moses le Aaron le a tapate in amau’ khut le a khete uh tua tui tawh a sil uh hi. Topa in Moses a thupiaksa bangin, kikhopna bukah amaute a pai ciang le biakna tau nai-ah a pai uh ciangin amaute kisil uh hi. Amah in biakbuk le biakna tau kiimah a buktual bawl a, buktual kongpi kongpuankhai a khai hi. Tua ahih ciangin Moses in a nasep a man ta hi. Tua ciangin meii in kikhopna buk tuam a, biakbuk sungah Topa’ minthanna vang a dim hi. Tua ahih manin kikhopna buk sungah Moses tum thei lo hi. A khualzin sung tawntung uh biakbuk tung panin meii a kilakkhiat toh peuhpeuh ciangin Israel mite mailam nawtin pai uh a, ahih hangin meii a kilakkhiat kei leh a kilakkhiat ni mateng amaute paikhia lo uh hi. Bang hang hiam cih leh a khualzin sung tawntung uh Israel mi khempeuh’ muhna-ah biakbuk tungah sunin Topa’ meii om a, zanin mei a om hi. Topa in Moses sam a, kikhopna buk panin amah hopihin hih bangin ci hi: “Israel mite tungah gen inla, amaute tungah hih bangin ci in: Note khatpeuh in Topa’ tungah biakna na paipih uh ciangin, ganhing tawh na biakna pen bawnghon panin hitaleh tuuhon panin hitaleh na paipih ding uh hi. “Ama biakna pen bawnghon panin meihal biakna ahihleh, amah in a sitbaang lo a pa khat pia ding a, Topa’ mai-ah a kisan’ theih nadingin kikhopna bukkongah pia ding hi. Amah in meihal biakna ganhing lu tungah a khut nga ding a, ama a dingin kilemna bawl nadingin kisang ding hi. Tua ciangin amah in Topa’ mai-ah a bawngtal go ding hi. Aaron’ suan siampite in a si hong paipihin, kikhopna buk kong-a biakna tau kimkotah a si theh ding hi. Tua ciangin amah in meihal biakna ganhing a vun hawkin semnen ding a, Aaron’ suan siampite in biakna tau tungah mei koihin, mei tungah a ngeina bangin sing koih ding hi. Tua ciangin Aaron’ suan siampite in a sanente, a lutang le a thaute, biakna tau tunga om mei tunga sing tungah a ngeina bangin koih ding a, ahih hangin a sungkuate le a khete tui tawh sil ding hi. Tua ciangin siampipa in mei tawh kihal biakna, Topa a dingin a gim namtui, meihal biakna-in biakna tau tungah a vekpi-in hal ding hi. “Meihal biak nadingin ama letsong pen tuu hitaleh keel hitaleh a hon lak panin ahihleh, amah in a sitbaang lo a pa khat pia ding hi. Amah in Topa’ mai biakna tau tung leilu lampangah go ding a, Aaron’ suan siampite in biakna tau tung kimkotah a si theh ding hi. Tua ciangin amah in semnen ding a, biakna tau tunga om mei tunga sing tungah a ngeina bangin siampipa in a lutang le a thau tawh koih khawm ding a, ahih hangin a sungkuate le a khete amah in tui tawh sil ding hi. Siampipa in a vekpi-in pia-in, biakna tau tungah hal ding hi. Tua pen Topa a dingin a gim namtui, mei tawh kihal biakna, meihal biakpiakna ahi hi. “ Topa’ tungah ama biakna pen vasa tawh meihal biakna ahihleh, amah in vakhu tawh ahi zongin, kawl vakhuno tawh ahi zongin, a biakna hong paipih ding hi. Tua ciangin siampipa in biakna tau-ah paipihin a lu heektat ding a, biakna tau tungah hal ding hi. Biakna tau pangah a si taakkhiasak ding hi. Amah in a tangkhai le a multe bot khia-in, vut koihna, biakna tau pang nisuahna lamah lawnkhia ding hi. Amah in a khate-in balkek ding a, ahih hangin baltat lo ding hi. Tua ciangin siampipa in mei tunga om sing tung, biakna tau tungah hal ding hi. Tua pen Topa a dingin a gim namtui, mei tawh kihal biakna, meihal biakna ahi hi. “Mi khatpeuh in Topa’ tungah an tawh biakna hong paipih le, ama biakpiakna pen annel hi ding hi. Amah in tua annel tungah sathau sungin, paknamtui koihin, tua ciangin Aaron’ suan siampite kiangah paipih ding hi. Tua ciangin siampipa in annel khutdim le sathau, a paknamtui khempeuh tawh la ding a, siampipa in hih pen Topa a dingin a gim namtui, mei tawh biakna, phawkna-in biakna tau tungah hal ding hi. An tawh biakna a valteng pen Aaron le a tapate a’ ding hi ding hi. Tua pen Topa’ tungah mei tawh biakna sung panin a siangtho pen ahi hi. “Nangmah in biak nadingin meibung sunga ki-em an tawh biakna na paipih ciangin, silngo sawh loh, sathau tawh a kizut mohpheng hi ding hi. “Na biakna pen beelpei daii tunga ki-em an tawh biakna ahihleh, sathau tawh a kibawl annel hi ding hi. Balnenin a tungah sathau na sung ding hi. Tua pen an tawh biakna ahi hi. “Na biakna pen sikbeel daii sunga kihuan an tawh biakna ahihleh, sathau tawh a kibawl annel hi ding hi. Nangmah in hih nate tawh a kibawl an tawh biakna, Topa’ kiangah na paipih ding a, siampipa kiangah a kipaipih ciangin amah in biakna tau-ah paipih ding hi. Siampipa in an tawh biakna panin a phawkna biakna teng la-in, Topa’ tungah a gim namtui, mei tawh biakna-in biakna tau tungah hal ding hi. An tawh biakna a valteng pen Aaron le a tapate a’ ding hi ding hi. Tua pen Topa’ tungah mei tawh biakna sung panin a siangthopen ahi hi. “ Topa’ tungah na paipih an tawh biakna pen silngo tawh kibawl lo ding hi. Bang hang hiam cih leh silngo hitaleh khuaizu hitaleh khat peuhpeuh Topa’ tungah meihal biakna-in na hal kei ding hi. Anpal tawh biakna ahihleh Topa’ kiangah na paipih thei ding hi. Ahih hangin a gim namtui dingin biakna tau tungah kipia lo ding hi. An tawh na biaknate khempeuh ci na sawh ding hi. An tawh na biakna-ah na Pasian tawh na thuciamna ci sawh loin na om kei ding a, na biakna khempeuh ci na sawh ding hi. “Anpal tawh Topa’ tungah biakna na piak leh, anpal tawh na biak nadingin a vui thak panin kila-in a kigawivui, mei-ah a kihangkeu na pia ding hi. Nang in a tungah sathau sungin, paknamtui na buak ding hi. Tua pen an tawh biakna ahi hi. Siampipa in phawk nadingin a kigawivui an pawlkhat le a sathau leh a paknamtui khempeuh hal ding hi. Tua pen Topa’ tungah meihal biakna ahi hi. “Mi khat’ biakna pen thunuama biakna ahih a, amah in a nu hitaleh a pa hitaleh bawnghon lak panin a piak leh, amah in Topa’ mai-ah a sitbaang lo pia ding hi. Tua ciangin amah in a biakna ganhing lu tungah a khut nga-in kikhopna buk kongah go ding a, tua ciangin Aaron’ suan siampite in biakna tau kimkot tungah a si theh ding uh hi. Thunuama biakna panin Topa’ tungah mei tawh biakna-in a gilpi tuam a thaute le a sungkuate’ tunga a om a thau khempeuh tawh, a kawnga om a kal nihte a thau le a kalte tawh a lakkhiat khop ding ahi a sintuamte pia ding uh hi. Tua ciangin Aaron’ suante in mei tunga om sing tunga meihal biakpiakna tau tung mahah hal ding uh hi. Tua pen Topa a dingin a gim namtui, mei tawh kihal biakna ahi hi. “ Topa’ tungah thunuama a piak ding ama biakna pen tuu le keel honte sung panin a nu hitaleh a pa hitaleh ganhing khat ahihleh, amah in a sitbaang lo pia ding hi. Amah in biak nadingin tuuno khat a piak leh, Topa’ mai-ah pia ding a, a biakna ganhing lu tungah a khut nga-in kikhopna buk mai-ah go ding hi. Tua ciangin Aaron’ suante in biakna tau kimkot tungah a si theh ding uh hi. Tua ciangin thunuama biakna panin Topa’ tungah meihal biakna-in a thau, a nungguh ciangah a ki-attan a mei thau buppi le a gilpi tuam a thaute le a sungkuate tunga om a thau khempeuh tawh, a kawnga om a kal nihte a thau tawh, a kalte tawh a lakkhiat khop ding ahi a sintuamte pia ding uh hi. Tua ciangin siampipa in Topa’ tungah mei tawh kihal an tawh biakna-in biakna tau tungah hal ding hi. “Ama biakna keel ahihleh, amah in Topa’ mai-ah pia ding a, a lu tungah a khut nga-in kikhopna buk mai-ah go ding hi. Tua ciangin Aaron’ suante in biakna tau kimkot tungah a si theh ding uh hi. Tua ciangin Topa’ tungah mei tawh kihal biakna-in piak dingin a gilpi tuam a thau le a sungkuate tunga om a thau khempeuh tawh, a kawnga om a kal nihte a thau tawh, a kalte tawh a lakkhiat khop ding ahi a sintuamte pia ding uh hi. Tua ciangin siampipa in a gim namtui dingin mei tawh kihal an tawh biakna-in biakna tau tungah hal ding hi. A thau khempeuh Topa -a’ ahi hi. Tua pen na khang tawntungun na tenna khempeuh uhah note in a thau le sisan na nek loh nadingun a tawntungin ngeina kip hi ding hi,” a ci hi. Topa in Moses kiangah, “Israel mite tungah hih bangin gen in: Hih lo ding ci-in Topa in a thupiakte khat peuhpeuh, mi khatpeuh in theih lohna hangin khial a, tuate khatpeuh a hihkhak leh, a khial pa pen sathau a kinilh siampipa ahih a, mite tungah tua bangin mawhna hong tut leh, ama gamtatnasa a khialhna hangin a sitbaang lo bawngtalno khat Topa’ mai-ah khialhna hanga biakna-in amah piasak un. Amah in Topa’ mai kikhopna buk kongah a bawngtal paipihin, bawngtal lu tungah a khut nga ding a, Topa’ mai-ah a bawngtal go ding hi. Tua ciangin sathau a kinilh siampipa in a bawngtal si tawmkhat la-in, kikhopna bukah paipih ding hi. Tua ciangin siampipa in a si sungah a khutme diahin, biakbuk dalna puan mai Topa’ mai-ah a si kimkhat sagih vei theh ding hi. Tua ciangin siampipa in kikhopna buk sung Topa’ mai-a om paknamtui biakna tau kite a si kimkhat nuhin, kikhopna bukkongah a om meihal biakna tau bulah bawngtal si a omlai teng sungkhia ding hi. Tua ciangin amah in khialhna hanga biakna bawngtal thau khempeuh a gilpi tuam a thau le a sungkuate tunga om a thau khempeuh tawh, a kawnga om a kal nihte a thau tawh, a kalte tawh a lakkhiat khop ding a sintuamte (thunuama biakna bawngtal panin hihte a kilak mah bangin) la ding a, siampipa in meihal biakna tau tungah tuate hal ding hi. Ahih hangin bawngtal vun le a sa khempeuh, a lutang, a khete, a sungkuate, le a ek tawh, a bawngtal buppi puakhia-in vut kibuakna, giahphual pualam mun siangtho khatah sing a kicih mei tungah amah in hal ding a, vut a kibuakna munah kihal ding hi. “Israel mihonte khempeuh in theih lohna hangin khialhna khat gamta-in tua pen mihonte in a phawk kei a, hih lo ding, ci-in Topa in a thupiakte khat peuhpeuh amaute in hihin a mawh uhleh, amau’ gamtatnasa khialhna a kitheih ciangin, khialhna hanga biak nadingin mihonte in bawngtalno khat pia-in kikhopna buk mai-ah paipih ding uh hi. Tua ciangin mihonte’ upate in Topa’ mai, bawngtal lu tungah amau’ khut nga ding uh a, Topa’ mai-ah tua bawngtal kigo ding hi. Tua ciangin sathau a kinilh siampipa in kikhopna bukah bawngtal si kimkhat paipih ding a, a si sungah a khutme diahin dalna puan mai Topa’ mai-ah sagih vei theh ding hi. Tua ciangin amah in Topa’ mai kikhopna buk sunga om biakna tau kite tungah a si kimkhat zut ding a, kikhopna bukkongah a om biakna tau bulah si a omlai teng sung ding hi. Tua ciangin amah in a thau khempeuh la-in biakna tau tungah hal ding hi. Tua bangin a bawngtal hih ding hi. Amah in khialhna hanga biakna bawngtal a hihsa mah bangin hih zong hih ding hi. Siampipa in amau a’ dingin kilemna bawlsak ding a, amaute kimaisak ding hi. Amah in giahphual pua-ah bawngtal puakhia ding a, a masa bawngtal a hal mah bangin a hal ding hi. Tua pen mihonpi a dingin khialhna hanga biakna ahi hi. “Ukpa khat khialin, hih lo ding, ci-in Topa ama Pasian in a thupiakte khempeuh lakah khat peuhpeuh theih lohna hangin hihkha-in a mawh ciangin, ama gamtatnasa khialhna ama tungah a va kihilh leh, amah in biakna-in a sitbaang lo keel pa khat paipih ding a, keel lu tungah a khut nga-in, Topa’ mai, meihal biakna a kigawh nading munah go ding hi. Tua pen khialhna hanga biakna ahi hi. Tua ciangin siampipa in a khutme tawh khialhna hanga biakna si tawm la-in meihal biakna tau kite nuhin meihal biakna tau bulah a si omlai teng sung ding hi. Thunuama biakna sathaute mah bangin amah in biakna tau tungah a thau khempeuh hal ding hi. Tua ahih ciangin siampipa in ama khialhna hangin kilemna bawlsak ding a, amah kimaisak ding hi. “Hih lo ding, ci-in Topa’ thupiakte khat peuhpeuh mi mawkmawk khat in theih lohna hangin hihin a khialh a, a mawh leh, ama gamtatnasa a khialhna ama tungah a kihilh ciangin amah in a gamtatnasa a khialhna hangin biak nading a sitbaang lo keel a nu khat paipih ding hi. Amah in a khialhna hanga biakna ganhing lu tungah a khut nga-in, meihal biakna munah khialhna hanga biakna go ding hi. Siampipa in a khutme tawh si tawm la-in meihal biakna tau kite nuh ding a, biakna tau bulah si a omlai teng sung ding hi. Thunuama biakna panin a thaute a kilakkhiat mah bangin amah in a thau khempeuh lakhia ding a, Topa a’ ding a gim namtui dingin siampipa in biakna tau tungah hal ding hi. Siampipa in ama a dingin kilemna bawlsak ding a, amah kimaisak ding hi. “Amah in khialhna hanga biakna-in a piak dingin tuuno khat a paipih leh, a sitbaang lo a nu khat hi ding a, khialhna hanga biakna ganhing lu tungah a khut nga-in, meihal biakna a kigawhna munah khialhna hanga biak nadingin go ding hi. Tua ciangin siampipa in khialhna hanga biakna si tawmkhat a khutme tawh la-in meihal biakna tau kite nuh ding a, biakna tau bulah a si omlai teng sung ding hi. Thunuama biakpiakna panin tuuno thau a kilak khiat mah bangin amah in a thau khempeuh lakhia ding a, Topa’ tungah mei tawh kihal biakna, biakna tau tungah siampipa in hal ding hi. Siampipa in ama gamtatnasa a khialhna hangin kilemna bawlsak ding a, amah kimaisak ding hi. “Mi khatpeuh teci pang dingin a kisap ciangin a muhsa a theihsa thute gen loin a ip leh, amah in tua mawhna pua ding hi. “Tua ahih kei leh mi khatpeuh in gamlak ganhing nin a sisa hitaleh inn ganhing nin a sisa hitaleh a bokvak a nin ganhing a sisa hitaleh, a muh lohin a nin khat peuhpeuh lawngkha-in amah a nin a suah leh, a mawh hi ding hi. “Tua ahih kei leh amah in mihing nitna hitaleh, mu loin a lawnkhak leh, a theih ciangin a mawh hi ding hi. “Tua ahih kei leh mi khatpeuh in a sia bawl ding hitaleh a pha bawl ding hitaleh mite a kiciam theih ngei kiciamna nam khat peuhpeuh ama kam tawh a theih lohin a kiciampak khak leh, a theih ciangin hihte khat peuhpeuhah a mawh hi ding hi. “Hihte khat peuhpeuhah mi khat a mawh ciangin, amah in a gamtatnasa a khialhna pulak ding a, mawhna hanga biakna-in tuuhon pan ahi a, keelhon pan ahi zongin a nu khat peuhpeuh tuu hitaleh keel hitaleh, a gamtatnasa a khialhna hangin Topa’ tungah biakna paipih ding a, siampipa in a khialhna hangin kilemna bawlsak ding hi. “Ahih hangin amah in tuuno khat a piak zawh kei leh a gamtatnasa a khialhna hangin Topa’ tungah biakna-in vakhu nih ahi a, kawl vakhuno nih ahi zongin, khat khialhna hanga biakna, a khat meihal biak nadingin paipih ding hi. Amah in siampipa tungah tuate paipih ding a, siampipa in khialhna hanga biak nading pen pia masa ding hi. Amah in a ngawng panin a lu heek ding a, ahih hangin heeksat lo ding hi. Amah in khialhna hanga biakna si tawmkhat biakna tau pangah theh ding a, biakna tau bulah a si omlai teng taaksak ding hi. Tua pen khialhna hanga biakna ahi hi. Tua ciangin amah in ngeina kip om bangin meihal biak nadingin a khat pia ding hi. Siampipa in a gamtatnasa a khialhna hangin kilemna bawlsak ding a, amah kimaisak ding hi. “Ahih hangin amah in vakhu nih ahi a, kawl vakhuno nih ahi zongin a piak zawh kei leh, amah in a gamtatnasa a khialhna hangin a biakna-in annel lawh khat, khialhna hanga biak nadingin paipih ding hi. Tua pen khialhna hanga biakna ahih manin amah in tua sungah sathau khah lo ding a, paknamtui zong hel lo ding hi. Amah in siampipa kiangah paipih ding a, siampipa in phawkna-in khutdim khat la-in Topa’ tungah mei tawh kihal biakna, biakna tau tungah hal ding hi. Tua pen khialhna hanga biakna ahi hi. Tua bangin siampipa in hihte khat peuhpeuh a gamtatnasa a khialhna hangin kilemna bawlsak ding a, amah kimaisak ding hi. An tawh biakna-a mah bangin a omlai teng siampipa a’ ding ahi hi,” a ci hi. Topa in Moses kiangah, “Mi khatpeuh in theih lohna hangin thu palsatin Topa’ na a siangtho khat peuhpeuhah a khialh leh, a mawhna hanga biakna-in tuuhon sung panin a sitbaang lo tuutal khat, biakinn shekel tawh kizui-in ngun shekel-in nangmah in a man sehin, amah in Topa’ kiangah paipih ding hi. Tua pen mawhna hanga biakna ahi hi. Amah in a siangtho na a hih khialhna-ah lohkikna zong bawl ding a, seh nga-ah khat gawm behin siampipa tungah pia ding hi. Siampipa in mawhna hanga biakna tuutal tawh ama a dingin kilemna bawlsak ding a, amah kimaisak ding hi. “Hih lo ding, ci-in Topa’ thupiakte khat peuhpeuh, mi khatpeuh in hihin a khialh leh, a theih lohna hang hitaleh zong, amah a mawh hi veve-in, ama mawhna mah pua ding hi. Tuuhon lak pan a sitbaang lo tuutal khat, a manzah ding nangmah in seh inla, amah in mawhna hanga biak nadingin siampipa kiangah paipih ding hi. Theihlohna hanga ama gamtatnasa khialhna hangin siampipa in ama a’ ding kilemna bawlsak ding a, amah kimaisak ding hi. Tua pen Topa’ tungah khial ahih manin mawhna hanga biakna ahi hi,” a ci hi. Topa in Moses kiangah, “Mi khatpeuh khialin, Topa’ thu palsatin, na kepsakna thu-ah ahi zongin, khapna nate’ thu-ah ahi zongin a vengpa khemin, ahih kei leh a na sutin, a vengpa nengniamin, tua ahih kei leh a mang na khat mu-in tua thu-ah zuau-in a man loin kiciam a, mite a khialh theih ngeina khat peuhpeuhah khialin a mawh ciangin amah in a suhte hitaleh, a netniamna tawh a ngahte hitaleh, amah a kikemsak na hitaleh, a mang na a muh hitaleh, a man loin a kiciamnasa na khat peuhpeuh hitaleh loh ding hi. Amah in a cingin lohin seh nga-ah khat piak beh ding a, a mawhna hanga biakna a piak ni-in a nei pa tungah pia ding hi. Tua ciangin a mawhna hanga a biak nading, tuuhon lak pan a sitbaang lo tuutal khat, Topa’ tungah a piak ding, a man ding nangma sehzah, amah in siampipa kiangah paipih ding hi. Siampipa in Topa’ mai-ah ama a’ ding kilemna bawlsak ding a, mi khat a mawh theih ngeina khat peuhpeuhte-ah amah kimaisak ding hi,” a ci hi. Topa in Moses kiangah, “Aaron le a tapate thu pia inla, hih bangin ci in: Hih pen meihal biakna ngeina ahi hi. Meihal biakna pen biakna tau tunga meikhuk tungah zingsang mateng zan tawntung om ding a, tua biakna tau tungah mei kikuangsak den ding hi. Siampipa in a saihadial puan silhin, a saihadial pheituam tengin, biakna tau tungah meihal biakna mei in a kattum vutte la-in biakna tau pangah koih ding hi. Tua ciangin amah in a puante suahin puan dang silh ding a, giahphual pualam a siangtho mun khatah a vutte puakhia ding hi. Biakna tau tunga mei kikuangsak den ding a, kimitsak lo ding hi. Siampipa in zingsang simin a tungah sing cihin, meihal biakna a ngeina bangin a tungah koihin, thunuama biakna thau a tungah hal ding hi. Biakna tau tungah mei kikuangsak tawntung ding a, kimitsak lo ding hi. “Tua ciangin an tawh biakna ngeina hih bang ahi hi. Aaron’ suante in biakna tau mai, Topa’ mai-ah pia ding uh hi. Mi khat in, biakna tau tungah a om an tawh biakna annel khutdim khat, a sathau le a paknamtui khempeuh tawh la-in, Topa a dingin a gim namtui, phawkna-in biakna tau tungah hal ding hi. Aaron le a tapate in a omlai teng ne ding uh hi. A siangtho mun khatah silngo sawh loh in ne ding uh a, kikhopna buktual sung mun khat hi ding hi. Tua pen silngo sawhin a ki-em hi lo ding hi. Meihal biakna hong kipiakna sung panin amau’ tanh dingin ka piaksa ahi hi. Tua pen khialhna hanga biakna le mawhna hanga biakna bangin a siangtho pen ahi hi. Na khang tawntung uha dingin thu hong kipiak mah bangin, Topa’ tungah meihal biakna a kipiakna panin Aaron’ suante lakah pasal peuhmah in tuate ne thei ding hi. Tuate a lawng peuhmah a siangtho suak ding hi,” a ci hi. Topa in Moses kiangah, “Aaron le a suante sathau a kinilh ni-in Topa’ tungah hih bangin biakna kipia ding hi: An tawh biakna ngeina bangin annel lawh khat, alang zingsangin, alang nitakin pia ding hi. Tua pen beelpei tung khatah sathau tawh kibawl ding hi. An tawh biakna mah bangin limtakin helsa leh balnensa-in na paipih ding a, Topa a’ ding a gim namtui dingin na pia ding hi. Aaron’ suante sung panin amah a laih dingin sathau a kinilh siampipa in, thu a kipiaksa mah bangin Topa’ tungah pia ding a, a vekpi-in kihal ding hi. Siampipa in an tawh a biakna peuhmah a vekpi-in kihal ding a, kine lo ding hi,” a ci hi. Topa in Moses kiangah, “Aaron le a tapate tungah hih bangin gen in: Khialhna hanga biakna ngeina hih bang ahi hi. Meihal biakna a kigawhna mun Topa’ mai-ah khialhna hanga biakna kigo ding a, tua pen a siangtho pen ahi hi. Khialhna hanga biakna a pia siampipa in kikhopna buktual sung a siangtho mun khatah ne ding hi. A sa a lawng peuhmah a siangtho suak ding hi. Puan tungah a si a kithehkhak ciangin, a siangtho mun khatah tua si a kithehkha pen kisawp ding hi. Tua ciangin a kihuanna leibeel kisukham ding hi. Ahih hangin taaubeelin a kihuan ahihleh a beel kikiatin tui sungah kisawp siang sitset ding hi. Siampite’ lak panin pasal peuhmah in ne thei ding uh hi. Tua in a siangtho pen ahi hi. Ahih hangin siangtho munah kilemna bawl nadingin kikhopna buk sungah a kipaipih si a kilak khiatna, khialhna hanga biakna sa kine lo ding a, mei tawh kihal ding hi. “Mawhna hanga biakna ngeina, a siangtho pen hih bang ahi hi. Amaute in meihal biakna a gawhna mun uhah mawhna hanga biakna go ding uh a, biakna tau kimkotah a si kitheh ding hi. Tua ciangin a thau khempeuh, a meithau, a gilpi tuam a thau, a kawnga om a kal nihte a thau tawh, a kalte tawh a lakkhiat khop ding ahi a sin tuamte kipia ding hi. Topa’ tungah meihal biakna-in siampipa in biakna tau tungah hal ding a, tua pen mawhna hanga biakna ahi hi. Siampite lakah pasal peuhmah in a siangtho mun khatah ne thei ding uh hi; tua in a siangtho pen ahi hi. “Mawhna hanga biakna pen khialhna hanga biakna tawh kibang a, tuate a’ ding a ngeina a kibang hi ding a, kilemna a bawlsak siampipa in tua biakna sa ngah ding hi. Mi khatpeuh’ meihal biakna a piaksak siampipa in ama piaksak tua meihal biakna a vun ngah ding hi. Mei bung sunga a ki-em an tawh biakna peuhmah leh sikbeel daii ahi a, beelpei tungah ahi zongin a kibawl khempeuhte, a pia siampipa in ngah ding hi. An tawh biakna khempeuh, sathau a kihel hitaleh a kihel lo hita leh, Aaron’ suan khempeuh in a kikimin hawm ding uh hi. “Mi khatpeuh in Topa’ tungah a piak theih ding, thunuama biakna ngeina hih bang ahi hi. Amah in lungdam kohna-in a piak leh, silngo sawh loh sathau tawh a kihel moh, silngo sawh loh mohpheng sathau tawh a kizut, annel moh sathau limtakin a kihelte, lungdam biakna tawh pia khawm ding hi. Amah in lungdam koh nadingin thunuama ama biakpiakna tawh silngo kisawh anlum mohte ama biakna-in paipih khawm ding hi. Amah in Topa biak nadingin tua biakna sung panin moh khat ciat pia ding a, thunuama biakna si a theh siampipa in tua moh ngah ding hi. Lungdam kohna-in thunuama ama biakpiakna a sa pen a piak ni-in kine ding a, a zingsang dong bangmah kisit lo ding hi. “Ahih hangin ama biakpiakna pen thuciamna hanga biakpiakna ahi a, utthu-a biakpiakna ahi zongin ahihleh, amah in a biakpiakna a piak ni-in kine ding a, a omlai teng a zing ciangin kine ding hi. Ahih hangin a ni thum ni-in biakpiakna sa a omlai teng mei tawh kihal ding hi. A ni thum ni-in thunuama ama biakpiakna sa khat peuhpeuh a kinek leh, tua biakpiakna a piapa kisang lo ding a, tua pen ama a’ in zong kiciamteh lo ding hi. Tua sa a nin hi ding a, a ne pa in ama mawhna pua ding hi. “A nin na khat peuhpeuh tawh a kisawhkha sa kine lo ding a, mei tawh kihal ding hi. Ahi zongin a siang mi khempeuh in a sa ne thei ding uh hi. A nin hi napi-in thunuama Topa’ tungah biakpiakna sa a ne pa ama mipihte’ lak panin kihawlkhia ding hi. Mi khatpeuh in mihing nin hitaleh ganhing nin hitaleh a kihhuai a nin khat peuhpeuh hitaleh lawng a, tua khit ciangin thunuama Topa’ tungah biakpiakna sa a nek leh, ama mipihte’ lak panin tua mipa kihawlkhia ding hi,” a ci hi. Topa in Moses kiangah, “Israel mite tungah hih bangin gen in: Note in bawngtal ahi a, tuu ahi a, keel ahi zongin a thau na ne kei ding uh hi. A mawk sih ganhing thau leh gamsate in a balgawp ganhing thaute, nadangin kizang thei ding a, ahih hangin bangbang hileh na ne kei ding uh hi. Bang hang hiam cih leh Topa’ tungah mei tawh kihal biakna ganhing thau a ne mi peuhmah ama mipihte’ lak panin kihawlkhia ding hi. Tua tham loin note in na tenna uh mun khat peuhpeuhah vasa sisan hitaleh ganhing sisan hitaleh si peuhmah na ne kei ding uh hi. Si khat peuhpeuh a ne mi peuhmah ama mipihte’ lak panin kihawlkhia ding hi,” a ci hi. Topa in Moses kiangah, “Israel mite tungah hih bangin gen in: Topa’ tungah thunuama ama biakpiakna a piapa in Topa’ kiangah ama biakna paipih ding hi. Thunuama ama biakpiakna panin amah in Topa’ tungah meihal biakna a khutin paipih ding hi. Topa’ mai-ah vei-a biak nadingin a iik a kivei theih nadingin amah in a thau a iik tawh paipih ding hi. Siampipa in biakna tau tungah a thau hal ding a, ahih hangin a iik pen Aaron le a suante a’ ding hi ding hi. Thunuama na biakpiakna panin biakna-in siampipa tungah a taklam phei na pia ding uh hi. Aaron’ suante sung panin thunuama biakna si le a thau a piapa in a taklam phei a ngah ding ahi hi. Bang hang hiam cih leh a kivei a iik le a kipia a phei pen keimah in Israel mite’ tung panin thunuama amau’ biakpiakna sung panin lakhia-in, Israel mite’ tung panin a tawntungin a ngah dingun siampi Aaron le a suante’ tungah ka pia khinzo hi. Hih pen, Topa’ siampi na a sem dingin amaute a kipiak ni-in, Topa’ tungah meihal biakna sung panin amau’ tungah a kipia, Aaron leh a suante’ tanh ahi hi. Israel mite in amaute tungah a piak nadingin amaute sathau a kinilh ni-in Topa in hih thu pia a, tua pen a khang tawntungun amau’ kaih ahi hi,” a ci hi. Topa in Moses kiangah, “Aaron le amah tawh a om a tapate, a puante, a nilh sathau, khialhna hanga biakna a bawngtal, a tuutal nihte le silngo sawh loh anlum lawh la inla, kikhopna bukkongah Israel mihonte khempeuh khawm in,” a ci hi. Topa in amah a thupiak bangin Moses in hih a, kikhopna bukkongah mihonte kikhawm hi. Moses in mihonte kiangah, “Tu-a ka hih dingte pen Topa in hih dingin a thupiak ahi hi,” a ci hi. Tua ciangin Moses in Aaron le a tapate paipihin tui tawh amaute a sil hi. Amah in a puantungsilh amah silhsak a, a kawnggak tawh gakin, a puantualpi silhsak a, a siampipuan silhsakin, siampipuan’ khau, hoihtakin a kigan tawh gak a, tua tawh ama tungah a khih hi. Amah in ama tungah a awmdal bulhin, a awmdal sungah Urim le Thummim a koih hi. Amah in Aaron’ lu tungah a dialpi khimsakin, a dialpi tung a mai lamah, Topa in Moses a thupiak bangin amah in kham peek, a siangtho kumpi lukhu a khusak hi. Tua ciangin Moses in nilh sathau la-in, biakbuk le a sunga om khempeuh nuhin tuate a ap hi. Amah in biakna tau tungah tuate kimkhat sagihvei thehin, biakna tau le a nazat khempeuh le kuang le a ngaknate, ap dingin sathau a nuh hi. Amah in nilh sathau kimkhat Aaron’ tungah sung a, ap dingin amah a sathau a nilh hi. Topa in Moses a thupiak bangin, Moses in Aaron’ tapate paipih a, puantungsilhte silhsakin, kawnggak tawh amaute gak a, amau’ lu tungah lukhute a khih hi. Tua ciangin amah in khialhna hanga biakna bawngtal paipih a, Aaron le a tapate in tua bawngtal lu tungah amau’ khut nga uh hi. Kilemna bawl nadingin Moses in a bawngtal go a, a si la-in a kiima biakna tau kite a khutme tawh nuhin, biakna tau siangthosak a, biakna tau bulah a site sungkhia-in a ap hi. A sungkuate tunga om a thau khempeuh le a sintuamte le a kal nihte a thau tawh la-in, biakna tau tungah tuate a hal hi. Ahih hangin, Topa in Moses a thupiak bangin a omlai a vun, a sa le a ek, amah in giahphual pualamah mei tawh a hal hi. Tua ciangin Moses in meihal biakna tuutal pia a, Aaron le a tapate in tuutal lu tungah amau’ khut nga uh hi. Moses in tua tuutal go-in, biakna tau tung kimkotah a si theh hi. Tuutal a kisemnen ciangin, Moses in a lu le a ki-atnente le a thau a hal hi. Topa in Moses a thupiak bangin, a sungkuate le a khete tui tawh a kisawp khit ciangin, Topa’ tungah mei tawh kihal biakna a gim namtui, meihal biakna-in Moses in biakna tau tungah tuutal buppi a hal hi. Tua ciangin Moses in a tuutal dang, kipsakna tuutal pia a, Aaron leh a tapate in tuutal lu tungah amau’ khut nga uh hi. Moses in tuutal go a, a si tawmkhat la-in Aaron’ taklam bilteep leh a taklam khutpi le a taklam khepi nuh hi. Aaron’ tapate hong kipaipih a, Moses in amau’ taklam bilteepte le amau’ taklam khutpite le amau’ taklam khepite a si tawmkhat nuh a, a si a val laite, biakna tau tung kimkotah a theh hi. Tua ciangin amah in a thau, a mei thau le a sungkuate tunga om a thau khempeuh le a sintuamte, a kal nihte le a thau, le a taklam phei a la hi. Topa’ mai-ah a om silngo sawh loh anlum lawh sung panin amah in silngo sawh loh moh khat le sathau sawh anlum moh khat le mohpheng khat la-in, a thau tung le a taklam phei tungah tuate a koih hi. Amah in hihte khempeuh, Aaron le a tapate’ khut sungah koih a, amaute in vei-a biakna-in Topa’ mai-ah tuate a vei uh hi. Tua ciangin Moses in amaute’ khutsung panin tuate la-in, Topa’ tungah meihal biakpiakna, a gim namtui, kipsakna biakna-in biakna tau tungah meihal biakna tawh tuate a hal khawm hi. Moses in a iik la-in vei-a biakna-in Topa’ mai-ah a vei hi. Topa in Moses a thupiak bangin tua pen kipsakna tuutal panin Moses’ tanh ahi hi. Tua ciangin Moses in nilh sathau kimkhat le biakna tau tunga om a si la-in, Aaron le ama tapate le amau’ puante tungah a theh hi. Tua ahih ciangin Moses in Aaron le ama tapate, a puante uh tawh a apkhawm hi. Moses in Aaron le a tapate kiangah, “Keimah in thu hong pia-in, ‘Aaron le a tapate in ne ding uh hi,’ ka cih mah bangin, kikhopna buk kongah a sa huan unla, tua lai munah tua sa le kipsakna biakna lawh sungah a om anlum ne unla, a sa le anlum na khamvalte uh mei tawh na hal ding uh hi. Note hong kikipsak nading hun ni sagih sung hi ding ahih manin, note hong kikipsakna hun a cin mateng, kikhopna bukkong pua-ah ni sagih sung na paikhia kei ding uh hi. Tuni-a kibawl bangin, note a dingin kilemna bawl ding, Topa in thu hong pia khin hi. Kikhopna bukkongah ni sagih sung sun le zan na om ding uh a, Topa’ hong sawlte na hih ding uh hi. Tua hikeileh note na si ding uh hi. Bang hang hiam cih leh tua bang dingin keima tungah thu hong kipia hi,” a ci hi. Tua ahih ciangin Aaron le a tapate in zong, Topa in Moses’ tungtawnin a thupiakte khempeuh a hih uh hi. A ni giat ni-in Moses in Aaron le a tapate le Israel upate a sam hi. Amah in Aaron’ kiangah, “Khialhna hanga biak nadingin bawng pano khat le meihal biak nadingin tuutal khat, a nih tuakin a sitbaang lo, la inla, Topa’ mai-ah tuate pia in. Israel mite kiangah, ‘Khialhna hanga biak nadingin keel a pa khat, le meihal biak nadingin bawngno khat le tuuno khat, a nih tuakin kum khat pha-in a sitbaang lo, le thunuama biakna-in Topa’ mai-ah piak dingin bawngtal khat le tuutal khat, le sathau tawh a kibawl an tawh biakna la un. Bang hang hiam cih leh tuni-in note tungah Topa hong kilang ding hi,’ ci in,” a ci hi. Amaute in zong kikhopna buk mai-ah Moses’ thupiak teng hong paipih uh a, mihonpite khempeuh a nai-ah hong pai-in Topa’ mai-ah ding uh hi. Moses in, “Note tungah Topa’ minthanna vang hong kilat theih nadingin Topa in hih bangin thu hong pia hi,” a cih khit ciangin Aaron’ kiangah, “ Topa’ thupiaksa bangin biakna tau mai-ah pai-in khialhna hanga biakna le meihal biakna pia inla, nangma a’ ding le mite a dingin kilemna bawl in. Mite’ biakna paipih inla, amaute a dingin kilemna bawlsak in,” a ci hi. Tua ahih ciangin Aaron in biakna tau naihin, ama a’ mahmah ding ahi khialhna hanga biakna bawngno a go hi. Aaron’ tapate in ama tungah a si pia uh a, amah in a si sungah a khutme diahin biakna tau kite nuh a, biakna tau bulah a si vallai teng a sungkhia hi. Ahih hangin, Topa in Moses a thupiak bangin khialhna hanga biakna panin a thau le a kalte le a sintuamte biakna tau tungah a hal hi. A sa le a vunte ahihleh giahphual pualamah mei tawh a hal hi. Tua ciangin a meihal biakna a go hi. A tapate in ama tungah a si pia uh a, amah in biakna tau tung kimkotah a theh hi. Amaute in meihal biakna ama tungah a nen nenin a lutang tawh pia uh a, amah in biakna tau tungah tuate a hal hi. Tua ciangin amah in a sungkuate le a khete sawp a, biakna tau tungah meihal biakna tawh tuate a halkhawm hi. Tua ciangin a masa-a khialhna hanga biakna mah bangin amah in mite’ biakna pia-in, mite a’ ding ahi khialhna hanga biakna keel la-in go a, khialhna hanga biak nadingin a pia hi. Tua ciangin meihal biakna paipihin ngeina kip omsa bangin a pia hi. Amah in zingsang a meihal biakna banah biakna paipihin, tua sung panin a khutdim la-in, biakna tau tungah a hal hi. Moses’ thupiak bangin amah in mite a dingin thunuama biakna bawngtal le tuutal zong a go hi. A tapate in ama kiangah a si paipih uh a, amah in biakna tau kimkotah theh a, bawngtal le tuutal thau, a mei thau, a gilpi tuam, a kalte, a sintuamte le a thau, amaute in a iikte tungah koihin, amah in biakna tau tungah a thau a hal hi. Ahih hangin Aaron in a iikte le a taklam pheite, Topa’ mai-ah vei-a biakna-in a vei hi. Tua ciangin Aaron in mite’ lamah a khutte laamto-in thupha a piak khit ciangin khialhna hanga biakna le meihal biakna le thunuama biakna a piakna panin hong paisuk hi. Kikhopna buk sungah Moses le Aaron hong tum uh a, hong pusuah khiat ciangun mite thupha pia a, mi khempeuh tungah Topa’ minthanna vang hong kilang hi. Topa’ mai panin mei hong piangkhia-in meihal biakna le biakna tau tunga om sathau a kang hi. Mi khempeuh in a muh uh ciangin awng uh a, lei maingatin a kunsuk uh hi. Tu-in Aaron’ tapate Nadab le Abihu in amau’ paknamtui beel tuak la-in, a sungah mei koih uh a, a tungah paknamtui koihin, Topa in amau’ tungah tua banga thu a piak ngei loh a siang lo mei, Topa’ mai-ah a pia uh hi. Topa’ omna mun panin mei hong paikhia-in amaute kang a, Topa’ mai-ah a si uh hi. Tua ciangin Moses in Aaron’ kiangah, “ Topa in, ‘Ka kiang nai-a a omte kiangah keimah a siangtho-in ka kilak ding a, mi khempeuh’ mai-ah keimah hong kiminthangsak ding hi,’ ci hi,” ci-in a gen hi. Aaron pau loin a om hi. Moses in Aaron’ pa’ sanggampa Uzziel’ tapate Mishael le Elizafan samin amaute kiangah, “Hong pai unla biakbuk panin giahphual pualamah na sanggamte uh puakhia un,” a ci hi. Tua ahih ciangin amaute in hong naihin, Moses’ sawl bangin giahphual pualamah amau’ puantungsilh mah uh tawh amaute a puakhia uh hi. Tua ciangin Moses in Aaron le a tapate Eleazar le Ithamar kiangah, “Na lu uha na sam uh phiahsak kei unla, na puante uh balkek kei un. Tua bangin na hih uhleh note si-in, mihon khempeuh tungah Topa’ hehna hong tung ding hi. Ahih hangin na mipih uh, Israel mihon buppi pen, Topa’ mei in a katlup mite’ hangin dahin kap thei ding uh hi. Kikhopna buk kong panin a pualamah paikhia kei un. Na pai uhleh na si ding uh hi. Bang hang hiam cih leh Topa’ nilh sathau note’ tungah om hi,” a ci hi. Moses’ gen bangin amaute a gamta uh hi. Topa in Aaron kiangah, “Nang hitaleh na tapate hitaleh kikhopna bukah na pai uh ciangin leenggahzu hitaleh khamtheih zu hitaleh ne kei un. Na nek uhleh na si ding uh hi. Tua pen na suan na khakte uh tungah khang tawntungin ngeina kip khat hi ding hi. Note in a siangtho le a mawkmawk, le a nin le a siang na khen ding uh hi. Topa in Moses tungtawnin amaute’ tunga a gensa thukhamte khempeuh note in Israel mite a hilh ding na hi uh hi,” a ci hi. Moses in Aaron le a omlai a tapate Eleazar le Ithamar kiangah, “ Topa’ tungah meihal biakna sung panin a vallai ahi an tawh biakna la unla, tua pen a siangtho pen ahih manin silngo sawh lohin biakna tau gei-ah ne un. Tua an pen Topa’ tungah meihal biaknate lak panin nang le na tapate’ kaih ding ahih manin a siangtho mun khatah na ne ding uh hi. Tua bang ding mahin kei’ tungah thu hong kipia hi. Ahih hangin a kivei a iik le a kipia a pheite pen nang le na tapate le na tanute in a siangtho mun khatpeuhah ne ding uh hi. Bang hang hiam cih leh tua pen Israel mite in thunuama a biakpiakna panun nang le na tapate’ kaih dinga hong kipia ahi hi. Topa in a thupiaksa bangin a kipia a phei le a kivei a iikte ahihleh Topa’ mai-ah vei-a biakna-in vei dingin amaute in meihal biakna sathau tawh hong paipih ding uh a, tua pen nang le na tapate in a tawntungin na kaih ding uh ahi hi,” a ci hi. Tu-in Moses in khialhna hanga biakna keel tawh kisai thu limtakin kan a, na kihal khin mawk hi. Aaron’ tapa a omlai Eleazar le Ithamar-te’ tungah amah heh a, “Note in mihonte a dingin Topa’ mai-ah kilemna bawlin, amau’ mawhna a kilakkhiat theih nadingin note’ tungah hong kipiasa a siangtho sa pen khialhna hanga biakna hi napi, bang hangin a siangtho mun khatah ne lo na hi uh hiam? En un, biakbuk sungah a sisan kipaipih lo hi. Ka thupiaksa bangin note in biakbuk sungah na nek dingun a kilawm ahi hi,” a ci hi. Tua ciangin Aaron in Moses kiangah, “En in, tuni-in amaute in Topa’ mai-ah amau’ khialhna hanga biakna le amau’ meihal biakna pia khinzo uh hi. Tua bang hinapi hih bang thute kei’ tungah hong tung veve hi. Khialhna hanga biakna tuni-in a ne hi leng, Topa’ muhna-ah sanhuai ding ka hi hiam?” a ci hi. Moses in tua thu a zak ciangin a lungkim hi. Topa in Moses le Aaron tungah, “Israel mite kiangah hih bangin gen un: Hihte pen leitung a om ganhing khempeuh lak panin na nek theih ding uh a nungta ganhing ahi hi. Ganhingte lak panin a khecin a ka, eknel a hai peuhmah na ne thei ding uh hi. Ahi zongin eknel haite lak pan hitaleh khecin kate lak pan hitaleh, note in na nek theih loh dingte uh: Kalaoh in eknel a hai hangin a khecin ka lo ahih ciangin note a dingin a nin ahi hi. Sakikh ganhing in eknel a hai hangin a khecin ka lo ahih ciangin note a dingin a nin ahi hi. Bilpi in eknel a hai hangin a khecin ka lo ahih ciangin note a dingin a nin ahi hi. Vok pen khecin ka ahih hangin eknel hai lo ahih ciangin note a dingin a nin ahi hi. Note in tuate’ sa na ne kei ding uh a, a sisate zong na lawng kei ding uh hi. Tuate pen note a dingin a nin ahi hi. “Tui sunga omte sung panin nek theih dingte: Tuipi sung hitaleh gun sung hitaleh tui sungah a om phe le lip a neite peuhmah na ne thei ding uh hi. Ahih hangin tuipi sung, gun sunga om phe le lip a nei lo, tui sunga a hontat ganhingte le tui sunga a nungta ganhingte pen note a dingin a kihhuai ahi hi. Tuate pen note a dingin a kihhuai hi ding hi. Note in tuate’ sa na ne kei ding uh a, a sisate zong na kih ding uh hi. Tui sunga a omte sung panin phe le lip a nei lo peuhmah note a dingin a kihhuai ahi hi. “Vasate lak panin note in na kih ding uh, a kine lo ding, a kihhuaite: Muvanlai, mupi, luimu, mumeika, musan nam khempeuh, va-ak nam khempeuh, vasa-kalaoh, pengpelep, vatawt, musi nam khempeuh, keising, tuimu, gun vakang, gam vatawt, tui vatawt, musane, gun vapi, gun vazonei nam khempeuh, huihtun, le bak ahi hi. “Khe li tawh a pai, kha a nei ganhing khempeuhte, note a dingin a kihhuai ahi hi. Ahi zongin khe li tawh a pai, kha a nei ganhingte khempeuh lak panin leitungah a tuan nadingun a khepek uh tawh kizom ngaltak tawn a neite na ne thei ding uh hi. Tuate lak panin na nek theih dingte uh: Kauphe kitom nam khempeuh, kauphe zol nam khempeuh, khuangbai nam khempeuh, le kauphe kisau nam khempeuh ahi hi. Ahih hangin khe li nei-in kha a nei ganhing dangte khempeuh note a dingin a kihhuai ahi hi. “Hihte tawh note a nin na suak ding uh hi. A sisa a lawng peuhmahte a nitak mateng a nin hi ding a, a sisa themkhat a pua peuhmah in a puan sawpin, a nitak mateng a nin hi ding hi. A khecin a ka ahih hangin eknel a hai lo ganhing peuhmah note a dingin a nin ahi hi. Tuate a lawng peuhmah a nin hi ding hi. Khe li tawh a pai ganhingte khempeuh lak panin amau’ khebom tawh a paite khempeuh note a dingin a nin ahi hi. Tuate a sisa a lawngkha peuhmahte a nitak dong a nin hi ding a, a sisa a puapa in a puan sawpin, a nitak mateng a nin hi ding hi. Tuate note a dingin a nin ahi hi. “Leitungah a vak kawikawi, a pai thei ganhingte lak panin note a dingin a ninte: Savokphual, zusa, innhikpi nam khempeuh, tawlbawkpi, tang, tangteuh, le sehnel gam thankik ahi hi. A hontat ganhing khempeuhte lak panin hihte pen note a dingin a nin ahi hi. Tuate a sisa a lawng peuhmah a nitak mateng a nin hi ding hi. Tuate a sisa khat peuhpeuh a tukna nate, sing nazat, puan, savun, ippi le na khat peuhpeuhin a kizang beel khat peuhpeuh hitaleh a nin hi ding hi. Tuate pen tui sungah kidiah ding a, a nitak mateng a nin hi ding hi. Tua khit ciangin a siang hi ding hi. Tuate khat peuhpeuh lei beel khat peuhpeuh sungah a kiat leh, tua sunga om khempeuh a nin hi ding a, note in tua beel na sukham ding uh hi. Tua lei beel sungah a om a kine thei ding an tungah tua bang tui a tuk leh a nin hi ding hi. Tua bang beel sunga om dawn theih ding peuhmah a nin hi ding hi. Tua bang a sisa themkhat a tukna peuhmah a nin hi ding hi. Meibung hitaleh beelpei hitaleh kisuzan ding hi. Tuate a nin hi a, note a dingin a kihhuai ahi hi. Ahi zongin tuinak le tuibeem ahihleh a siang hi ding a, ahih hangin a sisate a lawng peuhmah a nin hi ding hi. A kivawh ding khaici tungah tua a sisate themkhat a tuk leh, tua khaici a siang hi ding hi. Ahih hangin khaici tui kidiah a, tua a sisate themkhat tua khaici tungah a tuk leh, note a dingin tua khaici a nin ahi hi. “Note’ nek theih ding ganhing khat peuhpeuh a sih leh a sisa a lawng pa pen a nitak mateng a nin hi ding a, a sisa a ne pa in ama puante sawpin a nitak mateng a nin hi ding hi. A sisa a puapa in zong ama puante sawpin a nitak mateng a nin hi ding hi. “Leitungah a hontat ganhing peuhmah a kihhuai hi a, tuate kine lo ding hi. A awmtal peuhmah leh khe li-a a pai peuhmah, ahih kei leh khe tampi a nei, leitungah a pai a hontat ganhing khempeuh, note in na ne kei ding uh hi. Bang hang hiam cih leh tuate pen a kihhuai ahi hi. A hontat ganhing khat peuhpeuh tawh nomau mah a kihhuai-in na kibawltawm kei ding uh a, tuate tawh nomau na kininsak tawm kei ding uh hi. Na kinitsak tawm uhleh a nin na suak ding uh hi. Kei pen Topa na Pasian uh ka hi hi. Tua ahih ciangin note ki-ap unla, kei siangtho ka hih manin note zong siangtho un. Leitungah a bokvak a hontat ganhing khat peuhpeuh tawh note na kininsak tawm kei ding uh hi. Bang hang hiam cih leh note’ Pasian ahi dingin Egypt gam panin note a hong pai khiatpih pa pen keimah Topa ka hi hi. Tua ahih ciangin kei siangtho ka hih manin note na siangtho ding uh hi,” a ci hi. Topa in Moses kiangah, “Israel mite tungah hih bangin gen in: Nupi khat gai-in ta pasal a neih leh ni sagih sung tua nu a nin hi ding a, a nin neih huna mah bangin amah a nin hi ding hi. A ni giat ni-in a naungek vun dawn ki-at ding hi. Tua ciangin nupi in ama si luanna hangin a sian nadingin ni sawmthum le ni thum sung omlai ding hi. Amah in kisiansuahna ni a cin mateng a siangtho na khat peuhpeuh lawng loin, biakbuk sungah zong tum lo ding hi. “Ahih hangin amah in ta numei a neih leh, ama nin neih huna mah bangin nipikal nih sung a nin hi ding hi. Ama si luanna hangin a sian nadingin ni sawmguk le ni guk sung omlai ding hi. “Amah a kisiansuahna hun a cin ciangin tapa a’ ding hitaleh tanu a’ ding hitaleh, amah in kikhopna bukkong a siampipa kiangah meihal biak nadingin kum khat a pha tuuno khat, le khialhna hanga biak nadingin kawl vakhuno khat ahi a, vakhu khat ahi zongin pia ding a, siampipa in Topa’ mai-ah pia-in, ama a’ ding kilemna bawlsak ding hi. Tua ciangin ama si luanna panin tua nu a siang hi ding hi. Hih pen ta pasal hitaleh ta numei hitaleh a nei nu a dingin ngeina ahi hi. “Tua nu in tuuno a piak zawh kei leh vakhu nih ahi a, kawl vakhuno nih ahi zongin paipih ding a, khat pen meihal biak nading, adang khat pen khialhna hanga biak nading ahi hi. Siampipa in ama a dingin kilemna bawlsak ding a, tua nu a siang hi ding hi,” a ci hi. Topa in Moses le Aaron kiangah, “Mi khat in ama pumpi vun tungah a bawk ahi a, meima ahi a, a mel tuampian ahi zongin a neih a, tua pen ama pumpi vun tungah phaknatna a suah leh, tua pa pen siampipa kiang ahi a, ama tapa siampi khat peuhpeuh kiangah ahi zongin kipaipih ding hi. Siampipa in ama pumpi vun tunga natna mun vel ding hi. A natna munah a om a multe kangin ama vun sangin a natna thuktum zaw-in a kimuh leh, tua pen phaknatna hi a, siampipa in a vel khit ciangin amah a nin hi, ci-in gen ding hi. Ahih hangin ama pumpi vun sungah a natna mun kang napi-in, a vun sangin a thuk lozaw bangin omin, tua sungah a multe kang loin a om leh, siampipa in ni sagih sung cina pa khumcip ding hi. Siampipa in a ni sagih ni-in amah vel ding a, a natna noptuamin, a natna in a vun sung lawh lo hi ci-in a muh leh, siampipa in ni sagih sung mah khumcip lai ding hi. Siampipa in a ni sagih ni-in amah vel kik ding a, a natna mun mualin, a vun sung a lawh kei leh, siang hi, ci-in siampipa in gen ding hi. Tua pen meima mawkmawk hi lel a, amah in a puante sawpin a siang hi ding hi. Ahih hangin amah a sian nadingin siampipa kiangah a kilah khit ciangin a meima in a vun sung a lawh leh siampipa mai-ah kilak kik ding hi. Siampipa in vel ding a, a meima in a vun sung a lawh leh phaknatna hi a, siampipa in amah a nin hi, ci-in gen ding hi. “Mi khat in meima a neih ciangin siampipa kiangah kipaipih ding hi. Siampipa in vel ding a, a vun sungah a bawk kang omin, tua in a multe kangsakin a bawk sungah ma thak a om leh, tua pen ama pumpi vun sungah a om luisa phaknatna hi a, siampipa in amah a nin hi, ci-in gen ding hi. Amah a nin ahih manin khumcip lo ding hi. Siampipa’ muh theihna ciangah tua natna in a vun phukhamin, tua natna a veipa’ vun khempeuh a lutang panin a khe dongin a lawh khit leh, siampipa in vel ding a, a natna in a pumpi khempeuh a lawh khit leh siampipa in tua natna tawh kisai-in amah siang hi, ci-in gen ding hi. A pumpi-in kang khin ahih manin amah a siang ahi hi. Ahih hangin ama tungah ma thak a kilat ciangin amah a nin hi ding hi. Siampipa in a ma thak velin, amah a nin hi, ci-in gen ding hi. Bang hang hiam cih leh a ma thak pen phaknatna ahih manin a nin ahi hi. Ahih hangin a ma thak pen kikheel kikin a kang a suah leh, siampipa kiangah pai ding a, siampipa in amah velin a natna pen a kang a suah leh, siampipa in natna a veipa siang hi, ci-in gen ding a, amah a siang hi ding hi. “Mi khatpeuh’ pumpi vun sungah a damsa meimatum khat om a, a meimatum munah a bawk kang ahi a, a san kang mun ahi zongin a om leh, siampipa kiangah kilak ding hi. Siampipa in vel ding a, tua pen a vun sangin thukzaw-in a multe a kang a suah leh, siampipa in amah nin hi, ci-in gen ding hi. Tua pen phaknatna hi a, meimatum sung tawnin hong phukhia ahi hi. Ahih hangin siampipa in velin, tua tunga a multe kang loin a vun sangin a thukzawk kei a, mualin a om leh, siampipa in ni sagih sung khumcip ding hi. Tua in a vun sung a lawh leh phaknatna hi a, siampipa in amah nin hi, ci-in gen ding hi. Ahih hangin a natna mun pen mun khat bekah omin a kilawh kei leh meimatum pawn hi a, siampipa in amah a siang hi, ci-in gen ding hi. “Tua ahih kei leh, pumpi in a vun tungah meikangma khat nei-in tua meikangma a thak mun pen a san kang ahi a, a kang ahi zongin hong suah leh, siampipa in vel ding hi. Tua mun a om a multe kangin a vun sangin a natna a thukzawk leh, tua pen phaknatna ahi hi. Tua pen meikangma tawnin hong phukhia hi a, phaknatna ahih manin siampipa in amah a nin hi, ci-in gen ding hi. Ahih hangin siampipa in velin, tua mun a multe kang loin a vun sangin a thukzawk kei a, mualin a om leh, siampipa in ni sagih sung khumcip ding hi. Siampipa in a ni sagih ni-in amah vel ding hi. Tua in a vun sung a lawh leh phaknatna hi a, siampipa in amah nin hi, ci-in gen ding hi. Ahih hangin a natna mun pen mun khat bekah omin a vun sung lawh loin mualin a om leh, tua pen meikangma pana bawk hi a, meikangma pawn ahih manin siampipa in amah siang hi, ci-in gen ding hi. “Numei ahi a, pasal ahi zongin a lutang tung ahih kei leh a kha-ah meima khatpeuh a neih ciangin, siampipa in tua natna vel ding hi. Tua natna pen a vun sangin thukzaw-in a kimuh a, a sunga a multe eng-in a mal a neu leh, siampipa in amah a nin hi, ci-in gen ding hi. Tua pen cithak ahi, lu-phak ahih kei leh kha-phak natna ahi hi. Siampipa in cithak natna velin, a vun sangin thukzaw lo bangin kimu-in tua sungah mul vom a om kei leh, siampipa in ni sagih sung cithak natna tawh tua pa khumcip ding a, a ni sagih ni-in siampipa in a natna vel ding hi. A cithak kilawh loin, a sungah mul eng om loin, a cithak pen a vun sangin thukzaw loin a kimuh leh, amah le amah a mul kikiat ding a, ahih hangin a cithak san kiat lo ding hi. Siampipa in adang ni sagih sung mah cithak natna tawh tua pa khum ding hi. A ni sagih ni-in siampipa in a cithak vel ding a, a cithak in a vun sung lawh loin, a vun sangin a thuk lo zaw-in a kimuh leh, siampipa in amah a siang hi, ci-in gen ding hi. Amah in ama puante sawp ding a, a siang hi ding hi. Ahih hangin amah a kisiansak khit ciangin a cithak in a vun sung a lawh leh, siampipa in vel ding a, a cithak in a vun sung a lawh takpi leh, siampipa in mul eng a zon ding kisam lo hi; amah a nin ahi hi. Ahih hangin ama mitah, cithak noptuam zo hi, ci-in mu a, a sungah mul vom po-in a cithak a dam leh, amah a siang hi a, siampipa in amah a siang hi, ci-in gen ding hi. “Numei ahi a, pasal ahi zongin, a pumpi vun tungah a mel tuampian a kang mun a neih leh, siampipa in vel ding a, a pumpi vun tunga om a tuampian munte pen a kang milmial ahihleh, tua pen vun a phukham meima hi a, amah a siang hi ding hi. “Mi khat a sam pulh a, a lu a tol hangin amah a siang ahi hi. Mi khat a taltang le a paang panin a sam le a mul a pulh leh, amah a talkolh hi lel a, amah a siang ahi hi. Ahih hangin a lutol tung hitaleh a talkolh tung hitaleh ah a san kang meima a om leh, tua pen a lutol tung ahih kei leh a talkolh tunga a suakkhia phaknatna ahi hi. Tua ciangin siampipa in amah vel ding a, a bawk natna pen a lutol tung hitaleh a talkolh tung hitaleh ah, pumpi vun tunga phak om tawh kibangin a san kang ahihleh, amah pen miphak hi a, a nin ahih manin siampipa in amah a nin hi, ci-in a gen kul hi; a lutang tungah ama natna a om ahi hi. “Tua natna a nei mi phakpa in puankekte silhin a sam phiahsak ding a, amah in a muk humin, ‘Nin, nin!,’ ci-in kiko ding hi. Amah in a natna a neih laiteng a nin hi ding hi. Amah a nin ahih manin giahphual pualam mun khatah amah guak teng ding hi. “Samul puan hitaleh saihadial puan hitaleh, puan khat peuhpeuh tungah phaknatna a om ciang, tua saihadial puan, samul puante, a tung le a pheite’ tung hitaleh, savun le savun tawh a kibawl na khat peuhpeuh tungah a om ciangin, tua natna pen a hing melin ahi a, a san melin ahi zongin puan tungah a kilat ciang, puan a tung a phei tung hitaleh savun le savun tawh a kibawl na khat peuhpeuh tungah a om ciangin, tua pen phaknatna hi a, siampipa kiangah kilak ding hi. Siampipa in a natna vel ding a, tua natna a banna na pen ni sagih sung koihcip ding hi. Tua ciangin amah in a ni sagih ni-in a natna velkik ding hi. A natna pen puan tungah kizelin, puan a tung a phei-ah hitaleh, savun le savun a kizatna na khat peuhpeuh tungah a om leh, tua natna pen a lauhuai phaknatna hi a, a nin ahi hi. Amah in a puan hal ding hi. Tua natna pen puan a tung a phei-ah hitaleh, samul puan saihadial puan hitaleh savun tawh a kibawl na khat peuhpeuh tungah a om leh hal ding hi. Bang hang hiam cih leh tua pen a lauhuai phaknatna ahih manin mei sungah kihal ding hi. “Siampipa in velin, a natna pen puan tung, a tung a phei-ah hitaleh, savun tawh a kibawl na khat peuhpeuh tungah a kizelh kei leh, siampipa in tua natna a banna pen amaute in a sawp ding uh thu pia ding a, amah in adang ni sagih sung mah tua na koihcip ding hi. Siampipa in tua natna a banna pen a kisawp khit ciangin vel ding hi. Tua natna a banna mun a mel a kikheel kei leh, a natna a kizelh loh hangin tua pen a nin mah ahi hi. Tua natna pen a sunglamah ahi a, a pualamah ahi zongin a baan leh mei sungah tua puan na hal ding uh hi. Ahih hangin siampipa in vel a, a kisawp khit ciangin a meima a mualh leh, amah in a puan tung pan hitaleh savun tung pan hitaleh a puan a tung a phei tung pan hitaleh natna a banna mun balkhia ding hi. Tua ciangin a puan tung hitaleh puan a tung a phei tungah hitaleh savun tawh a kibawl na khat peuhpeuh tungah a kilatkik leh, tua natna a kizel ahih manin natna a banna pen mei tawh na hal ding uh hi. Ahih hangin a puan hitaleh puan a tung a phei hitaleh savun tawh a kibawl na khat peuhpeuh a kisawp khit ciangin tua natna a paikhiatna na pen, a nih veina kisawp kikin a siang hi ding hi,” a ci hi. Hih pen samul puan hitaleh saihadial puan hitaleh puan a tung hitaleh a phei hitaleh, savun tawh a kibawl na khat peuhpeuh tungah a om phaknatna tawh kisai-in siang hiam, nin hiam, ci-in khen nading ahi hi. Topa in Moses kiangah, “Hih pen amah a kisiansak ni-in mi phakpa’ zuih ding ngeina hi ding hi. Siampipa kiangah amah kipaipih ding a, giahphual pualamah siampipa paikhia-in vel ding hi. Tua ciangin a phaknatna pen a phakpa’ tung pan a dam leh, a kisiangsak ding mipa a dingin a hing vasa siang nih le taamtak sing le a ausan puan le puknah a la dingin siampipa in amaute sawl ding hi. Amaute in lei beel khat sunga kikoih tuiluang tungah a vasa khat a gawh ding uh siampipa in thu pia ding hi. Amah in a hing lai vasa pen taamtak sing le a ausan puan le puknah tawh la khawmin, tuate le a hing lai vasa pen tuiluang tunga kithat vasa’ si sungah diah ding hi. Amah in phaknatna panin a kisiangsak ding pa’ tungah sagihvei theh ding a, tua ciangin amah siang hi, ci-in gen ding a, a hing vasa pen gamlakah khah ding hi. A kisiangsak ding mipa in a puante sawpin, a mul khempeuh metkhia-in, tui sungah amahmah kisilin, amah a siang hi ding hi. Tua khit ciangin amah giahphual ah hong ciah ding a, ahih hangin ama puanbuk pualamah ni sagih sung om ding hi. A ni sagih ni-in amah in a sam, a khamul le a mitkhu mul, le a pum tungah a om a mul khempeuh metkhia ding hi. Tua ciangin amah in a puante sawpin, tui sungah a pumpi silin, amah a siang hi ding hi. “A ni giat ni-in amah in a sitbaang lo tuuno a pa nih, le a sitbaang lo kum khat a pha tuuno a nu khat, le an tawh biakna ahi sathau tawh annel lawh thum le sathau biingta khat la ding hi. Amah a siangsak ding siampipa in a kisiangsak ding mipa le hih nate, kikhopna bukkong a Topa’ mai-ah paipih ding hi. Siampipa in tuuno a pa khat la-in sathau biingta khat tawh mawhna hanga biakna-in pia-in, vei-a biakna-in Topa’ mai-ah tuate vei ding hi. Amaute in khialhna hanga biakna le meihal biakna, siangtho mun sunga a gawhna mun uhah amah in tuuno go ding hi. Bang hang hiam cih leh mawhna hanga biakna pen khialhna hanga biakna mah bangin siampipa a’ hi a, tua pen a siangthopen ahi hi. Siampipa in mawhna hanga biakna si tawmkhat la-in, tua si pen a kisiangthosak ding mipa’ taklam bilteep, a taklam khutpi, le a taklam khepi nuh ding hi. Tua ciangin sathau biingta panin kimkhat la-in amahmah’ veilam khut sungah sungin, a veilam khutsunga om sathau sungah a taklam khutme diahin, a khutme tawh a sathau kimkhatte Topa’ mai-ah sagihvei theh ding hi. Ama khut sungah a omlai sathau kimkhatte pen siampipa in a kisiangthosak ding mipa’ taklam bilteep, a taklam khutpi, le a taklam khepi nuhin, mawhna hanga biakna si tungah koih ding hi. Siampipa in a khutsunga sathau omlai teng a kisiangthosak ding mipa’ lu nilh ding hi. Tua ciangin siampipa in ama a dingin Topa’ mai-ah kilemna bawlsak ding hi. “A nitna panin a kisiangthosak ding mipa a’ ding kilemna bawl nadingin siampipa in a khialhna hanga biakna pia ding hi. Tua khit ciangin amah in meihal biakna go ding a, meihal biakna le an tawh biaknate, biakna tau tungah pia ding hi. Tua bangin siampipa in ama a dingin kilemna bawlsak ding a, amah a siang hi ding hi. “Ahih hangin amah zawngin tuazah a piakzawh kei leh, ama a’ ding kilemna bawl nadingin a kivei ding, mawhna hanga biakna-in tuuno a pa khat, an tawh biak nadingin sathau tawh a kibawl annel lawh khat le sathau biingta khat pia ding a, vakhu nih ahi a, kawl vakhuno nih ahi zongin, a piakzawh bangbang pia ding hi. Khat pen khialhna hanga biak nading hi a, a khat pen meihal biak nading ahi hi. A ni giat ni-in amah in Topa’ mai, kikhopna bukkong, siampipa kiangah ama kisianthosak nadingin tuate paipih ding hi. Siampipa in mawhna hanga biakna tuuno, le a sathau biingta khat la-in, vei-a biakna-in Topa’ mai-ah tuate vei ding hi. Amah in mawhna hanga biakna tuuno go ding hi. Siampipa in mawhna hanga biakna si tawmkhat la-in, a kisiangthosak ding mipa’ taklam bilteep, a taklam khutpi, le a taklam khepi nuh ding hi. Siampipa in amahmah’ veilam khut sungah a sathau kimkhat sung ding a, a veilam khutsunga a om sathau tawmkhat a taklam khutme tawh Topa’ mai-ah sagihvei theh ding hi. Siampipa in ama khutsunga a om sathau tawmkhat a kisiangthosak ding mipa’ taklam bilteep, taklam khutpi, le a taklam khepite, mawhna hanga biakna si a kikoihna munah va nuh ding hi. Siampipa in a khutsunga a omlai sathau teng a kisiangthosak ding mipa a’ ding Topa’ mai-ah kilemna bawl nadingin a lu nilhsak ding hi. Amah in vakhu hitaleh kawl vakhuno hitaleh, a piakzawh bangbang pia-in, khat pen khialhna hanga biak nading, a khat pen meihal biak nadingin an-a biakna tawh pia khawm ding hi. Siampipa in a kisiangthosak pa a dingin Topa’ mai-ah kilemna bawlsak ding hi. Hih pen phaknatna a vei, a kisianthosak nadingin biakna a pia zo lopa a dingin ngeina ahi hi,” a ci hi. Topa in Moses le Aaron kiangah, “Note a dingin kong piak Kanaan gamah na om ciangun note’ leitang a inn khat sungah phaknatna kong tunsak ciangin, inn nei pa pai-in siampipa kiangah, ‘Ka inn sungah natna nam khat a om ding tawh kibang,’ ci ding hi. Tua ciangin, inn sunga om na khempeuh a nin hi, a kicih khak loh nadingin a natna a vel dingin siampipa a pai ma-in amaute in tua inn a na hawmsak nading uh thu pia ding a, tua khit ciangin inn vel dingin siampipa pai ding hi. Amah in a natna vel ding hi. A natna pen tua inn kawm tungah omin, a hing mel ahih kei leh a san mel na pua-in, tua natna kawm maitang sangin a thuk zawk tuak leh, innsung panin innkongah siampipa paikhia ding a, ni sagih sung inn khakcip ding hi. A ni sagih ni-in siampipa hong paikikin en ding hi. Tua inn kawm tungah a natna a kizelh leh, natna a banna suang lakhia-in khuapi pualam a nin mun khatah a paipih nadingun siampipa in thu pia ding hi. Amah in a innsung kimkot kiatsakin, amaute in a kiatkhiat, a kizutna themte, khuapi pualam a nin mun khatah bua ding uh hi. Tua ciangin amaute in suang dang la-in, tua suangte’ omna munah koihin, amah in zutna dang la-in tua inn zut ding hi. “Amah in a suangte lakhia-in a inn kiatin a zut khit ciangin tua inn sungah natna hong suahkik leh, siampipa pai-in en ding hi. Inn sungah a natna a kizelh leh, tua pen inn sunga om a lauhuai phaknatna hi a, tua inn a nin ahi hi. Amah in tua inn, a sing a suang le inn a kizutnate khempeuh phel ding a, khuapi pualam a nin mun khatah tuate puakhia ding hi. Tua tham loin tua inn a kikhakcip sungteng a sungah a lut mipa a nitak dong a nin hi ding hi. Tua inn sungah a lum mipa le an a ne mipa in ama puante sawp ding hi. “Ahih hangin siampipa hong pai-in a vel a, a inn a kizut khit ciangin inn sungah natna a kizelh kei leh, tua ciangin a natna dam ahih manin siampipa in tua inn siang hi, ci-in gen ding hi. Tua inn siangthosak nadingin amah in vasa neu nih, taamtak sing le a ausan khau le puknah tawh la khawmin, beel sunga kikoih tui luang tungah a vasa khat go ding a, taamtak sing le puknah le a ausan khau pen a vasa hing tawh la khawmin, tua pen a kigo vasa’ si le tuiluang sungah diahin, tua inn sagihvei theh ding hi. Tua bangin amah in vasa si tawh, tuiluang tawh, a hing vasa tawh, taamtak sing le puknah le a ausan khau tawh a inn siangsak ding a, vasa hing pen khuapi pualam gamlakah khahkhia ding hi. Tua bangin amah in tua inn a dingin kilemna bawlsak ding a, tua inn a siang hi ding hi,” a ci hi. Hih pen phaknatna khat peuhpeuh tawh kisai-in ngeina ahi hi: Cithak tawh kisai, puan tung hitaleh innsung hitaleh ah a om phaknatna tawh kisai, a bawk hitaleh meima hitaleh a tuampian’ khat peuhpeuh tawh kisai-in, bang hunin nin a, bang hunin siang hiam, ci-in lah nading ahi hi. Hih pen phaknatna tawh kisai ngeina ahi hi. Topa in Moses le Aaron kiangah, “Israel mite tungah hih bangin gen in: Pasal khatpeuh, a natui a paikhiat ciangin tua a paikhia a natui pen a nin ahi hi. Amah a ninsak a natui paikhia tawh kisai-in ngeina hih bang ahi hi: A natui a paipai a, a khawl zongin, ama sungah nitna mah hi veve hi. A natui a paikhia mipa’ lupna le a tutna peuhmah a nin hi ding hi. Ama lupna a lawng peuhmah in a puante sawp ding a, amahmah tui sungah kisilin, a nitak mateng a nin hi ding hi. A natui a paikhia mipa’ tutnasa na khat peuhpeuh tungah a tu mi peuhmah in a puante sawp ding a, amahmah tui sungah kisilin, a nitak mateng a nin hi ding hi. A natui a paikhia mipa’ pumpi a lawng mi peuhmah in a puante sawp ding a, amahmah tui sungah kisilin, a nitak mateng a nin hi ding hi. A natui a paikhia mipa in a siang mipa’ tungah cil a siat leh, tua pa in a puante sawp ding a, amahmah tui sungah kisilin, a nitak mateng a nin hi ding hi. A natui a paikhia mipa a tutna tutphah khat peuhpeuh zong a nin hi ding hi. Ama nuai-ah a om na khat peuhpeuh a lawng mipa pen a nitak mateng a nin hi ding hi. Tua bang na a pua mipa in a puante sawp ding a, amahmah tui sungah kisilin, a nitak mateng a nin hi ding hi. A natui a paikhia mipa in tui sungah a khut sil lopi-in a lawn’ mi peuhmah in ama puante sawp ding a, amahmah tui sungah kisilin, a nitak mateng a nin hi ding hi. A natui a paikhia mipa in a lawn’ lei tawh kibawl umlebeelte kisukham ding a, sing tawh kibawl kuanglekeute ahihleh tui sungah kisawp ding hi. “A natui a paikhia mipa a natui a kan ciangin a kisiansak nadingin amah in ni sagih sung ngak ding a, tua ciangin a puante sawpin, tuiluang sungah a pumpi sil ding a, a siang hi ding hi. A ni giat ni-in amah in vakhu nih ahih kei leh kawl vakhuno nih la-in, Topa’ mai kikhopna bukkongah pai-in, siampipa tungah tuate pia ding hi. Siampipa in tuate, khat khialhna hanga biak nading le adang khat meihal biak nadingin pia ding a, a natui a paikhia mipa a dingin siampipa in Topa’ mai-ah kilemna bawlsak ding hi. “Mi khat in a natui a teh leh, amah in a pumpi khempeuh tui sungah sil ding a, a nitak mateng a nin hi ding hi. A tungah a natui a tukna puan le savun peuhmah tui tawh kisawp ding a, a nitak mateng a nin hi ding hi. Pasal le numei a lupkhawm khit ciangin, amau tegel tui sungah kisil ding uh a, a nitak mateng a nin hi ding uh hi. “Numei khat in nin a neih ciangin, ni sagih sung a ninin om ding a, amah a lawng mi peuhmah a nitak mateng a nin hi ding hi. Amah a nit hun sungin a lupna le a tutna peuhpeuh a nin hi ding hi. Ama lupna a lawng peuhmah in a puan sawp ding a, amahmah tui sungah kisilin, a nitak mateng a nin hi ding hi. Ama tutna a lawng peuhmah in ama puante sawp ding a, tui sungah amahmah kisilin, a nitak mateng a nin hi ding hi. Ama tutna ahi lupna hitaleh na khat peuhpeuh hitaleh, mi khat in a lawn’ ciangin a nitak mateng a nin hi ding hi. Pasal khat peuhmah tua nu tawh lumin, tua nu’ nitna ama tungah a om leh, ni sagih sung tua pa a nin hi ding a, tua pa’ lupna peuhmah zong a nin hi ding hi. “Numei khat in ama nit hun hi lo napi-in ni tampi sung a si a suak ahi a, ama nit hun sung khengin nin nei-in ahi zongin a om leh, a ninneih sung khempeuh, ama nit hun sung mah bangin a nin hi ding hi. Ama ninneih hun sungtengin a tutna khempeuh zong a nit sungin ama lupna tawh kibang ding a, amah a nin ahih mah bangin a tutna khempeuh zong a nin hi ding hi. Hih nate a lawng peuhmah a nin hi ding a, a puante sawpin, amahmah tui sungah kisil ding a, a nitak mateng a nin hi ding hi. Ahih hangin tua nu a nin a bei zawh ni sagih khit ciangin a siang hi ding hi. A ni giat ni-in tua nu in vakhu nih ahih kei leh kawl vakhuno nih la-in, kikhopna bukkong, siampipa kiangah tuate paipih ding hi. Siampipa in khialhna hanga biak nadingin khat pia-in, meihal biak nadingin adang khat pia ding hi. Siampipa in ama nitna hangin Topa’ mai-ah ama a’ ding kilemna bawlsak ding hi. “Amau’ laizang a om ka biakbuk ninsakkha le-uh amaute in sihlawh ding uh ahih ciangin, tua bangin note in Israel mite amau’ nitna panin siangsakin na kem ding uh hi,” a ci hi. Hih pen a natui a paikhia mipa ahih kei leh a natui tehin, tua tawh mi nin a suak pa a dingin ngeina hi a, nin a nei nu a’ ding zong ahi hi. Hihte pen pasal a natui a paikhia mi, ninnei numei le, a nin neih sungin numei tawh a lumkhawm mipa a dingin ngeina ahi hi. Aaron’ tapa nihte in ngeina lopi-in Topa’ mai-ah mei tawh va pai-in a sihlawh khit uh ciangin Topa in Moses kiangah thu a gen hi. Topa in Moses kiangah, “Thuciamna singkuang tunga om hehpihna tokhom mai, dalna puan sunglam a siangtho munah a hunlopi-in hong pai nawn loh nadingin na sanggampa Aaron kiangah gen in. A hunlopi-in hong pai leh amah si ding hi. Bang hang hiam cih leh tua mun pen hehpihna tokhom tunga meii sungah kei ka kilatna mun ahi hi. Ahih hangin siangtho munah Aaron hong pai ding zia in: Khialhna hanga biak nadingin bawngtalno khat le meihal biak nadingin tuutal khat hong paipih ding hi. “Amah in a siangtho saihadial puantungsilh silhin, saihadial pheituam teengin, saihadial kawnggak tawh kigakin, saihadial dialpi khim ding hi. Hihte pen a siangtho puan ahi hi. Amah in tui sungah a pumpi sil ding a, tua ciangin tua puante silh ding hi. “Amah in Israel mihonte tung panin khialhna hanga biak nadingin keeltal nih le meihal biak nadingin tuutal khat la ding hi. Aaron in amahmah a dingin khialhna hanga biakna-in a bawngtal pia-in, amah le a innkuanpihte a dingin kilemna bawl ding hi. Tua ciangin amah in keeltal nih la-in, Topa’ mai kikhopna bukkongah tuate koih ding hi. Aaron in tua keel nihte tungah ai saanin, khat pen Topa a’ ding, adang khat pen Azazel a’ ding ahi hi. Aaron in Topa a’ ding ai a pha keel paipihin, khialhna hanga biakna-in pia ding hi. Ahih hangin Azazel a dingin ai a pha keel pen gamlakah Azazel’ kiangah a kipuak theih nadingin kilemna bawl nadingin a hingin Topa’ mai-ah kipaipih ding hi. “Aaron in amahmah a dingin khialhna hanga biakna-in a bawngtal pia-in, amah le a innkuanpihte a dingin kilemna bawl ding a, amahmah a dingin khialhna hanga biakna-in a bawngtal go ding hi. Amah in Topa’ biakna tau panin mei-am a dim paknamtui beel khat le a kisunen paknamtui khut nih dim la ding hi. Amah in dalna puan sungah paipihin thuciamna singkuang tungah a om hehpihna tokhom pen paknamtui khu in a tuam theih nadingin Topa’ mai-ah a om mei tungah a paknamtui koih ding hi. Tua hi kei leh amah si ding hi. Amah in bawngtal si tawmkhat la-in, a khutme tawh hehpihna tokhom a mailam tungah thehin, hehpihna tokhom mai-ah a khutme tawh a si sagihvei theh ding hi. “Tua ciangin amah in mite a’ ding ahi khialhna hanga biakna keel go-in, dalna puan sungah a si paipih ding a, bawngtal si a theh mah bangin a si thehin, hehpihna tokhom tung le hehpihna tokhom mai-ah theh ding hi. Amah in tua bangin Israel mite’ nitna hang, amau’ thu palsatna hang, le amau’ khialhna khempeuh hangin siangtho mun adingin kilemna bawl ding hi. Amah in amau’ nitna sungah amau tawh a omkhawm kikhopna buk a dingin tua mah bangin a bawl ding hi. Siangtho munah kilemna bawl dingin amah tumin ama a’ ding, a innkuanpihte a’ ding, le Israel mihonte khempeuh a dingin kilemna a bawl khit hong paikhiat matengin kikhopna buk sungah kuamah om lo ding hi. Tua ciangin Topa’ mai-ah a om biakna tau-ah amah va pai-in, biakna tau siansuahna bawl ding a, bawngtal si le keel si tawmkhat la-in, biakna tau kimkota a kite nuh ding hi. Amah in a khutme tawh a si tawmkhat biakna tau tungah sagihvei thehin, siangsakin, Israel mite’ nitsakna panin biakna tau siangthosak ding hi. “Amah in siangtho mun, kikhopna buk, le biakna tau siansuahna a bawl khit ciangin, keel hing pen paipih ding hi. Aaron in keel hing lu tungah a khut tegel nga-in, Israel mite’ mawhna, amau’ thu palsatna, le amau’ khialhnate khempeuh, keel tungah pulak ding hi. Amah in keel lu tungah tuate suanin, a paikhiatpih dingin a kithawisa mipa tawh sehnel gamah sawlkhia ding hi. Keel in amau’ mawhnate khempeuh pua-in gam daihna-ah a pai dingin a keel khah ding hi. “Tua ciangin kikhopna bukah Aaron hong pai-in, siangtho munah a tum hunin a silh saihadial puante suahin, tua lai-ah a puante nusia ding hi. Amah in a siangtho mun khatah, a pumpi tui sungah silin, a puante silh ding a, hong paikhia-in, ama meihal biakna le mite’ meihal biakna pia-in, ama a’ ding le mite a dingin kilemna bawl ding hi. Amah in biakna tau tungah khialhna hanga biakna sathau hal ding hi. Azazel’ kiangah keel a paisak pa in a puante sawpin, a pumpi tui sungah sil ding a, tua khit ciangin giahphual ah hong ciah thei ding hi. Siangtho munah kilemna bawl nadingin hong kipaipih si a kilakna, khialhna hanga biakna bawngtal le keel pen giahphual pualamah kipuakhia ding a, a vun, a sa, le a ekte, mei tawh kihal ding hi. Tuate a hal pa in ama puante sawpin, tui sungah a pumpi sil ding a, tua khit ciangin giahphual ah hong ciah thei ding hi. “Hih pen, a kha sagihna, a ni sawm ni-in note a dingin a tawntungin thukham hi ding a, tualsung mi hitaleh note lakah a hong peem khualmi hitaleh in an tangin, na na sem kei ding uh hi. Bang hang hiam cih leh hih ni-in note siansak nadingin note-a’ ding kilemna kibawl ding a, na khialhna khempeuh panun Topa’ mai-ah na siang ding uh hi. Tua pen note a dingin a thupi tawlngakna Sabbath hi a, an na tang ding uh hi. Tua pen a tawntung a thukham ahi hi. A pa’ tanga siampi dingin sathau a kinilh a ki-ap siampipa in kilemna bawlin, a siangtho saihadial puante silh ding hi. Amah in biakbuk siansuahna bawlin, kikhopna buk le biakna tau siansuah ding a, siampite le mihonte khempeuh a dingin kilemna a bawl ding hi. Hih pen Israel mite a dingin amau’ khialhnate khempeuh hangin kum khatin khatvei kilemna a kibawlsak theih nadingin note a dingin a om tawntung ngeina kip khat hi ding hi,” a ci hi. Topa in amah a thupiak bangin Moses a gamta hi. Topa in Moses kiangah, “Aaron, ama tapate, le Israel mite khempeuh tungah hih bangin gen in. Hih pen Topa’ thupiaksa thu ahi hi. Israel mi khatpeuh in bawngtal ahi a, tuuno ahi a, keel ahi zongin giahphual sung ahi a, giahphual pua-ah ahi zongin go a, Topa’ biakbuk mai, Topa’ tungah letsongin piak dingin kikhopna bukkongah a gawh kei leh, tua mipa thu palsat hi ding hi. Amah in sisan luangsak ahih manin ama mite’ lak panin tua mipa kihawlkhia ding hi. Hih pen, gamlakah Israel mite in a gawh uh amau’ biakpiaknate hong paipih theih nading, kikhopna buk kongkhak-a siampipa’ kiang, Topa’ tungah amaute in tuate hong paipih theih nading, le thunuama biakpiakna-in Topa tungah sa hong gawh theih nading uh deihna ahi hi. Siampipa in kikhopna buk kong-a Topa’ biakna tau tungah a si thehin, Topa’ tungah a gim namtui dingin a thau hal ding hi. Tua ahih ciangin amaute in a biak uh keeldawite a dingin amau’ biakpiaknate go nawn lo ding uh hi. Hih pen amau’ khang tawntungin amaute’ tungah ngeina kip khat hi ding hi. “Nangmah in amaute tungah hih bangin na gen ding hi: Israel mite sung pan hitaleh, amaute lakah a peem khualmite sung panin hitaleh meihal biakna ahi a, biakpiakna ahi zongin a pia mipa in Topa’ tungah piak dingin kikhopna bukkongah a paipih kei leh, ama mipihte kiang panin tua mipa kihawlkhia ding hi. “Israel mite sung pan hitaleh amau’ lakah a peem khualmite sung pan hitaleh mi khat in si khat peuhpeuh a nek leh, si a ne mipa ka maisiat ding a, ama mite lak panin amah ka khenkhia ding hi. Bang hang hiam cih leh pumpi nuntakna pen si sungah om hi. Note a’ ding kilemna bawl nadingin note a dingin biakna tau tungah tua si ka piazo hi. Si pen nuntakna ahih manin kilemna a piangsak na ahi hi. Tua ahih ciangin keimah in Israel mite tungah hih bangin ka ci khin hi: Note lakah kuamah in si ne lo ding a, note lakah a hong peem khualmi khatpeuh in zong si ne lo ding hi. “Israel mite khatpeuh hitaleh, amaute lakah a peem khualmi khatpeuh hitaleh in zong, sabetna-ah, a kine thei ding gamsa khatpeuh hitaleh vasa hitaleh a man pa in a si buakhia-in leivui tawh vuk ding hi. Ganhing khempeuh’ nuntakna pen a si ahih manin Israel mite tungah hih bangin ka ci khinzo hi: Ganhing khat peuhpeuh si na ne kei ding uh hi. Bang hang hiam cih leh ganhing khempeuh’ nuntakna pen a si ahi hi. Si a ne mi peuhmah a mipihte kiang panin kihawlkhia ding hi. “A mawk sih hitaleh gamsate in a balgawp hitaleh a ne mi peuhmah, tualsung mi hitaleh peemta hitaleh tua mi in a puante sawp ding a, amahmah tui sungah kisilin, a nitak mateng a nin hi ding a, tua khit ciangin amah siang ding hi. Ahih hangin amah in tuate sawp loin ahi zongin, kisil loin ahi zongin a om leh, amah in ama mawhna pua ding hi,” a ci hi. Topa in Moses kiangah, “Israel mite tungah hih bangin gen in: Kei pen Topa na Pasian uh ka hi hi. Note na tenna uh Egypt gamah amaute a gamtat bangin note na gamta kei ding uh a, note kong paipihna Kanaan gamah zong amaute a gamtat bangin note na gamta kei ding uh hi. Note in amau’ gamtatnate na zui kei ding uh hi. Note in keima biakna ngeina kipte semin ka thukhamte lenin tuate na zui ding uh hi. Kei pen Topa na Pasian uh ka hi hi. Tua ahih ciangin note in ka thukhamte le ka biakna ngeina kipte na zui ding uh hi. Tuate a zui mi peuhpeuh nungta ding hi. Kei pen Topa ka hi hi. “Note kuamah in na kinaipih na behte uh mawhpih dingin na naih kei ding uh hi. Kei pen Topa ka hi hi. Na nu mawhpihna tawh na pa’ tungah maizumna na tun kei ding hi. Amah pen na nu ahih manin na mawhpih kei ding hi. Nangmah in na pa’ zi dangte zong na mawhpih kei ding hi. Tua pen na pa’ mindai nading ahi hi. Nangmah in na sanggamnu, na pa’ tanu, ahih kei leh na nu’ tanu, inn-a suak hitaleh gam a suak hitaleh na mawhpih kei ding hi. Nangmah in na tapa’ tanu ahih kei leh na tanu’ tanu na mawhpih kei ding hi; bang hang hiam cih leh amau’ mindaina pen nangma mindaina mah ahi hi. Na pa’ zi’ tanu, na pa’ tanu pen na sanggamnu ahih manin na mawhpih kei ding hi. Na ni na mawhpih kei ding hi; tua nu pen na pa’ sanggam numei ahi hi. Na nu’ sanggamnu na mawhpih kei ding hi; bang hang hiam cih leh amah pen na nu tawh a kinai beh numei ahi hi. Na pa’ sanggampa’ tungah mindaina na tun kei ding hi; tua pen ama zi na naih kei ding hi, cihnopna ahi hi; tua nu pen nangma innlak nu ahi hi. Na monu na mawhpih kei ding hi; tua nu pen na tapa’ zi ahi hi; amah na mawhpih kei ding hi. Na sanggampa’ zi na mawhpih kei ding hi; tua pen na sanggampa’ mindai nading ahi hi. Na luppih numei khat’ tanu na mawhpih kei ding a, tua numei’ tapa’ tanu hitaleh tua numei’ tanu’ tanu hitaleh, luppih dingin na la kei ding hi. Amaute pen nangmah tawh a kinai beh numeite ahi uh hi. Tua bang gamtatna pen a siahuai ahi hi. Nangmah in a sanggamnu a hingsuan dingin numei khat zi-in na la kei ding a, a sanggamnu a hing laipi-in amah na luppih kei ding hi. “Nangmah in numei khat nin a neih laitak, a nit hun sungin luppih dingin na naih kei ding hi. Na vengpa’ zi tawh na lumkhawm kei ding a, tua nu tawh na kininsak kei ding hi. Nangmah in Molek tungah meihal biakna-a piak dingin na tate khat peuhpeuh na pia kei ding a, tua bangin na Pasian’ min na daisak kei ding hi; keimah pen Topa ka hi hi. Numei khat tawh lupkhop bangin pasal khat tawh na lumkhawm kei ding hi; tua pen a kihhuai ahi hi. Ganhing khatpeuh tawh mawhin tua tawh na kininsak kei ding a, numei khatpeuh in zong ganhing khatpeuh tawh a mawh dingin kipia lo ding hi; tua pen ngeina hi lo hi. “Hih nate khatpeuh tawh note kininsak kei un; bang hang hiam cih leh note’ mai-a ka paihkhiat minamte in hihte khempeuh tawh amaute kininsak uh hi. Leitung a nin suak ahih manin keimah in a leitang gimna pia-in, leitang in ama tunga a teng mite a luakhia hi. Ahih hangin, tualsung mi hitaleh note lakah hong peem khualmi hitaleh, note in keima thukhamte le keima biakna ngeina kipte na zui ding uh a, hih a kihhuai nate khat beek na hih kei ding uh hi; (bang hang hiam cih leh note’ ma-a a om gam mite in hih a kihhuaite khempeuh gamta uh ahih manin leitang a nin a suak hi;) tua bang hikeileh leitang in note’ ma-a a om minamte a luakkhiat bangin note in amah na nitsak uh ciangin amah in note hong luakhia ding hi. Bang hang hiam cih leh hih a kihhuaite khatpeuh a hihte peuhmah, amau’ mite lak panin kihawlkhia ding hi. “Tua ahih ciangin note’ ma-a a kizang hih a kihhuai ngeinate khat peuhpeuh na gamtat ngei loh nading uh le tuate tawh nomau na kinitsak loh nadingun kong thuhilhte zui un; kei pen Topa na Pasian uh ka hi hi,” a ci hi. Topa in Moses kiangah, “Israel mihonte khempeuh kiangah hih bangin gen in: Note na siangtho ding uh hi; bang hang hiam cih leh Topa note’ Pasian keimah ka siangtho hi. Note a kuamah peuh in na nu le na pa uh zahtakin, note in ka Sabbath-te na tang ding uh hi; kei pen Topa na Pasian uh ka hi hi. “Milimte lamah kihei kei unla, note in a kisungtawm pasian-te nomau a dingin bawl kei un; kei pen Topa na Pasian uh ka hi hi. “Note in Topa’ tungah thunuama biakpiakna na piak uh ciangin, note hong kisan’ theih nadingin na pia ding uh hi. Tua pen na piak ni mah uh ahih kei leh a zing ciangin kine ding a, a ni thum ni ciang dongin a omlai peuhmah mei tawh kihal ding hi. A ni thum ni-in a kinek peuhmah leh, tua pen a kihhuai hi a, kisang lo ding hi. Tua a ne mi peuhmah in ama mawhna pua ding hi; bang hang hiam cih leh amah in Topa’ na a siangtho ninsak ahih manin ama mite sung panin kihawlkhia ding hi. “Na leitang tung panun an na lak uh ciangin, na lo uhah a nawl dongin an na la kei ding uh a, an na lak khit uh ciangin a sang zong na khawm kei ding uh hi. Note in na leenggui lo uh hawkmai loin, leenggah a kiate zong na leenggui lo panun na tawm kei ding uh hi. Note in mizawngte le peemtate a dingin tuate na nusia ding uh hi; kei pen Topa na Pasian uh ka hi hi. “Note na guta kei ding uh hi. A man loin na gamta kei ding uh a, khatlekhat tungah zuau na kigen kei ding uh hi. Note in a man lopi-in keima min tawh na kiciam kei ding uh a, tua bangin na Pasian uh’ min na daisak kei ding uh hi; kei pen Topa ka hi hi. “Note in na vengte uh na nengniam kei ding uh a, a na na sut kei ding uh hi. A kicial nasempa’ thaman pen a zingsang dong zan tawntung na kemcip kei ding uh hi. Note in bilngongte phuisam loin, mittawte’ mai-ah a puk theih nading na na koih kei ding uh a, note in na Pasian uh na zahtak ding uh hi; kei pen Topa ka hi hi. “Note in thukhenna-ah thu a tang loin na khen kei ding uh hi. Mizawngte langgen loin, a liante’ thu zui loin, thumanna tawh na vengte uh thu na khen ding uh hi. Note in na mipihte lak uhah mi gensia-in vaksuk vakto loin, na vengpa uh a sih nadingin na langpang kei ding uh hi; kei pen Topa ka hi hi. “Note in na lungsim sung uhah na sanggampa uh na mudah kei ding uh a, na vengte uh tawh thu na kituah lohna uh kikum khawmin na siangsak ding uh hi; tua hikeileh ama hangin khialhna na pua ding uh hi. Note in nomau’ mipihte tungah phu la loin, amau na lungsim neih kei ding uh a, nomau na ki-it uh bangin na vengte uh na it ding uh hi; kei pen Topa ka hi hi. “Note in ka thukhamte na zui ding uh hi. Note in na ganhingte uh a namdang tawh ta na neisak kei ding uh hi. Note in na lo uhah khaici nam nih na pawikhawm kei ding uh a, khau nam nih a kigan puan zong na silh kei ding uh hi. “Sila ahi numei, midang khat in zuthawl a piaksa, kitankhia nai loin amah suahtakna a kipia nai lo nu, pasal dang khat in a lupkhoppih leh, thukanna kinei ding hi. Amaute kithat lo ding hi; bang hang hiam cih leh tua nu sila hi lai hi. Ahih hangin tua pa in amahmah a dingin mawhna hanga biak nadingin tuutal khat, kikhopna bukkong, Topa’ kiangah hong paipih ding hi. Siampipa in, tua pa a gamtatnasa a khialhna hangin mawhna hanga biakna tuutal tawh Topa’ mai-ah ama a dingin kilemna bawlsak ding a, a gamtatnasa a khialhna kimaisak ding hi. “Note, Kanaan gamah tungin nek dingin kung nam khempeuh na suan uh ciangin, note in amau’ gahte kum thum sung na ne kei ding uh hi. A kum lina ciangin amau’ gah khempeuh siangtho-in, Topa’ tungah phatna biakna hi ding hi. Ahih hangin a kum ngana ciangin tuate pen note a dingin hong gah semsem nadingin tuate’ gah na ne thei ding uh hi; kei pen Topa na Pasian uh ka hi hi. “Note in sa khat peuhpeuh a sunga si tawh na nekhawm kei ding uh hi. Mailam thugen kholhna, ahih kei leh aisan na sem kei ding uh hi. Note in na baa samte uh met loin na khamul mongte uh zong na tan kei ding uh hi. Note in mi site’ hangin dahna limin na ci tung uh liamsak loin note’ tungah ciaptehna khat peuhpeuh zong na sun kei ding uh hi; kei pen Topa ka hi hi. “Na tanu uh biakinn sungah paktat dinga piakna tawh siasak kei un. Tua bang hileh pasian dangte biakna sungah na tung ding uh a, gam sung khempeuh, mawhna tawh a kidim suak kha ding hi. Note in ka Sabbath ni tangin keimah hong kibiakna mun na zahtak ding uh hi; kei pen Topa ka hi hi. “Vankahte le aisanna lamah kihei kei un. Amaute tawh a kininsak dingin amaute zong kei un; kei pen Topa na Pasian uh ka hi hi. “Note, sam kangte’ mai-ah na kun ding uh a, puteekte’ maitang zahtakin, na Pasian uh na kihta ding uh hi; kei pen Topa ka hi hi. “Na gam sung uhah note lakah khualmi khat hong peem leh, ama tungah a man loin na gamta kei ding uh hi. Note lakah a hong peem khualmite tualsung mi mah bangin na ngaihsun ding uh a, nomau mah bangin amaute na it ding uh hi; bang hang hiam cih leh note pen Egypt gam sungah khualmi na hi ngei uh hi; kei pen Topa na Pasian uh ka hi hi. “Note in thukhenna, a sau tehna, a tam tehnate-ah a man loin na gamta kei ding uh hi. Note in tawi khaina man, tawisuang man, seu man, bung man, na zang ding uh hi. Kei pen Egypt gam panin a hong paikhiatpih Topa na Pasian uh ka hi hi. Note in ka thukhamte khempeuh le ka biakna ngeina kipte khempeuh zui-in tuate na sem ding uh hi; kei pen Topa ka hi hi,” a ci hi. Topa in Moses kiangah, “Israel mite kiangah hih bangin gen in: Israel mite khat peuhpeuh hitaleh Israel sunga a peem khualmite hitaleh, a tate khat peuhpeuh Molek pasian tungah a pia mipa kithat ding a, mihonte in suang tawh denglum ding uh hi. Kei mahmah in tua mipa ka maisiat ding a, ama mite lak panin ka hawlkhia ding hi; bang hang hiam cih leh amah in a tate Molek tungah pia-in, ka biakbuk ninsakin, ka min siangtho daisak hi. Amah in Molek tungah a tate khat a piak ciangin mihonte in tua pa kimuhmawh bawlin amah a thah kei uhleh, keimah in tua mipa le ama innkuanpihte maisiatin, amah le Molek biakna-ah amah a zuite khempeuh amau’ mite lak panin ka hawlkhia ding hi. “Mi khat vankahna le aisan lamah kihei-in tuate thu a dot leh, keimah in tua mipa ka maisiat ding a, ama mite lak panin amah ka hawlkhia ding hi. Tua ahih ciangin note ki-ap unla siangtho un; bang hang hiam cih leh kei pen Topa na Pasian uh ka hi hi. Ka thukhamte zui unla, tuate sem un; note a hong siangthosak Topa pen keimah ka hi hi. “Bang hang hiam cih leh a nu ahih kei leh a pa a samsia mi peuhmah kithat ding hi. Amah in a nu ahih kei leh a pa samsia khin a, ama sihna amahmah ngawh ding ahi hi. “Pasal khatpeuh a vengpa’ zi tawh a mawh leh, tua a khial pa le a khialnu kithat khawm ding hi. A pa’ zi tawh a lumkhawm mipa in a pa a mindaisak a suak hi. Amau tegel kithat ding hi. Amau’ sihna amau mah ngawh ding ahi hi. Pasal khat a monu tawh a lupkhop leh, amau tegel kithat ding hi; amaute in si kinailua mi tawh khialhna a bawl uh ahi hi. Amau’ sihna amau mah ngawh ding ahi hi. Pasal khat in numei khat tawh lupkhop bangin pasal dang khat tawh a lupkhop leh, amau tegel kihhuaina a gamta khin uh ahih manin amaute kithat ding a, amau’ sihna amau mah ngawh ding ahi hi. Pasal khat in zi nei-in, a zi’ nu tawh zong a lakthuah leh, tua pen a kilawm lo ahi hi. Note lakah tua bang kilawm lohna a om loh nadingin tua pa le a nutate, mei tawh kihallum ding hi. Pasal khatpeuh ganhing khat tawh a mawh leh amah le a ganhing kithat ding hi. Numei khat in ganhing khat naihin tua tawh a mawh leh, note in a numei le a ganhing na that ding uh hi; amau’ sihna amau mah ngawh ding ahi hi. “Pasal khat in ama sanggamnu, ahih kei leh a nu’ tanu tenpihin a lupkhawm uhleh, tua pen a zumhuai hi a, amau’ mipihte’ omna panin amaute kihawlkhia ding hi. Ama sanggamnu tawh mawh ahih manin tua pa in ama mawhna pua ding hi. Pasal khat, nin a nei numei khat tawh lumkhawmin a mawh uhleh, amau tegel in siantho nading ngeina palsat uh ahih manin amau’ mipihte lak panin kihawlkhia ding hi. “Note pen na nu’ sanggamnu ahih kei leh na pa’ sanggamnu tawh na mawh kei ding uh hi. Tua pen a nai behte tawh mawhna ahih manin amaute in amau’ mawhna pua ding uh hi. Pasal khat, a pa’ sanggampa’ zi tawh a lupkhop leh, amah in a pa’ sanggampa a mindaisak ahi hi. Amaute in amau’ khialhna thuak ding uh a, ta nei loin si ding uh hi. Pasal khat in a sanggampa’ zi a lak leh, tua pen nitna hi a, amah in a sanggampa a mindaisak ahi hi. Amaute in ta nei lo ding uh hi. “Tua ahih ciangin note in ka thukham khempeuh le ka biakna ngeina kipte khempeuh zui-in, tuate na sem ding uh hi. Tua pen note na ten nadingun kong paipih nading leitang in note hong luakkhiat loh nading ahi hi. Note’ mai-ah keimah in ka paihkhiat minamte’ ngeinate na zui kei ding uh hi. Amaute in hih nate khempeuh hih uh ahih manin amaute ka kih hi. Ahih hangin keimah in note kiangah, ‘Note in amau’ leitang na luah ding uh hi. Bawngnawi le khuaizu a luanna leitang, na neih dingun note tungah kong pia ding hi,’ kong ci khinzo hi. Kei pen mite’ kiang panin note a hong khenkhia Topa na Pasian uh ka hi hi. Tua ahih ciangin note in ganhing a siang leh a nin, vasa a siang leh a nin khentelna na bawl ding uh hi. Note in nin hi, ci-in na seh dingun keimah in ka tuam koihsa ganhing hitaleh vasa hitaleh leitung a a pai thei khat peuhpeuh tawh hitaleh, note na kininsak kei ding uh hi. Note pen keima a dingin na siangtho ding uh hi; bang hang hiam cih leh Topa ahi keimah ka siangtho a, note pen keima-a’ na hih theih nadingun mite kiang panin note kong tuamkoih zo hi. “Numei ahi a, pasal ahi zongin van a kah a, ai a saan leh kithat ding a, suang tawh amaute kidenglum ding hi. Amau’ sihna amau mah ngawh ding ahi hi,” a ci hi. ahih kei leh nungak ahi a sanggamnu (tua nu in pasal nei nai lo ahih manin amah tawh a kinai ahi hi; tua nu hangin amah kininsak thei ding hi) longal ama mite lakah misite’ hangin kininsak lo ding hi. Amah in pasal neisa numei khatpeuh hangin ama mite lakah va kininsakin, tua bangin kidaisak lo ding hi. “Amaute in a lu uh mettol loin, amau’ khamul nawlhui zong kiat loin, a ci tung uh liamsak lo ding uh hi. Amaute pen amau’ Pasian a dingin siangtho ding uh a, amau’ Pasian’ min daisak lo ding uh hi. Bang hang hiam cih leh amaute in amau’ Pasian’ anlum ahi, Topa’ tungah meihal biakna pia uh hi. Tua ahih ciangin amaute siangtho ding uh hi. Amaute in numei paktat ahih kei leh a kininsaksa numei tenpih lo ding uh a, a pasal in a maksa numei zong tenpih lo ding uh hi. Bang hang hiam cih leh siampipa pen ama Pasian a dingin siangtho hi. Amah in note’ Pasian’ anlum pia ahih manin note in amah na ap ding uh a, amah pen note a dingin siangtho ding hi. Bang hang hiam cih leh Topa ahi keimah, note hong siangthosakpa, ka siangtho hi. Siampipa khat peuhpeuh’ tanu in paktatna tawh amah le amah a kidaisak leh, ama pa a daisak ahi hi. Tua nu mei tawh kihallum ding hi. “Ama sanggamte lakah siampi lianpen, a lu tungah nilh sathau a kisunnapa, a puante silh dingin a ki-ap khin siampipa in a samte phiahsak loin, a puante zong balkek lo ding hi. Amah in a nu le a pa nangawn ahi zongin misi khat peuhpeuh kiangah pai loin, amahmah zong kininsak lo ding hi. Biakbuk panin zong paikhia loin, ama Pasian’ biakbuk zong daisak lo ding hi. Bang hang hiam cih leh ama Pasian-a’ ahi ki-apna nilh sathau ama tungah om hi; kei pen Topa ka hi hi. Amah in a zi dingin nungak la ding hi. Meigong numei, a kimasa numei, a kininsaksa numei, numei paktat, hih bangte pawl tenpih lo ding a, amah in ama mite lak panin nungak khat zi-in la ding hi. Tua pen ama mite lakah a tate a daisak loh nading ahi hi. Bang hang hiam cih leh amah a siangthosakpa pen keimah Topa ka hi hi, ci in,” a ci hi. Topa in Moses tungah, “Aaron kiangah hih bangin gen in: Na suanlekhakte sung panin poina a nei mi in a khang khangin ama Pasian’ anlum pia dingin hong neh thei lo ding hi. Bang hang hiam cih leh poina a nei, mittaw, khelbai, maihem, le khutlekhe saulua, khut liam, khe liam, elkul leh mi cingtaak lo, mit hoih lo le cithak a vei, meima nei leh ciltang kitam mi in hong naih lo ding hi. Siampi Aaron’ suanlekhakte sung panin poina a nei mi khatpeuh in Topa a’ ding meihal biakna a pia dingin a nai-ah hong pai lo ding hi. Amah in poina nei ahih manin, ama Pasian’ anlum pia dingin a nai-ah hong pai lo ding hi. Amah in ama Pasian’ anlum, a siangthopen le a siangtho ante ne thei ding hi. Ahih hangin amah in poina nei ahih manin, ka biakbuk a daisak loh nadingin dalna puan gei ahi a, biakna tau nai-ah ahi zongin hong pai lo ding hi. Bang hang hiam cih leh amaute a siangthosakpa pen keimah Topa ka hi hi,” a ci hi. Tua ahih ciangin Moses in Aaron le a tapate le Israel mi khempeuh tungah hih thute a gen hi. Topa in Moses kiangah, “Aaron le a tapate in keima min siangtho a daisak loh nadingun amaute in keima tungah a hong ap uh ahi, Israel mite’ piak a siangthote panin a kikep nadingun gen in; kei pen Topa ka hi hi. Amaute kiangah, ‘Na suanlekhakte uh sung panin a khangkhangin khatpeuh in a nit laitakin Israel mite in Topa’ tungah a ap a siangtho nate a naih leh keima omna panin tua pa kihawlkhia ding hi; kei pen Topa ka hi hi. “‘Aaron’ gui sung panin meima nei leh a natui a paikhia mi peuhmah in amah a siangtho mateng a siangtho an ne thei lo ding hi. Misi lawnna hitaleh a natui a teh pa lawnna hitaleh a nin na khat peuhpeuh a lawng pa, amah a nit theih nadingin a bokvak ganhing khat hitaleh nitna a ngah theih nading mi khat hitaleh a lawng pa, ama nitna pen bangbang hitaleh, tua bang na a lawng mipa pen a nitak mateng a nin hi ding a, amah in tui sungah a pumpi a sil kei leh a siangtho an ne lo ding hi. Ni a tum ciangin amah siang ding a, tua khit ciangin amah in a siangtho an ne thei ding hi. Bang hang hiam cih leh tua bangte pen ama nek ding mah ahi hi. A mawk sihte hitaleh gamsate in a balgawpte hitaleh amah in tuate nekna tawh amah kininsak lo ding hi; kei pen Topa ka hi hi, ci hi,’ ci in. “Tua ahih ciangin amaute in ka thuhilhna zui ding uh hi. Tua hikeileh amaute in tua thu a daisak uh ciangin khialhna thuakin sihpih ding uh hi. Amaute a siangthosakpa pen keimah Topa ka hi hi. “A pualam mi in a siangtho an ne lo ding hi. Siampipa’ inn-ah a om peemta ahi a, a kicial nasemte in ahi zongin a siangtho an ne lo ding hi. Ahih hangin siampipa khat in ama a dingin sum tawh sila khat a lei leh, tua a sila in ne thei ding hi. Ama inn sungah a suak mite in ama an ne thei ding uh hi. Siampipa’ tanu khat a pualam mi khat tawh a kiten leh tua nu in a siangtho biakna an ne thei lo ding hi. Ahih hangin siampipa’ tanu pen meigong ahi a, a kima ahi zongin, ta nei loin a nungak lai mah bangin a pa’ inn-ah a ciahkik leh, tua nu in a pa’ an ne thei ding hi. Ahi zongin a pualam mi kuamah in tua an ne thei lo ding hi. “Mi khat in theih lohna hangin a siangtho an khat peuhpeuh a nekkhak leh, tua a na manzah seh nga-ah seh khat behlapin, siampipa tungah a siangtho an man pia ding hi. Amaute in Topa’ tungah a piak ahi, Israel-te’ an a siangtho pen siampite in ninsak lo ding uh a, tua bangin amau’ an a siangthote nekna tawh mawhna le khialhna amaute puasak lo ding hi; bang hang hiam cih leh kei pen amaute a siangthosak Topa ka hi hi,” a ci hi. Topa in Moses kiangah, “Aaron le a tapate le Israel mi khempeuh tungah hih bangin gen in: Israel mite sung panin ahi zongin Israel mite sungah a peem mite lak pan ahi zongin mi khatpeuh in biakna a piak ciangin, thuciamna a tunsakna hitaleh meihal biakna-in Topa’ tungah a kipia utthu-a biakna hitaleh, hong kisan’ theih nadingin bawngtal hitaleh tuu hitaleh keel hitaleh, a sitbaang lo a pa khat na pia ding uh hi. Note in a sitbaang khat peuhpeuh na pia kei ding uh hi; bang hang hiam cih leh hong kisang zo lo ding hi. Mi khatpeuh in bawnghon panin ahi a, tuulekeel hon panin ahi zongin thuciamna tunsak nading hitaleh utthu-a biakna-in hitaleh Topa’ tungah thunuama biakna a piak ciangin, a kisan’ theih nadingin a ganhing a cidam hi ding a, sitbaanna a om lo hi ding hi. Ganhing a mittaw, a gamtang thei lo, a hem, meima nai a nei, cithak ahih kei leh meima a neite pen, note in Topa’ tungah pia loin, Topa’ tungah mei tawh kihal biakna-in biakna tau tungah tuate na zang kei ding uh hi. Bawngtal hitaleh tuuno hitaleh a na khat peuhpeuh a saulua ahih kei leh a tomluate pen note in utthu-a biakna-in na pia thei ding uh hi. Ahih hangin thuciamna tunsakna a piak dingin tua bangte kisang zo lo hi. A ciltangte a sanim, a kisuzan, a kitam, ahih kei leh a ki-atkhia ganhing khat peuhpeuh, note in Topa’ tungah pia loin, na gam sung uhah biakna-in na zang kei ding uh hi. “Gamdang mite khat peuhpeuh tung panin a kingah ganhingte zong na Pasian uh’ an dingin note in na pia kei ding uh hi. Amaute sitbaang a, hem ahih manin tuate hong kisang zo lo ding hi,” a ci hi. Topa in Moses kiangah, “Bawng ahih kei leh tuu ahih kei leh keel khat a suah ciangin a pi tawh ni sagih sung omkhawm ding hi. A ni giat ni a kipanin tua ganno pen Topa’ tungah mei tawh kihal biakna-in kisang thei ding hi. A pi pen bawng hitaleh tuu hitaleh, note in a pi le a no ni khat sungin na gokhawm kei ding uh hi. Note in Topa’ tungah lungdam koh biakna na piak uh ciangin, note hong kisan’ theih nadingin na pia ding uh hi. A tua ni mahin kine ding a, note in zingsang dong siit na nei kei ding uh hi; kei pen Topa ka hi hi. “Tua ahih ciangin note in ka thupiaknate zui-in tuate na sem ding uh hi; kei pen Topa ka hi hi. Note in keima min siangtho na daisak kei ding uh a, Israel mite lakah kei hong kisiangthosak ding hi. Kei pen note a hong siangthosak Topa, note’ Pasian ahi dingin Egypt gam panin note a hong paikhiatpih pa ka hi hi; kei pen Topa ka hi hi,” a ci hi. Topa in Moses kiangah, “Israel mite tungah hih bangin gen in: Note in a siangtho biak kikhopnate hi, ci-in na gen ding uh keimah Topa’ pawi a kisehte hih bang ahi hi. Ni guk sungin nasep kizo ding a, ahih hangin a ni sagih ni pen a thupi tawlngakna Sabbath, a siangtho kikhopna ahi hi. Note in tua ni-in na na sem kei ding uh hi. Tua pen note’ tenna khempeuhah Topa a dingin Sabbath ahi hi. “Hihte pen amaute a dingin a kiseh hunin note in na gen ding uh ahi Topa’ pawi a kisehte, a siangtho biak kikhopnate ahi hi. “A kha masa, a ni sawm le li nitak pen Topa’ Paisan Pawi ahi hi. Tua kha mah, a ni sawm le nga ni pen Topa’ tungah silngo sawh loh anlum pawi ahi hi. Ni sagih sung note in silngo sawh loh anlum na ne ding uh hi. A ni masa ni-in note in a siangtho kikhopna khat na nei ding uh a, thatang nasep na sem kei ding uh hi. Ahih hangin note in Topa’ tungah meihal biakna ni sagih sung na pia ding uh hi. A ni sagih ni pen a siangtho kikhopna ni hi ding a, thatang nasep na sem kei ding uh hi,” a ci hi. Topa in Moses kiangah, “Israel mite tungah hih bangin gen in: Note tungah ka hong piak leitangah note tungin an na lak uh ciangin, note in an na lakna uhah anpal lom khat, siampipa kiangah na paipih ding uh hi. Note hong kisan’ theih nadingin amah in Topa’ mai-ah anlom vei ding a, Sabbath ni a zing ciangin siampipa in tua anlom vei ding hi. Note in anlom na vei ni-un, Topa’ tungah meihal biakna-in a sitbaang lo kum khat a pha tuuno a pa khat na pia ding uh hi. Tua tawh a kipia khawm ding an tawh biakna pen sathau tawh a kibawl annel lawh nih hi ding a, a gim namtui dingin Topa’ tungah meihal biakna-in kipia ding hi. Tua tawh a kipia khawm ding leenggahzu tawh biakna pen leenggahzu thawl khat hi ding hi. Note in na Pasian uh biakna na paipih ma, hih ni matengin anlum hitaleh a ki-em an hitaleh a sial hitaleh na ne kei ding uh hi; tua pen note’ khang tawntungin na tenna khempeuh uhah ngeina khat hi tawntung ding hi. “Note in Sabbath khit a zing ciang, vei-a biakna anlom na paipih ni uh a kipan nipikal sagih bit dong a ni na simto ding uh hi. A Sabbath sagihna khit a zing ciang dong ni sawmnga dong na simto ding uh a, tua ciangin note in Topa’ tungah an thak tawh biakna na paipih ding uh hi. Note in na tenna uh panin vei dingin an lawh nih a kibawl anlum nih nong paipih ding uh hi. Tuate pen annel a kibawl, silngo sawhin a ki-em, Topa’ tungah anpalin a kipia hi ding hi. Note in anlum tawh, a sitbaang lo kum khat a pha tuuno sagih, le bawngtalno khat, le tuutal nih na pia ding uh hi. Tuate, Topa’ tungah a gim namtui mei tawh kihal biak nadingin an tawh biakna le leenggahzu tawh biaknate tawh Topa’ tungah meihal biakna hi ding hi. Note in khialhna hanga biakna-in keel a pa khat le thunuama biakpiakna-in kum khat a pha tuuno a pa nih na pia ding uh hi. Siampipa in Topa’ mai-ah vei-a biakna-in anpal-anlum le tuuno nih tawh tuate vei ding a, tuate pen siampipa a dingin Topa’ mai-ah a siangtho hi ding hi. Note in tua ni mahin thu zaksakna na bawl ding uh a, a siangtho kikhop khat na nei ding uh hi. Note in thatang nasep na sem kei ding uh hi; tua pen note’ tenna khempeuhah na khang tawntungun ngeina khat hi tawntung ding hi. “Note in na leitang panun an na lak uh ciangin, na lonawl dongun la loin, an na lak khit uh ciangin a sangte zong na khawm kei ding uh a, mizawngte le khualmi a dingin tuate na nusia ding uh hi; kei pen Topa na Pasian uh ka hi hi,” a ci hi. Topa in Moses kiangah, “Israel mite tungah hih bangin gen in: A kha sagihna, a ni masa ni-in note in a thupi tawlngakna ni khat, peengkul aw tawh a kitaangko phawksakna, a siangtho kikhopna khat na nei ding uh hi. Note in thatang nasep na sem kei ding uh a, Topa’ tungah meihal biakna na paipih ding uh hi,” a ci hi. Topa in Moses kiangah, “Hih a kha sagihna ni sawm ni pen kilemna ni ahi hi. Tua pen note a dingin a siangtho kikhop hun hi ding a, note in an tangin, Topa’ tungah meihal biakna na pia ding uh hi. Note in tua ni-in na na sem kei ding uh hi; bang hang hiam cih leh tua pen Topa note’ Pasian’ mai-ah note a dingin kilemna bawl nadingin kilemna bawl ni ahi hi. Bang hang hiam cih leh tua ni-in bang khat peuhpeuh a nekha mi peuhmah ama mite kiang panin kihawlkhia ding hi. Tua ni-in na khat peuhpeuh a sem mi peuhmah keimah in ama mite lak panin ka that ding hi. Note in na na sem kei ding uh hi. Tua pen na khang tawntungun na tenna khempeuh uhah ngeina khat hi tawntung ding hi. Tua pen note a dingin a thupi tawlngakna Sabbath ni hi ding a, an na tang ding uh hi. Tua kha ni kua nitak a kipan, a nitak panin a nitak kik dong note in na Sabbath uh na tang ding uh hi,” a ci hi. Topa in Moses kiangah, “Israel mite tungah hih bangin gen in: Hih kha sagihna a ni sawm le nga ni a kipan ni sagih sung pen Topa a’ ding buk pawi ahi hi. A ni masa ni pen a siangtho kikhopna ni hi ding a, thatang nasep na sem kei ding uh hi. Ni sagih sung note in Topa’ tungah meihal biakna na pia ding uh a, a ni giat ni-in a siangtho kikhopna khat nei-in, Topa’ tungah meihal biakna na pia ding uh hi. Tua pen a thupi kikhopna khat hi a, note in thatang nasep na sem kei ding uh hi. “Hihte pen Topa’ tungah mei tawh kihal biakna, meihal biakna le an tawh biaknate, biakpiakna le leenggahzu tawh biaknate, amau’ ni ciatin piak dingin a siangtho kikhopna hunin na gen ding uh, Topa’ pawi a kisehte ahi hi. Note in Topa’ tungah na piak uh Topa’ Sabbath-te, note’ letsongte, thuciamna hangin na biaknate khempeuh uh le utthu-a na biaknate khempeuh uh banah piak ding ahi hi. “Note in leitang a piangte na kaihkhop khit uh, kha sagihna, a ni sawm le nga ni a kipan ni sagih sung Topa’ pawi na bawl ding uh hi. A ni masa ni pen a thupi tawlngakna khat hi a, a ni giat ni zong a thupi tawlngakna khat mah hi ding hi. Note in a ni masa ni-in singkung hoih gahte, nisuh hiangte, a teh tam singhiangpite, le lui a gialhekte la-in, Topa na Pasian uh pahtawina, ni sagih sung pawi na bawl ding uh hi. Note in tua pen kum simin ni sagih sung pawi-in na nei ding uh a, note’ khang tawntungin ngeina khat hi tawntung ding hi. Note in kha sagihna sungah na bawl ding uh hi. No Israel mi khempeuh ni sagih sung buk sungah na teng ding uh hi. Tua pen keimah in Egypt gam panin amaute ka paikhiatpih lai-in Israel mite, buk sungah ka tensakna thu note’ suanlekhakte in a theih nading uh ahi hi; kei pen Topa na Pasian uh ka hi hi,” a ci hi. Tu-a bangin Moses in Israel mite tungah Topa’ pawi a kisehte a gen hi. Topa in Moses kiangah, “Meivak khat a tawntungin a kivaksuak theih nadingin meivak a dingin oliv gah a kisuzante panin sathau siangtho nang kiangah hong paipih nading uh Israel mite thu pia in. Kikhopna buk sung, thuciamna singkuang dalna puan pualamah, Aaron in nitak a kipanin zingsang dongin Topa’ mai-ah a tawntungin tua meivak a ngeina bangin koih ding a, tua pen na khang tawntungun ngeina khat hi tawntung ding hi. Amah in kham citak meivakkhuam tungah meivakte a ngeina bangin Topa’ mai-ah omsak tawntung ding hi. “Nangmah in annel la inla, tua panin moh sawm le nih bawlin em in; moh khat ciangin annel lawh nih hi ding hi. Nangmah in kham citak sabuai tungah tuate gual nihin na koih ding a, gual khatah guk om ding hi. Phawkna-in Topa’ tungah mei tawh biakna-in piak dingin anlum tawh a paikhawm theih nadingin nangmah in a gual nihte-ah paknamtui siangtho na koih ding hi. Sabbath ni simin Aaron in a tawntung thuciamna-in Israel mite tang dingin Topa’ mai-ah a ngeina bangin koih tawntung ding hi. Tua pen Topa’ tungah mei tawh kihal biakna sung panin amah in a tawntung a a ngah ding, a siangtho pen ama kaih ahih manin, Aaron le a suante-a’ ding hi a, amaute in a siangtho mun khatah ne ding uh hi,” a ci hi. Tu-in Israel numei khat’ tapa, a pa Egypt mi ahi khat, Israel mite lakah a pai hi. Israel numei’ tapa le Israel mi khat giahphual ah kitawng uh a, Israel numei’ tapa in Min Siangtho gensia-in samsia hi. Amaute in Moses kiangah amah paipih uh hi. Ama nu’ min pen Shelomith hi a, Dan minam, Dibri’ tanu ahi hi. Topa’ deihna amaute tungah a kigen mateng amaute in tua mipa khumcip uh hi. Topa in Moses kiangah, “A samsia mipa pen giahphual pualamah paipih in. Ama samsiat a za mi khempeuh ama lu tungah amau’ khut ngasak inla, mihonte khempeuh amah denglumsak in. Tua ciangin Israel mite tungah hih bangin gen in: Ama Pasian a samsia mi peuhmah in ama khialhna thuak ding hi. Topa’ min a gensia mipa kithat ding hi. Mihonte khempeuh in amah denglum ding uh hi. Peemta hitaleh tualsung mi hitaleh, Min Siangtho a gensiate kithat ding hi. “Mi a that pa kithat ding hi. Ganhing a that pa in a ganhing mahin loh ding hi. A thu-in ci lehang nuntakna le nuntakna a kithuk ding ahi hi. “Mi khat in a vengte khat a poisak leh, ama hih bangin ama tung mahah kithukkik ding a, guh kitan tang ding guh kitan, mittang tang ding mittang, ha tang ding ha kihih ding a, amah in mi khat a poisak bangin amah kipoisak ding hi. Ganhing a that pa in loh ding a, mi a that pa kithat ding hi. Note in peemta le tualsung mi a dingin ngeina a kibang khat na nei ding uh hi; bang hang hiam cih leh kei pen Topa na Pasian uh ka hi hi,” a ci hi. Tua ahih ciangin Moses in Israel mite tungah hih thu a gen hi. Amaute in a samsia mipa giahphual pualamah paipih uh a, suang tawh a denglum uh hi. Topa in Moses a thupiak bangin Israel mite in a hih uh hi. Topa in Sinai Mual tungah Moses kiangah, “Israel mite tungah hih bangin gen in: Note kong piak leitangah na tun uh ciangin, Topa pahtawina-in leitang tawlngak hun na omsak ding uh hi. Kum guk sung note in na lo uh na pawi ding uh a, kum guk sung na leenggui lo uh hahin a gahte na kaikhawm ding uh hi. Ahih hangin a kum sagihna-ah leitang ading a thupi tawlngakna sabbath, Topa pahtawina sabbath om ding hi. Note in na lo uh na pawi kei ding uh a, na leenggui lo uh na hah kei ding uh hi. A li pote note in na kaikhawm kei ding uh a, a kipuah lo leenggui gahte na khawm kei ding uh hi. Leitang adingin a thupi tawlngakna hi ding hi. Lo na khawh loh uh hangin leitang tawlngak kumin a piang tawmte in note a’ ding, na sila numei le na sila pasalte a’ ding, a kicial nasemte le note tawh a teng a peem mite a’ ding an hong sik ding hi. A piang khempeuhte pen na bawngte uh le na leitang uhah a om ganhingte’ an ding ahi hi. “Kum nipi sagih hun pen note a dingin kum sawmli le kua ahih theih nadingin note in kum nipi sagih, kum sagih mun sagihvei na simto ding uh hi. Tua ciangin note in kha sagihna a ni sawm ni-in nakpi-in peengkul na tum ding uh a, kilemna ni-in note in na gam sung khempeuh uhah peengkul aw na gingkhiasak ding uh hi. Note in a kum sawmngana siangthosakin, gam sunga a teng mi khempeuh tungah suahtakna thu na zasak ding uh hi. Note in nomau’ neihsa ciat ngahkikin, sila-in a kizuak mite nomau’ innkuanpihte ciat kiangah na ciahkik uh ciangin note a dingin jubilee hi ding hi. Tua a kum sawmngana pen note a dingin jubilee hi ding hi. Tua kum sungin note in lo pawi loin, a li pote zong la loin, a kihah lo leengguite panin zong leenggah na khawm kei ding uh hi. Bang hang hiam cih leh tua pen jubilee ahi hi. Tua pen note-a’ dingin siangtho ding a, note in lo panin a piang tawmte na ne ding uh hi. “Hih jubilee kum sungin note khempeuh in nomau’ neihsa ciat na ngahkik ding uh hi. Note in na vengte’ tungah na zuak uh ahi zongin na vengte’ kiang panin na lei uh ahi zongin note khatlekhat na kikhem kei ding uh hi. Jubilee khit ciangin a jubilee kik dong a kum phazah tawh kituakin note in na vengte uh kiang panin lei-in, a an piang ding kum zah tawh kituakin amau in note tungah hong zuak ding uh hi. A kum a tam lai leh a man na tamsak ding uh a, a kum a tawm leh a man na tawmsak ding uh hi. Bang hang hiam cih leh no tungah hong zuak pen a tuk tung ding zah ahi hi. Note khatlekhat kikhem loin na Pasian uh na zahtak ding uh hi; bang hang hiam cih leh kei pen Topa ka hi hi. “Tua ahih ciangin note in ka thukhamte le ka biakna ngeina kipte zui-in tuate na sem ding uh hi. Tua hileh note lungmuang takin gam sungah na teng ding uh hi. Leitang in an hong piangsak ding a, note in na khamtakun ne-in, lungmuang takin na teng ding uh hi. “Note in, ‘Lo lah pawi loin, an lah la kei lehang, a kum sagihna-ah bang ne ding ihi hiam?’ na cih uhleh keimah in a kum gukna-ah note tungah thupha kong pia ding a, kum thum sung khom ding an hong piang ding hi. A kum giatna-ah lo na pawi ding uh ciangin, note in anlui na ne lai ding uh hi. Anthak hong tun a kum kuana mateng note in a lui na ne ding uh hi. “Leitang pen keima-a’ ahih manin neihsuak dingin leitang kizuak lo ding hi; bang hang hiam cih leh note pen kei tawh a omkhawm khualmi leh peemtate na hi uh hi. “Note in na neih uh leitang khempeuh na kitanhkiksak thei ding uh hi. Na sanggampa zawngin a neihsa leitang khenkhat a zuak leh, amah tawh a kinai a behpa hong pai-in a sanggampa’ zuaksa tanh ding hi. Mi khat in tua na a tatsak ding mi a neih kei a, amahmah hong haukikin a tanhzo dingin a pian’ leh, amah in tua na a zuak zawh a kumte sim ding a, a zuakna mipa tungah a piak lai ding a kisam zah pia ding a, amah in a neihsa ngahkik ding hi. Ahih hangin amah in ama a dingin ngahkik zawh nading lampi a neih kei leh, tua ama zuak leitang pen jubilee kum mateng a leipa’ khut sungah om ding hi. Jubilee kum ciangin tua leitang kipiakhia ding a, amah in a neihsa ngahkik ding hi. “Mi khat in khuapikulh sungah tenna inn khat a zuak leh, a kizuak khit kum khat bit sungin amah in tanhkik thei ding a, kum khat bit sungin amah in tatkik theih nading thu nei ding hi. Tua pen kum khat bit sungin a kitatkik kei leh, khuapikulh sunga om tua inn pen a leipa in khang tawntungin a neih dingin kibawlsak ding a, jubilee kum ciangin zong kipiakhia kik tuan nawn lo ding hi. Ahih hangin a kimkotah kulh a nei lo khua neu-a innte pen gam sung lote tawh a kibangin kingaihsun ding hi. Tuate kitanhkik thei ding a, jubilee kum ciangin tuate kipiakhia ding hi. Ahi zongin Levi mite’ khuapite, amau’ neihsa khuapite-a innte ahihleh, Levi mite in khatvei peuh ciangin tanh thei ding uh hi. Levi mi khatpeuh in ama tatkik theih ding hinapi a tatkikzawh kei leh, amau’ neihsa khuapi sunga tua inn pen jubilee kum ciangin kipiakik ding hi. Bang hang hiam cih leh Levi mite’ khuapi sunga innte pen Israel mite’ lakah amau’ neihsa ahi hi. Ahih hangin amau’ khuapi taang gamte kizuak thei lo ding hi; bang hang hiam cih leh tua pen amau’ neih tawntung na ahi hi. “Na sanggampa uh zawngin, note bangin amah a kivak zawh kei leh, note in amah na vak ding uh hi. Khualmi le peemta bangin amah pen note tawh hong om ding hi. Na sanggampa uh no kiangah hong ten theih nadingin ama tung panin a meet a khang la kei unla, na Pasian uh zahtak un. Note in ama tungah a meetin sum leitawi pia loin, ama tungah a meetin na an uh zong na pia kei ding uh hi. Kei pen note’ Pasian ahi ding le, note tungah Kanaan leitang a hong pia dingin Egypt gam panin note a hong paikhiatpih Topa na Pasian uh ka hi hi. “Na gei-a om na sanggampa zawngin, nangma tungah amahmah hong kizuak leh, sila bangin na na semsak kei ding hi. Amah pen a kicial nasem le peemta bangin nang kiangah om ding hi. Amah in jubilee kum mateng nangma na hong sem ding a, tua ciangin nang kiang panin amah le ama kiangah a om a tate paikhia ding a, ama innkuan zuan kikin, a pate’ neihsa ngahkik ding hi. Bang hang hiam cih leh amaute pen Egypt gam panin ka paikhiatpih keima nasemte hi a, amaute sila-in kizuak lo ding hi. Note in hih gawpgawpna tawh amah na uk kei ding uh a, na Pasian uh na zahtak ding uh hi. Note in na neih theih ding uh sila numei le sila pasalte hih bang ahi hi: Na kimkot uha om minam dangte lak panin sila numei le sila pasal na lei thei ding uh hi. Note in na gam sung uhah a suak, note lakah a hong peem khualmite leh note tawh a om amau’ innkuante lak panin zong na lei thei ding uh a, amaute pen nomau a’ hi thei ding uh hi. Note in amaute pen note’ khit ciangin na tapate uh tungah amau’ neih tawntung dingin a luah dingin na pia thei ding uh hi. Note in sila-in amaute na nei thei ding uh a, ahih hangin na sanggam uh Israel mite khatlekhat hih gawpgawpna tawh na ki-uk kei ding uh hi. “Note lakah a teng khualmi ahih kei leh peemta khat hong hau a, ama kianga om na sanggampa uh zawngin, no tawh a om khualmipa tung ahi a, peemta mipa tungah ahi zongin, tua ahih kei leh khualmipa’ innkuan khat peuhpeuh tungah amah a kizuak leh, amah a kizuak khit ciangin amah kitanhkik thei ding a, ama sanggamte khat peuhpeuh in amah tanh thei ding hi. Ama innlak pa ahih kei leh a innlak sanggampa in tanh thei ding hi. Ama innkuan sunga a kinaipih a beh khatpeuh in amah tanh thei ding hi. Tua ahih kei leh zong amah a hauh leh amahmah kitanhkik thei ding hi. Midang tungah amahmah a kizuak a kipan jubilee kum dong amah a leipa tawh tuat ding a, ama suahtak nading sum pen a kum phazah tawh kituak hi ding hi. A topa tawh a omkhawm hun sungteng pen a kicial nasem khat thaman zahin seh ding hi. Kum tampi in a sap lai leh, amah in tuate tawh a kituakin ama thaman ding a kipiakna sung panin ama kitatkhiat nadingin pia kik ding hi. Ahih hangin jubilee kum ding kum tawmkhat bek in a sap leh amah in a topa tawh tuatna khat nei ding hi. Ama sepsak ding kum a omlai tawh kituakin ama kitatkhiat nadingin sum piakik ding hi. Amah pen a topa tungah a kum kumin a kicial nasempa tawh kibang ding hi. A topa in note’ muhna-ah hih gawpgawpna tawh amah uk lo ding hi. Hih bang danin amah a kitatkhiat kei leh, jubilee kum ciangin amah le amah tawh a om a tate kikhahkhia ding hi. Bang hang hiam cih leh Israel mite pen kei a dingin nasemte ahi uh hi. Amaute pen Egypt gam panin keimah in ka paikhiatpih keima nasemte ahi uh hi; kei pen Topa na Pasian uh ka hi hi. “Note in nomau a dingin a mai-ah na kun dingun milim bawl loin, a kiseek milim hitaleh biakna song hitaleh na dingsak kei ding uh a, na gam sung uhah suang milim na phut kei ding uh hi; bang hang hiam cih leh kei pen Topa na Pasian uh ka hi hi. Note in ka sabbath-te tangin keimah hong kibiakna mun na zahtak ding uh hi; kei pen Topa ka hi hi. “Note in ka thukham zui-in, ka thupiaknate mangin tuate na sep uhleh, keimah in note tungah guahtui a hunin kong pia ding a, leitang in an hong piangsakin, lo-a kungte in amau’ gah gah ding uh hi. Na cil uh ante leenggah lawh hun dong kimang ding a, leenggah minte zong lopawi hun dong kimang ding hi. Note in na khamtakun an na ne ding uh a, lungnuam takin na gam sung uhah na teng ding uh hi. “Keimah in gam sungah nopsakna hong pia-in, note lungnuam takin na lum ding uh a, bangmah in note hong lausak lo ding hi. Keimah in gam sung panin ganhing gilote ka hawlkhia ding a, galkidona in na gam uh hong nawk lo ding hi. Note in na galte uh na delh ding uh a, note’ mai-ah namsau in amaute puksak ding hi. Note nga in zakhat zo-in, note zakhat in tul sawm na zo ding uh hi. Note’ mai-ah namsau in na galte uh puksak ding hi. Keimah in note ka hong pi ngaihsut ding a, note hong pungsakin, tampi kong phasak ding a, note tawh ka thuciamna ka kipsak ding hi. Note in sauveipi a kikhol anluite ne-in, a thak koih nadingin a lui na hahsiang masa ding uh hi. Keimah in note lakah omna ka bawl ding a, keimah in note kong kih kei ding hi. Keimah, note’ lakah omin note’ Pasian ka hi ding a, note, keima mite na hi ding uh hi. Note pen amau’ sila na hihloh nadingun Egypt gam panin note a hong paikhiatpih Topa na Pasian uh ka hi hi. Keimah in note’ gimna hakkolte kuaitanin note a dingtangin kong paisak hi. “Ahih hangin note in ka thu ngai loin, hih thupiaknate khempeuh na hih kei uh a, ka thukhamte nialin, ka biakna ngeina kipte kih a, ka thupiaknate khempeuh sem loin, ka thuciamna na palsat uhleh, keimah in note tungah hih bangin kong hih ding hi: Note’ tungah hong tung dingin keimah in thakhatthu a dipkuatna, zawngkhalna, le mite siasakin nuntakna a kiamsak ding cisa natna kong tungsak ding hi. Note’ lopawi zong a mawkna hi ding hi; bang hang hiam cih leh na galte un tuate ne ding hi. Keimah in note kong maisiat ding a, na galte uh mai-ah lelhna na thuak ding uh hi. Note hong mudah mite in note hong uk ding a, kuamah in note hong delh lo napi-in na tai ding uh hi. “Tua bang hinapi-in note in ka thu nong ngaih kei veve uhleh, keimah in na khialhna hangun a zah sagih vei-in note kong thuhilhkik ding a, keimah in na kiphatsakpih uh note’ vangliatna susia-in, van panin guah hong zusak loin, na leitang uh sik ka bangsak ding hi. Na leitang un an piangsak loin, na gam sung uha kungte in amau’ gah gah lo ding ahih manin note’ thatang a mawkna-in a bei hi ding hi. “Tua ciangin kei hong demin, keima thu na ngaih kei lai uhleh, keimah in note’ khialhna a zah sagih vei-in note’ tungah gimna kong tungsak ding hi. Keimah in note’ lakah gamsate hong khahin, amaute in na tate uh hong neksak ding uh a, na ganhingte uh susia-in, note mi tawmno khat hong suah ding a, note’ lampite zong gamkhing hong suak ding hi. “Hih banga hihna tawh note hong kihei tuan loin, kei na hong demlai uhleh, kei zong note hong gawtin, kei mahmah in na khialhnate uh hangin a zah sagih vei-in kong sat ding hi. Keimah in, thuciamna omsa bangin phulakna na a sem ding namsau khat note’ tungah kong tungsak ding hi. Na khuapi sung uhah note na kikaihkhop uhleh zong keimah in note’ lakah natna kong tungsak ding a, na galte uh khut sungah note hong kipia ding hi. Keimah in note’ nuntakna an ka suksiat ciangin, an kicing lo ahih manin nupi sawm in meibung khat sungah na anlum uh emkhawm ding a, na anlum uh a tawitehin hong piakhia kik ding hi. Note in na ne ding uh a, na khamzo kei ding uh hi. “Tua bang hinapi-in note in keima thu ngai loin, kei na hong demlai uhleh, note ka hong heh ngawh bawl ding a, note’ khialhna hangin a zah sagih vei-in kong thuhilh ding hi. Note na gil uh kial lua ding ahih manin na tapate uh le na tanute uh’ sa na ne ding uh hi. Keimah in mual dawna na biaknate uh susia-in, na paknamtui biakna taute uh phukin, note’ milim’ siluang hawmte tungah na luanghawmte uh ka pai ding a, keimah in note kong kih ding hi. Keimah in na khuapite uh siasakin, na biakna munte uh gamkhing ka suaksak ding a, nomau’ hong biakna a gim namtuite ka diik kei ding hi. Keimah in leitang ka siasak ding a, tua tungah a teng na galte un lamdangsa ding uh hi. Keimah in minam dangte lakah note kong thehthang ding a, keimah in namsau a paai panin dokin note kong delh ding hi. Na leitang uh gamkhing suak ding a, na khuapite uh a sia hi ding hi. Tua ciangin na galte uh leitangah na om tanvei uh, gamkhingin a om sungteng, leitang in tawlngak hun a ngah hi ding hi. Leitang tawlnga-in, a sabbath-te a tang hi ding hi. Ama tungah na ten laitakun na ngahsak loh uh tawlngakna ahi a sabbath-te, gamkhingin a om sungteng a tawlnga hi ding hi. “Note’ sung panin galte’ leitangah a omlai mite tungah lungsim gimna ka tungsak ding hi. Nahthel ging in amaute taisak ding a, namsau mai-ah mi khat a tai bangin amaute tai ding uh a, kuamah in a delh lohpi-in amaute puk ding uh hi. Kuamah in delh lo napi-in namsau mai pan a taikhia bangin khatlekhat na kiphupai ding uh a, na galte uh nanzawh nading vangliatna na nei kei ding uh hi. Minam dangte lakah note na sia ding uh a, na galte uh’ leitang in note hong valhtum ding hi. Note’ sung panin galte’ leitangah a omlaite amau’ mawhna hangin kiam ding uh a, amau’ pute pate a mawhna uh hangin a kiam bangun amau zong a kiam ding uh hi. keimah in Jakob tawh ka thuciamna, Isaac tawh ka thuciamna, le Abraham tawh ka thuciamna ka phawk ding a, leitang zong ka phawk ding hi. Ahih hangin amaute in leitang nusia-in, amaute om loin gamkhingin a om sungteng leitang in a sabbath-te na ngah ding hi. Amaute in ka biakna ngeina kipte nialin, ka thukhamte mudah uh ahih manin, a mawhna uh a kipuahphat ding uh kisam hi. Bangbang ahi zongin, a galte uh gam sungah amaute a om sungteng uh keimah in amaute nilkhia loin, amaute a susia maimang zah ding le amaute tawh ka thuciamna a pelhzah dingin amaute ka mudah kei ding hi; bang hang hiam cih leh kei pen Topa amau’ Pasian ka hi hi. Ahih hangin keimah in amaute ka ngaihsutna-in amau’ Pasian ka hih theih nadingin, minam dangte’ muhna-ah Egypt gam panin ka paikhiatpih amau’ pulepate tawh ka thuciamna ka phawk ding hi; kei pen Topa ka hi hi,” a ci hi. Hihte pen Moses tungtawnin Sinai Mual tungah Topa in amah le Israel mite kikalah a bawl thukhamte le biakna ngeina kipte le thute ahi hi. Topa in Moses kiangah, “Israel mite tungah hih bangin gen in: Mi khat in a tuam vilvelin kiciamna a bawl ciangin, tua a kiciam mite pen nangmah in Topa -a’ in na seh dinga, a nuai-a kiseh bangin kitanh-in suaktakik thei ding hi. Pasal kum sawmnih panin kum sawmguk a phate a man na sehna pen, biakinn shekel zangin pasal khat ciangin ngun shekel sawmnga hi ding hi. Numei ahihleh shekel sawmthum hi ding hi. Kum nga pan kum sawmnih ciang a phate, pasal ahihleh shekel sawmnih hi ding a, numei ahihleh shekel sawm hi ding hi. Kha khat pan kum nga ciang a phate pen pasal ahihleh ngun shekel nga hi ding a, numei ahihleh ngun shekel thum hi ding hi. Kum sawmguk pan a tungsiahte pen pasal ahihleh shekel sawm le nga hi ding a, numei ahihleh shekel sawm hi ding hi. “Mi khatpeuh zawnglua-in nangma sehzah a piakzawh kei leh, siampipa kiangah a mi hong kipaipih ding a, siampipa in ama man seh ding hi. A kiciam mipa a siamna tawh kizui-in siampipa in ama man seh ding hi. “Mite in Topa’ tungah biakna-in a piakte pen ganhing ahihleh, mi khatpeuh in Topa’ tungah a piak tua bang ganhingte khempeuh a siangtho ahi hi. Amah in na khat peuhpeuh, a hoihte a hoih lo tawh ahi zongin, a hoih lote a hoih tawh ahi zongin, laih lo, khek lo ding hi. Amah in ganhing khat ganhing adang khat tawh a khek leh, tua ganhing le a khekna ganhing a siangtho hi khawm ding hi. Tua pen Topa’ tungah a kipia thei lo ganhing nin khat ahihleh, mipa in siampipa mai-ah a ganhing paipih ding a, siampipa in hoih hi, ci-in ahi zongin sia hi, ci-in ahi zongin a man zah seh ding hi. Ahih hangin amah in tua ganhing a tatkik nop leh, a kisehna banah nga-ah khat behlap ding hi. “Mi khatpeuh in a siangtho dingin Topa’ tungah a inn a ap ciangin, siampipa in a hoihna le a hoih lohna tawh kizui-in a man seh ding a, siampipa’ sehna bangin kip ding hi. A ap pa in ama inn a tatkik nop leh, a kisehna banah nga-ah khat sum tawh behlap ding a, tua inn ama a’ hi kik ding hi. “Mi khat in a luah ama leitang phelkhat Topa’ tungah a ap leh, nangma sehna pen khaici vawh zah ding tawh kizui ding hi. Mangbuhham beem khat dim a pawina leitang pen ngun shekel sawmnga-in kiseh ding hi. Amah in jubilee kum a kipanin a lo a ap leh, nangma sehna zahzah bit ding hi. Ahih hangin jubilee kum khit ciangin amah in a lo a ap leh, siampipa in jubilee kumkik dong a omlai kumte tawh kizui-in a manzah sum seh ding a, nangma sehna zah panin kikhiam ding hi. Lo a ap pa in a tatkik nop leh, a kisehna banah nga-ah khat sum tawh behlap ding a, tua lo ama a’ hisuak ding hi. Ahih hangin amah in a lo a tanh nuam lo ahi a, amah in midang khat tungah a zuak ahi zongin ahihleh, tua pen amah in tanhkik thei nawn lo ding hi. A lo pen, jubilee huna piak khiat ciangin, a ki-apsa lo mah bangin Topa’ tungah a siangtho hi ding a, siampipa in tua lo tang ding hi. “Amah in luahna tawh a neih ahi lo, a leisa lo pen Topa’ tungah a ap leh, siampipa in jubilee kum ciang dong ding tua man seh ding a, tua ni-in a mipa in a kiseh zah, Topa’ tungah a siangtho-in pia ding hi. Jubilee kum ciangin a lo pen a kileinapa, gamhluahna tawh tua leitang a nei mipa tungah tungkik ding hi. “A kisehna peuhmah biakinn shekel kizang ding hi; gerah sawmnih ciangin shekel khat hi ding hi. “Ahih hangin tacil pen Topa a’ hi khinzo ahih mah bangin, kuamah in ganhing tacilte ap thei lo ding hi; bawng hitaleh tuu hitaleh Topa -a’ ahi hi. Ganhing nin ahihleh, nangma sehna bangin amah in lei kikin, tua banah seh nga-ah khat behlap ding hi. Tua hi lo a, a kitat kei leh, a kisehna bangin kizuak ding hi. “Ahih hangin mi khat in a neih, Topa’ tungah a ap, a ki-apsa nate, mi hitaleh ganhing hitaleh, a luah ama lo hitaleh, kizuak lo ding, kitanh lo ding hi. A ki-ap na peuhmah Topa’ tungah a siangthopen ahi hi. Mite lak nangawn panin a kisusiamang dingin a ki-apsa mi peuhmah, kitanh lo ding a, kithat ding hi. “Leitang panin a piang khempeuh khaici hitaleh singgah hitaleh sawm-ah-khat Topa a’ hi a, Topa a dingin siangtho hi. Mi khatpeuh in sawm-ah-khat a piak na khat peuhpeuh a tat nop leh, amah in tua banah nga-ah khat behlap ding hi. Bawnghon leh tuulekeel hon sawm-ah-khat khempeuh le a cing pa’ ciangkhut nuai-a a pai ganhing khempeuh sawm-ah-khat peuhmah Topa a dingin a siangtho hi ding hi. Mi khat in pha hiam sia hiam ci-in kantel lo ding a, khek lo ding hi. A khek leh, tua leh a khekna pen a siangtho hi khawm ding hi. Tua pen kitanh lo ding hi,” a ci hi. Hihte pen Sinai Mual tungah Topa in Israel mite a dingin Moses tungah a piak thute ahi hi. Amaute, Egypt gam panin a paikhiat zawh uh a kum nihna, a kha nihna a ni masa ni-in, Sinai sehnel gam kikhopna puanbuk sungah Topa in Moses hopihin hih bangin ci hi: “Nang le Aaron in Israel mihonte khempeuh a innkuankuan, a behbehin, pasal peuhmah a milipin a phazah sim un. Israel sungah kum sawmnih panin a tungsiah a pha, galdo dingin a kuan thei ding mi khempeuh a honhonin na sim ding uh hi. A minam simin a beh sungah a lutang ahi mi khat ciat in hong huh ding uh hi. No hong huh dingte’ min: Reuben sung panin Shedeur’ tapa Elizur; Simeon sung panin Zurishaddai’ tapa Shelumiel; Judah sung panin Amminadab’ tapa Nahshon; Issakhar sung panin Zuar’ tapa Nethanel; Zebulun sung panin Helon’ tapa Eliab; Josef tapate, Efraim sung panin Ammihud’ tapa Elishama, le Manasseh sung panin Pedahzur’ tapa Gamaliel; Benjamin sung panin Gideoni’ tapa Abidan; Dan sung panin Ammishaddai’ tapa Ahiezer; Asher sung panin Okran’ tapa Pagiel; Gad sung panin Deuel’ tapa Eliasaf; Naftali sung panin Enan’ tapa Ahira ahi hi,” a ci hi. Hihte pen mihon sung panin a kiteel, amau’ phung sung panin a makaite, Israel behte’ lutangte ahi uh hi. Ahih hangin Levi mite in amau’ nam min mah a tuamin pua uh ahih manin adangte tawh kisimkhawm lo hi. Bang hang hiam cih leh Topa in Moses kiangah, “Levi minamte na sim kei ding a, Israel mite lakah amaute na simkhawm kei ding hi. Ahih hangin Levi mite pen thuciamna biakbuk le a sung nazat khempeuh, le tua tawh a kisai na khempeuh a uk dingin seh in. Amaute pen biakbuk le a nazat khempeuh a pua dingte hi a, amaute in a biakbuk semin, a kimkotah phual sat ding uh hi. Biakbuk a kikhin ding ciangin Levi mite in phel ding uh a, biakbuk a kilam ding ciangin Levi mite mah in lam ding uh hi. Midang khat peuhpeuh in tua nasep a sep leh tua mi kithat ding hi. Israel mite in a milipun amau’ giahphual ciat leh a dialkhai gei ciat uhah a pawlpawlin a puanbuk uh lam ding uh hi. Ahih hangin Israel mihonte tungah hehna a om loh nadingin thuciamna biakbuk kiimah Levi mite bek in phual sat ding uh a, Levi mite bek in thuciamna biakbuk kem ding uh hi,” a ci hi. Tua bangin Israel mite gamta uh a, Topa in Moses a thupiak bangin amaute in a sem uh hi. Topa in Moses le Aaron kiangah hih bangin gen hi: Israel mite in amau’ dialkhai gei ciatah a beh dialkhaite tawh phual sat ding uh a, amaute in a pang simah kikhopna buk mai ngatin phual sat ding uh hi. Tua ciangin kikhopna buk pen, giahphualte’ laizangah a om Levi mite’ phual tawh kikhin khawm ding a, a phual sat hun mah bangun amau’ san ciatah a dialkhai uh tawh paikhia ding uh hi. Hihte pen Israel mite a beh zui-a kisim hi a, a pawlpawlin giahphual ah a om mi a vekpi-in tul zaguk le tulthum le zanga le sawmnga a pha hi. Ahih hangin Topa in Moses a thupiak bangin Israel mite lakah Levi mite kisimkhawm lo hi. Tua bangin Israel mite gamta uh hi. Topa in Moses a thupiak bangin a beh tawh kizui-in a innkuankuanin amau’ dialkhaite’ gei-ah giahphual sat uh a, tua bangmahin paikhia uh hi. Hihte pen Sinai Mual tungah Topa in Moses tawh a thugen hun lai-a Aaron le Moses’ huna mite ahi hi. Aaron’ tapate’ minte in: A ta upa Nadab, Abihu, Eleazar, le Ithamar hi a, sathau a kinilh siampi, siampi za-ah na a sem dingin a kikipsak, Aaron’ tapate’ minte ahi hi. Ahih hangin Sinai sehnel gam Topa’ mai-ah mei siangtho lo a zat uh ciangin Topa’ mai-ah Nadab le Abihu si hi. Amaute in ta nei lo uh ahih ciangin Eleazar le Ithamar in a pa uh Aaron’ nuntak sungteng bek siampi na a sem uh ahi hi. Topa in Moses kiangah, “Levi minamte va paipih inla, amaute in siampi Aaron’ na a sep theih nadingun a mai-ah va koih in. Amaute in biakbuk-ah a sep uh ciangin amah le mihonpi a dingin kikhopna buk mai-ah na sem ding uh hi. Amaute in kikhopna buk sung nazat khempeuh vaan ding uh a, biakbuk-ah a sep uh ciangin Israel mite a dingin na sem ding uh hi. Nangmah in Aaron le a tapate’ tungah Levi mite na pia ding a, amaute pen Israel mite lak panin keima tungah a kipiate hi ding uh hi. Nangmah in Aaron le a tapate na seh ding a, amaute in a siampi nasep uh don ding uh hi. Ahih hangin midang khatpeuh in siampi nasep a sep leh, tua mi kithat ding hi,” a ci hi. Topa in Moses kiangah, “En in, Israel mite lakah tacil khempeuh tang dingin Levi mite ka la khin hi. Levi mite pen keima a’ hi ding hi. Bang hang hiam cih leh tacil khempeuh keima-a’ ahi hi. Egypt gam sungah tacil khempeuh ka thah ni-in, Israel sungah tacil khempeuh, mihing tacil le ganhing tacil khempeuh, keima a dingin ka ap a, amaute pen keima a’ hi ding hi; kei pen Topa ka hi hi,” a ci hi. Topa in Sinai sehnel gam Moses kiangah, “Levi mite, a behbeh, a innkuankuanin, pasal kha khat a pha panin a tungsiah peuhmah na sim ding hi,” a ci hi. Tua ahih ciangin Moses thu a kipiak bangin amah in Topa’ thupiakna tawh kizui-in amaute a sim hi. Levi’ tapate’ min in: Gershon, Kohath, le Merari ahi hi. Gershon’ tapate’ min in: Libni le Shimei ahi hi. Kohath’ tapate’ min in: Amram, Izhar, Hebron, le Uzziel ahi hi. Merari’ tapate’ min in: Mahli le Mushi ahi hi. Hih mite pen Levi mite beh lutangte ahi uh hi. Gershon-te beh pen Libni mite le Shimei mite hi a, hihte pen Gershon-te beh ahi uh hi. Amaute, kha khat pan a tungsiah a pha pasal peuhmah tulsagih le zanga ahi hi. Gershon-te beh in nitumna lam biakbuk nungah giahphual sat ding uh a, tua Gershon mite sung pan a beh ukpi pen Lael’ tapa Eliasaf hi ding hi. Gershon-te beh in kikhopna buk sungah a et dingte pen a biakbuk, puanbuk a tuamna tawh, kikhopna buk kongkhak puankhai, buktual a puan kikhaite, biakbuk kiima om buktual a kongkhak puankhai le biakna tau, le a khaute le hihte tawh a kizom nasep khempeuh ahi hi. Kohath-te beh pen Amram mite, Izhar mite, Hebron mite, le Uzziel mite hi a, hihte pen Kohath-te beh ahi hi. Pasal khempeuh kha khat pan a tungsiah, biakbuk nasep a sem peuhmah tulgiat le zaguk ahi hi. Kohath-te beh in biakbuk leitaw lampangah giahphual sat ding uh a, Kohath mite sung pan a beh ukpi pen Uzziel’ tapa Elizafan hi ding hi. Amau’ et dingte pen thuciamna singkuang, a sabuai, a meivakkhuam, a biakna taute, siampite in nasepna-in a zat uh biakbuk nazatte’ kidalna puan le hihte tawh a kizom nasep khempeuh ahi hi. Siampi Aaron’ tapa Eleazar pen Levi mi makaite tungah a ukpi hi ding a, biakbuk a en mite’ nasepna vil ding hi. Merari-te beh pen Mahli mite le Mushi mite hi a, hihte pen Merari-te beh ahi hi. Amaute kha khat panin a tungsiah pasal peuhmah tulguk le zanih ahi hi. Merari-te beh sung pan a beh ukpi pen Abihail’ tapa Zuriel hi ding a, amaute pen biakbuk leilu lampangah giahphual a sat dingte ahi uh hi. Merari-te beh’ et dinga a kisehte pen biakbuk khuampeekte, a zawlte, a khuampite, khuam bullente, a nengneng teng le hihte tawh a kizom nasep khempeuh ahi hi. Buktual kimkota khuampite le a bullente tawh, khetphimte le a khaute zong ahi hi. Nisuahna lampang biakbuk mai, kikhopna buk mai-ah giahphual a sat ding mite pen Israel mite a dingin bang khat peuhpeuh sep nadingin biakbuk sungah thu a nei Moses le Aaron le a tapate hi a, midang khatpeuh in biakbuk sungah na a sep leh kithat ding hi. Moses le Aaron in Topa’ thupiakna tawh a innkuankuanun a sim Levi mi pasal kha khat panin a tungsiah peuhmah tul sawmnih le tulnih a pha hi. Topa in Moses kiangah, “Israel mite sung pan pasal tacil khempeuh sim inla, kha khat panin a tungsiah peuhmah a min la in. Israel mite lak panin tacil khempeuh tang dingin Levi mite nong laksak ding a, Israel mite’ ganhing tacil khempeuh tang dingin Levi mite’ ganhing nong laksak ding hi - kei pen Topa ka hi hi,” a ci hi. Tua ahih ciangin Moses in Topa’ thupiak bangin Israel mite lakah tacil khempeuh a sim hi. Kha khat panin a tungsiah tacil pasal a kisim peuhmah tul sawmnih leh tulnih le zanih le sawmsagih le thum ahi hi. Topa in Moses kiangah, “Israel mite lakah tacil khempeuh le a ganhingte uh tang dingin Levi mite le a ganhingte uh la in. Levi mite keima a’ hi ding hi; kei pen Topa ka hi hi. Levi mi pasal khempeuh sangin Israel mi tacil khempeuh zanih le sawmsagih le thumin tamzaw ahih manin, tuate tat nadingin shekel khatah gerah sawmnih a pha, biakinn shekel zangin mi khat ciangin shekel nga pai la inla, tua a tamzaw teng a kitatna uh sumte Aaron le a tapate tungah pia in,” a ci hi. Tua ahih ciangin Moses in Levi mite banah a vallai mite tung panin kitatkhiatna sum la a, biakinn shekel zangin Israel mi tacilte tung panin sum shekel tul khat le zathum le sawmguk le nga a la hi. Tua ciangin, Topa in Moses a thupiak mah bangin Topa’ thu tawh kizui-in kitatkhiatna sumte Aaron le a tapate tungah Moses in a pia hi. Topa in Moses kiangah, “Levi mite lak panin Kohath mite amau’ innkuankuan le a behbehin, kikhopna buk sungah na a sem thei ding kum sawmthum pan kum sawmnga a pha mi khempeuh sim in. Kikhopna buk sungah Kohath mite in a siangthopen nate tawh kisai nasepte sem ding uh hi. “Giahphual a kisuan ding ciangin Aaron le a tapate tumin kidalna puan lakhia ding uh a, tua puan tawh thuciamna singkuang tun ding uh hi. Tua ciangin amaute in savun tawh tuam ding uh a, tua tungah puan a dum tawh khuhin, a zawlte bulh ding uh hi. “Ompihna Anlum sabuai tungah amaute in puan a dum phah ding uh a, tua tungah a kuangdaite, paknamtui pakante, kuang-ukte, le tuibuahna thawl gongbakte koih ding uh a, a kikoih tawntung anlum zong a tungah om ding hi. Tua ciangin amaute in a ausan puan tawh tuate khuh ding uh a, savun tawh khuh thuahin, a zawlte bulh ding uh hi. “Mei vakna meikhuam pen, a meivakte, a taitehte, a kuangte, le sathau piakna nazatte khempeuh tawh puan a dum khatin tun ding uh hi. Amaute in a nazat khempeuh savun-in tunin a puak nading tal tungah koih ding uh hi. “Puan a dum khat tawh kham biakna tau khuh ding uh a, savun tawh tua mah tuam thuahin, a zawlte bulh ding uh hi. Amaute in biakbuk sungah a kizang nazat khempeuh la-in puan dum khat tawh tunin, savun tawh tuate tun thuah ding uh a, a puak nading tal tungah koih ding uh hi. Amaute in a biakna tau panin a vutte luakkhia ding uh a, a tungah puan a dupsan khat phah ding uh hi. Tua lai-ah nasep nadinga a kizang, biakna tau nazat khempeuh, a vutluahna peek, a tu-ka, a kawbia, le a kuang, biakna tau nazat khempeuh, a tungah koihin, tua tungah savun tawh tuam ding uh a, a zawlte bulh ding uh hi. Aaron le a tapate in biakbuk le biakbuk nazat khempeuh a tun khit uh giahphual a kisuan ciangin, tuate a pua dingin Kohath mite hong pai ding uh a, ahih hangin amaute in a siangtho nate lawngkha lo ding uh hi; lawng le-uh si ding uh hi. Hihte pen Kohath mite’ puak ding kikhopna buk nate ahi hi. “Siampi Aaron’ tapa Eleazar in meivak tui, a namtui paknamtui, a kikoih tawntung an tawh biakna, nilh sathau, le biakbuk le a sunga om khempeuh, le a nazat khempeuh uk ding hi,” a ci hi. Topa in Moses le Aaron kiangah, “Levi mite lakah Kohath minamte a sih loh nadingin hih un. A siangthopen nate nai-ah amaute a pai ciangun si loin a hinna dingun hih un. Aaron le a tapate pai-in a nasep ding uh le a van puak ding ciat uhah amaute seh ding uh hi. Ahih hangin a siangtho nate tomkhano sung bek nangawn a en dingin amaute tum lo ding uh hi; tum le-uh si ding uh hi,” a ci hi. Topa in Moses kiangah, “Gershon mite zong, amau’ innkuankuan le a behbehin sim in. Kikhopna buk sungah na a sem thei ding kum sawmthum pan kum sawmnga a pha mi khempeuh na sim ding hi. Nasep le van puak ciangin Gershon-te beh’ nasep dingte: Biakbuk dalna puante, kikhopna buk a tuamna tawh, a tungzang a om a khuhna tuuvun, kikhopna buk kongkhak-a puankhai, buktual a puan kikhaite, biakbuk le biakna tau kimkotah a om buktual kongpi puankhaite, a khaute, le amau’ nasep nadinga nazat khempeuh pua ding uh a, amaute in tuate tawh a kizom nasep kisam khempeuh sem ding uh hi. Gershon beh pasalte’ nasep ding, a puak ding le a hih dingte khempeuh uh Aaron le a tapate’ thupiakna bang hi ding a, a puak ding khempeuh uh amaute na ap ding uh hi. Hih pen kikhopna buk sungah Gershon beh pasalte’ nasep hi a, amau’ nasepna pen siampi Aaron’ tapa Ithamar’ ukna nuai hi ding hi. “Merari mite zong amau’ innkuankuan le a behbehin, kikhopna buk sungah na a sem thei ding kum sawmthum pan kum sawmnga a pha mi khempeuh na sim ding hi. Kikhopna buk sungah amau’ sep dingte in: Biakbuk khuampeekte, a zawlte, a khuampite, khuam bullente tawh, a kimkota om buktual a khuampite a bullente tawh, khetphimte, a khaute, a nazatte khempeuh le a nengnengte hi a, amaute’ puak dingin a kiseh nate a minin na lo ding hi. Hih pen siampi Aaron’ tapa Ithamar’ khutnuai-ah Merari mite in kikhopna buk sungah a sep ding teng uh ahi hi,” a ci hi. Moses’ tungtawnin Topa’ thupiakna bangin a sep ding a puak ding ciat uh kiseh a, Topa’ thupiak bangin Moses in amaute a sim hi. Topa in Moses kiangah, “Amaute in miphakte, ninneite le misi tawh kisukha-in a ninte khempeuh giahphual pua-ah a omsak nadingun Israel mite thu pia in. A laizangah keima omna ahi amau’ giahphual a nitsak loh nadingun hih bangin a nin numei le pasal paikhiasakin, giahphual pua-ah na omsak ding uh hi,” a ci hi. Tua mah bangin Israel mite in hih uh a, giahphual pua-ah amaute hawlkhia uh hi. Topa in Moses tungah a gen bangin Israel mite in hih uh hi. Topa in Moses kiangah, “Israel mite tungah hih bangin gen in: Topa’ tungah mite a khialh theihna ahi khialhna khat peuhpeuh, numei ahi a, pasal ahi zongin gamta-in a mawh leh, a gamtatnasa a khialhna pulak ding hi. Amah in a tatkhialhna-ah a kicingin dinkik ding a, tua tungah nga-ah khat behlapin, a khialhna mi tungah pia ding hi. Ahih hangin a khialhna mi in tua khialhna hanga ditkikna a sang ding tanau a neih kei leh, a khial mi a dingin kilemna a bawlsakna ahi kilemna tuutal banah, khialhna hanga tua ditkikna pen siampipa a dingin Topa’ tungah tung ding hi. Amaute in siampipa tungah a paipih uh biakna peuhmah, Israel mite’ na a siangthote khempeuh, ama a’ hi ding hi. Mi khempeuh’ na a siangthote zong ama a’ hi ding a, mi khatpeuh in siampipa tungah a piak peuhmah ama a’ hi ding hi,” a ci hi. Topa in Moses kiangah, “Israel mite kiangah hih bangin gen in: Mi khatpeuh’ zi vakvai-in a pasal a palhngulh a, pasal khat in tua nu luppihin, a pasal in tua thu a theih kei a, tua nu kininsak napi-in kuamah in phawk loin, a khialh laitakin tua nu kiman lo ahih manin a langah a pang ding teci a om loh hangin, a pasal in upmawhna lungsim nei-in, a kininsak tawm a zi a upmawh leh; tua ahih kei leh zong, a numei kininsak lo napi-in, a pasal in upmawhna lungsim nei-in, a zi a upmawh le; tua pa in siampipa kiangah a zi paipihin, tuanu a dingin a kisam biakna, mangbuhham lawh khat paipih ding hi. A tungah sathau sung loin, paknamtui zong koih lo ding hi; bang hang hiam cih leh tua pen upmawhna hanga an tawh biakna, mawhna phawkkik nadinga an tawh biakna ahi hi. “Siampipa in tua nu va paipihin, Topa’ mai-ah koih ding hi. Siampipa in lei beel khatin tui siangtho la ding a, biakbuk sual tunga om leivui tawmkhat la-in tua tui sungah khah ding hi. Siampipa in Topa’ mai-ah tua numei koih ding a, numei’ sam phelin, upmawhna hanga an tawh biakna ahi phawkkikna an tawh biakna tua numei tawisak ding hi. Siampipa in ama khut sungah tuisia tawi ding hi. Tua ciangin siampipa in amah kiciamsakin, ‘Na pasal’ ukna nuai-ah na om sungin, kuamah in nang hong luppih loin, nitna lamah a kihel lo na hih leh, hih tuisia panin suakta in. Ahih hangin na pasal’ ukna nuai-ah om napi-in nangmah vakvai a, nang le nang kininsakin, na pasal ahi lo midang khat in nang hong luppih leh, (siampipa in tua numei kiciamsak ding a, tua nu kiangah) Topa in na pheipi teemsakin na pumpi a pawmsak ciangin, na mite lakah hamsia le kiciamna-a zat dingin Topa in nang hong bawlin, hih tuisia in na gil sung zui hen la, na pumpi pawmsakin na pheipi teemsak hen,’ ci ding hi. Tua ciangin numei in, ‘Amen, Amen,’ ci ding hi. “Tua ciangin siampipa in laibu khat sungah hih hamsiate gelhin tuisia sungah silkhia ding hi. Tua numei a nasak velval thei ding tuisia a dawnsak siampipa in numei’ khutsung panin upmawhna hanga an tawh biakna lakhia ding a, Topa’ mai-ah tua an vei-in biakna tau-ah paipih ding hi. Siampipa in phawk nadingin an tawh biakna khut dim khat la-in biakna tau tungah hal ding a, tua khit ciangin a tui pen a numei dawnsak ding hi. Amah in a tui a dawnsak khit ciangin, tua nu amahmah kininsakin a pasal tungah thuman loin gamta ahihleh, tua tuisia pen ama sungah tumin nasak velval ding a, a pumpi pawmin a pheipi teem ding a, tua numei pen mite lakah hamsiatna-in kizang ding hi. Ahih hangin amahmah a kininsak hi loin a siang ahihleh, tua nu suakta-in ta nei thei ding hi. “Zi khat, a pasal’ ukna nuai-ah om napi-in vakvai-in amahmah a kinitsak ciang, ahih kei leh pasal khat in upmawhna lungsim nei-in a zi a upmawh ciangin, upmawhna thute-ah zat ding ngeina tu-a bang ahi hi. Siampipa in Topa’ mai-ah numei koih ding a, hih ngeina khempeuh numei’ tungah zang ding hi. Hih thu-ah pasal in mawhsakna thuak lo ding a, ahih hangin numei a mawh leh ama mawhna thuak ding hi,” a ci hi. Topa in Moses kiangah, “Israel mite tungah hih bangin gen in: Numei ahi a, pasal ahi zongin, Topa a dingin amahmah a kituam koih nadingin Nazir kiciamna ahi, a tuam mahmah kiciamna a bawl ciangin, leenggahzu le khamtheihzu ne lo ding hi. Leenggahzu le khamtheihzu pan a kibawl tuithuk dawn lo ding a, leenggahtui khat peuhpeuh dawn loin, leenggah a hing hitaleh a keu hitaleh ne lo ding hi. Amah a kituam koih hun sungteng leenggui panin a piang bangmah ne lo ding a, a tang ahi a, a hawng nangawn ahi zongin ne lo ding hi. “Tuam om dingin a kiciam hun sungteng ama lu tungah mulkiatna kitah lo ding hi. Topa a dingin a tuam om hun a cin mateng amah a siangtho hi ding a, a sam a sau-in hawi ding hi. Topa a dingin a tuam om hun sungteng mi siluang kiangah pai lo ding hi. A nu, a pa, a sanggamnu, a sanggampa ahi zongin a sih leh tuate khat peuhpeuh hangin amah kininsak lo ding hi; bang hang hiam cih leh Pasian a dingin a tuam omna ama lu tungah om hi. A tuam om hun sungteng Topa a dingin a siangtho ahi hi. “Mi khatpeuh ama gei-ah thakhatin si-in, amah in a ki-ap ama sam a nitsak leh, ni sagih sung ngakin tua ciangin kisiansuahin a sam met ding hi. A ni giat ni-in amah in siampipa kiang kikhopna bukkongah vakhu nih ahih kei leh kawl vakhuno nih paipih ding a, siampipa in khialhna hanga biak nadingin khat pia-in, meihal biak nadingin a khat pia ding a, ama a dingin kilemna bawlsak ding hi; bang hang hiam cih leh misi luang hangin amah khial hi. Amah in tua ni mahin a lutang apphakik ding a, a tuam om ding hun sungteng Topa a dingin amah tuam omin, mawhna hanga biak nadingin kum khat a pha tuuno a pa khat paipih ding hi. Ahih hangin ama tuam omna kininsak khin ahih manin a masa hun pen a mawkna hi ding hi. “A tuam om hun a cin ciangin zuih ding Nazir ngeinate: Kikhopna buk kongah amah kipaipih ding a, amah in Topa’ tungah letsong ahi meihal biak nadingin kum khat a pha a sitbaang lo tuuno a pa khat, khialhna hanga biak nadingin kum khat a pha a sitbaang lo tuuno a nu khat, le thunuama biak nadingin a sitbaang lo tuutal khat, le silngo sawh loh anlum lawh khat, sathau tawh a kibawl annel mohte, le silngo sawh loh, sathau tawh a kizut mohphengte, le an tawh biaknate le leenggahzu tawh biaknate paipih ding hi. “Siampipa in Topa’ mai-ah tuate paipihin a khialhna hanga biakna le a meihal biakna pia ding a, a tuutal pen Topa’ tungah thunuama biakna-in silngo sawh loh anlum lawh tawh piakhawm ding a, an tawh a biakna le leenggahzu tawh biakna zong siampipa in pia ding hi. Tua Nazir mipa in a ki-ap a sam, kikhopna bukkongah met ding a, a ki-ap ama lutang panin a samte la-in thunuama biakpiakna nuai-ah a om mei sungah hal ding hi. “Siampipa in a kihuansa tuutal liang, le lawh sung panin silngo sawh loh moh khat, le silngo sawh loh mohpheng khat la-in, a ki-ap hun sunga a sam a met khit ciangin tua Nazir mipa’ khutah tuate koih ding a, Topa’ mai-ah vei-a biak nadingin siampipa in tuate vei ding hi. Tuate pen a kivei a sa-iik le a kipia a phei tawh siampipa a dingin a siangtho ama tanh ahi hi. Tua khit ciangin Nazir mipa in leenggahzu ne thei ding hi. “Hih pen kiciamna a la Nazir mipa a dingin ngeina ahi hi. Ama piakzawh zahzah a piak banah, Topa’ tungah ama piakna pen Nazir hihna tawh a kiciamna bang hi ding a, ama kiciamna mah bangin amah in Nazir hihna tawh tuam om nading ngeina zui-in a gamta ding hi,” a ci hi. Topa in Moses kiangah, “Aaron le a tapate tungah hih bangin gen in: Note in hih bangin Israel mite thupha na pia ding uh hi. Amaute tungah hih bangin na ci ding uh hi: Topa in note thupha hong pia-in hong kem tahen. Topa in note tungah a maitang hong taangsakin note hong ompih tahen. Topa in note tungah a maipha hong pia hen la, note tungah nopsakna hong pia ta hen,’ ci-in thupha pia uh hen. “Amaute in tua bangin Israel mite tungah keima min lo ding uh a, keimah in amaute thupha ka pia ding hi,” a ci hi. Moses in biakbuk dingsakin, tua biakbuk le a nazatte khempeuh sathau nuhin ap a, biakna tau le a nazatte khempeuh sathau nuhin a ap a man ni-in, Israel makaite, a beh ukpite, minam makaite ahi a kisim mite a ukte in, buk a nei leeng guk le bawngtal sawm le nih Topa’ mai-ah paipih uh a, leeng khatah makai nih, mi khatah bawngtal khat ciatin sehin a biakna uh pia uh hi. Amaute in biakbuk mai-ah tuate pia uh hi. Tua ciangin Topa in Moses kiangah, “Kikhopna buk nasepna-ah zat dingin amau’ tung panin tuate sang inla, a nasep ciat uh tawh kizui-in Levi mite pia in,” a ci hi. Tua ahih ciangin Moses in leengte le bawngtalte saangin Levi mite a pia hi. Amau’ nasep tawh kizui-in Gershon mite tungah leeng nih le bawngtal li pia hi. Siampi Aaron’ tapa Ithamar’ ukna nuai-ah na a sem Merari mite tungah amau’ nasep tawh kizui-in leeng li le bawngtal giat pia hi. Ahih hangin Kohath mite tungah bangmah pia lo hi. Bang hang hiam cih leh liangko-ah a puak ding uh a siangtho nate kep ding amaute tavuan kipia hi. Biakna tau sathau a kinuh ni-in a ap nadingin makaite in a biakna uh biakna tau mai-ah pia uh hi. Topa in Moses kiangah, “Biakna tau ap nadingin makai khat in ni khat ciat a biakna uh pia ding uh hi,” a ci hi. A ni masa ni-a biakna a piapa pen Judah minam, Amminadab’ tapa Nahshon ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat, le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Amminadab’ tapa Nahshon’ piak ahi hi. A ni nih ni-in Issakhar mite a makai, Zuar’ tapa Nethanel in biakna pia hi. A biak nadingin amah in biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Zuar’ tapa Nethanel’ piak ahi hi. A ni thum ni-in Zebulun mite a makai, Helon’ tapa Eliab ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Helon’ tapa Eliab’ piak ahi hi. A ni li ni-in Reuben mite a makai, Shedeur’ tapa Elizur ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Shedeur’ tapa Elizur’ piak ahi hi. A ni nga ni-in Simeon mite a makai, Zurishaddai’ tapa Shelumiel ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Zurishaddai’ tapa Shelumiel’ piak ahi hi. A ni guk ni-in Gad mite a makai, Deuel’ tapa Eliasaf ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Deuel’ tapa Eliasaf’ piak ahi hi. A ni sagih ni-in Efraim mite a makai, Ammihud’ tapa Elishama ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Ammihud’ tapa Elishama’ piak ahi hi. A ni giat ni-in Manasseh mite a makai, Pedahzur’ tapa Gamaliel ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Pedahzur’ tapa Gamaliel’ piak ahi hi. A ni kua ni-in Benjamin mite a makai, Gideoni’ tapa Abidan ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Gideoni’ tapa Abidan’ piak ahi hi. A ni sawm ni-in Dan mite a makai, Ammishaddai’ tapa Ahiezer ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Ammishaddai’ tapa Ahiezer’ piak ahi hi. A ni sawm le khat ni-in Asher mite a makai, Okran’ tapa Pagiel ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, kum khat a pha tuuno a pa khat; khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, le kum khat a pha tuuno a pa nga ahi hi. Hihte pen Okran’ tapa Pagiel’ piak ahi hi. A ni sawm le nih ni-in Naftali mite a makai, Enan’ tapa Ahira ahi hi. Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat, khialhna hanga biak nadingin keel a pa khat; le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Enan’ tapa Ahira’ piak ahi hi. Biakna tau sathau a kinuh ni-in a piakte: Ngun kuangdai sawm le nih, ngun kuang sawm le nih, ngun kuangdai khat ciangin shekel za le sawmthum gikin ngun kuang khat ciangin shekel sawmsagih gik a, ngun kuangte khempeuh pen biakinn shekel tawh kizui-in shekel tulnih le zali gik hi. Paknamtui tawh a kidim kham pakan sawm le nihte, biakinn shekel tawh kizui-in khat ciangin shekel sawm gik a, kham pakan khempeuh pen shekel za le sawmnih gik hi. Meihal biak nadingin ganhing khempeuh pen bawngtal sawm le nih, kum khat a pha tuuno a pa sawm le nih, an-a biaknate tawh; le khialhna hanga biakna-in keel a pa sawm le nih, le thunuama biakpiakna-in ganhing khempeuh bawngtal sawmnih le li, tuutal sawmguk, keel a pa sawmguk, kum khat a pha tuuno a pa sawmguk ahi hi. Hihte pen biakna tau sathau a kinuh khit ciangin apna biakna ahi hi. Topa tawh a kiho dingin kikhopna buk sungah Moses a pai ciangin, kherub nihte’ kikal, thuciamna singkuang tungah a om hehpihna tokhom tung san teng panin amah a hopih awging khat om a, tua awging in Moses a hopih hi. Tu-in Topa in Moses kiangah, “Aaron tungah hih bangin gen in. Meivakte na koih ciangin, meivak sagihte in meivak khuam mai teng a taan dingin koih in, ci-in gen in,” a ci hi. Aaron in tua bangmahin hih a, Topa in Moses a thupiak bangin, meivak khuam mai teng a taan dingin meivakte a koih hi. Meivakkhuam a kibawlna zia in: Kham a kiseek hi a, a bul pan a kipan a paakte dongin a kiseek ahi hi. Topa in Moses tungah a lahsa lim tawh kizui-in amah in meivakkhuam a bawl hi. Topa in Moses kiangah, “Israel mite lak panin Levi mi teng lakhia inla, amaute siangsak in. Amaute siansak nadingin hih bangin na hih ding hi: Siansuahna tui amaute tungah theh inla, a pumpi khempeuh uh mulkiatna tawh amau kiatsak inla, a puante uh sawpin amau mah na kisiang tawmsak ding hi. Tua ciangin bawngtalno khat le sathau le annel a kibawl an tawh biakna amaute na lasak ding a, nangmah in khialhna hanga biak nadingin bawngtalno adang khat na la ding hi. Kikhopna buk mai-ah Levi mite paipihin, Israel mihon buppi na khawm ding hi. Topa’ mai-ah Levi mite na paipih ciangin, Israel mite in Levi mite tungah a khut uh nga ding uh a, amaute in Topa’ na a sep theih nadingun Aaron in Israel mite sung panin Levi mite Topa’ mai-ah vei-a biakna-in a pia ding hi. Tua ciangin Levi mite in bawngtalte’ lu tungah a khut uh nga ding uh hi. Levi mite a’ ding kilemna bawlsak nadingin khialhna hanga biakna-in khat, meihal biakna-in a khat, Topa’ tungah na pia ding hi. “Aaron le a tapate’ mai-ah Levi mite na koih ding a, Topa’ tungah amaute vei-a biakna-in na pia ding hi. Tua bangin Israel mite lak panin Levi mite na khenkhia ding a, Levi mite keima a’ hi ding uh hi. Amaute siangthosakin vei-a biakna-in na piak khit ciangin kikhopna bukah na a sem dingin Levi mite pai ding uh hi. Bang hang hiam cih leh Israel mite’ lak panin kei’ tungah amaute hong kipia khin hi. Israel mite’ tacil khempeuh tang dingin keima a dingin amaute ka la khin hi. Bang hang hiam cih leh Israel mite’ lakah tacil khempeuh mihing hitaleh ganhing hitaleh keima-a’ ahi hi. Egypt gam sungah tacil khempeuh ka thah ni-in keima a dingin amaute ka tuam koih a, Israel mite’ lak panin tacil khempeuh tang dingin Levi mite ka la khin hi. Kikhopna bukah Israel mite a dingin na a sem ding le, biakbuk mai-ah Israel mite a paikhak ciangin Israel mite’ lakah gimna a tun loh nadingin Israel mite a dingin kilemna a bawl dingin Israel mite’ lak panin Aaron le a tapate’ tungah letsongin Levi mite ka pia khin hi,” a ci hi. Tua bangin Moses le Aaron le Israel mihonpite khempeuh in Levi mite’ tungah a hih uh hi. Topa in Levi mite tawh kisai-in Moses’ tungah a thupiak khempeuh tawh kizui-in Israel mite in amaute tungah a hih uh hi. Israel mite, khialhna panin amaute kisiangthosak tawm uh a, a puante uh sawp uh hi. Aaron in vei-a biakna-in Topa’ mai-ah amaute pia a, amaute siansak nadingin Aaron in amau a’ ding kilemna a bawlsak hi. Tua khit ciangin Aaron le a tapate’ omna kikhopna buk sungah na a sem dingin Levi mite a pai uh hi. Topa in Levi mite tawh kisai-in Moses a thupiak bangin amaute in Levi mite’ tungah a hih uh hi. Topa in Moses kiangah, “Hih pen Levi mite tawh a kisai thu ahi hi. Kum sawmnih le kum nga pan a tungsiah a phate, kikhopna buk nasepna sungah na a sem dingin hong pai ding uh hi. Kum sawmnga a phak uh a kipan nasepna panin amau kihemkhia-in na sem nawn lo ding uh hi. Ahih hangin kikhopna buk sungah a sanggamte uh huh ding a, amaute in a na taktak sem lo ding uh hi. Tua bangin Levi mite’ nasep ding na seh ding hi,” a ci hi. Amaute Egypt gam panin a paikhiat zawh uh a kum nihna a kha masa sungin Sinai sehnel gamah Topa in Moses kiangah, “A kiseh hunin Paisan Pawi, Israel mite khamsak in. A kiseh hun, tu kha ni sawm le li ni nitakin a thukhamte le a ngeina kip omte bangin na kham ding uh hi,” a ci hi. Tua ahih ciangin amaute in Paisan Pawi a kham nadingun Moses in Israel mite tungah a gen hi. Amaute in a kha masa, a ni sawm le li ni nitakin Sinai sehnel gamah Paisan Pawi kham uh a, Topa in Moses a thupiak bangin Israel mite a gamta uh hi. Misi luang a lawnna uh hangin a nin mi pawlkhat om uh a, tua ni-in amaute in Paisan Pawi kham thei lo uh ahih manin Moses le Aaron’ mai-ah pai uh hi. Tua mite in, “Misi luang lawnna hangin ka nin uh hi. Ahi ta zongin bang hangin a kiseh hunin Israel midangte tawh Topa biakna hong kipiasak khawm lo ahi hiam?” a ci uh hi. Moses in amaute kiangah, “Note’ thu tawh kisai, Topa’ thupiak ka zak dong na ngak dih un,” a ci hi. Topa in Moses kiangah, “Israel mite tungah hih bangin gen in: Note’ lakah mi khatpeuh ahi a, na suanlekhakte uh khatpeuh in ahi zongin misi luang lawnna hangin a nin ahi a, khualzinin gamlapi-ah a om ahi zongin, Topa a dingin Paisan Pawi kham veve ding hi. A kha nihna a ni sawm le li ni nitakin amaute in kham ding uh a, amaute in silngo sawh loh anlum le a kha meh tawh ne ding uh hi. Amaute in a zingsang dong bangmah siit lo ding uh a, a guh khat zong sutan lo ding uh hi. Paisan Pawi ngeinate tawh kizui-in amaute in a kham ding uh hi. Ahih hangin a siang mi khat khualzin lo napi-in Paisan Pawi a kham kei leh, amah in a kiseh hunin Topa biakna pia lo ahih manin a mite lak panin tua mipa kihawlkhia ding hi. Tua mi in ama khialhna mah thuak ding hi. “Note’ lakah khualmi khat hong peemin, Topa a dingin Paisan Pawi a kham le Paisan Pawi thukhamte le a ngeina kipte bangin hih ding hi. Peemta le tualsung mite a dingin ngeina a kibang na neikhawm ding uh hi,” a ci hi. Biakbuk a kidinsak ni-in meii in thuciamna biakbuk tuam a, nitak a kipan a zingsang dong meikuang tawh kibangin biakbuk tung sanah a om hi. Tua bangin omden hi. Sunin meii in tuam a, zanin mei tawh a kibang khat in tuam hi. Puanbuk tung san panin meii a kilaktoh khit ciangin Israel mite ding khia uh a, meii a kiphuhna munah Israel mite in giahphual a sat uh hi. Topa in thu a piak ciangin Israel mite ding khia uh a, Topa in thu a piak ciangin amaute in giahphual a sat uh hi. Biakbuk tung sanah meii a khawl laiteng, amaute zong giahphual ah om uh hi. Biakbuk tungah ni tampi sung meii a om khinta zongin Israel mite in Topa’ thupiakna zui-in ding khia tuan lo uh hi. Biakbuk tungah ni tawmno sung bek meii om thei zel hi. Tua bang ciangin zong Topa’ thupiak bangin giahphual ah amaute tawmno sung mah omin, Topa’ thupiakna bangin amaute a ding khia uh hi. Khat veivei nitak a kipan zingsang dong tua meii om hi. Zingsangin meii a kilaktoh ciangin amaute ding khia uh a, tua ahih kei leh, sun khat le zan khat a omlai le zong, meii a kilaktoh hun hunin amaute ding khia uh hi. Ni nih ahi a, kha khat ahi a, a hun sauzaw ahi zongin biakbuk tung sanah meii a khawl laiteng giahphual ah Israel mite omin ding khia lo uh a, ahih hangin a kilaktoh peuh ciangin amaute ding khia uh hi. Topa’ thupiakna tawh amaute in giahphual sat uh a, Topa’ thupiakna mah tawh amaute ding khia uh hi. Topa in Moses a thupiak bangin amaute in Topa’ thu a mang uh hi. Topa in Moses kiangah, “Ngun peengkul nih bawl in. Tuate na bawl ciangin na seek ding a, mihonte khop nading le giahphual nusiat nadingin na zang ding hi. A nihin a kitum ciangin kikhopna bukkong nangma kiangah mihon khempeuh hong kikhawm ding uh hi. Ahih hangin khat bek a kitum leh Israel minamte’ lutang ahi makaite nangma kiangah hong kikhawm ding uh hi. Dinkhiat nading zaksakna na tum ciangin nisuahna lampang a giahphual-ate ding khia masa ding uh hi. A nih veina na tum ciangin leitaw lampang a giahphual-ate ding khia ding hi. Amaute a dinkhiat ding peuhmah ciangun zaksakna kitum ding hi. Mihonte a kikaihkhop ding ciangin na tum ding a, ahih hangin a gindan na kibangsak kei ding hi. Aaron’ tapa siampite in peengkulte tum ding uh hi. Peengkul zatna pen na khang tawntungun note a dingin a kip den ngeina khat hi ding hi. Na gam sung uhah, no hong nengniam na galte uh tawh na kido ding uh ciangin, Topa na Pasian uh mai-ah note hong kiphawk nadingin peengkulte tawh pataukohna aw na gingsak ding uh a, na langte panun note hong kihon ding hi. Na lungdam hun uh, a kiseh na pawi hunte uh, le kha kipat hunte-in, note in na meihal biaknate uh le thunuama na biakpiaknate uhah zong peengkulte na tum ding uh hi. Tuate pen na Pasian uh mai-ah phawkna-in kimang ding hi; kei pen Topa na Pasian uh ka hi hi,” a ci hi. A kum nihna, a kha nihna, a ni sawmnih ni-in thuciamna biakbuk tung san panin meii kilakhia to a, Sinai sehnel gam panin Israel mite phual khat pan phual khatah ding khia uh a, Paran gamlakah meii a khawl hi. Moses’ tungtawnin Topa’ thupiakna tawh khualzin cilna kipan uh hi. Judah mite’ giahphual dialkhai a neite a pawlpawlin ding khia masa uh hi. Tua mihonte, Amminadab’ tapa Nahshon in uk hi. Issakhar minam honte, Zuar’ tapa Nethanel in uk hi. Zebulun minam honte, Helon’ tapa Eliab in uk hi. Biakbuk a kiphel khit ciangin, biakbuk a pua Gershon mite le Merari mite ding khia uh hi. A zomah Reuben’ giahphual dialkhai a neite a pawlpawlin ding khia uh hi. Tua mihonte, Shedeur’ tapa Elizur in uk hi. Simeon minam honpite, Zurishaddai’ tapa Shelumiel in uk hi. Gad minam honpite, Deuel’ tapa Eliasaf in uk hi. Tua ciangin a siangtho nate pua-in Kohath mite ding khia uh a, amaute a tun ma-in biakbuk na kidingsak khin hi. A zomah Efraim mite’ giahphual dialkhai a neite a pawlpawlin ding khia uh hi. Tua mihonte, Ammihud’ tapa Elishama in uk hi. Manasseh minam honte, Pedahzur’ tapa Gamaliel in uk hi. Benjamin minam honte, Gideoni tapa Abidan in uk hi. Tua ciangin adang khempeuh’ nungdalin Dan mite’ giahphual dialkhai a neite a pawlpawlin ding khia uh hi. Tua mihonte, Ammishaddai’ tapa Ahiezer in uk hi. Asher minam honte, Okran’ tapa Pagiel in uk hi. Naftali minam honte, Enan’ tapa Ahira in uk hi. Hih pen Israel mite a dinkhiat uh ciangin amau’ mihonte tawh kizui-in a paina zia uh ahi hi. Moses in ama zi’ sanggampa ahi, Midian mi Reuel’ tapa Hobab kiangah, “ Topa in, ‘Note’ tungah kong pia ding hi,’ a cihna mun zuanin a ding khia ding ka hi uh hi. Ko hong zui in; nang kong limbawl ding uh hi. Bang hang hiam cih leh Topa in Israel-te hong limbawl ding hong ciam hi,” a ci hi. Ahih hangin amah in, “Kong zui kei ding hi. Ka leitang le ka behte kiangah ka pai ding hi,” a ci hi. Moses in, “Kote hong nusia kei in, kong thum hi; nangmah in gamlakah giahphual sat nading zia thei na hih manin, kote a dingin lamhilh nong hi ding hi. Kote hong zui lecin, Topa in kote hong limbawl ding bangbangin nang zong kong limbawl ding uh hi,” a ci hi. Tua ciangin Topa’ mual panin amaute dingkhia-in ni thum lam a pai uh hi. A tawlngak nading mun uh a zonsak dingin Topa’ Thuciamna Singkuang, amau’ mai ni thum lam na pai khol hi. Giahphual panin a dinkhiat peuhmah uh ciangin sunin amaute’ tungah Topa’ meii a om hi. Singkuang a dinkhiat peuhmah ciangin Moses in, “ Topa aw, dingin na galte kithehthangsak inla, nang hong mudahte na mai-ah taisak in,” a ci hi. A khawl ciangin, “ Topa aw, Israel tul sawm tampite’ kiangah hong ciahkik in,” a ci hi. Mihonte in amau’ tuahsiatna hangin Topa’ zakin a phun uh hi. Topa in tua thu a zak ciangin heh mahmah a, amaute’ lakah Topa’ mei kuangin, giahphual nawl kimkhat kangtum hi. Tua ciangin Moses’ zak dingin mite kiko uh hi. Moses in Topa’ tungah thu ngen a, mei a mit hi. Tua ahih manin tua mun pen Taberah kici hi. Bang hang hiam cih leh amaute’ lakah Topa’ mei a kuang hi. Tu-in amaute’ lakah a om gamdang mite in anlim a lunggulh mahmah uh hi. Israel mite zong kap kik uh a, “Sa nek ding nei hi leeng maw! Egypt-ah man pia loin i nek ngasate, tangmaite, dawnpawlte, lo-uih neute, lo-uih sante, le lo-uih kangte i phawkphawk hi. Ahih hangin tu-in i tha bei ta a, hih manna simloh bangmah dang om peuhmah lo hi,” a ci uh hi. Manna pen nannan tang tawh kibang a, a mel pen bedolak singnai tawh kibang hi. Mite pai kawikawi-in khawm uh a, an gawina tawh gawi-in, tua ahih kei leh sum sungah su-in, beelin huan uh a, mohin a bawl uh hi. A limna pen sathau tawh a kibawl moh ki-em tawh kibang hi. Zanin giahphual tungah daitui a kiat ciangin manna tawh kia khawm hi. Mite a innkuankuanun a milipin a puanbuk kongah a kahna uh Moses in a za hi. Topa nak hehlua mahmah ahih manin Moses lungkim lo hi. Moses in Topa’ kiangah, “Bang hangin na nasempa hong hici bawlsiat na hi hiam? Bang hangin na maipha hong musak loin, hih mi khempeuhte’ tavuan kei’ tungah hong suan na hi hiam? Keimah in hih mite khempeuh paii ka hi hiam? Nangmah in kei’ kiangah, ‘Nau cingnu in nawine naungek a puak bangin, nangmah in amau’ pate piak dingin ka ciam leitangah amaute ang puakin paipih in,’ nong cih theih nadingin kei’ sunga piang ahi uh hiam? Hih mite khempeuh piak ding koi-ah sa ngah ding ka hi hiam? Bang hang hiam cih leh ka mai-ah amaute kapin, ‘Ka nek ding uh sa hong pia in,’ hong ci uh hi. Kei guak in hih mite khempeuh ka sizo kei a, kei a dingin tavuan lianlua hi. Hih bangin kei hong bawl ding na hih leh, ka gentheihna ka kimuh loh nadingin nong hehpih zawh leh, thakhatin hong thatzaw in,” a ci hi. Topa in Moses kiangah, “Mite’ upa le ulian hi ci-in na theih, Israel upate’ sung panin mi sawmsagih hong khopsakin, kikhopna bukah amaute paipih inla, tua lai-ah nang tawh dingkhawmsak in. Keimah hong paisukin tua munah nang tawh i kiho ding a, keimah in nang’ sunga om kha pawlkhat la-in amaute’ sungah ka guang ding hi. Nang guak in na puak loh nadingin amaute in mite’ tavuan hong puakpih ding uh hi. Mite tungah, ‘Zing cianga dingin note ki-ap pha un, sa na ne ding uh hi; bang hang hiam cih leh Topa’ zakin na kap uh a, “Sa nek ding kua in hong pia ding ahi hiam? Bang hang hiam cih leh Egypt gamah nuam i sa hi,” na ci uh hi. Tua ahih ciangin note’ tungah Topa in sa hong pia ding a, note in sa na ne ding uh hi. Note in ni khat sung, ahih kei leh ni nih sung, ahih kei leh ni nga sung, ahih kei leh ni sawm sung, ahih kei leh ni sawmnih sung bek ne loin, na ikkhiat dong uh le na kih dong matengun kha khat sung tawntung sa na ne ding uh hi. Bang hang hiam cih leh note’ lakah a om Topa nialin a mai-ah na kap uh a, “Bang hangin Egypt panin paikhia ihi hiam?” na ci uh hi,’ ci in,” a ci hi. Ahih hangin Moses in, “Kei tawh a kisim khawm mi tul zaguk tak om hi. Nangmah in, ‘Kha khat sung tawntung a nek dingun amaute sa pia ning!’ na ci hi. Amaute’ khamzah dingin tuuhonte le bawnghonte amau a dingin kigozo ding ahi hiam? Tua ahih kei leh tuipi ngasate khempeuh amau’ khamzah ding kimanzo ding ahi hiam?” a ci hi. Topa in Moses kiangah, “ Topa’ hih theih ding zah kiciangtan sa na hi hiam? Ka thugen a manin hong tun leh hong tun loh tu-in na mu ding hi,” a ci hi. Tua ahih ciangin Moses paikhia-in mite’ tungah Topa’ thugente a gensawn hi. Amah in mite a makai mi sawmsagih kaikhawmin, Puanbuk kimkotah amaute omsak hi. Tua ciangin meii sungah Topa hong paisukin amah hopih a, ama sunga om kha pawlkhat la-in upa sawmsagihte’ sungah a guang hi. Amaute’ sungah tua kha a om ciangin, amaute in kamsangte bangin thu genin a kiko uh hi. Ahih hangin amaute in tua khit zawh hih nawn lo uh hi. Giahphual ah mi nih om uh a, khat Eldad kici-in, a khat Medad kici a, amaute’ sungah tua kha a lut hi. Amaute pen a kiciamtehte lakah a kihelte hi uh a, ahih hangin Puanbukah pai loin, giahphual ah kamsangte bangin thu genin a kiko uh hi. Tangval khat va tai-in Moses kiangah, “Eldad le Medad-te in giahphual ah thu a gen uh hi,” va ci hi. Ama teel mite lakah khat ahi, Moses’ nasem, Nun’ tapa Joshua in, “Ka topa Moses aw, amaute kham in,” a ci hi. Ahih hangin Moses in ama kiangah, “Keima tangin hong hazatsak na hi hiam? Topa’ mi khempeuh kamsang hi hen la, Topa in amau’ sungah ama Kha guan leh ka cih laitak hi,” a ci hi. Tua ciangin Moses le Israel upate giahphual ah a ciahkik uh hi. Topa’ kiang panin huih nungin, tuipi panin vamimte hong puak a, giahphual kiang hih lampang ni khat paina ciang, hua lampang ni khat paina ciang mah giahphual kimkotah kiasak a, lei maitang tungah pi thum bang a sah hi. Tua sun tawntung le a zan tawntung le a zing ciang tawntung mite dingin vamimte a khawm uh hi. Tawm a khawm pen mipa in beem sawm dim khawm a, amaute in amau a dingin giahphual kimkotah tuate a pho uh hi. Sa a kigaih ma, amau’ ha kawmah sa a baang laipi mahin, mite’ tungah Topa hong heh mahmah a, Topa in gimna lianpi khat tawh mite a vatgawp hi. Tua ahih ciangin tua mun pen Kibrothhattaavah kici hi. Bang hang hiam cih leh amaute in sa a lunggulh mite tua lai munah a vui uh hi. Kibrothhattaavah panin Hazeroth munah mite pai uh a, Hazeroth-ah amaute a taam uh hi. Moses in Kush numei khat tenpih ahih manin, ama tenpih Kush numei’ hangin Miriam le Aaron in amah gensia-in, “ Topa in Moses’ tung bek tawnin thu gen ahi hiam? Eite’ tung zong tawnin hong gen hi lo ahi hiam?” a ci uh hi. Topa in tua thu a za hi. Moses a lungnem mahmah hi a, leitung a om mi khempeuh sangin a lungnemzaw ahi hi. Topa in thakhatthu-in Moses le Aaron le Miriam kiangah, “Kikhopna bukah no mihing thumte hong pai un,” a ci hi. Amau thumte a pai uh hi. Meii khuam sungah Topa hong kumsukin, kikhopna bukkongah ding a, Aaron le Miriam a sam hi. Amau tegel mailam nehin hong pai uh hi. Topa in, “Ka thu za un: Note’ lakah kamsang a om leh Topa keimah in ama tungah maangmuhna tawh ka kilak a, amah tawh mang sungah ka kiho hi. Ka nasempa Moses tawh tua bang hi lo hi; ka innsung thu khempeuh amah ki-ap hi. Amah tawh kam le kam kiho-in, a kitel lo kampaute tawh hi loin, a kitel takin thu ka gen uh a, amah in Topa’ mel a mu hi. Tua bang ahih ciangin bang hangin ka nasem Moses gensiat ding lau lo na hi uh hiam?” a ci hi. Amaute tungah Topa heh mahmah a, a hehsapi-in a paikhia hi. Puanbuk tung san panin meiipi a kilakkhiat ciangin Miriam phak a, vuk bangin a pak hi. Miriam’ lamah Aaron kihei a, tua numei a na phak hi. Aaron in Moses kiangah, “Ka topa aw, kote hai gamtatin ka khialhna hangun gim hong pia kei in. A nu’ sung panin a suahkhiat ciangin a pum phel langkhat a bei misi bangin Miriam hisak kei in,” a ci hi. Tua ciangin Moses in Topa’ tungah, “Amah damsak in, Pasian aw, kong thum hi,” ci-in a kiko hi. Ahih hangin Topa in Moses kiangah, “Tua numei’ maitang, a pa in cil phih leh tua numei ni sagih sung maizum ding hi lo ahi hiam? Giahphual pualamah ni sagih sung kikhumcipsak in; tua khit ciangin amah hong kipaipih kik thei ding hi,” a ci hi. Tua ahih ciangin giahphual pualamah ni sagih sung Miriam kikhumcip hi. Miriam a kipaipih kik mateng khualzin a zom dingin mite ding khia lo uh hi. Tua khit ciangin Hazeroth panin mite ding khia uh a, Paran gamlakah giahphual a sat uh hi. Topa in Moses kiangah, “Israel mite tungah ka piak Kanaan leitang a vaan dingin mi sawl inla, amaute lakah makai ahi, nam khat sung panin mi khat ciat sawl in,” a ci hi. Tua ahih ciangin Moses in Topa’ thupiakna tawh Paran gamlak panin Israel mite’ lutang ahi mi khempeuh a sawl hi. Hihte pen gam vaan dingin Moses in a sawl mite’ min ahi hi. Moses in Nun’ tapa Hoshea pen Joshua ci-in a min kheelsak hi. Moses in Kanaan gam a vaan dingin amaute sawlin amaute kiangah, “Negeb gam galkhatah paito-in, mualtung gamah paito unla, leitang bangci hiam, tua leitangah a teng mite thahat hiam, amaute tawm hiam, tam hiam, amau’ tenna gam pen nuntak olna gam hiam, haksatna gam hiam, amau’ tenna khuapite pen giahphual hiam, munmuanhuai hiam, a leitang a lei hoih hiam, lei sia hiam, sing om hiam, om lo hiam, va thei un. Na siam tawpun va hih unla, tua leitang a gah pawlkhat hong ciahpih un,” a ci hi. Tua hun pen leenggah a palte a min hun ahi hi. Tua ahih ciangin amaute paito-in Zin gamlak panin Hamath khua lutna gei, Rehob mun dong gam a vaan uh hi. Amaute Negeb lamah paito uh a, Hebron tung uh hi. Anak’ suanlekhakte ahi Ahiman mite, Sheshai mite, le Talmai mite, tua lai-ah na om uh hi. (Hebron pen Egypt gam a Zoan a kisat ma kum sagih lai-in kisat hi.) Amaute Eshkol kuam tung uh a, tua lai panin leenggah bawk khat bek a hiang tawh loin, mi nih in zawl khatin a zawng uh hi. Amaute in mang kawlsing le thei zong tawmkhat a pua uh hi. Tua lai panin Israel mite in leenggah bawk a lawhna hangin tua mun pen Eshkol Kuam kici hi. Ni sawmli a cin ciangin gam vaanna panin amaute hong ciahkik uh hi. Paran gamlak Kadesh mun a Moses le Aaron le Israel mihonte khempeuh kiangah amaute hong tung uh hi. Amaute le mihon khempeuh tungah thu puakkik uh a, tua leitang a gahte amaute a lak uh hi. Amaute in Moses kiangah, “Kote nong sawlna leitangah ka va tung uh hi. Tua lai-ah bawngnawi le khuaizu tui bangin luang a, hih pen tua gam a gah ahi hi. Ahi zongin tua gam a teng mite thahat uh a, a khuapite uh kulh tawh ki-umin lian mahmah hi. Tua banah Anak’ suanlekhakte tua lai-ah ka mu uh hi. Amalek mite Negeb gamah teng uh hi. Hit mite, Jebus mite, le Amor mite, mualtung gamah teng uh hi. Kanaan mite tuipi gei le Jordan dungah teng uh hi,” ci-in a gen uh hi. Ahih hangin Kaleb in Moses’ mai-ah mite gamdaisakin, “Thakhatin paito-in va luah ni; bang hang hiam cih leh eite pen a zo thei mahmah ding ihi hi,” a ci hi. Tua ciangin amah tawh a paito mite in, “Tua mite a sim dingin i pai ngam kei ding hi; bang hang hiam cih leh eite sangin amaute hatzaw uh hi,” a ci uh hi. Tua ahih ciangin amaute a tamzaw in amau’ vaansa gam thu Israel mite tungah a sia lamin hong puak uh a, “Kote, a vaan dingin ka va paina uh gam pen a tunga teng mite a puksisak thei ding gam hoih lo ahi hi. Tua lai-ah Nefilim mite (Nefilim pana hong piang Anak mite) ka mu uh hi. Kote pen kauphe bang lelin ka kingaihsun uh a, amau’ muhna-ah zong tua bangmah ka hi takpi uh hi,” a ci uh hi. Tua ciangin mihon khempeuh nakpitakin kiko uh a, tua zan sung kap uh hi. Israel mite khempeuh in Moses le Aaron phunsan uh a, mihon buppi in amaute tungah, “Egypt gamah a si khin hizaw hoh le-ung! Tua ahih kei leh zong hih gamlakah a si khin hizaw hoh le-ung! Namsau tawh a si dingin bang hangin Topa in hih gamah kote hong paipih ahi hiam? Ka zite uh le ka tate uh galte’ mat suak ding uh hi. Egypt-ah ciahkik ding ko a dingin hoihzaw ding hi lo ahi hiam?” a ci uh hi. Amaute khatlekhat kiangah, “Makai khat teelin Egypt-ah ciahkik ni,” kici uh hi. Tua ciangin Israel mihon kikhawmte khempeuh’ mai-ah Moses le Aaron boksuk uh hi. Gam vaante’ lakah a kihel Nun’ tapa Joshua le Jefunneh’ tapa Kaleb-te in a puan uh balkekin, Israel mihonte khempeuh tungah, “A vaan dingin kote ka va painasa uh leitang a hoih mahmah ahi hi. Eite’ tungah Topa a lungkim leh, bawngnawi le khuaizu tui bangin a luanna hih leitangah eite hong paipihin eite tungah tua leitang hong pia ding hi. Topa phunsan kei hamtang un. Amaute pen zialmang pak ding ihih manin tua gam mite kihta kei un. Amau’ kiang panin amau’ kidalna kilakhia khin a, eite tawh Topa hong om hi; amaute kihta kei un,” a ci uh hi. Ahih hangin mihonte khempeuh in, amaute suang tawh deng un, a ci uh hi. Tua ciangin Israel mi khempeuh’ muhin kikhopna buk tungah Topa’ minthanna vang hong kilang hi. Topa in Moses kiangah, “Hih mite in bang tanvei kei hong simmawh ding ahi uh hiam? Amaute’ lakah ka hihsa limte om napi-in, amaute in bang tanvei hong um lo lailai ding ahi uh hiam? Pulnatna tawh amaute vatgawpin ka lawnkhia kik ding a, amaute sangin a lianzaw a thahat zaw minamin nang kong bawl ding hi,” a ci hi. Ahih hangin Moses in Topa’ kiangah, “Tua bang hileh Egypt mite in hih thu za ding uh hi; bang hang hiam cih leh amaute’ lak panin na thahatna tawh hih mite na paikhiatpih hi. Amaute in hih gam a teng mite tungah gen ding uh hi. Topa aw, hih mite’ lakah nang na omna thu hih mite in za khinzo uh hi; bang hang hiam cih leh Topa aw, maitang kituahin nang hong kimu a, amaute’ tungah nangma meii a ding hi. Amaute’ mai-ah sunin meii khuam sungah, zanin mei khuam sungah nang na pai hi. Tu-in hih mite mihing khat thah bangin that lecin, nangma minthang vangliatna a zasa minamte in, ‘Amaute’ tungah piak dinga a kiciam leitangah Topa in hih mite paipih zo lo ahih manin, amah in gamlakah amaute that hi,’ ci ding uh hi. A lian nangma itna kip tawh a kizui le Egypt panin tuhun dong hih mite na maisaksa tawh kizui-in hih mite’ mawhna maisak in, kong thum hi,” a ci hi. Tua ciangin Topa in, “Nangma gen bangin ka maisak hi. Ahih hangin a taktakin, ka nuntak laiteng, Topa’ minthanna tawh leitung kidim ding ahih mah bangin, Egypt le gamlakah ka hihsa ka vangliatna le ka limte mu khin napi-in sawmvei kei hong ze-etin keima aw a ngai lo mite, amau’ pate tungah piak dinga ka kiciam leitang a mu kuamah om lo ding uh hi. Kei hong simmawh mi kuamah in tua leitang mu lo ding hi. Ahih hangin ka nasem Kaleb ahihleh, amah in lungsim tuam nei-in limtakin kei hong zui ahih manin, amah in a zuat leitangah ka tunpih ding a, ama suanlekhakte in tua leitang luah ding uh hi. Tu-in tua kuam sungah Amalek mite le Kanaan mite teng uh ahih manin, San Tuipi paina lampi tawnin zing ciangin gamlakah pai un,” a ci hi. Topa in Moses le Aaron kiangah, “Hih a gi lo mihonte in bang tanvei kei hong phunsan ding uh ahi hiam? Israel mite in kei hong phunsanna ka za khin hi. Amaute tungah hih bangin gen in: Topa in, ‘Kei a nungta ka hih mah bangin ka zakna-ah na gente uh no tungah ka hong hih ding hi. Na luanghawmte uh hih gamlakah lum ding hi. Note khempeuh, kum sawmnih pan a tungsiah, kei hong phunsante, Jefunneh’ tapa Kaleb le Nun’ tapa Joshua simloh, note tengsak dingin ka kiciamna leitangah khat beek na tung kei ding uh hi. Ahih hangin galte in man ding na cih uh na tate uh, keimah in ka tumpih ding a, note in na thusim loh uh leitang amaute in mu ding uh hi. Ahih hangin note ahihleh, na luanghawmte uh hih gamlakah lum ding hi. Na luanghawmte uh a nunung pen gamlakah a kisial mateng, gamlakah kum sawmli sung na tate uh tuucing hi ding uh a, note’ ginat lohna thuak ding uh hi. Na gam vaan sung uh ni phazah tawh kizui-in, ni sawmli, ni khat ciangin kum khat, note in na mawhna uh kum sawmli sung na thuak ding uh a, keima lungkim lohna na thei ding uh hi,’ ci hi. Topa ahi keimah in thu ka gen hi. Keimah langpangin a kikaikhawm hih a gilo mihonte khempeuh tungah hih thu ka hih taktak ding hi. Hih gamlakah amaute beimang ding uh a, amaute si ding uh hi,” a ci hi. Moses in gam vaan dingin a sawl mite hong ciahkikin a gam thu a sialamin gen uh ahih manin mihonte Topa a phunsansak, a gam thu a sialamin a gen tua mite, Topa’ mai-ah gimna in sisak hi. Ahih hangin gam vaan dingin a pai mite lak panin Nun’ tapa Joshua le Jefunneh’ tapa Kaleb-te hing lai uh hi. Moses in Israel mite khempeuh tungah hih thute gen a, nakpitakin mite thum uh hi. Amaute zingsangin tho baih uh a, gamlak mual dawnah paito-in, “Thei un, hih lai-ah i om hi. Topa’ ciamnasa munah i paito ding hi; bang hang hiam cih leh i khial khin hi,” a ci uh hi. Ahih hangin Moses in, “Bang hangin tu-in Topa’ thupiakna palsat na hi uh hiam, tangtung lo ding hi lo ahi hiam? Na galte uh mai-ah note hong kisatpuk kha ding ahih manin kuanto kei un. Bang hang hiam cih leh note’ lakah Topa om lo hi. Amalek mite le Kanaan mite na mai uhah om ahih ciangin namsau tawh note na puk ding uh hi. Topa zuihna panin nungkik na hih uh ciangin note tawh Topa hong om lo ding hi,” a ci hi. Ahih hangin Topa’ thuciamna singkuang hitaleh Moses hitaleh giahphual panin ding khia lo napi-in gamlak mual dawnah kuantoh ding amaute in ngaihsun veve uh hi. Tua ciangin mualtung gamah a teng Amalek mite le Kanaan mite hong paisuk uh a, amaute zo-in Hormah ciang dong nangawnah amaute a delh uh hi. Topa in Moses kiangah, “Israel mite tungah hih bangin gen in: Note kong piak leitangah a teng dingin na tun uh ciangin bawnghon pan hitaleh tuuhon pan hitaleh thuciamna tunsak nadingin Topa’ tungah meihal biakna ahi a, biakpiakna ahi zongin na piak ciang uh hitaleh, Topa’ tungah a gim namtui bawl nadingin utthu-a biakna hitaleh, a kiseh pawi hunte-ah biakpiakna hitaleh na piak uh ciangin, biakna a paipih mipa in annel lawh khat sathau biing khat tawh a kibawl an tawh biakna Topa’ tungah pia ding hi. Tuuno khat tawh piak khawm dingin meihal biakna ahih kei leh biakpiakna tawh, tuibuah dingin leenggahzu thawl khat na bawl ding uh hi. Tua ahih kei leh tuutal khat tawh piakkhawm dingin annel lawh nih sathau biing nih tawh a kibawl an tawh biak nading na bawl ding uh hi. Topa’ tungah a gim namtui-in tuibuah dingin leenggahzu thawl khat na pia ding uh hi. Meihal biak nading ahi a, thuciamna tunsakna-in biakpiak nading ahi a, Topa’ tungah thunuama biak nading ahi zongin bawngtal na bawl uh ciangin, mi khat in a bawngtal tawh annel lawh thum sathau biing thum tawh a kibawl an tawh biakna pia ding a, Topa’ tungah a gim namtui, mei tawh kihal biakna-in tuibuah dingin leenggahzu thawl nih na pia ding uh hi. “Bawngtal ahi a, tuutal ahi zongin, tuuno a pa ahi a, keelno a pa tawh ahi zongin piak khawm dingin tua bangin kihih ding hi. Na piak uh ganhing khempeuh a malzah tawh kizui-in tua bangin na bawlkim ding uh hi. Topa’ tungah a gim namtui, mei tawh kihal biakna a piakna uhah tualsung mi khempeuh in hih nate tu-a bangin hih ding uh hi. Note kiangah khualmi khat hong peem ahi a, na khang tawntungun note lakah mi khatpeuh hong om ahi zongin, amah in Topa’ tungah a gim namtui, mei tawh kihal biakna a piak nop leh, note’ hih mah bangin hih ding hi. Mihonpi a dingin ngeina khat om ding a, note le note’ lakah hong peem mi a dingin tawntung ngeina khat na khang tawntungun om ding hi. Topa’ mai-ah note le peemta mite na kibang ding uh hi. Note le note’ lakah hong peem mi a dingin a kibang thukhat, ngeina kip khat om ding hi,” a ci hi. Topa in Moses kiangah, “Israel mite tungah hih bangin gen in: Note kong paipihna gamah tungin tua gam a piang ante na nek uh ciangin Topa’ tungah biakna na pia ding uh hi. Na anlak uh a masa pen sung panin biakna-in moh khat na pia ding uh a, an cilna pana biakna-in na piak bangun na bawl ding uh hi. Na khang tawntungun na anlak uh a masa pen Topa’ tungah biakna-in na pia ding uh hi. “Ahih hangin note khialin, Topa in Moses tungah a gensa hih thupiaknate khempeuh, Topa in a thupiak a kipanin na khang tawntungun, Moses tungtawnin Topa in note hong thupiakte khempeuh na zuih kei uhleh, theih lohna hangin mihonte’ phawk lohin a kikhial ahihleh, mihonte khempeuh in Topa’ tungah a gim namtui, meihal biak nadingin bawngtalno khat, ngeina kip om bangin an tawh biakna le a tuibuah tawh, le khialhna hanga biakna-in keel a pa khat pia ding hi. Siampipa in Israel mihonte khempeuh a dingin kilemna bawlsak ding a, amaute kimaisak ding hi. Bang hang hiam cih leh tua pen tatkhialhna hi a, amaute in tua amau’ tatkhialhna hangin Topa’ tungah mei tawh kihal amau’ biakna le khialhna hanga amau’ biakna uh Topa’ mai-ah paipih khin uh hi. Tua tatkhialhna in amaute khempeuh huamkha ahih manin Israel mihonte khempeuh le amau’ lakah a peem khualmi zong kimaisak ding hi. “Theihlohna hangin mi khat a khialh leh, khialhna hanga biak nadingin kum khat a pha keelnu khat pia ding hi. Mi khat, theih lohna hangin a khialh ciangin, amah a siankik theih nadingin siampipa in tua a khial mipa a dingin Topa’ mai-ah kilemna bawlsak ding a, amah kimaisak ding hi. Theihlohna hangin na khat peuhpeuh a hih kha, Israel mite’ lakah a om tualsung mipa le amaute’ lakah a peem khualmipa a dingin ngeina a kibang khat na nei ding uh hi. “Ahih hangin tualsung mi hitaleh peemta hitaleh, na khat peuhpeuh a hih teitei mipa in Topa a simmawh hi a, tua mipa kithat ding hi. Amah in Topa’ thu simmawhin, a thupiakna siasak ahih manin, tua mipa kithat ding a, ama mawhna amah in thuak ding hi,” a ci hi. Israel mite gamlakah a om sungun, Sabbath ni-in sing a tom mi khat mu uh hi. Sing a tom laitak a mu mite in Aaron le Moses, le mihonte khempeuh kiangah amah paipih uh hi. Amah bang kicih ding ci-in teltakin kigen lo ahih manin amaute in khumcip uh hi. Topa in Moses kiangah, “Tua mipa kithat ding hi. Mihonte khempeuh in giahphual pua-ah suang tawh amah deng ding uh hi,” a ci hi. Mihonte khempeuh in giahphual pua-ah amah paipih uh a, Topa in Moses a thupiak bangin suang tawh amah a denglum uh hi. Topa in Moses kiangah, “Israel mite tungah gen inla, a khang tawntungun a puan mongte uhah a teep bawlin, a puan mongteep tungah khau dum khat a khih dingun sawl in. Tua pen, note in utluatna tawh na zuih theihzel uh ahi nomau’ lungsim le nomau’ mittang’ deihna zuikha loin, note in na et ding uh puanmongteep le Topa’ thupiakte khempeuh phawkin na sep nading uh ahi hi. Tua ahih ciangin note in ka thupiakte khempeuh phawkin na sem ding uh a, na Pasian uh tungah na siangtho ding uh hi. Kei pen, note’ Pasian ahi dingin Egypt panin note a hong paikhiatpih Topa na Pasian uh ka hi hi; kei pen Topa na Pasian uh ka hi hi,” a ci hi. Tu-in Levi mite sung pan Levi’ tapa Kohath, Kohath’ tapa Izhar, Izhar’ tapa Korah; le Reuben mite sung pan Reuben’ tapa Eliab, Eliab’ tapa Dathan; le Abiram; le Peleth’ tapa On; hih mite in pawl kai uh hi. Israel mite sung panin mi’ theihkim, mihon sung panin a kiteel, mihonte a makai mi zanih le sawmnga tawh Moses’ mai-ah ding uh hi. Moses le Aaron langpangin amaute kikaikhawmin amaute kiangah, “Khengval lua uh teh! Mihon khempeuhte a milipin siangtho uh a, amaute’ lakah Topa om hi. Bang hangin Topa’ mihonpite tungah nomau kiliansak tawm na hi uh hiam” a ci uh hi. Moses in tua thu a zak ciangin boksukin Korah le a pawlte khempeuh kiangah, “Zing ciangin Topa in a siangtho ahi mi, ama a’ ahi mi hong lakin, ama kiangah paisak ding a, amah in a teel ding mipa ama kiangah paisak ding hi. Hih bangin gamta un: Korah le a pawlte khempeuh in paknamtui beel la un. Zing ciangin Topa’ mai-ah tua beelte sungah mei koihin, mei tungah paknamtui koih unla, tua ciangin Topa’ teel mi pen a siangtho hong hi ding hi. Levi’ tapate aw, khengvallua uh teh!” a ci hi. Tua ciangin Moses in Korah kiangah, “No Levi mite aw, tu-in za un. Israel mite’ Pasian in ama kiangah hong paipih ding, Topa’ biakbuk sungah nasep sem ding, mihonte’ na a sem dingin amau’ mai-ah a ding dingin Israel mihonte’ kiang panin hong khenkhiatna, le nang le na sanggamte ahi Levi’ mite, ama kiangah hong paipihna hawmthawh lai na hi hiam? Siampi nasepna zong deih lai na hi hiam? Tua ahih ciangin nang le na pawlte khempeuh hih lai-ah na kikaihkhopna uh pen Topa langpanna ahi hi. Note in na phunsan uh Aaron pen bang mi hi mawk ahi hiam?” a ci hi. Tua ciangin Moses in mi sawlin Eliab’ tapa Dathan le Abiram samsak hi. Amaute in, “Kong pai kei ding uh hi. Kote’ tungah nangmah ulianin kibawl tawmin, gamlakah kote hong that dingin bawngnawi le khuaizu tui bangin a luanna gam panin nong paikhiatpihna thu hawmthawh lai na hi hiam? Tua tham loin nangmah in bawngnawi le khuaizu tui bangin a luanna gamah kote hong paipih loin, lote le leenggui lote zong nong luahsak kei hi. Hih mite’ mit khelkhia ding na hi hiam? Kong pai kei ding uh hi,” a ci uh hi. Moses heh mahmah ahih manin Topa’ kiangah, “Amau’ biakna thupi ngaihsut kei in. Amaute tungah bangmah ka gamta khial kei a, a la uh khat beek nangawn ka laksak kei hi,” a ci hi. Tua ciangin Moses in Korah kiangah, “Nang le na pawlte, nang le amaute, Aaron tawh zing ciangin Topa’ mai-ah hong om un. Note in na milipun na paknamtui beel ciat uh la-in, a sungah paknamtui koih unla, Topa’ mai-ah na paknamtui beel ciat uh, paknamtui beel zanih le sawmnga paipih un. Aaron le nangmah in zong na paknamtui beel tuak uh paipih un,” a ci hi. Tua ahih ciangin a milipun a paknamtui beel ciat uh la uh a, tuate sungah mei koihin a tungah paknamtui koih uh a, kikhopna buk kongah Moses le Aaron tawh ding khawm uh hi. Tua ciangin Korah in amaute’ langkhat, kikhopna bukkongah mihonte khempeuh khawm hi. Topa’ minthanna mihon khempeuhte tungah hong kilang hi. Tua ciangin Topa in Moses le Aaron kiangah, “Amaute tomno sungin ka beisak theih nadingin hih mihonte lak panin kihem un,” a ci hi. Amaute boksuk uh a, “Pasian, mi khempeuhte’ tungah nuntakna a pia Pasian aw, mi khat’ khialhna hangin mihon khempeuhte’ tungah nang heh ding na hi hiam?” a ci uh hi. Topa in Moses kiangah, “Mihonte tungah hih bangin gen in: Korah, Dathan, le Abiram-te’ omna kiim panin paikhia un, ci in,” a ci hi. Tua ciangin Moses dingin Dathan le Abiram kiangah pai a, Israel upate in zong amah a zui uh hi. Amah in mihonte kiangah, “Amaute’ khialhna khempeuh tawh note hong kiphiatkhia kha ding ahih manin, hih migilote’ puanbuk panin paikhia unla, amau’ na khat beek lawng kha kei un, hong thum ing,” a ci hi. Tua ahih ciangin Korah, Dathan, le Abiram-te’ omna kiim panin amaute a paikhia uh hi. Dathan le Abiram-te, a zite uh le a tapate uh le a taneute uh tawh hong pusuakin a puanbuk kong uhah dingkhawm uh hi. Tua ciangin Moses in, “Hih na khempeuh a sem dingin Topa in kei hong sawl hi. Hih nasep pen keima utthu ahih lohna, hih thu tawh na thei ding uh hi. Mi khempeuh a sih ngei bang danin hih mite si a, tua ahih kei leh mi khempeuh in a tuah ngeite a tuah leh, Topa in kei hong sawl loh ahi hi. Ahih hangin Topa in a thak khat hong piangsakin, leitang in a kam ka-in amaute’ neih khempeuh tawh hih mite valhtumin, a hingtangin Leinuai-ah a tumsuk uhleh, hih mite in Topa a simmawh ahihna thu na thei ding uh hi,” a ci hi. Hih thute a gen khit phetin amau’ nuai-ah lei kiphelkham hi. Leitang a kam ka-in, Korah tawh a kipawl mi khempeuh le a innkuanpihte uh le a neihsa khempeuh uh valhtum hi. Tua ahih ciangin amaute le a neihsa khempeuh uh a hingtangun Leinuai-ah tumsuk uh hi. Leitang in amaute khupnelhin mihonpite’ lak panin amaute bei uh hi. Amaute’ kikona hangin a kiim uha om Israel mite khempeuh tai uh hi. Bang hang hiam cih leh amaute in, “Leitang in hong valhtum kha in teh!” ci uh hi. Tua ciangin Topa’ kiang panin mei hong paikhia a, paknamtui a pia mi zanih le sawmngate kangtum hi. Tua ciangin Topa in Moses kiangah, “Siampi Aaron’ tapa Eleazar in meikuang sung panin paknamtui beelte a lakkhiat ding gen inla, tua ciangin a gamlapi-ah mei thehthang in. Bang hang hiam cih leh tua nate, amau’ nuntakna a beina dongin a khial hih mite’ paknamtui beelte a siangtho hi. Tua ahih ciangin biakna tau sitna kuangdai dingin seek un; bang hang hiam cih leh amaute in Topa’ mai-ah tuate pia uh hi. Tua ahih ciangin tua nate siangtho hi. Israel mite tungah tua bangin hih nate pen lim khat hi ding hi,” a ci hi. Tua ahih ciangin siampi Eleazar in mei tawh a kangtum mite’ piak paknamtui sumngo beelte la-in biakna tau sitna-in a seek hi. Topa in Moses tungtawnin Eleazar tungah a gen bangin Korah le a pawlte tawh a kibang kha lo dingin, siampi ahi lo, Aaron’ suanlekhakte ahi lo mi peuhmah, Topa’ mai-ah paknamtui hal dingin a pai loh nading, Israel mite tungah phawksakna khat ahi hi. Ahih hangin a zing ciangin Israel mihon khempeuh in Moses le Aaron phunsan uh a, “ Topa’ mite na that uh hi,” a ci uh hi. Moses le Aaron langpangin mihonte a kikhop uh ciangin, kikhopna buk lamah amaute a khuadak uh ciangin, meii in na tuam a, Topa’ minthanna vang kilang hi. Kikhopna buk mai lamah Moses le Aaron pai a, Topa in Moses kiangah, “Tomno sungin amaute ka siatsak theih nadingin hih mihonte’ lak panin paikhia un,” a ci hi. Tua ciangin amau tegel zong boksuk uh hi. Moses in Aaron kiangah, “Na paknamtui beel la-in, biakna tau pana mei a sungah koih inla, a tungah paknamtui koihin, mihonte’ lakah paipih mengmeng inla, amaute a dingin kilemna bawlsak in. Bang hang hiam cih leh Topa’ kiang panin hehna hong paikhia khin a, gimna kipan khin hi,” a ci hi. Tua ahih ciangin Moses’ gen bangin Aaron in paknamtui beel la-in mihonte lakah a tai hi. Mite lakah gimna kipan khin takpi a, amah in paknamtui koihin mite a dingin kilemna a bawlsak hi. A si le a hingte’ kikalah amah ding a, gimna a veng hi. Tu-in Korah’ tungtangah a site simloh, hih gimna tawh a si mi tul sawm le tulli le zasagih ahi hi. Gimna a ven’ ciangin kikhopna bukkong Moses kiangah Aaron a ciahkik hi. Topa in Moses kiangah, “Israel mite tungah thu gen inla, amaute tung panin, beh khat ciangin ciangkhut khat, a beh tawh kizui-in a makaite khempeuh tung panin ciangkhut sawm le nih la in. A ciangkhut tungah amau’ min ciat gelh inla, Levi ciangkhut tungah Aaron’ min gelh in. Bang hang hiam cih leh beh lutang khatah ciangkhut khat hi ding hi. Tua ciangin kikhopna buk sung, thuciamna mai, nang tawh i kituahna munah tuate na koih ding hi. Keimah in ka teel mipa’ ciangkhut hong sel ding hi. Amaute in nang hong phunsanna, Israel mite’ phunna tua bangin kei’ kiang panin ka beisak ding hi,” a ci hi. Moses in zong Israel mite tungah tua thu a gen hi. A makaite khempeuh in a beh tawh kizui-in makai khat ciangin khat pai, ciangkhut sawm le nih ama tungah pia uh a, Aaron’ ciangkhut zong amau’ ciangkhut lakah a om hi. Moses in thuciamna puanbuk sung Topa’ mai-ah tua ciangkhutte a koih hi. A zing ciangin thuciamna puanbuk sungah Moses a pai leh, Levi-te beh a’ ding Aaron’ ciangkhut selin nguumkhia a, paakin, almond min gah a gah hi. Tua ciangin Moses in Topa’ mai panin Israel mite khempeuh kiangah ciangkhut khempeuh paikhiatpih hi. Amaute in en uh a, a ciangkhut ciat uh a la uh hi. Topa in Moses kiangah, “Amaute si kha ding ahih manin, amaute in kei hong phunsanna beisak theih nadingin a lehdo mite a dingin lim ahi dingin thuciamna mai-ah Aaron’ ciangkhut koihkik in,” a ci hi. Tua ahih manin Topa’ sawl bangin Moses in zong a hih hi. Israel mite in Moses kiangah, “En in, kote a si ka hi ta uh a, kote khempeuh a mawkna ka hi ta uh hi. A nai-ah a pai, Topa’ biakbuk nai-ah a pai peuhmah si ding hi. Kote khempeuh ka bei nading uh hita hi lo ahi hiam?” a ci uh hi. Tua ciangin Topa in Aaron kiangah, “Nang le na tapate le na behte in biakbuk sung nasepnate tawh kisai-in khialhna a om leh mawhna na puakhawm ding uh hi. Ahi zongin nang le na tapate in na siampi nasepna uh tawh kisai-in khialhna a om leh no teng bek in mawhna na pua ding uh hi. Amaute in nang hong pawlin, thuciamna puanbuk mai-ah nang le na tapate na om laitakun note’ na hong sepsak theih nadingin na pate nam ahi Levi minam na sanggamte zong paipih in. Amaute in note hong huhin puanbuk nasep khempeuh sem ding uh a, ahih hangin note le amaute si kha ding na hih ciangun biakbuk nazatte leh biakna tau-ah na hong seppih lo ding uh hi. Amaute in note hong pawlin, kikhopna buk vaanin puanbuk nasep khempeuh sem ding uh a, note’ nasepte midang kuamah in hong seppih thei lo ding hi. Israel mite tungah hehna a om nawn loh nadingin biakbuk nasep leh biakna tau nasep note in na sem ding uh hi. En un, Israel mite kiang panin na sanggam uh Levi mite ka la khin a, amaute pen kikhopna buk nasep a sem dingin Topa’ tungah a kipia, note’ tungah letsong ahi hi. Nang le na tapate in biakna tau tawh kisai nate le dalna puan sunga om nate khempeuhah na siampi nasep uh na sem ding uh hi. Na siampi nasep uh letsongin kong piak hi a, midangte in hong sep leh kithat ding hi,” a ci hi. Tua ciangin Topa in Aaron kiangah, “En in, kei tungah hong kipia biakna a kikoih khempeuh, Israel mite in a ap nate khempeuh nang kong pia hi. Nangma tanh ding le na suanlekhakte’ kaih ahi tawntung dingin note tungah kong pia hi. Mei tawh hal dingte lak panin a kisit, a siangtho pen nangma ngah dingte in: Amaute in kei’ tungah hong piak amau’ biaknate khempeuh, an tawh amau’ biaknate khempeuh, khialhna hanga amau’ biaknate khempeuh, leh mawhna hanga amau’ biaknate khempeuh pen nang le na suanlekhakte a dingin a siangtho pen hi ding hi. A siangtho pen mun khatah na ne ding uh hi. Pasal peuhmah in ne thei ding hi; note a dingin a siangtho ahi hi. “Amau’ letsong biakna, Israel mite in vei-a biaknate khempeuh uh zong nomau-a’ ahi hi. Nang le na tapate le na tanute’ kaih tawntung dingin tuate kong pia hi. Na inn sunga om a siangtho mi peuhpeuh in ne thei ding hi. “Sathau limci pen khempeuh, le leenggahzu le an a limci pen khempeuh, Topa’ tungah amau’ piak anpalte, note’ tungah kong pia hi. Amaute in Topa’ tungah a piak uh, amau’ leitangah a min masa gah khempeuh nomau a’ hi ding hi. Na inn sunga om a siangtho mi peuhpeuh in ne thei ding hi. “Israel-te’ sungah a ki-ap na peuhmah nomau a’ hi ding hi. “Mihing le ganhing khempeuh sung panin Topa’ tungah mite in a piak tacil khempeuh, mihing hitaleh ganhing hitaleh, nomau a’ hi ding hi. Ahi zongin mihing tacil na tankhia ding uh a, ganhing nin tacil zong na tankhia ding uh hi. Tuate a kitatna man (kha khat a phak ciangin tuate na tankhia ding uh hi) gerah sawmnih a pha biakinn shekel tawh kizui-in ngun shekel nga-in na seh ding uh hi. Ahih hangin bawng tacil, ahih kei leh tuu tacil, ahih kei leh keel tacilte na tan kei ding uh hi; tuate a siangtho ahi hi. Biakna tau tungah tuate’ si na theh ding uh a, Topa’ tungah a gim namtui, mei tawh kihal biakna-in tuate’ thau na hal ding uh hi. Ahih hangin a kivei sa-iik le a taklam phei nomau-a’ ahih mah bangin, tuate’ sate nomau a’ hi ding hi. “Israel mite in Topa’ tungah a piak a siangtho biaknate khempeuh, nang le na tapate le na tanute tungah kaih tawntung dingin kong pia hi. Tua pen nang le na suanlekhakte a dingin Topa’ mai-ah a tawntungin a kiphel thei lo, ci tawh thuciamna ahi hi,” a ci hi. Topa in Aaron kiangah, “Nang in amau’ gam sungah gamhluah na nei kei ding a, amaute’ lakah tanh zong na nei kei ding hi. Kei pen Israel mite’ lakah nangma tanh le nangma luah ka hi hi. “Kikhopna buk sungah amaute’ nasepna thaman dingin Israel sunga sawm-ah-khat khempeuh, Levi mite’ tungah gamh-in ka pia hi. Amaute in khialhna thuakin si kha ding uh ahih manin, tu a kipanin kikhopna buk sungah Israel midangte pai-in tua sawm-ah-khat nekpih lo ding uh hi. Ahih hangin Levi mite in kikhopna buk nasep sem ding uh a, amaute in a tavuan uh pua ding uh hi. Tua pen amau’ khang tawntungin ngeina kip hi ding a, amaute in Israel mite’ lakah luah nei lo ding uh hi. Bang hang hiam cih leh amaute in biakna-in Topa’ tungah a piak uh Israel mite’ sawm-ah-khat pen Levi mite tungah luah dingin ka pia khin hi. Tua ahih ciangin Israel mite lakah amaute in luah a neih loh ding uh ka gensa ahi hi,” a ci hi. Topa in Moses kiangah, “Levi mite kiangah hih bangin na gen lai ding hi: ‘Note’ luah dingin amaute’ tung panin kong piak sawm-ah-khat, Israel mite’ tung panin na lak uh ciangin, tua sung panin Topa’ tungah biakna, sawm-ah-khat sung pan sawm-ah-khat na pia sawn ding uh hi. Tua na biaknate uh, ancilna pana an le leenggah sukna pana kipia mah bangin note-a’ in kiciamteh ding hi. Tua ahih ciangin Israel mite’ tung panin na ngah uh sawm-ah-khat khempeuh tung panin Topa’ tungah biakna na pia ding uh hi. Tua bangin siampi Aaron’ tungah Topa a kibiakna na pia ding uh hi. Note tungah hong kipia letsong lakah a limci pen, a siangtho pen paipihin Topa a’ ding biakna khempeuh na pia ding uh hi,’ ci-in gen in. Tua ahih ciangin amaute kiangah, ‘Tuate sung panin a limci pen teng na piak khit uh ciangin, a omlai teng Levi mite a dingin ancilna panin a piangte le leenggah sukna panin a piangte a kipia mah bangin kiciamteh ding hi. Nang le na innkuanpihte in mun khat peuhpeuhah na ne thei ding uh hi; bang hang hiam cih leh tua pen kikhopna buk sungah note’ nasepna thaman ahi hi. Tua sung panin a limci pen na piak nak-uhleh tua thu hangin mawhsakna na thuak kei ding uh hi. Israel mite’ na a siangthote na ninsak kei ding uh hi. Na nitsak uhleh na si ding uh hi,’ ci-in gen in,” a ci hi. Tu-in Topa in Moses le Aaron’ kiangah, “ Topa’ thupiak thukham le ngeina hih bang ahi hi: Poina a nei lo, sitbaanna a om lo, a tungah nasepna kol a kivawh ngei nai lo, bawngla a san khat nomau kiangah hong paipih nadingun Israel mite kiangah gen un. Siampi Eleazar kiangah na pia ding uh a, giahphual pualamah kipaipihin ama mai-ah kigo ding hi. Siampi Eleazar in a khutme tawh a si tawmkhat la-in, kikhopna buk mai lamah a si sagihvei theh ding hi. Ama muhna-ah a bawngla kihal ding a, a vun, a sa, le a si, a ek tawh kihal ding hi. Siampipa in taamtak sing le puknah le a ausan khaute la-in bawngla a kihalna sungah tuate khul ding hi. Tua ciangin siampipa in ama puante sawpin tui sungah kipumsil ding a, tua khit ciangin giahphual ah hong pai ding hi. A nitak mateng siampipa a nin hi ding hi. Bawngla a hal mipa in ama puante sawpin tui sungah kipumsil ding a, a nitak mateng a nin hi ding hi. Mi a siang khat in bawngla vu khawmin, giahphual pualam a siang mun khatah tuate koih ding a, khialhna maisak nading, nitna siansak nading tui-ah zat dingin Israel mihonpite a dingin tuate kikem ding hi. Bawngla vute a khawm mipa in ama puante sawpin, a nitak mateng a nin hi ding hi. Hih pen Israel mite le amaute lakah a peem khualmi tungah tawntung ngeina hi ding hi. “Misi luang khatpeuh a lawng pa ni sagih sung a nin hi ding hi. A ni thum ni le a ni sagih ni-in amahmah tui tawh kisiangsakin, tua khit ciangin a siang hi ding hi. Ahih hangin a ni thum ni le a ni sagih ni-in amahmah a kisiansak kei leh, amah a siang suak thei lo ding hi. Misi khatpeuh a lawng mi in amahmah a kisiansak tawm kei leh amahmah in Topa’ biakbuk a ninsak hi a, Israel sung panin tua mi kihawlkhia ding hi. Nitna hangin ama tungah tui kibuak lo ahih manin ama tungah nitna baang lai ahih ciangin a nin hi ding hi. “Mi khat puanbuk sungah a sih ciangin puanbuk sungah a pai mi peuhmah le puanbuk sungah a om mi peuhmah ni sagih sung a nin hi ding hi. A kisiincip lo a kihong beel peuhmah a nin ahi hi. Namsau tawh gamlakah a kithat mi ahi a, misi pumpi ahi a, mi guh ahi a, han ahi zongin a lawng mi peuhmah ni sagih sung a nin hi ding hi. “Amaute in a nin mipa a dingin a kihal khialhna hanga biakna vute la-in beel sung khatah tui luanglai tawh hel ding uh hi. Tua ciangin a siang mi khat in puknah la-in a sungah diah ding a, puanbuk tung le a nazat khempeuh tung le tua lai-ah a om mi khempeuh tung le guh ahi a, a kithat mi ahi a, misi ahi a, han ahi zongin a lawng mipa tungah theh ding hi. A ni thum ni le a ni sagih ni-in a siang mipa in a nin mipa tungah theh ding a, tua bangin a ni sagih ni-in amah in mi ninpa siangsakin, amah in a puante sawpin, tui sungah kipumsil ding a, a nitak ciangin amah a siang hi ding hi. “Ahih hangin a nin hi napi-in a kisiangsak lo mipa in Topa’ biakbuk ninsak ahih manin mihonpi panin tua mipa kihawlkhia ding hi. Nitna hangin ama tungah tui kibuak lo ahih manin amah a nin ahi hi. Tua pen amaute a dingin tawntung ngeina khat hi ding hi. Nitna hangin tui a theh mipa in ama puante sawp ding a, nitna hangin a kizang tui a lawng mipa a nitak mateng a nin hi ding hi. A nin mipa in a lawn’ na khat peuhpeuh a nin hi ding a, tua na a lawng peuhpeuh zong a nitak mateng a nin hi ding hi,” a ci hi. Israel mite, a mihon buppi, a kha masa sungin Zin gamlak tung uh a, Kadesh munah phual sat uh hi. Tua lai-ah Miriam si a, tua lai mahah kivui hi. Tu-in mihonte a’ ding tui om lo ahih manin Moses le Aaron’ langah amaute kikhawmin kituah uh hi. Mite, Moses tawh kiselin, “ Topa’ mai-ah ka sanggamte uh a sih lai-in a si hizaw hoh ta le ung! Bang hangin hih lai-ah kote le ka ganhingte uh a si dingin Topa’ mihonte hih gamlakah hong paipih na hi hiam? Bang hangin hih mun sia-ah hong paipih dingin Egypt panin kote hong paitosak na hi hiam? An ahi a, thei ahi a, leenggui ahi a, mang kawlsing ahi zongin a omna mun ahih loh banah tui dawn ding nangawn zong om lo hi,” a ci uh hi. Tua ciangin mihonte omna panin kikhopna bukkongah Moses le Aaron pai-in boksuk uh hi. Topa’ minthanna vang amaute’ tungah hong kilangin Topa in Moses kiangah, “Ciangkhut la-in, nang le na sanggampa Aaron in mihonte khawm un la, suangpi in amau’ muhin tui a piak ding sawl un. Tua bangin mihonte le amau’ ganhingte tui na ngahsak ding uh hi,” a ci hi. Moses in zong Topa’ thupiak bangin ciangkhut a la hi. Moses le Aaron in suangpi mai-ah mihonte kaikhawmin amah in amaute kiangah, “Tu-in za un, a lehdo mite aw; hih suangpi panin note a’ ding tui hong phulkhiasak ding ka hi uh hiam?” a ci hi. Moses in a khut laamto-in a ciangkhut tawh tua suangpi nihvei sat a, tui tampi phulkhia-in mihonte le amau’ ganhingte in a dawn uh hi. Ahi zongin Topa in Moses le Aaron kiangah, “Israel mite’ mai-ah kei hong um lo, hong siangthosak lo na hih uh ciangin amaute ka piaksa leitangah hih mihonte na tunpih kei ding uh hi,” a ci hi. Hihte pen, Israel mite in Topa a phunsanna, amaute lakah amahmah a siangtho-a a kilahna mun, Meribah tui phuala thupiang ahi hi. Moses in Kadesh panin Edom kumpipa kiangah kamtaite sawl a, “Na sanggam Israel-te in hih bangin ci hi: Kote’ tuahkhak kamsiatna khempeuh na thei hi. Ka pu ka pate uh Egypt-ah na paisukin Egypt-ah sauveipi ka teng uh a, Egypt mite in kote le ka pu ka pate uh hong gimbawl hi. Topa’ tungah ka kiko uh ciangin amah in ka aw uh hong za a, vantungmi khat hong sawlin, Egypt panin hong paikhiatpih a, tu-in nangma gam nawl Kadesh khuapi-ah ka om uh hi. Tu-in kote na gam hong kantansak in. Lo ahi a, leenggui lo ahi zongin nawkkha loin, tuikhuk panin zong tui ka dawn kei ding uh hi. Kumpipa’ Lamlian dungah ka pai ding uh a, na gam sung ka khen’ matengun lam ka pial kei ding uh hi,” a ci hi. Ahih hangin Edom mite in ama kiangah, “Nong nawk kei ding uh hi; nong nawk uhleh note langpangin namsau tawh kong kuan ding uh hi,” na ci hi. Israel mite in, “Lamlian tawnin ka paito ding uh hi. Kote le ka ganhingte un na tui uh ka dawn uhleh, a man kong pia ding uh hi. Khe tawh pai-in hong nawksak un; adang kong ngen kei uh hi,” a ci uh hi. Ahih hangin Edom mite in, “Nong nawk kei ding uh hi,” na ci uh hi. Amaute’ langkhatah galkap tampi tawh Edom mite kuan hi. Israel mite, amau’ gam a nawksak ding tua bangin Edom mite in nial uh ahih ciangin amau’ kiang panin Israel mite paikhia uh hi. Kadesh panin Israel-te pai uh a, a hon buppi-in Hor Mual tung uh hi. Edom gamgi Hor Mual-ah Topa in Moses le Aaron’ tungah, “Aaron in ama mite kiang zuan ta ding hi; bang hang hiam cih leh Meribah tui-ah no tegel in ka thupiak hong nial na hih manun, Israel mite tungah ka piak leitangah amah tum lo ding hi. Aaron le ama tapa Eleazar sam inla, Hor Mual-ah amaute paipih in. Aaron’ tung panin a puante suahkhia inla, a tapa Eleazar silhsak in. Aaron in ama mite kiang zuan ta ding a, tua lai-ah si ding hi,” a ci hi. Topa’ thupiak bangin Moses zong gamta hi. Mihonte khempeuh’ muhin Hor Mual tungah amaute paito uh hi. Moses in Aaron’ puante suahkhiatsakin a tapa Eleazar silhsak a, tua mual dawnah Aaron a si hi. Tua ciangin mualtung panin Moses le Eleazar paisuk uh hi. Aaron si hi, ci-in mihonte khempeuh in a theih uh ciangin, Aaron’ hangin Israel mi khempeuh ni sawmthum sung a kap uh hi. Kanaan mi, Negeb gam a teng Arad gam kumpipa in Atharim lam tawnin Israel mite hong paina thu a zak ciangin amah in Israel-te do-in, amaute kimkhat salin a man hi. Tua ciangin Israel-te in Topa’ tungah kiciamna khat bawl uh a, “Ka khutsung uhah hih mite nong piak nakleh kote in amau’ khuapite ka susiamang ding uh hi,” a ci uh hi. Topa in zong Israel-te’ cihna mangin Kanaan mite a pia hi. Israel-te in amau le a khuapite uh susiamang ahih ciangin tua mun pen Hormah kici hi. Hor Mual panin amaute dingkhia-in Edom gam kiimah a pai dingin San Tuipi lamah pai uh a, lamkalah mite lungkia uh hi. Mite in Pasian le Moses gensia uh a, “Bang hangin sehnel gamah a si dingin Egypt panin kote hong paikhiatpih to na hi hiam? An le tui om lo a, bangmah a man lo hih an ka kih uh hi,” a ci uh hi. Tua ciangin Topa in mite’ lakah gul guphate khah a, tuate in mite tu-in Israel mi tampi a si hi. Moses kiangah mite hong pai-in, “ Topa le nang hong gensia-in kampau kha ka hih manun ka khial uh hi. Kote’ kiang panin gulte a lakkhiat nadingin Topa’ tungah thum in,” a ci uh hi. Tua ahih ciangin mite a dingin Moses in thumsak hi. Topa in Moses kiangah, “Gul gupha tawh a kibang sumngo gul khat bawl inla, khuam khat tungah khai in. Gul in a tuk mi peuhmah in tua gul a et ciangin hing ding hi,” a ci hi. Tua ahih ciangin Moses in sumngo gul khat bawl a, khuam khat tungah a khai hi. Gul in mi khatpeuh a tuk leh amah in tua sumngo gul enin hing pah hi. Israel mite ding khia uh a, Oboth munah giahphual sat uh hi. Oboth panin ding khia uh a, nisuahna lam, Iyeabarim munah giahphual sat uh hi. Tua lai panin ding khia uh a, Zered Kuam-ah giahphual sat uh hi. Tua lai panin ding khia uh a, Amor mite’ gamgi panin a hong kikhungsuk gamlak a om Arnon gun galkhatah giahphual sat uh hi; bang hang hiam cih leh Arnon gun pen Moab le Amor mite’ kikalah Moab-te’ gamgi ahi hi. Tua ahih manin Topa’ Gal Laibu sungah, “Sufa gam a Vuahep khua, le Arnon gun kuamte, le Ar khua ciang ban sukin, Moab gamgi lamah a paisuk kuam” kici hi. Tua lai panin Beer munah pai uh hi. Tua mun pen Topa in Moses kiangah, “Mite kaikhawm in; amaute tui ka pia ding hi,” a cihna tuikhuk ahi hi. Tua ciangin Israel mite in hih la sa uh hi: “Tuikhuk aw, phul in! La kong sak ding uh hi. Kumpi ciangkhut le amau’ ciangkhutte tawh mite’ uliante in a tawh, kumpi tate in a tawh tuikhuk aw,” a ci uh hi. Gamlak panin amaute Mattanah munah pai uh a, Mattanah panin Nahaliel, Nahaliel panin Bamoth, Bamoth panin sehnel gam a kimuhsuk theihna Pisgah mual kiang nai, Moab gam sunga kuam khatah tung uh hi. Tua ciangin Israel-te in Amor kumpipa Sihon kiangah kamtaite sawl uh a, “Na gam hong kantansak in. Lo ahi a, leenggui lo-ah ahi zongin ka pial kei ding uh hi. Tuikhuk tuite kong neksak kei ding uh a, na gam ka khen’ khit mateng uh Kumpipa’ Lamlian tawnin ka pai ding uh hi,” a ci uh hi. Ahih hangin Sihon in Israel mite ama gam kantansak lo hi. Amah in a mite khempeuh kaikhawmin, Israel-te a do dingin gamlakah pai-in Jahaz mun tung a, Israel-te a do hi. Israel-te in namsau tawh amah le a mite tampi thatin, Arnon gun panin Jabbok lui, Ammon mite kiang dong bek a gam laksak hi. Bang hang hiam cih leh Ammon mite’ gamgi nawksuak zo lo uh hi. Israel-te in a khuapite khempeuh la-in, Heshbon gam sunga Amor mite’ khuapi khempeuh le khuaneu khempeuhah a teng uh hi. Bang hang hiam cih leh Heshbon pen, nidangin Moab kumpipa simin a khutsung panin Arnon gun ciang dong a gam khempeuh a laksak, Amor mite’ kumpipa Sihon’ khuapi ahi hi. Tua ahih ciangin la a sa pawlte in, “Heshbon-ah hong pai un. Lamkik unla, Sihon’ khuapi kipsak un. Heshbon panin mei piangkhia a, Sihon’ khuapi panin meikuang piangkhia hi. Moab mite’ khuapi Ar, Arnon mual sang a ukte kangtum hi. Moab! Gimna na ngah hi. Khemosh mite! Na mangthang uh hi. Amah in a tapate galtai-in, a tanute galmatin, Amor kumpipa Sihon a dingin hong bawl hi. Tua ahih ciangin amau’ suanlekhakte Heshbon pan Dibon ciang dong si uh a, mei in Medeba ciang dong a bat mateng ka siasak uh hi,” ci-in sa uh hi. Tua bangin Amor mite’ gam sungah Israel-te teng uh hi. Moses in Jazer khua thu a kansim dingin mi a sawl hi. Amaute in a khuaneute la-in tua lai-a om Amor mite suankhia uh hi. Tua ciangin amaute kihei-in Bashan lamah paito uh hi. Bashan kumpipa Og le a mite khempeuh Edrei-ah amaute a do dingin hong kuan uh hi. Ahih hangin Topa in Moses kiangah, “Amah kihta kei un; bang hang hiam cih leh amah le a mite khempeuh le a leitang, nomau khut sungah kong pia khin hi. Heshbon-ah a teng Amor kumpipa Sihon na bawl bangun amah na bawl ding uh hi,” a ci hi. Tua ahih ciangin khat beek a nungta a om nawn lo dingin amaute in amah le a tapate le a mite khempeuh that uh a, amaute in ama gam a luah uh hi. Tua ciangin Israel mite ding khia uh a, Jerikho gei Jordan galkhat Moab gam zanglei-ah giahphual a sat uh hi. Israel-te in Amor mite tungah a bawlna khempeuh Zippor’ tapa Balak in mu hi. Amaute tam mahmah uh ahih manin Moab mite in tua mite kihta uh a, Israel mite kihtakna hangin Moab mite linggawp uh hi. Moab mite in Midian upate kiangah, “Bawngtal in gamlak lopate a liah bangin hih mite in i kiima om mi khempeuh liaktum mang ding hi,” a ci hi. Tua ahih ciangin Zippor’ tapa Balak, tua hun laitak a Moab kumpipa in Amaw mite’ gam Gun gei Pethor-ah a om Beor’ tapa Balaam kiangah kamtaite sawlin, “En in, Egypt panin mihon khat hong paikhia hi. Amaute, lei maitang teng dim khin uh a, keima galkhatah amaute om uh hi. Tu-in hong pai inla, amaute hat lua uh ahih manin hih mite hong samsiatsak in. Tua hileh amaute zo-in hih gam panin ka hawlkhiazo kha ding hi. Bang hang hiam cih leh thupha na piak mi in thupha ngahin, na samsiat mi in siatna a ngahna ka thei hi,” cisak hi. Tua ahih ciangin Moab upate le Midian upate aisanna man ding tawh kuankhia-in Balaam kiangah pai uh a, Balak’ thu ama kiangah sung uh hi. Balaam in amaute kiangah, “Tuzan hih lai-ah giak phot un. Topa in kei tungah hong gen bangin note tungah kong genkik ding hi,” a ci hi. Tua ahih ciangin Moab uliante Balaam tawh a om uh hi. Balaam kiangah Pasian hong pai-in, “Nang tawh a om hih mite kua ahi hiam?” a ci hi. Balaam in Pasian kiangah, “Zippor’ tapa Balak, Moab kumpipa in kei kiangah mi hong sawlin, ‘En in, Egypt panin mihon khat hong paikhia a, lei maitang teng dim uh hi. Tu-in hong pai inla, amaute hong samsiatsak in. Tua hileh amaute do-in ka hawlkhiazo kha ding hi,’ hong ci hi,” ci-in a gen hi. Pasian in Balaam kiangah, “Amaute na zui kei ding hi. Tua mite thupha a kipia ahih manin na samsia kei ding hi,” a ci hi. Tua ahih ciangin zingsangin Balaam tho-in Balak’ uliante kiangah, “Na gam uhah ciah un; bang hang hiam cih leh Topa in note kong zuih ding hong phal lo hi,” a ci hi. Tua ahih ciangin Moab uliante dingin Balak kiangah ciah uh a, “Balaam in kote hong zui nuam lo hi,” a ci uh hi. Tua ciangin Balak in amaute sangin a tamzaw leh a zahtakhuai zaw uliante khatvei sawlkik hi. Amaute zong Balaam kiangah pai-in ama kiangah, “Zippor’ tapa Balak in hih bangin ci hi: ‘Kei kiangah nong pai nading bangmah kikol-awksak kei in; bang hang hiam cih leh minphatna lianpi nang kong pia ding a, kei’ tunga nong gen peuhpeuh ka hih ding hi. Hong pai inla, hih mite hong samsiatsak in,’ ci hi,” ci-in a gen uh hi. Ahih hangin Balaam in Balak’ nasemte kiangah, “Balak in kham leh ngun tawh a kidim ama inn hong pia ding hitaleh zong, Topa ka Pasian’ thupiakna banah a tamzaw hitaleh a tawmzaw hitaleh bangmah ka hih thei kei hi. Tu-in kong thum hi; Topa in kei tungah bang hong ci lai ding hiam cih ka theihna dingin tuzan zong hih lai-ah giak phot un,” ci-in a dawng hi. Tua zanin Balaam kiangah Pasian hong pai-in, “Nangmah a sam dingin mite hong pai ahihleh, tho inla amaute zui in. Ahih hangin nang kong sawl teng bek na hih ding hi,” a ci hi. Tua ahih ciangin zingsangin Balaam tho-in a la tutphah vawhin Moab uliante a zui hi. Ahih hangin amah pai ahih manin Pasian heh a, amah a khaktan dingin Topa’ vantungmi in lampi-ah na pang hi. Tu-in a la tungah amah tuang a, a nasemte nih in zong a zui uh hi. Topa’ vantungmi in a khut sungah namsau dawhsa tawi-in lampi-ah a ding, a la in mu ahih manin lampi panin pialin gamlakah a pai hi. Balaam in lampi-ah a paikik nadingin a la a sat hi. Tua ciangin leenggui lo kikal, a pang tuakah phung a omna lam kawcikah vantungmi na ding leuleu hi. La in Topa’ vantungmi a muh ciangin phung phu a, phungah Balaam’ khe nengcip ahih ciangin amah in a la sat kik hi. Tua ciangin Topa’ vantungmi na ma pai-in, taklamah ahi a, veilamah ahi zongin kihei theih nading a om lohna mun kawcik khatah na ding leuleu hi. La in Topa’ vantungmi a muh ciangin Balaam’ nuai-ah lumsuk hi. Balaam heh mahmah a, a ciangkhut tawh a la a sat hi. Tua ciangin Topa inla pau theisak a, la in Balaam kiangah, “Thumvei dong nong sat nadingin nang bang hong cih ka hi hiam?” a ci hi. Balaam in a la kiangah, “Nang in kei nong mawlpihna hang ahi hi. Ka khutah namsau a tawi hi leng ka ut hi. Tua hileh nang kong that khin ding hi,” a ci hi. La in Balaam’ kiangah, “Na khantawnin tuni ciang dong na tuanna na la hi lo ka hi hiam? Hih bangin nang hong hih ngei ka hi hiam?” a ci hi. Amah in, “Nong hih ngei kei hi,” a ci hi. Tua ciangin Topa in Balaam’ mitte honsak a, a khut sungah namsau dawhsa tawh Topa’ vantungmi lampi-ah a ding mu ahih manin a lu kunin a boksuk hi. Topa’ vantungmi in ama kiangah, “Bang hangin na la thumvei dong sat na hi hiam? En in, hih na khualzinna-ah lungkim lo ka hih manin nang hong pang dingin kong kuankhia hi. La in kei hong mu-in thumvei dong hong peel hi. Hong peel kei leh, tu mahmahin nang hong that khinin na la ka hingsak ding hi,” a ci hi. Tua ciangin Balaam in Topa’ vantungmi kiangah, “Kei hong pangin lampi-ah na dinlam thei lo ka hih manin ka khial hi. Tua ahih ciangin tu-in ka khualzinna hoihsa lo na hih leh ka ciahkik ding hi,” a ci hi. Topa’ vantungmi in Balaam kiangah, “Mite zui in; ahih hangin nang kong sawlteng bek na gen ding hi,” a ci hi. Tua ahih ciangin Balaam in Balak’ uliante a zuisuak hi. Balaam’ hong paina thu Balak in a zak ciangin, Arnon gun gamgi-in a kizatna dunga om, Moab gamgi gei-a om Ar khuapi ciangah amah a dawn dingin a paikhia hi. Balak in Balaam kiangah, “Nang hong sam ding mi hong sawl hi lo ka hi hiam? Bang hangin hong pai lo na hi hiam? Nang hong liansak lah ding ka hi hiam?” a ci hi. Balaam in Balak kiangah, “En in, na kiang hong tung ing! Thu khatpeuh ka gen theih nading vangliatna nei ka hi hiam? Pasian in hong sawl thu bek ka gen ding hi,” a ci hi. Tua ciangin Balaam in Balak zui a, Kiriathhuzoth khua-ah a tung uh hi. Balak in bawngtalte le tuute tawh biakna pia-in Balaam le amah tawh a om uliante kiangah a puak hi. A zing ciangin Balak in Balaam samin Bamothbaal munah paipihto hi. Tua lai panin amah in Israel mi a madawk pente galmuh thei hi. Tua ciangin Balaam in Balak kiangah, “Hih lai-ah kei a dingin biakna tau sagih hong bawlsak inla, kei a dingin bawngtal sagih le tuutal sagih hong pia in,” a ci hi. Balaam’ gen bangin Balak gamta a, Balak le Balaam in biakna tau simah bawngtal khat le tuutal khat ciat a pia uh hi. Balaam in Balak kiangah, “Na meihal biakna kiangah na ding in; kei ka va pai ding hi. Kei hong dawn dingin Topa hong pai kha ding hi. Amah in kei hong lah khempeuh nang kiangah kong gen ding hi,” a ci hi. Tua ciangin a sang mual dawn pawn khatah amah a paito hi. Pasian in Balaam na dawn hi. Balaam in ama kiangah, “Biakna tau sagih ka bawl khin a, biakna tau simah bawngtal khat le tuutal khat ciat ka pia hi,” a ci hi. Topa in Balaam kiangah thu gen a, “Balak kiangah ciahkikin hih bangin na gen ding hi,” a ci hi. Balak kiangah a ciahkik ciangin amah le Moab uliante khempeuh ama meihal biakna gei-ah na ding uh hi. Balaam in a thugen ding teng genin: “Aram panin Balak in kei hong paipih a, nisuahna mualte panin Moab kumpipa in kei hong paipih hi: ‘Hong pai in, Israel mite mawhsak in!’ hong ci hi. Pasian’ samsiat loh mite bangci samsiat ding ka hi hiam? Topa’ mawhsak loh mite bangci mawhsak ding ka hi hiam? Bang hang hiam cih leh mual dawn panin amaute ka mu a, mual neute panin amaute ka en hi. En in, a tangten’ mite, minamte lakah a kihel lote! Leivui zahin a tam Jakob mite, kua in a mal simzo ding a, Israel mi phazah a mal simzo ding ahi hiam? Mi thuman pa’ sihna bangin hong sisak inla, ka mailam thu ama a’ bang hisak in!” a ci hi. Tua ciangin Balak in Balaam kiangah, “Kei bang hong cih na hi hiam? Ka galte a samsia dingin nang kong sam a, ahi zongin amaute bangmah cih loin, amaute thupha na pia zawsop hi,” a ci hi. Amah in, “ Topa in ka gen dingin hong sawl thu, don lo ding ka hi hiam?” ci-in a dawng hi. Tua ciangin Balak in ama kiangah, “Amaute na muh theih nading mun dangah kei hong zui in. Amaute a madawk teng bek na mu ding a, a vekpi-in na mu kei ding hi. Tua ciangin tua lai panin amaute nong samsiatsak ding hi,” a ci hi. Tua ciangin amah in Zofim gamlak, Pisgah mual dawnah amah paipihin, biakna tau sagih bawl a, biakna tau simah bawngtal khat le tuutal khat ciat a pia hi. Balaam in Balak kiangah, “Hua lamah Topa tawh ka va kituah kalun na meihal biakna gei hih lai-ah na ding in,” a ci hi. Topa in Balaam na dawnin ama kiangah, “Balak kiangah ciahkikin hih bangin thu na gen ding hi” a ci hi. Balak kiangah a paikik ciangin a meihal biakna gei-ah amah na ding a, Moab uliante tawh na om uh hi. Balak in ama kiangah, “ Topa in bang hong gen ahi hiam?” a ci hi. Tua ciangin Balaam in a thugen ding teng genin: “Balak aw, ka thugen ding za in. Zippor’ tapa aw, ka thu ngai in: A zuau dingin Pasian pen mihing hi lo a, a kisik dingin mihing’ tapa hi lo hi. Amah in gen khin hi; a gen bangin hih lo ding ahi hiam? Amah in ci khin hi; a cih bangin tungsak lo ding ahi hiam? En in, thupha piak ding thu ka ngah hi. Amah in thupha pia khin a, ke’n ka kheelkik thei kei hi. Amah in Jakob mite tungah mawhna mu lo a, Israel mite tungah gamtatsiatna mu lo hi. Topa amau’ Pasian, amaute tawh om a, kumpipa phatna awging amaute’ lakah om hi. Pasian in Egypt panin amaute paikhiatpih a, amaute in gamsial tha bang hatna nei uh hi. Bang hang hiam cih leh Jakob mite a kibum nading om lo a, Israel mite’ langkhatah aisan ding om lo hi. Tu-in Israel-te tawh kisai-in, ‘Pasian’ sepna en un,’ kici ding hi. En un, hua mite! Humpinelkai bangin thoto a, humpinelkai bangin kaangto hi. A an a nek mateng, amaute’ si a dawn mateng, lumsuk lo hi,” a ci hi. Tua ciangin Balak in Balaam kiangah, “Amaute samsia peuhmah kei inla, thupha zong pia peuhmah kei in,” a ci hi. Ahih hangin Balaam in Balak kiangah, ” Topa’ cih khempeuh keimah in ka hih ding hi,’ hong ci hi lo ka hi hiam?” ci-in a dawng hi. Balak in Balaam kiangah, “Tu-in hong pai in; mun dangah kong paipih ding hi. Tua lai panin amaute nong samsiatsak nading Pasian in hong lungkimpih kha ding hi,” a ci hi. Tua ahih ciangin Balak in sehnel gam a kimuh sukna Peor mual dawnah Balaam paipih hi. Tua ciangin Balaam in Balak kiangah, “Hih lai-ah kei a dingin biakna tau sagih hong bawlsak inla, bawngtal sagih le tuutal sagih hih lai-ah hong pia in,” a ci hi. Balaam’ cih bangin Balak in hih a, biakna tau simah bawngtal khat le tuutal khat ciat a pia hi. Israel-te thupha piak ding in Topa lungkimsak ahihna Balaam in a muh ciangin, a hun dang a bangin kihilna lim a mu dingin pai lo a, a maitang gamlak lam ngat hi. Balaam khuadak a, a nam namin Israel-te in giahphual a sat a mu hi. Pasian’ Kha ama tungah hong tung a, amah in a thugen ding teng genin: “Beor’ tapa Balaam’ thugen, a mit in khua a mu thei mipa’ thugen, Pasian’ thute a za, Vanglianpa’ maangmuhna a mu, maang mu napi-in a mit in khua a mu thei mipa’ thugen: Jakob mite aw, na puanbukte uh bangzahin hoih ahi hiam? Israel mite aw, na giahphual uh bangzahin hoih ahi hiam? Saupi a kiphah kuamte tawh kibang a, gun gei-a om huante tawh kibang hi. Topa in a suan aloes paknamtui kungte tawh kibang a, tuipi gei-a om taamtak kungte tawh kibang hi. A phelkhaite panin tui luang ding a, a khaici in tui tampi ngahin, a kumpipa uh, Agag sangin lianzaw ding a, ama kumpi gam kiliansak ding hi. Pasian in Egypt gam panin amaute paikhiatpih a, gamsial bangin amaute thahat uh hi. Amaute in a gal uh ahi minam dangte sugawp ding uh a, amau’ guhte suzan gawp ding uh a, a thaltang uh tawh amaute kaplet ding uh hi. Amaute bok a, humpinelkai pa bangin lumsuk uh hi. Humpinelkaipi bangin lumsuk uh hi. Kua in amaute phong ngam ding ahi hiam? Note thupha hong piate in thupha ngah hen la, note hong samsiate in samsiatna ngah ta hen,” a ci hi. Balaam’ tungah Balak heh mahmah a, amah in a khut le a khut a tuum hi. Balak in Balaam kiangah, “Ka galte a samsia dingin nang kong sam hi. En in, nang in amaute thumvei tak thupha na pia khinzo hi. Tua ahih ciangin tu-in na omna munah tai in. ‘Nang kong min liansak ding hi,’ ka hong ci hi. Ahih hangin na min liat nading panin Topa in nang hong khaktan hi,” a ci hi. Balaam in Balak kiangah, “Kei kiangah nong sawl na kamtaite kiangah, ‘Balak in kham le ngun tawh a kidim ama inn hong pia ding hitaleh zong, Topa’ thu banah keima thu-in a pha bawl ding ahi a, a sia bawl ding ahi zongin bangmah ka hih thei kei hi. Topa’ gente bek keimah in ka gen ding hi,’ ci-in gen khin hi lo ka hi hiam? “Tu-in en in, ka mipihte kiangah ka pai ding hi. Hong pai in; nidang ciangin hih mite in na mite’ tungah a bawl dingte kong theisak ding hi,” a ci hi. Amah in a thugen ding teng genin, “Beor’ tapa Balaam’ thugen, a mit in khua a mu thei mipa’ thugen, Pasian’ thute a za, Sang Pen pa’ thugen a thei, Vanglianpa’ maangmuhna a mu, maang mu napi-in a mit in khua a mu thei mipa’ thugen in: Amah ka mu hi; ahih hangin tunai hun hi lo hi: Jakob sung pan aksi khat hong suakkhia ding a, Israel sung pan kumpi ciangkhut hong piang ding hi. Tua in Moab thaltang satkham ding a, Sheth’ suante khempeuh sugawp ding hi. Israel gualzo ding a, Edom mite kisuankhia ding a, a galte ahi Seir zong, kisuankhia ding hi. Jakob tawh ukna na kisem ding a, khuapi sunga a suaktate kisusia ding!” a ci hi. Tua ciangin amah in Amalek mite enin, ama thugen ding teng genin, “Amalek, minamte lakah a masa pen hi a, ahih hangin a tawpna-ah siatna a tuak ding hi,” a ci hi. Tua ciangin amah in Ken mite enin, ama thugen ding teng genin, “Na omna mun kho a, suangpi sungah na bu kibawl hi. Ahih hangin Kain bei ding hi. Asher in galmatin nang bang tanvei hong nei ding ahi hiam?” a ci hi. Amah in a thugen ding a omlai teng genin, “Ala! Pasian in hihte a hih ciangin kua nungtazo ding ahi hiam? Ahih hangin Kittim panin teembawte hong pai-in Asshur le Eber gimsak ding a, amah in zong siatna tuak ding hi,” a ci hi. Tua ciangin Balaam dingin ama gamah ciahkik a, Balak zong a ciah hi. Shittim-ah Israel mite a om laitakin Moab gam numeite tawh paktat ding kipan uh hi. Hih numeite in amau’ pasian biakpiakna pawi-ah Israel mite sam uh a, amaute in a pawi an nekpihin, amau’ pasian-te’ mai-ah kun uh hi. Tua ahih ciangin Peor-a Baal tawh Israel mite va kizomtawm hi. Israel mite tungah Topa heh mahmah a, Topa in Moses kiangah, “Israel mite’ tung panin Topa’ hehna a kihtakhuai a bei theih nadingin mite’ ukpite khempeuh man inla, Topa’ mai-ah suntangin amaute khai in,” a ci hi. Moses in Israel thukhente kiangah, “Note khempeuh in Peor-a Baal tawh a va kizomtawm na mite khempeuh uh na that ciat ding uh hi,” a ci hi. Kikhopna bukkongah amaute kapin a om laitak, Moses’ muhna le Israel mihon buppi’ muhna-ah Israel mite khat hong pai-in, Midian numei khat ama innkuanpihte kiangah hong ciahpih hi. Siampi Aaron’ tapa Eleazar, Eleazar’ tapa Finehas in a muh ciangin dingin mihonte’ lak panin paikhia a, a khutah teipi khat tawi-in Israel mipa inndei sungah zui a, Israel mipa le a numei, a numei’ pumpi pailetin a nihin sun khawm hi. Tua bangin Israel mite’ sung panin gimna dai hi. Ahi zongin gimna tawh a si mite tul sawmnih le tulli ahi hi. Topa in Moses kiangah, “Siampi Aaron’ tapa Eleazar, Eleazar’ tapa Finehas in Israel mite tungah ka hehna damsakkik hi. Keimah in pammaih ka sak bangin amah in pammaihsa ahih ciangin pammaih ka sakna tawh Israel mite ka beisak kei hi. Tua ahih ciangin, ‘En in, ka thuciam ahi nopsakna, amah ka pia hi. Ama tung le ama khitah a suanlekhakte tungah tawntung siampi hihna thuciamna hi ding hi; bang hang hiam cih leh ama Pasian a’ ding amah in pammaih saksak a, Israel mite a ding kilemna bawlsak hi,’ ci in,” a ci hi. Midian numei tawh a kithat khawm, Israel mi a kithat pa’ min pen Simeon mite sung panin a beh lutang Salu’ tapa Zimri ahi hi. Midian numei a kithatnu’ min pen Midian innkuan sungah a beh lutang ahi Zur’ tanu Kozbi ahi hi. Topa in Moses kiangah, “Midian mite gimsakgawp inla, amaute vatgawp in; bang hang hiam cih leh amaute in a khelpilna uh tawh note hong gimsakgawp uh a, Peor tawh kisai thu le Peor’ hangin gimna ni-in a kithat, amau’ sanggamnu, Midian uliante’ tanu Kozbi thu-ah note hong khem uh hi,” a ci hi. Tua gimna khit ciangin Topa in Moses tung le siampi Aaron’ tapa Eleazar tungah, “Israel mihonte khempeuh kum sawmnih pan a tungsiah, a behbehin, Israel sung panin galdo dingin a kuankhia thei ding khempeuh sim in,” a ci hi. Moses le siampi Eleazar in Jerikho nai, Jordan kiang, Moab zanglei-ah amaute’ tungah thu gen a, Topa in Moses a thupiak bangin, “Kum sawmnih pan a tungsiah peuhmah mi sim un,” a ci hi. Egypt gam panin a paikhia Israel mite: Israel’ tacil Reuben hi a, Reuben’ tapate: Hanok pan Hanok behte ahi uh hi; Pallu pan Pallu behte ahi uh hi; Hezron pan Hezron behte ahi uh hi; Karmi pan Karmi behte ahi uh hi. Hihte khempeuh pen Reuben minam ahi uh hi; amau mi tul sawmli le tulthum le zasagih le sawmthum pha hi. Pallu’ tapa Eliab ahi hi. Eliab’ tapate pen Nemuel, Dathan, le Abiram ahi uh hi. Hih Dathan le Abiram pen, mihonte lak panin pawl a kai, amaute in Topa’ thu a seel lai-in Korah tawh kipawlin Moses le Aaron’ thu a seelte ahi uh hi. Mei in mihing zanih le sawmnga a kattum lai-in lei in a kam ka-in Korah tawh amaute valh tumin amau pawl teng si uh a, amaute pen hilhkholhna a suak uh hi. Ahi zongin Korah’ tapate si lo uh hi. Amau’ behbehin Simeon minamte: Nemuel pan Nemuel behte ahi uh hi; Jamin pan Jamin behte ahi uh hi; Jakhin pan Jakhin behte ahi uh hi; Zerah pan Zerah behte ahi uh hi; Shaul pan Shaul behte ahi uh hi. Hihte pen Simeon minam hi uh a, mi tul sawmnih le tulnih le zanih ahi uh hi. Amau’ behbehin Gad minamte: Zefon pan Zefon behte ahi uh hi; Haggi pan Haggi behte ahi uh hi; Shuni pan Shuni behte ahi uh hi; Ozni pan Ozni behte ahi uh hi; Eri pan Eri behte ahi uh hi; Arod pan Arod behte ahi uh hi; Areli pan Areli behte ahi uh hi. Hihte pen Gad minamte hi a, mi tul sawmli le zanga ahi hi. Judah’ tapate pen Er le Onan hi a, Kanaan gamah Er le Onan si uh hi. Amau’ behbehin Judah minamte in: Shelah pan Shelah behte ahi uh hi; Perez pan Perez behte ahi uh hi; Zerah pan Zerah behte ahi uh hi. Perez mite: Hezron pan Hezron behte ahi uh hi; Hamul pan Hamul behte ahi uh hi. Hihte pen Judah minamte hi a, mi tul sawmsagih le tulguk le zanga ahi uh hi. Amau’ behbehin Issakhar minamte: Tola pan Tola behte ahi uh hi; Puvah pan Puvah behte ahi uh hi; Jashub pan Jashub behte ahi uh hi; Shimron pan Shimron behte ahi uh hi. Hihte pen Issakhar minamte hi a, mi tul sawmguk le tulli le zathum ahi uh hi. Amau’ behbehin Zebulun minamte: Sered pan Sered behte ahi uh hi; Elon pan Elon behte ahi uh hi; Jahleel pan Jahleel behte ahi uh hi. Hihte pen Zebulun minamte hi a, mi tul sawmguk le zanga ahi uh hi. Amau’ behbehin Josef minamte: Manasseh le Efraim ahi uh hi. Manasseh minamte: Makhir pan Makhir behte ahi uh hi; Makhir pen Gilead’ pa ahi hi; Gilead pan Gilead behte ahi uh hi. Gilead’ suante: Iezer pan Iezer behte ahi uh hi; Asriel pan Asriel behte ahi uh hi; Shekhem pan Shekhem behte ahi uh hi; Shemida pan Shemida behte ahi uh hi; Hefer pan Hefer behte ahi uh hi. Tu-in Hefer’ tapa Zelofehad in tapa nei lo a, ahih hangin tanu nei hi: Zelofehad’ tanute’ minte in Mahlah, Noah, Hoglah, Milkah, le Tirzah ahi hi. Hihte pen Manasseh minamte hi a, mi tul sawmnga le tulnih le zasagih ahi hi. Amau’ behbehin Efraim minamte: Suthelah pan Suthelah behte ahi uh hi; Bekher pan Bekher behte ahi uh hi; Tahan pan Tahan behte ahi uh hi. Suthelah minamte: Eran pan Eran behte ahi uh hi. Hihte pen Efraim minamte hi a, mi tul sawmthum le tulnih le zanga ahi hi. Hihte pen amau’ behbehin Josef minamte ahi hi. Amau’ behbehin Benjamin minamte: Bela pan Bela behte ahi uh hi; Ashbel pan Ashbel behte ahi uh hi; Ahiram pan Ahiram behte ahi uh hi; Shefufam pan Shefufam behte ahi uh hi; Hufam pan Hufam behte ahi uh hi. Bela’ tapate pen Ard le Naaman ahi uh hi: Ard pan Ard behte ahi uh hi; Naaman pan Naaman behte ahi uh hi. Hihte pen amau’ behbehin Benjamin minamte hi a, mi tul sawmli le tulnga le zaguk ahi hi. Amau’ behbehin Dan minamte: Shuham pan Shuham behte hi a, hihte pen Dan minamte ahi uh hi. Dan minam sung pan Shuham behte mi tul sawmguk le tulli le za li ahi hi. Amau’ behbehin Asher minamte: Imnah pan Imnah behte ahi uh hi; Ishvi pan Ishvi behte ahi uh hi; Beriah pan Beriah behte ahi uh hi. Beriah minamte: Heber pan Heber behte ahi uh hi; Malkhiel pan Malkhiel behte ahi uh hi. Asher’ tanu’ min Serah ahi hi. Hihte pen Asher minamte hi a, tul sawmnga le tulthum le zali ahi hi. Amau’ behbehin Naftali minamte: Jahzeel pan Jahzeel behte ahi uh hi; Guni pan Guni behte ahi uh hi; Jezer pan Jezer behte ahi uh hi; Shillem pan Shillem behte ahi uh hi. Hihte pen Naftali minamte hi a, mi tul sawmli le tulnga le za li ahi hi. Hihte pen Israel mi vekpi a phazah hi a, mi tul zaguk le tul khat le zasagih le sawmthum ahi uh hi. Topa in Moses kiangah, “Mi a phazah tawh kizui-in hih mite tungah luah dingin leitang kihawm ding hi. Minam a tamte tungah gamh a tam na pia ding a, minam a tawmte tungah gamh a tawm na pia ding hi. Minam khempeuh a mi phazah tawh kizui-in gamh kipia ding hi. Ahih hangin leitang pen aisanna tawh kihawm ding a, amau’ beh min tawh kizui-in amaute in luah ding uh hi. Aisanna tawh kizui-in a tamte tungah a tam, a tawmte tungah a tawm, a gamh uh kihawmsak ding hi,” a ci hi. Amau’ behbehin a kisim Levi minamte: Gershon pan Gershon behte ahi uh hi; Kohath pan Kohath behte ahi uh hi; Merari pan Merari behte ahi uh hi. Amau’ suante: Libni behte, Hebron behte, Mahli behte, Mushi behte, le Korah behte ahi uh hi. Kohath pen Aram’ pa ahi hi. Amram’ zi pen Levi sung pan Egypt gamah a suak ahi Levi’ tanu Jokhebed ahi hi. Tua nu in Amram tawh Aaron, Moses, le a sanggamnu uh Miriam nei hi. Aaron in ta Nadab, Abihu, Eleazar, le Ithamar nei hi. Ahih hangin Nadab le Abihu pen amaute in Topa’ mai-ah mei siangtho lo a piak lai-un si uh hi. Pasal peuhmah kha khat pan a tungsiah, amau’ sung pan a kisimte, tul sawmnih le tulthum ahi hi. Bang hang hiam cih leh Israel mite lakah amaute gamh kipia lo ahih manin Israel mite lakah amaute kisimkhawm lo hi. Jerikho nai Jordan kiang Moab zanglei-ah Israel mite a sim Moses le siampi Eleazar mah in a sim mite pen hihte ahi uh hi. Ahih hangin Sinai sehnel gamah Israel mite a sim Moses le Aaron in a simte lakah tu-in khat zong kihel nawn lo hi. Bang hang hiam cih leh Topa in amaute’ thu a genna-ah, “Amaute gamlakah si ding uh hi,” a ci hi. Jefunneh’ tapa Kaleb le Nun’ tapa Joshua lobuang amaute khat beek om nawn lo hi. Tua ciangin Josef’ tapate sung panin Manasseh’ tapa Makhir, Makhir’ tapa Gilead, Gilead’ tapa Hefer, Hefer’ tapa Zelofehad’ tanute a nai-ah hong pai uh hi. Ama tanute’ minte in: Mahlah, Noah, Hoglah, Milkah, le Tirzah ahi hi. Amaute, Moses’ mai le siampi Eleazar’ mai le makaite’ mai le mihonte khempeuh’ mai, kikhopna bukkongah ding uh a, “Ka pa uh gamlakah a si hi. Korah tawh kipawlin Topa langpangin a kikaikhawm mihonte lakah amah kihel lo hi. Ahih hangin ama khialhna hangin si a, amah in tapa nei lo hi. Amah in tapa a neih loh man bekin bang hangin a beh sung panin ka pa uh’ min mangthang ding ahi hiam? Ka pa uh sanggamte’ lakah kote zong neihsa hong pia un,” a ci uh hi. Moses in Topa’ mai-ah amau’ thu a gen hi. Topa in Moses kiangah, “Zelofehad’ tanute’ thugen man hi. Amau’ pa’ sanggamte lakah neihsa gamh amaute tungah na pia ding a, amau’ pa’ gamh amaute’ tungah na tungsak ding hi. Israel mite tungah hih bangin na gen ding hi: ‘Pasal khat si-in, tapa a neih kei leh, ama gamh a tanu na luahsak ding uh hi. Amah in tanu a neih kei leh, ama gamh a sanggam pasalte tungah na tungsak ding uh hi. Amah in sanggam pasal a neih kei leh, ama gamh ama pa’ sanggam pasalte tungah na pia ding uh hi. Ama pa in sanggam pasal a neih kei leh, ama gamh ama innkuan tawh a kinai ama behpa’ tungah na pia ding uh a, amah in tang ding hi. Topa in Moses a thupiak bangin hih pen Israel mite tungah thukham le ngeina kip hi ding hi,’ ci in,” a ci hi. Topa in Moses kiangah, “Hih Abarim mual tungah paito inla, Israel mite’ tungah ka piak leitang en in. Na muh khit ciangin na sanggampa Aaron mah bangin nang zong na mite kiang na zuan ta ding hi. Bang hang hiam cih leh, mihonpite a kitot lai-un tui phualah keimah sianthosak ding hunin Zin gamlakah keima thu nong lehpan’ hi,” a ci hi. (Hihte pen Zin gamlak, Kadesh gam Meribah tui a thupiangte a cihna ahi hi.) Moses in Topa kiangah, Topa in Moses kiangah, “Nun’ tapa Joshua, siamna a nei mipa la inla, ama tungah na khut nga in. Siampi Eleazar le mihon khempeuh mai-ah amah na dingsak ding a, amaute’ muhna-ah amah za na pia ding hi. Israel mihon khempeuh in ama thu a man’ theih nadingin thuneihna pawlkhat amah na guan ding hi. Siampi Eleazar’ mai-ah amah ding ding a, amah in Topa’ mai-ah Urim thukhenna tawh thu dotsak ding hi. Amah le amah tawh a om Israel mi khempeuh, mihon buppi, ama thu tawh pusuak ding uh a, ama thu mah tawh sungtum ding uh hi,” a ci hi. Topa in amah a thupiak bangin Moses gamta a, amah in Joshua la-in siampi Eleazar le mihon buppi mai-ah dingsak a, amah in ama tungah a khutte nga-in, Topa in ama tungah a gen bangin Joshua tungah za a pia hi. Topa in Moses kiangah, “Israel mite thu pia-in amaute tungah, ‘Keimah hong kibiakna mei tawh a kihal an, a gim namtui keima-a’ pen a hunin kei tungah nong piak ding uh phawk un,’ ci-in gen in. “ Topa’ tungah na piak ding uh mei tawh kihal biakna in: A sitbaang lo kum khat a pha tuuno nih, tatsat loin biakpiakna-in nisimin na pia ding uh hi. Tuuno khat zingsangin na pia ding uh a, a tuuno khat pen nitakin na pia ding uh hi. An tawh biakna-in oliv thau hai khat tawh a kibawl annel lawh khat na pia ding uh hi. Tua pen Topa’ tungah mei tawh kihal biakna, a gim namtui dingin Sinai Mual-ah a kikipsak, a kitatsat lo meihal biakna ahi hi. Leenggahzu tawh biakna pen tuuno khat ciangin hai khat hi ding hi. Topa’ tungah leenggahzucil tawh biakna pen siangtho munah na sung ding uh hi. A tuuno khat nitakin na pia ding uh hi. Zingsang a an tawh biakna le a leenggahzu tawh biakna mah bangin, mei tawh kihal biakna, Topa’ tungah a gim namtui-in na pia ding uh hi. “Sabbath ni-in a sitbaang lo, kum khat a pha tuuno nih le an tawh biakna-in sathau tawh a kibawl annel lawh nih le a leenggahzu tawh biakna hi ding hi. Hih pen tatsat loin meihal biakna le a leenggahzu tawh biaknate banah Sabbath simin meihal biakna ahi hi. “Kha simin a ni masa ni-in Topa’ tungah meihal biakna na pia ding uh hi. Bawngtal nih, tuutal khat, a sitbaang lo kum khat a pha tuuno a pa sagih hi ding hi. Bawngtal khat ciangin an tawh biakna-in sathau tawh a kibawl annel lawh thum zong hi ding hi. A tuutal khat ciangin an tawh biakna-in sathau tawh a kibawl annel lawh nih hi ding hi. Tuuno khat a dingin an tawh biakna-in sathau tawh a kibawl annel lawh khat ciat hi ding a, a gim namtui meihal biak nading ahi hi. Leenggahzu tawh biaknate pen, bawngtal khat ciangin leenggahzu thawl lang, tuutal khat ciangin leenggahzu hai nih, tuuno khat ciangin leenggahzu hai khat hi ding hi. Hihte pen kum khat sunga om kha simin meihal biakna ahi hi. Khialhna hanga biakna-in Topa’ tungah keel a pa khat zong kipia ding hi. Tua pen a kitatsat loin meihal biakna le a leenggahzu tawh biaknate banah a kipia ding ahi hi. “Kha masa a ni sawm le ni li ni pen Topa’ Paisan Pawi ni ahi hi. Tua kha a ni sawm le ni nga ni pen biakna pawi ni hi a, ni sagih sung silngo sawh loh anlum kine ding hi. A ni masa ni-in a siangtho kikhopna khat om ding hi. Tua ni-in leitung nasep na sem kei ding uh a, Topa’ tungah meihal biakna na pia ding uh hi. Tuate pen bawngtalno nih, tuutal khat, le kum khat a pha tuuno a pa sagih hi ding hi. Tuate a sitbaang lo ahih ding thei un. Sathau tawh a kibawl annel ahi an tawh biaknate zong hi ding hi. Bawngtal khat ciangin annel lawh thum le tuutal khat ciangin annel lawh nih tawh na pia khawm ding uh hi. Tuuno sagihte khat ciangin annel lawh khat mah tawh na pia khawm ding uh hi. Note a dingin kilemna bawl nadingin khialhna hanga biakna-in keel a pa khat zong hi ding hi. Meihal biak nading ahi zingsang a meihal biakna banah tatsat lo-a biakna-in hihte na pia ding uh hi. Tua bangmahin mei tawh kihal an tawh biakna ahi, Topa’ tungah a gim namtui, ni sagih sung ni simin na pia ding uh hi. Tua pen a kitatsat lo-a meihal biakna le leenggahzu tawh biaknate banah kipia ding hi. A ni sagih ni-in a siangtho kikhopna khat na nei ding uh a, tua ni-in leitung nasep na sem kei ding uh hi. “Na nipikal pawi hunun Topa’ tungah an thak tawh biakna na piak hun uh anpal piak ni-in a siangtho kikhopna khat na nei ding uh hi. Tua ni-in leitung nasep na sem kei ding uh a, meihal biakna, Topa’ tungah a gim namtui na pia ding uh hi. Bawngtalno nih, tuutal khat, le kum khat a pha tuuno a pa sagih, a vekpi-in a sitbaang lo hi ding hi. Sathau tawh a kibawl ahi an tawh a biak nadingin zong, bawngtal khat ciangin annel lawh thum, tuutal khat ciangin lawh nih, tuuno sagihte khat ciangin lawh khat tawh na pia khawm ding uh hi. Note a dingin kilemna bawl nadingin keel a pa khat zong na pia ding uh hi. A kitatsat lo-a meihal biakna le an tawh biaknate banah tuate le leenggahzu tawh biakna na pia ding uh hi. Tuate a sitbaang lo ahih ding thei ta un. “A kha sagihna a ni masa ni-in kikhopna siangtho khat na nei ding uh a, tua ni-in leitung nasep na sem kei ding uh hi. Tua ni pen note in peengkul na tum ni ding uh hi a, meihal biakna, Topa’ tungah a gim namtui na piak dingte un: Bawngtalno khat, tuutal khat, le kum khat a pha tuuno a pa sagih, a vekpi-in a sitbaang lo hi ding hi. Bawngtal tawh piak dingin sathau tawh a kibawl annel ahi an tawh biaknate lawh thum, tuutal tawh lawh nih, le tuuno sagihte khat ciangin lawh khat hi ding hi. Note a dingin kilemna bawl nadingin khialhna hanga biakna-in keel a pa khat zong hi ding hi. A khasim meihal biakna le an tawh biakna, le a kitatsat lo-a meihal biakna le an tawh biakna, le tuate a’ ding ngeina a om bangin a gim namtui, Topa’ tungah mei tawh kihal biakna ahi leenggahzu tawh biaknate banah hi ding hi. “Hih kha sagihna a ni sawm ni-in a siangtho kikhopna khat na nei ding uh a, an tangin tua ni-in na na sem kei ding uh hi. Topa’ tungah a gim namtui meihal biakna na piak dingte un: Bawngtalno khat, tuutal khat, le kum khat a pha tuuno a pa sagih hi ding a, tuate pen note’ muhna-ah a sitbaang lo hi ding hi. Sathau tawh a kibawl annel tawh biaknate pen, bawngtal tawh piak khawm dingin lawh thum, a tuutal tawh lawh nih, tuuno sagihte khat ciangin lawh khat hi ding hi. Kilem nadingin khialhna hanga biakna le a kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi. “A kha sagihna ni sawm le ni nga ni-in a siangtho kikhopna khat nei-in tua ni-in leitung nasep na sem kei ding uh a, Topa a dingin ni sagih sung pawi na kham ding uh hi. A ni masa ni-in meihal biakna, Topa’ tungah a gim namtui, mei tawh kihal biak nadingin bawngtalno sawm le thum, tuutal nih, kum khat a pha tuuno a pa sawm le li na pia ding uh a, tuate a sitbaang lo hi ding hi. Sathau tawh a kibawl annel ahi an tawh biaknate pen, bawngtal sawm le thumte khat ciangin lawh thum, tuutal nihte khat ciangin lawh nih, le tuuno sawm le lite khat ciangin lawh khat hi ding hi. A kitatsat lo-a meihal biakna, an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi. “A ni nih ni-in bawngtalno sawm le nih, tuutal nih, le kum khat a pha tuuno a pa sawm le li, a vekpi-in a sitbaang lo, ngeina kip om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi. A kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi. “A ni thum ni-in bawngtal sawm le khat, tuutal nih, le kum khat a pha tuuno a pa sawm le li, a vekpi-in a sitbaang lo, ngeina kip om bangin a phazah tawh kizui-in bawngtalte, tuutalte, le tuunote tawh piak bangin an tawh biakna le leenggahzu tawh biaknate zong hi ding hi. A kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi. “A ni li ni-in bawngtal sawm, tuutal nih, le kum khat a pha tuuno a pa sawm le li, a vekpi-in a sitbaang lo, ngeina om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi. A kitatsat lo-a meihal biakna, an tawh biakna, le leenggahzu tawh biaknate banah khialhna hanga biakna-in keel a pa khat zong hi ding hi. “A ni nga ni-in bawngtal kua, tuutal nih, le kum khat a pha tuuno a pa sawm le li, a vekpi-in a sitbaang lo, ngeina kip om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi. A kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi. “A ni guk ni-in bawngtal giat, tuutal nih, le kum khat a pha tuuno a pa sawm le li, a vekpi-in a sitbaang lo, ngeina kip om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi. A kitatsat lo-a meihal biakna, an tawh biakna, le leenggahzu tawh biaknate banah khialhna hanga biakna-in keel a pa khat zong hi ding hi. “A ni sagih ni-in bawngtal sagih, tuutal nih, le kum khat a pha tuuno a pa sawm le li, a vekpi-in a sitbaang lo, ngeina kip om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi. A kitatsat lo-a meihal biakna, an tawh biakna, le leenggahzu tawh biaknate banah khialhna hanga biakna-in keel a pa khat zong hi ding hi. “A ni giat ni-in a thupi kikhopna khat na nei ding uh a, tua ni-in leitung nasep na sem kei ding uh hi. Meihal biakna, mei tawh kihal biakna, Topa’ tungah a gim namtui na piak dingte un: Bawngtal khat, tuutal khat, kum khat a pha tuuno a pa sagih, a vekpi-in a sitbaang lo, ngeina kip om bangin bawngtal, tuutal, le tuunote a phazah tawh kizui-in piakkhawm dingin an tawh biakna le leenggahzu tawh biaknate zong hi ding hi. A kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi. “Na thuciam biakpiakna uh le utthu-a na biakpiaknate uh banah na meihal biaknate, le an tawh na biaknate, le leenggahzu tawh na biaknate, le thunuama na biak nadingun a kiseh na pawi hunte uhah hihte, Topa’ tungah na pia ding uh hi,” a ci hi. Topa in Moses a thupiak bangin amah in Israel mite tungah a thu a kimin a gensawn hi. Moses in Israel minam lutangte tungah, “ Topa’ thupiak hih bang ahi hi: Mi khat in Topa’ tungah thuciamna a ciam ciang ahi a, amah in a zuih dingin kiciamna a bawl ciang ahi zongin, amah ciampel lo ding a, ama kamsung panin a gingkhiate khempeuh tawh kizui-in gamta ding hi. “Tua ahih kei leh, numei khat in Topa’ tungah thuciamna bawlin, a pa’ inn sungah nungakin a om sungin kamciamna tawh amah kikhihtawm a, amah in a zuih dingin thuciamna le kamciamnate a bawlna a pa in za napi-in ama tungah bangmah a cih kei leh, ama thuciamna khempeuh kip ding a, amah a kikhih tawmna kamciamna khempeuh kip ding hi. Ahih hangin a pa in a zak ni-in a lungkim lohna a tanu’ tungah a gen leh, tua nu’ thuciamna, amah a kikhih tawmna kamciamnate khat zong kip lo ding hi. A pa in nial ahih manin Topa in tua nu maisak ding hi. “Tua numei, pasal khat tawh kiteng a, amah a kikhih tawmna thuciamna ahi a, ngaihsun lopi-in a kampaunate ahi zongin a pasal in za a, a zak ni-in a zi’ tungah bangmah a cih kei leh tua numei’ thuciamna kip ding a, amah a kikhih tawmna a kamciam kip ding hi. Ahih hangin, a pasal in tua thu a zak ni-in a lungkim lohna a gen leh, amah a kikhih tawmna ahi numei’ tunga om kamciamna le ngaihsun lopi-in a kampaunate amah in phiatsak ding a, Topa in tua nu maisak ding hi. “Ahih hangin meigong numei’ thuciamna ahi a, a kima numei’ thuciamna ahi zongin, amah a kikhih tawmna peuhmah ama tungah kip ding hi. “Numei khat in a pasal’ inn sungah thu a ciam ahi a, kiciamna khat tawh kamciamin amah a kikhih tawmna ahi zongin, a pasal in za a, a zi’ tungah bangmah ci loin, a nial kei leh, ama thuciamna khempeuh kip ding a, amah a kikhih tawmna thuciamna khempeuh zong kip ding hi. Ahih hangin a pasal in tua thute a zak ni-in a phiatsak leh, ama thuciamna tawh kisai-in a kam panin a gingkhia peuhmah ahi a, amahmah a kamciamna tawh kisaite ahi zongin kip lo ding hi. A pasal in tuate phiatsak ahih manin Topa in tua nu maisak ding hi. Thuciamna khatpeuh ahi a, an tang dingin a kikhihna kamciam khatpeuh ahi zongin, a pasal in kipsak thei, a pasal in phiatsak thei hi. Ahih hangin a pasal in tua a kiciam ni a kipanin a zi’ tungah bangmah a cih kei leh, amah in a zi’ tunga om thuciamna khempeuh hitaleh a kamciam khempeuh hitaleh a kipsak ahi hi. Amah in tuate a zak ni-in ama tungah bangmah ci lo ahih manin tuate a kipsak ahi hi. Ahih hangin amah in tuate a zak khit ciangin a nung phiat leh, amah in a zi’ mawhna pua ding hi,” a ci hi. Hihte pen, pasal le a zi, le a pa’ inn sungah nungakin a om laitakin a pa le a tanu’ kikal-ah a om, Topa in Moses a piak ngeinate ahi hi. Topa in Moses kiangah, “Israel mite’ phu Midian-te tungah la in. Tua khit ciangin na mipihte kiang na zuan ding hi,” a ci hi. Tua ahih ciangin Moses in mite kiangah, “Midian-te’ tungah Topa’ phulakna a sem ding, Midian-te a do dingin note’ lak panin mi pawlkhat galhiam guan un. Israel minamte nam khat panin mi tulkhat ciat gal sungah na kuansak ding uh hi,” a ci hi. Tua ahih ciangin Israel mi tul tampi sung panin minam khatah tulkhat, tul sawm le tulnih galdo dingin galhiam kiguan’ hi. Moses in amaute, minam khat panin tulkhat ciat, biakinn nate le pataukoh nadingin peengkulte siampi Eleazar’ tapa Finehas kengsakin ama makaihna tawh gal sungah a kuansak hi. Topa in Moses a thupiak bangin Midian-te do uh a, pasal khempeuh that uh hi. Amaute in midangte le Midian kumpi ngate Evi, Rekem, Zur, Hur, le Reba a thahna uhah, Beor’ tapa Balaam zong namsau tawh that khawm uh hi. Israel-te in Midian nupite le a tate uh manin, a bawngte, a tuuhonte khempeuh le a na khempeuh uh laksak uh hi. Amau’ tenna a khuapi khempeuh uh le a giahphual khempeuh uh mei tawh halsak uh a, a matsa khempeuh uh, mihing ganhing ciahpih khin uh hi. Tua ciangin amaute in Jerikho nai, Jordan kiang, Moab zanglei-a a giahphual uh a Moses le siampi Eleazar le Israel mihonte kiangah a galmatte uh le a na lakte uh tunpih uh hi. Moses, siampi Eleazar, le mihon makaite khempeuh zong giahphual pua-ah vai dawn dingin pai uh hi. Galdona panin a hong ciah mi tul tampi a ukte le mi za tampi a uk galkap uliante’ tungah Moses heh hi. Moses in amaute tungah, “Numei khempeuh hingkhawi na hi uh hiam? En un, hih mite in Balaam’ lamlahna tawh Peor-ah Topa’ tungah Israel mite zuautatsak hi. Tua ahih manin Topa’ mihonte lakah gimna hong tung hi. Tua ahih ciangin tu-in, a khangnote lakah pasal peuhmah that unla, pasal tawh a lumkhawmsa numei peuhmah zong that un. Ahih hangin pasal tawh a lumkhawm nai lo nungaknote khempeuh note a dingin kem un. Tu-in note lakah mi khat peuhpeuh a thatte le a kithatsa a lawng mi peuhmahte, giahphual pua-ah ni sagih sung om un. A ni thum ni le a ni sagih ni-in note le na galmatte uh na kisiansuah ding uh hi. Puan khempeuh, savun tawh a kibawl na khempeuh, keel mul tawh a kibawl na khempeuh, le sing tawh a kibawl na khempeuh na siansuah ding uh hi,” a ci hi. Siampi Eleazar in galdona-ah a va kuan galkapte tungah, “ Topa in Moses a thupiak thukham ngeina hih bang ahi hi: Kham, ngun, sumngo, sik, dal, le haknaw, mei a do zo peuhmahte bek mei-ah na hal ding uh a, a siang hi ding hi. Ahi zongin mei a do zo lo peuhmahte, nitna siansuahna tui tawh kisiansuah ding a, tui-ah na sawp ding uh hi. A ni sagih ni-in na puante uh na sawp ding uh a, note a siangtho na hi ding uh hi. Tua khit ciangin giahphual ah nong ciahkik thei pan ding uh hi,” a ci hi. Topa in Moses kiangah, “Nang le siampi Eleazar le mihon beh lutangte in gal sunga a kiman mihing le ganhingte sim un. Gal sunga a kingahte khen nih suah inla, galdo dingin a kuan galhangte le inn-a om mihonte tungah a kikimin hawmsak in. Galdo dingin a kuankhia galkapte’ tung panin mite, bawngtalte, late, le tuuhonte zanga ciangin Topa’ siah dingin khat ciat la in. Alang a ngah uh sung panin la inla, Topa’ tungah biakna-in siampi Eleazar tungah pia in. Israel mihonte in alang a ngah uh sung panin mite, bawngtalte, late, tuuhonte, ganhing khempeuh, sawmnga ciangin khat ciat la inla, Topa’ biakbuk a kem Levi mite tungah pia in,” a ci hi. Topa in Moses a thupiak bangin Moses le siampi Eleazar in a sem uh hi. Tu-in galkapte in a lak gal sunga a mat uh a omlai a kihawm dingte: Tuu tul zaguk le tul sawmsagih le tulnga, bawng tul sawmsagih le tulnih, la tul sawmguk le tulkhat, le pasal tawh a lumkhawm nai lo nungak a vekpi-in tul sawmthum le tulnih ahi hi. Alang ahi, gal sungah a kuankhia mite’ ngah pen tuu tul zathum le tul sawmthum le tulsagih le zanga hi a, Topa’ tuusiah pen tuu zaguk le sawmsagih le nga ahi hi. Bawngte tul sawmthum le tulguk hi a, Topa’ siah sawmsagih le nih ahi hi. Late tul sawmthum le zanga hi a, tua sung panin Topa’ siah sawmguk le khat ahi hi. Nungak tul sawm le tulguk hi a, tua sung panin Topa’ siah nungak sawmthum le nih ahi hi. Topa in Moses a thupiak bangin Moses in siampi Eleazar’ tungah Topa biak nading siah a pia hi. Galdo dingin a kuankhia mite a dingin Moses in a khenkhiat zah mah Israel mihonte in ngah uh a, mihonte in a ngah alang teng pen tuu tul zathum le tul sawmthum le tulsagih le zanga, bawng tul sawmthum le tulguk, la tul sawmthum le zanga, nungak tul sawm le tulguk ahi hi. Israel-te in a ngah alang sung panin Moses in mihing le ganhing sawmnga ciangin khat ciat la-in, Topa in ama tungah a thupiak bangin Topa’ biakbuk a kem Levi mite tungah a pia hi. Tua ciangin galkap tul tampite tunga uliante ahi, tul tampi a ukte le za tampi a ukte, Moses kiangah hong pai uh a, “Kote’ ukna nuai-a a om galkapte, na nasem kote in ka sim khin uh a, kote’ kiang panin mi khat zong a pelhem om lo hi. Kote in Topa’ mai-ah ko a dingin kilemna bawl nading, Topa biak nadingin kham tawh a kibawl nate, banbuhte le taaute, min gelhna zungbuhte, bilbahte, le khite ka muh ciat uh kong puak uh hi,” hong ci uh hi. Moses le siampi Eleazar in amaute’ tung panin na-a a kibawl khamte a sang uh hi. Tul tampi a ukte le za tampi a ukte’ tung panin a kingah, Topa’ tungah biakna-in a piak uh khamte khempeuh shekel tul sawm le tulguk le zasagih le sawmnga a gik hi. (Gal sunga a kuan mite in amau a’ ding ciat a la uh hi.) Moses le siampi Eleazar in tul tampi le za tampi a uk mite’ tung panin khamte sang uh a, Israel mite a dingin Topa’ mai-ah phawk tawntungna-in kikhopna buk sungah a koih uh hi. Reuben minamte le Gad minamte in ganhing hon tampi nei uh hi. Amaute in Jazer gam le Gilead gam a muh uh ciangin gan khawi nading munin hoihsa mahmah uh hi. Tua ahih ciangin Gad minamte le Reuben minamte pai-in Moses le siampi Eleazar le mihon makaite kiangah, “Ataroth, Dibon, Jazer, Nimrah, Heshbon, Elealeh, Sebam, Nebo, le Beon Topa in Israel mihonte a hong luahsak gamte pen a gan gam hi a, na nasem kote in gan ka nei uh hi. Nong hehpihna-un hih gam hong pia unla, Jordan kantanin kote hong paipih kei un,” a ci uh hi. Ahih hangin Moses in Gad minamte le Reuben minamte tungah, “Note hih laitakah om hithiatin na sanggamte uh gal sungah kuan ding ahi hiam? Topa in amaute a piakna gamah a pai nading uhah Israel mite bang hangin lungkiasak ding na hi uh hiam? Na pu na pate uh Kadeshbarnea panin gam vel dingin ka sawl lai-in zong tu-a mah a bang uh hi. Bang hang hiam cih leh amaute Eshkol Kuam-ah paito-in tua gam a muh uh ciangin, Topa in amaute a piakna gamah a pai nading uhah Israel mite lungkiasak uh hi. Tua hunin Topa heh mahmah ahih manin amah kiciamin, ‘Amaute in kei hong zui taktak lo uh ahih manin Egypt gam pan a paikhia mite kum sawmnih panin a tungsiah peuhmah khat beek in, Abraham, Isaac, le Jakob tungah piak dingin ka ciamsa gam mu lo ding uh hi. Ahi zongin Kenaz mi Jefunneh’ tapa Kaleb le Nun’ tapa Joshua in Topa zui taktak uh ahih manin a mu ding uh hi,’ ci hi. Israel mite tungah Topa heh a, ama muhna-ah siatna a gamta tua khangmi khempeuh a bei mateng kum sawmli sung gamlakah amaute vak kawikawisak hi. En un, Israel mite tungah Topa’ hehluatna a khangsakto lai dingin, na pu na pate uh’ tangin hong khang na hi uh hiam! Bang hang hiam cih leh amah zuihna panin note na pial uhleh amah in gamlakah amaute nusia kik ding a, note pen hih mi khempeuh a susia na hi ding uh hi,” a ci hi. Tua ciangin ama kiang nai-ah amaute hong pai-in, “Hih lai-ah ka tuute uh a dingin tuukhawkte bawlin, ka zi ka tate uh a dingin khua ka sat ding uh a, ahih hangin kote in hiam tawi-in amau’ munah Israel mite ka tunpih mateng uh amau’ mai-ah a pai dingin ka kiging ding uh hi. Tua kikal sungin hih gam sungah a teng mite’ kiang pan kihut nadingin khuapi muanhuai sungah ka zi ka tate uh a na om ding uh kisam hi. Israel mite in amau’ luah ding ciat a luah khit matengun ka inn uhah ka ciah kei ding uh hi. Jordan galkhat le tua ban siahah amaute tawh ka luah khawm kei ding uh hi. Bang hang hiam cih leh Jordan hih lamgal nisuahna lam kote’ luah hong suak hi,” a ci uh hi. Tua ahih ciangin Moses in amaute kiangah, “Note, tu-a bangin gamta-in, galdo dingin Topa’ mai-ah a pai dingin hiam la-in, Topa in a mai panin a galte a hawlkhiat matengin hiam a tawi note khempeuh in ama mai-ah Jordan kantanin, Topa’ mai-ah leitang a kilak matengin na om uhleh, Topa le Israel mite a’ ding na sep ding teng uh a zo khin na hih manun note na ciahkik ding uh a, hih leitang pen Topa’ mai-ah note’ neihsa hi ding hi. Ahih hangin note tua bangin na gamtat kei uhleh, en un, Topa’ tungah a khial khin na hi uh hi. Na khialhna un note hong sulzuih ding theitel un. Na zi na tate uh a dingin khuapite satin, na tuute uh a dingin tuukhawkte bawl unla, na ciamsa bangun gamta un,” a ci hi. Tua ciangin Gad minamte le Reuben minamte in Moses kiangah, “Ka topa’ thupiak bangin na nasemte ka gamta ding uh hi. Ka tate uh, ka zite uh, ka tuuhonte uh le ka ganhing khempeuhte uh Gilead gam khuapite-ah na om ding uh hi. Kote’ topa in nong thupiak bangin na nasemte, galdo dingin hiam a tawi thei khempeuh, galdo dingin Topa’ mai-ah ka galkah ding uh hi,” a ci uh hi. Tua ahih ciangin Moses in amaute’ thu tawh kisai-in siampi Eleazar’ tung le Israel minam beh lutang khempeuh tungah thu a pia hi. Moses in amaute tungah, “Gad minamte le Reuben minamte, Topa’ mai-ah galdo dingin hiam a tawi thei khempeuh in note tawh Jordan kantanin tua gam hong zawhpih leh, Gilead gam a neih dingun amaute tungah na pia ding uh hi. Ahih hangin hiam tawi-in note tawh hong galkah kei uhleh zong amaute in Kanaan gam sungah note mah bangin ngah nei veve ding uh hi,” a ci hi. Tua ciangin Gad minamte le Reuben minamte in dawng uh a, “Topa aw, Topa’ thupiak bangin kote ka gamta ding uh hi. Hiam tawi-in Topa’ mai-ah Kanaan gam sungah ka pai ding uh a, kote’ luah ahi ka neihsa uh Jordan galkhatah kote a’ mahin na kip ding hi,” a ci uh hi. Tua ahih ciangin Moses in Gad minamte, Reuben minamte, le Josef’ tapa Manasseh minam alangte tungah, Amor kumpi Sihon’ gam le Bashan kumpi Og’ gam, a leitang le a khuapite a gam sung tawh, a gam sunga leitang tunga om khuapi khempeuh a pia hi. Gad minamte in khuapi muanhuai Dibon, Ataroth, Aroer, Atrothshofan, Jazer, Jogbehah, Bethnimrah, le Bethharan-te satin, tuute a dingin tuukhawkte a bawl uh hi. Reuben minamte in Heshbon, Elealeh, Kiriathaim, Nebo, le Baalmeon (a minte kheel ding), le Sibmah khuapite sat uh a, amau’ satsa khuapite’ min a thak a phuak uh hi. Manasseh’ tapa Makhir-te beh, Gilead-ah pai-in va la uh a, tua sunga om Amor mite suankhia uh hi. Moses in Manasseh’ tapa Makhir-te beh tungah Gilead pia a, tua lai-ah amaute a teng uh hi. Manasseh minam sung panin Jair pai-in amau’ khuaneute va la a, tuate Havvothjair, ci-in min a phuak hi. Nobah pai-in Kenath le a khuaneute va la a, ama min tamin Nobah a phuak hi. Hihte pen Moses le Aaron’ makaihna tawh Egypt gam panin a honin a paikhiat lai-un Israel mite’ giahphualte ahi hi. Moses in Topa’ thupiakna tawh phual khat khit phual khat amau’ kipatna munte a gelh hi. Hihte pen amau’ kipatna mun tawh kizui-in a giahphualte ahi hi. A kha masa, tua kha ni sawm le ni nga ni-in Rameses panin amaute ding khia uh hi. Paisan Pawi masa ni khit a zing ciangin Egypt mite khempeuh’ muhna-ah gualzawhna tawh Israel mite paikhia uh a, Topa in amaute’ lakah a thahlup tacil khempeuh Egypt mite in a vui laitak uh ahi hi. Topa in amau pasian-te zogawp hi. Tua ahih ciangin Rameses panin Israel mite ding khia uh a, Sukkoth-ah giahphual sat uh hi. Sukkoth panin ding khia uh a, a gam mong a om Etham-ah giahphual sat uh hi. Etham panin ding khia uh a, Baalzefon nisuahna lama om Pihahiroth lamah kihei kik uh a, Migdol mai-ah giahphual sat uh hi. Pihahiroth mai panin ding khia uh a, tuipi laizang kantanin sehnel gamah pai-in Etham gam sungah ni thum lam pai uh a, Marah ah giahphual sat uh hi. Marah panin ding khia uh a, Elim tung uh hi. Elim-ah cik tuikhuk sawm le nih le nisuh kung sawmsagih om a, amaute in tua lai-ah giahphual sat uh hi. Elim panin ding khia uh a, San Tuipi gei-ah giahphual sat uh hi. San Tuipi panin ding khia uh a, Sin sehnel gamah giahphual sat uh hi. Sin gam panin ding khia uh a, Dofkah-ah giahphual sat uh hi. Dofkah panin ding khia uh a, Alush ah giahphual sat uh hi. Alush panin ding khia uh a, mite’ dawn ding tui a om lohna Refidim-ah giahphual sat uh hi. Refidim panin ding khia uh a, Sinai sehnel gamah giahphual sat uh hi. Sinai gam panin ding khia uh a, Kibrothhattaavah-ah giahphual sat uh hi. Kibrothhattaavah panin ding khia uh a, Hazeroth-ah giahphual sat uh hi. Hazeroth panin ding khia uh a, Rithmah-ah giahphual sat uh hi. Rithmah panin ding khia uh a, Rimmonperez-ah giahphual sat uh hi. Rimmonperez panin ding khia uh a, Libnah-ah giahphual sat uh hi. Ribnah panin ding khia uh a, Rissah-ah giahphual sat uh hi. Rissah panin ding khia uh a, Kehelathah-ah giahphual sat uh hi. Kehelathah panin ding khia uh a, Shefer Mual-ah giahphual sat uh hi. Shefer Mual panin ding khia uh a, Haradah-ah giahphual sat uh hi. Haradah panin ding khia uh a, Makheloth ah giahphual sat uh hi. Makheloth panin ding khia uh a, Tahath-ah giahphual sat uh hi. Tahath panin ding khia uh a, Terah-ah giahphual sat uh hi. Terah panin ding khia uh a, Mithkah-ah giahphual sat uh hi. Mithkah panin ding khia uh a, Hashmonah ah giahphual sat uh hi. Hashmonah panin ding khia uh a, Moseroth-ah giahphual sat uh hi. Moseroth panin ding khia uh a, Benejaakan-ah giahphual sat uh hi. Benejaakan panin ding khia uh a, Horhaggidgad-ah giahphual sat uh hi. Horhaggidgad panin ding khia uh a, Jotbathah-ah giahphual sat uh hi. Jotbathah panin ding khia uh a, Ebronah-ah giahphual sat uh hi. Ebronah panin ding khia uh a, Eziongeber-ah giahphual sat uh hi. Eziongeber panin ding khia uh a, (Kadesh ahi) Zin gamah giahphual sat uh hi. Kadesh panin ding khia uh a, Edom gam mong Hor Mual-ah giahphual sat uh hi. Israel mite Egypt gam panin a paikhiat zawh uh a kum sawmlina, a kha ngana, a ni masa ni-in Topa’ thupiakna tawh Hor Mual tungah siampi Aaron paito-in tua lai-ah a si hi. Hor Mual-ah Aaron a sihin kum za le kum sawmnih le kum thum a pha hi. Kanaan gam sung Negeb gamah a teng Kanaan mi Arad kumpipa in Israel mite hong paina thu a za hi. Hor Mual panin amaute ding khia uh a, Zalmonah-ah giahphual sat uh hi. Zalmonah panin ding khia uh a, Punon-ah giahphual sat uh hi. Punon panin ding khia uh a, Oboth-ah giahphual sat uh hi. Oboth panin ding khia uh a, Moab gam sung Iyeabarim-ah giahphual sat uh hi. Iyim panin ding khia uh a, Dibongad-ah giahphual sat uh hi. Dibongad panin ding khia uh a, Almondiblathaim ah giahphual sat uh hi. Almondiblathaim panin ding khia uh a, Nebo tun ma Abarim mualte ah giahphual sat uh hi. Abarim mualte panin ding khia uh a, Jerikho nai Jordan kiang Moab zanglei-ah giahphual sat uh a, Jordan kiang Bethjeshimoth panin Moab zanglei sunga om Abelshittim dongah amaute in giahphual a sat uh hi. Jerikho nai Jordan kiang Moab zanglei-ah Topa in Moses kiangah, “Israel mite tungah hih bangin gen in: Jerikho kantanin Kanaan gam na tun uh ciangin note’ mai panin tua gam a mi khempeuh na hawlkhia ding uh a, amau’ suang milimte khempeuh susia-in, a kisung amau’ milimte khempeuh na susia ding uh a, mualtung a a biaknate khempeuh uh na sumang ding uh hi. Na neih dingun note’ tungah leitang hong pia khin ka hih manin note in leitang luahin tua tungah na teng ding uh hi. Note in na minam uh tawh kizui-in aisanna tawh leitang na luah ding uh hi. Minam tamte tungah a tam na pia ding uh a, minam tawmte tungah a tawm na pia ding uh hi. Mi khatpeuh a’ ding ai a phatna peuhpeuh ama a’ hi ding a, na pate uh nam tawh kizui-in na luah ding uh hi. Ahih hangin note’ mai panin tua gam a teng mite na hawlkhiat kei uhleh, na omsak lai uh mite pen na mittang uh a hong do, na pang uh a hong sun lingte tawh hong kibang ding uh a, na tenna gam uhah note hong gimsak ding uh hi. Amaute tunga hih dinga ka ngaihsut bangin note’ tungah kong hih ding hi, ci-in gen in,” a ci hi. Topa in Moses kiangah, “Israel mite kiangah hih bangin gen in: Note tungah ka hong piak Kanaan gamah na lut uh ciangin na leitaw lampang uh pen Zin gam panin Edom pang teng hi ding a, leitaw lam na gamgi uh nisuahna lamah Ci Tuipi mong pan kipan ding hi. Na gamgi uh Akrabbim mual leitaw lamah kawi-in Zin dong banin, Kadeshbarnea leitaw lamah pai ding hi. Tua ciangin Hazaraddar lamah paisuakin Azmon dongah pai ding a, Azmon panin Egypt Lui lamah kawi-in Tuipi-ah tawp ding hi. “Nitumna gamgi dingin Tuipi Lian le a gei dungteng na nei ding uh hi; hih pen nitumna lam na gamgi uh hi ding hi. “Leilu lam na gamgi ding uh pen Tuipi Lian panin Hor Mual dong na ciamteh ding uh hi. Hor Mual panin Hamath tumna ciang dong na ciamteh ding uh a, gamgi in Zedad dong ban ding hi. Tua ciangin Zifron dongah gamgi kikhung ding a, a mong pen Hazarenan-ah tawp ding hi; hih pen leilu lam na gamgi uh hi ding hi. “Nisuahna lam na gamgi uh Hazarenan panin Shefam dong na ciamteh ding uh hi. Gamgi pen Shefam panin Ain nisuahna lam Riblah dongah paisuk ding hi. Gamgi paisuk lai-in nisuahna lamah Khinnereth tuipi liangko dong ban ding hi. Jordan dongah gamgi paisuk ding a, a mong pen Ci Tuipi-ah tawp ding hi. Hih pen a kimkota gamgi a nei na leitang uh hi ding hi, ci-in gen in,” a ci hi. Tua ahih ciangin Moses in Israel mite thu pia-in, “Hih pen minam kua le minam langte tungah piak dingin Topa in a thupiak, aisanna tawh na luah ding uh leitang ahi hi. Bang hang hiam cih leh Reuben minamte a behbeh le Gad minamte in a behbehin amau’ luah ding ngah khinzo uh a, Manasseh minam alangte in zong ngah khinzo uh hi. Minam nih le minam langte in nisuahna lam, Jerikho nai Jordan galkhatah amau’ luah ding ngah khinzo uh hi,” a ci hi. Topa in Moses kiangah, “Luah dingin note’ tungah gam a hawm ding mite pen siampi Eleazar le Nun’ tapa Joshua ahi uh hi. Luah dingin gam a hawm dingin minam simah makai khat na la ding hi. “Hihte pen Kanaan gamah Israel mite a dingin gamh a hawm dingin Topa in a thupiak mite ahi hi,” a ci hi. Jerikho nai Jordan kiang Moab zanglei-ah Topa in Moses kiangah, “Amaute in amau’ neih a luah uh sung panin ten nadingin Levi mite tungah khuapite a piak dingun Israel mite thu pia in. Khuapi kiima lonona gamte Levi mite tungah na pia ding hi. Khuapite pen amau’ tenna hi ding a, a lonona gamte pen amau’ bawngte le a inn ganhingte le a ganhing khempeuh uh a’ ding ahi hi. Levi mite tungah na piak ding uh khuapi lonona gamte pen khuapikulh panin a kimkot pi tul le zanga ciang ban ding hi. Khuapi laizang panin na teh ding a, nisuahna lampang pi tulthum, leitaw lampang pi tulthum, nitumna lampang pi tulthum, leilu lampang pi tulthum hi ding a, a laizangah khuapi om ding hi. Hih pen amau’ khuapi lonona taanggam dingin a neih ding uh ahi hi. Levi mite tungah na piak uh khuapite pen bukna khuapi gukte hi ding a, mi thatte tua lai-ah na taisak ding uh a, tuate’ banah khuapi sawmli le nih na pia thuah ding uh hi. Levi mite tungah na piak ding uh khuapi vekpi sawmli le giat hi-in, a lonona gamte tawh hi ding hi. Israel mite’ neihsa sung panin na piak ding khuapite pen minam tamte tung panin tam la-in, minam tawmte tung panin tawm na la ding hi. Amau’ luah gamh tawh a kizui-in Levi mite tungah a khuapite uh a piak ciat ding uh ahi hi,” a ci hi. Topa in Moses kiangah, “Israel mite tungah hih bangin gen in: Jordan kantanin Kanaan gamah na tun uh ciangin, sawm lopi-in mi khatpeuh a thatkha mi thatte a va tai theih nading, note a dingin bukna khuapi dingin khuapite na teel ding uh hi. Thu kikhen dingin mihonpi mai-ah a din ma-in mi thatte a sih loh nadingin tua khuapite pen phulapa’ kiang panin note a dingin bukna hi ding hi. Na piak uh tua khuapite, note’ bukna khuapi gukte hi ding hi. Bukna khuapi dingin Jordan galkhatah khuapi thum, Kanaan gamah khuapi thum na teel ding uh hi. Sawm lopi-in mi khatpeuh a thatkhate a tai theih nadingin hih khuapi gukte pen Israel mite, khualmite, le note’ lakah a peemte a dingin bukna hi ding hi. “Ahih hangin mi khat in na-a kizang sik khat tawh midang khat satin a sih leh, amah mi that hi a, tua mi that pa kithat ding hi. Amah in mi a sih theih nading mah ahi a khutsunga om suang khat tawh a suk a, a sih leh, amah mi that hi a, tua mi that pa kithat ding hi. Tua ahih kei leh, amah in mi a sih theih nading ahi a khutsunga om sing a kibawl hiam khat tawh amah a sat a, a sih leh, mi that hi a, tua mi that pa kithat ding hi. A kinaipih pen khat in a phu la-in mi that pa that ding a, amah a tuahna peuhah that ding hi. “Amah in muhdahna tawh sunin, ahih kei leh bukin a khawh-a a sih leh, tua ahih kei leh galbawlna tawh a khutin tumin a sih leh, tua a tum pa kithat ding hi. Amah mi that hi a, a phulapa in a tuah ciangin tua mipa that ding hi. “Ahih hangin galbawl lopi-in thakhatin amah sunin, ahih kei leh buk lopi-in na khatpeuh tawh amah khawhin, ahih kei leh, amah pen ama gal hi lo, ama siat nading a zong hi lo napi-in, mi a sih theih nading suang khat zangin a muh lohpi-in amah in deng kha-in a sih leh, tua mi that pa le a phulapa’ kikalah hih ngeina kipte tawh kizui-in mihonpi in khen ding hi. A phulapa’ khutsung panin mihonpi in mi that pa honkhia-in, mihonpi in amah a va taina, bukna khuapi-ah amah puakkik ding a, sathau siangtho a kinilh siampi lianpen pa a sih matengin tua khua-ah a teng ding hi. Ahih hangin hun khat peuhpeuhah amah a taina bukna khuapi gamgi khengin a pai a, a phulapa in ama bukna khuapi daihual pualamah amah mu-in, a phulapa in mi that pa a thah leh, tua a that pa mawh lo ding hi. Bang hang hiam cih leh siampi lianpen pa a sih matengin tua mipa a bukna khuapi sungah a om ding ahi hi. Ahih hangin siampi lianpen pa a sih khit ciangin mi that pa a neihsa leitangah ciahkik thei ding hi. “Hihte pen na tenna khempeuh uhah na khang tawntungun thukham le ngeina hi ding hi. Khatpeuh in mi khat a thah leh, tecite’ genna siksanin mi that pa kithat ding hi. Ahih hangin teci khat bek’ teci panna siksanin kuamah kithat lo ding hi. Tua tham loin, sihna thuak dingin a kilawm mipa tat nading sum na sang kei ding uh hi; amah kithat ding hi. Siampi lianpen pa a sih ma-in bukna khuapi-ah a taisa mipa a gamah a ciahkik theih nadingin ama nuntakna tat nading sum na sang kei ding uh hi. Na tenna uh leitang na ninsak kei ding uh hi; bang hang hiam cih leh mi thahna in leitang ninsak a, a that mipa a kithah kei buang leh, tua mi kithahna leitang siansak nading thudang om thei lo hi. A laizangah keimah ka tenna leitang na ninsak kei ding uh hi; bang hang hiam cih leh Topa keimah, Israel mite’ laizangah ka teng hi, ci hi, ci-in gen in,” a ci hi. Josef’ tapate beh Manasseh, Manasseh’ tapa Makhir, Makhir’ tapa Gilead, Gilead’ tapa beh lutangte in hong naihin Moses le Israel mite beh lutang ahi makaite’ mai-ah thu gen uh a, “Israel mite tungah aisanna tawh gamhluah dingin leitang piak ding Topa in ka topa tungah thu hong pia hi. Ka sanggampa uh Zelofehad’ gamhluahte a tanute tungah piak dingin Topa in ka topa tungah thu hong pia hi. Ahih hangin Israel sungah minam dangte’ tapate khat peuhpeuh tawh amaute kiteng leh ka pate uh’ gamhluah panin amau a’ teng kilakhia-in a manawh minamte tungah tua gamh kipia beh ding hi. Tua ahih ciangin ko’ ngahsa gamh a kikhenkhia ding ahi hi. Israel mite’ Jubilee hong tun ciangin amau a’ te pen a manawh minamte’ tungah kipia beh ding hi. Ka pa uh namte’ gamhluah panin amau a’ kikhenkhia ding hi,” a ci uh hi. Tua ahih ciangin Moses in Topa’ genna tawh kizui-in Israel mite thu pia a, “Zelofehad minamte’ genna man hi. Zelofehad’ tanute tawh kisai-in Topa’ thupiak hih bang ahi hi: ‘Amaute in hoih a sak pente uh tawh kiteng uh hen. Ahih hangin amau’ behte bek tenpih thei ding uh hi. Israel mite’ gamhte minam khat pan namdang khatah paikhia lo ding hi; bang hang hiam cih leh Israel mi khempeuh a minam gamhluah ciat uh tawh kip ding uh hi. Israel mi khempeuh in a pate uh’ gamh a luah theih nadingun, Israel mite’ sung panin minam khat peuhpeuhah gamh a nei tanu khempeuh pen a pate’ nam sung khat peuhpeuh’ zi hi ding hi. Tua ahih ciangin minam khat pan adang ah gamh paikhia lo ding hi; bang hang hiam cih leh Israel mite’ sung panin minam khempeuh amau’ gamh ciat tawh kip ding uh hi,’ ci hi,” ci-in a gen hi. Topa in Moses a thupiak bangin Zelofehad’ tanute gamta uh hi. Bang hang hiam cih leh Zelofehad’ tanu Mahlah, Tirzah, Hoglah, Milkah, le Noah-te, a pate uh’ sanggamte’ tapate tawh kiteng uh hi. Josef’ ta Manasseh’ tapate’ innkuan sungah amaute in pasal nei uh a, a pate nam innkuan sungah amau’ gamhluahte a kip hi. Hihte pen Jerikho nai Jordan kiang Moab zanglei-ah Israel mite tungah Moses tungtawnin Topa in a piak thupiaknate le ngeina kipte ahi hi. Hihte pen Jordan galkhat gamlak, Suf galkhat Arabah gam sung, Paran le Tofel, Laban, Hazeroth le Dizahab kikalah Moses in Israel-te khempeuh tungah a gen thute ahi hi. Tua mun pen Horeb panin Seir Mual tawnin Kadeshbarnea lamah ni sawm le ni khat paina ahi hi. Moab gam Jordan galkhatah Moses in hih thu gentel a, “Horeb gam sungah Topa i Pasian in eite’ kiangah, ‘Hih mualah sauvei na om khinzo uh hi. Kithawi-in na khualzin uh kipan kik unla, Amor mite’ mualtung gam le Arabah kiim, mualtung gam, lei niamna gam, Negeb gam khempeuh, le Kanaan mite’ gam tuipi gei le Lebanon, gun golpi ahi Eufratis gun dongin pai un. En un, note’ mai-ah leitang ka koihzo hi. Pai unla, Topa in na pate uh Abraham, Isaac, Jakob, le amau’ nunga a suanlekhakte uh tungah piak dingin a ciam leitang luah un,’ hong ci hi. “Tua hun laitakin note kiangah, ‘Kei guak bek in note kong enzo kei ding hi. Topa na Pasian un note tampi hong phasakzo hi. En un, note tuhunin vantung aksite zahin tampi na pha uh hi. Topa, na pate uh Pasian in tu-a zah tulin note hong bawl hen la, note tungah hong ciamsa bangin thupha hong pia ta hen! Kei guak in note’ thu kineihnate siansak nading tavuan lianpi bangci puakzawh ding ka hi hiam? Na minam uh tawh a kizui-in a pil, thuthei, thuphawksa mite teel unla, note’ lutangin amaute ka koih ding hi,’ kong ci hi. Note in, ‘Nangma hong gen thu pen kote a dingin hoih hi,’ ci-in nong dawng uh hi. Tua ahih ciangin na minam lutang uh ahi, a pil thu phawksa mite ka la a, note’ tungah lutangin a tul uk, a za uk, a sawmnga uk, a sawm ukte, le uliante na minam khempeuh sung uhah ka koih hi. “Tua hun laitakin na thukhente uh ka thuhilh a, ‘Na sanggamte uh thu neihte za unla, mi khat le a sanggampa ahi a, amah tawh a om khualmipa tawh ahi zongin thu a mantakin khen un. Thukhenna-ah angvan na nei kei ding uh hi. A neu le a liante a kibangin a thu na ngai ding uh a, maitang zahtak tuam na nei kei ding uh hi. Bang hang hiam cih leh thukhenna pen Pasian-a’ ahi hi. Note a dingin a haksa lua thute kei kiangah nong paipih ding uh a, keimah in tua thu ka za ding hi,’ ka ci hi. Amaute’ hih ding na khempeuh tua hunin amaute kiangah thu ka pia hi. “Tua ciangin Horeb gam panin i ding khia a, Topa i Pasian in hong thupiak bangin Amor mite mualtung gam zuatna lamkalah note’ muhsa a lian a lauhuai sehnel gam i nawk khit ciangin Kadeshbarnea i tung hi. Tua ciangin note’ kiangah, ‘ Topa i Pasian in eite hong piak Amor mite’ mualtung gam na tung khin uh hi. En un, Topa na Pasian un note’ mai-ah leitang koihzo hi. Topa, na pate uh Pasian in note tungah hong gensa bangin paito-in luah un. Lau kei unla, lungkia kei un,’ kong ci hi. “Tua ciangin na vekpi-un ka kiangah nong pai uh a, ‘Eite a dingin gam va enin, i paitoh nading lampi le i zuat ding khuapite hong genkik thei ding eite’ mai-ah mi sawl ni,’ nong ci uh hi. “Tua thu hoihtuak ka sa a, minam khatah khat, note mi sawm le nih kong la hi. Amaute kithawi-in mualtung gamah paito uh a, Eshkol kuamah pai-in va en uh hi. Amaute in tua gam singgah pawlkhat a khutun hong tawi-in i kiangah hong tunpihsuk uh a, amaute in eite kiangah thu hong zasakkikin, ‘ Topa i Pasian in eite hong piak gam pen leitang hoih ahi hi,’ hong ci uh hi. “Ahi zongin note paito nuam loin, Topa na Pasian un hong thupiak na nial uh hi. Na puanbukte uh sungah na phun uh a, ‘ Topa in eite hong mudah ahih manin eite a hong susia ding Amor mite’ khut sungah hong pia dingin Egypt gam panin eite hong paikhiatpih hi. Koi lai-ah paito ding ihi hiam? I sanggamte in i lungsim hong siasak khin uh a, “A mite ei sangin lianzaw-in sangzaw uh hi. A khuapite lianin van banin ki-um hi. Tua tham loin Anak mite tua munah ka mu uh hi,” hong ci uh hi,’ na ci uh hi. “Tua ciangin note kiangah, ‘Lau kei unla, amaute kihta kei un. “ Topa in note’ thu hong za a, a heh suakin kiciam a, Note’ hangin kei tungah zong Topa heh a, ‘Nang zong tua gamah na pai kei ding hi. Nun’ tapa Joshua, nangma mai-ah a ding pa lut ding hi. Amah hanthawn in; bang hang hiam cih leh amah in Israel mite tua gam luahsak ding hi. “Tua tham loin galte’ mat suak ding hi, na cih uh na taneute uh le, tuhun laitakin a sia le a pha a khenthei nai lo na tate uh, tua gamah pai ding a, amaute tungah tua gam pia-in, amaute in tua gam luah ding uh hi. Ahih hangin note ahihleh, kihei unla, San Tuipi lam manawhin sehnel gamah pai un,’ hong ci hi. “Tua ciangin note in kei nong dawng uh a, ‘ Topa’ tungah ka khial khin uh hi. Topa i Pasian in hong thupiak bang teekteekin paito-in i do ding hi,’ nong ci uh hi. Na milipun na galhiam uh tawh na kithawi uh a, mualtung gamah paitoh ding na baih ngaihsut uh hi. “Tua ciangin Topa in kei kiangah, ‘Amaute kiangah gen in: Note lakah kei om lo ka hih manin kuanto kei unla, do kei un. Tua bangin kuanto le-uhcin na galte uh na lel ding uh hi, ci in,’ hong ci hi. Tua ahih ciangin note kiangah kong gen a, note in na ngai nuam kei uh hi. Topa’ thupiakna na nial uh a, mualtung gamah na kuanto hamtang uh hi. Tua ciangin tua mualtung gamah a teng Amor mite hong kuanin, Seir gam Hormah ciang dongah khuai bangin hong delhin hong zo uh hi. Note hong ciahkikin Topa’ mai-ah na kap uh hi. Ahih hangin Topa in na aw uh hong ngai loin, a bil zong hong ngat lo hi. Tua ahih ciangin tua thu hangin ni tampi sung Kadesh munah na om uh hi. “Tua ciangin Topa in kei tungah hong gen bangin eite kihei-in San Tuipi lam manawhin sehnel gamah i pai a, ni tampi sung Seir Mual tung gamah i pai kawikawi hi. “Tua ciangin Topa in kei tungah, ‘Hih mual kiimah sauvei khop na pai khinta uh hi; leilu lamah kihei un. Mite’ tungah hih bangin thu pia in: Seir gamah a teng Esau’ suanlekhak, na behte uh gam sung a nawk ding na hi uh hi. Amaute in note hong kihta ding uh hi. Ahi zongin note kidawm un. Amaute tawh kisel kei un; bang hang hiam cih leh amau’ leitang themkhat zong no kong pia peuhmah kei ding hi. Esau’ neih dingin ama tungah Seir Mual pia khin ka hih manin khe a ta khopzah zong no kong pia kei ding hi. Na nek ding uh an amaute’ tung panin sum tawh na lei ding uh a, na dawn ding uh amau’ tui zong sum mah tawh na lei ding uh hi. “‘Bang hang hiam cih leh na sepna khempeuh uhah Topa na Pasian un note thupha hong pia hi. Hih a zai sehnel gam na paina uh amah in hong thei hi. Hih kum sawmli sung Topa na Pasian uh no tawh hong om hi. Bangmah na kisam kei uh hi, ci-in gen in,’ hong ci hi. “Tua ahih ciangin Seir gamah a teng Esau’ suan i behte, le Elath le Eziongeber khua pan hong kipan Arabah lampi panin i paikhia suak hi. “Tua ciangin eite kihei-in Moab gam lamah i pai hi. Topa in kei kiangah, ‘Amau’ leitang na neih dingun note’ tungah hong pia lo ding ka hih manin Moab mite gimsak kei unla, amaute tawh galin kido kei un; bang hang hiam cih leh a neih dingun Lot’ suanlekhakte tungah Ar khua ka piazo hi,’ hong ci hi. (Anak mite zahin a tun a sang, a lian, a tam Emim mite tua lai-ah teng ngei hi. Anak mite mah bangin amaute zong Refaim mite kici a, ahih hangin Moab mite in Emim ci uh hi. Hor mite zong Seir-ah nidangin teng ngei a, ahih hangin Topa in amaute’ tungah a piak amau’ leitang tungah Israel mite in a hih mah bangin, Esau’ suanlekhakte in amaute suankhia-in susia uh a, amau’ munah teng uh hi.) “Tua ciangin Topa in, ‘Tu-in ding unla Zered lui kantan un,’ hong cih bangin Zered lui i kantan hi. Amaute tungah Topa a kiciam mah bangin galsim mi ahi tua khangmite khempeuh gam sungah a sih khit dong ahi, Kadeshbarnea i nusiat a kipan Zered lui i kantan dong kikal kum sawmthum le kum giat ahi hi. Amaute a bei khit mateng gamlakah amaute a susia dingin Topa langpang takpi hi. “Tua ahih ciangin mihingte lak panin galsim mite bei-in a sih khit ciangin Topa in kei kiangah, ‘Tuni-in Ar khua san takah Moab gamgi a kantan ding na hi uh hi. Ammon mite’ leitang na neih dingun khat zong hong pia lo ding ka hih manin, Ammon mite’ gamgi na nai uh ciangin amaute gimsak kei unla, amaute tawh kido kei un; bang hang hiam cih leh a neih dingun Lot’ suanlekhakte tungah ka pia khin hi,’ hong ci hi. Amah in Seir-ah a teng Esau’ suanlekhakte a dingin amaute’ mai-ah Hor mite a suksiat mah bangin amaute in tua mite susia-in tuni dongin amau’ munah teng uh hi. Gaza ciang dong khuaneute-ah a teng Avvim mite ahihleh Kaftor pana hong pai Kaftor mite in susia-in amau’ munah teng uh hi.) “Moab gam sung i khen’ ciangin Topa in, ‘Ding un, na khualzin uh kipan unla, Arnon kuam kantan un. En un, Heshbon kumpipa, Amor mi Sihon le ama leitang note’ khut sungah kong piazo hi. Amah suankhiat ding kipan unla, gal sungah amah tawh kido un. Nomau’ thu za-in note’ hangin lingin a gim ding ahi, mun khempeuhah a om mite’ tungah note hong kikihtakna le note’ hanga launa ka tunsak ding tuni-in ka kipan ding hi,’ hong ci hi. “Tua ahih ciangin Kedemoth sehnel gam panin Heshbon kumpipa Sihon’ kiangah kilemna ding thu genin kamtai ka sawl a, ‘Na gam sung hong nawksak in. Lampi bekah ka pai ding uh a, taklam ahi a, veilamah ahi zongin ka pial kei ding uh hi. Ka nek ding uh an sum tawh lei dingin nong zuak ding a, ka dawn ding uh tui sum tawh lei dingin nong pia ding hi. Khe tawh hong nawksak bek in. Jordan kantanin Topa ka Pasian un kote hong piak leitangah ka tun matengun Seir-a a teng Esau’ suante le Ar-a a teng Moab mite in kei hong paisak mah bangun hong paisak in,’ ka ci hi. “Ahih hangin Heshbon kumpipa Sihon in eite hong paisak lo hi; bang hang hiam cih leh tuhuna mah bangin na khutsung uhah amah hong piak theih nadingin Topa na Pasian un a lungsim khauhsakin, amah paupeengsak hi. “Tua ciangin Topa in kei kiangah, ‘En in, Sihon le a leitang nang tungah piak kong kipan khinzo hi. Ama leitang na luah theih nadingin suankhiat kipan in,’ hong ci hi. Tua ciangin Sihon le a mite khempeuh eite a do dingin Jahaz-ah hong pai uh hi. Topa i Pasian in amah hong pia a, amah le a tapate le a mi khempeuh i zo hi. Tua hunin a khuapi khempeuh i la a, a khuapi khempeuh, papi, nupi, le naupangte i susia maimang a, bangmah i siit kei hi. I laksa a khuapi sunga van kinusiate tawh a ganhingte uh eima a dingin i la bek hi. Arnon kuam mong a a om Aroer le tua kuam sunga om khuapi Gilead ciang dongah eite a dingin khuapikulh a sanglua khat beek om lo a, Topa i Pasian in a vekpi-in eite’ khut sungah hong pia hi. Ammon mite’ leitang ahi Jabbok gun pang khempeuh le mualtung gam khuapite le Topa eite’ Pasian in hong khamna munte bek i va neh kei hi. “Tua ciangin eite kihei-in Bashan lamah i paito a, Bashan kumpipa Og le ama mite khempeuh Edrei-ah eite a do dingin hong kuankhia hi. Ahih hangin Topa in kei kiangah, ‘Amah kihta kei in; bang hang hiam cih leh amah le a mite khempeuh le a leitang nangma khut sungah kong pia khinzo hi. Heshbon-ah a teng Amor kumpipa Sihon na bawl bangin ama tungah na bawl ding hi,’ hong ci hi. “Tua ahih ciangin Topa i Pasian in eite’ khut sungah Bashan kumpipa Og le a mite khempeuh zong hong pia a, ama a dingin mi khat beek a suakta nawn lo dingin i vatmai hi. Tua hunin a khuapite khempeuh uh i la a, amau’ kiang pan i lak loh khuapi khat zong om lo hi. Tua banga i lakte pen Bashan gam a Og kumpi gam sung, Argob gambup, khuapi sawmgukte ahi hi. Kulhpi-a ki-um lo khuaneu tampite simloh, hih khuapite khempeuh kulh sangpi, kongpi le sikzawlte tawh a muanhuai takin a kibawl ahi hi. Heshbon kumpipa Sihon i bawl bangin amaute i susiamang a, a khuapi khempeuh, papi, nupi, le naupangte i susia hi. Ahih hangin a ganhing khempeuh le khuapi sunga van kinusiate i la hi. “Tua ahih ciangin tua hun laitakin, Jordan galkhat a om Amor kumpi nihte’ khutsung pan, Arnon kuam panin Hermon Mual dong (Sidon mite in Hermon pen Sirion ci a, Amor mite in Senir ci uh hi), mualzang khuapite khempeuh le Gilead gam khempeuh le Bashan gam khempeuh, Salekah le Edrei dong, Bashan-a om Og kumpi gam khuapite i la hi. (Bang hang hiam cih leh Bashan kumpipa Og bek Refaim gam sungah a omlai ahi hi. Ama lupna a han pen suang han hi a, Ammon mite’ khuapi Rabbah-ah tua han omlai hi lo ahi hiam? Tua han a sauna pi sawm le li dektak hi a, a zaina pi guk ahi hi.) “Tua hunin hih leitang i luah ciangin, Reuben mite le Gad mite tungah Arnon kuam mong a a om Aroer pan le Gilead mualtung gam kimkhat a khuapite tawh ka pia hi. Gilead gam a omlai teng le Argob gam khempeuh ahi, Og kumpi gam, Bashan gam khempeuh, Manasseh minam kimkhatte tungah ka pia hi. (Bashan gam buppi pen Refaim leitang kici hi. Manasseh mi Jair in Bashan kici Argob gam khempeuh, Geshur mite le Maakath mite’ gamgi dong la a, tua sunga khuaneu minte ama min tamsakin tuni donga a kip Havvothjair a phuak hi.) “Makhir tungah Gilead ka pia a, Reuben mite le Gad mite tungah Gilead panin Arnon kuam dong, gamgi dingin a kuam laita, Ammon mite’ gamgi ahi Jabbok gun dong tawh ka pia hi. Arabah gam zong, a gamgi dingin Jordan tawh, Khinnereth pan nisuahna lama om Pisgah mualpang nuai-a Ci Tuipi ahi Arabah tuipi ciang dong amaute ka pia hi. “Tua hunin note thu kong pia a, ‘ Topa na Pasian un na neih dingun hih leitang hong piazo hi. Na galhang mite khempeuh uh galhiam tawh kithawi-in Israel mi na sanggamte uh mai-ah va kuan ding hi. Ahih hangin na zite, na taneute, le na ganhingte uh (ganhing tampi na neih uh ka thei hi) note kong piaksa khuapite-ah om ding uh a, Topa in note hong piak bangin na sanggamte uh tungah lungsim tawlngakna pia-in, Topa na Pasian un Jordan galkhatah amaute a piak leitang amaute in zong a luah matengun na huh ding uh hi. Tua ciangin note kong piaksa ahi na neihsa ciat uhah note khempeuh na ciah ding uh hi,’ kong ci hi. “Tua hun laitakin Joshua thu ka pia a, ‘ Topa na Pasian in hih kumpi nihte’ tungah a bawlte khempeuh na mit in mu khin a, na nawk lai ding kumpi gam khempeuh tungah zong Topa in tua mah bangin hih ding hi. Amaute na kihta kei ding hi; bang hang hiam cih leh nang a’ dinga hong dosak pa pen Topa na Pasian ahi hi,’ ka ci hi. “Tua hunin keimah in Topa’ tungah ka thum a, ‘Topa Pasian aw, na liatna le na thahatnate na nasempa’ tungah lah ding a hong kipan pan bek na hi hi; bang hang hiam cih leh vantung hitaleh leitungah hitaleh nangma hih bangin tua bang nasep leh a vanglian gamtatna a hih thei bang pasian om ahi hiam? Kei hong paisak inla, Jordan galkhat a om gam hoih, tua mualtung gam hoih le Lebanon hong musak in, ci-in kong thum hi,’ ka ci hi. “Ahih hangin note’ hangin kei’ tungah Topa heh a, ka thunget hong pia lo hi. Topa in kei kiangah, ‘Phazo hi; hih thu kei kiangah hong gen nawn kei in. Pisgah mual dawnah paito inla, nitumna lam, leilu lam, leitaw lam, le nisuahna lamah khuadakto inla, na mit tawh gal et in; bang hang hiam cih leh nangmah in hih Jordan na kantan kei ding hi. Ahih hangin Joshua thu pia inla, hanthawnin thakhauhsak in; bang hang hiam cih leh hih mite’ mai-ah amah pai ding a, nangmah in na muh ding leitang amaute luahsak ding hi,’ hong ci hi. “Tua ahih ciangin Bethpeor gal-a kuam sungah i taam lai hi. “Tu-in Israel-te aw, note nungta-in, Topa, na pate uh Pasian in note hong piak leitangah va pai-in na luah theih nadingun note kong hilh thukhamte le ngeina kipte don unla zui un. Topa na Pasian un hong piak ahi keima hong thugente na zuih theih nadingun no kong thupiakte behlap loin, zong na khiam kei ding uh hi. Na mit un Baalpeor-ah Topa’ hihna mu khin hi; bang hang hiam cih leh na Pasian un note’ lak panin Peor-a Baal a zui mi khempeuh susia a, ahih hangin Topa na Pasian uh a lenkipte khempeuh tuni-in na hinglai uh hi. “En un, note in a luah dingin na lutna uh gam sungah na zuih dingun Topa ka Pasian in kei hong thupiak bangin thukhamte le ngeina kipte kong hilh khinzo hi. Tuate zui unla, sem un; bang hang hiam cih leh hih thukhamte khempeuh a zak uh ciangin, ‘Hih minam liante pen a pil thuthei taktak hi,’ a ci ding uh mite’ muhna-ah hih thu pen nomau’ pilna le nomau’ theihna hi ding hi. “Bang hang hiam cih leh eite in Topa i sap hun simin eite’ kiangah i Pasian hong nai zahin tua bang pasian a nei minam lian koi-ah om ahi hiam? Tuni-in note kong hilh thute bangin thukham le ngeina kip a man a nei minam lian koi-ah om ahi hiam? “Mei in mual kangin van laizang dong banto-in, khuamial le meii le khuazing in a tuamcip laitakin note a nai-ah hong pai-in mual bulah na ding uh hi. Tua ciangin mei sung panin Topa in note’ kiangah thu hong gen hi. Note in awging na za uh a, ahih hangin bangmah mu loin, awging bek a om hi. Thupiak Sawmte ahi note’ hih dinga hong thupiak ama thuciamna note’ tungah hong gen a, amah in suangpek nih tungah tuate a gelh hi. Note in na luah ding uh gam sungah na zuih theih nadingun, thukhamte le ngeina kipte note kong hilhna ding tua hun laitakin Topa in kei thu hong pia hi. “Tua ahih ciangin note hoihtakin kidawm un. Horeb-ah mei sung panin Topa in note’ tungah thu hong gen ni-in bangmah mu lo na hih manun, note a dingin lim khat peuhpeuh, pasal tawh a kibang hitaleh numei tawh a kibang hitaleh, leitung a om ganhing khat peuhpeuh tawh a kibang hitaleh, huihlaka leeng kha a nei vasa khat peuhpeuh tawh a kibang hitaleh, leitungah a bokvak khat peuhpeuh tawh a kibang hitaleh, leinuai-ah a om tui sunga ngasa khat peuhpeuh tawh a kibang hitaleh, a kiseek milim bawlna tawh a sia-in na gamtat khak loh nadingun kidawm un. Note in na mit uh tawh vantung lam ento-in, ni le kha le aksite, vantung na khempeuh na muh uh ciangin, mun khempeuh a mite’ tungah Topa na Pasian un a piak nate’ lamah kihei-in tuate bia-in a na na sep khak loh nading uh kidawm un. Ahih hangin Topa in tuni-a bangin sik meikhuk tawh a kibang Egypt panin ama neih mi dingin note hong la-in hong paikhiatpih khin hi. Tua tham loin note’ hangin kei’ tungah Topa heh a, keimah in Jordan kantan loin Topa na Pasian un note’ gamh dingin hong piak leitang hoihah ka lut loh nadingin a kiciam hi. Hih gamah kei ka si ding a, Jordan khengin ka pai thei kei ding hi. Ahih hangin note in kantanin tua gam hoih na luah ding uh hi. Topa na Pasian un note tawh hong bawl thuciamna mangngilhin, Topa na Pasian un note’ hih dinga hong kham lim khat peuhpeuh tawh a kibang a kiseek milim na bawlkhak loh nadingun kidawm un. Bang hang hiam cih leh Topa na Pasian uh hong kangtum thei mei tawh kibang a, a haza Pasian ahi hi. “Note in tuleta nei-in gam sungah mi khangham na suah uh ciangin, na khat peuhpeuh tawh a kibang limin a kiseek milim bawlna le Topa na Pasian uh’ muhna-ah a sia bawlna tawh amah a heh nadingin na siat gamtat uhleh, Jordan galkhat luah dingin na paina leitang uhah na siat maimang baih nadingun note’ langkhatah teci pang dingin tuni-in van le lei ka sam hi. Tua leitang tungah note sauvei na hing kei ding uh a, na siamaimang ding uh hi. Topa in mite lakah note hong thehthang ding a, Topa in note hong hawlna minamte lakah mi tawmcik bek na omlai ding uh hi. Note in tua lai munah mite’ khut in a bawl, khua mu thei lo, khua za thei lo, a ne thei lo, a nam thei lo sing le suang pasian-te’ na na sem ding uh hi. Ahih hangin tua lai panin Topa na Pasian uh na zong ding uh a, na lungsim khempeuh uh le na nuntakna khempeuh uh tawh na zon uhleh amah na mu ding uh hi. Note in gimna thuakin, mailam hunah hih nate khempeuh note’ tungah hong tun ciangin, Topa na Pasian uh lamah kihei-in ama thu na mang ding uh hi. Bang hang hiam cih leh Topa na Pasian uh hehpihna a nei Pasian ahi hi. Amah in note hong tamasak loin, hong nusia lo ding a, na pate uh tawh a thuciamna mangngilh lo ding hi. “Pasian in leitungah mi a piansak ni a kipan, note’ pian’ ma-a hun beisa thu tu-in kan unla, van mong khat pan mong khat kikal thu zong kan un. Hih bang na lian piang ngei-in, a kiza ngei peuhmah hiam? Note in Pasian’ aw za khin napi-in na hin lai uh bangin meikuang sung panin pasian dang khat peuhpeuh’ pauna aw mi khat peuhpeuh in za ngei ahi hiam? Tua ahih kei leh, Topa na Pasian un Egypt gam sungah note a dingin na muhna uhah a bawlte khempeuh tawh a kibangin, ze-etna, lim, nalamdang, gal, a vanglian le a thahatna le a lauhuai mahmah tawh pasian dang khat peuhpeuh in ama mite a dingin minamdang khat sung pan minam khat a va lak ding hanciam ngam ngei ahi hiam? Topa Pasian hi, ci-in na theih nadingun note’ tungah hih thu hong kilak hi a, amah simloh kuamah dang om lo hi. Amah in note hong khal theih nadingin vantung panin ama aw note hong zasak hi. A mei lianpi leitungah note hong musak a, mei sung panin ama aw na za uh hi. Amah in na pate uh itin, amau’ suanlekhakte hong teel a, amahmah in ama vanglian tawh Egypt panin note hong paikhiatpih a, note sangin a tamzaw le a vanglian zawte’ gamah hong paipihin, note’ luah dingin amau’ leitang hong piak nadingin note’ mai-ah amaute hong hawlkhiatsak ahih manin tuni-in hih bangin na om thei uh hi. Tua ahih ciangin tunga om vantung hitaleh nuai-a om leitung hitaleh ah Topa pen Pasian ahihna thu tuni-in thei unla, na lungsim uhah ciamteh un; kuamah dang om lo hi. Tua ahih ciangin note le note’ khita na tate uh tungah thu hong nuamin, Topa na Pasian un a tawntung a hong piak gam sungah na khan uh na sausak theih nadingun tuni-a no kiangah kong gen ahi ama thukhamte le a thupiakte na zui ding uh hi,” a ci hi. Reuben mite a dingin mualzang sehnel gam Beza khua, Gad mite a dingin Gilead gam sung Ramoth khua, le Manasseh mite a dingin Bashan gam sung Golan khua ahi hi. Moses in Israel mite tungah thu pia hi. Moses in Israel-te khempeuh samin amaute kiangah, “Israel-te aw, tuni-a note’ zakin kong gen thukhamte le ngeina kipte ngai unla, note in thei-in limtakin zuih ding na ngaihsun ding uh hi. Topa i Pasian in eite tawh Horeb-ah thuciamna khat bawl hi. Topa in i pute i pate bek tawh hih thuciamna a bawl hi loin, tuni-a a hinglai eite khempeuh tawh zong a bawl ahi hi. “‘Kei pen salsuahna Egypt leitang panin note a hong paikhiatpih Topa na Pasian uh ka hi hi. “‘Keimah longal pasian dang na nei kei ding uh hi. “‘A kiseek milim hitaleh, tunga vantung hitaleh, nuai-a leitung hitaleh, leinuai-a om tui sung hitaleh ah a om na khat peuhpeuh a sun khat peuhpeuh note a dingin na bawl kei ding uh hi. Amaute’ mai-ah kun loin, amau’ na na sem kei ding uh hi; bang hang hiam cih leh keimah Topa note’ Pasian, a aam Pasian ka hi a, kei hong mudahte’ tungah a pate’ mawhna a tate’ tungah khang thum khang lina dongin thuk-in, ahih hangin kei hong itin ka thupiakte a zui mi a tul tampite’ tungah itna kip a lak pa ka hi hi. “ Topa note’ Pasian’ min a sia lamin na zang kei ding uh hi; bang hang hiam cih leh Topa in ama min a sia lamin a zang mi a mawh lo hi, ci lo ding hi. “‘ Topa note’ Pasian in hong thupiak bangin na sianthosak nadingun Sabbath ni tang un. Ni guk sung na semin na nasep ding khempeuh uh na hih ding uh hi. Ahih hangin a ni sagih ni pen Topa note’ Pasian’ Sabbath ni ahi hi. Tua ni-in note bangin na nasem numei le na nasem pasalte uh a tawlngak theih nadingin note, na tapate, na tanute, na nasemnute, na nasempate, na bawngtal, na la, na ganhing khat peuhpeuh uh le na huang sung uha om zinte in na khat peuhpeuh sem lo ding uh hi. Egypt-ah nasem na hihna uh le tua lai panin Topa na Pasian un a vangliatna khut le a thahatna tawh hong paikhiatpihna na phawk ding uh hi. Tua ahih ciangin Sabbath ni na tan’ ding uh Topa note’ Pasian in thu hong pia hi. “‘ Topa note’ Pasian in hong piak leitang tungah na khan uh sau-in na nopsak theih nadingun Topa note’ Pasian in hong thupiak bangin na nu na pa uh zahtak un. “‘Mi na that kei ding uh hi. “‘Nulepa mawhna zong na bawl kei ding uh hi. “‘Na na gu kei ding uh hi. “‘Na vengte uh langkhatah zong a man loin teci na pang kei ding uh hi. “‘Na vengte uh zi zong na deihgawh kei ding uh hi. Na vengte’ inn, a lo, a nasempa, a nasemnu, a bawngtal, a la, ahih kei leh na vengte’ na khat peuhpeuh na deihgawh kei ding uh hi,’ ci hi. “ Topa in mei, meii, le a mial mahmah sung panin awging lianpi tawh mualtung a no a kikhawm khempeuh tungah hih thute hong gen a, amah in bangmah dang genthuah lo hi. Amah in suangpek nih tungah tuate gelhin, tua suangpeekte kei tungah hong pia hi. “Mei in mual a kat laitakin khuamial sung panin awging na zak uh ciangin minam lutang khempeuh le upate kei kiangah hong pai uh hi. Note in, ‘En in, Topa i Pasian in a minthanna le a liatna eite’ tungah hong lak khin a, mei sung panin ama awging i za khin hi. Pasian in mi hopih napi, mi a hinglai veve-in tuni-in i mu hi. Tua ahih ciangin bang hangin tu-in eite si ding ihi hiam? Hih mei lianpi in eite hong kangtum ding hi. Topa i Pasian’ awging za lai lehang eite i si ding hi. Bang hang hiam cih leh a si thei mihing khempeuh sung panin eite’ zak bangin mei sung panin a nungta Pasian a paukhiatna awging za-in a nungta lai kua om ahi hiam? A nai-ah va pai inla, Topa i Pasian in a gen ding khempeuh va za in. Topa i Pasian in nang tungah hong genteng ko’ tungah nang hong gensawn in. Kote in hong mangin ka sem ding uh hi,’ nong ci uh hi. “Kei kiangah nong gen uh ciangin Topa in na thu uh a za hi. Topa in kei kiangah, ‘Hih mite in nang kiangah hong gen uh thu ka za khin a, a gen khempeuh uh a manin gen uh hi. Amaute le a suan a khakte uh a nopsak tawntung theih nadingun keimah zahtak ding le ka thupiak khempeuh zuih ding hih bang ngaihsutna nei tawntung le-uh ka deih ahi hi. Pai inla amaute kiangah, “Na puanbuk uhah ciah un,” ci in. Ahih hangin nang, kei kiang hih lai-ah ding in. Amaute’ neih dingin ka piak leitangah amaute in a zuih theih nadingun amaute na hilh ding thupiakna le thukhamte le ngeina kipte khempeuh nang tungah kong gen ding hi,’ hong ci hi. “Tua ahih ciangin Topa na Pasian un note hong thupiak bangin na gamtat ding uh na kingaihsun ding uh a, ama thu panin taklam hitaleh veilam hitaleh ah na pial kei ding uh hi. Note nungta-in, nuamsa-in na luah ding uh leitangah sawtpi na nuntak nadingun Topa na Pasian un note hong thupiakna lampi khempeuh na tawn ding uh hi. Tua ahih ciangin Israel-te aw, note nuamsa-in, Topa, na pate uh Pasian in note tungah hong ciamsa bangin bawngnawi le khuaizu a luanna gamah tampi pha-in na khan theih nadingun hih thute za unla, na zuih ding uh ngaihsun un. “Israel-te aw, za un: Topa i Pasian, Topa khat bek ahi hi. Topa note’ Pasian, na lungsim khempeuh uh, na nuntakna khempeuh uh, le na thahatna khempeuh uh tawh na it ding uh hi. Tuni-a no kong piak hih thute na lungsim uhah om ding hi. Na tate uh tungah limtakin na hilh ding uh a, na innsung uhah na tut uh ciang, lampi-ah na pai uh ciang, na lup ciang uh le na thawh ciangun tua thute na gengen ding uh hi. Na khut tung uhah lim dingin tuate na hen ding uh a, na mitte uh kikalah tuate pen talsuante bang hi ding hi. Na inn kongkhak khuam tung uh le na kongpi uh tungah tuate na gelh ding uh hi. “ Topa na Pasian un note piak dingin na pate uh Abraham, Isaac, le Jakob tungah a ciam, note’ phuh loh a lian a hoih khuapite, note’ khol loh na hoih khempeuh tawh a kidim innte, note’ bawl loh tuibeem, note’ suan loh leengguite, le oliv kungte a omna leitangah hong paipihin, note in ne-in na kham uh ciangin, salsuahna Egypt leitang panin hong paikhiatpih Topa na mangngilh khak loh nading uh kidawm un. Topa na Pasian uh na zahtak ding uh hi. Ama na bek na sem ding uh a, ama min tawh na kiciam ding uh hi. Note’ kiima om mite’ pasian-te ahi pasian dangte’ nung na zui kei ding uh hi; bang hang hiam cih leh note’ lakah a om Topa na Pasian uh a aam Pasian ahi hi. Tua bang hikeileh note’ tungah Topa na Pasian uh hong hehin, lei maitang panin note hong susia ding hi. “Massah munah amah na ze-et uh bangin Topa na Pasian uh na ze-et nawn kei ding uh hi. Amah in note hong thupiaksa ahi Topa na Pasian un hong thupiakte khempeuh na zui ding uh hi. “Hong tung ding hunah na tapate un, ‘ Topa i Pasian in note hong piak hih thute, bang a cihnopna ahi hiam?’ ci-in hong dot uh ciangin na tapate uh kiangah, ‘Eite pen Egypt gam sungah Faro’ silate ihi a, Topa in Egypt panin a vangliatna tawh hong paikhiatpih hi. Topa in eite’ muhna-ah a lian a nasia lim le na lamdangte Egypt mite le Faro le a uliante khempeuh tungah lak hi. Amah in i pu i pate tungah piak dinga a ciam leitangah hong paipihin, eite hong piak theih nadingin tua lai panin eite hong paikhiatpih hi. Tuhuna bangin i nuntak theih nadingin amah in eite’ hoih tawntung ding a deihna-in, Topa i Pasian zahtakin hih thukhamte khempeuh i zuih ding Topa in thu hong pia hi. Amah in eite hong thupiak bangin Topa i Pasian’ mai-ah hih thupiakte khempeuh limtakin zui lehang eite a dingin thumanna hi ding hi,’ na ci ding uh hi. “ Topa na Pasian un luah dinga na tumna uh leitangah hong paipihin, note’ mai-ah Hit mite, Girgash mite, Amor mite, Kanaan mite, Perez mite, Hiv mite, le Jebus mite, note sangin lianzaw-in a thahatzaw minam sagihte note’ mai panin siangkhiasakin, Topa na Pasian un note tungah amaute hong pia-in, note in amaute na zawh uh ciangin, note in amaute na susiamang ding uh hi. Amaute tawh thuciamna na bawl kei ding uh a, amaute tungah hehpihna na lak kei ding uh hi. Amaute tawh kiteng loin, na tanute uh amau’ tapate pia loin, a tanute uh na tapate uh a dingin na la kei ding uh hi. Bang hang hiam cih leh pasian dangte’ na a sem dingin Topa zuihna panin na tapate uh amaute in heikhia ding uh hi. Tua ciangin no tungah Topa hong hehin note hong susia pak ding hi. Amaute tungah hih bangin note na gamta ding uh hi: A biakna taute uh phelsakin, a biakna songte uh dengzanin, amau’ Asherah milimte phuksakin, a kiseek a milimte uh mei tawh na hal ding uh hi. “Bang hang hiam cih leh note pen Topa note’ Pasian’ tungah a siangtho mi na hi uh hi. Leitung a om mite khempeuh sung panin ama mi ahi dingin Topa na Pasian un note hong teelzo hi. “ Topa in note hong itin hong teelna pen midangte sangin na tamzawkna hang uh hi lo hi. Bang hang hiam cih leh mi khempeuh lakah a tawmpen na hi uh hi. Topa in salsuahna Egypt kumpipa Faro’ khutsung panin note hong honkhia-in a vangliatna tawh hong paikhiatpihna pen Topa in note hong itin, na pate uh tunga a kiciam thuciam a zuihna hang ahi hi. Tua ahih ciangin Topa na Pasian uh amah bek ahi Pasian hi a, amah itin a thupiakna a zuite tungah khang tulkhat dongin thuciamna le itna kip lenin a thuman Pasian, amah a mudah mite, suksiatna tawh a thukpah pa ahihna thei un. Amah a mudah mi tungah zekai loin a maitang mahah thuk ding hi. Tua ahih ciangin tuni-a no kong piak thute khempeuh limtakin na zuih ding uh ngaihsun un. “Note in hih ngeina kipte za-in, kemin tuate na zuihna hangun, Topa na Pasian un na pu na pate uh tungah a ciam thuciamna le itna kip note tungah hong tungsak ding hi. Amah in note hong itin, tampi hong phasak ding hi. Amah in note tungah piak dingin na pu na pate uh tungah a ciam gam sungah note’ suanlekhakte le na gam sung panun a piangte, na an uh le na leenggahzu uh le na sathau uh, le na ganhingte uh pungsakin, na tuulekeelno honte uh zong thupha pia ding hi. Midangte khempeuh sangin note thupha hong kilim piakzaw ding hi. Note’ lak hitaleh na ganhingte uh lak hitaleh ah a nu ahi a, a pa ahi zongin a ciing om lo ding hi. Topa in note’ tung panin natna khempeuh lakhia ding hi. Note in na theihsa uh ahi Egypt gam a natna siate note’ tungah khat zong hong tung lo ding a, ahih hangin no hong mudahte khempeuh tungah tuate tungsak ding hi. Topa na Pasian un note tungah hong piak mi khempeuh na beisak ding uh a, amaute na khasiat kei ding uh hi. Note a dingin thangzak hi ding ahih manin amau’ pasian-te zong na bia kei ding uh hi. “Na lungsim uhah, ‘Hih minamte ei sangin tamzaw hi. Amaute bangci suankhiat zawh ding ihi hiam?’ na cih khak uhleh, amaute na kihta kei ding uh hi. Topa na Pasian un Faro le Egypt mite khempeuh tungah a hih, na mitte un a muhsa a lian ze-etnate, limte, na lamdangte, a vangliatna le Topa na Pasian un hong paikhiatpihna a thahatna na phawk ding uh hi. Topa na Pasian un na kihtak uh mi khempeuh tungah tua bangin hih ding hi. Tua tham loin, a omlai mite le no kiang panin a bu mite a siat khit dong matengin Topa na Pasian un amaute’ lakah tunpi khah ding hi. Note in amaute na kihta kei ding uh hi; bang hang hiam cih leh a lian a kihtakhuai ahi Pasian, Topa na Pasian uh note tawh a om hi. Topa na Pasian un note’ mai-ah hih minamte tawm tawmin siang khiasak ding hi. Note a dingin gamsate hong tam khanlua kha ding ahih manin thakhatthu-in amaute na beisak kei ding uh hi. Ahih hangin Topa na Pasian un note tungah amaute hong pia ding a, amaute a bei matengin kibuaisak ding hi. Amah in note’ khut sungah amaute’ kumpite hong pia ding a, note in mun khempeuh panin amaute’ min na maimangsak ding uh hi. Amaute na susiamang khin ding uh a, note’ langkhatah mi khat beek hong pang zo lo ding hi. A kiseek amau’ pasian milimte mei tawh na hal ding uh hi. Tua nate-ah na awk khak loh nadingun amaute’ tunga a om kham le ngun deihgawh loin, note a dingin na la kei ding uh hi. Bang hang hiam cih leh tua pen Topa na Pasian uh tungah a kihhuai ahi hi. Note’ inn sungah a kihhuai nate na tumpih kei ding uh a, tua nate tawh kibangin samsiat a thuak mi na kisuaksak kei ding uh hi. Note in tua nate mudah mahmahin na kih ding uh hi. Bang hang hiam cih leh tua nate a kisamsia na ahi hi. “Note nungta-in tampi na phak theih nading uh le na pu na pate uh tungah piak dinga Topa a kiciamsa leitangah va pai-in na neih theih nadingun tuni-a note kiangah kong gen thupiakna khempeuh limtakin na zuih ding uh na ngaihsun ding uh hi. A thupiakte na zui uh hiam, na zui kei uh hiam cih a theih nadingin note hong niamkhiatin, na lungsim uhah bang om hiam cih a theih nadingin Topa na Pasian un sehnel gamah hih kum sawmli sung note hong paipihna lampi khempeuh na ciamteh ding uh hi. Mite, an bek tawh nungta loin Topa’ kamsung panin a pusuak thu khempeuh tawh nungta hi, ci-in note hong theihsak nadingin, amah in note hong niamkhiatin hong gilkialsak a, note hitaleh na pu na pate uh hitaleh in a theih ngei loh manna tawh hong vak hi. Hih kum sawmli sung note’ tunga om na puan uh sia loin, na khe uh zong bawk lo hi. Tua ahih manin mi khat in a tapa a khal bangin Topa na Pasian un note hong khalna thu na lungsim uhah thei un. Tua ahih ciangin ama lampi zuihna le amah zahtakna tawh Topa note Pasian’ thupiakte na zui ding uh hi. Bang hang hiam cih leh Topa note’ Pasian in, mual le guamah a luang tuite a omna, ciktui le tuikhuk a omna leitang, mangbuh le mangbuhham, leenggui le theikung, le mang kawlsing a omna leitang, oliv kungte le khuaizu a omna leitang, bangmah kisam loin, cilbawl loin an na nek nading uh leitang, a suangte sik ahihna leitang, mualte sung panin sumsan na tawh theihna uh leitang ahi gam hoihah note hong paipih hi. Note in ne-in na gil uh vah ding a, note tungah gam hoih hong piakna hangin Topa na Pasian uh na phat ding uh hi. “Tuni-a no tungah kong gen ahi ama thupiaknate le a ngeina kipte le a thukhamte zuih lohna tawh Topa na Pasian uh mangngilh kha ding na hih manun kidawm un. Tua hikeileh, an ne-in na kham uh ciang, inn hoihte lamin tuate sungah na ten uh ciang, na bawnghonte uh le na tuuhonte uh tampi a phak ciang le na khamte uh le na ngunte uh tampi pha-in, na neih khempeuh uh tampi a phak ciangin na lungsim uh lianin, salsuahna Egypt gam panin note a hong paikhiatpih, a lian a lauhuai sehnel gamah gul gunei le momai lak le tui om lohna lei keu-ah a hong paipihpa, meisuang tawh a kibang suangpi panin tui a hong piapa, a tawpna-ah a hoihin na gamtat theih nading uh a deihna-in note hong niamkhiatin a hong ze-et theih nadingin na pu na pate un a theih loh manna tawh sehnel gamah a hong vak Topa na Pasian uh na mangngilh kha ding uh hi. Na lungsim uhah, ‘Ka vangliatna uh le ka thahatna un hih hauhna hong ngahsak hi,’ ci kha ding na hih manun kingaihsun un. Tuni-a mah bangin na pu na pate uh tungah a kiciamna a kipsak theih nadingin, na hauh nadingun vangliatna a hong piapa amah ahih manin Topa na Pasian uh na phawk ding uh hi. Topa na Pasian uh mangngilhin pasian dangte’ nung zui-in tuate’ na semin na biak uhleh, na sia taktak ding uh hi, ci-in tuni-in limtakin kong hilhkhol hi. Topa note’ Pasian’ aw ngai lo ahih manun, Topa in note’ mai-ah a siatsak minamte bangin note na sia ding uh hi. Tua ahih ciangin, a kangtum thei mei bangin note’ mai-ah a pai pa pen Topa na Pasian uh ahihna thu tuni-in thei un. Amah in note’ mai-ah amaute susia-in, amaute zogawp ding hi. Tua ahih ciangin Topa in note tungah hong ciamsa bangin amaute hawlkhia-in manlangin na siamangsak ding uh hi. “ Topa na Pasian un note mai panin amaute a nawhkhiat khit ciangin, na lungsim uhah, ‘Hih leitang a luah dingin Topa in hong paipihna pen komau’ thumanna hang ahi hi,’ ci kha kei un. Topa in na mai uhah amaute a hawlkhiatna pen hih minamte’ gitlohna hang hizaw hi. Na thumanna hang uh ahi a, na lungsim manna hang uh tawh ahi zongin amau’ leitang a luah ding na hi kei uh hi. Topa na Pasian un na mai panun amaute a hawlkhiatna pen hih minamte’ gitlohna hang le Topa in na pu na pate uh Abraham, Isaac, le Jakob tungah a thuciamna kammal a kipsak theih nading ahi hi. “Tua ahih ciangin note’ thumanna hangin Topa na Pasian un na tan’ dingun hih leitang hoih note tungah hong pia ahihlohna thei un. Bang hang hiam cih leh note pen lungsim khauh mi na hi uh hi. “ Topa na Pasian uh sehnel gamah phinin na hehsakna uh phawk unla, mangngilh kei un. Egypt gam panin na paikhiat ni uh a kipan hih lai na tun dongun Topa langpanin na lehdo uh hi. Horeb mual nangawnah a heh nadingin Topa na phin uh a, note’ tungah Topa heh a, amah in note hong susia dektak hi. Topa in note tawh a bawl thuciamna suangpeekte a sang dingin mualtungah ka paitoh lai-in, mualtungah sun sawmli le zan sawmli sung ka om a, an ne lo, tui dawn loin ka om hi. Pasian’ khut tawh a kigelh suangpek nihte kei tungah Topa in hong pia hi. Kikhop ni-in mei sung panin note tungah Topa in hong gensa kammal khempeuh tua suangpeekte tungah om hi. Sun sawmli le zan sawmli a cin ni-in kiciamna suangpek nihte Topa in kei hong pia hi. “Tua ciangin Topa in kei kiangah, ‘Kithawi inla, hih lai panin paisuk mengmeng in. Bang hang hiam cih leh Egypt panin na paikhiatpih mite a sia-in gamta khin uh hi. Amaute ka thupiakna panin kiheikhia pak uh a, amaute a dingin a kisung milim khat bawl khin uh hi,’ hong ci hi. “Tua tham loin Topa in kei kiangah, ‘Hih mite ka mu khin a, a lungsim khauh mite ahi hi. Amaute susia-in mun khempeuh panin amaute’ min ka phiat theihna dingin kei guak hong omsak in. Amaute sangin a vanglianzaw, a tamzaw minamin nang kong bawl ding hi,’ hong ci lai hi. “Tua ahih ciangin kihei-in mualtung panin kong paisuk a, mei in mual kangin na kuang hi. Kiciamna suangpek nihte ka khut nihte sungah om hi. Tua ciangin ka khuadak leh, Topa na Pasian tung uhah na khial khin takpi uh a, a kisung bawngno milim amaute a dingin na bawl uh hi. Topa in note hong thupiakna panin na kiheikhia pak uh hi. Tua ahih ciangin suangpek nihte la-in ka khut nihte’ sung panin lawnin note’ muhna-ah ka sukham hi. Tua ciangin a masa-a bangin sun sawmli le zan sawmli sung Topa’ mai-ah kunin ka om a, ama heh nadingin phinin, Topa’ muhna-ah a sia gamtatna tawh note’ khialhnate khempeuh hangin an ne lo, tui dawn loin ka om hi. Bang hang hiam cih leh note’ tungah Topa’ hehna le a lungkim hetlohna, note susia dingin a kithawina hangin ka lau hi. Ahih hangin tua hunin zong Topa in kei’ thu hong ngai hi. Aaron’ tungah Topa heh mahmah a, amah susia dingin kithawi a, tua hun mahin Aaron a’ ding zong thu ka ngen hi. Tua ciangin note’ khialhna, na bawlsa uh bawngno, mei tawh halin sukhamin, leivui bangin a neel dongin ka gawizan hi. Tua ciangin mualtung panin a hong luangsuk lui sungah a vuite ka lawn hi. “Taberah, Massah, le Kibrothhattaavah munte-ah zong Topa phinin na hehsak uh hi. Topa in Kadeshbarnea panin note hong sawlin, ‘Paito unla note kong piak leitang luah un,’ hong cih lai-in Topa na Pasian uh hong thupiakna nialin, amah um loin, ama aw na ngai kei uh hi. Note kong theih ni a kipan Topa na nial uh hi. “Tua ahih ciangin Topa in note ka susia ding ci ahih manin hih sun sawmli le zan sawmli sung Topa’ mai-ah kunin ka om hi. Topa’ tungah thu ka ngen a, ‘Topa Pasian aw, nangmah in na liatna tawh na hotkhiatsa, na vangliatna tawh Egypt panin na paikhiatpih na mite le na luahte susia kei in. Na nasem Abraham, Isaac, le Jakob phawk inla, hih mihingte’ lungsim khauhna hitaleh a gitlohna uh hitaleh a khialhna uh hitaleh thusim kei in. Tua bang hikeileh kote nong paikhiatpihna gam mite in, “ Topa in amaute tungah a ciamsa leitangah amaute paipih zo loin, amah in amaute mudah ahih manin, sehnel gamah amaute a that dingin paikhiatpih hi,” ci kha ding uh hi. Bang hang hiam cih leh amaute pen na vangliatna le na thahatna tawh na paikhiatpih na mihingte le na luahte ahi hi,’ ka ci hi. “Tua hun laitakin Topa in kei kiangah, ‘A masa-a bangin suangpek nih seekin, mualtung ka kiangah hong pai inla, sing singkuang khat bawl in. A masa-a suangpek na sukkhapte’ tunga thute tua suangpeekte tungah ka gelh ding a, singkuang sungah tuate na koih ding hi,’ hong ci hi. “Tua ahih ciangin singkha sing tawh singkuang khat bawlin, a masa-a bangin suangpek nih ka seek a, ka khut sungah a peek nihte tawi-in mualtungah ka paito hi. Kikhop ni-in mei sung panin mualtungah Topa in note tungah hong gensa thupiak sawmte, a masa-a a kigelh bangin tua suangpeekte tungah amah in gelh a, tua ciangin Topa in kei tungah tua suangpeekte hong pia hi. Tua ciangin kihei-in mualtung panin ka paisuk a, ka bawlsa singkuang sungah tua suangpeekte ka koih hi. Topa in kei hong thupiak bangin suangpeekte tua sungah a om hi. (Beeroth Benejaakan panin Moserah-ah Israel mite zin uh hi. Tua lai-ah Aaron si a, tua lai munah kivui hi. Ama tangin a tapa Eleazar in siampi na sem hi. Tua lai panin Gudgodah-ah pai uh a, Gudgodah panin lui tuite a omna gam Jotbathah-ah pai uh hi. Tua hun laitakin Topa in, tuni dongin ama na a sem ding le ama min tawh thupha a pia dingin Topa’ mai-ah dingin, Topa’ thuciamna singkuang a pua dingin Levi minamte a tuam koih hi. Tua ahih ciangin a sanggamte uh bangin Levi mite in tanh ahi a, luah ahi zongin nei lo uh a, Topa na Pasian un amau kiangah a gen bangin Topa pen amau’ luah ahi hi.) “A masa-a bangin sun sawmli le zan sawmli sung mualtungah ka om a, Topa in tua hunin zong ka thu hong ngai a, Topa in note hong susia nawn lo hi. Topa in kei kiangah, ‘Amaute tungah piak dingin a pu a pate uh tungah ka kiciam leitangah pai-in a luah theih nadingun ding inla, na khualzin uh zomin mite mai-ah pai in,’ hong ci hi. “Israel-te aw, tu-in, Topa na Pasian uh zahtak ding, ama lampite tot ding, amah it ding, na lungsim khempeuh uh le na nuntakna khempeuh uh tawh Topa note’ Pasian’ na sep ding, le nomau’ hoih nadingin tuni-a kong gen thupiaknate le Topa’ thukhamte zuih ding cih simloh, Topa na Pasian un note’ tung panin bang dang hong kal ahi hiam? En un, vantung le vantung a sangpente le leitung le a sunga om khempeuh pen Topa note’ Pasian-a’ ahi hi. Tua hi napi-in Topa in na pu na pate uh a itna lian mahmah ahih manin tuni-a mah bangin midangte khempeuh sangin amau’ suanlekhakte hong teelzaw hi. Tua ahih ciangin Topa’ thu mang unla, lungkhauh nawn kei un. Bang hang hiam cih leh Topa na Pasian uh a lian, a vanglian, a kihtakhuai Pasian, angvan nei loin, sumgolh a la lo, pasian-te’ Pasian, topate’ Topa ahi hi. Amah in pa nei lote le meigong numeite a dingin thutang semin, peemtate itin an le puan a pia hi. Tua ahih ciangin peemtate it un; bang hang hiam cih leh note zong Egypt gamah peemta na hi uh hi. Topa note’ Pasian na zahtak ding uh a, ama na semin, amah beelin, ama min tawh na kiciam ding uh hi. Amah pen nomau’ phat ding ahi hi. Na mitte un a muhsa hih a lian a kihtakhuai nate note a dingin hong bawlsak pa pen na Pasian uh ahi hi. Na pu na pate uh mihing sawmsagih bek Egypt-ah paisuk uh a, ahi zongin tu-in Topa na Pasian un vantung aksi zahin note hong tamsak hi. “Tua ahih ciangin Topa na Pasian uh itin ama hong thuhilhna, a thukhamte, a ngeina kipte, a thupiakte na zui tawntung ding uh hi. Tuni-in ngaihsun un (a thei nai lo, a mu nai lo na tate uh tungah a gen hi lo ka hih ciangin), Topa note’ Pasian’ hong thuhilhna, ama liatna, a vangliatna le a thahatna, Egypt kumpipa Faro le a leitang tung khempeuhah a hih Egypt gam sunga ama limte le a sepnate; Egypt galkapte, a sakolte le a leengte tungah a hihte; note hong delh laitakin San Tuipi tawh amaute tuumsakin, tuni dongin Topa in amaute a suksiatna; hih mun na tun ma sungtengun sehnel gamah amah in note tungah hong hihte; Reuben’ tapa Eliab, a tapa Dathan le Abiram-te tungah a hihte; leitang a kam ka-in Israel khempeuh lakah a innkuanpihte, a puanbukte le amau a zuite khempeuh tawh amaute a nawmvalhna ngaihsun un. Bang hang hiam cih leh Topa’ hihsa a nasepna a liante khempeuh na mitte un mu khin hi. Bang hang hiam cih leh luah dinga na lut nading uh leitang pen note’ hong paikhiatna, anteh cinna huan banga khaici vawhin tui na buah nadingun nakpitakin na semin tui na lakna uh Egypt leitang tawh kibang lo hi. Note va pai-in na luah ding uh leitang pen, vantung panin guahtui a ngah mual le guam a omna leitang, Topa na Pasian un a kep leitang hi a, kum kipat a kipan kum bei dongin Topa note’ Pasian in tua leitang en tawntung hi. “ Topa na Pasian uh itin, na lungsim khempeuh uh le na nuntakna khempeuh uh tawh ama na na sep nadingun tuni-a kong gen ama thupiaknate na zuih uhleh, na an uh le na leenggahzu uh le na sathau uh na kaihkhop theih nadingun amah in guah masa le guah nunung, a hunin na leitang uh a dingin hong zusak ding hi. Amah in na ganhingte uh a dingin na gam sung uhah lopa hong posak ding a, note in zong an ne-in na gil uh vah ding hi. Midangte’ hong khemna hangin note kihei-in pasian dangte’ na semin tuate na biakkhak loh nadingun kingaihsun un. Tua hikeileh no tungah Topa hong hehin guah zu lo ding a, leitang in bangmah piangsak loin, Topa in no hong piak leitang hoihah manlangin na siat pak theihna dingun amah in vantungte khakcip kha ding hi. “Tua ahih ciangin hih ka thugente na lungsim uhah ciamtehin na ngaihsun ding uh hi. Na khut tung uhah lim dingin na khih ding uh a, tuate pen na mitte uh kikalah talsuan hi ding hi. Na tate uh tungah na hilh ding uh a, na innsung uhah na lut laitak, lampi-ah na pai laitak, na lup ciang uhleh na thawh ciangun tuate genin na nei ding uh hi. “Bang hang hiam cih leh Topa na Pasian uh itin, ama lampi khempeuh zui-in, amah beelin, nomau zuih dingin kong gen hih thupiakna khempeuh zuih ding na kingaihsut uhleh, Topa in na mai uhah a om hih minamte khempeuh hawlkhia ding a, note sangin lianzaw-in a thahatzaw minamte na suankhia ding uh hi. Na khe un a sikna mun khempeuh nomau a’ hi ding hi. Na gamgi uh sehnel gam panin Lebanon ciang dong le Eufratis gun panin nitumna tuipi dong hi ding hi. Na lang uhah kuamah pang zo lo ding hi. No tungah hong ciam bangin Topa na Pasian un na tot ding uh gam khempeuh tungah note hong kizahtakna le note hong kikihtakna tungsak ding hi. “En un, tuni-in na mai uhah thupha khat le hamsia khat ka koih hi. Tuni-a kong gen, Topa na Pasian uh thupiaknate na zuih uhleh thupha hi a, Topa na Pasian uh thupiaknate mang loin, na theih nai loh uh pasian dangte’ nungzui dingin tuni-a no kong thupiakna panin na kiheikhiat uh le hamsia ahi hi. Luah dingin na lutna uh leitangah Topa na Pasian un hong paipih ciangin Gerizim Mual tungah thupha taangko-in, Ebal Mual tungah hamsia na taangko ding uh hi. (Tua mualte, Jordan gal, lampi panin nitumna lam, Moreh tawsaw gei-a Gilgal galkhat, Arabah-ah a teng Kanaan mite’ gam sungah om hi.) Bang hang hiam cih leh Topa na Pasian un note hong piak leitang a luah dingin Jordan kantanin a pai ding na hi uh hi. Tua leitang luahin a sungah na ten uh ciangin, tuni-a note kong piak thukhamte le ngeina kipte khempeuh na zuih ding uh limtakin na ngaihsun ding uh hi. “Hihte pen, leitungah na nuntak laiteng uh Topa, na pu na pate uh Pasian in na neih dingun no hong piaksa gam sungah limtakin na zuih ding uh thukhamte le ngeina kipte ahi hi. Na suankhiat ding uh minamte in a biakna mun mual sangte tung le mual neute tung le singniim nuai, mun khempeuh na susia taktak ding uh hi. Amaute’ biakna taute phelkhia-in, a biakna songte dengzanin, amaute’ Asherah milimte mei tawh na hal ding uh hi. A kiseek amau’ pasian-te’ limte na phukpai ding uh a, tua mun panin amau’ min na maimangsak ding uh hi. “Ahih hangin Topa na Pasian uh tungah tua bangin na hih kei ding uh hi. Topa na Pasian un na minam khempeuh uh sung panin ama min koih nadingin teelin, ama omna dinga a bawlna mun na zong ding uh hi. Tua lai-ah na pai ding uh a, na meihal biaknate uh le na biakpiaknate uh, note in na piak uh sawm-ah-khat le na piak thuahte uh, thuciamna biakpiakna, utthu-a na piakna, na bawnghon tacilte uh le na tuuhon tacilte uh tua lai-ah na paipih ding uh hi. Topa na Pasian uh mai tua lai munah na ne ding uh a, Topa na Pasian un note thupha hong piakna hangin na hihna khempeuh uhah note le na innkuanpihte na lungdam ding uh hi. “Tua hun ciangin mi khempeuh in ama hoihsak bangin a gamtat ngei ciat bangin na gamta nawn kei ding uh hi. Bang hang hiam cih leh Topa na Pasian un note hong piak tawlngakna le luahna-ah na tung nai kei uh hi. Ahih hangin Jordan galkhatah pai-in, Topa na Pasian un luah dingin note hong piak leitangah tengin, nuamtakin na nuntak theih nadingun na kiim uha na langte khempeuh uh kiang panin tawlngakna hong piak ciangin, Topa na Pasian un ama min om nading munin a teelna munah note kong sawl khempeuh na paipih ding uh hi. Na meihal biaknate uh le na biakpiaknate uh, note in na piak uh sawm-ah-khat le na piak thuahte uh le Topa’ tungah na ciam uh na thuciam piaknate uh na paipih ding uh hi. Topa na Pasian uh mai-ah note le na tapate uh le na tanute uh, na nasem numeite uh le na nasem pasalte uh, le note’ neih bangin tanh ahi a, luah ahi zongin a nei lo na khuasung uha om Levi mite tawh lungdam khawm un. Na tuahna mun peuh uhah na meihal biaknate uh na piak loh nadingun kingaihsun un. Na minamte uh sung panin Topa in a teelna mun khatah na meihal biaknate uh pia-in, note kong thupiakte khempeuh tua lai munah na hih ding uh hi. “Ahi zongin, Topa na Pasian un note tungah hong piak thupha tawh kizui-in na khuapite uh khat peuhpeuh sungah sa na deih zahzah uh go-in na ne thei ding uh hi. Sanang le sakhitalte a kinek mah bangin mi a nin le a siang kideidan loin na ne thei ding uh hi. A si na ne kei bek ding uh hi; tui bangin leitungah a si na bua ding uh hi. Na an uh sawm-ah-khat ahi a, na leenggahzu uh ahi a, na sathau uh ahi zongin, na bawnghon uh le na tuuhonte uh sung pan tacilte ahi zongin, na kiciamna uh ahi na thuciam uh biakpiakna khat peuhpeuh ahi zongin, utthu-a na piakte uh ahi zongin, nomau’ piak thuahte ahi zongin na khuapite uh sungah na ne thei kei ding uh hi. Topa na Pasian un a teelna munah note le na tapate le na tanute, na nasem numeite le na nasem pasalte, le na khuapite uh sunga om Levi mite in Topa na Pasian uh mai-ah na ne ding uh hi. Na hihna khempeuh uhah Topa na Pasian uh mai-ah na lungdam ding uh hi. Na gam sung uhah na ten laiteng uh Levi mite na mangngilh loh nadingun kingaihsun un. “No tungah hong ciamsa bangin Topa na Pasian un na gamgi uh hong sotsak ciangin, sa na duh manun, ‘Sa ka ne ding uh hi,’ na cih uhleh, na duh zahzah uh sa na ne thei ding uh hi. Topa na Pasian un ama min koih nadingin a teelna mun pen note kiang panin a gamla lua ahihleh, note kong thupiaksa bangin Topa in no hong piaksa na bawnghon uh pan ahi a, na tuuhon uh pan ahi zongin khat peuhpeuh na go thei ding uh a, na duh zahzah uh na khuasung uhah na ne thei ding uh hi. Sanang ahi a, sakhital ahi zongin a kinek mah bangin na ne thei ding uh a, mi a nin le a siang kideidan loin a kibangin na ne thei ding uh hi. A si na nek loh ding uh theitel un. Bang hang hiam cih leh si pen nuntakna hi a, nuntakna pen sa tawh na ne khawm kei ding uh hi. Si na ne kei ding uh a, tui bangin leitungah na buakhia ding uh hi. Topa’ muhna-ah a manin na gamtat uh ciangin note le note’ khit cianga na tate uh a nopsak theih nadingin si na ne kei ding uh hi. Ahih hangin na bat uh a siangtho nate le na thuciamna uh na piaknate uh note in la-in Topa in a teelna munah na paipih ding uh a, Topa na Pasian uh biakna tau tungah na meihal biakna uh, a sa le a si na pia ding uh hi. Na biakpiakna uh site Topa note’ Pasian’ biakna tau tungah kibuakhia ding a, ahih hangin a sa na ne thei ding uh hi. Topa na Pasian uh muhna-ah a hoih le a manin na gamtat uh ciangin note le note’ khit cianga na tate uh a nopsak theih nadingin note kong thupiak khempeuh na kin ding uh limtakin ngaihsun un. “ Topa na Pasian un na mai panun na suankhiat ding uh minamte beimangsakin, amaute suankhia-in amau’ leitangah na ten uh ciangin, na mai uhah amaute a kisuksiat khit ciangin amaute zui-in na awk khak loh nading uh le, ‘Kei zong amau’ hih bangin ka hih theih nadingin hih minamte in a pasian-te uh bangci biak ahi uh hiam?’ ci-in a pasian-te uh thu na kan loh nadingun kingaihsun un. Topa na Pasian uh tungah tua bangin na hih kei ding uh hi. Bang hang hiam cih leh Topa in a muhdah a kihhuai nam khempeuh amaute in a pasian-te uh a dingin hih uh hi. A pasian-te uh a dingin a tapate uh le a tanute nangawn uh mei sungah a hal uh hi. “Note kong thupiak khempeuh na hih ding uh na lim ngaihsut ding uh hi. Na behlap kei ding uh a, zong na khiam kei ding uh hi. “Note lakah kamsang khat ahi a, mangman khat ahi zongin hong khangin, lim ahi a, nalamdang ahi zongin hong lak a, ama hong gen lim ahi a, nalamdang ahi zongin hong tungin, na theih ngei loh uh, ‘Adang pasian-te’ nung zui-in amaute va bia ni,’ hong cih leh, tua kamsangpa’ thu ahi a, mangman pa’ thu ahi zongin na ngai kei ding uh hi. Bang hang hiam cih leh Topa note’ Pasian na lungsim khempeuh uh le na nuntakna khempeuh uh tawh na it uh hiam cih a kitheih nadingin Topa na Pasian un no hong ze-etna ahi hi. Topa na Pasian uh nung zui-in, amah na zahtak ding uh a, a thupiaknate zui-in a thu na ngai ding uh a, amah bia-in amah na beel ding uh hi. Ahih hangin tua kamsangpa ahi a, mangman pa ahi zongin kithat ding hi. Bang hang hiam cih leh Topa na Pasian un na pai nadingun a hong thupiak na nusiat theih nading uh le Egypt leitang panin hong paikhiatpihin salsuahna panin hong honkhia Topa na Pasian uh langpangin na lehdo nading uh thu hong hilh ahi hi. Tua bangin note’ lak panin siatna na siangkhiasak ding uh hi. ama cih mang loin, a thu ngai loin, amah hehpih loin, amah khahkhong loin, amah na im kei ding hi. Nangmah in amah na that ding hi. Amah a that dingin nangmah a masa pen na hi ding a, tua khit ciangin midangte khempeuh in hong zui ding uh hi. Salsuahna ahi Egypt gam panin a hong paikhiatpih Topa na Pasian uh kiang panin note hong paikhiatpih ding ngaihsun ahih manin suang tawh amah na denglum ding uh hi. Tua ciangin Israel-te khempeuh in za-in lau ding uh a, hih banga gitlohna note lakah bawlkik ngei nawn lo ding uh hi. “ Topa na Pasian un tenna dinga hong piak na khuapite uh khat peuhpeuh sungah, mi ginalo pawlkhat note lakah hong pai-in, ‘Pai-in pasian dangte va bia ni,’ ci-in na theih ngei lohte uh lamah khuapi sunga teng mite a paikhiatpihna na zak uhleh, note in a thu na kan ding uh a, zongin limtakin na dong ding uh hi. Note lakah tua banga a kihhuai-in gamtatna thu a om mah ahih takpi leh, tua khua sunga mite namsau tawh na that ding uh a, khua sunga om mi khempeuh le a ganhingte, namsau tawh na susiamang ding uh hi. Note in van kinusiate khempeuh khua laizang mun awngah khawmin, Topa na Pasian uh tungah khuapi le van kinusia khempeuh meihal biakna bupin mei tawh na hal ding uh hi. Tua khuapi pen ninkikholna hi tawntung ding a, kilamkik nawn lo ding hi. “Note pen Topa na Pasian uh mite na hi uh hi. Misite hangin note ki-atkeh loin, na sam uh zong na mettol kei ding uh hi. Bang hang hiam cih leh note pen Topa na Pasian uh tungah a siangtho mite na hi uh a, leitung a om mite khempeuh sung panin ama neih dingin Topa in note hong teel ahi hi. “A kihhuai na khat peuhpeuh na ne kei ding uh hi. Na nek theih ding uh ganhingte: Bawng, tuu, keel, sakhital, sanang, simsakhi, sathak, saza, zosakhi, le gamtuu ahi hi. Ganhingte lak panin a khecin a ka, eknel a hai ganhing peuhmah na ne thei ding uh hi. Ahi zongin eknel a hai a, a khecin a ka ahi zongin na nek theih loh dingte uh: Kalaoh, bilpi, le sakikhte in eknel a hai hangin a khecin ka lo ahih manin note a dingin a nin ahi hi. Vok pen a khecin a kat hangin eknel hai lo ahih manin note-a’ dingin a nin ahi hi. Tuate’ sa ne loin, a sisate zong na lawng kei ding uh hi. “Tui sunga om khempeuh lak panin phe le lip a nei peuhmah na ne thei ding uh hi. Phe le lip a nei lo peuhmah na ne kei ding uh a, tuate pen no-a’ dingin a nin ahi hi. “Vasa a siang khempeuh na ne thei ding uh hi. Ahih hangin na nek loh dingte uh: Muvanlai, musane, luimu, mupi, mumeika, amau nam ciat; va-ak nam khempeuh; vasa-kalaoh, pengpelep, vatawt, musi nam khempeuh; keising le simbu, gam vatawt le tui vatawt, samuat ne musane le tuimu, gun vapi, gun vazonei nam khempeuh; huihtun le bak ahi hi. “Kha a nei insek ganhing khempeuh no a dingin a nin ahi hi; tuate kine lo ding hi. A leng thei insek ganhing a siangte khempeuh na ne thei ding uh hi. “Ama thu-a a si tawm ganhing peuhmah na ne kei ding uh hi. A nek dingun na khuasung uha om khualmite tungah na pia thei ding uh a, tua ahih kei leh zong gamdang mite tungah na zuak thei ding uh hi. Bang hang hiam cih leh note pen Topa na Pasian uh tungah a siangtho mi na hi uh hi. “Keelno a pi’ nawizu tawh na huan kei ding uh hi. “A kum kumin na lo uhah a piang, na khaici panun a piang khempeuh sawm-ah-khat na pia ding uh hi. Topa na Pasian uh na zahtak tawntung nading uh na theih nadingun, ama min a ten nadingin a teelna mun Topa note’ Pasian’ mai-ah na an uh, na leenggahzu uh, na sathau uh sawm-ah-khat, le na bawnghon uh le na tuuhon tacilte uh na ne ding uh hi. Topa na Pasian un a min koih nadingin a teelna mun pen, Topa na Pasian un no thupha hong piak ciangin note kiang panin gamla lua a, no a dingin lam a sau luat manin sawm-ah-khat na paipih zawh kei uhleh, tuate sum na suah ding uh a, a sumte tunin, Topa na Pasian un a teelna munah na pai ding uh a, na deih peuhpeuh uh bawng ahi a, tuu ahi a, leenggahzu ahi a, khamtheihzu ahi zongin, na duh peuhpeuh uh leina-in a sum na zang ding uh hi. Topa na Pasian uh mai tua lai munah na ne ding uh a, note le na innkuanpihte uh na lungdam ding uh hi. “Note bangin amaute in tanh le luah nei lo ahih manin na khuasung uha om Levi mite na mangngilh kei ding uh hi. “Kum thum simin tua kum-a note’ anpiang sawm-ah-khat khempeuh hong paikhiatpihin na khuasung uhah na khol ding uh hi. Topa na Pasian un na sepnate khempeuh uhah thupha hong piak theih nadingin, note tawh kibangin amaute in tanh ahi a, luah ahi zongin nei lo uh ahih manin note’ khua sunga om Levi mite, peemtate, pa nei lote, leh meigong numeite hong pai-in tua ante ne-in a gilvah ding uh hi. “Kum sagih a cin simin leiba maisakna na nei ding uh hi. Maisak nading zia in: Leitawi a pia mi khempeuh in a vengte tungah leitawi a a piaksate maisak ding hi. Topa’ maisakna thu kigen khin ahih manin a vengpa, a sanggampa’ tung pan kuamah in leiba siik nawn lo ding hi. Gamdang mite’ tung pan na siik thei ding uh a, ahih hangin na sanggamte uh tung panin no-a’ hong bat peuhmah na maisak ding uh hi. Bang hang hiam cih leh Topa na Pasian un hong ciamsa bangin note thupha hong pia ding a, minam tampi tungah leitawi na pia ding uh a, ahih hangin note in lei na tawi kei ding uh hi. Minam tampite na uk ding uh a, ahih hangin amaute in note hong uk lo ding uh hi. “ Topa na Pasian un note hong piak gam sunga na khuate uh khat peuhpeuh sungah na sanggam khat uh note lakah a zawng a om leh na lungsim uh khauhsak loin, na sanggam zawng pa uh huh loin na om kei ding uh hi. Ama tungah na cingh gamtat ding uh a, bangbang hitaleh ama kisap zah na leitawi ding uh hi. Na lungsim uhah ngaihsutna hoih lo omin, ‘Kum sagihna, maisakna kum hong nai hi,’ ci-in na sanggampa galmi et-in amah bangmah na piak loh uh ciangin na langkhatah Topa’ tungah amah kiko-in, no tungah khialhna a suahkhak ding kingaihsun un. Citna tawh amah na pia ding uh a, amah na piak uh ciangin lungsim neihna na nei kei ding uh hi. Topa na Pasian un na sepna na hihna khempeuh uhah hih thu hangin note thupha hong pia ding hi. Bang hang hiam cih leh leitang tungah mizawng bei ngei lo ding hi. Tua ahih ciangin, ‘Gam sungah a om na sanggampa, na a kisam mite le mizawngte tungah na cingh mahmah ding uh hi,’ ci-in thu kong pia hi. “Na sanggampa, Hebru pasal khat ahi a, Hebru numei khat ahi zongin nang tungah hong kizuak leh, amah in nangma na kum guk sung hong sem ding a, a kum sagihna ciangin nang kiang panin a suakta-in na paikhiasak ding hi. Na kiang panin a suakta-in na paikhiatsak ciangin khuthawm guakin na paisak kei ding hi. Na tuuhon lak, na ancilna le na leenggah sukna panin citna tawh tampi na pia ding a, Topa na Pasian in nang thupha hong piak zahin amah na pia ding hi. Egypt gamah sila na hihna uh le Topa na Pasian un note hong suahtaksakna na phawk ding uh hi. Tua ahih manin hih thu tuni-in kong pia hi. “Ahih hangin amah in note nuam hong sa-in, nang le na innkuanpihte hong it ahih manin ‘Nang kiang panin ka paikhia kei ding hi,’ hong cih leh, phimpi khat la-in, kongkhak dapphahin a bil na vut ding a, na sila hi tawntung ding hi. Na sila numei zong tua bangmahin na hih ding hi. Na kiang panin a suakta-in amah na paisak ciangin haksa sa kei in; bang hang hiam cih leh a kicial nasem thaman lang tawh amah in nangma na kum guk sung hong sem khinzo hi. Tua ahih ciangin Topa na Pasian un na hihna khempeuh uhah thupha hong pia ding hi. “Na bawnghon uh le na tuuhon uh panin tacil a pa khempeuh Topa note’ Pasian’ tungah na ap ding uh hi. Na bawnghon tacilte uh tawh na na sem kei ding uh a, na tuuhon tacilte uh zong a mul na met kei ding uh hi. Topa in a teelna munah a kum kumin Topa note’ Pasian’ mai-ah na innkuanpihte uh tawh na ne ding uh hi. Ahih hangin poina khatpeuh, a khebai a mittaw, ahih kei leh poina lian khat peuhpeuh a neih leh, Topa note’ Pasian’ tungah biakna-in na pia kei ding uh hi. Na khuasung uhah na ne ding uh hi. Sanang ahi a, sakhi ahi zongin a kinek bangin mi nin le mi siangte in a kibangin ne thei ding uh hi. A si na ne kei bek ding uh a, tui bangin leilakah a si na buakhia ding uh hi. “Abib kha tang unla, Topa na Pasian uh a dingin Paisan Pawi bawl un. Bang hang hiam cih leh Abib kha sungin Topa na Pasian un Egypt gam panin zanin note hong paikhiatpih hi. Tuuhon pan ahi a, bawnghon pan ahi zongin Topa in ama min om nadingin a teelna munah Paisan Pawi biakpiakna Topa na Pasian uh tungah na pia ding uh hi. Silngo sawh anlum tawh na ne kei ding uh a, ni sagih sung silngo sawh loh anlum, gimna anlum tawh na ne ding uh hi. Egypt gam panin nawhsa-in na taikhia uh hi. Egypt gam panin na taikhiat uh hun na nuntak sung tawntung uh na phawk theih nading uh ahi hi. Na gam sung khempeuh uhah ni sagih sung note lakah silngo kimu lo ding hi. A ni masa nitakin biakpiakna-ah na piak uh sa khat peuhpeuh zong a zingsang dong zan tawntung na omsak kei ding uh hi. “ Topa na Pasian un note hong piak khua khempeuhah Paisan Pawi biakpiakna na pia thei kei ding uh hi. Topa na Pasian un ama min om nadingin a teelna mun bekah ni a tum khit nitak, Egypt panin na paikhiat uh hunin Paisan Pawi biakpiakna na pia ding uh hi. Topa na Pasian un a teelna munah huanin na ne ding uh a, zingsang ciangin na puanbukte uhah na ciah thei ding uh hi. Ni guk sung silngo sawh loh anlum na ne ding uh a, a ni sagih ni-in Topa na Pasian uh a dingin a thupi kikhopna khat na nei ding uh hi. Tua ni-in na na sem kei ding uh hi. “An na lak masak ni uh a kipanin nipikal sagih na simto ding uh hi. Tua ciangin Topa na Pasian un note thupha hong piakna tawh kizui-in na piak ding uh ahi note’ khutsung panin utthu-a piakna tawh Topa na Pasian uh tungah nipikal pawi na bawl ding uh hi. Topa na Pasian uh mai, ama min om nadingin Topa na Pasian un a teelna munah, note a kipan na tanute le na tapate, na nasem numeite le na nasem pasalte, na khua sunga om Levi mite, peemtate, pa nei lote, le note lakah a om meigong numeite tawh na lungdam khawm ding uh hi. Egypt-ah sila na hihna uh na phawk ding uh a, hih thukhamte zuih ding limtakin na ngaihsun ding uh hi. “Na ancilna uh le na leenggah sukna panun an na kaihkhop uh ciangin ni sagih sung buk pawi na bawl ding uh hi. Tua pawi sungah nang a kipan na tanute le na tapate, na nasem numeite le na nasem pasalte, Levi mite, peemtate, pa nei lote, le na khua sunga om meigong numeite tawh na lungdam khawm ding uh hi. Topa in a teelna munah ni sagih sung Topa na Pasian uh tungah pawi na bawl ding uh hi. Bang hang hiam cih leh note na lungdam khawm theih nadingun na khawhsa uh le na khut uh tawh na sepna khempeuh uhah Topa na Pasian un note thupha hong pia ding hi. “Na minam uh tawh kizui-in Topa na Pasian un note hong piakna khuate-ah thukhente le uliante na koih ding uh a, amaute in a manin mite tungah thu khen ding uh hi. Thutang na heikhia kei ding uh a, angvan tuam na nei kei ding uh hi. Sumgolh in mipilte’ mit tawsakin thumante’ thu heikhia ahih manin sumgolh na la kei ding uh hi. Note nungta-in Topa na Pasian un hong piak leitang na luah theih nadingun a thuman bekbekin na gamta ding uh hi. “Note in na bawlsa uh ahi, Topa na Pasian uh biakna tau kiangah Asherah milim dingin khuam khat peuhpeuh na phut kei ding uh hi. Topa na Pasian un a muhdah biakna songpi na phut kei ding uh hi. “Bawng ahi a, tuu ahi zongin, poina a nei, kisapna khat peuhpeuh a om peuhmah Topa note’ Pasian’ tungah biakpiakna-in na pia kei ding uh hi. Bang hang hiam cih leh tua pen Topa note’ Pasian a dingin a kihhuai ahi hi. “ Topa note’ Pasian in note hong piak khua khat peuhpeuh sungah numei ahi a, pasal ahi zongin, ama thuciamna palsatin, Topa na Pasian uh muhna-ah a sia-in a gamtatna kimu-in, pasian dangte’ na semin tuate bia ahi zongin, keimah in ka kham ahi ni ahi a, kha ahi a, vantung na khat peuhpeuhte’ na semin bia ahi zongin, no kiangah hong kigenin tua thu na zak uhleh, note in limtakin na kantel ding uh a, Israel-te sungah tua bang a kihhuai na a kigamtatna thu a om mah ahih takpi leh, numei ahi a, pasal ahi zongin tua banga a sia-in a gamta mi pen na khua pua uhah na paipih ding uh a, tua numei ahi a, pasal ahi zongin suang tawh na denglum ding uh hi. Teci nih ahih kei leh thum bang genna tawh a si ding pa kithat ding a, teci khat bek thugenna tawh mi kithat lo ding hi. A that dingin tecite masa ding a, tua khit ciangin midang khempeuh in hih ding uh hi. Tua bangin note’ sung panin hoih lohna na siangsak ding uh hi. “Mi khatlekhat kithah khakna, khatlekhat thu kituhna, mi khatlekhat kisatna, note a dingin a haksalua thu khat peuhpeuh note’ khua sungah khen ding hong om leh, note kithawi-in Topa na Pasian un a teelna mun, Levi siampite le tua huna thukhente kiangah pai-in thu na dong ding uh a, amaute in note kiangah thukhen nading hong gen ding uh hi. Tua ciangin Topa in a teelna mun panin note’ tungah hong gen bangun na hih ding uh hi. Amaute in note tungah hong lah bangin limtakin na hih ding uh na ngaihsun ding uh a, amaute in note tungah hong piak thuhilhna le note tungah hong gen uh thukhensatna tawh kizui-in na hih ding uh hi. Amaute in note tungah hong gen bang teekteekin na hih ding uh hi. Topa note’ Pasian’ mai-ah nasem dingin a ding siampipa’ thu ahi a, thukhen pa’ thu ahi zongin man lohna tawh a khengvala a gamta mi peuhpeuh kithat ding hi. Tua bangin Israel-te’ sung panin hoih lohna na siangsak ding uh hi. Tua hileh mi khempeuh in za-in, kihta-in, a khengvalin gamta ngam nawn lo ding uh hi. “ Topa na Pasian un note hong piak leitangah tungin, note in tua leitang nei-in a tungah na ten uh ciangin, ‘Eite’ kimkota om minamte khempeuh mah bangin eite’ tungah kumpi khat i koih ding hi,’ na ci nuam kha ding uh hi. Topa note’ Pasian in a teel mipa note’ tungah kumpi-in na koih thei takpi ding uh hi. Ahi zongin na mipihte bek uh lak panin kumpi-in mi khat na koih ding uh a, na sanggam uh ahi lo gamdang mi khat no’ tungah na koih thei kei ding uh hi. Amah in ama aituam dingin sakol tampi nei lo ding hi. Topa in no kiangah, ‘Hih lampi tawnin na kilehkik ngei kei ding uh hi,’ hong ci ahih manin, amah in sakolte a lei dingin Egypt gamah mite paisak lo ding hi. A lungsim heikhia kha ding ahih manin zi la thuah lo ding a, ama a dingin ngun le kham zong nakpitakin behlap lo ding hi. Ama kumpi tokhom tungah a tut ciangin Levi siampite’ kep hih thukhamte ama a dingin laibu khat sungah gelh ding hi. “Siampi ahi Levi minam khempeuh in Israel-te bangin tanh ahi a, luah ahi zongin nei lo ding uh a, amaute in Topa’ tungah mei tawh kihal biaknate le a kaih ngeite uh ne ding uh hi. Amaute in a sanggamte uh lakah gamhluah nei lo ding uh a, amah in amaute tungah a ciam mah bangin Topa pen amaute’ luah ahi hi. “Bawng hitaleh tuu hitaleh biakna-in a pia mite’ tung panin siampite’ kaih dingte: Amaute in siampite’ tungah a liang le a paang nihte le a gilpi pia ding uh hi. Na anpal, na leenggahzu, na sathau, le na meet masak uh na tuumul uh na pia ding uh hi. Bang hang hiam cih leh Levi minamte Topa’ na a sem tawntung dingin na minam khempeuh uh sung panin Topa na Pasian un a teel ahi hi. “Levi mi khat, Israel-te sung na khuapi uh khat peuhpeuh ahi ama tenna panin ama ut hun peuh ciangin Topa’ teelna munah hong pai thei ding hi. Tua ciangin Topa’ mai-ah nasem dingin a om a lawm Levi midangte khempeuh mah bangin Topa a Pasian’ min tawh na sem thei ding hi. Amah in a gamhluah a zuakna pan a sum ngahte banah nek ding a kikimin amaute tawh tanh ngahkhawm ding hi. “ Topa na Pasian un note hong piak leitangah na tun uh ciangin, tua minamte’ gamtatna a kihhuaite zuih ding na kisin kei ding uh hi. Note lakah a tanu ahi a, a tapa ahi zongin biakna-in a zang, ai a saan, khong a khai, mailam thu a gen, ai a tawi, bum a zang, van a kah, sikhate tawh a kiho, sikha thu a dong kuamah na om kei ding uh hi. Bang hang hiam cih leh hihte a hih mi peuhmah Topa a dingin a kihhuai ahi hi. Hih bang a kihhuai gamtatnate hangin note’ mai panin Topa na Pasian un amaute hawlkhia hi. Note pen Topa na Pasian uh mai-ah paubaang loin na om ding uh hi. Bang hang hiam cih leh note in na suankhiat ding uh hih minamte in khongkhaite le aisante thu ngai uh hi. Ahih hangin note ahihleh tua bangin na gamtat ding uh Topa na Pasian un hong phal lo hi. “ Topa na Pasian un note lak ahi na sanggamte uh lak panin note a dingin kei tawh a kibang kamsang khat hong khangsak ding hi. Note in ama thu na ngai ding uh hi. “Note in, ‘Si kha ding ka hih manun Topa kote’ Pasian’ aw hong zasakkik kei in. Hih a lian mei zong hong musak nawn kei in,’ ci-in na kikhop ni-un Horeb-ah Topa na Pasian uh tung pan na deih bang uh hi ding hi. Topa in kei kiangah, ‘Amaute’ hong ngetna thuman taktak hi. Amau sanggamte lak panin nang tawh a kibang kamsang khat amaute a dingin ka khangsak ding hi. Ama gen dingte ka hilh ding a, amah ka thupiak khempeuh amaute tungah a gen ding hi. Amah in keima min tawh a gen ka thute a don lo mi peuhmahte kei mahmah in ka thuk ding hi. Ahih hangin keimah in thugen dingin thu pia lo napi-in keima min tawh thu a gen ngam kamsangpa hitaleh pasian dangte’ min tawh thu a gen pa hitaleh, tua bang mite si ding hi,’ hong ci hi. “Na lungsim sung uhah, ‘ Topa’ gen ahi lo thu bangci theih ding ihi hiam?’ na cih uhleh, kamsang khat in Topa’ min tawh thu genin, tua thu pen hong tung lo ahi a, a man lo ahi zongin hong hih leh, tua thu pen Topa’ gen loh thu ahi hi. Kamsangpa in ama utthu a gen hi a, amah na kihtak ding uh kul lo hi. “ Topa na Pasian un amaute’ leitang note hong piak minamte beisakin, note in amaute suankhia-in, amaute’ khuapite le innte-ah na ten uh ciangin, Topa na Pasian un note’ neih dingin hong piak gam sungah note a dingin khuapi thum na tuamkoih ding uh hi. Mi a thatkha peuhpeuh a tai theih nadingin Topa na Pasian un na neih dingun a hong piak leitang seh thumin khenin seh khat sungah khuapi khat ciat koihin a lampite na puah ding uh hi. Tua bang hikeileh, amah in a beisa hunah a vengpa tawh kigal neihna nei lo ahih manin sih nading thu om lo napi-in, a hehna tawh phula nuampa in mi that khapa delhin lampi a gamlatna hangin amah pha-in a si dingin liamsak kha ding hi. Tua ahih ciangin, khuapi thum tuamkoih un, ci-in note thu a hong pia ka hi hi. Tua hikeileh Topa na Pasian un luah dingin note hong piak leitang tungah mawhbaang lo mi kithat kha ding a, tua mi thahna hanga mawhna note’ tungah hong tu ding hi. “Ahih hangin mi khat in a vengpa mudahin, amah pangsim a, amah satin liamsakin a sihsak a, tua mipa hih khuapi khat peuhpeuhah a tai leh, ama khua upate in amah hong puakin hong paipih ding uh a, a sih theih nadingin phulapa tungah ap ding uh hi. Note na nopsak theih nadingun amah hehpih loin, Israel-te sung panin mi that pa na beisak ding uh hi. “ Topa na Pasian un na neih dingun hong piak leitang tungah note’ kep ding na gamhluahna sung uhah khanglui mite in a phuhsa na vengte’ gisuang na khin kei ding uh hi. “Mi khat in a hihkhak mawhna lian ahi a, khialhna khat peuhpeuh a gamtatna-ah ahi zongin tua mipa’ langah teci khat guak kicing lo ding a, teci nih ahih kei leh teci thum bang thugenna tawh mawhsakna kikipsak bek ding hi. Elna lungsim a nei teci khat in mi khat gamta khial hi, ci-in a mawhsak leh, thuneite a langnih tuakin, tuahun laitak a siampite le thukhente’ mai, Topa’ mai-ah pai ding uh hi. Thukhente in limtakin kan ding uh a, teci pa pen zuau teci hi-in, a man lopi-in a sanggampa a mawhsak ahihleh, a sanggampa tungah amah in hih dinga a sawm bang teekin ama tungah na hih ding uh hi. Tua bangin note sung panin gitlohna na siangsak ding uh hi. Tua hileh a omlai mite in za-in lau ding a, note lakah tua bang gitlohna bawlkik ngei nawn lo ding uh hi. Amah na hehpih kei ding uh hi. Nuntakna tang ding nuntakna, mit tang ding mit, ha tang ding ha, khut tang ding khut, khe tang ding khe na hisak ding uh hi. “Na langte uh a do dingin pai-in a sakolte, a leengte, le a galkapte uh nomau-a’ sangin a tamzaw-in na muh uh hangin amaute na kihta tuan kei ding uh hi. Bang hang hiam cih leh Egypt gam panin note a hong paikhiatpih Topa na Pasian uh note tawh hong om hi. Gal nai na tun uh ciangin siampipa a mai-ah hong pai-in mite kiangah thu genin amaute kiangah, ‘Israel-te aw, za un. Tuni-in na langte uh a do dingin na nai uh hi. Na lungsim uh lausak kei un. Lau kei un, ling kei un, amaute kihta kei un. Bang hang hiam cih leh note tungah gualzawhna a hong pia ding, na langte uh hong dosak dingin note tawh hong kuan khawm pa pen Topa na Pasian uh ahi hi,’ ci ding hi. “Tua ciangin uliante in mite kiangah thu genin, ‘Inn thak lam khinin a ap nai lo kua om na hi uh hiam? Gal sungah amah si-in midang khat in a inn ap kha ding ahih manin a inn-ah ciahkik hen. Leenggui lo kho khinin a gah a ne nai lo kua om na hi uh hiam? Gal sungah amah si-in midang khat in a gah ne kha ding ahih manin a inn-ah ciahkik hen. A zi dingin lawm dong khinin a la nai lo kua om na hi uh hiam? Gal sungah amah si-in midang khat in tua numei la kha ding ahih manin a inn-ah ciahkik hen,’ ci ding uh hi. “Uliante in mite kiangah thu genthuah lai-in, ‘A lau, a lungsim meidawi kua om na hi uh hiam? A lawmte meidawilawh kha ding ahih manin a inn-ah ciahkik hen,’ ci ding uh hi. Uliante in mite kiangah thugen a man khit uh ciangin mite a makai ding kiseh ding hi. “A do dingin khuapi khatpeuh na nai uh ciangin kilem nading thu gen masa un. Note hong dawnna pen kilem nading lam hi-in note kongpi hong hon leh, tua sunga om mi khempeuh in note a dingin aana tawh na semin, na na uh hong sepsak ding uh hi. Ahih hangin note tawh kilemna hong bawl loin note hong do leh, note in tua khua na umcih ding uh a, Topa na Pasian un note’ khut sungah hong piak ciangin pasal khempeuh namsau tawh na that ding uh hi. Ahih hangin numeite le naupangte, ganhingte, khua sunga na dang khempeuh, a kinusiate khempeuh note a dingin na la ding uh a, Topa na Pasian un note hong piak ahi na langte uh vante na tang ding uh hi. Hih nai-a om minamte’ khuapi ahi lo, note kiang panin a gamla khuapi khempeuh tungah tu-a bangin na hih ding uh hi. “Khuapi khat na lak theih nadingun do-in sauveipi na umcih uh hangin hei zatna tawh a singgah kungte na susia kei ding uh hi. A gahte na ne thei ding uh a, ahih hangin a kungte na phuk kei ding uh hi. Gamlak a om singkungte, note’ sukgawp dingin na gal uh hi zenzen ahi hiam? Nek dinga kizang lo singkung hi, ci-in na theih teng bek uh note hong do khuapi a tuk mateng umcihna-in na zat dingun na phuk thei ding uh hi. “ Topa na Pasian un note’ neih dingin a hong piak leitangah mi khat kithatin gamlakah lum a, a that a kitheih kei leh, na upate uh le na thukhente uh hong paikhia-in, a kithat mipa’ omna kiima khuapite a gamlatna teh ding uh hi. Tua ciangin a kithat mipa’ omna tawh a kinai pen khuapi upate in a kisin nai lo, kol a kai nai lo bawngla khat la ding uh hi. Tua khuapi upate in a kikho nai lo, khaici a kivawh nai lo, tuiluang a omna kuam khatah a bawngla paipihsuk ding uh a, tua kuam sungah a bawngla ngawng attan ding uh hi. Topa na Pasian un Levi mi siampite ama na a sem ding le Topa’ min tawh thupha a pia dingin teelkhia ahih manin amaute hong pai ding uh a, kithuneihna le kitotna peuhmah amau’ thu tawh kivengsak ding hi. A kithat mipa tawh a kinai pen khuapi upate khempeuh in kuam sunga a ngawng a kitan bawngla tungah a khut uh sil ding uh a, amaute in teci pangin, ‘Kote in hih mipa ka that kei uh a, a kithahlam zong ka thei kei uh hi. Topa aw, na hotkhiatsa Israel mite’ mawhna hong maisak inla, mawhna nei lo mipa a kithahna hanga mawhna na Israel mihingte hong thuaksak kei in. Mi thahna hanga mawhna pan hong maisak in,’ ci ding uh hi. Topa’ muhna-ah a manin na gamtat uh ciangin note lak panin mawhna nei lo mi thahna hanga mawhna tua bangin na siangsak ding uh hi. “Na galte uh a do dingin kuan khia-in, Topa na Pasian un note’ khut sungah amaute hong pia a, amaute salin na mat ciangun, salte lakah numei a melhoih khat mu-in, tua nu deihin na zi dingin na lak nop leh, na inn-ah tua numei na ciahpih ding a, amah in a lu metin a cinte tan ding hi. Amah in sal hihna puan suahkhia-in, na inn-ah om ding a, a nu le a pa’ hangin kha khat bit sung kap ding hi. Tua khit ciangin amah na luppih thei pan ding a, nang pen ama pasal hi-in, amah pen na zi hi ding hi. Tua ciangin, amah na deih nawn kei leh, ama utna peuhah na paisak ding hi. Ahih hangin amah daisak khin na hih manin sumin amah zuak loin, sila bangin na bawl kei ding hi. “Mi khat in zi nih nei a, khat itin a khat mudah a, a it leh a muhdah a zi tegel in ta nei tuakin, tapa a neih cil pen a muhdah nu tawh a neih ahihleh, a tapate tungah gamhluah dingin ama neihsa a hawm ciangin, a muhdah nu’ tapa cil sangin deihzawkna hangin a it nu’ tapa pen a ta cil-in bawl thei lo ding hi. Ama neihsa khempeuh tanh nih piakna tawh a muhdah nu’ tapa a tacil mahin sang ding hi. Bang hang hiam cih leh tua pa pen ama sung panin a piang masa pen ahih manin tacil hihna za pen ama a’ ahi hi. “Mi khat in a lungkhauh, a langpang thei, a nu’ thu ahi a, a pa’ thu ahi zongin a mang lo, a tai hangun amau’ thu a ngai lo tapa khat a neih leh, a nu le a pa in tua mipa manin ama khuapi upate kiang, a tenna mun kongpi-ah paipihin, amaute in a khuapi upate kiangah, ‘Hih ka tapa uh lungkhauhin hong langpang thei a, amah in ka thu uh hong mang lo a, an hai, zu hai bek ahi hi,’ ci ding uh hi. Tua ciangin khuapi pasal khempeuh in suang tawh amah denglum ding uh hi. Tua bangin note’ sung panin siatna na siangsak ding uh hi. Tua hileh Israel-te khempeuh in za-in lau ding uh hi. “Mi khat in sihna thuak theih nading mawhna bawlin amah kithat a, sing tungah na khai uhleh, zan tawntung sing tungah ama luang na omsak kei ding uh a, a ni mahin na phum ding uh hi. Bang hang hiam cih leh khuam tungah a kikhai siluang hawm pen Pasian in muhthadah sa hi. Topa na Pasian un luah dingin note hong piak na leitang uh na ninsak kei ding uh hi. “Na mipihte’ bawngtal ahi a, a tuu ahi zongin a gammang na muh uhleh huh loin na om kei ding uh hi. A nei pa kiangah na ciahpih kik ding uh hi. Amah na veng nai uh hi lo a, a nei na theih kei uhleh, na inn uhah a gan ciahpihin a nei pa in hong zon mateng na kem ding uh a, hong zon ciangin na piakik ding uh hi. Tua bangin a la, a puan, a mangsa na muh, na mipihte’ na a mang khat peuhpeuh na hih ding uh a, huh loin na om kei ding uh hi. “Na mipihte’ la ahi a, a bawngtal ahi zongin lam gei-ah a kia na muh uhleh, tuate huh loin na om kei ding uh a, tuate phottohsakkikna tawh na huh ding uh hi. “Numei in pasal puan khat peuhpeuh silh lo ding a, pasal in zong numei puan silh lo ding hi. Bang hang hiam cih leh hih bangin a gamta peuhmah Topa na Pasian uh tungah a kihhuai ahi hi. “Vasabu khat, sing tung ahi a, leilakah ahi zongin, a no ahi a, a tui ahi zongin omin, a pi in a no a ompih ahi a, a op ahi zongin na muh khak zenzen uhleh, a pi pen a no tawh na la khawm kei ding uh hi. A pi na khah ding uh a, a no na la thei ding uh hi. Hih bang gamtatna pen na nopsak nading uh, sauveipi na nuntak theih nading uh ahi hi. “Na inn tung panun mi khat kia-in mi sihna hanga mawhna na innsung uhah na tunsak khak loh nadingun inn thak na lam uh ciangin na innkhumzang uhah tangban na khung ding uh hi. “Na leenggui lo uhah khaici nam nih na vawh kei ding uh hi. Vawh le-uh cin na vawh uh an le na leenggui lo uhah a piang khempeuh a nin suak ding hi. “Bawngtal khat le la khat tawh lo na khokhawm kei ding uh hi. “Samul le khau a kigankhawm puan na silh kei ding uh hi. “Na puanza uh kiu lite tungah puanmongteep na bawl ding uh hi. “Mi khat in zi la-in, amah a luppih khit ciangin amah mudahin, a zumhuai gamtatna tawh tua nu mawhsakin, ‘Keimah in hih numei ka la a, amah tawh ka lupkhop ciangin ama sungah nungakna lim ka mu kei hi,’ cihna tawh tua nu tungah minsia a tut leh, tua numei’ nu le a pa in a tanu uh’ nungakna lim a kilatna puan lakhia-in upate kiang kongpi-ah paipih ding uh hi. Numei’ pa in upate kiangah, ‘Hih mipa tungah a zi dingin ka tanu ka pia a, amah in deih nawn lo a, “Na tanu’ sungah nungakna lim ka mu kei hi,” cihna tawh a zumhuai-in amah mawhsak hi. Ahi zongin hihte pen ka tanu’ nungakna a kilatna limte ahi hi,’ ci-in a puan lak ding hi. Amaute in khua upate mai-ah a puan phah ding uh hi. Tua ciangin tua khua upate in tua mipa la-in sat ding uh hi. Amaute in ngun shekel zakhat liausak ding uh a, a numei’ pa’ tungah tuate pia ding uh hi. Bang hang hiam cih leh amah in Israel nungak tungah minsia tun hi. Tua ciangin a numei pen ama zi mah hi ding a, a nuntak laiteng tua nu ma thei lo ding hi. “Ahih hangin a mawhsakna thumanin, numei sungah nungakna lim a kimuh kei takpi leh, amaute in a pa’ inn kongah a numei paipih ding uh a, ama khuapi pasalte in suang tawh amah denglum ding uh hi. Bang hang hiam cih leh amah in a pa’ inn sungah paktat gamtatna tawh Israel sungah haina tun hi. Tua bangin note’ lak panin siatna na siangsak ding uh hi. “Mi khat, midang khat’ zi tawh a lumkhawm a kimuh leh, numei tawh a lum pa le a numei, a nih tuakun kithat ding hi. Tua bangin Israel sung panin siatna na siangsak ding uh hi. “A kidongsa nungak khat om a, mi khat in khuapi sungah tua nu tuakin amah tawh a lupkhop leh, tua khuapi kongpi-ah amau tegel na paipih ding uh a, a numei khuapi sungah a om hinapi-in mi’ huhna ngen dingin a kiko lohna hang le, tua pasal in a vengpa’ zi a va suksakna hangin, suang tawh a nihun na denglum ding uh hi. Tua bangin note’ lak panin siatna na siangsak ding uh hi. “Ahih hangin mi khat in a kidongsa nungak khat gamlakah tuakin, mipa in tua nu buanin a luppih leh, tua numei tawh a lum mipa bek kithat ding hi. A numei’ tungah bangmah na hih kei ding uh hi. Numei’ tungah sih nading mawhna om lo hi. Bang hang hiam cih leh hih thu pen mi khat in a vengpa do-in a thah tawh kibang hi. Hih mipa in gamlakah numei hih ahih manin, a kidongsa numei in huhna ngen dingin a kiko hangin amah a hon ding kuamah om lo hi. “Mi khat in a kidong nai lo nungak khat tuakin, tua numei buanin luppih a, amau tegel a kimuh leh, numei tawh a lum pa in nungak’ pa tungah ngun shekel sawmnga pia ding a, tua numei ama zi hi ding hi. Bang hang hiam cih leh amah in a numei va su khin hi. A nuntak laiteng tua numei ma thei lo ding hi. “Mi khat in a pa’ zidangte tenpih lo ding a, a pa-a’ ahi numei tawh mawh lo ding hi. “A ciltang a kitam ahih kei leh, a pasal na a cing lo mipa Topa a’ ding kikhopna sungah lut lo ding hi. “Zawlta peuhmah, Topa a’ ding kikhopna sungah lut lo ding hi. A suan a khak khang sawmna dong nangawnin Topa a’ ding kikhopna sungah tua bang mi kuamah lut thei lo ding hi. “Ammon mite ahi a, Moab mite ahi zongin Topa a’ ding kikhopna sungah lut thei lo ding uh hi. A khang sawmna dong nangawnun Topa a’ ding kikhopna sungah lut thei ngei peuhmah lo ding uh hi. Bang hang hiam cih leh Egypt panin na paikhiat lai-un lampi-ah anletui tawh amaute in note hong dawn lo uh a, note hong samsia dingin Mesopotamia gam Pethor khua panin Beor’ tapa Balaam cial uh hi. Ahih hangin Topa na Pasian un Balaam’ thu ngai lo hi. Topa na Pasian un note hong it ahih manin, Topa na Pasian un samsiatna pen note a dingin thupha-in hong heisakzaw hi. Amaute’ nopsak nading ahi a, a daupai nading uh ahi zongin na khantawnun na hanciam kei ding uh hi. “Edom mite khatpeuh na mudah kei ding uh hi. Bang hang hiam cih leh amaute na sanggam uh ahi hi. Egypt mi khatpeuh na mudah kei ding uh hi. Bang hang hiam cih leh amau’ gamah peemta na hi ngei uh hi. Amaute’ sung pana piang a khang thumna mite a kipan Topa a’ ding kikhopna sungah lut thei ding uh hi. “Na galte uh a do dingin kuanin giahphual ah na om uh ciangin, siatna nam khempeuh panin nomau na kikem ding uh hi. Note lakah, zan sungin ama tungah thupiang hangin a siang lo mi a om leh giahphual pualamah amah paikhia ding a, giahphual sungah hong pai lo ding hi. Ahih hangin nitak ciangin amahmah tui sungah kisil ding a, ni a tum ciangin giahphual sungah hong paithei ding hi. “Giahphual pua-ah awnghawh nading mun khat na nei ding uh hi. Na galhiamte uh banah tulzum khat na nei ding uh a, awng na hawh khit uh ciangin tua tawh lei to-in, na ek uh na vuk ding uh hi. Bang hang hiam cih leh note hong hon ding le note’ mai-a na galte uh a hong pia dingin Topa na Pasian uh na giahphual laizang uhah hong pai hi. Tua ahih ciangin note lakah a kilawm lo nate a muh loh nading le note kiang panin amah a paikhiat loh nadingin na giahphual uh siangtho ding hi. “A topa’ kiang panin no kiangah a hong tai sila, a topa kiang mahah na apkik kei ding uh hi. Na khuapite uh lak panin ama teelna mun, ama lungkim penna, note lakah note tawh amah hong teng ding a, amah na nengniam kei ding uh hi. “Israel ta numeite biakinn sunga a paktat pawlin om lo ding uh a, Israel tapate zong a paktat pawlin om lo ding uh hi. A paktat nu a kiguaihna sum ahi a, a paktat pa a kiguaihna sum ahi zongin thuciamna khat peuhpeuh piakna-in Topa note’ Pasian’ inn sungah na paipih kei ding uh hi. Bang hang hiam cih leh hih tegel pen Topa note’ Pasian’ tungah a kihhuai ahi hi. “Na sanggampa tungah sumgum hitaleh, ankhing hitaleh, a meet ngaihsutna-in na khat peuhpeuh leitawi na pia kei ding uh hi. Gamdang mi tungah a meetin leitawi na pia thei ding uh a, ahih hangin na sanggampa tungah a meetin leitawi na pia kei ding uh hi. Hihte pen a luah dingin na tumna uh gam sungah Topa na Pasian un na sepna khempeuh uhah thupha hong piak theih nading ahi hi. “ Topa note’ Pasian’ tungah thuciamna na bawl ciangun na ciamna uh tungsak loin na ommawk kei ding uh hi. Bang hang hiam cih leh Topa na Pasian un hong kal teekteek ding a, note tungah khialhna hong hi ding hi. Ahih hangin thuciamna bawl ding pan na kikep uhleh note’ sungah khialhna om lo ding hi. Na kam uh tawh na ciamsa uh thu pen Topa note’ Pasian’ tungah nomau utthu-a na ciam uh ahih manin na kam uh panin a gingkhia peuhmah na tunsak ding uh na ngaihsun ding uh hi. “Na vengpa’ leenggui lo-ah na pai uh ciangin na ut zahzah uh na kham dong uh leenggah na ne thei ding uh a, ahih hangin na van sung uhah na guang kei ding uh hi. Na vengpa’ ankung ding laite lakah na pai uh ciangin na khut uh tawh a vuite na zut thei ding uh a, ahih hangin phiaukawi tawh na vengpa’ ankung ding laite na at kei ding uh hi. “Mi khat in zi la-in a tenpih ciangin, tua nu tungah kilawm lohna a om manin numei in a pasal’ mitah maipha mu lo a, amah in makna lai gelhin ama tungah pia-in ama inn panin sawlkhia a, a pasal’ inn panin amah kihem khia-in, amah pai-in midang khat’ zi va suak a, a pasal nunung in amah deih lo leuleu a, makna lai gelhin a numei’ khut sungah koih a, a inn panin tua nu sawlkhia-in, tua ahih kei leh zi dinga a la a pasal nunung a sih leh, tua numei a hawlkhia a pasal masa in, tua nu a kinitsak khit ciangin a zi dingin lakik thei nawn lo ding hi. Bang hang hiam cih leh tua pen Topa’ mai-ah kihhuaina hi a, Topa note’ Pasian un luah dingin hong piak leitang tungah mawhna na tunpih kei ding uh hi. “Mi khat in zi a neih tungin galkapte tawh kuankhia lo ding a, nasep khat peuhpeuh zong kisawl lo ding hi. A laksa a zi tawh a lungdam khawm dingin inn-ah kum khat sung maang ding hi. “Kuamah in an gawina ahi a, an gawina suangpek a tungnung ahi zongin khapna-in la lo ding hi. Bang hang hiam cih leh khapna-in nuntakna a la suak ding hi. “Mi khat in Israel mi a sanggamte khat gu-in, amah in sila bangin a bawl ahi a, a zuak ahi zongin a kimuh leh, tua guta pa kithat ding hi. Tua bangin note’ lak panin siatna na siangsak ding uh hi. “Phaknatna hong tun ciangin Levi siampite in hong gen bangin na gamtat ding uh ngaihsun un. Amaute ka thupiakna bangin na gamtatna dingun na kingaihsun ding uh hi. Egypt panin na paikhiat lai-un lampi-ah Topa na Pasian un Miriam’ tungah a hihna phawk un. “Na vengte uh tungah na khat peuhpeuh leitawi na piak uh ciangin ama hong khapna a la dingin a inn-ah pai kei un. A pualamah na ding ding uh a, leitawi na piakna mipa in nang kiangah a na khap hong paipih ding hi. Amah mizawng ahihleh ama hong khap puan na zantaamsak kei ding uh a, ni a tum ciangin, a puanza silhin nang thupha hong piak theihna dingin tua hong na khap ama kiangah na piakik ding uh hi. Tua pen Topa note’ Pasian’ mai-ah note a dingin thumanna hi ding hi. “A zawng a cimawh a kicial nasempa, na sanggamte khat ahi a, na gam sung na khuapite sunga om peemta khat peuhpeuh ahi zongin, na nengniam kei ding uh hi. A sep ni-in ama thaman, nitum ma-in na pia ding uh hi (bang hang hiam cih leh amah zawng a, tua bek a lungsimah om hi). Tua hikeileh Topa’ tungah amah in hong khia ding a, note na mawh ding uh hi. “Tate’ tangin pate kithat lo ding a, pate’ tangin zong tate kithat lo ding hi. Mi khempeuh ama khialhna hang bekin kithat ding hi. “Peemta’ thu ahi a, pa nei lo mi’ thu ahi zongin tuate a’ ding thutang na heisak kei ding uh a, meigong numei’ puan zong khapna-in na laksak kei ding uh hi. Egypt-ah sila na hihna uh le Topa note’ Pasian in tua lai panin hong hotkhiatna na phawk ding uh hi. Tua ahih manin hih banga na gamtat nading uh thu kong pia hi. “Na lo-ah an la-in lo lai-ah anlom na mangngilh uh ciangin a tawm dingin na paikik kei ding uh hi. Tuate pen peemta, pa nei lo, le meigong numeite a’ ding ahi hi. Hih pen Topa note’ Pasian in na khut uh tawh na sepna khempeuh uhah note thupha hong piak theih nading ahi hi. Na oliv kungte uh na sat uh ciangin a hiangte na sat kikkik kei ding uh hi. Tuate pen peemta, pa nei lo, le meigong numeite a’ ding ahi hi. Na leenggui lo panun leenggah na kaihkhop uh ciangin a sang na nung khop kik kei ding uh hi. Tuate pen peemta, pa nei lo, le meigong numeite a’ ding ahi hi. Egypt gamah sila na hihna uh na phawk ding uh hi. Tua ahih manin hih bangin na gamtat nadingun thu kong pia hi. “Mite kikalah thu kineihna om a, thukhen zumah amaute pai-in, thukhente in amau’ thu khensakin, a dikpa khahin a mawh pa lelsak a, a mawh pa satna thuak dinga kilawm ahihleh, thukhen pa in amah lumsuksakin a khialhna zahin ama muhin satsak ding hi. Sat sawmli kipia thei ding a, ahih hangin tua val hi lo ding hi. Tua hikeileh, hih sangin a tamvei zaw mi khat in sat lai leh note’ muhna-ah na sanggampa uh a kineubawl suak ding hi. “Bawng in an a cil laitakin a muk na tuam kei ding uh hi. “Sanggam pasalte teng khawmin, tuate khat si-in tapa a neih kei le, a sipa’ zi pen innkuan pualam khualmi tawh kiteng lo ding hi. A pasal’ sanggampa in luppihin a zi dingin amah la ding a, ama tungah pasal’ sanggampa’ nasep sem ding hi. Ama min Israel tungah a maiman’ loh nadingin tua nu in a neih masak a tapa pen a sisa a pasal’ ta-in kiseh ding hi. Mipa in a sanggampa’ zi a laknop kei leh, upate kiang kongpi-ah a sanggampa’ zi pai ding a, ‘Ka pasal’ sanggampa in a sanggampa’ min Israel sungah a zop ding ut lo a, pasal’ sanggampa’ nasep kei tungah hong sem nuam lo hi,’ ci ding hi. Tua ciangin mipa’ khuapi upate in amah samin thu genpih ding uh hi. Amah in, ‘Tua nu ka la nuam kei hi,’ a cih teitei leh, upate’ omin a sanggampa’ zi ama kiangah paito-in a khe panin a khedap kaihkhiatsakin a maitang cilphih ding hi. Tua ciangin tua nu in, ‘A sanggampa’ innkuan a zomto lo mipa hih bangin kibawl ta hen,’ cikhia ding hi. Israel mite lakah ama innkuan pen, ‘A khedap a kikaih khiatsak mipa’ innkuan,’ kici ding hi. “Mi khatlekhat a kilai ciangin, a satpa’ kiang panin a pasal a honkhia dingin a khat pa’ zi hong pai a, a khutin a selsimte a matsak leh, tua nu’ khut na sattansak ding uh a, amah na hehpih kei ding uh hi. “Na ipsung uhah tawisuang nam nih, a lian le a neu, na neikhawm kei ding uh hi. Na innsung uhah tehna nam nih, a lian le a neu, na neikhawm kei ding uh hi. Tawisuang a cing a man na nei ding uh a, tehna a cing a man na nei ding uh hi. Topa note’ Pasian in hong piak leitangah na khan uh a sau theih nading ahi hi. Bang hang hiam cih leh tua bangin gamta-in, a thuman lote khempeuh, Topa note’ Pasian’ tungah a kihhuai ahi hi. “Egypt panin nong paikhiat lai-un lampi-ah Amalek mite in note hong bawlna, note gimin lungkhamin na om laitakun lampi-ah a hong simna, le note’ nungah a nunung khempeuh hong thahna uh phawk un; amaute in Pasian kihta lo uh hi. Tua ahih ciangin Topa note’ Pasian in note’ neih dingin gamh-in hong piak leitang tungah, Topa na Pasian un na kiim uha na galte khempeuh panun tawlngakna hong piak ciangin, mun khempeuh panin Amalek mite a kiphawkna na phiatkhiat ding uh na mangngilh kei ding uh hi. “ Topa na Pasian un luah dingin a hong piak leitangah va pai-in, tua leitang luahin a tungah na ten uh ciangin, Topa na Pasian un a hong piak leitang pana piang gah khempeuh panin a gah masa pawlkhat la-in lawh khat sungah na koih ding uh a, ama min na omsak nadingun Topa na Pasian un a teelna munah na pai ding uh hi. Tua hun laitakin na a sem siampipa kiangah pai-in ama kiangah, ‘ Topa in kote piak dingin ka pu ka pate uh tungah a ciam leitangah ka tun khitna uh tuni-in Topa na Pasian kiangah kong ko uh hi,’ na ci ding uh hi. “Tua ciangin siampipa in note’ khut panin a lawh hong saang ding a, Topa note’ Pasian biakna tau mai-ah koih ding hi. “ Topa note’ Pasian mai-ah note in, ‘A vak kawikawi kote’ pupi pen Aram mi hi a, amah Egypt-ah paisukin tua munah a peem lai-in mi tawmno ahi hi. Tua lai-ah amah a lian, a thahat, tampi a pha minam khat a suak hi. Egypt-te in kote hong ngong bawlin hong gimsak a, kote sal bangin hong bawl uh hi. Tua ciangin ka pu ka pate uh Pasian ahi Topa Pasian’ tungah ka kiko uh a, Topa in kote’ aw hong za-in, ka gimnate uh, ka sepnate uh le hong netniamnate uh a mu hi. Topa in a vangliatna le a thahatna, launa lianpi, lim le na lamdangte tawh Egypt panin kote hong paikhiatpih hi. Amah in hih mun hong tunpihin, bawngnawi le khuaizu tui bangin a luanna gam hih leitang ko tungah hong pia hi. Tua ahih ciangin en in, Topa, nangmah in kote nong piaksa leitang panin a gah a min masa kong paipih uh hi,’ na ci ding uh hi. Tua ciangin Topa note’ Pasian’ mai-ah na koihsuk ding uh a, Topa note’ Pasian’ mai-ah na bia ding uh hi. Topa note’ Pasian in note le na innkuanpihte uh tungah hong piak na a hoih khempeuhte hangin note le Levi mite le note lakah a om peemtate na lungdam khawm ding uh hi. “Sawm-ah-khat piak kum ahi, a kum thumna kumin, amaute in na khuapite uh sungah an ne-in, gilvahin a om theih nadingun Levi mite, peemtate, pa nei lote, le meigong numeite tungah na piak uh, na khawhsa uh sawm-ah-khat na piak khit uh ciangin, Topa note’ Pasian’ mai-ah, ‘Ka innsung panin a siangtho dingteng ka tuamkoih khin hi. Tua tham loin kei nong sawlna bangin na thupiaknate khempeuh tawh kizui-in Levi mite, peemtate, pa nei lote, le meigong numeite tungah ka pia khin hi. Hih tungtangah na thupiakna khat zong ka khial kei a, ka mangngilh zong om lo hi. Dahin ka kah sungin zong sawm-ah-khat ka ne kei a, ka nit sungin zong ka khenkhia kei a, misite tungah zong ka pia kei hi. Topa ka Pasian’ thu ka mang a, kei nong thupiakna khempeuh bangin ka hih khin hi. Vantung, nangma omna a siangtho panin hong ensuk inla, kote’ pulepate tungah bawngnawi le khuaizu tui bangin a luanna gam na ciam mah bangin, nangma mi Israel-te le na hong piaksa leitang thupha hong pia in,’ na ci ding uh hi. “Tuni-in Topa na Pasian un hih thukhamte le ngeina kipte na zuih ding uh note tungah thu hong pia hi. Tua ahih ciangin na lungsim khempeuh uh le na nuntakna khempeuh uh tawh na hih ding uh limtakin na ngaihsun ding uh hi. Tuni-in, Topa pen note’ Pasian ahihna le note in ama lampite tawnin, ama thukhamte le ama thupiaknate le ama ngeina kipte zui-in, ama thu na man’ ding uh na gen khin uh hi. Tuni-in Topa in note pen amah in note tungah hong ciamsa bangin ama neih ding mi na hihna uh, le note in ama thupiaknate khempeuh na zuih nading uh, ama bawlsa minam dangte khempeuh sangin phatna le minthanna le pahtawina a lianzaw a ngahin hong koih nading, le ama gensa mah bangin Topa note’ Pasian a dingin a siangtho mi na hih nading uh hong gen khin hi,” a ci hi. Tu-in Moses le Israel upate in mite thu pia-in, “Tuni-a kong gen uh thupiakna khempeuh na zui ding uh hi. Topa na Pasian un note hong piak leitangah pai dingin Jordan na kantan ni-un suangtumpite na phut ding uh a, buan tawh na zut ding uh hi. Na pu na pate uh Pasian ahi Topa in note tungah hong ciam mah bangin bawngnawi le khuaizu tui bangin a luanna leitang, Topa na Pasian un note hong piakna gamah a lut dingin na galkah uh ciangin tua suangte tungah hih thute na gelh ding uh hi. Jordan na galkah khit uh ciangin Ebal Mual tungah tuni-a kong thupiakna uh tawh kizui-in hih suangte na phut ding uh a, buan tawh tua suangte na zut ding uh hi. Tua lai-ah Topa na Pasian uh a dingin suang kibawl biakna tau khat na bawl ding uh a, tuate tungah sik tawh a kibawl nazatte na liik kei ding uh hi. Topa na Pasian uh a dingin a kiseek lo suangtumte tawh biakna tau na bawl ding uh a, tua biakna tau tungah Topa na Pasian uh a dingin meihal biaknate na pia ding uh hi. Tua ciangin thunuama biaknate na pia ding uh a, tua lai munah ne-in, Topa na Pasian uh mai-ah na lungdam ding uh hi. Hih thute khempeuh tua suangte tungah a kitel takin na gelh ding uh hi,” a ci uh hi. Tua ciangin Moses le Levi siampite in Israel-te khempeuh tungah, “Israel-te aw, gamdai unla ngai un: Tuni-in Topa note’ Pasian’ mi na suak uh hi. Tua ahih ciangin Topa note’ Pasian’ thu mangin, tuni-a kong gen uh ama thupiaknate le ama thukhamte na zui ding uh hi,” a ci uh hi. Moses in tua ni mahin mite thuhilhin, “Jordan na galkah khit uh ciangin mite thupha a pia dingin Gerizim Mual tungah a ding ding minamte: Simeon, Levi, Judah, Issakhar, Josef, le Benjamin ahi hi. Ebal Mual tungah hamsia a pia dingin a ding ding minamte: Reuben, Gad, Asher, Zebulun, Dan, le Naftali ahi hi. Levi mite in awging lianpi tawh Israel mite khempeuh tungah hih bangin ci ding uh hi. “‘ Topa a dingin a kihhuai ahi, khutsiampa’ khut tawh a kibawl, a kiseek ahi a, a kisung ahi zongin milim bawlin, mun simthamah a koih mipa in gimna ngah ta hen,’ ci ding uh hi. Tua ciangin mi khempeuh in dawngin, ‘Amen,’ ci ding uh hi. “‘A nu ahi a, a pa ahi zongin a zahtak lo mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘A vengpa’ gisuang a botkhia mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Mittaw pa lam a lakkhial mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Peemta, pa nei lo, le meigong numeite a’ ding thutang a heikhiatsak mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Amah in a pa’ tungah maizumna tun ahih manin, a pa’ zidang tawh a lumkhawm mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Ganhing khat peuhpeuh tawh nulepa mawhna a bawl mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘A nu’ tanu, a pa’ tanu, ahih kei leh a sanggamnu tawh a lumkhawm mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘A sungnu tawh a lumkhawm mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘A vengpa a thatsim mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Mawhna nei lopa thah nadingin sumgolh a la mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Hih thute zuihna tawh hih thu a kipsak lo mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “Note in Topa na Pasian uh thu mangin, tuni-a kong gen ama thupiakna khempeuh limtakin na zuih uhleh Topa na Pasian un leitung minam dangte khempeuh sangin a lianzaw-in note hong bawl ding hi. Topa na Pasian uh thu na man’ uhleh hih thuphate khempeuh note tungah hong tung ding hi. “Khuapi sungah thupha ngah mi na hi ding uh a, lote-ah zong thupha ngah mi mah na hi ding uh hi. “Note’ sung pana piangte, le na leitang uh pana piangte, le na ganhing uh pana piang, na bawngte uh pungin na tuuhonte uh tungah thupha om ding hi. “Na seengte uh le na annel mekna kuangte uhah thupha om ding hi. “Na sepna khempeuh uhah thupha na ngah ding uh hi. “ Topa in, note’ langah hong pang na galte uh na mai uhah lelhna thuaksak ding hi. Amaute lampi khat tawnin hong kuan ding uh a, note’ mai panin lam sagih tawnin taikeek ding uh hi. “ Topa in note’ ansal tung le na hihna khempeuh uhah thupha hong puak ding hi. Topa na Pasian un note hong piakna leitangah amah in note tungah thupha hong pia ding hi. “Note in Topa na Pasian uh hong thupiaknate zui-in ama lampi na tot uhleh amah in note tungah hong ciamsa bangin ama a dingin a siangtho mi dingin Topa in note hong kipsak ding hi. Topa in note hong sapna thu midang khempeuh in thei ding uh a, amaute in note hong kihta ding uh hi. Note piak dingin na pu na pate uh tungah Topa in a ciamsa gam sungah note’ sung pana piangte, na gan khawi pan uha piangte, le na leitang pan uha piangte-ah Topa in note nakpitakin hong hausak ding hi. Note’ leitangah ama hunin guah a zusak ding le na sepna khempeuh uh thupha a pia dingin Topa in a na hoih kholna vantung note hong hon ding hi. Note in minam tampite tungah leitawi na pia ding uh a, ahih hangin note in leitawi na la kei ding uh hi. “Ahih hangin note in Topa na Pasian uh thu mang loin, tuni-a kong gen ama thupiaknate le ama thukhamte khempeuh limtakin na zuih kei uhleh, hih samsiatna khempeuh note tungah hong tung ding a, note hong ban ding hi. “Khuapi sungah hong kisamsia ding a, lo-ah zong hong kisamsia ding hi. “Na lawhte uh le na annel mekna kuangte un zong samsiatna ngah ding hi. “Note’ sung pana piangte le na leitang uh pana piangte, na bawngte uh le na tuuhon note uh in zong samsiatna ngah ding hi. “Na sep na bawlna khempeuh uhah hamsia na ngah ding uh hi. “Note in Topa na nusiat uh a, na gamtatsiat uhleh, note sia-in na sihmang khit matengun Topa in note tungah samsiatna, buaina, cihmawhnate hong tungsak ding hi. A luah dingin na lutna uh leitang panin note hong beisak matengin note lakah pulnatna a tun nadingin Topa in bawl ding hi. Topa in pulnatna le cisa natna, meima nasia le a sa mahmah keutumna, huihpi’ mutgawpna le a nom tawh note hong vatgawp ding a, note na sih matengun tuate na thuak ding uh hi. Na lu tung uha om vantungte pen sumngo bangin sanin guah zu lo ding a, na nuai uha om leitung pen sik bangin sak ding hi. Topa in na gam sung uha guahte tang dingin leivui le sehnel hong zusak ding a, note na sih matengun vantung panin note tungah tuate hong kiasuk ding hi. “ Topa in na galte uh mai-ah note hong guallelsak ding hi. Amaute a do dingin lam khatah na kuan khawm ding uh a, amau’ mai-ah lam sagihin na taikeek ding uh hi. Leitung kumpi gamte khempeuh’ muhna-ah note a cikzethuai na hi ding uh hi. Note’ luanghawmte pen huih lak a leeng vasate khempeuh le leitung a ganhingte khempeuh’ an hi ding a, tuate a bengkhia ding mihing om lo ding hi. Topa in note na damkik theih loh nading uh Egypt meimatumte le meima daite, meima lipneite le cithak tawh note hong vatgawp ding hi. Topa in haina, mittawtna, le lungsim buaina tawh note hong vatgawp ding hi. Mittawte in khuamial lakah khua a zawt bangin sunin khua na zawt ding uh a, na hihnate uhah na maavang kei ding uh hi. Note hong kinengniamin na tate uh hong kisut niloh ding a, note hong huh ding kuamah om lo ding hi. “Zi dingin lawm khat na dong ding uh a, midang khat in na luppih ding hi. Inn na lam ding uh a, tua sungah na teng kei ding uh hi. Leenggui lo na zuan ding uh a, a gah na ne kha kei ding uh hi. Na muh tangpi-un na bawngtal uh kigo ding a, a sa na ne kha kei ding uh hi. Note’ mai panin na la uh hong kingawh laksak ding a, note kiangah hong kipia kik nawn lo ding hi. Na tuute uh na galte uh tungah kipia ding a, note hong huh ding kuamah om lo ding hi. Na tapate uh le na tanute uh midang tungah kipia ding a, amaute ngai-in sun nilohin na mit un enin na mit uh gim ding hi. Tuate pen nomau’ tha tawh na dalzawh ding uh hi lo ding hi. Na theih nai loh uh minam khat in na leitang panun a piangte le na nasepsa khempeuh uh ne tum ding a, note hong kinengniamin hong kisugawp tawntung lel ding hi. Tua ahih ciangin na mit un a muh ding nate in note hong hehsak mahmah ding hi. Topa in note na kidamsakkik theih loh ding uh a nasia mahmah meimatumte tawh na khukte uh le na khete uh meimasak gawpin, na khenuai panun na luzang dong uhah na thuak ding uh hi. “Note le na pu na pate un a theih ngei loh minam khat kiangah Topa in note le note tungah na koih uh na kumpipa uh hong tunpih ding a, tua lai-ah singlesuang tawh a kibawl pasian dangte’ na na sem ding uh hi. Topa in note hong paikhiatpihna mite lakah a cikzethuai, paunak, le gentehna na suak ding uh hi. “Khaici tampi lo-ah na tuh ding uh a, ahi zongin tawmno bek na khawm ding uh hi; bang hang hiam cih leh kauphe in nemang ding hi. Note in leenggah lo zuanin na puah ding uh a, ahih hangin leenggahzu dawn loin, leenggah zong na ne kei ding uh hi; bang hang hiam cih leh lung in tuate ne ding hi. Na gam sung khempeuh uhah oliv kung na nei ding uh a, ahih hangin a thau tawh note na kizut kei ding uh hi; bang hang hiam cih leh na oliv gahte uh pulh ding hi. Tanute le tapate na nei ding uh a, ahih hangin amaute pen nomau a’ hi lo ding uh hi; bang hang hiam cih leh amaute galmat suak ding uh hi. Na singte khempeuh uh le, na leitang panun a piang khempeuh kauphete in tang ding uh hi. “Note lakah a om peemtate lian semsem ding uh a, note na neu semsem ding uh hi. Amaute in note’ tungah leitawi hong pia ding uh a, note in amaute tungah leitawi na pia kei ding uh hi. Amaute a makai hi-in, note a nungzui na hi ding uh hi. “Amah in note hong piak thupiaknate le thukhamte zui loin, Topa na Pasian uh thu mang lo na hih manun, note na sih matengun hih samsiatnate khempeuh note’ tungah hong tungin, note hong delhin hong pha ding uh hi. Note le na suanlekhakte uh tungah a tawntungin tuate pen lim le nalamdang hi ding hi. Hih a tampi nate khempeuh om napi-in note in lungdamna le lungsim kipahna tawh Topa note’ Pasian’ na sem lo na hih manun, Topa in note’ langah a hong sawl ding na galte uh’ na, gilkialna le dangtakna, pum guakin omna, le na khempeuh kitangsapna tawh, na sem ding uh hi. Na galte un note hong suksiat matengin note’ ngawngah sik hakkol hong thuah ding uh hi. note na sih matengun amaute in na ganhon note uh le na leitang panun a piang gahte hong neksak ding uh hi. Amaute in note hong beisak matengun note a dingin an, leenggahzu, ahih kei leh sathau, na ganhingte uh ahih kei leh na tuuhon note uh zong hong nusiat lo ding uh hi. Na gam sung uha a om na muan uh, a sang a muanhuai na kulhpite uh a cip khit dong matengin note’ khuapite khempeuh sungah amaute in note hong umcih ding uh hi. Topa na Pasian un note hong piaksa na gam sung khempeuh uhah a om na khuapite khempeuh sung uhah note hong umcih ding uh hi. “Na galte un hong umcihna le hong lungkhamsak nading ahi na lungkham hun sung uhah Topa na Pasian un note a hong piaksa, na sung panun a piang na tanute uh le na tapate uh’ sate na ne ding uh hi. Note lakah a ngeksuak, a cithei pen mipa in a sanggampa, a it a zi, le amah tawh a om a tate a nunung pen’ tungah an pia nuam lo ding hi. Na khuapite khempeuh sung uhah hong umcihna le na galte un note hong lungkhamsak nading hun sungah bangmah kinei nawn lo ding ahih manin ama nek a tate’ sate kuamah in midang hawm nuam lo ding hi. “Hih a minthang, a zahtakhuai min, Topa na Pasian uh na kihtak theih nadingun hih laibu sunga kigelh hih thute limtakin zuih ding na ngaihsut kei uhleh, Topa in note le na suan na khakte uh tungah nasia-in sauvei a om gimna, gimna a tuan diak, le a nasia, nat saute hong tungsak ding hi. Amah in note’ kihtak Egypt natnate note’ tungah hong tungsakkik ding a, note’ tungah tuate kilawi lo ding hi. Note na siat matengun hih thukham laibu sungah a kiciamteh lo natna le gimna khempeuh zong Topa in no tungah hong tungsak ding hi. Note, vantung aksite zahin a tam na hihna sung uhah tawmno bek na pha ding uh hi; bang hang hiam cih leh Topa na Pasian uh thu na mang kei uh hi. Topa in note tungah a hong bawlna le note tampi hong phaksakna-ah nuam a sak mah bangin, note tungah siatna tunsakna le note suksiatna-ah zong Topa in nuamsa ding a, a luah dingin na lutna uh leitang panin note hong kilakhia ding hi. “ Topa in leimong khat panin mong khat, mi khempeuhte lakah note hong thehthang ding hi. Tua lai-ah note le na pu na pate un a theih nai loh singlesuang tawh a kibawl pasian dangte’ na na sem ding uh hi. Hih minamte lakah oltak a nuntakna na mu kei ding uh a, kiptaka na om nading uh gam na nei kei ding uh hi. Topa in tua lai-ah lungsim linna, mit gimna, le nuntak tha beina hong pia ding a, na nuntakna uh lunghimawhin na om tawntung ding uh hi. Sun le zanin na lau ngitnget ding uh a, nuntak lungmuanna na nei kei ding uh hi. Na lungsim un a kihtak launa le na mit un a muh ding nate’ hangin, zingsangin, ‘Nitak hileh!’ na ci ding uh a, nitakin, ‘Zingsang hileh!’ na ci ding uh hi. Note na zin kik ngei nawn kei ding uh hi, ci-in kong ciam khualzinna, Egypt gamah teembaw tawh Topa in note hong paipih kik ding hi. Tua lai-ah sila numei le sila pasal dingin na galte uh tungah na kizuak ding uh a, ahih hangin kuamah in note hong lei lo ding hi,” a ci hi. Hihte pen, Horeb-ah amaute tawh thuciamna a bawlsa banah, Israel mite tawh Moab gamah thuciamna a bawl dingin Topa in Moses a sawl, a thuciamna kammalte ahi hi. Moses in Israel-te khempeuh samin amaute kiangah, “Egypt gam sung note’ mit muhah, Topa in Faro’ tung le ama nasemte khempeuh le ama gam khempeuhah a bawlna, note’ mit in a muhsa ze-etna lianpite, limte, tua nalamdang liante khempeuh na thei khin uh hi. Ahih hangin tuni dongin Topa in note’ tungah a thu na tel nading uh lungsim hitaleh, na muh nading uh mit hitaleh, na zak nading uh bil hitaleh hong pia nai lo hi. Kum sawmli sung sehnel gamah note hong makaih khin hi. Note’ tung panin na puante uh sia nai lo a, na khe panun zong na khedapte uh sia nai lo hi. Topa pen na Pasian uh ahihna na theih nadingun nek ding anlum, le dawn ding leenggahzu ahi a, khamtheih zu ahi zongin na ne nai kei uh a, ahi zongin na kisapna teng uh hong pia hi. Hih mun na tun uh ciangin Heshbon kumpipa Sihon le Bashan kumpipa Og, eite a do dingin hong kuankhia uh a, ahih hangin amaute i zo hi. Amaute’ leitang i la a, Reuben mite, Gad mite, le Manasseh minam alangte tungah luah dingin i pia hi. Tua ahih ciangin na hihna khempeuh uhah na daupai theih nadingun hih thuciamna kammalte khempeuh limtakin na zuih ding uh na ngaihsun ding uh hi. Hih kiciamna note bek tawh a bawl hi lo a, tuni-in eite tawh Topa i Pasian’ mai-ah a ding mite tawh a bawl mah bangin tuni-in eite tawh a om nai lo i suan i khakte tawh zong a bawl ahi hi. “Egypt gamah i tenna le note in na nawk uh minamte lakah i paina na thei uh hi. A muhdahhuai amau’ na, singlesuang a kibawl, ngunlekham a kibawl, amaute’ lakah a om a milimte uh na mu khin uh hi. Topa in amah maisak lo ding a, Topa’ hehna le hazatna meikhu bangin tua mipa’ langkhatah khuzaw-in, hih laibu sunga kigelh samsiatnate ama tungah tu ding a, Topa in a mun khempeuh panin ama min phiat ding hi. Topa in hih thukham laibu sunga a kigelh thuciam samsiatnate khempeuh tawh kizui-in gimna a thuak dingin Israel minamte khempeuh lak panin amah tengkhia ding hi. “Hong khanglai ding, note’ nungah hong piang na tate uh, le a gamla gam panin a hong pai gamdang mite in, tua gam’ gim ngahna le Topa in a natsak cinatnate a muh uh ciangin, ‘A gambup pen kaat le ci, le nin a kangtum, khai kituh lo, bangmah po lo, lopa zong a po zawh lohna mun Sodom le Gomorrah, Admah le Zeboiim bangin a kilawnthal gawp, a hehna le a sinsona tawh Topa’ lotgawpte tawh kibang hi,’ ci ding uh hi. Minam khempeuhte in, ‘Bang hangin Topa in hih bangin hih gam bawl ahi hiam? Hih hehna lian, bang a cihnopna ahi hiam?’ ci takpi ding uh hi. Tua ciangin mite in, ‘Amah in Egypt gam panin a paikhiatpih lai-in amaute tawh a bawl, a pu a pate uh Pasian ahi Topa’ thuciamna amaute in nusia-in, a theih nai loh uh pasian-te le amah in amaute tungah a piak loh pasian dangte’ na va semin a biakna hang uh ahi hi. Tua ahih ciangin a mite tungah Topa heh mahmah a, hih laibu sunga om samsiatnate khempeuh hih leitungah tungsak hi. Topa in hehna, sinsona, lungham mahmahna tawh a leitang panun amaute zunglot a, tuni-a i muh bangin amaute gam dangah hawlkhia hi,’ ci ding uh hi. “ Topa i Pasian in hong lahkhiat loh thusim om a, ahih hangin hih thukham sunga om thute khempeuh i zuih theih nadingin hong lakkhia a, eite le i suan i khakte’ zuih tawntung ding ahi hi. “Note’ mai-ah ka koih, na teel ding thu thupha le samsiatna, hih nate khempeuh note tungah hong tungin, Topa in note hong hawlkhiatna minamte lakah hih thute phawk kikin, Topa note’ Pasian’ kiangah note le na suan na khakte uh paikikin, na lungsim khempeuh uh le na nuntakna khempeuh uh tawh tuni-a kong gen ama thute na man’ uh ciangin, Topa na Pasian un note na ngei uh hong bangsakkikin, note tungah hehpihna hong nei ding a, Topa na Pasian un note hong thehthangna mi khempeuhte lak panin note hong kaikhawm kik ding hi. A kihawlkhia na mite uh van mong pekah a om leh zong, Topa na Pasian un tua lai panin note hong khawmin, tua lai panin amah in hong paipih ding hi. Note in na neih theih nadingun, na pu na pate uh neih leitangah, Topa na Pasian un hong paipih ding a, na pu na pate uh sangin a citheizaw a tamzaw-in note hong bawl ding hi. Note in na lungsim khempeuh uh le na nuntakna khempeuh uh tawh Topa na Pasian uh itin na hintheih nadingun, Topa na Pasian un note le na suanlekhakte uh tungah thu man’ nopna lungsim hong guan ding hi. Topa na Pasian un hih samsiatnate khempeuh, no hong bawlsia na galte uh le na langte uh tungah tungsak ding hi. Note in Topa’ thu mangkikin, tuni-a kong gen ama thupiaknate khempeuh na zui ding uh hi. “Bang hang hiam cih leh tuni-a kong gen hih thupiakna pen note a dingin a haksa lua hi lo a, na zuihlah ding uh zong hi lo hi. Note in, ‘Eite in a thu za-in i sep theih nadingin kua in vantungah eite a dingin hong paisakin hong laksak ding ahi hiam?’ na cih theih nadingun vantung a om hi lo hi. Note in, ‘Eite in a thu za-in i sep theih nadingin kua in tuipi galkhatah hong paisakin hong laksak ding ahi hiam?’ na cih theihna dingun tuipi gal-a om zong hi lo hi. A thu, hong nai mahmah hi. Note in na hih theih nadingun na kamsung uh le na lungsim sung uhah om hi. “Tuni-in na teel dingun note’ mai-ah nuntakna le a hoih na, sihna le siatna ka koih khinzo hi. Topa na Pasian uh itna, ama lampite totna, ama thupiaknate le ama thukhamte le ama ngeina kipte zuihna tawh, tuni-a no tungah kong gen ahi Topa na Pasian uh thupiaknate na man’ uhleh, note nungta-in tampi na pha ding uh a, a luah dingin note na lutna uh leitang tungah Topa na Pasian un note thupha hong pia ding hi. Ahih hangin na lungsim uh kihei-in, note in amah zui loin, pasian dangte a bia ding le a na a sem dingin note na kiheikhiat uhleh, tuni-in note tungah hih thu kong genkhol hi: Note na si ding uh a, Jordan kantanin note a lut ding le a nei dingin na paina uh leitang tungah sauvei na nungta kei ding uh hi. Tuni-in note’ langkhatah teci a pang dingin vantung le leitung ka sam a, note’ mai-ah na teel dingun nuntakna le sihna, thupha le samsiatna ka koih hi. Tua ahih ciangin note le na suanlekhakte uh na hintheih nadingun nuntakna teel unla, Topa na Pasian uh itin, ama thu mangin, amah beel un; bang hang hiam cih leh Topa in na pu na pate uh Abraham, Isaac, le Jakob tungah piak dingin a kiciamsa leitangah note na tentheih nadingun tua pen note-a’ dingin nuntakna le khansauna ahi hi,” a ci hi. Tua ciangin Moses in Israel-te khempeuh tungah a thugen zomlai hi. Amah in amaute kiangah, “Tuni-in kei kum za le kum sawmnih ka pha ta a, keima ut bangin ka gamtangzo nawn kei hi. Topa in kei kiangah, ‘Hih Jordan galkhatah na pai kei ding hi,’ hong cizo hi. Topa na Pasian mahmah uh note’ mai-ah hong galkah ding hi. Note’ mai-ah hih minamte amah in susia ding a, note in amaute na suankhia ding uh hi. Topa’ gensa bangin note’ mai-ah Joshua hong galkah ding hi. Topa in amaute a suksiat lai-in, Amor kumpi Sihon le Og tung le amau’ leitang tungah a bawl bangin amaute tungah bawl ding hi. Topa in note tungah amaute hong pia ding a, note kong piak thupiaknate khempeuh tawh kizui-in amaute tungah na bawl ding uh hi. Thahat unla, hang un. Lau kei unla, amaute kihta kei un. Bang hang hiam cih leh note tawh hong pai pa pen Topa na Pasian uh ahi hi. Note hong cimawhsak lo ding a, hong nusia lo ding hi,” a ci hi. Tua ciangin Moses in Joshua samin, Israel-te khempeuh muhin ama kiangah, “Thahat inla hang in. Bang hang hiam cih leh amaute tungah piak dingin Topa in amau’ pute pate tungah a ciamsa leitangah hih mite tawh na pai ding a, nangmah in tua leitang amaute na ngahsak ding hi. Na mai-ah a pai pa pen Topa ahi hi. Amah in nang hong ompih ding a, nang hong cimawhsak loin, zong hong nusia lo ding hi. Lau kei inla, lungkia kei in,” a ci hi. Moses in hih Thukham gelhin Topa’ Thuciamna Singkuang a pua Levi mi siampite le upate khempeuh tungah a pia hi. Moses in amaute thu pia-in, “Kum sagih a cin sim, a kisehsa suahtaksakna hun, buk pawi hunin, amah in a teelna mun Topa na Pasian uh mai-ah a kilak dingin Israel-te khempeuh a pai uh ciangin, amau’ zakin Israel-te khempeuh mai-ah hih thukham na sim ding uh hi. Tua ciangin Topa in Moses kiangah, “En in, na sih ding hun hong nai ta hi. Joshua sam inla, amah ka sawl theih nadingin kikhopna buk sungah hong om un,” a ci hi. Tua ciangin Moses le Joshua pai-in kikhopna buk sungah va om uh hi. Tua ciangin meii khuam omna puanbuk sungah Topa kilang hi. Meii khuam, puanbuk kong gei-ah a ding hi. Tua ciangin Topa in Moses kiangah, “En in, na pu na pate kiang a zuan ding na hita hi. Nang na om nawn loh ciangin hih mite pen na paina uh mite lakah a gam sung pasian-te uh tawh paktat ding uh a, amaute in kei hong nusia-in amaute tawh ka bawl ka thuciamna uh siasak ding uh hi. Tua hun ciangin amaute tungah ka sin so-in, amaute nusia-in ka mai ka seel ding a, amaute beimang ding uh hi. Tua ni ciangin amaute in, ‘Eite’ lakah i Pasian a om loh manin hih siatnate i tungah hong tung hi lo ahi hiam?’ a cih theih nadingun amaute tungah siatna le gimna tampi tung ding hi. Amaute, pasian dangte lamah kihei uh ahih manin amau’ gamtatnasa siatnate khempeuh hangin tua hun ciangin ka mai ka seel taktak ding hi. “Tua ahih ciangin hih lai gelh inla, Israel mite hilh in. Hih la, kei a dingin Israel mite’ langkhatah teci a suah theih nadingin amaute tungah hilh in. Bang hang hiam cih leh a pu a pate uh tungah piak dinga ka kiciamna, bawngnawi le khuaizu tui bangin a luanna gamah amaute tunpih khinin, amaute in ne-in khamin a thau khit uh ciangin, pasian dangte a bia dingin kihei-in kei hong simmawhin ka thuciamna siasak ding uh hi. Siatna le haksatnate amaute tungah a tun ciangin hih la, teci-in amaute’ langkhatah pang ding hi (bang hang hiam cih leh a suanlekhakte un mangngilh lo ding uh hi); bang hang hiam cih leh piak dingin ka kiciam leitangah amaute ka paipih ma-in, amau’ vaihawm kholh a ngimnate uh ka thei hi,” a ci hi. Tua ahih ciangin tua ni mahin Moses in hih la gelh a, Israel mite a hilh hi. Tua ciangin Topa in Nun’ tapa Joshua sawlin, “Thahat inla hang in; bang hang hiam cih leh amaute piak dingin ka kiciam leitang tungah Israel mite na paipih ding a, nang tawh kong om ding hi,” a ci hi. Moses in a bei dongin hih Thukham kammalte laibu sungah a gelh a man ciangin, Moses in Topa’ Thuciamna Singkuang a pua Levi mite thu pia a, “Hih Thukham laibu la unla, note’ langkhatah teci dingin a om theih nadingin Topa na Pasian uh Thuciamna Singkuang gei-ah koih un. Bang hang hiam cih leh a lehdo mite le a lungkhauh thei mite na hihna uh ka thei hi. En un, note tawh kei a nungta khawm laipi mahin, tuni-in Topa na lehdo khin uh hi. Ka sih khit ciangin bangzah takin lehdozaw lai ding na hi uh hiam! Hih thute amaute’ bilah genin, amau’ langkhatah teci a pang dingin vantung le leitung ka sap theih nadingin na minam upate uh le na uliante khempeuh uh kei kiangah hong khawm un. Bang hang hiam cih leh ka sih khit ciangin note siatgamtatin, note kong sawlna lampi panin na pial taktak ding lam uh ka thei hi. Note’ sepna tawh amah hehsakin, Topa’ muhna-ah a sia gamta ding na hih manun, hong pai ding hunte-ah, note’ tungah gimna hong tung ding hi,” a ci hi. Tua ciangin hih la malte a bei dongin Israel a kikhawm khempeuhte’ zakin Moses in gen a, “Vantungte aw, ngai un, thu kong gen ding hi. Ka thugente leitung in za hen. Ka thuhilhte guahmal bangin zu-in, ka thugente daitui bangin kia hen la, lo ngeek tunga guah phin leh ankung tunga guahzu bang tahen. Bang hang hiam cih leh Topa’ min ka phat ding hi. Eite’ Pasian a liatna gen un! “Eite’ belh Topa, a nasepna kicing a, ama sepna khempeuh thumanna ahi hi. Thumanna nei-in, mawhna a nei lo Pasian hi a, amah thutangin thuman hi. Ama tungah amaute gamtat sia uh a, amaute’ sitbaanna hangin ama tate hi nawn lo uh hi. Amaute pen a lampial, a lungsim kawi khang mite ahi uh hi. A hai, ngaihsutna nei lo mite aw, tua bangin Topa thuk ding na hi uh hiam? Amah pen, note a hong piangsak, note hong bawlin a hong kipsak, na pa uh hi lo ahi hiam? “A beisa hunte phawk unla, khang tampi hunte ngaihsun un. Na pate uh dong le-uh cin, hong hilh ding uh a, na upate uh dong le-uh cin hong gen ding uh hi. Sang Pen pa in minam dangte tungah amau’ gamh pia a, mihingte a ten nading mun a seh ciangin vantungmi a phazah tawh a kizui-in mite’ gamgi a phut hi. Ahi zongin Topa’ tanh pen ama mite hi a, Jakob’ suante pen a kipia ama luah ahi hi. “Amah in sehnel gam, huihpi nunna gam sungah amaute mu hi. Amah in amaute kawi-in kem a, ama mitnauta bangin amaute kem hi. A bu a vil, a note tungah a kha a zap, a khate zakin a note a man, a kha tawh a note a pua muvanlai bangin Topa bek mah in amaute makaih a, amaute kiangah gamdang pasian om lo hi. “Amah in leitung a sangna-ah amaute tuangsak a, amaute in gamlak pana piangte a ne uh hi. Suangpi panin amaute khuaizu hupsakin, meisuang tawh a kibang suang panin sathau a nesak hi. Bawnghon panin bawngnawi thaukhal, tuuhon panin tuunawi, tuunote le tuutalte’ thau tawh, Bashan bawnghonte le keelte, mangbuh hoihpente tawh leenggahtui san na dawn uh hi. “Israel mite thau mahmah uh a, a lehdo thei mi suak uh hi. Note thau-in lianpi pha-in, na zol uh hi. Tua ciangin amaute a bawl Pasian amaute in nusia-in, amau a Honkhia pa thusim lo uh hi. Amaute pen pasian dangte tawh ama hazat theih nadingin gamta uh a, a kihhuai gamtatnate tawh amaute in amah hehsak uh hi. Amaute in pasian ahi lo dawite, amau’ theih ngei loh pasian-te, hong suak nunung pasian thakte, na pu na pate un a theih ngei loh pasian-te’ tungah biakna a pia uh hi. Note a hong Honkhia pa na phawk kei uh a, note a hong suaksak Pasian na mangngilh uh hi. “ Topa in tua thu thei a, a tapate le a tanute in amah hehsak uh ahih manin tua ama tate a nolh hi. Amah in, ‘Amaute’ kiang panin ka mai ka seel ding a, amaute’ thumong bang hong hi hiam, ka en ding hi. Bang hang hiam cih leh amaute a lampial khang mite hi a, cihtakna a nei lo tate ahi uh hi. Amaute in pasian a hilote tawh ka hazat nading hong bawl uh a, a milimte uh tawh kei hong hehsak uh hi. Tua ahih ciangin mi-a a gen taak lo mite tawh amaute’ hazat theih nading ka bawl ding a, a hai mahmah minam khat tawh amaute ka hehsak ding hi. Bang hang hiam cih leh ka hehna in mei tawhkuang a, Leinuaite’ gamdong a kuang hi. Leitung le a tunga piangte kangtum a, mualte’ bulpite kuangsak hi. “‘Amaute’ tungah siatna ka khol ding a, amaute’ tungah ka thaltangte ka zang ding hi. Gilkialin amaute si ding uh a, a sa mahmah meikuang le gunei natna in amaute netum ding hi. Keimah in amaute a pet dingin ha hiam a nei gamsate amaute a tu dingin gu a nei gulte ka sawl ding hi. Namsau in gamlakah amaute susia-in, inn sungah launa lianpi om ding a, tangval le nungak, naungek nawi nete, samkangte tawh susia khawm ding hi. Keimah in, “Amaute gamlapi-ah ka thehthang ding a, mite lakah amaute a kiphawkna ka beisak ding hi,” ka ci thei ding hi. Amau’ langte in ngaihsun khialin, amaute in, “Eite i gualzo hi. Topa in hihte khempeuh bawl lo hi,” hong ci kha ding uh ahih manin galte’ hong phin ding ka lau hi,’ a ci hi. “Bang hang hiam cih leh amaute, ngaihsutna a nei lo minam hi a, amaute’ sungah thu theihtelna om lo hi. Amaute a pil hileh, hih thu theitel ding uh a, amau’ thu tawpna mu ding uh! Amau a Honkhia pa in amaute zuakin, Topa in amaute piakhia kei leh bangci-in mi khat in mi tulkhat delh mangin, mi nih in mi tul sawm taisakzo ding ahi hiam? Bang hang hiam cih leh i galte’ pasian eite’ Pasian bang hi lo a, i galte’ thungetna a mawkna ahi hi. Amaute, Sodom le Gomorrah bangin siahuai uh a, gu nei-in a kha leenggah a gah leenggui tawh kibang uh hi. Amau’ leenggahzu pen gulpi gu le a gupha gul gunei gu tawh kibang hi. “Hihte kei kiangah kikholin, ka vankoihna sungah kisiincip hi lo ahi hiam? Phulakna le thukkikna kei a’ hi a, a hun ciangin amaute puk ding uh hi. Bang hang hiam cih leh amau’ gim ngah hun ding hong naita a, amau’ siat nading hong tung pah hi. Bang hang hiam cih leh amaute’ vang a beina le sila le sila a hilote a beina a muh ciangin Topa in a mite’ dikna kilangsak ding a, ama nasemte tungah hehpihna nei ding hi. Tua ciangin amah in, ‘Amau’ pasian-te, a bukna uh suangpi, amaute’ biakpiakna thau ne-in, leenggahzu tawh a biakna uh a dawnte koi-ah om ahi hiam? Amaute thosakin note kihuhsak unla, amaute, na kidalna uh hisak un! ‘Tu-in thei un, keimah a kici pa pen kei ka hi a, kei simloh pasian dang kuamah om lo hi. Ka that a, ka nungtasak hi. Ka liamsak a, ka damsak hi. Ka khutsung pan a honkhiazo kuamah om lo hi. Bang hang hiam cih leh vantung lamah ka khut laamto-in ka kiciam a, a nungta tawntung ka hih mah bangin, a tee ka namsau taatin, thu ka khen ciangin, ka galte tungah phu ka la ding a, kei hong mudahte ka thukkik ding hi. Ka thaltangte si ka tawksak ding a, ka namsau in mi that ding hi. a kithatte le a kimante, kei hong langpangte, sugawp ding hi,’ a ci hi. Topa’ mite phat un, no minam dangte aw; bang hang hiam cih leh amah in a nasemte’ phu la a, alangte thuk-in, ama mite’ gam adingin kilemna a bawl hi,” a ci hi. Tua ciangin Moses hong pai-in, mite’ zakin amah le Nun’ tapa Joshua in hih la malte khempeuh a sut uh hi. Moses in Israel-te khempeuh tungah hih thute a gen a man ciangin amaute kiangah, “Hih thu khempeuh limtakin zui unla, na tate un a zuih dingin na hilh theih nadingun tuni-a note tungah kong gen thu khempeuh na lungsim uhah koih un. Bang hang hiam cih leh hih pen note a dingin a thuneu hi loin note’ nuntakna hi a, a luah dingin Jordan galkhat na paina uh gam sungah hih thu tawh sauveipi na hing ding uh hi,” a ci hi. Tua ni mahmahin Topa in Moses kiangah, “Jerikho gallam, Moab gam sungah a om Nebo Mual, hih Abarim mualtungah kahto in. A neih dingun Israel mite tungah ka piak Kanaan gam gal et in. Hor Mual tungah na sanggampa Aaron si-in a mite kiangah a kigawm bangin, na kahtohna mualtungah si inla, na mite kiangah pai-in kigawm in. Bang hang hiam cih leh Zin gam, Kadesh khua gei-a Meribah tui phual, Israel mite lakah keimah nong upna na siasak a, Israel mite lakah a siangtho-in kei nong zahtak kei hi. Tua ahih manin na mai-ah a om gam na gal muh tei ding a, ahih hangin Israel mite ka piak gam sungah nang na pai kei ding hi,” a ci hi. Hih pen, Pasian’ mi Moses in ama sih ma-in Israel mite thupha a piakna ahi hi. Amah in, “Sinai panin Topa hong pai a, Sinai panin eite a’ ding hong suakkhia hi. Paran Mual panin hong taangkhia a, a taklam khutah meikuang tawi-in, mi siangtho tul sawmte kiang panin a hong pai hi. Hi taktak hi; amah in a mite it a, ama tungah a ki-ap mi khempeuh a khut sungah om hi. Tua ahih ciangin amaute in na kalsuanna hong zui uh a, nang tung panin lamlahna ngah uh hi. Jakob mihonte’ neih dingin Moses in kote tungah ngeina khat hong pia hi. Mite’ makaite kikhawmin, Israel minamte khempeuh a kikaihkhop ciangin, ama mi Israel-te lakah Topa, kumpi a suak hi,” a ci hi. Reuben minamte’ thu gen a, “Reuben nungta-in si kei hen la, ama mite zong mi tawm hi kei ta hen,” a ci hi. Tua ciangin Judah minamte’ thu genin, “ Topa aw, Judah’ aw ngai inla, a mite kiangah amah paipih in. Na khutte tawh ama a’ ding do inla, a galte’ dona-ah a huhpa hi in,” a ci hi. Tua ciangin Levi minamte’ thu genin, “Levi tungah na Thummim pia inla, na midik pa tungah na Urim pia in. Massah ah na ze-et mipa, Meribah tuite-ah na kitotpih pa ahi hi. A nu le a pa sangin nangmah hong thupi ngaihsutzaw uh a, ‘Amaute ka thupi sim kei hi,’ a ci pa ahi hi. Amah in a sanggamte paaikhia-in, a tate don lo hi. Bang hang hiam cih leh Levi minamte in na thu hong mangin, na thuciamna zui uh hi. Amaute in na ngeina kipte Jakob suante hilhin, na thukhamte Israel-te hilh ding uh hi. Amaute in na mai-ah paknamtui hong koihin, na biakna tau tungah meihal biakna bup hong koih ding uh hi. Topa aw, ama nate tungah thupha pia inla, a khut tawh a sepnate saang in. A galte’ kawng sutan inla, a ding kikzo nawn lo dingin amah a mudahte sugawp in,” a ci hi. Benjamin minamte’ thu genin, “ Topa in a it mipa ama kiangah nuam takin om hi. Amah in sun tawntung kemin, amaute lakah om hi,” a ci hi. Josef minamte’ thu genin, “ Topa in ama leitang, tung lamah a om vantung letsong hoihpente, le nuai-a om a thuknate tawh, ni hanga gah a hoihpente, le kha hanga piang a hoihpente tawh, tanglai mualte tunga piang a hoih a limci pente le tawntung mualte’ hauhna tawh, leitung le a tunga om letsong hoihpente le sawlbawk lakah a tengpa’ maipha tawh thupha pia tahen. Hihte khempeuh, Josef tungah tung hen la, a sanggamte lakah ulian ahi mipa’ lu tungah tung tahen. A tacil, bawngtal bangin thahat a, a kite, gamsial kite tawh kibang hi. Amah in tuate tawh mite nawt ding a, leimong dongah amaute khempeuh phul ding hi. Efraim mi tul sawmte tua bang hi a, Manasseh minam tul tampite zong tua bangmah ahi hi,” a ci hi. Zebulun minamte’ thu genin, “Zebulun aw, na paikhiatna-ah lungdam in. Issakhar aw, na puanbukte sungah lungdam in. Amaute in a mual uhah mite sam ding uh a, amaute in tua lai-ah biakpiakna mante pia ding uh hi. Bang hang hiam cih leh amaute in tuipi tung le sehnel sungah na manpha kiseelte ngah uh hi,” a ci hi. Gad minamte’ thu genin, “Gad a lianin a bawlpa in thupha ngah ta hen! Gad in humpinelkai bangin buk khikhe a, amah in a baan le a luzang, a balkham hi. Amah in lei hoihpenna mun ama a dingin teel hi. Bang hang hiam cih leh a ukpa’ tanh kikoihcingsak hi. Mi makaite’ ngahte mah amah zong kingahsak a, amah in Israel-te tawh Topa’ thupiakna le thuman khennate a sem hi,” a ci hi. Dan minamte’ thu genin, “Dan pen Bashan panin a diangkhia humpinelkai no ahi hi,” a ci hi. Naftali minamte thu genin, “O Naftali, maipha tawh nuam a sa, Topa’ thupha tawh a kidim, bualtuite le leitaw lam a nei pa,” a ci hi. Asher minamte thu genin, “Asher in tapa dangte sangin thupha ngahzaw tahen. A sanggamte’ pahtak hi hen la, a gam sungah oliv thau kidim tahen. Na khuapite, sik le sumngo tawh kidal ding a, na nuntak laiteng na thahatna tua bang hi ding hi,” a ci hi. “Israel aw, nangmah huh dingin vantungah a tuang a liatna tawh vanpi-ah a om, Pasian tawh a kibang kuamah dang om lo hi. Tawntung Pasian pen nangma omna hi a, nangmah huh dingin tawntung khutte a om hi. Amah in na mai-ah galte nawtkhia-in, ‘Susia un,’ ci hi. Tua ahih ciangin Israel mite lungmuangin om ding uh hi. Jakob suante bek an le leenggahzu gamah om hi. Hi taktak hi, a vantungte in daitui hong khiatsuk hi. Israel aw, mi nuamsa na hi hi. Nang hong kihuhna lum le na gualzawhna lum le na gualzawhna namsau ahi Topa in nang banga a hotkhiat mi kua om ahi hiam? Na galte in hong mai-etin, na kiangah hong pai ding uh a, amaute na tuancil ding hi,” a ci hi. Tua ciangin Moab zanglei panin Jerikho gal Nebo Mual, Pisgah dawnah Moses paito hi. Tua ciangin Topa in gam khempeuh, Gilead gam pan Dan ciang dong, Naftali gam khempeuh, Efraim le Manasseh gam, Judah gam khempeuh Nitumna Tuipi dong, Negeb gam, le nisuh kung khuapi kuam a kici Jerikho panin Zoar ciang dong a kikhung zanglei a lak hi. Tua ciangin Topa in ama kiangah, “Hih gam, Abraham, Isaac, le Jakob tungah kiciamin, ‘Na suanlekhakte uh tungah ka pia ding hi,’ ka cih leitang ahi hi. Na mit tawh nang kong musak khin a, ahih hangin tua lai-ah nang na pai kei ding hi,” a ci hi. Tua ahih ciangin Topa’ thugenna bangin Topa’ nasem Moses pen Moab gamah si a, Bethpeor galkhat, Moab gam kuamah amah kiphum hi. Ahih hangin tuhun dongin a kiphumna mun kuamah in thei lo hi. Moses a sihin kum za le kum sawmnih pha hi. A mit maang lo a, a tha ngeina zong kiam lo hi. Moab zanglei-ah Israel mite ni sawmthum sung Moses hangin a kah khit uh ciangin Moses hangin kahna le thumna a veng ta hi. Tua ciangin Moses in, ama tungah a khut nga khin ahih manin Nun tapa Joshua lungsim pilna tawh a kidim hi. Tua ahih ciangin Israel mite in ama thu mangin, Topa in Moses a thupiaksa bangin a gamta uh hi. Israel mite sungah Moses bangin Topa in maitang kimu-in a theih kamsang dang kuamah om lo hi. Egypt gam sungah Faro le a nasemte le a gam khempeuhah a hih dingin Topa in ama tungah a piak limte le na lamdangte khempeuh a nei kuamah dang om lo hi. Israel-te khempeuh muhna-ah Moses in a hih a lian vangliatna le a lauhuaite khempeuh a hih thei, amah tawh a kibang kuamah dang om lo hi. Topa’ nasem Moses a sih khit ciangin Topa in Moses’ nasem, Nun tapa Joshua kiangah, “Ka nasempa Moses si ta ahih ciangin tu-in ding inla, nang le hih mite khempeuh, hih Jordan kantanin Israel mite tungah ka piak gam sungah pai un. Moses tungah ka ciamsa bangin na khe in a totna mun khempeuh nang tungah kong pia hi. Sehnel gam le hih Lebanon panin gun lianpi Eufratis gun dong, ni a tumna lama Tuipi Lian lam, Hit mite’ leitang khempeuh nangma gam hi ding hi. Na nuntak sung tawntung kuamah in na mai hong khak zo lo ding hi. Moses tawh ka om mah bangin nang tawh zong kong om ding hi. Nang kong tamasak kei ding a, kong nusia kei ding hi. Thahat inla, hang in; bang hang hiam cih leh amaute piak dingin a pu a pate uh tungah ka ciam leitang hih mite na luahsak ding hi. Thahatin hang inla, ka nasem Moses in nang hong piak thukhamte khempeuh tawh kizui-in na gamtat ding limtakin ngaihsun in. Na paina peuhah hoihtakin na lamzan’ theih nadingin tuate khat zong pelh kei in. Hih thukham laibu na mangngilh ngei kei ding hi. A sunga kigelh thute khempeuh tawh kizui-in na gamtat theih nadingin sunlezanin na lungngaingai ding hi. Tua hileh na maa vang ding a, na nasep tangtung ding hi. Thu hong pia khin hi lo ka hi hiam? Thahat inla hang in. Lau kei inla lungkia kei in; bang hang hiam cih leh na paina peuhpeuhah Topa na Pasian nang tawh hong om hi,” a ci hi. Tua ciangin Joshua in mi makaite thu pia-in, “Giahphual ah pai unla, mite thu pia-in, ‘Na lam-an ding uh kigingkhol un; bang hang hiam cih leh Topa na Pasian un na neih dingun note hong piak leitangah pai-in a luah dingin ni thum sungin hih Jordan a galkah ding na hi uh hi,’ ci un,” a ci hi. Tua ciangin Joshua in Reuben mite, Gad mite, le Manasseh minam a langte tungah, “ Topa’ nasem Moses in note thu hong piakna kammal, ‘ Topa na Pasian un note tawlngakna mun hong pia-in, hih leitang note hong pia ding hi,’ a cihna thu phawk un. Moses in Jordan galkhat a note hong piak leitangah na zite uh, na taneute uh, le na ganhingte uh a na om ding uh hi. Ahih hangin note lakah galhang mi khempeuh in hiam tawi-in Jordan kantanin na sanggamte uh mai-ah pai-in, note hong piak bangin Topa in na sanggamte uh tungah tawlngakna pia-in, Topa na Pasian un amaute a piak leitang amaute in zong a luah mateng uh na huh ding uh hi. Tua ciangin note’ neih leitangah ciahkikin, Topa’ nasem Moses in Jordan gal ni a suahna lamah note hong piak leitang na luah ding uh hi,” a ci hi. Amaute in Joshua dawngin, “Kote nong thupiak khempeuh ka hih ding uh a, nong sawlna peuhpeuhah ka pai ding uh hi. Na khempeuhah Moses’ thu ka man’ uh mah bangin nangma thu zong kong mang ding uh hi. Moses a ompih mah bangin Topa na Pasian in nang hong ompih ta hen! Na thupiakna le na thute, na thupiak peuhpeuh hong langpangin a mang lo mipa kithat ding hi. Thahat inla hang in,” a ci uh hi. Tua ciangin Nun’ tapa Joshua in Shittim panin thukanin mi nih sawlsim a, “Pai-in gam va en unla, a diakdiakin Jerikho khua hong en un,” a ci hi. Amaute pai uh a, Rahab min nei a paktat numei khat’ inn-ah tungin giak uh hi. Jerikho kumpipa tungah, “Gam sung a en dingin Israel mi pawlkhat tu nitakin hih lai-ah hong tungzo hi,” ci-in kigen hi. Tua ciangin Jerikho kumpipa in Rahab kiangah mi sawlin, “Na inn sunga hong tum, na kianga hong tung mite hong paikhiatpih in; bang hang hiam cih leh gam khempeuh a en dingin amaute hong pai uh hi,” a ci hi. Ahih hangin Rahab in tua mi nihte la-in na seel khin hi. Tua ahih ciangin amah in, “Hi mah hi, ka kiangah mi hong pai uh hi. Ahih hangin amaute koi pan hong pai uh hiam, cih ka thei kei hi. Kulhkongpi a kikhak ding khuamial ciangin tua mite paikhia uh a, koi-ah pai uh hiam, cih ka thei kei hi. Manlangin amaute delh le-uhcin na pha kha ding uh hi,” a ci hi. Ahih hangin amah in innkhum zangah tua mite paipih to-in innkhum zangah a koih ngei bangin a koihsa anthul kungte lakah amaute seel khin hi. Tua ahih ciangin mite in Jordan lamah ngahmun dong delh uh a, a delhte a paikhiat phetin kulhkongpi kikhak hi. Amaute a lup ma-in innkhum zanga amaute kiangah Rahab paito-in tua mite kiangah, “ Topa in note’ tungah hih leitang hong piak khitna ka thei a, note ka hong kihta mahmah uh hi. Hih gam sunga a teng mi khempeuh note’ hangin lunggim uh hi. Bang hang hiam cih leh Egypt panin nong paikhiat lai-un Topa in note’ mai-ah San Tuipi a kansakna, le Jordan galkhat a om na suksiatmang uh Amor mite’ kumpi nihte ahi Sihon le Og tungah na bawlna uh ka za khin uh hi. Tua thu ka zak phetun ka lungsim uh bei a, note’ hangin mite’ lungsimah hanna bei hi; bang hang hiam cih leh Topa na Pasian uh, tunga om vantung le nuai-a om leitungah Pasian ahi hi. Tua ahih ciangin tu-in note tungah kong dik gamtat bangin note zong ko innkuan-ah nong dik gamtat nading uh Topa’ min tawh kei tungah hong kiciam unla, a man taktak lim khat kei hong pia un. Ka nu, ka pa, ka sanggamnute, ka sanggampate, le amaute tawh a kizomte khempeuh hong hon unla, sihna panin kote hong suaktasak un,” a ci hi. Mite in ama tungah, “Nang’ tangin kote ka si ngam uh hi. Hih ko’ thu na genkhiat kei nakleh, Topa in kote tungah hih leitang hong piak ciangin nang tungah dikna le thumanna tawh kong gamta ding uh hi,” a ci uh hi. Tua ciangin amah in tawlet panin khau khat tawh amaute khaisuk hi. Bang hang hiam cih leh khuapikulh sung lampangah ama inn kilam a, khuapikulh sungah amah teng hi. Amah in amaute kiangah, “Mualtungah pai un. Hong delhte tawh na kituak kha ding uh hi. Hong delhte hong ciahkik mateng ni thum sung tua lai-ah bu un. Tua khit ciangin na pai nading uhah na pai thei ding uh hi,” a ci hi. Mite in ama kiangah, “Kote nong kiciamsak thuciamna thu tawh kisai-in ka paubaang kei ding uh hi. En in, hih leitangah kong pai uh ciangin kote nong khaisukna hih tawlet-ah hih khauhual san na khih ding hi. Na inn sungah na nu le na pa, na sanggamte le na pa’ innkuanpihte khempeuh na khawm ding hi. Mi khatpeuh na innsung panin kongzing lampi-ah a paikhiat le ama sihna pen ama khialhna hang hi ding a, kote ka siang ding uh hi. Ahih hangin inn sungah nang tawh a om mi khatpeuh a kisukkhak leh, ama sihna pen kote’ khialhna hi ding hi. Ahih hangin hih ko thute na genkhiat leh, kote nong kiciamsak thuciamna tawh kisai-in kote ka siang ding uh hi,” a ci uh hi. Tua ciangin amah in, “Na thugen bangun hi ta hen,” a ci hi. Tua ciangin amah in amaute sawlkhia a, amaute paikhia uh hi. Amah in a khauhual san a tawlet-ah a khih hi. Amaute paikhia-in mualtungah pai uh a, a delhte a ciahkik mateng ni thum sung om uh hi. Bang hang hiam cih leh a delhte in lamdung khempeuh zongin bangmah mu lo uh hi. Tua ciangin mualtung panin mi nihte paisuk kik uh a, galkahin Nun’ tapa Joshua kiangah tungin amau’ tunga thupiang khempeuh a gen uh hi. Amaute in Joshua kiangah, “ Topa in leitang khempeuh eite’ khut sungah hong pia taktak hi. Tua tham loin tua gam a teng mi khempeuh eite’ hangin lungmang uh hi,” a ci uh hi. A zing ciangin Joshua tho baihin Israel mi khempeuh tawh Shittim pan dingkhia-in Jordan gun tung uh a, a galkah ma-un tua munah a giak uh hi. Ni thum a cin ciangin giahphual ah uliante pai-in mite thu pia uh a, “ Topa na Pasian uh Thuciamna Singkuang Levi siampite in a puak na muh uh ciangin na omna panun dingkhia-in na zui ding uh hi. Hih lamah pai ngei lo na hih manun na pai nading uh lampi tu-a bangin na thei ding uh hi. Ahi zongin note le tua Thuciamna Singkuang kikalah mun awng, pi tulthum bang om ding hi. A gei-ah pai kei un,” a ci uh hi. Tua ciangin Joshua in mite kiangah, “Nomau mah kisiangsak tawm un; bang hang hiam cih leh zing ciangin note’ lakah Topa in na lamdangte hong bawl ding hi,” a ci hi. Tua ciangin Joshua in siampite kiangah, “Thuciamna Singkuang la unla, mite’ mai-ah paisuak un,” a ci hi. Amaute in Thuciamna Singkuang la-in mite’ mai-ah a pai uh hi. Tua ciangin Topa in Joshua kiangah, “Moses tawh ka omkhawm bangin nang tawh kong omkhawm nading thu amaute in a theih nadingun Israel mite khempeuh muhna-ah tuni-in nang liatsak ding ka kipan ding hi. Thuciamna Singkuang a pua siampite thu na pia ding a, ‘Jordan tuite’ gei na tun uh ciangin Jordan tui sungah tang loin na ding ding uh hi,’ na ci ding hi,” a ci hi. Tua ciangin Joshua in Israel mite kiangah, “Hih lai-ah hong pai unla, Topa na Pasian uh thute za un,” a ci hi. Joshua in, “A nungta Pasian note lakah a omna hih thu tawh na thei ding uh hi. Amah in pel loin note’ mai panin Kanaan mite, Hit mite, Hiv mite, Perez mite, Girgash mite, Amor mite, le Jebus mite hawlkhia ding hi. En un, leitung buppi’ Topa’ Thuciamna Singkuang note’ mai Jordan lamah pai ding hi. Tua ahih ciangin tu-in Israel minamte sung panin nam khat pan mi khat, mi sawm le nih teel un. Leitung buppi’ Topa ahi Topa’ Thuciamna Singkuang a pua siampite’ khete in Jordan tui a sik ciangin Jordan tuite luang nawn lo ding a, a tunglam panin hong luangsuk tuite lomkhatin khawl ding hi,” a ci hi. Tua ahih ciangin mite’ mai-ah Thuciamna Singkuang a pua siampite tawh Jordan galkah dingin a puanbuk uh panin mite dingkhia-in, Thuciamna Singkuang a puate Jordan tung a, Thuciamna Singkuang a pua siampite’ khe tui-ah a kidiah ciangin (anlak hun sung khempeuh Jordan a piau khempeuhah let hi), a saklam panin hong luangsuk tuite khawlin khangto a, a gamlapi, Zarethan gei-a khuapi Adamah-ah a lomin kikhol a, Ci Tuipi a kici Arabah tuipi-ah a luangsukte kikhentat siang hi. Tua ciangin Jerikho gei-ah mite galkah uh hi. Israel-te khempeuh lei keu tungah a galkah sung, minam bup in Jordan a khen’ khit mateng, Topa’ Thuciamna Singkuang a pua siampite Jordan gun laizang lei keu tungah ding uh hi. A minam bupin Jordan a galkah khit uh ciangin Topa in Joshua kiangah, “Nam khat pan mi khat, mite lak panin mi sawm le nih teel inla, amaute thu pia-in, ‘Siampite’ khe a dinna mun mahmah, Jordan gun laizang panin suangtum sawm le nih la unla, a galah pua-in tu nitakin na giahna uh munah koih un,’ ci in,” a ci hi. Tua ciangin Joshua in nam khat panin mi khat, ama sehsa mi sawm le nihte Israel mite lak panin a sam hi. Joshua in amaute kiangah, “ Topa na Pasian uh Thuciamna Singkuang mai Jordan laizangah pai unla, note in Israel minam phazah tawh kizui-in suangtum khat ciat la-in na liangko tung uhah pua un. Hong tung ding hunah na tate un, ‘Hih suangtumte bang a cihnopna ahi hiam?’ ci-in hong dot ciangin note’ lakah lim khat hi ding hi. Tua ciangin amaute kiangah, ‘ Topa’ Thuciamna Singkuang mai-ah Jordan tuite kikhentan a, Jordan a galkah laitakun Jordan tuite kikhentan hi,’ na ci ding uh hi. Tua ahih ciangin hih suangtumte pen Israel mite tungah a tawntungin phawkna hi ding hi,” a ci hi. Joshua’ thupiak bangin Israel mite gamta uh a, Topa in Joshua a thupiak bangin Israel minam a phazah tawh kizui-in Jordan laizang panin suangtum sawm le nih a la uh hi. Amaute in a giahna uh munah tuate pua-in a koih uh hi. Tua ciangin Joshua in Thuciamna Singkuang a pua siampite’ khe a dinnasa mun, Jordan laizangah zong suang sawm le nih mah a phut hi. Tuni dongin tua suangte tua mun mahah omlai hi. Bang hang hiam cih leh Moses in Joshua a thupiak bangin mite tungah a gen dingin Topa in Joshua a thupiak khempeuh a vekpi-in a kiman khit matengin Jordan laizangah Thuciamna Singkuang a pua siampite a ding uh hi. Mite nawhsa-in galkah uh hi. Mite khempeuh a galkah khit uh ciangin Topa’ Thuciamna Singkuang le siampite, mite’ mai-ah na ma pai uh hi. Moses in amaute a sawlsa bangin Israel mite mai-ah hiam tawi-in Reuben minamte, Gad minamte, le Manasseh minam alangte na ma pai uh a, mi tul sawmli bang galdo dingin hiam tawi-in a baihsa-in Jerikho zanglei lam Topa’ mai-ah a pai uh hi. Tua ni-in Israel-te khempeuh’ muhna-ah Topa in Joshua liansak hi. Amaute in Moses lamdangsa-in a om uh mah bangin Joshua a nuntak sung tawntung lamdangsa-in a om uh hi. Tua ciangin Topa in Joshua kiangah, “Thuciamna Singkuang a pua siampite Jordan panin hong paikhiat nading thu pia in,” a ci hi. Tua ahih ciangin Joshua in siampite thu pia a, “Jordan panin hong paikhia un,” a ci hi. Topa’ Thuciamna Singkuang a pua siampite Jordan laizang panin hong paikhia-in, siampite’ khe lei keu tungah hong omtoh ciangin, a ngeina bangin amau’ munah Jordan tuite hong luangkikin a piau khempeuh a tuum hi. Kha masa a ni sawm ni-in Jordan panin mite paikhia uh a, Jerikho nisuahna lam gamgi Gilgal-ah giahphual sat uh hi. Jordan panin a lakkhiat uh tua suangtum sawm le nihte Joshua in Gilgal-ah a phut hi. Tua ciangin amah in Israel mite kiangah, “Hong tung ding hunah na tate un, ‘Hih suangte bang a cihnopna ahi hiam?’ ci-in hong dot uh ciangin, ‘Israel-te in lei keu tungtawnin hih Jordan kantan hi,’ ci-in na tate uh na theisak ding uh hi. Bang hang hiam cih leh eite in i kantan khit matengin Topa na Pasian un a kansak San Tuipi tungah a bawl bangin, note in na kantan khit matengun Topa na Pasian un Jordan tuite note a dingin kangsak hi. Topa vanglian mahmah hi, ci-in leitung mi khempeuh in a theih nading le Topa na Pasian uh na zahtak tawntung theih nading uh ahi hi,” a ci hi. Nitumna lam Jordan galkhat a om Amor mite’ kumpite khempeuh le tuipi gei-a om Kanaan mite’ kumpi khempeuh in, Israel mite in a kantan khit mateng amaute a dingin Jordan tuite Topa in a kansakna thu a zak uh ciangin lungmang uh a, Israel mite’ hangin a lungsim uh a bei hi. Tua hun laitakin Topa in Joshua kiangah, “Meisuang tem bawl inla, Israel mite a nih veina vun at kik in,” a ci hi. Tua ahih ciangin Joshua in meisuang tem bawl a, Gibeath-haaraloth munah Israel mite a vun a at hi. Joshua in amaute vun a atna a thu in: Egypt gam panin hong paikhia pasal galhang mite khempeuh, Egypt panin hong paikhiat khit uh ciangin lamkal sehnel gamah si khin uh hi. Hong paikhia mite khempeuh vun a ki-at khit hangin Egypt panin hong paikhiat khit uh sehnel gam lamkal a suak mite khempeuh a vun uh ki-at nai lo hi. Bang hang hiam cih leh amaute in Topa’ thu a ngaih lohna hangun Egypt panin a hong paikhia minam bup, galhang mite a sih khit dong kum sawmli sung sehnel gamah Israel mite lam pai uh hi. Topa in amau’ tungah a piak dingin a pu a pate tungah a ciamsa bawngnawi le khuaizu tui bangin a luanna leitang a muhsak loh nading thu amaute tungah Topa kiciam hi. Tua ahih ciangin Joshua in vun a at mite pen, amaute’ tangin amah in a piansak amau’ tate ahi hi. Bang hang hiam cih leh lampi-ah amaute a vun ki-at nai lo ahih manin vun at nai loh ahi uh hi. Minam bup vun ki-atna a man khit ciangin giahphual amau’ mun ciatah a dam mateng a om uh hi. Tua ciangin Topa in Joshua kiangah, “Tuni-in note’ tung panin Egypt gamah sal suakin na minsiatna uh ka zialkhia hi,” a ci hi. Tua ahih ciangin tua mun pen tuni dongin Gilgal kici hi. Israel mite Gilgal-a giahphual ah a om sungun tua kha a ni sawm le li ni nitakin Jerikho zanglei-ah Paisan Pawi a bawl uh hi. Paisan Pawi khit a zing ciang ni teekteekin amaute in tua gam a piang silngo sawh loh moh le ankan a ne uh hi. Tua gam a piang a nek ni uh a zing ciangin manna a bei ta hi. Israel mite in manna nei nawn lo uh a, ahih hangin tua kumin Kanaan leitang a piangte a ne uh hi. Jerikho khua kiangah Joshua a tun ciangin a khuadaktoh leh, a khut sungah namsau dawhsa tawh mi khat a mai-ah na ding hi. Ama kiangah Joshua pai-in, “Ko’ pawl na hi hiam, ahih kei leh ka langte’ pawl na hi hiam?” a ci hi. Amah in, “Hilo hi; Topa’ galkapte a ukpa-in tu-in kong pai hi,” a ci hi. Joshua zong bok sukin bia-in ama kiangah, “Ka topa in a nasempa bang hong sawl nuam ahi hiam?” a ci hi. Tua ciangin Topa’ galkapte a ukpa in Joshua kiangah, “Na khe panin na khedapte suah in. Bang hang hiam cih leh na dinna mun a siangtho leitang ahi hi,” a ci hi. Tua bangmahin Joshua a gamta hi. Tu-in Israel mite’ hangin Jerikho kulhkongpi kikhakcip a, kuamah pusuak thei lo, sungtum thei lo hi. Tua ciangin Topa in Joshua kiangah, “Thei in, na khut sungah a kumpipa le a mi thahatte tawh Jerikho khua kong pia khin hi. Khuapi kimkotah galkap mi khempeuh khatvei na pai ding uh hi. Tua bangin ni guk sung na pai ding uh hi. Siampi sagih in Thuciamna Singkuang mai-ah tuutal ki peengkul sagih tawi ding uh hi. A ni sagih ni-in khuapi kimkotah sagihvei na pai ding uh a, siampite in peengkul tum ding uh hi. Amaute in tuutal ki sauveipi a ginsak khit uh ciangin, peengkul aw na zak phetun nakpitakin mi khempeuh awng ding uh hi. Khuapikulh cimmai ding a, mi khempeuh amau mai ciatah tangtakin khuapi sungah paisuak ding uh hi,” a ci hi. Tua ahih ciangin Nun tapa Joshua in siampite samin amaute kiangah, “Thuciamna Singkuang la unla, tua Topa’ Thuciamna Singkuang mai-ah siampi sagihte tuutal ki peengkul sagih tawisak un,” a ci hi. Tua ciangin amah in mite kiangah, “Mai nawtin pai un. Khuapi kimkotah pai unla, Topa’ Thuciamna Singkuang mai-ah hiam tawi mite paisak un,” a ci hi. Joshua in mite a thupiak bangin Topa’ mai-ah a pai tuutal ki peengkul a tawi siampi sagihte mai nawtin pai-in peengkul tum uh a, Topa’ Thuciamna Singkuang in amaute zui hi. Tua ciangin peengkul a tum siampite’ mai-ah hiam tawi mite pai uh a, peengkulte a kitum suak hun laitakin Thuciamna Singkuang nungah a nungdalte a pai uh hi. Ahih hangin Joshua in mite thu pia-in, “Awng un, ci-a kong sawl hun matengin note awng loin, na aw uh zong na kizasak kei ding uh a, na kam panun aw khat beek gingkhia lo ding hi. Awng un, kong cih ciangin na awng bek ding uh hi,” a ci hi. Tua ahih ciangin amah in Topa’ Thuciamna Singkuang khuapi kimkotah khatvei paisak a, amaute hong ciahkikin giahphual ah a zan giak uh hi. Tua ciangin zingsangin Joshua tho baih a, siampite in Topa’ Thuciamna Singkuang a la uh hi. Topa’ Thuciamna Singkuang mai-ah a pai tuutal ki peengkul sagih a tawi siampi sagihte paisuakin peengkulte tumsuak uh hi. Amaute’ mai-ah hiam tawite pai-in, peengkulte a kitum suak hun laitakin Topa’ Thuciamna Singkuang nungah a nungdalte a pai uh hi. A ni nih ni-in khuapi kimkotah khatvei pai uh a, giahphual ah ciahkik uh hi. Tua bangin ni guk sung a hih uh hi. A ni sagih ni-in khuavak tungin tho baih uh a, tua bangmahin khuapi kimkotah sagihvei a pai uh hi. Tuani bekin khuapi kimkotah amaute sagihvei pai uh hi. A sagih veina-ah, siampite in peengkul a tum ciangin Joshua in mite kiangah, “Awng un; bang hang hiam cih leh Topa in khuapi note hong piazo hi. Khuapi le a sunga omte khempeuh pen Topa’ tungah biakna-in kisusia ding hi. Amah in i sawl kamtaite na seel ahih manin numei paktat Rahab le ama inn sungah amah tawh a omkhawmte khempeuh bek hing ding hi. Ahih hangin suksiat dingin a kiseh nate panin nomau mah na kikem ding uh hi. Tua hikeileh tuate na suksiat ding uh ciangin a kisusia ding nate khat peuhpeuh iplahin la kha-in Israel-te’ giahphual sungah siat nading na khat suaksakin haksatna na tun kha ding uh hi. Ahih hangin ngun le kham, sumngo le sik tawh kibawl nazatte Topa a dingin a siangtho ahi hi. Topa’ sumkoihna-ah tuate tung ding hi,” a ci hi. Tua ahih ciangin mite awng a, peengkulte kitum hi. Mite in peengkul aw a zak phetun nakpitakin awng uh a, kulhpi cimmai-in, mi khempeuh amau mai ciatah tangtakin khuapi sungah pai uh a, khuapi a la uh hi. Tua ciangin amaute in khuapi sunga om khempeuh numei le pasal, a moi a ham, bawngtalte, tuute, le late khempeuh namsau tawh thatmang khin uh hi. Tua ciangin Joshua in tua gam thu a va kansim mi nihte kiangah, “Numei paktat nu’ inn-ah va pai unla, tua lai panin a numei le amah tawh a kizom khempeuh, ama tungah na ciamsa bangun hong paikhiatpih un,” a ci hi. Tua ahih ciangin thu kansim tangvalte va tum uh a, Rahab, a nu, a pa, a sanggamte, le amah tawh a kizom khempeuh a paikhiatpih uh hi. Amaute in tua nu’ tanau teng khempeuh paipih uh a, Israel-te’ giahphual pualamah a koih uh hi. Amaute in khuapi le a sunga om khempeuh mei tawh hal uh a, ngun le kham, sumngo le sik tawh a kibawl nazatte bek Topa’ inn-a sumkoihna-ah a koih uh hi. Ahih hangin numei paktat Rahab, le tua nu tawh a kizomte khempeuh Joshua in a hingkhawi hi. Jerikho khua thu a kansim dingin Joshua in a sawl kamtaite tua nu in na seel ahih manin tuni dongin Israel mite lakah a suanlekhakte a teng uh hi. Tua hun laitakin Joshua in amaute tungah thuciamna khat koih a, “Mi khat kipanin hih Jerikho khuapi a lamkik pa in Topa’ mai-ah samsiatna thuak tahen. A tacil luang khaamin tua khuapi bulpi phut ding a, a tapa neupen luang khaamin a kulhkongpite phut ding hi,” a ci hi. Tua bangin Topa in Joshua ompih a, gam khempeuhah ama min a thang hi. Ahih hangin a ki-ap nate tawh kisai-in Israel mite zuautat uh hi. Bang hang hiam cih leh Judah minam Zerah tapa Zabdi, a tapa Karmi, a tapa Akhan in a ki-ap nate pawlkhat la ahih manin Israel mite tungah Topa heh mahmah hi. Joshua in Jerikho panin Bethel nisuahna lam Bethaven gei-a om Ai khua-ah mi sawlin amaute kiangah, “Paito unla a gam va en un,” a ci hi. Tua mite paito-in Ai khua va ensim uh hi. Amaute Joshua kiangah hong ciahkikin ama kiangah, “Mi khempeuh kuantosak kei inla, mi tulnih ahi a, tulthum ahi zongin kuantosakin Ai khua simsak in. Amaute mi tawmno khat ahih manin tua lai-ah mi khempeuh gimtosak kei in,” a ci uh hi. Tua ahih ciangin mite lak panin tulthum bang tua lai-ah a kuanto uh hi. Ai mite’ mai-ah amaute tai uh a, Ai mite in amau’ kulhkongpi mai panin Shebarim ciang dong delh uh a, tuahsukna munah amaute sawmthum le guk khawng a that uh hi. Hih thu hangin Israel mite’ hanna bei-in, lau mahmah uh hi. Tua ciangin Joshua in dahna limin ama puante balkekin nitak mateng Topa’ Thuciamna Singkuang mai-ah, amah le Israel upate boksuk uh a, amaute in a lu tung uhah leivui a koih uh hi. Tua ciangin Joshua in, “Ala, Topa Pasian, kote a hong susia ding Amor mite’ khut sungah a hong pia dingin bang hangin hih mite Jordan galkhatah hong paipih peuhmah na hi hiam? Jordan galkhatah ten ding a lungkim hi hoh ta le-ung! Topa aw, Israel-te a galte uh mai-ah a nungkik uh ciangin bang gen thei ding ka hi hiam! Bang hang hiam cih leh Kanaan mite le hih gam a teng mi khempeuh in hih thu za ding uh a, kote hong umcihin leitung panin kote hong phiatkhia mang ding uh hi. Tua ciangin a lian mahmah nangma min bang cih ding na hi hiam?” a ci hi. Topa in Joshua kiangah, “Tho in, bang hangin tua bangin lei-ah bok na hi hiam? Israel mite khial a, amaute in ka thupiak thuciamna palsat khin uh hi. Amaute in a ki-ap nate pawlkhat la uh a, amaute in gu-in zuauthu gen uh a, amau’ van lakah tua nate koih uh hi. Tua thu hangin Israel mite in a galte uh nang zo lo uh hi. Amaute pen suksiat ding mi na suak khin uh ahih manin a galte uh mai-ah nungkik uh hi. Note’ lak panin a ki-ap nate na suksiat kei uhleh note tawh kong omkhawm nawn kei ding hi. Tho in, mite siansuah inla, ‘Zing cianga dingin note kisiansuah tawm un. Bang hang hiam cih leh Israel Pasian Topa in, “Israel mite aw, note’ lakah a ki-ap nate om hi. Note’ lak panin a ki-ap nate na lakkhiat matengun na galte uh na nangzo kei ding uh hi,” ci hi. Tua ahih ciangin zingsangin na minam namun note hong kipaipih ding hi. Topa in a lak minam sung panin a behbehin hong pai ding hi. Topa in a lak a beh sung panin a innkuankuanin hong pai ding hi. Topa in a lak a innkuan sung panin a mimi-in hong pai ding hi. Tua ciangin a ki-ap nate tawh a kila khawm mipa le a neih khempeuh, mei-in kihal ding hi. Bang hang hiam cih leh amah in Topa’ thuciamna palsat hi. Israel sungah a zumhuai-in a gamta ahi hi,’ ci in,” a ci hi. Tua ahih ciangin zingsangin Joshua tho baihin, a namnamin Israel-te hong paipih a, Judah minam kila hi. Tua ciangin amah in Judah behte hong paipih a, Zerah-te beh kila hi. Amah in Zerah-te beh a mimi-in hong paipih a, Zabdi kila hi. Tua ciangin amah in ama innkuanpihte a mimi-in hong paipih a, Judah minam Zerah’ tapa Zabdi, a tapa Karmi, a tapa Akhan kila hi. Tua ciangin Joshua in Akhan kiangah, “Ka tapa aw, Israel Topa Pasian minthangsak inla, amah phat in. Tu-in na gamtatnasate kei tungah hong gen inla, bangmah hong im kei in,” a ci hi. Tua ciangin Akhan in Joshua dawngin, “A taktakin, Israel Topa Pasian tungah ka khial khin a, hih bangin ka gamta kha hi. Shinar panin vankia lakah puanhoih khat, le ngun shekel zanih a gik, le shekel sawmnga a gik kham tawn khat ka muh ciangin, tuate iplahin ka lakha hi. Tu-in tuate ka puanbuk sung leilakah a ngunte a nuai-ah omin kiseel hi,” a ci hi. Tua ahih ciangin Joshua in sawltakte sawl a, amaute a puanbukah va tai uh a, a puanbuk sungah a ngun nuainungin na kiseel takpi hi. Amaute in puanbuk panin tuate lakhia-in Joshua le Israel mite khempeuh kiangah hong paipih uh a, tua ciangin amaute in Topa’ mai-ah a koih uh hi. Tua ciangin Joshua le amah tawh a om Israel-te khempeuh in Zerah’ tapa Akhan, le a ngun, a puan, a kham tawn, a tanute, a tapate, a bawngtalte, a late, a tuute, a puanbuk, le a neih khempeuh la uh a, amaute in Akhor Kuam ciangah tuate a paipih uh hi. Tua ciangin Joshua in, “Bang hangin kote tungah gimna hong tun na hi hiam? Tuni-in Topa in nang tungah gimna hong pia hi,” a ci hi. Tua ciangin Israel-te khempeuh in suang tawh Akhan a denglum uh hi. Amaute in a innkuanpih dangte le a neihsate uh zong suang tawh denglumin a hal uh hi. Tua ciangin amaute in tuni donga a om suang honpi ama tungah a ciang uh hi. Tua ciangin Topa’ hehluatna a dai hi. Tua ahih ciangin tu dongin tua mun pen Akhor Kuam, kici hi. Tua ciangin Topa in Joshua kiangah, “Lau kei inla lungkia kei in. Galkap khempeuh nang kiangah la inla, kithawi-in Ai-ah paito in. Nangma khut sungah Ai kumpipa le a mite, a khuapi, le a leitang kong piak khitna thei in. Jerikho le a kumpipa tungah na bawl bangin Ai le a kumpipa tungah na bawl ding a, a van kinusiate le a ganhingte bek note a dingin na la ding uh hi. A khuapi nungah a khuapi a sim dingin na buksim ding uh hi,” a ci hi. Tua ahih ciangin Joshua le galkap khempeuh Ai-ah a paito dingin kipan uh hi. Joshua in a tha kicing mi thahat tul sawmthum teel a, zanin tua mite a sawlkhia hi. Amah in amaute thu pia a, “En un, tua khuapi a sim dingin a nungah na buksim ding uh a, khuapi panin gamlapi-ah na pai kei ding uh hi. Ahih hangin a kigingsa-in na om ding uh a, tua ciangin keimah le kei tawh a om mite khempeuh in khuapi kong naih ding uh hi. A masa bangin kote a do dingin hong kuankhiat uh ciangin amaute’ mai-ah kote ka na tai khem ding uh hi. Khuapi panin amaute hong paikhiat khit uh matengin kote hong delh ding uh hi. Bang hang hiam cih leh amaute in ‘A masa-a bangin eite’ mai-ah amaute tai uh hi,’ ci ding uh hi. Tua ahih ciangin amaute kiang panin ko ka tai ding uh hi. Tua ciangin na buksimna panun note na kipan ding uh a, khuapi na la ding uh hi. Bang hang hiam cih leh Topa na Pasian un note’ khut sungah hong pia ding hi. Khuapi na lak khit uh ciangin Topa’ hong sawlna bangin hihin, mei tawh khuapi na hal ding uh hi. Note thu kong piak khitna thei un,” a ci hi. Tua ahih ciangin Joshua in amaute a sawlkhia hi. A buksimna ding uh munah amaute pai-in, Ai nitumna lam, Bethel le Ai kikalah pang uh a, ahih hangin tua zanin giahphual a mite lakah Joshua omlai hi. Zingsangin Joshua tho baihin mite sam a, mite’ mai-ah Israel upate tawh Ai-ah a paito uh hi. Amah tawh a om galkap khempeuh paito uh a, khuapi mai naihin Ai leilu lampangah phual sat uh a, Ai le amaute’ kikalah luihawm khat om hi. Tua ciangin amah in mi tulnga bang paipihin, khuapi nitumna lam Bethel le Ai kikalah a buksim dingin a koih hi. Tua ahih ciangin galkapte, khuapi leilu lamah a phualpi le khuapi nitumna lamah a nungdalte a koih uh hi. Ahih hangin tua zanin Joshua kuam sungah a om hi. Ai kumpipa in hih thu a theih ciangin amah le tua khuapi mi khempeuh, Israel-te a do dingin manlangin kithawi-in Arabah lam paisukna-ah zingtungin a kuankhia uh hi. Ahih hangin khuapi nungah amah a buksim a omlam thei lo hi. Tua ciangin amau’ mai-ah Joshua le Israel-te khempeuh kilelsak khem uh a, gamlak lamah a tai uh hi. Tua ahih ciangin khuapi sunga om mi khempeuhte amau a delh dingin kikaikhawm uh a, Joshua a delh uh ciangin amaute khuapi panin a kihemkhia ahi hi. Ai khuasung pan Israel-te a delh lo pasal khat beek om lo uh a, khuapi kong honsa-in nusia-in Israel-te a delh uh hi. Tua ciangin Topa in Joshua kiangah, “Na khutsunga om teipi Ai lamah zan in. Bang hang hiam cih leh na khut sungah tua khua kong pia ding hi,” a ci hi. Tua ciangin Joshua in a khutsunga om teipi khuapi lamah a zan hi. Tua ciangin a buksimte diangkhia pah uh a, amah in a khut a zan khit phetin amaute tai-in khuapi sungah lut uh a, a khuapi la-in manlangin a hal uh hi. Ai mite in a nung et kik uh ciangin, khuapi meikhu vanah a kahto a mu uh hi. A nung a mai koimahah tai thei lo uh hi. Bang hang hiam cih leh gamlak lamah tai-in a kilelsak khemte in amau a delhte’ lamah hong kihei-in lehdelh kik uh hi. A buksimte in khuapi a lak khitna le khuapi meikhu a kahtohna Joshua le Israel khempeuh in a muh uh ciangin amaute kihei kikin Ai mite vatgawp uh hi. Tua ciangin Ai khua mite a do dingin khuapi panin Israel dangte hong kuankhia uh hi. Tua ahih ciangin Israel-te’ kikalah amaute om uh a, pawlkhat hih lamah pawlkhat hua lamah om uh ahih manin a suakta khat zong a om lo dongin Israel-te in amaute a vatmai uh hi. Ahih hangin amaute in Ai kumpipa hingmatin Joshua kiangah a paipih uh hi. Amaute in a delhna gamlakah Ai khuami khempeuh thatin, amaute khempeuh a bei dongin namsau tawh a thah uh a man khit uh ciangin, Israel-te khempeuh Ai-ah paikikin Ai khuami a omlaite namsau tawh a vatgawp uh hi. Tua ni-in a si, Ai mi khempeuh numei le pasal a vekpi-in tul sawm le tulnih ahi hi. Bang hang hiam cih leh Ai khuami khempeuh a suksiatmang khit matengin amah in a teipi a zanna a khut dokkik lo hi. Amah in Joshua a thupiak, Topa’ thugenna bangin Israel-te in ganhing le khuapi sunga van kinusiate bek a la uh hi. Tua ahih ciangin Joshua in Ai hal a, tuni donga a om mah bangin nin khol napi khatin piangsak den hi. Tua ciangin amah in nitak mateng sing khat tungah Ai kumpipa a khai hi. Ni a tum ciangin Joshua in thu pia a, amaute in sing tung panin a luang la sukin, khuapi kulhkongpi lutna-ah paai uh a, a tungah suangtum lompi ciang uh a, tuni dongin tua suangcian omlai hi. Tua lai mun, Israel mite’ omna-ah, Moses in a gelhsa a thukhamte tua suangte tungah a gelh hi. Tua ciangin Israel mite in thupha a ngah theih nadingun Topa’ nasem Moses in a thupiaksa bangin Israel mite khempeuh peemta hitaleh tualsuak hitaleh, a upate le a uliante le a thukhente uh tawh, Topa’ Thuciamna Singkuang a pua Levi siampite’ mai, Thuciamna Singkuang langkhat, Gerizim Mual mai lamah mi alang, Ebal Mual mai lamah mi alang a ding uh hi. Tua khit ciangin amah in thukham laibu sunga a kigelh bangbangin thukham kammal khempeuh, thupha le samsiatnate a sim hi. Moses in a thupiak kammalte khempeuh Israel mihonpite, numeite, le amaute lakah a teng peemtate mai-ah Joshua in a simloh khatzong om lo hi. Jordan galkhat a om mualtung gam le lei niamna gam Lebanon lam Tuipi Lian dung khempeuhah a om kumpite, Hit mite, Amor mite, Kanaan mite, Perez mite, Hiv mite le Jebus mite in hih thu a zak uh ciangin Joshua le Israel mite a do dingin lungsim kikhatin kikhawm uh hi. Ahih hangin Gibeon khua-a teng mite in Jerikho le Ai tungah Joshua’ hihnasa thu a zak uh ciangin amaute in khembawl ding vaihawm uh a, lam-an bawlin, a late uh tungah a paatsa ip le a paatsa leenggahzu um, a kikeek leh a kiphopte suanin, a khe uhah a paatsa, a kiphop khedapte bulhin, a paatsa puante tawh a pai uh hi. A ante khempeuh uh zong keu-in ap hi. Amaute Gilgal-a giahphual a Joshua kiangah hong pai-in amah le Israel mite tungah, “A gamlapi panin kong pai uh hi. Tua ahih ciangin kote tawh thuciamna khat hong bawl un,” a ci uh hi. Ahih hangin Israel mite in tua Hiv mite kiangah, “Kote’ mai-ah a teng mite na hi khathei ding uh hi. Tua hileh note tawh thuciamna hong bangci bawltheih ding ka hi uh hiam?” a ci uh hi. Amaute in Joshua kiangah, “Kote, nangma nasem ka hi uh hi,” a ci uh hi. Tua ciangin Joshua in amaute kiangah, “Kuate na hi uh hiam? Koi lai panin hong pai na hi uh hiam?” a ci hi. Amaute in, “ Topa na Pasian uh min hangin a gamla mahmah gam panin na nasemte kong pai uh hi. Bang hang hiam cih leh ama thu, le Egypt gam sungah a hihte khempeuh, le Jordan galkhatah a om Amor kumpi nihte ahi, Ashtaroth ah a teng Heshbon kumpi Sihon le Bashan kumpi Og tungah a hihte khempeuh a kigenna ka za khin uh hi. Ka upate uh le ka gam sung uha a teng mite khempeuh in kote kiangah, ‘Na khualzin nading uh lam-an bawl unla, amaute a dawntuah dingin pai-in amaute kiangah, “Kote, na nasem ka hi uh hi. Tua ahih ciangin kote tawh thuciamna hong bawl un,” va ci un,’ hong ci uh hi. Hih lai-ah ka anlum uh om hi. No kiangah a hong pai dingin kong dinkhiat ni uh, khualzin lam-an dingin ka inn panun ka guan laitakun lum lai hi. Ahih hangin tu-in en un, keu-in ap hi. Hih leenggahzu umte ka thun laitakun a thak ahi hi. Tu-in en un, puakgawp ta hi. Hih ka puante uh le ka khedapte uh khual gamlapi zinna-in paatgawpta hi,” a ci uh hi. Tua ahih ciangin Israel mite in amau’ an puakte sangkha uh a, Topa’ tung panin lamlahna dong lo uh hi. Tua ciangin Joshua in amaute tawh kilemna bawlin, amaute a hinsak nading thuciamna a bawl uh hi. Tua ciangin mihonte’ makaite amau’ tungah a kiciam uh hi. Amaute tawh thuciamna a bawl khit uh ni thum a cin ciangin, amaute pen a vengte ahihna le amaute’ nai-ah a tengte ahihna thu a za uh hi. Israel mite ding khia uh a, a ni thum ni-in amaute’ khuapite a ban uh hi. Amau’ khuapite pen Gibeon, Khefirah, Beeroth, le Kiriathjearim na hi hi. Ahih hangin, Topa, Israel Pasian min tawh mihonte’ makaite kiciamzo uh ahih manin Israel mite in amaute that lo uh hi. Tua ciangin makaite tungah mihon khempeuh phun uh hi. Ahih hangin makaite khempeuh in mihon khempeuh tungah, “ Topa, Israel Pasian min tawh amaute tungah i kiciamzo a, tu-in amaute i su thei kei ding hi. Amaute tungah i kiciam thuciamna hangin eite tungah hehna hong tung kha ding ahih manin hih bangin gamta-in amaute i hingsak ding hi,” a ci uh hi. Tua ciangin makaite in mihonte kiangah, “Amaute hingsak un,” a ci uh hi. Tua ahih ciangin makaite’ gen mah bangin mihon khempeuh a dingin amaute pen sing suite le tui tawite a suak uh hi. Joshua in amaute samin amaute kiangah, “Bang hangin kote’ nai hih lai-ah a teng hinapi-in, ‘Note’ kiang panin gamla mahmah ung,’ cihna tawh kote hong khem na hi uh hiam? Tu-in note hong kisamsia a, note pawlkhat a tawntungin sila, ka Pasian uh inn-a dingin sing suite le tui tawite na hi ding uh hi,” a ci hi. Amaute in Joshua dawngin, “Gam khempeuh nang tungah a hong piak nading Topa na Pasian in a nasempa Moses a thupiakna le na mai panin gam sunga a teng mi khempeuh suksiat taktak nading thu na nasemte kiangah hong kigen hi. Tua ahih ciangin note’ hangin nakpitakin ka lunghimawh uh a, hih bangin ka gamtakha uh hi. Tu-in, en in, nangma khut sungah kote ka om uh hi. Hoih na sak bang leh kote tungah bawl dingin nangma muhna-ah man na sak bangin hong bawl in,” a ci uh hi. Tua ahih ciangin amah in amaute tungah tua bangin bawl a, Israel mite’ khutsung panin amaute honkhia a, amaute thatsak lo hi. Ahih hangin Joshua in mihonte le Topa’ biakna tau-a dingin singtomte le tuitawite a suaksak hi. Topa in amah biak nadingin a teelna munah tuni dongin tua nasepte mah amaute in sem uh hi. Joshua in Ai a lakna zia, le Jerikho le a kumpipa tungah a bawl bangin Ai le a kumpipa tungah a bawlna, le Gibeon khuasunga teng mite in Israel-te tawh kilemna a bawlna le amaute lakah a omna thu Jerusalem kumpipa Adonizedek in a zak ciangin nakpitakin a lau hi. Bang hang hiam cih leh Gibeon pen kumpi khuate khat mah bangin khua lian khat hi a, Ai khua sangin zong lianzaw-in a mite khempeuh zong mi thahat ahi hi. Tua ahih ciangin Jerusalem kumpipa Adonizedek in Hebron kumpipa Hoham kiang, Jarmuth kumpipa Piram kiang, Lakhish kumpipa Jafia kiang, le Eglon kumpipa Debir kiangah kamtai sawlin, “Kei kiangah hong pai un. Hong huh unla, Gibeon vatgawp ni. Bang hang hiam cih leh Joshua le Israel mite tawh kilemna na bawl khin uh hi,” a ci hi. Tua ciangin Amor kumpi ngate, Jerusalem kumpi, Hebron kumpi, Jarmuth kumpi, Lakhish kumpi, le Eglon kumpi, a galkapte khempeuh uh tawh paito-in Gibeon langkhatah phual satin a do uh hi. Tua ciangin Gibeon mite in Gilgal-a giahphual a Joshua kiangah kamtai sawlin, “Na nasemte hong nusia kei in. Manlang takin ko kiangah hong paito-in, kote hong hon inla, hong huh in. Bang hang hiam cih leh mualtung gam a teng Amor kumpite khempeuh kote langpangin kikhawm uh hi,” a ci uh hi. Tua ahih ciangin Gilgal panin amah le galhang mite khempeuh le a thahat mi khempeuh tawh Joshua a kuanto hi. Tua ciangin Topa in Joshua kiangah, “Amaute na khut sungah hong pia khin ka hih manin amaute kihta kei in. Amaute khat beek in nang hong nang zo lo ding uh hi,” a ci hi. Tua ahih ciangin Gilgal panin zan tawntung paito-in Joshua in thakhatthu-in amaute simgawp hi. Topa in Israel-te’ mai-ah amaute amkhamsakin, amaute in Gibeon-ah amaute tampi tak that uh a, Bethhoron paitohna lampi-ah amaute delhin, Azekah le Makkedah ciang dong amaute a vatgawp uh hi. Israel-te’ mai-ah amaute a tai laitak, Bethhoron paitohna-ah amaute a paisuk laitakun, Topa in vantung panin gialpi lianpite Azekah khua ciang dong, amaute’ tungah lawnsuk a, amaute a si uh hi. Israel mite in namsau tawh a thah sangin tua gialpi hangin a si mi tamzaw hi. Tua ciangin, Topa in Israel mite tungah Amor mite a piak ni-in Joshua in Topa tungah thu gen a, amah in Israel mite’ muhna-ah, “Ni aw, Gibeon-ah, Kha aw, Aijalon Kuam-ah khawlcip in,” a ci hi. Tua ciangin hih minamte in a galte uh a zawh khit mateng ni ding cipin kha a khawl hi. Hih thute, Jashar’ Laibu sungah kigelh hi. Vankim lai-ah ni khawlin ni khat bup bang tumsuk lo hi. Tua hun ma hitaleh tua hun khit hitaleh Topa in mi khat thu a ngaih tua ni bang nidang om lo hi. Bang hang hiam cih leh Topa in Israel mite a dingin a dosak hi. Tua ciangin Joshua, amah tawh a om Israel-te khempeuh tawh Gilgal-a giahphual ah a ciahkik hi. Hih kumpi ngate tai-in Makkedah leihawm sungah bu uh hi. Tua ciangin Joshua kiangah, “Kumpi ngate Makkedah leihawm sungah a bu kimu khin hi,” ci-in kigen hi. Tua ciangin Joshua in, “Suangtum lianpite a leihawm gong liknelh unla, a cing dingin a gei-ah mi koih un. Ahih hangin note tua lai-ah om kei un. Na galte uh delhin a nungdalte bawh unla, a khuapi sung uhah amaute lutsak kei un. Bang hang hiam cih leh Topa na Pasian un note’ khut sungah amaute hong piazo hi,” a ci hi. Joshua le Israel mite in amaute a beisiang dongin tampi tak a thah khit uh ciang, le a suakta lai mite amau’ khuapi muanhuai sungah a tum khit uh ciangin, Makkedah giahphual Joshua kiangah mi khempeuh cidamin a ciahkik uh hi. Israel mite khatpeuh a paupih ngam kuamah om lo hi. Tua ciangin Joshua in, “Leihawm gong hong unla, leihawm panin tua kumpi ngate kei kiangah hong paikhiatpih un,” a ci hi. Amaute in tua bangmahin hih uh a, leihawm panin tua kumpi ngate, Jerusalem kumpi, Hebron kumpi, Jarmuth kumpi, Lakhish kumpi, le Eglon kumpite, ama kiangah a paipih uh hi. Amaute in Joshua kiangah tua kumpi ngate a paikhiatpih uh ciangin, Joshua in Israel mi khempeuh samin, amah tawh a kuankhawm galkapmangte kiangah, “A nai-ah hong pai unla, hih kumpite’ ngawngah na khe uh nga un,” a ci hi. Tua ciangin amaute a nai-ah hong pai-in, a khe uh amaute’ ngawng tungah a nga uh hi. Joshua in amaute kiangah, “Lau kei unla, lungkia kei un. Thakhauh unla, hang un. Bang hang hiam cih leh note’ do na gal khempeuhte uh tungah Topa in hih bangin bawl ding hi,” a ci hi. Tua khit ciangin Joshua in amaute satin sisak a, singkung nga tungah amaute a khai hi. Amaute in nitak dong sing tungah a khai uh hi. Ahih hangin ni a tum hun ciangin Joshua in thu pia a, amaute in sing tung panin lakhia sukin, amaute a buknasa leihawm sungah lawnsuk uh a, suangtum lianpite leihawm gongah a koih uh hi. Tu dongin tua suangtumte omlai hi. Tua ni-in Joshua in Makkedah khua la a, namsau tawh tua khua le a kumpipa vatgawp hi. A sunga om mi khempeuh susia mangin, bangmah siit lo a, Jerikho kumpipa tungah a bawl bangin Makkedah kumpipa tungah a bawl hi. Tua ciangin Joshua, amah tawh a om Israel-te khempeuh tawh Makkedah panin Libnah-ah paisuak uh a, Libnah khua a sim uh hi. Topa in tua khua le a kumpipa zong Israel mite’ khut sungah a pia hi. Amah in namsau tawh tua khua le a sunga om mi khempeuh a vatgawp hi. Tua khua sungah bangmah siit lo a, Jerikho kumpipa tungah a bawl bangin a kumpipa tungah a bawl hi. Tua ciangin Joshua, amah tawh a om Israel-te khempeuh tawh Libnah panin Lakhish-ah paisuak uh a, tua khua umcihin a sim uh hi. Topa in Israel mite’ khut sungah Lakhish pia a, amah in a ni nih ni-in la-in, Libnah a bawl bangin tua khua le a sunga om mi khempeuh namsau tawh a vatgawp hi. Tua ciangin Lakhish a huh dingin Gezer kumpipa Horam hong kuanto hi. Ahi zongin khat zong a om nawn lo dongin Joshua in amah le a mite a vatgawp hi. Tua ciangin Lakhish panin Eglon-ah, amah tawh a om Israel-te khempeuh tawh Joshua paisuakin tua khua umcihin a sim uh hi. Tua ni mahin tua khua la uh a, namsau tawh a vatgawp uh hi. Lakhish a hih mah bangin tua khua sunga om mi khempeuh tua ni-in amah in a susiamang hi. Tua ciangin Joshua, Israel-te khempeuh tawh Eglon panin Hebron-ah a paito hi. Amaute in tua khua simin, la-in, namsau tawh tua khua le a kumpi le a kiima om khempeuh a vatgawp hi. Eglon tungah a bawl bangin amah in kuamah siit lo a, tua khua le a sunga om khempeuh a susiamang hi. Tua ciangin Joshua, Israel-te khempeuh tawh Debir lamah kihei kikin tua khua a sim hi. Amah in a kumpipa le a kiimnai-a khuapite khempeuh tawh tua Debir khua a la hi. Amaute in namsau tawh vatgawp uh a, a sunga om mi khempeuh a susiamang uh hi. Amah in kuamah siit lo a, Hebron le Libnah le a kumpipa tungah a bawlsa bangin Debir le a kumpipa tungah a bawl hi. Tua ahih ciangin Joshua in gam khempeuh, mualtung gam le Negeb gam le lei niamna mun le mualpang suk, le a khuapite khempeuh a zo hi. Amah in kuamah siit lo a, Israel-te’ Topa Pasian’ thupiaksa bangin mi khempeuh a susiamang hi. Joshua in amaute Kadeshbarnea panin Gaza ciang dong, le Goshen gam khempeuh Gibeon ciang dong a zogawp hi. Israel-te’ Topa Pasian in Israel-te a dingin dosak ahih manin Joshua in hih kumpite khempeuh le amau’ leitang hun khat sungin a la khin hi. Tua ciangin amah tawh a om Israel khempeuh tawh Gilgal-a a giahphual ah Joshua a ciahkik hi. Hazor kumpipa Jabin in Israel-te’ gualzawhna thu a zak ciangin amah in Madon kumpipa Jobab le Shimron kumpipa, Akshaf kumpipa, saklam mualtung le Khinneroth leitaw lama om Arabah gam sung, le Jordan gunkuam le nitumna lamah Nafathdor gam sunga om kumpite, nisuahna le nitumna lama om Kanaan mite, Amor mite, Hit mite, Perez mite, le mualtung gam a om Jebus mite, le Mizpah gam Hermon nuai-a Hiv mite tungah thu a puak hi. Tua ciangin amaute tampi a pha a galkap honpite tawh, a tam mahmah sakolte le leengte tawh, tuipi gei-a om sehnel bangin tampi tak hong kuankhia uh hi. Hih kumpite khempeuh in amau’ galkapte gawmin Israel mite tawh a kido dingin hong pai-in Merom lui-ah giahphual a sat khawm uh hi. Tua ciangin Topa in Joshua kiangah, “Zing ciang tubang hunin amaute khempeuh a kithatsa-in Israel mite tungah pia ding ka hih manin amaute kihta kei un. A sakolte uh a zagui na sattat ding uh a, a leengte uh mei tawh na hal ding uh hi,” a ci hi. Tua ahih ciangin Joshua zong a galkapte khempeuh tawh thakhat thu-in Merom lui gei amaute kiangah pai-in va sim uh hi. Topa in Israel-te’ khut sungah amaute pia a, amaute in vatgawpin a Lian Sidon le Misrefothmaim ciang dong, le nisuahna lamah Mizpeh kuam ciang dong delh uh a, amaute kuamah a om nawn lo dongin a vatgawp uh hi. Topa’ sawl bangin Joshua in amaute hih a, amau’ sakolte uh a zagui sattat sakin mei tawh a leengte uh a halsak hi. Tua hun laitakin Joshua kihei kikin Hazor la a, namsau tawh a kumpipa a that hi. (Tua hun laitakin Hazor khua pen tua kumpipa gam khempeuh sungah a thahat pen ahi hi.) Amaute in tua sunga om mi khempeuh namsau tawh that khinmang uh hi. Khat zong hingkhawi lo uh a, a khuapi uh zong a haltum uh hi. Topa’ nasem Moses in a thupiaksa bangin Joshua in tua kumpite’ khuapite, le a kumpi khempeuh la-in namsau tawh amaute vatin thatmang khin hi. Ahih hangin Hazor khua longal mualtung a om khuapite khat zong Israel mite in hal lo uh a, Joshua in tua khua bek a hal hi. Israel mite in tua khuapite sunga van kinusiate le ganhingte amau’ galzawh van dingin a la uh hi. Ahih hangin amaute a thah khit matengun namsau tawh vatgawp uh a, khat beek hingkhawi lo uh hi. Topa in ama nasem Moses a thupiak bangin Moses in zong Joshua thu pia a, Joshua zong tua bangmahin gamta a, Topa in Moses a thupiaknate khempeuh a hihloh om lo hi. Tua ahih ciangin Joshua in gam khempeuh, mualtung gam le Negeb gam le Goshen gam khempeuh le lei niamna gam le Arabah le Israel-te’ mualtung gam le a lei niamna gamte, Seir lamah a kikhungto Halak Mual panin Hermon Mual nuai Lebanon kuama om Baalgad ciang dong a la hi. Amah in amau’ kumpite khempeuh la-in amaute vatgawpin a that hi. Hih kumpite khempeuh le Joshua sauveipi sung a kido hi. Gibeon khua-a teng Hiv mite longal, Israel mite tawh kilemna a bawl khuapi khat zong om lo hi. Amaute in tua khua dangte khempeuh simin a lak uh ahi hi. Bang hang hiam cih leh Topa in Moses a thupiakna bangin amaute a kisuksiat mang nading le hehpihna ngah loin a kibeisak theih nadingin Israel-te a do nadingin a lungsim uh a khauhsak pa pen Topa ahi hi. Tua hun laitakin Joshua hong pai-in mualtung gam, Hebron, Debir, Anab, le Judah mualtung gam khempeuh, le Israel mualtung gam khempeuh panin Anak mite notkhiasiang a, Joshua in a khuapite uh tawh amaute susiamang khawm hi. Israel mite’ leitangah Anak mite khat zong om nawn lo a, Gaza, Gath, le Ashdod sung bekah pawlkhat omlai hi. Topa in Moses tungah a gensa bangin Joshua in leitang khempeuh a la hi. Tua ciangin Joshua in amau minam tawh kizui-in a ngah ding bangin Israel mite tungah gamh-in a pia hi. Tua hun a kipan galdona panin tua gam a tawlnga hi. Tu-in nisuahna lam Jordan galkhat, Arnon kuam panin Arabah khempeuh, Hermon Mual ciang dong Israel mite in a leitang uh laksakin a zawh kumpi nihte: Topa’ nasem Moses le Israel mite in amau tegel a zo uh hi. Tua ciangin Topa’ nasem Moses in Reuben mite le Gad mite le Manasseh minam alangte tungah a neih dingun amau’ leitang a pia hi. A zawh uh kumpite: Jerikho kumpi, khat; Bethel gei-a om Ai kumpi, khat; Jerusalem kumpi, khat; Hebron kumpi, khat; Jarmuth kumpi, khat; Lakhish kumpi, khat; Eglon kumpi, khat; Gezer kumpi, khat; Debir kumpi, khat; Geder kumpi, khat; Hormah kumpi, khat; Arad kumpi, khat; Libnah kumpi, khat; Adullam kumpi, khat; Makkedah kumpi, khat; Bethel kumpi, khat; Tappuah kumpi, khat; Hefer kumpi, khat; Afek kumpi, khat; Lasharon kumpi, khat; Madon kumpi, khat; Hazor kumpi, khat; Shimronmeron kumpi, khat; Akshaf kumpi, khat; Taanak kumpi, khat; Megiddo kumpi, khat; Kadesh kumpi, khat; Karmel gam sunga Jokneam kumpi, khat; Nafathdor sunga Dor kumpi, khat; Galilee sunga Goiim kumpi, khat; Tirzah kumpi, khat; a vekpi-in kumpi sawmthum le khat ahi hi. Tu-in Joshua teekin a kum tampi pha hi. Topa in ama kiangah, “Nang teekin na kum tampi pha a, ahi zongin leitang lak ding tampi tak omlai hi. A omlai leitang: Filistia gam sung khempeuh, le Geshur gam khempeuh (Kanaan mite’ gam ci-a a kiciamteh, leilu lam Ekron gamgi lam, Egypt nisuahna lama om Shihor pan Filistia gam Gaza, Ashdod, Ashkelon, Gath, le Ekron gamte a uk mi nga om hi), le Avvim gam, leitaw lamah, Kanaan mite leitang khempeuh, le Sidon mite gam ahi Mearah gam Amor mite gamgi ahi Afek ciang, le Gebal mite’ leitang, le Lebanon gam khempeuh, nisuahna lamah, Hermon Mual nuai-a Baalgad panin Hamath tumna ciang, Lebanon le Misrefothmaim kikalah a teng Sidon mite khempeuh ahi hi. Kei mahmah in Israel mite’ mai panin amaute ka hawlkhia ding a, nang kong thupiaksa bangin Israel mite tungah a luah dingun leitang hawm in. Tua ahih ciangin tu-in minam kua le Manasseh minam alangte tungah luah dingin hih leitang hawm in,” a ci hi. Reuben mite le Gad mite in Manasseh minam alang dang khatte tawh Topa’ nasem Moses in amaute a piaksa ahih manin nisuahna lam Jordan galkhatah gamh ngah khin uh hi. Arnon kuam mong a om Aroer pan, le kuam laizang a om khuapi, le Dibon ciang dong Medeba mualzang khempeuh; le Ammon mite’ gamgi ciang dong Heshbon-ah a uk Amor kumpi Sihon’ khuapi khempeuh; Gilead, le Geshur mite le Maakath mite’ gam, le Hermon Mual khempeuh, le Salekah dong Bashan gam khempeuh; Ashtaroth le Edrei-ah a uk Bashan gam sunga Og kumpi gam khempeuh (Refaim-a a suak tate lakah amah bek om hi); Moses in hihte zo-in a hawlkhia hi. Ahi zongin Israel mite in Geshur mite ahi a, Maakath mite ahi zongin hawlkhia lo uh a, tuni dongin Geshur mite le Maakath mite Israel-te lakah a teng uh hi. Levi minamte tung bekah Moses in gamh pia lo hi. Topa in Moses kiangah a gensa mah bangin Israel-te’ Topa Pasian’ tungah a kipia mei tawh kihal biaknate pen amau’ gamh ahi hi. Tua ciangin Moses in Reuben minamte tungah amau’ beh tawh kizui-in gamh pia hi. Tua ahih ciangin amau’ gamh pen Arnon kuam gei-a a om Aroer pan, le kuam laizang a om khuapi, le Medeba kianga mualzang khempeuh, Heshbon tawh, le mualzang tunga om a khuapite khempeuh; Dibon, Bamothbaal, Bethbaalmeon, Jahaz, Kedemoth, Mefaath, Kiriathaim, Sibmah, le tua kuam mualtung a om Zereth-shahar, Bethpeor, Pisgah pang suk, le Bethjeshimoth hi a, mualzang khuapite khempeuh, le Heshbon-ah a uk, Moses in Midian makaite Evi, Reke, Zur, Hur, le Reba, tua gam a teng Sihon’ uliante tawh a zawh khop ahi Amor kumpi gam khempeuh a huam ahi hi. Beor’ tapa, aisan pa Balaam zong, Israel mite in adang a thahte lakah namsau tawh thatkhawm uh hi. Reuben mite’ gampi pen Jordan ahi hi. Hihte pen amau’ beh tawh kizui-in a khuapite le a khuaneute tawh Reuben mite’ gamhluah ahi hi. Tua ciangin Moses in Gad minamte tungah zong amau’ beh tawh kizui-in gamh pia hi. Amau’ gam pen Jazer, le Gilead khuapite khempeuh, le Rabbah nisuahna lamah a om Aroer ciang dong Ammon mite’ leitang kimkhat, le Heshbon panin Ramathmizpeh le Betonim ciang, le Mahanaim panin Debir gam ciang dong, le Bethharam kuam sungah Bethnimrah, Sukkoth, le Zafon, Jordan galkhat nisuahna lam, Khinnereth Tuipi a niamna lam mong ciang, Jordan gamgi-in a nei, Heshbon kumpipa Sihon’ kumpi gam a omlai teng ahi hi. Hihte pen amau’ beh tawh kizui-in a khuapite le a khuaneute tawh Gad mite’ gamhluah ahi hi. Tua ciangin Moses in Manasseh minam alangte tungah amau’ beh tawh kizui-in gamh a pia hi. Amau’ gam pen Mahanaim pan kipanin Bashan gam sung khempeuh, Bashan kumpipa Og’ kumpi gam sung khempeuh, le Bashan gam sunga om Jair khuapi sawmgukte, le Gilead alang, Ashtaroth, le Edrei, Bashan gam a Og’ kumpi gam khempeuh ahi hi. Hihte amau’ innkuan tawh kizui-in Makhir mi alangte a dingin Manasseh’ tapa Makhir mite tungah kipia hi. Hihte pen Jerikho nisuahna lam Jordan galkhat, Moab zanglei-ah Moses in a hawm gamhte ahi hi. Ahih hangin Levi minamte tungah Moses in gamh pia lo hi. Israel-te’ Topa Pasian in amaute kiangah a gensa mah bangin amah pen amau’ gamh ahi hi. Hihte pen, siampi Eleazar, Nun tapa Joshua, le Israel minam sung pan beh lutangte in amaute tungah a piak, Kanaan gam sungah Israel mite’ ngah gamhte ahi hi. Minam kua le alangte a dingin Topa in Moses a thupiak bangin amau’ gamhte aisanna tawh kipia hi. Bang hang hiam cih leh Moses in Jordan galkhatah minam nih le alangte tungah gamh pia khinzo hi. Ahih hangin amaute lakah Levi mite tungah bangmah pia lo hi. Bang hang hiam cih leh Josef mite minam nihin kikhen a, Manasseh le Efraim minamte ahi uh hi. Tua gam sungah Levi-te tungah tanh kipia lo a, ahih hangin amau’ ten nading khuapite le a ganhingte uh a dingin lonona gamte kipia bek hi. Topa in Moses a thupiak bangin Israel mite gamta uh a, amaute in leitang a hawm uh hi. Tua ciangin Judah minamte Gilgal-a Joshua kiangah pai uh a, amaute sung panin Kenaz mi Jefunneh tapa Kaleb in ama kiangah, “ Topa in Kadeshbarnea-ah Pasian mi Moses tungah nang le kei’ thu tawh kisai a gente na thei hi. A gam sung thukansim dingin Topa’ nasem Moses in Kadeshbarnea panin kei hong sawl lai-in kum sawmli ka pha a, ka lungsim a om bangin ama kiangah thu ka tunkik hi. Ahih hangin kei tawh hong paito khawm ka sanggamte in mite lungkiasak uh a, ahi zongin keimah in lungsim tak tawh Topa ka Pasian ka zui hi. Tua ni-in Moses kiciamin, ‘Nangmah in Topa ka Pasian, lungsim tak tawh zui na hih manin na khe in a totsa leitang pen nang le na tate a dingin gamh hi tawntung ding hi,’ hong ci hi. Tu-in, a cihsa bangin Topa in, Israel mite sehnel gamah a pai sung, Topa in hih thu Moses tungah a gen a kipan hih kum sawmli le nga sung kei hong nungtasak a, tu-in kei kum sawmgiat le nga ka pha hi. Moses in hong sawl hun lai mah bangin tuni-in kei ka tha hat lai a, galdo nading, le kuankhiatna le ciahkik nadingin ka thatang pen tua hun lai-a ka thatang mah bang lai hi. Tua ahih ciangin tu-in tua ni-a Topa’ gen hih mualtung gam kei hong pia in. Anak mite a muanhuai mahmah khuapi sungah a omna thu tua hun lai-in kong gen uh hi. Topa in kei hong ompih ding a, Topa’ cih mah bangin amaute ka hawlkhiazo kha ding hi,” a ci hi. Tua ciangin Joshua in amah thupha pia a, Jefunneh’ tapa Kaleb tungah gamh-in Hebron a pia hi. Tua ahih ciangin amah in Topa, Israel-te’ Pasian, lungsimtak tawh zui ahih manin tuni dongin Hebron pen Kenaz mi Jefunneh’ tapa Kaleb’ gamh a suak hi. Hih Hebron min a nidangin Kiriatharba kici hi; Arba pen Anak mite lakah mi lianpen khat ahi hi. Tua ciangin galdona panin tua gam a tawlnga hi. Amau’ beh tawh kizui-in Judah mite’ ngah pen leitaw lamah Edom gamgi ciang hi a, leitaw lam a gamla penna munah Zin gam ciang ban hi. Leitaw lam a gamgi pen Ci Tuipi mong, leitaw lam a sun tuidawk pan kipan hi. Leitaw lam Akrabbim kahtohna-ah paikhia-in, Zin dong ban a, Kadeshbarnea leitaw lamah Hezron dung tawnin Addar ciang dong paito-in Karka lamah kihei a, Azmon ciang dong pai-in Egypt lui-ah suakkhia a, tuipi-ah a mong bei hi. Hih pen amau’ leitaw lam gamgi hi ding hi. Tua ciangin nisuahna lam gamgi pen Jordan tunna ciang dong Ci Tuipi ahi hi. Leilu lampang gamgi pen Jordan tunna tuipi dawk panin kipan hi. Bethhoglah lamah a gamgi paito a, Betharabah leilu lampangah paisuak hi. Tua ciangin Reuben tapa Bohan’ Suangpi dongah a gamgi paito-in, Akhor Kuam panin Debir-ah paito a, leilu lam manawhin, tua kuam leitaw lampangah a om, Adummim kahtohna galkhatah a om Gilgal lamah kihei hi. Tua ciangin Enshemesh luidung ah gamgi pai-in Enrogel-ah tawp hi. Tua ciangin Jebus (Jerusalem a cihna) liangko leitaw lam Hinnom’ tapa’ kuamah gamgi paito-in, Refaim kuam leilu lam mong, nitumna lam Hinnom Kuam galkhatah a kikhung mual dawnah gamgi paito hi. Tua ciangin mual dawn panin Neftoah lui-ah gamgi kikhung a, tua panin Efron Mual khuapite-ah pai a, tua ciangin Baalah (Kiriathjearim a cihna) lamah gamgi kawi kual hi. Tua ciangin Baalah nitumna lam Seir Mual-ah gamgi kual a, tua panin paisuakin Jearim Mual (Khesalon a cihna) liangko leilu lamah pai-in, Bethshemesh-ah paisuk a, Timnah kiangah paisuak hi. Ekron leilu lam mual liangko-ah a gamgi paikhia a, tua ciangin Shikkeron-ah gamgi kawi kualin, Baalah Mual-ah paisuak a, Jabneel-ah lengkhia-in tuipi-ah a gamgi tawp hi. Tua ciangin nitumna gamgi pen Tuipi Lian dungteng ahi hi. Hih pen amau’ beh tawh kizui-in Judah mite’ kiimah a gamgi ahi hi. Topa in Joshua tungah a thupiak bangin Jefunneh tapa Kaleb tungah amah in Judah mite lakah tanh khat Kiriatharba, Hebron a cihna, (Arba pen Anak’ pa hi) pia hi. Tua lai panin Kaleb in Anak’ tapa thumte Sheshai, Ahiman, le Talmai, Anak’ suanlekhakte a hawlkhia hi. Tua lai panin Debir sunga a teng mite a sim dingin amah kuanto hi. Debir pen a nidangin Kiriathsefer kici hi. Kaleb in, “Kiriathsefer vatgawpin a lazo mi tungah ka tanu Aksah a zi dingin ka pia ding hi,” a ci hi. Tua ciangin Kaleb’ sanggampa Kenaz’ tapa Othniel inla a, amah in a zi dingin a tanu Aksah a pia hi. Tua nu ama kiangah a pai ding ciangin ama pa’ tung panin lo khat a nget ding hah gen hi. A la tung panin tua nu a kum ciangin Kaleb in tua nu kiangah, “Bang ut na hi hiam?” a ci hi. Amah in, “Letsong khat hong pia in. Negeb gamah kei hong koih na hih buangin cik tuikhukte zong hong pia in,” a ci hi. Tua ciangin Kaleb in tua nu tungah ciktui tungnungte le ciktui nuainungte a pia hi. Hihte pen amau’ beh tawh kizui-in Judah minamte’ gamhluah ahi hi. Leitaw lam mongciik, Edom gamgi lamah Judah minamte’ neih khuapite: Kabzeel, Eder, Jagur, Kinah, Dimonah, Adadah, Kadesh, Hazor, Ithnan, Zif, Telem, Bealoth, Hazorhadattah, Keriothhezron (Hazor a cihna), Amam, Shema, Moladah, Hazargaddah, Heshmon, Bethpelet, Hazarshual, Beersheba, Biziothiah, Baalah, Iim, Ezem, Eltolad, Khesil, Hormah, Ziklag, Madmannah, Sansannah, Lebaoth, Shilhim, Ain, le Rimmon: a vekpi-in khuapi sawmnih le kua, a khuaneute tawh ahi hi. Tua ciangin lei niamna lamah Eshtaol, Zorah, Ashnah, Zanoah, Engannim, Tappuah, Enam, Jarmuth, Adullam, Sokoh, Azekah, Shaaraim, Adithaim, Gederah, le Gederothaim: khuapi sawm le li, a khuaneute tawh ahi hi. Tua banah Zenan, Hadashah, Migdalgad, Dilean, Mizpeh, Joktheel, Lakhish, Bozkath, Eglon, Kabbon, Lahmam, Khitlish, Gederoth, Bethdagon, Naamah, le Makkedah: khuapi sawm le guk, a khuaneute tawh zong ahi hi. Tua ciangin Libnah, Ether, Ashan, Iftah, Ashnah, Nezib, Keilah, Akzib, le Mareshah: khuapi kua, a khuaneute tawh ahi hi. Ekron a khuapite le a khuaneute tawh ahi hi. Ekron panin tuipi dong, Ashdod lampang a omte khempeuh a khuaneute tawh ahi hi. Ashdod, a khuapite le a khuaneute tawh ahi hi. Gaza, a khuapite le a khuaneute tawh ahi hi. Egypt lui le tuipi lian a gei ciang dong tawh ahi hi. Tua ciangin mualtung gamah Shamir, Jattir, Sokoh, Dannah, Kiriathsannah (Debir a cihna), Anab, Eshtemoh, Anim, Goshen, Holon, le Giloh: khuapi sawm le khat, a khuaneute tawh ahi hi. Arab, Dumah, Eshan, Janim, Bethtappuah, Afekah, Humtah, Kiriatharba (Hebron a cihna), le Zior: khuapi kua, a khuaneute tawh ahi hi. Maon, Karmel, Zif, Juttah, Jezreel, Jokdeam, Zanoah, Kain, Gibeah, le Timnah: khuapi sawm, a khuaneute tawh ahi hi. Halhul, Bethzur, Gedor, Maarath, Bethanoth, le Eltekon: khuapi guk, a khuaneute tawh ahi hi. Kiriathbaal (Kiriathjearim a cihna), le Rabbah: khuapi nih, a khuaneute tawh ahi hi. Sehnel gamah Betharabah, Middin, Sekakah, Nibshan, Ci Khuapi, le Engedi: khuapi guk, a khuaneute tawh ahi hi. Ahih hangin Judah mite in Jerusalem-a a teng Jebus mite hawlkhia zo lo uh hi. Tua ahih ciangin tuni dongin Jebus mite pen Judah mite tawh Jerusalem-ah a tengkhawm uh hi. Josef’ suanlekhakte’ tanh gamgi pen Jerikho luite’ nisuahna lam, Jerikho kiang Jordan panin sehnel gamah pai a, Jerikho panin mualtung gamte tawnin Bethel-ah paito hi. Tua ciangin Bethel panin Luz-ah pai-in, Arkhi mite gam Ataroth nawk hi. Tua ciangin nitumna lam Jaflet mite’ gam lam Bethhoron a niam lam gam ciang dongah paisuk hi. Tua ciangin Gezer-ah pai-in tuipi-ah tawp hi. Josef’ suan Manasseh, le Efraim mite in amau’ gamhluah dingin hih gamte ngah uh hi. Amau’ behbehin Efraim mite’ gam pen a nuai-a bang ahi hi: Nisuahna lamah amau’ gamgi pen Atarothaddar pan Bethhoron tungnung ciang ahi hi. Tua panin tuipi ciangah a gamgi pai a, leilu lamah Mikmethath ahi hi. Tua ciangin nisuahna lam a gamgi Taanathshiloh lamah kual pai-in, nisuahna lam galah pai-in Janoah a tung hi. Janoah panin Ataroth le Naarah ah paisuk a, Jerikho banin Jordan-ah tawp hi. Tappuah panin nitumna lam Kanah lui-ah gamgi pai-in tuipi-ah tawp hi. Hih pen amau’ behbehin Efraim minamte’ gamhluah hi a, Manasseh mite’ gamhluah sung panin Efraim mite a dingin a kikhenkhia khuapite, a khuaneute tawh ahi hi. Ahi zongin amaute in Gezer sunga teng Kanaan mite hawlkhia lo uh hi. Tua ahih ciangin tuni dongin Kanaan mite pen Efraim mite lakah teng a, ahih hangin aana nasep a sem dingin sal a suak uh hi. Tua ciangin Josef’ tacil ahih manin Manasseh minam tungah tanh kipia hi. Manasseh minam sung panin tacil, Gilead’ pa Makhir tungah Gilead gam le Bashan gam kipia hi. Bang hang hiam cih leh amah galhang mi ahi hi. Tua ciangin Manasseh minam a omlaite Abiezer, Halek, Asriel, Shekhem, Hefer, le Shemida-te tungah a behbehin piakna kinei hi. Hihte pen Josef’ tapa Manasseh’ ta pasal suanlekhakte a behbeh ahi hi. Ahih hangin Manasseh’ tapa Makhir, a tapa Hefer, a tapa Zelofehad in tapa nei loin tanu bek nei a, a tanute’ min in: Mahlah, Noah, Hoglah, Milkah, le Tirzah ahi hi. Amaute, siampi Eleazar le Nun tapa Joshua le makaite mai-ah pai uh a, “Ka sanggamte uh tawh gamh hong piak nadingin Topa in Moses thu pia hi,” a ci uh hi. Tua ahih ciangin Topa’ thupiakna bangin amau pate’ sanggamte tawh amah in gamh a pia khawm hi. Tua ahih ciangin Jordan galkhatah Gilead le Bashan-te simloh Manasseh tungah tanh sawm kia hi. Bang hang hiam cih leh Manasseh’ tanute in a tapate tawh gamh ngahkhawm uh hi. A omlai Manasseh mite tungah Gilead leitang kipia hi. Manasseh-te’ gam in Asher panin Shekhem nisuahna lamah a om Mikmethath dong ban a, tua ciangin Entappuah mite’ leitaw lamah a gamgi pai hi. Tappuah leitang pen Manasseh a’ ahi hi. Ahih hangin Manasseh gamgi a om Tappuah khuapi pen Efraim tapate a’ ahi hi. Tua ciangin Kanah lui-ah a gamgi paisuk hi. Manasseh khuapite lak panin lui leitaw lama om hih lai-a khuapite pen Efraim a’ ahi hi. Tua ciangin lui leilu lampangah Manasseh gamgi paisuakin tuipi-ah tawp hi. Tua gam leitaw lamteng Efraim a’ hi-in, a leilu lamteng Manasseh a’ hi a, tuipi pen a gamgi hi a, leilu lamah Asher banin nisuahna lamah Issakhar a ban hi. Issakhar le Asher gam sungah zong Manasseh in gam ngah a, tuate pen Bethshean le a khuaneute, Ibleam le a khuaneute, Dor-a tengte le a khuaneute, Endor a tengte le a khuaneute, Taanak a tengte le a khuaneute, le Megiddo a tengte le a khuaneute hi a, a thumna pen Nafath ahi hi. Ahi zongin Manasseh’ tapate in hih khuapite luah zo lo uh ahih manin tua gamah Kanaan mite teng teitei uh hi. Ahih hangin Israel mite tampi pha-in a hat uh ciangin amaute in Kanaan mite nasemin koih uh a, hawlkhiamang khin lo uh hi. Tua ciangin Josef minam in Joshua kiangah thu genin, “ Topa in kote thu hong pia khin a, kote mi tampi hi napi-in bang hangin ngah khat le tanh khat bek gamh-in hong pia na hi hiam?” a ci uh hi. Tua ciangin Joshua in amaute kiangah, “Note mi tampi pha a, Efraim mualtung gam pen note a dingin neulua ahih ciangin Perez le Refaim gam tulakah pai unla, nomau a dingin gam sattawm un,” a ci hi. Josef minam in, “Kote a dingin mualtung gam kicing zo lo hi. Ahi zongin zang gam a teng Kanaan mite khempeuh, Bethshean le a khuaneute, Jezreel Kuam sunga om mite pen sik leeng neite hi zel uh hi,” a ci uh hi. Tua ciangin Joshua in Josef’ suan Efraim le Manasseh mite tungah, “Note mi tampi pha-in vanglian na hih manun tanh khat kia na nei kei ding uh hi. Mualtung gam pen note a’ hi ding a, tulak ahih hangin note in hah siangin a gamgi mong dong na luah ding uh hi. Bang hang hiam cih leh amaute in sik leeng nei-in, amaute a thahat hangin Kanaan mite na hawlkhiazo ding uh hi,” a ci hi. Tua ciangin Israel mihon buppi Shiloh-ah kikhawmin tua lai-ah kikhopna buk lam uh a, amaute’ mai-ah gam zawhsa-in om hi. Israel mite lakah gamh a kipia nai lo minam sagih omlai hi. Tua ahih ciangin Joshua in Israel mite kiangah, “ Topa, na pu na pate uh Pasian in note hong piaksa leitangah pai-in na luah ding uh bang tanvei zekai lai ding na hi uh hiam? Minam khat panin mi thum ciat hong pia unla, amaute va kuan khia-in vaksuk vakto-in, amaute’ luah dinga ngaihsutna tawh a leitang omziate hong gelhin, tua ciangin kei kiangah hong ciah dingun amaute ka sawl ding hi. Amaute in seh sagihin khenin, leitaw lam ama gam mahah Judah omsuakin, Josef’ innkuante leilu lam amau’ gamah om ding hi. Note in leitang khen sagihin hong ciamteh unla, na ciaptehna uh hih mun kei kiangah nong paipih ding uh hi. Tua ciangin keimah in Topa i Pasian’ mai-ah note a’ ding ai ka san ding hi. Levi mite in note lakah tanh nei lo hi. Bang hang hiam cih leh Topa’ siampi nasepna pen amau’ luah ahi hi. Gad, Reuben, le Manasseh minam alangte in Topa’ nasem Moses in amaute tungah a piak ahi Jordan Nisuahna lam galkhatah amau’ gamh ngah khinzo uh hi,” a ci hi. Tua ahih ciangin mite a kuan uh hi. Leitang a ciaptehna a gelhna dingun Joshua in a pai mite thu pia a, “Vaksuk vakto-in leitang ciaptehna hong gelh unla, kei kiangah hong paikik un. Tua ciangin Shiloh mun Topa’ mai-ah note a dingin ai ka san ding hi,” a ci hi. Tua ciangin mite kuanin gam sungah paisuk paito-in khen sagih suahin tua gam a khuakhua-in a ciaptehna uh laibu khat sungah khum uh a, Shiloh giahphual a Joshua kiangah amaute hong pai uh hi. Joshua in amaute a dingin Topa’ mai Shiloh-ah ai sansak hi. Tua ciangin Joshua in amau’ tanh ding ciat Israel-te tungah leitang a pia hi. A behbeh tawh kizui-in Benjamin minamte a’ ding aisan hun hong tung a, amau’ tungah a kipia gam pen Judah minam le Josef minamte kikalah hong kia hi. Leilu lamah amau’ gamgi pen Jordan panin kipan a, Jerikho leilu lam liangko-ah paito-in, tua panin mualtung gam nawkin nitumna lamah pai a, Bethaven sehnel gamah a tawp hi. Tua lai panin gamgi in Luz lam manawhin leitaw lam nawtin Luz (Bethel a kici) liangko-ah pai a, Bethhoron Nuainung leitaw lama om mualtung a Atarothaddar khua-ah paisuk hi. Tua ciangin mun dang manawhin gamgi pai a, Bethhoron galkhat, leitaw lama om mual panin nitumna lampang leitaw lamah kihei a, Judah minamte a’ ahi Kiriathbaal (Kiriathjearim a cihna)-ah a tawp hi. Hih in a nitumna lampang piangsak hi. Tua ciangin Kiriathjearim mong panin leitaw lampang kipan a, Efron lam, Neftoah Luite-ah gamgi pai hi. Tua ciangin Refaim kuam leilu lam mong a om, Hinnom’ tapa’ kuam a kimuhna mual a gamgi-ah pai hi. Tua ciangin Jebus mite’ gam liangko leitaw lam, Hinnom Kuam-ah paisukin, Enrogel-ah paisuk suak hi. Tua ciangin leilu lam manawhin kawi-in, Enshemesh-ah paisuak a, tua lai panin Adummim kahtohna galkhat, Geliloth-ah pai a, Reuben’ tapa Bohan’ Suangpi-ah paisuk hi. Tua ciangin Betharabah gam liangko leilu lamah paisuakin Arabah-ah paisuk hi. Tua ciangin Bethhoglah gam liangko leilu lamah gamgi paisuak a, Jordan mong leitaw lam, Ci Tuipi dawk leilu lamah a tawp hi. Hih pen leitaw lam gamgi hi a, Jordan in nisuahna lampang a gamgi piangsak hi. Hih pen a beh zui-in a kimkotah a gamgi a gamgi-in Benjamin minam’ luah ahi hi. Tu-in amau’ beh tawh kizui-in Benjamin minamte’ khuapite in Jerikho, Bethhoglah, Emekkeziz, Betharabah, Zemaraim, Bethel, Avvim, Parah, Ofrah, Khefarammoni, Ofni, Geba - khuapi sawm le nih, a khuaneute tawh ahi hi. Tua ciangin Gibeon, Ramah, Beeroth, Mizpeh, Khefirah, Mozah, Rekem, Irpeel, Taralah, Zela, Haelef, Jebus (Jerusalem a cihna), Gibeah, le Kiriathjearim - khuapi sawm le li, a khuaneute tawh zong ahi hi. Hihte pen a beh tawh kizui-in Benjamin minamte’ luah ahi hi. A beh zui-in Simeon minam a’ ding aisan nihna hong tung hi. Amau’ gamh in Judah minamte’ gamh ngahsa pawkhat huam hi. Amau’ ngah ding gamhte pen Beersheba, Sheba, Moladah, Hazarshual, Bala, Ezem, Eltolad, Bethul, Hormah, Ziklag, Bethmarkaboth, Hazarsusah, Bethlebaoth, le Sharuhen - khuapi sawm le thum, a khuaneute tawh ahi hi. Tua ciangin Ain, Rimmon, Ether, le Ashan - khuapi li a khuaneute tawh zong ahi hi. Negeb gam Ramah-a om Baalathbeer ciang dong hih khuapite’ kiima om khuaneute khempeuh zong a huam ahi hi. Hihte pen a beh tawh kizui-in Simeon minamte’ luah ahi hi. Simeon minamte’ luah in Judah minamte’ gam sung khenkhat hong huam hi. Bang hang hiam cih leh Judah minamte’ ngah pen amau a dingin lianlua a, amau’ luah sung panin Simeon minam in gamh ngahsawn uh hi. A beh tawh kizui-in Zebulun minam a dingin aisan thumna hong tung hi. Amau’ luah gam in Sarid ciang dong ban hi. Tua ciangin nitumna lamah a gamgi paito-in Mareal ah paisuak a, Dabbesheth va su a, tua ciangin Jokneam nisuahna lama om lui a ban hi. Sarid panin nisuahna lam manawhin pai-in Khislothtabor gamgi-ah tung hi. Tua panin Daberath-ah pai-in Jafia ciang ban a, tua lai panin nisuahna lam Gathhefer, Ethkazin lamah paisuak a, tua ciangin Rimmon-ah pai lai-in Neah lamah a kawi hi. Tua ciangin leilu lam pan, Hannathon lamah gamgi kihei a, Iftahel kuamah a tawp hi. Tua ciangin Kattath, Nahalal, Shimron, Idalah, le Bethlehem khuate zong huam a, khuapi sawm le nih, a khuaneute tawh ahi hi. Hihte pen a beh tawh kizui-in Zebulun minamte’ luah hi a, hih khuapite a khuaneute tawh ahi hi. A beh tawh kizui-in Issakhar minamte a dingin aisan lina hong tung hi. A gam in Jezreel, Khesulloth, Shunem, Hafaraim, Shion, Anaharath, Rabbith, Kishion, Ebez, Remeth, Engannim, Enhaddah, le Bethpazzez a huam hi. A gamgi in Tabor, Shahazumah, le Bethshemesh zong ban a, Jordan-ah a tawp hi. Khuapi sawm le guk, a khuaneute tawh ahi hi. Hihte pen a beh tawh kizui-in Issakhar minamte’ luah hi a, a khuapite a khuaneute tawh ahi hi. A beh tawh kizui-in Asher minamte a dingin aisan ngana hong tung hi. A gam in Helkath, Hali, Beten, Akshaf, Allammelek, Amad, le Mishal huam hi. Nitumna lamah Karmel le Shihorlibnath ban a, tua ciangin nisuahna lamah kihei-in Bethdagon-ah pai a, leilu lam Bethemek le Neiel lamah Zebulun le Iftahel kuam ban hi. Tua ciangin leilu lam Kabul, Ebron, Rehob, Hammon, Kanah, le a Lian Sidon ciang dong paito lai hi. Tua ciangin Ramah-ah a gamgi kihei a, kulh a nei Taia khuapi a tung hi. Tua ciangin Hosah-ah gamgi kihei a, tuipi-ah a tawp hi. Mahalab, Akzib, Ummah, Afek, le Rehob khuapite huam a - khuapi sawmnih le nih, a khuaneute tawh ahi hi. Hihte pen a beh tawh kizui-in Asher minamte’ luah hi a, hih khuapite a khuaneute tawh ahi hi. A beh tawh kizui-in Naftali minamte a dingin aisan gukna hong tung hi. A gamgi pen Helef, Zaanannim-a om tawsaw, le Adaminekeb, le Jabneel panin Lakkum ciang dong pai-in Jordan-ah a tawp hi. Tua ciangin nitumna lam Aznothtabor-ah a gamgi kihei a, tua lai panin Hukkok-ah pai-in, leitaw lamah Zebulun ban a, nitumna lamah Asher banin, nisuahna lam panin Jordan-ah Judah a ban hi. Kulh a nei khuapite pen Ziddim, Zer, Hammath, Rakkath, Khinnereth, Adamah, Ramah, Hazor, Kedesh, Edrei, Enhazor, Iron, Migdalel, Horem, Bethanath, le Bethshemesh - khuapi sawm le kua, a khuaneute tawh ahi hi. Hihte pen a beh tawh kizui-in Naftali minamte’ luah hi a, a khuapite a khuaneute tawh ahi hi. A beh tawh kizui-in Dan minamte a dingin aisan sagihna hong tung hi. A luah gamte in Zorah, Eshtaol, Irshemesh, Shaalbim, Aijalon, Ithlah, Elon, Timnah, Ekron, Eltekeh, Gibbethon, Baalath, Jehud, Beneberak, Gathrimmon, le Joppa galkhat a om Mejarkon le Rakkon a gamte tawh a huam hi. Dan mite in amau’ gam a taan ciangun Dan mite kuanto-in Leshem sim uh a, amaute in a mite manin namsau tawh a thah khit uh ciangin tua gam luahin a sungah teng uh a, amau’ pupi’ min tamin Leshem pen Dan ci-in min a phuak uh hi. Hihte pen a beh tawh kizui-in Dan minamte’ luah hi a, hih a khuapite a khuaneute tawh ahi hi. Israel mite in gamh-in tua leitangte a hawm khit uh ciangin amaute lakah Nun tapa Joshua tungah gamh a pia uh hi. Topa’ thupiakna tawh ama nget khuapi, Efraim mualtung gam a om Timnathserah a pia uh hi. Amah in tua khuapi lamkikin a sungah a teng hi. Hihte pen siampi Eleazar le Nun tapa Joshua le Israel minam beh lutangte in kikhopna bukkong, Topa’ mai Shiloh-ah aisanna tawh a hawmkhiat uh gamh ahi hi. Tua bangin amaute in leitang hawmna a zo uh hi. Tua ciangin Topa in Joshua kiangah, Hih khuapite khat peuhpeuhah amah tai-in khuapi kongpi tumna-ah ding ding a, tua khuapi upate kiangah a thu gentel ding hi. Tua ciangin amaute in khuapi sungah amah paipihin amah mun khat pia ding a, amaute tawh amah omkhawm ding hi. Tua ciangin phulapa in amah a delh leh, tua pa tungah mi that pa pia lo ding uh hi. Bang hang hiam cih leh amah in theih lohna hangin a vengpa thatin, a beisa hun sungah ama tungah galneihna bangmah nei lo hi. Thukhenna thuak dingin mihonte mai-ah a din mateng, le tua hun laitak a siampi lianpen pa a sih hun mateng, tua khuapi sungah amah om ding hi. Tua khit ciangin mi that khapa ama khua ama inn, a hong taikhiatna khua-ah paikik thei ding hi,’ ci-in gen in,” a ci hi. Tua ahih ciangin amaute in Naftali mualtung gam sunga om Galilee gam sung panin Kedesh khua, Efraim mualtung gam sungah Shekhem khua, le Judah mualtung gam sungah Kiriatharba (Hebron a cihna) khuate a tuamkoih uh hi. Jerikho nisuahna Jordan galkhatah Reuben minam sung panin mualzang sehnel gam a om Bezer khua, Gad minam sung panin Gilead gam sunga om Ramoth khua, le Manasseh minam sung panin Bashan gam sunga om Golan khuate a seh uh hi. Hihte pen Israel mi khempeuh le amaute lakah a peem khualmi a dingin sawm lopi-in mi khat a that khapa pen mihonte mai-ah a din ma-in phulapa khutah a sih loh nadingin a tai theih nadinga a kiseh khuapite ahi hi. Tua ciangin siampi Eleazar le Nun tapa Joshua le Israel minam beh lutangte kiangah Levi beh lutangte hong pai uh hi. Amaute in Kanaan gam sung Shiloh munah, “Ten nadingin khuapi le ka ganhingte uh a dingin a lononate tawh kote hong kipiak ding Moses tungtawnin Topa in thu piazo hi,” ci-in amaute kiangah a gen uh hi. Tua ahih ciangin Topa’ thupiakna tawh Israel mite in amau’ luah sung panin Levi mite tungah a nuai-a khuapite le lonona gamte a pia uh hi. Kohath behte a dingin aisan hong tung hi. Tua ahih ciangin siampi Aaron’ suanlekhak ahi Levi mite in Judah, Simeon, le Benjamin minamte tung panin aisanna tawh khuapi sawm le thum ngah uh hi. Tua ciangin a omlai Kohath mite in Efraim minam, Dan minam le Manasseh minam alangte tung panin aisanna tawh khuapi sawm ngah uh hi. Gershon mite in Issakhar minam, Asher minam, Naftali minam, le Bashan gam sunga om Manasseh minam alangte tung panin aisanna tawh khuapi sawm le thum ngah uh hi. Merari mite in a beh uh tawh kizui-in Reuben minam, Gad minam, le Zebulun minamte tung panin khuapi sawm le nih ngah uh hi. Topa in Moses tungtawnin a thupiak bangin hih khuapite le a lonona gamte Israel mite in aisanna tawh Levi mite tungah a pia uh hi. Judah minam le Simeon minam sung panin amaute in a nuai-a min kigen khuapite pia uh a, Levi mite ahi Kohath beh sung panin Aaron’ suanlekhakte tungah tung hi; amaute tungah a ai kia masa ahih man hi. Amaute in Judah mualtung gam Kiriatharba, Arba pen Anak’ pa (Hebron a cihna), a kiima lonona gam tawh amau tungah pia uh hi. Ahih hangin tua khuapi’ lote le a khuaneute pen Jefunneh’ tapa Kaleb tungah a neih dingin kipia khin hi. Amaute in siampi Aaron’ suanlekhakte tungah mi thatte’ bukna khuapi Hebron a lonona gamte tawh, Libnah a lonona gamte tawh, Jattir a lonona gamte tawh, Eshtemoa a lonona gamte tawh, Holon a lonona gamte tawh, Debir a lonona gamte tawh, Ain a lonona gamte tawh, Juttah a lonona gamte tawh, le Bethshemesh a lonona gamte tawh, hih minam nihte sung panin khuapi kua a pia uh hi. Tua ciangin Benjamin minam panin Gibeon a lonona gamte tawh, Geba a lonona gamte tawh, Anathoth a lonona gamte tawh, le Almon a lonona gamte tawh, khuapi li a pia uh hi. Siampi Aaron’ suanlekhakte’ khuapite a vekpi-in khuapi sawmthum le thum, a lonona gamte tawh ahi hi. Levi mite sung panin Kohath beh ahi a omlai Kohath mite tungah a kipia khuapite pen Efraim minamte a’ sung pan ahi hi. Efraim mualtung gam a om khuapite sung panin mi thatte a’ ding Shekhem a lonona gamte tawh, Gezer a lonona gamte tawh, Kibzaim a lonona gamte tawh, le Bethhoron a lonona gamte tawh, khuapi li amaute tungah kipia hi. Tua ciangin Dan minam sung panin Eltekeh a lonona gamte tawh, Gibbethon a lonona gamte tawh, Aijalon a lonona gamte tawh, le Gathrimmon a lonona gamte tawh, khuapi li kipia hi. Tua ciangin Manasseh minam alangte sung panin Taanak a lonona gamte tawh, le Gathrimmon a lonona gamte tawh, khuapi nih kipia hi. Kohath mi a omlai behte’ khuapite a vekpi-in a lonona gamte tawh khuapi sawm ahi hi. Tua ciangin Levi beh sunga om Gershon mite tungah Manasseh minam alangte a’ sung panin Bashan gam sunga om khuapite sung panin mi thatte a dingin bukna khuapi Golan a lonona gamte tawh, le Beeshterah a lonona gamte tawh, khuapi nih kipia hi. Tua ciangin Issakhar minam sung panin Kishion a lonona gamte tawh, Daberath a lonona gamte tawh, Jarmuth a lonona gamte tawh, le Engannim a lonona gamte tawh, khuapi li kipia hi. Tua ciangin Asher minam sung panin Mishal a lonona gamte tawh, Abdon a lonona gamte tawh, Helkath a lonona gamte tawh, le Rehob a lonona gamte tawh, khuapi li kipia hi. Tua ciangin Naftali minam sung panin Galilee gam sunga om khuapite sung panin mi thatte a dingin bukna khuapi Kedesh a lonona gamte tawh, Hammothdor a lonona gamte tawh, le Kartan a lonona gamte tawh, khuapi thum kipia hi. Gershon mite beh tuamtuamte’ khuapite a vekpi-in a lonona gamte tawh khuapi sawm le thum ahi hi. Tua ciangin Levi mi a omlai Merari behte tungah, Zebulun minam sung panin Jokneam a lonona gamte tawh, Kartan a lonona gamte tawh, Dimnah a lonona gamte tawh, le Nahalal a lonona gamte tawh, khuapi li kipia hi. Tua ciangin Reuben minam sung panin Bezer a lonona gamte tawh, Jahaz a lonona gamte tawh, Kedemoth a lonona gamte tawh, le Mefaath a lonona gamte tawh, khuapi li kipia hi. Tua ciangin Gad minam sung panin Gilead gam sunga om khuapite sung panin mi thatte a’ ding bukna khuapi Ramoth a lonona gamte tawh, Mahanaim a lonona gamte tawh, Heshbon a lonona gamte tawh, le Jazer a lonona gamte tawh, a vekpi-in khuapi li kipia hi. Levi beh a omlai ahi Merari beh tuamtuamte a’ ding khuapi a kipia a vekpi-in sawm le nih ahi hi. Israel mite’ neihsa lakah Levi mite’ khuapi a vekpi-in a lonona gamte tawh khuapi sawm le giat ahi hi. Hih khuapite in a kiim ciatah lonona gam nei ciat a, hih khuapi khempeuh tua bang ahi hi. Tua bangin Topa in amau’ pulepate tungah piak dingin a kiciam leitang khempeuh Israel tungah pia a, amaute in a ngah khit uh ciangin tua lai-ah a teng uh hi. Tua ciangin a pu a pate uh tungah a ciamsa bangin Topa in amaute tungah na khempeuhah tawlngakna a pia hi. Topa in a galte khempeuh uh amau khut sungah pia ahih manin a galte uh khat beek in zong amaute nang zo lo hi. Topa in Israel mite tungah a ciamsa thuhoih khempeuh khat zong a mawkna om lo a, a vekpi-in tangtung kim hi. Tua ciangin Joshua in Reuben mite, Gad mite, le Manasseh minam alangte samin amaute kiangah, “ Topa’ nasem Moses in note hong thupiak khempeuh zui-in, keimah in note kong thupiakna khempeuhah ka thu na hong mang khin uh hi. Tuni dong hih hun saupi sung na sanggamte uh na nusia kei uh a, Topa na Pasian uh hong sawlna limtakin zuih ding na ngaihsun uh hi. Tu-in Topa na Pasian un amaute tungah a ciamsa bangin na sanggamte uh tawlngakna pia hi. Tua ahih ciangin Topa’ nasem Moses in note hong piak Jordan galkhat, note’ neihsa a omna leitang na inn uhah note ciah un. Topa’ nasem Moses in note hong piak thupiakna le thukham ahi, Topa na Pasian uh it ding, ama lampi khempeuh zuih ding, ama thupiakte zuih ding, amah belh ding, le na lungsim khempeuh uh le na nuntakna khempeuh uh tawh ama na na sep ding uh limtakin ngaihsun un,” a ci hi. Tua ahih ciangin Joshua in amaute thupha pia-in ciahsak a, amaute zong a inn ciat uhah a ciah uh hi. Tu-in Manasseh minam alangte tungah Moses in Jordan nisuahna lam Bashan gam sungah neihsa pia khin hi. Ahi zongin Joshua in alangte tungah Jordan nitumna lam a sanggamte kiang uhah neihsa a pia hi. Joshua in amaute a inn uhah sawlin thupha a piak ciangin amaute tungah, “Na inn uhah hauhna lianpi, ganhing tampi tak, ngun, kham, sumngo, sik le puan tampi tawh ciahkik un. Na galte uh van na suhte uh na sanggamte uh tawh hawm un,” a ci hi. Tua ahih ciangin Reuben mite, Gad mite, le Manasseh minam alangte, Moses tungtawnin Topa’ thupiakna tawh a neih uh amau’ leitang ahi Gilead gamah a pai dingin Kanaan gam sunga om Shiloh munah Israel mite tawh kikhenin a inn uhah a ciah uh hi. Kanaan gam sunga om Jordan gam kiimteng a tun uh ciangin Reuben mite, Gad mite, le Manasseh minam alangte in tua lai Jordan gun kiangah a lian mahmah biakna tau khat a lam uh hi. Tua ciangin Israel mite in, “En un, Israel mite’ lampang, Jordan kiim gam, Kanaan gam nawlah Reuben mite, Gad mite, le Manasseh minam alangte in biakna tau khat lam uh hi,” a kicihna za uh hi. Israel mite in tua thu a zak uh ciangin amaute a do dingin Israel mihon buppi khempeuh Shiloh-ah kikhawm uh hi. Tua ciangin Israel mite in Gilead gam a om Reuben mite, Gad mite, le Manasseh minam alangte kiangah siampi Eleazar tapa Finehas, le amah tawh ukpi sawm, Israel minam innkuan panin khat ciat, Israel behte lakah innkuan lutang ahite a sawl uh hi. Tua ciangin Gilead gam sunga om Reuben mite, Gad mite, le Manasseh minam alangte kiangah va pai-in amaute kiangah, “ Topa’ mihon buppi in, ‘ Topa lehdona-ah tuni-in note a dingin biakna tau khat lamna tawh Topa zuihna panin tuni-in kihei-in Israel Pasian’ tungah na gamtatnasa uh ahi hih khemna pen bang ahi hiam? Ahih hangin tu-in note’ lak na leitang uh nin ahihleh Topa’ biakbuk a dinna mun Topa’ leitangah hong pai unla, kote’ lakah luah hong nei un. Topa lehdo kei unla, Topa i Pasian’ biakna tau simloh note a’ ding biakna tau na lamna uh tawh kote a lehdo hong suaksak kei un. Zerah’ tapa Akhan, a ki-ap nate-ah a khialh manin Israel mihon khempeuh tungah hehna hong tung hi lo ahi hiam? Ama mawhna hangin amah bek si lo hi,’ ci uh hi,” ci-in a gen uh hi. Tua ciangin Reuben mite, Gad mite, le Manasseh minam alangte in Israel beh lutangte dawngin, Tua bang hi het lo hi. Hong tung ding hunte-ah na tate un ko’ tate tungah, ‘Israel Pasian, Topa tawh no bang kisai na hi uh hiam? Bang hang hiam cih leh no Reuben mite le Gad mite, le ko’ kikalah Topa in gamgi-in Jordan bawl khinzo hi. Topa’ sungah no tanh bangmah om lo hi,’ a cihkhak ding uh launa tawh ka bawl uh ahi hi. Tua ahih ciangin ka tate un Topa a biak ding uh na tate un khaktan kha ding uh hi. Tua ahih ciangin hong tung ding hunte-ah kote tung ahi a, kote’ suanlekhakte’ tungah ahi zongin hih bangin hong kicih leh, ‘Meihal biak nading ahi a, biakpiak nading ahi zongin hi loin note le kote kikalah teci dingin ka pu ka pate un a bawl Topa’ biakna tau lim en un,’ i ci ding hi, ci-in ka ngaihsun uh hi. Ama biakbuk mai-a om Topa ka Pasian uh biakna tau longal, meihal biakna ahi a, an tawh biakna ahi a, biakpiak nading lamna tawh ahi zongin kote in Topa lehdo-in Topa zuihna panin a pial ka hi het kei uh hi,” a ci uh hi. Siampi Finehas le amah tawh a om mihon ukpi, Israel beh lutangte in Reuben mite, Gad mite, le Manasseh mite’ thugenna a zak uh ciangin tua thugennate in amaute lungkimsak mahmah hi. Tua ciangin siampi Eleazar’ tapa Finehas in Reuben mite, Gad mite, le Manasseh mite tungah, “ Topa tungah note zuautat nai lo na hih manun eite’ lakah Topa om hi, ci-in tuni-in i thei hi. Tu-in note in Topa’ gimpiak nading panin Israel mite na honkhia uh hi,” a ci hi. Tua ciangin siampi Eleazar’ tapa Finehas le ukpite, Gilead gam a om Reuben mite le Gad mite kiang panin Israel mite’ omna Kanaan gamah ciahkik uh a, amaute tungah thu puak kik uh hi. Tua thu in Israel mite lungkimsak hi. Israel mite in Pasian phat uh a, Reuben mite le Gad mite a tenna leitang susia-in amaute galin do ding gen nawn lo uh hi. Reuben mite le Gad mite in a biakna tau uh min dingin “Teci” a phuak uh hi. “Bang hang hiam cih leh Topa pen Pasian ahihna thu eite’ kikalah teci ahi hi,” amaute in ci uh hi. Topa in amau’ kiima om gal khempeuh panin Israel mite tungah lungmuanna a piak khit a sawtpi ciangin Joshua teekin a kum tampi pha ta hi. Joshua in Israel khempeuh, a upate le a lutangte, a thukhente le a uliante uh samin amaute kiangah, “Tu-in kei teekin ka kum tampi pha ta hi. Note’ hangin Topa na Pasian un hih minam dangte khempeuh tungah a bawlnate na mu khin uh hi. Bang hang hiam cih leh note a dingin hong dosak pa pen Topa na Pasian uh ahi hi. En un, Jordan panin nitumna lama Tuipi Lian dong, a omlai minamte pen ka zawhsa minamte tawh na minamte uh gamh dingin note tungah kong pia khin hi. Topa na Pasian un note’ mai-ah amaute lehnawt ding a, note’ muhna panin hawlkhia ding hi. Topa na Pasian un note’ tungah hong ciam bangin amau’ gam na luah ding uh hi. Bang hang hiam cih leh Topa in note’ mai-ah a lian a thahat minamte hawlkhia a, note ahihleh tuni dongin mi khat beek in hong nangzo nai lo hi. Note tungah hong ciamsa bangin note a dingin hong dosak pa pen Topa na Pasian uh ahih manin note khat in mi tulkhat na taikeeksak zo uh hi. Tua ahih ciangin Topa na Pasian uh na it ding uh hoihtakin ngaihsun un. Bang hang hiam cih leh note nungkikin note lakah a omlai minamte tawh kipawlin amaute tawh kitengin, note in amau’ numeite tenpihin amaute in note’ numeite a tenpih leh, Topa na Pasian un note’ mai-ah hih minamte hawlkhia nawn lo ding hi, ci-in teltakin thei un. Topa na Pasian un note hong piak hih leitang hoih panin na sih khit matengun amaute pen note a dingin thangzak le tehlop, na nung uh a hong sat ciangduai, ahih kei leh na mit sung uh a hong sun ling tawh kibang ding uh hi. “Tu-in leitung mi khempeuh ngeina bangin kei a pai ding ka hi ta a, note khempeuh in na lungsim uh le na nuntakna uhah, Topa na Pasian un note tawh kisai na hoih hong ciam khempeuh khat zong maimawk lo ahihna na thei uh hi. A vekpi-in note a dingin hong tangtung a, khat zong maimawk lo hi. Tua ciangin Joshua in Israel minam khempeuh Shekhem-ah kaikhawmin a upate, a makaite, a thukhente, le Israel uliante a sam hi. Tua ciangin Pasian’ mai-ah amau ciat kipia uh hi. Tua ciangin Joshua in mi khempeuh tungah, “Israel Pasian, Topa in hih bangin thu gen a, ‘Tanglai-in Eufratis gun galkhatah na pu na pate uh teng ngei a, tuate lakah Abraham le Nahor’ pa Terah pen khat bek ahi hi. Na pu na pate un pasian dangte bia uh hi. Tua ciangin Gun gal panin na pu uh Abraham la-in Kanaan gam khempeuhah ka paipih a, a suanlekhakte tampi ka phasak hi. Ama tungah Isaac ka pia a, Isaac tungah Jakob le Esau ka pia hi. A neih dingin Seir mualtung gam Esau ka pia a, ahih hangin Jakob le a tate Egypt-ah a paisuk uh hi. Tua ciangin Moses le Aaron ka sawl a, a gam sunga ka sepnate tawh Egypt ka gimsak khit ciangin note kong paikhiatpih hi. Egypt panin na pu na pate uh ka paikhiatpih a, tuipi a tung uh hi. Egypt mite in leeng le sakol tung tuangte tawh na pu na pate uh San Tuipi-ah delh uh hi. Kei tungah amaute hong kiko uh ciangin amaute le Egypt mite kikalah khuamial ka koih a, Egypt mite tungah tuipi luangsakin amaute ka tuumsak hi. Egypt tungah ka bawlna na thei uh a, sehnel gam sungah sauveipi na om uh hi. Tua ciangin Jordan galkhatah a teng Amor mite’ leitangah note kong paipih hi. Amaute in note hong do-in, note’ khut sungah amaute kong pia a, note in amau’ leitang na luah uh a, note’ mai-ah amaute ka susia hi. Tua ciangin Moab kumpipa, Zippor’ tapa Balak hong khangin Israel mite hong do hi. Amah in mi sawlin note hong samsia dingin Beor’ tapa Balaam a samsak hi. Ahih hangin Balaam’ thu ka ngai kei hi. Tua ahih ciangin amah in note thupha hong pia hi. Tua ahih manin Balak’ khutsung panin note kong honkhia hi. Tua ahih ciangin Jordan galkhatah pai-in Jerikho na tung uh a, Jerikho mite in note hong do uh hi. Amor mite, Perez mite, Kanaan mite, Hit mite, Girgash mite, Hiv mite, le Jebus mite in zong note hong do uh a, ahi zongin note’ khut sungah amaute kong pia hi. Amor kumpi nihte note mai-ah a hawlkhia tunpite keimah in note mai-ah ka sawl hi. Tua pen note’ namsau ahi a, note’ thal tawh ahi zongin na dona hang uh hi lo hi. Note in na sep loh uh leitang, na sat loh uh khuapite, note tungah kong pia a, tuate sungah na teng uh hi. Na suan loh uh leenggui lo pan a gah leh oliv huan pan a gah na ne uh hi,’ ci hi. “Tua ahih ciangin tu-in Topa zahtak unla, lungsim tak le thumanna tawh ama na sem un. Na pu na pate un Gun gal le Egypt gam sungah a biak uh pasian-te koihkhia unla, Topa’ na sem un. Topa’ na na sepnop kei uhleh, Gun galkhat a a na na sepsak uh na pu na pate uh pasian ahi a, note’ tenna gam Amor mite’ pasian ahi zongin, a na na sepsak ding peuhpeuh uh tuni-in teel un. Ahih hangin kei le ka innkuanpihte in ahihleh Topa’ na ka sem ding uh hi,” a ci hi. Tua ciangin mite in dawngin, “Adang pasian-te’ na a sem dingin Topa nusiat ding ka ngaihsun ngei kei ding uh hi. Bang hang hiam cih leh salsuahna Egypt gam panin eite le i pu i pate a hong paikhiatpih, eite’ muhna-ah tua lim liante a bawl, i paina lampi khempeuh le i nawk mite khempeuh lakah hong kem pa pen Topa i Pasian ahi hi. Topa in eite’ mai-ah tua gam a teng Amor mite khempeuh hawlkhia hi. Tua ahih ciangin amah pen eite’ Pasian ahih manin kote in zong Topa’ na ka sem ding uh hi,” a ci uh hi. Ahih hangin Joshua in mite kiangah, “ Topa’ na na semzo kei ding uh hi. Bang hang hiam cih leh amah pen a siangtho Pasian hi a, a aam Pasian zong ahi hi. Note’ thupalsatna ahi a, na khialhna uh ahi zongin hong maisak lo ding hi. Topa nusia-in gamdang pasian-te’ na na sep uhleh, note tungah a hoih hong bawl khit ciangin amah hong kihei-in note’ tungah siatna hong bawlin note hong beisak ding hi,” a ci hi. Tua ciangin mite in Joshua kiangah, “Hilo hi; Topa’ na ka sem ding uh hi,” a ci uh hi. Tua ciangin Joshua in mite kiangah, “Ama na a sem dingin Topa na teel khitna uhah note a dingin note mah teci na hi uh hi,” a ci hi. Tua ciangin amaute in, “Kote, teci ka hi uh hi,” a ci uh hi. Amah in, “Tua ahihleh note’ lakah a om gamdang pasian-te koihkhia unla, Israel Pasian, Topa’ lamah na lungsim uh nga un,” a ci hi. Mite in Joshua kiangah, “ Topa i Pasian’ na ka sem ding uh a, ama thu ka mang ding uh hi,” a ci uh hi. Tua ahih ciangin Joshua in Shekhem-ah tua ni-in mite tawh thuciamna bawl a, amaute a dingin thukham le biakna ngeina kipte a bawl hi. Tua ciangin Joshua in Pasian’ thukham laibu sungah hih kammalte a gelh hi. Amah in suangtum lianpi khat la-in Topa biakna mun tawsaw nuai-ah a phut hi. Tua ciangin Joshua in mi khempeuh kiangah, “En un, hih suangtum pen eite’ langkhatah teci hi ding hi. Bang hang hiam cih leh Topa in eite tungah hong thugen khempeuh hih suangtum in za khin hi. Tua ahih ciangin note, na Pasian uh tungah a man loin na gamtat loh nadingun hih suangtum pen note’ langkhatah teci hi ding hi,” a ci hi. Tua ahih ciangin Joshua in a milipin amau’ gamh ciatah, mite a ciahsak hi. Hih thute khit ciangin Topa’ nasem, Nun’ tapa Joshua si a, a khan kum za le kum sawmkhat a pha hi. Tua ciangin amaute in Gaash mual leilu lam, Efraim mualtung gam a om Timnathserah mun a ama gamhluah leitangah a vui uh hi. Joshua’ khang sung le Joshua sangin sau a nungtazaw upate khempeuh khang sungin Israel mite in Topa’ na sem a, Israel mite a dingin Topa in a sep na khempeuh a thei uh hi. Israel mite in Egypt panin a puak uh Josef’ guhte pen Shekhem’ pa Hamor’ tapate tung panin Jakob in dangka zakhat tawh a lei Shekhem leitangah kivui a, tua leitang pen Josef’ suanlekhakte’ luah a suak hi. Tua ciangin Aaron’ tapa Eleazar a si hi. Amaute in Efraim mualtung gam sunga a om, ama tapa Finehas tungah a kipia Gibeah khua-ah a vui uh hi. Joshua a sih khit ciangin Israel mite in Topa tungah thu dong uh a, “Kanaan mite a sim dingin kua kuanto masa ding ka hi uh hiam?” a ci uh hi. Topa in, “Judah minamte kuanto masa ding uh hi. En un, amau’ khut sungah tua leitang ka piazo hi,” a ci hi. Tua ciangin Judah minamte in a sanggam uh Simeon minamte kiangah, “Kanaan mite i zawh theih nadingin ko tungah hong kipia gamah kote hong zui un. Tua mah bangin no hong kipia gamah kote in zong kong zui ding uh hi,” a ci uh hi. Tua ahih ciangin Simeon minamte in a zui uh hi. Tua ciangin Judah minamte kuanto uh a, Topa in amaute’ khut sungah Kanaan mite le Perez mite a pia hi. Amaute in Bezek-ah tua mite tul sawm bang a zo uh hi. Amaute in Bezek-ah Adonibezek tuakin amah tawh kido uh a, Kanaan mite le Perez mite a zo uh hi. Adonibezek tai hi. Ahih hangin amaute in delhin man uh a, a khutpite le a khepite attan uh hi. Tua ciangin Adonibezek in, “A khutpi le a khepi a ki-attan kumpi sawmsagihte in ka sabuai nuai-ah an nengkia tawm ngei uh hi. Ka gamtatnasa bangin Pasian in kei hong thuk hi,” a ci hi. Tua ciangin amaute in Jerusalem-ah amah paipih uh a, tua munah amah a si hi. Tua ciangin Judah mite in Jerusalem simin la uh a, a mite thatin a khuapi hal uh hi. Tua khit ciangin Judah mite, mualtung gam, Negeb gam, le lei niamna-a teng Kanaan mite a sim dingin paisuk uh hi. Tua ciangin Hebron (Hebron pen a nidangin Kiriatharba)-ah a teng Kanaan mite a sim dingin Judah mite kuansuk uh a, amaute in Sheshai le Ahiman le Talmai a zo uh hi. Tua lai panin Debir mite a sim dingin amaute a pai uh hi. Debir min pen nidangin Kiriathsefer ahi hi. Tua ciangin Kaleb in, “Kiriathsefer simin a lazo pa tungah a zi dingin ka tanu Aksah ka pia ding hi,” a ci hi. Tua ciangin Kaleb’ naupa Kenaz’ tapa Othniel inla a, amah in a zi dingin a tanu Aksah a pia pah hi. Tua nu tawh a kiten ciangin a pa kiang panin lo khat a nget nading a zi hahsawl hi. A zi zong a la tung panin kum a, Kaleb in ama kiangah, “Bang ut na hi hiam?” a ci hi. Amah in, “Letsong khat hong pia in. Negeb lei keu gamah hong koih na hih ciangin tuikhukte zong hong pia in,” a ci hi. Tua ciangin Kaleb in ama tungah tuikhuk tungnungte le tuikhuk nuainungte a pia hi. Tua ciangin Moses’ sungpate nam ahi Ken’ suanlekhakte, Judah mite tawh nisuh khuapi panin Negeb gam Arad gei-a om Judah gamah paito uh a, tua lai munah tungin tua mite tawh a tengkhawm uh hi. Judah mite zong Simeon mite tawh paikhawmin Zefathah a teng Kanaan mite va zo-in susiamang uh hi. Tua ahih ciangin tua khuapi min Hormah kici hi. Judah mite in zong Gaza le a gam, Ashkelon le a gam, le Ekron le a gamte a la uh hi. Topa in Judah mite huh ahih manin amaute in mualtung gamteng luah uh a, ahih hangin zang gam a teng mite hawlkhia zo lo uh hi. Bang hang hiam cih leh amaute in sik leeng nei uh hi. Tua ciangin Moses in a gensa bangin Kaleb tungah Hebron kipia a, tua sung panin amah in Anak’ tapa thumte a hawlkhia hi. Ahih hangin Benjamin mite in Jerusalem-ah a teng Jebus mite hawlkhia lo uh ahih manin tuni dongin Jebus mite pen Jerusalem-ah Benjamin mite tawh a tengkhawm uh hi. Josef minamte zong Bethel a sim dingin kuanto uh a, Topa in amaute a huh hi. Amaute in thu kansim dingin Bethel-ah mi sawl uh hi. (Tua khuapi min pen a nidangin Luz ahi hi.) Thu kansimte in khuapi panin hong paikhia mi khat mu-in ama kiangah, “Khuapi sung lutna lampi hong hilh in, kong thum uh hi, nang tungah kong diktat ding uh hi,” a ci uh hi. Tua ciangin amah in khuapi sung lutna lampi amaute a lak hi. Amaute in namsau tawh tua khuapi mite vat uh a, ahih hangin tua mipa le a innkuante suaktasak uh hi. A nung ciangin Hit mite gamah tua mipa pai-in khuapi khat sat a, a min pen Luz ci-in a phuak hi. Tu dongin tua khua min pen Luz mah ahi hi. Manasseh mite in Bethshean le a khuaneute-a teng mite, Taanak le a khuaneute-a teng mite, Dor le a khuaneute-a teng mite, Ibleam le a khuaneute-a teng mite ahi a, Megiddo le a khuaneute-a teng mite ahi zongin hawlkhia lo uh ahih manin Kanaan gammite tua leitangah tenglai uh hi. Ahi zongin Israel-te a thahat uh ciangin amaute in aana tawh na a sem dingin Kanaan mite koih uh a, hawlkhia siang lo uh hi. Efraim mite in zong Gezer-ah a teng Kanaan mite hawlkhia lo uh ahih manin Gezer-ah amaute’ lakah Kanaan mite a teng uh hi. Zebulun minamte in Kitron-a teng mite ahi a, Nahalol a teng mite ahi zongin hawlkhia lo a, Kanaan mite amaute lakah tengin aana tawh nasemte a suak uh hi. Asher minamte in Akko a teng mite, Sidon a teng mite, Ahlab a tengte, Akzib a tengte, Helbah a tengte, le Afik a tengte ahi a, Rehob-a tengte ahi zongin hawlkhia lo uh hi. Tua gam a teng Kanaan mite lakah Asher mite teng uh hi. Bang hang hiam cih leh amaute in hawlkhia lo uh hi. Naftali minamte in Bethshemesh-a tengte ahi a, Bethanath-a tengte ahi zongin hawlkhia loin, tua gam a teng Kanaan mite lakah a teng uh hi. Ahi zongin Bethshemesh le Bethanath-a teng mite pen amaute a dingin aana tawh na a sem mite a suak uh hi. Amor mite in mualtung gamah Dan mite notkik uh a, zang gamah paisuksak lo uh hi. Amor mite pen Harheres, Aijalon le Shaalbim-ah teng uh a, ahih hangin Josef minamte in amaute gawt semsem a, amaute pen aana tawh nasemte a suak uh hi. Amor mite’ gamgi pen Akrabbim kahtohna, Sela leilu lam pan kipan hi. Tu-in Gilgal panin Bokhim-ah Topa’ vantungmi paito hi. Amah in Israel mite kiangah, “Egypt panin note kong paipihto a, na pu na pate uh tungah piak dinga ka ciam leitangah note kong paipih hi. Keimah in, ‘Note tawh ka thuciam ka siasak ngei kei ding a, hih gam a teng mite tawh thuciamna na bawl kei ding uh hi. Amau’ biakna taute na susia ding uh hi,’ ka hong ci hi. Ahih hangin note in ka thupiakna na mang kei uh hi. Bang hangin lehgamtat na hi uh hiam? Tua ahih ciangin tu-in keimah in note’ mai-ah amaute ka hawlkhia kei ding hi. Amaute pen note’ lang suak ding uh a, a pasian-te uh note a dingin thang antah hi ding hi,” a ci hi. Topa’ vantungmi in Israel mi khempeuh tungah hih thute a gen ciangin mite a kap uh hi. Tua ahih manin tua mun pen Bokhim, ci-in min phuak uh a, tua lai munah Topa’ tungah biakna a pia uh hi. Joshua in mite ciahsak a, Israel mite zong leitang luah dingin amau’ gamh ciatah pai uh hi. Mite in Joshua’ nuntak sung le, Israel-te a dingin Topa’ sepsa na lian khempeuh a mu, Joshua sanga sau a nungta zawte khempeuh nuntak sungin Topa’ na sem uh hi. Tua ciangin Topa’ nasem ahi, Nun’ tapa Joshua, a khan kum za le kum sawmkhat a phak laitakin a si hi. Amaute in Gaash Mual leilu lam, Efraim mualtung gam sung, Timnathheres-a ama luahna huam sungah a vui uh hi. Tua ciangin tua khangmite khempeuh zong si khin uh a, amaute’ khit ciangin Topa hitaleh, Israel-te a dingin a septe hitaleh a thei lo khangthak hong piang uh hi. Tua ciangin Israel mite, Topa’ muhna-ah a sia gamta-in Baal-te’ na sem uh hi. Egypt panin amaute a paikhiatpih a pu a pate uh Pasian ahi Topa amaute in nusia uh hi. Amau’ kiima om mite’ pasian dangte’ nung zui-in, tuate’ mai-ah kun uh a, amaute in Topa hehsak uh hi. Amaute in Topa nusia uh a, Baal-te le Ashtaroth pasian-te bia uh hi. Tua ahih ciangin Israel-te tungah Topa sinso a, amaute’ na a sut, mi’ na a sut thei mite’ tungah amaute a pia hi. A kiima om a galte uh tungah amaute pia a, amaute in a galte uh nangzo nawn lo uh hi. Galsim dingin amaute a kuankhiat sialun, Topa in a hilhkholhsa le Topa in amaute tungah a kiciamsa bangin amaute’ langkhatah a sia lamin Topa pang hi. Tua ahih ciangin amaute in lungkhamna tuak uh hi. Tua ciangin, amaute’ na a sutgawp mite’ vangliatna panin amaute a honkhia thukhente Topa in khangsak hi. Ahi zongin amaute in a thukhente uh thu ngai lo uh hi. Bang hang hiam cih leh amaute in pasian dangte bia-in tuate’ mai-ah kun uh hi. Topa’ thupiakna a mang amau’ pute pate’ tot lampi panin amaute pial pah uh a, amaute in Topa’ thu mang lo uh hi. Topa in amaute a dingin thukhente a khansak sialin Topa in thukhente huh a, thukhente’ nuntak sung tawntung a galte uh khutsung panin amaute hon hi. Bang hang hiam cih leh amaute a gimsak a nengniamte’ hangin amau’ tauna in Topa’ hehpih nading piangsak hi. Ahih hangin thukhente a sih peuhpeuh ciangin amaute kihei kikin a pu a pate uh sangin a siazaw-in gamta zel uh hi. Adang pasian-te’ nung zui uh a, amaute’ na semin a mai uhah kun uh hi. Amaute’ gamtatnate uh ahi a, a lungkhauhnate uh ahi zongin khia lo uh hi. Tua ahih ciangin Israel-te tungah Topa heh mahmah a, amah in, “Hih mite in amau’ pulepate’ tungah ka thupiak ka thuciamna khialin keima thu ngai lo uh ahih manin, Joshua a sih lai-in a nusiat minamte khat zong tu a kipanin amaute’ mai-ah ka hawlkhia kei ding hi. Amau’ pute pate in Topa’ lampi a zuih bangin zuih ding a don uh hiam, a don kei uh hiam, cih a kitheih nadingin hih mite tawh Israel mite ka ze-et ding hi,” a ci hi. Tua ahih ciangin Topa in tua minamte thakhatin hawlkhia loin koihcing a, Joshua’ khut sungah amaute pia lo hi. Tu-in Israel-te sung panin Kanaan gam sungah galdona a theikha nai lo Israel-te ze-et nadingin Topa in minam pawlkhat a siit hi. Tua khang Israel mite in galdona a theih nading, nidangin galdona a thei ngei lo tua bang mite a hilh theih nading bek ahi hi. Tua a siit minamte: Filistia ulian ngate, Kanaan mi khempeuh, Sidon mite, le Baalhermon Mual panin Hamath lutna ciang dong Lebanon Mual tungah a teng Hiv mite ahi hi. Moses tungtawnin a pu a pate uh a thupiak, Topa’ thupiaknate Israel-te in a mang uh hiam, cih a kitheih nadingin amaute pen Israel-te a kize-etna ahi hi. Tua ahih ciangin Kanaan mite, Hit mite, Amor mite, Perez mite, Hiv mite, le Jebus mite’ lakah Israel mite teng uh hi. Amaute in a zi dingun a tanute uh la uh a, amau’ tanute a tapate uh tungah a pia uh hi. Amaute in a pasian-te uh a bia uh hi. Topa’ muhna-ah Israel-te a sia gamta-in, Topa amau’ Pasian mangngilh uh a, Baal-te le Asherah milimte a bia uh hi. Tua ahih ciangin Israel-te tungah Topa sinso a, amah in Mesopotamia kumpipa Kushanrishathaim tungah amaute a pia hi. Israel mite in Kushanrishathaim’ na kum giat sung a sem uh hi. Ahih hangin Topa’ tungah Israel mite kiko uh a, Topa in Kaleb’ naupa Kenaz’ tapa Othniel, amaute a honkhia dingin a khangsak hi. Topa’ Kha ama tungah tung a, amah, Israel mite’ thukhen a suak hi. Galsim dingin kuankhia a, Topa in ama khut sungah Mesopotamia kumpipa Kushanrishathaim a pia hi. Tua ahih ciangin a gam in kum sawmli sung tawlngakna hun nei hi. Tua ciangin Kenaz’ tapa Othniel a si hi. Tua ciangin Topa’ muhna-ah Israel-te a sia gamta kik uh ahih ciangin Topa in Israel-te’ langkhatah Moab kumpipa Eglon thahatsak hi. Bang hang hiam cih leh Topa’ muhna-ah amaute a sia gamta uh hi. Eglon in Ammon mite le Amalek mite ama kiangah khawm a, va kuanin Israel-te va zo hi. Amaute in nisuh khuapi a luah uh hi. Israel mite in Moab kumpi Eglon’ na kum sawm le giat sung a sem uh hi. Ahih hangin Topa’ tungah Israel mite a kiko uh ciangin, Topa in Benjamin mi, Gera’ tapa a veikhoi Ehud, amaute’ honpa dingin a khangsak hi. Israel mite in ama tungtawnin Moab kumpipa Eglon tungah siah a puak uh hi. Ehud in ama a dingin langnih a hiam, pi khat le alang a sau namsau khat bawl a, a puannuai a taklam phei tungah tua namsau a khih hi. Tua ciangin amah in Moab kumpipa Eglon tungah a siah sung hi. Eglon pen a thau mahmah mi khat ahi hi. Ehud in a siahsun’ a man khit ciangin siah a puak mite ciahsak hi. Ahih hangin Gilgal kiang suang milimte omna panin amah kileh kikin, “Kumpipa aw, nang tungah gen ding thusim khat ka nei hi,” a ci hi. Tua ciangin amah in, “Gam dai un,” ci-in thu a pia hi. Amah a cing mi khempeuh ama omna panin paikhia uh hi. Innkhum zang inndei a votna sungah amah guak tu-in a om laitakin ama kiangah Ehud hong pai hi. Ehud in, “Pasian’ kiang panin nang tungah gen ding thu khat ka nei hi,” a ci hi. Tua ciangin a tutna panin amah dingto hi. Tua ciangin Ehud in a veilam khut tawh a taklam phei panin a namsau la-in, tua pa’ gil sungah a siatsuk hi. A namsau banah a bul zong tum a, a thau in a namsau tuamcip hi. Bang hang hiam cih leh a gil panin amah in a namsau dok lo a, a ek lawtkhia hi. Tua ciangin inndei pua-ah Ehud paikhia-in, innkhumzang inndei kongkhakte amah khaknelhin tuate a kalh hi. Amah a paikhiat khit ciangin nasemte hong pai hi. Innkhumzang inndei kongkhakte a kikalh a muh uh ciangin amaute in, “Inn vot sunga inndei-ah awnghawh hi in teh,” ci-in ngaihsun uh hi. A cih nading uh a theih loh zah dong uh ngak uh hi. Ahih hangin innkhumzang inndei kongkhak amah in a hon loh veve ciangin, amaute in a tawhtang la-in hong uh a, sual tungah a topa uh na si hi. Amau’ zia kikalin Ehud tai-in suang milimte kheng a, Seirah-ah a tai hi. Amah a tun ciangin Efraim mualtung gamah peengkul a gingsak hi. Mualtung gam panin Israel mite amah tawh paisuk uh a, amau’ lutangin Ehud a nei uh hi. Amah in amaute kiangah, “Ka nung hong zui un. Bang hang hiam cih leh Topa in na gal uh Moab mite na khutsung uhah hong piazo hi,” a ci hi. Tua ahih ciangin ama nungah amaute paisuk uh a, Moab mite kiang panin Jordan ngahmunte la-in, mi khat zong galkahsak lo uh hi. Tua hunin amaute in a thahat a siam Moab mite khempeuh, mi tul sawm bang that uh a, mi khat zong suakta lo hi. Tua ahih ciangin tua ni-in Moab gam pen Israel-te’ khutnuai a suak hi. Tua gam in kum sawmgiat sung tawlngakna a nei hi. Ama khit ciangin Anath’ tapa Shamgar hi a, ciangkhut zum tawh Filistia mite zaguk a that pa ahi hi. Amah in zong Israel-te honkhia hi. Ehud a sih khit ciangin Topa’ muhna-ah Israel mite a sia gamta kik uh hi. Tua ciangin Topa in Hazor-ah a uk, Kanaan kumpipa Jabin’ khut sungah amaute a pia hi. Ama galkapte a ukpa pen, Harosheth-ha-goiim ah a teng Sisera ahi hi. Tua ciangin Israel mite huhna a ngen dingin Topa’ tungah a kiko uh hi. Bang hang hiam cih leh amah in sik leeng zakua nei a, Israel mite kum sawmnih sung nakpitakin gim a pia hi. Tua hun lai-in Lappidoth’ zi kamsang numei Deborah in Israel-te thu khen hi. Tua nu, Efraim mualtung gam sung Ramah le Bethel kikal nisuhkung nuai-ah tu zel a, thu a khensak dingin ama kiangah Israel mite hong pai uh hi. Amah in mi sawlin Naftali gam Kedesh panin Abinoam’ tapa Barak samsakin ama kiangah, “ Topa, Israel-te’ Pasian in nang thu hong pia-in, ‘Pai in, Tabor Mual-ah na mite khawm inla, Naftali minam le Zebulun minam panin mi tul sawm bang la in hong ci hi lo ahi hiam? Keimah in Jabin’ galkapmang Sisera, Kishon gun-ah nang hong dawntuah dingin a leengte le a galkapte tawh ka kaikhia ding a, na khut sungah amah kong pia ding hi,’ hong ci hi,” a ci hi. Barak in ama kiangah, “Kei na hong zuih ding le, ka kuan ding hi. Ahih hangin kei tawh nong kuan kei ding le, ka kuan kei ding hi,” a ci hi. Tua ciangin amah in, “Nang tawh kong kuan taktak ding hi. Ahi zongin gualzawhna pen nangma min than nading hi lo ding hi. Bang hang hiam cih leh Topa in numei khat’ khut sungah Sisera pia ding hi,” a ci hi. Tua ciangin Deborah dingin Barak tawh Kedesh-ah pai hi. Barak in Kedesh-ah Zebulun minam le Naftali minamte a sam hi. Ama kiangah mihing tul sawm bang kuanto uh a, amah tawh Deborah kuanto khawm hi. Tu-in Moses’ zi’ sanggampa Hobab’ suanlekhak Ken mite sung panin Ken mi Heber paikhia a, Kedesh kianga Zaanannim-a tawsaw ciang pekah a puanbuk a lam hi. Abinoam’ tapa Barak, Tabor Mual-ah paito khin, ci-in Sisera kiangah a kigen ciangin, Sisera in a leeng khempeuh, sik leeng zakua, le ama kianga om mi khempeuh, Harosheth-ha-goiim panin Kishon gun-ah a samkhia hi. Tua ciangin Deborah in Barak kiangah, “Pai in! Bang hang hiam cih leh Topa in na khut sungah Sisera hong piak ni ahi hi. Na mai-ah Topa pai hi lo ahi hiam?” a ci hi. Tua ahih ciangin mihing tul sawm bang in zui-in Tabor Mual panin Barak a paisuk hi. Topa in Barak’ mai-ah Sisera le a leengte khempeuh a taisak hi. Tua ciangin Sisera a leeng tung pan tuakin a khe-in a tai hi. Barak in Harosheth-ha-goiim ciang dong a leengte le a galkapte delh a, Sisera’ galkapte khempeuh namsau tawh kithatin beimang uh a, mi khat zong suakta lo hi. Ahih hangin Sisera, Ken mi Heber’ zi Jael’ puanbukah a khe-in a tai hi. Bang hang hiam cih leh Hazor kumpipa Jabin le Ken mi Heber’ innkuante kilem uh hi. Sisera a dawn dingin Jael hong pusuakin ama kiangah, “Hong kihei in, ka topa aw, kei lamah hong kihei in; lau kei in,” a ci hi. Tua ahih ciangin ama puanbukah Sisera hong pai a, tua nu in sualphah puan khat tawh amah na khuh hi. Amah in tua nu kiangah, “Hong thum ing, dawn ding tui hong pia in; bang hang hiam cih leh ka dangtak hi,” a ci hi. Tua ahih ciangin amah in bawngnawi koihna savun thawl hongin dawnsakin amah a khuhkik hi. Amah in tua nu kiangah, “Puanbuk kongah ding inla, mi khatpeuh hong pai-in na kiangah, ‘Hih lai-ah mi khatpeuh a om hiam?’ hong cih leh, ‘Om kei,’ na ci in,” a ci hi. Ahih hangin Heber’ zi Jael in puanbuk khetphim khat la a, a khutah sek khat tawi-in ama kiangah damtakin pai a, a gimluatna hangin ihmucipin a om laitakin a khetphim in lei a bat dongin a paangah a khensuk hi. Tua ciangin Sisera a si hi. En in, Barak in Sisera hong delh ciangin amah a dawn dingin Jael hong pusuakin ama kiangah, “Hong pai in, na mi zon kong lak ding hi,” a ci hi. Tua ahih ciangin tua nu’ puanbuk sungah amah hong pai hi. Tua lai-ah Sisera a paangah puanbuk khetphim tawh a si-in na om hi. Tua ahih ciangin tua ni-in Israel mite’ mai-ah Pasian in Kanaan kumpi Jabin nuaisiah hi. Israel mite in Kanaan kumpipa Jabin a suksiat matengin Kanaan kumpipa Jabin tungah thuak hak semsem uh hi. Tua ciangin Deborah le Abinoam’ tapa Barak in tua ni-in la sa uh a, “Makaite in Israel-te makai uh a, mite amau mahmah utna tawh kipia uh hi. Topa phat un. Ngai un, kumpite aw, na bil uh ngat un, uliante aw. Topa tungah la ka sa ding a, Israel-te’ Pasian, Topa’ tungah la ngaih ka sa ding hi. Topa aw, Seir panin na paikhiat ciang, Edom gam panin na paikhiat ciang, leitung ling a, vantung panin guah zu hi. Hi hi, meiite in tui hong khia a, Topa’ mai-ah mualte kiling hi, Israel Pasian, Topa’ mai Sinai galkhatah. “Anath’ tapa Shamgar’ hun lai, Jael’ hun lai-in, a hon hona khualzinte om nawn lo a, khualzinte lam gei-ah pial uh hi. Israel sunga lo khote khawlcip uh a, bangmah sem thei lo uh hi. Nang, Deborah, nong khan mateng, Israel sungah nu banga nong khan mateng. A thak pasian-te a kiteel ciangin, kulhkongpi sungah gal om pah hi. Lum ahi a, tei ahi zongin, Israel tul sawmlite lakah kimu ahi hiam? Mite lak panin utna tawh amau a kipia tawm Israel a ukte’ lamah ka lungsim pai hi. Topa phat un. “A thu gen un, no la puang tungah a tuangte, sualphah puanhoih tungah a tute le lampi-ah a paite aw. Tui phuala lasakna a tumte’ ginna in Topa’ gualzawhna gen a, Israel sunga lo khote in zong a gualzawhna mah genkik uh hi. Tua ciangin Topa’ mite kulhkongpite-ah paisuk uh hi. “Khanglo in, khanglo in, Deborah! Khanglo in, khanglo in, la khat sa in! Tho in, Barak, na galmatte paikhiatpih in, Abinoam’ tapa aw. Tua ciangin ulianpa’ mi a omlaite paisuk uh a, ama a’ ding a dosak dingin Topa’ mite paisuk uh hi. Efraim panin amaute dingkhia-in tua kuamah pai uh a, nang, Benjamin, na behte tawh hong zui uh hi. Makhir panin a ukte hong paisukin, Zebulun panin ulianpa’ ciangkhut a tawite hong paisuk uh hi. Issakhar uliante Deborah tawh hong pai a, Barak tungah Issakhar thuman hi. Kuam sung ama khe phungah amaute kituah uh hi. Reuben behte lakah nakpi taka lungsim ngaihsutna a om hi. Bang hangin tuukhawkte lakah tuuhonte a dingin tamngai kitum a ngai dingin zekai na hi hiam? Reuben behte lakah nakpi taka lungsim ngaihsutna a om hi. Jordan galkhatah Gilead om hi. Dan minamte bang hangin teembaw tawh om ahi hiam? Asher minamte, tuipi gei-ah tu lai a, leilak a tunna gei-ah a teng uh hi. Zebulun mite a sih dongun gal sungah a kipia ngam mi hi a, Naftali minamte zong, gamlak a sangna munah tua bangmah ahi hi. “Kumpite hong pai-in do uh hi. Tua ciangin Kanaan kumpite in Megiddo tuite’ gei, Taanak-ah do uh a, amaute in a kinusia ngunte ngah lo uh hi. Vantung panin aksite in do uh a, amau paina ciat panin Sisera do uh hi. Kishon guntui khang in amaute tai a, a leeng vanvan tuikhang, Kishon tuikhang in tai hi. Thakhauh takin mai nawtsuak ding! Tua ciangin sakol khe, a kop taina, a sakol hangte’ koptaina a ging hi. “ Topa’ vantungmi in, ‘Meroz khua samsia in, a sunga teng mite nasia takin samsia in. Bang hang hiam cih leh Topa a huh dingin a thahatpa dona-ah Topa a huh dingin hong kuan lo uh hi,’ a ci hi. “Numeite lakah thupha ngah phapen Jael, Ken mi Heber’ zi, puanbukah a teng numei lak pan thupha ngah phapen ahi hi. Sisera in tui ngen a, Jael in bawngnawi pia hi. Ulian hai sungah tua nu in bawngnawi thaukhal paipih hi. Amah in puanbuk khetphim a khutin zam a, a taklam khutin nasemte’ khetbuk a zam hi. Sisera khatvei sat a, a lutang satkhamin, amah in phelkhamin a paang a sun hi. Amah tuk hi, amah puk hi. Tua nu’ khe kiangah amah taang loin om hi. Ama khe phungah amah tuk hi, amah puk hi. A tukna munah, amah a si-in puk hi. “Tawlet panin Sisera’ nu khuadak a, a kikalh simsiam kawm panin Sisera’ nu khuadak hi: ‘Bang hangin a leeng hong ciah ding hih tanvei sawt ahi hiam? A leeng khegingte bang hangin hici zekai ahi hiam?’ a ci hi. A numeite a pilpennu in amah a dawng hiam, dawng lo hi. Amah le amah kidawng a, ‘Amaute in vankinusiate mu-in hawm hi lo ahi hiam? Mi khat ciangin nungak khat ahih kei leh nih pai; a kinusia puan kinimte Sisera a’ ding, a kinusia puan kinim a kizemte, a kinim a kizem puan nihte ka ngawng a ding maw?’ a ci hi. “Tua ahih ciangin na gal khempeuh si khin uh hi, Topa! Ahih hangin na lawmte pen a vangliatna tawh a suak ni bang ta hen,” a ci uh hi. Tua ciangin tua gam in kum sawmli sung tawlngakna hun a nei hi. Topa’ muhna-ah Israel-te a sia gamta uh a, Topa in Midian-te’ khut sungah amaute kum sagih sung a pia hi. Israel-te tungah Midian-te gualzo uh hi. Midian-te’ kiang panin a buk nadingun leihawmte le munmuanhuaite a bawl uh hi. Bang hang hiam cih leh Israel-te in khai a tuh peuhmah uh ciangin Midian-te le Amalek mite le Nisuahna lam mite hong pai-in amaute sim uh hi. Amaute a sim nadingun giahphual satin Gaza kiim ciangciang dong lei pana piangte susia uh a, Israel mite a nuntak nading bangmah nusia loin, tuu ahi a, bawngtal ahi a, la ahi zongin siit nei lo uh hi. Bang hang hiam cih leh amaute a ganhingte le a puanbukte uh tawh kauphe honpi bangin tamin hong pai uh a, amaute le a kalaohte uh kisim zo lo hi. Tua ahih ciangin amaute hong tun ciangin gamteng beisak uh hi. Midian-te’ hangin Israel-te kiniamkoih mahmah a, Israel mite in Topa’ tungah huhna ngenin kiko uh hi. Midian-te’ hangin Israel mite Topa’ tungah a kiko uh ciangin, Topa in Israel mite kiangah kamsang khat a sawl hi. Amah in amaute kiangah, “Israel-te’ Pasian, Topa in hih bangin ci hi: Salsuahna Egypt panin note kong paikhiatpih hi. Egypt mite le note hong nengniam mi khempeuh khut sung panin note kong honkhia a, note’ mai-ah amaute hawlkhia-in, amau’ leitang note kong pia hi. Tua ciangin note kiangah, ‘Kei pen Topa na Pasian uh ka hi hi. Na tenna uh Amor mite’ pasian-te zahtakna na pia kei ding uh hi,’ kong ci hi. Ahih hangin note in ka thu na ngai kei uh hi, ci hi,” a ci hi. Tua ciangin Ofrah khua-ah Topa’ vantungmi hong pai a, Abiezer mi Joash neihsa tawsaw nuai-ah hong tu hi. Tua laitakin Joash’ tapa Gideon in Midian mite’ muh loh dingin leenggah sukna-ah mangbuh cil simin na om hi. Topa’ vantungmi ama tungah kilangin ama kiangah, “ Topa in nang hong ompih hi, a thahat a vanglian mipa aw,” a ci hi. Gideon in ama kiangah, “Kong thum hi, sia aw, Topa in kote hong ompih ahihleh, bang hangin hih thu khempeuh ko tungah hong tung ahi hiam? Ka pate un kote tungah hong genin, ‘ Topa in Egypt panin eite hong paipih hi lo ahi hiam?’ a cih uh a lamdang ama sepnate khempeuh koi-ah om ta ahi hiam? Ahih hangin tu-in Topa in kote hong paaikhia-in Midian-te’ khut sungah hong pia khin hi,” a ci hi. Tua ciangin ama lamah Topa kihei-in, “Hih nangma thahatna tawh pai inla, Midian-te’ khutsung panin Israel-te honkhia in. Nangmah hong sawl khin hi lo ka hi hiam?” a ci hi. Tua ciangin Gideon in ama kiangah, “Kong thum hi, Topa aw, Israel-te bangci hotkhiat zawh ding ka hi hiam? En in, Manasseh minam sungah keima behte a hat lo pen hi a, ka innkuan sung panin kei a neupen ka hi hi,” a ci hi. Topa in ama kiangah, “Nang kong ompih ding a, nangmah in mihing khat bang lelin Midian-te na vatgawp ding hi,” a ci hi. Tua ciangin amah in, “Tu-in nong hehpih zawh leh, kei tawh a kiho mi pa pen nang na hihna lim khat hong lak in. Kong thum hi, letsong puakin nang kiangah hong pai-in nangma mai-ah kong koih mateng hih lai panin na paikhia kei in,” a ci hi. Amah in, “Nong tunkik mateng ka na om ding hi,” a ci hi. Tua ahih ciangin Gideon a inn-ah pai-in keelno khat le annel seu khat silngo sawh loh moh a bawl hi. A sa ciang sung khatah koihin a satui beel sung khatah koih a, tawsaw nuai ama kiangah tuate hong paipihin a pia hi. Tua ciangin Pasian’ vantungmi in ama kiangah, “Sa le silngo sawh loh moh la-in, hih suang tungah koih inla, a tungah satui sung in,” a ci hi. Tua bangmahin amah in a hih hi. Tua ciangin Topa’ vantungmi in a khutsung a om ciangkhut dawn dawksakin, sa le silngo sawh loh mohte a su hi. A suang panin mei piangkhia-in, sa le silngo sawh loh moh a kangtum hi. Tua ciangin ama muhna panin Topa’ vantungmi a mang hi. Tua ciangin Gideon in amah pen Topa’ vantungmi ahihlam a thei hi. Gideon in, “Ala, Topa Pasian! Topa’ vantungmi mai kituahin ka mukha khin hi,” a ci hi. Ahih hangin Topa in ama kiangah, “Nopna na tungah hong om ta hen; lau kei in, na si kei ding hi,” a ci hi. Tua ciangin Gideon in Topa a dingin biakna tau khat tua lai-ah lamin tua pen, “ Topa in nopna ahi hi”, ci-in min a phuak hi. Tua pen, Abiezer mite’ neihsa Ofrah khua-ah tuni dongin a dinglai hi. Tua zanin Topa in ama kiangah, “Na pa’ bawng sung pan kum sagih a pha a bawngtal nih la inla, na pa’ neih Baal biakna tau phelin, a gei-a om Asherah milim phuk in. Tua ciangin hih lai munmuanhuai dawnah Topa na Pasian a dingin biakna tau khat lamin, a suangte a ngeina ding bangin koih in. Tua ciangin a bawngtal nih la-in, na phuk Asherah milim sing tawh meihal biakna-in pia in,” a ci hi. Tua ahih ciangin Gideon in a nasemte mi sawm paipihin, Topa in ama tungah a gen bangin a hih hi. Ahih hangin sunin a hih ding a innkuanpihte le a khuamite kihta lua ahih manin zanin a hih hi. Tua khua mite zingsang tungin a thawh uh ciangin, Baal biakna tau kiphelkhia-in a gei-a om Asherah milim kiphuk a, a kilam thak biakna tau tungah bawngtal a nihna a kipia a mu uh hi. Amaute khatlekhat kiangah, “Hih na kua in hih ahi hiam?” kici uh hi. Amaute in a thu kanin a dot uh ciangin, “Joash’ tapa Gideon in hih hi,” kici uh hi. Tua ciangin tua khuamite in Joash kiangah, “Na tapa in Baal biakna tau phelkhia-in a gei-a om Asherah milim phuk ahih manin ka thah theih nadingun amah hong paikhiatpih in,” a ci uh hi. Ahih hangin Joash in ama langkhatah a pang mite khempeuh tungah, “Baal panpih ding a, ama tupna hutpih ding na hi uh hiam? Amah a panpih peuhmah zingsang ciangin kithat ding hi. Amah pasian ahihleh amahmah kihu tawm tahen. Bang hang hiam cih leh ama biakna tau a kiphelsak ahi hi,” a ci hi. Tua ahih ciangin tua ni-in Gideon, “Keima langkhatah Baal pangsak un,” a cihnopna ahi Jerubbaal min kiphuak hi. Bang hang hiam cih leh Gideon in a biakna tau a phel hi. Tua ciangin Midian mite, Amalek mite le Nisuahna lam mite khempeuh hong paikhawm uh a, amaute in Jordan kantanin Jezreel Kuam-ah giahphual a sat uh hi. Ahih hangin Gideon’ tungah Topa’ kha hong tung hi. Amah in peengkul gingsak a, amah a zui dingin Abiezer mite kisamkhia hi. Amah in Manasseh gam khempeuhah kamtaite sawl a, amaute zong amah a zui dingin kisam hi. Amah in Asher, Zebulun le Naftali minamte kiangah kamtaite sawl a, amah a pawm dingin amaute zong paito uh hi. Tua ciangin Gideon in Pasian kiangah, “Na gensa bangin keima tha tawh Israel-te na hotkhiat ding leh, en in, ancilna sual tungah tuumul lom khat ka koih hi. Tuumul tung bekah daitui omin leilak dang khempeuh a keu leh, na gensa bangin keima tha tawh Israel-te na honkhia ding hi, cih ka thei ding hi,” a ci hi. Tua bangmahin a piang hi. A zing ciangin tho baihin a tuumulte a tui suk a, tuumul panin tui hai khat dim a sukkhia hi. Tua ciangin Gideon in Pasian kiangah, “Kei tungah hong heh kei in, tu-a khatvei bek hong pausak lai in, kong thum hi; tuumul tawh hih khatvei bek hong sinsak lai in, kong thum hi. Tuumul tung bek keusak inla, mun dang leitung khempeuhah daitui omsak in,” a ci hi. Tua bangmahin Pasian in tua zanin a hih hi. Bang hang hiam cih leh tuumul tung bek keu a, mun dang leitung khempeuhah daitui a om hi. Tua ciangin Jerubbaal (Gideon a cihna) le amah tawh a om mi khempeuh zingsangin tho baihin Harod tuikhuk gei-ah giahphual a sat uh hi. Midian-te’ giahphual pen amau’ kiang pan leilu lam, Moreh mual kiang, kuam sungah om hi. Topa in Gideon kiangah, “Amau’ khut sungah Midian mite piak nadingin nang tawh a omkhawm mite kei a dingin tamlua hi. Tua bangin tamlua leh kei tungah Israel-te kisialin, ‘Komau’ hatna hangin ka gualzo uh hi,’ ci kha ding uh hi. Tua ahih ciangin tu-in mite’ zakin taangko inla, ‘Lau-in a ling mi peuhmah a inn-ah ciah un,’ ci in,” a ci hi. Tua ciangin Gideon in amaute ze-et hi; tul sawmnih le tulnih ciahkikin, tul sawm bang bek omlai hi. Tua ciangin Topa in Gideon kiangah, “Mite tamlua lai ahih manin tui gei-ah amaute paipih in. Nang a dingin tua munah amaute kong sinsak ding hi. Nang kiangah, ‘Hih mipa nang tawh hong kuan ding hi,’ ka cih pa nang tawh hong kuan ding hi. Nang kiangah, ‘Hih mipa nang tawh hong kuan lo ding hi,’ ka cih peuhpeuh pa kuan lo ding hi,” a ci hi. Tua ahih ciangin amah in tui phualah mite paipih suk hi. Topa in Gideon kiangah, “Ui in a liah bangin a lei tawh tui a liak mi peuhmah na tuamkoih ding hi. Tua mah bangin tui dawn dingin a khukdin suk peuhmah zong na tuamkoih ding hi,” a ci hi. Tui a liak, a khut uh a kamah a tuah mi zathum ahi hi. Ahih hangin a dangte khempeuh tui dawn dingin khukdin suk uh hi. Tua ciangin Topa in Gideon kiangah, “Tui a liak mi za thumte tawh nangmah hong honkhia-in, na khut sungah Midian mite kong pia ding hi. A dangte khempeuh amau’ inn ciatah ciahsak in,” a ci hi. Tua ahih ciangin amah in Israel midang khempeuh ciahsak a, a beelte le a peengkulte khempeuh uh a kem mihing za thumte a khawlsak hi. Midian-te’ giahphual pen amau’ khanglam kuam sungah om hi. Tua zan mahin Topa in ama kiangah, “Tho in, giahphual simin pai in; bang hang hiam cih leh na khut sungah kong piazo hi. Ahih hangin na simsuk ngam kei leh, na nasempa Purah tawh a giahphual nai uhah paisuk in. Tua ciangin amaute’ thugen na za ding a, giahphual simin a kuansuk dingin na tha hong khauh ding hi,” a ci hi. Tua ciangin a nasempa Purah tawh giahphual a om galkapte in a pualamah a galpanna munah a paisuk uh hi. Midian mite, Amalek mite le Nisuahna lam mite khempeuh kauphe bangin tamin kuam dungah om uh hi. A kalaohte uh simzawh hi lo a, a tamna pen tuipi gei-a sehnel omzah bang ahi hi. Gideon a tun ciangin, mi khat in a lawmpa kiangah mang khat na gen hi. Amah in, “Ngai in, mang khat ka man hi. Midian-te giahphual sungah mangbuhham tawh a kibawl moh khat hong tuksukin puanbuk hong ban a, puanbuk deng kha-in puanbuk puk a, puanbuk kilumletin leilakah kiphah hi,” a ci hi. Tua ciangin a lawmpa in dawngin, “Hih pen, Israel mi Joash’ tapa Gideon’ namsau lo adang hi lo hi. Pasian in ama khut sungah Midian le mihon khempeuh pia khin hi,” a ci hi. Gideon in a mang le a khiatna a kigenna a zak ciangin Pasian bia-in a khukdin hi. Israel-te’ giahphual ah ciahkik-in, “Tho un, bang hang hiam cih leh Topa in na khutsung uhah Midian honte hong piazo hi,” a ci hi. Amah in mihing za thumte pawl thumin khenin, amaute khempeuh tungah peengkul le beel sungah meilah a om beel hawmte a pia hi. Amaute kiangah, “Keimah hong en unla, a giahphual nawl ka tun ciangin kei’ hih bangin hih un. Kei le ka ompih khempeuh in peengkul ka tum uh ciangin, giahphual pang khempeuhah zong peengkulte tum unla, ‘ Topa -a’ ding le Gideon a’ ding,’ ci-in awng un,” a ci hi. Tua ahih ciangin, amaute in galvil a laih khit phet, zankim laitakin, Gideon le amah tawh a om mi za khatte giahphual nawlah hong pai uh a, amaute in peengkul tumin a khutsung uha om beelte a sukham uh hi. A pawl thumun peengkul tumin beelte sukham uh a, a veilam khutun meilah tawi-in, a taklam khutun a tum ding uh peengkul tawi uh hi. Tua ciangin amaute kiko-in, “ Topa a’ ding le Gideon a’ ding namsau khat!” a ci uh hi. Amaute a vekpi-in giahphual kiimah ding uh a, a galte khempeuh uh kiko-in taikhia uh hi. Amaute in peengkul za thumte a tum uh ciangin, Topa in a galte khempeuh a namsau uh tawh amau le amau kisatgawp sak hi. Tua ciangin a galte uh Zererah gei Bethshittah ciang, le Tabbath kiang Abelmeholah gamgi dong tai uh hi. Tua ciangin Naftali, Asher, le Manasseh minamte khempeuh sung panin mite kisamkhia a, amaute in Midian-te a delh uh hi. Tua ciangin Gideon in Efraim mualtung gam khempeuhah kamtaite sawl a, “Midian mite’ langkhatah hong kuansukin Bethbarah ciang dong luite hong la unla, Jordan zong hong la un,” cisak hi. Tua ahih ciangin Efraim mite khempeuh kisamkhia a, amaute in Bethbarah ciang dong luite la-in, Jordan zong a la uh hi. Amaute in Midian ulian nihte Oreb le Zeeb a man uh hi. Amaute in Midian-te a delh kawmun Oreb Suangpi-ah Oreb that uh a, Zeeb Leenggahsukna ah Zeeb that uh hi. Amaute in Jordan galkhat Gideon kiangah Oreb le Zeeb lutangte hong paipih uh hi. Tua ciangin Efraim mite in Gideon kiangah, “Midian-te a do dingin na kuancil lai-in kote nong sap loh, kote hong bangci ngaihsut na hi hiam?” a ci uh hi. Amaute in nakpitakin amah mawhsak uh hi. Amah in amaute kiangah, “Note tawh teh dingin kote bang hi lel ka hi uh hiam? No Efraim minamte’ sep a themno khat pen ko minam bup khempeuhte’ sep sangin thupizaw hi lo ahi hiam? Pasian in note’ khut sungah Midian uliante Oreb le Zeeb hong piazo hi. Note tawh teh dingin kote in bang hihzo ka hi uh hiam?” a ci hi. Amah hih bangin kam a pau ciangin ama tunga amau’ hehna a bei hi. Tua ciangin Gideon le amah tawh a om mi za thumte, Jordan tungin galkah uh a, a gimpi mahin amaute delh lai uh hi. Tua ahih ciangin amah in Sukkoth mite kiangah, “Kong thum hi, kei hong zuite tungah anlum pawlkhat pia un; bang hang hiam cih leh amaute gim uh a, Midian kumpi Zebah le Zalmunna a delh ka hi uh hi,” a ci hi. Tua ciangin Sukkoth uliante in, “Na galkapte tungah anlum ka piak dingun Zebah le Zalmunna na khut sungah omkhin ahi hiam?” a ci uh hi. Tua ciangin Gideon in, “Tua ahihleh pha hi. Topa in Zebah le Zalmunna ka khut sungah hong piak khit ciangin gamlak lingte le lingkungte tawh na sa uh ka kuikek ding hi,” a ci hi. Tua lai panin Penuel-ah paito a, amaute tungah zong tua mah bangin a gen hi. Penuel mite in Sukkoth mite’ dawn mah bangin amah na dawng uh hi. Tua ciangin amah in Penuel mite kiangah, “Lungnuamin kong paikik ciangin hih tausang ka supai ding hi,” a ci hi. Tu-in Zebah le Zalmunna-te, Nisuahna lam mi galkap khempeuh sung pan a omlaiteng, mihing tul sawm le tulnga bang bek a pha lai a galkapte uh tawh Karkor-ah om uh hi; bang hang hiam cih leh namsau a tawi mi tul za le tul sawmnih si khin hi. Tua ciangin Nobah le Jogbehah nisuahna lam mihonte’ tot lampi zui-in Gideon paito-in a galte va bingphawn’ hi. Bang hang hiam cih leh a galte uh galvil om lo hi. Tua ciangin Zebah le Zalmunna tai uh hi. Amah in amaute delhin Midian kumpi nihte Zebah le Zalmunna manin amau’ galkap khempeuh kithehthang sak hi. Tua ciangin Joash’ tapa Gideon a galsimna panin Heres kahtohna lam tawnin ciahkik hi. Amah in Sukkoth mi tangval khat manin thu dong hi. Tua pa in ama a dingin uliante le upate mihing sawmsagih le sagih a min gelhsak hi. Tua ciangin Sukkoth mite kiangah amah tungin, “Kei tungah hong kisialin, ‘A gim na mite tungah anlum ka piak dingun Zebah le Zalmunna na khut sungah omkhin ahi hiam?’ na cih uh Zebah le Zalmunna en un,” a ci hi. Tua ciangin amah in a khuapi upate sam a, gamlak lingte le lingkungte zong la-in, tuate tawh Sukkoth mite a thuhilh hi. Tua ciangin amah in Penuel tausang supai-in tua khua mite a that hi. Tua ciangin amah in Zebah le Zalmunna kiangah, “Tabor-ah na thah uh mite koi-ah om ahi hiam?” a ci hi. Amaute in, “Amaute, nangmah bang uh hi; amaute in kumpipa’ tapate suun uh hi,” a ci uh hi. Tua ciangin amah in, “Amaute, ka sanggam, ka laigui zoppihte ahi uh hi. Topa a nuntak mah bangin, amaute suaktasak hi le-uhcin note kong that kei ding hi,” a ci hi. Tua ciangin amah in a ta upa pen Jether kiangah, “Ding in, amaute that in,” a ci hi. Ahih hangin tangvalpa in a namsau dok ngam lo hi. Bang hang hiam cih leh amah tangval lai ahih manin a lungsim hang nai lo hi. Tua ciangin Zebah le Zalmunna in, “Nangmahmah ding inla, kote hong hih in; bang hang hiam cih leh pasal nasep a sem dingin pasal mah kisam hi,” a ci uh hi. Tua ciangin Gideon dingin Zebah le Zalmunna that a, amau’ kalaohte’ ngawng a a om khade lim tawh a kibang kizepnate a la hi. Tua ciangin Israel mite in Gideon kiangah, “Nang le na tapa le na tupa dongin zong kote hong uk un; bang hang hiam cih leh Midian-te’ khutsung panin kote nong honkhia hi,” a ci uh hi. Gideon in amaute kiangah, “Note kong uk kei ding a, ka tapa in zong note hong uk lo ding hi. Topa in note hong uk ding hi,” a ci hi. Tua ciangin Gideon in amaute kiangah, “Note tung panin kong ngetnop khat om hi. Note in van kinusia na top uh lak panin bilbahte hong pia un,” a ci hi. (Bang hang hiam cih leh amaute, Ishmael mite ahih manin kham bilbah nei uh hi.) Amaute in dawngin, “Lungkim takin kong pia ding uh hi,” a ci uh hi. Tua ciangin amaute in puan phah uh a, mi khempeuh in van kinusia a top uh lak panin bilbahte tua puan tungah a lawn uh hi. Ama nget kham bilbahte a gihna pen kham shekel tulkhat le zasagih ahi hi. Midian kumpite in a zat khade lim tawh a kibang kizepnate, khainiangte, puan dupsante le a kalaohte uh ngawng kimkotah a om ngawng-awhte a kisim lo ahi hi. Tua ciangin Gideon in tuate mi limin bawlin ama khuapi Ofrah khua-ah a koih hi. Israel-te khempeuh in tua lai munah tua milim bia uh a, Gideon le a innkuanpihte a dingin thangzak khat a suak hi. Tua ahih ciangin Israel mite’ mai-ah Midian-te guallel uh a, amaute kihisak zo nawn lo uh hi. Gideon’ hun sungin tua gam in kum sawmli sung lungnopna a nei hi. Joash’ tapa Gideon pai-in ama aituam inn-ah a teng hi. Tu-in Gideon in tapa sawmsagih, ama a’ mahmah nei hi; bang hang hiam cih leh amah in zi tampi nei hi. Shekhem-ah a om a zineu in zong tapa khat nei a, amah in a min Abimelek a phuak hi. Tua ciangin Joash’ tapa Gideon teeksih a, Abiezer mite’ neihsa Ofrah khua-a om a pa Joash’ hanah kivui hi. Gideon a sih khit phetin Israel mite kihei kikin Baal-te bia uh a, a pasian dingun Baalberith a bawl uh hi. Israel mite in, mun khempeuh panin amau’ galte’ khutsung pan a honkhia Topa a Pasian uh phawk lo uh hi. Jerubbaal in Israel-te tungah a bawl thuhoihte khempeuh hangin amaute in Jerubbaal innkuante tungah lungdamna bangmah lak lo uh hi. Tu-in Jerubbaal’ tapa Abimelek, Shekhem a a nu’ tanaute kiangah pai-in amaute khempeuh kiangah, “Shekhem khuami khempeuh huau-in gen un, ‘Jerubbaal’ tapa sawmsagihte a vekpi in note hong uk ding le khat in note hong uk ding, note a dingin koi hoihzaw ahi hiam?’ a ci hi. Kei pen note’ guh note’ sa ka hihna zong phawk un,” a ci hi. Tua ciangin a nu’ tanaute in ama tangin Shekhem mite khempeuh tungah hih thute gen uh hi. Tua ciangin amaute’ lungsim Abimelek zuih ding lamah hoi hi; bang hang hiam cih leh amaute in, “Amah i naihuai ahi hi,” a ci uh hi. Tua ciangin amaute in Baaberith inn panin ngun pek sawmsagih Abimelek pia uh a, amah in ama nung a zui, bangmah-a a kimang lo le thu ngaihsun thei lo mite cialna hi. Tua ciangin Ofrah-a a pa’ inn-ah amah pai-in, Jerubbaal’ tapa a sanggam mi sawmsagihte suang khat tungah a that hi. Ahih hangin amah bu ahih manin Jerubbaal’ tapa neupen Jotham a suakta hi. Tua ciangin Shekhem khuamite khempeuh le Bethmillo khuamite khempeuh hong paikhawm uh a, amaute in Shekhem khua-a tawsaw songpi kiangah Abimelek kumpi a suaksak uh hi. Jotham kiangah tua thu a kigen ciangin amah pai-in Gerizim Mual dawnah ding a, nakpi-in kiko-in amaute kiangah, “No Shekhem mite aw, Pasian in note’ thu hong ngaih theih nadingin ka thu hong ngai un. Khatvei, singkungte amau’ tungah kumpi-in sathau a nilh dingin kuankhia uh a, amaute in oliv kung kiangah, ‘Kote hong uk in,’ a ci uh hi. Ahih hangin oliv kung in amaute kiangah, ‘Keimah in pasian-te le mite a kipahtawina ahi ka thaunate nusia-in singkungte a uk dingin hong pai ding ka hi hiam?’ ci hi. Tua ciangin singkungte in theikung kiangah, ‘Hong pai inla, kote hong uk in,’ ci uh hi. Ahih hangin theikung in amaute kiangah, ‘Keimah in ka khumna le ka gah hoihte nusia-in singkungte a uk dingin hong pai ding ka hi hiam?’ ci hi. Tua ciangin singkungte in leenggui kiangah, ‘Hong pai inla, kote hong uk in,’ ci uh hi. Ahih hangin leenggui in amaute kiangah, ‘Keimah in pasian-te le mite a lungnuamsak ka leenggahzu nusia-in singkungte a uk dingin hong pai ding ka hi hiam?’ ci hi. Tua ciangin singkung khempeuh in thangling kung kiangah, ‘Hong pai inla, kote hong uk in,’ ci uh hi. Thangling kung in singkungte kiangah, ‘Note tungah kumpi-in lungsim tak tawh sathau hong nilh na hih uhleh, hong pai unla, ka liimah hong bu un. Ahi zongin ka liim nuai-ah nong buk kei uhleh, thangling kung lak panin meikuang hong paikhia hen la, Lebanon taamtak kungte kangtum hen,’ ci hi. “Tua ahih ciangin tu-in Abimelek kumpi-in na bawl uh ciangin lungsimtak le thumantak mah tawh a gamta na hi uh hiam? Jerubbaal le a innkuan tungah thuman takin gamta-in ama sepna tawh a kituakin amah a bawl mah na hi uh hiam? Bang hang hiam cih leh ka pa in note a’ ding hong dosakin a lauhuaina sungah a nuntakna pia a, Midian-te’ khutsung panin note hong honkhia hi. Ahi zongin tuni-in ka pa’ innkuan langkhatah note pangin a tapate mi sawmsagih suang khat tungah na that uh a, ka pa in a nasem numei tawh a neih a tapa Abimelek pen note’ naihuai ahihna hangin Shekhem khuamite tungah kumpi-in na bawl uh hi. Note in tuni-in Jerubbaal le a innkuanpihte tungah lungsimtak le thumantak tawh a gamta takpi mah na hih uhleh, Abimelek tungah note lungdam unla, note tungah zong amah lungdam tahen. Ahih hangin tua bang ahih takpi kei leh, Abimelek sung panin meikuang hong paikhia hen la, Shekhem le Bethmillo khuamite kangtum hen. Shekhem khuamite sung pan le Bethmillo khuamite sung panin meikuang hong pai hen la, Abimelek kangtum hen,” a ci hi. Tua ciangin a sanggampa Abimelek a kihtakna hangin Jotham taikhia-in Beer-ah pai-in tua lai-ah a teng hi. Abimelek in Israel-te tungah kum thum sung uk hi. Pasian in Abimelek le Shekhem mite kikalah kigalneihna omsak a, Shekhem mite in Abimelek lehdo uh hi. Tua pen, Jerubbaal tapa sawmsagihte a kithahna thu tawh kisai-in, amaute a that a sanggampa uh Abimelek, le a sanggamte thah nadingin a hanthawn Shekhem mite tungah thukkikna hong tuntheih nadingin a kibawl mahmah ahi hi. Tua hi a, Shekhem mite in Abimelek a pangsim dingin mual dawnah mi koih uh a, amaute in tua lam a tawn mi khempeuhte’ na na sut uh hi; hih thu Abimelek kiangah kigen hi. Tua ciangin Ebed’ tapa Gaal a tanaute tawh Shekhem-ah hong kikhin uh hi. Shekhem mite in amah muang uh hi. Amaute lo-ah kuanin a leenggui uh panin leenggah khawmin cil uh a, pawi khamin amaute’ pasian’ inn-ah pai uh a, an ne tui dawnin omin Abimelek zahko uh hi. Tua ciangin Ebed’ tapa Gaal in, “Abimelek, kua hi a, ama na i sepsak dingin ei Shekhem mite kua ihi hiam? Jerubbaal’ tapa le ama ulian Zebul in Shekhem mite’ pulepa Hamor’ na sem uh hi lo ahi hiam? Tua ahih ciangin bang hangin ama na sem ding ihi hiam? Hih mite keima khutnuai hileh! Abimelek ka khinkhia ding hi. Abimelek kiangah, ‘Na galkap behlap inla hong kuankhia in,’ ka ci ding hi,” a ci hi. Tua khuapi a uk Zebul in Ebed tapa Gaal’ kammalte a zak ciangin heh mahmah hi. Amah in Arumah khua-a om Abimelek kiangah kamtaite sawlin, “En in, Ebed tapa Gaal le a tanaute Shekhem-ah hong pai-in nang langpangin tua khuapi sosuah hi. Tua ahih ciangin tu-in na ompih mite tawh zanin pai unla, gamlakah pangsim un. Tua ciangin zingsang ni a suah phetin tho baih unla, khuapi simgawp un. A ompih mite tawh nang a do dingin hong kuankhiat ciangun ahi thei bangin amaute tungah na bawl ding uh hi,” cisak hi. Tua ciangin Abimelek le amah tawh a om mite khempeuh zanin tho-in pawl li kisuahin Shekhem a sim dingin pangsim uh hi. Tua ciangin Ebed tapa Gaal paikhia-in khuapi kulhkongpi lutna-ah ding a, Abimelek le amah tawh a om mite zong a pansimna panun dingto uh hi. Gaal in tua mite a muh ciangin amah in Zebul kiangah, “En in, mual dawn panin mite hong paisuk!” a ci hi. Zebul in ama kiangah, “Mual liimte mi bangin a mu na hi hi,” a ci hi. Gaal pau kikin, “En in, a gam laizang panin mite hong paisuk a, Aisante’ Tawsaw lam panin pawlkhat hong pai hi,” a ci hi. Tua ciangin Zebul in ama kiangah, “Tu-in na kamhanna koi-ah om ahi hiam? ‘Ama na i sep dingin Abimelek kua ahi hiam?’ a ci pa hi lo na hi hiam? Hih mite, na simmawhte hi lo ahi hiam? Tu-in paikhia inla amaute tawh kido in,” a ci hi. Tua ciangin Shekhem mite’ mai-ah Gaal kuankhia-in Abimelek tawh kido hi. Abimelek in Gaal delh a, ama mai-ah Gaal a tai hi. Kulhkongpi lutna ciang dong nangawnah mi tampi liamin tuk hi. Tua ciangin Arumah ah Abimelek a teng hi. Zebul in Gaal le a tanaute hawlkhia a, amaute Shekhem-ah teng thei nawn lo uh hi. A zing ciangin gamlakah Shekhem mite paikhia uh hi. Hih thu Abimelek kiangah kigen hi. Amah in a mite la-in pawl thum suahin gamlakah pangsim uh hi. Tua ciangin amah khuadakin khuapi panin mite a kuankhia mu a, amaute do-in kipan a, amaute that hi. Abimelek le amah tawh a om a pawlte in thakhatin mainawt uh a, ama pawldang nihte in gamlak a om mite delhin a thah sungin khuapikulh lutna-ah amaute na ding uh hi. Abimelek in sun tawntung tua khuapi sim a, tua khuapi la-in a sunga om mite that a, tua khuapi phiatin ci a vawh hi. Shekhem Tausang mite khempeuh in tua thu a zak uh ciangin Elberith’ inn munmuanhuai-ah lut uh hi. Shekhem Tausang mite khempeuh kikaikhawm uh hi, ci-in Abimelek kiangah kigen hi. Tua ciangin amah tawh a om mi khempeuh tawh Zalmon Mual-ah Abimelek kuanto hi. Abimelek in a khutin hei khat la-in selkeu lom khat sat a, tuate la to-in a liangko tungah koih hi. Tua ciangin amah tawh a om mite kiangah, “Kei’ hih nong muhsa bangun kei’ hih bangbangin manlangin hih un,” a ci hi. Tua ahih ciangin mi khempeuh in amau a’ ding ciat selkeu tomin Abimelek zui-in munmuanhuai sim nadingin koih uh a, amaute in mei tawh munmuanhuai halin Shekhem Tausang mite, numei le pasal mi tulkhat bang a si hi. Tua ciangin Thebez-ah Abimelek pai a, Thebez langpangin giahphual sat a, tua khua a la hi. Ahih hangin tua khuapi sungah tausang muanhuai om a, tua khua numei le pasal, tua khuami khempeuh tua tausangah tai-in kikhaknelh uh a, tausang khumah amaute om uh hi. Tua ciangin Abimelek zong tausangah pai-in sim a, mei tawh a hal dingin tausang kongkhak a naih hi. Numei khat in an gawina suangpek tungnung, Abimelek’ lu tungah lawnin a lu guh dengkham hi. Tua ciangin amah in ama hiam a tawisak tangvalpa nawh sapin ama kiangah, “Na namsau dok inla kei hong that in. Tua hikeileh mite in, ‘Numei khat in amah that hi,’ hong ci kha ding uh hi,” a ci hi. A tangvalpa in amah sunletin amah a si ta hi. Israel mite in Abimelek a sihna a muh uh ciangin amau’ inn ciatah a ciah uh hi. Ama sanggam sawmsagihte thatin a pa tungah a khialhna hangin tua bangin Pasian in Abimelek’ khialhna a thuk ahi hi. Pasian in Shekhem mite khempeuh’ gitlohna hangin Jerubbaal’ tapa Jotham’ samsiatna bangin amau’ tungah gimna a tungsak hi. Abimelek khit ciangin Israel-te a honkhia dingin Issakhar minam Dodo’ tapa Puah, Puah’ tapa Tola hong khang a, Efraim mualtung gam Shamir-ah a teng hi. Amah in Israel-te kum sawmnih le kum thum sung thu khen hi. Tua ciangin amah si a, Shamir-ah kivui hi. Ama khit ciangin Israel-te kum sawmnih le kum nih sung thu a khen Gilead mi Jair hong khang hi. Amah in la sawmthum tungah a tuang tapa sawmthum a nei hi. Amaute in Gilead gam sunga om tu dongin Havvothjair a kici khuapi sawmthum nei uh hi. Tua ciangin Jair si-in Kamon-ah kivui hi. Tua ciangin Topa’ muhna-ah Israel mite a sia gamta kik uh a, Syria mite’ pasian-te, Sidon mite’ pasian-te, Moab mite’ pasian-te, Ammon mite’ pasian-te, Filistia mite’ pasian-te le Baal-te, le Ashtaroth bia uh a, amaute in Topa nusia-in ama na sem lo uh hi. Tua ciangin Israel-te tungah Topa sinso a, amah in Filistia mite tung le Ammon mite tungah amaute pia a, amaute in Israel mite tua kum sugawpin nengniam uh hi. Amaute in Jordan galkhat Gilead gam sunga om Amor mite’ leitangah a om Israel mite khempeuh kum sawm le kum giat sung nengniam uh hi. Judah, Benjamin, le Efraim minamte a sim dingin Ammon mite Jordan hong galkah uh hi. Tua ahih ciangin Israel-te nakpitakin lungkham uh hi. Tua ciangin Topa tungah Israel-te kiko uh a, “Nang tungah kong khial khin uh hi; bang hang hiam cih leh kote in ka Pasian uh nusia-in Baal-te ka bia uh hi,” a ci uh hi. Topa in Israel mite kiangah, “Egypt-te le Amor mite, Ammon mite le Filistia mite kiang panin hong honkhia hi lo ka hi hiam? Sidon mite, Amalek mite, le Maon mite in note hong nengniam uh hi. Kei tungah note nong kiko uh a, keimah in amaute’ khutsung panin note kong honkhia hi. Tua hinapi-in note in kei hong nusia-in pasian dangte na bia uh hi. Tua ahih ciangin note kong honkhia nawn kei ding hi. Pai unla note’ teel pasian-te tungah ko un. Na lungkham hunun amaute kihonkhia sak un,” a ci hi. Ahi zongin Israel mite in Topa tungah, “Ka khial khin uh hi. Hoih na sak bangin ko tungah hong hih in. Tuni-in hong honkhia in, kong thum uh hi,” a ci uh hi. Tua ahih ciangin amaute in amau’ lak panin gamdang pasian-te koih khia-in Topa a bia uh hi. Tua ahih ciangin Israel-te’ gentheihna ah amah a dah hi. Tua ciangin Ammon mite galhiam tawi dingin kisam uh a, Gilead-ah giahphual sat uh hi. Israel mite zong kikaikhawmin Gilead gam sung Mizpah-ah giahphual sat uh hi. Tua ciangin Israel mihonte le makaite khatlekhat in, “Ammon mite do dinga a kipan ngam kua om ihi hiam? A kipan ngam mipa, Gilead gam a teng mite khempeuh tungah lutang hi ding hi,” a kici uh hi. Tu-in Gilead khuami Jefthah, a thahat galhang khat hi a, ahih hangin amah pen zawlta ahi hi. Jefthah’ pa Gilead hi a, Gilead’ zi in zong amah tawh tapa dang nei hi. A tapate a khan ciangun amaute in Jefthah notkhia-in ama kiangah, “Ka pa uh inn sungah gamh na luah kei ding hi; bang hang hiam cih leh nang pen numei dang tawh zawlta na hi lel hi,” a ci uh hi. Tua ciangin a sanggamte kiang panin Jefthah tai-in Tob gam sungah teng a, bangmah a man lo mite in Jefthah pawmin amah tawh mite sugawpin pai kawikawi uh hi. Tawlkhat khit ciangin Ammon mite in Israel-te sim uh hi. Ammon mite in Israel-te a sim ciangin Tob gam panin Jefthah a la dingin Gilead upate va pai uh hi. Amaute in Jefthah kiangah, “Ammon mite i do theih nadingin hong pai inla kote’ makai hong hi in,” va ci uh hi. Ahih hangin Jefthah in Gilead upate kiangah, “Note in kei hong mudahin ka pa’ inn pan hong hawlkhia hi lo na hi uh hiam? Bang hangin thuhaksa na tuah uh ciangin kei kiangah hong pai na hi uh hiam?” na ci hi. Tua ciangin Gilead upate in Jefthah kiangah, “Kote tawh nang hong pai-in Ammon mite do-in Gilead gam sunga teng mi khempeuh tungah lutang nong hih theih nadingin nang’ lamah hong kihei ka hi uh hi,” a ci uh hi. Jefthah in Gilead upate kiangah, “Note in Ammon mite a do dingin inn-ah kei nong ciahpih uh a, kei tungah Topa in amaute hong piak leh kei pen note’ lutang ka hi ding hi,” a ci hi. Gilead upate in Jefthah kiangah, “ Topa pen eite’ kikalah teci hi ding hi. Na cih bangin ka gamta ding uh hi,” a ci uh hi. Tua ahih ciangin Gilead upate tawh Jefthah pai a, mite in amau’ tungah lutang le makai-in amah koih uh hi. Jefthah in hih thute khempeuh Mizpah khuasung Topa’ mai-ah a gen ahi hi. Tua ciangin Jefthah in Ammon mite’ kumpipa kiangah kamtaite sawlin, “Ka gam a sim dingin kei kiangah nong pai nadingin kei’ tungah bang thu om ahi hiam?” cisak hi. Ammon mite’ kumpipa in Jefthah’ kamtaite dawng a, “Egypt panin Israel-te hong pai lai-in Arnon panin Jabbok le Jordan ciang ka gam hong laksak hang ahi hi. Tua ahih ciangin tu-in thudamin hong piakik in,” a ci hi. Jefthah in Ammon mite’ kumpipa kiangah kamtaite sawlkikin ama kiangah, “Jefthah in hih bangin ci hi: Israel-te in Moab leitang hitaleh Ammon mite’ leitang hitaleh la lo hi. Egypt panin Israel-te hong paitoh lai-in gamlak tawnin San Tuipi-ah hong pai-in Kadesh hong tung uh hi. Israel-te in Edom kumpipa kiangah kamtaite sawl a, ‘Kong thum uh hi; na gam sung hong nawksak in,’ cisak uh hi. Ahih hangin Edom kumpipa in a thu ngai lo hi. Tua ciangin Moab kumpipa kiangah zong sawl uh a, ahih hangin amah thukim lo hi. Tua ahih ciangin Kadesh-ah Israel-te om phot uh hi. Tua ciangin sehnel gam tawnin amaute khualzin uh a, Edom gam le Moab gam kimkotin pai-in Moab gam nisuahna lampangah tung uh a, Arnon gun galkhatah phual sat uh hi. Ahih hangin Moab gam sungah amaute lut lo uh hi. Bang hang hiam cih leh Arnon gun pen Moab gamgi ahi hi. Tua ciangin Israel-te in Heshbon khua-ah a om Amor mite’ kumpi Sihon kiangah kamtaite sawl uh hi. Israel-te in ama kiangah, ‘Kong thum uh hi; ka gam uh a zuan dingin na gam hong nawksak in,’ ci uh hi. Ahih hangin Sihon in ama gam a nawk dingin Israel-te muang lo hi. Tua ahih ciangin Sihon in a mite khempeuh kaikhawmin Jahaz-ah giahphual sat a, Israel-te na sim hi. Topa, Israel-te’ Pasian in Sihon le a mite khempeuh Israel-te’ khut sungah pia a, amaute in zo uh hi. Tua ahih ciangin tua gam sunga teng Amor mite’ leitang khempeuh Israel-te in luah uh hi. Amaute in Arnon gun panin Jabbok lui ciang leh sehnel gam panin Jordan gun ciang, Amor mite’ gam khempeuh a luah uh hi. Tua ahih ciangin Topa, Israel-te’ Pasian in ama mi Israel-te’ mai panin Amor mite paaikhia hi. Tu-in nangmah in luahkik ding sawm na hi hiam? Na pasian Khemosh in na neih dinga hong piakte kem peuh in. Kote ahihleh Topa ka Pasian un kote’ mai-ah a suankhiatte ka tang ding uh hi. Tu-in nang pen Moab kumpipa, Zippor’ tapa Balak sangin ginazaw na hi hiam? Amah in Israel-te to ngei a, amaute do ngei ahi hiam? Heshbon le a khuaneute, Aroer le a khuaneute, le Arnon gun panga om khuapite khempeuh sungah Israel-te a ten kum zathum hun sung tengin bang hangin lakik lo na hi hiam? Tua ahih ciangin nang tungah ka khial kei a, kei nong simna-ah kei tungah nang nong khial hi. Topa, Thukhen pa in Israel mite le Ammon mite kikalah tuni-in thu khen ding hi,” a ci hi. Ahih hangin Ammon kumpipa in ama kiangah thu a puak Jefthah’ thu a don kei hi. Tua ciangin Jefthah’ tungah Topa’ kha hong tung a, amah in Gilead le Manasseh nawkin Gilead gam Mizpah-ah paisuak a, Gilead gam Mizpah panin Ammon mite kiangah paisuak lai hi. Jefthah in Topa tungah thuciamna bawlin, “Ka khut sungah Ammon mite nong piak leh Ammon mite kiang panin gualzo-in ka ciah ciangin keimah a dawn dingin ka innsung pan a hong pai peuhpeuh Topa a’ hi ding a, meihal biak nadingin kong pia ding hi,” a ci hi. Tua ahih ciangin amaute a sim dingin Ammon mite kiangah Jefthah galkah a, Topa in ama khut sungah amaute a pia hi. Amah in Aroer panin Minnith kiimnai ciang dong khuapi sawmnih, le Abelkeramim ciang dong mi tampi tak thatin a vatgawp hi. Tua ahih ciangin Israel mite mai-ah Ammon mite guallel uh hi. Tua ciangin Mizpah-a ama inn-ah Jefthah hong ciah hi. Amah a dawn dingin a tanu khuangneute tawh a laamsa-in hong paikhia hi. Tua nu pen ama ta khat neihsun hi a, amah simloh tapa ahi a, tanu ahi zongin adang nei lo hi. Amah in a tanu a muh ciangin a puan balkekin, “Ala, ka tanu! Kei nong niamkoih mahmah hi. Kei a dingin lungkhamna lianpi nong suak hi. Bang hang hiam cih leh Topa tungah thu ka ciam khin a, ka thuciamna ka dokkik thei kei hi,” a ci hi. Tua ciangin a tanu in ama kiangah, “Ka pa aw, Topa tungah thu ciam khin na hih leh, na thuciamna tawh kizui-in kei’ tungah hong bawl in. Tu-in Topa in na gal Ammon mite tungah nang a’ ding hong thuksak khin hi,” a ci hi. Tua ciangin amah in a pa kiangah, “Kong ngetnop thu khat om hi. Kei pai-in mualtungah vak kawikawi-in kei le ka lawmte in nungak-in ka sih nading hangin ka thum theih nadingun kha nih sung kei guak hong omsak in,” a ci hi. Amah in, “Pai ta in,” a ci hi. Amah in kha nih sung a tanu paikhia sak hi. Tua ciangin amah le a lawmte paikhia-in nungakin a sih nading hangin mualte tungah kapin a thum uh hi. Kha nih a cin ciangin a pa kiangah amah ciahkik a, amah in ama bawlsa a thuciamna bangin a tanu tungah hih hi. Tua nu pen pasal tawh a lumkhawm nai lo, nungakin khansih hi. Tua ciangin Israel-te sungah ngeina khat suak a, Israel numeite kum khatin ni li sung kum simin Gilead mi Jefthah’ tanu hangin a thum dingin paikhia uh hi. Efraim mite galhiam tawi dingin kisam uh a, amaute Zafon gun kantanin galkah uh a, Jefthah kiangah, “Bang hangin Ammon mite a sim dingin galkahin, nang tawh a kuankhawm dingin kote hong zawn lo na hi hiam? Na inn tawh nang kong halnelh ding uh hi,” a ci uh hi. Tua ciangin Jefthah in amaute kiangah, “Kei le ka mite in Ammon mite tawh buaina lianpi khat ka nei ngei uh hi. Note kong sap hangin amau’ khutsung panin kei nong honkhia kei uh hi. Note in kei nong hotkhiat loh ding uh ka theih ciangin kei mahmah hanciam tawmin Ammon mite a sim dingin ka galkah a, Topa in kei’ khut sungah amaute hong pia hi. Tua ahih ciangin bang hangin tuni-in kei a hong sim dingin hong kuan na hi uh hiam?” a ci hi. Tua ciangin Jefthah in Gilead mite khempeuh khawmin Efraim mite tawh kido uh hi. Gilead mite in Efraim mite vatgawp uh hi. (Efraim mite in, “No Gilead mite pen Efraim-te le Manasseh-te sung panin Efraim mite a taisante na hi uh hi,” ci ngei uh hi.) Gilead mite in Efraim mite tung panin Jordan ngahmunte la uh hi. Efraim galtaite khat peuhpeuh in, “Hong galkah sak in,” a cih ciangin Gilead mite in ama kiangah, “Efraim mi na hi hiam?” ci uh hi. Amah in, “Hi kei ing,” a cih ciangin amaute in ama kiangah, “Tua ahihleh Shibboleth ci in,” ci uh a, tua ciangin amah in, “Sibboleth,” ci hi; bang hang hiam cih leh a manin ci thei lo hi. Tua ciangin amaute in amah manin Jordan ngahmunte-ah that uh hi. Tua tungin Efraim mi tul sawmli le tulnih tuk hi. Jefthah in Israel mite kum guk sung thu khen hi. Tua ciangin Gilead mi Jefthah si a, Gilead gam ama khuapi sungah kivui hi. Ama nungah Bethlehem khuami Ibzan in Israel-te thu khen hi. Amah in tapa sawmthum nei hi. Ama beh pualam mite tungah tanu sawmthum mo kha a, a pualam panin a tapate a dingin tanu sawmthum la hi. Amah in Israel-te kum sagih sung thu khen hi. Tua ciangin Ibzan si a, Bethlehem-ah kivui hi. Ama nungah Zebulun mi Elon in Israel-te kum sawm sung thu khen hi. Tua ciangin Zebulun mi Elon si a, Zebulun gam Aijalon-ah kivui hi. Ama nungah Pirathon mi Hillel’ tapa Abdon in Israel-te thu khen hi. Amah in la sawmsagihte tungah a tuang tapa sawmli le tupa sawmthum nei hi. Amah in Israel-te kum giat sung thu khen hi. Tua ciangin Pirathon mi Hillel’ tapa Abdon si a, Amalek mite’ mualtung gam Efraim leitang tung, Pirathon-ah kivui hi. Topa’ muhna-ah Israel mite a sia gamtakik uh a, Topa in Filistia mite’ khut sungah kum sawmli sung amaute a pia hi. Dan minam sung panin Zorah khuami Manoah min nei mi khat om hi. Ama zi tasel ahih manin ta nei lo hi. Topa’ vantungmi tua numei kiangah kilangin ama kiangah, “En in, na tasel a, ta na nei kei hi. Ahi zongin tu-in gai-in tapa khat na nei ding hi. Tua ahih ciangin kidawm inla, leenggahzu ahi a, khamtheihzu ahi zongin ne loin, a nin bangmah ne kei in. Bang hang hiam cih leh nang gai-in tapa khat na nei ding hi. Ama lu tungah mulkiatna kitah lo ding hi. Bang hang hiam cih leh naupang pen a suah a kipanin Pasian’ tungah Nazir mi hi ding a, amah in Filistia mite’ khutsung panin Israel-te hotkhiat ding kipan ding hi,” a ci hi. Tua ciangin tua nu pai-in a pasal’ kiangah gen a, “Pasian’ mi khat ka kiangah hong pai a, ama mel pen Pasian’ vantungmi mel tawh kibangin dipkuathuai mahmah hi. Koi panin hong pai cih amah ka dong kei a, amah in ama min hong gen lo hi. Ahih hangin amah in kei kiangah, ‘En in, nang gai-in tapa khat na nei ding hi. Tua ahih ciangin leenggahzu ahi a, khamtheihzu ahi zongin ne kei inla, a nin bangmah ne kei in. Bang hang hiam cih leh naupang pen a suah a kipan a sih dong Pasian’ tungah Nazir mi hi ding hi,’ hong ci hi,” a ci hi. Tua ciangin Manoah in Topa kunh a, “ Topa aw, kong thum hi; na hong sawl Pasian’ mipa ko’ kiangah hong paisakkik inla, a hong suak ding naupang ka bawl nading uh hong hilhsak in,” a ci hi. Pasian in Manoah’ aw ngai-in lo lai-ah tua nu a tut laitakin Pasian’ vantungmi ama kiangah hong pai hi. Ahih hangin a pasal Manoah amah tawh om lo hi. Tua ciangin tua nu nawhsa-in tai-in a pasal kiangah, “En in, zanhal a kei kiangah hong pai mipa ka kiangah hong kilang kik hi,” a ci hi. Tua ciangin Manoah dingin a zi zui a, mipa kiangah pai-in, “Hihnu kiangah thugenpa nang na hi hiam?” a ci hi. Amah in, “Ka hi hi,” a ci hi. Tua ciangin Manoah in, “Na thugente a manin hong tun ciangin naupang’ nuntakna zia ding bang hi a, amah in bang hih ding ahi hiam?” a ci hi. Tua ciangin Topa’ vantungmi in Manoah’ kiangah, “Numei’ kiangah ka gente khempeuh na kidawm hen. Amah in leenggui pana piang peuhmah ne thei lo ding a, leenggahzu ahi a, khamtheihzu ahi zongin ne thei loin, a nin na khat peuhpeuh ne thei lo ding hi; amah ka thupiak khempeuh tang hen,” a ci hi. Manoah in Topa’ vantungmi kiangah, “Kong thum hi; tawlkhat khawl inla, nang a dingin keelno khat hong bawlsak nung,” a ci hi. Topa’ vantungmi in Manoah kiangah, “Nong khawlsak zongin na an ka ne kei ding hi. Ahih hangin meihal biak nading a baihsa-in na bawl leh Topa tungah pia in,” a ci hi. (Bang hang hiam cih leh Manoah in amah Topa’ vantungmi ahihlam thei lo hi.) Manoah in Topa’ vantungmi kiangah, “Na thugente a manin hong tun ciangin nang kong pahtawi theih nadingun, na min bang ahi hiam?” a ci hi. Topa’ vantungmi in ama kiangah, “Hih thu a lamdang hi, ci-in thei napi-in bang hangin ka min hong dong na hi hiam?” a ci hi. Tua ahih ciangin Manoah in an-a biakna tawh a keelno la-in nalamdang a bawl Topa a dingin suang tungah a pia hi. Biakna tau panin vantung lamah meikuang a paitoh ciangin, Manoah le a zi in a et laitakun biakna tau meikuang sungah Topa’ vantungmi kahto hi. Tua ciangin amaute leilakah a bok uh hi. Manoah le a zi’ tungah Topa’ vantungmi kilang nawn lo hi. Tua ciangin Manoah in amah Topa’ vantungmi ahihlam thei hi. Manoah in a zi kiangah, “Pasian mu khin ihih manin i si taktak ding hi,” a ci hi. Ahih hangin a zi in ama kiangah, “ Topa in eite thah hong sawm hileh, i meihal biakna le an tawh i biakna hong sang lo ding a, hih nate khempeuh hong lak loin, hih bang nate zong eite’ tungah hong pulak lo ding hi,” a ci hi. Tua numei in tapa khat nei-in a min Samson a phuak hi. Naupang khangto a, Topa in thupha a pia hi. Tua ciangin Topa’ kha in Zorah le Eshtaol kikal Mahanehdan ah Samson hanthot ding a kipan hi. Khatvei Timnah-ah Samson va paisuk a, Timnah-ah Filistia nungak khat mu hi. Tua ciangin amah ciahto-in a nu le a pa kiangah, “Filistia nungak khat Timnah-ah ka mu hi. Ka zi dingin va la un,” a ci hi. Ahih hangin a nu le a pa in ama kiangah, “Nang pai-in dawibia Filistia mite kiang panin zi na lak nadingin na tanaute’ lak ahi a, i mipih khempeuh lakah ahi zongin numei khat beek om lo ahi hiam?” a ci uh hi. A nu le a pa in hih thu pen Topa’ kiang pan ahihlam thei lo uh hi; bang hang hiam cih leh Topa in Filistia mite tungah paulap ding a zong ahi hi. Tua hun laitakin Filistia mite in Israel-te uk uh hi. Tua ciangin a nu le a pa tawh Timnah-ah Samson paisuk a, Timnah leenggui lote-ah amah tung hi. Tua lai-ah humpinelkai khanglai khat in amah hawksan hi. Tua ciangin ama tungah Topa’ kha khauhtakin hong tung a, mi khat in keelno khat a balgawp bangin amah in a khut guak tawh humpinelkai a balzan hi. Ahih hangin tua bangin ahihna thu a nu tung ahi a, a pa tungah ahi zongin gen lo hi. Tua ciangin amah paisukin a numei tawh kiho hi. Tua nu in Samson lungkimsak mahmah hi. Tawlkhat khit ciangin tua nu a la dingin paikik hi. Humpinelkai luanghawm a en dingin amah lampialin a va et leh humpinelkai luanghawm sungah khuai hon khat le khuaizu na om hi. Amah in a khut tawh tuate sawkin paisuak a, a pai kawmin a ne hi. Amah a nu le a pa kiangah tungin tuate pawlkhat pia a, amaute in a ne uh hi. Ahih hangin humpinelkai luanghawm sung panin tua khuaizu a lakna thu gen lo hi. Tua ciangin numei kiangah a pa paisuk a, Samson in zong tua lai-ah pawi khat a kham hi; bang hang hiam cih leh tangvalte’ hih ngei ahi hi. Mite in amah a muh uh ciangin amah a uap dingin tangval sawmthum hong paipih uh hi. Tua ciangin Samson in amaute kiangah, “Note’ mai-ah thuhaksa khat hong gen ning. Hih pawi ni sagih sungin a thu mukhia-in bang hiam cih nong gentheih uhleh saihadial puan silh sawmthum le pawipuan silh sawmthum note kong pia ding hi. Ahih hangin bang hiam cih nong gentheih kei uhleh saihadial puan silh sawmthum le pawipuan silh sawmthum kei nong pia ding uh hi,” a ci hi. Tua ciangin amaute in ama kiangah, “Na thuhaksa hong gen in, za dih ni,” a ci uh hi. Tua ciangin amah in amaute kiangah, “A ne pa sung panin nek ding pawlkhat hong piang a, a thahatpa sung panin a khum pawlkhat hong piang hi,” a ci hi. Ni thum sungin tua thuhaksa bang hiam cih gen thei lo uh hi. A ni li ni-in amaute in Samson’ zi kiangah, “A thuhaksa bang hiam cih hong gen nadingin na pasal zol in. Tua hi kei le nang le na pa, na inn uh tawh kong hal ding uh hi. Kote a hong zawngsak dingin hih lai-ah hong sam na hi hiam?” a ci uh hi. Tua ciangin Samson’ zi ama mai-ah kapin, “Kei nong mudah hi, kei nong it kei hi. Ka gam mite tungah thuhaksa na gen a, bang hiam cih kei’ tungah nong gen kei hi,” a ci hi. Amah in numei kiangah, “En in, ka nu kiang hitaleh ka pa kiang hitaleh ah ka gen kei hi. Nang kiangah hong gen tuan ding ka hi hiam?” a ci hi. A pawi ni sagih hun sungteng ama mai-ah tua nu kap niloh hi. A ni sagih ni-in Samson in a lawmnu kiangah gen ta hi; bang hang hiam cih leh amah in nakpitakin kunh niloh hi. Tua ciangin tua nu in a gam mite kiangah tua thuhaksa gen hi. Tua khuapi mite in a ni sagih ni, ni a tum ma-in ama kiangah gen uh a, “Khuaizu sangin bang khumzaw a, humpinelkai sangin bang hatzaw ahi hiam?” a ci uh hi. Tua ciangin amah in amaute kiangah, “Ka bawngla tawh lo kho khawm lo hi le-uhcin, ka thuhaksa na thei kei ding uh hi,” a ci hi. Tua ciangin Samson’ tungah Topa’ kha khauhtakin hong tung a, Ashkelon ah amah paisukin tua khuamite sawmthum that a, amaute’ nate la-in a thuhaksa a genthei mite tungah a pawipuante a pia hi. A hehsa-in a pa’ inn-ah amaute ciahsan hi. Tua ahih manin Samson’ zi pen a moliah pa’ zi dingin na kipia hi. Tawlkhat khit, mangbuh lak hunin a zi kiangah a hawh dingin keelno khat tawh Samson a pai hi. Amah in, “Inndei sung ka zi kiangah ka lum ding hi,” a ci hi. Ahih hangin a sungpa in amah lutsak lo hi. A sungpa in, “Amah mudah taktak hi ni teh, ci-in ngaihsun ka hih manin na lawmpa’ zi dingin ka pia hi. A naunu amah sangin hoihzaw hi lo ahi hiam? A u tangin amah na tenpih nadingin kong thum hi,” a ci hi. Samson in, “Tutungin amau tungah siatna ka bawlna-ah Filistia mite tawh kisai-in ka mawh kei ding hi,” a ci hi. Tua ciangin Samson pai-in ngia zathum manin meilah zong a la hi. Amah in a ngia meite khatlekhat kimatsakin a meite kikalah meilah khat ciat hencip hi. A meilahte a kuansak khit ciangin Filistia mite’ ankung dinglaite lakah ngiate paisak a, anphualte le ankung dinglaite, le oliv lote kangtum hi. Tua ciangin Filistia mite in, “Kua in hih ahi hiam?” a ci uh hi. Amaute in, “Timnah mite’ makpa Samson in hih hi; bang hang hiam cih leh a sungpa in a zi laksakin a lawmpa tungah piaksak hi,” a ci uh hi. Tua ciangin Filistia mite hong paito-in tua nu le a pa mei tawh a hallum uh hi. Samson in amaute kiangah, “Hih pen, note’ hih ahihleh, ka kiciam hi. Note kong thuk ding a, tua khit ciangin ka khawl ding hi,” a ci hi. Amah in amaute dawm loin tampi that a, tua ciangin paisukin Etam suanghawm sungah a om hi. Tua ciangin Filistia mite paito-in Judah gamah giahphual sat uh a, Lehi sim uh hi. Judah mite in, “Bang hangin kote simin hong paito na hi uh hiam?” a ci uh hi. Amaute in, “Samson a hen ding le ko tungah amah in hong hih bangin ama tungah a hih dingin kong paito uh hi,” a ci uh hi. Tua ciangin Judah mite mihing tulthum Etam suanghawmah paisukin Samson kiangah, “Filistia mite, eite a hong ukte ahihlam thei lo na hi hiam? Kote’ tungah nang’ hong bawl bang ahi hiam?” a ci uh hi. Samson in amaute kiangah, “Amaute in kei tungah hong bawl bangin amaute tungah ka bawl hi,” a ci hi. Tua ciangin amaute in Samson kiangah, “Filistia mite’ khut sungah nang kong piak theih nadingun nangmah a hen dingin kong paisuk uh hi,” a ci uh hi. Samson in amaute kiangah, “Note mahmah in nong thah loh nading uh kei tungah hong kiciam un,” a ci hi. Amaute in Samson kiangah, “Kong that kei ding uh hi. Nang hong henin amaute’ khut sungah kong pia bek ding uh a, nang kong that het kei ding uh hi,” a ci uh hi. Tua ahih ciangin amaute in khauhual thak nih tawh amah hen uh a, tua suanghawm sung panin amah pai khiatpihto uh hi. Lehi-ah Samson a tun ciangin amah a dawn dingin Filistia mite hong pai-in awng uh hi. Tua ciangin ama tungah Topa’ kha khauhtakin hong tung a, a khut tunga om khauhualte pen mei in a kat anthul khau tawh kibang a, amah a kikhihnate a khut panin tolhkhia hi. Tua ciangin amah in la khaguh thak khat mu a, a khut zanin tua khaguh la-in tua tawh mihing tulkhat a that hi. Tua ciangin Samson in, “La khaguh khat tawh a lom lomin, la khaguh khat tawh mihing tulkhat ka that hi,” a ci hi. Tua a thugen a man khit ciangin a la khaguh paaikhia hi; tua mun pen Ramathlehi kici hi. Tua ciangin amah dangtak mahmah ahih manin Topa samin, “Na nasempa’ tha tawh hih bang suahtakna lian nong piazo hi. Tu-in dangtakin kei si-in dawibia mite’ khut sungah puk ding ka hi hiam?” a ci hi. Tua ciangin Pasian in Lehi a om komdep khat hong a, tua sung panin tui hong phul hi. Amah in tua tui a dawn ciangin a tha hong dimkikin thakhauh kik hi. Tua ahih ciangin tua mun min Enhakkore kici a, tuhun dongin Lehi-ah tua tuikhuk omlai hi. Amah in Filistia mite’ uk hun sung Israel-te kum sawmnih sung thu a khen hi. Ni khat, Gaza khua-ah Samson pai a, tua lai-ah numei paktat khat mu-in tua nu kiangah a giak dingin a pai hi. Gaza mite kiangah, “Samson hong pai,” ci-in kigen a, amaute in tua khua umcihin khuapi kulhkongpi-ah zan tawntung amah pangsim uh hi. Amaute zan tawntung daitakin om uh a, “Zingsang khuavak mateng ngak ni; tua ciangin amah that ni,” ci uh hi. Ahih hangin zankim ciang dong Samson lum a, zankim ciangin tho-in khuapi kulhkongpi kongkhakte le a khuam nihte lenin a zawlte le a na khempeuh botto a, a liangko tungah tuate pua-in Hebron mai-ah a om mual dawnah tuate a tunpih hi. Tua khit ciangin Samson in Sorek kuamah Delilah a kici numei khat ngai hi. Tua ciangin Filistia mi uliante tua nu kiangah hong pai-in, “Amah hong zol inla, ama hatna koi-ah om hiam cihna le amah i nuaisiah zawh nadingin amah i hen theih nading, amah i zawh theih nading zia hong thei in. Na theihzawh le ngun pek tul le zakhat ciat nang kong pia ding uh hi,” a ci uh hi. Delilah in Samson kiangah, “Na hatna lian koi-ah om a, mi khatpeuh in nang hong zawhtheih nadingin hong bangci kihen ding cihna thu, nong hehpihna-in hong gen in,” a ci hi. Samson in tua nu kiangah, “Amaute in a keu nai lo thalkhau thak sagih tawh hong hen leh ka tha nem ding a, midang mah ka bang ding hi,” a ci hi. Tua ciangin Filistia mi uliante in tua nu kiangah a keu nai lo thalkhau sagih hong paipih uh a, tua nu in tua khaute tawh amah a hen hi. Tua laitakin tua nu in inndei sungah mi busak hi. Tua ciangin tua nu in ama kiangah, “Filistia mite in nang hong hih, Samson!” a ci hi. Ahih hangin, patkhaute in mei a sukkhak ciangin a kitah bangin amah in thalkhaute botsat ziau hi. Tua ahih ciangin ama thahatna thusim kithei zo lo hi. Tua ciangin Delilah in Samson kiangah, “En in, kei nong simmawh a, zuauthu nong gen hi. Nang hong bangci kihen theih ding cih nong hehpihna-in hong gen in,” a ci hi. Amah in tua nu kiangah, “Amaute in a kizang nai lo khauhual thakte tawh kei hong hen leh ka tha nem ding a, midang mah ka bang ding hi,” a ci hi. Tua ahih ciangin Delilah in khauhual thakte la-in tuate tawh amah hen a, “Filistia mite in nang hong hih, Samson!” a ci hi. A busim mite inndei sungnungah om uh hi. Ahih hangin Samson in mimkhau bangin khauhualte botsat ziau hi. Tua ciangin Delilah in Samson kiangah, “Tu dong kei nong simmawh a, zuauthu nong gen hi. Nang hong bangci kihen theih ding cih hong gen in,” a ci hi. Amah in tua nu kiangah, “Ka lu tunga ka sam lom sagihte mimkhau tawh gan khawmin ciampek tawh khen bikbek lecin ka tha nem ding a, midang mah ka bang ding hi,” a ci hi. Tua ahih ciangin amah a ihmut laitakin a lu tunga a sam lom sagihte la-in siamin a gan hi. Amah in ciampek tawh khen bikbek a, “Filistia mite in nang hong hih, Samson!” a ci hi. Ahih hangin a ihmutna pan amah khanglo-in a ciampek, a siambu, le a siam a kaikhia hi. Tua ciangin numei in ama kiangah, “Bang hangin na lungsim kei tawh a om lopi, ‘Nang kong it hi,’ ci thei na hi hiam? Hih thumvei dong kei nong simmawh a, na thahatna a omna mun nong gen kei hi,” a ci hi. Nisimin nakpitakin a kutkut ciangin, sihna dong dingin Samson lunggim hi. Amah in tua nu kiangah a lungsim khempeuh gen a, “Ka lu tungah mulkiatna kitah ngei lo hi; bang hang hiam cih leh ka suah tung a kipan Pasian’ tungah a kipia Nazir mi ka hi hi. Ka sam kimet leh ka hatna in kei hong nusia ding a, ka tha nem ding a, midang mah ka bang ding hi,” a ci hi. Ama tungah a lungsim khempeuh gen khin hi, ci-in Delilah in a theih ciangin amah in mi sawlin Filistia mi uliante sam a, “Tu-a khatvei hong pai un; bang hang hiam cih leh amah in a lungsim khempeuh kei kiangah hong gen khinzo hi,” a ci hi. Tua ciangin Filistia uliante tua nu kiangah hong pai-in sum zong hong pua uh hi. Tua nu in a phei tungah Samson ihmusak hi. Amah in mi khat samin a lu tunga a sam lom sagihte metsak hi. Tua ciangin tua nu in amah gimsak ding kipan a, ama thahatna in amah nusia ta hi. Tua nu in, “Filistia mite in nang hong hih, Samson!” a ci hi. A ihmutna panin amah khanglo-in, “Nidanga mah bangin paikhia-in keimah kisingin suakta ning,” a ci hi. Topa in amah a nusiat khitlam amah in thei lo hi. Tua ciangin Filistia mite in amah manin a mitte khelkhia uh a, Gaza-ah paipihin amah sumngo kol a bulh uh hi. Amah in thong sung an gawina-ah an a gawi hi. Ahih hangin a kimet khit ciangin a lu tunga a samte khangkik dingin hong kipan hi. Tu-in Filistia uliante a pasian uh Dagon tungah biakna lianpi khat a pia ding le a gualnuam dingin kikhawm uh hi. Bang hang hiam cih leh amaute in, “I pasian in i khut sungah i gal pa Samson hong piazo hi,” a ci uh hi. Mite in amah a muh ciangun a pasian uh phat uh hi. Bang hang hiam cih leh amaute in, “I pasian in eite’ khut sungah i gam a susiapa, eite tampi hong that pa hong piazo hi,” a ci uh hi. A lungsim uh a nop ciangin amaute in, “Eite a dingin a kimawl theih nadingin Samson sam un,” a ci uh hi. Tua ahih ciangin amaute in thong panin Samson samkhia-in amau’ mai-ah mawlpih uh hi. Khuampite kikalah amah kidingsak hi. Samson in ama khut a len tangvalpa kiangah, “Ka kingak theih nadingin innpite a do khuampite hong lawngsak in,” a ci hi. Tua laitakin a innpi pen numei le pasal tawh kidim hi. Samson a kimawlsak laitakin a en Filistia ulian khempeuh le innkhum zangah numei le pasal mi tulthum bang om uh hi. Tua ciangin Samson in Topa samin, “ Topa Pasian aw, kei hong phawk in, kong thum hi. Tu-a ka mittang nihte’ tang dingin Filistia mite ka thuktheih nadingin hong thahatsak in, tu-a bek kong thum hi,” a ci hi. Samson in innpi a do khuampi nihte manin, a khut taklamin khat, a khut veilamin khat lenin ama gihna tawh a khuamte a luai hi. Samson in, “Filistia mite tawh hong sisak in,” a ci hi. Tua ciangin a thaneih khempeuh tawh a awng hi. Tua ciangin uliante le inn sunga om mi khempeuh tungah a innpi kicimsuk hi. Tua ahih ciangin a nuntak lai-a a thah sangin a sihna-a a thah a si mi tamzaw hi. Tua ciangin a sanggam pasalte le a innkuanpihte khempeuh hong paisukin a luanghawm la uh a, ciahpihto-in Zorah le Eshtaol kikal-a om a pa Manoah’ hanah a vui uh hi. Amah in Israel-te kum sawmnih sung thu a khen hi. Efraim mualtung gammi Mikah a kici min nei mi khat om hi. Amah in a nu kiangah, “Ngun pek tul le zakhat hong kiguksak lai-in a gu pa na samsiatna thu ka za hi. A ngunte pen keima guk hi a, tu-in hih lai-ah tuate om hi,” a ci hi. Tua ciangin a nu in, “Ka tapa aw, Topa in thupha hong pia ta hen,” a ci hi. Amah in ngun pek tul le za khatte a nu kiangah piakik hi. A nu in, “A kiseek milim khat le a kisung milim khat bawl nadingin ka tapa a dingin Topa’ tungah a ngunte ka apsa ahi hi. Tua ahih ciangin tu-in nang tungah kong piakik ding hi,” a ci hi. Tua ahih ciangin amah in a nu kiangah a sum a piakkik ciangin a nu in zong ngun pek zanih la-in, a kiseek milim khat le a kisung milim khat-a a bawlsak ngunseek pa kiangah pia a, tuate pen Mikah’ inn sungah om hi. Tua mipa Mikah in biakna phual khat nei a, amah in siampipuan khat le innsung pasian-te bawlin siampi a suak dingin a tapate khat a koih hi. Tua hun lai-in Israel sungah kumpi om lo a, mi khempeuh amau’ hoihsak bang ciatin gamta uh hi. Tua hun laitakin Judah gam Bethlehem khua sungah Levi mi tangval khat om hi. Tua mipa a muhna mun peuhpeuhah a teng dingin Judah gam Bethlehem khua panin paikhia hi. Tua bangin khualzinin a pai laitakin Efraim mualtung gam sunga Mikah’ inn-ah va tung hi. Mikah in ama kiangah, “Koi panin hong pai na hi hiam?” a ci hi. Amah in, “Judah gam sung Bethlehem khua-a om Levi mi ka hi a, mun ka muhna peuhah a peem ding ka hi hi,” a ci hi. Mikah in ama kiangah, “Kei tawh hong omin kei a dingin pa le siampi hong hi in; kum khatin ngun pek sawm, puan silh khat, le annek kong pia ding hi,” a ci hi. Levi mipa zong Mikah tawh a tengkhawm dingin lungkim hi. Tangvalpa pen ama tungah a tapate khat tawh kibang hi. Mikah in Levi mipa koihin, tangvalpa ama siampi suakin Mikah’ inn-ah a om hi. Tua ciangin Mikah in, “ Topa in kei hong daupaisak ding hi, ci-in tu-in ka thei hi; bang hang hiam cih leh siampi-in Levi mite khat ka neita hi,” a ci hi. Tua hun lai-in Israel-te sungah kumpi om lo hi. Tua hun lai-in Dan minamte in a ten nading uh leitang zong uh hi. Bang hang hiam cih leh tua hun dong mateng Israel minamte sung panin amau a’ ding gamhluah bangmah kialo hi. Tua ahih ciangin Dan mite in gam ensimin a va zong dingin amau’ minam bup khempeuh lak panin mi siam nga Zorah le Eshtaol panin a sawl uh hi. Amaute in tua mite kiangah, “Pai unla gam va zong un,” a ci uh hi. Amaute Efraim mualtung gam, Mikah’ inn-ah hong tung uh a, tua lai-ah a taam uh hi. Amaute Mikah’ inn-ah a om uh ciangin Levi mi tangval’ aw khat khenthei uh hi. Amaute kihei-in ama kiangah, “Kua in hih lai-ah nang hong paipih ahi hiam? Hih lai munah bang hih na hi hiam? Hih lai-ah na nasep bang ahi hiam?” a ci uh hi. Amah in amaute kiangah, “Tua bang tua bangin Mikah in kei hong bawl hi. Amah in kei hong cialin kei pen ama siampi ka suak hi,” a ci hi. Tua ciangin amaute in ama kiangah, “Kote’ kuankhiat khualzinna a tangtung ding hiam cih ka theih nadingun Pasian hong dotsak in, kong thum uh hi,” a ci uh hi. Tua ciangin siampipa in amaute kiangah, “Lung nuamin pai un. Note’ khualzinna thu-ah Topa in hong panpih hi,” a ci hi. Tua ciangin mi ngate paikhia-in Laish tung uh a, tua lai-a om mite, Sidon mite’ om bang danin daitakin omin bangmah a upmawh lohna, leitungah bangmah kisam loin a hauhna, le amaute Sidon-te’ kiang panin gamla omin kuamah tawh kizopna a neih lohna, lungmuang taka a tenna uh a mu uh hi. Amaute Zorah le Eshtaol-a a sanggamte uh kiangah hong tunkik uh ciangin, a sanggamte un amaute kiangah, “Bang thu gen ding nong nei uh hiam?” a ci uh hi. Amaute in, “Ding un, amaute a sim dingin paito ni. Bang hang hiam cih leh a leitang ka mu khin uh a, a lei hoih mahmah hi. Bangmah hih loin ommawk ding na hi uh hiam? Pai ding zekai kei un; lutin leitang va luah ni. Na pai uh ciangin bangmah a ummawh lo mite kiang na tung ding uh hi. Leitang zai mahmah hi. Pasian in na khutsung uhah leitungah bangmah a kisap lohna mun hong pia khinzo takpi hi,” a ci uh hi. Tua ciangin Dan minamte galhiam a tawi mihing zaguk Zorah le Eshtaol panin kuankhia uh a, amaute paito-in Judah gam sung Kiriathjearim-ah giahphual sat uh hi. Hih thu hangin tuhun dongin tua mun pen Mahanehdan kici hi. Tua pen Kiriathjearim nitumna lamah om hi. Amaute tua lai mun panin Efraim mualtung gamah paisuakin Mikah’ inn-ah a tung uh hi. Tua ciangin Laish gam a ensim dingin a pai mi ngate in a sanggamte uh kiangah, “Hih innte khat sungah siampipuan khat, innsung pasian-te, a kiseek milim khat, le a kisung milim khat a omlam thei lo na hi uh hiam? Tua ahih ciangin tu-in na hih ding uh ngaihsun un,” a ci uh hi. Tua ciangin amaute kihei-in Mikah’ inn-a Levi tangvalpa’ omna-ah tung uh a, ama omzia dong uh hi. Tua hun sungtengin galhiam a tawi Dan mi za gukte kulhkongpi lutna-ah ding uh hi. Tua ciangin, galhiam a tawi mi za gukte tawh kulhkongpi lutna-ah siampipa a din khawm laitakin gam ensim dingin a kuankhia mi ngate tumin a kiseek milim, a siampipuan, a innsung pasian-te, le a kisung milim la uh hi. Hih mite Mikah’ inn sungah tumin a kiseek milim, a siampipuan, a innsung pasian-te, le a kisung milim a lak uh ciangin siampipa in amaute kiangah, “Bang hih na hi uh hiam?” a ci hi. Amaute in ama kiangah, “Pau kei in; na khutin na kam hum inla, kote tawh hong pai-in kote a dingin pa le siampi hong hi in. Nang a dingin mi khat’ inn sungah siampi hih ding hoihzaw ahi hiam, tua ahih kei leh Israel-te’ sungah minam le beh siampi hih ding hoihzaw ahi hiam?” a ci uh hi. Tua ciangin siampipa a lungkim hi. Amah in a siampipuan, a innsung pasian-te, le a kiseek milim la-in mite’ lakah a pai hi. Tua ahih ciangin amaute’ mai-ah a taneute le a ganhingte le a vante uh omsakin, amaute paikhia uh hi. Amaute Mikah’ inn panin a gamla khopkhat a tun uh ciangin Mikah’ innveng a om mite kikaikhawm uh a, Dan mite delhin a pha uh hi. Amaute in Dan mite a otsan uh ciangin Dan mite hong kihei-in Mikah kiangah, “Hih bang mihon tawh nong delh nading bang thu om ahi hiam?” a ci uh hi. Amah in, “Note in keima bawlsa ka pasian-te le ka siampipa la-in na paikhia uh hi. Keimah in bang nei nawn ka hi hiam? Tua ahih ciangin, ‘Bang thu ahi hiam?’ bang hangin hong ci thei na hi uh hiam?” a ci hi. Dan mite in ama kiangah, “Kote’ lakah na aw hong kizasak kei in; tua hikeileh ka lawmte uh hehin nang hong hih ding uh a, na innkuanpihte tawh na si kha ding uh hi,” a ci uh hi. Tua ciangin Dan mite pai uh hi. Mikah in ama a dingin amaute thahat lua hi, ci-in a muh ciangin amah kihei-in a inn-ah a ciahkik hi. Dan mite in Mikah’ bawlsate le a siampipa paipihin, gamdai-in a om, bangmah a ummawh lo mite’ omna Laish tung uh a, namsau tawh amaute vatin mei tawh a khuapi a hal uh hi. Amaute pen Sidon panin gamla uh ahih manin a honkhia ding om lo a, amaute in kuamah tawh kizopna nei lo uh hi. Tua mun pen Bethrehob-te’ neihsa kuam sungah om hi. Amaute in khuapi lamkikin a sungah teng uh hi. Amaute in tua khuapi min pen Israel’ suan amau’ pianna Dan tamin Dan a phuak uh hi. Ahih hangin a masa-in tua khuapi min pen Laish ahi hi. Tua ciangin Dan mite in a kiseek milim amau a dingin phut uh a, Moses’ tupa, Gershom’ tapa Jonathan le ama tapate pen tua gam a kilak hun dong Dan minamte a dingin siampi ahi uh hi. Tua ahih ciangin Shiloh-ah Pasian’ biakbuk a om sungteng Mikah’ bawlsa a kiseek milim tua lai-ah a om hi. Israel-te sungah kumpi a om loh hun laitakin, Levi mite khat Efraim mualtung gam mongah peemin, Judah gam Bethlehem panin zineu khat a la hi. A zineu ama tungah heh a, ama kiang panin paikhia-in Judah gam Bethlehem khua-a a pa’ inn-ah ciah a, tua lai-ah kha li sung khawng a om hi. Tua ciangin a pasal dingkhia-in kam nem tawh a hopih ding le a ciahpih kik dingin tua nu’ nungah a pai hi. Amah in a nasempa le a la nih tonpih hi. A sungpa’ inn-ah tung a, a sungpa in amah a muh ciangin lungdamna tawh a dawn dingin hong pai hi. Tua ciangin a sungpa in amah taamsak a, amah tawh ni thum sung a om hi. Tua ahih ciangin amaute in an ne, tui dawnin giakkhawm uh hi. Tua ciangin a ni li ni zingsangin amaute tho baih uh a, pai dingin kithawi uh hi. Ahih hangin a sungpa in a makpa kiangah, “An tawmkhat ne-in na tha khauhsak in. Tua khit ciangin na pai thei ding hi,” a ci hi. Tua ahih ciangin tua mi nihte tukhawmin an ne-in tui dawn uh hi. A sungpa in a makpa kiangah, “Tuzan taam ding lungkim hoh inla, na lung nuamsak in,” a ci hi. A pai dingin mipa a din ciangin a sungpa in a taamkik dong mateng kho hi. Tua ciangin a ni nga ni-in a ding dingin zingsangin amah tho baih hi. A sungpa in, “An ne phot inla, ni a dialh mateng khawl lai in,” a ci hi. Tua ahih ciangin amaute in an ne uh hi. Mipa le a zineu le a nasempa a paikhia dingin a din uh ciangin a sungpa in, “En in, tu-in nitak nai-in ni niamta hi; tuzan taam un. En in, ni tum dektak hi. Hih lai-ah giak inla, na lung nuamsak in. Zing ciang zingsangin tho baihin inn-ah na ciah ding uh hi,” a ci hi. Ahih hangin mipa tua zan taam nawn lo hi. Amah dingin paikhia a, Jebus (Jerusalem a cihna) galkhat tung hi. Amah pen tuanna a kivawh la nih le a zineu tawh ahi hi. Amaute Jebus kiang nai a tun uh ciangin ni niam khin a, a nasempa in a topa kiangah, “Hih Jebus mite’ khuapi-ah zan taam ni,” a ci hi. A topa in, “Israel mite ahi lo, gamdang mite’ khuapi sungah i taam kei ding hi. Gibeah-ah i paisuak ding hi,” a ci hi. Tua ciangin amah in a nasempa kiangah, “Hong pai in, hih munte khat peuhpeuh va naihin, Gibeah ahih kei leh Ramah-ah zan taam ni,” a ci hi. Tua ahih ciangin amaute in khengin paisuak uh a, Benjamin-te’ gam ahi Gibeah khua gei-ah ni tum a, Gibeah-ah pai-in a giak dingin tua khua a zuan uh hi. Amah pai-in khuapisung kongzing laizangah tu hi; bang hang hiam cih leh a zan taam dingin kuamah in a inn-ah amaute sang lo hi. Tua laitakin puteek khat lo-a a nasepna panin nitak ciangin hong ciah hi. Tua pa pen Efraim mualtung gam pan hi a, amah Gibeah khua-ah a peem hi a, tua khuamite pen Benjamin mite ahi hi. Amah khuadak a, khualzin pa, khuapi kongzingah a mu hi. Tua ciangin puteekpa in, “Koi-ah pai ding na hi hiam? Koi panin hong pai na hi hiam?” a ci hi. Amah in, “Keima hong paikhiatna Judah gam Bethlehem khua panin Efraim mualtung gam mongah a pai dingin hong nawk ka hi uh hi. Judah gam Bethlehem-ah ka pai hi. Tu-in ka inn-a a ciah ka hi hi. Kuamah in a inn-ah hong tungsak nuam lo hi. Ka late uh a dingin buhtu le gan-an, kei le na nasemnu le na nasemte tawh a om tangvalpa a dingin anlum le leenggahzu ka nei uh a, a kisam bangmah om lo hi,” a ci hi. Tua ciangin puteekpa in, “Lunghimawh kei in. Na kisapna khempeuh ka en ding hi. Kongzingah giak kei hamtang in,” a ci hi. Tua ahih ciangin amah in a inn-ah ciahpihin late gan-an a pia hi. Amaute in a khe uh silin an a ne uh hi. Amaute in a lung uh nuamsakin a om laitakun, tua khuapi mi, mi ginalote in tua inn kimkotah pangin a kongkhak tumgawp uh hi. Amaute in inn nei puteekpa kiangah, “Ama taw ka luk theih nadingun na inn-ah a hong tung mipa hong paikhiatpih in,” a ci uh hi. Inn nei pa, amaute kiangah pusuakin amaute tungah, “Hilo hi, ka sanggamte aw; tua bangin gitloh gamtat kei un. En un, hih lai-ah ka ta nungak le ka zin pa’ zineu om hi. Amaute hong paikhiatpih ning. Amaute buanin hoih na sak bangun amaute tungah hih un. Ahih hangin hih mipa tungah tua bang a sia gamta kei un,” a ci hi. Ahih hangin mite in ama thu ngai lo uh hi. Tua ciangin Levi mipa in a zineu manin amaute kiangah koihkhia hi. Amaute in tua nu buan uh a, zingsang mateng zan tawntung tua nu hih uh hi. Zingsang khuavak dingin a kipat ciangin amaute in tua nu ciahsak uh hi. Zingsang khua hong vak ciangin a numei hong ciahin, ama topa a omna mipa’ kongkhakah pukin khuavak dong om hi. Zingsang ciangin a topa tho a, a khualzin zom dingin inn kongkhak hongin a paikhiat ciangin, inn kongkhakah a zineu lumin sangkil tungah a khutte a kinga a mu hi. Amah in a zineu kiangah, “Tho in, pai ta ni,” a ci hi. Ahih hangin amah in dawng nawn lo hi. Tua ciangin amah in domto-in a la tungah tua nu koih a, a inn-ah a ciahpih hi. A inn-ah a tun ciangin amah in tem khat la a, a zineu lenin a phei a liangin seh sawm le nih suahin sem a, Israel-te’ gam sung khempeuhah a hawm hi. A mu mite khempeuh in, “Egypt gam panin Israel mite a paikhiata kipan tuni dongin hih bang thu piang ngei lo a, zong kimu ngei lo hi. Hih thu ngaihsun un; kikum unla, gen un,” a ci uh hi. Tua ciangin Israel mite khempeuh, Gilead gam zong a kihel, Dan panin Beersheba dong hong kuankhia uh a, Topa’ kiang Mizpah-ah mihing khat bangin mihon hong kikhawm lian uh hi. Israel minam khempeuh sung pan makai khempeuh, namsau tawi khe galkap mihing tul zali, Pasian’ mite’ kikhopna-ah amau mahmah kipia uh hi. (Tu-in Israel mite Mizpah-ah a paina thu Benjamin mite in za uh hi.) Israel mite in, “Hih bang tatsiatna hong pianna thu hong gen in,” a ci uh hi. Tua ciangin a kithat numei’ pasal, Levi mipa in dawngin, “Benjamin-te’ gam Gibeah-ah kei le ka zineu a taam dingin ka tung uh hi. Tua ciangin Gibeah mite kei’ langah hong pang uh a, zanin kote’ omna inn hong umcih uh hi. Amaute in kei hong that nuam uh a, ka zineu buangawpin tu-in amah si hi. Tua ciangin ka zineu la-in ka semnen a, Israel-te’ luah gam sung khempeuhah ka hong hawm hi. Bang hang hiam cih leh amaute in Israel-te’ lakah kihhuaina le lanluat khialhna gamta uh hi. En un, no Israel mihingte khempeuh aw, na ngaihsutna uh gen unla, hih lai-ah kikum un,” a ci hi. Tua ciangin mi khempeuh mihing khat bangin ding lianin, “Eite khempeuh khat zong i puanbukah pai loin, eite khat zong i inn-ah i ciah kei ding hi. Tu-in Gibeah tungah eite’ hih ding thu in: Tua khua a sim dingin aisanna tawh i pai ding a, amaute in Israel-te sungah lanluatna tawh a khialhna uh hangin Benjamin-te’ gam Gibeah a thuk theih nadingun mite a’ ding annek tuidawn a pua dingin Israel minamte khempeuh sung panin mi zakhat sung pan mihing sawm, tulkhat sung pan zakhat, tul sawm sung pan tulkhat i la ding hi,” a ci uh hi. Tua ahih ciangin khuapi a sim dingin Israel mite khempeuh kikhawm uh a, kipawlin mi khat a bang uh hi. Tua ciangin Israel minamte in Benjamin minam khempeuh kiangah mi sawl uh a, “Note’ lakah a piang thu pen bangzah tatsiatna ahi hiam? Tua ahih ciangin tu-in kote in amaute thatin Israel-te’ sung panin siatna ka phiatkhiat theih nadingun Gibeah khuasunga om a mi ginalote hong piakhia un,” a ci uh hi. Ahih hangin Benjamin-te in a sanggam uh Israel mite’ thu ngai lo uh hi. Tua ciangin Israel mite do-in a kuankhia dingin Benjamin gam sung khuapite panin Gibeah khuapi-ah hong kituah uh hi. Benjamin mite in tua ni-in amau’ khuapite panin, Gibeah-ah a teng a kitengkhia mihing zasagih banah, namsau a tawi mihing tul sawmnih le tulguk a khawm uh hi. Hihte khempeuh lakah mi a kitengkhia a veikhoi zasagih om a, amaute khempeuh pen suang tawh samzang kapin a khial lote ahi uh hi. Israel mite in Benjamin-te simloh, namsau a tawi mihing tul zali khawm uh a, hih mite khempeuh galsiam mi ahi uh hi. Israel mite dingin Bethel-ah paito uh a, “Benjamin mite a sim dingin kua pai masa ding ka hi uh hiam?” ci-in Pasian a dong uh hi. Topa in, “Judah minamte paito masa ding hi,” a ci hi. Tua ciangin Israel mite zingsangin tho-in Gibeah khua a sim dingin giahphual a sat uh hi. Tua ciangin Benjamin mite a sim dingin Israel mite kuankhia uh hi. Israel mite in Benjamin mite a sim dingin Gibeah-ah a gualin va naih uh hi. Benjamin mite Gibeah pan hong kuankhia-in tua ni-in Israel mite tul sawmnih le tulnih lei-ah a tuksak uh hi. Ahih hangin Israel mite kihanthawnin a ni masa ni-a a panna mun mah uhah gal pangkik uh hi. Tua ciangin Israel mite paito-in nitak dong Topa’ mai-ah a kap uh hi. Amaute in Topa’ kiangah thu dongin, “Ka sanggam uh Benjamin mite a sim dingin gal phualah ka naihkik ding uh hiam?” a ci uh hi. Topa in, “Amaute a sim dingin kuanto un,” a ci hi. Tua ahih ciangin Israel mite a ni nih ni-in Benjamin mite a sim dingin hong nai uh hi. Amaute a sim dingin a ni nih ni-in Gibeah panin Benjamin-te hong kuankhia uh a, Israel mite tul sawm le tulgiat lei-ah tuksak uh hi. Hih a site khempeuh namsau a tawi mite ahi hi. Tua ciangin Israel mite khempeuh, galkap vekpi paito-in Bethel-ah tungin a kap uh hi. Tua lai mun Topa’ mai-ah amaute tu-in nitak dong tua ni an tang uh a, Topa’ mai-ah meihal biakna le thunuama biakna a pia uh hi. Israel mite in Topa thu dong uh a (bang hang hiam cih leh tua hunin Pasian’ Thuciamna Singkuang tua lai-ah om a, Aaron’ tapa Eleazar’ tapa Finehas in tua lai-ah tua hunin na sem hi), “Ka sanggam uh Benjamin mite a sim dingin kuankik lai ding ka hi uh hiam, tua ahih kei leh khawl ding ka hi uh hiam?” a ci uh hi. Topa in, “Paito un; bang hang hiam cih leh zing ciangin amaute na khutsung uhah kong pia ding hi,” a ci hi. Tua ahih ciangin Israel-te in Gibeah kiimah a pangsim dingin mi koih uh hi. Israel mite a ni thum ni-in Benjamin mite a sim dingin kuanto uh a, a hun dangte-a mah bangin Gibeah langkhatah pang uh hi. Tua ciangin amaute a do dingin Benjamin mite hong kuankhia uh a, khuapi panin amaute kipaikhia sak hi. A hun dangte-a mah bangin amaute in Bethel lamah a paito pen le Gibeah lamah a pai lam lianpi, le gamlakah Israel mite sawmthum bang that uh hi. Tua ciangin Benjamin mite in, “A masa-a mah bangin i mai-ah amaute tai uh hi,” a ci uh hi. Ahih hangin Israel mite in, “Eite tai-in, khuapi panin lam lianpi-ah amaute paikhiasak ni,” a kici uh ahi hi. Israel mite khempeuh amau’ omna mun panin dingin Baaltamar-ah a gualin pang uh hi. A pangsim Israel mite Gibeah nitumna lam amau omna panin hong ding khia uh hi. Gibeah khua a sim dingin Israel-te khempeuh sung pan a kitengkhia mi tul sawm hong kuan uh a, a galdo uh haksa mahmah hi. Ahih hangin Benjamin mite in amau a dingin siatna a naina thu thei lo uh hi. Tua ciangin Israel-te mai-ah Topa in Benjamin-te a zo hi. Israel mite in tua ni-in Benjamin mite tul sawmnih le tulnga le zakhat that uh a, hih a site khempeuh namsau a tawi mite ahi uh hi. Tua ahih ciangin Benjamin mite in a guallelhna uh kimu uh hi. Israel mite in Benjamin mite awn uh hi; bang hang hiam cih leh Gibeah khua a sim dingin a koih uh a pangsimte muang uh hi. Tua ciangin a pangsim mite manlangin hong pai-in Gibeah khua sungah lut uh a, a pangsim mite in namsau tawh khuapi mi khempeuh vatgawp uh hi. Israel mite le a pangsim mite a kiciamna lim in, amaute in khuapi sung panin meikhu lianpi a suahsak toh uh ciangin Israel mite galsim dingin hong tum ding uh hi. Tu-in Benjamin mite in Israel mite sawmthum bang vatgawpin thah ding kipan uh hi. Amaute in, “A masa-a mah bangin eite’ mai-ah amaute kivattuk gawp taktak hi,” a ci uh hi. Ahih hangin amau’ kiciamna lim meikhu khuapi sung panin suakto dingin a kipat ciangin Benjamin mite nunghei uh a, a khuapi bup a khu-in vantungah a kahto a mu uh hi. Tua ciangin Israel mite hong kilehhei uh a, Benjamin mite lungkia uh hi; bang hang hiam cih leh amau’ siat nading a naina thei uh hi. Tua ahih ciangin Israel-te’ mai panin amaute kileh kikin gamlak lam manawh uh hi. Ahih hangin gal in amaute pha a, khuapi sung panin hong paikhia mite in amaute le a pawlte uh kikalsung tengah amaute sumai uh hi. Amaute in Nohah panin nisuahna lamah Gibeah gal ciang dong Benjamin mite delhin tuancilin vatgawp uh hi. Benjamin mite sung pan galhang mihing tul sawm le tulgiat tuk uh hi. Tua ciangin a dangte kihei-in sehnel gam lam Rimmon Suangpi-ah tai uh hi. Amaute mihing tulnga lam lianpi dungah si uh a, Gidom ciang dong nakpitakin amaute kidelhin tulnih kithat hi. Tua ahih ciangin tua ni-in Benjamin-te a si khempeuh, namsau a tawi galhang mihing tul sawmnih le tulnga ahi hi. Ahih hangin mihing zaguk kihei-in gamlak lam Rimmon Suangpi-ah tai uh a, Rimmon Suangpi-ah kha li sung om uh hi. Tua ciangin Benjamin mite a sim dingin Israel mite kithawi kik uh a, namsau tawh a mi a sa-in a muh khempeuh uh vatgawp uh hi. A muh uh khuate khempeuh mei tawh a hal uh hi. Tu-in Israel mite Mizpah-ah kiciam uh a, “Benjamin mite tungah kuamah in i tanu mo-in i kha kei ding hi,” a ci uh hi. Tua ciangin Bethel-ah Israel mite hong pai-in Pasian’ mai-ah nitak dong tu uh a, amaute nakpitakin a kap uh hi. Amaute in, “Israel-te’ Pasian, Topa aw, tuni-in Israel-te sungah minam khat a pelem nading, hih thu bang hangin Israel-te tungah hong tung ahi hiam?” a ci uh hi. A zing ciangin mite tho baihin tua lai-ah biakna tau khat lam uh a, meihal biakna le thunuama biakna a pia uh hi. Tua ciangin Israel mite in, “ Topa a’ ding kikhopna-ah Israel minamte khempeuh sung panin kua teng hong pai lo ahi hiam?” a ci uh hi. Bang hang hiam cih leh amaute in Topa kiangah a pai lo mite tawh kisai-in Mizpah-ah kiciamna lianpi khat bawl uh a, “Kithat ding hi,” a ci uh hi. Israel mite in a sanggam uh Benjamin mite khasiat uh a, “Tuni-in Israel-te’ sung panin minam khat bei hi. Eite in i tanute amaute tungah zi dingin pia lo ding hi hang, ci-in Topa tawh kiciam khin ihih ciangin a nungta lai amaute’ zi ding bang cih ding ihi hiam?” a ci uh hi. Tua ciangin amaute in, “ Topa kiang Mizpah-ah Israel minamte hong pai lo a om hiam?” a ci uh hi. En in, Jabeshgilead panin tua giahphual kikhopna-ah kuamah pai lo hi. Bang hang hiam cih leh mite a kikhop ciangin, tua lai-ah Jabeshgilead a tengte khat zong om lo hi. Tua ahih ciangin mihonte in a galhangte uh mihing tul sawm le tulnih tua lai-ah sawl uh a, “Pai unla Jabeshgilead-a tengte namsau tawh va vatgawp unla, nupite le naupang neute zong hih un. Hih bangin na hih ding uh hi: Pasal khempeuh le pasal tawh a lumkhawmsa numei khempeuh na sumai ding uh hi,” ci-in thu pia uh hi. Amaute in Jabeshgilead-a teng mite lakah pasal tawh a lumkhawm nai lo nungakno zali mu uh a, Kanaan gam a om Shiloh giahphual ah tuate hong paipih uh hi. Tua ciangin mihon buppite in Rimmon Suangpi-a om Benjamin mite kiangah thu puak a, amaute kiangah kilemna thu gen uh hi. Tua hun ciangin Benjamin-te hong ciah uh a, amaute in Jabeshgilead numei a hing a a koihte uh pia uh a, ahi zongin amau a dingin kicing zo lo hi. Israel minamte sungah Topa in kitapkhapna omsak ahih manin mite in Benjamin-te khasiat uh hi. Tua ciangin mihonte’ upate in, “Benjamin-te’ sung panin numeite kithat khin ahih manin a omlai mite’ zi ding bang cih ding ihi hiam?” a ci uh hi. Amaute in, “Israel-te sung panin minam khat a bei loh nadingin Benjamin a suakta laite a dingin gamhluah a om ding kisam hi. Ahi zongin amau’ zi dingin i tanute i pia thei kei hi,” a ci uh hi. Bang hang hiam cih leh Israel mite kiciam khinin, “Benjamin-te tungah zi a pia mipa in samsiatna ngah ta hen,” a ci uh hi. Tua ahih ciangin amaute in, “En un, Bethel leilu lam, Bethel panin Shekhem lamah a paito lam lianpi nisuahna lam, Lebonah leitaw lamah a om Shiloh-ah Topa a’ ding kumsim pawi khamna om hi,” a ci uh hi. Tua ahih ciangin amaute in Benjamin mite thu pia-in, “Pai-in leenggui lote-ah bukin vil un. Laamna-ah Shiloh nungakte a laam dingin hong pai uhleh, leenggui lote panin note in delhin mi khempeuh in na zi ding ciat uh Shiloh nungakte man unla, Benjamin gamah ciahpih un. Amau’ pate ahi a, a sanggampate uh ahi zongin a lungkim lohna uh kote’ kiangah a gen dingin hong pai uh ciangin kote in amaute kiangah, ‘Kote tungah hehpihna tawh amaute hong pia un; bang hang hiam cih leh mi khempeuh zi ding galsimna sungah ka ngahsakzo kei uh a, note zong a mawh na suahloh nadingun note in amaute tungah utna tawh na piaktawm uh ahi kei hi,’ ka ci ding uh hi,” a ci uh hi. Benjamin mite zong tua bangmahin gamta uh a, amau mi a phazah tawh kituakin a laamte lak panin a zi dingun a la uh hi. Tua ciangin amaute pai-in a gamhluahna uhah ciahkik uh a, khuapite lamkikin a sungah a teng uh hi. Tua hun ciangin Israel midangte tua lai panin paikhia uh a, mi khempeuh amau’ minam le a innkuanpih ciat, amau’ gamhluahna ciatah a ciah uh hi. Tua hun lai-in Israel-te sungah kumpi om lo a, amau’ hoihsak bang ciatin mi khempeuh a gamta uh hi. Thukhente in a uk hun lai-in tua gam sungah kialpi tung a, Judah gam sunga Bethlehem khuami khat, a zi le a tapa nihte tawh Moab gamah a peem dingin a pai uh hi. Tua mipa’ min Elimelek hi a, a zi’ min Naomi hi-in, a tapa nihte min Mahlon le Khilion ahi hi. Amaute pen Judah gam Bethlehem-a Efrathah mite ahi uh hi. Amaute Moab gamah pai-in tua lai-ah om uh hi. Ahih hangin Naomi’ pasal Elimelek si a, a tapa nihte bek tawh tua nu a om hi. Hih a tapa nihte in Moab mite zi-in la uh hi. A khat min Orpah hi a, adang khat min Ruth ahi hi. Tua lai-ah amaute kum sawm bang teng uh hi. Tua ciangin Mahlon le Khilion si a, tua nupi a tapa nihte le a pasal in sihsan hi. Tua ciangin tua nu a mo tegel tawh Moab gam panin a ciahkik dingin kithawi hi. Bang hang hiam cih leh Topa in a mite kemin an a piakna thu Moab gam sung panin amah in za hi. Tua ahih ciangin ama omna mun panin a mo tegel tawh tua nu ding khia a, Judah gamah a ciahkik dingin pai uh hi. Ahih hangin Naomi in a mo nihte kiangah, “Pai un, na inn tuak uhah ciahkik unla, na nute uh tawh om un. A sisate hitaleh kei hitaleh nong limbawl uh mah bangin Topa in note hong limbawl tahen. Topa in na pasal kik uh inn tuakah hong nuamsasak ta hen!” a ci hi. Tua ciangin amah in amaute namin, amaute a kap uh hi. Tua ciangin amaute in ama kiangah, “Hilo hi, na mipihte kiangah nang tawh kong ciahkhawm ding uh hi,” a ci uh hi. Ahih hangin Naomi in, “Kilehkik un, ka tanute aw, bang hangin hong zui ding na hi uh hiam? Note’ pasal hong hi thei dingin tapa nei nawn ding ka hi hiam? Kilehkik un, ka tanute aw, na pai nading uhah pai un; bang hang hiam cih leh pasal nei dingin ka teek luata hi. Pasal nei dingin kilamen ing ci mah lengzong, tunitak mahmahin pasal nei-in tapate nei phial ta mah lengzong, amaute a khan khit dong ngakzo ding na hi uh hiam? Hilo hi, ka tanute aw, Topa in kei hong bawlsia ahih manin note sangin nakpitakin kei ka lunggimzaw hi,” a ci hi. Tua ciangin amaute a kap kik uh hi. Orpah in a teeknu namin ciah a, ahih hangin Ruth in a teeknu beel hi. Tua ciangin amah in, “En in, na sanggamnu a mipihte le a pasian-te kiangah ciahkik khin hi. Na sanggamnu’ nungah nang zong ciah in,” a ci hi. Ahih hangin Ruth in, “Nang kong nusiat nading ahi a, nang zuihna panin ka ciahkik nading ahi zongin hong cici nawn kei in; bang hang hiam cih leh na paina-ah ka pai ding a, na giahna-ah ka giak ding hi. Na mite keima mite hi ding a, na Pasian keima Pasian hi ding hi. Na sihna-ah si-in ka kivui ding hi. Sihna cih lohbuang thudang hangin kong nusiat taak leh Topa in kei hong dawm kei ta hen,” a ci hi. Tua ciangin Naomi in amah a zuih ding a lungsim a khentatna a muh ciangin bangmah ci nawn lo hi. Tua ahih ciangin Bethlehem a tun mateng uh a nihun paisuak uh hi. Bethlehem a tun uh ciangin amaute’ hangin a khuazang un luum lialua-in nupite in, “Hihnu Naomi mah ahi hiam?” a ci uh hi. Amah in amaute kiangah, “Naomi hong ci nawn kei un; Mara hong ci un; bang hang hiam cih leh Vanglianpa in nakpitakin kei hong gimsak hi. A dimin ka paikhia a, Topa in a hawmin hong ciahpih kik hi. Topa in kei hong gimsakin, Vanglianpa in kei tungah gimna hong tungsak ahih ciangin bang hangin Naomi hong ci lai na hi uh hiam?” a ci hi. Tua ahih ciangin tu-a bangin Moab gam panin Naomi, Moab mi a monu Ruth tawh hong ciahkik hi. Mangbuhham lak kipat laitakin Bethlehem khua hong tung uh hi. Tu-in Naomi in a pasal’ tanaute, Elimelek innkuansung mi, Boaz min nei a hau migina khat nei hi. Tua ciangin Moab mi Ruth in Naomi kiangah, “Lo-ah hong kuansak in la, maipha ka muhna peuhpeuh pa’ nungah anvuite lakah a sang hong tawmsak in,” a ci hi. Tua ciangin amah in, “Pai in, ka tanu aw,” a ci hi. Tua ahih ciangin amah kuankhia-in pai a, anlate’ nung lo sungah ansangte a tawm hi. Elimelek-te innkuan Boaz’ lo-ah va kuankha hi. Boaz zong Bethlehem panin hong kuanin amah in anlate kiangah, “ Topa in note hong ompih ta hen!” a ci hi. Amaute in dawngin, “ Topa in nang thupha hong pia ta hen,” a ci uh hi. Tua ciangin Boaz in anlate a uk a nasempa kiangah, “Hih ka muh ngei loh numei kua’ ta ahi hiam?” a ci hi. Tua ciangin anlate a uk nasempa in dawngin, “Moab gam panin Naomi tawh a hong ciahkik Moab numei ahi hi. Tua numei in, ‘Kong thum hi; ansang hong tawmsakin anlate’ nungah anlomte lakah a kiate hong khawmsak in,’ hong ci hi. Tua ahih ciangin amah hong pai-in tawlkhat zong khawl loin zingsang tung a kipan tu dong semsuak hi,” a ci hi. Tua ciangin Boaz in Ruth kiangah, “Tu-in ngai in ka ta aw; midangte’ lo-ah ansang tawm dingin pai kei inla, hih lo zong nusia kei in. Hih lai-ah kuamah in bangmah hong cih lo ding ahih manin ka nasem numeite’ nai-ah om cinten in. Amaute’ anlakna lo mitsuan inla, amaute’ nungah zui in. Nang hong bawlsiat loh nading uh tangvalte thu ka pia khin hi. Na dang a tak ciangin pai inla tangvalte’ tui tawisa dawn in,” a ci hi. Tua ciangin amah a mai-in lei-ah puk a, leilakah kunin ama kiangah, “Kei gamdang mi khat hinapi, hih banga kei nong phawkna dingin bang hangin na mai-ah maipha ngah thei ka hi hiam?” a ci hi. Ahih hangin Boaz in tua nu dawngin, “Na pasal a sih khit a kipan na teeknu a dingin na sepnate khempeuh, le na nu le na pa le na pianna gam nusia-in cikmahin na theih ngei loh mite kiangah na paina thu a kicing takin kei kiangah hong kigenzo hi. Topa in na gamtatnasate a pha tawh hong thuk a, a liimnuai beel dinga na paina Israel-te’ Pasian, Topa in thaman a cingin hong pia ding hi,” a ci hi. Tua ciangin Ruth in, “Ka topa aw, kei tungah nong dik mahmah hi; bang hang hiam cih leh kei pen na nasem numeite hi lo napi-in na nasemnu’ tungah migitna kam nong pau hi,” a ci hi. Annek hun ciangin Boaz in tua nu kiangah, “Hih lai-ah hong pai in; anlum ne inla, leenggahzu sungah na an diah in,” a ci hi. Tua ahih ciangin anlate gei-ah amah tu a, tua pa in ankante tua nu a pia hi. Amah in a kham mateng ne a, a khamval zong pawlkhat omlai hi. Tua nu ansang tawm dingin a din ciangin Boaz in a tangvalte hilh a, “Anlomte lak nangawnah tawmsak unla, amah ko sia kei un. Anlom hente lak panin zong ama a dingin pawlkhat dokkhia-in ama top dingin nusia unla, amah tai kei un,” a ci hi. Tua ahih ciangin amah in nitak dong lo sungah ansang tawm hi. A topsa teng satkhia a, mangbuhham seu khat bang pha hi. Tua ciangin amah in tuate pua-in khuapi sungah a ciah hi. A an top teng a teeknu lakin, a ankhamvalte zong la-in a pia hi. Tua ciangin a teeknu in ama kiangah, “Tuni-in koi-ah tawm na hi hiam? Koi-ah sem na hi hiam? Nang hong phawk mipa in thupha ngah ta hen,” a ci hi. Tua ahih ciangin amah in a teeknu kiangah a naseppihte gen a, “Tuni-a ka sepna mipa pen Boaz ahi hi,” a ci hi. Tua ciangin Naomi in a monu kiangah, “A dikna in a site hitaleh a hingte hitaleh a mangngilh lo Topa in amah thupha pia ta hen,” a ci hi. Naomi in ama kiangah, “Tua mipa pen i behte, i tanau naipen khat ahi hi,” zong ci lai hi. Tua ciangin Moab numei Ruth in, “Tu-a banah amah in kei kiangah, ‘Ka an khempeuh a lak khit matengun ka nasemte’ kiang nai-ah om in,’ hong ci hi,” a ci hi. Naomi in a monu Ruth kiangah, “Ka tanu aw, ama numeite tawh na kuankhop theih hoih mahmah hi; tua hikeileh lo dangah nang hong kibawlsia kha ding hi,” a ci hi. Tua ahih ciangin Boaz’ numeite’ nai-ah amah omin mangbuhham lak khit dong ansang tawm a, a teeknu tawh a omkhawm hi. Tua ciangin a teeknu Naomi in ama kiangah, “Ka tanu aw, inn khat na suantheih nadingin na pasal ding kong vaihawmsak ding kilawm hi lo ahi hiam? A numeite tawh na nasepna Boaz pen i tanau hi lo ahi hiam? Thei in, amah in tu nitakin ancilna-ah mangbuhham haih hi. Tua ahih ciangin kisilin sathau kinuh inla, na puan hoihpente silhin ancilna-ah paisuk in. Ahih hangin a nek a dawn a man mateng ama kiangah na pailam kitheisak kei in. Ahih hangin amah a lup ciangin a lupna mun encik in; tua ciangin pai inla a khe lam puan leemin lum in; tua ciangin na gamtat nading amah in hong gen ding hi,” a ci hi. Tua ciangin amah in dawngin, “Na gen khempeuh ka hih ding hi,” a ci hi. Tua ahih ciangin ancilna-ah amah paisukin a teeknu in ama kiangah a gensa bang teekteekin a gamta hi. Boaz in a nek a dawn khit ciangin a lung nuam a, anphual nawlah lum dingin a pai hi. Tua ciangin damtakin numei hong pai-in a khe lam puan leem sakin a lumsuk hi. Zankim ciangin mipa a kihei ciangin a khe-ah numei khat na lum hi. Amah in, “Kua na hi hiam?” a ci hi. Tua nu in dawngin, “Keimah na nasemnu Ruth ka hi hi; tanaute na hih ciangin na nasemnu na puan hong zawn in,” a ci hi. Tua ciangin amah in, “ Topa in thupha hong pia ta hen, ka tanu aw; a hau hitaleh a zawng hitaleh tangvalte’ nung na zuih lohna-ah a masa sangin a lianzaw a tawpkhak hih ngeina man na gamta hi. Tu-in ka tanu aw, lau kei in; na nget khempeuh nang a dingin kong hihsak ding hi. Bang hang hiam cih leh ka khuapih mite khempeuh in numei gina na hihlam hong thei uh hi. Kei pen tanau nai ka hi mah hi; ahih hangin kei sangin a naizaw tanau khat omlai hi. Tuzan om in; zingsang ciangin amah in nang tungah tanaute’ hih ding hong hih leh pha hi; amah hih sak in. Ahih hangin nang tungah tanaute’ sep ding a sepnop kei leh, tua ciangin, Topa a nungta ahih mah bangin nang tungah tanau nasep kong sem ding hi. Zingsang dong lum in,” a ci hi. Tua ahih ciangin zingsang dong a khe kiangah lum a, ahih hangin mi mel khatlekhat a kitheih ma-in amah a tho hi. Tua ciangin mipa in, “Ancilna-ah numei a paina kitheisak kei in,” a ci hi. Mipa in, “Na puanza hong paipih inla hong dawh in,” a ci hi. Tua ahih ciangin a numei in dawh a, amah in mangbuhham lawh guk tehkhia-in tua nu guan a, tua ciangin khuapi sungah tua nu a ciah hi. A teeknu kiangah a tun ciangin amah in, “Ka tanu aw, bang na ci hiam?” a ci hi. Tua ciangin amah in a thu khempeuh genin, “Hih mangbuhham lawh guk hong guan hi; bang hang hiam cih leh amah in, ‘Na teeknu kiangah khut hawmguakin na ciah kei ding hi,’ hong ci hi,” a ci hi. Amah in dawngin, “Ka tanu aw, a thu hong bangci suahkhiat cih na theih mateng ngak in; bang hang hiam cih leh amah mawk om lo ding a, tuni-in a thu siangsak ding hi,” a ci hi. Tua ciangin mihon kikhopna kulhkongpi-ah Boaz paito-in tua munah tusuk hi. Tua laitakin a tanaute, Boaz’ gen pa hong pai hi. Tua ahih ciangin Boaz in, “Hong pai dih in, lawm aw; hih lai-ah tu dih in,” a ci hi. Tua ciangin amah hong kihei-in tusuk hi. Tua ciangin amah in khua upate mihing sawm samin, “Hih lai-ah tu dih un,” a ci hi. Tua ahih ciangin amaute tusuk uh hi. Tua ciangin amah in a tanaupa kiangah, “Moab gam panin a hong ciahkik Naomi in i tanaute Elimelek’ leitang zuak hi. Tua ahih ciangin hih thu nang kiangah kong gen ding ngaihsunin, ‘Hih lai-ah a tu mite’ muhna le keima mi upate’ muhna-ah lei in,’ kong ci hi. Na tat ding leh tanh in; ahih hangin na tat kei ding leh, a thu ka theih nadingin kei kiangah hong gen in; bang hang hiam cih leh nang simloh a tanh ding kuamah om lo ahih manin nang kiangah kong pai hi,” a ci hi. Tua ciangin Boaz in, “Naomi’ tung panin a lo na lei ni a kipanin, a site’ gamh a site’ beh sungah a kiptheih nadingin a sipa’ zi Moab numei Ruth zong a lei na hi hi,” a ci hi. Tua ciangin a tanaupa in, “Keima gamhluah siasak kha ding ka hih manin keima a dingin ka tanh thei kei ding hi. Keimah in tanh thei lo ka hih ciangin keima tattheihna thu nangmah in tang in,” a ci hi. Nidang lai-in Israel-te sungah tatna le kikhekna thu-ah ngeina hih bang ahi hi: Thu vaihawm khat peuhpeuh a kipsak nadingin mipa khat in a khedap suahkhia-in a lawmpa pia hi; hih banga hihna pen Israel-te’ sungah kipsakna ahi hi. Tua ahih ciangin a tanaupa in Boaz kiangah, “Nang a dingin lei in,” a cih ciangin amah in a khedap suahkhia hi. Tua ciangin Boaz in upate le mi khempeuh kiangah, “Tuni-in note pen Naomi’ tung panin Elimelek le Khilion le Mahlon’ neihsa khempeuh ka lei khitna thu teci na hi uh hi. A site’ min ama sanggamte le a pianna a khuasung panin a maiman loh nadingin ama gamhluahna-ah a site’ min a kizop theih nadingin a si khin Mahlon’ zi, Moab numei Ruth zong ka zi dingin ka lei khin hi; note pen tuni-in teci na hi uh hi,” a ci hi. Tua ciangin kulhkongpi-a om mite khempeuh le upate in, “Kote, teci ka hi uh hi. Topa in Israel-te’ pianna Rachel le Leah bangin na innkuan sunga hong pai numei bawl tahen. Efrathah-ah na dau pai hen la, Bethlehem-ah na min thang tahen. Topa in hih a khangno lai numei tawh nang hong piak na tate’ hangin Judah in Tamar tawh a neih a tapa Perez innkuan tawh kibangin na innkuan piang ta hen,” a ci uh hi. Tua ahih ciangin Boaz in Ruth la-in ama zi a suak hi. Amah in a zi luppih a, Topa in tua nu gaisakin amah in tapa khat nei hi. Tua ciangin nupite in Naomi kiangah, “Tanau nei loin tuni-in nang a hong omsak lo Topa in thupha ngah hen la, Israel-te’ sungah ama min thang ta hen! Amah pen nang a dingin na nuntakna a hong piakik, le na khanghamna-ah hong vak pa hi ding hi; bang hang hiam cih leh, tapa sagih sangin a thupizaw, nangmah hong it na monu’ neih tapa ahi hi,” a ci uh hi. Tua ciangin Naomi in naungek la-in a ang-ah tawi a, amah a cingnu a suak hi. A veng nupite in a min phuak uh a, “Naomi’ sung pan tapa khat suak,” a ci uh hi. Amaute in a min Obed phuak uh hi. Amah pen Jessi’ pa hi a, Jessi pen David’ pa ahi hi. Tu-in Perez’ suanlekhakte hih bang ahi hi: Perez pen Hezron’ pa, Hezron pen Ram’ pa, Ram pen Amminadab’ pa, Amminadab pen Nahshon’ pa, Nahshon pen Salmon’ pa, Salmon pen Boaz’ pa, Boaz pen Obed’ pa, Obed pen Jessi’ pa, Jessi pen David’ pa ahi hi. Efraim mi Zuf’ tapa Tohu, a tapa Elihu, a tapa Jehoram, a tapa Elkanah a kici min nei mi khat Efraim mualtung gam Ramathaimzofim-ah om hi. Amah in zi nih nei hi. Khat’ min Hannah hi a, a khat’ min Peninnah ahi hi. Peninnah in ta nei a, ahih hangin Hannah in nei lo hi. Elkanah a kumkumin a khuapi panin, Eli’ tapa nihte Hofni le Finehas in Topa’ siampi a sepna mun Shiloh-ah Vanglian Topa a bia ding le ama tungah biakna a pia dingin a pai zel hi. Elkanah in biakna a piak ciangin a zi Peninnah le a tanu le a tapate khempeuh tungah tanh pia hi. Amah in Hannah a it hangin Topa in amah ta neisak lo ahih manin Hannah tungah tanh khat bek a pia hi. Topa in amah ta neisak lo ahih manin amah a el a zipih in amah nakpitakin phin zel, hehsak zel hi. Tua ahih ciangin a kumkumin tua bangin hi den uh hi. Topa’ inn-ah a paitoh simin Peninnah in Hannah phin zel hi. Tua ahih ciangin Hannah kapin an ne lo hi. Tua ciangin ama pasal Elkanah in, “Hannah aw, bang hangin kap na hi hiam? Bang hangin an ne lo na hi hiam? Bang hangin na lungsim dah ahi hiam? Kei pen tapa sawm sangin nang a dingin hoihzaw hi lo ka hi hiam?” a ci hi. Amaute in Shiloh-ah an a nek khit uh ciangin khatvei Hannah ding khia-in biakinn-ah thungen dingin a pai hi. Tua hun laitakin Topa’ biakinn kongkhak khuam pangah siampi Eli na tu hi. Tua nu nakpitakin lungkhamin Topa’ tungah thu ngenin nakpitakin a kap hi. Amah in thuciamna khat bawlin, “Vanglian Topa aw, nangmah in na nasemnu’ gimna nong et takpi a, keimah hong phawkin na nasemnu hong mangngilh loin na nasemnu tungah tapa khat nong piak leh, Topa’ tungah a khan tawntungin amah kong pia ding a, ama lu-ah mulkiatna kitah lo ding hi,” a ci hi. Topa’ mai-ah thungenin a om laitakin Eli in tua nu’ kam na en hi. Hannah a lungsimah pau hi. A mukte bek lingin a awging kiza lo ahih ciangin Eli in tua numei zukhamin ngaihsun hi. Tua ahih ciangin Eli in ama kiangah, “Bang tanvei zu kham ding na hi hiam? Na leenggahzu nek khawl in,” a ci hi. Ahih hangin Hannah in dawngin, “Hilo hi, ka topa aw; kei pen nakpitakin a lungkham numei ka hi hi. Leenggahzu ahi a, khamtheihzu ahi zongin ka ne kei a, Topa’ mai-ah ka lungsim a sungkhia ka hi hi. Lungkhamna le gimna tawh a pau ka hih manin numei ginalo bangin na nasemnu hong ngaihsun kei in, a ci hi. Tua ciangin Eli in dawngin, “Nuam takin pai in. Israel-te’ Pasian in ama tungah na ngetsa thu hong pia hi,” a ci hi. Tua ciangin numei in, “Nangma mitah na nasemnu maipha hong musak in,” a ci hi. Tua ciangin tua numei pai-in an ne a, dahmai pua nawn lo hi. Amaute zingsangin tho baihin biakinn-ah Topa a biak khit uh ciangin amaute’ khua Ramah-a a inn uhah a ciahkik uh hi. Tua ciangin Elkanah in a zi Hannah luppih a, Topa in tua nu’ thungetna a pia hi. A hun ciangin Hannah gai-in tapa khat nei a, a min Samuel a phuak hi. Bang hang hiam cih leh amah in, “ Topa’ tung panin amah ka nget ahi hi,” a ci hi. Tua ciangin Elkanah le a innkuante khempeuh Topa’ tungah kumsim biakna le a thuciamna a pia dingin paito kik uh hi. Ahih hangin Hannah paito lo hi. Bang hang hiam cih leh amah in a pasal kiangah, “Naungek nawi tawh a kikhen phetin Topa’ omna mai-ah kilakin tua lai-ah a om tawntung dingin ka paipih ding hi,” a ci hi. A pasal Elkanah in ama kiangah, “Nangmah in hoih na sak pen bangin gamta inla, amah nawi tawh a kikhen dong ngak in. Topa in a kammal hong kipsak ta hen,” a ci hi. Tua ahih ciangin nupi omin nawi tawh a kikhen mateng a ta a khoi hi. Numei in amah nawi tawh a kikhensak khit ciangin kum thum a pha bawngtal khat, annel seu khat, le leenggahzu savun thawl khat tawh amah la-in, Shiloh-a Topa’ inn-ah amah a paipih hi. Tua ciangin amaute in a bawngtal go-in Eli kiangah a naupang a paipih uh hi. Tua nu in, “Aw ka topa! Nangmah, a nungta na hih mah bangin ka topa aw, keimah in Topa’ tungah thu ngenin nangma omna hih lai munah a ding nu ka hi hi. Hih naupang ka ngen hi. Topa in ama tungah keima ngetna hong pia hi. Tua ahih ciangin Topa’ tungah amah ka kawm hi. A nuntak laiteng Topa’ tungah amah a kikawm ahi hi,” a ci hi. Tua ciangin amaute in tua lai-ah Topa a bia uh hi. Hannah in zong thu ngenin, “ Topa’ tungah ka lungdam a, Topa’ hangin ka kipak hi. Nong huhna hangin ka galte ka nuihsan hi. “ Topa bangin a siangtho kuamah dang om lo a, amah simloh kuamah dang om lo a, i Pasian tawh a kibang hong hu dang om lo hi. Tua bangin kiphatsakna tawh pau nawn kei inla, na kamsung pan kihihsakna gingkhiasak kei in. Bang hang hiam cih leh Topa pen a thei Pasian hi a, amah in gamtatnate a tawi khai hi. A thahatte’ thalte kitan a, ahih hangin a thaneemte in thahatna ngah uh hi. A gilvahte in an thalawh uh a, ahih hangin a gilkialte kial nawn lo uh hi. Tasel mi in ta sagih nei a, ahih hangin ta tampi a nei nu a lungzuang hi. Topa in thatin hingsakkik a, amah in Leinuai-ah paipih sukin thotosak hi. Topa in zawngsakin hausak a, amah in niamkhiat sukin, zong sangtosak hi. Amah in leivui panin mizawngte phongto a, amah in a cimawhte a lungkhamna panun a phongto hi. Uliante tawh tukhawmsak a, minphatna ngahsak hi. Bang hang hiam cih leh leitung khuampite Topa a’ hi a, tuate tungah amah in leitung pumpi a koih hi. “Amah in a thuman mite’ kalsuanna limtakin cing a, ahih hangin migilote khuamialna sungah kikhiasuk ding hi. Bang hang hiam cih leh thatang hatna tawh mi gualzo lo ding hi. Topa’ langte tamkham ding a, amah in amaute do-in vantungah van gingsak ding hi. Topa in leimong dongah thu khen ding hi. Amah in ama kumpipa tungah thahatna pia ding a, a sathau nilh pa’ vangliatna sangsak ding hi,” a ci hi. Tua ciangin Ramah-a a inn-ah Elkanah a ciah hi. Ahi zongin naupang in siampi Eli’ omna-ah Topa’ na a sem hi. Eli’ tapate pen bangmah a man lo mite ahi uh hi. Amaute in Topa zahtakna nei lo uh hi. Mite’ tungah siampite’ gamtat zia ding ngeinate don lo uh hi. Mi khatpeuh in biakna a piak ciangin a sa a huan laitakin siampipa’ nasempa sikkeu-ka-thum nei khat a khutah tawi-in hong pai a, amah in a sikkeu tawh sikbeel daii ahi a, beel-uk ahi a, beelpi ahi a, beel sungah ahi zongin sunsuk hi. Sikkeuka in a kaihkhiattoh khempeuh siampipa in tang ding hi. Tua ahih ciangin Shiloh-ah a pai Israel-te khempeuh tungah amaute in tua bangin hih uh hi. Tua tham loin a thau a kihal ma-in siampipa’ nasempa hong pai-in biakna a pia mipa kiangah, “Siampipa a’ ding han’ ding sa hong pia in; bang hang hiam cih leh amah in nang tung panin sa minsa hong sang loin a sial bek hong sang ding hi,” a ci hi. Tua ciangin mipa in ama kiangah, “A thau hong hal masa sak inla, tua khit ciangin na deih zahzah la in,” a cih leh, amah in, “Hilo hi; tu mahmahin nong pia ding uh hi. Tua hikeileh thatanghat thu-in kong laksak ding hi,” a ci hi. Tua ahih ciangin Topa’ muhna-ah tangvalte’ khialhna lian mahmah hi; bang hang hiam cih leh amaute in Topa’ tungah biakpiaknate thupi seh lo uh hi. Samuel pen saihadial siampipuan silhin Topa’ mai-ah na a sem naupang khat ahi hi. Samuel’ nu a pasal tawh kumsim biakna pia dingin a paitoh ciangin ama a dingin puantual neu khat bawlin kum simin ama kiangah a puak hi. Tua ciangin Eli in Elkanah le a zi thupha pia-in, “Amah in Topa’ tungah a apkik a ta’ tang dingin Topa in hih numei tawh nang ta dang hong neisak ding hi,” a ci hi. Tua ciangin a inn uhah amaute a ciah uh hi. Tua ciangin Topa in Hannah thupha pia a, tua nu gai-in tanu nih le tapa thum a nei hi. Naupang Samuel ahihleh Topa’ omna-ah a khang hi. Tu-in Eli teek mahmah a, Israel-te khempeuh tungah a tapate’ gamtatnate, le kikhopna buk lutna-ah na a sem numeite tawh a lupkhopna thute khempeuh zong a za hi. Amah in amaute kiangah, “Bang hangin tua bangin gamta na hi uh hiam? Mi khempeuh tung panin na gamtat siatnate uh ka za hi. Hilo hi, ka tapate aw; Topa’ mite in a genthangna thu ka zakte hoih lo hi. Mi khat midang khat tungah a khialh le ama a dingin thukhente in palai sem ding hi. Ahih hangin mi khat Topa’ tungah khial leh ama a dingin kua in va thumsak ding ahi hiam?” a ci hi. Ahih hangin amaute in a pa’ thu ngai lo uh hi. Bang hang hiam cih leh tua pen amaute a thah nadingin Topa’ deihna ahi hi. Tu-in naupang Samuel a pumpi khangin Topa le mite’ maipha a ngahtoto hi. Tua ciangin Pasian’ mi khat Eli’ kiangah hong pai-in ama kiangah, “ Topa in hih bangin ci hi: ‘Egypt gam sung Faro’ khutnuai-ah na pupi Aaron le a innkuante a om laitakin Aaron’ tungah keimah ka kilang hi. Israel minamte khempeuh sung panin amah ka siampi ahi ding, ka biakna tau-ah a pai ding, paknamtui a hal ding, keima mai-ah siampipuan a silh dingin ka teel hi. Israel mite’ tung panin mei tawh kihal keimah hong kibiaknate khempeuh na pupi innkuan tungah ka pia hi. Tua ahih ciangin bang hangin keimah hong kibiaknate le ka thupiak ahi keimah hong kipiakte thusim loin, keima mi Israel-te’ piak a limci pen teng tawh note kithausakin, kei sangin na tapate pahtawi zaw na hi hiam?’ ci hi. Tua ahih ciangin Israel-te’ Pasian, Topa in thu hong genin: ‘Nangma innkuan le na behte keima mai-ah sungtumin pusuak tawntung ding hi, ci-in thu ka ciamsa hi,’ ci hi. Ahih hangin tu-in Topa in thu genin: ‘Tua bang hi nawn lo ding hi. Bang hang hiam cih leh kei hong pahtawite ka pahtawi ding a, kei hong simmawhte ka simmawh ding hi. En in, nangma innkuan sung le na beh sunga tangval hat khempeuh ka suksiat hun hong tung ding a, na innkuan sungah puteekte a om nawn loh hun hong tung ding hi. Tua ciangin Israel-te tungah ka piak daupainate khempeuh na lungkham hunin enna mit tawh na en ding a, na innkuan sungah puteek om ngei nawn lo ding hi. Ka biakna tau panin ka suksiat loh na suante khat pen mitlawt dongin a kap ding le a lunggim dingin kikoih ding hi. Tua ciangin na innsung panin a khang khempeuh, mite’ namsau tawh si ding uh hi. Na tapa nihte, Hofni le Finehas tungah hong tung ding hih thu pen nang a dingin lim hi ding hi. Amau tegel a ni kikhatin si ding uh hi. Tua ciangin ka lungsim sung le ka ngaihsutna bangin a sem ding a citak siampi khat keima a dingin ka khangsak ding hi. Amah, suanlekhak nei-in ka bawl ding a, ka sathau nilh pa’ mai-ah amah sungtumin pusuak tawntung ding hi. Na suanlekhak a suakta mite khempeuh ngun peek khat ahi a, anlum lum khat ngen ding ahi zongin ama kiangah pai-in, “An tawm ka neih theih nadingin siampipa’ omna mun khat peuhpeuhah kei hong koih in, ci-in kong thum hi,” ci ding uh hi,’ ci hi,” ci-in a gen hi. Tu-in Eli’ khutnuai-ah naupang Samuel in Topa’ na sem hi. Tua hun lai-in Topa in thu genmun lo a, maangmuh ommun lo hi. Tua hunin a mit a maang dingin a kipan khin Eli in khua mu thei lo a, ama omna tuamah lum hi. Pasian’ meivak mit nai lo a, Pasian’ Thuciamna Singkuang a omna mun Topa’ mun siangtho sungah Samuel lum hi. Tua ciangin Topa in, “Samuel! Samuel!” ci-in sam ahih manin amah in, “Hih lai-ah om ing!” ci-in Eli kiangah tai a, “Hih lai-ah om ing, nong sam hi,” a ci hi. Ahih hangin amah in, “Kong sam kei hi; lumkik in,” a ci hi. Tua ahih ciangin amah pai-in a lum hi. Tua ciangin Topa in sam kikin, “Samuel!” a ci hi. Samuel tho-in Eli kiangah pai-in, “Hih lai-ah om ing, nong sam hi,” a ci hi. Ahih hangin amah in, “Kong sam kei hi, ka tapa aw; lum kik in,” a ci hi. Tua laitakin Samuel in Topa thei nai lo hi. Bang hang hiam cih leh Topa in amah hopih ngei nai lo hi. Topa in Samuel a thum veina sam kik hi. Amah tho-in Eli kiangah pai-in, “Hih lai-ah om ing, nong sam hi,” a ci hi. Tua ciangin Topa in naupang a sapna thu Eli in a thei hi. Tua ahih ciangin Eli in Samuel kiangah, “Pai-in lum in; amah in nang hong sap leh nangmah in, ‘Hong gen in, Topa aw, na nasempa in za hi,’ na ci ding hi,” a ci hi. Tua ahih ciangin Samuel pai-in ama omna-ah lumsuk hi. Topa hong pai-in hong ding a, a hun dangte-a mah bangin, “Samuel! Samuel!” ci-in a sam hi. Tua ciangin Samuel in, “Hong gen in, na nasempa in za hi,” a ci hi. Tua ciangin Topa in Samuel kiangah, “En in, a za mite khempeuh’ bil nihte a vut ding na khat Israel-te’ sungah a sem ding ka hi hi. Tua ni ciangin ama innkuan tawh kisai ka gensa khempeuh a patna pan a tawpna dong Eli tungah ka tungsak ding hi. A tapate in Pasian mindaisak a, amah in a tate kham lo ahih manin, ama theih a mawhna hangin ama innkuan gimna a pia tawntung ding ka hihna ama kiangah ka gen hi. Tua ahih ciangin Eli innkuante’ mawhna pen biakna ahi a, piakna in ahi zongin a maisak zawh ngei loh nading thu Eli’ innkuante tungah ka kiciam hi,” a ci hi. Samuel zong zingsang dong lum hi. Tua ciangin amah in Topa’ inn kongkhakte hong hi. A maangmuhna Eli’ kiangah a gen ding Samuel lau hi. Ahih hangin Eli in Samuel samin, “Ka tapa Samuel aw,” a ci hi. Amah in, “Hih lai-ah om ing,” a ci hi. Eli in, “Amah in nang kiangah hong gen bang ahi hiam? Kei kiangah hong im kei in. Amah in nang tungah hong gente khempeuh kei kiangah ip nong neih leh, Pasian in nang hong dawm kei ta hen,” a ci hi. Tua ahih ciangin Samuel in ama kiangah a vekpi-in genin bangmah im lo hi. Tua ciangin Eli in, “Amah pen Topa ahi hi. Amah in hoih a sak bangin hih ta hen,” a ci hi. Samuel khang a, Topa in amah ompihin, Samuel’ thugente khat zong lei-ah kiasak lo hi. Tua ciangin Dan le Beersheba kikal-a om Israel-te khempeuh in Topa’ kamsangin Samuel a kikipsakna thei uh hi. Tua ciangin Shiloh-ah Topa kilang kik zelzel hi. Shiloh-ah Topa mahmah Samuel tungah kilangin thu gen a, Samuel in mite tungah gensawn hi. Tua ciangin Israel-te khempeuh in Samuel’ thu a zui uh hi. Tu-in Filistia mite a sim dingin Israel-te kuankhia uh hi. Amaute in Ebenezer-ah phual sat uh a, Filistia mite in Afek-ah phual sat uh hi. Israel-te a do dingin Filistia mite kipan uh a, gal a kido uh ciangin Filistia mite in Israel-te zo-in galphual sungah mi tulli bang that uh hi. Mihonte giahphual ah hong ciah ciangin Israel upate in, “Bang hangin Topa in tuni-in Filistia mite’ mai-ah eite hong taisak ahi hiam? Eite’ lakah amah hong pai-in a thahat i galte’ khutsung panin amah in eite hong hotkhiat theih nadingin Shiloh panin Topa’ Thuciamna Singkuang paipih ni,” a ci uh hi. Tua ahih ciangin mite in Shiloh-ah mi paisak uh a, kherub-te tungah a tu Vanglian Topa’ Thuciamna Singkuang tua lai panin hong pua uh hi. Eli’ tapa nihte, Hofni le Finehas, Pasian’ Thuciamna Singkuang tawh tua lai-ah om uh hi. Topa’ Thuciamna Singkuang giahphual sung hong tun ciangin Israel-te khempeuh nakpitakin awng uh a, lei a thawn hi. Filistia mite in otna gamlumna a zak uh ciangin amaute in, “Hebru mite’ giahphual ah nakpi a hih bang otna bang a cihnopna ahi hiam?” a ci uh hi. Topa’ Thuciamna Singkuang giahphual a tun khitna a theih uh ciangin Filistia mite lau uh hi. Bang hang hiam cih leh amaute in, “Giahphualah a pasian-te uh tungzo hi,” a ci uh hi. Amaute in, “Gimna ngah hi ta hang! Bang hang hiam cih leh nidangin hih bang piang ngei lo hi. Gimna ngah hi ta hang! Kua in hih a thahat pasian-te’ khutsung panin eite hong honkhiazo ding ahi hiam? Hihte pen gimna a tuamtuamte tawh gamlakah Egypt-te a vatgawp pasian-te ahi hi. Filistia mite aw, hang unla, pasal bangin gamta un. Tua hikeileh amaute, note’ sila hong hih mah bangin Hebru mite’ sila na suak ding uh hi. Pasal lungsim nei-in do un,” a ci uh hi. Tua ahih ciangin Filistia mite in do uh a, Israel-te kizo-in mi khempeuh a inn ciatah tai uh a, mi tampi tak kithat hi. Bang hang hiam cih leh Israel-te khe galkap mi tul sawmthum puk hi. Tua ciangin Pasian’ Thuciamna Singkuang zong kiman a, Eli’ tapa nihte, Hofni le Finehas zong kithat hi. Giahphual panin Benjamin mi khat hong tai-in a puan kikeeksa le a lu tungah leivui khu-in Shiloh hong tung hi. Amah a tun ciangin, lampi gei-ah a vilin ama tutna-ah Eli na tu hi; bang hang hiam cih leh Pasian’ Thuciamna Singkuang hangin a lungsim ling hi. Mipa khuapi sung hong tungin a thuteng a gen ciangin khuapi mi khempeuh lau-in kiko uh hi. Eli in kikona awging a zak ciangin amah in, “Hih gamlumna bang ahi hiam?” a ci hi. Tua ciangin mipa manlangin hong pai-in Eli kiangah a gen hi. Tu-in Eli kum sawmkua le kum giat pha a, a mitte maangin khua mu thei lo hi. Mipa in Eli kiangah, “Keimah, galphual panin hong ciah ka hi a, tuni-in giahphual panin kong tai hi,” a ci hi. Tua ciangin amah in, “Ka tapa aw, bangci ahi hiam?” a ci hi. A thu hong puak pa in dawngin, “Filistia mite’ mai-ah Israel-te tai uh a, mi tampi tak zong kithat hi; na tapa nihte, Hofni le Finehas zong si uh a, Pasian’ Thuciamna Singkuang kiman khin hi,” a ci hi. Amah in Pasian’ Thuciamna Singkuang a gen ciangin kulhkongpi gei-a a tutna mun panin Eli thalpukin a ngawng kitanin a si hi. Bang hang hiam cih leh amah puteek hi-in gik hi. Amah in Israel-te kum sawmli sung thu khen hi. Tu-in a monu, Finehas’ zi, naupaii-in a suak dektak ahi hi. Pasian’ Thuciamna Singkuang a kimatna le a pasal a sihna thu a zak ciangin amah kunin nausuak hi. Bang hang hiam cih leh a nat hun tung ta hi. Amah si dektak a, ahi zongin amah a don numeite in ama kiangah, “Lau kei in, tapa khat na nei hi,” a ci uh hi. Ahih hangin amah in dawng lo a, zong don lo hi. Tua ciangin amah in, “Israel-te’ sung panin minthanna paikhia khinta!” ci-in a naungek min Ikhabod a phuak hi. Bang hang hiam cih leh Pasian’ Thuciamna Singkuang a kimatna hang le a teekpa le a pasal’ hang ahi hi. Amah in, “Pasian’ Thuciamna Singkuang kiman khin ahih manin Israel-te’ sung panin minthanna paikhia khinta hi,” a ci hi. Filistia mite in Pasian’ Thuciamna Singkuang a mat uh ciangin Ebenezer panin Ashdod-ah pua uh hi. Tua ciangin Filistia-te in Pasian’ Thuciamna Singkuang la-in Dagon inn sungah paipihin Dagon kiangah koih uh hi. Ashdod mite a zing ciang zingsang tungin a thawh uh ciangin, Topa’ Thuciamna Singkuang mai leilakah Dagon na maipuk hi. Tua ahih ciangin amaute in Dagon phongto-in ama omna munah koihkik uh hi. Ahih hangin a zing ciang zingsang tungin amaute a thawh uh ciangin Topa’ Thuciamna Singkuang mai leilakah Dagon na maipuk leuleu a, Dagon lutang le a khut tegel kitankhia-in sangkil gei-ah om a, Dagon a pumpi bek omlai hi. Tuni dongin Dagon siampite le Dagon inn-ah a tumte khempeuh in hih thu hangin Ashdod a Dagon sangkil tung sik lo uh hi. Topa in Ashdod khua mite nakpitakin gawt a, amah in uilut tawh Ashdod khua le a gam sung lausakin gimsak hi. Ashdod mite in hih bang thute a muh uh ciangin amaute in, “Israel-te’ Pasian’ Thuciamna Singkuang eite kiang panin a paikhiat loh phamawh hi. Bang hang hiam cih leh amah in eite le i pasian Dagon hong gawt hi,” a ci uh hi. Tua ahih ciangin amaute in mi sawlin Filistia uliante khempeuh khawm uh a, “Israel-te’ Pasian’ Thuciamna Singkuang bang cih ding ihi hiam?” a ci uh hi. Amaute in dawngin, “Israel-te’ Pasian’ Thuciamna Singkuang Gath-ah koihsak ni,” a ci uh hi. Tua ahih ciangin amaute in Israel-te’ Pasian’ Thuciamna Singkuang tua lai-ah paipih uh hi. Ahih hangin amaute in tua Gath khua-ah a tunpih khit uh ciangin Topa in tua khuapi langpanin apkhapna lianpi piangsak a, amah in khuapi mite a moi a hamin gimsakin amaute in uilut vei uh hi. Tua ahih ciangin amaute in Pasian’ Thuciamna Singkuang Ekron-ah puak uh hi. Ahih hangin Pasian’ Thuciamna Singkuang Ekron a tun ciangin Ekron mite kiko uh a, “Kote le ka mite uh a that dingin amaute in Israel-te’ Pasian’ Thuciamna Singkuang ko kiangah hong paipih uh hi,” a ci uh hi. Tua ahih ciangin amaute in mi sawlin Filistia uliante khempeuh khawmin, “Kote le ka mite uh hong thahloh nadingin Israel-te’ Pasian’ Thuciamna Singkuang puakkhia unla, ama omna munah ciahkiksak un,” a ci uh hi. Bang hang hiam cih leh a khuapi sung khempeuhah si dektak a apkhapna om hi. Pasian in tua lai-ah amaute nak gawt mahmah hi. A si lo sunte in uilut vei uh a, khuapi sunga kahna awging vantung dongah kizato hi. Topa’ Thuciamna Singkuang Filistia gam sungah kha sagih sung om hi. Tua ciangin Filistia-te in siampite le aisante sam uh a, “ Topa’ Thuciamna Singkuang bang cih ding ihi hiam? Ama omna munah bang tawh kha ding ihi hiam, hong gen un,” a ci uh hi. Amaute in, “Israel-te’ Pasian’ Thuciamna Singkuang na puakkhiat uhleh, a hawm guakin puak kei un. Bangbang hitaleh mawhna hanga biakna pia un. Tua ciangin note na dam ding uh a, note hong gawtna thu na thei ding uh hi,” a ci uh hi. Tua ciangin amaute in, “Amah i piak ding mawhna hanga biakna bang ahi hiam?” a ci uh hi. Amaute in dawngin, “Filistia uliante a phazah tawh kizui-in kham uilut nga le kham simbeng nga hi ding hi. Bang hang hiam cih leh note khempeuh le na uliante uh tungah a kibang gimna hong tung hi. Tua ahih ciangin note in na gam sung uh hong sugawp na uilut uh limte le na simbeng limte uh bawlin, Israel-te’ Pasian’ tungah zahtakna na lak ding uh hi. Note le na pasian-te uh le na gam uh hong gawtna amah in hong zangsak kha ding hi. Egypt-te le Faro in a lungsim uh a khauhsak bangin bang hangin na lungsim uh khauhsak ding na hi uh hiam? Amah in amaute a mawlpih khit ciangin amaute in Israel mite paisakin, tua ciangin Israel mite kihemkhia uh hi lo ahi hiam? Tua ahih ciangin tu-in leeng thak khat bawlin a tungah kol a kibaang ngei nai lo bawngpi a no nawi a pia lai nih la unla, a bawngpite leeng-ah vawh un; ahih hangin amaute kiang panin a note la-in inn-ah ciahpih un. Tua ciangin Topa’ Thuciamna Singkuang la-in leeng tungah koih unla, mawhna hanga biakna-in na piak uh kham milimte a singkuang khat sungah guangin a gei-ah koih un. Tua ciangin sawlkhia unla, a lampi-ah paisak un. A bawngte in Bethshemesh khua zuanin a paitoh leh siatna lianpi hong bawl pa pen amah hi ding hi. Ahih hangin a paitoh kei leh eite hong susia pa amah hi lo a, eite tungah a piang mawkmawk hi, ci-in i thei ding hi,” a ci uh hi. Mite in tua bangmahin hih uh a, a no nawi a pia lai bawngpi nih la-in leeng-ah bulh uh hi. Amaute in Topa’ Thuciamna Singkuang, le kham simbeng le amau’ uilut limte a omna singkuang leeng tungah a koih uh hi. Tua ciangin bawngpite lamlian dung zui-in Bethshemesh lamah tang takin pai uh a, a paikawmun ham uh hi; taklam ah hitaleh veilam ah hitaleh kihei lo uh a, Filistia uliante in Bethshemesh gamgi ciang dong a nung a zui uh hi. Tu-in Bethshemesh uliante in kuam sungah a mangbuh uh a lak laitak ahi hi. Amaute khuadakin Thuciamna Singkuang a muh uh ciangin, a muhna uh hangin amaute lungdam uh hi. Bethshemesh khuami Joshua’ lo-ah a leeng hong tungin tua munah khawl hi. Tua lai-ah suangtum lianpi khat om hi. Amaute in a leeng singte ekkhamin a bawngpite Topa’ tungah meihal biakna-in a pia uh hi. Levi mite in Topa’ Thuciamna Singkuang le a gei-a om kham milim a omna singkuang la-in suangtumpi tungah a koih uh hi. Bethshemesh mite in tua ni-in Topa’ tungah meihal biaknate le biakpiaknate a pia uh hi. Filistia ulian ngate in tua bangteng a muh khit uh ciangin tua ni mahin Ekron-ah a ciahkik uh hi. Filistia-te in mawhna hanga biakna-in Topa’ tungah a piak uh kham uilutte in: Ashdod a’ ding khat, Gaza a’ ding khat, Ashkelon a’ ding khat, Gad a’ ding khat, le Ekron a’ ding khat ahi hi. Ulian ngate’ uk Filistia mite khuakulh tawh a ki-um khuapite le a ki-um lo khuaneute a dingin a khua phazah tawh kizui-in kham simbengte zong ahi hi. Topa’ Thuciamna Singkuang a koihna gei uha suangtumpi pen Bethshemesh khuami Joshua’ lo-ah tuni dongin teci ahi hi. Amaute in Topa’ Thuciamna Singkuang en uh ahih manin amah in Bethshemesh mite pawlkhat that hi. Amah in amaute sawmsagih that a, mite lakah Topa in mi tampi that ahih manin mite thuum uh hi. Tua ciangin Bethshemesh mite in, “Hih a siangtho Pasian, Topa’ mai-ah kua omzo ding ahi hiam? Eite’ kiang panin kua kiangah amah paisak ding ihi hiam?” a ci uh hi. Tua ahih ciangin amaute in Kiriathjearim-ah a teng mite kiangah kamtaite sawl uh a, “Filistia-te in Topa’ Thuciamna Singkuang hong puakkik khin uh hi. Hong paisuk unla, no kiangah puato un,” a ci uh hi. Tua ciangin Kiriathjearim mite hong pai-in Topa’ Thuciamna Singkuang puato uh a, mualtungah a om Abinadab’ inn-ah paipih uh hi. Topa’ Thuciamna Singkuang a en dingin amaute in ama tapa Eleazar a ap uh hi. Kiriathjearim-ah Thuciamna Singkuang a om a kipan, hun saupi, kum sawmnih bang pha a, Israel mite khempeuh in Topa ngai-in thuum uh hi. Tua ciangin Samuel in Israel mite khempeuh kiangah, “Na lungsim khempeuh uh tawh Topa’ lamah a kiheikik na hih uhleh note’ lak panin gamdang pasian-te le Ashtaroth nusian milim koihkhia-in Topa’ lamah na lungsim uh ngat unla, amah bek bia un. Tua hileh amah in Filistia-te’ khutsung panin note hong honkhia ding hi,” a ci hi. Tua ahih ciangin Israel-te in Baal-te le Ashtaroth koihkhia-in Topa bek a bia uh hi. Tua ciangin Samuel in, “Israel-te khempeuh Mizpah-ah khawm un. Note a dingin Topa’ tungah thu ka ngen ding hi,” a ci hi. Tua ahih ciangin amaute Mizpah-ah kikhawm uh a, tui tawi-in Topa’ mai-ah sungkhia uh a, tua ni-in an tangin tua lai munah, “ Topa’ tungah i khial khinzo hi,” a ci uh hi. Samuel in Israel mite Mizpah-ah thu khen hi. Israel mite Mizpah-ah a kikhopna thu Filistia-te in a zak uh ciangin Israel-te a sim dingin Filistia uliante kuanto uh hi. Israel mite in tua thu a zak uh ciangin amaute in Filistia-te kihta uh hi. Tua ciangin Israel mite in Samuel kiangah, “Filistia-te’ khutsung panin amah in eite hong hotkhiat theih nadingin Topa i Pasian’ tungah eite a dingin thunget na khawl kei in,” a ci uh hi. Tua ahih ciangin Samuel in nawi a ne lai tuuno khat la-in Topa’ tungah a bupin meihal biakna-in a pia hi. Israel-te a dingin Topa’ tungah Samuel kiko a, Topa in amah na dawng hi. Samuel in meihal biakna a piak laitakin Filistia-te in Israel-te a sim dingin hong nai uh hi. Ahih hangin Topa in aw lianpi tawh tua ni-in Filistia-te thawn gawpin amaute buaisakgawp a, Israel-te’ mai-ah amaute kinotkhia hi. Tua ciangin Mizpah panin Israel-te paikhia-in Filistia-te delh uh a, Bethkar nuai ciang dong amaute a vatgawp uh hi. Tua ciangin Samuel in suangtum khat la-in Mizpah le Jeshanah kikalah phut a, a min Ebenezer a phuak hi; bang hang hiam cih leh amah in, “Hih pen Topa in eite hong huhna teci ahi hi,” a ci hi. Tua ahih ciangin Filistia-te kizo a, Israel-te’ gam sungah tumkik nawn lo uh hi. Samuel’ hunsung khempeuh Topa in Filistia-te langpang hi. Israel-te’ tung panin Filistia-te in a laksa khuapite, Ekron panin Gath ciang kikal sungteng, Israel-te tungah kipia kik a, Israel-te in Filistia-te’ khutsung panin a gam uh lakik uh hi. Israel-te le Amor mite kikalah zong kilemna om hi. Samuel in a nuntak sung tawntung Israel-te thu khen hi. A kumkumin Bethel, Gilgal, le Mizpah-ah kot pai a, amah in hih munte khempeuhah Israel-te thu khen hi. Tua ciangin Ramah-ah amah ciahkik zel hi; bang hang hiam cih leh tua lai-ah ama inn om a, tua lai-ah zong Israel-te tungah thukhen na mah a sem hi. Amah in tua lai-ah Topa a’ ding biakna tau khat a lam hi. Samuel a teek ciangin amah in Israel-te’ tungah thukhenin a tapate a koih hi. A ta upa’ min Joel hi a, a nihna’ min Abijah ahi hi. Amaute pen Beersheba-ah thukhente ahi uh hi. Ahih hangin a tapate amah bangin gamta lo uh a, sum ngah ding lam bek kin uh ahih manin sumgolh la-in thuman heikhia uh hi. Tua ciangin Israel upate kikhawmin Ramah-a Samuel kiangah pai-in ama kiangah, “En in, nang na teek ta a, na tapate in nangma khekhap hong zui lo uh hi. Tua ahih manin minam dangte khempeuh mah bangin kote hong uk dingin kote a dingin kumpi khat seh in,” a ci uh hi. Ahih hangin amaute in, “Kote hong uk dingin kumpi khat hong pia in,” a cih uh ciangin hih thu in Samuel lungkim losak hi. Samuel in Topa’ kiangah thu ngen hi. Tua ciangin Topa in Samuel kiangah, “Amaute in nang kiangah hong gen thu khempeuh ngai in; bang hang hiam cih leh amaute in nang hong nial hi lo a, amaute tungah kumpi hihna panin kei hong nial ahi uh hi. Egypt panin amaute ka paikhiatpih a kipan tuni dongin amaute in kei hong nusia-in pasian dangte’ na semin, kei’ tungah hong bawlnate khempeuh mah bangin amaute in nang tungah zong hong bawl ahi uh hi. Tua ahih ciangin tu-in amaute’ thu ngai in. Amaute limtakin hilhkholin, amaute’ tungah a uk ding kumpipa’ hih zia ding lak bek in,” a ci hi. Tua ahih ciangin Samuel in ama tung panin kumpi khat a ngen mite kiangah Topa’ thugen khempeuh a gen hi. Amah in, “Note hong uk ding kumpipa’ hih zia dingte in: Amah in na tapate uh la-in a leengte-ah na semin a sakol nasem ding, le a leengte mai-ah a tai dingin seh ding hi. Tua ciangin amah in ama a dingin a tul-a uk le a sawmnga a ukte, le pawlkhatte a lo kho-in a an a la ding, le a galsung nazatte le a leeng nate a bawl dingin seh ding hi. Amah in na tanute uh paknamtui bawl ding, anhuan ding, le an em dingin la ding hi. Amah in na lote uh, na leenggui lote uh, le na oliv lote uh sung panin a limcipen teng la-in ama nasemte tungah pia ding hi. Amah in na an le na leenggahte uh sawm-ah-khat la-in ama uliante le ama nasemte tungah pia ding hi. Amah in na nasem numeite uh, na nasem pasalte uh, na bawngte, uh le na late uh a gina pen teng la-in ama na a sem dingin koih ding hi. Amah in na tuuhonte uh sawm-ah-khat la ding a, note pen ama sila na hi ding uh hi. Tua ni ciangin note a dingin na teelsa uh na kumpipa uh hangin note na kiko ding uh a, ahih hangin tua ni ciangin Topa in note hong dawng lo ding hi,” a ci hi. Ahih hangin mite in Samuel’ thu ngai nuam lo uh hi. Amaute in, “Hilo! Kote’ tungah kumpi khat ka nei ding uh hi. Kote zong minam dangte khempeuh mah bangin, ka kumpipa uh’n kote hong ukin kote’ mai-ah pai-in ka galte uh hong dosak ding hi,” a ci uh hi. Samuel in mite’ thugen khempeuh a zak khit ciangin Topa’ kiangah tua thute a genkik hi. Tua ciangin Topa in Samuel kiangah, “Amaute’ thu ngai inla, amaute-a’ dingin kumpi khat koih in,” a ci hi. Tua ciangin Samuel in Israel mite kiangah, “Mi khempeuh na khuapi ciat uhah ciah un,” a ci hi. Benjamin-te sung panin Afiah’ tapa Bekorath, a tapa Zeror, a tapa Abiel, a tapa Kish min nei, Benjamin-te mihau khat a om hi. Amah in tangval a melhoih, a min Saul ahi tapa khat nei hi. Israel mite lakah amah sangin a melhoihzaw, a thacingzaw khat zong om lo a, midang khempeuh ama liangko ciang bek pha uh hi. Tua laitakin Saul’ pa Kish’ late a mang hi. Tua ahih ciangin Kish in a tapa Saul kiangah, “Nasemte khat sam inla, late va zong in,” a ci hi. Tua ahih ciangin amaute in Efraim mualtung gamteng le Shalisha gam teng nawkin zong uh a, ahih hangin mu lo uh hi. Tua ciangin amaute in Shaalim gamteng zong uh a, ahih hangin tua gamah na om tuan lo hi. Tua ciangin amaute in Benjamin gamteng zong uh a, ahih hangin mu sam lo uh hi. Zuf gam a tun uh ciangin Saul in amah tawh a om a nasempa kiangah, “Hong pai in, ciahkik ni. Tua hikeileh ka pa in late ngaihsun nawn loin eite hong lunghimawh zaw kha ding hi,” a ci hi. Ahih hangin a nasempa in, “En in, hih khuapi sungah Pasian’ mi khat om a, a kizahtak mi khat ahi hi. Ama gen khempeuh a manin tung hi. Tua lai-ah pai ni. Eite’ khualzin khiatna thu amah in hong genthei kha ding hi,” a ci hi. Tua ciangin Saul in a nasempa kiangah, “Ahih hangin pai lehang, tua mipa bang puak ding ihi hiam? I van sunga i anlum beita a, Pasian’ mipa kiangah i puak ding letsong om lo hi. Bang nei nawn ihi hiam?” a ci hi. Tua ciangin a nasempa in Saul dawngkikin, “Hih lai-ah ngun sumnen tang khat ka nei hi. I vai hong gen nadingin Pasian’ mipa kiangah ka pia ding hi,” a ci hi. (Tua ma lai-in Israel-te sungah mi khat in Pasian kiangah thudong dingin a pai ciangin amah in, “Hong pai in, thumu pa kiangah va pai ni,” ci hi. Bang hang hiam cih leh tuhuna kamsang i cihte tua ma-in thumu pa kici hi.) Tua ciangin Saul in a nasempa kiangah, “Tua ahihleh hoih hi, va pai ni,” a ci hi. Tua ahih ciangin Pasian’ mipa a omna khuapi-ah amaute a pai uh hi. Amaute khuapi omna mual tungah a paitoh laitakun khuapi panin tui tawi dingin hong paikhia nungaknote tawh kituak uh ahih manin amaute kiangah, “Thumu pa hih lai-ah a om hiam?” a ci uh hi. Amaute in, “Amah om hi; note’ mai diakah pai hi. Kinawh un; khuapi sungah tu mahmahin hong pai hi. Bang hang hiam cih leh mite in tuni-in mualtung a biakna-ah biakna pia uh hi. Khuapi sung na lut phetun mualtung a biakna-ah an ne dingin a pai ma-in amah na mu ding uh hi. Amah in biakpiakna thupha pia ding ahih manin ama pai mateng mite in an ne lo ding uh hi. Thupha a piak khit ciangin a kisam mite in ne thei pan uh hi. Tu-in paito un; bang hang hiam cih leh amah na tuakpah ding uh hi,” a ci uh hi. Tua ahih ciangin khuapi-ah amaute paito uh hi. Khuapi sungah amaute a lut laitakun mualtung a biakna lamah Samuel a pai dingin amau’ lamah hong paikhia a mu uh hi. Tu-in Saul hong pai ni a zan ni-in Samuel tungah Topa in thu na gen khin hi: “Zing ciang tubang hunin Benjamin gam sung panin nang kiangah mi khat kong sawl ding a, nangmah in ka mi Israel-te tungah ulian dingin amah sathau na nilh ding hi. Amah in Filistia mite’ khutsung panin ka mite honkhia ding hi; bang hang hiam cih leh amaute’ kikona kei kiang hong tung khin ahih manin ka mite’ gimna ka mu khinzo hi,” a ci hi. Samuel in Saul a muh ciangin Topa in ama kiangah, “Nang kiangah kong gen mipa hih lai-ah hong paita hi. Amah pen ka mite’ tungah a uk ding pa ahi hi,” ci-in a gen hi. Tua ciangin Saul in kulhkongpi-ah Samuel va naihin, “Hong gen in; thumu pa’ inn koilai ahi hiam?” a ci hi. Samuel in Saul dawngin, “Keimah, thumu pa ka hi hi; mualtung a biakna-ah keima mai-ah na paito in; bang hang hiam cih leh nangmah in tuni-in kei tawh an na ne ding a, zingsang ciangin nang hong ciahsakin na lungsim a om khempeuh nang kiangah kong gen ding hi. Tuma ni thum lai-in a mang na late ahihleh, kimu khinta ahih manin tuate na lungsimah ngaihsun nawn kei in. Israel-te’ deihdeihte kua’ tungah om ahi hiam? Nang le na pa’ innkuante khempeuh tungah a om hi lo ahi hiam?” a ci hi. Saul in dawngin, “Kei pen Israel minamte sung panin a tawmpen Benjamin-te hi lo ka hi hiam? Keima innkuan, Benjamin minam innkuan khempeuh sung panin a niampen hi lo ahi hiam? Tua ahih ciangin bang hangin hih bangin kei tungah hong pau na hi hiam?” a ci hi. Tua ciangin Samuel in Saul le a nasempa samin inndei sungah paipih a, mihing sawmthum bang a pha a kisam mite lak tutna bul lamah a tusak hi. Tua ciangin Samuel in anhuan pa kiangah, “Nang kiangah kong piak, ‘Na tuam koih in,’ kong cih pawl hong paipih in,” a ci hi. Tua ahih ciangin anhuan pa in a khe le a kawngsa la-in Saul’ mai-ah a lui hi. Tua ciangin Samuel in, “Thei in, a kisit pen nang’ mai-ah hong kilui hi. Ne in; bang hang hiam cih leh leenglate tawh na nektheih nadingin a kiseh hun a cin mateng nang a dingin hong kisitsak ahi hi,” a ci hi. Tua ahih ciangin tua ni-in Saul in Samuel tawh an ne khawm hi. Amaute mualtung a biakna panin khuapi sungah a paisuk uh ciangin innkhumzangah Saul a dingin lupna khat na kiphah a, a ihmu dingin amah lumsuk hi. Khua a vak ciangin Samuel in innkhumzanga Saul samin, “Na paina dingah kong sawl theih nadingin tho in,” a ci hi. Tua ahih ciangin Saul tho-in, amah le Samuel, khuapi kongzingah a pai uh hi. Amaute khuapi nawlah a paikawmun Samuel in Saul kiangah, “I mai-ah na nasempa a paisuak nading gen inla, amah a paisuak khit ciangin nang’ tungah Pasian’ thute kong theihsak theih nadingin tawlkhat hih lai-ah khawl in,” a ci hi. Tua ciangin Samuel in sathau thawl khat la a, ama lu tungah buakin amah nam a, “ Topa in ama mi Israel-te tungah ulian dingin nang sathau hong nilh khin hi lo ahi hiam? Nangmah in Topa’ mite ukin a kiima om amau’ galte’ khutsung panin amaute na honkhia ding hi. Topa in ama luahte tungah ulian dingin nang sathau hong nilh khitna lim hih bang hi ding hi: Tuni-in kei kiang panin na paikhiat ciangin Benjamin-te’ gam Rachel’ han kiang Zelzah-ah mihing nih na tuak ding a, amaute in nang kiangah, ‘Pai a na zon late kimu khin a, tu-in na pa in late ngaihsun nawn loin nangmah hong lunghimawh a, “Ka tapa bang cih ding ka hi hiam?” ci hi,’ hong ci ding uh hi. Tua ciangin tua lai panin pai lai-in Tabor tawsaw lak na tung ding hi. Tua lai panin Bethel-a Pasian kiangah a paito, keelno thum a pua mi khat, anlum thum a pua adang khat, le leenggahzu savun thawl khat a pua mi khat, mi thum in nang hong dawn ding uh hi. Amaute in nang hong hopihin nangmah in amau’ tung panin na san ding anlum nih nang tungah hong pia ding uh hi. Tua khit ciangin Filistia khuacingte a omna Gibeath-elohim na tung ding hi. Tua khuapi sung na tun ciangin amaute mai-ah, harp lasakna, khuangneu, tamngai, le laiza lasakna tawh laamin awng kawmin mualtung a biakna panin hong paisuk kamsang honkhat na tuak ding hi. Tua ciangin Topa’ kha in khauhtakin nang hong uk ding a, amaute tawh laamin awng khawmin mi tuamdang khatin na kikheel ding hi. Hih limte nang tungah hong tun ciangin na tuah peuhpeuh na hih ding hi; bang hang hiam cih leh nang tawh Pasian hong om hi. Tua ciangin keima mai Gilgal-ah na paisuk ding hi. Meihal biaknate le thunuama biaknate a pia dingin nang kiangah kei zong kong pai ding hi. Nang kiangah kei hong pai-in na hih ding teng kong lah mateng, ni sagih sung na ngak ding hi,” a ci hi. Samuel nusia dingin a nunghei ciangin Pasian in ama tungah pianzia thak khat a pia hi. Tua ni-in Samuel’ gen limte khempeuh a piang hi. Gibeah-ah amaute a tun uh ciangin, kamsang honkhat in amah na dawn hi. Pasian’ kha in khauhtakin amah hong man takpi a, amah zong amaute’ lakah laamin a awng hi. Tua ciangin kamsangte tawh a gamtat khawmna, amah a theisa mi khempeuhte in a muh uh ciangin khatlekhat in, “Kish’ tapa’ tungah bang tung ahi hiam? Saul zong kamsang suak ahi hiam?” kici uh hi. Tua ciangin tua lai-a mite khat in dongin, “Hih kamsang dangte kua’ tate ahi uh hiam?” a ci hi. Tua ahih ciangin, “Saul nangawn kamsang suak hi,” cihna paunak a kipatna hong suak hi. Tua bangin laamin a otna a man ciangin mualtung a biakna tau omna-ah a pai hi. Saul’ pano in amah le a nasempa a muh ciangin, “Koi-ah pai na hi uh hiam?” a ci hi. Amah in, “Late a zong dingin ka pai uh hi. Late kimu zo lo ding ci-in ka theih uh ciangin Samuel kiangah ka pai uh hi,” a ci hi. Tua ciangin Saul’ pano in, “Kong thum hi; Samuel in nang kiangah hong gen teng kei tungah hong gen in,” a ci hi. Tua ciangin Saul in a pano kiangah, “Late a kimuh khitna ko kiangah teltakin hong kigen hi,” a ci hi. Ahih hangin Samuel in a gen kumpi suah nading thu tawh kisai ama tungah bangmah gen lo hi. Tu-in Samuel in Mizpah-a Topa’ kiangah mite khawm hi. Amah in Israel mite kiangah, “Israel-te’ Pasian, Topa in hih bangin ci hi: ‘Egypt panin Israel-te ka paikhiatpih a, Egypt-te’ khutsung le note hong nengniam kumpi gamte khempeuh’ khutsung panin note kong honkhia hi,’ ci hi. Ahih hangin note in na tuahsiatnate uh le na lungkhamnate uh panin note a hong honkhia na Pasian uh tuni-in na nial uh a, note in, ‘Kote’ tungah kumpi khat koih in,’ na ci uh hi. Tua ahih ciangin tu-in na minam nam uh le a tul tulin Topa’ mai-ah kilak un,” a ci hi. Tua ciangin Samuel in Israel minamte khempeuh a nai-ah hong paipih a, aisanna tawh Benjamin minam kila hi. Amah in Benjamin minamte a behbehin hong paipih a, aisanna tawh Matri innkuan kila hi. A tawpna-ah amah in Matri innkuan a mi malin hong paipih a, aisanna tawh Kish’ tapa Saul kila hi. Ahih hangin amaute in amah a zon uh ciangin amah kimu zo lo hi. Tua ahih ciangin amaute in Topa kiangah dongkik uh a, “Tua mipa hih lai-ah hong pai hiam?” ci uh a, Topa in, “En un, amahmah van kawm lakah bu hi,” a ci hi. Tua ciangin amaute tai-in tua lai mun panin amah hong paipih uh hi. Mite’ lakah amah a din ciangin mi khempeuh ama liangko ciang bek pha uh hi. Tua ciangin Samuel in mi khempeuh tungah, “ Topa in a teelsa mipa na mu uh hiam? Mi khempeuh lakah amah tawh a kibang khat zong om lo hi,” a ci hi. Tua ciangin mi khempeuh awngin, “Kumpipa khansau hen!” a ci uh hi. Tua ciangin Samuel in kumpipa’ thuneihna le a nasepte mite kiangah gen a, amah in tuate laibu khat sungah gelhin Topa’ mai-ah a koih hi. Tua ciangin Samuel in mi khempeuh amau’ inn ciatah a ciahsak hi. Saul zong Gibeah-a ama inn-ah ciah a, Pasian in amau’ lungsim a lawnsak mi thahatte zong amah tawh a pai uh hi. Ahih hangin bangmah a man lo mi pawlkhat in, “Hih mipa in eite hong bangci hotkhiat zawh ding ahi hiam?” a ci uh hi. Amaute in amah simmawhin ama kiangah letsong puak lo uh hi. Ahih hangin amah in tua mite bangmah cih lo hi. Tua ciangin Ammon mi Nahash a galkapte tawh paito-in Jabeshgilead umcih hi. Jabesh mite in Nahash kiangah, “Kote tawh kilemna hong bawl in; nangma na kong sem ding uh hi,” a ci uh hi. Ahih hangin Ammon mi Nahash in amaute kiangah, “Hih thu khat tawh note tawh kilemna ka bawl ding hi. Keimah in note’ taklam mittang khempeuh khelkhia-in Israel-te khempeuh tungah mindaina kong omsak ding hi,” a ci hi. Jabesh upate in ama kiangah, “Israel-te’ gam sung khempeuhah kamtaite ka sawltheih nadingun ni sagih sung a hun hong sot in. Tua ciangin kote hong honkhia ding kuamah a om kei le nang tungah kote kong kipia ding uh hi,” a ci uh hi. Saul’ khua Gibeah-ah kamtaite a tun uh ciangin amaute in mite kiangah a thu gen uh a, tua ciangin mi khempeuh a gingin kapkhia uh hi. Tu-in Saul a bawngtalte’ nung zui-in lo panin hong ciah hi. Saul in, “Amaute a kah nadingin bang in mite nasak ahi hiam?” a ci hi. Tua ahih ciangin amaute in Jabesh mite’ thute ama kiangah a gen uh hi. Saul in hih thute a zak ciangin Pasian’ kha in khauhtakin amah hanthawn a, nakpitakin a sin hong so hi. Amah in bawng leengkai kap khat la a, tuate go-in semnen a, kamtaite sawlin Israel gam khempeuhah khak a, “Saul le Samuel nung zui-in a kuankhia lo peuhmah a bawngtalte’ tungah hih bangin kihih ding hi,” ci-in a gen hi. Tua ciangin mite tungah Topa kihtakna hong tung a, mihing khat bangin amaute hong kuankhia uh hi. Amah in Bezek-ah amaute a kaihkhop ciangin Israel mite tul zathum pha a, Judah mite tul sawmthum pha hi. Amaute in a hong pai kamtaite kiangah, “Jabeshgilead mite tungah hih bangin gen un: ‘Zing ciang, sun hun ma-in note hong kihonkhia ding hi,’ ci un,” a ci hi. Kamtaite hong tungin Jabesh mite kiangah a gen uh ciangin amaute lungdam uh hi. Tua ahih ciangin Jabesh mite in Nahash kiangah, “Zing ciangin nang tungah kote kong kipia ding uh a, nangmah in hoih na sak bangbangin kote’ tungah nong hih ding hi,” a ci uh hi. A zing ciangin Saul in mite pawl thumin a khen hi. Tua ciangin amaute’ giahphual laizangah zingsang tungin hong pai uh a, sun nisat dong Ammon-te a satlum uh hi. A suakta mite kithehthang uh a, amaute mi nih nangawn a omkhopna om nawn lo hi. Tua ciangin mite in Saul kiangah, ”‘Saul in eite hong uk ding hiam?’ a cite kua ahi hiam? Amaute i thah theih nadingin a mite hong paipih in,” a ci uh hi. Ahih hangin Saul in, “Tuni-in mi khat zong kithat lo ding hi; bang hang hiam cih leh tuni pen Topa in Israel-te hong hotkhiat ni ahi hi,” a ci hi. Tua ciangin Samuel in mite kiangah, “Hong pai un; Gilgal-ah pai-in kumpi dingin Saul kipsak phakik ni,” a ci hi. Tua ahih ciangin mi khempeuh Gilgal-ah pai uh a, tua lai mun Topa’ mai Gilgal-ah Saul kumpi-in a koih uh hi. Amaute in tua lai Topa’ mai-ah thunuama biakna pia uh a, Saul le Israel mite khempeuh tua lai-ah nakpitakin lungdam khawm uh hi. Tua ciangin Samuel in Israel-te khempeuh tungah, “En un, note in keima kiangah nong gen uh thu khempeuh ka hong mang a, note tungah kumpi khat ka koih khin hi. Tu-in note’ makai pa pen kumpipa ahi hi. Keimah teekin ka sam kang ta a, ahi zongin note tawh ka tapate om hi. Ka neulai a kipan tuni dong note’ makai ka hi hi. Hih lai-ah ka om hi; ka mawhna a om leh Topa’ mai le a sathau nilh pa’ mai-ah ka mawhna hong pulak un. Kua’ bawngtal ka laksak hiam? Ahih kei leh kua’ la ka laksak hiam? Ahih kei leh kua khem ka hi hiam? Kua nengniam ka hi hiam? Ahih kei leh keima mit a tawsak dingin kua’ tung panin sumgolh la ngei ka hi hiam? Ka mawhna nong lah theih uhleh kong dinkik ding hi,” a ci hi. Tua ciangin amaute in, “Nangmah in kote nong khem kei a, zong nong nengniam kei a, mi khat peuhpeuh tung panin zong bangmah na la kei hi,” a ci uh hi. Tua ciangin amah in amaute kiangah, “Note in kei tungah bangmah na muh lohna thu uh Topa pen note’ langkhatah teci hi a, ama sathau nilh pa zong tuni-in teci ahi hi,” a ci hi. Tua ciangin amaute in, “Hi mah hi; Topa, i teci ahi hi,” a ci uh hi. Tua ciangin Samuel in mite kiangah, “Moses le Aaron teelin Egypt gam panin na pu na pate uh a paikhiatpih Topa, teci ahi hi. Tua ahih ciangin tuni-in note le na pu na pate uh a dingin Topa in hotkhiatna a sepna thu khempeuh Topa’ mai note’ tungah hong genin kong mawhsak theih nadingin ding lai dih un. Egypt-ah Jakob pai-in Egypt-te in amaute a netniam uh ciangin Topa’ tungah na pu na pate uh kiko uh a, Egypt panin na pu na pate uh paikhiatpihin hih lai munah amaute a tengsak ahi Moses le Aaron, Topa in a puak hi. Ahih hangin amaute in Topa a Pasian uh mangngilh uh hi. Tua ahih ciangin amah in Hazor kumpipa Jabin’ galkap mangpa Sisera’ tung le Filistia-te tung le Moab kumpipa tungah amaute zuak a, hih mite in amaute sim uh hi. Tua ciangin Topa tungah amaute kiko uh a, ‘Kote ka khial khin uh hi; bang hang hiam cih leh Topa nusia-in Baal-te le Ashtaroth na ka sem uh hi. Ahih hangin tu-in ka galte uh khutsung panin kote hong honkhia in; nangma na kong sem ding uh hi,’ a ci uh hi. Tua ciangin Topa in Jerubbaal, Barak, Jefthah, le Samuel hong sawl a, na kiim khempeuh uha na galte uh khutsung panin note hong honkhia a, note lungmuang takin na om uh hi. Tua ciangin note a sim dingin Ammon kumpipa Nahash hong kuanna na muh uh ciangin, Topa na Pasian uh na kumpi uh hi napi-in note in kei kiangah, ‘Kumpi khat in kote hong uk ding hi,’ na ci uh hi. “Tu-in note’ teelsa, note’ nget kumpipa en un; Topa in note’ tungah kumpi khat koih khinta hi. Note in Topa zahtakin ama na sem a, ama aw ngai-in Topa’ thupiakna na langpan’ kei uh a, note a hong uk kumpipa le na Pasian uh na zuih uhleh thu hong nuam ding hi. Ahih hangin note in Topa’ aw ngai loin Topa’ thupiakna na langpan’ uhleh Topa in note le na kumpipa uh hong langpan’ ding hi. Tua ahih ciangin tu-in taang loin ding unla, note’ muhna-ah Topa in a hih ding hih na lian en un. Tuhun pen mangbuh lak laitak hi lo ahi hiam? Amah in vanging le guah hong puaktheih nadingin Topa’ tungah thu ka ngen ding hi. Note a dingin kumpi khat na ngetna uh hangin Topa’ muhna-ah na gamtatnasa na gitlohna uh a liatna thu thei-in na mu ding uh hi,” a ci hi. Tua ahih ciangin Samuel in Topa’ tungah thu ngen a, Topa in tua ni-in van gingsakin guah zusak hi. Tua ciangin mi khempeuh in Topa le Samuel nakpitakin a zahtak uh hi. Tua ciangin mi khempeuh in Samuel kiangah, “Kote ka sih loh nadingun na nasemte a dingin Topa’ tungah thu ngen in; bang hang hiam cih leh ka khialhnasate uh banah kote a dingin kumpi khat ngenin ka khialhnate uh banah hih siatna ka behlap lailai uh hi,” a ci uh hi. Tua ciangin Samuel in mite kiangah, “Lau kei un; hih siatnate khempeuh na gamta khin uh hi. Ahi zongin Topa zuihna panin pial kei unla, na lungsim khempeuh uh tawh Topa’ na sem un. Meetna hong pia thei lo, hong hon thei lo, a mawkna milimte biakna lamah pial kei un; bang hang hiam cih leh tuate pen a mawkna ahi hi. Topa in ama min a khualna-in ama mite paaikhia lo ding hi; bang hang hiam cih leh ama mi-in note hong bawl nadingin Topa lungkim khin hi. Tua tham loin kei zong, note a dingin Topa’ tungah thunget lohna tawh ka na khial het kei ding a, keimah in a hoih a man lampite note kong hilh ding hi. Topa zahtak unla, na lungsim khempeuh uh tawh citakin ama na sem un; bang hang hiam cih leh note a dingin amah in na lian hong bawlsaksate ngaihsun un. Ahih hangin note na gamtat siat lai uhleh, note le na kumpipa uh, na nihun hong kiphiatkhia ding hi,” a ci hi. Saul in uk ding a kipatin kum sawmthum pha a, kum sawmnih le kum nih sung Israel-te a uk hi. Saul in Israel-te mihing tulthum teel hi. Tul nihte Mikmash le Bethel mualtung gamah Saul tawh om a, tul khatte Benjamin gam sung Gibeah-ah a tapa Jonathan tawh om uh a, midang a omlaite amau’ inn a puanbuk ciat uhah amah in ciahsak hi. Jonathan in Geba-ah a om Filistia-te’ khuacingte zo a, Filistia-te in tua thu za uh hi. Tua ciangin Saul in gam khempeuhah peengkul tum a, “Hebru mi khempeuh zasak un,” a ci hi. Tua ciangin Saul in Filistia khuacingte a zawhna le Filistia-te a dingin Israel-te a huathuai ahihna zong Israel-te khempeuh in za uh hi. Gilgal-ah Saul a pawm dingin mite kisamkhia hi. Tua ciangin Israel-te tawh a kido dingin Filistia-te kikhawmin, leeng tul sawmthum, sakol galkap tulguk, le a galkapte tuipi gei-a sehnel zahin tampi pha uh hi. Amaute hong paito-in Bethaven nisuahna lam Mikmash-ah phual sat uh hi. A galte in Israel mite neh mahmah ahih manin amaute haksatna sungah a omlam uh a kitheih uh ciangin suanghawm sung, leihawm sung, suang kawmlak, han lak, le tuikhukte sungah bu uh a, a dangte in Jordan ngahmun kantanin Gad le Gilead gamah galkah uh hi. Saul ahihleh Gilgal-ah omlai a, amah tawh a om mi khempeuh zong lau-in ling uh hi. Amah in Samuel’ seh hun, ni sagih sung a ngak hi. Ahih hangin Gilgal-ah Samuel hong pai lo a, ama kiang panin mite kithehthang hi. Tua ahih ciangin Saul in, “Meihal biakna le thunuama biakna hih lai kei kiangah hong paipih un,” a ci hi. Tua ciangin amah in meihal biakna a pia hi. Meihal biakna a piak a man khit phetin Samuel hong tung a, amah a dawn ding le a hopih dingin Saul paikhia hi. Samuel in, “Bang hih na hi hiam?” a ci hi. Saul in, “Kei kiang panin mite kithehthangin, a ni kiseh sungin nang lah hong tung lo a, Mikmash-ah Filistia-te a kikhopna ka muh ciangin keimah in, ‘Tu-in Filistia-te keimah hong hih dingin Gilgal-ah hong paisuk ding uh a, keimah in Topa’ maipha ka ngen nai kei hi,’ ka ci hi. Tua ahih ciangin kei mahmah kisawl tawmin meihal biakna ka pia hi,” a ci hi. Tua ciangin Samuel in Saul kiangah, “Na hai gamtat hi; Topa na Pasian’ hong thupiakna na zui kei hi; bang hang hiam cih le Topa in Israel-te tungah kumpi dingin nang le na suanlekhakte a kipsaksuak ding ahi hi. Ahih hangin tu-in na ukna kizomsuak lo ding a, Topa in ama lungsim bangin mi khat zong khin hi. Topa in nang hong thupiak zui lo na hih manin ama mite tungah ulian dingin Topa in amah seh khin hi,” a ci hi. Tua ciangin Samuel dingin Gilgal panin Benjamin-te’ gam sung Gibeah-ah paito hi. Tua ciangin Saul in amah tawh a om mite mihing zaguk bang kaikhawm hi. Saul, a tapa Jonathan, le amau tawh a om mite Benjamin-te’ gam sung Gibeah-ah om uh hi. Ahih hangin Filistia-te in Mikmash-ah phual sat uh hi. Tua ciangin Filistia-te’ giahphual panin galsimte pawl thumin hong kuankhia uh hi. Pawlkhatte Shual gam Ofrah lamah kihei-in, pawlkhatte Bethhoron lamah kihei a, pawlkhatte gamlak lam Zeboiim kuam a kimuh sukna gamgi lamah kihei uh hi. Tua laitakin Israel gam sung khempeuhah sikseek khat zong om lo hi. Tua ahih manin Filistia-te in, “Hebru mite in amau a dingin namsau ahi a, teipi ahi zongin hong seeksak kha ding hi,” a ci uh hi. Israel-te pen a lokhawhna tu, a hei, ahih kei leh a phiaukawi a seek hiam dingin Filistia-te kiangah paisuk zel uh hi. Lokhawhna tu le tuzum seek hiam thaman hamu bang hi a, hei seek hiam thaman le ciangkhutah sik phuh thaman mat khat bang ahi hi. Tua ahih ciangin galdo-in Saul le Jonathan tawh a om mite khat peuhpeuh khut sungah namsau ahi a, teipi ahi zongin om lo a, ahi zongin Saul le a tapa Jonathan in nei uh hi. Tua ciangin Filistia mite in Mikmash paina ciangka a cing dingin mi sawl uh hi. Ni khat ni-in Saul’ tapa Jonathan in ama galhiam a pua tangvalpa kiangah, “Hong pai in; gal khat-a Filistia khuacingte kiangah pai ni,” a ci hi. Ahih hangin amah in a pa kiangah a pai ding thu gen lo hi. Saul pen Migron-a om mang kawlsing nuai-a Gibeah nawlah om hi. Amah tawh a om mite zaguk bang pha a, Shiloh-ah Topa’ siampi Eli’ tapa Finehas, a tapa Ikhabod, a sanggampa Ahitub’ tapa Ahijah in siampipuan silh hi. Mite in Jonathan a paikhiat khitlam thei lo uh hi. Filistia khuacingte’ omna-ah pai ding Jonathan in a ngimna ciangka a pang khatah suangdawk khat omin, a pang langkhatah zong suangdawk khat mah om hi. A khat min Bozez hi a, a langkhat min Seneh ahi hi. Suangdawk khat pen Mikmash mai leilu lamah dawkin a khat pen Geba mai leitaw lamah dawk hi. Tua ciangin Jonathan in ama galhiam a pua tangvalpa kiangah, “Hong pai in; dawibia mi hih khuacingte kiangah va pai ni. Topa in eite a dingin hong hihsak kha ding hi. Bang hang hiam cih leh hotkhiat nadingin a tam a tawm in Topa nawngkaisak lo ding hi,” a ci hi. Tua ciangin a galhiam puapa in ama kiangah, “Na lungsim in a sawm khempeuh hih in. Nang tawh ka om a, nang lungsim mah bangin kei’ lungsim zong ahi hi,” a ci hi. Tua ciangin Jonathan in, “En in, hua mite kiangah galkahin amaute kiangah i va kilak ding hi. Amaute in, ‘Note kiangah kong pai mateng uh hong ngak un,’ hong cih leh i omna munah taang loin i om ding a, amaute kiangah i paito kei ding hi. Ahih hangin amaute in, ‘Ko’ kiangah hong paito un,’ hong cih leh eite i paito ding hi. Bang hang hiam cih leh Topa in eite’ khut sungah amaute hong pia khin hi. Hih pen eite a dingin lim hi ding hi,” a ci hi. Tua ahih ciangin Filistia khuacingte kiangah amau tegel va kilak uh hi. Filistia-te in, “En un, a bukna uh leivang panin Hebru mite hong pusuakkhia uh hi,” a ci uh hi. Khuacing mite in Jonathan le a galhiam puapa na hopih uh a, “Ko kiangah hong paito un; na khat kong lak ding uh hi,” a ci uh hi. Tua ciangin Jonathan in a galhiam puapa kiangah, “Ka nung hong zuito in; bang hang hiam cih leh Topa in Israel-te’ khut sungah amaute hong pia khin hi,” a ci hi. Tua ciangin Jonathan a khut le a khe tawh kahto-in a galhiam puapa a nungah pai hi. Jonathan in amaute vattuk a, a galhiam puapa in ama nungah amaute that hi. Jonathan le a galhiam puapa in a mi thah masak tungin lo ekah khat dung zui-in lo kaihna kuak dung tawnlang tan sungah mihing sawmnih bang si hi. Tua ciangin giahphual sung, gam sung, le mite lakah apkhapna om hi. Khuacingte le galsimte nangawn ling uh hi. Zin ling a, buaina lianpi mahmah khat hong suak hi. Benjamin-te’ gam sunga Gibeah-a Saul’ galvilte in a et uh ciangin hih lam hua lamah mihonte a kikhin muaimuai a mu uh hi. Tua ciangin Saul in amah tawh a omkhawm mite kiangah, “Mi sim unla, eite kiang panin kua paikhia hiam thei un,” a ci hi. Amaute in mi a sim khit uh ciangin, Jonathan le a galhiam puapa na om lo hi. Tua ciangin Saul in Ahijah kiangah, “Pasian’ Thuciamna Singkuang hih lai-ah hong paipih in,” a ci hi. Bang hang hiam cih leh tua hun laitakin Pasian’ Thuciamna Singkuang Israel mite tawh pai hi. Saul in siampipa a hopih laitakin Filistia-te’ giahphual a buaina hong lian semsem hi. Tua ciangin Saul in siampipa kiangah, “Tua Thuciamna Singkuang lenin Topa thu dot ding hun om nawn lo hi,” a ci hi. Tua ciangin Saul le amah tawh a om mi khempeuh kikhawmin galphualah pai uh hi. A galte khempeuh’ namsau in amau’ lawmte mah hih ciat a, kitawhnawina lianpi khat na om hi. Tu-in tua hun ma-in Filistia-te tawh omkhawm khinin giahphual ah amaute tawh a pai khinsa Hebru mite nangawn Saul le Jonathan tawh a omkhawm Israel-te tawh a kipawl dingin kihei uh hi. Tua mah bangin, Filistia-te a taina thu Efraim mualtung gamah a bu Israel mite khempeuh in a zak uh ciangin amaute in zong galphualah nakpitakin a nungdelh uh hi. Tua ahih ciangin Topa in Israel-te tua ni-in honkhia a, galkidona in Bethaven a kheng hi. Israel mite tua ni-in lungkham uh hi; bang hang hiam cih leh Saul in mite tungah kiciamna khat koih a, “Tu nitak mateng le ka galte ka thukzawh matengin an a ne pa in samsiatna ngah ta hen,” a ci hi. Tua ahih ciangin mite khat beek in an ciam lo uh hi. Mi khempeuh tulak a tun uh ciangin mun citengah khuaizu na om hi. Mite tulak a lut uh ciangin, a khuaizu taak a, ahih hangin kuamah in ciam ngam vet lo uh hi. Bang hang hiam cih leh mite in tua kiciamna kihta uh hi. Ahih hangin a pa in kiciamna tawh mite a thuhilhna Jonathan in za lo ahih ciangin amah in a khutsunga om a ciangkhut dawn dawk sakin khuaizu sungah diahin a ne hi. Tua ciangin a tha hatkik hi. Tua ciangin mite khat in, “Na pa in kiciamna khat tawh nakpitakin mite thuhilh a, ‘Tuni-in an a ne mipa in samsiatna ngah ta hen,’ ci hi,” a ci hi. Mite gim mahmah uh hi. Tua ciangin Jonathan in, “Ka pa in gam sung nawngkaisak hi; hih khuaizu tawmno khat ka ciapna hangin ka tha a hatkikna mu un. Mite in tuni-in a ut utun amau’ muhsa galte’ an kinusiate ne leh bangzah takin hoihzaw ding ahi hiam? Bang hang hiam cih leh tu-in Filistia-te i thah tamzo nai lo hi,” a ci hi. Amaute in tua ni-in Mikmash panin Aijalon ciang dong Filistia-te sattuk uh hi. Tua ciangin mite gim mahmah uh hi. Van kinusiate tungah mite va leengin, tuu le bawngtal le bawngnote a tuahtuahna munah go uh a, mite in tuate a si tawh a ne uh hi. Tua ciangin Saul kiangah thu kiko a, “A si tawh sa nekna hangin Topa’ tungah mite khial uh hi,” kici hi. Tua ciangin amah in, “Na zuau gamtat khin uh hi; suangtum lian khat hih lai kei kiangah hong khuk dih un,” a ci hi. Tua ciangin Saul in, “Mite lakah note pai-in amaute kiangah, ‘Mi khempeuh in a bawngtal ahi a, a tuu ahi zongin hih lai-ah hong paipihin go unla, a sa ne un; a si tawh nekna hangin Topa’ tungah khial kei un,’ ci un,” a ci hi. Tua ahih ciangin mi khempeuh in tua zanin a bawngtalte uh hong paipihin tua munah go uh hi. Tua ciangin Saul in Topa a’ ding biakna tau khat lam hi. Tua pen Topa a dingin a lam masak biakna tau ahi hi. Tua ciangin Saul in, “Filistia-te kiangah zanin paisukin zingsang khuavak dong amaute va sugawp ni; amaute mi khat zong siit kei ni,” a ci hi. Tua ciangin amaute in, “Hoih na sak peuhpeuh hih in,” a ci uh hi. Ahih hangin siampipa in, “Hih lai-ah Pasian kiang nai ni,” a ci hi. Tua ciangin Saul in Pasian kiangah thu dong a, “Filistia-te kiangah ka paisuk ding hiam? Israel-te’ khut sungah amaute nong pia ding hiam?” a ci hi. Ahih hangin tua ni-in amah in dawng lo hi. Tua ciangin Saul in, “Mi a makaite khempeuh aw, hih lai-ah hong pai un; hih mawhna tuni-in hong pianna thei unla mu un. Bang hang hiam cih leh Israel-te a honkhia Topa a nuntak mah bangin, ka tapa Jonathan’ tungah tua mawhna a om leh zong, amah a si taktak ding hi,” a ci hi. Ahih hangin mite lak panin amah a dawng ngam mi khat zong om lo hi. Tua ciangin amah in Israel-te khempeuh tungah, “Note langkhatah na om ding uh a, kei le ka tapa Jonathan a langkhatah ka om ding uh hi,” a ci hi. Tua ciangin mite in Saul kiangah, “Hoih na sak bangin hih in,” a ci uh hi. Tua ahih ciangin Saul in, “Israel-te’ Pasian Topa aw, bang hangin tuni-in na nasempa hong dawng lo na hi hiam? Hih mawhna kei tung ahi a, ka tapa Jonathan’ tungah ahi zongin a om leh, Israel-te’ Pasian Topa aw, Urim hong pia in; ahih hangin hih mawhna na mi Israel-te tungah om ahihleh Thummim hong pia in,” a ci hi. Tua ciangin Jonathan le Saul kila a, a midangte suakta hi. Tua ciangin Saul in, “Kei le ka tapa Jonathan kikalah ai san un,” a ci hi. Tua ciangin Jonathan kila hi. Tua ciangin Saul in Jonathan kiangah, “Na gamtatnasa hong gen in,” a ci hi. Jonathan in ama kiangah gen a, “Ka khutsunga om ciangkhut dawn tawh khuaizu tawmkhat ka ciam hi. Hih lai-ah ka om hi; kei a si dingin ka kiging hi,” a ci hi. Tua ciangin Saul in, “Nang na sih taktak kei taak leh Pasian in kei hong dawm kei ta hen, Jonathan aw,” ci-in a kiciam hi. Tua ciangin mite in Saul kiangah, “Israel-te sungah hih gualzawhna lian a piangsak Jonathan si ding ahi hiam? Hi dek peuhmah lo ding! Topa a nuntak mah bangin, a lu tunga samzang khat zong leilakah kialo ding hi; bang hang hiam cih leh amah in Pasian tawh tuni-in tua thu piangsak hi,” a ci uh hi. Tua ahih ciangin mite in Jonathan honkhia uh a, amah si lo hi. Tua ciangin Filistia-te a delhna panin Saul khawl a, Filistia-te zong amau’ munah a ciah uh hi. Saul, Israel-te tungah kumpi a suah khit ciangin mun khempeuha ama galte khempeuh, Moab-te, Ammon-te, Edom-te, Zobah kumpite, le Filistia-te a do hi. A galsimna peuhpeuhah amah gualzo tawntung hi. Amah in hangtakin hihin Amalek-te vatgawp a, amaute a sugawp mite’ khutsung panin Israel-te a honkhia hi. Tu-in Saul’ tapate pen Jonathan, Ishvi, le Malkhishua hi a, a tanu nihte: a uzaw min Merab hi a, a nauzaw’ min Mikhal hi a, Saul’ zi min Ahinoam hi a, Ahimaaz’ tanu ahi hi. A galkap mangpa’ min Abner hi a, Saul’ pano Ner’ tapa ahi hi. Saul’ pa Kish le Abner’ pa Ner pen Abiel’ tapate ahi uh hi. Saul’ nuntak sung khempeuh Filistia-te tawh nakpi taka kidona om hi. Saul in, mi thahat khat peuhpeuh ahi a, mi hang khat peuhpeuh ahi zongin a muh ciangin, tua mipa ama galkap dingin pawlbawl pahpah hi. Samuel in Saul kiangah, “ Topa in ama mi Israel-te tungah kumpi dingin nang sathau a nilh dingin kei hong sawl hi. Tua ahih ciangin tu-in Topa’ thugen ngai in. Vanglian Topa in hih bangin ci hi: ‘Amaute Egypt panin hong paikhiat lai-in amaute in lampi-ah Israel-te a nialna uh hangin Amalek mite gim ka pia ding hi. Tu-in pai-in Amalek mite vatgawp unla, amaute’ neih khempeuh susiamang khin un. Amaute siit loin, numei le pasal, naupang le nawine laite, bawngtal le tuu, kalaoh le la, that un,’ ci hi,” a ci hi. Tua ahih ciangin Saul in Israel mite sam a, Telaim-ah khe galkap mi tul zanih le Judah mi tul sawm kaikhawm hi. Tua ciangin Amalek khuapi-ah Saul hong pai-in kuam sungah pangsim hi. Tua ciangin Saul in Ken mite kiangah, “Pai un; kihemkhia un. Amalek mite lak panin paikhiasuk un. Tua hikeileh amaute tawh note kong susiakhawm kha ding hi. Bang hang hiam cih leh Egypt panin Israel-te hong paikhiat lai-in amaute khempeuh tungah migitna na lak uh hi,” a ci hi. Tua ahih ciangin Amalek mite lak panin Ken mite kihemkhia uh hi. Tua ciangin Saul in Havilah panin Egypt nisuahna lama om Shur ciang dong Amalek-te zo hi. Amah in Amalek-te’ kumpipa Agag a hingin man a, mi khempeuh namsau tawh thatmang hi. Ahih hangin Saul le mite in Agag, le a hoihpen tuute, bawngtalte, gannote, tuunote le a hoih khempeuh khawi uh a, tuate thatmang khin lo uh hi. A kisimmawh bangmah a man lo khempeuh amaute in thatmang uh hi. Topa’ thu Samuel tungah hong tung hi: “Kumpi-in Saul ka koih ka kisik hi. Bang hang hiam cih leh amah pen keimah zuihna panin kihei kik a, ka thupiaknate sem lo hi,” a ci hi. Tua ciangin Samuel heh hi; zan tawntung Topa’ tungah kiko hi. Tua ciangin Saul a dawn dingin zingsangin Samuel tho baih hi. Samuel kiangah, “Karmel-ah Saul hong pai hi. Amah in ama a dingin phawkna mual khat phutin, kihei-in paisuak a, Gilgal-ah paisuk hi,” kici hi. Tua ciangin Samuel hong pai a, Saul in ama kiangah, “ Topa’ thupha na tungah hong tung hen. Topa’ thupiakna ka sem khin hi,” a ci hi. Tua ciangin Samuel in, “Tua ahihleh ka bil-a tuu hamna le ka zak bawngtalte’ hamna bang ahi hiam?” a ci hi. Saul in, “Amaute in Amalek-te kiang panin tuate hong paipih uh hi; bang hang hiam cih leh Topa na Pasian tungah biakna piak nadingin a limci pen tuute le bawngtalte mite in siit uh a, a dangte ka thatmang khin uh hi,” a ci hi. Tua ciangin Samuel in Saul kiangah, “Khawl in! Topa in tuzanin kei kiangah hong gen thu nang kiangah kong gen ding hi,” a ci hi. Tua ciangin amah in Samuel kiangah, “Hong gen in,” a ci hi. Tua ciangin Samuel in, “Nang na kineu ngaihsut hun a om hangin, tu-in nang pen Israel minamte’ lutang hi lo na hi hiam? Topa in Israel-te tungah kumpi-in nang sathau hong nilh hi. Topa in nasem dingin nang hong sawl a, ‘Pai in; mawhnei Amalek mite va susiamang inla, amaute a bei mateng va simgawp in,’ hong ci hi. Tua ahih ciangin bang hangin Topa’ thu mang lo na hi hiam? Bang hangin vankinusiate bawhin Topa’ muhna-ah a sia gamta na hi hiam?” a ci hi. Tua ciangin Saul in Samuel kiangah, “Keimah in Topa’ thu ka mang a, Topa in hong sawl nasepna-ah pai khinin, Amalek kumpipa Agag kong ciahpih khin a, Amalek mite ka susiamang khin hi. Ahih hangin mite in a kinusiate, tuute le bawngtalte, suksiat dinga a ki-ap na hoihpente Gilgal-ah Topa na Pasian piak dingin la uh hi,” a ci hi. Tua ciangin Samuel in, “ Topa in meihal biaknate le biakpiaknate Topa’ thu man’ ding zahin deih ahi hiam? En in, biakpiakna sangin thu man’ ding hoihzaw a, tuutal thaute sangin thu ngaih ding hoihzaw hi. Bang hang hiam cih leh lehdona pen aisan mawhna bangmah hi a, lungkhauhna pen mawhna le milim biakna mah a bang ahi hi. Nangmah in Topa’ thu nial khin na hih manin, amah in zong kumpi hihna pan nang hong nolh khin hi,” a ci hi. Tua ciangin Saul in Samuel kiangah, “Ka khial khin hi; bang hang hiam cih leh keimah in mite kihta-in amau’ thu mangkha ka hih manin Topa’ thupiakna le nangma thute ka palsat khin hi. Tua ahih ciangin tu-in kong thum hi; ka khialhna hong maisak inla, Topa ka biaktheih nadingin kei hong lehzuihkik in,” a ci hi. Tua ciangin Samuel in Saul kiangah, “Nang tawh kong kilehkik kei ding hi; bang hang hiam cih leh nangmah in Topa’ thu na nial khin a, Israel-te’ tungah kumpi hihna panin Topa in nang hong nolh khin hi,” a ci hi. A paikhia dingin Samuel a kihei laitakin Saul in a puantualpi mongin len a, a puan kikeek hi. Tua ciangin Samuel in ama kiangah, “ Topa in Israel-te’ kumpi gam nang’ tung panin tuni-in balkhia-in nang sangin a hoihzaw na vengpa tungah pia khin hi. Israel-te’ minthang Pasian in zong zuau gen lo ding a, zong kisik lo ding hi; bang hang hiam cih leh a kisik dingin amah mi hi lo hi,” a ci hi. Tua ciangin amah in, “Ka khial khin hi; ahi zongin tu-in keima mi upate mai le Israel-te’ mai-ah kei hong pahtawi inla, Topa na Pasian ka biaktheih nadingin kei hong zuikik in,” a ci hi. Tua ahih ciangin Saul’ nung zui-in Samuel kilehkik a, Saul in Topa a bia hi. Tua ciangin Samuel in, “Amalek-te’ kumpi Agag hih lai ka kiangah hong paipih in,” a ci hi. Tua ciangin Agag launa linna tawh ama kiangah hong pai hi. Agag in, “Sih ding lungkhamna hong tung taktak ta hi,” a ci hi. Tua ciangin Samuel in, “Na namsau in nute ta bei-in a bawl mah bangin na nu zong ta bei hi ta ding hi,” a ci hi. Tua ciangin Samuel in Topa’ mai Gilgal-ah Agag a semnen hi. Tua ciangin Ramah-ah Samuel pai a, Gibeah-a a inn-ah Saul zong a ciahto hi. Samuel in ama sih ni dong Saul mukik lo a, ahih hangin Saul’ hangin Samuel a dah hi. Israel-te tungah kumpi-in Saul a koih manin Topa kisik hi. Topa in Samuel kiangah, “Israel-te tungah kumpi hihna panin amah ka nolhkhitna mu napi-in Saul’ hangin bang tanvei dah ding na hi hiam? Na sathau biingah sathau thun inla, pai in; Bethlehem mi Jessi kiangah kong sawl ding hi. Bang hang hiam cih leh ama tapate lak panin keima-a’ ding kumpi khat ka la khin hi,” a ci hi. Samuel in, “Bangci pai theih ding ka hi hiam? Saul in za le amah in kei hong that ding hi,” a ci hi. Tua ciangin Topa in, “Bawngla khat paipih inla, ‘ Topa’ tungah biakna pia dingin kong pai hi,’ ci in. Biakpiakna-ah Jessi sam in. Na hih ding teng na tungah kong lak ding a, nang tungah a min kong gen pa sathau nong nilhsak ding hi,” a ci hi. Topa’ thupiak bangin Samuel gamta-in Bethlehem-ah a pai hi. Tua khuapi upate a lingsa-in amah a dawn dingin hong pai uh a, “Thuhoih a hong pai na hi hiam?” a ci uh hi. Amah in, “Thuhoih hi; Topa’ tungah biakna a pia dingin kong pai hi. Note ki-ap unla, biakpiakna-ah kei tawh hong pai un,” a ci hi. Amah in Jessi le a tapate apin, biakpiakna-ah amaute a sam hi. Amaute hong tun ciangin amah in Jessi’ tapa Eliab enin, “ Topa’ sathau nilh pa ama mai-ah om taktak hi,” ci-in a ngaihsun hi. Ahih hangin Topa in Samuel kiangah, “A tungtham hitaleh a tun sanna hitaleh en kei in. Bang hang hiam cih leh amah ka nolh hi. Topa in mihingte’ muh bangin mu lo hi. Mihingte in a pualam a kilangte en a, ahih hangin Topa in a lungsim en hi,” a ci hi. Tua ciangin Jessi in a tapa Abinadab samin Samuel mai-ah a paisak hi. Amah in, “ Topa in hih pa zong teello hi,” a ci hi. Tua ciangin Jessi in Shammah paisak hi. Amah in, “ Topa in hih pa zong teello hi,” a ci leuleu hi. Jessi in a tapate a sagihna dongin Samuel mai-ah paisak hi. Samuel in Jessi kiangah, “ Topa in hih mite teello hi,” a ci leuleu hi. Tua ciangin Samuel in Jessi kiangah, “Na tapate khempeuh hih lai-ah a omkim mah ahi hiam?” a ci hi. Jessi in, “A nautum pen omlai a, ahih hangin amah tuu cingin om hi,” a ci hi. Tua ciangin Samuel in Jessi kiangah, “Hih lai-ah amah hong tun mateng eite in bangmah dang i hih thei kei ding hi,” a ci hi. Amah in David samsakin amah hong tumpih hi. Amah in cidam mel pua-in, a mitte hoih a, a mel hoih hi. Tua ciangin Topa in, “Ding in; amah sathau nilh in; hih pa ahi hi,” a ci hi. Tua ciangin Samuel in a sathau biing sunga sathau la-in a sanggamte laizangah amah sathau a nilh hi. Tua ni a kipanin Topa’ kha in khauhtakin David hong uk hi. Tua ciangin Samuel dingin Ramah-ah a ciah hi. Tu-in Saul’ tung panin Topa’ kha paikhia a, Topa in kha gilo sawlin tua kha gilo in amah gimsak hi. Saul’ nasemte in ama kiangah, “Tu-in en in, Pasian’ hong sawl kha gilo in nang hong gimsak hi. Tu-in na mai-a om nasemte in laiza lasakna a tumsiam mi khat a zon nadingin ka topa un na nasemte thu pia in. Pasian’ hong sawl kha gilo na tungah hong tun ciangin amah in tua hong tum ding a, tua ciangin na ci hong dam ding hi,” a ci uh hi. Tua ahih ciangin Saul in a nasemte kiangah, “Limtakin a tum thei khat kei a dingin hong zong unla, ka kiangah amah hong paipih un,” a ci hi. Tangvalte khat in dawngin, “En un, Bethlehem mi Jessi’ tapa, a tumsiam, a thahat, a galhang mi, thugen a siam, a omnuam mi khat ka mu a, Topa in amah a ompih mi khat ahi hi,” a ci hi. Tua ahih ciangin Saul in Jessi kiangah kamtaite sawl a, “Na tapa David, tuute tawh a om pa, kei’ kiangah hong sawl in,” a ci hi. Tua ciangin Jessi in anlum, leenggahzu savun thawl khat, le keelno khat a pua ding la khat la-in, Saul kiangah tuate a tapa David puaksak hi. Saul kiangah David hong tung a, ama nasepna-ah a lut hi. Saul in amah nakpitakin it a, amah pen a galhiam puapa a suak hi. Saul in Jessi kiangah mi sawlin, “Keima nasepna-ah David hong omsak in. Amah ka pahtak mahmah mi khat ahi hi,” cisak hi. Pasian’ sawl kha gilo Saul’ tungah a om peuhmah ciangin David in a laiza la-in a khut tawh tum ahih ciangin Saul thaksuakin a ci dam a, ama kiang panin kha gilo kihemkhia hi. Tu-in Filistia-te in galsim dingin a galkapte uh khawmin Judah gam Sokoh-ah amaute kituah uh a, Sokoh le Azekah kikal Efesdammim-ah giahphual sat uh hi. Tua ciangin Saul le Israel mite kikhawmin Elah kuamah giahphual sat uh a, Filistia-te a do dingin kithawi uh hi. Filistia-te a gal mualtungah ding uh a, Israel-te a galkhat mualtungah dingin, amaute’ kikalah kuam khat om hi. Filistia-te’ giahphual panin Gath khuami Goliath a kici a makai, a tun pi kua val a sang mi khat hong paikhia hi. Amah in a lu tungah sumngo sik lukhu khu-in, sik puan tawh amah kithawi a, a puan gihna sumngo shekel tulnga ahi hi. Amah in a khete tungah sumngo ngaltuam bulh a, a liangko-ah sumngo teipi khawh kikhai hi. A teibul siam lawngpi cia bang pha a, a teipak sik shekel zaguk gik a, ama mai-ah a lum puapa a pai hi. Amah dingin Israel uliante otsanin, “Galdo dingin bang hangin hong kuankhia ngam na hi uh hiam? Kei, Filistia mi hi-in, note, Saul’ nasemte hi lo na hi uh hiam? Note a dingin mi khat teel unla, tua mipa kei kiangah hong paisuksak un. Amah in kei hong do-in hong thah zawh leh kote na nasemte ka hi ding uh a, ahih hangin keimah in amah zo-in ka thah leh note, komau’ nasem na hi ding uh hi,” a ci hi. Tua ciangin tua Filistia mipa in, “Tuni-in Israel uliante kong to hi. I kido theih nadingin mi khat hong pia un,” cithuah lai hi. Saul le Israel-te khempeuh in Filistia mipa’ kammalte a zak uh ciangin amaute lungkia-in nakpitakin a lau uh hi. David pen Judah gam Bethlehem khua-a om Efrathah mi, tapa giat a nei Jessi min a nei pa’ tapa ahi hi. Saul’ hun lai-in tua mipa teek zo-in kum tampi pha ta hi. Jessi’ tapa a u pen thumte in galdona-ah Saul zui khin uh hi. Gal sungah a pai a tapa thumte’ min pen, a ta upa Eliab, ama zomah Abinadab, le a thumna Shammah ahi hi. David, a nautum pen hi a, a upa pen thumte in Saul zui a, ahih hangin Bethlehem-a a pa’ tuute a vak dingin Saul’ kiang panin David ciah zelzel hi. Ni sawmli sung zing le nitakin Filistia-pa hong pai-in hong ding zelzel hi. Tua ciangin Jessi in a tapa kiangah, “Hih ankan seu khat le hih anlum sawm na ute puak dingin guang inla, na ute kiang giahphual ah manlangin va puak inla, a tul a ukpa kiangah zong hih sathaukhal sawmte puak in. Na ute’ omdan va mu inla, amau’ omzia a kitheihna lim pawlkhat hong ciahpih in,” a ci hi. Tua laitakin Filistia-te tawh kido-in Saul le amaute, le Israel mite khempeuh, Elah kuamah om uh hi. Tua ciangin Jessi in a thupiak bangin zingsangin David tho baihin, a kem ding midang khat tawh a tuute nusia a, a ante pua-in a pai hi. Mihonte giahphual ah pai-in galdo kikona a ot laitakun amah giahphual va tung hi. Israel-te le Filistia-te, galkap le galkap a kido dingin kinaih uh hi. David in van cing pa’ khut sungah a nate nusia-in galkapte kiangah va tai a, pai-in a ute va hopih hi. Amaute tawh a kiho laitakin, Gath khuami Filistia-te a makaipi Goliath min nei pa, Filistia uliante lak panin hong paikhia-in a masa-a mah bangin kam hong pau hi. David in ama kampau a za hi. Israel mite khempeuh in tua mipa a muh uh ciangin ama kiang panin taikhia uh a, lau mahmah uh hi. Israel mite khatlekhat kiho-in, “Hih hong paikhia mipa na mu ngei uh hiam? Israel-te a to dingin hong paito takpi hi. Amah a that mipa tungah kumpipa in sum tampi pia-in, ama tanu zong pia ding a, a pa’ innkuante, Israel sungah aana nasep le siah khempeuh kipengsak ding hi,” a ci uh hi. David in ama kianga ding mite kiangah, “Hih Filistia-pa thatin Israel-te’ tung panin hih mindaina a beisak pa a dingin bang kihih ding ahi hiam? A nungta Pasian’ galkapte a to dingin hih dawibia Filistia-pa kua ahi hiam?” a ci hi. Mite in a kibang mahin dawng uh a, “Amah a that mipa tungah tua bang tua bangin kihih ding hi,” a ci uh hi. David in mite kiangah thu a gen laitakin ama u a upen Eliab in a za hi. David tungah Eliab heh mahmah ahih manin, “Bang hangin hong paisuk na hi hiam? Tua tuu tawmkhatte gamlakah kua tawh nusia na hi hiam? Na kihaimuanna le na lungsim gitlohna ka thei hi. Bang hang hiam cih leh galkidona a en dingin nong paisuk hi,” a ci hi. David in, “Bang hih ka hi hiam? Kam bek hi lo ahi hiam?” a ci hi. Tua ciangin ama kiang panin midang khat kiangah kihei-in a kibang mahin thu dong a, mite in a masa-a mah bangin amah dawngkik uh hi. David’ kampaute a kizak ciangin amaute in Saul kiangah gen uh a, Saul in amah samsak hi. Tua ciangin David in Saul kiangah, “Ama hangin kuamah lungkiasak kei in. Na nasempa pai-in hih Filistia-pa tawh ka va kido ding hi,” a ci hi. Saul in David kiangah, “Hih Filistia-pa tawh a kido dingin ama langkhatah na kuanzo kei ding hi. Nang pen tangval na hi pan a, amah pen a tangval a kipan galkap mi ahi hi,” a ci hi. Ahih hangin David in Saul kiangah, “Na nasempa in a pa’ tuute a kem zel hi. Humpinelkai ahi a, vom ahi zongin hong pai-in tuute lak panin tuuno a mat ciangin, a nungah delhin vatgawpin a kamsung panin tuuno ka honkhia hi. Kei hong hih dingin amah hong ding leh keimah in a ngawngin manin vatgawpin ka that hi. Na nasempa in humpinelkai le vomte that khin ngei hi. Amah in a nungta Pasian’ galkapte ninsak ahih manin dawibia hih Filistia-pa pen tuate khat tawh kibang lel ding hi,” a ci hi. Tua ciangin David in, “Humpinelkai khecin le vom khecin panin kei a hong honkhia Topa in hih Filistia-pa’ khutsung panin zong kei hong honkhia ding hi,” ci thuah lai hi. Tua ciangin Saul in David kiangah, “Pai in; Topa in nang hong ompih ta hen!” a ci hi. Tua ciangin Saul in a galvante David pia a, amah in a lu tungah sumngo lukhu khusakin, sik puan silhsak hi. Tua ciangin David in a galdalnate tungah a namsau khih a, amah kingeinaseh lo ahih manin lam pai dingin a kithawi leh pai thei lo hi. Tua ciangin David in Saul kiangah, “Hihte tawh lam ka pai thei kei hi; bang hang hiam cih leh ka kingeinaseh kei hi,” a ci hi. David in tuate suahkhia hi. Tua ciangin amah in a khutah a ciangkhut tawi-in, lui panin suangmai tang nga tengin a tuucin thungip sungah tuate koih hi. A khut sungah a suanglotna tawi a, Filistia-pa’ nai-ah a pai hi. Tua ciangin a mai-ah a lum puapa tawh Filistia-pa hong pai-in David hong naih hi. Filistia-pa khuadakin David a muh ciangin amah in simmawh hi; bang hang hiam cih leh amah a tangval pan, a cidam tuak, a melhoih khat hi lel hi. Tua ciangin Filistia-pa in David kiangah, “Ui hong sa a, ciangkang tawh sat hong sawm na hi hiam?” a ci hi. Filistia-pa in a pasian-te’ min tawh David samsia hi. Filistia-pa in David kiangah, “Ka kiangah hong pai in. Huih lak vasate le gamlak gamsate tungah na sa ka pia ding hi,” a ci hi. Tua ciangin David in Filistia-pa kiangah, “Namsau, teipi, le teikhawh tawh kei kiangah nang nong kuan hi. Ahih hangin kei pen Israel galkapte’ Pasian, a Vanglian Topa, nangmah in na to mipa’ min tawh nang kiangah kong kuan hi. Tuni-in Topa in ka khut sungah nang hong pia ding a, keimah in nang hong sattukin na lu ka tankhia ding hi. Tua ciangin tuni-in huihlak vasate le leitung ganhingte tungah Filistia mi a site’ luanghawmte ka pia ding hi. Israel sungah Pasian khat a omlam leitung mi khempeuh in a theih nading, le Topa in namsau le teipi tawh a hotkhiat lohna thu hih lai-a a om khempeuh in a theih nading ahi hi. Bang hang hiam cih leh galdona pen Topa a’ hi a, amah in kote’ khut sungah note hong pia ding hi,” a ci hi. David tawh a kituah dingin Filistia-pa dingin hong pai a, hong nai ciangin David zong Filistia-pa tawh a kituah dingin gal mai-ah a delh hi. Tua ciangin David in a khutin a thungip sawkin suangtang khat la a, a kap leh Filistia-pa’ taltang a kha hi. A taltangah a suangtang tum a, leilakah amah maipuk hi. Tua ahih ciangin David in suanglotna khat le suangtang khat tawh Filistia-pa zo-in a that hi. David’ khut sungah namsau om lo hi. Tua ciangin David tai-in ama tungah ding a, Filistia-pa’ namsau mah a paai panin dok a, amah thatin tua tawh a lu a tankhia hi. Filistia-te in a makai pa uh a sihna a theih uh ciangin a taikeek uh hi. Tua ciangin Israel-te le Judah-te awngin ding uh a, Gath le Ekron kulhkongpi ciang dong Filistia-te delh uh ahih manin Shaarim panin Gath le Ekron ciang dong Filistia mi a liamte puk uh hi. Tua ciangin Filistia-te a delhna panun Israel-te hong ciahkik uh a, amaute in a giahphual uh luhsak uh hi. David in Filistia-pa’ lutang la-in Jerusalem-ah paipih a, ahih hangin a galvan teng ama puanbukah a koih hi. Filistia-pa do-in David a kuankhiatna Saul in a muh ciangin galkap mangpa Abner kiangah, “Abner aw, hih tangvalpa kua’ tapa ahi hiam?” a ci hi. Abner in, “Kumpipa aw, ka thei kei hi,” a ci hi. Tua ciangin kumpipa in, “Tangvalpa kua’ tapa ahi hiam, kan in,” a ci hi. Filistia-pa a thahna panin David hong ciah ciangin Abner in amah samin a khutsunga Filistia-pa’ lutang tawh Saul’ mai-ah a paipih hi. Saul in ama kiangah, “Tangvalpa aw, kua’ tapa na hi hiam?” a ci hi. David in dawngin, “Bethlehem khuami na nasempa Jessi’ tapa ka hi hi,” a ci hi. David le Saul a kiho khit a kipanin Saul’ tapa Jonathan in ama pumpi zahin David a it hi. Saul in tua ni a kipanin ama kiangah David omsak a, a pa’ inn-ah ciahsak lo hi. Jonathan in ama pumpi zahin David it ahih manin amah tawh thuciamna khat a bawl hi. Jonathan in ama silhlai a puantualpi suahin David pia a, a galkidalna le a namsau nangawn le a thal le a kawnggak zong a pia hi. Saul in a sawlna mun khempeuhah David in a maa tun hi. Tua ahih ciangin Saul in galkapte a uk dingin amah a koih hi. Mi khempeuh le Saul’ nasemte in zong hih thu hoih a sa uh hi. Filistia-pa a thahna panin David ciahin, amaute in inn lam a zuat uh ciangin Israel khuapi khempeuh sung panin kumpi Saul a dawn dingin khuangtung le lasaknate tawi-in numeite a laam kawmin hong kuankhia uh hi. Amaute gualnuamin numeite khatlekhat in, “Saul in a tulin that, David in a tul sawmin that,” kici uh hi. Saul heh mahmah a, hih thugenna in amah lungkim lo sak hi. Amah in, “Amaute in David tungah a tul sawmin pia-in, kei tungah a tulin hong pia bek uh hi. Kumpi min puak cih simloh bang dang nei nawn ka hi hiam?” a ci hi. Tua ni a kipan Saul in David encik hi. A zing ciangin Pasian’ sawl kha gilo in Saul hong bawh a, nisimin David in a hih ngei bangin laiza lasakna a tum laitakin ama innsung tengah Saul hang gawp hi. Saul in a khut sungah a teipi tawi hi. Saul in a teipi-in David nih vei a khawh hi; bang hang hiam cih leh, “Kawm tawh David ka khawhcip ding hi,” ci-in ngaihsun hi. Ahih hangin David in a nih vei mahin na pelhthei hi. Saul in David kihta hi; bang hang hiam cih leh Topa in amah ompih a, ahih hangin Saul kiang panin amah kihemkhia khinta hi. Tua ahih ciangin Saul in a omna panin David lakhia-in mihing tulkhat a ukin koih a, mite a makai-in amah kuankhia-in hong ciah hi. David in a sepna khempeuhah a maa tun hi; bang hang hiam cih leh Topa in amah ompih hi. Amah in matutzawhna lianpi a neihlam Saul in a muh ciangin amah lamdang sa-in om hi. Ahih hangin Israel-te khempeuh le Judah-te khempeuh in David it uh hi; bang hang hiam cih leh amaute makaihin amah kuankhia-in hong ciah hi. Tua ciangin Saul in David kiangah, “Hih lai-ah ka tanu uzaw Merab om hi. Nang tungah zi dingin kong pia ding hi. Kei a dingin hang peuh inla, Topa’ gal do in,” a ci hi. Bang hang hiam cih leh Saul in, “Keima khut sungah amah si loin Filistia-te’ khut sungah si hen,” ci-in ngaihsun hi. David in Saul kiangah, “Kei pen kumpipa’ makpa ka hih nadingin kei, bang hi a, Israel-te tungah ka tanaute, ka pa’ innkuante bang ahi hiam?” a ci hi. Ahih hangin David’ tungah Saul’ tanu Merab a kipiak ding laitakin Meholah mi Adriel tungah a zi dingin kipia hi. Tu-in Saul’ tanu Mikhal in David ngai hi. Saul kiangah hih thu a kigen ciangin Saul a lungdam hi. Saul in, “Ama a dingin ka tanu pen thangzak ahih theih nading le Filistia-te’ khut sungah a sihtheih nadingin ama tungah ka tanu pia ning,” ci-in ngaihsun hi. Tua ahih ciangin Saul in David kiangah a nih veina genin, “Nang pen tu-in ka makpa na hi ding hi,” a ci hi. Saul in a nasemte thu pia a, “David kiangah thu tuam genpih unla, ‘En in, nang tungah kumpipa lungkim a, ama nasemte khempeuh in nang hong it hi. Tua ahih ciangin tu-in kumpipa’ makpa suak in,’ ci un,” a ci hi. Saul’ nasemte in David kiangah hih thute gen uh hi. David in, “Kei pen mizawng hi-in a zahtakhuai lo ka hihna mu napi-in kumpipa’ makpa suah ding a thuneu sa na hi uh hiam?” a ci hi. Tua ciangin Saul’ nasemte in ama kiangah, “Tua bang tua bangin David in gen hi,” a ci uh hi. Tua ciangin Saul in, “David kiangah hih bangin na gen ding uh hi: ‘Kumpipa in a galte a thukkik theih nadingin Filistia-te’ zangteep zakhat cih simloh kumpipa in moman deih lo hi,’ ci un,” a ci hi. Tu-in Saul in Filistia-te’ khut tawh David sihsak ding ngaihsun hi. Saul’ nasemte in David kiangah hih thute a gen uh ciangin kumpipa’ makpa ahih ding David a lungkim hi. A hun a bei ma-in, David dingin ama mite tawh pai a, Filistia mi zanih that hi. Tua ciangin amah kumpipa’ makpa a suahtheih nadingin kumpipa tungah a cingin a kipia amaute’ zangvun teepte David in hong paipih hi. Saul in a tanu Mikhal ama zi dingin a pia hi. Ahih hangin Topa in David a ompihna le Israel-te khempeuh in amah a itna thu Saul in a muh ciangin David a kihta semsem hi. Tua ahih ciangin Saul pen David’ gal hi tawntung hi. Tua ciangin Filistia mi uliante galsim dingin hong kuankhia uh a, amaute hong kuankhiat simin Saul’ nasem dangte khempeuh sangin David in a maa tunzaw hi. Tua ahih manin mite in David thupi muh semsem hi. Tua ciangin Saul in David thah ding a ngaihsutna thu a tapa Jonathan le a nuai-a ulian khempeuh kiangah a gen hi. Ahih hangin Saul’ tapa Jonathan in David diksa mahmah hi. Jonathan in David kiangah, “Ka pa Saul in nang thah hong sawm hi. Tua ahih ciangin zingsang ciangin kidawm inla, mun simtham khatah omin bu in. Kei paikhia-in nangma bukna phual nai-ah ka pa kiangah ka ding ding a, nangma thu ka pa kiangah ka gen ding hi. Ama tung panin phawk ka neih leh nang kiangah kong gen ding hi,” a ci hi. Jonathan in a pa Saul kiangah David’ thu a hoihin genin ama kiangah, “Kumpipa, a nasempa David tungah khial kei in; bang hang hiam cih leh nang tungah amah hong khial lo a, ama nasepnate nang a dingin nasep hoih ahi hi. Amah in a nuntakna pia ngamin Filistia-pa that a, Topa in Israel-te khempeuh a dingin gualzawhna lianpi piangsak hi. Nangmah in hih thu na mu a, na lung a dam hi. Tua ahih ciangin bang hangin thu om lopi-in David thahna tawh a mawhbaang lo mipa tungah khial ding na hi hiam?” a ci hi. Saul in Jonathan’ thu mang hi. Saul kiciam a, “ Topa a nungta ahih mah bangin amah kithat lo ding hi,” a ci hi. Tua ciangin Jonathan in David samin, Jonathan in hih thute khempeuh ama tungah lak hi. Jonathan in Saul kiangah David paipih a, a nidanga mah bangin ama sepna ngei-ah a sem hi. Tua ciangin gal hong omkik hi. David kuankhia-in Filistia-te tawh kido a, amaute tampi tak that a, ama mai-ah amaute a tai uh hi. Tua ciangin a khut sungah a teipi tawi-in a inn sungah a tut laitakin Topa’ sawl kha gilo Saul’ tungah hong tung hi. David in a laiza lasakna tum hi. Saul in a teipi-in kawm tawh David khawhcip dingin khawh a, ahih hangin amah in na pelh a, kawm tungah a teipi kiphut hi. Tua ciangin David tai-in a suakta hi. A zingsang ciangin amah a thahtheih nadingin tua zanin Saul in amah a vil dingin David’ inn-ah mi sawl hi. Ahih hangin David’ zi Mikhal in ama kiangah, “Tuzanin na nuntakna na suahtak kei leh, zing ciangin nang hong kithat ding hi,” a ci hi. Tua ahih ciangin Mikhal in tawlet-ah David khiasuk hi. Amah taikhia-in suakta hi. Mikhal in milim khat la-in lupna tungah koih a, keelmul lukham khat a lu-ah koihin puan silhsak hi. Saul in David a man dingin mi a paisak ciangin amah in, “Amah a ci na hi,” na ci hi. Tua ciangin Saul in David a en dingin mi sawl a, “Amah ka thahtheih nadingin a lupna tawh kei kiangah amah hong puato un,” a ci hi. A mi sawlte hong tun ciangin, keelmul lukham a lu sanah omin lupna tungah a milim na om hi. Saul in Mikhal kiangah, “Bang hangin tua bangin kei hong khem a, amah a suahtak nadingin ka gal pa khah na hi hiam?” a ci hi. Mikhal in Saul dawngin, “Amah in kei kiangah, ‘Hong paisak in; bang hangin nang hong that ding ka hi hiam?’ hong ci hi,” a ci hi. Tu-in David tai-in suakta a, Ramah-ah Samuel kiangah pai-in, ama tungah Saul’ hihna teng a gen hi. Tua ciangin amah le Samuel pai-in Naioth-ah om uh hi. Tua ciangin Saul kiangah, “En in, Ramah khuasung Naioth vengah David om hi,” kici hi. Tua ciangin David a man dingin Saul in mi sawl hi. Amaute in kamsang honte laamin awngin omin, amaute a makai-in Samuel a ding a muh uh ciangin, Saul’ sawltakte tungah Pasian’ kha hong tung a, amaute zong laamin a awng uh hi. Hih thu Saul kiangah a kigen ciangin, amah in midang sawl leuleu a, amaute zong laamin awng leuleu uh hi. Tua ciangin Saul in mi a thum veina sawl a, amaute zong tua bangmah hi veve uh hi. Tua ciangin amahmah Ramah-ah pai a, Seku-a om tuikhuk lianpi tung hi. Amah in, “Samuel le David koi-ah om ahi hiam?” ci-in a dong hi. Mi khat in, “En in, Ramah khuasung Naioth vengah om uh hi,” a ci hi. Tua lai panin Ramah khuasung Naioth vengah amah pai hi. Ama tungah zong Pasian’ kha hong tung a, Ramah khuasung Naioth veng a tun mateng a paikawmin laamin awng hi. Amah in zong a puante suahkhia-in Samuel’ mai-ah laamin awng a, tua sun tawntung le tua zan tawntung a guaktangin a om hi. Tua hun a kipanin, “Saul zong kamsang suak khin ahi hiam?” kici hi. Tua ciangin Ramah khuasung Naioth veng panin David tai-in, Jonathan kiangah hong tungin ama mai-ah, “Bang hih ka hi hiam? Ka mawhna bang ahi hiam? Amah in kei thah dingin hong zon nadingin na pa’ mai-ah ka khialhna bang om ahi hiam?” a ci hi. Tua ciangin amah in David kiangah, “Tua bang hi het lo ding! Na si kei ding hi. En in, ka pa in kei kiangah gen loin a lian hitaleh a neu hitaleh bangmah hihlo hi; bang hangin ka pa in kei tungah hih thu hong im ding ahi hiam? Tua bang hi lo hi,” a ci hi. Ahih hangin David in dawngin, “Nangma nong pahtaklam na pa in teltakin thei hi. Tua ahih manin amah in, ‘Amah dah kha ding ahih manin hih thu Jonathan theisak kei ning,’ ci-in ngaihsun hi. Ahih hangin a taktakin, Topa nungta-in nang na nuntak mah bangin kei ka sih nading themkhat bek in sam hi,” a ci hi. Tua ciangin Jonathan in David kiangah, “Na gen peuhpeuh nang a dingin kong hihsak ding hi,” a ci hi. David in Jonathan kiangah, “En in, zing ciang pen Khadet ni hi a, kumpipa tawh sabuai-ah pel loin ka tut ding ahi hi. Ahih hangin a ni thum ni nitak dongin lo sungah ka buk theih nadingin kei hong paisak in. Na pa in kei hong kan leh, ‘David in ama khuapi Bethlehem-ah a va taipak dingin kei kiangah limtakin hong kingen hi; bang hang hiam cih leh amau innkuan khempeuh a dingin kumsim biakpiakna tua lai-ah om hi,’ na ci ding hi. Amah in, ‘Pha hi!’ a cih leh na nasempa a dingin a hoih hi ding hi; ahih hangin amah a heh leh amah in siatna a ngaihsutna thei in. Tua ahih ciangin thuman itna tawh na nasempa hong bawl in; bang hang hiam cih leh nang tawh a siangtho thuciamna-ah na nasempa na tunpih hi. Ahih hangin kei sungah mawhna a om leh, nangmahmah in kei hong that in; bang hangin na pa kiangah kei hong paipih ding na hi hiam?” a ci hi. Tua ciangin Jonathan in, “Nang tungah tua bang hi het kei hen! Ka pa in nang tungah siatna tung ding a ngaihsutna thei leng nang kiangah hong gen lo ding ka hi hiam?” a ci hi. Tua ciangin David in Jonathan kiangah, “Na pa in nang hong ngawh dawn leh kua in kei kiangah hong gen ding ahi hiam?” a ci hi. Jonathan in David kiangah, “Hong pai in, lo sungah pai ni,” a ci hi. Tua ahih ciangin amau tegel lo sungah a pai uh hi. Tua ciangin Jonathan in David kiangah, “Israel-te’ Pasian, Topa, teci hi ta hen! Zing ciang tubang hun ahi a, a ni thum ni-in ahi zongin, ka pa’ ngaihsutna tawng ka kankhiat khit ciangin, nangma tungah a lungsim a hoih leh, nang kiangah mi hong sawlin hong pulak lo ding ka hi hiam? Ahih hangin nang tungah siatna bawl nading in ka pa a lungkimsak leh, a muanhuaina-ah nang na pai theih nadingin nang kiangah a thu kong pulak kei a, nang kong sawlkhiat kei taak leh Topa in keimah Jonathan hong dawm kei tahen. Topa in ka pa a ompih mah bangin nang zong hong ompih tahen. Kei ka nuntak lai leh ka sih loh nadingin Topa’ thuman itna kei tungah hong lak in. Keima innkuan panin na thumanna dokkik ngei kei in. Leitung maitang panin David’ galte khempeuh Topa in a phiatkhiat ciangin, David’ innkuan panin Jonathan’ min phiatkhia kei in. Topa in David’ galte tungah phu la ta hen,” a ci hi. Tua ciangin Jonathan in amah a itna David tungah kiciampha kik hi; bang hang hiam cih leh ama pumpi a it zahin amah in David a it hi. Tua ciangin Jonathan in ama kiangah, “Zing ciang pen Khadet ni ahi hi. Na tutna awng ding ahih manin nang hong kiphawk ding hi. A ni thum ni-in nakpitakin nang hong kiphawk kanzaw lai ding hi. A thu a kikup ciangin na bukna-ah pai inla, suangcian hua lampangah om in. Tua ciangin muitum bangin tua lampangah thaltang thum ka lawn ding hi. Naupang khat sawlin ama kiangah, ‘Pai in; thaltangte va zong in,’ ka ci ding hi. Naupang’ kiangah, ‘En in, nangma kiang hih lamah thaltangte om hi, tawm in,’ ka cih leh nang a hong pai ding na hi hi; bang hang hiam cih leh Topa a nungta ahih mah bangin nang a dingin lungmuanhuai-in launa om lo hi. Ahih hangin tangvalpa kiangah, ‘En in, thaltangte nangma khen ah om hi,’ ka cih leh, nang paikhia in; bang hang hiam cih leh Topa in nang hong sawlkhia hi. Nang le kei in i gen thu tawh kisai-in ahihleh, nang le kei kikalah Topa om tawntung hi,” a ci hi. Tua ahih ciangin lo sungah David bu hi. Khadet ni hong tun ciangin an ne dingin kumpipa tu hi. A nidanga bangin kawm gei-a a tutna tung, ama tutna-ah kumpipa tu hi. A kigalsai-in Jonathan tu-in, Saul’ pangah Abner tu a, ahih hangin David’ mun a awng hi. Ahi zongin Saul in tua ni-in bangmah gen lo hi; bang hang hiam cih leh amah in, “Ama tungah thu khatpeuh piang hi ding hi; amah siang lo hi; siang lo taktak hi,” a ci hi. Ahih hangin a ni nih ni, Khadet ni khit a zing ciangin David’ mun awng lai hi. Tua ciangin Saul in a tapa Jonathan kiangah, “Bang hangin Jessi’ tapa zanni hitaleh tuni hitaleh an nekna-ah hong pai lo ahi hiam?” a ci hi. Jonathan in Saul dawngin, “Bethlehem-ah a pai dingin limtakin kei tungah David hong kingen hi. Amah in, ‘Kei hong ciahsak in; ka innkuante un khua sungah biakpiakna bawl uh a, ka sanggampa in tua lai-ah ka om ding thu hong pia hi. Tua ahih ciangin tu-in nong hehpihna-in hong paisakin ka sanggamte hong musak in,’ hong ci hi. Hih thu hangin kumpipa’ sabuai-ah amah hong pai lo hi,” a ci hi. Tua ciangin Jonathan tungah Saul heh mahmahin ama kiangah, “A kiheikhial, a lehdo numei’ tapa aw, nangma maizum nading le na nu’ mindai nadingin Jessi’ tapa na pawlpihna thu a thei lo hong sa na hi hiam? Bang hang hiam cih leh leitungah Jessi’ tapa a nuntak laiteng nang na hi a, na kumpi za ahi zongin kip lo ding hi. Tua ahih ciangin mi sawl inla, kei kiangah amah hong paipih in. Amah a si taktak ding hi,” a ci hi. Tua ciangin Jonathan in a pa Saul dawngin, “Bang hangin amah kithat ding ahi hiam? Amah in bang hih ahi hiam?” a ci hi. Ahih hangin Saul in amah a khawhkha dingin ama lamah a teipi lawn hi. Tua ahih ciangin a pa in David thah ding a ngaihsutna Jonathan in theitel hi. Tua ciangin heh mahmahna tawh sabuai panin Jonathan ding khia a, tua pawi a ni nih ni-in an ne lo hi. Bang hang hiam cih leh a pa in David minsiasak ahih manin ama hangin a dah hi. A zing ciangin David tawh a kiciamna lo-ah Jonathan pai-in, amah tawh naupangno khat pai hi. Amah in a naupang kiangah, “Tai inla ka thaltang lotte va tawm in,” a ci hi. Naupang a tai laitakin ama khen ah a thaltang khat lawn hi. Jonathan’ thaltang lot a tukna munah naupang a tun ciangin Jonathan in a naupang samin, “Nang’ khen’ hua lamah thaltang om hi lo ahi hiam?” a ci hi. Tua ciangin Jonathan in naupang samin, “Manlang in; hong kinawh in; tua lai-ah om kei in,” a ci hi. Tua ahih ciangin Jonathan’ naupang pa in a thaltangte khawmin a topa kiangah a paipih hi. Ahih hangin naupang in bangmah thei lo a, Jonathan le David bek in a thu thei uh hi. Tua ciangin Jonathan in a hiamte a naupang pa kiangah pia-in ama kiangah, “Pai inla, khuapi sungah ciahpih in,” a ci hi. Naupang a paikhiat khit phetin suangcian pang panin David dingin lei-ah maipuk a, thumvei kun hi. Jonathan sangin David nakpitakin dahzaw a, amau khatlekhat kinamin, khitui luangin khatlekhat kikah uh hi. Tua ciangin Jonathan in David kiangah, “Ei tegel Topa’ min tawh kiciamin, ‘Kei le nang kikal, le keima suanlekhakte le nangma suanlekhakte kikalah a tawntungin Topa om ding hi,’ i cih mah bangin nuamtakin pai in,” a ci hi. Tua ciangin amah dingin paikhia a, Jonathan zong khuapi sungah a ciah hi. Tua ciangin Nob khua-a siampipa Ahimelek kiangah David pai hi. Ahimelek a lingsa-in David a dawn dingin hong pai-in ama kiangah, “Bang hangin nang guak hong hi a, kuamah hong tonpih lo na hi hiam?” a ci hi. David in siampi Ahimelek kiangah, “Kumpipa in na khat hong sawlin kei kiangah, ‘Nang kong sawlna le nang kong hilh thute khat zong kuamah theisak kei in,’ hong ci hi. Tua mun tua munah tangvalte tawh kiciamna khat ka bawlzo hi. Tua ahih ciangin tu-in nang bang nei na hi hiam? Anlum lum nga ahih kei leh hih lai-a a om peuhpeuh hong pia in,” a ci hi. Siampipa in David dawngin, “Tutakin anlum mawkmawk ka nei kei hi; ahih hangin anlum siangtho om hi; tangvalte numei panin a kikep nak-uhleh la in,” a ci hi. Tua ciangin David in siampipa dawngin, “A taktakin ci lehang, hih bangin ka paikhiat uh ciangin numeite kiang panin kote ka kikem tawntung uh hi. Khualzin mawkmawk ciang nangawnin zong tangvalte siangtho hi. Tuni-in amaute bangzahin siangthozaw kan ding ahi hiam?” a ci hi. Tua ahih ciangin siampipa in anlum siangtho amah pia hi. Bang hang hiam cih leh anlum dang om lo a, a kilakkhiat ni-in anlum a lum lai tawh a kilaih pah ding, Topa’ mai panin a kilakhia Ompihna Anlum bek om hi. Tua laitakin Topa’ mai-ah biakna vai-in a om, Saul’ nasemte mi khat tua lai-ah na omkha hi. Ama min Doeg hi a, Saul’ gancing makai pa hi a, Edom mi ahi hi. Tua ciangin David in Ahimelek kiangah, “Teipi ahi a, namsau ahi zongin hih lai-ah nei lo na hi hiam? Bang hang hiam cih leh kumpipa’ nasep pen nawhtat ding kul ahih manin ka namsau ahi a, ka hiamte ahi zongin ka la man kei hi,” a ci hi. Siampipa in, “Elah kuamah na thah Filistia mi Goliath’ namsau, puan tawh kitunin hih lai-ah siampipuan nungah om hi. Tua na deih leh la in. Bang hang hiam cih leh adang om lo a, tua bek hih lai-ah om hi,” a ci hi. David in, “Tua sanga hoihzaw adang om lo hi; kei hong pia in,” a ci hi. David dingin tua ni-in Saul kiang panin tai a, Gath kumpipa Akhish kiangah pai hi. Akhish’ nasemte in ama kiangah, “Hih David, a gam kumpipa hi lo ahi hiam? Amaute khatlekhat in ama thu la-in sa-in laam uh a, ‘Saul in a tulin that, David in a tul sawmin that,’ ci hi lo ahi uh hiam?” a ci uh hi. David in hih thute a lungsimah ciamteh a, Gath kumpipa Akhish kihta mahmah hi. Tua ahih ciangin amaute’ mai-ah a gamtat kheelin, amaute’ muhna-ah a hai-in kibawl a, kulhkongkhakte tung kui gawpin, a khamul tungah a cilphuan kaisuksak hi. Tua ciangin Akhish in a nasemte kiangah, “En un, hih mipa a hai ahihlam na mu uh hi. Tua ahih ciangin bang hangin kei kiangah amah hong paipih na hi uh hiam? Ka omna-ah mihai-a gamta dingin hih mipa nong paipih nadingun mihai kisam thuah lai ka hi hiam? Hih mipa ka inn sungah hong pai ding ahi hiam?” a ci hi. David tua lai panin kihemkhia-in Adullam leihawmah tai hi. A sanggamte le a pa’ innkuante khempeuh in a zak uh ciangin ama kiang tua lai munah paisuk uh hi. Tua ciangin a lungkham mi khempeuh, leiba a nei mi khempeuh, le a lungkim lo mite khempeuh ama kiangah hong kikhawm uh hi. Amah pen amaute tungah a ukpa a suak hi. Tua lai-ah amah tawh mihing zali bang a om hi. Tua lai mun panin Moab gam Mizpah-ah David a pai hi. Amah in Moab kumpipa kiangah, “Pasian in kei a dingin hong sepsak ding ka theih matengin ka nu le ka pa na kiangah hong omsak in, ci-in kong thum hi,” a ci hi. Amah in Moab kumpipa kiangah amaute nusia a, munmuanhuaina sungah David a om sungteng amah tawh omkhawm uh hi. Tua ciangin kamsangpa Gad in David kiangah, “Munmuanhuai sungah om nawn kei in; kihem inla, Judah gamah pai in,” a ci hi. Tua ahih ciangin David kihemkhia-in Hereth tulakah a pai hi. Tu-in David le amah tawh a om mite a kimuhna thu Saul in za hi. A khut sungah a teipi tawi-in, a nasemte khempeuh a kimkotah dingin Gibeah khua a sangna mun makeng kung nuai-ah Saul a tu hi. Tua ciangin Saul in a kimkotah a ding a nasemte kiangah, “Tu-in za un, no Benjamin-te aw; Jessi’ tapa in note khempeuh’ lote le leenggui lote hong pia-in, note khempeuh a tul a uk, a za a ukin hong koih dingin um a, note khempeuh in kei hong sawmsim na hi uh hiam? Tuni-a bangin hong pangsim dingin ka tapa in Jessi’ tapa tawh thukimna a bawl ciangin kuamah in kei kiangah hong pulak loin, ka tapa in keimah a do dingin ka nasempa a hanthotna-ah note kuamah dah loin, kei kiangah zong nong pulak kei uh hi,” a ci hi. Tua ciangin Saul’ nasemte’ kiangah a ding, Edom mi Doeg in dawngin, “Ahitub’ tapa Amalek’ kiang, Nob khua-ah Jessi’ tapa a pai ka mu a, amah in ama a dingin Topa’ tungah thu dotsakin, anletui pia a, Filistia mi Goliath’ namsau ama tungah pia hi,” a ci hi. Tua ciangin kumpipa in Ahitub’ tapa siampi Ahimelek le a pa’ innkuante ahi Nob-a om siampi khempeuh a sam dingin mi sawl a, kumpipa kiangah amaute khempeuh hong pai uh hi. Tua ciangin Saul in, “Ahitub’ tapa aw, tu-in za in,” a ci hi. Amah in dawngin, “Hih lai-ah om ing, topa aw,” a ci hi. Tua ciangin Saul in ama kiangah, “Tuni-a bangin hong pangsimin kei a do dingin hong kipat theih nadingin bang hangin nang le Jessi’ tapa in kei hong sawmsim a, ama tungah an le namsau pia-in, ama a dingin Pasian kiangah thu dotsak na hi hiam?” a ci hi. Tua ciangin Ahimelek in kumpipa dawngin, “Na nasemte khempeuh lak panin kumpipa’ makpa ahi nangmah hong cingte a ukpa David bangin kua thumanin, na inn sungah kua kipahtawi ahi hiam? Ama a dingin Pasian’ kiangah thu ka dotsak a masa pen tuni ahi hiam? Hilo hi. Kumpipa in a nasempa ahi a, ka pa’ innkuante khempeuh ahi zongin ngawh kei in; bang hang hiam cih leh na nasempa in a tam hitaleh a tawm hitaleh hih thu khempeuh bangmah thei lo hi,” a ci hi. Tua ciangin kumpipa in, “Ahimelek aw, nang le na pa’ innkuante na si taktak ding uh hi,” a ci hi. Kumpipa in ama kiimah a ding a cingte kiangah, “Kihei unla Topa’ siampite that un; bang hang hiam cih leh amaute zong David tawh pangkhawm uh a, amaute in ama tailam thei napi-in kei kiangah hong pulak lo uh hi,” a ci hi. Ahih hangin kumpipa’ nasemte in Topa’ siampite tung a tu dingin a khut uh taangkhiasak lo uh hi. Tua ciangin kumpipa in Doeg kiangah, “Kihei inla, siampite hih in,” a ci hi. Edom mi Doeg kihei-in siampite hih a, tua ni-in saihadial siampipuan a silh mihing sawmgiat le nga a that hi. Amah in siampite’ khuapi Nob khua sunga om nuntakna a nei khempeuh numei le pasal, naupang le nawine, bawngtalte, late le tuute, namsau tawh a that khin hi. Ahih hangin Ahitub’ tapa Ahimelek’ tapate lakah Abiathar a kici khat suakta-in David kiangah a tai hi. Saul in Topa’ siampite a thah khitna thu Abiathar in David kiangah a gen hi. David in Abiathar kiangah, “Tua ni-in Doeg tua lai-ah om ahih ciangin Saul’ kiangah gen taktak ding hi, ci-in ka thei hi. Na pa’ innkuanpih mite khempeuh’ sihna ka piangsakkha hi. Kei tawh hong om in; lau kei in; bang hang hiam cih leh kei a that dingin a hong zongte in nang zong thah dingin a hong zong ahi hi; kei kiangah om lecin lungmuanna sunga om na hi ding hi,” a ci hi. Tu-in amaute in David kiangah, “En in, Filistia-te in Keilah khua sim uh a, a ancilnate uh luh uh hi,” ci-in a gen uh hi. Tua ahih ciangin David in Topa thu dongin, “Pai-in Filistia-te ka sim ding hiam?” a ci hi. Topa in David kiangah, “Pai-in Filistia-te sim inla, Keilah khuamite honkhia in,” a ci hi. Ahih hangin David’ mite in ama kiangah, “En in, Judah gam hih munah eite i lau hi. Filistia galkapte simin Keilah-ah pai lehang bangzahin lauzaw ding ihi hiam?” a ci uh hi. Tua ciangin David in Topa thu dongkik hi. Topa in amah dawngin, “Ding in; Keilah-ah paisuk in; bang hang hiam cih leh na khut sungah Filistia-te kong pia ding hi,” a ci hi. Tua ciangin David le a mite Keilah-ah paisuk uh a, Filistia-te tawh kido-in amau’ ganhingte ciahpihin amaute tampi tak a that uh hi. Tua ahih ciangin David in Keilah-a teng mite a honkhia hi. David kiang Keilah-ah Ahimelek’ tapa Abiathar a tai lai-in amah in siampipuan khat kengin paisuk hi. Keilah-ah David a tunkhitna thu tu-in Saul kiangah kigen hi. Saul in, “Pasian in ka khut sungah amah hong pia khin hi; bang hang hiam cih le kulhkongpi le a kalhna zawl a nei khua sungah lutna tawh amahmah kikhaknelh hi,” a ci hi. Tua ciangin Saul in galsim ding, Keilah khua-ah a paisuk ding, David le a mite a umcih dingin mi khempeuh a sam hi. Saul in ama tungah a sia a sawmna David in thei hi. Amah in a siampi Abiathar kiangah, “Hih lai-ah siampipuan hong paipih in,” a ci hi. Tua ciangin David in, “Israel-te’ Pasian, Topa aw, keima hangin khuapi susia dingin Saul in Keilah-ah pai hong sawmna thu na nasempa in za khin taktak hi. Keilah mite in ama tungah kei hong ap ding hiam? Na nasempa’ zak bangin Saul hong paisuk ding hiam? Israel-te’ Pasian, Topa aw, kong thum hi, na nasempa tungah hong gen in,” a ci hi. Tua ciangin Topa in, “Amah hong paisuk ding hi,” a ci hi. Tua ciangin David in, “Keilah mite in kei le ka mite Saul’ tungah hong ap ding uh hiam?” a ci hi. Tua ciangin Topa in, “Amaute in note hong ap ding uh hi,” a ci hi. Tua ciangin mi zaguk bang a pha, David le a mite dingin Keilah panin kihemkhia uh a, amaute a pai theihna peuhpeuh uhah pai uh hi. Keilah panin David a suahtakna thu Saul kiangah a kigen ciangin amah in a vai a khawl phot hi. Zif gamlak mualtung gam sung, gamlak munmuanhuaina-ah David om hi. Saul in nisimin amah zong a, ahih hangin Pasian in ama tungah David pia lo hi. Amah a that dingin Saul kuankhia khin ahih manin David a lau hi. Zif gamlak Horesh munah David om hi. Tua ciangin Saul’ tapa Jonathan dingin David kiang Horesh-ah pai a, Pasian in hong huh ding hi, ci-in amah a hanthawn hi. Amah in David kiangah, “Lau kei in; bang hang hiam cih leh ka pa Saul in nang hong sukhalo ding hi. Nang pen Israel-te tungah kumpi na hi ding a, kei pen nangma zom ka hi ding hi; ka pa Saul in zong hih thu thei hi,” a ci hi. Tua ciangin amau tegel in Topa’ mai-ah thuciamna bawl uh hi. Horesh-ah David om lai-in, Jonathan a inn-ah a ciah hi. Tua ciangin Saul’ kiang Gibeah-ah Zif mite paito uh a, “Jeshimon leitaw lam, Hakhilah mualtung, Horesh a munmuanhuai sung kote’ lakah David om hi lo ahi hiam? Tu-in hong paisuk in, kumpipa aw; amah na matnopna thu thei ka hih manun hong paisuk in. Kote’ hih ding ahihleh kumpipa tungah amah kong ap ding uh ahi hi,” a ci uh hi. Tua ciangin Saul in, “ Topa in note thupha hong pia ta hen. Bang hang hiam cih leh note in kei tungah hehpihna nong nei uh hi. Pai-in va kiciansak lai un. Ama bukna mun thei-in va mu unla, tua lai-ah kua in mu hiam, hong thei un. Bang hang hiam cih leh amah ngiansiam mahmah hi, ci-in kei tungah hong kigen hi. Tua ahih ciangin amah a bukna, a kiselsimna mun khempeuh hong ciamteh unla, thu a kiteltak tawh kei kiangah hong paikik un. Tua ciangin note tawh kei kong kuan ding hi. Gam sungah amah a omlai nakleh, Judah gam sung khempeuh zon ding ahi zongin a tul lak panin amah ka zongkhia teitei ding hi,” a ci hi. Amaute ding uh a, Zif-ah a pai dingin Saul’ mai-ah a na ma pai uh hi. Tu-in David le a mite Jeshimon leitaw lam Arabah gam sung Maon gamlakah om uh hi. Saul le a mite amah a zong dingin kuan uh hi. Hih thu David kiangah kigen hi. Tua ahih ciangin Maon gamlak a om suangpi-ah amah paisuk hi. Saul in tua thu a zak ciangin amah in Maon gamlakah David delh hi. A mualpang khatah Saul pai a, David le a mite a mualpang langkhatah pai uh hi. Saul le a mite in David le a mite a man dingin hong um uh ahih manin Saul a pelh dingin David a nawhtai laitakin, Saul kiangah kamtai khat hong tung a, “Hong kinawh inla hong ciah in; bang hang hiam cih leh Filistia-te in gam sung hong sim hi,” a ci hi. Tua ahih ciangin David a delhna panin Saul kileh kik a, Filistia-te a do-in a pai hi. Tua ahih ciangin tua mun pen Kikhenna Mual kici hi. Tua lai panin David paito-in Engedi munmuanhuai-ah a om hi. Filistia-te a delhna panin Saul a ciah ciangin ama kiangah, “En in, Engedi gamlakah David om hi,” ci-in kigen hi. Tua ciangin Saul in Israel-te khempeuh sung pan a kiteel mihing tulthum la-in Sathak Suangpi mai-ah David le a mite a zong dingin a pai hi. Lam gei-a tuukhawk omna-ah a pai hi. Tua gei-ah leihawm khat om a, awng hawh dingin tua sungah Saul a pai hi. Tu-in David le a mite tua leihawm tawngnung sungah na tu uh hi. Tua ciangin David’ mite in ama kiangah, “ Topa in nang kiangah, ‘En in, na khut sungah na gal pa kong pia ding a, hoih na sak bangin ama tungah na hih ding hi,’ hong cih pen tuni hita hi,” a ci uh hi. Tua ciangin David dingin Saul’ puantualpi mong atkhiatsak sim hi. Tua khit ciangin amah in Saul’ puanmong a atkhiat manin David a lungsim nuamthei nawn lo hi. Amah in a mite kiangah, “Amah pen Topa’ sathau nilh pa hi, ci-in a thei gegupi-in ama tungah ka khut ka ngak ding, Topa’ sathau nilh pa ahi ka topa tungah hih bang ka hih ding Topa in hong kham hi,” a ci hi. Tua ahih ciangin David in hih thute tawh a mite zol a, amaute Saul hihsak lo hi. Tua ciangin Saul ding khia-in leihawm nusia a, a pai nading lampi-ah a paisuak hi. Tua khit ciangin David zong leihawm sung panin paikhia-in Saul nung sap a, “Ka to kumpipa!” a ci hi. Saul in a nung a et ciangin David in lei-ah a mai kunin zahtakna a bawl hi. Tua ciangin David in Saul kiangah, “Bang hangin, ‘En in, David in na siat nading zong hi,’ a ci mite’ thu um na hi hiam? En in, Topa in tuni-in leihawm sung, ka khut sungah nang hong piakna nangmahmah in tuni-in na thei khin hi. Mi pawlkhat in nang a that dingin kei hong sawl a, ahih hangin nang kong hih kei hi. Keimah in, ‘Ka topa tungah ka khut ka nga kei ding hi; bang hang hiam cih leh amah pen Topa’ sathau nilh pa ahi hi,’ ka ci hi. En in, ka pa aw, ka khutsunga na puantualpi mong en in. Kei tungah khialhna ahi a, kumpi dona ahi zongin a om lohna, na puantualpi mong atkhia napi-in nang kong thahlohna thu tawh thei-in na mu ding hi. Kei thah dingin nong zon hangin nang tungah ka khial kei hi. Topa in kei le nang kikalah thu hong khen tahen. Topa in kei tangin nang tungah hong thuk tahen. Ahih hangin keima khut tawh nang kong hih kei ding hi. Tang-ate’ paunak in, ‘A gilote’ sung panin gitlohna hong piang,’ a cih mah bang ahi hi. Ahih hangin keima khut tawh nang kong hih kei ding hi. Israel kumpipa kua do-a hong kuankhia ahi hiam? Kua delh na hi hiam? Uisi maw! Uili maw! Tua ahih ciangin Topa thukhen hong hi-in, kei le nang kikalah thukhenna hong pia hen la, hih thu thei-in ka thu-ah hong pang hen la, na khutsung panin kei hong honkhia ta hen,” a ci hi. David in hih thute Saul kiangah a gen a man khit ciangin Saul in, “Ka tapa David, tu-a ka zak nang’ aw ahi hiam?” a ci hi. Tua ciangin Saul a kap hi. Amah in David kiangah, “Nang pen kei sangin na thuman zaw hi. Keimah in nang tungah a sia kong bawl laitakin nang in kei tungah a pha nong bawl hi. Topa in na khut sungah kei hong koih laitakin nang in kei nong thah lohna-ah kei nong limbawlna tu-in na hong laktel hi. Bang hang hiam cih leh mi khatpeuh in a gal pa mu leh amah in a suakta-in a gal pa paikhiasak ding ahi hiam? Tua ahih ciangin tuni-in kei tungah nong bawlna hangin Topa in a hoih tawh nang thaman hong pia tahen. Tu-in en in, kumpi na hih taktak ding ka thei hi. Israel kumpi gam nangma khut sungah a kip ding hi. Tua ahih ciangin keima nunga ka suanlekhakte beisak loin, ka pa’ innkuan panin ka min na phiat loh nadingin Topa’ min tawh kei tungah hong kiciam in,” a ci hi. Tua ciangin Saul’ deih bangin David a kiciam hi. Tua ciangin Saul a inn-ah a ciah hi. Ahih hangin David le a mite munmuanhuai-ah paito uh hi. Tu-in Samuel si a, Israel-te khempeuh kikhawmin ama hangin kap uh a, amaute in Ramah-a a inn-ah amah a vui uh hi. Tua ciangin Paran gamlakah David paisuk hi. Karmel mualah nasep a nei mi khat Maon khua-ah a om hi. Tua pa hau mahmah a, amah in tuu tulthum le keel tulkhat nei hi. Amah in Karmel-ah a tuumul a met hi. Tua mipa’ min Nabal hi a, a zi’ min Abigail ahi hi. Tua numei, tei le melhoih a thuah khat hi a, ahih hangin a pasal pen a ki-uk zo lo mi le a gamtatsia khat hi a, amah Kaleb mi ahi hi. Nabal in a tuumul a metna thu David in gamlakah a za hi. Tua ahih ciangin David in a tangvalte sawm sawl hi. David in a tangvalte kiangah, “Karmel-ah paito-in Nabal kiangah pai unla, keima min tawh amah va hopih un. Hih bangin amah na hopih ding uh hi: ‘Nang tungah nopna om ta hen, na innkuan tungah nopna om ta hen, na neih khempeuh tungah zong nopna om tahen. Gan mul mette na neihna ka za hi. Na tuucingte kote tawh omin amaute tungah siatna ka bawl kei uh a, Karmel-ah a om sungteng uh amaute in bangmah mansuah lo uh hi. Na tangvalte uh dong lecin amaute in nang kiangah hong genthei ding uh hi. Tua ahih ciangin ka tangvalte maipha na musak in; bang hang hiam cih leh pawi ni-in kong pai uh hi. Na neih sung pan nong piak theih peuhpeuh na nasemte le na tapa David tungah pia in,’ ci un,” a ci hi. Tangvalte hong tun ciangin amaute in hih thu khempeuh David’ minin Nabal kiangah gen uh a, tua ciangin amaute in ngak uh hi. Tua ciangin Nabal in David’ nasemte dawngin, “David kua ahi hiam? Jessi’ tapa kua ahi hiam? Tulai-in a tote kiang panin a taikhia nasem tampi om hi. Ka anlum le ka tui le ka gan mul meette a dingin ka gawh ka sate la-in koilai panin hong pai cih ka theih loh mite tungah pia ding ka hi hiam?” a ci hi. Tua ahih ciangin David’ tangvalte ciahkikin hih thu khempeuh ama kiangah a gen uh hi. David in a mite kiangah, “Mi khempeuh in na namsau uh kuah ciat un!” a ci hi. Amaute khempeuh in a namsau uh kuah uh a, David in zong a namsau a kuah hi. Mihing zali bang David’ nungah paito uh a, mihing za nihte van ngakin om uh hi. Ahih hangin Nabal’ nasem tangvalte khat in Nabal’ zi Abigail kiangah thu genin, “En in, ka topa uh a hopih dingin gamlak panin David in kamtaite hong paisak a, amah in amaute na tai hi. Ahi zongin kote tungah tua mite hoih mahmahin kote in siatna ka thuak kei uh a, amaute tawh ka pai laiteng uh gamlakah ka om sungun bangmah ka mansuah kei uh hi. Tuute kemin amaute tawh ka omsung khempeuh uh sun le zanin amaute in kote hong hu uh hi. Tua ahih ciangin hih thu thei inla, na hih ding ngaihsun in. Bang hang hiam cih leh ka topa le a innkuan khempeuh tungah siatna tunsak ding kingaihsun a, amah a khansia ahih manin kuamah in hopih thei lo hi,” a ci hi. Tua ciangin Abigail kinawhin, anlum lum zanih, leenggahzu savun thawl nih, a han’ minsa tuu nga, ankan lawh nga, leenggahkeu bawk zakhat, le theimoh zanih la-in late tungah tuate a guang hi. Tua nu in a tangvalte kiangah, “Keima mai-ah na paisuak un; note’ nungah kei kong pai ding hi,” a ci hi. Ahih hangin amah in a pasal Nabal hilh lo hi. Amah la tungah tuangin mual liahah a paisuk laitakin, en in, David le a mite ama lamah hong paisuk uh hi; amah in amaute na dawn hi. Tu-in David in, “Ama neihsa khempeuh khat zong a mangthang lo dingin hih mipa’ neih khempeuh gamlakah a mawkna-in ka cing a, amah in hih thuhoihte a sia tawh kei tungah hong thuk hi. Zing ciangin ama neihsa khempeuh lakah pasal khat zong ka siit taak leh Pasian in keimah David hong dawm kei ta hen,” na ci khin hi. Abigail in David a muh ciangin kinawh a, a la tung panin tuakin David’ mai-ah puk a, leilakah a kun hi. Ama khe phungah pukin, “Kei tung bekah, ka topa aw, mawhna om tahen. Na kiangah na nasemnu thu hong gensak inla, na nasemnu’ thugente hong ngai in, ci-in kong thum hi. Ka topa in hih a khansia mipa Nabal ngaihsun kei in; bang hang hiam cih leh ama min mah bangin amah zong a tuaci mah ahi hi. Nabal ama min hi a, haina in amah vukcip hi. Ahih hangin na nasemnu keimah in nangma hong sawl na tangvalte ka mukha kei hi. Tua ahih ciangin tu-in, ka topa aw, Topa nungta-in, nang zong na nuntak mah bangin, mi na thahloh nading le nangma khut tawh thukkikna na hihloh nadingin Topa in nang hong kho ahih manin, tu-in na galte le nangma tungah siat nading a zongte khempeuh Nabal bang tahen. Tu-in na nasemnu keimah in nangmah ka hong puak hih letsong nangma nung hong zui tangvalte hong piasak in. Na nasemnu’ khialhna hong maisak in, ci-in kong thum hi. Bang hang hiam cih leh nangmah in Topa’ galte do na hih manin Topa in na suanlekhakte kipsak paisuak ding a, na nuntak laiteng nang sungah siatna kimu lo ding hi. Nangmah delhin hong that dingin mite hong kipat leh, nang pen Topa na Pasian’ kepna sung a hing mite lakah na om ding a, amah in suanglotna tawh lotkhiat bangin na galte lawnkhia ding hi. Topa in nangmah tawh kisai thu a hoih a gente khempeuh tawh kizui-in hong hihin, Israel-te tungah ulianin nang hong koih khit ciangin, thu om lopi-in mi thahna ahi a, nangmahmah in phulakna hangin ahi zongin, dah nading thu ahi a, lungsim nat nading thu ahi zongin na nei kei ding hi. Topa in limtakin nang hong bawl ciangin na nasemnu hong phawk in,” a ci hi. Tua ciangin David in Abigail kiangah, “Tuni-in keimah a dawn dingin nang a hong sawl Israel-te’ Pasian, Topa in thupha ngah ta hen! Tuni-in mi thahna le keima khut tawh phulak nading panin keimah hong kem nangma ngaihsutna in thupha ngah ta hen! Bang hang hiam cih leh nang kong gimsak nading panin hong kho Israel Pasian, Topa a nungta taktak ahih mah bangin, nang hong kinawhin keimah a dawn dingin hong pai lo hi lecin, zing ciangin Nabal sung pan pasal khat zong hing nawn lo ding hi,” a ci hi. Tua ciangin David in ama tung panin amah a puakte a sang hi. Amah in tua nu kiangah, “Lung nuamin na inn-ah ciahto ta in. Na thu ka ngai a, nong thumna kong pia khin hi,” a ci hi. Tua ciangin Nabal kiangah Abigail hong tungkik hi. Kumpipa’ pawi tawh kibangin amah in a inn sungah pawi na kham hi. Nabal lungnuam mahmah hi. Bang hang hiam cih leh amah in zu kham mahmah hi. Tua ahih ciangin zingsang khuavak mateng ama kiangah bangmah gen peuhmah lo hi. Zingsang ciang, Nabal’ zukhamna a ven’ ciangin a zi in ama kiangah hih thute gen a, thakhatin a lungtang si-in amah suangtum bang hi. Tua khit ni sawm bang ciangin Topa in Nabal vat a, amah a si ta hi. Nabal a sihna thu David in a zak ciangin amah in, “Nabal khut tung panin ka ngah zahkohna hong thuksakin, siatna panin a nasempa a lenkik Topa in thupha ngah tahen. Topa in Nabal’ gamtat siatna ama lu tung mahah tungkiksak hi,” a ci hi. Tua ciangin David in mi sawlin ama zi dingin Abigail helsak hi. David’ nasemte Karmel-a Abigail’ kiang a tun ciangin amaute in tua nu kiangah, “David in ama zi dingin a la dingin kote nang kiangah hong sawl hi,” a ci uh hi. Tua ciangin amah dingin lei-ah maikun a, “En un, na nasemnu uh ka topa’ nasemte’ khe a silsak ding nasem ahi hi,” a ci hi. Tua ciangin Abigail kinawhin dingin la tungah tuang a, ama nasem numei nga in amah a kem hi. David’ kamtaite’ nung zui-in pai a, tua ciangin ama zi a suak hi. David in Jezreel khuami Ahinoam zong la a, amau tegel ama zi a suak uh hi. Saul in ama tanu Mikhal, David’ zi pen, Gallim khuami Laish’ tapa Palti tungah na pia khin hi. Tua ciangin Saul kiang Gibeah-ah Zif mite hong pai uh a, “Jeshimon nisuahna lam Hakhilah mualtungah David bu hi lo ahi hiam?” va ci uh hi. Tua ahih ciangin Saul kithawi-in David a zong dingin Israel mi a kiteel mihing tulthum tawh Zif gamlakah a paisuk hi. Tua ciangin Saul in Jeshimon nisuahna lam lampi gei-ah a om Hakhilah mualtungah giahphual sat hi. Ahih hangin gamlakah David omlai hi. Amah a delhin gamlakah Saul a hong paina thu a theih ciangin David in thukan simte sawl a, Saul hong pai taktak ahihna thu a thei hi. Tua ciangin David dingin Saul in giahphual a satna munah a pai hi. David in Saul’ galkap mangpa, Ner’ tapa Abner tawh a lupna mun mu hi. Giahphual laizangah Saul lum a, ama kimkotah a galkapte in phual sat uh hi. Tua ciangin David in Hit mi Ahimelek le a nu uh Zeruiah ahi Joab’ sanggampa Abishai kiangah, “Saul’ giahphual ah kei tawh kua hong paisuk ding na hi uh hiam” a ci hi. Abishai in, “Kei nang tawh kong paisuk ding hi,” a ci hi. Tua ahih ciangin David le Abishai zanin galkapte kiangah pai uh hi. Giahphual sungah Saul na ihmu a, a lukhung leilakah a teipi na kiphut a, Abner le galkapte ama kimkotah na lum uh hi. Tua ciangin Abishai in David kiangah, “Pasian in na gal pa tuni-in na khut sungah hong pia ahih ciangin tu-in teipi-in lei tawh khatvei bek hong khawhcipsak in, nihvei khawh ding kisam lo hi,” a ci hi. Ahih hangin David in Abishai kiangah, “Ama tungah siatna bawl kei in; bang hang hiam cih leh Topa’ sathau nilh pa a su peuhpeuh mawhna pan peng ding sa na hi hiam?” a ci hi. David in, “ Topa a nungta ahih mah bangin Topa in amah vat taktak ding hi; tua ahih kei leh zong a sih hun hong tung ding hi; tua ahih kei leh gal kikapna sungah amah paisukin si ding hi. Topa’ sathau nilh pa tungah ka khut ka ngak ding Topa in kei hong kham hi; ahih hangin tu-in a lukhungah a om a teipi le a tuithawl la-in paikhia ni,” a ci hi. Tua ahih ciangin David in Saul’ lukhung a a om a teipi le a tuithawl a la hi. Tua ciangin amaute paikhia uh hi. Kuamah in mu lo hi; zong thei lo hi; kuamah khanglo lo hi. Amaute khempeuh ihmu uh hi; bang hang hiam cih leh Topa in amaute ihmut suak mahmah sak hi. Tua ciangin David a pang khatah pai-in, amaute kikal saupi a kihalin mual dawn a gamla-ah a ding hi. David in galkapte le Ner’ tapa Abner samin, “Abner aw, hong dawng lo ding na hi hiam?” a ci hi. Tua ciangin Abner in dawngin, “Kumpipa a sam kua na hi hiam?” a ci hi. David in Abner kiangah, “Pasal hi lo na hi hiam? Israel-te sungah nang tawh a kibang kua om ahi hiam? Tua ahihleh bang hangin na to kumpipa vil lo na hi hiam? Bang hang hiam cih leh na to kumpipa a that dingin mi khat hong pai hi. Hih banga na gamtatna hoih lo hi. Topa a nungta ahih mah bangin a si dingin na kilawm hi; bang hang hiam cih leh Topa’ sathau nilh pa, na topa na vil kei hi. Tu-in a lukhung a om kumpipa’ teipi le a tuithawl koi-ah om ahi hiam, thei in,” a ci hi. Saul in David’ aw khenthei a, “Ka tapa David, tu-a a ging nangma’ aw ahi hiam?” a ci hi. David in, “Ka topa, kumpipa aw, keima’ aw ahi hi,” a ci hi. Tua ciangin amah in, “Bang hangin ka topa in a nasempa delh ahi hiam? Bang gamta khial ka hi hiam? Ka tungah bang mawhna om ahi hiam? Tua ahih ciangin tu-in ka to kumpipa in a nasempa’ thu za in. Keimah a do dingin nang hong toksuah pa pen Topa ahihleh amah in biakna hong sang ta hen; ahih hangin mihing ahihleh amaute in Topa’ mai-ah samsiatna ngah tahen. Bang hang hiam cih leh amaute in, ‘Pai in; pasian dangte’ na sem in,’ ci-in Topa’ gamh ka ngah loh nadingin tuni-in kei hong hawlkhia uh hi. Tua ahih ciangin tu-in Topa’ omna panin gamdang leitangah kei hong sisak kei in; bang hang hiam cih leh mualtungah vaka a beng pa bangin uili bang lel keimah a that dingin Israel kumpipa nong kuankhia hi,” a ci hi. Tua ciangin Saul in, “Ka gamta khial hi; hong ciahkik in, ka tapa David aw; bang hang hiam cih leh tuni-in kei hong suaktasak na hih manin na tungah siatna kong bawl nawn kei ding hi. Ka hai gamtatkha a, nakpitakin ka khial khin hi,” a ci hi. Tua ciangin David in dawngin, “Hih lai-ah na teipi om hi, kumpipa! Tangvalte khat hong paisak inla hong lasak in. Topa in mi khempeuh a thumanna le a thutakna hangin thaman pia hi; bang hang hiam cih leh Topa in tuni-in ka khut sungah nang hong pia a, keimah in Topa’ sathau nilh pa a hih dingin ka khutte ka taangkhiasak kei hi. En in, tuni-in nangmah kong suahtaksak mah bangin Topa in zong kei hong suaktasak hen la, haksatna khempeuh panin kei hong honkhia ta hen,” a ci hi. Tua ciangin Saul in David kiangah, “Thupha ngah ta in, ka tapa David! Nangmah in na tampi na sem ding a, tuate na zo ding hi,” a ci hi. Tua ahih ciangin David ama lampi-ah pai-in, Saul zong ama omna munah a ciah hi. David in a lungsim sungah, “Saul’ khut tawh ni khat ni ciangin ka si theikha ding hi. Kei a dingin Filistia-te’ gamah tai ding sangin a hoihzaw dang om lo hi. Tua hileh Saul in Israel gamgi huam sungah kei hong zon niloh lungkia ta ding a, ama khutsung panin ka suakta ding hi,” a ci hi. Tua ahih ciangin David kithawi a, amah tawh a om mihing za gukte tawh Gath kumpipa, Maok’ tapa Akhish kiangah a pai hi. Tua ciangin David, a innkuanpihte le a mite a innkuanpih ciat tawh, David zong a zi nihte, Jezreel khuami Ahinoam le Nabal’ zi meigongnu, Karmel khuami Abigail tawh, Gath-a Akhish kiangah va teng hi. Gath-ah David tai hi, ci-in Saul kiangah a kigen ciangin amah in David zong nawn lo hi. Tua ciangin David in Akhish kiangah, “Nong hehpih zawh leh, ka ten theih nadingin gam sung khuate khatah kei a’ ding mun hong pia in; bang hangin na nasempa nang tawh kumpi khua sungah tengkhawm ding ahi hiam?” a ci hi. Tua ahih ciangin Akhish in tua ni-in ama tungah Ziklag khua a pia hi. Tua ahih manin tuni dongin tua khua pen Judah kumpite a’ ahi hi. Filistia gam sungah David a ten hunsung pen kum khat le kha li sung ahi hi. Tu-in David le a mite paito-in Geshur mite, Girzi mite, le Amalek mite va sim hi; bang hang hiam cih leh hih mite pen Egypt lam Shur ciang dongah tanglai a kipanin a teng mite ahi uh hi. Tua ciangin David in tua gam vatgawp a, numei ahi a, pasal ahi zongin hingkhawi loin, ahih hangin tuute, bawngtalte, late, kalaohte, le puante la-in Akhish kiangah hong ciahkik hi. Akhish in, “Tuni-in kua va sim na hi uh hiam?” ci-in a dot ciangin David in, “Judah mite’ Negeb gam,” ahih kei leh, “Jerahmeel mite’ Negeb gam,” ahih kei leh, “Ken mite’ Negeb gam,” a ci hi. David in, “Amaute in kote’ thu genin, ‘David in tua bangin hih hi,’ ci ding uh ahih ciangin,” ci-in ngaihsun ahih manin Gath-ah thu a puak thei ding numei ahi a, pasal ahi zongin hingkhawi lo hi. Filistia-te’ gam sungah a ten sungteng tua bang gamtatna pen ama ngeina ahi hi. Akhish in David muangin, “Ama mipih Israel-te in a muhdah theih nadingin amahmah kibawl khin hi. Tua ahih ciangin amah ka nasem hi tawntung ding hi,” ci-in a ngaihsun hi. Tua hunin Filistia-te in Israel-te a sim dingin a galkapte khawm uh hi. Akhish in David kiangah, “Nang le na mite, kei tawh galkapte lakah a kuankhawm ding na hihlam thei in,” a ci hi. David in Akhish kiangah, “Hoih mahmah hi; na nasempa in bang hih thei hiam, cih na thei ding hi,” a ci hi. Tua ciangin Akhish in David kiangah, “Hoih mahmah hi; khan tawntungin keimah a hong cing dingin nang kong koih ding hi,” a ci hi. Tu-in Samuel si khin a, Israel-te khempeuh ama hangin kapin, ama khuapi Ramah-ah vui uh hi. Saul in vankahte le aisante a gam sung panin beisak hi. Filistia-te kikhawm uh a, hong pai-in Shunem-ah giahphual sat uh hi. Saul in Israel-te khempeuh khawm a, amaute in Gilboa-ah giahphual sat uh hi. Saul in Filistia galkapte a muh ciangin lau a, a lungsim nakpi takin ling hi. Saul in Topa tungah thu a dot ciangin, Topa in mang tawh hitaleh, Urim tawh hitaleh, kamsangte tawh hitaleh dawng lo hi. Tua ciangin Saul in a nasemte kiangah, “Ama kiangah pai-in ama tung pan thu ka dot theih nadingin vankahthei numei khat kei a dingin hong zonsak un,” a ci hi. A nasemte in ama kiangah, “En in, Endor-ah vankahthei khat om hi,” a ci uh hi. Tua ahih ciangin Saul in a mel seelin puan dang silh a, amah le mi nih pai hi. Amaute zanin tua numei kiangah va pai uh hi. Amah in, “Kei a dingin a sisate’ kha kiang pan thu hong dotsak inla, nang kianga a min kong gen peuhpeuh kei a dingin hong saptohsak in,” a ci hi. Numei in ama kiangah, “Saul’ hihsa thu, gam sung panin vankahte le aisante a suksiatna na thei taktak hi. Tua ahih ciangin bang hangin keima sih nading a piangsak dingin kei a dingin thangzak hong koih na hi hiam?” a ci hi. Ahih hangin ama tungah Topa’ min tawh Saul kiciam a, “ Topa a nungta ahih mah bangin hih thu hangin nang tungah gimna hong tung het lo ding hi,” a ci hi. Tua ciangin numei in, “Kua hong sapsak ding ka hi hiam?” a ci hi. Amah in, “Samuel hong sapsak in,” a ci hi. Numei in Samuel a muh ciangin a gingin kikokhia hi. Numei in Saul kiangah, “Bang hangin kei hong khem na hi hiam? Nang, Saul na hi hi,” a ci hi. Kumpipa in ama kiangah, “Lau kei in; kua mu na hi hiam?” a ci hi. Numei in Saul kiangah, “Leisung panin pasian khat hong paikhiato ka mu hi,” a ci hi. Amah in tua nu kiangah, “Ama mel bangci ahi hiam?” a ci hi. Tua nu in, “Puteek khat hong paito a, amah in puantualpi silh hi,” a ci hi. Tua ciangin Saul in tua pen Samuel hi, ci-in thei a, lei-ah a maikunin zahtakna a bawl hi. Tua ciangin Samuel in Saul kiangah, “Bang hangin keimah saptohna tawh hong nawngkaisak na hi hiam?” a ci hi. Saul in dawngin, “Nakpi takin ka lungkham hi; Filistia-te in kei hong sim a, kei kiang panin Pasian kiheikhia-in kamsangte tawh ahi a, mang tawh ahi zongin hong dawng nawn lo hi. Tua ahih ciangin ka gamtat nading zia a hong gen dingin nang kong sam hi,” a ci hi. Tua ciangin Samuel in, “ Topa, nang kiang panin kiheikhia-in na gal suak khin ahih ciangin bang hangin kei thu hong dong lai na hi hiam? Topa in kei’ tungtawnin hong gensa bangin nang tungah hong hih hi. Topa in na khutsung panin kumpi gam balkhia-in na vengpa David’ tungah pia khin hi. Nangmah in Topa’ thu ngai loin, Amalek tungah ama heh mahmahna tawh kizui-in hihlo na hih manin Topa in nang tungah tuni-in hihte hong tungsak hi. Tua tham loin Topa in Israel mite zong nang tawh Filistia-te’ khut sungah hong piakhawm ding hi. Zing ciangin nang le na tapate in zong kei kiang nong zuan ding uh hi. Topa in Israel galkapte zong Filistia-te’ khut sungah pia ding hi,” a ci hi. Tua ciangin Samuel’ thugente hangin lau lua-in leilakah Saul tawnpuk pah hi. Amah in sun tawntung le zan tawntung bangmah ne lo ahih manin a tha nem mahmah hi. Tua ciangin Saul kiangah a numei hong pai-in amah a lau mahmahna a muh ciangin tua nu in Saul kiangah, “En in, na nasemnu in na thu hong ngaizo hi. Ka luang khamin, kei tungah nong gen bangin ka gamtazo hi. Tua ahih ciangin nang zong na nasemnu’ thu hong ngai in; na mai-ah anlum tawmkhat hong luisak in; na paina dingah na pai ciangin na thahat nadingin ne in,” a ci hi. Amah in nial a, “Ka ne kei ding hi,” a ci hi. Ahih hangin tua numei tawh kopin a nasemte in ci teitei uh ahih manin amau’ cih bangin a mang hi. Tua ahih ciangin leilak panin amah tho-in lupna tungah a tu hi. Tu-in tua numei in a inn-ah bawngno thau khat nei a, amah in manlang takin go-in, tua ciangin annel la a, a annel meekin silngo sawh loh anlum em a, Saul le a nasemte’ mai-ah lui a, amaute in a ne uh hi. Tua ciangin amaute dingin tua zanin a paikhia uh hi. Tu-in Filistia-te in a galkap khempeuh uh Afek-ah khawm uh a, Jezreel gam sunga om tuikhuk gei-ah Israel-te in giahphual sat uh hi. Filistia uliante a za za, a tul tulin a pai laitakin David le a mite zong Akhish tawh a nungah pai uh hi. Filistia galkap a ukte in, “Hih Hebru mite in hih lai-ah bang hong hih uh ahi hiam?” a ci uh hi. Akhish in Filistia galkap a ukte kiangah, “Ni tampi, kum tampi kei tawh a omkhin, Israel kumpi Saul’ nasempa David hi a, kei kiangah hong tai a kipanin tuni dongin ama tungah mawhna ka mu kei hi,” a ci hi. Ahih hangin Filistia galkap a ukte ama tungah heh uh hi. Filistia galkap a ukte in ama kiangah, “Amah na koihna munah a ciahkik theih nadingin hih mipa sawlkik in. Gal kidona sungah eite’ lang hong suak kha ding ahih manin galdona sungah eite tawh amah hong kuansuk lo ding hi. Bang hang hiam cih leh hih mipa in a topa tawh kilemna bangci bawl ding ahi hiam? Hih lai-a om mite’ lutang tawh bawl ding hi lo ahi hiam? Amaute khatlekhat in la-in sa-in laam uh a, ‘Saul in a tulin that, David in a tul sawmin that,’ a cih pa uh hi lo ahi hiam?” a ci uh hi. Tua ciangin Akhish in David samin ama kiangah, “ Topa a nungta ahih mah bangin, nang na thuman a, hih vai-ah kei tawh hong kuankhia-in na ciah ding man ka sa hi. Bang hang hiam cih leh kei kiangah nong pai a kipan tuni dong nang tungah khialhna bangmah ka mu kei hi. Ahih hangin uliante in nang hong thukim lo uh hi. Tua ahih ciangin tu-in ciahkik in. Filistia uliante na lungkim lohsak khak loh nadingin lungkim takin ciah in,” a ci hi. Tua ciangin David in Akhish kiangah, “Ahih hangin, keimah in bang hih ka hi hiam? Ka to kumpipa’ galte do-in ka pai theih loh nadingin nangma nasepna-ah kong tum ni a kipan tuhun dong na nasempa’ tungah bang mu na hi hiam?” a ci hi. Tua ciangin Akhish in David dawngin, “Nang pen keima muhna-ah Pasian’ vantungmi khat mah bangin paubaang lo na hihna ka thei hi; ahi zongin Filistia galkap a ukte in, ‘Amah pen eite tawh galphualah hong kuanto lo ding hi,’ ci uh hi. Tua ahih ciangin tu-in nang tawh a hong pai na topa’ nasemte tawh zingsangin tho baih un. Zingsangin kipan baih unla, khua a vak phetin kihemkhia un,” a ci hi. Tua ahih ciangin Filistia gamah a ciahkik dingin David a mite tawh zingsang tungin ding khia uh a, Filistia-te ahihleh Jezreel khua-ah paito uh hi. David le a mite a ni thum ni-in Ziklag hong tun uh ciangin, Amalek-te in Negeb le Ziklag na sim khin uh hi. Amaute in Ziklag zo-in mei tawh na hal uh a, numei khempeuh le tua khuasunga omteng a neu a lianin man uh hi. Amaute in khat zong that lo uh a, ahih hangin amaute khempeuh paikhiatpih uh hi. David le a mite khuapi a tun uh ciangin a khuapi uh mei tawh na kihalin, a zite uh, a tanute uh, le a tapate uh salin a kimat khitna thei uh hi. Tua ciangin David le amah tawh a om mite in a aw uh gingsakin a tha bei dongun kap uh hi. David’ zi nihte, Jezreel khuami Ahinoam le Karmel khuami Nabal’ zi meigongnu Abigail zong salin kiman hi. David nakpitakin lungkham hi. Bang hang hiam cih leh mi khempeuh a tanu a tapate uh hangin lungsimsia uh ahih manin amaute in suang tawh amah den ding gen uh hi. Ahih hangin Topa a Pasian in David thakhauhsak hi. Tua ciangin David in Ahimelek tapa Abiathar kiangah, “Siampipuan hong paipih in,” a ci hi. Tua ahih ciangin Abiathar in David kiangah siampipuan a paipih hi. Tua ciangin David in Topa thu dong a, “Hih mihonte ka delh ding hiam?” a ci hi. Amah in dawngin, “Delh in; bang hang hiam cih leh na pha taktak ding a, na mite na honkhiazo taktak ding hi,” a ci hi. Tua ahih ciangin David le amah tawh a om mihing za gukte kuankhia uh a, Besor lui-ah tungin, tua lai-ah mi pawlkhat kinusia uh hi. Ahih hangin David le mi za lite a delhin paisuak uh a, Besor lui a galkah dingin a gimlua mi zanih kinusia uh hi. Amaute in Egypt mi khat gamlakah mu uh a, David kiangah amah paipih uh hi. Amaute in an pia uh a, amah in ne hi. Amaute in tui dawn ding zong a pia uh hi. Theimoh khat le leenggahkeu bawk nih zong a pia uh hi. Amah in tuate a nek khit ciangin a tha hong dimkik hi. Bang hang hiam cih leh an ahi a, tui ahi zongin sun thum le zan thum ne lo dawn loin om hi. Tua ciangin David in ama kiangah, “Nang kuate na hi hiam? Koi pan na hi hiam?” a ci hi. Amah in, “Kei pen Amalek-te khat’ nasem, Egypt mi tangval khat ka hi hi. Tuma ni thum lai-in ka ci na ahih manin ka topa in hong nusia hi. Kote in Khereth mite’ Negeb gam le Judah-te’ gam sung le Kaleb mite’ Negeb gam ka sim uh a, mei tawh Ziklag ka hal uh hi,” a ci hi. Tua ciangin David in ama kiangah, “Hih mite kiangah nong paipih suk nuam ding hiam?” a ci hi. Amah in, “Nangmah in kei nong thahlohna ding ahi a, ka topa’ khut sungah nong apkik loh nading ahi zongin Pasian’ min tawh kei tungah hong kiciam peuh lecin hih mihonte kiangah nang kong paipihsuk ding hi,” a ci hi. Tua ciangin amah in David paipih suk hi. Filistia-te’ gam le Judah gam panin a lak uh na tampite hangin amaute gam sung khempeuhah kithehthangin an ne, tuidawn, laamin na om uh hi. Tua ciangin David in a zing ciang phalvak a kipan nitak dong amaute vatgawp a, kalaoh tung tuangin a tai tangval za lite simloh amaute khat zong suakta lo uh hi. David in Amalek-te’ laksa khempeuh ngahkik a, a zi nihte honkhia hi. A neu a lian, tanute tapate nate ahi a, a kila khat peuhpeuh ahi zongin a kisam khat zong om lo a, David in a vekpi-in ciahpih kik hi. David in tuuhonte le bawnghonte khempeuh zong man hi. Mite in tua ganhingte ama mai-ah hawl uh a, “David’ na lakte ahi hi,” a ci uh hi. Tua ciangin, David a zui dingin a gimlua, Besor lui-ah a kinusia mihing za nihte kiangah David tung hi. David le amah tawh a om mite a dawn dingin amaute hong kuankhia uh a, a nai a tun ciangin David in amaute hopih hi. Tua ciangin David tawh a pai mite lak panin a gilo le mi ginalote khempeuh in, “Amaute pen eite tawh hong paisuak lo uh ahih manin, amaute in a zite le a tate uh la-in a paikhiatpih uh cih simloh, eite’ ngahkik nate khat zong amaute i pia kei ding hi,” a ci uh hi. Ahih hangin David in, “Ka sanggamte aw, Topa in eite hong piaksa nate tua bangin na hih kei ding uh hi. Amah in eite hong kemin eite a do dinga hong pai mihonte i khut sungah hong pia khin hi. Hih thu-ah kua in no’ thu hong ngai ding ahi hiam? Bang hang hiam cih leh gal sungah a kuan mipa’ tanh zah mah, van a ngak mipa in tang ding a, amaute in a kibangin ngah ding uh hi,” a ci hi. Tua ni a kipanin tuni dongin amah in Israel-te a dingin thukham le biakna ngeina kipin a bawl hi. Ziklag a tun ciangin David in Judah upa a lawmte kiangah a na lakte pawlkhat khakin, “ Topa’ galte’ na a kilate sung panin hih lai-ah note a’ ding letsong a om hi,” a ci hi. Tua nate pen Bethel, Negeb gam sunga om Ramoth, le Jattir, Aroer, Sifmoth, Eshtemoa, Karmel, Jerahmeel khuapite, Ken khuapite, Hormah, Borashan, Athak, Hebron sunga omte, David le a mite a pai ngeina mun khempeuhte a’ ding ahi hi. Filistia-te in Israel-te sim uh hi. Filistia-te’ mai-ah Israel-te tai uh a, Gilboa Mual tungah thahin tuk uh hi. Filistia-te in Saul le a tapate pha uh hi. Filistia-te in Saul’ tapate Jonathan, Abinadab, le Malkhishua a that uh hi. Gal in nakpitakin Saul neh a, gal thaltawite in nakpitakin amah liamsak hi. Tua ciangin Saul in a galhiam puapa kiangah, “Hih dawibia mite hong pai-in kei hong dawtletin hong mawlpih kha ding uh ahih manin na namsau dok inla, tua tawh hong dawtlet in,” a ci hi. Ahih hangin a galhiam puapa in hih ngam lo hi; bang hang hiam cih leh amah lau mahmah hi. Tua ahih ciangin Saul in ama namsau la-in tua tungah puk hi. A galhiam puapa in Saul a sihna a muh ciangin amah zong a namsau tungah kipuksuk sakin amah tawh a sikhawm hi. Tua bangin Saul, a tapa thumte, a galhiam puapa, le a mi khempeuh, a ni kikhatin a sikhawm uh hi. Tua ciangin Jezreel kuam galkhat le Jordan galkhat a om Israel mite in Israel mite tai-in Saul le a tapate a sih khitna thu a zak uh ciangin amaute in a khuapite uh nusia-in tai uh ahih ciangin Filistia-te hong pai-in tuate sungah a teng uh hi. A zing ciangin a kithat mite’ na a la dingin Filistia-te hong pai ciangin Saul le a tapa thumte Gilboa Mual tungah a si mu uh hi. Amaute in Saul’ lu tankhia-in a galhiam hawkkhia uh a, a milimte uh le mite kiangah hih thuhoih a puak dingin Filistia gam sung khempeuhah kamtaite a sawl uh hi. Amaute in Ashtaroth biakinn sungah ama galhiam koih uh a, Bethshan khuakulhah ama luang a suang uh hi. Ahih hangin Jabeshgilead ah a teng mite in Saul’ tungah Filistia-te’ hihna a zak uh ciangin, a hang mi khempeuh dingin zan tawntung pai uh a, Bethshan kulh tung panin Saul’ luang le a tapate’ luangte va la uh hi. Amaute in Jabesh-ah tunpihin tua lai-ah a hal uh hi. Amaute in a guhte la-in Jabesh khuasung makeng kung nuai-ah vui uh a, ni sagih sung an a tang uh hi. Saul a sih khit, Amalek-te a thahna panin David a ciahkik ciangin Ziklag-ah David ni nih om hi. A ni thum ni-in, a puan kikekin a lu tungah lei omin Saul’ giahphual panin mi khat hong pai hi. David kiangah amah hong tun ciangin leilakah pukin zahtakna a bawl hi. David in ama kiangah, “Koi panin hong pai na hi hiam?” a ci hi. Tua ciangin amah in David kiangah, “Israel giahphual panin kong suakta hi,” a ci hi. David in ama kiangah, “Bangci bang ahi hiam? Hong gen in,” a ci hi. Tua ciangin amah in dawngin, “Giahphual panin mite tai a, mi tampi zong pukin si uh hi. Saul le a tapa Jonathan zong a si hi,” a ci hi. Tua ciangin David in ama kiangah a gen tangvalpa kiangah, “Saul le a tapa Jonathan a sihna bangci theih na hi hiam?” a ci hi. Tua ciangin tangvalpa in, “Gilboa Mual-ah ka omkha a, tua lai munah Saul a teipi tungah kingam hi. Saul in a nunglam hong et ciangin kei hong mu-in hong sam hi. Keimah in ka dawng a, ‘Hih lai-ah om ing,’ ka ci hi. Saul in kei kiangah, ‘Kua na hi hiam?’ hong ci hi. Keimah in Saul ka dawng a, ‘Kei, Amalek mi ka hi hi,’ ka ci hi. Saul in kei kiangah, ‘Ka pangah ding inla kei hong that in; bang hang hiam cih leh gimna ka thuak a, ahi zongin ka naang lai hi,’ hong ci hi. Tua ahih ciangin ama pangah dingin amah ka that hi; bang hang hiam cih leh amah a tuk khit ciangin nungta zo lo taktak ding hi, ci-in ka thei hi. Tua ciangin a lu tungah a om kumpi lukhu le a ban tungah a om a banbulh kong la a, tuate hih lai ka topa kiangah kong paipih hi,” a ci hi. Tua ciangin David in ama puante lenin balkek a, amah tawh a om mite khempeuh in zong tua bangmahin a hih uh hi. Tua ahih ciangin Saul, a tapa Jonathan, le Topa’ mi Israel-te hangin amaute thumin kap uh a, nitak dong an a tang uh hi; bang hang hiam cih leh gal sungah amaute si uh hi. Tua ciangin David in ama kiangah thu a puak tangvalpa kiangah, “Koi panin hong pai na hi hiam?” a ci hi. Amah in dawngin, “Kei pen Amalek mi peemta khat’ tapa ka hi hi,” a ci hi. David in ama kiangah, “ Topa’ sathau nilh pa a that dingin na khut na liik khiat ding na lau loh a bangci thu ahi hiam?” a ci hi. Tua ciangin David in tangvalte khat samin, “Pai in; amah thatlum in,” a ci hi. Amah in tua thupuak pa sat a, amah a si hi. Tua ciangin David in ama kiangah, “Nangma mawhna nangma lu tungah tung ta hen; bang hang hiam cih leh nangma kampau in nang’ langkhatah teci pangin, ‘ Topa’ sathau nilh pa ka that khin hi,’ na ci hi,” a ci hi. Tua ciangin Saul le a tapa Jonathan’ hangin kah la phuakin David kap a, amah in Judah mite tungah hih kah la a kihilh nading thu a pia hi. Tua la pen Jashar Laibu sungah kigelh hi. Amah in: “Israel aw, na minthanna, na mual sangte tungah kithat! A vanglianpa bangci-in tuk! Gath khua sungah gen kei in. Ashkelon kongzingah genthang kei in. Filistia numeite lungdam kha ding, dawibia numeite nuamin diang kha ding. “No Gilboa mualte aw, daitui ahi a, guahtui ahi zongin, na tung uhah omsak kei un. Tui thukpi kilok zong omsak kei un! Bang hang hiam cih leh a vanglianpa’ lum nin a, Saul’ lum, sathau kinuh lo hi. “Jonathan’ thaltang gupha a, Saul’ namsau zong kihtakhuai hi. Jonathan’ thaltang guakkik lo a, Saul’ namsau zong hong guakkik lo hi. “Saul le Jonathan, ki-it uh a, it-huai uh! A sih a hinin amaute kikhen lo a, muvanlai sangin zaptel zaw uh a, humpinelkai sangin thahat zaw uh hi. “No Israel numeite aw, Saul’ hangin kap un. Puansan neel a silh, na puan tung uhah kizepna kham a suangte aw, ama hangin kap un. “A vanglianpa bangci-in tuk galphual sungah! Jonathan aw, na mual sangte tungah nang hong kithat hi. Nangma hangin ka lungkham hi, ka sanggam Jonathan; kei nong itna lamdang a, numei’ itna sangin lianzaw hi. “A vanglianpa bangci-in tuk, galhiamte bangci-in sia!” a ci hi. Hih hun khit ciangin David in Topa thu dong a, “Judah khuapi khat peuhpeuhah ka paito ding hiam?” a ci hi. Topa in ama kiangah, “Paito in,” a ci hi. David in, “Koi penah paito ding ka hi hiam?” a ci hi. Amah in, “Hebron-ah,” a ci hi. Tua ahih ciangin tua lai-ah David paito a, ama zi nihte, Jezreel khua mi Ahinoam le Karmel khua mi Nabal’ zi meigongnu Abigail zong a pai uh hi. David in amah tawh a om a mite, mi khempeuh a innkuanpih ciat tawh paipihto a, Hebron khua-ah amaute a teng uh hi. Tua ciangin Judah mite hong pai-in amaute in tua lai munah Judah kumpi dingin David sathau a nilh uh hi. Amaute in David kiangah, “Saul a vuite pen Jabeshgilead mite hi,” ci-in a gen uh ciangin Jabeshgilead mite kiangah David in kamtaite sawlin amaute kiangah, “Note in na topa uh Saul tungah thumanna lakin amah vui na hih manun Topa in note thupha hong pia ta hen! Tu-in Topa in itna kip le thumanna note tungah hong lak ta hen! Note hih bangin gamta na hih manun note tungah thuhoih kong bawl ding hi. Tua ahih ciangin tu-in note kithakhauhsakin hang un; bang hang hiam cih leh na topa uh Saul si a, Judah mite in amau’ tungah kumpi-in kei sathau hong nilh khin uh hi,” a ci hi. Tu-in Ner’ tapa Abner, Saul’ galkap mangpa in Saul’ tapa Ishbosheth la-in Mahanaim ah paipih hi. Amah in Gilead, Ashur, Jezreel, Efraim, Benjamin, le Israel khempeuh tungah kumpi-in amah bawl hi. Israel-te tungah uk dingin a kipatin Saul’ tapa Ishbosheth kum sawmli pha a, amah in kum nih sung uk hi. Ahih hangin Judah minamte in David’ nung zui uh hi. Judah minamte tungah kumpi-in Hebron-ah David kum sagih le kha guk sung a om hi. Ner’ tapa Abner le Saul’ tapa Ishbosheth’ nasemte Mahanaim panin Gibeon-ah paikhia uh hi. Zeruiah’ tapa Joab le David’ nasemte paikhia-in Gibeon bual-ah amaute dawntuah uh hi. Amaute bual langkhatah, adang khatte a bual langkhatah tu uh hi. Tua ciangin Abner in Joab kiangah, “Tangvalte ding sakin eite’ mai-ah kimawlsak ni,” a ci hi. Joab in, “Amaute dingsak in,” a ci hi. Tua ciangin amaute dingin galkah uh a, Benjamin le Saul’ tapa Ishbosheth a dingin sawm le nih, le David’ nasemte zong sawm le nih mah ahi hi. Tua ciangin alang ciat uh lutang lenin, a namsau tawh a lang pa dawt ciat uh hi. Tua ahih ciangin amaute tukkhawm uh hi. Tua ahih manin Gibeon-ah a om tua mun pen Helkathhazzurim kici hi. Tua ni-in galkidona nasia mahmah a, Abner le Israel mite David’ nasemte in zo uh hi. Zeruiah’ tapa thumte, Joab, Abishai, le Asahel, tua lai-ah om uh hi. Asahel pen Syria sakhi lee bangin a khe manlang hi. Asahel in Abner delh a, amah a delh laitakin Abner a zuihna-ah pial hetloin delh paisuak hi. Tua ciangin Abner in a nung enin, “Asahel aw, nang na hi hiam?” a ci hi. Amah in dawngin, “Keimah ka hi hi,” a ci hi. Abner in ama kiangah, “Na taklamah ahi a, na veilamah ahi zongin kihei inla, tangvalte khatpeuh manin a na sut in,” a ci hi. Ahih hangin amah a zuihna panin Asahel pial lo hi. Tua ciangin Abner in Asahel kiangah, “Keimah zuihna panin pial in; bang hangin nang lei-ah hong vatgawp ding ka hi hiam? Nang hong vatgawp leng na sanggampa Joab’ mai-ah ka maitang bangci lak ding ka hi hiam?” a ci kik hi. Ahih hangin amah lampial nuam lo hi. Tua ahih ciangin Abner in a teipi tong lamin a gil khawh a, a nungah a teipi lengsuak hi. Tua ciangin amah tukin tua phualah a si hi. Asahel tukin a sihna munah a pai mi khempeuh tang loin a ding uh hi. Ahih hangin Joab le Abishai in Abner delh ding kipan uh hi. Ni a tum laitakin Gibeon gamlak paina lampi-a om Giah mai-ah a kikhung Ammah mual a tung uh hi. Tua ciangin Abner a pawlpih Benjamin-te kikaikhawm uh a, amaute pawlkhat suakin mual dawn khatah a pang uh hi. Tua ciangin Abner in Joab samin, “Mi hih bangin kithat lai ding ahi hiam? A tawpna-ah a haksat zawk nading thei lo na hi hiam? A sanggamte uh a delhna panin na mite a kihei nadingin na thupiak ding bangtan sawtlai ding ahi hiam?” a ci hi. Tua ciangin Joab in, “Pasian a nungta ahih mah bangin, hong pau lo hi lecin, a sanggamte uh a delhna panin zingsang mateng mite khawl lo taktak ding uh hi,” a ci hi. Tua ahih ciangin Joab in peengkul tum hi. Mi khempeuh khawl a, Israel-te delh nawn loin amaute in do nawn lo uh hi. Tua ciangin Abner le a mite Arabah kantanin tua zan tawntung pai uh hi. Amaute in Jordan kantan uh a, sun ma sungteng pai-in Mahanaim tung uh hi. Abner a delhna panin Joab ciahkik hi. Amah in mi khempeuh a kaihkhop khit ciangin Asahel sim lohin David’ nasemte mi sawmkua le kua kisam hi. Ahih hangin David’ nasemte in Abner a’ ahi Benjamin-te mihing zathum le sawmguk that uh hi. Tua ciangin amaute in Asahel la-in Bethlehem-ah a om ama pa’ hanah a vui uh hi. Tua ciangin Joab le a mite zan tawntung pai uh a, Hebron-ah khua a vak hi. Saul’ innkuan le David’ innkuante’ kikalah sauveipi galkidona om hi. David thahat semsem a, Saul thaneem semsem hi. Hebron-ah David’ tapate suak hi: A tacil pen Jezreel khuami Ahinoam tawh a neih Ammon ahi hi. A ta nihna pen Karmel khua mi Nabal’ zi meigongnu Abigail tawh a neih Khileab ahi hi. A thumna pen Geshur kumpipa Talmai’ tanu Maakah’ tapa Absalom ahi hi. A lina pen Haggith’ tapa Adonijah ahi hi. A ngana pen Abital’ tapa Shefatiah ahi hi. A gukna pen David’ zi Eglah ta Ithream ahi hi. Hihte pen Hebron khua-ah David’ sung pan a suak ahi hi. Saul innkuan le David innkuante a kisim sungin Saul’ innkuan sungah Abner hong thahat semsem hi. Tu-in Saul in Aiah’ tanu Rizpah min nei zineu khat nei hi. Ishbosheth in Abner’ kiangah, “Bang hangin ka pa’ zineu luppih na hi hiam?” a ci hi. Tua ciangin Ishbosheth’ thugennate hangin Abner heh mahmah a, “Kei pen Judah mite a dingin ui bang lel ka hi hiam? Keimah in na pa Saul’ innkuante, a sanggam pasalte, le a lawmte tungah tuni dongin thumanna ka lak lai a, David’ khut sungah note kong pia nai kei hi. Ahi zongin tuni-in nang in numei khat lel tawh kisai-in kei nong mawhsak hi. Ishbosheth in kam khatin zong Abner dawng ngam lo hi; bang hang hiam cih leh amah in Abner kihta hi. Tua ciangin Abner in Hebron-a David kiangah kamtaite sawlin, “Hih gam kua in uk ding ahi hiam? Kei tawh thuciamna hong bawl in. Israel-te khempeuh nang kiangah a paipih dingin keimah kong pang ding hi,” a ci hi. Amah in, “Pha hi; nang tawh thuciamna khat ka bawl ding hi. Ahih hangin nang’ tung panin na khat ka kisam hi. Tua pen, kei tawh a kimu dingin nong pai ciangin Saul’ tanu Mikhal nong paipih masak kei leh ka mai na mu kei ding hi,” a ci hi. Tua ciangin David in Saul’ tapa Ishbosheth kiangah kamtaite sawlin, “Filistia-te’ vundawn za khatin ka leisa ka zi Mikhal hong pia in,” a ci hi. Tua ciangin Ishbosheth in mi sawlin ama pasal, Laish tapa Paltiel kiang panin amah a la hi. Ahih hangin a pasal in amah zui-in, Bahurim paina lam tawntung ama nungah a kap hi. Tua ciangin Abner in ama kiangah, “Pai in; ciahkik in,” a ci hi. Tua ciangin amah ciahkik hi. Tua ciangin Abner in Israel upate tawh thu kikumin, “A beisa tawlkhat sungteng note tungah kumpi dingin David na zong uh hi. Tu-in taksuak sak un. Bang hang hiam cih leh Topa in David tungah kam ciamin, ‘Ka nasempa David’ khut tawh Filistia-te’ khutsung pan le amau’ galte khempeuh’ khutsung panin ka mi Israel-te ka honkhia ding hi,’ ci hi,” a ci hi. Abner in Benjamin-te tungah zong thu gen hi. Tua ciangin Israel-te le Benjamin-te khempeuh in tua bangin hih ding hoih hi, ci-in a ngaihsutna uh Hebron-a David’ kiangah a gen dingin Abner a pai hi. Hebron-a David kiangah mihing sawmnih tawh Abner a pai ciangin, Abner le amah tawh a om mite a dingin David in pawi khat a kham hi. Tua ciangin Abner in David kiangah, “Amaute in nang tawh thuciamna a bawl theih nading le na deih bangin amaute khempeuh tungah na uk theih nadingin keimah dingin ka to kumpipa kiangah Israel-te khempeuh ka kaikhawm ding hi,” a ci hi. Tua ahih ciangin David in Abner sawlkhia a, amah zong lung nuamin a pai hi. Tua khit phetin a galsimna panun David’ nasemte Joab tawh hong tung uh a, amaute in na tampi hong ciahpih uh hi. Ahih hangin Hebron khuasung David kiangah Abner na om nawn lo hi; bang hang hiam cih leh David in amah sawlkhia khin a, amah lungnuamin ciah khinzo hi. Joab le amah tawh a om galkap khempeuh hong tun ciangin Joab kiangah, “Kumpipa’ kiangah Ner’ tapa Abner hong pai a, lungnuam takin amah ciahkhiasak khin hi,” ci-in kigen hi. Tua ciangin kumpipa kiangah Joab pai-in, “Bang hih na hi hiam? Na kiangah Abner hong pai hi. Nang in amah sawlkhia-in amah a ciahkhiat khitna bang thu ahi hiam? Nang hong khem ding, na pusuahna le na sungtumna a thei ding, le na hihna khempeuh a thei dingin Ner’ tapa Abner’ hong paina na thei hi,” a ci hi. David’ omna panin Joab a paikhiat ciangin, amah in Abner’ nungah kamtaite sawl a, amaute in Sirah Tuibeem panin amah hong paipih kik uh hi. Ahih hangin David in tua thu thei lo hi. Hebron-ah Abner hong paikik ciangin, Joab in amah tawh a kituam ho dingin kulhkongpi pamah paikhiatpih a, a sanggampa Asahel’ phulakna-in amah in a gil sun a, tua ciangin a si hi. Tua khit, David in tua thu a zak ciangin amah in, “Ner’ tapa Abner a kithahna hangin Topa’ mai-ah keimah le ka kumpi gam, a tawntungin mawhbaang lo hi. Joab lu tung le ama innkuante khempeuh tungah tu ta hen! Joab’ innkuante nin paikhia a nei mi ahi a, a phak mi ahi a, ciangkhut khun mi ahi a, namsau tawh a kithat mi ahi a, annek ding a nei lo mi tawh ahi zongin kilawi ngei kei ta hen!” a ci hi. Tua bangin Joab le a sanggampa Abishai in Abner that uh hi; bang hang hiam cih leh amah in Gibeon-a galkidona-ah a sanggampa uh Asahel thahsak hi. Tua ciangin David in Joab le amah tawh a om mi khempeuh kiangah, “Na puan uh balkekin puanhampi silh unla, Abner’ mai-ah kap un,” a ci hi. Kumpipa David in hankuang a zui hi. Amaute in Hebron-ah Abner vui uh a, Abner’ hanah kumpipa a kap hi. Tua ciangin mi khempeuh zong a kap uh hi. Tua ciangin Abner’ hangin kumpipa in kah la-in, “Mi hai pa a sih bangin Abner si ding ahi hiam? Na khutte kihen lo a, na khete kol kibulh lo hi. Mi gilote’ thah bangin nang na si hi,” a ci hi. Tua ciangin mi khempeuh ama hangin kap kik uh hi. Tua ciangin ni a omlai-in an ne dingin David a zol dingin mi khempeuh hong pai uh a, ahih hangin David kiciamin, “Ni a tum matengin an ahi a, na khat peuhpeuh ahi zongin ka ciap taak leh Pasian in kei hong dawm kei ta hen!” a ci hi. Tua ciangin mi khempeuh in tua thu thei uh a, tua in amaute lungdamsak hi. Kumpipa’ sep khempeuh in mi khempeuh lungdamsak hi. Tua ahih ciangin Ner’ tapa Abner thah ding kumpipa’ deihna ahih lohlam tua ni-in mi khempeuh le Israel-te khempeuh in thei uh hi. Tua ciangin kumpipa in a nasemte kiangah, “Tuni-in Israel-te sungah ulian ahi milian khat a tukna thei lo na hi uh hiam? Sathau kinilh kumpipa hinapi-in tuni-in ka tha a nem hi. Zeruiah’ ta hih mite kei a dingin haksa lua hi. Gamtatsia pa a gitlohna bangin Topa in thuk ta hen!” a ci hi. Saul’ tapa Ishbosheth in Hebron-ah Abner a sihna thu a zak ciangin a tha kiam a, Israel-te khempeuh lungkia hi. Saul’ tapa in galsim pawlte a makai mi nih nei hi. Khat pa’ min Baanah hi-in, adang khat pa’ min Rekhab hi a, Beeroth khua pan Benjamin mi Rimmon’ tapate ahi uh hi. (Bang hang hiam cih leh Beeroth zong Benjamin a’ in kisim hi. Beeroth mite Gittaim-ah tai uh a, tuni dongin tua lai-ah peemta-in om uh hi.) Saul’ tapa Jonathan in a khezaw tapa khat nei hi. Jezreel panin Saul le Jonathan’ thu hong tunin amah kum nga pha hi. Amah a cingnu in amah la-in taipih a, tua nu a nawhtaina lamin naupang kia-in a khe zaw hi. Ama min Mefibosheth ahi hi. Tu-in Beeroth mi Rimmon’ tapate Rekhab le Baanah ding khia uh a, sun nisat hun pawlin Ishbosheth’ inn-ah a sun tawlngak laitakin hong tung uh hi. Inn kongcing nu mangbuh a su khin hi a, a lusuk suakin ihmu hi. Tua ahih ciangin Rekhab le a sanggampa Baanah simlut uh hi. Amaute inn sungah a tun uh ciangin a lupna deisung a lupna tungah Ishbosheth lumin a om laitakin amaute in amah satin that uh a, a lu tan uh hi. Amaute in ama lu la-in Arabah lam tawnin zan tawntung pai uh a, Ishbosheth’ lutang Hebron-a David’ kiang tunpih uh hi. Amaute in kumpipa kiangah, “Hih lai-ah, thah dingin nang a hong zong, na gal Saul’ tapa Ishbosheth’ lutang om hi. Topa in tuni-in Saul le a suanlekhakte tungah kote’ to kumpipa a dingin hong thuksak hi,” a ci uh hi. Ahih hangin David in Beeroth mi Rimmon’ tapate Rekhab le a sanggampa Baanah dawngin, “Haksatna khempeuh panin ka nuntakna hong honkhia Topa a nungta ahih mah bangin, mi khat in kei kiangah, ‘En in, Saul si hi,’ ci-in hong gen ciangin, amah thuhoih puakin kingaihsun a, ama thu puak thaman ka piakna-in amah manin Ziklag-ah ka that hi. Migilote in a thuman mi khat ama innsung a lupna tungah a thah ciangin note’ tungah ama phu hong la-in, leitung panin note hong susiazaw kan ding hi lo ahi hiam?” a ci hi. Tua ciangin David in a tangvalte thu pia a, tangvalte in amaute thatin a khut le a khete sattan uh a, Hebron-a bual gei-ah amaute khai uh hi. Ahih hangin amaute in Ishbosheth’ lutang la-in Hebron-a Abner’ hanah a vui uh hi. Tua ciangin Israel minamte khempeuh Hebron-a David kiangah hong pai-in, “En in, kote pen nangma guh le nangma sa ka hi uh hi. A beisa hunte-ah, kote tungah Saul kumpi ahih laitakin Israel-te kuan khiatpihin a ciahpih pa pen nangmah na hi hi. Topa in nangma kiangah, ‘Nang pen keima mi Israel-te a cing pa hi-in, Israel-te tungah ulian na hi ding hi,’ hong ci hi,” a ci uh hi. Tua ahih ciangin Israel upate khempeuh Hebron-a kumpipa kiangah hong pai uh hi. Kumpipa David in amaute tawh Topa’ mai Hebron-ah thuciamna khat bawl a, amaute in Israel-te tungah kumpi-in David sathau a nilh uh hi. Gam uk dingin a kipatin David kum sawmthum pha a, amah in kum sawmli sung uk hi. Hebron panin kum sagih le kha guk sung Judah gam sung uk a, Jerusalem panin kum sawmthum le thum sung Israel-te khempeuh le Judah gam a uk hi. Tua ciangin kumpipa le a mite tua gam a teng Jebus mite a sim dingin Jerusalem-ah pai uh a, amaute in David kiangah, “Kote nong zo vet kei ding hi; mittaw le khebaite nangawn in nang hong notkhiazo ding uh hi,” a ci uh hi. “Hih lai-ah David hong paizo peuhmah lo ding hi,” ci-in ngaihsun uh hi. Ahi zongin David in kumpipa’ khua ahi Zion munmuanhuai la hi. Tua ciangin David in tua ni-in, “Jebus mite a vatgawp nuam peuhmah, keimah David in ka muhdah zahin a mudah mi peuhmah, tua khebaite le mittawte a sim dingin tuizawl dungah pai ta hen,” a ci hi. Tua ahih ciangin, “Mittawte le khebaite Topa’ inn sungah lut lo ding hi,” kici hi. Tua ciangin munmuanhuai sungah David tengin David khuapi ci-in min a phuak hi. Tua ciangin David in Millo panin biakinn lamah khuapi lam hi. David lian semsem hi; bang hang hiam cih leh Vanglian Pasian, Topa in amah ompih hi. Tua ciangin Taia kumpipa Hiram in kamtaite le taamtak singte, le David a dingin inn khat a lamsak khutsiamte, le leilesuang innlam a siamte zong a puak hi. Tua ciangin David in Israel-te’ tungah kumpi-in Topa in amah a kipsak khitna le Israel mite’ hangin ama kumpi gam a liatsakna a phawktel hi. Hebron panin hong tun khit ciangin David in Jerusalem panin zineute le zite lathuah lai a, David’ tanute le tapate piangthuah lai hi. Jerusalem-ah a neih a tate’ min: Shammua, Shobab, Nathan, Solomon, Ibhar, Elishua, Nefeg, Jafia, Elishama, Eliada, le Elifelet ahi hi. Israel-te tungah kumpi-in David sathau a kinilh khitna thu Filistia-te in a zak uh ciangin David a man dingin Filistia-te khempeuh kuanto uh hi. Ahih hangin David in tua thu za-in munmuanhuai-ah paisuk hi. Tu-in Filistia-te hong pai-in Refaim kuamsung dim uh hi. Tua ciangin David in Topa thu dongin, “Filistia-te do-in ka kuanto ding hiam? Keima khut sungah amaute na hong pia ding hiam?” a ci hi. Topa in David kiangah, “Kuanto in; bang hang hiam cih leh na khut sungah Filistia-te kong pia taktak ding hi,” a ci hi. Tua ciangin Baalperazim-ah David hong pai-in David in tua lai-ah amaute a zo hi. Tua ciangin amah in, “Tuikhang in a phulkhap bangin Topa in ka mai-ah ka galte phukham hi,” a ci hi. Tua ahih ciangin tua mun Baalperazim ci-in min kiphuak hi. Filistia-te in tua lai-ah a milimte uh nusia uh a, David le a mite in tuate a puakhia uh hi. Tua ciangin Filistia-te hong kuantokik lai-in Refaim kuamsung dim khin uh hi. David in Topa thu a dot ciangin amah in, “Na kuanto kei ding hi; amaute’ nung lamah kual pai inla, lungli kungte gal panin amaute hih in. Lungli kungte’ dawnah lampaina kheging na zak ciangin na tha saan in; bang hang hiam cih leh Filistia galkapte a vatgawp dingin na mai-ah Topa pai hi,” a ci hi. Tua ciangin Topa in amah a thupiak bangin David in hih a, Geba panin Gezer ciang dong Filistia-te a vatgawp hi. David in Israel-te a kiteelkhia mi tul sawmthum khawmkik hi. Tua ciangin David in kherub-te tungah a tu, Vanglian Topa’ min tawh a kisam Pasian’ Thuciamna Singkuang tua mun panin a paipihto dingin amah tawh a om mi khempeuh tawh Baalejudah-ah a pai hi. Tua ciangin David le Israel mite khempeuh in Topa’ mai-ah a tha neih zahun la sa-in, laiza khausai lasaknate, harp khausai lasaknate, khuangneute, kuangtuahte, le daltuahte tumin lungdamin a lam uh hi. Nakon’ ancilna mun a tun uh ciangin bawngtalte muktu ahih manin Uzzah in Pasian’ Thuciamna Singkuang lamah a khut zanin len kha hi. Tua ciangin Uzzah tungah Topa hong sinso hi. Amah in Thuciamna Singkuang lamah a khut zan ahih manin Pasian in tua lai-ah amah vatlum a, Pasian’ Thuciamna Singkuang gei-ah amah si hi. Topa in Uzzah gim pia ahih manin David heh hi. Tuni dongin tua mun pen Perezuzzah kici hi. Tua ahih ciangin tua ni-in David in Topa kihta hi. Amah in, “ Topa’ Thuciamna Singkuang bangci-in ka kiangah hong tung thei ding ahi hiam?” a ci hi. Tua ahih ciangin David khuapi sungah Topa’ Thuciamna Singkuang a paipih ding David ut lo a, Gath khua mi Obededom’ inn-ah paipih hi. Topa’ Thuciamna Singkuang Gath khua mi Obededom’ inn sungah kha thum sung om a, Topa in Obededom le a innkuan khempeuh thupha a pia hi. Tua ciangin Kumpi David kiangah, “Pasian’ Thuciamna Singkuang hangin Topa in Obededom innkuan le ama neih khempeuh thupha pia hi,” ci-in kigen hi. Tua ahih ciangin David pai-in Obededom’ inn panin David khuapi-ah lungdamna tawh Pasian’ Thuciamna Singkuang paipihto hi. Topa’ Thuciamna Singkuang a puate kal guk a suan khit ciangin amah in a puate tawlkhat khawlsakin bawngtal khat le bawngno thau khat biakna-in a pia hi. Tua ciangin a tha neih khempeuh tawh Topa’ mai-ah David lam hi. David in saihadial siampipuan khat silh hi. Tua ahih ciangin David le Israel mi khempeuh in otna le saki tumna awging tawh Topa’ Thuciamna Singkuang paipihto uh hi. Topa’ Thuciamna Singkuang David khuapi sung hong tun laitakin tawlet panin Saul tanu a zi Mikhal hong khuadak a, Topa’ mai-ah Kumpi David diangin a lam mu hi. Tua nu in a lungsim sungah amah simmawh hi. Tua ciangin amaute in Topa’ Thuciamna Singkuang hong tumpih uh a, David in ama a dingin a lamsak puanbuk sung ama mun dingah a koih hi. Tua ciangin David in Topa’ mai-ah meihal biaknate le thunuama biaknate a pia hi. David in meihal biaknate le thunuama biaknate a piak khit ciangin amah in Vanglian Topa’ min tawh mite thupha pia a, Israel mihon buppi, mi khempeuh, numei le pasalte tungah anlum pheng khat, sa baak khat, le leenggahkeu pheng khat ciat a pia hi. Tua ciangin mi khempeuh a inn ciat uhah a ciah uh hi. Tua ciangin a innkuante thupha a pia dingin David a ciah hi. Ahih hangin David a dawn dingin Saul’ tanu Mikhal hong paikhia a, “Tuni-in Israel kumpipa, mi mawkmawkte khat maizum loin a guak om bangin, a nasemte’ numeite’ muhna-ah tuni-in a tangguakin omin, amahmah bangci kipahtawi ahi hiam?” a ci hi. Tua ciangin David in Mikhal kiangah, “ Topa’ mi Israel-te tungah ulian dingin a hong koih dingin na pa le a innkuan khempeuhte sangin kei a hong teelzaw Topa’ mai ahi hi. Keimah in Topa’ mai-ah lungdamna ka bawl ding hi. Hih sangin a simmawhhuai zaw-in ka kibawl lai ding a, nangma mit bekah a ginalo ka hi ding hi. Ahih hangin nangma gen numeite in keimah hong pahtawi ding uh hi,” a ci hi. Tua ahih ciangin Saul’ tanu Mikhal in a sih ni dongin ta nei thei nawn lo hi. Tu-in kumpipa ama inn sungah tengin Topa in ama kiima a galte khempeuh panin tawlngakna a piak khit ciangin, kumpipa in kamsang Nathan kiangah, “Tu-in thei in; keimah taamtak inn hoih sungah ka om a, ahih hangin Pasian’ Thuciamna Singkuang puanbuk sungah omlai hi,” a ci hi. Tua ciangin Nathan in kumpipa kiangah, “Pai in; na lungsim a om khempeuh hih in; bang hang hiam cih leh Topa in hong ompih hi,” a ci hi. Ahih hangin tua zan mahin Nathan kiangah Topa’ thu hong tung a, “Pai inla ka nasempa David kiangah gen in. ‘ Topa in hih bangin ci hi: Ten nading biakinn khat hong lamsak ding na hi hiam? Israel mite Egypt panin ka paikhiatpih toh ni a kipan tuni dongin biakinn sungah ka om nai kei a, puanbuk sungah omin ka pai kawikawi hi. Israel mite khempeuh tawh ka painasa mun khempeuhah, ka mi Israel-te a cing dingin ka piak thukhente khat peuhpeuh tungah, “Bang hangin taamtak biakinn hoih hong lamsak lo na hi hiam?” ci-in kam khat beek gen ngei ka hi hiam?’ ci hi. “Tua ahih ciangin tu-in ka nasempa David kiangah hih bangin na gen ding hi. ‘Vanglian Topa in hih bangin ci hi: Ka mi Israel-te tungah ulian dingin lonona mun, tuute na zuihna panin nang kong la hi. Na paina peuhpeuhah nang tawh kong om a, na galte khempeuh ka hong zosak hi. Leitung miliante’ min khat mah bangin nang a dingin min lian khat kong bawlsak ding hi. Keimah in ka mi Israel-te a dingin mun khat ka seh ding a, amau’ munah amaute tengin a kinawngkaisak nawn loh nadingin amaute ka phut ding hi. Nidanga bangin mi ngongtatte in, ka mi Israel-te tungah thukhente ka koih khit zawh, amaute gimsak nawn lo ding hi. Na galte khempeuh panin nang tungah tawlngakna kong pia ding hi. Tua tham loin Topa in nang a dingin suanlekhak hong bawlsak ding nang tungah Topa in gen hi. Na pu na pate’ kiang na zuat ni ciangin, nangma sung panin hong suakkhia ding na tapa nangma nungah ka khangsak ding a, keimah in ama kumpi gam ka kipsak ding hi. Amah in keima min dingin biakinn khat lam ding a, keimah in ama kumpi gam tokhom a tawntungin ka kipsak ding hi. Kei pen ama pa ka hi ding a, amah pen keima tapa hi ding hi. Amah in mawhna a bawl ciangin, keimah in mite’ ciangduai tawh amah ka thuhilh ding hi. Ahih hangin nangma ma-a ka hepkhiat Saul’ tung panin ka lakkhiat bangin ama tung panin ka itna kip ka lakhia kei ding hi. Na suanlekhakte le na kumpi gam keima mai-ah a kip tawntungin kibawl ding a, na kumpi tokhom kip tawntung ding hi,’ ci-in gen in,” a ci hi. Hih thute khempeuh tawh a kizui le hih maangmuhna khempeuh tawh a kizui-in Nathan in David kiangah a gen hi. Tua ciangin kumpi David sungtumin Topa’ mai-ah tu a, “Topa Pasian aw, tu ciang dong hih bangin kei nong kep nadingin kei kua hi a, ka innkuan bang ahi hiam? Hih pen nangma mitah thu neuno khat hi lai hi, Topa Pasian aw. A hong tung ding sauveipi sung na nasempa’ suanlekhakte’ thu ding na gen khin a, mailam khangte zong kei nong lak khin hi, O Topa Pasian! David in nang tungah bang genthuah nawn ding ahi hiam? Bang hang hiam cih leh nangmah in na nasempa na thei hi, O Topa Pasian! Nangma thuciamna bang le na lungsim tawh kizui-in na nasempa na theihsak nadingin hih thu lian khempeuh na piangsak hi. Tua ahih ciangin nang na lian takpi hi, Topa Pasian aw. Ka bilun ka zakna uh tawh kizui-in nang tawh a kibang kuamah om lo a, nang simloh Pasian dang om lo hi. “Ama mite’ mai-ah minam khat le a pasian-te hawlkhiatna tawh ama a dingin min bawlin, amaute a dingin a lian a lauhuai nate hih sakin, ama mi dingin a honkhia dingin Pasian a paina na mi Israel-te, leitung minam dang kua tawh kibang ahi hiam? Nangmah in nangma mi ahi tawntung dingin na mi Israel-te nangma a dingin na kipsak hi. Topa aw, nangmah, amaute’ Pasian na suak hi. Topa Pasian aw, tu-in na nasempa le ama suanlekhakte tawh kizomin na gensa thu a tawntung dingin kipsak inla, nangma gensa bangin hih in. Tua hileh, ‘Vanglian Topa pen Israel-te tungah Pasian hi,’ ci-in nangma min kiliansak tawntung ding a, nangma mai-ah na nasempa David’ suanlekhakte kumpi-in kikipsak ding hi. Bang hang hiam cih leh Israel-te’ Pasian, Vanglian Topa nangmah in, ‘Nangma suanlekhakte kumpi-in kong bawlsak ding hi,’ ci-in na nasempa tungah pulakna na bawl khin hi. Tua ahih ciangin na nasempa in nang tungah hih thungetna hong ngen ngam hi. Tu-in Topa Pasian aw, nang, Pasian na hi a, na thute manin, na nasempa tungah hih na hoih na ciam khin hi. Tua ahih ciangin tu-in nangma mai-ah a om tawntung theih nadingin na nasempa’ suanlekhakte thupha piak ding hong lungkim in. Bang hang hiam cih leh Topa Pasian aw, nangmah in na gen khin a, nangma thupha tawh na nasempa’ suanlekhakte thupha kipia tawntung ding hi,” a ci hi. Hih thu teng khit ciangin David in Filistia-te zo-in amaute nuaisiah a, David in Filistia-te’ khutsung panin Methegammah khua a la hi. Tua ciangin amah in Moab mite zo a, amaute khauzang khat tawh tehin, leilakah amaute lumsak hi. Amah in thah dingin gual nih le khah dingin gual khat dim a teh hi. Tua ciangin Moab mite David’ khutnuai mite suakin siah a puak uh hi. Zobah kumpipa Rehob’ tapa Hadadezer in Eufratis gun kiim gamte ngahkik nuamin hong kuan ahih manin David in amah do-in a zo hi. David in ama tung panin sakol galkap tulkhat le zasagih le khe galkap tul sawmnih la hi. David in leengkai sakol khempeuh a zagui atsat a, ahih hangin leeng zakhat a dingin a kicing a siit hi. Damaskas gam a Syria mite, Zobah kumpipa Hadadezer a huh dingin hong kuan ciangin David in Syria mite tul sawmnih le tulnih a that hi. Tua ciangin David in Damaskas gam Aram-ah khuacingte a koih hi. Syria mite David’ nasem suak uh a, siah a puak uh hi. Topa in David a paina peuhpeuhah gualzawhna a pia hi. Tua ciangin David in Hadadezer’ nasemte in a puak kham kibawl lumte la-in Jerusalem-ah a paipih hi. Hadadezer’ khuapite Betah le Berothai panin Kumpi David in sumngo tampi tak a la hi. Hamath kumpipa Toi in David in Hadadezer’ galkap buppi a zawhna thu a zak ciangin, amah in Hadadezer do-in a zawhna hangin amah va hopihin a lungdampih dingin Toi in Kumpi David kiangah a tapa Joram a sawl hi. Bang hang hiam cih leh Hadadezer pen Toi tawh galin kido ngei zel hi. Joram in ngun, kham, le sumngo tawh a kibawl nate puak hi. David minthang semsem hi. A ciah ciangin amah in Ci Kuam-ah Edom mite tul sawm le tulgiat a that hi. Tua ciangin amah in Edom-ah khuacingte a koih hi. Edom gam sung khempeuhah amah in khuacingte koih a, Edom mi khempeuh David’ nasemte a suak uh hi. Topa in David a paina peuhpeuhah gualzo sak hi. Tua ahih ciangin David in Israel-te khempeuh uk a, a mite khempeuh tungah thutang le thuman a zang hi. Zeruiah’ tapa Joab in galkapte uk hi. Ahilud’ tapa Jehoshafat thu ciamteh pa ahi hi. Ahitub’ tapa Zadok le Abiathar’ tapa Ahimelek siampi ahi uh hi. Seraiah lai-at pa ahi hi. Jehoiada’ tapa Benaiah in Khereth mite le Peleth mite uk uh hi. David’ tapate pen siampite ahi uh hi. Tua ciangin David in, “Jonathan’ hangin ama tungah migitna ka lahtheih nadingin Saul’ innkuan sungah mi khatpeuh a omlai hiam?” a ci hi. Saul’ innkuan sungah Ziba min nei nasempa khat om a, amaute in David kiangah amah sam uh hi. Kumpipa in ama kiangah, “Ziba na hi hiam?” a ci hi. Amah in, “Na nasempa kei pen Ziba ka hi hi,” a ci hi. Tua ciangin kumpipa in, “Pasian’ tungah ka ciamsa bangin migitna ka lahtheih nading Saul’ innkuan-ah mi khat beek omlai lo ahi hiam?” a ci hi. Ziba in kumpipa kiangah, “Jonathan’ tapa khat omlai hi; amah a khe zaw hi,” a ci hi. Kumpipa in ama kiangah, “Amah koi-ah om ahi hiam?” a ci hi. Tua ciangin Ziba in kumpipa kiangah, “Lodebar-a Ammiel’ tapa Makhir’ inn-ah amah om hi,” a ci hi. Tua ciangin Kumpi David in mi sawlin Lodebar-a Ammiel’ tapa Makhir’ inn panin amah a lasak hi. Tua ciangin Saul’ tapa Jonathan, a ta Mefibosheth David kiangah hong pai a, maipukin zahtakna a bawl hi. Tua ciangin David in, “Mefibosheth!” a ci hi. Amah in dawngin, “En in, na nasempa,” a ci hi. Tua ciangin David in ama kiangah, “Lau kei in; bang hang hiam cih le na pa Jonathan’ hangin nangma tungah migitna kong lak ding a, na pu Saul’ leitang khempeuh nangma tungah kong piakik ding hi. Tua ciangin nangmah in ka sabuai-ah an na ne tawntung ding hi,” a ci hi. Tua ciangin amah in zahtakna bawlin, “A sisa ui tawh a kibang kei bang lel, nong hici bawl nadingin na nasempa bang ka hi hiam?” a ci hi. Tua ciangin kumpipa in Saul’ nasempa Ziba samin ama kiangah, “Saul le a innkuan tawh a kizom khempeuh na topa’ tupa’ tungah ka pia khin hi. Nang le na tapate le na nasemte in ama a dingin lo na kho ding uh a, na topa’ tupa in annek ding a neihtheih nadingin a piangte na tunpih ding uh hi. Ahih hangin na topa’ tupa Mefibosheth in keima sabuai-ah an ne tawntung ding hi,” a ci hi. Ziba in tapa sawm le nga le nasem sawmnih nei hi. Tua ciangin Ziba in kumpipa kiangah, “Ka to kumpipa in nong thupiak khempeuh tawh kizui-in na nasempa in hih ding hi,” a ci hi. Tua ahih ciangin kumpipa’ tapate khat bangin Mefibosheth in David’ sabuai-ah an a ne hi. Mefibosheth in Mika min nei tapa tangval khat nei hi. Ziba’ inn-ah a teng khempeuh Mefibosheth’ nasemte a suak hi. Tua ahih ciangin Jerusalem-ah Mefibosheth teng a, amah in kumpipa’ sabuai-ah an ne tawntung hi. Mifibosheth a khe a langnihin a zaw hi. Hih hun khit ciangin Ammon mite’ kumpipa si a, a tapa Hanun in ama tangin uk hi. Tua ciangin David in, “Keima tungah a pa thuman takin hong gamtat bangin Nahash’ tapa Hanun’ tungah thuman takin ka gamta ding hi,” a ci hi. Tua ahih ciangin David in a pa’ hangin amah a hehnem dingin a nasemte a sawl hi. David’ nasemte Ammon mite’ gamah va tung uh hi. Ahih hangin Ammon mite’ uliante in a topa uh Hanun kiangah, “David in nangma kiangah hehnemte hong sawl manin na pa a pahtawi hi, ci-in ngaihsun na hi hiam? David in a nasemte khuapi sung a en ding, le a lawnthal dingin hong sawl hi lo ahi hiam?” a ci uh hi. Tua ciangin Hanun in David’ nasemte manin a khamul uh alang ciat kiatkhiatsak a, a puan uh a laizang, a kawng ciangah atkhiat sakin amaute a sawlkhia hi. David kiangah tua thu a kigen ciangin amaute a dawn dingin amah in mi sawl hi. Bang hang hiam cih leh a mite nakpitakin maizum uh hi. Kumpipa in, “Na khamul uh a saukik mateng Jerikho-ah om unla, tua ciangin hong ciah un,” a ci hi. Ammon mite in amaute David’ huat mi a suah khitna uh a muh uh ciangin, Ammon mite in mi sawlin Bethrehob-a Syria mite, Zobah-a Syria mite, khe galkap tul sawmnih, le Maakah kumpipa’ mi tulkhat tawh, le Tob mite tul sawm le tulnih a cial uh hi. David in tua thu a zak ciangin amah in Joab le a thahat mihon khempeuh a sawl hi. Tua ciangin Ammon mite hong kuankhia-in kulhkongpi lutna-ah galsim dingin panmun hong la uh hi. Zobah le Rehob-a Syria mite, Tob mite, le Maakah-te, gamlakah amau pawl ciatin om uh hi. Joab in a nung le a mai-ah amah a sim dingin gal in a panna a muh ciangin, amah in Israel-te’ sung pan mi pawlkhat teelkhia a, Syria mite a do dingin a pangsak hi. Ama mi a omlai teng a sanggampa Abishai’ ukna sungah koih a, Ammon mite’ langkhatah amaute a pangsak hi. Tua ciangin amah in, “Syria mite kei a dingin a hat luat leh kei nong huh ding hi. Ahih hangin Ammon mite nang a dingin a hat luat le kei hong pai-in nang kong huh ding hi. Kihangsak in; i mite a’ ding le i Pasian’ khuapite a dingin kipasalsak ni; Topa in hoih a sak bangin hong hih ta hen,” a ci hi. Tua ahih ciangin Joab le amah tawh a om mite in Syria mite a do dingin naih uh a, ama mai-ah amaute tai uh hi. Ammon mite in Syria mite a tai a muh uh ciangin amaute zong Abishai’ mai-ah tai-in khuapi sungah lut uh hi. Tua ciangin Ammon mite a dona panin Joab ciahin Jerusalem-ah a tung hi. Israel-te in amaute a zawhna thu Syria mite in a muh uh ciangin amau mahmah kikaikhawm uh hi. Tua ciangin Hadadezer in mi sawlin Eufratis galkhat a Syria mite samsak hi. Hadadezer’ galkap mangpa Shobak makai-in Helam-ah amaute tung uh hi. Hih thu David kiangah a kigen ciangin amah in Israel-te khempeuh kaikhawm a, Jordan kantanin Helam tung uh hi. David a do dingin Syria mite in na pang uh a, amah tawh kido uh hi. Israel-te’ mai-ah Syria mite tai uh hi. David in leeng zasagih a hawl Syria mite, le sakol tung tuang mi tul sawmli thatin, amau’ galkap mangpa Shobak liamsak a, tua lai-ah amah a si hi. Hadadezer’ nasem ahi kumpite khempeuh in Israel-te in amaute a zawhna thu a muh uh ciangin, amaute in Israel-te tawh kilemna bawl uh a, amaute’ khutnuai mi a suak uh hi. Tua ahih ciangin Ammon mite a huh lai ding uh Syria mite lau ta uh hi. Galdo dingin kumpite a kuankhiat hun tua kum phalbi sungin David in Joab, le amah tawh a om a nasemte, le Israel-te khempeuh sawl a, amaute in Ammon mite sugawpin Rabbah khua umcih uh hi. Ahih hangin David Jerusalem-ah om hi. Khatvei nitak lamin a lupna panin David tho-in kumpi innkhumzangah a pai leh innkhumzang panin amah in numei khat a kisil galmuh kha hi. A numei melhoih mahmah hi. David in mi sawlin tua numei’ thu kansak hi. Mi khat in, “Hih nu pen Hit mi Uriah’ zi, Eliam’ tanu Bathsheba hi lo ahi hiam?” a ci hi. Tua ahih ciangin David in kamtaite sawlin tua nu samsak hi. Tua nu ama kiangah hong pai a, amah in tua nu luppih hi. (Tua nu a khasim nitna panin a kisiansuah tung ahi hi.) Tua ciangin ama inn-ah a ciah hi. Tua ciangin tua numei gai hi. Amah in mi sawlin David kiangah, “Nau ka paii hi,” ci-in gensak hi. Tua ciangin David in Joab kiangah thu puak a, “Hit mi Uriah ka kiangah hong sawl in,” a ci hi. Tua ciangin Joab in David kiangah Uriah sawl hi. Ama kiangah Uriah a tun ciangin David in Joab bangci om a, mite bangci uh a, galdona bangci mavan’ hiam cih dong hi. Tua ciangin David in Uriah kiangah, “Na inn-ah ciahsuk inla tawlnga in,” a ci hi. Tua ciangin kumpipa’ inn panin Uriah paikhia a, kumpipa kiang panin letsong khat in amah zui hi. Ahih hangin Uriah a topa’ nasemte khempeuh tawh kumpipa’ kongpi gei-ah lum a, ama inn-ah ciahsuk lo hi. “Uriah a inn-ah ciahsuk lo hi,” ci-in amaute in David kiangah a gen uh ciangin David in Uriah kiangah, “Khualzin a hong tung hi lo na hi hiam? Bang hangin na inn-ah ciahsuk lo na hi hiam?” a ci hi. Uriah in David kiangah, “Thuciamna Singkuang, Israel-te, le Judah mite gal sungah om uh a, ka topa Joab le ka topa’ nasemte gamlakah giak uh hi. Tua ahih manin an ne tuidawn ding le ka zi tawh a lum dingin ka inn-ah ciahsuk ding ka hi hiam? Nangmah na hin mah bangin, hih bang ka gamta het kei ding hi,” a ci hi. Tua ciangin David in Uriah kiangah, “Hih lai-ah tuni zong om inla, zing ciangin nang kong paikhiasak ding hi,” a ci hi. Tua ahih ciangin Uriah zong tua zan le a zing ciang Jerusalem-ah om hi. David in amah samin ama omna-ah zu le an nesak a, amah zu khamsak hi. A nitak ciangin amah a lum dingin a topa’ nasemte tawh paikhia a, ahih hangin ama inn-ah ciahsuk tuan lo hi. Zingsang ciangin David in Joab kiangah lai khat gelh a, Uriah khut tungah a lai khak hi. A lai sungah, “Galsim a haksatna penah a madawkin Uriah koih inla, amah kivat tukin a sihtheih nadingin ama kiang panin nungkik un,” ci-in a gelh hi. Joab in khuapi a umcih ciangin mi a hangte om hi, ci-in a theihna munah Uriah a seh hi. Khuapi mite hong kuankhia-in Joab tawh kido uh hi. Mite’ lakah David’ nasemte pawlkhat si hi. Hit mi Uriah zong kithat hi. Tua ciangin Joab in mi sawlin galkidona thu khempeuh David kiangah a gen hi. Amah in kamtai pa thu hilhin, “Galkidona thu khempeuh kumpipa kiangah na gen khit ciangin, kumpipa a heh suakin amah in nangma kiangah, ‘A sim dingin khuapi-ah tua zahin a nai-in pai na hi uh hiam? Kulh tung panin hong kap ding uh thei lo na hi uh hiam? Jerubbesheth’ tapa Ahimelek kua in that hiam? Numei khat in angawina suangpek tungnung kulh tung pan ama tungah khiatsukin Thebez-ah amah si hi lo ahi hiam? Bang hangin tua zahin kulh nai-ah pai na hi uh hiam?’ hong cih leh nangmah in, ‘Hit mi na nasempa Uriah zong si hi,’ na ci ding hi,” a ci hi. Tua ahih ciangin kamtai pa pai a, hong tungin a gen dingin Joab in a sawl thu khempeuh David kiangah a gen hi. Kamtai pa in David kiangah, “Mite in kote hong zothawhin gamlakah kote a do dingin hong kuankhia uh hi. Ahih hangin kote in kulhkongpi lutna dongah amaute ka notkik uh hi. Tua ciangin thaltawite in kulh tung panin na nasemte hong kap uh a, kumpipa’ nasem pawlkhat si hi. Hit mi na nasempa Uriah zong si hi,” a ci hi. David in kamtai pa kiangah, “Joab kiangah hih bangin na gen in: ‘Hih thu hangin nangmah kilungkhamsak kei in; bang hang hiam cih leh namsau in koi lai panin hong vat ding cih a kimatheih lo mah ahi hi. Khuapi na simna hanciamin lumlet in,’ ci-in Joab hanthawn in,” a ci hi. Uriah’ zi in a pasal a sihna thu a zak ciangin a pasal’ hangin kap hi. A kahna a ven’ ciangin David in mi sawlin ama inn-ah tua nu lasak a, tua nu ama zi suakin, amah tawh tapa khat a nei hi. Ahih hangin David’ gamtatna thu in Topa lungkim lo sak hi. Tua ciangin Topa in David kiangah kamsang Nathan sawl hi. Amah hong pai-in David kiangah, “Khuapi khat sungah mi nih om a, khat hau-in a khat zawng hi. A hau pa in tuuhon le bawnghon tampi nei hi. Ahih hangin a zawng pa in bangmah nei lo a, a leisa tuuno a nu khat bek nei hi. Amah in tua tuuno khoi a, amah le a tate tawh khangkhawm hi. Ama an ne-in a hai panin dawn a, ama ang sungah lum a, ama a dingin tanu tawh kibang hi. Tu-in mihau pa’ inn-ah zin khat hong tung a, amah in a tuuhon ahi a, a bawnghon pan ahi zongin ama kiangah a tung khualzin pa a dingin a gawh ding la nuam loin mizawng pa’ tuuno laksak a, ama kianga a tung mipa a dingin a gawhsak hi,” a ci hi. Tua ciangin tua mipa’ tungah David sinso mahmah hi. Amah in Nathan kiangah, “ Topa a nungta ahih mah bangin hih banga a gamta mipa a sih ding kilawm hi. Amah hih bangin gamta a, amah in hehpihna nei lo ahih manin a tuuno a zah li-in loh ding hi,” a ci hi. Tua ciangin Nathan in David kiangah, “Nang pen tua mipa na hi hi. Israel Pasian, Topa in hih bangin ci hi: ‘Israel-te tungah kumpi-in nang sathau hong nilhin Saul’ khutsung panin nang kong honkhia hi. Keimah in na topa’ inn le na topa’ zite na khut sungah kong pia a, Israel-te le Judah mite nang kong pia hi. Hihte a tawmlua hileh tua zah nih a hong pia khin ding ka hi hi. Ama muhna-ah a sia a gamta dingin bang hangin Topa’ thu simmawh na hi hiam? Nangmah in Hit mi Uriah namsau tawh vatin, ama zi nangma zi dingin na la a, Ammon mite’ namsau tawh amah na that khin hi. Tua ahih ciangin tu-in nangmah in kei hong simmawhin Hit mi Uriah’ zi nangma zi dingin la khin na hih manin na inn sungah namsau tawh kidona veng ngei lo ding hi,’ ci hi. Topa in hih bangin ci hi: ‘En in, keimah in nangma innkuan sung panin nangma langah siatna a piangsak ding khat ka khangsak ding hi. Na zite na muhin la-in na vengpa’ tungah ka pia ding a, amah in sun nitaang sungah na zite luppih ding hi. Bang hang hiam cih leh nangmah in a simthamin na hih hi; ahih hangin keimah in Israel-te khempeuh’ muh dingin suntangpi-in ka hih ding hi,’ ci hi,” a ci hi. David in hih thu a zak ciangin Nathan kiangah, “ Topa’ tungah ka khial khin hi,” a ci hi. Tua ciangin Nathan in David kiangah, “ Topa in zong na khialhna hong maisak khinzo hi; nang na si kei ding hi. Ahi zongin, hih bangin gamtatna tawh Topa thusim peuhmah lo na hih manin nang’ sung panin a hong piang naungek si ding hi,” a ci hi. Tua ciangin Nathan a inn-ah a ciah hi. Tua ciangin Uriah’ zi in David tawh a neih naungek Topa in vat a, a ci hong na hi. Tua ahih ciangin David in naungek a dingin Pasian’ tungah thum hi. David in an tangin zan tawntung leilakah a lum hi. Tua ciangin leilak panin a phong dingin a innsung upate ama kiangah ding uh hi. Ahih hangin amah tho lo a, amaute tawh an zong ne nuam lo hi. A ni sagih ni-in naungek si hi. Ama kiangah, naungek si hi, ci-in a gen ding uh David’ nasemte lau uh hi. Bang hang hiam cih leh amaute in, “Naungek a hinlai nangawnin amah i hopih hangin i thu hong ngai lo hi. Tua ahih ciangin bangci-in ama kiangah, naungek si, ci ngam ding ihi hiam? Amahmah kisusia kha ding hi,” a ci uh hi. Ahih hangin ama nasemte a kihuauna uh David in a muh ciangin naungek si hi, ci-in a thei hi. Tua ciangin David in a nasemte kiangah, “Naungek si ahi hiam?” a ci hi. Amaute in, “Amah si ta hi,” a ci uh hi. Tua ciangin David leilak panin tho-in kisil a, sathau nilhin a puante khek a, Topa’ inn-ah pai-in Pasian a bia hi. Tua ciangin ama inn-ah ciah hi. An a nget ciangin amaute in a mai-ah lui uh a, amah in a ne hi. Tua ciangin a nasemte in ama kiangah, “Hih banga na gamtatna a bangci hiam? Naungek a hin lai-in an tangin na kap hi; ahih hangin naungek a sih ciangin tho-in an na ne zawsop hi,” a ci uh hi. Amah in, “Naungek a hin lai-in an tangin ka kap hi; bang hang hiam cih leh, ‘Naungek a hin nadingin Topa in kei hong hehpih ding hiam, hong hehpih lo ding hiam, cih kua in theikhol ahi hiam?’ ka ci hi. Ahih hangin tu-in amah si ta hi; bang hangin an tang nawn ding ka hi hiam? Amah lakik thei ding ka hi hiam? Ama kiangah kei ka pai ding a, ahih hangin kei kiangah amah hong kik lo ding hi,” a ci hi. Tua ciangin David in a zi Bathsheba hehnem a, ama kiangah pai-in amah tawh a lumkhawm hi. Tua nu in tapa khat nei a, a min Solomon a phuak hi. Topa in tua naupang it ahih manin, kamsang Nathan’ tungah thu puak hi. Topa’ itna hangin ama min Jedidiah a phuah ding a gen hi. Tu-in Joab in Ammon khuapi Rabbah simin a khuapi tuikhuk la hi. Joab in David kiangah kamtaite sawlin, “Rabbah khuapi ka sim a, a khuapi tuikhuk ka la khin hi. Tua ahih ciangin mi a omlaiteng kaikhawm inla, khuapi langah phual satin khuapi la in; tua hikeileh keimah in khuapi la-in keima min pua kha ding hi,” a ci hi. Tua ahih ciangin David in mi khempeuh kaikhawmin Rabbah-ah pai a, tua khuapi simin a la hi. Tua ciangin amah in amau’ pasian Molek lu tungah a om lukhu a laksak hi. Tua lukhu kham talen khat gik a, a sungah suangmanpha khat om hi. David’ kumpi lukhu tungah tua suangmanpha kikoih hi. Tua ciangin amah in khuapi sunga vankinusiate tampi tak paikhiatpih hi. Amah in a sunga om mite paikhiatpihin singatnate, tuzumte, le heite tawh na a sem dingin koih a, leiseek seekna-ah amaute na semsak hi. Tua bangin Ammon mite’ khuapi khempeuh a hih hi. Tua ciangin David le mi khempeuh Jerusalem-ah a ciah uh hi. Tu-in David’ tapa Absalom in Tamar min nei sanggam numei a melhoih mahmah khat nei hi. Tawlkhat khit ciangin David’ tapa Ammon in tua nu ngai hi. Ammon in ngailua mahmah ahih manin a sanggamnu Tamar hangin cinat lawh hi. Bang hang hiam cih leh nungak le tangval kituam omsak ahih manin Ammon in tua nu a muhtheih nading omtheih tuaklo hi. Ahih hangin Ammon in David’ sanggampa Shimeah’ tapa Jonadab min nei lawmpa khat nei a, Jonadab pen mi tei mahmah khat ahi hi. Amah in Ammon kiangah, “Kumpipa’ tapa aw, bang hangin zingsang khat khit zingsang khat thakiam semsem na hi hiam? Kei kiangah a hang hong gen lo ding na hi hiam?” a ci hi. Ammon in ama kiangah, “Ka sanggampa Absalom’ sanggamnu Tamar ka ngai hi,” a ci hi. Jonadab in ama kiangah, “Na lupna tungah lum inla, a cina kineih in. Nangmah a veh dingin na pa hong pai ciangin ama kiangah, ‘Keimah in mu-in ama khut panin an ka nek theih nadingin ka sanggamnu Tamar hong paisakin annek ding hong piasak inla, ka muhna-ah an hong bawl sak in,’ ci in,” a ci hi. Tua ahih ciangin Ammon lumin a cina kineih hi. Amah a en dingin kumpipa a pai ciangin Ammon in kumpipa kiangah, “Ama khut panin ka nek theih nadingin ka sanggamnu Tamar hong paisakin mohpheng nih khawng na bawlsak nading kong thum hi,” a ci hi. Tua ciangin David in inn-a Tamar kiangah mi sawlin, “Na sanggampa Ammon’ inn-ah pai-in ama a’ ding an bawlsak in,” cisak hi. Tua ahih ciangin a sanggampa Ammon lumin a omna mun a inn-ah Tamar pai hi. Amah in annel lom la-in meek a, ama muhna-ah mohphengte bawlin a em hi. Tua ciangin amah in sikbeeldai la-in ama mai-ah sungkhia a, ahih hangin amah in ne nuam lo hi. Tua ciangin Ammon in, “Kei kiang panin mi khempeuh sawlkhia masa in,” a ci hi. Tua ahih ciangin ama kiang panin mi khempeuh paikhia hi. Tua ciangin Ammon in Tamar kiangah, “Na khut tung panin ka nek theih nadingin inndei sungah an hong paipih in,” a ci hi. Tamar in a bawlsa mohphengte la-in inndei sung a sanggampa Ammon kiangah paipih hi. Ahih hangin amah in a nek dingin ama kiang nai-ah a paipih ciangin, amah in tua numei lenin ama kiangah, “Hong pai in; kei tawh hong lum in ka sanggamnu aw,” a ci hi. Amah in dawngin, “Hilo hi, ka sanggampa aw, kei hong thatang hih kei in; bang hang hiam cih leh Israel sungah tua bangin kigamta lo hi. Hih bangin hai gamtat lua kei in. Keimah in ka maizumna koi-ah seelcipzo ding ka hi hiam? Nang zong, Israel-te sungah mihai luate khat bang na hi ding hi. Tua ahih ciangin tu-in kong thum hi, kumpipa kiangah gen in; bang hang hiam cih leh amah in nang a dingin kei hong khaktan lo ding hi,” a ci hi. Ahih hangin amah in a thugen ngai lo hi. Amah sangin hatzaw ahih manin thatanghat thu tawh hihin amah luppih hi. Tua ciangin Ammon in nakpitakin Tamar mudah hi. Amah in a cil-a a itna zah sangin a muhdahna lianzaw hi. Tua ahih ciangin Ammon in ama kiangah, “Ding in, paikhia in,” a ci hi. Ahih hangin a numei in ama kiangah, “Hilo hi, ka sanggampa aw; bang hang hiam cih leh kei nong sawlkhiatna pen kei tungah nong hihsa thu sangin lianzaw hi,” a ci hi. Ahih hangin a thu ngai lo hi. Amah in a nasem tangvalpa samin, “Ka omna panin hih numei koihkhia inla, ama nungah kongkhak kalh in,” a ci hi. Tua nu in puantualpi ban nei khat silh hi; bang hang hiam cih leh kumpipa’ tanute in tua bangin puan silh hi. Tua ahih ciangin a nasempa in tua nu koihkhia-in ama nungah kongkhak kalh hi. Tua ciangin Tamar in a lu tungah vut koihin ama silh puantualpi bansau balkek hi. Tua ciangin a lu tungah a khut koihin paikhia a, a paikawmin a gingin a kap hi. Tua ciangin a sanggampa Absalom in ama kiangah, “Na sanggampa Ammon in nang hong bawlsia ahi hiam? Bangbang hitaleh kilungnuamsak in, ka sanggamnu aw; amah pen na sanggampa ahi hi; hih thu na lungsimah koih kei in,” a ci hi. Tua ahih ciangin a sanggampa Absalom’ inn-ah Tamar lungzuang khawngai-in a om hi. Kumpi David in hih thute khempeuh a zak ciangin heh mahmah hi. Absalom in Ammon kiangah a pha ahi a, a sia ahi zongin bangmah gen vet lo hi. Bang hang hiam cih leh amah in a sanggamnu Tamar thatanghat thu tawh hih ahih manin Absalom in Ammon mudah lua mahmah hi. Tua zawh kum nih bit khit ciangin Absalom in Efraim nai-a om Baalhazor-ah tuumul mette khawm a, Absalom in kumpipa’ tapate khempeuh sam hi. Tua ciangin kumpipa kiangah Absalom hong pai-in, “En in, na nasempa in tuumul mette khawm hi; kumpipa le a nasemte na nasempa tawh nong pai ding kong thum hi,” a ci hi. Ahih hangin kumpipa in Absalom kiangah, “Hilo hi, ka tapa aw; i vekpi-in pai kei ni; pai lehang kote pen nang a dingin vangik ka hi kha ding uh hi,” a ci hi. Amah in ci teitei a, ahih hangin amah pai nuam loin ama thupha a tungah a pia hi. Tua ciangin Absalom in, “Tua bang hi lo ding ahihleh ka sanggampa Ammon kote tawh nong paisak ding kong thum hi,” a ci hi. Tua ciangin kumpipa in ama kiangah, “Bang hangin nang tawh amah hong pai ding ahi hiam?” a ci hi. Ahih hangin Absalom in Ammon le kumpipa’ tapate khempeuh amah tawh a paisak mateng ci teitei hi. Tua ciangin Absalom in a nasemte thu pia a, “Ammon in zu a kham hun phawk unla, note kiangah, ‘Ammon sat un,’ kong cih ciangin amah that un. Lau kei un; note thu hong pia khin hi lo ka hi hiam? Hang unla, thahat un,” a ci hi. Tua ahih ciangin Absalom’ nasemte in ama thupiaksa bangin Ammon hih uh hi. Tua ciangin kumpipa’ tapate khempeuh dingin a la tung ciat uhah tuangin a tai uh hi. Amaute lamkalah a om laitakin David kiangah thu tung a, “Absalom in kumpipa’ tapate khempeuh that a, khat beek siit lo hi,” kici hi. Tua ciangin kumpipa ding a, a puante balkekin leilakah a lum hi. A kianga om a nasemte khempeuh in zong a puan uh balkek uh hi. Ahih hangin David’ sanggampa Shimeah’ tapa Jonadab in, “Amaute in kumpipa’ tapa tangvalte khempeuh that hi, ci-in ka topa in ngaihsun kei in; bang hang hiam cih leh Ammon bek si hi. Amah in a sanggamnu Tamar thatanghat thu tawh a hih ni a kipanin Absalom’ thupiakna tawh hih thu a kisehkhol ahi hi. Tua ahih ciangin kumpipa’ tapate khempeuh si hi, ci-in ka topa in ngaihsunin na lungsimah koih kei in; bang hang hiam cih leh Ammon bek si hi,” a ci hi. Tua kikal sungin Absalom tai hi. Tua ciangin galvil tangvalpa a khuadak leh, mualpang nai Horonaim lampi panin mihon hong pai a mu hi. Jonadab in kumpipa kiangah, “En in, kumpipa’ tapate hong tungzo hi. Na nasempa’ gen bangin hong piang takpi hi,” a ci hi. Amah in a thugen a man khit phetin, kumpipa’ tapate hong tungin hong kap uh hi. Tua ciangin kumpipa zong a nasemte khempeuh tawh nakpitakin a kap uh hi. Ahih hangin Absalom tai-in Geshur kumpipa Ammihud’ tapa Talmai kiangah tung hi. Ni tampi sung David a tapa’ hangin a thum hi. Absalom ahihleh Geshur-ah pai a, tua lai-ah kum thum sung a om hi. Tua ciangin kumpipa in Absalom ngai-in hong mahmah hi; bang hang hiam cih leh amah si hi, ci-in thei khin ahih manin Ammon’ thu-ah kihehnem khin hi. Tu-in kumpipa in Absalom a ngaihna thu Zeruiah’ tapa Joab in a phawk hi. Tua ahih ciangin Joab in Tekoa-ah mi sawlin tua panin numei pil khat la-in ama kiangah, “Dahin a kap kineih inla, dahna lim puante silh in. Sathau nilh kei inla, misi hangin ni tampi a thum khin numei bangin gamta in. Tua ciangin kumpipa kiangah pai inla, hih bangin ama kiangah thu gen in,” a ci hi. Tua ahih ciangin Joab in ama gen ding thute a hilh hi. Kumpipa kiangah Tekoa numei a pai ciangin lei-ah maipukin zahtakna bawl a, “Hong huh in! Aw kumpipa,” a ci hi. Tua ciangin kumpipa in ama kiangah, “Na lungkhamna bang om ahi hiam?” a ci hi. Amah in dawngin, “Kalai, ka pasal si ta a, meigong numei khat ka hi hi. Na nasemnu in tapa nih nei a, lo sungah amau tegel kitawng uh hi. Amau tegel a khen ding kuamah om lo a, khat in a khat pa satin that hi. Tu-in ka beh buppi na nasemnu’ langah hong pangin amaute in, ‘Ama thah a sanggampa’ nuntakna tangin amah ka thah theih nadingun a sanggampa a sat mipa hong pia in,’ hong ci uh hi. Tua bangin amaute in innluah pa zong susia ding uh hi. Tua bangin amaute in a omlai ka lametna pa beisakin leitungah ka pasal’ suanlekhak a suakta omsak lo ding uh hi,” a ci hi. Tua ciangin kumpipa in tua numei kiangah, “Na inn-ah ciah in; nang tawh kisai-in thu ka pia ding hi,” a ci hi. Tua ciangin Tekoa numei in kumpipa kiangah, “Ka to kumpipa aw, keima tung le ka innkuan tungah mawhna om ta hen; kumpipa le a tokhom mawhpeng ta hen,” a ci hi. Kumpipa in, “Nang’ tungah mi khatpeuh in thu khatpeuh hong gen leh kei kiangah amah hong paipih in; amah in nang hong sukik ngei nawn lo ding hi,” a ci hi. Tua ciangin amah in, “Phulapa in that nawn loin, ka tapa a kisuksiat loh nadingin kumpipa in Topa na Pasian’ tungah na kiciam ding kong thum hi,” a ci hi. Amah in, “ Topa a nungta ahih mah bangin na tapa’ samzang khat zong lei-ah kialo ding hi,” ci-in a kiciam hi. Tua ciangin a numei in, “Ka to kumpipa tungah na nasemnu kam khat hong gensak in, ci-in kong thum hi,” a ci hi. Amah in, “Gen in,” a ci hi. Tua ciangin a numei in, “Tua ahihleh bang hangin Pasian’ mite’ langah tua bang na hih sawm na hi hiam? Bang hang hiam cih leh hih bang lungsim khentatna na piakna-ah kumpipa in a hawlkhiatna a inn-ah a paipih kik mateng kumpipa amahmah mawh a kipia ahi hi. Eite khempeuh i si ding a, a kikhawm kik thei lo leilakah a bua tui tawh i kibang hi. Ahih hangin a hawlkhiat pa a kipuasehin a kikoih loh nadingin lampi a zong mipa’ nuntakna Pasian in lakhia lo ding hi. Mite in kei hong lausak ahih manin tu-in ka to kumpipa kiangah hih thu a gen dingin kong pai hi. Na nasemnu in, ‘Kumpipa kiangah thu ka gen ding a, kumpipa in a nasemnu’ ngetna sem kha ding hi. Bang hang hiam cih leh kumpipa in za-in, Pasian’ gamh panin kei le ka tapa hong susia khawm ding mipa’ khut panin a nasemnu honkhia ding hi,’ ci-in ngaihsun hi. Na nasemnu in, ‘Ka to kumpipa’ kammal in nopsakna hong pia ding hi,’ ci-in ngaihsun hi; bang hang hiam cih leh ka to kumpipa pen a pha le a sia a khenthei dingin Pasian’ vantungmi tawh kibang hi. Topa na Pasian in nang hong ompih ta hen!” a ci hi. Tua ciangin kumpipa in a numei dawngin, “Nang kong dot peuhpeuh hong im kei in,” a ci hi. A numei in, “Ka to kumpipa in gen hen,” a ci hi. Kumpipa in, “Hih thu khempeuh Joab’ vaihawmna tawh hong pai na hi hiam?” a ci hi. A numei in dawngin, “Nang a nungta taktak na hih mah bangin ka to kumpipa aw, ka to kumpipa’ gen bang teekteek mah ahi hi. Kei hong sawl pa pen na nasempa Joab hi a, na nasemnu’ gen dingin hih thute a hong sawl pa amah ahi hi. Na thu paizia khek nadingin na nasempa Joab in hih thu hih hi. Ahih hangin ka topa in leitung a om na khempeuh theih nadingin Pasian’ vantungmi pilna tawh a kibang pilna na nei hi,” a ci hi. Tua ciangin kumpipa in Joab kiangah, “Tu-in en in, hih thu kong pia hi; pai in, tangvalpa Absalom hong ciahpih kik in,” a ci hi. Tua ciangin Joab lei-ah maipuksuk a, zahtakna bawlin kumpipa thupha a pia hi. Tua ciangin Joab in, “Kumpipa in a nasempa’ ngetna a piakna-ah, tuni-in ka to kumpipa nangma muhna-ah maipha ka muhna na nasempa in ka thei hi,” a ci hi. Tua ahih ciangin Joab dingin Geshur-ah pai a, Jerusalem-ah Absalom a ciahpih hi. Tua ciangin kumpipa in, “Ama inn-ah amah tuam tensak in; keima omna-ah amah hong pai lo ding hi,” a ci hi. Tua ahih ciangin Absalom ama inn-ah tuam tenin kumpipa omna-ah pai lo hi. Tu-in Israel-te khempeuh sungah a melhoihna hangin Absalom zahin tua bangin phat ding kuamah om lo hi. A khenuai a kipan a luzang dongin ama tungah paubaanna om lo hi. Amah in a sam a met ciangin (kum bei simin amah in met zel hi; a sam a gih ciangin amah in met hi), amah in a sam tawi khai a, kumpipa’ gik tehna-in shekel zanih a gik hi. Absalom’ sung pan tapa thum, le a min Tamar ahi ta numei khat a suak hi; tua nu pen a melhoih mahmah khat ahi hi. Tua hi a, kumpipa’ omna-ah pai loin Absalom kum nih bit Jerusalem-ah teng hi. Tua ciangin kumpipa kiangah a sawl dingin Absalom in Joab samsak hi. Ahih hangin ama kiangah Joab hong pai lo hi. Amah in a nih veina sawl a, ahih hangin Joab hong pai lo veve hi. Tua ciangin amah in a nasemte kiangah, “En un, Joab’ lo pen keima-a’ zom hi a, tua lai-ah amah in mangbuhham nei hi; pai unla mei tawh va hal un,” a ci hi. Tua ahih ciangin Absalom’ nasemte in a lo mei tawh a hal uh hi. Tua ciangin Joab dingin Absalom’ kiang ama inn-ah pai-in ama kiangah, “Bang hangin na nasemte in mei tawh ka lo hong halsak ahi uh hiam?” a ci hi. Absalom in Joab dawngin, “En in, nang kiangah thu kong puak a, ‘Kumpipa kiangah nang hong sawlin, “Bang hangin Geshur panin hong pai ka hi hiam? Tua lai-ah omlai leng kei a dingin hoihzaw ding hi,” ci-in a va dong dingin hih lai-ah nong pai nading kong gen hi. Tua ahih ciangin tu-in kumpipa omna-ah kei hong paisak in; kei tungah mawhna a om leh amah hong thatsak in,’ ka ci hi,” a ci hi. Tua ciangin kumpipa kiangah Joab pai-in ama kiangah tua thu a gen hi. Tua ciangin kumpipa in Absalom sam hi. Tua ahih ciangin amah kumpipa kiangah hong pai a, a mai lei ngatin kumpipa’ mai-ah a kun hi; tua ciangin kumpipa in Absalom a nam hi. Hih hun khit ciangin Absalom in leeng khat le sakolte, le ama mai-ah a tai ding mi sawmnga la hi. Absalom tho baihin kulhkongpi lam gei-ah tu zel hi. Mi khatpeuh in thu khensak dingin kumpipa’ mai-ah pai nading thu a neih ciangin Absalom in amah samin, “Koi khua pan na hi hiam?” a ci hi. Amah in, “Na nasempa, Israel-te sungah tua minam tua khua ka hi hi,” a cih ciangin Absalom in ama kiangah, “Thei in, na thugente hoihin man hi; ahih hangin na thu a khen dingin kumpipa in a koih mi om lo hi,” a ci hi. Tua tham loin Absalom in, “Gam sungah kei thukhen hi leng! Thu ahi a, a hang khat peuhpeuh ahi zongin a nei mi peuhmah kei kiangah hong pai ding a, keimah in ama tungah thu a tangin ka khen ding hi,” a ci hi. Ama tungah zahtakna a bawl dingin mi khatpeuh a nai-ah hong pai ciangin amah in a khut zan a, amah lenin a nam hi. Tua bangin Absalom in kumpipa kiangah thu a khensak dingin a hong pai Israel-te khempeuh tungah a hih hi. Tua ahih ciangin Absalom in Israel mite’ lungsim na zo hi. Kum li a cin ciangin Absalom in kumpipa kiangah, “Kei hong paisak inla, Topa’ tungah ka ciamsa ka thuciam, Hebron-ah hong piasak in, ci-in kong thum hi. Bang hang hiam cih leh Aram gam Geshur-ah ka om laitakin na nasempa in thu khat ciam a, ‘ Topa in Jerusalem-ah kei hong paipih kik taktak leh Topa’ tungah biakna ka pia ding hi,’ ka ci hi,” a ci hi. Kumpipa in ama kiangah, “Nuamtakin pai in,” a ci hi. Tua ahih ciangin amah dingin Hebron-ah a pai hi. Ahih hangin Absalom in Israel minam khempeuh kiangah a simthamin kamtaite sawl a, “Peengkul aw na zak phetun, ‘Absalom, Hebron-ah kumpi hi!’ ci un,” a ci hi. A kisam mi za nihte Jerusalem panin Absalom tawh a pai uh hi. Amaute lungsim hoih tawh a pai hi a, bangmah thei lo uh hi. Absalom in biakna a piak laitakin David’ thulamlak pa, Giloh mi Ahithofel, ama khuapi Gilo panin samsak hi. Tua ciangin sawmsimna hong hat semsem a, Absalom tawh a om mite kibehlaplap hi. Tua ciangin kamtai khat David kiangah hong pai-in, “Israel mite’ lungsim Absalom’ lamah pai khin hi,” ci-in a gen hi. Tua ciangin David in Jerusalem-ah amah tawh a om a nasemte khempeuh kiangah, “Ding un, tai ni; tua hikeileh Absalom’ kiang panin eite’ suahtak nading om lo ding hi. Manlangin pai ni; tua hikeileh amah in eite hong pha pak ding a, eite’ tungah siatna hong tungsakin namsau tawh khuapi hong vat ding uh hi,” a ci hi. Tua ciangin kumpipa’ nasemte in ama kiangah, “En in, ka to kumpipa in na khensat peuhpeuh a sem dingin na nasemte kiging hi,” a ci uh hi. Tua ahih ciangin kumpipa paikhia a, ama innkuan le a ulian khempeuh in ama nung a zui uh hi. Kumpipa in inn kem dingin a zineu sawm nusia hi. Tua ciangin kumpipa paikhia a, mi khempeuh in ama nung a zui uh hi. Tua ciangin khuanawl inn tawpna-ah amaute khawl uh hi. Tua ciangin a nasemte khempeuh in amah nawkin pai uh hi. Khereth mi khempeuh, Peleth mi khempeuh, le Gath panin amah a zui mi za gukte khempeuh, kumpipa’ mai nawkin paisuak uh hi. Tua ciangin kumpipa in Gath mi Ittai kiangah, “Bang hangin nang zong kote hong zui na hi hiam? Ciahkik inla, kumpipa tawh om in; bang hang hiam cih leh nang pen gamdang mi na hi a, na inn panin gam dangah a om zong na hi hi. Nang pen zan mah beka hong pai na hi hi. Koi lai munah kei pai ding cih thei lopi-in kote tawh a kawivak dingin nang hong bawl ding ka hi hiam? Ciahkik in, na sanggamte ciahpih in. Topa in itna kip le thumanna nang’ tungah hong lak ta hen,” a ci hi. Ahih hangin Ittai in kumpipa dawngin, “ Topa nungta-in, ka to kumpipa zong nungta ahih mah bangin, sih nading ahi a, hin nading ahi zongin ka to kumpipa a omna peuhpeuhah na nasempa om ding hi,” a ci hi. Tua ciangin David in Ittai kiangah, “Tua ahihleh pai in, paisuak in,” a ci hi. Tua ahih ciangin Gath mi Ittai, a mi khempeuh le amah tawh a om a naupang khempeuh tawh a paisuak hi. Tua ahih ciangin mi khempeuh a pai laitakin gam sung mi khempeuh a gingin kapkhia uh a, kumpipa in Kidron lui kantanin, mi khempeuh zong gamlak lamah a paisuak uh hi. Tua ciangin Abiathar hong paito a, Zadok zong Levi mi khempeuh tawh hong pai-in Pasian’ Thuciamna Singkuang hong pua uh hi. Mi khempeuh in khuapi a khen’ khit mateng amaute in Pasian’ Thuciamna Singkuang nga phot uh hi. Tua ciangin kumpipa in Zadok kiangah, “Pasian’ Thuciamna Singkuang khuapi sungah puakik in. Topa’ maipha ka muh nakleh, amah in kei hong paipih kikin Thuciamna Singkuang le a omna mun hong musakkik ding hi. Ahih hangin amah in, ‘Na tungah lungkimna ka nei kei hi,’ hong cih leh, en in, hih lai-ah kei ka om hi; amah in hoih a sak bangin kei tungah hong bawl hen,” a ci hi. Kumpipa in siampi Zadok kiangah, “En in, nuamtakin nang le Abiathar, na tapa nihte Ahimaaz le Abiathar’ tapa Jonathan tawh khuapi sungah ciahkik un. Thei in, kei kiangah thu a hong zasak dingin nang’ kiang panin thuko mi hong tun mateng gamlak tui ngahmunte-ah ka na ngak ding hi,” cithuah lai hi. Tua ahih ciangin Zadok le Abiathar in Pasian’ Thuciamna Singkuang Jerusalem-ah puakik uh a, amaute tua lai-ah om uh hi. Ahih hangin Oliv Mual tung kahtohna-ah David paito a, khe guak le lu tuamsa-in a paikawmin kap hi. Amah tawh a om mi khempeuh zong lu khuhsa-in a paitoh kawmun a kap uh hi. Tua laitakin David kiangah, “Ahithofel zong mi sawmsimte lakah Absalom tawh om hi,” ci-in kigen hi. Tua ahih ciangin David in, “ Topa aw, kong thum hi; Ahithofel’ thugente haina-in na heisak in,” a ci hi. Pasian a kibiakna mun mual dawnah David a tun ciangin, Arkhi mi Hushai amah a dawn dingin a puantungsilh balkeksa le a lu tungah lei baang tawh hong pai hi. David in ama kiangah, “Nang hong zuisuak lecin kei a dingin vangik na hi ding hi. Ahih hangin khuapi sungah nang ciahkikin Absalom kiangah, ‘Aw kumpipa, kei, nangma nasem ka hi ding hi. Hun beisa sungah na pa’ nasem ka hih mah bangin tu-in nangma nasem ka hi ding hi,’ ci lecin, Ahithofel’ thugente kei a dingin na zo ding hi. Siampi Zadok le Abiathar tua lai-ah nang tawh om hi lo ahi hiam? Tua ahih ciangin kumpipa’ inn pan na zak peuhpeuh siampi Zadok le Abiathar’ kiangah gen in. En in, amau’ tapa tegel, Zadok’ tapa Ahimaaz le Abiathar’ tapa Jonathan, amaute tawh omkhawm hi. Na zak peuhpeuh amaute’ tungtawnin kei tungah nong puak ding hi,” a ci hi. Tua ahih ciangin Jerusalem-ah Absalom a lut laitakin David’ lawmpa Hushai zong khuapi sungah a pai hi. David in mual dawn a khen’ khit tawmvei ciangin Mefibosheth nasempa Ziba in anlum zanih, leenggah phehkeu bawk zakhat, khuakhal singgah zakhat le leenggahzu savun um khat a pua van a kivawh la nih tawh amah na dawn hi. Tua ciangin kumpipa in Ziba kiangah, “Bang hangin hihte hong paipih na hi hiam?” a ci hi. Ziba in dawngin, “Late pen kumpipa’ innkuante a tuan nading, anlum le khuakhal singgahte pen tangvalte’ nek ding, le leenggahzu pen gamlakah a gimte’ dawn ding ahi hi,” a ci hi. Tua ciangin kumpipa in, “Na topa Saul’ tupa koi-ah om ahi hiam?” a ci hi. Ziba in kumpipa kiangah, “Amah Jerusalem-ah om hi; bang hang hiam cih leh amah in, ‘Tuni-in Israel mite in ka pu Saul’ kumpi gam kei hong piakik ding hi,’ ci hi,” a ci hi. Tua ciangin kumpipa in Ziba kiangah, “En in, Mefibosheth’ neihsa khempeuh tu-in nangma a’ ahi hi,” a ci hi. Tua ciangin Ziba in, “Kei, nangma nasempa ka hi hi; ka to kumpipa’ muhna-ah maipha hong musak tawntung in,” a ci hi. Bahurim-ah Kumpi David a tun ciangin Saul’ innsung innkuan mi, Gera’ tapa Shimei min nei mi khat hong paikhia a, a paikawmin David samsia tawntung hi. Amah in Kumpi David le a nasemte khempeuh suang tawh deng hi. Mi khempeuh le mi thahatte khempeuh David’ taklam le veilamah om uh hi. Shimei in a samsiat kawmin, “Pai mang, pai mang, nang mi that pa, bangmah man lo mipa! Ama tangin na uk Saul’ innkuante na thahna hangin Topa in nangma tungah hong thuk hi. Topa in na tapa Absalom’ tungah kumpi gam pia khinta hi. Thei in, na siatna nangma lu tungah hong tu hi; bang hang hiam cih leh nang pen mi that pa na hi hi,” a ci hi. Tua ciangin a nu Zeruiah ahi Abishai in kumpipa kiangah, “Bang hangin hih uisi a banglel mi khat in ka to kumpipa samsia ding ahi hiam? Hong kuansak inla a lu hong tankhiasak in,” a ci hi. Ahih hangin kumpipa in, “No Zeruiah tapate aw, note tawh bang kisai ahi hiam? Topa in ama kiangah, ‘David samsia in,’ a cihna hangin hong samsia ahihleh, ‘Bang hangin tuaci hih na hi hiam?’ kua in ci ding ahi hiam?” a ci hi. Tua ciangin David in Abishai le a nasemte khempeuh kiangah, “En un, keima tapa mahmah in kei thah dingin hong zong hi; hih Benjamin mi in bangzahin tu-in hong zongzaw kan ding ahi hiam! Ama thu-in omsak un, amah hong samsiasak un; bang hang hiam cih leh Topa in amah a sawl hi kha ding hi. Topa in ka thuakna hong enin, tuni-a kei hong samsiatna hangin Topa in a hoih tawh kei hong thuk kha ding hi,” a ci hi. Tua ahih ciangin ama galkhat mualpangah Shimei pai a, a paikawmin samsia-in suang tawh amah dengin leivui a theh laitakin David le a mite lampi-ah pai uh hi. Tua ciangin kumpipa le amah tawh a om mi khempeuhte gim mahmahin Jordan tung uh a, tua lai-ah amah kitawldamsak hi. Tu-in Absalom le Israel mite khempeuh Jerusalem hong tung uh a, Ahithofel amah tawh om hi. Tua ciangin David lam a lak pa, Arkhi mi Hushai, Absalom kiangah hong tun ciangin Hushai in Absalom’ kiangah, “Kumpipa khan sawt ta hen! Kumpipa khan sawt ta hen!” a ci hi. Absalom in Hushai kiangah, “Hih bang pen na lawmpa tungah thumanna ahi hiam? Bang hangin na lawmpa tawh pai lo na hi hiam?” a ci hi. Hushai in Absalom kiangah, “Hilo hi; Topa le hih mite le Israel mite khempeuh a dingin a kiteel mipa a’ ka hi ding a, amah tawh ka om ding hi. Tua banah, kua’ na sem ding ka hi hiam? Ama’ tapa hi lo ding ahi hiam? Na pa’ na ka sep bangin nangma na ka sem ding hi,” a ci hi. Tua ciangin Absalom in Ahithofel kiangah, “Na ngaihsutna hong gen in; bang hih ding ihi hiam?” a ci hi. Ahithofel in Absalom’ kiangah, “Inn kem dingin a nusiat na pa’ zineute luppih in; tua ciangin nangmah in na pa na muhdah bawlna thu Israel-te khempeuh in za-in nangmah tawh a om mite khempeuh’ tha khauhsak ding hi,” a ci hi. Tua ciangin amaute in innkhumzangah Absalom a dingin puanbuk khat lam uh a, Israel-te khempeuh’ muhna-ah Absalom in a pa’ zineute luppih hi. Tua hun lai-in Ahithofel’ thugente pen Pasian’ kammal mahmah bangin kingaihsun hi. Tua bangin David le Absalom in Ahithofel’ thugente a thupi ngaihsut uh ahi hi. Tua zawh a sawt loin Ahithofel in Absalom kiangah, “Mi tul sawm le tulnih hong teelsak in; keimah kuankhia-in tuzanin David ka delh ding hi. Amah gimin lungkia-in a om laitakin amah ka hih ding a, amah ka amkhamsak ding hi. Tua hileh amah tawh a om mi khempeuh tai ding uh hi. Keimah in kumpipa bek ka satpuk ding a, mothak in a pasal kiang a zuatkik mah bangin mi khempeuh nang kiangah kong ciahpih kik ding hi. Nangmah in mi khat bek’ nuntakna na zong hi; midang khempeuh nuamtakin om ding uh hi,” a ci hi. Tua thugenna in Absalom le Israel upate khempeuh lungkimsak hi. Tua ciangin Absalom in, “Arkhi mi Hushai zong sam un; ama thugen ngai phot ni,” a ci hi. Absalom kiangah Hushai hong pai ciangin Absalom in ama kiangah, “Tua bangin Ahithofel in thu gen hi; ama genna bangin i hih ding hiam? Tua ahih kei leh nang gen in,” a ci hi. Tua ciangin Hushai in Absalom kiangah, “Tutungin Ahithofel’ thugen hoih lo hi,” a ci hi. Tua banah Hushai in, “Na pa le a mite mi thahat hi a, gamlakah a note a kilaksak vompi bangin amaute a hehna na thei hi. Tua banah na pa galdona lamsang a siam hi a, mite tawh zanin amah om khawm lo ding hi. Tu nangawnin amah dum khat sungah ahi a, mundang khatah ahi zongin bu khin ding hi. Kisim cilna-ah mi pawlkhat si leh tua thu a za mi peuhpeuh in, ‘Absalom a zui mite lakah a si om khin hi,’ ci ding hi. Tua ciangin a lungtang humpinelkai lungtang a bang galhang mipa nangawn launa tawh lungkia gawp ding hi; bang hang hiam cih leh Israel-te khempeuh in na pa mi thahat ahihna le amah tawh a om mite mi hang ahihna thei uh hi. Ahih hangin keima ngaihsutna hih bang ahi hi: Dan panin Beersheba ciang dong, tuipi gei-a sehnel bangin a tam Israel mi khempeuh nang kiangah khawmin galsim dingin nangmahmah na kuan ding hi. Tua ciangin amah i muhna mun khat peuhpeuhah theihkholh lohin i hihgawp ding hi. Amah le amah tawh a om mi khempeuh khat zong kisiit lo ding hi. Amah khuapi khat sungah a nungkik le, Israel-te khempeuh in tua khuapi sungah khauhual paipihin tua lai munah suangtang khat nangawn a kimu nawn lo dingin kuam sungah tua khua i kaikhia ding hi,” a ci hi. Tua ciangin Absalom le Israel mite khempeuh in, “Arkhi mi Hushai’ thugen pen Ahithofel’ thugen sangin hoihzaw hi,” a ci uh hi. Bang hang hiam cih leh Topa in Absalom’ tungah siatna a tunsak theih nadingin Ahithofel’ thugen hoih in a lelh ding Topa in a sehsa ahi hi. Tua ciangin Hushai in siampi Zadok le Abiathar kiangah, “Tua bang tua bangin Ahithofel in Absalom le Israel upate kiangah gen a, tua bang tua bangin keimah in thu ka gen hi. Tua ahih ciangin tu-in manlang takin mi sawl inla, David kiangah, ‘Tuzan gamlak tui ngahmunte-ah giak kei inla, bangbang hitaleh galkah in; tua hikeileh kumpipa le amah tawh a om mi khempeuh hong kivalhtum kha ding hi,’ ci-in gen sak in,” a ci hi. Tu-in Jonathan le Ahimaaz in Enrogel-ah ngak uh hi. Nasem numei khat pai-in amaute kiangah gen a, amaute pai-in Kumpi David kiangah gen zel uh hi; bang hang hiam cih leh amaute khuapi sungah a lutlam uh a kimu lo ding ahi hi. Ahih hangin tangval khat in amaute mu-in Absalom kiangah gen hi. Tua ahih ciangin amau tegel manlang takin paikhia uh a, a huang sungah tuikhuk a nei Bahurim-a mi khat’ inn-ah tung uh a, tuikhuk sungah amaute tuaksuk uh hi. Tua ciangin a numei in khuhna khat la-in tuikhuk gong tungah phah a, tua tungah an zalh a, bangmah kithei lo hi. Absalom’ nasemte tua nu’ inn-ah hong tun ciangin amaute in, “Ahimaaz le Jonathan koi lai-ah om ahi uh hiam?” a ci uh hi. A numei in amaute kiangah, “Amaute lui galkhatah pai khinzo uh hi,” a ci hi. Amaute in zong a muh zawh loh uh ciangin Jerusalem-ah a ciahkik uh hi. Amaute a paikhiat khit ciangin tuikhuk panin mite hong paikhia uh a, pai-in Kumpi David kiangah a thu gen uh hi. Amaute in David kiangah, “Ding in; tui galkhatah manlang takin pai in; bang hang hiam cih leh tua bang tua bangin nangma langkhatah Ahithofel in thu gen hi,” a ci uh hi. Tua ciangin David le amah tawh a om mi khempeuh ding uh hi. Amaute in Jordan kantan uh a, khuavak ciangin Jordan a kantan nai lo khat beek om nawn lo uh hi. Ahithofel in ama thugen a kizuih loh a muh ciangin a la tutphah vawhin ama khuapi a inn-ah nuak ciah hi. Tua ciangin amah in a innkuan vai hawmsak a, a man ciangin amahmah gui-awk hi. Amah si a, a pa’ hanah kivui hi. Tua ciangin Mahanaim ah David tung hi. Absalom in Israel mite khempeuh tawh Jordan kantan hi. Tu-in Absalom in Joab tangin galkapte a uk dingin Amasa koih khin hi. Amasa pen Nahash’ tanu Abigail a tenpih, Ishmael mi ahi Ithra min nei mi khat’ tapa hi a, ama nu Abigail le Joab’ nu Zeruiah a unau ahi hi. Israel-te le Absalom in Gilead gamah giahphual sat uh hi. Mahanaim ah David a tun ciangin Ammon mite’ gam Rabbah khua panin Nahash’ tapa Shobi, le Lodebar panin Ammiel’ tapa Makhir, le Rogelim panin Gilead mi Barzillai in lupnate, kuangte, le leibeelte, mangbuh, mangbuhham, an, an kan, bepi le besan, khuaizu le bawngnawi-thaukhal, le tuu le sathaukhalte, David le amah tawh a om mite’ nek dingin hong puak uh hi. Bang hang hiam cih leh amaute in, “Mite gamlakah gilkialin, gimin dangtak uh hi,” a ci uh hi. Tua ciangin David in amah tawh a om mite khawmin a tultul a ukte le a zaza a ukte-in koih hi. David in galkapte khen thum suah a, khenkhat Joab’ ukna nuai-ah, khenkhat Joab’ sanggampa Zeruiah’ tapa Abishai’ ukna nuai-ah, khenkhat Gath mi Ittai’ nuai-ah koihin galdo dingin a kuansak hi. Tua ciangin kumpipa in mite kiangah, “Note tawh kei zong kong kuankhia ding hi,” a ci hi. Ahih hangin mite in, “Nang nong kuankhia kei ding hi. Bang hang hiam cih leh kote tai le-ung amaute in kote phamawh hong sa lo ding hi. Kote kimkhat si le ung amaute in kote phamawh hong sa lo ding hi. Ahih hangin nang pen kote tul sawm zahin na manpha hi. Tua ahih ciangin khuapi panin kote kiangah huhna hong puak lecin hoihzaw hi,” a ci uh hi. Kumpipa in amaute kiangah, “Note in hoih na sak pen bangun ka gamta ding hi,” a ci hi. Tua ahih ciangin galkap khempeuh a zaza le a tultulin a paikhiat laitakun kulhkongpi pangah kumpipa ding hi. Tua ciangin kumpipa in Joab le Abishai le Ittai thu pia-in, “Keimah nong khualna-un tangvalpa Absalom hong dawm mahmah un,” a ci hi. Kumpipa in Absalom’ thu galkapmangte tungah a vaikhakna mi khempeuh in za uh hi. Tua ahih ciangin Israel-te a do dingin gamlakah galkapte kuankhia uh a, Efraim tulakah kido uh hi. David’ nasemte in tua lai-ah Israel mite zo uh a, tua ni-a mi kithat tam a, mi tul sawmnih ahi hi. Tua gam maitang tung khempeuhah galkikapna omkim hi. Tua ni-in namsau’ thah sangin thudang hangin tulakah a si mi tamzaw hi. David’ nasemte in Absalom tuakkha uh hi. Absalom a la tungah tuang a, tawsaw lianpi hiang pha nuai khatah a la tai-in, a lutang tawsaw hiang lakah awk a, ama nuai panin a la taisuakin, vanlelei kikalah amah a kikhai-in kinusia hi. Tua ciangin mi khat in mu-in Joab kiangah gen a, “En in, tawsaw hiang kawm lakah Absalom a kikhai ka mu hi,” a ci hi. Joab in ama kiangah a gen mipa kiangah, “Bang! Nang amah mu maw! Bang hangin leilakah amah satkhiasuk lo na hi hiam? Nang tungah ngun peek sawm le kawnggak khat hong pia ngel ding hi ve ing,” a ci hi. Ahih hangin a mipa in Joab kiangah, “Ngun peek tulkhat ka khut sungah hong koih ta lecin zong kumpipa’ tapa a hih dingin ka khutmeno khat zong ka zankhia kei ding hi; bang hang hiam cih leh kote’ zakin kumpipa in nang le Abishai le Ittai thu hong pia-in, ‘Keimah nong khualna-un tangvalpa Absalom hong dawm un,’ hong ci hi. Thudang khatah, amah langpangin zuautat leng (Kumpipa tungah a ki-im bangmah om lo hi), nangmahmah kikang koihin nong hu kei ding hi,” a ci hi. Joab in, “Hih bangin nang tawh hun ka beisak kei ding hi,” a ci hi. Tua ciangin amah in thaltang thum la-in tawsaw hiang kawmah Absalom a hing lai-in a lungtang sungah tuate a siat hi. Tua ciangin Joab’ galhiam tawite tangval sawm in Absalom umcih a, amah satin that uh hi. Tua ciangin Joab in peengkul tum a, Israel-te a delhna panun galkapte hong ciahkik uh hi; bang hang hiam cih leh Joab in amaute kho hi. Tua ciangin amaute in Absalom la-in tulaka dum lianpi khat sungah amah paai uh a, ama tungah suangcian a lian mahmah khat ciang uh hi. Tua ciangin Israel-te khempeuh amau’ inn ciatah tai uh hi. Absalom in ama nuntak lai-in khuampi khat la-in ama a dingin phutin Kumpipa’ Kuamah om hi; bang hang hiam cih leh amah in, “Keima min hong zom ding tapa ka nei kei hi,” a ci hi. Tua khuampi ama min tamin phuak a, tuni dongin Absalom’ Mual, kici hi. Tua ciangin Zadok’ tapa Ahimaaz in, “Kei hong taisak inla, Topa in ama galte’ vangliatna panin amah a hotkhiat lungdamna thu kumpipa kiangah hong puaksak in,” a ci hi. Joab in ama kiangah, “Nang in tuni-in lungdamna thu na puak kei ding hi. A nidang ciangin lungdamna thu na puak thei ding a, ahih hangin tuni-in lungdamna thu na puak kei ding hi; bang hang hiam cih leh kumpipa’ tapa si hi,” a ci hi. Tua ciangin Joab in Kush mipa kiangah, “Pai inla na muhsa teng kumpipa kiangah va gen in,” a ci hi. Kush mipa zong Joab’ mai-ah kunin, tua ciangin a tai hi. Tua ciangin Zadok’ tapa Ahimaaz in Joab kiangah, “Bangbang piang taleh kei zong Kush mipa’ nungah hong taisak in,” a ci kik hi. Joab in, “Lungdamna thu puakna hangin thaman ngah lo ding cih thei napi-in, ka tapa aw, bang hangin tai ding na hi hiam?” a ci hi. Amah in, “Bangbang piang taleh ka tai ding hi,” a ci hi. Tua ahih ciangin Joab in ama kiangah, “Tai in,” a ci hi. Tua ciangin Ahimaaz zanglei lam tawnin tai a, Kush mipa makhelh hi. Tua laitakin kulhkongpi puanung le a sungnung kikalah David na tu hi. Galvil pa kulhkongpi khumzangah paito a, a khuadak ciangin amah guakin a hong tai mi khat a mu hi. Galvil pa in kumpipa kiangah a gen hi. Kumpipa in, “Amah guak ahihleh thuhoih ahi hi,” a ci hi. Amah hong nawhtai-in hong nai hi. Tua ciangin galvil pa in midang khat a hong tai mu leuleu hi. Galvil pa in kulhkongpi-ah ko a, “En un, midang khat zong hong tai leuleu!” a ci hi. Kumpipa in, “Amah in zong lungdamna thu hong paipih hi,” a ci hi. Tua ciangin galvil pa in, “A masa pa’ taizia pen Zadok’ tapa Ahimaaz’ tai tawh kibang hi, ci-in ka ngaihsun hi,” a ci hi. Tua ciangin kumpipa in, “Amah mihoih hi a, lungdamna thuhoih tawh hong pai hi,” a ci hi. Tua ciangin kumpipa kiangah Ahimaaz hong kiko-in, “Na khempeuh hoih hi,” a ci hi. Tua ciangin kumpipa mai-ah lei maingatin amah kun a, “Ka to kumpipa’ langkhatah a khut a liik mite nangma khut sungah a hong pia Topa na Pasian in thupha ngah ta hen,” a ci hi. Tua ciangin kumpipa in, “Tangvalpa Absalom a hoihhoih hiam?” a ci hi. Ahimaaz in dawngin, “Joab in na nasempa hong sawl laitakin buaina lianpi khat ka mu a, ahih hangin bang hiam cih ka thei kei hi,” a ci hi. Tua ciangin kumpipa in, “Kiheikhia inla, hih lai-ah ding in,” a ci hi. Tua ahih ciangin amah kiheikhia-in taang loin a ding hi. Tua ciangin Kush mipa hong tung hi. Kush mipa in, “Ka to kumpipa a dingin lungdam nading thu om hi. Bang hang hiam cih leh nangma langah a ding mi khempeuh’ vangliatna panin tuni-in Topa in nang hong honkhia hi,” a ci hi. Kumpipa in Kush mipa kiangah, “Tangvalpa Absalom a hoihhoih hiam?” a ci hi. Kush mipa in dawngin, “Ka to kumpipa’ galte, le siat nadingin nangma langkhatah a ding khempeuh, tua tangvalpa bang ta hen,” a ci hi. Tua ciangin kumpipa’ lungsim nakpitakin sukha a, kulhkongpi tunga inndei sungah paito-in a kap hi. A paikawmin amah in, “Aw ka tapa Absalom, ka tapa, ka tapa Absalom! Nangma tangin kei sizaw taleng. Aw Absalom, ka tapa, ka tapa!” a ci hi. Joab kiangah, “En in, Absalom’ hangin kumpipa kapin thum hi,” ci-in kigen hi. Tua ahih ciangin tua ni-a gualzawhna mi khempeuh a dingin thumna hong suak mawk hi; bang hang hiam cih leh tua ni-in mite in, “Kumpipa a tapa’ hangin dah hi,” ci-in za uh hi. Tua ciangin galsung pan a tai uh ciangin a maizum mite a geel bangin tua ni-in khuapi sungah mite simlut uh hi. Kumpipa in a mai khuh a, nakpitakin kapkhia-in, “Aw ka tapa Absalom! Aw Absalom! Ka tapa, ka tapa!” a ci hi. Tua ciangin kumpipa’ inn sungah Joab hong pai-in, “Tuni-in nangma nuntakna, na tanute le na tapate’ nuntakna, na zite le na zineute’ nuntakna a hong honkhia na nasemte khempeuh na maizumsak hi. Bang hang hiam cih leh nangmah in nang hong mudahte itin, nang hong itte na mudah hi. Bang hang hiam cih leh a ukte le nasemte nang adingin bangmah ahihlohna tuni-in na kitelsak hi. Bang hang hiam cih leh Absalom hingin, kote khempeuh tuni-in si le ung na nuam ding ka thei hi. Tua ahih ciangin tu-in ding in, paikhia inla na nasemte tungah kamneem pau in; bang hang hiam cih leh na pai kei leh tuzan ciangin mi khat zong nang kiangah hong om nawn lo ding hi, ci-in Topa’ min tawh ka kiciam ngam hi. Hih thu pen na tangval a kipan tu ciang dong na tungah hong tungsa siatna khempeuh sangin nang a dingin siazaw ding hi,” a ci hi. Tua ciangin kumpipa dingin kulhkongpi gei-ah a tu hi. Tua ciangin mite kiangah, “En un, kulhkongpi-ah kumpipa tu hi,” ci-in kigen a, tua ciangin kumpipa mai-ah mi khempeuh hong pai uh hi. Tu-in Israel mite amau’ inn ciatah na tai khin uh hi. Israel minam khempeuh sungah mi khempeuh thu kisel uh a, “Kumpipa in i galte’ khutsung panin hong khahkhia-in Filistia-te’ khutsung panin hong honkhia hi. Tu-in Absalom’ hangin i gam sung panin amah taikhia hi. Ahih hangin eite’ tungah sathau i nilh Absalom, gal sungah si khin hi. Tua ahih ciangin tu-in bang hangin kumpipa lakkik ding bangmah gen lo na hi uh hiam?” a ci uh hi. Tua ciangin Kumpi David in hih thu, siampi Zadok le Abiathar kiangah puakin, “Judah upate kiangah hih bangin gen un: ‘Israel-te khempeuh’ thu kumpipa kiangah tung khin hi. Bang hangin note in kumpipa a inn-ah a ciahpih nunung pen hi ding na hi uh hiam? Note pen ka behnai na hi uh a, note pen keima si keima sa na hi uh hi. Tua ahih ciangin bang hangin kumpipa a ciahpih nunung pen hi ding na hi uh hiam?’ ci un. Tua ciangin Amasa kiangah, ‘Nang pen keima si keima sa hi lo na hi hiam? Tua kipan Joab’ munah nang pen ka galkapte a ukpa na hih kei taak leh Pasian in kei hong dawm kei ta hen, ci hi,’ ci-in gen un,” a ci hi. David’ thugen in Judah mite khempeuh’ lungsim thakhatin zo pah hi. Tua ahih ciangin amaute in kumpipa kiangah thu puakin, “Nang le na nasemte khempeuh hong ciahkik un,” a ci uh hi. Tua ahih ciangin Jordan-ah kumpipa hong paikik hi. Kumpipa a dawn ding le Jordan galah kumpipa a paipih dingin Gilgal-ah Judah mite hong pai uh hi. Tua ciangin Bahurim panin Benjamin mi Gera’ tapa Shimei, Kumpi David a dawn dingin Judah mite tawh manlangin paisuk hi. Benjamin sung panin mi tulkhat amah tawh om hi. Tua ciangin Saul’ innsung nasem Ziba, a tapa sawm le nga le a nasem sawmnihte tawh kumpipa’ mai Jordan-ah taisuk a, kumpipa’ innkuante a galkahpih ding le ama deih bangin na a sem dingin amaute in ngahmun ngap uh hi. Jordan a galkah ding ciangin Gera’ tapa Shimei kumpipa’ mai-ah boksukin kumpipa kiangah, “Ka to kumpipa in Jerusalem na nusiat ni-in na nasempa’ gamtat khialhna ka topa in hong mawhsak kei inla, hong ciamteh kei in; kumpipa in ngaihsutin nei kei in. Bang hang hiam cih leh ka khialh khitna na nasempa in ka thei hi. Tua ahih ciangin, en in, ka to kumpipa a dawn dingin a hong paisuk dingin Josef minam khempeuh sung panin a masa penin tuni-in kong tung hi,” a ci hi. Tua ciangin a nu Zeruiah ahi Abishai hong paukhia a, “Amah in Topa’ sathau nilh pa samsia ahih manin hih thu hangin Shimei thah ding hi lo ahi hiam?” a ci hi. Ahih hangin David in, “Note pen tuni-in kei’ lang bangin na om nadingun no Zeruiah’ tapate tawh kei bang kisai ihi hiam? Tuni-in Israel sungah mi khatpeuh kithat ding ahi hiam? Bang hang hiam cih leh tuni-in Israel-te’ tungah kumpi ka hihna thei hi lo ka hi hiam?” a ci hi. Tua ciangin kumpipa in Shimei kiangah, “Nang na si kei ding hi,” a ci hi. Kumpipa in ama tungah kiciamna a bawl hi. Tua ciangin kumpipa a dawn dingin Saul’ tupa Mefibosheth hong paisuk hi. Kumpipa a paikhiat ni a kipan lungnuamin hong tunkik ni dong, amah in a khete zem lo, a khamul puah lo, a puante zong sawp lo hi. Jerusalem panin kumpipa a dawn dingin hong pai ciangin kumpipa in ama kiangah, “Mefibosheth aw, bang hangin kei hong zui lo na hi hiam?” a ci hi. Amah in dawngin, “Ka topa! Aw Kumpipa, ka nasempa in kei hong khem hi; bang hang hiam cih leh na nasempa in ama kiangah, ‘Kei a tungah tuangin kumpipa ka zuih theih nadingin kei a dingin la khat tutphah vawh in,’ ka ci hi. Bang hang hiam cih leh na nasempa a khe bai hi. Amah in ka to kumpipa kiangah na nasempa hong gensia hi. Ahih hangin ka to kumpipa pen Pasian’ vantungmi tawh kibang hi. Tua ahih ciangin hoih na sak bangin hong hih in. Bang hang hiam cih leh ka to kumpipa’ mai-ah ka pa’ innkuante khempeuh a si zah dong dingin a sia ahi hi. Ahih hangin nangmah in na sabuai-ah a ne mite lakah na nasempa na hong koih hi. Tua ahih ciangin kumpipa tungah ka koh ding thudang bang neithuah nawn ding ka hi hiam?” a ci hi. Tua ciangin kumpipa in ama kiangah, “Bang hangin nangma thu gen lailai na hi hiam? Ka lungsim ka khentatzo hi; nang le Ziba in leitang na hawm ding uh hi,” a ci hi. Tua ciangin Mefibosheth in kumpipa kiangah, “Aw, ka to kumpipa lungnuamin inn hong tung khin na hih nungsang, a vekin amah lasak in,” a ci hi. Rogelim panin Gilead mi Barzillai zong hong paisuk hi. Jordan galkhatah amah a kha dingin kumpipa tawh Jordan ciang dong amah paisuak hi. Barzillai pen kum sawmgiat a pha, a khangham mahmah mi khat ahi hi. Mahanaim ah kumpipa a om laitakin amah in an pia hi; bang hang hiam cih leh amah mihau mahmah khat ahi hi. Kumpipa in Barzillai kiangah, “Kei hong zui inla, Jerusalem-ah kei tawh hong om in, nang kong vak ding hi,” a ci hi. Ahih hangin Barzillai in kumpipa kiangah, “Kei, kumpipa tawh Jerusalem-ah a paito dingin ka nuntak ding kum bangzah hun nei nawn ka hi hiam? Tuni-in kei kum sawmgiat ka pha ta a, a nuam le a nuam lo khentel thei nawn ka hi hiam? Na nasempa in a nek ahi a, a dawn ahi zongin a limna phawk thei nawn ka hi hiam? Lasa numeite le lasa pasalte’ aw za thei nawn ka hi hiam? Tua ahih ciangin bang hangin ka to kumpipa tungah na nasempa vangik kibehlap hong hi ding ka hi hiam? Na nasempa in Jordan galkhatah tomkha sung kumpipa hong zui ding hi. Kei pen tua bang hamphatna lianpi a ngah dingin zong ka kilawm kei hi. Keima khuapi sung mah, ka nu le ka pa’ han nai-ah ka sih theih nadingin na nasempa hong ciahsakkik in, ci-in kong thum hi. Ahih hangin hih lai-ah ka tapa na nasempa Khimham om hi; ka to kumpipa tawh amah galkah sak in; hoih na sak bangbangin ama a’ ding hihsak in,” a ci hi. Tua ciangin kumpipa in dawngin, “Khimham in kei hong zui ding a, nangmah in hoih na sak bangbangin ama a’ ding ka hihsak ding hi; kei tung panin na deih khempeuh nangma a dingin kong hihsak ding hi,” a ci hi. Tua ciangin mi khempeuh Jordan galah pai uh a, kumpipa zong a pai hi. Tua ciangin kumpipa in Barzillai namin thupha pia a, ama inn-ah amah a ciah hi. Gilgal-ah kumpipa paisuak a, amah tawh Khimham paisuak hi. Judah mi khempeuh, le Israel mi a kimkhatte in zong ama paina dingah kumpipa a kha uh hi. Tua ciangin Israel mite khempeuh hong pai-in kumpipa kiangah, “Bang hangin ka sanggam uh Judah mite in nang hong gukhia-in, kumpipa le a innkuante, le David’ mite amah tawh, Jordan galah paipih ahi hiam?” a ci uh hi. Judah mite khempeuh in Israel mite dawngin, “Kumpipa pen kote tawh beh kinai ahihna hang ahi hi. Tua ahih ciangin bang hangin hih thu-ah heh na hi uh hiam? Kumpipa’ sum bei-in an ne peuhmah ka hi uh hiam? Tua ahih kei leh amah in letsong khat peuhpeuh kote hong pia ahi hiam?” a ci uh hi. Tua ciangin Israel mite in Judah mite dawngin, “Kumpipa sungah tanh sawm ka nei uh a, David’ sungah note khempeuh sangin tam ka neizaw uh hi. Tua ahih ciangin bang hangin note in kote hong simmawh na hi uh hiam? Kote pen i kumpipa ciahpih kik ding a gen masate hi lo ka hi uh hiam?” a ci uh hi. Ahih hangin Israel mite’ kammal sangin Judah mite’ kammal kihtakhuai zaw hi. Tu-in tua lai-ah Benjamin mi, Bikhri’ tapa Sheba min nei, mi ginalo khat hong omkha hi. Amah in peengkul tumin, “David’ sungah tanh i nei kei a, Jessi’ tapa’ sungah gamh i nei kei hi; na inn ciat uhah ciah un, Israel-te aw,” a ci hi. Tua ahih ciangin Israel mi khempeuh David’ kiang pan nungkik uh a, Bikhri’ tapa Sheba zui uh hi. Ahih hangin Judah mite in Jordan panin Jerusalem ciang dong a kumpipa uh kiptakin zui uh hi. Tua ciangin Jerusalem-a a inn-ah David tung hi. Tua ciangin kumpipa in inn kem dingin a nusiat a zineu sawmte la-in a kivil inn khat sungah amaute koihin amaute a vak hi. Ahih hangin amaute luppih lo hi. Tua ahih ciangin amaute a khang laipi-in meigong numei suak uh a, a sih dong uh amaute kikhumcip hi. Tua ciangin kumpipa in Amasa kiangah, “Ni thum sungin Judah mite kei kiangah khawm inla, nangmahmah zong hih lai-ah hong om in,” a ci hi. Tua ahih ciangin Judah-te a sam dingin Amasa pai a, ahi zongin ama tungah a kiciam a kisehsa khengin amah zekai hi. Tua ciangin David in Abishai kiangah, “Tu-in Bikhri’ tapa Sheba in Absalom sangin eite tungah siatna tamzaw hong bawl ding hi. Na topa’ nasemte la inla, amah delh in. Tua hikeileh amah in ama a dingin khuapi muanhuaite ngahin eite tungah buaina hong piangsak ding hi,” a ci hi. Tua ciangin Abishai’ nungah Joab le Khereth mite le Peleth mite, le mi thahat khempeuh pai uh hi. Bikhri’ tapa Sheba a delh dingin Jerusalem panin amaute kuankhia uh hi. Gibeon gam sunga suangtumpi-ah amaute a tun uh ciangin amaute a dawn dingin Amasa hong pai hi. Tu-in Joab in galkap puan silhin, tua tungah, a kawng tungah a kigak a paai sunga namsau tawh a kithuah kawnggak khat om a, a mailam manawhin a pai laitakin a namsau seel hi. Tua ciangin Joab in Amasa kiangah, “Ka sanggampa aw, bang cici na hi hiam?” a ci hi. Tua ciangin Joab in amah a hopih kawmin a taklam khut tawh a khamul-in Amasa man hi. Ahih hangin Amasa in Joab’ khutsunga om namsau mu lo hi. Tua ahih ciangin Joab in a namsau tawh a pumpi sat a, nihvei sat kul loin a gilpi leilakah buakhia hi; tua ciangin Amasa a si hi. Tua ciangin Joab le a sanggampa Abishai in Bikhri’ tapa Sheba delh uh hi. Tua ciangin Joab’ mite khat Amasa’ kiangah dingin, “Joab a gum peuhmah, le David-a’ ahi mi peuhmah in Joab zui un,” a ci hi. Lam lianpi a ama sisan sungah Amasa kidiahin a om hi. Tua lai-ah a pai mi peuhmah in amah a muh ciangin a khawl uh hi. Mi khempeuh a khawlna tua mipa in a muh ciangin amah in lam lianpi panin gamlakah Amasa puakhia-in ama tungah puan khat a khuh hi. Lam lianpi panin amah a kilakkhiat khit ciangin Bikhri’ tapa Sheba a delh dingin Joab nungah mi khempeuh paisuak hi. Tua ciangin Israel minamte khempeuh nawkin Abelbethmaakah khua-ah Sheba pai hi. Bikhri mi khempeuh kikhawm uh a, amah zui-in khuapi sungah tum uh hi. Tua ciangin Joab tawh a om mi khempeuh hong pai-in Abelbethmaakah khua-ah amah umcih uh hi. Amaute in khuapi simna-in suang cianpi khat bawl uh a, kulhpi langkhatah ding uh hi. Tua ciangin kulhpi a puk theih nadingin amaute in kulhpi nuai to uh hi. Tua ciangin numei pil khat in khuapi panin samin, “Za un! Joab kiangah gen un: ‘Nang tungah thu kong gen theih nadingin hih lai-ah hong pai in,’ ci un,” a ci hi. Tua ciangin tua nu’ mai-ah Joab hong pai hi. Tua numei in, “Nang, Joab na hi hiam?” a ci hi. Amah in dawngin, “Ka hi hi,” a ci hi. Tua ciangin tua numei in ama kiangah, “Na nasemnu’ thugente ngai in,” a ci hi. Amah in dawngin, “Ka ngai hi,” a ci hi. Tua ciangin amah in, “Tanglai-in amaute in, ‘Abel-ah thu dong sak un,’ ci thei uh a, tua bangin amaute in thu siangsak uh hi. Kei pen Israel sungah tua bangin kilemna a deih a thuman mi khat ka hi hi. Nang in Israel sungah nu tawh a kibang khuapi khat suksiat ding na hanciam hi. Bang hangin Topa’ gamhluah valhtum ding na hi hiam?” a ci hi. Joab in dawngin, “Keimah in ka valhtum ding ahi a, ka suksiat ding ahi zongin keima ngaihsut hi dek lo hi. Tua thu man lo hi. Ahih hangin Efraim mualtung gammi Bikhri’ tapa Sheba a kici mipa in Kumpi David lehdo hi; amah bek hong pia in. Tua hileh khuapi panin ka nungkik ding hi,” a ci hi. Tua ciangin tua numei in Joab kiangah, “En in, kulh sung panin nang kiangah ama lutang hong kilawnsuk ding hi,” a ci hi. Tua ciangin ama pilna zangin mi khempeuh kiangah tua numei a pai hi. Tua ciangin amaute in Bikhri’ tapa Sheba’ lu tankhia-in Joab kiangah lawnkhia uh hi. Tua ahih ciangin amah in peengkul tum a, khuapi panin amaute kikhenin a milipin a inn ciat uhah a ciah uh hi. Tua ciangin kumpipa kiang Jerusalem-ah Joab a ciah hi. Tua laitakin Joab pen Israel galkap khempeuh a uk ahi hi. Jehoiada’ tapa Benaiah pen Khereth mite le Peleth mite a uk ahi hi. Adoram pen aana tawh na a kisemsakte a uk ahi hi. Ahilud’ tapa Jehoshafat pen thu ciamteh pa ahi hi. Sheva pen lai-at pa ahi hi. Zadok le Abiathar siampite ahi uh hi. Jair mi Ira zong David’ siampi ahi hi. Tu-in kum khat khit kum khat, David’ hun sungin kum thum sung kialpi tung hi. Tua ciangin David in Topa’ kiangah thu dong hi. Topa in, “Amah in Gibeon mite that ahih manin Saul le a innkuan tungah mi thahna hanga mawhna om hi,” a ci hi. Tua ahih ciangin kumpipa in Gibeon mite sam hi. Tu-in Gibeon mite pen Israel-te’ sung hi loin Amor mi a omlaite ahi uh hi. Amaute a hingkhawi ding Israel mite kiciam khin napi-in, Israel le Judah mite a’ ding a deih luatna-in Saul in amaute thah dingin hanciam hi. Tua ciangin David in Gibeon mite kiangah, “Note a dingin bang hong hihsak ding ka hi hiam? Note in Topa’ mite thupha na piaktheih nadingun bangci bangin kilemna hong bawl ding ka hi hiam?” a ci hi. Gibeon mite in ama kiangah, “Kote le Saul ahi a, a innkuan tawh kikalah ahi zongin kitotna a om pen ngun le kham in maisak zo lo ding hi. Israel-te sungah mi khatpeuh ka thah hangun zong lungkim zawh nading om lo hi,” a ci uh hi. Tua ciangin amah in, “Note a’ ding kong hihsak ding bang hi, ci na hi uh hiam?” a ci hi. Amaute in kumpipa kiangah, “Israel gam sungah kote in mun ka neih loh nadingun kote hong netumin suksiat ding Saul in vaihawm hi. Topa’ mualtung, Topa’ mai Gibeon-ah amaute ka khai theih nadingun ama tapa sagihte hong pia in,” a ci uh hi. Tua ciangin kumpipa in, “Amaute kong pia ding hi,” a ci hi. Ahih hangin kumpipa in amah le Saul’ tapa Jonathan’ kikalah a om, Topa tawh kiciamna hangin Jonathan’ tapa, Saul’ tupa Mefibosheth a siit hi. Ahi zongin Aiah’ tanu Rizpah’ tapa nih, Saul tawh a neih Armoni le Mefibosheth; le Saul’ tanu Merab in Meholah mi Barzillai’ tapa Adriel tawh a neih a tapa ngate a la hi. Amah in Gibeon mite tungah amaute pia a, amaute in Topa’ mai mualtungah amaute khai uh a, amau sagihte sikhawm uh hi. Mangbuhham lak kipat hun, anlak kipat cil lamin amaute kithat hi. Tua ciangin Aiah’ tanu Rizpah in a puanhampi la-in, anlak a kipan van panin amau’ luanghawmte tungah guah a zuk dongin ama lup nadingin suangpi tungah a phah hi. Sunin huihlak vasate in ahi a, zanin gamsate in ahi zongin amau’ luanghawmte a sukkhak loh nadingun a cing hi. Saul’ zineu, Aiah’ tanu Rizpah’ gamtatna thu David kiangah a kigen ciangin, David pai-in Gilboa mualtungah Filistia-te in Saul a thah lai hunin Filistia-te in amaute a khaina mun Bethshan khuasung kongzing lampi laizang panin a luanghawm a guksak Jabeshgilead mite’ tung panin Saul’ guhte le a tapa Jonathan’ guhte a lakik hi. Amah in tua lai panin Saul’ guhte le a tapa Jonathan’ guhte paipihto hi. Amaute in a kikhai mi sagihte’ guh zong kaikhawm uh hi. Tua ciangin amaute in Zela khuasung Benjamin’ leitang, a pa Kish’ han sungah Saul le a tapa Jonathan’ guhte phum uh a, amaute in kumpipa’ thupiak khempeuh hih uh hi. Tua khit ciangin tua gam ading thumnate Pasian in a ngai hi. Filistia-te, Israel-te tawh kidokik uh a, David a nasemte tawh paisuk khawmin Filistia-te a sim uh hi. Tua galkidona-ah David gim mahmah hi. Mithagolte’ suante khat, a teipi sumngo shekel zathum a gik, namsau thak khat a kuah Ishbibenob in David thah ding ngaihsun hi. Ahih hangin amah a huh dingin Zeruiah’ tapa Abishai hong pai a, Filistia-pa simin amah a that hi. Tua ciangin David’ mite in amah kunh-in, “Galsim dingin ko tawh nong kuankhia nawn kei ding hi. Hong kuan lecin Israel mite’ muan le suanpa kong taan kha ding uh hi,” a ci uh hi. Hih hun khit ciangin Filistia-te tawh Gob-ah galkidona omkik a, Hushah mi Sibbekai in mithagolte’ suante khat ahi Saf a that hi. Tua ciangin Filistia-te tawh galkidona om leuleu a, Bethlehem mi Jaareoregim’ tapa Elhanan in a teipi siamgante’ siamlawngpi cia a pha, Gath mi Goliath a that hi. Tua ciangin, a khut langtuakah khutme guk, le a khe langtuakah kheme guk, a vekpi-in sawmnih le li a nei, mi thalian khat a omna Gath-ah gal om leuleu hi. Amah zong mithagolte’ sung panin a piang ahi hi. Amah in Israel-te a phin ciangin, David’ sanggampa Shimei’ tapa Jonathan in amah that hi. Hih mi lite pen Gath-a mithagolte’ sung pana piang ahi uh hi. David le a nasemte in amaute a that uh hi. Tua ciangin Topa in ama galte khempeuh’ khutsung, le Saul’ khutsung panin amah a hotkhiat hunin David in hih la kammalte Topa’ tungah a gen hi. Amah in, “ Topa, kei hong hupa, ka kulhpi, kei hong honkhia pa, ka Pasian, ka kihutna, ka bukna pa, lum bangin kei a hong dal, ka munmuanhuai le ka belh, keimah hong honkhia pa hi a, ngong hihna panin hong hon hi. A phat taak Topa ka sam a, ka galte kiang panin kei hong kihon hi. “Bang hang hiam cih leh sihna tuihualte in kei hong tum a, siatna tuikhangte in kei hong nawk hi. Leinuai khaute in kei hong kancip a, sihna thangte in kei hong dawntuah hi. Ka lungkhamna-ah Topa ka sam a, ka Pasian ka sam hi. A biakinn panin amah in ka aw hong za a, ka kikona awging ama bil a tung hi. “Tua ciangin ama hehna hangin leitung kisingin, nakpitakin kilokgawp a, vantung bulpite kilinggawp hi. A nakvang sung panin meikhu pusuak a, a kamsung panin a kangtum mei pusuak a, ama tung panin mei-am san kuangkhia hi. Amah in vantungte niamsakin hong paisuk a, ama khenuai-ah khuamial sahpi om hi. Kherub khat tungah amah tuangin hong leng a, huih khate tungah amah kimu hi. Amah in ama kimkotah khuamial bawl a, a tung kikhuh nadingin meii sahpi a zang hi. Ama mai-a a taang sung panin mei-amte kuangkhia hi. “Vantung panin Topa hong awngsuk a, Sang Pen pa in a aw hong gingsak hi. Amah in thaltangte lawnin thehthang gawp a, khuaphialep phiasakin amaute a taisak hi. Tua ciangin Topa’ mawhsakna awging lianpi hangin tuipi tawte kidawk a, lei bulpite a guakin om hi. “Amah in a sangna mun panin hong banin kei hong la a, tui thukpi panin kei hong kaikhia hi. A hat ka galte panin kei hong honkhia a, kei hong mudahte panin hong suaktasak hi. Keima a dingin ka galte hatlua uh hi. Ka kamsiat ni-in kei hong simgawp uh a, ahih hangin Topa in kei hong huh hi. Amah in mun tanzau khatah kei hong paikhiatpih a, kei tungah lungkim ahih manin kei hong honkhia hi. “Ka thumanna tawh kizui-in Topa in thaman hong pia a, ka sianthona tawh kizui-in hong dinkik hi. Bang hang hiam cih leh Topa’ thu ka zui a, ka Pasian ka langpang kei hi. Ama biakna ngeina kipte hoihtakin ka zui a, ama thukhamte panin kei ka pial kei hi. Ama mai-ah kawk ka baang kei a, kisuanna dangte panin hoihtakin ka kikem hi. Tua ahih ciangin Topa in ka thumanna, ama muhna-ah ka sianthona tawh kizui-in kei hong dinkik khin hi. “Thuman mi tungah nangmah na thuman a, a kawkbaang lo mi tungah a kawkbaang loin na gamta hi. A siangtho mi tungah a siangtho-in na gamta a, a thukawi mi tungah thupeelin na gamta hi. Nangmah in mi niamte na honkhia a, ahih hangin a kiphasakte na niamkhiat hi. Topa aw, nang pen keima meivak na hi hi. Ka Pasian in ka khuamial vaksak hi. Nangma hangin galkap hon khat ka sugawpzo a, ka Pasian’ hangin khuakulh khat ka kanzo hi. “Hih Pasian a thu kicing a, Topa’ kamciamna a manna kilang hi. Amah a beelte khempeuh a dingin kidalna lum ahi hi. Topa longal Pasian kua hiam? I Pasian simloh, hong hu kua hiam? Hih Pasian, a muanhuai keima belh hi a, ka lampi khempeuh lungmuanhuaisak hi. Amah in sakhipite’ khe bangin ka khe kipsak a, mun sangna-ah keimah hong koih hi. Amah in galsimzia kei hong hilh a, sumngo thal khauhpente ka keekzo hi. “Nangmah in kei hong dalin na hong honkhia a, nangma hong huhna in kei hong liansak hi. Ka kalsuan nading mun tanzau keima nuai-ah nong pia a, ka khe taal lo hi. Ka galte delhin ka susia a, amaute a beitum mateng kei ka kileh kei hi. Amaute ka beisak a, amaute ka sunlet hi; amaute thokik nawn lo uh a, ka khenuai-ah amaute puk uh hi. “Bang hang hiam cih leh nangmah in galdo nadingin tha nong guan a, keimah hong dote ka nuai-ah na nengniam hi. Nangmah in ka galte, kei hong mudahte, na nungkiksak a, keimah in amaute ka susiagawp hi. Amaute khuadak uh a, ahih hangin a honkhia ding kuamah om lo hi. Topa’ tungah hong ko uh a, ahih hangin amah in amaute dawng lo hi. “Leivui bangin amaute ka satvui a, kongzing buante bangin amaute tuankhamin ka sikcipsuk hi. Mite tawh kidona panin nangmah in nong honkhia a, minamte’ lutangin kei nong bawl a, ka theih ngei loh mite in keima na hong sem uh hi. Keimah mai-etin gamdang mite ka kiangah hong pai uh hi. Amaute in ka thu a zak phetun, ka thu hong mang uh hi. Gamdang mite lungkia uh a, a phualkip panun lingin hong paikhia uh hi. “ Topa hing hi; kei hong hupa in thupha ngah hen la, ka Pasian, kei hong honkhia pa, hong thuksakin, keima nuai-ah mite a koihsuk Pasian, ka galte kiang panin kei hong paikhiatpih pa vanglian tahen. Nangmah in ka langte tungah kei nong liansak a, mi ngongtatte kiang panin kei nong honkhia hi. “ Topa aw, hih thu hangin minam khempeuh lakah nang kong phat ding a, na min phatna la ka sa ding hi. Zawhna lianpi ama kumpipa tungah pia a, a sathau nilh pa David le a suanlekhakte tungah a tawntungin itna kip a lak hi,” a ci hi. Jessi’ tapa David, milianpi a suak mipa, Jakob’ Pasian’ sathau nilh pa, Israel laphuak siampa David’ kam nunungte hih bang ahi hi: “ Topa’ kha in kei tungtawnin thu hong gen a, ka kam sungah ama thugente om hi. Israel Pasian kampau khin a, Israel a hupa in kei kiangah hong ci khin hi: Mi khat in mite tungah thutang takin ukin Pasian zahtakna tawh limtakin a uk ciangin amah pen amaute tungah zingsang khuavak bangin taang ziazua a, meii kaai loh ni zingsang a ni taangkhia, leilak panin lopate a selsak guahtui tawh kibang hi. Hi hi, ka innkuan zong Pasian tawh tua bangmah hi lo ahi hiam? Bang hang hiam cih leh amah in tawntung thuciamna kei tawh hong bawl a, na khempeuh a hoih a kipin hih hi. Bang hang hiam cih leh keimah hong huhin, ka deihna khempeuh tangtungsak ding hi lo ahi hiam? Ahih hangin mi gilote ahihleh a kilawnkhia lingkungte tawh kibang hi. Bang hang hiam cih leh khut guak tawh amaute kilawng ngam lo a, amaute a lawng ding mipa pen sik le teipi bul tawh kithawi a, amaute mei tawh kihaltum siang hi,” a ci hi. David’ neih mi thahatte’ minte: Tahkhemon mi Joshebbasshebeth hi a, amah pen mi thumte a ukpa ahi hi. Amah in a teipi tawh mihing zagiat do-in hun khat sungin thatmang khin hi. Tua ciangin mi thahat thumte lakah amah a zom pa pen Ahoah mi Dodo’ tapa Eleazar ahi hi. Galsim dingin a kikaikhawm Filistia-te to a, Israel mite a nungkik hunin David tawh amah om hi. Amah dingin a khut a hikcip mateng Filistia-te sattuk a, a namsau a khut sungah omcip hi. Topa in tua ni-in gualzawhna lianpi piangsak a, a kithat mite’ na a tawm ding bekin ama nungah mite hong paikik uh hi. Ama zomah Harar mi Agee’ tapa Shammah ahi hi. Besan a dimna mun Lehi-ah Filistia-te kikaikhawm uh a, Filistia-te’ kiang panin mite tai uh hi. Ahih hangin amah in tua munah panmun la-in hu a, Filistia-te that a, Topa in gualzawhna lianpi a piangsak hi. Ukpa sawmthumte lak panin mi thumte paisukin, Refaim kuamah Filistia mihonte in giahphual satin a om laitakin, Adullam leihawm a David kiangah anlak hun pawlin tung uh hi. Tua hunin munmuanhuai sungah David om a, Filistia khuacingte Bethlehem-ah om uh hi. David in lunggulhna tawh, “Kulhkongpi gei-a om Bethlehem tuikhuk panin mi khat in tuidawn ding kei hong pia leh!” a ci hi. Tua ciangin mi thahat thumte in Filistia-te’ giahphual phulin kulhkongpi gei-a om Bethlehem tuikhuk panin tui tawikhia uh a, a tui la-in David kiangah paipih uh hi. Ahih hangin David in a tui dawn lo hi. Amah in Topa a dingin a tui sung a, “ Topa aw, hih tui ka dawn het kei ding hi. Amau’ nuntakna khamin a pai mite’ sisan a dawn tawh ka kibang hi,” a ci hi. Tua ahih ciangin amah in dawn lo hi. Mi thahat thumte’ hanzia tu-a bang ahi hi. Tu-in Zeruiah’ tapa, Joab’ sanggampa Abishai, mihing sawmthumte a ukpa ahi hi. Amah in a teipi tawh mihing za thumte do-in amaute that a, mihing sawmthumte’ banah minphatna ngahbeh hi. Mihing sawmthumte sung pan amah a minthang pen hi a, amaute a ukpa a suak hi. Ahih hangin amah in mihing thumte ban nai lo hi. Jehoiada’ tapa, Kabzeel khuami Benaiah pen gal a hang, na lianpite a sempa hi a, amah in Moab galhang mi nih a vat hi. Amah zong paisukin vuk a kiat ni khatin leihawm sunga om humpinelkai khat a that hi. Amah in a melhoih Egypt mi khat a that hi. Egypt mipa in a khut sungah teipi tawi hi. Ahih hangin Benaiah ciangkhut khat tawh ama kiangah paisuk a, Egypt-pa’ khutsung panin a teipi sutkhia-in ama teipi mah tawh amah a that hi. Jehoiada’ tapa Benaiah in hihte hihin, a thahat mi thumte’ minphatna zah phial a ngah hi. Mihing sawmthumte’ lakah amah minthang a, ahih hangin amah in mihing thumte ban nai lo hi. David in amah a cingte a ukin a koih hi. Joab’ sanggampa Asahel zong sawmthumte’ lakah khat ahi hi. Bethlehem mi Dodo’ tapa Elhanan, Harod khuami Shammah, Harod khuami Elika, Palti mi Helez, Tekoa khuami Ikkesh’ tapa Ira, Anathoth khuami Abiezer, Hushah mi Mebunnai, Ahoah mi Zalmon, Netofah khuami Maharai, Netofah khuami Baanah’ tapa Heleb, Benjamin mite’ gam sunga om Gibeah khuami Ribai’ tapa Ittai, Pirathon khuami Benaiah, Gaash gei-a kuam pan Hiddai, Betharabah khuami Abialbon, Bahurim khuami Azmaveth, Shaalbon khuami Eliahba, Jashen’ tapate, Jonathan, Harar mi Shammah, Harar mi Sharar’ tapa Ahiam, Maakah khuami Ahasbai’ tapa Elifelet, Gilo khuami Ahithofel’ tapa Eliam, Karmel khuami Hezro, Arbi mi Paarai, Zobah khuami Nathan’ tapa Igal, Gad mi Bani, Ammon mi Zelek, Zeruiah’ tapa galhiam a tawi Beeroth khuami Naharai, Ithri mi Ira, Ithri mi Gareb, Hit mi Uriah, a vekpi-in sawmthum le sagih ahi uh hi. Khatvei, Israel-te tungah Topa hong hehkik a, amah in mite’ gim nadingin David hanthawnin, “Pai in; Israel le Judah mi a phazah sim in,” a ci hi. Tua ahih ciangin kumpipa in Joab le amah tawh a om galkap ukte kiangah, “Mite a phazah ka theih nadingin Dan panin Beersheba ciang dong Israel minamte khempeuh lakah pai unla mi phazah va sim un,” a ci hi. Ahih hangin Joab in kumpipa kiangah, “Ka to kumpipa’ muhin Topa na Pasian in mite tu-a a omzah za khatin a tamna behlap tahen. Ahih hangin bang hangin ka to kumpipa in hih thu deih na hi hiam?” a ci hi. Ahih hangin kumpipa’ kamgente in Joab le galkap ukte zozaw hi. Tua ahih ciangin Israel mite a phazah a sim dingin kumpipa’ omna panin Joab le galkap ukte a paikhia uh hi. Amaute in Jordan kantanin kuam laizang a om khuapi Aroer panin kipanin Gad lam manawh uh a, Jazer-ah paisuak uh hi. Tua ciangin amaute Gilead tung uh a, tua panin Hit mite’ gam Kadesh tung uh hi. Tua lai panin Dan tungin, Dan panin kual pai-in Sidon tung uh hi. Tua ciangin Taia munmuanhuai le Hiv mite le Kanaan mite’ khuapite khempeuh tung uh hi. Tua panin Judah-te’ Negeb lam Beersheba-ah pai uh hi. Tua ahih ciangin gam khempeuhah amaute a pai khit uh, kha kua le ni sawmnih a cin khit ciangin Jerusalem-ah hong tungkik uh hi. Tua ciangin Joab in kumpipa kiangah mite a phazah a gawm a pia hi: Israel sungah namsau a tawi galhang mi tul zagiat om a, Judah mi tul zanga om hi. Ahih hangin mi a sim khit ciangin David’ lungsim in amahmah gimsak hi. Tua ciangin David in Topa’ tungah, “Ka gamtatnasa sungah nakpitakin ka khial hi. Ahih hangin, tu-in, Topa aw, nang tungah kong thum hi; na nasempa’ mawhna hong maisak in; bang hang hiam cih leh ka hai gamtatkha khin hi,” a ci hi. Zingsangin David a thawh ciangin David’ thumu pa ahi kamsang Gad tungah Topa’ thu hong tung a, “Pai inla, David kiangah hih bangin gen in. ‘ Topa in hih bangin ci hi: Nangma tungah thu thum kong pia hi; nang tungah kong hih theih nadingin tuate khat teel in,’ ci hi,” a ci hi. Tua ahih ciangin David kiangah Gad hong pai-in ama tungah gen a, “Na gam sungah kum thum sung kialpi hong tung ding hiam? Ahih kei leh na galte in nang hong delh laitakin amaute’ mai-ah kha thum sung tai ding na hi hiam? Ahih kei leh na gam sungah ni thum sung pulnatna hong tung ding ahi hiam? Tu-in ngaihsun in; kei hong sawl pa’ kiangah bang dawnna puakkik ding ka hi hiam khentat in,” a ci hi. Tua ciangin David in Gad kiangah, “Nakpi takin ka lung a kham hi. Ama hehpihna lian ahih manin Topa’ khut sungah tung ni; bangbang ahi zongin mihing khut sungah hong tungsak kei hen,” a ci hi. Tua ahih ciangin Topa in zingsang a kipan a kiseh hun dongin Israel-te tungah natna tungsak hi. Dan panin Beersheba dongin mihing tul sawmsagih a si hi. Vantung mi in Jerusalem khua a susia dingin kithawi-in a khut a zan ciangin tua tatsiatna panin Topa kisik a, mite lakah suksiatna na a sem vantungmi kiangah, “Phazo hi; tu-in khawl ta in,” a ci hi. Topa’ vantungmi pen Jebus mi Araunah’ ancilna gei-ah a om hi. Tua ciangin mite a vat vantungmi a muh ciangin David in Topa’ tungah thu gen a, “En in, ka mawh hi; a khial pa pen kei ka hi hi. Hih mite in bang khialhna nei ahi uh hiam? Kong thum hi; kei le ka innkuante bek gim hong pia in,” a ci hi. Tua ciangin tua ni-in David kiangah Gad pai-in ama kiangah, “Paito in; Jebus mi Araunah’ ancilna-ah Topa a’ ding biakna tau khat phut in,” a ci hi. Tua ahih ciangin Topa’ thupiak bangin Gad’ cihna zui-in David paito hi. Araunah a khuadaksuk ciangin kumpipa le a nasemte ama lamah a hong paito a mu hi. Araunah paikhia-in a mai lei ngatin kumpipa zahtakna a bawl hi. Tua ciangin Araunah in, “Bang hangin ka to kumpipa a nasempa kiangah hong pai na hi hiam?” a ci hi. “Mite’ tung panin gimna a ven’ theih nadingin Topa a’ ding biakna tau lam nading na ancilna mun a lei ding,” a ci hi. Tua ciangin Araunah in David kiangah, “Ka to kumpipa in hoih na sak bangin la inla biakna pia in; meihal biak nadingin bawngtalte, le a sing dingin ancilna peekte le bawngtal kolte hih lai-ah om hi. Kumpipa aw, keimah Araunah in hihte khempeuh kumpipa tungah kong pia hi,” a ci hi. Tua banah Araunah in kumpipa kiangah, “ Topa, na Pasian in nang hong sang ta hen,” cithuah lai hi. Ahih hangin kumpipa in Araunah kiangah, “Hilo hi; nangma tung panin hihte a man tawh kituakin kong lei ding hi. Topa ka Pasian’ tungah kei’ sum bei loin meihal biaknate ka pia kei ding hi,” a ci hi. Tua ahih ciangin David in ngun shekel sawmnga tawh ancilna mun le bawngtalte a lei hi. Tua ciangin David in Topa a’ ding biakna tau khat tua lai-ah lam a, meihal biaknate le thunuama biaknate a pia hi. Tua ahih ciangin tua gam adingin thumna Topa in ngai a, Israel-te’ tung panin gimna a veng hi. Tu-in Kumpi David teekin kum tam ta hi. Amaute in amah puan a silhsak uh hangin a khua lum thei lo hi. Tua ahih ciangin a nasemte in ama kiangah, “Ka to kumpipa a dingin nungakno khat kizong hen la, amah in kumpipa enin amah a kemnu hita hen. Ka to kumpipa a khua a lum theih nadingin na ang sungah tua nu lum hen,” a ci uh hi. Tua ahih ciangin amaute in Israel gam sung khempeuhah nungak melhoih khat zong uh a, Shunem mi Abishag mu-in, kumpipa kiangah amah paipih uh hi. Tua nungak melhoih mahmah a, kumpipa a kemnu suakin ama na a sem hi. A lupkhawm uh hangin kumpipa in amah hih zo lo hi. Tu-in David in Haggith tawh a neih a tapa Adonijah amahmah kiliansak tawmin, “Keimah, kumpi ka hi ding hi,” a ci hi. Amah in ama a dingin leengte le sakol tung tuangte, le ama mai-ah a tai ding mihing sawmnga vaihawm hi. A pa David in, “Bang hangin tua bang tua bangin gamta na hi hiam?” ci-a dotna tawh khatvei beek amah tai ngei lo hi. Amah pen a melhoih mahmah mi khat zong ahi hi. Amah pen Absalom zom a suak ahi hi. Amah in Zeruiah’ tapa Joab le siampi Abiathar tawh vaihawm hi. Amaute in Adonijah zui-in amah panpih uh hi. Ahih hangin siampi Zadok, le Jehoiada’ tapa Benaiah, le David’ mi a thahatte in Adonijah panpih lo uh hi. Adonijah in Enrogel gei-a om Gulpi’ Suangpi kiangah tuute, bawngtalte, le ganno thaute biakna-in pia-in, amah in kumpipa’ tapate ahi a sanggamte khempeuh le Judah gam kumpi uliante khempeuh sam a, ahih hangin kamsangpa Nathan ahi a, Benaiah ahi a, mi thahatte ahi a, a sanggampa Solomon ahi zongin sam lo hi. Tua ciangin Nathan in Solomon’ nu Bathsheba kiangah, “Haggith’ tapa Adonijah kumpi suak khinin, David in tua thu a theih lohna thu za nai lo na hi hiam? Tua ahih ciangin tu-in hong pai in. Nangma nuntakna le na tapa Solomon’ nuntakna na suahtaksak theih nadingin nang tungah ngaihsutna kong pia ding hi. Thakhatin Kumpi David kiangah pai-in ama tungah, ‘Ka to kumpipa in na nasemnu’ tungah hong kiciamin, “Na tapa Solomon pen keima nungah maangin, keima kumpi tokhom tungah tu ding hi,” ci hi lo na hi hiam? Tua ahih ciangin bang hangin Adonijah kumpi suak ahi hiam?’ ci in. Tua ciangin kumpipa kiangah thu na gen laitakin kei zong nangma nungah hong pai-in nangma thugen teng kong panpih ding hi,” a ci hi. Tua ahih ciangin Bathsheba a inndei sung kumpipa kiangah va pai hi (tu-in kumpipa teek mahmah a, Shunem mi Abishag in kumpipa’ na sem hi.) Bathsheba kunin kumpipa tungah zahtakna bawl a, kumpipa in, “Bang deih na hi hiam?” a ci hi. Tua nu in ama kiangah, “Ka topa aw, na nasemnu tungah Topa na Pasian’ min tawh kiciamin, ‘Na tapa Solomon pen keima nungah maangin, keima kumpi tokhom tungah tu ding hi,’ na ci hi. Tu-in en in, ka to kumpipa in na theih loh hangin, Adonijah kumpi ahi hi. Amah in biakna-in bawngtalte, ganno thaute, le tuute, tampi tak pia khin a, kumpipa’ tapate khempeuh, siampi Abiathar, le galkapte a ukpa Joab sam a, ahih hangin amah in na nasempa Solomon sam lo hi. Ka to kumpipa aw, tu-in nangma nungah ka to kumpipa’ tokhom tungah kua tu ding, ci-a amaute kiangah na gen ding ngakin Israel-te khempeuh in nang hong en uh hi. Tua bang hikeileh ka to kumpipa na bei ciangin kei le ka tapa Solomon a khialin a hong kiseh hun hong tung ding hi,” a ci hi. Kumpipa tawh tua nu kiho-in a om laitakin kamsangpa Nathan hong tum hi. Kumpipa kiangah, “Hih lai-ah kamsangpa Nathan om hi,” ci-in a kigen hi. Kumpipa mai-ah amah hong pai ciangin a mai leilam ngatin kumpipa’ mai-ah a kun hi. Tua ciangin Nathan in, “Ka to kumpipa aw, ‘Keima nungah Adonijah maangin ka kumpi tokhom tungah tu ding hi,’ ci na hi hiam? Bang hang hiam cih leh tuni-in amah paisuk khinin, bawngtalte, ganno thaute, le tuute, tampi tak biakna-in pia a, kumpipa’ tapate khempeuh, galkapte a ukpa Joab, le siampi Abiathar sam hi. Amaute in ama a’ ding pawi bawl uh a, ‘Kumpi Adonijah a khansau hen!’ ci uh hi. Ahih hangin na nasempa keimah, le siampi Zadok, le Jehoiada’ tapa Benaiah, le na nasempa Solomon, amah in hong sam lo hi. Ka to kumpipa in hih thu thukimpihin, nangma khit ciangin ka to kumpipa’ tokhom tungah kua tu ding cih thu na nasem kote’ kiangah hong im na hi hiam?” a ci hi. Tua ciangin Kumpi David in dawngin, “Bathsheba ka kiangah hong samkik in,” a ci hi. Tua ahih ciangin kumpipa omna-ah tua nu hong pai-in, kumpipa’ mai-ah a ding hi. Kumpipa kiciamin, “Haksatna khempeuh panin kei a hong honkhia Topa a nungta ahih mah bangin, nangma tungah Topa, Israel Pasian’ min tawh hong kiciamin, ‘Keima nungah ka tapa Solomon maang ding a, keima tangin ka kumpi tokhom tungah tu ding hi,’ ka cihsa mah bangin, tuni-in zong ka cikik hi,” a ci hi. Tua ciangin Bathsheba in leilam maingatin kunin kumpipa tungah zahtakna bawl a, “Ka to kumpi David nungta tawntung ta hen!” a ci hi. Tua ciangin Kumpi David in siampi Zadok, kamsang Nathan, le Jehoiada’ tapa Benaiah samsak hi. Tua ahih ciangin kumpipa’ mai-ah amaute hong pai uh hi. Kumpipa in amaute kiangah, “Na topa’ nasemte paipih unla, ka tapa Solomon keima la-sakol tungah tuangsakin Gihon-ah paipihsuk un. Israel-te’ tungah kumpi-in tua lai munah siampi Zadok le kamsang Nathan sathau nilhsak un. Tua ciangin peengkul tum unla, ‘Kumpi Solomon khansau hen!’ ci un. Tua ciangin ama nungah note nong pai ding uh a, amah hong pai-in ka kumpi tokhom tungah hong tu ding hi; bang hang hiam cih leh keima tangin amah kumpi hi ding hi. Israel le Judah a ukpa dingin amah ka seh khinzo hi,” a ci hi. Tua ciangin Jehoiada’ tapa Benaiah in dawngin, “Hi ta hen! Topa, ka to kumpipa’ Pasian in tua bangin kipsak tahen. Topa in ka to kumpipa a ompih mah bangin Solomon zong ompih hen la, ka to Kumpi David’ tokhom sangin ama tokhom lianzaw sak hen,” a ci hi. Tua ahih ciangin Zadok, kamsang Nathan, Jehoiada’ tapa Benaiah, le Khereth mite le Peleth mite paisukin Kumpi David’ la-sakol tungah Solomon tuangsak uh a, Gihon-ah amah paipih uh hi. Tua lai-ah siampi Zadok in puanbuk panin sathau biing la-in Solomon a nilh hi. Tua ciangin amaute in peengkul tum uh hi. Tua ciangin mi khempeuh in, “Kumpi Solomon khansau hen!” a ci uh hi. Tua ciangin mi khempeuh ama nungah pai-in tamngaikop tum uh a, nakpitakin lungdam uh a, amau’ gamlumna in lei a thawnkham hi. Adonijah le amah tawh a om leenglate khempeuh in a pawi bawl a man khit uh ciangin hih thu za uh hi. Joab in peengkul aw a zak ciangin amah in, “Khuapi sungah hih gamlumna bang a cihnopna ahi hiam?” a ci hi. Amah a kampau laitakin, siampi Abiathar’ tapa Jonathan hong pai hi. Tua ciangin Adonijah in, “Hong tum in; bang hang hiam cih leh nang migina na hi a, thuhoih nong puak hi,” a ci hi. Jonathan in Adonijah dawngin, “Hilo hi; bang hang hiam cih leh i to kumpi David in kumpi-in Solomon bawl khin hi. Kumpipa in amah tawh siampi Zadok, kamsang Nathan, le Jehoiada’ tapa Benaiah, le Khereth mite le Peleth mite sawl khin hi. Amaute in kumpipa’ la-sakol tungah amah tuangsak khin uh hi. Siampi Zadok le kamsang Nathan in Gihon-ah kumpi-in amah sathau nilh khin uh hi. Tua lai panin amaute lungdamin ciahkhin uh ahih manin khuapi sung gamlum hi. Nangma zak pen hih gamlumna ahi hi. Tu-in Solomon in kumpi tokhom luah khinta hi. Tua tham loin kumpipa’ nasemte i to Kumpi David tungah lungdamna a ko dingin pai uh a, ‘Na Pasian in nangma min sangin Solomon’ min a thangzaw-in bawl hen la, nangma tokhom sangin ama tokhom a lianzaw-in bawl ta hen,’ ci uh hi. A lupna tung panin kumpipa mahmah zong kun hi. Kumpipa in zong, ‘Keima mit-a ka muhin keima suanlekhakte khat ka kumpi tokhom tungah a tu dingin tuni-in a pia Topa, Israel Pasian in thupha ngah ta hen,’ ci hi,” a ci hi. Tua ciangin Adonijah’ leenglate khempeuh ling uh a, dingin amau’ mun ciatah a ciah uh hi. Tua ciangin Adonijah in Solomon kihta hi. Amah pai-in biakna tau kite pom hi. Tua ciangin Solomon kiangah, “Adonijah in Kumpi Solomon hong kihta hi. Amah in biakna tau kite lenin, ‘Amah in a nasempa namsau tawh a thahloh nading kei tungah Kumpi Solomon hong kiciam masa hen,’ ci hi,” kici hi. Tua ciangin Solomon in, “Amah in a kilawm mi ahihna a lahtel theih leh ama samzang khat zong leilakah kialo ding a, ahi zongin ama sungah gitlohna a kimuh leh amah si ding hi,” a ci hi. Tua ahih ciangin Kumpi Solomon in mi sawl a, amaute in zong biakna tau panin amah paikhiatpih uh hi. Amah hong pai-in Kumpi Solomon’ tungah zahtakna bawl hi. Tua ciangin Solomon in ama kiangah, “Na inn-ah ciah in,” a ci hi. David’ sih ding hun a nai ciangin amah in a tapa Solomon thuhilhin, “Leitung mi khempeuh ngeina bangin a pai ding ka hi ta hi. Thakhauhin pasal na hihna kilangsak in. “Tham loin, Zeruiah’ tapa Joab in kei hong bawlna, gal sunga a si mite’ phu a lakna-in gal kilem hun sungin a thah, Israel galkap ukte ahi mi nih, Ner’ tapa Abner le Jether’ tapa Amasa tungah a bawlna le, amah in mawhna nei lo mite thatin, tua ama gamtatna hangin ka thuaknate zong na thei hi. Tua ahih ciangin nangma pilna bangin gamta inla, lungnuam takin sih ngeina tawh amah na sihsak loh ding thei in. Ahih hangin Gilead mi Barzillai’ tapate tungah thuman takin gamta inla, na sabuai a an nete bangin amaute omsak in; bang hang hiam cih leh na sanggampa Absalom’ kiang panin ka tai lai-in amaute in tua bang thumanna tawh kei hong bawl uh hi. Mahanaim ah ka pai lai-in a nasia samsiatna tawh kei a hong samsia, Bahurim panin a hong pai Benjamin mi Gera’ tapa Shimei zong nang tawh om hi. Ahih hangin Jordan-ah keimah a dawn dingin hong pai ciangin ama tungah Topa tawh kiciamin, ‘Namsau tawh nang kong that kei ding hi,’ ka ci hi. Ahi ta zongin tu-in amah a mawhbaang loin ngaihsun kei in; bang hang hiam cih leh nang mipil na hi hi. Ama tungah na bawl dinga a kilawm na thei ngawn ding hi. Amah thatin a lutang hanah na paipihsuk ding hi,” a ci hi. Tua ciangin David si a, David khuapi sungah kivui hi. Israel-te tungah David in kum sawmli sung uk hi. Amah in Hebron-ah kum sagih sung ukin, Jerusalem-ah kum sawmthum le kum thum sung uk hi. Tua ahih ciangin a pa David’ tokhom tungah Solomon tu a, ama kumpi gam kiptakin kiphut hi. Tua ciangin Solomon’ nu Bathsheba kiangah David in Haggith tawh a neih a tapa Adonijah hong pai hi. Tua nu in, “Thunuama hong pai na hi hiam?” a ci hi. Amah in, “Thunuam hi,” a ci hi. Tua ciangin Adonijah in, “Nang tungah gen ding khat ka nei hi,” a ci hi. Amah in, “Gen in,” a ci hi. Adonijah in, “Kumpi gam pen keima-a’ hi-in, Israel-te khempeuh in keima uk ding a lamet mahmahna uh na thei hi. Ahi zongin kumpi gam kihei-in ka sanggampa-a’ suak hi; bang hang hiam cih leh hih thu pen Topa’ kiang pan ahi hi. Tu-in nangma tung panin kong nget ding khat om hi; kei hong nial kei in,” a ci hi. Tua nu in ama kiangah, “Gen in,” a ci hi. Amah in, “Kumpi Solomon kiangah nong ngetsak ding kong thum hi. Amah in nang’ thu hong nial lo ding hi. Shunem mi Abishag ka zi dingin kei tungah hong piak ding ka ut hi,” a ci hi. Bathsheba in, “Hoih mahmah hi; kumpipa kiangah kong gensak ding hi,” a ci hi. Tua ahih ciangin Adonijah tangin ama tungah thu a gen dingin Kumpi Solomon kiangah Bathsheba va pai hi. Tua ciangin tua nu a dawn dingin kumpipa dingin tua nu mai-ah a kun hi. Tua ciangin ama tokhom tungah tu-in kumpipa’ nu a dingin tutna khat lasak hi. Tua nu ama taklamah a tu hi. Tua ciangin amah in, “Nangma tungah na neuno khat nget ding ka nei hi; kei hong nial kei in,” a ci hi. Kumpipa in ama kiangah, “Hong ngen in, nu aw; kong nial kei ding hi,” a ci hi. Amah in, “Shunem mi Abishag ama zi dingin na sanggampa Adonijah tungah kipia hen,” a ci hi. Kumpi Solomon in a nu dawngin, “Bang hangin Adonijah a dingin Shunem mi Abishag hong ngen na hi hiam? Kumpi gam zong ama a dingin ngetsak lai vet in; bang hang hiam cih leh amah ka u hi a, ama lamah siampi Abiathar le Zeruiah’ tapa Joab pang hi,” a ci hi. Tua ciangin Kumpi Solomon zong Topa tawh kiciamin, “Hih thu in Adonijah’ nuntakna a lei kei taak leh Pasian in kei hong dawm kei ta hen! Tua ahih ciangin tu-in, kei hong kipsakin ka pa David’ tokhom tungah hong koih a, ama ciamsa bangin kei tung le ka suanlekhakte tungah kumpi gam hong pia Topa a nungta ahih mah bangin, tuni-in Adonijah kithat ding hi,” a ci hi. Tua ahih ciangin Kumpi Solomon in Jehoiada’ tapa Benaiah sawl hi. Amah in tua pa satpuk sukin, tua ciangin amah a si hi. Tua ciangin siampi Abiathar’ kiangah kumpipa in, “Nangma mun le nangma gam a omna Anathoth ah ciah in; bang hang hiam cih leh na sih ding a kilawm ahi hi. Ahih hangin nangmah in ka pa David’ mai-ah Topa Pasian ’ Thuciamna Singkuang na puakna le ka pa’ gimna-ah na gimkhopna hangin tutungin nang kong that kei ding hi,” a ci hi. Tua ahih ciangin Solomon in Topa’ siampi hihna panin Abiathar hawlkhia-in, Eli innkuan tawh kisai thu Topa in Shiloh-ah a genna thu tua bangin a tungsak hi. Hih thu Joab kiang a tun ciangin Topa’ puanbukah Joab tai-in biakna tau kite a len hi. (Joab in Absalom pawlpih loin Adonijah a na pawlpihna hang ahi hi.) Kumpi Solomon kiangah, “ Topa’ puanbukah Joab tai hi,” ci-in a kigen ciangin Solomon in Jehoiada’ tapa Benaiah sawlin, “Pai in; amah satpuk in,” a ci hi. Tua ahih ciangin Topa’ puanbukah Benaiah hong pai-in ama kiangah, “Kumpipa in thu hong pia a, ‘Hong paikhia in,’ ci hi,” a ci hi. Ahih hangin amah in, “Hilo hi, hih lai-ah kei ka sizaw ding hi,” a ci hi. Tua ciangin Benaiah in kumpipa kiangah thu puakin, “Tua bangin Joab in thu gen a, tua bangin amah in kei hong dawng hi,” a ci hi. Kumpipa in amah dawngkikin, “Ama cihsa bangin hih in; amah satlum inla phum in. Joab in thu om lopi-in mi a thahna hangin mawhna pen keima tung le ka suanlekhakte’ tung panin tua bangin na siangsak ding hi. Topa in ama mawhna ama lu tung mahah tungsakkik ding hi. Bang hang hiam cih leh ka pa David’ theih loh kalin amah in Israel galkapte a uk Ner’ tapa Abner le Judah galkapte a uk Jether’ tapa Amasa, amah sangin thuman zaw-in a hoihzaw ahi mihing nih do-in namsau tawh a that hi. Tua ahih ciangin mi thahna hangin gimna pen Joab’ lu tung le ama suanlekhakte’ lu tungah a tawntungin hong tungkik ding hi. Ahih hangin David’ tung, ama suanlekhakte’ tung, ama innkuan tung, le ama kumpi tokhom tungah Topa’ kiang panin a tawntung nopna om ding hi,” a ci hi. Tua ciangin Jehoiada’ tapa Benaiah paito-in amah satpuk sukin that a, gamlak ama inn sungah amah kiphum hi. Kumpipa in Joab tangin galkapte’ tungah Jehoiada’ tapa Benaiah koih a, kumpipa in Abiathar’ tangin siampi Zadok a koih hi. Tua ciangin kumpipa in mi sawlin Shimei samsakin ama kiangah, “Jerusalem-ah inn khat lamin tua lai-ah teng inla, tua lai mun panin mun khat peuhpeuhah paikhia kei in. Bang hang hiam cih leh nang paikhia-in Kidron lui na kantan ni-in na sih ding teltakin thei in; na sih leh nangma khialhna hang hi ding hi,” a ci hi. Tua ciangin Shimei in kumpipa kiangah, “Na thugen hoih hi; ka to kumpipa’ gen bangin na nasempa gamta ding hi,” a ci hi. Tua ahih ciangin Jerusalem-ah sauveipi sung Shimei om hi. Ahih hangin kum thum a cin ciangin Gath kumpipa Maakah’ tapa Akhish kiangah Shimei’ silate nih va tai uh hi. Shimei’ kiangah, “En in, na silate Gath-ah om hi,” ci-in a kigen ciangin Shimei dingin la khat a van vawhin a silate a zong dingin Gath-a Akhish kiangah pai a, Gath panin a silate a ciahpih hi. Jerusalem panin Gath-ah Shimei pai-in a ciahkikna thu Solomon kiangah a kigen ciangin kumpipa in mi sawlin Shimei samsakin ama kiangah, “ Topa tawh hong kiciam sakin, thupi takin nang hong thuhilhin, ‘Nang, mun khat peuhpeuhah na paikhiat ni-in na sih ding teltakin thei in,’ hong ci hi lo ka hi hiam? Tua ciangin nangmah in, ‘Na thugen hoih hi; ka mang hi,’ na ci hi. Tua ahih ciangin bang hangin Topa’ tungah na kiciamna le nang hong thuhilhin kong thupiakna zui lo na hi hiam?” a ci hi. Tua banah kumpipa in Shimei kiangah, “Ka pa David tungah siatna na bawlte khempeuh na lungsimah na thei hi. Tua ahih ciangin Topa in nangma siatna nangma lu tung mahah hong tunkik ding hi. Ahih hangin Kumpi Solomon thupha kipia-in, a tawntungin Topa’ mai-ah a tokhom kikipsak ding hi,” zong a ci lai hi. psap Tua ciangin kumpipa in Jehoiada’ tapa Benaiah thu pia hi. Amah paikhia-in Shimei satpuk sukin, tua ciangin amah a si hi. Tua ahih ciangin Solomon’ khut sungah kumpi gam kikipsak hi. Solomon in Egypt kumpipa Faro tawh numei-a kizopna bawl hi. Amah in Faro’ tanu la a, ama inn le Topa’ biakinn le Jerusalem kimkota kulhpi a lam a zawh mateng David khuapi sungah tua nu paipihin omsak hi. Ahi zongin Topa a dingin biakinn kilam nai lo ahih manin mite in mualtung a biaknate-ah biakna pia uh hi. Solomon in Topa itin, a pa David’ thukhamte zui hi. Ahi zongin amah in mualtung a biaknate-ah biakna pia-in paknamtui hal hi. Tua ciangin biakna a pia dingin Gibeon-ah kumpipa pai hi; bang hang hiam cih leh mualtung a biakna mun a lian pen ahi hi. Solomon in tua biakna tau tungah meihal biakna tam veipi tak a piaknasa mun ahi hi. Gibeon-ah zanin mang sungah Solomon’ tungah Topa kilang hi. Pasian in, “Nang kong piak ding hong ngen in,” a ci hi. Solomon in, “Na nasem ka pa David’ tungah a lian itna kip na lak hi. Bang hang hiam cih leh cihtakna, thumanna tawh nangma mai-ah gamta-in, nangma tungah lungsim thutang hi. Nangmah in ama a dingin hih a lian itna kip koihsakin, tuni-in ama tokhom tungah a tu ding tapa khat na pia hi. Tu-in, Topa ka Pasian aw, kei pen naupangno khat hinapi-in ka pa David’ munah kumpi-in na nasempa nong koih hi. Bangci gamtatin bangci nasep ding cih ka theih khat zong om lo hi. A lian, a phazah a kisim zo lo, a tamna a kiseh thei lo, nangmah in na teelsa na mite lakah na nasempa om hi. Tua ahih ciangin keimah in a sia le a pha ka theihtheih nadingin na mite uk nading thu theihtelna lungsim na nasempa hong pia in. Bang hang hiam cih leh hih a lian a tam na mite kua in ukzo ding ahi hiam?” a ci hi. Solomon’ thungetna in Topa lungkimsak hi. Pasian in ama kiangah, “Nangmah in hih thu hong ngenin, nangma a dingin khansauna ahi a, hauhna ahi a, na galte thahzawh nading ahi zongin hong ngen loin, a man thu na theih nadingin nang a dingin thu theihtelna hong ngen na hih manin, en in, nangma hong ngetna bangin kong pia ding hi. En in, nangma hun ma-in nang tawh a kibang a om loh nading le nangma khitah zong nang tawh a kibang hong khan loh nadingin pilna le theihna lungsim kong pia ding hi. Nangma hunsung tawntung kumpi dang nang tawh a kiteh theih lohna dingin nangma hong nget loh hauhna le pahtawina zong nang kong pia ding hi. Na pa David in a tot bangin nangmah in ka lampite tawnin, ka thukhamte le ka thupiaknate na zuih nakleh na khan ka sausak ding hi,” a ci hi. Tua ciangin Solomon khanglo a, hih pen a mang na hi hi. Tua ciangin Jerusalem-ah amah pai a, Topa’ Thuciamna Singkuang mai-ah amah dingin meihal biaknate le thunuama biaknate pia-in, a nasemte khempeuh a dingin pawi khat a kham hi. Tua ciangin kumpipa kiangah numei paktat nih hong pai-in a mai-ah ding uh hi. A numei khat in, “Aw, ka topa aw, hih numei le kei, inn khat sungah ka omkhawm uh hi; amah zong inn-ah a om sungin keimah in ta khat ka nei hi. Ka ta neih khit ni thum ni ciangin hih numei in zong ta hong nei hi. Ko gel bek a om ka hi uh a, kote tawh inn sungah kuamah dang om lo hi. Amah in delhphahkha ahih manin zanin hih numei’ tapa a si hi. Tua ciangin zankim laitakin amah tho-in, na nasemnu ka ihmut laitakin ka kiang panin ka tapa la-in ama ang-ah koih a, ama tapa si kei’ ang-ah hong koih hi. Zingsangin ka ta nawi a pia dingin ka thawh ciangin, a sisa na hi hi. Ahih hangin limtakin ka et ciangin, amah pen keima sung pana suak ta na hi lo hi,” a ci hi. Ahih hangin a numei dang khat in, “Hilo hi; a hing naupang keima a’ hi a, a si naupang nangma a’ ahi hi,” a ci hi. Tua ciangin a masa nu in, “Hilo hi; a si naupang nangma a’ hi a, a hing naupang keima-a’ ahi hi,” a ci hi. Tua bangin kumpipa’ mai-ah amau tegel in thu gen tuak uh hi. Tua ciangin kumpipa in, “Khat in, ‘A nungta pen keima tapa hi a, nangma tapa si hi,’ ci hi. Tua ciangin adang khat in, ‘Hilo hi; nangma tapa si a, keima tapa a hing pen ahi hi,’ ci hi,” a ci hi. Tua ciangin kumpipa in, “Namsau khat hong la un,” a ci hi. Tua ahih ciangin kumpipa’ mai-ah namsau khat hong kipaipih hi. Tua ciangin kumpipa in, “A nungta naupang khen nih suah unla, khat tungah alang pia-in, adang khat tungah alang pia un,” a ci hi. Tua ciangin a tapa a nungta numei in a lungsimah a tapa khasiat ahih manin kumpipa kiangah, “Aw ka topa aw, a nungta naupang amah piazaw in; bangbang hitaleh amah that kei in,” a ci hi. Ahih hangin a khat in, “Hih pen kei ka hi a, amah in ahi zongin tang thei lo ding hi; hong hawmsak un,” a ci hi. Tua ciangin kumpipa in dawngin, “A masa numei tungah naupang hing pia un; bangbang hitaleh that kei un; amah pen a nu ahi hi,” a ci hi. Tua ciangin Israel mi khempeuh in kumpipa’ piak thukhenna za uh hi. Thutang a sem dingin ama tungah Pasian in pilna pia hi, ci-in phawk uh ahih manin amaute in kumpipa lamdangsa-in a om uh hi. Kumpi Solomon pen Israel mi khempeuh tungah kumpi hi a, ama nuai-ah panmunte le a semte hih bang ahi hi: Siampi nasep: Zadok’ tapa Azariah ahi hi. Lai-at nasep: Shisha’ tapa Elihoref le Ahijah ahi uh hi. Thu ciamteh nasep: Ahilud’ tapa Jehoshafat ahi hi. Galkapte a uk nasep: Jehoiada’ tapa Benaiah ahi hi. Siampite nasep: Zadok le Abiathar ahi uh hi. Uliante tungah a uk nasep: Nathan’ tapa Azariah ahi hi. Kumpi thu lamlak nasep: Nathan’ tapa Zabud ahi hi. Kumpi inn uk nasep: Ahishar ahi hi. Aana tawh nasemte a uk nasep: Abda’ tapa Adoniram ahi hi. Solomon in Israel khempeuh tungah ulian sawm le nih nei-in tuate in kumpipa le a innkuan a dingin annek tuidawn vaihawmsak uh hi. Mi khat in kum khatin kha khat sung annek tuidawn vaihawmsak ciat uh hi. Tua a vaihawm uliante: Benhur: Efraim mualtung gam sungah; Bendeker: Makaz khua, Shaalbim, Bethshemesh khua, le Elonbethhanan khua sungah; Benhesed: Arubboth khua sungah (Soko le Hefer gam khempeuh ama a’ hi); Benabinadab: Nafathdor gam sung khempeuhah (amah in Solomon’ tanu Tafath zi-in nei hi); Ahilud’ tapa Baana: Taanak khua, Megiddo khua, le Jezreel khua nuai Zarethan khua panga om Bethshean gam khempeuh, le Bethshean khua panin Jokmeam khua le Abelmeholah dongah; Bengeber: Ramothgilead gam sungah (amah in Gilead sunga om Manasseh’ tapa Jair’ khuaneute le Bashan sungah a om Argob gam sung, kulhpite le sumngo zawlte a nei khuapi lian sawmguk nei hi); Iddo’ tapa Ahinadab: Mahanaim khua sungah; Ahimaaz: Naftali gam sungah (amah in Solomon’ tanu Basemath zi-in la hi); Hushai’ tapa Baana: Asher gam le Bealoth khua sungah; Paruah’ tapa Jehoshafat: Issakhar gam sungah; Ela’ tapa Shimei: Benjamin gam sungah; Uri’ tapa Gebal: Amor mite’ kumpi Sihon le Bashan kumpi Og gam ahi Gilead gam sungah ahi hi. Tua ciangin hih sawm le nihte banah Judah gam sung khempeuh a uk ulian khat omlai hi. Judah mi le Israel mi tuipi gei-a sehnel bangin tam uh a, amaute in anne tuidawnin lungdam uh hi. Solomon in Eufratis panin Filistia gam le Egypt gamgi ciang dong kumpi gam khempeuh uk hi. Amaute in siah hong puak uh a, a nuntak sung tawntung uh Solomon’ na sem uh hi. Solomon a’ ding ni khatin annek tuidawn, annel lawh sawmthum, le an lawh sawmguk, bawngtal a thau sawm, le lonona a kivak bawng sawmnih; tuu zakhat; sakhitalte, le Syria sakhite, sanangte, le a thau vasate a kisim lo hi lai hi. Bang hang hiam cih leh amah in Eufratis nitumna lam gam sung khempeuh Tifsah panin Gaza ciang dong, Eufratis nitumna lampang kumpi khempeuh uk a, ama kiim mun khempeuhah galdaihna om hi. Solomon’ hun sung khempeuh Judah le Israel lungmuang takin omin, Dan panin Beersheba ciang dong nangawn mi khempeuh a leenggui le a theikung nuai uhah lungnuamin om uh hi. Solomon in a leengte a dingin buk a nei ciat sakol tul sawmli le sakol tung tuang mi tul sawm le tulnih zong nei hi. Tua uliante in Kumpi Solomon le Kumpi Solomon’ sabuai-ah a hong pai mite khempeuh a dingin amau ciat sik kha sunga dingin annek tuidawn vaihawm uh a, amaute in bangmah kisamsak lo uh hi. Amau’ nasep ciat tawh kizui-in a kisapna munah sakolte le sakol zaptelte a dingin mangbuhham le buhtu zong paipih uh hi. Pasian in Solomon’ tungah tehzawh lohin a thuk mahmah pilna le theihna, le genzawh loh lungsim zaina pia a, Solomon’ pilna in nisuahna lam mi khempeuh le Egypt pilna khempeuh khumlet hi. Bang hang hiam cih leh midang khempeuh sangin amah pilzaw a, Ezrah mi Ethan, le Mahol’ tapa Heman, Kalkol, le Darda sangin pilzaw lai a, a kiima minam khempeuh lakah ama minthanna kizel hi. Amah in paunak tulthum zong genkhia a, ama laphuah dawng tul le dawng nga ahi hi. Amah in Lebanon-a om taamtak a kipan phungmai a po puknahte dongin singkung thu a gen hi. Amah in khe li nei ganhingte, vasate, a bokvak ganhingte, le ngasate’ thu a gen hi. Mi khempeuh le leitung kumpi khempeuh sung panin Solomon’ pilna thu a ngai dingin ama pilna thu a zasate hong pai uh hi. Amaute in ama pa’ munah kumpi-in amah sathau a nilhna thu a zak ciangin Taia kumpi Hiram in a nasemte Solomon kiangah sawl hi; bang hang hiam cih leh Hiram in David it tawntung hi. Tua ciangin Solomon in Hiram kiangah kam khak a, “ Topa in ama khenuai-ah amaute a koihsak matengin amah a umcih a galte tawh kidona hangin ka pa David in Topa ama Pasian’ min dingin biakinn a lam theih lohna thu na thei hi. Ahih hangin tu-in Topa ka Pasian in na khempeuhah tawlngakna kei tungah hong pia hi. Hong langpang ahi a, thusia ahi zongin om lo hi. Tua ahih ciangin Topa in ka pa David kiangah, ‘Nangma tangin na kumpi tokhom tungah ka koih ding na tapa in ka min dingin biakinn lam ding hi,’ a cih mah bangin Topa ka Pasian’ min dingin biakinn khat lam ka sawm hi. Tua ahih ciangin Lebanon taamtak singte kei a dingin a kiphukna ding thu pia in; ka nasemte in nangma nasemte seppih ding uh a, nangma seh bangin na nasemte’ thaman ding nang tungah kong pia ding hi; bang hang hiam cih leh Sidon mite bangin sing suih a siam kote lakah khat zong a om lohna na thei hi,” a ci hi. Hiram in Solomon’ kam a zak ciangin nakpitakin lungdam a, “Hih a lian a tam mite a uk dingin David’ tungah a pil tapa a pia Topa in tuni-in thupha ngah ta hen,” a ci hi. Tua ciangin Hiram in Solomon kiangah mi sawlin, “Kei kiangah nong thu-khak ka za hi. Taamtak sing le taaksan sing tawh kisai na deih khempeuh a hih dingin ka kiging hi. Ka nasemte in Lebanon panin tuipi-ah tuate hong puaksuk ding uh hi. Nangma cihna munah a pai dingin tuipi a tawn dingin keimah in tuate phongin ka bawl ding a, tua lai munah keimah in a singte phelsakin nangmah in na ngah ding hi. Nangmah in ka mite a’ ding anpiakna tawh ka deihnate nong kicingsak ding hi,” cisak hi. Tua ahih ciangin Hiram in ama deih taamtak le taaksan singte Solomon pia a, Solomon in Hiram tungah a mite’ an dingin mangbuh beem tul sawmnih le oliv thau bungpi tul sawmnih dim a pia hi. Solomon in Hiram’ tungah a kum kumin hihte a pia hi. Ama tungah a ciam bangin Topa in Solomon tungah pilna pia hi. Solomon le Hiram kilem uh a, amau tegel in thuciamna khat a bawl uh hi. Kumpi Solomon in Israel sung panin aana tawh na a sem mite la hi. A lak mite mihing tul sawmthum pha hi. Amah in Lebanon-ah tua mite kha khatin tul sawm a kikhelin puak hi. Amaute Lebanon-ah kha khat omin inn-ah kha nih om ding uh hi. Adoniram in hih a kila mite uk hi. Solomon in vanpua mi tul sawmsagih le mualtung gamah suangseek mi tul sawmgiat zong nei a, na a sem mite a uk, Solomon’ nuai-ah ulian tulthum le zathum, nasep ukte a kihel lo ahi hi. Suangseeksa tawh biakinn bulpi a phuh theih nadingin kumpipa’ thupiakna tawh amaute in a lian, a manpha suangtumte tokhia uh hi. Tua ahih ciangin biakinn lam nadingin Solomon’ mi innlamte le Hiram’ mi innlamte le Gebal mite in sing phuk le singlesuang nasep a sem uh hi. Egypt gam panin Israel mite a paikhiat zawh kum zali le kum sawmgiatna, Israel-te tungah Solomon’ uk a kum lina, a kha nihna ahi Ziv kha-in amah in Topa’ biakinn lam ding kipan hi. Kumpi Solomon in Topa a dingin a lam biakinn, a sung pi sawmkua sau-in, pi sawmthum zai a, pi sawm le nga sang hi. Biakinn mai-ah a innliim pen biakinn zaina zahin pi sawmthum sau a, inn mai lamah pi sawm le nga sang hi. Tua ciangin amah in biakinn a dingin a pualam a kihui tawlette a bawl hi. Amah in biakinn pang tuak le a nunglam biakinn kawm kimkotin a kawm tungah zong inn lam a, a kimkot a pangah inndei bawl hi. A dawl nuainung pen pi sagih le alang zai-in, a laita pi kua zai a, a thumna pi sawm le alang zai hi. Kawm sungah innkam a lut loh nadingin amah in inn pualam pang kimkota dingin a nanna singbekte a bawl hi. Biakinn a kilam ciangin a kitawhna mun panin a kibawlsa suangte tawh kilam hi. Tua ahih manin a kilam laitakin hei ahi a, sek ahi a, sik nazat khat peuhpeuh ahi zongin a gingte biakinn huang sungah kiza lo hi. A dawl nuainung lut nading pen biakinn leitaw lampangah om hi. A dawl laita-ah kahlei zui-in kipai-in a dawl laita panin a thumna-ah kipai hi. Tua ahih ciangin amah in biakinn lamin a zo hi. Amah in innkamte khungin taamtak peekte tawh inndap a bawl hi. Amah in a inn buppi tungah a lambehte zomin, dawl khat ciangin pi sagih le alang sang ciat a, taamtak singte-in a biakinn tawh kizom hi. Tu-in Topa’ thu Solomon’ tungah hong tung a, “Nangmah in na lam hih biakinn tawh kisai-in, ka thukhamte zui-in ka ngeina kipte mang a, ka thupiaknate khempeuh kemin tuate na zuih leh, na pa David tungah ka gen thu nang’ tungah kong kipsak ding hi. Tua ciangin na lam biakinn sung Israel mite lakah ka teng ding a, keima mi Israel-te ka nusia kei ding hi,” a ci hi. Tua ahih ciangin Solomon in biakinn lamin a zo hi. Amah in taamtak peekte tawh biakinn sung kawm dap hi. Sual panin inndap innsunte dongin amah in sing tawh a sunglam tuam hi. Tua ciangin amah in taaksan peekte tawh a sual tuam hi. Amah in sual panin innsun dong inn nunglam pi sawmthum taamtak peekte tawh lam a, amah in siangtho pen mun, biakinn sungnung dingin a inn sungah a bawl hi. Biakinn sungnung mai-a innsung, pi sawmguk sau hi. Inn sunga om taamtak singte tungah umgah le pakpalh lim kigelh hi. A vekpi-in taamtak a kidap hi a, suang kimu lo hi. Amah in Topa’ Thuciamna Singkuang koih nadingin a sungtawng penah biakinn sungnung a bawl hi. Biakinn sungnung, pi sawmthum sau-in, pi sawmthum mah zai a, pi sawmthum mah sang a, amah in kham citak tawh a zut hi. Amah in taamtak sing biakna tau khat zong a bawl hi. Tua ciangin Solomon in kham citak tawh innsung zut a, biakinn sungnung mai kantanin kham khainiang khung a, kham tawh a zut hi. Amah in a inn buppi a zawh dongin kham tawh a zut hi. Biakinn sungnung a biakna tau buppi zong amah in kham tawh a zut hi. Amah in biakinn sungnungah oliv sing tawh kherub nih bawl a, pi sawm le nga tuak a sang hi. Kherub kha langkhat, pi sagih le alang sau-in, kherub kha lang dang khat, pi sagih le alang mah sau a, a kha langkhat mong panin a mong langkhat dong pi sawm le nga ahi hi. Kherub adang khat zong pi sawm le nga mah sau a, Kherub tegel a sauna le a pianlim kibang hi. Kherub khat a sauna pi sawm le nga hi a, a kherub dang khat zong tua zah mah ahi hi. Amah in biakinn sung tawngnung penah kherub-te a koih hi. Kherub-te’ khate kizal a, khat’ kha in kawm banin, adang kherub’ kha in a kawm langkhat ban hi. Amau’ kha langkhat tegel inn laizangah kituah hi. Amah in kham tawh tua kherub-te a zut hi. Amah in a sungnung le a puanung inndeite, a kimkotin inn kawm khempeuh tungah kherub-te le nisuh kungte le pakpalhte a bawl hi. A sungnung le a puanung inndei sung innsualte amah in kham tawh a zut hi. Biakinn sungnung lut nadingin amah in oliv sing kongkhak peekte a bawl hi; a bangtung zawl le kongkhak khuamte in kiu nga piangsak hi. Amah in kherub-te, nisuh kungte, le pakpalh lim kibawlte tawh oliv sing kongkhak peek nihte a tuam hi; amah in tuate kham tawh zut a, kherub-te le nisuh kungte tungah kham a theh hi. Tua bangmahin amah in kiu li nei-in biakinn sung lutna oliv sing kongkhak khuamte, le taaksan sing kongkhak peek nihte a bawl hi. Kongkhak a peek nihte kikhepin, adang kongkhak a peek nihte zong kikhep hi. Tuate tungah amah in kherub-te le nisuh kungte le pakpalhte bawl a, tua a bawlte tungah a tukimin kham tawh a zut hi. Amah in a kiseek suang gual thum le taamtak sing gual khat tawh a tual sungnung a bawl hi. A kum lina, Ziv kha-in Topa’ biakinn a bulpi kipan hi. A kum sawm le khatna, a kha giatna ahi Bul kha-in a na khempeuh le a kigen khempeuh bangin a kizo hi. Amah in tua a lamna-in kum sagih sung hun a bei hi. Solomon in ama inn ding zong kum sawm le thum sung lamin a inn buppi a zo hi. Amah in Lebanon Tulak Inn a kici khat a lam hi. A sauna pi zalesawmnga hi a, a zaina pi sawmsagih le nga hi-in, a sanna pi sawmli le nga hi a, taamtak khuampi gual thum tungah taamtak innkam kikhungin tua tungah a kilam ahi hi. Gual khatah sawm le nga a om khuampi sawmli le nga tunga kilam inndei tung san teng taamtak sing tawh kituam hi. A pang kawm tegel tungah tawlet gual thum tuak om a, a tawlet gual thumte khatlekhat kitang hi. A kongkhakte le a tawlet khempeuhte a pang kikim kiu li nei vive hi a, a gual thumin tawlet khatlekhat kitang dimdiam hi. Tua ciangin amah in Khuampi Innpi a kici khat lam hi. A sauna pi sawmsagih le nga hi a, a zaina pi sawmli le nga ahi hi. A mai lamah khuampite a nei innliim om a, tua khuampite tungah a tungkhuhna khat om hi. Tua ciangin amah in a thukhen nading mun Thukhenna Innpi ahi Kumpi Tokhom Innpi a kici khat lam a, a sual panin a innsun ciang dong taamtak sing kizang hi. Kumpi Tokhom Innpi nung lamah ama ten nading inn zong tua mah bangin a kilam ahi hi. Solomon in zi-a a lak Faro’ tanu a dingin hih innpi tawh a kibang inn dang khat zong a lam hi. Hihte khempeuh, a bulpi nangawn a kipan a khum dong, le Topa’ biakinn tual a kipan tual lianpi dongin, limtakin tehin, a kitan, a nung le a mai suangatna tawh a ki-at a manpha suangte tawh a kibawl ahi hi. A bulpi pen a manpha suang, suang lian, pawlkhat pi sawm le nih, pawlkhat pi sawm le nga a pha suangte ahi hi. Tuate’ tung ate pen limtakin tehin a kitan a manpha suang, le taamtak sing ahi hi. Tual lianpi in a kimkotah a kiseek suang gual thum simin taamtak sing gual khat nei hi. Tua mah bangin Topa’ biakinn tual sungnung le innliim in zong a nei hi. Tua ciangin Kumpi Solomon in mi sawlin Taia khua-a om Huram samsak hi. Amah pen Naftali minam meigongnu’ tapa hi a, ama pa pen Taia khuami sumngo seek na a sempa ahi hi. Amah in sumngo tawh na khat peuhpeuh hih nadingin pilna, theihna, siamna a nei ahi hi. Kumpi Solomon kiangah amah hong pai-in ama na khempeuh a sem hi. Amah in sumngo khuampi nih sung hi. Khuampi khat a sauna pi sawmnih le sagih hi a, a khuam pum kimkot pi sawm le giat pha hi. A sung hawm a, a sahna zung li ahi hi. A khuam nihna zong tua mah tawh kibang hi. Khuampite tungah a bulh dingin amah in a kisung sumngo khuamluzepna nih zong a bawl hi. Khuamluzepna khat a sauna pi sagih le alang hi a, adang khat khuamluzepna a sauna tua zah mah ahi hi. Tua ciangin amah in khuampite lu dawna khuamluzepna a dingin khainiang a kihuiheek tawh a kibawl ngen banga kikalh simsiam nih a bawl hi. Ngen khat pen khuamluzepna khat a’ ding hi a, a ngen dang khat pen khuamluzepna adang khat a’ ding ahi hi. Tua mah bangin amah in mang kawlsing gahte a bawl hi. Khuampi lu dawna om khuamluzepna tuam nadingin ngen tawh kibangin a bawl tung kimkotah gual nih bawl a, a khuamluzepna dang khat zong tua mah bangin a bawl hi. Tua ciangin innlim a om khuampi dawnah a om khuamluzepnate pi guk pha a, tuate tungah unok pak a kibawlte om hi. A khuamluzepnate pen a khuampi nihte tung le ngen tawh kibanga kibawl gei-a a om a bem a dawk tungah om hi. A kimkotah gual nihin mang kawlsing gah zanih om a, a khuamluzepna dang khatah zong tua bangmah ahi hi. Amah in biakinn innlimah khuampite a phut hi. Leitaw lamah a khuam khat phutin a min Jakhin phuak a, leilu lamah a khuam dang khat phutin a min Boaz a phuak hi. A khuampite dawnah unok pak a kibawl om hi. Tua bangin khuampite a bawl a man khin hi. Tua ciangin amah in a kisung tuikuangpi a bawl hi. Tua tuikuang a bem hi a, a gei khat pan a gei khat pi sawm le nga pha-in, pi sagih le alang thuk a, a kimkot pi sawmli le nga a pha hi. A geivial nuai pi sawmli le nga sung, tuikuangpi kimkotin um gahte kibawl hi. Tua um gahte gual nihin om a, a tuikuangpi a kisunin kisung khawm pah hi. Bawngtal sawm le nihte tungah tua tuikuangpi kinga a, thum leilu lam nga a, thum nitumna lam nga-in, thum leitaw lam nga a, thum nisuahna lam a nga hi. Tuate tungah a tuikuangpi kikoih a, a nunglam uh a sunglamah om hi. A tuikuang sahna khutpeekmai cia ahi hi. A geivial pen unok pak tawh a kibang hai geivial bangin kibawl hi. Tua sungah tui tambong tulli bang ta thei hi. Amah in sumngo kibawl tuikuang a kingakna sawm zong a bawl hi. Tua a bawlte pi guk sau, pi guk zai, pi li le alang sang hi. Tua a kingaknate hih bangin kibawl hi: Tuate in a khawkte nei-in, tua a khawkte a kungah kibulh a, tua ciangin a kungah a kibulh a khawkte tungah humpinelkaite, bawngtalte, le kherub-te om hi. Tua kungte tung, humpinelkaite le bawngtalte’ tung le nuai-ah a sawi-in a kikalh limliam om hi. Tua tham loin tua ngaknate in sumngo tawh a kibawl leengpeite le leengpei zawlte nei ciat a, a kiu lite-ah tuikuangpi nannate om hi. Tua nannate a kisung hi a, a pang ciatah pakkual om hi. A gong pen a kingakna pan pi khat le alang sangto hi. A gong pen kingakna a kibawl bangin bem a, pi nih le letmat thum thuk hi. A gongah lim kigelhte om hi. A khawkte in sikli nei a, bem lo hi. A leengpei lite pen a khawkte’ nuai-ah om hi. Leengpei zawlte a kingakna tawh sakhat mah hi a, leengpei a sanna pi nih le letmat thum ahi hi. A peite pen sakol leengpei bangin kibawl hi; a pei zawl, a peikual, a peikalhna, le a kalhna bulte khempeuh a kisung ahi hi. A kingaknate’ kiu ciatah a nanna li om ciat a, tua a nannate a ngakna tawh sakhat ahi hi. Tua ciangin a ngakna dawnah letmat kua a sang vial bem khat om hi. A ngakna dawnah a kipsaknate le a khawkte pen a ngakna tawh sakhat ahi hi. Tua ciangin a kipsaknate le a khawkte tungah a mun awng zah ciat tawh kizui-in amah in kherub-te, humpinelkaite, le nisuh kungte gelhin a kimkotah pakkual a bawl hi. Tu-a bangin amah in a kingakna sawm bawl hi. A vekpi-in a kibangin kisungin, a liatna le a pianlim a kibang ahi hi. Tua ciangin amah in sumngo tuikuang sawm bawl hi. Tuikuang khatah tui tambong sawmgiat bang ta-in, tuikuang vangsung pi guk ciat pha a, a kingakna sawmte a dingin tuikuang khat ciat om hi. Tua ciangin amah in tua a kingaknate, biakinn leitaw lamah nga, leilu lamah nga a koih hi. Tua ciangin biakinn khang nisuahna lam kiu-ah tuikuangpi a koih hi. Huram in beelte, kawbiate, le kuangte zong a bawl hi. Tua ahih ciangin Huram in Kumpi Solomon a dingin Topa’ biakinn a ding nasep khempeuh a zo hi. Khuampi nihte, khuampite dawnah a om khuamluzepna kuak nihte, le khuampite dawnah a om khuamluzepna kuak nihte tuam nading ngen tawh a kibanga kibawl nihte; khuampite tungah a om khuamluzepna nihte a tuam dingin ngen tawh a kibanga kibawl khat a dingin mang kawlsing gah gual nih ahi, ngen tawh a kibanga kibawl nih a dingin mang kawlsing gah za lite; a kingakna sawmte, le a kingaknate tungah a om tuikuang sawmte; tuikuangpi khat, le tuikuangpi nuai-ah a om bawngtal sawm le nihte ahi hi. Tu-in beelte, kawbiate, le kuangte, Huram in Kumpi Solomon a dingin a bawl, Topa’ biakinn sungah a om nazatte khempeuh a tee sumngo tawh a kibawl ahi hi. Jordan zanglei, Sukkoth le Zarethan kikal beel lei-ah kumpipa in tua nate sungsak hi. Tamlua ahih manin Solomon in hih nate khempeuh tawiteh zo lo hi; sumngo gik zah kithei lo hi. Tua ahih ciangin Topa’ biakinn sunga om nazat khempeuh Solomon in bawl hi. Kham biakna tau, Ompihna Anlum a dingin kham sabuai, biakinn sungnung mai, leitaw lampangah nga omin, leilu lampangah nga a om kham citak meivakkhuamte; kham tawh a kibawl paakte, meivakte, le taitehte; paknamtui a dingin haite, taitehte, kuangte, pakante, le kham citak vutluahna; le siangtho pen mun biakinn sung tawngnung kongkhakte le biakinn sung kongkhakte a dingin kham bilte ahi hi. Tua ahih ciangin Kumpi Solomon in Topa’ biakinn a hih nasep khempeuh kizo hi. Tua ciangin Solomon in a pa David’ apsa nate, ngun, kham, le nazatte paipihin Topa’ biakinn sung vankoihna-ah tuate a koih hi. Tua ciangin Solomon in Zion a kici David khuapi panin Topa’ Thuciamna Singkuang la-in Biakinn sungah a paipih dingin Jerusalem khuasung ama kiangah Israel upate le minam lutang, Israel beh makaite a khawm hi. Tua ciangin Israel mite khempeuh a kha sagihna Ethanim kha sunga pawi hunin Kumpi Solomon kiangah kikhawm uh hi. Israel upate khempeuh hong pai uh a, siampite in Thuciamna Singkuang la-in Biakinn-ah paipih uh hi. Tua ciangin amaute in kikhopna buk, le puanbuk sunga om a siangtho nazatte khempeuh a paipih uh hi. Siampite le Levi mite in tuate paipihto uh hi. Thuciamna Singkuang mai-ah a kikhawm Kumpi Solomon le Israel mihonte khempeuh in biakna-in tuu le bawngtalte tampi tak pia uh ahih manin tuate a phazah kisim zo lo hi. Tua ciangin siampite in a kherub-te’ kha nuai, siangthopen mun sung, biakinn sungnung lama ama munah Topa’ Thuciamna Singkuang paipih uh hi. Kherub-te in Thuciamna Singkuang omna mun tungah a kha uh zak ahih manin Thuciamna Singkuang le a zawlte tungah kherub-te in khuhna piangsak uh hi. A zawlte sau mahmah ahih manin biakinn sungnung mai siangtho mun panin a zawl mongte kimu a, ahih hangin a pualam panin kimu thei lo hi. Tuni dongin tua san takah tuate om hi. Tua Thuciamna Singkuang sungah, Egypt gam panin a paikhiat lai-un Topa in Israel mite tawh thuciamna a bawlna Horeb-ah Moses in suangpek nih a koih simloh bangmah dang om lo hi. Siangtho mun panin siampite a paikhiat ciangin meii in Topa’ biakinn tuam a, meii hangin siampite nasem dingin om thei lo uh hi; bang hang hiam cih leh Topa’ minthanna vang in Topa’ biakinn a tuam hi. Tua ciangin Solomon in, “ Topa in vantungah ni koih khin a, ahih hangin khuamial sahpi sungah amah a ten ding gen khin hi. Keimah in nangma a dingin a kipahtawi mun khat, na ten tawntung nading biakinn khat ka lam khin hi,” a ci hi. Tua ciangin Israel a kikhawmte a din laitakin kumpipa in en kawikawi-in Israel a kikhawmte khempeuh thupha a pia hi. Israel Pasian, Topa’ min dingin biakinn khat lam ding ka pa David’ lungsim sungah om ngei hi. Ahih hangin Topa in ka pa David kiangah, ‘Keima min dingin biakinn khat lam ding na lungsim sungah a omna thu a hoih mahmah ahi hi. Ahi zongin nangmah in a biakinn na lam kei ding a, nangma sung pan hong suak ding na tapa in ka min dingin biakinn a lam ding hi,’ a ci hi. Tu-in ama bawlsa thuciamna Topa in tungsak khin hi. Bang hang hiam cih leh ka pa David’ munah keimah khangin, Topa’ ciamsa bangin Israel kumpi tokhom tungah ka tu a, Israel Pasian, Topa’ min dingin a biakinn ka lam khin hi. Amah in Egypt leitang panin amaute a paikhiatpih lai-in amah in i pu i pate tawh a bawl Topa’ thuciamna a omna Thuciamna Singkuang a dingin tua lai-ah mun khat ka bawlsak hi,” a ci hi. Tua ciangin Israel a kikhawmte khempeuh a omna Topa’ mai-ah Solomon ding a, vantung lamah a khutte zak hi. Amah in, “Israel Pasian, Topa aw, tunga om vantung ahi a, nuai-a om leitungah ahi zongin, nangma mai-ah a lungsim khempeuh uh tawh a gamta na nasemte tungah thuciamna lenin itna kip a lak, nang tawh a kibang pasian om lo hi. Na nasem ka pa David tungah na gensa thu na kipsak hi. Nangmah in na kam tawh na gen a, tuni-in na tungsak hi. Tua ahih ciangin tu-in Israel Pasian, Topa aw, ama tungah, ‘Keima mai-ah nang na gamtat mah bangin na tapate in keima mai-ah gamtat ding a kidop nak-uhleh, Israel kumpi tokhom tungah a tu dingin keima mai-ah mi khat zong na tasam kei ding hi,’ ci-in na nasem ka pa David tungah na ciamsa thu lenkip in. Tua ahih ciangin tu-in Israel Pasian aw, na nasem ka pa David tungah na gensa thu kipsak in. “Ahih hangin leitungah Pasian teng taktak ding ahi hiam? Vantung le vantung a sangpen in nang hong huam zo lo hi. Tua ahih manin keima lamsa hih biakinn in bangzahin nang hong huam zo lo zaw kan ding ahi hiam? Ahi zongin na nasempa’ thungetna le a hong thumna hong don in la, Topa ka Pasian aw, tuni-in nangma mai-ah na nasempa in a hong ngetna, a kikona le a thungetna hong ngai in. ‘Tua lai-ah ka min om ding hi,’ na cihna mun hih biakinn lamah sun le zanin na mit hak inla, na nasempa in hih mun lamah a thungetna hong za in. Amaute in hih mun lamah hong nget uh ciangin na mi Israel-te’ hong thumna zong ngai in. Na tenna mun vantung panin hong za inla, ka mawhna uh hong maisak in. “Mi khat a vengpa tungah khialin, amah a kiciamsak a, amah hong pai-in hih biakinn sung nangma biakna tau mai-ah a kiciam leh, nangmah in vantung panin za-in gamta inla, na nasemte thu khen inla, a mawh pa thuak sakin ama lu tung mahah ama gamtatna tungsak in la, a dikpa a dikna langsakin ama dikna tawh kizui-in thaman pia in. “Nangma tungah hong khialhna hangin galte mai-ah na mi Israel-te a guallelh ciangin, amaute nang lamah hong kihei kikin nangma min hong phawk a, hih biakinn sungah thu ngenin nang tungah hong thum uhleh, vantung panin za-in na mi Israel-te’ khialhna maisak inla, a pu a pate uh tungah na piak leitangah amaute paipih kik in. “Nangma tungah hong khialhna hangin vantung kikhakcipin guah a zuk loh ciangin, amaute in hih mun lamah thu ngenin na min hong phawk a, amaute na gimsak ciangin amau’ khialhna panin a kihei uhleh, vantung panin za-in na mi Israel, na nasemte’ khialhna maisak in la, amaute’ zuih ding lampi hoih hilh inla, na mite tungah gamh-in na piaksa leitang tungah guah zusak in. “Gam sungah kialpi tungin, pulnatna ahi a, ankung natna ahi a, ankung zawngkhalna ahi a, kauphe ahi a, lung ahi zongin a om a, amau’ khuapi khat peuhpeuh a galte un umcihin, bangbang gimna, bangbang natna hitaleh, mi khatpeuh ahi a, na mi Israel-te khempeuh in ahi zongin amau’ lungsim natna thei-in hih biakinn lamah a khutte hong zanin bangbang thungetna hitaleh bangbang thumna hitaleh hong bawl uhleh, na tenna vantung panin za-in maisak in. Tua ciangin amau’ gamtatna khempeuh tawh kizui-in a lungsim uh na theih bangin amaute tungah pia ciat in (bang hang hiam cih leh nang, nang bek in mihing khempeuh lungsim na thei hi). Tua hileh ka pu ka pate uh tungah na piak leitang tungah a nuntak hun sung khempeuh uh amaute in nang hong zahtak ding uh hi. “Tua mah bangin na mi Israel a hi lo gamdang mi khat nangma min hangin a gamlapi panin hong pai-in (bang hang hiam cih leh amaute in a lian nangma minthanna le nangma mite a dingin na sepsak na liante’ thu za ding uh hi), hih biakinn lamah thu hong nget ciangin, na tenna vantung panin za inla, tua gamdang mipa in nang tungah hong ngetna khempeuh tawh kizui-in hih in. Nangma mi Israel-te mah bangin leitung mi khempeuh in na min thei-in nang hong zahtak nading, le hih ka lamsa biakinn pen nangma min tawh a kilo ahihna a theihna ding uh ahi hi. “A galte uh a do dingin na mite kuankhia-in, bangbang lamah amaute sawl hita lecin, nangmah in na teelsa khuapi lam, Topa’ tung le nangma min dingin ka lamsa biakinn lamah thu hong nget uh ciangin, amau’ hong thungetna le hong thumna vantung panin za-in amau’ vai huh in. “Amaute nang tungah hong khialin - bang hang hiam cih leh mi a khial lo kuamah om lo hi - amaute tungah nang heh a, galte tungah amaute pia-in, amaute kimanin a galte’ gam a gamla ahi a, a nai-ah ahi zongin kipuakhia a, ahi zongin amaute a kipuak khiatna leitangah amaute in a lungsim uhah thu ngaihsunin kisik kik a, ‘Kote khialin lampialin ka gitloh tat uh hi,’ ci-in amaute a mante’ leitang panin nang tungah hong thum uh a, amaute manin a puakhia a galte uh leitangah a ngaihsutna khempeuh uh le a lungsim khempeuh uh tawh amaute kisik kikin, nangmah in na teelsa khuapi, amau’ pute pate’ tungah na piaksa amau’ leitang, le nangma min dingin ka lam biakinn lam nga-in nangma tungah thu hong nget uhleh vantung na tenna mun panin amau’ hong thungetna le hong thumna za-in, amau’ vai huh in. Nang tungah hong khial na mite le nang tunga hong gamtatna uh amau’ thupalsatnate khempeuh maisakin, a galte un amaute tungah hehpihna a neih theih nadingun amaute manin a puakhia mite’ muhna-ah amaute hehpih in. (Bang hang hiam cih leh amaute pen Egypt panin na paikhiatpih, sik meiphual sung panin na paikhiatpih nangma mi le nangma luah ahi uh hi.) Na nasempa’ hong thumna le na mi Israel-te’ hong thumna-ah maipha tawh hong en tawntung inla, nang hong sap peuhmah uh ciangin amaute na bil na ngat in. Egypt panin ka pate uh na paikhiatpih lai-in na nasempa Moses tungtawnin na gen bangin nangma luah ahi dingin leitung mi khempeuh lak panin amaute na tengkhia hi, Topa Pasian aw,” a ci hi. Tu-in Solomon in hih thungetna le thumnate khempeuh Topa’ tungah a bawl khit ciangin, vantung lamah a khutte a zan sa-in a khukdinna mun Topa’ biakna tau mai panin amah dingto hi. Tua ciangin amah dingin awging pha tawh Israel a kikhawmte khempeuh thupha pia-in, “Ama hong ciamsa khempeuh tawh kizui-in ama mi Israel-te tungah tawlngakna a pia Topa in thupha ngah ta hen! A nasempa Moses tungtawnin a gensa ama thuciam hoihte khempeuh kam khat zong maimawk lo hi. I pu i pate a ompih mah bangin Topa i Pasian in eite hong ompih hen la, eite hong nusia kei hen la, hong taisan kei hen. Amah in i pu i pate a thupiaksa ahi ama lampi khempeuh a zui ding, le ama thupiaknate, a thukhamte, le a ngeina kipte a zui dingin ama lamah i lungsim hong awnsak hen. Topa’ mai-ah ka thumna kammalte sun le zanin Topa i Pasian in hong za hen la, nisimin a kisam bangin a nasempa’ vai le ama mi Israel-te’ vai hong huh tahen. Tua hileh mi khempeuh in Topa pen Pasian hi, ci-in thei ding uh a, kuamah dang a om lohna phawk ding uh hi. Tua ahih ciangin Topa i Pasian’ tungah na lungsim khempeuh uh tawh thuman unla, tuni-a bangin ama thukhamte zui-in a thupiaknate mang un,” a ci hi. Tua ciangin kumpipa le amah tawh a om Israel mi khempeuh in Topa’ mai-ah biakna a pia uh hi. Solomon in thunuama biakna-in Topa’ tungah bawngtal tul sawmnih le tulnih le tuu tul zakhat le tul sawmnih a pia hi. Tua bangin kumpipa le Israel mi khempeuh in Topa’ biakinn a ap uh hi. Tua ni mahin kumpipa in Topa’ biakinn mai-a om inntual laizang ap hi; bang hang hiam cih leh meihal biakna le an tawh biakna le thunuama biakna a thaute a tazo dingin Topa’ mai-a sumngo biakna tau neulua ahih manin tua lai-ah meihal biakna le an tawh biakna le thunuama biakna thaute a pia hi. Tua hi a, tua hun lai-in Solomon le amah tawh a om Israel mi khempeuh in Topa i Pasian’ mai-ah ni sagih sung, Hamath khua lutna panin Egypt lui dong kikhopna lianpi khat bawlin pawi khat kham uh hi. A ni giat ni-in amah in mite ciahsak hi. Amaute in kumpipa thupha pia uh a, Topa in a nasempa David le ama mi Israel-te tungah hoihna a lahnate khempeuh hangin lungdamna le lungsim kipahna tawh a inn ciat uhah a ciah uh hi. Solomon in Topa’ biakinn le kumpi inn le a lamnop khempeuh a lam a man khit ciangin, Gibeon-a ama tungah a kilahsa bangin Solomon tungah Topa a nihveina kilang hi. Topa in ama kiangah, “Keima mai-ah na hihsa na thungetna le na thumnate ka za khin hi. Na lamsa hih biakinn ka ap khin hi. A tawntungin tua biakinn sungah kei hong kibia ding a, a tawntungin tua biakinn ka hu ding hi. Nang ahihleh, na pa David a gamtat bangin lungsim thupina le thumanna tawh ka mai-ah gamta-in, nang kong thupiak khempeuh bangin sem a, ka thukhamte le ka ngeina kipte na zuih leh, na pa David tungah, ‘Israel kumpi tokhom tungah mi khat zong na tasam kei ding hi,’ ci-in ka ciamsa bangin Israel-te tungah na kumpi tokhom ka kipsak paisuak ding hi. Ahih hangin nang na hi a, na tate ahi zongin, keimah zuihna panin pialin, note mai-ah ka koih ka thupiaknate le ka thukhamte na zuih kei uh a, pasian dangte’ na a sem ding le a bia dingin na pai uhleh, amaute ka piaksa leitang panin Israel mite ka lakhia ding hi. Tua ciangin ka min dingin ka apsa biakinn pen ka muhna panin ka lawnkhia ding a, Israel-te pen mi khempeuh lakah paunak le thugentehna suak ding hi. Tua ciangin hih biakinn pen ninbulomtang suak ding a, a nawkkha mi khempeuh in lamdangsa-in, eh! ci ding uh hi. Amaute in, ‘Bang hangin Topa in hih leitang le hih biakinn hih bangin hih ahi hiam?’ ci ding uh hi. Tua ciangin amaute in, ‘Egypt panin a pu a pate uh a paikhiatpih Topa a Pasian uh amaute in nusia-in pasian dangte len uh a, tuate bia-in a na a sepna hang uh ahi hi. Tua ahih ciangin Topa in hih siatna khempeuh amaute tungah tungsak hi,’ ci ding uh hi,” a ci hi. Solomon in inn nihte, Topa’ biakinn le kumpi inn a lam kum sawmnih a beina, Taia kumpi Hiram in Solomon’ deih zahzah taamtak sing le taaksan sing le kham a piak khit ciangin, Kumpi Solomon in Galilee gam sunga om khuapi sawmnih, Hiram tungah a pia hi. Ahih hangin Solomon in amah a piaksa khuapite a en dingin Taia panin Hiram hong pai ciangin, tua khuapite tawh amah lungkim zo lo hi. Tua ahih ciangin amah in, “Ka sanggam aw, kei nong piak hih khuapite a bangci khuapi ahi hiam?” a ci hi. Tua ahih ciangin tuni dongin tuate Kabul gam kici hi. Hiram in kumpipa kiangah a piak kham talen zakhat le talen sawmnih a pha hi. Topa’ biakinn, ama inn, Jerusalem kulh, le Hazor, Megiddo, le Gezer khuate a lam dingin Kumpi Solomon in aana tawh na a semte a la hi. (Egypt kumpi Faro paito a, Gezer la-in mei tawh hal a, a khuapi sunga teng Kanaan mite thatin Solomon’ zi, a tanu’ tungah mokenin a khuapi a piak ahi hi. Tua ahih manin Solomon in Gezer khua lamkik hi). Tua banah Bethhoron nuainung le Baalath le Judah gam sung gamlakah Tamar, le Solomon in a neih vankoihna khuapi khempeuh, le a leengte-a’ ding khuapite, le a sakol tung tuangte a’ ding khuapite, le Jerusalem sung, Lebanon sung, le ama ukna gam sung khempeuhah zong Solomon in a lamnop khempeuh a lamkik hi. Israel mi a hi lo Amor mite, Hit mite, Perez mite, Hiv mite, le Jebus mite sung panin a omlai mi khempeuh, Israel mite in a suksiat khit siang zawh loh, tua gamah amau’ nunga a omlai a suanlekhakte uh, Solomon in aana tawh na a sem salin bawl ahih ciangin tuni dongin tua bangmahin amaute om uh hi. Ahih hangin Solomon in Israel mite salin bawl lo hi. Amaute pen galkapte, ama nuai-ah a uliante, a galkapmangte, a leeng ukte, le a sakol tung tuangte ahi uh hi. Solomon’ innlam nasep a uk ulianpite mi zanga le sawmnga ahi hi. Faro tanu a dingin Solomon in a lamsak ama inn-ah a om dingin David khuapi panin amah a paikhiat khit ciangin Solomon in Millo a lam hi. Solomon in Topa a dingin a lam biakna tau tungah meihal biakna le thunuama biakna kum khatin thumvei pia-in Topa’ mai-ah paknamtui a hal hi. Tua ahih ciangin amah in a biakinn a zo hi. Kumpi Solomon in Edom gam sung San Tuipi gei dunga om Eloth nai-a Eziongeber-ah teembaw honkhat a bawl hi. Tua ciangin Hiram in tua teembaw honte tawh tuipi tung nasep a thei tuipi mi a nasemte, Solomon’ nasemte tawh sawlkhia hi. Tua ciangin amaute Ofir-ah pai-in tua lai panin kham talen zali le sawmnih hong pua uh a, amaute in Kumpi Solomon kiangah tuate tunpih uh hi. Tu-in Sheba kumpinu in Topa’ min tawh kisai-in Solomon’ minthanna a zak ciangin thudotna haksate tawh amah a ze-et dingin hong pai hi. Amah nungzui honpi, a namtui nate a pua kalaohte, kham tampi, le suangmanpha tampi tawh Jerusalem-ah hong pai a, Solomon’ kiangah a tun ciangin amah in a lungsim a om khempeuh Solomon tungah a gen hi. Tua ciangin Solomon in ama dotna khempeuh dawng hi. Kumpipa in ama tungah a gentel theih loh, haksa lua a sak bangmah om lo hi. Sheba kumpinu in Solomon’ pilna, ama lamsa a inn, a sabuai-ah a an, a uliante’ omzia, le a nasemte’ etna, a puante uh, a an piate, le Topa’ biakinn-ah a piak meihal biaknate khempeuh a muh khit ciangin lamdang a sa mahmah hi. Tua ciangin amah in kumpipa kiangah, “Ka gam sung panin nangma thu le na pilna ka zak a kigen thute man mahmah hi. Kei hong pai-in keima mit in a muh mateng a kigente ka um kei hi. Ahi zongin alang zong kei tungah hong kigen lo na hi a, na pilna le na daupaina in ka zak thute vuknelh hi. Na zite a hampha mahmah hi a, na mai-ah ding tawntungin na pilna a za hih na nasemte zong hampha mahmah uh hi. Nang tungah lungdamin Israel kumpi tokhom tungah nang a hong koih Topa na Pasian in thupha ngah ta hen! Topa in Israel it tawntung ahih manin nangmah in thutang le thuman na sepkhiat theih nadingin amah in kumpi-in nang hong bawl hi,” a ci hi. Tua ciangin amah in kumpipa tungah kham talen za le sawmnih, le a namtui nate tampi tak, le suangmanphate a pia hi. Sheba kumpinu in Kumpi Solomon tungah a piak hih banga a tam a namtui nate hong pai ngei nawn lo hi. Tua tham loin Ofir panin kham hong pua Hiram’ teembaw honte in Ofir panin cingsing le suangmanpha tampi tak hong pua uh hi. Tua ciangin kumpipa in cingsingte Topa’ biakinn le kumpipa’ innkhuamte, lasate a dingin laiza lasakna le harp lasakna-in bawl hi. Tuni dongin tua bang cingsing hoihte hong tungkik ngei lo, kimu ngei nawn lo hi. Tua ciangin Kumpi Solomon in citna tawh ama tungah a piak banah ama deih a nget khempeuh zong Sheba kumpinu tungah a pia hi. Tua ahih ciangin amah le a nasemte a gam uhah a ciahkik uh hi. Kumpi Solomon in a kiseek kham tawh kibawl lum lianpi zanih bawl a, lum khatah kham shekel zaguk bei hi. Tua ciangin amah in a kiseek kham tawh kibawl lum zathum bawl a, lum khat ciangin kham mina thum bei hi. Tua ciangin kumpipa in Lebanon Tulak Inn a kici sungah tuate koih hi. Kumpipa in saiha kumpi tokhom a lian khat zong bawl a, kham hoihpente tawh tua tokhom zut hi. Kumpi tokhom in kahlei cial guk nei-in, kumpi tokhom nungah bawngno lutang khat om a, a tutna pang tuakah ban ngakna omin ban ngaknate pangah humpinelkai nih ding a, kahlei cial gukte’ mong ciatah khat ciat a om humpinelkai sawm le nih ding hi. Kumpi gam sung khat peuhpeuhah tua tawh a kibang kibawl ngei lo hi. Kumpi Solomon’ tuidawnna haite khempeuh kham hi a, Lebanon Tulak Inn sunga om haite khempeuh kham citak hi a, khat zong ngun hi lo hi. Solomon’ hun lai-in ngun bangmahin kingaihsun lo hi. Bang hang hiam cih leh kumpipa in Hiram’ teembaw honte tawh Tarshish teembaw honkhat tuipi-ah a pai nei hi. Tarshish teembaw honte kum thumin khatvei hong pai-in kham, ngun, saiha, zawngmaw, le utongte hong puak zel hi. Tua bangin Kumpi Solomon in hauhna le pilna tawh leitung kumpi khempeuh khumkhelh hi. Tua ciangin Pasian in ama lungsim sunga a koih ama pilna a ngai dingin leitung mi buppi in Solomon’ omna zong uh hi. Amaute khempeuh in letsong, ngun le kham tawh kibawl nate, puante, myrrh paknamtui, a namtui nate, sakolte, le la-sakolte, a kumkumin tampi tak hong puak uh hi. Tua ciangin Solomon in leengte le sakol tung tuangte khawm hi. Amah in leeng tul le zali le tuanna sakol tul sawm le tulnih nei a, amah in tuate, leeng khuapite le Jerusalem-ah zattawm dingin a koih hi. Kumpipa in Jerusalem-ah suang bangin ngun olsak a, amah in Shefelah theithek sing bangin taamtak sing tamsak hi. Solomon’ sakol lakte Egypt le Kue pan hi a, kumpipa’ sumbawlte in Kue-ah a man pia-in tuate ngah uh hi. Egypt panin leeng khat ciangin ngun shekel zaguk, sakol khat ciangin za le sawmnga-in kingah hi. Tua ahih ciangin kumpipa’ sumbawlte in Hit kumpite le Syria kumpite khempeuh tungah zuakkhia uh hi. Tu-in Kumpi Solomon in gamdang numei tampi ngai hi. Faro’ tanu, le Moab mi, Ammon mi, Edom mi, Sidon mi, le Hit numeite, Topa in Israel mite tungah, “Amaute tawh na kiteng kei ding uh hi. Bang hang hiam cih leh amaute in amau’ pasian’ lamah na lungsim uh hong heikhia taktak ding uh hi,” a cih minamte’ lak pan lawm ngai a, Solomon in hih mite ngai-in pom hi. Amah in kumpite’ tanu vive zi zasagih, le zineu zathum nei hi. A zite in ama lungsim heikhia uh hi. Bang hang hiam cih leh Solomon a teek ciangin a zite in pasian dangte’ lamah ama lungsim heikhia uh a, ama pa David’ lungsim bangin ama lungsim Topa’ tungah thuman bup taktak zo lo hi. Bang hang hiam cih leh Sidon mite’ nusian Ashtoreth, le Ammon mite a’ ahi a kihhuai Milkom, Solomon in bia hi. Tua ahih ciangin Topa’ muhna-ah Solomon a sia gamta a, a pa David bangin Topa zuibup lo hi. Tua ciangin Solomon in Jerusalem nisuahna lam mualtungah Moab mite a’ ahi a kihhuai Khemosh le Ammon mite a’ ahi a kihhuai Molek a dingin mualtung a biakna khat a lam hi. Tua mah bangin amah in paknamtui halin a pasian-te uh tungah biakna a pia a gamdang zite khempeuh a dingin hihsak hi. Tua ahih ciangin Topa in Solomon kiangah, “Hih pen nangma ngaihsutna hi-in, nang kong piaksa ka thuciamna le ka thukhamte zui lo na hih ciangin, keimah in nangma tung panin na kumpi gam balkekin na nasempa tungah ka pia taktak ding hi. Ahi zongin na pa David’ hangin nangma hun sungin ka hih kei ding a, na tapa’ khutsung panin ka balkhia ding hi. Ahi zongin kumpi gam khempeuh ka balkhia kei ding hi. Ka nasempa David hang le ka teelsa Jerusalem hangin na tapa’ tungah minam khat ka pia lai ding hi,” a ci hi. Tua ciangin Topa in Solomon a langpang ding Edom mi Hadad khangsak hi. Amah pen Edom kumpi innkuansung mi khat ahi hi. Bang hang hiam cih leh Edom-ah David a omlai, a site a vui dingin galkap a ukpa Joab a paitoh lai-in Edom sunga pasal khempeuh amah in that hi. (Bang hang hiam cih leh Joab in Edom sunga pasal khempeuh a suksiat khit matengin amah le Israel-te khempeuh tua lai-ah kha guk sung om uh hi). Ahih hangin Hadad naupangno ahih lai-in, a pa’ nasem Edom mite pawlkhat tawh Egypt-ah a tai hi. Amaute Midian panin dingkhia-in Paran tung uh a, Paran panin mi zawnin tonpih a, ama tungah inn khat pia-in, annek ding pia-in, leitang a pia Egypt kumpipa Faro kiang Egypt gam tung uh hi. Hadad in Faro’ mai-ah maipha lianpi mu a, amah in ama zi Tahpenes’ sanggamnu tawh kitengsak hi. Tua ciangin Tahpenes sanggamnu in amah tawh tapa Genubath nei a, Tahpenes in Faro’ inn-ah a naupang khoi hi. Faro’ inn sungah Faro’ tapate tawh Genubath om hi. Ahih hangin Hadad in David le galkap a ukpa Joab a sihna thu Egypt panin a zak ciangin Faro’ kiangah, “Keima gamah ka ciah theih nadingin hong paikhiasak in,” a ci hi. Ahih hangin Faro in ama kiangah, “Nangma gamah ciah ding na hanciam nadingin kei tawh na omna-ah bang kitangsapna nei na hi hiam?” a ci hi. Ahi zongin amah in Faro’ kiangah, “Hong paisak hoh in,” a ci hi. Tua ciangin Pasian in ama topa ahi Zobah kumpi Hadadezer kiang panin a tai Eliada tapa Rezon zong Solomon a langpang dingin a khangsak hi. Amah in ama kiimah mi khawmin mite’ na a sut pawl a makai a suak hi. Amaute Damaskas-ah pai-in tua lai munah teng uh a, Damaskas-ah amah kumpi-in bawl uh hi. Hadad mah bangin Solomon’ hun sung khempeuh Israel-te a langpangin amah omin siatna a bawl hi. Amah in Israel mite mudah a, Syria gamah a uk hi. Solomon’ nasem, Zeredah khuasunga om Efraim mi, Nebat’ tapa, a nu’ min Zeruah hi-in meigong ahi, Jeroboam in zong kumpipa lehdo hi. Amah in kumpipa a lehdona thu hih bang ahi hi: Solomon in Millo lamin a pa David’ khuapi a vangte a hu hi. Jeroboam pen nasep siam mahmah khat hi a, Solomon in hih a khangno mipa a kizen mi hi, ci-in a theih ciangin Josef minam aana tawh na a semte tungah a ukin a bawl hi. Tua hun sungin Jerusalem panin Jeroboam a paikhiat ciangin Shiloh khuami kamsang Ahijah in lampi-ah amah na dawn hi. Ahijah in puan thak khat na silhtawm a, amau nih tegel bek gamlakah om uh hi. Tua ciangin Ahijah in ama tungah a silh a puan thak lenin seh sawm le nih suahin a balkek hi. Tua ciangin amah in Jeroboam kiangah, “Nang a dingin bek sawm la in; bang hang hiam cih leh Israel Pasian, Topa in hih bangin ci hi, ‘En in, Solomon’ khut panin kumpi gam a balkhia ding ka hi a, nangma tungah minam sawm kong pia ding hi. (Ahih hangin ka nasem David le Israel minam khempeuh sung panin ka teelsa khuapi Jerusalem hangin amah in minam khat nei ding hi). Bang hang hiam cih leh amah in kei hong nusia a, Sidon mite’ nusian Ashtoreth, Moab pasian Khemosh, le Ammon mite’ pasian Milkom bia-in, a pa David bangin keima muhna-ah a manin gamtatna le ka thukhamte le ka ngeina kipte zui loin ka thu hong nial hi. Ahi zongin ama khutsung panin kumpi gambup ka lakhia kei ding hi. Ka thupiaknate le ka thukhamte a zui, ka teel ka nasem David’ hangin a nuntak sung tawntung ukpa-in amah ka bawl ding hi. Ahih hangin ama tapa’ khutsung panin kumpi gam la-in nangma tungah minam sawm kong pia ding hi. Ahi zongin ka min koih nadingin ka teelsa khuapi Jerusalem-ah ka nasempa David in keima mai-ah suanlekhak a neih tawntung theih nadingin a tapa tungah minam khat ka pia ding hi. Tua ciangin keimah in nang hong la-in na deih khempeuh tungah na uk ding a, nang pen Israel tungah kumpi na hi ding hi. Ka nasempa David bangin ka thukhamte zuihna tawh nang kong thupiak khempeuh ngai-in, ka thu hong zui-in, ka muhna-ah a manin na gamtat leh, nang tawh hong omkhawmin, David a dingin ka hih bangin nangma tungah Israel mite ka hong pia ding a, na suanlekhakte in zong uk paisuak ding hi. Hih thu hangin David’ suanlekhakte ka gimsak ding a, ahih hangin a tawntung ding hi lo hi,’ ci hi,” a ci hi. Tua ahih ciangin Solomon in Jeroboam thah dingin zong hi. Ahih hangin Jeroboam dingin Egypt kumpipa Shishak kiangah tai a, Solomon’ sih mateng Egypt-ah a om hi. Tu-in Solomon’ sep a omlaite, le a hih khempeuh, le a pilna, Solomon’ Nasepna Laibu sungah kigelh hi. Jerusalem panin Israel-te khempeuh tungah Solomon in a uk hun kum sawmli sung ahi hi. Tua ciangin Solomon si a, a pa David khuapi sungah kivui hi. Tua ciangin ama tangin a tapa Rehoboam in uk hi. Shekhem-ah Rehoboam pai hi. Bang hang hiam cih leh amah kumpi a suaksak Israel mi khempeuh Shekhem-ah hong pai uh hi. Nebat’ tapa Jeroboam in tua thu a zak ciangin (bang hang hiam cih leh kumpi Solomon kiang panin a taina Egypt-ah amah omlai hi), Egypt panin hong ciahkik hi. Tua ciangin amaute in mi sawlin amah sam uh hi. Tua ciangin Jeroboam le a kikhawm khempeuhte hong pai-in Rehoboam kiangah, “Na pa in kote hong gimbawlin vangikpi hong suan hi. Tua ahih ciangin tu-in na pa’ nasep haksate le kote tungah a giklua thuhaksate zangsak in. Tua hileh kote in nangma na kong sem ding uh hi,” a ci uh hi. Amah in amaute kiangah, “Ni thum sung va kihem unla, tua ciangin kei kiangah hong paikik un,” a ci hi. Tua ahih ciangin mite paikhia uh hi. Tua ciangin Kumpi Rehoboam in a pa Solomon a nuntak lai-in ama mai-ah a ding ngei khangham mite thu dongin, “Hih mite ka dawn nading ngaihsutna hong bangci piak ding na hi uh hiam?” a ci hi. Tua ciangin amaute in ama kiangah, “Nangmah in tuni-in hih mite’ deihna bang zui inla, amaute na dawn ciangin kamhoih pau lecin, amaute pen a tawntungin nangma nasemte hi ding uh hi,” a ci uh hi. Ahih hangin khanghamte in ama tungah ngaihsutna a piakte nusia-in, amah tawh a khangkhawm ama mai-ah a ding khangnote thu dong hi. Amah in amaute kiangah, “‘Na pa in kote tungah hong suat vangik zangsak in,’ kei tungah hong ci hih mite i dawn nading ngaihsutna hong bangci piak ding na hi uh hiam?” a ci hi. Tua ciangin amah tawh a khangkhawm khangnote in ama kiangah, “Nang kiangah, ‘Na pa in vangikpi hong puasak ahih manin kote a dingin hong zangsak in,’ hong ci hih mite kiangah hih bangin na gen ding hi. Amaute kiangah, ‘Ka khutmeno pen ka pa’ kawng sangin golzaw hi. Tu-in ka pa in note tungah vangik hong suat banah kong behlap lai ding hi. Ka pa in ciang tawh note hong thuhilh hi. Ahih hangin keimah in ciang lingnei tawh note kong thuhilh ding hi,’ na ci ding hi,” a ci uh hi. Tua ahih ciangin kumpipa in, “Ni thum ni-in ka kiangah hong paikik un,” a cih mah bangin Jeroboam le mi khempeuh a ni thum ni-in Rehoboam kiangah hong pai uh hi. Tua ciangin kumpipa in mite ngawhdawn a, khangham mite in ama tungah ngaihsutna a piakte nusia-in, khangnote’ ngaihsut piakna tawh kizui-in amaute kiangah thu gen a, “Ka pa in note’ tungah vangik hong suat banah keimah in ka hong behlap lai ding hi. Ka pa in ciang bek tawh note hong thuhilh hi. Ahih hangin keimah in ciang lingnei tawh note kong thuhilh ding hi,” a ci hi. Tua bangin kumpipa in mite’ deihna zui lo hi. Bang hang hiam cih leh Topa in Shiloh khuami Ahijah’ tungtawnin Nebat’ tapa Jeroboam’ tungah a gensa thu a tunsak nadingin Topa in a piansak thu kiheina ahi hi. Kumpipa in amau’ thu a ngaih lohna Israel-te khempeuh in a muh uh ciangin mite in kumpipa dawng uh a, “David sungah kote in bang ngah nei ka hi uh hiam? Jessi tapa sungah gamhluah ka nei kei uh hi. Israel-te aw, na inn ciat uhah ciah un. Rehoboam in ama a’ ding vaihawmtawm ta hen,” a ci uh hi. Tua ahih ciangin Israel-te a inn ciat uhah kihem uh hi. Ahih hangin Rehoboam in Judah khuapite sungah a teng Israel mite a uk hi. Tua ciangin Kumpi Rehoboam in aana tawh nasemte a uk Adoram, Israel-te tawh a kimu dingin sawl a, ahi zongin amaute in amah suang tawh na denglum uh hi. Tua ciangin Jerusalem-ah a tai dingin Kumpi Rehoboam a sakol leeng-ah a tuang dingin nawhtai hi. Tua ahih ciangin tuni dongin leilulam Israel-te in David’ suante’ ukna lehdo uh hi. Jeroboam hong ciahkik khitna thu Israel-te khempeuh in a zak uh ciangin amaute in mi sawlin kikhopna-ah amah samsak uh a, Israel-te khempeuh tungah kumpi-in amah a bawl uh hi. David’ suante a zui kuamah dang om lo a, Judah minam bek in a zui uh hi. Jerusalem-ah Rehoboam a tun ciangin, a kumpi gam a ngahkikna dingin Israel mite a sim dingin Judah minam khempeuh, le Benjamin minam, a kiteel galhang mi tul zakhat le tul sawmgiat a khawm hi. Ahih hangin Pasian’ mi Shemaiah’ tungah Pasian’ thu hong tung hi: “Judah kumpipa, Solomon’ tapa Rehoboam tung, le Judah le Benjamin minam khempeuh tung, le a omlai midang khempeuh tungah gen in. ‘ Topa in hih bangin ci hi: Note na kuanto kei ding uh a, na beh uh ahi Israel-te na do kei ding uh hi. Mi khempeuh a inn ciat uhah ciah hen. Hih thu pen keima vaihawm ahi hi,’ ci hi,” a ci hi. Tua ahih ciangin amaute in Topa’ thu ngai uh a, Topa’ thugen bangin inn-ah a ciahkik uh hi. Tua ciangin Jeroboam in Efraim mualtung gam sungah Shekhem khua phutin tua lai-ah tawlkhat sung a teng hi. Tua ciangin amah paikhia-in Penuel a puah hi. Tua ciangin Jeroboam in a lungsim sungah, “Tu-in kumpi gam pen David’ suante’ tungah kiheikik khathei ding hi. Jerusalem-a Topa’ biakinn-ah biakna pia dingin hih mite paito leh, hih mite’ lungsim Judah kumpi Rehoboam, a topa uh lamah kiheikik kha ding a, amaute in kei hong thatin Judah kumpi Rehoboam kiangah ciahkik ding uh hi,” ci hi. Tua ahih ciangin kumpipa in thu kikupna khat bawl a, tua ciangin kham bawngno nih bawl hi. Tua ciangin amah in mite kiangah, “Jerusalem-ah sauvei khop na pai khinta uh hi. Israel mite aw, Egypt leitang panin note hong paikhiatpih na pasian-te uh en un,” a ci hi. Amah in Bethel-ah khat koihin, Dan-ah adang khat a koih hi. Hih na pen khialhna khat a suak hi. Bang hang hiam cih leh mite Bethel-a bia ding le Dan-a bia dingin a gamla pekah va pai uh hi. Amah in mual dawnte-ah zong biak nading inn lamin mite khempeuh lak panin Levi mi ahi lo mite siampi-in a seh hi. Tua ciangin Jeroboam in Judah a om pawi tawh a kibangin a kha giatna a ni sawm le nga ni-in pawi khat bawl a, biakna tau tungah biaknate a pia hi. Tua mah bangin amah in Bethel-ah bawlin ama bawlsa bawngno milimte tungah biakna a pia hi. Tua ciangin amah in ama bawlsa mualtung a biakna siampite Bethel-ah a koih hi. A kha giatna a ni sawm le nga ni, ama deih kha sungin Bethel-a ama bawlsa biakna tau-ah amah paito hi. Amah in Israel mite a dingin pawi khat kipsak a, paknamtui hal dingin biakna tau-ah a paito hi. Tua laitakin Topa’ sawlna tawh Judah panin Pasian’ mi khat Bethel-ah hong pai hi. Paknamtui hal dingin biakna tau gei-ah Jeroboam na ding hi. Tua ciangin Topa’ sawlna bangin biakna tau langpangin mipa kiko a, “Biakna tau, biakna tau aw, Topa in hih bangin ci hi: ‘En in, Josiah min nei tapa khat David’ suan sung pan hong piang ding hi. Amah in nangma tungah paknamtui a hal mualtung a biakna a pia siampite nangma tungah biakna-in pia ding a, nangma tungah mihingte’ guhte kihal ding hi,’ ci hi,” a ci hi. Tua ciangin tua ni mahin amah in lim khat pia a, “Hih pen Topa in thu a gen khitna lim ahi hi: ‘En in, biakna tau kitam khamin a tunga om vutte kithehthang ding hi,’ ci hi,” a ci hi. Bethel-a biakna tau langpangin Pasian’ mipa’ thugenna kumpipa in a zak ciangin biakna tau panin Jeroboam in a khut zan a, “Amah lencip un,” a ci hi. Tua ciangin amah langpangin a zankhiat a khut keucip ahih manin a khut tonsakkik thei nawn lo hi. Topa’ sawlna bangin Pasian’ mipa in lim khat a piakna tawh kizui-in biakna tau zong kiphelkhamin biakna tau panin a vutte kithehthang hi. Tua ciangin kumpipa in Pasian’ mipa kiangah, “Tu-in Topa na Pasian’ maipha kunh inla, ka khut a ngei a bat nadingin thu hong ngetsak in,” a ci hi. Tua ciangin Pasian’ mipa in Topa’ tungah kunh hi. Tua ciangin kumpipa’ khut a ngei bangkik a, a nidanga mah hong bang hi. Tua ciangin kumpipa in Pasian’ mipa kiangah, “Inn-ah hong zui in la, tawlnga in. Keimah in nangma tungah thaman kong pia ding hi,” a ci hi. Tua ciangin Pasian’ mipa in kumpipa kiangah, “Na inn phel langkhat hong pia ding na hi zongin kong zui kei ding hi. Keimah in hih lai munah an ahi a, tui ahi zongin ka ne ka dawn kei ding hi. Bang hang hiam cih leh Topa in kei tungah thu hong pia khinzo a, ‘An ahi a, tui ahi zongin ne lo dawn loin, na paina lampi tawnin na ciahkik kei ding hi,’ hong ci hi,” a ci hi. Tua ahih ciangin amah lampi dangah pai a, Bethel-ah hong paina lampi tawnin ciahkik lo hi. Tua hun laitakin kamsang khangham khat Bethel-ah a teng hi. Ama tapate hong pai-in tua ni-in Pasian’ mipa in Bethel-ah a hih thu teng ama kiangah a gen uh hi. Kumpipa kiangah a gen thute zong, amaute in a pa uh kiangah a gen uh hi. Tua ciangin a pa un amaute kiangah, “Koi lamah amah pai ahi hiam?” a ci hi. Tua ciangin a tapate in Judah panin hong pai Pasian’ mipa a paina lam a hilh uh hi. Amah in a tapate kiangah, “Kei a dingin la van hong vawhsak un,” a ci hi. Tua ahih ciangin amaute in ama a dingin la van vawhsakin a tungah amah a tuang hi. Tua ciangin Pasian’ mipa nungah amah pai a, tawsaw khat nuai-ah tu-in amah mu hi. Tua ciangin amah in Pasian’ mipa kiangah, “Nang pen Judah panin a hong pai Pasian’ mipa na hi hiam?” a ci hi. Amah in, “Ka hi hi,” a ci hi. Tua ciangin amah in, “Kei tawh inn-ah hong ciahin an ne in,” a ci hi. Amah in, “Nang tawh kong ciahkik kei ding a, nang kong zui thei kei ding hi. Hih munah nang tawh an ahi a, tui ahi zongin ka ne ka dawn kei ding hi. Bang hang hiam cih leh Topa in kei tungah, ‘An ahi a, tui ahi zongin tua lai-ah ne lo dawn loin, na paina lampi tawnin na ciahkik kei ding hi,’ hong ci hi,” a ci hi. Tua ciangin amah in, “Kei zong nangmah bangin kamsang khat ka hi a, Topa’ sawlna bangin vantungmi khat in kei tungah thu hong gen a, ‘Amah in anletui ne-in a dawn theih nadingin na inn-ah amah paipih kik in,’ hong ci hi,” a ci hi. Ahih hangin amah in Pasian’ mipa tungah zuau genin a phuahtawm ahi hi. Tua ahih ciangin amah zui-in hong ciahkik a, ama inn-ah an ne-in tui a dawn hi. Amaute sabuai-ah a tut laitakun amah a ciahpih kik kamsang teekpa tungah Topa’ thu hong tung hi. Judah panin hong pai Pasian’ mipa tungah amah kiko a, “ Topa in hih bangin ci hi: ‘Nangmah in ama thu mang loin, Topa na Pasian in hong thupiaksa thupiakna zui loin, nang hong paikikin, amah in, “An ne kei inla, tui dawn kei in,” hong cihna munah an ne-in tui na dawn hi. Tua ahih manin na pate’ hanah na luanghawm kivui lo ding hi,’ ci hi,” a ci hi. Tua ciangin amah in an ne-in tui a dawn khit ciangin, amah in a ciahpih kik kamsangpa a dingin la van vawhsak hi. Amah a paikhiat ciangin humpinelkai khat in lampi-ah na dawntuahin amah that hi. Ama luanghawm lampi-ah kipaai a, a gei-ah a la ding a, a humpinelkai zong a luanghawm gei-ah a ding hi. Tua laitakin mite in va nawkkha uh a, lampi-ah a luanghawm kipaai-in a luanghawm gei-ah humpinelkai a ding mu uh hi. Amaute hong pai-in kamsang khangham pa a tenna khuapi sungah a gen uh hi. Lampi panin amah a ciahpih kik kamsangpa in tua thu a zak ciangin amah in, “ Topa’ thu a mang lo Pasian’ mipa ahi hi. Tua ahih ciangin Topa in ama tungah a gensa thu tawh kizui-in amah balnenin a that humpinelkai tungah Topa in amah pia hi,” a ci hi. Tua ciangin amah in a tapate kiangah, “Kei a dingin la van hong vawhsak un,” a ci hi. Amaute in vawhsak uh hi. Tua ciangin amah pai a, lampi-ah a luanghawm kipaai-in la leh humpinelkai a luanghawm gei-ah a ding a mu hi. Humpinelkai in a luanghawm ne lo a, a la zong balnen lo hi. Tua ciangin kamsangpa in Pasian’ mipa’ luanghawm la-in la tungah koih a, kah ding le vui dingin khuapi sungah a ciahpih hi. Tua ciangin amah in ama hanah a luanghawm a vui hi. Tua ciangin ama hangin amaute kap uh a, “Ala, ka sanggampa!” a ci uh hi. Amah a vui khit ciangin a tapate kiangah, “Kei ka sih ciangin Pasian’ mipa a kivuina hanah kei hong vui un. Ama guh gei-ah kei’ guhte koih un. Bang hang hiam cih leh Bethel-a biakna tau le Samaria khuapite sunga om mualtung a biaknate khempeuh langpangin Topa’ sawlna bangin a thugenna hong tung taktak ding hi,” a ci hi. Hih thu khit ciangin zong ama gamtat sia panin Jeroboam kihei tuan lo a, mite khempeuh sung panin mualtung a biaknate-a sem ding siampite bawlkik hi. Amah in a sem nuam peuhpeuh mualtung a biakna siampi dingin a ap hi. Hih pen lei maitang panin khenkhia-in a susia zah dongin Jeroboam’ innkuan tungah khialhna lianpi a suak hi. Tua hun laitakin Jeroboam’ tapa Abijah a ci na hi. Jeroboam in a zi kiangah, “Ding inla, na mel kiseelin Jeroboam’ zi na hihlam kitheisak kei inla, Shiloh-ah va pai in. Hih mite tungah kumpi ka hih nading thu a gen kamsangpa Ahijah tua lai-ah om hi. Anlum sawm, moh pawlkhat, khuaizu thawl khat keng inla ama kiangah va pai in. Naupang tungah a piang ding thu amah in nang kiangah hong gen ding hi,” a ci hi. Jeroboam’ zi tua bangmahin gamta hi. Amah kithawi-in Shiloh-ah pai a, Ahijah’ inn va tung hi. A khanghamna hangin a mitte maang ahih manin Ahijah in khua mu thei lo hi. Tua ciangin Topa in Ahijah kiangah, “En in, a tapa tawh kisai nangma kiangah thu a dong dingin Jeroboam’ zi hong pai hi. Bang hang hiam cih leh a tapa a ci na hi. Tua bang tua bangin tua nu tungah na gen ding hi,” a ci hi. Amah hong pai ciangin numei dang khatin kineih hi. Ahih hangin Ahijah in amah kongkhak hong tun a kheging a zak ciangin, “Hong tum in Jeroboam’ zi aw, bang hangin midang khat kineih na hi hiam? Nang a dingin thugik khat kei tungah hong kipia hi. Pai inla Jeroboam kiangah hih bangin gen in, ‘Israel Pasian, Topa in hih bangin ci hi: “Mite lak panin nang hong liansakin ka mi Israel-te tungah makai-in kong bawl a, David’ suante’ tung panin kumpi gam balkhia-in nangma tungah kong pia hi. Ahi zongin nang pen ka thupiaknate zui-in, a lungsim khempeuh tawh kei hong zui-in ka muhna-ah a man nate bek a sem ka nasempa David na bang kei a, nangmah in na mai-a om mite khempeuh sangin siatna bawlzaw-in, pai-in pasian dangte le a kisung milimte nang a dingin bawlin ka hehna dingin nong phin a, na nung lamah kei nong paai hi. Tua ahih ciangin en in, mi khat in a bei matengin ek a haltum mah bangin Jeroboam innkuan tungah siatna tungsakin, sal le sal ahi lo mi a kibangin pasal khempeuh Jeroboam innkuan panin ka susia ding a, Israel sungah Jeroboam innkuan ka beisiangsak ding hi. Tua ahih ciangin Jeroboam’ mi, khuapi sunga a si mi peuhpeuh uite in ne ding a, gamlakah a si mi peuhpeuh huihlak vasate in ne ding hi. Bang hang hiam cih leh Topa in gen khin hi,” ci hi,’ ci-in a gen hi. “Tua ahih ciangin ding inla na inn-ah ciah in. Na khua na tun ciangin na tapa si ding hi. Tua ciangin Israel mi khempeuh ama hangin kapin vui ding uh hi. Bang hang hiam cih leh Israel Pasian, Topa’ tungah a lungkimhuai na khat Jeroboam’ innkuan sung panin ama tungah kimu ahih manin Jeroboam sung panin amah bek mah hanah kivui ding hi. Tua tham loin tuni-in Jeroboam innkuan a beisak ding, Israel-te’ tungah kumpi khat Topa in ama a dingin khangsak ding hi. Tua hun a kipan tui sunga pumpeeng a kilin’ mah bangin Topa in Israel mite vatin amau pute pate tungah a piak hih gam hoih panin Israel zunglot ding a, Eufratis gun galkhatah amaute thehthang ding hi. Bang hang hiam cih leh amaute in Asherah milimte bawlin Topa a heh nadingin phin uh hi. Tua ciangin ama khialhna le Israel-te a khialhsakna ahi Jeroboam’ khialhna hangin amah in Israel nusia ding hi,” a ci hi. Tua ciangin Jeroboam’ zi dingin kihemkhia a, Tirzah-ah a ciah hi. Amah inn tungin sangkil a kan laitakin naupang a si hi. Tua ciangin a nasem kamsang Ahijah tungtawnin Topa’ thugenna tawh kizui-in Israel mi khempeuh in amah vui-in ama hangin a kap uh hi. Tu-in Jeroboam’ gamtatna a omlaite, a galsimna le a gam uknate, Israel Kumpite’ Khang Tangthu Laibu sungah kigelh hi. Jeroboam’ uk hun sung kum sawmnih le nih ahi hi. Tua ciangin amah si a, ama tangin a tapa Nadab in a uk hi. Tu-in Solomon’ tapa Rehoboam in Judah-ah uk hi. Gam uk dingin a kipatin Rehoboam kum sawmli le khat pha a, a min koih nadingin Topa in Israel minam khempeuh sung panin a teelkhiat khuapi Jerusalem-ah amah in kum sawm le sagih sung uk hi. Ama nu a min Naamah hi a, Ammon mi ahi hi. Tua ciangin Judah mite, Topa’ muhna-ah a sia gamta uh a, a pu a pate khempeuh uh hih sangin a tamzaw-in amau’ khialhnate uh tawh ama hazat nading piangsak uh hi. Bang hang hiam cih leh amaute in amau a dingin mualtung a biaknate, biakna songte le mual sang tung khempeuh le singniim nuai khempeuhah Asherah milimte bawl uh a, biakna phualte-ah numei-pasal paktat pawlte zong om uh hi. Topa in Israel mite’ mai-ah a hawlkhiat minam dangte’ gamtatna a kihhuai khempeuh bangin amaute gamta uh hi. Kumpi Rehoboam’ kum ngana kumin Jerusalem a sim dingin Egypt kumpi Shishak hong kuanto hi. Amah in Topa’ biakinn-a van manphate le kumpipa’ inn-a van manphate lakhia hi. Amah in na khempeuh lakhia hi. Amah in Solomon’ bawlsa kham lumte khempeuh zong la hi. Tua ciangin Kumpi Rehoboam in tuate’ tangin sumngo lumte bawl a, kumpipa’ inn kongkhak a cing inncing uliante’ khut sungah tuate a ap hi. Topa’ biakinn-ah kumpipa a pai simin inncingte in tuate pua-in, tua ciangin inncinna inndei sungah tuate koihkik zel uh hi. Tu-in Rehoboam’ gamtatna a omlaite, le a sep khempeuh, Judah Kumpite’ Khang Tangthu Laibu sungah kigelh hi. Tua ciangin Rehoboam le Jeroboam’ kikalah galkidona om tawntung hi. Tua ciangin Rehoboam si a, David khuapi sungah a pate tawh kivui hi. Ama nu a min Naamah hi a, Ammon mi ahi hi. Tua ciangin ama tangin a tapa Abijam in a uk hi. Tu-in Nebat’ tapa Kumpi Jeroboam’ kum sawm le giatna kumin Abijam in Judah tungah uk ding kipan hi. Amah in Jerusalem-ah kum thum sung uk hi. Ama nu’ min Maakah hi a, Absalom’ tanu ahi hi. Ama mai-a a pa’ khialhna khempeuh amah in zui hi. A pusawn David a thuman bangin Topa a Pasian’ tungah a lungsim thuman bup lo hi. Ahi zongin David’ hangin Topa a Pasian in Jerusalem-ah amah tapa khat pia a, ama khitah a tapa koihin Jerusalem kipsak hi. Bang hang hiam cih leh Hit mi Uriah thu-ah cih simloh ama nuntak sung tawntung Topa’ mitah David a manin gamta-in a thupiakte khat peuhpeuh panin amah pial lo hi. Tu-in Abijam’ nuntak sung tawntung amah le Jeroboam’ kikalah kidona om hi. Abijam’ gamtatna a omlaite, le a sep khempeuh, Judah Kumpite’ Khang Tangthu Laibu sungah kigelh hi. Tua ciangin Abijam le Jeroboam kikalah galkidona om hi. Tua ciangin Abijam si a, amaute in David khuapi sungah amah vui uh hi. Ama tangin a tapa Asa in uk hi. Israel kumpi Jeroboam’ kum sawmnihna kumin Asa in Judah tungah uk ding kipan a, amah in Jerusalem-ah kum sawmli le khat sung uk hi. Ama pi’ min Maakah hi a, Absalom’ tanu ahi hi. Ama pupi David a gamtat bangin Topa’ muhna-ah Asa a manin gamta hi. Amah in gam sung panin pasal paktat pawlte koihkhia-in a pate’ bawlsa milim khempeuh khinkhia hi. Amah in Asherah milim dingin a kibawl a kihhuai milim khat nei ahih manin kumpinu’ nu hihna panin a pi Maakah zong khinkhia hi. Tua hi a, Asa in tua nu’ milim phukin Kidron lui-ah a hal hi. Ahih hangin mualtung a biaknate kilakhia lo hi. Ahi zongin ama hun sung khempeuh Asa’ lungsim Topa’ tungah thuman bup hi. Tua ciangin amah in a pa’ apsa letsongte le ama apsa letsongte, ngun, kham, le nazatte Topa’ biakinn sungah a paipih hi. Amau’ hun sung tawntung Asa le Israel kumpi Baasha kikalah galkidona om hi. Judah a sim dingin Israel kumpi Baasha kuanto a, Judah kumpi Asa kiang pan kuamah paikhia thei lo, kuamah a tum theih loh nadingin Ramah khua a lam hi. Tua ciangin Asa in Topa’ biakinn sung vankoihna le kumpipa inn vankoihna sungah a omlai ngun le kham khempeuh la-in ama nasemte’ khut sungah tuate a pia hi. Tua ciangin kumpi Asa in Damaskas-ah a teng, Syria kumpi, Hezion’ tapa Tabrimmon, a tapa Benhadad kiangah tuate puak a, “Ka pa le na pa mah bangin kei le nang kikalah kipawlna khat omsak ni. Ngun le kham letsong nangma tungah kong puak hi. Keima kiang panin amah a nungkik theih nadingin Israel kumpi Baasha tawh na kipawlna va sutat in,” a ci hi. Tua ciangin Benhadad in Kumpi Asa’ thu mang a, Israel khuapite a sim dingin a galkap a ukte sawlin, Ijon, Dan, Abelbethmaakah, le Khinneroth khempeuh, Naftali gam khempeuh tawh a zo hi. Baasha in tua thu a zak ciangin Ramah a lam khawlin Tirzah-ah om hi. Tua ciangin kumpi Asa in Judah gam khempeuhah thu genzakna khat bawl a, kuamah peng loin a milipin Baasha in khua lamna-a a zat Ramah suangte le a singte a puakhia dingin a sawl hi. Tua ciangin kumpi Asa in tuate tawh Benjamin mite’ khua Geba le Mizpah khua a lam hi. Tu-in Asa’ gamtatna a omlaite khempeuh, ama thahatna khempeuh, ama sep khempeuh, le ama lam khuapite, Judah Kumpite’ Khang Tangthu Laibu sungah kigelh hi. Ahih hangin a teek ciangin a khete-ah natna khat a nei hi. Tua ciangin Asa si a, a pupi David khuapi sungah a pate tawh kivui hi. Tua ciangin ama tangin a tapa Jehoshafat in a uk hi. Judah kumpi Asa’ kum nihna kumin Jeroboam’ tapa Nadab in Israel tungah uk ding kipan a, amah in Israel tungah kum nih sung uk hi. Topa’ muhna-ah amah a sia gamta a, a pa’ khekhap mah tawnin, Israel a khialhsakna ama khialhna mah a zui hi. Issakhar minam Ahijah’ tapa Baasha in Nadab sawmsim hi. Baasha in Filistia-te’ khua Gibbethon-ah amah sattuk hi. Nadab le Israel khempeuh in Gibbethon umcihin a om laitakun a thah ahi hi. Tua ahih ciangin Judah kumpi Asa’ kum thumna kumin Baasha in Nadab that a, Nadab tangin amah in a uk hi. Amah kumpi ahih phetin Jeroboam’ innkuan khempeuh that hi. Topa in Shiloh khuami a nasempa Ahijah tungtawnin a gensa bangin a vekpi-in a suksiat khit dongin mi khat zong Jeroboam’ innkuan-ah nusia lo hi. Tua pen ama khialhna le Israel a khialhsakna ahi Jeroboam’ khialhnate hang le Israel Pasian, Topa a hehsakna hang ahi hi. Tu-in Nadab’ gamtatna a omlaite, le a sep khempeuh, Israel Kumpite’ Khang Tangthu Laibu sungah kigelh hi. Amau’ hun sung khempeuh Asa le Israel kumpi Baasha kikalah galkidona a om hi. Judah kumpi Asa’ kum thumna kumin Ahijah’ tapa Baasha in Israel khempeuh tungah Tirzah panin uk ding kipan a, kum sawmnih le li sung a uk hi. Topa’ muhna-ah amah a sia gamta a, Jeroboam’ khekhap mah tawnin, Israel a khialhsakna ama khialhna mah a zui hi. Tua ciangin Baasha langpangin Hanani tapa Jehu tungtawnin Topa’ thu hong tung a, “Keimah in leivui lak panin nang hong sangto sakin ka mi Israel-te tungah makai-in nang hong bawl napi-in, nangmah in Jeroboam’ khekhap mah tawnin ka mi Israel-te na khialsak a, amaute’ khialhna tawh kei hong hehsak na hih manin en in, keimah in Baasha le a innkuan ka phiatsiang ding a, Nebat’ tapa Jeroboam’ innkuan bangin na innkuan ka bawl ding hi. Baasha’ mi, khuapi sunga a si peuhpeuh uite in ne ding a, ama mi gamlakah a si peuhpeuh huihlak vasate in ne ding uh hi,” a ci hi. Tu-in Baasha’ gamtatna a omlaite, a septe, le a thahatna, Israel Kumpite’ Khang Tangthu Laibu sungah kigelh hi. Tua ciangin Baasha si a, Tirzah-ah kivui hi. Ama tangin a tapa Elah in uk hi. Tua tham loin Jeroboam innkuan bangin ama nasepna tawh hehsakin Topa’ muhna-ah a sia a gamtatna khempeuh hang le amah in Jeroboam le a innkuan a suksiatna hangin Hanani’ tapa kamsang Jehu’ tungtawnin Baasha le a innkuan langpangin Topa’ thu hong tung hi. Judah kumpi Asa’ kum sawmnih le gukna kumin Baasha’ tapa Elah in Tirzah panin Israel tungah uk ding kipan a, kum nih sung uk hi. Ahih hangin ama leengte alang a ukpa ama nasem Zimri in amah sawmsim hi. Tirzah-a kumpi innsung a ukpa Arza’ inn-ah zukhamin Tirzah-ah a om laitak, Judah kumpi Asa’ kum sawmnih le sagihna kumin Zimri hong pai-in Elah sattukin that a, ama tangin a uk hi. Amah in uk dinga a kipat, kumpi tokhom tungah a tut khit phetin amah in Baasha’ innkuan khempeuh that hi. Ama behte pasal khat beek ahi a, a lawmte ahi zongin khat zong siit lo hi. Tu-in Elah’ gamtatna a omlaite, le a sep khempeuh, Israel Kumpite’ Khang Tangthu Laibu sungah kigelh hi. Judah kumpi Asa’ kum sawmnih le sagihna kumin Zimri in Tirzah-ah ni sagih sung uk hi. Tua laitakin Filistia-te’ khua Gibbethon simin Israel galkapte in giahphual sat uh a, giahphual sat a om galkapte in, “Zimri in sawmsimin kumpipa that khin hi,” a kicihna a za uh hi. Tua ahih ciangin Israel-te khempeuh in tua ni-in giahphual ah galkap a ukpa Omri kumpi-in a bawl uh hi. Tua ahih ciangin Omri le amah tawh a om Israel khempeuh Gibbethon panin paito-in amaute in Tirzah umcih uh hi. Tu-in Zimri’ gamtatna a omlaite, le ama hihsa a sawmsimna, Israel Kumpite’ Khang Tangthu Laibu sungah kigelh hi. Tua ciangin Israel mite pawl nihin kikhen uh hi. Mi pawlkhat in kumpi-in a bawl dingin Ginath’ tapa Tibni zui uh a, a pawlkhat in Omri zui uh hi. Ahih hangin Omri a zui mite in Ginath’ tapa Tibni a zuite zo uh ahih ciangin Tibni si a, Omri kumpi a suak hi. Judah kumpi Asa’ kum sawmthum le khatna kumin Omri in Israel-te tungah uk ding kipan a, kum sawm le nih sung a uk hi. Amah in kum guk sung Tirzah-ah uk hi. Amah in Shemer’ tung panin ngun talen nihin Samaria mual lei hi. Amah in kulh tawh a mual um a, tua mual a nei pa Shemer’ min tamin a lamsa khuapi min Samaria a phuak hi. Topa’ muhna-ah Omri a sia gamta a, ama mai-a om mi khempeuh sangin a sia tamzaw gamta hi. Bang hang hiam cih leh Nebat’ tapa Jeroboam’ gamtat khempeuh, le Israel a khialhsakna khialhnate, a milimte uh tawh Israel Pasian, Topa a hehsakna uh a zui hi. Tu-in Omri’ gamtatna a omlaite, le a thahatna a lahna, Israel Kumpite’ Khang Tangthu Laibu sungah kigelh hi. Tua ciangin Omri si a, Samaria-ah kivui hi. Tua ciangin ama tangin a tapa Ahab in a uk hi. Judah kumpi Asa’ kum sawmthum le giatna kumin Omri’ tapa Ahab in Israel tungah uk ding kipan a, amah in Samaria panin Israel-te tungah kum sawmnih le nih sung a uk hi. Omri’ tapa Ahab, ama mai-a mite khempeuh sangin Topa’ muhna-ah a sia tamzaw gamta hi. Nebat’ tapa Jeroboam’ khialhnate zuih ding ama a dingin a thuzang tawh a kibat mah bangin, amah in Sidon mite’ kumpi Ethbaal’ tanu Jezebel zi-in la a, pai-in Baal na semin a bia hi. Amah in Samaria-a a lam Baal inn sungah Baal a dingin biakna tau khat dingsak hi. Tua ciangin Ahab in Asherah milim khat bawl hi. Ahab in ama mai-a om Israel kumpite khempeuh sangin Israel Pasian, Topa hehsak nading tam hihzaw hi. Ama hun sungin Bethel mi Hiel in Jerikho a puah hi. Topa in Nun tapa Joshua’ tungtawnin a gen bangin amah in a tacil Abiram’ luang khamin a bulpi phut a, a tapa neupen Segub’ luang khamin a kongpite a phut hi. Tu-in Gilead gam sung Tishbe khua panin Tishbe mi Elijah in Ahab kiangah, “A mai-ah ka dinna Israel Pasian, Topa a nungta ahih mah bangin keima thu tawh loin daitui ahi a, guah ahi zongin hong tung ding kumte sungah om lo ding hi,” a ci hi. Tua ciangin ama kiangah Topa’ thu hong tung a, “Hih lai panin kihemin nisuahna lamah kihei inla, Jordan nisuahna lam Kherith lui-ah bu in. Nangmah in lui panin tui na dawn ding hi. Tua lai-ah nangmah a hong vak dingin va-akte thu ka piazo hi,” a ci hi. Tua ahih ciangin amah pai-in Topa’ thugen bangin gamta a, Jordan nisuahna lam Kherith lui gei-ah a om hi. Tua ciangin va-akte in ama kiangah zing le nitakin anlum le sa puak a, amah in lui panin tui a dawn hi. Tua gam sungah guah zu lo ahih manin tawlkhat khit ciangin a lui a kang hi. Tua ciangin Elijah kiangah Topa’ thu hong tung a, “Ding inla, Sidon mite’ khua Zarefath-ah pai-in tua lai-ah om in. Tua lai-ah nangmah a hong vak dingin meigongnu khat thu ka piazo hi,” a ci hi. Tua ahih ciangin amah dingin Zarefath-ah a pai hi. Khuapi kulhkongpi a tun ciangin, meigongnu khat in sing na tom hi. Amah in tua nu samin, “Ka dawn theih nadingin beel khat sungah tui tawm hong paipih in,” a ci hi. Tua nu in paipih dingin a kisak laitakin, amah in tua nu samin, “Anlum neu khat hong tawi kawm in,” a ci hi. Tua ciangin amah in, “ Topa na Pasian a nungta ahih mah bangin emsa bangmah ka nei kei a, beel sungah annel khutdim khat le um sungah sathau tawmno khat bek om hi. Tu-in keimah le ka tapa a dingin tuate bawlin kote in ka nek theih nadingun singkang nih khawng a tom ka hi a, tua ciangin a si ta ding ka hi uh hi,” a ci hi. Tua ciangin Elijah in ama kiangah, “Lunghimawh kei in; pai inla na gensa bangin an hong bawl in. Kei a dingin mohneu khat hong bawlsak masa-in kei kiangah hong paipih inla, tua khit ciangin nang le na tapa a’ ding bawl in. Bang hang hiam cih leh Israel Pasian, Topa in hih bangin ci hi: ‘ Topa in leitungah guah a zuksak ni matengin beel sunga annel bei lo ding a, um sunga sathau zong kiam ngei lo ding hi,’ ci hi,” a ci hi. Tua ciangin amah pai-in Elijah’ gensa bangin hih hi. Tua nu, le amah, le tua nu’ innkuan in ni tampi sung ne uh hi. Elijah’ tungtawnin Topa’ thugen bangin beel sunga annel bei lo a, um sunga sathau zong kiam ngei lo hi. Hih thu khit ciangin innsung nupi ahi numei’ tapa a ci na hi. A natna nasia mahmah ahih manin gim semsemin a si hi. Tua ciangin amah in Elijah kiangah, “Pasian’ mipa aw, kei’ langkhatah bang thu nei na hi hiam? Ka khialhna a pholak ding ka tapa’ sihna a piangsak dingin kei kiangah nong pai hi,” a ci hi. Tua ciangin amah in tua nu kiangah, “Na tapa hong pia in,” a ci hi. Amah in tua nu’ ang panin amah la-in ama giahna innkhumzangah puato-in ama lupna tungah a sial hi. Tua ciangin Topa’ tungah kiko-in, “ Topa ka Pasian aw, ama tapa thahna tawh ka peemna meigongnu’ tung nangawnah gimna hong tungsak na hi hiam?” a ci hi. Tua ciangin naupang tungah amah thumvei kikhuangin Topa’ tungah kiko a, “ Topa ka Pasian aw, hih naupang hingkiksak in,” a ci hi. Tua ciangin Topa in Elijah’ aw ngai hi; naupang hong nak kikin a hingkik hi. Tua ciangin Elijah in naupang la-in innkhumzang panin inn sungah paipihsuk a, a nu kiangah a pia hi. Tua ciangin Elijah in, “En in, na tapa nungta hi,” a ci hi. Numei in Elijah kiangah, “Nang, Pasian’ mi na hihna le Topa in nang tungtawnin thu a gen takpi ahihna tu-in ka thei hi,” a ci hi. Ni tampi khit a kum thumna kumin Elijah’ tungah Topa’ thu hong tung a, “Pai in, Ahab kiangah nangmah kilak in. Tua ciangin keimah in leitungah guah ka zusak ding hi,” a ci hi. Tua ahih ciangin Ahab kiangah amah a kilaktawm dingin Elijah a pai hi. Tu-in Samaria-ah kialpi nasia hi. Tua ciangin Ahab in kumpi innsung a ukpa Obadiah sam hi. (Obadiah in nakpitakin Topa zahtak hi; Jezebel in Topa’ kamsangte a hon thah lai-in Obadiah in kamsang zakhat la-in sawmnga sawmnga-in leihawm sungah seel a, amaute anletui tawh a vak hi.) Tua ciangin Ahab in Obadiah kiangah, “Gam sung ciktui omna khempeuh le kuam omna khempeuhah va pai in. Lopa mu-in sakolte le la-sakolte i hinsuahzo kha ding a, ganhingte pawlkhat i sum kei ding hi,” a ci hi. Tua ciangin amaute in a et dingun leitang hawm uh hi. Ahab mahmah mun khat lamah pai-in Obadiah mahmah a mun dang khat lamah a pai hi. Obadiah lamkalah a om laitakin, Elijah in amah na dawntuah hi. Obadiah in amah thei-in a mai lei ngatin puk a, “Ka to Elijah, nang na hi hiam?” a ci hi. Tua ciangin amah in dawngin, “Keimah ka hi hi. Pai-in na topa kiangah, ‘Elijah hih lai-ah om hi,’ ci in,” a ci hi. Amah in, “Hong thah dingin Ahab’ khut sungah na nasempa nong piak nadingin bang thu-ah khial ka hi hiam? Topa na Pasian a nungta ahih mah bangin nangmah a zong dingin ka topa in a sawl lohna minam ahi a, kumpi gam ahi zongin om lo hi. Amaute in, ‘Hih lai-ah amah om lo hi,’ a cih uh ciangin, amaute in nang hong muh lohna thu amah in kumpi gam ahi a, minam ahi zongin kiciamsak hi. Tu-in nangmah in, ‘Pai-in na topa kiangah, “Hih lai-ah Elijah om hi,” ci in,’ nong ci hi. Nang kiang panin kei ka paikhiat phetin ka theih lohna munah Topa’ kha in nang hong pua ding hi. Kei va pai-in Ahab kiangah genin amah in nang hong muh loh ciangin, ka khangno lai a kipanin keimah na nasempa in Topa a zahtak hinapi-in, amah in kei hong that ding hi. Jezebel in Topa’ kamsangte a thah lai-in Topa’ kamsangte mi zakhat, sawmnga sawmnga-in leihawm sungah seelin, amaute anletui tawh ka vakna thu ka topa tungah hong kigen nai lo ahi hiam? Tu-in nangmah in, ‘Pai-in na topa kiangah, “Hih lai-ah Elijah om hi,” ci in,’ nong ci hi. Tua hileh amah in kei hong that ding hi,” a ci hi. Tua ciangin Elijah in, “A mai-ah ka dinna Vanglian Topa a nungta ahih mah bangin, tuni-in ama kiangah kei mahmah ka kilak taktak ding hi,” a ci hi. Tua ahih ciangin Ahab tawh a kimu dingin Obadiah pai-in ama kiangah a gen hi. Tua ciangin Elijah tawh a kimu dingin Ahab hong pai hi. Ahab in Elijah a muh ciangin, “Israel mite a lungkhamsak pa, nang na hi hiam?” a ci hi. Amah in dawngin, “Keimah in Israel mite ka lungkhamsak kei hi. Nang in Topa’ thupiaknate nusia-in Baal-te zui na hih manin nang le na pa’ innkuan in na lungkhamsak uh hi. Tua ahih ciangin tu-in mi sawl inla, Karmel Mual kei kiangah Israel-te khempeuh, le Jezebel’ sabuai-ah an a ne Baal kamsang zali le sawmnga le Asherah kamsang za lite hong khawm in,” a ci hi. Tua ahih ciangin Ahab in Israel mite khempeuh kiangah mi sawlin, Karmel Mual-ah Israel mite le kamsangte khawmsak hi. Tua ciangin mi khempeuh’ nai-ah Elijah hong pai-in, “Ngaihsutna kibang lo thu nih kikalah bang tanvei khensat loin om niloh ding na hi uh hiam? Topa pen Pasian ahihleh amah zui un; tua hi loin Baal pen Pasian ahihleh amah zui un,” a ci hi. Ahi zongin mite in kam khat beek dawng lo uh hi. Tua ciangin Elijah in mite kiangah, “Kei, kei bekbek, Topa’ kamsang sung panin ka omlai a, ahih hangin Baal kamsangte mihing zali le sawmnga om hi. Kote tungah bawngtal nih hong pia un. Amau a dingin bawngtal khat amaute teelsak unla, semnen sakin sing tungah koihsak unla, ahih hangin a tungah mei koihsak kei un. Tua ciangin keimah in a bawngtal khat bawlin sing tungah koihin, a tungah mei ka koih kei ding hi. Tua ciangin note in na pasian tung uhah thu ngen unla, keimah in zong Topa’ tungah thu ka ngen ding hi. Tua ciangin thungetna mei tawh hong pia pasian pen Pasian taktak ahi hi,” a ci hi. Tua ciangin mi khempeuh in dawngin, “Hih na thugen hoih hi,” a ci uh hi. Tua ciangin Elijah in Baal kamsangte kiangah, “Note tam na hih manun note a dingin bawngtal khat teel unla bawl masa un. Tua ciangin na pasian uh tungah thu ngen unla, ahih hangin a tungah mei koih kei un,” a ci hi. Tua ciangin amaute in amaute tungah a kipia bawngtal la-in bawl uh a, zingsang a kipan sun dong Baal tungah thu ngenin, “Baal aw, kote hong dawng in,” a ci uh hi. Ahih hangin awging om lo a, kuamah in dawng lo hi. Tua ciangin amau’ bawlsa biakna tau-ah amaute diang uh hi. Sun ciangin Elijah in amaute zahpihin, “Amah pen pasian ahih ciangin a gingin kiko un. Amah in thu a lungngaih laitak, ahih kei leh mun dangah paikhia, ahih kei leh khualzin, ahih kei leh amah ihmu-in phot ding kisam hikhathei ding hi,” a ci hi. Tua ciangin amaute a gingin kiko-in, amau’ ngeina bangin namsaute le sikzumte tawh, amaute tungah si a luan dongin ki-atin kisun uh hi. Sunkim khit ciangin biakpiak hun dong mateng amaute awngsuak uh a, ahih hangin awging om lo hi. Kuamah in dawng lo a, kuamah in don lo hi. Tua ciangin Elijah in mi khempeuh kiangah, “Ka kiang nai-ah hong pai un,” a ci hi. Tua ciangin mi khempeuh ama kiang nai-ah hong pai uh hi. Tua ciangin amah in Topa’ biakna tau a kisupaisa khat puahkik hi. “Israel, nangma min hi ding hi,” ci-in Topa’ thu a tunna Jakob’ tapa minam sawm le nihte tawh kizui-in Elijah in suangtum sawm le nih la hi. Tua ciangin tua suangte tawh Topa’ minin biakna tau khat lam hi. Amah in khaici lawh nih a tazo dingin a lian hawklam khat biakna tau kimkotah bawl hi. Tua ciangin amah in a ngeina bangin a sing koih a, a bawngtal semnenin a sing tungah koih hi. Tua ciangin amah in, “Beel li sungah tui dim unla, meihal biakna tau tung le a sing tungah sung un,” a ci hi. Tua ciangin amah in, “A nihveina hih un,” a ci hi. Tua ciangin amaute in a nihveina hih uh hi. Tua ciangin amah in, “A thumveina hih un,” a ci hi. Tua ciangin amaute in a thumveina hih leuleu uh hi. Tua ciangin biakna tau kimkotah tui luang a, a hawklam zong tui tawh kidim hi. Biakpiak hun ciangin kamsang Elijah a nai-ah hong pai-in, “Abraham, Isaac, le Israel Pasian, Topa aw, nang pen Israel sungah Pasian na hihna, le kei pen nangma nasem ka hihna, le hih nate khempeuh nangma thu tawh ka hihna thu tuni-in kitheisak in. Topa aw, nangmah Pasian na hihna le amaute’ lungsim na heikikna thu hih mite in a theih nadingin hong dawng in, Topa aw, hong dawng in,” a ci hi. Tua ciangin Topa’ meikuang hong kia a, a meihal biakna, a sing, a suangte, le a leivui kangtumin, hawklam sunga om tui nangawn kangcip hi. Mi khempeuh in tua thu a muh uh ciangin a mai uh leilam ngatin puk uh hi. Amaute in, “ Topa pen Pasian ahi hi; Topa pen Pasian ahi hi,” a ci uh hi. Tua ciangin Elijah in amaute kiangah, “Baal kamsangte man un; amaute khat zong suaktasak kei un,” a ci hi. Tua ciangin amaute in man uh hi. Elijah in Kishon lui-ah amaute paipih sukin tua lai-ah amaute a that hi. Tua ciangin Elijah in Ahab kiangah, “Paito inla, an ne-in tui dawn in; bang hang hiam cih leh guahpi huging om hi,” a ci hi. Tua ahih ciangin anne tuidawn dingin Ahab paito hi. Karmel Mual dawnah Elijah paito a, amahmah leilakah kun sukin a khukte kikalah a maitang a phum hi. Tua ciangin a nasempa kiangah, “Tu-in paito in; tuipi lam va en in,” a ci hi. Amah paito-in khuadak a, “Bangmah om lo hi,” a ci hi. Tua ciangin amah in, “Sagihvei paikik in,” a ci hi. A sagihveina ciangin amah in, “Khuttum cia bang meii tawmno khat tuipi panin hong kaito hi,” a ci hi. Tua ciangin amah in, “Paito-in Ahab kiangah, ‘Guah in hong khak kha ding ahih manin na leeng kithawi in la paisuk in,’ va ci in,” a ci hi. Tomno sungin meiite le huih tawh van hong vom a, guah tampi a zu hi. Ahab a leeng tungah tuangin Jezreel-ah a pai hi. Tua ciangin Elijah tungah Topa’ vangliatna hong tung hi. Amah in a kawng gakin Jezreel khua lutna dongah Ahab’ mai-ah na tai hi. Ahab in Jezebel kiangah Elijah’ hih khempeuh le namsau tawh kamsangte khempeuh a thah khitna thu a gen hi. Tua ciangin Jezebel in Elijah kiangah kamtai khat sawlin, “Zing ciang tubang hunin amaute na thah bangin nangmah ka hong thah kei taak le pasian-te in kei hong dawm kei ta hen,” cisak hi. Tua ciangin amah lau a, kithawi-in a suahtak nadingin paikhia a, Judah-te’ khua Beersheba tungin tua lai-ah a nasempa nusia hi. Ahih hangin amahmah gamlakah ni khat lam pailai-in poding kung nuai khatah a tu hi. Tua ciangin amah in a sih nading thu ngenin, “Phazo hi; tu-in Topa aw, ka nuntakna hong la ta in; bang hang hiam cih leh ka pate sangin kei ka hoihzaw kei hi,” a ci hi. Tua ciangin poding kung khat nuai-ah amah lumsukin a ihmu hi. Tua laitakin vantungmi khat in amah lawngin ama kiangah, “Tho inla an ne in,” a ci hi. Amah khuadak a, ama lutang gei suang sa tungah a ki-em moh khat le tui hai khat na om hi. Amah in tuate ne-in dawnin lumkik hi. Tua ciangin Topa’ vantungmi a nihveina hong paikikin amah lawng a, “Tho in la an ne in; tua hikeileh nang a dingin khualzinna haksa lua ding hi,” a ci hi. Tua ciangin amah tho a, an ne-in tui dawn a, tua an thahatna tawh Pasian’ mual Horeb ciang dong sun sawmli le zan sawmli sung a pai hi. Tua ciangin leihawm khatah amah tungin tua lai-ah giak hi. Topa in Elijah hopih a, “Elijah, hih lai-ah bang hih na hi hiam?” a ci hi. Amah in, “Vanglian Pasian, Topa a dingin ka huaiham mahmah hi; bang hang hiam cih leh Israel mite in na thuciamna nusia-in, na biakna taute lawnkhia uh a, namsau tawh na kamsangte that hi; kei, kei bekbek ka omlai hi. Amaute in kei nangawn thah dingin hong zong lai uh hi,” a ci hi. Tua ciangin amah in, “Paikhia inla, mualtung, Topa’ mai-ah ding in,” a ci hi. Tua ciangin Topa in hong nawk a, a lian a khauh huihpi in mualte semkhamin Topa’ mai-ah suangtumte sukham a, ahih hangin huihpi sungah Topa om lo hi. Huihpi nun’ a daih khit ciangin zin ling a, ahih hangin zinling sungah Topa om lo hi. Zinling khit ciangin meikuang om a, ahih hangin meikuang sungah zong Topa om lo hi. Meikuang khit ciangin aw nem neu khat a ging hi. Elijah in a zak ciangin a puan tawh a mai tuamin paikhia a, leihawm lutna-ah ding hi. Ama kiangah aw khat hong ging a, “Elijah, hih lai-ah bang hih na hi hiam?” a ci hi. Amah in, “Vanglian Pasian, Topa a dingin ka huaiham mahmah hi; bang hang hiam cih leh Israel mite in na thuciamna nusia-in, na biakna taute lawnkhia uh a, namsau tawh na kamsangte that uh hi; kei, kei bekbek ka omlai hi. Amaute in kei nangawn thah dingin hong zong lai uh hi,” a ci hi. Tua ciangin Topa in ama kiangah, “Pai in, Damaskas gamlak na lampi-ah ciahkik in. Na tun ciangin Syria gam kumpi dingin Hazael sathau na nilh ding hi. Tua ciangin Israel kumpi dingin Nimshi’ tapa Jehu sathau na nilh ding hi. Tua ciangin nangma munah kamsang dingin Abelmeholah khuami Shafat’ tapa Elisha sathau na nilh ding hi. Jehu in Hazael’ namsau panin a suakta peuhpeuh that ding hi. Elisha in Jehu’ namsau panin a suakta peuhpeuh that ding hi. Ahi zongin Baal mai-ah a kun nai lo, amah a nam nai lo mihing tul sagih Israel sungah ka siit ding hi,” a ci hi. Tua ahih ciangin tua lai panin amah paikhia a, ama neihsa a bawngtal kap sawm le nih tawh lo a kho Shafat’ tapa Elisha mu a, amah a sawm le nihna tawh a kho ahi hi. Elijah in ama gei nawkin ama tungah a puan lawn hi. Tua ciangin amah in a bawngtalte nusia-in Elijah’ nungah tai a, “Ka nu le ka pa kam vaikhakin hong namsak phot in; tua ciangin nang kong zui ding hi,” a ci hi. Amah in Elisha kiangah, “Paikik in; nang hong khaktan ka hi hiam?” a ci hi. Tua ciangin amah a zuihna panin ciahkik a, a bawngtal kolte la-in a bawngtalte go a, a sate bawngtal kolte tawh huanin mite tungah pia a, amaute in a ne uh hi. Tua ciangin amah kithawi-in Elijah’ nung zui a, ama na a sem hi. Syria kumpipa Benhadad in ama galkap khempeuh khawm hi. Amah a huh ding kumpi sawmthum le nih, le sakolte le leengte om hi. Amah paito-in Samaria umcihin simgawp hi. Amah in Israel kumpi Ahab khuapi sungah kamtaite sawlin ama kiangah, “Benhadad in hih bangin ci hi: ‘Na ngun le na kham keima a’ hi a, na zi hoihpente le na tate zong keima-a’ mah ahi hi,’ ci hi,” cisak hi. Tua ciangin Israel kumpipa in dawngin, “Na gen mah bangin, ka topa, kumpipa aw, kei le ka neih khempeuh nangma a’ ahi hi,” a ci hi. Kamtaite hong paikikin, “Benhadad in hih bangin ci hi: ‘Nang kiangah mi hong sawlin, “Kei tungah na ngun le na kham, na zite le na tate hong pia in,” kong cisak hi. Ahi zongin zing ciang tubang hunin nangma kiangah ka nasemte kong sawl ding a, amaute in nangma inn le na nasemte’ innsung thawi-in, amau’ deih peuhpeuh hong la ding uh hi,’ ci hi,” cisak hi. Tua ciangin Israel kumpipa in gam sung upa khempeuh samin, “Tu-in ciamteh un, hih mipa in buaina a zonna thei un; bang hang hiam cih leh ka zite le ka ngun le ka kham a la dingin mi hong sawl a, ama thu ka nial kei hi,” a ci hi. Tua ciangin upa khempeuh le mi khempeuh in ama kiangah, “Don kei inla, zong thukim kei in,” a ci uh hi. Tua ahih ciangin amah in Benhadad’ kamtaite kiangah, “Ka to kumpipa kiangah hih bangin gen un: ‘Na nasempa’ tung panin nong kalh masak kong pia ding hi; ahih hangin a nihna kong piazo kei hi, ci hi,’ ci un,” a ci hi. Tua ciangin kamtaite kihemkhia-in ama tungah thu tunkik uh hi. Benhadad in ama kiangah mi sawlin, “Samaria leitang pen kei hong zui khempeuh’ khutkuak a dimzawh taak leh, pasian-te in kei hong dawm kei ta hen,” a ci hi. Tua ciangin Israel kumpipa in dawngin, “Ama kiangah gen un: ‘Gal a zawh khit ciangin galhiam a suahkhia pa bangin galsim dingin galhiam a kuah lai pa kiphasak kei hen,’ ci un,” a ci hi. Bukte sungah kumpite tawh zu ne-in Benhadad a om laitakin hih thu a zak ciangin amah in a mite kiangah, “Panmun la un,” a ci hi. Tua ciangin amaute in khuapi a simgawp dingin panmun a la uh hi. Tua ciangin Israel kumpi Ahab kiang nai-ah kamsang khat hong pai-in, “ Topa in hih bangin ci hi: Hih mihon tampi khempeuh na mu hiam? En in, tuni-in nangma khut sungah kong pia ding hi. Tua ciangin keimah, Topa ka hihna na thei ding hi, ci hi,” a ci hi. Tua ciangin Ahab in, “Kua tawh hi ding hiam?” a ci hi. Amah in, “ Topa in hih bangin ci hi: Gamte a ukte’ nasemte tawh, ci hi,” a ci hi. Tua ciangin amah in, “Kua in galsim pan ding hiam?” a ci hi. Amah in dawngin, “Nangmah in na pan ding hi,” a ci hi. Tua ciangin amah in gamte a ukte’ nasemte khawm a, amaute zanih le sawmthum le nih ahi hi. Amaute’ khit ciangin amah in Israel mi khempeuh, tulsagih a khawm hi. Tua ciangin Benhadad, bukte sungah amah a huh kumpi sawmthum le nihte tawh zukhamin a om laitak sun hunin amaute kuankhia uh hi. Gam a ukte’ nasemte kuankhia masa uh hi. Tua ciangin Benhadad in thukante sawlkhia a, amaute in ama kiangah, “Samaria panin mi hong kuankhia uh hi,” ci-in zasak uh hi. Amah in, “Kilemna a bawl dingin hong pai ahihleh a hingin amaute man un. Tua ahih kei a, a hong sim dingin amaute a hong pai ahih le zong amaute a hing mahin man un,” a ci hi. Tua ahih ciangin gamte a ukte’ nasemte le amaute a zui galkapte, khuapi panin kuankhia uh hi. Mi khempeuh in amau’ kisikpih ciat that uh hi. Syria-te tai-in Israel mite in amaute delh uh a, ahih hangin Syria kumpipa Benhadad sakol tung tuangte tawh sakol khatin tai hi. Tua ciangin Israel kumpipa paikhia-in sakolte le leengte man a, Syria-te tampi tak a that hi. Tua ciangin Israel kumpipa kiang nai-ah kamsangpa hong pai-in ama kiangah, “Hong pai in, nangmah kithakhauhsak inla, na hih ding thu limtakin ngaihsun in; bang hang hiam cih leh khuakhal ciangin Syria kumpipa nangmah simin hong kuanto kik ding hi,” a ci hi. Tua ciangin Syria kumpipa’ nasemte in ama kiangah, “Amaute’ pasian-te pen mualtung pasian-te hi a, tua ahih ciangin eite sangin amaute hatzaw uh hi. Ahih hangin zanglei-ah amaute do lehang amaute sangin eite i hatzaw taktak ding hi. Hih bangin hih in: Kumpite ama panmun ciat panin khinkhia inla, amaute’ munah galkapmangte koih in. Tua ciangin na taansa galkap tawh a kibang galkap, sakol tangin sakol, leeng tangin leeng khawm in. Tua ciangin zanglei-ah amaute i do ding a, amaute sangin eite i hatzaw taktak ding hi,” a ci uh hi. Tua ciangin amah in amau’ thu ngai-in a hih hi. Khuakhal ciangin Benhadad in Syria-te khawmin Israel mite a sim dingin Afek-ah a kuanto hi. Tua ciangin Israel mite kikhawmin, lam-an kiguan’ a, amaute a do dingin a kuan uh hi. Israel mite in amaute’ mai-ah keelhon neu nih bangin giahphual sat uh a, Syria-te ahihleh gam sung khempeuh dim uh hi. Tua ciangin Pasian’ mi khat a nai-ah hong pai-in Israel kumpipa kiangah, “ Topa in hih bangin ci hi: ‘Syria-te in, “ Topa pen mualtung pasian hi a, amah pen kuamsung pasian hi lo hi,” ci uh ahih manin hih a lian mihonpi khempeuh nangma khut sungah kong pia ding a, keimah, Topa ka hihna na thei ding hi,’ ci hi,” a ci hi. Amaute a kimaituahin ni sagih sung giahphual satin om uh hi. A ni sagih ni-in gal kido uh hi. Israel mite in Syria-te ni khat sungin khe galkap tul zakhat vatlum uh hi. Tua ciangin a omlaite Afek khuapi-ah tai uh a, ahi zongin tuate mi tul sawmnih le tulsagih pen khuapi kulh in cipnelh hi. Benhadad zong tai a, khuapi sunga inndei sungnung khatah a lut hi. Tua ciangin a nasemte in ama kiangah, “Israel kumpite pen hehpihna a nei kumpite hi, ci-in i za hi. Puanhampi i kawngah tengin i lu tungah khauhual vialin Israel kumpipa kiangah pai ni; amah in na nuntakna hong suaktasak kha ding hi,” a ci uh hi. Tua ahih ciangin amaute in a kawng uhah puanhampi tengin a lu uhah khauhual vialin Israel kumpipa kiangah pai uh a, “Na nasempa Benhadad in, ‘Kong thum hi, kei hong nungtasak in,’ ci hi,” a ci uh hi. Amah in, “Amah nungta lai ahi hiam? Amah ka sanggam bang ahi hi,” a ci hi. Tu-in mite in a lim en cikin ama tung panin a theih uh ciangin, “Hi hi, amah nungta lai hi,” a ci uh hi. Tua ciangin amah in, “Pai un la amah hong paipih un,” a ci hi. Tua ciangin ama kiangah Benhadad hong paikhia hi. Ahab in leeng tung ama kiangah Benhadad kahtosak hi. Tua ciangin Benhadad in ama kiangah, “Ka pa in na pa’ tung panin a lak khuapite kong piakik ding hi. Ka pa in Samaria-ah a bawl mah bangin Damaskas-ah nang a dingin sumbuk na bawl thei ding hi,” a ci hi. Tua ciangin Ahab in, “Hih na thugente’ hangin nang kong suaktasak ding hi,” a ci hi. Tua ahih ciangin amah in thuciamna khat amah tawh bawlin a ciahsak hi. Tua ciangin Topa’ thupiakna tawh kamsangte’ tapate khat in a lawmte khat kiangah, “Hong sat in, kong thum hi,” a ci hi. Ahih hangin a mipa in amah sat nuam lo hi. Tua ciangin amah in a lawmpa kiangah, “Nangmah in Topa’ thu mang lo na hih manin, kei kiang panin na paikhiat khit phetin humpinelkai khat in nang hong that ding hi,” a ci hi. Ama kiang panin amah a kihepkhiat khit phetin humpinelkai khat in amah dawntuahin petlum pah hi. Tua ciangin amah in midang khat mu a, “Hong sat in, kong thum hi,” a ci hi. Tua ciangin mipa in amah nakpitakin satin amah liamsak hi. Tua ciangin kamsangpa kihemkhia-in lam gei-ah kumpipa ngak a, a mit tung puan tawh tuamin a mel a seel hi. Kumpipa in a nawk laitakin kumpipa tungah amah kiko-in, “Na nasempa gal sungah kuan hi. Galkap khat in kei kiangah gal matsa mi khat hong paipih a, ‘Hih mipa kem in; amah na taisuah leh ama nuntakna tangin nangma nuntakna hi ding a, ahih kei leh ngun talen khat na liau ding hi,’ hong ci hi. Na nasempa hih lai hua lai-ah manlahin ka om kalin amah na mang hi,” a ci hi. Tua ciangin Israel kumpipa in ama kiangah, “Nangma thukhenna bang hi ta hen; nangmahmah in na khentawm hi,” a ci hi. Tua ciangin amah in a mit panin a tuamna thakhatin phelvat hi. Tua ciangin Israel kumpipa in amah pen kamsangte khat ahihlam thei hi. Tua ciangin amah in ama kiangah, “ Topa in hih bangin ci hi: ‘Thah dinga ka seh mipa khah na hih ciangin ama nuntakna tangin nangma nuntakna, ama mite’ tangin nangma mite pai ding hi,’ ci hi,” a ci hi. Tua ciangin Israel kumpipa a inn-ah a lungkim lo, maikhingin pai a, Samaria a tung hi. Tua laitakin Jezreel khuami Naboth in Samaria kumpi Ahab’ kumpi inn gei-ah leenggui lo khat nei hi. Hih thu teng khit ciangin Ahab in Naboth kiangah, “Ka inn tawh kinai ahih manin anteh huan dingin ka neih theih nadingin na leenggui lo hong pia in; keimah in tua tang dingin leenggui lo hoihzaw khat kong pia ding hi; ahih kei leh zong nang a dingin a hoihzawk ding leh a man ding sum kong pia ding hi,” a ci hi. Ahih hangin Naboth in Ahab kiangah, “Ka pu ka pate’ gamh nang tungah kong piak ding Topa in hong kham hi,” a ci hi. Tua ciangin Jezreel khuami Naboth in ama tungah a thugenna hangin hehna le maikhinna tawh Ahab a inn-ah ciah hi; bang hang hiam cih leh amah in, “Ka pu ka pate’ gamh nang tungah kong pia kei ding hi,” ci hi. Amah a lupna tungah lumin a mai hei a, an ne lo hi. Ahih hangin a zi Jezebel ama kiangah hong pai-in, “An a ne lo zah dingin bang hangin na lungsim tua zahin heh ahi hiam?” a ci hi. Amah in, “Keimah in Jezreel khuami Naboth kiangah thu genin, ‘Sum tawh lei dingin na leenggui lo hong pia in; ahih kei leh zong, na lungkim leh tua tang dingin leenggui lo dang khat kong pia ding hi,’ ka ci hi. Amah in hong dawngin, ‘Nang tungah ka leenggui lo kong pia kei ding hi,’ hong ci hi,” a ci hi. Tua ciangin a zi Jezebel in, “Tu laitakin Israel mite a ukpa hi lo na hi hiam? Tho-in an ne inla, na lungsim nuamsak in. Keimah in Jezreel khuami Naboth’ leenggui lo nangma tungah kong pia ding hi,” a ci hi. Tua ahih ciangin amah in Ahab’ minin laikhakte gelhin ama min gelhna tawh tua laite tungah gelh a, ama khuapi sungah Naboth tawh a teng upate le uliante tungah tua laite a khak hi. Amah in a laite sungah, “An tan’ ding thu zasak unla, mite’ lak a sangna munah Naboth koih un. Ama mai-ah mi ginalo nih koihin ama langkhatah mawhna zong sakin, ‘Nang in Pasian le kumpipa na samsia hi,’ cisak un. Tua ciangin amah lakhia unla denglum un,” a ci hi. Tua ciangin ama khuapi mi, ama khuapi sungah a teng upate le uliante in amaute tungah Jezebel’ thupuak bangin hih uh hi. Amaute tungah a khak laite sungah a kigelh mah bangin, amaute in an tan’ ding thu zasak uh a, mite’ lak a sangna munah Naboth koih uh hi. Tua ciangin mi ginalo nihte hong pai-in ama mai-ah tu uh hi. Tua ciangin mi ginalo nihte in mite’ omin Naboth’ mawhna zong uh a, “Naboth in Pasian le kumpipa samsia hi,” a ci uh hi. Tua ahih ciangin amaute in khuapi pualamah amah paipih uh a, suang tawh amah denglum uh hi. Tua ciangin amaute in Jezebel kiangah thu puakin, “Suang tawh Naboth kideng khinzo a, amah sita hi,” a ci uh hi. Jezebel in Naboth suang tawh kidengin a sihna thu a zak phetin Ahab kiangah, “Tho in; sum tawh lei dingin nangma tungah hong piak nop loh, Jezreel khuami Naboth’ leenggui lo tang in; bang hang hiam cih le Naboth nungta nawn lo hi; sita hi,” a ci hi. Naboth a sihna thu Ahab in a zakphetin, a luah dingin Jezreel khuami Naboth’ leenggui lo-ah a paisuk dingin a tho hi. Tua ciangin Tishbe khuami Elijah tungah Topa’ thu hong tung a, “Tho inla, Samaria-ah a om Israel kumpi Ahab a dawntuah dingin paisuk in. Naboth’ leenggui lo a la dingin tua lai-ah amah om hi. Nangmah in ama kiangah, ‘ Topa in hih bangin ci hi: “That khinin zong luahkhin na hi hiam?” ci hi,’ na ci ding hi. Tua ciangin ama kiangah, ‘ Topa in hih bangin ci hi: “Uite in Naboth’ sisan a liahna munah uite in nangma sisan liak ding uh hi,” ci hi,’ ci-in gen in,” a ci hi. Ahab in Elijah a muh ciangin, “Ka gal pa aw, kei hong mu na hi hiam?” a ci hi. Amah in dawngin, “ Topa’ muhna-ah a sia a gamta dingin nangmah kipiatawm na hih manin nang kong mu hi. Topa in hih bangin ci hi: Nangma tungah siatna kong tungsak ding hi. Nang kong phiatkhia siang ding a, Israel sungah nangma mi sal le sal ahi lo mi pasal khempeuh ka beisak ding hi. Kei nong hehsakna hang le Israel na khialhsakna hangin Nebat’ tapa Jeroboam’ innkuan le Ahijah’ tapa Baasha’ innkuan bangin nangma innkuan ka bawl ding hi. Jezebel’ thu zong Topa in genin, ‘Uite in Jezreel khua sungah Jezebel ne ding uh hi,’ ci hi. Khuapi sungah Ahab’ innkuan a si peuhpeuh uite in ne ding uh hi; gamlakah a si nangma innkuan peuhpeuh huihlak vasate in ne ding uh hi, ci hi,” a ci hi. Ama zi Jezebel in a hanthot Ahab bangin Topa’ muhna-ah a sia a gamta dingin amahmah a kipiatawm mi kuamah dang om lo hi. Topa in Israel mite’ mai-ah a hawlkhiat Amor mite mah bangin milimte zui-in a kihhuai mahmahin a gamta hi. Ahab in hih thute a zak ciangin a puante balkek a, a pum tungah puanhampi silhin, an tangin puanhampi tungah lum a, maikhingin a vak kawikawi hi. Tu-in Tishbe khuami Elijah tungah Topa’ thu hong tung a, “Keima mai-ah bangzahin Ahab a kiniamkhiatna na mu hiam? Keima mai-ah amah kiniamkhiat ahih manin ama hun sungin siatna ka tungsak kei ding hi. Ahih hangin a tapa’ hun sungin ama innkuan tungah siatna ka tungsak ding hi,” a ci hi. Kum thum sung Syria le Israel gal kido loin om uh hi. Ahih hangin a kum thumna kumin Israel kumpi Ahab kiangah Judah kumpi Jehoshafat va paisuk hi. Tua ciangin Israel kumpipa in a nasemte kiangah, “Ramothgilead eima a’ hi a, eite pau loin omin Syria kumpipa’ khutsung panin i lakkhiat lohna thu na thei uh hiam?” a ci hi. Tua ciangin amah in Jehoshafat kiangah, “Ramothgilead-ah galsim dingin kei nong zui ding hiam?” a ci hi. Jehoshafat in Israel kumpipa kiangah, “Kei a kipan ka mite le ka sakolte nangma a’ ka hi uh hi,” a ci hi. Tua ciangin Jehoshafat in Israel kumpipa kiangah, “ Topa thu dong masa in,” a ci hi. Tua ciangin Israel kumpipa in kamsangte mihing zali bang khawmin amaute tungah, “Ramothgilead a sim dingin ka kuan ding hiam, ahih kei le ka thuak ding hiam,” a ci hi. Amaute in, “Kuanto in; bang hang hiam cih leh Topa in kumpipa’ khut sungah hong pia ding hi,” a ci uh hi. Ahih hangin Jehoshafat in, “Thu i dot theih ding Topa’ kamsang adang khat beek om nawn lo ahi hiam?” a ci hi. Tua ciangin Israel kumpipa in Jehoshafat kiangah, “ Topa thu i dot theih nading, Imlah’ tapa Mikaiah a kici mi khat omlai hi. Ahih hangin amah in kei’ thu a hoih gen ngei loin a sia gen den ahih manin amah ka mudah hi,” a ci hi. Tua ciangin Jehoshafat in, “Kumpipa in tua bangin ci kei in,” a ci hi. Tua ciangin Israel kumpipa in ulian khat samin, “Manlangin Imlah’ tapa Mikaiah hong paipih in,” a ci hi. Samaria kulhpi lutna ancilna-ah Israel kumpipa le Judah kumpipa Jehoshafat a kumpi tokhom tung uhah tu-in kumpi puan tawh kizemin om uh a, kamsang khempeuh in amau’ mai-ah thu gen uh hi. Tua ciangin Khenaanah’ tapa Zedekiah in ama a dingin sik kite bawl a, “ Topa in hih bangin ci hi: ‘Amaute na zawh matengin hihte tawh Syria mite na nawt ding hi,’ ci hi,” a ci hi. Kamsang khempeuh in zong tua bangmahin genin, “Ramothgilead-ah kuanto inla gualzo in; Topa in kumpipa’ khut sungah hong pia ding hi,” a ci uh hi. Tua ciangin Mikaiah a sam dingin a pai kamtai pa in ama kiangah, “Thu kikhatin kamsangte’ thugen pen kumpipa a dingin a hoihlam ahi hi. Amaute bangin nang zong gen inla, a hoihlamin gen in,” a ci hi. Ahih hangin Mikaiah in, “ Topa a nungta ahih mah bangin, Topa in kei tungah hong gen thu ka gen ding hi,” a ci hi. Kumpipa kiangah amah a tun ciangin kumpipa in ama kiangah, “Mikaiah aw, Ramothgilead-ah galsim dingin i kuan ding hiam, ahih kei le i thuak ding hiam?” a ci hi. Tua ciangin amah in dawngin, “Kuanto inla va gualzo ve. Topa in kumpipa’ khut sungah hong pia ding hi ven’,” a ci hi. Ahih hangin kumpipa in ama kiangah, “ Topa’ min tawh thudang gen loin thuman bek kei tungah nong gen nading bangzah vei hong thuhilh ding ka hi hiam?” a ci hi. Tua ciangin amah in, “Tuucing a nei lo tuute bangin mualte tungah Israel mi khempeuh a kithehthang ka mu hi. Topa in, ‘Hihte in makai nei lo hi; amaute lungnuam takin a inn ciat uhah ciah hen,’ ci hi,” a ci hi. Tua ciangin Israel kumpipa in Jehoshafat kiangah, “Amah in kei’ thu a hoih gen loin a sia gen ding hi, nang kiangah hong ci khin hi lo ka hi hiam?” a ci hi. Tua ciangin Mikaiah in, “Tua ahih ciangin Topa’ thu ngai in: Topa a kumpi tokhom tungah tu-in, ama taklam le a veilamah vantung mihonpi a ding ka mu hi. Tua ciangin Topa in, ‘Amah kuanto-in Ramothgilead-ah a va sih nadingin kua in Ahab va zol ding hiam?’ ci hi. Khat in thu khat genin adang khat in thudang khat gen hi. Tua ciangin kha khat hong madawkin Topa’ mai-ah ding a, ‘Keimah in amah ka va zol ding hi,’ ci hi. Topa in ama kiangah, ‘Bang lam tawh zol ding na hi hiam?’ a ci hi. Amah in, ‘Keimah paikhia-in, ama kamsangte khempeuh sungah a zuau kha ka va hi ding hi,’ ci hi. Tua ciangin amah in, ‘Nangmah in amah a va zol ding na hi a, nangmah in na zo ding hi; paikhia inla tua bangin va hih in,’ ci hi. Tua ahih ciangin tu-in en in, Topa in hih na kamsangte khempeuh’ sungah zuaugen kha khat koih khin hi. Topa in nang tawh kisai-in a sia gen khin hi,” a ci hi. Tua ciangin Khenaanah’ tapa Zedekiah a nai-ah hong pai-in Mikaiah a paang bengin, “Nang’ tungah thu a gen dingin Topa’ kha in cikin kei hong nusia-in nang kiang hong tung ahi hiam?” a ci hi. Tua ciangin Mikaiah in, “En in, nangmah a bu dingin inndei nungah na pai ni ciangin na thei ding hi,” a ci hi. Tua ciangin Israel kumpipa in, “Mikaiah man unla, khuapisung a ukpa Amon le kumpipa’ tapa Joash kiangah paipih kik un. Tua ciangin, ‘Kumpipa in hih bangin ci hi: “Hih mipa thong sungah koih unla, lungnuamin kei kong ciahkik matengin anletui tawmno cik bek tawh vak un,” ci hi,’ va ci un,” a ci hi. Tua ciangin Mikaiah in, “Lungnuam takin nong ciahkik leh Topa in kei’ tungtawnin thu hong gen lo ahi hi,” a ci hi. Tua ciangin amah in, “A kuamah peuh in hih ka thugen za un,” cithuah lai hi. Tua ahih ciangin Israel kumpipa le Judah kumpipa Jehoshafat, Ramothgilead-ah kuanto uh hi. Tua ciangin Israel kumpipa in Jehoshafat kiangah, “Kei ka mel seelin gal sungah kong kuan ding a, ahih hangin nangmah in na kumpi puante nong silh ding hi,” a ci hi. Tua ahih ciangin Israel kumpipa in a mel seelin gal sungah kuan hi. Tu-in Syria kumpipa in ama leeng a uk mi sawmthum le nihte thu pia-in, “A neu ahi a, a lian tawh ahi zongin kido loin, Israel kumpipa bek tawh na kido ding uh hi,” a ci hi. Leeng a ukte in Jehoshafat a muh uh ciangin amaute in, “Israel kumpipa hi taktak hi,” a ci uh hi. Tua ahih ciangin amah a do dingin amaute kihei uh hi; tua ciangin Jehoshafat awngkhia hi. Israel kumpipa ahih lohna leeng a ukte in a theih uh ciangin amah a delhna panun amaute nungkik uh hi. Ahih hangin mi khat in a thal mawk lot a, a galhiam awmdal thep kikalah lutin Israel kumpipa kha hi. Tua ahih ciangin amah in a leeng hawlpa kiangah, “Kei liam ka hih manin hong kihei inla, gal sung panin hong puakhia in,” a ci hi. Tua ni-in galkidona lian a, nitak a a sih dong Syria-te’ lam maingatin a leeng sungah Israel kumpipa kingamin a om hi. A liamma panin a si luangte leeng taw lamah luangkhia hi. Nitum pawlin galkapte lakah kikona khat hong om a, “Mi khempeuh ama khuapi-ah, mi khempeuh ama gamah!” kici hi. Tua ahih ciangin kumpipa si a, Samaria-ah kipaipih a, amaute in Samaria-ah kumpipa vui uh hi. Tua ciangin amaute in Samaria bual gei-ah a leeng sil uh a, Topa in a gensa thu tawh kizui-in uite in a sisan liak tumin numei paktatte tua sungah kisil uh hi. Tu-in Ahab’ gamtatna a omlaite, a hih khempeuh, ama lamsa saiha inn, le ama lam khuapi khempeuh, Israel Kumpite’ Khang Tangthu Laibu sungah kigelh hi. Tua bangin Ahab si a, ama tangin a tapa Ahaziah in uk hi. Israel kumpi Ahab’ kum lina kumin Asa’ tapa Jehoshafat in Judah gamah uk ding kipan hi. Gam uk dingin a kipatin Jehoshafat kum sawmthum le nga pha a, Jerusalem-ah kum sawmnih le nga sung uk hi. Ama nu’ min Azubah hi a, Shilhi’ tanu ahi hi. Amah in a pa Asa’ khekhap tawn a, tua lampi panin pial loin, Topa’ muhna-ah a manin gamta hi. Ahi zongin mualtung a biaknate kilakhia lo a, mite in tuate tungah biakna pia lai-in paknamtui hal uh hi. Jehoshafat in Israel kumpipa tawh zong kilemna a bawl hi. Tu-in Jehoshafat’ gamtatna a omlaite, amah in a lah a thahatna, le amah in a galdona, Judah Kumpite’ Khang Tangthu Laibu sungah kigelh hi. A pa Asa’ hun lai-in a omlai pasal paktat pawlte amah in gam sung panin beisak hi. Edom-ah kumpi om lo a, Judah kumpipa’ khutnuai-a a huhpa khat in uk hi. Jehoshafat in kham zongin Ofir-ah a pai dingin Tarshish teembawte bawl hi. Ahih hangin Eziongeber-ah teembawte sia ahih manin amaute pai lo uh hi. Tua ciangin Ahab’ tapa Ahaziah in Jehoshafat kiangah, “Teembawte sungah nangma nasemte tawh keima nasemte paikhawm sak in,” a ci hi. Ahih hangin Jehoshafat ut lo hi. Tua ciangin Jehoshafat si a, David khuapi Jerusalem-ah a pate tawh kivui hi. Tua ciangin ama tangin a tapa Jehoram in a uk hi. Judah kumpipa Jehoshafat’ kum sawm le sagihna kumin Ahab’ tapa Ahaziah in Samaria panin Israel tungah uk ding kipan a, amah in Israel tungah kum nih sung uk hi. Topa’ muhna-ah amah a sia gamta a, ama nu, le ama pa, le Israel a khialsak Jeroboam’ khekhap mah tawn hi. Amah in Baal na semin bia a, a pa mah bangin a hihna khempeuhah Israel Pasian, Topa hehsak hi. Ahab a sih khit ciangin Moab gam in Israel lehdo hi. Samaria-a a inndei tungnung innliim panin Ahaziah kia-in a liam hi. Tua ahih ciangin amah in kamtaite sawlin amaute kiangah, “Pai un, hih natna panin ka damkikzo ding hiam cih thu Ekron pasian, Baalzebub kiangah va dong un,” a ci hi. Ahih hangin Topa’ vantungmi in Tishbe mi Elijah kiangah, “Ding in, Samaria kumpipa’ kamtaite a dawn dingin paito-in amaute kiangah, ‘Ekron pasian, Baalzebub kiangah thu a dong dingin na pai nadingun Israel sungah Pasian om nawn lo ahi hiam?’ ci in. Tua ahih ciangin Topa in hih bangin ci hi: ‘Nang pen tu-a na liamna panin na damkikzo nawn kei ding a, na si taktak ding hi, ci hi,’ ci in,” a ci hi. Tua ahih ciangin Elijah zong pai-in a gen hi. Kamtaite zong kumpipa kiangah hong ciahkik uh a, amah in amaute kiangah, “Bang hangin hong ciahkik na hi uh hiam?” na ci hi. Tua ciangin amaute in ama kiangah, “Kote a dawn dingin mi khat hong pai-in kote kiangah, ‘Note hong sawl kumpipa kiangah paikik unla, Topa in hih bangin ci hi: Ekron pasian, Baalzebub kiangah thu a dong dingin mi na sawl nadingin Israel sungah Pasian om nawn lo ahi hiam? Tua ahih ciangin tu-a na liamna panin na damkikzo nawn kei ding a, na si taktak ding hi,’ hong ci hi,” a ci uh hi. Amah in amaute kiangah, “Note a dawn dingin hong pai-in hih thute a gen pa a bangci mi ahi hiam?” a ci hi. Amaute in amah dawngin, “Amah in samulpuan khat silh a, a kawngah savun kawnggak gak hi,” a ci uh hi. Tua ciangin amah in, “Amah pen Tishbe mi Elijah ahi hi,” a ci hi. Tua ciangin kumpipa in ama kiangah mihing sawmnga a ukpa a mihing sawmnga tawh a sawl hi. Mual dawn khatah a tu Elijah kiangah amah paito-in ama kiangah, “Pasian’ mipa aw, kumpipa in, ‘Hong paisuk hen,’ ci hi,” a ci hi. Ahih hangin Elijah in mihing sawmnga a ukpa dawngin, “Kei pen Pasian’ mi khat ka hih leh, vantung panin meikuang hong paisuk hen la, nang le na mihing sawmngate hong kangtum hen,” a ci hi. Tua ciangin vantung panin meikuang hong paisukin amah le a mihing sawmngate a kangtum hi. Tua ciangin kumpipa in ama kiangah mihing sawmnga a uk adang khat a mihing sawmnga mah tawh sawlkik hi. Tua ciangin amah paito-in ama kiangah, “Pasian’ mipa aw, kumpipa’ thupiakna hih bang ahi hi: ‘Manlang takin hong paisuk in,’ cihna ahi hi,” a ci hi. Ahih hangin Elijah in amaute dawngin, “Kei pen Pasian’ mi khat ka hih leh, vantung panin meikuang hong paisuk hen la, nang le na mihing sawmngate hong kangtum hen,” a ci hi. Tua ciangin vantung panin Pasian’ meikuang hong paisukin amah le a mihing sawmngate a kangtum leuleu hi. Tua ciangin kumpipa in mihing sawmnga a uk a thumna pa a mihing sawmnga mah tawh sawl leuleu hi. Tua ciangin mihing sawmnga a uk a thumna pa paito a, Elijah’ mai-ah hong pai-in khukdinin hong puk a, amah kunh-in, “Pasian’ mipa aw, nangma tungah kong thum hi, keima nuntakna le nangma nasem hih mihing sawmngate’ nuntakna pammaih sa-in hong hehpih in. En in, vantung panin meikuang hong paisuk a, mihing sawmnga a uk a masa nihte a mi sawmnga tuak uh tawh kangtum hi. Ahih hangin ka nuntakna pammaih sa-in hong hehpih in,” a ci hi. Tua ciangin Topa’ vantungmi in Elijah kiangah, “Amah tawh paisuk in; amah kihta kei in,” a ci hi. Tua ahih ciangin amah dingin kumpipa kiangah amah tawh paisuk a, tua ciangin ama kiangah, “ Topa in hih bangin ci hi: ‘Nangmah in Ekron pasian, Baalzebub kiangah thu a dong dingin kamtaite na sawl khin hi. Thudot nading Israel sungah Pasian om nawn lo ahi hiam? Tua ahih ciangin tu-a na liamna panin nang na damkikzo nawn kei ding a, na si taktak ding hi,’ ci hi,” a ci hi. Tua ahih ciangin Elijah’ gensa Topa’ kammal tawh kizui-in amah si hi. Ahaziah in tapa nei lo ahih manin Judah kumpipa Jehoshafat’ tapa Jehoram’ kum nihna kumin, a sanggampa Joram ama tangin kumpi a suak hi. Ahaziah’ gamtatna a sepsa a omlaite, Israel Kumpite’ Khang Tangthu Laibu sungah kigelh hi. Topa in pingpei-in vantungah Elijah a lak ding lai-in Elijah le Elisha-te Gilgal panin inn zuanin lamkal a om ahi uh hi. Elijah in Elisha kiangah, “Hih lai-ah khawl in, kong thum hi; bang hang hiam cih leh Topa in Bethel ciang dong kei hong sawl hi,” a ci hi. Ahih hangin Elisha in, “ Topa nungta a, nangmahmah na nuntak mah bangin, nang kong nusia ngei kei ding hi,” a ci hi. Tua ahih ciangin amaute Bethel dongah paisuak uh hi. Tua ciangin Bethel-ah a om kamsang honkhat Elisha kiangah hong pai-in ama kiangah, “ Topa in tuni-in nangma kiang panin na topa a lakkhiat ding na thei hiam?” a ci uh hi. Tua ciangin amah in, “Hi hi, ka thei hi; bangmah gen nawn kei un,” a ci hi. Tua ciangin Elijah in Elisha kiangah, “Elisha aw, hih lai-ah khawl in, kong thum hi; bang hang hiam cih leh Topa in Jerikho-ah kei hong sawl hi,” a ci hi. Ahih hangin amah in, “ Topa nungta a, nangmahmah na nuntak mah bangin, nang kong nusia ngei kei ding hi,” a ci hi. Tua ahih ciangin Jerikho-ah amaute tung uh hi. Jerikho-ah a om kamsang honkhat in Elisha hong naihin ama kiangah, “ Topa in tuni-in nangma kiang panin na topa a lakkhiat ding na thei hiam?” a ci uh hi. Tua ciangin amah in dawngin, “Hi hi, ka thei hi; bangmah gen nawn kei un,” a ci hi. Tua ciangin Elijah in ama kiangah, “Hih lai-ah khawl in, kong thum hi; bang hang hiam cih leh Topa in Jordan-ah kei hong sawl hi,” a ci hi. Ahih hangin amah in, “ Topa nungta a, nangmahmah na nuntak mah bangin, nang kong nusia ngei kei ding hi,” a ci hi. Tua ahih ciangin amaute a nihun pai lai uh hi. Kamsang mihing sawmnga in zong zui uh a, amau tegel Jordan gei-ah a din laitakun a kiang panun a gamla simah kamsangte a ding uh hi. Tua ciangin Elijah in a puantualpi suahin zial a, tua tawh a tui sat hi. Lei keu tungah amau tegel a pai theih matengun a pang khat le a pang langkhatah a tui kikhen hi. Amaute a galkah khit uh ciangin Elijah in Elisha kiangah, “Nang kiang panin kei hong kilak khiat ma-in nang a dingin kong hihsak ding na deih hong gen in,” a ci hi. Tua ciangin Elisha in, “Kong thum hi, kha thu-ah na vangliatna a zah nih hong luahsak in,” a ci hi. Tua ciangin amah in, “A haksa na khat nong ngen hi. Ahi zongin nangma kiang panin kei hong kilak laitakin kei nong muh leh nang a dingin tua thu hong piang ding hi. Ahih hangin kei nong muh kei leh tua bangin hong piang lo ding hi,” a ci hi. Tua ciangin amaute a pai kawmkawm a kiho laitakun, mei leeng khat le mei sakolte in amaute nih a khen hi. Tua ciangin vantungah Elijah pingpei-in paito hi. Tua ciangin Elisha in tua mu-in amah kiko a, “Ka pa, ka pa! Israel mite a hupipa! Nang pai ta maw!” a ci hi. Tua ciangin amah in Elijah mu nawn lo hi. Tua ciangin Elisha in a dah manin a puan balkekin phel nih a suak hi. Tua ciangin amah in Elijah tung panin a kiakhia puan tawm a, kilehin Jordan gun pangah a ding hi. Tua ciangin amah in ama tung panin a kiakhia Elijah’ puan la-in tui sat a, “Elijah’ Pasian, Topa koi-ah om na hi hiam?” a ci hi. Amah in tui a sat khit ciangin a pang khat le a pang langkhatah a tui kikhen hi. Tua ciangin Elisha pai-in a galkah hi. Tu-in Jerikho-ah a om kamsangte in amah a muh uh ciangin amaute in, “Elijah’ vangliatna Elisha’ tungah om hi,” a ci uh hi. Tua ciangin amah a dawn dingin amaute hong pai uh a, ama mai leilakah amaute a kun uh hi. Tua ciangin amaute in ama kiangah, “Tu-in en in, a thahat na nasem mihing sawmnga ka om uh hi; kong thum uh hi, kote hong paisak inla na topa hong zongsak in. Topa’ kha in amah manin mualtung ahih kei leh guam sungah amah khia hi kha ding hi,” a ci uh hi. Tua ciangin amah in, “Na zong kei ding uh hi,” a ci hi. Ahih hangin amaute in amah a maizum dongin a cih teitei uh ciangin amah in, “Pai un,” a ci hi. Tua ahih ciangin amaute mihing sawmnga a pai uh hi. Amaute in ni thum sung amah zong uh a, ahih hangin amah mu zo lo uh hi. Tua ciangin amah Jerikho-ah a khawl sungin ama kiangah amaute hong paikik uh a, amah in amaute kiangah, “Note kiangah, ‘Pai kei un,’ hong ci hi lo ka hi hiam?” a ci hi. Tu-in khuapi mite in Elisha kiangah, “En in, topa in na muh bangin, hih khuapi omzia nuam hi. Ahih hangin a tui sia a, hih gamah kipung thei lo hi,” a ci uh hi. Amah in, “Hai thak khat hong paipih unla, a sungah ci koih un,” a ci hi. Tua ahih ciangin amaute in ama kiangah paipih uh hi. Tua ciangin tuinakah amah pai-in a sungah ci lawnin, “ Topa in hih bangin ci hi: Hih tui a hoihin ka bawl khin hi. Tu-a kipanin sihna ahi a, tatolhna ahi zongin piangsak nawn lo ding hi,” a ci hi. Tua ahih ciangin Elisha’ kampauna tawh kizui-in tuni dongin a tui hoih hi. Amah tua lai panin Bethel-ah paito hi. Lampi-ah a paitoh laitakin khuapi panin naupangneu pawlkhat hong paikhia-in amah zahko uh a, “Paito in, nang lukolh pa” a ci uh hi. Tua ciangin amah a kiimah khuadak a, amah in amaute a muh ciangin Topa’ min tawh amaute a samsia hi. Tua ciangin gamlak panin vompi nih hong pai-in naupang sawm le nih balnen hi. Tua lai panin amah Karmel Mual-ah paisuak a, tua ciangin Samaria-ah a ciahkik hi. Judah kumpi Jehoshafat’ kum sawm le giatna kumin Samaria sung Israel tungah Ahab’ tapa Joram kumpi suak a, amah in kum sawm le nih sung uk hi. Ama nu le ama pa zahin a siatloh hangin Topa’ muhna-ah amah a sia gamta hi. Amah in a pa’ bawlsa Baal biakna song koihkhia tei a, ahi zongin amah in Israel a khialsak Nebat’ tapa Jeroboam’ khialhna mah pomlai hi; tua panin amah kihemkhia lo hi. Moab kumpipa Mesha pen tuu khawi pa ahi hi. Amah in Israel kumpipa tungah kum simin tuuno tul zakhat, le tuutal tul zakhat’ mul a piak ding ahi hi. Ahih hangin Ahab a sih khit ciangin Moab kumpipa in Israel kumpipa lehdo hi. Tua ahih ciangin tua laitakin Samaria panin kumpi Joram kuankhia-in Israel mi khempeuh khawm hi. Tua ciangin amah pai-in Judah kumpi Jehoshafat kiangah thu zasak a, “Moab kumpipa in kei hong lehdo hi; Moab gam a sim dingin kei tawh nong kuan ding hiam?” a ci hi. Tua ciangin amah in, “Kong kuan ding hi; keimah a kipan ka mite le ka sakolte nangma a’ ka hi uh hi,” a ci hi. Tua ciangin amah in, “Koi lam tawnin kuan ding ihi hiam?” a ci hi. Joram in dawngin, “Edom gam lam tawnin i kuan ding hi,” a ci hi. Tua ahih ciangin Judah kumpipa le Edom kumpipa tawh Israel kumpipa a kuan hi. Amaute ni sagih sung a kual pai khit uh ciangin galkapte hitaleh amaute a zui ganhingte a’ ding hitaleh tui om lo hi. Tua ciangin Israel kumpipa in, “Ala! Moab kumpipa’ khut sungah a hong piak dingin Topa in ei kumpi thumte hong sam hi,” a ci hi. Tua ciangin Jehoshafat in, “Ama tungtawnin Topa’ tungah thu i dot theih nadingin hih lai-ah Topa’ kamsang om lo ahi hiam?” a ci hi. Tua ciangin Israel kumpipa’ nasemte khat in dawngin, “Elijah a huhpa om a, Shafat’ tapa Elisha ahi hi,” a ci hi. Tua ciangin Jehoshafat in, “Amah pen Topa’ kamsang man taktak ahi hi,” a ci hi. Tua ahih ciangin Israel kumpipa le Jehoshafat le Edom kumpipa ama kiangah paisuk uh hi. Tua ciangin Elisha in Israel kumpipa kiangah, “Nang tawh bang kisai ka hi hiam? Na nu’ kamsangte le na pa’ kamsangte’ kiangah pai in,” a ci hi. Ahih hangin Israel kumpipa in ama kiangah, “Hilo hi; Moab’ khut sungah hong piak dingin ko kumpi thumte a hong sampa pen Topa ahi hi,” a ci hi. Tua ciangin Elisha in, “Ama na ka sep Vanglian Topa a nungta ahih mah bangin, Judah kumpipa Jehoshafat thupi ngaihsutna nei lo hi leng nang hong en loin, zong kong mu kei ding hi. Ahi zongin tu-in lasakna a tumsiam khat hong paipih in,” a ci hi. Lasakna a tumsiam pa in a tum ciangin Topa’ vangliatna ama tungah hong tung hi. Tua ciangin amah in, “ Topa in hih bangin ci hi: ‘Hih a keu lui taw pen tuilite tawh a kidimin ka bawl ding hi,’ ci hi. Bang hang hiam cih leh Topa in hih bangin ci hi: ‘Huih ahi a, guah ahi zongin na mu kei ding a, ahih hangin nangmah in na dawn ding, na gan hon, le na ganpite in a dawn dingin lui taw pen tui tawh kidim ding hi,’ ci hi. Hih pen Topa’ muhna-ah a thuneu khat ahi hi. Amah in Moab mite zong nangma khut sungah hong pia ding a, nangmah in kulhpi a nei khuapi khempeuh, le khuapi deihhuai khempeuh zo-in, singkung hoih khempeuh phukin, tuinak khempeuh na khakcip ding a, leitang hoih khempeuh suangtum tawh na kidimsak ding hi,” a ci hi. A zingsang ciangin biakpiak hunin, gam sungteng tui tawh a kidim matengin Edom panin tui hong luang hi. Amaute a sim dingin kumpite a kuantohna thu Moab mite khempeuh in a zak uh ciangin, a moipen panin a hampen dongin galhiam a tawi thei khempeuh kisamkhia uh a, gamgi-ah kikhawm uh hi. A zing ciang zingsang tungin amaute tho-in, tui tungah ni a taan ciangin, Moab mite in amau’ galkhatah a om tuite pen sisan bangin a sanin mu uh hi. Tua ahih ciangin amaute in, “Hua pen sisan ahi hi; kumpite khatlekhat kido-in, khatlekhat kithat hi taktak ding hi. Tua ahih ciangin tu-in, Moab-te aw, vankinusiate va la ni!” a ci uh hi. Ahih hangin Israel-te’ giahphual ah amaute a tun uh ciangin, amaute’ mai-ah a taikhiat matengin Israel mite hong kipanin Moab mite a do uh hi. Tua ciangin amaute mainawtin pai-in a paikawmun Moab mite that uh hi. Tua ciangin amaute in khuapite lawnthal uh a, a suang in a khuhcip dongin leitang tung khempeuhah mi khempeuh in suang lawn uh hi. Amaute in tuinak khempeuh khakcip uh a, singkung hoih khempeuh phuk uh hi. Kirhareseth-ah a suangtumte bek a om dongin suanglotna a tawite in umcihin vatgawp uh hi. Moab kumpipa in a lelhlam a kitheih ciangin, Edom kumpipa’ san tak a phukhia dingin namsau tawi mihing zasagih a la hi. Ahih hangin amaute in phukhia zo lo uh hi. Tua ciangin amah in ama tangin a uk ding a ta upa pen la-in kulh tungah meihal biakna-in a pia hi. Israel mite in tua bangin a gamtatna a muh uh ciangin a lungsim uh sukha mahmah a, amau’ kiang panin nungkikin a gamah a ciahkik uh hi. Tu-in kamsang honte sung pan mi khat’ zi Elisha’ tungah kiko-in, “Na nasem ka pasal si hi. Na nasempa in Topa a zahtakna na thei hi. Ahih hangin ka tapate nih sila dingin a la dingin a leibatna pa hong pai hi,” a ci hi. Tua ciangin Elisha in tua numei kiangah, “Nang a dingin bang hong hihsak thei ding ka hi hiam? Inn sungah bang nei na hi hiam?” a ci hi. Tua ciangin amah in, “Na nasemnu in sathau biing khat cih simloh inn sungah bangmah dang nei lo hi,” a ci hi. Tua ciangin amah in, “A pua-ah paikhia inla, beel hawm a tawm lua lo, na vengte khempeuh’ beel va kawm in. Tua ciangin sungtumin, nang le na tapate kong kikhaknelh unla, hih beelte khempeuh sungah sung in. Beel khat a dim simin tuamkoih pahpah in,” a ci hi. Tua ahih ciangin ama kiang panin tua numei paikhia-in amah le a tapate kong kikhaknelh uh hi. Amah in a sun’ laitakin a tapate in ama kiangah a beelte paipih uh hi. Beelte a dim ciangin amah in a tapa khat kiangah, “Beel dang khat hong paipih in,” a ci hi. Tua ciangin a tapa in, “Beel adang om nawn lo hi,” a ci hi. Tua ciangin sathau a luan a khawl hi. Tua nu hong pai-in Pasian’ mipa kiangah a thu teng gen a, tua ciangin amah in, “Pai in; a sathau zuakin na leibate loh in. Nang le na tapate, a omlaite tawh na nungta ding uh hi,” a ci hi. Ni khat Shunem-ah Elisha paisuak a, tua lai-ah a hau numei khat tengin tua nu in an ne dingin amah a sam hi. Tua ahih ciangin amah in tua lam a nawk peuhpeuh ciangin an ne dingin tua lai-ah baang zel hi. Tua ciangin tua numei in a pasal kiangah, “Tu-in en in, hih lai mun hong nawk tawntungpa pen Pasian’ mi siangtho hi, ci-in ka thei hi. Eite kiangah amah hong pai peuhpeuh ciangin a tuntheih nadingin innkhumzangah kawm a nei inndeineu khat bawlin tua sungah ama a dingin lupna khat, sabuai khat, tutphah khat, le meivak khat koihsak ni,” a ci hi. Nikhat amah tua lai-ah hong pai-in inndei sungah lutin tua lai-ah tawlnga hi. Tua ciangin amah in a nasempa Gehazi kiangah, “Hih Shunem mi sam in,” a ci hi. Amah in tua numei a sap ciangin ama mai-ah tua nu hong ding hi. Tua ciangin Elisha in ama kiangah, “Tu-in tua nu kiangah hih bangin gen in: Thei in, kote a dingin hih haksatna khempeuh na thuak hi. Nang a dingin bang hong kihihsak ding deih na hi hiam? Kumpipa kiang ahih kei leh galkap a ukpa kiangah nang tangin thu khat peuhpeuh hong kigensak ding na deih a om hiam?” a ci hi. Amah in dawngin, “Kei pen ka mipihte lakah teng ka hih manin bangmah ka kisam kei hi,” a ci hi. Tua ciangin amah in, “Tua bang ahihleh tuanu a dingin bang kihihsak thei ding ahi hiam?” a ci hi. Gehazi in dawngin, “Thu khat bek om hi. Tua nu in tapa nei lo a, a pasal teekta hi,” a ci hi. Amah in, “Tua nu sam in,” a ci hi. Amah in tua nu a sap ciangin kongkalai-ah a hong ding hi. Tua ciangin amah in, “A hun hong tun ciangin tapa khat na tawi ding hi,” a ci hi. Tua ciangin tua nu in, “Hilo hi, ka topa, Pasian’ mipa aw; na nasemnu tungah zuau kei in,” a ci hi. Ahih hangin tua nu in nau paii a, Elisha in ama tungah a gensa bangin a hun a tun kik ciangin amah in tapa khat a nei hi. Naupang a gol ciangin ni khat a pa kiang anlate lakah a pai hi. Tua ciangin amah in a pa kiangah, “Aw, ka lutang, ka lutang!” a ci hi. A pa in a nasempa kiangah, “A nu kiangah va pua in,” a ci hi. Amah in domin a nu kiangah a paipih ciangin a ang sungah sun dong naupang tawi a, tua ciangin a si hi. Tua ciangin tua nu paito-in Pasian’ mipa lupna tungah amah koih a, amah kong khaknelhin a paikhia hi. Tua ciangin amah in a pasal samin, “Manlang takin Pasian’ mipa kiangah pai-in kong ciahkik theih nadingin nasemte khat le late khat hong puak in,” a ci hi. Tua ciangin amah in, “Bang hangin tuni-in ama kiangah pai ding na hi hiam? Khadet ni ahi a, Sabbath ni ahi zongin hi lo hi,” a ci hi. Amah in, “Hong hoih na ding hi,” a ci hi. Tua ciangin amah inla van vawhin a nasempa kiangah, “Gan nawh in; kong gen kei nakleh kei a dingin a pai khiamsak kei in,” a ci hi. Tua ahih ciangin amah ding khia a, Karmel Mual a, Pasian’ mipa kiangah a pai hi. Pasian’ mipa in amah hong pai a muh ciangin a nasempa Gehazi kiangah, “En in, galah Shunem nu hong pai hi. Amah a dawn dingin thakhatin va tai inla ama kiangah, ‘Na dam hiam? Na pasal a dam hiam? Naupang a dam hiam?’ va ci in,” a ci hi. Tua ciangin tua nu in, “Hoih hi,” a ci hi. Tua ciangin Pasian’ mipa kiang mualtungah tua nu a tun ciangin tua nu in ama khe len hi. Tua ciangin amah a sawnkhia dingin Gehazi hong pai hi. Ahih hangin Pasian’ mipa in, “Amah tuaci omsak in; bang hang hiam cih leh amah nakpitakin lungkham hi. Topa in kei tungah a thu hong im a, kei kiangah hong gen lo hi,” a ci hi. Tua ciangin tua nu in, “Ka topa’ tung pan tapa hong ngen ka hi hiam? Kei hong khem kei in, hong ci hi lo ka hi hiam?” a ci hi. Amah in Gehazi kiangah, “Na kawng gak inla na khutah ka ciangkhut tawi-in pai in. Mi khatpeuh in nang hong hopih leh zong dawng kei in. Tua ciangin naupang’ mai tungah ka ciangkhut va nga in,” a ci hi. Tua ciangin naupang’ nu in, “ Topa nungta a, nangmahmah na nuntak mah bangin, nang kong nusia kei ding hi,” a ci hi. Tua ahih ciangin amah dingin tua nu a zui hi. Gehazi na mapai suakin naupang’ maitang tungah a ciangkhut nga a, ahih hangin awging ahi a, nuntakna lim ahi zongin om lo hi. Tua ahih ciangin amah a dawn dingin hong kileh kikin ama kiangah, “Naupang khanglo nai lo hi,” a ci hi. Inn sungah Elisha hong tun ciangin amah in a lupna tungah a si-in a lum naupang a mu hi. Tua ahih ciangin amah bek lutin kong a kikhaknelh hi. Tua ciangin Topa’ tungah thu ngen hi. Tua ciangin amah paito-in naupang’ tungah bok a, ama kam le naupang’ kam tuahin, a naupang’ mit tungah ama mitte omsak a, a naupang’ khutte tungah ama khutte omsak hi. Tua ciangin ama tungah kikhuang a, naupang a ci hong lum hi. Tua ciangin amah dingto kikin inn sungah khatvei vak kawikawi a, tua ciangin paito-in ama tungah kikhuang leuleu hi. Naupang sagihvei hong hetchiai-in a mit a hak hi. Tua ciangin amah in Gehazi samin, “Shunem numei sam in,” a ci hi. Tua ahih ciangin amah in tua nu a sam hi. Tua nu ama kiangah hong pai ciangin amah in, “Na tapa la in,” a ci hi. Tua nu hong pai-in ama khe-ah pukin leilakah a kun hi. Tua ciangin a tapa la-in a paikhia hi. Tua gam sungah kialpi a tun laitakin Gilgal-ah Elisha hong paikik hi. Kamsangte ama mai-ah tu-in thu a ngaih laitakin amah in a nasemte kiangah, “Beelpi suang unla kamsangte a’ ding meh huan un,” a ci hi. Amaute khat meh zong dingin gamlakah pai a, vatak-um gui khat mu-in tua tung panin a ang dimin umgah lo a, tuate bang hiam cih thei lopi-in hong pai-in mehbeel sungah atnen hi. Tua ciangin amaute in mite’ nek dingin hong thukkhia uh hi. Ahih hangin amaute in meh a nek laitakun amaute kiko-in, “Pasian’ mipa aw, an sungah gu om!” a ci uh hi. Amaute in ne thei lo uh hi. Amah in, “Tua ahihleh a an tawm hong la un,” a ci hi. Tua ciangin amah in beel sungah tua an lawn a, “Amaute in a nek theih nadingin mite a dingin thukkhia un,” a ci hi. Tua ciangin bangmah ci nawn lo hi. Mi khat Baalshalishah panin hong pai-in Pasian’ mipa kiangah anpal anlum, mangbuhham lum sawmnih, le anvui a thak a van sungah hong pua hi. Tua ciangin Elisha in a nasempa kiangah, “Amaute in a nek theih nadingun kamsangte tungah pia in,” a ci hi. Ahih hangin a nasempa in, “Mihing za khatte’ mai-ah keimah in hih bangci lui theih ding ka hi hiam?” a ci hi. Ahi zongin amah in, “Amaute in a nek theih nadingun mite tungah tuate pia in. Bang hang hiam cih leh Topa in, ‘Amaute in ne-in khamval ding uh hi,’ ci hi,” a ci kik hi. Tua ciangin amah in amaute mai-ah tua an a lui hi. Tua ciangin amaute in ne uh a, Topa’ gensa bangin pawlkhat a vallai hi. Syria kumpipa’ galkap a uk Naaman pen kumpipa’ maipha a ngah ulianpi khat ahi hi. Bang hang hiam cih leh Topa in ama hangin Syria mite gualzawhna pia hi. Amah a thahat a vanglian khat hi a, ahih hangin amah a phak ahi hi. Syria mite in a galsimna khat uhah Israel gam panin numeino khat ciahpih uh a, tua nu in Naaman’ zi na’ a sem hi. Amah in a tonu kiangah, “Samaria-ah a om kamsangpa tawh ka topa kimu thei leh! Amah in a phakna damsak ding hi,” a ci hi. Naaman in hih thu a zak ciangin sungtumin a topa kiangah, “Tua bang tua bangin Israel gam numeino in thu gen hi,” ci-in a gen hi. Tua ciangin Syria kumpipa in, “Tu-in pai in. Israel kumpipa kiangah lai khat ka khak ding hi,” a ci hi. Tua ahih ciangin amah pai-in ngun talen sawm, kham shekel tulguk, le pawipuan sawm a keng hi. Amah in Israel kumpipa tungah laikhak keng a, tua sungah, “Hih laikhak na ngah ciangin, ama phakna na damsak theih nadingin ka nasempa Naaman nangma kiangah kong sawlna thu thei in,” a ci hi. Israel kumpipa in a laikhak a sim ciangin amah in a puante balkekin, “Mi khat a phaknatna damsak dingin hih mipa in kei tungah hih thu hong puak nadingin a that ding le a nungtasak dingin kei, Pasian ka hi hiam? Ngaihsun dih un. Kei tawh kitotna ding a zonna thei un,” a ci hi. Ahih hangin Israel kumpipa in a puante a balkekna thu Pasian’ mipa Elisha in a zak ciangin amah in kumpipa kiangah mi sawlin, “Bang hangin na puante balkek na hi hiam? Israel sungah kamsang khat a omna thu amah in a theih nadingin tu-in kei kiangah amah hong paisak in,” cisak hi. Tua ahih ciangin a sakolte le a leengte tawh Naaman hong pai-in Elisha’ kongah a khawl hi. Tua ciangin Elisha in ama kiangah kamtai khat sawlin, “Pai in la, Jordan gun sungah sagihvei va kisil in. Tua ciangin nangma cilesa a ngei hong bangkikin, nang na siang ding hi,” cisak hi. Ahih hangin Naaman hehin paikhia a, “En un, amah kei kiangah hong paikhia-in, ka gei-ah hong dingin, a Pasian a Topa’ min loin, a natna mun tungah a khut vanin, kei miphak pa hong damsak taktak ding hi, ci-in ka ngaihsun hi. Israel tuite khempeuh sangin Damaskas gam a om Abana le Farpar gun tuite hoihzaw hi lo ahi hiam? Tuate’ sungah kisilin siang thei lo ding ka hi hiam?” a ci hi. Tua ahih ciangin amah kihei-in paikhia hi. Ahih hangin a nasemte a nai-ah hong pai-in ama kiangah, “Ka topa aw, kamsangpa in na lian khat a sem dingin hong sawl hileh sem ding hi lo na hi hiam? Tua ahih ciangin amah in nang kiangah, ‘Kisil inla siang in,’ hong cih ciangin na hih ding bangzah ta-in kilawmzaw hi lo ahi hiam?” a ci uh hi. Tua ahih ciangin Pasian mipa’ kamgen bangin amah paisukin Jordan gun sungah sagihvei kidiah hi. Tua ciangin a cilesa naupangno cilesa bangin a ngei bangkikin amah a siang hi. Tua ciangin Pasian’ mipa kiangah amah le a pawlte khempeuh kileh kikin ama mai-ah ding uh hi. Tua ciangin amah in, “En in, leitung mundang khempeuhah Pasian om loin, Israel sung bekah om hi, ci-in ka thei hi. Tua ahih ciangin tu-in na nasempa tung panin letsong khat hong sang in,” a ci hi. Ahih hangin amah in, “A na ka sep Topa a nungta ahih mah bangin, bangmah kong sang kei ding hi,” a ci hi. Tua ciangin amah in a lakna ding kunh teitei a, ahih hangin amah in nial veve hi. Tua ciangin Naaman in, “Tua ahihleh kong thum hi, na nasempa tungah la-sakol nih puakkhop leitang hong pia in. Bang hang hiam cih leh tu a kipanin na nasempa in meihal biakna ahi a, biakpiakna ahi zongin pasian dangte khat peuhpeuh tungah pia loin Topa’ tung bekah pia ding hi. Ahi zongin hih thu-ah Topa in na nasempa a mawhna hong maisak hen: Rimmon biakinn sungah a bia dingin ka topa a pai ciangin zui ding ka hih manin Rimmon biakinn sungah kei ka kunna thu-ah Topa in a nasempa hong maisak hen,” a ci hi. Amah in ama kiangah, “Nuamtakin pai in,” a ci hi. Ahih hangin ama kiang panin Naaman tawmkhat a pai khit ciangin, Pasian’ mipa Elisha’ nasem Gehazi in, “Ama hong puak nate sang loin ka topa in Syria mi hih Naaman ciahsak mawk hi. Topa a nungta ahih mah bangin, amah nungdelhin ama tung panin na khat peuhpeuh ka ngah ding hi,” a ci hi. Tua ahih ciangin Gehazi in Naaman nungdelh hi. Tua ciangin ama nungah mi khat hong taina Naaman in a muh ciangin amah a dawn dingin a leeng panin kum a, “Thu a hoihkim hiam?” a ci hi. Tua ciangin amah in, “A vekpi-in hoih hi. Ka topa in, ‘Kamsangte nih Efraim mualtung gam panin kei kiangah tu mahmahin hong tung hi. Kong thum hi, amaute tungah ngun talen khat le pawipuan nih pia in,’ a ci dingin hong sawl hi,” a ci hi. Tua ciangin Naaman in, “Talen nih hong sang nuam hoh in,” a ci hi. Tua ciangin amah in a san ding kunh a, ngun talen nih ip nihin henin pawipuan nih tawh, a nasem nihte tungah a guan hi. Tua ciangin amaute in Gehazi’ mai-ah tuate pua uh hi. Tua ciangin mualtungah amah a tun ciangin amah in amaute tung panin tuate la-in inn sungah koih hi. Tua ciangin a mite sawlkhia a, amaute kihem uh hi. Amah sungtumin a topa’ mai-ah ding a, tua ciangin Elisha in ama kiangah, “Gehazi aw, koi-ah pai na hi hiam?” a ci hi. Amah in, “Na nasempa koimah pai lo hi,” a ci hi. Ahih hangin Elisha in ama kiangah, “Nangmah a dawn dingin a leeng tung panin mipa a kihei laitakin nang tawh ka kha omkhawm hi lo ahi hiam? Sum le puante, oliv huante le leenggui lote, tuute le bawngtalte, nasem numeite le nasem pasalte san ding hun ahi hiam? Tua ahih ciangin nangma tung le na suanlekhakte tungah Naaman’ phakna hong belh tawntung ta hen,” a ci hi. Tua ahih ciangin ama omna panin vuk bangin kangin a phakin a paikhia hi. Ni khat, kamsangte khat in Elisha kiangah, “Thei in, nangma khutnuai-a om kote’ tenna mun kote a dingin neulua hi. Kote Jordan-ah hong paisakin kote in singluang khat ciat la-in ka tenna ding uh mun khat ko hong bawl sak in,” a ci uh hi. Tua ciangin amah in dawngin, “Pai un,” a ci hi. Tua ciangin amaute khat in, “Na nasemte tawh kuan kawm ding hong ut in,” a ci hi. Amah in dawngin, “Kong kuan ding hi,” a ci hi. Tua ahih ciangin amaute tawh amah a kuan hi. Jordan a tun uh ciangin amaute in sing phuk uh hi. Ahih hangin khat in singluang a tan laitakin a heitang leengin tui sungah kia hi. Amah kiko-in, “Ala, ka topa! A kikawm hi ve’n,” a ci hi. Tua ciangin Pasian’ mipa in, “Koi lai-ah kia ahi hiam?” a ci hi. Amah in a kiatna mun ama kiangah a lah ciangin amah in ciangkang khat khiakin tua munah lawn a, a heitang laamtosak hi. Tua ciangin amah in, “La to in,” a ci hi. Tua ahih ciangin amah in a khut zanin a heitang a la hi. Khatvei Syria kumpipa le Israel mite kido a, Syria kumpipa le a nasemte thu kikumin, “Tua mun tua munte i panmun ding hi,” a ci hi. Ahih hangin Pasian’ mipa in Israel kumpipa tungah thu puak a, “Syria-te in hong buksim uh ahih manin hih mun na nawk loh nadingin kingaihsun in,” a ci hi. Tua ciangin Israel kumpipa in Pasian’ mipa genna mun kiimah a om mite kiangah mi sawlin hilh kholsak hi. Tua ahih manin tua bangin amaute suakta zelzel uh hi. Tua ciangin hih thu hangin Syria kumpipa nakpitakin patau hi. Amah in a nasemte samin amaute kiangah, “Eite sung panin Israel kumpipa lamah a pangsim mipa hong gen lo ding na hi uh hiam?” a ci hi. Tua ciangin a nasemte khat in, “Kuamah om lo hi, ka topa, kumpipa aw; ahih hangin Israel sungah kamsang Elisha in na lupna inndei sunga na thugente Israel kumpipa tungah gen hi,” a ci hi. Tua ciangin amah in, “Keimah in mi sawlin amah ka mattheih nadingin pai inla, amah a omna mun va thei in,” a ci hi. Tua ciangin ama kiangah, “En in, amah Dothan-ah om hi,” ci-in kigen hi. Tua ahih ciangin amah in sakolte le leengte le galkap hon lianpi khat tua lai-ah a sawl hi. Amaute zanin hong pai-in a khuapi umcih uh hi. Pasian’ mipa’ nasempa zingsangin tho baihin a paikhiat ciangin, en in, khuapi kimkotah sakolte le leengte tawh galkap honpi na om hi. Tua ciangin nasempa in, “Ala, ka topa! Bangcih ding ihi hiam?” a ci hi. Amah in, “Kihta kei in; bang hang hiam cih leh amaute tawh a omte sangin eite tawh a omte tamzaw hi,” a ci hi. Tua ciangin Elisha in thu ngenin, “ Topa aw, kong thum hi; amah in a muh theih nadingin ama mitte honsak in,” a ci hi. Tua ahih ciangin Topa in tangvalpa’ mitte honsak a, tua ciangin amah in mu hi. En in, Elisha’ kimkot mualtung khempeuh sakolte le mei leengte tawh kidim hi. Amah a sim dingin Syria-te hong paisuk ciangin Elisha in Topa kiangah thu ngenin, “Hih mite mittawtna tawh vatgawp in, kong thum hi,” a ci hi. Tua ahih ciangin Elisha’ thungetna bangin amah in mittawtna tawh amaute vatgawp hi. Tua ciangin Elisha in amaute kiangah, “Hih pen a lampi hi lo a, hih zong a khuapi hi lo hi; hong zui un; na zon uh mipa kiangah note kong paipih ding hi,” a ci hi. Tua ciangin amah in Samaria-ah amaute a paipih hi. Amaute Samaria-ah a lut phetin Elisha in, “ Topa aw, amaute in a muh theih nadingun hih mite’ mitte honsak in,” a ci hi. Tua ahih ciangin Topa in amau’ mitte honsak a, tua ciangin amaute in khua mu uh hi. Samaria khua sungah a om ahihna uh thei uh hi. Israel kumpipa in amaute a muh ciangin amah in Elisha kiangah, “Ka pa aw, amaute ka that ding hiam? Amaute ka that ding hiam?” a ci hi. Amah in dawngin, “Amaute na that kei ding hi. Na namsau le na thal tawh loin galmatin na laksate that ding na hi hiam? Amaute in an ne-in tui a dawn khit ciangin a topa uh kiangah a ciahkik theih nadingun amaute’ mai-ah anletui lui in,” a ci hi. Tua ahih ciangin amah in amaute a dingin pawi lianpi khat bawl hi. Amaute in an ne-in tui a dawn khit uh ciangin amaute sawlkhia a, tua ciangin a topa uh kiangah amaute a ciah uh hi. Tua ciangin Israel gam a sim dingin Syria-te hong pai nawn lo uh hi. Tua khit ciangin Syria kumpipa Benhadad in a galkap buppi khawmin paito a, Samaria a umcih hi. Amaute in a umcih hun sungteng, la lutang khat ngun shekel sawmgiat, gam lo-uih bul hai khat ngun shekel nga-in a kizuak dongin Samaria-ah kialpi lianpi a tung hi. Israel kumpipa kulhzangah a pai laitakin numei khat ama tungah kiko-in, “Hong huh in, ka topa, Aw Kumpipa!” a ci hi. Tua ciangin amah in, “ Topa in nang hong huh ding ahih kei leh koi lai panin nang hong huh ding ka hi hiam? An ahi a, leenggahzu ahi zongin nei ka hi hiam?” a ci hi. Tua ciangin kumpipa in tua nu dongin, “Na lungkhamna bang ahi hiam?” a ci hi. Amah in dawngin, “Hih numei in kei kiangah, ‘Tuni-in amah i nek theih nadingin na tapa hong pia in; zing ciangin keima tapa i ne ding hi,’ hong ci hi. Tua ahih ciangin kote in ka tapa’ sa huanin ka ne uh hi. A zing ciangin keimah in ama kiangah, ‘Amah i nek theih nadingin na tapa hong pia in,’ ka ci hi. Ahih hangin tua nu in a tapa na seel hi,” a ci hi. Kumpipa in tua numei’ thugente a zak ciangin ama puante balkek hi. Kulhzangah kumpipa pai kawikawi a, mite khuadakin amah a et uh ciangin amah in a sung lamah puanhampi a silh mu uh hi. Tua ciangin amah in, “Tuni-in Shafat’ tapa Elisha’ lutang a kitankhiat kei taak leh Pasian in kei hong dawm kei ta hen,” a ci hi. Elisha a inn sungah tu a, upate amah tawh tukhawm uh hi. Tu-in kumpipa in ama omna panin mi khat sawlkhia hi. Ahih hangin kamtai pa a tun ma-in Elisha in upate kiangah, “Hih mi that pa in ka lutang a tankhia dingin hong sawlna na mu uh hiam? En un, kamtai pa hong tun ciangin kong khak unla, ama langkhatah khauhtakin kongkhak lencip un. Ama nungah a topa’ kheging hong kiza hi lo ahi hiam?” a ci hi. Amaute tawh amah a kiho laitakin ama kiangah kumpipa hong paisukin, “Hih lungkhamna Topa’ piansak hi lo ahi hiam! Bang hangin Topa in bang khat peuhpeuh a sep ding ngaklai ding ka hi hiam?” a ci hi. Ahih hangin Elisha in, “ Topa’ thu za in. Topa in hih bangin ci hi: Zing ciang tubang hunin Samaria kulhkongpi-ah annel lawh khat shekel khatin kizuak ding a, mangbuhham lawh nih shekel khatin kizuak ding hi, ci hi,” a ci hi. Tua ciangin a ban tungah kumpipa a kingapna galkap ukpa in Pasian’ mipa kiangah, “ Topa mahmah in vantung tawlette hong hong taleh zong, hih bang thu hi thei ding ahi hiam?” a ci hi. Ahih hangin amah in, “Nangma mit mahmah tawh hih thu na mu ding a, ahih hangin nang in na nekha kei ding hi,” a ci hi. Tua laitakin kulhkongpi lutna-ah a phak mi li om hi. Amaute khatlekhat in, “I sih dongin bang hangin hih lai-ah tu ding ihi hiam? Eite, ‘Khuapi sungah lut ni,’ ci lehang, khuapi sungah kialpi om a, tua lai-ah i si ding hi. Hih lai-ah tu lehang lah eite i si veve ding hi. Tua ahih ciangin tu-in hong pai un. Syria-te’ giahphual ah va pai ni. Amaute in eite hong hingkhawi leh eite i nungta ding a, ahih hangin amaute in eite hong that leh zong a si veve ding mah ihi lel hi,” kici uh hi. Tua ahih ciangin amaute Syria-te’ phualah a pai dingin phalvak tungin tho uh hi. Ahih hangin Syria-te’ phual a nawl a tun uh ciangin tua lai-ah kuamah na om nawn lo hi. Bang hang hiam cih leh Topa in leengte, le galkap hon lianpite’ huging Syria galkapte zasak ahih ciangin amaute khatlekhat in, “En un, Israel kumpipa in eite a hong hih dingin Hit kumpite le Egypt kumpite cial hi,” kici uh hi. Tua ahih ciangin amaute phalvak tungin tai-in a puanbukte, a sakolte, le a late uh nusia uh a, a phual uh a tuaci bangmahin nusia-in a suahtak nadingun tai uh hi. Giahphual nawlah hih miphakte hong tun uh ciangin puanbuk khat sungah amaute lutin an ne-in tui dawn uh a, amaute in ngun le kham le puante puakhia-in tuate a seel uh hi. Tua ciangin amaute hong paikikin puanbuk dang khatah lut uh a, tua panin vante puakhia-in seel leuleu uh hi. Tua ciangin amaute khatlekhat in, “A manin i gamta kei hi. Tuni pen thuthak a hoih i theih ni ahi hi. Eite pau loin zingsang khuavak dong ngak lehang gimna i thuak ding hi. Tua ahih ciangin tu-in hong pai un. Eite pai-in kumpipa innkuante kiangah va gen ni,” kici uh hi. Tua ahih ciangin amaute hong pai-in kulhkongpi cingte samin amaute kiangah, “Syria-te’ phualah ka va tung uh a, tua lai-ah kuamah kimu lo, bangmah kiza lo, bangmah om lo; ahih hangin sakolte kikhihin, late kikhihin, puanbukte a om bangbangin om hi,” ci-in a gen uh hi. Tua ciangin kulhkongpi cingte in thu zasak uh a, kumpipa innkuante kiangah hih thute kigen hi. Tua ciangin kumpipa zanin tho-in a nasemte kiangah, “Syria-te in eite’ langkhatah a vaihawmna kong gen ding hi. Eite i kialna amaute in hong thei uh hi. Tua ahih ciangin amaute gamlakah a bu dingin a phual panin paikhia uh a, ‘Khuapi sung panin amaute a paikhiat uh ciangin amaute a hingin manin khuapi sungah i lut ding hi,’ ci-in ngaihsun uh hi,” a ci hi. Tua ciangin a nasemte khat in, “Mi pawlkhat sakol a omlaite sung panin nga paipih sak ni. Hih lai-ah a om eite pen a sisa Israel mihon buppi tawh a kibang lel ihihna i thei hi. Amaute sawlin en dih ni,” a ci hi. Tua ahih ciangin amaute in sakol tung tuang mi nih sam a, kumpipa in Syria galkapte’ nungah amaute sawl a, “Pai-in va thei un,” a ci hi. Tua ahih ciangin amaute Jordan ciang dong va pai uh hi. Syria-te in nawhsa-in a paihkhiat uh puante le nate tawh lamdung khempeuh pak zeizai hi. Tua ciangin kamtaite hong kikin kumpipa kiangah a gen uh hi. Tua ciangin mite paikhia uh a, Syria-te’ phual luh uh hi. Tua ahih ciangin Topa’ gensa bangin annel lawh khat shekel khatin kizuakin, mangbuhham lawh nih shekel khatin kizuak hi. A khut tungah a kingapna pa, a ukpa pen kulhkongpi a ukin kumpipa in seh hi. Mite in kulhkongpi-ah amah nawkpai-in a tung sikin pai uh a, ama kiangah kumpipa a paisuk laitakin Pasian’ mipa gensa bangin amah na si hi. Bang hang hiam cih leh Pasian’ mipa in kumpipa kiangah, “Zing ciang tubang hunin Samaria kulhkongpi-ah mangbuhham lawh nih ciangin shekel khatin kizuak ding a, annel lawh khat ciangin shekel khatin kizuak ding hi,” a cih ciangin galkap ukpa in Pasian’ mipa dawngin, “ Topa mahmah in vantung tawlette hong hong hitaleh zong, hih bang thu hi thei ding ahi hiam?” ci hi. Tua ciangin amah in, “Nangma mit mahmah tawh hih thu na mu ding a, ahih hangin nang in na nekha kei ding hi,” ci hi. Mite in kulhkongpi-ah ama tung sikin pai uh hi. Amah si ahih manin ama tungtawnin tua bangin a kipai ahi hi. Tu-in Elisha in a tapa a hinkiksak numei kiangah, “Ding in; na innkuan tawh kihemkhia inla, na hih theihna peuhpeuhah peem in; bang hang hiam cih leh Topa in kialpi khat tungsak ding a, gam sungah tua kialpi kum sagih sung hong tung ding hi,” ci khinzo hi. Tua ahih ciangin tua numei dingin Pasian’ mipa thugen bangin gamta hi. Tua nu a innkuan tawh pai-in Filistia-te gamah kum sagih sung a peem hi. Kum sagih a cin khit, Filistia-te gam panin tua numei hong ciahkik ciangin, kumpipa kiangah a inn le a leitang a ngen dingin a pai hi. Tua laitakin Pasian’ mipa’ nasem Gehazi tawh kumpipa kiho a, “Elisha’ sepsa na lian khempeuh hong gen in,” a ci hi. Elisha in a sisa mi a hinsakna thu kumpipa kiangah a gen laitakin, a tapa a hinkiksak numei in kumpipa kiangah a inn le a leitang hong ngen hi. Tua ciangin Gehazi in, “Ka topa, Kumpipa aw, hih lai-ah a numei om a, Elisha in a hinkiksak a tapa zong hih lai-ah om hi,” a ci hi. Kumpipa in numei kiangah a dot ciangin tua nu in ama kiangah a gen hi. Tua ahih ciangin kumpipa in a uliante khat sawlin, “Leitang a nusiat ni a kipan tuhun dong lo panin a piang khempeuh tawh ama a’ ahi khempeuh piakik in,” a ci hi. Syria kumpipa Benhadad cina-in a om laitakin Damaskas-ah Elisha hong pai hi. Ama kiangah, “Hih lai-ah Pasian’ mipa hong pai hi,” ci-in a kigen ciangin kumpipa in ama nuai-a ulian Hazael kiangah, “Letsong khat kengin Pasian’ mipa a dawn dingin va pai in. Ama tungtawnin Topa thu va dong inla, ‘Hih natna panin ka damkikzo ding hiam, ci hi,’ va ci in,” a ci hi. Tua ahih ciangin amah a dawn dingin Hazael pai a, Damaskas a na hoih namkim kalaoh puak sawmli, letsong a keng hi. Amah hong tungin ama mai-ah a din ciangin amah in, “Syria kumpipa na tapa Benhadad in nang kiangah kei hong sawlin, ‘Hih natna panin ka damkikzo ding hiam?’ ci hi,” a ci hi. Tua ciangin Elisha in ama kiangah, “Pai in; ama kiangah gen in, ‘Na damkik taktak ding hi,’ va ci in. Ahi zongin amah a sih taktakna ding thu Topa in kei kiangah hong lak khin hi,” a ci hi. Tua ciangin amah a maizum dongin a etna mun mah en denin Hazael sal gega hi. Tua ciangin Pasian’ mipa a kap hi. Tua ciangin Hazael in, “Bang hangin ka topa kap na hi hiam?” a ci hi. Amah in dawngin, “Bang hang hiam cih leh Israel mite tungah nangmah in na bawl ding siatna ka thei hi. Nangmah in amau’ munmuanhuaite mei tawh na hal ding a, namsau tawh amau’ tangvalte thatin, amau’ naupang neute lei na denkhapna ding a, naupaii amau’ numeite na phelkham ding hi,” a ci hi. Tua ciangin Hazael in, “Ui bang ahi lel na nasempa in hih na lian a hih dingin bang ahi hiam?” a ci hi. Elisha in dawngin, “Syria tungah nang kumpi na hih ding thu Topa in kei tungah hong lak khinzo hi,” a ci hi. Tua ciangin Elisha kiang panin amah kihemkhia a, ama kiangah, “Elisha in nang kiangah bang hong ci ahi hiam?” a na ci Benhadad kiangah va tung hi. Tua ciangin amah in dawngin, “Amah in kei kiangah nang na damkik taktakna ding thu hong gen hi,” a ci hi. Ahih hangin amah in a zing ciangin delhphah puan khat la-in tui sungah tua puan diah a, tua puan kawt tawh kumpipa’ maitang tuamcipin a sisak hi. Tua ciangin ama tangin Hazael kumpi a suak hi. Israel kumpi, Ahab’ tapa Joram’ kum ngana kumin, Judah kumpi, Jehoshafat’ tapa Jehoram in uk ding kipan hi. Amah kumpi a suah hunin ama pian’ kum sawmthum le nih pha a, Jerusalem-ah kum giat sung a uk hi. Ahab’ tanu ama zi ahih manin Ahab’ innkuante’ gamtatnasa, Israel kumpite’ lampi mah amah in tawn hi. Topa’ muhna-ah amah a sia gamta hi. Ahi zongin amah in ama tung le a suante tungah ukna a piak ding thu ciam khin ahih manin a nasem David’ hangin Topa in Judah gam susia nuam lo hi. Ama hun sungin Judah gam ukna panin Edom mite lengkhia-in amau a’ ding kumpi khat koih uh hi. Tua ciangin Judah kumpi Jehoram zong a leengte khempeuh tawh Zair-ah a kuan hi. Tua lai-ah Edom mite in amaute na umcih uh a, ahi zongin zanin amaute kipanin amah le a leeng ukte in Edom mite vatgawpin inn-ah a tai uh hi. Tua ahih ciangin tuni dongin Judah gam ukna panin Edom mite leengkhia hi. Tua ciangin tua hun mahin Libnah leengkhia leuleu hi. Jehoram’ gamtatna a omlaite le ama sep khempeuh, Judah Kumpite’ Khang Tangthu Laibu sungah kigelh hi. Tua ciangin Jehoram si a, David khuapi sungah a pate tawh kivui hi. Tua ciangin ama tangin a tapa Ahaziah in uk hi. Israel kumpi, Ahab’ tapa Joram’ kum sawm le nihna kumin, Judah kumpi, Jehoram’ tapa Ahaziah in uk ding kipan hi. Amah in uk ding a kipatin Ahaziah kum sawmnih le nih pha a, amah in Jerusalem-ah kum khat sung uk hi. Ama nu’ min Athaliah hi a, Israel kumpi Omri’ tanu ahi hi. Amah zong Ahab’ innkuante’ makpa ahih manin Ahab’ innkuante’ gamtatsa bangin Topa’ muhna-ah a sia gamta a, Ahab’ innkuante’ lampi mah a tawn hi. Syria kumpipa Hazael tawh gal kido dingin Ahab’ tapa Joram tawh kipawlin Ahaziah a kuan hi. Syria mite in a galkidona mun Ramothgilead-ah Israel kumpi Joram liamsak uh hi. Tua ciangin Syria kumpipa Hazael a sim laitakin Syria mite in amah a liamsakna mate Jezreel khua-ah a kidamsak dingin kumpi Joram ciahkik hi. Jezreel-ah Ahab’ tapa Joram a cina-in om ahih manin a veh dingin Judah kumpi Jehoram’ tapa Ahaziah va paisuk hi. Tua ciangin kamsang Elisha in kamsangte’ sung pan khat samin ama kiangah, “Kithawi inla, hih sathau biing tawi-in Ramothgilead-ah va pai in. Na tun ciangin Nimshi’ tapa Jehoshafat, a tapa Jehu tua lai-ah va zong in. Tua ciangin pai-in a lawmte lak panin a paikhiat ding sawl inla, inndei sungnung khat sungah amah paipih in. Tua ciangin sathau biing la-in ama lu tungah sung inla, ‘ Topa in hih bangin ci hi: Israel tungah kumpi-in sathau kong nilh hi, ci hi,’ va ci in. Tua ciangin kongkhak hong inla tai in; zekai kei in,” a ci hi. Tua ahih ciangin kamsang tangvalpa Ramothgilead-ah pai hi. Amah a tun ciangin, galkap a ukte in thu kikupna na nei uh hi. Tua ciangin amah in, “A ukpa aw, nang tungah thugen ding khat ka nei hi,” a ci hi. Tua ciangin Jehu in, “Kote lakah kua’ tungah nei na hi hiam?” a ci hi. Tua ciangin amah in, “Nangma tung hi, a ukpa aw,” a ci hi. Tua ahih ciangin amah dingin inn khat sungah a paikhawm uh hi. Tua ciangin tangvalpa in ama lu tungah a sathau sungin ama kiangah, “Israel Pasian, Topa in hih bangin ci hi: ‘Israel mite tung, Topa’ mite tungah kumpi-in nang sathau kong nilh hi. Kamsang ka nasemte a thahna le Topa’ nasemte khempeuh a thahna hangin Jezebel’ tungah phu ka laktheih nadingin na topa Ahab’ innkuan na satpuk ding hi. Bang hang hiam cih leh Ahab innkuan sia ding hi. Israel sungah keimah in Ahab innkuan panin sal hitaleh sal ahi lo hitaleh pasal khempeuh ka beisak ding hi. Tua ciangin keimah in Nebat’ tapa Jeroboam innkuan le Ahijah’ tapa Baasha’ innkuan bangin Ahab’ innkuan ka bawl ding hi. Tua ciangin uite in Jezreel khua sungah Jezebel ne-in, kuamah in amah vui lo ding hi,’ ci hi,” a ci hi. Tua ciangin amah in kongkhak hongin a taikhia hi. A topa’ nasemte kiangah Jehu hong pusuah ciangin amaute in ama kiangah, “Thu khempeuh a hoih hiam? Bang hangin hih mihai pa nang kiangah hong pai ahi hiam?” a ci uh hi. Tua ciangin amah in amaute kiangah, “A mipa le a thugen na thei uh hi,” a ci hi. Tua ciangin amaute in, “Tua thu ka thei kei uh hi. Tu-in ko kiangah hong gen in,” a ci uh hi. Tua ciangin amah in, “Tua bang tua bangin amah in kei kiangah thu hong genin, ‘ Topa in hih bangin ci hi: “Israel tungah kumpi-in nang sathau kong nilh hi,” ci hi,’ hong ci hi,” a ci hi. Tua ciangin nawhsa-in mi khempeuh in a puan uh la-in ama din nadingin kahlei tungah phah uh a, tua ciangin amaute in peengkul tumin, “Jehu, kumpi hi,” ci-in a taangko uh hi. Tua ciangin Nimshi’ tapa Jehoshafat, a tapa Jehu in Joram sawmsim hi. (Tu-in Syria kumpi Hazael langpangin Ramothgilead-ah Israel khempeuh tawh khuacingin Joram om hi. Ahih hangin Syria kumpi Hazael tawh a kido lai-in Syria-te in amah a liamsakna mate Jezreel khua-ah a kidamsak dingin Kumpi Joram ciahkik khinta hi.) Tua ahih ciangin Jehu in a ulianpihte kiangah, “Kei hong pawlpih nuam peuhmah in, mi khatpeuh Jezreel-ah pai-in thu a va ko dingin hih khuapi panin kuamah a paikhiatkhak loh nading thei un,” a ci hi. Tua ciangin Jehu a leeng tungah kahin Jezreel-ah pai hi. Bang hang hiam cih leh tua lai-ah Joram lum hi. A tun ciangin Joram’ kiangah a hawh dingin Judah kumpipa Ahaziah na tung khin hi. Tua laitakin Jezreel tausang tungah galvil pa ding a, amah hong pai laitakin Jehu’ pawlte amah in mukhia a, “Mi honkhat ka mu hi,” ci hi. Tua ciangin Joram in, “Sakol tung tuang mi khat la-in amaute a dawn dingin sawl inla, ‘Thuhoih ahi hiam?’ cisak in,” a ci hi. Tua ahih ciangin sakol tung tuangin amah a dawn dingin mi khat pai a, “Kumpipa in hih bangin ci hi: ‘Thuhoih ahi hiam?’ ci hi,” a ci hi. Tua ciangin Jehu in, “Thuhoih tawh bang hih ding na hi hiam? Kihem inla ka nungah hong pai in,” a ci hi. Tua ciangin galvil pa in thu zasakin, “Kamtai pa in amaute kiang ban a, ahih hangin amah hong kilehkik lo hi,” a ci hi. Tua ciangin amah in sakol tung tuang a nihna sawlin amaute kiangah tua pa paisak a, “Kumpipa in hih bangin hong ci khin hi: ‘Thuhoih ahi hiam?’ ci hi,” a ci hi. Tua ciangin Jehu in dawngin, “Thuhoih tawh bang hih ding na hi hiam? Kihem inla ka nungah hong pai in,” a ci hi. Galvil pa in thu zasakkikin, “Amah in amaute va ban a, ahih hangin amah zong hong kilehkik lo hi. A leeng hawlzia pen Nimshi’ tapa Jehu’ hawl tawh kibang hi; bang hang hiam cih leh amah in nakpitakin nawhhawl hi,” a ci hi. Tua ciangin Joram in, “Kithawi un,” a ci hi. Tua ciangin amaute in a leeng kithawisak uh hi. Tua ciangin Israel kumpipa Joram le Judah kumpipa Ahaziah, a sakol leeng tuak uhah tuangin ding khia uh a, Jehu a dawntuah dingin pai uh a, Jezreel mi Naboth’ lo-ah amah tawh kituak uh hi. Joram in Jehu a muh ciangin, “Jehu aw, thuhoih ahi hiam?” a ci hi. Amah in dawngin, “Na nu Jezebel’ paktatnate le aisannate tua zahin a tam laiteng bang thuhoih om thei ding ahi hiam?” a ci hi. Tua ciangin Joram in a sakol kamkaih lehhei-in tai a, Ahaziah kiangah, “Ahaziah aw, gal om!” a ci hi. Tua ciangin Jehu in a tha neih khempeuh tawh a thal keekin Joram’ liangko kikal kap a, a thaltang in a lungtang pailetin a leeng sungah amah a puksuk hi. Jehu in amah a huhpa Bidkar kiangah, “Amah tawmto inla, Jezreel mi Naboth’ neihsa lo lai-ah amah paai in; bang hang hiam cih leh nang le kei, a pa Ahab’ nungah mai kimin i tuan laitakin amah langpangin Topa in hih thu a genna phawk in: ‘Za ni-in Naboth le a tapate a kithahna ka muh taktak mah bangin leitang tung hih munah nang kong thuk ding hi,’ Topa in ci hi. Tua ahih ciangin tu-in Topa’ thugen bangin amah tawmin tua mun leitang tungah amah paai in,” a ci hi. Judah kumpipa Ahaziah in hih thu a muh ciangin Bethhaggan lamah a tai hi. Tua ciangin Jehu in amah delhin, “Amah zong kap un,” a ci hi. Tua ciangin amaute in Ibleam gei, Gur kahtohna san a leeng sungah amah kap uh hi. Ahih hangin amah Megiddo khuapi ciang dong taizo lai a, tua khua-ah a si hi. A nasemte in leeng khat tawh Jerusalem-ah amah pua uh a, David khuapi sung ama hanah a vui uh hi. Ahab’ tapa Joram’ kum sawm le khatna kumin Ahaziah in Judah tungah uk ding a kipan ahi hi. Jezreel khua-ah Jehu hong tun ciangin Jezebel in a thu na za hi. Amah in a mitte zutin a lutang zem a, tawlet-ah khuadak hi. Kulhkongpi-ah Jehu hong lut laitakin Jezebel in, “Nang Zimri! A topa a that pa aw, bang hih a hong pai na hi hiam?” a ci hi. Tua ciangin tawlet lamah Jehu khuadak to-in, “Kei’ lamah kua om na hi uh hiam?” a ci hi. Innsung maangte nih khawng thum khawng in amah hong ensuk hi. Jehu in, “Amah hong lawnsuk un,” a ci hi. Tua ahih ciangin amaute in Jezebel lawnsuk uh hi. A sisan pawlkhat kulh tung le sakolte tungah kitheh a, tua ciangin amaute in amah tuancil uh hi. Tua ciangin amaute sungtumin an ne-in tui a dawn uh hi. Tua ciangin amah in, “Tu-in a kisamsia hih numei tawm unla, phum un. Bangbang ahi ta zongin amah kumpipa’ tanu hibuang hi,” a ci hi. Ahih hangin amah a phum dingin amaute a pai uh ciangin a lu guh le a khete le a khutpeek simloh bangmah dang mu nawn lo uh hi. Amaute hong paikikin Jehu kiangah a gen uh ciangin amah in, “Hih pen a nasempa, Tishbe mi Elijah tungtawnin Topa’ gensa ahi hi: ‘Jezreel khua sungah uite in Jezebel’ sa ne ding uh hi. Tua ciangin Jezebel’ luanghawm pen Jezreel khuasung lei maitang tungah eklei tawh kibang ding hi. Tua ahih manin kuamah in, “Hih pen Jezebel hi,” cih thei lo ding hi,’ ci hi,” a ci hi. Tu-in Ahab’ suanlekhak mihing sawmsagih Samaria-ah teng uh hi. Tua ahih ciangin Jehu in laikhakte gelh a, khuapi ukte, upate, le Ahab’ suanlekhak a kemte tung Samaria-ah tua laite khakin, “Tu-in hih lai na ngah phetun, na topa uh suante note tawh omin, leengte le sakolte, kulh a nei khuapite zong, le hiamte na neihna uh thei un. Na topa uh suante sung pan a hoihpen le a kilawm pen teelin a pa’ kumpi tokhom tungah tusak unla, na topa uh innkuan a dingin do un,” a ci hi. Ahih hangin amaute nakpitakin lau uh a, “En un, kumpi nihte in amah nang zo lo uh ahih ciangin eite in bangci nanzawh ding ihi hiam?” a ci uh hi. Tua ahih ciangin kumpi inn a ukte le khuapi a ukte in upate le a kemte tawh kigawmin Jehu kiangah mi sawl uh a, “Kote nangma nasemte ka hi uh a, nong sawl khempeuh ka hih ding uh hi. Khat zong kumpi-in ka bawl kei ding uh hi; hoih na sak bangbangin hong hih in,” a ci uh hi. Tua ciangin Jehu in amaute kiangah laikhak nihna gelhin, “Note kei lamah omin, keima thu a mang dingin a kiging na hih uhleh, na topa uh Ahab’ suanlekhakte’ lutangte hong la unla, zing ciang tubang hunin kei kiang Jezreel-ah hong puak un,” a ci hi. Tu-in kumpipa’ suanlekhak mihing sawmsagihte pen amaute a khoi khuapi makaite tawh omkhawm uh hi. Amaute kiangah a laikhak a tun ciangin amaute in kumpipa’ suanlekhak tua mihing sawmsagihte that uh a, a lutangte seeng sungah guangin Jehu kiang Jezreel-ah a puak uh hi. Kamtai pa hong pai-in ama kiangah, “Amaute in kumpipa’ suanlekhakte’ lutangte hong paipih uh hi,” ci-in a gen ciangin amah in, “Zingsang mateng kulhkongpi lutna-ah khawl nihin koih un,” a ci hi. Zingsangin amah a paikhiat ciangin tua mite khempeuh kiangah, “Note na paubaang kei uh hi. Kumpi Joram sawmsimin a that pa keimah ka hi hi. Ahih hangin hihte khempeuh a sattuk kua ahi hiam? Ahab’ innkuan tawh kizomin Topa in a gen thu, Topa’ kammal khat zong lei-ah kialo ding hi, ci-in thei un. Bang hang hiam cih leh a nasempa Elijah kiangah a gensa thu Topa in sem khinzo hi,” a ci hi. Tua ahih ciangin Jehu in kuamah a siit nawn loh dongin Jezreel khua sungah Ahab’ innkuan a omlaite, a behte, le a lawm meltheihte, le a siampite khempeuh a that hi. Tua ciangin amah dingkhia-in Samaria-ah a pai hi. Lamkal, Tuucingte’ Buk a tun laitakin, Jehu in Judah kumpi Ahaziah’ behte tuak a, amah in, “Kuate na hi uh hiam?” a ci hi. Tua ciangin amaute in dawngin, “Ahaziah’ behte ka hi uh a, Jezreel khua-a om kumpinu’ tapate le kumpi ta dangte kiangah a hawh dingin hong paisuk ka hi uh hi,” a ci uh hi. Amah in a mite kiangah, “Hingmat un,” a ci hi. Tua ciangin amaute in tua mite hingmat uh hi. Tua ciangin amaute thatin tua lai-a om dum sungah amaute mi sawmli le nih a sisa-in lawnsuk uh a, amah in amaute khat zong hingkhawi lo hi. Tua lai panin amah a kihepkhiat ciangin amah a dawn dingin a hong pai Rekhab’ tapa Jehonadab tawh kituak hi. Jehu in tua pa hopihin ama kiangah, “Keima lungsim nang tungah a thuman bangin nang’ lungsim kei’ tungah a thuman hiam?” a ci hi. Tua ciangin Jehonadab in dawngin, “Man hi,” a ci hi. Jehu in, “A man le na khut hong khak in,” a ci hi. Tua ahih ciangin amah in a khut a khak hi. Tua ciangin Jehu in leeng sungah amah kaito hi. Tua ciangin amah in, “Kei hong zui inla, Topa a’ ding ka deihluatna hong thei in,” a ci hi. Tua ahih ciangin Jehu in a leeng sungah amah tuangsak hi. Samaria-ah a tun ciangin Topa in Elijah’ tungah a gen bangin Jehu in amaute a siakkhiat dongin Samaria sunga Ahab mi a omlaite khempeuh a that khin hi. Tua ciangin Jehu in mi khempeuh khawmin amaute kiangah, “Ahab in Baal na tawmkhat sem a, ahi zongin Jehu in tampi semzaw ding hi. Tua ahih ciangin tu-in Baal kamsangte khempeuh, le a siampite khempeuh kei kiangah hong sam un. Baal tungah biakpiakna lianpi nei ding ka hih manin kuamah pelemsak kei un. A pelem peuhmah nungta lo ding hi,” a ci hi. Ahih hangin Baal a biate a suksiat theih nadingin Jehu in ngian tawh a hih ahi hi. Tua ciangin Jehu in thu pia-in, “Baal a dingin a thupi kikhopna khat bawl un,” a ci hi. Tua ahih ciangin amaute in tua thu zasak uh hi. Tua ciangin Jehu in Israel sung khempeuhah thu zasak hi. Baal a bia khempeuh hong pai uh a, hong pai lo mi khat zong om lo hi. Tua ciangin Baal biakinn sungah amaute lut uh a, Baal biakinn mong khat pan mong khat dong a dim uh hi. Amah in puan koihna a ukpa kiangah, “Baal a biate khempeuh a dingin puante hong la in,” a ci hi. Tua ahih ciangin amah in amaute-a’ dingin a puante hong paikhiatpih hi. Tua ciangin Rekhab’ tapa Jehonadab tawh Baal biakinn sungah Jehu a tum hi. Tua ciangin amah in Baal a biate kiangah, “Hih lai-ah Baal a biate bek omin note’ lakah Topa’ nasemte a om loh nading thei unla, zong un,” a ci hi. Tua ciangin biakpiaknate le meihal biaknate a pia dingin amah a tum hi. Tu-in Jehu in a pualamah mi sawmgiat koih a, “Na khutsung uhah kong piakte khat peuhpeuh a khahsuah pa in ama nuntakna tawh loh ding hi,” a ci hi. Tua ahih ciangin meihal biakna a bawl a man khit phetin Jehu in a cingte le uliante kiangah, “Sungtum unla, amaute that un; mi khat zong suaktasak kei un,” a ci hi. Amaute in namsau tawh a thah khit uh ciangin a cingte le uliante in amaute lawnkhia uh a, tua ciangin Baal biakinn sungnung dei-ah tumin, Baal biakinn sunga om biakna song paikhiatpihin a hal uh hi. Tua ciangin amaute in Baal biakna song susia-in, Baal biakinn susia uh a, tuni dongin ekbuk a suaksak uh hi. Tua bangin Jehu in Israel sung panin Baal siakkhia hi. Ahih hangin Bethel le Dan-ah a om kham bawngnote ahi, Israel-te a khialhsakna, Nebat’ tapa Jeroboam’ khialhnate panin Jehu kiheikhia lo hi. Tua ciangin Topa in Jehu kiangah, “Nangmah in keima muhna-ah a man thu limtakin na sepna hang, le ka lungsimah a om bangin Ahab’ innkuan tungah na bawlna hangin, na suante khang lina dongin Israel kumpi tokhom tungah tu ding hi,” a ci hi. Ahih hangin Jehu in a lungsim khempeuh tawh Israel Pasian, Topa’ thukham limtakin zuih ding ngaihsun lo hi. Israel-te a khialhsakna ahi Jeroboam’ khialhnate panin amah kihei lo hi. Tua hun lai-in Topa in Israel gam pawlkhat khenkhiat ding kipan hi. Hazael in Israel gam sung khempeuhah amaute zo hi. Jordan panin nisuahna lam, Gilead gam khempeuh, Gad mite, Reuben mite, le Manasseh mite, Arnon kuam gei-a om Aroer panin Gilead le Bashan gam khempeuh a zogawp hi. Tu-in Jehu’ gamtatna a omlaite, a sep khempeuh, le ama thahatnate khempeuh, Israel Kumpite’ Khang Tangthu Laibu sungah kigelh hi. Tua ciangin Jehu si a, amaute in Samaria-ah amah a vui uh hi. Tua ciangin ama tapa Jehoahaz in ama tangin a uk hi. Jehu in Samaria panin Israel tungah kum sawmnih le giat sung a uk hi. Ahaziah’ nu Athaliah in a tapa a sihna a theih ciangin amah kipanin kumpi innkuan khempeuh thatsak hi. Ahih hangin Ahaziah’ sanggamnu, Kumpi Joram’ tanu Jehosheba in Ahaziah’ tapa Joash la-in, thah dingin a kikoih kumpipa’ tapate lak panin amah gukhia a, biakinn sung lupna inndei sungah amah le a cingnu a koih hi. Tua bangin tua nu in Athaliah kiang panin amah seel a, tua ahih manin amah kithat kha lo hi. Athaliah in Israel gam sungah a uk sungteng a cingnu tawh amah kum guk sung omin Topa’ biakinn sungah a bu hi. Ahih hangin a kum sagihna kumin siampi Jehoiada in mi sawlin Kar mite le kumpi inncing a ukte kiangah paisak a, Topa’ biakinnsung ama kiangah samsak hi. Tua ciangin amah in amaute tungah a ngaihsutna genin Topa’ biakinn sungah kiciamna khat bawl uh a, amah in amaute kiangah kumpipa’ tapa a lak hi. Tua ciangin amah in amaute thu pia a, “Note hih bangin na gamta ding uh hi: Sabbath ni-in nasep pengin kumpipa inn a cing no seh thum ah sehkhatte in (adang seh thum ah sehkhatte Sur kulhkongpi-ah omin adang seh thum ah sehkhatte a cingte’ nung kulhkongpi-ah om hi) kumpi inn na cing ding uh hi. Tua ciangin Sabbath ni-in na semin Topa’ biakinn a cing no a khennihte in na khutsung uhah na hiam ciat uh tawh kumpi Joash na cing ding uh hi. Note kiang nai-ah a hong pai peuhpeuh kithat ding hi. Kumpipa a paikhiat ciang le a sungtum ciangin amah na cing ding uh hi,” a ci hi. A ukte in siampi Jehoiada’ thupiak khempeuh bangin hih uh a, Sabbath ni-in nasep a sem dingte tawh Sabbath ni-in ama mi nasep a peng dingte hong paipih ciat uh a, siampi Jehoiada kiangah hong tung uh hi. Tua ciangin siampipa in a ukte tungah Topa’ biakinn sungah a om David-a’ ahi teipite le lumte a pia hi. Tua ciangin biakinn leitaw lampang, biakna tau le biakinn kimkotah mi khempeuh a khut uhah a hiam ciat uh tawh a cingin a ding uh hi. Tua ciangin amah in kumpipa’ tapa paikhiatpihin, ama lu tungah kumpi lukhu khusak a, kumpi hihna tecipanna lai amah a pia hi. Tua ciangin amaute in amah kumpi hi, ci-in taangko-in amah sathau a nilh uh hi. Tua ciangin amaute in a khut uh bengin, “Kumpipa khansau hen!” a ci uh hi. Athaliah in a cingte le mite’ gamlumna a zak ciangin mite’ kiang Topa’ biakinn sungah a pai hi. Amah a khuadak ciangin a ngeina ding bangin biakna song gei-ah kumpi thak pa dingin, kumpipa gei-ah a ukte le peengkul tumte om a, tua gammi khempeuh in lungdamin peengkul na tum uh hi. Tua ciangin Athaliah in a puante balkekin kiko a, “Sawmsimna! Sawmsimna!” a ci hi. Tua ciangin siampi Jehoiada in galkap a ukte thu pia-in, “A pua-ah tua nu paikhiatpih un. Amah a panpih peuhmah namsau tawh that un,” a ci hi. Bang hang hiam cih leh siampipa in, “ Topa’ biakinn sungah amah that kei un,” a ci hi. Tua ahih ciangin amaute in tua nu man uh a, Kumpipa’ inn lutna Sakol Kongpi a tun ciangin tua lai-ah amah kithat hi. Tua ciangin Jehoiada in amaute Topa’ mi ahihna ding uh Topa le kumpipa le mite kikalah thuciamna khat bawl a, kumpipa le mite kikalah zong a bawl hi. Tua ciangin tua gammi khempeuh Baal biakinn-ah pai-in a biakinn a phelkek uh hi. A biakna taute le a milimte amaute in sukham uh a, amaute in biakna taute mai-ah Baal siampi Mattan a that uh hi. Tua ciangin siampipa in Topa’ biakinn-ah galvilte a koih hi. Tua ciangin amah in a ukte, a cingte, le tua gammi khempeuh kaikhawm hi. Tua ciangin amaute in Topa’ biakinn panin kumpipa paipihsuk uh a, a Cingte’ Kongpi tawnin kumpipa’ inn-ah a pai uh hi. Tua ciangin kumpite’ kumpi tokhom tungah amah hong tu hi. Tua ahih ciangin tua gammi khempeuh a lungdam uh hi. Kumpipa’ inn-ah namsau tawh Athaliah a kithah khit ciangin khuapi sung a gamdai hi. Joash in uk ding a kipat ciangin ama khan kum sagih pha pan hi. Jehu’ kum sagihna kumin Joash in uk ding kipan a, amah in Jerusalem-ah kum sawmli sung uk hi. Ama nu’ min Zibiah hi a, Beersheba khuami ahi hi. Siampi Jehoiada in amah thuhilh ahih manin Joash in ama uk hun sung tawntung Topa’ muhna-ah a man gamta hi. Ahi zongin mualtung a biaknate kilakhia lo hi. Mite in tuate tungah biakna pia-in paknamtui hal lai uh hi. Joash in siampite kiangah, “Pasian’ biakinn sungah a kipaipih a siangtho nate’ man sum khempeuh, a milipin piak dingin a kiseh sum, le amau’ utthu tawh Pasian’ biakinn-ah a kipaipih sumte, nomau’ nasepna mite ciat panin no siampite in khawm un. Tua ciangin biakinn puahphatna ding a kisapna a kimuhna khempeuh puahsak un,” a ci hi. Ahih hangin Kumpi Joash’ uk kum sawmnih le thumna kum dongin siampite in biakinn puah kipan nai lo uh hi. Tua ahih ciangin Kumpi Joash in siampi Jehoiada le siampi dangte samin amaute kiangah, “Bang hangin biakinn puah lo na hi uh hiam? Tua ahih ciangin tu-in na nasepna uh mite kiang panin na sumlakte uh kem nawn kei unla, a sumte biakinn puah nadingin ap un,” a ci hi. Tua ahih ciangin mite tung pan sum kaihkhop tavuan la nawn loin, biakinn puah ding zong tavuan a lak nawn loh nading uh siampite a thukim uh hi. Tua ciangin siampi Jehoiada in singkuang khat la-in a siin vutvang a, Topa’ biakinn sung tum ciangin taklam pang khuam gei-ah a koih hi. Tua ciangin kongkhak a cing siampite in Topa’ biakinn sungah a kipaipih sum khempeuh tua sungah a koih uh hi. Singkuang sungah sum tam om hi, ci-in a theih peuhpeuh uh ciangin kumpipa’ lai-at pa le siampi lianpen pa hong paito-in Topa’ biakinn sungah a om sumte amaute in simin ip-in tun uh hi. Tua ciangin amaute in Topa’ biakinn a en nasemte’ khut sungah a tawi teh khiat uh sumte pia uh hi. Tua ciangin amaute in Topa’ biakinn a sem khutsiamte le innlamte tung, le leilesuang innlam siamte le suangseekte tungah Topa’ biakinn puah nadingin sing leina ding le suang tawhna ding, le biakinn puahna khat peuhpeuh a zat dingin piakhia uh hi. Ahih hangin Topa’ biakinn a dingin ngun kuangte, taitehte, haite, peengkulte, ahih kei leh kham ahi a, ngun nazat khat peuhpeuh ahi zongin, Topa’ biakinn-ah a kipaipih sumte panin kibawl lo hi. Bang hang hiam cih leh Topa’ biakinn a puah nasemte tungah tua sumte kipia hi. Amaute in thuman takin na sem uh ahih manin nasemte tungah piak dingin a khutsung uhah sum a apnate uh tung panin amaute in sazian ngen lo uh hi. Mawhna hanga piak sum le khialhna hanga piak sumte Topa’ biakinn sungah kipaipih lo hi; tuate pen siampite-a’ ahi hi. Tua hun laitakin Syria kumpipa Hazael kuanto-in Gath simin a la hi. Ahih hangin Hazael in Jerusalem simin a paito dingin a mai a ngat ciangin, Judah kumpi Joash in Judah kumpite ahi ama hun ma-a sem Jehoshafat le Jehoram le Ahaziahte’ apsa thuciam piakna letsongte khempeuh, le ama thuciam piakna letsongte, le Topa’ biakinn le kumpipa’ sumkoihnate-ah a om kham khempeuh la-in Syria kumpipa Hazael kiangah a puak hi. Tua ciangin Jerusalem panin Hazael a paikhia hi. Tu-in Joash’ gamtatna a omlaite, le a hih khempeuh, Judah Kumpite’ Khang Tangthu Laibu sungah kigelh hi. Ama nasemte kipanin sawmsimna khat vaihawm uh a, Silla paisukna lampi, Millo inn sungah Joash a that uh hi. Amah a satpukte pen ama nasemte, Shimeath’ tapa Jozakar le Shomer’ tapa Jehozabad ahi hi; tua hi a, amah si ta hi. Tua ciangin amaute in David khuapi sungah a pate tawh amah vui uh a, ama tangin a tapa Amaziah in a uk hi. Judah kumpi, Ahaziah’ tapa Joash’ kum sawmnih le thumna kumin, Jehu’ tapa Jehoahaz in Samaria panin Israel uk ding kipan a, amah in kum sawm le sagih sung uk hi. Topa’ muhna-ah amah a sia gamta a, Israel-te a khialhsakna, Nebat’ tapa Jeroboam’ khialhnate zui hi. Tuate panin amah kihemkhia lo hi. Tua ciangin Israel-te tungah Topa heh a, amah in Syria kumpipa Hazael’ khutsung le Hazael’ tapa Benhadad’ khut sungah amaute pia tawntung hi. Tua ciangin Jehoahaz in Topa’ tungah thum a, Topa in a thu ngai hi; bang hang hiam cih leh Syria kumpipa in amaute a nenniamna mu hi. (Tua ahih ciangin Topa in Israel tungah honpa khat pia hi. Tua ahih manin Syria-te’ khutsung panin amaute suakta uh hi. Tua ciangin a nidanga bangin Israel-te a inn uhah teng uh hi. Ahi zongin Israel a khialhsakna, Jeroboam’ khialhnate panin amaute kihemkhia lo uh a, amaute in tuate zui uh hi. Asherah milim zong Samaria mahah omlai hi.) Bang hang hiam cih leh Jehoahaz a dingin galkap sakol tung tuang sawmnga le leeng sawm le khe galkap tul sawm bang bek omlai hi. Bang hang hiam cih leh Syria kumpipa in amaute susia-in leivui bangin amaute a bawl hi. Tu-in Jehoahaz’ gamtatna a omlaite, ama hih khempeuh, le ama vangliatna, Israel Kumpite’ Khang Tangthu Laibu sungah kigelh hi. Tua ciangin Jehoahaz si a, amaute in Samaria-ah amah vui uh hi. Tua ciangin ama tangin a tapa Jehoash in a uk hi. Judah kumpipa Joash’ kum sawmthum le sagihna kumin Jehoahaz’ tapa Jehoash in Samaria panin Israel tungah uk ding kipan a, amah in kum sawm le guk sung a uk hi. Amah zong Topa’ muhna-ah a sia gamta hi. Israel-te a khialhsakna, Nebat’ tapa Jeroboam’ khialhnate khempeuh panin amah kihemkhia lo a, tua bangmahin amah gamta hi. Tu-in Jehoash’ gamtatna a omlaite, ama hih khempeuh, le Judah kumpipa Amaziah a dona a thahatnate, Israel Kumpite’ Khang Tangthu Laibu sungah kigelh hi. Tua ciangin Jehoash si a, ama kumpi tokhom tungah Jeroboam Nihna pa a tu hi. Tua ciangin Israel kumpi dangte tawh Samaria-ah Jehoash kivui khawm hi. Tu-in a sih nading natna tawh Elisha a nat ciangin, Israel kumpipa Jehoash ama kiangah paisukin ama mai-ah kap a, “Ka pa, ka pa! Israel mite a hupipa!” ci-in a kiko hi. Tua ciangin Elisha in ama kiangah, “Thal khat le thaltangte hong la in,” a ci hi. Tua ahih ciangin amah in thal khat le thaltangte a la hi. Tua ciangin amah in Israel kumpipa kiangah, “Na thal keek in,” a ci hi. Tua ciangin amah in a keek hi. Tua ciangin Elisha in kumpipa khut tungah ama khutte nga hi. Tua ciangin amah in, “Nisuahna lam tawlet hong in,” a ci hi. Tua ciangin amah in hong hi. Tua ciangin Elisha in, “Na thal lawn in,” a ci hi. Tua ciangin amah in lawn hi. Tua ciangin amah in, “ Topa’ gualzawhna thaltang, Syria tungah gualzawhna thaltang! Bang hang hiam cih leh amaute na beisak dongin Afek-ah Syria-te na do ding hi,” a ci hi. Tua ciangin amah in, “Thaltangte la in,” a ci hi. Tua ciangin amah in a la hi. Tua ciangin amah in Israel kumpipa kiangah, “Tuate tawh leilak sat in,” a ci hi. Tua ciangin amah in thumvei satin a khawl hi. Tua ciangin Pasian’ mipa ama tungah hehin, “Ngavei ahi a, gukvei ahi zongin na sat ding kilawm hi. Tua hileh na beisak dongin Syria na satpuk ding hi. Ahih hangin tu-in thumvei bek Syria na satpuk ding hi,” a ci hi. Tua ciangin Elisha si a, amaute in amah a vui uh hi. Tu-in Moab mihonte in sik-hiau sungin tua gam simzel uh hi. Tua ciangin amaute in misi khat a vui laitakun, amaute a sim dingin a hong pai mihon khat mu uh a, amau zong a misi uh Elisha’ han sungah lawn uh hi. A misi in Elisha’ guhte a sukkhak phetin hingkik a, tua ciangin ama khe-in a ding hi. Tu-in Syria kumpipa Hazael in Jehoahaz’ hun sung khempeuh Israel mite nengniam hi. Ahih hangin Topa in amaute hehpihin amaute khasiat a, Abraham, Isaac, le Jakob tawh a thuciamna hangin amaute lamah amah kihei a, amaute nusia lo hi. Tu dongin zong ama mite mangngilh lo hi. Syria kumpipa Hazael a sih ciangin ama tangin a tapa Benhadad kumpi a suak hi. Tua ciangin a pa Jehoahaz’ tung panin gal sungah Hazael in a laksa khuapite Hazael’ tapa Benhadad tung panin Jehoahaz’ tapa Jehoash in lakik hi. Jehoash in amah thumvei zo-in Israel khuapite a ngahkik hi. Israel kumpi, Jehoahaz’ tapa Jehoash’ kum nihna kumin, Judah kumpi, Joash’ tapa Amaziah in uk ding kipan hi. Amah in uk ding a kipatin kum sawmnih le nga pha a, Jerusalem-ah amah in kum sawmnih le kua sung uk hi. Ama nu’ min Jehoaddin hi a, Jerusalem khuami ahi hi. Topa’ mitah amah a manin gamta a, ahi zongin a pu David bang zo lo hi. A pa Joash’ hihsa na khempeuh hih hi. Mualtung a biaknate koihkhia lo hi. Mite in tuate tungah biakna pia-in paknamtui hal lai uh hi. Kumpi aana kiptakin ama khut sungah a om phetin ama pa ahi kumpipa a that a nasemte amah in that hi. Ahih hangin Topa in a thupiaksa, Moses thukham laibu sungah, “Tate’ hangin pate kithat lo ding a, pate’ hangin tate zong kithat lo ding hi; ahih hangin mi khempeuh amau’ khialhna hangin si ding hi,” ci-in a kigelh bangin amah in mi thatte’ tate that lo hi. Amah in Edom mite tul sawm Ci Kuam-ah thatin Sela khua simin la a, a min dingin Joktheel phuak a, tuni dongin tua min kipsuak hi. Tua ciangin Amaziah in Israel kumpi, Jehu’ tapa Jehoahaz, a tapa Jehoash kiangah kamtaite sawlin, “Hong pai in, khatlekhat mai kituahin kisu ni,” ci-in a to hi. Tua ciangin Israel kumpipa Jehoash in Judah kumpi Amaziah kiangah thu puak a, “Lebanon-a om thangling kung khat in Lebanon-a om taamtak khat kiangah mi sawlin, ‘Ka tapa’ zi dingin na tanu hong pia in,’ ci hi. Tua ciangin Lebanon gamsa khat in hong nawkin tua thangling tuancil hi. Nangmah in Edom na vatgawp khin a, na lungsim in nang hong liansak hi. Na minthanna tawh lungkim inla, inn-ah om in; bang hangin nang tukin, Judah tawh nang na tuk nadingin buaina piangsak se ding na hi hiam?” a ci hi. Ahih hangin Amaziah in a thu ngai lo hi. Tua ahih ciangin Israel kumpipa Jehoash paito a, Judah-te’ gam Bethshemesh-ah amah le Judah kumpipa Amaziah khatlekhat kimaituahin gal kido uh hi. Tua ciangin Israel in Judah zo a, mi khempeuh a inn ciat uhah tai uh hi. Tua ciangin Israel kumpipa Jehoash in Bethshemesh-ah Ahaziah’ tapa Joash, a tapa Amaziah ahi Judah kumpipa man hi. Tua ciangin Jerusalem-ah amah hong pai a, Efraim Kongpi panin Kiu Kongpi dong Jerusalem kulh pi zaguk sung susia hi. Tua ciangin amah in kham le ngun khempeuh, le Topa’ biakinn sung le kumpi inn vankoihna sungah a om umlebeel khempeuh la-in, mite zong man a, tua ciangin Samaria-ah a ciahkik hi. Tu-in Jehoash in a hih a gamtatna a omlaite, a vangliatna, le Judah Kumpipa Amaziah tawh a kidona, Israel Kumpite’ Khang Tangthu Laibu sungah kigelh hi. Tua ciangin Jehoash si a, Israel kumpite tawh Samaria-ah kivui hi. Tua ciangin ama tangin a tapa Jeroboam Nihna in a uk hi. Israel kumpipa, Jehoahaz’ tapa Jehoash a sih khit ciangin Judah kumpipa, Joash’ tapa Amaziah kum sawm le nga sung nungta lai hi. Tu-in Amaziah’ nasepna a omlaite, Judah Kumpite’ Khang Tangthu Laibu sungah kigelh hi. Tua ciangin amaute in Jerusalem-ah amah sawmsim uh a, amah zong Lakhish-ah tai hi. Ahih hangin amaute in ama nung zui-in Lakhish-ah mi sawl uh a, tua lai-ah amah that uh hi. Tua ciangin amaute in sakolte tungah amah hong pua uh hi. David khuapisung Jerusalem-ah a pate tawh amah kivui hi. Tua ciangin Judah mite khempeuh in kum sawm le guk a pha Uzziah la-in a pa Amaziah’ tangin kumpi-in a koih uh hi. A pa a sih khit ciangin amah in Elath khua zo kikin lampha a, Judah mite a dingin ngahkik hi. Judah kumpipa, Joash’ tapa Amaziah’ kum sawm le ngana kumin, Israel kumpipa, Jehoash’ tapa Jeroboam in Samaria-ah uk ding kipan a, amah in kum sawmli le khat sung uk hi. Topa’ muhna-ah amah a sia gamta hi. Israel a khialhsakna, Nebat’ tapa Jeroboam’ khialhnate khempeuh panin amah kihemkhia lo hi. Amah in Gathhefer pana kamsangpa, Amittai’ tapa, a nasem Jonah’ tungtawnin Israel Pasian, Topa’ thugen bangin, Hamath lutna panin Arabah Tuipi dong Israel gam a ngahkik hi. Bang hang hiam cih leh Israel-te’ thuakna nasia mahmah hi, ci-in Topa in mu hi. Bang hang hiam cih leh sal ahi a, sal ahi lo ahi zongin a peng kuamah om lo a, Israel a huh ding kuamah om lo hi. Ahih hangin Israel min a phiatkhiat ding Topa in gen nai lo ahih manin Jehoash’ tapa Jeroboam’ khut tawh amah in amaute honkhia hi. Tu-in Jeroboam’ gamtatna a omlaite, a hihte khempeuh, a vangliatna, a galsimna, le Judah in a na neih ngei Damaskas le Hamath khuapite Israel a dingin a ngahkikna, Israel Kumpite’ Khang Tangthu Laibu sungah kigelh hi. Tua ciangin Jeroboam si-in a pate tawh kivui a, ama tangin a tapa Zekhariah in a uk hi. Israel kumpi Jeroboam Nihna’ kum sawmnih le sagihna kumin Judah kumpipa, Amaziah’ tapa Uzziah in uk ding kipan hi. Amah in uk ding a kipatin kum sawm le guk pha a, Jerusalem-ah kum sawmnga le nih sung uk hi. Ama nu’ min Jekoliah hi a, Jerusalem khuami ahi hi. A pa Amaziah’ sepna khempeuh tawh kizui-in Topa’ mitah a man gamta hi. Ahi zongin mualtung a biaknate kilakhia lo hi. Mite in tuate tungah biakna pia-in paknamtui hal lai uh hi. Tua ciangin Topa in phaknatna tawh kumpipa vat ahih manin a sih ni dongin amah a phak hi a, inn tuam sungah amah teng hi. Tua ciangin kumpipa’ tapa Jotham pen a innkuan tungah a uk hi a, tua gam mite a uk hi. Tu-in Uzziah’ gamtatna a omlaite, le a hih khempeuh, Judah Kumpite’ Khang Tangthu Laibu sungah kigelh hi. Tua ciangin Uzziah si a, amaute in David khuapi sungah a pate tawh amah vui uh a, tua ciangin ama tangin a tapa Jotham in a uk hi. Judah kumpi Uzziah’ kum sawm le giatna kumin Jeroboam Nihna’ tapa Zekhariah in Samaria panin Israel tungah kha guk sung uk hi. A pate’ hihsa bangin Topa’ muhna-ah amah a sia gamta hi. Israel a khialhsakna, Nebat’ tapa Jeroboam’ khialhnate panin amah kihemkhia lo hi. Jabesh’ tapa Shallum in amah sawmsim a, Ibleam-ah amah satpukin that a, tua ciangin ama tangin a uk hi. Tu-in Zekhariah’ sepna a omlaite, Israel Kumpite’ Khang Tangthu Laibu sungah kigelh hi. (Hih pen Topa’ thuciamna, Jehu tungah a piak, “Na suante khang lina dongin Israel kumpi tokhom tungah tu ding hi,” a cih ahi hi. Tua ahih ciangin tua bangin a piang ahi hi.) Judah kumpi Uzziah’ kum sawm le kuana kumin Jabesh’ tapa Shallum in uk ding kipan a, amah in Samaria-ah kha khat sung uk hi. Tua ciangin Tirzah panin Gadi’ tapa Menahem hong paito-in Samaria hong tung a, tua ciangin amah in Samaria-ah Jabesh’ tapa Shallum satpukin that a, ama tangin a uk hi. Tu-in Shallum’ sepna a omlaite, le amah in a hihsa a sawmsimna, Israel Kumpite’ Khang Tangthu Laibu sungah kigelh hi. Tua hun laitakin Menahem in Tappuah le a sunga teng khempeuh le Tirzah pan a kipan a gam sungteng a luh hi. Bang hang hiam cih leh amaute in ama a dingin a kongpite uh hong lo uh hi. Tua ahih ciangin amah in luhin, a sunga om numei naupaii khempeuh a phelkham hi. Judah kumpi Uzziah’ kum sawmthum le kuana kumin Gadi’ tapa Menahem in Israel tungah uk ding kipan a, amah in Samaria panin kum sawm sung uk hi. Topa’ muhna-ah amah a sia gamta hi. Israel khempeuh a khialhsakna, Nebat’ tapa Jeroboam’ khialhnate khempeuh panin a nuntak sung tawntung amah kihemkhia lo hi. Assiria kumpi Tiglathpileser tua gam a sim dingin kuanto hi. Tua ciangin ama kumpi aana a kipna ding a huh ding a deihna-in Menahem in Tiglathpileser tungah ngun talen tulkhat a pia hi. Menahem in Assiria kumpipa tungah a piak dingin mihau khempeuh, a mi kim khut tung panin ngun shekel sawmnga, Israel-te tung panin sum a dok hi. Tua ahih ciangin Assiria kumpipa kiheikik a, tua gam sungah om lo hi. Tu-in Menahem’ sepna a omlaite, le a hih khempeuh, Israel Kumpite’ Khang Tangthu Laibu sungah kigelh hi. Tua ciangin Menahem si a, ama tangin a tapa Pekahiah in a uk hi. Judah kumpi Azariah’ kum sawmngana kumin Menahem’ tapa Pekahiah in Samaria panin Israel tungah uk ding kipan a, amah in kum nih sung uk hi. Topa’ muhna-ah amah a sia gamta hi. Israel a khialhsakna, Nebat’ tapa Jeroboam’ khialhnate panin amah kiheikhia lo hi. Tua ciangin ama nuai-ah a ukpa, Remaliah’ tapa Pekah in Gilead mi sawmnga tawh amah sawmsim a, kumpipa’ inn sungtawng, Samaria-ah amah that hi. Amah a thah khit ciangin ama tangin a uk hi. Tu-in Pekahiah’ nasepna a omlaite, le a hih khempeuh, Israel Kumpite’ Khang Tangthu Laibu sungah kigelh hi. Judah kumpi Uzziah’ kum sawmnga le nihna kumin Remaliah’ tapa Pekah in Samaria panin Israel tungah uk ding kipan a, kum sawmnih sung uk hi. Topa’ muhna-ah amah a sia gamta hi. Israel a khialhsakna, Nebat’ tapa Jeroboam’ khialhnate panin amah kihemkhia lo hi. Israel kumpi Pekah’ hun laitakin Assiria kumpi Tiglathpileser hong pai-in Ijon, Abelbethmaakah, Janoah, Kedesh, Hazor, Gilead, le Galilee, le Naftali gam khempeuh la a, amah in galmatin mite Assiria-ah a ciahpih hi. Tua ciangin Uzziah’ tapa Jotham’ kum sawmnihna kumin Elah’ tapa Hoshea in Remaliah’ tapa Pekah sawmsimin amah satpukin that a, tua ciangin ama tangin a uk hi. Tu-in Pekah’ gamtatna a omlaite, le a hih khempeuh, Israel Kumpite’ Khang Tangthu Laibu sungah kigelh hi. Israel kumpi Remaliah’ tapa Pekah’ kum nihna kumin Judah kumpi Uzziah’ tapa Jotham in uk ding kipan hi. Amah in uk ding a kipatin kum sawmnih le nga pha a, amah in Jerusalem-ah kum sawm le guk sung uk hi. Ama nu’ min Jerusha hi a, Zadok’ tanu ahi hi. A pa Uzziah’ gamtatnasa khempeuh bangin Topa’ mitah amah a manin gamta hi. Ahi zongin mualtung a biaknate kikoihkhia lo hi. Mite in tuate’ tungah biaknate pia-in paknamtui hal lai uh hi. Amah in Topa’ biakinn kulhkongpi tungnung bawl hi. Tu-in Jotham’ nasepna a omlaite, le a hih khempeuh, Judah Kumpite’ Khang Tangthu Laibu sungah kigelh hi. Tua hunin Topa in Judah a sim dingin Syria kumpipa Rezin le Remaliah’ tapa Pekah sawl ding kipan hi. Jotham si a, a pu David khuapi sungah a pate tawh kivui hi. Ama tangin a tapa Ahaz in uk hi. Remaliah’ tapa Pekah’ kum sawm le sagihna kumin Judah kumpi Jotham’ tapa Ahaz in uk ding kipan hi. Ahaz in uk ding a kipatin kum sawmnih pha a, Jerusalem-ah kum sawm le guk sung uk hi. A pu David’ gamtatnasa bangin a Pasian, Topa’ mitah amah a manin gamta lo a, Israel kumpi dangte’ khekhap mah zui hi. Topa in Israel mite’ mai-ah a hawlkhiat minamte’ zat a kihhuai a gamtatte mah uh bangin biakna-in ama tapa nangawn a hal hi. Amah in mualtung a biaknate tung, le mual dawnte tung, le singniim nuai khempeuhah biakna pia-in paknamtui a hal hi. Tua ciangin Syria kumpi Rezin le Israel kumpi, Remaliah’ tapa Pekah, Jerusalem a sim dingin hong kuanto uh a, amaute in Ahaz umcih uh hi. Ahih hangin amah zo zo lo uh hi. Tua hun laitakin Edom kumpipa in Edom gam dingin Elath la kikin Elath panin Judah gam mite hawlkhia hi. Tua ciangin tuni dongin amaute a tenna ahi Elath-ah Edom mite hong pai uh hi. Tua ciangin Ahaz in Assiria kumpi Tiglathpileser kiangah kamtaite sawlin, “Kei pen na nasempa le na tapa ka hi hi. Hong kuanto inla, keimah a hong sim Syria kumpipa le Israel kumpipa kiang panin kei hong honkhia in,” a ci hi. Ahaz in zong Topa’ biakinn sung le kumpipa’ vankoihna-a ngun le khamte la a, Assiria kumpipa tungah letsongin a puak hi. Tua ciangin Assiria kumpipa in ama thu ngai hi. Assiria kumpipa zong Damaskas a sim dingin hong kuanto-in tua khua la a, a mite galmatin Kir-ah pua a, amah in Rezin a that hi. Assiria kumpi Tiglathpileser tawh a kimu dingin Kumpi Ahaz zong Damaskas-ah a pai ciangin, amah in Damaskas-ah a om biakna tau mu hi. Tua ciangin Kumpi Ahaz in biakna tau a omdan, a neng a tawngin a lahkimna lim khat siampi Urijah kiangah puak hi. Tua ciangin siampi Urijah in biakna tau bawl hi. Damaskas panin Kumpi Ahaz hong tun ma-in Kumpi Ahaz in Damaskas panin a khakna tawh kizui-in siampi Urijah in na bawl hi. Damaskas panin kumpipa hong tun ciangin kumpipa in tua biakna tau a en hi. Tua ciangin kumpipa in biakna tau hong naihin paito a, a meihal biakna le an tawh a biakna halin, leenggahzu tawh a biakna sung a, thunuama a biakna sisan biakna tau tungah a theh hi. Tua ciangin amah in ama biakna tau thak le Topa’ biakinn kikalah a om sumngo biakna tau lakhia-in ama biakna tau leilu lampangah a koih hi. Tua ciangin Kumpi Ahaz in siampi Urijah thu pia-in, “Gam sung mi khempeuh’ meihal biakna, an tawh a biakna, le leenggahzu tawh a biakna uh tawh biakna tau lian tungah zingsang meihal biakna, nitakin an tawh biakna, kumpipa’ meihal biakna, le an tawh a biaknate halkhawm in. Tua tungah meihal biakna sisan khempeuh, le biakpiakna sisan khempeuh theh in. Ahih hangin sumngo biakna tau pen kei a dingin thudotna ding hi ding hi,” a ci hi. Kumpi Ahaz’ thupiak bangin siampi Urijah in hih thu khempeuh a hih hi. Tua ciangin Kumpi Ahaz in a kingakna kungte tankhia-in tuate panin a kuang lakhia a, a nuai-a om sumngo bawngtalte tung panin tui kuangpi lakhia sukin suang vial tungah a nga hi. Tua ciangin Assiria kumpipa a mai-et nadingin amah in Sabbath ni-in zat dingin a sungah a kikoih tutna khuhna le kumpipa’ lutna a puanung, Topa’ biakinn panin a lakhia hi. Ahaz in a hih a gamtatna a omlaite, Judah Kumpite’ Khang Tangthu Laibu sungah kigelh hi. Tua ciangin Ahaz si a, David khuapi sungah a pate tawh kivui hi. Tua ciangin ama tangin a tapa Hezekiah in a uk hi. Judah kumpi Ahaz’ kum sawm le nihna kumin Elah’ tapa Hoshea in Samaria panin Israel tungah uk ding kipan a, amah in kum kua sung uk hi. Topa’ muhna-ah amah a sia gamta a, ahi zongin ama ma-a Israel kumpi dangte bang hi lo hi. Assiria kumpi Shalmaneser amah a simin kuanto hi. Tua ciangin Hoshea ama khutnuai mi suak a, ama tungah siah a puak hi. Ahih hangin Assiria kumpipa in Hoshea a zuautatna mu hi; bang hang hiam cih leh amah in Egypt kumpipa So kiangah kamtaite sawlsim a, a kumkumin ahih ngeisa bangin Assiria kumpipa tungah siah pia nawn lo hi. Tua ahih ciangin Assiria kumpipa in amah man a, thong sungah koihin a hencip hi. Tua ciangin Assiria kumpipa in gam sung khempeuh simin Samaria ciang dong tung a, amah in kum thum sung umcih hi. Hoshea’ kum kuana kumin Assiria kumpipa in Samaria la a, amah in Assiria-ah Israel mite ciahpihin Halah gam sung, Gozan gam a om Habor gun gei, le Media khuapite sungah amaute a koih hi. Hih thu a pianna pen Egypt kumpi Faro’ khutnuai Egypt gam panin amaute a paikhiatpih a Pasian uh Topa’ tungah Israel mite khial a, pasian dangte kihta-in Israel mite’ mai-ah Topa in a hawlkhiat minamte’ ngeina le Israel kumpite in a piansaktawm ngeinate a zuihna hang uh ahi hi. Tua ciangin Israel mite in Topa a Pasian uh langpangin a man lo na vaihawm uh hi. Amaute in amau a dingin galvilna bukno a kipan kulh a nei khuapi dongin khuapi khempeuhah mualtung a biakna bawl uh hi. Amaute in amau a dingin mual sang tung khempeuh le singniim nuai khempeuhah biakna songte le Asherah milimte a phut uh hi. Tua ciangin amaute’ mai-ah Topa in a puakkhiat minamte’ hih bangin amaute in mualtung a biakna mun khempeuh tungah paknamtui a hal uh hi. Amaute in a hoih lo nate hihin Topa hehsak uh a, Topa in amaute tungah, “Note in na hih kei ding uh hi,” a cih milimte’ na sem uh hi. Ahi zongin Topa in kamsangte khempeuh le thumute khempeuh tungtawnin Israel le Judah mite hilhkhol a, “Na pu na pate uh ka thupiak thukhamte khempeuh, le kamsangte ahi ka nasemte’ tungtawnin note kiangah thu kong puak bangin na gamtat siate panun kihei-in ka thupiaknate le ka thukhamte zui un,” a ci hi. Ahih hangin amaute in a thu ngai lo uh a, Topa a Pasian uh a um lo a pu a pate uh mah bangin lungsim khauh uh hi. Amaute in ama thukhamte, le a pu a pate uh tawh a bawl a thuciamna, le amaute tungah a piak hilhkholhnate simmawh uh hi. Amaute in a mawkna milimte zui-in a mawkna suak uh a, amaute tawh kibangin gamta kei un ci-in Topa in a thupiak tawh kisai-in, amaute in amau’ kiima om minamte zui uh hi. Amaute in Topa a Pasian uh thupiakte khempeuh nusia-in amau a dingin a kisung bawngno lim nih bawl uh hi. Amaute in Asherah milim khat bawl uh a, vantung a om nate khempeuh bia-in Baal milim na sem uh hi. Amaute in biakna-in a tanute uh le a tapate uh halin vankahna le aisanna zang uh a, Topa’ muhna-ah a sia a gamta dingin kipia tawmin amah hehsak uh hi. Tua ahih ciangin Israel mite tungah Topa heh a, ama muhna panin amaute hemkhia hi. Kuamah dang om nawn loin Judah gammi bek omlai hi. Judah mite in zong Topa a Pasian uh thupiaknate zui loin Israel mite in a phuahtawm ngeinate zuihpih uh hi. Tua ciangin Topa in Israel suanlekhakte khempeuh nialin amaute gimsak a, ama muhna panin amaute a paihkhiat dongin amaute a siasak migilote’ khut sungah amaute a pia hi. Amah in David suante tung panin Israel gam a balkhiat khit ciangin Israel mite in Nebat’ tapa Jeroboam kumpi-in koih uh hi. Tua ciangin Jeroboam in Topa zuihna panin Israel hawlkhia-in khialhna lianpi amaute bawlsak hi. Tua ciangin Assiria kumpipa in Babylon, Kuthah, Avva, Hamath, le Sefarvaim panin mite paipih a, Israel mite’ tangin Samaria khuapite-ah amaute a koih hi. Amaute in Samaria gam luahin a khuapite-ah teng uh hi. Tua lai-ah a ten cilun amaute in Topa kihta lo uh hi. Tua ahih ciangin Topa in amaute kimkhat a that humpinelkaite amaute lakah a khah hi. Tua ahih ciangin Assiria kumpipa kiangah, “Nangmah in puakhia-in Samaria khuapite sungah na koih minamte in tua gamte’ pasian’ thukham thei lo uh hi. Tua ahih ciangin amah in amaute lakah humpinelkai khah hi. Amaute in tua gam pasian’ thukham thei lo uh ahih manin tua humpinelkaite in amaute that uh hi,” ci-in kigen hi. Tua ciangin Assiria kumpipa in thu pia a, “Na puak khiatna uh mun siampite khat tua lai-ah puak un. Amah pai-in tua lai-ah tengin a gam sung pasian’ thukhamte amaute hilhsak un,” a ci hi. Tua ahih ciangin Samaria panin a puakkhiat uh siampite khat hong pai-in Bethel-ah teng a, amaute in Topa bangci kihtak ding cih thu amaute kiangah a hilh hi. Ahih hangin minam khempeuh in amau’ pasian ciat bawl uh a, minam khempeuh in amau’ tenna khuapi sung, Samariate’ bawlsa mualtung a biakna munte-ah tuate koih uh hi. Babylon mite in Sukkothbenoth pasian lim, Kuth mite in Nergal pasian lim, Hamath mite in Ashima milim, le Avva mite in Nibhaz le Tartak milimte bawl uh hi. Sefarvaim mite in Sefarvaim pasian-te ahi Adrammelek le Anammelek biakna-in a tate uh mei tawh a hal uh hi. Amaute in Topa zong kihta uh a, mualtung a biakna siampi dingin amau sung panin mi namkim seh uh a, tuate in mualtung a biaknate tungah amau a dingin piaksak uh hi. Tua ahih ciangin amaute in Topa bia uh a, ahih hangin amaute a kipuak khiatna minamte’ ngeina bangin amau’ pasian-te’ na zong semkhawm uh hi. Tuni dongin amaute in a nidanga ngeina bangin gamta uh hi. Amaute in Topa bia lo uh hi. Israel min a phuah Jakob’ suante’ Topa in a thupiak thukhamte ahi a, ngeina kipte ahi a, zuih ding ngeinate ahi a, a thupiakna ahi zongin amaute in zui lo uh hi. Topa in Israel-te tawh thuciamna khat bawlin amaute thu pia a, “Note in pasian dangte kihta loin, amaute mai-ah note kun loin, amau’ na zong sem loin, amaute tungah biakna zong na pia kei ding uh hi. Egypt gam panin vangliatna le thahatna tawh a hong paikhiatpih Topa na kihta ding uh hi. Ama mai-ah note na kun ding uh a, ama tungah biakna na pia ding uh hi. Note a dingin a gelh thukhamte, ngeina kipte, zuih ding ngeinate, le thupiaknate zuih ding na kingaihsun tawntung ding uh hi. Note in pasian dangte na kihta kei ding uh a, note tawh ka bawlsa thuciamna na mangngilh kei ding uh hi. Note in pasian dangte na kihta kei ding uh a, ahih hangin Topa na Pasian uh na kihta ding uh hi. Tua ciangin amah in na galte khempeuh uh khutsung panin note hong honkhia ding hi,” a ci hi. Ahi zongin mite in tua thu ngai lo uh a, a nidang ngeina bangun gamta veve uh hi. Tua ahih ciangin hih minamte in Topa bia uh a, a kiseek amau’ milimte’ na zong semkawm uh hi. A tate uh le a tate uh’ tate zong tua bangmahin gamta uh hi. A pu a pate uh gamtat bangin a suan a khakte uh tuni dongin gamta uh hi. Israel kumpi, Elah’ tapa Hoshea’ kum thumna kumin Judah kumpi, Ahaz’ tapa Hezekiah in uk ding kipan hi. Amah in uk ding a kipatin kum sawmnih le nga pha a, amah in Jerusalem-ah kum sawmnih le kua sung uk hi. Ama nu’ min Abi hi a, Zekhariah’ tanu ahi hi. A pu David’ hihna khempeuh tawh kizui-in Topa’ mitah a man gamta hi. Amah in mualtung a biaknate hemkhia-in biakna songte sutan a, Asherah milim phukpai hi. Tua ciangin amah in Moses’ bawlsa sumngo gulpi satnen hi; bang hang hiam cih leh tua ni dongin Israel mite in tua tungah paknamtui hal uh hi; tua pen Nehushtan kici hi. Amah in Israel Pasian, Topa muang hi. Tua ahih ciangin ama nunga Judah kumpite khempeuh lak hitaleh ama mai-ate lak hitaleh ah amah tawh a kibang kuamah dang om lo hi. Bang hang hiam cih leh amah in Topa kiptakin len hi. Amah zuihna panin kihemkhia lo a, Topa in Moses tungah a gen thupiaknate a zui hi. Tua ahih ciangin Topa in amah ompih a, a sepna khempeuhah maavang hi. Amah in Assiria kumpipa lehdo-in ama na sem lo hi. Amah in galvilna bukno a kipan kulh a nei khuapi dongin, Gaza le a gam sung ciang dong Filistia-te a vatgawp hi. Israel kumpi, Elah’ tapa Hoshea’ kum sagihna kum ahi, Kumpi Hezekiah’ kum lina kumin Assiria kumpi Shalmaneser, Samaria a simin hong kuanto-in umcih a, kum thum a beina-ah tua khua lazo hi. Israel kumpi Hoshea’ kum kuana kum ahi, Hezekiah’ kum gukna kumin Samaria kila hi. Assiria kumpipa in Israel mite Assiria-ah la a, Halah gam sung, Gozan gam a om Habor gun gei, le Media khuapite sungah a koih hi. Bang hang hiam cih leh amaute in Topa a Pasian uh thu mang lo uh a, ama thuciamna, Topa’ nasem Moses’ thupiak khempeuh nangawn palsat uh hi. Amaute in thu ngai loin, thu zong mang lo uh hi. Kumpi Hezekiah’ kum sawm le lina kumin Assiria kumpi Sennakherib, Judah khuapi kulh a neite khempeuh a sim dingin hong kuanto-in tuate a la hi. Tua ciangin Judah kumpi Hezekiah in Assiria kumpipa kiang Lakhish-ah mi sawlin, “Ka gamta khial hi; kei kiang panin nungkik in; kei tungah nong nget peuhpeuh kong pia ding hi,” a ci hi. Tua ciangin Assiria kumpipa in Judah kumpi Hezekiah tung panin ngun talen zathum le kham talen sawmthum a kal hi. Tua ciangin Hezekiah in Topa’ biakinn sung le kumpipa’ inn vankoihnate-ah a om ngun khempeuh ama tungah a pia hi. Tua hunin Hezekiah in Topa’ biakinn kongkhakte tung pan, le amahmah in kongkhak mungte a zutna khamte hawkkhia-in Assiria kumpipa tungah a pia hi. Tua ciangin Assiria kumpipa in Lakhish panin Kumpi Hezekiah kiang Jerusalem-ah galkap hon lianpi khat tawh a galkapmang lianpen pa, a innsung mang lianpen pa, le a ulian khat a sawl hi. Amaute paito-in Jerusalem tung uh hi. Amaute a tun uh ciangin amaute hong pai-in Puansawppa’ nasepna phual zuatna lampi-a om bual tungnung tuilakna gei-ah hong ding uh hi. Amaute in kumpipa a sap uh ciangin, amaute kiangah innsung ukpa ahi, Hilkiah’ tapa Eliakim, lai-at Shebnah, le thuciamteh pa ahi, Asaf’ tapa Joah hong pai uh hi. Tua ciangin a ulianpa in amaute kiangah, “Hezekiah kiangah hih bangin gen un. ‘Assiria kumpipa, kumpi lianpa in hih bangin ci hi: Hih banga na kimuanna uh bang suang na hi uh hiam? Note in kampau lel pen galsim nadingin thu lamlahna le thahatna-in na ngaihsun uh hi. Note in kei nong lehdo nadingun bang suang na hi uh hiam? En un, a tungah a kingam mipa’ khut a sun ding pumpeeng kung kitam a banglel Egypt tu-in na suang uh hi. Amah a suangte khempeuh tungah Egypt kumpipa Faro pen tua banglel ahi hi. “‘Ahih hangin note in kei kiangah, “Kote in Topa ka Pasian uh ka suang uh hi,” na cih uhleh, Hezekiah in mualtung a biaknate le biakna taute hepkhiatsakin Jerusalem tungah, “Jerusalem khuasung hih biakna tau mai-ah na bia ding uh hi,” a cih pa hi lo ahi hiam? Tu-in hong pai un; Assiria kumpi ka topa tawh kikhapna khat bawl un; no lam panin a tunga tuang ding na ngah nak-uhleh note tungah sakol tulnih kong pia ding hi. Tua ahih ciangin note in leengte le sakol tung tuangte tawh kisai-in Egypt a suang kimlai in bangci-in ka topa’ nasemte lakah a neupen galkap ukpa khat lehnawhzo ding na hi uh hiam? Tua tham loin, Topa tawh a kikop lopi-in hih mun simin a susia dingin a hong paito ka hi hiam? Topa in kei kiangah, “Hih gam a sim dingin paito inla susia in,” hong ci hi,’ ci in,” a ci hi. Tua ciangin Hilkiah’ tapa Eliakim, Shebnah, le Joah in a ulianpa kiangah, “Kong thum uh hi; kote in Aram pau thei ka hih manun na nasemte tungah Aram pau-in thu hong gen in; kulh tunga om mite’ zakin Jew pau-in kote’ tungah hong gen kei in,” a ci uh hi. Ahih hangin a ulianpa in amaute kiangah, “Ka topa in hih thute na topa uh le note tung bekah a gen dingin hong sawlin, amau’ ek mah ne-in, amau’ zun mah dawnin note tawh a siakhawm ding kulh tunga tu mite kiangah a gen lo dingin hong sawl ahi hiam?” a ci hi. Tua ciangin a ulianpa dingin Jew pau-in a gingin kiko a, “Assiria kumpi, kumpi lianpa’ thu za un! Kumpipa in hih bangin ci hi: ‘Hezekiah’ khemsa-in om kei un; bang hang hiam cih leh amah in keima khutsung panin note hong honkhia zo lo ding hi. Topa in eite hong honkhia taktak ding a, Assiria kumpipa’ khut sungah hih khuapi kipia lo ding hi, ci-a Hezekiah’ hong genna tawh Topa suang kei un,’ ci hi. Assiria kumpipa’ khutsung panin minam dangte’ pasian khatpeuh in a gam honkhiazo ngei ahi hiam? Hamath le Arpad’ pasian-te koi-ah om ahi uh hiam? Sefarvaim, Hena, le Ivvah pasian-te koi-ah om ahi uh hiam? Keima khutsung panin amaute in Samaria a honkhiazo uh hiam? Topa in ka khutsung panin Jerusalem a hotkhiat nadingin, gam sungah pasian-te khempeuh lakah kua in keima khutsung panin a gam uh honkhiazo ngei ahi hiam?’ ci hi,” a ci hi. Ahih hangin mite dai-in kam khat beek dawngkik lo uh hi; bang hang hiam cih leh kumpipa’ thupiakna pen, “Amah dawng kei un,” cihna ahi hi. Tua ciangin innsung a uk, Hilkiah’ tapa Eliakim, lai-at pa Shebnah, le thuciamteh pa, Asaf’ tapa Joah-te a puan uh balkeksa-in Hezekiah kiangah hong pai uh a, a ulianpa’ kammalte ama kiangah a gen uh hi. Kumpi Hezekiah in hih thu a zak ciangin a dahna hangin a puante balkekin puanhampi silh a, Topa’ biakinn sungah a pai hi. Tua ciangin amah in biakinn sung a ukpa Eliakim, lai-at pa Shebnah, le siampi khangham zawdeuhte puanhampi silhsakin Amoz’ tapa kamsang Isaiah kiangah a sawl hi. Amaute in ama kiangah, “Hezekiah in hih bangin ci hi: ‘Tuni pen lungkham ni, hong kitai ni, mindai ni ahi hi. Naungekte a suah hun tung a, amaute hinkhiatna ding thatang om lo hi. Ama topa ahi Assiria kumpipa in a nungta Pasian a zahko dingin a sawl a ulianpa’ kammalte khempeuh Topa na Pasian in za-in, Topa na Pasian in a zaksa thute nialkhin kha ding hi. Tua ahih ciangin a omlai mite a dingin thu ngen in,’ ci hi,” a ci uh hi. Kumpi Hezekiah’ nasemte Isaiah kiang hong tun uh ciangin “Isaiah in amaute kiangah, “Na topa uh kiangah hih bangin gen un. Topa in hih bangin ci hi: “Assiria kumpipa’ nasemte in kei hong simmawhna, na zaksa uh thute hangin lau kei un. En un, keimah in ama tungah thu khat ka piangsak ding a, amah in kamdawn khat za-in a gamah ciahkik ding hi. Ama gam mahah namsau tawh amah a tukna ding ka piangsak ding hi,” ci hi,’ ci un,” a ci hi. Assiria kumpipa in Lakhish nusia khinin Libnah khua tawh a kidona thu, a ulianpa in za ahih manin, kumpipa kiangah thu a dong dingin a pai hi. Ethiopia kumpi Tirhakah amah a sim dingin a hong kuankhiat khitna thu kumpipa in a zak ciangin, amah in Hezekiah kiangah kamtaite sawl kikin, “Judah kumpi Hezekiah kiangah hih bangin gen un: ‘Assiria kumpipa’ khut sungah Jerusalem kipia lo ding hi, ci-a a hong ciamna tawh na suan na Pasian’ khemsa-in om kei in. En in, Assiria kumpite in gam khempeuh a hihnasa, a suksiat mangna thu na za khin hi. Tua ahih ciangin nang hong honkhiazo ding ahi hiam? Ka pu ka pate in a suksiat minam Gozan, Haran, Rezef, le Telassar gam sunga Eden mite, tua minamte’ pasian-te in amaute honkhiazo ahi hiam? Hamath kumpipa, Arpad kumpipa, Sefarvaim khuapi kumpipa, Hena kumpipa, ahih kei leh Ivvah kumpipa koi-ah om ahi uh hiam, ci hi,’ ci un,” a ci hi. Hezekiah in kamtaite tung panin a lai sangin a sim hi. Tua ciangin Topa’ biakinn-ah Hezekiah paito a, Topa’ mai-ah a lai a zal hi. Tua ciangin Hezekiah in Topa’ mai-ah thu ngenin, “ Topa, Israel Pasian, kherub tungah a tupa aw, leitung kumpi gam khempeuh lakah nangmah, nangmah bek Pasian na hi a, nangmah in vantung le leitung na bawl hi. Topa aw, na bil hong ngat inla hong za in. Topa aw, na mitte hak inla hong mu in. Tua ciangin a nungta Pasian a zahko nadingin a hong khak Sennakherib’ thute za in. A taktakin, Topa aw, Assiria kumpite in minam dangte le a gam uh siasak uh a, a pasian-te uh meikhuk sungah lotsak uh hi. Bang hang hiam cih leh tuate pasian hi loin, mihingte’ khut tawh a kibawl sing le suang ahi hi. Tua ahih manin tuate kisusia hi. Tua ahih ciangin tu-in, Topa kote’ Pasian aw, leitung kumpi gam khempeuh in nang, nang bek Pasian na hihna a theih nadingun ama khutsung panin kote hong honkhia in, kong thum hi, Topa aw,” a ci hi. Tua ciangin Amoz’ tapa Isaiah in Hezekiah kiangah thu puak a, “Israel Pasian, Topa in hih bangin ci hi: ‘Assiria kumpipa Sennakherib tawh kisai kei tungah nong thungetna ka zazo hi,’ ci hi. Amah tawh kisai-in Topa’ gensa thu hih bang ahi hi: Zion khuapi in nang hong simmawh a, nang hong nuihsan hi. Jerusalem khuapi in na nungah a lu hong peisan hi. Kua zahko-in, a simmawh na hi hiam? Kua langpangin na aw sang sakin kihihsakna tawh gamta na hi hiam? Israel-te’ a Siangtho pa, a simmawh na hi hi. Na kamtaite tawh Topa na zahko a, nangmah in, ‘Ka leeng tampite tawh mual sangpen munah ka pai khin a, Lebanon gam tawng pek dong ka tung khin hi. A taamtak sangpente ka phukmang khin a, a taaksan hoihpente zong ka phukmang khin hi. A gam tawngnung pen dongah keimah ka lut a, a tulak thukpen dongah zong ka lut khin hi. Tuikhukte ka to a, gamdang tuite ka dawn hi. Ka khenuai tawh Egypt lui khempeuh ka keusak hi,’ na ci hi. Sawt pek lai-in ka ngaihsutsa ahihlam za nai lo na hi hiam? Tanglai pek panin ka geelkholhsa hi a, tu-a ka tunsak ding thute kulh a nei khuapite ninbulomtangin na heina ding, a sunga tengte a hatna teng kilakhia-in, lungkia-in cih nading thei loin, gamlak singnote le lo ngeekte bangin, innkhumzanga lopate bangin a om laitak, a khankhit ma-in a sih ding ka geelsa ahi hi. Ahih hangin keimah in na tutsukna le na pusuahna le na sungtumna, kei tungah na hehna ka thei khin hi. Kei tungah na hehna hang le na kiphatsakna ka bilah hong tunkhitna hangin na nakah nakpheh hong bulhin, na kamah kamkaih kong bulh ding a, nong kuankhiatna lam mahah kong lehhei kik ding hi,” a ci hi. Tua ciangin Isaiah in Hezekiah kiangah, “Nang a dingin lim hih bang hong hi ding hi: Tu kumin ama thu-in a pote na ne ding a, a kum nihna ciangin tua bangmahin a selkhiate na ne ding hi. A kum thumna ciangin khai tuhin atin, leenggui suanin a gah na ne ding hi. Tua ciangin Judah gam sungah a suakta a omlaite in singkung bangin a thuk lamah zung kha kikin a tung lamah gah hong gahto ding hi; bang hang hiam cih leh a omlaite Jerusalem panin hong paikhia ding a, a suakta khat Zion Mual panin hong paikhia ding hi. Topa’ deih luatna in hih thu hong tungsak ding hi. “Tua ahih ciangin Topa in Assiria kumpipa tawh kisai-in hih bangin gen hi: ‘Hih khuapi sungah amah hong pai lo ding a, thaltang khat zong lawn lo ding hi. Khuapi mai-ah lum tawh zong hong pai loin, khuapi simna-in phung zong ciang lo ding hi. Amah hong paina lampi mah tawnin amah kilehkik ding a, hih khuapi sungah amah hong pai lo ding hi, Topa in ci hi. Bang hang hiam cih leh keima min ka khualna le ka nasempa David tungah ka ciamsa thu hangin hih khuapi ka hu ding hi,’ ci hi,” a ci hi. Tua zanin Topa’ vantungmi paikhia a, Assiria-te giahphual ah galkap tul zakhat le tul sawmgiat le tulnga a that hi. Zingsang tungin mite a thawh ciangin, hihte khempeuh si luanghawm na hi hi. Tua ciangin Assiria kumpipa Sennakherib kihemkhia a, inn-ah ciahin Nineveh-ah a teng hi. Tua ciangin amah in ama pasian Nisrok’ biakinn sungah bia-in a om laitakin, ama tapate Adrammelek le Sharezer in namsau tawh amah thatin Ararat gamah a tai uh hi. Tua ciangin ama tangin a tapa Esarhaddon in a uk hi. Tua hun laitakin Hezekiah cina-in si dektak hi. Tua ciangin Amoz’ tapa kamsang Isaiah hong pai-in ama kiangah, “ Topa in hih bangin ci hi: ‘Na innkuan vai ding hawm in; bang hang hiam cih leh nang na si ding hi; na damkikzo kei ding hi,’ ci hi,” a ci hi. Tua ciangin Hezekiah in a mai kawm lam ngatin Topa tungah thu ngen a, “Nangma mai-ah thuman tak le ka lungsim khempeuh tawh ka gamtatna, le nangma muhna-ah a hoih ka sepna thu tu-in hong phawk in, kong thum hi, Topa aw,” a ci hi. Tua ciangin Hezekiah nakpitakin a kap hi. Tua ciangin inntual laita panin Isaiah a paikhiat ma-in ama tungah Topa’ thu hong tung hi. “Kileh kik inla keima mite’ makai Hezekiah kiangah hih bangin gen in: Na thungetna ka za khin a, na khituite ka mu khin hi. En in, nang kong damsak ding a, ni thum ni-in Topa’ biakinn-ah na paito ding hi. Na nuntakna kum sawm le nga sung kong behlap ding hi. Assiria kumpipa khutsung panin nangmah le hih khuapi ka honkhia ding a, keima hang le ka nasempa David hangin hih khuapi ka hu ding hi, ci hi, ci-in gen in,” a ci hi. Tua ciangin Isaiah in, “Theimoh khat hong la un. Amah a damkik theih nadingin tuate la unla, a uilut nuh un,” a ci hi. Tua ciangin Hezekiah in Isaiah kiangah, “ Topa in kei hong damsakna ding, le a ni thum ni-in Topa’ biakinn-ah ka paitohna ding a lim bang hi ding ahi hiam?” a ci hi. Tua ciangin Isaiah in, “ Topa in a ciamsa thu hong hih nadingin Topa’ tung panin nangma tungah a lim hih bang hi ding hi: A liim kal sawm maipai ding hiam, ahih kei leh kal sawm nungkik ding ahi hiam?” a ci hi. Tua ciangin Hezekiah in dawngin, “Liim kal sawm a mai nawt ding a baih khat ahi hi; liim kal sawm nungkiksak zaw in,” a ci hi. Tua ciangin Topa tungah kamsangpa Isaiah kiko hi. Tua ciangin amah in Ahaz’ ni-nai tungah a ni tumsa a liim kal sawm lehkaih kik hi. Tua hun laitakin Babylon kumpipa, Baladan’ tapa Merodak-baladan in Hezekiah kiangah laikhakte le letsong khat tawh kamtaite a sawl hi; bang hang hiam cih leh Hezekiah a ci na hi, ci-in amah in za hi. Tua ciangin Hezekiah in amaute na zindo a, amah in amaute kiangah a vankoihna inn khempeuh, ngun, kham, a namtui nate, sathau manpha, a galvan, le a vankoihna innte-ah a om khempeuh a lak hi. Ama innsung hitaleh ama gam sung khempeuh pan hitaleh Hezekiah in amaute a lah loh om lo hi. Tua ciangin Kumpi Hezekiah kiangah kamsang Isaiah hong pai-in ama kiangah, “Hih mite in bang gen ahi hiam? Koi lai panin nang kiangah hong pai ahi hiam?” a ci hi. Tua ciangin Hezekiah in, “Amaute, Babylon gam, a gamlapi panin hong pai uh hi,” a ci hi. Amah in, “Amaute in na inn sungah bang mu ahi uh hiam?” a ci hi. Tua ciangin Hezekiah in dawngin, “Amaute in ka innsunga om khempeuh mu uh hi; ka vankoihna inn sungte panin amaute ka lah loh bangmah om lo hi,” a ci hi. Tua ciangin Isaiah in Hezekiah kiangah, “ Topa’ thu za in: En in, na innsunga om khempeuh le na pu na pate in tuni donga a kholte Babylon-ah a kipuak ni ding hong tung ding hi; bangmah kisiit lo ding hi, Topa in ci hi. Nangma sung pan a suak na tapate pawlkhat kilakhia ding a, amaute pen Babylon kumpipa inn sungah innsung maangte hi ding uh hi,” a ci hi. Tua ciangin Hezekiah in Isaiah kiangah, “Na gensa ahi Topa’ thugen a hoih hi,” a ci hi. Bang hang hiam cih leh amah in, “Keima hun sungin kilemna le lungmuanna a om nakleh bang phamawh ding ahi hiam?” ci-in ngaihsun hi. Hezekiah’ sepna a omlaite, a vangliatna, le tuili le tuilakna bawlin khuapi sungah tui a tutna, Judah Kumpite’ Khang Tangthu Laibu sungah kigelh hi. Tua ciangin Hezekiah si a, ama tangin a tapa Manasseh in a uk hi. Manasseh in uk ding a kipatin kum sawm le nih pha a, amah in Jerusalem-ah kum sawmnga le nga sung a uk hi. Ama nu’ min Hefzibah ahi hi. Topa in Israel mite’ mai-ah a hawlkhiat minamte’ gamtatna a kihhuaite mah bangin Topa’ muhna-ah amah a sia gamta hi. Bang hang hiam cih leh amah in a pa Hezekiah’ suksiatsa mualtung a biaknate lamkik hi. Tua ciangin amah in Baal a dingin biakna taute phut a, Israel kumpi Ahab’ bawl bangin Asherah milim khat bawl a, vantung a om nate khempeuh bia-in tuate’ na a sem hi. Tua ciangin Topa in, “Jerusalem-ah ka min ka koih ding hi,” a cihna Topa’ biakinn sungah amah in biakna taute lam hi. Tua ciangin amah in Topa’ biakinn tual nihte tungah vantung a om nate khempeuh a dingin biakna taute a lam hi. Tua ciangin amah in biakna-in a tapa hal a, aisanna le mailam thugen kholhnate semin, vankah theite le aisante tawh na semkhawm hi. Topa’ muhna-ah amah a sia tampi gamta a, amah hehsak hi. Ahih hangin amaute in thu ngai lo uh a, Topa in Israel-te’ mai-ah a suksiat minamte’ gamtatna sangin a siahuaizaw a gamtat nadingun Manasseh in amaute a zol hi. Tua ciangin Topa in kamsangte ahi a nasemte’ tungtawnin gen a, “Judah kumpipa Manasseh in hih a kihhuai nate sem a, ama ma-a Amor mite’ gamtatna sangin a siazaw-in na semin a milimte tawh Judah mite zong khialsak khin hi. Tua ahih ciangin Israel Pasian Topa in hih bangin ci hi: En un, a za mite khempeuh’ bilte a vut ding siatna Jerusalem le Judah tungah ka tungsak ding hi. Keimah in Samaria le Ahab le ama suante gim ka piak bangin Jerusalem tungah gimna ka tungsak ding hi. Tua ciangin mi khat in pakan a nul bangin keimah in Jerusalem nulin ka lumlet ding hi. Tua ciangin keimah in ka mi a omlaite paaikhia-in amau’ galte tungah ka pia ding a, amaute pen a galte’ mat ding mi le vankiate suak ding uh hi; bang hang hiam cih leh a pu a pate uh Egypt panin hong paikhiat a kipan tuni dongin keima muhna-ah a sia gamta-in kei hong hehsak uh hi,” a ci hi. Tua tham loin Topa’ muhna-ah amaute a sia a gamtat nadingun amah in Judah mite a khialhsak banah, Jerusalem mong khat pan mong khat sisan tawh a kidimsak dongin Manasseh in mawhna baang lo mi tampi a that hi. Manasseh’ sepna a omlaite, a hih khempeuh, le ama hihsa a khialhna, Judah Kumpite’ Khang Tangthu Laibu sungah kigelh hi. Tua ciangin Manasseh si a, Uzza’ huansung, ama inn huan sungah kivui hi. Tua ciangin ama tangin a tapa Amon in a uk hi. Amon in uk ding a kipatin kum sawmnih le nih pha a, amah in Jerusalem-ah kum nih sung uk hi. Ama nu’ min Meshullemeth hi a, Jotbah khuami Haruz’ tanu ahi hi. A pa Manasseh’ gamtat bangin Topa’ muhna-ah amah a sia gamta hi. Amah in a pa’ khekhap khempeuh tawn a, a pa in a na a sepsak milimte’ na mah semin tuate a bia hi. Amah in a pu a pate’ Pasian, Topa nusia a, Topa’ lampi tawn lo hi. Tua ciangin Amon’ nasemte in amah sawmsim uh a, ama inn sungah kumpipa a that uh hi. Ahih hangin tua gammite in Kumpi Amon a sawmsimte khempeuh that leuleu uh a, tua ciangin tua gammite in ama tangin a tapa Josiah kumpi-in a koih uh hi. Tu-in Amon’ hihsa a gamtatna a omlaite pen Judah Kumpite’ Khang Tangthu Laibu sungah kigelh hi. Tua ciangin Uzza’ huansung ama hanah amah kivui a, ama tangin a tapa Josiah in a uk hi. Josiah in uk ding a kipatin kum giat pha a, amah in Jerusalem-ah kum sawmthum le khat sung uk hi. Ama nu’ min Jedidah hi a, Bozkath khuami Adaiah’ tanu ahi hi. Topa’ mitah amah a manin gamta-in, a pu David’ khekhap khempeuh zui cinten a, themkhat zong pial lo hi. Kumpi Josiah’ kum sawm le giatna kumin, kumpipa in a lai-at pa Meshullam’ tapa Azaliah, a tapa Shafan, Topa’ biakinn-ah sawl a, “Kongcingte in mite tung panin a kaihkhop uh ahi Topa’ biakinn sungah hong kipaipih sum phazah a theih nadingin siampi lianpen pa Hilkiah kiangah paito in. Tua ciangin Topa’ biakinn nasemte tungah a sum piasak in. Topa’ biakinn-ah a om inn a puah nasemte tungah amaute tua sum piasak in. Tua sumte pen khutsiamte, innlamte, le leilesuang innlam siamte tungah piak ding le biakinn puah nadingin sing leina ding le suang tawhna ding zong ahi hi. Ahih hangin thuman takin amaute gamta uh ahih manin amaute’ khut sungah a kipia sumte hangin amaute tung panin sazian kingen lo ding hi,” a ci hi. Tua ciangin siampi lianpen pa Hilkiah in lai-at pa Shafan kiangah, “ Topa’ biakinn sungah thukham laibu ka mu hi,” a ci hi. Tua ciangin Hilkiah in Shafan kiangah a laibu pia a, amah in a sim hi. Tua ciangin kumpipa kiangah lai-at pa Shafan hong pai-in thu zasak a, “Nasemte in biakinn sungah a om sumte lakhia-in Topa’ biakinn nasemte tungah pia khinzo uh hi,” a ci hi. Tua ciangin lai-at pa Shafan in kumpipa kiangah, “Siampi Hilkiah in laibu khat kei hong pia hi,” a ci hi. Tua ciangin Shafan in kumpipa mai-ah tua laibu a sim hi. Kumpipa in thukham laibu sunga thute a zak ciangin a dahna hangin a puante a balkek hi. Tua ciangin kumpipa in siampi Hilkiah, Shafan’ tapa Ahikam, Mikaiah’ tapa Akbor, lai-at pa Shafan, le kumpipa’ nasem Asaiah thu pia a, “Pai unla, a kimu hih laibu sunga thute tawh kisai-in keima a’ ding, mite a’ ding, le Judah mi khempeuh a dingin Topa’ tungah thu va dong un; bang hang hiam cih leh hih laibu sunga thu, eite tawh kisai-in a kigelh khempeuh bangin gamtat ding i pu i pate in na mang lo uh ahih manin eite tungah Topa’ hehna lian hi,” a ci hi. Tua ahih ciangin siampi Hilkiah, Ahikam, Akbor, Shafan, le Asaiah te zong Harhas tapa Tikvah, a tapa Shallum, biakinn puan a kem pa’ zi kamsangnu Huldah kiangah a pai uh hi (tua laitakin Jerusalem khuasung a Veng Nihna-ah tua nu teng hi); tua ciangin tua nu tawh amaute kiho uh hi. Tua ciangin amah in amaute kiangah, “Israel Pasian, Topa in hih bangin ci hi: ‘Kei kiangah note hong sawl mipa kiangah gen un. Topa in hih bangin ci hi: En un, hih lai mun le a tungah a tengte tungah Judah kumpipa in laibu sunga a sim siatna thute khempeuh ka tungsak ding hi. Bang hang hiam cih leh amaute in kei hong nusia-in pasian dangte tungah paknamtui hal uh a, amau khut tawh a bawl milimte tawh kei hong hehsak uh ahih manin hih mun tungah ka hehna so ding a, ka hehna dai lo ding hi. Ahih hangin Topa’ tungah thu a dong dingin note a hong sawl Judah kumpipa tungah ahihleh note in hih bangin na gen ding uh hi. Israel Pasian, Topa in hih bangin ci hi: Nangmah in na zaksa thute tawh kisai-in, amaute gamkhing le samsiat a ngahte a suah nadingin hih mun le a tungah a teng mite tungah ka kampauna na zak ciangin na lungsim kisikin Topa’ mai-ah nangmahmah kiniamkhiatin, na puante balkekin ka mai-ah na kahna thu, keimah in zong ka za hi, Topa in ci hi. Tua ahih ciangin, nangmah in nuamtakin na han na zuan ding a, hih mun tungah ka tunsak ding siatna khempeuh na mit in mu lo ding hi,’ ci hi,” a ci hi. Tua ciangin amaute in kumpipa kiangah tua thu a puakkik uh hi. Tua ciangin kumpipa in Judah le Jerusalem upate khempeuh samsak a, ama kiangah hong kikhawm uh hi. Tua ciangin Topa’ biakinn-ah kumpipa paito a, amah tawh Judah mi khempeuh, Jerusalem-a tengte khempeuh, siampite, kamsangte, le mi khempeuh a neu a lian tawh pai uh hi. Tua ciangin amah in amaute’ zakin Topa’ biakinn sungah a kimu thuciamna laibu sunga thute khempeuh a sim hi. Tua ciangin khuampi gei-ah kumpipa dingin hih laibu sunga a kigelh thuciamna kammalte khempeuh a sepna ding, Topa’ thu mangin a thupiaknate le a thukhamte, a lungsim le a ngaihsutna khempeuh tawh a zuihna ding, Topa’ mai-ah thuciamna khat a bawl hi. Tua ciangin mi khempeuh zong tua thuciamna-ah a kihel uh hi. Tua ciangin kumpipa in siampi lianpen pa Hilkiah, le a nihna siampi, le kongcingte in Topa’ biakinn sung panin Baal le Asherah nusian milim a dingin a kibawl nazatte khempeuh, le vantung a om nate khempeuh biak nadingin a kibawlte hong paikhiatpih nading uh thu a pia hi. Amah in Jerusalem pualam Kidron leikang halna munah tuate halin a vute Bethel khua-ah a pua hi. Tua ciangin amah in Judah khuapite le Jerusalem kiima om mualtung a biaknate tungah paknamtui hal dingin Judah kumpite in a kipsaksa milim biate’ siampite a hawlkhia hi. Baal tung, ni tung, kha tung, aksi honpite tung, le vantung a om nate khempeuh tungah paknamtui a halte zong a hawlkhia hi. Tua ciangin amah in Topa’ biakinn panin Jerusalem pualam, Kidron lui-ah Asherah nusian milim paikhiatpihin hal a, tua ciangin amah in satvui-in mi nautangte’ han tungah a vuite lawn hi. Tua ciangin amah in numeite in Asherah milim a dingin a kizang puante a gatna mun Topa’ biakinn sunga om a paktat pawlte’ innte a phelkhia hi. Tua ciangin amah in Judah khuapite panin siampite khempeuh paikhiatpih a, Geba panin Beersheba ciang dong, siampite in paknamtui a halna mualtung a biaknate a susia hi. Tua ciangin amah in khuapi kulhkongpi veilam, khuapi ukpa Joshua’ kongpi lutna-ah a om dawibiakna munte a phelkhia hi. Tua lai-a sem siampite ahihleh Jerusalem-a Topa’ biakna tau-ah hong paito thei lo uh a, ahi zongin amau’ sanggamte’ lakah silngo sawh loh anlum ne thei uh hi. Tua ciangin kuamah in Molek pasian tungah a tanu ahi a, a tapa ahi zongin biakna-in a hal theih nawn loh nadingin Hinnom Kuam sunga om Tofeth kici milim biakna mun a susia hi. Tua ciangin amah in a kiimnai-a om, innsung ulian Nathanmelek’ inn gei, Topa’ biakinn sung lutna munah, Judah kumpite in ni tungah a ap uh a sakolte hemkhia hi. Tua ciangin amah in ni’ sakol leengte mei tawh a hal hi. Tua ciangin Judah kumpite in a bawlsa, Ahaz’ inndei tungnung khumzanga a om biakna taute, le Topa’ biakinn tual nihte sungah Manasseh in a bawlsa biakna taute, amah in phelin satnen a, tua a vuite Kidron lui-ah a paai hi. Tua ciangin Kumpi Solomon in Sidon mite’ kihhuaina Ashtoreth pasian a’ ding, le Moab-te’ kihhuaina Khemosh pasian a’ ding, le Ammon mite’ kihhuaina Milkom pasian a dingin a lam, Jerusalem nisuahna lam, Oliv Mual leitaw lama om mualtung a biaknate kumpipa in a susia hi. Tua ciangin amah in a biakna songte satkhamin, Asherah milimte phuk a, mihing guh tawh a dim tua munte a vuk hi. Tua tham loin Israel-te a khialsak Nebat’ tapa Jeroboam in Bethel-ah a phuhsa mualtung a biakna, tua biakna mun a biakna tau tawh, amah in phelin a suangte sukham a, tuate a satvui hi. Amah in Asherah milim zong a hal hi. Tua ciangin Josiah kihei-in khuadak a, mualtung a om hante a mu hi. Amah in mi sawlin hante sung panin a guhte lasak a, hih thute a genkhol Pasian’ mipa in a gen Topa’ thugen tawh kizui-in biakna tau tungah tuate halin a susia hi. Tua ciangin amah in, “Hua galkhat a ka muh phawkna mual bang ahi hiam?” a ci hi. Tua ciangin khuapisung mite in ama kiangah, “Judah panin hong pai-in Bethel-a biakna tau tungah na bawl hih thute a genkhol Pasian’ mipa’ han ahi hi,” ci-in a gen uh hi. Tua ciangin amah in, “Amah tuaci omsak un; kuamah in ama guhte khin kei un,” a ci hi. Tua ahih ciangin amaute in Samaria panin hong paikhia kamsangte’ guhte le ama guhte tuaci omsak uh hi. Tua ciangin Israel kumpite in a bawlsa, Topa a hehsakna uh, Samaria khuapite sunga om mualtung a biakna munte khempeuh zong Josiah in a lakhia hi. Bethel-a a hihsa khempeuh mah bangin tuate tungah a hih hi. Tua ciangin amah in tua lai-a a om, mualtung a biakna siampite khempeuh, biakna taute tungah that a, tuate tungah mihing guh a hal hi. Tua ciangin Jerusalem-ah amah a ciahkik hi. Tua ciangin kumpipa in mi khempeuh thu pia a, “Hih thuciamna laibu sungah a kigelh mah bangin Topa na Pasian uh pahtawina-in Paisan Pawi bawl un,” a ci hi. Bang hang hiam cih leh Israel-te thu a khen thukhente’ hun a kipan hitaleh, Israel kumpite ahih kei leh Judah kumpite’ hun sung khempeuh tua bang Paisan Pawi kibawl ngei lo hi. Ahih hangin Kumpi Josiah’ uk kum sawm le giatna kumin Jerusalem-ah Topa a dingin Paisan Pawi kibawl hi. Tua tham loin Topa’ biakinn sungah siampi Hilkiah in a muh laibu sungah a kigelh thukham kammalte amah in a kipsak theih nadingin Judah gam sung le Jerusalem-a om vankahte, aisante, innsung pasian-te, milimte, le a kihhuai nate khempeuh Josiah in a hemkhia hi. Ama hun ma-in, amah tawh a kibang, Moses thukham tawh kizui-in a lungsim khempeuh, a nuntakna khempeuh, le a thahatna khempeuh tawh Topa’ lamah a kihei kumpi om lo a, ama nungah zong amah tawh a kibang khat zong hong khang nawn lo hi. Manasseh in amah a phinnate khempeuh hangin Judah tungah ama hehna, a lauhuai hih hehna lian panin Topa kihei nai lo hi. Topa in, “Israel ka khinkhiat bangin ka muhna panin Judah zong ka khinkhia ding a, keimah in ka teelsa khuapi Jerusalem, le ka min om ding hi, ka cihna biakinn ka paaikhia ding hi,” a ci hi. Tu-in Josiah’ gamtatna a omlaite, le a hih khempeuh, Judah Kumpite’ Khang Tangthu Laibu sungah kigelh hi. Ama hun sungin Assiria kumpipa a huh dingin Eufratis gun-ah Egypt kumpipa Faro Neko kuanto hi. Amah a khaktan dingin Kumpi Josiah zong a kuan hi. Faro Neko in Josiah a muh ciangin Megiddo ah a that hi. Tua ciangin ama nasemte in Megiddo panin a sisa-in leeng khat sungah amah pua-in Jerusalem-ah ciahpih uh a, a hanah amah a vui uh hi. Tua ciangin tua gam mite in Josiah’ tapa Jehoahaz la-in sathau nilh uh a, a pa’ tangin kumpi-in a koih uh hi. Jehoahaz in uk ding a kipatin kum sawmnih le thum pha a, amah in Jerusalem-ah kha thum sung uk hi. Ama nu’ min Hamutal hi a, Libnah khua mi Jeremiah’ tanu ahi hi. A pu a pate’ gamtatnasa khempeuh bangin Topa’ muhna-ah amah a sia gamta hi. Tua ciangin amah in Jerusalem a uk theih loh nadingin Faro Neko in Hamath gam sung Riblah khua-ah amah kol bulh a, Judah mite tung panin ngun talen zakhat le kham talen khat siah a kai hi. Tua ciangin Faro Neko in a pa Josiah’ tangin Josiah’ tapa Eliakim kumpi-in koih a, ama min Jehoiakim ci-in a kheelsak hi. Ahih hangin amah in Jehoahaz paikhiatpih hi; amah Egypt tung a, tua lai-ah a si hi. Tua ciangin Jehoiakim in a ngun le a kham Faro’ tungah pia a, ahih hangin Faro’ thupiakna bangin tua sum a piak dingin a gam sung mite tung pan amah in siah a dong hi. Faro Neko tungah a piak dingin, amah in mi khempeuh tung panin a neihsa uh tawh kizui-in a gam sung mite’ ngun le kham a dok hi. Jehoiakim in uk ding a kipatin kum sawmnih le nga pha a, amah in Jerusalem-ah kum sawm le khat sung uk hi. Ama nu’ min Zebidah hi a, Rumah khuami Pedaiah’ tanu ahi hi. A pu a pate’ gamtatnasa khempeuh bangin Topa’ muhna-ah amah a sia gamta hi. Ama hun sungin Babylon kumpipa Nebukhadnezzar hong kuanto a, Jehoiakim kum thum sung ama nasem a suak hi. Tua ciangin Jehoiakim in amah lehdo hi. Tua ciangin ama nasem kamsangte tungtawnin a gen Topa’ thugenna bangin Judah a susia dingin ama langkhatah Topa in Khaldea mihonte, Syria mihonte, Moab mihonte, le Ammon mihonte a sawl hi. Tu-in Jehoiakim’ sepna a omlaite, le a hih khempeuh, Judah Kumpite’ Khang Tangthu Laibu sungah kigelh hi. Tua ciangin Jehoiakim si a, ama tangin a tapa Jehoiakhin in a uk hi. Tua ciangin Babylon kumpipa in Egypt lui panin Eufratis gun dong Egypt kumpipa’ neih khempeuh laksak khin ahih manin Egypt kumpipa a gam panin hong kuankhia kikzo nawn lo hi. Jehoiakhin kumpi a suahin kum sawm le giat pha a, amah in Jerusalem-ah kha thum sung uk hi. Ama nu’ min Nehushta hi a, Jerusalem khuami Elnathan’ tanu ahi hi. A pa’ gamtatnasa khempeuh bangin Topa’ muhna-ah amah a sia gamta hi. Tua hun laitakin Jerusalem-ah Babylon kumpipa Nebukhadnezzar hong kuanto a, tua khuapi a umcih hi. Ama nasemte in a umcih laitakin Babylon kumpipa Nebukhadnezzar tua khuapi-ah hong tung hi. Amah in Jerusalem mi khempeuh, a ulian khempeuh, le a thahat a vanglian khempeuh, galmatin tul sawm, le khutsiamte le sikseekte khempeuh a ciahpih hi. Tua gam a a zawngpente simloh kuamah dang om nawn lo hi. Amah in Babylon-ah Jehoiakhin a ciahpih hi. Kumpipa’ nu, kumpipa’ zite, ama nuai-ah a zaneite, le tua gam sung ukpite, Jerusalem panin Babylon-ah galmatin a la hi. Babylon kumpipa in a thahat, galdo dingin a hoih mi thahat khempeuh a vekpi-in tulsagih, le khutsiamte le sikseekte tulkhat, galmatin Babylon-ah a paipih hi. Tua ciangin Babylon kumpipa in Jehoiakhin’ tangin ama pa’ sanggampa Mattaniah kumpi-in koih a, ama min Zedekiah-in a kheelsak hi. Zedekiah kumpi a suahin kum sawmnih le khat pha a, amah in Jerusalem-ah kum sawm le khat sung a uk hi. Ama nu’ min Hamutal hi a, Libnah khuami Jeremiah’ tanu ahi hi. Jehoiakim’ gamtatnasa khempeuh bangin Topa’ muhna-ah amah a sia gamta hi. Bang hang hiam cih leh Topa’ hehna hangin ama kiang panin amaute a paihkhiatna zah dong dingin Jerusalem le Judah tungah thu hong om hi. Tua ciangin Zedekiah in Babylon kumpipa lehdo hi. Tua ahih manin ama uk a kum kuana, tua kum a kha sawmna, tua kha a ni sawm ni-in Babylon kumpipa Nebukhadnezzar a galkap khempeuh tawh Jerusalem a sim dingin hong kuanin tua khua a umcih uh hi. Tua ciangin amaute in a kimkotah umcih nading panmun a bawl uh hi. Tua ahih ciangin Kumpi Zedekiah’ kum sawm le khatna kum dong tua khuapi ki-umcih hi. A kha lina a ni kua ni-in tua khuapi sungah kialpi nasia mahmah ahih manin tua gam mite a’ ding an om lo hi. Tua ciangin khuapikulh sulet uh hi. Khaldea mite khuapi kiimah a ompi mahin, kumpipa’ huan kiang lam kulhpi nih kikal kulhkongpi lampi zui-in kumpipa le a galhang mi khempeuh zanin a tai uh hi. Arabah lam manawhin amaute pai uh hi. Ahih hangin Khaldea mite’ galkapte in kumpipa delh uh a, Jerikho zanglei-ah amah pha uh hi; tua ciangin a galkap khempeuh ama kiang panin kithehthang hi. Tua ciangin amaute in kumpipa man uh a, ama tungah thukhenna a pia, Riblah-a Babylon kumpipa kiangah amah paipih uh hi. Amaute in Zedekiah’ muhna-ah a tapate thatin, Zedekiah’ mitte khelkhia uh a, amah kol bulhin Babylon-ah a paipih uh hi. A kha ngana, tua kha a ni sagih ni-in, Babylon Kumpi Nebukhadnezzar’ kum sawm le kuana kumin, Babylon kumpipa’ nasem, amah a cingte a ukpa Nebuzaradan Jerusalem-ah hong pai hi. Amah in Topa’ biakinn a kipan kumpipa’ inn le Jerusalem khuasunga om inn khempeuh hal a, inn lian khempeuh amah in haltum hi. Tua ciangin a cingte a ukpa tawh a om Khaldea mi galkapte khempeuh in Jerusalem kimkota kulhpi susia uh hi. Tua ciangin a cingte a ukpa Nebuzaradan in khuapi sungah a kinusia a omlai mite le Babylon kumpipa a taisan mite, mihonpi a omlai teng khempeuh salin paipih khawm hi. Ahih hangin a cingte a ukpa in leenggui lote a en ding le lo kho dingin tua gammi a zawngpente pawlkhat nusia lai hi. Tua ciangin Topa’ biakinn sungah a om sumngo khuampite, Topa’ biakinn sungah a om tuikuang kingaknate, le sumngo tuikuangpi, Khaldea mite in satnen uh a, Babylon-ah a sumngo pua uh hi. Tua ciangin amaute in beelte, kawbiate, taitehte, paknamtui a dingin pakante, le biakinn sung nasepna a kizang sumngo nazatte khempeuh, vutluahna, le haite lakhia uh hi. A cingte a ukpa in kham ahite kham mahin la-in, ngun ahite a ngun mahin a la hi. Solomon in Topa’ biakinn a dinga a bawl khuampi nihte, tuikuangpi khat, le a kingaknate, sumngo tawh kibawl hih nazatte khempeuh ahihleh tawi teh zawh ding hi lo hi. Khuampi khat a sanna pi sawmnih le sagih hi a, tua tungah sumngo khuamluzepna khat om hi; khuamluzepna a sanna pi li le alang ahi hi. Sumngo tawh a kibawl ngen banga kikalh simsiam le mang kawlsingte khuamluzepna kimkotah om hi. A khuampi nihna zong tua mah bangin, ngen banga kikalh simsiam tawh ahi hi. Tua ciangin a cingte a ukpa in siampi lianpa Seraiah, siampi nihna Zefaniah, le kong a cing mi thumte a la hi. Tua ciangin khuapi panin galkapte a uk ngei ulian khat, le khuapi sungah a om kumpipa’ thukuppihte mi nga a la hi. Tua ciangin gam sung mite a khawm galkapte a ukpa’ lai-at pa a la hi. Tua ciangin khuapi sungah a om tua gam sung mi sawmguk a la hi. Tua ciangin a cingte a ukpa Nebuzaradan in amaute la-in Riblah-a Babylon kumpipa kiangah amaute a paipih hi. Tua ciangin Babylon kumpipa in amaute vat a, Hamath gam sung Riblah-ah amaute a that hi. Tua ahih ciangin amau’ gam panin salin Judah mite kilakhia hi. Tua ciangin Judah gam sungah a omlai, Babylon kumpipa Nebukhadnezzar in a nusiatte tungah a uk dingin Shafan’ tapa Ahikam, a tapa Gedaliah amah in a seh hi. Tu-in gam sunga om galkap a ukte le a mite in Babylon kumpipa in a uk dingin Gedaliah a sehna thu a zak uh ciangin amaute a mite uh tawh Mizpah-a Gedaliah kiangah hong pai uh hi. Tuate pen Nethaniah’ tapa Ishmael, Kareah’ tapa Johanan, Netofah mi Tanhumeth’ tapa Seraiah, le Maakath mi Jaazaniah ahi uh hi. Tua ciangin amaute le a mite uh tungah Gedaliah kiciamin, “Khaldea mi uliante’ hangin lau kei un; gam sungah tengin, Babylon kumpipa’ na sem un. Tua hileh note a dingin thu hong nuam ding hi,” a ci hi. Ahih hangin a kha sagihna sungin kumpi innkuan sung panin Elishama’ tapa Nethaniah, a tapa Ishmael mihing sawm tawh hong kuanin Gedaliah le Mizpah-ah amah tawh a om Judah mi le Khaldea mite simin a that hi. Tua ciangin a lian a neu-in mi khempeuh, le galkap a ukte kithawi-in Egypt-ah pai uh hi; bang hang hiam cih leh amaute in Khaldea mite kihta uh hi. Judah kumpi Jehoiakhin thong sungah a omzawh kum sawmthum le kum sagihna kum, kha sawm le nihna, tua kha ni sawmnih le sagih ni, Babylon kumpipa Evilmerodak in uk ding a kipat kumin, hehpihna tawh thong panin Judah kumpi Jehoiakhin a khah hi. Amah in migitna kam tawh amah hopih a, Babylon sunga amah tawh a om kumpi a mat dangte khempeuh sangin a sangzaw-in amah a pahtawi hi. Tua ahih ciangin Jehoiakhin in a thong puante suahkhia hi. Tua ciangin a nuntak sung nisimin kumpipa’ sabuai-ah a manmanin an a ne hi. Tua ciangin ama ngahthuap dingin, amah a nuntaksung tawntung nisimin tanh khat, a manmanin ngahthuapna ama tungah kumpipa in a pia hi. Adam’ ta Seth, Seth’ ta Enosh, Enosh’ ta Kenan, Kenan’ ta Mahalalel, Mahalalel’ ta Jared, Jared’ ta Enok, Enok’ ta Methuselah, Methuselah’ ta Lamek, Lamek’ ta Noah ahi hi. Noah in tapa thum nei a, tuate pen Shem, Ham, le Jafeth ahi uh hi. Jafeth’ tapate: Gomer, Magog, Madai, Javan, Tubal, Meshek, le Tiras hi a, amau’ min ciat pua-in minam tuamtuam a piang hi. Gomer’ suante: Ashkenaz mite, Rifath mite, le Togarmah mite ahi uh hi. Javan’ suante: Elishah mite, Tarshish mite, Kittim mite, le Rodanim mite ahi uh hi. Ham’ tapate: Kush, Egypt, Put, le Kanaan hi a, amau’ min ciat pua-in minam a piang hi. Kush’ suante: Seba mite, Havilah mite, Sabta mite, Raamah mite, le Sabteka mite ahi uh hi. Raamah’ suante: Sheba mite, le Dedan mite ahi uh hi. Kush in Nimrod kici tapa khat nei a, leitungah amah a vanglian masa pen ahi hi. Egypt pen Lud mite, Anam mite, Lehab mite, Naftuh mite, Pathrus mite, Kasluh mite (Filistia mite’ hong pianna), le Kaftor mite’ pianna pupi ahi hi. Kanaan pen a tacil Sidon, le Heth, le Jebus mite, Amor mite, Girgash mite, Hiv mite, Arka mite, Sin mite, Arvad mite, Zemari mite, le Hamath mite’ pianna pa ahi hi. Shem’ tapate: Elam, Asshur, Arpakshad, Lud, Aram, Uz, Hul, Gether, le Meshek hi a, amau’ min ciat pua-in minam a piang hi. Arpakshad pen Shelah’ pa hi a, Shelah pen Eber’ pa ahi hi. Eber’ sung pan a piang tapa nihte: A khat pa’ min Peleg ahi hi (bang hang hiam cih leh ama hunin gam kikhen hi). A sanggampa’ min Joktan ahi hi. Joktan pen Almodad mite, Shelef mite, Hazarmaveth mite, Jerah mite, Hadoram mite, Uzal mite, Diklah mite, Ebal mite, Abimael mite, Sheba mite, Ofir mite, Havilah mite, le Jobab mite’ pianna pa ahi hi. Hihte khempeuh, Joktan’ suante ahi uh hi. Shem, Arpakshad, Shelah, Eber, Peleg, Reu, Serug, Nahor, le Terah hi a, tua ciangin Abraham a kici Abram ahi suk uh hi. Abraham’ tapate: Isaac le Ishmael ahi uh hi. Amau’ khangsimna hih bang ahi hi: Ishmael’ tacil Nebaioth ahi hi. Tua ciangin Kedar, Adbeel, Mibsam, Mishma, Dumah, Massa, Hadad, Tema, Jetur, Nafish, le Kedemah ahi uh hi. Hihte pen Ishmael’ tapate ahi uh hi. Abraham’ zineu Keturah’ tapate: Zimran, Jokshan, Medan, Midian, Ishbak, le Shuah ahi uh hi. Jokshan’ tapate: Sheba le Dedan ahi uh hi. Midian’ tapate: Efah, Efer, Hanok, Abida, le Eldaah ahi uh hi. Hihte khempeuh pen Keturah’ suanlekhakte ahi uh hi. Abraham pen Isaac’ pa ahi hi. Isaac’ tapate Esau le Israel ahi uh hi. Esau’ tapate: Elifaz, Reuel, Jeush, Jalam, le Korah ahi uh hi. Elifaz’ tapate: Teman, Omar, Gatam, Kenaz, Timna, le Amalek ahi uh hi. Reuel’ tapate: Nahath, Zerah, Shammah, le Mizzah ahi uh hi. Seir’ tapate: Lotan, Shobal, Zibeon, Anah, Dishon, Ezer, le Dishan ahi uh hi. Lotan’ tapate Hori le Homam hi uh a, Lotan’ sanggamnu pen Timna ahi hi. Shobal’ tapate: Alian, Manahath, Ebal, Shefi, le Onam ahi uh hi. Zibeon’ tapate: Aiah le Anah ahi uh hi. Anah’ tapa Dishon ahi hi. Dishon’ tapate: Hamran, Eshban, Ithran, le Kheran ahi uh hi. Ezer’ tapate: Bilhan, Zaavan, le Jaakan ahi uh hi. Dishan’ tapate: Uz le Aran ahi uh hi. Israel-te tungah kumpi khat peuhpeuh in a uk ma-in Edom gam sungah a uk kumpite: Beor’ tapa Bela hi a, ama khuapi min Dinhabah ahi hi. Bela a sih ciangin ama tangin Bozrah khuami Zerah’ tapa Jobab in uk hi. Jobab a sih ciangin ama tangin Teman mite’ gammi Husham in uk hi. Husham a sih ciangin Moab gam sungah Midian mite a zopa, Bedad’ tapa Hadad in ama tangin uk a, ama khuapi min Avith ahi hi. Hadad a sih ciangin ama tangin Masrekah khuami Samlah in uk hi. Samlah a sih ciangin ama tangin Eufratis gun gei-a om Rehoboth khuami Shaul in uk hi. Shaul a sih ciangin ama tangin Akbor’ tapa Baalhanan in uk hi. Baalhanan a sih ciangin ama tangin Hadad in uk hi. Ama khuapi min Pai hi a, ama zi’ min Mehetabel hi a, Mezahab’ tunu hi a, Matred’ tanu ahi hi. Tua ciangin Hadad si hi. Edom ukpite: Ukpi Timna, Aliah, Jetheth, Oholibamah, Elah, Pinon, Kenaz, Teman, Mibzar, Magdiel, le Iram hi uh a, hihte pen Edom ukpite ahi uh hi. Israel’ tapate: Reuben, Simeon, Levi, Judah, Issakhar, Zebulun, Dan, Josef, Benjamin, Naftali, Gad, le Asher ahi uh hi. Judah’ tapate: Er, Onan, le Shelah ahi uh hi. Hih thumte pen Kanaan mi Bathshua tawh a neih ahi hi. Judah’ tacil Er pen Topa’ muhna-ah gamtat hoih lo ahih manin Topa in amah that hi. A tapa’ zi Tamar in zong amah tawh Perez le Zerah nei hi. Judah in a vekpi-in tapa nga nei hi. Perez’ tapate: Hezron le Hamul ahi uh hi. Zerah’ tapate: Zimri, Ethan, Heman, Kalkol, le Dara, a vekpi-in nga pha uh hi. Karmi’ tapa: A ki-ap nate-ah a khial, Israel mite a nawngkaisak Akhan ahi hi. Tua ciangin Ethan’ tapa Azariah ahi hi. Ama sung panin a suak Hezron’ tapate: Jerahmeel, Ram, le Khelubai ahi uh hi. Ram pen Amminadab’ pa hi a, Amminadab pen Judah’ tapate’ sung pan ulian Nahshon’ pa ahi hi. Nahshon pen Salma’ pa, Salma pen Boaz’ pa, Boaz pen Obed’ pa, Obed pen Jessi’ pa ahi hi. Jessi in a tacil Eliab, a nihna Abinadab, a thumna Shimea, a lina Nethanel, a ngana Raddai, a gukna Ozem, a sagihna David a nei hi. Amau’ sanggam numeite Zeruiah le Abigail ahi uh hi. Zeruiah’ tapate: Abishai, Joab, le Asahel, thum pha uh hi. Abigail in Amasa nei a, Amasa’ pa pen Ishmael mi Jether ahi hi. Hezron’ tapa Kaleb in a zi Azubah le Jerioth tawh ta nei hi. Ama tate: Jesher, Shobab, le Ardon ahi uh hi. Azubah a sih ciangin Kaleb in Efrath tenpihin, tua nu in amah tawh Hur nei hi. Hur pen Uri’ pa hi a, Uri pen Bezalel’ pa ahi hi. Ama khan kum sawmguk a phak ciangin Hezron in a tenpih, Gilead’ pa Makhir’ tanu luppih hi. Tua nu in amah tawh Segub nei hi. Segub pen Jair’ pa hi a, Gilead gam sungah khuapi sawmnih le thum nei hi. Ahih hangin Geshur le Aram in amaute tung panin Havvothjair khua le Kenath le a khuaneute, khua sawmguk la hi. Hihte khempeuh pen Gilead’ pa Makhir’ suanlekhakte ahi uh hi. Hezron a sih khit ciangin Kaleb in a pa Hezron’ zi Efrath luppih a, tua nu in amah tawh Tekoa khuapi a sat Ashhur a nei hi. Hezron’ tacil Jerahmeel’ tapate: A tacil Ram, Bunah, Oren, le Ahijah ahi uh hi. Jerahmeel in zi dang khat zong nei a, a min Atarah ahi hi. Amah pen Onam’ nu ahi hi. Jerahmeel’ tacil Ram’ tapate: Maaz, Jamin, le Eker ahi uh hi. Onam’ tapate: Shammai le Jada ahi uh hi. Shammai’ tapate: Nadab le Abishur ahi uh hi. Abishur’ zi’ min Abihail hi a, tua nu in amah tawh Ahban le Molid nei hi. Nadab’ tapate: Seled le Appaim ahi uh hi. Seled in ta nei loin si hi. Appaim’ tapa Ishi ahi hi. Ishi’ tapa Sheshan ahi hi. Sheshan’ tapa Ahlai ahi hi. Tua ciangin Shammai’ sanggampa Jada’ tapate: Jether le Jonathan ahi uh hi. Jether in ta nei loin si hi. Jonathan’ tapate: Peleth le Zaza ahi uh hi. Hihte pen Jerahmeel’ suanlekhakte ahi uh hi. Sheshan in tapa nei loin tanu bek nei hi. Ahih hangin Sheshan in Jarha min nei Egypt sila khat nei hi. Tua ahih ciangin Sheshan in a sila Jarha tungah a zi dingin a tanu pia a, tua nu in Attai nei hi. Attai pen Nathan’ pa hi a, Nathan pen Zabad’ pa ahi hi. Zabad pen Eflal’ pa hi a, Eflal pen Obed’ pa ahi hi. Obed pen Jehu’ pa hi a, Jehu pen Azariah’ pa ahi hi. Azariah pen Helez’ pa hi a, Helez pen Eleasah’ pa ahi hi. Eleasah pen Sismai’ pa hi a, Sismai pen Shallum’ pa ahi hi. Shallum pen Jekamiah’ pa hi a, Jekamiah pen Elishama’ pa ahi hi. Jerahmeel’ sanggampa Kaleb’ tapa: Zif’ pa ahi a tacil Mareshah ahi hi. Mareshah’ tapa Hebron ahi hi. Hebron’ tapate: Korah, Tappuah, Rekem, le Shema ahi uh hi. Shema pen Raham’ pa hi a, Raham pen Jorkeam’ pa ahi hi. Rekem pen Shema’ sanggam hi a, Shammai’ pa ahi hi. Shammai’ tapa Maon hi a, Maon pen Bethzur’ pa ahi hi. Kaleb’ zineu Efah in Haran, Moza, le Gazez nei a, Haran in Gazez kici tapa khat nei hi. Jahdai’ tapate: Regem, Jotham, Geshan, Pelet, Efah, le Shaaf ahi uh hi. Kaleb’ zineu Maakah in Sheber le Tirhanah nei hi. Tua ciangin tapa nih nei leuleu a, Madmannah khuapi a sat Shaaf, le Makbenah khuapi le Gibea khuapi a sat Sheva ahi uh hi. Kaleb in tanu khat zong nei a, a min Aksah ahi hi. Hih a nuai-ate zong Kaleb’ suanlekhakte ahi uh hi. Kaleb’ zi Efrath’ tacil Hur’ tapate: Kiriathjearim khuapi a sat Shobal, Bethlehem khuapi a sat Shalma, le Bethgader khuapi a sat Haref ahi uh hi. Kiriathjearim khuapi a sat Shobal in tapa nei hi: Haroeh mite le Menuhoth gam a mi alangte’ pianna ahi hi. Tua ciangin Kiriathjearim khua sungah a tengte: Ithri mite, Puth mite, Shumath mite, le Mishrai mite ahi uh hi. Hihte sung panin Zorah mite le Eshtaol mite hong piang hi. Bethlehem khuapi a sat Salma’ suante: Netofah mite, Atrothbethjoab mite, le Zorah mi ahi Manahath minam nih sung pan alang ahi hi. Jabez ah a teng laithei minamte: Tirath mite, Shimeath mite, le Sukath mite ahi uh hi. Hihte pen Rekhab minamte tawh a kiteng Ken mite ahi uh hi. David sung panin Hebron-ah a piang tapate: Jezreel mi Ahinoam tawh a neih a tacil Ammon, Karmel numei Abigail tawh a neih a nihna Daniel, Geshur kumpipa Talmai’ tanu, a nu Maakah ahi a thumna Absalom, a nu Haggith ahi a lina Adonijah, Abital tawh a neih a ngana Shefatiah, a zi Eglah tawh a neih a gukna Ithream hi a, amah in kum sagih le kha guk sung a ukna Hebron-ah ama sung panin guk suak hi. Tua ciangin amah in Jerusalem-ah kum sawmthum le thum sung uk hi. Ama sung panin Jerusalem-ah a suakte: Shimea, Shobab, Nathan, le Solomon hi a, Ammiel’ tanu Bathsheba tawh a neih li pha hi. Tua ciangin Ibhar, Elishua, Elpelet, Nogah, Nefeg, Jafia, Elishama, Eliada, le Elifelet, kua pha uh hi. Hihte pen a zineute’ tapate sim loin, David’ tapate ahi hi. Tamar a kici tanu khat zong amah in neilai hi. Solomon’ suanlekhakte: Rehoboam, a tapa Abijah, a tapa Asa, a tapa Jehoshafat, a tapa Joram, a tapa Ahaziah, a tapa Joash, a tapa Amaziah, a tapa Azariah, a tapa Jotham, a tapa Ahaz, a tapa Hezekiah, a tapa Manasseh, a tapa Amon, a tapa Josiah ahi uh hi. Josiah’ tapate: A tacil Johanan, a nihna Jehoiakim, a thumna Zedekiah, a lina Shallum ahi uh hi. Jehoiakim’ suanlekhakte: A tapa Jehoiakhin le Zedekiah ahi uh hi. Babylon-ah sal a suak Jehoiakhin’ tapate: A tapa Shealtiel, Makhiram, Pedaiah, Shenazzar, Jekamiah, Hoshama, le Nedabiah ahi uh hi. Pedaiah’ tapate: Zerubbabel le Shimei ahi uh hi. Zerubbabel’ tapate: Meshullam le Hananiah hi a, Shelomith kici tanu khat zong nei hi. Tua ciangin tapa dang Hashubah, Ohel, Berekhiah, Hasadiah, le Jushabhesed, nga neilai hi. Hananiah’ tapate: Pelatiah le Jeshaiah hi a, Jeshaiah’ ta Refaiah, a tapa Arnan, a tapa Obadiah, a tapa Shekaniah ahi uh hi. Shekaniah in tapa khat le tupa nga nei a, a tapa Shemaiah ahi hi. Shemaiah tapate: Hattush, Igal, Bariah, Neariah, le Shafat ahi uh hi. Neariah’ tapate: Elioenai, Hizkiah, le Azrikam, thum pha uh hi. Elioenai’ tapate: Hodaviah, Eliashib, Pelaiah, Akkub, Johanan, Delaiah, le Anani, sagih pha uh hi. Judah’ tapate: Perez, Hezron, Karmi, Hur, le Shobal ahi uh hi. Shobal’ tapa Reaiah pen Jahath’ pa hi a, Jahath pen Ahumai le Lahad’ pa ahi hi. Hihte pen Zorah khua-ah a teng minamte’ pu le pate ahi uh hi. Tekoa khuapi a sat Ashhur in zi nih, Helah le Naarah nei hi. Naarah in amah tawh Ahuzzam, Hefer, Temeni, le Haahashtari nei hi. Hihte pen Naarah’ tapate ahi uh hi. Helah tawh a tapate: Zereth, Izhar le Ethnan ahi uh hi. Koz pen Anub le Zobebah’ pa hi a, Harum’ tapa Aharhel’ suante’ pupi ahi hi. Jabez a kici mi khat a sanggamte sangin pahtawihuai zaw hi. A nu in, “Gimpi-in amah nei ka hih manin,” ci-in a min Jabez a phuak hi. Jabez in Israel Pasian tungah thu ngen a, “Kei thupha hong pia-in ka gamgi hong keeksak in. Kei hong ompih inla, siatna khatpeuh in kei hong gimsak loh nadingin hong kem in,” a ci hi. Tua ciangin Pasian in ama ngetna pia hi. Shuhah’ sanggampa Khelub pen Mehir’ pa hi a, Mehir pen Eshton’ pa ahi hi. Eshton in Bethrafa, Paseah, le Tehinnah, tapa thum nei a, Tehinnah pen Irnahash khuapi a satpa ahi hi. Hih mite’ suanlekhakte, Rekah munah teng uh hi. Kenaz’ tapate: Othniel le Seraiah ahi uh hi. Othniel’ tapate: Hathath le Meonothai ahi uh hi. Meonothai pen Ofrah’ pa ahi hi. Seraiah pen Joab’ pa hi a, Joab pen Geharashim khuapi a satpa ahi hi. Tua khua-a teng mite khutsiamte vive ahih manin tua min a kiphuak ahi hi. Jefunneh’ tapa Kaleb’ tapate: Iru, Elah, le Naam ahi uh hi. Elah’ tapa Kenaz ahi hi. Jehallelel’ tapate: Zif, Zifah, Tiria, le Asarel ahi uh hi. Hodiah in Naham’ sanggamnu tenpih a, amau’ suante pen Keilah khua-ah a teng Garm mite le Eshtemoa khua-ah a teng Maakath minamte ahi uh hi. Shimon’ tapate: Amnon, Rinnah, Benhanan, le Tilon ahi uh hi. Ishi’ tapate: Zoheth le Benzoheth ahi uh hi. Judah’ tapa khat ahi Shelah’ tapate: Lekah khuapi a sat Er, le Mareshah khuapi a sat Laadah hi a, Bethashbea khua-ah saihadial puan a gan minamte ahi hi. Tua ciangin Jokim le Kozeba khuapi sungah a teng mite hi a, tua ciangin Joash le Saraf zong ahi uh hi. Amau tegel in Moab numeite tenpihin Bethlehem khua-ah teng uh hi. (Hih pen tuanthu lui pekpek thu ahi hi.) Hihte pen beelseekte hi a, Netaim khua le Gederah khua-ah a tengte ahi uh hi. Ama na a sem dingin kumpipa tawh tua khuate-ah tengkhawm uh hi. Simeon’ tapate: Nemuel, Jamin, Jarib, Zerah, le Shaul ahi uh hi. Shaul’ tapa Shallum, a tapa Mibsam, a tapa Mishma ahi uh hi. Mishma’ suante: A tapa Hammuel, a tapa Zakkur, a tapa Shimei ahi uh hi. Shimei in tapa sawm le guk le tanu guk nei hi. Ahih hangin a sanggamte in ta tampi nei lo uh a, Judah minamte a pun’ bangin Simeon minamte pung lo uh hi. Amaute Beersheba, Moladah, Hazarshual, Bihah, Ezem, Tolad, Bethuel, Hormah, Ziklag, Beth Markaboth, Hazarsusim, Bethbiri, le Shaaraim-ah teng uh hi. Hihte pen David’ uk hun mateng amaute’ khuapite ahi hi. Tua ciangin amau’ khuate Etam, Ain, Rimmon, Tokhen, le Ashan, khuapi nga, Baal ciang dong hih khuapite kiima om a khuaneute khempeuh tawh ahi hi. Hihte pen amau’ tenna hi a, amaute in khangsimna ciaptehna nei uh hi. Tua ciangin Meshobab, Jamlek, Amaziah’ tapa Joshah, Joel, Asiel’ tapa Seraiah, a tapa Joshibiah, a tapa Jehu, Elioenai, Jaakobah, Jeshohaiah, Asaiah, Adiel, Jesimiel, Benaiah, Shemaiah’ tapa Shimri, a tapa Jedaiah, a tapa Allon, a tapa Shifi’ tapa Ziza hi uh a, a minin a kilo hih mite pen amau’ beh ciatah ulian hi uh a, amau’ beh ciat nakpitakin a khang hi. A tuuhonte uh a dingin lonona a zong dingin kuam nisuahna lampang, Gedor lutna lamah khualzin uh a, lei hoih, lonona, le gam zai-in, gam dai-in, a nopna mun mu uh hi; bang hang hiam cih leh tua lai-ah a teng masate pen Ham mite ahi uh hi. A minin a kiciamteh hih mite, Judah kumpi Hezekiah’ hun sungin hong pai uh a, tua lai-ah a om Meunim mite le amau’ puanbukte susia-in tuni dongin amaute beisak uh a, amau’ tuuhonte a dingin tua lai-ah lonona om ahih manin amau’ munah amaute a teng uh hi. Tua ciangin amaute pawlkhat, Simeon mi zanga, Seir Mual-ah pai uh a, amaute in Ishi’ tapate Pelatiah, Neariah, Refaiah, le Uzziel makai-in a nei uh hi. Amaute in Amalek mi a suakta a omlaite susia uh a, tuni dongin tua munah amaute teng uh hi. Israel’ tate sung panin Reuben a tacil ahi hi. (Amah in a pa’ zineute khat luppih ahih manin tacil hi napi-in ama innluahza pen Josef’ tungah kipia hi. Tua ahih ciangin innluahza tawh kizui-in khangsimna-ah amah kiciamteh lo hi. A sanggamte lakah Judah a thahat suakin ama sung panin ulian khat a om hangin innluahza pen Josef a’ ahi hi.) Israel’ tacil Reuben’ tapate: Hanok, Pallu, Hezron, le Karmi ahi uh hi. Joel’ suante: A tapa Shemaiah, a tapa Gog, a tapa Shimei, a tapa Mikah, a tapa Reaiah, a tapa Baal, le a tapa Beerah hi a, Assiria kumpipa Tiglathpileser in amau’ minam makai Beerah manin salin a puakkhiat pa ahi hi. Amah pen Reuben mite a ukpipa ahi hi. Tua ciangin amau’ khangsimna a kiciamteh ciangin a innkuankuanin ama behte: Ukpi Jeiel, Zekhariah, le Joel mite beh sung panin Shema’ tapa Azaz, a tapa Bela ahi hi. Aroer le tua panin Nebo le Baalmeon ciang dongah a teng uh hi. Gilead gam sungah amau’ bawngte khangin tampi pha ahih manin Eufratis gun hih lampang sehnel gam lutna ciang dong nisuahna lamah zong a teng uh hi. Tua ciangin Saul’ hun lai-in amaute in Hagri mite simin zo uh a, Gilead nisuahna lam gam khempeuh a amau’ puanbukte luahin tuate sungah a teng uh hi. Bashan gam Salekah dongah Reuben-te’ galkhatah a teng Gad minamte: Ukpi Joel hi-in, a zom Shafam hi a, Janai le Shafat, Bashan-ah beh makai ahi uh hi. Tua ciangin amau’ beh makai dangte: Mikhael, Meshullam, Sheba, Jorai, Jakan, Zia, le Eber, sagih pha uh hi. Hihte pen Buz’ tapa Jahdo, a tapa Jeshishai, a tapa Mikhael, a tapa Gilead, a tapa Jaroah, a tapa Huri’ tapa Abihail’ suante ahi uh hi. Guni’ tapa Abdiel’ tapa Ahi pen amau’ behte sungah ukpi ahi hi. Amaute Gilead gam sung, Bashan gam le a khuapite sung, le Sharon gam sung lonona a kiten theihna ciang dongah a teng uh hi. Hihte khempeuh Judah kumpi Jotham’ hun sung, le Israel kumpi Jeroboam’ hun sungin khangsimna-ah kiciamteh hi. Reuben mite, Gad mite, le Manasseh minam a langte in mi thahat, lum le namsau kuahin thal a tawi, gal a siam, nasem dingin a baihsa-in a om mi tul sawmli le tulli le zasagih le sawmguk nei hi. Amaute in Hagri mite, Jetur mite, Nafish mite, le Nodab mite zo uh hi. Amaute a sim nadingin huhna a ngah uh ciangin Hagri mite le amau tawh a kipawl khempeuhte amaute’ khut sungah kipia hi; bang hang hiam cih leh gal kidona sungah amaute in Pasian’ tungah ko uh a, amaute in Pasian muang uh ahih manin amah in amaute’ thumna a pia hi. Amaute in amau’ ganhingte matsak uh hi. A kalaoh uh tul sawmnga, tuu tul zanih le tul sawmnga, la tulnih, le mi tul zakhat hingmat uh hi. Tua gal pen Pasian’ gal ahih manin mi tampi tak kithatin puk hi. Tua ciangin amaute sal a suah hun dong uh tua munah teng uh hi. Manasseh minam a langte pen Bashan panin Baalhermon, Senir, le Hermon Mual tungah tengin tam pha mahmah uh hi. Amau’ beh lutangte: Efer, Ishi, Eliel, Azriel, Jeremiah, Hodaviah, le Jahdiel hi a, a thahat galhangte, mi minthangte, a beh lutangte ahi uh hi. Ahih hangin amaute in a pate uh Pasian’ thu palsat uh a, Pasian in amaute’ mai-ah a suksiat tua gam mite’ pasian-te bia uh hi. Tua ahih ciangin Israel Pasian in Assiria kumpipa Pul (Tiglathpileser zong a kici) Assiria kumpipa hansuah a, amah in Reuben mite, Gad mite, le Manasseh minam alangte puakhia-in, Halah, Habor, Hara khuate, le Gozan gun dungah paipihin tuni dongin tua gamte-ah om uh hi. Levi’ tapate: Gershom, Kohath, le Merari ahi uh hi. Kohath’ tapate: Amram, Izhar, Hebron, le Uzziel ahi uh hi. Amram’ tate: Aaron, Moses, le tanu Miriam ahi uh hi. Aaron’ tapate: Nadab, Abihu, Eleazar, le Ithamar ahi uh hi. Eleazar’ suanlekhakte: A tapa Finehas, a tapa Abishua, a tapa Bukki, a tapa Uzzi, a tapa Zerahiah, a tapa Meraioth, a tapa Amariah, a tapa Ahitub, a tapa Zadok, a tapa Ahimaaz, a tapa Azariah, a tapa Johanan, le a tapa Azariah, (Solomon in Jerusalem-ah a lam inn sungah siampi a sempa) ahi hi. Azariah’ tapa Amariah, a tapa Ahitub, a tapa Zadok, a tapa Shalum, a tapa Hikiah, a tapa Azariah, a tapa Seraiah, a tapa Jehozadak ahi hi. Topa in Nebukhadnezzar’ khut tawh Judah le Jerusalem salin a mat ciangin Jehozadak zong salin a pai hi. Levi’ tapate: Gershom, Kohath, le Merari ahi uh hi. Gershom’ tapate: Libni le Shimei ahi uh hi. Kohath’ tapate: Amram, Izhar, Hebron, le Uzziel ahi uh hi. Merari’ tapate: Mahli le Mushi ahi uh hi. Hihte amau’ beh tawh kizui-in Levi minamte ahi uh hi. Gershom’ suante: A tapa Libni, a tapa Jahath, a tapa Zimmah, a tapa Joah, a tapa Iddo, a tapa Zerah, a tapa Jeatherai ahi hi. Kohath’ suante: A tapa Amminadab, a tapa Korah, a tapa Assir, a tapa Ekanah, a tapa Ebiasaf, a tapa Assir, a tapa Tahath, a tapa Uriel, a tapa Uzziah, le a tapa Shaul ahi hi. Elkanah’ tapate: Amasai le Ahimoth ahi hi. Ahimoth’ suante: A tapa Elkanah, a tapa Zofai, a tapa Nahath, a tapa Eliab, a tapa Jeroham, a tapa Ekanah, a tapa Samuel ahi uh hi. Samuel’ tapate: A tacil Joel, a nihna Abijah ahi uh hi. Merari’ suante: Mahli, a tapa Libni, a tapa Shimei, a tapa Uzza, a tapa Shimea, a tapa Haggiah, le a tapa Asaiah ahi uh hi. Topa’ biakbuk sungah Thuciamna Singkuang a tawlngak khit ciangin tua sungah lasak nasep a ukin David in a koih hih mite ahi hi. Solomon in Jerusalem-ah Topa’ Biakinn a lam ciang dong amaute in kikhopna puanbuk ahi biakbuk mai-ah lasak na sem uh a, amaute in a nasep uh a hunhun a banbanin sem uh hi. Hih nasep a semte’ khangsimna a nuai-a bang ahi hi. Kohath mite beh sung panin: Heman la makai pa hi a, Joel’ tapa ahi hi. Heman’ khangsimna pen a pupi Israel lam manawhin kileh simto hi. Heman a pa Joel, a pa Samuel, a pa Ekanah, a pa Jehoram, a pa Eliel, a pa Toah, a pa Zuf, a pa Ekanah, a pa Mahath, a pa Amasai, a pa Ekanah, a pa Joel, a pa Azariah, a pa Zefaniah, a pa Tahath, a pa Assir, a pa Ebiasaf, a pa Korah, a pa Izhar, a pa Kohath, a pa Levi, a pa Israel ahi hi. Asaf pen lasa pawl nihna a makai pa hi a, ama khangsimna a pupi Levi lam manawhin kileh simto hi. Tuate in: Asaf, a pa Berekhiah, a pa Shimea, a pa Mikhael, a pa Baaseiah, a pa Makhijah, a pa Ethni, a pa Zerah, a pa Adaiah, a pa Ethan, a pa Zimmah, a pa Shimei, a pa Jahath, a pa Gershom, a pa Levi ahi uh hi. Merari-te beh sung panin Ethan pen lasa pawl thumna a ukpa hi a, ama khang simna a pupi Levi lam manawhin kileh simto hi. Tuate in: Ethan, a pa Kishi, a pa Abdi, a pa Malluk, a pa Hashabiah, a pa Amaziah, a pa Hikiah, a pa Amzi, a pa Bani, a pa Shemer, a pa Mahli, a pa Mushi, a pa Levi hi a, Levi mi a sanggamte uh Pasian’ biakbuk nasep dang khempeuh a sem dingin a kisehte ahi hi. Aaron le a tapate in Pasian’ nasem Moses’ thupiaksate khempeuh bangin siangtho pen mun nasepnate khempeuh le Israel mite a dingin kilemna a bawl dingin meihal biakna tau tung le paknamtui biakna tau tungah piakna a bawl uh hi. Aaron’ suanlekhakte: Aaron a tapa Eleazar, a tapa Finehas, a tapa Abishua, a tapa Bukki, a tapa Uzzi, a tapa Zerahiah, a tapa Meraioth, a tapa Amariah, a tapa Ahitub, a tapa Zadok, a tapa Ahimaaz ahi hi. Amau’ gamgi huam sungah amau’ tenna tawh kizui-in amau’ omna munte: Kohath-te beh sung pan Aaron suante tungah a kipia, amau a dingin a tanh uh om a, Judah gam sungah Hebron le a kiim lononate amaute tungah pia uh a, ahih hangin a lote le a khuaneute Jefunneh’ tapa Kaleb tungah a pia uh hi. Aaron suante tungah amaute in a piak khuapite: Bukna khuapi Hebron, Jattir, le Libnah khuapite, Eshtemoa a lonona gamte tawh, Hilen a lonona gamte tawh, Debir a lonona gamte tawh, Ashan a lonona gamte tawh, le Bethshemesh a lonona gamte tawh ahi hi. Tua ciangin Benjamin minamte’ gam sung panin Geba a lonona gamte tawh, Alemeth a lonona gamte tawh, le Anathoth a lonona gamte tawh ahi hi. Amau’ beh khempeuh’ khuapite sawm le thum ahi hi. Kohath mi a omlaite tungah aisanna tawh Manasseh minam alangte’ gam sung panin khuapi sawm kipia hi. Gershom-te beh tungah a innkuan-a kizui-in Issakhar-te’ gam, Asher-te’ gam, Naftali-te’ gam, le Bashan-a om Manasseh-te’ gam sung panin khuapi sawm le thum kipia hi. Merari-te beh tungah a innkuan-a kizui-in Reuben-te’ gam, Gad-te’ gam, le Zebulun-te’ gam sung panin khuapi sawm le nih kipia hi. Tua ahih ciangin Israel mite in hih bangin Levi mite tungah khuapite a lononate tawh a pia uh hi. Amaute in Judah-te’ gam, Simeon-te’ gam, le Benjamin-te’ gam sung panin zong a minin a kilo hih khuapite amaute tungah a pia uh hi. Tua ciangin Kohath-te beh pawlkhat in Efraim minamte’ gam sung panin amau’ gam khuapite mah ngah uh hi. Amaute tungah a kipia bukna khuapite: Efraim mualtung gam sungah a om Shekhem a lonona gamte tawh, Gezer a lonona gamte tawh, Jokmeam a lonona gamte tawh, Bethhoron a lonona gamte tawh, Aijalon a lonona gamte tawh, Gathrimmon a lonona gamte tawh, le Manasseh minam alangte’ gam sung panin Aner a lonona gamte tawh, le Bileam a lonona gamte tawh hi a, hihte pen Kohath-te beh a omlaite a’ ding ahi hi. Manasseh minam alangte’ gam sung panin Gershom-te beh tungah a kipiate: Bashan gam sunga Golan a lonona gamte tawh le Ashtaroth a lonona gamte tawh ahi hi. Tua ciangin Issakhar-te’ gam sung panin: Kedesh a lonona gamte tawh, Daberath a lonona gamte tawh, Ramoth a lonona gamte tawh, le Anem a lonona gamte tawh ahi hi. Asher-te’ gam sung panin: Mashal a lonona gamte tawh, Abdon a lonona gamte tawh, Hukok a lonona gamte tawh, le Rehob a lonona gamte tawh ahi hi. Tua ciangin Naftali-te’ gam sung panin: Galilee gam sungah a om Kedesh a lonona gamte tawh, Hammon a lonona gamte tawh, le Kiriathaim a lonona gamte tawh ahi hi. Merari-te beh a omlaite tungah Zebulun-te’ gam sung panin a kipiate: Rimmono a lonona gamte tawh, Tabor a lonona gamte tawh, le Reuben-te’ gam sung panin Jordan nisuahna lam, Jerikho kiang Jordan galkhat sung pan: Pawn a om Bezer a lonona gamte tawh, Jahzah a lonona gamte tawh, Kedemoth a lonona gamte tawh, le Mefaath a lonona gamte tawh ahi hi. Tua ciangin Gad-te’ sung panin: Gilead gam a om Ramoth a lonona gamte tawh, Mahanaim a lonona gamte tawh, Heshbon a lonona gamte tawh, le Jazer a lonona gamte tawh ahi hi. Issakhar’ tapate: Tola, Puah, Jashub, le Shimron, li pha uh hi. Tola’ tapate: Uzzi, Refaiah, Jeriel, Jahmai, Ibsam, le Shemuel-te hi a, amau’ beh sung panin innkuan lutangte hi a, Tola-te beh pen amau’ khangin a galhangte ahi uh hi. David’ hun laitakin mihing tul sawmnih le tulnih le zaguk pha uh hi. Uzzi in tapa Izrahiah nei hi. Izrahiah le a tapate Mikhael, Obadiah, Joel, le Isshiah, mi nga hi a, a vekpi-in ukpite ahi uh hi. Amaute’ banah a pate uh a innkuan kuanin khangsimna-ah a kiciamtehna tawh kizui-in galsim dingin galkap honte mi tul sawmthum le tulguk om hi; bang hang hiam cih leh amaute in zi tampi nei-in ta tampi nei uh hi. Issakhar minam sungah a om, khangsimna-ah a kiciamteh, a galhang a thahat amau beh mi a vekpi-in tul sawmgiat le tulsagih ahi hi. Benjamin’ tapate: Bela, Bekher, le Jediael, thum pha uh hi. Bela’ tapate: Ezbon, Uzzi, Uzziel, Jerimoth, le Iri, nga pha uh a, amau’ beh sungah innkuan lutang, a thahat galhangte ahi uh hi. Amau’ khang simna a kiciamtehna-ah tul sawmnih le tulnih le sawmthum le li pha uh hi. Bekher’ tapate: Zemirah, Joash, Eliezer, Elioenai, Omri, Jeremoth, Abijah, Anathoth, le Alemeth ahi uh hi. Hihte khempeuh Bekher’ tapate ahi uh hi. Amau’ khang tawh kizui-in a khang simna a kiciamtehna-ah, amau’ beh sungah innkuan lutang, a thahat a galhang mihing tul sawmnih le zanih ahi hi. Jediael’ tapa pen Bilhan ahi hi. Bilhan’ tapate: Jeush, Benjamin, Ehud, Khenaanah, Zethan, Tarshish, le Ahishar ahi uh hi. Hihte khempeuh amau’ beh sungah innkuan lutang hi uh a, a thahat, a galhang, Jediael’ suante gal simna-ah nasem dingin a baihsa-in a om mihing tul sawm le tulsagih le zanih pha uh hi. Tua ciangin Shuppim le Huppim zong hih minamte sung mah hi a, Dan in Hushim kici tapa khat a nei hi. Naftali’ tapate: Jahziel, Guni, Jezer, le Shallum hi a, Bilhah sung pana piangte ahi uh hi. Manasseh’ tapate: A zineu Aram numei tawh a neih Asriel le Makhir ahi hi. Makhir pen Gilead’ pa ahi hi. Tua ciangin Makhir in Huppim le Shuppim a’ ding zi a la hi. Ama sanggamnu’ min Maakah ahi hi. Makhir’ tapa a nihna’ min Zelofehad hi a, Zelofehad in tanu bek a nei hi. Tua ciangin Makhir’ zi Maakah in tapa nih nei a, a min Peresh le Sheresh ahi hi. Peresh’ tapate Ulam le Rakem ahi hi. Ulam’ tapa Bedan ahi hi. Hihte pen Manasseh’ tapa Makhir’ tapa Gilead’ suante ahi hi. Tua ciangin Gilead’ sanggamnu Hammolekheth in Ishhod, Abiezer, le Mahlah nei hi. Shemida’ tapate Ahian, Shekhem, Likhi, le Aniam ahi uh hi. Efraim’ suante: A tapa Shuthelah, a tapa Bered, a tapa Tahath, a tapa Eleadah, a tapa Tahath, a tapa Zabad, a tapa Shuthelah ahi hi. Efraim in tapa dang nih nei a, tuate Ezer le Elead ahi uh hi. Gath khua mite’ bawng a sut dingin a kuan lai-in Gath mite in amau tegel na that uh hi. Tua ciangin a pa uh Efraim ni tampi sung kap a, amah a hehnem dingin a sanggamte hong pai uh hi. Tua ciangin Efraim in a zi luppih a, amah gai-in tapa khat nei hi. Ama inn sungah siatna tung ahih manin amah in a min Beriah a phuak hi. Ama tanu Sheerah hi a, Bethhoron nuainung le a tungnung le Uzzensheerah khua a lam nu ahi hi. Tua ciangin Refah kici tapa khat nei a, ama suante: Resef, a tapa Telah, a tapa Tahan, a tapa Ladan, a tapa Ammihud, a tapa Elishama, a tapa Nun, a tapa Joshua ahi hi. Amau’ neihsa gam le a tenna uh Bethel le a khuapite, le nisuahna lamah Naaran, le nitumna lamah Gezer le a khuapite, Shekhem le a khuapite, le Azzah le a khuapite ahi hi. Manasseh’ suante in Bethshean le a khuapite, Taanak le a khuapite, Megiddo le a khuapite, Dor le a khuapite a uk uh hi. Hihte sungah Israel’ tapa Josef’ suante a teng uh hi. Asher’ tapate: Imnah, Ishvah, Ishvi, Beriah, le a sanggamnu uh Serah ahi hi. Beriah’ tapate: Heber le Malkhiel hi a, Malkhiel pen Birzaith khuapi a satpa ahi hi. Heber pen Jaflet, Shomer, Hotham, le a sanggamnu uh Shua-te’ pa ahi hi. Jaflet’ tapate: Pasak, Bimhal, le Ashvath ahi uh hi. Hihte pen Jaflet’ tapate ahi uh hi. A sanggampa Shomer’ tapate: Rohgah, Jehubbah, le Aram ahi uh hi. A sanggampa Hotham’ tapate: Zofah, Imna, Shelesh, le Amal ahi uh hi. Zofah’ suante: Suah, Harnefer, Shual, Beri, Imrah, Bezer, Hod, Shamma, Shilshah, Ithran, le Beera ahi uh hi. Jether’ suante: Jefunneh, Pispa, le Ara ahi uh hi. Ulla’ suante: Arah, Hanniel, le Rizia ahi uh hi. Hihte khempeuh Asher’ beh lutangte, a kipakta, a thahat galhangte, ulian a ukte ahi uh hi. Gal sungah nasem dingin khangsimna-ah a kiciamteh amaute a phazah mihing tul sawmnih le tulguk ahi hi. Benjamin pen a tacil Bela, a nihna Ashbel, a thumna Aharah, a lina Nohah, le a ngana Rafa-te’ pa ahi hi. Bela’ tapate: Addar, Gera, Abihud, Abishua, Naaman, Ahoah, Gera, Shefufan, le Huram ahi uh hi. Ehud’ tapate (amaute pen Geba-a teng beh lutangte hi uh a, amaute Manahath-ah galmatin kipua hi): Naaman, Ahijah, le Uzza le Ahihud’ pa Heglam a kici Gera ahi uh hi. Shaharaim in a zite Hushim le Baara a mak khit ciangin Moab gam sungah tapate nei hi. Amah in a zikik Hodesh tawh a neih a tapate: Jobab, Zibia, Mesha, Malkam, Jeuz, Sakhia, le Mirmah ahi uh hi. Hihte pen amau beh sungah innkuan lutangte ahi uh hi. Amah in Hushim tawh zong a neih a tapate: Ahitub le Elpaal ahi uh hi. Elpaal’ tapate: Eber, Misham, le Ono le Lod a khuapite tawh a sat Shemed, le Beriah le Shema (Gath a tengte a taisak Aijalon a teng beh lutangte), le Ahio, Shashak, le Jeremoth ahi uh hi. Zebadiah, Arad, Eder, Mikhael, Ishpah, le Joha-te pen Beriah’ tapate ahi uh hi. Zebadiah, Meshullam, Hizki, Heber, Ishmerai, Izliah, le Jobab-te pen Elpaal’ suante ahi uh hi. Jakim, Zikri, Zabdi, Elienai, Zillethai, Eliel, Adaiah, Beraiah, le Shimrath-te pen Shimei’ suante ahi uh hi. Ishpan, Eber, Eliel, Abdon, Zikri, Hanan, Hananiah, Elam, Anthothijah, Ifdeiah, le Penuel-te pen Shashak’ suante ahi uh hi. Shamsherai, Shehariah, Athaliah, Jaareshiah, Elijah, le Zikri-te pen Jehoram’ suante ahi uh hi. Hihte pen amau khang tawh kizui-in beh lutangte, a ukpite ahi uh hi. Hihte khempeuh Jerusalem-ah a teng uh hi. Gibeon khuapi a satpa Jeiel pen Gibeon-ah teng a, ama zi’ min Maakah ahi hi. Ama tapa upa pen Abdon, tua ciangin Zur, Kish, Baal, Ner, Nadab, Gedor, Ahio, Zekher, le Mikloth (amah pen Shimeah’ pa) ahi hi. Tu-in amau’ suanlekhakte zong Jerusalem-a amau’ behte’ galkhatah amau’ behte mah tawh teng uh hi. Ner pen Kish’ pa, Kish pen Saul’ pa ahi hi. Saul pen Jonathan, Malkhishua, Abinadab, le Eshbaal’ pa ahi hi. Tua ciangin Jonathan’ tapa pen Meribbaal hi a, Meribbaal pen Mikah’ pa ahi hi. Mikah’ tapate: Pithon, Melek, Tarea, le Ahaz ahi uh hi. Ahaz pen Jehoaddah’ pa ahi hi. Jehoaddah pen Alemeth, Azmaveth, le Zimri’ pa hi a, Zimri pen Moza’ pa ahi hi. Moza pen Binea’ pa ahi hi. Binea’ tapa Rafah, a tapa Eleasah, a tapa Azel ahi hi. Azel in tapa guk nei a, tuate’ minte: Azrikam, Bokheru, Ishmael, Sheariah, Obadiah, le Hanan ahi uh hi. Hihte khempeuh Azel’ tapate ahi uh hi. Azel’ sanggampa Eshek’ tapate: A tacil Ulam, a nihna Jeush, le a thumna Elifelet ahi hi. Ulam’ tapate a thahat galhangte, thal tawite, tapa tampi le tupa tampi a neite hi a, mi za le sawmnga pha uh hi. Hihte khempeuh Benjamin minamte ahi uh hi. Israel mi khempeuh khangsimna-ah kiciamteh a, Israel Kumpite’ Laibu sungah tuate kigelh hi. Amau thuman lohna hangin gimpiakna-in Babylon-ah salin Judah mite kipaipih hi. Tu-in amau’ neihsa amau’ khuapite sungah a tengkik masate pen Israel nautangte, siampite, Levi mite, le biakinn nasemte ahi uh hi. Tua ciangin Judah, Benjamin, Efraim, le Manasseh mi pawlkhat Jerusalem-ah teng uh a, tua a tengte: Judah tapa Perez’ tapate sung panin Bani’ tapa Imri, a tapa Omri, a tapa Ammihud, a tapa Uthai a makai ahi hi. Tua ciangin Judah tapa Shelah mite sung panin: Innkuan lutang Asaiah a makai ahi hi. Judah tapa Zerah mite sung panin: Jeuel a makai ahi hi. Judah minam sung panin innkuan zaguk le sawmkua ahi hi. Benjamin mite sung panin: Hassenuah’ tapa Hodaviah, a tapa Meshullam, a tapa Sallu ahi hi. Tua ciangin Jehoram’ tapa Ibneiah, Makri’ ta Uri, a tapa Elah, le Ibnijah’ ta Reuel, a tapa Shefatiah, a tapa Meshullam ahi hi. Benjamin minamte sung panin innkuan zakua le sawmnga le guk ahi hi. Hih min kilote khempeuh pen amau’ beh ciatah beh lutangte ahi uh hi. Siampite’ sung panin: Jedaiah, Jehoiarib, Jakhin, le Ahitub’ tapa Meraioth, a tapa Zadok, a tapa Meshullam, a tapa Hilkiah’ tapa Azariah, (Pasian’ biakinn sung a ukpipa) le Malkhijah’ tapa Pashhur, a tapa Jehoram’ tapa Adaiah, le Immer’ tapa Meshilemith, a tapa Meshullam, a tapa Jahzerah, a tapa Adiel’ tapa Maasai ahi hi. Hihte banah amau’ behte, a beh lutangte, Pasian’ biakinn-ah nasep nadingin a siam mahmah mihing tulkhat le zasagih le sawmguk ahi hi. Levi mite sung panin: Merari’ tapate sung pan Hashabiah, a tapa Azrikam, a tapa Hasshub’ tapa Shemaiah, le Bakbakkar, Heresh, Galal, le Asaf’ tapa Zikri, a tapa Mika’ tapa Mattaniah, le Jeduthun’ tapa Galal, a tapa Shemaiah’ tapa Obadiah, le Netofah khuaneute sungah a teng, Elkanah’ tapa Asa’ tapa Berekhiah ahi hi. Kulhkongpi cingte: Shallum, Akkub, Talmon, le Ahiman hi a, Shallum pen amau’ makai pa ahi hi. Tu dongin Kumpipa’ Kulhkongpi nisuahna lampangah a omte ahi uh hi. Hihte pen Levi mite’ omna kongcingte ahi ngei uh hi. A pu a pate uh, biakbuk lutna mun a cing, Topa’ phual a ukte ahih uh mah bangin Korah’ tapa Ebiasaf, a tapa Kore’ tapa Shallum, le a behte ahi Korah mite pen nasepna a uk, puanbuk kong a cingte ahi uh hi. Eleazar’ tapa Finehas pen a beisa hun sungah amaute a ukpa hi a, Topa in amah ompih hi. Meshelemiah’ tapa Zekhariah pen kikhopna puanbuk lutna-ah kongcing pa ahi hi. Kongcingin a kiteel hih mite khempeuh zanih le sawm le nih ahi hi. Amaute pen a khuaneute uha khangsimna-ah kiciamteh uh hi. David le thumu pa Samuel in amau’ panmun-ah amaute phut hi. Tua ahih ciangin amaute le a suan a khakte uh Topa’ biakinn kulhkongpite a uk, a cingte ahi uh hi. Kongpi cingte pen a pang li, nisuahna, nitumna, leilu, le leitaw lamah om uh hi. Tua ciangin amau’ khuaneute sungah a om a behte uh hih mite tawh a om dingin a hun hunin ni sagih simin a hong pai ding uh a kisam ahi hi. Bang hang hiam cih leh Levi mi kongpi a cing ukpi lite pen biakinn sungte le Pasian’ biakinn van manpha koihnate a uk ahi uh hi. Pasian’ biakinn kiimah amaute giak uh hi; bang hang hiam cih leh amaute tungah vilna nasep, le zingsang simin kong a hon ding uh nasep kiguan hi. Amaute pawlkhat in biakinn sunga kizang umlebeelte uk uh hi; bang hang hiam cih leh tua nazatte hong kitumpih ciang hitaleh a kilakkhiat ciang hitaleh a malzah a sim ding uh kisam hi. Amau sung pan adang pawlkhatte pen tutphah sabuaite, le a kituam koih umlebeel, annelte, leenggahzute, sathaute, paknamtuite, le a namtui nate zong a en dingin kiseh hi. Siampite’ ta a dangte in a namtui nate hel dingin bawl uh a, tua ciangin Levi mite lak pan Korah mi Shallum’ tacil Mattithiah in biakna ding moh pheengte bawl ding uk hi. Kohath mi amau’ behte pawlkhat in zong Sabbath simin koih ding Ompihna Anlum uk uh hi. Tu-in hihte pen lasate, Levi mi beh lutangte, nasep dangte panin pengin biakinn deite sungah a tengte ahi uh hi. Bang hang hiam cih leh amaute in sun le zanin na sem uh hi. Hihte pen Jerusalem-ah a teng amau’ khang tawh kizui-in makaite, Levi mi beh lutangte ahi uh hi. Gibeon-ah tua khuapi a satpa Jeiel teng a, ama zi’ min Maakah hi-in, a tapa upa pen Abdon, tua ciangin Zur, Kish, Baal, Ner, Nadab, Gedor, Ahio, Zekhariah, le Mikloth ahi uh hi. Mikloth pen Shimeah’ pa ahi hi. Amau’ suanlekhakte zong Jerusalem-a a behte uh galkhatah a behte uh tawh teng uh hi. Ner pen Kish’ pa, Kish pen Saul’ pa ahi hi. Saul pen Jonathan, Makhishua, Abinadab, le Eshbaal’ pa ahi hi. Jonathan’ tapa Meribbaal hi a, Meribbaal pen Mikah’ pa ahi hi. Mikah’ tapate: Pithon, Melek, Tahrea, le Ahaz ahi uh hi. Ahaz pen Jarah’ pa hi a, Jarah pen Alemeth, Azmaveth, le Zimri’ pa ahi hi. Zimri pen Moza’ pa ahi hi. Moza pen Binea’ pa ahi hi. A tapa Refaiah, a tapa Eleasah, a tapa Azel ahi hi. Azel in tapa guk nei a, tuate’ min: Azrikam, Bokheru, Ishmael, Sheariah, Obadiah, le Hanan ahi uh hi. Hihte pen Azel’ tapate ahi uh hi. Filistia mite in Israel mite sim uh hi. Filistia mite mai-ah Israel mite tai uh a, Gilboa Mual tungah tuk zeizai uh hi. Filistia mite in Saul le a tapate pha uh hi. Filistia mite in Saul’ tapate Jonathan le Abinadab le Malkhishua that uh hi. Gal kidona in Saul neh mahmah a, thal tawite in amah pha-in liamsak uh hi. Tua ciangin Saul in a galvan puapa kiangah, “Na namsau dok inla tua tawh kei hong sun let in. Tua hikeileh hih dawibia mite hong pai-in kei hong khelbawl kha ding hi,” a ci hi. Ahih hangin a galvan puapa in hih ngam lo hi; bang hang hiam cih leh amah lau mahmah hi. Tua ahih ciangin Saul in ama namsau la-in tua tungah puk hi. A galvan puapa in Saul a sihna a muh ciangin amah zong a namsau tungah kipuksuk sakin a si hi. Tua bangin Saul a si hi. Amah le a tapa thumte le a innkuan khempeuh a sikhawm uh hi. Kuam sungah a om Israel mite khempeuh in galkapte tai khinin, Saul le a tapate a sihna a theih uh ciangin amaute in a khuapite uh nusia-in a tai uh hi. Tua ciangin Filistia mite hong pai-in tua khuate sungah a teng uh hi. A zing ciang, a kithatte’ nate a hawkkhia dingin Filistia mite hong pai uh ciangin Saul le a tapate Gilboa Mual tungah a sihna mu uh hi. Tua ciangin amaute in ama nate hawkkhia-in a lutang le a galhiam la uh a, a milimte uh le mite kiangah hih thuthak a ko dingin Filistia gam sung khempeuhah kamtaite a sawl uh hi. Amaute in amau’ pasian’ biakinn sungah ama galhiam koihin Dagon biakinn sungah ama lutang a suang uh hi. Ahih hangin Jabeshgilead mi khempeuh in Saul’ tungah Filistia mite’ hihsa thu khempeuh a zak uh ciangin a thahat mi khempeuh kithawi-in Saul le a tapate’ luanghawmte lakhia-in Jabesh-ah a paipih uh hi. Tua ciangin amaute in Jabesh-a tawsaw nuai-ah amaute’ guhte vui uh a, ni sagih sung an a tang uh hi. Tua ahih ciangin Saul a thuman lohna hangin a si hi. Amah in Topa’ thupiakna a zuih lohna, le vankah khat thu dongin a lamlah ding a zonna, le Topa’ tung panin lamlahna a zon lohna-ah Topa’ tungah a thuman lo ahi hi. Tua ahih ciangin Topa in amah that a, Jessi’ tapa David tungah kumpi gam a hei hi. Tua ciangin Israel mi khempeuh David kiang Hebron-ah hong kikhawm uh a, “En in, kote nangma guh le nangma sa ka hi uh hi. A hun beisa, Saul kumpi ahih sung nangawnin Israel a kuankhiatpih le a ciahpih pa nangmah na hi hi. Topa na Pasian in nangma kiangah, ‘Nang pen ka mi Israel-te a cing pa na hi ding a, ka mi Israel-te tungah ulian na hi ding hi,’ hong ci hi,” a ci uh hi. Tua ahih ciangin Israel upate khempeuh kumpipa kiang Hebron-ah hong pai uh hi. Tua ciangin David in Topa’ mai Hebron-ah amaute tawh thuciamna khat bawl a, Samuel’ tungtawnin Topa’ thugen bangin amaute in Israel kumpi-in David sathau a nilh uh hi. Tua ciangin Jebus mite a tenna, Jebus a kici Jerusalem-ah David le Israel mi khempeuh hong pai uh hi. Jebus-ah a teng mite in David kiangah, “Hih lai-ah nang nong pai kei ding hi,” na ci uh hi. Ahi zongin David in David khuapi a kici Zion munmuanhuai a la hi. David in, “Jebus mite a va sim masa peuhpeuh pen ukpi le ukpa hi ding hi,” a ci hi. Tua ciangin Zeruiah’ tapa Joab kuanto masa ahih ciangin amah, ukpi a suak hi. Tua ciangin munmuanhuaina sungah David teng hi. Tua ahih ciangin tua khua pen David khuapi kici hi. Tua ciangin amah in Millo panin a kualin khuapi lam hi. Joab in khuapi sung a omlai mun teng puahkik hi. Vanglian Topa in amah ompih ahih manin David a lian semsem hi. Tu-in hihte pen Israel tawh kisai-in Topa’ thugen bangin amah kumpi-in a bawl dingin Israel khempeuh tawh ama kumpi gam sungah amah nakpitakin a huh David’ mi a thahat a ukpite ahi hi. David’ mi a thahatte a kiciamtehna: Hakmoni mi Jashobeam pen mi thumte a ukpi ahi hi. Amah in a teipi tawh mihing zathum do a, hun khat sungin that khin hi. Tua ciangin a thahat mihing thumte lak panin amah a zom pa pen Ahoh-te beh Dodo’ tapa Eleazar ahi hi. Filistia mite galsim dingin a kikaihkhop laitakun Pasdammim-ah David tawh a om hi. Tua lai-ah mangbuhham a dimna leitang khat om a, Filistia mite’ kiang panin mite tai hi. Ahih hangin amah in tua leitang laizangah panmun la-in hu a, Filistia mite that hi. Tua ahih ciangin Topa in gualzawhna lianpi a pia hi. Refaim kuamah Filistia mite’ galkapte in giahphual a sat laitakun Adullam leihawm David kiang suangpi-ah ukpi sawmthumte sung panin mihing thum paisuk uh hi. Tua hunin munmuanhuai sungah David om a, Filistia khuacingte Bethlehem-ah om uh hi. Tua ciangin David in, “Kulhkongpi gei-a Bethlehem tuikhuk panin mi khat in tuidawn ding kei hong pia leh!” ci-in lunggulhna tawh a pau hi. Tua ciangin a thahat mihing thumte in Filistia mite’ giahphual phulin kongpi gei-a om Bethlehem tuikhuk panin tui tawi uh a, a tui la-in David kiangah paipih uh hi. Ahih hangin David in tua tui dawn lo hi. Amah in Topa a dingin sung a, “Ka Pasian’ mai-ah hih bangin ka gamta het kei ding hi. Hih mihingte’ nuntakna sisan tui dawn ding ka hi hiam? Bang hang hiam cih leh amaute in a nuntakna uh khamin kei kiangah hong paipih uh hi,” a ci hi. Tua ahih ciangin amah in a tui dawn lo hi. A thahat mi thumte in hih bangin na a sem uh ahi hi. Tu-in Joab’ sanggampa Abishai pen sawmthumte lakah a ukpi ahi hi. Amah in a teipi tawh mihing zathum do-in amaute that a, mihing sawmthumte’ banah min khat ngah thuah hi. Amah pen mihing sawmthumte sung panin a minthang pen hi a, amaute a ukpa a suak hi; ahih hangin amah in mihing thumte ban nai lo hi. Jehoiada’ tapa Benaiah pen Kabzeel khuami gal a hang, na lianpite a sempa ahi hi. Amah in Moab galhang mi nih vatlum hi. Amah zong paisukin vuk a kiat ni khatin leihawm sunga om humpinelkai khat that hi. Amah in Egypt mi khat, a thagol, pi sagih le alang a sang mi khat a that hi. Egypt-pa in a khut sungah siamgante’ siamlawngpi cia a pha teipi khat nei hi. Ahih hangin ciangkhut khat tawh ama kiangah Benaiah paisuk a, Egypt-pa’ khutsung panin a teipi sutkhia-in ama teipi mah tawh amah a that hi. Jehoiada’ tapa Benaiah in hih nate sem a, a thahat mi sawmthumte’ banah min khat ngah thuah hi. Mihing sawmthumte lakah amah minthang a, ahih hangin amah in mi thumte ban nai lo hi. Tua ciangin David in amah a cingte a ukin a koih hi. Galkap lak panin a thahat mite pen Joab’ sanggampa Asahel, Bethlehem khuami Dodo’ tapa Elhanan, Harod khuami Shammoth, Pelon khuami Helez, Tekoa khuami Ikkesh’ tapa Ira, Anathoth khuami Abiezer, Hushah khuami Sibbekai, Ahoh-te beh Ilai, Netofah khuami Maharai, Netofah khuami Baanah’ tapa Heled, Benjamin mite sung panin Gibeah khuami Ribai’ tapa Ithai, Pirathon khuami Benaiah, Gaash mualkuam mi Hurai, Betharabah khuami Abiel, Bahurim khuami Azmaveth, Shaalbon khuami Eliahba, Gizon khuami Hashem, Harar khuami Shagee’ tapa Jonathan, Harar khuami Sakhar’ tapa Ahiam, Ur’ tapa Elifal, Mekherath khuami Hefer, Pelon khuami Ahijah, Karmel khuami Hezro, Ezbai’ tapa Naarai, Nathan’ sanggampa Joel, Hagri’ tapa Mibhar, Ammon mi Zelek, Zeruiah’ tapa Joab’ galhiam puapa Beeroth khuami Naharai, Ithri mi Ira le Gareb, Hit mi Uriah, Ahlai’ tapa Zabad, Reuben mite’ makai khat ahi, Reuben mi Shiza’ tapa Adina, le amah tawh mihing sawmthum, Maakah’ tapa Hanan, Mithni mi Joshafat, Ashterath khuami Uzzia, Aroer khuami Hotham’ tapate Shama le Jeiel, Tiz khuami Shimri’ tapate Jediael le Joha, Mahavah khuami Eliel, Elnaam’ tapate Jeribai le Joshaviah, Moab mi Ithmah, Zobah khuami Eliel, Obed, le Jaasiel ahi uh hi. Tu-in Kish’ tapa Saul’ hangin a ut utin David a tat theih loh laitakin Ziklag-a ama kiangah mite hong pai-in amah pawlpih uh hi. Gal sungah amah a huh a thahatte lakah amaute a kihelte ahi uh hi. Amaute pen thal tawite hi uh a, taklam khut tawh ahi a, veilam khut tawh ahi zongin thaltang le suangte lawn thei uh hi. Amaute pen Saul’ behte Benjamin mi ahi uh hi. Ahiezer a ukpi hi a, tua ciangin Joash ahi hi. Amau tegel pen Gibeah khuami Shemaah’ tapate ahi uh hi. Amau gel nuai-ah galkapte: Azmaveth’ tapate Jeziel le Pelet; Anathoth khuami Berakah le Jehu; Gibeon khuami Ishmaiah, mihing sawmthumte lakah a thahatpa le sawmthumte a makai pa; Gederah khuami Jeremiah, Jahaziel, Johanan, le Jozabad; Harif mi Eluzai, Jerimoth, Bealiah, Shemariah, le Shefatiah; Korah mi Elkanah, Isshiah, Azarel, Joezer, le Jashobeam; Gedor khuami Jeroham’ tapate Joelah le Zebadiah ahi uh hi. Gad minam sung panin gamlak a munmuanhuai a David kiangah a thahat a siam galhangte, lum le tei zat a siam, a maitang uh humpinelkai maitang bangin, mualtung a om sakhi bangin a manlang mi hong paite: A ukpi Ezer, a nihna Obadiah, a thumna Eliab, a lina Mishmannah, a ngana Jeremiah, a gukna Attai, a sagihna Eliel, a giatna Johanan, a kuana Elzabad, a sawmna Jeremiah, a sawm le khatna Makbannai ahi uh hi. Hih Gad mite pen galkap uliante hi a, a neuzawte in zakhat val, a golzawte in tulkhat val uk uh hi. Hihte pen Jordan a piau khempeuh a dimlet laitak kha masa sungin Jordan kantanin kuam sunga om mite nisuahna lam le nitumna lamah a taisak mite ahi uh hi. Tua ciangin Benjamin mi le Judah mi pawlkhat David kiang munmuanhuai-ah hong pai uh hi. Amaute a dawntuah dingin David paikhia-in amaute kiangah, “Kei kiangah kilawmtatna tawh keimah a huh dingin hong pai na hih uhleh note tawh ka lungsim kihual khawm ding hi. Ahih hangin keimah in bangmah khialhna nei lo napi-in ka langte tungah kei a hong lehhek dingin a hong pai na hih uhleh, i pu i pate’ Pasian in thei hen la, note hong tai ta hen,” a ci hi. Tua ciangin mihing sawmthum a ukpipa Amasai’ tungah Pasian’ kha hong tungin amah in, “David aw, kote, nangma a’ hi ung! Jessi’ tapa aw, nangma pawl hi ung! Nangma tungah nopna hong om hen la, nang hong huhte tungah zong nopna hong om ta hen! Bang hang hiam cih leh na Pasian in nang hong huh hi,” a ci hi. Tua ciangin David in amaute sang a, ama galkap uliante-in a bawl hi. Saul a do dingin Filistia mite tawh David a kuan laitakin Manasseh mi pawlkhat tai-in David a beel hi. (Ahi zongin David in Filistia mite huh thei lo hi; bang hang hiam cih leh Filistia mi a ukte in thu kikupna khat nei uh a, “Eite’ makaite’ siat nadingin a topa Saul kiangah David tai ding hi,” ci-in amah sawlkhia uh hi.) Ziklag-ah amah a pai laitakin Manasseh sung panin tai-in amah a beelte: Adnah, Jozabad, Jediael, Mikhael, Jozabad, Elihu, le Zillethai hi a, Manasseh sungah mi a tulin a ukte ahi uh hi. Amaute in mi’ na a sut thei mite panin David huh uh hi; bang hang hiam cih leh amaute a thahat a vanglian mi hi a, galkap sungah a ukte ahi uh hi. Pasian’ galkap hon bangin galkap hon tampi a phak dongin a ni ni-in David a huh dingin mi hong paipai hi. Hihte pen Topa’ thugen bangin Saul kumpipa’ gam David tungah a hei dingin Hebron-a ama kiangah a pai galkap a khen phazah ahi uh hi: Judah mi: Lum le tei a pua galkap tulguk le zagiat ahi hi. Simeon mi: Galdo dingin a thahat a vanglian mihing tulsagih le zakhat ahi hi. Levi mi: Tul li le zaguk ahi hi. Aaron’ suante sung pan ulian Jehoiada, le amah tawh mi tulthum le zasagih ahi hi. A thahat a vanglian a khangno Zadok, le ama beh sung panin galkap a ukte mi sawmnih le nih ahi hi. Benjamin mi: Tua hun ciang dong mi a tamzaw Saul tawh a kipawl, Saul’ behte ahi Benjamin mite sung panin mihing tulthum ahi hi. Efraim mi: Amaute sung panin a thahat, a vanglian, amau’ beh sungah a minthang mi tul sawmnih le zagiat ahi hi. Manasseh minam alangte: Amau sung panin hong pai-in David kumpi-in a bawl dingin a min a kilo mihing tul sawm le tulgiat ahi hi. Issakhar mi: Amaute sung panin Israel in bang a sep dingin kilawm cih a thei, hun paizia a thei ukpi zanih le amau’ ukna nuai-ah a om amau’ behte khempeuh ahi uh hi. Zebulun mite: Amaute sung panin David a huh dingin lungsim a kikhat, hun khempeuhah gal a kap thei, galdo nadingin galhiam khempeuh a nei mihing tul sawmnga ahi hi. Naftali mi: Amaute sung panin galkap a ukte tulkhat le amau tawh a om lum le tei a tawi mihing tul sawmthum le tulsagih ahi hi. Dan mi: Amaute sung panin galdo dingin a kithawi mihing tul sawmnih le tulgiat le zaguk ahi hi. Asher mi: Amaute sung panin galdo dingin a baihsa-in a om hun khempeuhah gal a kap thei mihing tul sawmli ahi hi. Jordan gal khata om Reuben mite le Gad mite le Manasseh minam alangte sung panin galhiam nam khempeuh tawh a kithawi mihing tul zakhat le tul sawmnih ahi hi. Galkap mi ahi, galsim dingin a kithawi hih mite khempeuh, Israel tungah David kumpi-in koih ding ngaihsutna takpi tawh Hebron-ah hong pai uh hi. Tua mah bangin Israel a omlaite khempeuh zong David kumpi-in a bawl ding uh a ngaihsutna uh kikhat hi. A sanggamte un amaute a dingin na vaihawmkhol uh ahih manin amaute tua lai-ah David tawh ni thum sung an ne tui dawnin omkhawm uh hi. Israel gam sungah lungdamna om ahih manin a vengte uh Issakhar le Zebulun le Naftali ciang dong panin zong hong pai-in late le kalaohte le la-sakolte le bawngtalte tawh an hong pua-in, an tampi tak, theimohte, leenggahkeu bawkte, le leenggahzu le sathau, bawngtalte le tuute, lungdam lahna-in hong puak uh hi. David in a tul-a ukte le a za-a ukte le a makai khempeuh tawh thu kikupna khat nei hi. Tua ciangin David in Israel a kikhawm khempeuhte kiangah, “Note in kilawm na sak uh a, Topa i Pasian’ deihna ahihleh, eite’ kiangah hong pai theih nadingun Israel gam sungah a omlai i sanggamte le lonona gam a nei khuapi sunga om siampite le Levi mite a sam dingin mi sawl ni. Tua ciangin Thuciamna Singkuang eite kiangah lakik ni; bang hang hiam cih leh Saul’ hun lai-in i don kei hi,” a ci hi. Mi khempeuh in tua thu hoihsa uh ahih manin tua bangin hih ding a kikhawm mi khempeuh a thukim uh hi. Tua ahih ciangin Kiriathjearim panin Pasian’ Thuciamna Singkuang a ciahpih dingin David in Egypt gam Shihor lui panin Hamath lutna ciang dong Israel mi khempeuh a khawm hi. Tua ciangin David le Israel mi khempeuh, kherub-te’ tungah a tu Topa’ min tawh a kilo Pasian’ Thuciamna Singkuang a paipihto dingin Kiriathjearim a kici Baalah-ah a paito uh hi. Amaute in Abinadab’ inn panin leeng thak khat tungah Pasian’ Thuciamna Singkuang pua uh a, Uzza le Ahio in a leeng a hawl uh hi. Tua ciangin David le Israel mi khempeuh in Pasian’ mai-ah la le laiza lasakna, harp lasakna, khuangneute, daltuahte, le peengkulte tawh a tha neih zahun gualnopna a bawl uh hi. Amaute Khidon’ ancilna phual a tun uh ciangin bawngtalte muktu ahih manin Uzza in Thuciamna Singkuang a len dingin a khut va zan kha hi. Tua ciangin Uzza tungah Topa heh hi. Amah in a khut tawh Thuciamna Singkuang sukha ahih manin Topa in amah vat hi. Tua ciangin Pasian’ mai tua lai-ah amah si hi. Uzza tungah Topa hehin gim pia ahih manin David zong a heh suak hi. Tua mun pen tuni dongin Perezuzza kici hi. Tua ni-in David in Pasian kihta hi. Amah in, “Pasian’ Thuciamna Singkuang kei kiang inn-ah bangci ciahpih theih ding ka hi hiam?” a ci hi. Tua ahih ciangin David in Thuciamna Singkuang David khuapi a inn-ah ciahpih lo-a, Gath mi Obededom’ inn-ah va koih hi. Tua ahih ciangin Pasian’ Thuciamna Singkuang Obededom’ innkuan tawh kha thum sung om hi. Topa in Obededom’ innkuan le a neih khempeuh thupha a pia hi. Tua ciangin Taia kumpipa Hiram in David kiangah kamtaite, taamtak singte, ama a dingin inn khat a lamsak dingin leilesuang innlam a siamte, le khutsiamte zong a puak hi. Tua ciangin David in Israel-te tungah kumpi-in Topa in amah a kipsak khitna le ama mi Israel-te’ hangin ama kumpi gam nakpitakin a lianin a kibawlna a phawktel hi. David in Jerusalem-ah zi nei thuahin tapate le tanute a nei hi. Jerusalem-ah a neih a tate’ min: Shammua, Shobab, Nathan, Solomon, Ibhar, Elishua, Elpelet, Nogah, Nefeg, Jafia, Elishama, Beeliada, le Elifelet ahi uh hi. Israel mi khempeuh tungah kumpi-in David sathau a kinilhna thu Filistia mite in a zak uh ciangin David a zong dingin Filistia mi khempeuh kuanto uh hi. David in zong tua thu za ahih manin amaute a do dingin a kuankhia hi. Tu-in Filistia mite hong pai-in Refaim kuamsung a luh uh hi. Tua ciangin David in Pasian kiangah thu dong a, “Filistia mite a do dingin ka kuanto ding hiam? Keima khut sungah amaute nong pia ding hiam?” a ci hi. Tua ciangin Topa in ama kiangah, “Kuanto in; nangma khut sungah amaute kong pia ding hi,” a ci hi. Tua ciangin Baalperazim-ah David paito a, amah in tua lai-ah amaute a zo hi. Tua ciangin David in, “Tuikhang in a phulkhap bangin Pasian in keima khut tawh ka galte phukham hi,” a ci hi. Tua ahih ciangin tua mun a min Baalperazim kici hi. Filistia mite in tua lai-ah a pasian-te uh nusia uh a, David’ thupiakna tawh tuate kihal hi. Tua ciangin Filistia mite hong kuanin kuam sung hong luhkik lai uh hi. David in Pasian kiangah thu a dotkik ciangin Pasian in ama kiangah, “Amaute’ nungah na kuanto kei ding hi. Kual pai inla lungli kungte’ galkhat lam panin amaute hih in. Lungli kungte dawnah kalsuan huging na zak ciangin galsim dingin pai in; bang hang hiam cih leh Filistia galkapte a vat dingin nangma mai-ah Pasian kuan khin hi,” a ci hi. Pasian in amah a thupiak bangin David gamta a, amaute in Gibeon panin Gezer ciang dong Filistia galkapte vatgawp uh hi. Tua ciangin David’ minthanna in gam khempeuh zel a, Topa in minam dang khempeuh tungah amah kihtakna a tungsak hi. David in ama a dingin David khuapi sungah innte a lam hi. Amah in Pasian’ Thuciamna Singkuang a dingin mun khat bawlin puanbuk khat lamsak hi. Tua ciangin David in, “ Topa’ Thuciamna Singkuang a pua ding le ama na a sem tawntung dingin Topa in amaute teel ahih manin Levi mite simloh kuamah in Pasian’ Thuciamna Singkuang pua thei lo ding hi,” a ci hi. Tua ciangin amah in a bawlsa, ama omna ding munah Topa’ Thuciamna Singkuang a paipihto dingin David in Jerusalem-ah Israel mi khempeuh a khawm hi. David in Aaron’ suante le Levi mi a khopte: Kohath-te beh sung panin a ukpi Uriel, a behte za le sawmnih tawh ahi hi. Merari-te beh sung panin a ukpi Asaiah, a behte zanih le sawmnih tawh ahi hi. Gershom-te beh sung panin a ukpi Joel, a behte za le sawmthum tawh ahi hi. Elizafan-te beh sung panin a ukpi Shemaiah, a behte zanih tawh ahi hi. Hebron-te beh sung panin a ukpi Eliel, a behte sawmgiat tawh ahi hi. Uzziel-te beh sung panin a ukpi Amminadab, a behte za le sawm le nih tawh ahi hi. Tua ciangin David in siampite Zadok le Abiathar, le Levi mite Uriel, Asaiah, Joel, Shemaiah, Eliel, le Amminadab samin amaute kiangah, “Note pen Levi mite beh lutangte na hi uh hi. Ama a dingin ka bawlsakna munah Israel Pasian, Topa’ Thuciamna Singkuang na paipihtoh theih nadingun note le na Levi mipihte uh nomau mah kisiansuah tawm un. A masa lai-in note na om kei uh a, a kisehsa bang danin kem lo ihih manin eite tungah Topa i Pasian hong hehin gim hong pia hi,” a ci hi. Tua ahih ciangin Israel Pasian, Topa’ Thuciamna Singkuang a paipihto dingin siampite le Levi mite amau mah kisiansuah tawm uh hi. Tua ciangin Topa’ kamgenna tawh kizui-in Moses’ thupiak bangin Levi mite in a liangko uhah a zawlte tawh Topa’ Thuciamna Singkuang a pua uh hi. Lungdamna aw ginsak nadingin lasakna nate, harp lasakna le laiza lasaknate le a daltuahte nakpitakin tumin la a sa dingin Levi ukpite in a mipihte uh a sehna ding David in thu a pia hi. Tua ahih ciangin Levi mite in Joel’ tapa Heman seh uh hi. Tua ciangin a beh sung panin Berekhiah’ tapa Asaf, Merari minam sung panin a behte uh Kushaiah’ tapa Ethan; tua ciangin amaute tawh a pawl nihna-in a behte uh Zekhariah, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Elifelehu, le Mikneiah, le kongcingte Obededom le Jeiel seh uh hi. Lasate Heman, Asaf, le Ethan-te in sumngo daltuahte a tum ding uh ahi hi. Zekhariah, Aziel, Shemiramoth, Jehiel, Unni, Eliab, Maaseiah, le Benaiah-te in a paisuak aw-in harp lasaknate a tum ding uh ahi hi. Mattithiah, Elifelehu, Mikneiah, Obededom, Jeiel, le Azaziah-te in laiza lasaknate a un aw-in a makai ding uh ahi hi. Levi mite sungah la makai Khenaniah inla uk ding hi; bang hang hiam cih leh amah in thei hi. Berekhiah le Elkanah-te pen Thuciamna Singkuang a dingin kongcingte hi ding uh hi. Siampite Shebaniah, Joshafat, Nethanel, Amasai, Zekhariah, Benaiah, le Eliezer-te in Pasian’ Thuciamna Singkuang mai-ah peengkulte tum ding uh hi. Obededom le Jehiah-te zong Thuciamna Singkuang a dingin kongcingte hi ding uh hi. Tua ahih ciangin David le Israel upate, le a tul-a a ukte, Obededom’ inn panin lungdamna tawh Topa’ Thuciamna Singkuang a paipihto dingin a pai uh hi. Pasian in Topa’ Thuciamna Singkuang a pua Levi mite huh ahih manin amaute in bawngtal sagih le tuutal sagih biakna-in a pia uh hi. David in saihadial puantualpi silh a, tua mah bangin Thuciamna Singkuang a pua Levi mite khempeuh, le lasate, le lasate a uk Khenaniah-te in zong a silh uh hi. Tua ciangin David in siampipuan khat silh hi. Tua ahih ciangin Israel mi khempeuh in sakite le peengkulte, le daltuahte’ awging tawh kizui-in awng kawmin Topa’ Thuciamna Singkuang paipihto uh a, harp lasaknate le laiza lasaknate tawh nakpitakin la a sa uh hi. David khuapi-ah Topa’ Thuciamna Singkuang hong tun laitakin Saul’ tanu a zi Mikhal in tawlet panin na en a, Kumpi David lamin a gualnuam-a a om a mu hi. Tua ahih ciangin amah in a lungsim sungah David a neu-et hi. Tua ciangin amaute in Pasian’ Thuciamna Singkuang hong tumpih uh a, David in ama a dingin a lamsak puanbuk sungah koih uh hi. Tua ciangin amaute in meihal biaknate le thunuama biaknate Pasian’ mai-ah pia uh hi. David in meihal biaknate le thunuama a biaknate a piak a man khit ciangin amah in Topa’ min tawh mite thupha pia a, Israel mi numei le pasal khempeuhte tungah anlum khat, sa bak khat, le leenggahkeu bek khat ciat a hawm hi. Tua tham loin amah in Topa’ Thuciamna Singkuang mai-ah na semin thu a ngen ding, lungdamna a ko ding, le Israel Pasian, Topa a phat dingin Levi mite pawlkhat a seh hi. Asaf a ukpi hi a, ama zomah Zekhariah ahi hi. Jeiel, Shemiramoth, Jehiel, Mattithiah, Eliab, Benaiah, Obededom, le Jeiel, harp lasaknate le laiza lasaknate a tum dingte ahi uh hi. Asaf in daltuahte a tum ding hi a, siampite Benaiah le Jahaziel-te in Pasian’ Thuciamna Singkuang mai-ah peengkulte a tum paisuak ding uh ahi hi. Tua ciangin tua ni-in David in Asaf le a Levi mipihte in Topa tungah hih bangin lungdamkohna la a sa dingin a seh masa hi: Topa’ tungah lungdamna ko-in, ama min lo unla, ama septe khempeuh mite’ lakah kitheisak un! Amah la sak un. Phatna la amah sak unla, a lamdang a septe khempeuh mite tungah gen un! Ama min siangtho hangin nuamin diang unla, Topa a zong mite khempeuh lungdam ta uh hen! Topa le ama hatna zong unla, ama ompihna zong den un! A lamdang a nasepte phawk unla, a lamdang ama genkhiat a thukhennate phawk un, no ama nasem Abraham’ suante, Jakob’ suante, ama teeltuamte aw! Amah, eite’ Topa Pasian hi a, ama thupiaknate leitung khempeuh a’ ding ahi hi. Amah in a thuciamna phawk tawntung hi. Khang tul khat-a dingin a thupiakna kammal, Abraham tawh a thuciamna, Isaac tungah a khapna, Jakob tungah thu ciamin, amah in a kipsak, Israel tungah tawntung thuciamna-in a kipsak, “Nangma tungah Kanaan gam hong pia-in, gamhluahin na tanh dingin kong pia ding hi,” a cihte phawk tawntung hi. Amaute a mi-in tawmin, gentaak loin peemta hi uh a, minam khat pan nam khatah vak kawikawi-in, kumpi gam khat pan gamdang khatah a pai lai-un, amaute kuamah nengniamsak lo hi. Amaute’ hangin amah in kumpite taigawp a, “Ka sathau nilhte lawng kei unla, ka kamsangte tungah siatna hih kei un!” ci hi. Leitung mi khempeuh aw, Topa la sak un! A ni ni-in ama hotkhiatna thu gengen un. Minam dangte lakah ama minthanna genkhia unla, a lamdang ama septe mi khempeuh lakah gen un! Bang hang hiam cih leh Topa lian mahmah a, nakpitakin phat ding ahi hi; pasian khempeuh sangin lamdang sakzawk ding ahi hi. Bang hang hiam cih leh minam dangte’ pasian-te milim hi lel a, ahih hangin Topa ahihleh vantungte a bawlpa ahi hi. Pahtawina le minliatna in amah umcih a, thahatna le lungdamna in amah kimkot hi. Leitung mi khempeuh aw, Topa theitel unla, Topa’ minthanna le a thahatna theitel un! Amah in a ngah ding a kilawm minthanna Topa’ tungah pia un. Biakna puak unla, ama mai-ah pai un! Biakna puan silhin Topa bia un. Leitung mi khempeuh aw, ama mai-ah ling un; hi hi, leitung kip mahmah a, kilok ngei lo ding hi. Vantung kipak hen la, leitung lungdam ta hen; minam khempeuhte lakah, “ Topa maang hi!” amaute in ci ta uh hen. Tuipi le a sunga om khempeuh awng uh hen la, gamlak le a sunga om khempeuh lungdamin diang ta uh hen! Tua ciangin gamlak singte in lungdamna tawh Topa’ mai-ah la sa ding uh hi; bang hang hiam cih leh leitung thu khen dingin amah hong pai hi. Amah hoih ahih manin Topa’ tungah lungdamna ko un; bang hang hiam cih leh ama itna kip a tawntungin a kho hi! “Kote hong khahkhia in, kote hong honkhia Pasian aw, minam dangte lak panin kote hong kaikhawm in. Na min siangtho tungah lungdam kong koh theih nading uh le, nangmah phatna-ah ka minthan nadingun kote hong hon in. Israel Pasian, Topa in thupha ngah ta hen, a tawntung pan a tawntung dongin!” zong ci lai un, a ci hi. Tua ciangin mi khempeuh in, “Amen!” ci-in Topa a phat uh hi. Tua ahih ciangin David in nisima a kisam bangin Thuciamna Singkuang mai-ah na a sem tawntung dingin Asaf le a Levi mipihte Topa’ Thuciamna Singkuang mai-ah nusia a, Obededom le a behte sawmguk le giatte zong a nusia hi. Jeduthun’ tapa Obededom le Hosah-te pen kongpi cing dingte ahi uh hi. Tuate’ banah amaute tawh Heman le Jeduthun zong om a, ama itna kip kho tawntung ahih manin Topa’ tungah lungdamna a ko dingin a kiteel, a minin a kilokhia midang omlai hi. Heman le Jeduthun inla aw dingin peengkulte le daltuahte nei uh a, biakna lasak nadingin lasakna nate nei uh hi. Jeduthun’ tapate kulhkongpi cing dingin kiseh hi. Tua ciangin mi khempeuh a inn ciat uhah ciah uh a, David zong a innkuante thupha a pia dingin a inn-ah a ciah hi. Tu-in David a inn-ah a ten ciangin amah in kamsang Nathan kiangah, “En in, taamtak inn hoih sungah kei ka teng a, ahih hangin puanbuk nuai-ah Topa’ Thuciamna Singkuang om lai hi,” a ci hi. Tua ciangin Nathan in David kiangah, “Pasian in nang hong ompih ahih manin na lungsimah a om khempeuh hih in,” a ci hi. Ahih hangin tua zan mahin Nathan kiangah Topa’ thu hong tung a, “Pai inla ka nasempa David kiangah hih bangin gen in. ‘ Topa in hih bangin ci hi: Nangmah in keima ten nadingin biakinn na lam kei ding hi. Bang hang hiam cih leh Israel-te ka paipihtoh a kipan tuni dongin biakinn sungah ka teng kei a, puanbuk khat pan puanbuk khat, omna khat pan omna khatah ka pai kawikawi hi. Israel mi khempeuh tawh ka painasa mun khempeuhah, keima mite tuu bangin a cing dingin ka sawl thukhente khat peuhpeuh tungah, “Bang hangin taamtak biakinn khat kei a dingin hong lamsak lo na hi hiam?” ci-in kam khat beek ka gen hiam?’ ci hi. Tua ahih ciangin tu-in ka nasempa David kiangah hih bangin na ci ding hi. ‘Vanglian Topa in hih bangin ci hi: Ka mi Israel-te tungah ulian ahi dingin lonona, tuu na zuihna panin nang kong la hi. Na paina peuhpeuhah nang tawh kong omkhin a, na mai panin na galte khempeuh ka susia hi. Leitung miliante khat min bangin nang a dingin min khat kong bawlsak ding hi. Na nuntakna bei-in na pate kiang na zuat ciangin nangma nungah na tapate khat ka khangsak ding a, ama kumpi gam ka kipsak ding hi. Amah in kei a dingin biakinn khat hong lamsak ding a, keimah in ama kumpi tokhom ka kipsak paisuak ding hi. Kei pen ama pa ka hi ding a, amah pen keima tapa hi ding hi. Nangma hun ma-a sem Saul’ tung panin ka lakkhiat bangin nangma tung panin ka itna kip ka lakhia kei ding a, ka mite le ka kumpi gam a kem dingin amah ka koih ding a, ama kumpi tokhom kip paisuak ding hi,’ ci hi,” a ci hi. Hih kammalte khempeuh tawh kizui le hih maangmuhna khempeuh tawh kizui-in Nathan in David kiangah a gen hi. Tua ciangin Kumpi David tumin Topa’ mai-ah tu a, “ Topa Pasian aw, nangmah in hih ciang dong kei nong tunpihna kei kua hi a, ka innkuanpihte bang ahi hiam? Hih a beisa thu pen nangma mitah na neu khat ahi hi, Pasian aw. Nangmah in a hong tung ding hunpi khat sung tang ding na nasempa’ suanlekhak tawh kisai thu zong na gen khin a, mailam a khang dingte thu kei nong lak khin hi, Topa Pasian! Na nasempa nong pahtawina-ah David in nang tungah bang gen ding nei nawn ahi hiam? Bang hang hiam cih leh nangmah in na nasempa na thei hi. Topa aw, na nasempa’ hang, le nangma lungsim bangin hih na liante khempeuh na kitheihsakna-ah hih liatna khempeuh na hih hi. Ka bilun ka zakna uh tawh kizui-in Topa aw, nangmah tawh a kibang kuamah om lo a, nang simloh Pasian dang om lo hi. Egypt panin na hotkhiat na mite’ mai-ah minam dangte hawlkhiatna tawh nang a dingin a lian a lauhuai min khat na bawlna, Pasian pai-in ama mi dingin a hotkhiat Israel-te tawh a kibang mi leitungah minam dang kua om ahi hiam? Na mi Israel-te a tawntungin nangma mi ahi dingin na bawl hi. Tua ciangin Topa aw, nang pen amaute’ Pasian na suak hi. “Tu-in Topa aw, na nasempa le a suan a khakte tawh kisai-in na gensa thu a tawntungin kip hen la, na gensa bangin hong hih in. Tua ciangin, ‘Israel Pasian, Vanglian Topa pen Israel-te’ Pasian hi,’ ci-in nangma min a tawntungin kipin kiliansak ding a, na nasempa David’ ukna nangma mai-ah kip tawntung ding hi. Bang hang hiam cih leh nang ka Pasian in keima suante kumpi-in nong bawlsakna ding na nasempa tungah nong lak khinzo hi. Tua ahih ciangin na nasempa in na mai-ah thu nget ding hanna lungsim hong nei hi. Tu-in Topa aw, nang, Pasian na hi a, na nasempa tungah hih na hoih na ciam khin hi. Tua ahih ciangin tu-in nangma mai-ah a kizop tawntung theih nadingin na nasempa’ suanlekhakte thupha na piak ding nang hong lungkim ta in; bang hang hiam cih leh Topa aw, nangmah in thupha na piaksate a tawntungin thupha ngah ahi hi,” a ci hi. Hih thute khit ciangin David in Filistia mite zo-in nuaisiah a, Filistia mite’ khutsung panin Gath le a khuaneute a la hi. Tua ciangin amah in Moab mite zo a, Moab mite David’ nasem suakin siah hong puak uh hi. Zobah le Hamath gam kumpipa Hadadezer in Eufratis gun kuam gamte ngahkik nuamin hong kuan ahih manin David in amah do-in a zo hi. Tua ciangin David in ama tung panin leeng galkap tulkhat, sakol tung tuang galkap tulsagih, le khe galkap tul sawmnih la hi. Tua ciangin David in leengkai sakol galkap khempeuh a zagui attatsak a, ahih hangin leeng zakhat a dingin a kicing a siit hi. Zobah kumpi Hadadezer a huh dingin Damaskas a Syria mite hong pai ciangin David in Syria mite tul sawmnih le tulnih that hi. Tua ciangin David in Syria gam Damaskas-ah khuacingte koih hi. Tua ciangin Syria mite David’ nasem suak uh a, siah a puak uh hi. David a paina peuhpeuhah Topa in gualzosak hi. Tua ciangin David in Hadadezer’ nasemte in a puak kham kibawl lumte la-in Jerusalem-ah a ciahpih hi. Tua ciangin Hadadezer’ khuapite Tibhath le Kun panin David in sumngo tampi tak la hi. Solomon in tuate tawh sumngo tuikuangpi le khuampite le sumngo umlebeelte a bawl hi. David in Zobah kumpi Hadadezer’ galkap buppi a zawhna thu Hamath kumpi Toi in a zak ciangin, Hadadezer simin a zawhna hangin a hopih ding le a lungdampih dingin Kumpi David kiangah a tapa Joram a sawl hi; bang hang hiam cih le Hadadezer le Toi kido zel ngei hi. Amah in kham, ngun, le sumngo tawh kibawl na namkim khempeuh puak hi. Kumpi David in hihte zong, Edom, Moab, Ammon mite, Filistia mite, le Amalek, minam khempeuh kiang panin a puakkhiat ngun le kham tawh Topa’ tungah a apkhawm hi. Tua ciangin Zeruiah’ tapa Abishai in Ci Kuam-ah Edom mite tul sawm le tulgiat that hi. Tua ciangin amah in Edom-ah khuacingte koih a, Edom mite khempeuh David’ nasem a suak uh hi. Topa in David a paina peuhpeuhah gualzosak hi. Tua ahih ciangin David in Israel mi khempeuh uk a, amah in a mite khempeuh tungah thuman le thutang a zang hi. Zeruiah’ tapa Joab pen galkapte a uk hi a, Ahilud’ tapa Jehoshafat pen thuciamteh pa ahi hi. Ahitub’ tapa Zadok le Abiathar’ tapa Ahimelek siampite hi a, Shavsha lai-at pa ahi hi. Jehoiada’ tapa Benaiah pen Khereth mite le Peleth mite tungah a uk hi a, David’ tapate pen kumpipa’ nasepna-ah uliante ahi uh hi. Hih thu khit tawlkhat ciangin Ammon mite’ kumpipa Nahash si a, a tapa in ama tangin uk hi. Tua ciangin David in, “Ama pa kei tungah thuman takin hong gamta ahih manin Nahash’ tapa Hanun’ tungah thuman takin ka gamta ding hi,” a ci hi. Tua ahih ciangin David in a pa’ huhau-in amah a hehnem dingin kamtaite a sawl hi. Tua ciangin David’ nasemte amah a hehnem dingin Ammon mite’ gam Hanun’ kiangah hong pai uh hi. Ahih hangin Ammon mite’ uliante in Hanun’ kiangah, “David in nang kiangah hehnemte hong sawlna hangin na pa a pahtawi hi, ci-in ngaihsun na hi hiam? Gam sung a pheklek ding le a lumlet ding le gam sung a ensim dingin ama nasemte na kiangah hong pai hi lo ahi hiam?” a ci uh hi. Tua ahih ciangin Hanun in David’ nasemte manin a khamul uh metsak a, a kawng ciang uhah a puante uh atkhiatsakna tawh amaute daisakin a sawlkhia hi. Tua ahih ciangin amaute kihem uh hi. Hih mite tawh kisai thu David kiangah a kigen ciangin amaute a dawntuah dingin mi a sawl hi; bang hang hiam cih leh hih mite nakpi takin maizum uh a, ciah ngam lo uh hi. Tua ciangin kumpipa in, “Na khamul uh a khankik mateng Jerikho-ah om unla, tua ciangin hong ciah un,” a ci hi. Ammon mite in David’ muhdahin amau mah a kibawl tawmna uh a muh uh ciangin Hanun le Ammon mite in Mesopotamia, Arammaakah, le Zobah panin leeng galkapte le sakol galkapte cial nadingin ngun talen tulkhat a puak uh hi. Amaute in leeng galkap tul sawmthum le tulnih le Maakah gam kumpipa a galkap tawh cial uh a, amaute hong pai-in Medeba khua kiangah phual a sat uh hi. Tua ciangin a khuapite uh panin Ammon mite kikhawmin galsim dingin hong kuan uh hi. David in tua thu a zak ciangin Joab le mi thahat galkap khempeuh a sawl hi. Tua ciangin Ammon mite hong kuankhia-in khuapi lutna-ah galdo dingin hong pang uh a, a hong kuan kumpite in gamlakah panmun a la uh hi. Gal in a nung le a mai panin a panna Joab in a theih ciangin Israel mi a kitengkhia mi pawlkhat teel a, Syria mite a do dingin pangsak hi. A omlai a mite amah in a sanggampa Abishai’ ukin koih a, Ammon mite a do dingin amaute kipangsak hi. Tua ciangin amah in, “Syria mite ka lelhtuak leh nangmah in kei nong huh ding a, ahih hangin Ammon mite nang na lelhtuak leh keimah in nang kong huh ding hi. Hang in; i mite a’ ding le i Pasian’ khuapite a dingin pasal tat ni; Topa in ama hoihsak bangin hong hih ta hen,” a ci hi. Tua ahih ciangin Joab le amah tawh a om mite in a do dingin Syria mite kiang hong naih uh hi. Tua ciangin ama mai-ah Syria mite tai uh hi. Syria mite a taina Ammon mite in a muh uh ciangin tua bangmahin amaute zong Joab’ sanggampa Abishai’ mai-ah tai uh a, khuapi sungah lut uh hi. Tua ciangin Jerusalem-ah Joab hong ciahkik hi. Ahih hangin Syria mite in Israel-te a lelhlam uh a kitheih uh ciangin, amaute in kamtaite sawlin Eufratis gal khata om Syria galkapte sam uh a, Hadadezer’ galkapte a ukpa Shofak a makai-in koih uh hi. David kiangah hih thu a kigen ciangin, amah in Israel khempeuh khawmin Jordan galkah a, amaute kiangah pai-in amaute a do dingin galkapte khawm hi. David in Syria mite a do dingin gal pangsak a, Syria mite tawh kido uh hi. Tua ciangin Israel-te’ mai-ah Syria mite tai uh hi. Tua ciangin David in Syria mite’ leeng hawl galkap mihing tulsagih, le khe galkap tul sawmli that a, amau’ galkap a ukpa Shofak zong a that hi. Tua khit ciangin Hadadezer’ nasemte in Israel-te a lelhlam uh a kitheih uh ciangin amaute in David tawh kilemna bawl uh a, ama khutnuai mi a suak uh hi. Tua ahih ciangin Syria mite in Ammon mite huh nuam nawn lo uh hi. Khuakhal sungin galsimin kumpite kuankhia zel uh hi. Tua bang hunhoih khuakhal hong tun ciangin Joab in galkapte kuan khiatpihin Ammon mite’ gam sugawp a, hong pai-in Rabbah khua umcih hi. Ahih hangin Jerusalem-ah David om hi. Tua ciangin Joab in Rabbah khua vatin lumlet hi. Tua ciangin David in amau’ kumpipa’ kumpi lukhu ama tung panin lakkhiatsak hi. Tua lukhu kham talen khat gikin a sungah suangmanpha khat a omna amah in thei hi. Tua hi a, David in tua lukhu ama lu tungah khu hi. Tua ciangin amah in tua khuapi van kinusiate tampi tak khat paikhiatpih hi. Tua ciangin amah in tua sunga om mite paikhiatpihin singatnate le tuzumte le heite tawh na a sem dingin a koih hi. Tua bangin Ammon mite’ khuapite khempeuhah David in hih hi. Tua ciangin David le mi khempeuh Jerusalem-ah a ciah uh hi. Hih thute khit ciangin Gezer-ah Filistia mite tawh kidona hong om a, Hushah khuami Sibbekai in mithagolte’ suanlekhakte khat ahi Sippai a that hi. Tua bangin Filistia mite kinuaisiah hi. Tua ciangin Filistia mite tawh kidona omkik leuleu hi. Tua hi a, Jair’ tapa Elhanan in a teipi kung siamlawngpi cia a pha, Gath khuami Goliath’ sanggampa Lahmi a that hi. Tua ciangin a khut langtuakah khutme guk a nei, a khe langtuakah zong kheme guk mah a nei, a vekpi-in sawmnih le li a nei, mi thalian khat a omna Gath-ah gal omkik hi. Tua mipa zong mithagolte’ sung pana hong piang ahi hi. Amah in Israel a to ciangin David’ sanggampa Shimea’ tapa Jonathan in amah that hi. Hih mi thumte pen Gath-a mithagolte sung pana hong piang ahi uh hi. David le a nasemte’ khutin amaute puk uh hi. Satan in Israel mite gimsak nuam ahih manin Israel mi phazah a sim dingin David hanthawn hi. Tua ahih ciangin David in Joab le galkap a ukte kiangah, “Pai un; Beersheba panin Dan ciang dong Israel mi phazah va sim unla, amaute a phazah ka theih nadingin kei kiangah thu hong zasak un,” a ci hi. Ahih hangin Joab in, “ Topa in a mite a zah za khatin behlap ta hen! Ka to kumpipa aw, amaute khempeuh ka topa’ nasemte hi lo ahi uh hiam? Tua ahih ciangin bang hangin ka topa in hih kisam sa na hi hiam? Bang hangin Israel tungah mawhna tun ding na hi hiam?” a ci hi. Ahih hangin kumpipa in Joab thuzawh hi. Tua ciangin Joab kihemkhia-in Israel sung khempeuhah pai a, tua ciangin Jerusalem-ah hong ciahkik hi. Tua ciangin Joab in David kiangah mite a kigawm khit ciangin a phazah a pia hi. Israel khempeuh sungah gal kap thei ding mihing awn khat le sang khat om a, Judah sungah gal kap thei ding mi tul za le tul sawmsagih om hi. Ahih hangin Joab in kumpipa’ thupiakna hoihsa het lo ahih manin a mi simna-ah Levi minam le Benjamin minamte hel lo hi. Ahih hangin hih thu-ah Pasian lungkim lo a, amah in Israel-te vatgawp hi. Tua ciangin David in Pasian kiangah, “Hih ka nasepna-ah nakpitakin ka khial hi. Tua ahih ciangin tu-in nang tungah kong thum hi; na nasempa’ mawhna hong maisak in; bang hang hiam cih leh a haihuai mahmahin ka gamta kha khin hi,” a ci hi. Tua ciangin Topa in David’ thumu pa Gad tungah thu gen a, “Pai inla David kiangah, ‘ Topa in hih bangin ci hi: Nangma tungah thu thum kong pia hi. Nang tungah kong hih theih nadingin tuate khat teel in, ci hi,’ ci-in gen in” a ci hi. Tua ahih ciangin David kiangah Gad hong pai-in ama tungah, “ Topa in hih bangin ci hi, ‘Na lak ding khat teel in: Kialpi kum thum sung, ahih kei leh na galte in nang hong simgawp laitakin na galte mai-ah kha thum sung galtaina, ahih kei leh gam sungah pulnatna le Topa’ vantungmi in Israel sung khempeuhah suksiatna ni thum sung a piangsak Topa’ namsau,’ ci hi. Tu-in kei hong sawl pa kiangah ka ciahpih ding dawnna ding khentel in,” a ci hi. Tua ciangin David in Gad kiangah, “Keimah in lungkhamna lianpi khat ka tuak hi. Ama hehpihna lian mahmah ahih manin Topa’ khut sungah hong puksak inla, mihing’ khut sungah hong puksak kei in,” a ci hi. Tua ahih ciangin Topa in Israel tungah pulnatna khat tungsak a, Israel mi tul sawmsagih puk hi. Tua ciangin Pasian in a susia dingin Jerusalem-ah vantungmi sawl hi. Ahih hangin amah in a suksiat ding laitakin Topa in mu a, tua thusia-ah amah kisik hi. Tua ahih ciangin amah in a susia vantungmi kiangah, “Phazo hi; tu-in khawl ta in,” a ci hi. Jebus mi Ornan’ ancilna gei-ah Topa’ vantungmi a din laitak ahi hi. Tua ciangin David khuadak to a, leitung le vantung kikalah Topa’ vantungmi dingin, a khut sungah a kidoksa namsau khat omin Jerusalem tungah a zan mu hi. Tua ciangin David le a upate puanhampi silhin maipuk uh hi. Tua ciangin David in Pasian kiangah, “Mi phazah a sim dingin thu a piapa keimah hi lo ka hi hiam? Khialin a gitloh gamtat mahmah pa keimah ka hi hi. Ahih hangin hih mite in bang gamtat khialhna nei ahi uh hiam? Topa ka Pasian aw, kong thum hi, keimah le ka innkuan gim hong pia in. Ahih hangin na mite tungah gimna tungsak kei in,” a ci hi. Tua ciangin David paito-in Jebus mi Ornan’ ancilna phualah Topa a’ ding biakna tau khat a lamna ding a gen dingin Topa’ vantungmi in Gad sawl hi. Tua ahih ciangin Topa’ min tawh a gen Gad’ kammal bangin David paito hi. Ornan le a tapa lite in mangbuh a cilcil laitakin a khuadak uhleh Topa’ vantungmi mu uh a, a tapa lite lau-in a bu uh hi. Ornan kiangah David hong tun ciangin, Ornan khuadak a, David mu-in ancilna panin hong paikhia a, a mai leilam ngatin David tungah zahtakna a bawl hi. Tua ciangin David in Ornan kiangah, “Mite kiang panin gimna a ven’ theih nadingin Topa a’ ding biakna tau khat ka lam theih nadingin na ancilna mun hong pia in. A man a cingin piak dingin hong pia in,” a ci hi. Tua ciangin Ornan in David kiangah, “La in; ko to kumpipa in hoih na sak bangin hih in. Meihal biaknate-a zat dingin bawngtalte, a sing dingin ancilna singte, le an tawh biak nadingin a mangbuhte kong pia hi. A vekpi-in kong pia hi,” a ci hi. Ahih hangin Kumpi David in Ornan kiangah, “Hilo hi, a man a cing tawh kong lei ding hi. Topa a dingin nangma a’ ka la kei ding a, keima sum bei loin meihal biaknate zong ka pia kei ding hi,” a ci hi. Tua ahih ciangin David in Ornan’ tungah a mun lei nadingin kham shekel zaguk a gik a pia hi. Tua ciangin David in tua lai-ah Topa a dingin biakna tau khat lamin meihal biaknate le thunuama biaknate bawlin Topa’ tungah thu ngen a, tua ciangin amah in a thungetna a piakna-in a meihal biakna a hal dingin vantung panin meikuang a piasuk hi. Tua ciangin Topa’ thupiakna tawh vantungmi in a namsau a pai sungah a siatkik hi. Tua hunin, Jebus mi Ornan’ ancilna phualah ama nget thu Topa in a piakna David in a muh ciangin amah in tua lai-ah a biakpiaknate a bawl hi. Bang hang hiam cih leh Moses in gamlakah a bawl Topa’ biakbuk le meihal biakna tau pen tua hunin Gibeon mual dawnah omlai hi. Ahih hangin amah in Topa’ vantungmi’ namsau kihta ahih manin Pasian tungah thu a dong dingin tua lai-ah David pai ngam lo hi. Tua ciangin David in, “Hih lai-ah Topa Pasian’ inn om ding a, hih lai-ah Israel mite’ meihal biakna tau om ding hi,” a ci hi. Israel gam sunga om gamdang mite a kikaihkhop nadingun David in thu a pia hi. Tua ciangin amah in Pasian’ biakinn lam nadingin suangseeksate a bawl dingin suangseekte a koih hi. David in kongpi kongkhak-a zat dingin siktukkilh le gak nadingin sik tampi koihin, teh zawh lohin sumngo tampi tak zong koih a, taamtak singte simzawh hi lo hi; bang hang hiam cih leh Sidon khuamite le Taia khuamite in David kiangah taamtak tampi tak puak uh hi. Bang hang hiam cih leh David in, “Ka tapa Solomon khangno-in pumpi tawh sinna om nai lo a, Topa a’ ding a kilam biakinn pen gam khempeuhah minthanna le pahtawina-ah a lian mahmah ding ahi hi. Tua ahih ciangin tua biakinn dingin keimah ka kigingkhol ding hi,” a ci hi. Tua ahih ciangin David in a sih ma-in na tampi tak koihkhol hi. Tua ciangin amah in a tapa Solomon sam a, Israel Pasian, Topa a dingin biakinn khat a lam ding a gen hi. David in Solomon kiangah, “Ka ta aw, Topa ka Pasian’ min dingin biakinn khat lam ding ka lungsimah om hi. Ahih hangin kei’ tungah Topa’ thu hong tung a, ‘Nangmah in gal lianpipi tampi simin mi tampi na that hi. Nangmah in keima mai leitungah sisan tua zahta luangsak na hih manin ka min dingin biakinn na lam kei ding hi. En in, nangma sung panin tapa khat hong piang ding a, amah pen lungnopna a nei mi hi ding hi. Keimah in a kimkota a galte khempeuh panin ama tungah lungnopna ka pia ding hi; bang hang hiam cih leh ama min Solomon hi ding a, ama hun sungin Israel tungah lungnopna le daihna ka pia ding hi. Amah in keima min dingin biakinn khat lam ding hi. Amah ka tapa hi-in, kei, ama pa ka hi ding a, Israel sungah ama kumpi tokhom ka kipsak paisuak ding hi,’ hong ci hi. Tu-in ka ta aw, amah in nangma thu a gensa bangin Topa na Pasian’ biakinn na lamna-ah na tangtun theih nadingin Topa in nang hong ompih tahen. Amah in Israel tungah nang hong uksak ciangin Topa na Pasian’ thukham na zuih theih nadingin Topa in ngaihsut pilna le thutelna nang tungah hong pia tahen. Tua ciangin Israel-te a dingin Topa in Moses a piak thukhamte le biakna ngeina kipte zuih ding na kidop nakleh na maavang ding hi. Thakhauh inla hang in. Lau kei inla lungkia kei in. Nakpi taka hanciamna le gimna lianpi tawh Topa’ biakinn dingin kham talen tul zakhat, ngun talen awn khat, le tehzawh lohin sumngo le sik ka koih khinzo hi; bang hang hiam cih leh tam mahmah hi; sing le suang zong ka koihzo hi. Nangmah in hihte na behlap ding hi. Nangmah in na a sem ding mi tampi na nei hi; suangseekte, leilesuang innlam siamte, khutsiamte, le simzawh lohin siamna nam khempeuh a nei, kham, ngun, sumngo, le sik sep a siamte na nei ding hi. Kithawi inla sem in! Topa in nang hong ompih ta hen!” a ci hi. Israel makaite khempeuh in zong a tapa Solomon a huhna ding David in thu pia a, “ Topa na Pasian uh note tawh hong om hi lo ahi hiam? Amah in na kiim khempeuh uhah lungnopna hong pia hi lo ahi hiam? Bang hang hiam cih leh amah in gam sunga teng mite keima khut sungah hong pia khin a, Topa le ama mite’ mai-ah gam sung khempeuh kinuaisiah hi. Tu-in Topa na Pasian uh a zong dingin na ngaihsutna uh le na lungsim uh kipsak un. Topa’ min dingin a kilam biakinn sungah Topa’ Thuciamna Singkuang le Pasian’ umlebeel siangthote a kipaipih theih nadingin kithawi unla Topa Pasian’ biakinn lam un,” a ci hi. Tu-in David teekin kum tampi pha a, amah in Israel tungah kumpi-in a tapa Solomon a koih hi. David in Israel makai khempeuh le siampite le Levi mite a khawm hi. Levi mite kum sawmthum panin a tungsiah teng kisim a, a vekpi-in pasal tul sawmthum le tulgiat pha hi. David in, “Hihte sung panin tul sawmnih le tulli in Topa’ biakinn sungah nasep uk ding a, tulguk pen maangte le thukhente hi ding a, tulli kongcingte, le tulli in phatna dinga ka bawlsa lasaknate tawh Topa tungah phatna pia ding uh hi,” a ci hi. Tua ciangin David in Levi mite a behbehin pawl thum suah a, tuate pen: Gershom pawl, Kohath pawl, le Merari pawl ahi uh hi. Gershom’ tapate: Ladan le Shimei ahi uh hi. Ladan’ tapate: A ukpi Jehiel, le Zetham, le Joel, thum pha uh hi. Shimei’ tapate: Shelomoth, Haziel, le Haran, thum pha uh hi. Hihte pen Ladan’ beh lutangte ahi uh hi. Tua ciangin Shimei’ tapate: Jahath, Zina, Jeush, le Beriah ahi uh hi. Hih lite pen Shimei’ tapate ahi uh hi. Jahath a ukpi hi-in, Zina a nihna ahi hi. Ahih hangin Jeush le Beriah-te in tapa tampi nei lo uh ahih manin innkuan khat kisuak sakin sim khatin kisim khawm uh hi. Kohath’ tapate: Amram, Izhar, Hebron, le Uzziel, li pha uh hi. Amram’ tapate: Aaron le Moses ahi uh hi. Amah le a tapate in Topa’ mai-ah paknamtui a hal tawntung ding le ama na semin ama min tawh thupha a piak tawntung theih nadingin a siangtho pen nate a ap dingin Aaron kituam koih hi. Ahih hangin Pasian’ mipa Moses’ tapate ahihleh Levi minamte lakah kisim hi. Moses’ tapate: Gershom le Eliezer ahi uh hi. Gershom’ tapate lakah Shebuel a ukpi ahi hi. Eliezer’ tapa Rehabiah zong a ukpi ahi hi. Eliezer in tapa dang nei lo a, ahih hangin Rehabiah’ tapate tam mahmah hi. Kohath’ tapa nihna Izhar’ tapate lakah Shelomoth a ukpi ahi hi. Kohath’ tapa thumna Hebron’ tapate lakah: Jeriah a ukpi, Amariah a nihna, Jahaziel a thumna, le Jekameam a lina ahi hi. Kohath’ tapa lina Uzziel’ tapate lakah: Mikah a ukpi, le Isshiah a nihna ahi hi. Merari’ tapate: Mahli le Mushi ahi hi. Mahli’ tapate: Eleazar le Kish ahi hi. Eleazar in tapa nei loin si a, tanu bek nei hi. Amau’ tanau, Kish tapate in amaute tenpih uh hi. Mushi’ tapate: Mahli, Eder, le Jeremoth, thum pha uh hi. Hihte pen Topa’ biakinn nasepna-ah na a sem ding, kum sawmnih panin a tungsiah, a milipin a minin a mi phazah zui-in a kiciamtehna bangin beh lutangte, a behbehin Levi suante ahi hi. Bang hang hiam cih leh David in, “Israel Pasian, Topa in a mite tungah lungnopna piazo a, Jerusalem-ah amah om tawntung ta hi. Tua ahih ciangin Levi mite in puanbuk hitaleh tua tawh kisai nasepna ding nate khat peuhpeuh hitaleh a puak ding uh kisam nawn lo hi,” a ci hi. Bang hang hiam cih leh David’ thupiakna a nunung pen tawh a kisim hihte pen kum sawmnih panin a tungsiah Levi mi a phazah ahi hi. “Ahih hangin amaute’ nasep ding pen Topa’ biakinn nasepna-ah Aaron’ suante huhin, biakinn tualte le biakinn deite kemin, biakna na khempeuh a siangtho sak ding, le Pasian’ biakinn nasepna-ah hih ding khat peuhpeuh a sem ding uh ahi hi. Ompihna Anlum, an tawh biak nadingin annel, silngo sawh loh anlum moh, a ki-em piakna, sathau tawh a kihel piakna, le a tam tehna ahih kei leh a lian tehna nasep khempeuh zong a huh ding uh ahi hi. Tua ciangin amaute zingsang simin ding ding uh a, lungdamna ko-in Topa phatin, nitakin zong tua bangmahin hih ding uh a, a mal zah a kisam bangin Sabbath nite, Khadet nite, le pawi nite-in Topa tungah meihal biakna a kipiak peuhpeuh ciangin a tawntungin Topa’ mai-ah om ding uh hi. Tua bangin amaute in kikhopna puanbuk le biakinn kemin, Topa’ biakinn nasepna-ah amau’ behte ahi Aaron’ suante huh ding uh hi,” a ci hi. Aaron’ suante a kisehkhennate hih bang ahi hi. Aaron’ tapate: Nadab, Abihu, Eleazar, le Ithamar ahi uh hi. Ahih hangin a pa uh a sih ma-in Nadab le Abihu si-in ta nei lo uh ahih manin Eleazar le Ithamar-te siampi suak uh hi. Eleazar’ suan Zadok, le Ithamar’ suan Ahimelek’ huhna tawh David in amau’ nasepna-ah a kiseh bangin Aaron’ suante a koih hi. Ithamar’ suante lak sangin Eleazar’ suante lakah ukpi tam omzaw ahih manin, amaute in Eleazar’ suante pawl sawm le guk suahin, Ithamar’ suante pawl giat suah uh hi. Eleazar’ suante le Ithamar’ suante lakah biakinn uliante le Pasian’ uliante om tuak uh ahih manin amaute in a kibangin aisanna tawh amaute koih uh hi. Tua ciangin Levi mi Nethanel’ tapa ahi lai-at pa Shemaiah in kumpipa, uliante, siampi Zadok, Abiathar’ tapa Ahimelek, siampite, le Levi mi beh lutangte’ omna-ah amaute ciamteh hi. Eleazar’ suante-a’ dingin khat kiteelin, tua ciangin Ithamar’ suante a dingin khat kiteel a, kilaihsak niloh uh hi. Aisanna a masa pen Jehoiarib tung, a nihna Jedaiah tung, a thumna Harim tung, a lina Seorim tung, a ngana Malkhijah tung, a gukna Mijamin tung, a sagihna Hakkoz tung, a giatna Abijah tung, a kuana Jeshua tung, a sawmna Shekaniah tung, a sawm le khatna Eliashib tung, a sawm le nihna Jakim tung, a sawm le thumna Huppah tung, a sawm le lina Jeshebeab tung, a sawm le ngana Bilgah tung, a sawm le gukna Immer tung, a sawm le sagihna Hezir tung, a sawm le giatna Happizzez tung, a sawm le kuana Pethahiah tung, a sawmnihna Jehezkel tung, a sawmnih le khatna Jakhin tung, a sawmnih le nihna Gamul tung, a sawmnih le thumna Delaiah tung, a sawmnih le lina Maaziah tungah a tu hi. Hihte in Israel Topa Pasian in amah a thupiak bangin a pupi uh Aaron in amaute-a’ dingin a kipsaksa ngeina bangin Topa’ biakinn sungah a pai dingin amau’ nasep uh ahi a kiseh nasep nei uh hi. Tua ciangin Levi suante a omlaite lakah: Aram’ suante sung panin Shubael’ suante Jehdeiah ahi hi. Rehabiah’ suante sung panin Isshiah a ukpi ahi hi. Izhar’ suante sung panin Shelomoth’ suante Jahath ahi hi. Hebron’ suante lakah: Jeriah a ukpi, Amariah a nihna, Jahaziel a thumna, Jekameam a lina ahi hi. Uzziel’ suante sung panin Mikah’ suante Shamir ahi hi. Isshiah’ suante sung panin Zekhariah ahi hi. Mikah’ sanggampa pen Isshiah ahi hi. Merari’ suante: Mahli, Mushi, le Jaaziah ahi hi. Merari’ suante Jaaziah sung panin Beno, Shoham, Zakkur, le Ibri ahi hi. Mushi’ tapate: Mahli, Eder, le Jerimoth ahi uh hi. Hihte pen a beh tawh kizui-in Levi’ suante ahi uh hi. Hihte in zong a behte uh ahi Aaron’ suante mah bangin Kumpi David, Zadok, Ahimelek, siampite, le Levi mi beh lutangte’ muhna-ah beh lutangte le a nau pasalte khat ciat in a kibangin aisanna tawh nasep tavuan a la uh hi. David le nasepna ah a ukpite in zong laiza lasaknate, harp lasaknate, le daltuahte tawh Pasian thu a gen dingin Asaf, Heman, le Jeduthun-te’ tapate pawlkhat nasepna-a dingin koihtuam uh hi. Na a semte le amau’ nasepte: Asaf’ tapate sung panin: Kumpipa’ makaihna nuai-ah Pasian’ thu a gen Asaf’ makaihna nuai-ah Asaf’ tapate Zakkur, Josef, Nethaniah, le Asharelah ahi hi. Jeduthun’ sung panin Jeduthun’ tapate: Lungdam kohna le Topa phatna-in laiza lasakna tawh thu a gen, a pa uh Jeduthun’ makaihna nuai-ah Gedaliah, Zeri, Jeshaiah, Shimei, Hashabiah, le Mattithiah, guk pha uh hi. Heman sung panin Heman’ tapate: Bukkiah, Mattaniah, Uzziel, Shebuel, Jerimoth, Hananiah, Hanani, Eliathah, Giddalti, Romamtiezer, Joshbekashah, Mallothi, Hothir, le Mahazioth ahi hi. Hihte khempeuh pen Pasian thuciamna bangin amah a pahtawi dingin kumpipa’ thumu pa Heman’ tapate ahi hi; bang hang hiam cih leh Pasian in Heman tungah tapa sawm le li le tanu thum pia hi. Amaute khempeuh Pasian’ biakinn nasep nadingin Topa’ biakinn sungah daltuahte, harp lasaknate, le laiza lasaknate tawh la lamsangah a pa uh ukna nuai-ah om uh hi. Asaf, Jeduthun, le Heman-te pen kumpipa’ thupiakna nuai-ah om uh hi. A Levi mipihte uh tawh Topa a’ ding lasakna lamah sinna a nei a siam mi a vekpi-in zanih le sawmgiat le giat ahi hi. Tua ciangin a neu a lian, sia le a sinte a kibangin, amaute in amau’ nasep ding uh ai a san uh hi. Asaf’ behte a dingin ai masa Josef tungah tu hi. A nihna Gedaliah, a sanggamte, le a tapate, sawm le nih tung tu hi. A thumna Zakkur, a tapate, le a sanggamte, sawm le nih tung tu hi. A lina Izri, a tapate, le a sanggamte, sawm le nih tung tu hi. A ngana Nethaniah, a tapate, le a sanggamte, sawm le nih tung tu hi. A gukna Bukkiah, a tapate, le a sanggamte, sawm le nih tung tu hi. A sagihna Jesharelah, a tapate, le a sanggamte, sawm le nih tung tu hi. A giatna Jeshaiah, a tapate, le a sanggamte, sawm le nih tung tu hi. A kuana Mattaniah, a tapate, le a sanggamte, sawm le nih tung tu hi. A sawmna Shimei, a tapate, le a sanggamte, sawm le nih tung tu hi. A sawm le khatna Azarel, a tapate le a sanggamte, sawm le nih tung tu hi. A sawm le nihna Hashabiah, a tapate, le a sanggamte, sawm le nih tung tu hi. A sawm le thumna Shubael, a tapate le a sanggamte, sawm le nih tung tu hi. A sawm le lina Mattithiah, a tapate, le a sanggamte, sawm le nih tung tu hi. A sawm le ngana Jeremoth, a tapate, le a sanggamte, sawm le nih tung tu hi. A sawm le gukna Hananiah, a tapate, le a sanggamte, sawm le nih tung tu hi. A sawm le sagihna Joshbekashah, a tapate, le a sanggamte, sawm le nih tung tu hi. A sawm le giatna Hanani, a tapate, le a sanggamte, sawm le nih tung tu hi. A sawm lekuana Mallothi, a tapate, le a sanggamte, sawm le nih tung tu hi. A sawmnihna Eliathah, a tapate, le a sanggamte, sawm le nih tung tu hi. A sawmnih le khatna Hothir, a tapate, le a sanggamte, sawm le nih tung tu hi. A sawmnih le nihna Giddalti, a tapate, le a sanggamte, sawm le nih tung tu hi. A sawmnih le thumna Mahazioth, a tapate, le a sanggamte, sawm le nih tung tu hi. A sawmnih le lina Romamtiezer, a tapate, le a sanggamte, sawm le nih tung a tu hi. Kongcingte a kisehkhenna hih bang ahi hi: Korah behte, Asaf’ innkuan sung panin Kore’ tapa Meshelemiah ahi hi. Meshelemiah’ tapate: Zekhariah a tacil, Jediael a nihna, Zebadiah a thumna, Jathniel a lina, Elam a ngana, Jehohanan a gukna, Eliehoenai a sagihna ahi hi. Obededom’ tapate: Shemaiah a tacil, Jehozabad a nihna, Joah a thumna, Sakar a lina, Nethanel a ngana, Ammiel a gukna, Issakhar a sagihna, Peullethai a giatna ahi hi. Ama tapa upa pen Shemaiah sung panin zong a beh sungah ukte ahi tapate a suak hi; bang hang hiam cih leh amaute pen siamna lian a nei mite ahi uh hi. Shemaiah’ tapate: Othni, Refael, Obed, le a sanggamte siamna a nei ahi Elzabad, Elihu, le Shemakhiah ahi hi. Hihte khempeuh pen Obededom’ tapate le amau’ tapate le a sanggamte uh tawh, nasep nadingin siamna a nei mi kician ahi uh hi. Obededom sung panin sawmguk le nih pha uh hi. Meshelemiah in siamna a nei tapate le sanggamte, sawm le giat nei hi. Merari innkuan sung panin Hosah’ tapate: Shimri a ukpi (amah tacil ahih loh hangin a pa in a ukpi-in amah bawl hi), Hilkiah a nihna, Tebaliah a thumna, Zekhariah a lina ahi hi. Hosah’ tapate le a sanggamte khempeuh sawm le thum a pha uh hi. Innkuan pasal lutangte pen kongcingte ahi uh hi. Amaute in a sanggamte uh tawh Topa’ biakinn sungah nasep nei uh hi. Amaute in a neu a lian a kibangin a pate uh innkuankuanin amau’ kongpi cin ding ai san uh hi. Nisuahna lama dingin ai, Shelemiah tungah tu hi. A tapa, a pil thulamlak pa Zekhariah a dingin zong ai san uh a, leilu lama dingin ai pha hi. Obededom a dingin leitaw lamah hong suak a, a tapa tungah vankoihna inndei kipia hi. Shuppim le Hosah a dingin lampi a paitohna, Shallekheth kongpi san, nitumna lamah kia hi. Galvil le galvil kimaituah uh hi. Vankoihna inndei kongah nih nihin a om mah bangin nisimin nisuahna lamah guk omin, nisim mahin leitaw lamah li om hi. Tua ciangin nitumna lama om lampi inn-a dingin a lampi-ah li omin a inn-ah nih om hi. Hihte pen Korah mite le Merari’ tapate lakah kongcingte a kisehkhenna ahi hi. Tua ciangin Levi mite sung panin Ahijah in Pasian’ biakinn vanmanpha koihnate le a ki-ap letsong koihnate uk hi. Gershon-te beh sung panin Ladan pen innkuan tampi a piankhiatna mi khat hi a, Jehiel innkuante zong ama sung panin a piang ahi hi. Jehiel’ tapa Zetham le a sanggampa Joel in Topa’ biakinn vanmanpha koihnate uk uh hi. Amram mite, Izhar mite, Hebron mite, le Uzziel mite sung panin: Moses’ tapa Gershom-te beh sung panin Shebuel pen vanmanpha koihna a ukte lakah a ukpi ahi hi. Gershom’ sanggam Eliezer’ suan Shelomith tawh zong beh kinai ahi hi. Eliezer’ sung panin a tapa Rehabiah, a tapa Jeshaiah, a tapa Joram, a tapa Zikri, a tapa Shelomith ahi hi. Hih Shelomith le a sanggamte in, Kumpi David, beh lutangte, le a tultul le a zaza-a uk uliante, le galkap a ukte in a ap uh ahi, a ki-ap letsongte a kikoihna khempeuh uk uh hi. Gal sungah a ngah uh van kinusiate sung panin Topa’ biakinn puah nadingin amaute in letsongte ap uh hi. Thumu pa Samuel, Kish’ tapa Saul, Ner’ tapa Abner, le Zeruiah’ tapa Joab in a apsate khempeuh zong, a ki-ap letsong khempeuh Shelomith le a sanggamte’ kepna sungah om hi. Izhar mite sung panin Khenaniah le a tapate pen Israel a dingin uliante le thukhente-in a pualam nasepna-ah kiseh hi. Hebron mite sung panin Hashabiah le a sanggamte, siamna a nei mihing tulkhat le zasagih in Jordan nitumna lam Israel tungah Topa’ nasepna khempeuh le kumpipa’ nasepna-ah uk uh hi. Hebron mite sung panin Jerijah a ukpi ahi hi. (David’ uk a kum sawmlina kumin kikantelna bawl uh a, Gilead gam sung Jazer-ah amaute sung panin siamna lian a nei mihing kimu hi.) Kumpi David in Jerijah le a sanggamte, siamna a nei mihing tulnih le zasagih, a beh sungah lutang ahite pen Pasian tawh a kisai na khempeuh le kumpipa’ vaite-ah, Reuben mite, Gad mite, le Manasseh minam alangte tungah a uk dingin a seh hi. Tu-in Israel mite, beh lutangte, a tul le a za-a a ukte, le khen khatah mi tul sawmnih le tulli a om, kum tawntung kha khat khit kha khat hong tungin a kuankhia a khente tawh kisai-in na khempeuhah kumpipa’ na a sem a uliante: A kha masa sungin Zabdiel’ tapa Jashobeam a khen masa a uk hi a, ama khen sungah mi tul sawmnih le tulli om hi. Amah pen Perez’ suanlekhak hi a, a kha masa sungin galkap a ukte khempeuh a ukpi ahi hi. A kha nihna sungin Ahoh-te beh Dodai a khen a ukpi hi a, ama khen sungah tul sawmnih le tulli om hi. A kha thumna sungin siampi Jehoiada’ tapa Benaiah a ukpi hi a, ama khen sungah tul sawmnih le tulli om hi. Hih pa pen mihing sawmthumte sungah a thahat, mihing sawmthumte a uk Benaiah hi a, ama tapa Ammizabad pen ama khen a ukpa ahi hi. A kha lina sungin Joab sanggampa Asahel hi a, ama nungah amah a laih dingin a tapa Zebadiah om hi. Ama khen sungah mi tul sawmnih le tulli om hi. A kha ngana sungin Izrah-te beh Shamhuth hi a, ama khen sungah tul sawmnih le tulli om hi. A kha gukna sungin Tekoa khuami Ikkesh’ tapa Ira hi a, ama khen sungah tul sawmnih le tulli om hi. A kha sagihna sungin Efraim suante sung panin Pelon khuami Helez hi a, ama khen sungah tul sawmnih le tulli om hi. A kha giatna sungin Jerah mi sung panin Hushah khuami Sibbekai hi a, ama khen sungah tul sawmnih le tulli om hi. A kha kuana sungin Benjamin mi sung panin Anathoth khuami Abiezer hi a, ama khen sungah tul sawmnih le tulli om hi. A kha sawmna sungin Zerah mi sung panin Netofah khuami Maharai hi a, ama khen sungah tul sawmnih le tulli om hi. A kha sawm le khatna sungin Efraim suante sung panin Pirathon khuami Benaiah hi a, ama khen sungah tul sawmnih le tulli om hi. A kha sawm le nihna sungin Othniel’ suante sung panin Netofah khuami Heldai hi a, ama khen sungah tul sawmnih le tulli om hi. Israel minamte tungah a ukpite: Reuben mite a dingin Zikri’ tapa Eliezer ahi hi. Simeon mite a dingin Maakah’ tapa Shefatiah ahi hi. Levi mite a dingin Kemuel’ tapa Hashabiah ahi hi. Aaron mite a dingin Zadok ahi hi. Judah mite a dingin David’ sanggamte’ sung panin Elihu ahi hi. Issakhar mite a dingin Mikhael’ tapa Omri ahi hi. Zebulun mite a dingin Obadiah’ tapa Ishmaiah ahi hi. Naftali mite a dingin Azriel’ tapa Jeremoth ahi hi. Efraim mite a dingin Azariah’ tapa Hoshea ahi hi. Manasseh minam a langte a dingin Pedaiah’ tapa Joel ahi hi. Gilead gam sunga Manasseh minam alangte a dingin Zekhariah’ tapa Iddo ahi hi. Benjamin mite a dingin Abner’ tapa Jaasiel ahi hi. Dan mite a dingin Jehoram’ tapa Azarel ahi hi. Hihte pen Israel minamte’ makaite ahi uh hi. Israel mite vantung aksi zahin a tamin a bawlna ding Topa in thu ciam khin ahih manin David in kum sawmnih le a nuaisiah mite sim lo hi. Zeruiah’ tapa Joab in sim ding kipan a, ahih hangin zo man lo hi. Bang hang hiam cih leh hih thu hangin Israel tungah Pasian’ hehna hong tung a, Kumpi David’ khang tangthu sungah tua a kisimte kikhum lo hi. Kumpipa’ vanmanpha a ukte: Kumpipa’ vanmanpha koihnate-ah Adiel’ tapa Azmaveth ahi hi. Gam sunga vanmanpha koihnate, khuapi sungate, khuaneute le tausangte sunga omte tungah Uzziah’ tapa Jonathan ahi hi. Lo khawh nasep a sem mite tungah Khelub’ tapa Ezri ahi hi. Leenggui lote tungah Ramah khuami Shimei ahi hi. Leenggui lo panin a piang leenggahzu koihnate tungah Shifmoth khuami Zabdi ahi hi. Shefelah gam sunga om oliv le theithek kungte tungah Gederah khuami Baalhanan ahi hi. Sathau koihnate tungah Joash ahi hi. Sharon gam sungah a gamta ganhonte tungah Sharon khuami Shitrai ahi hi. Kuam sunga om ganhonte tungah Adlai’ tapa Shafat ahi hi. Kalaohte tungah Ishmael mi Obil ahi hi. La a nute tungah Meronoth khuami Jehdeiah ahi hi. Tuuhonte tungah Hagri mi Jaziz ahi hi. Hihte khempeuh pen Kumpi David’ neihsa a kemte ahi hi. David’ pano Jonathan pen thuthei mi le laithei mi ahih manin thu lamlak pa ahi hi. Amah le Hakmoni’ tapa Jehiel in kumpipa’ tapate cing uh hi. Ahithofel pen kumpipa’ thu lamlak pa hi a, Arkhi mi Hushai pen kumpipa’ lawmpa ahi hi. Ahithofel a sih ciangin Benaiah’ tapa Jehoiada le Abiathar in laih uh hi. Joab pen kumpipa’ galkapte a ukpa ahi hi. David in Jerusalem-a Israel-te lakah zaneite, minamte sungah zaneite, kumpipa’ na a sem a khente sungah uliante, a tultul a a ukte, a zaza-a a ukte, neihsa khempeuh le kumpipa’ ganhingte le a tapate a kemte pen, kumpi inn-a zaneite, a thahat mite, le gal a hang tawntungte khempeuh tawh a khawm hi. Tua ciangin Kumpi David a khe-in dingto-in, “Ka sanggamte le ka mite aw, ka thugen hong za un. Topa’ Thuciamna Singkuang a’ ding le i Pasian’ khengak nadingin tawlngakna biakinn khat lam ding ka lungsim sungah om a, a lamna ding ka kiging hi. Ahih hangin Pasian in kei kiangah, ‘Nang pen galhang khat hi-in sisan tampi luangsak na hih manin keima min dingin biakinn na lam thei kei ding hi,’ hong ci hi. Ahi zongin Israel Topa Pasian in Israel tungah kumpi ahi tawntung dingin ka pa’ innkuan khempeuh panin kei hong teel hi; bang hang hiam cih leh amah in makai-in Judah teel a, tua ciangin Judah innkuan panin ka pa’ innkuan teel a, tua ciangin ka pa’ tate lak panin Israel khempeuh tungah kumpi-in kei hong bawl ding kei tungah amah lungkim hi. Tua ciangin ka tapate khempeuh lak panin (bang hang hiam cih leh Topa in kei tungah tapa tampi hong pia hi) Israel-te a ukin Topa’ kumpi tokhom tungah a tu dingin amah in ka tapa Solomon teel khin hi. Amah in kei kiangah, ‘Ka biakinn le a inntualte a bawl ding pa pen na tapa Solomon ahi hi; bang hang hiam cih leh ka tapa dingin amah ka teel khin a, kei pen ama pa ka hi ding hi. Amah in ka thupiaknate le ka biakna ngeina kipte tuni-a mah bangin zuih ding a ngaihsut paisuak nakleh ama kumpi gam ka kipsak tawntung ding hi,’ hong ci hi. Tua ahih ciangin tu-in note in hih leitang hoih nei-in note’ khit na tate uh tungah gamh-in na nusiat tawntung theih nadingun Topa’ mai-ah kikhopna ahi Israel khempeuh’ muhna, le i Pasian’ zakna-ah Topa na Pasian uh thupiaknate khempeuh zui-in zong un. “Tu-in nang, ka tapa Solomon aw, na pa’ Pasian thei inla, na lungsim khempeuh le utna lungsim tawh ama na sem in; bang hang hiam cih leh Topa in lungsim sung zong a, ngimna le ngaihsutna khempeuh thei hi. Nangmah in amah na zon le nangmah in amah na mu ding hi. Ahih hangin amah na nusiat leh amah in nang hong paaikhia paisuak ding hi. Biakinn dingin inn khat a lam dingin Topa in nang hong teel khin ahih manin tu-in kingaihsun in; thahat inla sem in,” a ci hi. Tua ciangin David in a tapa Solomon tungah biakinn innliim, a innte, a vanmanpha koihnate, a dawl tungnungte, a dei sungnungte, le hehpihna tokhom a dingin inndei a geelna; le Topa’ inn a tualte a dingin a lungsim ah a ngaihsut khempeuh, a kimkot a inndeite khempeuh, Pasian’ biakinn sung van manpha koihnate, le a ki-ap letsongte a’ ding van manpha koihnate; siampite le Levi mi a khente, le Topa’ biakinn sungah nasepna khempeuh a ding; Topa’ biakinn sungah nasepna ding umlebeel khempeuh a’ ding, nasepna-ah zat ding kham tawh kibawl umlebeel khempeuh a gihna, nasepna-ah zat dingin ngun tawh kibawl umlebeelte a gihna, nasepna-ah meivakkhuam a kizat ciatna bangin kham meivakkhuamte le a meivakte a gihna, a meivakkhuam le meivakte a gihna zah ciat, meivakkhuam khat le a meivakte ngun a gihna, Ompihna Anlum a dingin sabuai kham a gihna ciat, ngun sabuaite a dingin ngun a gihna, le sikkeute, kuangte, le haite a dingin kham citak a gihna; kham haipite le a gihna ciat, ngun haipite le a gihna ciat; a kisiangsaksa kham tawh kibawl paknamtui biakna tau ding le a gihna zah ding a geelna; a khate uh zakin Topa’ Thuciamna Singkuang a khuh kherub-te’ kham leeng ding a geelna zong a pia hi. Nasep ding khempeuh geelsa bangin sep dingin hih thu tawh kizui-in Topa’ genna bangin lai-in gelhna tawh amah in hihte khempeuh a siangin a hih hi. Tua ciangin David in a tapa Solomon kiangah, “Thakhauhin hang inla sem in. Lau kei in; bang hang hiam cih leh Topa Pasian, keima Pasian nangawn nang tawh hong om hi. Topa’ biakinn sung nasepna khempeuh a kizawh matengin amah in nang hong tamasak lo ding a, hong nusia lo ding hi. Tua ciangin Pasian’ biakinn-ah nasep khempeuh a sem dingin siampite le Levi mi a khente om hi. Nasepna khat peuhpeuhah siamna a nei mite in nasepna khempeuhah nang hong huh ding hi. Uliante le mi khempeuh zong nangma thupiakna bangbangin gamta ding uh hi,” a ci hi. Tua ciangin Kumpi David in a kikhawm khempeuhte kiangah, “Pasian in amah bek a teelsa ka tapa Solomon pen khangno-in pumpi tawh sinna om nai lo a, nasep ding pen lian mahmah hi. Bang hang hiam cih leh hih biakinn lianpi pen mihing a’ ding hi lo a, Topa Pasian a’ ding ahi hi. Tua ahih ciangin ka Pasian’ biakinn dingin ka hih theihzah ciang, phuh dingin onik suang, suangpak, mel tuamtuam a nei suang, suangkang, le suangmanpha nam khempeuh tampi takte banah kham zatna ding nate-ah kham, ngun zatna ding nate-ah ngun, sumngo zatna ding nate-ah sumngo, sik zatna ding nate-ah sik, le sing zatna ding nate-ah sing ka koih khinzo hi. Tua tham loin, a siangtho biakinn a dingin ka koihte khempeuh banah, ngun le kham keima-a’ mahmah zong om a, ka Pasian’ biakinn ka ngaihsutna hangin ka Pasian’ inn-ah ka piakte: Kawm zut nadingin Ofir gam kham ahi kham talen tulthum, le a kisiangsaksa ngun talen tulsagih, le siamneelte in a hih ding nasepna khempeuh a dingin kham zatna ding nate-ah kham, le ngun zatna ding nate-ah ngun ahi hi. Kua teng utna lungsim tawh Topa’ tungah tuni-in amahmah kipia-in ki-ap ding na hi uh hiam?” a ci hi. Tua ciangin beh lutangte in utthu-a piakna bawl uh a, minam makaite, a tul tul-a a ukte le a za za-a a ukte, le kumpipa’ nasepna-ah a uk uliante in zong hih uh hi. Amaute in Pasian’ biakinn nasep nadingin kham talen tulnga le kham darik tul sawm, ngun talen tul sawm, sumngo talen tul sawm le tulgiat, le sik talen tul zakhat a pia uh hi. Suangmanpha a nei peuhmah in Gershon mi Jehiel’ kepna sung, Topa’ biakinn sung vanmanpha koihna-ah a pia uh hi. Tua ciangin hih mite in utna lungsim tawh pia uh ahih manin mite lungdam uh hi; bang hang hiam cih leh amaute in a lungsim khempeuh uh tawh Topa’ tungah pia ziahziah uh a, kumpi David zong nakpitakin a lungdam hi. Tua ahih ciangin a kikhawmte khempeuh’ omna-ah David in Topa phat hi. David in, “Nang, Topa, ka pu uh Israel Pasian aw, a tawntungin thupha ngah ta in. Topa aw, liatna, vangliatna, minthanna, gualzawhna, le min liatnate nangma a’ ahi hi; bang hang hiam cih leh vantung le leitungah a om khempeuh zong nangma a’ ahi hi. Topa aw, kumpi gam nangma a’ hi a, tuate khempeuh tungah nang a lutangin hong kisangsak hi. Hauhna le minphatna nangma kiang pan hong pai a, nangmah in na khempeuh tungah na uk hi. Na khut sungah vangliatna le minthanna om a, liatsakna ding le thakhauhsakna ding na khut sungah om hi. Tu-in nangma tungah ka nuam uh hi, kote’ Pasian aw, a minthang na min ka phat uh hi. “Ahih hangin kote in hih bangin utna tawh kong piak nadingun kei kua hi a, ka mite bang ahi hiam? Bang hang hiam cih leh na khempeuh nang kiang pan hong pai hi a, nangma a’ mah nang tungah a hong pia ka hi uh hi. Bang hang hiam cih leh ka pu ka pate khempeuh uh mah bangin kote pen nangma mai-ah khualmite le pemtate ka hi uh hi. Ka hunte uh leitungah niliim bang hi a, sih ding ka pelh thei kei uh hi. Topa kote’ Pasian aw, na min siangtho pahtawi nadingin nang a’ ding biakinn lam nadingin ka piaksa uh hih a tampite zong nangma khutsung panin hong pai hi a, a vekpi-in nangma a’ mah ahi hi. Nangmah in lungsim entelin thumanna-ah na lungkimna ka thei hi, ka Pasian aw. Lungsim thumanna le citna tawh hih nate khempeuh kong pia khin a, tu-in nang tungah citna le lungdamna tawh a hong pia, hih lai-ah a om na mite ka muzo hi. Ka pute uh Abraham, Isaac, le Israel Pasian, Topa aw, na mite’ lungsim sungah tua bang ngimnate le ngaihsutnate omsak tawntung inla, amaute’ lungsim nangma lamah kai in. Amah in a lungsim khempeuh tawh na thupiaknate, na teci pannate, le na thukhamte kemin a vekpi-in sem a, keimah in ka vaihawmsa biakinn lianpi amah in a lam theih nadingin ka tapa Solomon tungah utna lungsim guan in,” a ci hi. Tua ciangin David in a kikhawmte khempeuh tungah, “ Topa na Pasian uh phat un,” a ci hi. Tua ciangin a kikhawmte khempeuh in a pute a pate uh Pasian Topa phatin a lu uh kun uh a, Topa bia-in kumpipa tungah zahtakna a bawl uh hi. Tua ciangin amaute in Topa tungah biakpiakna bawl uh a, a zing ciangin Topa tungah meihal biakna bawngtal tulkhat, tuutal tulkhat, le tuuno tulkhat, a leenggahzu tawh a biakna teng tawh, le Israel khempeuh a dingin biakpiakna tampi a pia uh hi. Tua ciangin amaute in tua ni-in lungdamna lianpi tawh Topa’ mai-ah pawi khamin a om uh hi. Tua ciangin amaute in David’ tapa Solomon kumpi-in a nihveina bawl uh a, amaute in Topa a dingin amah kumpi-in sathau nilhin, siampi dingin Zadok sathau a nilh uh hi. Tua ciangin a pa David tangin Topa’ phuhsa kumpi tokhom tungah kumpi-in Solomon a tu hi. Amah a dau pai a, Israel mi khempeuh in ama thu a mang uh hi. Makaite khempeuh le a thahat mite, le Kumpi David’ tapate khempeuh in zong Kumpi Solomon tungah a thuman ding uh thu ciam uh hi. Tua ciangin Topa in Israel mi khempeuh muhna-ah Solomon tungah minthanna lianpi pia a, Israel sungah ama ma-in kumpi khat peuhpeuh tungah a kipia ngei nai lo kumpi minliatna a guan hi. Tua hi a, Jessi’ tapa David in Israel khempeuh tungah a uk hi. Israel tungah ama uk hun kum sawmli sung hi a, amah in Hebron-ah kum sagih sung, Jerusalem-ah kum sawmthum le thum sung a uk hi. Tua ciangin a khangham, a ni cing, hauhna le minthanna tawh a si hi. Tua ciangin a tapa Solomon in ama tangin uk hi. Tu-in Kumpi David’ gamtatna a patna pan a tawpna dongin thumu pa Samuel’ Khang Tangthu sung, kamsang Nathan’ Khang Tangthu sung, le thumu pa Gad’ Khang Tangthu sungah ama ukna le ama vangliatnate khempeuh le ama tung le Israel tung, gam sung kumpi gamte khempeuh tungah a tung thute a kiciamtehna tawh kigelh khawm hi. David’ tapa Solomon in ama kumpi gam kho takin lenkip hi; bang hang hiam cih leh Topa ama Pasian in ompih a, a lian mahmahin amah a bawl hi. Solomon in Israel mi khempeuh tung, a tultul le a zaza-a a ukte tung, thukhente tung, Israel sunga makai khempeuh tung, le beh lutangte tungah thu a gen hi. Tua ciangin Solomon le amah tawh a om khempeuh, Gibeon-a a om mual dawna biakpiakna munah pai uh hi; bang hang hiam cih leh Topa’ nasem Moses in gamlakah a bawlsa Pasian’ kikhopna buk tua lai-ah om hi. (Ahih hangin David in Kiriathjearim panin ama a dingin a bawlsak nasa munah Pasian’ Thuciamna Singkuang paipihto khin hi; bang hang hiam cih leh amah in Jerusalem-ah ama a dingin puanbuk khat lamsak khin hi.) Tua tham loin Hur’ tapa Uri, a tapa Bezalel in a bawl sumngo biakna tau pen Topa’ biakbuk mai tua lai-ah om hi. Tua ciangin Solomon le a kikhawm mite in Topa thu dong uh hi. Tua ciangin kikhopna bukah a om Topa’ mai-a sumngo biakna tau-ah Solomon paito-in tua tungah meihal biakna ganhing tulkhat a pia hi. Tua zanin Solomon tungah Pasian kilangin ama kiangah, “Nang kong piak ding hong gen in,” a ci hi. Tua ciangin Solomon in Pasian kiangah, “Nangmah in ka pa David tungah a lian le a kip itna na lak khin a, ama tangin kumpi-in keimah nong koih khin hi. Topa Pasian aw, leitung leivui zahin a tam mite tungah kumpi-in kei hong koih khin na hih manin ka pa David tungah na thuciamna tu-in hong tungsak in. Hih mite ka uk theih nadingin tu-in pilna le theihna hong pia in; bang hang hiam cih leh hih zahin a tam hih na mite kua in ukzo ding ahi hiam?” a ci hi. Pasian in Solomon dawngin, “Hih thu na lungsim sungah om a, nangmah in neihsate, hauhna, pahtawina, ahih kei leh nang hong mudahte’ nuntakna hong ngen loin, a tungah kumpi-in nang kong koihna ka mite na uk theih nadingin nang a’ ding pilna le theihna hong ngen na hih manin, pilna le theihna nangma tungah hong kipia hi. Nang’ ma-a kumpite kuamah in a neih ngei loh, nang’ khit-ate kuamah in zong tua bang a neih loh ding hauhnate, neihnate, le pahtawina zong, nangma tungah kong pia thuah ding hi,” a ci hi. Tua ahih ciangin Gibeon-a om mual dawna biakpiakna mun, kikhopna buk mai panin Jerusalem-ah Solomon hong pai hi. Tua ciangin amah in Israel tungah a uk hi. Solomon in leengte le sakol tung tuangte kaikhawm hi. Amah in leeng tulkhat le zali le sakol tung tuang mi tul sawm le tulnih nei a, leeng khuapite sung le Jerusalem-ah tuate a koih hi. Tua ciangin kumpipa in Jerusalem-ah suang bangin ngun le kham olsak a, taamtak singte pen Shefelah theithek sing bangin tamsak hi. Solomon in gamdang panin sakol a lakna munte pen Egypt le Kue pan hi a, kumpipa’ sumbawlte in a man ding pia-in Kue panin tuate ngah uh hi. Amaute in Egypt panin leeng khat ciangin ngun shekel za guk-in la uh a, sakol khat ciangin za le sawmnga-in la uh hi. Tua bangmahin amaute in zuakkhiat kik dingin Hit kumpite le Syria kumpite khempeuh tung panin zong sakol le leeng a la uh hi. Tu-in Solomon in Topa’ min dingin biakinn khat le ama a dingin kumpi inn khat lam ding sawm hi. Tua ahih ciangin Solomon in van a pua ding mi tul sawmsagih le mualtung gamah suang a to ding mi tul sawmgiat, le tuate a van dingin mi tulthum le zaguk a seh hi. Tua ciangin Solomon in Taia kumpi Hiram kiangah thu puak a, “Tenna ding inn khat a lam nadingin ka pa David tungah taamtak sing na puak mah bangin kei tungah zong hong puak in. En in, Israel-te a dingin a tawntung a ding a kikipsaksa bangin, ama mai-ah a namtui nate ahi paknamtui halna ding, le Ompihna Anlum piak tawntungna ding, le Sabbath nite, Khadet nite, le Topa kote’ Pasian a dingin a kisehsa pawi nite-in zing le nitakin meihal biaknate piak nadingin Topa ka Pasian’ minin biakinn khat lamin ama tungah a ap ding ka hi hi. Kote’ Pasian pen pasian dang khempeuh sangin lianzaw ahih manin ka lam ding biakinn zong lian ding hi. Ahih hangin vantung, a sang pen vantung nangawn in amah huam zo lo ahih manin ama a dingin kua in biakinn lamzo ding ahi hiam? Ama mai-ah paknamtui halna ding cih simloh ama a dingin biakinn a lamsak dingin kei kua ka hi hiam? Tua hi a, tu-in ka pa David in a sehsa, Judah le Jerusalem-ah kei tawh a om nasep siamte tawh a semkhawm dingin kham, ngun, sumngo, le sik, le a ausan, a dupsan, puandumte, le nasepna-ah zong siamna a nei mi khat hong puak in. Sing nasem sing a phukte a dingin a kisuvui mangbuh beem tul sawmnih, mangbuhham beem tul sawmnih, leenggahzu tambong tul sawmli, le sathau tambong tul sawmli ka hong pia ding hi,” a ci hi. Tua ciangin Taia kumpipa Hiram in lai-in thuk-in Solomon kiangah khak a, “ Topa in a mite it ahih manin amaute tungah kumpi-in nang hong koih hi,” a ci hi. Tua ciangin a lai sungah genthuah lai a, “ Topa a dingin biakinn khat, le ama a dingin kumpi inn khat a lam ding, thutheihna le thutelna tawh a kidim mipil, David tungah a pia, van le lei a bawl Israel Topa Pasian in thupha ngah tahen. Tua ahih ciangin tu-in ka topa in a gensa mangbuh le mangbuhham, sathau le leenggahzute, na nasemte tungah hong puak in. Tua ciangin na kisap sing peuhmah Lebanon panin kong phuk ding uh a, nangmah in Jerusalem-ah na puaktoh theih nadingin phongin tuipi tungah Joppa dong nang kiangah kong paipih ding uh hi,” zong ci lai hi. Tua ciangin a pa David in mi phazah a sim mah bangin, Solomon in Israel gam sunga om gamdang mi phazah simna bawl a, mi tul zakhat le tul sawmnga le tulthum le zaguk pha hi. Amah in van a pua dingin amaute tul sawmsagih, mualtung gamah suang a to dingin tul sawmgiat, le mite’ nasep a van dingin tulthum le zaguk a seh hi. Tua ciangin Solomon in Jerusalem sung Moriah Mual tung, a pa David’ tungah Topa a kilahna mun, David in a sehnasa mun ahi, Jebus mi Ornan’ ancilna phualah Topa’ biakinn lam ding kipan hi. Amah in ama uk a kum lina a kha nihna sungin lam ding kipan hi. Pasian’ biakinn lamna ding Solomon’ geelna hih bang ahi hi: A dung pi sawmkua hi a, a vai pi sawmthum ahi hi. Inn mai-a innliim pen inn vai tawh kikimin pi sawmthum sau a, a sanna zong pi sawmthum mah ahi hi. Amah in taaksan tawh innpi kawm dapin kham hoih tawh zut a, tua tungah nisuh le khainiang a bawl hi. Amah in suangmanpha phutin a inn zem hi. A kham zatte Parvaim kham ahi hi. Tua ahih ciangin amah in a inn, a innsunte, a sangkilte, a kawmte, le a kongkhakte kham tawh zut a, tua ciangin a kawmte tungah kherub-te a bawl hi. Tua ciangin amah in siangtho pen mun bawl hi. A dung pen a vai tawh kizui-in pi sawmthum hi a, a vai zong pi sawmthum mah ahi hi. Amah in kham hoih talen zaguk tawh a zut hi. A kilhnate a gihna kham shekel sawmnga ahi hi. Tua ciangin amah in a inn dawl tungnungte kham tawh a zut hi. Amah in siangtho pen mun sungah sing kherub nih bawlin kham tawh tuate zut hi. Tua kherub tegel’ kha a kizalin pi sawmthum ahi hi. A khat’ kha pen pi sagih le alang hi-in inn kawm ban a, tua ciangin alang khat pi sagih le alang in a kherub dang khat’ kha ban hi. Tua mah bangin a kherub dang khat’ kha langkhat zong pi sagih le alang hi-in inn kawm langkhat ban a, pi sagih le alang mah a sau a kha langkhat pen a kherub masa’ kha tawh kizom hi. Hih kherub-te’ khate in pi sawmthum huam hi. Kherub-te amau’ khe-in dingin innpi sunglam nga uh hi. Tua ciangin amah in a dum, a ausan, le a dupsan puante, le saihadial puan tawh a dalna puan bawl a, tua tungah kherub-te a bawl hi. Amah in inn mai sanah pi sawmnga le pi nih le alang a sang, a dawn tuakah pi sagih le alang a pha khuamluzepna a nei khuampi nih bawl hi. Amah in ngawng a awhte bangin khainiangte bawlin khuampite dawnah khai hi. Tua ciangin amah in mang kawlsing zakhat bawlin khainiangte tungah koih hi. Amah in tua khuamte, khat leitaw lam, a khat leilu lam, biakinn mai-ah phut hi. Amah in leitaw lama om pen Jakhin phuakin, leilu lama om pen Boaz a phuak hi. Amah in sumngo biakna tau, a dung pi sawmthum, a vai pi sawmthum, a sang pi sawm le nga a pha khat bawl hi. Tua ciangin amah in a kisung tuikuangpi khat zong bawl hi. Tua pen a bem hi a, a gei khat pan a gei khat dong pi sawm le nga pha-in, pi sagih le alang sang a, a kimkot pi sawmli le nga a pha hi. Tuikuangpi pualam kimkot pi sawmlinga sungah umgah limte om hi. Tua um gahte gual nihin om a, tuikuangpi a kisunin kisungkhawm pah hi. Bawngtal sawm le nihte tungah tua tuikuangpi kinga a, thum leilu lam nga a, thum nitumna lam nga-in, thum leitaw lam nga a, thum nisuahna lam nga hi. Tuate tungah a tuikuangpi kinga a, a nunglam uh a sunglamah om hi. A sahna pen khutpeek mai cia ahi hi; a geivial pen unok tawh a kibang hai geivial bangin kibawl a, tua sungah tui tambong tulguk val ta hi. Amah in kisilna ding tuikuang dang sawm zong bawl a, leitaw lamah nga, leilu lamah nga a koih hi. Amaute in meihal biakna-a a zatte uh hihte sungah silsiang ding uh a, tuikuangpi pen siampite’ kisilna ding ahi hi. Tua ciangin amah in a kigelhsa bangin kham meivakkhuam sawm bawl a, biakinn sung leitaw lamah nga, leilu lamah nga a koih hi. Amah in sabuai sawm zong bawl a, biakinn sung leitaw lampangah nga, leilu lampangah nga koih hi. Tua ciangin amah in kham kuang zakhat bawl hi. Amah in siampite’ inntual, le inntual lian, le inntual kongkhakte bawl a, a kongkhakte sumngo tawh a zut hi. Tua ciangin amah in inn khang nisuahna lam kiu-ah tuikuangpi koih hi. Huram in beelte, kawbiate, le kuangte zong bawl hi. Tua ahih ciangin Huram in Kumpi Solomon a dingin Pasian’ biakinn a bawl nasep a zawhte: Khuampi nihte, kuang-ukte, le a khuampite lu dawnah a om khuamluzepna nihte, khuampite lu dawnah a om khuamluzepna, kuang-uk nihte a tuam dingin ngen bangin a kibawl nihte, khuampite tungah a om khuamluzepna kuang-uk nihte a tuam dingin ngen banga kibawl khat a dingin mang kawlsing gual nih ahi ngen banga kibawl nihte a dingin mang kawlsing za lite, tuikuang a kingaknate le tuate tungah a kikoih tuikuangte, tuikuangpi khat, le tua nuai-a a om bawngtal sawm le nihte, Topa’ biakinn dingin Kumpi Solomon a dingin siapa Huram in a kihal sumngo tawh a bawl beelte, kawbiate, sikkeukate, le hihte a dingin nazat khempeuh ahi hi. Jordan zanglei sung Sukkoth le Zeredah kikal beel lei-ah kumpipa in hihte sungsak hi. Solomon in hih nate tampi tak bawlsak a, sumngo a gikzah kithei zo lo hi. Tua ahih ciangin Solomon in Pasian’ biakinn sunga na khempeuh a bawl sakte: Kham biakna tau, Ompihna Anlum a dingin sabuaite, a kigelhsa bangin biakinn sungnung mai-ah vak dingin kham citak meivakkhuamte le a meivakte; kham hoih pen tawh a kibawl a paakte, a meivakte, le a tehte; kham citak tawh a kibawl a taitehte, kuangte, paknamtui a dingin pakante, le vutluahna ahi hi. Siangtho pen mun pai nading kongkhak sungnungte a’ ding le biakinnpi sung kongkhakte a dingin biakinn kongkhak bilte zong kham tawh a kibawl ahi hi. Tua bangin Topa’ biakinn ding a hih nasep khempeuh kizo hi. Tua ciangin a pa David in a apsa nate Solomon in paipihin, Pasian’ biakinn sung vanmanpha koihnate sungah a ngunte, a khamte, le umlebeel khempeuh a seng hi. Tua ciangin Zion a kici David khuapi sung panin Topa’ Thuciamna Singkuang a paipihto dingin Kumpi Solomon in Israel upate, minam lutang khempeuh, le Israel beh makaite, Jerusalem-ah kaikhawm hi. Tua ciangin a kha sagihna-a pawi hun sungin kumpipa’ mai-ah Israel mi khempeuh kikhawm uh hi. Tua ciangin Israel upate khempeuh hong pai uh a, Levi mite in Thuciamna Singkuang la uh hi. Tua ciangin amaute in Thuciamna Singkuang, le kikhopna buk, le puanbuk sunga om a siangtho umlebeel khempeuh puato uh a, siampite le Levi mite in tuate puato uh hi. Tua ciangin Kumpi Solomon le ama mai-ah a kikhawm Israel-te khempeuh Thuciamna Singkuang mai-ah om uh a, biakna-in tuu le bawngtal tampi tak pia uh ahih manin a phazah kisim zo lo hi. Tua ahih ciangin siampite in kherub-te’ kha nuai, siangtho pen mun sung, biakinn sungnung sung ama munah Topa’ Thuciamna Singkuang a paipih uh hi. Kherub-te in Thuciamna Singkuang tungah a khate uh zak uh ahih manin kherub-te pen Thuciamna Singkuang le a zawlte tungah khuhna khat a suak uh hi. A zawlte sau ahih manin siangtho mun panin biakinn sungnung mai-ah a mongte kidawk a, ahih hangin a pualam panin kimu thei lo hi; tuni dongin tua lai-ah tuate om hi. Egypt panin amaute hong paikhiat lai-in Topa in Israel mite tawh thuciamna a bawlna mun Horeb-ah Moses in suangpek nihte a koih simloh Thuciamna Singkuang sungah bangmah dang om lo hi. Siangtho mun panin siampite hong pusuakin (bang hang hiam cih leh amau’ pawlte cihtuam om loin tua lai-a om siampite khempeuh amau mahmah kisiansuah uh hi. Tua ciangin Levi mi lasate Asaf, Heman, le Jeduthun, amau’ tapate le a behte, saihadial puan tawh kizemin, daltuahte, harp lasaknate, le laiza lasaknate tawi-in peengkul tum siampite za le sawmnih tawh biakna tau nisuahna lamah ding khawm uh hi. Aw kikhatin phatin Topa’ tungah lungdam koh ding pen peengkul tumte le lasate’ nasep ahi hi) peengkulte le daltuahte le adang lasaknate tawh, “ Topa’ tungah lungdam koh ding hoih hi; bang hang hiam cih leh ama itna kip tawntung hi,” ci-in Topa phatna-in la a kisak ciangin, Topa’ biakinn sung meii tawh kidim a, meii hangin siampite in na sem zo lo uh hi; bang hang hiam cih leh Topa’ minthanna vangtaang Pasian’ biakinn sung a dim hi. Tua ciangin Solomon in, “Khuamial sahpi sungah ten ding a teel Topa aw, a tawntungin na tenna ding a lian biakinn khat hih lai-ah kong lamsak khin hi,” a ci hi. Tua ciangin kumpipa in en kawikawi a, Israel mi a kikhawmte khempeuh a din laitakin amaute khempeuh thupha a pia hi. “Tu-in Israel Pasian, Topa’ min dingin biakinn khat lam ding ka pa David’ lungsim sungah om hi. Ahih hangin Topa in ka pa David tungah, ‘Na lungsimah keima min dingin biakinn khat lam ding na ngaihsun a, tua na ngaihsutna hoih mahmah hi. Ahi zongin keima min dingin tua biakinn a lam ding pa nangmah hi loin, nangma sung pan hong piang ding na tapa hizaw ding hi,’ ci hi. “Tu-in Topa in a bawlsa thuciamna tungsak khin hi; bang hang hiam cih le Topa’ thuciam bangin ka pa David munah hong khangin Israel kumpi tokhomah kong tu a, Israel Pasian, Topa’ min dingin biakinn ka lam khin hi. Amah in Israel mite tawh a bawl Topa’ thuciamna a kikoihna Thuciamna Singkuang tu-in tua lai-ah ka koih khin hi,” a ci hi. Tua ciangin Israel a kikhawmte khempeuh’ omna Topa’ biakna tau mai-ah Solomon dingin a khut zan hi. Solomon in a dung pi sagih le alang, a vai pi sagih le alang, a sang pi li le alang a pha sumngo tau khat bawlin inntualah a koih khin hi. Tua ciangin tua tungah amah ding hi. Tua ciangin Israel a kikhawmte khempeuh’ muhin amah khukdinin van lamah a khut zan hi. Tua ciangin Solomon in thu ngen a, “Israel Pasian, Topa aw, vantungah ahi a, leitungah ahi zongin thuciamna lenin a lungsim khempeuh uh tawh nangma thu hong mang na nasemte tungah itna kip a lak, nang tawh a kibang Pasian dang om lo hi. Ama tungah na gensa bangin na nasem ka pa David tungah a tungsak pa na hi hi. Na kam tawh thu na gen a, na khut tawh tuni-in na tungsak takpi hi. Tua ahih ciangin tu-in Israel Pasian, Topa aw, ama tungah thu ciamin, ‘Keima thu na hong man’ bangin na suan na khakte in ka thukham zui-in a gamtatna uhah a kidop nak-uhleh Israel kumpi tokhom tungah a tu dingin keima mai-ah mi khat beek na kitasam kei ding hi,’ na cihsa bangin na nasem ka pa David tawh na thuciamsa kipsak in. Tua ahih ciangin tu-in Israel Pasian, Topa aw, na nasempa David tungah na gensa na kammal kipsak in. “Ahih hangin Pasian pen mite tawh leitungah hong teng takpi ding ahi hiam? En in, vantung le a sangpen vantung in nang hong huam zo lo hi; hih keima lamsa biakinn in hong huam zo lo zaw kan ding! Ahi zongin na nasempa’ thungetna le hong thumna don in, Topa ka Pasian aw, na nasempa na mai-ah hong kikona le a hong nget thungetna hong ngai in. Na nasempa in hih mun lamah hong thungetna na zak theih nadingin nangmah in na min koih nadingin na ciamsa mun hih biakinn lam sun le zanin hong en in. Amaute in hih mun lam nga-in thu hong nget uh ciangin na nasempa le na mi Israel-te’ hong thumnate nangmah in ngai in. Na tenna mun vantung panin hong za takpi inla, na zak ciangin hong maisak in. “Mi khat a vengte tungah khialin kiciamna kiciamsak a, hong pai-in hih biakinn sung na biakna tau mai-ah a kiciamna hong kiciam le, vantung panin za-in gamta inla, na nasemte thu khenin, a mawh mi a gamtatna ama lu tung mahah tusakin thuk inla, a thuman mi a thumanna tawh kizui-in thaman piakna tawh langsak in. “Na mi Israel-te nang tungah hong khialhna hangin a galte uh mai-ah guallelin, amaute hong kihei kikin na min hong phawkin hih biakinn sung nangma kiangah thu ngenin thumna hong bawl uh ciangin, vantung panin nangmah in za inla, na mi Israel-te’ khialhna maisakin amaute le a pu a pate uh tungah na piak leitangah amaute paipih kik in. “Amaute nangma tungah hong khialhna hangin vantung kikhak cipin guah a zuk loh hun, amaute na gimsak hun ciangin, amaute in hih mun lam nga-in thu ngen a, na min hong phawkin amau’ khialhna panin a kihei uh le, amaute a pai nading lampi hoih hilh inla, vantung panin za-in na nasem, na mi Israel-te’ khialhna maisak in. Tua ciangin na mite tungah gamh-in na piak leitang tungah guah zusak in. “Gam sungah kialpi tungin, pulnatna ahi a, ankung natna ahi a, ankung zawngkhalna ahi a, kauphe ahi a, lung ahi zongin a om a, amau’ khuapi khat peuhpeuhah a galte un umcihin, bangbang gimna, bangbang natna hitaleh, mi khatpeuh ahi a, na mi Israel-te khempeuh in ahi zongin amau’ natna le a dahna ciat uh thei-in hih biakinn lamah a khut uh hong zanin bangbang thungetna hitaleh bangbang thumna hitaleh hong bawl uhleh, na tenna mun vantung panin za inla, maisakin, amau’ gamtatna khempeuh tawh kizui-in a lungsim uh na theih bangin amaute tungah pia ciat in (bang hang hiam cih leh nang, nang bek in mihing’ lungsim na thei hi). Tua hileh ka pu ka pate uh tungah na piak leitang tungah a nuntak hun sung khempeuh uh amaute in nang hong zahtakin nangma thu hong zui ding uh hi. “Tua mah bangin na mi Israel ahi lo gamdang mi khat a lian nangma min hang, le nangma thahatna hangin a gamlapi gam panin hong pai-in, hih biakinn lam nga-in thu hong nget leh na tenna mun vantung panin za inla, gamdang mipa in na tungah hong ngetna khempeuh tawh kizui-in hih in. Tua hileh nangma mi Israel-te mah bangin leitung mi khempeuh in na min thei-in nang hong zahtak ding uh a, keima lamsa hih biakinn pen nangma min tawh a kilo ahihna thei ding uh hi. “A galte uh a do dingin na mite kuankhia-in, bangbang lamah amaute sawl hita lecin, nangmah in na teelsa hih khuapi, nangma tung le nangma min dingin ka lamsa hih biakinn lam nga-in amaute in thu hong nget uhleh, amau’ hong thungetna le hong thumnate vantung panin za-in amau’ vai huh in. “Amaute nang tungah hong khialin (a khial lo kua om ahi hiam?) amaute tungah nang heh a, galte tungah amaute pia-in, amaute a gamla gam ahi a, a nai-ah ahi zongin galmatin kipuakhia a, ahi zongin galmatin a kipuakna gamah amaute in a lungsim sung uhah tua thu ngaihsunin kisikkik a, ‘Kote khialin lampialin ka gitloh tat uh hi,’ ci-in amaute galmatin a omna uh gam panin nang tungah hong thum a, amaute galmatin a kitutna, galmatin a omna uh leitangah a ngaihsutna khempeuh uh le a lungsim khempeuh uh tawh amaute kisikkikin, na teelsa khuapi le nangma min dingin ka lamsa biakinn, nangmah in amau’ pute pate tungah na piak amau’ leitang lam nga-in thu hong nget uh le, na tenna vantung panin amau’ thungetna le hong thumnate za in la, amau’ vai huhin nang tungah hong khial na mite maisak in. “Ka Pasian aw, tu-in na mit hak inla, hih lai mun a thungetna na bil hong ngat in. Tu-in ding in, Topa Pasian aw, na tawlngakna ding munah na vangliatna lim Thuciamna Singkuang tawh pai in. Topa Pasian aw, na siampite, thupha pia inla, na hoihna-ah na mi siangthote lungdam tahen. Topa Pasian aw, na sathau nilh pa nial kei in. Na nasempa David na itnasa hong phawk in,” a ci hi. Solomon a thunget a tawp ciangin, vantung panin meikuang hong paisukin meihal biakna le biakpiaknate kangtum a, tua ciangin Topa’ minthanna vang biakinn sung hong dim hi. Topa’ minthanna vang biakinn dim ahih manin Topa’ biakinn sungah siampite lut thei lo uh hi. Israel mite khempeuh in meikuang hong paisukin Topa’ minthanna vang biakinn tungah a om a muh uh ciangin suangphah tungah leilam maingatin kun uh a, Pasian bia-in Topa’ tungah lungdamna ko-in, “ Topa’ tungah lungdam koh ding hoih hi; bang hang hiam cih leh ama itna kip tawntung hi,” a ci uh hi. Tua ciangin kumpipa le mi khempeuh in Topa’ mai-ah biakna pia uh hi. Kumpi Solomon in biakna-in bawngtal tul sawmnih le tulnih, le tuu tul zakhat le tul sawmnih pia hi. Tua bangin kumpipa le mi khempeuh in Pasian’ biakinn a ap uh hi. Siampite amau panmun uhah ding uh hi. Levi mite zong, Kumpi David in Topa tungah lungdam koh nadingin a bawl Topa’ tungah lasakna ding lasaknate tawh ding uh hi. Bang hang hiam cih leh ama itna kip tawntung hi. David in amau’ nasepna tawh phatnate a bawl ciangin tua bangin hih uh hi. Amaute tawh a kigalsai-ah siampite in peengkulte tum uh a, Israel mi khempeuh zong a ding uh hi. Tua ciangin Solomon in Topa’ biakinn mai-ah a om inntual laizang ap hi; bang hang hiam cih leh Solomon in a bawl sumngo biakna tau-ah meihal biakna le a thaute ta zo lo ahih manin tua lai munah amah in meihal biakna le thunuama biakna thaute a pia hi. Tua hun laitakin Solomon le amah tawh a om Israel khempeuh mihon tampi in Hamath lutna panin Egypt lui ciang dongah ni sagih sung pawi a kham uh hi. Tua ciangin a ni giat ni-in amaute in a thukhupna khat nei uh hi; bang hang hiam cih leh amaute in biakinn apna ni sagih sung pawi kham uh a, tua pawi ni sagih sung kibawl hi. A kha sagihna a ni thum ni-in, Topa in David le Solomon, le ama mi Israel tungah a hoih a bawlna hangin amah in lungdamna le kipakna tawh a inn uhah mite a ciahsak hi. Tua bangin Solomon in Topa’ biakinn le kumpi inn zo hi. Solomon in Topa’ biakinn le ama inn sungah hih dinga a geel khempeuh nuamtakin zo hi. Tua ciangin zanin Solomon tungah Topa kilangin ama kiangah, “Na thungetna ka za khin a, keima-a’ dingin biakpiakna inn dingin hih mun ka teel khin hi. Keimah in vantungte khakcipin guah a zuk loh ciang ahi a, gam sung a netum dingin kauphe thu ka piak ciang ahi a, ka mite lakah natna ka tunsak ciang ahi zongin, keima minin a kisam ka mite amau mahmah kiniamkhiatin, thu ngenin ka mai hong zong a, amau’ gitlohnate panin a kihei uhleh, keimah in vantung panin ka za ding a, amaute’ khialhna maisakin a leitang uh ka hoihsakkik ding hi. Tu-in ka mitte hakin hih lai munah a kingen thungetna ka bilte in ngai ding hi. Bang hang hiam cih leh a tawntungin ka min a om theih nadingin keimah in hih biakinn teelin ka ap khin a, ka mit tawh enin ka lungsim a tawntungin tua lai-ah om ding hi. Nang a dingin ahihleh, na pa David a gamtat bangin keima mai-ah na gamtat a, nang kong sawl khempeuh bangin semin, ka thukhamte le ka biakna ngeina kipte na zuih leh, na pa David tawh kiciamin, ‘Israel a uk dingin mi khat zong na kitasam kei ding hi,’ ka cih bangin na kumpi tokhom ka kipsak ding hi. Ahih hangin note kihei-in, na mai uhah ka koihsa ka thukhamte leh ka thupiaknate nusia a, pai-in pasian dangte’ na semin tuate na biak uhleh, note’ tungah kong piaksa leitang panin note kong botkhia ding hi. Tua ciangin ka min dingin ka apsa hih biakinn ka muhna panin ka lawnkhia ding a, mi khempeuh lakah paunak le gentehna ka suaksak ding hi. “Tua ciangin a minthangsa hih biakinn a nawkkha khempeuh in lamdangsa-in, ‘Bang hangin hih bangin Topa in hih gam le hih biakinn bawl ahi hiam?’ ci ding uh hi. Tua ciangin amaute in, ‘Bang hang hiam cih leh Egypt gam panin amaute a paikhiatpih a pu a pate uh Pasian ahi Topa amaute in nusia uh a, pasian dangte pom uh a, tuate bia-in a na sem uh hi. Tua ahih ciangin amah in hih bang siatna khempeuh amaute tungah tungsak hi,’ ci ding uh hi,” a ci hi. Solomon in Topa’ biakinn le ama inn a lam khit kum sawmnih a cin ciangin, Kumpi Hiram in ama tungah a piaksa khuapite Solomon in lampha-in tuate sungah Israel mite tengsak hi. Tua ciangin Hamathzobah-ah Solomon pai-in tua gam a la hi. Amah in sehnel gam sungah Tadmor khua satin Hamath gam sungah vankoihna khuapite khempeuh a lam hi. Amah in khuapi kulh, kongpite, le zawlte a nei Bethhoron Tungnung leh Bethhoron Nuainung, le Baalath, le Solomon’ neih vankoihna khuapite khempeuh, a leengte a’ ding khuapite khempeuh, a sakol tuangte a’ ding khuapite, le Solomon in Jerusalem, Lebanon sung, le ama ukna gam sung khempeuhah a lamnop khempeuh zong a lam hi. Israel ahi lo Hit mite, Amor mite, Perez mite, Hiv mite, le Jebus mite sung panin a omlai, Israel mite in a suksiat nai loh amau nungah a suanlekhakte uh tua gam sungah a omlaite, Solomon in aana tawh siah a pia dingin bawl a, tua bangin tuni dongin amaute om uh hi. Ahih hangin Israel mite ahihleh Solomon in ama na a sem dingin salin bawl lo hi. Amaute pen galkapte, ama nuai-ah uliante, a leengte a ukte, le a sakol tung tuangte ahi uh hi. Kumpi Solomon’ ulian, mite’ tungah aana a zang mihing zanih le sawmnga a om uh hi. Solomon in David khuapi panin Faro’ tanu ama zi paipihin ama a’ dingin a lamsak inn-ah tunpih hi; bang hang hiam cih leh amah in, “ Topa’ Thuciamna Singkuang a tunnasa munte a siangtho ahih manin Israel kumpi David’ inn sungah ka zi teng lo ding hi,” a ci hi. A pa David’ biakna ngeina kip tawh kizui-in, nasep nadingin siampite a pawlpawlin a kikhennate, le nisim nasepna-ah a kisam bangin siampite’ mai-ah Levi mite phatna lasak panmunte le kongpi tampite-a’ dingin kongcingte amau’ pawl kikhenna ciatah amah in seh hi; bang hang hiam cih leh tua bangin Pasian’ mipa David in thu pia hi. Thu khat peuhpeuh le vanmanpha koihnate tawh kisai-in kumpipa in siampite le Levi mite a thupiakna bang teekteekin amaute in a sem uh hi. Tua bangin Topa’ biakinnpi a kiphuh ni a kipan a kizawh dongin Solomon’ nasep khempeuh kimansiang hi. Tua ahih ciangin Topa’ biakinn kizo hi. Tua ahih ciangin Edom gam sung tuipi gei-a om Eziongeber le Eloth khuate-ah Solomon pai hi. Tua ciangin Kumpi Hiram in teembawte le tuipi a thei a nasemte tawh ama nasemte sawl a, Solomon’ nasemte tawh Ofir-ah paikhawmin tua lai panin kham talen zali le sawmnga pua-in Kumpi Solomon kiang a tunpih uh hi. Tu-in Sheba kumpinu in Solomon’ minthanna a zak ciangin thudotna haksate tawh a ze-et dingin Jerusalem-ah hong pai a, nungzui honpi le a namtui nate le kham tampi le suangmanphate a pua kalaohte hong keng hi. Solomon kiangah amah hong tun ciangin a lungsim a om khempeuh ama tungah gen hi. Tua ciangin Solomon in ama dotna khempeuh dawng hi. Solomon in ama tungah a gentel theih loh haksa lua a sak bangmah om lo hi. Sheba kumpinu in Solomon’ pilna, a lamsa inn, a sabuai-ah a an, a uliante’ omzia, le a nasemte’ etna zia le a puansilhte, a anpiate le a puansilhte, le Topa’ biakinn-ah a piak a meihal biaknate a muh khit ciangin a lungsim a bei hi. Tua ciangin amah in kumpipa kiangah, “Ka gam sung panin nangma thute le na pilna ka zak a kigen thute a man hi. Ahih hangin kei hong pai-in ka mit in a muh matengin a kigen thute ka um kei hi. A taktakin, na pilna alang zong kei kiangah hong kigen lo ahi hi. Ka zaksa thute sangin na thupi zaw hi. Na zite hampha mahmah hi. Na mai-ah ding tawntungin na pilna a za hih na nasemte hampha mahmah hi. Na tungah lungkimin Topa na Pasian a dingin kumpi-in a kumpi tokhom tungah nang hong tusak Topa na Pasian in thupha ngah ta hen! Na Pasian in Israel mite itin a tawntungin amaute kipsak ding ahih manin, nangmah in thutang le thuman na sepkhiat theih nadingin amaute tungah kumpi-in nang hong koih hi,” a ci hi. Tua ciangin amah in kumpipa tungah kham talen zakhat le sawmnih, le a namtui nate tampi tak, le suangmanphate a pia hi. Sheba kumpinu in Kumpi Solomon tungah a piak tua banga a namtui nate zahin a hoih om ngei lo hi. Tua tham loin Ofir panin kham hong pua Kumpi Hiram’ nasemte le Solomon’ nasemte in cingsing le suangmanphate hong pua uh hi. Tua ciangin kumpipa in Topa’ biakinn le kumpi inn-a cingsing kahlei ding le lasate-a’ dingin laiza lasaknate le harp lasaknate-in zong a bawl hi. Tua hun ma-in Judah gam sungah tua bang kimu ngei lo hi. Tua ciangin kumpinu in amah a puakte a thukna-in letsong a piakte banah, a deih khempeuh, a nget khempeuh, Sheba kumpinu tungah Solomon in a pia hi. Tua ahih ciangin amah kihei-in a nasemte tawh ama gamah a ciahkik hi. Tu-in kum khat sungin Solomon tungah a tung kham a gihna talen zaguk le sawmguk le guk hi a, sumbawlte le sumbukte’ tutte a kisim lo ahi hi. Arabia kumpite khempeuh le gam sung a ukte in Solomon kiangah kham le ngun puak uh hi. Kumpi Solomon in kham a kiseek lumpi zanih bawl hi; lum khat ciangin a kiseek kham shekel zaguk bei hi. Tua ciangin amah in a kiseek kham lum zathum bawl hi; lum khat ciangin kham shekel zathum bei hi. Tua ciangin kumpipa in Lebanon Tulak Inn sungah tuate koih hi. Kumpipa in saiha kibawl kumpi tokhom a lian khat zong bawl a, kham citak tawh zut hi. Kumpi tokhom in cial guk le kham a kibawl khengakna khat nei-in, tuate kumpi tokhom tawh kimat a, a tutna pang tuakah ban ngaknate le a ban ngaknate pangah humpinelkai nih ding a, kahlei cial guk mong ciatah khat ciat, humpinelkai sawm le nih ding hi. Kumpi gam khat peuhpeuhah tua tawh a kibang kibawl ngei lo hi. Kumpi Solomon’ dawnna haite khempeuh kham hi a, Lebanon Tulak Inn sunga umlebeelte khempeuh zong kham citak ahi hi. Solomon’ hun lai-in ngun bangmahin kingaihsun lo hi. Bang hang hiam cih leh Kumpi Hiram’ nasemte tawh kumpipa’ teembawte, Tarshish-ah pai hi. Tarshish teembawte kum thum simin khatvei hong tungin kham, ngun, saiha, zawngmaw, le utong hong puak zel hi. Tua bangin kumpi Solomon in hauhna le pilna tawh leitung kumpi khempeuh khumkhelh hi. Tua ciangin Pasian in ama lungsim sungah a koihsak pilna a za dingin leitung kumpi khempeuh in Solomon’ omna hong zong uh hi. Amaute khempeuh in a letsong ciat uh, ngun le kham tawh a kibawl nate, puante, myrrh paknamtuite, a namtui nate, sakolte, le la-sakolte, a kum kumin tampi tak hong puak uh hi. Solomon in sakolte le leengte a dingin buk tulli, le sakol tung tuang mi tul sawm le tulnih nei a, leeng khuapite sungah pawlkhat koih a, Jerusalem khua ama kiangah pawlkhat koih hi. Amah in Eufratis panin Filistia gam ciang, le Egypt gamgi ciang dong kumpi khempeuh a uk hi. Kumpipa in Jerusalem-ah suang bangin ngun olsak a, Shefelah theithek sing bangin taamtak sing tamsak hi. Solomon a dingin Egypt le gam khempeuh panin sakolte kila hi. Tu-in Solomon’ gamtatna a omlaite, a kipatna pan a tawp dong, Kamsang Nathan’ Tangthu sung, le Shiloh Khua Mi Ahijah’ Thugen Kholhna sung, le Nebat’ tapa Jeroboam thu tawh kisai-in Thumu pa Iddo’ Maangmuhna sungah kigelh hi. Solomon in Jerusalem panin Israel khempeuh tungah kum sawmli sung uk hi. Tua ciangin Solomon si a, a pa David khuapi sungah kivui hi. Tua ciangin a tapa Rehoboam in ama tangin a uk hi. Amah kumpi a suaksak dingin Israel khempeuh Shekhem-ah pai ahih manin Shekhem-ah Rehoboam pai hi. Nebat’ tapa Jeroboam in tua thu a zak ciangin (bang hang hiam cih leh Kumpi Solomon kiang panin a taina Egypt-ah amah omlai hi), Egypt panin Jeroboam hong ciahkik hi. Amaute in mi sawlin amah samkik uh a, tua ciangin Jeroboam le Israel khempeuh hong pai-in Rehoboam kiangah, “Na pa in hong gimbawlin vangik hong suan hi. Tua ahih ciangin tu-in na pa’ nasep haksa le kote’ vangik hong zangsak inla, kote in nangma na kong sem ding uh hi,” a ci uh hi. Amah in amaute kiangah, “Ni thum sung a hun hong pia unla, tua ciangin hong paikik un,” a ci hi. Tua ciangin Kumpi Rehoboam in a pa Solomon a nuntak lai-a a mai-ah a ding khangham mite thu kuppih a, “Hih mite ka dawnna ding ngaihsutna hong bangci piak na hi uh hiam?” a ci hi. Tua ciangin amaute in ama kiangah, “Hih mite tungah nang dik inla, amaute lungkimsakin amaute tungah kam hoih pau lecin, amaute nangma nasem hi tawntung ding uh hi,” a ci uh hi. Ahih hangin khanghamte in a piak ngaihsutna nusia-in, amah tawh a khangkhawm, ama mai-ah a ding khangnote thu a kuppih hi. Amah in amaute kiangah, “Kei kiangah, ‘Na pa in kote tungah hong suat vangik zangsak in,’ a hong ci hih mite i dawnna ding bang ngaihsutna hong pia na hi uh hiam?” a ci hi. Tua ciangin amah tawh a khangkhawm khangnote in ama kiangah, “Nangma kiangah, ‘Na pa in vangik hong suan hi; ahih hangin kote a dingin hong zangsak in,’ hong ci hih mite kiangah hih bangin gen in, ‘Ka khutmeno pen ka pa’ kawng sangin lianzaw hi. Tu-in ka pa in note tungah vangik hong suatna-ah keimah in na vangik uh ka behlap ding hi. Ka pa in ciang tawh note hong thuhilh hi; ahih hangin keimah in ciang lingnei tawh note kong thuhilh ding hi,’ ci in,” a ci uh hi. Tua ahih ciangin kumpipa in, “Kei kiangah ni thum ni-in hong paikik un,” a cih mah bangin Jeroboam le mi khempeuh a ni thum ni-in Rehoboam kiangah hong pai uh hi. Tua ciangin kumpipa in amaute ngawh dawnin, khangham mite’ ngaihsutna nusia a, “Ka pa in note vangik hong suan hi; ahih hangin keimah in ka hong behlap lai ding hi. Ka pa in ciang tawh note hong thuhilh hi; ahih hangin keimah in ciang lingnei tawh note kong thuhilh ding hi,” ci-in khangnote’ ngaihsut piakna bangin Kumpi Rehoboam in amaute kiangah a gen hi. Tua ahih ciangin kumpipa in hih mite’ thu ngai lo hi; bang hang hiam cih leh Shiloh mi Ahijah’ tungtawnin Nebat’ tapa Jeroboam tungah a thugente Topa in a tunsak theih nadingin Pasian in a piansak thu kiheina ahi hi. Kumpipa in amaute’ thu a ngaih lohna Israel mi khempeuh in a muh uh ciangin mite in kumpipa dawngin, “David’ sungah kote in bang ngah nei ka hi uh hiam? Jessi’ tapa’ sungah gamhluah ka nei kei uh hi. Israel-te aw, na inn ciat uhah ciah un. Rehoboam in ama a’ ding vaihawm tawm ta hen,” a ci uh hi. Tua ahih ciangin Israel mi khempeuh a inn ciat uhah kihem uh hi. Ahih hangin Judah khuapite-ah a teng Israel mite tungah Rehoboam in a uk hi. Tua ciangin Kumpi Rehoboam in aana tawh na a kisemsakte a uk nasep ukpa Hadoram Israel-te kiangah sawl a, Israel mite in suang tawh amah na denglum uh hi. Tua ciangin Jerusalem-ah a tai dingin Kumpi Rehoboam a leeng tungah a tuang dingin nawhtat hi. Tua ahih ciangin tuni dongin leilu lama om Israel-te in David innkuan lehdo uh hi. Jerusalem-ah Rehoboam hong tun ciangin a kumpi gam a ngahkikna dingin Israel-te a sim dingin amah in Judah minam le Benjamin minam a kitengkhia galhang mihing tul zakhat le tul sawmgiat kaikhawm hi. Ahih hangin Pasian’ mi Shemaiah’ tungah Topa’ thu hong tung hi: “Judah kumpi Solomon’ tapa Rehoboam, le Judah le Benjamin sunga om Israel mi khempeuh tungah gen in, Topa in hih bangin ci hi: “Note na kuanto kei ding uh a, na mipihte uh na sim kei ding uh hi. Mi khempeuh na inn uhah ciahkik un; bang hang hiam cih leh hih thu pen keima kiang pan hong pai ahi hi,” ci-in gen in,’” a ci hi. Tua ahih ciangin amaute in Topa’ thu ngai-in ciahkik uh a, Jeroboam a sim dingin kuan lo uh hi. Jerusalem-ah Rehoboam teng a, kihut nadingin Judah gam sungah khuapite a lam hi. Amah in Bethlehem, Etam, Tekoa, Bethzur, Soko, Adullam, Gath, Mareshah, Zif, Adoram, Lakhish, Azekah, Zorah, Aijalon, le Hebron, Judah le Benjamin gam sunga om kulh a nei khuapite a lam hi. Amah in munmuanhuaite a muanhuai-in bawlpha-in tuate sungah a ukte, le an, sathau, le leenggahzu a koih hi. Tua ciangin amah in khuapi khempeuhah lum le tei koih a, a muanhuai mahmahin a bawl hi. Tua ahih ciangin Judah gam le Benjamin gam ama a’ a suak hi. Tua ciangin Israel sungah a om siampite le Levi mite khempeuh in amau’ tenna mun khempeuh panin amah hong beel uh hi. Tua ciangin Israel Topa Pasian zon ding a lungsim uhah a khentat khin mite in amau’ pute pate’ Pasian, Topa tungah biakna a pia dingin Israel minam khempeuh sung panin amau’ nung zui-in Jerusalem-ah hong pai uh hi. Amaute in Judah kumpi gam thakhauhsak uh a, amaute in Solomon’ tapa Rehoboam lungmuangin kum thum sung koih uh hi; bang hang hiam cih le David le Solomon’ thu a zuih bangun kum thum sung ama thu a mang uh hi. Rehoboam in Mahalath tenpih hi. Mahalath’ pa pen David’ tapa Jerimoth hi a, a nu pen Jessi’ tapa Eliab’ tanu Abihail ahi hi. Tua nu in amah tawh tapate Jeush, Shemariah, le Zaham nei hi. Tua nu’ khit ciangin amah in Absalom’ tanu Maakah la a, amah tawh Abijah, Attai, Ziza, le Shelomith nei hi. Rehoboam in a zi dangte le a zineute khempeuh sangin Absalom’ tanu Maakah itzaw hi (amah in zi sawm le giat le zineu sawmguk la a, tapa sawmnih le giat le tanu sawmguk nei hi). Tua ciangin Rehoboam in Maakah’ tapa Abijah, a sanggamte lakah a ulian penin a seh hi; bang hang hiam cih leh kumpi-in amah koih sawm hi. Amah pil gamtat a, Judah le Benjamin gam sung, kulhnei khuapite khempeuhah a tapa pawlkhat a khen hi. Amah in amaute tungah na tampi pia a, amaute a dingin zi zong a zonsak hi. Rehoboam’ ukna kipin a thahat ciangin, amah a kipan amah tawh a om Israel mi khempeuh in Topa’ thukham nusia uh hi. Amah in kulhnei khuapite la-in Jerusalem ciang dong hong tung hi. Tua ciangin Shishak’ huhau-in Jerusalem-ah a kikhawm Rehoboam le Judah uliante kiangah kamsang Shemaiah hong pai-in amaute kiangah, “ Topa in hih bangin ci hi: ‘Note in kei nong nusia uh hi. Tua ahih ciangin Shishak’ khut sungah note kong pia khin hi,’ ci hi,” a ci hi. Tua ciangin Judah uliante le kumpipa kiniamkhiatin, “ Topa thuman hi,” a ci uh hi. Amaute a kiniamkhiatna thu Topa in a muh ciangin Shemaiah’ tungah Topa’ thu hong tung hi: “Amaute kiniamkhiat ahih manin ka susia kei ding hi. Amaute ka suaktasak liailiai tei ding a, Shishak’ khut tawh Jerusalem tungah ka hehna a cingin ka tungsak kei ding hi. Ahi zongin amaute in keima nasepna le leitung kumpite’ nasepna a kilamdanna a theih nadingun amaute pen Shishak’ nasemte suak ding uh hi,” a ci hi. Tua ahih ciangin Jerusalem a simin Egypt kumpipa Shishak hong kuanto hi. Amah in Topa’ biakinn-a vanmanphate le kumpipa’ inn-a vanmanphate a kipan na khempeuh a lakhia hi. Amah in Solomon’ bawlsa kham lumte zong lakhia hi. Tua ciangin Kumpi Rehoboam in tuate’ tangin sumngo lum bawl a, kumpipa’ kongcing ahi inncing a ukte’ khut sungah tuate a ap hi. Topa’ biakinn-ah kumpipa a pai simin a cingte hong pai-in tuate keng uh a, tua ciangin cinna inndei sungah tuate koihkik uh hi. Amah a kiniamkhiat ciangin siat cimitna a pian loh nadingin ama tung pan Topa’ hehna kiheikhia hi. Tua tham loin Judah gam sungah thu paizia zong hong hoihsak hi. Tua ahih ciangin Kumpi Rehoboam amahmah Jerusalem-ah kikipsakin a uk hi. Rehoboam in uk ding a kipatin kum sawmnih le khat pha a, Israel minam khempeuh sung panin a min koih nadingin Topa in a teelkhiat khuapi Jerusalem-ah amah in kum sawm le sagih sung a uk hi. Ama nu’ min Naamah hi a, Ammon mi ahi hi. Amah in Topa zon ding a lungsimah koih lo ahih manin a sia a gamta hi. Tu-in Rehoboam’ gamtatnate, a kipatna pan a tawpna dong, Kamsang Shemaiah le Thumu pa Iddo’ Khang Tangthu sungah kigelh hi. Rehoboam le Jeroboam kikalah galkidona om tawntung hi. Tua ciangin Rehoboam si a, David’ khuapi sungah kivui hi. Tua ciangin a tapa Abijah in ama tangin a uk hi. Israel Kumpi Jeroboam’ uk kum sawm le giatna kumin Abijah in Judah tungah uk ding kipan hi. Amah in Jerusalem-ah kum thum sung uk hi. Ama nu’ min Mikaiah hi a, Gibeah khuami Uriel’ tanu ahi hi. Tu-in Abijah le Jeroboam kikalah galkidona om hi. Galsim dingin Abijah kuankhia a, a kitengkhia mi tul zali a pha, a thahat galhang galkap hon a nei hi. Tua ciangin Jeroboam in Abijah a do dingin a kitengkhia galhang tul zagiat tawh a pang hi. Tua ciangin Efraim mualtung gamah a om Zemaraim Mual tungah Abijah dingto-in, “Jeroboam le Israel mi khempeuh aw, ka thu ngai un! Israel Topa Pasian in David le a suante tungah Israel kumpi hih ding thuciamna kip tawh a piakna na theih ding uh kilawm hi lo ahi hiam? Ahi zongin David’ tapa Solomon’ nasempa, Nebat’ tapa Jeroboam kipanin a topa lehdo hi. Rehoboam khangno lai a, thu khentat thei nai loin, amaute a nial zawh nai loh hun laitakin mi ginalo honkhat Solomon’ tapa Rehoboam’ kiimah kikhawmin amah dem uh hi. Note mi tampi na hihna uh le note’ pasian dingin Jeroboam in hong bawlsak kham bawngnote note tawh a om manin, David’ suante’ khut sungah a om Topa’ kumpi gam do ding tu-in na ngaihsun uh hi. Note in Aaron’ suan, Topa’ siampite, le Levi mite hawlkhia-in, gamdang mite bangin note a dingin siampite bawl khin hi lo na hi uh hiam? Bawngtalno khat tawh ahi a, tuutal sagih tawh ahi zongin a ki-ap dingin a hong pai peuhpeuh, pasian a hilote’ siampi suak pahpah hi. “Ahih hangin kote ahihleh, Topa pen ka Pasian uh hi a, amah ka nusia kei uh hi. Topa’ na a sem, Aaron’ suan ahi siampite le amau’ nasepna-ah a huh dingin Levi mite ka nei uh hi. Amaute in Topa tungah zing le nitak simin meihal biaknate le a namtui nate ahi paknamtuite pia uh a, kham citak sabuai tungah Ompihna Anlum koihin, a meivakte a kuan nadingin nitak simin kham meivakkhuamte a don uh hi; bang hang hiam cih leh kote in Topa Pasian’ hong sawlnate ka zui uh a, ahih hangin note in amah na nusia uh hi. En un, kote’ lutangin kote tawh Pasian hong omkhawm a, note a do ding sapna peengkul a tum dingin a siampite a galkap peengkulte uh tawh hong om uh hi. Israel mite aw, na pu na pate uh Pasian, Topa do kei un; bang hang hiam na cih uhleh na tangtung kei ding uh hi,” a ci hi. A nunglam panin amaute a hih dingin a pangsim ding pawlkhat Jeroboam in kual paisak hi. Tua ahih ciangin Judah mite’ mai-ah ama galkapte om a, a pangsimte amau’ nungah om hi. Judah mite a khuadak uh ciangin, amau’ mai le a nung uhah gal a omlam mu uh hi. Tua ciangin Topa’ tungah amaute kiko uh a, siampite in a peengkulte uh a tum uh hi. Tua ciangin Judah mite in galdona aw kiko uh hi. Judah mite a kiko uh ciangin Abijah le Judah mite’ mai-ah Pasian in Jeroboam le Israel khempeuh zo hi. Judah mite’ mai-ah Israel-te tai uh a, Pasian in amau’ khut sungah Israel-te a pia hi. Abijah le a mite in Israel-te tampi tak that uh hi. Tua ahih ciangin Israel mi a kitengkhia mihing tul zanga a kithatin tuk hi. Judah mite in a pu a pate uh Pasian, Topa suang uh ahih manin gualzo uh a, tua hunin Israel mite kizo hi. Tua ciangin Abijah in Jeroboam delh a, ama tung panin khuapite, Bethel a khuaneute tawh, Jeshanah a khuaneute tawh, le Efron a khuaneute tawh a la hi. Jeroboam in Abijah’ hun sungin ama vangliatna ngahkik lo hi. Tua ciangin Topa in Jeroboam vat a, amah a si hi. Ahih hangin Abijah a thahatna a khang hi. Amah in zi sawm le li la a, tapa sawmnih le nih le tanu sawm le guk a nei hi. Abijah’ gamtatna a omlaite, ama ziate le a thugente, Kamsang Iddo’ Tangthu sungah kigelh hi. Tua ciangin Abijah si a, David khuapi sungah kivui hi. Tua ciangin ama tangin a tapa Asa in uk hi. Asa hun sungin tua gamah kum sawm sung gal dai hi. Tua ciangin Asa in ama Pasian, Topa’ mitah a hoih le a man na sem hi. Amah in gamdang biakna taute le mual dawna biakpiakna munte lakhia-in, biakna songte supai-in Asherah milimte phuk a, amau’ pute pate’ Pasian, Topa zongin thukham le thupiaknate a zuih nadingun Judah mite thu a pia hi. Amah in Judah khuapi khempeuh panin mual dawna biakpiakna munte le paknamtui biakna taute zong lakhia hi. Tua ciangin ama khutnuai-ah kumpi gam sung gal dai hi. Tua gamah gal dai ahih manin Judah gam sungah kulh a nei khuapite a lam hi. Topa in ama tungah galdaihna hun pia ahih manin tua hun sungin amah in galdona nei lo hi. Tua ciangin amah in Judah mite kiangah, “Hih khuapite lamin kulhpite le tausangte, kulhkongpite le zawlte tawh um ni. Eite in Topa i Pasian zong ihih manin leitang pen eima a’ hi lai hi. Eite in amah i zong a, amah in i kiim khempeuh panin galdaihna hong pia hi,” a ci hi. Tua ahih ciangin amaute in khuapite lamin kulh tawh um uh a, maavang uh hi. Asa in Judah mite sung panin lumneu le teipi a tawi galkap tul za thum, le Benjamin mite lum pua-in thal a keek tul zanih le tul sawmgiat nei hi. Hih mite khempeuh pen a thahat a galhang mite vive ahi uh hi. Amaute a sim dingin Ethiopia mi Zerah, galkap awn khat le leeng galkap zathum tawh hong kuankhia a, Mareshah ciang dong hong tung hi. Tua ciangin amah a dawntuah dingin Asa kuankhia a, Zefathah le Mareshah kuamah galdona ding panna a bawl uh hi. Tua ciangin Topa Pasian’ tungah Asa kiko a, “ Topa aw, a thahat le a zawngkhal a kidona-ah a huh dingin nang tawh a kibang kuamah dang om lo hi. Kote hong huh in, Topa kote’ Pasian aw; bang hang hiam cih leh nang kong suang uh a, nangma minin hih mihonpi a do dingin kong pai uh hi. Topa aw, nang, kote’ Pasian na hi hi; mite kizosak kei in,” a ci hi. Tua ahih ciangin Topa in Asa le Judah mite’ mai-ah Ethiopia mite zo a, Ethiopia mite tai uh hi. Asa le amah tawh a om mite in Gerar ciang dong amaute delh uh a, a hing kuamah a om nawn loh dongin Ethiopia mite puk uh hi; bang hang hiam cih leh Topa le ama galkapte’ mai-ah amaute kisusia hi. Judah mite in vankinusia tampi tak pua uh hi. Topa a kikihtakna amaute tungah om ahih manin amaute in Gerar kiima khuapi khempeuh vat uh hi. Amaute in khuapite luh uh a, tuate sungah vankinusiate tam mahmah hi. Tua ciangin amaute in gan omna puanbukte vat uh a, tuu tampi le kalaohte paikhiatpih uh hi. Tua ciangin Jerusalem-ah a ciahkik uh hi. Oded’ tapa Azariah’ tungah Pasian’ kha hong tung hi. Tua ciangin Asa a dawntuah dingin amah pai-in ama kiangah, “Asa, le Judah mite le Benjamin mite aw, ka thu ngai un. Note amah tawh na om laiteng uh note tawh Topa hong om hi. Amah na zon uhleh amah na mu ding uh a, ahih hangin amah na nusiat uhleh amah in note hong nusia ding hi. Hun saupi sung Israel mite, Pasian man tawh om lo, thu a hilh siampi tawh om lo, thukham tawh om lo uh hi. Ahih hangin a lungkham uh ciangin Israel Pasian, Topa’ lamah kihei uh a, amah zongin amaute in amah a mu uh hi. Tua hun lai-in nasemin mite a zinsuk a zintohna uhah lungmuanna om lo a, gam khempeuhah buaina om hi. Pasian in lungkhamna nam khempeuh tawh buaisak ahih manin minam khat le minam khat, khuapi khat le khuapi khat kido-in amaute kitamkham uh hi. Ahih hangin nang, hang in! Na nasepna thaman hong kipia ding ahih manin na khut zawsak kei in,” a ci hi. Asa in Oded’ tapa Azariah’ thugenkholh, hih thute a zak ciangin amah a lungsim hong hangin, Judah gam khempeuh le Benjamin le Efraim mualtung gam panin a laksa khuapite panin a kihhuai milimte lakhia a, Topa’ biakinn mai-a om Topa’ biakna tau a puah hi. Tua ciangin amah in Judah le Benjamin mi khempeuh, le Efraim, Manasseh, le Simeon sung panin amaute kiangah a peemte zong a khawm hi; bang hang hiam cih leh Topa a Pasian in amah a ompihna thu amaute in a muh uh ciangin Israel-te kiang panin mi tampi tak ama kiangah tai uh hi. Asa’ uk kum sawm le ngana a kha thumna sungin Jerusalem-ah amaute kikhawm uh hi. Tua ni-in amaute in galsung panin a ciahpih uh nate sung panin bawngtal zasagih le tuu tulsagih tawh Topa’ tungah biakna a pia uh hi. Tua ciangin a lungsim khempeuh uh le a nuntakna khempeuh uh tawh a pu a pate uh’ Pasian, Topa a zon ding uh, le Israel Pasian, Topa a zong lo peuhmah, a moi ahi a, a ham ahi a, numei ahi a, pasal ahi zongin a kithahna ding uh thuciamna khat a bawl uh hi. Amaute in awging pha, otna, peengkulte, le sakite tawh Topa’ tungah kiciamna a bawl uh hi. Tua ciangin Judah mi khempeuh tua kiciamna-ah lungdam uh hi; bang hang hiam cih leh amaute in a lungsim khempeuh uh tawh kiciamin deihna taktak tawh amah zong uh hi. Tua ciangin amaute in amah mu uh a, Topa in a kiim uhah amaute galdaihna a pia hi. Ama nu Maakah in Asherah milim dingin a kihhuai milim khat a bawlna hangin kumpipa’ nu hihna za panin kumpi Asa in a nu a lakhia hi. Asa in a nu’ milim phuksakin satnen a, Kidron lui-ah a hal hi. Ahih hangin Israel gam sung panin mual dawna biakpiaknate kilakhia lo hi. Ahi zongin ama hunsung tawntung Asa’ lungsim paubaang lo hi. Tua ciangin amah in a pa’ apsa letsongte le ama apsa letsongte, ngun le kham, le nazatte, Topa’ biakinn-ah paipih hi. Asa’ uk kum sawmthum le nga ciang dong galkidona om nawn lo hi. Asa’ uk a kum sawmthum le gukna kumin Judah a simin Israel kumpipa Baasha paito a, Judah kumpipa Asa kiang panin kuamah a paikhiat theih loh nading le ama kiangah kuamah a pai theih loh nadingin Ramah khua a phut hi. Tua ahih ciangin Asa in Topa’ biakinn le kumpipa’ inn-a vanmanpha koihnate panin ngun le kham la-in, Damaskas-ah a teng Syria kumpipa Benhadad kiangah tuate puakin, “Ka pa le na pa a kipawl mah bangin kei le nang i kipawl hi. Tu-in ngun le kham kong puak hi. Kei kiang panin amah a nungkik theih nadingin pai inla Israel kumpipa Baasha tawh na kipawlna va sutat in,” a ci hi. Tua ciangin Benhadad in Kumpi Asa’ thu ngai-in Israel khuapite a sim dingin a galkap ukte sawl a, amaute in Ijon, Dan, Abelmaim, le Naftali vankoihna khuapite a zo uh hi. Baasha in tua thu a zak ciangin Ramah khua a lam khawl a, a nasep a tawpsak hi. Tua ciangin Kumpi Asa in Judah mi khempeuh khawmin thu pia a, Baasha in lamna-a a zat Ramah suang le a singte amaute in puakhia uh a, tuate tawh Geba le Mizpah a lam uh hi. Tua hun laitakin Judah kumpi Asa kiangah thumu pa Hanani hong pai-in ama kiangah, “Nangmah in Syria kumpipa suangin, Topa na Pasian suang lo na hih manin, Syria kumpipa’ galkapte in nang hong suaktasak hi. Ethiopia mite le Libya mite pen leeng tampi tak le sakol tung tuang tampi tak tawh a om galkap tampi hi lo ahi hiam? Ahi zongin Topa suang na hih manin amah in na khut sungah amaute hong pia hi. Bang hang hiam cih leh ama lamah a lungsim a paubaang lo mite’ tangin ama vangliatna a lak dingin Topa’ mit in leitung khempeuh en kawikawi hi. Hih thu-ah na hai gamtat khin hi; bang hang hiam cih leh tu a kipan gal na do ding hi,” a ci hi. Tua ciangin thumu pa tungah Asa heh a, amah kol bulhin thong sungah a koih hi; bang hang hiam cih leh hih thu hangin ama tungah nakpitakin heh hi. Tua hun mahin Asa in mi pawlkhat zong gitlohna tawh a gimsak hi. Asa’ gamtatnate, a patna pan a tawpna dong, Judah le Israel Kumpite’ Tangthu sungah kigelh hi. Ama uk a kum sawmthum le kuana kumin Asa in a khe-ah natna nei a, a natna nasia mahmah hi. Ahi zongin ama nat hun nangawnah amah in Topa zong lo a, zato siamte’ huhna a zong hi. Tua ahih ciangin Asa si a, ama uk a kum sawmli le khatna kumin a bei ahi hi. David khuapi sungah amahmah in a khuak han sungah amaute in a vui uh hi. Paknamtui bawl siamte in a bawl a namtui a nam tuamtuamte tawh a kidim hankuang sungah amah a sial uh hi. Tua ciangin amah zahtakna-in amaute in meiphual lian mahmah khat a cih uh hi. Tua ciangin a tapa Jehoshafat in ama tangin uk a, Israel langpangin amahmah kithakhauhsak hi. Amah in Judah khuapi kulhneite khempeuhah galkapte koih a, Judah gam sung le a pa Asa in a laksa Efraim khuapite sungah khuacingte a koih hi. Amah in a pa’ gamtat masate zui ahih manin Jehoshafat tawh Topa om hi. Amah in Baal-te bia lo hi. Israel-te’ gamtat bang hi loin ama pa’ Pasian zongin ama thupiakna a zui hi. Tua ahih ciangin Topa in ama khut sungah kumpi gam kipsak a, Judah mi khempeuh in Jehoshafat tungah siah puak uh hi. Amah hau mahmah a, minthang mahmah hi. Topa’ na a sepna-ah hang mahmah a, Judah gam sung panin mual dawna biakpiaknate le Asherah milimte a lakhia hi. Ama uk a kum thumna kumin ama uliante Benhail, Obadiah, Zekhariah, Nethanel, le Mikaiah, Judah khuapite-ah thuhilh dingin a sawl hi. Amaute tawh Levi mi Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, le Tobadonijah a paikhawm sak hi. Tua ciangin Levi mite tawh siampi Elishama le Jehoram zong a paisak hi. Amaute in Topa’ thukham laibu kengin Judah gam sungah hilh uh hi. Judah khuapi khempeuhah amaute pai kawikawi-in mite lakah a hilh uh hi. Tua ciangin Judah gam kimkotah a om kumpi gam khempeuh tungah Topa kihtakna om a, amaute in Jehoshafat do ngam nawn lo uh hi. Filistia mite pawlkhat in Jehoshafat tungah letsongte, le siah dingin ngun a puak uh hi. Tua ciangin Arab-te in zong ama tungah tuutal tulsagih le zasagih, le keeltal tulsagih le zasagih mah a puak uh hi. Tua ciangin Jehoshafat hong lianzaw semsem hi. Amah in Judah gam sungah munmuanhuaite le vankoihna khuapite lam a, amah in Judah khuapite sungah van tampi a nei hi. Amah in a thahat a hang galkapte Jerusalem-ah a nei hi. A beh ciat uh tawh kizui-in amaute a phazah hih bang ahi hi. Judah sung pan a tulin a ukte: Adnah a ukpa hi a, a thahat a galhang mi tul zathum tawh ahi hi. Ama zomah a ukpa Jehohanan hi a, mi tul zanih le tul sawmgiat tawh ahi hi. Ama zomah Topa’ nasep nadingin a kipia Zikri’ tapa Amasiah hi a, a thahat a galhang mi tul zanih tawh ahi hi. Benjamin sung panin: A thahat a galhang Eliada hi a, thal le lum a tawi mi tul zanih tawh ahi hi. Tua ciangin ama zomah Jehozabad hi a, galdo dingin hiam a tawi mi tul zakhat le tul sawmgiat tawh ahi hi. Hihte pen kumpipa in Judah gam sung khempeuhah kulh a nei khuapite-ah a koihte banah kumpipa’ na a semte ahi hi. Jehoshafat hau-in hong minthan’ ciangin Ahab tawh numei-a kizopna a bawl hi. Kum tawmkhat khit ciangin Samaria-a Ahab kiangah amah paisuk hi. Tua ciangin Ahab in amah le amah tawh a hong pai mite a dingin tuu tampi le bawngtal tampi go a, Ramothgilead a sim dingin amah a zol hi. Israel kumpipa Ahab in Judah kumpipa Jehoshafat kiangah, “Ramothgilead-ah kei tawh nong kuan ding hiam?” a ci hi. Amah in dawngin, “Kei pen nangmah bang ka hi a, ka mite zong nangma mite mah bang ahi hi. Kote pen galsimna ah nang tawh kong kuan ding uh hi,” a ci hi. Tua ciangin Jehoshafat in Israel kumpipa kiangah, “ Topa thu dong masa ni,” a ci hi. Tua ciangin Israel kumpipa in kamsangte mihing zali khawmin amaute kiangah, “Ramothgilead a sim dingin kuanto ding ka hi hiam, tua ahih kei leh thuak ding ka hi hiam?” a ci hi. Tua ciangin amaute in, “Kuanto in; bang hang hiam cih leh Pasian in kumpipa’ khut sungah hong pia ding hi,” a ci uh hi. Ahih hangin Jehoshafat in, “Eite in i dot theih ding Topa’ kamsang adang hih lai-ah om nawn lo ahi hiam?” a ci hi. Tua ciangin Israel kumpipa in Jehoshafat kiangah, “Eite in Topa thu i dot theih nading Imlah’ tapa Mikaiah a kici mi khat omlai hi. Ahih hangin amah in kei tawh kisai a hoih thu gen ngei loin a sia bekbek gen tawntung ahih manin amah ka mudah hi,” a ci hi. Tua ciangin Jehoshafat in, “Tua bangin kumpipa in ci kei in,” a ci hi. Tua ciangin Israel kumpipa in ulian khat samin, “Imlah’ tapa Mikaiah manlang takin hong paipih in,” a ci hi. Tu-in Israel kumpipa le Judah kumpipa Jehoshafat a kumpi tokhom tung uhah tu-in a puantualpi uh tawh kizem uh hi. Samaria kulhkongpi lutna munah amaute tu uh a, amaute’ mai-ah kamsangte khempeuh in thu a gen uh hi. Tua ciangin Khenaanah’ tapa Zedekiah in sik kite bawl tawmin, “ Topa in hih bangin ci hi: ‘Amaute a siat matengin hihte tawh Syria mite na nawt ding hi,’ ci hi,” a ci hi. Tua ciangin kamsang khempeuh in zong tua bangmahin gen uh a, “Ramothgilead-ah kuanto inla, gualzo in. Topa in kumpipa’ khut sungah hong pia ding hi,” a ci uh hi. Tua ciangin Mikaiah a sam dingin a pai kamtai pa in ama kiangah, “En in, thu kikhatin kamsangte’ thugen pen kumpipa a dingin a hoihlam ahi hi. Nang zong amaute’ gen bangin gen inla, a hoihlamin gen in,” a ci hi. Ahih hangin Mikaiah in, “ Topa a nungta ahih mah bangin, ka Pasian’ gen thu bek ka gen ding hi,” a ci hi. Kumpipa kiangah amah hong tun ciangin kumpipa in ama kiangah, “Mikaiah aw, Ramothgilead-ah galsim dingin kuan ding ka hi hiam, tua ahih kei leh thuak ding ka hi hiam?” a ci hi. Tua ciangin amah in dawngin, “Kuanto inla va gualzo ve! Na khut sungah amaute hong kipia ding hi ve’n,” a ci hi. Ahih hangin kumpipa in ama kiangah, “ Topa’ min tawh thudang gen loin thuman bek kei tungah nong genna ding bangzah vei hong thuhilh ding ka hi hiam?” a ci hi. Tua ciangin amah in, “A cing nei lo tuute bangin mualte tungah Israel mi khempeuh a kithehthang ka mu hi. Tua ciangin Topa in, ‘Hihte in to nei lo hi; nuamtakin a inn ciat uhah ciahsak un,’ ci hi,” a ci hi. Tua ciangin Israel kumpipa in Jehoshafat kiangah, “Amah in kei tawh kisai a hoih gen loin a sia bek gen ding hi, ci-in nang kiangah hong gen hi lo ka hi hiam?” a ci hi. Tua ciangin Mikaiah in, “ Topa’ thugen za in: Topa a kumpi tokhom tungah tu a, a taklam le a veilamah vantung mihon khempeuh a ding ka mu hi. Tua laitakin Topa in, ‘Israel kumpipa Ahab kuanto-in Ramothgilead-ah a pukna dingin kua in amah zol ding ahi hiam?’ a ci hi. Tua ciangin khat in thu khat gen a, adang khat in thudang khat a gen hi. Tua ciangin kha khat hong madawkin Topa’ mai-ah ding a, ‘Keimah in amah ka va zol ding hi,’ a ci hi. Tua ciangin Topa in ama kiangah, ‘Bang lam tawh zol ding na hi hiam?’ a ci hi. Amah in, ‘Keimah paikhia-in ama kamsangte khempeuh’ kam sungah zuau thugen kha khat ka va hi ding hi,’ a ci hi. Tua ciangin amah in, ‘Nangmah in amah na va zol ding hi. Pai inla tua bangin va hih in,’ a ci hi. “Tua ahih ciangin Topa in hih na kamsangte’ kam sungah zuauthu a gen kha khat koih khin ahihna thei in. Topa in nang na siatna ding gen khinzo hi,” a ci hi. Tua ciangin Khenaanah’ tapa Zedekiah a nai-ah hong pai-in Mikaiah a paang bengin, “Cik hun a kipan Topa’ kha in kei hong nusia-in, hih bang na gen nadingin nang tungah hong tung ahi hiam?” a ci hi. Tua ciangin Mikaiah in, “Nangmah a bu dingin inndei sungnungah na pai ni ciangin na thei ding hi,” a ci hi. Tua ciangin Israel kumpipa in, “Mikaiah man unla, khuapi ukpa Amon le kumpipa’ tapa Joash kiangah paipih kik un. Tua ciangin, ‘Hih bangin kumpipa in ci hi: Hih mipa thong sungah koih unla, lungnuam takin kong ciahkik mateng anletui tawmno bek tawh vak un, ci hi,’ ci un,” a ci hi. Tua ciangin Mikaiah in, “Lungnuam takin nong ciahkik leh kei tungtawnin Topa in thu a gen lo ahi hi,” a ci hi. Tua ciangin amah in, “Mi khempeuh aw, tu-a ka thugen za un!” a ci hi. Tua ciangin Israel kumpipa le Judah kumpipa Jehoshafat, Ramothgilead-ah a kuanto uh hi. Tua ciangin Israel kumpipa in Jehoshafat kiangah, “Kei pen mel kiseelin gal sungah kong kuan ding a, ahih hangin nangmah in na puantualpite nong silh ding hi,” a ci hi. Tua ahih ciangin Israel kumpipa a mel kiseel a, amaute gal sungah a kuan uh hi. Tu-in Syria kumpipa in a leeng a ukte thu pia khin a, “A neu tawh ahi a, a lian tawh ahi zongin kido loin, Israel kumpipa bek tawh na kido ding uh hi,” a ci hi. Leeng galkap a ukte in Jehoshafat a muh uh ciangin, “Israel kumpipa hi,” a ci uh hi. Tua ahih ciangin amah a hih dingin amaute in naih uh hi. Tua ciangin Jehoshafat kikokhia a, Topa in amah huh hi. Pasian in ama kiang panin amaute kaikhia hi; bang hang hiam cih leh Israel kumpipa ahih lohna leeng galkap a ukte in a theih uh ciangin amah a delhna panin kilehhei kik uh hi. Ahih hangin mi khat in a thal mawklot a, Israel kumpipa a galdal thep le a awmdal kikal a kha hi. Tua ahih ciangin amah in a leenghawl pa kiangah, “Kei liam ka hih manin kileh inla, galphual panin hong puakhia in,” a ci hi. Tua ni-in galkidona nasia mahmah a, nitak dong Syria mite maingatin a leeng sungah Israel kumpipa kingam hi. Tua hi a, nitum laitakin amah a si ta hi. Judah kumpipa Jehoshafat lungmuang takin Jerusalem-a ama inn-ah ciahkik hi. Ahih hangin amah a dawn dingin Hanani’ tapa, thumu pa Jehu hong paikhia a, Kumpi Jehoshafat kiangah, “Mi gilote huhin Topa a mudahte it ding na hi hiam? Hih thu hangin Topa’ hehna nang tungah hong tungzo hi. Ahi zongin nang na hoihna pawlkhat om hi; bang hang hiam cih leh nangmah in gam sung panin Asherah milimte nusia-in Pasian zon ding na lungsimah na ngaihsun hi,” a ci hi. Jerusalem-ah Jehoshafat teng hi. Tua ciangin Beersheba panin Efraim mualtung gam ciang dong mite lakah zin kawikawi a, amau’ pute pate’ Pasian, Topa kiangah amaute tunpihkik hi. Amah in gam sunga Judah khuapi kulhnei khempeuh a khuapi a khuapi-ah thukhen dingte seh a, thukhente tungah, “Note in mi a’ ding hi loin Topa a dingin a khen na hih manun na hih dingte uh limtakin ngaihsun un; thukhenna na piak laitakun note kiangah amah hong om hi. Tu-in note in Topa zahtak unla, na hihnate uhah kingaihsun un. Bang hang hiam cih leh Topa i Pasian in thuman heikhiatna, mi deidanna, le sumgolh laknate deih lo hi,” a ci hi. Tua tham loin, Topa a dingin thukhenna a pia ding le thuneite a khensak dingin Levi mite le siampite le Israel mi beh lutangte pawlkhat, Jehoshafat in Jerusalem-ah a seh hi. Amaute in Jerusalem-ah a phual ding uh nei uh hi. Tua ciangin amah in amaute thuhilh a, “ Topa zahtakna, cihtakna, le na lungsim khempeuh uh tawh hih bangin na hih ding uh hi: A khuapi uhah a teng na sanggamte uh tung panin mi kithahna thu, thukham ahih kei leh thupiakna, upadi ahih kei leh biakna ngeina kipte tawh kisai-in thu khat peuhpeuh note tungah hong tun ciangin, amaute in Topa’ mai-ah mawhna a piansak loh nading le note le na sanggamte uh tungah hehna hong tun loh nadingin amaute na hilh ding uh hi. Tua bangin na gamta ding uh a, mawhna na piangsak kei ding uh hi. En un, Topa’ thu tawh kisai thute khempeuhah siampi lian Amariah note tungah om hi. Tua ciangin kumpipa tawh kisai khempeuhah Judah mite a ukpa Ishmael’ tapa Zebadiah om hi. Tua ciangin Levi mite in note tungah ulian na hong sem ding uh hi. Hang takin gamta un; thuman mite tawh Topa hong om ta hen!” a ci hi. Hih thu khit ciangin Moab mite le Ammon mite, le Meunim mite pawlkhat, Jehoshafat a sim dingin hong kuan uh hi. Mi pawlkhat hong pai-in Jehoshafat kiangah, “Tuipi galkhat, Edom gam panin mihon tampi khat nangmah a sim dingin hong kuan uh hi. Amaute Hazazontamar (Engedi a kici)-ah om uh hi,” ci-in a gen uh hi. Tua ciangin Jehoshafat lau a, amahmah in Topa’ lamlahna ding zong a, Judah gam khempeuhah an tan’ ding thu a zasak hi. Tua ciangin Topa’ tung pan huhna a ngen dingin Judah mite hong kikhawm uh hi. Judah khuapi khempeuh panin Topa thu a dong dingin amaute hong pai uh hi. Tua ciangin Topa’ biakinn huangsung, inntual thak mai, Judah le Jerusalem-te’ kikhopna sungah Jehoshafat ding a, “ Topa, ka pu ka pate uh Pasian aw, nang, vantungah Pasian hi lo na hi hiam? Minamte’ kumpi gam khempeuh tungah nang a uk hi lo na hi hiam? Na khut sungah vangliatna le thahatna om a, kuamah in nang hong nang zo lo hi. Kote’ Pasian aw, hih gamah a teng mite na mi Israel-te’ mai-ah hawlkhia-in, na lawmpa Abraham’ suanlekhakte tungah a tawntung dingin pia hi lo na hi hiam? Hih gamah amaute tengin, nangma min dingin hih lai-ah biakinn khat lam uh a, ‘Eite tungah siatna, namsau, thukhenna, ahih kei leh natna, ahih kei leh kialpi hong tun leh, hih biakinn sungah ama min om ahih manin hih biakinn mai-ah dingin i gimna hunah ama tungah i kiko ding a, amah in hong za-in hong hon ding hi,’ ci uh hi. “Tu-in en in, Egypt gam panin Israel-te hong paikhiat lai-in na simsak loh, amaute in a suksiat loh uh Ammon mite le Moab mite le Seir Mual gam mite, ka luah dingun kote tungah nong piaksa nangma neihsa panin kote a hong hawlkhia dingin hong paina tawh amaute in kote hong lehthuk zawsop uh hi. Kote’ Pasian aw, amaute tungah thu khen lo ding na hi hiam? Bang hang hiam cih leh kote a sim dingin a hong pai hih mihon tampite a do dingin thahatna ka nei kei uh hi. Ka cih nading uh ka thei kei uh a, nangmah bek kong mitsuan uh hi,” a ci hi. Tua laitakin Topa’ mai-ah Judah mi khempeuh a taneute, a zite, le a naupangte uh tawh a ding uh hi. Tua ciangin a kikhawmte’ lak, Levi mi Asaf’ suante sung pan Mattaniah, a tapa Jeiel, a tapa Benaiah, a tapa Zekhariah, a tapa Jahaziel tungah Topa’ kha hong tung hi. Tua ciangin amah in, “Judah gam khempeuh le Jerusalem-a teng khempeuh, le Kumpi Jehoshafat aw, ngai un. Topa in hih bangin note’ tungah hong gen hi: ‘Kihta kei unla, hih a tam mi honpi hangin lungkia kei un; bang hang hiam cih leh galdona pen note a’ hi loin Pasian-a’ ahi hi. Zing ciangin amaute a do-in paisuk un. Ziz kahtohna lampi tawnin amaute hong kuanto ding uh a, Jeruel gamlak nisuahna lam kuam mongah amaute na mu ding uh hi. Note in hih kidona-ah na do ding uh kisam lo hi. Judah gam mite le Jerusalem khuamite aw, na panmun uh la-in taang loin ding unla, note’ tangin Topa’ gualzawhna mu un,’ ci hi. Kihta kei unla, lungkia kei un. Zing ciangin amaute a do-in pai un. Topa in note hong ompih ding hi,” a ci hi. Tua ciangin Jehoshafat in a maitang leilam ngatin kun a, Judah gam le Jerusalem-a a teng mite khempeuh zong Topa’ mai-ah pukin Topa a bia uh hi. Tua ciangin Levi mite sung pan Kohath mite le Korah mite, awging pha mahmah tawh Israel Pasian, Topa a phat dingin a dingto uh hi. Tua ciangin zingsangin amaute tho baihin Tekoa gamlakah a paikhia uh hi. Amaute a paikhiat laitakin Jehoshafat dingin, “Judah gam le Jerusalem-a a tengte aw, ka thugen za un! Topa na Pasian uh um un; tua hileh note na kip ding uh hi. Ama kamsangte um un; tua hileh na maavang ding uh hi,” a ci hi. Amah in mite tawh thu kikupna a neih khit ciangin, galkapte mai-ah amaute a paikawmin, “ Topa tungah lungdamna ko un; bang hang hiam cih leh ama itna kip tawntung hi,” ci-in biakna puan silhin Topa tungah la sa-in amah a phat dingte a seh hi. Amaute inla sa-in phat ding a kipat uh ciangin, Judah mite a sim dingin a hong pai Ammon mite, Moab mite, le Seir Mual gam mite a pangsim ding Topa in koih a, amaute kizo hi. Bang hang hiam cih leh Ammon mite le Moab mite in Seir Mual a, a tengte a do dingin kipanin amaute susia mang uh a, Seir-a a tengte a beisak khit uh ciangin amaute khatlekhat kisusia uh hi. Gamlak a galvilna tausangah Judah-te hong tun ciangin mihonpite’ omna lam en uh hi. Amaute pen leilakah a puk misi luanghawm vive na hi a, a suakta kuamah om lo hi. Van kinusiate a tawm dingin Jehoshafat le a mite hong pai ciangin bawngte, vante, puante, le na manphate tampi tak mu uh a, a puakzawh nawn loh ciang dong uh amau a dingin a la uh hi. Van kinusiate tam mahmah ahih manin ni thum sung tawm uh hi. A ni li ni-in Berakah Kuam-ah amaute kikhawm uh hi; bang hang hiam cih leh amaute in tua lai-ah Topa phat uh hi. Tua ahih ciangin tuni dongin tua lai mun pen Berakah Kuam kici hi. Tua ciangin Judah mi le Jerusalem mi khempeuh ciah uh a, Jehoshafat makai-in lungdamna tawh Jerusalem-ah a pai uh hi; bang hang hiam cih leh a galte uh hangin Topa in amaute lungdamsak hi. Amaute, harp lasaknate le laiza lasaknate tawh Jerusalem-a Topa’ biakinn-ah tung uh hi. Topa in Israel-te’ galte a dosakna thu a zak uh ciangin kumpi gamte khempeuh in Topa a kihta uh hi. Tua ahih ciangin Jehoshafat’ ukna gam sung gamdai hi; bang hang hiam cih leh a Pasian in ama kiimah galdaihna a pia hi. Tua bangin Jehoshafat in Judah tungah uk hi. Amah in uk ding a kipatin kum sawmthum le nga pha a, Jerusalem-ah kum sawmnih le nga sung uk hi. Ama nu’ min Azubah hi a, Shilhi’ tanu ahi hi. Amah in a pa Asa’ gamtat bangmahin Topa’ muhna-ah a man na sem hi. Ahi zongin mual dawna biakpiaknate kilakhia lo hi. Mite in a lungsim uhah a pu a pate uh’ Pasian ngaihsun nai lo uh hi. Tu-in Jehoshafat’ gamtatna a omlaite, a patna pan a tawp dongin, Israel Kumpite’ Tangthu sunga a kiciamteh, Hanani’ Tapa Jehu’ Khang Tangthu sungah kigelh hi. Hih thu khit ciangin Judah kumpi Jehoshafat in a gilo a a gamta Israel kumpipa Ahaziah tawh kipawlna a bawl hi. Tarshish a pai ding teembawte bawlna-ah amah pawl a, amaute in Eziongebar-ah teembawte a bawl uh hi. Tua ciangin Mareshah khuami Dodavahu’ tapa Eliezer in Jehoshafat langpangin thu genin, “Nangmah in Ahaziah tawh kipawlna bawl na hih manin Topa in na bawlsa uh nate susia ding hi,” a ci hi. Tua ciangin teembawte kisia a Tarshish-ah pai thei lo hi. Jehoshafat si a, David khuapi sungah a pate tawh kivui hi. Tua ciangin a tapa Jehoram in ama tangin uk hi. Jehoshafat’ tapa Jehoram’ sanggam pasalte: Azariah, Jehiel, Zekhariah, Azariah, Mikhael, le Shefatiah ahi uh hi. Hihte khempeuh, Judah kumpi Jehoshafat’ tapate ahi hi. A pa un amaute tungah letsong lianpite, ngun, kham, le a manpha neihsate, Judah gam sunga kulhnei khuapite tawh a pia hi. Ahih hangin amah ta upa ahih manin Jehoram tungah kumpi gam a pia hi. A pa’ kumpi tokhom tungah Jehoram kahin a kip ciangin namsau tawh a sanggam pasal khempeuh that a, Judah ulian pawlkhat zong a that hi. Jehoram kumpi a suahin a kum sawmthum le nih pha a, Jerusalem-ah kum giat sung uk hi. Amah in Ahab innkuan mah bangin Israel kumpi dangte’ gamtat a zui hi; bang hang hiam cih leh Ahab’ tanu ama zi ahi hi. Topa’ muhna-ah amah a sia gamta hi. Ahi zongin, David tawh a bawlsa a thuciamna, ama tung le a suante tungah ukna za a piak suakna ding a ciam khitna hangin Topa in David’ suante susia lo hi. Ama hun sungin Judah ukna panin Edom lengkhia-in amau’ kumpi tuam a koih uh hi. Tua ciangin ama nuai-a a ukte le a leengte khempeuh tawh Jehoram galkah a, zanin amah kipanin amah le a leeng ukte a umcih Edom mite a vatgawp hi. Tua ahih ciangin tuni dongin Judah ukna panin Edom mite leengkhia hi. Amah in a pu a pate’ Pasian, Topa nusia ahih manin tua hun laitakin Libnah zong ama ukna panin a lengkhia hi. Tua tham loin amah in Judah mualtung gamah mual dawna biakpiaknate bawl a, Jerusalem-a teng mite citak loin omsak a, Judah mite lampialsak hi. Tua ciangin kamsang Elijah tung panin ama kiangah laikhak khat hong tung a, “Na pu David’ Pasian, Topa in hih bangin ci hi: ‘Na pa Jehoshafat’ gamtat bang leh Judah kumpi Asa’ gamtat bangin gamta loin, Israel kumpi dangte’ gamtat bangin gamta-in Ahab innkuan in cihtak lohna-ah Israel a paipih bangin Judah le Jerusalem-a teng mite cihtak lohna-ah na paipih a, na pa’ innkuan sung panin nang sangin a hoihzaw na sanggam pasalte zong na that hi. Tua ahih manin na mite, na tate, na zite, le na neih khempeuh tungah Topa in gimna lianpi khat hong tungsak ding a, na natna hangin a ni ni-in na gil a tolhkhiat dongin, nangmahmah in gilnatna lianpi khat na nei ding hi,’ ci hi,” a ci hi. Tua ciangin Topa in Ethiopia mite kiangah a om Filistia mite le Arab mite, Jehoram tungah a heh nadingun tok lo hi. Tua ahih ciangin Judah a simin amaute hong kuanto-in luh uh a, kumpipa’ inn-ah a om a muh uh na khempeuh, le a tapate le a zite zong puakhia uh a, a tapa neupen Jehoahaz simloh a tapate a kinusia om lo hi. Hih thute khempeuh khit ciangin Topa in a dam thei lo natna tawh a gil nasak hi. A hun a cin, kum nih beina ciangin a natna hangin a gil tolhkhia a, nakpitakin na sa-in a si hi. A pate a dingin mei a cih uh bangin a mite in amah zahtakna-in mei cih lo uh hi. Amah in uk ding a kipatin kum sawmthum le nih a pha hi. Jerusalem-ah kum giat sung uk a, kuama dahpih lohin amah kihemkhia hi. Amaute in David khuapi sungah amah vui uh a, ahih hangin kumpite’ han sungah kivui lo hi. Tua ciangin Jerusalem-ah a tengte in ama tangin a tapa neupen Ahaziah kumpi-in koih uh hi; bang hang hiam cih leh Arab mite tawh giahphual ah hong pai mite in a tapa golzawte khempeuh that khin uh hi. Tua ahih ciangin Judah kumpi Jehoram’ tapa Ahaziah in uk hi. Ahaziah in uk ding a kipatin kum sawmli le nih pha a, Jerusalem-ah kum khat sung uk hi. Ama nu’ min Athaliah hi a, Omri’ tanu ahi hi. Ama nu in a sia-a a gamtatna ding lamlak ahih manin amah zong Ahab innkuan dangte’ gamtat bangin a gamta hi. Ahab innkuan dangte mah bangin Topa’ muhna-ah a sia gamta hi; bang hang hiam cih leh a pa’ sih khit ciangin ama siatna dingah thu lamlakte pen Ahab’ innkuante ahi uh hi. Amah in amaute’ thugen nangawn zui a, Ramothgilead-ah Syria kumpi Hazael tawh a kido dingin Israel kumpi Ahab’ tapa Joram tawh a kuan hi. Tua ciangin Syria mite in Joram liamsak uh a, Syria kumpi Hazael a do laitakin gal sungah a ngah a liamnate Jezreel-ah a kidamsak dingin a kileh kik hi. Tua ciangin Jezreel-ah Ahab’ tapa Joram a ci na ahih manin amah a en dingin Judah kumpi Jehoram’ tapa Ahaziah a hawhsuk hi. Ahih hangin Joram’ kiangah a hawhna tawh Ahaziah’ pukna a tunna ding Pasian’ sehsa ahi hi. Bang hang hiam cih leh tua lai-ah amah a hawh sungin Ahab innkuan a susia dingin Topa in sathau a nilhsa, Nimshi’ tapa Jehu tawh a kimu dingin Joram tawh paikhia hi. Jehu in Ahab innkuan tungah Pasian’ thukhenna a sepkhiat laitakin Judah uliante le Ahaziah’ na a sem, Ahaziah’ sanggam pasalte’ tapate tuak a, amah in amaute a that hi. Amah in Ahaziah zong a, Samaria-ah a buk laitakin amah kiman a, tua ciangin Jehu kiangah amah kipaipihin kithat hi. Amaute in amah vui uh hi; bang hang hiam cih leh amaute in, “Amah pen a lungsim khempeuh tawh Topa a zong Jehoshafat’ tupa ahi hi,” ci uh hi. Tua ciangin Ahaziah innkuante in kumpi gam a ukzo ding mi khat zong nei nawn lo uh hi. Tu-in Ahaziah’ nu Athaliah in a tapa a sihna a theih ciangin amah kipanin Judah sung pan kumpi innkuan khempeuh thatsak hi. Ahih hangin kumpipa’ tanu Jehosheba in Ahaziah’ tapa Joash la a, a kithat ding kumpipa’ tapate lak panin amah gukhia-in lupna senna inndei sungah amah le a cingnu a koih hi. Amah pen Ahaziah’ sanggamnu ahih manin Kumpi Jehoram’ tanu ahi, siampi Jehoiada’ zi Jehosheba in tua bangin Athaliah’ kiang panin amah seel a, tua nu in amah thatkha lo hi. Tua bangin Athaliah in gam sung a uk laitakin Pasian’ biakinn sungah bu-in kum guk sung amaute tawh amah a om hi. Ahih hangin a kum sagihna kumin Jehoiada amah kihanthawnin a za-a a ukte, Jehoram’ tapa Azariah, le Jehohanan’ tapa Ishmael, le Obed’ tapa Azariah, le Adaiah’ tapa Maaseiah, le Zikri’ tapa Elishafat-te tawh thukimna khat a bawl hi. Tua ciangin Judah gam sungah amaute pai kawikawi-in Judah khuapite khempeuh panin Levi mite, le Israel mi beh lutangte khawmin Jerusalem-ah hong pai uh hi. Tua ciangin a kikhawm khempeuh in Pasian’ biakinn sungah kumpipa tapa Joash tawh thuciamna khat bawl uh hi. Tua ciangin Jehoiada in amaute kiangah, “En un, kumpipa’ tapa! Topa in David suante tawh kisai-in a gen bangin amah uksak un. Note in hih bangin na hih ding uh hi: Sabbath ni-in nasep a peng no siampite le Levi mite sung panin seh thum ah seh khat kulhkongpi cingte na hi ding uh a, seh thum ah seh khat kumpipa’ inn-ah omin seh thum ah seh khat Khuabul Kulhkongpi-ah na om ding uh hi. Tua ciangin mi khempeuh Topa’ biakinn tual sungah na om ding uh hi. Siampite le na a sem Levi mite simloh, Topa’ biakinn sungah kuamah lutsak kei un. Amaute a siangtho ahih manin amaute lut thei ding uh a, ahih hangin mi khempeuh in Topa’ sawlna na mang ding uh hi. Levi mite in a khutsung uhah a galhiam ciat uh tawh kumpipa cing ding uh a, biakinn sungah a lut peuhpeuh kithat ding hi. Hong tum ciang hitaleh a pusuah ciang hitaleh ah kumpipa tawh om un,” a ci hi. Siampi Jehoiada’ thupiak khempeuh bangin Levi mite le Judah mi khempeuh gamta uh hi. Amaute in amau’ mi ciat Sabbath ni-in na a sem ding mite tawh Sabbath ni-in nasep a peng ding mite hong paipih uh hi; bang hang hiam cih leh Jehoiada in nasep a peng ding siampite ciahsak lo hi. Tua ciangin siampi Jehoiada in Topa’ biakinn sungah a om, Kumpi David-a’ ahi ngei teipite le lum lian le lum neute, a ukte tungah a pia hi. Tua ciangin amah in mi khempeuh a galhiam ciat uh tawh kumpipa a cingin, biakinn leitaw lampang pan leilu lampang, biakna tau le inn kiimah a koih hi. Tua ciangin amah in kumpipa’ tapa paikhiatpihin ama lu tungah kumpi lukhu khusak a, kumpi za ngahna lai zong a pia hi. Tua ciangin amaute in kumpi-in amah taangko uh a, Jehoiada le a tapate in amah sathau nilhin, “Kumpipa khansau hen!” a ci uh hi. Mite tai-in kumpipa a phatna uh gamlumna Athaliah in a zak ciangin mite’ omna Topa’ biakinn-ah a pai hi. Amah a khuadak ciangin, biakinn lutna-a om a khuampi gei-ah kumpipa a ding, le a ukte le peengkul tumte kumpipa gei-ah a om, le gam sung mi khempeuh lungdamin peengkulte a tum, le lasate a lasakna nate uh tawh tua pawi makai-in a na om uh a mu hi. Tua ciangin Athaliah in a puante balkekin kiko a, “Sawmsimna! Sawmsimna!” a ci hi. Tua ciangin siampi Jehoiada in galkapte tungah a kikoih a ukte paikhiatpihin amaute tungah, “A gualin a cingte lak panin a pua-ah amah paikhiatpih un. Amah a panpih mi khat peuhpeuh namsau tawh kithat ding hi,” a ci hi. Bang hang hiam cih leh siampipa in, “ Topa’ biakinn sungah tua nu that kei un,” ci hi. Tua ahih ciangin amaute in tua nu man uh a, kumpipa omna inn Sakol Kongpi vangah paikhiatpihin tua lai-ah amah a that uh hi. Tua ciangin Topa’ mi ahihna ding uh Jehoiada in amah le mi khempeuh le kumpipa kikalah thuciamna khat a bawl hi. Tua ciangin mi khempeuh Baal inn-ah pai-in a inn a laikhia uh hi. Amaute in a biakna taute le a milimte sukham uh a, biakna taute mai-ah Baal siampi Mattan a that uh hi. Tua ciangin Jehoiada in David’ hih ngei bangin, Moses thukham sungah a kigelh bangin lungdamna le lasakna tawh, Topa’ tungah meihal biakna a pia ding, Topa’ biakinn a en dingin David in a vaihawmsa Levi siampite le Levi mite’ ukna nuai-ah Topa’ biakinn a vil galvilte a koih hi. Lam khat peuhpeuhah a nin mi khat peuhpeuh hong lut loh nadingin Topa’ biakinn kulhkongpite-ah amah in kulhkongpi cingte a koih hi. Tua ciangin amah in galkap ukte, mi liante, mi a ukte, le gam sung mi khempeuh a paipih hi. Tua ciangin amaute in Topa’ biakinn panin kumpipa’ inn kulhkongpi tungnung tawnin kumpipa paipihsuk uh hi. Tua ciangin amaute in kumpi tokhom tungah kumpipa tusak uh hi. Tua ahih ciangin gam sung mi khempeuh lungdam uh hi. Namsau tawh Athaliah a kithah khit ciangin khuapi sung a nuam pah hi. Joash in uk ding a kipatin kum sagih pha a, Jerusalem-ah kum sawmli sung uk hi. Ama nu’ min Zibiah hi a, Beersheba khuami ahi hi. Siampi Jehoiada’ hunsung khempeuh Topa’ mitah Joash a manin gamta hi. Jehoiada in ama a dingin zi nih laksak a, amah in tapate le tanute a nei hi. Hih hun khit ciangin Joash in Topa’ biakinn a ngei batsakkik ding ngaihsun hi. Amah in siampite le Levi mite khempeuh khawmin amaute kiangah, “Judah khuapite-ah pai unla, Pasian’ biakinn a kum kumin puah nadingin Israel khempeuh tung panin sum khawm un; hih thu na nawh hih ding uh thei un,” a ci hi. Ahih hangin Levi mite kinawh lo uh hi. Tua ahih ciangin kumpipa in amau’ ukpi Jehoiada samin ama kiangah, “ Topa’ nasem Moses in Topa’ ompihna puanbuk-a dingin Israel mihonte tung panin a khon mangmu bang hangin Judah le Jerusalem panin Levi mite khawmsak lo na hi hiam?” a ci hi. Bang hang hiam cih leh tua a gilo numei Athaliah le a pawlte in Pasian’ biakinn luh uh a, Topa’ biakinn sunga om a ki-ap nate khempeuh zong Baal-te a dingin zang uh hi. Tua ahih ciangin kumpipa in thu pia a, amaute in singkuang khat bawlin Topa’ biakinn kulhkongpi pualamah a koih uh hi. Gamlakah a omlai-un Pasian’ nasem Moses in Israel mite a piaksak mangmu Topa a dingin hong puak nadingun Judah le Jerusalem sung khempeuhah thu zaksakna kibawl hi. Tua ciangin ulian khempeuh le mi khempeuh lungdamin a mangmu uh hong sung uh a, a man khit mateng uh singkuang sungah khia uh hi. Levi mite in kumpipa’ uliante kiangah a singkuang paipih uh a, a sungah sum tampi a omlam a muh peuhpeuh uh ciangin, kumpipa’ lai-at pa le siampi lianpen pa’ sawltak pa hong pai-in singkuang sunga sum teng bungkhia-in la uh a, tua ciangin a omna ngei-ah a singkuang koihkik uh hi. Tua bangin a ni ni-in amaute in hih uh a, sum tampi a khawm uh hi. Tua ciangin kumpipa le Jehoiada in Topa’ biakinn nasep a ukte tungah tua sumte pia uh a, amaute in Topa’ biakinn a ngei a bangsakkik dingin leilesuang nasep a siamte le khutsiamte, le Topa’ biakinn a puahkik dingin sik le sumngo nasep a siamte zong a cial uh hi. Tua ahih ciangin tua nasepna-ah a kisehte in na semin amau’ khut sungah puahkikna nasep in mai nawt a, amaute in a ngei bangin Topa’ biakinn bawlkikin kipsak uh hi. Amaute in a zawh khit uh ciangin, kumpipa le Jehoiada kiangah sum a omlaite hong paipih uh a, amaute in tuate tawh Topa’ biakinn-ah nasepna ding le meihal biak nadingin nazatte, le paknamtui a dingin pakante, le kham le ngun beelte a bawl uh hi. Tua ahih ciangin amaute in Jehoiada’ nuntak sung khempeuh a tawntungin Topa’ biakinn sungah meihal biaknate a pia uh hi. Ahih hangin Jehoiada teekin a hun kicing ta a, tua ciangin a si hi. A sihin kum za le kum sawmthum pha hi. Amah in Israel sung, le Pasian’ na le Pasian’ biakinn-ah nasep hoih sem ahih manin amaute in David khuapi sung kumpite’ lakah amah a vui uh hi. Jehoiada a sih khit ciangin Judah uliante hong pai-in amau’ thu a zuih nadingin kumpipa tungah thu va gen uh a, kumpipa in zong amaute’ thu a ngai hi. Tua ahih ciangin amaute in a pu a pate uh Pasian, Topa’ biakinn nusia uh a, Asherah milimte le milim dangte’ na sem uh hi. Hih amau’ mawhna hangin Judah le Jerusalem tungah hehna hong tung hi. Ahi zongin Topa’ lamah amaute a paipih kik dingin amah in amaute lakah kamsangte a puak hi. Hihte in amau’ langkhatah teci pang a, ahih hangin amaute in don lo uh hi. Tua ciangin siampi Jehoiada’ tapa Zekhariah’ sungah Pasian’ kha hong lut hi. Tua ciangin amah dingin mite en sukin mite kiangah, “Pasian in hih bangin ci hi: ‘Bang hangin na mavan’ theih loh nadingun Topa’ thupiaknate palsat na hi uh hiam? Note in Topa nusia na hih manun amah in note hong nusia hi,’ ci hi,” a ci hi. Ahih hangin amaute in amah sawmsim uh a, kumpipa’ thupiakna tawh amaute in Topa’ biakinn tualah suang tawh amah denglum uh hi. Tua bangin kumpipa Joash in Zekhariah’ pa Jehoiada in ama tungah a lah dikna phawk nawn loin ama tapa thahsak mawk hi. Amah in a sih ding ciangin, “ Topa in mu hen la thuk ta hen!” a ci hi. Kum bei ciangin Joash a simin Syria galkapte hong kuanto hi. Judah le Jerusalem-ah amaute hong pai-in mite lak panin ulian khempeuh that uh a, a van ngahte khempeuh uh Damaskas kumpipa kiangah puak uh hi. Syria galkapte mi tawmno hong pai hi napi-in, amaute in a pu a pate uh Pasian, Topa nusia uh ahih manin Topa in amaute’ khut sungah galkap tampi ahi mite a pia hi. Tua bangin amaute in Joash’ tungah thukhenna a pia uh hi. Amah nakpi tak a liamsa-in nusia-in, ama kiang panin Syria mite a kihepkhiat khit uh ciangin, siampi Jehoiada’ tapa a thahna hangin a nasemte in amah sawmsim uh a, a lupna tungah amah that uh hi. Tua ahih ciangin amah si hi. David khuapi sungah amah vui uh a, ahih hangin amaute in kumpite’ hanah amah vui lo uh hi. Amah a sawmsim mite pen Ammon numei Shimeath’ tapa Zabad, le Moab numei Shimrith’ tapa Jehozabad ahi uh hi. Ama tapate’ thute, le amah a kigensiatna thute, le Pasian’ biakinn a kilamkikna thute, Kumpite’ Khang Tangthu Laibu sungah kigelh hi. Tua ciangin a tapa Amaziah in ama tangin a uk hi. Amaziah in uk ding a kipatin kum sawmnih le nga pha a, amah in Jerusalem-ah kum sawmnih le kua sung uk hi. Ama nu’ min Jehoaddin hi a, Jerusalem khuami ahi hi. Topa’ mitah a manin amah gamta a, ahi zongin a lungsim a paubaang lo hizo nai sam lo hi. Ama khut sungah kumpi vangliatna kiptakin a om khit phetin a pa ahi kumpipa a that a nasemte a that hi. Ahih hangin Moses laibu sungah, “Tate’ hangin pate kithat lo ding a, pate’ hangin tate kithat lo ding hi,” ci-in Topa in a thupiakna thukham sungah a kigelh mah bangin amah in amau’ tate that lo hi. Tua ciangin Amaziah in Judah mite khawm a, a tul-a ukte le a za-a ukte’ khutnuai-ah Judah mite le Benjamin mite a behbeh, a pawlpawlin a koih hi. Amah in kum sawmnih le a tungsiah a pha mite khawm a, galsim dingin a hoih, teipi le lum a zang thei, a kitengkhia mihing tul zathum a pha hi. Amah in Israel sung panin ngun talen zakhat tawh a thahat galhang mi tul zakhat zong a cial hi. Ahih hangin Pasian’ mi khat ama kiangah hong pai-in, “Kumpipa aw, Israel mi ahi hih Efraim mite khempeuh, Topa in ompih lo ahih manin hih Israel galkapte nang tawh kuankhawm sak kei in. Ahih hangin hih bang lama hihna tawh galdona-ah thahat dingin kingaihsun kha na hih leh, Pasian in galte’ mai-ah nang hong paai ding hi; bang hang hiam cih leh Pasian in huhna ding ahi a, paihna ding ahi zongin vangliatna nei hi,” a ci hi. Tua ciangin Amaziah in Pasian’ mipa kiangah, “Ahi ta zongin Israel galkapte tungah ka piaksa talen zakhat thu bang cih ding ihi hiam?” a ci hi. Pasian’ mipa in dawngin, “ Topa in hih sangin nakpitakin a tamzaw hong pia thei hi,” a ci hi. Tua ciangin Amaziah in Efraim panin hong pai galkapte, inn-ah a ciahkik dingin a paikhiasak hi. Tua ciangin Judah mite tungah amaute heh mahmah uh a, heh mahmahna tawh inn-ah a ciahkik uh hi. Ahih hangin Amaziah kihanthawnin a mite paikhiatpih a, Ci Kuam-ah pai-in Seir gam mite mihing tul sawm a that hi. Adang tul sawm hingmat uh a, keen sang dawn khatah amaute paipihin tua keen dawn panin amaute lawnsuk uh a, amaute khempeuh themlen’ hi. Ahih hangin Amaziah in gal sungah amah tawh kuansak loin, inn-ah a sawlkik galkapte in Samaria panin Bethhoron dong Judah khuapite na sim uh a, tuate sungah mi tulthum thatin van tampi a la uh hi. Seir gamah Edom mite a thahna panin Amaziah hong ciah ciangin amah in Seir gam mite’ pasian-te hong ciahpih a, ama pasian dingin tuate koih a, tuate bia-in tuate’ tungah biakna a pia hi. Tua ciangin Amaziah tungah Topa hehin ama kiangah kamsang khat sawl a, tua pa in, “Bang hangin nangma khut panin ama mite a honkhia lo, mi pawlkhatte’ pasian-te beel na hi hiam?” a ci hi. Ahih hangin amah in thu a gen laitakin kumpipa in ama kiangah, “Kumpipa tungah ngaihsutna a pia dingin nang hong koih ka hi uh hiam? Khawl in! Bang hangin nang hong kithat ding ahi hiam?” a ci hi. Tua ahih ciangin kamsangpa khawl a, ahih hangin ama kiangah, “Hih bang gamta-in ka thugenna ngai lo na hih manin Pasian in nang hong suksiat ding a lungsim a khentatna ka thei hi,” a ci hi. Tua ciangin Judah kumpi Amaziah in ngaihsutna a lak khit ciangin Israel kumpi, Jehu’ tapa Jehoahaz, a tapa Joash kiangah mi sawlin, “Hong pai in; khatlekhat kisi ni,” cisak hi. Tua ciangin Israel kumpi Joash in Judah kumpi Amaziah kiangah thu puak a, “Lebanon-a thangling kung in Lebanon-a taamtak tungah thu puak a, ‘A zi dingin ka tapa’ tungah na tanu pia in,’ ci hi. Tua ciangin Lebanon gamsa khat hong pai-in thangling kung tuancil hi. Nangmah in, ‘Edom mite ka vat khin hi,’ na ci a, na lungsim in nang hong kisathei sak hi. Tu-a na minthanna zah tawh inn-ah om in; bang hangin nangmah le Judah mite na pukkhawm nadingun buaina piangsak ding na hi hiam” a ci hi. Ahih hangin Amaziah in mang lo hi; bang hang hiam cih leh amaute in Edom pasian-te bia uh ahih manin, Pasian in amau’ galte’ khut sungah amaute a piaktheih nadingin tua pen Pasian’ vaihawmna ahi hi. Tua ahih ciangin Israel kumpipa Joash kuanto a, Judah-te’ gam Bethshemesh-ah amah le Judah kumpipa Amaziah khatlekhat gal sungah kisi uh hi. Tua ciangin Israel mite in Judah mite zo a, mi khempeuh a inn uhah a tai uh hi. Tua ciangin Israel kumpipa Joash in Bethshemesh-ah Ahaziah’ tapa Joash, a tapa Amaziah ahi Judah kumpipa manin Jerusalem-ah paipih a, Efraim Kongpi panin a Kiu Kulhpi ciang dong pi zaguk sung Jerusalem kulh a phelkhia hi. Tua ciangin amah in kham le ngun khempeuh, le Pasian’ biakinn sungah a kimu umlebeel khempeuhte tawh Obededom mankhawm hi. Amah in kumpipa’ inn-a vanmanphate la-in luang khapna ding mite zong man a, tua ciangin Samaria-ah a ciahkik hi. Israel kumpi, Jehoahaz’ tapa Joash a sih zawh Judah kumpi Joash’ tapa Amaziah kum sawm le nga sung hinglai hi. Tu-in Amaziah’ nasep a omlaite, a patna panin a tawpna dong, Judah le Israel Kumpite’ Khang Tangthu Laibu sungah kigelh hi. Topa kiang panin amah a kihei khiat a kipanin amaute in amah sawmsimna khat Jerusalem-ah nei uh ahih ciangin Lakhish-ah amah tai hi. Ahih hangin amaute in Lakhish-ah amah nungdelh sak uh a, tua lai-ah amah that uh hi. Tua ciangin sakolte tungah amah pua-in kiciahpih a, David khuapi sungah a pate tawh kivui hi. Tua ciangin Judah mi khempeuh in kum sawm le guk a pha Uzziah la-in a pa Amaziah’ tangin kumpi-in a koih uh hi. Kumpi ahi ama pa a sih khit ciangin amah in Eloth khua la kikin Judah gam dingin a ngahkik hi. Uzziah in uk ding a kipatin kum sawm le guk pha a, amah in Jerusalem-ah kum sawmnga le nih sung uk hi. Ama nu’ min Jekoliah hi a, Jerusalem khuami ahi hi. A pa Amaziah’ hihsa khempeuh bangin amah in Topa’ mitah a man sem hi. Pasian zahtak ding ama tungah a hilh Zekhariah’ hun sungteng amah in Pasian zong hi. Amah in Topa a zon laiteng, Pasian in amah daupaisak hi. Amah kuankhia-in Filistia mite va sim a, Gath khuapi kulh, Jabneh khuapi kulh, le Ashdod khuapi kulh sucim hi. Tua ciangin amah in Ashdod gam sung le Filistia-te’ gam sung mun dangte-ah khuapite a lam hi. Filistia mite, Gurbaal-ah a teng Arab mite, le Meunim mite a dona-ah Pasian in amah huh hi. Ammon mite in Uzziah tungah siah puak uh a, amah a thahat mahmah suak ahih manin a minthanna in Egypt gam ciang dong nangawn zel hi. Tua tham loin Uzziah in Jerusalem a Kiu Kongpi le a Kuam Kongpi, le Kulh Keen sanah tausangte lam a, tuate kulh tawh a um hi. Tua ciangin amah in gamlakah tausangte lam a, Shefelah le zanglei-ah ganhon tampi nei ahih manin tuikhuk tampi to a, lei nasep uuk ahih manin mualtung le lei hoihna gamte-ah lokhote le leenggui puahte a nei hi. Tua tham loin Uzziah in kumpipa’ khutnuai-ah galkap ukte khat ahi Hananiah’ ukna nuai-ah, lai-at Jeiel le ulian Maaseiah in mi a khop lai-in a khen khenin a koih a mi phazah mah bangin, galsim dingin a hoih galkap tampi a nei hi. A thahat galkapmang a vekpi-in tulnih le zaguk ahi hi. Amaute’ ukna nuai-ah galdona-ah kumpipa a huh dingin thahatna tawh gal a do thei ding galkap tul zanga om hi. Uzziah in galkap khempeuh a dingin lumte, teipite, sik lukhute, thalte, lot ding suangtangte a bawl hi. Amah in thaltangte le suang liante lot nadingin tausang omna munte le a kiute-ah koih ding, mi a siamte in a bawltawm sette, Jerusalem-ah a bawl hi. Amah a thahat dong a lamdangpi khatin kihuh ahih manin ama minthanna in gamlapi a zel hi. Ahih hangin amah a thahat ciangin a siat nadingin a kiphatsakna hong khang hi. Bang hang hiam cih leh Topa a Pasian tungah amah khial a, paknamtui biakna tau tungah paknamtui hal dingin Topa’ biakinn sungah a lut hi. Ahih hangin Topa’ siampi Azariah, a thahat mihing sawmgiat tawh ama nungah pai hi. Tua ciangin amaute in Kumpi Uzziah nialin ama kiangah, “Uzziah aw, Topa’ tungah paknamtui hal ding nangma hih ding hi lo hi. Paknamtui hal dingin a ki-ap, Aaron’ suan siampite’ hih ding ahi hi. Biakinn sung panin paikhia in; bang hang hiam cih leh na gamta khial a, hih bang hihna in Topa Pasian tung panin nang’ tungah pahtawina hong tun lo ding hi,” a ci uh hi. Tua ciangin Uzziah a heh suak hi. Tu-in amah in paknamtui a hal dingin a khut sungah paknamtui beel tawi a, siampite tungah a hehna hangin paknamtui biakna tau gei Topa’ biakinn sung siampite’ muhin ama taltangah phaknatna hong suakkhia hi. Tua ciangin siampi lian Azariah le siampi khempeuh in amah a et uh ciangin a taltangah phaknatna na nei hi. Tua ciangin amaute in manlang takin amah sawnkhia uh a, Topa in amah vat khin ahih manin amahmah zong a paikhia dingin nawhtat hi. Tua ahih ciangin a sih ni dong Kumpi Uzziah a phak hi a, amah miphak ahih manin inn tuam khatah a teng hi; bang hang hiam cih leh Topa’ biakinn panin amah kipuaseh hi. Tua ciangin a tapa Jotham in tua gam mite a uk hi. Tu-in Uzziah’ gamtatna a omlaite, a patna panin a tawp dong, Amoz’ tapa kamsang Isaiah in gelh hi. Uzziah si a, amaute in kumpite’ neihsa hanah vui loin a huang sungah a vui uh hi; bang hang hiam cih leh amaute in, “Amah a phak ahi hi,” a ci uh hi. Tua ciangin a tapa Jotham in ama tangin a uk hi. Jotham in uk ding a kipatin kum sawmnih le nga pha a, amah in Jerusalem-ah kum sawm le guk sung uk hi. Ama nu’ min Jerushah hi a, Zadok’ tanu ahi hi. A pa Uzziah hihsa khempeuh bangin Topa’ mitah a man gamta hi. Ahih hangin a pa bangin Topa’ biakinn sungah amah va mawk lut lo hi. Ahih hangin mite in a sia gamtatnate zui lai uh hi. Jotham in Topa’ biakinn kulhkongpi tungnung lam a, Ofel kulh tungah zong inn tampi a lam hi. Tua tham loin amah in Judah mualtung gamah khuapite, le sing tamna mualte tungah munmuanhuaite le tausangte a lam hi. Amah in Ammon kumpipa sim a, amaute a zo hi. Tua ciangin Ammon mite in tua kumin ama tungah ngun talen zakhat, mangbuh lawh tul sawm, le mangbuhham lawh tul sawm mah a puak uh hi. Ammon mite in ama tungah a kum nihna le a kum thumna kumin tua zah mah a puak uh hi. Tua ahih ciangin Topa a Pasian’ mai-ah Jotham a hoih tatna tawh kizui-in a vang zong a lian hi. Tu-in Jotham’ gamtatna a omlaite, le a galsimnate, le a omziate, Israel le Judah Kumpite’ Tangthu Laibu sungah kigelh hi. Amah in uk ding a kipatin kum sawmnih le nga pha a, Jerusalem-ah kum sawm le guk sung uk hi. Tua ciangin Jotham si a, David khuapi sungah amaute in amah a vui uh hi. Tua ciangin a tapa Ahaz in ama tangin a uk hi. Ahaz in uk ding a kipatin kum sawmnih pha a, amah in Jerusalem-ah kum sawm le guk sung uk hi. A pu David gamtat hoih bangin Topa’ mitah a man gamta lo a, Israel kumpite’ khekhap zuizaw hi. Amah in a kisung milimte nangawn Baal-te a dingin a bawl hi. Tua ciangin Hinnom’ tapa’ kuamah paknamtui hal a, Topa in Israel-te’ mai-ah a hawlkhiat minamte in a zat uh a kihhuai gamtatnate mah bangin biakna-in a tapate a hal hi. Tua ciangin amah in mual dawna biakpiaknate, le mual neute, le singniim nuai khempeuhah biakna pia-in paknamtui a hal hi. Tua ahih ciangin Topa in Syria kumpipa khut sungah amah pia a, amah in zo-in mi tampi salin Damaskas-ah a ciahpih hi. Israel kumpipa’ khut sungah zong amah kipia a, amah zo-in a mite tampi tak a that hi. Bang hang hiam cih leh amaute in a pu a pate uh Pasian, Topa nusia uh ahih manin Remaliah’ tapa Pekah in nikhat thu-in amaute galhang mihing tul zakhat le tul sawmnih, Judah gam sungah a that hi. Tua ciangin Efraim mi a thahat Zikri in Kumpi Ahaz’ tapa Maaseiah le kumpi inn a uk Azrikam le kumpipa zomah aana a nei Elkanah a that hi. Israel mite in amau’ beh Judah mite lak panin numeite, tapate, le tanute, mihing tul zanih salin a man uh hi. Amaute in amau’ kiang panin van tampi zong la-in tua vante Samaria-ah a ciahpih uh hi. Ahih hangin Oded min nei Topa’ kamsang khat tua lai-ah om hi. Samaria-ah hong tung galkapte a dawn dingin amah paikhia-in amaute kiangah, “En un, Judah tungah na pu na pate uh Pasian Topa heh ahih manin note’ khut sungah amaute hong pia a, ahih hangin note in heh mahmahna tawh amaute na that uh a, tua in vantung dong ban hi. Tu-in note in Judah mi le Jerusalem mi, numei le pasalte, na sal dingun nuaisiah na sawm uh hi. Topa na Pasian uh tungah nomau mahmah in khialhna nei hi lo na hi uh hiam? Tu-in ka thugen hong za unla, na behte uh kiang panin na lak uh na galmatte uh puakkik un; bang hang hiam cih leh note tungah Topa’ hehna a lauhuai om hi,” a ci hi. Efraim mi ukpite pawkhat, Johanan’ tapa Azariah, Meshillemoth’ tapa Berekhiah, Shallum’ tapa Jehizkiah, le Hadlai’ tapa Amasa, galsung panin hong tungte’ langkhatah pangin amaute kiangah, “Tuhuna i khialhnate le i mawhna behlapin Topa’ tungah mawhna eite tungah behlap hong sawm na hih manun hih lai-ah galmatte nong tunpih kei ding uh hi. Bang hang hiam cih leh i mawhna lian khinzo a, Israel tungah a lauhuai hehna om hi,” a ci uh hi. Tua ahih ciangin galhiam tawi mite in uliante le a kikhawm khempeuh’ mai-ah galmatte le a lak uh nate nusia uh hi. Tua ciangin tua na a sem dingin mite dingin galmatte la uh a, amaute lakah guaktangin a omte, a vanlakte uh sung pan puante silhsak uh hi. Amaute puan silhsak uh a, khedap kaihte pia-in anletui vak uh a, sathau nilh uh hi. Tua ciangin amaute lakah a tha ginalote la tungah pua uh a, nisuh khuapi ahi Jerikho khua amau’ behte kiangah paipih uh hi. Tua ciangin Samaria-ah amaute ciahkik uh hi. Tua hun laitakin Kumpi Ahaz in Assiria kumpipa kiangah huhna a ngen dingin mi a sawl hi. Bang hang hiam cih leh Edom mite in Judah simkikin zo uh a, galmatin a mite puakhia uh hi. Tua ciangin Filistia mite in Shefelah le Judah-te’ Negeb gam sung khuapite luh uh a, Bethshemesh, Aijalon, Gederoth, Soko a khuaneute tawh, Timnah a khuaneute tawh, le Gimzo a khuaneute tawh la uh a, amaute tua munah teng uh hi. Judah Kumpi Ahaz pen Judah mite tungah kihihsakna tawh gamta-in Topa’ tungah citak lo ahih manin ama hangin Topa in Judah mite niamkoih hi. Tua ahih ciangin Kumpi Ahaz’ ngetna zui-in Assiria kumpipa Tiglathpileser hong kuan hi. Ahi zongin amah thakhauhsakzaw loin gimsakzaw hi. Bang hang hiam cih leh Ahaz in Topa’ biakinn, kumpipa’ inn, le uliante’ inn panin vanmanphate la-in Assiria kumpipa tungah siah pia a, ahih hangin hihte khempeuh a kimanna om lo hi. Hih Kumpi Ahaz mah pen, a lungkham hunin Topa’ tungah citak lozaw lai hi. Bang hang hiam cih leh amah a zo Damaskas-te’ pasian-te tungah biakna pia-in, “Syria kumpite’ pasian-te in amaute huh ahih manin amaute in kei hong huh theih nadingun amau’ tungah biakna ka pia ding hi,” ci hi. Ahih hangin tua pasian-te pen amah le a mipihte khempeuh’ siatna ahi hi. Tua ciangin Ahaz in Pasian’ biakinn-a umlebeelte khawmin satnen a, tua ciangin Topa’ biakinn kongkhakte a kalhcip hi. Tua ciangin ama a dingin Jerusalem kiu khempeuhah biakna tau a bawl hi. Amah in pasian dangte tungah paknamtui hal nadingin Judah khuapi khempeuhah mual dawna biakpiaknate bawl a, a pu a pate’ Pasian, Topa a heh nadingin a phin hi. Tu-in ama gamtatna a omlaite le a omzia khempeuh, a patna panin a tawpna dong, Judah le Israel Kumpite’ Tangthu Laibu sungah kigelh hi. Tua ciangin Ahaz si a, amaute in Jerusalem khuapi sungah vui uh a, ahi zongin Judah kumpite tawh vuikhawm lo uh hi. Tua ciangin a tapa Hezekiah in ama tangin a uk hi. Hezekiah in uk ding a kipatin kum sawmnih le nga pha a, amah in Jerusalem-ah kum sawmnih le kua sung uk hi. Ama nu’ min Abijah hi a, Zekhariah’ tanu ahi hi. A pu David’ hihnasa khempeuh bangin Topa’ mitah a man gamta hi. Ama uk a kum khatna, a kha masa sungin amah in Topa’ biakinn kongkhakte hongin tuate a puah hi. Amah in siampite le Levi mite paipihin nisuahna lam mun awngah amaute khawmin amaute kiangah, “Levi mite aw, ka thugen hong za un! Tuni-in nomau kisiansuah unla, na pu na pate uh Pasian, Topa’ biakinn siangthosakin a ninsak thei na khempeuh siangtho mun panin nawnkhia un. Bang hang hiam cih leh i pute i pate citak lo a, Topa i Pasian’ muhna-ah a sia gamta uh hi. Amaute in amah nusia-in, Topa i Pasian’ muhna-ah a sia gamta uh hi. Amaute in amah nusia-in, Topa’ tenna panin a mai uh heikhia uh a, a nung uh ngat uh hi. Amaute in innliim kongkhakte zong khakin meivakte sumit uh a, siangtho munah paknamtui halna le meihal biaknate Israel Pasian tungah bawl lo uh hi. Tua ahih ciangin Judah le Jerusalem tungah Topa’ hehna hong tung a, note’ mit mahmah tawh na muh uh mah bangin amah in amaute a cikzethuai, lamdangsakna, le a dipkuathuai-in a bawl hi. Bang hang hiam cih leh en un, hih thu hangin namsau-in i pu i pate puk uh a, i tapate, i tanute, le i zite galmatin om uh hi. Tu-in a lauhuai a hehna eite tung pan a kiheikhiat theih nadingin Israel Pasian, Topa tawh thuciamna khat bawl ding ka lungsimah om hi. Ka tate aw, Topa in ama omna-ah a ding ding, ama na a sem ding, le ama nasemte hi-in ama tungah paknamtui a hal dingin note hong teel khin ahih manin tu-in mawk om kei un,” a ci hi. Tua ciangin Levi mite, Kohath’ beh sung panin Amasai’ tapa Mahath, le Azariah’ tapa Joel; Merari’ beh sung panin Abdi’ tapa Kish, le Jehallelel’ tapa Azariah; Gershon beh sung panin Zimmah’ tapa Joah, le Joah’ tapa Eden; Elizafan’ beh sung panin Shimri le Jeuel; Asaf’ beh sung panin Zekhariah le Mattaniah; Heman’ beh sung panin Jehiel le Shimei; Jeduthun’ beh sung panin Shemaiah le Uzziel kipan uh hi. Amaute in a sanggamte uh khawmin amau kisiansuah uh a, Topa’ genna tawh kumpipa’ thupiak bangin Topa’ biakinn a puahsiang dingin a tum uh hi. A puahsiang dingin Topa’ biakinn sung tawngnungah a siampite lut uh a, Topa’ biakinn sunga a muh uh a nin khempeuh Topa’ biakinn tualah hong paikhiatpih uh hi. Tua ciangin Levi mite in la-in Kidron lui-ah puakhia uh hi. Kha masa a ni masa ni-in amaute in siansuah ding kipan uh a, tua kha a ni giat ni-in Topa’ innlimah amaute hong pai uh hi. Tua ciangin amaute in ni giat sung Topa’ biakinn siansuah uh a, a kha masa a ni sawm le guk ni-in zo uh hi. Tua ciangin kumpipa Hezekiah kiangah amaute tumin, “ Topa’ biakinn khempeuh, meihal biakna tau le a nazatte khempeuh, le Ompihna Anlum sabuai le a nazatte khempeuh ka puahsiang khin uh hi. Kumpi Ahaz a cihtak loh laitakin ama uk sungin a paihkhiat nazat khempeuh a baihsa-in bawlin ka siansuah uh hi. Topa’ biakna tau mai-ah tu-in tuate om hi,” a ci uh hi. Tua ciangin kumpipa Hezekiah tho baihin khuapi sung zaneite khawmin Topa’ biakinn-ah a paito uh hi. Tua ciangin amaute in kumpi gam le biakinn le Judah a dingin khialhna hanga biakna-in bawngtal sagih, tuutal sagih, tuuno sagih, le keel sagih hong paipih uh hi. Tua ciangin amah in Topa’ biakna tau tungah tuate a pia dingin Aaron’ suan siampite a sawl hi. Tua ahih ciangin amaute in a bawngtalte go uh a, siampite in a sisan la-in biakna tau tungah theh uh hi. Tua ciangin amaute in tuutalte go-in a sisan tawh biakna tau theh uh hi. Tua ciangin amaute in tuunote go-in a sisan tawh biakna tau theh uh hi. Tua ciangin khialhna hanga biakna ding keeltal sagihte kumpipa le a kikhawmte kiangah hong kipaipih a, amaute in tuate tungah a khut uh nga hi; tua ciangin Israel khempeuh a dingin pumkhat suahna bawl nadingin siampite in go-in tuate’ sisan tawh biakna tau tungah khialhna hanga biakna a bawl uh hi. Bang hang hiam cih leh Israel khempeuh a dingin meihal biakna le khialhna hanga biakna a bawl ding uh kumpipa in thu pia hi. Tua ciangin amah in David le kumpipa’ thumu pa Gad le kamsang Nathan’ thupiakna bangin Topa’ biakinn sungah daltuahte, harp lasaknate, le laiza lasaknate tawh Levi mite a koih hi; bang hang hiam cih leh tua thupiakna pen kamsangte’ tungtawnin Topa’ kiang pan a hong pai ahi hi. David’ lasaknate tawh Levi mite ding uh a, peengkulte tawh siampite ding uh hi. Tua ciangin biakna tau tungah meihal biakna a kipiakna ding Hezekiah in thu a pia hi. Meihal biakna a kipat ciangin Topa’ tungah lasakna zong kipan a, Israel kumpi David’ lasaknate in peengkulte pawm hi. A kikhawm khempeuh in Pasian bia-in, lasate inla sa uh a, peengkul tumte in peengkul tum uh hi. Meihal biakna a kiman mateng hihte khempeuh hih paisuak uh hi. Biakpiakna a kiman ciangin kumpipa le amah tawh a om khempeuhte kunin Pasian a bia uh hi. Tua ciangin David’ kammalte le thumu pa Asaf’ kammalte zangin Topa’ tungah phatna la a sak nadingun kumpipa Hezekiah le uliante in Levi mite thu a pia uh hi. Tua ciangin amaute in lungdamna tawh phatna late sa uh a, tua ciangin amaute kunin Pasian a bia uh hi. Tua ciangin Hezekiah in, “Tu-in Topa’ tungah nomau mah na ki-ap khin uh hi. A nai-ah hong pai unla Topa’ biakinn-ah biakpiaknate le lungdam piaknate hong paipih un,” a ci hi. Tua ciangin a kikhawmte in biakpiaknate le lungdam piaknate hong paipih uh hi. Tua ciangin piaknopna lungsim a nei khempeuh in meihal biaknate hong paipih uh hi. A kikhawmte in a hong paipih meihal biakna a phazah bawngtal sawmsagih, tuutal zakhat, le tuuno zanih hi a, hihte khempeuh pen Topa’ tungah meihal biakna khat ahi hi. A ki-ap biaknate bawngtal zaguk le tuu tulthum ahi hi. Ahih hangin siampite a mi tawmlua uh ahih manin meihal biaknate khempeuh a vun hawk khin zo lo uh a, siampi dangte a kisiansuah ma sungteng, a sanggam uh Levi mite in nasep a kizawh mateng amaute huh uh hi. Bang hang hiam cih leh kisiansuahna thu-ah siampite sangin Levi mite ngentel zaw uh hi. Meihal biakna a tampite banah thunuama biakna thaute, le meihal biakna a dingin leenggahzu tawh biaknate om hi. Tua bangin Topa’ biakinn sungah nasepna ki-omsakkik hi. Pasian in mite a dingin a bawlsak thute hangin Hezekiah le mi khempeuh lungdam uh hi; bang hang hiam cih leh tua thu thakhatin hong piangvat hi. Israel Pasian, Topa’ Paisan Pawi a bawl dingin Jerusalem-a Topa’ biakinn-ah hong pai nadingun Hezekiah in Israel mi khempeuh le Judah mite kiangah mi sawl a, Efraim mite le Manasseh mite tungah zong laikhakte a gelh hi. Bang hang hiam cih leh kumpipa le a uliante le Jerusalem-a a kikhawm khempeuh in Paisan Pawi a kha nihna sungin bawl ding kikum khin uh hi. Siampite mi a kicingzah ding amau kisiansuah nai lo uh a, mite zong Jerusalem-ah kikhawm nai lo uh ahih manin a hunin bawl thei lo uh hi. Hih geelna pen kumpipa le a kikhawm khempeuh a dingin hoih leh kilawm hi. Tua ahih ciangin mite hong pai-in Israel Pasian, Topa a dingin Jerusalem-ah Paisan Pawi a bawl nadingun Beersheba panin Dan ciang dong Israel sung khempeuhah taangkona khat a bawlna ding uh thukhensatna khat bawl uh hi; bang hang hiam cih leh bawl dinga a kigen bangin amaute in a lianpi-in bawl ngei lo uh hi. Tua ahih ciangin kumpipa le a uliante kiang pana laikhakte tawh Israel khempeuh le Judah sungah laikhakte tawh pai uh a, kumpipa’ thupiakna: “Israel mite aw, Assiria kumpite’ khutsung panin a suakta, a omlai note’ lamah amah hong kiheikik theih nadingin Abraham, Isaac, le Israel Pasian, Topa’ lamah kiheikik un. Note in na theih uh bangin, amau’ pute pate’ Topa Pasian’ tungah a cihtak lohna uh hangin nakpitakin gim a piak na pute na pate uh le na sanggamte uh bang kei un. Tu-in na pute na pate uh bangin lungkhauh kei unla, note kiang panin a lauhuai ama hehna a kiheikhiat theih nadingin Topa’ lamah kipia unla, amah in a tawntung dingin a sianthosaksa a biakinn-ah Topa na Pasian uh bia un. Bang hang hiam na cih uhleh Topa’ lamah note na kilehkik uhleh, na sanggamte uh le na tate un amau a mante’ tung panin hehpihna ngahin hih gamah hong ciahkik ding uh hi. Bang hang hiam cih leh Topa na Pasian uh dikna le hehpihna a nei hi a, ama lamah na kiheikik nak-uhleh note kiang panin a maitang heikhia lo ding hi,” ci-in a gen uh hi. Tua ahih ciangin Efraim le Manasseh gam sung khuapi khat pan khuapi khat, le Zebulun ciang dongah laitaite a pai uh hi. Ahih hangin amaute in na nuihsanin zahpih uh a, na simmawh bawl uh hi. Asher mi, Manasseh, le Zebulun mi tawmkhat bek kiniamkhiatin Jerusalem-ah hong pai uh hi. Topa’ thupiakna tawh kumpipa le uliante’ sawlna a sem dingin Judah mite tungah Pasian in lungsim kikhatna a guan hi. Tua ciangin a kha nihna sungin silngo sawh loh anlum pawi a bawl dingin Jerusalem-ah mihon tampi tak hong pai uh hi. Amaute nasem dingin kipanin Jerusalem-a biakna taute hemkhia uh a, paknamtui halna ding biakna taute khempeuh amaute in lakhia-in Kidron kuamah paai uh hi. Tua ciangin amaute in a kha nihna a ni sawm le li ni-in Paisan Pawi tuuno go uh hi. Tua ciangin biakna vai-in a siangtho nai lo siampite le Levi mite nakpitakin maizum uh hi. Tua ahih ciangin amau mah kisiansuahin Topa’ biakinn sungah meihal biaknate hong paipih uh hi. Pasian’ mipa Moses’ thukham bangin amaute in amau’ panmun ngei hong la uh a, siampite in Levi mite’ khut tung panin a ngah uh sisan theh uh hi. Bang hang hiam cih leh a kikhawm lakah amau mah a kisiansuah nai lo tampi om uh hi. Tua ahih ciangin Topa’ tungah a siangtho-in a kibawl nadingun a nin khempeuh a dingin Levi mite in Paisan Pawi tuuno a gawh ding uh kisam hi. Bang hang hiam cih leh mi tampi tak, Efraim, Manasseh, Issakhar, le Zebulun sung pan, amau mah kisiansuah nai lo uh a, ahi zongin ngeina lopi-in amaute in Paisan Pawi ne uh hi. Bang hang hiam cih leh Hezekiah in amaute a dingin thu ngenin, “Ka pute ka pate uh’ Pasian a dik Topa aw, biakinn sianthona ngeina om bangin lungsim tak tawh nang hong biate khempeuh’ mawhna maisak in,” a ci hi. Tua ciangin Topa in Hezekiah’ thungetna pia-in mite’ mawhna maisak a, gimna ngahsak lo hi. Tua ciangin Jerusalem-ah a om Israel mite in lungdamna lianpi tawh ni sagih sung silngo sawh loh anlum pawi a bawl uh hi. Tua ciangin Levi mite le siampite in a hatna khempeuh uh tawh Topa la sak uh a, a ni ni-in Topa phat uh hi. Tua ciangin Hezekiah in Topa’ nasepna-ah a siamna hoih uh a lak Levi mite khempeuh tungah hanthotna thu a gen hi. Tua ahih ciangin mite in pawi an ni sagih sung ne uh a, thunuama biakna pia-in a pu a pate uh Pasian, Topa tungah lungdamna a ko uh hi. Tua ciangin adang ni sagih sung mah tua pawi a bawlthuah lai ding uh a kikhawm khempeuh thukim uh hi. Tua ahih ciangin amaute in lungdamna tawh adang ni sagih sung mah bawlthuah uh hi. Bang hang hiam cih leh Judah kumpipa Hezekiah in biakpiak nadingin a kikhawmte tungah bawngtal tulkhat le tuu tulsagih pia a, uliante in a kikhawmte tungah bawngtal tulkhat le tuu tul sawm pia uh hi. Siampite tampi tak amau mah kisiansuah uh hi. Judah mi a kikhawm khempeuh, le siampite le Levi mite, le Israel panin a hong paikhia a kikhawm khempeuh, le Israel gam panin a hong paikhia peemtate, le Judah gam sungah a teng peemtate, lungdam uh hi. Israel kumpi David’ tapa Solomon hun a kipanin Jerusalem-ah hih bang om ngei lo ahih manin Jerusalem-ah lungdamna lianpi a om hi. Tua ahih ciangin siampite le Levi mite dingin mite thupha pia uh a, amau’ awging kiza-in, amau’ thungetna in vantung a a siangtho ama tenna a banto hi. Tu-in hihte khempeuh a man ciangin, tua lai-a a om Israel khempeuh Judah khuapite-ah pai-in biakna songte sat khamin Asherah milimte phukin, Judah le Benjamin sung, le Efraim le Manasseh sunga mual dawna biakpiaknate le biakna taute a suksiat khit mateng uh phelkek uh hi. Tua ciangin Israel mi khempeuh, a mi kimin amau’ inn omna a khuapi ciat uhah a ciah uh hi. Tua ciangin Hezekiah in siampite le Levi mite amau’ nasep ciat tawh kizui-in a khen a khenin seh a, siampite le Levi mite in meihal biaknate le thunuama biaknate pia-in, Topa’ biakinn sung phual tuamtuamte-ah na semin lungdamkohna le phatna a bawl ding uh ahi hi. Kumpipa in ama neihsa sung panin a piakte pen meihal biakna ding ahi hi. Topa’ thukham sungah a kigelh mah bangin zing le nitak a meihal biaknate, Sabbath nite, Khadet nite, le a kiseh pawite a dingin meihal biaknate ahi hi. Tua ciangin Topa’ thukham om bangin nasepna-ah siampite le Levi mite a kibuppiak theih nadingun amau’ ngah ding a kilawm nate, Jerusalem-a a teng mite in amaute tungah a piak nadingun amah in a sawl hi. Tua thupiakna a kitheihthang phetin Israel mite in anpalte, leenggahzu, le lo-a piang khempeuh tampi tak hong pia uh hi. Tua ciangin amaute in na khempeuh sung pan sawm-ah-khat ahi tampi tak hong paipih uh hi. Tua ciangin Judah khuapite sungah a teng Israel mite le Judah mite in zong bawng le tuu sawm-ah-khat le Topa a Pasian uh tungah a kipiasa a ki-ap nate hong paipih uh a, a lom a lomin a koih uh hi. A kha thumna sungin amaute in tua a lomte cian ding kipan uh a, a kha sagihna sungin a mansiang uh hi. Hezekiah le uliante hong pai-in a lomte a muh uh ciangin amaute in Topa le ama mi Israel-te thupha a pia uh hi. Tua ciangin Hezekiah in a lomte’ thu, siampite le Levi mite a dong hi. Zadok’ suan ahi siampi lianpen pa Azariah in amah dawngin, “Amaute in amau’ piakte uh Topa’ biakinn sungah paipih ding hong kipat uh a kipan kote in an ka ne uh a, a kicing nei-in tampi vallai hi. Topa in ama mite thupha pia ahih manin hih na tampi a omlai i nei hi,” a ci hi. Tua ciangin amaute in Topa’ biakinn sungah inndeite a bawlna ding uh Hezekiah in thu pia a, amaute in zong a deite a bawl uh hi. Tua ciangin amaute in a piaknate, sawm-ah-khat le a ki-ap nate cihtakna tawh hong paipih uh hi. Tuate a en ulian pen pa Levi mi Konaniah hi a, a sanggampa Shimei pen amah a huhpa ahi hi. Kumpipa Hezekiah le Pasian’ biakinn ukpa Azariah’ sehna tawh Jehiel, Azaziah, Nahath, Asahel, Jerimoth, Jozabad, Eliel, Ismakhiah, Mahath, le Benaiah-te in Konaniah le a sanggampa Shimei huhin a ukte ahi uh hi. Tua ciangin nisuahna lam kulhkongpi cing pa, Levi mi Imnah tapa Kore pen Topa a’ ding le siangtho pen biak nadingin koihcing dingin a kipiate a sehkhen dingin, Topa’ tungah utthu-a piaknate a ukpa ahi hi. Eden, Miniamin, Jeshua, Shemaiah, Amariah, le Shekaniah-te in siampite’ khuapi sungah a moi a ham a kibangin a khen khenin, a ngah ding ciat a sanggamte uh tungah a hawm dingin cihtakna tawh amah huh uh hi. Khangsimna-a amau’ kiciamtehna tawh kisai-in a kipia hi tuan loin, a khen khenin amau’ panmun tawh kizui-in nisimin nasepna-ah a kisam bangin Topa’ biakinn sungah a lut, kum thum le a tungsiah a pha pasal khempeuh tungah tanh kipia kim hi. Siampite a beh zui-in nasep kipia hi. Levi mi kum sawmnih le a tungsiahte a khen khenin amau’ panmun tawh kizui-in nasep kipia hi. Siampite a naupangte khempeuh, a zite, a tapate, le a tanute uh tawh a mihon bupin kiciamteh hi; bang hang hiam cih leh a siangtho-in a kikepna uhah amaute citak uh hi. Amau’ khuapite-a’ ahi taang gam lote-ah a om Aaron’ suan siampite a’ ding ahihleh, a kiciamteh siampite’ lak le Levi mite lakah pasal khempeuh tungah amau’ ngah ding ciat a hawmkhia dingin a minin a kiseh mi, khuapi tampite sungah a om hi. Tua bangin Hezekiah in Judah gam sung khempeuhah hih hi. Amah in Topa a Pasian’ mai-ah a hoih le a manin gamta-in cihtakna tawh a sem hi. Amah in Pasian’ biakinn sung nasepna le thukham le thupiaknate tawh kizui-in a hihna-ah ama Pasian zongin, a lungsim khempeuh tawh sem a, a maa a vang hi. Hih thute khempeuh le citak a hih banga na a kisep khit ciangin Assiria kumpipa Sennakherib hong pai-in Judah simin kulhnei khuapite’ langkhatah phual sat a, ama a dingin lak a sawm hi. Sennakherib hong pai-in Jerusalem sim ding a sawmna thu Hezekiah in a theih ciangin, amah in a uliante le a mi thahatte tawh khuapi pualamah a luangkhia tuinakte khakcip ding vaihawm a, amaute in amah a huh uh hi. Mi tampi tak kikhawm uh a, gam sungah a luang tuinak le lui khempeuh khakcipin, “Bang hangin Assiria kumpite hong pai-in tui tampi mu ding ahi uh hiam?” a ci uh hi. Amah in lungsim khotakin sep ding kipan a, a cimsa kulh khempeuh ciangpha-in tua tungah tausangte koihto a, tua pualamah kulh dang khat a ciang hi. Amah in David khuapi sungah Millo a muanhuai-in a bawlpha hi. Amah in galhiamte le lumte zong tampi bawl hi. Amah in mite a uk dingin galdona-ah a ukte koih a, khuapi kulhkongpi mun awnna ama kiangah amaute khawmin amaute tungah hanthotna tawh thu genin, “Thakhauh unla hang un. Assiria kumpipa le amah tawh a om mihon khempeuh mai-ah lau kei unla, zong lungkia kei un; bang hang hiam cih leh amah tawh a omte sangin eite tawh a om pa lianzaw hi. Amah in mihing thahatna nei a, ahih hangin eite hong huhin i gal hong dosak dingin Topa i Pasian in eite hong ompih hi,” a ci hi. Tua ahih ciangin mite in Judah kumpipa Hezekiah’ kammalte a muang uh hi. Hih thute khit ciangin a galkap khempeuh tawh Lakhish a umcih, Assiria kumpipa Sennakherib in Judah kumpipa Hezekiah le Jerusalem-ah a om Judah mi khempeuh kiang Jerusalem-ah a nasemte sawlin, “Assiria kumpipa Sennakherib in hih bangin ci hi: ‘Note in Jerusalem umcihna na nanna ding uh bang suang na hi uh hiam? Hezekiah in note kiangah, “Assiria kumpipa’ khut panin Topa i Pasian in eite hong honkhia ding hi,” hong cih ciangin, note gilkial dangtakin a hong sisak dingin amah in note hong makai khial hi lo ahi hiam? Hih Hezekiah mah in mual dawna a biakpiaknate le ama biakna taute lakhia-in Judah le Jerusalem thu pia a, “Biakna tau khat mai-ah note in bia-in tua tungah na biakpiaknate uh na hal ding uh hi,” ci hi lo ahi hiam? Keimah le ka pu ka pate in gamdang mi khempeuh tungah ka hihnasate uh thei lo na hi uh hiam? Tua gam minamte’ pasian in keima khutsung panin a gam uh honkhiazo ahi uh hiam? Na Pasian un keima khutsung panin note hong hotkhiat theih nadingin ka pu ka pate in a suksiatmang tua minamte’ pasian khempeuh lakah kua in a mite honkhiazo ngei ahi hiam? Tua ahih ciangin tu-in note, Hezekiah’ khemsa-in ta kei unla, hih bangin kimakai khialsak kei un. Amah um kei un; bang hang hiam cih leh minam khatpeuh, kumpi gam khatpeuh’ pasian in keima khut pan ahi a, ka pu ka pate’ khutsung pan ahi zongin a mite honkhiazo ngei nai lo hi. Keima khutsung pan na Pasian un note hong honkhia zo lo zaw kan ding hi,’ ci un,” a cisak hi. Tua ciangin ama nasemte in Topa Pasian le a nasempa Hezekiah langpangin thu tamzaw gen lai uh hi. Tua ciangin amah in Israel Pasian, Topa’ hehna ding le amah a langpanna-in laikhakte gelh a, “Ka khutsung panin a mite a honkhia zo lo gam sung minam dangte’ pasian-te mah bangin ka khutsung panin Hezekiah’ Pasian in a mite honkhia zo lo ding hi,” ci hi. Amaute in khuapi a laktheih nadingin khuapi mite lau-in a linglawnsak nadingun kulh tungah a om Jerusalem mite tungah Judah pau tawh nakpitakin kiko uh hi. Amaute in, mite’ khut tawh a kibawl leitung mite’ pasian-te a gen bang lelun Jerusalem Pasian a gen uh hi. Tua ciangin kumpipa Hezekiah le Amoz’ tapa, kamsang Isaiah in hih thu hangin thu ngenin vantung lamah kiko uh hi. Tua ciangin Topa in Assiria kumpipa’ giahphual ah a thahat galhang khempeuh le galkap a ukte le uliante a susia vantungmi khat a sawl hi. Tua ahih ciangin ama gamah maizumna tawh a ciahkik hi. Ama pasian’ inn sungah amah a tun ciangin ama tapate pawlkhat in namsau tawh amah satlum uh hi. Tua ahih ciangin Topa in Assiria kumpipa Sennakherib’ khut le ama galte khempeuh panin Hezekiah le Jerusalem-a a tengte honkhia a, amah in mun khempeuh panin galdaihna amaute tungah a pia hi. Tua ciangin mi tampi in Jerusalem khua Topa kiangah letsongte hong puakin, Judah kumpi Hezekiah kiangah na manphate hong puak uh a, tua hun a kipanin minam khempeuh’ muhna-ah amah kisangtawi hi. Tua hun lai-in Hezekiah cina-in si dektak a, amah in Topa’ tungah thu ngen hi. Topa in a ngetna pia-in ama tungah lim khat a pia hi. Ahih hangin a lungsim kiphasak ahih manin ama tungah phattuamna a kibawl zahin Topa’ tungah Hezekiah in lungdam ko nuam lo hi. Tua ahih manin amah le Judah le Jerusalem tungah Topa’ hehna hong tung hi. Ahi zongin a nung ciangin Hezekiah a lungsim kiphatsakna thu-ah amah le Jerusalem-a teng mite tawh kiniamkhiat uh ahih manin amaute’ tungah Topa’ hehna hong tung lo hi. Hezekiah hau mahmahin a min thang mahmah hi. Amah in ngun, kham, suangmanphate, a namtui nate, lumte, a manpha umlebeel khempeuh a dingin vanmanpha koihnate a bawl hi. An, leenggahzu, le sathau koihna ding vankoihnate zong a bawl hi. Ganhing nam khempeuh a dingin ganbukte, le tuubukte a bawl hi. Amah in tua bangmahin amahmah a dingin khuapite le tuuhonte le ganhonte tampi a koih hi; bang hang hiam cih leh Pasian in ama tungah neihsa tampi tak pia hi. Hih Hezekiah mah in Gihon tui tungnungte khaktanin David khuapi nitumna lampangah luangsak hi. Hezekiah a nasepna khempeuhah a maa vang hi. Tua ahih ciangin gam sung omzia lim a kan dingin ama kiangah a kisawl Babylon uliante’ kamtaite tawh kisai-in, amah a ze-etna ding le ama lungsim sungah bang om hiam cih a vekpi-in a theih nadingin Pasian in ama thu-in amah a omsak hi. Tu-in Hezekiah’ gamtatna a omlaite, le ama nasep hoihte, Judah le Israel Kumpite’ Khang Tangthu Laibu sung, le Amoz’ Tapa, Kamsang Isaiah’ Maangmuhna sungah kigelh hi. Tua ciangin Hezekiah si a, amaute in David’ suante’ han paina mualpangah amah vui uh hi. Judah mi khempeuh le Jerusalem-a tengte in a sih lai-in amah zahtakna bawl uh hi. Tua ciangin ama tapa Manasseh in ama tangin a uk hi. Manasseh in uk ding a kipatin kum sawm le nih pha a, amah in Jerusalem-ah kum sawmnga le nga sung uk hi. Topa in Israel minamte’ mai-ah a hawlkhiat minamte’ zat a kihhuai gamtatnate mah bangin, Topa’ muhna-ah amah a sia gamta hi. Bang hang hiam cih leh a pa Hezekiah in a suksiatsa mual dawna biakpiaknate amah in lamkikin, Baal-te a dingin biakna taute phut a, Asherah milimte bawlin vantung nate khempeuh bia a, tuate’ na sem hi. Topa in, “Jerusalem-ah ka min om tawntung ding hi,” a cihna Topa’ biakinn sungah amah in biakna taute a lam hi. Tua ciangin amah in Topa’ biakinn tual nihte sungah vantung nate khempeuh a dingin biakna taute lam hi. Tua ciangin amah in Hinnom’ tapa’ kuamah biakna-in a tapate hal a, aisanna le mailam thugenkholhna le khongkhaina zang a, vankah theite le aisante tawh na semkhawm hi. Amah in Topa’ muhna-ah siatna tampi bawl a, amah hehsak hi. Manasseh in Judah le Jerusalem-a tengte zol ahih manin, Israel mite’ mai-ah Topa in a suksiat minamte sangin amaute a sia tamzaw gamta uh hi. Topa in Manasseh tung le ama mite tungah thu gen a, ahih hangin amaute in don lo uh hi. Tua ahih ciangin Topa in Assiria kumpipa’ galkap ukte amau’ kiangah paipih a, amaute in sikkawite tawh Manasseh manin sumngo khau tawh khihin Babylon-ah a paipih uh hi. Amah a lungkham ciangin Topa a Pasian kunh-in a pu a pate’ Pasian’ mai-ah nakpitakin amahmah kiniamkhiat hi. Amah in ama kiangah thu ngen a, tua ciangin Pasian in ama kutna saangin, a thumna a ngai hi. Amah in Jerusalem-ah amah paipih kikin a kumpi gam a piakik hi. Tua ciangin Topa pen Pasian ahihna Manasseh in a thei hi. Tua khit ciangin amah in kuam sung, Gihon nitumna lam, David khuapi-ah, Ngasa Kongpi lutna lamah kulh puanung khat ciang a, Ofel kiimah ciang suakin a sang mahmahin ciangto hi. Amah in Judah gam sunga kulhnei khuapi khempeuhah zong galkap a ukte koih hi. Tua ciangin amah in Topa’ biakinn panin gamdang pasian-te le a milim lakhia a, Topa’ biakinn mualtung le Jerusalem-a ama lamsa biakna tau khempeuh lakhia-in, khuapi pualamah tuate paai hi. Amah in Topa’ biakna tau zong koihkikin tua tungah thunuama biakna le lungdamkohna a pia hi. Tua ciangin amah in Israel Pasian, Topa’ na a sep nadingun Judah-te thu a pia hi. Ahi zongin mite in mual dawna biakpiaknate ah biakna pia lai uh a, ahih hangin Topa amaute’ Pasian’ tung bek mahah a piak uh ahi hi. Tu-in Manasseh’ gamtatna a omlaite, le a Pasian’ tungah a thungetna, le Israel Pasian, Topa’ min tawh ama tungah thu a gen thumute’ thugente, Israel Kumpite’ Khang Tangthu sungah om hi. Tua ciangin ama thungetna, le ama kutna Pasian in a sanna, le ama khialhna le a cihtak lohna khempeuh, le amah a kiniamkhiat ma-in mual dawna biakpiaknate bawlin Asherah-te le milim dangte a koihna munte thu, Thumute’ Khang Tangthu sungah kigelh hi. Tua ciangin Manasseh si a, amaute in a inn sungah vui uh hi. Tua ciangin a tapa Amon in ama tangin a uk hi. Amon in uk ding a kipatin kum sawmnih le nih pha a, amah in Jerusalem-ah kum nih sung uk hi. A pa Manasseh’ gamtatnasa khempeuh bangin Topa’ muhna-ah amah a sia gamta hi. Amon in a pa Manasseh’ bawlsa milim khempeuh tungah biakna pia a, tuate’ na sem hi. A pa Manasseh a kiniamkhiat bangin Topa’ mai-ah amah kiniamkhiat lo a, hih Amon in mawhna tam piangsak semsem hi. Tua ciangin ama nasemte in amah sawmsimin ama inn sungah amah that uh hi. Ahih hangin tua gam mite in Kumpi Amon a sawmsim khempeuh that leuleu uh hi. Tua ciangin tua gam mite in ama tangin a tapa Josiah kumpi-in a koih uh hi. Josiah in uk ding a kipatin kum giat pha a, amah in Jerusalem-ah kum sawmthum le khat sung uk hi. Topa’ mitah a man gamta a, a pu David’ khekhap zui-in themkhat zong lampial lo hi. Ama uk a kum giatna sung, naupang ahi laipi mahin, amah in a pu David’ Pasian zon ding kipan hi. A kum sawm le nihna ciangin amah in Judah le Jerusalem panin mual dawna biaknate, Asherah milimte, le a kiseek le a kisung milimte beisiangsak ding kipan hi. Tua ciangin amah in Baal-te’ biakna taute ama muhna-ah supaisak hi. Tua ciangin amah in tuate tungah a om paknamtui biakna taute phuk a, Asherah milimte, le a kiseek le a kisung milimte sukhamin gawivui a, tuate’ tungah biakna a pia mite’ han tungah tua a vuite a theh hi. Amah in amau’ biakna taute tungah a siampite’ guhte zong hal a, Judah le Jerusalem a siangsak hi. Tua ciangin Manasseh, Efraim, le Simeon, le Naftali khuapi ciang dong, mun awngte le a kiim a pamah, amah in biakna taute sukhamin Asherah milimte le milim dangte satvui a, Israel gam sung khempeuhah paknamtui biakna taute a satvui hi. Tua ciangin Jerusalem-ah a ciahkik hi. Tu-in ama uk a kum sawm le giatna, gam sung le biakinn a siansak khit ciangin, Topa a Pasian’ biakinn a puah dingin amah in Azariah’ tapa Shafan, le khuapi sung ukpa Maaseiah, le thu ciamteh pa ahi, Joahaz’ tapa Joah a sawl hi. Siampi lianpen pa Hilkiah kiangah amaute hong pai uh a, kongcingte ahi Levi mite in Manasseh le Efraim, le Israel a omlaite khempeuh, le Judah le Benjamin khempeuh, le Jerusalem-a a teng mite tung panin a khop uh ahi, Pasian’ biakinn-ah a hong kipaipih sumte a pia uh hi. Amaute in Topa’ biakinn a vaan nasemte tungah tua sumte pia uh hi. Tua ciangin Topa’ biakinn-ah a sem nasemte in biakinn puahna ding le a ngei batsakkik nadingin pia uh hi. Amaute in a kito suangte leina ding, le Judah kumpite in a siatsak, tep nadingin singte le biakinn lam nadingin innkamte leina dingin khutsiamte le innlamte tungah a sumte a pia uh hi. Tua ciangin mite in cihtakna tawh na sem uh hi. Amaute tungah a en dingin Levi mi Merari-te beh sung pan Jahath le Obadiah, le Kohath-te beh sung pan Zekhariah le Meshullam kikoih hi. Levi mi, lasakna nazatte-ah siamna a nei khempeuh, vangik puate a uk, le nasep namkim a sem khempeuh a makaih uh hi. Tua ciangin Levi mi pawlkhatte pen laigelhte, le za neite, le kulhkongpi cingte ahi hi. Amaute in Topa’ biakinn-ah a kipaipih sumte a lakkhiat laitakun siampi Hilkiah in Moses tungtawnin a kipia thukham laibu a mu hi. Tua ciangin Hilkiah in lai-at pa Shafan kiangah, “ Topa’ biakinn sungah thukham laibu ka mu hi,” ci hi. Tua ciangin Hilkiah in Shafan tungah a laibu pia hi. Shafan in kumpipa kiangah a laibu paipihin ama kiangah, “Na nasemte tungah a kipia khempeuh amaute in a sep san laitak uh ahi hi. Topa’ biakinn sungah a kikoih sumte amaute in lakhia-in nasep vaante le nasemte tungah pia uh hi,” ci-in gen thuah lai hi. Tua ciangin lai-at pa Shafan in kumpipa kiangah, “Siampi Hilkiah in kei tungah laibu khat hong pia hi,” a ci hi. Tua ciangin Shafan in kumpipa mai-ah tua laibu a sim hi. Kumpipa in thukham kammalte a zak ciangin a puante balkek hi. Tua ciangin kumpipa in Hilkiah, Shafan’ tapa Ahikam, Mikah’ tapa Abdon, lai-at pa Shafan, le kumpipa’ nasempa Asaiah thu pia-in, “Pai unla, a kimu laibu sunga kammalte tawh kisai-in keima a’ ding le Israel le Judah-ah a omlai mite a dingin Topa thu va dong un; bang hang hiam cih leh i pu i pate in hih laibu sungah a kigelh khempeuh bangin sep ding Topa’ kammal na zui lo uh ahih manin eite tungah Topa’ hehna lian hi,” a ci hi. Tua ahih ciangin Hilkiah le kumpipa in a sawl mite, Hasrah, a tapa Tokhath, a tapa Shallum, biakinn puante a kem pa’ zi ahi kamsangnu Huldah kiangah pai-in (tu-in tua nu Jerusalem sung a Veng Nihna-ah teng hi) tua thu tawh kisai ama kiangah va gen uh hi. Tua ciangin tua nu in amaute kiangah, “Israel Pasian, Topa in hih bangin ci hi: ‘Kei kiangah note a hong sawl pa kiangah gen un. Topa in hih bangin ci hi: En un, Judah kumpipa mai-ah a kisim laibu sunga kigelh samsiatnate khempeuh ahi siatna, hih mun le a tungah a teng mi khempeuh tungah ka tungsak ding hi. Amaute in amau’ gamtatna tawh kei hong hehsak theih nadingun amaute in kei hong nusia-in pasian dangte tungah paknamtui hal uh ahih manin hih mun tungah ka hehna kisungin dai lo ding hi. Ahih hangin Topa thu a dong dingin note a hong sawl Judah kumpipa tungah hih bangin na gen ding uh hi. Israel Pasian, Topa in hih bangin ci hi: Na zaksa thute tawh kisai-in, hih mun le a tunga tengte langpanna ama kammal na zak ciangin na lungsim kisikin Pasian’ mai-ah na kiniamkhiat a, keima mai-ah nang kiniamkhiatin na puante balkekin ka mai-ah kap na hih manin, kei zong nang kong za hi, Topa in ci hi. Na pate kiang kong zuansak ding a, hih mun le a tunga tengte tungah ka tunsak ding siatna khempeuh na mit in mu lo ding hi,’ ci hi,” a ci hi. Tua ciangin amaute in kumpipa kiangah a thu puakkik uh hi. Tua ciangin kumpipa in mi sawlin Judah le Jerusalem upa khempeuh kaikhawm hi. Tua ciangin kumpipa, Judah mite le Jerusalem-a a teng mite, siampite le Levi mite, le mi khempeuh a lian a neu tawh, Topa’ biakinn-ah paito uh hi. Tua ciangin amah in Topa’ biakinn sungah a kimu thuciamna laibu sunga thute khempeuh amau’ zakin a sim hi. Tua ciangin kumpipa ama munah dingin, hih laibu sungah a kigelh thuciamna kammalte a sem dingin a lungsim khempeuh le a nuntakna khempeuh tawh Topa’ nung a zuihna ding le ama thupiaknate, ama tecipannate, le a thukhamte a zuihna ding, Topa’ mai-ah thuciamna khat a bawl hi. Tua ciangin amah in Jerusalem le Benjamin sunga a om mi khempeuh hih thu a zuisak hi. Tua ciangin Jerusalem-a teng mite zong amau’ pute pate’ Pasian ahi Pasian’ thuciamna bangin a gamta uh hi. Tua ciangin Josiah in Israel mite’ neihsa gam sung khempeuh panin a kihhuaite khempeuh lakhia a, Israel sunga om mi khempeuh Topa amaute’ Pasian’ na a semsak hi. Ama nuntak sung khempeuh amau’ pute pate’ Pasian ahi Topa zuihna panin amaute kiheikhia lo uh hi. Josiah in Topa a dingin Jerusalem-ah Paisan Pawi bawl hi. Amaute in a kha masa a ni sawm le li ni-in Paisan Pawi tuuno go uh hi. Amah in siampite amau’ panmunte-ah seh a, Topa’ biakinn sunga nasepna-ah amaute hanthawn hi. Tua ciangin amah in Israel khempeuh hilhin Topa’ tungah a siangtho Levi mite tungah, “Israel kumpipa, David’ tapa Solomon in a lam biakinn sungah Thuciamna Singkuang siangtho koih un. Na liangko tung uhah na puak ding uh kisam nawn lo hi. Tu-in Topa na Pasian uh le ama mi Israel-te’ na sem un. Note a khenkhenin na beh uh tawh kizui-in kithawi unla, Israel kumpipa David’ lamlahna le a tapa Solomon’ lamlahna zui un. Tua ciangin mi nautang na sanggamte uh beh kikhenna tawh kizui-in siangtho munah ding uh hen la, Levi minam beh tuamtuamte sung pan kihelkim un. Tua ciangin Paisan Pawi bawlna ganhing go-in nomau mah kisiansuah unla, Moses’ tungtawnin Topa’ thugen bangin na sanggamte uh a dingin kithawi un,” a ci hi. Tua ciangin Josiah in tua lai-a a om mi khempeuhte a dingin Paisan Pawi piakna-in a ganhon panin mi nautangte tungah tuunote le keelnote tul sawmthum ciang dong, le bawngtal tulthum a pia hi. Hihte pen kumpipa’ neihsa sung pan a kipia ahi hi. Tua ciangin ama uliante in zong utna lungsim tawh mite tung, siampite tung, le Levi mite tungah a pia uh hi. Pasian’ biakinn-ah ulianpite ahi Hilkiah, Zekhariah, le Jehiel-te in siampite tungah Paisan Pawi bawl nadingin tuuno le keelno tulnih le zaguk, le bawngtal zathum a pia uh hi. Levi mi ukpite Konaniah, Shemaiah, le a sanggam Nethanel, Hashabiah, Jeiel le Jozabad-te in Paisan Pawi piak nadingin Levi mite tungah tuuno le keelno tulnga, le bawngtal zanga a pia uh hi. Nasepna ding a kithawi khit uh ciangin, siampite amau’ munah ding uh a, kumpipa’ thupiakna bangin Levi mite amau’ khen sungah om uh hi. Tua ciangin amaute in Paisan tuuno go uh a, Levi mite in a vun a hawk laitakun siampite in amau’ tung panin a ngah uh sisan a theh uh hi. Tua ciangin amaute in, Moses laibu sungah a kigelh bangin Topa’ tungah piak dingin mi nautang sungah a innkuan a pawlpawl tawh kizui-in a hawm theih nadingun meihal biaknate a tuamkoih uh hi. Tua bangin amaute in bawngtalte zong a hih uh hi. Tua ciangin amaute in biakna ngeina kip tawh kizui-in Paisan tuuno sa mei-ah a hang uh hi. Tua ciangin amaute in beel sung, beelpi sung, le sikbeel daite sungah a siangtho piaknate huan uh a, mi nautang khempeuh kiangah tuate manlang takin a puak uh hi. Tua khit ciangin amau a’ ding le siampite a dingin amau mah in a sa bawl uh hi; bang hang hiam cih leh Aaron’ suan siampite zankim ciang dong meihal biakna pia-in manlah uh hi. Tua ahih ciangin Levi mite in amau a’ ding le Aaron’ suan siampite a dingin a sa bawl uh hi. David’ thupiak bangin Asaf’ behte ahi lasate, le Asaf, le Heman, le kumpipa’ thumu pa Jeduthun-te amau’ munah om uh hi. Kulhkongpi cingte a kulhkongpi ciatah om uh a, amau’ sanggam Levi mite in amau a dingin sa bawlsak uh ahih manin amau’ nasepna pan amaute a paikhiat ding uh kisam lo hi. Tua ahih ciangin Kumpi Josiah’ thupiakna bangin Paisan Pawi bawlna ding le Topa’ biakna tau tungah meihal biaknate piak nadingin tua ni-in Topa’ nasepna ding khempeuh a kithawi uh hi. Tua lai-ah a om Israel mite in tua hunin Paisan Pawi, le Silngo Sawh loh Anlum Pawi ni sagih sung a bawl uh hi. Kamsang Samuel huna kipan Israel sungah tua bang Paisan Pawi kibawl ngei lo hi. Josiah le siampite le Levi mite, le tua lai-ah a om Judah le Israel mi khempeuh, le Jerusalem-a a teng mite in a bawl Paisan Pawi tawh a kibang, Israel kumpite kuamah in bawl ngei lo hi. Josiah’ uk a kum sawm le giatna kumin hih Paisan Pawi kibawl hi. Hih thute khempeuh khit, Josiah in biakinn a bawl khit ciangin, Eufratis gun gei Karkhemish-ah galsim dingin Egypt kumpipa Neko hong kuanto a, amah a do dingin Josiah a kuankhia hi. Ahih hangin Neko in ama kiangah kamtaite sawlin, “Judah kumpipa aw, ei tegel khatlekhat i kihihna ding bang om ahi hiam? Tu-in nang a sim dingin hong kuan ka hi kei a, ka galte a sim dingin a hong kuan ka hi hi. Ka kinawhna ding Pasian in kei tungah thu hong pia khin hi. Kei tawh a omkhawm Pasian na nialna khawl in. Tua hikeileh nang hong susia ding hi,” cisak hi. Ahi zongin ama kiang panin Josiah kiheikhia nuam lo a, amah tawh a kido theih nadingin a mel kiseel hi. Amah in Neko’ kam pana Pasian’ thugente ngai lo a, Megiddo zanglei-a gal kidona-ah va pawm hi. Tua ciangin thaltawite in Kumpi Josiah kap hi. Tua ciangin kumpipa in a nasemte kiangah, “Nakpi takin liam ka hih manin kei hong paikhiatpih un,” a ci hi. Tua ahih ciangin a nasemte in leeng sung panin amah lakhia-in ama leeng nihna sungah amah pua-in Jerusalem-ah a paipih uh hi. Tua ciangin amah si a, a pate’ han sungah kivui hi. Judah gam le Jerusalem khuami khempeuh Josiah’ hangin kap uh hi. Jeremiah in zong Josiah’ hangin kah la a phuak hi. Numei lasate le pasal lasate khempeuh in tuni dongin amau’ kahna-ah Josiah tamlawh uh hi. Amaute in Israel sungah hih thu biakna ngeina kipin a bawl uh hi. Kah la sungah tuate kikhum hi. Tu-in Josiah’ gamtatna a omlaite, le Topa’ thukham sungah a kigelh bangin a nasep hoihte, le ama gamtatna, a masa le a nunungte, Israel le Judah Kumpite’ Tangthu Laibu sungah kigelh hi. Tua gam mite in Josiah’ tapa Jehoahaz la-in Jerusalem-ah a pa’ tangin kumpi-in a koih uh hi. Jehoahaz in uk ding a kipatin kum sawmnih le thum pha a, amah in Jerusalem-ah kha thum sung uk hi. Tua ciangin Egypt kumpipa in Jerusalem-ah amah zakiasak a, siah ngun talen zakhat le kham talen khat, tua gam kipiasak hi. Tua ciangin Egypt kumpipa in Judah le Jerusalem tungah a ukin Jehoahaz’ sanggampa Eliakim koih a, ama min Jehoiakim-in kheelsak hi. Ahih hangin Neko in a sanggampa Jehoahaz la-in Egypt-ah a paipih hi. Jehoiakim in uk ding a kipatin kum sawmnih le nga pha a, amah in Jerusalem-ah kum sawm le khat sung uk hi. Topa a Pasian mai-ah amah a sia gamta hi. Babylon kumpipa Nebukhadnezzar amah a simin hong kuanto a, Babylon-ah a paipih dingin amah kol bulh hi. Nebukhadnezzar in Topa’ biakinn-a umlebeel pawlkhatte zong Babylon-ah pua-in Babylon-a a kumpi inn-ah tuate a koih hi. Tu-in Jehoiakim’ gamtatna a omlaite, le ama hih a kihhuaite, le amah a hoih lohna a kimute, Israel le Judah Kumpite’ Tangthu Laibu sungah kigelh hi. Tua ciangin a tapa Jehoiakhin in ama tangin a uk hi. Jehoiakhin in uk ding a kipatin kum sawm le giat pha a, amah in Jerusalem-ah kha thum le ni sawm sung uk hi. Topa’ muhna-ah amah a sia gamta hi. Tua kum khuakhal sungin Kumpi Nebukhadnezzar in mi sawlin Topa’ biakinn-a umlebeel manphate tawh amah Babylon-ah lasak a, Judah le Jerusalem tungah Jehoiakhin’ sanggampa Zedekiah kumpi-in a koih hi. Zedekiah in uk ding a kipatin kum sawmnih le khat pha a, amah in Jerusalem-ah kum sawm le khat sung uk hi. Topa a Pasian’ muhna-ah amah a sia gamta hi. Topa’ kammal a gensawn kamsang Jeremiah mai-ah amah kiniamkhiat lo hi. Pasian tawh amah a kiciamsak kumpi Nebukhadnezzar zong amah in lehdo hi. Israel Pasian, Topa’ kiang zuankik nuam lo a, zong kisik nuam loin a lung khauhsak hi. A makai siampite le mi khempeuh zong tua bangmahin citak lo mahmah uh a, minam dangte’ kihhuainate zui uh hi. Amah in Jerusalem-ah a siangtho-in a koih Topa’ biakinn amaute in ninsak uh hi. A mite le ama tenna mun khasiat ahih manin amau’ pute pate’ Pasian, Topa in a kamtaite amaute kiangah sawl teitei hi. Ahih hangin a mite tungah Topa a heh ciang dong, a hehna a kidamsak zawh nawn loh ciang dongin amaute in Pasian’ kamtaite zahpihin, a thute simmawhin, a kamsangte thusim lo niloh uh hi. Tua ahih ciangin Topa in Khaldea mite’ kumpipa amaute’ langkhatah paipih a, tua kumpipa in amau’ Pasian’ biakinn sung nangawnah namsau tawh a tangvalte uh that a, numei pasal, a moi a ham, a dam a na, kuamah khasiat lo hi. Pasian in a vekpi-in ama khut sungah a pia hi. Tua ciangin Topa’ biakinn-a umlebeel khempeuh a lian a neu, le Topa’ biakinn-a vanmanphate, le kumpipa le a uliante’ vanmanphate khempeuh amah in Babylon-ah paipih hi. Tua ciangin amaute in Pasian’ biakinn halin Jerusalem khua susia uh a, a kumpi inn khempeuh mei tawh halin umlebeel a manpha khempeuh a susia uh hi. Amah in namsau panin a suakta mite Babylon-ah salin la a, Persia kumpi in a uk hun mateng amah le a suanlekhakte’ nasem a suak uh hi. Tua sungin Israel leitang in a sabbath-te a kicingin na tang hi. Kamsang Jeremiah tungtawnin Topa’ thugen a tun nadingin kum sawmsagih a cin nadingin leitang a kinusiat sung khempeuh leitang in sabbath tawlngakna a nei ahi hi. Tu-in Persia kumpipa Sairas’ kum khatna kumin, Jeremiah’ kam pana Topa’ thugen a tun theih nadingin, Topa in Persia kumpipa Sairas’ lungsim hanthawn a, amah in a kumpi gam sung khempeuhah taangkona khat bawl a, lai-in zong a gelh hi. A lai gelhna-ah, “Persia kumpipa Sairas in hih bangin ci hi: ‘Vantung Pasian, Topa in leitung kumpi gam khempeuh kei hong pia khin a, Judah gam sung Jerusalem khua-ah ama a dingin biakinn khat ka lamsak ding hong sawl hi. Note lakah ama mi ahi khempeuh, Topa a Pasian uh in ompih tahen. Biakinn lam dingin Jerusalem-ah amaute paito sak un,’ ci hi,” a ci hi. Persia kumpi Sairas’ uk kum khatna kumin, Jeremiah tungtawnin Topa’ thugen a tun theih nadingin, ama gam sung khempeuhah taangkona khat bawlin lai-in zong a gelh nadingin Persia kumpi Sairas’ lungsimah Topa in a suaksak hi. Amah in hih bangin a hih hi: “Persia kumpi Sairas in hih bangin ci hi: Vantung Pasian, Topa in leitung kumpi gam khempeuh keima tungah hong pia khin a, Judah gam sung Jerusalem khua-ah ama a dingin biakinn khat ka lamsak ding hong sawl hi. Note lakah ama mi peuhmah a Pasian in ompih hen la, Judah gam sung Jerusalem khua-ah paito hen la, Israel Pasian, Topa’ biakinn lamkik hen. Amah pen Jerusalem-ah a om Pasian ahi hi. Tua ciangin koilai mun koilai gam a om hitaleh Judah mi a omlai khempeuh, ama omna mun mite in Jerusalem-a om Pasian’ biakinn a dingin utthu-a a piakte uh banah, ngun le kham, nate le ganhingte tawh zong huh ciat uh hen,” a ci hi. Tua ciangin Judah le Benjamin sunga innkuan lutangte, le siampite le Levi mite, Jerusalem khua-a om Topa’ biakinn a lamkik dingin a lungsim sung uhah Pasian in a suahsak mite khempeuh kithawi uh hi. Tua ciangin a veng a pamte in thatang tawh a huh uh banah ngun tawh kibawl umlebeel, kham, van tuamtuamte, ganhingte, le letsong manphate tawh huh thuah lai uh hi. Tua tham loin, Nebukhadnezzar in Jerusalem panin puakhia-in ama pasian-te’ biakinn sungah a koihsa ahi Topa’ biakinn-a om ngei umlebeelte zong kumpipa Sairas in pusuah hi. Persia kumpi Sairas in hihte pusuahin sumkem pa Mithredath’ khut sungah ap hi. Tua pa in Judah ukpa Sheshbazzar a dingin a malzah simin sazian bawlsak hi. Tua nate a phazah: Kham kuang tulkhat, ngun kuang tulkhat, umlebeel a nam tuamtuam sawmnih le kua, kham kuang-uk sawmthum, ngun kuang-uk a nam tuamtuam zali sawmkhat, le umlebeel adang tulkhat ahi hi. Kham le ngun kibawl umlebeelte khempeuh a vekpi-in tulnga zali sawmguk kua pha hi. Tua hi a, Babylon panin salte a kiciahpih kik ciangin Sheshbazzar in tua nate khempeuh Jerusalem-ah a ciahpih hi. Babylon kumpi Nebukhadnezzar in a zawhna gam panin Babylon-ah salin a lakte sung panin hih mite Jerusalem le Judah-ah a ciahkikte hi a, amau’ khua ciatah a ciah uh ahi hi. Zerubbabel, Jeshua, Nehemiah, Seraiah, Reelaiah, Mordekai, Bilshan, Mispar, Bigvai, Rehum, le Baanah-te makai-in tua mite a ciahpih uh hi. Israel mi phazahte: Parosh suante - tulnih zakhat sawmsagih le nih ahi hi. Shefatiah suante - zathum sawmsagih le nih ahi hi. Arah suante - zasagih sawmsagih le nga ahi hi. Pahathmoab beh sung panin Jeshua le Joab suante - tulnih zagiat sawm le nih ahi hi. Elam suante - tulkhat zanih sawmnga le li ahi hi. Zattu suante - zakua sawmli le nga ahi hi. Zakkai suante - zasagih sawmguk ahi hi. Bani suante - zaguk sawmli le nih ahi hi. Bebai suante - zaguk sawmnih le thum ahi hi. Azgad suante - tulkhat zanih sawmnih le nih ahi hi. Adonikam suante - zaguk sawmguk le guk ahi hi. Bigvai suante - tulnih sawmnga le guk ahi hi. Adin suante - zali sawmnga le li ahi hi. Ater a kici Hezekiah suante - sawmkua le giat ahi hi. Bezai suante - zathum sawmnih le thum ahi hi. Jorah suante - zakhat sawmnih le nih ahi hi. Hashum suante - zanih sawmnih le thum ahi hi. Gibbar suante - sawmkua le nga ahi hi. Bethlehem khuami - zakhat sawmnih le thum ahi hi. Netofah khuami - sawmnga le guk ahi hi. Anathoth khuami - zakhat sawmnih le giat ahi hi. Bethazmaveth khuami - sawmli le nih ahi hi. Kiriathjearim khua, Khefirah khua, le Beeroth khuami - zasagih sawmli le thum ahi hi. Ramah khua le Geba khuami - zaguk sawmnih le khat ahi hi. Mikmash khuami - zakhat sawmnih le nih ahi hi. Bethel khua le Ai khuami - zanih sawmnih le thum ahi hi. Nebo khuami - sawmnga le nih ahi hi. Magbish khuami - zakhat sawmnga le guk ahi hi. Elam adang khat suante - tulkhat zanih sawmnga le li ahi hi. Harim suante - zathum sawmnih ahi hi. Lod khua, Hadid khua, le Ono khuami - zasagih sawmnih le nga ahi hi. Jerikho khuami - zathum sawmli le nga ahi hi. Senaah gammi - tulthum zaguk sawmthum ahi uh hi. Siampite sung panin: Jeshua-te beh panin Jedaiah suante - zakua sawmsagih le thum ahi hi. Immer suante - tulkhat sawmnga le nih ahi hi. Pashhur suante - tulkhat zanih sawmli le sagih ahi hi. Harim suante - tulkhat sawm le sagih ahi uh hi. Levi mite sung panin: Hodaviah-te beh panin Jeshua suante le Kadmiel suante - sawmsagih le li ahi hi. Lasate sung panin Asaf’ suante - zakhat sawmnih le giat ahi hi. Kongcingte nam sung panin Shallum suante, Ater suante, Talmon suante, Akkub suante, Hatita suante, le Shobai suante, a vekpi-in - zakhat sawmthum le kua ahi hi. Biakinn nasemte sung panin Ziha suante, Hasufa suante, Tabbaoth suante, Keros suante, Siaha suante, Padon suante, Lebanah suante, Hagabah suante, Akkub suante, Hagab suante, Shamlai suante, Hanan suante, Giddel suante, Gahar suante, Reaiah suante, Rezin suante, Nekoda suante, Gazzam suante, Uzza suante, Paseah suante, Besai suante, Asnah suante, Meunim suante, Nefisim suante, Bakbuk suante, Hakufa suante, Harhur suante, Bazluth suante, Mehida suante, Harsha suante, Barkos suante, Sisera suante, Temah suante, Neziah suante, le Hatifa suante ahi uh hi. Solomon’ nasemte nam sung panin: Sotai suante, Hassofereth suante, Peruda suante, Jaalah suante, Darkon suante, Giddel suante, Shefatiah suante, Hattil suante, Pokherethhazzebaim suante, le Ami suante ahi uh hi. Biakinn nasemte khempeuh le Solomon’ nasemte’ suanlekhak khempeuh a vekpi-in zathum sawmkua le nih a pha uh hi. Temelah, Teharsha, Kherub, Addan, le Immer khuate panin a hong ciahkik, Israel mi hinapi-in amau’ behlephung a kan thei lo mite: Delaiah suante, Tobiah suante, le Nekoda suante, mi zaguk sawmnga le nih ahi uh hi. Siampite sung panin zong: Habaiah suante, Hakkoz suante, le Barzillai suante (amah in Gilead mi Barzillai tanute khat tenpihin tua min tawh a kilo pah) ahi uh hi. Hih mite in khang kiciamtehna-ah amau’ min a zon uh hangin amau’ min na om lo ahih manin amaute a siang loin seh uh a, siampi nasep semsak thei lo uh hi. Urim le Thummim aisanna tawh ai a san ding siampi khat a om mateng amaute in biakna an siangpente a nek loh nading uh gam ukpa in a gen hi. Mi a vekpi - tul sawmli le tulnih le zathum sawmguk pha uh a, amaute’ nasem numei le pasal mihing - tulsagih le zathum sawmthum le sagihte kisim lo hi. Amaute in lasa numei le pasal mihing zanih nei uh hi. Amau’ sakolte - zasagih sawmthum le guk, amau’ la-sakol - zanih sawmli le nga, amau’ kalaoh - zali sawmthum le nga, le a la uh - tulguk zasagih le sawmnih pha hi. Amaute Jerusalem-a Topa’ biakinn a tun uh ciangin Pasian’ biakinn ama mun ngei-ah lamkik nadingin innkuan lutangte pawlkhat in Pasian’ biakinn a dingin piakna bawl uh hi. Amaute in a hih zawhna zah uh tawh kizui-in tua nasep nadingin vanmanpha koihna-ah kham darik tul sawmguk le tulkhat, ngun mina tulnga, le siampipuan zakhat a pia uh hi. Siampite, Levi mite, le mi pawlkhatte Jerusalem le a kiim nai-ah teng uh hi. Lasate, kongcingte, biakinn nasemte, le Israel mi khempeuh amau’ khuapi ciatah a teng uh hi. A kha sagihna hong cin ciangin Israel mite amau’ khuapi ciatah teng khin uh ahih manin, khekhat khai bangin Jerusalem-ah hong kituah diam uh hi. Tua ciangin Jozadak’ tapa Jeshua le a siampipihte, le Shealtiel’ tapa Zerubbabel le a behte hong kipan uh a, Pasian’ mi Moses thukham sungah a kigelh bangin meihal biaknate piak nadingin Israel Pasian biakna tau a bawl uh hi. Amaute in tua gam a midang tengte kihta uh ahih manin a mun lui mahah biakna tau phut pahin zing le nitak simin Topa’ tungah meihal biakna a pia uh hi. Tua ciangin amaute in a kikipsaksa bangin buk pawi bawl uh a, nisimin zat dingin a kisehsa zah bangin meihal biakna nisimin a pia uh hi. Tua ciangin hihte banah a tawntung a meihal biakna, Khadet sima biakna, le Topa’ pawi a kisehsa hun khempeuh le Topa’ tungah amau’ utthu tawh a pia mite khempeuh’ biaknate zong a pia uh hi. Topa’ biakinnpi a bul a kiphuh nai loh hangin a kha sagihna a ni masa ni a kipanin amaute in Topa’ tungah meihal biaknate piak ding kipan uh hi. Tua hi a, amaute in suangseekte le khutsiamte tungah sum pia uh a, Persia kumpi Sairas’ tung panin a thu ngahna bangun Lebanon mualtung gam panin tuipi gei Joppa khua-ah taamtak singte a hong puaksuk ding Sidon khuamite le Taia khuamite tungah zong annek tuidawn le sathau a pia uh hi. Amaute, Jerusalem khua-a Pasian’ biakinn-ah a hong ciahkik uh a kum nihna, tua kum a kha nihna sungin Shealtiel’ tapa Zerubbabel le Jozadak’ tapa Jeshua, nasep kipan uh a, a Israel mipihte, siampite, Levi mite, le salsuahna panin Jerusalem-ah a hong ciahkik mite khempeuh in zong a huh uh hi. Amaute in Levi mite kum sawmnih panin a tungsiah peuhmah Topa’ biakinn sungah biakna nasepte a vaan dingin a seh uh hi. Jeshua a tapate le a behte tawh, le Hodaviah-te beh Kadmiel le a tate in Henadad’ tapate le Levi mi a tapate uh le a behte uh tawh Pasian’ biakinn-ah nasemte tungah ukna tavuan a lakhawm uh hi. Innlamte in Topa’ biakinn a bul a phuh uh ciangin, Israel kumpipa David in a geelkholhsa bangin Topa a phat dingin siampite in a puan uh silhin peengkul tawh, Asaf’ tapa Levi mite daltuah tawh a panmun ding uhah hong pang uh hi. Tua ciangin amaute in Topa phatna le lungdamkohna a kidawngin sa uh a, “ Topa hoih hi; bang hang hiam cih leh Israel-te hong itna kip tawntung hi,” a ci uh hi. Topa’ biakinn bulpi kiphut khin ahih manin mi khempeuh in nakpitakin Topa phat uh hi. Midang tampi lungdamin a aw neih zahun a kiko uh hangin a biakinn masa a mu ngeisa siampite, Levi mite, le innkuan lutang, midang tampite in hih biakinn bulpi a kiphuh a muh uh ciangin kapin a thum uh hi. Mite nakpitakin kiko ahih manin lungdamna awging, le kahna le thumna awgingte mite in khen thei lo uh hi. Gamlapi pek panin tua awgingte a kiza hi. Salsuahna panin a hong ciahkik mite in Israel Pasian Topa a dingin biakinn khat a lamna thu Judah le Benjamin mite’ galte in a zak uh ciangin Zerubbabel, Jeshua, le innkuan lutangte kiangah va pai-in amaute kiangah, “Biakinn lamna-ah ko zong hong kihelsak un; bang hang hiam cih leh note mah bangin ko zong na Pasian uh ka bia uh a, hih lai-ah kote hong koih Assiria kumpipa Esarhaddon’ hun lai a kipanin note’ Pasian’ tungah biakna ka pia uh hi,” a ci uh hi. Ahih hangin Zerubbabel le Israel sunga innkuan lutang a omlaite in amaute kiangah, “Kote’ Pasian a dingin ka lam uh biakinn pen note’ hong lunghihmawhpih ding hi lo hi. Persia kumpipa Sairas in kote hong thupiaksa bangin Israel Pasian, Topa a dingin ko teng guak mah in ka lam ding uh hi,” a ci uh hi. Tua ciangin tua gam a teng midangte in Judah mite lungkiasakin biakinn a lam zomlai ding uh a lausak uh hi. Amau’ ngimna a tangtun theih loh nadingin amaute in a langpang dingin zum nasemte golhguk pia uh hi. Persia kumpipa Sairas’ hun a kipan kumpi Darias hun dong hih bangin hih ngitnget uh hi. Ahasueras in uk ding hong kipat ciangin Judah gam le Jerusalem-a a tengte a khiatna thu tua gamah a na tengsate in lai-in a gelh uh hi. Tua ciangin Persia kumpi Artakzaksis hun ciangin Mithredath, Tabeel, le a lawmte uh thukimna tawh kumpipa tungah lai gelh uh a, a lai pen Aram lai-in kigelh a, Aram pau mahin kisimkhia hi. Menzipipa Rehum le lai-at pa Shimshai in Kumpi Artakzaksis tungah Jerusalem tawh kisai thu a nuai-a bangin gelh uh hi. Menzipipa Rehum, lai-at Shimshai, le a lawmte khempeuh, thukhente, mangpite, thuvaante, uliante, Erek khuami le Babylon khuami, Susa khua-a om Elam mite, le a lian a minthang Ashurbanipal in hong puakhia-in Samaria khuapi-ah a hong tensak mite le Eufratis Gun langkhat a kizawhna gam sunga a om mite tung panin lai puak, a ci uh hi. A lai sung thu hih a nuai-a bang ahi hi: “Artakzaksis Kumpipa tungah, Eufratis Gungal gam a om na nasemte in hopihna kam kong puak uh hi. “Nangma kiang panin ko kiangah a hong pai Judah mite, tu-in Jerusalem-ah tung khin uh a, a gilo, mi lehdo thei ahi khuapi pen amaute in lamkikin, amaute in a khua bulpi vel khinin, kulhpi cian’ a kipat khitna thu thei in. Amau’ khuapi kilam kikin kulhte kizo leh amaute in siah ahi a, mangmu ahi a, losap ahi zongin hong pia nawn lo ding uh a, a tawpna-ah kumpi hong sukkhak ding thu thei in. Hih khuapi kilam kikin a kulhte kizo khin leh Eufratis Gungal gam na uk nawn loh nading thu, nangma tungah kong theikholsak uh hi,” a ci uh hi. Tua ciangin kumpipa in a lai uh hih bangin thuk hi: “Menzipipa Rehum, lai-at pa Shimshai, le Samaria le Eufratis Gungal gam sunga om na lawmte khempeuh uh tungah hopihna lai kong khak hi. “Keima tungah nong khak uh lai pen a kitel takin keima zakna-ah hong kisim khin hi. Keimah in hih thu a kikanna ding thu ka pia a, tu-in kikantel khinta hi. Tanglai a kipanin hih khuapi pen kumpi langah pangin, hih khua sungah lehdona le kumpi dona a om ngitngetna thu kimukhia hi. A vanglian kumpite in Jerusalem-ah uk ngei-in, Eufratis Gungal gambup tungah aana zang uh a, siah, mangmu, le losapte tua kumpite tungah kipia hi. Tua ahih ciangin hih mite a nasep uh a khawlna ding thu pia in. Keimah in thu kong piakkik mateng hih khuapi kilamkik lo ding hi. Hih thu tawh kisai-in na sep ding don loin ommawk kei in. Tua hi kei leh kumpi tungah siatna le gimna hong khang ding hi,” a ci hi. Menzipipa Rehum, lai-at Shimshai, le amau’ lawmte’ zakna-ah Kumpi Artakzaksis tung panin a kingah lai a kisim ciangin, Jerusalem-ah amaute pai pahin Judah mite a nasep uh aana tawh a khawlsak uh hi. Tua hun a kipanin Jerusalem-a om Pasian’ biakinn a kisepna a khawl hi. Persia kumpi Darias’ uk a kum nihna dong tua bangin a khawlcip phot hi. Tu-in kamsangte Haggai le Iddo’ suan Zekhariah in Judah gam le Jerusalem-ah a om Judah mite hanthawnin, Israel Pasian’ min tawh thu a gen uh hi. Tua ciangin Shealtiel’ tapa Zerubbabel le Jozadak’ tapa Jeshua, Jerusalem-a Pasian’ biakinn lamkik ding kipan pah uh a, Pasian’ kamsangte in amaute ompihin huh uh hi. Tua laitakin Eufratis Gungal gam sung teng a uk sawn Tattenai, Shetharbozenai, le amau’ lawmte hong paipahin amaute kiangah, “Note in hih biakinn lamkikin a nate na bawlna ding uh kua in thu hong pia ahi hiam?” a ci uh hi. Hih biakinn lam nasepna-ah a sem mite’ min zong amaute in dong uh hi. Ahi zongin Pasian in Judah upate huh ahih manin Darias kiangah a thu va tungin ama tung pan thu a kingahkik hun dong a nasep zomna uh kikhaktan lo hi. Eufratis Gungal gam a uk sawn Tattenai, Shetharbozenai, le Eufratis Gungal gam sung thu a vaan ama lawmte in Kumpi Darias tungah lai khak uh hi. Amaute in thuzaksakna lai hih bangin a gelh uh hi: “Kumpi Darias tungah thupha namcin hong tung tahen. “Judah gam, a lian Pasian’ biakinn-ah ka va paina uh kong theisak uh hi. Tua biakinn pen suang lianpipite tawh kilamin a kawmte sing tawh kibawl hi. Hih biakinn limtakin kisemin amau’ makaihna tawh a nasep uh telh mahmah hi. “Hih biakinn a kilamkikna ding le a nate a zawh nadingin kua in thu pia hiam, cih thu hih upate tungah ka dong uh hi. Nangmah in a makai teng na theih nadingin amaute’ min zong ka dong uh hi. “Amaute in hih bangin hong dawng uh hi: ‘Kote pen vantung le leitung Pasian’ nasemte ka hi uh a, kum tampi lai-in a kilamsa biakinn a lamkik ka hi uh a, a lian Israel kumpi khat in lamin a zawhsa ahi hi. Ahi zongin ka pu ka pate un vantung Pasian hehsakkha uh ahih manin Babylon kumpipa, Khaldea mi Nebukhadnezzar’ khut sungah amaute pia hi. Tua kumpipa in hih biakinn susia a, a mite Babylon-ah ciahpih hi. Ahi zongin Babylon kumpipa Sairas’ uk a kum khatna kumin hih Pasian’ biakinn a kilamkikna ding amah in thu pia hi. Tua tham loin Jerusalem-a biakinn sung panin Nebukhadnezzar in la-in Babylon biakinn sunga a koih ahi Pasian’ biakinn sunga om ngeisa kham le ngun kibawl umlebeelte zong kumpi Sairas in Babylon biakinn panin lakhia-in gam ukin a hong koih Sheshbazzar min nei pa tungah ap hi. Kumpipa in ama tungah, “Hih umlebeelte paipih inla, Jerusalem-a biakinn-ah va koihkik in. Tua lai-a Pasian’ biakinn pen a mun ngei mahah lamkik sak in,” ci hi. Tua ciangin Sheshbazzar hong pai-in Jerusalem-a Pasian’ biakinn a bulpi hong phut hi. Tua hun a kipanin tu dong lamkik kisem suak a, ahi zongin kizo nai lo hi,’ ci uh hi. “Tua ahih ciangin hoih na sak leh, Jerusalem-a hih Pasian’ biakinn a kilamkikna ding thu kumpipa Sairas in thu pia takpi hiam, pia taktak lo hiam cih a kitheih nadingin Babylon khua sunga om laibu koihna innte sung zongsak in. Tua khit ciangin kumpipa in na deihna hong zasakkik in,” a ci uh hi. Tua ciangin Kumpi Darias in thu pia a, Babylon khua sunga lai manphate a kisenna innte sung kizong hi. Ahi zongin Babylon khua sungah na om lo a, Media gam sung kumpi khuapi Ekbatana-ah laizial khat kimu a, tua sungah hih a nuai-a bangin a kiciamteh kimu hi: “Kumpi Sairas’ kum khatna kumin Jerusalem khua-a Pasian’ biakinn tawh kisai-in kumpipa in thu pia hi: Biakna kipia-in meihal biakna a kipaipihna munah biakinn lamsakkik un. A sanna pi sawmkua, a vai pi sawmkua mah hi ding a, a kawm pen suang thuap thum le sing thuap khat tawh a kibawl, thuap li hi ding hi. Hih sum beinate ahihleh kumpi sum panin kipia ding hi. Nebukhadnezzar in Jerusalem biakinn panin lakhia-in Babylon-ah a hong tunpih Pasian’ biakinn sunga om kham le ngun tawh kibawl umlebeelte zong kipiakik ding hi. Tuate khempeuh Jerusalem biakinn-ah kipuakik ding a, Pasian’ biakinn sunga a omna munmun ciatah kikoihkik ding hi,” ci-in kigelh hi. Tua ciangin Kumpi Darias in hih bangin thu a pia hi: “Tu-in Eufratis Gungal gam a uk Tattenai, Shetharbozenai, le Eufratis Gungal gam sung a vaan na lawmte, tua mun panin na kihemkhia ding uh hi. Judah mi a ukpa le a upate in hih Pasian’ biakinn a lamkik theih nadingun na tuaci omsak ding uh hi. Ama mun ngei mahah a biakinn lamsakkik un. Hih a kigen Pasian’ biakinn a kilamkik theih nadingin hih Judah upate a dingin na hih dingte uh zong thu kong pia hi. Hih nasepna a mawk khawl loh nadingin, Eufratis Gungal gam sung panin a kingah siahte ahi kumpi sum sung panin beina khempeuh a cingin kipia ding hi. Vantung Pasian’ tungah meihal biakna-in piak dingin a kisam khempeuh - bawngtalnote, tuutalte, ahih kei leh tuunote na pia ding uh a, Jerusalem-a siampite’ hong ngetna bangin mangbuh, ci, leenggahzu, ahih kei leh sathaute, kitasam loin nisimin amaute tungah piasak un. Tua hileh amaute in vantung Pasian’ tungah a namtui biaknate pia-in kumpipa le a tapate’ nuntakna ding thu hong ngetsak thei ding uh hi. Tua tham loin, mi khatpeuh in hih thupiakna a siatsak leh ama inn panin a innkam khat kidawhkhiat sakin tua tungah amah kihen cipin kisatgawp ding a, tua banah a inn zong a kisuksiatna ding thu kong pia thuah lai hi. Hih ka thupiakna a siasak nuam, Jerusalem-a Pasian’ biakinn a susia nuam kumpi khatpeuh ahi a, mi khatpeuh ahi zongin a om leh, ama min omna dinga tua mun a bawl Pasian in tua mipa lawnthal tahen. Keimah Darias in thu kong pia hi. Ka thupiak bang teekteekin sep ding ahi hi,” a ci hi. Tua ciangin Kumpi Darias in amaute tungah a thupiak bang teekteekin Eufratis Gungal gam sung a uksawn Tattenai, Shetharbozenai, le a lawmte in sem uh hi. Tua hi a, kamsang Haggai le Iddo’ suan Zekhariah’ thugenna hangin Judah upate in a biakinn lam uh zom suakin maavang uh hi. Israel Pasian’ sawlna le Persia kumpi Sairas le Darias le Artakzaksis-te’ thupiakna tawh amaute in a biakinn lam uh a zo uh hi. Tua hi a, Kumpi Darias’ kum gukna, Adar kha a ni sawm le thum ni-in a biakinn kizo hi. Tua ciangin Israel mite, siampite, Levi mite, le sal a suaksa a hong ciahkik mi khempeuh in lungdamna lianpi tawh Pasian’ biakinn apna a bawl uh hi. Amaute in Pasian’ biakinn apna-in bawngtal zakhat, tuutal zanih, le tuuno zali go uh a, mawhna hanga biak nadingin Israel-te khempeuh a dingin a minam phazah tawh kizui-in keeltal sawm le nih a pia uh hi. Tua ciangin Moses laibu sungah a kigelh bangin Jerusalem-a Pasian’ nasep nadingin siampite amau’ panmun ngei-ah pangsak uh a, Levi mite amau’ nasepna ngei-ah a semsakkik uh hi. A kha masa a ni sawm le li ni-in sal a suaksa a hong ciahkik mite in Paisan Pawi a bawl uh hi. Siampite le Levi mite a vekpi-un kisiansuah khin uh a, a vekpi-un zehsiang khin uh hi. Tua hi a, amaute in sal suaksa a hong ciahkik khempeuh a’ ding, a siampipihte uh le amau mahmah a dingin Paisan tuuno a go uh hi. Salsuahna panin a hong ciahkik Israel-te le Israel Pasian, Topa a bia dingin tua gam a midang tengte le a nitna uh pan amau le amau a kihemkhia tawm mite khempeuh in tua Paisan Pawi an a ne uh hi. Tua hi a, amaute in lungdamna tawh ni sagih sung silngo sawh loh anlum pawi a bawl uh hi. Bang hang hiam cih leh amau’ lungdamna ding a om theih nadingin Topa in Assiria kumpipa’ lungsim amau’ tungah a nuam dingin a bawlsak hi. Tua ahih manin Israel Pasian ahi Pasian’ biakinn a sepna uhah kumpipa in amaute a huh hi. Hih thu teng khit ciangin Persia kumpi Artakzaksis uk hun sungin Ezra, a pa Seraiah, a pa Azariah, a pa Hikiah, a pa Shalum, a pa Zadok, a pa Ahitub, a pa Amariah, a pa Azariah, a pa Meraioth, a pa Zerahiah, a pa Uzzi, a pa Bukki, a pa Abishua, a pa Finehas, a pa Eleazar, a pa siampi lianpen pa Aaron: hih Ezra pen Babylon panin hong tungto hi. Amah pen Israel Pasian, Topa in a piak Moses thukham a siam laithei mi khat ahi hi. Topa ahi ama Pasian in ompih ahih manin ama nget khempeuh kumpipa in a pia hi. Kumpi Artakzaksis in a uk a kum sagihna kumin Israel mite, siampite, Levi mite, lasate, kongcingte, le biakinn nasem pawlkhat zong, Jerusalem-ah Ezra tawh tungto uh hi. Kumpipa’ uk kum sagih a cin kum, a kha ngana sungin Jerusalem tung uh hi. A kha masa a ni khat ni-in Babylon pan a ding khia dingin Ezra in a ni sehkhol a, a kha ngana a ni khat ni-in Jerusalem a tung uh hi; bang hang hiam cih leh Pasian in amah ompih hi. Bang hang hiam cih leh Ezra in Topa’ thukham sinin zuih ding, le Israel mite a hilh dingin amah kipia hi. Kumpi Artakzaksis in siampi ahi, laithei pa lah ahi, Israel-te a dingin Topa’ thupiaknate le thukhamte a siam Ezra tungah a piak lai pen hih bang ahi hi: “Kumpite’ kumpi ahi Artakzaksis kiang panin vantung Pasian’ thukham a siam, siampi hi-in laithei pa lah ahi Ezra tungah: “Ka lungsim khentatna hih bang ahi hi: Ka gam sunga om Israel mi khatpeuh ahi a, a siampite uh ahi a, Levi mite ahi zongin, Jerusalem-ah a ciahkik nuam khempeuh in nang hong zuih theih nadingun thu ka pia hi. Nang tungah hong kipia ahi na Pasian’ thukham tawh kisai-in Judah le Jerusalem-ah thu bangci om hiam cih a va thei dingin kumpipa keimah le thu hong lamlak mihing sagihte in kong sawl uh hi. Kumpipa le a thu lamlakte in Jerusalem-ah a teng Israel Pasian tungah lungkim takin a piak ngun le khamte zong, Babylon gamah na muh uh ngun le khamte, le Jerusalem-a note’ Pasian’ biakinn dingin mite le siampite in lungkim takin a piak khiat zuazuate uh tawh a va puakkhawm ding na hi uh hi. “Hih ka thupiakna tawh kizui-in hih sumte pen Jerusalem-a note’ Pasian’ biakinn-a biakna tau tungah piak dingin bawngtalte, tuutalte, tuunote, le a an tawh biaknate, le a leenggahzu tawh biakna dingte leina ding bekin na zang ding uh hi. Tua banah ngun le kham a val a omlai leh, note’ Pasian’ deihna tawh kituakin hoih na sak bangun na lawmte tawh na zang thei ding uh hi. Na Pasian’ biakinn-ah zat dingin hong kipia umlebeelte pen Jerusalem Pasian tungah na va pia ding hi. Na Pasian’ biakinn a dingin a kisam, na piak ding a phamawh a omkhak zenzen leh kumpipa sum sung panin na zang thei ding hi. “Tua hi a, kumpipa keimah Artakzaksis in Eufratis Gungal gam sunga om kumpi vankemte khempeuh tungah hih bangin thu ka pia hi: Vantung Pasian’ thukham a siam lai a thei, siampi Ezra in note tung panin a kisapna hong nget ciangin, ngun talen zakhat, mangbuh seu zakhat, leenggahzu tambong zanih, sathau tambong zanih ciang, le ci a deih zahzah na pia ding uh hi. Vantung Pasian in a deih peuhpeuh, vantung Pasian biakinn a dingin limtakin hih un. Tua hikeileh kumpipa tapate le kumpi gam tungah amah hong heh kha ding hi. Siampite, Levi mite, lasate, kongcingte, biakinn nasemte, ahih kei leh hih Pasian’ biakinn-a nasemte khat peuhpeuh tung panin siah ahi a, mangmu ahi a, losap ahi zongin lakna ding thu na neih lohna uh zong kong zasak uh hi, ka ci hi. “Tua hi a, nang Ezra in nang tungah hong kipia na Pasian’ pilna tawh kizui-in Eufratis Gungal gam sunga mite thu a khen dingin na Pasian’ thukham a thei mite seh in. Nang le amaute in na Pasian’ thukham a thei lote na hilh ding uh hi. Na Pasian’ thukham le kumpipa’ thukham a mang lo peuhmah, sihna ahi a, hawlkhiatna ahi a, neihsa matna ahi a, thongkiatna ahi zongin, a ngah ding a kilawm thukhenna tawh khauhtakin gim kipia ding hi,” a ci hi. Kumpi Artakzaksis’ uk hun sungin Babylon panin kei tawh hong ciahto khawm a behbehin a kiciamteh beh lutangte hih bang ahi hi: Gershom: Finehas-te beh pan ahi hi. Daniel: Ithamar-te beh pan ahi hi. Hattush: David-te beh panin Shekaniah’ tapa ahi hi. Zekhariah: Parosh-te beh sung pan hi a, amah tawh pasal zakhat le sawmnga kiciamteh hi. Eliehoenai: Pahathmoab-te beh panin Zerahiah’ tapa hi a, pasal zanih tawh ahi hi. Shekaniah: Zattu-te beh panin Jahaziel’ tapa hi a, pasal zathum tawh ahi hi. Ebed: Adin-te beh panin Jonathan’ tapa hi a, pasal sawmnga tawh ahi hi. Isaiah: Elam-te beh panin Athaliah’ tapa hi a, pasal sawmsagih tawh ahi hi. Zebadiah: Shefatiah-te beh panin Mikhael’ tapa hi a, pasal sawmgiat tawh ahi hi. Obadiah: Joab-te beh panin Jehiel’ tapa hi a, pasal zanih le sawm le giat tawh ahi hi. Shelomith: Bani-te beh panin Josifiah’ tapa hi a, pasal za le sawmguk tawh ahi hi. Zekhariah: Bebai-te beh panin Bebai’ tapa hi a, pasal sawmnih le giat tawh ahi hi. Johanan: Azgad-te beh panin Hakkatan’ tapa hi a, pasal za le sawmkhat tawh ahi hi. Elifelet, Jeiel, le Shemaiah: A hong nungpai Adonikam-te beh zong hi uh a, pasal sawmguk tawh ahi uh hi. Uthai le Zabbud: Bigvai-te beh pan hi uh a, pasal sawmsagih tawh ahi uh hi. Ahava gam lamah a luang lui gei khatah amaute ka khawm a, tua lai-ah ni thum sung ka tam uh hi. Mite le siampite ka etphat ciangin Levi mite khat zong na om lo hi. Tua ahih ciangin a lawmte lakah a makai, Eliezer, Ariel, Shemaiah, Elnathan, Jarib, Elnathan, Nathan, Zekhariah, le Meshullam-te, le thu ngaihsut siam Joiarib le Elnathan-te ka sam a, Kasifia mun a a makai pa Iddo kiangah va pai-in, tua lai-a biakinn nasem amah le a behte in, eite’ Pasian’ biakinn-a na a sem ding mihing hong puak ding uh a ngen dingin ka sawl hi. Tua hi a, hehpihna a nei eite’ Pasian in hong ompih ahih manin Levi mi Mahli-te beh sung panin thu ngaihsutsiam mi ahi Sherebiah, a tapate le a behte tawh pasal sawm le giat, le Merari-te beh panin Isaiah, a behte le amau’ tapate mi sawm le nih le Hashabiah tawh, Levi mite’ na a sem dingin David le a uliante in a tuamkoih ahi biakinn nasem zanih le sawmnih hong pia hi. Hih mite khempeuh amau’ min ciat tawh a kisam ahi hi. Tua ciangin eite’ Pasian’ mai-ah kote kiniamkhiat thei-in, kote le ka naupangte uh le ka neihsa khempeuh uh nuamtakin ka khualzinna uhah ka pai theih nading uh Pasian’ tung pan ka nget theih nadingun Ahava lui-ah an tanna ding thu ka taangko hi. Bang hang hiam cih leh kumpipa kiangah, “Ka Pasian un amah a zong mite khempeuh ompihin amau a dingin a hoih na sem a, amah a nusiate khempeuh tungah amah heh hi,” ci-in gen khin ka hih manun lampi-ah kote hong kha dingin galkapte le sakol tung tuangte kumpipa kiangah ka nget ding ka mai a zum hi. Tua hi a, kote in an ka tang uh hi. Nuamtakin khual ka zin theih nading uh i Pasian’ tungah ka ngen uh a, amah in ka thungetna uh hong pia hi. Tua ciangin siampi liante sung panin mi sawm le nih - Sherebiah, Hashabiah, le amau’ behte mi sawm ka tuamkoih hi. Tua ciangin i Pasian’ biakinn nasep nadingin kumpipa le a thu lamlakte le a uliante le tua lai-a a om Israel mi khempeuh in a tuam khen ciat uh ngun le kham le umlebeelte, amaute tungah ka ap hi. Amaute tungah ka apte: Ngun talen zaguk sawmnga, talen nih a gik ngun tawh a kibawl umlebeel zakhat, kham talen zakhat, kham darik tulkhat man tawh a kibawl kuang-uk sawmnih, le kham zahin a manpha sumsan hoih tawh a kibawl beel nih ahi hi. Tua ciangin amaute kiangah, “ Topa tungah note hong ki-ap hi. Umlebeelte zong biakna vante ahi hi. Ngun le khamte ahihleh na pu na pate uh Pasian ahi Topa tungah citna tawh a kipia na ahi hi. Siampi liante, Levi mite, le Israel mi beh lutangte’ muhin Jerusalem khua-ah Topa’ biakinn dei sungah na puak dong mateng uh vilin kem un,” ka ci hi. Tua ahih manin siampite le Levi mite in Jerusalem-a i Pasian’ biakinn-ah puak dingin ngun, kham, le umlebeelte a hong sang uh hi. Tua ciangin Jerusalem a zuan dingin kha masa a ni sawm le nih ni-in Ahava lui panin ka ding khia uh hi. I Pasian in kote hong ompih ahih manin lamkalah galte le pansimna a tuamtuamte tawh hong kipelhsak hi. Jerusalem khua ka tun uh ciangin ni thum sung ka tawlnga uh hi. A ni li ni-in Uriah’ tapa siampi Meremoth’ tavuan lakna tawh i Pasian’ biakinn sungah ngun, kham, le umlebeelte kiseng hi. Finehas’ tapa Eleazar in amah huh a, Levi mi Jeshua’ tapa Jozabad le Binnui’ tapa Noadiah in amau tegel huh uh hi. Vante a ki-ap ciangin limtakin kivel a, a ki-ap na khempeuh ciaptehna lai khat kibawl hi. Tua ciangin salsuahna panin inn hong zuankik mite in Israel-te khempeuh a dingin Israel Pasian tungah meihal biakna-in bawngtal sawm le nih, tuutal sawmkua le guk, tuuno sawmsagih le nih, le mawhna hanga biakna-in keeltal sawm le nih a pia uh hi. Hihte khempeuh pen Topa’ tungah meihal biakna ahi hi. Amaute in Eufratis Gungal gam sung tenga kumpipa’ nuai-ah a uksawn a lian pente le uliante tungah kumpipa’ thupiaknate zong a va gen uh hi. Tua hi a, amaute in mite le Pasian’ biakinn lam nasep a huh uh hi. Hih thute khempeuh a kisep khit ciangin keima kiangah makaite pawlkhat hong pai-in, “Hih gam a teng gamdang mite’ nitna le Kanaan mite, Hit mite, Perez mite, Jebus mite, Ammon mite, Moab mite, Egypt mite, le Amor’ mite’ gamtat a kihhuaite panin Israel mi, siampite le Levi mite nangawn zong, a siangtho-in tuam om lo uh hi. Amaute le a tapate un hih gam a teng minam dangte’ numeite tenpih uh a, tua thu hangin a siangtho minam pen tu-in gamdang mite tawh a kihel suak ta hi. Tua hi a, hih thu-ah makaite le thukhen uliante pen a khial masa ahi uh hi,” hong ci uh hi. Hih thu ka zak ciangin dah mahmahin ka puante balkekin, ka sam le ka khamul botin, cih nading thei loin ka om hi. Tua ciangin sal a suak hih mite’ cihtak lohna hangin Israel Pasian’ gim piak ding lau-in a ling mite khempeuh kei kiangah hong kikhawm uh a, nitak biakpiak hun dong cih nading thei loin ka om hi. Tua hi a, nitak biakpiak hun ciangin khua phawk kikin ka puankekpi mah silh kawmin khukdinin Topa Pasian’ lamah ka khut zakin, “Ka biak Pasian aw, ka mawhnate un ka lu dawn dong uh hong vuknelhin vantung dong banto ahih manin nangma lam kong et ding maizumin ka mai a san hi, ka Pasian aw. Ka pu ka pate uh hun a kipanin tuhun dong mawhna lianpi ka nei uh hi. Tua thu hangin ka kumpite uh le ka siampite un gamdang kumpite’ khut sungah sihna, salsuahna, neihsa kisuhna, le maizumna thuak uh a, tuhunin zong tua bangmah ka thuak uh hi. Ahi zongin tu-in Topa ka Pasian un tomkha sung kote hong hehpih a, a suakta pawlkhat hong omsakin nangma mun siangtho-ah siksan ding mun nong pia hi. Nangmah in ka mit uh hong vaksakkikin ka salsuahna uhah ka nuntakna uh ka thakpat theih nading uh kalsuan cilna nong pia hi. Kote pen sal ka hi takpi uh hi; ahi zongin ka salsuahna uhah ka Pasian un nong nusia kei a, kote’ Pasian’ biakinn puahkikin ka dinsakkik theih nading uh le Judah le Jerusalem-ah kidalna kulh ka neih theih nadingun kipat thakna na hong piak theih nadingin Persia kumpite ko tungah a thunuam dingin nong bawlsak hi. Tu-in kote’ gamtatsiate le a lian ka mawhnate uh hangin hih bang gimna lian ka thuak uh hi; ahi zongin nangmah in kote’ tuah dinga kilawmzah gimna hong tuaksak loin, tu-a banga a nungta lai-in nong omsak zaw hi. Hih banga ka thuak khit uh ciangin kote in na thupiaknate mang lo kikin, a kihhuai-in a gamta mite tawh kitengin kizomkik ding ka hi uh hiam? Tua bang hi kik le-ung, a suakta, a nungta ka om nawn loh dongun kote’ tungah na hehna hong tungsak ding hi lo na hi hiam? Israel Pasian, Topa aw, nang na thutang a, ahi zongin tuni-a a omlai ko teng nong suaktasak veve hi. Na muhna-ah kote a mawhpi mah hita le-ung hong hehpih in; bang hang hiam cih leh mawhna tawh nangma mai-ah kuamah om thei lo hi,” ci-in thu ka ngen hi. Ezra in tu-a bangin thu ngenin mawhna pulakin khitui naptui tawh Pasian’ biakinn mai-ah kunin a om laitakin Israel mi numei, pasal, naupang, mi tampi tak ama kiimah hong kikhawmin amaute khempeuh zong nakpitakin a kap uh hi. Tua ciangin Elam-te beh sung panin Jehiel’ tapa Shekaniah hong pau-in Ezra kiangah, “Hih gam a teng gamdang numeite tenpihna tawh i Pasian tungah i khial hi. Ahi ta zongin Israel mite a dingin lametna omlai hi. Tua ahih ciangin tu-in, ka topa uh nangma ngaihsutna le i Pasian’ thupiakna a kihta mite’ ngaihsutna bangin hih i zite le a tate uh i makna ding thu i Pasian’ tungah kiciam ni. Tua ciangin thukham sunga om bangin gamta ni. Kipan in; nangma nasep ding ahi hi; kote in kong huh ding uh hi. Hang inla sem in,” a ci hi. Tua ciangin Ezra dingin, a kigensa bangin amaute a gamtat nadingun a kiciam dingin siampi makaite, Levi mite, le Israel mi khempeuh sawl a, amaute zong a kiciam pah uh hi. Tua ciangin Pasian’ biakinn panin Ezra paikhia-in Eliashib’ tapa Jehohanan’ omna inndei-ah pai-in tua lai-ah a giak hi. Salsuahna pan a hong ciahkik mite’ khialhna hangin dah ahih manin amah in anletui ne zo lo hi. Tua ciangin Judah le Jerusalem sunga a om a hong ciahkik salte khempeuh Jerusalem-ah a hong kikhopna ding uh, le ni thum sungin a hong tung lo a om leh uliante le upate’ hoihsakna bangin a neihsa khempeuh uh kimanin, salsuaksa mihonte panin a kihawlkhiat theih nading thu taangkona khat kibawl hi. Tua ahih ciangin Judah le Benjamin mi khempeuh ni thum sungin Jerusalem-ah hong kikhawm uh a, tua pen a kha kuana a ni sawmnih ni ahi hi. Tua hi a, Pasian’ biakinn mai inntualah hih thu hangin mi khempeuh patau-in guah lakah lingin a tu uh hi. Tua ciangin siampi Ezra dingto-in amaute kiangah, “Note in gamdang numeite zi-in la-in Israel mite’ mawhna na behlap uh hi. Tua ahih ciangin tu-in na pu na pate uh Pasian ahi Topa’ tungah na mawhna uh pulak unla, ama deihna bangin gamta-in hih gam a teng gamdang mite le gamdang mi ahi na zite uh tawh kikhenin tuam om un,” a ci hi. Tua ciangin a kikhawm mi khempeuh in dawngin kiko uh a, “Hi ta hen, na gen bangin ka gamta ding uh hi. Ahi zongin mi tampi hi hang a, guahzuk laitak zong ahi hi. Hih guah lakah ka omsuak zo kei ding uh hi. Tua tham loin hih thu-ah eite in mawhna lianpi hihkha ihih manin ni khat ni nih sungin hih nasep a kizo thei ding hi lo hi. A kikhawm mihonpite’ tangin i makaite semsak inla, hih thu hangin eite’ tungah Pasian’ hehna a dam matengin, i khuapite sung khempeuhah gamdang numei a tenpih mi khempeuh amau khuasung upate le thukhente ciat tawh a kiseh hunin i makaite kiangah va kilak uh hen,” a ci uh hi. Asahel’ tapa Jonathan le Tikvah’ tapa Jahzeiah tegel bek in hih thu nial uh a, Meshullam le Levi mi Shabbethai bek in tua a nialte panpih uh hi. Tua hi a, thukham omsa bangin, a hong ciahkik salsuakte a gamta uh hi. Siampi Ezra in amau’ beh ciat tangin beh lutang pawlkhat tengkhia a, tuate khempeuh a minin a kilokhia ahi hi. A kha sawmna a ni khat ni-in hih mite a thukan ding uh kipan uh a, a kha masa a ni khat ni-in gamdang numei a tenpih mite’ thu a kan uh a zo uh hi. Siampite beh lak panin Jozadak’ tapa Jeshua le a sanggamte beh sung panin Maaseiah, Eliezer, Jarib, le Gedaliah-te in gamdang numei a tenpihna kimu hi. Amaute in a zite a mak ding uh kiciam uh a, amau’ mawhna hangin biakna-in tuuhon panin tuutal khat hong paipih uh hi. Immer-te beh sung panin Hanani le Zebadiah ahi uh hi. Harim-te beh sung panin Maaseiah, Elijah, Shemaiah, Jehiel, le Uzziah ahi uh hi. Pashhur-te beh sung panin Elioenai, Maaseiah, Ishmael, Nethanel, Jozabad le Elasah ahi uh hi. Levi mite sung panin Jozabad, Shimei, Kelaiah (Kelita a kici), Pethahiah, Judah, le Eliezer ahi uh hi. Lasate sung panin Eliashib ahi hi. Kongcingte sung panin Shallum, Telem, le Uri ahi uh hi. Israel mi adangte sung pan: Parosh-te beh panin Ramiah, Izziah, Malkhijah, Mijamin, Eleazar, Makhijah, le Beinaiah ahi uh hi. Elam-te beh panin Mattaniah, Zekhariah, Jehiel, Abdi, Jeremoth, le Elijah ahi uh hi. Zattu-te beh panin Elioenai, Eliashib, Mattaniah, Jeremoth, Zabad, le Aziza ahi uh hi. Bebai-te beh panin Jehohanan, Hananiah, Zabbai, le Athlai ahi uh hi. Bani-te beh panin Meshullam, Maluk, Adaiah, Jashub, Sheal, le Jeremoth ahi uh hi. Pahathmoab-te beh panin Adna, Khelal, Benaiah, Maaseiah, Mattaniah, Bezalel, Binnui, le Manasseh ahi uh hi. Harim-te beh sung panin Eliezer, Isshijah, Malkhijah, Shemaiah, Shimeon, Benjamin, Maluk, le Shemariah ahi uh hi. Hashum-te beh sung panin Mattenai, Mattattah, Zabad, Elifelet, Jeremai, Manasseh, le Shimei ahi uh hi. Bani-te beh panin Maadai, Amram, Uel, Benaiah, Bedeiah, Kheluhi, Vaniah, Meremoth, Eliashib, Mattaniah, Mattenai, le Jaasu ahi uh hi. Binnui-te beh panin Shimei, Shelemiah, Nathan, Adaiah, Maknadebai, Shashai, Sharai, Azarel, Shelemiah, Shemariah, Shalum, Amariah, le Josef ahi uh hi. Nebo-te beh panin Jeiel, Mattithiah, Zabad, Zebina, Jaddai, Joel, le Benaiah ahi uh hi. Hih mite khempeuh in gamdang numei tenpih uh a, amaute in a zite uh a tate uh tawh a makhawm uh hi. Hakaliah’ tapa Nehemiah’ thugen hih bang ahi hi. A kum sawmnihna Khislev kha sungin kumpi khuapi Susa-ah ka om laitakin, ka sanggampa Hanani le midang pawlkhat Judah gam panin hong tung uh hi. Tua ciangin keimah in Jerusalem khua thu le sala matna panin a suakta ahi a omsuak Judah mite’ thu tawh kisai amaute kiangah ka dong hi. Salsuahna panin a suakta, tua gam a omsuakte in haksatna lianpi le maizumna a ngahna uh, le Jerusalem kulh kicimin kulhkongpite mei in a kattumna thu a hong gen uh hi. Hih thu ka zak ciangin tusukin ka kap niloh a, ni tampi sung an tangin, vantung Pasian kiangah thu ka ngen hi. Ka thungetna-ah, “Aw vantung Pasian, Topa, nang hong itin na thupiakna a zuite tungah thuciamna limtakin a zui, a lian a kihtakhuai Pasian aw, Israel mi ahi na nasemte’ tangin sun le zanin kong thunget nilohna a ngai dingin na bil hong ngat inla, na mit hong hak in. Nangma tungah ko Israel mite ka khialhna uh, keimah le ka pu ka pate zong ka khialhna uh ahi ka mawhnate uh kong pulak uh hi. Nangma tungah kong khialkhin uh a, na nasempa Moses tungah na piak ahi thupiaknate, thukhamte, le ngeina kipte ka zui kei uh hi. Na nasem Moses tungah, ‘Na cihtak kei uhleh minam dangte lakah kong thehthang ding hi. Ahi zongin kei kiangah hong ciahkikin ka thupiaknate zui-in na sep uhleh leimong dongah a kithehthangsa na mite uh kaikhawmin keima min om nadingin ka teelnasa munah amaute ka ciahpih ding hi,’ ci-a na thugen hong phawkkik in. Topa aw, amaute pen na vangliatna le a thahat na khut tawh na hotkhiatsa na nasemte le nangma mite ahi uh hi. Keima hong thungetna le nangma min a zahtak nuam na nasemte’ thungetna na bil hong ngat in. Tu-in kei tungah maavanna hong pia inla, kei tungah hih kumpipa hong migitna ding lungsim hong guan in,” ka ci hi. Tua hun laitakin kei pen kumpipa’ an a piapa ka hi hi. Kumpi Artakzaksis’ kum sawmnihna Nisan kha sungin khatvei, a leenggahzu a baihsa-in a om khit ciangin la-in kumpipa ka pia a, ama mai-ah ka om laitakin ka mai a khing hi. Amah in, “Cina lopi-in bang hangin na mai khing ahi hiam? Na dahna khat om hi ding hi,” hong ci hi. Tua ciangin lau mahmahna tawh kumpipa ka dawng a, “Kumpipa nungta tawntung in. Ka pute ka pate a kivuina khuapi siagawp a, a kongpite kangtum ahih ciangin maikhing loin bangci om theih ding ka hi hiam?” ka ci hi. Tua ciangin kumpipa in, “Kei tungah bang hong ngen nuam na hi hiam?” hong ci hi. Kei zong ka lungsim tawngah vantung Pasian kiangah thu ka ngen a, tua khit ciangin kumpipa dawngin, “Kumpipa na lung a kim a, dik na sak leh, ka puahphatkik theih nadingin Judah gam sung ka pute ka pate a kivuina khuapi-ah nong paisakna ding kong thum hi, topa,” ka ci hi. Tua ciangin kumpipa in (kumpinu a gei-ah tukawmin), “Bang tanvei sawt ding a, cik ciangin hong ciahkik thei ding na hi hiam?” ci-in hong dong hi. Tua ahih ciangin kumpipa in ka ngetna hong thukimpih a, kei zong ka ciahkik ding hun ka gen hi. Tua ciangin kumpipa kiangah, “Kumpipa na thukim leh, Judah gam ka tun dong amaute in hong paisuaksak theih nadingun Eufratis Gungal gam sung a uksawn mite ka piak ding laikhakte, le biakinn hutna ding munmuanhuai kongpi ding, khuapi kulh ding, le ka omna ding inn lam nadingin sing hong piaktheih nadingin kumpipa’ tulak a kem Asaf’ tungah piak ding laikhak zong, kei tungah hong pia in,” ka ci hi. A dik ka Pasian in kei hong ompih ahih manin kumpipa in ka ngette hong pia hi. Tua ahih ciangin Eufratis Gungal gam a uksawn mite kiang ka tung a, kumpipa’ laikhakte amaute tungah ka pia hi. Kumpipa in galkapmangte le sakol galkapte kei hong khasak hi. Ahi zongin Israel mite’ phattuamna ding a sem dingin mi khat a paina thu Horonaim khuami Sanballat le Ammon mi sal ahi Tobiah in a zak uh ciangin nakpitakin lungkim lo uh hi. Jerusalem khua ka tun ciangin ni thum sung ka tawlnga hi. Tua ciangin zanin vakkhia-in mi tawmkhat ka tonpih hi. Ahi zongin Jerusalem a dingin ka bawlsak ding ka Pasian in ka lungsimah hong suahsak thu kuama kiangah ka gen kei hi. Keima tuanna simloh ganhing dang ka kizuisak kei hi. Kuam Kongpi tawnin Gulpi Tuikhuk le Nin Kongpi lamah ka pai a, a kicimsa Jerusalem kulhpi le mei in a kattumsa a kongpite ka en hi. Tua ciangin Tuinak Kongpi le Kumpipa’ Bual-ah ka paisuak hi. Ahi zongin ka tuanna ganhing a paisuak theih nading mun om lo hi. Tua hi a, a zanpi mahin kuam lampi-ah pai-in khuapi kulh ka vel hi. Tua ciangin Kuam Kongpi mah tawnin khuapi sungah ka lutkik hi. Tua hi a, khuasung upate in ka paina mun ahi a, ka sep ahi zongin thei lo uh hi; bang hang hiam cih leh hih nasep tavuan a la ding Judah mite, siampite, uliante, khuasung upate, le a dangte tungah ka gen nai kei hi. Tua ciangin amaute kiangah, “I lungkhamna thu na thei uh hi. Jerusalem a siasa-in omin, a kongpite mei in kangtum hi. Hong pai un, zahkona i ngah nawn loh nadingin Jerusalem kulh ciangpha ni,” ka ci hi. Tua ciangin a dik ka Pasian in kei hong ompihna le kumpipa in kei tungah hong gen thute zong amaute tungah ka gen hi. Tua ciangin amaute in, “Tu-in nasep kipan pah ni,” hong ci uh hi. Tua ahih ciangin lawp mahmahna le ngimna hoih tawh nasep a kipan uh hi. Ahi zongin Horonaim khuami Sanballat, Ammon mi sal ahi Tobiah, le Arab gammi ahi Geshem in tua thu a zak uh ciangin, kote zahpihna le simmawhna tawh, “Hih na sep uh bang ahi hiam? Kumpipa lehpan’ na hi uh hiam?” hong ci uh hi. Tua ciangin amaute dawngin, “Vantung Pasian in ka maa uh hong telhsak ding a, ko ama nasemte in nasep a kipan ta ka hi uh hi; note in ahihleh Jerusalem tawh kisai-in thu na neih theih nadingun bangmah kimematna na nei kei uh hi,” ka ci hi. Tua ciangin siampi lianpen pa Eliashib le a siampipihte in nasep kipanin Tuu Kongpi a bawl uh hi. Amaute in a khuamte le a zawlte bawlin a kongkhakte bulh uh hi. Amaute in Za Khat Tausang ciang banah Hananel Tausang dong sem uh a, tua ciangin Pasian’ tungah ap uh hi. A zomah Jerikho khua mite in sem uh hi. Amaute’ zomah Imri’ tapa Zakkur in sem hi. Tua ciangin Hassenaah’ tapate in Ngasa Kongpi bawl uh hi. Amaute in a zawlte khungin a kongkhakte a kalhna bulh uh hi. Amaute’ zomah Hakkoz’ tapa Uriah, a tapa Meremoth in ama khawk sung puah hi. Tua zomah Meshezabel’ tapa Berekhiah, a tapa Meshullam hi a, tua zomah Baana’ tapa Zadok in puah hi. A zom kikah Tekoa khua mite in puah uh a, ahi zongin amau’ uliante in a tote uh sawl bangin sem nuam lo uh hi. Tua ciangin Paseah’ tapa Joiada le Besodeiah’ tapa Meshullam in Jeshanah Kongpi puah uh a, a zawlte khungin a kongkhakte a kalhna bulh uh hi. Amaute’ zomah Gibeon le Mizpah khuami ahi, Gibeon mi Melatiah le Meronoth khuami Jadon in Eufratis Gungal gam a uksawn pa’ zum dong puah uh hi. Tua zomah khamseek pa Harhaiah’ tapa Uzziel in puah a, a zomah paknamtui bawlpa Hananiah in puah hi. Amaute in Kulh Zai ciang dong a ngeina bangin Jerusalem bawlkik uh hi. Amaute’ zomah Jerusalem gam phelkhat a uk, Hur’ tapa Refaiah in puah hi. A zomah Harumaf’ tapa Jedaiah in ama inn mai san teng puah hi. Tua ciangin a zomah Hashabneiah’ tapa Hattush in puah hi. Harim’ tapa Malkhijah le Pahathmoab’ tapa Hasshub in Meikhuk Tausang a huam khawk dang khat sung puah uh hi. Amaute’ zomah Jerusalem gam a phelkhat a uk, Hallohesh’ tapa Shallum in a tanute tawh a puah uh hi. Hanun le Zanoah khua-a teng mite in Kuam Kongpi puah uh hi. Amaute in tua kongpi bawlpha-in a kongkhakte a kalhna bulh uh a, Nin Kongpi ciang dong pi tul le pi zanga sung kulh a puah uh hi. Bethhakkherem gam a uk, Rekhab’ tapa Malkhijah in Nin Kongpi puah a, tua kongpi bawlpha-in a kongkhakte a kalhna a bulh hi. Mizpah gam a uk, Kolhozeh’ tapa Shallum in Tuinak Kongpi puah a, tua kongpi bawlpha-in a kongkhakte a kalhna bulh hi. Tua ciangin amah in kumpipa’ huan gei-a kulh ciang a, David khuapi pana hong paisuk kahlei ciang dong a sem hi. Ama zomah Bethzur gam phelkhat a uk, Azbuk’ tapa Nehemiah in David’ han san ciang, a kibawl tawm bual le Galkap Inn ciang dong puah hi. Ama zomah a puah Levi mite: Bani’ tapa Rehum hi a, ama zomah Keilah gam phelkhat a uk Hashabiah in ama gam tangin puah hi. Ama zomah a puah a behte: Keilah gam phelkhat a uk, Henadad’ tapa Bavvai in puah hi. A zomah Mizpah gam a uk, Jeshua’ tapa Ezer in a Kiu-a galvan koihna kahtohna san khawk khat puah hi. Ama zomah Zabbai’ tapa Baruk in a Kiu panin siampi lianpen pa Eliashib’ inn kongkhak ciang dong khawk khat sung puah hi. Ama zomah Hakkoz’ tapa Uriah, a tapa Meremoth in Eliashib’ inn kongkhak panin Eliashib’ innmong ciang dong khawk khat sung puah hi. Ama zomah Jerusalem kiimnai-a om siampite in puah uh hi. A zomah Benjamin le Hasshub in amau’ inn mai san puah uh hi. A zomah Ananiah’ tapa Maaseiah, a tapa Azariah in ama inn gei san teng puah hi. Ama zomah Henadad’ tapa Binnui in Azariah’ inn panin a Kiu, le kulh kiu ciang khawk khat sung puah hi. Uzai’ tapa Palal in a Kiu gal san teng le kumpipa’ inn panin hong dawkkhia, zumcingte’ omna ahi tausang tungnung teng puah hi. Ama zomah Parosh’ tapa Pedaiah in nisuahna lam manawhin Tui Kongpi gal san ciang le tausang dawk puah hi. Ama zomah Tekoa khuamite in a lian tausang dawk panin Ofel mualbo kulh ciang, khawk dang khat sung puah uh hi. Sakol Kongpi tung san teng ahihleh siampite in amau’ inn mai san ciat puah uh hi. Amaute’ zomah Immer’ tapa Zadok in ama inn mai san puah hi. Ama zomah Nisuahna Kongpi a cing, Shekaniah’ tapa Shemaiah in puah hi. Ama zomah Shemaiah’ tapa Hananiah le Zalaf’ tapa gukna Hanun in khawk dang khat sung puah uh hi. Amau zomah Berekhiah’ tapa Meshullam in ama inndei mai san teng puah hi. Ama zomah khamseek pa Malkhijah in Kikaihkhopna Kongpi mai sana om biakinn nasemte’ inn le sumbukte’ inn ciang, le a kiu-a inndei tungnung ciang dong puah hi. Tua ciangin khamseekte le sumbukte in a kiu-a inndei tungnung le Tuu Kongpi kikal a puah uh hi. Sanballat in kote’ kulh cianna thu a zak ciangin lungkim loin heh mahmah a, ko Jew mite hong zahko hi. Amah in a kikholhpihte le Samaria galkapte’ kiangah, “Hih Jew mi niangnuangte in bang hih ding a kipan ahi uh hiam? Hih mun a bawlpha dinga kingaihsun ahi uh hiam? Biakpiakna hangin a nasep uh ni khat sungin zo dingin kilamen ahi uh hiam? Amaute in a kangtumsa ninbulomtang panin suangtum bawlkik thei ding ahi uh hiam?” ci hi. Ama kiangah a om Ammon mi Tobiah in, “Amaute in bangbang ciang ta le amau’ kulh cian’ tungah ngia khat kah leh kicim lel ding hi,” ci hi. Tua ciangin keimah Nehemiah in thu ka ngen a, “Hong za in, kote’ Pasian aw; kote hong kisimmawh hi. Kote hong zahkona amau’ lu tungah lehtuksak inla, gamdang khatah sal suakin mi’ bawlsiatin amaute omsak in. Amaute in a langtangin kulh ciangte’ mai-ah nang hong hehsak uh ahih manin amau’ mawhna maisak kei inla, na ciaptehna panin zong a mawhna uh sumit kei in,” ka ci hi. Tua ahih ciangin kulh ka ciang uh a, nasep a kimciang bang kizo hi. Mite in utna lungsim tawh sem uh hi. Ahi zongin Sanballat, Tobiah, Arab mite, Ammon mite, le Ashdod mite in Jerusalem kulh cian’ nasep kizom suakin, kulh vang teng huk ding a kipat khitna thu a zak uh ciangin heh mahmah uh hi. Tua hi a, Jerusalem hong simin buaina a piangsak dingin amaute kipawlin vaihawmna khat nei uh hi. Tua ahih ciangin ka Pasian uh tungah thu ka ngen uh a, amaute a en dingin sun le zanin galvil ka koih uh hi. Tua ciangin Judah gam mite in, “Nasemte a tha uh zaw ta a, ahi zong nin tampi omlai hi. Eima tha tawh kulh cian’ i zo ngei kei ding hi,” hong ci uh hi. Tua ciangin ka galte un, “Amau’ phawk loh kalun amaute lakah pai-in i that ding a, a nasep uh i beisak ding hi,” hong ci uh hi. Amaute lakah a teng Jew mite khuapi sungah hong pai ciangin, ka galte uh a omna khempeuh ciat panun hong pai-in kote hong simna ding thu, sawmvei tak hong hilhkhol uh hi. Tua ahih ciangin kulh nunglam mun niam penna mun awng tengah a namsau uh, a teipi uh, le a thal uh tawh, a innkuan kuanun ka mite ka pangsak hi. Mite’ launa ka muh ciangin, uliante, mi ukte, le mi khempeuh tungah, “Amaute kihta kei un. Na sanggamte, na tapate, na tanute, na zite uh, le na inn na lote uh a dingin hong dosak, a lian a kihtakhuai Topa phawk un,” ka ci hi. Amau’ hong sawmna thu kote in ka phawkna uh le Pasian in amau’ geelna a suksiatna thu ka galte un thei uh hi. Tua ahih ciangin ka nasepna ciat uh kulh tungah ka vekpi-un ka kuankik uh hi. Tua hun a kipanin ka khutnuai-a om mite kimkhat in na sem a, a kimkhat in a teipite, a lumte, le a thalte uh tawi-in sik puan silhin ding uh a, uliante in kulh a ciang Judah mi khempeuh uk uh hi. Kulh-a cian’ ding na a nawn mite in a khut langkhat uh tawh a van puak uh lenin a khut langkhat uhah galhiam tawi uh hi. Kulh ciangte in na a sep kawmun a kawng ciat uhah a namsau uh kuah uh hi. Peengkul tum pa ahihleh keima kiangah om hi. Tua ciangin mi liante, mi ukte, le mi khempeuh tungah, “I nasepna lian a, zaipi tak huam hi; eite kulh tungah kikhenin khatlekhat i kigamla hi. Peengkul kitum na zakna peuhpeuh panun ko kiangah hong kikhawm un. I Pasian in eite a dingin hong dosak ding hi,” ka ci hi. Tua hi a, nisimin khuavak a kipan nitak aksi suah dong, mi kimkhat in teipi tawi-in, mi kimkhat in na ka sem uh hi. Tua hun mahin mite kiangah, “Zanin galvil, sunin nasemin hong om theih nadingun mi khempeuh na nasemte ciat uh tawh Jerusalem khua sungah hong giak un,” ka ci hi. Tua ahih ciangin keimah a kipan ka behte, ka nasemte, le kei hong cingte, a kuamah peuh puan suah man om loin, mi khempeuh in ka khut uhah galhiam ka tawi den uh hi. Tu-in mi nautang numei le pasalte in a Jew mipihte uh tungah lungkim lohna kam hong gingsak uh hi. Mi pawlkhatte in an lei nadingin a tanute uh le a tapate uh a piakna thu hong gen uh hi. Pawlkhatte in kial tun huhau-in an lei nadingin a lote, a leenggah lote, le a innte uh a piakna hong gen uh hi. Pawlkhatte in kumpipa tungah siah piak dingin a lote uh le a leenggui lote uh khamin a piakna uh hong gen uh hi. Amaute in, “Kote pen ka behte uh mah bangin cilesa kibang hi-in, ka naupangte uh zong amau’ naupangte mah bangin a hoih hinapi-in, ka tanute uh le ka tapate uh sal suak dingin ka phum uh hi. Ka tanute uh pawlkhat zong sal suakkhin a, ka lote uh le ka leenggui lote uh midangte a’ suakkhin ahih manin amaute tat nadingin ka hih zawh uh bangmah om lo hi,” hong ci uh hi. Amaute’ kikona le hih thute ka zak ciangin ka heh mahmah hi. Kei zong hih thu limtakin ka ngaihsun a, tua ciangin uliante le thukhente taii-in amaute kiangah, “No le no leiba manin salin na kila uh hi,” ka ci hi. Amaute nakpitakin taii-in, “Minam dangte tungah sala kizuaksa i Jew mipihte ahizo zahzahin i tanhkik hi. Tua hinapi-in note in na mipihte uh na zuak uh a, tu-in amaute i tatkik ding hi zel hi,” ka ci hi. Amaute pau loin om uh a, a gen ding mel uh thei lo uh hi. Tua ciangin keimah in, “Note’ gamtatna hoih lo hi. I gal ahi minam dangte’ zahkona i ngah loh nadingin i Pasian zahtakna tawh na gamtat ding uh kilawm hi. Kei le ka behte le ka nasemte in zong an le sum leitawi-in ka piakhia uh hi. Leiba manin mi kilakna phiat ni. Tuni mahmahin a lote, a oliv lote, a innte uh le a meetin na lak uh sum, an, leenggahzu, le sathaute, amaute tungah pia kik un,” ka ci hi. Tua ciangin amaute in, “Hihte khempeuh ka piakik ding uh a, amaute tung panin bangmah ka kal nawn kei ding uh hi. Na gen bangin ka gamta ding uh hi,” hong ci uh hi. Tua ciangin siampite ka sam a, a ciamsa bangun a gamtat nadingun siampite’ mai-ah kiciamna ka bawlsak hi. Tua ciangin kei zong ka puan singin, “Hih thuciamna a tungsak lo peuhmah a inn le a neihsa panin Pasian in singkhia tahen. Hih bangin kisingkhia hen la, hawmsuak hen!” ka ci hi. Tua ciangin a kikhawmte khempeuh in, “Hi ta hen,” ci uh a, Topa a phat uh hi. Tua hi a, a ciamsa bangun mite a gamta uh hi. Tua tham loin, Judah gam a uk dingin hong kiseh hun a kipan, Kumpi Artakzaksis’ kum sawmnihna pan a kum sawmthum le nihna dong, kum sawm le nih sung, kei le ka behte in gam ukte’ ngah ngei ante ka ne kei uh hi. Keima hun ma-in a ukte in mite tungah van gikpi suan uh a, amaute’ tung panin nisimin an le leenggahzu ngun shekel sawmli man a la uh hi. Amau’ nasemte nangawn mite tungah kiliansak lai uh hi. Ahi zongin Pasian ka zahtakna hangin tua bangin kei ka gamta kei hi. Hih kulh cianna-ah kei mahmah in zong ka sem a, kei a dingin leitang bangmah ka la kei hi. Keima mite khempeuh nasem ding bekin tua lai-ah kisutuah uh hi. Kiim le pama minam dangte’ kiang pan hong paite banah, nisimin ka sabuai-ah an a ne, thukhente le Jew mi a kihelin leengla za le sawmnga bang ka nei den hi. Nisimin innsung annektawm dinga kibawl bawngtal khat le tuu limci guk ahi hi. Tua mah bangin ak zong kibawl a, ni sawm simin leenggahzu a um tampipi-in kihih hi. Tua zahin bei taseleh gam ukte’ ngah theih ahi anletui ka kal kei hi; bang hang hiam cih leh mite genthei lua hi. Pasian aw, hih mite a dingin ka bawlna khempeuh kei a dingin a hoih lamin hong phawk in. Kongpite-ah kongkhak ka bulh nai loh uh hangin, kulh ka cian’ khitna uh le a vang khat zong a om nawn lohna thu, Sanballat, Tobiah, Arab mi Geshem, le ka gal dangte khempeuh un a zak uh ciangin, Sanballat le Geshem zong Ono zanglei sunga om Hakkofirim khua-ah pai-in amaute tawh thu a kikum dingin hong sam uh hi. Hih pen kei hong suksiat nopna uh ahi hi. Tua ahih ciangin kei zong amaute kiangah kamtaite ka sawl a, “Tu laitakin nasep thupi ka nei hi; kong pai thei kei ding hi. Kei hong pai leng, kong pai sung ka om loh kalteng nasep kitawlnga ding hi,” ka ci hi. Amaute in tu-a bangmahin livei tak hong sam uh a, kei zong a livei mahin tu-a bangin ka dawngkik hi. Tua bangmahin Sanballat in a ngaveina hong sam a, tua tungtangin a kamtai pa in laikhak khat hong pia hi. A laikhak sungah, “Minam dangte lakah a kigen, Geshem in zong tu-a a kigen thu man hi, ci-a a gen thu in: Nang le Jew mite in kumpi lehdo ding na sawm uh a, tua thu hangin kulh na ciang uh hi. Tua banah nangmahmah zong kumpi na utna kigen lai hi. Judah gam in kumpi khat nei ta hi, ci-in, nang kumpi na hihna thu Jerusalem-ah a taangko dingin kamsangte pawlkhat a koihin zong hong kigen hi. Kumpipa in hih thu za pelmawh ding hi. Tua ahih ciangin thakhatin hong pai inla, hih thu kikum ni,” ci-in kigelh hi. Tua ciangin keimah in, “Tu-a na gen bangin bangmah om lo hi. Tua bang thu pen nangma phuahtawm ahi hi,” ci-in ka thuk hi. Kote in ka hanciamna uh khiamin nasep a kizawh loh nading deihna tawh amaute in kote hong lausak theih nading uh a hanciam uh ahi hi. Tua ahih ciangin ka hahkat semsem zaw uh hi. Mehetabel’ tapa Delaiah, a tapa Shemaiah a inn-ah omcip ahih manin ni khat ama kiangah ka pai leh amah in, “Pasian’ inn sung, siangtho munah kituahin biakinn kong kikhaknelh ni; bang hang hiam cih leh nang hong that dingin amaute hong pai uh a, zanin amaute in nang hong that ding uh hi,” hong ci hi. Ahih hangin keimah in, “Mi kei bangte tai ding ahi hiam? Mi kei bangte a suahtak nadingin biakinn sungah bu ding ahi hiam? Ka pai peuhmah kei ding hi,” ka ci hi. Tua ciangin a thusim ka phawkkhia hi. Pasian in tua bang thu a gen dingin amah a sawl hi lo a, Tobiah le Sanballat in tua bangin thugen dingin golhguk a na pia na hi a, ama thugenna pen keimah suksiat nopna ahi hi. Ama thugen bangin gamta-in mawhna ka bawl theih nadingin keimah hong lausak nadingin a kicial ahi hi. Tua bangin zuikha leng kei hong minsia sakin hong simmawh ding uh hi. Ka Pasian aw, amau’ sepnate’ hangin Tobiah le Sanballat thei inla, keimah lausak dingin a hanciam kamsangnu Noadiah le kamsang dang khempeuh zong thei in. Elul kha ni sawmnih le nga ni-in kulh kizo a, ni sawmnga le nih sung hun bei hi. Ka galte un hih thu za-in, ka kiim uha om minam dangte in a theih uh ciangin lamdangsa a, kote’ Pasian’ huhna tawh hih nasep kizo ahihna a phawk uh hi. Hih hun sungteng khempeuh Jew uliante in Tobiah kiangah lai tampi khak uh a, Tobiah’ laikhakte zong amaute’ kiangah tung hi. Tobiah pen Arah’ tapa Shekaniah’ makpa hi a, ama tapa Jehohanan in Berekhiah’ tapa Meshullam’ tanute khat tenpih ahih manin Judah gam sunga mi tampi amah tawh kipawl hi. Amaute in ama hoihnate zong keima zak-ah hong gen uh a, keima sepna teng zong ama kiangah na puak uh hi. Tua hi a, Tobiah in zong ka lau theih nadingin kei tungah lai tampi hong khak hi. Kulh kiciang khinin, kongkhakte ka bulh khin uh a, kongcingte, lasate, le Levi mite a kiseh khit ciangin, ka sanggampa Hanani le biakinn a uk Hananiah in a et dingin Jerusalem ka pia hi; bang hang hiam cih leh Hananiah pen midang tampi sangin a citakzaw, Pasian a zahtakzaw khat ahi hi. Tua hi a, amaute tungah, “Sun mateng Jerusalem kongpite hongsak kei un. Tua ciangin ni omlai mahin kongte khaksakin kalhsak un. Jerusalem khuasunga tengte lak panin khuacing dingte seh unla, pawlkhatte galvilna munah, pawlkhatte amau’ omna inn mai ciatah omsak un,” ka ci hi. Khuapi lianin zai a, ahi zongin a sungah mi tawm bek om a, innte a kilam om nai lo hi. Tua ciangin uliante, thukhente, le mite a innkuan kuanun ciaptehna ding ka lungsim sungah Pasian in hong suaksak hi. Tua hi a, hong ciahkik masate’ khang ciaptehna laibu ka mu hi. Tua sungah a kigelh ka muhte: Parosh suante - mi tulnih zakhat sawmsagih le nih ahi hi. Shefatiah suante - mi zathum sawmsagih le nih ahi hi. Arah suante - mi zaguk sawmnga le nih ahi hi. Pahathmoab-te beh sung panin Jeshua le Joab suante - mi tulnih zagiat le sawm le giat ahi hi. Elam suante - mi tulkhat zanih sawmnga le li ahi hi. Zattu suante - mi zagiat sawmli le nga ahi hi. Zakkai suante - mi zasagih sawmguk ahi hi. Binnui suante - mi zaguk sawmli le giat ahi hi. Bebai suante - mi zaguk sawmnih le giat ahi hi. Azgad suante - mi tulnih zathum sawmnih le nih ahi hi. Adonikam suante - mi zaguk sawmguk le sagih ahi hi. Bigvai suante - mi tulnih sawmguk le sagih ahi hi. Adin suante - mi zaguk sawmnga le nga ahi hi. Ater a kici Hezekiah’ suante - mi sawmkua le giat ahi hi. Hashum suante - mi zathum sawmnih le giat ahi hi. Bezai suante - mi zathum sawmnih le li ahi hi. Harif suante - mi zakhat sawm le nih ahi hi. Gibeon suante - mi sawmkua le nga ahi hi. Bethlehem le Netofah khuami - zakhat sawmgiat le giat ahi hi. Anathoth khuami - zakhat sawmnih le giat ahi hi. Bethazmaveth khuami - sawmli le nih ahi hi. Kiriathjearim, Khefirah, le Beeroth khuami - zasagih sawmli le thum ahi hi. Ramah le Geba khuami - zaguk sawmnih le khat ahi hi. Mikmash khuami - zakhat sawmnih le nih ahi hi. Bethel le Ai khuami - zakhat sawmnih le thum ahi hi. Nebo adang khat khuami - sawmnga le nih ahi hi. Elam adang khat suante - tulkhat zanih sawmnga le li ahi hi. Harim khuami - zathum sawmnih ahi hi. Jerikho khuami - zathum sawmli le nga ahi hi. Lod, Hadid, le Ono khuami - zasagih sawmnih le khat ahi hi. Senaah khuami - tulthum zakua sawmthum ahi hi. Siampite sung panin: Jeshua-te beh panin Jedaiah suante - zakua sawmsagih le thum ahi hi. Immer suante - mi tulkhat sawmnga le nih ahi hi. Pashhur suante - mi tulkhat zanih sawmli le sagih ahi hi. Harim suante - mi tulkhat sawm le sagih ahi uh hi. Levi mite sung panin: Hodevah-te beh panin Jeshua suante le Kadmiel suante - sawmsagih le li ahi hi. Lasate sung panin Asaf suante - mi zakhat sawmli le giat ahi hi. Kongcingte nam sung panin Shallum suante, Ater suante, Talmon suante, Akkub suante, Hatita suante, le Shobai suante - mi zakhat sawmthum le giat ahi uh hi. Biakinn nasemte sung panin a hong ciahkikte: Ziha suante, Hasufa suante, Tabbaoth suante, Keros suante, Sia suante, Padon suante, Lebana suante, Hagaba suante, Shamai suante, Hanan suante, Giddel suante, Gahar suante, Reaiah suante, Rezin suante, Nekoda suante, Gazzam suante, Uzza suante, Paseah suante, Besai suante, Meunim suante, Nefushesim suante, Bakbuk suante, Hakufa suante, Harhur suante, Bazlith suante, Mehida suante, Harsha suante, Barkos suante, Sisera suante, Temah suante, Neziah suante le Hatifa suante ahi uh hi. Solomon’ nasemte’ suanlekhakte sung panin: Sotai suante, Sofereth suante, Perida suante, Jaala suante, Darkon suante, Giddel suante, Shefatiah suante, Hattil suante, Pokherethhazzebaim suante, le Amon suante ahi uh hi. Biakinn nasemte le Solomon’ nasemte’ suanlekhakte mi a vekpi-in zathum sawmkua le nih a pha uh hi. Temelah, Telharsha, Kherub, Addan, le Immer khuate panin a hong ciahkik, Israel mi hinapi-in amau’ behlephung a kan thei lo mite: Delaiah suante, Tobiah suante, le Nekoda suante, mi zaguk sawmli le nih ahi uh hi. Siampite’ sung panin zong: Hobaiah suante, Hakkoz suante, Barzillai suante (amah in Gilead mi Barzillai’ tanute khat tenpihin tua min tawh a kilo pah) ahi uh hi. Hih mite in khang ciaptehna sungah a kiciamteh mite lakah amau’ min a zon uh hangin mu lo uh ahih manin amaute a siang loin seh uh a, siampi nasep semsak thei lo uh hi. Tua hi a, Urim le Thummim aisanna tawh ai san ding siampi khat a om matengin amaute in biakna an siangtho pente a nek loh nading uh gam ukpa in a gen hi. Mi a vekpi-in tul sawmli tulnih zathum sawmguk pha a, amaute’ nasem numei le pasal tulsagih zathum sawmthum le sagihte kisim lo lai hi. Tua banah amaute in lasa numei le pasal zanih sawmlinga nei uh hi. Amau’ sakol zasagih sawmthum guk, a la-sakol uh zanih sawmli nga, a kalaoh uh zali sawmthum nga, le a late uh tulguk zasagih sawmnih a pha hi. Beh lutang mi pawlkhat in nasep nadingin nate pia uh hi. Gam ukpa in vanmanpha koihna-ah kham darik tulkhat, kuang-uk sawmnga, le siampipuan zanga sawmthum a pia hi. Tua ciangin beh lutang pawlkhatte in vanmanpha koihna-ah kham darik tul sawmnih le ngun mina tulnih zanih a pia uh hi. Tua ciangin midangte’ piakte pen kham darik tul sawmnih, ngun mina tulnih, le siampipuan sawmguk le sagih ahi hi. Tua ciangin siampite, Levi mite, le mi pawlkhatte Jerusalem khua le a kiimah teng uh hi; kongcingte, lasate, biakinn nasemte, le Israel midangte amau’ khuapi ciatah a teng uh hi. Kha sagihna hong cin ciangin Israel mite amau’ khuapi ciatah teng khin uh hi. Tua ciangin Tui Kongpi mai tualpi-ah mi khempeuh khekhat khai bangin hong kikhawmtuah diam hi. Tua ciangin Topa in Israel mite tungah a piak ahi Moses thukham laibu pen laithei pa Ezra in hong paipih nadingin a gen uh hi. Tua hi a, a kha sagihna a ni khat ni-in numei pasal, le thu theitel thei ding a kikhawm khempeuh mai-ah siampi Ezra in thukham laibu hong paipih hi. Tua ciangin amah in Tui Kongpi mai-a om tualpi lam mai ngatin zingsang tung a kipan sun ciang dong, numei pasal le thu a tel thei ding mite’ zakin tua laibu sunga thute sim a, mi khempeuh in tua thukham laibu sunga thu kisimte limtakin a ngai uh hi. Tua ciangin thugenna dinga sing tawh kibawl tau tungah laithei pa Ezra dingto a, ama taklam pangah Mattithiah, Shema, Anaiah, Uriah, Hilkiah, le Maaseiah ding uh a, a veilam pangah Pedaiah, Mishael, Malkhijah, Hashum, Hashbaddanah, Zekhariah, le Meshullam a ding uh hi. Mi khempeuh sangin a sangzaw munah amah om ahih manin mi khempeuh’ muh theih dingin Ezra in a laibu a hong hi. A laibu a hon ciangin mi khempeuh a ding uh hi. Tua ciangin Ezra in a lian Pasian, Topa thupha pia a, mi khempeuh in a khut uh laamto-in, “Hi tahen. Hi ta hen,” ci-in a dawng uh hi. Tua ciangin a lu uh kunin leilam maingatin Topa a bia uh hi. Mite amau’ omna san ciatah a om sungun mite in thukham a tel theih nadingun Levi mi Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, le Pelaiah-te in a khiatna a gen uh hi. Amaute in Pasian’ thukham laibu sung panin a kitel takin sim uh a, a cihnopna a kitelin gen uh a, tua a kisim thute a tel nadingun a hilh uh hi. Tua ciangin a gam ukpa Nehemiah, laithei pa lah hi-in siampi lah ahi Ezra, le mite a hilh Levi mite in amaute khempeuh kiangah, “Tuni pen Topa note’ Pasian a dingin biakna ni siangtho ahi hi; a kap a mau om kei un,” a ci hi. Bang hang hiam cih leh thukham kammalte a zak uh ciangin mi khempeuh kap uh hi. Tua ciangin amah in amaute kiangah, “Tu-in ciah un. Anlim tuilim ne-in thadim unla, a nei zo lote zong va kholh un; bang hang hiam cih leh i Topa a dingin tuni pen biakna ni siangtho ni ahi hi; dah kei un, bang hang hiam cih leh Topa’ hong piak lungdamna in note hong thahatsak ding hi,” a ci hi. Tua ahih ciangin Levi mite in mite gamdaisak a, “Daitakin om un; bang hang hiam cih leh tuni pen biakna ni siangtho ni ahi hi; dah kei un,” a ci uh hi. Tua ahih ciangin mi khempeuh anne tuidawnin midangte a kholh ding le lungdam a om dingin a ciah uh hi; bang hang hiam cih leh amaute tungah a kigen thute amaute in a theitel uh hi. A ni nih ni-in thukham sin dingin siampite le Levi mite tawh beh lutang khempeuh laithei pa Ezra kiangah hong kikhawm uh hi. Tua ahih ciangin mite kuankhia-in tua singhiangte hong pua-in amau’ innkhumzang ciat, le a inntual uh le Pasian’ biakinn tual, Tui Kongpi tual, le Efraim Kongpi tualah sawlbuk a lam uh hi. Tua hi a, salsuahna panin a hong ciahkik a kikhawm mite khempeuh in sawlbuk lamin tuate sungah om uh hi; bang hang hiam cih leh Nun’ tapa Joshua’ hun a kipanin tua ni dongin Israel mite in tua bangin hih ngei lo uh hi. Tua hi a, amaute lungdam mahmah uh hi. Tua hi a, a kipat ni a kipan a bei ni dong Ezra in ni simin Pasian’ thukham laibu a simkhia hi. Amaute in ni sagih sung tua pawi kham uh a, a ngeina om bangin a ni giat ni-in pawi khupna thupi kikhopna khat a om hi. Tua kha mah a ni sawmnih le li ni-in an tang dingin Israel mite kikhawm uh a, puanhampi silhin a lu tung uhah lei kibuak uh hi. Tua hi a, gamdangmi khempeuh panin Israel mite tuam om uh a, amaute in dinsa-in amau’ khialhnate le a pu a pate uh mawhnate a pulak uh hi. Tua ciangin amau’ omna mun ciat uhah dingin Topa amau’ Pasian’ thukham laibu nai thum sung sim uh a, adang nai thum sung amaute in mawhna pulakin Topa a Pasian uh zahtakna a bawl uh hi. Levi mite’ kahlei tungah Jeshua, Bani, Kadmiel, Shebaniah, Bunni, Sherebiah, Bani, le Khenani ding uh a, Topa amaute’ Pasian’ tungah nakpitakin kiko uh hi. Tua ciangin Levi mi Jeshua, Kadmiel, Bani, Hashabneiah, Sherebiah, Hodiah, Shebaniah, le Pethahiah-te in, “Ding un, Topa na Pasian uh phat unla, ‘A tawntung pan a tawntung dongin a minthang na min in thupha ngah a, thupha khempeuh le phatna dang khempeuh sangin a sangzaw hi. Nang bek Topa na hi hi. Nangmah in a sang pen vantung le vana om khempeuh, leitung le a tunga om khempeuh, le tuipi le a sunga om khempeuh na bawl hi. Nangmah in tuate khempeuh na omsak a, vantung mihonpi in nang hong bia uh hi. Nang pen Abram teelin Khaldea gam Ur khuapi panin paikhiatpihin Abraham min a phuak Pasian, Topa na hi hi. Nangma tungah amah a cihtakna na mu a, Kanaan mite gam, Hit mite gam, Amor mite gam, Perez mite gam, le Girgash mite gam, amah le a suanlekhakte tungah piak dingin ama tungah thuciamna khat na bawl hi. Nang thuman na hih manin na thuciamna na tungsak hi. “‘Nangmah in Egypt gam sunga ka pute ka pate uh’ gimna mu-in San Tuipi-ah hong kikona uh na za a, amaute in ka pu ka pate uh kihihsakna tawh a hih gawpna thei na hih manin Faro le a nasemte le a gammi khempeuh langpangin lim le na lamdang na bawl hi. Tua hi a, tuni dongin a kip minphatna khat nangma a’ dingin na ngah hi. Amaute’ mai-ah tuipi phelkham na hih manin tuipi laizang lei keu tungah amaute paisuak uh a, ahi zongin tuihual sunga suanglot bangin tui thukna sungah amau a delhte na lawn hi. Sunin meii khuam khat tawh amaute lam na lak a, amau’ lampaina khua a vaksak dingin zanin mei khuam khat tawh lam na lak hi. Sinai Mual tungah kumsukin, vantung panin amaute hopihin, amaute tungah a man thukhenna, thukham taktak, a hoih ngeinate le thupiaknate na pia a, na nasempa Moses tungtawnin amaute tungah na Sabbath siangtho na theisak a, thupiaknate, ngeinate, le thukhamte na pia hi. A gilkialna uh a vahsak dingin vantung panin an na pia a, a dangtakna uh a phasak dingin suangpi panin tui na phulsak a, amaute tungah piak dingin na kiciamsa gamah lutin a luah nadingun amaute na sawl hi. “‘Ahi zongin kote’ pute pate kihisakin lungkhauh uh a, na thupiaknate mang lo uh hi. Amaute in thu mang nuam lo uh a, amaute lakah na bawl na lamdangte ngaihsun kha lo uh hi. Amaute lungkhauh niloh uh a, a salsuahna uh Egypt-ah a paipih kik dingin makai khat seh uh hi. Ahi zongin nang pen mawhna a maisak nuam, dikin hehpihna a nei, lungduai-in itna kip a nei Pasian na hi a, amaute na nusia tuan kei hi. Amaute in a kisung bawngno khat amau mah a dingin bawlin, “Hih pen Egypt panin note a hong paikhiatpih na pasian uh ahi hi,” ci-in gendai mawhna lianpi a bawl uh ciangin zong, nang in na hehpih mahmah manin amaute gamlakah na nusia kei hi. Sunin lam a lak meii khuam in amaute nusia lo a, zanin a pai nading uh lampi a vaksak dingin mei khuam in zong amaute nusia lo hi. Amaute hoihtakin thu na hilh a, na manna an zong amaute kiang panin na lakik kei a, a dangtakna uh a phasak dingin tui na pia hi. Kum sawmli tawntung gamlakah amaute na vak a, amaute in bangmah tangsapna nei lo uh hi. A puante uh zong sialo a, a khe uh zong bawk beek lo hi. Nangmah in amaute tungah kumpi gamte le mite na pia a, tuate pen galsung van ngah dingin na piak ahi hi. Tua ahih ciangin amaute in Heshbon kumpipa Sihon’ gam le Bashan kumpipa Og’ gam luah uh hi. Nangmah in amau’ suanlekhakte vana aksi zahin simzawh lohin na tamsak a, a pu a pate un a luah dingin na piak dingin na ciamsa gamah amaute na paipih hi. A suan a khakte uh tua gamah lutin a lak uh ciangin, amau’ mai-ah tua gam a teng Kanaan mite na nuaisiah a, a ut bang bangun a bawl dingun a kumpite le a mite amau’ khut sungah na pia hi. Tua hi a, amaute in kulhnei khuapite le gam hoihte la uh a, na hoih tampi tawh a kidim innte, suang kikhuak tuibemte, leenggui lote, oliv lote, le nek theih singgah kung tampi a luah uh hi. Amaute in tuate ne-in gilvahin thau uh a, nangma hoihna hangin nuamsa mahmah uh hi. “‘Ahi zongin amaute in demnopna lungsim nei-in nang hong lehdo uh hi. Amaute in na thukham nungngat uh a, nangma lamah hong ciahkikna dingun amaute a hilh na kamsangte that uh a, amaute in gendai mawhna lianpi bawl uh hi. Hih thu hangin a galte uh khut sungah amaute na ap a, a galte un amaute hih gawpgawp uh hi. Ahi zongin amau a kihih gawpgawp hun ciangin nang tungah hong ko uh a, nangmah in vantung panin na za a, na hehpihna lianpi tawh amau’ galte’ kiang panin amaute a honkhia ding honkhiate na puak hi. Ahi zongin a tawldam khit uh ciangin nangma muhna-ah a sia gamta zel uh a, nangmah in amau’ galte’ khut sungah amaute na nusia a, a galte un amaute a ukgawp uh hi. Ahi zongin amaute in nang tungah huhna hong nget uh ciangin vantung panin amau’ ngetna za-in na hehpihna tawh amaute tam veipi na honkhia hi. Tua hi a, na thukham lamah amaute hong kihei kikna ding limtakin na hilh a, ahi zongin amaute kihisakin na thupiaknate don lo uh hi. A zuite tungah nuntakna a pia thei ahi na ngeina kip tungah amaute khial uh hi. Lungkhauhin phengphi-in amaute kiheikhia uh a, thu mang nuam lo uh hi. Kum tampi sung lungduaina tawh amaute na thuak a, na kamsangte tungtawnin amaute na hilh hi. Ahi zongin amaute in ngai nuam lo uh hi. Tua ahih ciangin gamdang mite’ khut sungah amaute na pia hi. Ahi ta zongin na hehpihna lian hangin amaute beisak loin, zong na nusia kei hi; bang hang hiam cih leh dikna le hehpihna a nei na hi hi. “‘Tua ahih ciangin tu-in a lian, a vanglian, a kihtakhuai, thuciamna kiptakin a len kote’ Pasian aw, Assiria kumpite’ hun a kipan tuni dongin ka kumpite uh, ka uliante uh, ka siampite uh, ka sanggamte uh, ka pu ka pate uh le ko mi khempeuh tungah hong tung gimnate hong neu ngaihsutsak kei in. Kote tungah hong tungsa thu khempeuhah nang a thutang na hi a, nang citakin a om na hi a, kote a khial gamtatkha ka hi uh hi. Ka kumpite uh, ka uliante uh, ka siampite uh le ka pu ka pate un nangma thukham zui lo uh a, amaute tungah na piak ahi na thupiaknate le na hilhkholhnate zong don lo uh hi. Amaute tungah na piak gamzai lei hoihah omin, amaute tungah na piak hauhna lianpi tawh nuamsa-in amau’ kumpite’ khutnuai-ah a om laitak nangawnun amaute in nangma na hong sem lo uh a, a gamtat hoih lote uh nusia lo uh hi. Tu-in kote sal ka hi uh hi. Ka pu ka pate un a leitang pana piangte ne-in a na hoih khempeuhte nuamtakin a ngah nadingun na piak gam hih lai munah kote sal ka hi ta uh hi. Tu-in leitang tunga piang khempeuh pen kote’ mawhna hangin kote’ tungah nong koih kumpite tungah tung ta hi. Tua kumpite in kote tungah thu hong nei-in, ka ganhingte uh a ut utun hong hihsak uh a, kote lungkham mahmahin ka om uh hi,’ ci un,” a ci uh hi. Hih thute khempeuh hangin a kip thuciamna khat bawlin lai-in ka gelh uh a, ka uliante uh, ka Levi mite uh le ka siampite un zong tua lai tungah a min uh a gelh uh hi. Tua lai tungah a min a gelh masa mite a masa pen Hilkiah’ tapa, gam ukpa Nehemiah hi a, tua ciangin Zedekiah in zom hi. Tua ciangin Seraiah, Azariah, Jeremiah, Pashhur, Amariah, Makhijah, Hattush, Shebaniah, Maluk, Harim, Meremoth, Obadiah, Daniel, Ginnethon, Baruk, Meshullam, Abiah, Mijamin, Maaziah, Bigai, le Shemaiah in gelh uh hi. Azaniah’ tapa Jeshua, Henadad-te beh Binnui, Kadmiel, Shebaniah, Hodiah, Kelita, Pelaiah, Hanan, Mika, Rehob, Hashabiah, Zakkur, Sherebiah, Shebaniah, Hodiah, Bani, le Beninu ahi uh hi. Parosh, Pahathmoab, Elam, Zattu, Bani, Bunni, Azgad, Bebai, Adonijah, Bigvai, Adin, Ater, Hezekiah, Azzur, Hodiah, Hashum, Bezai, Harif, Anathoth, Nebai, Magpiash, Meshullam, Hezir, Meshezabel, Zadok, Jaddua, Pelatiah, Hanan, Anaiah, Hoshea, Hananiah, Hasshub, Halohesh, Piha, Shobek, Rehum, Hashabnah, Maaseiah, Ahiah, Hanan, Anan, Maluk, Harim, le Baanah-te ahi uh hi. A omlai Israel mite, siampite, Levi mite, kongcingte, lasate, biakinn nasemte, a zite a tapate le a tanute, thu teltheihna a nei, Pasian’ thukham hangin gamdang mite panin a tuam om mi khempeuh in a sanggam uh ahi amau’ makaite pawmin, Pasian’ nasem Moses in a piak Pasian’ thukham zui-in, eite’ Topa ahi Topa’ thupiakna khempeuh, ama ngeinate le ama thukhamte a zuihna ding uh kiciamna a bawl uh hi. Gamdang mite tungah i tanute i kha kei ding a, i tapate’ zi dingin zong i la kei ding hi. Hih mite in Sabbath ni-in van ahi a, an ahi zongin hong zuak leh Sabbath ni le ni siangtho khat peuhpeuh ni-in i lei kei ding hi. Kum sagihna-a an piangte nusia-in tua kumin leiba khempeuh i maisak ding hi. Tua ciangin thukham sunga a kigelh bangin a kiseh hunin a kumkumin Topa eite’ Pasian’ biakna tau tungah cih dingin beh a banbanin i Pasian’ biakinn sungah sing a kitut nadingin siampite, Levi mite, le ko mi vekpite in sing pua ding sehna ai ka san uh hi. I leitang panin a piang anpalte le singgah kungte panin a gah masa khempeuh a kumkumin Topa’ biakinn-ah puak ding ka kiciam uh hi. Thukham sunga kigelh mah bangin i Pasian’ biakinn-ah a om, i Pasian’ biakinn sungah na a sem siampite kiangah zong tapa upa pente le bawngte’ tacilte, le ganhonte’ tacilte, le tuuhonte’ tacilte paipih ding, le annel lom meek masak pen siampite tungah puak ding, le gah nei sing khempeuh panin a gah masa, sathau le leenggahzu thakte khempeuh i Pasian’ biakinn sung vankoihna-ah puak ding, le lokhawhna khuaneute khempeuhah sawm-ah-khat a kaikhawmte pen Levi mite ahih manin leitang panin sawm-ah-khat khempeuh Levi mite kiangah puak ding ka kiciam uh hi. Levi mite in sawm-ah-khat a khop uh ciangin Aaron’ suan siampite tawh hih khawm ding uh hi. Tua ciangin Levi mite in i Pasian’ biakinn sunga vankoihna a kilawm mun inndeite-ah sawm-ah-khat a ngah uh sung pan sawm-ah-khat puaksawn ding uh hi. Bang hang hiam cih leh biakinn umlebeelte a kikoihna inndeite le na a sem siampite, kongcingte le lasate a giahna inndeite-ah Israel mite le Levi mite in a kipia ante, leenggahzu le sathaute a paipih ding uh ahi hi. Eite’ Pasian’ biakinn kinloin i om kei ding hi. Tua ciangin Jerusalem-ah mi makaite teng uh hi. Tua lo midang teng, amau’ lak pan mi sawm-ah-khat, khuapi siangtho Jerusalem-ah a teng ding aisanna tawh kiteel uh a, a omlai mi sawmah kuate ahihleh khuapi dangte-ah om uh hi. Tua hi a, sawl lohin, Jerusalem-ah amau’ thu-in a tengtawm nuam khempeuhte mipi in pakta uh hi. Hih a nuai-ate pen Jerusalem-a a teng a uksawn ukpite ahi uh hi. Ahi zongin Judah khuapi dangte-ah Israel midangte, siampite, Levi mite, biakinn nasemte, le Solomon’ nasemte’ suanlekhakte teng uh a, amau’ neihsa, amau’ khuapi ciatah teng uh hi. Judah minam le Benjamin minam sung panin mi pawlkhat zong Jerusalem-ah teng uh hi. Perez’ suan Mahalalel, a tapa Shefatiah, a tapa Amariah, a tapa Zekhariah, a tapa Uzziah, a tapa Athaiah’ suante, le Shelah’ suan Zekhariah, a tapa Joiarib, a tapa Adaiah, a tapa Hazaiah, a tapa Kolhozeh, a tapa Baruk, a tapa Maaseiah’ suante ahi uh hi. Jerusalem-ah a teng Perez’ suante khempeuh galhang mi zali sawmguk le giat a pha uh hi. Jeshaiah’ tapa Ithiel, a tapa Maaseiah, a tapa Kolaiah, a tapa Pedaiah, a tapa Joed, a tapa Meshullam, a tapa Sallu’ suante, le a beh Gabbai le Sallai hi uh a, mi zakua sawmnih giat pha uh hi. Zikri’ tapa Joel pen amau’ mapi hi a, Hassenuah’ tapa Judah pen khuapi uk a nihna pa ahi hi. le inn nasep a sem a behte hi uh a, mi zagiat sawmnih le nih pha uh hi. Tua ciangin Malkhijah’ tapa Pashhur, a tapa Zekhariah, a tapa Amzi, a tapa Pelaliah, a tapa Jehoram, a tapa Adaiah, le beh lutang ahi a beh dangte hi a, mi zanih sawmlinih pha uh hi. Tua ciangin Immer’ tapa Meshillemoth, a tapa Ahzai, a tapa Azarel, a tapa Amashsai, le a thahat a vanglian a behte hi a, mi zakhat sawmnih le giat pha uh a, Haggedolim’ tapa Zabdiel pen amau’ mapi ahi hi. Bunni’ tapa Hashabiah, a tapa Azrikam, a tapa Hasshub, a tapa Shemaiah, le Pasian’ biakinn pualam nasep a uk, Levi mite’ ukpite ahi Shabbethai, Zozabad, le lungdam koh thungetna patkhiat ding a makai Asaf, a tapa Zabdi, a tapa Mika, a tapa Mattaniah, le a sanggamte lakah a nihna ahi Bakbukiah, le Jeduthun’ tapa Galal, a tapa Shammua, a tapa Abda’ suante beh ahi uh hi. Khuapi siangtho sungah Levi mi a om khempeuh mi zanih sawmgiat le li a pha uh hi. Akkub, Talmon, le a behte hi uh a, mi zakhat sawmsagih nih pha uh hi. A omlai Israel-te, siampite, le Levi mite ahihleh Judah khuapi dangte-ah amau’ luah leitang ciatah teng uh hi. Ahi zongin biakinn nasemte ahihleh Ofel mualbo-ah teng uh a, Ziha le Gishpa in amaute a uk uh hi. Jerusalem-a Levi mite ukin Pasian’ biakinn nasepna a vaan pa pen Mika’ tapa Mattaniah, a tapa Hashabiah, a tapa Bani, a tapa Uzzi hi a, amah pen lasa Asaf suante sung pan ahi hi. Tuate beh in kumpipa’ thupiakna tawh na sem uh a, tua lasate in nisimin na a sep ding uh kisam hi. Tua ciangin Judah’ tapa Zerah, a tapa Meshezabel, a tapa Pethahiah pen mite tawh kisai zum thu khempeuhah kumpipa’ zat pen ahi hi. Khuaneute le a kiima lote tawh kisai-in: Mi pawlkhatte’ tenna pen Kiriatharba le a khuaneute, Dibon le a khuaneute, Jekabzeel le a khuaneute, Jeshua, Moladah, Bethpelet, Hazarshual, Beersheba le a khuaneute, Ziklag, Mekonah le a khuaneute, Enrimmon, Zorah, Jarmuth, Zanoah, Adullam le a khuaneute, Lakhish le a lote, le Azekah le a khuaneute ahi hi. Tua hi a, amaute pen Beersheba panin Hinnom Kuam dongah teng uh hi. Tua ciangin Geba, Mikmash, Aija, Bethel le a khuaneute, Anathoth, Nob, Ananiah, Hazor, Ramah, Gittaim, Hadid, Zeboiim, Neballat, Lod, Ono, le Geharashim khuate-ah Benjamin mite teng uh hi. Tua ciangin Judah gam a Levi mite pawlkhat Benjamin gamah kigawm hi. Shealtiel’ tapa Zerubbabel le Jeshua tawh a hong ciahkik siampite le Levi mite: Seraiah, Jeremiah, Ezra, Amariah, Maluk, Hattush, Shekaniah, Rehum, Meremoth, Iddo, Ginnethoi, Abijah, Mijamin, Maadiah, Bigah, Shemaiah, Joiarib, Jedaiah, Sallu, Amok, Hikiah, le Jedaiah te ahi uh hi. Hihte pen Jeshua hun lai-in siampite le a sanggamte uh lakah a ukpite ahi uh hi. Jeshua, Binnui, Kadmiel, Sherebiah, Judah, le Mattaniah hi a, Mattaniah in a sanggamte tawh lungdamkohna late a uk hi. Tua ciangin a sanggamte uh Bakbukiah le Unno in amaute tawh kigal sai-in omin a dawng uh hi. Tua hi a, Jeshua pen Joiakim’ pa, Joiakim pen Eliashib’ pa, Eliashib pen Joiada’ pa, Joiada pen Jonathan’ pa, Jonathan pen Jaddua’ pa ahi hi. Tua ciangin Joiakim hun lai-in beh lutang ahi siampite: Seraiah suante sung panin Meraiah, Jeremiah suante sung panin Hananiah, Ezra suante sung panin Meshullam, Amariah suante sung panin Jehohanan, Malukhi suante sung panin Jonathan, Shebaniah suante sung panin Josef, Harim suante sung panin Adna, Meraioth suante sung panin Helkai, Iddo suante sung panin Zekhariah, Ginnethon suante sung panin Meshullam, Abijah suante sung panin Zikri, Miniamin suante sung panin, Moadiah suante sung panin Piltai, Bilgah suante sung panin Shammua, Shemaiah suante sung panin Jehonathan, Joiarib suante sung panin Mattenai, Jedaiah suante sung panin Uzzi, Sallai suante sung panin Kallai, Amok suante sung panin Eber, Hilkiah suante sung panin Hashabiah, Jedaiah suante sung panin Nethanel ahi uh hi. Eliashib, Joiada, Johanan, le Jaddua-te’ hun lai-a beh lutangte le siampite ahihleh Persia kumpipa Darias hun ciang dong Khang Tangthu Laibu sungah kiciamteh hi. Levi mite beh sung panin beh lutangte pen Eliashib’ tupa Johanan’ hun ciang dong Khang Tangthu Laibu sungah kigelh hi. Tua ciangin Levi mi ukpite: Hashabiah, Sherebiah, Jeshua, Binnui, le Kadmiel hi uh a, Pasian’ mi David’ thupiakna bangin a banbanin phatna la a sa ding le lungdamna a ko dingin a sanggamte uh tawh na a sem ding uh ahi hi. Mattaniah, Bakbukiah, Obadiah, Meshullam, Talmon le Akkub-te pen vankoihna kongpite a cing kongcingte ahi uh hi. Hih pen Jozadak’ tapa Jeshua, a tapa Joiakim’ hun le gam ukpa Nehemiah, le siampi hi-in laithei pa zong ahi Ezra-te’ hun lai-a vaihawmna ahi hi. Tua ciangin amaute in daltuahte, harp lasaknate, le laiza lasaknate tawh lungdam ko-in la sa-in lungdamna tawh kulhpi apna a bawl dingin Jerusalem-ah hong pai theih nadingun Levi mite a omna khempeuh uhah a zong uh hi. Tua hi a, Jerusalem kiim le Netofah mite’ khuaneute panin Levi mi lasate hong kikaikhawm uh hi. Bethgilgal khua le Geba kiimnai le Bethazmaveth khua panin zong hong pai uh hi. Bang hang hiam cih leh lasate pawl in Jerusalem kiimah amau a dingin khuaneute sat uh hi. Tua ciangin siampite le Levi mite amau mah kisiansuah tawm uh a, tua khit ciangin mite le kongpite le kulhpi a siansuah uh hi. Tua ciangin khuapi kulhzangah Judah mi uliante ka paipih a, lampai kawmin lungdamna a ko dingin pawl lian nih ka seh hi. Kulhzang panin pawlkhatte taklam manawhin Nin Kongpi lamah a pai uh hi. Tuate’ nungah Hoshaiah le Judah uliante kimkhat, le Azariah, Ezra, Meshullam, Judah, Benjamin, Shemaiah, le Jeremiah, le siampi pawlkhat: Asaf, a tapa Zakkur, a tapa Mikaiah, a tapa Mattaniah, a tapa Shemaiah, a tapa Jonathan, a tapa Zekhariah, le ama behte Shemaiah, Azarel, Gilalai, Maai, Nethanel, Judah, le Hanani-te, Pasian’ mi David’ lasakna nate tawh pai uh a, tuate lakah laithei pa Ezra masa hi. Tuinak Kongpi panin kulh kahtohna David khuapi kahlei-ah paito-in, David’ inn khengin nisuahna lam manawhin Tui Kongpi dongah pai uh hi. Lungdamna a ko a pawldang khat pen veilam manawhin pai uh a, mi a kimkhat tawh amaute ka zui hi. Kulh tungah pai-in Meikhuk Tausang pan Kulh Zai-ah tua panin Efraim Kongpi, tua ciangin Jeshanah Kongpi, tua ciangin Ngasa Kongpi, tua ciangin Hananel Tausang, tua ciangin Za Khat Tausang, tua ciangin Tuu Kongpi-ah pai uh a, tua ciangin Thong Kongpi-ah khawl uh hi. Tua hi a, lungdamna a ko hih pawl nihte, Pasian’ biakinn hong tung uh a, uliante pawlkhat le kei ka omkhawm uh hi. Tua ciangin siampi Eliakim, Maaseiah, Miniamin, Mikaiah, Elioenai, Zekhariah, le Hananiah-te a peengkulte uh tawh om uh a, Maaseiah, Shemaiah, Eleazar, Uzzi, Jehohanan, Malkhijah, Elam, le Ezer zong a om uh hi. Tua hi a, Jezrahiah makai-in lasate inla sa uh hi. Pasian in nakpitakin amaute lungdamsak ahih manin amaute in tua ni-in biakpiakna lian tampi pia-in lungdam uh a, numei naupangte zong lungdam uh hi. Tua hi a, Jerusalem khuasunga lungdamna awging gamlapi pek pan nangawnin kiza hi. Tua ciangin khuapite’ kiimah lo omte panin a golna le a neuna tawh kizui-in siampite le Levi mite a dingin thukham sunga om bangin a kaihkhop ding uh a kipia nate, anpalte, le sawm-ah-khatte a koihna ding uh vankoihna innte a uk dingin mi kiseh hi; bang hang hiam cih leh siampite le Levi mite’ nasepna hangin Judah mi khempeuh lungdam mahmah uh hi. Tua hi a, David le a tapa Solomon’ thupiakna tawh kizui-in lasate le kongcingte mah bangin amaute in amau’ Pasian’ nasepte le siansuah nasep a sem uh hi. Bang hang hiam cih leh David’ hun lai-in lasate a ukpi le phatna le lungdamkohna a makai-in Asaf om hi. Zerubbabel le Nehemiah’ hun lai-in Israel mite khempeuh in lasate le kongcingte a dingin a nisim tanh uh pia uh a, amaute in Levi mite a’ ding tuamkoih uh hi. Tua ciangin Levi mite in Aaron suante a dingin tuamkoihsawn leuleu uh hi. Tua ciangin amaute in mipi’ zakin Moses’ laibute sim uh a, Pasian’ mite’ kikhopna-ah Ammon mi le Moab mite a kihel ngei loh nading thu kiphawkkhia hi; bang hang hiam cih leh amaute in anletui tawh Israel mite na dawn lo uh a, amaute a samsia dingin Balaam cial zawsop uh hi. Ahi zongin i Pasian in tua samsiatna thupha-in hong heisak hi. Mite in hih thukham a zak uh ciangin Israel mite lak panin gamdang suan peuhmah khenkhia uh hi. Ahi zongin tua hun ma-in, i Pasian’ biakinn sunga vankoihna inndeite a uk dingin a kiseh, Tobiah tawh a kimeltheih siampi Eliashib in, Levi mite, lasate, le kongcingte tungah piak dingin a kisawl an tawh biakna, paknamtui, umlebeelte, sawm-ah-khat a kipia an, leenggahzu, le sathau, le siampite a dingin a kipia nate a koihna ngei uh inndei lianpi khat, Tobiah a dingin bawlsak hi. Babylon kumpipa Artakzaksis in a uk kum sawmthum le nihna kumin ama kiangah pai ka hih manin hih thu a pian’ laitakin Jerusalem-ah ka om kei hi. Tawlkhat khit ciangin kumpipa kiangah a khuan ka ngen a, Jerusalem-ah ka ciahkik hi. Tua ciangin Tobiah a dingin Pasian’ biakinn huang sungah inndei khat a vaihawmsakna thu, Eliashib’ gamtat hoih lohna ka phawkkhia hi. Hih thu-ah lungkim het lo ka hih manin inndei sung panin Tobiah’ van teng ka lawnkhia hi. Tua ciangin tua inndei a siansakna ding uh, le Pasian’ biakinn-a umlebeelte, an tawh biakna le paknamtui a koihkik nadingun thu ka pia hi. Levi mite’ ngah dingte amau’ tungah kipia lo ahih manin Levi mite le lasate in a nasep ngeite uh nusia-in a lote uhah na a sepna uh zong ka phawkkhia hi. Tua ahih ciangin uliante tungah ka lungkim kei a, “Bang hangin Pasian’ biakinn kinusiacip ahi hiam?” ka ci hi. Tua hi a, amaute kaikhawm kikin amau’ sepna ngei mun ciatah ka pangsakkik hi. Tua ciangin Judah mite khempeuh in an, leenggahzu, le sathau sung pan sawm-ah-khat hong paipihin vankoihna innte-ah hong tun uh hi. Tua ciangin tua vankoihna innte a kem dingin siampi Shelemiah, laithei Zadok, le Levi mi Pedaiah, le amaute a huh dingin Mattaniah’ tapa Zakkur, a tapa Hanan ka seh hi; bang hang hiam cih leh amaute mi muanhuai ahi uh hi. Amau’ nasep pen a sanggamte uh tungah amau’ tanh ciat uh a hawmkhia ding uh ahi hi. Ka Pasian aw, hih thu tawh kisai-in kei hong phawk inla, ka Pasian’ biakinn le a nasep nadingin ka sepsa gamtat hoihte maimangsak kei in. Tua hun lai-in Judah gam sungah mite in Sabbath ni-in leenggah sukin, a khawhsate uh khawmin late tungah suanin, leenggah, thei, le van namkim, Sabbath ni-in Jerusalem-ah hong puakna ka mu hi. Tua ni-in na a zuakna uh hangin ka lungkim lohna amaute tungah ka gen hi. Jerusalem khuasunga teng Taia khuamite in zong ngasa le van namkim hong paipihin Judah mite tung le Jerusalem khua sungah Sabbath ni-in zuak uh hi. Tua ciangin Judah uliante tungah lungkim loin amaute kiangah, “Bang hangin hih bangin hoih lohna gamta-in Sabbath ni ninsak ngam na hi uh hiam? Na pu na pate uh tu-a bang teekin a gamtat manin eite tung le hih khuapi tungah hih bang siatna khempeuh hong tung hi lo ahi hiam? Tua hinapi-in note in Sabbath ni nitsakna tawh Israel tungah hehna tamzaw na tungsak uh hi,” ka ci hi. Tua hi a, Sabbath ni ding khuamial ciangin kongpite a kikhakna ding ka sawl a, Sabbath bei khit mateng a kihon loh nadingin thu ka pia hi. Tua ciangin, Sabbath ni-in khua sungah van hong kilutpih lohna dingin kongpite a cing dingin ka nasemte pawlkhat ka koih hi. Tua ahih manin sumbukte le na nam tuamtuam a zuakte, khatvei nihvei khawng Jerusalem khua pualamah giak uh hi. Ahi zongin amaute hilhkholin amaute kiangah, “Bang hangin kulh gei-ah giak na hi uh hiam? Nong giah kik uhleh note tungah thu kong bawl ding hi,” ka ci hi. Tua hun a kipanin Sabbath ni-in amaute hong pai nawn lo uh hi. Tua ciangin Sabbath ni a siangtho-in a omsak theih nadingun amaute kisiansuah tawmin kongpite hong cin nadingun Levi mite ka sawl hi. Ka Pasian aw, hih thu-ah zong hong phawk inla, na itna tawh kizui-in siatna panin kei hong pengsak in. Tua hun lai mahin zong Judah mite in Ashdod numei, Ammon numei, le Moab numeite a tenpihna, le a tate uh kimkhat in Ashdod kampau a zatna, le Judah kampau zang thei loin, amau pau ciat bek a zat theihna thu ka mukhia hi. Amaute taigawpin ka samsia a, pawlkhat satin a sam uh ka bawhsak gawp hi. Tua ciangin Pasian’ min tawh amaute ka kiciamsak a, “Note in amau’ tapate’ zi dingin na tanute uh na pia kei ding uh a, na tapate uh zi ding ahi a, nomau’ zi dingin ahi zongin amaute’ tanu na la kei ding uh hi. Israel kumpipa Solomon zong tua bang numeite’ hangin khial hi lo ahi hiam? Minam tampite lakah amah tawh a kibang kumpi khat zong om lo a, ama Pasian in amah itin, Israel khempeuh tungah kumpi-in amah koih hi; ahi ta zongin gamdang numeite in amah nangawn khialsakzo hi. Tua ahih ciangin Solomon aw, nangma gamtatnate hong zui-in, gamdang numeite tenpihna tawh hih siatna lian khempeuh gamta-in i Pasian tungah hong zuautat ding ka hi uh hiam?” ka cisak hi. Siampi lianpen pa Eliashib’ tapa Jehoiada’ tapate khat pen Horonaim khuami Sanbalat’ makpa na hi hi. Tua ahih manin keima kiang panin amah ka hawlkhia hi. Ka Pasian aw, amaute in siampi nasepna le siampite le Levi mite’ thuciamna siasak uh ahih manin amaute thei ta in. Tua bangin gamdang tawh a kizom nate khempeuh panin amaute ka siangsak a, siampite le Levi mite a nasep ngei mah uhah ka semsakkik hi. Tua ciangin a kiseh hunin zat dingin cih ding sing tawh biakna le anpal tawh biakna ding ka vaihawmsak hi. Ka Pasian aw, a hoih lamin kei hong phawk in. Hih lai-a kigelh thupiangte pen India gam panin Ethiopia gam dong, gamneu zakhat sawmnih le sagih a uk Ahasueras’ hun lai-a piang thu ahi hi. Hih hun laitakin kumpi khua ahi Susa khuapi sunga kumpi tokhom tungah amah tu hi. Ama uk a kum thumna kumin ama nuai-a a uliante khempeuh le a nasemte a dingin pawi khat bawlsak hi. Ama khutnuai-a om Persia le Media galkapmangte le ama nuai-a uliante le ama nuai-ah gam a uksawnte a om laitakin, a kumpi gam hauhna le ama thupi ziazuana ni tampi sung, ni za le ni sawmgiat sung tak a lak hi. Hih pawi hun a bei khit ciangin kumpi khua Susa khuapi sunga om milian mineu mi khempeuh a dingin kumpipa in pawi khat a bawl hi. Tua pawi pen kumpi inn huang sungah kibawl a, ni sagih sung kibawl hi. Tua huang sungah suangkang khuamte kiphut a, khau malneu le khau dupsan tawh ngun kualte-ah kikhihin a kikhai dalna puanpakte kikhungin, suangmanpha a san, a dum, a kang, le a vom, a nam tuamtuamte kizangin a kizem suangphah kiphah tungah kham le ngun kibawl lupnate kikoih hi. Kham hai nam tuamtuamte tawh zu kihawm a, kumpipa’ hauhna tawh kituakin deihdeihin zu kizang hi. Tua lai-ah zu nekna zia pen kihah piak cih om lo hi; bang hang hiam cih leh mi khempeuh in amau’ duh zahzah bek a neksakna ding uh kumpipa in a nuai-a a uliante thu pia hi. Tua banah Kumpinu Vashti in zong numeite a dingin Kumpipa Ahasueras’ innsung mahah pawi khat a bawl hi. Ahih hangin Kumpinu Vashti in innsungmangte’ thupuak kumpipa’ sapna a nial hi. Hih a nialna thu-ah kumpipa heh mahmah a, a hehna hangin a sin so hi. Tua ciangin kumpipa in upadi siam a mipilte thu dong hi. Bang hang hiam cih leh upadi le biakna lam thutheite khempeuh thu dot pen kumpipa’ zat ngei khat ahi hi. Ama gei nai penah a tu mite pen Persia le Media gam ulian sagihte ahi Karshena, Shethar, Admatha, Tarshish, Meres, Marsena, le Memukan-te hi uh a, kumpipa kiangah a hawh thei, kumpi gam sungah ulian pente ahi uh hi. “Innsung mangte’ tungtawnin keimah kumpi Ahasueras’ thupiakna bangin Kumpinu Vashti gamta lo ahih manin Kumpinu Vashti tungah upadi tawh kizui-in bangci kihih ding ahi hiam?” a ci hi. Tua ciangin kumpipa le uliante’ zakin Memukan in dawng a, “Kumpinu Vashti khial hi; kumpipa tung bek hi loin Kumpipa Ahasueras’ ukna gam sung khempeuha om uliante le mi khempeuh tungah zong a khial ahi hi. Kumpinu’ gamtatna thu numei dangte khempeuh in thei ding uh a, hih thu hangin numeite in a pasalte uh simmawh ding uh a, amaute in, ‘Kumpipa Ahasueras in ama kiangah a pai dingin Kumpinu Vashti thu pia napi-in pai lo hi,’ ci ding uh hi. Hih banga kumpinu’ gamtatna thu a za Persia le Media gam numei liante in kumpipa nuai-a uliante tungah tuni mahmahin hih thu gen ding uh a, kisimmawhna le kizahtak lohna tampi piangsak ding hi. Kumpipa in hoih na sak leh, kumpi thupiakna khat paisak inla, Kumpipa Ahasueras’ mai-ah Vashti a kilakkik nawn loh nadingin a kikhelkik ngei nawn lo ding Persia mite le Media mite’ upadi sungah gelhsak in. Tua ciangin amah sangin a kilawmzaw numei khat ama za luahsak in. Tua banga kumpipa’ thupiakna thu kumpi gam sung khempeuhah a kizak ciangin numei khempeuh in a neu a lian amau’ pasal ciat zahtak ding uh hi,” a ci hi. Kumpipa le uliante in hih ngaihsutna hoihsa uh a, Memukan’ gen bangin kumpipa a gamta hi. Pasal khempeuh pen ama innsung ukpa ahihna ding le ama kampau a kizuih kim nadingin kumpipa’ ukna gam khempeuhah amau’ lai ciat, le mi khempeuh tungah amau’ pau ciatin laikhakte kigelh hi. Hih thu teng a pian’ khit, Kumpipa Ahasueras’ hehna a dam ciangin, amah in Vashti phawkin, Vashti’ gamtatna le amah tawh kisai-in a thupiakna zong thei hi. Tua ahih ciangin kumpipa’ nasemte in ama kiangah, “Kumpipa a dingin a melhoih nungak khangnote zongsak in. Kumpi khua ahi Susa khuapi-a numeite’ omna-ah a melhoih nungak khangno khempeuh hong paipih nadingun na ukna gam tuamtuam khempeuhah uliante sawl in. Tua numeite pen numeite a uk, kumpipa’ innsungmang Hegai’ kep dingin ki-ap hen. Tua ciangin tua numeite tungah paknamtui tuamtuam kiguan’ hen. Tua sung panin kumpipa’ deih bel nungak pen Vashti’ tangin kumpinu suak hen,” a ci uh hi. Kumpipa in hih ngaihsutna hoihsa a, tua bangin a gamta hi. Tu-in kumpi khua Susa khuapi sungah Benjamin minam Kish, a tapa Shimei, a tapa Jair, a tapa Mordekai a kici Jew mi khat om hi. Amah pen, Babylon kumpipa Nebukhadnezzar in Jerusalem panin Judah kumpipa Jekoniah tawh a lak galmatte lak a kihel khat ahi hi. Amah in a innlak pate khat’ tanu, a min masa Hadassah, a nung ciangin Esther a kici, a khoi hi; bang hang hiam cih leh a nu le a pa om nawn lo hi. Tua numei melhoihin a ngaihbaang mahmah khat hi a, a nu le a pa a sih ciangin Mordekai in ama tanu dingin a lak ahi hi. Kumpipa’ thupiakna kithei kimin, Hegai’ kep dingin ap dingin kumpi khua Susa khuapi-ah numei tampi hong kipaipih ciangin, numeite a uk Hegai’ tungah ap dingin kumpipa’ inn-ah Esther zong kipaipih hi. Amah in tua nungak hoihsa-in pakta mahmah ahih manin paknamtuite le a annek ding pia pah a, kumpipa’ innsung panin a kiteel nasem numei sagih zong guan a, amah le a nasem numeite’ tungah numeite’ omna a hoihpen mun a pia pah hi. Mordekai in kham ahih manin Esther in ama namlephung genkhia lo hi. Esther bangci om a, ama tungah bang piang hiam cih a theih nadingin numeite’ omna inntual mai-ah nisimin Mordekai va pai zel hi. Numeite a kigin’ hun a vekpi-in kha sawm le nih sung hi a, sathau le myrrh paknamtui tawh kha guk sung kipuahin, paknamtui tuamtuamte le kipuahna dangte tawh kha guk sung mah kipuah uh hi. Kiginkholhna hun cing a, Kumpipa Ahasueras’ kiangah numeite a pai ciangin numeite’ omna panin kumpipa’ inn-ah a deih peuhpeuh uh kikengsak hi. Nitakin kumpipa kiangah va pai a, a zingsang ciangin numeite’ omna a mun dang khatah kiciahsak a, kumpipa’ zineute a uk, kumpipa’ innsungmang Shaashgaz in kem hi. Kumpipa in a deihkik kei leh kumpipa kiangah paikik nawn lo a, kumpipa in a deih leh a minin kisamkik hi. Mordekai in ama tanu dingin a lak a innlak pa Abihail’ tanu Esther pen kumpipa kiangah a pai ding hun a tun ciangin, numeite a uk kumpipa’ innsung mangpa Hegai’ gen teng lobuang kizepna ding puan dang bangmah ngenthuah lo hi. Tu-in Esther a mu mi peuhmah in hoihsa kim uh hi. Ama uk a kum sagihna, kha sawmna ahi Tebeth kha sungin kumpi innsung Kumpi Ahasueras’ kiangah Esther a kipaipih ciangin, kumpipa in ama numei dangte khempeuh sangin itzaw a, a nungak dangte khempeuh sangin limbawl zaw hi. Tua hi a, kumpi lukhu amah khusakin Vashti’ tangin kumpinu a suaksak hi. Tua ciangin kumpipa in Esther pahtawina-in ama uliante le a nasem khempeuh a dingin pawi lianpi khat a bawl hi. Amah in ama ukna gam khempeuhah tua ni nasep khawlin zum a khakna ding uh zong thu zasak kim a, kumpipa min tawh a kilawm a kituak letsongte zong a hawmkhia hi. Tua hun sungin Mordekai in kumpi nasep a ngah hi. Ama hilhna tawh kizui-in Esther in ama minam ahi a, a innkuan ahi zongin pulak lo hi. Mordekai’ kep sungin ama thu a man’ mah bangin tu-in zong Mordekai’ gen bangin gamta hi. Ni khat, kumpi nasemin Mordekai a om hun sungin kongcing ahi kumpipa’ innsungmangte Bigthana le Teresh heh uh a, Kumpipa Ahasueras thah ding a sawm uh hi. Hih thu Mordekai in phawkin Kumpinu Esther kiangah ko a, Esther in Mordekai’ hong thupuak, ci-in kumpipa kiangah a gensawn hi. A thu kikanin a manna a kitheih ciangin khuampite tungah tua mi nih tegel kikhailum hi. Hih thupiangte khempeuh kumpipa’ theihin Kumpi Gam Tangthu Laibu sungah kiciamteh hi. Hih thute khit ciangin Kumpipa Ahasueras in Agag-te beh Hammedatha’ tapa Haman a za khangsak a, amah tawh a semkhawm ulian dangte khempeuh sangin a lianzaw-in a bawl hi. Tua ahih ciangin kumpi huang sunga om kumpipa’ nasem khempeuh in Haman zahtak bawlin ama mai-ah kun uh hi; bang hang hiam cih leh tua banga a hih ding uh kumpipa in thu pia hi. Ahih hangin Mordekai pen amah zahtakna limin a mai-ah kun lo hi. Tua ciangin kumpipa’ huang sunga om kumpipa’ nasemte in Mordekai kiangah, “Bang hangin kumpipa’ thupiak mang lo na hi hiam?” a ci uh hi. Nisimin amaute in Mordekai kiangah gengen uh a, ahih hangin amah in mang nuam lo hi. Jew mi ahihna thu amaute kiangah gen khin ahih manin tua banga ama nialna a kimang ding mah ahi hiam cih a theih nadingun Haman kiangah a thu ko uh hi. Ama mai-ah Mordekai a kun lohna, amah a zahtakbawl lohna a theih ciangin Haman nak heh mahmah hi. Amah in Mordekai’ mipihte a theih ciangin amah bek suktaak sa lo a, Ahasueras’ kumpi gam sung khempeuhah a om Jew mi khempeuh, Mordekai le a minam buppi-in a suksiat theih nading lampi a zong hi. Kumpi Ahasueras’ uk a kum sawm le nihna, a kha masa pen ahi Nisan kha a kipanin a ni ni, a kha kha-in Pur a kici aisanna tawh Haman’ muhin ai kisan a, a kha sawm le nihna Adar kha a ni sawm le thum ni-in ai a pha hi. Tua ciangin Haman in Kumpipa Ahasueras’ kiangah, “Na ukna gam tuamtuam sunga om mite lakah a om kawikawi, amau a tuam om mi pawlkhat om hi. Amau’ ngeinate pen midangte a’ tawh kibang lo a, amaute in nangma thukhamte zui lo uh hi. Tua ahih manin hih mite na hici khahkhong ding kilawm lo hi. Kumpipa in hoih na sak leh amaute a kisuksiatna ding thu pia-in lai-in gelh in. Tua hileh nangma sumkholna sungah koih dingin na khutnuai-a na uliante tungah ngun talen tul sawm ka pia ding hi,” a ci hi. Tua ahih ciangin kumpipa in ama khutsung panin a minthuhna zungbuh suahin Jew mite’ gal, Agag-te beh Hammedatha’ tapa Haman’ tungah a pia hi. Tua ciangin kumpipa in Haman kiangah, “Na sum cihte nangmah kong piakik hi; na mi cihte zong nangma khut sungah kong pia hi; na ut bangbangin bawl in,” a ci hi. A kha masa a ni sawm le thum ni-in kumpipa’ lai-atte khempeuh kisam a, Haman’ genna tawh kizui-in kumpipa’ nuai-ah gam tampi a uksawnte le gam khat a uksawnte, le gam uksawnte’ khutnuai-ah a mi tuamtuamte lakah uliante tungah lai kipaisak hi. Gam khempeuhah amau’ lai ciat, mi khempeuh tungah amau pau ciatin kigelh hi. Hih lai pen kumpipa Ahasueras’ min tawh kigelhin kumpipa’ minthuhna zungbuh tawh min kithuh hi. Tua bangin kumpipa’ ukna gam khempeuhah laitaite kipiasak a, Adar kha ahi a kha sawm le nihna a ni sawm le thum ni, ni khat sungin Jew mi a moi a ham, numei naupang, a vekpi-in susia-in, thatin, a beisakmangna ding uh, le a neihsate uh a laksak nadingun thu kipia hi. Tua a ni seh ni-in amaute a baihsa-in a om theih nadingun hih thupiakna lai pen gam khempeuhah dal khat ciat kipuakin tua thu pen a gam sung mi khempeuh tungah a kizasak kim ding ahi hi. Kumpipa’ thupiakna tawh laitaite kinawh sawl a, hih thupiakna pen kumpi khua Susa khuapi panin a kihawmkhia ahi hi. Kumpipa le Haman zu ne-in om hithiat uh a, ahi zongin Susa khuapi sung buai mahmah hi. Mordekai in hih thupiang teng a theih ciangin a puan balkekin puanhampi silhin vut kibuak a, nakpitakin a kap kawmin khua sungah vak kawikawi hi. Puanhampi silh kawmpi-in kongpi-ah kuamah kilutsak lo ahih manin kumpi inn kongpi panin a kimuhna mun ciangah pai hi. Kumpipa’ thupiakna a tunna gam Jew mite’ omna khempeuhah nakpi taka thumna le tauna, antanna, kahna, le dip-humna om hi. Mi a tamzaw in puanhampi silhin vut lakah lum uh hi. Esther’ nasem numeite le a innsungmangte hong pai-in ama kiangah tua thu a gen ciangun kumpinu in lamdangsa mahmah hi. A puanhampi a laih nadingin amah in Mordekai a’ ding puante khak a, ahih hangin Mordekai in tuate na sang lo hi. Tua ciangin Esther in ama na a sem dingin a kiseh, kumpipa innsungmangte lak panin Hathak a kici mipa samin hih thu pen bang hi a, bang a cihnopna ahi hiam, ci-in Mordekai tung panin thu a va kan dingin a sawl hi. Kumpi inn kongpi mai-a om khuapi kongzing tualpi a om Mordekai kiangah Hathak va pai a, Mordekai in ama tunga thupiangte khempeuh le Jew mite sukmang nadingin kumpipa’ sumkholna-ah Haman in piak dinga a sum ciamzah thute khempeuh ama kiangah na gen hi. Amaute a kisukmang nadingin Susa khua panin a kihawmkhia lai dal khat zong Mordekai in ama tungah pia a, amah in Esther tungah tua lai na pia-in a thu a na gentelna ding le, kumpipa kiangah Esther na pai-in ama mipihte a dingin a na thumsak ding zong a sawl hi. Hathak zong ciahin Mordekai’ thugen teng Esther kiangah va gen hi. Tua ciangin Esther in Hathak mah sawlkikin Mordekai’ tungah thu zasak a, “Numei ahi a, pasal ahi zongin sap lohpi-in mi khat peuhpeuh kumpipa’ omna inn sungah a va lut leh upadi khat bek om a, tua pen, thah ding ahi hi; kumpipa in ama lamah a kham kumpi ciangkhut a na zan leh tua mipa suakta bek ding ahihna thu kumpipa’ nasemte le ama ukna gam mi khempeuh in a theih ciat uh ahi hi. Tu-in kumpipa kiangah a pai dingin hong kisap loh zawh ni sawmthum bang pha ta hi,” a ci hi. Tua hi a, Esther’ thugen teng Mordekai tungah kigen hi. Tua ciangin Mordekai in Esther a dawnkikna thu amahmah puasakkik a, “Kumpi inn sungah na omna hangin Jew mi khempeuh lak panin nang a suakta tuan dingin kingaihsun kei in. Hih bang hunin bangmah hih loin na omcip leh, Jew mite’ suahtakna ding le noptuamna ding thu mundang khat pan hong piang veve ding a, nangmah le na innkuanpihte na simang ding uh hi. Hih kumpi inn na tunna pen hih bang huna mah dinga a tung na hih mel zong kua in thei ahi hiam?” a ci hi. Tua ciangin Esther in Mordekai a dawnna lai amah puasak leuleu a, “Pai-in Susa khua sunga om Jew mi khempeuh khawm inla, keimah ngaihsutna-in an na tang un. A sun a zan ci loin ni thum sung an ne lo, tui dawn loin na om un. Na tan’ uh mah bangin kei le ka nasem numeite in zong ka na tang ding uh hi. Tua khit ciangin ngeina ahihloh hangin kumpipa kiangah ka va pai ding hi,” a ci hi. Tua ahih ciangin Mordekai pai-in Esther’ sawl bang teekteekin a gamta hi. A ni thum ni-in Esther in a kumpipuan silhin kumpipa’ inntual sungnungah dingin kumpi inn lam a nga hi. Kumpi innsung a kumpi tokhom tungah kumpipa tu-in kongpi lam na nga hi. Inntualah Kumpinu Esther dinga a om kumpipa in a muh ciangin Esther in kumpipa’ maipha ngah a, kumpipa in a khuta a tawi kumpi ciangkhut pen Esther’ lamah a zan hi. Tua ciangin Esther in hong naihin tua ciangkhut dawn va lawng hi. Tua ciangin kumpipa in ama kiangah, “Kumpinu Esther aw, bang thu ahi hiam? Kei tungah nong nget peuhpeuh, ka kumpi gam phelkhat ciang dong, nang tungah hong kipia ding hi,” a ci hi. Tua ciangin Esther in, “Nong hehpih zawh leh, kumpipa a’ dinga kong bawlsak nitak an a ne dingin tuni-in Haman tawh hong pai un,” a ci hi. Tua ciangin kumpipa in, “Esther’ deih bangin i gamtat theih nadingin manlangin Haman va sam un,” a ci hi. Tua ahih manin Esther’ bawlsak nitak an a ne dingin kumpipa le Haman hong pai uh hi. Amaute in zu a nek laitakun kumpipa in Esther’ kiangah, “Nong nget peuhpeuh hong kipia ding hi. Nong nget peuhpeuh ka kumpi gam phelkhat ciang dong nangawn hong kipia ding hi,” a ci hi. Esther in dawngin, “Nang tung panin kong ngetnop kong thumnop thu in: Topa aw, nong hehpih zawh a, na lung a kim a, kong nget thu nong piakzawh ding le, no tegel a dingin ka na bawl an a ne dingin zing ciangin kumpipa le Haman hong pai un. Zing ciangin nong cih bangin ka deihna kong gen ding hi,” a ci hi. Tua ahih ciangin lungdam kipakin tua ni-in Haman a ciah hi. Ahih hangin kongpi-a om Mordekai in amah zahtakna limin a mai-ah ding lo, kun lo-a om a muh ciangin Mordekai tungah nakpitakin a heh hi. Ahi zongin Haman ki-ip tentanin inn-ah a ciah hi. Tua ciangin a lawmte le a zi Zeresh sam a, ama hauhna teng, a tapa neih teng, kumpipa in amah a pahtak manin a za a khansakna teng, le kumpipa’ nasemte le ulian dangte khempeuh sangin a lianzaw-in amah a koihna thute khempeuh amaute tungah genin a lak hi. Tua ciangin Haman in, “Tua tengbek hi nai lo lai hi. Kumpinu Esther nangawn in ama bawlsa an kumpipa tawh a nekhawm dingin kei simloh midang kuamah paisak lo hi. Zing ciangin zong kumpipa tawh kei hong samkhawm hi. Ahi zongin kumpipa’ kongpi-a a tu Jew mi Mordekai ka muh laiteng hih thute khempeuh a mawkna suak zel hi,” ci lai hi. Tua ciangin a zi Zeresh le a lawmte khempeuh in ama kiangah, “Pi sawmsagih le nga a sang khuam phutsak inla, tua tungah Mordekai a kikhailup nadingin zingciangin kumpipa kiangah gen in. Tua ciangin nitak an ne dingin lungnuam takin kumpipa tawh pai in,” a ci uh hi. Haman in hih ngaihsutna hoihsa a, a khuam a phutsak hi. Tua zanin kumpipa ihmu thei lo a, nisim thupiang ciaptehna Khang Tangthu Laibu lasak a, ama zakin tua laibu kisim hi. Tua banga a kisim ciangin, kongcingte sung panin innsungmang Bigthana le Teresh in Kumpipa Ahasueras thah a sawmna thu pen Mordekai in a genna thu a kiciamtehna simkha uh hi. Tua thu a zak ciangin kumpipa in, “Hih thu hangin Mordekai’ tungah pahtawina ahi a, minliatna ahi zongin bang kipia ahi hiam?” a ci hi. Tua lai-a a om kumpipa’ nasemte in Mordekai’ tungah bangmah a kipiak lohna thu a gen uh hi. Tua ciangin kumpipa in, “Hih kiimnai-ah kua om ahi hiam?” a ci hi. Tua laitakin Mordekai thah nadingin a phuhsa khuam tungah Mordekai khailupna ding thu kumpipa kiangah a ngen dingin kumpi huang sungah Haman hong tum hi. Tua ahih ciangin kumpipa’ nasemte in ama kiangah, “Hih lai-ah Haman om hi; inntualah ding hi,” a ci uh hi. Tua ciangin kumpipa in, “Amah hong tumsak un,” a ci hi. Tua ahih ciangin Haman hong tum a, kumpipa in ama kiangah, “Kumpipa in a pahtawi nop mipa tungah bang kihih leh hoih na sa hiam?” a ci hi. Tua ciangin Haman in a lungsim sungah ngaihsun a, “Kumpipa in kei sangin a pahtawi nopzawk ding kua om zenzen ahi hiam?” ci-in ngaihsun hi. Tua ahih manin Haman in kumpipa kiangah, “Kumpipa in a pahtawi nop mipa a dingin kumpipa mahmah in a silh kumpi puante, le kumpipa a tuanna sakol a lukhu tawh la sak in. Tua ciangin kumpipa’ ulianpen khat tungah tua kumpi puante le sakol apsak in. Kumpipa in a pahtawi nop mipa pen amah zemsak inla, tua ciangin khuasung kongzing lampi-ah sakol tungah a tuangsa-in na ulian pen pa kaisak inla, ama mai-ah kiko sakin, ‘Kumpipa in a pahtawi nop mipa tungah hih bangin kibawl ding hi,’ cisak in,” a ci hi. Tua ciangin kumpipa in Haman kiangah, “Na cihsa bangin manlangin kumpi puante le sakol la pah inla, kongpi-a om Jew mi Mordekai tungah hih thute khempeuh hih in. Na gensa khat beek siit kei in,” a ci hi. Tua ahih ciangin Haman in kumpi puante le sakol la-in Mordekai zem a, khuapi sung kongzing lampi-ah amah tuangsakin, “Kumpipa in a pahtawi nop mipa tungah hih bangin kibawl ding hi,” ci-in a taangko hi. Tua ciangin kumpipa’ kongpi-ah Mordekai ciahkik hi. Haman ahih le kilukhuhsa-in a thum kawmin a inn-ah ciahpah vingveng hi. Tua ciangin Haman in a zi Zeresh le a lawmte khempeuh tungah ama tunga thupiang teng a gen hi. Tua ciangin a zi Zeresh le a lawmte in ama kiangah, “Tu-a na lelhtak Mordekai pen Jew mi ahi hi; amah na zo kei ding a, amah in nang hong zozaw ding hi,” a ci uh hi. Tua bangin Haman tawh amaute a kiho laitakin kumpipa’ innsungmangte hong pai a, Esther’ bawlsa nitak an a ne dingin amah a paikhiatpih pah uh hi. Tua ahih ciangin Kumpinu Esther tawh an a ne dingin kumpipa le Haman va pai uh hi. A ni nih ni, amaute in zu a nek laitakun kumpipa in Esther kiangah, “Kumpinu Esther aw, nong ngetnop bang ahi hiam? Nong nget khempeuh ka kumpi gam phelkhat dongin hong kipia ding hi,” ci kik leuleu hi. Tua ciangin Kumpinu Esther in dawngin, “Kumpipa in nong hehpihzawh a, kumpipa in hoih na sak leh, kong nget kong thumnop thu pen keimah le ka mipihte sihna tawh nong kipelhsakna ding ahi hi. Bang hang hiam cih leh kei le ka mite suksiat ding, thah ding, beisakmang dingin hong kizuak hi. Kote, numei pasal a kibangin sal dingin hong kizuak hileh bangmah ka pau kei ding hi; tua bang lel tawh kumpipa nawngkaisak taak lo hi,” a ci hi. Tua ciangin Kumpipa Ahasueras in Kumpinu Esther kiangah, “Hih banga gamtat ding a ngaihsun kua hi a, koi-ah om ahi hiam?” a ci hi. Tua ciangin Esther in, “Hong langpang ka gal pa! Hih migilo Haman!” a ci hi. Tua laitakin kumpipa le kumpinu’ mai-ah cih nading thei loin Haman a om hi. Tua ciangin kumpipa a hehsa-in annekna pan dingkhia-in kumpi huan sungah a pai hi. Ahi zongin Haman ahihleh tua lai mahah omin Kumpinu Esther in a nuntakna a suahtaksakna ding a thum hi; bang hang hiam cih le kumpipa in amah thah dingin a ngaihsutna a lungsim a thei hi. Kumpi huan panin a annekna mun uhah kumpipa hong paikik ciangin Esther’ tutna lamah Haman na awn phei-in a om mu a, kumpipa in, “Ka innsung ka muhna nangawnah hih mipa in kumpinu hih ding ahi hiam?” ci hi. Kumpipa in tua thu a cih phetin amaute in Haman’ mai puan a khuh uh hi. Tua ciangin kumpipa’ na a sem innsungmangte lakah Harbona in, “Nidangin kumpipa’ na hoihtakin a sem ngei Mordekai thah nadingin Haman mahmah in a phuhsak, pi sawmsagih le nga a sang khuam pen Haman’ inn-ah tumahin om hi,” a ci hi. Tua ciangin kumpipa in, “Tua tungah amah khailum un,” a ci hi. Tua ahih ciangin Mordekai khailup nadingin a phuh khuam tungah Haman a khailum uh hi. Tua ciangin kumpipa’ hehna a dam hi. Tua ni mahin Kumpipa Ahasueras in Jew mite’ gal ahi Haman’ neihsa khempeuh Kumpinu Esther tungah pia hi. Tua ciangin kumpipa’ omna-ah Mordekai hong tung hi; bang hang hiam cih leh amah tawh a kinaina zia, kumpipa kiangah Esther in gen hi. Tua ciangin kumpipa in Haman’ tung panin a lakkiksa minthuhna zungbuh pen suahkhia-in Mordekai a pia hi. Tua hi a, Haman’ neihsa khempeuh a uk dingin Esther in Mordekai a koih hi. Kumpipa’ mai-ah Esther khatvei va paikikin khitui naptui tawh a khe mai-ah va puk a, Agag mi Haman’ vaihawm siatna lianpi le Jew mite a sawmna thu a kipelhkik theih nadingin va thum hi. Kumpipa in Esther’ lamah a kham ciangkhut na zan a, tua ciangin Esther thoto-in kumpipa mai-ah dingin, “Kei nong hehpihzawh a, hih ka ngaihsutna man na sak a, hoih na sak le, na ukna gam sung khempeuhah a om Jew mite thahna ding a sawmna-in Agag-te beh Hammedatha’ tapa Haman in a laigelhte dawhkik nadingin lai khat gelhsak in. Ka mipihte tungah hih siatna lianpi a tung ka muh ding bangci thuakzawh ding ka hi hiam? Ahih kei le ka innkuanpih tungah a tung hih siatna ka muh ding bangci thuakzawh ding ka hi hiam?” a ci hi. Tua ciangin Kumpipa Ahasueras in Kumpinu Esther le Jew mi Mordekai tungah, “Haman in Jew mite thah hong sawm ahih manin sing tungah amah kikhailum khin a, Haman’ neihsa khempeuh Esther’ tungah kong pia khin hi. Kumpipa’ min tawh kigelhin, kumpipa’ minthuhna tawh a kithuh khinsa lai pen kidokkik thei nawn lo ahih manin, tu-in Jew mite tawh kisai-in hoih dinga na up bangin kumpipa’ min tawh gelh inla, tua khit ciangin kumpipa’ minthuhna zungbuh tawh thuh in,” a ci hi. Tua ahih ciangin a kha thumna ahi Sivan kha a ni sawm le thum ni-in kumpipa’ lai-atte kisam a, Mordekai’ gen bang teekteekin Jew mite tung le India panin Ethiopia dong gam zakhat le sawmnih le sagih a uk ahi gam tampi a ukte, gam khat a ukte le tua gam sunga uliante tungah lai kihawmkik a, amau’ lai ciat le amau’ pau ciatin kigelh a, Jew mite a’ ding zong amau’ lai le amau’ pau mahin kigelh hi. Tua lai pen Kumpipa Ahasueras’ minin kigelhin kumpipa’ min thuhna zungbuh mah tawh kithuh a, kumpi sakol bukah a kikhawi kumpipa’ sakolte tungah laitaite kituangsakin lai kihawmsak hi. Tua thupiakna lai pen gam khempeuhah kihawmin mi khempeuh kitheisakin, amau’ galte a thukkikna ding ahi tua ni tawh kisai-in Jew mite a kiginkholh ding uh ahi hi. Tua ahih ciangin kumpipa’ sakolte tungah laitaite tuangin kumpipa’ thu-kin sawl mah bangin nawhtai uh hi. Tua ciangin kumpi khua Susa khuapi sungah zong tua thupiakna lai a kihawm hi. Tua ciangin kumpi puan a san le a kang silhin, kham tawh kibawl kumpi lukhu lianpi khu-in, saihadial puanneel le puansan silhsa-in kumpipa’ omna panin Mordekai paikhia hi. Tua ciangin Susa khuapi sung mi khempeuh lungdamin awng uh hi. Tua hi a, Jew mite in suahtakna, lungdamna, le pahtawina ngah uh hi. Kumpipa’ thupiakna a tunna gam le khua khempeuhah Jew mite a dingin lungdamna le kipahna, pawi bawlna le nasep khawlin zum khakna a om hi. Tua hi a, midangte in Jew mite kihta uh ahih manin tua gam a om mi tampi tak in Jew mi ka hi uh hi, a ci uh hi. A kha sawm le nihna ahi Adar kha a ni sawm le thum ni-in kumpipa’ thupiakna bangin sepkhiatna ding hun hong tung hi. Jew mite’ galte in gualzo dinga a ki-up ni teek pen amau a mudah mite’ tungah Jew mite a gualzawh ni ding hong hizaw hi. Tua ni-in amaute’ siatna ding a geelte a sugawp dingin Kumpipa Ahasueras’ ukna gam khempeuha amau’ khuapite sungah Jew mite kikhawm uh hi. Mi khempeuh in Jew mite kihta uh ahih manin kuamah in Jew mite nang ngam lo uh hi. Mordekai kihta uh ahih manin gam tampi a ukte le gam khat a ukte le gam sunga ulian tuamtuamte le kumpi ulian khempeuh in Jew mite panpih uh hi. Bang hang hiam cih leh kumpi inn sungah Mordekai ulianpi khat suak a, a vangliatna a khan semsem mah bangin gam khempeuhah ama minthanna kizel hi. Tua ahih ciangin Jew mite in namsau tawh a galte uh tampi tak thatlum uh a, amau a mudahte a ut utun hihgawp uh hi. Kumpi khua Susa khuapi sung mahmahah Jew mite in mi zanga thatin susia uh hi. Kumpi khua Susa khuapi sunga a kithat zah tua ni mahmahin kumpipa kiangah kizasak hi. Tua ciangin kumpipa in Kumpinu Esther kiangah, “Kumpi khua Susa khuapi sungah Jew mite in mi zanga that uh a, Haman’ tapa sawmte zong that uh hi. Ka ukna gamdangte sungah zong bangzah that ding kithei lo hi. Tu-in bang deih lai na hi hiam? Nong nget peuhpeuh hong kipia lai ding hi,” a ci hi. Tua ciangin Esther in, “Kumpipa in hoih na sak leh, tuni-a mah bangin zing ciangin zong Susa khuapi sunga om Jew mite tungah hih theihna thu pia inla, Haman’ tapa sawmte’ luanghawmte khuam tungah khaisak in,” a ci hi. Tua ahih manin tua banga a hih nadingin kumpipa in a sawl hi. Susa khuapi sungah hih thu suakkhiasak a, khuam tungah Haman’ tapa sawmte kikhai hi. Susa khuapi sunga om Jew mite Adar kha a ni sawm le li ni-in kikhawm kikin Susa khua sungah mi zathum that uh hi. Ahi zongin amau’ neihsate suksak lo uh hi. Tua mah bangin kumpipa’ ukna gam tuamtuama om Jew mite zong amau’ kihut nadingin kikhawm uh hi. Amaute in zong amau a mudah mihing tul sawmsagih le tulnga thatin a galte uh tungah phu la uh hi. Ahih hangin a neihsate uh suksak lo uh hi. Hih banga a hih pen Adar kha a ni sawm le thum ni hi a, a ni sawm le li ni-in tawlnga uh a, pawi bawlin lungdamin om uh hi. Ahih hangin Susa khua sunga om Jew mite ahihleh a ni sawm le thum le sawm le li ni-in kikaikhawm uh a, a ni sawm le nga ni tawlnga uh a, pawi bawlin lungdamin om uh hi. Hih thu hangin gam sung khuaneute-a teng Jew mite in Adar kha a ni sawm le li ni pawi bawlna le lungdam ni dingin tawlngak ni-in nei uh a, anlim nono kikholhna ni-in a zang uh hi. Tua ciangin Mordekai in hih thupiangte khempeuh lai-in ciamteh a, a nai a gamla a om Kumpi Ahasueras’ ukna gam sung khempeuha om Jew mite tungah lai paisak hi. A kumkumin Adar kha ni sawm le li ni le sawm le nga ni a tanna dingun thu a pia hi. Tua nite pen Jew mite a galte uh tung panin a suahtak ni, dahna le thumnate lungdamna le lungnopna a suah kha ahi hi. Tua ahih manin amaute in pawi bawl ni le lungdam ni-in nei-in, anlim nono khatlekhat kikholh ni le mizawngte tungah letsong piak ni-in a zat dingun thu a pia hi. Tua ahih ciangin Mordekai’ laigelhna tawh kizui-in Jew mite in a patsa uh hih banga a hihnate uh a zom uh hi. Bang hang hiam cih leh Jew mi khempeuh’ gal ahi, Hammedatha’ tapa, Agag-te beh Haman in Jew mite sugawpin a suksiat nadingin Pur kici ai sanin Jew mite suksiat ding sawm hi. Ahih hangin kumpipa in hih thu a theih ciangin, Jew mite sukna dingin Haman in a geelsa thu hoih lo pen Haman’ lu tung mah a lehtukna ding, le amah le a tapate khuam tungah a kikhaina ding lai-in gelhin thu a pia hi. Tua ahih ciangin Pur min tamin hih hun sung teng Purim ci-in min a phuak uh hi. Tua ahih ciangin hih lai sunga a kigelh thute khempeuh, le hih thute amau’ mit tawh mu-in a pumpi uh tawh a tuahna uh hangin, Jew mite amau mahmah, le a suan a khakte uh, le amau a pawlpih khempeuh in lai sunga kigelh bangin a kiseh hunin kum simin hih ni nihte a pel loin a tan’ ding uh kipsak uh a, a khangkhangin innkuan sim, gam sim, khuapi simah hih nite phawkin a kitanna ding, le Jew mite lakah hih Purim nite a kitan’ ngitngetna ding ahi a, a suanlekhakte un zong hih thu a mangngilh hetloh nading uh ahi zongin khotakin a len uh hi. Tua ciangin Abihail’ tanu Kumpinu Esther in Purim thu tawh kisai hih laikhak nihna a kipsak nadingin Jew mi Mordekai tungah aana a kicingin a piakna lai-in a gelh hi. Kumpi Ahasueras’ ukna gam za le sawmnih le sagih sungah a om Jew mite khempeuh tungah kilemna le nopna a omna ding deihsakna laite kikhak a, Jew mi Mordekai in a gelhsa bangin a kisehsa tawh kizui-in hih Purim nite a tan nadingun thu kipia hi. Tua mah bangin amaute le a suanlekhakte uh a dingin antanna ding le thumna bawlna ding ngeinate a gelh uh hi. Kumpinu Esther’ thupiakna in hih Purim bawlna ding ngeinate kipsak a, lai thupite sungah hih thu kiciamteh hi. Kumpipa Ahasueras in a ukna gam leitung le tuikulh tunga tengte tung panin siah kai hi. Ama vangliatna le a sepnate khempeuh, le Mordekai tungah a piak minphatnate, Media le Persia Kumpite’ Khang Tangthu Laibu sungah kigelh hi. Bang hang hiam cih leh Kumpipa Ahasueras’ zomah Mordekai a lianpen ahi hi. Mordekai in ama mite’ phattuamna ding le a suanlekhakte uh a khantohna ding hanciam ahih manin Jew mite lakah milian khat hi a, a gam mihonpite in a it kim uh hi. Uz gamah Job kici min nei mi khat a om hi. Tua mipa a paubaang lo, a thutang, Pasian a zahtak mi khat hi a, amah in gamtat hoih lo peuhmah peel hi. Amah in tapa sagih le tanu thum nei hi. Amah in tuu tulsagih, kalaoh tulthum, bawngtal kap zanga, lapi zanga le nasem tampi tak a nei hi. Tua ahih manin nisuahna gam sungah Job a haupen khat ahi hi. Ama tapate in inn khat panin inn khatah a ban banin pawi bawlin pai kawikawi uh a, tua pawi a siim dingin a sanggam numei thumte uh zong a sam kawikawi uh hi. Tua banga a pawi bawl uh gual khat a kikhit ciangin Job in a tapate samin amaute siansuah a, zingsangin tho baihin a ta phazah tawh kizui-in meihal biakna a pia hi; bang hang hiam cih leh Job in, “Ka tate khialin, a lungsim sung uhah Pasian samsia khathei ding uh hi,” a ci hi. Tu-a bangin Job in hih tawntung hi. Ni khat ni-in Topa’ omna-ah vantung mite hong pai uh a, tuate lakah Satan zong hong kihel hi. Topa in Satan kiangah, “Koi pana hong pai na hi hiam?” a ci hi. Satan in Topa dawngin, “Leitung khempeuh a lu pan a taw dong vak kawikawi-in ka va phehlehna mun panin ka hong pai hi,” a ci hi. Tua ciangin Topa in Satan kiangah, “Ka nasem Job na phawkkha hiam? A paubaang lo, a thutang, Pasian zahtakin gamtat hoih lo a peel amah tawh a kibang midang leitungah na mu kei ding hi,” a ci hi. Tua ciangin Satan in Topa dawngin, “Job in Pasian hong mawk zahtak ahi hiam? Amah le a innkuan le a neihsate khempeuh na hutna-in a kimkotah daai khan hi lo na hi hiam? Ama hihna khempeuhah thupha na pia a, genzawh lohin ama neihsa pung hi. Ahi zongin na khut zanin ama neihsa khempeuh suksak lecin na maitang mahmahah nang hong samsia pah ding hi,” a ci hi. Tua ciangin Topa in Satan kiangah, “En in, ama neihsa khempeuh na khut sungah kong ap hi; ahi zongin amah taktak ahihleh na su kei ding hi,” a ci hi. Tua ciangin Topa’ omna panin Satan a paikhia hi. Ni khat, a tapate le a tanute in a u pen uh inn-ah an ne zu ne-in om uh hi. Kamtai khat Job kiangah hong tungin, “Bawngtalte in lo kho-in, tuate gei-ah late gamta uh hi. Tua laitakin Seba mite hong pai-in ganhingte hong sut a, namsau tawh gancingte thatkhin uh hi. Hih thu a hong zasak thei dingin kei bek kong suakta hi,” a ci hi. Amah in a thugen a khit ma-in kamtai dang khat hong tungin, “Vantung panin keek hong kia a, tuute le tuucingte kha-in kangtum uh hi. Hih thu nang kiangah a hong ko thei dingin kei bek kong suakta hi,” a ci hi. Tua pa in a thugen a khit ma-in kamtai dang khat hong tung leuleu-in, “Khaldea mite hon thum in kalaohte hong sut a, namsau tawh kalaoh tung tuangte khempeuh that hi. Hih thu nang kiangah a hong ko thei dingin kei bek kong suakta hi,” a ci hi. Amah in a thugen a khit ma-in kamtai dang khat hong tung leuleu a, “Na tapate le na tanute a u pen uh inn-ah an ne zu ne-in om uh hi. Tua laitakin sehnel gam panin huihpi pingpei hong nungin a inn mutpai-in na tate denglum hi. Nang kiangah hih thu a hong ko thei dingin kei bek kong suakta hi,” a ci hi. Hih thu a zak ciangin Job dahlua-in a puan balkek a, a sam met khia-in leilakah bok sukin Pasian a bia hi. Tua ciangin amah in, “Ka nu sung panin guaktangin ka suak a, guaktang mahin ka ciahkik ding hi. Topa in hong pia a, Topa mah in hong lakik hi. Topa’ min kiphat ta hen,” a ci hi. Hih thu khempeuhah Job khial lo a, Pasian zong mawhsak lo hi. Ni khat ni-in Topa’ omna-ah vantung mite hong paikik uh a, Satan zong amaute lakah hong kihelin Topa’ omna mahah hong pai hi. Tua ciangin Topa in Satan kiangah, “Koi lai panin hong pai na hi hiam?” a ci hi. Satan in Topa dawngin, “Leitung khempeuh a lu pan a taw dong vak kawikawi-in ka va phehlehna mun panin kong pai hi,” a ci hi. Tua ciangin Topa in Satan kiangah, “Ka nasem Job na phawk hiam? A paubaang lo, a thutang, Pasian zahtakin gamtat hoih lo a peel, amah tawh a kibang midang leitungah om lo hi. Thu om lopi-in amah susia dingin kei nong kam pausak a, ahi zongin ama hoihna bangmah hem tuan lo hi,” a ci hi. Tua ciangin Satan in Topa dawngin, “Vun bek in vun mah leizo bek, ci-in paunak a om mah bangin mi khat in ama nuntakna a hutna-in a neih khempeuh pia ngam ding hi. Tu-in na khut zan inla, ama sa le a guh suksak lecin nangma maitang mahah pel loin nang hong samsia ding hi,” a ci hi. Tua ciangin Topa in Satan kiangah, “En in, na khut sungah amah kong ap hi; ahi zongin amah sisak kei in,” a ci hi. Tua ahih ciangin Topa’ omna panin Satan paikhia a, Job a khetul pan a luzang dongin a kihhuai meima a veisak hi. Tua ciangin Job in beel kitam themkhat la-in tua tawh kikhuatin vut lakah a tu hi. Tua ciangin a zi in, “Na upna khiam tuan lo ding na hi hiam? Pasian samsia inla sisuk mai in,” a ci hi. Ahih hangin amah in a zi kiangah, “Numei haite’ kampau bangin na pau hi. Pasian’ tung panin a hoih sang ihih ciangin siatna zong sang lo ding ihi hiam?” a ci hi. Hih thu khempeuhah a kampau nangawnin Job khial lo hi. Job’ lawmte thum, Teman khuami Elifaz, Shuah gammi Bildad, le Naamah gammi Zofar-te in Job in a thuak gimna thu teng a zak uh ciangin a inn ciat panun amah a hehnem ding le a hanthawn dingin kituahin hong paikhawm uh hi. Amaute in a gamla sim mun panin Job a muh tungun amah thei pah lo uh hi. Tua ciangin amaute a gingin kapkhia uh a, a puan uh balkekin a lu tung uh a tukik dingin leivui lawnto uh hi. Tua ciangin leilakah sun sagih le zan sagih sung amah tawh tukhawm uh a, ama thuakna a nasiat mahmah lamtak mu uh ahih manin kuamah in kam khat beek a paupih ngam kei uh hi. Hih bang teng khit ciangin Job in thugen hong kipan a, mihingin a pian’ ni a samsia hi. Tua ciangin Job in, “Ka suah ni, le ‘Pasal naungek khat kipaii hi,’ a kicih zan beimang hen! Tua ni khimzin’ ni suak hen! Vana Pasian in phawkin nei kei hen la, tua ni-in khuavak taang kei hen. Khuaniim, khuamial in khuhcip hen. Tua ni-in meiipi zing hen la, tua ni awk in valhtum hen. “Tua zan, khuamial sahpi in mancip hen! Kum khat sunga nidangte tawh kisim khawm kei hen la, kha khat sunga nidangte lakah kiseh khawm kei hen. Tua zanin ta piang kei hen la, lungdam otna awging tua zanin ging nawnkei hen. Phuisamna tawh awle a khiim thei, a mitphial tawh tuipi ganhing a hencip thei mite in tua zan samsia tahen. Tua ni zingsang aksite mial hen. A vak ngei lo ding khuavak ngak niloh hen la, zingsang phalvak mu ngeikei hen; bang hang hiam cih leh kei hong kipaiina naugil na khakcip lo a, kei’ muhna panin lungkhamna hong hepkhiatsak lo hi. “Bang hangin a sisa-in suak hoh lo a, bang hangin ka suah phetin si pah hoh lo ka hi hiam? Bang hangin ka nu’ khuk tungah hong kitawi se a, ka nu’ nawi hong kiteepsak se ahi hiam? Tua hi zenzen kei leh hanah nuamtakin ka lum hithiat khin ding hi. Sihna sungah ihmu-in ka tawlnga khin ding a, inn hoihnono a lam kumpite le uliante, ngun le kham tawh a kidim a hau a liante tawh nuamtakin hanah ka tawlnga khinta ding hi. Bang hangin a hun cing lo-a suakte bang, khuavak a mu man loin a si naungekte bangin hong kiseelcip hoh lo ahi hiam? Tua lai-ah migilote in hong sukha nawn lo ding a, a gim mite tawlnga hithiat ding hi. Tua lai-ah galmat salte in nopna ngah ding a, nasem ukpa’ awging za nawn lo ding uh hi. Tua lai munah milian mineu omkhawm a, silate nangawn a topa’ kiang pan suakta hi. “Bang hangin lungkhamna a thuak mipa, a nuntakna haksa a sa mahmah mipa, sih ding lunggulh ngeungau napi, a si thei lo, sum phum zon sangin sih ding a lim zonzaw, han sung a tun ciangin a nuam mahmah, hankhuk a tun ciangin nuam lua-in a dianggawp mite, khuavak a mu dingin mi-in piang laizang ahi hiam? Bang hangin mailam thu ding a thei lopi-in a mot om ding, a kimkotah Pasian in daai a khaknelh mipa, mi-in piang zenzen ahi hiam? Bang hang hiam cih leh khuisatna, ka annek suak a, ka tauna, luipi ging bang hi. Ka kihtaktak thu ka tungah hong tung ta a, ka laulau thu, ka tuak ta hi. Lungnopna, daitakin omna, ka nei kei hi. Lungkhamna in hong nawk niloh a, tawldam hun ka nei kei hi,” a ci hi. Tua ciangin Teman khuami Elifaz in thu hong gen a, “Mi khatpeuh in thu hong genpih leh na heh ding hiam? Kua in a kam ipzo nawn ding ahi hiam? Lunghiang mite na hanthotna, khut kha ban kha mite na thakhauhsakna, a puk mite na thugenna tawh na kipsakna, khukzaw mite na hatsak ngeite ngaihsun in. Ahi zongin nang tungah tuate hong tung a, na thuakzo kei hi. Tuate in nang hong su a, na lungniam hi. Na biakna in hong hehnem zo lo ahi hiam? A paubaang lo, na nuntakna in lametna hong pia zo lo ahi hiam? Tu-in ngaihsun in: Midik kimlai kua sia ngei ahi hiam? A thutang mi a kisuksiatna koi-ah mu ngei na hi hiam? Mawhna bawlin buaina a piangsak mi in a gamtatna bangin a gah a atna ka thei hi. Pasian’ husanna tawh tua bang mite sia a, ama hehna in tua bang mite kangtum hi. Humpinelkai hawk bangin migilote’ hawkna dai ta a, Pasian in amaute’ ha suktansak khin ahih manin gamdai ta uh hi. Annek ding a mu lo a thahat humpinelkai bangin amaute simang khin uh a, a tate uh kithehthang hi. “Tu-in kei kiangah thu khat hong tung khian a, ka bil in tua thu ginghiau a za hi. Mi a ihsip hun zankim laitak, zan mangmat hun laitakin launa le linna kei tungah hong tung a, ka pumpi linna in kei hong lausak hi. Huih in ka mai hong mut a, ka khuasikmul hong suaksak hi. A mel ka khen theih loh lim khat hong ding a, keima mai-ah mihing lim khat hong om a, tua ciangin aw un duadua khat ka za a, ‘Pasian’ mai-ah mi khatpeuh paubaang loin omzo ngei ding ahi hiam? Amah a Bawlpa’ mai-ah sitbaang loin omzo ngei ding ahi hiam? Pasian in ama nasemte mahmah muangzo loin, ama sawltakte’ mawhna mu ahihleh, inn umna kawmin buan a kizatna inn sunga a teng mite, a inn bulpi leivui ahi, zing kal nitak kalin, a kisusia thei sungah a omte, bangzah ta-in kuama don lohin si pakin, amau’ liatna in taisan pak ding a, pilna ngah ngei loin si pakzaw ding hi lo ahi hiam?’ hong ci hi. “Tu-in na thu ko in: Nang hong huh ding om ahi hiam? A siangthote kua pen’ lam zuan ding na hi hiam? Mihai pa in a hehna sihlawh a, muhdahna in sihna piangsak hi. Mihai pa in limtakin zung kha ngei napi, ama inn thakhatin a kizunglot ka mu ngei hi. A tapate suahtaksak zawh ding hi nawn lo hi. Kulhkongpi gei-ah amaute kisugawp a, amaute a honkhia ding kuamah om lo hi. Midangte in a neihsate liahtumsak uh a, amah sangin a hatzaw pa in a um a beel sunga a omte nangawn laksak a, a neih a lam duhgawhin a deihgawh hi. Leilak panin gimna hong piangtawm lo a, lei sung panin lungkhamna hong pokhiatawm lo hi. Mei-ek a to leen mah bangin mihingte in amau’ lungkhamna ding mah a piangsak uh hi. “Nang hi leng, ka Pasian’ tungah ka thum ding a, ama tungah ka thu ka ap ding hi. Amah in na liante le kuama phawk zawh loh thute sem a, genzawh lohin a lamdang na tampi a bawl hi. Amah in guah zusak a, lo khempeuh tui a buak hi. Amah in mi niamte sangkoih a, a dahte lungnuamsak hi. Amah in migilote’ geelna suksiatsak ahih manin amaute in a ngimna uh tangtun thei lo uh hi. Amah in migilote amau’ gitlohna mahah awksak a, ngian a zangte’ geelna zong a lumletsak hi. Sunthapai-in khuamial sung kidenna a, suntangpi mahin zan bangin mial a zawt uh hi. Ahi zongin amah in amau’ kiang panin pa nei lote honkhia a, mi thahatte kiang panin mi cimawhte a honkhia hi. Tua ahih manin mizawngte in lametna neikik uh a, thuman lo mite ahihleh kihencip hi. “Pasian in a taii mite mi nuamsa hizaw ahih manin, Vanglianpa’ taiina thupi san in. Bang hang hiam cih leh amah in a liamsak hangin a liamna tunsak ding a, ama satna liamma damsak ding hi. Lungkhamna gukvei dong na tuahna-ah amah in nang hong hon ding a, a sagihveina dingah siatna in nang hong su nawn lo ding hi. Kialpi sungin sih nading pan nang hong honkhia ding a, gal sungah namsau panin nang hong suaktasak ding hi. Gensiatna panin nang hong kihu ding a, siatna hong tun ciangin na lau kei ding hi. Suksiat ding le puksih dingte na nuihsan lel ding a, leitung gamsate na kihta kei ding hi. Bang hang hiam cih leh na lo sungah suang om lo ding a, gamlak gamsate in hong su lo ding hi. Na inn sungah lunghihmawhna ding om lo hi, ci-in na thei ding a, na inn kiim na et ciangin a kitasam bangmah om lo ding hi. Na suan na khakte tampi tak pha ding hi, ci-in na thei ding a, na sunga piangte leitung lopa zah pha ding hi, ci-in na thei ding hi. A hun ciangin ancilna phualah buhlom a tun mah bangin a teek sihin han na zuan ding hi. Hih thute khempeuh ka kantel uh a, a thuman a na hi hi. Hih thute ka zaksa uh hi a, a manna na thei ding hi,” a ci hi. Tua ciangin Job in dawng a, “Ka lunggimna kitawikhai hen la, ka haksatna khempeuh kitawiteh leh! Tuipi sehnel khempeuh sangin gikzaw ding ahih manin ka kampaute guhin a kha hi. Vanglianpa’ thaltangte in kei hong kha a, ka sungah a thal gu kidiah hi. Pasian in a kihtakhuai-in kei hong su hi. Gam late in lopa a nek laitakin ham a, bawngtal in an a nek laitakin ham ahi hiam? An lim lote, ci sawh loin kine thei a, aktui da kang in limna nei ahi hiam? Ka kam in tuate ciam nuam lo a, tuate khempeuh a luaksuahhuai an tawh a kibang lel ahi hi. “Ka ngetna ngah thei hi leng a, Pasian in ka deihna hong pia ding hileh Pasian in kei hong sucip hen la, a khut zanin kei hong that vet leh! Tua hileh keima kihehnepna hi ding a, hih zahta ka thuakna-ah nuamin ka diang ding hi. Bang hang hiam cih leh Siangtho Pa’ thu ka nial khat zong om lo hi. Ka thuak lai nadingin bang hatna nei nawn a, lungduai a ka om nadingin lamet ding bang om nawn ahi hiam? Ka thahatna suang bang hi a, ka pumpi in sumngo tha paii ahi hiam? Kei le kei’ sung panin huhna bangci ngahtawm theih ding ka hi hiam? Kei hong kihuhna ding ka ngetna ding kuamah om lo hi. “Pasian ka nusia a, ka nusia kei zongin, hih bang lungkham hunin lawm citak ka kisam hi. No ka lawmte pen, lui tuikhang bang, a mangthang pak tui let bang, nin a khalhnelh vuk le tuikhal bangin na zuautat uh hi. Khua a lum ciangin tuate tui mangthang a, ni a sat ciangin a kang hi. Tua tui a zong dingin khualzin mite pai kawikawi a, gam sung tengah kawi pai-in a mangthang uh hi. Tema khuami khualzinte in zong tua tui zong uh a, Sheba mite in zong tua tui muanin a nei uh hi. Ahi zongin tua a lametna uhah cimawh uh hi. Tua tui zuan uh a, a om loh ciangin cih nading thei loin kamka lel uh hi. Tu-in zong kei a dingin note tua bang lel na hi uh hi. Ka gimna teng nong mu uh a, na lau uh hi. No kiangah, ‘Na khat peuhpeuh hong pia un, ka suahtak nadingin sum tawh hong huh un, ka galte’ kiang panin hong honkhia un, kei a hong nengniamte’ khutsung panin hong tankhia un,’ hong ci ngei zenzen ka hi hiam? “Hong hilh thei le-uhcin, pau loin ka ompah ding hi. Ka khialhna hong theitelsak dih un. Lungsim takpi tawh thugennate heh loin kisang thei a, ahi zongin no hong taiina in bang phatuamsak ahi hiam? Kamging mawkmawk lelte heh taak sa a, huih’ letmang cihmawh kamte thupi ngaihsut na hi uh hiam? Mi cimawh khat suksiatgawp sawm a, na lawm khat uh hihgawp sawm na hi uh hiam? Tu-in kong thum hi; kihei unla kei hong en un. Na maitang uhah zuau a gen dingin kilawm ka hi hiam? Ngaihsun pha un, a kilawm lopi-in kei hong hih kei un. Ngaihsun pha un, ka hoihna teng a hong kize-et hi lel hi. Ahi zongin zuau gen mahin nong ngaihsun lai veve uh a, a sia le a pha a khenthei loin nong seh lai veve uh hi. “Leitungah mihing in nasep haksa nei a, ama hun pen nasempa-a’ bang hi lo ahi hiam? Sila nasemte in niliim lunggulhin nasempa in a thaman a ngak tawh kibang hi lo ahi hiam? A mawkna-in kha tampi sung ka om a, zanthapai-in lungkhamna bek keima tanh ahi hi. Nitak ka lup ciangin, ‘Cik ciangin khua hong vakin zing ka tho tam,’ ka ci hi. Ahi zongin zan sau a, zingsang khuavak mateng ka kigawigawi hi. Ka pumpi tung khempeuhah than bekbek kidim a, ka vun tung khempeuh meima in tuamcip hi. Ka hunte siamgante’ siam ciangtang sangin manlang zaw a, lametna om loin a mong tung pak hi. “Pasian aw, ka nuntakna husan’ bang bek ahihna hong phawk in. Ka mit in hun nuam mukik ngei nawn lo ding hi. Kei hong mu ngei pa in kei hong mukik nawn lo ding a, na hong et laitak mahin ka mangthang ding hi. Meiilum kaite bei-in a manthan bangin Leinuai a paisuk pa mangthang ding hi. Ama inn ah hong ciahkik nawn lo ding a, ama omna ngei mun in amah thei nawn lo ding hi. Tua ahih manin pau loin ka om kei ding hi. Ka lungkham manin kam ka pau ding a, ka gimluat manin ka phun ding hi. “Kei a hong cing ding na koih nadingin kei, tuipi ganhing hong sa na hi hiam? Lum leng nuam ding a, ihmu leng phatuam ding hi, ci leng lah, a lauhuai mang nong mansak a, a lauhuai maangmuhna tawh nong lausak hi. Tua ahih manin gui-awk ding ka utzaw a, hih bang ka thuak sangin ka si nuamzaw hi. Ka lungkham a, ka nungta nuam nawn kei hi. Ka nuntakna pen husan’ bang hi lel ahih manin hong hici omsak hoh in. “Nang in hih zahin na thupi ngaihsut dingin na lungsimah na ngaihsut dingin zingsang simin gim a pia dingin ama kiangah pai-in amah na ze-et themthum nadingin mihing bang hi lel ahi hiam? Tomkha sung beek hong pelh lo ding a, ka hu beek hong sangsak man lo ding na hi hiam? Mihingte a encik pa aw, a khial ka hih leh zong nangma tungah bang gamta khial ka hi hiam? Bang hangin kei hong ngim a, bang hangin nangma muitum suak zenzen ka hi hiam? Bang hangin ka khialhna hong maisak lo a, ka mawhna hong maisak lo na hi hiam? Tu-in han sungah ka lum ding a, nong zonzon hangin ka na om nawn kei ding hi,” a ci hi. Tua ciangin Shuah gammi Bildad in dawng a, “Tua bang thu bang tanvei gengen ding a, bang tanvei paupau ding na hi hiam? Pasian in thutang a zanglo sa na hi hiam? Vanglianpa in thuman a zanglo sa na hi hiam? Na tate ama tungah khial a, amau’ mawhnate amaute a tuaksak ahi hi. A hun lai-in Pasian zong inla, Vanglianpa’ hehpihna ding thuum lecin, nang dikin thutang kisa mahmah na hih leh pel loin amah in nang hong en ding a, na thumanna tawh kizui-in thaman hong pia ding hi. Tua hileh, na zawn’ mahmah khit hangin a tawpna-ah na hau kik ding hi. “Khangluite’ thu kantel inla, pute pate’ tuahsa thute ngaihsun pha in. Eite pen zan mah mi ihi a, bangmah i thei kei hi. Leitung a i nuntakna pen niliim bang lel ahi hi. Amaute in nang hong hilhin, a thu hong genin, amau’ phawksa thute hong gen ding hi lo ahi hiam? “Ciknawng om lohna-ah laiphai kung po thei ahi hiam? Tui om lohna-ah pumpeeng pung thei ahi hiam? Ahi zongin tuate a pak kimlai a phuk hun nai lopi-in kungno dang khempeuh sangin keu masa zaw hi. Pasian a mangngilhte tua bangmah ahi hi. Pasian a don lo mite’ lametna a bei ta ahi hi. Ama kimuanna maimom khau bang hi lel a, ama ki-upna maimom bu bang hi lel hi. A inn tungah kingam a, a inn hoi hi. A inn lencip a, ahi zongin kip zo lo hi. “Amah pen nitaang sungah hoihtakin a khang kungno, a huan sungah a dawn hilhhelh kungno ahi hi. Ahi zongin suangtum lakah a zung a kivialgawp, suangtawphah a phukha zung a suak hi. Tua ciangin mi khatpeuh in a phung pan zungbawh a, ‘Cik mahin nang hong thei ngei peuhmah kei ing,’ ci-in a lawnkhia hi. Hih bang danin ama nuntakna bei a, lei sung panin kung dangte hong pokhia hi. “Theitel in; Pasian in cikmah hunin mawhbaang lo mite nilkhia lo ding a, gamtatsia mite huh ngei lo ding hi. Na mukah lungdam nuihna hong omsak ding a, na kam sungah lungdam a kikona hong omsak ding hi. Nang hong mudahte in maizumna ngah ding uh a, migilote’ puanbuk maimang ding hi,” a ci hi. Tua ciangin Job in Pasian dawng a, “Kuamah in Pasian a zawhzawh lohna a teltakin ka theita hi. Mi khatpeuh Pasian tawh thu a kinial ding hileh tulkhat sungah khatvei nangawn dawng thei lo ding hi. Amah pil mahmah a, vanglian mahmah hi. Kua in khauhtakin nial a, nial paisuakzo ahi hiam? Pasian in mualte lingsak a, tawlngasak lo hi. Ama hehna tawh mualte a lumlet hi. Amah in leitung lokgawp a, a khuampite kiling hi. Amah in ni a suak lo dingin thu pia a, aksite sincip hi. Amah bek in vanpi zal a, tuipi tuihualte tuancil hi. Amah pen vana a om Khawlei-uikai, Zawlzawng, Seguk, le Khanglam aksite a bawlpa ahi hi. Amah in kuama theih zawh loh na lian tampi bawl a, kuama simzawh loh nalamdang tampi sem hi. “Ka kiangah amah hong pai a, ke’n amah ka mu thei kei hi. Amah gam tangtang napi-in, amah ka theithei kei hi. Amah in lakhia nuam leh a khaktanzo ding kua om ahi hiam? Bang hih na hi hiam, kua’n ci thei ding ahi hiam? Pasian in ama hehna dokkik het lo mah ding hi. Rahab’ pawlte nangawn a khenuai-ah kun uh hi. Tua ahih ciangin keimah in bangci dawn theih ding a, amah ka nialna ding kammal bangci muh ding ka hi hiam? Kei ka dik hangin amah ka dawng thei kei hi. Kei hong mawhsak pa tungah hong hehpih ding ka nget kul hi. Thukhen zumah amah samin hong pai hita mah leh zong ka thumna hong ngai dingin ka um tuan kei hi. Bang hang hiam cih leh thu themno khat hangin nakpitakin kei hong hih a, thu om lopi-in gimna tampi hong thuaksak hi. Ka hu nangawn hong sangsak man lo a, lungkhamna tawh kei hong kidimsak hi. Thatanghat thu ding hileh, amah hat mahmah a, thutang kituh hi leng, kua in thukhen zumah amah samzo ding ahi hiam? Kei ka dik hangin keima kam mah siksanin kei hong man ding a, mawhbaang lo ka hih hangin keima kampau hong lehheisak ding hi. Paubaanna ka neih loh hangin kei a thupi-in ka kingaihsun tuan het kei a, ka nuntakna ka kih hi. Thu khat bek om hi. Tua ahih ciangin amah in a paubaang lote le a gilote susia khawm hi, ka ci hi. Lauhuai lianpi hong tung pakin sihna a om ciangin mawhbaang lote’ thumna a nuihsan lel hi. Migilote’ khut sungah leitung kipia a, amah in thukhen mangte’ mit a tuncipsak hi - amah hikeileh kua hi ding ahi hiam? “Laitaite sangin ka hun nawhtai zaw a, beipak ahih manin nopna ngah kha lo hi. Pumpeeng gunkuang bangin ka hun nawhpai a, muvanlai sa bawh bangin a nawhlen’ hi. Ka dahnate kimangngilh bawlin kimaitaisak ding ci taleng zong, a dikin nong seh loh ding lamtak thei khin ka hih manin ka thuak ding thute hangin kei ka lau mahmah hi. Kei a mawhin hong kiseh veve ding ahihleh bang hangin a mawkna-in na sem ding ka hi hiam? Satpiang tawh kei kisilin, vuttui tawh ka khut sawp taleng, buannawng sungah kei nong hencip veve ding a, ka puan ninte in a kihhuai hong suaksak ding hi. Amah ka dawn theih nadingin amah, kei bangin mi hi lo a, thukhen zumah thu kineihpih theih hi lo hi. Ko tegel kikalah thu hong khen ding khat om thei hen la, ko tegel tungah aana hong zang ding khat om thei hileh, kei hong kisatna ciang hong paih khiatsak ding a, kei tungah lauhuaina lianpite hong om nawn lo ding hi. Bangbang ahi zongin amah kihta hetloin ka pau ding hi; bang hang hiam cih leh kei’ omzia ding bangin kei ka om loh lamtak teltakin ka kithei hi. “Ka nuntakna ka cimtak mahmah ta hi. Ka dahna thu ka ut utin ka gen ding a, ka lungkham manin ka paupau ding hi. Pasian kiangah hih bangin ka ci ding hi: Kei hong mawhsak kei in. Kei nong langpanna thu hong gen in. Na khut tawh na sepsate simmawh bawlin, migilote’ vai panpihin, hih bangin nong netniamna ah bang phattuamna ngah na hi hiam? Mihing bang lelin gamta na hi hiam? Na nuntak hun tan kote’ nuntak tan bang lelin ngaihsun na hi hiam? Bang hangin ka mawhna hong sulzuihin, ka khialhna khempeuh hong kantel na hi hiam? Ka mawh lohna na thei a, nang kiang panin kei hong hon ding a om lohna na theihsa mah ahi hi. “Nangma khut tawh kei hong lomin na hong piangsak a, tu-in nangma khut mah in kei hong lehsuksiat hi. Leivui pana kei nong bawlna hong phawkkik in. Leivui mahin hong dengvui kik takpi ding na hi hiam? Kei ka pian nadingin ka pa’ tungah tha na guan a, ka nu’ sungah kei nong khangsak hi. Guh le thaguite tawh ka pumpi ding nong bawl a, sazang le vun tawh tua guhte nong tuamsak hi. Kei, nuntakna hong pia-in, nong it tawntung a, nangma hong kepna hangin kei ka nungta hi. Ahi zongin a beisa hun sung khempeuhah kei a’ ding thusim khat na neihna tu-in ka theita hi. Ka khialhkhaknate hong ensim niloh na hih manin ka mawhnate hong maisak nuam lo na hi hi. Ka khialh phetin gim nong pia pah a, ka gamtat hoih ciangin zong nong pakta tuan kei hi. Mindaina le maizumna tawh kei ka kidim hi. Mavanna khatpeuh neisun leng zong, humpinelkai bangin ka siatna ding na zong a, kei’ gimtheih nadingin nalamdang tuamtuam nangawn na bawl liang hi. Kei a hong langpang dingin teci na nei tawntung a, keima tungah na hehna hong khang semsem a, kei nong sukna ding thuthak na mu tawntung hi. “Pasian aw, bang hangin ka nu’ sung panin kei hong piangsak peuhmah na hi hiam? Kuama hong muh ma-in a si hizaw hoh leng! Ka nu’ sung pan hankhuk zuat pah ding pen mihing a pian loh zah mahin a hoih ahi hi. Keima nuntakna bei dektak ta hi lo ahi hiam? Hong hici omsak hoh in! Ka hun neih laisun teng nuam takin hong zangsak in. Kei a pai baihta ding ka hi a, a hong ciahkik ngei ding ka hi kei hi - khuamial, lungzinna gam, khuavak nangawn khuamial ahihna gam, khuamial gam, lungzinna gam, lungkhamna gam, a zuan ta ding ka hi hi,” a ci hi. Tua ciangin Naamah gammi Zofar in dawng a, “Kampau hih zahta hong kidawng lo ding sa a, kam tam pauna hangin thumanin hong kiseh dingin ngaihsun na hi hiam? Job aw, na thugente hong dawng thei lo dingin hong ngaihsun na hi hiam? Na simmawh kampaute hong kidawng mawh dingin ngaihsun na hi hiam? Nangma thugente a man na sa kha a, Pasian’ muhna-ah a siangtho dingin na kingaihsun kha hi. Pasian in na thugente hong dawngkik le ut mahmah ing! Pilna nam tampi a omna thu, mihing’ theih zawh loh thuthuk, a omna thu hong gen ding hi. Na mawhna zahin Pasian in gim hong piak lohna thei in. “Pasian’ thuthuk thei khinzo ding na hi hiam? Vanglianpa’ hih theihna thei khinzo ding na hi hiam? Vantung sangin Pasian sangzaw a, ahi zongin tua vantung nangawn na banzo kei hi. Pasian in leinuai thu thei a, ahi zongin nangmah in tua thu na thei kei hi. Pasian’ liatna pen leitung sangin golzaw a, tuipi sangin zaizaw hi. Pasian in nang hong manin thu hong sit leh amah a khaktan ding kua om ahi hiam? Pasian in mi hoih lote thei takpi hi. Mawhna a muh ciangin thudon lo ding ahi hiam? Gamlak a om late mihing suak ngei ding a, mihaite pil ngei ding ahi hiam? “Job aw, na lungsim a hoihin bawl inla, Pasian’ lamah kihei in. Khialhna na bawl khak leh paaikhia inla, na inn sungah gitlohna omsak kei in. Tua hileh kisuanna om loin na khuadak ngam ding a, na lung nuamin launa na nei kei ding hi. Na lungkhamnate veng ding a, tuikhang pak bangin na phawk nawn kei ding hi. Tua ciangin na nuntakna, sun sangin taangzaw ding a, nuntak lungzin’ pen hun, sun sangin taangzaw ding hi. Lungnuam tak le lametna nei-in na om ding a, Pasian in nang hong hu-in, tawldamna hong pia ding hi. Kuamah kihtak nei loin nuamtakin na om ding a, mi tampi in nangma maipha hong zong ding uh hi. Ahih hangin migilote ahihleh cimawhin khuadak ding uh a, suahtakna ding lampi mu lo ding uh hi. Amau’ ngah ding ahihleh sihna bek ahi hi,” a ci hi. Tua ciangin Job in dawng a, “Note pen theihna kicing na kisa mah uh a, pilna a nei na kisa mah uh hi. Ahi zongin note zah mahin kei zong thu ka thei a, midangte sangin na theihzawk uh bang om tuan ahi hiam? Ka lawmte nangawn in tu-in kei hong nuihsan uh a, kei dikin paubaang lo napi hong nuihsan uh hi. Ahi zongin Pasian in ka thungetna a hong piak hun om hi. Note in lungkhamna bangmah na nei kei uh a, kei na hong ciamnuih bawl gawpgawp uh hi. A puk dektak mipa na satgawp uh hi. Guta mite nuamtakin om hithiat uh a, Pasian a simmawhte nuamtakin nungta uh hi. “Ahi zongin gamsate va dong un, hong hilh ding uh hi. Vasate va dong un, hong hilh ding uh hi. Leitung ganhingte va dong un, hong hilh ding uh hi. Tui sung ngasate zong va dong un, hong hilh ding uh hi. Pasian’ khut in amaute a bawlna thu a vekpi-un thei kim uh hi lo ahi hiam? A piansaksate’ nuntakna Pasian mah in a uk ahi hi. Mihing khempeuhte’ nuntakna ama khut sungah om hi. Leii in an a ciap mah bangin, bil in ngai thei hi lo ahi hiam? “Khanghamte in pilna nei a, nuntak saute in thu theitel uh hi. Pasian in pilna le vang nei a, amah thukipin thu a theitel hi. Pasian in phelkek leh kuamah in lamkik zo lo a, Pasian in thongah mi koih leh kuamah in suaktasak zo lo hi. Pasian in guah khaktan leh leitung keugaw a, tui a khah ciangin tui hong khang hi. “Pasian thahatin gualzo tawntung a, mi khemte le khemna a thuakte Pasian’ ukna nuai-ah a om uh ahi hi. Amah in mipilte’ pilna susia-in, makaite pen mihai bangin gamtasak hi. Amah in kumpite zakiasak a, thongah a khia hi. Siampite mihai suaksak a, mi vangliante lawnthal hi. Amah in mi’ muante a pau thei loin bawl a, khanghamte’ pilna a paihkhiatsak hi. Amah in mi vangliante mindaisak a, mi thupite’ kihihsakna a beisak hi. Amah in khuamial sung panin thuthukte kalkhia a, a kithei zo lo thute kitelsak hi. Amah in minamte thahatsakin liansak a, ahi zongin amah in tuate zogawpin susia hi. Amah in minam makaite a pilna uh paihkhiatsak a, lampi om lohna gamlakah vakvaisak hi. Khuamial lakah amaute in mialzawt uh a, zukham bangin amaute hoihoi uh hi. “Na gen uh thu khempeuh ka muhsa vive hi a, ka bil-in ka zakzaksa, ka theihtheihsa thu ahi hi. Note’ theih khempeuh, kei zong ka thei hi. Note khempeuh sangin ka neuzaw tuan het kei hi. Ahi zongin note tawh kam a kinial hi loin, Pasian tawh a kinial ka hi hi. Pasian tawh hih ka thu ka kinial nuam hi. Note in na haina uh zuauthu tawh na melh uh a, kuamah a damsak zo lo zato siam-a kinei mite tawh na kibang uh hi. Pau hetloin om hi le-uhcin, mipil mah hong kisazaw ding hi. “Tu-in ka thugen hong ngai unla, ka gen laitakin limtak ngai un. Pasian’ min dingin thuman lo genin, ama a dingin zuauthu gensak ding na hi uh hiam? Pasian angvan ding a, ama a’ ding gensak ding na hi uh hiam? Pasian in limtakin note hong entel leh note’ sungah hoihna mu ding ahi hiam? Mihingte na khem bangun Pasian a khem thei dingin kingaihsun na hi uh hiam? A simthamin angvanna na zat uhleh amah in note hong taii taktak ding hi. Ama vangliatna in note hong lausak ding a, note tungah amah kihtakna hong tung ding hi lo ahi hiam? Na thugente uh vutkhu bang hi lel a, na siksante uh leivui bang hi lel hi. Pau kei unla, kei, thu hong gensak dih un; a piang peuhpeuh a piang hi mai hen. “Ka nuntakna pia ngamin, ka nuntakna ka ap ngam hi. Pasian in kei hong that mah taleh zong, phamawh ka sa kei hi. Ahi zongin ama mai-ah ka thu ka gen veve ding hi. Pasian’ mai-ah migilote pai ngam lo uh ahih manin, ka hanna pen ka gualzawhna hi ding hi. Ka thugente limtak ngai unla, ka lahtelnate na za un. Ka thu a gen dingin a baihsa-in ka om a, thu ka zawh ding lamtak teltakin ka thei hi. “Pasian aw, keimah hong mawhsak ding na hi hiam? Nong mawhsak leh pau hetloin a si dingin ka kiging hi. Thu nih ka hong ngen hi, ka hong nget hong pia in. Tua ciangin nang tungah bangmah kong im kei ding hi. Kei tungah gim hong pia nawn kei inla, hih bang launa hong thuaksak nawn kei in. Pasian aw, hong hopih masa in, kong dawng ding hi. Kei, thu hong gensak inla, nangmah in hong dawng in. Ka mawhna ka khialhna bangzah pha ahi hiam? Ka mawh ka khialhna teng hong theisak in. “Bang hangin kei hong peel a, gal bangin hong ngaihsun na hi hiam? Bang hangin keimah lausak ding hanciam na hi hiam? Kei, singteh bang lel hi lo ka hi hiam? Anvai themkhat galin do ding na hi hiam? “Nangmah in kei tungah thusiapi nong zong a, ka neulai huna ka gamtatna nangawn tawh nong mawhsak hi. Nangmah in ka khe sikkol nong bulh a, ka kalsuanna khempeuh le ka khekhap nangawn na entel hi. Tua huhau-in singmuat bangin ka puk a, nget in a nek puan bangin ka zan-gawp hi. “Mihingte a nuntak hun tom mahmah a, lungkhamna tawh kidim hi. Amaute paak bangin khangin keu pak uh a, niliim bangin pai hanhanin, mangthang uh hi. Pasian aw, tua bang lel mi kei hong en a, thukhenna a thuak dingin na mai-ah hong sam na hi hiam? Mihing banga a ninte sung panin a siang hong piang lo ding hi. A nuntak tan ding kisehkhol a, a nuntak kha phazah ding kiciangtan khin hi. Nangmah in na ciangtan khin a, kikheel thei nawn lo hi. Amah en loin tuaci omsak mai inla, a nuntak haksapi mah zomzomsak hoh in. “A kiphuk khinsa singkung nangawn in lametna nei buang a, a bul sel kikin nungtakik thei hi. Lei sungah a zungte teek a, a bulsum a si zongin, guahtui ngahin, singkungno-in hong selkik hi. Ahi zongin mi si a, amah maimang pah hi. Amah a beina tungta a, koi-ah om nawn ahi hiam? “Gun tuite le tuipi tuite a kan’ hun om thei ding hi. Ahi zongin vanpi a omlaiteng, misite thokik ngei lo ding a, a ihmutna panun khanglo ngei lo, gamtang ngei lo ding uh hi. Tua khit ciangin kei na hong sam ding a, ke’n kong dawng ding hi. Nangma bawlsa ahi keimah na hong lunggulh ding hi. Tua hun ciangin ka kalsuanna khempeuh nong en ding a, ahi zongin ka khialhnate nong sulzuih nawn kei ding hi. Ka khialhnate hong maisakin, nong paihkhiatsak ding a, ka mawhna khempeuh nong phiatkhiatsak ding hi. Tu-a bangin a piang thei hileh ka ut mahmah hi. “Ahi zongin a taktakin, mualte a puk ding hun suangkeente nangawn a cip ding hun hong tung ding hi. Tui in suangte nawtkhia-in, guahtui in lei a nawtkhiat bangin nangmah in mihingte’ lametna na beisak hi. Nangmah in mi khat zogawpin na hawlkhia a, na sa mahmah ahih manin a si dingin a ha a li hi. Amah a pahtawi dingin a tapate hong pai taleh zong amah gimlua ahih manin bangmah phawkzo nawn lo a, a tapate mindai taleh zong bangmah phawkzo nawn lo hi. A pumpi sunga a natnate le a lungsim gimnate bek a phawkzo lai hi,” a ci hi. Tua ciangin Teman khuami Elifaz in Job dawng a, “Job aw, mawk paupau kei in! Nang’ pau bangin mipilte pau ngei lo a, bangmah-a kimang lo kampaute pau lo a, phattuamna om lo dingpi-in thu seello uh hi. Ahi zongin nangmah in Pasian zahtakna na beisak a, ama mai-ah thugenna ding na khaktan hi. Tu-in na mawhna thu na kam pan hong gingkhia a, ngian zangin na kampau tawh na mawhna na seel hi. Na mawhna thu kei’ hong gen kisam lo a, na pauna khempeuh in na mawhna hong langsakta hi. “Mihing a a piang lakah a masa pen kisa na hi hiam? Pasian in mualte a bawl lai-in a piang khin kisa na hi hiam? Pasian’ vaihawmnate a za simin kingaihsun na hiam? Nang bek in pilna khempeuh a nei-in kingaihsun na hi hiam? Ko’ theih loh thu bang thei tuan na hi hiam? Ko’ muh loh thu bang mu tuan na hi hiam? Na pa’ pianma a a piang puteek samkangte’ tung panin kote in ka pilnate uh a ngah ka hi uh hi. “Pasian in nang hong hehnem hi; bang hangin nialnial na hi hiam? Kam khum kam nem tawh Pasian’ tangin nang tungah thu kong gen uh hi. Ahih hangin na lung khauhin kote nong heh et hi. Pasian’ tungah a heh na hi a, amah a simmawh na hi hi. “Mihing a a piang peuhmah paubaang hetloin siangtho taktak zo ding ahi hiam? Pasian’ tungah a thumanzo kua om ding ahi hiam? Pasian in a siangtho vantung mite nangawn muang lo ahihleh, ei mawhnei mite bang hangin hong muang mah ding ahi hiam? Mihing in tui i dawn bangin siatna i dawndawn a, mihing pen siahuai-in bangmah i man kei hi. “Job aw, ka thutheihte na ngai in. “Mi a nengniam migilo pa in a khan tawntungin lungkhamna thuak ding hi. Launa ding awging a bilah za ngitnget ding a, lungmuangin a om laitakin gutate in buluh ding hi. Lungzinna pan suahtakna ding lametna om lo a, amah a that dingin mun khatah namsau in ngak khinkhian a, amah a ne dingin musanete in a ngak uh hi. A mailam thu lungzinhuai ahihna thei hi. A thahat kumpi khat bangin lungkhamna le lungzinna in amah a hihgawp dingin a ngak khikhe hi. “Pasian langpangin a khuttum a lahsan, Vanglianpa a dem mipa in hih bang thute a thuak hi. Bang hang hiam cih leh amah in khauhtakin Pasian langpangin, a lum sahpi tawh a lehdo hi. “A thatang muanhuai-in a pumpi a liat hangin ama tenna khuapi sia-in, ama inn kinusia ding a, a sawt loin ninbulomtang suak ding hi. Amah sauvei hau lo ding a, a neihsate kip lo ding hi. Ama liim nangawn maimang ding a, khuamial panin suakta lo ding hi. Amah pen a hiangte mei in a kattumsak, a paakte huih in a letkhiatsak, singkung tawh kibang ding hi. Amah in gitlohna suanin nei ahih manin, gitlohna bek mah ngahkik ding hi. A hun a tun ma-in amah bei ding a, singhiang bangin keu-in hingkik nawn lo ding hi. A min ma-in a gahte a pulh leenggui bang ding a, a paakte a pulhmang khin oliv kung bang ding hi. Bang hang hiam cih leh Pasian a ngaihsun lote mi cimang suak a, sumgolh tawh a kilam innte mei in kangtum hi. Mihingte in siatna ding bek ngaihsunin sem uh a, mi khem ding bekbek ngaihsun niloh uh hi,” a ci hi. Tua ciangin Job in dawng a, “Tua bang thute ka zaza khin a, no’ hehnepna pen gimna ding bek ahi hi. Khawl hun nei loin gengen lai ding na hi uh hiam? Na gen ding uh omom lai ahi hiam? Note le keimah a kikhek thei hi lehang, note’ gen khempeuh kei zong ka gen thei ding hi. Note ka lu hong peisanin thu tampi tak mah ka hong gen thei ding hi. Ahi zongin keimah in note hong tua cih loin, thuhoih mahmah tawh note hong hehnemin, note hehnepna ding thu ka gen ding hi. Thu gengen taleng ka natna nuamtuam lo a, pau kei taleng zong, phatuam tuan lo hi. Pasian aw, kei nong paatsak ngingei a, ka innkuan khempeuh na sisakmang khin hi. Kei na hong mancip a, keima gal na suak hi. Ka vun guak le ka guh guak bekin ka om a, keima mawhna a kilatna-in mite in a ngaihsun uh hi. “Pasian in a hehna tawh hong balnen ngingei a, a ha hong gawisanin hong heh et hi. Mite in kei hong zahko uh a, ka paang a beeng dingin hong kikhawmtuah uh hi. Pasian in migilote’ khut sungah kei hong pia hi. Kei nuamtakin a om kimlai, Pasian in ka gawlin hong manin, hong balgawpin hong sugawp hi. Pasian in a muitum dingin kei hong suang a, ka kimkot panin a thaltangte tawh hong kap hi. Tua thaltangte in kei hong kha-in hong liamsak a, tua bang nangawnah kei hong hehpih lo hi. Amah in hong hehpih hetloin kei hong liamsak thuahthuah a, galkap a heh pa bangin kei hong hihgawp hi. “Kei thumin puanhampi ka silh a, guallelin leivui lakah ka om hi. Ka kahkahna-in ka mai khempeuh san gawp a, ka mitkhute bawkgawpin khua ka mu thei kei hi. Ahi zongin ngongtatna themkhat zong ka zang kei a, Pasian tungah ka thungetna pen lungsim takpi tawh ahi hi. “Leitung aw, a man loin kei hong kibawlna seelcip kei in! Thuman deihin ka kikona ka awging daicipsak kei in. Kei a dingin a ding ding, a hong panpih ding mi khat vantungah om hi. Pasian in ka khitui luanna hong mu-in ka thungetna hong za leh ka ut hi. Mi khat in a lawmpa a’ ding a thumsak mah bangin mi khatpeuh in Pasian’ kiangah kei a dingin hong thuumsak leh ka ut hi. Bang hang hiam cih leh ka hun nai mahmah ta a, ka lehzuih nawn loh ding lampi zui-in a pai ka hita hi. “Ka bei ding hun nai kuan ta a, hu ka sangzo nawn kei hi. Kei a dingin hankhuk cih loh bangmah dang om nawn lo hi. Ka heina khempeuhah mite in hong zahko uh a, amau’ hong phinna in hong lungzingsak hi. Pasian aw, kei hong hu in. Ka thugente hong panpih ding kuamah dang om lo hi. Nangmah in amaute thuman a mu lo dingin bawl na hih manin amaute a gualzo-in na bawl kei ding hi. Paunak-ah, sum ngahnop manin mi khat in a lawmte a heek leh, ama tate in tua gitlohna thaman thuak hi, kici hi. Tu-in amaute in kei tungah hih paunak hong bulh uh a, mite in hih thu za-in kei hong cilphih uh hi. Ka dahna hangin ka mit mial a, ka khut ka khete ciangkang bang ta hi. Mihoihin a kineite in lamdang hong sa uh a, migiloin kei hong seh uh hi. Mite’ zahtaka a kinei mite in amau’ ngaihsutna uh man mahmah sa semsem uh hi. Ahi zongin amaute khempeuh hong pai-in ka mai-ah hong ding le-uh amaute’ lakah mipil khat zong ka mu kei ding hi. “Ka hun beita hi. Ka geelna teng maimang a, ka lametna teng beita hi. Ka lawmte in, khuamial kimlai, sun khuavak, ci uh hi. Khuavak hong nai ta hi, ci-in gen uh a, ahi zongin khuamial sung mahah kei ka omlai veve hi. Kei’ lamet ding misite’ gam bek omlai a, tua khuamial sungah lumin ka ihmu ding hi. Hankhuk sung pen ka pa hi, ka ci ding a, kei hong ne thante pen ka nu le ka sanggam numeite, ka ci ding hi. Kei’ lamet ding tua lai-ah bang om ahi hiam? Tua lai-ah ka lamet ding bang nong muhsak uh hiam? Misite’ gam Leinuai-ah ka pai ciangin nopsakna in kei hong zui lo ding hi,” a ci hi. Tua ciangin Shuah gammi Bildad in dawng a, “Job aw, khawl hun nei thei lo ding na hi hiam? Hong khawl phot lecin, thu kong gen thei ding uh hi. Bang hangin bawng bang lelin kote hong ngaihsun a, mihaipi-in kote hong seh na hi hiam? Na hehna tawh nangmah a kigimsak bek na hi hi. Nangma hangin leitung kinusia ding a, mualte a kinkhia dingin ngaihsun na hi hiam? “Migilo pa’ meivak kisumit ding a, cikmah hunin kuangkik nawn lo ding hi. Ama buk sungah a meivak mit ding a, ama inn sungah khua a mial ding hi. A khe kip ngei a, ahi zongin tu-in a khe bai ta hi. Amah in a ngaihsut khialhna a puklawh hi. Thangsiahna ngen sungah amah bungbu tuk a, gum sungah amah kia hi. Thangah a khetulin awk a, thangkhau in amah gakcip hi. Amah siahna-in leilakah khauzak kitung a, a pai nading lampi-ah thang kisiah hi. Lauhuaina in amah pang a, a kalsuanna khempeuh a sulzuih hi. A hauh ngei hangin tu-in gilkial ta a, siatna in a su dingin amah ngak gige hi. A kihtakhuai natna in a pum khempeuh tuam a, a khut le a khete muatsakmang khinta hi. Lungmuang takin a omna a inn panin amah kikaikhia a, Sihna Kumpipa kiangah amah kitunpih hi. Ahih hangin zatui tawh ama inn a kisiansuah khit ciangin tua inn-ah a ut peuhpeuh teng thei pah ding hi. Lei sunga ama zungte keu-in, a tunga a hiangte a si ta hi. Inn le gamah ama minthanna beita a, kuamah in amah phawkkha nawn lo hi. A nungtate’ gam panin amah kihawlkhia ding a, khuavakna mun panin khuamialna-ah kihawlkhia ding hi. Amah in suanlekhak nei lo a, ama tennasa munah ama gui a zom ding om lo hi. Nisuahna pan nitumna dong ama thuakna a za peuhmah kigaihin a ling uh hi. Migilote, Pasian a ngaihsun lote a thutawpna uh tu-a bang ahi hi,” a ci hi. Tua ciangin Job in dawng a, “Bang tanvei thu genin hong gimsak ding na hi hiam? Kei nong simmawh niloh a, tua banga na gamtatna-ah maizumna mel na nei thei kei hi. A khial takpi hi taleng zong nang’ lainatna ding bang om ahi hiam? Keimah sangin a hoihzaw-in nang na kingaihsun a, ka thuak gimnate pen keima mawhna hangin na ngaihsun hi. Hih thu hong piangsak pa Pasian ahihlam mu thei lo na hi hiam? Kei hong mat nadingin amah in thang hong siah hi. Keimah hong ngongbawlna ka nialnial hangin kuamah in hong don kei hi. Thuman ka deih hangin hong kipia kei hi. Pasian in ka lampi khaktan a, ka paisuakzo kei hi. Amah in ka pai nading lampi khua mialcipsak hi. Amah in ka hauhna khempeuh hong lakkhiatsak a, ka min hoih kimlai hong siasak hi. Amah in ka pumpi khempeuh hong satgawp hi. Ka nopsakna teng hong zunglot sakin, vulgawpin a si dingin kei a hong nusia hi. Keima tungah Pasian’ hehna hong sogawp a, ama gal lian penin kei a hong ngaihsun hi. Amah in keimah a sim dingin a galkapte hong sawl a, a galkapte in dum to-in ka buk hong umcih uh hi. “Pasian in ka sanggamte hong taisansak a, kei hong theisate kiangah khualmi ka suak hi. Ka behte le ka lawmte beimang khinta uh hi. Ka inn-ah a hong tung ngei keima zinte in hong mangngilh ta a, ka na a sem numeite in khualmi bangin hong bawl uh a, amaute’ mai-ah midangpi khat ka suak hi. Ka nasemte khatpeuh ka sap ciangin hong dawng nuam lo uh a, hong huhna ding uh ka thum ciang nangawnin hong thudon lo uh hi. Ka zi nangawn in ka gimnam thuak zo lo a, ka sanggamte mahmah in zong hong naih nuam lo uh hi. Naupang melmawl nangawn in kei hong simmawh uh a, kei hong muh uh ciangin hong nuihsan uh hi. Ka lawm it pente nangawn in kei hong muhdah et uh a, ka it pente nangawn in kei hong langbawl uh hi. Ka guh tungah ka vun kol dihdiahin om a, a nungta liailiai bekin kei a om ka hi hi. Hong hehpih un! Hong hehpih un! Keima lawmte hi lo na hi uh hiam? Pasian in kei hong satpai ta hi. Pasian’ hong bawlsiat bangin bang hangin no zong kei hong bawlsia ding na hi uh hiam? Nong gimsakna uh kicing ta hoh hi lo ahi hiam? “Ka thugente khempeuh mi khatpeuh in ciamteh hen la, laibu khat sungah a khum hileh ut mahmah ing! Tua ahih kei leh zong, ka thugente khempeuh sikkhu khat tawh suang tungah kikhen hen la, a mang ngei nawn lo dingin a kigelh hileh ut ing! “Ahi zongin a tawpna-ah kei hong panpih ding a nungta tawntung khat vantungah a omna thu ka thei hi. Natna in ka vun a nektum khit hangin, hih ka pumpi mahmah tawh Pasian ka mu ding hi. Keima mit teekteek tawh amah ka mu ding a, amah in kei hong khualmi et lo ding hi. “Ka lungsim hanna a bei hi. Bang hang hiam cih leh, ‘Amah bangci gimsak thei ding ihi hiam?’ na ci uh hi. Kei nong suktheih nadingun paulap khatpeuh na zong uh hi. Ahi zongin tu-in namsau kihta un. Tua namsau in a mawhte tungah Pasian’ hehna hong sem ding hi. Tua ciangin thukhen ding khat a omlam na thei ding uh hi,” a ci hi. Tua ciangin Naamah gammi Zofar in dawng a, “Job aw, ka heh nong suaksak a, ka ki-ipzo nawn kei hi. Na thugente khempeuh kei nong simmawhna kampau vive hi a, ahi zongin kong dawnna ding ka thei hi. Tanglai pek a kipan, leitung mi a om cil a kipanin, migilote’ nopsak hun a tom mahmahna thu, Pasian a don lote’ lungdam hun a tom mahmahna thu thei lo na hi hiam? Migilo pa lian mahmahin vantung a banto zongin, lian mahmahin a lutang in meii lak a banto zongin, leivui them bangin maimang veve lel ding hi. Amah a thei ngei mite in, ‘Amah koi-ah omta ahi hiam?’ ci-in lamdangsa ding uh hi. Amah pen zan a mangmat bang, mumaang bangin maimang ding a, cikmah hunin kimukik ngei nawn lo ding hi. Ama tenna ngei mun panin amah maimang ding a, mizawngte’ na a suhsakte, a tate in lohsak ding uh hi. A pumpi moi suahin a thatang a hat mahmah hangin a sawt loin leivui a suakpak ding ahi hi. “Ama kam sungah gitlohna lim sa mahmahin, namtui mahmah sa-in, a leii tawh lop melmel a, amah in muammuam nuamin siakhia nuam lo a, lim sa mahmahin a dangtawng denna-in a neih hangin, a gil sung a tun ciangin a kha mahmah an suakin, gu a kha mahmahte zahin kha deidai hi. Migilo pa in a guksa nate luakhia kik a, a gil sung nangawn panin Pasian in a lakkhiatsak hi. Migilo pa’ nekte pen gu tawh kibang a, gul guneite’ tuk bangin amah a sisak hi. Amah in bawngnawi le khuaizu gun tui bangin a luang mukha lo ding hi. Amah in a nasep thamante nusia ding a, a hauhna khempeuh zangkha man lo ding hi. Bang hang hiam cih leh amah in mizawngte bawlsia-in don lo a, midangte’ inn lamsate sutin a tang hi. “A huaihamna bei ngei lo a, a duh khempeuh siit nei lo hi. Amah in a nek ciangin a khamval cih om ngei lo a, tu-in a hauhna khempeuh a beimang khinta ahi hi. A cihtheih pen hun laitakin lungkhamna lianpen a tuak hi. Amah in a duhduh ne mai hen! Pasian in hehna tawh amah gim pia ngawn ding hi. Amah in namsau pelhin a taina-ah sumngo thal in kaptuk ding hi. Thaltang khat in ama pumpi pailet a, a te-dildel thaltang mukah si taak keuhkeuh a, ama tungah a kihtakhuai hong tung hi. A kholsa khempeuh kisusia a, mihing’ tawh loh meikuang in amah le a innkuan khempeuh a kangtum hi. Vantungte in hih mipa’ mawhna pholak uh a, leitung in ama langah teci a pang hi. Pasian’ hehna hangin ama hauhna khempeuh a kisusiamang ding ahi hi. “Migilote’ ngah dingin Pasian in a piak gimna migilote’ ngah pen tu-a bang ahi hi,” a ci hi. Tua ciangin Job in dawng a, “Ka thugente limtakin hong ngai unla, ka thu nong ngaihna uh nong hehnepna uh hisak ni. Thu ka gen theih nading hun hong pia unla, ka gen khit ciangin na ut uhleh hong zahpih un. “Kei’ kitotpih pen mihing hi lo hi. Bang hangin lungtom lo ding ka hi hiam? Kei hong en dih un. Lamdangsak taak hi lo ka hi hiam? Keima tunga thupiang ka ngaihsut ciangin lamdangsa mahmahin lau-in ka ling hi. “Bang hangin Pasian in migilote khantosak a, hausakin liansak ahi hiam? A tate uh nuamtakin a khantohna, a u a nau, a suan a khakte uh a punna a mu ding dongin a nungta uh hi. Pasian in amaute’ inn sungah lungkhamna tungsak lo a, amaute in lauhuaina thuakkha ngei lo uh hi. A bawngte uh pung a, tatolh cih om ngei lo hi. Tuuno bangin a naupangte uh taikhia-in kimawl uh a, tamngai le harp lasakna aw tawh a kituakin a lam uh hi. Amaute a nuntak sungin cithei mahmah uh a, gentheihna tuak se loin nuamtakin a si hiat uh hi. “Migilote in Pasian nawlkhin uh a, Pasian in amau’ nuntak ding a deihsakte thei nuam lo uh hi. Pasian’ na sep ding kisam sa se lo uh a, Pasian kianga thunget phattuamna om kei, ci uh hi. Amau’ thahatna hang bek tawh a gina kisa uh a, amau’ ngaihsutna le kei’ ngaihsutna kigamla hi. “Migilo pa’ meivak kisukmitsak ngei ahi hiam? Amaute khat beek in lungkhamna tuak ngei ahi uh hiam? Pasian in hehna tawh migilote gim pia ngei ahi hiam? Huih in a letkhiat buhkungte, le huihpi in a mutkhiat buhsi bangin amaute bawl ngei ahi hiam? “Pasian in a pa’ khialhna hangin a ta gim pia hi, na ci uh hi. Tua bang hi lo! Pasian in a mawhte teek mah gim pia hen la, amau’ mawhna hangin gim pia ahihna theisak hen. Mawhneite amau’ mawhna hangin gimna thuaksak hen la, Vanglianpa’ hehna theisak tahen. Mi khat a nuntakna a bei khit ciangin, a naupangte’ nopsakna phawk thei nawn ahi hiam? Mi khat in Pasian’ tungah thu hilh thei ding ahi hiam? Vanglianpa tungah thu khen thei ding ahi hiam? “Mi pawlkhatte a cithei mahmahin si a, lungmuang tak le lungnuam takin om uh a, annek tuidawn a kicingin a nei uh hi. Mi pawlkhatte ahihleh nopsak cih theikha ngei loin lunggimin a si uh hi. Ahi zongin a kibangin a vekpi-in si-in kivui a, than in amaute tuamcip hi. “Na lungsim sung uhah na ngaihsutna uh, kei nong siatsak nopnate uh ka tel mahmah hi. Siatna a gamta, mi lianpa’ inn, koi-ah omta ahi hiam, na ci uh hi. “Khualzinzin mite tawh kiho ngei lo na hi uh hiam? Amaute’ thugente, thei lo na hi uh hiam? Pasian hehin, mite gim a piak ciangin migilote peng tawntung zawsop hi. Migilo pa a gamtatna bangin a thukkik ding, migilo pa mawhsakin a langpang ding kuamah om lo hi. Migilo pa a kivui ciangin a hankhuk kicing a, mi tul tampi in amah kha-in hoihtakin lei tawh kivuk hi. “Tu-in note in a mawknapi tawh hehnep nong sawm uh hi. Na gen uh thu khempeuh zuauthu vive hi lel hi,” a ci hi. Tua ciangin Teman khuami Elifaz in dawng a, “Mipil pente i cih nangawn, ama a’ ding cih lohbuang, Pasian a dingin a kimanna om lo hi. Na gamtat hoihna in Pasian’ phattuamna ding bangmah piangsak lo a, na hoihna in Pasian hoihsak tuan lo hi. Nangmah in Pasian na zahtakna hangin amah in nang hong taii-in hong ze-et hi lo hi. Na mawhna a tamna hang, na gitlohna a liatna hang hizaw hi. Na sanggampa’ leiba tangin a silh ding sitsak loin a puan teng na laksak hi. A dangtakte tui na pia nuam kei a, a gilkialte an na pia nuam kei hi. Na vangliatna le na za liatna zangin, gam khempeuh na la khin hi. Meigongte a huh nuam lo ciang bek hi loin, mi tagahte bawlsia-in a neihsa uh na sut hi. Tua ahih manin na kimkotah thang hong kisiah a, thakhatthu-in launa in nang hong buaisak hi. Khuavak kimlai khuamial hong suak vatin khua na mu thei kei a, tuikhang in nang hong tuumcip hi. “Van a sangpen dawnah Pasian a om hi a, a sang mahmah a om aksite hong suk et lai hi. Ahi zongin nangmah in, ‘Pasian in bang thei ding ahi hiam? Meii in Pasian tuamcip hi. Eite’ thu bangci-in khenthei ding ahi hiam?’ na ci hi. Van khumzangah Pasian a paikawmin meii pailetin Pasian in hong musuk thei lo ding hi, ci-in na ngaihsun hi. “Migilote’ gamtat ngeite mah gamtat ding ngaihsun na hi hiam? Amau’ hun tung lopi-in tuikhang in amaute taai hi. Hih mite pen Pasian a nial, Pasian in bangmah a cih thei lo dingin a ki-um mite ahi uh hi. Tua hitaseleh amaute a daupaisak Pasian hi a, migilote’ ngaihsutna pen keima ngaihsutna tawh kigamla mahmah hi. Migilote tungah gim kipia a muh uh ciangin mihoihte nuam a, paubaanna a nei lo mite in a nuihsan uh hi. Bang hang hiam cih leh migilote’ neih khempeuh kisuksiatsak gawp a, a omlai sunte nangawn mei in a kangtum hi. “Job aw, tu-in Pasian tawh kilem inla, amah galbawl nawn kei in. Tua hileh amah in nang thupha hong pia ding hi. Ama hong hilhnate zui inla, ama thute ciamteh in. Lungsim tak tawh Vanglianpa lamah kihei inla, na innsung pan gamtatsia beisak inla, na kham neihte leivui bang lelin ngaihsunin, na Ofir khamte suang bang lelin ngaihsunin, Vanglian Pasian pen na kham le na ngun hisak lecin, Pasian muanin na nei tawntung ding a, na lungdamna bulpi amah ahihlam na thei ding hi. Thu na nget ciangin na ngetna hong pia ding a, nangma thuciamnate na tungsak ding hi. Na hih khempeuh na tangtun ding a, na maa hong vang ding hi. Pasian in mi kiphasakte niamkhiat a, mi niamte a hon hi. Nang a mawhbaang lo, a gamtat man na hih nakleh nang hong hon ding hi,” a ci hi. Tua ciangin Job in dawng a, “Tu laitakin Pasian’ tungah a phun lo, a heh loin ka om thei kei a, thum loin ka om thei kei hi. Amah ka zon dan ding thei-in, ama kiang ka tunna ding zia a thei hi leng, a mai-ah ka thu ka gen ding a, kei ka dikna thu a kicingin ka gen ding hi. Ama hong gen ding thute le kei a hong dawnna ding thute ka thei nuam hi. Pasian in a thaneih khempeuh tawh keima langkhatah hong pang ding ahi hiam? Hong langpan lo ding a, ka thugen hong ngai ding hi. Kei a thuman ka hi a, Pasian kiangah ka gen ding hi. Kuama phelzawh nawn loh dingin kei’ dikna a genkhia ding hi. “Ahi zongin Nisuahna lam ka zong a, Pasian ka mu kei hi. Nitumna lam ka zong a, amah ka mu thei tuan kei hi. Leilu lam ka zon hangin amah ka mu thei kei a, Leitaw lam ka zon hangin zong amah ka mu thei tuan kei hi. Ahi zongin Pasian in ka kalsuanna khempeuh thei a, kei hong ze-et leh ka sianthona a mu ding hi. Ama hong lamlahna citakin ka zui cinten a, lam ka pial ngei kei hi. Pasian’ thupiakna bangin ka gamta ngitnget a, keima utna zui loin ama deihna ka zui hi. “Amah kikheel ngei lo a, kuamah in amah nial zo lo hi. Ama hih nopte kuamah in khaktan zo lo hi. Tua ahih manin kei a dingin a geelsate tungsak ding hi. Amah in hih bangin geelna tampi tak a nei ahi hi. Tua hi a, ama omna-ah kei ka lau mahmah a, ka ngaihsut khak ciangin amah ka kihta hi. Vanglian Pasian in ka lungsim hanna hong mangsak hi. Khuamial in ka mit a mialsak hangin keima kihtak pen khuamial hi lo a, Pasian ahi hi. “Pasian in bang hangin a thukhen ni ding seh lo a, ama nasemte thutang ahihna a lah ni ding seh lo ahi hiam? “Mihingte in leitang zaipi a ngah theih nadingun gisuangte khinsim uh a, tuute gu-in amau’ tuuhonte tawh khawi khawm uh hi. Mi tagahte’ la neihsunte guksak uh a, meigong numei in a leiba a loh khit dong a bawngtal a matsak uh hi. Mizawngte’ ngah theih dingte khaktan uh a, mizawngte notkhia ahih manun amaute lau-in a bucip uh hi. “Tua ahih manin gamlak a om la bangin gam keu sungah a an ding uh zongtawm uh a, a tate uh an ding koimahah mu zo lo uh hi. Midangte’ lo sungah anlak na sem uh a, migilote’ leenggui lo-ah leenggah loin a om uh hi. Zanin puan silhloin lum uh a, khuadampi lakah silh ding nei loin om uh hi. Mualtung gam panin a hong zu guahtui in amaute kawtciimsak a, suangpi pang peuh beelin a toncip uh hi. “Migilote in pa nei nawn lo naupangte sila-in nei uh a, mizawngte’ tate leiba tangin a la uh hi. Tua mizawngte in puan silhloin na sem uh a, gilkialpi mahin anlak na a sem uh hi. A thau ngah nadingin oliv gahte gawi-in leenggahzu ngah nadingin leenggahte cil napi-in, gilkial dangtakin ki-omsak hi. Khuapi sungah a liam le a si kuante’ kikona kiza napi-in Pasian in amau’ thungetnate don lo hi. “Sun khuavak a nial, tua khuavak thuzia a thei lo, khuavak lampi a pelh mi pawlkhat om hi. A zawng a cimawhte a thatlum dingin khuavak ma-in mi that pa kuankhia a, zan khuamial hun sungin mite’ na a guksak hi. Numei tunga a mawh mipa in khuamial ding ngakin om a, mite’ theih loh dingin ama mel a seel hi. Gutate in sun sungin a ciamtehsa teng zanin a inn luh uh a, sun sung bu-in khuavak a peel uh hi. Bang hang hiam cih leh zan khuamial pen amaute khempeuh a dingin zing khuavak bang hi a, zan khuamial lauhuai sung nuam a sa uh hi. “Tua bang migilo peuhpeuh tuikhang in taai a, ama neih leitangte Pasian in samsia a, tua leenggui lote-ah nasemin kikuan nawn lo hi. Nisat hun le khuakhal hunin vukkhalte a manthan bangin mihingte’ gam sung panin mawhnei mi a mangthang hi. Amah kiphawkkha nawn lo a, ama nu nangawn in zong a mangngilh ta hi. Thante in amah netum a, amah maimang ta hi. Bang hang hiam cih leh tua bang mite, numei taciingte’ neihsa tawh a kivak uh hi a, meigongte’ phattuamna ding bangmah bawl lo uh hi. Pasian in a thahatna tawh mi vangliante susia a, amah a gamtat ciangin migilo pa a si pah hi. Pasian in a lungnuamin amah nungtasak a, ahi zongin Pasian in amah encik tawntung hi. Migilo pa tomkha sung a liat hangin kiak bangin vulkik pah a, a kisattan ankung bangin a keu pah hi. Hih thu kua in nialzo ding na hi uh hiam? Ka thugennate man lo hi, ci-in kei langah hong pangin ka thugente hong selzo ding kua om na hi uh hiam?” a ci hi. Tua ciangin Shuah gammi Bildad in dawng a, “Pasian vanglian a, mi khempeuh in a zahtak ding ahi hi. Ama vantung kumpi gam, nuamtakin a omsakzo hi. Ama na a sem vantung mite bangzah pha cih kua in simzo ding ahi hiam? Pasian’ khuavak in a bat lohna koi lai mun om ahi hiam? Pasian’ muhna-ah kua dikzo ding a, siangthozo ding ahi hiam? Ama mitah khapi nangawn taang sa zo lo lai a, aksite nangawn siang sa zo lo lai hi. Tua ahihleh, lungno, ganhing no ahi lel mihing pen bangci ding ahi hiam? Mihing in Pasian’ muhna-ah bang man lel ahi hiam?” a ci hi. Tua ciangin Job in dawng a, “A hehpihhuai kei nong huhna, a thazawngkhal kei nong hotna, hih bang ahi hiam? Kei bang mihai tungah thu manpha nong gen a, pilna thu tampi nong pulak hi. Tua bang thu a gen dingin kua in hong sawl a, kua’ lungsim hong pulakkhia na hi hiam? “Misite’ gam kiling a, a sunga a teng mite launa tawh a ling hi. Pasian’ muhna-ah misite’ gam kilang sinsen a, a muh theih loh nadingin a liah bangmah om lo hi. Pasian in mun awng tungah vanpi hong zalkhia a, bangmah in a len lopi-in leitung a khai lingleng hi. Amah in meiilom lakah tuite khol a, tua a gik mahmah tui meii a puazosak hi. Amah in kha a liah ding bawl a, meii tawh kha a khuh hi. Amah in muh tawpna-ah git dinden a, khuavak le khuamial a khen hi. Amah in vanpi a pua khuampite a taii ciangin tua khuampite lau-in a ling uh hi. Ama thahatna tawh tuipi zo a, ama siamna tawh tui ganhing golpi Rahab thatlum hi. A hu a san ciangin vantung teng siang pah a, ama khut in a taikhia gulpi thatlum hi. Hihte pen ama vangliatna themkhat bek hi pan a, i zak thute pen a hemlam bek hi pan hi. Pasian a liatna taktak kua’n theizo ding ahi hiam?” a ci hi. Tua ciangin Job in thu genkik a, “Keima dikna a hong seelcipsak Pasian, ka lungsim a hong gimsak Vanglian Pasian a nungta ahih mah bangin, ka sungah nuntakna a omlaiteng, Pasian’ hu, ka nakah ka diik laiteng, ka muk tawh thusia peuhmah ka gen het kei ding a, ka kam tawh zuauthu peuhmah ka gen het kei ding hi, ci-in ka kiciam hi. Note a thuman hi, kong ci ngei kei ding a, ka nuntak laiteng, kei a thuman hi’ng, ka cihna thu ka khia ngei kei ding hi. Kei thuman ka kisakna ka khia ngei kei ding hi. Ka lungsimah kisuanna om loin siang mahmah hi. “Kei a hong langpan’, kei a hong dote in migilo le thuman lote bangin gimna thuak ta uh hen. Pasian in amaute’ nuntakna a laksak hun ciangin, migilote a dingin lametna om nawn ahi hiam? Lungkhamna a thuak uh ciangin Pasian in amau’ kikona awging ngai ding ahi hiam? Pasian’ piak ding lungdamna a deih ding uh kilawm ahih manin, ama tungah thu a nget tawntung ding uh a kilawm ahi hi. “Pasian’ vangliatna bangzahin lian mahmah cih hong gensak unla, Vanglian Pasian’ geelsa teng hong laktelsak dih un. Ahi zongin tuate khempeuh na theih khitsa uh ahi hi. Tua ahih ciangin bang hangin mawk pau na hi uh hiam? “Vanglian Pasian in migilote, mi ngongtatte, gim a piakzia hih bang ahi hi. Tapa tampi a neih hangun, a vekpi-in gal sungah si mangkhin ding uh hi. A tate uh a tawntungin gilkial niloh ding uh hi. A nungta laisunte zong pulnatna tawh si ding uh a, meigong numeite in misite kahzo nawn lo ding uh hi. Migilote in kuama simzawh loh ngun tampi tak nei ding uh a, genzawh lohin nikten’ puansilh ciang venvan ding uh hi. Ahi zongin mihoih pawlkhat in tua puante silhin, thuman mi pawlkhat in tua ngunte tang lel ding uh hi. Migilote’ lam innte kho lo a, maimom bu, ahih kei leh lo honna buk tawh kibang lel hi. Amaute a hausa-in lum uh a, ahih hangin a khanlawh uh ciangin a hauhna teng uh na maimang ta hi. Lauhuaina in tuikhang pak bangin nawkgawp ding a, zan ciangin huihpi in amaute mutkhiamang ding hi. Nisuahna huihpi in amaute leenkhia-in a inn panun gamlapi-ah leenkhia ding hi. Amaute a suahtak theih nading a hanciam tantan kimlai mah, hehpih ngaihsut hetloin leenkhiamang ding hi. Amaute a tai laitakun huih in nawk gawpin, a susiagawp dingin mutkhiagawp ding hi. “Ngun a kitawh khiatna a khuk om a, kham a kisiansakna a mun mah om hi. Mihingte in lei sung panin sik tokhia a, suang sung panin sumsan a huantui uh hi. Mihingte in khuamial thukpen sung zongin, lei sung a thukpi dong hahkatin zong uh a, khuamial thuktawng sung pan suang a tokhia uh hi. Mihingte’ tenna panin a gamlapi mun, kuamah a pai ngei lohna sungah lei sung sumte a tokhia uh hi. Tua lai munah amau guak in na semsem uh a, lei thuk sungah khauhual tawh kiveisuk kiveito uh hi. I annek dingte leitungah hong pokhia a, ahi zongin leinuai thuk sung mei bangin a sa mahmah hi. Lei sunga om suangte sungah sapfaia suangmanpha om a, a leivuite sungah kham a om hi. Simbung in zong tua lampi thei ngei lo a, luimu zong tua lai-ah va leng ngei lo hi. Humpinelkai ahi a, ganhing dangte ahi zongin cikmah hunin tua lai-ah va pai ngei lo uh hi. “Mihingte in suang a sakpente to uh a, mualte’ bul lei sung panin a tokhia uh hi. Suangte a tawhvang uh ciangin suangmanphate a mu uh hi. Amaute in tuinak kipatna dong lei sung to uh a, a kiphumcip nate hong suahkhia uh hi. Ahi zongin koi lai-ah pilna kimu ding ahi hiam? Koi lai-ah thutheihna nak om ahi hiam? “Mihingte in a kimuhna ding a lampi thei lo uh a, mihingte’ gam sungah zong a lampi om lo hi. A thuk mahmah tuipi liante in, ‘Ko’ sungah om lo hi,’ ci uh a, tuipite in, ‘Ko kiangah om lo hi,’ a ci uh hi. Pilna pen kham tawh a kileizo hi lo a, a man ding zah zong ngun tawh sehtheih hi lo hi. Ofir kham tawh pilna a kileizo hi lo a, suangmanpha pen tawh zong a kileizo hi tuan lo hi. Pilna a manphatna kham le limlang tawh tehtheih hi lo a, kham hoihpen a kibawl nate tawh zong leizawh hi lo hi. Pilna a manphatna suangkhi le limlang tawh genteh theih hi lo a, pilna themkhat bek nangawn kep sangin manphazaw lai hi. Ethiopia gamah a piang topaz suangmanphate tawh tehtheih ding hi lo a, kham citak hoihpen tawh zong kiteh thei tuan lo hi. “Tua ahihleh koi lai panin pilna hong piang ahi hiam? Thutheihna koi lai-ah om ahi hiam? Nuntakna a nei sung pan a mu thei kuamah om lo a, a leengthei vasate nangawn in mu thei lo uh hi. Sihna le siatna nangawn in a thu hemzak bek ung, ci lai uh hi. “Pasian bek in pilna lampi thei a, amah bek in a omna mun a thei hi. Bang hang hiam cih leh amah in leimong dong mu a, vantung nuai-ah a om na khempeuh a mu thei hi. Pasian in huih a gik ding zah bawlin, tuipi a liatna ding zah a seh laitak, guah zukna ding mun thu pia-in, khuaphialep in a zuih ding lampi bawlin a vaihawm laitak nangawnin, amah in pilna mu-in a manphate entel a, amah in hoihsa ahih manin a kipsak hi. “Tua ciangin amah in mihingte tungah thu genin, ‘Topa zahtakna, pilna hi a, siatna pelhna pen thutheihna hi,’ ci hi,” a ci hi. Tua ciangin Job in a thu genkik a, “Ka nuntakna nidanga bang hi kik hen la, Pasian in kei hong et hun lai bang hong hi kik leh ka ut hi. Tua hun lai-in Pasian in kei hong ompih tawntung a, khuamial sungah ka pai laitakin khuavak hong pia hi. Tua hun pen ka cihtheih hun laitak hi a, Pasian in ka innkuan a hong hut laitak hun ahi hi. Tua hun lai-in Vanglian Pasian in kei hong ompih a, ka kimkotah ka tate a om uh hi. Ka bawngte le ka keelte in nawi deih zahzah hong pia uh a, suang tam penna nangawnah ka oliv kungte hoih mahmah hi. Khuasung upate a kikhop uh ciangin a kikhawm dingin kei ka pai ciangin kei hong muh phetun khangnote in tutna hong awn uh a, kei hong zahtakna limun papite na ding uh hi. Khuasung uliante a kiho na khawl pah uh a, a khut uh tawh a kam uh na hum uh hi. Mi a thupi pente nangawn na gamdai pah uh a, kuamah pau loin na om uh hi. “Ka thugen a za mi peuhmah in a hoihlamin na za uh a, a hong mu mi peuhmah in dik hong sa uh hi. Mizawng ka theih peuhmah ka huh tawntung a, cih nading thei lo tagahte zong ka huh hi. A lungkham a cimawhte in kei hong phat uh a, meigong numeite a lungnuamin ka omsak hi. Thuman, puan bangin ka silh a, thuman in kei hong tuam hi. Thutang, puanpi-in ka silh a, thutang in kei hong tuam hi. Mittaw mite a dingin mittang ka hi a, khebai mite a dingin khe ka hi hi. Mizawngte a dingin a pa uh ka hi a, lungkhamna a thuak, ka theih loh mite nangawn ka panpih tawntung hi. Migilote’ gitlohna khempeuh ka susia gawpmang a, amau’ sukgawp mi khempeuh ka honkhia hi. “Ka nuntak kum sehnel zahin a tam dingin ka ngaihsun a, lungnuam takin inn-ah a si dingin ka kilamen hi. A zung in tui a ngah tawntung singkung tawh ka kibang a, daitui in a hiangte a nomsak singkung tawh ka kibang hi. Mi khempeuh in kei hong phat tawntung uh a, ka tha a hat tawntung hi. Mite in ka thugen ngai-in hong ngak dimdem uh a, kuamah pau hetloin limtakin hong ngai uh hi. Thu ka gen khit ciangin a genthuah ding uh bangmah thei nawn lo uh a, ka thugente khempeuh hoihtakin na sang pah uh hi. Lo khote in khuapi guah deih mahmahin a ngak bangin, ka thugente khempeuh hoihtakin na sang uh hi. Itna tawh ka nuihsat ciangin amaute lungnuam mahmah uh a, ka mai a tai ciangin a maigumna uh a bei hi. Amaute ukin a vai ding uh ka hawmsak a, kumpipa in a galkapte a makaih bangin ka makai a, a lungkham uh ciangin amaute ka hehnem hi. “Ahi zongin tu-in, a pate uh kimanna a nei lo ka uite tawh tuu cing dingin a kuan dingin zong ka deih loh, kei sanga a khangnozawte in hong ciamnuih bawlta uh hi. Amau’ hatna khempeuh tu-in bei khinta ahih manin, amau’ hatna kei a dingin a kimanna om nawn lo hi. Amaute zawng mahmahin gilkial uh ahih manin gamlak singzung keu peuh teep lel ding uh hi. Amaute in singkungnote botin ne uh a, limna alna a nei lo poding zung nangawn a ne uh hi. Gutate otkhai-in a kidelh khiat bangin mite lak panin amaute kihawlkhia hi. Amaute pen hawkguam sung, leihawm sung, luihawm, le keenhawm sungah a ten uh a kul ahi hi. Ganhing bangin gamlakah amaute ham uh a, sawlkawm nuai-ah kilomin a omkhawm uh hi. Bangmahin a kimang lo hih bang misia honte, mite omna gam sung panin a kihawlkhia hi. Tu-in amaute in kei hong simmawh bawlin hong nuihsan uh a, amaute’ ciamnuihna bek ka suak khinta hi. Amaute in kei hong kih uh a, kei tawh tehna-in amaute hoihlua kisa uh a, amaute in ka maitang nangawn cil hong phih vial uh hi. Pasian in hong zawngkhalsak, hong cimawhsak ahih manin amaute in a ut utun kei hong bawlsia uh hi. Amaute in hong simgawpin, kei hong taikhiasak uh a, ka sih theih nadingin ka mai-ah na pang uh hi. Ka suahtak theih nading lampi na khaktan uh a, kei suksiat ding hanciam uh a, amaute a kho ding kuamah om lo hi. Kei ka bukna leihawmah amaute hong tuaksuk uh a, kei hong sucipsuk uh hi. Launa tawh ka kidim a, ka cihtheihna khempeuh meii bangin a thengta hi. “Tu-in a si ding ka hita a, ka gimna panin noptuam ngahna ding bangmah om nawn lo hi. Zan thapai-in ka guh sung, ka tang sung khempeuh na a, a hong pet tawntung natna dai ngei peuhmah lo hi. Pasian in ka puan ngawng pan kei hong manin ka puan tawh hong heekcip hi. Buannawng ciim sungah kei hong lawnkhia a, ninbulom bang lel ka hita hi. “Pasian aw, nang kong sam a, na hong dawng ngei kei hi. Nang tungah thu kong ngen a, nong don het kei hi. Kei tungah nong gilo mahmah a, nong hih theih zahin kei na hong bawlsia hi. Huih lakah na hong lawn a, huih na hong leensak a, huihpi in hong lawnsuk hong lawnto hi. Mi khempeuh a dingin sehkholhin a kikoihsa sihna-ah a hong paipih na hihna ka thei hi. Na hehpih ding a hong thum ding cih lohbuang, bangmah dang a hih thei nawn lo misia pa, bang hangin sugawp na hi hiam? A lungkham mite tawh kei kap khawmin, a cimawh mite dahpih hi lo ka hi hiam? Lungdamna le khuavakna ka lamet laitakin, lungkhamna le khuamialna hong tung zawsop hi. Lunggimna le natna in kei hong sugawp a, gimna ka thuak ding cih loh bangmah dang om nawn lo hi. Lungkham sinkhamin ka om a, mihon lakah dingin huhna ka ngen hi. Kei pen gamkhing sunga a om ngia le vasa-kalaohte tawh kipawlin a kikhawl ka hita hi. Ka vun vomin dulhkhia a, ka pumtangin ka ci sa gawp hi. Nidangin lungdamna la a kisa ka zakna munah tu-in thumna le kahna aw bek ka za ta hi. “Lunggulhna tawh nungak khatpeuh ka et ngei loh nading, kiciamna ka bawlkhin hi. Vanglian Pasian in eite bang hong cih a, mihingte’ gamtatna bangci thuhkik ahi hiam? A man loin a gamtate tungah siatna le gimna a tungsak hi. Pasian in ka gamtatna khempeuh thei a, ka kalsuanna khempeuh a hong mu hi. “Ka gitloh gamtat ngei lohna, kuamah ka khem ngei hetlohna, ka gamtat hoihna thute-ah ka kiciam ngam hi. Pasian in tawikhaina manah hong tawikhai hen; ka paubaan hetlohna hong mu ding hi. Lampi man panin ka pial a, siatna lam ka zuih a, ka khut tungah mawhna a baan taak leh ka khawhsa ante midangte’ nek suak hen la, ka an neih khempeuh maimang tahen. “Ka vengte’ zi zawlmitin, a kong gei-ah ngakin ka buk taak leh ka it ka zi in midangte’ an suksak hen la, midangte’ ang-ah lum tahen. (Tua bang mawhna pen a siahuai hi a, sihna a thuak ding ahi hi. Ka neih khempeuh a kangtum thei mei husia tawh a kibang ahi hi.) “Ka nasemte khat peuhpeuh kei tungah hong phun ciangin, ama thu ngai-in limtakin ka bawl hi. Tuaci kei leng, Pasian’ mai mu ngam ding ka hi hiam? Keima thu a khen dingin Pasian hong pai ciangin bang gen mawk ding ka hi hiam? Kei a hong piangsak Pasian mah in keima nasemte zong a piangsak ahi hi. “Mizawngte ka huh ding ka mangngilh ngei kei a, meigong numeite ka guaksuaksak ngei kei hi. Keimah in an ne napi-in, tagahte a gilkialin ka koihkhong ngei kei hi. Ka khang tawntungin tua bangte ka en tawntung hi. “Mi a cimawh, puan silh ding a lei zo lo, a zawng lua ka muh ciangin, ka tuuhon panin ka ngah tuumul puan kibawl ka pia hi. Amah in zong a lungsim neih khempeuh tawh kei a hong phat hi. “Zum thukhenna-ah zo-na ning cih ngaihsutna tawh tagah khatpeuh ka khem taak leh, ka khutte buisum hen la, ka liang bul panin kilongkhia tahen. Pasian’ gimpiak ding kihta ka hih manin, tua bang peuhmah ka gamta ngei kei ding hi. “Leitung hauhna muan le suanin ka nei ngei kei a, ka hauhna zong ka kisaktheihpih ngei kei hi. A taang mahmah ni ahi a, a hoih mahmah kha ahi zongin, cikmahin ka bia ngei kei hi. Tuate pahtawina le zahtakna limin ka khut lapna tawh cikmah hunin ka khial ngei het kei hi. Tua bang mawhna in sihna a thuak ding hi a, tua bang mawhna pen Vanglian Pasian nialna ahi hi. “Ka galte’n gim a thuak teh ka kipak ngei kei a, haksatna a tuah uh teh ka lungdam ngei kei hi. A sih ding uh deihna tawh ka samsia ngei kei hi. Zin le leengte limtakin ka do tawntungna thu ka na a hong sepsak mi khempeuh in a thei uh hi. Khualzin mi khempeuh ka inn-ah ka tungsak tawntung a, kongzing lakah amaute ka lumsak ngei kei hi. Midangte in a mawhnate uh pulak loin imcip uh a, ahih hangin keima mawhna cikmahin ka im ngei kei hi. Midangte’ hong kam pau ding kihtakin ka nei ngei kei hi. Amau’ hong simmawh ding ka kihtakna hangin pau loin ka om ngei kei a, ka bucip ngei kei hi. “Ka thugente kuamah in na ngai lo ding ahi hiam? Ka gen thu khempeuh man hi, ci-in ka kiciam hi. Vanglian Pasian in kei hong dawng tahen. “Ka langte in kei hong mawhsakna thute ka tawi theih dingin lai sungah a kigelh hileh tua mawhsaknate kisialhna tawh ka ngawngah ka ok ding a, mi khempeuh in a muh dingin ka sangsak ding hi. Ka gamtatna khempeuh Pasian kiangah ka gen ding a, ama muhna-ah lungdamin kihihsakna tawh ka om ding hi. “Ka khawh leitang ka guk ahih a, a nei taktak pa’ tung pan ka suh ahih a, tua leitang a piang ante ka nek a, tua lo a khote a puksi-in ka omsak taak leh, tua lo sungah mangbuh le mangbuh ham tangin kiak le ling po ta hen,” a ci hi. Job’ thugente beita hi. Job amahmah dik kisa tawntung ahih manin hih mihing thumte in Job’ thugente dawn ding ngaihsun nawn lo uh hi. Ahi zongin a thu a za, Ram minam, Buz-te beh, Barakhel’ tapa Elihu a heh hong suak hi. Bang hang hiam cih leh Job amah kidiksakin Pasian mawhsak zawsop hi. Job’ lawm thumte tungah zong a heh suak hi. Bang hang hiam cih leh Job a dawnna ding uh thei lo uh ahih manin Pasian a khial tawh hong kibang hi. Elihu ahihleh amaute lak panin a khangno pen ahih manin adangte a pau kim khit mateng bangmah pau loin a om hi. Ahi zongin hih mihing thumte in Job a dawn theih loh a muh ciangin a hehna thuakzo nawn lo hi. Tua ahih ciangin Buz-te beh Barakhel’ tapa Elihu in thu gen ding hong kipan a, “Kei a khangno lai hi-in, note a khangham na hih manun, ka ngaihsutna note lakah kong gen ngam kei hi. No a khangham zawte in thu a gen ding kilawm hi, ci-in ka ngaihsun hi. Ahi zongin mihingte tungah a hong tung pilna pen Vanglian Pasian’ kha in a hong piak ahi hi. Khanghamna in mi pilsak lo a, thuman zong theisak tuan lo hi. Tua ahih ciangin tu-in keima thugen dingte nong ngaih ding uh ka deih hi. Keima ngaihsutna hong gensak dih un. “Thu na gengen laitakun lungduai takin kong ngaingai a, na thugen dingte uh na zonzon laitakun ka hong ngak hithiat hi. Limtakin kong ngai a, na cihmawhna uh ka thei hi. Job’ thugente a man lohna na gentel thei kei uh hi. Bang hangin pilna a nei-in kigen thei ding na hi uh hiam? Note in lel na hih manun Pasian in Job dawng ding hi. Job in note tungah thu tampi hong gen a, kei tungah hong gen lo hi. Ahi zongin note’ dawn bangin ka dawng ngei kei ding hi. “Job aw, hih mite in nang hong lel uh a, nang hong dawnna ding bangmah thei lo uh hi. Amaute pau loin a om ciangun kei zong pau loin ngak lailai ding ka hi hiam? Amaute in a gen ding uh thei nawn loin ommawk uh hi. Tu petpetin kei zong nang kong dawng ding a, keima ngaihsutnate ka hong pulak ding hi. Thu a gen dingin kha in kei hong sawl a, tu taktak ciangin ka kam ka ki-ipzo nawn het kei hi. Thugen theih nading hun a nei lo hi leng, leenggahzu thak a kithun leenggahzu um bangin ka puakkham ding hi. Ka thuakzo nawnkei a, ka genkhia ta ding hi. Hih ka thugenna-ah kuamah ka pawlpih kei ding a, kuamah phattuam ka nei kei ding hi. Kuamah ka mawkphat thei kei hi. Tuaci mawkphat leng Pasian in kei hong sumang pak ding hi. “Job aw, tu-in ka thugen khempeuh limtakin hong ngai in. Ka lungsim sunga om thute a hong gen ding ka hi hi. Ka gen khempeuh lungsim takpi tawh ka gen hi a, a man thu a gen ka hi hi. Bang hang hiam cih leh Pasian’ kha in kei hong sawl a, Vanglianpa in kei tungah nuntakna hu hong pia hi. “Na hong dawn theih leh limtakin hong dawng in. Na hong seelna ding limtakin kiging in. Job aw, nang le kei, Pasian’ hong muhna-ah a kibang ihi a, i nih tuakin leivui pana piang ihi hi. Tua ahih manin kei nong kihtakna ding bangmah thu om lo a, nang ka hong zawhthawh bawlgawpna ding zong bangmah thu om tuan lo hi. “Keima zakin thu na gen khin a, na thugente ka za khin hi. Nang in, ‘Kei ka mawh kei a, ka gamta khial kei hi. Ka paubaang kei a, mawhna ka sukha kei hi. Pasian in kei hong sukna ding thu zongzong a, gal bangin kei hong bawl hi. Amah in ka khe kolbulh a, ka gamtatna khempeuh hong encik hi,’ na cihna ka za hi. “Ahih hangin, Job aw, nangmah na khialzaw hi. Pasian pen mihing sangin lianzaw hi. Pasian in mihingte’ phunna thudon ngei lo hi, ci-in thugenna tawh bang hangin Pasian mawhsak na hi hiam? Pasian in a lam tuamtuamin thu hong gengen napi-in, ama thugente khempeuh kuamah in thudon lo hi. Zanin mite a ihmut ciangin, mang le maangmuhna sungah Pasian in thu a gen hi. Pasian in thu hong gen a, ama hilhkholhna hangin mite lau mahmah uh hi. Mite in khialhna a bawl nawn lohna ding, mi kiphasakte a suahkhak loh nading, Pasian in a deihna hangin mite kiangah thu a gen hi. Pasian in mihingte siatna thuaksak lo a, sih nading panin amaute a honkhia hi. Pasian in cinatsakna tawh mihingte thuhilh a, a pumpi khempeuh natna tawh a kidimsak hi. Cina pa in an ne zo lo a, an limpen nangawn a kih tha a suak hi. A ci a sa khempeuh kiam a, a guh guak bekin a om hi. A beina ding a nai hita a, misi gam a zuan ding hita hi. “Mihingte’ tavuan a phawksak, Pasian’ vantungmi tul tampite lak panin vantungmi khat amah a huh dingin hong paikhia ding hi. Vantung mi in amah a hehpihna hangin, ‘Amah suaktasak in. Misite gamah paisak kei in. Amah tatkhiatna ding hih lai-ah om hi,’ a ci ding hi. Tua ciangin ama pumpi khangnosuak kikin, a thahat pen hun laitak a bangkik ding hi. Tua ciangin Pasian in ama thungetna pia ding a, amah in lungdamna tawh Pasian bia ding a, Pasian in ama a dingin thu a hoihlamin a heisakkik ding hi. Tua ciangin amah in mihonpite’ zakna-ah, ‘Kei ka khial khin hi. A manin ka gamta kei a, ahi zongin Pasian in kei hong suaktasak hi. Misite’ gam sung ka tunna ding panin amah in kei hong kem a, tu-in kei ka nungta lai hi,’ a ci ding hi. Pasian in hih thute khempeuh mihingte tungah hong hihkik zelzel a, sih nading panin honkhia kik zelin nuntak nuam a pia kik hi. “Job aw, ka thugente limtakin hong ngai in. Gamdai-in om inla, kei thu hong gensak in. Ahi zongin gennop mahmah na neih leh hong gen in; bang hang hiam cih leh midik na hih ding ka hong deihsak hi. Ahi zongin gennop velvel na neih khol kei leh keima thugen hong ngai in. Mipil na hih theih nading thu kong hilh ding hi,” a ci hi. Tua ciangin Elihu in, “No a pilin a kinei mite aw, ka thugente ciamteh un. Thu thei a a kinei mite aw, ka thugente ngai un. An na ciap uh ciangin a lim a lim lo na thei uh hi. Thu kigen na zak uh ciangin pil kampau le hai kampau na khenthei uh hi. Thuman bang hiam cih tengkhia ni. Thuhoih bang hiam cih mukhia ni. Job in, ‘Kei ka dik hi. Pasian in kei a thumanin hong seh nuam lo hi. Kei a thuman hinapi zuauthu genin hong seh hi. Kei a khial hi lo napi gim thuakin ka cimawh hi,’ a ci hi. “Hih Job tawh a kibang mi na mu ngei uh hiam? Amah in Pasian zahtakna lim bangmah nei het lo hi. Amah in migilote tawh kikholh nuam sa mahmah a, mawhnei mite tawh a vak kawikawi hi. Bang hang hiam cih leh amah in, ‘Pasian’ deihna i zuih hangin phattuamna bangmah om lo hi,’ ci hi. “Ahi zongin thu ngaihsun thei a kinei note khempeuh in ka thugenna hong ngai un. Pasian a giloin gamta ngei ding a, Vanglianpa in a man loin sem ngei ding ahi hiam? Pasian in a gamtatna tawh kizui-in mite tungah thaman pia a, a thuak dingun a kilawm bangin gim a pia hi. A taktakin ci lehang, Pasian a man loin gamta ngei lo a, thutang kimlai a khialin heisak lo hi. Pasian in ama vangliatna mi khatpeuh tung panin a ngah ahi hiam? Leitung khempeuh a uk dingin mi khatpeuh in amah a koih ahi hiam? Pasian in ama ngaihsutna kheel hen la, nuntakna hu a dokkik hileh nuntakna a nei khempeuh si pah ding uh a, mihing khempeuh leivui suakkik ding uh hi. “Job aw, mipil-a kinei na hih leh ka thugente hong ngai in. Vanglianpa in thutang a deih lo dingin ngaihsun na hi hiam? Nang in a thuman Pasian mawhsak na hi hiam? Kumpite le uliante bangmahin kimang loin a gitloh uh ciangin, amaute a mawhsak ngam pa Pasian bek ahi hi. Pasian pen mi khempeuh a hong piangsak pa hi a, amah in uliante panpih tuan nei lo a, mizawngte sangin mihaute thupi ngaihsutzaw tuan lo hi. Mihingte ahihleh zan khat thu-in sipak thei hi. Pasian in mite satpukin sisak thei a, nakpitakin hih kul loin mi thahat pente zong a that thei hi. Pasian in mihingte’ gamtatna khempeuh hong encik a, i kalsuanna themno dongin hong mu khin hi. Gamtatsia mite a buk theih nadingun a seelcipzo ding, khuamial khuazing koimahah om lo hi. Pasian’ mai-ah mihingte in thukhenna a thuak ni ding, a kiseh hun omtuam lo hi. Amah in a thu kan kul loin mi vangliante sugawp a, amaute’ tang dingin midangte a koih hi. Amah in amaute’ gamtatnate a vekpi-in thei ahih manin zan khat thu-in amaute lumletin a susiagawp hi. Pasian in mi khempeuh’ muhin mawhneite gim a pia hi. Bang hang hiam cih leh amaute in ama thu mang nawn lo uh a, a thupiakte khempeuh don nawn lo uh hi. Amaute in mizawngte kapsak gawp uh a, mizawngte’ huh ngetna awging Pasian in a za hi. “Pasian in bangmah hih het kei taleh zong, kuamah in Pasian mawhsak thei lo ding hi. Amah in hong maingat hetkei taleh zong, kuamah in bangmah cihthei tuan lo ding hi. Migilote hong uksak taleh zong, tua panin suahtakna ding kuamah in vaihawm zo lo ding hi. “Job aw, Pasian’ tungah na khialhnate pulakin na khialh nawn loh nading thu ciam nai lo na hi hiam? Pasian in na khialhnate a hong lahna ding ngenin, na gamtatsiat nawn loh nading ut nai na hi hiam? Pasian nial na hih manin amah in nangma utna a bang hangin hong hihsak ding ahi hiam? Hih thu pen kei’ ngaihsut ding hi loin, nangma khensat ding ahi hi. Tu-in nangma ngaihsutna a kician takin hong gen in. “Thu a ngaihsun theite in hih thu man hi, hong cihpih ding uh a, ka thugenna a za mipil peuhmahte in, ‘Thu a thei lopi-in Job in thu gen a, a thugen peuhmah a khiatna nei om lo hi. Job’ thugente khempeuh ngaihsun le-uhcin, migilo bangin a kampauna na thei ding uh hi. Amah a khialhna khawl nuam het lo a, eite khempeuh’ mai-ah Pasian simmawhin zahpih bawlgawp hi,’ hong ci ding uh hi,” a ci hi. Tua ciangin Elihu mah in, “Job aw, Pasian’ muhna-ah ka paubaang kei hi, na cih ding kilawm lo hi. Pasian kiangah, ka khialh hangin bang phamawh sa na hi hiam? Khialhna ka gamtat loh manin bangmah phattuamna ka ngah kei hi, na cih ding kilawm lo hi. Nang le na lawmte tungah thu ka hong gen ding hi. “Vantung ento dih un. Meiite bangzah takin sang omto ahi hiam? Mawhna na gamtat manin, Pasian bangmah sukha lo hi. Tampi tak khial talecin zong amah sukha tuan ahi hiam? Na thumanna hangin Pasian in phattuamna ngah ahi hiam? Pasian in nang kiang panin bangmah deih lo hi. Na khialhna hangin na mipihte bek in thuak a, na gamtat hoihna hangin na mipihte bek in phattuamna ngah hi. “Mite in gim a thuak ciangin tau uh a, amaute a honkhia dingin midang khatpeuh a sam uh hi. Lungzin’ hun laitakin thahatna a pia, amaute a Piangsak Pasian’ lam nga lo uh hi. Eite mipilin a hong bawl, ganhingte le vasate sangin a pilzaw-in a hong bawl Pasian’ lam nga lo uh hi. Amaute migilo mi kihisakte ahih manun, huh ding a nget hangun Pasian in pia lo hi. Ngetnget, gengen, a phattuamna bangmah om lo hi. Vanglian Pasian in na mu lo, na ngai lo hi. “Job aw, nangmah in, ‘Pasian ka mu thei kei a, ahi zongin ka thu ama khut sungah om a, lungduai takin ka ngak niloh hi,’ na ci hi. Pasian in kuamah gim pia lo a, khialhna zong thupi ngaihsut lo hi, ci-in na ngaihsun hi. Tua banga kam na paupau a mawknapi hi a, na gen mel zong a thei het lo na hihna thu a hong kilangsak na hi hi,” a ci hi. Elihu in a thugen zomlai a, “Lungduai takin tawmkhat hong ngailai in. Pasian’ tangin ka gen ding thu pawlkhat omlai hi. Kei a hong Piangsak Pasian thuman hi, ci-in kong lah nadingin thu tampi tak kaikhawmin ka hong gen ding hi. Ka thugente khempeuh a khial om het lo a, na mai-ah thugenpa pen mipil khat ahi hi. “Pasian a thahat mahmah hi napi-in, kuamah simmawh lo hi. Amah in a theih loh bangmah om lo hi. Amah in mimawhte daupaisak lo a, a zawng gimna a thuakte tungah a manin a gamta hi. Amah in thuman mite hu a, kumpi ukna za zong pia a, pahtawina lianpi a ngahsak tawntung hi. Ahi zongin mite sikkol kibulh a, a gamtatnasate hangin gimna a thuak uhleh, Pasian in amau’ mawhna le a kiphatsaknate uh a lakkhia ahi hi. A gamtatsiatna panun a khawl nadingun amau’ bil sungah thu a gengen hi. Amaute in Pasian’ thu mangin ama na sem le-uh amaute nuamsa-in a khan uh a sau hi. Ahi zongin ama thu mang kei le-uh, namsau tawh si ding uh a, misite’ gam zuan ding uh hi. “Migilote a hehin nitum uh a, gimna a thuak ciang nangawnun ama huh ding ngen lo uh hi. Amaute khansih uh a, a zumhuaipi-in a bei uh hi. Ahi zongin Pasian in gimna tawh mite thuhilh a, khua a phawktheih nadingun gimna a zang ahi hi. Pasian in lungkhamna panin nang hong paikhiatpihin, lungnuam takin nang hong omsak a, na sabuai tungah anlim nono kilui venvan hi. Ahi zongin tu-in na ngah dinga kilawm gimna a thuakta na hi hi. Sumgolh’ khemsa-in gamta kei inla, leitung nate’ bawlin lam kipialsak kei in. Huh ding na nget hangin a phattuamna om nawn lo a, na hauhna na liatna in hong huh thei nawn lo hi. Mihingte a beimang hun ding, zan khuamial hong tun hun ding lunggulh kei in. Siatna lamah na kihei khak lohna ding limtakin kidawm in. Na siat khak loh nadingin gimna hong kithuaksak ahi hi. “Pasian a vangliat mahmahna limtakin phawktel in. Pasian pen sia khempeuh lakah sia lianpen ahi hi. Pasian’ gamtatzia ding kuamah in sawl thei lo a, Pasian gamtatsia hi, ci-in kuamah in zong mawhsak zo lo hi. Pasian a nasepna hangin mi khempeuh in a phat tawntung mah bangin nang zong amah phatzaw in. Mi khempeuh in Pasian’ sepsate mu uh a, theikim zo lo uh ahih manin lamdang a sa uh hi. Pasian a liatna a kicingin i theizo kei a, ama kum phazah zong i simzo kei hi. “Amah in tuipi panin tuite lato a, tua a lak tuite guahtui-in a bawl hi. Amah in meii sung panin guah piangsak a, mihing khempeuh a dingin guah a zusak hi. Meiite a pai henhanna hitaleh, vanah van a ginna hitaleh kuamah in thei zo lo hi. Amah in vantungah khua phiasak a, ahi zongin tuipi thuk sung a mialsak hi. Amah in tu-a bangin mihingte hong vak a, annek ding tampi tak a hong pia ahi hi. Amah in keek thu pia a, a kap nop penpen a kha dingin a sawl hi. Amah a heh ciangin huihpi sam a, vanging pen ama hong pai nading a kitheihna ahi hi. “Hih huihpi in ka dip hong kuasak a, ka dip vana khai hong bangsak hi. Ama kam panin a hong gingkhia hih vanging Pasian’ pauna awging, limtakin ngai in. Amah in vanah khua phiasak a, leimong khat pan mong khat dong a taan hi. Tua ciangin a vanglian vanging, ama awging hong kiza a, tua hun sungteng mahin khua a phiaphia hi. Pasian’ sawlna tawh na lamdangpipi piang a, eite’ theih zawh loh thute a hong piang hi. Amah in leitungah vuk a kia dingin sawl a, guah tampi tak a zusak hi. Amah in mihingte a nasep uh khawlsak a, amah a gamtang ahihna a kilangsak hi. Gamsate in a lupna ngei delh uh a, a kua sungah bucip uh hi. Leitaw lam panin guahpi hong zu a, leilu lam panin huihpi hong nung hi. Pasian’ husanna in tuite khalsak a, tui lianpite khalin sik bangin a sak hi. Amah in meiipi nomsak a, meiipi in khua a phiasak hi. Pasian’ deihna zui-in a kikhin kawikawi hi. Leitung mun khempeuhah pai-in, Pasian’ sawl teng a sem uh hi. Pasian in mihingte gim a piakna ding ahi a, pahtakna a lahna ding ahi zongin, leitungah tu-a bangin a piangsak hi. “Job aw, tawlkhat khawlin ngai inla, Pasian’ bawlsa na lamdangte ngaihsun dih in. Pasian in thu pia a, meii lak panin khua a phiatsak theihna na thei hiam? Bangmah in a len lopi-in vantungah meii a omsak theihna, a lamdang hih ama siamna na thei hiam? Leitaw lam huihpi nasia takin a nun’ laitakin na puan sungah khua-ul kai-in na om hi. Limlang bangin a sak mahmah van peekpi ama hih bangin zalzo na hi hiam? Pasian kiangah ka gen ding uh hong hilh in. A hawmpi-in ka om uh a, ka gen ding uh om lo hi. Pasian tawh kiho theih nading ka ngen kei ding hi. Kei hong suksiat nadingin kei kipia ding ka hi hiam? “Tawlkhat sung khuavak kimu vet lo a, guah le meii in a liah hi. Tua ciangin huih hong nungin tuate khempeuh a mutsiang hi. Kham mel khuavak leilu lam pan hong taang a, Pasian’ minthanna pen zahtakna tawh kidimsak hi. Pasian vanglian mahmah a, eite’ theihzawh hi lo hi. Amah thuman mahmah a, thutang takin na a sem hi. Tua ahih manin mi khempeuh in amah a zahtakna, mipil a kisate amah in a don lohna, lamdangsak ding hi lo hi.” a ci hi. Tua ciangin huihpi lak panin Topa in Job tungah thu hong gen a, “Kei’ pilna a nial dingin nang kua na hi hiam? Thu na theih lohlam a kilangsak na hi bek hi. Kipasalsakin dingto inla, kong thudot dingte hong dawng in. Leitung ka bawl laitakin nang om na hi hiam? Thei kisa na hih leh tua thu hong gen in. Bangcia-in golsak ding cih kua in seh ahi hiam? Kua in a golna ding zah khau khai ahi hiam? Hihte khempeuh thei kisa na hi hiam? Leitung a pua khuampite bang tungah kiphut ahi hiam? Kua in leitung a bulpi phut ahi hiam? Tua ni-in zingsang aksite in la sa khawm uh a, Pasian’ tapate lungdamin a kiko uh hi. “Lei sung panin tuipi hong suahkhiat laitakin, tua tuipi a khaktan ding kongpi kua in na khak ahi hiam? Meii tawh tuipi a tuamcip pa, khuamial tawh a vialcip pa keimah ka hi hi. Tuipi gamgi ding ciamteh sakin, ama huangsung ding bekah ka omsak hi. Tuipi kiangah, ‘Hih ciang bek na pai ding a, hih banah na kin nawn kei ding hi. Na tuihualte hih ciang bek pai ding hi,’ ka ci hi. Job aw, nangmah in, ‘Tuni-in khua vak in,’ ci-in na nuntak sung tawntung thu pia ngei na hi hiam? Zing khuavak in leitung a mongin manin, a kawma bu migilote a sinkhiat ding, thu pia thei ngei na hi hiam? Khuavak in mualleguamte kilangkhia sak a, puan a tonin a kikoih tawh a kibatna a kilangsak hi. Migilote a dingin sun khuavak taanglua a, siatna a gamtatna ding uh a khamcip hi. “Tuipi sungtawng tuinakah pai ngei na hi hiam? Tuipi nuai lei tam tungah lam pai ngei na hi hiam? Misite’ gam khuamial kongkhakpi, mi khatpeuh in nang hong lak ngei ahi hiam? Leitung bangcia lian ding cih na thei hiam? Hih thute thei na hih leh hong dawng in. “Leitung khuavak hong kipatkhiatna mun ahi a, leitung khuamial hong kipatna mun ahi zongin, thei na hi hiam? Nangmah in amau’ omna mun ciang dong va thei a, tua ciang dongah va kha kik ngei na hi hiam? Na nuntakna sawtta a, leitung a pianin nang suakkhin na hih teh tua thute khempeuh thei mah ni teh! “Vuk a kikoihna munah nang va lut ngei a, gial a kikhopna mun va mu ngei na hi hiam? Tuate, lungkham huna ding, gal om hun cianga dingin ka koihcing ahi hi. Leitung nitaang a hong suahkhiatna mun ahi a, nisuahna huihpi hong kipatna mun ahi zongin, va tung ngei na hi hiam? “Kua in guahzukna ding tui lampi bawlsak a, keek’ lampi ding sialsak ahi hiam? Mihing om lohna mun leilakah, kua in guah zusak ahi hiam? Lopate a po theih nadingin lei keu-in a sak bekbakte kua in tui buak ahi hiam? Guah in pa nei ahi hiam? Daitui in pa nei ahi hiam? Kua’ sung panin tuikhal hong piangkhia a, kua’ sung panin vana vukte hong suak ahi hiam? Tua tuite suang bangin sak a, tuipi tui teng khalcip hi. “Vana om Seguk henkop thei a, Zawlzawng a kikhihna phel thei na hi hiam? Ama hun hunin aksite lam lak thei a, Khawlei-uikai a pai nading lampi lak thei na hi hiam? Vana om nate’ zuih ding ngeina bawlsak thei a, lei-a om nate’ zuih ding ngeina bawl thei na hi hiam? “Vana om meiite in guah hong zuksakna ding nangmah in sawl na hi hiam? ‘Khua phia in,’ ci-in thu pia lecin, ‘Nong sawl bangin phia ning,’ hong ci ding ahi hiam? Nail gun a khan ding a thei gun vapite kua in hilh a, guahzuk ding a thei akluite, kua in hilh ahi hiam? Va-akte a gilkialin leng kawikawi-in, a note in an duhin kei tungah hong nget ciangun, tua va-akte an a piapa kua ahi hiam? “Sathakte a suah hun ding thei ngei na hi hiam? Sakhite a suah laitakin nau va dom ngei na hi hiam? Tuate a ni ciamtehin, a suah hun ding uh thei na hi hiam? A no suak dingin lei-ah a bawhsuk hun laitak thei na hi hiam? A note gamlakah khangin, a nute kiang pan paikhia-in ciahkik nawn lo uh hi. “Kua in gam-late tungah suahtakna pia ahi hiam? Kua in khahin a ut utin vaksak ahi hiam? Amau’ om nadingin gamlak ka pia a, bangmah a po zawh lohna zanglei-ah ka tengsak hi. Gamlumna mun khuapite tawh a kigamla-ah om uh a, kuamah in zualsak zo lo a, na semsak zo lo uh hi. Mualte tungah an zongin vak kawikawi uh a, nektheih ding singkung lopa a hing peuhpeuh zuan kawikawi uh hi. “Gambawngtal in nangma na hong sem ding ahi hiam? Na ganbukah gambawngtal hong giak nuam ding ahi hiam? Nangmah in khauhual tawh khihzo ding a, na lo-ah na lokhawhna leeng kaisakzo ding na hi hiam? Nasem dingin a hat mahmah hangin, nangma na hong sepsak dingin lamen ngam na hi hiam? Lo a na anpiangte hong kaihkhop sakin, na ancilna-ah an hong khawm dingin um na hi hiam? “Vasa-kalaohte in a kha uh bangzah takin nawh zap thei ahi hiam! Ahi zongin gun vapi bangin vasa-kalaoh leng thei lo hi. Vasa-kalaoh in leilakah a tui nusia a, a tuite a luumsak dingin leilak a ap hi. Mi khatpeuh in a khe tawh a tuite a sikkhap khak ding, gamsa khatpeuh in a sikkhap khak ding, phawk khollo hi. A tuite ama a’ bangin ngaihsun khollo a, ka gimnate a mawkna suakkha ding hi, ci-in lunghimawh lo hi. Amah a hai-in a bawlpa ama tungah pilna a guan lopa keimah ka hi hi. Ahi zongin a tai ciangin sakol sangin hatzaw hi. “Job aw, sakolte a hatsak pa nang na hi hiam? Sakol zaangmul a posak pa nang na hi hiam? Sakolte kauphe bangin diangsak thei-in, mite’ kihtak dingin phitsak thei na hi hiam? Amaute in lawpna tawh a khe-un lei khuat uh a, a thaneih khempeuh uh tawh gal sungah a diang uh hi. Amaute in launa mel bangmah thei lo uh a, namsau kihta-in nungkik cih zong om lo hi. Amaute’ tungah a tuang mite’ galhiam, lum le teite a tee zalzal hi. Lawp mahmahna tawh sakolte in mainawt uh a, peengkul a kitum ciangin omkhong thei lo uh hi. Peengkul a kitum ciangin ham hathat uh a, gal mai a tun ma-un gal gimnam za uh a, galkapmangte’ thupiakna awging a za uh hi. “Simbung in a kha zalin leitaw lamah a leentheihna ding nangma kiang panin hong sin ahi hiam? Muvanlai in sang leenin mualtungah bu a tomna ding nang’ thupiakna hong ngak ahi hiam? Suangpi dawnah bu bawl a, suangheeng kawmte phualpi-in nei hi. Tua lai mun panin khuadak kawikawi a, manin a nek ding an a gal et hi. Gan sihna kimkotah musanete kikhawm uh a, a note in sasi a dawn uh hi,” a ci hi. Tua ciangin Topa in Job kiangah, “Job aw, nangmah in Vanglian Pasian nong dem hi. Tu-in khawl ding na hiam, ahih kei leh keima thugen nong dawng ding hiam?” a ci hi. Tua ciangin Job in dawng a, “ Topa aw, ka haipau kha hi. Hong bangci dawn theih ding ka hi hiam? Tu a kipanin ka pau nawn kei ding hi. Ka gen dinga kilawm zahval genkha ka hih manin, tu a kipanin ka pau nawn het kei ding hi,” a ci hi. Tua ciangin huihpi sung panin Topa in Job tungah thu genkik a, “Kipasalsakin dingto inla, ka thudotnate hong dawng in. Kei a thutang loin hong seh a, nang thutang kisa-in kei hong mawhsak na hi hiam? Kei zahin nang hat na hi hiam? Kei’ awging zahin nang a’ gingzo ding ahi hiam? Na ngap nakleh na minthanna ding le na kihihsak theih nadingin tu-in hong kipan inla, minthanna le minliatna ngah ta in. A kiphasak mite en inla, na hehna tawh amaute niamkhiat gawp in. Mi kiphasakte en inla, amaute niamkhiat gawp in. Migilote khempeuh a omna mun munah tuancil in. Amaute khempeuh lei sungah phumcip inla, misite’ gam sungah amaute khihcip in. Tua bangin na hihzawh nakleh nang a hong phat masa pen pa, nang a gualzo pa na hihna thu a hong phawk masa pen pa ka hi ding hi. “Tui-sakol ganhing golpi ngaihsun dih in. Amah le nang a piangsak pa keimah ka hi hi. Amah in bawngtal bangin lopa bek mah ne a, ahi zongin ama pum sungah bangzah hatna om a, bangzahta-in a sazang khauh ahi hiam? Ama mei, taamtak sing bangin khauhin tal po veva a, a khe-a a sazangte hat pha mahmah hi. Ama guhte sumngo bangin khauh a, ama khete sikzawl bangin a khauh hi. “Ganhing khempeuh lak pan a lamdang pen hi a, amah a Piangsak pa bek mah in amah a zozo ahi hi. Gamsate omna mualtung panin ama an ding lopa kipuak hi. Amah lingkung nuai-ah lum a, nawng sunga pumpeeng lakah a bu hi. Lingkungte le lui gei-a gialhek kungte in ama a’ ding niliim piangsak hi. Amah in gun tuikhangte kihta het lo a, tuikhang in ama maitang a nawkgawp hangin nuamtakin omthei veve hi. Kua in ama mit tawsakin manzo ding ahi hiam? Kua in a nakpheh-ah khau vawhzo ding ahi hiam? “Ngasa siahna sikkawi tawh Awle manzo ding a, khauhual khat tawh a leii henzo ding na hi hiam? A nakpheh-ah khau vawhzo ding a, a khaguh-ah sikkawi bulhzo ding na hiam? Amah in na khahna ding hong thum ding a, na hehpihna ding hong ngen ding ahi hiam? Na sila ahi tawntung dingin nangma tungah thu hong ciam ding ahi hiam? Na nasem numeite na mawlpih bangin mawlpihzo ding a, vasa khawi bangin bawlzo ding na hi hiam? Ngasa bengte in lei dingin hong deek ding a, sa zuakte in zuak dingin a sa sem ding ahi hiam? Ngasa khawhna teipi tawh a vun khawhletzo ding a, teipi lingnei tawh a lutang khawhletzo ding na hi hiam? Khatvei sukhakhin lecin na hihkik nawn kei ding a, tua na sukkhakna thu na mangngilh nawn kei ding hi. “Awle a mu mi peuhmah lau-in lei-ah a puk uh hi. Awle a heh ciangin kihtakhuai mahmah a, ama omna mai-ah kuamah om ngam lo hi. Leitung a om mihingte lakah Awle a suk manin a sihlawh lo kua om ahi hiam? “Awle khete, a guh a taang, a thahatna ziate gen loin ka om thei kei hi. Kua in ama puan tungnung hawkkhiatsak zo a, a sik puanpi sunletzo ahi hiam? A kihtakhuai a hate a kam sungah om ahih manin, kua in ama kam phensak ngam ahi hiam? A nungzang sukah a lipte lum bangin kithuapsuk cinten a, suang bangin sakin kimatcip bikbek ciat hi. Tua lipte khatlekhat kithuapcip bikbek ahih manin, khatlekhat kikalah huih nangawn thawl zo lo hi. Tuate kinak mat lua ahih manin, bangmah in phelkhia zo lo hi. Amah a hetchiai ciangin mei-ek bangin taang zaizai a, a mittangte nisuak bangin a taang hi. A kam panin mei kuangkhia a, mei-ek leengkhia zaizai hi. A nak panin meikhu suak a, selkeu khu tawh kibang hi. Ama husanna in mei tawhkuang a, ama kam panin meikuang a suakkhia hi. A ngawng zong thakhauh mahmah ahih manin, a gim thei het lo thatang a nei ahi hi. A vun tung khempeuh a nipna mun mahmah om lo a, sik peek bangin a sak kim hi. A lungsim in suangtum bangin kihtak khat zong nei lo a, an gawina suang bangin sakin do lah nei lo hi. Amah hong kithawi ciangin mi thahat pente nangawn lau a, kihta mahmah uh ahih manin cih nading thei loin a om uh hi. Namsau tawh a kisut hangin bunzo vet lo a, teipi le thaltangte in zong bunzo tuan het lo hi. Ama a dingin sikte, buhkung bangin nip a, sumngote nangawn sing muatsa bang lel hi. Amah khua a phawksakzo ding, thaltang om lo a, suang tawh a kiden ciangin anvai them tu bang lel hi. Ama a dingin molhtum pen buhkung bang hi lel a, teipi tawh a kikhawh ciangin a nuihsan lel hi. A khecinte, beelpei kitamte tawh kibang a, lam a pai ciangin leilak kuikek gawp hi. Amah in tuipi tokin beel sunga tuiso bangsakzo a, sathau sa sunga tui tu bangin tuipi phuansak zaizai zo hi. A painasa khempeuhah tuihual om dandan a, tuipi phuansak pheuphau hi. Amah tehpih theih ding leitungah bangmah om lo a, bangmah kihtak a nei het lo ganhing ahi hi. Amah in a kihtakhuai ganhing a kihisak pente nangawn nuai-et lai a, amah pen gamsa khempeuh’ kumpi ahi hi,” a ci hi. Tua ciangin Job in Topa dawng a, “ Topa aw, vangliatna khempeuh na neihna, na hihnop khempeuh na hih theihna thu ka thei hi. Kei bangmah a thei lo kimlai, ‘Bang hangin ka pilna hong dem ngam na hi hiam?’ na hong ci hi. Keimah in ka tel zawh loh thute, kei a dingin a lamdanglua thu a gengen ka hi hi. Thu na gen laitakin ka na ngaihna ding, na thugente kong dawn ding, na hong gen hi. Nidangin mi’ gensawn bekin nang ka hong thei a, tu-in keima mit mahmah tawh nang ka hong mu ta hi. Tua ahih ciangin tu-in ka paunasate khempeuh hangin ka maizum mahmah a, tu-in vutlevai khu-in nakpitakin ka kisik hi,” a ci hi. Topa in hih thute khempeuh Job tungah a gen khit ciangin, Teman khua mi Elifaz kiangah, “Ka nasempa Job bangin, keima thu na gen ding uh a kilawm bangin gen lo na hih manun, nang le na lawm tegel tungah ka heh hi. Tu-in bawngtal sagih le tuutal sagih la-in Job kiangah paipih un la, note a dingin biakpiakna-in nei un. Job in note a dingin thu hong ngetsak ding a, keimah in ama thungetna ka pia ding hi. Note’ haina zahin kong minsiasak kei ding hi. Note in Job’ gen bangin keima thu a manin na gen kei uh hi,” a ci hi. Tua ahih ciangin Topa’ sawl bangin Elifaz, Bildad, le Zofar gamta uh a, Topa in Job’ thungetna a pia hi. Job in a lawm thumte a’ ding thu a ngetsak khit ciangin, Topa in Job citheisakkik a, nidanga a neih ngeizah nihin neihsa lamsa a guan hi. Tua ciangin Job’ sanggam pasalte, a sanggam numeite, le a lawm ngeite a inn-ah hong hawh uh a, a inn-ah pawi bawlin lungdamin a omkhawm uh hi. Topa in ama tungah a tunsak gimnate hangin a khasiatpihnate uh genin a hanthawn uh hi. Amaute in sum le kham zungbuh khat ciat tawh va pha uh hi. Tua tham loin Topa in Job’ nuntakna a masa lam sangin a nunung lamah thupha limpiak zaw hi. Job in tuu tul sawm le tulli, kalaoh tulguk, bawngtal kap tulkhat, le la a pi tulkhat a nei hi. Amah in tapa sagih le tanu thum neikik a, a tanu upa pen Jemimah phuak a, a nihna Keziah phuak a, a tum pen Kerenhappuk a phuak hi. Job’ tanute zahin a melhoih leitungah numei dang khat zong om lo a, a pa un a sanggam pasalte uh tawh a kibangin gamh a luahkhawmsak hi. Hih hun khit ciangin Job kum za le kum sawmli sung nungta lai a, a tute ciang bek hi loin a tu-sawnsawn ciang dong zong a mu hi. Tua khit ciangin a khankhinin a teeksih ta hi. Mi nuamsa i cihte pen migilote’ thu a zui lo mi, mimawhte’ gamtat bangin a gamta lo mi, mi a thusim lote tawh a kipawl lo mi ahi hi. Ama nopsakna pen Topa thu sung bek mah hi a, sun le zanin ama thu a ngaihsunsun mi ahi hi. Amah pen lui tuiluang gei-a a kisuan ama gah hunin gah a, a teh a vul ngei lo singkung tawh kibang hi. Ama hihna khempeuhah a maa pai mahmah hi. Migilote ahihleh tua bang hi lo uh a, huih in a letkhiat anvai tawh kibang lel uh hi. Tua ahih ciangin migilote in thukhenna thuak zo lo ding uh a, mimawhte pen midikte’ pawl sungah kihel thei lo ding uh hi; bang hang hiam cih leh Topa in midikte lam lakin hu tawntung a, migilote ahihleh sia maimang ding uh hi. Bang thu hangin minam dangte siatna dingah kithukhat sim uh a, mite in a mawkna dingpi-in sawmsim uh ahi hiam? Leitung kumpite le gam ukte in Topa le ama sathau nilh pa langpangin vaihawm uh a, “Amau’ hong henna khaute sutat khia-in, amau’ khaute ei kiang panin paaikhia ni,” ci uh hi. Vantunga a tupa in amaute na nuihsan a, tua Topa in amaute a zahko hi. Tua ciangin hehna tawh amau kiangah thu gen ding a, hehluat mahmahna tawh amaute linglawng sakin, “Ka mual siangtho Zion tungah ka kumpi ka tusak khin hi,” ci hi. Topa’ thukhenna tu-in ka hong gen ding hi: Amah in keima tungah, “Nang pen ka tapa na hi a, tuni-in na Pa ka suak hi. Keima tungah hong ngen in; nangma luah dingin minamte ka bawl ding a, leimong dongin na neihsa ka hisak ding hi. Sik tawn khat tawh amaute na satkham ding a, beelseek pa in beel a denkhap bangin leilakah amaute na dengzan ding hi,” hong ci hi. Tua ahih ciangin kumpite aw, tu-in pil ta un; leitung gam a ukte aw, tu-in thu phawk ta un. Topa aw, ka galte tam mahmah a, mi tampi tak in kei hong langpan’ nainai uh hi. Pasian in amah huh lo ding, mi tampi in hong ci uh hi. Ahih hangin Topa aw, nang pen ka kidalna lum, ka minthanna le ka lu hong phong pa na hi hi. Nakpi takin Topa ka galsap a, amah in a mual siangtho panin kei a hong dawng hi. Lumin ka ihmu a, Topa in hong kem ahih manin ka thokik hi. Keimah a hong galbawl keimah a hong umcih mi tul sawm tampite ka kihta kei hi. Tho in, Topa! Kei hong hon in, ka Pasian! Bang hang hiam cih leh ka galte khempeuh’ paang nangmah in na beenggawp a, migilote’ ha na sutan hi. Gualzawhna pen Topa nangma hang ahi hi. Na mite tungah na thupha hong tung ta hen! A thuman ka Pasian aw, ka hong sap ciangin hong dawng in. Gimna ka thuak ciangin nopsakna nong pia hi. Kei hong hehpih inla, ka thungetna hong za in. Mite aw, ka minphatna in bang tanvei daina thuak ding ahi hiam? Bang tanvei thumawkna deihin zuauthu zong ding na hi uh hiam? Ahih hangin Topa in ama a dingin miphate a tuamkoihlam thei ta un. Ke’n ka sap ciangin Topa in hong za hi. Lau-in ling unla, mawhna peel un. Na lupna tung uhah lungngai phapha unla, om khikhe un. A man biakpiaknate lui unla, Topa muang un. Mi tampi in, “Thupha tampi hong pia in. Ko tungah na maitang vang hong taangsak in, Topa!” ci uh hi. Amaute, an le leengtui a hauh cianga a nuam uh sangin nuamna lianzaw ka lung sungah nong guan hi. Nuamtakin lumin ka ihmu ta ding hi; bang hang hiam cih leh Topa aw, nangmah bek in lungmuanna munah na hong omsak hi. Topa aw, kong paunate hong ngai inla, ka hong thumnate hong thudon in. Ka kumpi le ka Pasian aw, nangma tungah hong thum ka hih manin ka kikona aw hong ngai in. Topa aw, zingsang simin ka aw nong za a, zingsang simin nangma a dingin biakna bawlin kong ngak hi. Bang hang hiam cih leh gitlohna lamsang a deih Pasian na hi kei a, siatna pen tawlkhat zong nang tawh a omkhawm thei ahi kei hi. A kisathei mite nangma mit tawh kituak lo a, siatna a bawlte khempeuh nangmah in na mudah hi. Zuauthu a gen mite nangmah in na susia hi. Topa in mi thahnopna lungsim le mi khemnopna lungsim a neite a mudah hi. Kei ahihleh a kicing itna kip suangin na inn sungah ka tum ding a, nangmah zahtakna tawh kunin a siangtho na biakinn lam nga-in kong bia ding hi. Topa aw, gal tampi nei ka hih manin na thumanna tawh kei hong makaih inla, keima mai-ah na lampi taangsak in. Bang hang hiam cih leh amau sungah thuman om lo hi. Amau lungsimah siatna bek ngaihsun uh a, amau’ gawlgui pen a kihongsa hankhuk tawh kibang hi. A kam uh tawh mawk phat uh hi. Pasian aw, a mawhna uh amau mah thuaksak inla, amau’ thu mah tawh amaute puksak in. Amaute in nangmah hong lehdo uh ahih manin amau’ mawhna tampite hangin amaute paaikhia in. Ahih hangin nang hong belte khempeuh lungdamsak inla, nuamna la sasak tawntung in. Nangma min a deihte nangma hangin gualzo-in a lungdam theih nadingun amaute na hu hi. Topa aw, thuman mi thupha na pia a, lum tawh dal bangin deihsakna tawh na dal hi. Topa aw, na heh laitak hong taii kei inla, lungso sa-in hong thuhilh kei in. Topa aw, thaneem ka hih manin kei tungah dikna hong zang in. Topa aw, ka guh ka taang na mahmah ahih manin hong damsak in. Ka hingim mahmah hi. Topa aw, bang tanvei nang hong zekai lai ding na hi hiam? Topa aw, hong kihei inla, kei hong hon in. Itna kip a nei pa na hih manin keimah hong hon in. Bang hang hiam cih leh misite omna gam sungah nangmah phawk theih nading bangmah om lo ahih manin, Leinuai panin kua in nang hong phat thei ding ahi hiam? Ka tautauna-in ka gim hi. Zan sialin ka khitui in ka lupna tum a, ka kahkahna-in ka lupna kawt dikdek hi. Dahna hangin ka mit mial a, ka galte’ hong bawlna hangin ka mitzung zaw semsem hi. Siatna a bawlte khempeuh aw, ka kiang panin kihemkhia un; bang hang hiam cih leh Topa in ka kahna aw a za hi. Topa in keima thumna hong za khinzo a, Topa in ka thungetna hong sang ta hi. Ka galte khempeuh zahhuai mahmahin genthei ding uh hi. Amaute nungkikin maizumna thuak pah ding uh hi. Topa ka Pasian aw, nangmah ka hong bel hi. Kei hong delhte’ kiang panin hong dal inla hong hon in. Kei hong hon kei lecin a hong hon ding dang kuamah om lo ahih manin amaute in humpinelkai bangin hong kaikhia-in hong balgawp ding uh hi. Topa ka Pasian aw, ka gamtat a siat a, ka khut a khialh leh, bangmah thu om lopi-in ka lawmte khemin, ka galte ka huh taak leh, galte in kei hong delhin hong pha uh hen la, leilakah kei hong tuancilsak inla, leilakah kei hong sialpai ta uh hen. Tho in, Topa, a hehsa-in thasaan inla, ka galte’ hehna panin kei hong dal in. Khanglo in, ka Pasian aw, thukhenna ding hun khat na seh khinzo hi. Nangma omna kiimah mite kikhawmsak inla, amaute’ omna tung a sangna munah tu in. Topa in mite thu a khen hi. Topa aw, ka thumanna le keima sunga om ka dikna tawh kizui-in thu hong khen in. Lungsim le ngaihsutna a en a thuman Pasian aw, migilote’ siatna beisak inla, mi thumante kipsak in. Pasian, kei hong hupa hi a, lungsim man mite a hon hi. Pasian, thu a tangin a khen pa hi a, migilote tungah a heh den pa ahi hi. Mite a kibawlphat kik kei leh, Pasian in a thalkhau sui zo a, a namsau taat ding hi. Amah in mei thaltang bawl a, sih theihna ama galhiamte a baihsa-in a koihzo hi. Migilo in thusia paii a, suak nuamin na a, zuauthu a hingkhia hi. Amah in gum to a, ama tawhsa gum sung mahah amah a kia hi. Ama lunggulh hoih lo pen ama lu tungah tukik a, ama gamtatsia pen ama luzang mahah tukik hi. Ke’n ahihleh, ama dikna om bangin Topa’ tungah lungdamna ka lak ding a, a Sangpen Topa’ min phatna la ka sak ding hi. Topa kote’ Topa aw, leitung khempeuhah na min lian mahmah hi. Nangmah a hong kiphatna awgingte in vantung ban a, naungekte le naupangte’ kam tawh nangmah phatna la kisa hi. Gal na neih manin galte le langpangte na daihsakna dingin panmunkip na bawl khin hi. Na nasepna, na bawlsa, kha le aksite, le na vantungte ka et ciangin, na ngaihsut tham dingin mihing bang hi lel a, na phawk tham dingin mihing’ ta bang hi lel ahi hiam? Ahi zongin, vantungmi sangin a neuzaw deuh bekin na bawl a, minthanna le pahtawina nangmah in na guan hi. Na khut tawh na bawlsate khempeuh tungah ukna thu ama tungah na pia a, na khempeuh na uksak hi. Tuu le bawng khempeuh, gamsa khempeuh zong, huih lak a leng vasate, tui sunga om ngasate, tui, lampi-a a tawn khempeuhte, na khempeuh ama khenuai-ah na koih hi. Topa, kote’ Topa aw, leitung khempeuhah na min lian mahmah hi. Ka lungsim khempeuh tawh Topa tungah lungdamna kong ko ding a, na bawl a lamdangte khempeuh ka gen ding hi. Nangma hangin nuamin ka diang ding a, na min phatna ka sa ding hi, Sangpenpa aw. Ka galte a nungkik ciangin, nangma mai-ah amaute pukin kisia uh hi. Bang hang hiam cih leh keima thutanna na hong kipsak a, tokhom tungah tu-in thu a manin na khen hi. Minamte na taii a, migilote na susia hi. A maimang dingin amau’ min na phiat hi. Siat denna sungah galte beimang hi. A khuate uh na zunglot a, amaute kiphawkkha nawn lo hi. Topa ahihleh kumpi za-ah tu ngitnget a, thukhen nadingin a tokhom a bawl hi. Leitung mite’ thu a mantakin khen a, a kilawm bangin mite’ thu a khen hi. Topa pen, netniamna a thuakte a’ dingin munkip hi a, haksat hun ciangin munmuanhuai ahi hi. Topa aw, nang a hong zongte nusia lo na hih manin, na min a theite in nang hong muang uh hi. Zion-ah a om Topa phatna la sa un! Ama nasepnate mite’ lakah gen un! Bang hang hiam cih leh mi thahna a hua pa in amaute phawk a, a thuak mite’ awging amah in mangngilh lo hi. Ka tungah hong dik in, Topa! Sihna pan hong honkhia pa aw, kei hong mudahte’ hangin keima gim thuaknate hong en inla, nangmah a hong kiphatnate phawk kikkik inla, na hong hotkhiatna hangin Jerusalem khua sungah ka nuamna ka gengen ding hi. Amau’ bawlsa gum sung mahah minamte kiasuk uh a, a ngenthang siahna uhah amau’ khe mah a awk hi. Topa in thu hong khenin migilote amau’ nasepna mahah awksakna tawh amah hong kilang hi. Pasian a mangngilh minam khempeuh sung panin migilote, Leinuai-ah pai ding uh hi. Bang hang hiam cih leh mi cimawhte kimangngilh den lo ding a, mizawngte’ lametna bei paisuak lo ding hi. Tho in, Topa! Mi kizosak ke’n; na mai-ah minamte sam inla, amaute’ tungah thu khen in! Amaute lausak in, Topa! Mi ahih lelna uh minamte theisak in! Topa aw, bang hangin gamla din na hi hiam? Haksat hunin bang hangin nang bucip khong na hi hiam? Migilote in kiphatsakna tawh mizawngte uuk delh uh hi. Amau ngaihsut vaihawmna mahah amaute awksak in. Bang hang hiam cih leh migilo in a lungsim deihna kisaktheihpih a, ngahna dingah a huaiham pa in Topa phuisamin a taisan hi. Migilo in kiphatsakna lungsim nei a, Topa zong lo hi. Ama ngaihsutna khempeuhah, “Pasian om kei,” a ci hi. A hihna khempeuhah a maa pai ngitnget hi. Na thukhennate khempeuh ama muhna in a batzawh lohin sang mahmah a, a galte khempeuh ahihleh amah in nehpiksan lel hi. A lungsim sungah, “Kiling ngei kei ning; khang tawntungin kamsiatna tuak kei ning,” ci-in a ngaihsun hi. Ama kampaute pen hamsia, khemna, le netniamna tawh kidim a, siatna le man lohna bekbek thugenin a nei tawntung hi. Khuaneute sungah mi a buksimin tu a, munbu kawmah mawhnei lote a that hi. Ama mit in mi tuahsiate ensim a, humpinelkai in a kuahawm sung pan a buk bangin amah in buksimin, mizawngte a man dingin buk a, a ngenthang sungah mizawngte kai-in a man hi. A thatanghat thu tawh mi tuahsia mi sucipin a puksuk sak hi. Ama lungsim sungah, “Hih thute pen Pasian in mangngilh hi; a mai seel hi, en lo ding hi,” ci-in a ngaihsun hi. Tho in, Topa! Pasian aw, na tha hong san inla, a thuakte mangngilh kei in. Bang hangin migilo in Pasian simmawh a, a lungsim sungah, “Hong thei kei na’n teh,” ci ahi hiam? Nangmah in na mu hi. Na huh theih nadingin haksatna le gimna a thuakte na ciamteh hi. A tuahsia mi in nangma tungah ama pumpi hong ap a, pa nei lote a huhpa na hi hi. Giloin siatna a bawlte’ khut kuaitan gawp inla, siatna a bawlzo nawn lo dingin gim pia in. Topa, a tawntungin kumpi hi a, ama leitang panin minam dangte beimang ding hi. Topa aw, lungnemte’ deihna na ngai ding hi. A lungsim uh na hatsak ding a, na bil na ngat ding hi. Pa nei lote le netniamna a thuakte tungah nang na thutang a, leitung mite in launa tuakkha nawn lo ding uh hi. Ke’n Topa ka bel hi. Bang hangin ka tungah, “Vasa leeng bangin mualtungah tai in; bang hang hiam cih leh, en in, migilote in khuamial sung panin lungsim thutangte a kap dingin a thalkhau uhah thaltang bulhin a thal uh a keek uh hi. Bulpite kisusia khin leh midikte in bangcih thei nawn ding hiam?” nong ci thei diam? Topa a biakinn siangtho sungah om a, Topa’ tokhom vantungah om hi. Amah in mihingte hong en a, mihingte’ gamtatna khempeuh a theitel hi. Topa in midikte le migilote entel a, a ngongtat nuam mite a lungsim in mudah hi. Amah in migilote tungah mei-am le kaat zusak ding a, amau’ ngah ding gimna huihsa mahmah hi ding hi. Bang hang hiam cih leh Topa dik mahmah a, dik gamtatna a deih hi. Thutang mi in ama mai a mu ding hi. Topa aw, hong huh in; bang hang hiam cih leh mihingte lak panin mi thumante maimang ta a, mipha khat zong om nawn lo hi. Mi kim in a vengte kiangah zuauthu gen ciat a, phat khemna kam zol le lungsim nam nih tawh thu a gen uh hi. Topa in, “Mizawngte a neihsa kihawkkhia a, mi cimawhte thumin tau uh ahih ciangin tu-in dingin, amau’ lunggulh, lungmuanna munah amaute ka koih ding hi,” a ci hi. Topa’ thuciamnate, a siangtho thuciamna hi a, meikhuk sungah sagihvei a kisiangsak ngun tawh kibang hi. Topa aw, kote hong dal inla, tukhang mite kiang panin kote hong kem in. Bang hang hiam cih leh mihingte lakah siatna kipahtawi a, mun khempeuhah migilote kidimin vak kawikawi uh hi. Topa aw, bang tanvei hi lai ding ahi hiam? Kei hong mangngilh paisuak ding na hi hiam? Bang tanvei kei kiang pan na maitang seel ding na hi hiam? Bang tanvei gimna thuakin, sunthapai-in ka lungsim dah ding ahi hiam? Bang tanvei kei tungah ka galte gualzo ding ahi hiam? Topa ka Pasian aw, ngaihsun inla hong dawng in. Ihmulum kha ding ka hih manin ka mitte hong vaksak in. Ka galte in, “Ama tungah gualzo khin ung,” ci kha ding hi. Kei ka lin’ manin ka galte nuam kha ding hi. Ahih hangin na itna kip ka muang a, nong hotkhiatna hangin ka lungdam ding hi. Nong hehpihna kicing ahih manin, Topa, la kong sak ding hi. Mihaite in a lungsim sung uhah, “Pasian om lo hi,” ci-in ngaihsun uh hi. Amaute sia uh a, kihhuai gamtat uh a, a hoihin a gamta kuamah om lo hi. A pil gamtat, Pasian a zong a om uh hiam, cih a theih nadingin Topa in vantung panin mihingte hong ensuk hi. Amaute khempeuh a vekpi-un pukkhin uh hi. A kibangin sia kim uh a, a hoihin a gamta khat zong om lo hi. Topa’ tungah thu a ngen lo, annek bangin ka mite a netum, siatna a bawlte in thutheihna nei lo ahi hiam? Launa lianpi sungah amaute om ding uh hi; bang hang hiam cih leh Pasian in midikte ompih hi. Mizawngte’ geelna susia nuam uh a, ahih hangin Topa pen mizawngte’ belh ahi hi. Israel-te a’ ding hotkhiatna Zion panin hong tunna ding thu ka ngenngen hi. Topa in ama mite tungah nopsakna a piakkik ciangin, ama mi Israel-te kipak mahmah ding uh hi. Topa aw, na biakinn sungah kua om ding ahi hiam? Na mual siangtho tungah kua teng ding ahi hiam? Paubaang loin gamta-in, a manin na sem a, lungsim tak a gen mi, mi gensia loin, a lawmte tungah siatna bawl lo a, a vengte a mawhsak lo mi, migilote thusim lo a, ahi zongin Topa a zahtakte a pahtawi mi, ama natna ding nangawnah a ciampel lo mi, ama sum a meetin a kha lo, thutang mite a langpan lo, golhguk a la lo mite teng ding uh hi. Hih bangin a gamtate pen ling ngei lo ding hi. Pasian aw, nang hong bel ka hih manin keimah hong kem in. Topa tungah, “Nang, ka Topa na hi hi; nang tawh loin hoihna ka nei kei hi,” ka ci hi. Leitungah a om mi siangthote ahih le, amaute nampi hi a, amaute sungah ka lungkimna teng om hi. Pasian dang a teelte in amau’ dahna khangsak hi. Amau’ si theh biaknate ke’n bawlpih loin, amau’ pasian-te ka biakpih kei ding hi. Topa pen keima luah dinga ka teelsa, keima muanpi na hi a, keima ngah ding khempeuh na khut sungah om hi. Kei-a’ pen mun nuam mahmah sung hong tu ahih manin gamhluah hoih nei ka hi hi. Ngaihsutna a hong lak Topa ka phat a, zanin zong ka lungsimah hong suak hi. Topa ka maingat tawntung a, ka taklamah amah om ahih manin ka kiling kei ding hi. Tua ahih ciangin lungdamin ka kipak a, lungmuangin ka om hi. Bang hang hiam cih leh Leinuai nong zuansak kei a, na mihoih pa Leihawmpi na musak kei hi. Nangmah in nuntakna lampi keimah nong lak hi. Nangma omna munah lungdamna lianpi om a, nangma taklamah nop tawntungnate a om hi. Topa aw, thuman ka hong ngetna hong za inla, ka otna hong ngai in! Lungsim takpi tawh ka hong thungetna hong ngai in! Thuman mu na hih manin ka dikna hong kilangsak in. Keima lungsim hong sin inla, zan hun sungin ka kiangah hong hawh inla, keimah hong ze-et lecin, ka sungah gitlohna na mu kei ding hi. Ka kampau-in zong bangmah ka khial kei hi. Gamtatna thu-ah ci leng, nangma thupiaknate ka zui a, mi ngongtatte’ gamtat ziate ka pelh hi. Nangma lampi zui-in ka pai a, na lam ka pial ngei kei hi. Pasian aw, hong dawng ding na hih manin nang kong sam hi. Na bil hong ngat inla, ka thu hong za in. Amau’ galte’ kiang panin nang hong belte a honpa aw, na itna kip lamdang takin hong lak in. Amaute in hehpihna lungsim bangmah nei lo uh a, a kam uh tawh amaute kiphatsak pau uh hi. Amaute in kei hong sulzuih uh a, tu-in kei hong umcihin, keimah leilak den nadingin a hong en uh hi. Amaute pen a balnen nuam humpinelkai tawh kibang uh a, humpinelkai khanglai sabuk tawh kibang uh hi. Kei ka hih leh, thumanna tawh na maitang ka en ding a, ka khanlawh ciangin nangma mel muhna tawh ka lungkim ding hi. Ka thahatna ahi Topa aw, nangmah ka hong it hi. Topa pen keima suangpi, ka munkip muanhuai, kei a hong honkhia pa, ka Pasian, ka suangpi, ka belh pa, ka lum, ka kihotkhiatna ki, ka munkip ahi hi. A phattaak Topa ka sam a, ka galte kiang panin kei hong honkhia hi. Sihna khaute in hong gakcip a, sihna tuihualte in kei hong nawk hi. Leinuai sihna khaute in kei hong kancip a, sihna thangte in kei hong dawntuah hi. Ka gimna-ah Topa ka sam a, ka Pasian’ tungah huhna ngenin ka kiko hi. Amah in a biakinnpi panin ka aw hong za a, amah ka kohna aw in ama bilte va banto hi. Ama hehna hangin leitung kipumpei-in kivei a, mual bulpite zong kisingin ling damdam hi. Ama nakvangte panin meikhu pusuak hi. Ama kam panin mei husia pusuak a, ama tung panin mei-am san kuangkhia hi. Amah in vanpi niamsakin hong kumsuk a, ama khenuai-ah meiivom sahpi a om hi. Kherub khat tungah amah tuangin hong leeng a, huih khate tungah manlang takin hong leeng hi. A kimkotah a ki-um nadingin khuamial bawl a, a tung kikhuh nadingin meii sahpi le tui tawh a zingsak hi. Ama mai-a khuaphia sung panin gialpi le mei-amte in ama meii sahpite a phulet hi. Topa zong vantungah awng a, Sangpenpa in gialpi le mei-am ahi ama aw hong gingsak hi. Amah in a thaltangte lawn a, a galte kithehthangsak hi. Khuaphialep phiasak a, a galte a susia hi. Topa aw, nangma mawhsakna na awging hangin tuipi taw kidawk a, lei bulpite a guakin om hi. Amah in a sangna panin a khut tawh zamin kei hong la a, tui thukpi panin keimah hong kaikhia hi. Ka gal hat pa kiang pan le hong mudahte kiang panin kei hong honkhia hi; bang hang hiam cih leh kei a dingin amaute hatlua uh hi. Amaute in ka kamsiat hunin kei hong nehthawh uh hangin Topa in kei hong huh hi. Amah in mun tanzau khatah kei hong paikhiatpih a, ka tungah lungkim ahih manin a hong honkhia hi. Topa in ka thumanna tawh kizui-in noptuamna hong pia a, ka sianthona tawh kizui-in hong dinkik hi. Bang hang hiam cih leh Topa’ lampite ka tawn khin a, ka Pasian’ kiang panin gitlohna tawh ka paikhia kei hi. Bang hang hiam cih leh ama biakna ngeina thukip omte khempeuh limtakin ka zui a, ama thukhamte ka paaikhia kei hi. Ama mai-ah kawkbaang hetloin ka om a, kisuanna dingte panin kei ka kikem hi. Tua ahih manin Topa in ka thumanna le ama muhna-ah ka sianthona tawh kizui-in kei hong dinkik khin hi. Thuman mi tungah nang na thuman a, kawkbaang lo mi tungah nang na diktat hi. A siangtho mi tungah na siangtho gamtat a, thukawi mite na galbawl hi. Bang hang hiam cih leh mi niamte na honkhia a, ahih hangin mi kiphasakte na niamsak hi. Nangmah in keima mei nong vaksak a, Topa ka Pasian in ka khuamial na vaksak hi. Nangma hangin galkap honkhat ka sugawpzo a, ka Pasian hangin khuakulh khat ka kanzo hi. Hih Pasian - a thu kicing a, Topa’ kamciamna a manna kilang hi. Amah a belte khempeuh a dingin kidalna lum ahi hi. Topa longal, Pasian kua hiam? Pasian longal, suangpi kua hiam? Keima tungah thahatna a hong guan Pasian, ka lampi lungmuan nadingin a bawl pa ahi hi. Amah in sangaipi khe bangin keima khe hong bawlsak a, mual sang dawnah ka khe hong kipsak hi. Galsim siam nadingin ka khutte hong hilh a, keima khut in sumngo thal nangawn a keekzo hi. Na hotkhiatna lum kei hong pia khinin, na taklam khut in kei hong phong a, nangma hong huhna in keimah hong liansak hi. Ka kalsuanna ding mun tanzau nong pia a, ka khe taal lo hi. Ka galte delhin ka pha a, a vekpi-un a kisiat khit matengun ka ciahkik kei hi. Amaute khempeuh a thawhkik zawh loh nadingun ka sunletgawp a, ka khenuai-ah a puk uh hi. Bang hang hiam cih leh galdo nadingin keimah tha nong guan a, keimah a hong dote ka nuai-ah na nengniam hi. Ka galte na nungkiksak a, kei hong mudahte ka susia hi. Huhna ding ngenin amaute kikoko uh a, ahih hangin a hon ding kuamah om lo hi. Amaute in Topa’ tungah ko uh a, ahih hangin amah in dawng lo hi. Huihpi mai-ah leivui bangin amaute ka satvui a, kongzing buante bangin amaute ka lawnkhia hi. A lehdo mite kiang panin nangmah in kei na hong honkhia a, minamte’ lutangin kei na hong bawl a, ka theih ngei loh mite in keima na hong sem uh hi. Ka thu a zak phetun amaute in hong mang pah uh a, gamdang mite in kei hong mai-et uh hi. Gamdang mite lungkia uh a, a phualkip panun a lingsa-in hong paikhia uh hi. Topa hing hi. Keima suangpi in thupha ngah hen la, ka kihotkhiatna Pasian, hong thuhkik sakin keima nuai-ah mite a hong zawhsak Pasian, ka galte kiang panin keimah a hong honkhia pa minthangin vanglian tahen. Ka langte tungah keimah nong liansak a, mi ngongtatte kiang panin na hong honkhia hi. Topa aw, hih thu hangin minam dangte lakah nang ka hong phat ding a, nangma min phatna la ka sa ding hi. Zawhna lianpi ama kumpipa tungah pia a, a sathau nilh pa David le a suan a khakte tungah a tawntungin itna kip a lak hi. Vantung in Pasian’ minthanna gen a, vanpi in ama nasepna taangko hi. Nisimin thu gengen a, zan simin theihtelna pulaklak hi. Pauna le kammal om lo a, amau’ aw kiza lo hi. Ahih hangin a aw uh leitung khempeuhah kizel a, a kammal uh leimong dongah a tung hi. Amau’ sungah ni a’ ding omna khat bawl khin a, a innsung pan a hong pusuak zi pi tangval tawh ahi zongin, lungtaii takin tai ding a kipan mi thahat khat tawh ahi zongin a kibang hi. Ama suahna van mong pan hi a, mong khat dongin pai a, ama satna panin a kiliah thei bangmah om lo hi. Topa’ thu kicing a, nuntakna a thaksuaksak hi. Topa’ teci panna hi takpi a, mi pillote pilsak hi. Topa’ thuhilhte man a, lungsim nuamsak hi. Topa’ thupiakna siang a, mitte vaksak hi. Topa a kizahtakna siang a, kip tawntung hi. Topa’ ngeina kipte thuman a, a vekin kituakin man kim hi. Kham sangin ahi zongin kham hoihpen sang ahi zongin tuate deihhuaizaw a, khuaizu le khuailuzu taakte sangin zong khumzaw lai hi. Tua tham loin tuate’ hangin a nasem pa in thuphawkna ngah a, tuate zuihna-ah noptuamna lian a om hi. Ahih hangin kua in ama khialhnate mukhia theitawm ahi hiam? Theih loh manin khialhna panin kei hong siangsak hi. Mawh kaltangnate panin zong na nasempa hong kem inla, tuate keima tungah hong uksak kei in! Tua ciangin kei ka kawkbaang kei ding a, mawhna liante panin ka siang ding hi. Topa, ka belh suangpi le keimah hong tankhia pa aw, ka kammal le ka lungsim ngaihsutnate nangma muhna-ah a sanhuai suaksak ta in! Gimna na thuak ciangin Topa in nang hong en hen la, Jakob’ Pasian in nangmah hong dal ta hen! Siangtho mun panin huhna nang hong puak hen la, Zion panin nang hong panpih ta hen! Na biakpiaknate khempeuh amah in hong phawk hen la, na meihal biakpiakna hong sang ta hen! Na lungsim’ deihna amah in hong pia hen la, na geelna khempeuh hong tangtungsak ta hen! Na gualzawhna-ah eite lungdamin awngin, i Pasian’ min tawh i lante khai ni! Topa in a sathau nilh pa a huh ding tu-in ka thei ta a, ama vantung siangtho panin amah dawng ding a, a vangliatna tawh amah gualzosak ding hi. Mi pawlkhat in leengte kihihsakpih a, mi pawlkhat in sakolte kihihsakpih hi. Ahih hangin eite in Topa i Pasian’ min bek i kihihsakpih hi. Amaute kinawmsawmin pukgawp ding uh a, ahih hangin eite tho-in i dingtang ding hi. Topa aw, kumpipa tungah gualzawhna pia inla, kong sap ciangun hong dawng in. Topa aw, na hatna hangin kumpipa lungdam a, na huhna hangin amah nak nuam mahmah hi. Ama lungsim deihna teng nangmah in na pia khin a, ama hong ngette na khaktan kei hi. Bang hang hiam cih leh thupha hoihte tawh amah na dawntuah a, ama lu tungah kham siang lukhu na khusak hi. Nangma tung panin amah in nuntakna hong ngen a, ama tungah nuntak sau na pia hi. Nangma huhna hangin ama minthanna lian a, hoihna le minliatna ama tungah na pia hi. Nangmah in a tawntungin thupha ngah pen dingin amah na bawl a, nangma ompihna hangin lungdamna tawh amah na kipaaksak hi. Bang hang hiam cih leh kumpipa in Topa muang a, Sangpenpa’ itna kip hangin amah a kiling kei ding hi. Na khut in na galte khempeuh sugawp ding a, na khut taklam in nang hong mudahte sugawp ding hi. Na kilat ciangin meiphual kuang bangin amaute na hih ding hi. Topa in hehna tawh amaute nawmvalh ding a, meikuang in amaute kangtum ding hi. Leitung panin a suan a khakte, mi’ tate’ lak panin amau’ tate na susia ding hi. Nangma langah siatna ding vaihawmin, gitlohna a bawl uh hangin tangtung lo ding uh hi. Bang hang hiam cih leh amaute na taisak ding a, na thal tawh a maitang uh na ngim ding hi. Topa aw, na hatna hangin nang hong kipahtawi ta hen! Nangma vangliatna la sa-in ka hong phat ding uh hi. Ka Pasian, ka Pasian aw, bang hangin kei hong nusia na hi hiam? Nong huhna ding ka hong thumna panin bang hangin gamla om na hi hiam? Ka Pasian aw, sunin kong kiko a, ahi zongin nong dawng kei hi. Zanin zong ka kiko a, ahi zongin lungsim nopna ka mu thei tuan kei hi. Ahih hangin nang na siangtho a, Israel-te’ pahtawi-in na tu hi. Ka pate un nangmah hong muang uh hi. Amaute in hong muang uh a, nangmah in amaute na honkhia hi. Nangma tungah amaute in hong ko uh a, amaute kihon hi. Nangmah hong muang uh a, guaksuak lo uh hi. Ahih hangin kei pen lungno khat bang lel ka hi a, mi ka bang kei hi. Mite’ ko gawpgawp, mite’ simmawh ka hi hi. Hong mu mi khempeuh in kei hong zahko-in, hong mukpiksan uh a, a lu uh hong peisan hi. “ Topa’ tungah amah in ama thu ap hi. Amah kihonkhia sak un; amah deih ahih manin honkhia ta hen!” hong cihsan uh hi. Ahih hangin nang pen gil sung panin kei a hong suaksakpa na hi a, ka nu’ ang sungah a muanhuai-in keimah na hong kem hi. Ka suah tung a kipan nangma tungah kong tung a, ka nu in hong paii lai a kipan keima Pasian na hi hi. Haksatna nai ahih manin kei tawh kigamla om kei in; kei a hong huh ding kuamah dang om lo hi. Bawngtal tampi tak in kei hong umcih uh a, Bashan gam bawngtal hatte in kei hong umcih uh hi. Humpinelkai hawk, a sabawh nuam bangin amaute in kei hong kamkat beba uh hi. Tui buakkhiat bangin kei hong kibuakhia a, ka guh ka taang khempeuh kilawi mangkhin hi. Ka lungtang khuainun bang a, ka awm sungah tuisuak hi. Ka thahatna, leibeel phel bangin keu a, ka leii zong toncip ta hi. Nangmah in leivui sungah kei na hong koih hi. Ka kiimah uite om a, siatna bawl mi honkhat in kei hong umcih uh hi. Ka khut ka khete hong sunletzo uh hi. Ka guh khempeuh kimu thei hi. Amaute in hong sal gega uh hi. Amaute in ka puante hawm uh a, ka puan a hawm nadingun lai ai a san uh hi. Ahih hangin Topa aw, gamla om kei in. Keimah a hong huhpa aw, a huh dingin hong manlang in. Namsau panin keimah hong hon inla, uite’ kiang panin ka nuntakna hong hon in. Humpinelkai kam panin keimah hong hon inla, gamsialte’ ki panin a cimawh keimah hong hon in. Ka u ka naute tungah nangma min ka gen ding a, mihon kikhopna laizangah nangmah kong phat ding hi. Topa a zahtak mi khempeuh aw, amah phat un. Jakob’ suan mi khempeuh aw, amah minthangsak un. Israel mi khempeuh aw, amah lamdang sa un. Bang hang hiam cih leh amah in a thuak mi’ gimna simmawh bawl lo a, zong kihbawl lo hi. Ama kiang pan a mai seello a, ama tungah a koh ciangin, amah in a za hi. Mihonpite lakah nang ka hong phatna ding na piangsak a, nang a hong zahtakte’ mai-ah ka thuciamna kong pia ding hi. Gimna a thuakte in kham takin ne ding uh a, amah a zongte in Topa phat ding uh hi. A lungsim uh nuam tawntung ta hen! Leitung mi khempeuh in phawkin Topa’ lamah kihei ding uh a, minam khempeuh in ama mai-ah bia ding uh hi. Bang hang hiam cih leh ukna pen Topa a’ hi a, minamte tungah amah in a uk hi. Hi hi, a kiphasak mi khempeuh ama mai-ah kunsuk ding uh a, a sithei mihing khempeuh ama mai-ah kun ding uh hi. A hong khangkik mite in ama na sem ding uh hi. Mite in a hong piang lai ding mite tungah Topa’ thu gen ding uh a, a suak nai lo mite tungah ama sepsa, hotkhiatna thu gen ding uh hi. Topa pen tuucin bangin hong cing hi a, kisapna teng kicing ta hi. Lo nona-ah hong lumsak a, tuidam kiangah hong paipih hi. Thahatna thak kei hong guan hi. A hong ciamsa mah bangin-ah lampi manah kei hong kha hi. Topa aw, kei hong ompih na hih manin khuamial thukpi ka nawk hangin ka lau kei hi. Na molhtum le na ciangkhut in kei hong hu hi. Keima galte’ muhna munah an nong lui hi. Thupi takin nong pahtawi a, keima hai zong dimlet ta hi. Na hoihna le nong itna in ka khantawnin a hong zuih ding tel takin-ah ka thei ta a, a tawntungin na inn sungah ka om ding hi. Leitung le a tunga omte, leitung le a tunga tengte Topa -a’ ahi hi. Bang hang hiam cih leh amah in tuipite sungah a bul phut a, tui tungah a kipsak hi. Topa’ mual tungah kuate kahto ding ahi hiam? Ama mun siangtho-ah kuate ding ding ahi hiam? Gamtat siangtho le lungsim siangtho a nei, a man lo thu-ah a nuntakna pia loin, khemna tawh a kiciam lo mite ahi hi. Tua bang mite in Topa’ tung panin thupha ngah ding uh a, amaute a honkhia Pasian’ kiang panin diksakna ngah ding uh hi. Tua bang mite pen, amah a zong, Jakob’ Pasian’ mai a zong minam ahi hi. Minthang Kumpipa hong tumtheih nadingin, kulh kongpite lian hon unla, tanglai kongkhakte gol hon un. Minthang Kumpipa kua ahi hiam? Hatin a vanglian Topa, galhat Topa ahi hi. Minthang Kumpipa hong tumtheih nadingin, kulh kongpite lian hon unla, tanglai kongkhakte gol hon un. Hih a minthang Kumpipa kua ahi hiam? Vanglian Topa, minthang Kumpipa ahi hi. Topa aw, nangma tungah thu ka hong ngen hi. Ka Pasian aw, nangmah ka hong muang hi. Hong zahhuaisak kei in. Keima tungah ka galte gualzo-in lungdamsak kei in. Nangmah a hong ngakte kuamah zahhuaisak kei in. Thukhual loin a zuau theite zahhuaisak in. Topa aw, na zia na tong a thei-in hong bawl inla, na lampite hong hilh in. Na thuman sungah kei hong paipih inla, lam hong hilh in. Bang hang hiam cih leh kei a hong hon Pasian na hi a, nang kong muang tawntung hi. Topa aw, tanglai pek a kipan a omsa ahih manin, na hehpihna le na itna kip hong phawkkik in. Topa aw, ka khangno lai-a ka mawhna le ka khialhnate ciamteh kei inla, na hoihna na ngaihsutna le na itna kip tawh kizui-in kei hong phawk in! Topa hoihin thutang hi. Tua ahih manin mimawhte lam a hilh hi. Amah in lungsim kiniamkhiatte a manah paipihin a zia a tong a hilh hi. Ama thuciamna le a thupiak a zuite a dingin Topa’ lampi pen itna kip le cihtakna ahi hi. Topa aw, ka mawhna lian ahih manin, nangma min phat nadingin keima mawhna hong maisak in. Topa a zahtak mi kua ahi hiam? Ama lampi zuih ding Pasian’ hilhna a ngah mi ahi hi. Amah nuamsa tawntung ding a, a tate in leitang nei ding uh hi. Topa tawh kilawmtatna pen amah a zahtakte a’ ding hi a, a thuciamna amau tungah kitheithangsak hi. Topa’ lam ka en tawntung hi; bang hang hiam cih leh amah in ngenthang panin ka khete hong sutkhia ding hi. Kei lamah nang hong kihei-in, kei hong hehpih in; bang hang hiam cih leh kei guakbek hi-in gimna ka thuak hi. Ka lungsim natnate khempeuh hong damsak inla, ka gimnate khempeuh panin hong paikhiatpih in. Ka gimna le ka thuaknate hong ngaihsun inla, ka mawhna khempeuh hong maisak in. Ka galte bangzah takin a tamna le kei hong muhdah luatnate hong ngaihsun in. Kei hong cing inla, hong honkhia in. Nangmah hong bel ka hih manin kei hong maizumsak kei in. Nang hong muang ka hih manin, kicinna le thutanna in kei hong kem tahen. Pasian aw, amau’ haksatna khempeuh panin na mi Israel-te honkhia ta in. Topa aw, a hoihin gamta-in Topa hong muang ka hih manin, ka thutanna hong lak in. Topa aw, hong ze-et inla hong sin in. Ka lungsim le ka ngaihsutna hong entel in. Bang hang hiam cih leh na itna kip in lam hong lak a, nangma tungah citakin ka gamta hi. Mikhialte tawh tukhawm loin, thusim neite tawh ka kipawl kei hi. Siatna a bawl mite ka mudah a, migilote tawh ka tukhawm kei hi. Topa aw, mawh baan lohna ka lahna-in ka khutte ka sil a, biakna pia-in na biakna tau kiim ah ka pai hi. Lungdam kohna la a gingin sa-in, nangma nasep a lamdangte ka gen kawm hi. Topa aw, nangma inn-a ten ding le na minthang a omna munah om ding ka ut hi. Ahih hangin kei ahihleh, ka hoih gamtat hi. Hong hehpih inla, kei hong honkhia in. Leizang munah ka ding hi. Mihon tampi lakah Topa ka phat ding hi. Topa, ka khuavak le hong honpa ahi hi. Kua kihta ding ka hi hiam? Topa, kei a dingin munmuanhuai ahi hi. Bang laupih ding ka hi hiam? Hong langpangte le ka galte ahi, siatna bawlte in hong do a, kei nektum hong sawm ciangun, amaute kisukha-in puk ding uh hi. Mi honkhat in keimah hong langpangin phual a sat uh hangin, ka lungsim lau lo ding hi. Keimah hong langpangin gal hong kuan hangin tua nangawnah ka lungmuang ding hi. Topa’ tung panin na khat ka ngen khin a, tua ngenin ka zon ding pen: Topa’ inn sungah ka khan tawntungin om ding, Topa’ hoihna et ding le ama biakinn sungah thu dot dingte ahi hi. Bang hang hiam cih leh haksat hun ciangin amah in a buk sungah kei hong seel ding hi. A puanbuk khuhna nuai-ah kei hong seel ding a, a sangna suang tungah kei hong koih ding hi. Tu-in ka kimkotah a om ka galte tungah ka gualzo ding hi. Lungdamin kikona tawh ama buk sungah biakna ka pia ding a, la ka sa ding hi. Topa tungah la ngaih ka sa ding hi. Topa aw, ka otna aw hong za inla, kei hong hehpihin hong dawng in! “Ka mai hong zong in,” na hong ci khinzo hi. Keimah in nangma tungah, “ Topa aw, nangma mai kong zong hi,” ka hong ci hi. Kei kiang panin na maitang seel kei in. Hehpihna tawh na nasempa hong hawlkhia kei in; kei hong nei pa na hi hi. Hong paaikhia kei inla, hong nusia kei in, kei hong honkhia Pasian aw. Bang hang hiam cih leh ka nu le ka pa in hong nusiat hangin Topa in kei hong kem ding hi. Topa aw, na lampi hong hilh inla, ka galte’ hangin lam phei-ah kei hong kha in. Ka langte’ deihna bangin kei hong nusia kei in; bang hang hiam cih leh teci man lote ka langah pang khin a, amaute in zuau genin kei hong tawng niloh uh hi. A hingte’ gam sungah Topa’ hoihna a mu dingin kei ka ki-um hi. Topa muang in. Thakhauh inla, na lungsim hangsakin, Topa muang in. Topa aw, awngin nang kong sam hi. Ka belh suangpi aw, keima thu-ah hong bilngong kei in. Tua bangin kei tungah hong dai dide lecin, Leihawm sunga a paisukte tawh a kibang ka suak ding hi. Siangtho pen mun lamah ka khutte hong laamto a, nangma kiangah huhna kong nget mah bangin kong thumna aw hong za in. Amau’ lungsim sungah siatna a om hinapi a vengte tawh kilemna thu a gen khem, siatna bawlte, migilote tawh kei hong lakhiakhawm kei in. Amau’ sepna le a gamtat siatnate uh bangin amaute thukkik in. Amau’ sepna tawh a kizui-in amaute tungah thuk inla, amau’ ngah ding a kilawm thaman pia in. Amaute in Topa’ nasepnate thupi ngaihsut lo ahih manun, amah in amaute susia-in a donkik nawnkei ding hi. Ka thumna aw hong za ahih manin Topa in thupha ngah tahen. Topa, ka hatna le ka lum hi a, amah ka muang hi. Tua ahih manin kei hong kihuh a, lungdamin ka diang a, ka lasakna tawh ama tungah lungdamna ka ko hi. Topa, ama mite’ hatna hi a, amah pen a sathau nilh pa’ bukna le a honkhia pa ahi hi. Na mite hon inla, na luahte thupha pia in. Amau a cing pa hi inla, a tawntungin amaute huh in. Topa -a’ ci un, van mite aw; minthanna le hatna Topa -a’ ci un. Ama minthanna Topa’ tungah pia unla, a siangtho kizepna tawh Topa bia un. Topa’ awging tuipite tungah kiza hi. A minthang Pasian’ aw ging damdam a, tui tampite tungah Topa’ aw kiza hi. Topa’ awging vanglian a, Topa’ awging, liatna tawh kidim hi. Topa’ awging in taamtak singte kitansak a, Topa’ awging in Lebanon mual taamtak singte a kuaitan hi. Lebanon mual le Sirion mualte bawngno le gamsialno bangin amah in a diangsak hi. Topa’ awging in meikuang taangkhia sak hi. Topa’ awging in gamlak lok a, Topa in Kadesh gamlak lok hi. Topa’ awging in singkungte heekgawp a, gammang tulak hawkkhia-in a kolhsak hi. Ama biakinn sungah a vekpi-un awngin, “Pasian’ min thang ta hen,” a ci uh hi. Topa in tui thukpite uk a, a tawntung kumpi hihna tawh Topa a tu hi. Topa in ama mite tungah thahatna pia tahen. Topa in ama mite tungah nopsakna thupha pia tahen. Topa aw, nangmah hong phatin ka diang ding hi. Bang hang hiam cih leh kei nong laamto khin a, ka tungah ka galte na lungdamsak kei hi. Topa ka Pasian aw, huhna a hong ngenin nang tungah kong awng a, kei na hong damsak khin hi. Topa aw, Leinuai panin kei nong paikhiatpihto khin a, Leihawm sungah a pai khinsate lak panin kei nong nungta kiksak hi. Ama mi siangthote aw, Topa tungah phatna la sa-in ama tungah lungdamna ko un. Ama hehna tomno sung bek hi a, ama hong deihsakna pen khang tawntung ading ahi hi. Zan hun sungteng kahna omkha mah ding a, ahih hangin zing khuavak tawh nuamna hong tung hi. Keimah in ahihleh, ka daupai laitakin, “Ka kiling ngei kei ding hi,” ka ci kha hi. Topa aw, nong deihsakna tawh mual kip bangin kei nong phut khin hi. Ahi zongin tu-in na maitang na seel a, kei ka khasia hi. Topa aw, nangma tungah kong kiko a, Topa tungah kong thum hi: “Leihawm sungah paisukin ka sihna-ah bang meetna om ahi hiam? Leivui in nang hong phat ding ahi hiam? Na thumanna gen ding ahi hiam? Topa aw, hong za inla, kei hong hehpih in. Topa aw, keimah huhpa hong hi in,” ka ci hi. Topa aw, nang kong bel hi. Hong maizumsak ngei kei inla, na thumanna tawh kei hong honkhia in! Na bil hong ngat inla, hong hon pak in! Ka belh ding suangpi hong hi inla, kei hong dal ding munkip muanhuai hong hi in! Nang pen ka suangpi le ka munkip muanhuai na hi hi. Nangma min ngaihsutna tawh kei hong kha-in lam hong lak inla, keima belh pa na hih manin hong kisiahna ngenthang panin kei hong lakhia in. Nangma khut sungah keimah kong ki-ap hi. Topa, a thuman Pasian aw, keimah na hong hon ding hi. Mawkna milim a thupi ngaihsutte na mudah hi; ahih hangin keimah in Topa ka hong muang hi. Na itna kip hangin lungdamin ka kipak ding hi. Bang hang hiam cih leh ka thuakna mu khinin, ka kamsiatna-ah na hong don khin hi. Galte’ khut sungah kei na hong pia kei a, mun tanzau-ah ka khe na dingsak hi. Topa aw, genthei ka hih manin kei hong hehpih in. Dahna hangin ka mit thuk a, ka lungsim le ka pumpi zong gim mahmah ta hi. Bang hang hiam cih leh ka nuntakna dahna vive hi a, ka hunte khuisatna vive ahi hi. Ka gentheihna hangin ka tha kiamgawp ta a, ka guhte zong ngaam ta hi. Ka vengte khempeuh’ nuihsat ka suak a, ka vengte tungah a cikzethuai ka hi a, ka meltheih khempeuhte’ gimneih mi ka suak hi. Konglakah hong mute in kei hong peelin hong taisan uh hi. Misi bangin kei hong kiphawk nawn lo a, beel kitam khat tawh ka kibang lel ta hi. Ka galte’ kihuauna ka za a, ka kiim ka pamah launa om hi. Kei hong langpangin amaute in vai hawmkhawm a, thah dingin kei hong sawm uh hi. Ahih hangin nang kong muang hi, Topa aw. Keima Pasian na hi hi. Keima nuntakna nangma khut sungah om hi. Keima galte le kei a hong bawlsiate’ khutsung panin kei hong honkhia in! Na nasempa tungah na mai hong taangsak inla, na itna kip tawh kei hong hon in! Topa aw, nangma tung panin huhna hong ngen ka hih manin kei hong maizumsak kei in. Migilote maizumsak inla, amaute a pau ding thei loin Leinuai-ah paisak in. Thumante’ langah pang a, kihihsak pau-in, kiphatsakna le simmawhna tawh pau-in zuauthu a gen mite a pau thei loin omsak in. Nang hong zahtakte a dingin na koihsa na hoihte, nang hong beelte a dingin mite’ muhna-ah na bawl, nangma hoihna kicing a, mi khempeuh in thei uh hi. Mite’ sawmsimna panin na omna huam sungah amaute na seel a, kitotna mun panin na buk sungah a muanhuai-in amaute na kem hi. Gal in khuapi a umcih bangin kei hong ki-umcih hun lai-in a itna kip a lamdangin kei tungah hong lak ahih manin Topa in thupha ngah tahen. Lauthawngna tawh, “Nangma muhna panin a gamlapi-ah kei hong notkhia hi,” ka ci khin hi. Ahih hangin nang tungah huhna ka hong nget ciangin keima hong thumnate nangmah in na hong za hi. Ama mi siangtho khempeuh aw, Topa phat un! Pasian in thuman mite kem a, ahih hangin a kiphatsak gamtatte nakpitakin a thuk hi. Topa a ngak mi khempeuh aw, na tha uh khauhsak unla, na lungsim uh hangsak ta un! Ama khialhna kimaisak a, ama mawhna a kiselcipsak mi, thupha ngah ahi hi. Topa in mawhna a khuksak loh mi, a lungsim sungah khemna a om lo mi, thupha ngah ahi hi. Ka mawhna ka pulak loh ciangin, sunthapai ka tautauna hangin ka pumpi a thaneem hi. Sun le zan tawntung gim nong piakna ka thuak a, khuakhal nisa’ kat bangin ka thahatna a keucip hi. Keima khialhnate nangma tungah kong pulak a, ka mawhna ka im kei hi. “Ka khialhnate khempeuh Topa’ tungah ka pulak ding hi,” ka ci hi. Tua ciangin ka mawhna nin nong maisak hi. Tua ahih ciangin nang hong kimuh theih lai-in mihoih khempeuh, nang tungah thu kingensak in. Tua hileh tuikhang in amaute ban lo ding hi. Nang pen kei a dingin ka bukna mun na hi a, haksatna pan kei hong kemin hotkhiatna kicing nong pia hi. Na pai nading lampi lakin ka hong hilh ding a, ka mit tawh hong enin thu kong hilh ding hi. A kamkaih tawh uk lohin a phamawh, thutheihna a nei lo, sakol le la bang kei in. Migilote in gimna tampi thuak uh a, Topa a muangte ahihleh itna kip in a hu hi. Thumante aw, Topa tungah lungdamin kipak un. Lungsim man mi khempeuh aw, lungdamin awng un! No thuman mite aw, Topa tungah lungdam un! Pahtawina pen thutangte tawh kilawm kituak hi. Laia khausai lasakna tawh Topa phat unla, harp zang sawm khausai lasakna tawh ama tungah la ngaih sa un. Ama tungah la thak sa unla, a gingpha mahmahin hoihtakin khausai tum un. Bang hang hiam cih leh Topa thutang a, ama hihna khempeuh thuman tawh a sem hi. Amah in thuman le thutang deih a, leitungah Topa’ itna kip a kidim hi. Topa’ kampauna tawh vantung piang a, a kam pana husanna tawh vantung nate a piang hi. Amah in tuipi tuite thawl khat sunga thun bangin mun khatah gawm a, tuithukpite tuibeem-ah a koih hi. Leitung khempeuh in Topa zahtak uh hen la, leitung a tengte khempeuh, amah lamdangsakna tawh ding ta uh hen! Bang hang hiam cih leh amah pau a, leitung hong piang hi; amah in thu pia a, na khempeuh hong om hi. Topa in minamte’ thungaihsutna a mawkna suahin, mite’ geelna a khaktan hi. Topa’ thungaihsutna kip ngitnget a, ama lungsim ngaihsutna khang tawntungin a kip hi. Topa, Pasian-a a nei minam, ama luah dingin teelna a ngah minamte thupha ngah ahi hi. Topa in vantung panin hong ensuk a, mihing khempeuh a mu hi. A tutna mun panin amah hong dakkhia-in, leitung mite a en hi. Amau’ lungsim a bawlpa in amaute’ gamtatnate en gige hi. Kumpi khat a galkap tampite in suaktasak zo lo a, galkap hang pa ama hatna tawh kihonkhia zo lo hi. Sakol galkapte pen gualzawh nadingin a mawkna lametna hi a, amau’ hatna tawh hon zo lo hi. Topa i ngak hi; amah pen eite hong huhpa le i lum ahi hi. Ama min siangtho eite in muang ihih manin ama sungah i lungdam hi. Topa aw, nang kong lamet uh mah bangin kote’ tungah na itna kip hong omsak in. Topa ka phat tawntung ding a, amah phatna ka gengen ding hi. Topa ka phat ding hi. Gimna thuakte zasak unla, lungdam uh hen. Kei tawh Topa nak phat un, ama min pahtawi khawm ni! Keimah in Topa ka zong a, amah in kei hong dawngin, ka launa khempeuh panin kei hong honkhia hi. Amah en unla, maitai un; tua hileh na mai uh zum ngei lo ding hi. Hih mi hehpihhuai pa kiko-in, Topa in amah za a, ama haksatna khempeuh panin amah a honkhia hi. Amah a zahtakte’ kiimah Topa’ vantungmi in giahphual sat a, amaute a honkhia hi. Topa tawh kikhawl phot unla, ama hoihna thei un! Amah a beel mite mi lungdam ahi uh hi. Ama mi siangthote aw, Topa zahtak un; bang hang hiam cih leh amah a zahtak mite in kitangsapna nei lo hi. Humpinelkai khanglaite in kisapna le gilkialna thuak a, ahih hangin Topa a zongte in na hoih a kisap uh om lo hi. Tate aw, hong pai unla hong ngai un; Topa zahtakna thu ka hong hilh ding hi. Nopna a neih theih nadingin nuntakna le khansau a deih kua ahi hiam? Siatna ding panin na leii kem inla, zuau genna panin na muk kem in. Siatna panin kihemkhia inla, a hoih bawl in. Kilemna ding hanciam inla, na phak mateng delh in. Topa’ mit in thuman mite’ lam en a, amau’ kikona lamah a bil a ngat hi. Siatna a bawl mite hih leitung panin a kiphawkna a kisuktat nadingin Topa in amaute a langpang hi. Huhna a ngen dingin thumante a kiko ciangin Topa in za a, a haksatna khempeuh panun amaute a honkhia hi. Lungsim kitamzante kiangah Topa hong om a, lungsim zangawpte a hon hi. Thuman mi’ thuakna a tam mahmah hangin tuate khempeuh panin Topa in amah a hon hi. Amah in thuman mipa kem a, a guh khat zong kitan lo hi. Siatna in migilote that ding a, thuman a mudah mite gim kipia ding hi. Topa in ama nasemte honkhia a, amah a bel mi khat beek gim kipia lo ding hi. Topa aw, kei hong langpangte langpang inla, kei hong dote do in. Lum lian le lum neu la inla, keimah hong huh in! Teipi le teitangzang dok inla, kei hong delhte’ lam ngat in! Keima tungah, “Nang a hong honpa ka hi,” hong ci in. Kei hong sawmte mai zumin mindaisak ta in! Keima siatna ding a bawlte nungkik sakin sisak in! Topa’ vantungmi’ hawlna tawh huih letkhiat ansite tawh amaute kibangsak in. Topa’ vantungmi’ delhna-ah a taina lampi uh mialin nalsak in. Bang hang hiam cih leh amaute in thu om lopi-in a ngenthang uh tawh kei hong siah uh a, thu om lopi-in gum to-in kei hong siah uh hi. A phawk loh kalun amaute’ tungah siatna tungsak in! Amau’ ngenthang mahah amaute mah awksak inla, a kisiamang khin dingin amaute puksak in. Tua ciangin Topa tungah ka lungdam mahmah ding a, ama hotkhiatna-ah nuamin ka diang ding hi. Ka lungsim khempeuh tawh, “ Topa aw, ama a dingin a hatluate kiang panin a thahat lo mi a honkhia, a bawlsiate’ kiang panin mizawngte a honkhia, nang tawh a kibang kua om ahi hiam?” ka ci ding hi. Mi a el tecite hong kipan uh a, ka theih loh thute kei hong dong uh hi. Amaute in ka hoihnate siatna tawh hong thuk uh a, ka khawngai mahmah hi. Ahih hangin kei ahihleh, amaute a cinat uh ciangin, puanhampi silhin an tangin kei ka kigimtawm sak hi. Ka lawm, ka sanggampa hangin a dah bangin ka dah hi. A nu’ hanga a kap mi bangin kapin ka vak kawikawi a, kunin ka kidikdik hi. Ahih hangin kei ka tukna-ah amaute nuamin kikhawm uh a, kei simmawh dingin kikaikhawm uh hi. Ka theih ngei hetloh khebaite nangawn in tawlnga hetloin kei hong gensia niloh uh hi. Zahtakna mel nei hetloin kei hong zahko niloh uh a, a ha uh hong gawisan uh hi. Topa aw, bang tanvei hong enkhong ding na hi hiam? Amau’ hong sukgawpna panin keimah hong honkhia inla, humpinelkaite kiang panin kei hong hon in. Tua ciangin mihon kikhopna lian sungah nangma tungah lungdamna ka hong ko ding a, mihonpite lak panin nang ka hong phat ding hi. A man lopi a ka gal a hite kei tungah lungdamsak kei inla, thu om lopi a kei hong mudahte, mitheek kipiasak kei in. Bang hang hiam cih leh amaute in kilemna thu gen lo uh a, daitakin a om mite langpangin, khemna thu ngaihsun uh hi. Amaute in kei hong kamkat beba uh a, amaute in, “Ha, Ha! Mu khin hang ei!” ci uh hi. Topa aw, na mu khin hi; dai ommawk ke’n! Topa aw, kei kiang panin gamla om ke’n! Ka Topa, ka Pasian aw, ka thu hong thei inla, kei a dingin nangmah hong kisosuah tawm in! Ka Topa, ka Pasian aw, na thumanna tawh a kituakin keima thutanna hong langsak inla, keima gimna-ah amaute lungdamsak ke’n! Amau le amau tungah, “Ha, i tuptup tung ei!” kicisak kei in. “Amah nawmvalhtum khin hang,” amaute cisak kei in. Kei’ kamsiatna-ah a lungdamte maizumsak inla, zahhuaigawp sak in! Kei tungah a hong kiliansakte maizumna le mindaina thuaksak in! Kei thutang ka hihna lahkhiat ding a deihte lungdamin awngin, kipaaksak inla, “A nasempa’ hoihna-ah a lungkim Topa lian hi,” cici sak in. Tua ciangin na thumanna le nangmah phatna sunthapai-in ka gengen ding hi. Mawhna in migilo pa’ lungsim tawngah thu gen a, amah in Pasian zahtakna nei het lo hi. Bang hang hiam cih leh ama mawhna kidawkkhia lo a, muhdahna thuak lo ahih manin amah kimawkphat tawm hi. Ama kammalte pen siatna le khemna vive hi a, pil gamtatna le hoih gamtatna bei khinta hi. A lupna tungah lumin siat gamtat ding a ngaihsun hi. Hoih lohna lamah amah kibulhtawm a, amah in siatna nolh lo hi. Topa aw, na itna kip in vantung ban a, na cihtakna in vanpi dong banto hi. Na thumanna pen Pasian’ mualte tawh kibang a, na thukhennate pen tuipi thuk tawh kibang hi. Mihing le ganhing na hon hi, Topa aw. Pasian aw, na itna kip manpha mahmah hi. Mihing tate na kha liimah bu uh hi. Na inn sunga na tampite tawh amaute nuamsa uh a, na hoihna gun panin amaute na dawnsak hi. Bang hang hiam cih leh nuntakna tuinak nangmah tawh om a, na khuavak sungah kote in khuavak ka mu uh hi. Nang hong theite tungah na itna kip hong zom inla, lungsim thutangte tungah na hotkhiatna hong zom in! A kihisak mite kei hong sukhasak kei inla, migilote, hong hawlkhiasak kei in. Hua lai-ah siatna bawlte a cimawhin kun uh a, amaute kisuncip sukin, thozo nawn lo uh hi. Migilote’ hangin kilungsosak kei inla, a man loin a gamta mite en’ dingin ngaihsun kei in. Bang hang hiam cih leh lopa bangin amaute vulpak ding uh a, lokung hingte bangin keutum ding uh hi. Topa muang inla, gamtat hoih in. Gam nuamah teng inla, thumanin om in. Topa sungah lungkim in; amah in na deihna hong pia ding hi. Topa tungah na vai teng ap in. Amah muang in; amah in hong sem ding hi. Amah in nangma dikna khuavak bangin, nangma thumanna nitaang bangin hong langsak ding hi. Topa’ mai-ah khawl dide inla, lungduai takin ngak in. A hihna a daupai pa tung le siatna a bawlpa tungah kilungso tawmsak ke’n! Hehna panin kikham inla, sinsona nusia in. Nangmah kilungso tawmsak ke’n; tua in siatna bekah a hong paipih hi. Bang hang hiam cih leh migilote kipuaseh ding a, ahih hangin Topa a ngakte in leitung luah ding uh hi. Ahih hangin tawlkhat sungin migilo pa om nawn lo ding a, ama omna mun na lim zon mahmah hangin tua lai-ah amah na om lo ding hi. Ahih hangin lungnemte in leitung luahin, genzawh lohin amaute nuamsa ding uh hi. Migilo in thuman pa sawm a, a ha a gawisan hi. Ahih hangin Topa in migilo pa’ hun a tungta ahihlam mu ahih manin amah a nuihsan lel hi. Mizawngte le mi cimawhte a suniam ding, a thutangte a that dingin migilote in namsau dokin, a thal uh a keek hi. A namsau uh amau’ lungtang mahah tumin, a thalte uh kitan ding hi. Migilote’ hauhna sangin thuman mite in tawmno khat bek a neihna hoihzaw lai hi. Bang hang hiam cih leh migilote’ thahatna kipaih khiatsak ding a, ahih hangin Topa in mihoihte a huh hi. Topa in a paubaang lote kem a, amau’ gamh kipden ding hi. Siatna hun ciangin amaute kimaizumsak lo a, kial hun ciangin tampi nei uh hi. Ahih hangin migilote kisia hi. Topa’ galte pen lono etlawm tawh kibang a, amaute mangthang pak uh hi. Meikhu bangin mangthang uh hi. Migilo in leitawi la a, lohkikzo nawn lo hi. Thuman mi ahihleh cingh-in mi a pia hi. Bang hang hiam cih leh Topa’ thupha piakte in leitung luah ding uh a, ahih hangin a samsiatte kipuaseh ding hi. Topa in mi a lam pai nading lak a, ama lungkim bangin a gamta pa amah in a kipsak hi. Amah a puk hangin lutuk lo ding hi. Bang hang hiam cih leh Topa in ama khut len hi. Thuman mi a kinusiacip, a suanlekhakte ngen tawmin a kivak, ka neu lai a kipanin tu-a ka teek hun ciang dong ka mu ngei nai kei hi. Amah in mi citpiak ngitngetin, mi tungah leitawi piakhia a, a suanlekhakte zong thupha ngah mi a suak hi. Siatna panin kikem inla, gamtat hoih in; tua hileh na khantawnin, na kip paisuak ding hi. Bang hang hiam cih leh Topa in thutang deih a, ama mi siangthote nusia lo ding hi. Thuman mite kikemcing den ding a, ahi zongin migilo’ suanlekhakte kipuaseh ding hi. Thuman mi in leitung luah ding a, tua leitang tungah teng paisuak ding hi. Thuman mi’ kam in pilna gen a, a leii in thutang gen hi. A lungsim sungah ama Pasian’ thukham om a, a gamtatna khempeuhah lampial het lo hi. Migilo in thuman mi encik a, thah dingin a zong hi. Topa in migilo pa’ khut sungah amah nusia lo ding a, thusit dingin a kipaipih ciangin mawhna thuaksak lo ding hi. Topa ngak inla, ama lampi zui in. Leitang a luah dingin nang hong liansak ding a, migilote’ siatna nangmah in na en ding hi. Lebanon taamtak sing bangin a sang pha mahmah migilo kiphasak khat keimah in ka mu hi. Ama kiangah ka paikik a, amah na om nawn lo hi. Amah ka zonzon hangin kimuzo nawn lo hi. Paubaang lo mi ciamteh inla, thutang mi en in; bang hang hiam cih leh gal a phuang lo mi a dingin nopna a om hi. Ahih hangin thupalsatte kisusiamang khin ding a, migilote’ suanlekhakte kipuaseh ding hi. Topa in thuman mite honkhia a, amah pen haksat hun ciangin amaute’ bukna ahi hi. Amaute in Topa beel ahih manin amah in amaute huhin honkhia a, migilote’ kiang panin amaute honin suaktasak hi. Topa aw, a hehsa-in kei hong taii kei inla, lungsosa in kei hong thuhilh kei in. Bang hang hiam cih leh nangma thaltangte ka sungah hong tum khin a, ka tungah na khuttum hong tu khinta hi. Nangma hehna hangin kei ka ci na a, ka mawhna hangin ka pumtangin ka na hi. Bang hang hiam cih leh ka mawhnate in ka lu dong hong tuumzo a, keima puak dingin a giklua vangik tawh kibang hi. Ka haina hangin ka liamnate nai-in uih a, keimah hong kikunsak a, hong kibokcipsak hi. Sunthapai-in kapin ka vak kawikawi hi. Bang hang hiam cih leh ka ci sa mahmah a, nakpitakin ka ci na hi. Kei hong kinengcip gawpin ka thahatna beimang khin a, ka lungsim gimna hangin thumin ka tautau hi. Topa aw, ka deihna khempeuh na thei a, ka khuisatnate na za hi. Ka lungtang kisat a, ka tha in lel hi. Ka mit in zong khua mu thei nawn lo hi. Ka gim thuakna-ah ka lawmte le ka kithuahpihte kidang koih uh a, keima behte nangawn kei kiang pan gamla om uh hi. Kei a hong that nuamte in a thang uh zak a, kei’ natna ding a zongte in siatna ding thu bek gen uh a, sunthapai-in khemna bekbek ngaihsutin nei uh hi. Ahih hangin kei pen bilngong ka bang a, khua ka za kei hi. A kam a ka thei lo, a pau thei lo mi ka bang hi. Bil khua za lo, tawnna kam a za thei lo mi khat tawh kei ka kibang takpi hi. Ahih hangin Topa aw, nangmah ka hong muang hi. Topa ka Pasian aw, a hong dawng ding pa nangmah na hi hi. Bang hang hiam cih leh, “Ka khe a taal ciangin kei tunga hong kihisakte, keima gim thuakna-ah lungdam sak kei in,” cih bek ka hong thum hi. Bang hang hiam cih leh puk dingin ka kithawi a, ka gimna kam tuan lo hi. Ka thuman lohna ka pulak a, ka mawhna hangin ka dah hi. A thuman lopi-in ka gal a hite thahat a, kei a hong mudah khialte tam mahmah uh hi. A hoih gamta ka hih manin ka hoihna pen siatna tawh a hong thukte ka langpangte ahi hi. Topa aw, kei hong nusia kei in. Ka Pasian aw, ka kiang pan gamla om ke’n! Topa, kei hong honpa aw, keimah a hong huh dingin hong manlang in. “Ka leii tawh ka khialhloh nadingin ka gamtatna ka kikem ding a, ka omna-ah migilote a omlaiteng ka kam ka kham ding hi,” ka ci hi. Pau loin ka dai om a, ka dai omna a mawkna suak a, ka thuakna khang semsem hi. Ka sungah ka lung so a, ka lungngaih ciangin ka lung so semsem hi. Tua ciangin ka paukhia a, “ Topa aw, ka mong le ka hun a kisehzah hong theisak inla, ka nuntakna a beipak hun ding hong theisak in!” ka ci hi. Ka nuntakna hun khutme tan bang bekin na bawl a, ka nuntakna hun nangma muhna-ah bangmah gentham lo hi. Mihing khempeuh, husan’ bang bek hi takpi hi. Niliim bangin mihing pai kawikawi takpi hi. A mawkna-in amau lungkham takpi uh a, kua’ ngah ding cih thei lopi-in mite in na a khol uh hi. Tu-in Topa aw, ke’n, bang ngaklai ding ka hi hiam? Keima lametna nangma sung bekah om hi. Ka thupalsatna khempeuh panin kei hong honkhia inla, mite’ nuihsatin kei hong bawl kei in. Hih bangin a hong bawl nangmah na hih manin pau loin ka om a, ka kam ka ka kei hi. Nong vuakna ma ka tung panin lakhia in. Na hong vuakna hangin ka tha beita hi. Mi khat a mawhna hangin tai-in na sat ciangin, nget in a nektum bangin ama na manpha na beisak hi. Mihing khempeuh husan’ khat bang bek hi takpi hi. Topa aw, ka thungetna hong ngai inla, ka kikona hong za in. Ka khitui luanna hong thudon in. Bang hang hiam cih leh ka pu ka pate khempeuh bangin kei zong na zin, na peemta ka hi hi. Ka manthan hun matengin ka lungnop theih nadingin kei hong en in! Topa lamenin ka ngak ngiungeu a, amah kei lam hong nga-in ka kikona aw hong za hi. Dahna dum sung, buannawng panin kei hong kaikhia-in suangpi tungah ka khete nga a, ka khesikna mun a muanhuaisak hi. Eima Pasian phatna la thak keimah hong hilh hi. Mi tampite in hih thu mu-in amah zahtak ding uh a, amaute khempeuh in Topa muang ding uh hi. Topa a muang a, mi kiphasakte lamah a kihei lo, pasian man lote lamah a pialkhia lo mi thupha ngah ahi hi. Topa ka Pasian aw, na sep a lamdangte le ko a dingin na ngaihsutnate tampi tak na phasak a, kuamah dang tawh tehtheih na hi kei hi. Tuate pulakin gen ding hi leng, genkhit zawh ding hi lo hi. Gan gawh biakna le khawhsa tawh biakna na deih kei a, khua ka zak theih nading bil na hong guan hi. Meihal biakna le mawhmaina ding biakna zong na kulsak kei hi. Tua ciangin keimah in, “En in, laibu sungah keima thu a kigelh khinsa bangin ka hong pai hi. Nangma deih bang hihna-ah nuam ka sa hi, ka Pasian aw. Nangma thukham ka lung sungah om hi,” ka ci hi. Hotkhiatna hangin lungdam thu mihonpi lakah ka gen ding hi. Topa aw, lungdam thugen ka khawl ngei kei ding hi. Nangma hotkhiatna thu ka im kei a, na thumanna le na hotkhiatna ka gen khin hi. Na itna kip le na thumanna mihonpi tungah ka im kei hi. Topa aw, na hehpihna kei kiang panin humcip kei inla, na itna kip le na thumanna kei a hong kem tawntung ding hisak ta in. Bang hang hiam cih leh a malin simzawh loh ding siatna tampite in kei hong umcih a, khua a hong musak thei lo zah dong dingin ka mawhna thaman ka thuak khinta hi. Amaute ka sam mal sangin tamzaw uh a, ka lung in a lel ta hi. Topa aw, keimah hong honkhia nuam in. Topa aw, hong huh meng in. Kei a hong that nuamte zahhuaisak inla, maisiasak in. Keima siatna ding a deihte nungkiksak inla minsiasak in. Keima tungah, “Ha ha!” hong ci vialte zahhuaina tawh maikhingsak in. Ahih hangin nang a hong zongte khempeuh nangma hangin nuamin kipak hen la, na hotkhiat ding a deihte in, “ Topa lian hi!” ci ngitnget ta uh hen. Kei ahihleh zawngin ka cimawh a, ahih hangin Topa in kei hong mangngilh lo hi. Nang pen kei hong huhpa le hong honkhia pa na hi hi. Zekai kei in, ka Pasian aw. Mi genthei a khualte thupha ngah ahi hi. Topa in haksatna hunah amaute honkhia ding hi. Topa in amaute hu-in hingsak ding a, leitungah amaute thupha ngah mi kici ding hi. Amau’ galte’ khut sungah amaute pia lo ding hi. A ci uh a nat ciangin Topa in amaute kem ding a, a cinatna khempeuh uh damsakkik ding hi. Ke’n ahihleh, “ Topa aw, kei hong hehpih inla, kei hong damsak in; bang hang hiam cih leh nang tungah kong khialzo hi,” ka ci hi. Ka galte in elna tawh keima thu gen uh a, “Cik ciangin amah a si tam, cik ciangin a min a mang tam,” ci uh hi. Keimah a en dingin mi hong pai ciangin, kam mawkna a pau uh hi. A lungsim uhah siatna kaikhawm uh a, a paikhiat uh ciangin a genthang uh hi. Kei hong mudah khempeuh in keima thu kihuauhuau uh a, kei a dingin a sia thei pen ding a geelgeel uh hi. Amaute in, “Amah nak gim mahmah hi. A lupna panin thokikzo nawn lo ding hi,” ci uh hi. Ka muan, ka lawm it pa, keima an a ne pa nangawn in a khetul tawh kei hong peek vial hi. Ahih hangin, Topa aw, amaute na thukkik theih nadingin kei hong hehpih inla, hong damsak in. Ka galte in keimah hong zo lo ding a, keima tungah nong lungkimna ka thei ding hi. Keima hoihna hangin na hong huh ding a, nangma omna-ah nong omsak tawntung ding hi. Israel Pasian, Topa in khang tawntungin thupha ngah tahen. Amen, Amen! Sakhi in tuiluang sialsial a lunggulh bangin nang ka hong lunggulh hi, ka Pasian aw. A nungta Pasian kong deih hi. Cik ciangin kei hong pai-in Pasian’ maitang hong mu thei ding ka hi hiam? Mite in keima tungah, “Na Pasian koi-ah om ahi hiam?” hong cihcih sungteng, sun le zanin ka khitui an-in ka ne hi. Ka lungsim sung ka suahkhia a, pawi bawl mihon khat kipakin otna le nuamna la tawh Pasian’ inn-ah ka makaihna, mihonpi tawh ka paina ka phawkkik hi. Bang hangin khakunkun a, lunghimawh niloh ka hi hiam? Pasian’ sungah lametna nei ning; bang hang hiam cih leh kei a hong huh ka Pasian ka phatkik ngawn ding hi. Ka lungsim tamkham ahih manin Jordan le Hermon gam, Mizar mualtung panin nang ka hong phawk hi. Nangma tuizeu gingte khatlekhat kidawng uh a, dahna tuihualte in kei a hong tuum hi. Topa in sun tawntungin a itna kip hong lak a, zan hun ciangin nuntakna a hong pia Pasian’ tungah thungetna la ka sa hi. “Bang hangin kei hong mangngilh na hi hiam? Galte in hong sukcip manin bang hangin kapin kidikdik ka hi hiam?” ci-in ka Pasian, kei a hong huhpa’ tungah ka gen hi. Ka langte in kei tungah, “Na Pasian koi-ah om ahi hiam?” hong cihcih sungteng, ka sungah meima nai tawm bangin hong tum ngangngang hi. Bang hangin khakunkun a, lunghimawh niloh ka hi hiam? Pasian’ sungah lametna nei ning; bang hang hiam cih leh kei a hong huh ka Pasian ka phatkik ngawn ding hi. Pasian aw, ka dikna hong langsak inla, migilote tawh ka thu-ah kei hong panpih in. Mi khemte le thutang lote kiang panin kei hong honkhia in. Bang hang hiam cih leh ka hong belh Pasian na hi hi. Bang hangin kei hong nilkhia na hi hiam? Galte’ sukcip manin bang hangin kapin kidikdik ka hi hiam? Na khuavak le na thuman hong sawlkhia inla, na mual siangtho, na omna-ah kei hong paipih sakin, hong khasak in. Tua ciangin na biakna tau-ah ahi a, ka lung a hong damsak Pasian kiangah ahi zongin ka pai ding a, laiza khausai lasakna tawh nang ka hong phat ding hi, aw Pasian, ka Pasian aw. Bang hangin khakunkun a, lunghimawh niloh ka hi hiam? Pasian sungah lametna nei ning; bang hang hiam cih leh kei a hong huh ka Pasian ka phatkik ngawn ding hi. Pasian aw, ka pu ka pate uh a khan lai-a na hihnasate, amaute in kote tungah hong gen uh a, kote in ka bil uh tawh ka za khin uh hi. Nangmah in minam dangte na hawlkhia mang a, ahih hangin amau’ munah ka pu ka pate uh na tengsak hi. Midangte na sugawp a, ahih hangin amaute na suaktasak hi. Bang hang hiam cih leh amaute in namsau tawh leitang ngah lo uh a, amau’ khut in amaute’ tungah gualzawhna pia lo hi. Na khut taklam le na baan, na hehpihna maipha hizaw hi. Bang hang hiam cih leh amaute tungah nang na lungkim hi. Nang pen Jakob a dingin gualzawhna a sehkhol, keima Kumpipa le keima Pasian na hi hi. Nangma huhna tawh ka galte uh ka sawnpai uh a, ko a hong do mite na min suangin ka tuancil uh hi. Bang hang hiam cih ka thalpi suanin ka nei kei a, ka namsau in zong kei hong hon zo lo hi. Ahih hangin nangmah in ka galte’ kiang panun kote na hong hon a, ko a hong mudahte na zahhuai gawpsak khin hi. Pasian’ hangin kote ka angtang ngitnget uh a, nangma tungah ka lungdam tawntung ding uh hi. Ahih hangin nangmah in kote hong nusia-in, nong minsiasak khin a, ka galkap hon uh tawh na hong kuankhawm kei hi. Galte kiang panin kote nong nungkiksak a, ka galte un ka neihsa teng uh buluah khin uh hi. Tuu gawh ding bangin kote na hong bawl a, minam dangte lakah nong thehthang khin hi. Na mite a man tawmno khatin na hong zuak a, a man ding na sang nget kei hi. Ka vengte uh’ zahko, ka kiim uha omte’ nuihsat leh thusim lohin kote na hong bawl khin hi. Minam dangte lakah a sia lama gentehna, mite lakah ciamnuih-a neihin kote na hong bawl khin hi. Na thuciamna-ah khial lo napi, nang hong mangngilh lo napi, hih thute khempeuh ko tungah hong tung khin hi. Ka Pasian uh mangngilh khinin pasian dang tungah ka khutte uh a khakkhin hi le ung, Pasian in hih thu mukhia lo ding ahi hiam? Bang hang hiam cih leh amah in lungsim thusim a thei hi. Nangma hangin sunthapai-in kote hong kithat a, gan gote’ tuu gawh ding bangin kote hong kikoih hi. Topa aw, bang hangin ihmu na hi hiam? Nangmah hong tho tawm in! Bang hangin na maitang seel na hi hiam? Bang hangin ka thuakna uh le hong kisukcipnate mangngilh na hi hiam? Bang hang hiam cih leh leilakah ka puk uh a, leivui lakah guallelin ka lum uh hi. Tho to in, kote a hong huh dingin hong pai in! Na itna kip hangin kote hong honkhia in! Thubul hoih khat tawh ka lungsim hong dimletin, kumpipa la ka phuah a, ka leii pen laithei pa’ laikung tawh hong kibang hi. Mihingte lakah nangmah na hoihpen a, thugen na siam a, na kam khum zungzung hi. Tua ahih manin Pasian in nang thupha hong pia tawntung hi. Vanglian kumpipa aw, na minthanna le na liatna tawh na namsau kuah in. Thumanna a omna ding le thuman a hu dingin na minliatna tawh gualzo-in hong pusuak inla, dipkuathuai hihnate na taklam khut nangmah kihilhsak in. Kumpipa’ galte’ lungtangah na thaltang hiamte lut a, mite na nuai-ah puk uh hi. Na kumpi tokhom siangtho kip tawntung hi. Na kumpi ciangkhut thumanna ciangkhut hi a, thuman deihin gitlohna na mudah hi. Tua ahih ciangin Pasian ahi, nangma Pasian in na khangualte tungah a kikhai to-in lungdamna sathau nang hong nilhzo a, na puantualpite myrrh paknamtui, aloes paknamtui, le thalsing namtuite a nam hi. Saiha tawh kibawl innpite panin khausai lasaknate in nang hong lungdamsak a, kumpite’ tanute, numei uliante lakah om a, na taklamah Ofir gam khamte tawh kizemin kumpinu a ding hi. Tanu aw, ngai dih in; ngaihsun inla, na bil hong ngat in. Na mite le na behte mangngilh in. Na melhoihna hangin kumpipa in hong deih ding hi. Na topa ahih ciangin ama mai-ah kun in. Mi haupen ahi Taia mite in na manpha namkim letsong tawh nang hong maivil ding uh hi. Kumpipa’ inn-ah a tun ciangun lungdamna le nuamna tawh amaute kitumpih hi. Na pate’ tang ding na tapate hong hi ding a, nangmah in leitung khempeuhah amaute, ulian na suaksak ding hi. Keimah in khang tawntungin na min ka kiphawksak ding hi. Tua ahih ciangin mite in nang hong phat den ding uh hi. Pasian, i belh leh i thahatna hi a, haksat hunin a hong huh pahpah pa ahi hi. Sangpenpa’ tenna khua siangtho, Pasian’ khuapi, a lungdamsak gun khat a om hi. Ama laizangah Pasian om a, amah a kiling kei ding hi. Pasian in phalvak tungin amah huh ding hi. Minamte lungkham uh a, kumpi gamte kiling hi. Ama aw gingkhiasak a, leitung kicimgawp hi. Vanglian Topa eite tawh hong omkhawm a, Jakob Pasian eima belh ahi hi. Hong pai unla, Topa’ sepna hong mu un. Leitung khempeuh gamkhing a suahsak khitna hong en un. Amah in leimong dongah gal beisak hi. Amah in thalpi kuaitanin teipi susia a, leengte mei tawh a haltum hi. “Om hithiat unla, Pasian ka hihna thei un. Minamte lakah keimah hong kisangsak a, leitung khempeuhah ka min hong kithangsak hi,” a ci hi. Vanglian Topa, eite tawh hong omkhawm a, Jakob’ Pasian, eima belh ahi hi. Mi khempeuh aw, na khut uh beeng un! Lungdamna la nakpi-in sa-in Pasian phat un. Bang hang hiam cih leh Topa, a Sangpenpa, dipkuathuai a, leitung khempeuh a uk kumpi lian khat ahi hi. Mi khempeuh eima nuai-ah, minamte i khenuai-ah amah in hong zawhsak hi. Ama it Israel-te’ angtanpih eima luah ding leitang amah in hong teelsak hi. Awging tawh Pasian paito a, peengkul aw tawh Topa paito hi. Pasian tungah phatna la sa un, phatna la sa un! I Kumpipa tungah phatna la sa un, phatna la sa un! Bang hang hiam cih leh Pasian pen leitung khempeuhte’ kumpi ahi hi. La sakna tawh amah phat un! Pasian in minamte uk a, a tokhom siangtho tungah Pasian tu hi. Uliante le Abraham’ Pasian’ mite kipawl khawm uh hi. Bang hang hiam cih leh leitung mite’ lumte khempeuh Pasian-a’ suak khinta a, amah a sangpi-in kithangsak hi. Topa lian a, i Pasian’ khuapi sungah nakpitakin phat ding ahi hi. Kumpi lianpa’ khuapi, leilu lama a om ama mual siangtho hoihin a sang mahmah Zion mual pen leitung khempeuh’ lungdamna ahi hi. A muanhuai tua mualah amah a hu taktakpa ahihna Pasian in a lakkhin hi. Ahi zongin, kumpite kikaikhawmin, a sim dingin hong kuankhawm uh hi. Amaute in Zion a muh phetun lamdangsa mahmah uh a, dipkua vatin tai uh hi. Numei nausuak na a sa bangin amaute linggawp uh hi. Nisuahna huihpi tawh Tarshish kici teembaw liante nang na susia hi. Ka zaksa bangun Vanglian Topa’ khuapi, i Pasian’ khuapi, Pasian in a phuhkip ngitngetna ka mu khin uh hi. Pasian aw, na biakinn sungah nangma itna kip ka ngaihsun uh hi. Pasian aw, na min in leimong dong a zelh bangin, nangmah hong kiphatna in zong a zel hi. Na taklam khut gualzawhna tawh a kidim hi. Zion Mual lungdamsak in. Na thukhenna hangin Judah mite lungdamsak in. Hih thu za un, mi khempeuh aw! Ngai un, leitung a a teng khempeuh, milian mineu, mihau mizawngte aw! Ka kam in pilna thu gen ding a, ka lungsim ngaihsutna kitelsiang ding hi. Paunak thu theihhak khat ka ngaihsun ding a, laiza lasakna tawh a khiatna ka gentel ding hi. Haksat hun, hong bawlsiate’ gitlohna in hong nencip ciangin bang hangin lau ding ka hi hiam? Mite in a hauhna uh muangin, tampi a neihna uh a kisaktheihpih hangun, amah le amah a kitankhia tawmzo taktak, a nuntakna man ding Pasian’ tungah a piazo mi kuamah om lo hi. Amah in a pilte nangawn a si mu ding a, a haite le a tei lote a kibangin sia-in, amau’ neihsa khempeuh midangte’ tungah nusiat uh hi. Amaute in leitangte amau’ min a puaksak uh hangin hankhuk pen khang tawntung amau’ omna hi ngitnget ding hi. Ama hauhna-ah mi kipsuak thei lo a, a sithei ganhingte tawh a kibang lel ahi hi. Hih pen a kihai muante’ ngah hi a, amau’ ngahsa tawh a lungkimte’ thumong ahi hi. Tua bangin amaute Leinuai-a dingin kiseh hi. Sihna pen amau a cing pa hi ding hi. Hankhuk sungah amaute tuaksuksuak ding uh a, a mel uh sia ding a, Leinuai, amau’ inn hi ding hi. Ahih hangin Pasian in Leinuai’ vangliatna panin kei hong honkhia ding hi; bang hang hiam cih leh amah in kei hong sang ding hi. Mi khatpeuh a hauh ciang ahi a, a innkuan minthanna a khan ciang ahi zongin lau-in lunghihmawh dingin ngaihsun tuan kei in. Bang hang hiam cih leh a sih ciangin bangmah keng lo ding a, a minthanna in amah zuisuk lo ding hi. A hin lai-in amah a lungdamin kingaihsunin, mi khat in ama a’ ding na a lim sep ciangin phatna a ngah hangin, khuavak a mu nawn lo dingin a si khinsa a pu a pate kiang mahah amah pai veve ding hi. Ama hauhna in mi hing paisuaksak thei lo a, a sithei ganhingte tawh a kibang lel ahi hi. Vanglian, Topa Pasian hong paukhia a, nisuahna le nitumna kikal leitung mi khempeuh a khawm hi. Hoih kicinna Zion panin Pasian hong taangkhia hi. Eite’ Pasian hong pai a, amah dai ommawk lo hi. Ama mai-ah mei husia om a, a kimkotah huihpi om hi. A mite tungah thu a khen theih nadingin tunglam vantung le leitung a sam hi. “Biakpiakna tawh, kei tungah thuciamna a bawlte, ka mi citakte ka kiangah hong khawm un,” a ci hi. Vantung in ama thumanna gen hi; bang hang hiam cih leh Pasian mahmah thukhen pa ahi hi. “Ka mite aw, ngai un; thu ka hong gen ding hi. Israel-te aw, note’ langkhatah teci ka pang ding hi. Kei pen Pasian ka hi a, nomau’ Pasian ka hi hi. Na biakpiakna uhah note kong mawhsak kei hi. Na meihal biaknate uh ka mai-ah om ngitnget hi. Ahi zongin na inn pan uha bawngtal hitaleh na ganbuk pan uha keeltal hitaleh ka hong sang kei ding hi. Bang hang hiam cih leh gamlak ganhingte khempeuh, mual tul tampite tunga a om ganhingte keima-a’ ahi hi. Huih lak vasate khempeuh keimah in ka thei a, gamlak a gamta khempeuh keima-a’ ahi hi. “Ka gil kial taleh zong note kiang panin an kong ngen kei ding hi; bang hang hiam cih leh leitung le a sunga om khempeuh keima-a’ ahi hi. Bawngtalte’ sa ne ding a, keelte’ sisan dawn ding ka hi hiam? Lungdam biakpiakna Pasian tungah pia unla, Sangpenpa tungah na thuciamnate uh bawl un. Haksat hun ciangin keima tungah hong ko un. Note kong honkhia ding a, note in keima min nong thangsak ding uh hi,” a ci hi. Ahih hangin migilote tungah Pasian in thu gen a, “Ka thukhamte lawhna ding ka thuciamna na muk uh tawh genna ding thu nei na hi uh hiam? Bang hang hiam cih leh hilh ding na ut kei uh a, ka thute na nunglam uhah na paai uh hi. Guta khat mu le-uhcin ama lawm na hi pah uh a, a paktat mite tawh na kikhawl uh hi. “Na kam uh, siatna na uksak uh a, na leii un khemna a khangsak hi. Na sanggamte uh langpangin thu na gen uh a, amaute’ mawhna na zong uh hi. Hihte khempeuh na gamta khin uh a, bangmah ka pau kei hi. Kei pen no tawh a kibangin nong ngaihsunkha uh hi. Ahih hangin tu-in note ka hong taii a, na mawhna uh na mai uhah ka koih hi. “Tua ahih ciangin Pasian a mangngilh mite aw, hih thu ciamteh un. Tua hikeileh note kong balgawp ding hi. Note hong honkhia ding kuamah om lo hi. Biakpiak nadingin lungdam piakna hong paipih mi in kei a hong pahtawi ahi hi. Ka thu a mang mite khempeuh ka honkhia ding hi,” a ci hi. Pasian aw, nangma itna kip om bangin kei hong hehpih inla, na hehpihna lian om bangin ka thu palsatnate hong phiatkhiatsak in. Ka khialhna panin hong silsiang kiuhkeuh inla, ka mawhna panin kei hong siangsak in. Bang hang hiam cih leh ka thupalsatnate ka thei a, ka mawhnate khempeuh ka phawk ngitnget hi. Nangma tungah khialin, nangma muhna-ah a sia ka gamta khin hi. Tua ahih ciangin na thugenna-ah nang na thutang a, thu na hong khenna-ah pauna ding bangmah om lo hi. A khialsa mahin kei ka suak a, ka nu in a gil sungah hong paii tung a kipan a mawh sa ka hi hi. Nang in nuntakna sungah thumanna na deih hi. Tua ahih ciangin ka lungsim tawngah ciimna hong hilh in. Puknah tawh hong nul in; kei ka siang ding hi. Hong sil in; vuk sangin ka ngozaw ding hi. Lungdamna le kipahna kei tungah hong pia inla, na hong sukgawp mipa hong lungdamsak in. Ka mawhna khempeuh na mai panin seel inla, ka khialhna khempeuh hong phiatkhiatsak in. Pasian aw, keima sungah lungsim siangtho hong piangsak inla, a thak a man ngaihsutna ka sungah hong guan in. Nangma omna panin kei hong paaikhia kei inla, keima kiang panin na kha siangtho lakhia kei in. Nong hotkhiatna hangin hong lungdamsakkik inla, utna lungsim tawh keimah hong huh ta in. Tua ciangin thupalsatte na zia na tong ka hilh ding a, nangma lamah mimawhte hong kiheikik ding uh hi. Kei a hong hon Pasian aw, sih nading panin kei hong honkhia in. Nong hotkhiatna thu lungdam takin ka sa ding hi. Topa aw, ka pau theih nadingin kei hong huh in; nangmah ka hong phat ding hi. Bang hang hiam cih leh ganhing tawh biakna na deih kei hi. Meihal biakna hong pia hita leng zong, na lungdam kei ding hi. Pasian’ san theih biakna pen lungsim kitamzan ahi hi. Pasian aw, a kitamzan, a kisik lungsim na simmawh kei ding hi. Na lungkimna pha tawh Zion tungah a pha bawl inla, Jerusalem kulhpite ciangkik ta in. Tua ciangin biakpiakna man, meihal biakna le meihal biakpiakna bupah na lungkim ding a, na biakna tau tungah bawngtalte hong kipia ding hi. Mi thahatpa aw, bang hangin miphate suksiatna-ah kisial na hi hiam? Sunthapai-in, suksiatna na ngaihsunsun hi. Zuau nasempa aw, na leii a hiam pha mahmah mulkiatna tem tawh kibang hi. Hoihna sangin siatna na deihzaw a, thuman genna sangin zuauna na deihzaw hi. Mi a khem thei pa aw, a siasak thei kammal khempeuh deih belin na nei hi. Tua ahih manin Pasian in nang hong susia paisuak ding hi. Amah in nang hong bawhin na buk sung panin hong kaikhia ding a, a hingte’ leitang panin hong zunglot ding hi. Thuman mite in nang hong mu-in, lau mahmah ding uh a, nang hong nuihsanin, “Pasian a bel lo, ama hauhnate a muang, ama hauhna a bel pa en un,” hong ci ding uh hi. Ahih hangin kei ka hih leh Pasian’ innsunga a om oliv kung a hing tawh ka kibang hi. Pasian’ itna kip ka muang ngitnget hi. Hih bangin keimah hong bawlkhin na hih manin nangma tungah ka lungdam ngitnget ding hi. Thuhoih ahih manin miphate omna-ah nangma min ka taangko ding hi. Mihai in a lungsim sungah, “Pasian om lo hi,” ci-in ngaihsun hi. Amaute sia uh hi. A kihhuai-in gamta uh a, a hoihin a gamta kuamah om lo hi. A pil, Pasian a zong mi a om uh hiam, cih a theih nadingin Pasian in vantung panin mihingte hong ensuk hi. Amaute khempeuh a vekpi-un pukkhin uh hi. A kibangin kisia kim uh a, a hoihin a gamta khat beek om lo hi. Pasian tungah thu a ngen lo, an nek bangin ka mite a netum, siatna a bawlte in thu theihtelna nei lo ahi hiam? Cikmahin tua bang launa a om ngei lo, launa lianpi sungah amaute om uh hi. Bang hang hiam cih leh Pasian in migilote’ guhte thehthang ding hi. Pasian in amaute nial ahih manin, amaute maizumin kikoih ding hi. Zion panin Israel-te a’ ding hotkhiatna hong tunna ding thu ka ngenngen hi. Pasian in ama mite tungah nopsakna a piakkik ciangin, ama mi Israel-te kipak mahmah ding uh hi. Pasian aw, na thahatna tawh kei hong honkhia inla, na vangliatna tawh ka dikna hong kilangsak in. Pasian aw, ka thungetna hong za inla, ka kampaute hong ngai in. Bang hang hiam cih leh mi kiphasakte in kei hong langpang uh a, mi helhhawtte in thah dingin hong zong uh hi. Amaute in Pasian thudon lo uh hi. Pasian, kei hong huhpa hi a, Topa, kei hong hupa ahi hi. Amah in ka galte siatna tawh thuk ding hi. Na thumanna tawh kizui-in amaute sumai in. Utna lungsim tawh biakpiakna kong pia ding a, nang hoih na hih manin, nangma tungah lungdamna kong ko ding hi, Topa aw. Bang hang hiam cih leh haksatna khempeuh panin kei nong honkhia khin a, ka galte a guallelhna keimah in ka mu khin ta hi. Pasian aw, ka thungetna hong ngai inla, ka hong thumna panin nangmah bu kei in. Keima lam hong nga inla, ka hong ngetna hong pia in. Ka lungsim gimna in kei hong zogawp ta hi. Migilote’ sukcipna, galte’ huging in kei hong gimsak hi. Bang hang hiam cih leh amaute in keima tungah haksatna hong tun uh a, hehna tawh keimah hong galbawl ding amaute in nuamsa uh hi. Ka sungah ka lungsim na mahmah a, sih ding launate kei tungah hong tungzo hi. Launa le linna ka tungah hong tung a, launa in hong vukcip hi. Hih bangin ka ci hi: “Vakhu bangin kha nei hi leng! Ka leengkhia ding a, nuamtakin ka om hithiat ding hi. Gamla pekah ka vakthap ding a, gam sungah ka giak ding hi. Gensiatna huihpi le huih husiate panin bukna ka zong pak ding hi,” ka ci hi. Topa aw, amau’ geelnate suksiat sakin a pau uh kilamdangsak in. Bang hang hiam cih leh khua sungah ngongtatna le kam kiselna ka mu hi. Amaute sun le zanin kulhpi tungah kot paipai uh a, khua sungah siatna le ngongtatnate om a, mite lakah lungkhamna om hi. Sumzuak sumleina mun panin kisukcipna le kikhemnate veng lo hi. Kei hong phin galte hi lo hi. Hi leh ka thuakzo ding hi. Kiphatsakna tawh kei hong bawlte, langpang mi hi lo hi. Hi leh ama kiang panin ka bu thei ding hi. Ahih hangin ka kikimpih, ka kikholhpih, ka lawm theih mahmah, nangmah na hi hi. Kam khum tawh i kihoho ngei a, Pasian’ inn sungah i kikhawl khawm ngei hi. Amau’ tungah sihna tungsak in. Leinuai-ah a hingtangin amaute paisuk sak inla, amaute launa lianpi tawh a han uhah paisak in. Ahih hangin keimah in Pasian’ tungah ka ko a, Topa in kei hong hon ding hi. Nitak, zingsang, le sunin ka gimna leh ka thumnate ama tungah ka gen a, amah in keima thumna aw, hong za ding hi. Amah in ka galsimna sungah kei hong kem ding a, a muanhuai munah kei hong koih ding hi. Bang hang hiam cih leh keimah a hong do dingin mi tampi tak kigual deudau uh hi. Tanglai pek panin kumpi-in a kikoih Pasian in za-in amaute niamkhiat ding hi. Bang hang hiam cih leh amaute in thukham zui lo uh a, Pasian zahtak lo uh hi. Ka kikholhpih ngei mi in a lawmte langpangin sugawp a, a thuciamna palsat hi. Ama kampau, thawhbat sangin nelzaw a, ahi zongin a lung sungah muhdahna om hi. A kammalte sathau sangin nipzaw a, ahi zongin tuate pen namsau hiam mahmah tawh kibang hi. Topa tungah na vangik nga in, amah in hong huh ding hi. Amah in mi thumante kilingsak ngei lo ding hi. Ahih hangin Pasian aw, dum thuk penna munah amaute na lawnsuk ding a, mi thatte le mi khemte pen amau nuntak ding zah lang hing lo ding uh hi. Ahih hangin keimah in nang ka hong muang ding hi. Pasian aw, mite in kei hong tuancil ahih manin kei hong hehpih in. Sunthapai-in galte in kei hong sucip hi. Sunthapai-in ka galte in kei hong tuancil uh a, kiphatsakna tawh mi tampi in kei hong do hi. Kei ka lau ciangin nangmah ka hong muang hi. A thu ka phat Pasian’ sungah, lunghihmawhna khat zong nei hetloin Pasian ka muang hi. Mihing ahi lelte in kei, bang hong cihzo ding ahi hiam? Amaute in ka vai siatsak ding sunthapai-in hanciam uh a, amau’ ngaihsutnate khempeuh keima siatna ding ahi hi. Amaute kikaikhawmin keimah hong buk uh a, ka gamtatna khempeuh hong encik uh hi. Amaute in keimah thah ding a hanciam uh bangin, amau’ khialhna hangin amaute thuk in. Pasian aw, hehna tawh tua mite lawnkhiasuk in. Ka sin linnate khempeuh nangmah in na ciamteh khin hi. Ka khituite khempeuh na thawl sungah thun in. Tuate na laibu sungah kiciamteh hi lo ahi hiam? Tua ciangin, keimah in kong koh ni peuh ciangin ka galte nungkik ding hi. Pasian pen keima-a’ ahihna ka thei hi. A thu ka phat Pasian’ sungah, a thu ka phat Topa’ sungah, lunghihmawhna khat zong nei hetloin Pasian ka muang hi. Mihing lellelte in kei, bang hong cihzo ding ahi uh hiam? Pasian aw, nang tungah ka kiciamna ka zuih kul hi. Nangma tungah lungdamna kong thuk hi. Bang hang hiam cih leh sihna panin nong honkhia khin hi. Pasian’ mai, nuntakna khuavak sungah ka pai theih nadingin ka khe a taalna ding panin na hong honkhia hi. Kei hong hehpih in Pasian aw, nang hong bel ka hih manin kei hong hehpih in. Siatna huihpi a ven’ mateng na kha liimah kong bu ding hi. A Sangpen Pasian’ tungah, keima deihna a hong tungsak Pasian’ tungah ka ko hi. Amah in vantung panin keimah hong dawngin hong honkhia ding a, amah in kei hong tuancilte maizumin a koih ding hi. Pasian in ama itna kip le a thumanna hong lak ding hi. Huaihamna tawh mihing a netum, humpinelkai tawh a kibang mite’ lakah ka om hithiat hi. Amau’ hate, namsau hiam tawh kibang hi. Pasian aw, vantungah na liatna kilangsak in. Leitung khempeuhah na minthanna omsak in. Amaute in keima khe, thang hong siah uh a, lungkhamin hong koih uh hi. Ka pai nading munah gum khat to uh a, ahih hangin tua gum sungah amaute mah kia uh hi. Ka lungmuang hi, Pasian aw, ka lungmuang hi. La ka sa ding a, nakpitakin ka sa ding hi. Ka tho ding hi. Harp lasakna le laiza lasakna aw, tho ta un. Zingsang khuavak hong phong ning. Topa aw, mite lakah lungdam kong ko ding a, minamte lakah nangmah phatna ka sa ding hi. Bang hang hiam cih leh na itna kip in vantung ban a, na thumanna in meiipi banto hi. Pasian aw, vantungah na liatna kilangsak in. Leitung khempeuhah na minthanna omsak in. No gam ukte aw, a manin thu na khen uh hiam? Note in mi khempeuh’ thu a tangin na khen uh hiam? Hi peuhmah lo hi; na lungsim uhah a man lo na ngaihsun uh a, gam sungah ngongtatna na gamta uh hi. Migilote a khan tawnun khial uh hi. A suah tung mahun lam khial pah uh a, zuauthu gen uh hi. Pasian aw, amau’ kam sunga a om a hate uh sutan inla, humpinelkai khanglai hatu-te botkhia in, Topa aw. Tui luangkhiate bangin amaute mangthangsak inla, lopa bangin amaute kituancil gawpin keutumsak in. Amaute a naai a bei toktol, a hun cing loin a suak, ni a mu ngei lote bangsak in. Na beelte in lingkung kuang sa a sak ma-in, a hing a keu-in amah in phiatkhia mang hen. Heh thukna a muh ciangin thuman mipa lungdam ding a, migilote’ sisan sungah amah in a khete sil ding hi. Mite in, “Thuman mi a’ ding noptuamna om taktak a, leitung thu a khen Pasian khat om taktak hi,” ci ding uh hi. Ka Pasian aw, ka galte’ kiang panin keimah hong honkhia in. Kei a hong langpangte panin kei hong dal in. Siatna a bawlte’ kiang panin hong suaktasak inla, mi that nuamte’ kiang panin keimah hong hon in. Bang hang hiam cih leh amaute in kei hong pangsim uh a, a kihtakhuai mite keimah hong langpangin kikaikhawm uh hi. Topa aw, keima thupalsatna hang hi lo, kei’ khialhna hang hilopi-in, amaute va kithawi uh hi. Nangmah in hong phawk in. Keimah a hong huh dingin hong pai inla, kei hong en in. Nang, Vanglian Topa Pasian, Israel’ Pasian na hi hi. Minam khempeuh gim a pia dingin tho inla, khemna tawh siat gamtat ding a sawmte kuamah siit kei in. Nitak simin amaute hong paikik zelzelin ui bangin ku uh a, khuasung tengah vak khuankhuan uh hi. Amaute a kam uh tawh nakpipi-in hawk uh a, a muk uh tawh zuauthu gengen uh hi. Bang hang hiam cih leh, “Kua’n hong za ding hiam?” ci-in amaute in ngaihsun uh hi. Topa aw, ahih hangin nang in amaute na nuihsan lel a, minam khempeuh na zahpih hi. Ka thahatna aw, nangmah phatna ka sa ding hi. Bang hang hiam cih leh ka Pasian aw, ka munkip muanhuai na hi hi. Ka Pasian in ama itna kip tawh keimah hong dawn ding a, ka Pasian in gualzawhna tawh ka galte hong en sak ding hi. Amaute that kei in; that lecin ka mite in mangngilh ding hi. Na vangliatna tawh amaute kilokgawp sak inla, amaute niamkhiat in, Topa, kote hong hupa aw. Amau’ kama a mawhna a muk uh tawh a pauna hangin, amau’ kiphatsakna-ah amau mah awksak in. Amaute in hamsiatna zangin zuauthu a genna hangun, hehna tawh amaute beisak in. Amaute khempeuh a beisiang dongin sumai in. Tua hileh Pasian in Israel-te tungah leimong dongin a uk khitna thu mi khempeuh in thei ding uh hi. Nitak simin amaute hong paikik zelzelin ui bangin ku uh a, khuasung tengah vak khuankhuan uh hi. An zong dingin vak kawikawi uh a, a kham uh ngah kei leh humham uh hi. Ahih hangin keimah in na vangliatna la ka sa ding a, zingsangin na itna kip phatna la nakpitakin ka sa ding hi. Bang hang hiam cih leh nang, ka munkip muanhuai na hi a, ka gentheih hunin keima belh na hi hi. Ka thahatna aw, nangmah phatna ka sa ding hi. Bang hang hiam cih leh Pasian aw, nang pen ka munkip muanhuai, keima tungah itna kip a hong lak Pasian na hi hi. Pasian aw, kote na hong nilkhia khin a, ka panmunte uh na sukham mang khin hi. Kote tungah nangmah na heh khin hi. Kote ka ngei uh hong bangsakkik ta in. Nangmah in lei na lingsak khin a, lei na khangkhamsak khin hi. Kip lo ahih ciangin a kitam mate matkik in. Nangmah in na mite a haksa na thuaksak khin hi. Ka dawn dingun ko a hong hoisak leenggahzu na hong pia khin hi. Thalte panin kihemin a kikaihkhop nadingun nang hong zahtakte a dingin dial khat na koih khin hi. Nangma it mite a suahtak theih nadingin na khut taklam tawh gualzawhna pia inla, kote’ ngetna hong pia in. A biakinn sungah Pasian in thu gen a, “Gualzo a lungdamna tawh Shekhem gam khenkhia-in Sukkoth gam kuam ka sehkhia ding hi. Gilead gam keima a’ hi a, Manasseh gam zong keima-a’ mah ahi hi. Efraim gam ka siklukhu hi a, Judah gam ka ciangkhut ahi hi. Moab gam ka kisilna kuang hi a, ka neihsa hi cih lahna limin Edom gam tungah ka khedap ka lawn a, Filistia gam tungah gualzawhna tawh ka awng hi,” a ci hi. Kua in khuapi muanhuai-ah kei hong paipih ding hiam? Kua in Edom gamah kei hong paipih ding hiam? Pasian aw, nangmah in kote a hong don nawn lo khinta hi lo na hi hiam? Pasian aw, komau’ galkapte tawh na hong kuankhia kei hi. Ka galdona uhah huhna hong pia in; bang hang hiam cih leh mihing’ huhna a mawkna hi. Pasian tawh khauhtakin i hih ding hi. Amah pen i galte hong sikcipsak ding pa ahi hi. Pasian aw, ka kikona aw hong za inla, ka thungetna hong ngai in. Ka lungsim a neu ciangin, leimong panin nang kong sam hi. Keimah sangin a sangzaw suangpi tungah hong paipih in. Bang hang hiam cih leh nang, keima bukna na hi a, galte’ langah tausang muanhuai na hi hi. Na buk sungah hong omsak tawntung inla, nangma khate’ hutna sungah lungmuangin hong omsak in. Bang hang hiam cih leh Pasian aw, ka thuciamnate khempeuh nangmah in na za khin a, nangmah a hong zahtak mite’ ngah dingte keimah nong pia khinta hi. Kumpipa khantosak inla, khang tawntungin nungtasak in. Pasian’ mai-ah amah om ngitnget hen la, ama itna kip le a thumanna in amah kem tahen. Tua ciangin nisimin ka thuciamnate bangin gamta-in, na min phatna ka sasa ding hi. Dai dide-in Pasian bek ka ngak a, ama hong hotkhiat ding muangin ka om hi. Kei hong huhpa le hong honpa amah bek hi a, ka guallel ngei kei ding hi. Note khempeuh in kawm a hoi tawh a kibang, gawl bangin a kiling mi khat a susia dingin bang tanvei hih huan nilohin, susia ding na hi uh hiam? Amah a zaliatna panin sukniam ding bekbek amaute in a sawm uh hi. Amaute in thuman lo-ah nuamsa mahmah uh hi. Amaute in a kampi uh tawh phat khem uh a, ahih hangin a sungtawng uhah samsiat uh hi. Amah bek ka muan ahih manin, daitakin Pasian bek ka ngak hi. Kei hong hupa le hong honpa amah bek mah hi a, ka guallel ngei kei ding hi. Keima suahtakna le ka minphatna Pasian’ hang ahi hi. A muanhuai ka belh pa, ka bukna Pasian ahi hi. Mite aw, amah muang tawntung unla, na lungkhamna teng uh ama tungah gen un. Pasian, eite’ bukna ahi hi. Mihingte ahihleh husan’ bang bek hi a, a lian a neu kibang lel hi. Tawi a kikhai ciangin amaute in leek lo uh a, amaute a kigawmin husan’ sangin zangzaw hi. Zawhthawh thu tawh ngahna muanin nei kei inla, suhgawpnate lametin nei kei in. Na hauhna a khan leh, tuate muanin nei kei in. Vangliatna pen keima a’ hi, ci-in Pasian in a genna ka zak ngeingeisa ahi hi. Topa aw, itna kip nangma a’ ahi hi. Bang hang hiam cih leh a sepna bang ciatin mite na thuk hi. Pasian aw, keima Pasian na hi hi. Nangmah kong zong a, ka lungsim khempeuh tawh nang kong deih hi. Tui om lohna gamkeu bangin ka pumpi bup in nang hong deih hi. Tua ahih manin biakinn sungah nangmahmah le na vangliatna na minthannate kei hong musak in. Nuntakna sangin nangma itna kip hoihzaw ahih manin nangmah ka hong phat ding hi. Tua ahih ciangin ka nuntak laiteng nang kong phat ding a, ka khutte hong laam to-in thu kong ngen ding hi. Bang hang hiam cih leh kei a hong huhpa na hi a, nangma hutna sungah lungdamin la ka sa hi. Nangmah ka hong bel a, nangma taklam khut in keimah a hong len hi. Ahi zongin thah dingin kei a hong zongte, lei thukpi sungah paisuk ding uh hi. Gal sungah amaute si ding uh a, ngiate’ an suak ding uh hi. Ahi zongin Pasian’ hangin kumpipa lungdam ding a, Pasian tawh thuciamna a nei khempeuhte zong minthang ding uh hi. Bang hang hiam cih leh zuauthu a gen kam khempeuh kihubing ding hi. Pasian aw, ka thumna aw hong za inla, gallauna panin kei hong kem in. Migilote’ sawmsimna, thusia bawlte’ vaihawmna, namsau taat bangin a leii uh a taatte, thaltang bangin thu hoih lo a ngimte, a buk simna panun mawhbaang lo mi a kapte, lau hetloin thakhatin amah a kapte’ kiang panin kei hong liah in. Amaute in thusia bekbek ngaihsun niloh uh hi. Amaute in thangsiah sim ding gen uh a, “Eite kua in hong mu ding ahi hiam? Eite’ mawhna kua in phawkzo ding ahi hiam? Siam mahmahna tawh i sawmsimna i vaihawm hi,” ci-in a ngaihsun uh hi. Bang hang hiam cih leh mihingte’ sung thu le a lungsim ngaihsutna uh thuk mahmah hi. Ahih hangin Pasian in a thaltang tawh amaute kapgawp ding a, amaute khempeuh thakhatin liam ding uh hi. Amau’ kampaunate hangin amaute siatna thuaksak ding a, amaute a mu khempeuh in a lu uh peisan ding uh hi. Tua ciangin mi khempeuh lau ding uh hi. Amaute in Pasian’ hihsa thute gengen ding uh a, ama hihsa nate khempeuh ngaihsunsun ding uh hi. Topa’ nasepna hangin midikte lungdam ding uh a, amah a bel ding uh hi. Lungsim thutangte khempeuh in amah a phat ding uh hi. Pasian aw, Zion-ah nangmah phat dingin kilawm a, nangma tunga thuciamsate hong kitungsak ding hi. Thungetna a zapa na hi a, mawhna hangin nangma kiangah mi khempeuh hong pai ding uh hi. Ka mawhnate un kote hong zawh ciangin, nangmah in tuate na hong maisak hi. Nangma inn-ah a om dingin na teel na lakte mi nuamsa ahi hi. Nangma biakinn siangtho, na innsunga hoihna tawh kote ka lungkim ding uh hi. Tuipi gamla pente le leimong khempeuhte’ lamet, kote a hong honkhia Pasian, a thahatna tawh mualte a bawl, vangliatna tawh a kidim, tuipi gingte, tuihualte, mi gamlumte a daisak pa aw, leimong peka omte in na hihna limte a kihtak nadingun a kihtakhuai gamtatna zangin, nong hotkhiatna tawh kote’ ngetna nong pia hi. Nisuahna le nitumna kikalah a om mi khempeuhte lungdamna tawh a awng dingin na bawl hi. Nangmah in leitung enin, guah na hong zusak a, leitung a hoihna nakpitakin na behlap hi. Pasian’ gunpi tui tawh kidim a, leitungah an na piangsak hi. Tua bangin nangmah in na khempeuh na bawlkhol hi. Tu-ma-kuakte khempeuh tui tampi tak na buak a, leivumte zalhmai-in, guahtui tawh na nipsak a, a po kungte thupha na pia hi. Nangma hauhna tawh kum na phasak a, na leeng paina khempeuhah sathau a taak hi. Ganhing tatna, a noptuak mahmah munte-ah ganhing honte omin, mualte khempeuh zong lungdamna tawh kidim a, gamlak lonona munte tuuhon tawh kizemin, kuampite an tawh kidim a, amaute lungdamin awngin la a sa khawm uh hi. Leitung mi khempeuh aw, Pasian’ tungah lungdamna aw ging phasak un. Ama minthanna sa unla, ama tungah minthanna pia un. Pasian’ tungah thu gen unla, “Nangma bawlnate bangzahta-in dipkuathuai! Na vang lian mahmah ahih manin na mai-ah na galte in nang hong mai-et uh hi. Leitung mi khempeuh in nangmah hong bia uh hi. Amaute in nangmah phatna la hong sak uh a, nangma minphatna la hong sak uh hi,” ci-in gen un. Hong pai unla, Pasian’ sepsate mu un. Mite’ lak a a bawlnate-ah amah dipkuathuai hi. Amah in tuipi tui pen leikeu suaksak a, i pu i pate in a khe uh tawh tua tuipi na kantan uh hi. Tua bangin ama nasepna hangin eite i lungdam hi. Ama thahatna tawh a uk ngitnget pa, ama mit tawh minamte a encik ngitnget pa, mi lehdote in langpan’ kei uh hen. Bang hang hiam cih leh Pasian aw, kote na hong sin khin a, mei tawh ngun a kisin bangin kote na hong sin khin hi. Nangmah in ngen sungah kote na hong tungsak a, ka nungzang uhah vangikpi na hong suan hi. Ka galte uh nong tuancilsak a, tui le mei lauhuainate ka thuak uh hi. Ahih hangin nangmah in a tanzau munah kote nong paipih hi. Ganhing thaute tawh meihal biaknate, tuutal-a biakna khute tawh biakna kong pia ding a, bawngtalte le keelte tawh nangmah biakpiakna ka bawl ding hi. Pasian a zahtakte khempeuh aw, hong pai unla, hong za un. Kei-a’ dinga ama bawlsate ka hong gen ding hi. Ama tungah huhna ngenin nakpitakin ka kiko a, lasakna tawh amah ka phat hi. Ka lung sungah mawhna kem leng, Topa in keima thu hong ngai lo ding hi. Ahih hangin Pasian in, keima thu hong ngai khin taktak a, keima thungetna aw, hong don khinzo hi. Amah in keima thungetna hong nolh loin, keima kiang panin a itna kip lakhia lo ahih manin Pasian in thupha ngah ta hen! Pasian in eite hong hehpihin thupha hong pia hen la, eite khempeuh tungah a mai hong taangsak tahen. Leitungah nangma deihna, minam khempeuhte lakah na vanglian hotkhiatna kithei tahen. Pasian aw, mi khempeuh in nangmah hong phat hen la, mi khempeuh in nangmah hong pahtawi tahen. Mite’ thu a manin khenin, leitung minamte khempeuh lamlakin makai na hih manin, minamte nuamin lungdamna la hong sak ta uh hen. Pasian aw, mi khempeuh in nangmah hong phat hen la, mi khempeuh in nangmah hong pahtawi tahen. Leitang in ama hauhna gahkhia khinta a, Pasian, eima Pasian in eite thupha hong pia khin hi. Pasian in eite thupha hong pia khin hi. Leimong dong mi khempeuhte in amah zahtak uh hen. Pasian hong kipan hen la, ama galte kithehthangsak hen. Amah a mudahte ama mai-ah tai uh hen. Meikhu leengkhia bangin amaute a hawlkhia ding hi. Mei mai-ah khuainun a tui bangin Pasian’ mai-ah migilote siamang ding hi. Ahih hangin midikte lungdam ding hi. Pasian’ mai-ah nuamin diang ding uh a, amaute lungdam mahmahin awng-awng ding uh hi. Pasian’ tungah la sa unla, ama min phatna la sa un. Meiite tungah a tuang pa la sak un. Ama min pen Topa ahi hi; ama mai-ah lungdamin diang un! Pa nei lote’ pa le meigong numeite a hupa pen, a siangtho mahmah ama omna-ah a om Pasian ahi hi. Pasian in a cimawhte a tenna ding innlelo guan a, thongkia mite nopsakna munah a tunpih hi. Ahih hangin mi lehdote ahihleh keugaw gamah teng uh hi. Pasian aw, nangma mite mai-ah na kuankhiat ciang, gamlak nawkin na pai ciangin, nangmah Pasian na om manin lei kiling gawpin vantungte in guah a zusak hi. Pasian ahi, Israel Pasian’ omna-ah Sinai mual nangawn a kiling gawp hi. Pasian aw, na luah mite vulgawp uh ahih manin guah tampi zusakin na nosuaksakkik hi. Nangma mihonte in tua sungah omna ding mu uh hi. Pasian aw, nangma hoihna tawh a cimawh mite’ kisapna a kicingin na guan hi. Topa in thu pia hi: Hih thu a pua mihonte tam mahmah uh a, “Kumpipa’ galkapte tai uh!” ci uh hi. Inn-a om nupite in galte’ van a kisutte hawm uh a, tua vante pen ngun tawh a kizut vakhu limte hi a, a khate kham tawh kizut hi. Bang hangin note pawlkhat, tuukhawk sungah mawk om na hi uh hiam? Vanglianpa in tua gam panin kumpite a nawhkeek ciangin Zalmon mualtungah vuk a kia tawh kibang hi. Aw mual lianpi, Bashan mual, aw mual dawnzum tampi a nei Bashan mual! Dawnzum tampi a nei mual aw, Pasian in ama om nadingin a deih mual Pasian’ om tawntungna ding mun bang hangin simmawh et na hi hiam? Leeng muanhuai tul sawmnih, vantungmi a tultul tawh, Sinai mual pan siangtho munah Topa hong pai hi. Topa nangmah Pasian tua munah na om theih nadingin a sangna-ah kahto-in salte na paipih a, mihonte le mi lehdote’ tung nangawn panin piakkhong nate na ngah hi. Nisimin eite a dingin a hong thuaksak Topa in thupha ngah tahen. Pasian pen eite hong honkhia pa ahi hi. Eite’ Pasian pen hong honkhia Pasian hi a, sihna pan a hong suaktasak Topa Pasian ahi hi. Ahih hangin Pasian in mawhna a gamta a galte’ lutang khempeuh sukham ding hi. Pasian aw, ka Kumpipa, keima Pasian, a zahtakhuai takin biakinn sungah na paina kimu hi. A masa-in lasate, a nunungin tamngai tumte, a laizangah nungak khuangtumte in: “Israel’ suanlekhakte aw, mipi kikhopna sungah Topa Pasian phat un!” ci uh hi. Amaute’ lakah a mi tawmpen Benjamin-te a mapi-in om a, amau’ zomah Judah kumpite le a mite, Naftali kumpite le a mite ahi uh hi. Pasian aw, na vangliatna kilangsak in. Kote a dingin a hong bawlsak Pasian aw, na thahatna hong lak in. Jerusalem-a na biakinn hangin kumpite in nang tungah letsong hong puak uh hi. Pumpeeng lak a teng Egypt mite- tua ganhingte, bawngtal hon, bawngnote taigawp in. Siah a lunggulhte tuancil inla, gal a uuk mite thehthang gawp in. Egypt gam panin sumngo lakhiasak inla, Pasian’ tungah thungetna-in Ethiopia gam a khut zansak mengmeng in. Israel-te’ tungah a lian, Pasian’ hatna pahtawi un; ama vangliatna vantungah om hi. Israel-te’ Pasian, ama biakinn sungah zahtakhuai mahmah a, ama mite tungah vangliatna le hatna a pia hi. Pasian in thupha ngah ta hen! Pasian aw, hong hon in! Bang hang hiam cih leh tuikhang in ka ngawng ciang hong tuum ta hi. Khe tawh dinkipna ding mun a om lohna buannawng thuk sungah ka tumsuk a, tuithuk sung tung khinta-in ka tungah tuikhang a luang hi. Ka kikokona-in ka gim a, ka dang keuta hi. Ka Pasian ka ngakngakna-in ka mitte maang ta hi. Thu om lopi-in kei a hong mudah mi, ka lu tunga samzangte sangin tamzaw uh hi. Kei a hong susia ding, zuauthu tawh a hong dote hat mahmah uh hi. Kei’ guk lohpi ke’n loh ding ka hi hiam? Pasian aw, ka pil lohna na thei a, ka tatkhialhnate nangma kiang pan kiliah lo hi. Vanglian Topa Pasian aw, nangmah a hong muangte keima hangin zahhuaisak kei in. Israel Pasian aw, nang a hong zongte keima hangin mindaisak kei in. Bang hang hiam cih leh nangma hangin kona ka thuak a, maizumna in kei hong pumtuam khinta hi. Ka sanggamte lakah midangpi ka suak a, khualmi ka bang hi. Nangma inn ka deihluatna mei bangin ka sungah sa a, nangmah hong kote’ konate keima tung hong tu hi. An ngolhna tawh ka lungsim ka kiniamkhiat a, tua pen keimah hong kikona lehsuak zawsop hi. Ka puan dingin puanhampi bawl taleng zong amaute a dingin gentehna ka suak veve hi. Kongzing lakah mite’ gengen ka hi a, zukhamte in keima thu la-in hong sa uh hi. Topa aw, ke’n ahihleh nang tungah thu kong ngen hi. A kicing na itna kip tawh a hun hoih ciangin hong dawng in, ka Pasian aw. Buannawng thuk sungah tumsukna ding panin nangma thuman huhna tawh kei hong hon inla, tuithukte le ka galte’ kiang panin kei hong suaktasak in. Keima tungah tuikhang lauhuai hong luangsak kei inla, khuamial thukpi hong nawmvalhsak kei in. Gum in a kuavang keima tungah hong khaknelhsak kei in. Topa aw, na itna kip hoih ahih manin kei hong dawng inla, na hehpihna lian a om tawh kizui-in kei’ lam hong nga in. Na nasempa kiang pan na maitang seel kei inla, kei cimawh ka hih ciangin hong dawng meng in. Kei kiangah hong nai inla, kei hong hon in. Ka galte’ khutsung pan kei hong khah in! Keimah hong kisimmawhna, ka maizumna le ka mindaina nang na thei a, ka galte khempeuh zong nang na thei hi. Simmawhna in ka lungsim hong zo a, kei ka cimawh ta hi. Kei a hong hehpih ding mi ka zonzon hangin kuamah om lo a, hong huh ding ka zon hangin kuamah ka mu kei hi. Amaute in an dingin gu hong pia uh a, ka dangtakna-ah dawn dingin tuithuk hong pia uh hi. Amau’ mai-a kilui ante thangzak suaksak inla, amau’ biakna pawi ante tehlop suaksak in. Khua a muh theih loh nadingun amau’ mit mialsak inla, a kawngte uh zawcipsak in. Amaute tungah nangma thangpaihna sungsuk inla, na sinsona amaute bansak in. Amaute’ phualpi a kilawi mun suak hen la, amau’ bukah mi khat zong tengsak kei in. Bang hang hiam cih leh nangmah in na satgawp mi amaute in bawlsia uh a, nangmah in na liamsaksa mi amaute in gimsak sawnsawn uh hi. Amau’ gim thuakna banah thuaksak thuahthuah lai inla, nangma tung panin suahtakna ngah kei ta uh hen. A nungtate’ laibu sung panin amaute kiphiatsak inla, miphate lakah a min uh kikhumsak kei in. Ahih hangin keimah in gimna thuakin na ka sa hi. Pasian aw, kei hong kaito-in hong honkhia ta in. Lasakna tawh Pasian’ min ka phat ding a, lungdamna tawh amah ka pahtawi ding hi. Hih banga hihna in bawngtal tawh biakna ahi a, bawngtalno tawh biakna sangin zong Topa lungdamsak zaw ding hi. Netniamna a thuakte in hih thu mu-in lungdam uh hen. Pasian a zong note aw, na lungsim uh nosuaksakkik un. Bang hang hiam cih leh Topa in a cimawhte’ aw za a, henna sungah a om a mite simmawh lo hi. Vantung le leitung, tuipi le a sungah a om khempeuhte in amah phat ta uh hen. Bang hang hiam cih leh Pasian in Zion honin Judah khuapite lamkik ding a, a nasemte tua lai-ah tengin tang pah ding uh hi. Ama nasemte’ tate in tua leitang luah ding uh a, amah a itte tua sungah teng ding uh hi. Pasian aw, keimah hong honkhia nuam in. Topa aw, keimah a huh dingin hong manlang in. Kei, thah hong sawmte maizumin kibuaigawp sak in. Keima siatna ding a deihte nungkiksak inla, mindaisak in. “Ha, ha!” a cite a maizumna uh tawh maikhingsak in. Nang hong zongte khempeuh lungdam mahmahin na min hangin kipak tahen. Na hotkhiat ding a utte in, “Pasian lian hi,” cici tahen. Ahih hangin kei zawngin ka cimawh hi. Pasian aw, hong manlang in. Nang pen keimah huhpa le hong honkhia pa na hi hi. Topa aw, hong zekai kei in. Topa aw, nang kong bel hi. Kei hong zahhuaisak kei in. Na thumanna tawh kei hong huh inla, hong honkhia in. Keima lamah na bil hong ngat inla, hong hon in. Hong hon dingin ka belh suangpi, ka kulh muanhuai, hong hi ta in; bang hang hiam cih leh keimah hong honpa le ka belh pa na hi hi. Ka Pasian aw, migilote’ khutsung pan le thuman lo mite le migilote’ matna panin keimah hong hon in. Bang hang hiam cih leh Topa Pasian aw, ka neu lai a kipanin ka hong lamet, ka hong muan na hi hi, Topa aw. Ka suah tung a kipanin nangmah kong bel a, ka nu’ gil sung panin hong lakhia pa na hi hi. Nangmah ka hong phat ngitnget hi. Mi tampite a dingin a siahil bang ka hih hangin nang pen a muanhuai, keima belh na hi hi. Sunthapai-in nangmah ka hong phat a, na minthanna ka gen tawntung hi. Ka teek hun ciangin kei hong lawnkhia kei inla, ka tha a kiat ciangin kei hong nusia kei in. Bang hang hiam cih leh ka galte kihoho-in, keimah hong thahnopna thu kikumkum uh hi. “Pasian in amah nusiazo a, amah a hon ding kuamah om lo ahih manin, amah delhin man ni,” kici uh hi. Pasian aw, kei kiang panin gamla om kei in. Ka Pasian aw, keimah a huh dingin hong manlang in. Kei hong mawhsakte zahhuai-in beimang uh hen la, keima siatna ding a zongte simmawhna le minsiatna in tuamcip tahen. Ahih hangin ke’n, nang kong lamen ding a, nangmah kong phat semsem lai ding hi. Thuman tawh na hotkhiatna na nasepnate simzawh lohin tam ahih manin sunthapai-in ka gengen ding hi. Topa Pasian aw, na nasep liante ka phat ding a, na thumanna bek genin ka nei ding hi. Pasian aw, ka khangno lai a kipanin nong thuhilh a, a lamdang na nasepnate ka gengen lai hi. Tua ahih ciangin Pasian aw, hong piang lai ding mite khempeuh tungah nangma hatna thu ka gen khit matengin, teekin ka sam a kang zongin kei hong nusia kei in. Pasian aw, na vangliatna le na thumanna in van sangpite banto hi. Pasian aw, na lianpipi na sem khinzo hi. Nang tawh a kibang kua om ahi hiam? Gimna lianpipi a hong tuaksak nangmah in kei nong hingkiksak ding a, lei thukpi sung panin nong lakhiato ding hi. Nangmah in ka min hoihna nong khangsak ding a, nong hehnem kik ding hi. Ka Pasian aw, na thumannate hangin kei zong harp lasakna tawh nangmah kong phat ding hi. Israel-te’ Siangtho Pa aw, laiza lasakna tawh nangmah phatna ka sa ding hi. Nangmah phatna ka sak ciangin nuamin ka awng ding a, na hong hotkhiatna hangin ka lungsim khempeuh tawh nuamin ka awng ding hi. Keima siatna ding a zongte kizahhuaisak khin a, minsia khinzo ahih manun thuman tawh na hong huhna sunthapai-in ka gengen ding hi. Pasian aw, nangma thutang, kumpipa hilh inla, nangma thuman, kumpi tapa hilh in. Amah in thumanna tawh na mite tungah thu khen hen la, na mizawngte tungah thu a tangin khen tahen. Mual liante le mual neute in thumanna tawh na mite a dingin nopna tampi piangsak tahen. Amah in mizawngte a’ ding thu a manin khen hen la, mi cimawhte tungah suahtakna pia-in, midang a nengniamte sucipgawp tahen. Ni le kha a omlaiteng, khang tawntungin amah hing tahen. Amah pen pawn lak lopa tungah a kia guah, lei a kawtsak guahzu tawh kibang tahen. Ama hun sungin thuman pung hen la, khapi a bei mateng nopna om tahen. Ama ukna, tuipi khat pan tuipi khat, Gunpi panin leimong dongin om tawntung tahen. Ama galte khempeuh ama mai-ah kun uh hen la, amah a langpangte leilak kidenna uh hen. Tarshish kumpite le tuikulh neu-a kumpite in ama tungah siah pia uh hen la, Sheba le Seba kumpite in letsong puak ta uh hen. Kumpi khempeuh ama mai-ah bok uh hen la, minam khempeuh in ama na sem ta uh hen. Bang hang hiam cih leh mi cimawhte in a koh ciangin amah in honkhia a, mizawng, a huh ding a om lote amah in a honkhia hi. A thakiam, a cimawh mite amah in hehpih a, mi cimawhte’ nuntakna amah in a honkhia hi. Amah in amaute pammaihsa ahih manin netniamna le ngong hihna panin amaute a honkhia hi. Amah a khansau hen la, Sheba gam a khamte ama tungah kipia tahen. Ama a dingin thu kingetsak tawntung hen la, sunthapai-in ama a dingin thupha kingetsak tahen. Gam sung khempeuhah an tampi tak piang hen la, mual liante dawnah dim mema-in Lebanon gam hoih sung bang ta hen la, gamlak a lopate bangin khuapite sunga om mite pung ta uh hen. Ama min kip tawntung hen la, a minthanna kip paisuak hen. Ama hangin mite in thupha ngah hen la, minam khempeuh in amah pen thupha ngah pa, ci ta uh hen. Na lamdangte a bawl amah bek ahi Israel Pasian, Topa in thupha ngah tahen. A minthang ama min in thupha ngah tawntung hen la, ama minthanna tawh leitung khempeuh kidim tahen. Amen! Amen! Jessi’ tapa David’ thungetnate a beita ahi hi. Israel mite bangin a lungsim a siangtho a thutang mite tungah Pasian hoih takpi hi. Ahih hangin kei ka hih leh ka khe kisuipuk dektak a, ka khe taal dektak hi. Bang hang hiam cih leh migilote’ daupaina ka muh ciangin mi kihisakte ka eng hi. Bang hang hiam cih leh amaute in nat velvalna bangmah thuak lo uh a, a pumpi uh cidamin zol hilhial hi. Amaute in midangte bangin haksatna thuak lo uh a, amaute in midangte bangin gimna ngah lo uh hi. Tua ahih ciangin amaute in khainiang bangin kiphatsakna ok uh a, puan bangin ngongtatna silh uh hi. A lungsim panun gitlohna pusuaksak uh a, a ngaihsutna uh gitlohna tawh a dimlet hi. Amaute in mi thusim loin el pau uh a, kiliatsakna tawh a sucip dingin mi a tawng uh hi. Amaute’ gensiatna in vantung dong banto a, kiliatsakna tawh leitungah thu gen kawikawi uh hi. Tua ahih ciangin mite in amaute phat uh a, amau’ mawhna zong lo uh hi. Amaute in, “Pasian in bangci theih ding ahi hiam? Sangpenpa in phawk ding ahi hiam?” ci uh hi. Amaute migilo ahi uh hi. A tawntungin nuamtakin om hithiat uh a, amaute a hauhna uh khang semsem zaw lai hi. Ka lungsim siangsak a, mawhna ka bawl loh hangin a phattuamna om tuan lo hi. Bang hang hiam cih leh sunthapai-in gimna ka thuak a, zingsang simin hong kithuhilh hi. Tu-a bangin thu a gen hi leng, nangma mite tungah a thutak lo ka suak ding hi. Ahih hangin hih thu a bangci hiam, ci-in ka ngaihsut ciangin kei a dingin a lunggimhuai mahmah nasep khat hong suak a, Pasian’ biakinn sungah ka pai ciangin a thutawpna dongte ka tel hi. Nangmah in amaute mun nalna-ah na koih takpi ding a, a sia dingin amaute na tuksak ding hi. Tomno sungin amaute kisusia-in, lau mahmahna in amaute nilkhiamang ding hi. Amaute pen zan a mangmat tawh kibang lel a, na khanlawh ciangin amaute a bangci pian hiam, ci-in na phawk nawn kei hi. Ka lung khamin ka lungsim hong nat ciangin, keimah hai-in bangmah ka thei kei a, nangma mai-ah ganhing tawh ka kibang hi. Ahih hangin nangmah tawh ka omkhawm ngitnget a, ka khut taklamin kei na hong len hi. Thulahna tawh keimah nong makaih a, a nung ciangin minthanna munah na hong tunpih ding hi. Nang simloh vantungah kua nei ka hi hiam? Nang simloh ka deih ding leitungah kuamah om lo hi. Ka lungsim le ka pumpi zawngkhal kha ding a, ahih hangin Pasian pen ka lungsim hatna le keima a’ hi tawntung ding hi. Bang hang hiam cih leh nang tawh a kigamlate kisia ding uh a, nangma tungah a hong khialte na beisak ding hi. Ahih hangin kei a dingin Pasian’ kiangah om ding a hoih ahi hi. Na sepnate khempeuh ka gentheih nadingin Topa Pasian ka hong bel hi. Pasian aw, bang hangin kote hong paaikhia paisuak na hi hiam? Bang hangin na gam sunga om nangma tuute tungah heh na hi hiam? Tanglai-in na ngahsa na mihonte, nangma luah minam dingin na tatkhiatsate phawk in! Na tennasa Zion Mual hong phawk in. A sia densa munah hong pai in. Na biakinn sunga om khempeuh galte in susia khinta hi. Nangma galte mun siangtho laizangah awng uh a, amau’ dialte gualzawhna lim dingin a khai uh hi. Amaute pen tulak sing phatna-ah pai-in heipi tawh sing a phuk bang uh hi. Tua ciangin biakinn na a kizemte khempeuh sek-hei le sekpi tawh a satkham uh hi. Amaute in mei tawh na biakinn hal uh a, nangmah hong kibiakna mun a susia uh hi. Amaute in, “A vekpi-in zo mang khin ni,” kici uh a, gam sung tenga om Pasian biakna inn khempeuh mei tawh a hal uh hi. Kote in ka mailam thu ding uh ka thei kei uh hi. Kamsang khat zong om nawn lo a, bang tanvei hi ding, ci-in a thei kuamah ka om kei uh hi. Pasian aw, ka galte in bang tanvei hong thusim loin om ding ahi hiam? Langpangte in nangma min hong simmawh den ding ahi uh hiam? Bang hangin na khut dokkik a, na khut taklam na ang-ah koihcip na hi hiam? Ahi zongin Pasian pen tanglai pek a kipanin kumpi hi tawntung a, hih leitungah a hong honkhia zelzel ngei ka Kumpi ahi hi. Na vangliatna tawh tuipi na khenkham a, tuite tunga gulpite’ lutangte na sukham hi. Nangmah in Awle’ lutangte na sukham a, amah pen, gamlak ganhingte’ nek dingin na pia hi. Ciktuite le luite na phulsak a, guntui luangte na kangsak hi. Sun pen nangma a’ hi a, zan zong nangma a’ mah ahi hi. Nangmah in ni le kha na bawl hi. Leitung gamgi khempeuhte le phalbi hun le khuakhal hunte na bawl khin hi. Topa aw, galte in nang hong thusim lohna le, dawibia mite in nangma min a hong simmawhna hong phawk ta in. A cimawh mite a gal gilote uh khut sungah nusia kei inla, bawlsiatna a thuak mite mangngilh kei in. Nangma thuciamna hong pi ngaihsut in; bang hang hiam cih leh leitung mun mialna khempeuh mi ngongtatte tawh kidim hi. A kisikcip mite zahhuaisak kei inla, mizawng le mi cimawhte nangma min kiphatsak in. Pasian aw, tho inla, nangma thu-ah hong pang in. Dawibia mite in sun tawntungin nang a hong thusim lohna hong phawk ta in! Nangma galte’ kikona aw, nang a hong langpangte a gamlum semsemna mangngilh kei ta in. Pasian aw, nangma tungah ka lungdam mahmah uh a, nangma tungah ka nuam mahmah uh hi. Nangma liatna thu ka gen uh a, a lamdang na bawlnate ka sut kikkik uh hi. A hun ka sehsa ni ciangin thu a manin ka khen ding hi. Leitung le a tunga tengte khempeuh a kilin’ ciangin a khuampite a kipsak pa keimah ka hi hi. A kiphasakte tungah, “Kiphasak kei un,” a gilote tungah, “Kihisak kei un. Kihisak kei unla, kiphatsakna tawh kampau kei un,” ka ci hi. Bang hang hiam cih leh vangliatna pen nisuahna lam ahi a, nitumna lam ahi a, gamlak pan ahi zongin a hong pai hi lo hi. Mihing khat a sangsak, mihing khat a niamsak thukhen pa pen Pasian ahi hi. Bang hang hiam cih leh Topa’ khut sungah leenggahzu a phuan, a kihelkim ngingei hai khat om a, amah in tua sung panin hong bungkhia ding a, leitung migilo khempeuh in a tawdat dong takin a liaktum ding uh hi. Ahih hangin kei ahihleh ka lungdam ngitnget ding a, Jakob Pasian’ tungah phatna late ka sa ding hi. Migilote’ vangliatna khempeuh amah in susia ding a, ahih hangin thuman mite’ vangliatna khang semsem ding hi. Judah gam sungah Pasian kithei a, Israel gam sungah ama min lian hi. Zion khua sungah ama tenna mun kibawl hi. Amah in tua lai-ah thaltangte, lum, namsau, le galhiamte a kuaitan hi. A om ngitnget mual liante sangin na min thangzaw a, na lianzaw hi. A thahatte’ neihsa nate kisutkhia a, amaute ihmucip suak uh hi. Jakob’ Pasian aw, nangma thuhilhna hangin sakol le a tung tuang pa khawlcip uh hi. Ahih hangin nang na kihtakhuai mahmah hi. Na heh khit phot ciangin nangma mai-ah kua ding ngam nawn ding ahi hiam? Mihingte’ hehna in nang hong kiphatna ding piangsak ding a, na hehna panin a suakta mite in nangmah pahtawina pawi a bawl ding uh hi. Pasian’ tungah a gingin ka kiko khia a, a hong zaktheih nadingin a gingin ka kiko hi. Ka lungkham hunin keimah in Topa ka zong hi. Zanin thu ngenin gim hetloin ka khut ka zan a, ahi zongin hehnepna ka ngah kei hi. Keimah in Pasian ka ngaihsun a, ka tautau hi. Lung ka geelgeel a, ka gim mahmah hi. A ihmu lo dingin kei na hong bawl a, lungkham lua-in ka pau thei kei hi. Hun luite ka ngaihsun a, sawtpek lai-a kumte ka phawk hi. Zanthapai-in ka lungsimah ka kihoho a, lung geelgeelin thu ka kan ciangin: “Topa in hong nial paisuakin, kei tungah maipha hong piakik lo ding hiam? Ama itna kip bei paisuakin, ama thuciamte maimang suak ding hiam? Pasian in hehpihna a neih ding mangngilh khinta ahi hiam? Ama hehna in hehpihnate vukcip khin ahi hiam?” ka ci hi. Tua bang ahihleh, “Sangpenpa’ hat nawn lohna pen ka khakham veina ahi hi,” ka ci hi. Topa’ sepnate ka lungsimah ka phawk ding a, hun lui lai-a nangma na lamdangte ka ciamteh ding hi. Nangma nasepna khempeuh ka lungngaingai ding a, nangma sep na liante ka ngaihsunsun ding hi. Pasian aw, nangma lampi siangtho hi. Eima Pasian tawh kibangin bang pasian lian ahi hiam? Nang pen na lamdangte a bawl, minam dangte’ lakah na vangliatna a langkhiasak khin Pasian na hi hi. Nangmah in na vangliatna tawh Jakob le Josef’ suante, na mite na honkhia hi. Tui in nang hong muh ciangin Pasian aw, tuite in nang hong muh ciangin a lau uh hi. Tui thukpi zong a ling hi. Meiipite in tui sungkhia-in, vante ging damdam a, nangma thaltangte mun citengah a leeng uh hi. Na vanging lianpi pingpei sungah omin, khuaphialepte in leitung taan a, leitang linggawpin a kising damdam hi. Nangma lamlianpi tuipi tung hi a, nangma lamneute zong luiliante’ tung mah ahi hi. Ahi zongin na khekhapte kimu lo hi. Nangmah in Moses le Aaron’ khut tawh nangma mite tuuhon bangin na makaih hi. Ka mite aw, keima hilhna ngai unla, ka kam tawh ka thugente na bil uh hong ngat un. Hih thute, i tate tungah eite in im loin, a hong piang lai ding khang thakte tungah, Topa’ minthang nasepna, ama vangliatna, ama sepsa na lamdangte i gen ding hi. Thal a tawi Efraim mite, galkido ni-in nungkik uh hi. Amaute in Pasian’ thuciamna zui lo uh a, ama thukham bangin gamta nuam lo uh hi. Ama bawlsa le amaute tungah nalamdang a lahsate amaute in mangngilh uh hi. Egypt gam sung Zoan munah, a pu a pate uh’ muhna-ah amah in nalamdang a bawl hi. Amah in tuipi kikhensakin amaute kantansak a, tuite a lompi-in a omsak hi. Sun hunin amah in amaute meiipi khat tawh kha a, zan tawntung, meikuang taang khat tawh amaute a kha hi. Amah in gam sungah suangpite kitamsak a, tuithukpi sung panin a piangkhia bangin amaute’ tungah tui dawn ding tampi a pia hi. Amah in suangpi sung panin luitui luangkhiasak a, guntui luang bangin tuite a luangsak hi. Ahi zongin ama tungah amaute khial lailai uh a, Sehnel gam sungah Sangpen pa a lehpan uh hi. Amaute in amau’ duh mahmah an a kalhna uh tawh amaute in a lungsim sung uhah Pasian a ze-et uh hi. Amaute in Pasian gensia uh a, “Pasian in gamlakah an pia thei ding ahi hiam? Amah in suangpi sat a, tui lengkhia-in tuite dimlet takpi ahi hiam? Amah in ama mite, an ahi a, sameh ahi zongin a pia thei takpi ahi hiam?” a ci uh hi. Topa in tua thu a zak ciangin hehna tawh kidimin, meikuang tawh Jakob sugawp a, Israel tungah a heh semsem hi. Bang hang hiam cih leh amaute in Pasian um lo uh a, a honkhiazo dingin muang lo uh hi. Ahi zongin amah in, tunga om vantungte thu pia-in, vantung kongte hong a, nek dingin amau tungah manna an zusakin, amaute tungah vantung an a pia hi. Mihingte in vantung mite’ an ne uh a, amah in amaute tungah an tampi a puak hi. Amah in vantungah nisuahna huih nungsakin, ama vangliatna tawh leitaw lam huih paikhiatpih a, amah in amaute tungah leivui zah-a tam sa zusak a, tuipi sehnel zah-a tam vasate a khiatsuk hi. Amau’ giahphual laizang, amau’ omna kiim khempeuhah tuate a kiasak hi. Amau’ duh pen pia ahih manin, amaute in ne-in gilvah uh hi. Ahih hangin amaute in a duh pen uh a kham ma, amau’ kam sungah an a omlaipi mahin, amaute’ tungah Pasian’ hehna tungkikin amah in amaute lakah a hatpen teng thatin, Israel-te’ muanlesuan teng a vatlum hi. Hih na lamdangte khempeuh a omkhin hinapi-in amaute khial lai veve uh a, ama na lamdangte’ hangin amaute in um tuan lo uh hi. Tua ahih ciangin amah in amau’ hunte husan’ khat bangin maimangsak a, amau’ nuntakna, launa lianpi tawh a beisak hi. Amaute pawlkhat a thah khit ciangin a omlai mite in amah zong pan uh hi. Amaute kisikin, lungsim taktak tawh Pasian a zong uh hi. Amaute in Pasian pen, amaute a honkhia, Sangpen Pasian, amaute a hupa ahihna a phawk uh hi. Ahih hangin amaute in a kampi bek uh tawh amah phatkhem uh a, a leii uh tawh ama tungah zuaugen uh hi. Amaute’ lungsim ama lamah kip lo uh a, ama thuciamna-ah amaute thuman lo uh hi. Ahi zongin amah in hehpihna lungsim nei ahih manin amau’ khialhnate maisakin, amaute susia lo hi. Amah in a hehna ip zelzel a, a hehna khempeuh phongkhia lo hi. Amah in, amaute pen mihing hi lel a, a hong paikik nawn lo huihnung bang ahihna uh a phawk hi. Amaute in gamlakah amah lehdo zelzel uh a, sehnel gam sungah amah dahsak uh hi. Amaute in amah ze-et kikkik uh a, Israel-te’ Siangtho Pasian a phin uh hi. Amaute in a luituite uh a dawn theih loh nadingin amau’ guntuite amah in sisan a suaksak hi. Amaute a petthei cippi honte, amaute’ lote a susia uiphukte amau’ lakah a sawl hi. Amau’ lo ante tangngol pia a, amau’ sepna gahte kauphe a pia hi. A leengguite uh gial tawh denggawp a, a theithekte uh vukkhal tawh susia hi. A ganhingte uh gial tawh denglum a, a gan khawite uh keek tawh a denglum hi. Amaute’ tungah a lauhuai ama sinsona, hehna, thangpaihna, gimna, le a susiathei van mi honkhat a khah hi. Amah in a sinsona ip loin, kuamah hinkhawi lo a, pulnatna tawh amaute a sisak hi. Ham’ suante’ inn sungah a ta upa pen teng, Egypt gam sung tacil khempeuh amah in a vatmai hi. Tua ciangin amah in tua bangin ama mite gamlakah paikhiatpihin, ganhing honpi bangin amaute a paipih hi. Amah in a muanhuaina munah amaute paipih ahih manin amaute lau lo uh hi. Ahih hangin tuipi in amau’ galte tuumcip hi. A khut taklam tawh ama ngahsa mual ahi, a gam siangtho-ah amaute a paipih hi. Amau’ mai panin midangte hawlkhia-in, amaute’ luah ding neihsa hawmsak a, Israel minamte amau’ buk sungah a tengsak hi. Ahi zongin amaute in Sangpen Pasian ze-etin lehdo uh a, ama thupiakna zui loin, a pu a pate uh mah bangin kiheikhia-in a zuau gamtat uh hi. Thal ginalo bangin amaute a kihuiheek uh hi. Bang hang hiam cih leh amaute in a munsangte uh tawh amah a sinso nadingin phinphin uh a, amau’ milim bawlte tawh ama hazatna ding a piangsak uh hi. Pasian in a zak ciangin heh pha mahmah a, amah in Israel-te a nial siangtho hi. Mihingte’ lakah ama omna puanbuk ahi, Shiloh khua-a ama omna biakinn nusia a, ama vangliatna, galte’ tungah ap a, ama minthanna, galte’ khutah a pia hi. Amah in ama mite namsau tawh sisak a, ama luahte tungah a hehna a nga hi. Mei in a tangvalte kanglum a, a nungakte’ pasal ding kuamah om nawn lo hi. Amau’ siampite, namsau in puksak a, amau’ zite in a pasalte kah zo lo uh hi. Tua ciangin Topa pen zukhamin a awng mi thahatpa, a ihmu tho bangin a khanglo hi. Amah in a langpangte zo a, a maizum tawntung dingin amaute a koih hi. Amah in Josef’ suante nial a, Efraim minamte teello hi. Ahih hangin ama it Zion Mual, Judah minam a teel hi. A kip den dingin a phuhsa leitang bang leh, a vantung inn bangin ama biakinn a lam hi. Amah in lungsim thutang tawh amaute hoihtakin cingin, a siam mahmah a khut tawh amaute lam a lak hi. Pasian aw, na luah gam sungah dawibiate hong pai uh hi. Amaute in na biakinn siangtho ninsak gawp uh a, Jerusalem khuapi siasak gawp khin uh hi. Amaute in, na nasemte’ luanghawmte huihlak vasate pia uh a, na mi siangthote’ sate leilak ganhingte a pia uh hi. Amaute in Jerusalem kimkotah tui buakkhiat bangin amaute’ sisan buakhia uh a, amaute a vui ding kuamah om lo hi. Kote pen ka vengte uh’ zahko, ka kiim uha omte in a hong ko a hong nuihsat ka suak khinta uh hi. Topa aw, bang tanvei hi ding ahi hiam? Heh paisuak ding na hi hiam? Nangma hazat hehna meikuang bangin kuang paisuak ding ahi hiam? Nangmah a hong thei lo minamte tung le, nangma tungah thu a hong ngen lo kumpi gamte tungah hehgawp in. Bang hang hiam cih leh amaute in ka mite uh thatmang khin uh a, ka gam sung khempeuh uh susiagawp khin uh hi. Ka pu ka pate uh mawhna hangin ko a suanlekhakte hong lang ngaihsut kei inla, hong kiniamkoih ahih manin kote a huh dingin na hehpihna hong paisak mengmeng in. Kote a hong honkhia Pasian aw, nangma min a than nadingin kote hong huhin, nangma min hangin kote hong khahkhia-in, ka mawhnate uh hong maisak ta in. “Amaute’ Pasian koi-ah om ahi hiam?” minam dangte in a cih ding kilawm ding ahi hiam? Na nasemte’ sisan luangkhia a phulakna pen, minam dangte’ lak, komau’ muhna-ah kitheisak in. Thongkiate’ tauna ngai inla, thah dingin a kisehte na vangliatna tawh kizui-in suaktasak in. Amaute in nang hong zahkona mah tawh ka vengte uh’ ang sungah a zah sagihin thuk in, Topa! Tua ciangin nangma mi, nangma gam sung tuu kote in nangma tungah lungdamna kong lak ngitnget ding uh a, a khang khangin nangmah phatnate ka gengen ding uh hi. Tuuhon bangin Josef a paipih, Israel Tuucingpa aw, ngai in! Kherub tungah a tupa aw, Efraim, Benjamin le Manasseh’ mai-ah taangkhia in! Na tha saan inla, kote a honkhia dingin hong pai ta in. Ka ngei uh hong bangsakkik in, Pasian aw. Kote khempeuh hong kihotkhiat theih nadingin na maitang hong taangsak in. Vanglian Topa Pasian aw, na mite’ thungetna-ah bang tanvei sinso niloh ding na hi hiam? Nangmah in a an dingun amaute tungah khitui na pia a, amaute’ dawn dingin khitui tampi na pia hi. Nangmah in, ka vengte uh’ thusim lohin kote na hong bawl a, ka galte un hong thusim loin hong nuihsan uh hi. Ka ngei uh hong bangsakkik in, Vanglian Pasian aw. Kote khempeuh hong kihotkhiat theih nadingin na maitang hong taangsak in. Nangmah in Egypt panin leenggui khat na la a, minam dangte hawlkhia-in, tua leenggui na suan hi. Nangmah in tua leenggui a dingin leitang na hahsiang a, amah in zungthuk kha-in gam sung a dim hi. Ama liim in mual liante hoihtakin liimsun a, a hiang in taamtak sing liante hoihtakin khuh a, tuipi lamah a hiangte zamin, a dawnngekte in Gunpi lam a zuan hi. Tua ahih ciangin, lampi-ah a pai mi khempeuh in a gah a lawhtheih nadingin, bang hangin nangmah in a daigawl suvang na hi hiam? Gamlak a om ngal in susiagawp a, zangsung sa khempeuh in kivakna-in nei uh hi. Amaute in mei tawh halin sattan gawp uh hi. Amaute heh et inla, susiagawp in. Ahih hangin nangma a dingin na hatsak mi’ tapa, na taklama om mipa tungah na thahatna guan in. Tua ciangin nang kiang panin ka kiheikik nawn kei ding uh hi. Kote hong nungtasak in, nang kong phat ding uh hi. Ka ngei uh hong bangsakkik in, Vanglian Topa Pasian aw. Kote khempeuh hong kihotkhiat theih nadingin na maitang hong taangsak in. Eite’ thahatna Pasian’ tungah nakpitakin la sa unla, Jakob Pasian’ tungah lungdamin awng un. La khat phuangin, khuangno tumin, a ngaih laiza khausai lasakna le harp khausai lasakna limtakin tum un. Khadet, khalik, i pawi ni-in peengkul tum un. Bang hang hiam cih leh, tua bang hih ding pen Israel-te a dingin thukham hi a, Jakob Pasian’ biakna ngeina a kip khat ahi hi. Egypt gamah a pai lai-un Israel mite’ tungah thupiakna-in amah in a neih ahi hi. Ka theih ngei loh kampau khat hih bangin ka za hi: “Na liangko uha om na vangikte uh ka hong lakkhiatsak a, na khut uha vangikte ka hong khiasak hi. Na cihmawh uh ciangin kei na hong sam uh a, keimah in note ka hong honkhia hi. A kilang lo vanging sung panin note ka hong dawng a, Meribah tui phualte-ah note ka hong ze-et hi. Ka mite aw, note kong thuhilh laitakin limtakin hong ngai un. Israel-te aw, keima thu a hong ngai hi hoh le-uh cin! Note’ lakah pasian dang om lo ding a, pasian dang khat’ mai-ah na kun kei ding uh hi. Egypt gam panin note a hong lakhia, Topa na Pasian uh ka hi hi. Na kam uh a golin ka un, keimah in kong dimsak ding hi. “Ahih hangin ka mite in keima thu hong ngai lo uh a, Israel-te in keima thu themkha zong zui lo uh hi. Tua ahih ciangin a ut bangun a gamta dingin amau’ lungsim khauhna bangin ka gamtasak hi. Ka mite in ka thu hong ngai-in, keima deih bangin Israel a gamta hileh! Amau’ galte khempeuh ka zawhsak pak ding a, amau’ galte langpangin ka khut ka liik ding hi. Kei a hong mudahte ka mai-ah hong kun ding uh a, amaute’ gimthuakna kip paisuak ding hi. Mangbuh hoihpen tawh note ka hong vak ding a, suangpi pana khuaizu tawh note kong gilvahsak ding hi,” a ci hi. Thu vaihawm kikhopna sungah Pasian in ama panmun hong len a, amah in pasian-te’ lakah thu a khen hi. “Note in bang tanvei a man loin thu khenin, migilote tungah angvanna zang ding na hi uh hiam? A ginalo mite le pa a nei lo mite tungah thuman unla, a thuakte le a cimawhte’ thu a manin khen un. A ginalo mite le a cimawh mite hon unla, migilote’ khutsung panin amaute honkhia un,” a ci hi. Amaute in thutheihna ahi a, thutelna ahi zongin bangmah nei lo uh a, khuamial sungah gamta uh ahih manin leitung bulpite khempeuh a kilinggawp hi. Ke’n kong cihin-ah, “Note khempeuh, Sangpenpa’ tate, pasian-te na hi uh hi. Ahi zongin mite bangin si-in, kumpi khat peuhpeuh bangin na kia ding uh hi,” kong ci hi. Pasian aw, tho in; leitung mite thu khen in. Bang hang hiam cih leh minam khempeuh nangma a’ ahi hi. Pasian aw, dai dide-in om kei in. Lungnuamin, tang loin ommawk kei in, Pasian aw. Bang hang hiam cih leh na galte in gamlumna piangsak uh a, nang hong mudahte kiphasak mahmah uh hi. Amaute in khem siamna tawh na mite thangsiah uh a, amaute in na it mite langpangin thu kikum uh hi. Amaute in, “Hong pai un, minam khat hihna panin amaute beisak ni. Israel min peuhmah kiphawksak nawn kei ni!” ci uh hi. Amaute in siatna ding geelin kithukhat uh a, nangmah hong langpangin thuciamna a bawl uh hi. Edom mite le Ishmael mite, Moab le Hagri mite, Gebal, Ammon, le Amalek mite, Filistia le Taia khua mite tawh thuciam a bawl uh hi. Assiria mite in zong amaute pawlpih uh a, amaute pen Lot’ suanlekhakte a dingin pawl muanhuaite ahi uh hi. Ka Pasian aw, amaute pen pingpei sunga ninnen, huih mai-a ansi leeng bangsak ta in. Mei in gamlak a haltum bang, mualliante a kuansak bangin na khuapi huihpi tawh amaute delh inla, na huihpi tawh amaute lausak gawp in. Topa aw, amaute in na min hong zontheih nadingin amaute khempeuh maizumna tawh kidimsak in. Amaute maizumin lungkia densak inla, a mindai-in siasak in. Topa a kici min nei nangmah bek leitung khempeuhah a Sangpenpa na hihna amaute theisak in. Vanglian Topa aw, nangma tenna mun bangzah takin etlawm ahi hiam? Ke’n ka lunggulh mahmah hi. Topa’ huangsung ka lunggulh mahmah a, ka lungsim le ka pumpi a nungta Pasian’ tungah lungdam mahmahin la a sa hi. Vanglian Topa, ka kumpi le ka Pasian aw, na biakna tau-ah, kawlgit nangawn in a inn ding mu a, phialphiah in a omna ding, a note a koihna ding bu a mu hi. Nangma inn sungah tengin, nangmah phatna a sa ngitnget mite thupha ngah mi ahi uh hi. Nangma tung panin thahatna ngahin Zion zuatna lampi a tawn nuam mite thupha ngah mi ahi uh hi. Amaute in Kuamkeu mun kantanin a pai laitakun tua kuam pen ciktui tampi tawh kidim a, guahzu masate in zong tua mun pen bualtuite tawh a kidimsak hi. Amaute a paikawmun a tha uh hat semsem a, pasian-te’ Pasian Zion-ah mu ding uh hi. Vanglian Topa Pasian aw, ka thungetna hong za inla, ka thungetna hong ngai in, Jakob Pasian! Pasian aw, kote a hong hu ding pa hong etsak inla, na sathau nilh pa hong kem in. Bang hang hiam cih leh mun dangah ni tulkhat om sangin nangma huang sungah ni khat om hoihzaw hi. Gitlohna inn sungah ka ten sangin ka Pasian’ inn kongcing pa ka hi nuamzaw hi. Bang hang hiam cih leh Topa Pasian pen eite a hong hupa a minthang i kumpi hi a, maipha le pahtawina a hong piapa ahi hi. Thumanin a gamta mite tungah Topa in na hoih bangmah siit lo hi. Vanglian Topa aw, nangmah a hong muang mite, thupha ngah mi ahi uh hi. Topa aw, nangma leitang na hehpih a, Jakob’ nopsaknate a ngeina na bangsakkik hi. Na mite’ mawhna na maisak a, amau’ khialhna khempeuh na maisak hi. Na hehna khempeuh na damsak a, na sinsona na daisak hi. Kote hong honkhia Pasian aw, kote ka ngei uh hong bangsakkik inla, kote tunga na lungkim lohna hong beisak ta in. Kote’ tungah heh paisuak ding na hi hiam? Khang tawntungin heh paisuak ding na hi hiam? Kote in nangmah kong phat theih nadingun ko na mite hong nungtasakkik lo ding na hi hiam? Topa aw, kote tungah na itna kip hong lak inla, hong huhin hong hon in. Topa Pasian’ thugen ding hong zasak dih un. Bang hang hiam cih leh ama lamah lungsim takpi tawh a kihei ama mi siangtho, ama mite’ tungah kilemna thu a gen ding hi. I gam sungah minthanna a om theih nadingin amah a zahtakte a dingin ama hong hotkhiatna hong om takpi hi. Itna kip le thutak kigawm ding a, thuman le kilemna kihual ding uh hi. Leilak panin thutak hong pokhia ding a, vantung panin thuman in hong ensuk ding hi. Topa in a hoih nate eite tungah hong pia ding a, i leitang in hauhna piangsak ding hi. Topa’ mai-ah thuman na ma pai ding a, ama lampi a bawlkhol ding hi. Topa aw, kei hehpihhuai-in cimawh ka hih manin na bil hong ngat inla, hong dawng in. Mihoih ka hih manin kei hong kem in. Nangmah a hong muang na nasempa hong hon in. Nang pen ka Pasian na hi hi. Topa aw, sun tawntung hong kiko ka hih manin kei hong hehpih in. Topa aw, nangma tungah thu hong ngen ka hih manin na nasempa hong kipaaksak in. Bang hang hiam cih leh Topa aw, nangmah hoihin mawhna na maisak a, hong ngente khempeuh tungah itna kip tampi na nei hi. Topa aw, ka thungetna hong za inla, nang tungah thumin kong kikona hong ngai in. Kei hong dawng na hih manin ka haksat hun ciangin nangma tungah kong ngen hi. Topa aw, pasian-te lakah nang tawh a kibang kuamah om lo a, nangma sep bang, kuamah in sem thei lo hi. Topa aw, na bawlsa minam khempeuh hong pai-in na mai-ah hong kun ding uh a, nangma min hong phat ding uh hi. Bang hang hiam cih leh nangmah lianin na lamdangte na bawl a, nang bek Pasian na hi hi. Topa aw, nang tungah hong thumanin nangma lampi ka zuih theih nadingin kei hong hilh inla, nangma min a zahtakte tawh keima lungsim pumkhat hong bangsak in. Topa ka Pasian aw, ka lungsim khempeuh tawh na tungah ka lungdam a, nangma min ka thangsak ngitnget ding hi. Bang hang hiam cih leh keimah na hong itna kip lian mahmah a, Leinuai thuk sung panin kei nong honkhia khin hi. Pasian aw, mi kihisakte, kei langpangin hong kipan hi. Thu-helhawt mi pawlkhat in kei, thah hong sawm uh a, amaute in nang hong thudon lo uh hi. Ahih hangin Topa aw, nang pen a hehpih thei, a dik Pasian na hi a, heh hak mahmahin, itna kip le thumanna tawh a kidim na hi hi. Kei lamah hong kihei inla, kei hong hehpih in. Na nasempa thahatsak inla, na nasem numei’ tapa hong hon in. Topa nangmah in kei hong huhin, nong thahatsakna hangin, kei hong mudahte in mu-in a zahhuai nadingun keima tungah na maipha hong lak in. Mual Siangtho tungah ama phuhsa khuapi om hi. Topa in Israel gam mundang khempeuhte sangin Zion kulhkongpi itzaw hi. Pasian’ khuapi aw, na minthanna teng hong kigengen hi. Kei hong theite lakah Egypt le Babylon ka hel hi. Filistia, Taia le Ethiopia te zong kihel a, “Hihte pen hua lai mah panin a piang ahi hi,” kici ding hi. Zion tawh kisai-in ahihleh, “Minam khempeuh ama sung pana suak ahi hi,” kici ding hi. Bang hang hiam cih leh Sangpenpa mahmah in amah kipsak ding hi. Topa in, “Hihte pen hua lai-a suak,” ci-in minam khempeuh ciamtehin a gelh ding hi. Tua sunga teng mite in, “Kote’ lungdamna khempeuh nangma sungah om hi,” ci ciat ding uh hi. Topa, ka Pasian aw, sunin huhna kong ngen a, zan hun sungin nangma mai-ah kong kiko hi. Ka thungetna hong za inla, nong huh ding ka hong ngetna hong ngai in. Bang hang hiam cih leh lungkhamna tampi thuakin, ka si dektak hi. Kei pen a sidek mi tawh ka kibang ta a, ka thahatna khempeuh beimang khinta hi. Misite lakah a kinusia, a kithatlum, han sunga lum, na huh zawh ahi nawn lo, na phawk nawn lohte ka bang ta hi. Kei pen, mialin a thukna mun, Leihawm thuk sungah nong koih khinta hi. Nangma hehna keima tungah gik mahmah a, na tuihualte khempeuh tawh kei na hong vukcip hi. Ka kikholhpih mite in kei a hong pelh dingin na hong bawl a, amaute tungah a cikzethuai khatin kei na hong bawl hi. Ka suahtak theih loh nadingin kei hong kikhumcip a, ka gim thuakna hangin ka mit a mial ta hi. Topa aw, nisimin nangma tungah kong ngen a, thu ngenin ka khutte nangma lamah kong zan hi. A sisate a dingin nalamdang a bawl na hi hiam? Nangmah a phat dingin mi a si khinsate hong tho ding ahi hiam? Han sungah na itna kip kigen ding a, siatna munah nangma thumannate kigen ding ahi hiam? Khuamialna sungah na na lamdangte kithei a, mangngilhna gam sungah na hotkhiat huhna kithei ahi hiam? Ahih hangin Topa aw, na tungah huhna kong ngen a, zingsang simin na mai-ah thu ka hong ngen hi. Topa aw, bang hangin kei hong paaikhia na hi hiam? Bang hangin kei kiang panin na maitang seel na hi hiam? Ka neu tung a kipan gim thuakin ka si dektak hi. Nong gimpiakte ka thuak a, ka cih nading mel ka thei nawn kei hi. Nangma hehna in keimah hong nawkgawp khin a, a lauhuai mahmah nangma hong sukgawpna in kei hong susia ta hi. Amaute in tuikhang bangin sun tawntungin kei hong umcih uh a, kei hong tuamcip uh hi. Kei hong itte le ka lawmte keimah nong pelhsak khin a, khuamial bekbek, keima kikholhpih ahi hi. Topa aw, na itna kip la-in ka sa tawntung ding a, nangma thutakna ka gen tawntung ding hi. Bang hang hiam cih leh nangma itna kip tawntung a, na thutakna zong vantung bangin kip tawntung hi. Nangmah in, “Ka teelpa tawh thuciamna ka bawlzo a, ka nasem David tungah thu ka ciamzo hi: ‘Na suan na khakte kumpi-in ka kipsak ding a, na kumpi gam khang tawntungin ka kipsak ding hi,’” na ci khin hi. Topa aw, na nasepna a lamdangte, vantungte phatsak inla, mi siangthote’ kikhopna sungah na thumanna phatsak in. Vanglian Topa Pasian aw, na khempeuhah na thutak a, nangmah bangin a vanglian kua om ahi hiam, Topa aw. Nang in tuipi khang na uk a, a tuihualte a san ciangin na daisak hi. Nangmah in a kithat lumsa luanghawm khat bangin ganhing golpi Rahab na sugawp a, na thahatna tawh na galte na zogawp hi. Vantungte nangma a’ hi a, leitung zong nangma a’ mah ahi hi. Leitung le a sunga om khempeuh nangma phuhsa ahi hi. Saklam le khanglamte nangma bawlsa hi a, Tabor mual le Hermon mual in lungdamna tawh na min hong phat uh hi. Nangma vang lian mahmah a, na thahatna kigen thei lo hi. Thuman le thutang tawh na ukna za na phut a, itna kip le thuman tawh na khempeuh na sem hi. Bang hang hiam cih leh nangmah in nakpitakin kote na hong gualzosak a, kote hong angvanin na hong gualzosak hi. Kote a hong hu Topa hi a, Israel-te’ Siangtho Pasian nangmah in ka kumpipa uh nong pia hi. Hun lui lai-in na thuman mipa tungah mang sungah thu na gen a, “A vanglian khat pa tungah lukhu ka koih khinzo a, mite lak panin a kitengkhia mi khat ka liansakzo hi. Galte in amah khemzo ngei lo ding a, migilote in zong amah zo ngei lo ding uh hi. Ama mai-ah a galte ka sugawp ding a, amah a mudahte ka satpuk ding hi. Amah it tawntungin ama tungah ka thutak ding a, amah a gualzo-in ka bawl tawntung ding hi. Mediterranean Tuipi a kipan Eufratis Gunpi dong amah ka uksak ding hi. Amah in kei kiangah, ‘Nang pen keima Pa le ka Pasian na hi a, kei a hong honkhia pa le a hong hupa na hi hi,’ hong ci ding hi. Keimah in amah ta upa penin ka bawl ding a, leitung kumpite lakah a lianpenin ka bawl ding hi. Amah ka itna ka kipsak tawntung ding a, ama tungah ka thuciamna ka kipsak tawntung ding hi. Ama suanlekhakte kumpi ka hisak ngitnget ding a, a ukna za, vantung bangin ka kipsak ding hi. Ahih hangin amah ka itna ka khiam kei ding a, ka thuciamna ka kipelhsak kei ding hi. Ka thuciamna siasak loin, ka kam pana paikhia thute ka kheel kei ding hi. “A tawntung a kimang dingin ka sianthona tawh khatvei ka kiciam khin a, David’ tungah ka zuau kei ding hi. Ama suanlekhakte kizom paisuak ding a, vana ni a taan laiteng a kumpi gam ka kipsak ding hi. Khapi bangin tua pen kipsuak ding a, vantung a om laiteng kip ding hi,” na ci hi. Ahih hangin tu-in amah nialin na lawnkhia a, na sathau nilh pa’ tungah na heh mahmah hi. Na nasempa tawh na thuciamna na pelh khin a, ama kumpi lukhu leivui lakah na paihsak hi. Ama kulhte khempeuh na sukham khin a, ama galpanmun kipte a sia na suah khin hi. A pai khempeuh in ama nate sutgawp uh a, amah pen a vengte’ nuihsat a suak hi. Ama galte na gualzosak a, ama galte na lungdamsak khin hi. Ama galhiamte a mawkna na suaksak a, gal kidona-ah amah na guallelsak hi. Nangmah in ama khut panin a kumpi ciangkhut na lakhia a, a kumpi tokhom leilak na denna hi. Nangmah in a teek hun nai lopi-in amah na teeksak a, maizumna tawh na kidimsak hi. Topa aw, nang bang tanvei bucip den ding na hi hiam? Na hehna bang tanvei meikuang bangin kuangkuang ding ahi hiam? Topa aw, nuntak hun a tom mahmahlam hong phawk in. Mihingte a mawk nadingin bawl na hi hiam? A si thei lo kua om ahi hiam? Sihna hankhuk panin kua suaktazo ahi hiam? Topa aw, na thumanna tawh David tunga na thuciamna, hun lui lai-a na itna kip koi-ah omta ahi hiam? Topa in thupha ngah tawntung tahen. Amen! Amen! Topa aw, khang tawntungin kote’ omna mun na hi hi. Mual liante a kipiansak ma, leitang le leitung na bawl ma pek, a tawntung a kipan a tawntung dongin Pasian na hi hi. Mi, leivui na suaksakkik a, “Mihingte aw, ciahkik un,” na ci hi. Bang hang hiam cih leh nangma muhna-ah kum tulkhat a bei ciangin zanni ahi a, zan ihmut laitakin khanlawh khat sung tawh ahi zongin a kibang bek hi. Nangmah in mite na phiatkhia hi. Amaute pen a ihmu tawh kibang uh a, zingsangin a nokik lopa tawh kibang uh hi. Zingsangin palhin thaksuak kik a, nitak ciangin vulin a keu uh hi. Bang hang hiam cih leh nangma sinsona in kote hong susia a, na hehluatna in kote hong lausak gawp hi. Nangmah in ka mawhnate uh na mai-ah na koih a, ka khialh simnate uh na maitangah na koih hi. Bang hang hiam cih leh ka hun khempeuh uh na hehna-in bei a, ka nuntak hun uh husan’ khat bangin a bei hi. Kote’ nuntak sung kum sawmsagih bang hi a, cidam le-ung kum sawmgiat bang hithei hi. Ahih hangin tua hunsung nangawn gimna le haksatna hi a, tua hunte bei pakin kote ka maimang uh hi. Nang hong kizahtak nadingin na sinsona’ vangliatna kua in thei a, na hehna’ husiatna kua in thei ahi hiam? Tua ahih ciangin pilna lungsim ka ngah theih nadingun ka nuntak hun uh a tomlam ka theih nadingun hong hilh in. Topa aw, hong kihei kik in. Bang tan sauvei ding hiam? Na nasemte hong hehpih in. Ka nuntak tawntung uh lungdamin ka kipak theih nadingun zingsangin na itna kip tawh kote hong lungkimsak in. Kote nong gimsak ni zah, siatna ka thuak uh kum phazah mah, kote hong kipaaksak in. Na nasemte tungah na nasepna, a tate uh tungah na minthanna, na vang hong kilangsak in. Kote’ Topa Pasian aw, kote tungah na thupha hong tungsak inla, kote’ nasepna khempeuh hong tangtungsak in. Sangpenpa’ liahna sung, Vanglianpa’ liim sungah a om mi khempeuh in Topa’ tungah, “Ka bukna le ka munkip muanhuai, ka muan ka Pasian na hi hi,” ci ding uh hi. Bang hang hiam cih leh amah in thangsiah pa’ thangzak le a lauhuai pulnatna panin nang hong honkhia ding hi. Amah in a khate tawh nang hong tuam ding a, ama khate’ nuai-ah bukna ding na mu ding hi. Ama thumanna in nang hong dalin hong hu ding hi. Na kiangah mi tulkhat, na kimkotah mi tul sawm, hong tukin a sih hangin bangmah na ci kei ding hi. Na mit tawh na en bek ding a, migilote a kithukkikna na mu ding hi. Nangmah in Topa pen na buk nadingin bawlin, Sangpenpa, nang a hong hu dingin bawl khin na hih manin nangma tungah siatna hong tung lo ding a, na inn sungah gimna hong tung lo ding hi. Bang hang hiam cih leh nangmah a hong cing dingin amah in ama vantungmi nang hong kemsak ding hi. Na khete le suang a kitahkhak loh nadingin amaute in a khut uh tawh nang hong dom ding uh hi. Nangmah in humpinelkai le gul gunei tung na tawn ding a, na khenuai-ah humpinelkai khanglai le gulpi na tuancil ding hi. Itna tawh hong bel ahih manin amah ka honkhia ding a, ka min hong thei ahih manin mun sangna-ah amah ka koih ding hi. Amah in hong sap ciangin amah ka dawng ding hi. Haksatna sungah amah ka ompih ding a, amah honkhia-in ka pahtawi ding hi. Nuntak sau tawh amah ka lungkimsak ding a, amah ka honkhia ding hi. Bang hang hiam cih leh Topa aw, nangma sepna tawh kei nong lungdamsak a, nangma sepnate hangin lungdamin la ka sa hi. Topa aw, na nasepnate lian mahmah a, na ngaihsutnate thuk mahmah hi. Topa aw, na galte si ta ding! Bang hang hiam cih leh na galte beimang ding a, siatna a bawl khempeuhte kithehthang ding uh hi. Ahih hangin nangmah in zangsial bangin kei na hong hatsak a, kei thupha hong pia-in nong lungdamsak hi. Ka galte’ pukna ka mit in mu khinta a, keimah a hong do a gilote’ siatna ka bil in za khinta hi. Nisuh kung bangin thuman mi palh a, Lebanon mualtung a om taamtak kung bangin a khang hi. Topa’ inn sungah amaute kisuan a, i Pasian’ huang sungah amaute palh uh hi. Topa in uk a, vangliatna kumpi puan kisilhsak hi. Topa, kumpi puan kisilhsak a, thahatna tawh amah kidim hi. Leitung kikipsak a, kiling ngei lo ding hi. Tanglai pek panin na tokhom a kipsa hi a, nang pen a tawntung a om na hi hi. Topa aw, gunte hong khangin, a aw uh hong sangsak a, nakpitakin hong ging hi. A sangna munah a om Topa vanglian hi. Tui tampi gingte sangin vanglian zaw a, tuipi hualte sangin vanglian zaw hi. Na thupiaknate kip mahmah hi. Topa aw, sianthona pen a tawntungin na inn tawh a kilawm ahi hi. A thukkik Pasian, a thukkik Pasian, Topa aw, na hehna hong lakkhia in. Tho in, leitung thukhen pa aw, a kiphasak mite tungah amau’ ngah ding a kilawm gimna pia ta in. Topa aw, migilote bang tanvei lungdam ding uh a, migilote bang tanvei lungnuamin omom lai ding ahi uh hiam? Gamtatsiate bang tanvei kihisak lai ding uh a, a siat gamtatna uh bang tanvei kisialhpih lai ding ahi uh hiam? Topa aw, amaute in nangma mite sugawp uh a, nangma luahte gimsak uh hi. Amaute in meigong numeite le khualmite thatlumin pa nei lote suamlum uh hi. Amaute in, “ Topa in mu lo hi; Jakob Pasian in thei lo hi,” hong ci uh hi. Theitel un, mi lungsimmawl pente aw! Lung pillote aw, cik ciangin pil ding na hi uh hiam? I bil a bawlpa in khua za lo ding ahi hiam? I mit a piangsak pa in khua mu lo ding ahi hiam? Bang hang hiam cih leh Topa in ama mite nusia lo ding a, ama luahte paidak lo ding hi. Bang hang hiam cih leh thutang pen thuman mite tungah hong tungkik ding a, lungsim thutang khempeuh in amah zui ding uh hi. Kei a dingin migilote a do dingin kua kipan ahi hiam? Kei a dingin siatna a bawlte’ langkhatah kua ding ahi hiam? Topa in kei hong huh lo hileh, gamkhing sungah ka tung khinta ding hi. Topa aw, “Ka khe taal,” ci-in ka ngaihsut ciangin na itna kip in kei hong kaito hi. Ka lungsim ngaihsutna a tam mahmah ciangin kei na hong hehnem a, na hong lungdamsak hi. Sihna ding ngeina a bawl, a gilo gam ukte, nang tawh kipawl ding ahi hiam? Amaute in thuman mihoihte thah sawm uh a, a mawhbaang lo mite sihna thuaksak uh hi. Ahih hangin Topa pen keima munkip, keima Pasian, ka belh suangpi a suak khinta hi. Amah in amau’ mawhnate amau’ tung mahah tungsakkikin, a gitlohna hangun amaute a maimangsak ding hi. Topa, i Pasian in amaute maimangsak ding hi. Hong pai un, Topa phat ni. Eite a hong hu, a hong honkhia pa tungah lungdamna la sa ni. Ama omna-ah lungdamna ko-in pai ni. Phatna late, ama tungah lungdam takin sa ni. Bang hang hiam cih leh Topa, a lian Pasian hi a, pasian khempeuh tungah Kumpi lianpa ahi hi. Amah in leitung khempeuh uk a, guam thuk pen panin mual sang pen dawn dongin amah in a uk hi. Ama bawlsa tuipite uk a, ama bawlsa leitung zong amah in a uk hi. Hong pai un, amah bia-in kun ni. Eite hong Bawl Topa’ mai-ah khukdin ni. Bang hang hiam cih leh amah pen eite’ Pasian hi a, eite pen ama hong kep mite le ama khutsunga om a tuute ihi hi. Tuni-in hih bangin ama hong thugen za un: Kum sawmli sung tua minam ka kih a, “Amaute pen a lungsim uhah a khial mi hi a, amaute in ka thupiakte mang lo uh hi,” ka ci hi. Tua ahih ciangin keima nopsakna munah amaute a lut lo dingin sinso kawmin ka kiciam hi. Leitung mi khempeuh aw, Topa tungah la thak khat sa un. Topa tungah la sa un. Topa tungah la sa unla, ama min phat un. Ni khat khit ni khat ama hong hotkhiatna thu gen tawntung un. Ama minthanna minamte lakah gen unla, ama nalamdang septe mi khempeuh lakah pulak un. Bang hang hiam cih leh Topa lian a, nakpitakin phat ding ahi hi; pasian dangte khempeuh sangin amah zahtak zawk ding ahi hi. Bang hang hiam cih leh minam dangte’ pasian khempeuh milim hi lel a, ahih hangin Topa ahihleh vantungte a bawlpa ahi hi. Pahtawina le liatnate ama mai-ah om a, hatna le hoihnate ama omna mun siangtho-ah om hi. Mi namkimte aw, Topa in minthanna le hatna nei hi, ci-in mang un. Topa in nei hi, ci-in mang un. Ama min in a ngah dingin a kilawm minthanna Topa’ tungah pia unla, biakpiakna hong kengin ama huang sungah hong pai un. Puan siangtho silhin Topa bia un. Leitung mi khempeuh aw, ama mai-ah ling un. Minam khempeuh lakah thu gen kawikawi unla, “ Topa in uk hi. Leitung kikipsak a, kiling ngei lo ding hi. Amah in mihingte’ thu a manin khen ding hi,” ci un. Vantung mite kipak hen la, leitung mite lungdam hen. Tuipi le a sunga om khempeuh awng ta uh hen. Topa in uk hi. Leitung lungdam hen la, tuikulh neu tampite zong lungdam ta uh hen. Meiipite le khuamial sahpite ama kiimah om a, thumanna le thutannate ama tokhom bulpi ahi hi. Ama mai-ah mei pai a, ama kiima om a galte a kangtum hi. Ama khuaphialepte in leitung taangsak a, leitung in mu-in a ling hi. Topa’ mai, leitung mi khempeuh’ Topa’ mai-ah mual liante khuainun bangin a tuisuak uh hi. Vantungte in ama thumanna genkhia uh a, mi khempeuh in ama minthanna mu uh hi. Bangmah a man lo milimte a kisaktheihpih, milim a bia mi khempeuhte maizumin kikoih a, ama mai-ah pasian khempeuh kun uh hi. Pasian aw, Zion in za-in nuam a, na thukhennate hangin Judah khuapite lungdam uh hi. Bang hang hiam cih leh Topa aw, leitung khempeuh a ukpa na hi a, pasian dang khempeuh sangin nakpitakin na lianzaw hi. Topa in gitlohna a mudahte it a, amah in a mi siangthote’ nuntakna siatna ding pan a kem hi. Amah in migilote’ khutsung panin amaute a honkhia hi. Thuman mite’ tungah khuavak hong taang a, lungsim thutang mite tungah lungdamna hong tung hi. Thuman mite aw, Topa’ nasepnate hangin lungdam unla, ama min siangtho phat un. Amah in na lamdangte bawl ahih manin Topa’ tungah la thak sa un. Ama khut taklam le ama khut siangthote in amah gualzosak hi. Topa in ama gualzawhna kitheisak khinzo a, amah in minamte’ muhna-ah ama thumanna langsak khin hi. Amah thutakin, it tawntungna nei ahih manin Israel-te tungah a thuciamna a tungsak hi. Leitung mi khempeuh in eite’ Pasian’ gualzawhna mu khinta uh hi. Leitung mi khempeuh aw, Topa’ tungah lungdamin la sa-in lungdamin awngkhia unla, phatna la sa un. Laia lasakna tawh Topa’ tungah phatna late sa unla, laiza lasakna le la ngaih tawh phat un. Peengkulte le saki aw tawh Topa, Kumpipa’ mai-ah lungdamna gingsak un. Tuipi le a sunga omte khempeuh aw, awng unla, leitung le a tunga teng khempeuhte aw, la sa un. Topa in uk hi. Mihonte ling hen. Kherub-te tungah amah tu hi. Leitung ling tahen. Zion khuapi-ah Topa lian a, amah in leitung mi khempeuh uk hi. A lian a kihtakhuai ama min mi khempeuh in phat ta uh hen. Amah siangtho hi. Thutang a deih, Vanglian Kumpipa aw, nangmah in thuman na phut khin a, Israel-te sungah thutang le thuman na semkhia hi. I Topa Pasian phat unla, ama khengakna munah bia un. Amah siangtho hi. Moses le Aaron-te ama siampi hi uh a, amah a biate lakah Samuel zong a kihel hi. Topa’ tungah amaute kiko uh a, amah in amaute a dawng hi. Amah in meii khuampi sung pan amaute tungah thu gen a, ama teci pannate le amah in amaute tungah a thukham piakte amaute in a zui uh hi. Kote’ Topa Pasian aw, nang in amaute na dawng hi. Amau’ mawhna hangin gim na piak tei hangin amau’ mawhnate a maisak nuam Pasian na hihna amaute’ tungah na kilangsak hi. I Topa Pasian phat unla, ama mual siangtho-ah bia un; bang hang hiam cih leh i Topa Pasian a siangtho hi. Gam khempeuh aw, Topa’ tungah lungdamna aw gingsak un. Lungdamna tawh Topa’ na sem un. Ama omna-ah la sa kawmin hong pai un. Topa, Pasian ahihna thei un. Eite hong bawlpa amah hi a, eite ama a’ ihi hi. Eite ama mi ihi a, ama gankhahna sunga om a tuute ihi hi. Lungdam kohna tawh ama kongpi-ah lut unla, amah phatna tawh ama huang sungah tum un. Ama tungah lungdam ko unla, ama min phat un. Bang hang hiam cih leh Topa hoih hi. Ama itna kipin kho tawntung a, ama thumanna a khang khangin kip hi. Keima la pen thumanna le thutanna la ahi hi. Nang ka hong sak ding hi; Topa aw, kong sak ding hi. Paubaanna a om lo thu bek ka kin ding hi. Cik ciangin kei kiangah hong pai ding na hi hiam? Lungsim hoihna tawh ka inn sungah ka gamta ding hi. A sia na peuhmah ka deih kei ding hi. Lamkhial mite’ nasepna ka mudah a, tuate tawh ka kisukha kei ding hi. Lungsim kawina ka deih hetkei a, siatna, ngaihsutin zong ka neikha kei ding hi. A vengte a gensia sim mite ka susia ding a, kiphatsakna, kihihsakna lungsim a nei mi ka thuak kei ding hi. Leitungah a thuman mite kei tawh a om theih nadingin maipha ka pia ding a, paubaanna om loin a gamta mi in keima na hong sem ding hi. Khemna a zang mi peuhmah keima inn-ah teng lo ding a, zuauthu a gen mi peuhmah keima omna-ah om thei nawn lo ding hi. Zingsang simin leitung a migilote khempeuh ka susia ding a, Topa’ khuapi panin siatna bawlte khempeuh ka khenkhia ding hi. Topa aw, ka thungetna hong za inla, ka thumna hong ngai in. Ka cihmawh hunin kei kiang panin bu kei in. Keima lam hong nga inla, kong sap ciangin hong dawng pah in. Bang hang hiam cih leh ka nuntakna, meikhu bangin beimang a, ka pumpi meikuang bangin a sa hi. Lungkham luatna hangin lopa bangin ka keutum a, an nangawn ka nezo kei hi. A gingin ka tautauna hangin ka guh guakin ka om hi. Gamlak a om musane le mun kolhna-ah a om simbu tawh ka kibang hi. Ihmu thei loin ka om a, innkhum dawna vasa khat guak a om tawh ka kibang hi. Sun nilohin ka galte in kei hong zahko uh a, kei hong simmawhte in samsiatna-in ka min a zang uh hi. Keima nuntakna pen nitak lama a om niliim tawh kibang lel a, lopa bangin ka vulgawp hi. Ahih hangin Topa aw, nang na kip ngitnget a, khang tawntungin nang hong kiphawkna kip hi. Nangmah tho-in Zion khua na hehpih ding hi. Amah na angvan hun ding hita a, a kiciangtansa hun hong tung khin hi. Bang hang hiam cih leh na nasemte in tua khua suangtumte it uh a, a leivuite nangawn pammaih sa uh hi. Minamte in Topa hong zahtakin, leitung kumpi khempeuh in na minthanna hong zahtak ding uh hi. Bang hang hiam cih leh Topa in Zion khua lam ding a, ama minthanna hong kilang ding hi. Amah in mi cimawhte’ thungetna kinin, amau’ thumna simmawh lo ding hi. A suak nai lo mite in Topa a phat theih nadingin a hong tung lai ding khang mite a dingin hih thu kiciamteh hen: Amah in kei a khangtung kimlai ka thahatna hong suktat sakin, ka hunte hong khiapsak hi. Keimah in, “Khang tawntungin a kip ka Pasian aw, hong khansihsak kei in,” ka ci hi. Tanglai hunin nangmah in leitung bulpi na koih a, vantungte zong nangma khut tawh na bawlsa ahi hi. Amaute sia ding uh a, ahih hangin nang na kip ding hi. Puan bangin amaute paatkhia ding uh hi. Nangmah in amaute puan bangin na khek a, amaute a maimang uh hi. Ahi zongin nang na kibang ngitnget a, na nuntak hun in mong nei lo hi. Na nasemte’ tate lungmuangin om ding uh a, amau’ suanlekhakte na mai-ah kip ding uh hi. Topa ka phat ding a, ka lungsim khempeuh tawh ama min siangtho ka phat ding hi. Topa ka phat ding a, ama migitna ka mangngilh kei ding hi. Amah in ka mawhna khempeuh hong maisak a, ka natna khempeuh hong damsak hi. Hankhuk tung ding kimlai hong suaktasak a, itna le hehpihna tampi hong pia hi. Muvanlai bangin ka tha a hat theih nadingin thupha namkim hong pia hi. Topa in a kinengniamte a dingin thuman thutangin thu a khen hi. Amah in ama geelna Moses tungah gen a, ama nasepnate Israel mite a musak hi. Topa dikin hehpihna tawh kidim a, heh hakin, a lian mahmah itna kip tawh a kidim hi. Amah in a tawntungin hong taii ngitnget lo ding a, amah heh paisuak lo ding hi. Amah in eite’ khialhna tawh a kituakin eite tungah hong bawl lo a, eite’ mawhna tawh a kituakin hong thukkik lo hi. Vantung pen leitung panin a san mah bangin amah a zahtakte’ tungah ama itna kip lianin sang mahmah hi. Nisuahna pen nitumna panin a gamlat mah bangin i mawhna hangin gimnate eite’ kiang panin gamlapi-ah a nilkhia hi. Pa in tate a hehpih bangin Topa in amah a zahtakte hong hehpih hi. Bang hang hiam cih leh amah in eite’ pianna hong thei a, eite pen leivui ihihna a phawk hi. Eite ihih leh i nuntakna pen lopa tawh kibang a, lolai-ah a po paakte bangin a palh hi. Bang hang hiam cih leh huih in amah semin beimang a, tua mun in amah thei nawn lo hi. Topa in vantungah ama tokhom phutkhin a, amah in mun khempeuh a uk hi. Ama thugen a ngai, ama thu bangin a sem no a thahat, no ama vantung mite aw, Topa phat un. Ama deih bangin a gamta ama nasem, ama mihon khempeuhte aw, Topa phat un. Ama ukna sunga a om ama bawlsate aw, Topa phat un. Ke’n, Topa ka phat ding hi. Topa ka phat ding hi. Topa ka Pasian aw, nang na lian mahmah hi. Minthanna le liatna nang na silh hi. Puanza tawh tuam bangin khuavak tawh na kituam a, vantungte pen puanbuk bangin na zal hi. Vana om tui tungah na inn na lam a, na leeng dingin meiipite na bawl a, huih khate tungah nang na tuang hi. Na kamtai dingin huihte na bawl a, mei le meikuangte na nasemte na hisak hi. Leitung a ling ngei lo dingin ama bulpi tungah na phut hi. Nangmah in puan tawh tuam bangin leitung pen tui thukpi tawh na tuam a, tuate in mualte tuumcip hi. Na thuhilhna hangin tua tuite taikhia uh a, na thupiakna awging a zak uh ciangin kikhawhkhia uh hi. Mualtung le guam sungah tua tuite luang uh a, amau a dingin na sehsa munah a tung uh hi. Tua tuite in leitung a tuamkik loh nadingin amaute’ kantan loh ding gamgi khat na phut hi. Kuamte sung panin ciktui na phulkhiasak a, mualte kikalah a luang uh hi. Gamlak ganhingte’ dawn ding tui na pia a, gamlak sakolte in a dangtakna uh tua tui-ah a phasak uh hi. Tua tui kiangah huihlak vasate om uh a, singhiangte lakah amaute ham zaizai uh hi. A sangna mun na omna panin mite tungah guah na zusak a, nangma thupha tawh leitung a kidim hi. Nangmah in ganhingte a dingin lopa, mihing in leilak panin an a ngah theih nadingin a khawh ding ankungte, mihing lungsim a nuamsak ding leenggahzu, mihing maitang a zolsak ding sathau, mihing lungsim a hatsak ding an na piangsak hi. Topa in a suan, Lebanon muala om taamtak singte, tua ama singkungte in guahtui tampi a ngah hi. Tua singte tungah vasate in bu bawl uh a, taksing kungte lakah gun vapite in bu a tom uh hi. Mual sangte pen sathakte a’ ding hi a, suangtumte pen sakhite’ belh ding ahi hi. Hun ciamteh nadingin khapi na bawl a, ni in zong a tum ding hun a thei hi. Nangmah in khuamial na bawl a, gamlak ganhing khempeuh a vakkhiat hun pen zan hunsung ahi hi. Humpinelkai khanglaite in amau’ nek ding sa a ngah nadingun nakpitakin hawk uh a, amau’ an ding Pasian’ tung pan a ngah uh hi. Ni a suah ciangin amaute kihemkhia uh a, a kua sung uhah a lum hithiat uh hi. Mite pen nasem dingin kuankhia uh a, nitak mateng na sem uh hi. Topa aw, na sepsa nate tam mahmah hi. Nangmah in ciimna tawh tuate khempeuh na bawl a, na piansak ganhingte tawh leitung a kidim hi. Hua lai-ah, ganhing a lian a neu, simzawh lohin a tam, a vak muamua-na, lianin a zai mahmah tuipi om hi. Hua tuipi tungah teembawte le gualnop nadingin na bawl Awle a pai hi. A hun ciangin an na piak ding ngakin hihte khempeuh in nangmah hong en uh hi. Na piak ciangin amaute in ne uh a, an na pia a, amaute lungkim uh hi. Na maitang na seel ciangin amaute khasia uh hi. Amau’ husanna na lakkhiat ciangin amaute si-in amau’ pianna leivui-ah a ciahkik uh hi. Na hu na sankhiat ciangin amaute a kipiangsak hi a, nangmah in leitung na bawlthak hi. Ka nuntak laiteng Topa tungah la ka sa ding a, ka hin laiteng ka Pasian phatna la ka sasa ding hi. Topa in hong lungdamsak ahih manin ka lasaknate in zong amah lungdamsak tahen. Leitung panin mawhnei mite beimang hen la, migilote om nawn kei hen. Ke’n, Topa ka phat ding hi. Topa ka phat ding hi. Topa tungah lungdamna ko-in, ama min phat unla, ama sepnate khempeuh mite lakah kitheisak un. Ama tungah la sa un. Ama tungah phatna la sa unla, a lamdang a septe khempeuh gen ciat ta un. Ama min siangtho hangin lungdam unla, Topa a zong mite lungdam tahen. Topa le ama huh ding zon belin nei unla, a tawntungin ama maipha zong niloh un. Amah pen Topa, eite’ Pasian hi a, ama thupiaknate leitung khempeuh in a zuih ding ahi hi. Amaute tawm mahmahin, bangmah gentham lo uh a, khualmi hi-in, minam khat panin minam dang khatah, gam khat pan gam khatah a vak kawikawi laitakun, amah in amaute kuamah nengniamsak lo hi. Amaute’ hangin amah in kumpite thuhilhin, “Ka sathau nilhte sukha kei un; ka kamsangte tungah siatna bawl kei un,” ci hi. Amah in leitungah kialpi tungsakin, nektheih an khempeuh a siatsak ciangin, amah in, Josef a kici, sila-a a kizuak mi khat, amaute’ mai-ah a sawl hi. Ama khete pen kolte in nasak a, ama ngawng pen sikkol sungah kikoih hi. Ama thugente a tun matengin Topa in amah ze-et hi. Amah a khahkhia dingin kumpipa in mi paisak a, mihingte a ukpa in amah a khahkhia hi. Tua ciangin Egypt gamah Israel va pai a, Ham’ gam sungah peemta-in Jakob va om hi. Topa in ama mite pungsak mahmah a, a galte sangin amaute hatzaw sak hi. Ama mite mudahin, ama nasemte siamna tawh a khem dingin amaute’ lungsim amah in kiheisak hi. Amah in, ama nasem Moses le ama teelsa Aaron a sawl hi. Amaute in ama limte amaute’ lakah na lamdangte Ham’ gam sungah a bawl uh hi. Amah in khuamial sawl a, leitung khim a zingsak hi. Ahih hangin Egypt mite in ama thu a langpang uh hi. Amah in amau’ tuite sisan suaksak a, a ngasate uh a sisak hi. Amau’ leitang tung le a kumpipa’ innsung nangawn uiphukte tawh a kidim hi. Amah kampau a, thohonpi le thokangte gam sung dimin hong om hi. Amah in a guah dingun gialpi, amau’ gam sung khempeuh a taangsak khuaphialep, amaute a pia hi. Amah in amau’ leengguite le a theikungte uh vattansak a, amau’ gam sung sing khempeuh a kuaihtansak hi. Amah kampau a, kauphete le tangngolte, simzawh lohin hong pai uh a, gam sunga kung khempeuh, amau’ leitang panin a gah khempeuh a nektumsak mang hi. Amau’ sung pan a piang masa Egypt tacil khempeuh a satlum hi. Tua ciangin amah in ngun le kham tawh Israel-te paikhiatpih a, amaute a vekpi-in cidamin thahat kim uh hi. Amaute a paikhiat ciangun Egypt mite lungdam mahmah uh hi. Bang hang hiam cih leh amaute kihta uh hi. Amaute a liah dingin amah in meiipi kaisak a, zanin khua muh nadingin mei a omsak hi. Amaute in ngen a, vantung panin anlum tampi a pia hi. Amah in suangpi hong a, tui a phulkhia hi. Guntui bangin sehnel gamah tui a luang hi. Bang hang hiam cih leh a siangtho ama thuciamna le ama nasem Abraham a phawk hi. Tua ahih ciangin ama mite lungdamna tawh, ama teel mite lasakna tawh a paikhiatpih hi. Topa phat un. Topa’ tungah lungdam ko un; bang hang hiam cih leh amah hoih a, ama itna kip tawntung hi. Topa’ nasepna lianpite kua in genkhia thei ding a, kua in a kicingin amah phat thei ding ahi hiam? Thutang a zui, a tawntungin thumanin a gamta mite, mi nuamsa ahi hi. Ka pu ka pate uh a kipan kote ka khial khin uh hi. Mawhna ka bawl khin uh a, ka gilo gamtat khin uh hi. Ka pu ka pate un Egypt gamah a om lai-un nangma nasepna a lamdangte ngaihsun lo uh hi. Na itna kip a tampite phawk lo uh a, San Tuipi-ah Sangpenpa hong lehdo uh hi. Ahi zongin amah in a lian mahmah a vangliatna a kitheihsak nadingin ama min a ngaihsutna-in amaute a honkhia hi. Amah in San Tuipi thuhilh a, tua tuipi a kang hi. Amah in gamlak kantan bangin tuithuk kantanin amaute a paipih hi. Tua ahih ciangin amah in galte’ khutsung panin amaute honkhia a, langpangte’ vangliatna panin amaute a khahkhia hi. Tui in amau’ langte tuummang khin a, amaute a suakta khat zong om lo uh hi. Tua ciangin amaute in ama thu um uh a, amah phatna la a sa uh hi. Ahih hangin amaute in ama nasepte mangngilh pah uh a, ama thugen ding ngak loin a gamta pah uh hi. Ahih hangin amaute in gamlakah duhluat mahmahna nei uh a, sehnel gam sungah Pasian a ze-et uh hi. Amah in amaute’ nget pen pia a, ahih hangin amaute lakah natsia a tungsak hi. Gamlakah Moses le Topa’ mi siangtho Aaron a hazat uh ciangin, lei kihongin Dathan valhtum a, Abiram’ pawlte a vukcip hi. Amaute’ sungah mei hong piangkhia a, meikuang in migilote a kangtum hi. Amaute in Horeb gam sungah bawngno khat bawl uh a, a kisung tua milim a bia uh hi. Amaute in Pasian’ minthanna pen lopa a ne bawngtal lim tawh a khek uh hi. Tua ahih ciangin amaute a suksiatna ding a hehna panin a heikhia dingin Pasian’ mai-ah ama teelpa Moses ding hikeileh amaute ka susia ding hi, amah in ci hi. Amaute in gam nuam simmawh uh a, ama thuciamna um lo uh hi. Amaute a puanbuk sung uhah phun niloh uh a, Topa’ thu ngai lo uh hi. Tua ciangin amaute in Peor-a Baal pasian bel uh a, nuntakna a nei lote tungah biakna-in a kipia sate a ne uh hi. Amau’ gamtatna tawh Topa’ hehna ding piangsak uh a, amaute’ lakah pulnatna hong tung hi. Tua ciangin Finehas dingin hong palai a, pulnatna a hong dai hi. Tua thu pen a khang a khangin ama thumanna-in kiciamteh tawntung hi. Topa in amaute a thupiak bangin amaute in tua mite that lo uh hi. Minam dangte tawh kihelin amau’ gamtat bangbang a gamta dingin a kisin uh hi. Amau a dingin thangzak ahi amau’ milimte a biakpih uh hi. Amaute in a tapate uh le a tanute uh dawi biakna-in a nei uh hi. Amaute in Kanaan gam milimte a biakna-un mawhna nei lo a tanute uh le a tapate uh that uh a, hih mi thahna hangin gam sung a nin a suak hi. Tua ahih ciangin amau’ sepna tawh amaute a nin suak uh a, amau’ gamtatnate tawh palhngulhna a bawl uh hi. Tua ciangin ama mite tungah Topa’ hehna hong kitawhkuang a, amah in ama luah minamte a kih hi. Amau a mudah minamte in amaute a uk theih nadingin tua minamte’ khut sungah amaute a pia hi. A galte un amaute nengniam uh a, amau’ khutnuai-ah amaute a koih uh hi. Amah in amaute tam veipi honkhia hi. Ahih hangin amaute in lehdona lungsim vom uh a, amau’ mawhna hangin amaute a kiniamkoih hi. Tua bang ahi ta zongin amaute’ kikona a zak ciangin amaute’ cihmawhna a don hi. Amaute a’ ding a ngaihsutna-in ama thuciamna phawk a, ama itna kip tawh kizui-in a kolsak hi. Amaute a man mi khempeuhte in a khasiatpih zah dong dingin amah in amau’ tungah a piangsak hi. Topa, kote’ Pasian aw, kote hong hon inla, nangma min siangtho kong phat theih nading uh le nangma tungah lungdamna kong koh theih nadingun minam dangte’ lak panin kote hong kaikhawmkik in. Topa, Israel Pasian in a tawntung a kipan a tawntung dongin thupha ngah tahen. Mi khempeuh in, “Amen,” ci ta uh hen. Topa phat un. “ Topa tungah lungdam ko un; bang hang hiam cih leh amah hoih a, ama itna kip tawntung!” Pawlkhatte gamlakah gammang uh a, a tenna ding uh khuapi tunna lampi mu zo lo uh hi. Gilkial dangtakin amaute sibup uh hi. Tua ciangin amaute in a lungkhamna uhah Topa ko uh a, amau’ cihmawhna panin amah in a honkhia hi. Amau’ tenna ding khuapi a tun matengun amah in lampi manah amaute a paipih hi. Ama itna kip le mihing tate tungah a lamdang ama sepnate hangin amaute in Topa’ tungah lungdamna ko ta uh hen. Bang hang hiam cih leh amah in a gilkial a dangtakte phasak a, bangmah a nei lote tungah na hoih tampi a pia hi. Pawlkhatte, khuamial sung, a zing sungah tu uh a, sikkol kibulhin gimna thuakin thong kia uh hi. Bang hang hiam cih leh amaute in Pasian’ thu sel uh a, Sangpenpa’ thugente a nial uh hi. Nasep haksa tawh amaute’ lungsim niamsak hi. Amaute puk uh a, a huh ding kuamah om lo hi. Tua ciangin amaute in a lungkhamna uhah Topa ko uh a, amau’ cihmawhna panin amah in a honkhia hi. Amah in khuamial sung le a zing sung panin amaute lakhia a, amau a kihennate a botsat hi. Ama itna kip le mihing tate tungah a lamdang a nasepnate hangin amaute in Topa tungah lungdamna ko ta uh hen. Bang hang hiam cih leh amah in sumngo kongkhakte sukhamin sikzawlte tum nih a suah hi. Pawlkhatte amau’ khialhna hangin a ci uh na a, a mawhna hangun gimna a thuak uh hi. Amaute in an peuhmah kih uh a, sihna kongpi tawh amaute kinai ta uh hi. Tua ciangin amaute in a lungkhamna uhah Topa ko uh a, amau’ cihmawhna panin amah in a honkhia hi. Amah in thu vaikhakin amaute damsak a, siatna ding panin amaute a honkhia hi. Ama itna kip le mihing tate tungah a lamdang a nasepnate hangin amaute in Topa tungah lungdamna ko ta uh hen. Lungdam koh piaknate pia-in ama nasepnate lungdam la tawh amaute gensak un. Pawlkhatte, teembaw tawh tuipi-ah pai uh a, tui liante tungah sumbawl na a sem uh hi. Amaute in tuithuk tungah Topa’ gamtatna a lamdang a septe a mu uh hi. Bang hang hiam cih leh amah in thu pia a, tuipi hualte a piangsak huihpi a nungsak hi. Amaute, vanah kilawnto-in, a thukna-ah kiasuk uh hi. A lauhuai siatna sungah amau’ lungsim hanna a bei hi. Amaute zukham bangin hoisuk hoito uh a, a cih nading mel uh thei nawn lo uh hi. Tua ciangin amaute in a lungkhamna uhah Topa ko uh a, amau’ cihmawhna panin amah in a honkhia hi. Amah in huihpi daisak a, tuipi hualte a bei hi. Tua ciangin, tua tuihualte a khawl manin amaute a lungdam uh hi. Amah in amaute’ utna khua-ah a paipih hi. Ama itna kip le mihing tate tungah a lamdang a sepnate hangin amaute in Topa tungah lungdamna ko ta uh hen. Amaute in mihon kikhopna sungah amah pahtawi-in, upate’ kikhopna sungah amah phat ta uh hen. Amah in sehnel gam pen bualtuite suaksak a, leitang keu pen ciktui a suaksak hi. Amah in tua munah gilkialte tengsak a, a tenna ding uh khuapi amaute in a sat uh hi. Amaute in lo-ah an tuhin leenggui suan uh a, a gah tampi tak a ngah uh hi. Ama thupha piakna hangin ante nakpitakin pung a, amau’ bawngte zong kiamsak lo hi. Amaute pen nenniamna, haksatna le dahna tawh khiamsuk gawpin a kiniamkoih suk ciangin amah in, amau a bawlsiate tungah simmawhna buak sukin lampi om lohna gam sungah amaute a vakvaisak hi. Ahih hangin amah in amau’ thuakna sung panin a cimawhte laamto a, tuu honpite bangin amau’ innkuante a pungsak hi. Lungsim thutangte in hih thu mu-in kipak uh a, a gilote in ahihleh amau’ kam a cih ciat uh hi. A pil peuhmah in hih thute don hen la, Topa’ itna kip lungngaingai tahen. Pasian aw, ka lungsim a kigingsa-in om hi. Ka sa ding hi; nangmah phatna late ka sa ding hi. Kei ka khanglo ding hi. Harp lasakna le laiza lasakna aw, khanglo un. Zingsang khuavak hong phong ning. Topa aw, mite lakah nangma tungah lungdamna kong ko ding a, minam dangte lakah nangma tungah phatna ka sa ding hi. Bang hang hiam cih leh na itna kip in vantung ban a, na thumanna in meiipite banto hi. Pasian aw, vantungte’ tungah sangto lai in. Leitung khempeuhah na minthanna omsak in. Nangma it mite, na hatna tawh hon inla, kong ngetna bangun hong pia in. Ama biakinn sungah Pasian in thu ciam khin a, “Gualzo a lungdamna tawh Shekhem gam khenkhia-in, Sukkoth gam kuam ka sehkhia ding hi. Gilead gam keima a’ hi a, Manasseh gam zong keima-a’ mah ahi hi. Efraim gam ka siklukhu hi a, Judah gam ka ciangkhut ahi hi. Moab gam ka kisilna kuang hi a, keima neihsa hi, cih lahna limin Edom gam tungah ka khedap ka lawn hi. Filistia gam tungah gualzawhna tawh ka awng hi,” a ci hi. Kua in khuapi muanhuai-ah kei hong paipih ding hiam? Kua in Edom gamah kei hong paipih ding hiam? Pasian aw, nangmah in kote hong don lo khinta hi lo na hi hiam? Pasian aw, komau galkapte tawh na kuankhia kei hi. Ka galdona uhah kote hong huh in. Bang hang hiam cih leh mihing’ huhna a mawkna hi. Pasian tawh khauhtakin i hih ding hi. Amah pen i galte hong sikcipsak ding pa ahi hi. Keima hong phat Pasian aw, dai dide-in ommawk kei in. Bang hang hiam cih leh migilote le zuauthu gente keima langah hong pang uh a, keimah hong gensia-in, zuauthu bekbek genin nei uh hi. Amaute in muhdah kamte pau-in kei hong gensia uh a, thu om lopi-in kei hong langpang uh hi. Amaute ka itna, amaute a dingin thu ka ngetsakna nangawn amaute in hong thukna-in kei hong mawhsak uh hi. Tua ahih ciangin amaute in hoihna a dingin siatna itna a dingin muhdahna tawh kei hong thuk uh hi. Ka gal pa’ langah migilo khat pangsak inla, thusitna a thuak dingin mawhna a zong mi khat paipih sak in. Amah thu a kisit ciangin thu lelin pusuaksak inla, ama hong thumnate zong mawhna suaksak in. Amah khantom hen la, midang khat in ama nasep za ngah tahen. Ama tate pa nei lo hi ta hen la, a zi zong meigong numei hi tahen. Ama tate vak kawikawi-in khut dawhin ngen hen la, a kisiasa a tenna mun panun kihawlkhia ta uh hen. Ama leibatna pa in a neih khempeuh man hen la, khualmite in a omlai sunsunte sut tahen. Ama tungah kuamah migi kei hen la, pa nei lo ama tate kuamah in hehpih kei tahen. Ama suanlekhakte bei hen la, khang khat sungin a vangliatna maimang tahen. Topa’ mai-ah a pu a pate’ mawhna kiciamteh hen la, a nu’ mawhna kimaisak kei tahen. Topa’ mai-ah tua mawhnate omsak inla, leitung panin amah a kiphawkna bei tahen. Bang hang hiam cih leh migitna lah ding ngaihsun lo a, a zawng a cimawhte le lungsim kitamzan mite a sih dongun a bawlsia hi. Amah in mi samsiat nuam a sa hi. Ama tungah samsiatnate tungsak in. Amah in thupha pia nuam lo hi. Kuamah in amah thupha pia kei tahen. Amah pen puansilh bangin samsiatna kingeina seh hi. Tua a samsiatnate ama pumpi sungah tui bangin a guhte sungah sathau bangin lutin kizel tahen. Tua samsiatnate pen ama kituamna puan tawh kibang hen la, nisimin amah a kigakna a kawnggak tawh kibang tahen. Hih bang teng pen keimah hong mawhsakte’ tung, kei hong gensiate’ tungah Topa’ kiang pan a thaman hi tahen. Ahih hangin Topa ka Pasian aw, na min na ngaihsutna tawh keima tangin hong pang inla, na itna kip hoih ahih manin kei hong honkhia in. Bang hang hiam cih leh kei genthei-in ka cimawh a, ka lungsim tawng dongin na hong nasak hi. Nitak a niliim bangin kei ka bei a, kauphe bangin kei hong kisingkhia hi. An ngolhna hangin ka khukte zaw a, ka pumpi silesa zong kiamgawp khinta hi. Amaute’ nuihsatin kei ka om a, amaute in kei hong muh ciangun lusu ngeungeu uh hi. Topa ka Pasian aw, kei hong huh in. Nangma itna kip tawh kituakin kei hong hon in. Topa aw, hih pen nangma bawl, nangma khut in a sep ahihna amaute theisak in. Amaute in kei hong samsiat hangin nangmah in kei thupha nong pia ding hi. Ka langte zahhuaisak inla, na nasempa keimah hong kipsak ta in. Kei hong mawhsakte in mindaina silh uh hen la, puanza silh bangin amau’ maizumna tawh kituamcip ta uh hen. Topa tungah ka lungdamna a gingpha-in ka ko ding a, mihonte lakah amah ka phat ding hi. Bang hang hiam cih leh sih nading gimna a piapa’ khutsung pan a honkhia dingin mi cimawh pa’ taklamah amah hong ding hi. Topa in ka to kumpipa tungah, “Na galte nangma khengakna-in ka bawl matengin ka taklamah tu in,” a ci hi. Topa in Zion panin na kumpi ciangkhut hong puak hi. Na galte’ tungah uk in. Nangma mihonte mual siangtho tungah na makaih ciangin, utna lungsim tawh na mite hong kipia ding uh hi. Daitui bangin zingsangin na khangnona nangma tungah hong tung ding hi. Topa in thu ciamzo a, ama ngaihsutna kheel lo ding hi. “Melkhizedek bangin a tawntungin siampi na hi hi,” a ci hi. Nangma taklamah Topa hong om a, ama heh ni-in kumpite a zogawp ding hi. Kumpipa in minamte lakah thu khen ding a, tua munte si luanghawm tawh a dimsak ding hi. Amah in a zai mahmah leitungah ukpite a susia ding hi. Amah in lampi gei-a om luitui dawn ding a, amah a tha hatin a gualzo pa hi ding hi. Topa phat un. Lungsim thutangte a omna, mihon kikhopna sungah ka lungsim khempeuh tawh Topa’ tungah lungdamna ka ko ding hi. Topa’ nasepna lian a, hoih a sa mi khempeuh in tuate kankan uh hi. Ama nasepnate, pahtawina le minliatna tawh kidim a, ama thumanna kip tawntung hi. Amah in phawk tawntung dingin a lamdang nasepnate hong bawl a, Topa dikin hehpihna nei hi. Amah in amah a zahtakte an pia a, a thuciamna a phawk tawntung hi. Amah in ama mite tungah minamte’ gamh a piakna tawh ama vangliatna hong lak khin hi. Ama nasepnate khempeuhah amah thumanin citak a, a thupiaknate muantaak mahmah hi. A tawntungin tuate kip ngitnget a, thuman le thutang tawh zuih ding ahi hi. Amah in ama mite honkhia a, a tawntung a kimang dingin thupiakna a bawl khin hi. Ama min siangtho-in vanglian mahmah hi. Topa zahtakna pen pilna kipatna ahi hi. Ama thupiak a zuite khempeuh tungah thukhen siamna a pia hi. Amah phat tawntung ding ahi hi. Topa phat un. Topa zahtakin a thupiaknate nuam a sa mahmah mi, thupha ngah mi ahi hi. Ama suanlekhakte leitungah vanglian ding a, a lungsim thutang mite’ suanlekhakte thupha kipia ding hi. Hauhna le nopsaknate a innkuan sungah dim ding a, ama thumanna kip tawntung ding hi. Lungsim thutangte a dingin khuamial sung panin khuavak hong taangkhia hi. Topa dik a, hehpihna nei-in, amah thuman hi. Cingh gamtatin mite tungah leitawi pia a, thutangin a gamta mite tungah thu a hoih hi. Amah kiling lo taktak ding a, kiphawk tawntung ding hi. Amah in thusia zak ding lau lo hi. Topa muang a, ama lungsim a kip hi. Amah lau loin, lunghimawh loin om hithiat a, amah a langpangte a guallelh ding a theitel hi. Amah in hawmkhia zuahzuah a, mizawngte tungah a piakhia hi. Ama migitna kip tawntung a, amah vanglianin kipahtawi ding hi. Migilo in hih thu mu-in a heh suak mahmah a, a ha gawigawi-in a tuimang hi. Migilote’ lametna a mawkna a suakta hi. Topa phat un. Topa’ nasemte aw, phat un. Topa’ min phat un. Topa’ min in tu a kipanin thupha ngah tawntung tahen. Nisuahna pan nitumna dongin Topa’ min phat ding ahi hi. Topa in minam khempeuh tungah uk a, ama minthanna vantung sangin sangzaw hi. Amah in leivui panin mizawngte laamto-in, ninphual panin mi cimawhte le a lungkhamte domto a, uliante tawh kikhawl sakin ama mite’ ulianin a bawl hi. Amah in tasel numei tungah ta guan a, ta a nei nu a lungdamin a bawl hi. Topa phat un. Israel-te, Egypt gam panin pusuakin, Jakob innkuanpihte paudang a zang mite kiang pan a paikhiat uh ciangin Judah-te, Topa’ mi siangtho suak a, Israel-te, ama uk mi a suak hi. Tuipi in amaute mu-in taikhia a, Jordan gun a nungkik hi. Mual liante tuutal bangin diang uh a, mual neute tuuno bangin a diang uh hi. Tuipi aw, na taikhiatna ding, Jordan gun aw, na nungkikna ding, mual liante aw, tuu bangin mual neute aw, tuuno bangin na dianna ding uh bang in hong nasak ahi hiam? Kote tungah hi loin, Topa aw, kote tungah hi loin, na itna kip le na thumanna hangin nangma tungah minthanna om tahen. Bang hangin minam dangte in, “Amaute’ Pasian koi-ah om ahi hiam?” ci laizang ding ahi uh hiam? Vantungah eite’ Pasian om a, ama ut peuhpeuh a hih hi. Amau’ milimte pen ngun le kham hi lel a, mihingte’ khut tawh a kibawl ahi hi. Amaute in kam nei napi-in pau thei lo uh a, mit nei napi-in khua mu thei lo uh hi. Amaute in bil nei napi-in khua za lo uh a, nak nei napi-in a nam thei lo uh hi. Amaute in khut nei napi-in lawng thei lo uh a, khe nei napi-in pai thei lo uh hi. Amaute in aw gingsak thei lo uh hi. Tuate a bawlte le tuate a muangte khempeuh pen tuate mah tawh kibang uh hi. Israel-te aw, Topa muang un. Amah pen note hong huhpa le hong hupa ahi hi. Aaron innkuante aw, Topa muang un. Amah pen note hong huhpa le hong hupa ahi hi. Topa a zahtakte aw, Topa muang un. Amah pen note hong huhpa le hong hupa ahi hi. Topa in eite hong phawk a, thupha hong pia ding hi. Amah in Israel mite, thupha hong pia ding a, amah in Aaron innkuante thupha hong pia ding hi. Amah in Topa a zahtakte a lian a neu-in thupha hong pia ding hi. Topa in note le na tate uh hong pungsak tahen. Van le lei a bawl Topa in note thupha hong pia tahen. Vantung pen Topa a’ hi a, ahih hangin leitung pen mihingte tungah hong pia khin hi. Misite ahi a, gamdaihna sungah a pai peuhpeuhte in ahi zongin Topa phat lo uh hi. Ahih hangin eite in tu a kipanin a tawntungin Topa i phat ngitnget ding hi. Topa phat un. Topa ka it hi; bang hang hiam cih leh amah in ka aw hong za-in ka thumnate hong ngai hi. Amah ka sap sialin ka sapna aw hong ngai hi. Sihna khau in kei hong gakcip hi. Leinuai sihna in kei hong mancip a, natna le lungkhamna ka thuak hi. Tua ciangin Topa’ tungah thu ngenin, “ Topa aw, nang tungah kong thum hi; kei hong hon in,” ka ci hi. Topa dikin thuman a, i Pasian in hehpihna nei hi. Topa in thu thei lo mi hong kem a, kei hong kiniamkoih ciangin amah in hong huh hi. Lungmuang takin ka om ding hi; bang hang hiam cih leh keima tungah Topa hong thunuam hi. Topa in sihna panin kei hong honkhia hi. Ka khituite hong kangsak a, kei hong guallelsak lo hi. Tua ahih ciangin mihingte’ omna leitung, Topa’ mai-ah nungta-in ka vak kawikawi hi. “Nakpi takin gimna ka thuak hi,” ka cih hun ciang nangawnin ka upna mah ka len cinten hi. Lunghihmawhna tawh, “Mi khempeuh zuau gen vive hi,” ka cih hun nangawnin ka um lailai hi. Kei tunga ama thupha tampite Topa’ tungah bangci thuk ding ka hi hiam? Topa in kei hong hotkhiat ka lungdamna hangin, ama kiangah tuiphih biakna ka paipih ding hi. Topa’ tungah ka thuciamnasa pen ama mite khempeuh a kikhopna munah ka pia ding hi. Ama mi siangthote a sih ciangin Topa in na sa mahmah hi. Topa aw, kei pen nangma nasem ka hi hi. Nangma nasem ka hi a, na nasemnu’ ta ka hi hi. Keimah hong kikhihnate nong sutkhiatsak zo hi. Lungdam koh biakpiakna nang tungah kong pia ding a, Topa’ tungah thu kong ngen ding hi. Minam khempeuhte aw, Topa phat un. Minam khempeuhte aw, amah phat un. Bang hang hiam cih leh eite a hong itna lian mahmah a, Topa’ thutakna a tawntungin kip ngitnget hi. Topa phat un. Topa’ tungah lungdamna ko un. Bang hang hiam cih leh amah hoih a, ama itna kip tawntung hi. “Ama itna kip tawntung hi,” Israel-te in ci ta uh hen. “Ama itna kip tawntung hi,” Aaron innkuante in ci ta uh hen. “Ama itna kip tawntung hi,” amah a zahtakte in ci ta uh hen. Ka cihmawhna-ah Topa ka sam a, Topa in hong dawngin mun tanzau-ah hong koih hi. Topa in kei hong ompih hi. Bangmah ka kihta kei ding hi. Mihingte in kei, bang hong cihzo ding ahi uh hiam? Kei hong huh dingin kei lamah Topa om hi. Kei hong mudahte pen gualzawhna tawh ka en ding hi. Mi i muan sangin Topa belh ding hoihzaw hi. Uliante i muan sangin Topa belh ding hoihzaw hi. Minam khempeuh in kei hong umcih uh hi. Ahih hangin Topa’ vang tawh amaute ka sugawp hi. Amaute in ka kimkotah kei hong umcih uh hi. Ahih hangin Topa’ vang tawh amaute ka sugawp hi. Amaute in khuaipi bangin kei hong umcih uh a, ahi zongin selkeu kuang bangin amaute daikik pak uh hi. Topa’ vang tawh amaute ka sugawp hi. Kei ka puk nadingin nakpitakin hong kisawn a, ahih hangin Topa in kei hong huh hi. Topa in a vanglian, a thahatin kei hong bawl a, amah pen kei a hong honpa ahi hi. Ngai un! Thuman mite’ puanbuk sungah gualzawh lungdamna la kisa a, “ Topa’ taklam khut in a lian nate hih khin hi. Topa’ taklam khut kipahtawi a, Topa’ taklam khut in a lian nate hih khin hi,” kici hi. Kei ka si kei ding a, ka hing ding hi. Topa’ sepnate ka gengen ding hi. Topa in nasia takin kei hong thuhilh a, ahih hangin kei hong sisak lo hi. Topa’ tungah lungdamna ko-in ka lut theih nadingin biakinn kongpite kei hong hon in. Hih pen Topa’ kongpi ahi hi. Thuman mi bek hih kongpi-ah lut ding hi. Nangmah in kei hong dawngin, hong honkhia na hih manin nangma tungah ka lungdam hi. Innlamte in a nilkhiat suang pen innkiu suang bulpi suak khinta hi. Hih pen Topa’ nasepna hi a, eite’ mitah lamdang hi. Hih ni pen Topa’ hong piak ni hi a, eite lungdamin i kipak ding hi. Topa aw, kote hong hon in; hong thum ung. Topa aw, kong thum uh hi; kote hong daupaisak in. Topa’ min tawh hong pai pa in thupha ngah tahen. Topa’ inn panin nang kong phat uh hi. Topa pen Pasian ahi hi. Amah in eite tungah nopsakna hong piazo hi. Na khut uhah singhiang tawi-in, biakna tau kimkotin pai un. Nang pen keima Pasian na hi a, nangma tungah lungdamna kong ko ding hi. Nang pen keima Pasian na hi a, nangmah kong phat ding hi. Topa tungah lungdamna ko un; bang hang hiam cih leh amah hoih a, ama itna kip tawntung hi. Amau’ gamtatna-ah paubaan om loin Topa’ ngeina sungah a gamtate thupha ngah ahi hi. Nangma thuhilhte limtakin zuih dingin thu nong pia hi. Nangma ngeina kipte zuihna-ah ka gamtatna kip tahen. Na thupiakte khempeuh mitsuanin nei ka hih manin, kei ka maizum kei ding hi. Nangmah biakna ngeina kipte ka sin khit ciangin lungsim thutang tawh nangmah kong phat ding hi. Nangma ngeina kipte ka zui ding hi; kei hong nusia suak kei in. Tangval khat in ama gamtatna a siangtho mahmah dingin bangci kep ding ahi hiam? Nangma thu zuihna tawh ama gamtatna siangthosak thei ding hi. Ka lungsim khempeuh tawh nang ka hong zong hi. Na thupiaknate panin kei hong pialsak kei in. Nangma tungah kong khialh loh nadingin ka lungsim sungah nangma thu ka khol hi. Topa aw, thupha ngah ta in; na ngeina kipte kei hong hilh in. Nangma hong piak nangmah biakna ngeina kipte khempeuh ka gengen ding hi. Hauhnate khempeuh sangin nangma thuhilhnate nuam ka sa zaw hi. Nangma thuhilhnate lungngaingai-in, nangma lampite ka mitsuan ding hi. Nangma ngeina kipte-ah nuam ka sa ding a, nangma thu ka mangngilh ngei kei ding hi. Nungta-in nangma thu ka zuih theih nadingin na nasempa tungah hong cingh in. Nangma thukham sung panin a lamdang nate ka muh theih nadingin keima mitte hong honsak in. Kei pen hih leitungah peemta ka hi hi; kei’ kiang panin na thuphate seel kei in. Nangmah biakna ngeina kipte a tawntungin ka lunggulh venvan hi. Nangmah in na thupiaknate panin a pialkhia, a kisamsiat, a kiphasakte na thuhilh hi. Na thuhilhnate zui ka hih manin amau’ hong nuihsatna le hong simmawhnate panin kei hong suaktasak in. Uliante in kei hong langpangin thu a vaihawm uh hangin na nasempa in na ngeina kipte ngaihsunsun ding hi. Na thuhilhnate ka deih hi. Tuate pen keimah thu hong lakte ahi hi. Guallelin leivui lakah ka lum hi. Na thu omsa bangin kei hong hingsak in. Ka gamtatnate kong gen ciangin nangmah in kei nong dawng hi. Na ngeina kipte kei hong hilh in. Nangma ngeina kipte kei hong theitel sak in. Nangma nasep lamdangte ka ngaihsunsun ding hi. Dahna in kei hong vukcip hi. Nangma thu omsa bangin kei hong thakhauhsak in. A man lo lampite ka zuih khak loh nadingin kei hong kem in. Hong hehpih inla, na ngeinate hong hilh in. Thuman lampi ka teel khin a, na biakna ngeina kipte ka deih hi. Topa aw, na thuhilhnate ka pom hi. Kei hong zahhuaisak kei in. Keima theihna nong zaisak ciangin nangma thupiaknate lawpna tawh ka zui ding hi. Topa aw, na ngeina kipte kei hong hilh in. A mong dongin ka zui ding hi. Nangma thute kemin ka lungsim khempeuh tawh ka zuih theih nadingin thu theihtelna hong pia in. Nangma thupiakna lampi-ah kei hong paipih in. Bang hang hiam cih leh tua-ah nuam ka sa hi. Nangma thuhilhnate’ lamah ka lungsim awnsak inla, ngahna ding bekah awnsak kei in. Bangmahin a kimang lo nate, kei hong kinsak kei inla, nangma thu omsa bangin hong nungtasak in. Na thu hong mangte tungah na thuciamnate, na nasempa tungah hong kipsak in. Ka kihtak hong kikonate kei’ kiang pan heikhia in. Bang hang hiam cih leh nangmah biakna ngeina kipte hoih mahmah hi. En in, na thuhilhnate ka lunggulh hi. Na thumanna tawh kei hong hingsak in. Topa aw, na ciamna bangin na itna kip, na hotkhiatna kei tungah hong tungsak in. Tua hileh na thu ka muanna hangin kei hong zahkote ka dawnna ding hong om ding hi. Nangmah biakna ngeina kipte lamenin om ka hih manin a man thu hong gen theisak tawntung in. Nangma thu tatsat loin ka zui ngitnget ding hi. Nangma thuhilhnate zuih ding hanciam ka hih manin nuamtakin ka nungta ding hi. Kumpite’ mai-ah nangma thute ka gen ding a, maizumna ka thuak kei ding hi. Bang hang hiam cih leh ka deih nangma thupiakna zuih ding nuam ka sa hi. Keima deih ahi na thupiakte ka zahtak a, na ngeina kipte ka lungngaingai ding hi. Keimah nong lametsakna ahi na nasempa’ tungah na thuciamna hong phawk in. Hih pen ka thuakna-ah keima kihehnepna hi a, na thuciamna in kei tungah nuntakna hong pia hi. Mi kiphasakte in kei hong zahko gawp uh a, ahih hangin nangma thupiakna panin kei ka pial kei hi. Topa aw, hun lui lai-a nangmah biakna ngeina kipte ka ngaihsut ciangin ka lung hong nuam hi. Nangma thu a nusia migilote’ hangin ka heh a suak hi. Hih leitung ka omna peuhah nangma ngeina kipte la phuahin ka sa hi. Topa aw, zanin na min ka phawk a, nangma thu ka zui hi. Nangma thuhilhte zui ka hih manin keima tungah hih thupha hong tung hi. Topa pen keima tanh ahi hi. Na thute zuih ding ka kiciam hi. Ka lungsim khempeuh tawh na maipha kong ngen hi. Na thuciamna omsa bangin kei hong hehpih in. Ka gamtatnate ka ngaihsun a, na ngeinate zuih ding ka kiciam hi. Kei kinawhin, na thupiakte zuih ding ka zekai kei hi. Migilote’ khau in kei hong vialh hangin nangma thu ka mangngilh tuan kei hi. A thuman na ngeina kipte hangin nangmah a phat dingin zankim laitakin ka tho hi. Kei pen, na thuhilhte a zui, nangmah a hong zahtakte tawh a kikhawlpa ka hi hi. Topa aw, leitung pen nangma itna kip tawh kidim hi. Na ngeina kipte kei hong hilh in. Topa aw, na thuciamna bangin na nasempa na limbawl hi. Na thupiakte um ka hih manin thu khentel theihna le theihsiamna hong hilh in. Gim nong piak ma-in lam ka pial thei zel a, ahih hangin tu-in na thu ka zui hi. Nangmah na hoih a, a hoih nate na sem hi. Na ngeina kipte kei hong hilh in. Mi kiphasakte in kei’ thu, zuau vive gengen uh a, ahih hangin keimah in ka lungsim khempeuh tawh na thuhilhte ka zui hi. Amaute’ lungsim in thu theithei loin khikcip a, ahih hangin keimah in nangma thu sung nuam ka sa hi. Nangma ngeina kipte ka sin theih nadingin gimna ka thuak pen kei a dingin hoih mahmah hi. Nangma kam sung pana thu pen kham le ngun tul tampite sangin kei a dingin hoihzaw hi. Nangmah in kei hong piangsakin na hong bawl hi. Na thupiaknate ka sin theih nadingin thu theihtelna hong pia in. Nangma thuciamna muang ka hih manin nang hong zahtakte in kei hong mu-in lungdam ding uh hi. Topa aw, nangmah biakna ngeina kipte man hi, ci-in ka thei a, na thumanna hangin kei gim na hong pia hi. Na nasempa tungah na thuciamna bangin keimah hong hehnem dingin na itna kip a baihsa-in hong omsak in. Ka nuntak theih nadingin kei hong hehpih in. Bang hang hiam cih leh nangma thu nuam ka sa hi. Mi kiphasakte zahhuaisak in. Bang hang hiam cih leh amaute in khemna tawh kei hong lumlet uh hi. Ke’n ahihleh na thuhilhte ka lungngaingai ding hi. Na teci pannate a theih nadingun nang hong zahtakte kei’ lamah hong kiheisak in. Guallelh maizumna ka thuak loh nadingin nangma ngeina kipte a kicing takin a zuizo mi hong hisak ta in. Na hong hotkhiat ding ka ngakngakna-in ka tha bei ta a, nangma thu muangin ka lamen hi. Na thuciamnate ka etetna-in ka mitte thazaw ta hi. “Cik ciangin hong hehnem ding na hiam?” kong ci hi. Bang hang hiam cih leh kei pen meikhu lak a a kikoihdak savun-um tawh ka kibang a, ahi zongin nangma ngeina kipte ka mangngilh tuan kei hi. Na nasempa in bang tanvei ngaklai ding ka hi hiam? Kei hong bawlsiate cik ciangin thu khen ding na hi hiam? Nangma thu a zui lo, mi kiphasakte in keimah hong siahna-in gum a to uh hi. Nangma thupiakte khempeuh man taktak hi. Amaute in thuman lopi-in kei hong bawlsia uh hi. Kei hong huh in. Amaute in kei hong thatzo dektak uh hi. Ahih hangin na thuhilhnate ka mangngilh tuan kei hi. Na kam pana na teci pannate ka zuih theih nadingin na itna kip tawh kei hong hingsak in. Topa aw, vantungah nangma thu kip tawntung hi. Nangma thumanna khang tawntungin kip hi. Nangmah in leitung na kipsak a, om tawntung hi. Nangma sehna tawh tu dongin amaute kip uh hi. Bang hang hiam cih leh na khempeuh nangma nasem ahi hi. Nangma thu, nuam a sa lo hileng, ka gimthuakna-ah ka kisia khinzo ta ding hi. Nangma thuhilhte ka mangngilh ngei kei ding hi. Bang hang hiam cih leh tuate tawh nong nungtasak hi. Kei pen nangma a’ ka hi hi. Kei hong hon in. Bang hang hiam cih leh nangma thuhilhte zuih ding ka hanciam hi. Migilote in keimah a hong that dingin hong buk uh hi. Ahih hangin na teci pannate ke’n ka lungngaingai ding hi. A kicinga a kingaihsun nate khempeuh in mong a neihna ka mu khin a, ahih hangin na thupiakna in mong nei loin zai mahmah hi. Na thu deih mahmah ing. Sun tawntungin ka lungngaihngaih ahi hi. Na thupiakna in ka langte khempeuh sangin a pilzaw-in hong bawl hi. Bang hang hiam cih leh tua pen kei tawh omkhawm den hi. Ka siate khempeuh sangin thu ka telzaw hi. Bang hang hiam cih leh na teci pannate ka ngaihsunsun hi. Khanghamte sangin thu ka telzaw hi. Bang hang hiam cih leh na thuhilhnate ka zui hi. Na thu ka zuih theih nadingin gamtatsia khempeuh ka pelh hi. Nangmah in hong hilh khin na hih manin na biakna ngeina kipte panin kei ka pial kei hi. Nangma thute khum mahmah a, khuaizu sangin khumzaw hi. Na thuhilhnate hangin thu theihtelna ka ngah hi. Tua ahih ciangin a man lo lampi khempeuh ka mudah hi. Nangma thu pen lam hong lak ding meivak hi a, ka paina lampi-ah khuavak ahi hi. A thuman ahi nangmah biakna ngeina kipte a zui dingin ka kiciam khin a, ka kipsak khin hi. Nakpi takin gimna ka thuak hi. Topa aw, nong ciamsa bangin kei hong nungtasak in. Topa aw, phatin kong biaknate hong sang inla, nangmah biakna ngeina kipte kei hong hilh in. Nisimin ka nuntakna a lauhuai sungah om ngitnget a, ahih hangin nangma thu ka mangngilh tuan kei hi. Migilote in kei thang hong siah uh a, ahih hangin na thuhilhnate panin kei ka pial kei hi. Nangmah biakna ngeina kipte tawntung keima luah ahi hi. Tuate pen keima lungdamna ahi hi. Nangma ngeina kipte ka sih mateng a zui tawntung dingin ka lungsim ka khensat hi. Nangma tungah a thuman lote ka mudah a, ahih hangin keimah in nangma thu ka deih hi. Nang pen keima bukna mun le kei hong hupa na hi hi. Na thuciamna ka muang hi. No, siatna a bawlte aw, Pasian’ thupiakte ka zuih theih nadingin kei kiang panin paikhia un. Kei ka nuntak theih nadingin na thuciamna tawh kizui-in kei hong huh inla, ka lametna-ah kei hong zahhuaisak kei in. Ka suahtak theih nading le na ngeina kipte sungah nuamsa-in ka om ngitnget theih nadingin kei hong huh in. Nangma ngeina kipte panin a pialkhiate khempeuh na nilkhia hi. Amau’ khem siamna a mawkna ahi hi. Leitung a migilote khempeuh sik-ek bangin na ngaihsun hi. Tua ahih ciangin na teci pannate ka deih hi. Nang kong zahtakna hangin ka khuasikmul suak a, na thukhennate ka zahtak hi. Thutang thumanin ka gamta hi. Hong nengniamte’ khut sungah kei hong nusia kei in. Na nasempa a dingin nangmah hong kikham inla, mi kiphasakte hong nengniamsak kei in. Nangma hotkhiatna le a man na thuciamna hong tun ding ka etna-in ka mitte a gim ta hi. Na itna kip tawh kituakin na nasempa tungah hong bawl inla, na ngeina kipte kei hong hilh in. Kei pen na nasempa ka hi hi. Na thuhilhnate ka theih nadingin thu theihtelna hong guan in. Topa aw, nangma thu kipalsat khin ahih ciangin thu na khen ding hun hita hi. Tua ahih ciangin khamte, le kham hoihpente sangin nangma thupiakna ka deihzaw hi. Tua ahih ciangin na thuhilhnate khempeuh tawh a kituakin kei ka gamta a, a man lo lampi khempeuh ka mudah hi. Na thuhilhnate lamdang pha mahmah a, ka lungsim khempeuh tawh tuate ka zui hi. Na thute gentelna in khua vaksak a, thu thei lote tungah thu theihtelna a guan hi. Na thupiakte ka lunggulhna-in ka kam ka-in ka leii ka kha hi. Nangmah hong itte tungah na hih ngei bangin kei lamah hong kihei-in kei hong hehpih in. Na hong ciamsa bangin ka pukna ding panin hong kem inla, keima tungah siatna gualzosak kei in. Nangma thuhilhte ka zuih theih nadingin hong nengniamte’ kiang pan kei hong honkhia in. Na nasempa tungah na mai hong taangsak inla, na ngeina kipte hong hilh in. Mite in nangma thu zui lo uh ahih manin ka khitui hawk luanin a luang hi. Topa aw, nang na thuman a, na thukhennate zong thuman mahmah hi. Nangma koihsa ngeina kipte thumanin thutak hi. Ka galte in nangma thu kin het lo uh ahih manin keima hehna mei bangin a kuang hi. Na thuciamnate kician mahmah a, na nasempa in tuate deih mahmah hi. Kei ka neu a, hong kisimmawh hi. Ahih hangin na thuhilhnate ka mangngilh tuan kei hi. Nangma thumanna kip tawntung a, na thukham zong man tawntung hi. Dahna le lungkhamna ka tungah hong tung a, ahih hangin na thupiaknate nuam ka sakna ahi hi. Na teci pannate a tawntungin thuman hi. Thu theihtelna hong guan in; tua hileh ka nungta ding hi. Ka lungsim khempeuh tawh nang tungah kong kiko hi. Hong dawng in, Topa! Na ngeina kipte ka zui ding hi. Nang tungah kong kiko hi. Na thuhilhnate ka zuih theih nadingin kei hong hon in. Khuavak ma-in tho-in huhna ngenin kong kiko a, nangma thuciamna hong tun ding lamenin ka om niloh hi. Nangma thuciamna a lungngaingai dingin zan khuavakin ka zanhak hi. Topa aw, na itna kip tawh a kizui-in ka aw hong za inla, nangma thutang tawh kizui-in ka nuntakna hong kem in. Gitloh ngimna tawh kei hong bawlsia mite in kei hong nehta uh a, amaute in nangma thu ngaihsutin nei lo uh hi. Ahih hangin Topa aw, kei kiangah nang nong nai a, na thupiaknate khempeuh ahi taktak vive ahi hi. Tuate a tawntungin a kip dingin na bawl ahihna thu, nangma thuhilhnate panin sawtpi-in ka thei hi. Ka thuakna hong en inla, kei hong honkhia in. Bang hang hiam cih leh nangma thu ka mangngilh kei hi. Ka thu-ah hong pang inla, kei hong suaktasak in. Na ciamsa bangin kei hong honkhia in. Migilote, kihonkhia lo ding hi. Bang hang hiam cih leh amaute in na thukhamte zui lo uh hi. Topa aw, na hehpihna lian hi. Na biakna ngeina kip tawh a kituakin kei hong honkhia in. Kei hong bawlsiate, ka langte tam mahmah a, ahih hangin nangma thu panin kei ka pial tuan kei hi. Thuman lo mite ka muh ciangin ka kih mahmah hi. Bang hang hiam cih leh amaute in nangma thupiakte zui lo uh hi. Nangma thuhilhnate bangzah takin ka deihna hong ngaihsun in. Topa aw, na itna kip tawh a kizui-in kei hong hon in. Na thubulpi thumanna hi a, a man mahmah, nangmah biakna ngeina kipte khempeuh a tawntungin kip paisuak hi. Uliante in thu om lopi-in kei hong bawlsia uh a, ahih hangin na thute lamdang sa mahmahin ka thupi ngaihsut hi. Vankinusia tampi tak a ngah pa bangin na thuciamna-ah ka lung a dam mahmah hi. Zuaunate zadahin ka kih a, ahih hangin nangma thu ka deih mahmah hi. Nangmah biakna ngeina kipte hangin nisimin sagihvei nang kong phat hi. Nangma thu a deihte in lungnopna lianpi ngah uh a, amaute a tuksakzo ding bangmah om lo hi. Topa aw, nong hotkhiat ding ka ngak a, na thupiakte ka sem hi. Na thuhilhnate ka zui a, tuate ka nak deih mahmah hi. Na thuhilhnate le na ngeina kip omte khempeuh hoihtakin ka zui a, ka gamtatna khempeuh nangmah in na hong mu hi. Topa aw, kong kikona aw, na kiang hong tung hen la, nangma thu omsa tawh kizui-in thu theihtelna kei hong guan in. Keima thumna in na kiang hong ban hen la, nangma thu omsa tawh kizui-in kei hong honkhia in. Na ngeina kipte kei hong hilh na hih manin kong phat tawntung ding hi. Na thupiak khempeuh man mahmah ahih manin nangma thu phatna la ka sa ding hi. Nangma thuhilhte hong zui ka hih manin keimah hong huh dingin a kigingsa-in om tawntung in. Topa aw, nong hotkhiat ding ka lamen a, nangma khut sungah nuam ka sa mahmah hi. Nang kong phat theih nadingin kei hong nungtasak inla, nangmah biakna ngeina kipte kei hong huhsak in. A gammang tuu bangin lam ka pial khin hi. Tua ahih manin na nasempa hong zong in. Bang hang hiam cih leh nangma thupiaknate ka pelh kei hi. Ka cihmawh ciangin Topa’ tungah ka kiko a, amah in hong dawng hi. Topa aw, mizuaute le mikhemte’ kiang panin kei hong honkhia in. Mikhem theite aw, note’ tungah bang hong kipia ding a, note’ tungah bang hong kihih ding ahi hiam? Galhang pa’ thal hiamte le sesing hol-am hi ding hi. Note lakah ka omkhak pen Meshek gam sungah tenkhak sangin haksazaw a, Kedar mite lakah tenkhak sangin siahuaizaw hi. Gal kilemna a deih lo mite lakah sauvei ka teng luakha hi. Kei pen gal kilemna a ngaihsun mi ka hi hi. Ahih hangin kilemna ding thu ka gen ciangin amaute in galkido ding utna tengin nei uh hi. Keimah in mualtung lam ka ento hi. Keimah huhna koi lai pan hong pai ding ahi hiam? Van le lei a bawl Topa’ kiang panin keimah huhna hong pai hi. Amah in ka khe taalsak lo ding a, kei hong kem pa lusu lo ding hi. En un, Israel a kem pa lusu lo a, zong ihmu lo hi. Topa in nang hong cing ding a, nangmah a hong hu dingin na kiangah hong om hi. Sunin ni in nang hong gimsak lo ding a, zanin kha in zong nang hong sukha lo ding hi. Topa in siatna khempeuh panin nang hong hu ding a, amah in a muanhuai-in nang hong kem ding hi. Topa in tua kipan a tawntungin na vaksuk na vaktohna-ah nang hong kem ding hi. Amaute in kei tungah, “ Topa’ inn-ah pai ni,” hong cih uh ciangin kei ka kipak hi. Jerusalem aw, na kulhkongpi sungah kote hong tungin ka ding khinta uh hi. David’ innkuante’ kumpi tokhom, thukhenna ding kumpi tokhomte, tua lai-ah kikoih hi. Jerusalem khuapi, a nopsakna ding thu ngen unla, “Nang hong itte a dau pai tahen. Na khua sungah lungnopna om hen la, na galvilna tausangte’ huam sungah lungmuanna om ta hen,” ci-in ngen un. Sanggamte le kikholhpihte ka khualna-in, “Jerusalem in nopna om ta hen,” ka ci ding hi. Topa eite’ Pasian’ inn ka khualna-in nangma hoihna ding thu ka ngen ding hi. Vantungah a om pa aw, nangmah kong ento hi. Nasem pasalte in a topa uh muang a, nasem numeite in a tonu uh a muan mah bangin ko tungah hehpihna nong neih matengin Topa kote’ Pasian kong mitsuan uh hi. Kote hong hehpih in. Topa aw, kote hong hehpih in. Bang hang hiam cih leh kote in ka thuak zawh loh uh simmawhna ka thuak uh hi. A ututin a gamta mite in kote a hong zahkona, a kiphasak mite in hong simmawh bawlna hangin ka gimthuakna uh sauvei lua khinta hi. Israel mite aw, Topa in hong panpih lo hileh i tuah ding thu thei un. Eite langpangin mite hong kipat ciangin eite’ lamah Topa hong pang lo hileh, eite’ tungah a hehna uh a kisosuah ciangin amaute in eite a hingin hong nawmvalh khin ding uh hi. Tuikhang in eite hong tai-in, tuihual in hong tum khin ding a, tuipi husiate in hong tuummang khin ding hi. Amaute’ suksiat dingin eite a hong piakhia lo Topa in thupha ngah tahen. Thangsiahte’ thangzak panin vasa a suahtak bangin eite i suakta hi. Thangkhau kibottat a, eite i suakta khinta hi. Van le lei a bawl Topa’ tung panin eite huhna hong pai hi. Topa a muang mite pen ling hetloin a om tawntung Zion Mual tawh kibang hi. Jerusalem kimkotah mualte a om mah bangin ama mite’ kimkotah tua kipan a tawntungin Topa om ding hi. Thuman mite a khialhkhak loh nadingun amau a kipia leitang tungah migilote in amaute uk paisuak lo ding hi. Topa aw, a hoih mite tung le na thupiakna a zui mite tungah hehpihna hong nei in. Ahih hangin amau’ gitlohna a zuite pen siatna a bawlte gim na piak ciangin amaute tawh piakhawm in. Israel tungah nopna om ta hen! Topa in Zion-ah eite hong ciahpih kik ciangin i mang tawh kibang liang hi. Lungdamin i nui a, lungdam lua-in la i sa hi. Tua ciangin minam dangte kiho-in, “ Topa in amau a dingin na lianpite bawl khinta hi,” kici uh hi. Topa in eite a dingin na lianpite bawl khinta a, eite i kipak hi. Topa aw, lei keuna munah guah in tui a puak bangin kote’ nopsaknate a ngei hong bangsakkik ta in. Khitui tawh khai a tuhte lungdamin kikona tawh an la sak ta in. Kap kawmin kuankhia-in a tuh ding khaici a pua mi lungdamin kikona tawh buhlomte pua-in hong ciah ding hi. Topa in inn lampih kei leh innlamte’ sepna a mawkna ahi hi. Topa in khuapi hutpih kei leh khuapi cingte’ cinna a mawkna ahi hi. Zingsangin tho baihin, gimpi a nangma sepsa an na nek hakna zong a mawkna mah ahi hi. Bang hang hiam cih leh amah in ama itte tungah a ihmut sung nangawnun a pia hi. En un, tate pen Topa’ tung pana letsong hi a, tapate pen ama hong piak thupha ahi hi. Mi khat in a khangno lai-in a neih tate pen galhang pa’ khutsunga a om a thaltangte tawh kibang hi. A thallawng dimin tua bang thaltang a nei pa mi lungdam ahi hi. Amah guallel ngei lo ding a, zahhuai ngei lo ding hi. Topa zahtakin ama thu a zui mi khempeuh thupha ngah mi ahi hi. Na khut tawh na sep thaman na ne ding a, na lungdamin na maavang ding hi. Nangma inn sungah na zi, a gah pha mahmah leenggui tawh kibang ding a, na sabuai kiimah a tu na tate, oliv no dawng hilhhelh tawh kibang ding uh hi. En un, Topa a zahtak mi tua bangin thupha kipia ding hi. Topa in Zion panin nang thupha hong pia hen la, na nuntak sung tawntung Jerusalem’ nopsakna mu ta in. Na tute a mu dingin hong siam tahen. Israel tungah nopna om ta hen! “Ka neu lai a kipanin nakpitakin amaute in kei hong gimsak uh hi,” Israel in tu-in ci tahen. “Ka neu lai a kipanin nakpitakin amaute in kei hong gimsak uh a, ahih hangin amaute in kei hong zo nai lo uh hi. Lo khote in lei a kuih bangin ka nungzang hong kuikek uh a, tu-ma-kuakte tawh kibangsak uh hi. Topa thuman a, amah in migilote’ henna khaute sutat khinta hi,” amaute in ci ta uh hen. Zion a mudahte khempeuh maizumin kinungkiksak tahen. Topa aw, ka lungkham mahmahna panin nang tungah kong kiko hi. Topa aw, ka aw hong za in. Ka thumna awgingte hong ngai in. Topa aw, nangmah in mawhneite ciamteh lecin, Topa aw, kua in thuakzo ding ahi hiam? Ahih hangin nangmah hong kizahtak theih nadingin nangmah in mawhna na maisak hi. Topa’ hong huh ding lawpna tawh ka ngak a, ama thugen ka muang hi. Galvilte in zingsang hun ding a ngaklah sangin galvilte in phalvak hun ding a ngaklah sangin, Topa ka ngaklah zaw hi. Israel aw, Topa muang in. Bang hang hiam cih leh Topa’ itna kip tawntungin, hong honkhia nuam tawntung hi. Mawhna a om khempeuh panin amah in Israel-te a honkhia ding hi. Topa aw, ka lungsim kiliansak nawn lo a, kei ka kihisak nawnkei hi. Kei a dingin a lianlua le a lamdang luate ngaihsutin ka nei kei hi. A nu’ nawi tawh a kikhenta naupang bangin daitakin ka om dide zota hi. A dai hithiat-a om naupang tawh ka kibangta hi. Israel aw, tu a kipanin a tawntungin Topa muang in. Jaar gam sungah Thuciamna Singkuang ka mu uh hi, cihna thuthak Bethlehem-ah kiza hi. “Ama omna munah va pai ni; ama khengakna-ah va bia ni,” ka ci uh hi. Topa aw, tho inla na vangliatna lim Thuciamna Singkuang tawh na omna munah pai in. Na mite na hotkhiatna thu, na siampite in taangko hen la, na mi siangthote lungdamin awng ta uh hen. Na nasempa David tungah thu na ciamzo hi; na sathau nilh pa nial kei in. Topa in a pelh loh ding kiciamna taktak khat David tungah kiciam a, “Nang’ sung pana na tate khat na kumpi tokhom tungah ka koih ding hi. Na tate in, amau’ tungah ka hilh ding ka thuciamna le ka teci pannate a zuih nak-uhleh, amau’ tate zong na kumpi tokhom tungah tu paisuak ding uh hi,” na ci hi. Bang hang hiam cih leh Topa in Zion teel khinzo a, amah in tua mun pen ama ten nadingin a deih hi. “Hih mun pen ka om tawntungna ding ahi hi; hih mun deih ka hih manin hih lai-ah ka teng ding hi. Ama beemlepang thupha tampi ka pia ding a, a mizawngte an ka vak kham ding hi. Ka hotkhiatna thu, a siampite ka taangkosak ding a, a mi siangthote lungdamin la sa-in awng ding uh hi. Keimah in tua lai-ah David’ suanlekhakte kumpi lianin ka koih ding a, ka sathau nilh pa’ ukna ka kipsak ding hi. Ama galte maizumna tawh ka dimsak ding a, ahih hangin ama kumpi gam khangin zai semsem ding hi,” na ci hi. En un, sanggamte pumkhat suakin a tut khawm uh ciangin bangzahin hoihin nuam ahi hiam? Tua pen a puan ngawng tungah Aaron’ khamul kaisuk zui-in a lu tung panin a taaksuk, sathau manpha tawh kibang hi. Tua pen Zion mualte tungah a kia, Hermon mual pana hong piang daitui tawh kibang hi. Bang hang hiam cih leh Topa in nuntak tawntungna thupha tua munah a pia hi. Zan khuavakin Topa’ inn sungah a ding, Topa’ nasemte khempeuh aw, hong pai-in Topa phat un. Siangtho mun lamah na khutte uh laamto-in Topa phat un. Van le lei a bawl Topa in Zion panin note tungah thupha hong pia tahen. Topa phat un; bang hang hiam cih leh Topa hoih hi. Ama min phatna la sak un; bang hang hiam cih leh amah phatnophuai hi. Bang hang hiam cih leh Topa in ama a dingin Jakob teel a, ama neihsa dingin Israel teel khinta hi. Bang hang hiam cih leh Topa lian hi, ci-in ka thei a, eite’ Topa pen pasian dang khempeuh sangin a lianzaw hi. Vantung le leitung, tuipi le a thukna sung khempeuhah Topa in ama ut peuhpeuh a bawl hi. Amah in leimong panin meiipi kaisakin, guahzuk nadingin khuaphialepte bawl a, a huihkua panin huih a pusuaksak hi. Amah in Egypt gam sungah mihing ganhing tacil khempeuh a vatmai hi. Egypt aw, nangma sungah lim le na lamdangte, Faro le a nasem khempeuhte gimpiakna-in a lak hi. Minam tampite vatmai-in kumpi vangliante that a, Amor kumpipa Sihon, Bashan kumpipa Og le Kanaan kumpite a that hi. Amau’ leitang khempeuh, ama mi Israel-te’ luah dingin a piakhia hi. Topa aw, nangma min kip tawntung hi. Topa aw, na minthanna khang tawntungin a kip hi. Bang hang hiam cih leh Topa in ama mite’ thu khenin, ama nasemte tungah hehpihna a nei ding hi. Minam dangte’ pasian-te pen mihingte’ khut tawh a kibawl, ngun le kham ahi hi. Amaute in kam nei napi, pau thei lo uh hi. Amaute in mit nei napi, khua mu thei lo uh hi. Amaute in bil nei napi, khua za thei lo uh hi. Amaute’ kam sungah naksuk naktoh theihna nei lo uh hi. Milim a bawl mite pen milim mah bangsak in. Milim a muang khempeuhte zong tua milimte mah bangsak in. Israel mite aw, Topa phat un. Aaron’ innkuante aw, Topa phat un. Levi mite aw, Topa phat un. Topa a zahtakte aw, Topa phat un. Jerusalem inn-a a nei, Zion-a om Topa in thupha ngah tahen. Topa phat un. Amah hoih ahih manin Topa tungah lungdamna ko un; bang hang hiam cih leh ama itna kip tawntung hi. Lungdamna pen pasian-te’ Pasian’ tungah ko un; bang hang hiam cih leh ama itna kip tawntung hi. Lungdamna pen topate’ Topa’ tungah ko un; bang hang hiam cih leh ama itna kip tawntung hi. Na lamdang lian a bawl amah bek Pasian ahipa tungah, bang hang hiam cih leh ama itna kip tawntung hi. Theihna tawh vantungte a bawlpa tungah, bang hang hiam cih leh ama itna kip tawntung hi. Tuite tungah leitung a zal pa tungah, bang hang hiam cih leh ama itna kip tawntung hi. Khuavak lianpite a bawlpa tungah, bang hang hiam cih leh ama itna kip tawntung hi. Sun pen ni a uksak pa tungah, bang hang hiam cih leh ama itna kip tawntung hi. Zan pen kha le aksite a uksak pa tungah, bang hang hiam cih leh ama itna kip tawntung hi. Egypt gam tacil khempeuh a vatmaipa tungah, bang hang hiam cih leh ama itna kip tawntung hi. Amau’ gam sung pan Israel-te a paikhiatpih pa tungah, bang hang hiam cih leh ama itna kip tawntung hi. A baan zanin a khut thahat tawh a paikhiatpih pa tungah, bang hang hiam cih leh ama itna kip tawntung hi. San Tuipi a phelkham pa tungah, bang hang hiam cih leh ama itna kip tawntung hi. Israel-te tui laizang a kantan sakpa tungah, bang hang hiam cih leh ama itna kip tawntung hi. Ahih hangin Faro le a mihonte San Tuipi sungah a thalpaih pa tungah, bang hang hiam cih leh ama itna kip tawntung hi. Sehnel gam nawkin ama mite a paipihpa tungah, bang hang hiam cih leh ama itna kip tawntung hi. Kumpi liante a vatmaipa tungah, bang hang hiam cih leh ama itna kip tawntung hi. Kumpi minthangte a that pa tungah, bang hang hiam cih leh ama itna kip tawntung hi. Amor mite’ kumpipa Sihon’ hang le, bang hang hiam cih leh ama itna kip tawntung hi; Bashan kumpipa Og’ hangin, bang hang hiam cih leh ama itna kip tawntung hi. Amaute’ leitang pen gamhluah dingin a piakhia pa tungah, bang hang hiam cih leh ama itna kip tawntung hi. Ama nasem Israel tungah gamh a a piapa tungah, bang hang hiam cih leh ama itna kip tawntung hi. Miniam ihih laitakin a hong phawk pa tungah, bang hang hiam cih leh ama itna kip tawntung hi. I galte’ kiang pan eite hong honkhia pa tungah, bang hang hiam cih leh ama itna kip tawntung hi. Nuntakna a nei khempeuh an a vak pa tungah, bang hang hiam cih leh ama itna kip tawntung hi. Vantung Pasian’ tungah lungdamna ko un; bang hang hiam cih leh ama itna kip tawntung hi. Zion khuapi i ngaihsut khak ciangin Babylon luite gei-ah eite tusukin i kapkap hi. Tua lai-a gialhek kungte tungah i laiza lasaknate i khai hi; bang hang hiam cih leh ei hong man mite in la i sak ding hong deih a, ei hong bawlsiate in i gualnop ding hong deihin, “Zion late khat hong sak un,” hong ci uh hi. Topa’ la, gam dangah bangci sak theih ding ihi hiam? Jerusalem khuapi aw, nang kong mangngilh taak leh ka taklam khut buisum ta hen! Nang kong phawk kei a, kei’ lungdamna a lian pen sangin Jerusalem a sangzaw-in kong koih kei taak leh ka dang tawngah ka leii toncip ta hen! Topa aw, Jerusalem a siat hun lai-in Edom mite in, “Sumai un, sumai un! A bulpi dongin sumai un!” a cih vialna uh phawk in. Misusia Babylon aw, kote’ tungah nong bawl bangin nang tungah hong thukpa in lungdamna ngah ta hen! Na taneute hong laksakin suangtumpi denna-in a hong neihsak pa in lungdamna ngah ta hen! Topa aw, ka lungsim khempeuh tawh nangma tungah lungdamna kong ko a, pasian-te’ mai-ah nangmah phatna ka sa hi. Na biakinn siangtho lamah kei ka kun a, na itna kip le na thumanna hangin na min kong phat hi. Bang hang hiam cih leh na dang khempeuh sangin na min le na thu a liatzawkna na lak hi. Nang kong sap ciangin kei nong dawng a, na thahatna tawh kei nong thakhauhsak hi. Topa aw, leitung khempeuh in na thuciamnate za khin uh ahih manin nang hong phat ding uh hi. Topa’ minthanna lian mahmah ahih manin amaute in Topa’ nasepna ziate la-in sa ding uh hi. Bang hang hiam cih leh Topa lian mahmah napi-in amah in a neute don a, a kiphasakte ahihleh amah in gamlapi panin mu thei veve hi. Haksatna tuamtuamte ka thuak ciangin kei nong kem hi. A heh ka galte, kei’ tangin nong dosak a, na thahatna tawh kei na hong honkhia hi. Topa in kei a dingin a ngaihsutte hong tungsak ding hi. Topa aw, na itna kip tawntung hi. Na sepsa na maban hong tun ta in. Topa aw, nangmah in kei na hong entel a, nong thei khin hi. Nangmah in ka heksukna, ka hektohnate na thei hi. Nangmah in ka ngaihsutnate gamlapi pek panin na thei hi. Nangmah in ka sep laitak ahi a, ka khawl laitak ahi zongin na hong mu a, ka gamtatna khempeuh a vekpi-in na thei hi. Topa aw, kam khat bek nangawn ka paukhiat ma-in, nangmah in ka gen dingteng a vekpi-in na thei khin hi. Nangmah in ka nung le ka mai-ah nong dal a, na thahatna tawh kei na hong hu hi. Tua bangin kei nong theihna pen kei a dingin lamdang lua mahmah a, thuthuk lua ahih manin kei’ theihtel zawh ding hi lo hi. Nangmah a pelh dingin koi-ah pai ding a, nangma omna panin koi lai-ah taikhia ding ka hi hiam? Vantungah kahto leng tua lai-ah nang na om ding a, Leinuai misite’ gamah lupna bawlta leng zong tua lai-ah zong nang na om veve ding hi. Leimong pekah leengin, tuipi mong pekah omta leng zong, tua lai nangawnah nangma khut in kei hong paipihin, na khut taklam in kei hong len ding hi. “Khuamial in kei hong tuamcip hen la, ka kiima khuavak omte zan khuamial suak hen,” ci taleng zong, tua nangawnah, nangma a dingin khuamial pen mial lo a, zan khuamial pen sun nitaang tawh kibang hi. Bang hang hiam cih leh nang a dingin khuamial pen khuavak mah bang lel hi. Bang hang hiam cih leh ka pumpi na khempeuh na hong piangsak a, ka nu’ gil sungah keimah nong khuituah hi. Kihtak dingin a kilawm na hih manin nang ka hong phat hi. Na nasepnate lamdang mahmah! Nangmah in kei nong lim theih mahmah hi. A thukna sung mun simthamah kei hong kikhuituahin hong kibawl laitakin, ka guh ka taang, na mai-ah kiliah lo hi. A kipiangsak nai lo keima pumpi nate na mit in a mu hi. Ka pumpi nate khat beek a om ma, ka ni zah ding a kiciangtan laitakin, tuate khempeuh na laibu sungah kigelh khin hi. Pasian aw, na ngaihsutnate kei a dingin manpha mahmah a, tuate khempeuh a vekpi-in zai mahmah hi. Tuate a mal sim leng sehnel sangin tamzaw hi. Ka khanlawh ciangin nang tawh ka omkhawm lai hi. Pasian aw, migilote that inla, kei kiang panin mi that theite paikhia sak in. Bang hang hiam cih leh amaute in nang hong dem uh a, ngimna hoih lo tawh nang hong pang uh hi. Topa aw, nang hong mudah mite ke’n mudah hi lo ka hi hiam? Nang’ langah hong pangte ke’n kih hi lo ka hi hiam? Amaute ka mudah mahmah a, amaute ka galin ka seh hi. Pasian aw, kei hong entel inla, ka lungsim hong thei in. Kei hong sit inla, ka ngaihsutnate hong thei in. Kei sungah siattheihna a omkha hiam hong en inla, tawntung lampi-ah kei hong kha in. Topa aw, migilote kiang panin kei hong honkhia inla, mi ngongtatte kiang panin kei hong kem in. Amaute in a lung sung uhah thusia geelgeel uh a, gal phuang ngitnget uh hi. A leii uh gulpi leii bang a, a thugente uh gulgu bang hi. Topa aw, migilote’ khutsung panin kei hong cing inla, kei, sukpaih ding a hong sawm mi ngongtatte kiang panin kei hong kem in. Mi kiphasakte in keimah hong siahna-in tehlop tung sim uh a, amaute in ngenthang zakin lam gei-ah thangzak tawh kei hong siah uh hi. Topa’ tungah hih bangin ka ci hi: Nang pen keima Pasian na hi hi; ka thumna awte hong ngai in, Topa! Topa, keima Topa, a thahat hong honkhia pa aw, galkidona sungah keimah nong hu hi. Topa aw, migilo pa’ deihnate tangtungsak kei inla, ama thusia sawmna a maban sotsak kei in! Kei hong umcih mite gualzosak kei inla, kei hong sawmnate uh amau’ lu tung mah tusak in! Amaute tungah mei-am kuang zusak in. A thokikzo nawn lo dingin dum sungah amaute kiasak in! Mi gensia pa leitungah mavangsak kei inla, mi ngongtat pa pen thusia in sulzuih ta hen! Topa in gimna a thuak mite’ thu a panpihna, mi cimawhte a dingin thu a manin a khenna ka thei hi. Thuman mite in nangma min hong phat pelmawh ding uh a, lungsim thutangte pen nangma omna-ah teng ding uh hi. Topa aw, nang kong sam hi; hong kinawh in. Nang kong sap ciangin ka aw hong ngai in. Ka thungetna pen na mai-ah paknamtui bangsak inla, ka khutte ka laptohna pen nitak biakpiakna bangsak in. Topa aw, keima kam a cing ding khat koih inla, ka mukte’ kongkhak a vil ding khat koih in. Mawh bawlnopna lungsim hong neisak kei inla, a gilo mite tawh hong kikhawlsak kei in. Amau’ anlimte hong duhgawh sak kei ta in. Mipha pa kei hong vuasak inla, ahih hangin migilote ka lu sathau nilhsak kei in; bang hang hiam cih leh amau’ gitloh gamtatnate nakpitakin langpangin thu ka ngenngen hi. Amaute, thu kisitin mawhsakna a thuak uh ciangin, Topa’ thute man hi, ci-in a thei ding uh hi. Mi khat in suangpi khat sukhamin leitungah a thehthang gawp bangin Leinuai’ kongvangah amau’ guhte kithehthang hi. Ahih hangin Topa Pasian aw, nang ka hong muang tawntung a, nangmah ka hong bel hi. Tua ahih manin kei hong nusia kei in. Amaute in kei hong siahna uh tehlop le siatna bawlte’ thangzak panin kei hong kem in. Kei ka suahtak khit ciangin amau’ ngenthang sung mahah migilote awksak in. Topa’ hong huh ding ngenin ka kiko a, Topa’ tungah ka thum hi. Ama mai-ah ka lungkim lohna ka sung a, ama mai-ah ka haksatna teng ka gen hi. Ka cih nading ka theih nawn loh ciangin, amah in ka mailam ding hong theihsak hi. Ka paina lampi-ah ka galte in tehlop khat tawh kei hong siah uh hi. Ka kiim ka pam khuadakin ka en kawikawi a, ahih hangin kei hong huh ding kuamah om lo hi. Ka belh ding kuamah om lo a, kuamah in kei hong don lo hi. Topa aw, nang tungah kong kiko hi. Nang pen keima belh na hi a, a hingte’ leitangah keima tanh na hi hi, ka hong ci hi. Ka kikona hong ngai in. Bang hang hiam cih leh nakpitakin kei hong kiniamkoih suk hi. Kei hong bawlsiate’ kiang pan hong honkhia in. Bang hang hiam cih leh kei a dingin amaute hatlua uh hi. Thong sung panin kei hong lakhia in. Tua ciangin nangma mite tawh kong phatkhawm ding uh hi. Bang hang hiam cih leh itna lianpi tawh kei tungah nong gamta hi. Topa aw, ka thungetna hong za inla, kong thumnate hong ngai in. Na thumanna le na thutakna tawh kizui-in kei hong dawng in. Na nasempa, thu hong sit kei in. Bang hang hiam cih leh nangma mai-ah mihing a dikzo kuamah om lo hi. Bang hang hiam cih leh gal in kei hong bawlsia-in hong zogawp hi. Sauveipi lai-a a site bangin a mial sungah hong tusak hi. Tua ahih ciangin cih nading ka thei nawn kei a, ka lungtangah si teng nawn lo hi. Hun luite ka phawk a, na sepsa khempeuh ka ngaihsunsun hi. Na khut in a sepsa nate ka lungngaingai hi. Thu ngenin nang lamah ka khutte ka hong zan a, lei keu in tui a duh bangin nang ka hong duh hi. Topa aw, kei hong dawng mengmeng in. Kei ka cimawh ta hi. Leihawm sung misite kiangah a paisukte tawh ka kibat loh nadingin kei kiang panin na maitang seel kei in. Nang hong muang ka hih manin zingsang simin na itna kip kei hong phawksak in. Nangma tungah thu hong ngen ka hih manin ka pai nading lampi hong hilh ta in. Topa aw, ka langte’ kiang panin kei hong honkhia in. Nangmah a bel dingin ka hong tai hi. Keima Pasian na hih manin nangma deih bangin a gamta dingin kei hong hilh in. Kei hong hehpih inla, lam phei-ah hong kha in. Topa aw, nangma min na ngaihsutna-in keima nuntakna hong kem in. Nangma thumanna tawh kituakin haksatna panin hong paikhiatpih in. Kei pen nangma nasem ka hih manin na itna kip tawh kituakin ka galte khenkhia inla, ka langte khempeuh susia in. Ka khutte galdona ding ka khutmete galkap nadingin a hilh, keimah a hong hu, Topa in thupha ngah tahen. Amah pen ka suangpi le ka munkip muanhuai, ka kulhpi le hong honkhia pa, ka lum le ka belh pa, ka nuai-ah mite a zopa ahi hi. Topa aw, nangmah in na hong phawk tham dingin mi pen bang hi a, nangmah in na hong ngaihsut tham dingin mihing’ tapa bang ahi hiam? Mi pen husan’ khat tawh kibang a, ama hunte pen a tai dandan niliim tawh kibang hi. Topa aw, na vanpite niamsak inla, hong paisuk in. Mualte lawng inla, meikhu suaksak in. Khuaphialep phiasak inla, amaute kithehthang sak in. Na thaltangte lawn inla, amaute susia in. A sangna mun panin na khut hong zan inla, tui lian lauhuaite le gamdang mite’ vangliatna panin hong honkhia in. A kam uh tawh zuauthu a gente le limtakin kiciamna a bawl khit ciang nangawnin zuauthu mah a gen lai vevete’ kiang pan kei hong phel inla, hong honkhia ta in. Pasian aw, la thak khat kong sak ding a, harp zangsawm khausai lasakna nang kong tum ding hi. Kumpite tungah gualzawhna a piapa, na nasem David a honkhia pa na hi hi. A gilo galte kiang panin kei hong hon inla, a kam uh tawh zuauthu a gen limtakin kiciamna a bawl khit ciang nangawnin zuau a gen lai veve gamdang mite’ khutsung pan kei hong honkhia in. Ka tapate uh a tangval lai-in khang cingin a khauh mahmah singkungte bang ta hen la, ka tanute uh a nungak lai-in kumpi inn lamna dinga a kisui innkiu khuampite bang tahen. Ka saalte uh a dimin an nam khempeuh om ta hen la, ka tuute uh a tultul a thenthen-in gamlakah suak tahen. Ka kongzingte uhah cimawhin kikona om kei tahen. Tua bang thupha a ngah mi mi lungdam ahi hi. Topa pen amau’ Pasian ahi mite pen mi lungdam ahi hi. Ka Pasian le ka Kumpipa aw, nangmah hong pahtawi-in a tawntungin nangma min kong phatphat ding hi. Nisimin hong pahtawi-in a tawntungin nangma min kong phatphat ding hi. Topa lian hi; nakpitakin phat ding hi a, ama liatna ngaihsutzawh ding hi lo hi. A khang a khangin nangma nasepnate kiphatphat ding a, a vanglian na bawlnate kigengen ding hi. Na liatna le na minthanna a lamdang nangma sepnate ka lungngaingai ding hi. A vanglian nangma bawlnate mite in taangko ding uh a, nangma vangliatna mah kei zong ka pulak ding hi. Amaute in nangma liatna, na minthanna genkhia-in nangma thumanna nakpitakin sa ding uh hi. Topa dikin hehpihna nei a, heh hak mahmahin itna kip lianpi a nei hi. Topa pen mi khempeuh tungah hoih a, a bawlsa khempeuh tungah hehpihna a nei hi. Topa aw, nangma bawlsa khempeuh in nangma tungah lungdamna hong ko ding uh a, na mi siangtho khempeuh in nang hong phat ding uh hi. Amaute in na kumpi gam a minthanna thu gengenin na vangliatna thu sutsut ding uh a, a vanglian nangma sepnate le na kumpi gam a hoihna, a minthannate mi khempeuh tungah kitheisak ding uh hi. Nangma kumpi gam pen a kip tawntung kumpi gam hi a, nangma ukna khang tawntungin a kip hi. A thuciamna khempeuhah Topa thutak mahmah a, a gamtatna khempeuhah zong hehpihna a nei ahi hi. Topa in a puk mite khempeuh huh a, niamsakna a thuakte khempeuh a sangtosak hi. Nuntak husanna a nei khempeuhte’ mit in nang hong en uh a, a hun a tun ciangin amaute an na vak hi. Nangmah in na khut na hong a, nuntak husanna a nei khempeuhte’ deihna a kicingin na pia hi. Topa pen a sepna khempeuhah thutang a, a gamtatna khempeuhah hehpihna a nei hi. Amah a sam mi khempeuh kiangah Topa nai om a, lungsim takpi tawh a sam mi khempeuh kiangah amah nai om hi. Amah a zahtakte’ deihna a kicingin tungsak a, amaute’ kikona zong za-in amaute a honkhia hi. Topa in amah a itte khempeuh kem a, ahih hangin migilo khempeuh amah in susia ding hi. Topa ka phat tawntung ding hi. Mi khempeuh in a tawntungin ama min siangtho phat ta uh hen. Topa phat un. Ke’n, Topa ka phat ding hi. Ka hin laiteng Topa ka phat ding a, ka nuntak laiteng ka Pasian’ tungah phatnate ka sa ding hi. Huhna a hong pia thei lo uliante ahi a, mi mawkmawkte ahi zongin muang kei un. A husanna a bei ciangin lei-ah ciahkik uh a, tua ni mahmahin a ngaihsutnate uh beita hi. Jakob’ Pasian pen amah huhpa hi-in, ama Topa Pasian a muang mipa mi lungdam ahi hi. Amah in van le lei, tuipi le tuate sungah a om khempeuh bawl a, a tawntungin thuman hi. A kinengniam mite a dingin thumanna semkhia a, gilkialte an a vak hi. Topa in thongkiate a khahkhia hi. Topa in mittawte khua a musak hi. Topa in niamsakna a thuak mite sangtosak a, Topa in thuman mite a it hi. Topa in peemtate kem a, meigong numeite le pa nei lote a huh hi. Ahih hangin amah in migilote’ vaihawmna a suksiatsak hi. Zion aw, nangma Pasian Topa in khang tawntungin uk ding hi. Topa phat un. Topa phat un. Bang hang hiam cih leh eite’ Pasian’ tungah phatnate i sak ding hoih hi. Phatna sak ding nuam a, zong a kilawm ahi hi. Topa in Jerusalem khuapi lam a, amah in a kinilkhia Israel-te a kaikhawm hi. Amah in lungsim kitamte damsak a, amau’ meimate a tuamsak hi. Amah in aksite a phazah ding seh a, tua aksite amau min ciatin a sam hi. Eite’ Topa lian a, ama vang lian mahmah hi. Amah in thu a theihtelna pen ngaihsutzawh ding hi lo hi. Topa in a kisikcip mite laamto-in, migilote leilak a denna hi. Topa tungah lungdamkohna la sa unla, laiza lasakna tawh eite’ Pasian’ tungah la ngaih sa un. Amah in vanpite meiipi tawh tuamin, leitung a dingin gun bawl a, mualte tungah lopa a posak hi. Amah in ganhingte le a ham va-aknote an a vak hi. Ama lungkimna le amah in nuam a saknate pen sakol thahatna le galhangte’ hang hi lo hi. Amah a zahtak mite le ama itna kip a muangte tungah Topa a lungkim hi. Jerusalem khuapi aw, Topa phat in. Zion aw, nangma Pasian phat in. Bang hang hiam cih leh amah in na kulhkongpi zawlte tosak a, nangma mite thupha hong piaksak hi. Amah in na gam sungah kilemna bawl a, mangbuh hoihpente tawh nang hong gilvahsak hi. Amah in thu hong pia a, ama thu manlangin leitung hong tungsuk hi. Amah in tuumul bangin vukkhal hong pia a, vut bangin vukpak hong thehthang hi. Amah in suangtum bangin tuikhalte hong lawnkhia hi. Tua a votna kua in thuakzo ding ahi hiam? Amah in thu pia-in tuate tuisuak hi. Amah in a huih nungsak a, tuite a luang hi. Amah in Jakob tungah ama thu gen a, Israel tungah ama ngeina kipte le ama biakna ngeina kipte a gen hi. Amah in tua bangin minam dang khat peuhpeuh tungah bawl ngei lo hi. Amaute in amah biakna ngeina kipte thei lo uh hi. Topa phat un. Topa phat un. Vantung panin Topa phat unla, a sangna panin amah phat un. Ama vantungmi khempeuh aw, amah phat un. Ama mihonte khempeuh aw, amah phat un. Ni le kha aw, amah phat un. A taang aksi khempeuh aw, amah phat un. Van sangpente le vantung a om tuite aw, amah phat un. Topa’ min amaute phatsak un. Bang hang hiam cih leh amah in thu pia a, amaute a piang hi. Amaute a tawntung a om dingin amah in kipsak a, a palsat loh ding uh thupiakna amah in a bawl hi. Leitung panin Topa phat un, no gulpi liante le tuipi thuk khempeuh, mei le gial, tuikhal le vuk, ama thupiakna a mang huihpi! Amah phat un, no mual liante le mual neute khempeuh, gah a nei singkungte le taamtak singkung khempeuh! Gamsate le innsate khempeuh, a bokvak ganhingte le a leeng vasate khempeuh! No leitung kumpite le mihing khempeuh, leitung uliante le thukhente khempeuh! Nungakte le tangvalte, teeksiate le naupangte aw, amah phat un. Topa’ min phat un. Bang hang hiam cih leh amah bek a minlian hi a, ama minthanna pen leitung le vantung sangin sangzaw lai hi. Amah in ama mite thahatsak a, ama mi siangthote khempeuh, ama mai-ah a om Israel-te khempeuh in amah phat uh hi. Topa phat un. Topa phat un. Topa’ tungah la thak sa un. A thuman mite’ kikhopna sungah amah phatna sa un. Amah a Bawlpa tungah Israel lungdam hen la, amau’ Kumpipa’ tungah Zion mite kipak tahen. Lamna tawh amah phat unla, khuang le laiza lasakna tawh ama tungah la ngaih sa un. Bang hang hiam cih leh ama mite tungah Topa lungdam a, miniamte gualzo sakin a pahtawi hi. A gualzawhna uhah thuman mite lungdamin diang uh hen la, ama mai-ah khukdinin nuamna la sa uh hen. Topa phat un. Ama biakinn sungah Pasian phat unla, ama vangliatna mun vantungah amah phat un. A vanglian ama sepnate hangin amah phat unla, a liat mahmahna tawh kituakin amah phat un. Peengkul aw tawh amah phat unla, githa lasakna le harp lasakna tawh amah phat un. Khuang le lamna tawh amah phat unla, khausai lasaknate le tamngai tawh amah phat un. Daltuahte tawh amah phat unla, nakpitakin a ging daltuahte tawh amah phat un. Husang thei khempeuh in Topa phat un. Topa phat un. David’ tapa, Israel kumpi Solomon’ paunakte: Mite in pilna le thuhoihte a phawk theih nading, khiatna thuk a nei kammalte a theih theih nading. A hoihin a pil gamtat theih nading, thuman, thutang, a kilawmin a gamtat theih nading. Thuthei nai lote in a theih nading, khangnote in pilna le thu ngaihsut theihna a ngahna ding. Mi ciimsate ciimsak semsemin, mi pilsate pilsak semsemin, paunakte le thugentehnate hoihtakin thei-in, mipilte’ kampau leh a thugente uh a theih nading ahi hi. Topa zahtakna in pilna kipatna hi a, mihaite in pilna le thuhilhna don lo uh hi. Ka ta aw, na pa’ hong thuhilhna hoihtakin zui inla, na nu’ hong thugente ngai in. Tua thuhilhnate in na gamtat hong hoihsak ding a, kizepna lukhu le kizepna khi bangin hong etlawmsak ding hi. Ka ta aw, mi hoih lote in nang hong zol ciangin, amau’ zolna zui kei in. Amaute in, “Hong pai in, mi khatpeuh va that ni! Mi ommuang khat va muansuam ni! I muh tungin a cidam, a hing kimlai hinapi, i suk khit ciangin a sisa hi ding! Na a manpha a namkimin i sut ding a, tua bang nate i inn dimin i nei ding hi. Kote tawh hong kipawl lecin, i ngah khempeuh i hawm ding hi,” hong cih uh hangin ut kei in. Ka ta aw, tua bang mite tawh kikhawl kei inla, amaute kiang panin kihemkhia in. Amaute a sia-in gamta nuam vanvan uh a, mi thah ding lamsang haksa sa het lo uh hi. I matnop vasate’ muhtangpi-in, i siahna ngenthang zaak leeng a mawkna ahi hi. Ahi zongin mite in amau’ awkna ding mah thang siah uh a, kuamah dang awk loin, amau mah hai awk uh hi. Zawhthawh thu tawh mi’ na a sutte in sihlawh tawntung zaw a, hih bangin a gamtate in tua bangmah tuak ngitnget hi. Ngai in! Kongzing lampi le van kizuakna phualpi-ah pilna hong kiko hi. Khuapi kulhkongpi tual le mi a kikhopna mun khempeuhah nakpitakin hong awngkhia a, “Mihaite aw, bang tanvei hai omom nuam na hi uh hiam? Bang tanvei pilna thudon loin om ding na hi uh hiam? Pilna ngaihsutin nei ngei lo ding na hi uh hiam? Kong thuhilhna hong ngai un; ka ngaihsutna kong gen ding a, ka theihna kong zasak ding hi. Keimah in note hong samsam napi-in nong ngai nuam kei uh a, ka khut hong vanvan napi-in kuamah in nong thudon kei uh hi. Ka thugente khempeuh hong thudon loin, kong tainate khempeuh hong mang nuam lo na hih manun, lungkhamna na tuah uh ciangin kong nuihsan lel ding a, launa na tuah uh ciangin kong thusim kei ding hi. Lungkhamna in huihpi’ nawk bangin note hong nawkgawpin, pingpei’ pei bangin note hong peigawpin, lungkhamna le sinkhamna na tuah uh ciangin kong don kei ding hi. Tua bang hun ciangin kei nong sam ding uh a, ahi zongin kong dawng kei ding hi. Limtakin kei nong zong ding uh a, ahi zongin koimahah nong mu kei ding uh hi. Note in pilna na deih kei uh a, Topa na zahtak nuam kei uh hi. Ka thugente na deih kei uh a, kong thuhilhna ngai nuam lo na hih manun, na gamtatna bangun na thuak ding uh a, nomau’ gamtatna mah in note hong gimsak ding hi. Bang hang hiam cih leh thu thei lote in pilna a don loh manun sihlawh uh a, mihaite in lunghihmawhna a neih loh manun siatlawh uh hi. Ahi zongin ka thugenna a ngaite in lungnopna ngah ding uh a, launa nei loin nuamtakin om hithiat ding uh hi,” a ci hi. Ka ta aw, kong hilhte thei inla, kong gente mangngilh kei in. Pilna thute limtakin ngai inla, na theihtel zawh nadingin hanciam in. Thu theih nading hanciam takpi inla, thu muhna ding hahkat takpi in. Ngun, ahih kei leh a kiseel sum manpha zon bangin, hahkatin pilna zong in. Tua hileh, Topa zahtakna thu na thei ding a, Pasian na theitel ding hi. Bang hang hiam cih leh pilna a piapa pen Topa hi a, amah pen pilna le siamna a hilh pa ahi hi. Pasian in thuman mite pilna guan a, midikte a hu hi. Amah in thutang mite cing a, amah a itte a kem hi. Tua hileh thuman le thutang a hoih le a kilawm na thei ding hi. Tua ciangin mipil na suak ding a, na pilna hangin nuam na sa ding hi. Na thungaihsut theihna le na thutelna in nangmah hong hu-in, a sia-in na gamtatkhak ding hong kem ding a, kampauna tawh buaina a piangsak thei mi, nuntakna manin a nungta lo, mawhna khuamial sungah a gamta, a sia-in gamtat ding nuam a sa, a sia-a gamtatna-ah a lungkim mahmah, mi lungsim kawi, muan theih loh ding mite panin nang hong kem ding hi. Tua nu’ inn-ah pai lecin sihna lampi a zui na hi a, misite gam a zuan na hi hi. Tua bang numei tawh mawhna a bawl mite in nuntak nuam neikik ngei lo uh hi. Tua ahih manin mihoihte’ gamtat bangin na gamta ding a, thuman mite’ gamtatna na zui ding hi. Bang hang hiam cih leh mi thuman, miginate, hih i leitungah tengin om ding uh a, ahi zongin Pasian in leitung panin migilote lawnkhia-in, singkung zungbawh bangin mawhneite botkhia ding hi. Ka ta aw, kong thuhilhte mangngilh kei inla, kong thugente phawk tawntung in. Kong thuhilhte in na khan hong sausak ding a, hong daupaisak ding hi. Thumanna le cihtakna khahsuah ngei kei inla, na ngawngah tuate okin, na lungtang tungah gelh in. Tua hileh, Pasian’ mai le mite’ mai-ah maipha ngahin na maa vang ding hi. Na lungsim khempeuh tawh Topa muang inla, nang’ theihna suang kei in. Na hihna khempeuhah amah phawk in. Tua hileh lampi man amah in hong lak ding hi. Nangmah a pilin kingaihsun tawm kei inla, Topa zahtakin a sia peel in. Tua hileh nang a dingin damna zatui tawh kibang ding a, na meimate hong damsakin na natnate hong daisak ding hi. Na neihsa le na anpalte tawh Topa zahtak in. Tua hileh na ansalte an tawh kidim ding a, beel dimletin leenggahzu na nei ding hi. Ka ta aw, Topa’ thuhilhna limtakin ngai-in, hong tainate thudon in. Bang hang hiam cih leh pa in a pahtak a tapa a thuhilh bangin Topa in a it mite a thuhilh hi. Pilna nei-in thu a thei mipa, a lungdam mi ahi hi. Pilna nei leeng ngun sangin hoihzaw a, kham sangin zong manpha zaw hi. A manpha pen suangmanpha nangawn sangin pilna manpha zaw lai a, mihingte’ deih theih na lakah tehpih theih ding om lo hi. Pilna in khan hong sausak a, hauhna le pahtawina zong hong piathuah lai hi. Pilna in nuntakna hong nuamsak a, lungmuang takin hong omsak den hi. Pilna a nei mite a lungdam mi hi a, pilna a nei mite nuntakna singkung tawh kibang uh hi. Topa in pilna tawh leitung bawl a, a theihtelna tawh vantung a bawl hi. Ama pilna in guntuite luangsak a, meiite in leitungah guah zusak hi. Ka ta aw, pilna le thu ngaihsut theihna len tawntung inla, cikmah ciangin khahsuah ngei kei in. Tuate pen nang a dingin nuntakna hi ding a, na hoih nadingin kizepna hi ding hi. Tua hileh lungmuang takin na nungta ding a, pukna ding thu bangmah om lo ding hi. Launa om loin nuamtakin na lum ding a, zan tawntung lungmuang takin na ihmu thei ding hi. Migilote tungah huihpi bangin siatna a tun ciangin, nang na lunghihmawhna ding bangmah om lo ding hi. Bang hang hiam cih leh Topa in a muanhuai-in nang hong kem ding a, siatna hong tuaksak lo ding hi. Na hihzawh ding ahih nakleh midangte’ kitangsapna huh tawntung in. Na vaihawmsak theihpah ding thute ahih nakleh, zing ciangin hong paikik in, ci-in a hun sotto kei in. Nangmah hong muangin nangma nai-ah a hong teng na vengpa, gim a ngahna ding bangmah vaihawm kei in. Nangma tungah siatna bangmah a hong bawl lo, mi khatpeuh tawh thu om lopi-in kimawk tot kei in. A ngongtat thei mite engkha kei inla, amau’ gamtat bangin gamtakha kei in. Bang hang hiam cih leh Topa in a sia-in a gamtate mudah a, thuman mite bek a pawlpih dingin a la hi. Topa in migilote’ innsung samsia a, thuman mite’ innsung thupha a pia hi. Amah in mi kihisakte bangmahin sim lo a, a kiniamkhiatte tungah maipha a pia hi. Mipilte in minphatna le pahtawina ngah ding uh a, mihaite in maizumna le mindaina ngah ding uh hi. Tate aw, na pa uh’ hong hilhnate ngai unla, thu na teltheih nadingun limtakin ngaihsun un. Bang hang hiam cih leh kong hilh thute thuhoih ahi hi. Kong hilhte khempeuh limtakin ciamteh un. Kei zong tapa khat neihsun ka hi a, naupangno khat ka hih lai-in ka pa in thu hong hilh a, “Ka thugente ciamteh inla, mangngilh kei in. Kong gen bangin gamta in; tua hileh na nungta ding hi. Pilna le thu ngaihsut theihna na neihna ding hahkat in. Kong gen thute mangngilh kei inla, hoihtakin ngaihsun in. Pilna nusia kei in; tua hileh siatna panin nang hong hu ding hi. Pilna deih in; tua hileh lungmuang takin na om nadingin hong kem ding hi. Pilna na ngahna ding a thupi masa pen hi a, na neih khempeuh na beilawh zongin na zon ding ahi hi. Pilna deih in; mi lianin hong bawl ding hi. Limtakin pom in; pahtawina hong ngahsak ding hi. Pilna in pahtawina le minthanna nangma tungah hong tungsak ding hi,” hong ci hi. Ka ta aw, ka thugente limtakin zui in. Tua hileh na khansau ding hi. Na pilna ding lampi kong hilhzo a, na gamtatna ding zia kong genzo hi. Hoihtakin gamta lecin nang hong nawngkaisakzo ding bangmah om lo ding a, na tai hangin zong na pukkha kei ding hi. Hong kihilhnate lencip inla, khahsuah kei in. Na nuntakna ding ahih manin limtakin zui in. Migilote tawh kikhawl kei inla, amau’ gamtatnate zui kei in. Amau’ gamtat bangin gamta peuhmah ke’n! Gitlohna peel in! Paisan inla, na maban sem in. Migilote in a sia khatpeuh a sep mateng uh lum thei lo uh a, mi khatpeuh a sukzawh mateng uh ihmu thei lo uh hi. Gitloh gamtatna, annek bangin nuamsa uh a, ngongtatna, tui dawn bangin a ngaihsun uh hi. Ahi zongin thuman mite’ zuih lampi ahihleh sun dong a taang pha semsem zingsang khuavak tung tawh kibang hi. Migilote’ lampi ahihleh zan khuamial bangin mial a, amaute a tuksak, a suihkhakte nangawn mu thei lo uh hi. Ka ta aw, ka thugente don inla, ka kammalte ngai in. Na kiang panin paikhiasak kei inla, na lungsimah ciamteh in. Bang hang hiam cih leh tua thu a zuite in nuntakna le cidamna-in a nei uh hi. Na lungsim ngaihsutnate nuntakna nak hi a, na neihsa a manpha pen bangin na kep ding ahi hi. A man lo thu gen ngei kei inla, zuauthu le a kiza khial thei ding kammalte zang het kei in. Kisuanna nei hetloin om liuliau inla, maizumin kuncip kei in. Na khatpeuh na sepna thu theitel in. Tua hileh na nasep peuhpeuh maavang ding hi. Siatna peelin a manin gamta inla, thuman lampi panin themcik zong pialkha kei in. Ka ta aw, ka pilna le ka thumuhnate, limtakin ngai-in hong za in. Tua hileh a kilawmin na gamtatzia ding na thei ding a, na kampaunate in na pil lamtak hong kilangsak ding hi. Numei paktatte’ kampau khuaizu bangin khum mahmahin a thugente uh a neel dakdak hangin, a tawpna-ah lungkhamna le natna simloh nangma tungah bangmah dang hong guan lo hi. Amah in sihna gamah nang hong paipih ding a, ama tot lampi pen sihna mun tunna lampi ahi hi. Nuntakna lampi-ah amah om lo a, nang na phawk loh hangin amah lam pialin a vakvai ahi hi. Tate aw, tu-in ka thugente limtakin hong ngai unla, ka thugente mangngilh kei un. Tua bang numei tawh kinehkha kei unla, a inn gei nangawnah paikha kei un. Tua bang na hih kei uhleh na min hoihna teng uh midang tungah tung ding a, hehpihna a nei lo mite’ khutlum tawh na khansih ding uh hi. Khualmite in na neihsa teng uh la ding a, na sepsa khempeuh uh midangte in ngah ding uh hi. Na sih kuan uh ciangin thumin na tau ding uh a, gawngin na guhguak bekun na om ding uh hi. Tua ciangin, “Bang hangin thu thei hoh lo a, hong kihilhna mang hoh lo ka hi hiam? Kei hong hilh siate’ thu ka mang nuam kei a, amau’ hong hilhnate ka don keikha hi. Tua ahih manin tu-in ka cimawh vat a, mi’ mai-ah ka min a sia hi,” na ci ciat ding uh hi. Na zi’ tungah citak inla, amah bek itin nei in. Pasal dang tawh va vakzau-in kongzing lakah va mawhkha ding hi. Na zi pen nangma a’ ding bek hi a, midangte tawh na neihkhawm ding hi lo hi. Tua ahih ciangin na zi tawh lungkim inla, na tenpih numei tawh lungdam in. A it-huai a ngaihbaangin ngaihsun tawntung inla, ama ngaihbaanna tawh lungdamin, ama hong itna tawh lungkim in. Ka ta aw, bang hangin numei dang lunggulh ding a, numei dangte’ ngaihbaanna iplah ding na hi hiam? Bang hang hiam cih leh Pasian in na gamtatna khempeuh hong mu a, na paina khempeuhah nang hong en kawikawi hi. Migilo pa’ mawhna thangzak bang hi a, ama mawhna thang sung mahah amah a awk hi. Ama pumpi ki-uk zo lo ahih manin amah in sihlawh a, ama hailuatna in hankhuk sung a tun hi. Ka ta aw, na lawmte khatpeuh in sum leitawi a lak ciangin a lohzawh kei leh ama tangin a lohsak dingin kam na ciamkha hiam? Na kampauna hangin nang hong kimanin, na thuciamna hangin na awkkha hiam? Ka ta aw, tua bang na hih khak leh, tua mipa’ khut sungah a om na hi hi. Na suahtak theih nadingin manlangin a kiangah pai inla, hong khah nadingin ama kiangah thum in. Ihmumu kei inla, om mawkmawk kei in. Sabeng pa’ kiang panin a suahtak nadingin sakhi a tai bangin, thangah a awk vasa a kitom bangin na suahtak nadingin hanciam in. Thadahpa aw, miksite kiangah pai inla, amau’ nuntakzia va en in. Amaute in a uk ding le a makai ding kuamah nei lo napi-in, khuakhal sungin a nek ding uh, tuk hun sungin kaikhawm khol uh hi. Thadahpa aw, bang tanvei lumlum ding a, cik ciangin thokhia ding na hi hiam? Tawmkhat sung mengme lai ning, na cih kikalin zawnna le cihmawhna in migilo gutate bangin nang hong sugawp pak ding hi. Miginalo pa, a gilo pa, thuzuau genin vak kawikawi a, nang hong khemnop manin a mitheek hong pia-in, a khe tawh hong su-in a khut tawh hong khoih hi. A lungsimah thusia bekbek ngaihsun niloh a, a omna peuhah buaina a piangsak hi. Tua ahih manin theihkholh lohin ama tungah lungkhamna tung ding a, bawlkikzawh nawn loh dongin siatna ngah ding hi. Topa in a muhdah, a khahkhong ngei loh ding, thu guk, tua zah bek hi lo, thu sagih tak om a, tuate pen kihihsakna, zuauthu genna, mawhnei lo mi thahna, thusia bawl ding ngaihsutna, gamtatsiat ding a manlangte, zuauthu gen teci man lote, le kitotna a piangsakte ahi hi. Ka ta aw, na pa’ hong gen bangin gamta inla, na nu’ hong thuhilhnate mangngilh kei in. Amau’ hong thugente phawk tawntung inla, na lungsimah ciamteh niloh in. Tua thute in na paina peuhah lam hong lak ding a, zanin na ihmut kalin nang hong cing ding a, sunin na hah sungin na gamtatna ding hong hilh ding hi. Bang hang hiam cih leh thukham le a hilhnate pen a taang mahmah khuavak bang hi a, khalna le hilhnate pen nuntakna ding lampi hi a, mi’ zi tawh na mawh loh nadingin nang hong kemin, kam khum zangin a hong zol numei ginalote kiang panin nang hong hu ding hi. Amau’ melhoihna iplahkha kei inla, amau’ hong zawlmitna khenglahkha kei in. Bang hang hiam cih leh anlum khat tawh numei paktat khat kingahzo a, ahi zongin numei tawh mawhna in nuntakna bup siasak hi. Na ang sungah meikuang pom lecin na puan kang loin om ding ahi hiam? Mei-am tungtawnin pai lecin na khe kang loin om ding ahi hiam? Tua mah bangin mi’ zi tawh a mawhte in gimna thuak ding uh a, tua bang a gamta peuhmah in gimna thuak ding uh hi. A gilkial a cimawh mi khat in na a guk ciangin, midangte in mawhsak lua lo napi, amah kiman leh a zah sagihin kilohsak a, a neih khempeuh a piak kul hi. Ahi zongin numei tawh a mawhte pen thu ngaihsun thei lo mi hi a, amau le amau a kisusiatawm ahi uh hi. Mawhna a bawl mi in satgawpna thuak ding a, a min sia-in mindai paisuak ding hi. A numei’ pasal a hehzawk theih nading thudang om nawn lo a, a heh thukna-ah khawl hun cih nei thei lo hi. Amah in sumlepai sang nuam vet lo a, letsong tampi piakna in a hehna damsak zo lo hi. Ka ta aw, ka thugente ciamteh inla, kong sawl thute khempeuh mangngilh ngei kei in. Kong gen bangin gamta lecin na nungta ding hi. Kong thuhilhte, na mitnauta bangin hoihtakin kem in. Kong hilhnate kem tawntung inla, na lungtang tungah gelh in. Pilna na sanggamnu dingin nei inla, thumuhna na lawm it pen dingin nei in. Tua hileh midangte’ zi tungah na khialhkhak loh nading, kam khum tawh a hong zol numei ginalote tawh na khialhkhak loh nadingin hong hu ding hi. Khatvei, ka omna inn-ah, ka tawlet panin ka khuadak a, bangmah a phawk nai lo tangval honkhat lakah, tangval thu thei lo khat, ka lim muhkha hi. Lamdungah amah a vak laitakin, tua bang numei paktat a omna inn gei khatah va paikha a, tua hun pen nitak nitum khit zawh, khuamui hun laitak ahi hi. Tua numei in numei paktatte’ puansilh ngeite a silh kawmin ngimna khat tawh tua tangval na dawntuah hi. Tua numei pen maizumna mel thei loin a hang mahmah hi a, lamdung tengah vak tawntung hi. Mihon omna van zuakna phual, lamdung citeng, kongkiu khatpeuhah mi ngakin om niloh hi. Tua numei in tangvalpa thakhatin kawi-in tawp a, na maitai bawl mahmahin ama kiangah, “Tuni-in biakpiakna ka bawl a, nek ding sa tampi ka nei hi. Ka nekpih dingin nang ka hong zong a, tu-in kong mu petmah hi. Ka lupna tungah a nop mahmah dingin, Egypt gam puan hoihpente ka phahzo hi. Myrrh paknamtui, aloes paknamtui, le sinnamon paknamtui tawh, ka lupna tung a namtui dingin ka bawl khinta hi. Hong pai in; zanthapai-in ki-itna bawlin, ang kikawmin lungnuam ni. Bang hang hiam cih leh ka pasal khual gamlapi-ah zin a, tu laitakin inn-ah om lo hi. Amah in sum tampi keng a, nipikal nih bang mateng hong tung lo ding hi,” a ci hi. Tua ahih manin kam khum kam neel tawh amah zol a, tangvalpa in tua zolna a mangkha hi. Tua ahih manin a kigo ding bawngtal in a sih nading mun a zuat bangin, sakhi in a awkna ding thang zuanin a dian’ laklak bangin, thaltang in ama lungtang a khakna ding munah amah va pai hi. Vasa in a sih nading thang antah a bawh bangin va bawh a, a lauhuai sung a tun lamtak thei lo hi. Ka tate aw, kei’ lam hong nga unla, ka thugente hong ngai un. Tua bang numeite’ zolna mang kei unla, tua bangte tawh khialkha kei un. Tua bang numei in mi tampi tak siasakin, simzawh loh ding mi tampi’ sihna a piangsak hi. Tua bang numei zuihna pen sihna gam zuatna hi a, sih baihna ding lampi zuatna ahi hi. Ngai un! Pilna in hong sam a, thungaihsut theihna hong kiko hi lo ahi hiam? Lamdung mualtung tengah, lamka citeng mun khempeuhah ding a, khuapi lutna lampi gei-ah, mi omna kongpi tualah hong kiko a, “Mi khempeuh tungah ka hong thum a, leitung a om mi khempeuh ka hong sam hi. Ngaihsut kicing nai lote aw, na lungsim uh khanghamsak un. Mihaite aw, thu ngaihsun un. Ngai un, thu manpha kong gen ding hi; ka gen khempeuh thuman vive ahi hi. Ka thugente a man bekbek hi a, zuauthu ka deih kei hi. Ka gen khempeuh ahi vive hi a, zuauthu, thukawi om het lo hi. Thungaihsun theite a dingin telnop mahmah a, thu mutheite a dingin siang mahmah hi. Ngun sangin kong thuhilhnate deihzaw unla, kham hoihpen sangin thutheihna deihzaw un. “Suangmanpha sangin pilna ahi keimah ka hoihzaw a, kei tawh na hong tehpih theih ding uh a manpha dang om lo hi. Pilna ahi keimah in thuthuk muhtheihna ka nei a, thu a telin theihna le a kilawm ngaihsut theihna ka nei hi. Topa zahtakna pen thusia muhdahna hi a, kiphatsakna le kihihsakna, gamtatsia le thuzuau ka mudah hi. Thu geelin ka semkhia a, thu theihtelna nei-in, kei ka thahat hi. Kumpite in a gammite a ukna ding, mi ukte in ngeina man a zat theih nadingin keimah in ka huh hi. Leitung a om mi ukte khempeuh in keima huhna bek tawh ukzo uh a, milian mi thupite in keima huhna bek tawh vaihawmzo uh hi. Kei hong itte ka it a, kei hong zong peuhmahte in hong mu uh hi. Piakkhiat theih ding hauhna le minphatna, daupaina le ma tutsak zawhna a kicingin ka nei hi. Keima kiang panin na ngahte uh ngun hoihpen sangin hoihzaw a, kham hoihpen sangin zong hoihzaw lai hi. Thuman lampi ka zui a, thutang lampi ka tawn hi. Kei hong itte ka hausak a, a inn dimin neihlelam ka pia hi. “ Topa in kei hong piangsak masa pen a, tangtawnga ama sep lak pan a masa pen ka hi hi. Tangtawng pek lai-in kei hong bawl a, leitung a om ma-in hong bawl masak pen ka hi hi. Tuipite a om ma-in kei ka suakkhin a, kei’ suah hunin lui tuite om nai lo hi. Mual liante a kibawl ma-in kei ka suakkhin a, mual neute a kibawl mapekin kei ka om khinta hi. Leitung khempeuh a bawl ma, lei themkhat bek nangawn a bawl mapekin kei ka om khinta hi. Amah in vantung bawlin tuipi kimkotah vanpi mong ding a bawl laitak, amah in vantungah meiite kipsakin tuipi tuinakte a bawl laitak, tuipi tuite in ama cihna ban a khengin a luan loh nading thu a piak laitak ka om a, leitung bulpi a phuh laitak kei ka om hi. Na geel siampa bangin amah tawh kikhawlin keimah pen nisimin ama lungdamna ka hi a, ama kianga om nuamsa-in, leitungah ka lungdam a, mihingte lakah nuam ka sa hi. “Tate aw, tu-in ka thugen hong ngai unla, kong gente zui le-uhcin lungdamna na ngah ding uh hi. Hong kihilhnate zui-in pilna ngah unla, thudon loin ommawk kei un. Ka thugenna a ngai, nisimin ka kong gei-ah omin, ka inn-ah a ngak mipa in lungdamna ngah ding hi. Kei hong mu mi in nuntakna a mu hi a, Topa’ mai-ah maipha ngah ahi hi. Ahi zongin kei hong mu lo mi, amahmah a kisusia hi a, kei hong mudah peuhmah, a si nuam ahi hi,” hong ci hi. Pilna in a inn lam a, a innkhuampi sagih a phut hi. Amah in pawi bawl dingin sa go-in leenggahzu khaih a, annekna ding sabuai a bawl hi. Khuasung munsang khempeuh panin mi a sam dingin a nasem numeite sawl a, “Thu thei lote aw, hong pai un,” ci-in samsak a, mihaite kiangah, “Hong pai unla, ka an huansa ne-in, ka bawlsa leenggahzu hong dawn un. Thu thei lote taisanin khansau unla, pilna lampi zui un,” cisak hi. Mihaite thuhilh lecin hong maizumsak ding a, migilote thuhilh lecin hong sugawp ding hi. Mihaite thuhilh kei in; hong mudah ding uh hi. Mipilte thuhilh in; hong it ding uh hi. Mipilte thuhilh lecin pil semsemna-in nei ding a, thuman mite thuhilh lecin a thutheihna uh khang semsem ding hi. Topa zahtakna pen pilna kipatna hi a, Siangtho Pa theihna pen thumuhna ahi hi. Pilna in na khang hong khan ding a, na nuntakna hong sausak ding hi. Pil lecin nangma phattuamna ding hi a, pilna don kei lecin nangma supna ding ahi hi. Haina pen a kamtam, zumna mel a thei lo numei tawh kibang a, ama kong gei-ah ahi a, a sangpen munah ahi zongin amah tu a, ama kiang a nawkkha, amau’ nasep bek a phawk kimlai mite kiangah, “Thu thei lote aw, hong pai un,” ci-in samin, mihaite kiangah, “Tui dawnsim, khumdiak a, an neksim, limdiak hi,” ci hi. Tua lai-ah a paite a sihna thu tua lai-ah a lutsate sihna gam thuk sungah a om khitna thu, a khemzawh mite in phawkkha lo uh hi. Hihte pen Solomon’ paunakte ahi hi: Ta pil in a pa lungdamsak a, ta hai in a nu dahsak hi. Thuman loin ngahna-ah phattuamna om lo a, thumanna in sih nading pan hong hon hi. Topa in mihoihte a gilkialin koih lo a, migilote a duh uh nesak lo hi. Thadahna in zawnna hi a, thanuamna in hauhna hi. A hunin an a lapa mipil hi a, anlak hunin a ihmu pa in maizumna a ngah hi. Mihoihte in thupha ngah a, migilote in thusia bekbek gen hi. Mihoihte kiphawkphawk a, migilote kimangngilh pah hi. Mipilte in thuhilhna mang a, a hai paute in lungkhamna tuak hi. Thuman mite lungnuamin om hithiat a, thuman lote kiman hi. Khialhna kimuhmawh bawlna in buaina piangsak a, hang takin hilh ngamna in nopna piangsak hi. Mihoihte’ kampaute pen nuntakna tuinak bang a, migilote in thusia bekbek gen uh hi. Muhdahna in kitotna piangsak a, itna in mawhna khempeuh maisak hi. Thungaihsun theite’ kam sungah pilna om a, mihaite’ nungzangah ciangduai kinga hi. Mipilte in a pilna uh behlapin, mihaite a pau ciangin thusia tawh kizom pahpah hi. Hauhna in mihaute hu a, zawnna in mizawngte siasak hi. Mihoihte’ thaman nuntakna hi a, migilote’ thaman siatna ahi hi. Kihilhna manna nuntak lampi zuihna hi a, hilhna man’ nop lohna lampi lauhuai zuihna ahi hi. Mi a mudahte bek in zuauthu gen a, mi a gensiate mihai ahi hi. Kam tam paute tampi khial a, pau iptheite mipil hi. Mihoihte’ thugente nguntang bang a, migilote’ ngaihsutnate in bangmah man lo hi. Mihoihte’ thugente in mi tampi nuamtuamsak a, mihaite in a hai sihpih uh hi. Topa’ thupha in mite hausak a, dahna le gimna tawh piakhawm lo hi. Mihaite in gamtatsiat ding nuamsa uh a, thungaihsun theite in pil gamtatna nuamsa uh hi. Migilote tungah a kihtaktak uh tung a, mihoihte in a deihdeih uh ngah uh hi. Huihpi a nun’ ciangin migilote leenmang a, thuman mite lungmuangin om tawntung uh hi. Leenggahtui thuk in ha kimsak a, meikhu in mit a siipsak bangin, mi thadah in a cial pa a nasak hi. Topa zahtakna in khan sausak a, migilote khansih hi. Mihoihte’ lametna lungdamna hi a, migilote’ lametna a hawmpi ahi hi. Topa in midikte hu a, migilote a susia hi. Midikte lungmuang takin om tawntung ding uh a, migilote in omna ding mun ngah zo lo ding uh hi. Midikte in pilna thu gen uh a, thu hoih lo a gente’ leii ki-attan ding hi. Midikte in a gen ding uh thuhoih thei a, migilote in thusia bekbek gengen uh hi. Tawikhaina man lo a zangte Topa in mudah a, tawikhaina man a zangte tungah Topa lungkim hi. Mi kiphasakte in minsiatna ngahpak ding ahih manin a hoihbekin om ding hoihzaw tham hi. Midikte thumanin gamta uh a, migilote amau’ hoih lohna in susia hi. Hauhna in sih nading panin hong hu thei lo a, thumanna in na sih ding hong hu thei hi. Thumanna in midikte’ nuntakna a nuamzaw-in piangsak a, migilote in amau’ gitlohna mah puklawh uh hi. Thumanna in midikte honkhia a, thuman lo mite in amau’ huaihamna mah awkpih uh hi. Migilote a sih ciangin a lametna teng uh tawh bei khawm a, hauhna suanna a mawkna a suak hi. Lungkhamna a tuah loh nadingun midikte kihu a, migilote tungah lungkhamna tungzaw hi. Pasian a ngaihsun lo mite’ thugenna hangin mite in siatna thuak a, midikte’ pilna hangin mite in hotkhiatna ngah uh hi. Midikte a tuahphat ciangin khua sungah lungdamna om a, migilote a sih ciangin zong khua sungah lungdamin kikona a om hi. Thuman mite’ omna hangin khuapi a lian suak a, migilote’ kampauna hangin khuapi a sia suak hi. Simmawhna tawh midang hopihna pen haina hi a, mipilte pau loin om dide hi. Mi a gensiasiate tungah thusim kigen ngam lo a, a muanhuai mite’ tung bekah thusim kigen ngam hi. Thulamlak ding a nei lo mihingte kipuk uh a, thulamlak tampi neihna pen lungmuanna ahi hi. Midang khat’ leiba lohsak ding na kiciam leh na kisik ding hi. Tua bang thu-ah kihel kei lecin nang a dingin hoihzaw hi. A dik numei kizahtak a, a dik lo numei mindai hi. A thadah mi in sum nei ngei lo a, a hahkat mi in sum hau hi. Migi lecin nang a dingin a hoih a bawl na hi a, gilo lecin nangmahmah a kigimsak na hi bek hi. Migilote in a man nei taktak bangmah ngah lo a, thumanin a gamtate in peel loin thaman hoih a ngah hi. Thumanin gamtat ding a hanciamte nungta ding a, a sia-in a gamta teiteite si ding uh hi. Topa in lungsim gilote mudah a, a manin a gamtate tungah a lungkim hi. Migilote in gim a thuak hamtang nading, midikte gimna tawh a kipelhna ding teltakin thei in. Thu a ngaihsun thei lo numei melhoih pen vokpi muk a om kham nakbah tawh kibang lel hi. Mihoihte’ deihna thuhoih tawh kizom tawntung a, migilote’ deihna a tun ciangin mi khempeuh a heh hi. Mi pawlkhat in sum zang ziahziah napi-in hau semsem uh a, mi pawlkhat cil mahmah napi, zawng semsem hi. A cingh mite hau semsem ding a, midang a huhte in huhna mah ngahkik ding hi. An man khan ding ngakna-in a zuak nuam lote kisamsia a, leinop hunin a zuakpahte kiphat hi. Thuhoih a hanciamte in pahtakna ngah a, siatna a hanciamte in siatna mah ngah hi. Tuk lai-a singteh tam bangin midikte’ hauhna khang ding a, phalbi lai-a singteh pulh bangin hauhna a suangte kiam ding uh hi. A innkuan sung a ukkhial mite hawmsuak ding a, a haite pen mipilte’ sila suak tawntung ding hi. Midikte a khansau a, migilote khansih hi. Mihoihte hih leitungah thaman kipia ahihleh migilo le mawhneite gimna kipiazaw kan ding hi. Pilna a deihte, kithuhilh ding ut uh a, kitai ding ut lohna pen haina ahi hi. Mihoihte in Topa’ maipha ngah a, siatna a gamtate amah in a mawhsak hi. Gitlohna in lungmuanna piangsak lo a, thuman mite lungmuang takin om uh hi. Zi hoih pen a pasal’ minthanna le lungdamna hi a, a pasal a maizumsak zi pen a pasal a dingin a dam thei lo guhnatna tawh kibang hi. Thuman mite in a kilawm a kituakin hong bawl a, migilote bek in hong khem nuam hi. Migilote’ thugente mi thahnopna bekbek hi a, midikte’ thugente in lauhuaina sunga om mite a honkhia hi. Migilote in sihna tuakin cimang a, thuman mite nungta-in khang kizom hi. Mipilte kiphatin kipahtawi a, mihaite kineu-et hi. Nektawm ding nei lopi-in milian bangin omna sangin nuntakna ding na semin mi mawkmawk hihna hoihzaw hi. Midikte in a gannote hoihtakin don a, migilote in a gannote bawlsia hi. Nakpi takin lo khote in an hau a, man nei lopi-in hun beisakna in haina ahi hi. Migilote’ belh munmuanhuai pen leikhal bangin kitamzan a, mihoihte’ zung kip tawntung hi. Migilote in a zuaugenna uh awkpih a, thuman mite buaina tawh kipelh hi. Mite in kam hoih pauna hangin thaman ngah uh a, a sepna bangun zong thaman ngah uh hi. Mihaite pen amau mah thuman kisa tawntung a, mipilte in mi’ thugenna ngai nuam uh hi. Mihaite in a hehna uh langsakpah uh a, mipilte in a hehna uh ipzo hi. Thuman mite in thu taktak mah gen uh a, zuau tecite in khemna thu bek gen uh hi. Ngaihsun lo-a kampauna in tem hiam bangin mi liamsak thei a, mipilte’ kampauna in tua bang liamna damsak thei hi. Thuman genna kip tawntung a, thuzuau genna tomno sung bek kimang hi. Thusia ngaihsunte lungkham uh a, thuhoih vaihawmte lungdam uh hi. Thuman mite tungah thusia tung lo a, migilote lungkhamna tawh kidim hi. Topa in zuaugen mite mudah a, mi citakte tungah a lungdam hi. Mipilte in a theihna uh im khinkhian a, mihaite in a haina uh pholaklak hi. Mi thanuamte vanglian a, mi thadahte sila suak hi. Lunghihmawhna in lungkhamna piangsak a, kampau hoih in mi lungdamsak hi. Midikte in a gamtatna uh tel et a, migilote a gamtatna un lam pialsak hi. Thadahte a tup tung ngei lo a, a thanuamte in a deih ngah hi. Mi thumante’ gamtatna in nuntakna piangsak a, mihaite’ gamtatna in sihna piangsak hi. Ta pil in a pa’ hilhna mang a, a kihisak mi in a khial min pua nuam lo hi. Mihoihte in a kam siamna bangun thaman sang a, mizuaute pen siattat ding bek ut uh hi. Pau a ki-ipzo mi in a nuntakna a hu hi a, a mawk paupau mi pen amah a kisiasak tawm ahi hi. Thadah mi in a deih ngahzo lo a, nasep hahkat mi in a deih khempeuh ngahzo hi. Thuman mi in zuauthu deih lo a, a gilo mi in gensiatna le mindaina ding bek a pau hi. Thumanna in midikte hu a, gitlohna pen mawhneite’ pukna ahi hi. Mi pawlkhatte, zawng napi-in kihausak uh a, mi pawlkhatte, hau napi-in kizawngsak uh hi. Mihau pa’ sum hauhna in a nuntakna tankhiazo a, mizawng pa in a kitatna ding bangmah nei lo hi. Thuman mite khuavak bangin taang lela a, migilote meivak bangin mitpak hi. Hilh ding ut lo, kihihsakna in kitotna bek piangsak thei a, hong kithuhilh ding utna pen a hoihzaw ahi hi. Ol takin hauhpakna oltak mahin kiamkik pah a, haksapi-in hauhtohna khangto semsem hi. Lamet tun lohna in lungsim cinasak a, deihna tangtunna pen lungdamna ahi hi. Thu kihilh ding ut lohna pen siat ding utna hi a, thu kihilhna zuihna pen lungnopna ahi hi. Mipilte’ thuhilhna pen nuntakna tuinak bang hi a, sihna thang tawh kipelhna ahi hi. Thungaihsut theihna maipha ngahna hi a, zuautatna in lungkhamna bek piangsak hi. Thungaihsun theite pilna tawh gamta a, mihaite in a haina taangko hi. Kamtai ginalo in mi lungkhamsak a, a citak thupuak pa in mi lungdamsakkik hi. Thukihilhna a zui lo mi in zawnna le mindaina ngah a, thukihilhna a zui mi in minphatna le pahtawina a ngah hi. Deihna ngahna in lungsim nuamsak a, siat gamtatna panin mihaite pialkhia nuam lo hi. Mipil tawh kikhawl lecin na pil ding a, mihai tawh kikhawl lecin gimna na thuak ding hi. Tuahsiatna in mawhneite sulzuih kawikawi a, midikte tuahpha kawikawi hi. Midikte in a tu a tate’ luah ding gamh nei uh a, mawhneite’ neihsate ahihleh midikte a’ ding hi lel hi. Lo thak panin mizawngte’ khamkhop ding an piangkha ding a, ahi zongin thuman lohna hangin tua nangawn maimang thei ding hi. A ta a tai nuam lote a ta mudah hi a, a ta a itte in limtakin thuhilhin a tai hi. Thuman mi in a kham ding nei-in gilvah a, a gilo mi in nektawm ding nei loin a gil a kial hi. Numei pilte in innsung nuntakna khangsak a, numei haite in innsung susia hi. Thumanin a gamta mite in Topa zahtak uh a, a sia-in a gamta mite in Topa simmawh uh hi. Mihaite a pau ciangin siatna thuaklawh uh a, mipilte’ pauna in siatna ding pan pengsak hi. Bawngtal om kei leh lo panin an tawm bek kila a, bawngtal tha tawh an a kihau ahi hi. A citak teci in thuman bekbek gen tawntung a, a ginalo teci in zuau bekbek gen tawntung hi. Mi a simmawh theite in pilna a zon uh hangin ngah zo lo uh a, thungaihsun theite in olno takin ngah thei uh hi. Mihaite tawh kikhawl kei in; amau’ kiang pan pilna na ngah kei ding hi. Thungaihsun theite a pilna in lampi man musak a, mihaite a haina in lam khialsak hi. Mihaite in a khialh hangun phamawh sa lo uh a, mipilte a khialh ciangun mawhmaisak ding deih uh hi. Lungdamna le lungkhamna eimah bek in i theih hi a, midang kuamah in hong phawkpih kha lo hi. Migilote’ inn kisusia ding a, thuman mite’ inn kipin gina semsem ding hi. Mihingte in thuman lampi hi, ci-in a ngaihsutte pen sihna lampi hikha thei hi. Nuihna pen cihmawh seelna zong hithei a, kigualnop sakna a ven’ ciangin dahna hong kilangkik hi. Misia in siatna thaman ngah a, mipha in phatna thaman ngah hi. Mihaite in a thuzak peuh um pahpah a, mipilte in a gamtatna ding ngaihsun cian hi. Mipilte kidawmin siatna panin kihem a, mihaite in thu ngaihsun masa loin gamta pahpah hi. A lungtom mite hai gamtat a, mipilte lungduai hi. Mihaite in haina bek mah ngah a, mipilte in pilna mah ngah thuah hi. Migilote in mihoihte mai-et uh a, maipha a piak ding uh a thum uh hi. Kuamah in mizawngte ngai lo a, mihaute in lawm tampi nei hi. Mizawngte a simmawhte a khial hi a, mizawngte tungah a cinghte a lungdam hi. Na a hoih a semte mite in muangin zahtak a, a sia gamtatna pen khialhna lianpi ahi hi. Gimpi-a nasepna pen hauhna hi a, kam bek pau-in tutmawkna pen zawnna ahi hi. Pilna pen mipilte’ minthanna lukhu hi a, haina pen mihaite’ kizepna bulpi ahi hi. Thutak a gen teci in nuntakna huzo a, zuauthu a gen teci in mi lehhek hi. Topa a zahtak mi in lungmuanna nei a, a tate’ belhtheih ding mi kician ahi hi. Topa zahtakna pen nuntakna tuinak tawh kibang a, sihna thang tawh hong kipelhsak hi. Mi tampi a uk kumpipa minthang a, a uk ding mi om kei leh a mawkna ahi hi. A lungduaite mipil hi a, lungtomna pen haina kilatna ahi hi. Lungnopna in pumpi cidamsak a, hazatna pen guh a muatsak natna ahi hi. Mizawngte bawlsiatna pen a piangsak Pasian simmawhna hi a, mizawngte tungah citna pen Pasian zahtakna ahi hi. Migilo pa ama tatsiatna in puksak a, mihoih pa ama hoihtatna in hu hi. Thungaihsun theite’ sungah pilna teng a, mihaite in pilna thei kha lo uh hi. Thumanna in minam minthangsak a, mawhna in minam mindaisak hi. A hoihin a gamta a mite tungah kumpipa lungdam a, a gina-in a gamta lote gim a pia hi. Kam nemin dawnna in hehna damsak a, kam khauh in hehna piangsak hi. Mipilte in pilna thu gen a, mihaite in haina thu gen hi. Topa’ mit in mun khempeuh mu a, misia, mipha, hong encik kim hi. Kam khum in nuntakna piangsak a, kam sia in lung gimsak hi. A pa’ hilhna a ngai nuam lote mihai hi a, hilhna a mang nuamte mipil ahi hi. Thuman mite’ neihsa kip a, migilote’ hauhna in lungkham a guan hi. Mipilte’ kampauna in pilna khangsak a, mihaite’ lungsimah thuman lohna bek om hi. Topa in migilote’ biakpiakna kihhuai sa a, thuman mite’ thungetna-ah lungdam hi. Topa in migilote’ gamtatna kihhuai sa a, thuman a deih mite a it hi. A gamta khial mite nakpitakin kithuhilh a, thukihilhna a mang nuam lote in sihna thuak ding uh hi. Sihna gam sungah a omte nangawn Pasian in mu ahihleh, mihingte’ ngaihsutna tel muhzaw kan ding hi lo ahi hiam? A kihisak mite in kithuhilhna ngai nuam lo uh a, mipilte kiangah thu dong ngei lo uh hi. Lungdamna in maitaisak a, lungkhamna in maigumsak hi. Thungaihsun theite in pilna zong uh a, mihaite ahihleh a theih lohna uh tawh lungkim uh hi. Mizawngte lungkham tawntung uh a, a lungdam mite in nuntak nuamsa mahmah uh hi. Hau napi-in lungkham sangin zawng napi-in Topa zahtakna hoihzaw tham hi. Kitawngtawng kawmin sameh limpen nekna sangin ki-it diamdiamin anteh meh nek hoihzaw hi. Lungtomna in kitotna piangsak a, lungduaina in kilemna piangsak hi. Mi thadahte in mun khempeuhah haksatna tuak a, mi thumante in haksatna tuak kha lo hi. Ta pilte in a pa lungdamsak a, ta haite bek in a nu simmawh hi. Mihaite in a hai mah uh lungdampih a, mipilte ahihleh a manin gamta uh hi. Lim ngaihsut loin sepna tawh bangmah piang zo lo a, limtakin geelna tawh maa kitunzo bek hi. A hun mahin dawnpah theihna lungkimhuai a, a kilawm kammal tawh dawnpah theihna hoihzaw kan hi. Mipilte in nuntakna lampi zuito uh a, sihna lampi zuisuk lo uh hi. Topa in mi kiphasakte’ inn phelkhiatsak a, meigongte’ neihsa hutpih hi. Topa in migilote’ ngaihsutna kihhuaisa a, midikte’ kampaunate hoih a sa hi. A man loin sum ngahna in innsung lungkhamsak a, sumgolh a deih lote a nuntak sauvei nuam hi. Mihoihte in a kampau ding ngaihsun phot a, migilote’ paupakna pen thusia tawh kizom hi. Topa in midikte’ thungetna ngai a, migilote’ thungetna thudon lo hi. Maitaina in lung nuamsak a, thuhoih zakna in lung damsak hi. Kithuhilhna zuih theihna pen mipilte’ lakah kihel theihna ahi hi. Kihilh ding a ut lote amahmah a kisusia hi a, kithuhilh ding a utte pil semsem ding hi. Topa zahtakna pen pilna mah hi pah a, kiniamkhiatna in pahtawina hong ngahsak hi. Mite in bangbang a geel zongin Topa’ deihna bang bekin a piang ding hizaw hi. Mihingte pen a gamtatna uhah man kisa a, ahi zongin Topa in a khenna khat na om hi. Na geelnate khempeuh Topa ap in; tua hileh na geelna bangin tangtung ding hi. Topa in na khempeuh ngimna nei-in bawl a, migilote nangawn siatna a thuak dingin a bawl ahi hi. Topa in a kihisak mite mudah a, amaute in gimna thuak hamtang uh hi. Thumanna le cihtakna mawhmai ngahna hi a, Topa zahtakna siatna tawh kipelhna ahi hi. Topa’ deih bangin gamtatna pen galte nangawn lawma kaihzawhna ahi hi. Thuman loin hauhna sangin thumanin tawmno neihna a hoihzaw ahi hi. Mihing in thu geel a, ahi zongin Topa’ deihna bangin kisemkhia hi. Kumpipa in thuman genin thu a khen ciangin khial ngei lo hi. A man tawikhaina le tawi tehnate Topa a’ hi a, a tawisuang khempeuh ama bawlsa ahi hi. Thumanin gamtatna bek in kumpi kipsak ahih manin a sia-a gamtat ding kumpite ut lo uh hi. Kumpite in thuman genna deih uh a, thuman a gen mite it uh hi. Kumpipa heh leh mi khatpeuh in sihlawh thei a, mipil khat in kumpipa lungdamsak thei hi. Kumpipa maitai leh nuntakna hi a, ama pahtakna pen tuk hunin guah a zusak meiipi tawh kibang hi. Kham sangin pilna hoihzaw a, ngun sangin thutheihna deihhuai zaw hi. Mihoihte in siatna tawh a kipelh ding lampi tawn uh a, a lampi tot ding limtakin a ngaihsun mi in a nuntakna a hu ahi hi. Kisaktheihna in siatna hong tuaksak a, kiphatsakna in pukna hong piangsak hi. Mi kihisak tawh kipawlin vankisutte ngahna sangin mizawngte tawh kikhawlin mineu a om hoihzaw hi. Thuhilhna a mang mite a maa vang ding a, Topa a muang mite a lung dam ding hi. Lungsim pilte thumuhna tawh kampau uh a, amau’ kam khumna zaknophuai kisa semsem hi. Pilna pen mipilte a dingin hinna tuinak bang hi a, mihaite ahihleh amau’ haina mah in gimna thuaksak hi. Mipilte in thu ngaihsun kawmin kam pau uh a, amau’ pauna zaknophuai semsem hi. Kam khum pen khuaizu bang hi a, i kamah khum a, i pumpi a dingin zong hoih mahmah hi. Hoih hi, ci-in i ngaihsut thu khat pen sih theih nading thu na hi zawsop thei hi. An duhna in mi na semsak a, gilkialna in nak sepsak semsem zaw hi. Migilote in siatna ding bek zongzong uh a, a kampaunate uh na a kangtumthei meikuang tawh kibang hi. Mihoih lote in kitotna piangsak a, mi gensiate in lawmta ki-it kimlai kimudahsak hi. A ngongtat mite in a lawmte zol a, lungkhamna sung tunpih hi. A mit hong sitsante thusia a ngaihsun hi a, a neh hong piksante thusia geel ahi hi. A teekte’ sam kang minthanna lukhu hi a, thumanin nuntakna tawh a ngah ahi hi. Thahatna sangin lungduaina hoihzaw a, khuapi khat ukzawhna sangin eimah ki-ukzawhna hoihzaw hi. Mite in bangbangin ai a san zongin, a piang ding thu pen Topa’ deihna bangbek hizaw hi. Kitawng kawmkawmin pawipi sungah an nekna sangin lungnuam takin mohkeu themkhat nekna hoihzaw hi. A pil silapa in a topa’ ta hai tungah aana nei-in a topa’ gamh pawlkhat a luah hi. Kham le ngunte mei sungah kize-et a, mihingte’ lungsim Topa in ze-et hi. Migilote in gitlohna thu bek mah ngaihin nei uh a, zuautheite in zuauthu mah ngaihin nei hi. A zawngte a simmawh pa in amah a Piangsak pa a simmawh hi a, midangte’ tuahsiatna-ah a lungdam mipa in gim thuak hamtang ding hi. Tute pen puteekte a dingin minthanna lukhu hi a, tate pen pate’ minthanna ahi hi. Miliante in zuauthu gen ngei lo a, mihaite in na-a kimang kam pau ngei lo hi. Sumgolh a zangte in ai bangin ngaihsun uh a, a deih khempeuh uh a ngahsak dingin ngaihsun uh hi. Mi’ khialhna a maisakte midangte in itin lawm hau uh a, mi’ khialhna ciaptehna pen lawm taanna ahi hi. Mihai khat zavei a kisatna sangin mipil khat khatvei tai-na in bunzaw hi. Thusia bekbek a deih tawntung migilote kiangah, a gilo kamtai pa bangin sihna tung ding hi. Mihaite a hai gamtatna uh i tuahkhak sangin a no a kilaksak vompi hang khat tuak lehang hoihzaw lai hi. Thuhoih kimlai thusia tawh a thukte’ inn sungah cikmahin thusia veng cih om ngei lo hi. Kitot i kipat ciangin tui lipi cinna phung kehsakkhak tawh kibang hi. Tua ahih manin a nasiat ma-in kitot khawlpak in. Migilote khahkhongna, thuman mite mawhsakna, a nih tuakin Topa in deih lo hi. Mihai pa in thu ngaihsun thei lo ahih manin pilna zonna ding sum tampi a zat hangin a phattuamna om lo hi. Lawm citak in a tawntungin hong it a, i sanggamte pen i lungkhamna a hong thuakpih dingin a piang ahi hi. Thu a ngaihsun thei lo mihaite bek midang’ leiba lohsak dingin kipia ngam hi. Khialh ding a utte lungkham ding a ut hi a, kihisak-a kam paupaute buaina ding a zongzong ahi hi. Lungsim hoih lote in lungdam mu lo uh a, mi a khem theite in lungkhamna tuak uh hi. Tapa hai pen a pa’ lungkhamna hi a, ta hai a nei pa a lung dam lo hi. Maitaina in ci damsak a, maigum tawntungna in guhtui teepkang hi. A ginalo thukhente in sumgolh sangsim uh a, a thukhenna uhah thuman om nawn lo hi. Mipilte in a hoihpenin gamtatna ding thei uh a, mihaite in a cih nading thei lo uh hi. Ta hai in a pa dahsak a, a nu lungkhamsak hi. A thuman mi gimpiak ding hoih lo a, mihoihte satna pen thukhialhna ahi hi. Thu a thei taktakte in gengen khol lo a, a paupau khol lote thumu taktak hizaw hi. Mihaite pau loin om leh a pil mahin kingaihsun hi. Thungaihsun thei na hihna a kilat nadingin pau loin om khinkhian in. Midangte tawh a kipawlthei pha lote amah bek thupi a kisate hi a, midangte’ cih khempeuh man a sak khat beek om lo hi. Mihaite in thu a teltheih zawhna ding uh kin lo uh a, pil si, a kicih theih nading deihna bek tawh thu gen uh hi. Mawhna bawl leeng maizumna tawh kizom pah a, minsiatna ngah leeng mindaina tawh kizom pah hi. Mihingte’ kampau pen pilna kipatna suak thei a, tuipi bangin thuk-in luitui bangin a siang hi. Mimawhte angvanin diksak a, midikte mawhsak ding thuman lo hi. Mihaite in kitotna ding a pat ciangin hong sat un, ci-in a ngenngen ahi hi. Mihaite a pau ciangin amau’ siatna ding mah a pau hi a, amau’ kampau mah awkpih uh hi. Gensiatna pen anlim mahmah tawh kibang a, thakhatin i sungah kihupsuk hi. Na a susia mite a hoih loh zah mahin a thadahte zong mihoih lo ahi hi. Topa’ min pen tausang muanhuai tawh kibang a, thuman mite in belin lungmuangin om thei uh hi. Khuapi kiima kulhpi in amah a hut bangin a hauhna in amah a hu dingin mihau pa in ngaihsunkha hi. A kiniamkhiatte in zahtakna ngah uh a, a kihisakte pen siat ding a manawh hita hi. A thu za khin nai lopi-in dawnkikna pen haina le maizumna ahi hi. Mihingte’ lungsim in cinatna thuakzo sak a, mihing lungsim kisia leh cih nading om nawn lo hi. Thungaihsun theite in a pilna uh behlap a, pilna a ngah nadingun mipilte in a bil uh tawh limtakin ngai uh hi. Letsong in a piapa a dingin lampi honsak a, miliante tawh kimusak thei hi. Thukhenna zumah a lang pa in a thuk mateng a gen masa pa a thuman tawh kibang hi. Thugen a siam tuak mi nih zum sungah a kiseel ciangin kiciamna bek in thu khenzo hi. Sanggamte na huhna in khuapi muanhuai bangin hong hu a, sanggam tawh kitotna in kidon lohna piangsak hi. Mi khat in a kampauna hangin gilvahna ngah ding a, a thugenna hangin nuntakna ngah ding hi. Kampauna in sihna ahi a, hinna ahi zongin piangsak thei a, i kampauna bangin a piangte san loh phamawh hi. Zi a muzote na hoih a mu hi a, Topa’ maipha a ngah ahi hi. Mizawngte a pau ciangin thumna kam zang a, mihaute in a dawn ciangin kihihsakna kam zang hi. Lawm pawlkhatte sauvei kimang lo a, lawm pawlkhatte sanggam sangin kipzaw hi. Zuau genin mihai hihna sangin citakin zawn’ khiukheuna hoihzaw hi. Thuthei lopi-in lawpluatna hoih lo a, mawk nawhtatna in lungkhamna piangsak thei hi. Mi pawlkhat in amau’ haitatna hangin gimna a ngah hinapi-in Topa ngawhin mawk heh uh hi. Mihaute in lawm mu thuahthuah a, mizawngte in a neihsun teng nangawn khahsuahsuah uh hi. Thuman gen lo teci in gim tuak pelmawh ding a, zuaugen mi suakta lo ding hi. A cingh mihau pa’ maipha ngah ding ki-ut ciat a, na a piak mi khempeuh ama lawm ahi hi. Mi khempeuh in a sanggam zawng pa uh mudah ciat ahih manin a lawmte in a taisatna a thu lamdang hi lo hi. Pilna a zongpa in ama phattuamna ding a zong hi a, thu a thei mipa’ sepna maavang ding hi. Thuman lo teci in gim tuak pelmawh ding a, zuaugen mi in sihna thuak ding hi. Mihaite a nop lua-in a nuntak ding kilawm lo a, silate in miliante a uk ding kilawm lo zaw lai hi. Pilna in mi lungduaisak a, mi’ hong hehsaknate kiphawkmawh bawlna in minthanna ahi hi. Kumpipa’ hehna humpinelkai hawk bangin lauhuai a, ama pahtakna lopa tunga daitui taak bangin deihhuai hi. Tapa hai pen a pa’ lungkhamna hi a, zi phunphun pen a theu thei lo guahciin tawh kibang hi. Inn le neihsate pen pate’ tung panin a kiluah hi a, zi pil ahihleh Topa bek in hong pia thei hi. A thadahte lumlum a, a mawk omte a gil kial hi. Thukham a zuite a khansau ding a, thukham a zui lote si ding hi. Mizawngte tungah a piate in Topa’ tungah a pia hi a, Topa in a cingin amaute tungah lohkik ding hi. Thu hong mantheih lai-in na ta thuhilh in; na hilh kei leh a siatna ding a deih na hi hi. Migilo pa ama thuak ding gimna mah thuaksak zaw in. Honkhia lecin na hotkhiatkik zelzel kul ding hi. Thu kigente ngai-in hong kihilhte mang lecin mai lamah na pil ding hi. Mihing’ ngaihsutna-ah thu tampi om a, ahi zongin Topa’ deihna tawh a kituakte bek kimang ding hi. Duhhopna pen mindaina hi a, zuau gen pa hihna sangin mizawng hihna hoihzaw lai hi. Topa a zahtakte a khansau a, lungkim takin nuamsa-in om uh a, siatna bangmah tuak kha lo uh hi. A thadah mi in a khut tawh ankuang sawksukin a kam sungah a tuttohkik ding nangawn ut lo liang hi. Thu thei lote in satna bek tawh pilna ngahzo a, thungaihsun theite in taina lel tawh pilna ngahzo uh hi. A pa nawtgawpin a nu a notkhia tapa pen zumna le mindaina a piangsak tapa ahi hi. Thuhilhna a mang nuam lo tapa pen pilna a thei kha lo ding tapa ahi hi. Mi a susia nuam teci in thuman gen nuam lo a, migilote in gitloh tatna nuamsa uh hi. Mi a thusim lote in ciangduai thuak uh a, mihaite in satna thuak uh hi. Leenggahzu in mi kamtam sakin khamtheihzu in mi kitawngsak a, zukhamna pen haina ahi hi. Kumpipa’ hehna pen a lauhuai mahmah humpinelkai hawk bang hi a, kumpipa a hehsak khate in sihlawh uh hi. Kitot khak ding pelhna in pahtak ngahna hi a, mihaite bek kitot ding ut uh hi. Lo khawh hunin a kho nuam lo thadahpa in tuk anlak hun ciangin bangmah nei lo ding hi. Mihingte’ ngaihsutna pen a thuk sunga om tui tawh kibang a, thuthuk mu theite bek in suahkhia thei hi. Mi khempeuh pen mi citakin kigen kim uh hi; ahi zongin a citak takpi ding mi kimuzo ding ahi hiam? Mi khat thumanin a hoihin a nuntak leh ama suanlekhakte mi hampha ahi uh hi. Thukhenna tokhom tungah thu khenin a tu kumpipa in a mitin a etna tawh a hoih lote khenkhia thei hi. “Ka lungsim siangtho hi; mawhna ka nei het kei hi,” a ci thei ding mi kua om ahi hiam? Tawisuang nam nih le piciang nam nih zangin mi khemna pen Topa in a deih lohna kibang hi. Naupangte nangawn mi citak mihoih ahihna a gamtatna panun kimukhia thei hi. Topa in khua muhna ding mit, khua zakna ding bil hong guan hi. Lumlum lecin na zawng ding a, semsem lecin na hau ding hi. Van leipa in van zuakpa kiangah, “Kiman kei, kiman kei,” cici khem a, a paikhiat khit ciangin sumdek siam mahmah ing, ci-in mi kiangah kisial hi. Pilna tawh kam na pau theih leh kham le suang manpha sangin a manphazaw a nei na hi hi. Mi khat in gamdang mi khat’ leiba a lohsak dingin kam a hai ciam leh a ciam bangin a neihsa kilaksak takpi ding hi. A man loin a kingah an pen lim zungzung a, ahi zongin a nung ciangin suangtang haikhak tawh a kibang ahi hi. Hoihtakin geelna tawh nasepna tangtung hi. Geelna kician om lopi-in galsim dingin kipan kei in. Mi a gensia kawikawite in thu im thei lo hi. Tua banga mi haipaute tawh kikhawl kei in. Na nu le na pa na samsiat leh khuamial sunga om meivak kisumit na bang ding hi. A baih lamin hauhpakna pen a tawpna-ah phattuamna om lo hi. Mite’ hong bawlsiatna thuk ding ngaihsun kei inla, Topa’ hong huh ding ngakzaw in. Tawisuang nam nih a zangte Topa in mudah a, amah in tawikhaina man lote hoih sa lo hi. Topa in mite’ gamtatna zia ding uk hi. Koici gamtat ding cih mihing in bangci theih ding ahi hiam? Pasian’ tungah piak ding na ciam ma-in hoihtakin ngaihsun masa in. Tua hikeileh na kinungsik kha ding hi. A pil kumpipa in migilote tengkhia a, khasiat loin gim piagawp hi. Topa in mihing lungsim meivak bangin zang a, i sungtawng dongin hong mu tel hi. Kumpipa in thuman, thutang, citakin a uk laiteng a kumpi za-ah kip bek hi. Khangnote’ thahatna pen amau’ minthanna hi a, khanghamte’ sam kanna pen amau’ thupina lim ahi hi. Nakpi takin satna in misia kimlai a pha hong suah a, nakpitakin vuakna in i sungtawng hoih lohna teng a siangsak hi. Topa’ khut sungah kumpipa om a, lo sunga tuilak bangin a deihna peuhah hei kawikawi thei hi. Na gamtatna khempeuh nangmah in man na sak hangin Topa in na lungsim tawng a ettelna phawk in. Topa in biakpiakna sangin thuman thutang deihzaw hi. Kihisakin gamtatna le kiphatsakna lungsimte pen mawhna hi a, migilo hihna lim ahi hi. Limtakin ngaihsunin geelgeelna pen hauhna lampi hi a, nawhsa-in lopthop hihna pen zawnna lampi ahi hi. Zuaugenna tawh hauhnate beimang pak a, sihna khuk sung hong tunpih hi. Migilote a manin gamta nuam lo uh ahih manin amau’ gamtatsiatna mah a awkpih uh hi. Mimawhte thukawi-in gamta uh a, midikte a manin gamta uh hi. Phun bek a thei zi tawh inn sungah tenkhop sangin innkhumzang kiu khatah tangten’ hoihzaw tham hi. Migilote in thusia bekbek deih uh a, a lawmte nangawn zah tuan lo uh hi. Mi kiphasakte gim a kipiak ciangin mi mawkmawkte in pillawh uh a, mipilte a kihilh ciangin thutheihna-in nei uh hi. Pasian in migilo pa’ inn sungah a kisem khempeuh mu tel a, migilote lawnthalin a siasak hi. Mizawngte’ huh ngetna a pia nuam lote pen amau zong cimawhin huhna a nget uh ciangin kipia lo ding hi. A simthamin letsong piakna in hehna damsak a, puannuai tawi in sinsona daisak hi. Thutangin na a kisep ciangin midik khempeuh lungdam a, ahi zongin migilote lungkham hi. A kilawm gamtatna pan a pialkhia mite misi honte lakah a tung hi. A noptat nuamte zawng uh a, zu ne-in sathau namtui a nilhte hau lo uh hi. Midikte’ thuak dingin a bawlsak uh gimnate pen migilote mah in lehthuak zawsop uh hi. A phun hat zi gilo tawh tenkhop sangin gam simthamah khat guak tangten’ hoihzaw hi. Mipil pa’ inn sungah neihlelam a dimin om a, ahi zongin mihai pa in a ngahzahzah zangkhia pah hi. Thuman thutakin gamta tawntung lecin na khan sau-in pahtawina na ngah ding hi. Mipil khat in mi thahatte in a hut khuapi lazo a, amau’ muanmuan kulhpi nangawn susiazo hi. Kampau a ki-ipzote lungkhamna tawh kipelh hi. Mi kihisak i cihte pen kilian sakin a kiphasak mite ahi hi. Mi thadahpa in na sem nuam lo ahih manin amahmah a kithattawm ahi hi. Mihoih lote in lungkim hun nei loin deih thuah tawntung uh a, mihoihte cingh-in piakhia tawntung uh hi. Topa in migilote’ biakpiaknate deih lo a, ngimna hoih lo tawh a piakte uh deih lo zaw kan lai hi. A man lo tecite mangthang ding uh a, thuman tecite’ kam kizaza ding hi. Migilote pen muantheih dingin khauh pau uh a, midikte ahihleh lungmuang takin kampau hiathiat uh hi. Mihingte’ pilna, a thutheihna le a thugente khempeuh, Topa’ deihna tawh a kituah kei leh a kimanna om lo hi. Galdo nadingin sakolte a baihsa-in kikoih a, ahi zongin galzawhna pen Topa’ hang hizaw hi. Hauhna sangin min hoihna deihhuai zaw a, kham le ngun sangin mi’ hong thusimna deihhuai zaw hi. A hau a zawng a kilamdanna om lo a, a nih tuakun Topa’ bawlsa ahi uh hi. Mipilte in a lauhuai thu mu thei-in pelh uh a, mi mawkmawkte in phusuakin thuak uh hi. Kiniamkhiat-a Topa zahtakna thaman in hauhna, minthanna, le khansauna ahi hi. Migilote’ lampi-ah thang kisiahin so kidawh a, mipilte in tua lampi pelh uh hi. Naupang khat a neulai-in lampi man tawnsak lecin a teek dongin lampial nawn lo ding hi. Mihaute in mizawngte uk a, leitawi a late pen a piate’ sila a suak hi. Thuman lo khaici a vawhte in lungkhamna tuak uh a, amau’ hehna ciangduai amau’ tung mah tukik ding hi. A cingh mi in mizawngte an pia a, amah in thupha ngahkik hi. Mi kiphasakte hawlkhia lecin kitotna le kisimmawhna bei pah ding hi. Kamsiamna in kumpipa’ lawm hong suaksak a, ahi zongin Topa in lungsim takpi a deih hi. Topa in thuman mite kem a, ahi zongin thuzuau gente a lawnthal hi. Mi thadahte a inn-ah lumlum a, “Pua pial lehang humpi’n hong hih kha’n teh,” ci uh hi. Numei tungah mawhna pen thangzak bang hi a, tua thangah a awkte tungah Topa a heh hi. Naupangte a hai gamtat a ngeina hi a, deihtakin pangbetna in mihoih suaksak thei hi. Hauhnop manin mihaute letsong pia leeng kizawnlawh a, hauhnop manin mizawngte’ neihsa laksak lehang zong kihauhlawh tuan lo hi. Na bil uh hong ngatin mipilte’ thugen ngai unla, ka hong hilh pilna thute na lungsim uhah lutsak un. Na lungsim uhah ciingin zang thei le-uhcin, na lung uh dam tawntung ding hi. Tua hileh Topa muanin na nei ding uh a, tuni-in note’ phattuamna ding kam a pau ka suak ding hi. Thuhilhna le pilna thu nam sawmthum hih lai-ah note a dingin ka gelh a, thuman a kan dingin note hong sawlte’ tungah thuman bang hiam cih na genkik theih nadingun thuman na theih nading uh ka deihna ahi hi. Bangmah hong cih zo lo ding cihna hangin nuamtak sa-in mizawngte’ neihsa mawk suh kei unla, zumah khia-in mawk bawlsiat kei un. Bang hang hiam cih leh Topa in amaute panpih ding a, amau a bawlsiate tungah phu a laksak ding hi. A hehbaih mite tawh kipawl kei unla, a lungtom mite tawh kikhawl kei un. Amau’ hoih lohnate na zuihkhak loh nadingun na kidop kei uhleh note in zong na awklawh kha ding uh hi. Midangte’ leiba lohsak dingin kamciamin leiba tavuan lakha kei un. A leiba lohsakzo kei le-uhcin na lupna nangawn uh hong kidawhkhiatsak ding hi. Na pu na pate’ phuhsa gisuang cikmah hunin khin kei un. A nasepna-ah a siam mahmah mi na theikha uh hiam? Amah in mi mawkmawkte’ na sem lo ding a, kumpite’ na sem ding hi. Miliante tawh an nekhawm dingin na tut uh ciangin na tutpih pa limtakin en un. An a ngaklah thei mi na hih khak uhleh zong limtakin kidawm un. Hong thangsiahna hi khathei ding ahih manin tua anlimte lunggulh pah lua kei un. Hauhnop man bekin sum’ sila suak kei unla, a man loin gamtakha kei un. Na ngahsa uh sumte mitphiat kalin beimang thei a, muvanlai bangin thakhatin leengmang thei hi. A cil tentan mite’ an neksak kei unla, a anlimte uh duhgawhkha kei un. “Ne ne un,” hong cih hangin a cih takpi hi lo hi. Bang hang hiam cih leh na dangtawng a hong sun samzang nekkhak tawh kibang ding hi. Na neksa teng uh na luakhia kik ding uh a, na kamsiam ngah teng uh maimang ta ding hi. Mihaite pil hopih kei un; amaute in a manphatna phawk thei lo uh hi. Tanglai gisuang khin kei unla, tagahte’ leitang va keek kei un. Amaute a pawlpih pa pen Topa hi a, note’ langkhatah amaute panpih ding hi. Hong kihilhnate zui unla, pilna thu hong kigente ngai un. Naupangte sat ding lunghiang kei un; satna hangin si lo ding hi. Ciangduai tawh sat le-uhcin nuntaklawh zaw ding uh hi. Ka ta aw, mipil suak lecin ka lungdam mahmah ding hi. Thuman na gen ciangin ka nuam mahmah ding hi. Mawhnei mite engkha kei inla, Topa zahtakna zom paisuak in. Tua bang hi lecin lametna om a, cithei-in na khansau ding hi. Ka ta aw, ka thu ngai inla, mipil suak in; lampi man zuih ding ngaihsutpi-in nei in. Zu nenete tawh kikhawl kei inla, a uisante tawh kithuahkha kei in. Zu nenete le a uisante zawng ding uh a, a ne beka nitumte in puansia bek silhzo ding hi. Nangma pianna na pa’ thu ngai inla, na nu a teek ciangin simmawh bawl kei in. Thuman, pilna, siamna, thungaihsut theihna lei in; zuakkhiat dingin tuate pammaih lua hi. Ta hoih a nei pa a lung dam ding a, ta pil a nei pa a ta’ tungah lungkim ding hi. Na nu le na pa a kipak nadingin gamta inla, na pianna nu lungdamsak in. Ka ta aw, ka thugente ciamteh inla, keima gamtat bangin nang zong gamta in. Numei paktatte pen kiattheihna ding gum tawh kibang a, numei ginalote pen tangciak theihna hawkguam tawh kibang hi. Gutate bangin nang hong buksim a, mi tampi tak siasak uh hi. Kuate in gal nei a, kuate in dahna thuak hiam? Thu om lopi-in kuate liam a, thu om lopi-in kuate a mit san gega hiam? Zu ne-a a tut khote zu a nenete ahi hi. Hai sungah a phuan seuhseuh gawl sungah a tumsuk hithit thei leenggahzu san et-in nei kei in. A tawpna-ah gulpi bangin nang hong tu ding a, gul gunei in a tuk na bang ding hi. Na mitah na lamdangdang hong suak ding a, hoihtakin na pau thei nawn kei ding hi. Tuipi tungah a lum tawh na kibang ding a, a suk awn a to awn teembaw dawna tuang tawh na kibang ding hi. “Hong vuak hangun ka liam kei a, hong sat hangun ka phawk kei hi. Ka pilvang ciangin zu ka ne kik ding hi,” na ci ding hi. Migilote eng kei inla, amaute tawh kikhawl kei in. Amaute in tatsiat ding bek ngaihsun uh a, thusia bekbek genin nei uh hi. Pilna tawh inn kilam a, ngaihsut siamna tawh inn kip hi. Thungaihsut theihna inn sungah a hoih a manpha nate a dimtakin om hi. Thahatna sangin pilna hoihzaw a, thakhauhna sangin thutheihna hoihzaw hi. Geel siamna tawh galte kizo a, ngaihsut siamna tawh gualzawhna kingah hi. Pil kampauna pen mihaite’ theihzawh dingin thuk lua mahmah a, mihaite in mihon lakah thu gen ngam lo uh hi. Thusia lamsang a deih mite thusia bawl mi kici hi. Mihaite’ vaihawmna in khialhna bek piangsak lel a, mi a simmawh theite midangte in mudah uh hi. Haksatna na tuah ciangin na lung a kiat leh a ginalo mi na hi hi. Thah dinga a kikaikhia mipa honkhia inla, sih nading mun a zuan mipa lehkaih kik in. Ke’n theikha kei ing, na cihnop hangin lungsim a thei Pasian in theitel veve hi; nang hong encik Pasian in hong teltheihna phawk in. Mi khempeuh a gamtatna bangin a thukkik ding hi. Ka ta aw, khuaizu khum ahih manin ne in. I kamah khuailuzu khum mahmah hi. Pilna pen i nuntakna-ah khuaizu tawh kibang a, pilna nei lecin mai lamah lametna om a, na khan hong sausak ding hi. Migilote’ gamtat bangin thuman mite’ omna sugawp kei inla, amau’ tenna inn luhgawp kei in. Mihoihte sagihvei dong a puk hangin tho kikkik thei a, migilote ahihleh tuahsiatna thuakin kithallot hi. Na galte in gimna a ngah ciangin lungdam kei inla, a puk ciangin kipak kei in. Bang hang hiam cih leh Topa in hong thei-in nang tungah lungkim lo ding a, na galte tungah heh nawn loin gim pia lo kha ding hi. Migilote’ hangin lung nuammawh kei inla, amaute eng kei in. Amaute in mai lamah lamet ding bangmah nei lo a, amaute’ meivak kisukmitsak ding hi. Ka ta aw, Topa le kumpipa zahtak khawm inla, amau a langpangte tawh kipawlkha kei in. Tua bang mite thakhatthu-in kisugawp thei ding hi. Pasian le kumpipa’ piansak theih ding gimna kuamah in genkhol thei lo hi. Mipil dangte in zong hih bangin thu gen uh hi: Mi lang muhin thukhenna hoih lo hi. Mimawh kimlai a diksak thukhen pa leitung a mi khempeuh in mudahin phuisam ding hi. A mawh mi gim a pia thukhen pa ahihleh thupha kipia-in daupai ding hi. A mantakin dawnkikna pen lawm taktak hihna lim ahi hi. Na nuntakna ding zong masa inla, na an nek ding a kicin ciang bekin na inn ding lamin zi le ta nei pan in. Thu kician om lopi-in na vengpa’ langkhatah teci pang kei inla, amau’ siat nadingin zuauthu gen kei in. Kei tungah hong bawl bangin kei zong ka bawl ding a, ama hong hihna bangin ka thuk ding hi, cikha kei in. Mi thadahpa’ lo gei-ah ka va pai a, mihai pa’ leenggui lo ka va nawkkha hi. Limtakin ka et ciangin a lo ciing bupah kiak dim a, a leitang khempeuh lopa in khuhcip a, a umna a phungcian suangte kicim khin hi. Tua bang ka muh ciangin thu ka lungngaingai a, thu manpha khat ka mukhia hi. Tawmkhat ihmutna, tawmkhat lusukna, tawmkhat sung na sep lohna, khutzepin ommawkna hangin i tungah zawnna hong tung a, cihmawhna in hong khuhcip hi. Judah kumpi Hezekiah’ lai-atte in a teikhiat uh Solomon’ paunak dangte: Pasian in thu a ip manin a min thang a, kumpite in thu a genkhiat manin minthang uh hi. Vantung sang lua-in leisung a thuk luat mah bangin kumpipa’ ngaihsutna thuk lua-in kithei zo lo hi. Ngun a ek teng paikhia lehang sikseekpa in na hoihpi piangsak thei hi. Kumpipa kiang pan migilote nilkhia lehang thumanin ama ukna kip thei bek hi. Kumpipa mai-ah na om ciangin milian kineih kei inla, miliante’ tutna ding munah tukha kei in. Uliante a awn dingin hua lai-ah va tusuk in, hong kicih sangin hih lai-ah hong tuto in, hong kicih ding hoihzaw hi. Thu khatpeuh na theih ciangin thukhen zum tun pah kei in. Na vengpa in nang’ khialhna hong laktel kik leh nang bang lawh nawn ding na hi hiam? Na thuneihpih na vengpa bek mah tawh thu kiseel inla, mi khat’ thusim midang’ tungah genthang kei in. Tua hikeileh amah hehin nang hong maizumsak ding a, na minsiatna bei ngei nawn lo ding hi. A kilawm hunin kammal khat paukhiatna pen ngun pek tunga kham pek khat a kisuang tawh kibang hi. Hilhna a sang thei mipa a dingin a pil thuhilhpa pen kizepna kham bilbah tawh kibang hi. Amah a sawlte tungah a citak kamtai pa pen anlak huna tuivot tawh kibang a, a tote’ lungsim thaksuak sak hi. Bangmah a piak lohpi a kisialhpih pa pen guah a zusak tuan lo meiipi le huihpi nung tawh kibang lel hi. Lungduai a zolzolna tawh gam ukte kizo thei a, kam nemin pauna tawh aana neite kizo thei hi. Khuaizu na nek ciangin a hoihkhop bek zah ne in. Tua hikeileh khamlua-in na lua ding hi. Na vengte’ inn-ah hawh mun lua kei in. Hong cimtakin hong mudah kha ding hi. A lawmte’ langkhatah teci man lo a pang mi pen molhtum, namsau, ahih kei leh thal hiam tawh kibang hi. Haksat hunin a zuautat mi muanin neihkhakna pen hana, ahih kei leh khebai tawh kibang hi. A dah a lungkham mipa kiangah lasakna pen khuadam laitakin puan suahkhiat tawh kibang a, meima ci-al nuh tawh kibang hi. Na galte a gil a kial leh an pia inla, a dang a tak leh tui pia in. Tua hileh amau’ maizum nadingin a bawl na hi a, Topa in nang tungah thaman hong pia ding hi. Leilu lam huih in guah a zuksak bangin gensiatna in hehna piangsak hi. Phun bek a thei zi tawh inn sungah tenkhop sangin innkhumzang kiu khatah tangten’ hoihzaw tham hi. A dangtak mipa in tuivot lim a sak bangin gamlapi-a om lawmte’ kiang panin thuzak nuam kisa hi. Mihoih khat in mihoih lote’ gamtatna a zuihkhak ciangin hawktui nin, ahih kei leh tui uih tawh kibang hi. Khuaizu a tam lua nek ding a hoih loh bangin phat ding deihluatna a hoih lo ahi hi. Ama lungsim a ki-uk zo lo mipa pen dalna kulhpi a nei lo khuapi tawh kibang hi. Tuk laitak a vuk kia le anlak huna guahzu bangin mihaite a dingin pahtawina a kilawmna om lo hi. Thu om lopi a hong kisamsiatna pen bangmah a hong cih thei lo, khawlna mun mel a nei lo, a leengsuk a leengto phialphiah tawh kibang lel hi. Sakolte sat ding kisam a, late kamkaih kisam a, mihaite zong sat ding a kisam ahi hi. Mihaite’ thudotna dawngdawng lecin nang zong amau mah bangin a hai na hi hi. Mihaite a pilin a kingaihsut khak loh nadingin amau’ haina tawh kizui-in dawng zaw in. Mihai khat kamtai-in a zang pa pen ama khe mah a sattantawm, siatna a zong pa ahi hi. Khebai pa’ khe a kimanna om loin a kikhai mawk bangin mihaite a dingin paunak in bangmah man nei lo hi. Saili kuangah sailungtang khihcip lehang phattuamna a om loh bangin mihaite pahtawina zong a mawkna ahi hi. Mihaite in paunak thuhilhnate a paukhiat ciangin zukham pa in a khut a ling om a khei dingin a kipan tawh kibang lel hi. Mihai a tuahkhak peuh tha cial a a nei pa pen a tuahkhak peuh a ban kap thal tawipa tawh kibang hi. Ui in a luak a zuatkik bangin mihaite zong a haitat ngei bangin ta kik zel hi. A pil lo kimlai a pil a kisapa sangin mihaite a dingin lametna omzaw lai hi. Thadahpa in, “Lampi-ah humpinelkai om! Kongzingah humpinelkai om!” ci-in lumlum hi. Kongkhak pen kawmhek tungah a kiheihei lel bangin mi thadahpa a lupna tungah kiheihei hi. Thadahpa in a khutin ankuang sawksuk a, a kamah a bahtoh kik ding nangawn gim zungzung kisa hi. A kilawmin thu a dawngthei mihing sagih sangin mi thadahpa a ngaihsutna-ah pil kisa zaw hi. Eite tawh a kisai lo kitotna sunga kiphumna pen ui ommuang khat a bil-in i kaihsak tawh kibang hi. A vengte a khem khit ciangin ka ciamnuihna hi, a ci pa pen sihtheihna gu a baang thaltang tawh a kap pa tawh kibang hi. Sing om kei leh mei mit a, gensiatna om kei leh kitotna bei hi. Meihol in mei-am ding piangsak a, sing in mei kuangsak a, migilo in kitotna piangsak hi. Gensiatna pen a lim mahmah an tawh a kibang hi a, mihingte’ sungtawng pekah tumsuk pahpah hi. Tungtham beka kam khum pauna pen cimbeng kizut leibeel tawh kibang hi. A simtat mi in a kampi bek tawh thuhoih gen a, a lungsimah zuauthu bek om hi. A lungsimah a deihhuai lo thu sagih tak om ahih manin kam khum takin a pau manin umkha kei in. Ama hoih lohna a ip nop hangin mi khempeuh in ama gitlohna thei veve hi. Mi siahna-in gum a tote amau’ gum tawhna sung mahah lehkiat zawsop uh a, mi a dengkha dingin suang a khukte amau’ suang khuk mah in amau mah lehden kha zaw hi. Zuaugenna in midik kimlai a mawh bangsak a, tungtham beka thugenna in siatna bek piangsak hi. Zing ciang hun ading kima-sialh kei in. Tuhun le tua hun kikalah a piang ding thu bangmah na thei kei hi. Midangte in hong phat lohbuang nangmah kiphattawm kei in. Khual mite in hong phat lohbuang nangma kamin kiphattawm kei in. Suangtum le sehnel gik mahmah a, ahi zongin mihaite’ piansak lungkhamna gikzaw lai hi. Hehna le sinsona siahuai a, ahi zongin hazatna siahuaizaw lai hi. Itna i seel bawl sangin a langtangin taina hoihzaw hi. I lawmte in hong liamsak hangin i hoihna ding a hong deihsakna hizaw hi. I galte in hong ngawng kawina pen hong lehbawlna ahi hi. A gilvah mipa in khuaizu nangawn duh nawn lo a, a gilkial mipa in a kha an nangawn limsa hi. Inn panin gamlapi-ah a zinkhia mipa a bu panin a leengkhia vasa tawh kibang hi. Sathau namtui le paknamtui in lung nuamsak a, lawmte’ limbawlna in tha hatsak hi. Na lawmte daangkoih kei inla, na pa’ lawmte dong nangawn lawm bawl in. Na lungkham ciangin na sanggampa va ko kei in. A gamla-ah a om i sanggampa sangin a nai-ah a om i vengpa kimangzaw hi. Ka ta aw, pil in; tua hileh ka lungdam ding a, kei hong mawhsak nuamte in bangmah hong cih thei lo ding hi. Mipilte in a lauhuai thu muthei-in pelh uh a, mi mawkmawkte in phusuakin thuak uh hi. Mi khat in gamdang mi khat’ leiba a lohsak dingin kam a ciam leh a ciam bangin ama neihsa kilaksak takpi ding hi. Mi khat in a kituak lopi-in midang khat limbawl lualiang leh amah in a sia lamin na ngaihsun zaw hi. Phun bekbek a thei zi pen theu hun mel a nei lo guahciin tawh kibang hi. Tua bang numeite kikho thei lo a, a kikham thei lo huihnung, le i khutin sathau i tawi nop tawh kibang hi. Sik in sik mah hiamsak thei a, mi in midang pilsak thei hi. Theikung a cing pa in a theigah ne a, a tapa a kem pa in pahtakna ngah hi. Tui sung en leeng eima maitang i muh bangin i lungsim en leeng eima pianzia kilang hi. Mihingte’ lungsim pen misite’ gam tawh kibang a, tamlua cih hun nei thei lo hi. Ngun le khamte meikhukah kize-et a, mihing ahihleh phatna tawh kize-et hi. Mihai khat a sih dek dongin na satsat hangin a hai ngei mahin hai veve lai ding hi. Na tuuhonte hoihtakin thei inla, na bawnghonte hoihtakin kem in. Bang hang hiam cih leh neihsa kip tawntung lo a, hauhna pen a khangkhangin kizom suak lo hi. Lopate ki-atmang khin a, ahi zongin a no hong selkik hi. Mualtungah a po lopa hing khempeuh ki-atin inn-ah kipua a, tuute in na puan ding hong guan a, na keeltal mante lo ciing khat man tawh kikim hi. Na keelnawite ahihleh na innkuan annek ding, le na nasem numeite’ nuntak nadingin kicing ding hi. Kuama delh lohpi-in migilote taimang a, mithumante ahihleh humpinelkai bangin a hang uh hi. Gam sung mite a hoih loh ciangin a banbanin gam uk kumpi tampi nei uh a, ahi zongin mipil thungaihsun theite in gam sung thahatsakin kipsak uh hi. Mizawngte a bawlsia aana a nei mipa pen lo-a ante a susiagawp guahzu tawh kibang hi. Thukham a zui lo mite in migilote pakta uh a, thukham a zui mite ahihleh migilote tawh kilem lo uh hi. Mi siahuaite in thutang cihmel thei lo uh a, Topa a biate in ahihleh a kicingin a thei uh hi. Hau napi-in lungsimkawi mi hihna sangin zawng napi-in paubaan neih lohna hoihzaw hi. Thuhilhna a mang mite ta pil hi a, lawm gilo tawh a kikhawl mi in a pa mindaisak hi. A meet a pung lakna tawh a hau mipa pen mizawngte a hehpih mipa a dingin sum a zonsak hi lel hi. Mi khat in thukham a zuihnop kei leh ama thungetna nangawn Pasian in zakthadahhuai sa hi. A diktat mi khat siatsak ding a hanciam pa pen ama tawhsa gum sung mahah kia ding hi. A dik mipa in gamh hoih luah ding a, migilo pa in bangmah luah lo ding hi. Mihau pa pen amah pil kisa a, ahi zongin a zawng mi pil pa in a hau pa’ haina phawkkhia veve hi. Mihoihte in vangliatna a ngah ciangin mi khempeuh lungdam uh a, migilote a liat ciangin adangte in gimna thuak uh hi. A khialhna a im mite a dau pai lo ding a, a mawhna pulakin a kikheel mite in hehpihna ngah ding uh hi. Topa a zahtak tawntungte pen mi nuamsa hi a, a lungkhauh mite in lungkhamna tuak ding uh hi. Mizawngte a uk migilo pa pen humpinelkai gilkial le vompi halungvei tawh kibang hi. Ngaihsut siamna a nei lo gam ukpa a gilo kumpi hi ding a, thuman tawh ngah ding bek a deih mipa in sauveipi uk ding hi. Mi thatin a khial pa in ama hankhuk ding a to ahi hi. Ama hankhuk tawh kho kei in. Thumanin a gamta mite lungmuangin om ding uh a, a zuautat mite ahihleh puk ding uh hi. Nakpi takin lo a khopa hau mahmah a, bangmahin a kimang tum lo na a sempa zawng mahmah hi. A citak mipa in thupha tampi ngah ding a, a hau baih nuam mipa in gim tuak pelmawh ding hi. Mi langbawlna hoih lo a, ahi zongin letsong neucik khat hangin thukhente gamta khial thei zel hi. A huaiham mi in a hauh nadingin huai mengmeng a, a tawpna-ah a zawn’ ding lamtak phawkkha lo hi. Mi khat tai-in thuhilh lecin tungthama phatna sangin a tawpna-ah lungdamzaw ding hi. A nu a pa’ neihsa laksakin, “Khialhna hi kei,” a ci pa pen guta mah hi veve hi. A huaiham mi in kitotna piangsak a, Topa a muang mite mihau hi ding hi. Ei le ei kimuanna haina hi a, mipilte’ hilhna zuihna pen lungmuanna ahi hi. Mizawng a huhte cimawh ngei lo ding a, huhna a pia nuam lote in samsiatna ngah ding hi. Migilote a liat ciangin midangte bucip uh a, amaute a zakiat ciangin midikte in ukkik ding hi. Kihilh napi-in a mang nuam lote bawlphat zawh nawn loh dongin kisia ding uh hi. Midikte in gam a uk ciangin gammite lungdam uh a, migilote in a uk ciangin a gammite thum uh hi. Pilna a deih mi in a pa lungdamsak a, numei paktat tawh a kikhawl mi in a neihsa teng lawnmang hi. Thumanin a gamta kumpi in a gam kipsak a, sum bek a ngaihsun kumpi in a gam siasak hi. A man lopi-in mi khat mawkphatna pen a awk nadingin thangsiahna ahi hi. Migilote amau mawhna sungah awkcip a, midikte ahihleh suakta-in lungdam uh hi. Midikte in mi cimawhte a’ ding thu khual uh a, migilote in tua bang thukhualna thei lo uh hi. Thu a khual lote in khua sungah buaina lianpi piangsak a, mipilte in tua buaina daisak thei hi. Mipil khat in mihai khat tawh zumah thu nei leh mipil pa tungah hehin zahko a, phattuamna piang tuan lo hi. Mi a that nuamte in a thuman mi mudah a, midikte in a thuman mi hu uh hi. Mihai pa a hehna bangin kam pau-in gamta gawp a, mipil pa ahihleh ki-ipin a hehna damsak hi. Kumpipa in zuauthu saangin na sem leh a nuai-a ulian khempeuh zong zuaugenin nitum ding uh hi. Mizawng pa le mi bawlsia pa a kibatna uh khat om hi. Topa in a nih tuakun mittang guan hi. Kumpipa in mizawngte’ thu a manin khensak leh a ukna kip tawntung ding hi. Ciangduai le tai-na in pilna guan a, a kikhahkhong ta in a nu maizumsak hi. Migilote ulian suak leh siatna khang semsem a, ahi zongin midikte in amau’ mit mahmah tawh a gilo uliante’ zakiatna mu ding uh hi. Na ta thuhilhin tai lecin ama hangin na kipak ding a, na lung hong kimsak ding hi. Pasian’ lamlahna a kizuih lohna gamah gam sung mite phengtat gawp uh hi. Pasian’ thukham a zui mite ahihleh a lungdam uh hi. Kama hilh lel tawh silate pil zo lo a, a theih hangun hong mang tuan lo hi. Thu ngaihsun loin a pheng paupau mipa sangin mihai pa a dingin lametna omzaw lai hi. Sila khat a neu tung a kipan limtakin na khoi hangin a tawpna-ah nang hong hehsak veve ding hi. A heh pahpahte in kitotna piangsak a, a heh baihte khial thei tawntung hi. A kiphasakte in niamkhiatna thuak ding a, a kiniamkhiatte in pahtawina ngah ding hi. Guktakna sungah a kipawl mipa ama a dingin thusia zongpa ahi hi. A guktakna pulak leh amah gim kipia ding a, genkhia kei leh lah Pasian in samsia veve ding hi. Midangte kihtakna in hong lunghimawhsak a, Topa muanna in hong lungmuangsak hi. Mi khempeuh in gam ukte’ maipha ngah ding hanciam ciat uh a, ahi zongin Topa’ kiang pan bekin thutang kingah hi. Midikte in migilote mudah uh a, migilote in midikte mudah uh hi. Jakeh’ tapa Agur’ thugente: Amah in, “Pasian aw, ka lunggim a, ka cih nading ka thei kei hi. Ka hai lua a, mihing ka sun kei hi. Mihing bangin ngaihsut siamna ka nei kei hi. Pilna thu ka thei kei a, Pasian’ thu ka theih om lo hi. Vantungah kua kahto a, leitungah kua hong kumsuk kik ahi hiam? Kua in a khut sungah huihte lomcip a, puan tawh tuite tuncip ahi hiam? Kua in leitung bulpite phut kip ahi hiam? Tua bang mi na theih ngei leh a tapa’ min bang ahi hiam? “Pasian in a thugen khempeuh a manna laktel a, amah a belte a dingin kidalna lum ahi hi. Ama gen lohpi behlapsak kei in; na tua cih leh amah in nang hong tai-in zuau thugen na hihna hong kilang ding hi,” a ci hi. Pasian aw, thu nih kong ngen hi. Ka sih ma-in tuate hong pia in. Zuauna le khemna ka zat loh nadingin hong huh inla, a haulua lo, a zawnglua loin hong bawl inla, ka khamkhop zah lian bek an hong pia in. Haulua leng nang hong nialin, “ Topa i cih kua ahi hiam?” kong ci kha ding a, zawnglua leuleu leng mi’ na guksakin ka Pasian’ min kong daisak khazel ding hi. Sila khat a topa kiangah gensia kei in; amah in nang hong gensia-in gimna na thuakkha ding hi. A pate samsia-in a min a daisak, a nute a phat lo mi pawlkhat om hi. Amaute a nin mahmah hinapi-in amau’ muhna-ah siang a kisa mahmah mi pawlkhat om hi. Mihoih pha mahmahin a kingaihsun, a kiliansak mahmah mi pawlkhat om hi. A ha uh namsau tawh a kibang gam sung mizawngte a netum, mi cimawhte a liaktum mi pawlkhat om hi. Vot in tanu nih nei a, khat in, “Hong pia in,” ci a, a khat in zong, “Hong pia in,” mah ci veve hi. “Phazo ta,” a ci ngei lo nam thum om a, eh! li hi zaw: Han khuk, taciing numei, tui a deih tawntung lei keu, le a kisumit zo lo meikuang. A pa a simmawh mipa, a nu’ thu a mang nuam lo mipa, va-ak in a mittang khelkhiat sakin musanete in a sa ne ding uh hi. Ka theihzawh hetloh a lamdang mahmah thu thum om a, eh! li hi zaw: Vanah musane a leentheihna zia, suangpi tungah gul a pai theihna zia, tuipi tungah teembaw a pai theihna zia, le nungak tangval a kingaihna zia. A citak lo zi hih bangin gamta hi: Midang tawh khialin tua ciangin kisilsiang a, “Khialhna bangmah gamta kei ing,” ci khem hi. Leitung mi khempeuh in a thuakzawh loh thu thum, eh! thu li om a, sila khat kumpi a suah ciang, mihai khat in a duh bangbang a nek zawh ciang, a muhthadahhuai numei khat in pasal a neih ciang, nasem numeino in a tonu’ za a suan ciang. A neu mahmah ganhing nam li leitungah om a, ahi zongin a pil penpente ahi hi. Miksite: A hat het lo ganhing hinapi-in khuakhal sungin a nek ding uh kholzo uh hi. Ngalvangte: A thahat lo ganhing hinapi-in suang lakah a kua ding bawl uh hi. Kauphete: Kumpi nei lo napi-in a kituak diamdiamin hontat thei uh hi. Innhikte: Khut sunga tawizawh ganhing hilel napi-in kumpi inn sungah tengzo uh hi. A gamtatna i et ciangin a thupi suak mahmah thum, eh! li om hi. Humpinelkai: Ganhing lak pan a hatpen kuamah a kihta lo. Aklui: A kihisak pai kuankuan. Keeltal: A kihisak pai gangan. Kumpipa: A mite’ mai-ah a pai lanlan. Kiphasakin na hai pau ngei a, thusia bawl ding na ngaihsut ngei khak leh limtakin thu ngaihsun pha in. Bawngnawi toktok lehang thawhbat hong suak a, mi khat’ nak tupsak lehang si hong luang a, mi phin lehang kitotna hong piang hi. Kumpipa Lemuel, a nu in a thuhilhna: Kong it mahmah ka ta aw, thu ngenngenin kong neih ka tapa na hi hi. Nangma tungah bang teng hong gen ding ka hi hiam? Na thatang teng numei tungah beisak kei inla, na sum khempeuh numei tungah zang kei in. Numei in kumpipa siasak thei hi. Lemuel aw, ka thugen hong ngai in. Kumpite in zu nek huai lo a, mi ukte in khamtheihzu a duh ding hi lo hi. Zu ne le-uh, thukham mangngilh uh a, thukham hei-in mizawngte gim pia khathei uh hi. A si dekdekte, khamtheihzu pia inla, a lungkham mahmahte, leenggahzu pia in. Amaute nesak lecin a zawnna uh mangngilhin, a lungkhamna uh phawk nawn lo ding uh hi. Thu a gen thei lo mite a dingin thu gensak inla, a huh ding a om lo mite panpih in. Amau a’ ding thu genin thu a tangin khen inla, a zawng a cimawh mite amau a dingin a kilawm hamphatna ngahsak in. Zi hoih pen suangmanpha sangin manphazaw pek a, ahi zongin zi hoih ngah ding haksa mahmah hi. A pasal in muang mahmah a, a innsung uhah annek kitasam ngei lo uh hi. Amah in a khan tawntungin a pasal tungah thupha bawl a, a pasal tungah thusia tun ngei lo hi. Amah in samul le khau zongin thanuam takin na sem hi. Amah in sumbukte’ van pua teembaw bangin gamlapi panin an hong ciahpih hi. Phalvak tungin zingtho a, annek ding teng limtakin bawlin a nasem numeite’ sep dingteng a vaihawmsak hi. Amah in leitang hoih penpen zong a, a thalawhsa sum tawh a leenggui lo ding a lei hi. A nik singtenin a puanban zial a, thalawp takin na a sem hi. Amah in a nasepte a manphatna thei a, zankim zankhang dongin nakpitakin na a sem hi. Amah in khau kheekin a puan ding gantawm hi. A zawng mite tungah amah cingh mahmah a, a cimawh mite tungah huhna a pia hi. A innkuan buppi puanlum guanzo ahih manin phalbi tun ding lunghimawh lo hi. Amah in a puan ding khuitawm a, saihadial puansan vive a silhzo hi. Thukhen upate lakah a pasal a tut ciangin mite’ lakah a kitheikim mi khat ahi hi. Amah in puan khui-in kawnggakte zong bawl a, sumbukte tungah tuate a zuak hi. Amah a tha hatin zong kizahtak a, mailam hun ading a lung patau lo hi. Amah in a pilna tawh thu gen a, kam khum takin pau hiathiat hi. Amah in a innkuansung kisapna teng sem a, a tawntungin manlah den hi. A tate in amah it mahmah uh a, a pasal in zong pakta mahmah a, “Zi hoih tampi a om tei hangin nang kan-a hoih kuamah om kei,” ci-in a phat hi. Ngaihbaanna pen zuaupi hithei a, melhoihna zong maimang thei hi. Ahi zongin Topa a zahtak numei a phattaak ahi hi. A sepna khempeuh hangin amah phat un. Mi khempeuh in a zahtak dingin a kilawm ahi hi. Jerusalem khua sungah kumpi a sem, David’ tapa, Thugen Siampa’ thugente: Thugen Siampa in hih bangin ci hi: A mawknapi, a mawknapi, na khempeuh a mawknapi. Gimpi-a nisa thuakin nasepna-ah mihing in bang noptuam ngah ahi hiam? Khang khat bei-in khang khat hong tung a, ahi zongin leitung kibangbang niloh hi. Ni hong suakin ni tum a, a suakkik dingin tum zel hi. Leitaw lamah huih nungin leilu lamah nung leuleu a, a zuih ngeina teng mah zui-in nungnung niloh hi. Lui khempeuh tuipi-ah luangsuk a, ahi zongin tuipi dim nai lo hi. Tuipi tuite a khu-in leengin tuinakah guahin zu a, a nak panin hong luangsuk kik zel hi. Na khempeuh lunggimhuai a, kuama genzawh ding hi lo hi. Mit in a muh cim thei lo a, bil in a zak cim thei lo hi. A omsa mah bangin hong piang kik ding a, a kisemsa bangin hong kisem kik ding hi. Leitungah a thak na khat beek om lo hi. Hih pen a thak ahi hi, a kici thei ding khat beek om lo hi. Eite’ khan ma-in a omsa vive ahi hi. A beisa nate kiphawkkha nawn lo a, hong tung lai ding thute zong a khangkikte in phawk nawn lo ding hi. Thugen Siampa kei pen Jerusalem khua-ah Israel kumpipa ka hi ngei hi. Hih leitungah a kisem na khempeuh entelin a thu kan ding ka ngaihsun hi. Pasian in tua bang nasep ei tungah hong guat pen a nuam het lo nasep khat ahi hi. Leitungah a kisem khempeuh ka mu khin a, tuate khempeuh a mawknapi na hi a, huihpi nung tawh kibang lel hi. A kawisate kimamsak thei lo a, a om lopi a omin kiseh thei lo hi. “Pilna sangpi ka nei a, keima mai-ah Jerusalem a uk dangte khempeuh sangin ka pilzaw hi. Pilna le theihna a kici khempeuh ka thei loh om lo hi,” ka ci hi. Pilna le haina, theihna le mawlna, a kilamdanna ka zong hi. Ahi zongin tua bang ka hahkatna zong a mawknapi ahihlam ka phawk hi. Pil semsem lehang kilunghimawh semsem a, tam thei semsem lehang hong gimsak semsem zawsop hi. Lungdamna zongin nuam ka sak bang bangin om ning, ci-in ka ngaihsun leuleu hi. Tua zong a mawknapi ahihna ka phawk zel hi. Nuihna pen haina ahihna, nopna pen bangmahin a kiman lohna ka mukhia hi. Mihingte in leitungah tomno a nuntak sungin bangci om leh hoih ding ahi hiam, cih ka muh theih nadingin pilna ka deihna mah tawh, zunekna tawh ka lung nuamsakin, ka utut sep ding ka hanciam hi. Na lian tampi tak mah ka sem zo hi. Keima a dingin inn tampi tak ka lam a, leenggui lo tampi tak mah ka nei hi. Huan bawlin singno cinna lo zong ka nei a, ka huan sungah nektheih namkim kidim hi. Tua singnote tui piak nadingin tuikhukpi zong ka bawl hi. Ka inn-ah a suak silate banah, sila a nu a pa-in tampi tak ka neithuah hi. Tuuhonte le bawnghonte zong tampi tak ka nei a, Jerusalem-a om ngei dangte khempeuh sangin ka hauzaw hi. Ka zawhsa kumpite’ sumkholna panin keima a dingin ngun le kham zong ka la hi. Ka lungnop nadingin la a sa ding lasiam numei le pasal tampi ka nei a, ka deih zahzah zong ka neizo hi. Tua ahih ciangin keima hun ma-in Jerusalem-ah a om ngei mite khempeuh sangin ka lianzaw a, ka pilna zong bei tuan lo hi. Ka deih khempeuh ka nei a, ka ut bangbangin omin ka gamta hi. Ka sepna khempeuhah nuam ka sa hi; tua nopsakna pen ka nasepna hangin ka phattuamna ahi hi. Tua ciangin ka sepsa na khempeuh, tua bangin haksapi a ka sepnate ka ngaihsut kik ciangin, na khempeuh a mawknapi ahihna, le leitungah bangmah phattuamna a om lohna ka phawk hi. A hi-in ci lehang, kumpi khat in ama ma-a kumpipa’ hihsa teng mah a hih thei bek ahi hi. Tua ahih ciangin pilna, haina, mawkna i cih bang ahi hiam, ci-in ka ngaihsun hi. Tua banga ka ngaihsut ciangin, khuavak in khuamial a zawh bangin, pilna pen haina zawhna ahihlam ka mu hi. Mipilte in a pai nading mun mu thei a, mihaite in a pai nading mun mu thei lo hi. Ahi zongin a pil le a hai in a kibang khat a tuah tuak ding ka thei hi. Tua ciangin, “Mihaite tungah a piang ding thute kei’ tungah zong hong piang ding ahih manin, ka pil mahmah manin bang phattuamna ngah ka hi hiam?” ka ci a, “Bangmah ngah kei ing, themkhat zong ngah kei ing,” ci-in ka kidawng hi. Mihaite a kiphawkphawk loh mah bangin, mipilte zong kiphawkphawk tuan lo a, mailam hunah i vekpi-in hong kimangngilh lel ding ahi hi. A pil a hai-in, i vekpi-in i si ding hi. Tua ahih ciangin hih leitung a sepna khempeuh in lungkhamna cih loh hong piaktheih dang bangmah om lo ahih manin, hih leitung a hinna pen kei a dingin a kimanna bangmah om lo hi. A mawknapi, huih hawmguak bang bek hi lel hi. Keimah a hong laih ding pa tungah ka neih ka lam khempeuh ka nusiat ding thei ka hih manin, nakpitakin sem-a ka gimpih nate pen kei a dingin a phattuamna om lo hi. Kei hong laih pa pil taleh hai taleh, ka pilna ka siamna khempeuh zanga ka sepsa nate luahin a ukpa hi ding hi. Hih pen a mawknapi taktak ahi hi. Tua ahih ciangin hih leitungah nakpitakin na ka sepna ka kisik hi. Pilna, siamna, theihna siit loin na kisem a, themkhat zong a gimpih het lo mi khat a dingin nusiat ding hi zenzen hi. Hih thu a man het lo, a mawknapi taktak ahi hi. Mi khat in hih leitungah lunghimawhin thatang sanin na a sepna-ah bang phattuamna ngah ahi hiam? Sepna bawlna khempeuhah lungkhamna le sinkhamna bekbek hi a, zan nangawnin a ihmut mawhpih hi. Hih pen a mawknapi taktak ahi hi. Mihing khat in a nasepna thamanin an ne tui dawnin nuamsa-in a om sangin a hoihzaw bangmah dang om lo hi. Ahi zongin tua nangawn zong, Pasian’ hang ahihna ka phawk hi. Pasian kihel loin kua in an ne-in nuamsa thei ding ahi hiam? Pasian in amah a lungdamsakte tungah pilna, theihna, le lungdamna pia a, ahi zongin a hehpihhuai mimawhte ahihleh a sep bek sisakin, amau’ thalawhsa khempeuh amah a lungdamsakte tungah a piaksak hi. Hih pen a mawknapi taktak, huihpi nungdelh bang bek ahi hi. Hih leitungah a piang thu khempeuh, Pasian in ama pian’ hun dinga a sehsa hunin a piansak ahi hi. Suah hun om a, sih hun om hi. Suan hun om a, bawhkhiat hun om hi. Gawh hun om a, khoi hun om hi. Phel hun om a, lam hun om hi. Kah hun om a, nuih hun om hi. Dah hun om a, laam hun om hi. Lupkhawm hun om a, tuamlup hun om hi. Kikawi hun om a, kikhah hun om hi. Zon’ hun om a, mansuah hun om hi. Kep hun om a, paihkhiat hun om hi. Balkek hun om a, phop hun om hi. Daih hun om a, pau hun om hi. It hun om a, muhdah hun om hi. Kido hun om a, kilem hun om hi. Na a sem mipa in a sepsa khempeuh thamanin bang ngah ahi hiam? Pasian in eite’ manlahpih dingin hong piak nasep ka thei hi. Amah in na khempeuh amau’ hun ciat tawh a kituak dingin a bawl hi. Amah in mailam thu theihnopna lungsim eite tungah hong guan a, ahi zongin ama sepnate a cing a theihzawhna ding hong guan lo hi. Tua ahih ciangin mihingte in a nuntak laiteng a siam tawpun gamta-in lungdamin a om ding a thupi pen ahihna ka phawk hi. Eite khempeuh in an ne tui dawnin i sepna thaman tawh lungdamin i om ding kilawm a, tua pen Pasian’ hong piak letsong ahi hi. Pasian’ sep khempeuh a kip tawntung ding ahihna ka thei hi. I behlap theih ding om lo a, i paihkhiat ding zong om lo hi. Amah i zahtak theih nadingin Pasian in tua bang ding mahin a bawl ahi hi. A piang khat peuhpeuh pen a piang ngeisa mah na hi a, a piang lai ding khat peuhpeuh zong a piang ngeisa mah na hi lel hi. Pasian in ama hun hunin a piang ngeisa mah piangsakkik zelzel hi. Tua tham loin, hih leitungah gitlohna in thuman thutang a suankhiatna zong ka mu hi. Pasian in sepna bawlna le na khempeuh ama hun ding sehkhol khin ahih manin, midikte le migilote thu khen ding hi. Mihingte pen ganhing bang lel ahihna uh a lahtel nadingin Pasian in mihingte ze-et hi, ci-in ka lungsimah ka ngaihsun hi. A tawpna-ah ci lehang, mihingte le ganhingte in a tuah ding uh kibang a, ganhing mah bangin mihing zong a si ahi hi. Mihing le ganhing in a kibangin nuntakna hu nei a, mihing le ganhing nuntakna a kimanna bangmah om lo ahih manin, mihing pen ganhing sangin a hoihzawkna bangmah om tuan lo hi. A nih tuakun mun khatah tung khawm ding uh a, leivui panin a piang uh ahih mah bangin leivui mah suakkik ding uh hi. Mihingte’ kha vanah kahto-in ganhingte’ kha lei-ah lutsuk hi, cih a thei zong kuamah om lo hi. Tua ahih ciangin mihingte in a sep thaman uh ne-in nuamsa-in a om ding uh a hoihpen ahihna ka phawk hi. Tua lo a hih theih ding uh bangmah dang om lo hi. I sih khit ciangin bang piang ding cih theihtheihna bangmah om lo hi. Tua ciangin leitungah thuman loin a kigamtatnate khempeuh ka ngaihsun kik leuleu hi. Nenniamna a thuak mite kap uh a, ahi zongin kuamah in amaute hehnem lo uh hi. A nengniam mite thahat lua uh ahih manin kuamah in thuk ngam lo hi. A hinglai mite sangin a si khinsa mite hamphazaw ka sa hi. Mihing a hong piang nai lo, hih leitung gitlohna teng a mu nai lote hamphazaw lai sawnsawn uh hi. Mi khatlekhat, hauhnop mana kidemna hangin nakpi taka na kisem ahihna ka mu hi. Hih zong a mawknapi hi a, huihpi nungdelh mah tawh kibang bek hi. Mihaite in na sem loin a khut zepin om uh a, a tawpna-ah gilkialin sihlawh uh hi. Nakpi takin na sem a, a mawknapi ahi ding, khut nih dim sangin lungsim nuamin khut khat dim neihna hoihzaw hi. Nuntakna sungah a mawknapi ahi thudang khat ka mu leuleu hi. Mi khat in tapa ahi a, sanggam ahi zongin nei lo napi-in, a tawntungin na semin a neihsa tawh lungkim hun nei thei lo hi. Kua a dingin gimpi-in na sem a, a ututin ta hoh lo ahi hiam? Hih zong a mawknapi mah, a dahhuai nuntakna khat ahi hi. Mi khat sangin mi nih hoihzaw hi; amau’ sepna thaman a tamzaw ngah uh hi. Bang hang hiam cih leh khat cimawh leh a khat in huh a, mi khat guak pen cimawh zenzen leh a huh ding om lo ahih manin a dahhuai pha mahmah ahi hi. Khua a dam ciangin mi nih lumkhawm leh khua lum hi; khat guak bangci khualum theih ding ahi hiam? Mi khat bek hileh zawhnop kisa a, nih pha leh kizo zo lo hi. Zang thum a kiheek khauhual bawhsat hak hi. Mi’ thugen a sang thei nawn lo, teek leh hai a thuah kumpipa sangin zawng napi-in a pil tangval khat hoihzaw hi. Mi khat pen thong panin suakta-in kumpi suak thei a, zawng napi-in ama gam sungah kumpi suak thei hi. Hih leitungah mi khempeuh’ thu ka ngaihsun a, tua mite lak panin kumpipa’ za a luah ding khangno mi khat a omlam ka phawk hi. Kumpipa’ uk ding mite simzawh lohin tam a, ahi zongin amah a sih ciangin ama nasepna hangin a lungdam khat beek om lo hi. Hih pen a mawkna taktak, huihpi nungdelh bang bek ahi hi. Biakinn-ah na pai ciangin limtakin kingaihsun in. A man le a man lo a khen thei lo mihaite’ biakpiaknate tawh a kibang piakna sangin thu ngai dingin biakinn-a paina hoihzaw hi. Thu ngaihsun masa-in pau inla, Pasian’ tungah thu mawk ciampak kei in. Vantungah Pasian om a, leitungah nang om na hih manin na pau ding a kilawm zahval pau kei in. Lunghimawh semsem lecin na mang sia semsem ding a, tam pau semsem lecin na haina kilang semsem ding hi. Pasian’ tungah thu na ciam ciangin manlangin tungsak pah in. Amah in mihaite diksa lo hi. Na thuciamna bangin tungsak in. Na thuciamna bangin na tunsak kei ding le thu ciam vet kei zaw in. Khialkha ing, ci-in Pasian’ siampipa’ mai-ah na gen ding kisam kha ding ahih manin na kampauna hangin khialkha kei in. Tua bangin gamta khial lecin nangma tungah Pasian heh ding a, na sepsa khempeuh hong suksiatsak ding hi. Mang tam man leeng a mawkna mah tam a, kam tam pau leeng zong a kituak mahin a mawkna thu mah kibehlap hi; bangbang ahi zongin Pasian zahtak lai veve in. Kumpite in mizawngte gim ngahsakin, thuman thutangin na a kisep kei leh lamdang sa kei in. Uliante pen amau’ tunga uliante in en uh a, tuate’ tungah a ensawn a lianzaw khat omlai hi. Gam khat peuhpeuh in lo khawhna lamsang a lunghimawh kumpi khat kisam hi. Sum deihna lungsim na neih leh lungkim hun cih na nei ngei kei ding hi. Na hauhnop hangin na deih khempeuh na ngah ngei kei ding hi. Hih pen a mawknapi ahi hi. Hau semsem lecin na vak ding mi tam semsem a, a hau zaw hi’ng, ci-a na theih bek cih simloh bangmah phattuamna na ngah kei hi. Na a sem mipa pen a nek ding nei taleh nei ta kei leh lungnuam takin ihmu thei a, a haute ahihleh lungnuam takin ihmu thei lo uh hi. A hoih het lo na khat hih leitungah ka mu hi: Mite amau’ lunggim nadingin hau uh hi. Na a sep khialh manun a neihsa teng uh suplawh uh a, a tu a tate’ luah ding bangmah om nawn lo hi. I nute’ sung panin bangmah nei loin guaktangin i suah mah bangin guaktang mahin i ciahkik hi. I sepsate i ciahpihkik theih bangmah om lo hi. A dahhuai mahmah thu in: I suah hun lai-a mah bang teekteekin i ciahkik ding hi. A mawknapi ding a i sepna-ah bang phattuamna ngah ihi hiam? I nuntak sungteng lungzinna, dahna, lunghihmawhna, natna satna le hehna bek tawh hun bei lel hi. Keimah in ka phawkkhiat thu in: Pasian in tomkha nuntak hih leitungah hong piak sungin, i sep thaman ne-in dawnin i om ding a hoihpen ahi hi. Hih pen mihingte’ thumong ahi hi. Pasian in mi khat neihlelam guanin, a hauhna nuamtakin a neksak leh, amah lungdamin a sepna thaman ne-in a om ding hi. Tua nopsakna pen Pasian’ kiang pan ahi hi. Pasian in lungdamin omsak ahih manin a nuntak tomlam phawkin nei kha lo ding hi. Hih leitung a mihingte tungah a man hetloin hong kibawlna ka phawk hi. Pasian in mi khatpeuh tungah neihlelam, hauhna, le pahtawina pia-in, a deih khempeuh neisak napi-in, tua nate nuamtakin zangsak loin, midang khat in nopsaklawh laizang hi. Hih pen a mawknapi, a thuman het lo khat ahi hi. Mi khat in ta zakhat nei-in kum saupi zong nungta thei kha ding hi. Bangzahin sauveipi a nungta ahi zongin leitungah nopsakna ngah loin, limtak a vuina a ngah kei leh, a sisa-a suak naungek hoihzaw lai hi. A sisa-a suak naungek a kimanna om lo hi. Khuamial sungah suakin, khuamial sung mahah mangthangin kiphawk nawn lo hi. Sun khuavak mukha loin, nuntakna bangci hiam, cih a theihkhak loh hangin tawlngakna a ngah hi buang hi. Nuntakna-ah nopsakna a ngah lo mipa kum tulnih a hing zongin, a tawpna-ah a sisa-a suak naungek mah tawh a tunna mun kibang lel hi. Mihingte’ nasepna pen a nektawm ding bek a ngaihsutna hi lo napi-in, a khamkhop ngahzo tuan lo hi. Tua ahih manin mihai pa sangin mipil pa a hamphat zawkna bang om tuan ahi hiam? Mihai pa in nuntakna ding zia a theih hangin bang phatuam tuan ahi hiam? Na dangdang deihthuah ngitngetna sangin i neihsa teng tawh lungkimna hoihzaw hi. Hih zong a mawknapi, huihpi nungdelh mah tawh a kibang bek ahi hi. A piang thu khempeuh, a tuaci mahin tangtawnga kisehsa hi a, mi khat in amah sangin a thahatzaw mi khat a nial zawh lohna thu i vekpi-in i thei hi. Sauvei kinial lehang a mawkna hi semsem a, a phattuamna om lo hi. Niliim bangin a pai hanhan, a mawknapi hih nuntak tom sungah mihing a’ ding a hoihpen kua in thei ding ahi hiam? Ama sih khit ciangin leitungah bang piang ding cih kua in gen thei ahi hiam? A manpha paknamtui sangin minpha hoihzaw a, i suah ni sangin i sih ni hoihzaw hi. Pawisimna sangin sigalna hoihzaw hi. Sih ding bek a ngak ahihna mihing khempeuh in a phawk ding uh kilawm hi. Nuihna sangin dahna hoihzaw hi; na mai hong gumsak zahin na thu theihna hong khangsak hi. Mipilte dahna lakah omtual a, mihaite nopna lakah omtual hi. Mihaite in pahtawina la hong sak sangin mipilte’ hong taina hoihzaw hi. Mihaite’ nuihna pen meikuang sunga selkeu kikhul a puak zaizai tawh kibang a, khiatna nei lo, a mawknapi ahi hi. Mipil khat in midangte a khem ciangin mihai bangin a gamta ahi hi. Sumgolh lakna in a lapa’ gamtat hoihna siasak hi. Thu khatpeuh a kipatna sangin a tawpna hoihzaw a, kiphatsakna sangin lungduaina hoihzaw hi. Heh pahpah kei in; hehna a haihuai ahi hi. “Bang hangin nidang lai-in hih sangin hoihzaw tham ahi hiam?” ci-in dong kei in. Tua bangte pil thudotna hi lo hi. Pilna pen hauhna zahin hoih a, mihingte a dingin phattuamna ahi hi. Sum in hong lungmuansak bangin pilna in zong hong lungmuangsak hi. Pilna a manphatna, a pilte a nuntaksak theihna ahi hi. Pasian’ sepsate ngaihsun dih in. Pasian in a kawi-a a bawlsate kua in mamsakkik thei ahi hiam? Nopna na ngah laitakin lungdam in; haksatna na tuah ciangin hih thu ngaihsun in: Lungdamna le lungkhamna hong piapa pen Pasian hi a, mai lamah bang piang ding cih kuamah in thei lo hi. Ka nuntakna a mawknapi hi a, ahi zongin ka nuntak sungin thu khempeuh ka thei hi. Mi khat hoih napi-in si a, mi khat siahuai napi-in a khansau hi. Tua ahih ciangin hoihlua kei inla, lah sia lua kei in. Bang hangin nang kisiasak tawm ding na hi hiam? Gilo lua, hau lua kei in. Bang hangin khansih laizang ding na hi hiam? A nih tuakin lenkip in. Pasian na zahtak nakleh khat peuhpeuh na zuihna-ah na maa vang ding hi. Khuapi a uk mihing sawm sangin pilna in mi khat hatsak zaw hi. A manin a gamta, a khial ngei het lo, leitungah mi khat zong om het lo hi. Mi’ gen khempeuh thudon kei in. Na nasempa’ hong samsiatna na zakha ding hi. Nang zong midang na samsiat zelzelna teltakin na kithei hi. Hihte khempeuh ka pilna tawh ka ze-et a, pil ding ka hahkat hangin kei’ batzawh ding hi lo hi. Mihing nuntakna kua in theikhia zo ding ahi hiam? Eite a dingin thuk lua a, telhak lua hi. Keimah in pilna siamna ka theih nading, pilna mu-in thupiangte a hang ka theih nadingin nakpitakin hanciamin ka lungsim ka pia a, haina a hoih lohna le a haihuaina ka theikhia hi. Sihna sangin numei a siahuai zawkna ka theikhia hi. Ama hong piak itna in thang bangin hong tepcip a, ama hong kawina khut in sikkhau bangin hong hencip hi. Pasian’ deihna bangin a gamtate in tua bang numei pelhthei a, ahi zongin a mawh nuamte a thangah a awk uh hi. Thugen siampa in hih bangin ci hi: Thu ka kan ciangin, a banbanin thu ka phawkkhia hi. A thudang ka zonzon hangin bangmah ka muzo nawnkei hi. Pasal tulkhat sung pan khat bang bek a pil a omkhak theihna, ahi zongin numei lakah a pil cih bang a om lohna keimah in ka phawkkhia hi. Keima theihkhiat thu in: Pasian in eite a thuman dingin hong bawl hinapi-in, eite in paulap tuamtuam zongin, i kikai-awksak hi. Mipilte bek in na a khiatna taktak theithei uh hi. Pilna in mipilte maitaisak a, a hehmai a beisak hi. Kumpipa’ hong sawl bangin gamta inla, Pasian’ tungah thu mawk ciampak kei in. Kumpipa in a ut peuhpeuh hih thei ahih manin ama kiang panin paikhia in; ama lungkim lohna hih teitei kei in. Kumpipa aana neihna tawh gamta hi. Ama gen bangin gamta in; kuamah in amah nial zo lo hi. Ama thu a mangte in haksatna tuakkha lo ding hi. Mipilte in a gamtatna zia le a hun hoih thei uh hi. Na khatpeuh i hih ding ciangin a kilawm hun, le a ngeina man om a, ahi zongin eite in bangmah i thei kei hi. A hong piang ding thu i thei kei a, a hong gen thei zong kuamah om lo hi. A sih ding a pelhthei, a sih ding hun a phiatthei kuamah om lo hi. Gal a om ciangin gallauna a pelhthei, siatna sungah a lut ciangin a pengthei kuamah om lo hi. Leitung a gamtatnate ka ngaihsut ciangin hih thute ka mukhia hi. Mi khat in midang tungah vangliatna nei-in, a uk sung mite a gimsak gawp hun a om hi. Migilote si-in kivui a, a siat gamtatna khuasunga om mite mah in han panin a ciah ciangun amah a phat veve-na uh ka mu hi. A mawhte gim kipia pahpah lo ahih manin mihingte in khialh ding haksa sa lo uh hi. Mawhnei khat in zavei dong siatna bawl napi-in a khansau veve hi. Ahi zongin “Pasian a zahtakte a dingin thu khempeuh nuam ding hi. Migilote a dingin thu nuam lo ding a, amaute in Pasian zahtak lo uh ahih manin a nuntak hun uh niliim bangin beipak ding a, khansih ding uh hi,” kici hi. Ahi zongin hih thugenna a mawknapi ahi hi. Leitung a thupiangte ngaihsun dih in: Khat veivei midikte in migilote’ gimthuak dingteng thuak zawsop a, migilote in midikte’ thaman ngah dingteng ngah zawsop uh hi. Hih thu pen a haivai, a mawkna taktak ahi hi. Tua ahih ciangin mihing in hih leitungah nuam a sak theih ding adang om lo ahih manin an ne tui dawnin nuamsa-in a om ding bek ahi hi. Pasian in hih leitungah nuntak a piak sungteng a sep thaman a ngah theih ding hih bek om hi. Pil ding hahkatin, leitung a thupiangte ka theih ciangin sun le zanin ihmu lo liangin i om hangin, Pasian’ nasepna i theihzawh lohna ka phawk hi. Mihingte in bangzahin i hahkat hangin kitheikhia zo lo hi. Mipilte in thei a kisak hangun bangmah thei lo uh hi. Nakpi takin sauveipi ngaihsunin ka phawk thu in: Mipilte le midikte’ gamtatna a vekpi-in Pasian in uk a, Pasian’ itna hang hizaw hiam, a muhdahna hang hizaw hiam kuamah in thei lo hi. Amau’ mailam thu khempeuh a mawkna ahi hi. Bang hang hiam cih leh mi khempeuh a thumong kibang a, midikte le migilote, mihoihte le misiate, mi siangte le mi ninte, biakna piate le a pia lote, a thutawpna uh a vekpi-in kibang lel hi. Mawhnei pa sangin mihoih pa hamphazaw tuan lo a, thuciamna a bawl lopa sangin a bawl pa hamphazaw tuan lo hi. Mi khempeuh’ thumong kibang kim a, hih pen leitung a thupiang lakah a man het lo khat ahi hi. Mihingte a nuntak laiteng gitlohna le a mawkna thu tawh a lungsim uh kidim a, theihkholh lohin mihingte sipak uh hi. Ahi zongin a hing laite a’ ding lametna om thei a, a sisa humpinelkai sangin a hinglai ui hoihzaw hi. A hing laite in a si ding ahihlam uh thei a, a sisate in bangmah thei nawn lo uh hi. A sisate in thaman bangmah nei nawn lo uh a, amaute kiphawkkha nawn lo hi. Amau a dingin itna, muhdahna, hanciamna cihte om nawn lo a, leitung a om nate khat beek theikha kik nawn lo ding uh hi. An ne-in lungdam inla, zu ne-in lungnuam in. Na gamtatna peuhpeuh Pasian in hoih a sa hi. Na puante siangsakin paaksak tawntung inla, na sam gumsak ngei kei in. Pasian in hih leitungah nang a hong piak, tomkha sung na nuntak laiteng, na it na zi tawh a nuam theithei-in om in. Leitung lungkhamna sungah na lawhtak, tua bek mah hi kha ding hi. Na mai-ah sep ding a om khempeuh, na tha neihzah tawh sem in. Bang hang hiam cih leh na zuat ding sihna gam sungah nasepna le thungaihsutna, pilna le theihna cihte om lo hi. Hih leitungah ka phawk dang thu khat in: A taihat mite in tai kidemna-ah zo tawntung lo a, galhang thahatte in gal zo tawntung lo hi. A pilte in an a kham ngah tawntung lo a, a pilte hau tawntung lo hi. Hih theih siamna a neite milian suak tawntung lo hi. Mi khempeuh tungah kamsiatna vive tung hi. Mihing in ama hun ding thei ngei lo hi. Thangah a awk vasate le ngen-ah a awk ngasate tawh i kibang hi. Lamet loh hun laitak keekin hunsia sungah mihingte i tung hi. Thudang khat zong ka mukhia hi: Hih leitungah pilna a hoihna gentehna a hoih khat om hi. Mi tawmno bek a omna khua khat om a, a vanglian kumpi khat in tua khua a sim hi. Amah in tua khua umcihin a khuasung luhgawp dingin a ngaihsun hi. Tua khua sungah a zawng mipil khat om a, ama pilna tawh tua khua a huzo hi. Ahi zongin kuamah in tua mizawng pa phawkkha lo hi. Thahatna sangin pilna hoihzaw ka ci hi; ahi zongin kuamah in mizawngte a pil dingin ngaihsun lo a, mizawngte’ thugen kuamah in thudonin nei lo hi. Mihai hon lakah gam ukpa in thu a gen lualua sangin mipil pa in damtakin a gen hiathiat ngaihhuai zaw hi. Galhiamte sangin pilna hoihzaw a, ahi zongin khialhna khat in a hoih tampi susia thei hi. A sisa thote in paknamtui bung sungah a om paknamtui uihsak thei a, haitatna themno khat in pilna lianpen susia thei hi. Mipilte a manin a gamtat ding a ngeina hi a, mihaite a sia-in a gamtat ding a ngeina ahi hi. Mihaite lampi-ah a paikawm nangawnin hai tat uh a, a haina uh mi khempeuh theisak uh hi. Nang tungah gam ukpa a heh leh na nasep za taisan pah kei in. Dai tak-a om hithiatna in khialhna lianpi maisak thei hi. Hih leitungah a thuman lo gam ukte’ piansak ka muhte: Mihaite, zalianpi kipia a, mihaute kiniamkoih suk hi. Sakol tungah silate tuang a, miliante, sila bangin a khe-un pai uh hi. Gum a tote gum sung mahah kia ding a, mi’ phung a phelsakte gul in tu ding hi. Suang a tokhiate suang mah in liamsak ding a, sing a ekte sing ehna mahah liam ding hi. I hei mawlnapi-in i tat kei leh nakpitakin sat kul a, ngaihsut masak ding pilhuai zaw hi. Gul khimthei napi i khim kei leh a kimanna om tuan lo hi; gul in hong tu veve ding hi. Mipilte’ kampauna in pahtawina ngahsak a, mihaite’ kampauna in amau mah siasak hi. Thugen a kipat ciangun bangtumlo teng tawh kipan pah malam uh a, gitloh vai teng tawh a thugen a khum lel uh hi. Mihaite in thu gengenin ciakciak uh hi. Mailam a thupiang ding kuamah in thei lo a, a sih khit-a thupiang ding a hong gen thei om lo hi. A inn zuatna ding lampi a thei lo mihai luate bek, a inn lam zonna-in gim ding uh hi. A kumpipa mi’ cih bangbangin gamta lel a, zankhuavak-in zune makai a a nei, gam khat peuhpeuh in lungkhamna thuak hi. A kumpipa in lungsim khentatna nei thei a, a makaite in annek tuidawn a hun thei a, amau ki-uk thei-in zu a kham lo makai a nei, gam khat peuhpeuh a hampha gam ahi hi. Thadah lua-in a inn vang nangawn a hu nuam lo mipa, a inn keh ding a, a inn nangawn in puklawh ding hi. An in lung damsak a, zu in lung nuamsak hi. Sum in ahihleh na khempeuh a kicingsak hi. Na lungsim nangawnah kumpipa gensia kei in. Kuama zak lohna mun na lupna tung nangawnah mihaute samsia kei in. Thopi in na thugen teng na puakkha ding hi. Sumbawl nadingin na sumte zang in. Ni khat ni peuh teh a meet na ngah ding hi. Na sumbuk vante mun sagih-ah ahi a, mun giat-ah ahi zongin khen kawikawi in. Hih leitungah bang thusia hong piang ding cih na theikhol kei hi. Meii sungah tui a tamluat ciangin leitungah guahin hong zusuk a, singkung khatpeuh a puk ciangin a pukna san sanah om paisuak hi. Huih le guah ngakin khuahun hoih dong a ngak mi in khaici tuh ngei lo ding a, an zong la ngei lo ding hi. Nupi gai khat sungah nuntakna thak bangci kipat hiam, ci-in na theihzawh loh mah bangin na khempeuh a bawl Pasian’ nasepna na theizo ngei kei ding hi. Zingsang a kipan khaici tuh inla, nitak dong mateng khawl kei in. A vekpi-in a po kim ding ahi a, a khat sia-in, a khat a po ding ahi zongin na theihkholh bangmah om lo hi. Khuavak hoih mahmah a, i mit in nitaang a muh ciangin nuam mahmah hi. Mi khat sauveipi a nuntak le a nuntak sung nuamtakin om tahen. Sauveipi tak a hing zongin a sih khit hun a sauvei zawkna phawk tahen. Mailamah a lamethuai bangmah a om kei hi. Khangnote aw, na khangnona uh nuamsa unla, na khangno lai-un lungdam un. Na hihnop peuhpeuh uh hih unla, na ut bangbangun gamta un. Ahi zongin na gamtatna uh tawh kizui-in Pasian in thu hong khen ding phawk gige un. Note kilunggimsak kei unla, na pumpi uh gentheisak kei un. Bang hang hiam cih leh na khangno hunsung uh sauvei lo ding hi. Na lungkham hun ding a hong tun ma, “Nuntak nuamsa kei ing,” na cih ma hun, na khangno lai-in nang hong Piangsak pa phawk in. Lungkham hun i cih in: Nang a dingin nitaang, khataang, aksi taangte a dialh hun, meiipi kai a then’ nawn loh hun, na muan na suan a thahat na khut, na baan, na khete, a thaneem hun, an hai nadingin na hatang tawmlua ta-in na mit maangin, limtakin khua na muh theih nawn loh hun, khuasung gamlumnate na bil in za thei nawn loin, ansukna gingte na zak theih phat nawn loh hun, la kisate za thei nawn loin vasa ham nangawn in hong phawnzawh nawn loh hun, keen sangte-ah pai ngam nawn loin, lam pai ding a haksat hun, na samte hong kangin, na khangno thahatna beita-in na tha a kiam hun ding ahi hi. Eite in a tawntung inn ding a zuan ding ihi a, khuasung lampi-ah kahna awging kiza ding hi. I ngun meivak khaina a khau kitatin, i kham meivak kia-in kitam ding a, i tuikhaina khau kitatin, i tuikhaina beel kitam ding hi. I pumpi, lei suakkik ding a, i nuntakna a hong pia Pasian’ kiangah i kha ciahkik ta ding hi. Thugen Siampa in, “A kimanna a om lo, a mawknapi, na khempeuh a mawknapi ahi hi,” a ci hi. Thugen Siampa, mipil ahih banah, amah in ama theihteng mite tungah a hilh hi. Amah in paunakte limtakin sin a, a man ahihna thu hoihtakin entel hi. Thugen Siampa in a zaknophuai kammal khawm a, ama gelh kammalte a man taktak ahi hi. Mipilte’ thugente pen tuucingte in tuu hawlna-in a zat ciangkhut hiam tawh kibang hi. Tua thute pen eite khempeuh tuucin bangin a hong Cing Pasian’ piak ahi hi. Ka ta aw, na phawk ding thudang khat omlai hi. Lai gelhin a bu-a bawlna in bei hun nei thei lo a, lai tam sin luatna in pumpi gimsak hi. Hih thute khempeuh banah gen ding thu khat bek om hi. Mihing hong kipiansakna a thu bulpi pen in: Pasian zahtakna le a thupiakte manna ahi hi. A pha hitaleh a sia hitaleh a simthamin i hih simte nangawn i hihna khempeuhah Pasian in thu hong khen ding hi. Solomon’ la ngaih pente: Na muk tawh nong tawp a, na hong itna leenggahzu sangin khumzaw hi. Na omna khempeuh nam vuauvuau a, na min kizaza a, nungak khempeuh in nang hong ngai hi. Hong kai inla zawltai ni. Ka kumpi hong hi inla, na inn-ah hong ciahpih in. Nang tawh om leeng i lung dam hi; leenggahzu ne-in nuamsa ni. Nang kong ngaihkhak tuahpha ing. Jerusalem nungakte aw, ka vom hangin ngaihbaang ing. Savun puanbuk bangin ang hiuhiau ing a, Solomon’ puankhaite tawh kei ka kibang hi. Ka vom manin hong en neu kei un. Nisa ka thuakna hang ahi hi. Ka ute in kei hong gawtbawl uh a, lo hong kuansaksak uh a, ka pumpi ka don man kei hi. Ngaihno aw, hong gen dih in. Koi lai-ah na tuu cing ding a, sunin koi lai-ah khawl ding na hi hiam? Bang hangin tuucing dangte lakah nang hong zong kawikawi masa se ding ka hi hiam? Nungak khempeuh lakah a ngaihbaang pen nungak aw, a mun thei lo na hi hiam? Tuuhonte zui-in na keelte hong khah inla, tuucingpa’ puanbuk gei-ah hong cing in. Ngaihno aw, Faro’ sakoltal in sakolpite a delh bangin nang hong kidelh hi. Na biang tuakah a kaisuk na samphekte ngaihbaang a, suangmanpha bangin na liangko tungah kinga hi. Nangma a dingin kham khainiang bawlin na kizepna ding zong ngun tawh bawl ni. Ka kumpipa a lupna tungah a om laitakin ka paknamtui hong kizel hi. Ka ang-ah ka ngaihno hong lup laitakin myrrh paknamtui bangin namtui viauviau hi. Ka ngaihno pen Engedi gam leenggui lo-ah a palh lihleh pak hoihte tawh kibang hi. Ngaihno aw, na mel hoih a, na mit zong ngaihbaang hi. Ngaihno ngingei aw, na etlawm a, na ngaihhuai hi. I lupna mun lopa tung hi ding a, taamtak kungte i inn khuam hi-in, taaksan hiangte i inn tungdap hi ding hi. Kei pen Sharon gam sunga a om gamlak pak, mualkuam sunga a om unok pak bang ka hi lel hi. Tua bang hi lo a, ka ngaihno pen numei khempeuh lak panin ling lak a a om unok pak tawh kibang hi. Ka ngaihno tangval dang tawh teh lehang gamlak singkung lak a a om epel kung tawh kibang hi. Ama liimah ka tu nuam a, a gahte lim ka sa hi. Annekna phualah hong paipih inla, itna mai tawh hong en in. Lungzuang, duangvul ka hih manin leenggahkeu tawh hong vak inla, epel gah tawh hong thadimsak in. A veilam baan hong khamsak a, a taklam khutin kei hong kawi hi. Jerusalem nungakte aw, ko’ kingaihna nong suknawi loh nadingun sakhi le sanang tawh kei tungah hong kiciam un. Ka ngaihno’ awging ka za hi. Mualtung tawnin hong tai a, mualte kantanin kei hong zuan hi. Ka ngaihno sanang tawh kibang a, sakhitalno tawh zong a kibang hi. Ka inn pualam uhah ding a, tawlet-ah hong dak zialin kawmvang panin hong en giau hi. Ka ngaihno in ka kiangah thu hong gen a, “Hong pai in, ngaihno aw, hong zui in, itluat aw. Phalbi veng ta a, guah zu nawn lo hi. Gam sung tengah paakte palh a, lasak hun tung ta hi. Gam sung tengah vakhu hamte kiza ta hi. Theite zong min ta a, leenggah pak gim namtui zong kiza ta hi. Hong pai in, ngaihno aw, hong zui in, itluat aw. Suangheeng kawma vasa bangin nang na bu niloh hi. A ngaihbaang na mai hong musak inla, a lungzuanhuai na awging hong zasak in. “I leengguite pak ta ahih manin ngiano hon in a suksiat ma-in tua ngiano honte man ni,” hong ci hi. Ka ngaihno keima a’ hi; kei zong ama a’ hi’ng. Amah in unok paakte lakah a tuu cing a, nitak huih vot mateng nitak nitum mateng a cing hi. Sanang bangin mualtung a sakhitalno bangin itluat aw, hong paikik in. Zan sialin ka lup kawmin, ka ngaihno ka lungngaingai a, amah ka zon hangin ka mu zo kei hi. Tho-in khuasung tengah ka vak a, kongzing kawm tengah ka pai kawikawi a, ka ngaihno ka zong a, ka zonzon hangin ka mu zo kei hi. Khuasung cingin a pai kawikawite ka tuak a, “Ka ngaihno na mu uh hiam?” ci-in ka dong hi. Khuasung cingte tawh ka kikhen khit phetin ka ngaihno tawh ka kimu hi. Amah kawi-in ka lencip a, ka pianna ka nu’ inndei sung, ka nu’ inn dong ka tunpih mateng ka khah kei hi. Jerusalem nungakte aw, ko’ kingaihna nong suknawi loh nadingun sakhi le sanang tawh kei tungah hong kiciam un. Myrrh paknamtui le saledi pak namtui a kihel tawh a kibang, sumbuk a paknamtui om khempeuh a kihal khin a khu tawh a kibang, gamlak a hong khuto henhan bang ahi hiam? En un, Solomon kumpi luai-in hong kizawng! Israel gam sunga om galkap hoihpen galkap sawmguk in amah cing hi. A vekpi-in namsau zat a siam vive hi a, galdo a siam vive hi khin uh hi. A vekpi-in namsau kuah kim uh a, mi’ hihkhak ding a cing uh hi. Sing hoihpen tawh a kibawl luai-in Kumpi Solomon hong kizawng hi. A luai khuamte, ngun tawh kizut a, a tungah kham tawh a kizem puan a kilam hi. A tut nadingin puansan kibawl a, a sungah savun kidap hi. Jerusalem nungakte aw, hong pai unla, Kumpi Solomon en dih ve un. A zi neih ni, a lungdam ni-a, a nu in amah a khuksak Kumpi lukhu hong khu hi. Itluat aw, na ngaihbaang a, na lu khuhna puan vang panin a ngaihbaang na mit hong tee kelkel hi. Gilead mual tunga keelhon diang leklek bangin na samphekte phe velvel hi. Na ha pak singsengte zong a mul a kimet khin phet, a kisawpsiang tuute tawh kibang hi. Na ha khat zong tok lo a, a vekpi-in kituak dimdiam hi. Na mukte puansan tawh kibang a, na kampau ngaihnop-huai hi. Na lu khuhna puan sung panin na kho hong san lihleh hi. Na ngawng pen galhangte’ zat lum tangzang tulkhat a kikhai zeizaina David’ tausang tawh kibang hi. Na nawite unok pak lakah a ta khawm helhel sanang nih tawh ahi a, a ta khawm hialhial sakhi peeng tawh ahi zongin a kibang hi. Zingsang huih vot a nun’ mateng, zingsang khuavak hong tun mateng, myrrh paknamtui a omna mualtungah omsuakin, saledi paknamtui lakah ka bual ding hi. Ngaihno aw, na ngaihbaang mahmah a, kawkbaanna ding na nei kei hi. Ka lawm ngaih aw, Lebanon Mual-ah hong pai inla, Lebanon Mual panin kei hong zui in. Humpinelkaite le kamkeite a tenna, Amana Mual dawn panin hong taisuk inla, Senir Mual le Hermon Mual panin hong paisuk in. Itluat ka lawm ngaih aw, na mit hah in ka lung hong kuai a, na khi awh in ka lungsim hong zo hi. Itluat ka lawm ngaih aw, nang tawh kingaih nuam mahmah hi. Na itna leenggahzu sangin khumzaw a, na paknamtui paknamtui dang khempeuh sangin namtui zaw hi. Lawm aw, na muk, khuaizu bangin khum a, na leii, bawngnawi le khuaizu bang hi. Na puante Lebanon Mual tunga paknamtui namkim a nam hi. Ka lawmnu, ka naunu, a ki-umcip huan hi a, a kinei tuam tuinak ahi hi. Tua huan sungah singkungte hoihtakin khang a, mang kawlsing cinna huan tawh kibang hi. Singgah limci pente tua lai-ah gah a, henna leh nard sing namtuite tua lai-ah a po hi. Nard sing le saffron sing, thalsing le sinnamon kung, a namtui a gah namkim kung po a, myrrh le aloes, a namtui namkim om hi. Lebanon Mual tung panin tui hong luangsuk a, ciktui luangte, luitui luangte, tua huan sungah a tungsuk hi. Saklam huih aw, hong nungsuk inla, khanglam huih aw, hong nungto in. Ka huan sungteng hong namtuisak un. Ka ngaihno, ka huanah hong paisak unla, a gah limci pente hong nesak un. Itluat ka lawmnu aw, ka huansung hong tungzo ing. Ka paknamtuite ka kaikhawm hi. Ka khuaizu le ka khuailuzu ka ne a, ka leenggahzu le ka bawngnawite ka dawn hi. Nungak le tangval aw, na lungkim piikpeek dongun ne-in dawnin nuamsa un. Ka lup hangin ka lungsim ihmu lo a, ka ngaihno in ka kong hong kiuh ka za hi. Itluat ngaihno ka lungtup aw, kei hong tumsak in. Ka lu tungah daingo kia a, meiizun in ka sam kawtsak hi. Ka puante suah khinzo ing. Ka puante silhkik ding ka hi hiam? Ka khete sil khinzo ing; ninsakkik ding ka hi hiam? Ka ngaihno in kongkhak hong len khin napi hong taisan kik hi. Ka ngaihno tumsak dingin ka kithawi a, ka khutte myrrh paknamtui tawh ka zut a, ka khutmete myrrh paknamtui ka nuh a, kong a hong dingin a honna ka len hi. Ka ngaihno a lutsak dingin kong ka hon a, amah na taikhia khinta hi. Amah a taikhiat manin ka dah lua a, amah ka zon hangin ka mu kei a, amah ka sap hangin hong dawng lo hi. Khuasung a cing mite tawh ka kituak a, kei hong satin hong liamsak uh a, kulhzang a a kileh den khuacingte in ka puantungsilh hawkkhia uh hi. Kong thum hi, Jerusalem nungakte aw, ka ngaihno na muh uhleh lungzuangin ka sih dekna na gensak un. Nungak lak a a hoihpen aw, na ngaihno a bangci hiam, hong gen dih in. Tua bangin kong gen liang ding uh bangzahtakin lamdang ahi hiam? Ka ngaihno a melhoih a, a thahat hi. Mi tul sawm lakah tehpih ding dang om lo hi. A sam sau-in kil thiuhtheuh a, a sam hoihin vom dikdek a, kham sangin zong deihhuai zaw hi. A mittangte ahihleh tuisiang phuan lakah a kisil siang kiuhkeuh, luitui luang gei-a a om vahuite tawh kibang hi. A biangte pen paknamtui a dimin a kithun thawl san kiuhkeuh tawh a kibang hi. A mukte pen myrrh paknamtui tawh a kidim unok pak tawh kibang hi. A khutte etlawmin hi linlian a, suangmanpha a kiphut zungbuhte a bulh hi. A pumpi pen suangmanpha a kiphut dimdiam saiha pak tawh kibang hi. A khete pen kham citak a kiphuh dimdiamna suangngo khuamte tawh kibang a, ama duang pen Lebanon mual sang, taamtak kung hoih bangin thupi suak mahmah hi. A kampaute khum zungzung a, a vekin, deih loh ding khat zong om lo hi. Ka ngaihno, hih bang teng hi, Jerusalem nungakte aw. Nungak lak a hoihpen nu aw, na ngaihno, koi-ah pai hiam? Na ngaihno koi lam pai hiam? Amah hong zonpih nung. Ka ngaihno, paknamtui kung a pona, a huan sungah pai hi. A huan sungah a tuu cing a, unok paakte a lo hi. Ka ngaihno kei a’ hi a, kei zong ama a’ hi’ng. Amah in unok pak lakah a tuute gamtasak hi. Ngaihno aw, Jerusalem khuapi bangin na etlawm mahmah a, Tirzah khuapi bangin na hoih mahmah a, vantung aksi bangin na deihhuai hi. Keima lam hong nga kei in. Na mai in hong leng lua hi. Gilead mual tunga keelhon diang leklek bangin na samphekte phe velvel hi. Na hate zong, a kisil khin phet tuuhon bangin pak singseng hi. A tok khat zong om lo a, a vekpi-in kituak dimdiam hi. Na lu khuhna puan sung panin na kho hong san lihleh hi. Kumpi-zi sawmguk, kumpi zineu sawmgiat, simzawh lohin nungak tampi om kha ding a, ahi zongin khat bek ka ngai a, amah pen vahui bangin it-huai hi. Amah pen a nu’ tanu neihsun hi a, a nu’ ta it pen khat ahi hi. Zing khuavak tawh a kibang hih nungak kua ahi hiam? Amah melhoih mahmah a, nitaang, khataang, a bang hi. Kuam sunga om singkungnote a en ding, leengguite a pak nai hiam a en ding, mang kawlsing a pak nai hiam a en dingin singno huanah ka paisuk hi. Galdo dingin a kipan sakol hawlpa a lin’ bangin nang kong ngaihna hangin ka lingling hi. Hong ciahkik in, hong ciahkik in, Shulam numei aw. Nang kong muh theih nadingun hong ciahkik in, hong ciahkik in. Shulam nungak, khanglui lai-a a lamte bangin bang hangin hong mu nuam na hi uh hiam? Kumpi mel a pua a ngaihbaang nungak aw, na khete le na khedap kilawm mahmah! Na phei le na tanzumte sing suih siamte’ suih bang hiuhiau! Na kalkawm pen leenggahzu lim tawh a kilawi lo hai bangin uk kiukeu hi. Na kawng pen unok pak tawh a ki-um buhlom hen tawh kibang hi. Na nawite pen a takhawm helhel sakhi peeng, a omkhawm hialhial sanang nih tawh kibang hi. Na ngawng, saiha tausang tawh kibang hi. Na mitte pen Heshbon khuapi kulh gei-a om tuilite tawh kibang hi. Na nak pen Damaskas khuapi lam a nga Lebanon tausang bangin hoih hiuhiau hi. Na lutang pen Karmel Mual bangin kitawito a, na samphekte san hiuhiau a, a etlawmna in kumpipa’ mit la vangvang hi. Itluat aw na ngaihbaang a, na mel kong muh nuam zungzung hi. Tuum kung bangin na etlawm a, na nawite pen, nisuh gah a bawk pha mahmah tawh a kibang hi. Tuum kung tungah kahto-in a gah ka lo ding hi. Na nawite kei a dingin leenggah bawk tawh kibang a, na gimnam epel min bangin namtui hi. Na kam, leenggahzu bangin khum zungzung hi. Ka ngaihno tungah leenggahzu khum luang hen la, a muk a ha tawk kim hen. Ka ngaihno a’ ka hi a, amah in kei hong deih hi. Ngaihno aw, gamlakah paikhia-in leenggui lo-ah va giak ni. Zingsangin tho baihin leengguite a sel nai hiam, leengguite a pak nai hiam, mang kawlsing kungte a pak nai hiam, i en ding hi. Tua lai munah kong itna letsong ka hong pia ding hi. Tua lai-ah zawl-ai kung a namtui gim na za ding a, singgah lim namcin i kong gei-ah a om hi. Ngaihno aw, a gah a lui le a thak nang a dingin na duhduh kong koihsak hi. Ka nu’ sung pana piang ka sanggampa hi lecin kei ka ut hi. Tua hileh, lamkalah hong tuak taleng zong kong tawptawp ding a, kuamah in phamawh sa lo ding hi. Keima pianna ka nu’ inndei sungah nang kong paipih ding a, tua lai-ah nong kawi ding hi. Tua lai-ah leenggahzu lim, mang kawlsing tui, kong tulh ding hi. A veilam khut hong khamsak a, a taklam khutin hong kawi hi. Jerusalem nungakte aw, ko’ kingaihna nong suknawi loh nadingun kei tungah hong kiciam un. Gamlak panin a lawmpa tawh khut kilensa-in a hong paikhia kua ahi hiam? Nangmah na pianna mun, na nu in hong neihna mun, epel kung nuai panin nang kong phong hi. Kei simloh kuamah ngai kei inla, kei simloh kuamah kawi kei in. Itna zong sihna zahin thahat a, ngaihna zong sihna zahin khauh hi. Itna, mei bangin kuangkhia a, meikuang lianpen a suak hi. Tui tampi nangawn tawh kisumit zo lo a, tui sungah i phumcip hangin mitzo tuan lo hi. Mi khat in a neihsa sum khempeuh tawh itna a lei dingin hong kithawi leh kinuihsan lel ding hi. Sanggam numeino khat ka nei uh a, a nawite neu mahmah hi. Tangval khat in hong hel zenzen leh ka sanggamnu uh bangci huh ding ka hi uh hiam? Amah khua umna kulh hileh, ngun kibawl tausang tawh ka hu ding uh a, amah kulhkongpi hileh, taamtak singpekte tawh ka dal ding uh hi. Kei, khuakulh ka hi a, ka nawite, a tausang ahi hi. Limtakin kei hong kihutna ka ngaihno in thei ding hi. Baalhamon a kici munah Solomon in leenggui lo khat a nei hi. Amah in tua lo a kho dingin losapte sawl a, a lo-a piangte’ man dingin losapte khat in ngun dangka tulkhat ciat a piak ding uh ahi hi. Keimah in keima aituam leenggui lo khat ka nei hi. Solomon aw, na ngun dangka tulkhat la inla, lokhote’ tungah amau’ tanh ding a zah nih pia in. Huan sunga om ka ngaihno aw, ka lawmte in hong ngai dide ahih manin nangma aw zong, hong gingsak dih in. Ka ngaihno aw, sanang bangin, paknamtui kung a pona mun mualtung a om sakhitalno bangin kei kiangah hong pai in. Judah gam kumpi ahi Uzziah, Jotham, Ahaz, le Hezekiah-te’ hun lai-in Amoz’ tapa Isaiah in Judah gam le Jerusalem khua tawh kisai a maangmuhnate: Vantungte aw, na za un; leitung aw, na ngai in; bang hang hiam cih leh Topa in thu hong gen khinzo a, “Ka pattahsa ka tate in kei hong lehdo uh hi. Bawng in amah a nei pa thei a, la in zong a topa’ an piakna mun thei buang hi. Ahih hangin Israel in bangmah thei lo a, keima mite in thei thei lo uh hi,” a ci hi. Ah, a khial minam, mawhna in a nencip mite, siatna a bawlte’ suanlekhakte, a gamtatsia tapate! Amaute in Topa nusia khin uh a, amaute in Israel-te’ Siangtho Pasian simmawh khin uh hi. Amaute in lam khial khin taktak uh hi. Bang hangin note hong kisat theih nadingin lehdo teitei na hi uh hiam? Israel aw, na lutang khempeuh liamma dim a, na lungsim le na ngaihsutna gim mahmah hi. Khenuai a kipan luzang dong nangawnin a cidamna mun om lo a, sanim gawpnate, meimapite, le siluang liammate a om hi. Tuate pen a nai kisal lo, kitun lo, sathau tawh zong kinomsak lo hi. Na gam uh khing a, na khuapite uh mei tawh kihal hi. Na muh tangpi mahun gamdang mite in na gam uh hong laksakin na khempeuh susia gawp hi. Jerusalem khuapi bek omlai a, leenggui lo-a buk, tangmai lo sunga om hampheng bangin kuama don lohin kinusia a, a ki-umcip khuapi bangin kinusia hi. Vanglian Topa in eite tawmno khat a nungta-in hong siit hikeileh, eite pen Sodom khua bang khinin Gomorrah khua i bang khinta ding hi. Sodom a uk mangte aw, Topa ’ thu na za un! No Gomorrah mite aw, i Pasian’ hihna na ngai un! Topa in hih bangin ci hi: “Note’ biakpiakna a tampite pen kei’ tungah bang hi leltak ahi hiam? Tuutalte le ganhing thaute’ sathau tawh meihal biaknate ka kham ta hi. Bawngtalte, tuunote, le keelte’ si tawh kei ka lungkim kei hi. Kei’ mai-ah a kilaak dingin na hong pai uh ciangin hih bangin ka huangsung na tuatcil gawpna uh kua’n hong deih ding ahi hiam? Bangmahin a kimang lo piaknate hong paipih nawn kei un. Paknamtui halna ka kih hi. Khadet ni, Sabbath ni, le thupi takin na kikhopnate uh mawhna tawh kidim ahih manin ke’n ka thuakzo kei hi. Note’ Khadet nite le na pawite uh ka mudah hi. Tuate pen kei a dingin vangikpi khat suakkhin a, tuate khempeuh ka puakna-in ka gim hi. “Thungenin na khutte uh nong zaak uh ciangin note kong en kei ding a, thu tampi na nget uh hangin ke’n ka ngai tuan kei ding hi. Bang hang hiam cih leh sisan tawh note’ khut kidim hi. Note kisil tawm unla, a siangtho-in kibawl un. Keima muhna-ah na gamtat siatnate uh paikhia-in, siatna na bawlte uh khawl un. Gamtat hoih ding kisin un. Thumanin gamta unla, kinetniamna kheel un. Pa nei lote hu unla, meigong numei panpih un,” ci hi. Topa in hih bangin ci hi: “Tu-in hong pai unla, thu kikumkhawm ni. Na mawhnate uh puansan a bat hangin vuk bangin hong ngo ding hi. Na mawhnate uh si bangin a san hangin tuumul bangin hong kang ding hi. Note in utna lungsim nei-in thu na man’ nak-uhleh lei pana piang a gah hoihte na ne ding uh hi. Ahih hangin note in kei hong nialin na hong lehdo uhleh namsau in note hong vatmai ding hi. Bang hang hiam cih leh Topa in hih thu gen khinzo hi,” a ci hi. A thutak, thutang tawh a kidim ngeisa khuapi, bangci-a a paktat numei tawh kibang ta ahi hiam? Ama sungah thumanna om ngei napi-in tu-in mi thatte bek a om ta hi. Jerusalem khuapi aw, nguntang na bang ngei a, tu-in ahihleh ngun-ek na suakta hi. Leenggahzu limci na bang ngei a, tu-in ahihleh tui mawkmawk na bangta hi. Na uliante, mi lehdote hi a, gutate tawh a kikhawlte ahi hi. Mi khempeuh in sumgolh le letsong a deih uh hi. Amaute in pa nei lote panpih lo uh a, meigongnu’ thu amaute in sang lo uh hi. Tua ahih ciangin, Topa, Vanglian Topa, Israel-te’ Vanglian Pasian in hih bangin ci hi: “Ah, ka lang ahi note’ tungah ka hehna kong khahkhia ding a, ka gal ahi note tungah keimah in kong thuk ding hi. Note tungah na kong sem ding a, meikhukah haltui bangin na saam-ek teng uh tuikhia sakin, na kihelpih na nin khempeuh uh ka lakhia ding hi. A masa-a bangin na thukhente, a kipat cil-a bangin na upate ka koihkik ding hi. Tua khit ciangin nang pen thuman khuapi, thutak khuapi, hong kici ding hi,” a ci hi. Topa thutang ahih manin Jerusalem khuapi honkhia ding a, a sungah a teng a kisik mi khempeuh zong a honkhia ding hi. Ahih hangin a lehdo mite le a khial mite kisusia khawmin Topa a nusiate pen kibeimangsak ding hi. Bang hang hiam cih leh tawsaw kungte na biakna hangun note na maizum ding uh a, biakna huan na bawlna hangun zahhuai-in na mai uh san ding hi. Bang hang hiam cih leh note pen a teh a vul tawsaw kung le tui a ngah lo huan tawh na kibang ding uh hi. A thahat mipa pen patlom tawh kibang ding a, ama nasepna pen mei-ek suak ding hi. Kuamah in phelhzo loin amau tegel kangtum khawm ding uh hi. Judah gam le Jerusalem tawh kisai thu Amoz’ tapa Isaiah’ muhna hih bang ahi hi: Nidang ciangin Topa ’ inn a omna mual pen mual liante lakah a sangpenin kikipsak ding a, mual neute tungah kisangsak ding hi. Tua lai-ah minam khempeuh pai muamua ding uh a, mi tampite hong pai-in, “Hong pai un, amah in ama zialetongte hong hilh theih nading le ama lampite i zuih theih nadingin Jakob’ Pasian’ inn, Topa ’ mualah paito ni,” a ci ding uh hi. Bang hang hiam cih leh Topa in Zion panin thu hong gen ding a, Jerusalem khua panin Topa ’ thuhilhna hong paikhia ding hi. Amah in minamte khatlekhat kikalah thu khenin, mi tampite’ thu khensak ding hi. Amaute in a namsaute uh lokhawhna tu, a teipite uh singhiang heuhna temkawi-in a seek ding uh hi. Minam khat le minam khat kido nawn lo ding uh a, galdo dingin kithawi nawn lo ding uh hi. Jakob’ suanlekhakte aw, hong pai un; Topa ’ khuavak sungah gamta ni. Amaute pen nisuahna lam gam a om khongkhaite le Filistia mite bangin aisante tawh kidim uh a, gamdang mite’ ngeina zui uh ahih manin Jakob suanlekhak, na mite nang na nial hi. Amau’ gamah ngun le kham kidim a, amau’ sumte in bei hun cih nei lo hi. Amau’ gam pen sakolte tawh kidim a, amau’ leengte in bei hun cih nei lo hi. Amau’ gam sung milimte tawh kidim a, amau’ khut tawh a bawlsate uh amaute in a bia uh hi. Tua ahih ciangin mite kiniamkhiat sukin, mite a niamin kikoih suk hi. Amaute’ mawhna maisak kei in. Topa kihtakna le a lian ama minthanna panin suanghawm sungah lut unla, leihawm sungah bu un. Mite’ kiliatsakna pen kiniam koih ding a, mihingte’ kiphatsakna pen kiniamkhiat ding hi. Tua ni ciangin Topa bek a lianin kikoih ding hi. Bang hang hiam cih leh Vanglian Topa in a kiphasak le a kiliansak khempeuh, a kisangsak le a sangte khempeuh; a sang, a kilaamto, Lebanon mual taamtak kung khempeuh, Bashan mual tawsaw kung khempeuh; a lian mual sang khempeuh le a sang mualneu khempeuh; tausang khempeuh le a muanhuai kulhte khempeuh; Tarshish teembaw khempeuh le teembaw hoih khempeuh a niamkoih hun ding ni khat a nei hi. Mite’ kiliatsakna kiniamkhiat ding a, mite’ kiphatsakna a niamin kikoihsuk ding hi. Tua ni ciangin Topa bek a lianin kikoih ding hi. Milimte khempeuh mangthang khin ding hi. Leitung a lingsakgawp dingin Topa a kipat ciangin amah kihtakna le a lian ama minthanna panin suanghawm sung le leihawm sungah mite bu ding uh hi. Mihingte muanin nei nawn kei un. Amaute leltak banga simtham ding ahi hiam? Topa, Vanglian Topa in Jerusalem khua le Judah gam panin nuntakna le luhinna, nuntakna an khempeuh le nuntakna tui khempeuh; mi vanglian pa le galkap pa, thukhen pa le kamsang pa, aisan pa le upa pa, mi sawmnga a ukpa le zalian a nei pa, thu lamlak pa le mitphial siampa, le bum siamte a lakhia hi. Amaute’ ulian dingin naupangte ka bawl ding a, naungekte in amaute uk ding uh hi. Mite khatlekhat, mi khempeuh in a lawmte ciat, mi khempeuh in a vengte ciat, hihgawp ding uh hi. Khangnote pen uhamte tungah, mi ginalote pen miliante tungah kiphasak ding uh hi. Mi khat in ama pa inn sungah a sanggampa lenin, “Nang in puan na nei hi; nang, kote’ makai pa nong hi ding a, hih a sialomtangte pen nangma khutsung hi ding hi,” a cih ciangin amah in, “Bangmah hihzo kei ning. Ka inn sungah an le puan om lo hi. Mite a makai-in nong bawl kei ding hi,” ci-in a genkhia ding hi. Bang hang hiam cih leh amaute khempeuh le amau’ gamtatnate in Topa langpangin amah dem uh ahih manin Jerusalem khua kipukin Judah gam kia hi. Amau’ maiput in amau’ langah teci pang hi. Sodom bangin amaute a langtangin gamta uh a, amaute in im lo uh hi. Amaute in gimna ngah ta hen! Bang hang hiam cih leh amaute in amau’ tung mahah siatna kitun uh hi. Amaute tungah thu hoih ding hi, ci-in thuman mite kiangah hih thu gen un. Bang hang hiam cih leh amaute in amau’ gamtat hoih thaman ngah ding uh hi. Migilo in gimna ngah ta hen! Midang tungah a gitloh gamtatna tawh kizui-in ama tungah kithukkik ding ahih manin ama tungah thu sia ding hi. Keima mite ahihleh naupangte in bawlsia uh a, numeite in zong uk uh hi. Ka mite aw, na makaite un note lam hong lakkhial a, note’ lampi zuih pen hong siasak hi. Topa in thupang dingin ama panmun hong la a, ama mite’ thu a khen dingin a ding hi. Topa pen upate le ama mite’ uliante tawh thukhen dingin kipan a, “Leenggui lo a netumte, note na hi uh a, mizawngte’ na a kisutte note’ inn sungah om hi. Ka mite sucipin mizawngte na gawina uh bang na cihnopna uh a hiam?” Vanglian Topa Pasian in ci hi. Topa in hih bangin ci hi: Jerusalem numeite kiphasakin ngawng doksa-in lam pai uh a, kiphatsakna tawh a mit uh hei pampamin hi tuihtuihin lam pai uh a, a khe uh gingsak sualsual ahih ciangun Topa in Jerusalem numeite’ lutang meima sakin Topa in amau’ lutang kolhsak ding hi. Tua ciangin Topa in khebuh hoihte, lutuam le khade lim tawh a kibang kizepnate; bilbah tualte, taaute, le mai sitnate; lukhute, banbulhte, kawngtente, paknamtui bungte, le a kivom aite; min gelhna zungbuhte le nakbuhte; pawipuante, puanza neute, puanpite le khutkhai ipte; puanza neu vang siseihte, saihadial puansungsilhte, dialkhipte, le kikhuhna puante lakhia ding hi. Paknamtui tangin uihna, kawnggak tangin khauhualpi, limtak a kizem sam tangin lu kolhna, puan hoih tangin puanhampi, melhoihna tangin maizumna hun hong tung ding hi. Na mite, namsau tawh si ding uh a, a vanglian na mite, gal sungah kisia ding uh hi. Khuapi kongpi tau-in thum ding hi. Khuapi, gamkhing suak ding a, a guaktanga om nupi leilakah a tucip tawh kibang ding hi. Tua ni ciangin nupi sagih in papi khat neikhawm ding uh a, “Kote in komau’ an ciat ne-in, komau’ puan ciat mah ka silh ding uh hi. Kote pen, nangma zi cih min bek hong puasak in; ka minsiatna teng uh hong hum in,” ci ding uh hi. Tua ni ciangin Topa ’ bulsel pen melhoihin minthang ding a, leitung panin a piang gahte pen, a suakta lai Israel mite’ kiphatsakna le minthanna hi ding hi. Tua ciangin Zion Mual tung, tua lai-a kikhawm mi khempeuh tungah, sunin meii sungah, zanin meikuang khu tawh Topa hong kilang ding a, Topa ’ minthanna vang in khuapi hu ding hi. Tua minthanna vang pen sun ciangin nisa a liah ding le huihpi guahpi panin bukna le belhna zong hi ding hi. Ka lawm it pa’ tangin a leenggui lo a itna la ke’n hong sa ning: Ka lawm it pa in leitang a hoih mahmahna mualtung khatah leenggui lo khat a nei hi. Amah in lei to-in a suangte paikhia a, leenggui hoihte a suan hi. A laizangah tausang khat lam a, tua lo sungah leenggahsukna khuk khat a to hi. Amah in leenggah hoih a hong gah ding lamen a, ahih hangin gam leenggah hong gah mawk hi. Tu-in, Jerusalem khua-ah a tengte le Judah mite aw, kei le ka leenggui lo kikalah thu nong khenna ding uh ka hong thum hi. Ka leenggui lo a dingin ka hih nai loh ka hih ding a kilawm bang omlai ahi hiam? Leenggah hoih gah ding ka lamet laitakin bang hangin gam leenggah hong gah mawk ahi hiam? Tu-in, ka leenggui lo tungah ka hih ding thu note tungah kong gen ding hi. A daai ka lakhia ding a, kinemang ding hi. A gawl ka susia ding a, kituancil ding hi. Lokhulin ka bawl ding hi. Kipuah loin, kikho lo ding a, tua lo sungah lingkung le lingte a khang ding hi. Ama tungah meiite in zong guah a zuksak loh nadingin thu ka pia ding hi. Bang hang hiam cih leh Vanglian Topa ’ leenggui lo pen Israel mite hi a, Judah mite pen lungdamna tawh a suan kungte ahi hi. Amah in thutang lamen a, ahih hangin sisan luanna om hi. Thumanna lamen a, ahih hangin kahna om hi. Leitang tungah amau guak a teng ding dong zahin midangte a dingin mun khempeuh a bei matengin inn khatlekhat, lo khatlekhat gawmin a la thuah tawntung mite in gimna ngah tahen. Vanglian Topa in ka zakna-ah hih bangin kiciam a, “A mantakin inn tampi tak hawmsuak ding a, a lian a hoih innte-ah a teng om lo ding hi. Bang hang hiam cih leh leenggah lo eka sawm in phelpi khat dim bek gah ding a, khaici beem khat in an seu khat bek piangsak ding hi,” ci hi. Zingsang tungin tho-in, khamtheihzu delhin, leenggahzu in amaute a satsak pialpual matengin nitakin a tutkho mite in gimna ngah ta hen! Amaute in a pawi sung uhah laiza lasakna le harp lasakna, khuang, tamngai, le leenggahzu, tampi a nei uh hi. Ahih hangin amaute in Topa ’ sepnate don lo uh a, a khut tawh a bawlte zong mu lo uh hi. Tua hi a, thu theih lohna hangin ka mite sal suak uh hi. A miliante uh gilkialin si dek uh a, a mihonte uh dangtakin keu uh hi. Tua ahih ciangin Leinuai in a duhna khangsakin bangmah tawh a kiteh thei lo zahin a kam ka beba a, Jerusalem’ hoihna teng, a mipite, a mihonte, ama sunga a lungdam mite, a nawmvalh hi. Mi khempeuh a niamin kikoih suk hi. A kiphasak mite kiniamkhiat suk hi. Ahih hangin thutang sepna tawh Vanglian Topa in a liatna hong kilangsak a, a Siangtho Pasian in a mite a thukhenna tawh ama sianthona hong kilangsak hi. Tua ciangin tuunote in amau’ tatna gamlak mun bangin tua khua sungah lopa ne ding uh a, a thau ganhingte le keelnote a siasa khuapi sungah gamta ding uh hi. A phate sia ci-in, a siate pha ci a, khuavak dingin khuamial koihin, khuamial dingin khuavak koih a, a khum dingin a kha koihin, a kha dingin a khum a koihte in gimna ngah tahen. Amau’ mitah pil kisa a, amau’ muhna-ah siam a kisate in gimna ngah ta hen! Leenggahzu tampi a dawnte, khamtheih zunek a hatte, mimawhte sumgolh tawh khah a, midikte a mawhsakte in gimna ngah ta hen! Tua ahih ciangin mei in buhkung keute kangtum a, meikuang sungah lopa keute a kattum bangin amaute’ zung pen muatgawp ding a, amaute’ pakpalhte leivui bangin vanah leengto ding hi. Bang hang hiam cih leh amaute in Vanglian Topa ’ thu nialin Israel-te’ Siangtho Pa’ thu a simmawh uh hi. Tua ahih ciangin Topa ’ hehna ama mite tungah hong khangin, a khut zanin amaute vatgawp a, mualte a kiling hi. Amaute’ luanghawmte kongzing lampite-ah nin bangin a om hi. Hih bang teng hangin zong a hehna damzo nai loin ama khut kizanlai hi. Amah in a gamlapi-a om minam khat a sapna-in lim khat lak a, leimong panin hong pai nadingin a sam hi. Manlang takin tua mite hong pai pah hi. Tua a hong pai mite kuamah gim lo uh a, kuamah tuk lo uh hi. Kuamah lusu lo a, kuamah ihmu lo uh hi. Dialkaih khat zong kol lo a, khedap khau khat zong kitat lo hi. Amau’ thaltangte hiam a, a thal khempeuh uh a kikeeksa ahi hi. Amau’ sakolte’ khecinte meisuang bangin sak a, a leengpeite uh pingpei bangin manlang hi. Amaute’ kikona pen humpinelkai hawk bang a, humpinelkai khanglaite bangin amaute a hawk uh hi. Amaute humhamin a sa nek ding uh man uh a, amaute in puakhia-in kuamah in honkhia zo lo hi. Tua ni ciangin amaute in tuipi ging bangin Israel ngik ding uh hi. Mi khatpeuh in hih gam sung en leh khuamial le lungzinna bek om a, meiite in khua a mialsak hi. Kumpi Uzziah a sih kumin, a sang mahmah, a lian kumpi tokhom tungah Topa a tu ka mu hi. Ama kumpi puanpi pen biakinn sungteng a dim hi. Ama kiimah serafim van mite a ding uh hi. Tuate in kha guk ciat nei uh hi; nih tawh a mai liahin, nih tawh a khe tuamin, nih tawh a leeng uh hi. Amaute khatlekhat kisamin: “Vanglian Topa, siangtho, siangtho, siangtho; leitung khempeuh ama minthanna tawh kidim,” ci-in awng uh hi. Tua kikona aw in biakinn kongkhak khuam bulpite kilingsak a, inn sungteng meikhu tawh a kidim hi. Tua ciangin keimah in, “Gim ngah pa hi ta ing! Bang hang hiam cih leh a mawknapi ka hi hi; ka kama ka thugen khempeuh a mawkna vive hi a, a thugen khempeuh uh mawhna le nitna ahi mite lakah ka tengkha hi. Vanglian Topa, Kumpipa ka mukha khinta hi,” ka ci hi. Tua ciangin serafim van mite khat, biakna tau panin taiteh tawh a teh mei-am khat a khutah tawi-in keima kiangah hong leeng hi. Amah in ka muk hong bi a, “En in, hih in na muk sukha zo hi; na mawhna beita a, na khialhna kimaisak zo hi,” hong ci hi. Tua ciangin, “Kua sawl ding a, eite a dingin kua va pai ding ahi hiam?” Topa’ cihna aw ka za hi. Tua ciangin ke’n, “Hih lai-ah kei om ing! Kei hong sawl in,” ka ci hi. Tua ciangin amah in, “Pai inla, hih mite tungah, ‘Zaza napi tel lo; mumu napi thei lo,’ va ci in. Amaute in a mit uh tawh a muh loh nading, a bil uh tawh a zak loh nading, a lungsim uh tawh thu a theihtel loh nading, amaute kihei-in damna a ngah loh nadingun hih mite’ lungsim mawlsak inla, amau’ bil uh ngongsak inla, a mit uh va sisak in,” hong ci hi. Tua ciangin keimah in, “ Topa aw, bang tanvei sawt ding ahi hiam?” ka ci hi. Amah in, “Khuapi-ah a teng kuamah om loin hawm suakin, innte-ah kuamah om loin, leitang pen gamkhing suak kiuhkeuhin, Topa in gamlapi-ah mite khinkhia-in, leitungah a kinusia mun tampi a om dong, hi ding hi. Mi sawm ah khat bang a omlai tei hangin, taak kung le tawsaw kungte a kiphuk khit ciangin a bulsum a omlaite mei tawh a kihalkik bangin amaute zong kisusia ding hi,” hong ci hi. (A bulsum pen Pasian’ mite a kipatthakna ding lahna lim ahi hi.) Uzziah’ tapa Jotham, Jotham’ tapa Ahaz ahi Judah kumpipa’ hun laitakin, Syria kumpipa Rezin le Remaliah’ tapa Pekah ahi Israel kumpipa, Jerusalem khuapi a sim dingin kuanto uh a, ahih hangin amaute in zo zo lo uh hi. “Syria-te pen Efraim mite tawh kikop,” ci-in David’ innkuante tungah a kigen ciangin, huih in gamlak a singte a mut bangin amah le a mihingte’ lungsim kiling hi. Topa in Isaiah tungah, “Ahaz tawh kimu dingin Puansawppa’ nasepna phual zuatna lampi kiangah a om, bual tungnung tuilakna mongah nang le na tapa Shearjashub pai-in ama tungah, ‘Kidawm inla, om khinkhian in. Lau kei in. Syria kumpipa Rezin le Remaliah’ tapa’ hehna pen, sing tumbang nih a khute tawh kibang lel ahih manin na lung gimsak kei in. Bang hang hiam cih leh Syria kumpi a kipan Remaliah’ tapa le Efraim mite in nang hong sawm uh a, “Judah gam a sim dingin pai-in va sugawp ni; eima a dingin va zo ni; tua gamah kumpi dingin Tabeel’ tapa va koih ni,” ci uh hi. Ahi zongin Topa Pasian in hih bangin ci hi: ‘Tua thu pen kip lo ding a, hong tung lo ding hi. Bang hang hiam cih leh Syria’ lutang, Damaskas khuapi hi a, Damaskas’ lutang, Rezin ahi hi. (Kum sawmguk le kum nga sungin minam ahizo nawn lo zah dongin Efraim kitamzan gawp ding hi.) Efraim’ lutang, Samaria hi a, Samaria’ lutang, Remaliah’ tapa ahi hi. Hih thu upna kho na neih kei leh, nang na kip kei ding hi,’ va ci in,” ci-in a gen hi. Topa in Ahaz kiangah thu genkik a, “ Topa na Pasian kiang panin lim khat ngen inla, a thuk Leinuai pan ahi a, a sang vantung panin ahi zongin ngen in,” a ci hi. Ahih hangin Ahaz in, “Ka ngen kei ding hi; Topa ka ze-et kei ding hi,” ci hi. Tua ciangin Isaiah in, “David’ innkuan aw, ngai un! Mite na lunggim sakna uh kicing sa lo a, ka Pasian zong lunggimsak lai na hi uh hiam? Tua ahih ciangin Topa mahmah in note tungah lim khat hong pia ding hi. En un, nungak khat gai-in tapa khat nei ding a, ama min Immanuel kici ding hi. Amah in a hoih lote nialin a hoihte a teel theih hun ciangin bawngnawi thaukhal le khuaizu ne ding hi. Bang hang hiam cih leh naupang in a hoih lote nialin a hoihte a teel theih hun ma-in na kihtak uh kumpi nihte’ gam kinusiacip ding hi. Efraim mite pen Judah mite’ kiang panin a paikhiat hun a kipan nidangin a piang ngei lo thu, Assiria kumpipa pen nang le na mite le na pate’ inn-ah Topa in hong tungsak ding hi. “Tua ni ciangin Egypt luite’ nakah a om Egypt mite, thopi hon bangin hong pai nading le Assiria mite, a gam panun khuaipi hon bangin hong pai nadingun Topa in sam ding hi. Tuate khempeuh hong pai-in, keenhawmte sung, suangpi heengte sung, lingkung kawmte, le ganhing tatna mun khempeuhah dim ding uh hi. “Tua ni ciangin Topa in Gun gal khat panin a kikawm temta ahi Assiria kumpipa tawh sam le khemul mettol ding a, khamul zong metkhia ding hi. “Tua ni ciangin mi khat in bawngla khat le tuu nih bang bek suahtakzo ding a, ahi zongin tuate in nawi tampi a piakna hangin amah in bawngnawi thaukhal ne zo ding hi; bang hang hiam cih leh gam sungah a omlai mi khempeuh in bawngnawi thaukhal le khuaizu ne ding uh hi. “Tua ni ciangin nguntang tulkhat a man leenggui tulkhat a omna mun khempeuh pen lingkungte le lingte’ omna suak ding hi. Gam khempeuh lingkungte le lingte tawh kidim ding ahih manin, thal le thaltangte tawh tua munah mihingte gam vak ding uh hi. Lingkungte le lingte na kihtakna hangin tupeek tawh a kikho ngei mual neute-ah na pai ngam kei ding hi. Tua munte pen bawng khahna le tuute’ gamtatna mun suak ding hi,” a ci hi. Tua ciangin Topa in kei kiangah, “Suangpek lianpi khat la inla, tua tungah mihingte’ theihkim lai tawh, ‘Mahershalahashbaz,’ ci-in gelh in,” hong ci hi. Hih thu a thei dingin a muanhuai teci, siampi ahi Uriah le Jeberekhiah’ tapa Zekhariah ka nei hi, hong ci hi. Tua ciangin ka zi tawh ka lumkhawm a, amah gai-in tapa khat hong nei hi. Tua ciangin Topa in ka tungah, “Ama min pen Mahershalahashbaz, ci-in phuak in. Bang hang hiam cih leh naungek in, ‘Nu aw, pa aw,’ a cih theih ma-in Damaskas khua’ hauhna le Samaria khuasunga a om a kisut vante, Assiria kumpipa in la-in masuan ding hi,” hong ci hi. Topa in kei tungah thu hong genkik leuleu a, “Hih mite in damtakin a luang didi Shiloah tuite nial uh a, Rezin le Remaliah’ tapa’ mai-ah launa tawh lingliang uh hi. Tua ahih ciangin Topa in Assiria kumpipa le ama galkap honpite, a tam mahmah a piau dimletin a khang Gunpi tui bangin amaute a sim dingin hong luangsak ding hi. Judah gam dong hong nawtsuk ding a, dimletin paisuakin, ngawng ciang dong tum ding hi,” hong ci hi. Ahih hangin Pasian in eite hong ompih a, a kizal ama khate in i gam hong hu ding hi. No minam dangte aw, thei unla, lungkham un. Gamlapi-ah a om gamte khempeuh aw, ngai un. Kigalging un; ahih hangin lungkiatna na thuak veve ding uh hi. Note kikhawmin thu na vaihawm uh hangin a mawkna suak ding a, thu khat peuhpeuh na gen uh hangin kip lo ding hi. Bang hang hiam cih leh kote tawh Pasian hong omkhawm hi. Bang hang hiam cih leh Topa in ama vangliatna tawh kei tungah thu hong gen a, hih mite’ lampi ka zuih loh nadingin hong hilhkhol a, “Hih mite’ vaihawmna pawlpih kei un. Amau’ kihtakte kihta kei unla, lau kei un. Ahih hangin Vanglian Topa pen a siangtho-in na ngaihsun ding uh hi. Amah pen note’ zahtak pa le note’ kihtak pa na hisak ding uh hi. Amah pen, a lamdang mahmahin a siangtho’ luatna hangin mite’ puktheihna ding suangtum tawh kibang hi. Judah le Israel kumpi gammite le Jerusalem khua-a a teng mite a awkna ding thangzak tawh kibang ding hi. Mi tampi tak tuk ding uh hi. Amaute tukin kitamzan gawp ding uh a, amaute awkin kiman ding hi,” hong ci hi. Ka nungzuite aw, Pasian in kei tungah hong piak hih thute, limtakin kemin koihcing un. Jakob’ innkuante’ kiang panin a maitang a seel Topa ngakin amah ka muang ding hi. En un, Topa in kei hong piak ka tate le keima pumpi pen Zion Mual tungah a teng Vanglian Topa ’ tung panin Israel mite’ sungah lim le kihilna ka hi uh hi. Amaute in note kiangah, “Phun suausuau-in a pau mualmual vankah theite le aisan theite kiangah thu dong un. Mite in amau’ pasian-te thu dongin, mihingte’ thu pen misite dot ding mah hi lo ahi hiam?” hong ci ding uh hi. Tua ciangin note in, “ Topa in note hong hilh thute ngai un. Aisante’ thu ngai kei un. Amaute’ hong gen thute a kimanna om lo hi,” ci-in dawng un. Mite pen gam sungah vak kawikawi-in, nakpitakin lungkhamin gilkial ding uh hi. A gil uh a kial ciangin amaute lungham gawp ding uh a, a kumpipa uh le a Pasian uh hamsiatin vandak ding uh hi. Amaute in leilak a etsuk hangun, lungkhamna le khuamialna, lungzinga gimna bek om hi. Khuamial ngeungau sungah amaute kihawlkhia ding hi. Zebulun minamte le Naftali minamte’ tenna gamte in mindaina thuak ngei uh a, ahi zongin mai lamah pahtawina ngahkik ding uh hi. Mediterranean tuipi a kipanin nisuahna lam Jordan gun gal, minam dangte’ tenna Galilee gam sung minthang kik ding hi. Khuamial sunga a pai mite in khuavak lianpi mu khinta a, khuamial thukna gam sungah a teng mite tungah khuavak taang khinzo hi. Nangmah in amaute na pungsak a, a lungdamna uh na khangsak hi. Anlak hun ciangin lungdamna le mite in vankisutte a hawm ciangun a lungdam bangun nangma mai-ah amaute lungdam uh hi. Bang hang hiam cih leh Midian-te a kizawh ni-a bangin nangmah in amau’ vangik puakna hakkol le amaute a kisatna ciangkhut na kuaihtansak a, nangma mi a bawlsia minamte na zogawp hi. Galkap hangte’ khedap khempeuh le si a baang puan khempeuh mei-in kicih ding hi. Bang hang hiam cih leh eite a dingin naungek khat hong suak a, eite’ tungah tapa khat hong kipia hi. Amah pen eite hong ukpa hi ding a, ama min pen “Lamdang Thulak pa, Vanglian Pasian, Tawntung Pa, Nopsakna Kumpi,” kici ding hi. Tuhun a kipanin a tawntungin David kumpi tokhom tung le ama gam sungah thutang le thuman phutin, a lian semsem ama ukna le nopsakna in mong nei lo ding hi. Vanglian Topa ’ deih luatna in hih thu hong tungsak ding hi. Topa in Jakob tungah thu khat khah a, Israel tungah thu hong tung ding hi. Tua ahih ciangin Topa in amaute do-in a langpang ding bawl a, amau’ galte a hanthawn hi. Ama mai-a om Syria mite le a nunga om Filistia mite in kam ka-in Israel netum uh hi. Hih thute khempeuh hangin ama hehna damzo nai lo a, ama khut kizanlai hi. Amaute a satpa’ lamah Israel mite kihei lo a, Vanglian Topa zong lo uh hi. Tua ahih ciangin Topa in Israel sung panin a makaite le a mihonte, a lu panin a mei dongin ni khat thu-in a vatmai hi. Upa pa le a zahtakhuai mipa pen a lutang hi a, zuauthu a hilh kamsangpa pen a mei ahi hi. Bang hang hiam cih leh hih minam a makaihte in lam khialsak a, amau’ makaih mite in siatna ngah uh hi. Tua ahih ciangin amau’ tangvalte tungah Topa lungdam lo a, pa nei lote le a meigong numeite uh tungah hehpihna nei lo hi. Bang hang hiam cih leh mi khempeuh pen Pasian’ thu a khual om loin siatna a bawl vive hi a, kam khempeuh in haina thu a gen uh hi. Hih thute khempeuh hangin ama hehna damzo nai lo a, ama khut kizanlai hi. Bang hang hiam cih leh gitlohna mei bangin kuang a, lingkungte le lingte kangtum sak hi. Gamlak lopa phate kuangsak a, meikhu lomtangin van lamah kizialto uh hi. Vanglian Topa ’ hehna hangin meikuang bangin gam sung kang a, mite pen mei a kicih sing tawh kibang uh hi. Kuamah in a sanggampa nangawn zah tuan lo hi. Amaute in a taklama omte ne uh a, ahih hangin a gil uh kiallai veve hi. A veilama omte ne uh a, ahih hangin kham nai lo uh hi. Mite in amau’ vengte’ sa ne ciat uh hi. Manasseh in Efraim, Efraim in Manasseh ne-in, tua tegel in Judah langpang khawm uh hi. Hih thute khempeuh hangin ama hehna damzo nai lo a, ama khut kizanlai hi. Gimpiak ni hun, gamlapi panin huihpi hong nun’ ciangin note in bangcih ding na hi uh hiam? Huhna ngenin kua kiangah tai ding a, na neihsa uh koi lai-ah koih ding na hi uh hiam? Thongkiate’ lakah tonbucipin om ding le a kithat mite lakah sih ding bek a om hi. Hih thute khempeuh hangin ama hehna damzo nai lo a, ama khut kizanlai hi. Assiria-te pen ka hehna mite gimpiak nadingin molhtum le ciangkhutin ka zat ahi hi. Keima thu a ngaihsun lo minam le kei a hong hehsak mite’ neihsa sutin laksakin, amaute pen konglak buannawng bangin a tuancil dingin amaute sawlin thu ka pia hi. Ahih hangin a kumpipa in tua bang bek sawm lo a, a lungsim in zong tua bang bek ngaihsun lo hi. Ama lungsim sungah minam tampi suksiat nopna thu om hi. Bang hang hiam cih leh amah in, “Ka galkapmangte, kumpi vive hikhin hi lo ahi hiam? Kalno khuapi pen Karkhemish khuapi tawh kibang hi lo ahi hiam? Hamath khuapi pen Arpad khuapi tawh kibang hi lo ahi hiam? Samaria khuapi pen Damaskas khuapi tawh kibang hi lo ahi hiam? Jerusalem le Samaria milimte sangin milim lianzaw a nei milim kumpi gamte ka khut in ban khin ahih ciangin Samaria le a milimte tungah ka bawl bangin Jerusalem le a milimte tungah bawl lo ding ka hi hiam?” ci hi. Topa in Zion Mual le Jerusalem khua-ah ama nasep dingteng a zawh khit ciangin Assiria kumpipa kiphasakin a kisialhna le a kiphatsakna hangin gim a pia ding hi. Bang hang hiam cih leh amah in, “Keimah in thu theihtelna nei ka hih manin keima thahatna le keima pilna tawh ka hih khin hi. Mihingte’ gamgite lakhia-in amau’ sumte ka sut khin a, keimah in bawngtal bangin a gammite ka sugawp hi. Vasa bumek bangin mihingte’ hauhna ka la ziau hi. A kinusia vasa tuite mite in a lak bangin leitung khempeuh ka la khin hi. A kha a zap, a kam a ka, a ham khat beek om lo hi,” a ci hi. Amah a likto pa pen molhtumin a zang ding bangkeek, sing ahi lo mipa pen ciangkhut bangin a likto ding bang keekin, phuk nadingin amah a zang pa tungah, hei, kihisak thei ding ahi hiam? Singat tem zong amah a zang pa tungah kiliansak thei ding ahi hiam? Tua ahih ciangin Topa, Vanglian Topa in ama mi thaute lakah natna lianpi tungsak ding a, tua natna pen amaute sungah mei bangin kuang niloh ding hi. Israel-te’ khuavak pen mei suakin, Israel-te’ Siangtho Pa pen meikuang suak ding hi. Ni khat sungin ama lingkungte le lingte kangin beitum ding hi. Gah tampi a piangsak ama leitang le ama gamlak a minthanna pen nuntakna le pumpi dong takin Topa in susia ding a, mi cina khat a si tawh kibang ding hi. A omlai gamlak singkungte tawm mahmah ta a, naupang khat nangawn in khat khatin sim khin thei hi. Tua ni a kipan Israel a omlaite, Jakob innkuan a suakta laite in amau a sugawp pa suang nawn loin, Topa ahi, Israel Siangtho Pa pen thuman tawh suanin nei ding uh hi. Jakob innkuan a omlaite a vanglian Pasian kiangah ciahkik ding hi. Na mi Israel-te, tuipi sehnel zah a phak hangin amaute tawmkhat bek hong ciahkik ding hi. Amaute’ thuak dingin a kilawm bangin thu a kikhen ahi hi. Bang hang hiam cih leh Topa, Vanglian Topa in a thukhennasa bangin leitung khempeuhah beisiangna a bawl ding hi. Tua ahih ciangin Topa, Vanglian Topa in thu gen a, “Zion-ah a teng ka mihingte aw, Egypt mite’ hih bangin amaute in molhtum tawh hong satin a ciangkhut uh hong liik ciangin Assiria mite kihta kei un. Bang hang hiam cih leh a sawt loin note tungah ka thangpaihna bei ding a, ka hehna amaute’ tung tu-in, amaute sia ding uh hi. Vanglian Topa in Oreb suangpi-ah Midian mite a sukgawp bangin, amah in amaute tungah gimpiakna zang ding a, Egypt mite a thuaksak bangin Assiria mite thuaksak ding hi. Tua ni ciangin na liangko panun ama vangikpi kinkhia ding a, ama hakkol pen na ngawng panun bei ding hi,” a ci hi. Rimmon gam pan galte hong kipanin Aiath khua hong tung uh a, Migron khua kantanin hong pai uh a, Mikmash khua-ah a van uh hong seng uh hi. Amaute in mualciang kantanin Geba khua-ah zan khat giak uh hi. Rama khuamite lau-in ling uh a, Saul’ tenna Gibeah khuamite a tai uh hi. Gallim khuamite aw, nakpitakin kiko un! Laisah khuamite aw ngai un! Anathoth khuamite aw, amah dawng un! Madmenah khuamite taikhia a, Gebim khua-a a teng mite a suakta dingin a tai uh hi. Tuni mahmahin Nob khua-ah galte tungin khawl uh a, Zion Mual ahi Jerusalem khuapi a khuttum uh sinsan uh hi. En un, Topa, Vanglian Topa in a kihtakhuai vangliatna tawh singhiangte heuh ding hi. A kung sangte kiphuk ding a, a kisangsakte a niamin kikoih ding hi. Amah in tulak singte hei tawh phuk ding a, Lebanon mual a singkung liante tawh pukkhawm ding hi. Jessi’ phung sung panin a sel khat hong khangkhia ding a, a zungte panin a no khat hong khang ding hi. Topa ’ kha in ama tungah ama mite a ukna ding pilna, thutheihna, le siamna pia ding hi. Amah in Topa ’ deihna thei-in Topa zahtak ding hi. Amah in Topa ’ nasep nuamsa ding hi. Amah in a tungtham bek muhna tawh thu khen lo ding a, kam lengsawn bek zakna tawh thu khentat lo ding hi. Thumanna tawh mizawngte’ thu khenin, lungsim nem mite’ thu ahi bangin khensak ding hi. Ama kam panin a thupiakna tawh leitung mite gim kipia ding a, a muk panin a thugenna tawh migilote si ding uh hi. Amah in thuman le thutak tawh ama mite uk ding hi. Keivom pen tuuno tawh omkhawm ding a, kamkei gialbem pen keelno tawh lumkhawm ding hi. Bawngno le humpinelkai le ganhing thaute omkhawm ding uh a, naupangno khat nangawn in tuate hawlzo ding hi. Bawngpi le vompi in an nekhawm ding uh a, amau’ note lumkhawm ding uh hi. Humpinelkai in bawngtal mah bangin buhkung ne ding hi. Nawine naungek, gul gilo’ kua vangah kimawl ding a, nawine nawn lo naupang in gul gunei’ bu a sawk hangin a gul in tu lo ding hi. Ka mual siangtho buppi tungah amaute khatlekhat kiliamsak lo ding uh a, kisusia lo ding uh hi. Bang hang hiam cih leh tuite in tuipi omna a tuamcip mah bangin leitungah Topa ’ thu theihna kidim ding hi. Tua ni ciangin Jessi’ zung pen mihingte’ tungah lim khat hi ding hi. Minamte in amah zong ding uh a, ama omna mun minthang mahmah ding hi. Tua ni ciangin Topa in Assiria gam, Egypt gam, Pathros gam, Ethiopia gam, Elam gam, Shinar gam, Hamath gam, le tuipi gei-a gamte panin ama mi a omlaite a ngahkik nadingin a vangliatna zang kik ding hi. Amah in minamte a dingin lim khat koih ding a, Israel mi a kihawlkhiate kaikhawmin, leitung kiu li panin Judah mi a kikhenthangte kaikhawm ding hi. Efraim in hazatna lungsim a neihnate bei ding a, Judah mi a galbawlte kisusia ding hi. Efraim in Judah haza nawn lo ding a, Judah in zong Efraim galbawl lo ding hi. Ahih hangin amaute in nitumna lama om Filistia mite simkhawm ding uh a, nisuahna lama om mite luhkhawm ding uh hi. Amaute in Edom mite le Moab mite zogawp ding uh a, Ammon mite in amau’ thu mang ding uh hi. Topa in ama huihsa nungsakin Nail gunpi le Eufratis gunpi tuite kangsak ding a, mi khempeuh in nuamtakin a kantan zawh ding lui neu sagih bek sitlai ding hi. Egypt gam panin Israel-te hong paitoh ciangin amau a dingin lam lianpi khat a om mah bangin, ama mi a omlaite a dingin Assiria gam panin zong lam lianpi khat om ding hi. Ni khat ni ciangin mite in, “ Topa aw, kei tungah na heh hangin na hehna damta a, kei hong hehnem na hih manin nang tungah lungdamna kong ko ding hi. En in, Pasian pen kei a hong honkhia pa ahi hi. Amah ka muang ding a, ka lau kei ding hi. Bang hang hiam cih leh Topa Pasian in thahatna le vangliatna hong pia a, amah pen kei a hong honkhia pa ahi hi,” a cih hun uh hong tung ding hi. Tui siangtho in a dangtakte a lungdamsak mah bangin, Pasian’ hotkhiatna in a mite lungdamsak ding hi. Ni khat ni ciangin mite in, “ Topa ’ tungah lungdam ko unla, ama hong huh ding ngen un. Minam khempeuh lakah ama septe kitheisak unla, ama min kiliansak hi, ci-in gen un. Amah in minthang takin sem khin ahih manin Topa ’ tungah phatna la sa unla, leitung khempeuhah hih thu kitheisak un. Zion-a teng mite aw, nomau’ lakah Israel-te’ Siangtho Pa lianin om ahih manin lungdamin awng unla, lungdamin la sa un,” a cih hun uh hong tung ding hi. Amoz’ tapa Isaiah in Babylon siatna ding tawh kisai a thumuhnate: Mualkolh tungah lim khat lakto unla, galkapte tungah nakpitakin kiko un. Miliante’ kongpi-ah amaute va pai-in a sim nadingun amaute khut vaan un. Keimah in ka tuamkoihsa mite thu pia khinin, ka hehna thu a semkhia dingin kiphatsakna tawh a lungdam ka mi thahatte ka sam khin hi. Ngai un, mihonpi lungdam bangin mualtungte ah gamlumna! Ngai un, minamte’ kumpi gamte kikhawmin a gamlumna! Vanglian Topa in galdo dingin mihon khat kaikhawm hi. Leitung buppi a susia dingin Topa le ama hehna galhiamte gamlapi van mong panin hong pai hi. Topa ’ ni hong naita ahih manin nakpitakin kap un. Vanglianpa’ kiang panin suksiatna hong tung ta ding hi. Tua ahih ciangin khut khempeuh zaw-in, mi khempeuh’ lungsim tuisuak ding a, amaute lungkia ding uh hi. Amaute in gim mahmahna le nat velvalna thuak ding uh a, numei nausuak ding bangin na sa ding uh hi. Amaute khatlekhat lamdang sakna tawh ki-en ding uh a, a maitangte un gimna mel pua ding hi. En un, leitung gamkhing suaksakin, leitung mawhneite a susia dingin hehna le sinsona tawh nasia takin Topa ’ ni hong tung ding hi. Bang hang hiam cih leh vantung aksite le amau’ aksi honpite in khuavak piakhia lo ding hi. Ni a suahtung a kipan mial ding a, kha in zong khuavak taangkhiasak lo ding hi. Leitung mite a tatsiatna hangun gim ka pia ding a, migilote a mawhna hangun gim ka thuaksak ding hi. Mi kihisakte’ kiphatsakna beisiang sakin, a kisatheite’ kiliatsakna ka niamkhiat ding hi. Mihingte pen kham hoihte sangin a hoihzaw, minam pen Ofir gam khamte sangin a hoihzaw-in ka bawl ding hi. Tua ahih ciangin ka sinso ni-in Vanglian Topa ka hehna hangin vantung lausakin ka lingsak ding a, ama omna panin leitung kisingkhia ding hi. A kidelh sanang le a cing om lo tuu bangin mi khempeuh amau’ mite’ lam ciatah kihei-in, amau’ gam ciatah tai ding uh hi. A kimu mi peuhmah kithat ding a, a kiman mi peuhmah namsau tawh si ding hi. Amau’ muhna mahah a naungekte uh leilak kidengawpna ding hi. Amaute’ inn kiluhin, a zite uh kibuansak ding hi. En un, ngun le khamte tawh a lungkim lo Media mite pen amaute a sim dingin ka hanthawn hi. Amau’ thalte in tangvalte that ding hi. Amaute in gil sung pana piang naungekte hehpih lo ding uh hi. Amaute’ mit in naupangte khasiat lo ding hi. Khaldea mite’ hoihna, a kiphatsakpih, kumpi gam a minthang bel Babylon khuapi pen Pasian in Sodom le Gomorrah a siatsak lai hun bang ding hi. Khang tawntungin tua lai-ah kuamah teng lo ding a, tua lai-ah kuamah om ngei nawn lo ding hi. Arabia mite kuamah in tua lai-ah a puanbuk lam lo ding a, tuucingte kuamah in tua lai-ah a tuute lumsak lo ding hi. Tua munah gamsate lum ding uh a, tua mun a innte pen a hawk ganhingte tawh kidim ding hi. Tua munah vasa-kalaoh golpite tengin, tua munah keeldawite laam ding uh hi. Mihaute’ inn sungah ngiate, kumpi inn nuam sungah se-alte a ham ding uh hi. Babylon khuapi a siat ding hun hong naita a, a ni sawt nawn lo ding hi. Topa in Jakob hehpihin Israel teelkik ding a, amaute pen a gam uhah koihkik ding hi. Khual mite in amaute pawlin Jakob innkuan bel ding uh hi. Israel mite in amaute manin amau’ gamah ciahpih ding uh a, Topa’ gam sungah amaute pen sila numei sila pasal dingin nei ding uh hi. Amaute a man ngei mite pen tu-in amaute in lehmat ding uh a, amaute a nengniam ngei mite tungah tu-in ukna nei ding uh hi. A haksa nasep hong kisepsakna, gimna le lungkhamna panin Topa in note tungah tawldamna hong piak ciangin, Babylon kumpipa tungah hih zahkona kam na zang ding uh a, “Kumpi gilo pa pukta a, amah in kuamah nengniamzo nawn lo ding! Leitung khempeuh tawlnga-in gamdai takin omta uh a, amaute inla sa-in kiko uh hi. Taksing kungte na tungah lungdamin, Lebanon mual taamtak singkungte in, ‘Nang hong kiniam koih khit a kipanin kote a phuk dingin kuamah hong pai nawn kei,’ ci uh hi. “Nang na paisuk ciangin a hong dawntuah dingin Leinuai-a misite kihanthawn a, nangmah a hong hopih dingin leitungah a lian ngei misi uliante kipusuak sak hi. A minamte’ kumpite khempeuh amau’ kumpi tokhom panin hong ding uh hi. Amaute in nang hong hopihin, ‘Nang zong kote mah bangin na thahat kei hi. Kote mah na bangta hi,’ hong ci ding uh hi. Nangma harp lasakna awte, nangma liatna khempeuh Leinuai-ah kipaipih suk hi. Thante pen nangma delhphah hi a, thante pen nangma silh ahi hi. “Nang Khuavak’ ta, Zingsol, Babylon kumpipa aw, vantung panin nang bangci kiat na hi hiam? Minamte a niam koihpa ahi nangmah leilak dongah hong bangci kiphukpai ahi hiam? Nang in na lungsim sungah, ‘Vantungah ka kahto ding hi. A sangna mun, Pasian’ aksite’ tung pekah ka kumpi tokhom ka koih ding a, leilu lam peka kikhopna mualtungah ka tu ding hi. Meiite’ tung pekah ka kahto ding a, Sang Pen pa bangin ka kibawl ding hi,’ na ci hi. Ahih hangin nang pen Leinuai thuk penna Leihawm sungah hong kikoih suk ding hi. “Nangmah hong mu mite in nang hong en gega-in, nangma thu lungngai dedu ding uh a, ‘Hih mipa pen leitung a lingsak pa, kumpi gamte a lokgawp pa, leitung pen sehnel gam suaksakin, khuapite a susiapa, thong sungah a kikhum mite inn-ah a ciahsak lopa hih pa hi lo ahi hiam?’ hong ci ding uh hi. “Minam dangte’ kumpite khempeuh amau hankhuk sung ciat uhah a minthangin lum uh hi. Ahih hangin nang pen namsau tawh a kithat misi a uihte, Suanghawmpi sunga a paisukte, khe tawh a kisikcip si luanghawmte bangin, na hankhuk pualamah hong kilawnkhia hi. Nangmah in na gam susia-in, nangma mihingte that khin na hih manin, nang pen amaute tawh hong kivui khawm lo ding hi. Siatna a bawlpa’ suanlekhakte’ min kilo ngei nawn kei ta hen! Amaute khangto loin leitung a neih loh nading le leitung maitang teng khuapite tawh a kidimsak loh nadingin amau’ pate’ mawhna hangin a tate’ kithahna ding piang ta hen,” na ci ding uh hi. Vanglian Topa in, “Amaute’ langkhatah ka pang ding a, Babylon min le a omlai mite’ tate le suanlekhakte ka susia ding hi, Topa in ci hi. Saphulipte’ om nadingin tua khuapi bawlin, bualtui ka suaksak ding a, siatna munphiah tawh ka phiatkhia siang ding hi,” Vanglian Topa in ci hi. Vanglian Topa kiciam khin a, “Ka geelsa bangin piang ding a, ka ngimnasa bangin kip ding hi. Keimah in ka gam sungah Assiria mite ka susia ding a, ka mual tungah ka sikcip ding hi. Ka mite’ tung panin Assiria-te’ hakkol amaute’ liangko panin Assiria-te’ vangik kiakhia ding hi,” a ci hi. Hih ngimna pen leitung buppi a dingin a kingim ahi hi. Hih ka khut pen minam khempeuh gimpiak nadingin a kizan ahi hi. Vanglian Topa in ngim khin ahih manin kua in phiatzo ding ahi hiam? Ama khut kizan khin ahih manin kua in kaiton kikzo ding ahi hiam? Kumpi Ahaz a sih kumin thu hong tung a, “Filistia mi khempeuh aw, note hong kisatna ciangkhut a kitan manin lungdam kei un. Bang hang hiam cih leh singbul panin a sel a om bangin, gulpi a sih khit ciangin a siahuaizaw gul gunei hong om ding a, tuate pen a leng thei gulpi hong hi ding uh hi. Mizawngte in keima gankhahna sungah an ne ding uh a, a cimawhte lungnuam takin lum hithiat ding uh hi. Ahih hangin no Filistia mite, kialpi tawh kong that ding a, a suaktakha a omlaite keimah in ka that ding hi. “Filistia khuapi kongpite aw, nakpitakin kap un; khuapite aw, kiko un. Filistia mi khempeuh aw, lau-in ling un! Bang hang hiam cih leh leilu lam panin galkap honte’ hong paina leivui khu hong kitung a, tua galkapte a meidawi khat beek om lo hi,” hong ci hi. Filistia mite in a hong sawl kamtaite mi khatpeuh in bangci dawn ding ahi hiam? “ Topa in Zion kipsak khin a, gimna a thuak ama mite in tua sungah bukna mu uh hi,” ci-in a dawng ding uh hi. Moab gam tawh kisai thu: Zan khat thu-in Ar khua kisiasak ahih manin Moab gam a bei hi. Zan khat thu-in Kir khua kisiasak ahih manin Moab gam a beita ahi hi. A sangna munte-ah a kap dingin Dibon khuamite paito uh hi. Nebo le Medeba khuate’ hangin Moab mite nakpitakin kap uh hi. Dahna limin lu khempeuh kimettol a, khamul khempeuh zong kimetmai hi. Kongzing lakah amaute in puanhampi silh uh hi. Innkhumzang le kongzing lampi kituahnate-ah mi khempeuh nakpi-in kapin khitui tawh a kawt uh hi. Heshbon khua le Elealeh khua kiko uh a, amau’ kahna awging Jahaz khua dongah kiza hi. Tua ahih ciangin Moab mi galhiam tawite lau-in nakpitakin kiko uh a, amaute a ling uh hi. Moab gam adingin ka lungsim kiko hi. A galtai ama mite Zoar khua le Eglathshelishiah khuate-ah a tai uh hi. Bang hang hiam cih leh Luhith lampi-ah amaute a kapsa-in paito uh hi. Horonaim khua zuatna lampi-ah amaute in siatna a thuakna uh hangin nakpi-in kiko uh hi. Nimrim luite kang hi. Lopa keu-in a selthak om lo a, lopa hing om nawn lo hi. Tua ahih ciangin amaute in a ngahsa uh le a kholsa uh na tampite pua-in Gialhek Lui-ah a paipih uh hi. Bang hang hiam cih leh Moab gam kiim khempeuhah kahna aw a ging hi. Kahna in Eglaim khua ban a, kahna in Beerelim khua zong a ban hi. Bang hang hiam cih leh Dibon luituite sisan tawh kidim hi. Ahi zongin Dibon khua in a thuak ding a nasiazaw omlai a, Moab gam panin a suakta mi le gam sungah a omlai mite khempeuh kithat gawp ding hi. Moab mite in Jerusalem-a om gam ukpa tungah sehnel gam Sela khua panin tuunote a puak uh hi. A bu a kipaih khiatsak ciangin a cih nading thei loin a leng kawikawi vasate bangin Arnon guntui ngahmunah Moab mite om uh hi. Amaute in Judah mite kiangah, “Kote tungah thuhoih hong lak unla, thutangin hong gamta un. Sunkim laitak a singliim bangin kote hong liah un. A kihawlkhia kote hong seel unla, galtai kote hong heek kei un. A kihawlkhia ko Moab mite note lakah hong tengsak unla, kote hong susiate’ kiang panin kote’ belh hong hi un. A nengniam pa om nawn loin siatna hun beita a, a khe tawh a sik mipa gam sung panin a manthan ciangin, itna kip tawh kumpi tokhom khat kiphut ding a, thuman sep ding a manlang, thutang zongin thu a khen mipa pen David’ buk sunga om tua tokhom tungah thuman tawh tu ding hi,” a ci uh hi. Tua ciangin Judah mite in, “Moab’ kiphatsakna thu i za khinta hi. Amah kiphasak mahmah hi. A kiliatsakna, a kiphatsakna, a kihihsakna, ama kisialhnate khempeuh a mawkna ahi hi,” a ci uh hi. Tua ahih ciangin a thuakna uh hangin Moab mite kap hen la, mi khempeuh zong Moab mite’ hangin kap ta uh hen. Nakpi takin gimna a thuak laitakun Kirhareseth khua-ah a anlim nekte uh a phawkkhak uh ciangin khasia-in a kap uh hi. Bang hang hiam cih leh a hiang zaai-in tuipi kantan a, Jazer khua banin sehnel gam dongah a zaam ama hiangte, minam dangte’ tote in sattan ahih manin Heshbon lolaite le Sibmah leengguite vul ta uh hi. Tua ahih ciangin Jazer khua mite a kah bangin Sibmah leengguite’ hangin kei ka kap hi. Heshbon le Elealeh khuamite aw, ka khitui tawh note kong kawtsak hi. Bang hang hiam cih leh galkidona in note’ singgah le ante hong banzo hi. An tampi a pian’ ngeina lolai-ah lungdamna le nuamna om nawn lo hi. Leenggui lote-ah lasakna om lo a, lungdam a kikona om nawn lo hi. Leenggah cilna-ah kuamah in leengtui suk nawn lo a, leenggah lawh cianga kikona aw kidaisak ta hi. Tua ahih ciangin Moab gam hangin laiza lasakna bangin ka lungsim kisat gaihgaih a, Kirhareseth khuapi hangin kei mahmah zong ka kisat gaihgaih hi. Moab amahmah hong kilaakin, a sangna munah lungkhamin hong pai a, ama siangtho munah thu a nget ciangin bangmah ngah lo ding hi. Hih bang thu pen Topa in a beisa hun lai-in Moab tawh kisai-in a gensa thu ahi hi. Ahih hangin tu-in Topa in, “Nasem dingin a kicial kum hunte sung bangin, kum thum sungin, ama mihon tampite om taseleh Moab’ minthanna in simmawhna thuak ding a, a suakta lai mite pen tawm mahmahin, thaneem ding uh hi,” a ci hi. Damaskas tawh kisai thu hih bangin gen hi: En un, Damaskas pen khuapi hi nawn loin ninbulomtang suak ding hi. Ama khuapite kinusiacip paisuak ding hi. Tuuhonte’ omna mun suak ding a, tua tuuhonte lum hithiatin bangmah in lausak lo ding hi. Efraim gam panin kulhpi bei-in, Damaskas khua panin kumpi gam mangthang ding hi. Syria mi a suakta laite pen Israel mite mah bangin mindai ding uh hi, Vanglian Topa in ci hi. Tua ni ciangin Jakob’ liatna bei ding a, ama hauhna khempeuh mangthang ding hi. An a la mi in ankung ding laite kaikhawmin ante a kilak khit ciangin leitang a hawm guakin a om tawh kibang ding a, mi khat in Refaim Kuam sungah ansang a kaihkhop khit ciangin lolai a hawm guakin a om tawh zong kibang ding hi. Oliv kung a kisin’ khit ciangin a hiang sangpen dawnah pum nih pum thum singkung hiang dawnah pum li pum nga a omlai tawh kibang lel ding hi, Israel-te’ Topa Pasian in ci hi. Tua ni ciangin mite in amaute a Bawlpa pi ngaihsut ding uh a, amaute’ mit in Israel-te’ Siangtho Pa en ding uh hi. Amaute in amau khut tawh a bawlsa uh biakna taute don lo ding uh a, amau’ bawlsa Asherah milimte hitaleh paknamtui halna biakna taute hitaleh muanin nei nawn lo ding uh hi. Tua ni ciangin amau’ khuapi muanhuaite pen Hiv mite le Amor mite in Israel mite’ hangin a nusiat uh munte tawh kibang ding a, gamkhing a suak ding hi. Nomau hong honkhia Pasian note in mangngilhin, nomau’ belh Suangpi phawk lo na hih manun note in biakna huan bawlin kung hoihte suan a, kung namdangte tawh pehin, tuate na suan ni mahun thakhatin khang a, na tuh ni uh a zing ciang mahin a hong pak hangin note in a gah na lokha kei ding uh hi. Gimna le lungkhamna hong tun ni-in tuate maimang ding hi. Ah, mi tampite’ kikona, tuipi ging bang! Ah, minamte’ otna, tui lianpi ging bang! Tui lianpi a ging bangin minamte awng uh hi. Ahih hangin amah in amaute tai ding a, gamlapi pekah amaute taikhia ding uh hi. Mualtung a huih mai-ah ansi leeng bang leh huihpi mai-a pingpei bangin leengkhia mang ding uh hi. En un, nitakin hong lausak a, zingsang ma-in amaute beita! Hih bang thute pen eite hong susia-in eite a hong luhgawpte in a thuak ding uh ahi hi. Leitung a teng mi khempeuh, leitung a om mi khempeuh aw, mualte tungah lim khat hong kilah ciangin en un! Peengkul hong kimut ciangin ngai un! Bang hang hiam cih leh Topa in kei tungah, “Nitaang sunga nisa silsel, anlak nisat hun sunga meiizun bangin, ka omna panin daitakin ka en ding hi,” hong ci hi. Bang hang hiam cih leh leenggah lawh hun ma deuh, leenggui a pak khit, leenggah a puamcin laitakin, amah in singhiang heuhna temkawi tawh a selte atkhia ding a, a zaam zeizai a hiangte heuhkhia ding hi. Tuate khempeuh mualtung a om vasate’ nek ding le leitung a ganhingte’ nek dingin kinusia ding hi. Khuakhal ciangin vasate in ne ding a, phalbi ciangin leitung a ganhingte in ne ding uh hi. Tua hun ciangin, amau’ gam gunpi in a phelkhap, a vanglian a gualzo minam, a nai a gamla-ah a kikihta mi, a tun sang mi, a cineel mite kiang panin Vanglian Topa ’ min omna Zion mual, Vanglian Topa ’ tungah letsong hong kipuak ding hi. Egypt tawh kisai thu hih bangin gen hi: A manlang mahmah meii tungah Topa tuangin Egypt gamah a pai hi. Ama mai-ah Egypt gam milimte lau-in ling ding uh a, Egypt mite’ hanna beita ding hi. Egypt mite amau le amau ka kitawngsak ding hi. Mi kim in ama vengte ciat do ding a, khua khatlekhat kido-in, mi khatlekhat kumpi za kituh ding hi. Egypt mite’ lungsim hawmsuak ding a, amau’ geelnate ka siasak ding hi. Amaute in milimte, vankah theite le aisan theite tungah thu dong ding uh hi. A thuakhak topa’ khut sungah Egypt mite ka pia ding a, a kihtakhuai mahmah a gilo kumpipa in amaute uk ding hi, Topa, Vanglian Topa in ci hi. Nail guntuite keu ding a, guntui kangcipin keu ding hi. Lei zui-a tui kilate uihin, Egypt gam a om Nail gun hiangte kiamin keucip ding a, pumpeeng kung le phai kungte muat ding hi. Nail gun gei, Nail gun kiang kolh ding a, Nail gun kiangah a kituh khempeuh keucipin huih in leenkhia-in om nawn lo ding hi. Nail gun sungah ngasiahna sikkawi a khia ngei, ngasa bengte thumin tau ding uh a, tui tungah ngen a pai ngei mite thaneem ding uh hi. Anthul khau ciingin na a semte le patpuan a gante lungkham ding uh hi. Gam sung makaite kisusiacip ding a, a kicial nasemte dah ding uh hi. Zoan uliante hai cihtakin hai uh a, Faro’ mipil thu lamlakte in thu haihuai gen uh hi. Nang in Faro’ tungah, “Mipil pa’ tapa ka hi hi; tanglai kumpite’ tapa ka hi hi,” bangci-in ci thei ding na hi hiam? Tua ahih kei leh Egypt kumpipa Faro aw, na mipilte koi-ah om ahi uh hiam? Vanglian Topa in Egypt gam gimpiak ding a ngimna thu, na mipilte in nangma tungah hong genthei kha ding hi. Zoan uliante mihai suak khin uh a, Memfis uliante zong hai khin uh hi. Minamte a makai dinga kineite in a mite uh lam khialhpih khin hi. Topa in amaute’ lungsim kitukalhsak khinzo hi. Zukham pa ama luak lakah a puk bangin Egypt gam mite’ hihna khempeuh khialin hoimang khin hi. A hau a zawng, a lian a neu, mi khat beek in Egypt a dingin a hihsak theih ding bangmah om lo hi. Tua ni ciangin Egypt mite, numei bang ding uh a, Vanglian Topa in amaute a khut a sinsanna hangin lau-in ling ding uh hi. Judah gam pen Egypt mite’ kihtak hong suak ding hi. Vanglian Topa in amaute gimpiak ding a ngimna hangin, hih thu a kigenna mi khempeuh lau ding uh hi. Tua ni ciangin Egypt gam sungah khuapi nga in Kanaan mite’ kampau zangin Vanglian Topa ’ tungah thuman ding thu ciam ding uh hi. Hih khuapi khat pen, “Ni Khuapi,” kici ding hi. Tua ni ciangin Egypt gamah Topa a’ ding biakna tau khat, a gamgi-ah Topa a’ ding khuapi khat om ding hi. Tua pen Vanglian Topa a dingin Egypt gam sungah lim le teci hi ding hi. A nengniam mite’ bawlsiatna hangin Topa tungah amaute a kiko ciangin, amah in amaute kiangah honpa khat sawl ding a, amaute hu-in khahkhia ding hi. Topa in Egypt mite tungah amahmah kitheisak ding hi. Tua ni ciangin Egypt mite in Topa thei-in biakpiakna le meihal biakna tawh bia ding uh a, amaute in Topa ’ tungah thuciamna bawlin, tua thuciamnate sem ding uh hi. Topa in Egypt mite sat ding a, ahi zongin damsakkik ding hi. Topa ’ lamah amaute kihei kik ding uh a, amah in amaute’ thumna donin amaute a damsak ding hi. Tua ciangin Egypt gam panin Assiria gamah lam lianpi khat pai-in, Assiria mite Egypt gamah hong pai ding a, Egypt mite Assiria gam sungah pai-in, Egypt mite in Assiria mite tawh biakhawm ding uh hi. Tua ni ciangin Israel, Egypt, le Assiria, hih thumte pen leitung khempeuh a dingin thupha hi ding uh a, Vanglian Topa in, “Ka mihingte ahi Egypt, ka khut tawh ka bawlsa ahi Assiria, le keima luah ahi Israel mite in thupha ngah ta hen,” ci-in thupha a piakte hi ding uh hi. Assiria kumpipa Sargon in a sawl galkapmang lianpen pa, Filistia khuapi Ashdod-ah pai-in, tua khua va sim hi. Tua hun ma kum thum laitakin Topa in Amoz’ tapa Isaiah tungtawnin thu genin, “Na puanhampi suah inla, na khe panin na khedapte suah in,” a ci hi. Amah zong tua mah bangin gamta-in, tangguak le kheguak tawh lam a pai hi. Ashdod khua a kilak khit ciangin Topa in, “Egypt le Ethiopia langkhatah lim le siahil dingin ka nasempa Isaiah tangguak le kheguak tawh kum thum sung lam a pai mah bangin, Assiria kumpipa in, Egypt gam mite’ maizumna ahi, a moi a hamin, tangguak kheguakin, tawbo dawksa-in, Egypt mite galin manin, Ethiopia mite salin manin paikhiatpih ding hi. Tua ciangin amau’ lametna Ethiopia le amau’ kisialhpih Egypt’ hangin amaute lungkia-in a cih nading uh thei lo ding uh hi. Tua ni ciangin hih tuipi gei-a teng mite in, ‘En un, eite’ lametna, Assiria kumpipa’ kiang panin eite hong honkhia dingin i belh mite’ tungah hih bang piang khinta hi. Eite bangci suahtak ding ihi hiam?’ ci ding uh hi,” a ci hi. Babylon gam tawh kisai thu hih bangin gen hi: Leitaw lam panin pingpei hong kipat mah bangin, a lauhuai gam panin siatna hong pai hi. A kihtakhuai maangmuhna khat kei tungah hong kigen hi. A sutzo mipa in sut a, a susiazo mipa in susia hi. Elam galkapte aw, kuanto un. Media galkapte aw, umcih un. Babylon’ piansak khuisatnate khempeuh Pasian in beisak ta hi. Tua ahih ciangin ka kawng na a, nausuak numei in na a sak bangin na ka sa hi. Khua a za thei lo zah dongin a kuncipin ka om a, khua a mu thei lo zah dongin lungkia-in ka om hi. Ka lung vai a, launa in hong sidaangsak hi. Keima lunggulh zan khuamial pen keima linna a suak hi. Amaute in sabuai phahin, sualpuante phah uh a, an ne-in tui dawn uh hi. Uliante aw, tho un; lum, sathau nuh un! Bang hang hiam cih leh Topa in kei tungah: “Pai in; galvil khat koih inla, ama muh bangbang gensak in. Amah in a kopkopin sakol tung tuang mite, la tunga a tuangte, kalaoh tunga a tuangte a muh ciangin limtak, phatakin encik hen,” hong ci hi. Tua ciangin a mu pa kiko a, “Topa aw, tausang tungah sun tawntung ka ding a, ka vilna munah zan khuavak ka om hi. En in, sakol tung tuangte a kopkopin hong pai!” a ci hi. Adang khat in, “Babylon cim hi, cim hi. A milim pasian-te khempeuh leilak dongah amah in suksiatsak hi,” ci-in a dawng hi. A kicilsa, a kiseepsa keima mite aw, Israel-te’ Pasian, Vanglian Topa ’ tung panin ka zaksa thu teng note tungah ka hong gen hi. Edom gam tawh kisai thu hih bangin gen hi: Seir mual tung panin khat in kei hong sam a, “Galvil pa aw, tuzan bangci hiam? Galvil pa aw, tuzan bangci hiam?” hong ci hi. Galvil pa keimah in, “Zing ni hong suak a, zan khua zong hong mial hi. Thukan nuam na hih leh hong paikik inla hong kan in,” ka ci hi. Arabia gam tawh kisai thu hih bangin gen hi: Dedan mi khualzin honte aw, Arabia gamlakah na giak ding uh hi. Tema gam a teng mite aw, a dangtakte tui puak unla, galtaite an tawh dawn un. Bang hang hiam cih leh amaute, namsau, a kidoksa namsau, a kikeek thal le gal in a phutna panin a hong tai uh ahi hi. Bang hang hiam cih leh Topa in keima tungah, “Thacial kum hunte mah bangin kum khat sungin Kedar mite’ minthanna khempeuh bei ding hi. Kedar mi thaltawi siam a omlaite tawm ding hi. Bang hang hiam cih leh Topa, Israel Pasian in hih thu gen khinzo hi,” hong ci hi. Note hong uk mite tai uh a, thal zat kul loin amaute kiman hi. Gamlapi-ah na tai uh hangin hong kimu note khempeuh hong kiman hi. Tua ahih ciangin keimah in, “Kei hong en kei unla, khitui tampi luangin hong kapkap sak un. Ka mi tampi a sihna hangin keimah hehnep ding hong hanciam kei un,” ka ci hi. Bang hang hiam cih leh Vanglian Topa Pasian in Maangmuhna Kuam sungah buaina le tuatcil gawpna, kitawhzauna, kulhte suksiat gawpna le mualte tungah kikona hong tungsak hi. Sakol leengte le sakol tung tuangte tawh Elam galkapte in thallawng pua uh a, Kir galkapte in a lumte uh a baihsa-in nei uh hi. Nomau’ teel Judah kuamte sakol leeng tawh kidim a, sakol tung tuangte in Jerusalem kulhkongpite-ah a pang uh hi. Judah a kihutna teng khempeuh kicim khinta hi. Tua ni ciangin Tulak Inn sunga kikoih galhiamte na suang ding a, David khuapi mun tampi tak a siatna mu-in, bual nuainung tuite na cingkik a, nangmah in Jerusalem innte a phazah simin, kulhpi siate puahna dingin innte na phel hi. Nangmah in, bual lui pana tuite khol nadingin kulhpi nih kikalah tuibempi khat na bawl hi. Ahih hangin nangmah in, tua na a na bawlpa phawk loin, sawtpekin a na geel pa na don kei hi. Tua ni ciangin Vanglian Topa Pasian in kahna le thumna, sam mettolna le puanhampi silhna a zang dingin thu hong pia hi. Ahih hangin note in lungdamna le kipahna, bawngtalte le tuute gawhna, sa nekna le leenggahzu nekna na nei zawsop uh a, “Zing ciangin si ding ihih ciangin nene-in dawndawn ni,” na ci zawsop uh hi. Vanglian Topa in keima tungah thu hong gen a, “Na sih matengun hih mawhna hong kimaisak het lo ding hi,” Vanglian Topa Pasian in hong ci hi. Tua ahih ciangin Vanglian Topa Pasian in, “Hong pai in. Innsung na teng a uk, neihsa kem pa Shebna kiangah pai inla ama tungah hih bangin gen in: Hih lai-ah nangma a’ ding hankhuk a to, a sangna munah hankhuk a bawl, na omna ding suang a khuak mipa aw, nang in hih lai-ah bang hih a, vui ding kua nei na hi hiam? En in, nang mi that pa aw, Topa in nang hong lawnkhia gawp ding hi. Amah in nakpitakin nang hong lenin, hong pingpei ding a, lei tanzau munah bawlung bangin hong lawn ding hi. Na topa’ inn sunga dingin maizumna ahi nang pen tua munah si-in, na kisaktheihpih na sakol leengte lakah na tuk ding hi. Na nasepna phual panin nang kong nawtkhia ding a, na omna panin nang hong kilawnkhia suk ding hi. “Tua ni ciangin Hikiah’ tapa ahi ka nasempa Eliakim ka sam ding a, nangma puantualpi amah silhsakin, nangma kawnggak tawh amah ka gak ding a, nangma ukna ama tungah ka pia ding hi. Amah pen Jerusalem khua-a teng mite le Judah mite tungah pa hi ding hi. David’ suanlekhakte’ khutnuai-ah aana neihna tawhtang, ama tungah ka pia ding hi. Amah in hongin, kuamah in khak zo lo ding hi. Amah in khakin, kuamah in hong zo lo ding hi. Amah pen a kician mun khatah vankhaina bangin ka khenkip ding a, ama beh sungah pahtawi ngahna phungpi a suak ding hi. “Ahi zongin a beh a phung, a suan a khakte khempeuh ama a dingin van gikpi hi ding a, umlebeel, kuanglekeute, hai a kipan thawl dongin van khaina-ah a kikhai bangin ama tungah kibom ding uh hi. Tua ni ciangin mun hoihna a a kikhen vankhai in lel ding hi. Topa in gen khin ahih ciangin, amah pen kitanin kia ding a, ama tunga vangik kikhai teng kisia ding hi,” Vanglian Topa in hong ci hi. Taia khua tawh kisai thu hih bangin gen hi: Tarshish teembaw hawlte aw, Taia khua kisia a, inn le khawlmunte om nawn lo ahih manin kap un! Saipras gam panin amaute in hih thu hong za uh hi. Tuipi gei-a teng mite aw, thumin tau un. Sidon sumbukte aw, na sawltakte un tuipi kantanin tui lianpite tungah om uh hi. Egypt gam a piang ante lei-in na zuak uh a, minam khempeuh tawh sum bawlin na kizom uh hi. Sidon aw, maizum in; bang hang hiam cih leh tuipi in thu gen khin hi. Tua tuipi muanhuai in, “Keimah in naupaii-in na ka sa ngei kei a, nau ka nei ngei kei hi. Ta numei ka khoi ngei kei a, ta pasal zong ka khansuah ngei kei hi,” ci hi. Egypt gamah hih thu a kizak ciangin, Taia tawh kisai thu hangin amaute in na sa ding uh hi. Tuipi gei-a teng mite aw, Tarshish khua-ah tai-in kap un! Tanglai pekin a piang, gamlapi pek panin a kiphut hih khuapi nomau’ lungdampih khuapi mah ahi hiam? Kumpi khuapi ahi, ama sumbukte ulian ahi, ama sumbawlte leitungah a kipahtawite ahi, Taia khuapi hih bang a pianna ding kua’ vaihawm ahi hiam? A Vanglian Topa ’ vaihawm ahi hi. Miliante’ kiphatsaknate a beisakna ding le a kipahtawi uliante a niamkhiat nadingin a bawl ahi hi. Tarshish mite aw, tu-in kuankhia-in lo kho un. Na sumbawlna teng uh maimang khinta hi. Topa in tuipi tungah a khut zan a, kumpi gamte lumlet gawp hi. Sumbawlna phualpite a kisuksiatna ding Topa in thu piazo hi. Amah in, “Sidon khuapi aw, na lungdamna teng bei khinta hi. Na mite in nenniamna thuak uh a, Saipras tuikulh-ah a va tai uh hangin, tua lai nangawnah lungnopna hun nei lo ding uh hi,” ci hi. Taia khuapi, gamsate’ phualpi a suaksakte pen Assiria mite hi lo a, Babylon mite ahi hi. Babylon mite in khuapi luhna ding panmun bawl uh a, Taia khuapi kulhte susia-in, khuapi sung khempeuh a sia a suaksak uh hi. Tarshish teembaw hawlte aw, na muan uh khuapi kisia ta ahih manin thumin kap un. Tua a siat hun a kipanin kumpi khat nuntak hunsung tan ahi, kum sawmsagih sung Taia khuapi kimangngilh ding hi. Kum sawmsagih a cin ciangin, paktat numei la sunga mah bangin Taia khuapi tungah piang ding hi. Tua la sungah, “Kuama phawk loh numei paktat aw, harp lasakna khat la inla, khuapi kimkotah pai in! Nangmah hong kiphawk theih nadingin la ngaih phuak inla, la tampi sa in,” ci hi. Kum sawmsagih a cin ciangin Taia khuapi-ah Topa hawh ding a, Taia khuapi in ama sep ngei sem kikin, leitung kumpi gam khempeuh tawh kizomin sumbawlna sem ding hi. Ama sumbuk vante le ama sepna panin a ngah nate pen Topa ’ tungah kipia ding hi. Ahih hangin tuate kikholcip mawk loin, Topa a bia mite’ an ding le puan hoihnono leina-in kizang ding hi. En un, Topa in leitung hawmsuak sakin gamkhing suaksak ding a, amah in lei maitang huiheek gawpin, a tunga a teng mite thehthang gawp ding hi. Mi khempeuhte’ thuakna kibang kim ding hi. Siampite le mi mawkmawkte silate le a tote, van leite le van zuakte, sumneite le leibate, a hau a zawng, a thuakna uh kibang ding hi. Leitung kihawmsuak sakin kisiacip ding hi. Bang hang hiam cih leh Topa in hih thu gen khinzo hi. Leitung vulin keugaw a, leitung buppi thaneemin vulgawp hi. Vantung le leitung a nih tuakin vulkhawm hi. Ama tunga a tengte in leitung ninsak uh hi. Bang hang hiam cih leh amaute in thukhamte khialin ngeina kipte palsat uh a, tawntung thuciamna peel uh hi. Tua ahih ciangin Topa in leitung samsiatin susia a, a tunga a teng mite in amau’ mawhna hangun a thuak uh hi. Tua ahih ciangin leitungah a teng mite tawm semsem hi. Leengguite keutumin leenggahzu tawm semsem a, a lungdam mi khempeuh khuisa ta uh hi. Lungdamna khuang gingte dai-in lungdam a gamlumnate om nawn lo a, lungdam a laiza tawh lasaknate a dai ta hi. Zu phungah lungdam a lasakna om nawn lo a, zu khempeuh kisia-in khagawp ta hi. Khuapi hawmsuak pen kisiacip ta a, kuamah a tum theih loh nadingin inn khempeuh kikhakcip hi. Leenggahzu a duh manun kongzingah mite kiko uh hi. Lungdamna khempeuh mangthang khinta a, leitung kipahna teng kibeisak ta hi. Khuapi sungah gamkhinna bek om a, kongpite kisat khamin kisiamang khinta hi. Hih bangmahin leitungah a om mi khempeuh tungah a hong tung ding ahi hi. Oliv kung a kisin’ khit ciang, leenggah kilo khinin a sangte a kikaihkhop khit ciangin a kinusia lo hawmte tawh kibang ding hi. A suaktasun mite in lungdamin la sa ding uh hi. Nitumna lama om mite in Topa a liat mahmahna thu gen ding uh hi. Nisuahna lama om mite in Topa phat ding uh hi. Tuipi dunga teng mite in Topa, Israel-te’ Pasian phat ding uh hi. Leimong a gamla pek pan nangawnin a thuman Israel minamte a kiphatna la i za ding hi. Ahih hangin keimah in, “Ka lungkham hi; ka lungkham hi. Gimna ngah hi ta ing! Bang hang hiam cih leh mi khemte in khemkhem lai-in sia semsem uh a, khemzawh thu mah ciamciam lai uh hi,” ka ci hi. Leitung a a teng mite aw, note a dingin launa, gum le thangzakte om hi. Lauhuaina panin a tai mipa gum sungah kia ding a, gum sung panin a taikhiat ciangin thangzak sungah awk ding hi. Bang hang hiam cih leh van panin guahpi hong bua sukin leitung bulpite kiling ding hi. Leitung khangkhamin kilokgawp ding a, kiphelkham ding hi. Leitung pumpi zukham bangin hoi ding a, huihpi’ mutgawp buk bangin awn ding hi. Ama mawhnate in nengcip gawp ding a, amah pukin thokikzo ngei nawn lo ding hi. Tua ni ciangin Topa in vantung a om mihonpite le leitung kumpite gim pia ding hi. Dum sunga om thongkiate bangin amaute khempeuh kikaikhawm ding hi. Thong sungah amaute kikhaknelh ding a, ni tampi khit ciangin amaute gim kipia pan ding hi. Tua ciangin khapi mial ding a, ni taang nawn lo ding hi. Bang hang hiam cih leh Vanglian Topa in Zion Mual tung le Jerusalem khua sungah uk ding a, ama upate’ mai-ah ama minthanna vang kilangsak ding hi. Topa aw, nang pen keima Pasian na hi hi. Nangmah kong liansak ding a, nangma min ka phat ding hi. Bang hang hiam cih leh a lamdang nate na sem khin a, tanglai peka na geelnate a kip a kho takpi ahi hi. Bang hang hiam cih leh nang in khuapi ninbulomtang na suah a, a muanhuai khuapi a sia na suaksak hi. Mi kiphasakte’ kumpi inn pen khua bang nawn lo a, cikmah hunin kilamkik nawn lo ding hi. Tua ahih ciangin mi thahatte in nangma min hong thangsak ding a, thukhual lo minamte’ khuapite in nang hong zahtak ding uh hi. Bang hang hiam cih leh nang pen mizawngte a dingin munmuanhuai, a cimawh mite a dingin a lungkhamna uhah munmuanhuai, huihpi panin bukna le nisa panin niliim na hi hi. Bang hang hiam cih leh thukhual lo mite’ hihna pen huihpi in kulh a nawkgawp tawh kibang a, mun keuna-ah nisa mahmah tawh kibang hi. Nang in mi kiphasakte’ gamlumna na daisak hi. Meii liim in nisa a votsak bangin thukhual lo mite’ lasakna kitawpsak ta hi. Vanglian Topa in hih mual tungah mi khempeuh a dingin anlim nekna pawi, a ciil mahmah leenggahzu nekna pawi, guhngek tawh a kidim an nekna, a siangtho leenggahzu ciil nekna pawi bawl ding hi. Amah in mi khempeuh’ khuk dahna puan le minam khempeuh’ silh dahna puante, hih mual tungah susia ding hi. Amah in sihna beimangsak ding a, maitang khempeuh panin khitui nul ding hi. Leitung khempeuh panin ama mite a kizahkona lakhia ding hi. Bang hang hiam cih leh Topa in hih thu gen khinzo hi. Tua ni ciangin, “En un, amah pen eima Pasian ahi hi. Eite a hong hon dingin amah i ngak hi. Amah pen eima Topa ahi hi. Amah i ngak hi. Amah in eite hong honkhia ahih manin lungdamin kipak ni,” kici ding hi. Bang hang hiam cih leh Topa in hih Zion Mual hu ding a, ahi zongin Moab mite ahihleh ninkholna dum sungah buhkungte a kisikcip bangin kisikcip gawp ding hi. Tuipeek pa in tui peek dingin a khutte a van bangin amaute in a khut uh vanvan ding uh a, ahih hangin a khut uh a van simin a kiphatsaknate uh a khut uh tawh bengtumsuk ding uh hi. Amah in Moab mite’ kulh muanhuaite suksiat sakin leilak denna ding a, leivui suakmangkhin ding hi. Tua ni ciangin Judah gam sungah hih la kisa ding hi: Khuapi muanhuai khat i nei a, Topa mahmah in i kulhte le i panmun kipte hong hutsak hi. Upna-ah a kip thuman minamte a lut theih nadingin kulhkongpite hong ta un. Topa aw, nang hong muang a, nangma tungah a lungsim khempeuh a koih mipa lungnopna kicing pia ta in. Topa Pasian in eite khempeuh hong hu tawntung ahih manin Topa muang tawntung un. Bang hang hiam cih leh amah in a kiphasak mite niamkhiat suk hi. Amau’ tenna khuapi muanhuai suksiatsak a, a kulhpite denkhap sakin leivui a suah hi. A zawng a cimawh a kinengniam mite in tu-in tua khua tuancil uh hi. Midik pa’ lampi tamkim a, nangmah in midik pa’ lampi na neelsak hi. Topa aw, nangma deihna kong zui uh a, nang kong ngak uh hi. Nang pen kote’ deih kicinna na hi hi. Ka lungsim khempeuh tawh zanin nang kong deih a, zingsang khuavak ciangin lungsim tak tawh nang kong zong hi. Bang hang hiam cih leh leitung le a mite tungah thu na khen ciangin leitung a a teng mite in thuman i cih bang hiam, cih a phawk ding uh hi. Migilote tungah nangmah na migit hangin a manin gamtat ding theithei tuan lo uh a, lungsim thutang mite’ gam sungah amaute in khialhna bawllai veve uh hi. Amaute in Topa ’ minliatna hong phawk nuam lo uh hi. Topa aw, amaute gim na piak ding lamtak na galte in thei lo uh hi. Amaute maizumna thuaksak inla, amaute a dingin na geelsa gimnate amaute thuaksak in. Na mite na itna thu na galte tungah kilangsak in. Topa aw, kote tungah maavanna hong pia in. Kote’ matut zawhna khempeuh nangmah in na hong sepsakna hang ahi hi. Topa, kote’ Pasian aw, nang ahi lo to dangte in ko tungah hong uk hangin, nangmah bek mah kote’ Topa na hi hi. Amaute si a, hingkik lo ding uh hi. Amaute mangthang ta uh a, omkik nawn lo ding uh hi. Tua bang a piantheih nadingin nangmah in amaute tungah siatna na tungsak a, amaute a kiphawkna khempeuh na beisak hi. Ahih hangin nangmah in ko minam nong khangsak hi. Topa aw, nangmah in ko minam nong khangsak a, gamgi khempeuh na hong keeksak khin hi. Hih thu hangin nangma min a thang hi. Topa aw, ka cihmawh uh ciangin nang kong zong uh a, nangma hong taina pen kote nong gimpiakna ahi hi. Topa aw, nangma hangin kote pen naupaii numei a hun a nai ciangin na sa-in kiheek a, a kap tawh ka kibang uh hi. Kote in naupaii-in ka kiheekheek uh a, huih bek a hingkhia tawh ka kibang uh hi. Kote in ka gam uh a’ ding bangmah ka suakkhiasak kei uh a, leitungah a teng ding mi kuamah ka hingkhia kei uh hi. Nangma mi a sisate hingkik ding uh a, amau’ pumpi thokik ding hi. Han sungah a lum mite aw, tho-in lungdamin la sa un! Bang hang hiam cih leh zing daitui in leitung a nosakkik bangin sawtpi-a a sisa mite Topa in hingkiksak ding hi. Ka mite aw, hong pai-in na innsung uhah tum unla, na kongte uh khak un. Hehna a dam matengin tawlkhat sung bu un. Bang hang hiam cih leh en un, amau’ mawhna hangin leitungah a teng mite gim a pia dingin ama omna panin Topa hong paikhia a, leitung in ama tunga a kithat mite lakkhia ding a, a kithat ama mite sincip nawn lo ding hi. Tua ni ciangin Topa in a sak mahmah, a lian mahmah, a to mahmah namsau tawh, a taikhia gulpi ahi awle, a kikualvial gulpi ahi awle gim pia ding a, amah in tuipi sunga om tua gulpi a that ding hi. Tua ni ciangin, “A deihhuai leenggah lo thu la-in sa un! Keimah, Topa, tua lo a hong pa ka hi a, a hunhunin tui ka buak hi. Khatpeuh in a suksiat loh nadingin sun le zanin ka hong ding hi. Leenggui lo tungah ka heh nawn kei hi. Ling le lingkungte hong om leh keimah kuankhia-in tuate ka haltum ding hi. Tua ahih kei leh keima hutna sungah amaute hong om hen la, amaute in kei tawh kilemna hong bawlin keimah tawh amaute hong kilem ta uh hen,” Topa in ci ding hi. Hong tung ding hunah Jakob in zung kha ding a, Israel palhin dawnkhia ding a, leitung khempeuh a gah tawh kidimsak ding hi. Pasian in Israel-te’ galte a vatgawp bangin Israel-te vatgawp ahi hiam? Tua ahih kei leh amau a thatte a kithah bangin Israel-te kithat ahi hiam? A kithukkim dingin amaute sal suahsakna tawh gim a pia hi. Nisuahna huihpi in a mutkhiat bangin amaute a khinkhia hi. Israel in suang tawh a kibawl biakna tau khempeuh suangkang satvui a batsak ciangin Asherah milimte le paknamtui taute a dinglai om nawn lo hi. Hih thu hangin Jakob’ mawhna kimaisakin a mawhna kilakkhiatsak hi. Bang hang hiam cih leh a muanhuai khuapi pen gamlak bangin amah guakin omin, mi’ tenna mun pen kitaisanin kinusia hi. Tua lai-ah bawngno gamta-in lum a, singhiangte a kheuh hi. A hiangte a keu ciangin kitan hi. Nupite hong pai-in mei-in cih uh hi. Hih mite in khentel theihna nei lo ahih ciangin amaute a bawlpa in amaute hehpih lo ding a, amaute a piangsak pa in amaute tungah maipha lak lo ding hi. Israel mite aw, tua ni ciangin Eufratis gunpi panin Egypt luipi dongin Topa in thu hong khen ding a, note khat khatin hong kikaikhawm ding hi. Tua ni ciangin peengkul lianpi khat kitum ding a, Assiria gam sunga a mangthang mite le Egypt gam sunga a kihawlkhia mite hong pai-in Jerusalem mual siangtho tungah Topa hong bia ding uh hi. Israel Kumpi gam in siatna a thuak ding hita hi. Zu a kham, a gam makaite’ lu tungah a om pak tawh a kibawl Kumpi lukhu bangin a minthanna maimangta hi. A lutang uh paknamtui kinuh napi-in zukhamin tukmangkhin uh hi. En un, a vang a lian, a hat mahmah mi khat Topa in nei hi. A susia huihpi gialpi, tuikhang le a thahat huihpi bangin amah in leilak dengawpna ding hi. Israel zukham makaite in a kiphatsakpih kumpi lukhu pen khenuai-ah kituancil ding hi. Tua a kiphasak zukham makaite’ minthanna pen tuk tun ma-in a om theipal min tawh kibang ding a, mi khat in tua theigah a muh ciangin lo-in a nekpah bangin maimang lel ding hi. Tua ni ciangin Vanglian Topa pen ama mi a omlaite a dingin minthanna kumpi lukhu le hoihna lukhu hi ding hi. Thukhenin a tupa tungah thutang lungsim guan ding a, khuapikulh hong luh galte a notkhia ding mite tungah hanna lungsim guan ding hi. Hih mite zong leenggahzu tawh hoi-in khamtheihzu tawh awn uh hi. Siampite le kamsangte nangawn zukhamin hoi uh hi. Kamsangte in zu kham lua uh ahih manin Pasian’ muhsak maangmuhnate theithei lo uh a, siampite in zong zu kham lua uh ahih manin a thukhen dingte uh khen thei lo uh hi. Bang hang hiam cih leh sabuai tung khempeuh a luak uh tawh kidim a, a nit lohna mun om lo hi. Amaute in kei hong phunsan uh a, “Amah in kua tungah hilh a, kua tungah thugen-a kinei ahi hiam? Angsung panin a kilakhia, nawi tawh a kikhen tung naungekte a hilha kinei ahi hiam? Bang hang hiam cih leh mal khat khit mal khat, gual khat khit gual khat, thu khat khit thu khat, cih bang hilel hi,” hong ci uh hi. A mantakin, note in ka thugen na ngaih kei uhleh Topa in a pau na theih loh uh gamdang mite, note tungah thu hong hilhsak ding hi. Topa in note tungah tawlngakna le lungnopna hong pia napi-in, note in ama thu na ngai kei uh hi. Tua ahih ciangin Topa in note tungah, mal khat khit mal khat, gual khat khit gual khat, thu khat khit thu khat, cih bangin hong hilh ding ahi hi. Tua ciangin na kalsuanna khempeuh uhah na puk ding uh a, note liamin, thangah awkin, salin hong kipaipih ding hi. Tua ahih ciangin Jerusalem khua sungah hih mite a uk, a kiphasak no uliante aw, Topa ’ thu za un! “Eite in sihna tawh thuciamna khat i bawl khin a, Leinuai tawh thukimna khat i neizo hi. A tuumcip ding tuiciin hong tun ciangin eite hong ban lo ding hi; bang hang hiam cih leh zuauthu i bel a, zuauna-ah i bu hi,” na ci uh hi. Tua ahih ciangin Topa Pasian in, “En un, keimah in Zion sungah bulpi ding khat, suang, a kize-etsa suang, a manpha innkiu suang, bulpi muanhuai khat ka koih hi. Tua suang tungah, ‘Hih a um mi in lungkhamna tuaklo ding hi,’ ci-in kigelh hi. Keimah in thutang pen khaukhai bangin ka bawl ding a, thuman pen khaukhai sikbawk bangin ka bawl ding hi. Gial in na zuau buk uh dengkhia ding a, tui in na bukna mun uh susia ding hi,” ci hi. Tua ciangin sihna tawh na thuciamna uh kiphiat ding a, Leinuai tawh na thukimna uh kip lo ding hi. A tuumcip ding tuiciin in a hong nawk ciangin note hong sugawp ding hi. Hong nawk sialin note hong ban ding hi; bang hang hiam cih leh zingsang khat khit zingsang khat, sun le zanin hong nawk tawntung ding hi. Topa ’ tung panin na zak uh thute a banbanin launa lianpi vive hi ding hi. Bang hang hiam cih leh puanbuk sungah khe khuan nadingin lupna tom lua a, silh dingin puanza neu lua hi, a cih tawh na kibang ding uh hi. Bang hang hiam cih leh a lamdang ama bawlte a bawl ding le a lamdang ama nasep a sem dingin Perazim Mual tungah a sep bangin Topa in hong sem ding a, Gibeon kuama a heh bangin amah hong heh ding hi. Tua ahih ciangin tu-in, note hong kikhihna a to mahmahin kibawl kha ding ahih manin thusim loin om kei un. Bang hang hiam cih leh mihonpite’ Topa Pasian ’ tung panin gambuppi-ah siatna ding thukhenna ka za khin hi. Na bil uh hong ngat unla, ka aw hong za un. Ngai unla, ka thugenna hong za un. Lokho pa in khaici tuhna ding a lo kho niloh ahi hiam? Amah in lei kalkhamin git niloh ahi hiam? Amah in lei a zalhtam khit ciangin masala tang vawhin, kummin tang tuh a, mangbuhte a gualgualin tuhin, mangbuhham a omna ding sanah tuh a, mangbuhhamte a nawl hui-ah tuh hi lo ahi hiam? Bang hang hiam cih leh amah a manin kihilh a, ama Pasian in amah hilh hi. Masalate buhcilna tawh kicil lo a, kummin tangte tungah buhcilna pei kihual lo hi. Ahih hangin masalate ciangkang tawh kisatkhia a, kumminte molhtum tawh kisat hi. Mi khatpeuh in antang cilvui ahi hiam? Hi lo hi; amah in cil paisuak ngitnget lo hi. A sakol tawh buhcilna pei a kihualsak ciangin amah in kitamvuisak lo hi. Hih zong Vanglian Topa ’ kiang pan a hong pai thu ahi hi. Amah pen thu lamlahna-ah lamdang mahmah a, pilna-ah lian mahmah hi. Pasian’ biakna tau, Jerusalem khuapi, David in a sat khuapi, a sia ding hita hi. Kumte, a banbanin paipai sak unla, pawite zong a ngeina bangin kot paipai sak un. Ahih hangin keimah in “Pasian biakna tau,” a kici tungah gimna ka tungsak ding hi. Thumna le tauna om ding a, tua khuapi pen biakna halna biakna tau suak ding hi. Na kimkotah hong umcihin tausangpite tawh kong um ding a, nangmah umcih nading dum ka bawl ding hi. Tua ciangin leithuk sung panin nang na pau ding a, a niamna mun leisung panin nangma kammal hong ging ding hi. Nangma aw pen leisung panin sikha’ aw bangin hong ging ding a, na thugenna pen leisung panin hong phun suausuau ding hi. Ahih hangin nangma gal honpite leivuineel leeng bang ding uh a, thukhual lo mihonpite ansi leeng bang ding uh hi. Tua ciangin tomkha sungin thakhat thu-in, Vanglian Topa in vanging, zinling, a ging lianpi, pingpei le huihpi le, a kangtum thei meikuang tawh nang hong hon ding hi. Tua ciangin Pasian biakna tau a do minam honpite khempeuh, tua khuapi le a kulhpi simin a lungkhamsakte khempeuh, zan a mangmat tawh kibangin maimang ding uh hi. A gilkial mipa in a mangin an ne a, a khanlawh ciangin a gil a vah tuan lo, a dangtak mipa in a mangin tui dawn a, a dangtak pha tuan loin a gim mahmahin a khanlawh mah bangin Jerusalem khuapi a do mi khempeuh zong tuaci ding uh hi. Lamdang kisasak unla lamdang a sa hi un! Kimittawsak unla a mittaw hi un! Leenggahzu a dawn lopi-in a zukham hi unla, khamtheihzu a ne lopi-in hoi un! Bang hang hiam cih leh Topa in note’ sungah ihmut nopna lungsim hong guan a, amau’ mit ahi kamsangte mitsi sakin amau’ lutang ahi thu mutheite khuhcip hi. Hih maangmuhnate khempeuh pen note a dingin ahihleh a kimatcip laibu sunga thu om tawh a kibang a suak hi. Mite in lai a sim thei pa khat tungah, “Hih lai sim dih in,” a cih ciangin amah in, “Kimatcip ahih manin ka sim thei kei hi,” ci hi. Tua ciangin amaute in lai a sim thei lopa kiangah, “Hih lai sim dih in,” a cih uh ciangin amah in, “Ka sim thei kei hi,” a ci hi. Tua ciangin Topa in, “Amaute’ lungsim kei tawh kigamla napi-in hih mite in a kam uh tawh kei kiangah hong pai uh a, a muk uh tawh kei hong pahtawi-in, amaute in kei hong kihtakna pen mihingte’ thupiak a zuihna uh ahi lel hi. Tua ahih ciangin en un, hih mite tungah a tumdang le a lamdang ahi a lamdang nate ka bawlkik ding hi. Amau’ mipilte’ pilna kisia ding a, amau’ thu mutheite’ thu muhtel theihna kiseel ding hi,” a ci hi. Topa ’ kiang panin amau’ thuvaihawmna a seelcip, khuamial sungah a gamta, “Kua in hong mu ding hiam? Kua in hong thei ding hiam?” a cite in gimna ngah tahen. Note in na khempeuh a lehlamin na koih uh hi. Beelseek pa pen tungman bangin kingaihsun ding a, a kibawlsa na in a bawlpa tungah, “Amah in kei hong bawl lo hi,” ci ding ahi hiam? A kipiangsak na in a piangsak pa tungah, “Amah in theihna nei kei,” ci ding ahi hiam? Lebanon mual pen singno lo hoih suakin, singno lo hoih pen tulak a suahna ding hun tomno sung bek hi lo ahi hiam? Tua ni ciangin bilngongte in laibu sunga thute za ding a, lungzinna le khuamialna sung panin mittawte’ mit in mu ding uh hi. Mi’ nopnehte in Topa ’ sungah lungdamna thak ngah ding uh a, Israel-te’ Siangtho Pa’ sungah mizawngte lungdam ding uh hi. Tua ahih ciangin Abraham a honkhia Topa in Jakob innkuan tawh kisai thu a genin-ah: “Jakob maizum nawn lo ding a, a mai khing nawn lo ding hi. Bang hang hiam cih leh keima khut tawh ka bawlsa amau’ tate a muh uh ciangin amaute in keima min hong phat ding uh hi. Amaute in Jakob’ Siangtho Pa, a siangtho ahihna phawk ding uh a, Israel Pasian zahtakin kihta ding uh hi. Lungzingin a khial mite in thu theitel ta ding uh a, a phunphun mite in thuhilhna ngai ta ding uh hi,” a ci hi. Tua ahih ciangin Faro’ hutna pen na maizumna uh hi ding a, Egypt liahna sungah na bukna uh nomau’ zahhuaina hi ding hi. Bang hang hiam cih leh amau’ uliante Zoan khua-ah va tung uh a, amau’ tangmite in Hanes khua a va phak uh hangin, amaute tungah phattuamna a pia thei lo, maizumna le mindaina cih loh buang huhna le phattuamna bangmah a pia thei lo Egypt mite’ hangin Judah mi khempeuh in maizumna ngah ding uh hi,” a ci hi. Negeb gam a om ganhingte tawh kisai thu hih bangin gen hi: Amaute in humpinelkai nu le humpinelkai pa, gul gunei le a leeng thei gulpi a omna, lungkhamna le gimna gam nawkin, amau’ hauhnate la nungzangah amau’ sumte kalaoh tungah suanin, amaute tungah phattuamna bangmah a pia thei lo mite tungah a puak uh hi. Bang hang hiam cih leh Egypt’ huhna bangmah man loin a hawmpi ahi hi. Tua ahih manin, “Taang loin a tu hithiat Egypt,” ci-in min ka phuah hi. Tu-in pai inla, hong tung lai ding hunte-ah teci ahi ngitnget dingin amaute’ mai-ah suangpek tungah gelh inla, laibu khat sungah at in. Bang hang hiam cih leh amaute pen a lehdo mite, a zuauthei tapate, Topa ’ thuhilhna a ngai nuam lo mite ahi uh hi. Amaute in thu mutheite tungah, “Mu kei un,” ci uh a, kamsangte tungah, “Kote’ tungah thuman hong gen kei un. Kote tungah thuzol bek hong gen unla, thutak ahi lote hong gen un. Lampi nusia-in, lamzin panin pial unla, Israel-te’ Siangtho Pa’ thu hong zasak kei un,” a ci uh hi. Tua ahih ciangin Israel-te’ Siangtho Pa in, “Note in hih thu simmawhin, zawhthawhna le khemna suangin, tuate muang na hih manun, hih mawhna pen note a dingin kulh sangpi khat khangkham a, lawtkhia-in a cim dektak, theihkholh lohin a cim vat tawh kibang ding hi. Tua cipna pen iplah ding om nawn loin a kidengkham beelseek pa’ beel themte meikhuka om meilakna ding ahi zongin, tuikhuka om tui dipna ding ahi zongin a om nawn het lo tawh kibang ding hi,” a ci hi. Bang hang hiam cih leh Israel-te’ Siangtho Pa, Topa Pasian in, “Kihei kikna le khawlna bek tawh note in suahtakna na ngah ding uh hi. Daitakin omna le muanna pen nomau’ thahatna hi ding hi,” a ci hi. Ahih hangin note na tuaci kei uh a, “Hilo! Sakol tung tuangin manlang takin i tai ding hi,” ci na hih uh ciangin note na taikhia ding uh hi. “Sakol zaptel tungah i tuang ding hi,” ci na hih uh ciangin note hong delh mite zong zaptel ding hi. Mual sang dawna om dial khuam ahi a, mualtung a limlahna tawh a kibangin ahi zongin, note hong kinusiat dong matengin, mi khat’ tawnna tawh mi tulkhat tai-in, mihing nga’ tawnna tawh note khempeuh na taimang ding uh hi. Tua ahih ciangin note hong hehpih nuamin Topa in hong ngak a, note tungah hehpihna hong lah ding amah kipakta hi. Bang hang hiam cih leh Topa pen a thutang Pasian hi a, amah a muangte khempeuh thupha ngah ahi hi. Jerusalem khuasunga a teng, Zion sunga om mite aw, note na kap nawn kei ding uh hi. Note’ kahna aw hangin Topa in hong hehpih taktak ding a, amah in a zak ciangin note hong dawng ding hi. Topa in note tungah cihmawhna le gimna hong tunsak hangin amahmah in note hong hilh ding a, note in amah na mu ding uh hi. Taklamah na kihei ciang uh ahi a, veilamah na kihei ciang uh ahi zongin, “Hih pen lampi hi, hih tawn un,” cihna aw, na nunglam panun na bil un a za ding hi. Tua ciangin note in ngun tawh a kizut na milimte uh le kham a kiluan, a kisung na milimte uh na ninsak ding uh hi. Nin bangin tuate na thehthang ding uh a, tuate tungah, “Beimang ta un!” na ci ding uh hi. Khaici na tuh nadingun amah in guah hong zusak ding a, lei panin a piang an hoih tampi tak hong pia ding hi. Tua ni ciangin gankhahna, mun zaina-ah na ganhingte un lopa ne ding uh hi. Lo a kho bawngtalte le late in kawbia le tu-ka tawh a kitoksa an al ne ding uh hi. Na galte uh’ tausangte pukin mi tampi a sih ni-in, mual sang le mual neute tung khempeuhah luitui luang ding hi. Tua tham loin, Topa in ama mite’ liamma tuamin ama satna meimate a damsak ni ciangin, khataang pen nitaang bang ding a, nitaang pen ni sagih sunga taangzah bangin a zah sagihin a taang ding hi. En un, Topa ’ vangliatna le a minthanna vang, gamlapi panin kimu thei hi. Meikuang le meikhu in ama hehna hong kilangsak a, ama kampaunate, mei bangin a kuang hi. Na khempeuh a tai tuikhang bangin ama mai-ah huihpi nungsak a, minam dangte nawtin sugawp a, amau’ gitloh vaihawmnate a suksiatsak hi. Ahi zongin no Pasian’ mite in ahihleh biakna pawi a kikham ni zan a bangin la na sa ding uh hi. Israel-te a hu Topa ’ biakinn-ah a pai dingin tamngai aw ginna zui-in a kuankhiate bangin na lungdam ding uh hi. Topa in heh mahmahna le a kangtum thei meikuang sung panin vanging, huihpi, le gialpi tawh, ama liatna minthanna aw kizasakin, ama khut a vik sukna kimusak ding hi. Amah in a ciangkhut tawh a sat ciangin, Assiria mite in Topa ’ aw kihta mahmah ding uh hi. Topa in amaute gim pia-in ciang tawh a satna a gingte tawh kituakin khuang le laiza lasaknate tumin na gingsak ding uh hi. Amah in a khut vikin amaute a do ding hi. Assiria kumpipa a kihalna ding mei phualpi mun, sawtpekin kibawl khinzo hi. Kumpipa a dingin a baihsa-in kikoih a, a mi halna pen lianin kisangsak a, sing a sangpi-in vum venvan hi. Topa in kaat kuang hu sangkhia ding a, tua mei phualpi tawhkuang ding hi. Egypt gamah huhna ngen dingin paisuk a, sakol suanin nei-in leengte a tam manin muang a, sakol tung tuangte a hat mahmah manin muang napi-in Israel-te’ Siangtho Pa a suang lo, Topa thu a dong lote in gimna ngah ta hen! Ahih hangin amah pilin gimna tungsak a, thu a gensate dokkik loin, siatna a bawl mite le mawhna nasep a seppihte gim a pia hi. Egypt mite mihing hi a, Pasian hi lo hi. Amau’ sakolte sa hi a, kha hi lo hi. Topa in a khut a zan ciangin a huhpa pukin, huhna a ngah pa tuk ding a, amaute khempeuh siakhawm ding uh hi. Bang hang hiam cih leh Topa in keima tungah hih bangin hong ci hi: Humpinelkai ahi a, humpinelkai khanglai a hat mahmah in ahi zongin a sa nek ding a ngik ciangin tua humpi a do dingin tuucing honpi khat kikaikhawmin, amaute’ otna hangin lau tuan hetloin, amaute’ gamlumna hangin a sin a dawi tuan loh mah bangin Vanglian Topa zong Zion Mual tungah galdo dingin kuansuk ding hi. A bu a hongin, a kot lamlam vasate bangin Vanglian Topa in Jerusalem dal ding hi. Amah in dalin khahkhia ding a, amah susia loin suaktasak ding hi. Israel mite aw, nakpitakin na do pa uh’ lamah kihei kik un. Bang hang hiam cih leh a kuamah peuh in no a dingin na bawlsa uh, mawhna ahi na ngun milimte uh na paihkhiat hun uh hong tung ding hi. “Assiria pen mihing’ namsau ahi lo, namsau khat tawh puk ding a, mihing’ namsau ahi lo, namsau khat in susia ding hi. Namsau panin tai ding uh a, a tangvalte uh zawhthawh thu tawh nasem dingin kikoih ding hi. Amau’ belh a kumpipa uh a launa hangin tai ding a, buaina hangin a uliante in a dialkhai uh taisan ding uh hi,” ama meikuang Zion-ah a om, ama meikhuk Jerusalem khua-ah a om Topa in ci hi. En un, ni khat ni ciangin thuman takin kumpi khat in hong uk ding a, uliante in thutang tawh hong uk ding uh hi. Amaute pen huihpi panin belhna, guahpi panin bukna bang ding uh hi. Sehnel gam sungah a luang tui bang ding uh a, nisa gam sungah a om suangpi liim bang ding uh hi. Tua ciangin amau’ mit in mi cimawhte’ kisapna mu ding uh a, amau’ bil in mi cimawhte’ thugen ngai ding uh hi. Amaute lungtomin hi phangphang nawn lo ding uh a, deihsakna lungsim tawh a kitel takin thu gen hiathiat ding uh hi. Mihaite pen mi thupi kici nawn lo ding a, mi ginalote pen mi zahtakhuai kici nawn lo ding hi. Bang hang hiam cih leh mihai in haina thu gen a, a hoihin gamtat loh ding, Topa ’ thu a hoih lopi-in gen ding, a gilkialte’ an duhna a phat loh nading le a dangtakte in tui dawn ding a neih theih loh nadingin, ama lungsim in mawhna bawl ding a sawm hi. Mi ginalo’ ginat lohna siahuai mahmah hi. Zuauna kam tawh mizawngte a siasak ding le mi cimawhte’ thu a thuman ciang nangawnin a siasak dingin amah in gitloh nasepna a bawl hi. Ahih hangin mipi lungsim a nei mi in na a hoihte geel a, thuhoih nate-ah a pang hi. Nuamtakin a om hithiat numeite aw, tho unla, ka aw za un. Nomau’ tumtakin a lungkim tanute aw, ka thugenna na ngai un. Nomau’ tumtakin a lungkim numeite aw, kum khat val zek khit ciangin na linglawng ding uh hi. Bang hang hiam cih leh leenggah kum hong sia ding a, singgah lawhna hun hong tung lo ding hi. Nuamtakin a om hithiat numeite aw, ling un. Nomau tumtakin a lungkimte aw, linglawng un. Na puan uh hawkkhia-in na tangguakun om unla na kawng uhah puanhampi teng un. Kumpi innte kinusia-in, mi tampi a omna kumpi khuapi kilawi ding hi. Mual le tausangte zong kisiagawp ding a, late le tuuhonte in gamtatna munin nei ding uh hi. Ahi zongin Pasian in ama kha hong puak ding hi. Leitang siate lei hoih suakkik ding a, lo-a ante hoih mahmahin tulak bang ding hi. Tua ciangin gam sung mun khempeuhah thutang om ding a, thu a manin kisem ding hi. Tua ciangin thumanna hangin nopna om ding a, thumanna hangin daihna le lungmuan tawntungna om ding hi. Ka mihingte pen kilem takin a tenna, lungmuang takin a omna, daitakin a tawlngakna munah om ding uh hi. (Tua ciangin tulak kolhsiang ding a, a khuapi pen cimzan ding hi.) Tui tampi a omna-ah khai tuh a, bawngtal le late a ut utna-ah a tasak note pen mi nuamsa na hi uh hi. Hong kisusia nai lo, mi a susiapa aw, tu-in gimna a ngah ding na hita hi. Kuamah in hong khem nai loh, mi khem pa aw, tu-in gimna a ngah ding na hita hi. Na suksiat nawn loh ciangin nang hong kisusia ding a, na khem nawn loh ciangin nang hong kikhem ding hi. Topa aw, kote hong hehpih in; nang kong muang uh hi. A tawntungin kote hong hu inla, lungkham hunin hong honkhia in. Nangma vanging hangin mite tai uh a, nangma thawhtohna hangin minamte kithehthang hi. Tangngol in na a khop bangin amau van kinusiate kaikhawm a, kauphe honpi bangin van tawmin mite phe zaizai hi. A sangna munah teng ahih manin Topa kipahtawi hi. Amah in thutang le thuman tawh Jerusalem dimsak ding hi. Amah pen nangma hunte a kipna, hotkhiatna a kicinna, pilna le theihna hi ding hi. Topa kihtakna pen ama sumgum hi ding hi. En un, galhangte huhna ngenin kiko uh a, kilemna ding palai semte nakpitakin kap uh hi. Lam lianpite gambulak suak a, kuamah khualzinin pai ngam nawn lo uh hi. Thuciamnate kipeksatin, thukimnasate kipalsat a, khatlekhat kizahtakna om nawn lo hi. Leitang kinusiacipin om mawk hi. Lebanon muala tulak singte vulgawp a, Sharon gam lei hoihpen sehnel gam bang ta hi. Bashan le Karmel muala singtehte pulhmang khinta hi. Topa in minam dangte kiangah, “Tu-in ka gamtang ding a, ka vangliatna ka lak ding hi. Tu-in kei hong kipahtawi ta ding hi. Na geelnate uh a kimanna om lo a, na nasepnate uh a mawkna ahi hi. No le no a kisusia na hi uh hi. Leikang ngah nadingin suangkang a kihal bangin na vui suak ding uh a, meikhuk sunga a kihaltum lingkungte na bang ding uh hi,” a ci hi. Gamlapi-a a om mite aw, ka sepna thu za un. A nai-a a om mite aw, ka vangliatna thei un. Zion-a a om mawhnei mite lau uh a, Pasian’ thu a ngaihsun lo mite lau-in lingcip uh hi. Amaute in, “Pasian’ thukhenna pen a kuang tawntung mei tawh kibang hi. Tua bang meikuang kua in thuakzo ding ahi hiam?” ci uh hi. Thumanin gamta-in thutang na gen uhleh na suakta ding uh hi. Na vangliatna uh mizawngte khemna-in zang kei unla, sumgolh deih kei un. Mi thah ding le siatna gamtat ding a vaihawmte tawh kipawl kei un. Tua hileh na tangtung ding uh a, kulh muanhuai mahmah sungah a om bangin lungnuam takin na om ding uh hi. Annek tuidawn na kitasam kei ding uh hi. Tua ciangin a thupi mahmah kumpipa na mu ding uh a, a zai mahmah a gam zong na en ding uh hi. Nidangin na kihtak uh gamdangmi siahdongte, siahkhawmte, thukan mite, na phawk nawn kei ding uh hi. Na theihtheih loh uh, a kitel lo kampau a zang, na teltheih lohun a pau bualbual, mi kihisakte na mu nawn kei ding uh hi. Pawite i bawlna khuapi Zion en un! Daitakin a kitenna mun, a khetphimte kidokkhia ngei loin a khaute a tat ngei lo, a kikhin thei het lo puanbuk a bang, Jerusalem khuapi, na mu ding uh hi. Tua khua sungah Topa in ama minthanna vang hong langsak ding a, a zai gunte le a zai lui geite-ah i teng ding hi. Tua tuite tungah ei hong do ding gal gunkuang hong kihot nawn lo ding a, gal teembaw zong hong pai nawn lo ding hi. Bang hang hiam cih leh Topa pen eite’ thukhen, Topa pen eite hong ukpa, Topa pen eite’ kumpi ahi hi. Amah in eite hong honkhia ding hi. Gal teembaw khaute kol a, ama omna ding mun sanah gunkuang puan khuam lenkip zo lo a, gunkuang puan kizal thei lo hi. Tua ciangin galte’ neihsate kihawmkeek ding a, khebaite nangawn in van ngah ding uh hi. I gamah a teng mite kuamah in, “Ka ci na hi,” ci nawn lo ding uh a, mawhna khempeuh kimaisak ding hi. Minam khempeuhte aw, thu za dingin hong pai un. Mihingte aw, hong ngai un! Leitang le a tungah a om khempeuhte aw, ngai un. Leitung buppi le a tung panin a hong pai mi khempeuh in ngai un. Bang hang hiam cih leh minam khempeuh tungah Topa lunghamin, amaute khempeuh tungah heh mahmah a, a simang dingin amaute koihin, thah dingin a pia khinta hi. A kithat amau’ mite kilawnkhia ding a, a siluang hawmte uih semsem ding hi. Amau’ sisan in mual khempeuh sansak ding hi. Vantunga a om khempeuh muatmang ding a, laidal bangin vantungte kizial ding hi. Leenggui panin a tehte pulhin, theikung panin a tehte a pulh bangin aksi hon khempeuh pulh ding uh hi. Bang hang hiam cih leh ka namsau in vantungah a sep ding khempeuh a zawh khit ciangin, en un, a siamang dinga ka sehsa Edom mite tungah thu a khen dingin hong kumsuk ding hi. Topa in namsau khat nei hi. Sisan tawh kidim ding a, biakpiakna tuuno si le keel si, tuutalte’ kal thau tawh a kizolsak bang ding hi. Bang hang hiam cih leh Topa in Bozrah khua-ah hih biakpiakna nei ding a, Edom gamah hih bang tampi thahna omsak ding hi. Gamsial talte amaute tawh tukkhawm ding a, bawngtalno gehsate le bawngtal hatte tukkhawm ding hi. Amau’ gam pen sisan tawh kidiah ding a, amau’ leitang pen sathau in nipsak ding hi. Topa in Zion a hotkhiat ding, a galte a thuksak ding hun khat a nei hi. Luitui khempeuh kultaltui suak ding a, leitang pen kaat suak ding hi. Gam sung khempeuh pen a kuang kultaltui a suak ding hi. Sun le zanin mit lo ding a, vantung lamah a khu kahto ngitnget ding hi. Khang khat pan khang khat, a hawmguakin om ding a, kuamah in nawk ngei nawn het lo ding hi. Ahih hangin mu le sakuh in gam sung teng luah ding uh a, keising le va-akte om ding uh hi. Tua gam pen gamsimtham suakin, hawmsuak ding hi. Kumpi om lo Gam, ci-in amaute in min phuak ding uh a, a ulian khempeuhte a mawkna hi ding uh hi. Kumpi inn liante sungah lingkung po ding a, kulh a nei khua sungah laho le thangling kungte a po ding hi. Ngiate’ an zonna mun suakin, vasa-kalaohte’ omna mun hi ding hi. Sangak le ngiate kikhawl ding uh a, keeldawi in a lawmte sam ding hi. Dawi zong hong tuaksukin ama omna ding mun a zong ding hi. Tua munah keising in bu tomin, tua lai-ah tui-in keuh ding a, ama liimah a note huai ding hi. Musite zong kikhawm tuahin a nupa ciat un om ding uh hi. Topa ’ laibu sung panin zong unla hih thu sim un. Hih ganhingte khempeuh khat beek zong mangthang lo ding a, lawm sam khat zong om lo ding hi. Bang hang hiam cih leh Topa in thu pia khinzo a, amahmah in amaute kaikhawm ding hi. Amah in amaute a dingin leitang hawmsak ding a, amau’ tanh ding ciat a pia ding hi. Amaute in tua gam nei tawntung ding uh a, khang khat pan khang khat dongin teng paisuak ding uh hi. Gamlak le lei keuna gam lungdam ding a, sehnel gam lungdamin palhkhia ding hi. Unok pak bangin tampi takin palhkhia ding a, lungnopna le lasakna tawh lungdam ding hi. Lebanon mual a minthanna, Karmel mual le Sharon mual a minliatna tua leitang in ngah ding hi. Mi khempeuh in Topa ’ minthanna, i Pasian’ liatna mu ding uh hi. A zaw khutte khauhsak unla, a no khukte kipsak un. Lungsim patau-in, a lauthawng mite kiangah, “Thakhauh un, lau kei un! En un, na galte uh tungah phu hong laksak dingin Pasian hong pai ding a, amah in note hong honkhia ding hi,” ci un. Tua ciangin mittawte’ mit kihong ding a, bilngongte’ bil kihong ding hi. Tua ciangin khebai mipa diangin lam ding a, a pau thei lo mipa in lungdamin la sa ding hi. Bang hang hiam cih leh gamlakah tui hong phulkhia ding a, sehnel gam sungah luitui hong luang ding hi. A sa mahmah sehnelte bualtui hong suak ding a, a keugaw leitang pen ciktui tawh hong kidim ding hi. Ngiate’ omna ngei leitang pen nawngpi suakin, lopa, pumpeeng, le mau, a po ding hi. Tua lai-ah lam lianpi khat om ding a, Lampi Siangtho kici ding hi. A siang lo mite in tua tung tawn ngei lo ding a, mihaite in tua lam a zui mite khialsak nawn lo ding hi. Tua lai-ah humpinelkai om lo ding a, sasialne ganhing khat peuhpeuh hong pai lo ding hi. Tua lai-ah ganhing lauhuaite kimu lo ding hi. Topa ’ hotkhiatsa mite in tua lampi tawnin hong ciah ding uh hi. Topa ’ hotkhiatsa mite hong ciahkikin, lungdam tawntungna mai pua-in la sa kawmin Jerusalem-ah hong tung ding uh hi. Amaute in lungdamna le kipakna ngah ding uh a, dahna le khuisatna om nawn lo ding hi. Kumpi Hezekiah in a uk zawh kum sawmli le ngana kumin Assiria kumpipa Sennakherib in Judah gam sunga khuapi muanhuai khempeuh simin a la hi. Lakhish khua panin Assiria kumpipa in Jerusalem khua-a kumpi Hezekiah a lut ding a gen dingin ama nuai-a ulian khat le galkap honpi a sawl hi. Puansawppa’ nasepna phual zuatna lampi-a bual tungnung tui lampi gei-ah a ulianpa a khawl hi. Tua ciangin amah tawh a kimu dingin Hilkiah’ tapa ahi kumpi innsung a saipa Eliakim le lai-at pa Shebna, le Asaf’ tapa ahi thuciamteh pa Joah hong paikhia uh hi. Tua ciangin a ulianpa in amaute kiangah a genna panin, “Hezekiah kiangah, ‘Kumpi lian ahi Assiria kumpipa in hih bangin ci hi: Hih na lungmuanna uhah bang siksan na hi uh hiam? Kampau lel pen galdo nadingin vaihawmna le vangin ngaihsun na hi uh hiam? Kei nong lehdo nadingun kua suang na hi uh hiam? En un, ama tunga a kingam mipa’ khut a sun ding, a kikuaitansa pumpeeng ciangkhut tawh a kibang Egypt na suang uh hi. Amah a muang khempeuhte’ tungah Egypt kumpipa Faro, tua pumpeeng bang hi lel hi. Ahih hangin note in, “ Topa ka Pasian uh ka suang uh hi,” a ci-a kinei na hih uhleh ama mun sangte le biakna taute Hezekiah in lakhia-in, Judah le Jerusalem tungah, “Hih biakna tau mai-ah na bia ding uh hi,” ci hi lo ahi hiam? Tu-in hong pai unla, ka topa Assiria kumpipa tawh kiciamna khat bawl un. A tungah a tuang ding mi na ngahzawh nak-uhleh sakol tulnih kong pia ding hi. Egypt mite’ leengte le sakol galkapte muanna tawh ka topa’ nasemte lak panin a neupen khat ahi galkapmang khat bek nangawn bangci-in notzo ding na hi uh hiam? Tua tham loin, hih gam a susia dingin Topa ’ thu loin hong pai ka hi hiam? Topa in kei kiangah, “Paito-in hih gam sim inla, susia in,” hong ci hi,’ ci-in gen un,” a ci hi. Tua ciangin Eliakim, Shebna, le Joah in a ulianpa kiangah, “Kote in thei ngawn ka hih manun na nasemte tungah Aram pau tawh hong gen hoh in. Kulh tunga om mite’ zakna-ah Judah pau tawh thu nong gen loh nadingin kong thum hi,” a ci uh hi. Ahih hangin a ulianpa in, “Hih thute na topa uh le note’ tung bekah gen ding a, amau’ ek mah ne-in amau’ zun mah dawnin note tawh a siakhawm ding kulh tunga a tu mite tungah a gen lo dingin ka topa in hong sawl sa na hi uh hiam?” a ci hi. Tua ciangin a ulianpa dingto-in, Judah pau-in nakpitakin kiko a, “Assiria kumpi, kumpi lianpa’ thu za un! Kumpipa in, ‘Amah in note hong honkhia thei lo ding ahih manin Hezekiah’ khemsa-in om kei un. “ Topa in eite hong honkhia taktak ding a, hih khuapi pen Assiria kumpipa khut sungah kipia lo ding hi,” ci-in Hezekiah in hong genna tawh na Topa uh muangkha kei un. Hezekiah in, “ Topa in eite hong honkhia ding hi,” ci-in lam hong khialsak kha ding ahih ciangin kidawm un. Assiria kumpipa’ khutsung panin minam dangte’ pasian khatpeuh in ama gam honkhiazo ngei ahi hiam? Hamath gam le Arpad gam pasian-te koi-ah om ahi hiam? Sefarvaim gam pasian-te koi-ah om ahi hiam? Amaute in ka khutsung panin Samaria honkhiazo ahi hiam? Topa in ka khutsung panin Jerusalem khua a hotkhiat nadingin, hih gamte khempeuh’ pasian lakah kua in ka khutsung panin a gam uh honkhiazo ahi hiam?’ ci hi,” ci-in a gen hi. Ahih hangin kumpipa in, “Dawng kei un,” ci-in thu piakhol ahih manin amaute daitakin om uh a, kam khat beek dawng lo uh hi. Tua ciangin Hilkiah’ tapa ahi kumpi innsung a sai Eliakim, lai-at Shebna le Asaf’ tapa ahi thuciamteh pa Joah in a puan uh balkekin Hezekiah kiangah pai uh a, a ulianpa’ thugen teng a va gen uh hi. Kumpi Hezekiah in a zak ciangin dahin ama puante balkek a, Topa ’ inn sungah a pai hi. Tua ciangin amah in innsung saipa Eliakim, lai-at pa Shebna, le siampi khangham teng dahna limin puanhampi silh kawmin Amoz’ tapa kamsangpa Isaiah kiangah a sawl hi. Amaute in Isaiah kiangah, “Hezekiah in, ‘Tuni pen lungkham ni, tai ngah ni, mindai ni ahi hi. Naungek a suah hun tung napi-in a hingkhia zo lo nupi tawh i kibang hi. A nungta Pasian a zahko dingin ama topa, Assiria kumpipa in a sawl a ulianpa’ thugente, Topa na Pasian in za hen la, tua bang thu a gente gim pia tahen. Tua ahih ciangin a omlai i mite a dingin thu ngen in,’ ci hi,” ci-in a gen uh hi. Kumpi Hezekiah’ nasemte Isaiah kiangah a tun uh ciangin Isaiah in amaute tungah, “Na topa uh kiangah, ‘ Topa in hih bangin ci hi: Assiria kumpipa’ nasemte in keimah a hong simmawhna na zaksa uh thute hangin lau kei un. En un, amah in kam lengsawn khat za-in ama gamah a ciahkikna ding lungsim ka guan ding a, ama gam sungah namsau tawh amah ka tuksak ding hi,’ ci-in gen un,” a ci hi. Tua ciangin a ulianpa ciahkik a, Assiria kumpipa in Libnah khua a simna-ah a va pai hi. Bang hang hiam cih leh kumpipa in Lakhish khua a nusiat khitna thu zazo ahih manin tua lai a va zuanpah ahi hi. Tu-in, Ethiopia kumpi Tirhakah in Assiria gam a sim dingin Egypt galkap honpi tawh a hong kuanna thu Assiria mite in a za uh hi. Hih thu a zak ciangin Assiria kumpipa in Hezekiah kiangah kamtaite sawl a, “Judah kumpi Hezekiah kiangah hih bangin gen un: ‘Assiria kumpipa’ khut sungah Jerusalem kipia lo ding hi, ci-a thu hong ciam na suan Pasian’ khemsa-in om kei in. En in, Assiria kumpite in gam khempeuhah a bawlna, a suksiatmang khitna na zazo hi. Nang hong kisuaktasak tuan ding ahi hiam? Ka pu ka pate un a suksiat minamte, Gozan minam, Haran minam, Rezef minamte, le Telassar khua-a om Eden mite pen amau’ pasian-te in honkhiazo ahi hiam? Hamath kumpipa, Arpad kumpipa, Sefarvaim khuapi kumpipa, Hena kumpipa ahih kei leh Ivvah kumpipate koi-ah om ahi hiam?’ va ci un,” ci-in a gen hi. Hezekiah in kamtaite tung panin a lai puak uh sangin, a lai a sim hi. Topa ’ inn-ah Hezekiah paito-in, Topa ’ mai-ah a lai a zal hi. Hezekiah in Topa ’ tungah thu ngenin, “Vanglian Topa, Israel-te’ Pasian, Kherub-te tunga a tupa aw, nangmah bek, leitung kumpi gam khempeuhte’ Pasian na hi hi. Nangmah in vantung le leitung na bawl khin hi. Topa aw, na bil hong ngat inla hong za in. Topa aw, na mit hak inla hong mu in. Sennakherib in a nungta Pasian a zahkona, hong khak hih thute khempeuh za in. Topa aw, Assiria kumpite in mi khempeuh le a gam khempeuh susiamang khin taktak a, amaute’ pasian-te pen meikhuk sungah paihsak khin hi. Bang hang hiam cih leh tuate pen pasian hi loin mite’ khut tawh a kibawl sing le suangte ahi uh hi. Tua ahih ciangin tuate kisusia hi. Tua ahih ciangin Topa kote’ Pasian aw, nang bek Topa na hihna thu leitung kumpi gam khempeuh in a theih nadingin, tu-in ama khutsung panin kote hong honkhia in,” a ci hi. Tua ahih ciangin Amoz’ tapa Isaiah in Hezekiah tungah thu puak a, “Israel-te’ Pasian, Topa in hih bangin ci hi: Nang in Assiria kumpipa Sennakherib tawh kisai thu, kei kiangah thu hong ngen khin na hih ciangin, amah tawh kisai-in Topa ’ thugen hih bang ahi hi: ‘Sennakherib aw, Jerusalem mite in nang hong simmawhin hong zahko uh hi. Jerusalem mite in na nungah a lu hong peisan lel uh hi. Nang in kua zahko-in kua a simmawh na hi hiam? Nang in kua’ tungah na aw sangsakin kiphasak na hi hiam? Israel-te’ Siangtho Pa, kei’ tungah a hong tuaci na hi hi. Nangmah in na nasempa zangin Topa na zahko a, Lebanon mual dong pek, mual sangte tungah ka leeng tampite tawh ka pai khin hi. Taamtak sing a sangpente, taksing hoihpente ka phuk khin hi. A sangpen mun, tulak a thukpenna munah ka pai khin hi. Tuikhuk to-in tui ka dawn a, Egypt luituite khempeuh ka galkapte’ khenuai tawh ka keusak hi, na ci hi. “‘Na omna mun, na vaksuk na vaktohna le keima tungah na hehna ka thei hi. Keima tungah nang hehin, na kiphatsakna thu keima tungah a thu hong tung ahih manin, na nakah sikkawi bulhin, na kamah kamkaih hong bulhin, nong kuanna lampi lam mahah nang kong ciahkiksak ding hi,’ ci hi. “Nang Hezekiah a dingin hih in lim hong hi ding hi: Tu kumin anli pote na ne ding uh a, a kum nihna ciangin tua bangmahin a pote na ne leuleu ding uh hi. A kum thumna ciangin khai tuhin an na la ding uh a, leenggui suanin a gah na ne ding uh hi. Tua ciangin, Judah minam sung panin a suaktalai mite in singkung bangin zung khasuk kikin, gah na gahto kik ding uh hi. Bang hang hiam cih leh a omlaite, Jerusalem pan ahi zongin a suakta teng, Zion Mual panin ahi zongin paikhia ding uh hi. Vanglian Topa ’ deihluatna in hih thu hong tungsak ding hi. “Tua ahih ciangin Assiria kumpipa tawh kisai-in Topa in hih bangin ci hi: Hih khuapi sungah amah hong pai lo ding a, thaltang zong lawn lo ding hi. Lum tawh hong pai lo ding a, galsimna ding panmun zong hong bawl lo ding hi. Hong kuanna lampi mahah amah ciahkik ding a, hih khuapi sungah hong pai lo ding hi, Topa in ci hi. Bang hang hiam cih leh keimah le ka nasempa David ka khualna-in hih khuapi a suahtak nadingin ka hu ding hi,” a ci hi. Tua ciangin Topa ’ vantungmi kuankhia-in Assiria mite’ giahphual ah mihing tul za le tul sawmgiat le tulnga a that hi. Zingsangin mite a thawh ciangin hihte khempeuh misi luang bekbek na hi hi. Tua ciangin Assiria kumpipa Sennakherib taikhia a, a inn-ah ciahin Nineveh khua-ah a teng hi. Amah in ama pasian Nisrok inn-ah bia-in a om laitakin, ama tate Adrammelek le Sharezer in namsau tawh amah that uh a, Ararat gamah a tai uh hi. Tua ciangin a tapa Esarhaddon in ama tangin a uk hi. Tua hun laitakin Hezekiah a ci na-in si dektak hi. Amoz’ tapa, kamsang Isaiah ama kiangah hong pai-in, “ Topa in hih bangin ci hi: Na innsung thu ding vaihawm in; bang hang hiam cih leh nang na damkikzo kei ding a, na si ding hi, hong ci hi,” ci-in a gen hi. Tua ciangin Hezekiah kawm lam nga-in Topa ’ tungah thu ngen a, “ Topa aw, ka lungsim khempeuh le thuman tak tawh nangma mai-ah gamta-in, nangma muhna-ah a hoih nate ka sepna thu, tu-in nong phawk nadingin kong thum hi,” a ci hi. Hezekiah nakpitakin a kap hi. Tua ciangin Isaiah tungah Topa ’ thu hong tung a, “Pai inla Hezekiah kiangah gen in. Topa, na pa David’ Pasian in hih bangin ci hi: Na thungetna ka za khin a, na khitui ka mu khin hi. Tua ahih ciangin na nuntakna kum sawm le kum nga kong piak beh ding hi. Assiria kumpipa’ khutsung panin nang le khuapi kong honkhia ding a, hih khuapi ka hu ding hi, ci hi,” a ci hi. Isaiah in, “Amah in hong ciamsa thu Topa in hong bawl nadingin, hih pen Topa’ tung panin nangma a dingin lim ahi hi: En in, Ahaz kumpipa’ ni-nai tungah nitum kuana liim pen kal sawm ka nungkiksak ding hi, ci hi,” a ci hi. Tua ahih ciangin a tum khinsa ni pen ni-nai tungah kal sawm a nungkik hi. Judah kumpipa Hezekiah a ci na-in, a natna panin a damkik khit ciangin la phuakin a gelh lai in: Ka hat saan laitakin a si ding ka hita a, ka hun omlai khempeuh Leinuai-ah a om dingin hong kiseh hita hi, ka ci hi. A hingte’ gam sungah Topa ka mu nawn kei ding a, leitung a a teng mite’ lakah mihing ka en nawn kei ding hi, ka ci hi. Tuucingpa’ puanbuk bangin ka omna inn kibotkhia-in kei kiang panin kilakhia hi. Siamgante in a hial bangin ka nuntakna kihial khin a, amah in siambu panin kei hong atkhia hi. Sun le zan tawntung gimna hong kithuaksak a, zingsang dong huhna ngenin ka kiko hi. Humpinelkai bangin amah in ka guh khempeuh hong kuaihtansak a, sun le zan tawntung gimna hong kithuaksak hi. Phialphiah ahi a, gun vapi bangin ahi zongin ka hamham a, vakhu bangin ka tautau hi. Vantung lam kong etetna-in ka mitte a gim hi. Topa aw, kei hong kinengniam hi; keima lungmuanna hong hi ta in! Ahih hangin keimah in bang gen thei ding ka hi hiam? Bang hang hiam cih leh amah in kei tungah hong gen khin a, amahmah in hih thu hong bawl hi. Ka lung gim lua a, ka ihmu thei kei hi. Topa aw, nang a dingin kong nungta ding a, nang a’ ding bekbekin kong nungta ding hi. Ka ci hong damsakkik inla, hong nungtasak in! Gimna lianpi ka thuakna pen keima lungnopna hong suak ding hi. Lauhuaina khempeuh panin kei nong honkhia a, ka mawhna khempeuh na hong maisak hi. Bang hang hiam cih leh Leinuai-ah a om mite in nangma tungah lungdamna hong ko thei lo a, a sisa mite in nang hong phat thei lo uh hi. Gum sunga a paisukte in nangma thumanna hong muang thei lo uh hi. Tuni-in keima hong gamtat bangin a hing mite bek in nang tungah lungdamna hong ko thei hi. Pate in tate tungah nangma thumanna gensawn uh hi. Topa in kei hong hon ding a, Topa ’ inn sungah i nuntak sung tawntung khausai lasakna i tum ding hi. Tua ciangin Isaiah in Hezekiah kiangah, “Theigah la sak inla, na damkik nadingin na meimate nuhsak in,” a ci hi. Hezekiah in, “ Topa’ inn-ah ka paitoh zawhna ding a kitheih nadingin bang lim om ahi hiam?” ci-in a dong hi. Tua hun laitakin Baladan’ tapa, Babylon kumpi ahi Merodak-baladan in Hezekiah a ci na-in a damkikna thu za ahih manin ama kiangah laikhak le letsong tawh tangmite a sawl hi. Hezekiah in amaute limtakin zin na do hi. Amah in ama dangka inn, ngun, kham, paknamtui, sathau manpha, a galvan koihna inn khempeuh, le a vankoihna sunga a kimu theite khempeuh amaute a na lak hi. Ama innsung hitaleh, ama gam sunga om khempeuh hitaleh Hezekiah in amaute a lah loh bangmah om lo hi. Tua ciangin Kumpi Hezekiah kiangah kamsang Isaiah hong pai-in, “Hih mite in bang hong gen ahi uh hiam? Koi lai panin nang kiangah hong pai ahi uh hiam?” a ci hi. Hezekiah in, “Amaute, a gamlapi, Babylon gam panin kei kiangah a hong pai uh ahi hi,” a ci hi. Amah in, “Amaute in na inn sungah bang teng mu ahi uh hiam?” a ci hi. Hezekiah in, “Amaute in ka innsunga a om khempeuh a vekin mu khin uh hi. Ka vankoihna innte sunga nate amau ka lah loh om lo hi,” ci-in a dawng hi. Tua ciangin Isaiah in Hezekiah kiangah, “Vanglian Topa ’ thu ngai in: En in, na innsunga a omte khempeuh le na pu na pate in tuni donga a kholsate, Babylon-ah a kipuak ding ni hong tung ding hi; bangmah kinusia lo ding hi, Topa in ci hi. Nang’ sung panin a suak, nangma tapate kimkhat kipaikhiatpih ding a, Babylon kumpipa’ inn sungah innsungmang nasep kisemsak ding hi,” a ci hi. Tua ciangin Hezekiah in Isaiah kiangah, “Nong gensa Topa ’ thu a hoih ahi hi,” a ci hi. Bang hang hiam cih leh amah in, “Kei’ nuntak hun sungin nopna le lungmuanna om buang ding hi,” ci-in a ngaihsun hi. Ka mite hehnem un, hehnem un, na Pasian un ci hi. Dam takin Jerusalem mite hopih un. Amau’ gimna hun beita a, amau’ mawhna kimaisakin, amau’ khialhnate hangin Topa in a kicingin gim pia khinzo ta hi, ci-in amau tungah gen un. Awging khat in, “Gamlakah Topa ’ lampi sial unla, sehnel gam sungah i Pasian a’ ding lam lianpi khat a tangin bawl un. Kuam khempeuh kivuk dim ding a, mual liante le mual neute kitotam ding hi. A tamkim lo munte kitamkim sak ding a, suanghum omna munte kizalhtam ding hi. Topa ’ kam in gen khin ahih manin, Topa ’ minthanna vang hong kilang ding a, mi khempeuh in mukhawm ding uh hi,” a ci hi. Awging khat in, “Kiko in!” hong ci hi. Tua ciangin keimah in, “Bang thu kiko ding ka hi hiam?” ka ci hi. “Mi khempeuh, lopa bang hi a, ama hoihnate khempeuh gamlakah a om pak tawh kibang lel hi. Topa ’ hu in a mut ciangin lopa vulin, pak a pulh hi. Mihingte lopa bang lel hi taktak hi. Lopa vul a, pak a pulh hi. Ahih hangin Pasian’ thu kho tawntung ding hi,” hong ci hi. Jerusalem aw, mual sang dawnah kahto-in lungdamna thu kiko in. Zion aw, nakpitakin awng inla, lungdamna thu taangko in. Nakpi takin kiko inla, lau kei in. Judah gam khuapite tungah, “Na Pasian uh hong pai ta hi,” ci-in gen ta un. Topa Pasian hong pai a, vangliatna tawh hong uk ding hi. Ama sep thamante hong pua a, a gualzawhna thamante hong masuan hi. Amah in tuucingpa bangin ama tuuhonte an vak ding a, ama tuuhonte kaikhawmin a ang sungah pua ding a, no ngeklai a neite dam takin a paipih ding hi. Kua in ama khutkuak sungah tuite tehin, ama khap tawh vantung teh a, leitung leivui khempeuh lawh khat sungah guangin, pongkhaina tawh mual liante khai a, tawitehna tawh mual neute teh ahi hiam? Kua in Topa ’ sep dingteng gen a, thu lamlak pa bangin kua in amah hilh ahi hiam? Thu a kicingin a muh nadingin amah in kua dong ngei a, kua in amah lampi man hilhin, ama tungah thutheihna hilh a, thu theihtelna lampi lak ahi hiam? En un, minamte pen phelkhai khat panin tuimal themkhat a taakkhia tawh kibang a, tawitehna tungah a om leivui nengbaang bangin kingaihsun lel hi. Amah in tuikulhte pen leivui them bangin tawmto lel hi. I Topa biak nadingin Lebanon sing kicing lo ding a, a ganhingte zong meihal biak nadingin kicing lo ding hi. Minam khempeuhte, ama mai-ah bangmah tham hi lo a, amaute pen bangmah a om lo le, a hawmguak sangin a tawmzaw-in amah in a ngaihsun hi. Tua ahih ciangin Pasian pen kua tawh tehkak ding a, amah pen bang lim tawh kibang ci ding na hi uh hiam? Milim tawh tehtheih ding hi lo hi. Milim a bawlpa in sungin, khamseek pa khat in tua milim kham tawh zut a, tua milim a dingin ngun khainiangte a sunsak hi. Ngun le kham a nei zo lo mipa in biakna-in a zat dingin a muat lo ding sing teel a, a taang thei lo milim khat ama a dingin a bawlsak dingin khutsiam mi khat a zong hi. Note in thei nai lo a, za nai lo na hi uh hiam? A kipat cil-in note tungah hong kigen khin hi lo ahi hiam? Leitung a pian a kipan thei khinta hi lo na hi uh hiam? Leitung a a teng mite kauphe tawh kibang lel hi. Leitung kimkot tungah a tupa, vantungte puan bangin zalin, a sungah a om theih nadingin puanbuk bangin a zal pa, uliante a mawkna suaksakin, leitung ukte pen bangmah lo a suaksakpa amah ahi hi. Amaute pen a gina-in kisuan lo a, a gina-in kivawh lo a, amau’ kungte in a gina-in lei sungah zung kha lo uh a, amah in a mut ciangin amaute vul a, huihpi in ham bangin amaute a lenkhiatpih hi. Tua ahih ciangin kei kua tawh hong genteh ding na hi uh hiam, Siangtho Pa in ci hi. A sangna lam ento unla mu un. Kua in hihte piangsak ahi hiam? Amau’ honpite khat khatin piangsakin, a lian ama thahatna tawh amaute khempeuh a minun a sampa ahi hi. Vangliatna-ah thahat ahih manin khat beek pelem lo hi. “ Topa ’ kiang panin keima lampi kiliah a, keima Pasian in ka lungkhamna hong thudon lo hi,” Jakob aw, bang hangin ci a, Israel aw, bang hangin tuaci pau na hi hiam? Thei nai lo a, za nai lo na hi hiam? Topa pen tawntung Pasian hi a, leitung mong khempeuh dong a Piangsak pa ahi hi. Amah gim lo a, zong tawl lo hi. Ama thu theihtelna kigen zo lo hi. Amah in a gim mi tungah vangliatna pia a, thahatna a nei lo mi a thahatna khangsak hi. Khangnote nangawn gimin tawl ding a, khanglai mite a tha uh bei ding hi. Ahih hangin Topa a muang mite a tha uh dimkik ding a, muvanlai bangin kha tawh leengto-in, amaute tai napi-un tawl lo ding uh a, amaute lam pai napi-un gim lo ding uh hi. Tuipi gei-a om gamte aw, gamdai takin ka thu ngai un. Na mite uh a tha uh dimsak unla, amaute a nai-ah hong paisak un. Amaute in thugen theih nading hun ngah ding uh hi. Thukhen zumah kei tawh kisi nu’ng. A paina peuhah a gualzo, nisuahna panin a hong pai mipa kua in hanthawn ahi hiam? Amah in ama khut sungah minam dangte pia khin ahih manin amah in kumpite tuancil hi. Amah in a namsau tawh amaute leivui bangin bawl a, ama thal tawh buhkung leeng a bangsak hi. Amah in amaute nawhdelh lua kisa-in, a khe in lei nangawn sik kha lo liang a, nuamtakin a paisuak hi. A kipat cil a kipanin a khangkhangin mite a sam, hih nasep semin a bawl kua ahi hiam? Keimah Topa in, a masa le a nunung ka hi a, kei pen Topa ka hi hi. Tuipi gei-a om gamte in mu khinin a lau uh hi. Leimong dongin mite lau-in ling uh a, amaute in hong nai-in hong pai uh hi. Mi khempeuh in a vengte ciat huh a, a sanggamte ciat kiangah, “Lau kei un,” a ci hi. Khutsiam pa in khamseek pa hanthawnin, sek tawh milim a neel puah pa in sekpi tawh a sat pa hanthawn a, sumtui a luanna uh, “Hoih hi,” a ci uh hi. A ling thei nawn lo dingin amaute in tua milim siktukkilh tawh a khenkip uh hi. Ahih hangin nang ka nasem pa Israel, ka lawm Abraham’ suanlekhak, ka hong teelsa Jakob aw, leimong panin kong lakkhiat, leimong kiu a gamla pen mun panin ka hong sapkhiat, “Nang pen ka nasem pa na hi a, nangmah kong teel khinzo a, nangmah kong nilkhia kei hi,” ka hong cih pa aw, nang hong ompih ka hih manin lau kei in. Na Pasian ka hih manin lungkia kei in. Nang hong thakhauhsakin ka hong huh ding a, nang hong huhin ka hong honkhia ding hi. Nangma tungah a heh mite khempeuh maizumna kithuaksakin kikoihkhong ding hi. Nangmah hong dem mite a mawkna suakin siatna thuak ding uh hi. Nangmah hong langpangte na zon hangin amaute na mu nawn kei ding hi. Nangmah hong dote pen bangmah hi het lo ding uh hi. Bang hang hiam cih leh keimah Topa na Pasian in na khut taklam ka len hi. “Lau kei in, nangmah kong huh ding hi,” nang tungah a hong ci pa keimah ka hi hi. Lungno bang ahi lel Jakob, no Israel mite aw, lau kei un! Note kong huh ding hi, Topa in ci hi. Note hong honpa pen Israel-te’ Siangtho Pa ahi hi. Note pen, a thak, a hiam, ha a nei buhcilna bangin ka hong bawl ding hi. Note in mual liante cilin na suvui ding uh a, mual neute pen ansi bangin na gawizan ding uh hi. Amaute na haih ding uh a, huih in amaute mutkhia ding a, huihpi in amaute thehthang ding hi. Tua ciangin Topa ’ hangin na lungdam ding uh a, Israel-te’ Siangtho Pa’ hangin na minthang ding uh hi. Keima mite in tui duhin, tui zongin, a dang uh a taak ciangin amau’ hong thungetna ka pia ding a, Israel-te’ Pasian keimah in amaute ka nusia kei ding hi. Bangmah a om lohna a sangna munte panin gunte ka luangsak ding a, kuamte’ laizangah tuikhukte ka omsak ding hi. Sehnel gam pen bualtui ka suaksak ding a, lei keuna mun pen ciktui ka suaksak ding hi. Gamlakah taamtak sing, singkha sing, mui sing le oliv kungte ka posak ding hi. Sehnel gam sungah taaksan sing, hiangpa sing le tak sing ka suan khawm ding hi. Topa ’ khut in hih nate bawl a, Israel-te’ Siangtho Pa in hih nate piangsak hi, ci-in mite in mu-in a theih nading, a thu ngaihsunin a tel theih nading uh ahi hi. Na thu uh sung un, Topa in ci hi. Na lahtel nop teng uh gen un, Jakob’ Kumpipa in ci hi. Amaute in a thu uh hong paipih uh hen la, a piang ding thu hong gen uh hen. Eite in i ngaihsut theih nading, a hong piang ding thu i theih nadingin a beisa huna om nate bang teng hiam hong gen ta uh hen. Tua ahih kei leh zong, a hong piang ding thu eite tungah hong gen ta uh hen. Note pen pasian-te na hihna uh ka theih nadingun tu khit ciangin a hong piang ding thute kote tungah hong gen un. Kote lungkia-in ka lau nadingun phatna ahi a, siatna ahi zongin khat peuhpeuh hong bawl dih un. A taktakin note bangmah na hi kei uh a, na nasepnate uh a mawkna ahi hi. Note a hong teelpa a etsathuai ahi hi. Leilu lam gam panin mi khat ka hanthawn a, amah hong kuan khin hi. Nisuahna lam panin amah in ka min hong lo ding hi. Beelseek pa in buan a cil bang, sum sunga a kisugawp bangin, amah in gam ukte tuancil gawp ding hi. Eite in i theih nadingin a kipat cil a kipan kua in hong genkhia a, “Amah man hi,” i cih theih nadingin a hun ma-in kua in gen ahi hiam? Kuamah in genkhia lo, kuamah in pulak lo a, kuamah in no’ thu za lo hi. Topa ahi keimah in Zion tungah hih thu ka pulak masa a, Jerusalem tungah lungdamna thu ka gen hi. Ahih hangin tua mun ka et ciangin kuamah om lo hi. Thu ka dot ciangin a hong dawng ding thulamlak amaute lakah om lo hi. Amaute khempeuh zuaupi vive hi a, amau’ nasepnate a mawkna ahi hi. A kisung amau’ milimte pen huih hawmpi bang ahi uh hi. Keimah in ka huh, ka teel, ka lungkimna ka nasempa en un. Ka kha tawh amah ka kidimsak a, amah in minam khempeuh tungah thuman tungsak ding hi. Amah kiko loin, a aw zong sangsak lo ding a, kongzing lakah zong thu gen zakzak lo ding hi. Amah in a zawngkhal mite dop bawl ding a, a cimawh mite tungah migi ding hi. Amah in thumanna tawh mi khempeuh tungah thutang thu semkhia ding hi. Amah in leitungah thutang thu a phuh khit matengin lungsi lo, lungkia lo ding hi. Tuipi gei-a om gamte in ama thu ngak uh hi. Vantungte piangsakin a zal, leitung phahin, a tung panin a hong paikhia nate a piangsak, leitungah a om mite tungah husanna pia-in, leitungah a paite khempeuh husanna a guan Topa Pasian in hih bangin ci hi: “Kei pen Topa ka hi a, Topa pen keima min ahi hi. Pasian dang’ tungah keima-a’ tawh a kibang minthanna ka pia kei a, a kisui milimte zong keimah hong kiphatnate pawl ka ngahsak kei hi. En un, hun beisa-a nate in hong khengta a, tu-in a thak nate kong gen hi. Tuate a hong piankhiat ma-in note tungah a thute ka hong genkhol hi,” a ci hi. Topa ’ tungah la thak sa unla, leimong panin amah phatna sa un! Tuipi le a sunga omte, tuipi gei-a om gamte le a tunga teng mite aw, la sa un. Sehnel gam le a khuapite, Kedar mite’ tenna khuaneute a aw uh sangkhai sak un. Sela gam a teng mite lungdamna tawh la sasak unla, mual dawn panin amaute awngsak un. Topa ’ minthanna gensak unla, tuipi gei-a gamte-ah amah phatna gensak un. Mi thahatpa bangin Topa kuankhia a, gal a do mipa bangin ama hehna sosak hi. Amah kiko-in nakpitakin awngkhia a, ama hatna a galte tungah a lak hi. Pasian in hih bangin ci hi: “Sauveipi sung bangmah hih loin ka om a, keimah le keimah kikhamcipin ka om hithiat hi. Tu-in ahihleh numei nausuak ding bangin ka kikokhia ding a, ka kam ka-in ka tungnak ding hi. Mual liante le mual neute ka susia ding a, a po khempeuh ka keusak ding hi. Gunte pen tuikulh ka suaksak ding a, bualtuite ka kangsak ding hi. “Amau’ theih loh lampi-ah mittawte ka paipih ding a, amau’ theih ngei loh sul zuihpihin ka kha ding hi. Amau’ mai-ah khuamial pen khuavak suaksakin, a phokna munte a tamin ka bawl ding hi. Hihte pen keima hih ding nate hi a, tuate sem loin ka nusia kei ding hi. A kisui milimte muangin, a kisung milimte kiangah, ‘Note, komau’ pasian-te na hi uh hi,’ a ci mite kinolh ding a, maizum mahmahin ki-omsak ding hi. “Bilngongte aw, za un. Mittawte aw, na muh theih nadingun en un! Ka nasempa bangin kua a mit taw a, keima sawl ka kamtai pa bangin kua a bil ngong ahi hiam? Keima thuciampih pa bangin kua a mit taw a, Topa ’ nasempa bangin kua a mit taw ahi hiam? Israel in na tampi mu a, ahih hangin tuate encian lo hi. Ama bilte vang a, ahih hangin amah in khua za lo hi,” a ci hi. Topa pen a honkhia nuam mahmah Pasian hi a, ama thuhilhnate limtakin a kizuih ding a deih hi. Ahih hangin ama mite pen a kiluh, a kisut mite hi a, leihawm sungah amaute khempeuh kikhiasuk a, thonginn sungah kiseel hi. Amaute pen a hon ding a om lo, nek dingin a kiman ganhing suakmangkhin uh a, kuamah in, “Hong piakik in,” a cih loh vankinusiate a suak khinta uh hi. Note lakah khat peuhpeuh in hih thu na ngai ding uh hiam? Tu a kipanin limtakin na ngai ding uh hiam? Kua in a sutgawppa tungah Jakob pia a, a luhgawpte tungah Israel pia ahi hiam? Topa mahmah in a piak hi lo ahi hiam? Ama tungah eite i khial hi. Ama hong deih bangin i nungta kei a, ama hong thuhilhnate i mang kei hi. Tua ahih ciangin amah in ama hehna so leh galkidonate eite tungah hong tungsak hi. Israel mi khempeuh lakah ama hehna mei bangin hong kuang a, ahih hangin eite in bangmah i thei kei hi. Tua bang i thuakna hangin eite in bangmah i phawk thei tuan kei hi. Ahih hangin Jakob aw, nangmah hong piangsak pa, Israel aw, nangmah hong bawlpa, Topa in tu-in hih bang ci hi: “Hong honkhia khin ka hih manin lau kei in. Na min tawh kong sam khinzo a, nang pen kei-a’ na hi hi. Tuite na kantan ciangin nang kong ompih ding a, gunte na kantan ciangin tui in hong tuum lo ding hi. Mei kantanin na pai ciangin na kang kei ding a, meikuangte in nang hong kangtum lo ding hi. Bang hang hiam cih leh kei pen Topa na Pasian, Israel-te’ Siangtho Pa, nangmah hong honpa ka hi hi. Nangmah tat nadingin Egypt ka pia a, nangmah khek nadingin Ethiopia le Seba ka pia hi. Nang pen keima mitah manpha-in, pahtakhuai-in, nangmah hong it ka hih manin nangma tangin mite ka pia a, na nuntakna khek nadingin mihingte ka pia hi. Nang hong ompih ka hih manin lau kei in. “Nisuahna lam panin na suanlekhakte kong paipih ding a, nitumna lam panin na mite kong kaikhawm ding hi. Mit nei napi-in a mit a tawte, bil nei napi-in a bil a ngongte, hong paikhiatpih un. Minamte khempeuh kikaikhawmsak unla, mihingte kikhawmsak un. Amaute’ lak panin kua in hih thu hong genkhia thei-in, a beisa huna nate kua in laktel thei ahi hiam? Amau’ dikna a langsak dingin a tecite uh hong paipihsak unla, amaute a thu zasakin, man mah hi, cisak un. “Note pen keima teci na hi uh hi,” Topa in ci a, “Kei pen Amah ka hihna thu, nangmah in thei-in keimah nong upna ding, nong theihtel nadingin kong teelsa ka nasempa na hi hi. Kei’ ma-in pasian om lo a, kei’ khitah zong kuamah om lo ding hi. “Kei, keimah pen Topa ka hi a, kei simloh honpa dang om lo hi. Note lakah pasian dang a om ma-in honkhia-in, pulakin, ka genkhol hi. Tua ahih ciangin note pen keima teci na hi uh hi,” Topa in ci hi. “Kei pen Pasian ka hi a, a kipat cil a kipanin zong kei pen Amah ka hi hi. Keima khutsung panin a lakhiazo kuamah om lo hi. Keima sepnate, a kua in hong khaktanzo ding ahi hiam?” a ci hi. Israel-te’ Siangtho Pa, note a hong hon Topa in hih bangin ci hi: “Note’ hangin Babylon-ah galkapte puakin, khua kongpi sikzawl khempeuh ka kuaitan ding a, Khaldea mite’ kikona pen tauna awging ka suaksak ding hi. Kei pen Topa, note’ Siangtho Pa, Israel a Piangsak pa, note’ Kumpi ka hi hi,” ci hi. “Masa lama nate ciamteh kei unla, a beisa hun nate ngaihsun kei un. Tu-in a thak na khat ka bawl a, tu-in hong piangkhia hi. Note in thei lo na hi uh hiam? Gamlakah lam lianpi khat ka bawl ding a, sehnel gam sungah gunte ka luangsak ding hi. “Ahih hangin Jakob aw, ka min nong lo kei hi. Israel aw, kei nong cimtak hi. Meihal biak nadingin kei kiangah na tuu nong paipih kei a, biakpiakna tawh kei nong pahtawi kei hi. Piakna tawh nang kong vangiksak nai kei a, paknamtui piakna tawh kong gimsak nai kei hi. Kei a dingin paknamtui nong leisak nai kei a, nangmah in biakna sa a thaute tawh nong taiisak nai kei hi. Ahih hangin nang in na khialhna tawh kei tungah vangik na hong suan khin a, na mawhna tawh kei nong gimsak khin hi. Na thupalsatnate hong paihkhiatsak pa pen keimah ka hi a, kei ka hih manin na khialhnate ka ciamteh kei ding hi. “Thuman na hihna hong laktel inla, thu kikum khawm ni. Na dikna a kilat nadingin na thu hong sungkhia in. Na pu na pa masate uh na khial uh a, na makaite uh zong kei tungah hong khial uh hi. Na uliante un ka biakinn mindaisak uh ahih manin Israel tungah siatna ka tungsak a, Jakob ka mindaisak hi,” a ci hi. Topa in, “Ka nasempa Jakob aw, ka teelsa Israel aw, tu-in za in. Nangmah a hong bawl, gil sung panin nang a hong piangsak, nang a hong huh ding Topa in hih bangin ci hi: Ka nasempa Jakob aw, ka teelsa Israel aw, lau kei in. “Bang hang hiam cih leh a dangtak leitang tungah tui ka sung ding a, lei keu tungah luitui ka luangsak ding hi. Na suanlekhakte tungah ka kha ka sung ding a, na tu na tate tungah ka thupha ka pia ding hi. Amaute pen tui sung panin a pokhia, luitui luang gei-ah a om, gialhek kungte bangin pokhia ding uh hi. “Khat in, ‘Kei pen Topa ka hi hi,’ ci-in, adang khat in Jakob min tawh ama min lo ding a, adang khat leuleu in, ‘ Topa -a’, ci-in ama khut tungah gelhin, Israel min tawh amahmah kinophuah ding hi,” ci hi. Topa, Israel Kumpipa le amah Tan pa, Vanglian Topa in hih bangin gen a, “Kei pen a masa pen le a nunung pen ka hi hi. Kei simloh pasian dang om lo hi. Kua pen kei tawh kibang ahi hiam? Amah gensakin pulaksak unla, keima mai-ah gensak un. A hong tung ding nate thu tanglai pek panin kua in thangko ahi hiam? Hong tung ding nate thu amaute gensak dih un. Lau kei unla, kihta kei un. Tanglai pek panin note kiangah hong genin hong pulak khin hi lo ka hi hiam? Note khempeuh keima teci na hi uh hi. Kei simloh pasian dang om ahi hiam? Suangpi dang om lo hi. Khat beek ka thei kei hi,” a ci hi. Milim a bawl mite khempeuh a mawkna hi a, amau’ deih milimte in phattuamna piangsak lo hi. Milim a biate in khua mu thei loin, thu theithei lo a, amaute in maizumna a thuak uh hi. Bangmahin a kimang lo pasian kua in bawl a, milim kua in sung ahi hiam? Milim a bia mite khempeuh in maizumna ngah ding uh hi. Milim a bawl khutsiamte pen mi hilel uh hi. Amaute khempeuh kikhawm sakin dingsak un. Amaute nakpitakin kilausak ding a, a vekpi-un maizumin kikoih khawm ding hi. Sikseekpa in seekin hol tawh na sem hi. Amah in sek tawh seekin a thahat a khut tawh a sat hi. Amah a gil kialin a tha zaw a, dangtakin a gim hi. Sing nasep khutsiampa in khau khungin laikung tawh a ciamteh hi. Amah in singnawtna tawh nawt a, laikung tawh a kualin a ciamteh hi. Amah in, inn sungah a teng ding mihing melhoih lim khat bangin mihing limin a bawl hi. Amah in taamtak singkungte a phuk hi. Tua ahih kei leh sesing kung khat ahi a, tawsaw kung khat ahi zongin tengkhia a, gamlak singte lakah khangsakin golsak hi. Amah in taamtak kung khat suan a, guah in khangsak hi. Tua ciangin tua kung pen mi khat a dingin mei sing a suak hi. Amah in tua sing kimkhat la-in khua lum nadingin mei-in cih a, amah in mei tawhin moh a em hi. Amah in pasian khat zong bawlin bia a, amah in milim khat bawlin tua milim mai-ah a kun hi. Amah in a sing kimkhat meikhukah cih hi. Adang kimkhat tawh an ne a, amah in sa hangin a gil vah hi. Amah in mei awi-in, “Ah, ka khua lumta, mei mu khin ing,” ci hi. Amah in a vallai teng, ama milim pasian khatin a bawl hi. Tua milim mai-ah kunin a bia hi. Amah in tua milim tungah thu ngen a, “Nang pen keima pasian na hih ciangin kei hong honkhia in,” ci hi. Amaute in bangmah thei lo a, amaute in bangmah khentel thei lo uh hi. Bang hang hiam cih leh amaute in bangmah a muh theih loh nadingun amah in a mit uh humsakin, bangmah a theih loh nadingun a lungsim uh khaksak hi. A kimkhat meikhukah cihin, a aam tungah moh zong ka em a, sa hangin ka ne khinzo hi. A omlai teng a kihhuai-in bawl buang ding ka hi hiam? Sing bek khat mai-ah kun buang ding ka hi hiam, a ci ding, thu a ngaihsun, theihna le thumuhna a nei khat beek om lo hi. Amah pen vut a nete tawh kibang lel hi. A lungsim haina in amah lam pialpih khin a, amah le amah kihonkhia thei loin, “Ka khut sungah ka tawi milim pen a zumhuai hi lo ahi hiam?” cih zong phawk thei lo hi. Jakob aw, hih thu phawk in. Israel aw, ka nasempa na hi hi. Nang kong bawl a, nang pen keima nasem na hi hi. Israel aw, nang kong mangngilh kei ding hi. Na thupalsatnate meiipi bangin na khialhnate meiilum bangin ka phiatkhia khinzo hi. Hong honkhia khin ka hih manin kei kiangah hong ciahkik in. Vantungte aw, Topa in tua thu sem khin ahih manin la sa un. Lei thuknate aw, awng un. Mualte aw, la sa-in awngkhia un. Tulak le a sunga om sing khempeuh aw, awng un. Bang hang hiam cih leh Topa in Jakob honkhia khin a, Israel sungah amah kiminthangsak ding hi. Gil sung panin nangmah a hong piangsak, nangmah hong Honpa, Topa in hih bangin ci hi: “Keimah in na khempeuh bawlin, keimah guak in vantungte zalin, kuama seppih lohin leitung ka zal hi. Zuau thugente’ hilhkholhna limte a siasak pa, aisante pen mihai a suaksak pa, mipilte lehhei kikin, amau’ thutheihte haina a suaksak pa; a nasempa’ thu kipsakin, a kamtaite’ thugente a sem pa, ‘Jerusalem khua-ah mi tengin, Judah khuapite kilamkik ding a, a kisia khuate ka lamkik ding hi,’ a ci pa; tui thukpi kiangah, ‘Keu in; na gunte ka keusak ding hi,’ a ci pa; ‘Sairas kumpipa pen ka tuucingpa hi a, ka deihna teng tungsak ding hi,’ a ci pa; ‘Jerusalem kilamkik ding a,’ biakinn pen, ‘Na bulpi kiphutkik ding hi,’ a ci Topa ka hi hi,” a ci hi. Kulhkongpi sungah a lut theih nadingin ama mai-ah kongkhakte a honsak ding, kumpite’ vangliatnate a lakkhiatsak ding, ama mai-ah minam dangte a zawhsak dingin, a taklam khutin a let, a sathau nilh pa Sairas tungah Topa in hih bangin ci hi: Ka nasempa Jakob, ka teelsa Israel ka ngaihsutna-in nang pen na minin kong sam a, nong theih loh hangin min thak kong phuak hi. Keimah in khuavak le khuamial piangsakin, a pha nate le a sia nate ka piangsak a, hih nate khempeuh a bawlpa, keimah Topa ka hi hi,” a ci hi. Vantungte aw, tunglam panin thuman zusak unla, vantungte in thumanna buasuk ta un. Hotkhiatna a pokhiat theih nadingin leitang kihongsak unla, thumanna zong pokhiato sak un. Keimah Topa in hih thu ka bawl khinzo hi. Amah a Bawlpa tawh a kido mipa, beelseek pa tawh a kilehdo lei beel in gimna ngah ta hen! Tungman in amah a sek pa kiangah, “Nang in bang bawl na hi hiam, na na bawl in khutlet nei lo hi,” ci-in a thu sel ngam ahi hiam? A pa kiangah, “Nangmah in kua piangsak na hi hiam?” a ci pa hitaleh, a nu kiangah, “Nang in nausuak dingin kua gimpih na hi hiam?” a ci pa in gimna ngah ta hen! Amah a Bawlpa, Israel-te’ Siangtho Pa, Topa in hih bangin ci hi: “Nang in keima tate’ thu hong dongin, ka khut tawh ka bawlsa tawh kisaite-ah thu hong pia ding na hi hiam? Keimah in leitung ka bawl a, tua tungah mi ka piangsak hi. Keima khut in vantungte zal a, keimah in vantung na honpite khempeuh thu ka pia hi. Thu a manin a sem dingin amah khua ka phawksak a, keimah in ama lampi khempeuh ka mamsak ding hi. Amah in nasep thaman ahi a, letsong ahi zongin ngaihsun loin keima khuapi lam ding a, salin a om ka mite a khahkhia ding hi,” Vanglian Topa in ci hi. Topa in Israel tungah, “Egypt’ hauhna le Ethiopia sumbuk vante le a tun a sang Seba mite nangma kiangah hong pai-in nangma a’ hong hi ding uh a, amaute in nang hong zui ding uh hi. Amaute sikkhau kibulhsa-in hong pai ding uh a, nangma kiangah hong kun ding uh hi. Amaute in nangma kiangah thumna hong bawl ding uh a, ‘Nangmah bek tawh Pasian omkhawm a, kuamah dang om loin, amah simloh pasian dang om lo hi,’ hong ci ding uh hi. A taktakin, Israel-te’ Pasian, Honpa pen, amahmah a bucip Pasian ahi hi. Milim a bawl mite khempeuh in maizumna thuakin cih nading thei loin om ding uh hi. Ahih hangin Topa in Israel-te honkhia hi. A tawntungin gualzo ding uh a, cikmah hunin maizumna thuak ngei lo ding uh hi,” a ci hi. Vantungte a piangsak pa (amah Pasian!) Leitung piangsakin a bawl pa (a kipsak pa; a awngthawl dingin bawl loin, ten nadingin leitung a piangsak pa!) Topa in hih bangin ci hi: “Kei pen Topa ka hi a, kuamah dang om lo hi. Keimah in mun simtham, khuamialna gam sungah thu ka gen kei hi. Jakob suanlekhakte tungah, ‘A awngthawl mun sungah kei hong zong un,’ ka ci kei hi. Keimah Topa in thuman ka gen a, a man nate ka pulak hi. “Minamte sung panin a suaktalai note aw, nomau kikaikhawmin hong pai unla, hong nai un! Sing milim a pua kawikawi mite in theihna nei lo uh a, a honkhia thei lo pasian tungah thu ngenngen uh hi. Na thu uh sung unla, hong gen un. Na thu uh kikum khawm un! Hih thu sawtpekin kua in gen ahi hiam? Tanglai-in kua in pulak ahi hiam? Keimah Topa hi lo ka hi hiam? Thuman Pasian le Honpa ahi, kei simloh pasian dang om lo a, kei simloh kuamah dang om lo hi. “Leitung mi khempeuhte aw, kei lamah hong kihei unla hotkhiatna ngah un! Bang hang hiam cih leh kei pen Pasian ka hi a, kuamah dang om lo hi. Kei mahmah ka kiciam khin a, a kikhelkik ngei nawn lo ding thukip hih bang ahi hi: ‘Keima mai-ah mi khempeuh hong khukdin ding a, keima tungah thuman ding hong kiciam ding hi,’ cihna, kei’ kamsung panin thumanna tawh pusuakkhia khinzo hi. Topa ’ hang bekin gualzawhna le thahatna kingah hi, hong kici ding hi. Kei hong mudahte khempeuh mindai-in maizum ding uh hi. Israel suanlekhakte khempeuh, Topa ’ hangin gualzo-in a kisial ding uh hi. “Bel pasian puksukin, Nebo pasian kunsuk a, tua milimte pen ganhing le bawngte tungah kipua hi. Note’ puak hih nate pen a gim mahmah ganhingte tungah a kisuan vangik bangin note tungah hong gik hi. Amaute kunin, amaute puksuk khawm uh a, amaute in vangik pengsak thei lo uh a, amaute mahmah zong galte’ matna sungah tung uh hi. “Na suah a kipan kong tawi, gil sung pana kong puak, Jakob innkuan, Israel innkuan a suakta laite khempeuh aw, keima thu hong ngai un. Na teek dongun kei pen Amah ka hi a, na sam uh a kan’ hun dongin note kong kem ding hi. Ka hong bawlkhin a, ka hong don ding hi. Keimah in hong tawi-in ka hong honkhia ding hi. “Note in kei, kua tawh hong kibangsakin kua tawh hong kikimsak ding a, ka kibatpih dingin a kua tawh hong enteh ding na hi uh hiam? Sumbawm panin khamte uang zatin tawitehna tawh ngunte a tehkhiate in kham seekpa cial uh a, amah in tua nate pen pasian-in a seeksak hi. Tua ciangin amaute kunin tua milim a bia uh hi. Amaute in tua pasian pen a liangko tung uhah ngato-in pua uh a, ama omna ding munah a koih uh hi. Tua a koihna-ah a milim om niloh hi. Ama omna panin kinkhia thei lo hi. Mi khatpeuh in amah sam le amah in dawng thei lo a, ama lungkhamna panin zong a honkhia thei kei hi. “Thu a palsat mite aw, hih thu phawkin ngaihsun unla, lungngai pha un. Hun lui thute phawk un; bang hang hiam cih leh kei pen Pasian ka hi a, adang om lo hi. Kei pen Pasian ka hi a, kei tawh a kibang adang om lo hi. A kipat cil-in a tawpna ding thu ka pulak a, tanglai pek panin a piang nai lo nate genin, ‘Ka thugen kip ding a, ka ngimna khempeuh ka tungsak ding hi,’ ka ci hi. Nisuahna gam panin sasialne vasa khat samin, keima thu a semkhia dingin gamlapi panin mi khat ka sam hi. Thu ka gen khin a, ka tungsak ding hi. Ka geel khin a, ka sem ding hi. “Suahtakna ding haksa mahmah ding hi, a ci lungsim khauh mite aw, ka thu ngai un: Suahtakna ding hun ka hong tungsak ta a, gamla nawn lo hi. Ka hong hotkhiat ding hun zekai nawn lo ding hi. Keima minthanna ahi Israel a dingin Jerusalem ka honkhia ding hi,” a ci hi. Nungak a bang Babylon aw, hong paisuk inla, leivui lakah tu in. Nungak a bang Khaldea aw, tokhom om lohna leilakah hong tusuk in! Bang hang hiam cih leh nang pen a moi milmel, a ngeek dikdek, hong kici nawn lo ding hi. An gawina suangte hei inla, an gawi in. Na kikhuhna puan lakhia inla, na nik na puan suahin gunte kantan in. Na seelsim teng kilang ding a, na zumhuaina teng kimu ding hi. Keimah in kong thukkik ding a, kuamah ka zah kei ding hi. Israel-te’ Siangtho Pa in eite hong suaktasak a, ama min pen Vanglian Topa ahi hi. Babylon aw, gamdai takin tu inla, khuamialna sungah pai in; bang hang hiam cih leh nang pen kumpi gamte’ tonu, hong kici nawn lo ding hi. Ka mite tungah ka heh a, ka luah gamh ka ninsak hi. Nangma khut sungah amaute kong pia a, nangmah in amaute na hehpih bawl kei hi. A khangham mite nangawn na ngong bawl mahmah hi. Nangmah in, “Tonu ka hi tawntung ding hi,” ci na hih manin hih thute na lungsimah koih loin, a thumongte zong na phawkkha kei hi. Tua ahih ciangin tu-in, a nuam bek a ut, lungmuang takin a tu hithiat, na lungsimah, “Keimah hi’ng, kei simloh midang om kei; meigongin om ngei kei ning, ta-khuai cih zong sin kei ning,” a ci khuapi aw, hih thu za in: Aisan siamnate le mibum siamna vang lianpi na neih hangin ta khuaisuahna le meigonna, hih thu nihte thakhat thu-in ni khat sungin a kicing takin nangma tungah hong tung veve ding hi. Na gitlohna-ah nang na lungmuang a, “Kuamah in kei hong mu kei hi,” na ci hi. Na pilna le na theihnate in lam hong pialsak a, na lungsim sungah, “Keimah hi’ng, kei simloh midang om kei,” na ci hi. Ahih hangin nangmah in na beisak theih loh lungkhamna na tungah hong tung ding a, nangmah in maisakna na ngah theih loh gimna nang tungah hong tung ding hi. A thu na theih hetloh siatna na tungah hong tungvat ding hi. Na neulai a kipan na sep na mibumna le na aisannate ah kiptakin om in. Phattuamna na ngah kha ding a, mite na lausakzo kha ding hi. Nang tungah a hong kilak thu tampite hangin na gim hi. Vantungte a sehin khenin, aksite en a, khadet simin nang tunga thupiang ding a hong genkhol mite tu-in dingsak inla, nangmah kihonsak in. En in, amaute pen buhkung tawh kibang uh a, mei in amaute kangtum hi. Meikuang’ vangliatna panin amau le amau kihontawm thei lo uh hi. Hih pen khua lumna ding mei-am hi lo a, awi ding mei zong hi lo hi. Nang tawh na a semkhawm, na neu lai a kipan nang tawh na a semkhawmte tungah hih thute hong tung ding hi. Amaute pen amau’ tum ciatah zauvak uh a, nang a hong hon ding kuamah om lo hi. Israel min tawh a kilo, Judah sung panin a piangkhia, Topa ’ min tawh thu ciam napi-in, thuman thutak tawh Israel Pasian a pulak lo Jakob innkuan aw, hih thu ngai un. Note tua bang hinapi-in, khuapi siangtho sungah a teng mite ihi a, Israel Pasian i muang hi. Ama min pen Vanglian Topa ahi hi, ci-in kisaktheihna-in na neizaw lai uh hi. A masa lama nate thu tanglai-in ka gen a, keima kam panin tuate gingkhia-in ka kitheithangsak hi. Tua ciangin thakhat thu-in keimah in ka sem a, a hong piang hi. Note pen paupeengin na ngawng uh sik thagui bang hi a, na thatang uh sumngo bangin a sakna thei khin ka hih manin, note in, “Ka milim un hihte bawl a, a kisui ka milim uh le a kisung ka milim un thu pia hi,” na cih theih loh nadingun tanglai a kipanin note tungah hih thute kong gen a, tuate hong pian’ ma-in note tungah kong zasakkhol hi. Ka gensa thu khempeuh hong tungta ahih manin, na gennate a man hi, na hong cih ding uh hita hi. Tu a kipanin na a thakte, na theih ngei loh uh hong tung ding a ki-im nate kong gen ding hi. Hihte pen tuhunin a piangsak ka hi a, a beisa hunah hih bang piang nai lo hi. A piang khinsa thu hileh, ka theihsa uh thu hi, na ci kha ding uh hi. Note pen muantheih ding na hihlohna uh, na suah tung uh a kipan mi lehdo thei na hihna uh ka hong thei hi. Tua ahih manin hih thute na za ngei kei uh a, zong na thei ngei kei uh hi. Note khempeuh kong suksiat khak loh nadingin ka min ka ngaihsutna tawh ka hehna diahin, keimah hong kiphatna ka ngaihsutna-in note tungah ka ki-ip hi. Meikhuk sungah ngun a kisiansak bangin gimna meikhuk sungah note kong ze-et hi. Ahi zongin note bangmahin a kimang lo na hihna uh hong kimu khin hi. Keimah ka kikhualna, keimah ka kingaihsutna-in hih bangin kong hih hi. Bang hang hiam cih leh ka min a siat ding kilawm ahi hiam? Midang khat tungah keima minthanna ka pia kei ding hi. Jakob aw, ka thu ngai in. Kong sap Israel-te aw, ka thu hong ngai un! Kei pen amah ka hi a, kei pen a masa hi-in, kei pen a nunung zong ka hi hi. Ka khut in leitung bulpi koih a, ka khut taklam in vantungte zal hi. Amaute ka sap ciangin amaute omkhawm pah uh hi. Note khempeuh hong kikhawm unla hong za un! Amaute sung panin kua in hih ka sep ding nate genkhol thei ahi hiam? Ka teelsa mipa in Babylon tungah keima ngimna sem ding a, Khaldea mite’ langkhatah kei ka pang ding hi. Kei, keimah in thu genin amah ka sam a, kei in amah ka panpih a, amah a dau pai ding hi. Kei kiangah hong nai unla, hih thu hong za un. A kipat cil a kipanin a simthamin thu ka gen ngei kei a, tua thu a pian a kipanin kei ka om hi. (Tu-in Topa Pasian in kei tungah a vangliatna hong pia a, kei hong sawl hi.) Israel-te’ Siangtho Pa, nangmah hong hon Topa in: Phattuamna na ngah nadingin nang a hong hilh, na zuih ding a kilawm lampi-ah a hong paipih Topa na Pasian ka hi hi. Ka thupiakna a ngai hi hoh leteh! Nangma nopsakna gunpi bang ding a, na thumanna, tuihualte tawh kibang ding hi. Na tu le na tate sehnel zah pha ding a, na suanlekhakte sehnel vui zah pha ding hi. Keima mai-ah amaute’ min kiphiatkhia lo ding a, kisusia ngei lo ding hi, a ci hi. Babylon panin paikhia-in Khaldea gam panin tai inla, lungdamna tawh hih thu genin taangko inla, leimong dongin puak in. “ Topa in ama nasem Jakob honkhia khinzo!” ci-in gen kawikawi in. Amah in sehnel gam kantanin amaute a paipih ciangin a dang uh taak lo hi. Suangpi panin amau a dingin amah in tui a luangsak hi. Amah in suangpi khangkhamsak a, tui a phulkhia hi. Tua ahih ciangin migilote a dingin nopna om lo hi, Topa in ci hi. Tuipi gei-a om gamte aw, ka thu ngai un. Gamlapi-a om mihingte aw, ka thu ngai un. Ka suah ma-in Topa in kei hong teel a, ka nu sungah ka om lai-in amah in keima min hong pulak khin hi. Amah in ka thugente, namsau hiam bangsak a, ama khut tawh keimah hong hu hi. Amah in a kinawtngil thaltang bangin kei hong bawl a, a hiamsa-in zat pah dingin a thallawng sungah kei hong koih hi. Amah in kei kiangah, “Nang pen keimah hong kiminthansakna ding ka nasempa Israel na hi hi,” a hong ci hi. Ahih hangin keimah in, “Na ka sem a, ahi zongin a kimanna om lo hi. Ka thatang khempeuh ka beisak a, ahi zongin bangmah ka tangtun kei hi. Ahi zongin Topa in a manin na hong sem ding, ci-in ka muang a, ka sep thaman hong pia ding hi, ci-in ka um hi,” ka ci hi. Ama kiangah Jakob kipaipih kikin, ama kiangah Israel-te a kikaihkhop theih nadingin Topa ’ mai-ah kei hong kipahtawi a, Pasian pen keima thahatna suakin, ama nasem dingin ka nu sung panin keimah a hong piangsak Topa in tu-in thu hong gen hi. Amah in, “Jakob minamte a laamto ding le a suaktalai Israel mite a ngei uh a bangsakkik dingin keima nasem na hihna pen a baih lua mahmah nasep ahi hi. Keima hotkhiatna in leimong dong a phak theih nadingin minam dangte tungah khuavak ahi dingin nang kong pia ding hi,” hong ci hi. Israel a honpa le ama Siangtho Pa ahi Topa in nakpitakin simmawhna a thuak, minamte in a muhdah, gam ukte’ nasempa tungah: “Nangmah a hong teel Israel-te’ Siangtho Pa, a thuman Topa ’ hangin mite na hotkhiatna thu kumpite in a muh uh ciangin zahtakna tawh na mai-ah hong ding ding uh a, na mai-ah uliante hong kun ding uh hi,” hong ci hi. Topa in ama mite kiangah, “Note hotkhiat ding hun a hong tun ciangin maipha kong pia ding a, huhna nong ngetna uh ka hong pia ding hi. Note hong kemin ka hong hu ding a, note’ tungtawnin mi khempeuh tawh thuciamna ka bawl ding hi. A kinusia na gam sung uhah note kong tengsakkik ding hi. Thongkia mite tungah, ‘Hong paikhia un,’ ci-in, khuamial sunga om mite tungah, ‘Hong pusuak un,’ ka ci ding hi. Amaute pen lam tawntung ah an a ne, mual pawn a sang munte khempeuhah nuamtakin a gamta tuute tawh kibang ding uh hi. Amaute gilkial loin, dangtak lo ding uh a, huihsa le nisa in amaute sukha lo ding hi. Bang hang hiam cih leh amaute a hehpih pa in amaute lamkaih ding a, ciktui kiangah amaute paipih ding hi. “Keimah in ka mite a dingin mual liante kantanin lampi ka ziksak ding a, ka lam lianpite-ah phung ka ciang ding hi. Ka mite a gamlapi panin hong pai ding uh a, leilu lam gam le nitumna lam gamte panin amaute hong pai-in, pawlkhatte, leitaw lam Siene gam panin hong ciah ding uh hi,” a ci hi. Vantungte aw, lungdamin la sa un. Leitung aw, lungdamin diang in. Mual liante aw, lungdamin la sa-in awngkhia un! Bang hang hiam cih leh Topa in ama mite hehnem ta a, gimna a thuak ama mite hehpih ta ding hi. Ahih hangin Jerusalem mite in, “ Topa in eite hong nusia khin a, hong mangngilh khinta hi,” a ci uh hi. Ahih hangin Topa in, “Ama sung panin a suak a tapa a hehpih lo ding zahin nupi khat in ama nawi a teep naungek mangngilh thei ding ahi hiam? Hihte nangawn in mangngilhkha thei ding a, ahi zongin keimah in kong mangngilh kei ding hi. Jerusalem aw, ka khutpeek sungah nang kong gelh khinzo a, nang ka hong mangngilh ngei kei ding hi. “Nang a hong lam mite in nang a hong susiate nuaisiah khinta uh a, nang hong siasakte nang kiang panin taikhia khinta uh hi. Na kimkotah khuadakto inla mu in. Na mi khempeuh hong kikhawm uh a, nangma kiangah amaute hong ciah uh hi. Kei pen a nungta Topa ka hih mah bangin, na mite khempeuh hangin nang na kisial ding a, mothak in kizepna-in a zat bangin amaute khempeuh na zang ding hi. “A kisia, a kinusia khinsa nangma munte le a kisusia nangma gam pen nangma tungah a teng mite a dingin tu-in kawcik lua ta ding a, nang hong valhtum mite, gamlapi-ah om ding uh hi. Na kikhen hun uh, salin a om sungun a suak mite in nangma kiangah, ‘Kote a dingin mun kawcik lua hi; ka omna ding uh mun hong bawlsak in,’ hong ci ding uh hi. Tua ciangin na lungsimah, ‘Kua in keima a dingin hih mite hong hinkhiatsak ahi hiam? Kei hong kinusia-in tang-awlin ka om a, salin hong kikoihin hong kipaikhiatpih hi. Hihte kua in hong khoisak ahi hiam? Keimah guakin hong kinusia hi. Tua ahih manin koi lai panin hihte hong piang ahi hiam?’ na ci ding hi,” a ci hi. Topa Pasian in, “En in, minamte tungah ka khut ka laamto ding a, mite tungah ka lim ka lakto ding hi. Amaute in a angsung uhah na tapate tawi-in hong paipih ding uh a, a liangko tung uhah na tate hong pua ding uh hi. Kumpite pen nang hong kem na pate hong hi ding a, kumpinute pen nang hong khoi na nute hong hi ding hi. Amaute in a maitang uh leilak ngatin nang kiangah hong kun ding uh a, na khe-a leivui baangte a liak ding uh hi. Tua ciangin kei pen Topa ka hihna na hong thei ding hi. Kei hong muangte maizum lo ding hi,” a ci hi. A thahatpa’ kiang panin nate kilakhia zo ding a, thukhauh pa’ mat mite kihonkhia zo ding ahi hiam? Topa in, “A thahatpa’ mat salte kilakhia ding a, a thukhauh pa’ na kilakhia ding hi. Nang hong dem mite keimah in ka dem ding a, na tate ka honkhia ding hi. Nang hong nengniam mite pen amau’ satak mah ka nesak ding a, zukham bangin amau’ si mah a kham ding uh hi. Tua ciangin kei pen Jakob’ Vanglian Pa, nang hong Tankhiapa, nang hong Hon Topa ka hihna mi khempeuh in hong thei ding uh hi,” a ci hi. Topa in, “Amah ka ciahsakna, na nu a kimakna lai koi-ah om ahi hiam? Tua ahih kei leh nang kong zuakna ka leibatnate koi pan ahi hiam? Nomau mawhna hangin note hong kizuak a, nomau khialhna hangin na nu uh kipaikhiasak hi. “Kong pai ciangin bang hangin mi khat zong om lo ahi hiam? Kong sap ciangin bang hangin hong dawng ding khat zong om lo ahi hiam? Hong hon zo lo zah dingin ka khut hat lo lua ahi hiam? Tua ahih kei leh zong note khahkhiatna ding vangliatna nei lo ka hi hiam? Keima taina tawh tuipi ka keusak a, gunte pen sehnel gam ka suaksak hi. Tui om loh manin a ngasate dangtakin si-in a uih gawp hi. Vantungte khuamial ka silhsak a, amau’ kituam nadingin puanhampi ka bawl hi,” a ci hi. A lunggim mite ka thahatsak theih nadingin Topa Pasian in ka gen ding thu hong hilh khin hi. Ama hong hilhnate a ngai dingin zingsang simin lawpna hong guan hi. Topa Pasian in thu theihtelna hong guan hi. Amah ka lehdo kei a, zong ka nungngat kei hi. Hong satte, ka nung ka dawh a, ka khamul-in a hong kai mite, ka paang ka dawh hi. Maizumna le cilphihna panin ka maitang ka hei kei hi. Topa Pasian in kei hong huh hi. Tua ahih ciangin cih nading thei loin ka om kei hi. Tua ahih manin ka thuak tentan a, hong maizumsak lo ding hi, ci-in ka thei hi. Ka thumanna a langsak Pasian a nai-ah hong om hi. Keima langkhatah kua hong pangzo ding ahi hiam? Thukhen zumah kikhia nu’ng. Thukhen zumah kua in hong khia nuam ahi hiam? Kei hong langpang dingin hong kuan tahen. Topa Pasian in kei hong huh hi. Kua in kei mawh hi, ci-in gen thei ding ahi hiam? Amaute khempeuh puan bangin paatkhia ding uh a, nget in amaute netum ding hi. Topa kihta a, a nasempa’ thu a mangte khempeuh khuamial sungah na pai hangun Topa muang unla, Pasian suanin nei un. Midang suksiat ding a sawm mite aw, note’ vaihawm siatna mah in note hong susia ding hi. Topa ’ khut tung panin gimna thuakin na lumsuk ding uh hi. Topa in, “Hotkhiat ding a ut, Topa a zongte aw, ngai un. Note hong ki-eu khiatna suangpi, note hong kitawhkhiatna khuk en un. Na pa uh Abraham le note’ pianna Sarah ngaihsun dih un. Bang hang hiam cih leh khat bek ahih laitakin amah ka samkhia a, amah thupha pia-in tampi ka phasak hi. “Tu-in Zion ka hehnem ding hi. A kisia ama munte khempeuh puahpha-in, ama gamlakte Eden huansung ka bangsak ding a, ama sehnel gamte Topa ’ huan ka bangsak ding hi. Ama sungah lungdamna le kipahna, lungdamkohna le lasakna awging om ding hi. “Ka mite aw, ka thugen hong ngai un. Minamte tungah thu ka hilh a, keima thukham in amaute tungah khuavak tun ding hi. Manlangin hong pai-in amaute ka honkhia ding hi. Ka gualzawh ding hun hong naita hi. Keimah in minamte ka uk ding hi. Tuipi gei-a gamte in kei hong muang uh a, amaute in keima hotkhiat ding hong ngak uh hi. Dakto-in vantungte en unla, leitung zong ensuk un. Bang hang hiam cih leh meikhu bangin vantungte mangthang hi. Puan bangin leitung paatkhia ding a, ama tunga tengte pen thokang bangin si ding uh hi. Ahih hangin keima hotkhiatna kip tawntung ding a, keima khahkhiatna bei ngei lo ding hi. “Thuman a thei, na lungsim sung uhah keima thu a vom mite aw, ka thu ngai un. Mihingte’ kosiatna kihta kei unla, amaute’ hong simmawhna hangin lungkia kei un. Bang hang hiam cih leh nget in puan a nektum bangin amaute beimang ding a, lungno in samul puan a pehtum bangin amaute maimang ding uh hi. Ahih hangin keima khahkhiatna om tawntung ding a, khang tawntungin ka hotkhiatna kip ding hi,” a ci hi. Khanglo in, khanglo in; thakhauh in, Topa aw. Khang sawtpi, hun lui lai-a bangin na vangliatna zangin hong huh in. Rahab a satzan gawp pa, gulpi a sunpa, nangmah hi lo na hi hiam? Tuipi, tuithukpite a keusak, a kihonkhia mite’ kantan dingin tuithukpite lampi-in a bawlpa nangmah hi lo na hi hiam? Topa ’ mi a kithehthangte hong ciahkik ding a, lasakna tawh Zion-ah hong pai ding uh hi. A tawntungin amaute lungdam ding uh a, amaute in lungdamna le kipakna ngahin, dahna le khuisatna nei nawn lo ding uh hi. Topa in, “Kei, keimah pen note hong hehnem pa ka hi hi. Lopa sangin sauvei a nungta zaw tuan lo, mihing lellelte, bang hangin kihta na hi uh hiam? Vantungte zalin, lei bulpite a koih, note a hong bawl Topa hong mangngilh khinta na hi uh hiam? Note susia dingin a kithawi, no a hong nengniamte’ hehna, bang hangin kihta-in lau tawntung na hi uh hiam? Amaute’ hehna in note hong susiazo het lo ding hi. Thong sunga kikhum mite kikhah baih ding hi. Amaute sauveipi nungta ding uh a, annek tuidawn kitasam lo ding uh hi. “Bang hang hiam cih leh kei pen tuipi tokgawpin tuihualte a hawksak Topa, note’ Pasian ka hi hi. Keima min pen Vanglian Topa ahi hi. Vantungte zalin lei bulpi ka phut a, Zion kiangah, ‘Nang pen keima mi na hi hi. Nang tungah thu kong hilh khin a, ka khut tawh nang ka hong hu hi,’ ka ci hi,” a ci hi. Topa ’ khutsung panin ama gimpiakna hai a dawn khin, hoina haipi a tawdat dongin a dawn khin Jerusalem aw, nangmah kisosuah tawm in. Nangmah kihanthawn tawm inla, dingtangto in. Na mite khempeuh sung panin nang a hong makaih ding kuamah om lo a, na khoisa tapate khempeuh lak panin na khut a hong len ding kuamah om lo hi. Nang tungah siatna le maimanna, kialpi le namsau, hih thu nih hong tungzo hi. Kua in nang hong dahpih ding ahi hiam? Kua in nang hong hehnem ding ahi hiam? Na mite gim khin a, ngenthang sungah a awk sanang bangin lam kiu khempeuhah amaute lum uh hi. Topa ’ hehna, na Pasian’ taina amaute in a thuak uh hi. Tua ahih ciangin gimna a thuak, zu ne lopi-in zukham a bang note in hih thu za un. Ama mite a dingin a thumsak Topa, Topa ahi note’ Pasian in hih bangin ci hi: “En un, note’ khutsung panin hoina hai ka lakhia khin a, ka hehna haipi na dawn nawn kei ding uh hi. Note kiangah, ‘Na tung uhah kong pai theih nadingun kunsuk un,’ a hong ci, no a hong bawlsiate’ khut sungah tua haipi ka koih ding hi. Note in na nungzang uh leilak bangin bawlin, amaute’ pai nadingin kongzing lampi bangin na bawl khin uh hi,” a ci hi. Zion aw, khanglo in; khanglo inla na tha khauhsak in. Khuapi siangtho Jerusalem aw, na puan hoihte silh in. Bang hang hiam cih leh dawibia mite le a nin mite nang sungah hong pai nawn lo ding hi. A kimancip Jerusalem mite aw, leivui panin kisingkhia unla dingto un. A kiman Zion mite aw, na ngawng panun hong kihenna khaute sutkhia un. Bang hang hiam cih leh Topa in, “Man nei loin note hong kizuak a, sum pia loin note hong kitankhia ding hi. Bang hang hiam cih leh Topa Pasian in hih bangin ci hi: Egypt gamah peemta dingin ka mite a masa-in pai uh a, tua banah thu om lopi-in Assiria in amaute nengniam uh hi. Tu-in Babylon-ah tua bangmahin amaute tungah piang leuleu hi. Thu om lopi-in salin om uh hi. Amau a ukte, kihihsakna tawh awng uh a, sunthapai-in keima min kisimmawh hi. Tua ahih ciangin ka mite in keima min hong thei ding uh a, thu a gen pa pen keimah ka hihna tua ni ciangin amaute in hong thei ding uh hi. Keimah, hih lai-ah ka om hi,” a ci hi. Thuhoih hong puak, kilemna thu a genzak, thuhoih thupha a hong puak, hotkhiatna thu a genzak, Zion tungah, “Na Pasian in uk hi,” ci-in mualte kantanin thu hong gen kamtai pa bangzahin hoih ahi hiam? Ngai un, na galvilte un a aw uh sangsak a, amaute in lungdamin la sa khawm uh hi. Bang hang hiam cih leh Zion-ah Topa hong paikikna amaute in maitang kituahin a mu uh hi. A kisia Jerusalem munte aw, la sa-in kiko khawm un. Bang hang hiam cih leh Topa in ama mite hehnemta a, Jerusalem honkhia khinta hi. Topa in minam khempeuh mai-ah a vangliatna siangtho zangin ama mite honkhia hi. Leitung mi khempeuh in i Pasian’ hotkhiatna mu ding uh hi. Kihem un, kihem un. Babylon panin paikhia unla, a nin nate lawng kei un. Topa ’ beellekuang a puate aw, khuasung panin paikhia unla, nomau kisiansuah tawm un. Note’ mai-ah Topa pai ding a, Israel Pasian pen note’ nungah hong cing pa hi ding ahih manin note galtai-in paikhia loin, a kinawhsa-in na paikhia kei ding uh hi. Topa in, “En un; ka nasempa a dau pai-in, amah a lianin kikoihin kilaamto ding a, sang mahmah ding hi. Mi tampite in amah lamdang sa uh hi. Mihing a bang nawn lo zah dongin nakpitakin a mai sia a, mihing a sun nawn lo zah dongin a mel a sia hi. Tua ahih ciangin amah in minam tampite dipkuasak ding a, ama hangin kumpite in a kam uh cih ding uh hi. Bang hang hiam cih leh amaute tungah a kigen ngei lo nate mu ding uh a, amaute in a zak ngei loh uh nate theitel ding uh hi,” a ci hi. Tua ciangin mite in, “I zak thu kua in um thei ding ahi hiam? Hih bang thu-ah Topa ’ vangliatna khut kua in bangci muh theih ding ahi hiam? Bang hang hiam cih leh amah pen kungno khat ahi a, lei keu sungah a om singzung khat bangin ahi zongin ama mai-ah khangto lel hi. Eite’ et dingin amah in lim le deihhuaina mel bangmah nei lo a, eite’ deih dingin hoihna nei lo hi. Amah pen mite in simmawhin nusia a, gimna le natna a thuak ahi hi. Mite in en nuam loin a mai uh a humsan uh mipa bangin amah kisimmawh a, eite in amah i thusim kei hi. “Amah in eite’ natna teng thuakin, eite’ gimna teng pua khin taktak hi. Ahi zongin eite in amah pen ama mawhna hangin Pasian in a gimsak, gimna a thuak bangin i ngaihsun hi. Ahih hangin eite’ khialhna hangin amah kiliamsak a, eite’ mawhna hangin amah kisatnim hi. Ama gim thuakna hangin nopna i ngah a, ama liamna hangin damna i ngah hi. Eite khempeuh in tuu bangin lam i khial khin a, eite khempeuh eimau san ciatah i pai khin hi. Topa in eite khempeuh’ mawhnate ama tungah a suan hi. “Amah kinengniamin gimna a kithuaksak hangin amah kam khat beek pau lo hi. Sa gote kiangah a kipaipih tuuno le a mulmette mai-ah a kipaipih tuu a ham loh mah bangin amah kam khat beek pau lo hi. Nenniamna le thukhenna tawh amah kipaikhiatpih hi. A hingte’ gam panin amah kikhenkhia-in, ama mite’ khialhna hangin amah in gimna thuak hi, ci-in ama khang mite kua in thei ahi hiam? Amah in mawhna bawl lo, zuau gen ngei lo napi-in, amaute in migilote tawh sihna a kibang, mihaute tawh hankhuk a kibang a bawlsak uh hi,” a ci uh hi. Ahih hangin amah a kisatnim ding pen Topa ’ deihna ahi hi. Amah in natna thuaksak hi. Mawhna hangin ama pumpi a kipiak ciangin amah in a suanlekhakte mu ding a, ama khan a sau ding hi. Topa ’ deihna ama khut sungah pung ding hi. Amah in a gimna thaman mu-in a lungdam ding hi. A mawk thuak ahihlohna thei-in a thuman ka nasempa in mi tampi tak a dik suaksak ding a, amah in amaute’ mawhnate pua ding hi. Tua ahih ciangin amah pen miliante tawh nate ka hawmsak ding a, amah in mihatte tawh nate a hawm ding hi. Bang hang hiam cih leh amah in sihna dongin a nuntakna piakhia a, khialhna a nei mite tawh a kisim khawm hi. Ahih hangin amah in mi tampi’ mawhna pua a, khialhna a neite a dingin a thumsak hi. Ta a nei lo, a ciing mi aw, lungdamin la sa in. Nausuak natna a thuak ngei lo mi aw, la sa khia inla, a gingin kiko in! Bang hang hiam cih leh a kinusia numei’ tate pen a kitenpih numeite’ tate sangin tamzaw ding hi, Topa in ci hi. Na bukmun khan inla, na tenna puanbukte kizalsak in. Cil bawl kei in. Na khaute sausak inla, na khetphimte khenkip in. Bang hang hiam cih leh taklam le veilamah nangmah kizelin, na suanlekhakte in minam dangte’ leitang luah ding uh a, a kinusia khuapite mi tawh dimsak ding uh hi. Lau kei in, maizumna na thuak kei ding hi. Cihna ding thei loin om kei in; maizumin nang hong kikoih lo ding hi. Bang hang hiam cih leh na khangno lai-in na zulhtatna le na meigonna hangin hong kikonate na phawkkha nawn kei ding hi. Bang hang hiam cih leh nangmah hong Bawlpa pen nang a dingin na pasal bang hi ding a, ama min pen Vanglian Topa ahi hi. Israel-te’ Siangtho Pa pen nang hong honkhia pa hi a, amah pen leitung buppi’ Pasian a kici hi. Khangno lai-a zineih a kima, kinusia-in a dah mahmah zi a kisamkik bangin Topa in nang hong samkik hi, na Pasian in ci hi. Tomno sung nang kong nusia pak a, ahih hangin hehpihna lianpi tawh nang kong lakik ding hi. Hehluatna hangin tomno sung nang kiang panin ka maitang ka seel a, ahih hangin tawntung itna tawh nang kong hehpih kik ding hi, nangmah a hong honkhia Topa in ci hi. Bang hang hiam cih leh hih pen kei a dingin Noah’ hun mah tawh a kibang hi. Noah tuite leitungah hong pai nawn lo ding, ci-in ka kiciam mah bangin nang tungah heh nawn loin nang a hong tai nawn lo dingin ka kiciam hi. Bang hang hiam cih leh mual liante kihemin, mual neute a kikhin zongin nang kiang panin ka itna kip paikhia ngei lo ding a, na nopsakna ding ka thuciamna kinlo ding hi, nang a hong hehpih Topa in ci hi. “Gimna a thuak, huihpi’ nawkgawp, hehnepna a ngah lo khuapi aw, en in, na suangte, suangvui hoih tawh ka ciang ding a, na bulpite suangmanpha tawh ka hih ding hi. Na khumdawnte suangmanpha tawh, na kulhkongpite suangsan tawh, na kulh khempeuh a manpha suang tawh ka bawl ding hi. “ Topa in na tapate khempeuh hoihtakin hilh ding a, na tapate daupai mahmah ding uh hi. Thuman le thutang in nang hong thahatsak ding hi. Nenniamna tawh na kigamla ding a, nang na lau kei ding hi. Kihtakna tawh na kigamla ding a, nangma nai-ah tuate hong pai lo ding hi. Mi khatpeuh in note tawh kidona a piansak leh tua pen keima kiang pan hi lo hi. Note tawh kidona a piangsak peuhmah note’ hangin puk ding uh hi. “En un, pum zapin ama kizatna ding ciatin a seek dingin hiam a bawl sikseekpa ka piangsak khin hi. A susia dingin a susia gawp thei pa zong ka piangsak khin hi. Nangmah do nadingin a kibawl hiam peuhmah maavang lo ding a, thukhenna sungah na langah a pang mi khempeuh na nialgawpzo ding hi. Hih thu pen Topa ’ nasemte’ gamhluah le keima kiang panin amaute’ dikna a kilahna ahi hi, Topa in ci hi,” a ci hi. A dangtak mi peuhmah tui phualah hong pai un. An nei lote aw, hong pai unla hong ne un! Hong pai un; a man ding bangmah piak kul loin leenggahzu le bawngnawi na duh zahzah uh hong ne un. An ahi lo nate lei nadingin bang hangin na sum uh zang a, hong gilvahsak thei lo nate ngah nadingin bang hangin na sem na hi uh hiam? Keima thu limtakin ngai-in a limci an ne unla, anlimte ah nuamsa-in om un. Ka mite aw, ka thu ngai unla, kei kiangah hong pai un. Na nuntak theih nadingun a thu hong za un. David ka it mah bangin keima itna kip, tawntung thuciamna note tawh ka bawl ding hi. David pen mite tungah teci ding, mite a makai ding le a ukpa dingin ka koih hi. Tu-in note in na theih ngei loh uh minam dangte na sam ding uh a, amah in note hong minthangsak zo ahih manin, Topa note’ Pasian, Israel-te’ Siangtho Pa’ hangin note hong thei lo minamte note kiangah hong tai ding uh hi. A kimuh thei hun lai-in Topa zong unla amah a nai om lai-in thu ngen un. Migilo in ama gitlohna nusia hen la, thuman lo mi in ama ngaihsutna nusia hen. Amah in a hehpih theih nadingin Topa eite’ Pasian’ kiangah amah paisak un. Bang hang hiam cih leh a mawhna maisiangsak ding hi. Bang hang hiam cih leh keima ngaihsutnate nomau’ ngaihsutna bang hi lo a, keima paiziate nomau’ paizia bang hi lo hi, Topa in ci hi. Vantung pen leitung sangin a sanzawk mah bangin, keima paiziate zong, nomau paizia sangin sangzaw a, ka ngaihsutnate zong, nomau ngaihsutna sangin a sangzaw ahi hi. Bang hang hiam cih leh vantung panin guahtui le vuk hong pai-in, amaute ciahkik loin leitung kawtsakin, kungnote mengin selkhiasak a, khai vawhpa khaici pia-in a ne pa tungah an a piak mah bangin, keima kam panin a paikhia ka thu zong tua mah bang ding hi. A hawmpi-in kei kiangah hong tungkik lo ding a, keima ngimnasa bangin tangtung sakin, amah ka sawlna thu tangtun ding hi. Bang hang hiam cih leh Babylon panin lungdamna tawh na paikhia ding uh a, nopsakna tawh hong kipaikhiatpih ding hi. Note mai-a mual liante le mual neute inla sa-in awng ding uh a, gam sunga sing khempeuh in a khut uh beeng ding uh hi. Ling tangin tak kung hong po ding a, lingkung tangin mui kung hong po ding hi. Tua pen Topa ’ nasepna phawk tawntungna, a kilakhia ngei lo ding, a tawntungin a om lim khat hi ding hi, a ci hi. Topa in hih bangin ci hi: “A sawt loin note ka hong honkhia ding a, hong khahkhia ding ka hih manin thutang thumanin gamta un. Hih banga a gamta mite, hih thu a lenkip mihingte, Sabbath tangin a siasak lote, siatna bawlna ding panin hoihtakin a kikemte, thupha ngah mi ahi hi,” a ci hi. Topa pawlin a beel gamdang mipa in, “ Topa in ama mite kiang panin kei hong khenkhia taktak ding hi,” ci kei hen. A kiget mipa in, “En un, kei pen Pasian’ mite lakah a kihel thei ding ka hi kei hi,” ci kei hen. Bang hang hiam cih leh Topa in hih bangin ci hi: “Keima Sabbath nite tangin, kei hong lungdamsak thei nate teel a, ka thuciamna a lenkip a kiget mite tungah ka innsung le ka huang sungah tanu le tapate sangin a hoihzaw phawkna le min ka pia ding a, a mang ngei nawn lo ding a kip tawntung min amaute tungah ka pia ding hi. “Ama na a sem ding, Topa ’ min a it ding, ama nasem a suak dingin Topa pawlin amah a beel gamdang mite, Sabbath ni tangin a siasak lo, ka thuciamna hoihtakin a lenkip mi peuhmah, ka mual siangtho-ah paipihin keima thungetna inn sungah ka lungdamsak ding a, amaute’ meihal biakna le a biakpiaknate uh ka biakna tau tungah kisang ding hi. Bang hang hiam cih leh ka inn pen mi khempeuh a dingin thungetna inn kici ding hi. Israel a kikhenthangte a kaikhawm Topa Pasian in, a kikaikhawmsa mite banah midangte keima kiangah ka kaikhawm lai ding hi, ci hi,” a ci hi. Lo sungah a om ganhing khempeuhte, gamlakah a om ganhing khempeuhte aw, a netum dingin hong pai un. Amau’ galvilte a mit uh taw a, amaute khempeuh in bangmah thei lo uh hi. Amaute khempeuh ui ham thei lo inncing tawh kibang uh a, amaute in tawng thei lo uh hi. Mot paupau, lumlum, lususu in om ding bek nuam a sa uh hi. Uite in nakpitakin duh uh a, kham hun cih nei ngei lo uh hi. Tuucingte in zong thutheihna nei lo uh hi. Amaute khempeuh amau tum ciatin gamta uh a, a vekpi-un amau’ phattuamna ding bek a zong ciat uh hi. Amaute in, “Hong pai un, leenggahzu nene ni; khamtheihzu dawndawn ni. Zing ciangin zong tuni sangin nuamzaw lai ding hi,” a ci uh hi. Thuman mipa si a, kuamah in tua thu ngaihsutin nei nawn lo hi. Kuamah in a theih loh kalin thutak mite si uh hi. Bang hang hiam cih leh tuahsiatna panin thuman mipa kilakhia a, nopsakna sungah amah tum hi. Thutangin a gamta mite in a sihna uhah nopna ngahin tawlnga uh hi. No, aisan numeite’ tapate, numei tawh a mawh mite le numei pangtatte’ tuletate aw, hih lai-ah hong pai un. Kuam sunga om suangmaite na la uh a, tua suangmaite na bia uh hi. Tuate tungah tui tawh biakpiakna sungin, an tawh biakpiakna na paipih uh hi. Hih thute’ hangin kei lungdam ding ka hi hiam? A lian a sang mual tungah nulepa mawhna na bawl uh a, tua munah biakna pia dingin na paito uh hi. Kongkhak le kongkhakmung nungah nangmah in na milimte na suang hi. Nangmah in kei hong nusia-in na puante na suah a, nang hong luppih dingin na cial mite tawh na lupna zai deda tungah kahto-in, tua lai-ah na hukna teng na kamsak hi. Molek pasian kiangah a pai dingin sathau tawh khual na zin a, na paknamtuite tawh na siam tawpin na kipuah hi. Nang in gamlapi-ah na tangmite na sawl a, Leinuai dong nangawnah na paisak hi. A gamla na khualzinna hangin nang na gim mahmah a, ahih hangin nangmah in, “Lametna om kei,” na ci kei hi. Nang zuautatin kei na hong phawk kei hi. Kei na hong ngaihsut loh nading a piangsak zah dingin hih pasian-te bang hi leltak ahi hiam? Sauveipi sung pau loin ka om hithiat manin kei hong zahtak lo na hi hiam? Nangma gamtatna a manin na ngaihsunkha hi. Ahih hangin na gamtatnate ka pholak ding a, na milimte in nang hong huh zo lo ding hi. Nang cimawhin na kiko ciangin na milim kaihkhopte kihonsak in! Huih in amaute mutkhia-in, husanna in amaute seemkhia ding hi. Ahih hangin kei hong beel mi in leitang ngah ding a, ka mual siangtho a luah ding hi. “Zik un, zik un, lampi bawl un; ka mite’ lampi a dongkhak thei ding na khempeuh lakhia un,” kici ding hi. Bang hang hiam cih leh a sang, a lian, a nungta tawntung Pa, ama min Siangtho ahipa in hih bangin ci hi: “Kei pen a sangna mun le a siangtho munah ka om a, a kiniamkhiat mite’ lungsim le a kisik mite’ lungsim a thakhauhsakkik dingin kisikna le kiniamkhiatna lungsim a neite tawh zong kei ka omkhawm hi. Ka mite tungah nuntakna ka pia hi. Amaute ka mawhsak paisuak kei ding a, amaute tungah ka heh tawntung kei ding hi. Amau’ huaiham-mawhna hangin ka heh mahmah a, ka hehna lungsim tawh amaute gim pia-in ka nusia hi. Ahih hangin amaute a lungsim uh khauhin, a gamtat ngei bangun gamta lai veve uh hi. “Amau’ mawh gamtatnate a vekin ka mu khin a, ahih hangin amaute ka damsak ding hi. Amaute makaihin ka hehnem ding a, a dah a kapte hehnemin ka lungdamsak ding hi. Nopsakna, nopsakna, a gamla le a nai mi khempeuh tungah om tahen. Keimah in amaute ka damsak ding hi, Topa in ci hi. Ahih hangin migilote pen a kilok tui tawh kibang uh hi. Bang hang hiam cih leh tuipi khawlcip thei lo a, a tuite in buan le ninte laamto uh hi. Migilote a dingin nopsakna om lo hi,” ka Pasian in a ci hi. Na aw siit hetloin nakpitakin kiko inla, peengkul aw bangin gingsak in. Ka mihingte tungah amau’ khialhnate gen inla, Jakob innkuan tungah amau’ mawhnate gen in. Amaute pen, thumanin a gamta, amau’ Pasian’ biakna ngeina kipte a nusia lo minam bang keekin nisimin amaute in kei hong zong uh a, keima lampi a thei nuam uh hi. Amaute in keima kiang panin thukhenna man hong ngen uh a, Pasian’ kiang hong nai nuam uh hi. “Kote in an tang napi-in bang hangin kote hong phawk lo na hi hiam? Kote kiniamkhiatin om napi-in bang hangin kote hong thei kha lo na hi hiam?” hong ci uh hi. Note in an na tan’ uh ciangin nomau’ deihna na zong uh a, na nasemte uh na nengniam uh hi. Note in a kitawng ding, a kilai ding, gitloh gamtatin, khuttum tawh a kitum ding bekin an na tang uh hi. Hih bang lelin antanna tawh na thungetna uh hong kingai ding ahi hiam? Maugua kun bangin na lu uh kunsukin, puanhampi le vut tungah lumin, nomau na kigimsak tawmnate uh kei’ deih antanna nam sa na hi uh hiam? Hih bang hihna pen antanna man le Topa’ santheih pawl hi, ci ding na hi uh hiam? Kei’ deih antanna hih bang pawl ahi hi: Gitlohna khaute phelin, hakkol savun khaute phel a, a kinengniam mite khahkhia-in thuman lohna hakkol khempeuh suktan ding ahi hi. Na an uh a gilkialte tawh nekhawm unla, inn nei lo a zawngte na innsung uhah paipihin, tangguakin a om mite puan silhsakin, na mipihte uh kiang panin bu lo ding hi lo na hi uh hiam? Tua ciangin ka maipha pen phalvaktung hong bang ding a, note’ tungah hong taangkhia ding hi. Manlang takin na liammate uh hong dam ding hi. Note hong ompih tawntungin note kong hon ding a, na nung na mai uhah ka hong dal ding hi. Tua ciangin nong thungetna uh ka hong pia ding a, nong sap uh ciangin ka hong dawng ding hi. Mi bawlsiatnate khawlin, mi simmawhna le kam gilo na paunate uh na khawl uh a, gilkial mite an pia-in, kisapna a nei mite tungah a kisapnate na piak uhleh na kimkot uha khuamial pen khuavak hong suak ding a, na lungzinna uh nitaang hong bang ding hi. Tua ciangin note lam kong lak tawntung ding a, na hoihte tawh kong lungkimsak ding hi. A cidam a thahatin kong omsak ding hi. Tui tampi a ngah tawntung huan, a kang ngei lo ciktui tawh na kibang ding uh hi. Tanglai-in a kisia na munte uh na lamkik ding uh a, khang tampi sung a kisia bulpite na dingtosakkik ding uh hi. Note pen a sia a puahkik, ten nadingin mun siate a ngei a bangsakkikte hong kici ding hi. Note in Sabbath siangtho sakin, keima ni siangtho ni-in na nasepna panun khawlin Sabbath ni pen deihhuai sa-in, Topa’ ni siangtho pen pahtawihuai na cih uh a, note in pahtawi-in note’ deih bang zui loin, note’ ut bang hi loin motpau loin na om uhleh, keimah biakna hangin lungdamna na ngah ding uh a, leitung khempeuhah pahtawina kong ngahsak ding hi. Na pu uh Jakob tungah ka piak leitang luahin nuam na sa ding uh hi. Topa ahi keimah in hih thu ka gen khin hi, a ci hi. A honkhia zo lo dingin Topa zawngkhal lo a, khua a za thei lo dingin a bil ngong lo hi. Ahih hangin note’ mawhnate in note le na Pasian uh kikhenna hong piangsak a, amah in note’ aw hong zak theih loh nadingin na khialhnate un ama maitang liah hi. Bang hang hiam cih leh na khutte uh mi thahna sisan tawh nin a, na khutmete uh mawhna tawh a nin hi. Na mukte un zuauthu gen a, na leiite un gitlohna thu a gen hi. Kuamah in thutang tawh thu na nei kei uh a, thuman tak tawh thukhen zumah na pai kei uh hi. Note in bangmah lopi suanin nei-in zuauthu na gen uh a, siatna ding thu ngaihsunin buaina na piangsak uh hi. Na ngaihsutnate uh gul gunei tui bangin gu a nei hi a, na vaihawmnate uh maimom khau puan tawh kibang lel hi. Gul gunei tui khat sukham lehang adang khat hong tui zel hi. Na maimom khau puante uh kizang thei lo ding a, kuamah in silhlo ding uh hi. Na vaihawmnate uh tua maimom khau puan bangin a mawkna suak lel ding hi. Siatna bekbek na geelgeel uh a, na sepkhiat ding uh na ngaklah mahmah uh hi. Mawhnei lo mite thah ding haksa na sa kei uh hi. Na paina khempeuh uhah siatna vive om kawikawi hi. Note’ omna peuhah kuamah lungmuang thei lo a, note’ sepna khempeuhah thuman khat beek om lo hi. Na lungsim uh kawi mahmah a, hong zuikha mite in thunuam mu ngei lo uh hi. Tua ahih ciangin ei a hong gimsakte kiang panin Pasian in a hong hotkhiat lohna a hang i thei hi. Eite in a nuam ding i lamen a, ahi zongin lungzinna bekbek i tuak hi. Mittaw bangin kawm i zawt a, mit nei lote bangin i mai hi. Suntang laipi mahin khuamial lak bangin i tuk a, a hat mite lakah misi tawh i kibang hi. Eite khempeuh vompi bangin i humham a, vakhu bangin i thumthum hi. Eite in thutang i zong a, ahi zongin khat zong i mu kei hi. Hong hotkhiat ding i ngen a, ahi zongin bangmah hong piang lo hi. Bang hang hiam cih leh nangma tungah kote’ thupalsatna tampi tak pha a, ka mawhnate un kote’ langah teci hong pang hi. Kote’ thupalsatnate, ka mawhnate uh ka thei uh hi. Nangmah hong lehdo-in nang kong nial uh a, na thu kong zui kei uh hi. Midangte nengniamin nang kong lehdo uh hi. Ka ngaihsutnate uh khial a, ka thugente uh zuauthu vive ahi hi. Thutang kihawlkhia a, thuman in hong naih thei lo hi. Mihonpite’ kikhopna munah thuman kizang lo a, thutang tum thei lo hi. Thuman om lo lua ahih manin siatna a pelh mipa pen mihai-in kingaihsun zawsop hi. Topa in hih thu mu a, thutang om lo ahih manin amah lungkim lo hi. Amah in nenniamna a thuakte a huh ding mi khat beek a om lohna a mu hi. Tua ahih ciangin amaute a honkhia ding le a gualzawh nadingin ama vangliatna a zang ding hi. Amah in thumanna pen awmdal lum bangin silh ding a, gualzawhna pen sik lukhu bangin khu ding hi. Na khempeuh a manin bawlkik nopna, gimna a piangsakte gim pia-in thukkik nopna lungsim puan bangin a silh ding hi. Amau’ gamtatna bangin amah in thukkik ding a, amah a langpangte gim pia ding hi. Ama galte a thukkik ding hi. A gamla pekah a om tuipi gei-a gamte zong a thukkik ding hi. Tua ahih ciangin nisuahna le nitumna kikalah a om mi khempeuh in amah zahtakin, a vangliatna kihta ding uh hi. Bang hang hiam cih leh huihpi nung bang, tuipi khang bangin amah hong pai ding hi. Topa in ama mite tungah, “Note a hong hu dingin Jerusalem-ah kong pai ding a, mawhna panin a kiheikhia mi peuhmah ka hong honkhia ding hi. “Note tawh hih bangin thuciamna ka bawl hi: Keima vangliatna tawh keima thukhamte le ka thuhilhnate note tungah ka hong pia khin a, tu a kipanin a tawntungin note in tua thute zui-in na suanlekhakte uh na hilh ding uh a, a khang khangin na maimangsak kei ding uh hi,” a ci hi. Jerusalem khuapi aw, tho-in sun nitaang bang in! Topa ’ minthanna in nangmah hong taanzo hi. Minam dangte khuamial in tuamcip ding a, ahi zongin nangma tungah Topa ’ khuavak hong taang ding hi. Ama minthanna in nang hong ompih ding hi. Nangma khuavak sungah minam dangte hong pai ding uh a, nangma taankhiatna sungah kumpite hong pai ding uh hi. Na kimkotah khuadak inla mu in. Na mite kikaikhawmin nang kiangah a ciah dingin hong pai uh hi. Na tapate gamlapi panin hong ciah ding uh a, na tanute naungek bangin hong kipua ding hi. Tua ciangin nangmah in mu-in na maitai ding a, na lungsim lingin na lungdam ding hi. Bang hang hiam cih leh tuipi tawnin nangma kiangah van hong kipuak ding a, minamte’ hauhna khempeuh nangma kiangah hong tung ding hi. Midian mite le Efah mite’ kalaoh note, kalaoh honpite in nang hong tuam ding uh a, Sheba gam sunga om khempeuh hong pai ding uh hi. Amaute in kham le paknamtui hong paipih ding uh a, Topa phatna a taangko ding uh hi. Kedar gam tuuhonte khempeuh nang kiangah hong kipua ding a, Nebaioth mite’ tuutalte nangma deih nana-ah kizang ding hi. Ka biakna tau tungah piak dingin tuate hong kipaipih ding a, keimah in a minthang ka biakinn ka minthangsak semsem ding hi. Meiipi leeng bangin hong pai henhan hih teembawte, vakhute a bukah a leeng bangin a hong leeng henhante kuate ahi hiam? Hih teembawte pen tuipi gei le tuikulh-ah a om teembawte hi a, Tarshish teembaw lianpite in hong makaih hi. Topa in nangmah a minthang mahmahin hong bawlkhin ahih manin gamlapi panin tua teembawte in nangma mite hong puak uh a, a ngun a khamte uh tawh hong puakkhawm uh hi. Topa, na Pasian, Israel-te’ Siangtho Pa a pahtawina-in a hong puak uh ahi hi. Gamdang mite in na kulhte ciangkik ding uh a, amau’ kumpite in nangma na hong sem ding uh hi. Bang hang hiam cih leh ka hehna tawh nang kong vatgawp khin a, ahih hangin tu-in keima maipha tawh nang tungah hehpihna kong nei khin hi. Kigual deudau-in a hong paina uhah a kumpite uh hong makai-in, mite in minamte’ hauhna na kiang hong tuttheih nadingin na kulhkongpite kihong tawntung ding a, a sun a zanin kikhak ngei lo ding hi. Bang hang hiam cih leh nangma na hong sem lo minam le kumpi gam beimang ding a, tua minamte kisia-maimang ding hi. Keima biakinn mun a mel a hoihsak dingin Lebanon mual minthanna ahi taaksan sing, hiangpa sing le taksingte na kiangah hong tung ding a, keima khengakna mun ka minthangsak ding hi. Nang hong nengniamte’ tate na mai-ah a kunsa-in hong pai ding uh a, nang hong simmawh mi khempeuh na khe mai-ah hong bok ding uh hi. Amaute in nang pen Topa ’ khuapi, Israel-te’ Siangtho Pa’ Zion, hong ci ding uh hi. Hong kinusia, hong kimudah, kuama hong nawk loh nang pen a tawntungin lianin, khang khat pan khang khat lungdamna ahi dingin ka hong bawl ding hi. Nupi khat in a ta nawi pia-in limtakin a kep bangin, minamte le kumpite in nang hong vakin hong kem ding uh hi. Tua ciangin kei pen Topa, nangmah a hong Honpa, nangmah a hong Tankhiapa, Jakob’ Vanglian Pa ka hihna na thei ding hi. Sumngo tangin kham kong puak ding a, sik tangin ngun kong paipih ding hi. Sing tangin sumngo, suang tangin sik kong puak ding hi. Nuam na sak nadingin na mang liante uh bawlin na nasem ukte uh thuman thutang tawh na ka semsak ding hi. Na gam sungah ngongtatna thu kiza nawn lo ding a, na gam sungah siatmaina le suksiatna om nawn lo ding hi. Nangmah in na kulhte pen Hotkhiatna, na kulhkongpite pen Phatna, na ci ding hi. Sun hunin ni pen nangma khuavak hi lo ding a, zan hunin kha pen na khuavak hi nawn lo ding hi. Topa pen a tawntung nangma khuavak hi ding a, na Pasian pen na minthanna hi ding hi. Na ni tum nawn lo ding a, na kha zong tumkik nawn lo ding hi. Bang hang hiam cih leh Topa pen nangma khuavak hi tawntung ding a, na thumna hunte beita ding hi. Na mihingte khempeuh thuman ding uh hi. Keima min a than nadingin keima suansa kung, ka khut tawh ka sepsa gam pen amaute in nei paisuak ding uh hi. A ngekpen mipa minam khat suak ding a, a neupente milianpi suak ding hi. Kei pen Topa ka hi hi. A hun a tun ciangin keimah in thakhatin hih thu ka tungsak ding hi. Gimna a thuak mite tungah thuhoih a puak dingin Topa in kei hong teelin hong sawl ahih manin keima sungah Topa Pasian ’ kha hong om hi. Lungsim kitamzante a damsak ding, salin a kimante tungah suahtakna thu a gen ding, a kikhum mite a dingin thong kong a hong ding, Topa in a mite honkhia-in, a galte a guallelhsak ding hun a tunna thu a gen ding, a thum mi khempeuh a hehnem ding, amaute pen a thuman mite kici-in, amah a kiminthansak theih nadingin Topa in a mite kem hi, a kicih theih nadingin Zion-ah a om a dah mite a lungdamna ding, a lungkham mite in phatna la a saktheihna ding, a lunggim mite in Pasian a phattheih nadingin amah in kei hong sawlzo hi. Amaute in tanglai-a a siasate, lampha kik ding uh a, a kisiamaisate ding kiksak ding uh hi. Amaute in khang tampi sung a kisiamaisa khuapite puahkik ding uh hi. Gamdang mite in na tuuhonte uh hong kepsak ding a, khualmite pen note’ lo kho le leenggui puahte hi ding uh hi. Ahih hangin note pen Topa ’ siampite hong kici ding a, mihingte in note pen i Pasian’ nasemte, ci-in hong gen ding uh hi. Minamte’ hauhna teng note in na ne ding uh a, amau’ hauhna teng note in na kisaktheihpih ding uh hi. Note’ maizumna tangin nopsakna a zah nihin na ngah ding uh a, note’ mindaina tangin no’ ngahna sungah na lungdam ding uh hi. Tua ahih ciangin na gam sung uhah a zah nih na luah ding uh hi. Note-a’ pen tawntung lungdamna hi ding hi. Bang hang hiam cih leh keimah Topa in thutang deihin, mi’ nate suhna le khialhna ka mudah hi. Amaute tungah amau’ thaman thuman takin ka pia ding a, tawntung thuciamna amaute tawh ka bawl ding hi. Amau’ suanlekhakte pen minamte lakah kithei ding a, amau’ tuletate pen mite laizangah kithei ding hi. Amaute pen Topa in thupha a piak mite hi, ci-in a mu mi khempeuhte in thei-in sang ding uh hi. Topa ’ hangin nakpitakin ka lungdam ding a, ka Pasian’ hangin kipakin ka diang ding hi. Bang hang hiam cih leh zipi pa puanhoih tawh kizemin, mothak nu a suangmanphate tawh a kizep mah bangin amah in hotkhiatna puan kei hong silhsakin, thumanna puanpi tawh kei hong tuam khin hi. Bang hang hiam cih leh leitung in a dawn meengsakin, huan in a kituhte a posak mah bangin Topa Pasian in minam khempeuh mai-ah thumanna le phatna a pokhia sak hi. Zion a kihotkhiatna thu khuavak bangin a taankhiat mateng, ama gualzawhna thu meivak kuang bangin a taankhiat matengin, Zion ka ngaihsutna-in gamdai takin ka om mawk kei ding a, Jerusalem ka ngaihsutna-in ka khawl mawk kei ding hi. Minamte in na gualzawhna mu ding uh a, kumpi khempeuh in na minthanna mu ding uh hi. Topa in nang a hong phuah min thak tawh nang hong kisam ding hi. Nang pen Topa a dingin hotkhiatna lukhu, na Pasian a dingin kumpi lukhu tawh na kibang ding hi. Nang pen a kinusia, hong kici nawn lo ding a, na leitang pen Gamkhing, kici nawn lo ding hi. Nang pen ama tungah ka lungkimna om, hong kici ding a, na leitang pen a Kitenpih, kici ding hi. Bang hang hiam cih leh nang tungah Topa lungkim a, na leitang pen a kitenpih zi tawh kibang ding hi. Bang hang hiam cih leh tangval in nungak khat a tenpih mah bangin nang hong lam pa in nang hong tenpih ding a, zipi pa mothak nu tungah a lungdam mah bangin nang tungah na Pasian lungdam ding hi. Topa in limtakin thuciamna bawl khinzo a, a vangliatna tawh tungsak ding hi. “Na galte’ an dingin na ante ka piakik nawn kei ding a, nangma sepsa leenggahzu gamdang mite in dawn nawn lo ding hi. Ahih hangin an a kholte in ne-in Topa na phat ding uh a, a kaikhawmte in keima biakinn huang sungah a dawn ding uh hi,” ci hi. Jerusalem mite aw, kulhkongpite panin paikhia unla a hong ciahkik na mipihte uh a dingin lam bawlkhol un. Lam zik un; lam lianpi zikin suangtumte paikhia unla, mite’ muh dingin lim khat khaito un. Leimong dongah Topa taangko khin hi. Jerusalem mite tungah, “En un, no hong honkhia pa hong pai hi. Ama sep thaman a mite hong pua a, a gualzawhna thaman a mite hong masuan hi,” ci un. Amaute pen A Siangtho Mi, Topa ’ Hotkhiatte kici ding a, nang pen a Kizongkhia, a kinusia lo khuapi, hong kici ding hi. Edom gam, Bozrah khua panin puan ausan silhin a hong pai, a puansilhna-ah minthanna mel nei-in, ama thahatna tawh a hong pai pa kua ahi hiam? A honkhiazo dingin hatna a nei, gualzawhna thu a zasak dingin a hong pai pa pen Topa ahi keimah ka hi hi. Bang hangin na puan san a, na puansilhte, leenggah cilna-ah leenggah a cil pa’ puan tawh kibang ahi hiam? Mite lak panin kuamah in kei hong huh lo a, keimah guak in leenggah cil bangin minam dangte ka cil hi. Sinsona tawh amaute ka cil a, hehna tawh amaute ka tuancil hi. Ka puan tungah amaute’ si hong kithehgawp a, ka puan khempeuh tungah sisan hong baang khin hi. Ka mite ka hotkhiat ding hunta ka sa a, a galte uh gimpiak ding a hun hita hi, ci-in ka ngaihsun hi. Hong huh ding mi ka zong a, ahi zongin kuamah om lo hi. Kei a hong huh ding a om loh ciangin lamdang ka sa hi. Ahi zongin ka hehna in hong thahatsak a, kei mahmah thahatna tawh ka gualzo hi. Ka sinsona tawh minam dangte cilin, ka hehna hangin amaute zukham ka bangsak a, amaute’ sisan leilakah ka thehthang hi. Topa ’ itna kip, Topa phatnate, Topa in eite tungah a hong piak khempeuh tawh a kizui leh, ama hehpihna le a lianpi ama itna kip tawh a kizui-in amaute tunga a piak, Israel innkuan tungah ama hoihna lianpite ka gengen ding hi. Bang hang hiam cih leh Topa in, “Amaute pen keima mi taktak hi a, amaute in kei hong khem lo ding hi,” a ci hi. Tua ahih manin a lungkhamna panun amaute a honkhia hi. Vantung mite’ hotkhiat hi loin, Topa mahmah in amaute honkhia hi. A itna le a hehpihna tawh amaute honkhia a, amah in a beisa hun khempeuhah amaute hoihtakin a kem hi. Ahih hangin amaute in lehdo uh a, ama kha siangtho a dahsak uh hi. Tua ahih ciangin amah pen amaute’ gal suak a, amahmah in amaute a do hi. Tua ciangin amaute in hun lui lai, ama nasem Moses’ hun a phawk uh hi. Ama mi a makaite honkhia-in, tuipi sung panin a paikhiatpih Topa koi-ah omta ahi hiam? Amaute’ tungah ama kha a piapa, Moses tungtawnin a vangliatna zangin na lianpipi a sempa, ama mite’ mai-ah tuite khenkhamin, a minthan’ tawntung nadingin hih bang nate a sempa, tu-in koi-ah omta ahi hiam, ci uh hi. Topa in tuithuk kantanin amaute a paipih ciangin leilak a sakol pai bangin kip mahmah uh a, amaute puk lo uh hi. Lonona kuamsung a zuansuk bawngte bangin Topa in amaute tawldamna a pia hi. Tua bangin Topa in a mite lamlak ahih manin ama min thang tawntung hi. A siangtho, a minthang, nangma omna vantung panin hong ensuk inla hong mu in. Nangma deihsakna le na vangliatna koi-ah omta ahi hiam? Na lungsim’ deihna le nangma hehpihna kote a dingin maimangta hi. Bang hang hiam cih leh, Abraham in kote hong huh loin, Israel in kote hong phawk loh hangin nang pen kote’ Pa na hi hi. Topa aw, nang pen kote’ Pa na hi a, nangmah in tanglai pek pan kote a hong honkhia pa na hi hi. Topa aw, kote in nang kong kihtak loh theih nadingun bang hangin na lampi panin kote hong pialsakin ka lungsim uh khauhsak na hi hiam? Nangma nasemte, nangma luah minamte na ngaihsutna-in hong kihei kik in. Nangma mi siangthote in tawlkhat sung bek na biakinn nei a, ko hong langpangte in tua na biakinn pen tuancilgawp khinta hi. Kote pen nangmah in cikmahin na uk ngei loh mite, nangma mi ahi ngei lo mite tawh a kibang ka suakkhin uh hi. Kote’ lamet lohpi-in nang hong pai-in a lauhuai nate na bawl ngei a, na mai-ah mualte a ling hi. Amah a ngakte a dingin na a sempa’ thu tanglai pek panin kuamah in thei ngei lo, kuama bil in za ngei lo a, kuama mit in nang simloh Pasian dang mu ngei lo uh hi. Thuman nasep lungdam takin a semte, nangma deih bangin a nungtate, nangmah in na limbawl hi. Kote tungah nang na heh a, ahi zongin kote ka khial lai veve uh hi. Tanglai pek a kipanin ka mawh ngitnget uh hi. A tua bangpi mahin kote hong kihon ding ahi hiam? Kote khempeuh mawhnei mi ka hi khin uh a, ka gamtat hoih khempeuh uh zong puannin tawh kibanglai veve hi. Kote khempeuh singteh bangin ka vul uh a, ka mawhna hangun huih letkhiat nahthel keu ka bang uh hi. Tua ahih ciangin nangmah a hong pom dingin a hanciam tawm, nangma min a lo kuamah om lo hi. Bang hang hiam cih leh kote kiang panin nang in na maitang na seel a, mawhna khut sungah kote na hong pia hi. Ahi zongin Topa aw, nang pen kote’ Pa na hi hi. Kote pen tungman bang hi-in, nang pen beelseek pa bang na hi a, kote khempeuh nangma bawl mite ka hi uh hi. Topa aw, nakpitakin sinso kei inla, mawhna ciamtehteh kei in. Kote khempeuh nangma mi ka hihna uh hong ngaihsun in. Nangma khuapi siangthote gamlak suak khinta a, Zion zong gamlakpi suak a, Jerusalem khua gamkhing a suak hi. Kote’ inn a siangtho le a hoihte, ka pate un nangmah hong phatna munte mei in kang khin a, kote’ mun nuam khempeuh a sia suak khinta hi. Topa aw, hih thute-ah nangmah ki-ipcip niloh ding na hi hiam? Nang daitakin om dide-in nakpitakin kote hong gimsak ding na hi hiam? Keima mite’ thungetna a pia dingin a baihsa-in kei om napi-in, amaute in hong ngen lo uh hi. Amaute’ muh dingin kei om napi-in, amaute in hong zong beek lo uh hi. Minamte tungah, “Hih lai-ah om ing, hih lai-ah om ing,” ci-in a dawng pah dingin kiging napi-in, amaute in kei tungah thu hong ngen lo uh hi. A hoih loin gamta-in, amau’ deih bang a zui teitei mite, ka maitangah a tawntungin kei hong hehsak denin, biakna huan sungah biakpiakna bawlin dawibiakna tau tungah paknamtui a hal mite, han sungah tu-in, mun simthamah zanin misite thu a dong mite, voksa ne-in amau’ beel sungah dawibiakna sa mehtui a koih mite, “Note kiang panin kote hong kituamkoih ahih manin kihemkhia unla, ko kiangah hong pai kei un,” ci-in midangte tungah a gen mite - hih bang mite khempeuh a sang dingin a beisa hun sungah ka kiging tawntung hi. Hih bang mite ka thuakzo nawn kei hi. Amaute tungah ka hehna pen a mit ngei lo meikuang tawh kibang hi. Topa in hih bangin ci hi: “Leenggahzu pen leenggah bom panin kingah a, mite in, ‘Tuate kimang thei ding ahih ciangin susia kei un,’ a cih mah bangun kei zong a minam bupun susia loin, keima na hong semte ka suaktasak ding hi. Jakob sung panin Judah minamte thupha ka pia ding a, amau’ suanlekhakte in mualtung gam a luah ding uh hi. Keima na hong sem, keima teel mite, tua gamah teng ding uh hi. Amaute in kei hong bia ding uh a, Sharon gam pen amau’ tuuhon gamtatna mun suaksak ding uh a, Akhor Kuam pen amau’ bawng honte’ lupna mun a suaksak ding uh hi. “Ahih hangin kei a hong nusia, ka mual siangtho a mangngilh, Gad pasian a dingin sabuai phahin, Meni pasian a dingin zu helsa hai sungah a dim note pen, namsau tawh a si dingin ka hong seh ding a, hong that dingte’ mai-ah na ngawng uh na dawh ding uh hi. Bang hang hiam cih leh kong sap ciangin note in nong dawng kei uh a, thu ka gen ciangin nong ngai kei uh hi. Keima thu man loh ding mah na utzaw uh a, a sia na gamta uh hi. Tua ahih manin Topa Pasian in hih bangin ci hi: En un, ka nasemte in ne ding uh a, ahih hangin note na gilkial ding uh hi. Ka nasemte in dawn ding uh a, ahih hangin note na dangtak ding uh hi. Ka nasemte lungdam ding uh a, ahih hangin note na maizum ding uh hi. Ka nasemte in lungdamin la sa ding uh a, note in lungsim na sa-in kiko-in, lungsim gimna hangin na tau ding uh hi. Keima teel mite in samsiatna-in na min uh zang ding uh a, Topa Pasian in note hong that ding hi. Ahih hangin ama nasemte pen min dang a phuah ding hi. Leitungah thupha a kipiak ding a ngen pa in thuman Pasian min tawh thupha a kipiak ding ngen ding a, leitungah thuciamna a lapa in thuman Pasian min tawh a ciam ding hi. Bang hang hiam cih leh a beisa huna haksatnate khempeuh kimangngilh khinta a, tuate beimang khinta hi. “Tu-in vantung thakte le leitung thak ka piangsak hi. A beisa thute kiciamteh nawn lo ding a, kiphawkkha nawn lo ding hi. Keima piansaksa sungah lungdamin kipakin om tawntung un. Bang hang hiam cih leh Jerusalem khuapi lungdamna khua-in bawlin, a mite a lungnuam dingin ka bawl hi. Jerusalem’ hangin ka lungdam ding a, ka mite’ hangin ka kipak ding hi. Tua khua sungah kahna aw le cimawhin kikona aw om nawn lo ding hi. Naupangte a ngeksih om lo ding a, sauveipipi kinungta ding hi. Kum za bek a nungtate a khansihin kingaihsun ding a, kum za cing loin a site, keima gimpiakna lim hi ding hi. Amaute in inn lam ding uh a, a sungah teng ding uh hi. Amaute in leenggui lo bawl ding uh a, a gah ne ding uh hi. Amaute in inn lam ding uh a, tua inn-ah midang teng, cih om nawn lo ding hi. Amaute in leenggui suanin adang khat in ne, cih om lo ding hi. Bang hang hiam cih leh keima mite’ nuntak hun pen singkung khat nuntak tan bang sawt ding a, keima teel mite in amau’ khut tawh a sepsa nate lungdamin nesuak ding uh hi. Amaute in a mawk nadingin na sem lo ding uh a, lungkham nadingin ta nei lo ding uh hi. Bang hang hiam cih leh amaute pen Topa ’ thupha piak, suanlekhakte hi ding uh a, amau’ tate amaute tawh nungta khawm ding uh hi. Amaute in hong sap ma-in ke’n ka dawng ding a, amaute in thu a gen laitakin ke’n ka za ding hi. Keivom le tuuno in an nekhawm ding uh a, humpinelkai in bawngtal bangin buhkung ne ding hi. Leivui pen gulpi’ an hita ding a, mite hong tu nawn lo ding hi. Keima mual siangtho tung tengah amaute kiliamsak lo ding uh a, kisusia lo ding uh hi, Topa in ci hi,” a ci hi. Topa in hih bangin ci hi: Vantung pen keima tokhom hi a, leitung pen keima khengakna ahi hi. Kei a dingin koi lai-ah inn lam ding a, keima tawlngakna ding mun koi lai ahi hiam? Hih nate khempeuh keima bawlsa ahih manin hih nate khempeuh keima-a’ ahi hi, Topa in ci hi. Ahih hangin kiniamkhiatin, lungsim a kitamzan mipa, keima thu-ah lau-in a ling kelkel pa, keima deih mipa ahi hi. Biakna-in bawngtal a gopa in mihing zong that hi. Biakpiakna-in tuuno a gopa in ui ngawng zong at hi. An tawh biakpiakna a bawlpa in vok si zong pia hi. Paknamtui tawh phawkna biakpiakna a bawlpa in milim zong bia-in thupha a pia hi. Hih mite amau ut bang ciatin gamta uh a, amau’ kihhuai gamtatna uhah nuam a sa uh hi. Tua ahih ciangin amaute tungah gimna ka tungsak ding a, amau’ kihtak thute mah amau’ tungah ka tungsak ding hi. Bang hang hiam cih leh ka sap ciangin kuamah in hong dawng lo uh a, thu ka gen ciangin kuamah in hong ngai lo uh hi. Keima thu man loh ding mah utzaw uh a, a sia-in gamta uh hi, a ci hi. Ama thu-ah lau-in a ling mite aw, Topa ’ thu za un: Keima tungah note nong cihtakna hangun na mipihte uh pawlkhat in note hong mudahin hong hawlkhia ding uh a, zahpihna tawh note hong hopihin, “Lungdamin na om ding uh hong deihsak ka hih manun, Topa in ama liatna hong lak hen la, note hong honkhia ta hen,” hong ci vial ding uh hi. Hih banga hong paute pen mindaina a thuak ding mite ahi uh hi. Ngai un, khuapi sunga gamlumna! Biakinn sunga awging! Topa in a galte gim a piakna huging ahi hi. Ka khuapi siangtho pen nausuak natna a thuak ma-in nau a suak nupi tawh kibang a, nausuak gimna a tun ma-in amah in tapa khat a nei hi. A tuaci bang kua’n za ngei na hi uh hiam? A tuaci bang kua’n mu ngei na hi uh hiam? Ni khat thu-in gam khat piang ngei ahi hiam? Tomnokhat sungin minam khat piangkhia ngei ahi hiam? Bang hang hiam cih leh Zion in nausuak gimna a thuak phetin a minamte suakkhia pah hi. Nausuah hun tungsak napi-in suaksak lo ding ka hi hiam, Topa in ci hi. Nau a suakkhiasak keimah in naugil khakcip ding ka hi hiam, na Pasian in ci hi. Topa in hih bangin ci hi: Tu-in gunpi bangin nopsakna le tuiletkhia bangin minamte’ hauhna ama tungah ka tungsak ding hi. Note pen a nu’ nawi teepin, a ang-ah kipua a, a khuk tungah a diang naungek na bang ding uh hi. A nu in a ta a hehnep bangin note kong hehnem ding a, note in Jerusalem khua sungah hehnepna na ngah ding uh hi. Hih thu a hong piang na muh uh ciangin na lungdam ding uh hi. Note hong thahatsakin hong cidamsak ding hi. Tua ciangin ka thu hong mangte ka huhna, ka galte tungah ka hehna ka lahna thu na thei ding uh hi, ci hi. Bang hang hiam cih leh heh mahmahna tawh ama sinsona le meikuang tawh gim a pia dingin meikuang sungah Topa hong pai ding a, huihpi bangin a leengte hong pai ding hi. Bang hang hiam cih leh Topa in mei tawh thukhenna sem ding a, a mawh mi khempeuh tungah a namsau tawh thu khen ding a, Topa in a thah mite tam mahmah ding hi. Biakna huan sungah a pai dingin amaute kisiansuahin a kisiangthosak, a laizang a om pen a zuite, voksa le kihhuaina le zusa a nete beimang khawm ding hi, Topa in ci hi. Bang hang hiam cih leh amau’ nasepnate le amau’ ngaihsutnate ka thei a, minam khempeuh a khawm dingin ka hong pai hi. Amaute hong pai-in ka minthanna mu ding uh a, amaute’ lakah lim khat ka khai ding hi. Amau’ sung panin, minamte tung, Tarshish mite tung, Put mi le Lud mite tung, Meshek mite tung, Tubal mi le Javan mite tung, ka min hoihna a za ngei lo, ka minthanna a mu ngei lo tuipi gei-a om gam mite tungah a suakta lai mite ka sawl ding hi. Amaute in minamte lakah ka minthanna genthang ding uh hi. Israel mite in beel siangtho sungah an tawh amau biakpiakna tawi-in Topa ’ biakinn-ah hong paipih uh mah bangin amaute in minam khempeuh lak panin Topa ’ tungah piak dingin na sanggamte khempeuh uh, sakolte, leengte, taalte, le late, kalaoh hatte tungah hong pua-in ka mual siangtho Jerusalem-ah hong paipih ding uh hi, Topa in ci hi. Amaute kimkhat zong, siampite le Levi mite a suak dingin ka la ding hi, Topa in ci hi. Ka bawl ding vantung thak le leitung thak pen ahihleh keima mai-ah kip ding hi. Tua mah bangin na suan na khakte uh le na min uh kip ding hi, Topa in ci hi. Khadet khat pan Khadet khat, keimah bia dingin Jerusalem-ah mi khempeuh hong pai ding uh hi, Topa in ci hi. Amaute a ciah uh ciangin kei hong lehdo mite’ luanghawmte en ding uh hi. Bang hang hiam cih leh amau a ne thante si ngei loin, amau a kihalna mei mit ngei lo ding a, amaute pen mi khempeuh’ kih hi ding hi, a ci hi. Benjamin gam Anathoth khua-a siampi khat ahi Hilkiah’ tapa Jeremiah’ thugente hih bang ahi hi. Amon’ tapa Josiah, Judah gamah kumpi a suahzawh kum sawm le kum thum a cin kumin ‘ Topa in Jeremiah a hopih hi. Josiah’ tapa Jehoiakim kumpi a suah ciangin Topa in Jeremiah a hopih leuleu hi. Tua khit ciangin Josiah’ tapa Zedekiah kumpi a suahzawh kum sawm le kum khat a phak kum, a kha ngana, Jerusalem khua mite sal tang dingin a kipuakkhiat dong tam veipi a hopihpih hi. Topa in kei hong hopih a, “Gil sungah kong bawl ma-in nang kong thei khinzo hi. Na suah ma-in nang kong teelkhia khinzo a, minam dangte tungah kamsang dingin kong koih khinzo hi,” hong ci hi. Tua ciangin keimah in, “Ah, Topa Pasian aw, kei thugen ka siam kei a, naupang khat ka hi lel hi,” ka ci hi. Ahih hangin Topa in, “‘Naupang khat ka hi lel hi,’ ci kei in; bang hang hiam cih leh kong puakna khempeuhte kiangah na pai ding a, kong sawl peuhpeuh na gen ding hi. Amaute kihta kei in; bang hang hiam cih leh nangmah a hong hu dingin ka hong ompih hi, Topa in kong ci hi,” hong ci hi. Tua ciangin Topa in a khut tawh hong zam phei-in ka muk hong lawnsakin hong hopih hi. “En in, ka thute na kam sungah kong koih khinzo hi. Gam khempeuh le kumpi khempeuhte’ tungah a botkhia ding le a phelkhia dingin ahi zongin, a susia ding le a lawnkhia dingin ahi zongin, a lam ding le a phut dingin ahi zongin, tuni-in za, nang kong piazo hi,” hong ci hi. Tua ciangin Topa in kei tungah, “Jeremiah aw, bang mu na hi hiam?” ci-in hong dong hi. Kei zong, “Ngak, a kici almond singhiang khat ka mu hi,” ci-in ka dawng hi. Tua ciangin Topa in, “Na man hi; bang hang hiam cih leh ka thugente ka tangtunsak nadingin kei zong ka ngak hi,” hong ci hi. Topa in a nihveina hong hopih leuleu a, “Bang na mu hiam?” ci-in hong dong hi. Kei zong, “Beel a so khat ka mu a, leilu lam panin hong awnsuk hi,” ka ci hi. Tua ciangin Topa in, “Leilu lam panin hih gammi khempeuhte’ tungah siatna hong sosuk ding hi. Bang hang hiam cih leh leilu lamah a om gam khempeuh keimah in ka sam a, amaute hong pai-in Jerusalem khua kongpite-ah ahi zongin, khua kimkota kulh kiimte-ah ahi zongin, Judah gam khuapi khempeuh kiimte-ah ahi zongin a kumpi tokhomte uh hong phut ciat ding uh hi. Ka mite in kei hong taisan uh ahih manin a mawhna uh hangin amau’ tungah thu ka khen ding hi; pasian dangte tungah meihal biakna pia uh a, a khut uh tawh a bawlsa uh milimte a bia uh hi. Tua ahih manin Jeremiah aw, kithawi in. Pai inla kong sawl khempeuh amaute kiangah va gen in. Amaute kihta kei in; na kihtak leh amau’ mai-ah kong lausakzaw lai ding hi. En in, hih gambup langah a ding ding, Judah kumpite, uliante, siampite le hih gammi khempeuh langah a pang dingin tuni-in nang, khuapi muanhuai khat bang ahi zongin, sikkhuampi khat bangin ahi zongin, sumngo kulhpi khat bangin ahi zongin ka hong bawl hi. Amaute in nang’ langkhatah hong do ding uh hi. Ahih hangin a hong zo kei ding uh hi; bang hang hiam cih leh Topa in kong cihin-ah, nangmah a hong hu dingin ka hong ompih ding hi,” a hong ci hi. Topa in kei hong hopih a, “Pai inla, Jerusalem khuamite’ zak dingin va taangko in. Topa in kong cihin-ah: Na khangno lai-a nong kipiakna, na mothak lai-a nong itna, a kikho nai lo gamlakah kei’ nung nong zuih lai hun ka phawk hi. Israel mite pen Topa a dingin a tuam om hi a, ama anlakna ah a anpalte ahi uh hi. Amaute a ne peuhpeuh a mawh suak uh a, gimna a thuak uh hi, Topa in hong ci hi, ci-in va gen in,” hong ci hi. Jakob suan le Israel innkuan khempeuhte aw, Topa’ kammal ngai dih un. Topa in hih bangin ci hi: “Na pute na pate uh kei kiang panin gamlapi-ah paikhia-in, bangmahin a kimang lo milim peuh bia-in, amau mahmah zong bangmahin a kimang lo a suah khit nadingun kei tungah bang mawhna hong mu uh ahi hiam? Amaute in, ‘Egypt gam panin eite hong paikhiatpihin sehnel lak le dum lak, lei keu lak le a lauhuai khuamial bekbak lak, kuama pai ngei lohna mun, kuama ten lohna gamlakah a hong makaih Topa koi-ah om ahi hiam?’ ci beek lo uh hi. Singgah le a hoih nate na nek theih nadingun an tamna munah kong tunpih hi. Ahih hangin no nong pai uh ciangin ka gam na ninsak uh a, ka neihsa leitang a kihhuai mun na suaksak tazen uh hi. Siampite in, ‘ Topa koi-ah om ahi hiam?’ ci-in dong lo uh hi. Thukham a theite nangawn in kei hong thei lo uh hi. Kei tungah kumpi uliante hong khial khin uh a, kamsangte in Baal min tawh thu genin kimanna a nei lo milimte a bia uh hi. “Tua ahih manin Topa in kong cihin-ah, note kong mawhsaklai ding a, na tate uh’ tate zong ka mawhsak ding hi. Bang hang hiam cih leh nitumna lamah Saipras tuikulh mong dong kantan unla va en dih un. Nisuahna lamah Kedar gamah mi sawl unla limtakin kan dih un; tua bang thu a piang ngei peuhmah hiam, en dih un. Gam khat peuhpeuh in pasian ahi taktak beek lo a pasian-te uh nangawn a khek ngei peuhmah uh hiam? Ahih hangin ka mite in a minthanna uh ahi keimah, bangmahin a kimang lo na peuh tawh hong khek tazen uh hi. Tua thu phawk unla lau un; vantungte aw, dah mahmah unla ling un, Topa in kong ci hi. Bang hang hiam cih leh ka mite in mawhna nam nih a bawlzo uh hi. Nuntakna ciktui ahi keimah a hong taisanzo uh hi. Tuikhuk totawm uh a, a tuikhuk tawh uh keu-in, tui a vung thei kei hi. “Israel sal ahi hiam? Sila namte ahi zenzen hiam? Hilo ahihleh bang hangin a galte in luhgawpzo ahi hiam? Humpinelkai bangin a galte in amah hawksan uh a, nakpitakin a hawkgawp uh hi. A gam uh gam simtham a suah uh a, a khuapite uh cimin kuamah teng lo hi. Tham loin, Memfis le Tahpanhes mite in zong a luguh a suktapsak zo uh hi. Israel aw, Topa na Pasian in lampi-ah hong makaih laitakin amah na nusiat manin nang tungah hih bang teng hong tung hi lo ahi hiam? Tu-in Egypt gamah nang na pai manin bang phattuamna ngah ding na hi hiam? Nail gun tui a va dawn lel ding na hi hiam? Assiria gamah na pai manin bang phattuamna ngah ding na hi hiam? Eufratis gun tui a va dawn lel ding na hi hiam? Na gitlohna mah in nangmah hong thuhilh ding a, kei na hong up nawn lohna in nangmah hong mawhsak ding hi. Topa na Pasian nong nusia a, keimah nong kihtak nawn loh ciangin, nuam hetloin kha velval hi, cih thu thei inla mu in, Vanglian Topa Pasian in ka hong ci hi. “Sawtpek lai a kipanin ka hakkol kuaitanin ka ukna nong nial a, hong kihenna khau sutatin, ‘Na na ka sem kei ding hi,’ na hong ci hi. Numei paktatte na bang uh a, mual sang tung teng le sing liim nuai tengah milim na bia kawikawi uh hi. A kiteelteel leenggui ci hoihte bangin nang kong suankik zo a, ahih hangin nang kisia kikin bang hangin leenggah gui a hoih lote na suakkik na hi hiam? Vuttui tawh kisilin satpiang tampi na zang zongin na mawhna nin ka mu lai veve hi, Topa Pasian in kong ci hi. Bangci bangin nangmah in, ‘Kei ka nin kei hi. Baal pasian-te’ nung ka zui kei hi,’ bang hangin ci thei ding na hi hiam? Mualkuam zangah a om na lampi totte ento inla, na hihsate mu dih in. A suktai a totai kawikawi kalaoh huk na bang tazen hi. Gamlak nuam a sa, lano hukte na bang tazen hi. A huk laitakin kua in khamzo ding ahi hiam? Amah a hih nuam peuhpeuh in haksa loin, a ut hunhunin a ngah lel ding uh hi. Na khe guakin lam pai kei inla, na dang taaksak kei in, kong cih hangin, nangmah in, ‘Bang phamawh ahi hiam? Gamdang pasian-te ka it a, amau’ nung ka zui ding hi,’ na ci hi. “Guta khatpeuh a kimat ciangin a zum bangin, Israel mite, a kumpite, a uliante, a siampite, le a kamsangte uh zong a maizum ding uh hi. Amaute in singtawng khat kiangah, ‘Nang pen ka pasian na hi hi,’ ci uh a, suangtum khat kiangah, ‘Ka pianna ka nu na hi hi,’ peuh a ci uh hi. Bang hang hiam cih leh amaute in kei hong nungngatin hong maingat lo uh hi. Ahih hangin haksatna a tuah uh ciangin, ‘Tho inla hong hon in,’ hong ci uh hi. “Note-a’ dinga na bawl uh na pasian-te uh koi-ah om ahi hiam? Haksatna na tuah uh ciangin a hong hon thei ahihleh kihonsak ta un; bang hang hiam cih leh Judah gam aw, na khuapi zahzah uh pasian na nei tazen uh hi. Kei na hong mawhsakna uh bang thu teng tawh ahi hiam? Na vekpi-un kei nong langpan’ khin uh hi, Topa in kong ci hi. Na tate uh thuhilhin ka sat hangin a mawkna suakzo ta hi. Amaute kibawlpha tuan lo uh hi. Humpinelkai hawk bangin na namsaute un na kamsangte uh a that khinzo uh hi. No Israel mite aw, Topa’ kammal limtakin ngai dih un. Israel-te a dingin gamlak tawh kibang ngei ka hi hiam? A mial mahmah gam tawh kibang ngei ka hi hiam? Tua ahihleh bang hangin ka mite in, ‘Ko ka suakta uh hi; nang kiangah kong pai nawn kei ding uh hi,’ ci uh ahi hiam? Nungak khat in a kizepnate mangngilh thei ahi hiam? A kipi mothak in a mothak puante mangngilh thei ahi hiam? Ahih hangin ka mite in simzawh loh ni tampi sung a hong mangngilh uh hi. Na lawm ngaih ding na zon siam mahmah a, numei gilote nangawn a zia na hilh thei zen hi. Mawhnei lo mizawngte’ sisan na puan tungah baang hi. Amaute in na inn hong luhngei beek lo uh hi. “Tua bang teng hinapi-in nang in, ‘Kei ka mawh kei hi, kei tungah Pasian heh nawn lo hi,’ na ci hi. En in, ‘Kei ka mawh kei hi,’ na cih manin nang tungah thu kong khen ding hi. Bang hangin na lungsim kheel ziauziau na hi hiam? Assiria in nang hong maizumsak ngei bangin Egypt-te in zong nang hong maizumsak ding uh hi. Nangmah zong tua gam panin maizumna tawh na lu tungah vut khusa-in nong paikhia ding hi; bang hang hiam cih leh keimah Topa in na muan mite ka nialzo hi; amaute’ hangin na gualzo ngei kei ding hi. “Mi khat in a zi ma hen la, tua nu in zong amah nusia-in, midang khat’ zi va suak leh, a pasal masa in tua nu lakik thei ding ahi hiam? Tua gamteng a ninsak khin suak ding hi lo ahi hiam? Nang pen numei paktat suakin mi tampi tak tawh kingai khinzo napi-in, tu-in kei kiang hong zuankik ding na hi hiam, Topa in kong ci hi. Khuadak inla mualsang dawnte en dih in. Hong kilup khoppih lohna mun koi laitakah om ahi hiam? Arab mite in a suam dingun gamlakah mi a ngak uh bangin lam gei-ah tu-in na luppih ding mi na ngak hi. Na paktatna le na gitlohna tawh hih gam na ninsakzo hi. Tua hang mahin guahtui kikangsak a, guah nunung hong zu lo hi. Ahi zongin numei paktatte tawh a kibang hinapi-in na maizum thei kei lailai hi. “Tumahin kei nong sam a, ‘Ka pa aw, ka neulai pek pan ka lawm na hi hi nang keima tungah heh tawntung ding na hi hiam? A tawp dongin lungham den ding na hi hiam?’ na hong ci hi. En in, tua bang na cih hangin, siatna na hih theih khempeuh na hih khinzo hi,” a ci hi. Kumpi Josiah in a uk laitakin Topa in kei hong hopih a, “A zulhzau Israel, mualsang tung khempeuhah pai-in singliim nuai khempeuhah numei paktat bangin a om kawikawina na mu khinzo hiam? Hih teng a hih khit ciangin kei kiangah hong kileh kik ngawn ding hi, ci-in ka up hangin amah hong kileh kik tuan lo hi. Tua bangin a gamtatna pen numei ginalo a sanggamnu Judah in zong a mu hi. A zulhzau Israel, midang tawh a khialhna hangin kimakna lai pia-in, ka hawlkhiat zong amah in a mu hi. Ahih hangin numei ginalo Judah lau tuan loin, amah zong numei paktat khat mah a va suak veve hi. Tua bang hih ding amah in baih ngaihsut lel ahih manin suangtum le singtawng peuh bia-in khial a, gam a ninsak hi. Hih bang teng hinapi a sanggamnu, numei ginalo Judah, a lungsim takpi tawh hong kilehkik loin, a kilehkik hong kineihkhem bek hi, Topa in kong ci hi,” hong ci hi. Tua ciangin Topa in kei hong hopih a, “A zulhzau Israel, numei ginalo Judah sangin a mawhna tamzaw hi. Pai inla leilu lam Israel gamah hih bangin va taangko in: ‘Hong kilehkik in, a zulhzau Israel aw, Topa in kong ci hi. Hehna tawh nang kong en kei ding hi; bang hang hiam cih leh a hehpih thei pa ka hi hi, Topa in kong ci hi. Ka heh tawntung kei ding hi. Na mawhna na phawk ding bek kisam hi. Topa na Pasian na langpanna, singliim nuai khempeuhah gamdang pasian-te tawh na khialh kawikawina le ka thu nong man lohnate pulak in, Topa in kong ci hi. Hong kileh kik un, a zulhzau ka tate aw, Topa in kong ci hi. Bang hang hiam cih leh note pen keima mite na hi uh a, khuapi khat panin mi khat, beh khat sung panin nih cih bangin hong la-in, Zion khua-ah ka hong puak ding hi. “‘Ka thu a hong mang makaite ka hong pia ding a, amaute in pilna le siamna tawh note hong uk ding uh hi. Tua hun ciangin gam sungah note pungin na tam uh ciangin Topa in kong cihin-ah, mite in, “ Topa’ Thuciamna Singkuang,” ci-in genin a nei nawn kei ding uh hi. Amaute in ngaihsun kha lo ding uh a, phawkkha loin, zong a goih beek kei ding uh hi. Tham loin zong a bawlkik nawn kei ding uh hi. Tua hun ciangin Jerusalem khua pen Topa’ kumpi tokhom kici ding a, Jerusalem khua Topa’ omna-ah gam khempeuh hong kikhawmin, amaute in amau’ mawhnopna lungsim uh a zui tentan nawn kei ding uh hi. Tua hun ciangin Judah mite in Israel mite hong pawlpih ding uh a, leilu lam gam salsuahna panin na pu na pate uh’ luah dingin ka piaksa gamah a paikhawm ding uh hi. “‘Israel aw, ka tapa bangin nang hong bawlin, gam khempeuh lakah a hoihpen gam nopci mahmah khat nang hong pia ning, ci-in ka ngaihsun hi. Ahih hangin a thuman lo zi in a pasal a nusiat bangin Israel mite aw, Topa in kong cihin-ah, no zong kei tungah nong thuman kei uh hi,’ ci-in va taangko in,” hong ci hi. Mualtung panin awging khat hong kiza a, Israel mite’ kahna le tauna awging ahi hi. Lam a pialna hang uh le Topa a Pasian uh a mangngilhna hang uh ahi hi. Topa in, “Hong kileh kik un, a zulhzau ka tate aw, na zulhzauna uh kong damsak ding hi,” a ci hi. Amaute in zong, “En in, nang kiang kong pai uh hi. Bang hang hiam cih leh Topa kote’ Pasian na hi hi. Mualtungte le mualsangte’ tungah gamlum lialuanate zuaupi taktak hi a, Israel mite hotkhiatna ding Topa eite’ Pasian’ kiang bekah om takpi hi. “Ahih hangin i neu lai a kipan a zumhuai Baal pasian i biakna hangin i pu i pate’ biakna ahi tuulebawngte, a tapate le a tanute khempeuh uh i sum khinzo hi. Tua ahih manin maizumin lum ni. I minsiatna silh ni. Bang hang hiam cih leh i neulai a kipan tuni ciang dong eite le i pu i pate pen Topa i Pasian’ tungah i mawh khinzo hi. Topa i Pasian’ thu i mang kei khinzo hi,” a ci uh hi. Topa in, “Israel mite aw, na kilehkik nop uhleh kei kiangah hong kilehkik un. Na kihhuainate uh kei kiang pan na paihkhiat uh a, na tai kawikawi kei uh a, ‘ Topa a nuntak bangin,’ ci-in, thuman tak, kiptak, thutang takin thu na ciam nak-uhleh gam khempeuh in thupha ka piak ding hong ngen ding uh a, kei’ sungah amaute a lungdam ding uh hi,” a ci hi. Judah gammite le Jerusalem khuamite tungah Topa in hih bangin ci hi: “Na lote uh kal unla, ling lakah khai vawh kei un. Judah mite le Jerusalem khuamite aw, Topa’ thu zui unla, lungsim takpi tawh zui un. Na tuacih kei uhleh na bawl uh mawhnate hangin ka hehna mei bangin hong kuangkhia ding a, a phelhzo kuamah om lo ding hi,” a ci hi. Judah gamah va gen unla, Jerusalem khua-ah va taangko un. Gam sung khempeuhah peengkul mutin awng unla, va gen un. Hong kikhawm unla khuapi muanhuaite sungah va bu ni, va ci un. Zion paina lampi kihilh unla, na suahtak nadingun tai un; zekai kei un. Bang hang hiam cih leh leilu lam panin siatna lianpi ka hong puaksuk hi. Humpinelkai khat a bukna sawlkawm panin hong kuankhiazo a, gamte a susia ding pa hong paikhiazo hi. Na gam uh a kisiasak ding le na khuapite uhah kuamah a ten loh nadingin a susia dingin ama omna panin hong kuankhia khinzo hi. Tua ahih manin puanhampi silhin tau-in kap un. Bang hang hiam cih leh Topa’ hehna lauhuaipi eite’ kiang panin kiheikhia nai lo hi. Topa in, “Tua ni ciangin kumpipa le kumpi uliante lungkia ding uh a, siampite lau mahmahin, kamsangte dipkua ding uh hi,” a ci hi. Tua ciangin keimah in, “Ah, Topa Pasian aw, nangmah in hih mite le Jerusalem khuamite khem cih takin na khem khinzo hi. Bang hang hiam cih leh amau kiangah, ‘Nopna hong om ding hi,’ ci napi-in, amau a sunlum dingin namsau khat a om gige hi,” ka ci hi. Tua hun ciangin hih mite le Jerusalem khua mite kiangah, “A sa mahmah huih, sehnel gam a sang mun panin ka mite tungah hong nung ding a, tua huih pen anvaite a zapsiang dingin a nung huih bang hi lo hi. Ka sawl huih pen tua bang dingin hat lua ding hi. Tu-in Topa in amaute tungah thu khenin a gen hi,” kici ding hi. En un, meii bangin i gal pa hong pai a, a sakol leengte pingpei tawh kibang a, a sakolte muvanlai sangin manlang zaw hi. Gimna i thuak ding hi; bang hang hiam cih leh gal lel ding ihi ta hi. Jerusalem khua aw, nang hong kihotkhiat nadingin na lungsim sung panin gitlohna sawpkhia in. Na sungah gitlohna lungsim bang tanvei kemcip ding na hi hiam? Ngai un; Dan gam panin aw khat hong ging a, Efraim Mual panin kisiatna ding thu hong kitaangko hi. Minamte kiangah va gen unla, Jerusalem kiangah va taangko un. “Gamlapi panin mite hong pai uh a, Judah gam khuapite langpangin hong kiko uh hi. Judah gam in kei hong langpan’ ahih manin lohongte bangin a galte in a kimkotah a pang dimdiam uh hi, Topa in kong ci hi. Na lungsim le na gamtatnate’ hangin nang’ tungah hih thu hong tung hi. Hih pen nangma gitlohna hang hi a, na lungtang pailetin hong sun hi,” a ci hi. Aw, ka lungtang, ka lungtang! Na ka sa mahmah hi. Ka lungtang kisai vanvan a, ka om hithiat thei kei hi; bang hang hiam cih leh peengkul mutna aw, gal kisimna aw ka za hi. Siatna khat khit ciangin adang khat hong tung a, gam sung khempeuh kisia khinta hi. Thakhat thu-in ka bukte hong kisuksiatsak a, ka puankhaite kikekgawp hi. Bang tanvei galkisimna mu lai ding ka hi hiam? Bang tanvei peengkul aw za lai ding ka hi hiam? Topa in, “Ka mite hai uh a, kei hong thei lo uh hi. Naupang haite bang uh a, bangmah thei lo uh hi. A sia bawl ding lamsang siam bek uh hi. A hoih bangmah bawl thei lo uh hi,” a ci hi. Leitung ka et leh limlemel nei lo a, vantungah zong khuavak om lo hi. Mualte ka et leh kiling damdam uh a, mual neute kileh kawikawi uh hi. Ka khuadak leh mi khat beek ka mu kei a, vana vasate zong a leengmang khin uh hi. Ka et leh, logam leihoih teng sehnel gam suakkhin a, Topa’ mai, a hehna lianpi mai-ah, khuapi khempeuh kisia khin uh hi. Bang hang hiam cih leh Topa in, “Gam buppi, gamlak suak ding a, ahih hangin ka susia sam kei ding hi. Tua thu hangin leitung kap ding a, vantung mial ding hi. Bang hang hiam cih leh ka gensa, ka khensatsa hi a, ka kisik loh bangin ka lungsim zong ka kheelkik kei ding hi,” a ci hi. Sakol tunga tuangte le thal tawite’ aw a kizak ciangin mi khempeuh galtai mang uh a, gamlakah tai-in suang lakah a kahto uh hi. Khuapi khempeuh kinusia khin a, kuamah teng nawn lo hi. Jerusalem khuapi aw, a siacip ding na hita hi. Puansan silhin kham tawh na kizep liatluat hangin, na mitte zemin na golsak hangin, a mawkna-in a kizem na hita hi. Na lawm ngaihte in nang hong nusia ta uh a, tu-in hong that nuam ta uh hi. Nau a suak ding numei a kiko bang khat ka za a, tacil a suak numei’ tauna tawh kibang hi. Zion’ tanu husam liangin a kikona aw na hi a, a khut tegel zakin, “Gimna ka thuak ding hi. Kei hong that ding uh hi,” a ci hi. Jerusalem khua sungah kileh kawikawi un. Khuadak unla en dih un! A thuman gamtat leh thuman a zong mi khat beek na mu uh hiam, zong dih un. Na muh uhleh tua khua’ mawhna ka maisak ding hi. “ Topa a nuntak bangin,” ci-in a kiciam uh hangin a zuaupi uh ahi hi. Topa aw, nangmah in thuman en gige hi lo na hi hiam? Nangmah in amaute na sat hangin a awlmawh tuan kei uh hi. Na sukgawp hangin na thuhilhna a ngai tuan kei uh hi. Amaute’ maitang suangtum sangin sakzaw a, a kisik nuam kei uh hi. Tua ciangin keimah in, “Hih mite mihai hi a, a hehpihhuai ahi hi. Topa’ lampi thei lo uh a, amau’ Pasian’ deihna a thei kei uh hi. Miliante kiangah pai-in ka va kiho ding uh hi. Amaute in Topa’ lampi thei uh a, amau’ Pasian’ deihna thei uh hi,” ci-in ka ngaihsun hi. Ahih hangin a vekpi-un ka uk ding nial khin uh a, ka hakkol kuaitanin ka henna khaute sutat khinzo uh hi. Tua ahih manin tulak panin humpinelkai in amaute that ding a, sehnel gam panin keivom in amaute a petgawp ding hi. Kamkei in a khuapite uh limtakin vil gige a, a pusuakkhia peuhpeuh balzan gawp ding hi. Bang hang hiam cih leh amaute’ mawhna tamlua a, hong taisan mun lua uh hi. “Na mawhnate uh hong koici maisak thei ding ka hi hiam? Na tate un kei hong nusiazo uh a, pasian ahi lopite peuh tawh kiciamzo uh hi. Amaute a gilvah dong uh an ka vak khit ciangin amaute in angkawmin, numei paktatte’ inn-ah a hon om uh hi. Sakol gilvah a lante bangin a inn vengte’ zite uh nehin a tau huthut uh hi. Hih thute hangin amaute gim pia lo ding ka hi hiam? Topa in ka genin-ah, hici bang minam tungah thukkik lo ding ka hi hiam? A gualin a kisuan a leenggah huan sungah pai inla, suksiat sak in; ahi zongin sukmai mangsak sam kei in. A hiangte heuhkhiatsak in; bang hang hiam cih leh tua a hiangte Topa a’ hi lo hi. Israel minamte le Judah minamte, Topa in ka cihin-ah, kei’ tungah hong thuman nawn het lo uh hi. “Amaute in Topa hong nial uh a, ‘Amah in bangmah hihlo ding hi. Eite tungah siatna hong tung lo ding a, gal ahi zongin kial ahi zongin i thuak kei ding hi. Kamsangte lah huih bang hi lel uh a, a sung uhah thu teng lo hi. Amau’ gen bangun amau mah in a thuak ding uh hi,’ ci uh hi,” a ci hi. Tua ahih manin Topa, Vanglian Pasian in hong hopih a, “Amaute, tu-a bangin kampau uh ahih manin na kam sungah mei bangin ka kuansak ka thute in sing tawh kibang hih minamte kangtum gawp ding hi. “En un, Israel minamte aw, Topa in kong cihin-ah, gamlapi panin note a hong sim dingin gam khat kong kuansak ding hi. Tua gam pen tanglai pekin a om khinsa, a hat mahmah, amaute’ pau na theih loh uh gam khat ahi hi. Thal tawh a kap uh teh kaplum lianlian uh a, a vekpi-un galhang kim uh hi. Amaute in lo-a na ante uh le na an huante uh hong gaihsak ding uh a, na tapate uh le na tanute uh hong thahsak ding uh hi. Na tuuhon, na bawnghonte uh hong gaihsak ding uh a, na leenggah, na theigahte uh hong nek mangsak ding uh hi. Na muan mahmah uh kulhpi tawh a ki-um na khuapite uh namsau tawh hong suksiatsak ding uh hi. “Ahih hangin tua bang hun ciang nangawnin, Topa in kong cihin-ah, note kong sumaimang khin sam kei ding hi. Na mipihte un, ‘Bang hangin Topa i Pasian in hih bangin ei’ tungah hong bawl ahi hiam?’ a cih uh ciangin nangmah in, ‘ Topa nusia-in na gam sung uhah gamdang pasian-te’ na na sep uh bangin, note’ gam ahi lo gam dangah, gamdang mite’ na na sem ding uh hi,’ na ci ding hi,” hong ci hi. Jakob’ suante’ tungah gen in. Judah mite’ tungah hih bangin ci in: “Ngai un, ngaihsutna a nei lo mihaite aw, mit nei napi-in a mu lote, bil nei napi-in a za lo mite aw, kei hong kihta lo na hi uh hiam, Topa in kong ci hi. Keima mai-ah ling lo na hi uh hiam? Tuipi gei-a om sehnelte keima koih hi a, tui ka dalsak tawntung hi. Tuihualte in a lawhlawh hangin zo zo lo uh a, a gin’ zuazua uh hangin kantanzo tuan lo uh hi. Ahih hangin hih mite a lungsim uh khauhin kei hong langpan’ zen uh hi. Hong kiheisan uh a, hong paisan uh hi. A lungsim sung uhah, ‘A huna guah hong zusak a, tukguah, khalguah hong pia a, anlak hun ding a hong sehsak den Topa i Pasian zahtak ni,’ a ci kei uh hi. Na khialhnate un hih na hoihte khaktan a, na mawhnate uh hangin tuate na taanlawh uh hi. “Ka mite’ lakah migilote kihel uh a, vasa thangsiah bangin mite thangsiahin a man uh hi. Bawm sung dimin vasa a kikhum bangin khemna tawh a ngah uh vante tawh a inn uh a dim hi. Tua ahih manin amaute lianin hau mahmah uh a, thau-in a mai uh a zol hi. Gitlohna lamah a hun bek a theithei kei uh hi. Tagah mite’ phattuamna ding khual loin thu a man lopi-in khen uh a, mizawngte’ tungah thuman lo uh hi. “Hih thute hangin amaute gim pia lo ding ka hi hiam, Topa in ka ci hi. Hih bang minam’ tungah thukkik lo ding ka hi hiam, ka ci hi. A dipkuathuai, a patauhhuai thu khat gam sungah a piang khinzo hi. Kamsangte in thuman gen lo uh a, siampite in zong amau’ ut bangun a uk uh hi. Ka mite in phamawh sa lo sawnsawn uh hi. A tawpna hun hong tun ciangin bang cih ding uh ahi hiam, Topa in ci hi, ci-in gen in,” hong ci hi. Benjamin’ suante aw, na suahtak nadingun tai un. Jerusalem khua taisan un. Tekoa khua-ah peengkul tum unla, Bethlehem khua-ah theihsakna meikhu khusak un. Bang hang hiam cih leh leilu lam panin gimna leh siatna lianpi a hong pai ding hi. A melhoih, a ngeek dikdek Zion tanu ka susia ding hi. Kumpite, a galkapte uh tawh ama kiang hong tung ding uh a, a kimkotah giahphual satin a deih peuhpeuh uh a la ding uh hi. Amaute in, “Jerusalem khua a sim dingin kisa un. Tho un, sun ciangin i sim ding hi,” a ci ding uh hi. Ahih hangin amau mah in, “Citciat aw, zekai lua hang! Ni tum dektakta a, i liimte sau keei ta hi. Kithawi un, zan ciangin i sim ding a, a kumpi innte uh i susia ding hi,” a ci ding uh hi. Bang hang hiam cih leh Vanglian Topa in, “A singte phuksak unla, Jerusalem khua sim nadingin phungin ciang un. Hih khuapi gim piak kul hi; bang hang hiam cih leh kinetniamna bekbek tawh a kidim hi. Tuikhuk panin tuiphul a tawlngak loh bangin, Jerusalem khua panin siatna tawlnga lo hi. Khua sungah ngongtatna le suksiatna ka za ngitnget a, cinatna le liamna bekbek ka mu hi. Jerusalem khuapi aw, kidawm in. Na kidop kei leh nang kong taisan ding a, kuama ten lohna gam simtham na suakkha ding hi,” a ci hi. Vanglian Topa in kei hong hopih a, “Leenggah lo-ah a sangte a kilawh khit bangin Israel mi a omlai sunteng lo siang vet in,” hong ci hi. Keimah in ka dawng kik a, “Amaute in a zak theih dingun kua kiangah va gen ding ka hi hiam? En in, a bil uh bing a, khua za thei lo uh hi. Topa’ thu simmawh uh a, lungdamna-in la lo uh hi. Tua ahih ciangin Topa aw, kei zong ka heh mahmah a, ka thuakzo nawn kei hi,” ka ci hi. Tua ciangin Topa in kei hong hopih a, “Kei’ tang dinga na hehna kongzing lak a naupangte tungah buakhia inla, tangvalte’ kikhopna-ah zong buakhia in. Papite le nupite zong kilakhia ding a, piteek puteekte zong kipaikhiatpih ding hi. A innte uh midangte in luah ding uh a, a lote le a zite uh a taan ding uh hi. Bang hang hiam cih leh Topa in kong cihin-ah, hih mite’ langkhatah ka khut zanin gim ka pia ding hi. Bang hang hiam cih leh a neupen pan a lianpen dongin, thuman lopi tawh sum zongin a huaiham uh hi. Kamsangte a kipan siampite dongin thuman lo khin uh hi. Amaute in ka mite’ thuaknate thupi simsak lo uh a, hoihna om keei lopi, ‘Hoih hi, hoih hi,’ ci mawkmawk uh hi. Hih a kihhuai nate a sep uh ciangin a maizum beek uh hiam? Maizum beek lo uh a, kisuangthei beek lo uh hi. Tua ahih manin a site’ lak mahah amaute zong si ding uh a, gim ka piak ni ciangin a kilawnkhia ding uh hi,” Topa in hong ci hi. Topa in mite tungah, “Lam kabomah ding unla khuadak un. Lam hoih ahi lampi luite dong unla tawn un. Tua hileh na tawldam ding uh hi,” a ci hi. Ahih hangin amaute in, “Ka tawn kei ding uh hi,” a ci uh hi. Topa in, “Peengkul tumna awging a ngai dingin ‘Galvil ding mi ka koih hi,’ kong ci hi,” a ci hi. Ahih hangin amaute in, “Ka ngai kei ding uh hi,” a ci uh hi. Tua ahih manin Topa in, “Gamdangte aw, ngai un. Mite aw, amau’ tungah bang tung ding hiam cih thei un. Leitung aw, ngai in! En un, hih mite tungah a thuak ding mahun a kilawm siatna ka tungsak ding hi. Bang hang hiam cih leh ka thu hong ngai lo uh a, ka thukhamte a nial uh hi. Bang deihna tawh Sheba gam panin paknamtuite hong pai a, gamlapi panin sing namtuite hong tung ahi hiam? Na meihal biaknate uh ka sang thei kei a, nong biaknate uh deihhuai ka sa kei hi. Tua ahih manin Topa in kong cihin-ah: En un, hih mite a puk nadingin a mai uhah suangtum ka koih ding a, pate le tate, inn vengte le lawmte pukin a si ding uh hi,” a ci hi. Topa in, “En un, leilu lam gam panin mi hong pai uh a, leimong gamla pen panin galsim dingin gam lian khat hong kithawithawi hi. Thal le teipi tawi uh a, gilo mahmah uh a, hehpihna lungsim nei loin a husa uh tuipi ging tawh kibang hi. Jerusalem aw, sakol tungah amaute tuangin, nangmah a hong sim dingin a kithawi uh hi,” a ci hi. Tua thu i za a, bangmah i cih thei kei hi. Lungkhamna in hong lencip a, nupi nausuak ding bangin na i sa hi. Gamlakah paikhia kei unla, lampi-ah zong pai dah un. Bang hang hiam cih leh i galte in namsau tawi uh a, i kimkot khempeuh a lauhuai hi. Topa in, “Ka mite’ tanu aw, puanhampi silh inla, vut lakah kikhuk in. Tapa khat neihsun a si bangin kap vangvang in. Bang hang hiam cih leh a hong susia ding pa thakhatin hong tung ding hi. Jeremiah aw, ka mite a ze-et dingin nang kong koih hi. Ze-et inla, a om dan uh thei in. A vekpi-un kei hong langpan’ tentan uh a, zuauthu a gen kawikawi uh hi. Sumngo le sik bangin khauh mahmah uh a, a vekpi-un a siat gamtat khin uh hi. Nakpi takin pum a kizap hangin a ekte tui thei lo a, luangkhia thei lo hi. Pum a kizapzap hangin a mawkna a suak hi. Bang hang hiam cih leh migilote omlai veve hi. Amaute, a kideih lo ngun-ek kici ding hi. Bang hang hiam cih leh Topa in, ‘Amaute ka deih kei hi,’” hong ci hi. Topa in Jeremiah kiangah hih bangin thu gen hi: “ Topa’ biakinn kongkhakpi kiangah ding inla, hih thuteng va taangko in: Topa a bia dingin kongkhak sunga hong tum Judah mite aw, Topa’ kammal ngai dih un. Vanglian Topa, Israel mite’ Pasian in hih bangin hong ci hi. Na nuntak zia uh le na gamtatnate uh kipuah un. Tua hileh hih munah kong tengsak bek ding hi. ‘A muanhuai sungah i om hi. Hih pen Topa’ biakinn ahi hi, Topa’ biakinn ahi hi, Topa’ biakinn ahi hi,’ a kicici zuauthute um kei un. “Bang hang hiam na cih uhleh na nuntak zia uh le na gamtatnate uh na kipuah uh a, khatlekhat kikalah thuman le thutakin na vaihawm uh a, namdang mite, pa nei lote le meigongte na nuaisiah kei uh a, hih munah mawhnei lo mite that nawn loin, note’ gimna ding mah ahi pasian dang peuh na biak nawn kei uhleh, tanglai-a na pu na pate un a neih tawntung dingun ka piak hih gam sungah ka hong tengsak ding hi. “En un, phattuamna a om het lo zuauthu na um ta zen uh hi. Note in na gu-in, tual thatin, ang kawmin, ahi lopi kiciamin, Baal kiangah meihal biakna pia-in, na theih ngei loh uh pasian dangte delhin, tua ciangin ka min tawh a kilo hih biakinnsung ka mai-ah hong pai-in hong dingin, ‘Hong kihonkhiazo hi,’ na cih khit uh ciangin hih a muhthadahhuai nate khempeuh va hihkik zel ding na hi uh hiam? Ka min tawh a kilo hih biakinn no’ ngaihsutna-ah misuam mi buluhte’ bukna mun bangin ngaihsun na hi uh hiam? Keimah in note’ hih khempeuh kong mu khin hi, Topa in kong ci hi. Ka min ka tensak masakna Shiloh khua-a biakinn-ah va pai unla ka mi Israel-te’ gitlohna hangin ka nasepna va en dih un. Tu-in zong hih nate khempeuh na hih uh a, kong gengen hangin hong ngai tuan loin kong sapsap hangin hong dawng lo na hih manun Topa in kong cihin-ah, ka min tawh a kilo, note in na muan uh hih Jerusalem biakinn le note le na pu na pate uh’ kiangah kong piak hih mun pen Shiloh-a biakinn tungah ka hih bangin ka hih ding hi. Efraim’ suanlekhak ahi leilu lama na behte khempeuh uh ka paihkhiat bangin note zong ka muhna panin kong paikhia ding hi. “Jeremiah aw, hih mite a dingin thu ngetsak kei in. Amau a dingin kapin kei’ tungah hong thumsak kei in. Bang hang hiam cih leh nong thumna kong ngai kei ding hi. Judah gam khuapite sung le Jerusalem khua kongzing lakah bang hih uh cih mu lo na hi hiam? Naupangte in sing tomin, a pate un mei tawh uh a, nupite in a nusian uh vantung kumpinu a’ ding moh bawlna ding annel meek uh a, kei hong hehsak nadingun, pasian dangte’ dawn dingin leenggahzu tawh biakna a pia tazen uh hi. Topa in kong cihin-ah, tua hangin gimna a thuak, kei hi zenzen ka hi hiam? Hilo hi. Amau’ zum nadingin amau mah in a thuak uh hizaw hi lo ahi hiam? Tua ahih manin Topa in kong cihin-ah: En in, ka hehna le ka thangpaihna hih munah ka bua ding a, mihingte’ tung le ganhingte’ tung, lo lai-a singkungte le leilak a singgahte tungah ka sung ding hi. Ka hehna mei bangin kuang ding a, kisumit lo ding hi. “Vanglian Topa, Israel mite’ Pasian in hih bangin kong ci hi: Mei tawh haltum ding na meihal biaknate uh hal nawn loin, sa nektheih biakpiaknate tawh kibangin ne vet un. Bang hang hiam cih leh Egypt gam panin na pute na pate uh ka lakkhiat lai-in ka hopih kei a, meihal biakna pia ding le biakpiakna a bawl dingin thu ka pia kei hi. Ahih hangin, ‘Ka thu hong mang un; tua hileh note’ Pasian ka hi ding a, note pen ka mite na hi ding uh hi. Note a dingin a hoihzawk nadingin na khempeuhah kong thupiak bang na zui un,’ ci-in thu ka pia zaw hi. Ahih hangin amaute in ka thu hong mang lo uh a, a bil uh hong ngat lo uh hi. Amau’ gitlohna lungsim uh zui-in amau’ thuthu-in a omzaw uh a, mainawt loin a nungkin zaw uh hi. Na pu na pate uh Egypt gam panin a hong paikhiat ni uh a kipan tuni ciang dong, ni khat khit ni khat, ka nasemte ahi kamsangte ka sawl tawntung a, ahih hangin amau in ka kamsangte’ thu ngai loin, a bil uh hong ngat lo uh a, a lungsim uh a khauhsak uh hi. A pute a pate uh sangin a siazaw uh hi. “Tua ahih manin Jeremiah aw, hih thute amau kiangah na va gen ding a, ahih hangin amau in a hong ngai kei ding uh hi. Amaute na sap hangin a hong dawng kei ding uh hi. Tua ciangin nangmah in amaute kiangah, ‘Hih gam pen, Topa amaute’ Pasian’ thu a mang lo gam hi a, thuhilhna sang loin, thuman om nawn lo a, thuman genin zong a nei nawn kei uh hi,’ na ci ding hi. “Jerusalem mite aw, na lu uh mettol un. Na sam uh paimang unla, mualtungah va kap un. Bang hang hiam cih leh Topa in hih a gilo khang mite ka nialzo a, ka taisan khinzo hi. “Bang hang hiam cih leh, Topa in kong cihin-ah, Judah mite in hoih ka sak loh nate a hih khinzo uh hi. Ka min tawh a kilo ka biakinn a nitsak nadingun a kihhuai milimte a koih uh hi. Hinnom Kuam-ah a tapate a tanute uh mei sungah a hallupna ding uh Tofeth a kici biakna tau khat a bawl uh hi. Tua pen kei’ sawl lah hi loin, zong ka ngaihsunkha ngei beek kei hi. Tua ahih manin en un, Topa in kong cihin-ah, tua mun pen Tofeth ahi zongin Hinnom Kuam ahi zongin a kicih nawn loh hun hong tung ding hi. Kithahna Kuam a kici zaw ding hi; bang hang hiam cih leh Tofeth munah mun awng a om nawn lo zah dongin misite a kivui ding hi. Misi luangte huih lak a leeng vasate le leitungah a om ganhingte’ an a suak ding uh a, tuate a delhmang ding kuamah om lo ding hi. Tua ciangin Judah gam khuapite le Jerusalem khua kongzing lakah gualnopna le lungdamna awte le zinei thakte le mothakte’ awte ka gingsak nawn kei ding hi; bang hang hiam cih leh tua mun kinusia ding hi. “Tua hun ciangin, Topa in kong cihin-ah, Judah gam kumpite’ guhte, uliante’ guhte, siampite’ guhte, kamsangte’ guhte le Jerusalem khuamite’ guhte a han sung uh panin kilakhia ding hi. Amaute in a it uh, a na a sepsak uh, a delh uh, a zon uhleh a biak uh ahi ni le kha le vana om nate khempeuh mai-ah a kiphokhia ding hi. Tua guhte kikhawm nawn lo ding a, kiphum nawn lo ding hi. Leilak a ek kinusia bang ahi lel ding hi. Hih a gilo minamte’ lakah a omlai sunteng in ka hawlkhiatna munah nuntak ding sangin sih ding a teelzaw ding uh hi, Vanglian Topa in kong ci hi. “Jeremiah aw, Topa in hih bangin gen hi, ci-in amaute kiangah va gen in. Mi khat a puk ciangin thokik buang hi lo ahi hiam? Mi khat in lam a khialh ciangin hong kilehkik buang hi lo ahi hiam? Tua ahihleh bang hangin hih mite lam khialin hong kilehkik nawn lo ahi uh hiam? Zuau pasian milimte lenkip uh a, hong kilehkik nuam lo uh hi. Amau’ thugente ka ngaihsak a, kuamah in thuman gen lo uh hi. A gitlohna uh panin kuamah kisik lo a, ‘Bang hih ka hi hiam?’ ci lel uh hi. Sakol galsim ding a tai bangin amau’ tum ciatin a pai uh hi. Gun vapite nangawn in a lal hun ding thei uh a, sumkuangte, phialphiahte, le gun vapite zong a hun ciangin hong tung zel uh hi. Ahih hangin ka mite in Topa’ ngeina kipte a thei kei uh hi. Bangci bangin note in, ‘Ko ka pil uh a, Topa’ thukham ka nei uh hi,’ ci thei ding na hi uh hiam? En un, thuman lo laitheite in tua thukham zuauthu a suah uh hi. Na mipilte uh maizum ding uh a, lungmangin a cih nading a thei kei ding uh hi. En un, amaute in Topa’ thu nial uh hi. Bang pilna nei nawn ahi uh hiam? Tua ahih manin a zite uh midangte ka piaksak ding a, a lote uh zong midangte ka luahsak ding hi. Bang hang hiam cih leh a neupen pan a lianpen dongin thuman lopi tawh sum zongin a huaiham uh hi. Kamsangte a kipan siampite dongin thuman lo khin uh hi. Amaute in ka mite’ thuaknate thupi simsak lo uh a, hoihna a om keei lopi, ‘Hoih hi, hoih hi,’ ci mawkmawk uh hi. Hih a kihhuai nate a sep uh ciangin a maizum beek uh hiam? Maizum beek lo uh a, kisuangthei beek lo uh hi. Tua ahih manin a site lak mahah amau zong si ding uh a, gim ka piak ni ciangin a kilawnkhia ding uh hi, Topa in kong ci hi. “ Topa in kong cihin-ah, amaute ka susia khin ding a, a lote uhah leenggah a om nawn kei ding hi. Thei in zong gah a nei nawn kei ding hi. A tehte nangawn keu ding a, amaute ka piaksa nate a bei ding uh hi. “Tua ciangin mite in, ‘Bang hangin tutu lai ihi hiam? Kikaikhawm unla khuapi muanhuaite va beel ni; tua lai-ah va si ni. Bang hang hiam cih leh Topa’ tungah i mawh manin Topa i Pasian in eite a si dingin hong seh khinzo a, i dawn dingin gu tui hong pia khinzo hi. Nopna i zong a, nopna i ngah kei hi. Cidamna i lamen a, siatna bek i ngah hi. Leilu lam Dan khua pek panin galte’ sakol nakging kiza hi. A sakol hatte’ hamna awging in gamlelei lingsak hi. Amaute in i gam le a sunga omteng, hong susia khin ding uh hi,’ a ci ding uh hi. “Bang hang hiam cih leh en un, note lakah gul kong khah ding hi. A kikhim zo lo gul guneite kong khah ding a, note hong tu ding hi,” Topa in a ci hi. Ka dahna dam thei lo a, ka lungsim na mahmah hi. Ngai un, gam sung mun khempeuhah ka mite’ tanute kap uh a, “Zion khua-ah Topa om nawn lo ahi hiam? A kumpipa uh om nawn lo ahi hiam?” a ci uh hi. Topa in dawngkik a, “Bang hangin milim bawltawmte le a gamdang milimte uh tawh kei hong hehsak ahi uh hiam?” a ci hi. Mite in, “An kila khinzo a, khuakhal hun zong beita napi-in, eite hong kihon nai lo lailai hi,” a ci uh hi. Ka mite’ thuakna hangin ka lungsim kisia a, lungkham lua-in ka kap hi. Gilead-ah zatui om lo ahi hiam? Zato siam om lo ahi hiam? Bang hangin ka mite dam thei lo ahi uh hiam? Ka lutang tuikhuk hong hithei hen la, ka mitte khitui nak hong hithei leh ka mite’ kithahlupna hangin a sun a zanin ka kapkap ding hi. Sehnel gamlakah khawlna ding bukno khat nei thei-in ka mite nusia-in a taisan thei hi leng ka ut hi. A vekpi-un angkawm hat hi khin uh a, thuman lo kim uh hi. A leii uh thalpeu bangin zang uh a, zuauthu bekbek a lawn khiakhia uh hi. Gam sungah thuman om loin zuauthu bekbek a dim hi. Siatna lam manawh tektek uh a, kei hong thei lo uh hi, Topa in a ci hi. Mi khempeuh a inn vengte uh kidawm uh hen la, a sanggamte uh muang kei uh hen. Bang hang hiam cih leh sanggamte khem hat ciat uh a, inn vengte khempeuh zong gensiat hat ciat uh hi. Mi khempeuh in a vengte uh khem ciat uh a, thuman gen kuamah om lo hi. A leii uh zuauthu gen dingin kisinsak uh a, mawhna a bawl manun tawllua uh a, kisikzo nawn lo uh hi. Siatna khat khit siatna khat, a banbanin gamta uh a, zuau zong a phuakphuak uh hi. Kei hong thei nuam lo uh hi, Topa in a ci hi. Tua ahih manin Vanglian Topa in a cihin-ah, “En un, amaute a siantho nadingun suangtui-in ka ze-et ding hi. Tua lo ka mite bangcih nawn ding ka hi hiam? A leii uh thaltang lauhuai bang a, zuauthu a gen uh hi. A kam uh tawh a inn vengte kiangah a aw-zol uh hangin, a sih nading uh a lungsim sung uhah a ngaihsun veve mawk uh hi. Hih thute hangin gim pia lo ding ka hi hiam, Topa in kong ci hi. Hih bang minam khat tungah ka phu la lo ding ka hi hiam? “Mualte a dingin kapin tau unla, gamlak lonona munte a dingin thumin tau un. Bang hang hiam cih leh tuate keu gawp a, kuamah pai nawn lo hi. Bawng ham zong kiza nawn lo a, vana leeng vasate le gamsate a taimangta uh hi. “Jerusalem khuapi ninkholna ka bangsak ding a, se-alte’ tenna mun ka suaksak ding hi. Judah gam khuapite gamlak ka suaksak ding a, kuamah teng nawn lo ding hi,” a ci hi. Tua ciangin keimah in, “Hih thu a theitel ding mipil kua om ahi hiam? Hih thu a gentel theih nadingin Topa in kua tungah hilhtel na hi hiam? Kuamah in hih gam a kantan nawn loh nadingin bang hangin kisia-in gamlak tawh kibang ahi hiam?” ci-in ka dong hi. Topa in, “Amaute in a mai uha ka lah ka thukham nusia uh a, ka thu hong mang loin ka cih bangin ta lo uh a, amau’ lungsim deihna zui tentanin a pu a pate uh hilhna bangin Baal nung a zuih man uh ahi hi. Tua ahih manin Vanglian Topa, Israel mite’ Pasian in kong cihin-ah: En in, hih mite gamsai-in ka vak ding a, gutui ka dawnsak ding hi. Amaute le a pute a pate’ theih ngei lohna gam dangah ka kithehthangsak ding a, a sih khit dong uh namsau ka nungdelhsak ding hi,” hong ci hi. Tua ahih manin Vanglian Topa in a cihin-ah, “Ngaihsun unla, numei kapte a hong pai dingin va sam unla, a kah siam tata vaikhak un,” a ci hi. Mite in, “Va kinawhsak unla, i khitui a luantheihna ding, i mitkhu a kawt theih nadingin eite hong kah uh hen,” a ci uh hi. Zion khua panin a kiza kahna awging in, “I kisia khinzo a, i zumhuai mahmah khinzo hi. Bang hang hiam cih leh amaute in i innte hong suksiatsak uh ahih manin i gam i nusia ding hi,” a ci uh hi. Tua ciangin keimah in, “No numeite aw, Topa’ kammal ngai dih un. A kam pana hong gingkhia thu na bil uhah lutsak un. Na tanute uh a kah dan ding hilh unla, na inn vengte ciat uh kah la hilh un. Bang hang hiam cih leh tawlet vang panin sihna hong lut a, kumpipa’ inn sungah zong sihna hong lut hi. Kongzing a naupangte vatmang a, sumbuk a tangvalte vatlum hi. Gamlak a ki-tha ek bangin misi luang kipaithang ding a, buhlom atsa kinusia bangin kuamah in a khawm kei ding hi, ci-in a gen dingin Topa in kei hong sawl hi,” ka ci hi. Tua ciangin Topa in, “Mipilte in a pilna uh kisaktheihpih kei uh hen la, mi hatte in a hatna uh kisaktheihpih kei uh hen. Mihaute in zong a hauhna uh kisaktheihpih kei uh hen. A kisatheite in, keimah, leitungah migitna, thuman le thutang a zang ka hihna le tuate sungah nuam a sapa ka hihna thu hong theihna uhah kisathei uh hen. Topa in hih thu kong gen khin hi,” a ci hi. Topa in, “Vun ki-at hinapi-in vun ki-at mite’ gamtat bangin a gamta lote gimpiak hun hong tung ding hi. Egypt mite, Judah mite, Edom mite, Ammon mite, Moab mite le a sam uh a mettom sehnel gam a omte khempeuh zong gim ka pia ding hi. Bang hang hiam cih leh hih gamte khempeuh in a vun uh at lo uh a, Israel mi khempeuh zong a lungsim sung uhah vun at lohpi ahi uh hi,” a ci hi. Israel mite aw, note hong hopihna Topa’ kammal ngai dih un. Topa in hih bangin ci hi: “Gamdangte’ omdan ciing kei unla, vantung a lim lamdangte lunghihmawhna-in ngaihsun kei un. Bang hang hiam cih leh gamdang mite in tuate a lunghihmawhpih uh hi. Hih mite’ ngeinate a kimanna om lo hi. Gamlakah sing khat kiphuk a, khutsiampa in a hei tawh milimin a bawl hi. Mite in tua pen kham le ngun tawh zem uh a, a kilakkhiat theih loh nadingin sik tawh a kilh uh hi. A milimte uh, tangmai huanah vasate’ lau nadingin a kikhai milimte tawh kibangin pau thei lo uh a, lam pai thei lo uh ahih manin puak a kul hi. Tuate kihta kei un; siatna bawl thei lo uh a, phatna zong bangmah bawl thei lo uh hi,” a ci hi. Topa aw, nang tawh a kibang kuamah om lo hi. Nang na lian a, na min vanglian mahmah hi. Gam khempeuhte’ Kumpipa aw, nang a hong kihta lo ding kua om ahi hiam? Nang, kihtak ding mah na hi hi. Bang hang hiam cih leh leitung mipil khempeuhte le amau’ gam sung khempeuh lakah nang tawh a kibang kuamah om lo hi. A mipilte uh mihai mimawl ahi uh hi. Sing milim in amaute bangci-in hilh thei mah ding ahi hiam? Tarshish khua panin ngun seksa va la uh a, Ufaz khua panin kham va la uh hi. Khutsiamte le kham seekte in milimin bawl uh a, siamgat siamte’ gat ahi, puan engdup le puan sandup tawh a zem uh hi. Ahih hangin Topa pen Pasian man hi a, amah pen a nungta Pasian le tawntung kumpipa ahi hi. A heh ciangin lei kiling a, gamte in a hehna nang zo lo hi. Amaute’ tungah, “Vantungte le leitung a bawl lo pasian-te, leitung mun khempeuh panin a mangthang ding uh hi,” ci-in na gen ding hi. Pasian in ama vangliatna tawh leitung bawl a, ama pilna tawh leitung piangsakin, ama siamna tawh vantung a zal hi. Amah a pau ciangin vantungah tuite ging hunhun a, leimong panin tuikhu a suaksak hi. Guahzuk nadingin khua phiasak a, huihkua panin huih a nungsak hi. Mi khempeuh hai-in pilna nei lo khin uh a, kham seekte khempeuh in a milimte uh a maizumlawh uh hi. Bang hang hiam cih leh a milimte uh zuau hi lel a, nak thei lo uh hi. Kimanna a nei lo, a haihuaipi hi a, gim a kipiak ni ciangin a kisia ding uh hi. Jakob’ Pasian tua bang hi lo a, amah pen na khempeuh a piangsak pa ahi hi. Ama mi dingin Israel mite teel a, ama min, Vanglian Topa ahi hi. Galte’ umcih a thuak mite aw, na puanlom uh zial un! Bang hang hiam cih leh Topa in, “En un, tu-in hih gam sungah a teng mite ka lawnkhia ding a, a theih nadingun a tung uhah lungkhamna ka tungsak ding hi,” a ci hi. Ka thuakna hangin ka gim a, ka liamna nasia mahmah hi. Ahih hangin, “Hih gimna ka thuak ding mah hi,” ka ci hi. Ka puanbuk hong kisuksiat sak a, a kikanna khau khempeuh kitat mangkhin hi. Ka tate in hong taisan uh a, tu-in om nawn lo uh hi. Ka puanbuk a hong lamsak ding leh ka kongkhak puante a hong khaisak ding kuamah om nawn lo hi. Bang hang hiam cih leh makaite hai khin uh a, Topa’ deihna dong lo uh hi. Tua thu hangin amaute mapai lo uh a, a mite uh kithehthang mang hi. Ngai dih un, thu khat kigen hi. Judah khuapite gamlak a suaksak ding le se-alte’ khua a suaksak dingin leilu lam gam panin buaina lianpi khat hong pai hi. Topa aw, mihing’ omdan ama uk theih ahih lohna ka theita a, ama kalsuanna ding ama geeltheih hi lo hi. Topa aw, a hoihbek takin, hehlua loin kei hong hilh in. Hong hehlua lecin kei ka si ding hi. Nangmah a hong thei lo gamte tung le nangma min a hong lo ngei lo mite tungah na hehna sungsuk in. Bang hang hiam cih leh amaute in Jakob’ suanlekhakte thatmang khinin amau’ tenna a susia khin uh hi. Topa in kei hong hopih a, “Hih thuciamna thute ngai inla, Judah mite le Jerusalem khuamite kiangah va gen in. Topa, Israel mite’ Pasian in kong cihin-ah, hih thuciamna a mang lo mi peuhmah in hamsiatna thuak ta hen, ci-in va gen in. Tua pen na pute na pate uh, sik haltuina meikhuk tawh a kibang Egypt gam pana ka lakkhiat ni-a ka thuciamna ahi hi. Tua ni-in, ka thu hong ngai-in kong thupiakna bangin na sep uhleh, note ka mi na hi ding uh a, kei pen note’ Pasian hi-in, tua bang na hih uhleh na pute na pate uh tungah ka ciamsa, tu-a na neih uh bawngnawi le khuaizu tui bangin a luanna gam kong pia ding hi, ci-in thu ka pia hi,” hong ci hi. Tua ciangin keimah in, “Hi ta hen, Topa aw,” ci-in ka dawngkik hi. Tua ciangin Topa in kei kiangah, “Hih thuciamna thute ngai-in a sep nadingun Judah gam khuapite le Jerusalem khua kongzing lakah va taangko in. Bang hang hiam cih leh Egypt gam panin ka lakkhiat pan a kipan tuni ciang dong ka thu hong mang un, ci-in na pute na pate uh tungah tam veipi nakpitakin ka hilh ngitnget hi. Ahih hangin amaute in ka thu hong mang loin a bil uh hong ngat lo uh a, a gitlohna lungsim uh a zui tentan uh hi. Hih thuciamna a zuih ding uh thu ka piak hangin hong nial veve uh ahih manin tua sunga thute a vekpi-in ka tungsak ding hi,” hong ci hi. Tua ciangin Topa in hong hopih leuleu a, “Judah minamte le Jerusalem khuamite in kei hong langpang uh hi. Ka thu a ngai nuam lo a pu a pate uh’ mawhna lamah kilehhei khinzo uh a, pasian dangte’ na a sem dingin a zui khinzo uh hi. Israel mite le Judah mite in a pu a pate uh tawh ka bawlsa uh thuciamna a palsat khinzo uh hi. Tua ahih ciangin Topa in kong cihin-ah, en un, a pelh theih loh uh gimna amau’ tungah ka tungsak ding a, kei kiangah a hong kap liang uh zongin ka dawng nawn kei ding hi. Tua ciangin Judah mite le Jerusalem khuamite in meihal biakna tawh a biak uh a pasian-te uh’ kiangah pai-in a va thum ding uh hi. Ahih hangin hih gimna hong tun ciangin a honkhia thei tuan kei ding uh hi. Bang hang hiam cih leh, Judah aw, na khua om zahzah uh pasian na nei uh a, Jerusalem khua kongzing om zahzah mah, meihal biakna tawh Baal biakna ding a zumhuai biakna taute na bawl tazen uh hi. “Tua ahih manin Jeremiah aw, hih mite a’ ding thu ngetsak kei in la, amau’ tangin thumsak kei in. Bang hang hiam cih leh amaute in gim ngahin hong sap uh ciangin ka ngai kei ding hi. Ka itte in siatna a bawl khit uh ciangin ka biakinn sungah bang thu nei thei nawn ding ahi uh hiam? Nong kamkhapte uh le na biakpiakna sate un na kisiatna ding uh hong kipelhsak thei ding ahi hiam? Tua ciangin note na lungdam thei ding uh hiam? Nidang lai-in Topa in note, a hing dikdek a gahpha oliv kung tawh kong genteh ngei hi. Ahih hangin kong hal ding a, na hiangte uh kangtumin ging huhu ding hi. Israel mite le Judah mite in meihalna tawh Baal bia-in hong hehsak uh a, hih bang siatna bawl uh ahih manin, amaute a phut keimah Vanglian Topa in amaute’ tungah siatna a tunna ding thu ka piazo hi,” hong ci hi. Ka galte in kei a hong sawmna uh Topa in nong hilh ciangin ke’n ka thei pan hi. A kigo dingin a kipaipih mawhna a nei lo tuuno bang ka hi hi. Amaute in, “Singkung a gahphat hun laitakin phuktan ni. Ama min a kiphawk nawn loh nadingin amah thatlum ni,” ci-in a gen uh a, kei hong sawmna uh ahihlam ka thei kei kha hi. Ahih hangin thu a mantakin khenin, mihingte’ lungsim le a ngaihsutna uh a entel a Vanglian Topa aw, amaute na thuhkikna kei hong musak in. Bang hang hiam cih leh nangma tungah ka thu kong ap khin hi. Tua ahih manin kei hong that nuamin, “ Topa’ min tawh thu hilh kei in. Na hilh leh kote’ khutlumin na si ding hi,” a hong ci Anathoth khuamite tawh kisai-in Vanglian Topa in, “En un, amaute gim ka pia ding hi. A tangvalte uh namsau-in si ding uh a, a tapate le a tanute uh kialin a puksi ding uh hi. Anathoth khuamite tungah siatna tungsakin gim ka piak hun ciangin a suakta kuamah a om nawn kei ding uh hi,” a ci hi. Topa aw, nang tawh thu i kisel ciangin nang a tawntungin na man den hi. Ahih hangin thu khat ka hong dongnuam lai hi. Bang hangin migilote daupai uh a, mikhem hatte gualzo sese ahi uh hiam? Nangmah in amaute na suan a, amaute in zong zung kha-in, khangin, gah hong gah uh hi. A kam uh tawh hong phat khem uh a, a lungsim uh nang tawh kigamla hi. Ahih hangin Topa aw, nangmah in kei nong thei hi. Ka gamtatnate nong mu a, nang ka hong itna thu na hong thei hi. Amaute pen gawh dingin a kikoih tuu bangin kaikhia inla, a kigawh ni hun ding a tun mateng tuamkoih in. Ka gam sung bang tanvei keucip ding ahi hiam? Mun khempeuhah lopate bang tanvei vulcip ding ahi hiam? A teng mite’ gitlohna hangin gamsate le vasate a mangthang khin uh hi. Bang hang hiam cih leh amaute in, “I gamtatnate Pasian in hong mu kei ngawn,” a ci uh hi. Topa in, “Jeremiah aw, mite tawh tai kidem a, nangmah hong gimsakzo uh ahihleh, sakol bangci demzawh ding na hiam? A nopna munah tuk lailai na hih leh Jordan gun gei sing kawm lakah bangcih ding na hi hiam? Bang hang hiam cih leh na sanggamte le na innkuanpihte nangawn in nang hong zuak uh a, nang a hong do ding mihonpi a kaikhawm uh hi. Kam khum tawh nang a hong zol uh hangin um kei in,” ci-in hong dawngkik hi. Tua ciangin Topa in, “Ka inn ka nusia khin a, ka luahsa mite ka paimangta hi. Ka it mahmah ka mite, a galte uh’ khut sungah ka piata hi. Ka luah dingin ka teelsa mite in gamlak a humpinelkai bangin kei’ langkhatah pangin hong hawksan uh ahih manin amaute ka mudah hi. Ka mite pen, sasialne vasa gial khat, sasialne vasa dangte in a kimkot panin a tuk huan nainai uh tawh a kibang uh hi. Gamsate aw, hong kikhawm unla, pawi hong siim un. Tuucing dang tampi in ka leenggah lo hong suksiatsak uh a, kei a’ teng hong tuatcilsak uh hi. A hoih mahmah ka leenggah lo pawnlak, gamlak, a suaksak uh hi. Pawn lak hong suahsak uh a, dahin ka kap hi. Gam sung khempeuh a kisiat khit hangin kuamah in phamawh sa lo sawnsawn uh hi. Sehnel gam mualsang panin a susia dingte hong paizo uh hi. Gammong khat panin gammong khat dongah a lungmuang kuamah om lo hi. Bang hang hiam cih leh Topa’ namsau in mi khempeuh a vattuk hi. Amaute in mangbuh tuh uh a, ahi zongin kiak bek a ngah uh hi. Nasep a hahkat mahmah hangun bangmah a ngah kei uh hi. A kihtakhuai Topa’ hehna hangin anlak hun ciangin a maizum ding uh hi,” a ci hi. Ka mi Israel-te’ luah dingin ka piak gamh a susia nuam a gilo a vengte tawh kisai-in Topa in ka cihin-ah, “En un, a gam uh panin amaute ka botkhia ding a, amau’ khutsung panin Judah mite ka suaktasak ding hi. Ahih hangin amaute ka lakkhiat khit ciangin ka hehpihkik ding a, amau’ luah ding amau’ gam ciatciat uhah ka koihkik ding hi. Tua ciangin, ka mite’ omdan hoihtakin a sin uh a, Baal min tawh a kiciam dingin ka mite a sinsak mah bangun, ‘ Topa a nuntak mah bangin,’ ci-in keima min tawh kiciam ding a sin uhleh ka mite lakah kiptakin a om ding uh hi. Ahih hangin gam khat peuhpeuh in ka thu hong ngaih kei leh tua gam botkhia-in ka susia ding hi, Topa in kong ci hi,” a ci hi. Topa in kei tungah, “Pai inla patpuan dialkaih khat na lei khit ciangin kawtsak loin teeng in,” hong ci hi. Tua ciangin kei zong Topa’ hong gen mah bangin dialkaih khat lei-in ka teeng hi. Topa in a nih veina hong hopih a, “Na kawngah na teen, na dialkaih lei la in. Tho inla Eufratis gun-ah pai in. Tua lai-ah suanghawm sungah va seel in,” hong ci leuleu hi. Kei zong pai-in Topa’ hong sawlna bangin Eufratis gun gei-ah ka seel hi. Tua zawh ni tampi khit ciangin Topa in kei kiangah, “Eufratis gun-ah va pai inla, na seel dingin ka hong sawl na dialkaih va lakik in,” hong ci hi. Tua ciangin kei zong Eufratis gun-ah pai-in dialkaih ka seelna mun khuat kikin ka la hi. Dialkaih na ngotgawp khin a, zattheih ding hi nawn lo hi. Tua ciangin Topa in kei hong hopih a, “ Topa in kong cihin-ah, hih bangmahin Judah mite’ kisaktheihna le Jerusalem khuate’ ki-uatsaknate ka susia ding hi. Ka thu hong ngai nuam loin amau’ ngaihsutna bang bekin a pai tentan nuam, pasian dangte’ na a sem ding le a bia dingin a nung a zui hih migilote pen zattheih ding ahi nawn lo, hih dialkaih bang ahi ding uh hi. Bang hang hiam cih leh dialkaih, mite’ kawng tungah a belh cinten mah bangin Israel mi khempeuh le Judah mi khempeuh kei’ tungah a hong belh cinten dingin ka bawl hi. Tua hileh amaute ka mi hi ding uh a, ka minthanna, ka hoihna, le ka vangliatna ding ahi ding uh hi. Ahih hangin amaute in ka thu hong mang lo uh hi, Topa in kong ci hi,” hong ci hi. Topa Pasian in kei kiangah, “Jeremiah aw, amau’ kiangah, ‘ Topa, Israel mite’ Pasian in a hong genin-ah, “Zubeel khempeuh leenggahzu tawh a kidim ding hi,” hong ci hi,’ va ci in. Amaute in nang kiangah, ‘Beel khempeuh leenggahzu tawh kidim ding cih kote in thei lo ka hi uh hiam?’ hong ci kik ding uh hi. Tua ciangin nangmah in amaute kiangah, ‘ Topa in hong cihin-ah: En un, David’ tokhom tungah a tu kumpite, siampite, kamsangte, le Jerusalem khua-a a teng mi khempeuh a kipan gam sungah a om mi khempeuh zu tawh kidim sakin ka khamsak ding hi. Pate le tate a kipan amaute khatlekhat ka kiphusak ding a, Topa in kong cihin-ah, hehpih lo, lainat lo, it loin ka sisak ding hi, ci hi,’ va ci in,” hong ci hi. Ngai-in na bil uh ngat un; kisathei kei un. Bang hang hiam cih leh Topa in thu a genzo hi. Topa in khua mialsak a, khuamialna mualtungah na tuk ma un, na lamet uh khuavak pen khuamial bikbek a suah ma-in, Topa na Pasian uh pahtawi un. Ahih hangin ka thu nong ngaih kei uhleh na kisaktheihna uh hangin ka kapsim ding a, khitui luangin nakpitakin ka kidik ding hi. Bang hang hiam cih leh Topa’ tuuhonte sal dingin kikaikhia zo hi. Topa in kei kiangah, “Kumpipa le a nu kiangah, ‘Na kumpi tokhomte tung panun hong tuaksuk un. Bang hang hiam cih leh na kumpi lukhute uh na lu tung uh panin kia khinzo hi,’ va ci in. Negeb gam a om khua kongpite lah kikhak a, kuamah lut thei nawn lo hi. Judah mite zong salin kikai a, a vekun sal suak khin uh hi,” hong ci hi. Jerusalem khua aw, khuadak inla, leilu lam panin a hong paite en dih in. Nangmah a hong kipia a hoih mahmah na tuuhonte koi-ah om ahi hiam? Nangma lawm dingin na bawl mite teekteek in nang hong uk ni ciangin bang na ci ding hiam? Numei nausuakte in na a sak velval uh bangin nang zong na na sa ding hi. Bang hangin hih thute kei tungah hong tung ahi hiam, ci-in na ngaihsut leh na mawhna a liatluatna hang ahi hi. Tua thu hangin na nik hong kihawkgawp a, a hong kibuan gawp ahi hi. Ethiopia mivomte in a vun uh khek thei a, kamkei in a gial khek thei ahi hiam? A khek theih uhleh siatna bawl ding a zongsang khin note in zong a hoih na bawl thei ding uh hi. Sehnel gam panin a hong nung huih in buhvai a mut bangin note kong thehthang ding hi. Hih pen nangma ngah dingin ka hong sehsak ahi hi, Topa in kong ci hi. Bang hang hiam cih leh kei na hong mangngilh a, pasian zuau peuh na um hi. Kei mahmah in na nik kong hawksak ding a, kong maizumsak ding hi. Na kihhuainate, na angkawmna, na hukna le gamlak mualtungah numei paktat bangin milim pasian peuh na biak kawikawinate ka muzo hi. Jerusalem aw, gimna ngah ta in. Na siantho nadingin bang tanvei sawt ding ahi hiam, a ci hi. Guah zu loin khua keuna tawh kisai-in Topa in Jerusalem kiangah hih bangin a gen hi: “Judah gam kap a, a khuapite maimang dekdek hi. A mite in puan vom khu-in leilakah bok uh a, Jerusalem khua-a om mite’ kahna aw ging hi. Uliante in a nasemte uh tuitawi dingin sawl uh a, tuikhuk a zuat uhleh tui na om lo hi. A beel hawm uh tawh hong kilehkik uh a, lungkhamin cih nading thei loin a lu uh puan a khuh uh hi. Lokhote lungmang uh a, a lu uh puan a khuh uh hi. Bang hang hiam cih leh guah zu lo ahih manin lei a keugawp hi. Lopa om lo lua ahih manin sazuk in gamlakah a no a nusia liang hi. Gam sakolte, bangmah om lohna mualtungah se-alte bangin a nak huhu uh hi. Lopa om lo ahih manin a hakzo kei uh hi. Ka mite in kei tungah, ‘ Topa aw, ka mawhna uh kote’ langkhatah hong pang ahi ta zongin nangma min hangin kote hong hehpih in. Kote in tam veipi nang kong nungngat uh a, nangma tungah ka hong khial khinzo uh hi. Israel mite’ lamet pa aw, haksat hun ciangin ko a hong honkhia pa na hi hi. Bang hangin ka gam sung uhah khualmi bangin nang omin khualzin zan khat bek a taam bangin hong om na hi hiam? Bang hangin mi lungkiagawp bangin omin, a honkhia thei lo galkap pa bangin om na hi hiam? Ahih hangin Topa aw, kote’ laizangah nang na om a, nangma minin kote hong kisam hi. Kote hong nusia kei in,’ hong ci uh hi,” hong ci hi. Hih mite tawh kisai-in Topa in thu gen a, “Kei kiang panin amaute vakkhia kawikawi nuam uh a, a kideek kei uh hi. Tua ahih manin Topa keimah in amaute ka sang kei a, a khialhnate uh phawkin, a mawhnate uh hangin gim ka pia ding hi,” a ci hi. Topa in kei kiangah, “Hih mite in thupha a ngah nadingin thu hong ngen nawn kei in. An a tan’ uh hangin amau’ thumna ka ngai kei ding a, meihal biakna le an tawh biaknate hong piak uh hangin ka sang kei ding hi. Amaute namsau tawh ahi zongin, kial tawh ahi zongin, pulnatna tawh ahi zongin ka sisakzaw ding hi,” hong ci hi. Tua ciangin keimah in, “Ah, Topa Pasian aw, en dih in. Kamsangte in amaute kiangah, ‘Note in namsau ahi zongin, kial ahi zongin na mukha ngei kei ding uh a, hih munah Pasian in lungnopna kip hong pia ding hi,’ a ci uh hi,” ka ci hi. Tua ciangin Topa in, “Tua kamsangte in kei’ min suangin zuauthu hong gen uh hi. Amaute ka sawl kei a, thu ka pia kei a, zong ka hopih kei hi. Note kiangah hong gen uh thute a man lo maangmuhna, bangmahin a kimang lo aisanna, le amau’ ngaihsuttawm thute ahi hi. Tua ahih ciangin ka sawl lohpi, ‘Hih gam sungah namsau ahi zongin, kial ahi zongin hong tung lo ding hi,’ ci-in keima min suangin thu a gen kamsangte tawh kisai-in Topa in ka cihin-ah, namsau le kial tawh hih kamsangte a si khin ding uh hi. A hilh uh mite in zong kial le namsau thuakin amaute a kipan a zite uh, a tapate uh, le a tanute uh Jerusalem khua kongzing lakah kipaithang ding a, kuamah in a vui kei ding hi. Bang hang hiam cih leh amau’ gitlohna amau’ tung mahah ka buaksuk ding hi,” hong ci hi. Tua ciangin Topa in kei tungah thu hong gen a, “Jeremiah aw, amaute kiangah, ‘Sun le zanin ka khitui luangluang hen la, kang ngei kei tahen. Bang hang hiam cih leh keima mite in nakpitakin liamna thuak uh a, nakpitakin a kisat uh hi. Lolai-ah paikhia leng, namsau tawh a kithat mi bekbek ka mu a, khuapi sungah lut leng, kialin a puksite bekbek ka mu hi. Kamsangte le siampite in koi-ah pai ding cih thei lopi-in gam sungah an ngenin a vak kawikawi uh hi,’ ci-in va gen in,” hong ci hi. Topa aw, nangmah in Judah gam nialsiang khinzo na hi hiam? Zion khua kihhuai sa na hi hiam? Bang hangin kote liamna hong thuaksak a, hong damsak nawn lo na hi hiam? Lungnopna ka lamen uh a, hoihna bangmah a hong tung kei hi. Damna ding hun ka lamen uh a, lauhuaina bekbek ka mu uh hi. Topa aw, ka gitlohna uh le ka pute ka pate uh gitlohnate ka hong pulak uh hi. Bang hang hiam cih leh nangma tungah ka hong mawh khin uh hi. Nangma min na khualna-in kote hong nolh kei inla, a vanglian na tokhom mindaisak kei ta in. Kote tawh nong thuciamna hong phawk inla, hong ciampel kei ta in. Gamdang pasian zuaute’ lakah guah a zusak thei om ahi hiam? Tua ahih kei leh zong vantungmi in ama thu-in guah zu tawmsak thei ahi hiam? Tua bang a hih thei nang bek hi lo na hi hiam? Topa kote’ Pasian aw, nangmah in tuate khempeuh hih na hih manin nangma sungah lametna kong nei uh hi. Tua ciangin Topa in kei hong hopih a, “Moses le Samuel nangawn ka mai-ah hong dingin hong thum uh zongin hih mite ka hehpih tuan kei ding hi. Ka muhna panin hawlkhia unla, paikhia sak un. Amaute in, ‘Koi-ah pai ding ka hi uh hiam?’ ci-in hong dot uhleh hih bangin genkik in: ‘ Topa in, “Pulnatna tawh a si dingte pul-in si ding uh a, namsau tawh a si dingte namsau-in si ding uh hi. Kial tawh a puksi dingte kialin si ding uh a, sala kikai dingte zong salin kikai ding uh hi,” a ci hi,’ va ci in. “Amaute’ sih nadingin gimna nam li ka tungsak ding hi. A kithahna ding uh namsau, a keizan gawp dingin ui, a valhtum ding le a susiagawp dingin huih lak a vasate le leilak a ganhingte ka koih ding hi. Judah kumpi Hezekiah’ tapa Manasseh in Jerusalem khua-ah hih bangin a bawl thu leitung gam khempeuhte in mu-in a lau ding uh hi. “Kua in nang hong hehpih ding ahi hiam? Jerusalem aw, kua in nang hong kah ding ahi hiam? Kua, hong lambaangin, damlenat kitheihsakna-in hong hawh ding ahi hiam? Nangmah in kei nong taisanzo hi, Topa in kong ci hi. Kei nong nungngat niloh hi. Tua ahih manin ka khut zanin nang kong susia hi. Ka hehna ka ki-ipzo nawn kei hi. Na gam sung khua kongpite-ah huihpi’ mut bangin note kong mutmang ding hi. Na tate uh ka beisak ding a, ka mite ka susia ding hi. Bang hang hiam cih leh na gitlohna uh le na omdan hoih lo panun na kiheikik kei uh hi. Tuipi a sehnel omzah sangin nupi meigong ka tamsakzaw ding hi. Na tangvalte uh a khan laitakin ka that ding a, a nute uh ka lunggimsak ding hi. Note’ tungah thakhat thu-in lungkhamna le launa ka hong tungsak ding hi. Ta sagih a nei nupi khakham vei-in a sibup hi. Sunkimlai hinapi ama a dingin khuamial bang a, maizumna le mindaina a thuak hi. No a nungta laite na galte un namsau tawh a hong satlup dingun ka hong pia ding hi, Topa in kong ci hi,” a hong ci hi. Gimna ka thuak hi; ka nu aw, gam sung khempeuh a mite tawh a kitawng a kisel dingin kei nong suaksak hi. Ka sumte kuamah lah leitawisak loin kuama-a’ lah leitawi la lo napi, a vekpi-un kei hong hamsiat teitei uh hi. Topa aw, amaute’ hoih nadingin nang tungah kong thumsak kei a, gimna le haksatna hun ciangin ka galte a dingin nang’ tungah kong ngetsak kei leh tua amau’ hong hamsiatnate kei’ tungah hong tung ta hen! Mi khat in sik kuaitan zo lo ding ahihleh leilu lama sik le sumngo kihel khawm kuaitan zozaw ding ahi hiam? Topa in, “Na gam sung tenga na bawl uh mawhna khempeuhte’ hangin na neih na lam uh le na sum na paite uh man ngah loin na galte uh ka tuahsakmang ding hi. Na theih ngei loh uh gam khatah na galte uh’ na ka hong semsak ding hi. Bang hang hiam cih leh ka hehna mei bangin kitawhkuang a, a mit nawn kei ding hi,” a hong ci hi. Tua ciangin keimah in: Topa aw, nang na thei hi. Hong phawk inla hong veh in. Kei a hong bawlsiate tungah phu hong laksak in. Ka galte tungah na lungduaina hangin kei’ sih nading piangsak kei in. Nangma hangin minsiatna a thuak ka hihlam hong thei in. Na thute in kei hong kem a, an bangin ka ne hi. Na thute kei a dingin kipahna le lungdamna ahi hi. Bang hang hiam cih leh nangma minin kei hong kilo hi, aw, Topa, Vanglian Pasian aw. Mi gualnuam mawkmawkte tawh ka kikhawl kei a, zong ka lungdam khawm kei hi. Nangma thu kong manna hangin kei tangkai ka hih manin a hehin ka omden hi. Bang hangin ka natna dai thei lo a, ka liamna dam thei lo a, dam nuam het lo ahi hiam? Tui a kang lui tawh kibangin lungkiatna hong thuaksak ding na hi hiam, ka ci hi. Tua ahih manin Topa in, “Na hong kilehkik leh kong koihna ngei-ah kong koihkik ding a, ka na na sem kik ding hi. Thu manpha lo gen loin thu manpha bek na gen leh, ka kamsang dingin ka hong zang ding hi. Nang kiangah amaute hong pai ding uh a, nang na hih leh amau’ kiangah na pai kei ding hi. Hih mite tungah sumngo a kibawl khuakulhpi kong bangsak ding a, amaute in a hong sim uh hangin a hong zo kei ding uh hi. Bang hang hiam cih leh a hong honkhia ding le a hong suaktasak dingin nang ka hong ompih hi, Topa in ka hong ci hi. Migilote’ khutsung panin nang kong suaktasak ding a, mi lauhuaite’ khutsung panin nang kong honkhia ding hi,” a hong ci hi. Topa in kei hong hopih a, “Hih bang munah zi nei kei inla, tanu tapa zong nei kei in. Bang hang hiam cih leh hih mun a suak tanu tapate le a nute uh tawh kisai-in Topa in ka cihin-ah: Natna lian tawh si ding uh a, kuamah in kah loin kuamah in zong a vui kei ding uh hi. Leilak a ek ki-tha a bang lel ding uh hi. Namsau le kial tawh a si ding uh a, a luanghawmte uh huihlaka a leeng vasate le leilaka ganhingte in a ne ding uh hi. “Bang hang hiam cih leh Topa in kong cihin-ah, mi’ kahna inn sungah lut kei unla, thumin kuamah va kah se kei un. Bang hang hiam cih leh lungnopna, itna lianpi, le ka hehpihna hih mite kiang panin ka lakhia khinzo hi, Topa in kong ci hi. Hih gamah miliante le mineute si ding uh a, kivui loin, amau’ hangin kuamah kap loin, kuamah in a pumpi uh kuiliam loin a sam uh zong a met kei ding uh hi. Misi hangin a kapte hehnep nadingin kuamah in anletui a lui kei ding uh a, a nu ahih kei leh a pa a site nangawn kuamah in a hehnem kei ding hi. Pawi kibawlna inn-ah na pai kei ding uh a, amaute tawh a ne a dawnkhawm dingin na tu kei ding uh hi. Bang hang hiam cih leh Vanglian Topa, Israel mite’ Pasian in hih bangin kong ci hi: En un, hih mun panin note’ muh teekteekin, note’ theih hunsung mahin gualnopna, lungdamna awte le zinei thakte, pasalnei thakte’ awte ka gingsak nawn kei ding hi. “Hih thuteng hih mite tungah na gen ciangin amaute in, ‘Bang hangin Topa in hih gimna lianpi eite tungah hong tungsak ahi hiam? I khialhna bang ahi hiam? Topa i Pasian’ tungah bang mawhna bawl ihi hiam?’ hong ci ding uh hi. Tua ciangin nangmah in amaute kiangah, ‘ Topa in, “Na pu na pate un kei hong taisan khin uh a, kei hong nusia-in ka thukham a zui kei uh hi. Note, na pu na pate sangun na siahuaizaw uh hi. Bang hang hiam cih leh en un, note’ utna bang ciat na zui tentan uh a, ka thu nong ngai nuam kei uh hi. Tua ahih manin hih gam panin note le na pu na pate un na theih ngei loh uh gamah kong notkhia ding hi. Tua lai-ah sun le zanin pasian dangte’ na na sem niloh ding uh hi; bang hang hiam cih leh note kong angvan nawn kei ding hi,” ci hi,’ na ci ding hi. “Tua ahih manin, en un, Topa in kong cihin-ah, kuamah in, ‘Egypt gam panin Israel mite a hong lakhia Topa a nuntak bangin,’ ci-in kei’ minin a kiciam nawn loh hun hong tung ding hi. Amaute in, ‘Leilu lam gam le eite hong hawlkhiatna gam khempeuh panin Israel mite a hong kaikhawm Topa a nuntak bangin,’ a cizaw ding uh hi. Bang hang hiam cih leh a pu a pate uh ka piaksa, amau’ neihsa gamah amaute ka paipih ding hi. “En un, Topa in kong cihin-ah, ngabeng tampi ka khah ding a, amaute ka mansak ding hi. Tua khit ciangin sabeng tampi ka khah ding a, amaute in mualtung khempeuh le suanghawmte lakah amaute a beng ding uh hi. Bang hang hiam cih leh a omdan khempeuh uh ka mitin ka mu a, kei’ kiang panin a kiseel bangmah om lo hi. A khialhna khempeuh uh zong ka mu hi. Amaute’ khialhna le a mawhnate uh a zah nihin ka thuk ding hi. Bang hang hiam cih leh amaute in a muhthadahhuai siluang hawmte tawh a kibang milimte tawh ka gam a ninsak uh a, kihhuaina tawh ka gamh a dimsak uh hi,” hong ci hi. Aw Topa, ka hatna le ka kulhpi, lungkham hun ciangin ka bukna pa aw, leimong panin gamdang mite nangma kiangah hong pai ding uh a, “Ka pu ka pate un zuauthu le bangmahin a kimang lo milimte longal bangmah dang a luah kei ding uh hi. Mi in ama pasian ding bawltawm thei ahi hiam? Tuate pasian hi lo hi,” hong ci ding uh hi. “Tua ahih manin amaute ka hilh ding hi. Tutung peuhmahin Topa ka hihna thu a hong theih nadingun ka vangliatna le ka hatna ka theisak ding hi,” ci-in Topa in a gen hi. Topa in a genna-ah, “Judah mite’ mawhna sik laikung khat tawh kigelh hi. Suangmanpha mukzum tawh amaute’ lungtang peek tung le biakna tau kite tungah khuakin ki-at hi. A tate un singniim nuai khempeuh le mualsangte’ tunga a biakna taute uh le a nusian uh Asherah milimte phawk veve uh a, zanglei-a om mualte tungah zong tua mawhna a kilang hi. Na gam sung khempeuh uhah na bawl uh mawhnate hangin na neih na lam uh le na sum na paite uh, na galte uh ka tuahmangsak ding hi. Note kong piak na gam uh zong na taan ding uh a, na theih ngei loh uh gam khatah na galte uh’ na ka hong semsak ding hi. Bang hang hiam cih leh ka hehna kitawhkuang a, a mit nawn kei ding hi,” a ci hi. Topa in kong cihin-ah: “Mi bek muangin mi’ hatna bek suang a, Topa tawh a lungsim a kilehngat mi in hamsiatna a ngah ahi hi. Amah pen sehnel gamah a po sawlbawk bang hi a, khangin a bawk a phazo kei ding hi. Kuama ten lohna ci gam, keugaw gamah amah a teng ding hi. “ Topa muangin amah a beel mi in thupha a ngah ahi hi. Amah, gun gei-a a kisuan singkung bang hi a, lui gei-ah a zung a kha hi. A tehte hing den ahih manin nisa kihta lo hi. Tatsat loin gah den ahih manin guah zuk loh kum ciangin zong lungkham tuan lo hi. “Na khempeuh lakah lungsim a khem hatpen hi a, a kisia pha mahmah ahi hi. Kua in lungsim theizo ding ahi hiam? Keimah Topa in mi khempeuh’ nuntakzia le a gamtatna tawh kizui-in a piakhia dingin ngaihsutna ka entel a, lungsim ka sittel hi,” a ci hi. Thuman lopi tawh a hau mi pen ama tui lopi a keuhsak dingin a opsim vasa tawh kibang hi. A khanlai-in a neihsa teng taan ding a, a tawpna-ah mihaipi a suak ding hi. I biakinnpi pen a kipat cil-in mualtungah a om a minthang mahmah kumpi tokhom tawh kibang hi. Aw Topa, Israel mite’ lamet pa aw, nang a hong taisan mite a zahhuai ding uh hi. Nang a hong lehngatsan mite leivui lak a min gelh bangin a mangthang uh hi. Bang hang hiam cih leh nuntakna ciktui ahi Topa a hong taisanzo uh hi. Topa aw, hong damsak lecin ka natna teng bei ding a, hong honkhia lecin kei ka suakta ding hi. Bang hang hiam cih leh nang pen ka hong phatpa na hi hi. En in, amaute in, “ Topa’ hong tawnnate koi lai takah om ahi hiam? Tu-in hong tungta hen!” a ci uh hi. Ahih hangin amaute tungah gimna na tunsak ding kong ngen kei a, siatna ni hong tun ding ka deihsak lohlam zong na hong thei hi. Ka kam panin a gingkhia thu khempeuh na thei khin hi. Kei hong lausak kei in. Gimna hong tun ciangin kong belh pa na hi hi. Kei hong bawlsiate na zahhuaisak inla, ahih hangin kei hong zahhuaisak kei in. Amaute lung-amsak inla, ahih hangin kei hong lung-amsak kei in. Amaute tungah siatna ni tungsak inla, a zah nihin susia in! Topa in kei kiangah, “Va pai inla, Judah gam kumpite’ lutna le pusuahna Mite’ Kongpi le Jerusalem khua kongpite khempeuhah va ding inla, hih bangin va gen in: ‘Hih kongpi sunga hong lut no Judah gam kumpite, Judah mi khempeuh, le Jerusalem khuami khempeuhte aw, Topa’ kammal ngai un. Topa in hih bangin ci hi: Na nuntak nop lai uhleh kidawm unla, Sabbath ni-in van pua kei un. Jerusalem khua kongpite-ah bangmah hong lutpih kei un. Sabbath ni-in na inn uhah bangmah sem kei un. Na pu na pate uh ka thupiak mah bangin Sabbath ni siangthosak un. Ahih hangin na pu na pate un ka thu hong ngai lo uh a, a bil uh hong ngat lo uh hi. Ka thu hong mang lo uh a, ka hilhna a theih loh nadingun a lungsim uh a khauhsak uh hi. “‘Ahih hangin Topa in kong cihin-ah, note in ka thu nong ngaih uh a, Sabbath ni-in hih khua kongpite-ah bangmah hong lutpih loin, Sabbath ni siangthosakin, na na sep kei uhleh, na kumpite uh le na uliante un David’ neih bang kumpi vangliatna a nei ding uh hi. Amaute in Judah mite le Jerusalem khuamite tawh sakol leeng le sakolte tungah tuangin hih khua kongpite-ah hong lut ding uh a, hih khuapi-ah zong mi teng tawntung ding hi. Mite in Judah gam khuapite le Jerusalem khua kiim panin ahi zongin, Benjamin gam, Shefelah zanglei gam, mualtung gam, le leitaw lam Negeb gamte panin ahi zongin meihal biakna le biakpiaknate, an tawh biakna, paknamtui le lungdam biakpiaknate, Topa’ biakinn-ah hong pia ding uh hi. Ahih hangin ka thu nong ngaih kei uh a, Sabbath ni siangthosak loin, Jerusalem khua kongpite-ah van pua-in nong lutpih uhleh, tua kongpite ka hal ding hi. A mei in Jerusalem khua kumpi innte lawhin kangtum ding a, a mei a kiphelhzo kei ding hi,’ va ci in,” hong ci hi. Topa in kei hong hopih a, “Tho in. Beelseek pa’ inn-ah paisuk inla, tua lai-ah ka thute kong hilh ding hi,” hong ci hi. Tua ciangin kei zong beelseek pa’ inn-ah ka paisuk leh beel a sek laitak ka va tuakkha hi. Buan tawh a bawl a beel ama khut sungah kisia ahih manin beelseek pa in hoih a sak bangin beel dang khatin a sek pha hi. Tua ciangin Topa in kei kiangah, “Israel mite aw, Topa in kong cihin-ah, hih beelseek pa’ hih bangin note zong hong hih thei lo ding ka hi hiam? En un, beelseek pa’ khutsunga buan tawh kibangin, Israel mite aw, kei’ khut sungah note na om uh hi. Minam khat peuhpeuh ahi zongin, gam khat peuhpeuh ahi zongin botkhia-in, khenkhamin, ka suksiatna ding thu, hun khat peuhpeuh lai-in ka gen khinzo ahi zongin tua ka gensa minam le gam a siatna panin a kiheikik leh, ama tungah siatna tunsak dingin ka sehsa pen ka kisikkik ding a, ka tungsak nawn kei ding hi. Minam khat peuhpeuh ahi a, gam khat peuhpeuh ahi zongin lam ding le phut dingin hun khat peuhpeuh lai-in ka gen khinzo ahi zongin, amah in ka thu hong ngai loin, hoih ka sak lohte a bawl teitei leh, ama tungah hoihna bawl ding ka sehsa pen ka kisikkik ding a, ka bawl nawn kei ding hi. Tua ahih manin tu-in, Judah mite le Jerusalem khuamite’ kiangah Topa in a cihin-ah, ‘En un, note’ siatna ding ka geel a, note’ langkhatah ngimna khat ka nei hi. Na vekpi-un na siatna uh pan kilehkik unla, na omdan uh le na nasepnate uh bawlpha un,’ va ci in. Amaute in, ‘Tua bang gen kullo hi. Ko’ ngimna bangin ka gamta ding uh a, mi khempeuh ama lungsim sia’ deihna bangin a gamta ding uh hi,’ hong ci ding uh hi. “Tua ahih manin Topa in kong cihin-ah: Minam dangte’ lakah hih bang thu a kiza ngei hiam, dong dih un. Keima mituam Israel in a mulkimhuai mahmah na khat a hihzo hi. Lebanon mualtung vuk in susia ngei ahi hiam? Mualtung panin a hong luang a vot kilkel luite kang ngei ahi hiam? Ahih hangin ka mite in kei hong mangngilh khin uh a, milim pasian-te kiangah paknamtui a hal uh hi. Amau’ tot ding lampi-ah tuk uh ahih manin a tot ngei uh lampi lui zui nawn loin, lampi lopi a tawn uh hi. Amaute’ gam pen a mulkimhuai le simmawhna tawh a kiphitsan den ding gam a suaksak uh hi. Tua gam a kantan khempeuh mulkim mahmah uh a, lamdangsa-in a lu uh a pei uh hi. Nisuahna lam huih in nin a mutmang bangin a galte uh mai-ah amaute ka thehthang ding hi. Haksatna a tuah ni-un amaute ka nungngat ding a, ka maingat kei ding hi,” hong ci hi. Tua ciangin amaute in, “Hong pai un, Jeremiah sawm ni. Bang hang hiam cih leh eite a hong hilh dingin siampite ahi zongin, i dot ding mipilte ahi zongin, Pasian’ thu a hong gen dingin kamsangte ahi zongin i nei hi. Hong pai un, amah mawhsakin ama thu peuhmah mal khat zong i mang kei ding hi,” hong ci uh hi. Hong en in, Topa aw, keima hong thugennate le ka galte in keima thu a gennate hong ngai in. Hoihna pen siatna tawh a kituak ding mah ahi hiam? Keimah hong siahna-in gum a to uh hi. Nangma mai-ah kong ding a, amau a’ ding thuhoih kong gen hi. Na hehna amaute tungah na tunsak loh nadingin ka hong ngetnate hong phawk in. Tua ahih manin a tate uh kial tawh puksisak inla, amaute namsau-in sisak in. A zite uh ta neisak kei inla, meigong suaksak in. A pasalte uh pulnatna tawh sisak inla, a tangvalte uh gal sungah namsau tawh kithatlum sak in. Amau a thatlum ding galkapte thakhat thu-in paisak inla, amau’ innte panin kahna aw kizasak in! Bang hang hiam cih leh ka kiat nadingin gum to uh a, ka khete a awk nadingin thang a hong siah uh hi. Ahih hangin Topa aw, amaute in thah dingin kei a hong sawmna uh nang na thei hi. Amau’ khialhnate na maisak kei inla, nangma muhna panin amau’ mawhnate phiatmangsak kei in. Nangma mai-ah amaute guallelsak inla, na heh ni mahin hih ek in. Topa in hong hopih a, “Beelseek pa kiangah pai inla, leibeel khat va lei in. Mite’ lakah upa pawlkhat le siampi upa pawlkhat tonpih in la, nisuahna lam kongpi gei, Hinnom kuam-ah pai-in, kong gen thute tua lai-ah va taangko in. Nangmah in, ‘Judah kumpite le Jerusalem khuamite aw, Topa’ kammal ngai un. Vanglian Topa, Israel mite’ Pasian in hong cihin-ah: En un, hih munah kong tunsak ding siatna lianlua ahih manin a za mi khempeuhte’ bil sungah ging den ding hi. Bang hang hiam cih leh hih mite in kei hong taisan khinzo uh a, amaute a kipanin a pu a pate uh le Judah kumpite’ theih ngei loh pasian dangte’ kiangah paknamtui halin, hih mun a ninsak uh hi. Hih mun pen mawhna nei lo mite thahna sisan tawh dimsak uh a, ka thupiak ahi lo, ka ngaihsutkhak beek zong ahi lo, a tate uh meihal biakna tawh Baal biak nadingin Baal biakna tau sangte a lam khinzo uh hi. Tua ahih manin, en un, Topa in kong cihin-ah, hih mun pen Tofeth ahi zongin Hinnom Kuam ahi zongin a kicih nawn loh hun hong tung ding hi. Kithahna Kuam a kicizaw ding hi. Hih munah Judah mite le Jerusalem mite’ ngimna ka tangtungsak kei ding a, a galte uh’ namsau le a thatnuamte’ khutlumin amaute ka sisak ding hi. Amau’ luanghawmte huihlaka leeng vasate le leilak ganhingte’ an dingin ka pia ding hi. Hih khuapi a mulkimhuai le a simmawhhuai ka suaksak ding a, a kantan mi khempeuh in khuapi siatna hangin lamdangsa-in zahpihin a phitsan ding uh hi. A galte uh le a that nuam mite in, amaute sim ding uh a, nek ding om lo lua ahih manin a tapate le a tanute uh’ sa ka nesak ding a, mi khempeuh in a vengte’ sa a ne ding uh hi,’ va ci in. “Tua ciangin na tonpihte’ muhin na beel sukham inla, amaute kiangah, Vanglian Topa in a cihin-ah, hih beelseek pa’ beel kisukham a, a kibawlphat kik theih nawn loh bangmahin hih mite le hih khuapi ka sukham ding hi. Mun dangah si vuina ding mun om nawn lo ding ahih manin Tofeth nangawnah a kivui ding uh hi. Topa in kong cihin-ah, hih mun le hih mun a teng mite tungah tu-a bangin ka hih ding a, hih khuapi Tofeth ka bangsak ding hi. Jerusalem khua-a innte le Judah kumpite’ innte a kipan, innkhum zangah vantung a aksite khempeuh tungah paknamtui hal biakna a kipiakna innte le pasian dangte tungah dawn ding biakna a kibuakna innte khempeuh a vekin Tofeth mun bangin a nin a suak ding hi, ci hi, va ci in,” hong ci hi. Tua ciangin Topa in thu gen dinga hong sawlna Tofeth panin ka ciahkik a, Topa’ biakinn sungah dingin mi khempeuh kiangah thu ka gen a, “Vanglian Topa, Israel mite’ Pasian in a cihin-ah: En un, hih khuapi le a kiima khuaneute tungah ka gensa siatna khempeuh ka tungsak ding hi. Bang hang hiam cih leh amaute in a lungsim uh khauhsak uh a, ka thute a ngai nuam kei uh hi, ci hi,” ka ci hi. Jeremiah in a gen hih thute, Immer’ tapa, Topa’ biakinn ukpa ahi siampi Pashhur in a za hi. Tua ciangin Pashhur in kamsang Jeremiah sat a, Benjamin Kongpi saknung gei, Topa’ biakinn sungah kol a bulh hi. A zing ciangin Pashhur in a kolbulhna panin Jeremiah a khah khit ciangin Jeremiah in, “ Topa in nang, Pashhur ci-in hong sam nawn lo a, ‘Mun Khempeuhah Launa,’ ci-in hong samta hi. Bang hang hiam cih leh Topa in hong cihin-ah, ‘En in, keimah in nang le na lawmte’ lau nadingin nang kong bawl ding hi. Babylon kumpipa’ khut sungah Judah gam khempeuh ka pia ding hi. Amah in sal dingin amaute Babylon khua-ah paipih ding a, namsau tawh a thatlum ding hi. Tua tham loin khuapi sunga hauhna khempeuh, a nasepsa uh khempeuh, a neih a lam a thupiteng khempeuh uh le Judah kumpite’ sumlepai khempeuhte a galte’ khut sungah ka pia ding a, amaute in sutin, manin, Babylon khua-ah a paipih ding uh hi. Pashhur aw, nang le na innsung uha omte khempeuh sal dingin Babylon khua-ah na pai ding uh a, tua lai munah nang na si ding hi. Nang a kipan a man lopi a na thuhilh a ngai na lawmte khempeuh hong kivui ding uh hi,” a ci hi. Topa aw, kei nong khem a, khemna ka thuak takpi hi. Kei sangin nang na hatzaw a, keimah nong zo hi. Nisimin mite’ nuihsat lel ka suak a, mi khempeuh in kei hong zahko uh hi. Bang hang hiam cih leh thu ka gen simin, “Ngongtatna le kisiatna!” ci-in ka kiko den hi. Bang hang hiam cih leh Topa’ kammal ka gen khiatna hangin nisimin simmawhna le zahpihna ka thuaklawh hi. Keimah in, “Ama thu ka gen kei ding a, ama min ka lo kei ding hi,” ci mah leng zong, ama thu ka lungsim sungah mei bangin hong kuang a, ka guh ka tang sungah kikhumcip ahih manin ka ki-ipipna-in ka gimlua a, gen loin ka om thei kei hi. Mite’ kihuau simna thu tampi ka za a, mun khempeuh lauhuai hi. Ka lawm itte khempeuh in ka cihmawh ding hong ngak gige uh a, “A mawhna pulak ni! A mawhna pulak ni! Amah i khemzo kha ding hi. Tua hileh i zo kha ding a, tua ciangin i thukkik ding hi,” hong ci uh hi. Ahih hangin Topa pen a kihtakhuai galhang pa bangin kei tawh hong omkhawm gige hi. Tua ahih manin kei hong bawlsiate tuk ding uh a, kei hong zo lo ding uh hi. A tawntung a a mindaina uh kimangngilh ngei lo ding hi. A thuman mite a entel, lungsim le ngaihsutna a mu Vanglian Topa aw, amaute na thukkikna kei hong musak in. Bang hang hiam cih leh nangma khut sungah ka thu kong ap khin hi. Topa’ tungah la sa unla, Topa phat un! Migilote’ khutsung panin amah in mi cimawhte a honkhia hi. Keima suah ni in gimna thuak ta hen! Ka nu in kei a hong suahsak ni in thupha ngah kei ta hen! Ka pa kiangah, “Tapa khat na nei hi,” ci-in va ko-in a lungdamsak pa in gimna thuak tahen. Topa in hehpih loin a lumlet khuapite tawh tua pa kibang tahen. Zingsangin kahna aw za hen la, sun ciangin patauhna aw za tahen. Bang hang hiam cih leh amah in ka nu’ gil sungah kei hong that lo hi. Hong that hileh ka nu’ gil sung ka han suakpah ding hi. Gimna le dahna a mu ding le nisima maizum den dingin bang hangin a gil sung panin suakkhia sese ka hi hiam? Zedekiah kumpipa in Malkhiah’ tapa Pashhur le Maaseiah’ tapa Zefaniah-te, Jeremiah kiangah sawl a, “Kote a dingin Topa’ kiangah thu hong dotsak in. Babylon kumpipa Nebukhadnezzar in a sim dingin hong umcih hi. Topa in a na lamdangte khat kei’ tungah hong zang leh amah kilehkiksak thei kha ding hi,” ci-in a dongsak hi. Tua ciangin Jeremiah in dawngkik a, “Zedekiah kiangah hih bangin na genkik un, ‘ Topa, Israel mite’ Pasian in a genin-ah: En un, khuakulhpi pualamah a hong umcih Babylon kumpipa le Khaldea mite na dona uh ahi, na khutsung uha na kep na galhiamte uh bangmahin a kimang lo ka suaksak ding a, amaute khempeuh hih khuapi laizangah kong paipih ding hi. Kei mahmah in hehna le thangpaihna lianpi tawh ka khut zanin, a hat mahmah ka khut tawh note kong do ding hi. Hih khuapi sungah a tengte a mi a sa ci loin ka thatlum ding a, pulnatna tawh a bei khin ding uh hi. Tua khit ciangin, Topa in kong cihin-ah, Judah kumpipa Zedekiah le a nasemte, le pulnatna, namsau, le kialin a si lo a nungta laiteng pen, amau’ galte le amaute a thatnuam Babylon kumpipa Nebukhadnezzar’ khut sungah ka pia ding hi. Amah in amaute namsau tawh that ding a, hehpih loin, zong a maap kei ding a, itna lungsim a nei kei ding hi,’ va ci un,” a ci hi. Topa in Jeremiah hopih a, “Jeremiah aw, hih mite kiangah, ‘ Topa in a cihin-ah: En un, na mai uhah nuntakna lampi le sihna lampi ka khung hi. Hih khuapi sunga om mi peuhmah namsau tawh ahi a, kial tawh ahi a, pulnatna tawh ahi zongin a si ding uh hi. Ahi zongin pusuak khia-in note a hong sim Khaldea mite kiangah a lut peuhmah suakta liailiai ding uh hi. Bang hang hiam cih leh Topa in kong cihin-ah, hih khuapi hoihna ding hi lo, a siatna dingin ka lungsim ka khensat khinzo hi. Babylon kumpipa’ khut sungah ka pia ding a, amah in mei tawh a hal ding hi,’ na ci ding hi. Mualkuam zang pan kilaamto a, zanglei lak a suangtum bangin a sangto Jerusalem aw, Topa in kong cihin-ah, na langkhatah ka pang ding hi. Nangmah in, ‘Kua in kei hong simsuk ding a, ka omna-ah kua hong lut ding ahi hiam?’ na ci hi. Na gamtatna tawh kizui-in gimna ka hong pia ding hi, Topa in kong ci hi. Tulaka sing hoihte tawh a kilam na kumpi innte uh mei tawh kihal ding a, a kimkot khempeuh ka kangtumsak ding hi,” a ci hi. Topa in kei hong hopih a, “Judah kumpipa’ inn-ah va paisuk inla, hih bangin va gen in. David tokhom tungah a tu Judah kumpipa aw, nang le na nasemte a kipan hih kongpi-ah a hong lut na gammite khempeuh in Topa’ kammal ngai dih un. Topa in a cihin-ah, thumanin diktat unla, a bawlsiate’ khutsung panin bawlsiatna a thuak mite honkhia un. Minam dangte, pa nei lote le meigongte simmawhbawl kha loin amau’ tungah ngongtat kei unla, hih munah zong mawhna nei lo mite that kei un. Bang hang hiam cih leh note in hih thute na zuih takpi uhleh David’ suante kumpi suak tawntung ding uh a, amaute a kipan a nasemte uh le a mite uh sakol leeng le sakol tungah tuangin hih inn kongpite-ah hong lut ding uh hi. Ahih hangin note in hih thute na zuih kei uhleh keimah Topa in kong genin-ah, hih inn gamlak a suaksak dingin ka kiciam hi. Bang hang hiam cih leh Judah kumpi inn tawh kisai-in Topa in kong cihin-ah: Nang pen Gilead gam ahi a, Lebanon mual bangin ahi zongin na hoih mahmah hi. Ahih hangin nang sehnel gam kong suaksak ding a, kuamah a ten lohna khua kong suaksak ding hi. Nang’ langkhatah a hong susia ding mi ka kithawisak ding a, a hei uh hong keng ding uh hi. Amaute in na sidar khuam hoihpente hong phuksakin mei-ah hong khulsak ding uh hi. “Tua ciangin minam dang tampi in hih khuapi kantan ding uh a, a innsak a innkhangte’ kiangah, ‘Bang hangin hih khuapi lian hici bawl ahi hiam,’ ci-in khatlekhat a kidong ding uh hi. Tua ciangin, ‘A Pasian uh Topa’ thuciamna taisan uh a, pasian dang peuh bia-in a na a sepsak man uh ahi hi,’ ci-in a kidawngkik ding uh hi, va ci in,” hong ci hi. Judah mite aw, misi pa Josiah kah kei unla, khasiat kei un. A kipaikhiatpih Shallum hangin nakpitakin kapzaw un. Bang hang hiam cih leh a pianna gam a mu dingin amah hong kilehkik nawn lo ding hi. Bang hang hiam cih leh Judah kumpipa Josiah’ za a luah a tapa, hih mun panin a paikhia pa Shallum thu tawh kisai-in Topa in, “Amah hong kilehkik nawn lo ding a, salin a kikaihna munah a si ding hi. Hih gam a mukik nawn kei ding hi,” a ci hi. Thuman lopi-in inn lam a, zuauthu tawh inndei tungnung a lam mi, ama na a mawkna-in a inn vengte a semsak mi, thaman a pia lo mi in gimna thuak tahen. “Inndei tungnung zapi a awng inn gol khat ka lam ding hi,” ci-in tawlet vangte bawl a, taamtak singpeek tawh thuap sawm a, za san a zut mi in gimna thuak tahen. Taamtak sing tawh inn na lam manin kumpi kisa na hi hiam? Na pa in an ne tui dawn a, thumanna le diktatna tawh na a sep manin a maa pai hi lo ahi hiam? Amah in mizawngte le mi cimawhte thuman tawh thu khen a, na khempeuh a hoih a suak pah hi. Tu-a banga hihna pen kei nong theihna uh hi lo ahi hiam, Topa in kong ci hi. Ahih hangin note in thuman lo tawh ngahna ding ahi zongin, mimawh lote’ sisan luanna ding ahi zongin, mi nuaisiahna le ngongtatna ding ahi zongin, na mitte uh le na lungsim uh na zang uh hi. Tua ahih manin Judah kumpipa Josiah’ tapa Jehoiakim thu tawh kisai-in Topa in hih bangin kong ci hi: “Amaute in, ‘Sanggampa aw,’ ‘Sanggamnu aw,’ ci-in a sih ciangun a kikah bangun amah a sih ciangin a kah kei ding uh a, ‘ Topa aw, kumpipa aw,’ ci-in zong a kah kei ding uh hi. La si a kiphum bang lelin amah kivui ding a, Jerusalem kongpi pualamah kikai talin kipaai ding hi,” a ci hi. Jerusalem khua mite aw, Lebanon Mual tungah kahto-in awng unla, Bashan gamah va kiko un. Abarim mualtungah va kiko un; bang hang hiam cih leh na pawlte un gal lel khin hi. Na daupai laitakun kong hopih hangin na hong ngai nuam kei uh hi. Na neu tung uh a kipan nong tuacih ngitnget uh a, keima thu nong mang ngei kei uh hi. Na makaite uh huih in hong mut mangsak ding a, na pawlte uh salin kiman ding uh hi. Tua ciangin na gitlohna uh hangin maizumin na lung-am ding uh hi. Lebanon gam panin a kila taamtak inn sungah nuamtakin na teng uh hi. Ahih hangin gimna hong tun ciangin bangzah takin na tau ding uh hiam? Numei nausuak dingte tawh na kibang ding uh hi. Topa in Jehoiakim tapa Judah kumpipa Jehoiakhin tungah, “Kei a nungta Pasian ka hih mah bangin, nangmah in ka taklam khutah a om ka letmatthuhna tawh a kibang na hih hangin nang kong lakhia ding a, na kihtak, nang hong thatnuamte’ khut sungah kong pia ding hi. Babylon kumpipa Nebukhadnezzar le Khaldea mite’ khut sungah nang kong pia ding hi. Nangmah le nang hong paii na nu, na suahna mun uh ahi lo gam dangah kong lawnkhia ding a, tua laitakah na si ding uh hi. Na ciahkik nopna gam uhah na ciahkik thei nawn kei ding uh hi,” a ci hi. Jehoiakhin, kuama deih loh a kipaimang beel kitam tawh kibang ta ahi hiam? Bang hangin amah le a tate kilawnkhia a, a theih loh uh gamah kipaimang ahi hiam? Aw ka gam, ka gam aw, Topa’ kammal ngai dih ve’n! Topa in hih bangin ci hi: “Hih pa, ta nei lopa, a khan tawntungin a gualzo ngei lopa, ci-in ciamteh un. Ama suanlekhakte khat beek in David’ tokhom luah lo ding a, Judah gam a uk kei ding hi,” a ci hi. Topa in thu gen a, “Ka mite sisakin, a kikhenthangsak gam ukte in gimna ngah ta hen!” a ci hi. Tua ahih manin ka mipihte a kem gam ukte tawh kisai-in Topa, Israel mite’ Pasian in hong genin-ah, “Note in ka mite kikhenthang sakin na hawlkhiamang uh a, amaute na don kei uh hi. En un, Topa in kong cihin-ah, na gamtatsiate uh hangin gim kong pia ding hi. Ka mite a omlai sunteng, ka hawlkhiatna ding gamte panin ka kaikhawmkik ding a, a gam uhah ka ciahsakkik ding hi. Amaute pungin a khang ding uh hi. Amaute a don ding makaite ka koih ding a, lau nawn lo, lungkham nawn loin khat beek a mangthang nawn kei ding uh hi, Topa in kong ci hi. “En un, Topa in kong cihin-ah, keimah in David’ suan lak panin kumpi dingin a diktat mi khat ka khankhiatsak ni hong tung ding hi. Amah gam uk siam mahmah ding a, gam sungah thuman thutang tawh thu hong khen ding hi. Ama hun hong tun ciangin Judah mite kihonkhia ding a, Israel mite lungmuang takin a teng ding uh hi. Amah a kilawh nadingin a min, ‘ Topa, Eite’ Diktanna,’ ci-in a kiphuak ding hi. “Tua ahih manin en un, Topa in kong cihin-ah, mite in, ‘Egypt gam panin Israel mite a hong paikhiatpih Topa a nuntak bangin,’ ci-in a kiciam nawn kei ding uh a, ‘A hawlkhiatna leilu lam gam le gamdangte khempeuh panin Israel mite’ suanlekhakte kaikhawmin a makaih Topa a nuntak bangin,’ ci-in a kiciamzaw ding uh hi. Tua ciangin amaute amau’ gam sung mahah a teng ding uh hi,” a ci hi. Kamsangte tawh kisai-in: Topa’ hang le ama thugen kammal siangthote’ hangin keima sungah ka lungsim hong kitamkham a, ka guh ka taang a ling hi. Zu tam ne lua-in a kham mipa tawh ka kibang hi. Bang hang hiam cih leh mun khempeuhah angkawmte a dim hi. Topa’ hamsiatna hangin gam sung tengah kahna dim a, gamlak lonona munte a keu mang hi. Amaute gamtatsia uh a, a vangliatna uh a man lopi-in a zang uh hi. Topa in a cihin-ah, “Kamsangte le siampite in Pasian a zahtak kei uh hi. Ka biakinnsung nangawnah amau’ gitlohna ka mu hi. Tua ahih manin amaute’ lampi pen khuamial lak lamnal hi ding a, amaute kinotkhia gawpin a tuk ding uh hi. Bang hang hiam cih leh amaute’ gimthuak ding hun hong tun ciangin amaute tungah gimna ka tungsak ding hi, Topa in kong ci hi. Samaria kamsangte sungah a muhthadahhuai mahmah na khat ka mu hi. Baal min suangin thu hilh uh a, ka mi Israel-te lam a pialpih uh hi. Ahih hangin Jerusalem khuasunga om kamsangte’ sungah a mulkimhuaizaw na khat ke’n ka mu hi. Angkawmin zuauthu gen uh a, mite a gitlohna uh pan a kikhel loh nadingin mi hoih lote a hanthawn zawlai uh hi. A vekpi-un kei’ muhna-ah Sodom khuamite tawh kibang khin ka sa a, Gomorrah khuamite tawh zong kilamdang lo uh hi. “Tua ahih manin tua kamsangte tawh kisai-in Vanglian Topa in kong genin-ah: En un, keimah in gamsai teh tawh amaute ka vak ding a, gu kisawh tui amaute ka dawnsak ding hi. Bang hang hiam cih leh Jerusalem khua-a om kamsangte’ kiang panin gam sung mun khempeuhah Pasian zahtak lohna hong kizel hi,” a ci hi. Vanglian Topa in, “Note kiangah thu hong hilh a, a hong lamen khialsak kamsangte’ thugennate na ngai kei un. Amaute in a lungsim uhah a geeltawm uh thu hong gen uh hi a, keima kiang pana hong pai thu ahi kei hi. Keimah Topa’ thugennna a hong ngai lo mite kiangah, hong hoih na ve, ci-in a gen tawntung uh hi. Amau’ lungsim’ deihna bang ciat bek a zui tentan mi khempeuhte kiangah zong, gimna hong tung zenzen lo ding hi, ci-in a gen uh hi,” a ci hi. Amaute’ lakah kua pen Topa tawh thu kikum khawm ngei a, a thugennate va thei ngei, va za ngei ahi uh hiam? Kua in ama kammal va ngai ngei a, va thupi ngaihsut ngei ahi uh hiam? En un, Topa’ hehna huihpi hong nung hi. A hehna huihpi hong kinuai nainai-in hong paikhia ta a, migilo pa’ lutang hong kidenna ding hi. A lungsim sunga a tupna teng a tangtunsak matengin Topa’ hehna damkik lo ding hi. Hong pai lai ding hunte-ah note in siangtakin na telzaw semsem ding uh hi. Topa in, “Keimah in sawlkhia lo napi-in tua kamsangte kuankhia teitei uh hi. Thu bangmah ka gen lohpi, kei’ min paulamin thu a gen mawkmawk uh hi. Ahih hangin amaute in keima lungsim tawng hong thei uh hileh keima thugente ka mite tungah taangko ding uh a, a nuntakna uh a hoih lote panin kikhelsakin, a gamtat hoih lote uh panin zong kikhelsak khinzo ding uh hi. “Kei pen mun khat bekah a om Pasian ka hi hiam? Mun khempeuhah a om Pasian hi lo ka hi hiam, Topa in kong ci hi. Mi khat peuhpeuh kei’ muh loh dingin busim thei ding ahi hiam, Topa in kong ci hi. Leitung, vantung, mun khempeuhah ka om lamtak thei lo na hi uh hiam, Topa in kong ci hi. Ka min tawh zuau phuakin, ‘Mang man zo ing, mang man zo ing,’ ci-in a gen kamsang zuau theite’ thuhilhnate zong ka za khinzo hi. Zuauthu tawh thu hilh a, a phuahtawm uh thu a hilh kamsangte’ lungsim sungah zuauthu bang tanvei tenglai ding ahi hiam? A pute a pate un kei’ min hong mangngilhin Baal a biak uh bangin a mangmat uh a gen kawikawina uh tawh ka mite in ka min hong mangngilh ding uh hi, ci-in a ngaihsun uh hi. Kamsangpa in mang a mat leh a mang bek mah gen hen la, ahih hangin ka thugenna a za mipa in ka thugente mah mantakin gen tahen. Buhtu le buhtang bangci kibat theih ding ahi hiam, Topa in kong ci hi. Ka kammal pen mei tawh ahi a, suangtum a satnenzo sek tawh ahi zongin kibang hi lo ahi hiam, Topa in kong ci hi. Tua ahih ciangin en un, Topa in kong genin-ah, kamsangte in amau khatlekhat tung panin a theih uh thute kei’ thugen bangin a genkhiatna uh ka deih kei hi. En un, Topa in kong genin-ah, amau’ ngaihsuttawm thu gen napi-in, ‘ Topa in ci hi,’ a ci khem kamsangte’ langkhatah kei ka pang hi. En un, Topa in kong genin-ah, ka sawl lohpi zuau mang manin tua thu hilh a, a zuauthu uh le a kiphatsakna uh tawh ka mite lam a khialhpih mite’ langkhatah kei ka pang hi. Ka mite a dingin amaute a kimanna uh themkha beek om lo hi, Topa in kong ci hi. “Jeremiah aw, ka mite khat peuhpeuh in ahi a, kamsang khat ahih kei leh siampi khat peuhpeuh in ahi zongin, ‘ Topa’ thugen bang ahi hiam?’ ci-in hong dot leh nangmah in, ‘ Topa’ thugen nangmah na hi a, nang pen vangik khat na hi hi. Topa in nang, kong paaikhia ding hi, hong ci hi,’ ci-in gen in. Kamsang khat, ahih kei leh siampi khat, ahih kei leh ka mite khat peuhpeuh in, ‘ Topa’ thugen pen vangik khat ahi hi,’ a cih leh tua mipa le a innkuanpihte khempeuh gim ka pia ding hi. Mi khempeuh in a lawmte kiangah ahi a, a sanggamte kiangah ahi zongin, ‘ Topa in bangin hong dawng hiam? Topa in bang hong gen hiam?’ ci-in na kidongzaw ding uh hi. ‘ Topa’ thugen pen vangik khat ahi hi,’ ci-in na gen nawn kei ding uh hi. Bang hang hiam cih leh note’ thugente, note’ vangik ahi zaw hi. Note in eite’ Pasian ahi a nungta Pasian, Vanglian Topa’ thugennate na lumletgawp uh hi. Kamsangpa kiangah, ‘ Topa in bangin hong dawng hiam? Topa in bang hong gen hiam?’ ci-in dongzaw un. Ahih hangin note in, ‘ Topa’ thugen pen vangik ahi hi,’ na cih peuhmah uhleh Topa in kong cihin-ah, note in na cih loh dingun kong hilh pen ci teitei na hih manun keimah in note le na pu na pate uh ka piaksa khuapi ka domto ding a, ka omna panin ka lawnkhia taktak ding hi. A tawntungin simmawhna le maizumna kong thuaksak ding a, cikmah hunin na mangngilh ngei nawn kei ding uh hi,” a ci hi. Babylon Kumpi Nebukhadnezzar in Jerusalem khua panin Jehoiakim’ tapa Judah kumpipa Jehoiakhin le Judah kumpi uliante, khutsiamte le sikseek siamte, Babylon khua-ah sal dingin a paikhiatpih khit ciangin Topa in hih maang hong musak hi. Topa’ biakinn mai-ah theigah bawm nih dim ka mu hi. Bawm khat sunga theigahte, a min masate tawh kibangin limci mahmah hi. Ahih hangin a bawm khat pen sunga theigahte limci hetloin nektheih ding bang hi dek lo hi. Topa in hong hopih a, “Jeremiah aw, bang mu na hi hiam?” ci-in hong dong hi. Kei zong, “Theigah ka mu hi. A limcite limci mahmah a, a limci lote limci lo lua ahih manin nektheih ding bang hi lo hi,” ka ci hi. Tua ciangin Topa in, “ Topa, Israel mite’ Pasian in kong cihin-ah: Hih mun panin Khaldea mite’ gam a ka puakkhiat Judah mi saltangte hih theigah hoihte bangin a hoihin ka ngaihsun ding hi. Amaute limtakin ka kem ding a, hih gamah ka lakik ding hi. Amaute ka khangtosak ding a, ka susia kei ding hi; ka suan ding a, ka botkhia kei ding hi. Keimah Topa ka hihlam theihtheihna lungsim ka pia ding hi. A lungsim khempeuh uh tawh kei kiangah hong kileh ding uh ahih manin amaute ka mi ahi ding uh a, kei pen amaute’ Pasian ka hi ding hi. “Ahih hangin Topa in kong cihin-ah: Judah kumpipa Zedekiah le ama gam uk uliante a kipan hih gamah a omsuak Jerusalem khuasunga a omlai sunteng le Egypt gamah a tengte limci lo lua ahih manin a kine thei lo theigahte bangin ka bawl ding hi. Amaute ka hawlkhiatna ding mun khempeuhah mite in kihamsiatna-in a zat dingun simmawhna le zahkonate ka thuaksak ding a, amaute’ thuakna hangin leitung gam khempeuh ka lausak ding hi. Namsau tawh kithahna, kialpi, le pulnatnate ka tungsak ding a, amaute le a pu a pate’ kiangah ka piaksa gam sungah khat beek ka nungtasak nawn kei ding hi,” hong ci hi. Josiah’ tapa Jehoiakim, Judah gamah kumpi a suahzawh kum sawmli a cin kumin Judah mite tawh kisai-in Topa in Jeremiah a hopih hi. (Hih hun pen Babylon-ah Nebukhadnezzar kumpi a suah kum ahi hi.) Kamsangpa Jeremiah in zong Judah gammi khempeuh le Jerusalem khuami khempeuhte’ tungah hih bangin a gensawn hi: “Amon’ tapa Josiah, Judah gamah kumpi a suahzawh a kum sawm le thum pan tu ciang dong kum sawmnih le kum thum sung Topa in kei hong hopih a, ke’n zong note kiangah kong gensawn tawntung hangin note in na ngai kei uh hi. Topa in ama nasem ahi kamsangte khempeuh hong sawl tawntung hinapi-in note in ngai loin na bil uh na ngat kei uh hi. Amaute in, ‘Tu-in na vekpi-un na gitlohna uh le na gamtat khialhnate uh panin na kihei uhleh Topa in note le tanglai-a na pu na pate uh tungah na neih tawntung dingun a hong piak gam sungah na teng thei ding uh hi. Pasian dangte’ nung delh loin, a na sem loin na biak kei uh a, na khut uh tawh na bawl uh milimte peuh bia-in na hehsak kei nak-uhleh, note bangmah hong cih kei ding hi,’ ci-in hong gen uh hi. Ahih hangin Topa in kong cihin-ah, note in ka thu nong ngai kei uh a, note’ gim ngahna ding mahin na khut uh tawh milim bawlin nong hehsak uh hi. “Tua ahih ciangin Vanglian Topa in kong cihin-ah, note in ka thu hong mang lo na hih uh ciangin en un, leilu lama om minam khempeuhte le ka nasempa ahi Babylon kumpipa Nebukhadnezzar ka vaikhak ding a, hih gam le a sunga a teng mi khempeuh le hih kiima om gam khempeuh a sim dingin ka va la ding hi. Keimah in amaute ka susia mangkhin ding a, amaute a tawntungin siacipin simmawhna ka thuaksak ding hi, ci-in Topa in kong gen hi. Tua tham loin lungdamna le kipahna awte, zinei thak pa le mothak nu’ awte, le an gawina suang gingte ka gingsak nawn kei ding a, meivak taangte ka sumit ding hi. Gam sung khempeuh kisia-in, gam simtham suak ding a, hih mite khempeuh kum sawmsagih sung Babylon kumpipa’ salin a om ding uh hi. Kum sawmsagih a cin khit ciangin Topa in kong cihin-ah, Babylon kumpipa le a gam amau’ mawhna hangin gim ka pia ding a, tua gam a tawntungin gam simtham ka suaksak ding hi. Tua gam a siatna ding ka gensa thute khempeuh hih laibu sungah kigelh a, Jeremiah in gam khempeuhte’ kiangah a gen hi. Tuate khempeuh ka tungsak ding hi. Bang hang hiam cih leh gam tampi le kumpi liante in amaute salin man ding uh a, amau’ gamtatna amau’ tungah ka thukkik ding hi,” a ci hi. Topa, Israel mite’ Pasian in kei hong hopih a, “Ka khuttung panin hehna tawh a kidim hih leenggahzu hai la inla, kong sawlna gamte khempeuh dawnsak in. Amaute in dawn ding uh a, amaute’ kianga ka sawl namsau hangin hoi dangdangin a hailawh ding uh hi,” hong ci hi. Tua ahih manin kei zong Topa’ khuttung panin tua hai ka la a, Topa’ hong sawlna gamte khempeuh ka dawnsak hi. Jerusalem le Judah gam a khuapite, a kumpite uh le a gam uliante uh ka dawnsak a, tuni dongin gam simtham suakin, mite’ simmawhna thuakin, a min uh hamsiat nadingin a kizang hi. Tua hai panin a dawn a dangte: Egypt kumpipa Faro le a nasemte, a kumpi uliante; Egypt mite le amau’ lakah a teng gamdang mite khempeuh; Uz gam sunga kumpite khempeuh le Filistia gam sunga om Ashkelon, Gaza, Ekron khuapite, le Ashdod khuapi-ah a omlai sunte’ kumpite khempeuh; Edom, Moab, le Ammon mite; Taia kumpite khempeuh, Sidon kumpite khempeuh; tuipi gei-a kumpite khempeuh; Dedan, Tema, Buz khuapite; a sam uh a tommet khempeuhte; Arabia kumpite khempeuh; sehnel gam sunga teng minam kigawm khawmte’ kumpite khempeuh; Zimri kumpite khempeuh, Elam kumpite khempeuh, le Media kumpite khempeuh; le a gamla hitaleh a nai hitaleh leilu lama a om kumpite khempeuh khat khit ciangin khat ka dawnsak hi. Tua ciangin leitung a om gam khempeuh ka dawnsak hi. A tawpna-ah Babylon kumpipa in a dawn ding hi. Tua ciangin Topa in hong hopih a, “Amaute kiangah, Vanglian Topa, Israel mite’ Pasian in hih bangin ci hi: ‘Dawn un. Kham unla lua un. Note kiangah namsau hong paisak ding ka hih manin tuk unla, thozo nawn kei un,’ va ci in. “Amaute in na khuttung panin hai la-in dawn ding uh a, hong nial uhleh amaute kiangah, ‘Vanglian Topa in hong genin-ah: Na dawn uh kul ding hi. Bang hang hiam cih leh en un, ka min tawh a kilo khuapi sungah suksiatna ka pan ding hi. Note in bangmah a thuak lo ding kisa na hi uh hiam? Gim thuak loin na om kei ding uh hi; bang hang hiam cih leh Vanglian Topa in kong cihin-ah, leitung a teng mite khempeuh a that dingin namsau khat ka sawl hi,’ ci in. “Tua ahih ciangin nangmah in amaute thu na va hilh ding a, hih bangin na va gen ding hi: ‘A sang vantung panin Topa hong hawk ding a, a tenna a siangtho panin hong paukhia ding hi. Ama mite’ langkhatah nasia takin hong hawkgawp ding a, leenggah cil mite bangin leitung mi khempeuhte a langpangin hong kiko ding hi. A awging, leimong dongah kithawn ding hi; bang hang hiam cih leh gamte’ langkhatah Topa pang hi. Amah in mi khempeuh thu sit ding a, namsau tawh migilote a thatlum ding hi, Topa in ci hi,’ na ci ding hi. “Vanglian Topa in a cihin-ah: En un, gam khat pan gam khatah siatna a paipai hi. Leitung a gamla pen mun panin huihpi hong nung hi. “Tua ni-a Topa’ thahlup mite’ luanghawmte leimong khat panin mong khat dongah a kithehthang ding uh hi. Amaute kuamah in a kah kei ding uh a, kikaikhawm loin, kiphum lo ding uh ahih manin leilakah ek nusiatin a kinusia ding uh hi. “No makaite aw, tau unla, kap un; vut lakah kikhuk un, no uliante aw. Bang hang hiam cih leh hong kithahlup ni ding le na kikhenthang ni ding uh hong tungzo hi; tuutal teelte bangin hong kithatlum ding hi. Makaite a dingin bukna ding om lo ding a, uliante a dingin suahtak theih nading om lo hi. Ngai dih un, makaite’ kahna aw le uliante’ tauna aw kiza hi. Bang hang hiam cih leh Topa in a gam uh suksiatsak hi. A lauhuai mahmah Topa’ hehna hangin a nop mahmah a gam uh kisia gawp hi. Topa’ namsau hang ahi a, a lauhuai ama hehna hang ahi zongin, amau’ gam pen gam simtham suakkhin ahih manin humpinelkai in a kua a nusiat bangin Topa in a mite nusiazo hi,” a ci hi. Josiah’ tapa Jehoiakim, Judah gam kumpi a suah tungin Topa in hih bangin Jeremiah hopih a, “ Topa in kong cihin-ah, Topa’ biakinnpi huang sungah va ding inla, Topa’ biakinnpi sungah a bia dinga a hong pai Judah gam khuapite khempeuh kiangah gen dinga kong sawl khempeuh va gen in. Kam khat beek im kei in. Amaute in na thugen hong ngai-in, a gitlohna uh pan kihei khathei ding uh hi. Tua hileh amau’ gitlohna hanga amaute suksiat dingin ka ngaihsutsa ka kheelkik ding hi. Nangmah in amaute kiangah, ‘ Topa in hih bangin ci hi: Note in ka thu hong ngai loin, note mai-a kong lahsa ka thukham bangin na gamtat kei uh a, note in a thu na man’ ngei loh uh ahi, kong sawl zelzel ka nasem kamsangte’ thu na thupi sim kei uhleh hih Jerusalem biakinnpi Shiloh khua-a biakinn ka bawl bangin ka bawl ding a, hih khuapi pen leitung gam khempeuhte’ kihamsiatna-in ka zangsak ding hi,’ na ci ding hi,” a ci hi. Siampite, kamsangte le mi khempeuh in hih thu a gen teng a za uh hi. Mi khempeuh tungah Topa in gen dingin a sawlteng Jeremiah in a gen khit ciangin siampite, kamsangte, le mi khempeuhte in amah man uh a, “Nang na sih ding kilawm hi. Bang hangin, ‘Hih biakinnpi pen Shiloh tawh kibang ding a, hih khuapi-ah a teng om loin gam simtham suak ding hi,’ ci-in Topa’ minin thu hilh ngam na hi hiam?” ci-in a gen uh hi. Topa’ biakinnpi sungah a om mi khempeuh in Jeremiah a umcih uh hi. Judah gam uk uliante in hih thu a zak uh ciangin kumpipa’ innsung pan Topa’ biakinnpi-ah hong paito uh a, Topa’ biakinnpi lutna Kongpi Thak-ah a tu uh hi. Tua ciangin siampite le kamsangte in kumpi uliante le mi khempeuhte’ kiangah, “Note in na bil uh tawh na zak ciat uh mah bangin hih pa in hih Jerusalem khuapi langpangin thu hilh ahih manin thah ding kilawm hi,” a ci uh hi. Tua ciangin Jeremiah in kumpi ulian khempeuhte le mi khempeuhte’ kiangah, “ Topa in na zaksa uh ahi hih biakinnpi le hih khuapi langkhatah ka gen thu khempeuh a gen dingin kei hong sawl hi. Tua ahih manin tu-in na nuntak dante uh le na gamtatziate uh kheel unla, Topa na Pasian uh thu ngai un. Tua hileh Topa in note’ kisiatna ding a gensa thu a kheelkik ding hi. Ahih hangin kei ka hih leh, en un, note’ khut sungah ka om hi. Note in hoih na sak uh bangin kei tungah hong bawl un. Kei nong thah uhleh bel, mawh nei lo mi khat na thah manun note mahmah a kipan hih khuapi le a sunga tengte in na thuak ding uh thei ta un. Bang hang hiam cih leh note’ bil mahmahin na zak dingun hih thute a gen dingin Topa’ hong sawl taktak ka hi hi,” a ci hi. Tua ciangin kumpi uliante le mi khempeuhte in siampite le kamsangte tungah, “Hih pa in eite’ Topa Pasian’ min tawh thu hong gen ahih manin thah ding kilawm lo hi,” a ci uh hi. Gam sung upa pawlkhat in zong, dingin tua a kikhawm mi khempeuhte’ kiangah, “Judah kumpipa Hezekiah in a uk laitakin Moresheth khuami Mikah in Judah mi khempeuhte’ kiangah, ‘Lo dingin Zion mual a kikho ding hi. Jerusalem khua kisia zan ding a, biakinn mual, gamlak a suak ding hi, ci-in Vanglian Topa in gen hi,’ ci hi. “Tua hinapi, Judah kumpipa Hezekiah le Judah mi khempeuhte in amah that zenzen uh ahi hiam? Kumpipa in Topa zahtakin, Topa’ pahtak ding a nget ciangin Topa in zong amau’ tungah siatna tunsak dingin a gensa khelkikzaw hi lo ahi hiam? Ahih hangin eite in eite’ tungah siatna lianpi khat i tungsak dektak hi,” a ci uh hi. Kiriathjearim khua panin zong Topa’ min tawh thu a hilh Shemaiah’ tapa Uriah a kici midang khat a omlai hi. Jeremiah’ gen bangmahin amah in zong hih Jerusalem khuapi le hih gam langkhatah thu a gen hi. Kumpi Jehoiakim le a galkapmang khempeuh le kumpi ulian khempeuhte in ama thugente a zak uh ciangin kumpipa in thah dingin a zong hi. Ahih hangin Uriah in tua thu a zak ciangin lau-in Egypt gamah a taisim hi. Tua ciangin kumpi Jehoiakim in Akbor’ tapa Elnathan le midang pawlkhat Egypt gamah sawl a, amau in zong Egypt gam panin Uriah manin kumpi Jehoiakim kiangah a puak uh hi. Amah in tua pa namsau tawh thatin a luanghawm mi mawkmawkte’ kivuina munah a paai hi. Ahih hangin Shafan’ tapa Ahikam in Jeremiah hu ahih manin thah dingin mite’ khut sungah kipia lo hi. Josiah’ tapa Zedekiah, Judah gamah kumpi a suah tungin Topa in kei kiangah thu hong gen hi. Topa in kei tungah, “Savun khau tawh a kithuah hakkol bawl in la, na ngawngah thuah in. Edom kumpipa tung, Moab kumpipa tung, Taia kumpipa tung, le Sidon kumpipa tungah, Judah kumpipa Zedekiah tawh kimu dingin Jerusalem khua-ah a hong pai a kumpi taangmite’ tungtawnin thu zasak in. Amaute in a kumpite uh tungah, Vanglian Topa, Israel mite’ Pasian in hih bangin ci hi, ci-in gen uh hen. ‘Keimah in a lian mahmah ka vangliatna tawh ka khut zanin, leitung le leitung a om mite le ganhingte ka bawl a, piak tuak ka sakte tungah ka pia hi. Tu-in hih gamte, ka nasempa ahi Babylon kumpipa Nebukhadnezzar’ khut sungah ka pia khinzo hi. Gamsate nangawn ama nasem dingin ka pia lai hi. Ama gam a kisiat hun a tun mateng gam khempeuh in amah a kipan a tapa le a tupa’ na a sepsak ding uh hi. Tua khit ciangin gam tampi le kumpi liante in amah salin a lehneih kik ding uh hi. “‘Ahih hangin gam khat peuhpeuh ahih kei leh kumpi khat peuhpeuh in Babylon kumpipa Nebukhadnezzar’ na sem loin, Babylon kumpipa’ hakkol a ngawngah a puak kei leh, amah ka ukcipsak mateng namsau tawh, kialpi tawh, pulnatna tawh tua gam gim ka pia ding hi, Topa in kong ci hi. Tua ahih manin Babylon kumpipa’ na sem kei un, ci-a note kiangah a hong gen na kamsangte uh, na aisan theite uh, na mang man theite uh, le na mangsan theite uh’ thugennate um kei un. Bang hang hiam cih leh note’ kianga hong gen uh thu pen zuauthu hi a, tua hangin na gam uh panin gamlapi-ah note hong kipaikhiatpih ding hi. Keimah in note kong hawlkhia ding a, note na si ding uh hi. Ahih hangin Babylon kumpipa’ hakkol pua a, ama na a sem gam pen, lo kho-in a tentheih nadingin ama gam sung mahah ka omsak ding hi, ci-in Topa in hong gen hi,’ ci-in gen uh hen,” hong ci hi. Judah kumpipa Zedekiah kiangah zong tua bangmahin ka gen a, “Na nuntak theih nadingin Babylon kumpipa’ hakkol pua in. Bang hangin namsau tawh, kialpi tawh, pulnatna tawh nang le na mite si ding uh ahi hiam? Babylon kumpipa’ na a sem lo gam khat peuhpeuh tuaci sih ding, ci-in Topa in a gen hi. Babylon kumpipa’ na sem kei un, ci-in note’ kianga hong gen kamsangte’ thugennate um kei un. Bang hang hiam cih leh note’ kianga hong gen uh thu pen zuauthu ahi hi. Topa in kong cihin-ah, ‘Keimah in amaute ka sawl kei hi. Ahih hangin amaute in kei’ min tawh a man lopi-in thu hilh uh a, tua hangin note le note’ kiangah thu hong hilh kamsangte kong sawlkhia khawm ding a, na si ding uh hi,’ ci hi,” ci-in ka gen hi. Tua ciangin siampite le hih mi khempeuhte’ kiangah, “ Topa in hong genin-ah, ‘En un, Babylon khua panin Topa’ biakinn beelte kila kik baih ta ding hi,’ ci-in note’ kiangah na kamsangte uh’ hong thugente um kei un. Bang hang hiam cih leh note kiangah hong gen uh thu pen zuauthu ahi hi. Amau’ thu na mang kei un. Na nuntak theih nadingun Babylon kumpipa’ na na semzaw un. Bang hangin hih khuapi gam simtham suak laizang ding ahi hiam? Amaute kamsang taktak ahih uh a, Topa in ka hopih taktak ahih uhleh, Topa’ biakinnpi sung, Judah kumpipa’ innsung, le Jerusalem khua sungah a kinusia lai beelte Babylon khua-ah a kipuakkhiat nawn lohna dingin Vanglian Topa kiangah hong thum uh hen. Topa’ biakinnpi sung, Judah kumpipa’ innsung, le Jerusalem khua sungah a kinusia lai beelte tawh kisai-in ahi zongin Vanglian Topa, Israel mite’ Pasian in a genin-ah: Tuate Babylon khua-ah kipuakhia ding a, ka kankik mateng tua lai-ah a omsuak ding hi. Tua khit ciangin tuate ka lakik ding a, hih munah ka koihkik ding hi, Topa in hong ci hi,” ci-in ka gen hi. Tua kum mahin (Judah gamah Zedekiah kumpi a suah zawh kum li le kha nga a phak kum) Gibeon khua panin a hong pai Azzur’ tapa kamsang Hananiah in Topa’ biakinnpi sungah siampite le mi khempeuh a omkim laitakin hong hopih a, “Vanglian Topa, Israel mite’ Pasian in hong genin-ah: Babylon kumpipa’ vangliatna ka susia khin hi. Kum nih sungin Babylon kumpipa Nebukhadnezzar in hih mun pan lakhia-in Babylon khua-ah a puak, Topa’ biakinnpi sunga beelte hih munah ka lakik ding hi. Jehoiakim’ tapa Judah kumpi Jehoiakhin le Judah gam panin Babylon-ah salin a paite khempeuh zong hih munah ka lakik ding hi, Topa in hong ci hi. Bang hang hiam cih leh Babylon kumpipa’ vangliatna ka susia ding hi, ci hi,” a hong ci hi. Tua ciangin Topa’ biakinnpi sungah dingin a om siampite le mi khempeuhte a omkim laitakin keimah Jeremiah in Hananiah ka hopih a, “Amen! Topa in tua na gen bangin hong sem tahen. Topa in na thugenkholhna bangin hong tungsak hen la, Babylon khua panin Topa’ biakinnpi sunga beelte le salin a kimante khempeuh hih lai munah hong lakik tapeuh hen! Ahi zongin tu-in nang le mi khempeuhte’ zakin kong gen ding hih thu na ngai ta un. Nang le kei’ ma-in a om, tanglai-a kamsangte in gam tampi le gam liante’ tungah gal ahi zongin, kial ahi zongin, pulnatna ahi zongin hong tung ding hi, ci-in a genkholzo uh hi. Ahi zongin, nopna hong tung ding hi, ci-in a gen kamsangpa pen Topa’ hong sawl kamsangpa hi taktak hiam, cih kamsangpa’ gen bang hong tun ciangin a kithei pan ding ahi hi,” ka ci hi. Tua ciangin kamsangpa Hananiah in ka ngawng panin ka hakkol hong lakkhiat sakin hong kuaihtansak hi. Hananiah in zong mi khempeuh a om laitakin thu gen a, “ Topa in, tu-a bangin Babylon kumpipa Nebukhadnezzar’ vangliatna kum nih sungin gam khempeuhte’ tung panin ka beisak ding hi, ci hi,” ci-in a gen hi. Tua ciangin kei ka paikhia hi. Kamsangpa Hananiah in ka ngawng panin ka hakkol lakhia a, hong kuaihtansak zawh tawlkhat khit ciangin Topa in kei hong hopih a, “Pai inla Hananiah kiangah, ‘ Topa in hih bangin hong ci hi: Nangmah in sing tawh kibawl hakkol na kuaitanzo hi. Ahih hangin keimah in sik tawh kibawl hakkol khat tawh ka laih ding hi. Bang hang hiam cih leh Vanglian Topa, Israel mite’ Pasian in hong genin-ah: Hih gam khempeuhte’ ngawngah sik hakkol ka thuah khinzo a, amaute in Babylon kumpipa Nebukhadnezzar’ na a sem ding uh hi. Bang hang hiam cih leh gamsate nangawn ama tungah ka pia khinzo hi, ci hi,’ va ci in,” hong ci hi. Tua ciangin kei zong kamsang Hananiah’ kiangah, “Na ngai in, Hananiah! Topa in nang hong sawl lohpi, hih mite zuauthu na umsak hi. Tua ahih manin Topa in a hong genin-ah: ‘En in, hih leitung panin nangmah hong lakhia ding hi. Topa langpanna thu gen na hih manin tu kum sung mahin na si ding hi,’ hong ci hi,” ka ci hi. Tua kum mah a kha sagih kha-in kamsangpa Hananiah a si ta hi. Jerusalem khua panin Nebukhadnezzar in Babylon khua-ah salin a paikhiatpih uliante, siampite, kamsangte, le mi khempeuhte’ tungah lai khat ka khak hi. Tua hunin kumpi Jehoiakhin le a nu, a kumpi innsungmangte, Judah gam le Jerusalem khua-a makai upate, khutsiamte le sikseekte, Jerusalem khua panin kipai khiatpih khinzo hi. Tua laikhak pen Judah kumpipa Zedekiah in Babylon khua Nebukhadnezzar kumpipa kiangah kumpi taangmi dingin a puak Shafan’ tapa Elasah le Hilkiah’ tapa Gemariah-te ka puasak hi. Tua sungah: “Jerusalem panin Babylon-ah a hong kipuakkhia saltang mi khempeuhte’ tungah Vanglian Topa, Pasian in hih bangin hong ci hi: Inn lam unla, a sungah teng un. Huan bawl unla, a sungah na cinte uh ne un. Zi pi unla tanu tapa nei un. Na tapate a’ ding mo la unla, na tanute uh mo kha un; tua hileh amau in zong tanu tapa hong nei ding uh hi. Kiam kei unla, pungzaw un. Note salin kong koihna khuapi’ phattuamna ding bawl unla, tua khuapi a dingin Topa’ tungah thu ngetsak un. Bang hang hiam cih leh tua khuapi in phattuamna ngah leh no zong phattuamna a ngah mah na hi uh hi. Vanglian Topa, Israel mite’ Pasian in kong genin-ah: Note’ lakah a om na kamsangte uh le na aisan theite uh’ khemsa-in ta kei unla, a mangmat hong gente uh na ngai kei un. Bang hang hiam cih leh ka min tawh no tungah hong gen uh thute zuauthu hi a, ka sawl lohpi ahi uh hi, Topa in ci hi. “ Topa in kong cihin-ah: Babylon khua-ah kum sawmsagih na om khit uh ciangin, note kong kan kik ding a, kong kamciamnasa hong tangtung sakin hih munah kong lakik ding hi. Bang hang hiam cih leh Topa in kong cihin-ah, mai lamah lametna note kong piakkik ding, na siatna ding uh hi loin na phattuamna ding uh geelna ka neihte kei bek in ka thei hi. Tua hun ciangin note in kei hong samin, hong pai-in thu nong ngen ding uh a, ke’n zong kong dawng ding hi. Note in kei nong zong ding uh a, na lungsim khempeuh uh tawh nong zon uh ciangin nong mu ding uh hi. Topa in kong cihin-ah, note in nong mu ding uh a, na saltanna uh hong beisakin, kong hawlkhiatna gam khempeuh le mun khempeuh panin kong kaikhawm kik ding a, note kong lakkhiatna gam mahah kong tunpih kik ding hi, Topa in kong ci hi. “Note in, ‘Eite a dingin Topa in Babylon khua-ah kamsang hong koihsak hi,’ ci-in gen na hih manun David kumpi tokhom tunga tu kumpipa le hih khuapi sunga om, note tawh saltang dingin a paikhawm lo na behte khempeuh uh tawh kisai-in Topa in kong genin-ah: En un, amaute tungah namsau tawh kithahna, kialpi le pulnatna ka tungsak ding a, amaute, a kine thei lo theigah muat ka bangsak ding hi. Amaute, namsau, kialpi, le pulnatna tawh ka nungdelh ding a, ka hawlkhiatna ding mun khempeuhah mite in kihamsiatna-in a zat dingun simmawhna le zahkonate ka thuaksak ding a, amaute’ thuakna hangin leitung gam khempeuh ka lausak ding hi. Bang hang hiam cih leh, Topa in kong cihin-ah, ka nasem ka kamsangte’ tungtawnin kong puak ngitnget thute amaute in thupisim loin a hong mang kei uh hi. Jerusalem khua panin Babylon khua-ah kong puakkhiat, no saltangte khempeuh aw, Topa’ kammal ngai dih un: “Vanglian Topa, Israel mite’ Pasian in, kei’ min tawh note kiangah zuauthu a hong hilh Kolaiah’ tapa Ahab le Maaseiah’ tapa Zedekiah-te tawh kisai-in kong genin-ah: En un, keimah in amaute Babylon kumpipa Nebukhadnezzar’ khut sungah ka pia ding a, amah in note’ muhin amaute a thatlum ding hi. Amaute’ hangin Judah gam panin Babylon khua-ah saltang mi khempeuh in, ‘Babylon kumpipa in Zedekiah le Ahab, a hingtangin mei sungah a hal bangin Topa in nang hong hal ta hen,’ ci-in kihamsiatna-in a zang ding uh hi. Bang hang hiam cih leh amaute, Israel gamah hai gamtat uh hi: A innvengte’ zite mawhpih uh a, thu ka piak lohpi ka min tawh zuauthu a gen uh hi. Keimah Topa in ka mu a, teci ka hi hi, hong ci hi,” ci-in ka gelh hi. “ Topa in siampi Jehoiada tangin nangmah siampi-in hong koih khinzo a, Topa’ biakinnpi sungah a ukpi ding na hi ta hi. Tua ahih manin thu a hilh mawkmawk mihaite thong kia sakin kol na bulh ding hi. Bang hangin note kiangah thu a hong hilh Anathoth khuami Jeremiah tai lo na hi hiam? Bang hang hiam cih leh amah in Babylon khua-ate lai hong khakin, sawt veipi sal tang ding na hih manun, inn lamin a sungah teng unla, huan bawlin a sunga na cinte uh ne un, hong ci hi,” ci-in a gelh hi. Hih bangin Zefaniah’ kiangah a laikhakna thu tawh kisai Shemaiah kiangah a gen dingin Pasian in kei hong sawl hi. Siampipa Zefaniah in hih laikhak kei kiangah hong simkhia hi. Tua ciangin Topa in kei hong hopih a, “Saltang mi khempeuhte’ kiangah Nehelam khuami Shemaiah tawh kisai-in Topa’ thugenna hih bangin zasak in: Kong sawl lohpi Shemaiah in note kiangah thu hong gen a, zuauthu hong umsak ahih manin, Topa in kong cihin-ah: En un, keimah in Nehelam khuami Shemaiah le a suan a khakte gim ka pia ding hi. Amah in keimah hong langpanna ding thu gen ahih manin ka mite a dingin a hoih ka bawl ding nate, amah le a suan a khakte khat beek in a mu kei ding uh hi, ci-in gen in,” hong ci hi. Topa in hong hopih a, “ Topa, Israel mite’ Pasian in kong genin-ah: Kong gensa thute khempeuh laibu khat sungah khum in. Bang hang hiam cih leh Topa in kong cihin-ah, ka mi Israel le Judah-te a saltanna uh ka beisakkik ni a hong tung ding hi. A pu a pate uh tungah ka piaksa gamah ka tunpihkik ding a, amaute in tua gam a tangkik ding uh hi, Topa in kong ci hi,” hong ci hi. Israel le Judah mite tawh kisai-in hih bangin a gen hi: “ Topa in kong cihin-ah: Launa le patauhna aw ka za a, lungnopna aw ka za kei hi. Tu-in ngaihsun dih un. Pasalte nau a suak ngei uh hiam? Tua ahihleh bang hangin pasal khempeuh in numei nausuak dingte bangin a tai uh hum ahi uh hiam? Bang hangin a mai uhah si teng lo ahi hiam? Nu e! Tua ni lianpi hong tung ding a, nidang tawh tehtheih ding hi lo hi. Jakob suante’ gimhun hi ding a, ahih hangin amaute suakta veve ding uh hi. “Vanglian Topa in kong cihin-ah, tua ni ciangin amau’ ngawng panin a hakkolte uh ka kuaihtansak ding a, a khaute ka sutat ding hi. Amaute, gamdang mite’ salin a om nawn kei ding uh hi. Topa, amau’ Pasian’ na ahi a, amaute’ kumpipa-in ka koih ding David’ na ahi zongin a semzaw ding uh hi. “Tua ahih manin Topa in kong cihin-ah: Ka nasempa Jakob’ suante aw, lau kei un. Israel mite aw, patau kei un. Bang hang hiam cih leh gamlapi gam panin no kong honkhia ding a, na suan na khakte uh a saltanna uh panin ka honkhia ding hi. Jakob’ suante hong ciah ding uh a, nuamtakin a tengkik ding uh hi. Kuamah in amaute a lausak nawn kei ding hi. Bang hang hiam cih leh Topa in kong cihin-ah, a hong honkhia dingin note kong ompih hi. Note ka hong thehthangna gamte khempeuh ka susia ding a, ahih hangin note kong susia kei ding hi. A kilawm zahin kong thuhilh ding a, gim pia loin kong mawk nusiat kei ding hi. “Bang hang hiam cih leh Topa in kong cihin-ah: Na liamma uh dam thei lo a, na meima uh nasia mahmah hi. Note a hong don ding kuamah om lo a, na liamma uh a’ ding zatui om lo a, note’ lungdamna ding bangmah om lo hi. Na lawm ngaihte un hong mangngilh khin uh a, hong don nawn lo uh hi. Bang hang hiam cih leh na khialhnate uh lian lua-in, na mawhnate uh nasia lua ahih manin, galte bangin note kong bawl a, nasia takin gim kong thuaksak hi. Bang hangin na sa-in kapkap na hi uh hiam? Na natna uh a dam thei ding hi lo hi. Na khialhnate uh lian lua-in, na mawhnate uh nasia lua ahih manin hih bangin note ka hong thuaksak hi. Tua ahih manin no hong thatte kithat ding a, na galte khempeuh uh salin kiman kik ding hi. No hong buluhte kibuluh ding a, no a hong mante, matin omzaw ding uh hi. Bang hang hiam cih leh Topa in kong cihin-ah, na galte un note, pampaih mi pawl, hong ci-in, ‘Kuama don loh Zion na hi hi,’ hong cih uh hangin note kong cidamsakkik ding a, na liammate uh ka damsak ding hi. “ Topa in kong cihin-ah: En un, keimah in Jakob suante’ bukte ka lamkik ding a, a tenna uh ka hehpih ding hi. Khuapi zong a omnasa mualtung mahah kilamkik ding a, kumpipa’ inn zong a omnasa mahah omkik ding hi. Tuate sung panin lungdamna la kisa ding a, gualnopna aw kiza ding hi. Amaute ka pungsak ding a, tawmkha bek hi lo ding uh hi. Amaute ka kipahtawisak ding a, ka neusak kei ding hi. A tate uh nidang bangmahin a omkik ding uh a, a mite uh zong kiptakin ka mai-ah ka phut ding a, amau a bawlsiate gim ka pia ding hi. A kumpi ding uh amaute khat mah hi ding a, amaute a uk ding amau’ sung mah panin a piang ding hi. Keimah in amah ka kai ding a, kei kiangah amah hong pai ding hi. Tua hikeileh ama thu-in kei a hong zuan ngam ding kua om ahi hiam, Topa in kong ci hi. Tua ciangin note, ka mite na hi ding uh a, kei pen note’ Pasian ka hi ding hi,” a ci hi. En un, Topa’ huihpi nung! A hehna hong kinuai nainai-in hong paikhia ta a, migilo pa’ lutang hong kidenna ding hi. A lungsim sunga a tupna teng a tangtunsak matengin, Topa’ hehna a lauhuaipi kilehkik lo ding hi. Hong pai ding hunte-ah note in na telzaw semsem ding uh hi. “ Topa in kong cihin-ah, tua hun ciangin kei pen Israel mi khempeuhte’ Pasian ka hi ding a, amaute pen keima mite ahi ding uh hi,” a ci hi. Topa in hong genin-ah: “Namsau tawh thahna a thuak lote in gamlakah hehpihna a mu ding uh hi. Israel mite in tawldamna ding a zon laitakun, gamlapi pek panin Topa ka kilang hi. Keimah in nang kong it tawntung a, tua ahih manin nang’ tungah kong thuman tawntung hi. Aw, nungak siangtho Israel aw, nang kong bawlpha kik ding hi. Na khuangte na man kik ding a, a gualnuamte’ lamna-ah na va kihel ding hi. Samaria gam mualtung tengah leenggah na suankik ding a, huan bawlte in suanin a gah ne-in nuam a sa ding uh hi. Bang hang hiam cih leh Efraim mualtung panin galvilte in, ‘Tho un! Topa i Pasian kiang Zion khua-ah va pai ni,’ ci-in a hong kiko hun uh hong tung ding hi,” hong ci hi. Bang hang hiam cih leh Topa in kong cihin-ah, “Jakob a dingin lungdamna tawh ngaih takin la sa unla, gam khempeuh lakah gam lian pen a dingin kiko-in awng un. ‘ Topa in Israel mi a omlaite, ama mite hong honkhia khinzo hi,’ ci-in taangko unla phat un. En un, keimah in leilu lam gam panin amaute ka la ding a, leitung a gamla pen mun panin ka kaikhawm ding hi. Mittawte le khebaite zong hong kihel ding uh a, nupi gaite le nausuak ding numeite a kipan hih lai munah mihonpi hong ciahkik ding uh hi. Amaute a kap kawmin hong pai ding uh a, keimah in hehnemin amaute ka pi kik ding hi. Tui omna lui gei-ah amaute ka paipihkik ding a, lam nuamah paipihin a tuk kei ding uh hi. Bang hang hiam cih leh Israel mite’ pa ka hi a, Efraim, ka ta upa pen ahi hi. “Aw, gamdangte aw, Topa’ kammal ngai unla, gamlapi, tuipi gei-a omte kiangah va gensawn un. ‘Israel mite a kithehthang sakpa in kaikhawm kik ding a, tuucingpa in a tuute a kep bangin a kem ding hi,’ va ci un. Bang hang hiam cih leh Topa in Jakob ka suaktasak khinzo a, a zawhzawh loh khutte’ sung pan ka honkhiazo hi. Amaute hong pai-in Zion mual tungah ngaihtakin la sa ding uh a, Topa’ hehpihna ahi, buh, leenggahzu, sathau le tuuno, bawngnote’ hangin amaute a lungdam mahmah ding uh hi. A nuntakna uh, tui a kibuak huan bang ding a, lungkham nawn lo ding uh hi. Tua ciangin nungakte lamin lungdam ding uh a, tangvalte le papite zong nuam ding uh hi. Amau’ kahnate lungdamna ka suaksak ding a, amaute hehpihin a dahnate uh kipahna ka suaksak ding hi. An lim pen tawh siampite ka vak ding a, keima hoihna hangin ka mite a lungkim ding uh hi, Topa in ka ci hi,” a ci hi. Topa in kong cihin-ah: “Ramah khua-ah aw khat kiza a, tauna le kah ngutngutna awging ahi hi. Rachel, a tate a dingin a kap hi. A tate om nawn lo ahih manin kinem zo lo hi,” a ci hi. Topa in kong cihin-ah: “Kap nawn kei unla, na khitui uh nul un. Bang hang hiam cih leh Topa in kong cihin-ah, na nasep thaman uh na ngah uh hi. Amaute galte’ gam panin hong ciahkik ding uh hi. Na mailam uh a dingin lametna a om hi, Topa in kong ci hi. Na tate uh zong na gam mah uhah hong ciahkik ding uh hi. Efraim’ kahna aw ka zazo a, ‘ Topa aw, bawngtal sin loh bangin kei nong thuhilh khinzo hi. Kong ciahkik theih nadingin hong lakik in; bang hang hiam cih leh nang pen Topa ka Pasian na hi hi. Nangma kiang panin ka paikhiat khit phetin ka kisikkik a, nong thuhilh khit ciangin dahin ka kun hi. Ka neu laitak a ka minsiatna teng pua niloh ka hih manin maizumin ka lung-am hi,’ a ci hi. “Efraim, ka it ka tapa hi lo ahi hiam? Amah keima ngaihno hi lo ahi hiam? Bang hang hiam cih leh ama thu ka gen simin amah ka phawk lailai hi. Tua ahih manin amah ka ngaihsun tawntung a, ka hehpih taktak ding hi, Topa in ka ci hi. Lampi-ah ciamtehnate bawl unla, lamlahnate phut un. Na paikhiatna uh lampi mah limtakin zongkik un. Nungak siangtho tawh a kibang Israel mite aw, hong kilehkik unla, na khuapite uh hong zuankik un. Bang tanvei lungka ding na hi hiam, a zulhzau ka tanu aw. Bang hang hiam cih leh Topa in leitungah na thak khat bawl a, numei in pasal a honzo hi,” a ci hi. Vanglian Topa, Israel mite’ Pasian in hong genin-ah: “Keimah in amaute a gam uhah ka omsakkik ciangin, Judah gam le a khuapite uhah amaute in, ‘Thuman thutak a tenna mual siangtho aw, Topa in thupha hong pia ta hen,’ ci-in a genkik leuleu ding uh hi. Judah gam le a khuapite sungah lokhote le tuucing a a vak kawikawi mite a tengkhawm ding uh hi. Bang hang hiam cih leh a gim mite ka tawldamsak ding a, gilkialin a thazawm mite khempeuh an ka vak kham ding hi,” a ci hi. Tua khit ciangin ka khanglo a, ka khuadak hi. Ka khanlawh nuam ka sa mahmah hi. Topa in kong cihin-ah, “Israel gam le Judah gam, mihing le ganhing tawh ka dimsak hun hong tung ding hi. Amaute a kibetkhiatna ding le a kitapzanna ding ahi zongin, a kisuankhiatna ding le a kisiatna ding ahi zongin ka vaihawm mah bangin, Topa in ka cihin-ah, amaute a kilamna ding le a kiphuh nadingin ka vaihawm ding hi. Tua ni ciangin amaute in: “‘Pate in leenggah thuk ne uh a, a tate uh’ ha a kim hi,’ a kici paunak a zang nawn kei ding uh hi. Mi khempeuh amau’ mawhna ciat uh hang bekin a si ding uh hi. Leenggah thuk a nete’ ha bek a kim ding hi. “En un, Topa in kong cihin-ah, Israel minamte le Judah minamte tawh thuciamna thak khat ka bawl ni hun hong tung ding hi. Tua pen, a pu a pate uh, Egypt gam panin ka lakkhiat nadingin a khut uh tawh ka kaihkhiat huna ka bawl uh thuciamna tawh kibang lo ding hi. Tua hun lai-in kei amaute’ pasal hinapi-in ka thuciamna a hong palsat uh hi, Topa in kong ci hi. Ahih hangin Topa in kong cihin-ah, tua hun hong tun ciangin Israel minamte tawh hih bangin thuciamna ka bawl ding hi: Amaute’ sungah ka thukham ka koih ding a, amaute’ lungtang tungah ka gelh ding hi. Kei pen amaute’ Pasian ka hi ding a, amaute pen keima mite ahi ding uh hi. Kuamah in midangte le a sanggamte uh kiangah, ‘ Topa thei in,’ ci-in a kihilh nawn kei ding uh hi; bang hang hiam cih leh Topa in kong cihin-ah, amaute in a neupen panin a lianpen dongin, a vekpi-un kei a hong thei ding uh hi. Bang hang hiam cih leh amau’ khialhnate ka maisak ding a, amaute’ mawhnate zong phawkin ka nei nawn kei ding hi,” a ci hi. Topa in sun-a khuavak dingin ni hong pia a, zan a khuavak dingin a kikheel ngei lo kha le aksite hong pia hi. Tuipi a lawh ciangin tuihualte ging zuazua a, ama min pen Vanglian Topa kici hi. Amah in, “ Topa in kong cihin-ah, hih a kip mahmah leitung le vantung ngeinate a kikheel hun ciang bekin, Israel mite’ suanlekhakte in gam nei loin a om pan bek ding uh hi,” a ci hi. Topa in hong genin-ah, “Vantung a kiteh theih ciang le leinuai-a leitung bulpite a kivel theih ciang bekin Israel-te’ suanlekhakte khempeuh a mawhna uh hangin ka lawnkhiamang pan ding hi, Topa in kong ci hi,” a ci hi. Topa in kong cihin-ah, “Hananel Tausangpi panin khuakulh Kiu Kongpi dongin khuapi a kibawlphat hun hong tung ding hi. Tua lai panin khuapi huang dingin nitumna lamah Gareb mual dong kiteh suak ding a, Goah lamah a kihei ding hi. Misi luanghawmte le vutte a kibuakna kuam buppi le Kidron lui phak ma-a loteng khempeuh tawh, tua panin nisuahna lama Sakol Kongpi kiu ciang dong, Topa a dingin mun siangtho a suak ding hi. Cikmah ciangin tua khuapi kisusia nawn lo ding a, a kisuankhia ngei nawn kei ding hi,” a ci hi. Nebukhadnezzar kumpipa in a ukzawh kum sawm le kum giat a phak kumin, Judah gamah Zedekiah kumpi a suahzawh kum sawm pha ta a, tua kumin Topa in Jeremiah a hopih hi. Tua hun pen Babylon kumpipa’ galkapte in Jerusalem khua a sim laitak hi a, kamsangpa Jeremiah zong Judah kumpipa’ inn huang sunga thong sungah a kikhumcip laitak ahi hi. Bang hang hiam cih leh Judah kumpipa Zedekiah in ama kiangah, “Bang hangin nangmah in thu genkhol a, ‘ Topa in a cihin-ah: En un, hih khuapi, Babylon kumpipa’ khut sungah ka pia ding a, amah in a la ding hi. Judah kumpipa Zedekiah zong Khaldea mite’ khutsung pan a suakta kei ding a, Babylon kumpipa’ khut sungah a kipia taktak ding hi. Amah tawh maitang kimu-in a ki-en ding uh a, a kiho ding uh hi. Amah in Babylon khua-ah Zedekiah la ding a, ama tungah na ka sep mateng tua lai-ah om ding hi. Khaldea mite na do uh hangin na zo kei ding uh hi, Topa in hong ci hi,’ ci-in bang hangin thu hilh na hi hiam?” ci-in thong sungah a khum hi. Jeremiah in zong, “ Topa in kei hong hopih a, En in, na pano Shullam’ tapa Hananel nang kiangah hong pai ding a, ‘Anathoth khua-a ka lo hong lei in. Bang hang hiam cih leh a lei thei ding lak panin ka kinaipih pen nangmah na om hi,’ ci-in hong gen ding hi, hong ci hi. Tua ciangin Topa’ hong cihna bangmahin thong sungah ka innlak sanggampa hong pai takpi-in hong hopih a, ‘Benjamin gam Anathoth khua-a ka lo hong lei in. Bang hang hiam cih leh, i ngeina bangin a nei ding le a tankhia ding nangmah na hi hi. Nang a dingin lei in,’ hong ci hi. Tua ciangin keimah in Topa’ hong hopihna taktak hi, ci-in ka thei hi. “Keimah in zong ka innlak sanggampa Hananel’ kiang panin Anathoth khua-a lo ka lei a, ama a dingin ngun shekel sawm le sagih ka tehkhia hi. Thukimna lai bawlin, min gelhin, gip khenin, a hong theihpih ding mite zong ka sap khit ciangin tawi khaina-ah sum ka teh hi. Tua ciangin ka kithukimna teng uh a ki-atna, gip a kikhen lai pen le gip a kikhen lo lai pen ka la a, Neriah’ tapa ahi, Mahseiah’ tupa Baruk kiangah ka pia hi. Tua laite, ka innlak sanggampa Hananel tawh, tua kileina laite tunga a min uh a gelh a hong theihpih mite tawh thong huang sunga a tu Judah mite tawh a omkim laitakun ka pia hi. Amaute’ om laitakin Baruk kiangah, ‘Vanglian Topa, Israel mite’ Pasian in a hong genin-ah: Hih gip a kikhen lai le a kikhen lo lai tegel la inla, sia loin sawtveipi a kikep theih nadingin leibeel khat sungah koih in. Bang hang hiam cih leh Vanglian Topa, Israel mite’ Pasian in a hong genin-ah: Hih gamah innte, lote le leenggah lote mite in a leikikta ding uh hi,’ ci-in ka gen hi. “Neriah’ tapa Baruk kiangah kileina lai ka piak khit ciangin Topa’ kiangah thu ka ngen a, ‘Topa Pasian! Nangma vangpi le na khut tawh vantung le leitung na bawl khinzo hi. Nang a dingin a haksalua khat beek om lo hi. Nangmah in a kikheel ngei lo itna mi tul tampite’ tungah na lak a, ahih hangin pate’ mawhnate tate’ tungah na thuk hi. Vanglian Topa a kici a lian mahmah, a hat mahmah Pasian aw, na ngimnate lian mahmah a, na sepnate thupi mahmah hi. Mite’ nuntak zia khempeuh na mu a, amau’ nuntak dan le a sepna tawh kizui-in mi khempeuh tungah thaman na pia kim hi. Egypt gamah lim le na lamdangte na lak a, tu-in zong Israel gam le minam dangte khempeuh tungah lakin, tu-in mun khempeuhah na min thang mahmah hi. Na mi Israel-te Egypt gam panin lim le nalamdang tawh ahi a, a khauh mahmah a kizan na khut tawh ahi a, lauhuaina lianpi tawh ahi zongin na lakhia a, a pute a pate uh tungah piak dingin na ciamsa, bawngnawi le khuaizu tui bangin a luanna hih gam na pia hi. Amau zong lutin a luahpah uh hi. Ahih hangin amaute in na thu hong mang loin, thukham hong zui lo uh a, hih dinga na thupiakte khat beek a hih kei uh hi. Tua ahih manin amaute tungah hih siatna khempeuh na tungsak hi. “‘En in, khuapi lak nadingin kan a to khinzo uh hi. Namsau tawh kithahna hang, kialpi hang, le pulnatna hangin amaute a sim Khaldea mite’ khut sungah khuapi a kipia ding hi. Nong gensa bangin hong tun loh phamawh ahih manin en in, nang’ na mu ta hi. Ahih hangin Topa Pasian aw, hih khuapi Khaldea mite’ khutsung a tung ding hinapi, nangmah in, “A hong theihpih ding mi sam inla, tua lo lei in,” ci-in nong sawl teitei hi,’ ci-in thu ka ngen hi,” a ci hi. Topa in kei hong hopih a, “En in, kei pen Topa ka hi a, mi khempeuhte’ Pasian zong ka hi hi. Kei a dingin a haksa lua bang om ahi hiam? Tua ahih manin, Topa in kong cihin-ah: En in, hih khuapi Khaldea mite’ khutsung le Babylon kumpipa Nebukhadnezzar’ khut sungah ka pia ding a, amah in a la ding hi. Hih khuapi a sim Khaldea mite hong pai-in mei tawh khuapi a hal ding uh a, ka heh nadingin innkhum tungah Baal milimte paknamtui halna tawh a biakna innte uh le pasian dangte’ kiangah tuidawn biakna a piakna uh innte zong a haltum ding hi. Bang hang hiam cih leh Israel mite le Judah mite in a neulai pek uh a kipan ka muhna-ah a sia bekbek a gamta uh hi. Keimah Topa in kong cihin-ah, Israel mite in a khut uh tawh milim a bawlna uh hangin kei hong hehsak uh hi. Hih khuapi in, a kisat cil a kipan tuni ciang dong hong hehsakin hong thangpaisak ahih manin ka muhna panin ka hemkhia ding hi. Bang hang hiam cih leh Israel mite le Judah mite, a kumpite uh le a kumpi uliante uh, a siampite uh le a kamsangte uh a kipan Judah mite le Jerusalem khuamite khempeuh in kei hong hehsak nadingin siatna a bawl uh hi. Amaute in kei hong nungngatin hong maingat lo uh a, ka hilh tawntung hangin ka hilhna a hong mang kei uh hi. Amaute in ka min tawh a kilo biakinnsung nangawnah a kihhuai milimte a koih uh a, a ninsak uh hi. Hinnom Kuam-ah a tapate le a tanute uh tawh Molek pasian a biak nadingun Baal a’ ding biakna tau sangte a bawl uh hi. Hih a kihhuai na semin, Judah mite mawhna a bawlsak nadingun amaute ka sawl kei a, zong ka ngaihsunkha ngei beek kei hi. “Jeremiah aw, nangmah in hih khuapi, namsau tawh thahna, kialpi tunna le pulnatna tawh Babylon kumpipa’ khut sungah kipia ding hi, na ci hi. Ahi zongin tu-in tua bang na cihna hih khuapi tawh kisai-in Topa, Israel mite’ Pasian in kong genin-ah: En in, ka hehna, ka thangpaihna le ka lungkim lohna lianpi tawh ka hawlkhiatna gam khempeuh panin amaute ka kaikhawm kik ding a, hih munah tunpih kikin, lungmuang takin ka omsak ding hi. Amaute keima mi hi ding uh a, kei pen amaute’ Pasian ka hi ding hi. Amaute’ hoihna ding le amaute’ nunga a tu a tate uh a hoih nadingin a tawntungin kei hong zahtak nadingun a lungsim uh kikhat sakin, a nuntak dan uh zong ka kikhatsak ding hi. Amaute tungah a tawntungin hoihna ka bawl den nadingin amaute tawh tawntung thuciamna khat ka bawl ding hi. Kei kiang panin a kiheikhiat loh nadingun amaute sungah kei hong zahtakna ding uh lungsim ka guan ding hi. Amaute tungah hoihna ka bawl manin ka lungdam ding a, ka lungsim khempeuh tawh thuman takin hih gamah amaute ka phut ding hi. “Bang hang hiam cih leh Topa in kong cihin-ah, hih siatna khempeuh hih mite tungah ka tunsak mah bangin, amaute’ tunga ka khapsa a hoih khempeuh zong ka tungsak pelmawh ding hi. Nangmah in, hih gam pen mihing le ganhing a ten lohna gam simtham hi ding a, Khaldea mite’ khut sungah kipia ding hi, ci-in na gen hangin tu-in hih gamah lo kileikik ta ding hi. Benjamin gam, Jerusalem khua kimkot le Judah gam khuapite a kipan mualtung a khuapite, Shefelah zanglei-a khuapite le leitaw lam Negeb gam a khuapite-ah sum tawh lo kilei ding a, a theihpih mite tawh thukimna min gelhin gip tawh kikhen ding hi; bang hang hiam cih leh keimah in amaute a gam mah uhah ka omsakkik ding hi, Topa in kong ci hi,” a hong ci hi. Thong huang sungah Jeremiah a kikhumcip laitak mahin Topa in a nihveina hopih a, “Leitung bawlin a kipsak Topa, a min Topa a kici Topa in kong genin-ah: Kei nong sap leh kong dawngkik ding a, na theih ngei nai loh a ki-imcip thu lianpite kong gen ding hi. Bang hang hiam cih leh galte’ kan tawhna le galkidona hangin a kisusiagawp ding hih khuapi sunga innte le Judah kumpite’ innte tawh kisai-in, Topa, Israel mite’ Pasian in kong cihin-ah: Ka hehna le ka thangpaihna tawh ka thahlup ding misi luangte tawh a kidimsak dingin Khaldea mite in a hong sim ding uh hi. Bang hang hiam cih leh khuapi sunga a om mite’ gitlohna hangin hih khuapi panin ka mai ka seel hi. Ahih hangin tu-in, keimah in hih khuapi ka damsak ding a, cidamin ka omsak ding hi. A mite cidamsakin hauhna le lungmuanna a kicing ka lak ding hi. Judah mite le Israel mite ka hausakkik ding a, a nidanga a om ngei bangun ka omsakkik ding hi. Kei tungah hong bawl uh mawhna khempeuh panin amaute ka siangsak ding a, kei tungah a hong mawhnate uh le a hong langpanna khempeuhte uh ka maisak ding hi. Jerusalem khuapi pen kei a dingin lungdamna, minphatna, le minthanna ahi hi. A sunga om mite tungah hoihna le hauhna ka tunsakna thu a za minam dangte lau-in a ling ding uh hi. “ Topa in kong cihin-ah, note in, ‘Hih munah mihing, ganhing om loin mundai suak hi,’ ci-in na gen uh mah bangin Judah gam khuapite le Jerusalem khua kongzingte awng a, mihing ganhing kuamah a teng kei hi. Ahih hangin lungdamna aw le kipahna awte, zinei thakte le mothakte’ awte kiza kik ding hi. Topa’ biakinn-ah mite hong pai-in lungdam kohna-in: ‘Vanglian Topa’ tungah lungdamna ko un. Bang hang hiam cih leh Topa hoih a, ama itna kip tawntung hi,’ ci-in a lasakna awte uh a kiza kik ding hi. Bang hang hiam cih leh Topa in kong cihin-ah, a masa-a mah bangin hih gam ka hausakkik ding hi. “Vanglian Topa in kong cihin-ah, mihing ganhing om loin mun awng ahi mun le a khuapi khempeuhte-ah tuucingte in tuu cingin a tentheihna ding mun hong om ding hi. Mualtung a khuapite, Shefelah zanglei-a khuapite le leitaw lam Negeb gam a khuapite, Benjamin gam, Jerusalem khua kimkot le Judah gam khuapite-ah, Topa in kong cihin-ah, tuucingte in a tuute uh a phazah a sim ding uh hi. “En un, Topa in kong cihin-ah: Israel mite le Judah mite tungah ka khapsa thu ka tangtunsak hun hong tung ding hi. Tua hun ciangin David’ suan lak panin kumpi dingin a diktat mi khat ka khangsak ding a, amah in gam sungah thuman tawh thu hong khen ding hi. Tua ni ciangin Judah mite kihonkhia ding a, Israel mite lungmuang takin a teng ding uh hi. Amah a kisap nadingin a min ‘ Topa, Eite’ Diktanna,’ ci-in a kiphuak ding hi. “Bang hang hiam cih leh Topa in kong cihin-ah: Israel mite’ kumpi dingin David’ suan sung panin mi kitasam ngei lo ding hi. Levi minam lak panin zong meihal biaknate, an tawh biakna le biakpiaknate a pia tawntung dingin ka mai-ah a ding ding siampi kitasam ngei lo ding hi,” a ci hi. Topa in kei hong hopih a, “ Topa in kong cihin-ah: Sun hun le zan hun a manmanin a hong tun loh theih nadingin sun tawh ka thuciamna le zan tawh ka thuciamna na siatsakzawh ciang bekin, keimah le ka nasempa David tawh ka thuciamna kisia pan ding a, amah in a kumpi tokhom luah ding tapa nei loin, ka na a sem ding siampi Levi minamte tawh ka thuciamna zong a kisia hi pan ding hi. Vana aksite kisim zo loin, tuipi a sehnelte a kiteh zawh loh bangin keimah in ka nasempa David’ suanlekhakte ahi a, siampi Levi minamte ahi zongin ka pungsak den ding hi,” hong ci hi. Topa in kei hong hopih a, “Hih mite in, Topa in a teelsa Israel le Judah minam tegel a nusia ta hi, ci-in a gen uh thei kha lo na hi hiam? Tua bangin amaute in ka mite simmawh uh a, amau’ muhna-ah minam khatin a sim nawn kei uh hi. Topa in kong genin-ah: Sun le zan tawh ka thuciamna ahi a, vantung le leitung ngeina kipte ahi zongin a kipsak khin nai lo hi leng Jakob le ka nasempa David’ suante ka nial ding a, Abraham, Isaac, le Jakob’ suante a uk dingin amaute’ lakah mi khat zong a teello ding mah ka hi hi. Ahi zongin tu-in tua bang hi loin amaute ka hausakkik ding a, ka hehpih ding hi,” a hong ci hi. Babylon kumpipa Nebukhadnezzar in a galkapte khempeuh, a ukna gam khempeuh le a mi khempeuh tawh Jerusalem khua le a kiima khuapite a sim laitakin Topa in kei hong hopih a, “ Topa, Israel mite’ Pasian in kong cihin-ah: Judah kumpipa Zedekiah kiangah pai inla, hih bangin va gen in: ‘ Topa in hong genin-ah: En in, keimah in Babylon kumpipa’ khut sungah hih khuapi ka pia ding a, amah in mei tawh a hal ding hi. Ama khutsung panin na suakta kei ding a, hong kimanin ama khut sungah nang hong kipia taktak ding hi. Nang le Babylon kumpipa maitang kimu-in na kiho ding uh a, Babylon khua-ah na pai ding hi. Judah kumpipa Zedekiah aw, Topa’ kammal ngai lai dih in. Topa in nangmah tawh kisai-in a hong genin-ah, nang in namsau tawh thahna na thuak kei ding hi. Nuamtakin na si ding a, nang’ ma-a kumpi a suak na pu na pate-a’ dingin paknamtui a kihal mah bangin nang a dingin zong paknamtui hong kihal ding a, “Aw, topa aw,” ci-in hong kah ding uh hi. Bang hang hiam cih leh Topa in hong gen khinzo hi,’ ci-in va gen in,” a hong ci hi. Kei zong hih thuteng khempeuh Jerusalem khua-a Judah kumpi Zedekiah kiangah ka gen hi. Tua hun pen Babylon kumpipa’ galkapte in Jerusalem khuapi le Judah gam a khuapi muanhuai lakah a omlai Lakhish khua le Azekah khuate gel zong a sim laitak uh ahi hi. Mi khempeuh in a silate uh numei ahi a, pasal ahi zongin khahkhia-in sila-in khawikik thei nawn lo ding hi, ci-in thuciamna a nei kumpi uliante a kipan mi khempeuh in mang uh a, a khahkhia uh hi. Ahih hangin tua nung ciangin a lungsim uh khelkikin a khahkhiatsa uh numei le pasal silate lakik uh a, sila mahin a zang kik mawk uh hi. Tua ciangin Topa in kei hong hopih a, “ Topa, Israel mite’ Pasian in kong cihin-ah, keimah in na pu na pate uh koltanna Egypt gam pan ka lakkhiat laitakin amau tawh thuciamna khat ka bawl a, note kiangah nasem dinga hong kizuak na Hebru mipihte uh in note a dingin kum guk, na hong sepsak khit a kum sagihna sungin na khahkhia ding uh a, na na uh na semsak nawn kei ding uh hi, ka ci hi. Ahih hangin na pu na pate un ka thu hong ngai lo uh a, hong mang lo uh hi. Zan diakin no na kisik kik uh a, na mipihte ciat uh suahtakna ding taangko-in, ka min tawh a kilo biakinnsung ka mai-ah thuciamna na bawl uh a, ka muhna-ah a kilawm na khat na sem khinzo uh hi. Ahih hangin na lungsim uh na kheelkik leuleu uh a, amau’ utna banga na khahkhiatsa uh sila numei le pasalte na lakik uh a, na na uh sem sakin ka min nong daisak uh hi. Tua ahih manin Topa in kong cihin-ah: Mi khempeuh in na sanggam na mipihte uh khahkhia loin, suahtakna pia loin ka thu hong mang lo na hih uhleh, en un, Topa in kong cihin-ah, note hong khahkhia-in suahtakna kong pia ta hi. Namsau tawh kithahna, pulnatna le kialpite tawh na sih nadingun note kong khahkhia a, kong suaktasak hi. Leitung gam khempeuhte’ hong lipkhap dingin kong bawl hi. A galte’ khut sungah amaute ka pia ding a, a thatnuam mite’ khut sungah ka pia ding hi. A luanghawmte uh vana vasate le leitung a gamsate’ an a suak ding uh hi. Judah kumpipa Zedekiah le a kumpi uliante, a galte uh’ khut sungah pia-in, amaute a that nuam mite le note’ kiang panin a kilehkik khinzo Babylon kumpipa’ galkapte’ khut sungah ka pia ding hi. En un, Topa in kong cihin-ah, keimah in thu ka pia ding a, hih khuapi-ah hong paikik ding uh hi. Amaute in hih khuapi hong simin, hong la-in mei tawh hong halsak ding uh hi. Judah gam khuapite kuama’ ten lohna mun awng ka suaksak ding hi,” a hong ci hi. Josiah’ tapa Jehoiakim, Judah gam kumpi ahih laitakin Topa in kei hong hopih a, “Rekhab behte kiangah pai inla, amau tawh na kiho khit ciangin Topa’ biakinn-ah hong pai inla, inndei khat sungah tumpihin, tua ciangin a dawn dingin leenggahzu pia in,” ci-in a hong sawl hi. Tua ciangin Habazziniah’ tupa ahi Jeremiah dang khat’ tapa, Jaazaniah le a sanggamte, a tate khempeuh le Rekhab behte khempeuh ka sam hi. Amaute, Topa’ biakinnsung, kumpi uliante’ inndei gei, Shallum’ tapa, kongpi uk biakinn upa lian Maaseiah’ inndei tung sanah a om, Igdaliah’ tapa, Pasian’ mi ahi Hanan’ tate’ inndei sungah ka lutpih hi. Tua ciangin Rekhab behte’ mai-ah leenggahzu a dimin a kikoih hai le keute ka pia a, leenggahzu dawn un, ci-in ka sawl hi. Ahih hangin amaute in, “Kote in leenggahzu ka ne kei ding uh hi. Bang hang hiam cih leh Rekhab’ tapa, ka pu uh Jonadab in thu hong pia a, ‘Note a kipan na ta na tute un leenggahzu na ne ngei peuhmah kei ding uh hi. Inn na lam kei ding uh a, khai na tuh kei ding uh hi. Singno na suan kei ding uh a, leenggah lo na bawl kei ding uh hi. Ahih hangin na tenpakna uh gam sungah sawtveipi na tentheih nadingun na nuntak hun sungteng uh puanbuk sungah na teng ding uh hi,’ hong ci hi. Kote in Rekhab’ tapa ka pu uh Jonadab’ hong thupiak khempeuh ka mang uh a, ka nuntak hun sungteng uh ko a kipan ka zite uh, ka tapate uh le ka tanute uh in leenggahzu dawn loin, tenna ding inn ka lam kei uh hi. Leenggah huan, lo le khaici bangmah ka nei kei uh hi. Ka pu uh Jonadab’ hong sawl bangbangin ka mang uh a, puanbuk sungah ka teng den uh hi. Ahih hangin Babylon kumpipa Nebukhadnezzar in hih gam hong sim ciangin kote in, ‘Hong pai un. Khaldea galkapte le Syria galkapte kihta ihih manin Jerusalem khua-ah pai ni,’ ka kici uh a, tua mah bangin tu-in Jerusalem khua-ah ka teng uh hi,” a hong ci uh hi. Tua ciangin Topa in kei hong hopih a, “Vanglian Topa, Israel mite’ Pasian in kong cihin-ah: Pai inla Judah mite kiang le Jerusalem khua-a teng mite’ kiangah, Topa in: Ka thuhilhna hong sang loin ka thu hong ngai lo ding na hi uh hiam? Rekhab’ tapa Jonadab in a suanlekhakte tungah leenggahzu a dawn loh nading uh a thupiakna amaute in zui uh a, tuni ciang dong bangmah a dawn kei uh hi. Bang hang hiam cih leh amaute in a pu uh’ thupiakna a mang uh hi. Keimah in note kong hopih tawntung hangin ka thu nong mang kei uh hi. Ka nasem ahi kamsangte khempeuh note kiangah hong sawl tawntungin, ‘Tu-in note khempeuh na hoih lohna uh panin kihei unla, na gamtat hoih lote uh kipuahpha un. Pasian dangte nung delh loin a na na sep kei nak-uhleh note le na pu na pate uh kiangah ka piak gam sungah na teng ding uh hi,’ ci-in note tungah hong gen uh hi. Ahih hangin note in na bil uh nong ngat kei uh a, ka thu nong ngai kei uh hi. Rekhab’ tapa Jonadab’ suante in a pu uh thupiakna a man’ uh hangin hih mite in ka thu hong mang lo uh hi. Tua ahih manin keimah Topa Vanglian Pasian in kong genin-ah: En un, Judah mite le Jerusalem khua-ah a teng mi khempeuh tungah a tung dingin ka gen khiatsa khempeuh ka tungsak ding hi. Bang hang hiam cih leh amau tungah ka gen hangin amaute in ka thu hong ngai lo uh a, amaute ka sap hangin hong dawngkik lo uh hi, ci hi, ci-in va gen in,” a hong ci hi. Tua ciangin kei zong Rekhab behte kiangah, “Vanglian Topa, Israel mite’ Pasian in hong genin-ah: Na pu uh Jonadab’ hong thupiakna mangin, a hong thuhilhna bangin zui-in, a hong sawl khempeuh sem khin na hih manun Vanglian Topa, Israel mite’ Pasian in hong cihin-ah: Rekhab’ tapa Jonadab’ suante’ lak panin ka mai-a ding ka nasem ding pasal khat beek a kitasam ngei kei ding hi, hong ci hi,” ci-in ka gen hi. Josiah’ tapa Judah kumpipa Jehoiakim in a ukzawh kum li a phakna kumin Topa in kei hong hopih a, “Laizial khat la inla, tua sungah Josiah kumpi a suah kum, nang kong hopih masak hun a kipan tuni ciang dong Israel gam le gamdang khempeuhte’ langkhatah ka thugente khempeuh gelh in. Judah mite in amau’ tungah tunsak dingin ka ngaihsut siatna khempeuh za-in, mi khempeuh in a siatna uh panin kiheina-in nei khathei ding uh a, keimah in zong amau’ khialhna le amau’ mawhnate ka maisak thei kha ding hi,” a hong ci hi. Tua ciangin kei zong Neriah’ tapa Baruk ka sam a, Topa in keima tungah a hong gen khitsa thu khempeuh sitin Baruk in laizial khat tungah a gelh hi. Tua ciangin Baruk ka sawl a, “ Topa’ biakinn-ah a pai dingin kei hong kiphal nawn lo ahih manin nang va pai inla, an tan’ ni ciangin Topa’ biakinn sungah a om mi khempeuhte’ zak dingin ka hong sit hih laizial sungah na at Topa’ kammalte na va sim ding hi. Amau’ khuapite pana hong paikhia Judah mi khempeuhte’ zakin zong na sim ding hi. Topa’ tungah amaute thumin a vekpi-un a hoih lohna uh panin a kihei thei kha ding uh hi. Bang hang hiam cih leh hih mite’ tungah Topa in tunsak dingin a gensa a hehna le a thangpaihna lian mahmah hi,” ka ci hi. Topa’ biakinn sungah laizial sunga Topa’ kammal simkhiat dingin ka sawl bangbangin Neriah’ tapa Baruk in zong a hih hi. Josiah’ tapa Judah kumpi Jehoiakim in a ukzawh kum nga a phak kum, a kha kuana kha-in Jerusalem khua-a om mi khempeuh le Judah gam khuapite panin Jerusalem khua-ah a hong pai mi khempeuh in Topa’ maipha ngah nadingin an a tang uh hi. Tua ciangin Topa’ biakinnsung, a Kongpi Thak tumna gei, a dei tungnunga Shafan’ tapa thuvanpi pa Gemariah’ inndei sungah mi khempeuh’ zakin Baruk in laizial sunga ka gelhsak kammalte a simkhia hi. Gemariah’ tapa, Shafan’ tupa ahi Mikaiah in laizial sunga thu teng khempeuh a zak ciangin kumpipa’ innsung, thuvanpi pa’ inndei sungah paisuk a, tua lai munah thuvanpi pa Elishama, Shemaiah’ tapa Delaiah, Akbor’ tapa Elnathan, Shafan’ tapa Gemariah, le Hananiah’ tapa Zedekiah-te a kipan kumpi ulian khempeuh tu-in na om uh hi. Tua ciangin Mikaiah in, mi khempeuh’ zakin Baruk in a sim a zaksa thu teng khempeuh a gen hi. Tua ciangin kumpi ulian khempeuh in, Kushi’ tusawn ahi, Shelemiah’ tupa, Nethaniah’ tapa Jehudi, Baruk kiangah sawl uh a, “Mite kiangah na sim na laizial hong la inla hong pai in,” ci-in a samsak uh hi. Tua ciangin Neriah’ tapa Baruk in zong tua laizial la-in amaute kiangah hong paipih hi. Amaute in, “Tu inla hong sim dih in,” ci-in a gen uh hi. Baruk in zong amaute kiangah a sim hi. Tua thute khempeuh a zak khit uh ciangin lau-in khatlekhat ki-en gapgap uh a, Baruk kiangah, “Hih thute khempeuh kumpipa kiangah i koh kul ding hi,” a ci uh hi. Tua ciangin Baruk kiangah, “Hih thute khempeuh bangci at na hi hiam? Jeremiah in hong sit ahi hiam?” ci-in a dong uh hi. Baruk in zong, “Amah in hih thu khempeuh hong sit a, ke’n zong laizial sungah laitui tawh ka at hi,” ci-in a dawngkik hi. Tua ciangin kumpi uliante in Baruk kiangah, “Pai inla, nang le Jeremiah va bu un. Na omna mun uh kuamah theisak kei un,” a ci uh hi. Tua ciangin amaute in thuvanpi pa Elishama’ inndei sungah tua laizial koih uh a, kumpipa’ omna inndei sungah a lut khit uh ciangin kumpipa kiangah tua thu khempeuh a gen uh hi. Kumpipa in zong tua laizial a la dingin Jehudi sawl a, amah in thuvanpi pa Elishama’ inndei sung pan a va lakhia hi. Kumpipa le kumpipa kiangah a ding ulian khempeuhte’ zakin Jehudi in a sim hi. Kha kua kha pen phalbi laitak ahih manin kumpipa zong a phalbi inn sungah tu-in, meikhuka meikuang a awi hi. Jehudi in khawk thum khawk li bang a sim khit ciangin kumpipa in temta neu khat tawh atkhia a, meikhuk sungah a khul hi. Tua bangin laizial buppi a kattum dong meikhuk sungah a paipai hi. Ahih hangin kumpipa ahi a, hih thute a za khin a nasemte khat beek ahi zongin lau tuan loin, kisik kik lo uh ahih manin a puan uh a balkek kei uh hi. Elnathan, Delaiah, le Gemariah in kumpipa in laizial a hal loh nading a khoh uh hangin amah in a mang kei hi. Tua ciangin kumpipa in kumpipa’ tapa Jerahmeel pen Azriel’ tapa Seraiah le Abdeel’ tapa Shelemiah tawh, ka lai-at Baruk le keimah a man dingin thu a pia hi. Ahih hangin Topa in ko tegel a hong seelsim hi. Keima sit bangin Baruk in a at laizial kumpipa in a haltum khit ciangin Topa in kei hong hopih a, “Laizial dang khat la inla tua tungah, Judah kumpipa Jehoiakim in a haltum a masa laizial sunga thu omteng khempeuh atkik in. Judah kumpipa Jehoiakim’ thu tawh kisai-in hih bangin ama kiangah va gen in: ‘ Topa in hong genin-ah: Nangmah in, “Jeremiah aw, bang hangin Babylon kumpipa hong pai taktakin hih gam hong susia ding a, mihing le ganhing a tengsak nawn kei ding hi, ci-in hih lai sungah at na hi hiam?” ci-in na gen a, tua laizial na haltum hi. Tua ahih ciangin Judah kumpipa Jehoiakim’ thu tawh kisai-in Topa in kong genin-ah, amah in David tokhom tunga tu ding suanlekhak a nei kei ding a, ama luanghawm pen sun laitakin nisa’ kap ding le zan laitakin vukngo’ tuam dingin kipaidak ding hi. Amah le a suanlekhakte le a nasemte a mawhna uh hangin gim ka pia ding a, ama tung le Jerusalem khua-a tengte tung a kipan Judah mite’ tungah amau’ tungah tunsak dingin ka gensa gimna khempeuh ka tungsak ding hi. Bang hang hiam cih leh amaute in ka thu hong ngai lo uh hi,’ ci-in va gen in,” ci-in kei a hong sawl hi. Tua ciangin kei zong laizial dang khat la leuleu-in Neriah’ tapa lai-at Baruk ka pia hi. Amah in zong Judah kumpipa Jehoiakim in meikhuk sungah a khul tumsa laizial sunga thu ki-at khempeuh, keima sit bangbangin a at hi. A thu kibang tampi zong ka gelhbehsak hi. Babylon kumpipa Nebukhadnezzar in Jehoiakim’ tapa Jehoiakhin’ tangin Judah gam a uk dingin Josiah’ tapa Zedekiah a koih hi. Ahih hangin amahmah a kipan a nasemte le a gam sung mite in keima tung tawna Topa’ thugennate a ngai kei uh hi. Kumpi Zedekiah in Shelemiah’ tapa Jehukal le Maaseiah’ tapa siampipa Zefaniah keima kiangah hong sawl a, “ Topa i Pasian’ kiangah kote a dingin thu hong ngetsak in,” ci-in a hong gensak hi. Hih hunin thong kia nai lo ka hih manin mi lakah ka ut utin ka vak kawikawi hi. Tua hun laitak pen Babylon galkapte in Jerusalem khua a sim laitak uh hi a, tua hun laitak mahin Faro kumpipa’ galkapte, galsim dingin Egypt gam panin hong kuankhia hi, cih thu a zak uh ciangin Jerusalem khua panin a nungkik uh hi. Tua ciangin Topa in kei hong hopih a, “ Topa ahi Israel mite’ Pasian in kong cihin-ah: Kei’ tungah thu a hong dongsak Judah kumpipa kiangah hih bangin na va gen ding hi: ‘En in, nang hong huh dingin a hong pai Faro kumpipa’ galkapte a gam uhah ciahkik ding uh hi. Tua ciangin Babylon-te hong kileh kikin hih khuapi hong sim ding uh a, khuapi la-in mei tawh a hal ding uh hi. Topa in kong cihin-ah, nang le nang kikhemin, “Babylon-te hong kilehkik nawn lo taktak ding uh hi,” cikha kei in. Bang hang hiam cih leh amaute hong kilehkik ding uh hi. Nangmah in na gal Babylon galkap khempeuh zolua kisa-in buk sunga mi liam teng bek na suaktasak khaphial ahi zongin, amaute hong thokik teitei ding uh a, hih khuapi hong halsak veve ding uh hi,’ ci-in va gen in,” a hong ci hi. Faro’ galkapte Jerusalem khua a hong naih ciangun Babylon galkapte a nungkik uh hi. Tua laitakin kei zong Jerusalem khua panin ka behte kiangah ka gamhluah teng a la dingin Benjamin gamah a pai dingin ka ding khia hi. Benjamin Kongpi ka tun ciangin Shelemiah’ tapa, Hananiah’ tupa Irijah a kici kongcing pa in kei kiangah, “Nang Babylon mite’ lamah a taisim ding na hi hi,” ci-in a hong man hi. Tua ciangin kei zong, “Hilo hi’ng; Babylon mite’ lamah ka taisim kei ding hi,” ka ci hi. Ahih hangin Irijah in ka thugen hong ngai loin kei hong man a, kumpi uliante kiangah hong paipih hi. Kumpi uliante zong kei tungah heh mahmah uh a, hong sat khit uh ciangin thong dingin a kizangsa, kumpi thuvanpi pa Jonathan’ inn-ah thong hong kiasak uh hi. Leisung thongmial-ah ni tampi ka om khit ciangin kumpi Zedekiah in kei hong samsak hi. Kumpipa in a inn sungah, “ Topa’ hong thugen kam khat beek om lo ahi hiam?” ci-in a hong dongsim hi. Kei zong, “Om mah hi,” ka cih khit ciangin, “Babylon kumpipa’ khut sungah nang hong kipia taktak ding hi,” ci-in ka gen hi. Tua ciangin kei zong kumpi Zedekiah’ kiangah, “Kei thong nong kiatsak nadingin nang’ tungah ahi a, na nasemte tung le hih mite’ tungah ahi zongin bang khialhna hong bawl ka hi hiam? Nang’ kiangah, ‘Babylon kumpipa in nang le hih gam hong sim lo ding hi,’ ci-in thu a hong genkhol, na kamsangte tu-in koi-ah om ahi uh hiam? Tu-in ka to kumpipa aw, ka thugen nong ngaih nadingin kong thum hi. Kumpi thuvanpi pa Jonathan’ inn-ah nong puak kik nawn loh nadingin na mai nuai-ah kiniamkhiatna tawh kong thum hi. Bang hang hiam cih leh nong puakkik leh tua lai-ah ka si taktak ding hi,” ka ci hi. Tua ahih manin kumpipa Zedekiah in kumpi thonginn sungah ka kiat zawkna ding thu pia a, khuasunga anlum a bei matengin anlum sai panin nisimin anlum khat ta hong piasak den hi. Tua ahih manin kumpipa’ thong sungah a om ka suak hi. Mattan’ tapa Shefatiah, Pashhur’ tapa Gedaliah, Shelemiah’ tapa Jehukal, le Malkhiah’ tapa Pashhur-te in mi khempeuh tungah keima thugenna a za uh hi. Keimah in mite kiangah, “ Topa in hong cihin-ah: Hih khuapi sungah a om mi peuhmah namsau tawh ahi a, kial tawh ahi a, pulnatna tawh ahi zongin a si ding uh hi. Ahih hangin pusuak khia-in Babylon mite a beel peuhmah nungta ding a, suakta liailiai ding uh hi. Topa in hong cihin-ah, Babylon kumpipa’ khut sungah hih khuapi kipia taktak ding a, a kila ta ding ahi hi,” ka ci hi. Tua ciangin kumpipa’ uliante in kumpipa kiangah, “Hih mipa i thatlum ding hi. Bang hang hiam cih leh hih thute a gen manin hih khuapi sungah a omlai galkapte le mi khempeuhte lungkia sakin thazawsak hi. Hih mipa in i gam mite’ phattuamna ding zong loin a gim ngah nading uh a zongzaw ahi hi,” a ci uh hi. Kumpipa Zedekiah in, “En un, note’ khut sungah amah om hi. Keimah in note kong kho thei kei hi,” a ci hi. Tua ciangin amaute in kei hong man uh a, thong huang sunga om kumpipa’ tapa Malkhiah’ tuikhuk sungah khau tawh hong khiasuk uh hi. Tuikhuk sungah tui om loin buan bek om a, buan sungah ka tumsuk hi. Kumpipa’ inn sungah na a sem kumpi ulian khat ahi Ethiopia mi Ebedmelek in tuikhuk sungah kei hong kikhiatlam a za hi. Tua laitakin Benjamin Kongpi-ah kumpipa tu-in a om hi. Ebedmelek zong kumpi inn panin hong paikhia-in kumpipa kiangah, “Ka to kumpipa aw, hih mite in kamsangpa Jeremiah, tuikhuk sungah a khiatsuk uh a khial uh hi. Bang hang hiam cih leh khua sungah anlum om nawn lo ahih manin an ngawlin a puksi veve ding ahi hi,” a ci hi. Tua ciangin kumpipa in Ethiopia mipa Ebedmelek sawl a, “Hih lai panin mi thum tonpih inla, kamsangpa Jeremiah a sih ma-in tuikhuk sung pan va kaikhia un,” a ci hi. Tua ciangin Ebedmelek in zong a mite tonpih a, kumpipa’ inn-ah pai-in vankoihna sungah a lut khit uh ciangin tuikhuk sung pan khau tawh kei hong kaihkhiatna ding uh puansiasa le puan lui pawlkhat a la uh hi. Tua ciangin Ethiopia mipa Ebedmelek in keima kiangah, “Na lenuai le khau kikalah puansiate dap in,” ci-in hong sawl hi. Kei zong tua mah bangin ka hih hi. Tua ciangin amaute in tuikhuk sung panin khau tawh kei a hong kaikhiato uh hi. Ahi zongin thong huangsung mahah ka omlai hi. Kumpi Zedekiah in kei hong vaikhak a, Topa’ biakinn kongkhak tumna-ah a hong sam hi. Kumpipa in kei kiangah, “Thu khat kong dong ding hi; bangmah hong im kei in,” hong ci hi. Kei zong Zedekiah kiangah, “Thuman bangin hong gen leng kei nong that taktak ding hi. Ka ngaihsutna hong pia taleng zong nong mang nuam kei ding hi,” ka ci hi. Tua ciangin kumpipa Zedekiah in kei kiangah, “Eite nuntakna a hong pia Topa a nuntak bangin kong sisak kei ding a, nang a hong thatnuam hih mite’ khut sungah zong kong pia kei ding hi,” ci-in kiciamna a hong piasim hi. Tua ciangin keimah in Zedekiah kiangah, “ Topa, Vanglian Pasian, Israel mite’ Pasian in hong genin-ah, Babylon kumpipa’ uliante na belh leh na nuntakna hong kimap ding a, hih khuapi in zong mei tawh haltumna thuak loin nang le na innkuanpihte na nungta ding uh hi. Ahih hangin Babylon kumpipa’ uliante na belh kei leh Babylon kumpipa’ khut sungah hih khuapi kipia ding a, amau in mei tawh halin amaute’ khutsung pan na suakta kei ding hi,” ka ci hi. Kumpipa Zedekiah in kei kiangah, “Babylon mite’ kiangah a tai Judah mite ka kihta hi. Amaute’ khut sungah kei hong kipia leh amaute in kei hong bawlsia ding uh hi,” a hong ci hi. Kei zong, “Amaute’ kiangah nang hong kipia lo ding hi. Tu-a kong gen bangin Topa’ thu mang in. Tua hileh nang a dingin hoih ding a, na nuntakna hong kimap ding hi. Ahih hangin na lut nop kei leh, Topa in ka maangmuhna sungah hih bangin hong lak hi: En in, Judah kumpipa’ inn sungah a kinusia numei khempeuh Babylon kumpipa’ uliante kiangah kipaipih a, tua numeite in Zedekiah kiangah, ‘Na lawm muante in nang hong khem uh a, nang hong zo ta uh hi. Buan sungah na khe tum ahih manin nang hong nungngat ta uh hi,’ ci-in a gen uh hi. Na nupite le na tate khempeuh Babylon mite kiangah kipaipih ding a, nangmahmah zong amaute’ khutsung panin na suakta kei ding hi. Babylon kumpipa in hong man ding a, hih khuapi mei tawh a kangtum ding hi,” ka ci hi. Tua ciangin Zedekiah in kei kiangah, “Hih thute kuamah theisak kei in. Tua hileh na si kei ding hi. Ahih hangin kumpi uliante in nang kong hopihlam a zakkhak uh a, nang kiangah hong pai-in hong hopihin, ‘Kumpipa kiangah na gen thute le kumpipa in nang kiangah hong gen thute hong gen in. Bangmah hong im kei lecin kong that kei ding uh hi,’ ci-in a hong genkhak uhleh amaute kiangah, ‘Kumpipa in kei, Jonathan’ inn-ah a si dingin a hong puakkik nawn loh nadingin a thum hi ing,’ ci-in dawng in,” ci-in a hong gen hi. Kumpi ulian khempeuh ka kiangah hong pai takpi uh a, thu a hong dong uh hi. Kei zong kumpipa’ hong vaikhakna bangin ka dawngkik hi. Tua ciangin amaute in a gen ding uh om nawn lo hi. Bang hang hiam cih leh kumpipa tawh ka kihona uh a hong zasim kuamah a om kei uh hi. Tua hi a, Jerusalem khua a kilak ciang dong kei zong thong huangsung mahah ka omlai hi. Judah gamah Zedekiah kumpi a suahzawh kum kua le kha sawm a phak laitakin, Babylon kumpipa Nebukhadnezzar le a galkap khempeuh Jerusalem khua a sim dingin a hong kuan uh hi. Zedekiah in a ukzawh kum sawm le kum khat, a kha lina, a ni kua ni-in, kumpipa’ khuapi kulh a hong phulet uh hi. Jerusalem khua a kilak laitakin Nergalsharezer, Samgarnebo, galkapbu Sarsekhim le sakol galkapmang Nergalsharezer te a kipan Babylon kumpi uliante khempeuh hong pai-in kongpi laita penah hong tu uh hi. Judah kumpipa Zedekiah le galkap khempeuh in amaute a muh uh ciangin a taisim uh hi. Zan laitakin kumpipa’ huansung tawnin kulh tegel kikal-a kongpi kantanin khuapisung pan paikhia uh a, Arabah gam lam a manawh uh hi. Ahih hangin Babylon galkapte in nungdelh uh a, Jerikho zanglei-ah Zedekiah a pha uh hi. A mat khit uh ciangin Hamath gam Riblah khua-ah, Babylon kumpipa Nebukhadnezzar’ kiangah paipih uh a, amah in thukhenna a pia hi. Riblah khua-ah Babylon kumpipa in Zedekiah’ muh mahin a tapate thahlupsak a, Judah gam kumpi ulian khempeuh zong a thatlum hi. Zedekiah’ mittangte a khelkhiatsak khit ciangin kol bulh a, Babylon-ah a ciahpih hi. Babylon mite in kumpipa’ inn le midangte’ innte hal uh a, Jerusalem khua kulhpi a susia uh hi. Tua ciangin kumpi cing galkap mangpa Nebuzaradan in khuapi sungah a kinusia lai mite pen ama kiangah a tai mite tawh, Babylon-ah sal dingin a paipih hi. Kumpi cing galkap mangpa Nebuzaradan in bangmah a nei lo mizawng pawlkhat Judah gamah nusia a, leenggah huan le lo a pia hi. Babylon kumpipa Nebukhadnezzar in kei tawh kisai-in kumpi cing galkap mangpa Nebuzaradan thu pia a, “Jeremiah la un. Limtakin kem unla bawlsia kei un. Ama deih bangbangin na bawl un,” a ci hi. Tua ciangin kumpi cing galkapmang Nebuzaradan tawh, galkapbu Nebushazban le sakol galkapmang Nergalsharezer te a kipan Babylon kumpipa’ uliante khempeuh in thong huangsung panin kei a hong lakhia uh hi. Ahikam’ tapa ahi, Shafan’ tupa Gedaliah in hong kemin inn-ah a hong ciahpih dingin kei a hong ap uh hi. Tua ahih manin ka mipihte’ lak mahah ka om hi. Thong huang sungah kikhumcipin ka om laitakin Topa in hong hopih a, “Ethiopia mi Ebedmelek kiangah pai inla, ‘Vanglian Topa, Israel mite’ Pasian in hong genin-ah: En in, hih khuapi hoihna ding hi lo, a siatna ding ka gensate ka tungsak ding a, tua ni a hong tun ciangin nangmah in zong na mu ding hi. Ahih hangin Topa in kong cihin-ah, tua ni ciangin nang kong honkhia ding a, na kihtak mite’ khut sungah hong kipia lo ding hi. Bang hang hiam cih leh nang kong honkhia taktak ding a, namsau tawh thahna na thuak kei ding hi. Topa in kong cihin-ah, kei hong muang na hih manin na nuntakna na suahtak liailiai ding hi, hong ci hi,’ ci-in va gen in,” a hong ci hi. Kol kibulhin Jerusalem khua le Judah gam a saltangte khempeuh tawh Babylon khua-ah hong kipuak khit ciangin Ramah khua panin kumpi cing galkapmang Nebuzaradan in hong khahkhia kik hi. Tua khit ciangin Topa in kei a hong hopih hi. Kumpi cing galkap mangpa in kei hong samkhia-in hong hopih a, “ Topa na Pasian in hih mun a siatna ding thu gen khinzo hi. Ama gen bangmahin Topa in tu-in zong a hih khinzo hi. Note in Topa’ thu mang loin a tungah mawh na hih manun, note tungah hih bang thu a hong tung ahi hi. Tu-in en in, na khuta kibulh kolte tuni-in kong sutkhiatsak a, kong khahkhia ta hi. Babylon khua-ah kei tawh pai ding hoih na sak leh hong pai in. Keimah in limtakin nang kong kem ding hi. Ahih hangin Babylon khua-ah kei tawh pai ding hoih na sak kei leh hong pai kei in. Gam khempeuh na mai-ah om a, na painopna peuhpeuhah na pai thei hi,” a hong ci hi. Kei ka pau loh ciangin Nebuzaradan in, “Babylon kumpipa in Judah gam khuapite a uk dingin a koih Ahikam’ tapa, Shafan’ tupa Gedaliah kiangah paikik in. Amah tawh na mipihte lakah na teng in. Na ten nop kei leh lah na pai nopna peuhpeuhah pai in,” a hong ci hi. Tua ciangin kumpi cing galkap mangpa in an le letsong hong pia-in kei a hong paisak hi. Tua ciangin kei zong Ahikam’ tapa Gedaliah’ omna Mizpah khua-ah ka pai a, gam sungah a omlai ka mipihte tawh ka omkhawm hi. Babylon kumpipa in gam uk dingin Ahikam’ tapa Gedaliah koih a, Babylon khua-ah sal dingin a kipaipih lo gam sungah mizawng pente ahi papi, nupi, le naupangte a en dingin a koihna thu, Babylon-te’ khut sungah a lut nai lo, gam sung khuaneu-a om galkapbute le a galkapte un a zak uh ciangin Mizpah khua Gedaliah kiangah a pai uh hi. Nethaniah’ tapa Ishmael, Kareah’ tapa Johanan, Tanhumeth’ tapa Seraiah, Netofah khuami Efai’ tate, le Maakath mi Jezaniah-te in a galkapte hong paipih uh hi. Ahikam’ tapa, Shafan’ tupa Gedaliah in zong amaute kiangah kiciamin gen a, “Babylon mite’ khutnuai-ah na om ding uh kihta tuan kei un. Hih gam sung mahah om unla, Babylon kumpipa’ na sepsak le-uhcin note tungah thusia bangmah om lo ding hi. Kei ka hih leh Mizpah khua mahah ka om ding a, ei kiangah hong pai ding Babylon mite kiangah note’ tangin ka ding ding hi. No na hih uhleh leenggahzu, khuakhal ante, le sathaute khawm unla, na beel sung uhah koih un. Na laksa uh khua ciat mahah na teng un,” a ci hi. Tua mah bangin Moab gam, Ammon gam, Edom gam, le gamdang a teng Judah mi khempeuh in, Babylon kumpipa in Judah gamah mi pawlkhat omsak lai a, tuate a uk dingin Ahikam’ tapa, Shafan’ tupa Gedaliah koih hi, cih thu a za uh hi. Tua ciangin Jew mi khempeuh a kithehthangna mun khempeuh panin Judah gamah hong ciahkik uh a, Mizpah khua Gedaliah kiangah hong pai uh hi. Leenggahzu le khuakhal an tampi a kaikhawm uh hi. Tua ciangin Kareah’ tapa Johanan le gam sung khuaneu-a om galkapbute khempeuh Mizpah khua Gedaliah kiangah hong pai uh a, “Ammon kumpipa Baalis in nang a hong suam dingin Nethaniah’ tapa Ishmael a sawllam na thei hiam?” ci-in a dong uh hi. Ahih hangin Ahikam’ tapa Gedaliah in amau’ thugen a um kei hi. Tua ciangin Kareah’ tapa Johanan in Mizpah khua-a Gedaliah’ kiangah, “Nethaniah’ tapa Ishmael hong thatsak in. Kuamah in hong thei lo ding uh hi. Nang hong kithat leh nang a hong beel Jew mite kikhenthang ding a, Judah gamah mi a omlai sunteng in zong beilawh ding uh ahih manin bang hangin amah in nang hong that laizang ding ahi hiam?” ci-in a hopihsim hi. Ahih hangin Ahikam’ tapa Gedaliah in Kareah’ tapa Johanan’ kiangah, “Tua bangin hih kei in; bang hang hiam cih leh Ishmael’ thu na genna man lo hi,” a ci kik hi. Kha sagih kha hong tun ciangin Nethaniah’ tapa, Elishama’ tupa, kumpi nam le kumpipa’ ulian pente khat ahi Ishmael, mi sawm tawh Mizpah khua Ahikam’ tapa Gedaliah’ kiangah hong hawh uh hi. Mizpah khua-ah amaute in an a nekkhawm laitakun, Nethaniah’ tapa Ishmael le tua mi sawmte in, Babylon kumpipa in gam uk dingin a koih Ahikam’ tapa, Shafan’ tupa Gedaliah pen namsau tawh satin a thatlum uh hi. Ishmael in Mizpah khua-ah Gedaliah tawh a omkhawm Jew mi khempeuh le tua laitakin a om Babylon galkapte zong a that hi. Gedaliah a kisuam ni a zing ciang, kuama theih ma-in Shekhem, Shiloh, le Samaria khuate panin mi sawmgiat hong pai uh hi. Amaute in a khamul uh metin a puan uh balkekin, a pumpi uh a kikui gawpsa-in Topa’ biakinn-ah an tawh biakna le paknamtui tawh biakna a piak ding uh hong tawi khawm uh hi. Nethaniah’ tapa Ishmael zong Mizpah khua panin kap kawmin hong paikhia a, amau hong dawntuah hi. Amau tawh a kimuh ciangin amah in, “Ahikam’ tapa Gedaliah hong en dih un,” ci-in a sam hi. Khuapi sung a tun uh ciangin Nethaniah’ tapa Ishmael le a mi sawmte in amaute thatin a luang uh tuikhuk sung khatah a paai uh hi. Ahih hangin amaute’ lakah mi sawm in Ishmael’ kiangah, “Ko hong that kei in. Mangbuh, mangbuhham, sathau le khuaizu ka seelsim uh lolai-ah tampi a om hi,” a ci uh hi. Tua ahih manin amah le a lawmte in amaute a that kei uh hi. Ishmael in a thahsa misi luanghawm khempeuh a paihna tuikhuk pen a gol khat hi a, kumpipa Asa in Israel kumpipa Baasha a nan nadingin a bawl ahi hi. Nethaniah’ tapa Ishmael in a thahsa misi luanghawmte tua tuikhuk a dimsak hi. Tua ciangin kumpi cing galkapmang Nebuzaradan in, Ahikam’ tapa Gedaliah’ uk dingin a piak kumpipa’ tanute le Mizpah khua-a a kinusia mi khempeuh a kipan Mizpah khua-ah a omlai mi khempeuh Nethaniah’ tapa Ishmael in man a, Ammon gam lam zuanin a paikhiatpih hi. Ahih hangin Kareah’ tapa Johanan le amah tawh a omkhawm galkapmang khempeuh in Nethaniah’ tapa Ishmael’ tatsiatnate a zak uh ciangin a galkap khempeuh uh tawh Nethaniah’ tapa Ishmael a sim dingin a kuankhia uh hi. Gibeon tuikhukpi a tun uh ciangin a pha uh hi. Ishmael’ mat mi khempeuh in Kareah’ tapa Johanan le a hong tonpih galkapmangte a muh uh ciangin a nuam uh hi. Tua ahih manin Mizpah khua panin Ishmael in manin a paikhiatpihte khempeuh hong kilehhei kikin Kareah’ tapa Johanan a beel uh hi. Ahih hangin Nethaniah’ tapa Ishmael le mihing giat Johanan’ khutsung panin suakta uh a, Ammon gamah a tai uh hi. Tua ciangin Kareah’ tapa Johanan le a paipih galkapmangte khempeuh in, Nethaniah’ tapa Ishmael in Mizpah khua-ah Ahikam’ tapa Gedaliah a thah khit ciangin manin a paikhiatpih galkapte, nupite, naupangte le kumpi innsung mangte a kipan a omlai mi khempeuh Gibeon khua panin a ciahpih kik uh hi. Egypt gam a zuan dingin amaute pai uh a, Bethlehem khua gei Khimham Khawlmun-ah a khawl uh hi. Bang hang hiam cih leh Babylon mite a kihta uh hi. Babylon kumpipa in gam uk dingin a koih Ahikam’ tapa Gedaliah pen Nethaniah’ tapa Ishmael in suamlum ahih manin a kihta uh ahi hi. Tua ciangin galkapmangte khempeuh, Kareah’ tapa Johanan, Hoshaiah’ tapa Azariah, le a neupen pan a kipan a lianpen dongin mi khempeuh hong paikhawmin kei kiangah, “Kong thumna uh hong ngai inla, a hong kinusia ko teng a dingin Topa na Pasian kiangah thu hong ngetsak in. Bang hang hiam cih leh khatvei lai-in mi tampi ka hih uh hangin tu-in nong muh bangin mi tawmno khat bek ka hita uh hi. Topa na Pasian in ka lam pai nading uh ahi a, ka na sepna ding uh ahi zongin a hong lah nadingin thu hong ngetsak in,” hong ci uh hi. Kei zong amaute kiangah, “Nong genna uh ka thei khinzo hi. En un, nong ngetna bangun Topa na Pasian uh kiangah thu ka ngen ding a, Topa’ hong dawnkikna bangbang ka hong gen ding hi. Bangmah kong im kei ding hi,” ka ci hi. Tua ciangin amaute in kei kiangah, “ Topa na Pasian in kote a dingin nang tungah a hong gen bangbang ka zuih kei tak mah uh leh Topa in mantakin thei tahen. Nang kong sawlna uh Topa i Pasian’ hong gen bangbang hoih taleh sia taleh ka mang ding uh hi. Bang hang hiam cih leh Topa i Pasian’ thu mang leeng, ei a dingin na hong hoih ding hi,” a hong ci uh hi. Tua zawh ni sawm khit ciangin Topa in kei a hong hopih hi. Tua ciangin keimah in Kareah’ tapa Johanan, amah tawh a omkhawm galkapmangte khempeuh, le a neupen a kipan a lianpen dongin mi khempeuh ka sam a, “Na deihna uh kong thumsak nadingin nong sawlna uh Topa, Israel mite’ Pasian in a hong genin-ah: Hih gamah note na omsuak uhleh note kong lam ding a, kong phel kei ding hi. Kong phut ding a, kong botkhia kei ding hi. Bang hang hiam cih leh note’ tungah siatna kong tunsak manin ka dah hi. Na kihtak uh Babylon kumpipa kihta nawn kei un. Topa in kong cihin-ah, lau nawn kei un. Bang hang hiam cih leh ama khutsung pan a hong honkhia ding le a hong lakhia dingin keimah in note kong ompih hi. Amah in note hong hehpihin na gam mah uhah na tensuak theihna dingun keimah in note kong hehpih ding hi. “Ahih hangin note in Topa na Pasian uh’ thu mang loin, ‘Hih gam sungah ka teng nawn kei ding uh hi. Gal om lohna, peengkul kitum lohna, anduh gilkial lohna Egypt gamah pai-in tua lai-ah ka teng ding uh hi,’ na cih uhleh Judah gamah a omlai mite aw, Topa’ kammal ngai un. Vanglian Topa, Israel mite’ Pasian in kong cihin-ah: Egypt gamah a teng dingin na pai teitei uh a, na ten teitei uhleh na kihtaktak uh namsau in Egypt gamah note hong that veve ding a, na kihtaktak uh kialpi in zong Egypt gamah note hong nungdelh veve-in, tua lai munah na si veve ding uh hi. Egypt gamah pai-in a teng khempeuh namsau tawh ahi a, kialpi tawh ahi a, pulnatna tawh ahi zongin a si ding uh hi. Amaute’ tungah ka tunsak ding gimna panin kuamah a suakta kei ding uh hi. “Bang hang hiam cih leh Vanglian Topa, Israel mite’ Pasian in kong cihin-ah: Jerusalem khua-ah a teng mite’ tungah ka hehna le ka thangpaihna a kibuak bangmahin Egypt gamah na pai uhleh note tungah ka hehna hong kibua ding hi. Mite in note hong lipkhap ding a, kihamsiatna-in hong zangin hong zahko ding uh hi. Note in hih mun na mukik nawn kei ding uh hi, ci-in gen hi,” ka ci hi. Tua ciangin Judah gamah a omlai sunte kiangah, “ Topa in note kiangah, Egypt gamah pai kei un, hong ci hi. Tuni-in note kong hilhkholhnate teltakin thei un. Na sih nadingun lam na pial khin uh hi. Bang hang hiam cih leh Topa na Pasian uh kiangah kei nong paisak uh a, ‘Ko a dingin Topa i Pasian’ kiangah thu hong ngetsak in. Topa i Pasian in a hong gen peuhpeuh ko kiangah hong gen in. Ko zong ka mang ding uh hi,’ na hong ci uh hi. Topa na Pasian un note’ kiangah gen dingin a hong sawl tu-in kong gen khinzo hi. Ahih hangin note in khat beek na mang kei uh hi. Tua ahih manin na tennopna mun uhah namsau tawh thahna, kial le pulnatna tawh sihna na thuak ding uh hi, ci-in tu-in teltakpi-in thei ta un,” ka cithuah lai hi. Topa Pasian in mi khempeuh kiangah a hong sawl hih thuteng ka gen khit ciangin Hoshaiah’ tapa Azariah le Kareah’ tapa Johanan a kipan migilo dangte khempeuh in kei kiangah, “Nang in zuau na phuak hi. Topa i Pasian in, ‘Egypt gamah a teng dingin pai kei un,’ ci-in a gen dingin nang hong sawl lo hi. Neriah’ tapa Baruk in Babylon mite’ khut sungah kote hong pia nuamin, hong kithahna ding ahih kei leh Babylon-ah saltang dingin hong kilak theih nading deih ahih manin ko a hong langpang dingin nang a hong zang ahi zaw hi,” a hong ci uh hi. Tua ahih manin Kareah’ tapa Johanan le galkapmangte khempeuh a kipan mi khempeuh in Judah gamah omsuakna ding Topa’ thugenna a mang kei uh hi. Tua ciangin Kareah’ tapa Johanan le galkapmangte khempeuh in, a kihawlkhiatna uh gam khempeuh panin a hong ciahkik mite le Judah gamah a omlaisun teng Egypt gamah a paipih uh hi. Papi, nupi, naupang, kumpipa’ tanute a kipan kumpi cing galkapmang Nebuzaradan in Ahikam’ tapa, Shafan’ tupa ahi Gedaliah’ kep dingin a nusiat mi khempeuh a paipih uh hi. Neriah’ tapa Baruk le kei zong a hong kipaipih hi. Amaute in Topa’ thu mang lo uh a, Egypt gamah pai-in Tahpanhes khua dong kitung hi. Tua ciangin Tahpanhes khua-ah Topa in kei hong hopih a, “Suangtum gol pawlkhat la inla, Tahpanhes khua Faro kumpi inn lutna suangphah nuai-ah phum in. Na phumlam Judah mi khempeuh musak in. Tua ciangin amaute kiangah, ‘Vanglian Topa, Israel mite’ Pasian in hong genin-ah: En un, keimah in ka nasempa ahi Babylon kumpipa Nebukhadnezzar ka la ding a, hih ka suang phumte tungah ama kumpi tokhom hong phut ding a, tuate tungah a kumpi puanbuk a lam ding hi. Amah hong pai-in Egypt gam hong simgawp ding a, pulnatna tawh a si ding mite pulnatna tawh si-in, sala mat dingte salin kimanin, namsau a si ding mite namsau tawh kithat ding uh hi. Egypt pasian-te a kibiakna biakinnte hal ding a, a pasian-te uh halin a puakhia ding hi. Tuucingte in a puan tung uha om khahte paai-in a siansak uh bangin amah in Egypt gam siangsak ding a, tua khit ciangin ngaihmuang takin a ciahkik ding hi. Amah in Egypt gam Heliopolis khua-a mual suangte susia ding a, Egypt pasian-te a kibiakna innte mei tawh a halsak ding hi, ci hi,’ ci-in va gen in,” hong ci hi. Egypt gam Migdol khua, Tahpanhes khua, Memfis khua, le leitaw lama teng Jew mite tawh kisai-in Topa in thu hong gen a, “Vanglian Topa, Israel mite’ Pasian in kong genin-ah: Note in Jerusalem khua le Judah gam khuapi khempeuh tungah ka tunsak gimna na muzo uh hi. En un, tuni-in tua khuate a siasa mahin omlai a, kuamah teng lo hi. Bang hang hiam cih leh amaute in ka heh nadingin gitlohna bawl uh a, amaute a kipan note le na pu na pate un a theih ngei loh uh pasian-te’ na semin paknamtui halin a bia uh hi. Ahih hangin note kiangah ka nasem kamsangte khempeuh kong sawl a, ‘Ka muhdah hih a kihhuai na na gamta nawn kei un,’ ci-in kong gensak tawntung hi. Ahih hangin amaute in ka thu hong ngai loin a bil uh hong ngat lo uh a, a gitlohna uh panin kihei loin, pasian dangte kiangah paknamtui hal veve uh hi. Tua ahih manin Judah gam khuapite sung le Jerusalem khua kongzing lakah ka hehna le ka thangpaihna ka bua a, ka kuangsak hi. Tuni-a na muh uh bangin tuate kisia-in gamlak suak khinta hi. “Tu-in Vanglian Topa Pasian, Israel mite’ Pasian in kong genin-ah: Bang hangin note in hih bangin note’ siat nadingin mawhna lianpi bawl na hi uh hiam? Judah gam sungah papi, nupi, naupang, le naungek a kipan a nungtalai kuamah om nawn kei hen, cih na deihna uh ahi hiam? Note si-in, leitung a minam dang khempeuhte in hamsiatna-in a hong zat ding uh le hong simmawh nadingun bang hangin na khut uh tawh milim bawlin, na ten nadingun na zuat uh Egypt gamah pasian dangte’ kiangah paknamtui halin kei hong hehsak na hi uh hiam? Judah gam le Jerusalem khua kongzing lakah na pute na pate uh’ gitlohna, Judah kumpite’ gitlohna, a zite uh’ gitlohna, note mahmah’ gitlohna, le na zite uh’ gitlohnate mangngilh khin na hi uh hiam? Tuni ciang dong note na kiniamkhiat kei uh a, kei hong zahtak loin, note le na pute na pate uh tungah kong piak ka thukhamte le ka ngeinate na zui kei uh hi. “Tua ahih manin Vanglian Topa, Israel mite’ Pasian in kong genin-ah: En un, note a susia dingin na langkhat uhah kei ka ding a, Judah gam khempeuh ka susia ding hi. Egypt gamah a teng dingin a lungsim a khensat khin Judah mi a omlaite, a vekpi-un ka sisak khin ding hi. Egypt gamah namsau tawh kithat sakin kial tawh ka puksisak ding hi. A neupen a kipan a golpen dongin namsau le kialpi tawh a si ding uh a, mite’ lipkhap, mite in kihamsiatna-in a zat leh mite’ simmawh ka suaksak ding hi. Jerusalem khua ka siatsak bangin Egypt gam a teng mite namsau tawh, kialpi tawh, pulnatna tawh sihna ka thuaksak ding a, Egypt gamah pai-in a teng Judah mi a omlaite in a zuatkik nop uh ahi Judah gamah ciahkik thei nawn loin, khat beek suakta loin, zong a nungta suak kei ding uh hi. Galtai pawlkhat longal khat beek a suakta kei ding uh hi,” a hong ci hi. Tua ciangin a zite un pasian dangte kiangah paknamtui a hallam a thei papi khempeuh le tua lai-ah a ding nupi khempeuh a kipan Egypt gam leitaw lamah a teng mi khempeuh, a vekpi-in mi tampi tak in kei kiangah, “ Topa’ mina nong gen thute kong mang kei ding uh hi. Ahih hangin ka ciamsa uh bangin kote, ka pute ka pate, ka kumpite uh le kumpi uliante in Judah gam khuapite le Jerusalem khua kongzing lakah ka hih ngei uh bangin vantung kumpinu kiangah paknamtui halin tuidawn biakna ka hihzaw ding uh hi. Bang hang hiam cih leh ka tuacih uh ciangin an tampi ka nei uh a, hau-in gimna zong ka thuak kei uh hi. Ahih hangin vantung kumpinu kiangah paknamtui halna le tuidawn biakna ka hih nawn loh uh a kipan bangmah ka nei nawn kei uh a, namsau le kial in hong thatlum zawsop hi,” a hong ci uh hi. Nupite in zong, “Vantung kumpinu’ lim a sun dingin moh bawlin paknamtui halna le tuidawn biakna ka bawl uh ciangin ka pasalte uh’ thukim lohpi-in a bawl ka hi zenzen uh hiam?” a hong ci uh hi. Tua ciangin tua bangin a hong dawngkik papi, nupi a kipan mi khempeuhte kiangah, “Judah gam khuapite le Jerusalem khua kongzing lakah note, na pute na pate uh, na kumpite uh, le na kumpi uliante uh a kipan gam sung mi khempeuh in paknamtui halna na bawl uh ciangin Topa in tua pen a phawk lo sa na hi uh hiam? A ngaihsun lo sa na hi uh hiam? Topa in na hoih lohnate uh le na bawl uh kihhuainate hangin note hong thuakzo nawn lo hi. Tua ahih manin tuni mahmahin zong na gam uh gamlak suakkhin a, mite’ kihamsiatna suakin kuamah teng nawn lo hi. Note in paknamtui halin, Topa’ tungah mawh tham loin, Topa’ thu mang loin ama thukhamte, a ngeinate, le a hong thupiakte zui lo na hih manun tuni mahmahin zong hih gimna note tungah hong tung ahi hi,” ka ci hi. Tua ciangin mi khempeuhte kiang le a diakdiakin nupi khempeuhte kiangah, “ Topa’ kammal ngai dih un. Egypt gamah a om no Judah mite khempeuh aw, Vanglian Topa, Israel mite’ Pasian in hong genin-ah: Note le na zite un na khut bek uh tawh na sep uh hi loin na kam mahmah uh tawh, ‘Vantung kumpinu’ tungah paknamtui hal ding le tuidawn biakna piak dingin ka kiciamnasa uh bangin ka sem taktak ding uh hi,’ ci-in na gen khinzo uh hi. Tua ahihleh na kiciamna uh kipsak ta unla, na kiciamna uh bangin sem dih un! Ahih hangin Egypt gamah a om no Judah mite aw, Topa’ thugenna hong ngai un. En un, Topa in kong cihin-ah, Egypt gamah a om Judah mi khat beek in, ‘ Topa a nuntak bangin,’ ci-in ka min zangin a kiciam nawn loh nadingun ka min lianpi tawh ka kiciam khinzo hi. En un, amaute tungah hoihna tung loin siatna a tun nadingin keimah in ka bawl ding hi. Egypt gamah a om Judah mi khempeuh namsau le kialpi tawh si ding uh a, khat beek a suakta kei ding uh hi. Namsau tawh thahna a thuak kha lo mi tawmkhate, Egypt gam panin Judah gamah hong ciahkik ding uh a, Egypt gamah a teng dingin a pai a nungtalai sunte in kei’ kammal le amau’ kammal koizaw a manin tung, cih a thei ding uh hi. Note’ siatna ding ka gensa thute a hong tung takpi ding ahihna thu na theih nadingun Topa in kong cihin-ah, note tungah hih lim kong pia ding a, hih munah note kong thuaksak ding hi: Topa in kong genin-ah: ‘En un, Judah kumpi Zedekiah, a gal pa ahi amah a that nuam Babylon kumpipa Nebukhadnezzar’ khut sungah ka piak mah bangin Egypt kumpipa Faro Hofra, a galte’ khutsung, amah a thatnuam mite’ khut sungah ka pia ding hi,’ hong ci hi,” ka cithuah lai hi. Josiah’ tapa Jehoiakim, Judah gamah kumpi a suahzawh kum li a cin ciangin Neriah’ tapa Baruk in laibu khat sungah keima gen bangbang a gelh hi. Tua ahih ciangin Baruk kiangah, “Baruk aw, Topa, Israel mite’ Pasian in nang hong hopih hi. Nangmah in, ‘Gimna thuak ing! Bang hang hiam cih leh Topa in ka dahna le ka natna hong behlap hi. Ka tautauna-in ka gim khinzo a, ka tawlnga thei kei hi,’ na ci hi. “ Topa in nang tungah hih bang a gen dingin hong sawl hi: En in, keimah in ka lamsate ka phelkik a, ka phuhsate ka botkhia kik hi. Keimah in leitung buppi tua bangin ka hih ding hi. Tua sung panin nang a pengthei tuam dingin kingaihsun na hi hiam? Tua bangin kingaihsun kei in; bang hang hiam cih leh en in, Topa in kong cihin-ah, mi khempeuh tungah gimna ka tungsak ding hi. Ahih hangin nang pen na paina mun khempeuhah kong suaktasak liailiai ding hi, ci hi,” ka ci hi. Gamdangte’ thu tawh kisai-in Topa in kei kiangah thu hong gen hi. Josiah’ tapa Jehoiakim, Judah gamah kumpi a suahzawh kum li a phak hunin Babylon kumpipa Nebukhadnezzar in Eufratis gun gei Karkhemish khua-ah Egypt kumpipa Faro Neko simin a zo hi. Egypt kumpipa’ galkapte tawh kisai-in hih bangin a hong gen hi: “Na lumte uh la unla galsim dingin kuankhia un! Sakol vante vawh unla, tuang ta un, sakol galkapte aw. Na sik lukhute uh khu unla, na teipite uh tat hiamin, na sik puante uh silh un. “A bangci mawk ahi hiam? Amaute lungmangin a nungkik ta uh hi. A galkapte uh kilehhawl a, lau-in taikekmang mawk uh hi. Kinungleh hei kik lo uh hi; mun khempeuhah launa vive! A manlang pente zong paikhia thei tuan lo uh a, galkapte zong suakta lo uh hi. Leilu lam Eufratis gun gei-ah hoi-in a tuk uh hi. Nail gunpi bangin a hong khang, guntui khang a bang kua ahi hiam? Nail gunpi bangin Egypt gam hong khang a, guntui khang hong bang hi. Amah in, kei ka khang ding a, leitung khempeuh ka tuam ding hi. Khuapite le a sunga teng mite ka susia ding hi, a ci hi. Sakolte aw, mai nawt un; sakol leengte aw, hat un! Lum a tawi Ethiopia mite le Put mite aw, thal tawi a siam Lud mite aw, na galkapte uh kuansak un. “Bang hang hiam cih leh tuni pen Vanglian Topa Pasian’ ni hi a, phu a lakkik ni, a galte a thuk ni ahi hi. Namsau in amaute that ding a, a kham mateng a si uh a dawn ding hi. Bang hang hiam cih leh Vanglian Topa Pasian in Eufratis gun gei leilu lamah amaute biakna-in a nei hi. Egypt nungakte aw, Gilead gamah pai unla, damna zatui va la un. Zatui tampi na zat khit uh hangin damna na ngah tuan kei uh hi. Gamdangte in na zumhuaina uh hong za khin uh a, leitung bupah na kahna aw uh kiza hi. Na galkapte uh khatlekhat kiphukha-in, a nihun a pukkhawm uh hi,” a hong ci hi. Egypt gam a sim dingin Babylon kumpipa Nebukhadnezzar’ hong paina tawh kisai-in Topa in hih bangin kei kiangah a hong gen hi: “Egypt gam le Migdol khua-ah va gen in. Memfis khua le Tahpanhes khua-ah va taangko in: ‘Kigingsa le kithawisa-in om un; bang hang hiam cih leh namsau tawh note hong kithat khin ding hi,’ va ci in. Bang hangin na bawngtal pasian uh Apis guallelin taimang ahi hiam? Topa in amah a vattuk hang ahi hi. Na mite uh tampi tak hoi-in tuk uh a, amaute in khatlekhat kiangah, ‘Kithawi dih un; i mipihte kiang, i suahna gamah va ciahkik ni; tua hileh hih namsau tawh sihna pan i suakta ding hi,’ a kici uh hi. “Egypt kumpipa Faro, min thak khat pia unla, ‘Kam si bekin hun mawk beisak pa,’ ci ta un. Vanglian Topa keimah Kumpipa ka hi hi. Taber mual, mual khempeuh sangin sangzaw-in, Karmel mual, tuipi tungah sangpi-in a dawktoh bangin, no hong sim pa’ thahatna a lian mahmah ding hi. Egypt gamah a tengte aw, note salin a hong kipaipih cianga ding na puanlomte uh zialkhol un. Bang hang hiam cih leh Memfis khua gamlak suak ding a, kisia gawpin, kuamah teng lo ding hi. Egypt gam, bawngla hoih mahmah tawh a kibang hi. Leilu lam panin a hong leeng cippi in amah a pet hi. A galkap cialte nangawn amaute’ lakah bawngno hat lote a bang lel uh hi. Pang loin, do tentan lo uh a, nungkikin a taikeek uh hi. Bang hang hiam cih leh amau’ kisiat ding ni, amau’ gimthuak ding ni, hong tungzo hi. A galte uh hong kuan uh ahih manin Egypt mite gul tai bangin zutkhat a kisuah uh hi. A galte uh sing phuk bangin hei tawh hong kuan uh hi. Gam pha lua-in a kiphut zawh loh hangin a galte un a singte uh a phukmaisak teitei ding uh hi, Topa in a ci hi. Bang hang hiam cih leh amaute kauphe sangin tamzaw uh a, simzawh loh zahin a tam uh hi. Egypt nungakte a maizum ding uh hi. Leilu lam panin a hong pai mite’ khut sungah amaute a kipia ding uh hi,” a hong ci hi. Vanglian Topa, Israel mite’ Pasian in, “En un: Keimah in Thebes khua-a Amon pasian le Faro kumpipa a kipan a pasian-te uh le a kumpite uh, Egypt kumpipa le amah a muang mi khempeuh tungah gimna ka tungsak ding hi. Amaute a that nuam Babylon kumpipa Nebukhadnezzar le a uliante’ khut sungah amaute ka pia ding hi. Ahi zongin Topa in kong cihin-ah, nidang lai bangin Egypt gamah mi a tengkik ding hi. Ahih hangin lau kei un, ka nasempa Jakob’ suante aw. Patau kei un, Israel mite aw. Bang hang hiam cih leh gamlapi panin note kong honkhia ding a, na suanlekhakte uh saltanna gam panin kong honkhia ding hi. Jakob’ suante hong ciahkik ding uh a, nuamtakin a om ding uh hi. Kuamah in amaute a lausak nawn kei ding hi. Topa in kong cihin-ah, ka nasem Jakob’ suante aw, lau kei un. Bang hang hiam cih leh note kong ompih hi. Note ka hong thehthangna gamte khempeuh ka susia khin ding a, ahih hangin note kong susia khin kei ding hi. A kilawm zahin kong thuhilh ding a, gim pia loin kong mawk koih kei ding hi,” a hong ci hi. Faro kumpipa in Gaza khua a sim ma-in Filistia mite tawh kisai-in Topa in kei tungah thu hong gen hi. Topa in a hong genin-ah, “En un, leilu lam panin tui hong khang ding a, hong letkhia-in hong luang ding hi. Gam sung le gam sunga om khempeuh hong tum ding a, khuapi le a sunga teng khempeuh hong tum ding hi. Mite kiko ding uh a, gam sunga om mi khempeuh a kap ding uh hi. Sakol khegingte za-in, sakol leeng gingte le a pei kigawite a zak uh ciangin, a khut uh zaw luata ahih manin pate in a tate uh a donzo nawn kei ding uh hi. Filistia mi khempeuh kisia-in, Taia le Sidon panin huhnate khaktanin, suksiat ding ni hong tungta hi. Bang hang hiam cih leh Topa keimah in Filistia mite le Kaftor tuipi gei-ah a omlaite ka susia ding hi. Gaza khuate maizum ta uh a, Ashkelon khua kisia ta hi. Aw, no Anak mi a omlaite aw, bang tanvei noleno kisuliam ding na hi uh hiam? Note in, ‘ Topa’ namsau aw, tawlnga nai lo ding na hi hiam? Na paai sungah lutkik inla, taang loin khawl dide in,’ na ci uh hi. Topa in ka sawl nakleh bang ci-in khawl dide thei ding ahi hiam? Ashkelon khua le tuipi gei teng a sim dingin ka sawlsa ahi hi,” a hong ci hi. Moab gam tawh kisai-in Vanglian Topa, Israel mite’ Pasian in a genin-ah: “Nebo mite in gimna a thuak ding uh hi. Bang hang hiam cih leh a gam uh a kisia ding hi. Kiriathaim khua kila khinzo a, a kulhpite uh cim khinta hi. A mite in maizumna thuak uh a, Moab gam a minthanna beita hi. Heshbon khua-ah a galte un a simna ding uh vaihawm uh a, ‘Hong pai un, Moab gam i beimangsak ding hi,’ a ci uh hi. Madmen khua aw, nang zong na gamdai ta ding hi. Namsau in nang hong nungdelh ding hi. Ngai dih un! Horonaim khua-ah mi kiko a, ‘Ngongtatna le siatna lianpi,’ a ci uh hi. “Moab gam kisusia khinta a, a kahna aw uh Zoar khua dongin a kiza hi. Luhith mual kahtohna lampi-ah a paikawmun a kap uh hi. Horonaim khua-ah a tuahsuk laitakun khuapi siatna hangin a kikona aw uh a za uh hi. ‘Tai un! Na suahtak nadingun tai un! Sehnel gam a gamlak late bangin taimang un!’ a ci uh hi. “Na hatnate uh le na neihsate uh na suan manun note zong hong kipai khiatpih ding hi. Na pasian uh Khemosh zong a siampi teng le a ulian teng tawh, kipai khiatpih ding hi. Khua khempeuh kisia khin ding a, khat beek a suakta kei ding hi. Topa in ka gensa bangin mualkuam le zangleite a kisia ding uh hi. Moab mite a leenkhiat theih nadingun a kha ding uh pia un. A khuapite uh gamlak suak ding a, kuamah a teng kei ding hi. “ Topa’ na citakin a sem lopa in kamsiatna thuak tahen. Thah nadingin a namsau a dok lopa in hamsiatna thuak tahen. Moab gam a neu lai a kipanin nuamtakin a om den ahi hi. Gamdangah kipaikhiatpih ngei lo a, thawl khat pan thawl khatah a kitei kawikawi leenggahzu tawh kibang lo hi. A limna kilamdang ngei lo a, a gimnam zong kikheel ngei lo hi. “Tua ahih manin en un, Topa in kong cihin-ah, Moab mite leenggahzu buak bangin a buakhia ding mi kong paisak hun hong tung ding hi. Amaute in a thawl a hawm dong bungkhia-in, tua khit ciangin a thawl sukhamzan ding uh hi. Tua ciangin Israel mite, a muan uh Bethel pasian in a maizumsak mah bangin Moab mite, a biak uh Khemosh pasian in a maizumsak ding hi. Note in bang hangin, ‘Galhangte ka hi uh a, galsim hatte ka hi uh hi,’ ci thei na hi uh hiam? Moab gam le a khuapite a susia ding pa hong paito ta hi. A tangval hoihpente uh thahlup dingin kipaipih khinzo hi, ci-in Vanglian Topa a kici keimah Kumpipa in kong gen hi. Moab gam a kisiat ding sawt nawn lo a, a gimna ding hong naita hi. “A kiima tengte le a min a thei mite aw, Moab gam kah un. ‘A minthanna bei khinta a, a vangliatna kumpi ciangkhut kitan ta hi,’ ci un. Dibon khua-a teng mite aw, na minthanna uh mun sang panin hong kumsuk unla, leivui lakah hong tu un! Bang hang hiam cih leh Moab hong sim dingte hong paita a, na kulhte uh hong suksiatsak zo uh hi. Aroer khua-a teng mite aw, lam gei-ah dingin na en un! A hong galtai numei le pasalte kiangah, ‘Bang thu piang ahi hiam?’ ci-in dong un. Moab gam kisia khinzo a, zumhuaina thuak khinzo hi. Thum unla kah un! Arnon gun dungah, Moab gam kisiatna thu va gen un. “Pasian’ thukhenna, mualtung gamteng le Holon khua, Jahzah khua, Mefaath khua, Dibon khua, Nebo khua, Bethdiblathaim khua, Kiriathaim khua, Bethgamul khua, Bethmeon khua, Kerioth khua, le Bozrah khua a kipan Moab gam sung a gamla, a nai-a om khuapi khempeuhah hong tungzo hi. Topa in kong cihin-ah, Moab gam’ hatna teng bei khinta hi. A hatna le a vangliatna teng kisuksiatsak hi. “Moab, zu khamsak un; bang hang hiam cih leh amah in Topa langpangin kiliansak hi. Tua ahih manin ama luak mahah amah bual ding a, mi khempeuh in awi-in a nuihsan ding uh hi. Moab aw, nang zong Israel mite nuihsan hi lo na hi hiam? Ama thu na gen simin lungdamin na lu na sinsin’, amah guta sa na hi hiam? Moab gam a teng mite aw, khuapite nusia unla, kawl lakah teng un! Keen pangah vakhu bu bawl bangin va om un. Moab’ kiphatsakna ka za khinzo a, kiphasak pha mahmah hi. Kiliansakin kisathei a, kuamah thusim loin mite a neu-et hi. Ama hehna ka thei a, a kisialhna teng zuaupi hi-in, a sepna teng zong zuaupi mah ahi hi, Topa in kong ci hi. Tua ahih manin Moab a dingin ka tau hi. Moab gammi khempeuh a dingin ka kap a, Kirheres khua a dingin zong ka thum hi. Sibmah khua aw, Jazer khua a’ ding sangin nang a dingin ka nak kahzaw hi. Nang pen leenggah gui zaam bangin na hiangte in tuipi kantan a, Jazer khua dongah na zaam suak hi. Na khuakhal ante le na leenggahte hong kisuksiatsak ta hi. Leihoih mahmah Moab gamah lungdamna le kipahna a beita hi. Leenggah cilna panin leenggahzu ka luangkhiasak nawn kei a, leenggah cilin lungdamin kuamah a kiko nawn kei a, a kikona uh lungdam kikona hi lo hi. “Heshbon khua panin Elealeh khua le Jahaz dongah, Zoar khua panin Horonaim khua le Eglathshelishiah khua dongah mite’ kahna aw kiza hi. Bang hang hiam cih leh Nimrim tui nangawn keu ta a, kisusia ta hi. Moab gam mualsang tungah biakna pia a, milim pasian-te tungah paknamtui a hal mite, Topa in kong cihin-ah, tua bang ka hihsak nawn kei ding hi. Tua ahih manin Moab a dingin ka kap a, Kirheres khua mite a dingin misi vuina tamngai kitum bangin ka kapkhia hi. Bang hang hiam cih leh a neih a lam khempeuh uh kisiamang khinta hi. “Mi khempeuh in a lu uh mettol uh a, a khamul uh kiatsiang uh hi. A khutte uh kuikek uh a, a kawng uhah puanhampi a teng uh hi. Moab gam innkhum khempeuh le lam lianpi khempeuhah kahna bekbek a om hi. Bang hang hiam cih leh Topa in kong cihin-ah, leibeel suktap bangin Moab gam ka sutam a, kuamah in phamawh a sa kei hi. Moab gam kitam ta! A mite kap! Maizumin hong nungngat ta! Tua ahih manin amah pen mite’ nuihsat ding le lipkhap ding a suakzo hi. Topa in kong cihin-ah: En in, muvanlai leeng bangin manlang takin gam khat hong leeng ding a, Moab gam a sim dingin a kha hong zal ding hi. A khuapite kila-in a kulhpite zong kila ding hi. Tua ni ciangin Moab galkapte nupi nausuak ding bangin a lau ding uh hi. Moab kisusia ding a, a minamin a om nawn kei ding hi. Bang hang hiam cih leh Topa demin a kiliansak uh hi. Moab gam a teng mite aw, Topa in kong cihin-ah, launa, dum le thangte in note hong pang! Lauhuaina pan a taisim mite dum sungah a kia ding hi. Dum sung panin a hong kahkhiato mite, thangah a awk veve ding hi. Bang hang hiam cih leh Moab gim ka piak ni-in hih thute ka tungsak ding hi, Topa in kong ci hi. A bahgawp galtaite in Heshbon khua hong beel uh hi. Ahih hangin Sihon kumpipa a maanna ngei Heshbon khua panin meikuang hong kipankhia veve hi. Gal a simnuam mite’ tenna Moab gam, a gammong dongin mualsangte zong a kangtum hi. Moab aw, gimna na thuak ding hi. Khemosh pasian a bia mite si khinta uh hi. Na tapate uh sal dingin kipaipih khin a, na tanute uh zong thongkia dingin kipaipih hi. “Ahih hangin Topa in kong cihin-ah, nidang ciangin Moab gam a ngei bangsakin ka hausakkik ding hi,” a ci hi. Moab tungah thukhenna tu-a zah ahi hi. Ammon mite tawh kisai-in Topa in a genin-ah: “Israel mite in tapa nei lo ahi uh hiam? Innluah ding nei lo ahi uh hiam? Bang hangin Milkom pasian biate in Gad gam la-in a khuapite sungah teng ahi uh hiam? Tua ahih manin, Topa in kong cihin-ah, Ammon gam Rabbah khua kisimin, galdona aw a kizak hun ka tungsak ding hi. Tua khuapi kisusiamang ding a, a khuaneute a kihaltum ding hi. Tua ciangin Topa in kong cihin-ah, Israel mite in a gam uh a laksakte’ kiang panin a gam uh a ngahkik ding uh hi. Heshbon khuamite aw, kap un! Ai khua kisia khinta! Rabbah khua numeite aw, kap un! Puanhampi silh unla kap un. Khua lakah lung-amin kawi taitai un. Bang hang hiam cih leh na Milkom pasian uh le a siampite le a uliante hong kilak khiatsak ding hi. A citak lo mite aw, bang hangin na hatna uh kisaktheihpih na hi uh hiam? ‘Kua in eite hong simzo ding ahi hiam?’ ci-in bang hangin na hauhna uh suang na hi uh hiam? Vanglian Topa Pasian in kong genin-ah, na kiim na pamte uh kiang panin note tungah gimna kong tungsak ding hi. Note hong kihawlkhia ding a, mi khempeuh amau tum ciatin taikeek ding uh a, a hong kaikhawm kik ding kuamah om lo ding hi. “Ahih hangin Topa in kong cihin-ah, nidang ciangin Ammon mite a ngei bangsakin ka hausakkik ding hi,” a ci hi. Edom gam tawh kisai-in Vanglian Topa in a genin-ah: “Teman gamah a pil om nawn lo ahi hiam? Thu ngaihsut siamte in ngaihsun thei nawn loin a pilna uh beita ahi hiam? Dedan gamah a tengte aw, kihei unla galtai un; guam sungah bu un. Bang hang hiam cih leh gim ka piak ni ciangin Esau’ suanlekhakte tungah siatna ka tungsak ding hi. Mite in leenggah a lawh uh ciangin a gui tungah tawm a nusia lai uh hi. Zanin gutate in na a guk uh ciangin a deih teng bek uh a gu uh hi. Ahih hangin Esau’ suanlekhakte khempeuh ka guaksuaksak a, a bukna munte uh ka kilangkhia sak hi. Tua ahih manin a bu thei nawn kei uh hi. A tate uh, a sanggamte uh, le a vengte uh si khin uh a, khat beek a suakta kei hi. A tagah na tate uh ka kiangah hong koih un; ke’n amaute ka kem ding hi. Na meigong numeite uh zong kei hong muangsak un. “Bang hang hiam cih leh Topa in kong cihin-ah: Gim a thuak dingin a kilawm lo mite nangawn in thuak veve uh ahihleh note in zong thuak loin om ding na hi uh hiam? Note in gim thuak loin na om kei ding uh a, na thuak veve ding uh hi. Bang hang hiam cih leh Topa in kong cihin-ah, Bozrah khua pen mite’ lipkhap ding, zahpih ding, nusiat ding le kihamsiatna-in a zat ding uh a suak ding hi,” a ci hi. Topa kiang pan thu ka za a, gam khempeuhah thugen dingin mi khat kisawl hi: “Hong kikaikhawm unla, Edom gam a sim dingin hong kithawi un. Bang hang hiam cih leh keimah in gamdangte sangin nang hong neusak zaw-in mite kong simmawhsak ding hi. Na kisaktheihna in nang hong khem a, na ngaihsut bangin mite in nang hong kihta lo hi. Suangkeen dawnah na teng a, mualsang tungah na teng hi. Muvanlai bu zahin sangpi-in na ten hangin tua lai mun panin kong lakhiasuk veve ding hi, Topa in kong ci hi. “Edom gam pen a mulkimhuai gam suak ding a, a kantan mi khempeuh in a siatgawpna hangin lamdangsa-in a mulkim ding uh hi. Topa in kong cihin-ah, Sodom khua, Gomorrah khua, le a kiima khuate a kisiatgawp bangin, tua lai munah kuamah teng lo ding a, kuamah a peem kei ding hi. En un, lonona-ah nuamtakin a om tuute, Jordan gam tulak panin a hong paito humpinelkai in a delhmang bangin, a gam uh nusia-in thakhat thu-in ka taimangsak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Keima to ahi ding kua omlai ahi hiam? Ka mai-ah kua kumpi hong ding ngam ding ahi hiam? Tua ahih manin Edom mite’ thuak ding le Teman gam a teng mite’ gim nadingin Topa’ geelna le ngimnate ngai dih un. A ta ngeekte nangawn uh kikaikhia ding hi. Mi khempeuh lau taktak ding uh hi. A pukna uh gin’ ngaih lua ahih manin leitung a kiling ding hi. A kahna uh San Tuipi dongah kiza ding hi. En un, muvanlai bangin manlang takin galte hong leengin Bozrah khua a sim dingin tua khua tungah a kha hong zal ding uh hi. Tua ni ciangin Edom galkapte pen nupi nausuak dingte bangin a lau ding uh hi,” a ci hi. Damaskas khua tawh kisai-in Vanglian Topa in a genin-ah: “Hamath khua le Arpad khuate in thusia za uh ahih manin lungmangin a om uh hi. Tuipi dai thei lo bangin a launa uh dai thei lo hi. Damaskas khuamite thazaw mahmah uh a, a taimang dingin a kithawi uh hi. Lungkhamna, dahna, le launa in amaute lencip a, nupi nausuak ding bangin a om uh hi. Tua khuapi minthang, lungdamna khuapi, tu-in kinusia ta! Tua ahih manin Vanglian Topa in kong cihin-ah, tua ni ciangin khuapi laizangah tangvalte si ding uh a, galkap khempeuh zong a kithat khin ding uh hi. Damaskas khua kulhpi mei tawh kihal ding a, Benhadad kumpipa’ inn zong a kangtum ding hi,” a ci hi. Babylon kumpipa Nebukhadnezzar in a zawh Kedar minamte le Hazor khua ukte tawh kisai-in Topa in a cihin-ah: “Kisa un, Kedar mite va sim un! Nisuahna lamah a om amaute va thatlum un! A puanbukte uh le a tuuhonte uh a kipan a buk kongkhak puante uh le a nate khempeuh uh kilaksak ding hi. A kalaohte uh kipaikhiatpih ding a, ‘Mun khempeuhah launa!’ ci-in a kiko ding uh hi. “Hazor khua-ah a teng mi khempeuhte aw, Topa in kong cihin-ah, gamlapi-ah taimang unla, guam thuk sungah bu un. Bang hang hiam cih leh Babylon kumpipa Nebukhadnezzar in note a hong langpang dingin geelna le ngimna a nei khinzo hi. Babylon kumpipa aw, tho in. Nuamtak, ngaihmuang takin a om gam va sim in. Tua khuapite in kongpi lah nei lo a, a kalhna sik tawn zong bangmah nei lo uh a, a tuaci ommawk uh ahi hi. “A kalaohte uh kisuh khiatsak ding a, a bawnghonte uh kilaksakmang ding hi. A sam uh a mettom amaute mun khempeuhah ka kithehthangsak ding hi. Mun khempeuh panin amaute tungah siatna ka tungsak ding hi, Topa in kong ci hi. Hazor khua pen se-alte’ tenna suak ding a, a tawntungin a kisia den khua a suak ding hi. Kuamah teng lo ding a, tawmvei beek zong a va zin kei ding uh hi,” a ci hi. Judah gamah Zedekiah kumpi a suah tungin Elam gam tawh kisai-in Topa in kei tungah thu hong gen hi. Vanglian Topa in a cihin-ah: “En in, Elam gam’ hatna bulpi ahi a thalpite ka kuaitan ding hi. Vantung mun li panin huihpi ka mutmangsak ding a, Elam gam panin ka hawlkhiatte mun khempeuhah kithehthang sakin a tun lohna uh gam khat beek ka omsak kei ding hi. Amaute a that nuam, a galte uh mai-ah Elam mite ka lausak ding hi. Amaute ka thahsiang mateng namsau ka nungdelhsak ding hi. Topa in ka cihin-ah, Elam gamah a kumpipa uh le kumpi uliante thatin ka kumpi tokhom ka phut ding hi. “Ahih hangin nidang ciangin Elam gam nidanga a ngei bangin omsakin ka hausakkik ding hi, Topa in ka ci hi,” a hong ci hi. Khaldea mite’ gam sungah a om Babylon khuapi tawh kisai-in Topa in hih bangin kei tungah a hong gen hi: “Gam khempeuhah genin taangko unla, dial khai unla im kei un. ‘Babylon khuapi kia ta hi. Bel pasian maizum ta a, Merodak pasian kitan gawpta hi. A milimte uh maizum ta a, a pasian-te uh kisiagawp ta hi,’ ci-in taangko un. “Bang hang hiam cih leh leilu lam panin Babylon gam a sim ding le gamlak a suaksak dingin gam khat hong pai ding hi. Gam sungah kuamah teng lo ding a, a mihing a ganhingin a taimang ding uh hi. “ Topa in kong cihin-ah, tua ni tua hun ciangin Israel mite le Judah mite kap kawmin hong paikhawm ding uh a, Topa a Pasian uh hong zong ding uh hi. Zion khua lampi a dong ding uh a, tua khua lam maingatin, ‘Hong pai un. A kimangngilh ngei nawn lo ding tawntung thuciamna khat Topa’ tungah ciamkhawm dih ni,’ a ci ding uh hi. “Ka mite tuu mangthang bang ahi khin uh hi. Makai tuucingte in mualtung tengah lamkhialin a gammanpih uh hi. Mual khat panin mual khatah a pai kawikawi uh a, a giahna inn uh a thei nawn kei uh hi. Amau a mute in na ne gawp uh hi. A galte un, ‘Ko bangmah khialhna ka nei kei uh hi. Bang hang hiam cih leh a pute a pate un a muan leh a lametna uh Topa’ tungah amaute a khial uh hi,’ a ci uh hi. “Israel mite aw, Babylon khuapi pan taikhia un. Khaldea gam panin paikhia un. Keelhon lak a keeltal bangin a paikhia masa ding kituh un. Bang hang hiam cih leh en un, keimah in leilu lam panin gam pawlkhat ka hanthawn ding a, Babylon ka simsak ding hi. Amaute in Babylon khua kimkotah gal pangin tua khua a la ding uh hi. Galkap siamte’ lot bangin a thaltangte un khak loh a nei kei uh hi. Khaldea gam kiluhgawp ding a, Topa in kong cihin-ah, a luh khempeuh in a lungkim dong uh a la ding uh hi. “Babylon mite aw, note in keima gamh Israel mite na luhgawp uh hi. Lungdamin kipakin, lopa kham bawngno bangin omin sakol bangin na ham uh hangin, na nu uh Babylon khuapi maizum ding a, note’ pianna na nu uh a mindai ding hi. En un, na gam uh gam khempeuh lakah a ginalo pen hi ding a, lei keu, gamlak, sehnel gam a suak ding hi. Topa’ hehna hangin kuamah teng lo ding a, gamlakpi a suak ding hi. Babylon khua a kantan mi khempeuh in lamdangsa-in khuapi siatna hangin zahko-in a phitsan ding uh hi. “No thal tawite khempeuh aw, Babylon khua a sim dingin a kimkotah gal pang un. Thaltang khat beek siit loin kap un. Bang hang hiam cih leh Topa’ tungah a khialzo uh hi. Khuapi a sim dingin a kimkotah awng un. Babylon khuapi in note hong lel khinzo hi. A galdalte uh cim khin a, a kulhte uh puk khinta hi. Hih pen Topa’ phulakna ahih manin, amau’ tungah phu la un. Midangte tungah a bawl bangin amau’ tungah zong bawl un. Babylon khua-ah khaici tuhte thatlum unla, anla dingin phiaukawi a tawite beisak un. Galte’ namsau kihta-in mi khempeuh in a mipihte’ lak mah uh zuankik ciatin a gam mah uhah a taikik ding uh hi. “Israel mite, humpinelkai in a delhmang tuu tawh a kibang uh hi. A masa-in Assiria kumpipa in ne a, tu-in a tawpna-ah Babylon kumpipa Nebukhadnezzar in a guh dongin a teeptum hi. Tua ahih manin Vanglian Topa, Israel mite’ Pasian in kong cihin-ah: En un, Assiria kumpipa gim ka piak bangmahin Babylon kumpipa le a gam ka thuaksak ding hi. Israel mite a omnasa mun mahah ka omsakkik ding a, Karmel le Bashan mual, Efraim mual le Gilead mualah a piang ante lungkim takin a ne ding uh hi. Tua ni hun ciangin, Topa in kong cihin-ah, Israel gamah khialhna kizong ding a, a kimu kei ding hi. Judah gamah mawhna kizong ding a, a kimu tuan kei ding hi. Bang hang hiam cih leh ka nuntaksak, ka nusiatlai mite a mawhna uh ka maisak ding hi. “Merathaim gam a sim dingin pai unla, Pekod mite zong va sim un. That unla a vekpi-in sumang un, Topa in kong ci hi. Kong sawl khempeuh hih un. Gam sungah galsimna aw kiza a, na tampi kisia hi. Leitung khempeuh sekpi bangin a satkham Babylon khuapi, tu-in tua sekpi kitanin kitamta hi. Gamdangte’ lakah tu-in Babylon khuapi a mulkimhuai a suak ta hi. Babylon khua aw, nang thang kong siah a, thei lo na hih manin na awk pah hi. Topa langpang na hih manin nang hong kimu-in hong kiman hi. Topa in a galhiam koihna hongkhiazo a, a hehna galhiamte a lakhia hi. Bang hang hiam cih leh Babylon gamah Vanglian Topa Pasian in sep ding khat a nei hi. Mun khempeuh panin hong sim unla, a ansal uh honsak un. An cian’ bangin amaute ciang un. A vekpi-in susia unla, bangmah nusiat kei un. A galkap hangte khempeuh uh thahsak un. Amaute in gimna thuak ding uh a, a thuak ni ding uh hong tungzo ta!” (Ngai dih un. Topa i Pasian’ thuhkikna, ama biakinnpi hangin a phulakna thu Zion khua-ah a taangko dingin Babylon gam panin ka mite suakta-in a tai uh hi.) “Babylon khua a sim dingin thalkap siam, thaltawi theite va sam un. Khuapi umcih unla, kuamah suaktasak kei un. Ama hihna tawh kituakin ama tungah hih un. Ama hih ngei bangmahin ama tungah bawl un. Bang hang hiam cih leh amah kisathei-in Topa ahi, Israel mite’ Siangtho Pa a simmawh hi. Tua ahih manin khuasung laizangah a tangvalte uh si ding uh hi. Tua ni ciangin a galkapte uh a beimang khin ding uh hi, Topa in kong ci hi. En in, a Vanglian Topa Pasian in kong cihin-ah: Nang a kisathei Babylon aw, nang kong langpan’ hi. Bang hang hiam cih leh nang gim kong piak hun ding na ni hong tungzo ta hi. A kisathei gam hoi-in tuk ding a, kuamah in a phongto kei ding hi. A khuapite mei tawh ka hal ding a, a kiima om khempeuh a kangtum ding hi. “Vanglian Topa in kong genin-ah: Israel mite le Judah mite in netniamna thuak uh a, sal dingin a paipih mite in lencipin a ciahsakkik nawn kei uh hi. Ahih hangin amaute a honkhia pa hat mahmah a, Vanglian Topa kici hi. Amah in leitungah kilemna a omna ding le Babylon mite in gimna a ngah nadingin, amaute a dingin a sem ding hi. “ Topa in kong cihin-ah, Khaldea gammite, Babylon khua-ah a tengte, a kumpi uliante le a mipilte namsau tawh kithat ta hen! Kamsang zuau mihaite namsau tawh kithat ta hen! A meidawi a galkapte namsau tawh kithat ta hen! Sakolte le sakol leengte, numei tawh a kibang lel a galkap cialte uh, namsau tawh kithat ta hen! A sum a pai khempeuh uh, kituahmang ta hen! Guah zu kei hen la, a gunte uh kang ta hen! Bang hang hiam cih leh milim biakna gam hi a, milimte a hailawh uh hi. “Tua ahih manin gamsate le se-alte Babylon khua-ah teng ding uh a, vasa-kalaohte zong a teng ding uh hi. A khang a khangin, a tawntungin mi kuamah a teng ngei nawn kei ding hi. Topa in kong cihin-ah, Sodom khua, Gomorrah khua, le a kiima khuate, Pasian in a suksiat bangin tua lai-ah kuamah a teng kei ding a, kuamah zong a va baang pak beek kei ding hi. “En un, leilu lam gam panin mi hong pai uh a, gam lian khat le kumpi tampi leimong gamla pek panin galsim dingin kithawithawi uh hi. A thal uh le a teipi uh tawi uh a, gilo mahmahin hehpihna lungsim nei lo uh hi. A husa uh tuipi ging bang a, sakol tungah tuang uh hi. Babylon mite aw, note a hong simgawp dingin hong kithawi uh hi. Babylon kumpipa in tua thu za khinzo a, bangmah a cih thei kei hi. Lungkhamin lumcip a, nupi nausuak ding bangin na a sa hi. “En un, lonona-ah nuamtakin a om tuute, Jordan gam tulak panin a hong paito humpinelkai in a delhmang bangin a gam uh nusia-in thakhat thu-in amaute ka taimangsak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Ka to ding kua omlai ahi hiam? Ka mai-ah kua kumpi hong ding ngam ding ahi hiam? Tua ahih manin Babylon khuapi’ thuak ding le Khaldea gam’ gim nadingin Topa’ geelna le ngimnate ngai dih un. A ta ngeekte nangawn uh kikaikhia takpi ding a, mi khempeuh a lau taktak ding uh hi. A pukna uh gin’ ngaihlua ahih manin leitung a kiling ding hi. A kahna aw uh gam khempeuhah a kiza ding hi,” a hong ci hi. Topa in a cihin-ah: “En un, Babylon khuapi le Khaldea mite a susia dingin keimah in huih ka nungsak ding hi. A zapsiang ding mi Babylon-ah ka sawl ding a, amaute in tua gam a zapsiang ding uh hi. Gimna ni hong tun ciangin amah a sim dingin mun khempeuh panin hong pai ding uh a, gam sungah bangmah a omsak nawn kei ding uh hi. Thaltawite a thal uh lawnsak man kei unla, sik puan silhte dingsak man kei un. A tangvalte uh maap kei unla, a galkap honpi khempeuh uh nuaimang khin un. Khaldea gam kongzing lakah liamgawp ding uh a, a si ding uh hi. Bang hang hiam cih leh Israel le Judah mite Israel mite’ Siangtho Pa tungah a khialh uh hangin, amaute’ Pasian, Vanglian Topa in amaute taisan nai lo hi. Babylon khuapi sung panin taikhia un. Mi khempeuh kisuahtak ciat un. Babylon’ mawhna sihpih kei un. Bang hang hiam cih leh a mawhna bangun a thuak nadingun Topa’ thuhkik hun ahi hi. Babylon khuapi, Topa’ khut sungah a om kham hai tawh kibang a, leitung buppi zu a khamsak hi. Gamdangte in a zu a dawn manun a hai khin uh hi. Thakhat thu-in Babylon puk a, kisiagawp hi. Ama a dingin kap un. A liammate a dingin zatui la un, damzo khathei lai ding hi. Ahi zongin midangte in, ‘Babylon khua i damsak nop hangin a damzo ding hi nawn lo hi. Nusia ta unla, i gam ciat zuanin ciah ni. Ama tunga thukhenna in vantung dong ban khinta a, van dawn dong a paito hi,’ a ci uh hi. “Keima mite in, ‘ Topa in thuman ihihna hong kilang khiasakzo hi. Hong pai un, Topa Pasian’ nasepna Zion khua-ah va taangko ni,’ a ci uh hi. Thaltangte hiam un. Lumte la un. “ Topa in Babylon khua susia nuam ahih manin Media kumpite a hanthawn hi. Bang hang hiam cih leh hih pen a biakinnpi hangin Topa’ thukkikna ahi hi. Babylon khuakulhpi tungah dial khai unla, galvil ding tampi koih un. Cingsak unla, galte a buksim dingin kithawi un. Bang hang hiam cih leh Babylon khua mite tawh kisai-in Topa in a gensa teng a geel khinzo a, a sem khinzo hi. Aw, tui tamna gei-ah a teng mite, sum a hau note aw, na hun uh beita a, na nuntakna khau uh kitat ta hi. Vanglian Topa in, ‘Kauphe zahin a tam mite kong simsak ding a, amaute in note hong zo-in a kiko ding uh hi,’ ci-in keima min tawh ka kiciam khinzo hi. “Pasian in ama vangliatna tawh leitung bawl a, ama pilna tawh leitung piangsakin, ama siamna tawh vantung a zal hi. Amah a pau ciangin vantungah tuite ging huhu a, leimong panin tuikhu a suaksak hi. Guah zuk nadingin khua phiasak a, a saal sung panin huih a nungsak hi. Mi khempeuh hai-in pilna nei lo hi khin uh a, kham seekte khempeuh in a milim uh a maizumlawh uh hi. Bang hang hiam cih leh a milim uh zuau hi lel a, nak thei lo hi. Kimanna a nei lo, a haihuaipi hi a, gim a kipiak ni ciangin a kisia ding uh hi. Jakob’ Pasian tua bang hi lo a, na khempeuh a piangsak pa ahi hi. Ama a dingin Israel mite teel a, ama min pen Vanglian Topa ahi hi. “Babylon aw, nang pen ka sekpi le ka galhiam na hi a, nang hong zangin gamdangte ka satnen a, kumpi gamte ka susia hi. Nang hong zangin sakolte le a tunga a tuangte, sakol leengte le a hawlte, papite le nupite, khanghamte le khangnote, tangvalte le nungakte, tuucingte le a tuute, lokhote le a tute, kumpite le ukpite ka satnen hi. “ Topa in kong cihin-ah, Babylon khua le Khaldea gamah a tengte khempeuh in Zion khua-ah siatna a bawl manun note’ muhna-ah ka thuk ding hi. “En in, mualpi bangin lian a, leitung khempeuh a susiazo Babylon aw, nang kong langpan’ hi, Topa in kong ci hi. Keimah in nang’ langkhatah ka khut ka zan ding a, mual dawn panin nang hong khukkhia-in, kong kangtumsak ding hi. Na suangte innkiu suangin a kiciang kei ding a, innbul suang nuaiphahin a kizang kei ding hi. A tawntungin gam simtham na suak ding hi, Topa in kong ci hi. “Gal a sim dingin leitung bup thu pia unla, gamdangte kiangah peengkul mut un. Amah a sim dingin kithawisak un; Ararat, Minni, le Ashkenaz gamte simsak un. Makai khat teel unla, kauphe honpi zahin a tam sakolte va la un. Amah a sim dingin gamdangte kithawisak un. Media kumpipa, a makaite, le a ukna gam khempeuh kithawisak un. Babylon gam in na sa-in, kitomin a ling hi; bang hang hiam cih leh ama tungah Topa’ ngimna tangtung a, Babylon gam gamsimtham suaksak a, kuamah a tengsak kei hi. Babylon galkapte in do nawn lo uh a, a phualpi uhah a khawl uh hi. A tha uh om nawn lo a, numei tawh a kibang uh hi. A innte uh kihalsak a, a khuakongpi a kikalhna siktawnte a kitan hi. Babylon kumpipa kiangah thu a ko dingin a hong pai kamtaite a ciah leh a kuan kiphamat uh a, ‘Mun khempeuh panin galte in Babylon khua hong simin, gun-a ngahmun teng la khinmang uh a, galpanna teng mei tawh kihalin, galkapte lau mahmah uh hi,’ a ci uh hi. Vanglian Topa, Israel-te’ Pasian in ka hong genin-ah, Babylon mite tawlkhat khit ciangin anlak bangin kila ding a, sual tunga ancil bangin a kicilgawp ding hi. “Babylon kumpipa Nebukhadnezzar in Jerusalem khua hong valhtumin, hong sukham gawp hi. Beel hawm bangin a hawmin hong koih a, gulpi’ valh bangin hong nawmvalh hi. Ka neihsa a limnono tawh amah kivak kham a, kei a hong hawlkhia hi. Kei’ tung le ka mipihte tungah hong kibawl ngongtatna Babylon mite tungah tung ta hen, ci-in Zion khua-ah a tengte in gen ta uh hen. Khaldea mite in ka thuakna teng thei ta hen, ci-in Jerusalem khua in gen tahen. “Tua ahih manin Topa in kong cihin-ah: En un, na thu uh ka hong sepsak ding a, note a dingin ka hong thuksak ding hi. A bual ka keusak ding a, a ciktui ka kangsak ding hi. Tua ciangin Babylon khuapi innsia losia suakgawp ding a, se-alte’ tenna mun suakin, a lipkhaphuai, simmawhna tawh a kiphitsan, kuamah a ten lohna gamkhing a suak ding hi. Babylon mite humpinelkai bangin a hawk khawm ding uh a, humpinelkai no bangin a ciak lualua ding uh hi. A duh mahmah laitakun amaute ka vak ding a, khua a phawk nawn loh dong uh zu ka khamsak ding hi. A tawntungin ihmu paisuak ding uh a, a khanglo nawn kei ding uh hi, Topa in kong ci hi. Gawh dingin a kipaipih tuuno bangin ahi a, tuutal le keeltal bangin ahi zongin amaute ka paipihsuk ding hi. “Leitung bup in a pahtawi Babylon khuapi kila ta hi. Gamdangte’ lakah Babylon khua, a mulkimhuai a suak ta hi. Babylon gamah tuipi hong kahto a, tuihual lauhuaite in a tum ta hi. A khuapite a mulkimhuai suak a, lei keuna sehnel gam a suak khinta hi. Gam sungah kuamah teng lo a, kuamah in kantan ngei lo hi. Babylon khuate’ pasian Bel zong gim ka pia ding a, a na guksa teng ka lakkhiatsakkik ding hi. Gamdangte in amah bia nuam nawn lo ding uh hi. Babylon khuakulhpi kicim khinta hi. Ka mite aw, amaute lak pan hong paikhia un. A lauhuai Topa’ hehna panin mi khempeuh kisuahtak ciat un. Gam sungah kamdawn a kigen sawnte hangin lungkia kei un; lau kei un. Kum khatin thu khat kigen a, a kum kik ciangin thudang khat kigen lel hi. Gam sungah ngongtatna thu om a, kumpi khat le kumpi khat kidona thu kigen thei hi. Tua ahih manin en un, Babylon khua-a milimte gim ka piak hun hong tung ding hi. A gam buppi ka zumhuaisak ding a, khua sungah kithatin a tuk ding uh hi. Tua ciangin vantung, leitung, le a sunga om nate khempeuh in Babylon’ hangin lungdamin la a sa ding uh hi. Bang hang hiam cih leh leilu lam panin amaute a susia ding mi hong pai ding uh hi, Topa in kong ci hi. Babylon khua in leitung khempeuhah mite a sihsak mah bangin tu-in amah in sihna a thuak ding hi. “Namsau in a hong thah khak loh a nungtalai note aw, pai un; dingding kei un. Gamlapi pek panin Topa hong phawk unla, Jerusalem khua zong mangngilh kei un. Note in, ‘Kote in maizumna ka thuak uh a, simmawhna kam ka za khin uh hi. Minsiatna in ka maitang uh hong tuam khin hi. Bang hang hiam cih leh Topa’ biakinn siangtho gamdang mite in a hong laksak uh hi,’ na ci uh hi. Tua ahih manin en un, Topa in kong cihin-ah, Babylon khua-ah a om a milimte uh tungah thu ka khen ni hun hong tung ding a, gam sung khempeuhah a liamte a tau ding uh hi. Babylon khua vantungah kahto thei a, a sangpi-ah kiptakin galdalna a bawl thei ahi zongin, Topa in kong cihin-ah, kei’ kiang panin amah a suankhia ding mi a hong pai teitei ding hi. “Ngai un! Babylon khua-ah mi kiko hi. Khaldea gam sung mite a kisuksiatna kahna awging ahi hi. Bang hang hiam cih leh Topa in Babylon khua maimangsak a, a gamlumna zong a daisak hi. Galte, tuihual lum henhan bangin hong lut uh a, awng gawpin, a gamlum henhan uh hi. Babylon khua a susia ding mi khat hong pai khinzo hi. A galkapte uh kiman khin a, a thalte uh a tum a tel suak khin hi. Bang hang hiam cih leh Topa, a thukkik thei Pasian hi a, a thukkik taktak ding hi. A kumpi uliante le a mipilte uh a kipan ukpite, uliante, le galkapte, zu ka khamsak ding a, a tawntungin ihmu-in a khanglo nawn kei ding uh hi, ci-in Vanglian Topa a kici kumpipa in kong gen hi. Vanglian Topa in ka hong genin-ah: Babylon khuakulhpi sah mahmahin a muanhuai mahmah leilakah cimsuk ding a, a sang mahmah khuakongpite zong mei tawh kihaltum ding hi. Mite’ nasepna a mawkna suak a, minamte’ hanciamnate vutlevai a suak hi,” a ci hi. Neriah’ tapa, Mahseiah’ tupa Seraiah pen Zedekiah kumpipa’ thuvan pa ahi hi. Kumpi Zedekiah in Judah gamah a ukzawh kum li ciangin Seraiah le kumpipa Babylon-ah a pai uh hi. Tua hun laitakin keimah in Seraiah thu ka vaikhak hi. Keimah in Babylon khua tawh kisai-in Babylon khua-ah a tung ding gimna khempeuh laibu khat sungah ka gelh hi. Seraiah kiangah, “Babylon khua na tun ciangin hih thute khempeuh na sim ding a, tua khit ciangin, ‘ Topa aw, hih munah mihing hitaleh ganhing hitaleh bangmah teng loin, a tawntungin a kinusia a suah nadingin na suksiatna ding na gen khinzo hi,’ ci-in thu ngen in. Hih laibu sunga thute mite’ zakin na sim khit ciangin suang khat tawh henkhawm inla, Eufratis gun sungah paai in. Tua khit ciangin, ‘Babylon khuapi’ gitlohna hangin a tungah gimna ka tungsak ding a, tu-a bangin Babylon khuapi zong tumsukin a hong dawkkikto nawn kei ding hi,’ ci-in gen in,” ka ci hi. Jeremiah’ thugenna tu-a ciang ahi hi. Zedekiah kumpi a suahin kum sawmnih le kum khat pha a, Jerusalem khua-ah kum sawm le kum khat sung a uk hi. A nu’ min Hamutal hi a, Libnah khua-a teng Jeremiah’ tanu ahi hi. Amah in kumpi Jehoiakim bangmahin Pasian’ hoihsak lohte hong sem hi. Topa in Jerusalem khuamite le Judah gam mite ama kiang panin a hawlkhiatna zah dong dingin a hehna a lian hi. Zedekiah in Babylon kumpipa langpan’ hi. Tua ciangin amah kumpi a suahzawh a kum kua kum, a kha sawmna, a ni sawm ni-in, Babylon kumpipa Nebukhadnezzar in a galkap khempeuh tawh Jerusalem khua a sim dingin hong kuan uh a, khuapi kimkotah galdalna a phut uh hi. Zedekiah in a ukzawh kum sawm le kum khat a phak dong khuapi a kisim hi. Tua kum a kha lina, a ni kua ni ciangin khuapi sungah kial nasia lua ahih manin, mite in annek ding a nei nawn kei uh hi. Tua ciangin khuakulhpi kiphulet a, khuapi kimkotah Khaldea mite om napi-in, zan laitakin kumpipa’ huan gei-a kulh tegel kikal-a kongpi tawnin galkapte taikhiasim uh a, Arabah gam lam a manawh uh hi. Ahih hangin Khaldea galkapte in kumpi Zedekiah nungdelh uh a, Jerikho zanglei-ah a phak uh ciangin a galkap khempeuh kithehthangin amah a taisan uh hi. Amaute in kumpipa a mat khit uh ciangin Hamath gam Riblah khua-a Babylon kumpipa kiangah puak uh a, amah in thukhenna a pia hi. Riblah khua-ah Babylon kumpipa in Zedekiah’ muh mahin a tate thahlupsak a, Judah gam kumpi ulian khempeuh zong a thatlum hi. Babylon kumpipa in Zedekiah’ mittangte a khelkhiatsak khit ciangin kol bulh a, Babylon khuapi-ah paipihin a sih mateng thong sungah a koih hi. Babylon kumpipa Nebukhadnezzar in a ukzawh kum sawm le kum kua a phak kum, a kha ngana, a ni sawm ni-in Babylon kumpipa a cing galkap mangpa Nebuzaradan, Jerusalem khua sungah hong lut hi. Amah in Topa’ biakinnpi a kipan kumpipa’ inn le Jerusalem khua-a inn lian khempeuh a hal hi. Amah tawh a omkhawm a galkap khempeuh in Jerusalem khua kimkota kulh khempeuh a susia hi. Kumpi cing galkap mangpa Nebuzaradan in mi zawngpen pawlkhat, khuapi sunga a kinusialai mite, Babylon kumpipa’ lamah a tai mite, le khutsiam mi a omlai teng, sal dingin a paikhiatpih hi. Ahih hangin kumpi cing galkap mangpa Nebuzaradan in leenggah lo a cing ding le lo a kho dingin gam sunga a zawngpente pawlkhat a nusialai hi. Babylon mite in Topa’ biakinnpi sungah a om sumngo khuamte, sumngo tuikuang le a ngaknate suzan gawp uh a, sumngo khempeuh Babylon-ah a la uh hi. Tua banah, biakpiakna a kizang beelte, vutluahnate, taitehte, kuangte, sikkeute, le biakinn kikhopna-a kizang sumngo tawh a kibawl kuangte khempeuh zong a la uh hi. Biakpiakna a kizang keuneute, mei-am luahna kuangdaite, kuangte, beelte, khuai meivakkhuamte, sikkeute, le tuibuahna dinga kizang keute zong a la uh hi. Kham tawh a kibawl nate kham dingin ahi zongin, ngun tawh a kibawl nate ngun dingin ahi zongin kumpi cing galkap mangpa in a lakhia hi. Solomon kumpipa in Topa’ biakinn a dingin a bawl khuampi nih, tuikuangpi khat le tua nuai-a a pua sumngo bawngtal sawm le nih le a kingaknate, sumngote a gihna kiteh zo lo hi. Tua khuamte khat ciangin pi sawmnih le pi sagih sang a, a kimkot pi sawm le giat pha a, a sahna zung li pha-in a sung a hawm ahi hi. A tunglam pi sagih le alang ciang sumngo hi-in, tua mun teng a kimkotah sumngo tawh a kibawl mang kawlsing lim kisuai hi. Mang kawlsing a vekpi-in a kimkotah zakhat om a, sawmkua le guk bek a kilang hi. Kumpi cing galkap mangpa in siampi lianpen pa Seraiah, siampi lian a nihna Zefaniah, le kongpi uk biakinn upa thum a paikhiatpih hi. Tua banah khuapi sung panin galkapte a uk galkapmang khat le khuasunga a kimu kumpipa’ uliante sagih, galkap zumlai a kem galkap mangpa’ lai-at pa le khuasunga a kimu midang sawmguk, khuasung panin a paikhiatpih hi. Kumpi cing galkap mangpa Nebuzaradan in amaute paipihin Riblah khua-a Babylon kumpipa kiangah a tunpih hi. Babylon kumpipa in zong Hamath gam Riblah khua-ah amaute satin a thatlum hi. Tu-a bangin Judah mite a gam panun sal dingin a kilakhia hi. Nebukhadnezzar in sal dingin a paipih mi phazah hih bang ahi hi: Kumpi a suahzawh a kum sagih kumin Judah mi tulthum sawmnih thum, a kum sawm le giat kumin Jerusalem khua panin Nebukhadnezzar in mi zagiat sawmthum nih sal dingin a paipih hi. Nebukhadnezzar in a ukzawh a kum sawmnih le thum kumin kumpi cing galkap mangpa Nebuzaradan in a sal dingin Judah mi zasagih sawmli nga a paikhiatpih hi. A vekpi-in mi tulli le zaguk a pha hi. Judah kumpipa Jehoiakhin sal a suahzawh kum sawmthum le kum sagih a cin ciangin Babylon-ah Evilmerodak kumpi a suak hi. Tua kumpipa in Judah kumpipa Jehoiakhin hehpih a, tua kum kha sawm le kha nihna a ni sawmnih le ni nga ni ciangin thong sung panin a suaktasak hi. Hoihtakin hopih a, Babylon khua-a a ompih kumpi dangte sangin a sangzaw tutna a pia hi. Tua ahih manin Jehoiakhin in a thong puante a suahkhia hi. A nuntak sungteng khempeuh kumpipa’ sabuai-ah nisimin an a ne hi. A sih mateng a nuntak hun sungteng nisimin a kisap khempeuh kumpipa in a pia tawntung hi. Khatvei lai-in mi a dimtakin a tenna Jerusalem khuapi bangzah takin gamdai ahi hiam? Leitung bup in a zahtak khuapi tu-in meigong tawh a kibang ta hi. Leitung a om khuapi khempeuhte’ lak panin a thupi pen khuapi tu-in salin a kiman khinzo hi. Amah zan khuavakin kap a, a khitui a biang tungah a tak kauhkauh hi. Amah a it ngeite khempeuh a hehnem ding khat beek a om nawn kei hi. A kipawlpihte khempeuh in amah khemin, tu-in a langpan’ khinta uh hi. Judah mite, a huh ding a nei lo silate bangin a inn panun kihawlkhia hi. Amaute gam dangah teng uh a, amau’ gam ding a om kei hi. Galte in umcih uh a, a suahtak theih nading uh lampi a om kei hi. Ni siangtho ni ciangin Pasian a bia dingin Biakinnpi-ah kuamah a pai nawn kei hi. Tua lai-a lasa numeite in gimna thuak uh a, siampite a tau uh hi. Khua kongpi-ah kuamah om nawn lo a, Jerusalem khuapi in gimna a thuak hi. A galte gualzo uh a, amaute a nuaisiah gawp uh hi. Mawhna tampi a neih manun, Topa in tua bangin gimna a thuaksak hi. A mite khempeuh sila dingin a kipuakhia hi. Jerusalem a minthanna teng a maimang zota hi. A makaite uh, lonona mun mu loin a vak kawikawi, sabengte a muh ciangin tailahpi-in a tai teitei sazuk tawh kibang hi. Tu-in Jerusalem kisiazo ta a, nidanga a thupinate a nung phawkkik hi. Galte in a sim laitakin a huh ding khat beek a om kei hi. Guallel ahih manin a galte in a nuihsan uh hi. A minthanna teng a beita hi. A guaktangin om ahih manin a maizum hi. Thumin tau a, a zum manin a mai a hum hi. Jerusalem in mawhna lian bawl ahih manin a kihhuai mahmah hi. A kihhuaina teng kimukhia pah hinapi, gimna thuak ding ahihlam a awlmawh tuan kei hi. Tua ahih manin gimna a thuakna lian lua mahmah a, kuamah in a hehnem zo kei hi. A galte in zo ahih manin Topa kiangah hehpihna a ngen hi. A galte in a neih a lam khempeuh a laksak khinmang hi. Biakinnpi sungah lut uh a, Topa in Gentail-te a pai ding a phal lohna munah a lut uh a mu hi. Amaute, a thum kawmsa-in annek zong dingin a paikhia uh hi. A nuntak theih nadingun a sum a pai uh tawh an a khek uh hi. Khuapi in, “Hong en in Topa aw, ka thuakna teng hong mu in,” ci-in a kiko hi. A kiim a pamah a pai mi khempeuh kiangah, “Hong en in, kei’ thuak zahin gimna a thuak, Topa in a heh laitakin a hong thuaksak gimna a thuak kei longal, midang kuamah om lo hi,” ci-in a kiko hi. Amah in vantung panin meikuang hong khiasuk a, ka sunglam a hong kang hi. Amah in thang hong siah a, awkin leilakah ka kipuk hi. Tua bangin natna ka thuak tawntung hi. Amah in ka mawhna khempeuh a vekpi-in ciamteh a, tuate henin lomkhat suahin ka ngawngzangah hong khih a, gik lua mahmah ahih manin ka taangzo peuhmah kei hi. Topa in ka galte’ khut sungah hong pia ahih manin a cimawh ta ka hi hi. Topa in ka galkap a thahat pente nuihsan lel a, amah in kei a hong sim ding, ka tangvalte a susia dingin galkap honpi a hong kuansak hi. Amah in ka nungakte leenggah gawizan bangin a hong gawizansak hi. Tua ahih manin ka mit pan khitui a dimletin a luang hi. Hong hehnem ding le a hong hanthawn ding kuamah om lo hi. Galte in hong zo khin a, ka mite a cimawh uh hi. Hong huh un, ci-in ka khut ka vanvan hangin kuamah in a hong huh nuam kei hi. Topa in mun khempeuh panin galte hong paisak a, amaute in a kihhuai na khat bangin kei a hong gimneih uh hi. Topa a thutang ahi hi. Bang hang hiam cih leh keimah in ama thu a mang lo ka hi hi. Mun khempeuhah a om mite aw, ka thugenna hong ngai un. Ka thuaknate hong mu dih un. Ka khangno numei le pasalte salin a kipuakhia hi. Ka kipawlpihte ka sapsap hangin a hong huh nuam kei uh hi. A nuntakna ding uh an a zonna lamun siampite le makaite kongzing lakah a si uh hi. Topa aw, ka thuaknate, ka lunggimnate hong en in. Ka mawhna hangin dah mahmah ka hih manin ka lungsim a kitam hi. Kongzing lakah kithahna om a, inn sungah zong sihna mah a om hi. Ka tauna hong ngai in; kei a hong hehnem ding kuamah dang om nawn lo hi. Gimna nong thuaksak manin ka galte lungdam lua uh hi. Na ni ciam ni hong tungsak inla, kei’ thuak bangin ka galte zong thuaksak in. A gitlohna hangun amaute tungah thu khen in. Ka mawhna hangin gim nong piak mah bangin amaute zong gim pia in. Gimna ka thuak manin ka tautau a, ka lungsim a gim mahmah hi. Topa in a heh manin Jerusalem khuapi a mialcipsak hi. A vantung minthanna teng uh kisiatna a suaksak hi. Amah in a heh ni-in a Biakinnpi nangawn a susia hi. Topa in Judah gam a om khuate khempeuh hehpih loin a susia hi. Amah in a galdalna kulhpite khempeuh balzan gawpin a gam le a gam ukte a maizumsak hi. A hehna tawh Israel-te’ thahatnate hong suksiatsak gawp a, gal in a hong sim ciangin amah in eite a hong huh nuam kei hi. Meikuang tawh kibangin eite’ langah hong pang a, na khempeuh a susia hi. Amah in galte bangin a thalpi tawh hong ngim a, i lungdamna teng le i kisaktheihna teng a hong thah khit sak hi. I innsung ciatah a hehna meikuang i mu thei hi. Topa in galte bangin Israel-te a susia hi. Amah in kulhpite le a kumpi innte a siasa-in a nusia hi. Amah in a bei thei lo dahna Judah gam sungah a tungsak hi. Amah in biakna Biakinnpi a zan gawpsak hi. Amah in biakna ni siangtho nite le Sabbath nite a beisak hi. Kumpite le siampite in a nasia ama hehna a thuakkhawm uh hi. Topa in a siangtho biakinnpi le a biakna tau deih nawn lo a, biakinn kulhpi, galte a susiasak hi. Lungdamna tawh amah i biakna munah, amaute gualzo-in a kiko uh hi. Jerusalem kulhpi a kipuk ding Topa in a ngaihsutsa ahi hi. A vekpi-in a kisia khin dingin amah in a sehsa ahi hi. Tausangte le kulhpite tu-in kisia khin piikpeek ta hi. Kulhkongpite cim gawpin lei in vukcip a, kongpi kalhna zawlte a kitan gawp hi. Kumpipa le miliante salin a om khin uh hi. Thukham kihilh nawn lo a, kamsangte in Pasian kiang pan maang a mu nawn kei uh hi. Jerusalem puteekte pau loin leilakah tu uh a, dahna lim lahna-in puanhampi silhin a lu zang uh leivui a buak uh hi. Jerusalem nungaknote a kun ngelhngalh uh hi. Ka kahkahna-in ka mit paatgawp ta a, ka lungsim gim lua mahmah hi. Ka mite a kisiatna hangin dahin husamin ka bahgawp hi. Naupangte le nungakte kongzing lakah sibup uh hi. Gilkial dangtakin nu aw, ci-in kapkap uh a, a liam a bai bangin kongzing tengah a tuk pekpak uh hi. Tua bangin damdamin a nute uh ang-ah a si uh hi. Ka it Jerusalem khuapi aw, bangci ding ka hi hiam? Hong bangci hehnep ding ka hi hiam? Nang thuak bangin a thuak kuamah om lo hi. Na tuahsiatna tuipi cia pha a, a lamethuai bangmah om nawn lo hi. Na kamsangte un zuauthu longal thudang gen ding nei lo uh a, a thuhilhna uh khemna thu bek ahih manin, a khial na hihlam uh a hong hilhtel kei uh hi. Amaute in lam hong lakkhial uh a, kisikkik theih nading hun a hong pia kei uh hi. Tua khuapi a siatna a mu mi peuhmah in awi-in a khut a betsan uh hi. A kisia Jerusalem khuapi a muh uh ciangin awi-in a lu uh pei-in a nuihsan uh hi. “Khuapi it-huai i cih hih maw, leitung bup in a kisaktheihpih hih khua maw,” ci-in a nui uh hi. Na galte in nang hong simmawh uh a, muhdahna tawh a hong sik-et uh hi. “Khuapi susiazo ta hang! I suksiatzawh mateng i cihcih niloh mah hi,” ci-in a hagawi uh hi. Topa in a sehsa bangin a tawpkhakna-ah a hong bawl hi. Sauveipi lai-in a hong hilhkholhna bangin hong hehpih nawn loin a hong susia hi. Galte gualzo a, ei hong guallelsak a, amaute a lungdamsak hi. Jerusalem aw, na kulhpite mahmah Topa tungah kikosak in! Sun le zanin na khitui gun tuiluang bangsak in. Dahna le kahna tawh na hun beisak in. Zanin tho zelzel inla, Pasian tungah kiko in. Na tate in hehpihna a ngah nadingin na lungsim khempeuh pia in. Kongzing khempeuhah naupangte puksi khin dektak uh hi. Topa aw hong en in. Na bawlsiat mite hong en dih in. Nupite in a it mahmah uh a tate uh’ sa ne tanghial uh hi. Siampite le kamsangte in biakinnpi sung mahmahah thahna thuak uh hi. Khangno le khanghamte kongzing tengah si uh hi. Galte in nungak le tangvalte namsau tawh a thatlum uh hi. Amaute hehpih loin na heh ni-in na thatlumsak hi. Kei a hong dipkuasak dingin ka galte pen pawi siim ding bangin na sam a, amaute in hong umcih uh hi. Nangma heh ni-in a suaktazo khat beek a om kei hi. Ka hawmthawh ka it ka tate a hong thahsak uh hi. Pasian in gim hong piakna zia a thuakkhin pa kei ka hi hi. Amah in a thuk mahmah khuamial sungah a hong hawlkhia hi. Hong hehpih hetloin a khut tawh a hong tum niloh hi. Amah in a liam a bai guh kitansa-in a hong nusia hi. Amah in lunggimna le gentheihna thonginn sungah a hong khumcip hi. Amah in sihna khuamial uih sungah a teng dingin aana tawh thu a hong pia hi. Amah in kol hong bulh a, taikhiatzawh hetlohna kulhpi sungah hong koih hi. Hong huh un, ci-in ka kiko hangin ka kikona aw a pualamah a kizazo kei hi. Hoi dangdang ka hih manin suang kulhpite ka kantanzo kei hi. Amah in vompi bangin kei hong buksim a, humpinelkai bangin a hong bawh hi. Amah in lam pamah hong delhkhia a, a hong balnen khit ciangin a hong nusia hi. Amah in a thalpi keek a, thal tawh kap dingin a hong ngim hi. Amah in a thaltang a thuktum theithei dingin a hong kap hi. Mite in sun tawntung hong nuihsan niloh uh a, leitung bup in ciamnuihna-in a hong nei uh hi. Amah in ka ut lohpipi-in tuikha hong dawnsak a, ka duh lohpipi-in an kha a hong nesak hi. Amah in ka maitang lei-ah hong hiat a, suang tungah ka ha a hong tahtansak hi. Lungnopna, cidamna, kipahna cihte bang ahi hiam, cih mel ka thei nawn kei hi. Sauveipi ka nungta nawn kei ding hi. Topa’ tung pan ka lametna teng a beita hi. Gimna ka thuaknate le innlelo nei loin ka omna pen gu-kha bang hi a, tua pen a tawntungin lungkiatna ahi hi. Ahi zongin ka phawk giugiau thu khat in lametna khat hong nei theisak hi. A bei thei lo Topa’ hong itna le a hehpihna a kizom paisuak hi a, zing nisuak bangin thaksuak tawntung a, ni a hong suah pelmawh mah tawh a kibang ahi hi. Topa longal neihdang nei lo ka hih manin ama tung bekah lametna ka nei hi. Amah a muangte a dingin Topa a hoih hi. Tua ahih ciangin thuakzawhna tawh ngak kenkanzo lehang a hoihpen ahi hi. A hong hotkhiat ding amah ngak ni. Na khangno lai-in thuakzawh hat ding kisin leteh hoihpen hi. Gimna i thuak ciangin damtakin tu hithiatin i thuakzo ding hi. Lametna ding om thei lai ahih manin phunphun huai dek lo hi. Guallelin bawlsiatna thuak ta lehang tua banga om lel ding ahi hi. Topa in hehpihna nei ahih manin hong nial paisuak lo ding hi. Dahna hong thuaksak thei ding a, ahih hangin eite a hong itna muanhuai-in kip tawntung hi. Dahna le gimna a hong thuaksak ciangin amah lungdampah sam lo hi. Topa in thong sungah i thuak i lunggimnate a hong thei hi. Mite in Pasian thusim loin, i hamphatnate hong paihkhiat sakin, zum thukhenna-ah a manin thu a kikhen loh ciangin, amah in a hong thei veve hi. Topa’ deihna bang bekin na khempeuh a piang ahi hi. Ama thupiakna bangin a sia ahi a, a pha ahi zongin a piang ahi hi. I mawhna hangin gim i thuak ciangin bang hangin phunphun ding ihi hiam? I gamtatnasate limtakin ki-enpha kikin Topa’ lamah kiheikik ni. Vantunga om Pasian tungah i lungsim pia-in thu ngen ni. “ Topa aw, nang tungah kong khial uh a, hong lehdokha ka hih manun ka mawhna uh na hong maisak nai kei hi. “Kote nong nungdelh a, na hong that khinzo hi. Heh na hih manin na hehpihna a kiseelcip hi. Na hehna, meiipi zahin sah mahmah ahih manin ka thungetna uh na kiang a hong tungzo kei hi. Hih leitungah kote a kihhuai nahteh muat bangin na hong bawl hi. “Ka galte khempeuh un hong simmawhin a hong zahpih uh hi. Siatna bekbek tawh kidimin, kihtakna le launa tawh ka nungta uh hi. Ka mite a kisiat manin ka khitui hawktui luang a bang hi. “Ka khitui kang thei loin luitui bangin luang tawntung a, vantung panin Topa in hong ensukin a hong muh ciangin, ka khuapi kisiatna in ka lungsim hong kitamsak hi. “A thu om lopi-in ka galte in hong mudah uh a, vasa siah bangin thang a hong siah uh hi. Leihawm thukpi kawt sungah hong hing khiat uh a, suangtumpi tawh a hong sincip uh hi. Tui in hong tuumcip gawp ahih manin a si khinta-in ka kingaihsun hi. “ Topa aw, leihawm thukpi taw panin ka hong kikoto hi. Kong thumna hong ngai in, ci-in ka hong thum ciangin na hong za hi. Na hong dawng a, a lau lo dingin thu nong pia hi. “Topa aw, nangmah in na hong huh a, na hong nungtasak hi. A mawkna-in kei hong kimawhsaknate thei khin na hih ciangin thu hong khen inla, kei hong khahkhia in. Ka galte’ hong muhdahna le a vaihawm simna thute uh na thei khinzo hi. “ Topa aw, amau’ hong simmawhnate na thei khinzo a, a ngimnate khempeuh uh zong na theizo hi. Sun tawntung keimah bawlsiat ding bekbek kikumin a vaihawm tawntung uh hi. Zingsang a kipan nitak dong a hong zahpih uh hi. “ Topa aw, amau’ gamtatna bangin thukkik in. Amaute phuisam inla, a cimawh dingin hawlkhia in. Amaute delhkek inla, leitung panin nuaimang gawp in,” ci ni. Biakinnpi kisia ta a, suang kiciangte kongzing lakah a kithehthang hi. Khamtui tawh a kizut a tee daldalte mualmang khinzo ta hi. Kham bangin a manpha Jerusalem tangvalnote, leibeel bang lelin kibawl khinta hi. Keivom nangawn in zong a note itin a nawi pia thei buang napi, ka mite in vasa-kalaoh bangin a tanote a sugawp hi. Amaute in a ta ngeekte uh gilkial dangtakin sisak uh a, naupangnote an ngen dingin vaksak uh a, kuamah in an a pia kei hi. An lim pen a ne ngeite kongzing lakah puksi uh a, nuamsa-in a khangkhia mite in ninbuakna lak thai-in an a zong uh hi. Jerusalem’ mawhna Sodom khuapi’ mawhna sangin lianzaw ahih manin, thakhatin Pasian’ khutsung pan kisiatna a ngah uh hi. Pasian’ mi dingin a kipia Nazir-te pen amau’ pumpi uh a siasak lo, vuk bangin a ngo, a cidam, a thahat mite ahi uh hi. Tu-in amaute kuama theih lohin kongzing lakah tuk pekpak uh a, a si dingin a mai uh dup khin a, a vun uh sing bangin keugaw-in, a guhguakin a om uh hi. Nek ding nei loin puksih sangin gal sungah a site hamphazaw lai hi. Annek ding nei loin a site a puksi ahi uh hi. Ka mite a cihmawh laitakun, itna a nei nupite nangawn in, a tanote uh go-in beel sungah a huan uh hi. Topa in a hehna khempeuh siit nawn loin hong buakhia a, meikuang tawh Jerusalem hong hal ahih manin a kangtum hi. Namdangte’ gam ukte le mi khempeuh Jerusalem a simzo ding kuamah om lo ding hi, ci-in a up laitakun hih thu hong piang hi. Kamsangte le siampite in mawhna a bawl manun mi siangtho midikte’ sihna a hong piang ahi hi. Amaute mittaw bangin kongzing lakah vak uh a, kuama lawn ngam loh dingin silenai tawh a dim uh hi. Mite in, “Paikhia un, mi ninte aw, hong lawngkha kei un,” ci-in a kiko uh hi. Tua bangin minam khat khit nam khat kiangah pai kawikawi uh a, ahih hangin kuamah in amaute a ngai kei uh hi. Topa in amaute a zat nopna om nawn lo ahih manin amaute a thehthang hi. Amah in i makaite le i siampite a awlmawh nawn kei hi. Huhna a ngenin ka khuadakdak uh a, khuadakzo nawn lo zah dongin ka om uh hangin bangmah ka ngah kei uh hi. A hong pia zo lo ding minamte tungah huhna ka ngenngenkha uh hi. Galte in hong vilsim uh ahih manin ka vakkhia ngam kei uh hi. Ka hun uh a beita hi a, a beina hun a tungzo ahi hi. Mu ak bawh sangin a manlang zaw-in amaute in a hong delh uh hi. Amaute in mualtung panin hong delhsuk uh a, theihkholh lohin a hong man khin uh hi. Amaute in galte’ khutsung panin a hong huhzo dingin ka up uh, Pasian’ teel a muanhuai kumpi a hong matsak uh hi. Edom le Uz mite aw, tu-in nuinui mai unla, ahih theih laiteng kipak un. Bang hang hiam cih leh siatna hun hong tung ding a, a hong tun ciangin na guaktangun omin, maizumin na om ding uh hi. Jerusalem in a mawhna thaman a sang khinzo ta ahi hi. Ka thuak ding uh a nasia penpen teng ka thuak khinzo ta uh hi. Ahi zongin Edom aw, Topa in nang gim hong pia ding a, na mawhna khempeuh a hong pholak ding hi. Topa aw, kote tunga thupiangte hong phawk in. Hong en inla, ka maizumna uh hong mu in. Ka neihsa teng uh gamdang mite’ khut sungah tung mangkhin a, ka innsung uhah gamdang mite teng ta uh hi. Ka pate uh gal in hong thahsak khin a, ka nute uh meigong suak khin uh hi. Ka tuidawn tawm ding uh lei ding kul ta a, ka sing cihtawm ding uh lei ding kul ta hi. Kalaoh van pua le la van pua bangin nakpitakin a hong kihawl gawpgawp hi. Gim mahmah hinapi tawlngakna ding hun a hong kipia kei hi. Ka nuntak theih nadingun Assiria le Egypt-te kiangah an ngen dingin ka pai uh hi. Ka pu ka pate un mawhna a bawl manun a si khin uh hi. Amaute’ mawhna kote in ka thuak uh hi. Silate sangin a zahpihhuai zaw mite in kote hong uk tazen uh a, amaute’ khutsung panin kuamah in a hong honkhiazo kei hi. Gam sung khempeuhah misuamte dim ahih manin, luangkham zen mahin an zong dingin ka pai uh hi. Gilkial luat manin cisa-in ka nattun uh a, ka pumpi uh mei-am sa a bang hi. Zion mual le Judah gam sung khempeuhah ka zite uh le ka nungakte uh hong kibuansak hi. Makaite khempeuh hong kikhailupsak a, ka puteekte uh a hong kithusimsak kei hi. Tangvalte sila bangin aana tawh an kigawisak a, naupangnote sing kitomsakin a lelh pipi uh a kipuasak hi. Puteekte khuapi kongpi-ah tu nawn lo uh a, khangnote inla a sa nawn kei uh hi. Lungnopna khempeuh bei mangkhin ta a, lungdamna khempeuh lungkhamna a suak ta hi. Kisaktheihna ding bangmah om nawn lo a, mawh ihih manin gimna a thuak ihi hi. I lungsim mahmah cina a, i khitui luangte in khua hong musak thei kei hi. Zion mual gamdai ta a, kinusia khin ahih manin se-alte a kawi vak ta hi. Ahih hangin Topa aw, nang na hih leh a tawntungin kumpi na hi a, hun tawp dongin na uk paisuak ding hi. Bang hangin sauveipi hong pampaih na hi hiam? Kote hong phawkkik nawn lo takpi ding na hi hiam? Topa aw, kote hong kaikhawm kik in! Hong kaikhawm kik in! A beisa sauveipi lai mah bangin hong thaksuaksakkik in. Kote hong nial tawntung takpi ding na hi hiam? Na hehna in ciangtan hun nei thei lo ding ahi hiam? Kum sawmthum ka phak kum, a kha lina, a ni nga ni-in Babylon gam a om Khebar Gun gei-ah sala om Jew midangte tawh ka om laitakin maang ka mu hi. Tua ka maangmuhna ah van hong kihong a, Pasian ka mu hi. Tua hun pen Kumpi Jehoiakhin salin a kimat zawh a kum ngana, tua kha sungah a ni nga ni mah ahi hi. Tua Babylon gam Khebar Gun gei-ah ka om laitakin siampi Buzi’ tapa keimah Ezekiel in Topa’ hong thugenna ka za a, ama vangliatna zong kei tungah a hong tunna ka phawk hi. Ka khuadak leh leilu lam panin huihpi a hong nung ka mu hi. Tua huihpi tawh a hong ton meiipi lak panin khua hong phia a, ka kimkotteng taang pempam hi. Tua khuaphiatna mun pen sumngo tawh kibangin a taang hi. Tua huihpi laizangah ganhing li a om tawh a kibang pian ka mu hi. Tua ka muhte in mihing lim pua napi-in, maitang li le kha li ciat a nei uh hi. A khete uh mam zeza a, ahi zongin a khepekte uh bawng khe tawh kibang hi. Tua ganhingte pen a kinawtngil sumngo tawh kibang uh hi. Maitang li le kha li ciat a neih ban uhah, a khaphung nuai a pangpi uh panin a meengkhia mihing khut tawh a kibang li ciat mah nei lai uh hi. Tua ganhing lite in a kha nih ciat uh zalin, a mong le a mong kimatsak uh a, ki-umcihin sikli nei-in kimu hi. Amaute a gamtat uh ciangin a li-in tatkhatin tang uh ahih manin a pumpi uh kituam hei lo hi. Tua ganhingte in maitang li ciat nei uh hi. Maitang ngeina lamah mihing mai, taklam pangah humpinelkai mai, veilam pangah bawngtal mai, a dek lamah muvanlai mai nei ciat uh hi. Tua ganhingte in a kha nih ciat uh zalin a zom a omte’ kha mong dawn tawh kimatsak uh a, a omlai a kha nih tegel ciat uh khupin a pumpi uh a tuam uh hi. Tua ganhingte in maitang li ciat nei-in mun khempeuh a maingat suak uh ahih manin a painop uh ciangin a pumpi uh kihei kul loin a utna peuh uhah pai thei pahpah uh hi. Tua ganhingte lakah meikuang tawh a kibang a phia niloh om hi. Tua meikuang pen kuang pha mahmah a, khua phiasak zaizai hi. Tua ganhingte khuaphia mah bangin kin zalzal kawikawi uh hi. Tua ganhing lite ka et laitakin amaute in leengpei khat ciat a neihlam uh ka mu a, a leengpeite leilakah kinga hi. Tua leengpeite a vekpi-in kibang kim a, suangmanpha bangin tee uh hi. Tua leengpeite in a kikantan lamin pei khat ciat nei thuah uh ahih manin, a utna lam peuhpeuhah pai thei uh hi. Tua leengpei kualte tungah mittang vive a dimin om hi. Tua ganhingte a kin ciangin leengpeite tawh kin khawm a, leilak panin tua ganhingte van lamah kangin a kahtoh ciangin a leengpeite tawh zong kangto khawm hi. Amau’ utna peuhpeuh uhah tua ganhingte pai uh a, tua leengpeite pen a ganhingte’ khutnuai ahih manin, ganhingte’ paina peuhpeuhah a pai uh hi. Tua leengpeite pen ganhingte’ khutnuai-a om ahih manin ganhingte pai leh pai-in, ganhingte khawl leh khawlin, vanah kahto leh kahto-in, a ganhingte’ tat bang teekteekin a ta uh hi. Tua ganhingte’ lu tung sanah limlang tawh a kibawl a kuum kiukiau pian khat om hi. Tua a kuum nuai-ah, ganhingte in a kizompih ciatte’ lamah a kha nihte ciat zal uh a, a kha nih ciat uh tawh amau’ pumpi ciat a tuam uh hi. Tua ciangin amaute’ leenna a khaging uh ka za hi. Tua a khaging pen tuipi ging, galkap honpi huging, le Vanglian Pasian’ awgingte tawh kibang hi. A leen nawn loh uh ciangin a kha uh khup a, ahi zongin amaute’ lu tung sana om a kuum tung san panin awging kiza lai hi. Tua kuum tungzangah, sapfaia suangmanpha tawh a kibawl kumpi tokhom bang pian khat om a, tua tokhom tungah mi tawh a kibang pian lim khat a tu hi. Tua tokhom tungah a tu ka muh pen meikhuk sunga kihalsan sumngo bangin taang heuhau a, a kimkot khempeuh zong tua mah bangin taang pempam hi. Tua a taang khuavak in meii lakah sakhituihup a kai ciangin a neih mel nam tuamtuam khempeuh a nei kim hi. Topa’ vangliatna lim pen tu-a ka gen bang ahi hi. Hih bang ka muh ciangin leilakah ka boksuk a, tua ciangin awging khat ka za hi. Tua awging in, “Mihing ahi Ezekiel aw, dingto in. Nang tungah thu kong gen nuam hi,” hong ci hi. Tua bangin thu hong gen laitakin ka sungah Pasian’ kha hong lutin ka khe-in hong dingtosak hi. Tua ciangin a awging kizom lai-in kei kiangah, “Mihing ahi Ezekiel aw, kei hong langpangin a hong lehdo Israel minamte kiangah nang a hong sawl ka hi hi. A pu a pate uh mah bangin amaute in tu dongin kei hong lehdo lai uh hi. Amaute a lungsim uh khauhin paupeeng uh hi. Keimah Topa Pasian in amaute tungah ka gen ding thute a va gen dingin a hong sawl ka hi hi. Amaute in nangma thu hong mang a, hong mang kei zongin, amaute lakah kamsang khat a omkhit lamtak thei ding uh hi. “Ahi zongin mihing ahi Ezekiel aw, amaute ahi a, a thugente uh ahi zongin na kihta kei ding hi. Amaute in nang ling hong kaihnelh ding uh a, momai lak a om na bang ding hi. Tua bang hitaseleh, hih a lehdo thei mite’ maipuak zia le amaute’ kampaunate hangin lau tuan kei in. Amaute in hong mang a, hong mang kei zongin, nang tungah kong gen khempeuh amaute tungah va gen in. Amaute pen a lehdo thei mi ahihna uh phawk in. “Mihing ahi Ezekiel aw, nang tungah kong gen thute ngai in. Amaute bangin hong langpang kei in. Na kam ka inla, tu-in ka hong piak ding na ne in,” a hong ci hi. Tua ciangin kei lamah khut khat hong kizan a, tua khut in laizial tawn khat a tawi ka mu hi. Tua ciangin tua khut in tua lai kizial hong phel a, a lang nih tuakah lai kigelhin, dahlekah thu le thumletau thute vive a kigelh ka mu hi. Tua ciangin amah in kei kiangah, “Mihing ahi Ezekiel aw, nang tungah ka hong piak hih laizial ne in. Tua ciangin va pai inla, Israel mite kiangah thu va gen in,” a hong ci hi. Tua ahih manin kei zong ka kam ka ka a, ka nek dingin a laizial hong pia hi. Amah in, “Mihing ahi Ezekiel aw, ka hong piak laizial ne inla, na gilpi dimtakin ne in,” a hong ci hi. Kei zong tua laizial ka ne a, khuaizu tawh kibangin khum ka sa mahmah hi. Tua ciangin amah in, “Mihing ahi Ezekiel aw, Israel mite kiangah pai inla, nang tungah kong gen peuhpeuh, amaute tungah va gen in. A pau na theih loh minam dangte kiangah a hong sawl ka hi kei hi. Na mipih Israel-te kiangah a hong sawl ka hi hi. A pau na theih loh, pau haksa a zang minam liante kiangah nang hong sawl hi leng, amaute in na thugen hong mang ding uh hi. Ahi zongin Israel mite khat beek in na thu hong ngai lo ding uh hi. Keima kam teekteek nangawn ngai lo ding uh hi. Amaute a lungsim uh khauh a, demnopna lungsim nei uh hi. Tu-in amaute mah bangin a khauh mahmah, a duai mahmahin nang kong bawl ding hi. Suang khempeuh sangin a sakzaw, diamond suang zahin a sakin na lungsim kong bawl ding hi. Tua ahih manin hih a lehdo thei mite kihta kei in,” a hong ci hi. Tua khit ciangin amah in thu hong genthuah lai a, “Mihing ahi Ezekiel aw, nang tungah kong thugen khempeuh limtakin ngai inla ciamteh in. Tua ciangin amaute in na thu hong ngai a, hong ngai kei zongin, salin a om na mipihte kiangah va pai inla, nang tungah kong thugen khempeuh amaute tungah va gen in,” a hong ci hi. Tua ciangin Pasian’ kha in hong paipihto a, zinling zahin a gin’ ngaih awging khat ka nungah ka za a, “Vantungah a om Topa, ama minthanna hangin phat un,” ci-in a kiko hi. Ganhingte in huihlakah a khazapna le leengpei gingte ka za a, zinling zahin gin’ ngaih mahmah hi. Pasian’ kha in hong paikhiatpih laitakin lungkim hetloin ka heh suak mahmah hi. Ahi zongin Topa’ vangliatna in kei hong zozaw hi. Tua ahih manin ka mipih salte’ omna, Khebar Gun gei-a a om Telabib munah ka va tung a, ka muhsa thute ngaihsunin tua lai-a amaute lakah ni sagih sung ka om hi. Ni sagih a cin khit ciangin Topa in kei hong hopih a, “Mihing ahi Ezekiel aw, Israel minamte’ galvil pa dingin nang kong koih hi. Nangma tungah ka hong gen hilhkholhnate khempeuh amaute tungah na gensawn ding hi. Migilo pa khat pen si ding hi, ci-in kong gen ciangin, amah kikheelin a nuntak theih nadingin thu na hilhkholh kei leh, tua mipa pen mawhnei mahin si ding a, ahi zongin ama sihna thu ahihleh nang kong ngawh ding hi. Migilo khat hilhkhol napi-in a mawh bawlna a tawp kei leh, a mawhnei mahin si ding a, ahi zongin nangma nuntakna suakta ding hi. “Mihoih mahmah khat gamtatsiat ding hong kipan leh a lauhuaina munah amah ka koih ding hi. Amah hilhkhol kei lecin si ding hi. Ama mawhna hangin si ding a, ama gamtat hoihsate phawkin ka nei kei ding hi. Ama sihna thu-ah nang kong ngawh ding hi. Ahi zongin a khialhloh nadingin mihoih khat na hilh a, na thu hong mangin mawhna a bawl kei leh amah nungta ding hi. Nang zong na suakta ding hi,” a hong ci hi. Ka sungah Topa’ vangliatna hong om lamtak ka phawk a, amah in kei kiangah, “Ding inla, kuam sungah va pai in. Tua lai mun panin nang kiangah thu kong gen ding hi,” hong cihna ka za hi. Tua ahih manin kei zong kuam sungah ka va pai a, Khebar Gun gei-a ka muh bang teek mahin tua lai-ah Topa’ minthanna vang ka mu hi. Kei zong lei-ah ka boksuk a, ahi zongin ka sungah Pasian’ kha hong lutin ka khe-in hong dingsak hi. Tua ciangin amah in, “Inn-ah ciah inla, inn kikhaknelh in. Mihing ahi Ezekiel aw, khauhual tawh nang hong kikhih ding a, mite kiangah na paikhia thei kei ding hi. Na leii ka zawsak ding a, hih a lehdo thei mite na thuhilh thei kei ding hi. Ahi zongin nang kong hopih kik ciangin kong pau theisakkik ding a, amaute kiangah, ‘ Topa Pasian in hih bangin ci hi,’ na ci ding hi. Tua ciangin mi pawlkhat in na thu hong ngai ding uh a, ahi zongin amaute pen a lehdo thei minam ahih uh manin pawlkhat in na thu hong ngai lo ding uh hi,” a hong ci hi. Tua khit ciangin, “Mihing ahi Ezekiel aw, leiseek khat la-in na mai-ah koih inla, Jerusalem khuapi lahna-in tua leiseek tung git in. Tua ciangin tua khuapi a ki-umcihna lah nadingin na kiimah dumte, phungte, galpanna phualte, le kulh sukkhapna ding molhtumte bawl in. Tua ciangin sikpeek khat la inla, nang le khuapi kikalah kulh lim dingin koih in. Tua ciangin khuapi lam en in. Tua khuapi a ki-umcih hi-in, nang pen a umcihte’ lim ding na hi hi. Hih pen Israel mite a dingin lim hi ding hi. “Tua ciangin na veilam pang delhphahin lum in. Israel mite’ mawhna hanga gimna nangma tungah kong nga ding hi. Tua lai munah lumin amaute’ mawhna ni zathum le ni sawmkua sung na thuak ding hi. Bang hang hiam cih leh amau’ gimthuak ding kum khat sung dingin ni khat, amau’ thuak ding kum zah nangmah in a ni-in na thuak ding hi. Hih bangin na gamtat khit ciangin na taklam delhphahin na kihei leuleu ding a, Judah mite’ mawhna ni sawmli sung gim na thuak leuleu ding hi. Nangma thuak ni khat pen amau’ thuak ding kum khat tang ahi hi. Tua ciangin Jerusalem khuapi a ki-umcihna sal gega in. Na puanak ban zialto inla, tua khuapi siatna ding thu gen in. Nang pen khauhual tawh kong hencip ding a, tua khuapi umcihna a kiman mateng na kihei thei kei ding hi. “Tu-in mangbuh, mangbuhham, belawi, taang, le mangbuhman pawlkhat la inla, tuate hel khawmin anlumin bawl in. Na veilam delhphahin na lup hun ni zathum le ni sawmkua sung tua na bawl anlum na ne ding hi. Nek khatin anlum shekel sawmnih gik bek na ne ding a, ni khatin khatvei bek na ne ding hi. Tui zong duh zahzah hi loin, ni khatin thawl khat bek na dawn ding hi. Na nek ding anlum pen mite’ muhin mihing ekkeu khawmin tuate mei-in na cih khit ciangin tua sungah na em ding hi,” hong ci hi. Tua ciangin Topa in, “Israel mite, gam dangah ka thehthang hun ciangin thukham in nek dingin a kham an ninte tu-a mah bangin ne ding uh hi,” a hong ci hi. Ahi zongin kei zong ka dawngkik a, “Topa Pasian aw, cikmahin kei ka kininsak ngei kei hi. Ka neu tung a kipan tu dongin ama thu-in a sitawm ganhing sa ahi a, gamsate’ nek baang ahi zongin ka ne ngei kei hi. A ninin a kiseh an khat peuhpeuh ka ne ngei nai kei hi,” ka ci hi. Tua ciangin amah in, “Tua ahihleh pha hi. Mihing ek tangin bawng-ek na zang ding a, tua bawng-ek am sungah na em ding hi,” a hong ci hi. Tua ciangin amah in thu hong genthuah lai a, “Mihing ahi Ezekiel aw, Jerusalem khuapi sungah an ka beisak ding a, mite in lunghihmawhna tawh a annek a tuidawnte uh ciangtan ding uh hi. An le tui loin amaute om ding uh a, amaute lunggimin, a tawpna-ah a mawhna hangun beimang ding uh hi,” a hong ci hi. Tua ciangin amah in, “Mihing ahi Ezekiel aw, namsau hiam khat la inla, na sam le na khamul ki-atkhia in. Tua ciangin a multe tawi tehin seh thum suah in. Umcihna lim na man ciangin khuapi lim sungah seh khat haltum in. Tua ciangin seh khat la leuleu inla, khuapi kiimah na paikawmin na namsau tawh satnen in. A omlai seh khat pen huihlakah lawn in. Keimah in ka namsau tawh tuate ka sat ding hi. Tua ciangin a multe tawmno khat la inla, na puanmongteep-ah tun in. Tua ciangin na tunsate sung panin tawmcikkhat la leuleu inla, meikuang sungah lawnin kangtumsak in. Tua sung panin mei hong kuangin Israel minam buppi hong lawh ding hi,” a hong ci hi. Tua ciangin Topa Pasian in, “Hih Jerusalem khuapi lim en in. Leitung laizangah ka koih a, a kimkotah gamdang khempeuh ka omsak hi. Ahi zongin Jerusalem in ka thupiakna lehdo-in, minam dangte sangin a gilo zaw hong suak a, a kiima om gamdangte sangin a thumang lo zaw hong suak hi. Jerusalem in ka thupiakte nialin, ka thukhamte zui nuam lo hi. Jerusalem aw, tu-in Topa Pasian ahi keima thugente ngai in. Ka thukhamte zui loin, ka thupiakte ngai lo na hih manin na kiima om minam dangte sangin siatna tamzaw na piangsak hi. Minam dangte’ gamtat ngeinate na zui hi. Tua ahih manin Topa Pasian ahi keimah in nang kong langpanna thu a hong gen ka hi hi. Minam dang khempeuhte’ muhin nang tungah thu kong khen ding hi. Ka deih loh hih nate khempeuh na gamtatna hangin cikmahin ka hih ngei nai loh, cikmah ciangin zong ka hih nawn loh ding thu tawh nang Jerusalem gim kong pia ding hi. Tua kong gimpiakna hangin nang Jerusalem khuapi sungah papite in a tapate’ sa ne-in, tapate in a pate uh’ sa ne ding uh hi. No a mite gim kong pia ding a, a suaktakha sunsunte nangawn mun khempeuhah kong thehthang gawp ding hi. “Tua ahih ciangin Topa Pasian ahi keimah a nungta ka hih mah bangin, note in siatna nam khempeuh le a muhdahhuai gamtatna tawh ka biakinn ninsak na hih manun cikze hetloin note kong sukmang taak kei leh, ci-in ka kiciam hi. Note seh thum suah seh khat pen cina le gilkialin khuapi sungah na si ding uh hi. Seh thum suah seh khat, khuapi kiimah namsau-in na si ding uh hi. A omlai seh thum suah seh khat ahihleh mun khempeuhah hong thehthangin namsau tawh kong delh ding hi. “Ka lung a kim dongin kong hih ding a, ka hehna le ka sinsona teng na thuak ding uh hi. Note tungah hih thute hong tun ciangin, note’ cihtak lohna hangin deihsak luatna tawh a hong heh pau ka hihna na phawk ding uh hi. Na kiim uhah a om minamte in note hong muhkhak uh ciangin hong phitsanin hong pelh ding uh hi. Note tungah hehin sinsona tawh gim kong piak ciangin na kim uha a om minam dangte khempeuh lau ding uh hi. Amaute in note hong muhdah et-in hong simmawhbawl ding uh hi. Na annek ding uh hong khaktan sakin note kong puksisak ding hi. Note a hong susia ding gilkialna pen thaltang’ kapkhak bangin na na sa velval ding uh hi. Na tate uh a sisak dingin kialpi hong tungsakin, a that dingin gamsate kong paisak ding hi. Natna, gal kidona, le gal kikapnate in note hong sisak ding hi. Topa ahi keimah in hih thu kong gen khin hi,” a hong ci hi. Topa in kei kiangah thu hong gen a, “Mihing ahi Ezekiel aw, Israel mualsang dawnte en inla, amaute tungah kong thupiak gen in. Topa Pasian ahi keimah in mual liante, mual neute, guam thukte, kuampite kiangah ka gen ding thute, Israel minamte in a ngaihna ding uh gen in. Mite in milim a biakna munte a vatgawp dingin namsau khat kong kuansak ding hi. Biakna taute kiphelkek ding a, paknamtui taute kisatkham ding hi. Tua lai-ah a om mi khempeuh kithatin, a milimte uh’ mai-ah kipaithang gawp ding hi. Israel misi luanghawmte ka thehthang gawp ding a, a guhte uh biakna tau kiimah ka lawnthang gawp ding hi. Israel khuapite khempeuh beimang ding a, milim a biakna uh mun khempeuh kisusia ding hi. Tua ahih manin a biakna taute uh le a milimte uh vutlevai suakin, a paknamtui taute uh kisatvui gawp ding ahih manin, milim biak nadingin a bawlsa khempeuh uh maimang ding hi. Mun citengah mi kithatlum ding a, a suakta sunsunte in kei pen Topa ka hih lamtak hong phawk ding uh hi. “Tua banga kihonthahna panin pawlkhat ka suaktasak ding a, minam dangte lakah kithehthangin, salin a om ding uh hi. Tua bangin salin a omna uh mun panin, amau’ lungsim cihtak lohna uh hangin kei hong nusiatna uh le keimah sangin milim a deihzawkna uh hangin a maizum nadingun gim a pia ding ka hih lamtak thei-in kei hong phawk ding uh hi. Amau’ gitlohna le a haitatnasate uh hangin amau mahmah kimudahtawm ding uh hi. Tua ciangin kei pen Topa ka hih lamtak hong thei ding uh a, amaute gimpiak ding ka genkholhnate a mawkpau ka hihlohlam a phawk ding uh hi,” a hong ci hi. Tua ciangin Topa Pasian in, “Israel mite’ gitlohna le a muhdahhuai a gamtatnate khempeuh uh hangin na khut singin lei tuan inla, a dahin kap in. Amaute galkidona, kial, le natna hangin si ding uh hi. A gamla a om mite cina-in si ding uh a, a nai-a omte gal sungah si ding uh hi. A omlai sunte gilkialin puksi ding uh hi. Amaute in keima hehna thuak ding uh hi. Milimte’ lak le biakna tau kiimah si luanghawm kithehthang ding a, mual sang tungteng, mual dawnzangteng, singniim nuai citeng, tawsaw kung lian nuai khempeuh, le milim biakna-in paknamtui a halna uh mun khempeuhah si luanghawm om ziazua kawikawi ding hi. Tua ciangin Topa ka hih lamtak mi khempeuh in hong thei ding uh hi. Keimah in ka khut zanin a gam khempeuh uh ka susia ding hi. Leitaw lam sehnel gam pan a kipanin leilu lam Riblah khuapi dongin, Israel mite’ omna mun khempeuh, siit nei loin ka vatmai ding hi. Tua ciangin Topa ka hih lamtak mi khempeuh in hong thei ding uh hi,” a hong ci hi. Topa in kei kiangah thu hong gen a, “Mihing ahi Ezekiel aw, Topa Pasian ahi keimah in Israel leitang tawh kisai-in ka gen thu hih bang ahi hi: A beina hita! Gam buppi a beina hita hi. Israel-te aw, tu-in na beina ding uh hong tungta a, note in ka hehna tu-in na thuakta ding uh hi. Na gamtatnasa uh tawh kizui-in thu kong khen ding a, na gamtatsiatna uh tawh kizui-in gim kong pia ding hi. Note kong zah kei ding a, zong kong khasiat kei ding hi. A muhdahhuai na gamtatnasate uh tawh kizui-in gim kong pia ding a, tua ciangin Topa ka hih lamtak na hong thei ding uh hi,” a hong ci hi. Topa Pasian in a gen thu in: “Note’ tungah haksatna khat khit khat a banbanin hong tung thuahthuah ding hi. A beina hong tungta hi. Note a man na hita uh hi. Israel gam sungah a teng note’ beina ding hong tungta ding hi. Mualsang dawn citeng a biakna munte-ah lungdamna om nawn loin buaina bek a omna ding hong naita hi. A sawt loin ka hehna thu na thuak ding uh a, na gamtatnasate uh hangin thu hong khenin, a muhdahhuai na gamtatnate uh hangin gim kong pia ding hi. Note kong zah kei ding a, zong kong khasiat kei ding hi. A muhdahhuai na gamtatnasate uh hangin gim a hong pia ding ka hi hi. Tua ciangin Topa ka hihna le note tungah gim a hong piapa ka hihna na thei ding uh hi. “Siatna ding hun hong tungta hi. Na ngongtatna uh khang a, na kiphatsakna uh lian hi. Migilote’ hauhna le lungmuannate haksa loin beimang ding hi. A hun hong tungta a, a ni hong naita hi. Mi khempeuh tungah ka hehna hong tungta ding ahih manin sumlei sumzuak nasepnate a kimanna om nawn lo hi. A neihsa a zuakkhia pa in a nuntak sungin a zuaksa van ngahkik lo ding hi. Mi khempeuh tungah hehna hong tung ahih manin a mawhna hangun kuamah nungta lo ding uh hi. “Amaute in gal peengkul tum uh a, a vekpi-un kiging uh hi. Ahi zongin mi khempeuh tungah ka hehna tungkim ding ahih manin galsim dingin kuamah kuankhia zo lo ding hi. Khua pualamah galkidona om a, khua sungah cinatna le gilkialna om hi. Gamlak a om khempeuh gal sungah si ding uh a, khuasunga om khempeuh cina le gilkialin si ding uh hi. Vakhu lau bangin mi pawlkhatte in mualtung tuh ding uh a, ahi zongin amau’ mawhna hangin si veve ding uh hi. Mi khempeuh’ khut zaw dakdakin, a khuk uh ling kelkel ding hi. Amaute in dahna limin puanhampi silh ding uh a, pumlingawp ding uh hi. A sam uh kimettolsak ding a, a mindai ding uh hi. Topa’ hehna amau’ tungah a tun ni ciangin, a ngun a khamte un amaute suahtak thei lo ahih manin, a ngun a khamte uh nin bangin kongzing lakah paai ding uh hi. A gilkial uh ciangin zong an bangin tuate ne thei lo uh hi. Ngun le khamte in mawhna sungah amaute tumpihzaw hi. Amaute in a kiphatsakpih uh kizepna a manphate, a muhdahhuai milim dingin a bawl uh hi. Tua ahih manin amaute’ hauhna pen amau mah in a kih dingin ka bawl hi. Amau’ nate, gamdang mite ka sutsak ding a, a neihsa khempeuh uh migilote sutsakin, ka ninsak ding hi. Ka biakinn a kinitsak ciangin ka kho kei ding hi. Gutate in ka biakinn luhin ninsak ding uh hi. “Na khuttum uh zial un. Bang hang hiam cih leh gam sungah mi kithahna dim a, khua sungah ngongtatna dim hi. Minam gilo pente hong paipihin na innte uh ka luahsak ding hi. Minam dangte in na biakna mun ngeite uh a nitsak ciangin mi thahat-a a kineite’ kimuanna beita ding hi. Lungkhamna na tuah uh ciangin lungnopna na zong ding uh a, ahi zongin na mu kei ding uh hi. Lungkhamna khat khit khat a banbanin na tuak ding uh a, thusia bekbek na zaza ding uh hi. Kamsangte kiangah thu na dong ding uh hi. Siampite in mite tungah hong hilh ding thu thei lo ding uh a, upate in hong gen ding mel thei lo ding uh hi. Kumpipa dahin thum ding a, ulian pen pa a cih nading thei loin omcipin, mi khempeuh lau-in ling ding uh hi. Na gamtatna uh tawh kizui-in gim kong pia ding a, midangte tungah thu na khen bangun note tungah thu kong khen ding hi. Hih bangin kong hih ciangin Topa ka hih lamtak na thei ding uh hi,” cihna thu ahi hi. Salin ka om uh kum guk a phak kum, a kha gukna, a ni nga ni-in sala om Judah makaite tawh ka inn sungah thu genin ka tut laitakun, thakhatin Topa Pasian’ vangliatna ka sungah hong tum hi. Ka khuadak leh, mihing tawh a kibang pian khat ka mu hi. A kawng nuaisiah ding teng meikuang tawh kibang a, a kawng tungsiah ding teng sumsan kinawtngil tawh kibangin san heuhau hi. A khut ding tawh a kibang pian khat in hong sawkin ka samin hong man hi. Tua ciangin hih ka maang sungin Pasian’ kha in vanah hong lenpihto-in Jerusalem khuapi hong tunpih hi. Tua lai panin, Pasian a hehsuahna ahi milim a omna mun, biakinn tual sungnung lutna, leilu lam kongpi-ah hong paipih hi. Kuam sungah ka maang a ka muh bang teekin tua sanah Pasian’ minthanna vang ka mu hi. Amah in kei kiangah, “Mihing ahi Ezekiel aw, leilu lamah khuadak in,” hong ci hi. Kei zong ka khuadak leh, kongpi kianga biakna tau kiangah, Pasian’ hehsuahna milim ka mu hi. Tua ciangin amah in, “Mihing ahi Ezekiel aw, amaute’ gamtatnate na mu hiam? Israel mite in a bawl uh a muhdahhuai gamtatnate, ka mun siangtho panin a gamla semsemah kei hong nawhkhiatnate en in. Hihte sangin a mindaihuai zaw nangawn na mu lai ding hi,” a hong ci hi. Tua ciangin biakinn tual puanung lutna gei-ah hong paipih a, tua lai-ah kulh a vanna mun khat hong lak hi. Amah in, “Mihing ahi Ezekiel aw, hih kulhpi tovang in,” a hong ci hi. Kei zong kulh ka tovang a, kongkhak khat ka tuak hi. Tua ciangin amah in, “A sungah tum inla, a muhdahhuai a gamtatnate uh va en in,” hong ci hi. Kei zong a sungah tumin ka khuadak hi. Kawm tung khempeuhah gul lim, adang ganhing ninte lim, le Israel mite’ biak ganhing khempeuh a kisuai ziazua ka mu hi. Tua lai-ah Israel minam makai sawmsagih na om a, tuate’ lakah Shafan’ tapa Jaazaniah zong na om hi. Amaute in paknamtui halna kuang khat ciat tawi uh a, paknamtui a kihalna khute van lamah kahto biaibuai hi. Tua ciangin amah in, “Mihing ahi Ezekiel aw, Israel mite a kimu lo munah a gamtatnate uh tu-in na mu hiam? Amaute in milim a dimna inn sungah biakna a bawl uh hi. Amaute in, ‘ Topa in hong mu lo hi. Topa in hih gam nusia khinta hi,’ ci-in paulap zong uh hi,” hong ci hi. Tua ciangin, “Hihte sangin a muhdahhuai zaw a gamtatna uh zong na mu lai ding hi,” hong cithuah lai hi. Tua ciangin leilu lama om biakinn kongpi-ah hong paipih a, Tammuz a cih uh pasian a sihna hangin dahin a kapin a om numeite a hong lak hi. Tua ciangin amah in, “Mihing ahi Ezekiel aw, na mu hiam? Hihte sangin a muhdahhuai zaw na mu lai ding hi,” hong ci hi. Tua ciangin biakinn tual sungnungah hong paipih hi. Tua lai-ah biakinn kongkhak gei, biakna taute le innliim kikal sanah mihing sawmnih le nga khawng na om a, biakna tau nungngatin nisuahna lam nga-in nisuak tung na bia uh hi. Tua ciangin amah in, “Mihing ahi Ezekiel aw, huate na mu hiam? Hih Judah gammite in na muhsa a muhdahhuai a gamtatnate uh tawh lungkim nai lo lai uh a, gam sung khempeuhah ngongtatna dimsak uh hi. Tua banah ka heh semsem nadingin hih bangin gamta uh hi. A siathei tawpin hih bangin kei hong simmawh bawlna hong thei in. Tua ahih manin amaute in ka heh mahmahna thuak ding uh a, amaute zah loin, zong ka khasiat kei ding hi. Amaute in a thaneih tawpun kei kiangah thu hong nget uh hangin amaute’ thungetna ka ngai kei ding hi,” a hong ci hi. Tua ciangin Pasian hong kiko a, “Hih khuapi a susia ding no mihingte hong pai unla, na hiam zat ciat ding uh zong hong keng un,” ci-in a sam hi. Leilu lam biakinn kongpi pualam panin thakhatin mihing guk hong pai-in hiam khat ciat hong tawi uh hi. Saihadial puan a silh, lai gelhna ding a tawi mi khat tawh zong hong paikhawm uh hi. A vekpi-un sumngo biakna tau gei-ah hong ding uh hi. Tua ciangin ama omnasa kherub-te’ tung panin Israel-te’ Pasian’ minthanna vang hong pai-in biakinn kongah hong om hi. Tua ciangin amah in saihadial puan a silh, lai gelhna ding a tawipa samin, “Jerusalem khuasung khempeuhah pai kawikawi inla, hih khuapi sungah a muhdahhuai gamtatnate a kisepna hangin dahin a lungkham mi khempeuhte’ taltangah ciaptehna va bawl in,” ci-in a sawl hi. Tua ciangin Pasian in a midangte kiangah, “Khuasung khempeuhah amah va zui unla, mi va that un. Kuamah hinkhawi kei unla, kuamah khasiat kei un. Puteek, nungak, tangval, numei, naupang dong takin va thatlum un la, ahi zongin a taltangah ciaptehna a nei peuhmah su kei un. Hih ka biakinn mahmah panin kipan pah un,” a cihna ka za hi. Tua ahih manin tua biakinn sungah a ding Israel makaite, kipatna-in a nei pah uh hi. Tua ciangin amaute kiangah, “Biakinn ninsak un. A tualtengah misi luanghawm dimsak un. Tu-in kipan un,” ci hi. Tua ahih ciangin amaute kuankhia-in khua sungah mi thah ding a kipan uh hi. Tua bangin mi a kithah laitakin keimah guak ka om hi. Kei zong lei-ah bokin, “Topa Pasian aw, Jerusalem tungah na hehna hangin Israel mi a omlaisun khempeuh that mangkhin ding na hi hiam?” ci-in ka kiko hi. Tua ciangin amah in hong dawng a, “Israel mite le Judah mite’ mawhna nak liat mahmah hi. Gam sung khempeuh mi thahna tawh kidimsak uh a, Jerusalem khuapi, siatna namkim tawh kidimsak uh hi. Amaute in, ‘ Topa in i gam susia khin a, Topa in eite hong mu lo hi,’ ci uh hi. Tua ahih manin amaute ka zah kei ding a, kuamah ka khasiat kei ding hi. Amaute’ gamtatna, amaute’ tung mah ka tusak ding hi,” hong ci hi. Tua ciangin saihadial puan silhin lai gelhna a tawi mipa in Topa’ kiangah thu hong zasakkik a, “Nong sawl bangin ka sem khinzo hi,” hong ci hi. Tua ciangin kherub-te’ lu tung sanah a om a kuum ka et leh sapfaia suangmanpha tawh a kibawl kumpi tokhom bang pian khat, tua a kuum tungah a om hi. Tua ciangin Pasian in saihadial puan a silhpa kiangah, “Na khut dimin mei-am tawi inla, kherub nuai-a om leengpeite kikalah va om in. Tua ciangin khuapi tungah a mei-amte theh in,” ci-in a sawl hi. Kei zong ama pai ka en gige hi. Tua ciangin mipa a pai laitakin kherub-te pen biakinn leitaw lamah na ding uh a, biakinn tual sungnungteng dimin meiipi a kai hi. Kherub-te’ tung panin Topa’ minthanna vang hong paikhia-in biakinn kongah va om hi. Tua ciangin biakinn sungah meiipi hong kai a, biakinn tualah Topa’ minthanna vang taang zeizai hi. Kherub-te’ khazap ging pen biakinn tual puanung ciang dongah kiza a, Vanglian Pasian a pau ciangin a awging tawh kibang hi. Kherub-te’ nuai-a om leengpeite’ kikal panin mei a la dingin Topa in saihadial puan silhpa a sawl ciangin, tua mipa zong va pai-in leengpei khat gei-ah a va ding hi. Tua ciangin kherub khat in a khut zanin amau’ kikal-a om meikhuk sawkin mei-am pawlkhat la a, saihadial puan a silhpa’ khut sungah a koih hi. Saihadial puan a silhpa zong tua mei-amte tawi-in a paikhia hi. Tua kherub-te in a kha nuai ciat uhah mihing khut tawh a kibang nei ciat uh hi. Tua kherub-te’ gei-ah leengpei khat ciat omin, tua leengpeite suangmanpha bangin tee hi. Tua leengpeite a pianzia kibang kim a, leengpei khat in a kikantanin pei dang khat ciat nei thuah uh hi. Tua kherub-te a pai ciangin kihei kul loin a utna lam peuhpeuh uhah pai thei uh hi. A pai nading lam a nga a pei paina-ah adangte in zui-in kihei tuan lo uh hi. A leengpei kualte a pei kanna khaute le a pei buppi dimin mittang om hi. Hih leengpeite pen maang ka muh masakna sungate mah tawh a kibang ahi hi. Tua kherub-te in maitang li ciat nei uh hi. A maitang khatna bawngtal maitang, a nihna mihing maitang, a thumna humpinelkai maitang, a lina muvanlai maitang tawh kibang hi. Hih kherub-te pen Khebar Gun gei-a ka muh ganhingte mah ahi hi. Tua ciangin hih kherub-te leengto uh a, amau a kin uh ciangin a leengpeite in zong a zui uh hi. A leeng dingin a kha a zal uh ciangin zong leengpeite in zui lai uh hi. Kherub-te a khawl ciangin leengpeite khawl a, kherub-te a leen ciangin leengpeite in zong a zui uh hi. Bang hang hiam cih leh tua leengpeite pen kherub-te’ khutnuai-ah a om ahi uh hi. Tua ciangin biakinn kong panin Topa’ minthanna vang paikhia-in kherub-te’ tung sanah va om hi. Tua bangin ka et laitakin kherub-te in zong a kha uh zalin leilak panin leengto uh a, leengpeite in zong a zui uh hi. Biakinn nisuahna lam kongpi-ah khawl uh a, amaute’ tung sanah Israel Pasian’ minthanna vang zong a khawl hi. Hih kherub-te pen, Israel Pasian a kumpi tokhom tawh a pua, Khebar Gun gei-a ka muhte mah hi, ci-in ka thei hi. Amaute in maitang li, kha li, le a kha nuai ciat uhah mihing khut tawh a kibang khut nei ciat uh hi. Amaute’ maitang pen Khebar Gun gei-a ka muhsa maitangte mah tawh kibang teekteek a, a pai uh ciangin a mailam ciat mahah tang takin a pai thei uh hi. Tua ciangin Pasian’ kha in biakinn nisuahna lam kongpi-ah hong paipih hi. Tua kongpi gei-ah mihing sawmnih le nga na om a, tuate lakah minam makai ahi nihte, Azzur’ tapa Jaazaniah le Benaiah’ tapa Pelatiah-te zong na kihel uh hi. Pasian in kei kiangah, “Mihing ahi Ezekiel aw, hih mite pen khuapi sungah thu hoih lo a gen migilote ahi uh hi. Amaute in, ‘Inn lam ding hun nai lo hi. Hih khuapi pen an huanna beel tawh kibang hi. Eite pen beel sunga kihuan sa tawh i kibang hi,’ ci uh hi. Tua ahih ciangin Ezekiel aw, hih mite tungah thukhenna thu gen in,” a hong ci hi. Ka sungah Topa’ kha hong lutin mite tungah hih bangin thugen dingin hong sawl hi: “Israel mite aw, na thugente uh le na ngaihsutnate khempeuh uh ka thei hi. Hih khua sungah mi tampi tak that na hih manun kongzing khempeuhah si luanghawm kidim hi. “Tua ahih ciangin Topa Pasian ahi keimah in note kiangah kong gen thu in: Hih khuapi, an huanna beel tawh kibang hi, na cih uh man hi. Beel sunga om sa pen na thahsa uh misi luanghawmte ahi hi. Ahi zongin note ahihleh khuapi sung panin kong lawnkhia ding hi. Note in namsau na kihta uh hi. Ahi zongin namsau tawh note a hong sat ding mi kong paisak ding hi. Khuapi sung panin note hong lakhia-in gamdang mite’ khut sungah kong pia ding hi. Note a si dingin thu kong khen khin hi. Na gam sung uhah galin na si ding uh hi. Tua ciangin Topa ka hih lamtak mi khempeuh in hong thei ding uh hi. Note, beel sunga a om sa bang na hi kei uh hi. Hih khuapi in note hong hu lo ding hi. Israel gam sung na omna peuhpeuh uhah gim kong pia ding hi. Note’ kiima om minam dangte’ ngeinate zui-in na om laitakun kei pen Topa ka hihna thu, na palsat uh thukhamte keima thukham ahihna, le na zuih loh uh thupiaknate keima thupiak ahihna na thei ding uh hi, ci-in gen in,” a hong ci hi. Tua bangin thu genin ka om laitakin Benaiah’ tapa Pelatiah hong dinsih hi. Kei zong leilakah boksukin ka kiko a, “Topa Pasian aw, Israel gam sungah a omlai mi khempeuh thah khit sawm na hi hiam?” ka ci hi. Topa in kei tungah thu hong gen a, “Mihing ahi Ezekiel aw, Jerusalem khuasunga teng mite in nang le salin a om na mipihte’ thu gen uh a, ‘Salin a om mite pen Topa tawh kigamla om lua khinta uh hi. Amah in eima luah dingin hih gam hong pia khinta hi,’ ci uh hi. Tua ahih ciangin na salpihte kiangah hih bangin keima thugente va gensawn in: A gamlapi gamah a teng dingin puakhia-in, gam dangah a thehthang pa pen keimah ka hi hi. Ahi zongin amaute’ omna gam dangah tawlkhat sung bek kei a hong bia dingin ka omsak hi. “Tua ahih manin Topa ahi keimah in amaute kiangah ka gen thu va gen in. Amaute ka thehthangna gam panin khawmkikin, amaute tungah Israel gam ka piakik ding hi. Amaute hong ciahkik ciangin a nin nate khempeuh le a muhdahhuai milimte khempeuh a nilkhia ding uh ahi hi. Amaute tungah lungsim thak le ngaihsutna thak ka pia ding hi. Amaute’ suang lungtang paihkhiat sakin mihing lungtang ka guan ding hi. Tua ciangin amaute in ka thukhamte zui-in ka thupiak khempeuh citakin mang ding uh hi. Amaute pen keima mi hi-in, kei pen amaute’ Pasian ka hi ding hi. Ahi zongin a nin a muhdahhuai milim a bia nuamte ahihleh gim ka pia ding hi. Amau’ gamtatna tawh a kizui-in gim ka pia ding hi, Topa Pasian ahi keimah in hih thu ka hong gen hi,” a hong ci hi. Tua ciangin a leeng dingin kherub-te in a kha uh zal a, a leengpeite in zong a zui hi. Israel-te’ Pasian’ minthanna vang amaute’ tung sanah a om hi. Tua ciangin Topa’ minthanna vang zong khuapi sung panin paikhia-in khuapi nisuahna lamah a om mualtungah a om hi. Tua ciangin ka maang sung mahin Pasian’ kha in hong leenpihin Babylon gamah salin a omte kiang hong tunpih hi. Tua ciangin ka maangmuhna hong beita a, Topa in kei hong muhsaksa thute khempeuh, salin a om mite kiangah ka gen hi. Topa in kei kiangah thu hong gen a, “Mihing ahi Ezekiel aw, a lehdo thei mite lakah a teng na hi hi. Amaute in mit nei napi-in khua mu lo uh hi. Amaute pen a lehdo thei mite ahihna hang uh ahi hi. Ezekiel aw, tu-in galtai dingte’ gamtat bangin na van puak ding guang inla, suntangpi-in paikhia in. Na omna panin na paikhiatlam mi khempeuh musak in. A lehdo thei mi ahih tei hangun a thu theithei kha ding uh hi. Khuavak lai-in mite’ muhin salin a pai dingin na van guang inla, nitak ciangin salin a pai ding bangin na paikhiatna mite musak in. Tua bangin amaute in hong et laitakin na kawm sulet inla, tua vang panin na van lakhia in. Amaute’ muhin na van na liangko-ah kisuanto inla, na pai nading mun na muh theih loh nadingin na mit tunsa-in khuamial lakah paikhia in. Hih bangin na gamtatna pen Israel mite a dingin hilhkholhna khat hi ding hi,” a hong ci hi. Kei zong Topa’ hong sawl bangin ka gamta hi. Galtaite’ hih ding bang teekin tua sunin ka van guangin, tua nitak khuamial ciangin ka khut tawh kawm ka sulet hi. Amaute’ muh mahin ka liangko-ah van kisuanin ka paikhia hi. A zingsang ciangin Topa in kei kiangah thu hong gen a, “Mihing ahi Ezekiel aw, a lehdo thei Israel mite in na gamtatna thu nang hong dot uh ciangin, Topa Pasian ahi keimah in amaute kiangah ka gen thu tu-in gen in. Tua thu pen Jerusalem khuasung a uk ulianpa le Jerusalem khua sungah a teng mi khempeuhte a’ ding ahi hi. Na gamtatnasate pen amaute tungah a thupiang ding lahna lim ahihna thu gen in. Amaute pen a kiman, sal a suak ding mi ahi uh hi. Amaute a uk ulianpa in khuamial lakah a liangko-in ama van pua-in paikhia ding hi. Ama paikhiat nadingin amaute in kulh tawhvang sakin tua panin amah suakta ding hi. Amah in a mai humcip ding ahih manin a paina ding mun mu thei lo ding hi. Ama pai nading munah ka ngenthang ka zak ding a, amah awk ding hi. Tua ciangin Babylon khuapi-ah amah ka paipih ding a, a khuapi a mu lopi-in tua lai-ah a si ding hi. A ulianpihte, a thulamlakte, le amah a cingte, mun citengah ka thehthang ding a, amaute a that dingin namsau ka nungdelhsak ding hi. Minam dangte’ lak gam dangah amaute ka thehthang ciangin Topa ka hihna thu amaute in hong phawk ding uh hi. Ahi zongin galsung, kialpi, le natna sung panin tawmkhat ka suaktasak ding a, minam dangte’ lakah a omna mun panun a gamtatnasate uh a muhdahhuaina phawkin, kei pen Topa ka hihna thu hong thei ding uh hi,” a hong ci hi. Topa in kei kiangah thu hong gen a, “Mihing ahi Ezekiel aw, lau mahmahna tawh a ling kawmsa-in an ne-in tui dawn in. Hih bangin na gamtatna pen, amaute’ gam a omlai ahi Jerusalem khuamite tungah Topa Pasian’ thugenna ahihna thu va gen in. Amaute in launa linna tawh an ne-in tui dawn ding uh hi. Amau’ gam sungah a tengte a hoih gamtat khat beek om lo ahih manin, a gam sung uhah a om mi khempeuh kipai khiatpihmang ding hi. Mihing a dimna khuapite kisusia ding a, gam sung khempeuh gamkhing suak ding hi. Tua ciangin Topa ka hihna thu hong thei ding uh hi,” a hong ci hi. Topa in kei tungah thu hong gen a, “Mihing ahi Ezekiel aw, bang hangin, ‘Hun beibei a, genkholhnate a tung om lo hi,’ cih paunak pen Israel mite’ lakah zat belin kinei ahi hiam? Tua ahih ciangin Topa Pasian ahi keimah in tua thu tawh kisai-in ka thugenna amaute kiangah va gen in. Hih paunak ka beisakta ding a, Israel mite in genin a nei nawn kei ding uh hi. Tu-in a hun a naina le genkholhnate a manin a tunna ding thu amaute kiangah va gen in. Israel mite lakah maangmuhna man lo ahi a, genkholhna man lo ahi zongin om nawn lo ding hi. Topa ahi keimah in amaute tungah thu ka gen ding a, ka gen bangin tung takpi ding hi. Tu-in zekai nawn lo ding hi. A lehdo thei mihingte aw, hih dingin ka gen bangin nomau’ nuntak sung mahmahin ka tungsak ding hi. Topa Pasian ahi keimah in thu ka gen khinzo hi,” a hong ci hi. Topa in kei tungah thu hong gen leuleu a, “Mihing ahi Ezekiel aw, na maangmuhnate le na thugen kholhnate pen mailam hun saupi ciangin a hong piang pan dingin Israel mite in ngaihsunkha uh hi. Tua ahih ciangin Topa Pasian ahi keima thugenna: ‘Zekai cih om nawn lo ding a, ka gensa bangin tung ding hi. Topa Pasian ahi keimah in ka gen khinzo hi, ci hi,’ ci-in gen in,” a hong ci hi. Topa in kei tungah thu hong gen a, “Mihing ahi Ezekiel aw, Israel kamsangte mawhsakna gen in. ‘ Topa’ thugen ngai in,’ ci khemin amau’ lungsim bangin thu a gente’ tungah gen in. Topa Pasian’ thugen hih bang ahi hi: Hih kamsang haite in gimna thuak ding uh hi. Amaute in amau’ lungsim bangin thu gentawmin, maangmu kineih uh hi. Israel mite aw, na kamsangte uh ahihleh innsia lakah a om ngiate tawh kibang uh hi. Amaute in kulh a kicipna munte cing lo uh a, a kicimte ciangkik lo uh ahih manin Topa’ ni-in gal hong tun ciangin Israel-te hu zo lo ding uh hi. Amaute’ maangmuhnate zuaupi hi a, a thugen kholhnate uh zong zuauthu ahi hi. Keimah in amaute sawl lo napi-in amaute in, ‘ Topa in hih bangin ci hi,’ ci khem uh hi. Tua bang hinapi-in amaute’ thugente ka tunsak ding a lamen lai uh hi. Tua ahih manin amaute kiangah ka gen thu in: ‘Na maangmuhnate uh zuaupi hi a, na thugen kholhnate uh zuauthu ahi hi. Note kiangah keimah in thu hong gen lo napi-in keima gen bangin na gen uh hi,’ ka ci hi,” a hong ci hi. Tua ahih ciangin Topa Pasian in amaute kiangah, “Na thugente uh zuaupi hi a, na maangmuhnate uh zuaupi ahi hi. Tua ahih manin note kong langpan’ hi. Zuauthu tawh maangmu kineihin, mite a khialh theih nadingin zuauthu a genkhol no kamsangte gim a hong pia ding ka hita hi. Ka mite a kikhop uh ciangin tuate lakah na kihel kei ding uh a, Israel mite’ min a kigelhna lakah note’ min kigelh lo ding hi. Na gam uhah na ciahkik ngei nawn kei ding uh hi. Tua ciangin Topa Pasian ka hihna thu na hong thei ding uh hi. Bang hang hiam cih leh thu hoih lo napi-in hoih hi, ci khemin ka mite na makaih khial uh hi. Ka mite in kulh dingin suang a cian uh ciangin no kamsangte in a tungtham buan tawh na zut uh hi. Tu-in na kulh zut uh kicim hi. Tu-in guahpi ka zusak ding a, gialpite in tua kulh kha-in huihpi hat in mutgawp ding hi. Tua bangin kulh a kicip ciangin na kulh zut uh bang phattuamna om ahi hiam, ci-in mite in hong dong ding uh hi. “Tua ahih manin Topa Pasian ahi keima thugen in: Ka hehna tawh huihpi nungsakin, guahpi zusakin, gialpi kiasakin, tua kulhpi ka susia ding hi. A tungtham na zut uh kulh sukhamin, thehthangin, a bul dawksak ding a sawm ka hi hi. Tua bangin ka suksiat ciangin note a hong denglum ding hi. Tua ciangin Topa ka hihna thu mi khempeuh in hong thei ding uh hi. Tua bangin kulh le tua kulh a zut note in ka hehna na thuak ding uh hi. Tua ciangin keimah in, ‘Tu-in kulh maimangta a, tua mah bangin kulh a zut mite - thu hoih lo napi-in thu hoih hi, ci-in Jerusalem a lungmuan nadingin thu a gen kamsangte zong bei khinta hi,’ ka ci ding hi. Topa Pasian ahi keimah in hih thu ka gen hi,” a hong ci hi. Tua ciangin Topa in, “Mihing ahi Ezekiel aw, na mite’ lakah a om, a thugen ding uh a phuaktawm numeite en in. Amaute’ gamtatna hangin mawhsakna thu gen inla, Topa Pasian ahi keimah in amaute tungah ka gen thu hih bangin gen in: No numeite in gimna na thuak ding uh hi. Mi khempeuh in a khutah a bulh ding uhleh a lu tungah a khip ding uh aite na bawl uh a, tua nate in mite’ lungsim uk hi. Note’ phattuam nadingin sih nading le hinna ding vangliatna thu, ka mihingte tungah na zang nuam uh hi. Mangbuhham khut khat dim le anlum them tawmkhat na ngah theih nadingun ka mite’ mai-ah kei nong minsiasak uh hi. A si dingin a kilawm lopite na that nuam uh a, a hing dingin a kilawm lopite na hingsak nuam uh hi. Tua bangin ka mite tungah zuauthu genin, amaute in note’ thugen hong um uh hi. “Topa Pasian ahi keimah in ka gen thu in: Sihna le hinna ukna-in na zat uh na aite uh ka deih kei hi. Note’ khut panin tuate hong bawhkhiat sakin, ukcip dingin na hanciam uh mite ka khahkhia ding hi. Na ai khipte uh zong hong hawkkhiat sakin note’ khutsung panin ka mite ka suaktasak paisuak ding hi. Tua ciangin Topa ka hihna thu na hong thei ding uh hi. Keima gen hi lo napi-in na thuzuau genteng uh tawh mihoihte na lunggimsak uh a, migilote a sihtheih nadingun hong kihei loh nading lamah na lehhanthot zawsop uh hi. Tua ahih ciangin tu-in na zuau maangmuhnate uh le mi lam a khialsak thei na thugen kholhnate uh beita ding hi. Note’ khutsung panin ka mite ka honkhia ta ding a, tua ciangin Topa ka hihna thu na hong thei ding uh hi,” a hong ci hi. Tua ciangin Israel mi makai pawlkhat kei kiangah hong pai-in Pasian’ deihna bang ahi hiam, ci-in hong dong uh hi. Tua ciangin Topa in kei kiangah thu hong gen a, “Mihing ahi Ezekiel aw, hih mite in milim bia uh a, milim in mawhna sungah amaute tunpih hi. Amaute’ thu theihnopte a gen dingin hong um uh ahi uh hiam? Tua ahih ciangin Topa Pasian ahi keimah in amaute tungah ka gen hih thute gen in: Milim bia-in mawhna sungah milimte kitunsak a, tua khit ciangin kamsangte tungah thu a dong dingin a hong pai Israel mi peuhmah in keima thudawnna kam ngah ding uh hi. Tua thudawnna pen a milim tampite uh in a zak dingun a kilawm dawnna hi ding hi. Tua milimte in keima kiang panin Israel mite paikhiatpih uh a, ahi zongin tua bangin ka dawnna tawh kei lamah ka mite ngahkik dingin ka kilamen hi. “Tua ahih ciangin Topa Pasian ahi keima thugen pen Israel mite tungah hih bangin gen in: Hong kihei kik unla, na milimte uh nusia un. Israel mite khat peuhpeuh ahi a, Israel mite lakah a om gamdang mi khat peuhpeuh ahi zongin, kei kiang panin paikhia-in milim bia a, milim in mawhna sungah a tunpih khit ciangin kamsangpa tungah thu a dong dingin a pai leh, Topa ahi keimah in ama thudotna ka dawng ding hi. Amah nialin, midangte’ etteh dingin ka bawl ding hi. Keima mite lak panin amah ka lakhia ding hi. Tua ciangin Topa ka hihna thu na thei ding uh hi. Kamsang khat peuhpeuh in khemna tawh a man loin thu hong dawn leh, Topa ahi keima khem hi ding hi. Israel mite lak panin tua kamsangpa ka lakhia ding hi. Kamsangpa le kamsang thu a dong pa a gim thuakna uh kibang ding hi. Israel mite in kei hong nusiat loh nading le a mawhna uh tawh a kinitsak loh nadingun hih bangin ka hih ding hi. Amaute pen keima mi hi ding uh a, kei pen amaute’ Pasian ka hi ding hi. Topa Pasian ahi keimah in hih thu ka gen hi,” a hong ci hi. Topa in kei kiangah thu hong gen a, “Mihing ahi Ezekiel aw, gam khat peuhpeuh in khialhna bawlin kei tungah hong thuman kei leh keimah in a annek dingteng uh ka susia ding hi. Kialpi tungsakin a mihing a ganhingin ka siasak ding hi. Noah, Daniel, le Job, hih mihing thumte nangawn, amaute’ lakah a om hileh, amaute’ hoihna in amau’ nuntakna ciat bek mah suahtakzo ding uh hi, Topa Pasian in ci hi. Mite a that dingin gamsa kihtakhuaite khahkhia-in, kuamah khual a zin ngam lo dingin tua gam sung a lauhuai-in om leh, tua gam sungah hih mihing thumte nangawn a om bang hileh, amaute’ tanute le tapate nangawn uh suahtak zo loin, amaute’ nuntakna ciat bek mah suahtakzo ding uh a, tua gam pen gamkhing suak takpi ding hi, ci-in a nungta Topa Pasian ka kiciam hi. Tua gam sungah gal tungsakin, mihing ganhing a siaksiang dingin a husia galhiamte kizang leh, tua sungah hih mihing thumte a om hangin amau’ pumpi ciat simloh, amau’ tate nangawn suahtakzo tuan lo ding hi, ci-in a nungta Topa Pasian ka kiciam hi. Tua gamah pulpi tungsakin, ka hehna tawh mihing ganhing sisak leng, tua sungah Noah, Daniel, le Job-te a om ahi zongin, amaute’ hoihna in amau’ nuntakna ciat bek a hutzawh cih loh, amaute’ tate nangawn huzo tuan lo ding hi, ci-in a nungta Topa Pasian ka kiciam hi. “Topa Pasian’ thugen hih bang ahi hi: Mihing ganhing a sumai dingin gimna nasia pen li ahi gal, kialpi, a kihtakhuai gamsate, le natna, Jerusalem-ah ka tungsak ding hi. A tanute a tapate a paikhiatpih dingin mi khat peuhpeuh a suaktazo kha a om a, nang kiangah hong pai leh, amaute’ omzia na en in. Amaute’ gitlohna zia na mu ding a, Jerusalem gim ka piakna a kilawm a thuman mah ahihna na phawk ding hi. Amaute’ gitlohna zia na muh ciangin ka hihnate khempeuh a kilawm mah ahihna na phawk ding hi. Topa Pasian in thu hong gen khinta hi,” a hong ci hi. Topa in kei kiangah thu hong gen a, “Mihing ahi Ezekiel aw, leenggui pen singkung tawh bangci kiteh ding ahi hiam? Tulaka om singkungte tawh tehna-in leenggui hiangte banga kimang ahi hiam? Leengguite na-in kizang thei ahi hiam? Vankhaina-a zat ding singzum khet dingin kimang thei ahi hiam? Meitawhna ding bekin kimang hi. A mong tuak a kattum khit ciangin a omlai a zulkatteng, bangin kimang nawn ahi hiam? A kat ma-in zong bangmahin kimang lo ahih manin, kangin a vom khit ciangin a kimanna om lo semsem hi. “Tua ahih ciangin Topa Pasian in hih bangin ci hi: Tulaka om singte in kimanna nei hi. Ahi zongin leengguite kila-in a kihaltum mah bangin Jerusalem-a teng mite lakhia-in gim ka pia ding hi. Mei panin khatvei a suahtak khit hangun tu-in mei in amaute kangtum ding hi. Amaute gim ka piak ciangin Topa ka hihna thu na hong thei ding hi. Kei’ tungah amaute hong citak lo uh ahih manin gam sung khempeuh gamkhing ka suaksak ding hi, Topa Pasian in ci hi,” a hong ci hi. Topa in kei tungah thu hong genkik a, “Mihing ahi Ezekiel aw, a muhdahhuai-in a gamtatna thu Jerusalem’ tungah gen in. Topa Pasian in Jerusalem tungah ka gen hih thute gen in: Jerusalem aw, nang pen Kanaan gam panin a piang na hi hi. Na pa pen Amor mite hi a, na nu pen Hit mite ahi hi. Nang na suah lai-in kuamah in hong don lo hi. Na lai hong kitansak lo a, hong kisil lo a, ci tawh zong hong kizut lo a, puan tawh zong hong kitun lo hi. Hihte khempeuh a hong hih dingin kuamah in nang hehpihna lungsim hong nei lo hi. Na suah lai-in kuamah in nang hong it lo ahih manin gamlakah nang hong kipaidak lel hi. “Tua ciangin na kiangah kong paikha a, sisan naisan lakah na kitomtom kong mu hi. Tua bangin na om laitakin na sih loh nadingin thu kong pia hi. Singkung hoih bangin nang kong khangtosak hi. Nang cidamin nong khangto a, nungak nong suak hi. Na nawite zong hoihtak mahin hong bawk a, na mul zong hong po ta hi; ahi zongin guaktangin na om hi. “Nang kong muhkhak kik ciangin pasal nei thei ding hun na hita hi. Na pum guakin a om kimlai, ka puan tawh kong khuh a, na zumhuaina-teng hong seelsakin, tenpih dingin kam kong ciam hi. Kong kamciamna tangtung sakin nang pen keima-a’ nong suak hi, Topa Pasian in ci hi. Kei zong tui la-in na tunga si baangteng kong sawpkhiatsak a, oliv thau tawh kong zut zol hi. Puanphan kizem hoihte tawh nang hong zemin, savun hoihpen tawh a kibawl khedap hong bulhsakin, saihadial puan hong khimsakin, nai puantungsilh kong silhsak hi. Kizepna a manphate nang kong pia a, tau hong butsakin khainiang kong oksak hi. Nakbahte, bilbahte, le na khuk ding kumpi lukhu hoih kong guan hi. Tua bangin kham le ngun kibawl kizepnate tawh na kizem a, saihadial puan, nai puan, le a kiphan a kizem puante bek na silh tawntung hi. Annel hoihpen pawl a kibawl anlum ne-in, nek ding khuaizu le oliv thaute na kitasam ngei kei hi. Na hoihna a kigen thei lo zahin hong om a, kumpinu na suak hi. A paubaang het lo dingin nang hong bawl ka hih manin gam khempeuhah na melhoihna kithang kawikawi hi, Topa Pasian in ci hi. “Ahi zongin na melhoihna le na minthanna a sia lamin zangin, na tuah peuhpeuh luppih ding zolna-in na zang hi. Na puan pawlkhatte, na biakna mun zep nadingin na zang a, numei paktat bangin mi citeng tungah na pumpi na pia hi. Nang kong piaksa kham le ngun kibawl kizepnate, pasal limin na bawl a, tuate tawh paktatna na gamta hi. Nang ka hong piak, a kizem a kiphan puan hoihte la-in milimte na silhsak a, nang ka hong piak oliv thau le paknamtuite, milim biakna-in na zang hi. Na nek dingin a limci pen annel, oliv thau, le khuaizu kong pia a, ahi zongin milim maipha zon nadingin biakna-in tuate na zang hi. “Tua ciangin kei tawh na neih na tanute le tapate la-in milim biakna-in haltum dingin na pia hi. Kei tungah na cihtak lohna thuneu lua sa a, milim biak nadingin ka tate piathuah lai na hi hiam? Hih bangin numei paktat nuntakna tawh a mindaihuai-in na om laitakin na neulai thu, guaktangin na omlai, sisan naisan lakah na kitomtom lai thu na phawkkha kei hi. “Topa Pasian in hih bangin ci hi: Gimna na thuak ding hi. Hih bang siatna nam khempeuh na gamta khin a, lam gei khempeuhah milim biakna ding mun bawlin, paktatna na gamta hi. Na melhoihna beelmang na kizutnelh hi. Na kimuhpih peuhpeuh tungah na pumpi na kipia a, a ni ni-in na paktatna na khan semsem hi. A lan mahmah na veng Egypt mite na luppih a, na paktatna tawh kei nong hehsak hi. “Tu-in nangmah gim a pia ding le na nopsaknateng a lakhia dingin ka khut ka liik khin hi. Nang hong mudahin, na gamtat hoih lohna hangin nang a hong hua Filistia mite’ khut sungah nang kong piazo hi. Bang hang hiam cih leh a dangte tawh lungkimzo nai lo na hih manin Assiria mite na nungdelh lai hi. Tuate tawh na paktat a, ahi zongin na lungkimzo nai sam kei hi. Sumbawl Babylon mite tawh na paktat a, ahi zongin tuate tawh zong na lungkimzo tuan nai sam kei hi. “Topa Pasian in hih bangin ci hi: A bangci lawmlawm na hi hiam? Zumna mel thei loin hih bangin na paktat hi. Kongzing citengah milim biakna ding mun na bawl a, paktatna na gamta hi. Ahi zongin numei paktat dangte bangin sum a ngah zong na hi kei hi. A pasal itzaw loin, gamdang mite tawh mawhna a bawl numei tawh na kibang hi. Numei paktatte sum tawh kiguai a, ahi zongin nang in na lunggulhte tungah letsong pia zawsopin, nang a hong luppih dingin mun khempeuh panin mi na guaizaw hi. Nang pen a tuampian numei paktat na hi hi. Kuamah in na tuaci gamtat nadingin hong zol lo hi. Nang tungah sum tawh guaihna hong kipia loin nang in na pia zawsop hi. Tua ahih manin a tuampian mahmah na hi hi. “Tua ahih ciangin a paktat Jerusalem aw, Topa’ thu ngai in. Topa Pasian in hih bangin ci hi: Nang in na puante suahkhia-in, numei paktat bangin na pumpi, na lunggulh mite le na milimte tungah kipia-in, milim biakna-in na tate that na hih manin na lawm luite khempeuh - na it hitaleh na muhdahte hitaleh a vekpi-in ka kaikhawm ding hi. Na kimkotah amaute omsakin, tua ciangin na puanteng kong hawkkhiatsak ding a, na guaktangin na omna ka ensak ding hi. Midangte tawh na mawhna hang le na mi thahna hangin thu kong khen ding a, ka hehna tawh sihna kong thuaksak ding hi. Na lunggulh mite’ khut sungah kong pia ding a, na paktat gamtatna munte le na milim biakna munte, amaute in susiagawp ding uh hi. Na puante le a manpha na kizepnate hong lakkhiat sakin, na guaktangin hong koih ding uh hi. “Amaute in mihonte hanthawnin, tua mihonte in suang tawh nang hong dengin, a namsau uh tawh hong satzan ding uh hi. Amaute in na innte hong haltum sakin, na gimthuakna, numei honpi ensak ding uh hi. Numei paktat na hihna kong khawlsak ding a, na mawhpih ding pasalte sum tawh na guaihna kong khawlsak ding hi. Tua ciangin ka hehna dam ding a, daitakin ka om ding hi. Na tungah ka heh nawn kei ding a, zong kong aam nawn kei ding hi. Na neu lai-a kong bawlna na mangngilh a, hih bang tengin na gamtatnate tawh kei nong hehsak hi. Tua ahih manin na gamtatna tawh kizui-in kong thuk hi. A muhdahhuai na gamtat dangte banah bang hangin hih paktatna gamta thuah na hi hiam?” Topa in ci hi. Topa in, “Jerusalem aw, ‘Tanu in a nu sun,’ cih paunak pen mite in nang tungah hong zang ding uh hi. Nang pen na nu’ ta taktak na hi hi. Na nu in a pasal le a tate mudah hi. A pasalte uh le a tate uh a mudah na sanggam numeite mah tawh na kibang hi. Nang le na sanggam numei ahi khuapi dangte in nu-in Hit mi nei-in, pa-in Amor mi na nei uh hi. Na unu pen leilu lama om Samaria le a khuaneute ahi hi. Amaute’ khekhap zui-in a muhdahhuai amaute’ gamtatnate bek tawh na lungkimzo nai kei lai a, tawmvei sungin na gamtatnate khempeuhah amaute sangin na siazaw hi. “Kei pen a nungta Topa Pasian ka hih takpi mah bangin kong cihin-ah: Nang le na khuaneute’ gamtatsiat zahin na sanggamnu Sodom le a khuaneute gamtatsia ngei nai lo hi. Na sanggamnu’ mawhna pen: Amah le a tanute in nek ding tampi nei-in nuamsa mahmahin, daitakin om uh ahih manin amaute kiphasak uh a, a zawng a cimawhte don lo uh hi. Amaute kihisakin ka deih loh nate gamta uh ahih manin, na theih mah bangin amaute ka nusia hi. Samaria in nangma gamtatsiat zah lang gamta lo hi. Na sanggamnu sangin gamtat siazaw mahmah na hih manin, nang le na sanggam numei dangte i etkak ciangin, amaute a mawh mahmah hinapi-in a mawh lo zah phialin hong kimu hi. Tu-in na mindainateng na thuak kul hi. Na sanggam numeite’ mawhna sangin nangma mawhnate naksiatzaw lua ahih manin nang kiang panin amaute a mawh lo tawh kibang phial hi. Na sanggam numeite a siangtho bangsak phial na hih manin zahla inla maizum in. “Ahi zongin, Sodom le a khuaneute, le Samaria le a khuaneute a cithei-in ka bawlkik ding hi. Tua mah bangin nang Jerusalem zong kong citheisakkik ding hi. Na gamtatnasate hangin na maizum ding a, tua na maizumna in na sanggam numei dangte maingalsak tuam ding hi. Na sanggam numei Sodom le a khuaneute, le Samaria le a khuaneute cithei kikin a ngei uh bangkik ding a, nang le na khuaneute zong na cithei kik ding uh hi. Na gamtat hoih lohna, na zumhuai gamtatnateng na thuak kul hi, Topa in ci hi. “Topa Pasian in hih bangin ci hi. Nang in i kamciamna le i thuciamna don lo na hih manin nangma gamtatna bangin nang tungah kong gamta hi. Ahi zongin na neu lai-a nang tawh i thuciamna lenkipin, a kimang tawntung ding thuciamna nang tawh ka bawl ding hi. Na unu le na naunu na ngahkik ciangin na gamtatnasa teng phawkkikin na mai a zum ding hi. Nang tawh i thuciamna sungah a kihel loh hangin amaute pen nangma tanu bangin hong om ding uh hi. Nang tawh ka thuciamna ka bawlpha ding a, tua ciangin Topa ka hihna thu na hong thei ding hi. Na gamtatnasa khempeuh kong maisak khit ciangin na gamtatnasa khempeuh na phawkkik ding a, maizum lua-in cih nading mel thei loin na om ding hi, Topa Pasian in ci hi,” a hong ci hi. Topa in kei tungah thu hong gen a, “Mihing ahi Ezekiel aw, Israel mite kiangah thugentehna khat gen inla, Topa Pasian in hih bangin ci hi, ci-in gen in: Muvanlai a gol mahmah, a khate zong golin a kizal deda khat om hi. Tua muvanlai in khaveng hoih mahmah nei hi. Lebanon Mual tungah va leengin taamtak kung khat a dawn va kuaitan a, sumbawlte’ omna gamah pua-in sumbuk bawlte’ khuapi sungah va koih hi. Tua ciangin Israel gam panin leengguino khat la-in, a khan theih nadingin tui a om tawntungna leihoih mun khatah a suan hi. Tua leengguino hong khangin a hiangpha leengguipi hong suak hi. A hiangte pen muvanlai lamah zaam a, a zungte in leisung thukpi-ah zung kha hi. Tua leenggui in hiang le teh tampi tak nei hi. “Tua ciangin a gol mahmah, a khate golin a mul a pha mahmah muvanlai dang khat a om hi. Tua ahih manin tua leenggui in, ama kisuannasa mun a tui a ngah sangin tui a tamzaw piazo ding, ci-in lametna tawh tua muvanlai lamah a zung kha-in a tehte zong tua lam mah a ngasak hi. Ahi zongin tua leenggui pen, a teh no-in, a gah gah thei-in leenggui lianpi a suah theih nadingin limtakin tui a ngah theihna mun leihoihna sungah a kisuan khinsa ahi hi. “Tua ahih ciangin Topa Pasian ahi keimah in ka dotnop thu pen: ‘Hih leenggui hingin hoihtakin khangzo ding ahi hiam? Muvanlai masa pen in zungbawhin, a gahte zutkhia-in, a hiangte kuaitanin, keutumsak ding hi lo ahi hiam?’ cihna ahi hi. Tua leenggui bawhkhiat nadingin thahatna ahi a, minam lianpi ahi zongin kisam lo hi. Hih leenggui pen a kisuan hi mah hi. Ahi zongin hingin khangzo ding ahi hiam? Nisuahna huihpi in a mutkhiat ciangin keutum ding hi lo ahi hiam? Tua a kisuanna munah keutum lel ding hi lo ahi hiam?” a hong ci hi. Tua ciangin Topa in kei tungah, “Hih a lehdo thei mite in hih thugentehna a khiatna a thei uh hiam, dong in. Jerusalem khua-ah Babylon kumpipa hong pai-in a kumpipa le a uliante manin Babylon-ah a ciahpihna thu gen in. Amah in kumpipa’ innkuanpih mite khat la-in, amah tawh thuciamna khat bawl a, ama tungah a thuman taktak nadingin kiciamna bawlsak hi. Tua gam a miliante ciahpih hi. Bang hang hiam cih leh tua minamte in lehdokik nawn loin, a thuciam bawlna uh a kizuihna ding a deihna ahi hi. Ahi zongin Judah Kumpipa in amah lehdo veve a, sakol galkap honpite a ngen dingin Egypt gamah mi paisim sak hi. A deihna bangin tangtung ding ahi hiam? Tua bangin a gamtatna tawh suaktazo ding ahi hiam? A thuciamna palsat napi-in gimthuak loin om thei ding ahi hiam? “Kei pen a nungta Topa Pasian ka hih mah bangin, kumpi tokhom tungah a tusak, Babylon kumpipa tawh a thuciamna palsat ahih manin Babylon gamah hih kumpipa si ding hi. Babylon mite in mi tampi a thah theih nadingun kan bawlin dum a tawh uh ciangin a thahat Faro’ galkap honpite nangawn in amah huh zo lo ding uh hi. Amah in a kiciamna le a thuciamna palsatin hih bangin gamta khin ahih manin, amah suakta ngei lo ding hi. “Tua ahih ciangin kei pen a nungta Topa Pasian ka hih mah bangin a zuih dingin keima min tawh a kiciam thukimna palsat ahih manin gim ka pia ding hi. Amah a awk theih nadingin ngenthang ka zak ding a, amah ka awksak ding hi. Kei tungah amah hong thutak lo ahih manin Babylon-ah paipihin tua lai-ah gim ka pia ding hi. A galkap muanhuai pente, gal sungah si ding a, a suakta sunte zong mun citengah kithehthang ding hi. Tua ciangin Topa ahi keimah in thu a gen ka hihlam na phawk ding hi,” a hong ci hi. Tua ciangin Topa Pasian in, “Keimah in taamtak sangpi a dawn khat la-in, a dawnngek khat ka satkhia ding a, mual sangpi dawn khatah ka suan ding hi. Israel mual sangpen dawnah suanin, a hiang zaai-in a gah luai ding a, taamtak lianpi khat suak ding hi. Tua tungah vasa nam khempeuh tawlnga ding a, bu bawlna munin a nei ding uh hi. Tua ciangin singkung sangte phukin, singkung neute a liansak pa, singkung hingte keusakin, singkung keute a hingkiksak Topa ka hihna thu gam sunga om singkung khempeuh in hong thei ding uh hi. Topa ahi keimah in hih thu ka gen khin a, hih dingin ka gen bangin ka gamta ding hi,” a hong ci hi. Topa in kei tungah thu hong gen leuleu a, “Israel gam sungah mite in zat belin a neih paunak, ‘A pate in leenggah thuk ne a, a tate’ ha kim,’ cihna pen bang a cihnopna ahi hiam? Kei pen a nungta Topa Pasian ka hih mah bangin kong genin-ah: Israel gam sungah hih paunak na zang nawn kei ding uh hi. Mi khempeuh keima a’ hi a, pate ahi a, tate ahi zongin keima-a’ ahi hi. A mawh mipa bek si ding hi. “Gentehna-in mi a hoih mahmah, a thuman, a diktat mi khat om hi. Amah in Israel mite’ milim biakte biakpih lo a, milim biakna pia lo ding, ci-in a kikhamna munah milim biakna sate zong ne lo hi. Midangte’ zi zong luppih dingin zol lo a, numei in nin a neih laitakin zong luppih lo hi. Kuamah khem lo a, kuama na zong sut lo hi. Sum leitawi a lapa in khapna van a apte zong piakik hi. Gilkialte an vakin, puan nei lote puan guan hi. A meet bekbek lunggulhna-in sum leitawi pia lo hi. Gamtatsiat ding ut lo a, mite’ thu a manin khensak hi. Amah in ka thupiakte mangin, ka thukhamte hoihtakin zui hi. Tua bang mi pen mihoih ahih manin nungta ding hi, Topa Pasian in ci hi. “Tua ciangin gentehna-in hih mihoih pa in tapa khat nei a, tua tapa in mi’ na gu-in mi that a, a pa’ gamtat ngei loh a siateng gamta hi. Amah in milim biakna pia lo ding a kici munah a kipia biakna sate ne a, midangte’ zite zolin luppih hi. Mizawng mi cimawhte khemin, mi’ na sut a, sum leitawi a lapa in khapna-in a piak nate piakik loin kemsuak hi. Milim bia-in a zumhuai-in gamta hi. A meet lunggulhna-in sum leitawi pia a, a meet zong a kilawm loin tampi tak la hi. Hih bang mipa nungta ding ahi hiam? Nungta het lo ding hi. Hih bangin a mindaihuaite khempeuh gamta ahih manin tuate’ hangin amah si ding hi. Ama sihna pen ama mawhna hang ahi hi. “Gentehna-in hih mihoih lopa in tapa khat hong nei hi. Tua a tapa in a pa’ gamtat hoih lohna teng mu a, a pa’ gamtat bangin gamta lo hi. Israel mite’ milim biakte biakpih lo a, a kikhamna munah biakna-in a kipia biakna sa zong ne lo hi. Midangte’ zi zol lo a, zong luppih lo hi. Kuamah bawlsia lo a, kuama na zong sut lo hi. Sum leitawi a lapa in a khapna van a apte zong piakik hi. Gilkialte an vak a, puan nei lote puan guan hi. Gamtatsiat ding ut lo a, a meet bekbek lunggulhna-in sum leitawi pia lo hi. Ka thukhamte zui-in ka thupiakte mang hi. Tua ahih manin hih mipa pen nungta ding a, a pa’ mawhna hangin si het lo ding hi. A pa in ahihleh mi’ na sutin, mite tungah a sia gamta tawntung hi. Tua ahih manin ama mawhna hangin amahmah si hi. “Ahi zongin, ‘Bang hangin a pa’ mawhna a tapa in thuak lo ding ahi hiam?’ nong ci kha ding uh hi. A tapa a hoih a manin a gamtatna hang ahi hi. Amah in ka thukhamte kemin hoihtakin zui hi. Tua ahih manin pel loin amah nungta ding hi. A si ding pa pen a mawh mipa ahi hi. Ta in pa’ mawhna thuak lo ding a, tua mah bangin pa in ta’ mawhna thuak lo ding hi. Mihoih pa in a hoihna thaman ngah ding a, migilo pa in a gitlohna thaman thuak ding hi. “Migilo khat in a mawh bawlna khawlin ka thukham zui hen la, a hoih a manin gamta leh, tua mipa si lo ding a, pel loin nungta ding hi. Ama mawhnasa khempeuh kimaisak ding a, amah a manin a gamtat manin nungta ding hi. Migilo khat a si ka muh ciangin a lungdam dingin hong ngaihsun na hi uh hiam? Ka lung dam het lo hi. Amah hong kisikin a nuntak ding pen keima deih ahi zaw hi. Ahi zongin mihoih khat in a gamtat hoihnateng khawlin, migilote’ gamtat bangin a mindaihuai gamtatsiate gamtat ding hong kipan leh, amah nungta paisuak ding ahi hiam? Nungta het lo ding hi. A hoih ama gamtatnasate kiphawksak lo ding hi. Ama cihtak lohna le ama mawhna hangin si ding hi. “Ahi zongin note in, ‘ Topa’ hihna zia man lo hi,’ na ci uh hi. Israel mite aw, ka thugen hong ngai un. Keima hihna zia a man loin ngaihsun na hi uh hiam? A man lo pen nomau’ ngaihsutna zia hizaw hi. Mihoih khat a gamtat hoih khawlin mawhna a bawl ciangin si ding hi. Ama sihna pen a gamtatsiatna hang ahi hi. Migilo khat a gitlohna panin khawlin a hoih a manin gamta leh ama nuntakna a suahtak ahi hi. Amah in a gamtatna phawkin a mawh bawlna khawl hi. Tua ahih manin amah si het lo ding a, nungta paisuak ding hi. Ahi zongin no Israel mite in, ‘ Topa’ hihna zia man lo hi,’ na ci uh hi. Israel mite aw, keima hihna zia man lo ahi zenzen hiam? A man lo pen nomau’ ngaihsutna zia hizaw hi. “Topa Pasian ahi keimah in note kiangah kong genin-ah: Israel mite aw, na gamtatnasa bang ciat un thu kong khen ding hi. Kisik kikin na gamtatsiatna khempeuh panun khawl unla, na mawhna hangun kisisak kei un. Na gamtatnasa uh mawhna khempeuh nusia unla, na lungsim uh le na ngaihsutna uh thaksuaksak un. Bang hangin no Israel mite si nuam na hi uh hiam? Kuama sih ding ka deih kei hi. Tua ahih manin na mawh gamtatna uh khawlin nungta un, Topa Pasian in ci hi,” a hong ci hi. Israel uliante hih bangin tamlawh in hong ci hi: Na nu uh humpinelkai tawh kibang hi. Humpinelkai dangte tawh kikhawlin, a note a khoi hi. A note khat thuhilh a, hong khangcing hi. Sabet zong hong siam a, mi hong ne hi. Mite in tua thu za uh a, gum sungah awksak uh hi. Bawm sungah khum uh a, Egypt gamah paipih uh hi. A pi’ lametnateng beita hi. A no dang khat pantah leuleu a, a khangcing khat a suah hi. Amah hong khangcing a, a dangte tawh kikhawl hi. Sabet zong hong siam a, mi hong ne hi. Kulhpite sugawp a, khuapite siasak hi. Hawk zelzel a, a za mite lau mahmah hi. Amah a hih dingin mite kikaikhawm uh a, mun khempeuh panin hong kuan uh hi. A ngenthang uh zak uh a, thangah a awksak uh hi. Bawm sungah khum uh a, Babylon kumpipa kiang a tunpih uh hi. Israel mualtung tengah ama hawkna a kizak nawn loh nadingin a khumcip uh hi. Na nu uh, luitui gei-ah a kisuan leenggui tawh kibang hi. Tui tampi ngah a, a teh, a gah, a pha hi. A gui hiangte hong lian a, kumpi ciangkhut hong suak hi. Leenggui hong khang a, van hong ban hi. A teh pha-in sang mahmah a, mi khempeuh in mu kim hi. Ahi zongin hehna tawh leenggui kizungbawh a, leilak kidenna hi. Nisuahna huihpi hong nung a, a gahteng keutumsak hi. A hiangte kikuaitan a, keu-in kihaltum hi. Tui om lohna lei keu gamah tu-in hih leenggui kituah hi. Hih leenggui mei in kang a, a hiang a gah kangtummang hi. A hiangte liankik nawn lo ding a, kumpi ciangkhut suakkik ngei nawn lo ding hi. Hih a tunga pen tamlawhna hi a, a kisa zelzel ngei khat ahi hi. Sal ka suah uh a kum sagih kum, a kha ngana, a ni sawm ni-in Topa’ kiang panin thu a dong dingin Israel makai pawlkhat ka kiangah hong pai uh hi. Tua ciangin Topa in kei tungah thu hong gen a, “Mihing ahi Ezekiel aw, Topa Pasian ahi keimah in amaute tungah ka gen, ‘Kei tungah thu a dong dingin hong pai na hi uh hiam? Kei pen a nungta Topa Pasian ka hih mah bangin note’ thudotin ka om het kei ding hi, ci-in gen in,’ hong ci hi. “Mihing ahi Ezekiel aw, amaute tungah thu a khen dingin na kiging nai hiam? Na kigin’ khit leh amaute tungah thu khen in. A pu a pate uh’ gamtat hoih lohna teng amaute phawksak in. Amaute tungah keima thugente gen in. Israel mite ka teel laitakin amaute tungah thuciamna khat ka bawl hi. Egypt gam sungah amaute tungah ka kilang a, kei pen Topa note’ Pasian ka hi hi, ci-in ka kigen hi. Egypt gam panin amaute paikhiatpihin, amaute a dingin ka zonkhiatsak, bawngnawi le khuaizu tui bangin a luanna gam ahi, gam sung khempeuh panin a hoihpenna munah amaute ka tunpih ding ni teek mahin ka kiciam hi. Kei pen Topa amaute’ Pasian ka hih manin a muhdahhuai a milim itte uh paikhia-in, Egypt mite’ pasian man lote tawh a kinitsak loh nading uh ka gen hi. Ahi zongin amaute in kei hong demin, ka thugen hong ngai lo uh hi. A muhdahhuai a milimte uh paikhia tuan lo uh a, Egypt pasian-te zong nusia lo uh hi. Tua hi a, ka heh mahmahna teng Egypt gam sungah thuaksakgawp ning, ci-in ka ngaihsun hi. Ahi zongin Egypt gam panin no Israel mite kong paikhiatpih ding hi, ci-in amau’ ompih mite’ zakin gen khin ka hih manin, tua bangin gim thuaksak leng keima min a daisak suak ding, cih ngaihsutna hangin gim ka pia kei hi. “Tua ahih ciangin Egypt gam panin amaute paikhiatpihin gamlak ka tunpih a, a zui peuhpeuh a nuntak theih nading ka thukhamte le ka thupiaknate ka hilh hi. Topa ahi keimah in amaute pen mi siangtho-in ka bawlna thu a phawk nadingun kote’ kikalah thukimna limin Sabbath tan’ ding thu ka pia hi. Ahi zongin Israel mite in gamlak nangawnah kei hong dem uh a, a zui peuhpeuh in nuntakna a ngahna ding uh ahi keima thukhamte le ka thupiaknate a nial uh hi. Ka Sabbath-te zong nakpitakin siasak uh hi. Tua ahih manin amaute a maiman nadingin ka hehnateng gamlakah a thuaksakgawp dingin ka kithawi hi. Ahi zongin Egypt gam panin amaute ka paikhiatpihna minam dangte in hong mu khin ahih manin tua bangin gamta leng, keima mindaina ding mah hi zel ahih manin amaute bangmah ka cih kei hi. Tua ahih manin bawngnawi le khuaizu tui bangin a luanna, gam hoihpen ahi, amaute tungah ka piaksa gamah amaute ka paipih loh nading thu, gamlakah ka kiciam hi. Tua bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka Sabbath-te siasak uh hi. Amaute in kei hong biak ding uh sangin milim biak ding utzaw uh ahihna hang ahi hi. “Ahi zongin amaute ka khasiat a, gamlakah amaute ka susia kei a, ka maimangsak kei hi. A tate uh kiangah, ‘Na pu na pate un a bawl thukhamte zui kei unla, amaute’ tat ngeinate zui kei un. A milim biakte uh tawh zong kininsak kei un. Kei pen Topa ahi note’ Pasian ka hi hi. Ka thukhamte zui unla, ka thupiaknate bangin gamta un. Kei pen Topa ahi note’ Pasian ka hihna na phawkna ding uh le note tawh i bawlsa thukimna lim dingin Sabbath-te na siangthosak un,’ ka ci hi. “Ahi zongin a tate nangawn un kei hong dem uh hi. A zuite in nuntakna a ngahna ding ahi ka thukhamte palsatin ka thupiaknate mang lo uh a, Sabbath-te siasak uh hi. Tua ahih manin, ka hehnateng gamlakah thuaksak gawpin, amaute a sumai dingin ka kithawi hi. Ahi zongin tua bangin hih leng, Egypt gam panin Israel mite ka paikhiatpih hong mu mite’ lakah ka min daii ding ahih manin amaute ka susia kei hi. Tua ahih manin leitung gam khempeuhah amaute ka thehthang gawpna ding thu, amaute tungah kiciamna dang khat tua gamlakah ka bawl leuleu hi. Hih bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka Sabbath-te siasak uh hi. Tua banah a pu a pate un a biak milimte mah a biakna hang uh ahi hi. “Tua ahih manin kei zong amaute a dingin nuntakna a piangsak lo thukhamte le thupiaknate amaute tungah ka pia hi. Amaute’ biakpiaknate mah tawh amau mah kininsakin, a tapa upa pente uh zong biakna-in ka piasak hi. Hih bangin ka hihna pen amaute gimpiakna le kei pen Topa ka hihna thu a hong theih nading uh ahi hi. “Tua ahih ciangin mihing ahi Ezekiel aw, Topa Pasian ahi keima thugen pen Israel mite tungah hih bangin gen in: A cihtak lohna uh tawh na pu na pate un ka min hong daisakin kei hong hehsak uh hi. Amaute tungah piak dingin ka ciamna gamah amaute ka paipih hi. Amaute in mual sang ahi a, singniim khat peuhpeuh ahi zongin a muh uh ciangin tua bang mun khempeuhah biakna a pia uh hi. Meihal biakna a piakna uh le tuiphih biakna a piaknate uh tawh kei hong hehsak uh hi. Amaute kiangah, ‘Na paina uh mun sangte bang ahi hiam?’ ci-in ka dong hi. Tua ahih manin tua hun a kipanin tua munte pen ‘Mun Sangte,’ kici hi. Tua ahih ciangin Israel mite tungah Topa Pasian ahi keima thugen hih bangin gen in: Na pu na pate un a bawl mawhnate mah note in zong bawlin a milimte mah uh sulzuih ding na hi uh hiam? Tuni ciang dongin note in a kipia ngei letsongte mah puakin, tua milimte mah biakna-in na tate uh na hal uh ciangin noleno a kininsaktawm na hi uh hi. Tua bangin na gamtat khit uh ciangin no Israel mite, kei kiangah thu a dong dingin nong pai lai uh hi. Kei pen a nungta Topa Pasian ka hih mah bangin, note’ thudotin ka om het kei taktak ding hi. Note in na lungsim ngaihsutna uh khentat khinin, gam dangah a teng minam dangte mah bangin sing le suang na bia nuam uh hi. Ahi zongin note’ utbang hithei ngei lo ding hi. “Kei pen a nungta Topa Pasian ka hih mah bangin, khut khauh tak le ka vangliatna le ka hehna tawh note kong ukgawp taktak ding hi. Gam khempeuhah note kong thehthangna panin kong kaihkhopkik ciangin note tungah ka vangliatna le ka hehna kong lak ding hi. Note pen minam tuamtuamte’ gamah kong paipih ding a, tua munah maitang kituahin note tungah thu kong khen ding hi. Egypt gam sung Sinai gamlakah na pu na pate uh tungah thu ka khen mah bangin tu-in note’ tungah kong khen ding hi, Topa Pasian in ci hi. “Note khauhtakin kong uk ding a, thuciamna kong zuisak ding hi. Note lak panin a lehdo thei mite le kei tungah hong mawh mite ka lakhia ding hi. Tu laitakin a ompakna uh gam panin ka lakhia ding a, ahi zongin Israel gamah ka ciahsakkik kei ding hi. Tua ciangin Topa ka hihna thu na thei ding uh hi,” a hong ci hi. Topa Pasian in, “Israel mite khempeuh aw, na milimte uh biabia un! Ahih hangin tu a kipanin keima thu nong man’ uh kul ding a, na milimte uh letsong piakna tawh ka min siangtho na daisak nawn kei ding uh hi,” a hong ci hi. Topa Pasian in, “Ka mual siangtho, Israel mual sang tungah Israel mite khempeuh in kei nong bia ding uh hi. Note tungah kong lungdam ta ding a, biakpiaknate, a limcipen piaknate, le na letsong siangthote uh kong lamen ta ding hi. Na kithehthangna uh gam tuamtuam panin note hong paikhiatpihin mun khatah note kong kaihkhop khit ciangin a namtui na biakpiaknate uh kong sang ding hi. Note in kei nong biak manun minam dangte in a siangtho ka hihna hong thei ding uh hi. Na pu na pate uh tungah piak dingin ka ciam Israel gam sungah note kong tunpih ciangin Topa ka hihna thu na hong thei ding uh hi. Tua hun ciangin, a kilawm loin na gamtatnate khempeuh uh le nomau mah na kinitsak tawmna thute uh na phawk ding uh a, na gamtat siatnasate uh hangin nomau mah na kimudahtawm ding uh hi. Na gitlohna, na gamtatsiatna uh tawh kizui-in note tungah hong bawl loin, ka min a daikhak ding khualna tawh note tungah hong gamta ka hih manin kei pen Topa ka hihna thu no Israel mite in na hong thei ding uh hi, Topa Pasian in ci hi,” a hong ci hi. Topa in kei tungah thu hong gen a, “Mihing ahi Ezekiel aw, leitaw lam gam en inla, leitaw lam gam siatna ding thu genin, leitaw lam gam tulakte a siatna ding thu genkhol in. Leitaw lam tulakte kiangah thu gen inla, Topa’ thugen ngai un. Topa Pasian in hih bangin ci hi: ‘En un, tu-in gamhal a kipan ding ka hi a, na sunga om singkung a hing, a keu-in kangtummang ding hi. Kuamah in tua meikuang phelh zo lo ding hi. A taw panin a khung dongin kangtummang ding hi. Hih gam sung a hal pa pen Topa ahi keimah ka hihna thu le kuamah in a phelh zawh lohna thu mi khempeuh in thei ding uh hi,’ ci-in gen in,” a hong ci hi. Tua ciangin kei zong, “Topa Pasian aw, kei hong sawl kei in. Mi khempeuh in kei pen khiatna nei-a thugen thei pa hi, ci-in a hong ngaihsut uh ka hi hi,” ci-in ka nial hi. Topa in kei tungah thu hong gen a, “Mihing ahi Ezekiel aw, Jerusalem khuapi, le mite in biakna a piakna uh mun tuamtuamte mawhsakna thu gen in. Israel gammite tungah Topa ahi keima thugen, hih bangin gen in: ‘Note ka hong langpan’ hi. Ka namsau dokin note a sia a pha a kibangin kong thatmang khin ding hi. Tua bangin kong thah nadingin leitaw lam pan leilu lam dongin mi khempeuh tungah ka namsau ka zang ding hi. Topa ahi keimah in namsau ka dawh khitna le a paai-ah ka siatkik loh nading thu mi khempeuh in thei ding uh hi,’ ci-in gen in. “Tua ahih ciangin mihing ahi Ezekiel aw, a lungkham mahmah bangin khuisa inla, mi khempeuh’ muh dingin thumin tau in. Tua bangin na omna thu mite in hong dot ciangin mailam a thupiang ding hangin a tuaci om na hihna thu gen in. Tua hun ciangin a lungsim uh launa tawh kidimin, launa hangin a khut uh lingcipin, a hanna lungsim uh bei-in, lau-in a khuk uh a lin’ kelkelna ding thu le, tua hun ding pen tu-in a hong tungta ahihna thu gen in,” Topa Pasian in a hong ci hi. Topa in kei kiangah thu hong gen a, “Mihing ahi Ezekiel aw, mailam thu ding genkhol inla, Topa in hih bangin ci hi, ci-in gen in: Namsau khat kitat hiam a, hoihtakin kipuah kilkel hi. Mi thah nadingin kitat hiam sitset a, khuaphia bangin a tee zialzial dingin a kipuah hi. Note in thuhilhna ngai nuam lo na hih manun, kuamah in tua namsau kho thei lo hi. Tua namsau limtakin kipuah a, zat pah lian dingin kikoih hi. Mi that ding pa’ zat dingin kitat hiamin kipuahsiang hi. Mihing ahi Ezekiel aw, awng inla kiko in. Hih namsau pen ka mihingte le Israel makai khempeuh a kisawmna ahi hi. Amaute pen ka mite khempeuh tawh a kithat khawm ding ahi hi. Dahna tawh na dip hum in. Note hong kize-et ahi hi. Note in thuhilhna nial lailai le-uhcin, hih thu khempeuh piang loin om ding ahi hiam, Topa Pasian in ci hi. “Mihing ahi Ezekiel aw, tu-in mailam thu ding genkhol in. Na khut beeng in. Namsau in satsat ding hi. Tua namsau pen mi a that namsau, mi a lausak namsau, mi a lomlomin a that namsau ahi hi. Tua namsau in ka mite meidawi sakin puksak hi. Khuaphia bangin a tee zalzal, mi that dingin a kithawi ka namsau tawh a khuapi uh ka ngim hi. A hiam namsau aw, na ziat na vei vatgawp in! Na ngatna san peuhpeuh vatgawp in. Kei zong ka khut ka beeng ding a, tua ciangin ka hehna dam ding hi. Topa ahi keimah in hih thu kong gen khin hi,” a hong ci hi. Topa in kei tungah thu hong genkik a, “Mihing ahi Ezekiel aw, Babylon kumpipa a namsau tawh hong kuan theih nading lampi nih ciaptehna bawl in. Tua lampi nihte pen gam khat panin a kipan khawm ding ahi hi. Tua lampi a katna munah ciaptehna khat phut in. Tua lamka khat in Ammon mite’ khuapi Rabbah-ah kumpipa a tun theih nadingin lak ding a, a khat pen in Judah gam sunga om Jerusalem khuapi sung teek a tun nadingin lak ding hi. Lamka a tun ciangin Babylon kumpipa khawl phot ding hi. A tot ding lampi a theih nadingin ai nam tuamtuam san ding a, a thaltangte sing seuhseuhin, innsung pasian milimte thu dongin, biakna-in a gawh ganhingte’ sin a vel ding hi. Jerusalem-ah a pai ding ai a phatna a lak a thaltangte a taklam khutah a tawi hi. Tua ai in Jerusalem-ah a pai nading, galnanna ding phung a cianna ding, galsim nadingin a kikona ding, kulhpite satkhapna ding molhtumte a bawlna ding, kidalna ding phung bawlin dumte a tawhna ding a gen hi. Jerusalem khuamite in khatlekhat a kihuhna ding uh midangte tawh thukimna nei khin uh ahih manin hih bangin amau’ khuapi a kisawmna thu um lo uh hi. Ahi zongin hih bangin ai a kisanna pen amau’ mawhna a phawktheihna ding uh le amaute a kiman ding ahihlam a theih nading uh lim khat ahi hi. Tua ahih ciangin Topa Pasian ahi keimah in ka gen thu pen: Na mawhnateng uh tu-in hong kipholak hi. Na mawhna uh mi khempeuh in thei hi. Na gamtatna panun na mawhna uh kilang hi. Mawhsakna a thuak ding na hita uh a, na galte uh khut sungah a hong pia ding ka hi hi. “A gilo, a siangtho lo, Israel gam uk migilo pa aw, nang’ hun zong hong tungta a, gim na tuah ding ni hita hi. Topa Pasian in hih bangin ci hi: Na kumpi lukhu le na dialkhip lakhia in. Nidang bang nawn lo ding hi. Mineute hong lian ding a, miliante hong neuta ding hi. Siacip! Siacip! Hih khuapi ka siacimitsak ding a, a mel a mang zong kimu nawn lo ding hi. A uk dingin a kilawm mipa hong om ciang bekin ama khut sungah ka pia ding hi. “Mihing ahi Ezekiel aw, mailam thu gen inla, Topa Pasian ahi keimah in Israel mite a simmawhbawl Ammon mite tawh kisai-in ka thugen, hih bangin amaute kiangah gen in: A vatlum dingin namsau khat a baihsa-in om a, mi thah nadingin kinawtngil a, khuaphia bangin a tee zialzial dingin a kibawl hi. No Ammon mite aw, a siangtho lo, migilote, gim a tuahna ding uh a hun tungta ahih manin sumaigawp un, ci-in a hong hanthawn, na maangmuhnate uh zuaupi hi a, na ai phate uh a mawkna ahi hi. “A do dingin kithawi vet kei unla na namsau uh a paai-ah siatkik zaw un. Note na pianna gam, na suahna mun uhah, thu a hong khen ding ka hi hi. Note tungah ka hehna kong khah ding a, mei-am kuang hong bang ding hi. Mi thah a siam, migilote’ khut sungah note kong pia ding hi. Mei in note hong kangtum ding a, note’ gam mahah na sisan uh luangin, kuamah in note hong phawkkha nawn lo ding hi, Topa in ci hi, ci-in gen in,” a hong ci hi. Topa in kei kiangah thu hong gen a, “Mihing ahi Ezekiel aw, mi thahna tawh a kidim khuapi tungah thukhen dingin na kiging nai hiam? A gamtat hoih lohna khempeuh tua khuapi kiangah gen in. Topa Pasian in hih bangin ci hi, ci-in gen in: Nangma mite mahmah tampi tak thatin, milim biakna tawh nangmah kininsaktawm na hih manin, tu-in na hun hong tungta hi. Na mi thahna hang le na milim bawlna hangin a mawh suak na hih manin tu-in nang a dingin a ni cingin, a kha cingta hi. Tua ahih manin minam dangte’ simmawhbawl, gamdang khempeuh’ hih thopthopin nang kong koih hi. A nai, a gamla-ah a om mi khempeuh in na gamtat hoih lohna hangin nang hong simmawh uh hi. Na sunga om Israel ulian khempeuh in amau’ thatang muang uh a, mi that uh hi. A nu a pa a zahtakbawl kuamah om lo hi. Pemtate kikhemgawp a, meigong le tagahte zong kihih thopthop hi. Mun siangthote zong zahtakna mel kinei loin, Sabbath-te zong kitang lo hi. Mi pawlkhatte in midangte a sih theih nadingin zuauthu phuak uh hi. Mi pawlkhat in milim biakna sa ne uh hi. Pawlkhatte amau’ lanna tawh kizui-in gamta tawntung hi. Pawlkhatte in a pa’ zi mawhpih uh a, pawlkhatte in numei ninnei kimlaipi buan uh hi. Pawlkhat in midangte’ zi tawh nulepa mawhna bawl uh a, pawlkhat in a mote mawhpihin, pawlkhat in a sanggamnu ahi a pa’ tanu mawhpih hi. Pawlkhat in sum deih manin mi that uh hi. Pawlkhatte in a Israel mipih sum leitawi a late tungah nuamtak sa-in a meet lakna tawh hauhlawh uh hi. Amaute in kei hong mangngilh uh hi, Topa Pasian in ci hi. “A man loin mi’ na na suhna le mi na thahna hangin ka khuttum ka zial ding hi. Tua bangin kong hih ciangin hang nawn dingin ki-um a, na khuttum likngam lai dingin ki-um na hi hiam? Topa ahi keimah in thu ka gen khin a, ka gen bangin ka gamta ding hi. Gam khempeuh le minam dang khempeuh lakah na mite ka thehthang gawp ding a, na gamtat hoih lohna teng ka beisak ding hi. Tua ahih ciangin minam dangte in nang hong mindaisak ding a, ahi zongin nang Jerusalem in Topa ka hihna thu na hong thei ding hi,” a hong ci hi. Topa in kei tungah thu hong gen a, “Mihing ahi Ezekiel aw, kei a dingin Israel mite a kimanna om nawn lo hi. Amaute pen sumngo, dal, sik, hak, le ngun a kihelkhawm sung panin meikhuk sungah kihalin a ngunteng a kilak khit ciangin a omlai ngun-ek tawh kibang uh hi. Tua ahih ciangin Topa Pasian ahi keimah in ka genin-ah: Note, tua ngun-ek bangin na kimanna uh om nawn lo ahih manin Jerusalem-ah kong kaikhawm ding hi. Mite in ngun, sumngo, sik, hak, le dalte kaikhawmin a tuisak dingun meikhuk sungah a khul bangin ka hehna tawh note hong kaikhawmin kong tuisuaksak mang ding hi. Jerusalem-ah note hong khawm takpi-in na nuai uhah mei tawhin, ka hehna tawh kong haltui ding hi. Meiphual sungah ngunte a kituisak bangin Jerusalem-ah note hong kibawl ding hi. Tua ciangin keima hehna a thuak na hihlam uh na thei ding uh hi,” a hong ci hi. Topa in kei tungah thu hong gen a, “Mihing ahi Ezekiel aw, Israel mite pen ka hehna hangin puah loin, a tungah guah ka zuksak lohna leitang tawh a kibatna uh amaute kiangah gen in. A uliante uh, ganhing a that humpinelkai hawk tawh kibang uh hi. Amaute in mi thatin, a sum le a neihsa khempeuh laksak uh a, a mi thahna hangun numei tampi tak meigong suaksak uh hi. A siampite un ka thukham palsatin, a siangtho biakna nate ninsak uh hi. A siangtho biakna nate le a mawkmawk nate khenna mel nei lo uh a, a tate uh tungah a siang le a nin a kilamdanna zong hilh lo uh hi. Sabbath-te zong donin nei lo uh hi. Tuate khempeuh hangin Israel mite in kei hong zahtak lo uh hi. A kumpi uliante uh, a sa matsa uh a bal gawpgawp ngiahon tawh kibang uh hi. Sum ngahtheih nadingin mi that uh hi. Kulh nin kimlai leikang tui tawh a kizut kang bangin a kamsangte un hih bang mawhnate imcip uh hi. A man lopi maang mu uh a, a man lopi-in mailam thu gen uh hi. Topa ahi keimah in amaute tungah thu gen lo napi-in, Topa Pasian in hih bangin thu gen hi, ci-in zuau phuakin mite tungah thu gen uh hi. Mi cithei a kineite in mi khemin a na sut uh hi. Mizawng mi cimawhte bawlsia-in, pemtate tungah nuamtak sa-in khualna mel nei loin a ututun gamta uh hi. Keimah in ka hehna tawh ka suksiat ding hun ciangin kulh a ciangzo ding, kulh a kicipna munah a cingzo ding, le gam sung a huzo ding mi khat amaute lakah ka zong a, ahi zongin tua bang ding mi khat beek ka muzo kei hi. Tua ahih ciangin amaute’ gamtatna tawh kizui-in gimpiakna-in amaute tungah ka hehna khahin, mei in a kat bangin amaute ka maimangsak ding hi, Topa Pasian in ci hi,” a hong ci hi. Topa in kei kiangah thu hong gen a, “Mihing ahi Ezekiel aw, khatvei lai-in unau numei nih om hi. Amaute Egypt-ah a omlai, a khangno laitakun, a nungakna lim uh bei-in numei paktat a suak uh hi. A unu’ min Oholah hi a, Samaria khuapi tawh kibang a cihnopna ahi hi. A naunu’ min Oholibah hi a, Jerusalem khuapi tawh kibang a cihnopna ahi hi. Hih numei nihte ka tenpih a, a nihun kei tawh ta nei uh hi. Keima zi hinapi-in Oholah pen numei paktatte mah bangin gamta lailai a, Assiria gam pana a lawm ngaihte lunggulh mahmah hi. Tua a lawm ngaihte pen puansan a silh galkap hangte, gam uk mangte, le galkapmang liante hi a, a vekpi-un a ngaihhuai, sakol tung tuang galkapmang liante ahi uh hi. Amah pen Assiria uliante khempeuh tawh a mawhsa khat hi a, ama huk luatna hangin Assiria milimte nangawn va bia hi. A nungakna beisakin, Egypt gam a a paktat mah zom lailai hi. A nungak tung a kipanin mite in luppihin numei paktatte bangin bawlin a ututun hih uh hi. Tua ahih ciangin a lunggulh mahmah, a it Assiria mite’ khut sungah amah ka pia hi. Assiria mite in a puan hawkkhiatsak uh a, a tanu le a tapate matsakin, tua ciangin namsau tawh amah that uh hi. Mun khempeuha numeite in amah gentehna khatin nei uh a, ama tungah thu kikhen hi. “A naunu Oholibah in hih thu thei napi-in, a unu Oholah sangin zong a siazaw, a sukzaw-in paktat lai hi. Amah in a vekpi-in a ngaihbaang Assiria mi tangval ahi gam ukte le galkapmangte, puansan a silh galkapte, le sakol tung tuang uliante nak lunggulh mahmah hi. Hih a naunu zong a u zah mahin sia taktak hi, ci-in ka mu hi. Amah in tua limte a muh phetin amaute lunggulh mahmah pah a, a sam dingin Babylon gamah kamtai a paisak pah hi. Babylon mite zong amah tawh a mawh dingin hong pai uh hi. Amaute in a lungkim dongun tua nu hih nilohin ninsak uh a, a tawpna-ah amaute a ngaih gen loh a kihzah ciang dongin a bawl uh hi. Amah numei paktat ahihna mi khempeuh theisakin, tua bangin amah le amah a kipholak ciangin a unu ka muhdah zah mah bangin amah zong ka mudah hi. A paktatna uang semsem a, a nungak lai-in Egypt gamah a paktat mah bangin gamta niloh hi. Sakoltal lan bangin a zang a gol, a lan mahmah mi khempeuh ngai pahpah hi. Tua hi a, Oholibah aw, Egypt gamah nungakin na omlai-in na nawi hong kinuaigawp sakin, na nungakna na beisak huna na gamtat hoih lote mah a gamtakik nuam na hi hi. “Oholibah aw, Topa Pasian ahi keima hong gen thu in: Tu-in nang in hih na lunggulh mite na cimtakta hi. Ahi zongin nangma tungah amaute ka hehsak ding a, nang a hong umcih dingin kong paipih ding hi. Babylon khuamite, Khaldea gammite, Pekod mite, Shoa mite, Koa mite, le Assiria mite khempeuh kong paipih ding hi. Amaute a vekpi-in tangval melhoih, a ngaihbaang gam ukte le galkapmangte hi a, a vekpi-un ulianpipi, sakol tung tuang galkapmang liante vive ahi uh hi. Amaute in leilu lam panin nang hong sim ding uh a, leeng galkap le vanpua leeng tampi hong kengin galkap tampi tak tawh hong kuan ding uh hi. Lumte le siklukhute tawh kidalin amaute in nang hong umcih ding uh hi. Amaute’ khut sungah nang kong ap ding a, amaute’ ngeina om bangin nang’ tungah thu hong khen ding uh hi. Nangma tungah kei heh ka hih manin nangma tungah amaute hong heh gamtat ding uh hi. Na nakleh na bilte hong atkhiatsakin na tate hong thahsak ding uh hi. Na tanu le na tapate na kiang panin hong sutin a hingtangun hallum ding uh hi. Na puante hong hawkkhiatsakin, a manpha na kizepnate zong hong laksak ding uh hi. Na huknate le Egypt gam a kipan na gamtat hoih lohnate ka beisak ding hi. Milimte et-in na nei nawn kei ding a, Egypt-te zong na ngaihsun nawn kei ding hi. “Bang hang hiam cih leh Topa Pasian in hih bangin ci hi: Na muhdah na etsat mite’ khut sungah nang kong pia ding hi. Amaute zong nangma tungah hong muhdah gamtat ding uh a, na thalawhsa na khempeuh hong laksakin na hawmguakin hong nusia ding uh hi. Na paktat gamtatnateng hong kipholak ding hi. Na hukna le na paktat gamtatna in nangma tungah hih bangteng hong tungsak hi. Minam dangte tawh na paktat a, a milimte uh tawh na kininsak hi. Na unu’ khekhapteng mah tawn na hih manin amah gim ka piak bangin nang zong gim ka hong pia ding hi. Topa Pasian in hih bangin ci hi: Na unu’ hai mah na dawn ding a, tua hai golin thuk mahmah hi. A hai dim sitset ahih manin mi khempeuh in hong simmawhin hong nuihsan ding uh hi. Na unu Samaria’ hai pen launa le siatna hai hi a, hong amsakin hong lungkhamsak ding hi. Tua hai a tawdat nangawn na dawn kang ding a, a hai na petkham ding hi. A hai kitam themte tawh na nawi na kuikham ding hi, Topa Pasian in ci hi. “Tu-in Topa Pasian in hih bangin gen hi: Nangmah in kei hong mangngilhin hong nungngat na hih manin na hukna le na paktatna hangin na thuak ding hi,” a hong ci hi. Topa in kei kiangah thu hong gen a, “Mihing ahi Ezekiel aw, Oholah le Oholibah tungah thukhen dingin na kithawi nai hiam? A gamtat hoih lohna teng uh amaute tungah gen in. Amaute in milim biakna tawh nulepa mawhna bawlin mi zong that lai uh hi. Milimte tawh mawhna gamta-in, kei tawh a neih a tapate uh that uh hi. A tapate uh milim biakna-in go uh hi. Amaute’ gamtatna tu-a bangteng bek hi lo lai hi. Ka biakinn ninsak uh a, ka Sabbath-te zong palsat lai uh hi. Milim biakna-in ka tate a gawh khit uh ciangin tua ni mahin ka biakinn-ah pai-in ninsak uh hi. Ka biakinn sungah hih bangin gamta tazen uh hi. “Amaute in gamlapi-a a om mite a sam dingin kamtai sawl uh a, a sap mite hong pai uh hi. Hih numeite kisilin, a mit uh zemin, kizepna a manpha a tuamtuamte tawh kizemin kipuah uh hi. Lupna hoih mahmah tungah tu-in a mai uhah sabuai limtakin koih uh hi. Tua sabuai tungah keima piaksa paknamtui le oliv thaute koih uh hi. Lungnuamin a om mihonte’ gamlumna kiza a, gamlak panin mihon mawkmawk pawlkhat zong hong kitunpih hi. Amaute in tua numeite’ khutah tau butsak uh a, a lu tung uhah kumpi lukhu hoihte khusak uh hi. Nulepa mawhna bawlin a paat ngingeisa numei khat, numei paktatte khat mah bangin a hih lailai uh hi tah a, ci-in ka ngaihsun hi. Numei paktatte kianga a hawh bangin amaute pai niloh uh hi. Tu-a bangin a gamtat hoih lo Oholah le Oholibah-te kiangah a paktat dingin amaute a pai uh hi. Amaute in nulepa mawhna bawlin mi thahna tawh zong kipelh lo uh ahih manin midikte in nulepa mawhna bawlna hang le mi thahna hangin a mawhsak ding uh hi. “Topa Pasian in hih bangin ci hi: Amaute lausak gawpin a nate uh a sutgawp dingin mihon khat paisak in. Tua mihonte in amaute suang tawh dengin, namsau tawh amaute sugawp hen la, a tate uh thatin, a innte uh halsak hen. Amaute’ gamtat bangin kuamah a gamtat loh nadingun gam sunga a om numei khempeuh hilhkholhna limin hih bang gamtat hoih lohnate, gam sung khempeuhah ka beisak ding hi. No unau numei nihte ahihleh, na paktatna uh le na milim biakna hangun gim kong pia ding hi. Tua ciangin Topa Pasian ka hihna thu na hong thei ding uh hi,” a hong ci hi. Zedekiah in a uk a kum kua kum, a kha sawmna sung a ni sagih ni-in Topa in kei kiangah thu hong gen a, “Mihing ahi Ezekiel aw, tuni pen Babylon kumpipa in Jerusalem khuapi a umcih ni ding ahih manin lai sungah tuni limtakin ciamteh in. Topa Pasian ahi keimah in amaute a dingin gentehna-in ka gen ahi hih thugentehna pen a lehdo thei ka mite tungah hih bangin gen in: Mei tungah beel suang unla a sungah tui a dimin buk un. Sa a phei, a liang, a limci pente khah unla, a guh limcite tawh zong dimsak un. Tuu limci pente’ sa zang unla, beel nuai-ah mei cih un. A tui sosak unla, a guh le a sate sosak un. “Topa Pasian ahi keimah in ka gen thu hih bang ahi hi: Mi thahna tawh a kidim khuapi tu-in a sia ding hi ta! Amah pen a kang-op a kinawtkhia ngei lo beel tawh kibang hi. Beel sunga sate khat khatin kilakhia a, a vekpi-in bei khinta hi. Khuapi sungah mi kithahna om a, a sisante, leivui in a vuh theih nading leilakah taaksak loin, suang tungah taaksak uh hi. Ka heh suakin a phu a kilak theih nadingin a manthan’ theih loh nading munah a sisante a tua ci-in ka omsak hi. “Tua ahih manin Topa Pasian ahi keima gen thu hih bang ahi hi: Mi thahna tawh a kidim khuapi pen tu-in a sia ding hi ta! Kei mahmah in a mei ka cih ding hi. Sing hong cih beh un! A mei sem un! A sa huan un! A tui kangsak un! A saguhte kangtumsak un! Tua ciangin a taubeel hawm mei-am tungah suangin sansak veva un. Tua hileh a kang-op ninteng kangtumin hong siangkik ding hi. Ahi zongin bangzahin hanciamin a kisep hangin, a kang-op in bun lua ahih manin siang zo lo ding hi. Jerusalem aw, na gamtat hoih lohnate in nang hong ninsak khin hi. A siansuah dingin kong hanciamciam hangin a nin mahin na omlai veve hi. Ka heh mahmahna na thuak khit matengin na siangkik ngei kei ding hi. Topa ahi keimah in thu ka gen khin hi. Tu-in ka gamtat hun ding hong tungta hi. Kong kiphawkmawh bawl nawn kei ding a, ki-ip nawn loin, zong kong khasiat ngaihsut kei ding hi. Na gamtatna bangin gim hong kipia ding hi, Topa Pasian in ci hi,” a hong ci hi. Topa in kei tungah thu hong gen a, “Mihing ahi Ezekiel aw, na it penpen mi khat thakhatin a hong laksak ding ka hi hi. Na thum na tau kei ding a, zong kap loin, na khitui zong na luangsak kei ding hi. Mite’ zakin zong na kidik kei ding a, dahna limin lukhu khu lo, khedap bulh lo, cih bangin zong na om kei ding hi. Na mai zong na khuh kei ding a, a dahte’ annekte pawl zong na ne kei ding hi,” a hong ci hi. A zingsang lamin mite kiangah thugenin ka om a, a nitak ciangin ka zi hong si hi. Kei zong a zing ciangin Topa’ hong sawl bang teekteekin ka gamta hi. Tua ciangin mite in, “Bang hangin hici gamtat na hi hiam?” ci-in hong dong uh hi. Kei zong amaute kiangah, “ Topa in kei kiangah thu hong gen a, Israel mite kiangah hih bangin thu gen in hong ci hi. Ama cihna-ah: Note in na kisaktheihpih uh, a sungah paipai-in na etet nop uh ka biakinn pen a ninsak ding ka hi hi. Tua ciangin note’ nungah a omlai na tate uh, namsau-in si ding uh hi, ci hi. Tua ciangin keima gamtat bangin note gamta-in, na mai uh na khuh kei ding uh a, a dahte’ annekte pawl zong na ne kei ding uh hi. Lukhu khu-in khedap na bulh ding uh a, thum lo, tau loin na om ding uh hi. Note’ gitlohna hangin note maimangin, a taukhawm litlit ding na hi uh hi. Tua ciangin kei pen note a dingin lim ka hi ding hi. Keima gamtat bangbangin a gamta ding na hihna uh hong gen hi. Hih bangin thu hong pian’ ciangin, kei pen Topa Pasian ka hihna hong thei ding uh hi, hong ci hi,” ci-in ka dawng hi. Tua ciangin Topa in kei kiangah, “Mihing ahi Ezekiel aw, amaute in a kisaktheihpih, a lungdampih, paipai-in a etet nop uh biakinnpi ka lakhia ding a, a tanu a tapate uh zong ka laksak ding hi. Tua bangin ka hih ni ciangin tua siatna panin a suakta mi khat hong tai-in nangma kiangah a thu hong ko ding hi. Tua ni ciangin nang na pauthei kik ding a, amah tawh na kihokhawm thei ding hi. Tu-a bangin nang pen mite a dingin lim khat na hi ding a, tua ciangin Topa ka hihna amaute in hong thei ding uh hi,” a hong ci hi. Topa in kei kiangah thu hong gen a, “Mihing ahi Ezekiel aw, Ammon mite’ lam nga inla, amaute mawhsakna thu gen in. Topa Pasian ahi keimah in amaute tungah ka gen thu hih bangin gen in: Ka biakinn kininsakin, Israel gam kisusia-in, Judah mite salin a pai na muh uh ciangin nuamin na lungdam se uh hi. Tua ahih manin nisuahna lam panin a hong pai mite’ khut sungah note ka hong pia ding a, amaute in note’ gam sungah phual hong satin hong teng ding uh hi. Note’ nek ding singgahte le note’ dawn ding bawngnawite hong gaihsakmang ding uh hi. Rabbah khuapi pen kalaoh khua ka suaksak ding a, Ammon khuapi dangte zong tuukhawk ka suaksak ding hi. Tua ciangin Topa ka hihna thu nong thei ding uh hi. “Bang hang hiam cih leh Topa Pasian ahi keimah in kong genin-ah: Note lungdamin khut bengin, kipakin na diang uh a, Israel gam na simmawhbawl uh hi. Hih bangin gamta se na hih manun note’ nate hong sutgawp ding minamte’ khut sungah kong pia ding hi. Note hong sumaimang ding ka hih manin a minamin ahi a, a gamin ahi zongin na dingzo nawn kei ding uh hi. Tua ciangin Topa ka hihna na hong thei ding uh hi, ci-in gen in,” a hong ci hi. Topa Pasian in kei kiangah thu hong gen a, “Moab mite in a thugenna uhah, Judah gammite pen minam dangte bangmah hi lel uh hi, ci se uh hi. Tua ahih manin Moab gam hutna-in a kiphut a kiima om khuapite le a khuapi minthang pente ahi Bethjeshimoth, Baalmeon, le Kiriathaim khuapite, midangte ka simsak ding hi. Ammon mite a zawhgawp mah bangin, Moab mite zong, nisuahna lam mite ka zogawpsak ding a, Moab mite pen minamin dingzo nawn lo ding uh hi. Tua bangin Moab mite gim ka pia ding a, tua ciangin Topa ka hihna thu hong thei ding uh hi,” a hong ci hi. Topa Pasian in kei kiangah thu hong gen a, “Edom mite in Judah mite tungah a phulakna uh nasia lua ahih manin tua a phulakna hangun Edom mite tungah mawhna om hi. Tua ahih ciangin Edom mite gim pia-in, a mihing a ganhingin ka thahmangna ding thu tu-in kong pulak hi. Teman khuapi pan a kipan Dedan khuapi dongin a gam sung khempeuh uh gamkhing ka suaksak ding a, a mite khempeuh uh gal sungah si ding uh hi. Keima mi Israel-te in Edom mite tungah phu hong laksak ding uh a, ka heh mahmahna tawh kizui-in Edom mite thuaksak ding uh hi. Keima phulakna zia Edom mite in thei ding uh hi. Topa Pasian in thu gen khin hi,” a hong ci hi. Topa Pasian in kei kiangah thu hong gen a, “Filistia mite in galin a neih tawntung mite uh tungah phu nasia lakin hehna tawh susiagawp uh hi. Tua ahih ciangin Filistia mite simin ka beimangsakna ding thu a hong genkhia ta ka hi hi. Filistia Zanglei a a omlai mi khempeuh ka susiamang ding hi. Amaute nakpitakin gim pia-in, a kicing zah dongin amaute tungah phu ka la ding a, ka hehna a thuak ding uh hi. Tua ciangin Topa ka hihna thu hong thei ding uh hi,” a hong ci hi. Zedekiah in a uk a kum sawm le khat kum, tua kha a ni masa ni-in Topa in kei kiangah thu hong gen a, “Mihing ahi Ezekiel aw, Taia khuapi mite awngin hih bangin kiko uh hi. Amaute in, ‘Sumbawlna lama i kidempih Jerusalem khuapi zancip gawp hi. A kulhpite tu-in kihongkek a, amaute’ guallelhna tu-in eima hauhna suak ding hi,’ ci uh hi. Tua ahih ciangin Topa Pasian ahi keimah in ka genin-ah: Taia khuapi aw, kei pen nangma lang ka hi hi. Nangmah a sim dingin minam tampi kong paipih ding a, tuipi hualte bangin hong kuan henhan ding uh hi. Na kulhpite susia-in, na tausangte supai ding uh hi. Tua ciangin leitang khempeuh kiatkhia-in a suangtumte bek omlai ding hi. Nidangin tuipi in a tup ngei suangte tungah tu-in ngasa bengte in a ngen uh pho ding uh hi. Topa Pasian ahi keimah in thu ka gen khin hi. Minam dangte in nang Taia khuapi hong luhgawp ding uh a, na gam sunga khuapi dangte sungah a teng mi khempeuh, a namsau uh tawh that khin ding uh hi. Tua ciangin Topa ka hihna thu nang Taia khuapi in na hong thei ding hi, ci hi. “Tua ciangin kumpi khempeuh lak panin a lianpen ahi Babylon kumpipa Nebukhadnezzar, nang Taia khuapi a sim dingin kong paipih ding hi. Amah leilu lam gam pan hong kipanin galkap honpi, sakolte le a leengte, le sakol galkap honte hong tonpih ding hi. Gam sunga om khuapi-a teng mi khempeuh galkidona sungah si ding uh hi. Note hong sim nadingun galte in dum to-in, phung ciangin, a kidalna dingun kulh muanhuai bawl ding uh hi. Amaute in molhtum tawh na kulhpite satkham ding uh a, na tausangte uh zong hei tawh phukgawp ding uh hi. A sakolte uh a paina leivui khute in khuapi tuamcip ding hi. Van pua leeng le leeng galkapte’ ginna in khuapi kulhte cimsak ding a, a kisusiasa kulhkongpi-a pai bangin hong lut lel ding uh hi. Sakol galkapte in kongzing khempeuh tuancilgawp ding uh a, a namsau uh tawh mi khempeuh vatlum ding uh hi. Innkhuam lianpipite leilak kidenna ding hi. Note’ neihsa na hoih khempeuh, na galte un a ututin zang ding uh hi. Kulhte supai-in inn hoihpipite satthanggawp ding uh hi. Inn-a kizang sing le suang, le na khempeuh la-in tuipi sung denna ding uh hi. Khuapi sungah lasakna awging ka beisak ding a, tumtheih awgingte khempeuh zong kiza nawn lo ding hi. Khuapi sungah bangmah om nawn loin, ngasa bengte in a ngen uh a pho theih nading suangtumte bek ka omsak lai ding hi. Nang Taia khuapi hong kilamkik nawn lo ding hi. Topa ahi keimah in hih thu ka gen khinta hi,” a hong ci hi. Topa Pasian in Taia khuapi tungah hih bangin thu gen hi: “Nang hong kisimin hong kilak ni ciangin na sunga kithat mite’ kut vengvangna in tuipi dunga teng mite lau-in patausak ding hi. Tuipi a zang minamte’ kumpite, a kumpi tokhom tung uh panin kumkhia ding uh a, a kumpi puante uh le a puan hoih silhte uh suahkhia-in, leilakah tu-in, lau-in a ling ding uh hi. Nangma thuakna hong muh manun lau mahmah ding uh a, a ci-lin uh pha thei lo ding hi. Tua ciangin nang tawh kisai-in hih bangin dah la hong phuah ding uh hi: A minthang khuapi kisia ta a, a teembawte tuipi panin maimangta hi. Hih khuapi mite in tuipi uk ngei uh a, tuipi gei-ah a teng mi khempeuh’ kihtak hi ngei hi. Tu-in hih khuapi kia ta a, tuikulh khempeuh lau-in ling uh hi. Tua bang siatna hangin tuikulh-ah a teng mite, lau-in lamdang a sa uh hi. “Bang hang hiam cih leh Topa Pasian ahi keimah in hih bangin ka ci hi. Kuamah a ten lohna a kisia khuapi bangin a gamkhing khuapi-in kong bawl ding hi. Tuipi tuite kong tumsak ding hi. Tanglai-a a sisa mite tawh a tengkhawm dingin misite’ khua Leinuai-ah kong puak ding hi. Siatna a thuak tawntung leinuai-a omte lakah kong koih ding a, a sisate tawh na om ding hi. A hingte lakah a omkik dingin tua lai panin nong kilehkik nawn kei ding hi. Nang pen mite’ etteh dingin a lauhuai mahmahin kong bawl ding a, tua pen nang a dingin a beina hita ding hi. Mite in nang hong zonzon hangun hong muzo nawn lo ding uh hi. Topa Pasian ahi keimah in hih thu ka gen khin hi,” a hong ci hi. Topa in kei kiangah thu hong gen a, “Mihing ahi Ezekiel aw, Taia khuapi tamlawhna kah la khat sa in. Tuipi gei-ah omin tuipi dunga mite tawh sumlei sumzuakna a nei khuapi tungah Topa Pasian keimah in ka gen thute hih bangin gen in: “Taia khuapi aw, na melhoihna na kisaktheihpih hi. Nangma inn pen tuipi hi a, nang hong lamte in teembaw hoih bangin hong bawl uh hi. A sing zat dingun Senir Mual a om taksingte zang uh a, na puankhai khuam dingin Labanon a om taamtak singte zang uh hi. Nangmah hawh nadingin Bashan tawsaw singte la uh a, Grik tuikulh panin a kila taaksante tawh na sual ding bawl uh a, saiha pak tawh nang hong zem uh hi. Egypt gam saihadial puan a kizemte tawh na puankhai kibawl a, gamlapi pek panin zong kithei thei hi. Saipras tuikulh panin a kingah puan hoihpente, kumpi mel puante tawh na tungkhuh kibawl hi. Sidon le Arvad khuapi mite in nang hong hot uh a, misiam mahmahte in nang hong hawl uh hi. Nang hong lem lettamate pen Gebal khuapi mi khutsiam mahmahte ahi uh hi. Tuipi tungah a pai teembaw nasemte khempeuh in na sumbuk hong zuan uh hi. “Persia gam, Lud gam, le Put gammite in nangma galkap hong sem uh a, na sungah a lumte uh le a siklukhute uh a khai uh hi. Amaute in nangma tungah minthanna hong tunpih uh hi. Arvad gam galkapte in na kulh cing uh a, Gamad gammite in na tausangte cing uh hi. Amaute in na kulh tungah a lum uh a khai uh hi. Nang a hong etlawmsak mite pen amaute ahi uh hi. “Tarshish gammite tawh sumlei sumzuakna-ah na kizom uh a, na van tampite hong lei-in ngun, sik, dal, le haknawte hong pia uh hi. Javan gammite, Tubal mite, le Meshek mite in zong sumlei sumzuakna-ah nang tawh kizopna nei uh a, na vante hong leina-in sila dingin mite, le sumngo beelte hong pia uh hi. Bethtogarmah gammite in zong vante hong leina-in vanpua sakolte, sakol galkapte, le late hong pia uh hi. Rods gammite in zong nang tawh sumzuakna-ah kizopna nei uh a, tuipi gei-a om gam khempeuhte in na van hong leina-in saiha le ningsing hong pia uh hi. Edom mite in zong na van tampi hong lei uh hi. Van leina-in emerald suangmanpha, puansan, a kizem puante, saihadial puan hoihte, suangkhi, le ruby suangmanphate hong pia uh hi. Judah le Israel gammite in zong na van leina-in mangbuh, oliv thau, le theipal, khuaizu le sing namtui tuamtuamte hong pia uh hi. Dedan mite in na van hong leina-in sakol dapphahte hong pia uh hi. Arabia mite le Kedar gam ukte in tuuno, tuutal, le keeltal tawh na van hong lei uh hi. Sheba le Raamah sumbukte in na van leina-in singnamtui hoihpente, suangmanphate, le kham hong pia uh hi. Haran, Kanneh, Eden, Asshur, le Khilmad khuapite in zong nang tawh sumlei sumzuakna-ah kizopna hong nei uh hi. Amaute in nang kiangah puan manpha mahmahte, puansan, a kizem puante, sualphah puante, le limtakin a kiheek khauhual hoih nam khempeuh hong zuak uh hi. Nangma vante ahihleh teembaw lianpente pawl in a honhonin hong pua uh hi. “Nang pen van a dim pua-in tuipi tungah a pai teembaw lianpi tawh na kibang hi. Nang hong hotte in tuipi thukna gamlapi-ah hong hot uh a, nisuahna huihpi in tuipi laizangah nang hong mutsia hi. Tua bangin nang na siat ni ciangin a tam mahmah na van khempeuh na sungah a om teembaw nasemte khempeuh, na lettamate le na sumbuk mite khempeuh, na sungah a om na galkap khempeuh, a vekpi-in nang tawh tuipi sungah tuummang khin uh hi. Teembaw nasem tuikiate’ kikona in tuipi geiteng a thawn hi. “Teembaw dangah a tuang mi khempeuh kumkhia uh a, a vekpi-un tuipi gei-ah pai uh hi. Nangma hangin nakpitakin kap uh a, a lu uh leivui thehin vut lakah a bual uh hi. Nangma hangin a lu uh mettol uh a, dahna limin puanhampi silh uh a, na sa lua-in a kap uh hi. Amaute in nang hong tamlawh uh a, ‘Tuipi sungah a daicipsuak Taia khuapi, kua dang tawh kitehthei ding a, ama thuak bang kua in thuak ngei ahi hiam? Na sumbuk vante tuipi tungah a pai ciangin minam khempeuh’ tangsapna na cingsak hi. Nangma van hauhna in kumpi dangte hauhlawh hi. Tu-in tuipi tungah na sia a, tuipi thuk sungah na kiasuk hi. Na vante le na mi khempeuh tuipi sungah nang tawh maimangta hi,’ hong ci ding uh hi. “Tuipi gei-ah a teng mi khempeuh in lamdang hong sa ding uh hi. A kumpite uh zong lau mahmah ding uh a, a maiput uh laumai ding uh hi. Tu-in nang a maimang paisuak na hita a, nangma tuah bang a tuahkhak ding uh leitungah a om sumbuk dang khempeuh lau-in ling uh hi,” a hong ci hi. Topa in kei kiangah thu hong gen a, “Mihing ahi Ezekiel aw, Taia khuapi a ukpa kiangah Topa Pasian ahi keimah in ka gennop thu, ama tungah hih bangin gen in: “Kisaktheihna lungsim lianpi nangmah in na nei a, kei, pasian khat ka hi hi, na ci hi. Nang pen pasian bangin pil na kisak hangin mihing na hi lel bek hi. Danel sangin pil na kisa zaw a, theih loh a nei loin na kingaihsun kha hi. Na pilna le na siamna tawh ngun le kham tampi na nei hi. Sumbawl na siamna tawh na hauhna na behlap a, na hauhna na kisaktheihpih hi. “Tua ahih manin Topa Pasian ahi keimah in ka hong genin-ah: Nang pen pasian zahin a pil kisa na hih manin thukhualna a nei het lo galte, nang ka hong simsak ding hi. Na pilna le na siamna tawh na lamsa na khempeuh amaute in hong vatmaisak ding uh hi. Amaute in nang hong that ding uh a, na hankhuk ding tuipi sungah hong khia ding uh hi. Nang a hong that ding a hong kuan ciangun, kei pasian bang hi ing, na ci lailai diam? Nang hong thatte na tuah ciangin mihing na hih lelna hong kilang ding hi. Gamdang mite’ khut sungah ui bang lelin na si ding hi. Topa Pasian ahi keimah in hih thu ka gen khin hi,” a hong ci hi. Topa in kei kiangah thu hong genkik a, “Mihing ahi Ezekiel aw, Taia kumpipa in a thuak ding tawh kisai-in tamlawh inla, Topa Pasian ahi keima thugen, hih bangin gen in: “Nidang lai-in mi kicing etteh pha khat na hi a, pilna le hoihna tawh a kidim na hi hi. Pasian’ Eden huan sungah nang na teng a, suangmanpha nam khempeuh tawh na kizem hi. Karnelian, topaz, le jasper, khrisolait, beryl, le onik, sapfaia, karbankel, le emerald suangmanphate, nangma kizepna hi a, kham tawh kibawl kizepna tampi tak zong na nei lai hi. Hihte khempeuh nangma a dingin na suah ni-in a hong kibawlsak ahi hi. Sathau a kinilh kherub-te nang ka hong cingsak a, ka mual siangtho tungah nang na teng a, a tee zaizai suangmanphate lakah na vak kawikawi hi. Gamtatsiat ding na kipat ma hun ciang dong, na suah tung a kipanin na gamtatna khempeuh paubaanna khat beek om lo hi. Na sumbawl luatna hangin mi ngongtat na suak a, mawhna sungah na tungkha hi. Tua ahih manin ka mual siangtho panin nang ka hong hawlkhia a, a tee zaizai suangmanphate lak panin nang a hong cing kherub-te in a hong hawlkhia uh hi. Na melhoihna na kisaktheihpih kha a, na minthanna in nang hong haitatsak hi. Leilak ka hong denna a, kumpi dangte hilhkholhna-in nang ka hong koih hi. A man loin sum na bawl luatna hang, tua bang na mawhna hangin na biakna munte na siasak hi. Tua ahih manin khuapi sung ka hal a, a vekpi-in kangtummang hi. Nangmah a hong en mi khempeuh’ muhna-ah vutlevai ka hong suah hi. Tu-in nang a maimang paisuak na hita a, nangma tuah bang a tuahkhak ding uh nang hong theisa minam khempeuhte lau-in a ling uh hi,” a hong ci hi. Topa in kei kiangah thu hong gen a, “Mihing ahi Ezekiel aw, Sidon lam nga inla, a siatna ding thu genkhol in. Topa Pasian ahi keimah in ka gen thu, amaute kiangah hih bangin gen in: “Sidon khuapi aw, kei pen nangma lang ka hi a, nangma tungah ka hong bawlna hangin mite in kei hong phat ding uh hi. Nangma sungah a teng mite gimpiakna tawh ka sianthona ka lah ciangin Topa ka hihna thu amaute in hong thei ding uh hi. Nangma sungah cinatna ka tungsak ding a, na kongzing khempeuhah sisan ka luangsak ding hi. Na kimkot khempeuh panin nang hong kisim ding a, na mi khempeuh kithatlum mang ding hi. Tua ciangin Topa ka hihna thu na hong thei ding hi,” a hong ci hi. Tua ciangin Topa in kei kiangah, “A kimkota om Israel mi a simmawh minam dangte in tu-in simmawh nawn lo ding uh a, Israel mite sunin a nasak thei ding ling le lingkung tawh kibang nawn lo ding uh hi. Tua ciangin Topa ka hihna hong thei ding uh hi,” a hong ci hi. Topa Pasian in kei kiangah, “Minam tuamtuamte lakah ka thehthangna panin Israel mite ka kaikhawm kik ding a, kei pen a siangthopa ka hihna thu minam khempeuh in hong thei ding uh hi. Tua ciangin ka nasempa Jakob ka piak leitang ahi amaute’ gam sungah Israel mite a teng ding uh hi. Tua gam sungah lungmuang takin teng ding uh a, amaute in inn lamin, leenggui suan ding uh hi. Israel mite a simmawh minam dangte gim ka pia ding a, Israel mite ahihleh lungmuang takin om hithiat ding uh hi. Tua ciangin Topa amau’ Pasian ka hihna thu amaute in hong thei ding uh hi,” a hong ci hi. Zedekiah in a uk a kum sawmna, a kha sawm, a ni sawm le nih ni-in Topa in kei kiangah thu hong gen a, “Mihing ahi Ezekiel aw, Egypt kumpipa Faro’ lam nga inla, amah le Egypt gam khempeuh gim a kipiakna ding thu genkhol in. Topa Pasian in hih bangin gen hi, ci-in Egypt kumpipa kiangah gen in: “Gun sungah a om awle lianpi ahi, nang Egypt kumpipa aw, kei pen nangma lang ka hi hi. Nail Gunpi, nangma a’ in na gen a, nangma bawlsa-in na ngaihsun hi. Na khaguh-ah sikkawi ka bulh ding a, na gun sunga om ngasa khempeuh nangma tungah ka belhsak ding hi. Tua ciangin nangma tungah a belh ngasa khempeuh tawh Nail gun sung panin nang kong kaikhia ding hi. Nang le na ngasa khempeuh gamlakah kong paai ding hi. Leilakah na pumpi kiphah ding a, phum lohin hong kikoih ding hi. Ganhingte le vasate’ an dingin nang ka hong pia ding hi. “Tua ciangin Topa ka hihna thu Egypt mi khempeuh in hong thei ding uh hi. Bang hang hiam cih leh nang pen Israel mite’ muan le suan khat na hi ngei a, ahi zongin nang pen a khauh lo pumpeeng kung khat bang na hi lel hi. Nangma tungah amaute hong kingap uh ciangin nang na kitan a, amaute sunin na puksak hi. Tu-in Topa Pasian in nang kiangah kong genin-ah: Namsau tawh mi kong simsak ding a, na mite le na ganhingte thatlummang ding uh hi. Egypt gam khempeuh a kinusia gam simtham suak ding a, tua ciangin Topa ka hihna thu na hong thei ding hi. Nangmah in Nail Gunpi pen keima a’ hi a, keima bawlsa hi, ci na hih manin, nangmah le Nail Gunpi langah keimah ka pang hi. Egypt gam khempeuh, leilu lam Migdol khuapi panin leitaw lam Siene khuapi, Ethiopia gamgi dong, a kinusia gamkhing ka suaksak ding hi. Na gam sungteng, mihing in ahi a, ganhing in ahi zongin sik nawn lo ding hi. Kum sawmli sung bangmah om lo ding hi. Leitung gam khempeuh lakah Egypt gam pen a gamkhing penin ka bawl ding hi. Kum sawmli sung khuapi sia dang khempeuh sangin a siazaw-in Egypt khuapite ka bawl ding hi. Egypt mite galtai-in ka bawl ding a, gam khempeuh le minam dang khempeuh kiangah taisakin ka kithehthangsak ding hi. “Bang hang hiam cih leh Topa Pasian in hih bangin ka ci hi: Kum sawmli khit ciangin a kithehthangna minamte lak panin Egypt mite ka kaikhawmkik ding a, amaute’ piancilna mun Egypt gam khanglam Pathros gamah ka tengsak ding hi. Tua lai-ah kumpi gam ginaloin om ding uh a, kumpi gam khempeuh lakah a ginalo pen suak ding uh a, minam dang kuamah ukzo nawn lo ding uh hi. A ginalo mahmahin bawl ding ka hih manin amau’ deih bangin minam dang khat beek tasak zo lo ding uh hi. Israel mite in muan le suanin amaute neikik ngei nawn lo ding uh hi. Egypt-te a tuahsiat ciangin a suang khialkha ahih lamtak uh Israel mite in a phawk ding uh hi. Tua ciangin Topa Pasian ka hihna thu Israel mite in hong thei ding uh hi,” hong ci hi. Zedekiah in a uk a kum sawmnih le sagih kum, a kha masa a ni masa ni-in Topa in kei kiangah thu hong gen a, “Mihing ahi Ezekiel aw, Babylon kumpipa Nebukhadnezzar in Taia khuapi sim hi. A galkapte, nakpitakin hanciamsak lua ahih manin a sam nangawn uh pulhmangin, a liangkote uh a sa nangawn lengkhiamang a, ahi zongin tua bangin amau’ gim thamanin kumpipa le a galkapte in bangmah phattuamna ngah lo uh hi. Tua ahih ciangin Topa Pasian ahi keimah in hih bangin thu kong gen hi: Tu-in Taia khuapi a simna hangin Babylon kumpipa Nebukhadnezzar tungah Egypt gam ka pia ding hi. Amah in Egypt gam luhin a nate uh sut ding a, galkapte’ thaman dingin Egypt-te’ neihsa khempeuh puakhiamang ding hi. A galkapte in keima a dingin na hong sepsak uh ahih manin, ama hong nasepsak ka thuhna-in ama tungah Egypt gam a pia ka hi hi. Topa Pasian ahi keimah in hih thu ka gen khin hi. “Hih thu hong tun ciangin Israel mite a thahat minamin ka bawlkik ding a, mi khempeuh’ zakna ding munah nang thu kong gensak ding hi. Tua ciangin Topa ka hihna thu amaute in hong thei ding uh hi,” hong ci hi. Topa in kei kiangah thu hong gen leuleu a, “Mihing ahi Ezekiel aw, Topa Pasian ahi keima thugen hih bangin pulak in: “‘A lauhuai ni,’ ci-in awng in. Minamte’ siatna ding hun Topa’ ni hong naita hi. Egypt gamah galpi tung ding a, Ethiopia gamah lungkhamna lianpi om ding hi. Egypt gamah mi tampi kithat ding a, a neihsa khempeuh uh kipuakhia-in, gam hawmguakin kinusia ding hi. “Tua galpi in Ethiopia gam, Put gam, Lud gam, Arabia gam, le Libya gam panin a kicial galkap khempeuh that ding a, keima mite’ lak pana galkapte nangawn si ding uh hi. “Leilu lama om Migdol khuapi panin leitaw lam Siene khuapi dong, Egypt gam a hute khempeuh gal sungah simang ding uh a, Egypt’ kiphatsakpih a galkapteng simang ding hi, ci-in Topa Pasian in ka gen khin hi. Egypt gam, leitung gam khempeuhah a gamkhing pen suak ding a, khuapi dang a siate khempeuh sangin a khuapite siazaw ding hi. Keimah in Egypt gam haltumin, a gam sung a hute khempeuh ka beisak khit ciangin, Topa ka hihna thu hong thei ding uh hi. “Tua bangin Egypt gam a siat ni hun hong tun ciangin bangmah khuaphawk loin a om Ethiopia mite kiangah kamtaite ka sawl ding a, amaute lau mahmah ding uh hi. Tua hun ding tu-in hong tungta hi. “Egypt’ hauhnateng a sumai dingin Babylon kumpi Nebukhadnezzar ka zang ding hi. Amah le a kihtakhuai a galkapte hong pai ding a, gam sung khempeuh susia ding hi. Namsau tawh Egypt mite vatlum ding a, gam sung khempeuhah misi luanghawm dim ding hi. Nail Gun a tui ka kangsak ding a, migilote’ khut sungah Egypt ka koih ding hi. Gamdang mite in susia gawpin, gamkhing suaksak ding uh hi, Topa ahi keimah in ka ci khin hi. “Milim khempeuh ka susia ding a, Memfis khuapi-ah a om pasian man lote ka beisak ding hi. Egypt gam a uk ding kuamah om nawn lo ding a, mi khempeuh lausakin ka lingsakgawp ding hi. Egypt gam khanglam Pathros gamteng gamkhing ka suaksak ding a, Egypt gam saklamah a om Zoan khuapi ka hal ding a, kumpi khua ahi Thebes, gim ka pia ding hi. Egypt gam sungah khuapi muanhuai pen Pelusium khuapi, ka hehna ka thuaksak ding a, Thebes khuapi mi khempeuh ka sumai ding hi. Egypt gam sung khempeuh ka haltum ding a, Pelusium khuapi in gimna lianpi thuak ding hi. Thebes khuapikulh khempeuh kicimgawp ding a, tui in a khuapi tuum ding hi. On khuapi le Pibeseth khuapi tangvalte, gal sungah si khin ding uh a, adangteng salin kiman ding hi. Egypt’ vangliatna ka suksiat ciangin Tahpanhes khuapi-ah khim zinggawp ding a, a kisaktheihpihna teng uh a beita ding hi. Egypt gam sung meiipi in khuhcip ding a, a mi khempeuh salin pai ding uh hi. Tu-a bangin Egypt tungah gim ka piak ciangin, Topa ka hihna thu amaute in hong thei ding uh hi,” hong ci hi. Zedekiah in a uk a kum sawm le khat kum, a kha masa a ni sagih ni-in Topa in kei kiangah thu hong gen a, “Mihing ahi Ezekiel aw, Egypt kumpipa Faro’ khut ka kuaihtansak zo hi. A khut damkikin namsau a tawizawh nadingin kuamah in a khut tuamsak lo hi. Tua ahih manin Topa Pasian ahi keima thugen in: Kei pen Egypt kumpipa Faro’ lang ka hi hi. A khut a damlai pen le a kitansa zong, a lang nihin ka kuaihtansak ding a, a khut panin namsau ka kiasak ding hi. Egypt mite pen, gam khempeuh le minam khempeuhte lakah ka thehthang ding hi. Tua ciangin Babylon kumpipa’ khut ka khauhsak ding a, ama khut sungah ka namsau ka pia ding hi. Ahi zongin Egypt kumpipa Faro’ khut ka kuaihtansak ding a, a langte’ mai-ah tai-in a si ding hi. Amah ka thaneemsak ding a, Babylon kumpipa ka thakhauhsak ding hi. Tua ciangin Topa ka hihna thu amaute in hong thei ding uh hi. Babylon kumpipa’ khut sungah ka namsau ka piak ciangin amah in Egypt lam a ngat ding hi. Tua ciangin gam khempeuh le minam tuamtuamte lakah Egypt mite ka thehthang ding hi. Tua ciangin Topa ka hihna thu amaute in hong thei ding uh hi,” hong ci hi. Zedekiah in a uk a kum sawm le khat kum, a kha thumna a ni masa ni-in Topa in kei kiangah thu hong gen a, “Mihing ahi Ezekiel aw, Egypt kumpipa Faro le ama mite’ kiangah hih bangin gen in: “Na lian mahmah uh a, kong tehpihtheih ding kuamah om lo hi. A hiangte hoihin pha mahmah a, a kung sang mahmahin meii lak a ban, Lebanon-a a po taamtak tawh na kibang uh hi. A khangsak ding tui om a, leisung panin an a pia ding tui om hi. Tua sing a pona mun tui kawt a, gam sung sing khempeuh in zong tui a ngah uh hi. Limtakin tui ngah ahih manin singkung dang khempeuh sangin a sangzaw hi. A hiangte golin sau mahmah hi. Vasa nam khempeuh in a hiang tungah bu tom uh a, ganhing nam khempeuh in a liimnuai, tasuahna-in a nei uh hi. Leitung minam khempeuh in zong a liimnuai belhin a nei uh hi. Tua singkung hoih mahmah a, a kung sangin, a hiang zau a, a zung in tui omna lei thukpi sung a ban hi. Pasian’ huanah a om taamtak hoihte tawh tehtheih ding hi lo a, taksing kung in tua bang hiang hoih nei ngei lo a, hiangpa kung in zong tua bang hiang hoih nei ngei lo hi. Pasian’ huana singkungte zong tua zahin hoih ngei lo hi. A melhoihin ka bawl a, a hiang ka zausak hi. Pasian’ huan sunga a po singkung khempeuhte’ enin ka bawl hi. “Tua ahih ciangin Topa Pasian keimah in hih bangin ka ci hi. Tua sing in meiipi a bat dongin khangto a, ahi zongin a san semsemna tawh kizui-in kiphasak semsem hi. Tua ahih manin tua singkung ka deih nawn kei hi. Gamdang kumpi khat’ khut sungah ka pia ding a, ama thuak dingin a kilawm bangin tua kumpipa in a bawl ding hi. Thukhualna a nei lo gamdang mite in tua singkung phukin a nusiacip ding uh hi. Mual khempeuh le guam khempeuhah a hiang kitante a kia ding uh hi. A lim a bel minam khempeuh in taisanta ding uh hi. Vasate hong leengin tua sing puk tungah tuang ding uh a, gamsate in a hiangte tuancil ding uh hi. Tua ahih ciangin tu a kipanin singkung khat beek, bangzahin tui a ngah hangin tua zahin khangin, a dawn in meiipi banin sangzo ngei nawn lo ding hi. Misite’ omna Leinuai khua a zuan ding, a si thei mihingte mah bangin singkung khempeuh a si ding ahi ta hi. “Topa Pasian in ka cihin-ah: Tua singkung in misite’ khua Leinuai a zuat ciangin, leinuai-a tuite tuumsakin ka thuumsak ding hi. Guntuite le luituite ka luangsak nawn kei ding a, Lebanon Mual maikhingin, gamlak sing khempeuh a keutum ding hi. Misite’ omna Leinuai khua-ah tua singkung ka khiatsuk ciangin, a kiatna ging in minam khempeuh lokgawp ding hi. Tua singkung a kiat manin Eden singkung khempeuh, le a hoihpen, limtakin tui a ngah Lebanon singkungte khempeuh in zong Leinuai-ah nuamtuam na sa ding uh hi. Bang hang hiam cih leh a sisate a zuan dingin misite’ omna Leinuai-ah amah tawh a paikhawm ding uh hi. Ama liimnuai a belte khempeuh, minam dangte’ lakah kithehthang khin uh hi. “Tua singkung pen Egypt kumpipa Faro le ama mite ahi hi. Eden huana singkungte nangawn tua zahin lianin hoih zo lo hi. Ahi zongin, Eden huana singkungte mah bangin, Pasian’ thu a ngaihsun lo, galsung a a site’ omna a zuan dingin, misite’ omna Leinuai a manawh ta ahi hi. Topa Pasian in hih thu ka gen khin hi,” hong ci hi. Zedekiah in a uk a kum sawm le nih kum, a kha sawm le nih a ni masa ni-in Topa in kei kiangah thu hong gen a, “Mihing ahi Ezekiel aw, Egypt kumpipa Faro tamlawh inla, hih bangin ci in: “Minam dangte lakah, humpinelkai bangin na kingaihsun hi. Ahi zongin nang pen gunsung tokgawpin a ninsak, awle tawh na kibangzaw hi. Topa Pasian ahi keimah in kong cihin-ah: Minam tampi hong kuansakin, ka ngen kong khuhsak ding a, tui gei-ah kong kaisak ding hi. Leilakah nang hong kaikhia-in, leilak kong denna ding a, vasate le ganhingte, a kham takun kong nesak ding hi. Mualteng guamteng, na sa ka dimsak ding hi. Na sisan tawh leitung khempeuh ka kawtsak ding a, mualteng guamteng na sisan tawh kidim ding hi. Nang kong suksiat ni ciangin vanpi ka khuhcip ding a, aksi ka mialsak ding hi. Ni, meiipi ka liahsak ding a, kha, ka mialsak ding hi. Vantung khuavak khempeuh ka mialsak ding a, na gam khempeuh khim zing ding hi, ci-in Topa Pasian in ka gen khin hi. “Na theih ngei loh gamdangte-ah salin kong omsak ciangin minam tampite lunggim ding hi. Nang tunga kong bawlna thu minam tampite in lamdangsa ding uh hi. Ka namsau ka vik ciangin kumpite lau-in kigaih ding uh hi. Nang na puk ni ciangin a sihkhak ding uh lau-in mi khempeuh ling kelkel ding uh hi. “Bang hang hiam cih leh Topa Pasian in hih bangin ka ci hi: Babylon kumpipa’ namsau na thuak ding hi. Minam dang a gilo pente sung panin a galkapte uh a namsau uh doksakin, na mihonpite ka thatsak ding hi. “Na kisaktheihpih teng vatmai ding uh a, na minam khempeuh thatmang ding uh hi. A tui nekna mun a omna khempeuh uhah, na gan khawite ka that khin ding hi. Tui a siknin ding mihing ganhing khat zong om nawn lo ding hi. Bangmah in su nawn lo ding ahih manin, tuite ciim sitset ding a, gunte zong dum dide ding hi, ci-in Topa Pasian in ka gen khin hi. Egypt gam gamkhing suaksakin, a gam sunga omteng ka suksiat ciangin Topa ka hihna thu hong thei ding uh hi. “Hih pen kah la-in a kisa ding tamlawhna hi a, Egypt le a mite tamlawhna-in minam dang numeite in nei ding uh hi. Topa Pasian in hih thu ka gen khin hi,” hong ci hi. Zedekiah in a uk a kum sawm le nih kum, a kha masa a ni sawm le nga ni-in Topa in kei tungah thu hong gen a, “Mihing ahi Ezekiel aw, Egypt mi tampite’ hangin kapin thum in. Misite’ omna Leinuai gamah a vanglian minam dangte tawh amaute paisak in. Amaute kiangah hih bangin ci in: “Midang khempeuh sangin melhoihzaw hi lo na hi uh hiam? Ahi zongin pai unla, Pasian a thei lo mite’ han sungah va lum un, ci-in gen in. “Galsung a a kithatte tawh si khawm ding uh hi. Egypt gam sunga om mi khempeuh a vatlum dingin namsau khat a baihsa-in om hi. Egypt mite a panpih galhang pente in misite’ gam Leinuai panin amaute na dawn ding uh a, ‘Pasian a thei lo, galsung a si mite hong paisuk uh a, hih lai-ah lumta uh hi,’ ci-in kiko ding uh hi. “Assiria zong, a kimkotah a galkapte’ han tawh, tua lai mahah om hi. Amaute khempeuh zong gal sungah a si uh hi a, Leinuai a thukpenna munah amaute’ han om hi. A galkap khempeuh gal sungah a si hi a, a hante uh ama kimkotah om hi. Ahi zongin amaute pen nidangin minam dangte a linglawngsak zo ngeite ahi uh hi. “Elam zong, a kimkotah a galkapte’ han tawh, tua lai mahah om hi. Amaute khempeuh gal sungah a si uh hi a, misite’ gam Leinuai-ah Pasian a thei loin paisuk uh hi. A hin lai-un mi khempeuh a lausak ngeite hi uh a, ahi zongin tu-in amaute si-in mindai-in a om uh hi. Galsung a a site lak mahah Elam lum a, ama kimkotah a galkapte’ han om hi. Amaute, Pasian a thei loin, gal sungah si uh hi. A hin lai-un mite a lausak ngeite hi uh a, ahi zongin tu-in amaute si-in mindai-in om uh a, galsung a site mah tawh a kibangin gimna a thuak uh hi. “Meshek le Tubal zong tua lai mahah om uh a, a kimkot uhah a galkapte uh’ han om hi. Amaute khempeuh zong Pasian a thei lo, galsung a a si ahi uh hi. Ahi zongin a hin lai-un midangte a lausakzo ngeite ahi uh hi. Hih mite pen misite’ omna Leinuai-ah a galvanteng uh tawh pai-in, a namsau uh kilukham sakin, a lum uh a awm tung uhah a kikoihsak kawmin limtakin a kivui tanglai galkapte bangin pahtawi a vuina ngah lo uh hi. Ahi zongin hih mite pen midang a lausakzo dingin a vanglian ngeite ahi uh hi. Tua mah bangin nang Faro zong Pasian a thei lo, galsung a site lakah na om ding hi. “Edom zong a kumpite le a gam ukte tawh tua lai mahah om hi. Amaute pen a thahat galkapte hi a, ahi zongin tu-in Pasian a thei loin galsung a a site lak, misite’ gam Leinuai-ah a lum uh hi. “Leilu lam uliante le Sidon mite zong tua lai mahah om uh hi. Amaute’ vangliatna in midangte lausak ngei a, ahi zongin tu-in galsung a si mite tawh mindai-in paisuk uh a, Pasian a thei loin kivui uh hi. Misite’ gam Leinuai-a a paisukte tawh a mindaina uh kibang hi. “Egypt kumpipa Faro in hih mite khempeuh a muh ciangin ama sihna le a galkapte gal sungah a sihna thu tawh kisai-in a lung nuamtuam ding hi, Topa Pasian in ci hi. Bang hang hiam cih leh Faro in midangte lausak gawp ahih manin amah le a galkapte khempeuh kithatin, Pasian a thei loin galsung a a si mite tawh kivui khawm ding hi. Topa Pasian keimah in hih thu ka gen khin hi,” hong ci hi. Topa in kei kiangah thu hong gen a, “Mihing ahi Ezekiel aw, gam khatpeuhah gal ka tunsak ciangin a thupiangteng na mipihte tungah gen in. Tua gal tunna ding gammite in amaute lak panin galvil dingin mi khat seh uh hi. Galvil pa in galte hong pai a muh ciangin mi khempeuh a theihsak nadingin pataukohna peengkul tum hi. Mi khatpeuh in tua pataukohna za napi-in don loin a ommawk a, a galte hong pai-in tua mipa a thah leh, ama sihna pen amahmah ngawh ding ahi hi. Amah in pataukohna za napi-in don lo ahih manin, ama sihna pen ama khialhna hang ahi hi. Thudon hileh amah a suakta ding ahi hi. Ahi zongin galvil pa in galte hong pai mu napi-in pataukohna peengkul a tum kei a, galte hong pai-in mi a thah leh, tua a site amau’ mawhna hangin a si hitaseleh galvil pa ka ngawh ding hi. “Mihing ahi Ezekiel aw, tu-in Israel minam khempeuhte’ galvil pa dingin nang kong koih hi. Nang tungah kong piak hilhkholhna khempeuh amaute tungah na gensawn ding hi. Migilo pa khat pen si ding hi, ci-in kong gen ciangin amah a nuntak theih nadingin na hilh kei leh, tua mipa pen a mawhnei-in si ding a, ahi zongin ama sihna nang kong ngawh ding hi. Nangmah in migilo pa khat hilhkhol napi-in a mawh gamtatna a khawl kei leh, tua mipa a mawhnei mahin si ding a, ahi zongin nang na suakta ding hi,” hong ci hi. Topa in kei kiangah thu hong gen a, “Mihing ahi Ezekiel aw, Israel mite tungah hih bangin gen in: Amaute in, ‘Ka mawhna uh le ka khialhnate un hong hencipin ka tha uh beita ahih manin, bangci nuntak zawh ding ka hi uh hiam?’ ci uh hi. Amaute kiangah hih bangin gen in: Kei pen a nungta Topa Pasian ka hih mah bangin mawhnei mi khat a si ka muh ciangin nuam ka sa het kei hi. A mawh gamtatna khawlin a nuntak ding ka deih hizaw hi. Israel mite aw, na mawh gamtatnate uh khawl un. Bang hangin si nuam se na hi uh hiam? “Mihing ahi Ezekiel aw, tu-in Israel mite kiangah hih bangin gen in: Midik khat in mawhna a bawl leh, a beisa-a ama hoihna in amah suaktasak thei lo hi. Migilo khat a gitlohna khawl leh gim kipia lo ding a, midik khat in mawhna bawl leh nungtasuak tuan lo ding hi. Midik khat tungah nuntakna ding kam ka ciam hangin, a beisa-a ama hoihna suangin mawh gamtat ding hong kipan leh, ama gamtat hoihnasate ka phawk kei ding hi. Ama mawh gamtatna hangin si veve ding hi. Migilo khat kiangah, na si taktak ding hi, ci-in ka hilhkholh hangin, a mawh gamtatna khawlin a man a hoihin hong gamtakik hen la, gentehna-in, leitawi lapa in ama tungah a ap khapna vante pia kikin, a guksa nate pia kikin, a mawh bawlnate khawlin, nuntakna a pia thei thukhamte a zuih leh, amah nungta taktak ding a, si het lo ding hi. Ama gamtatnasa mawhnate kimaisak ding hi. A man a hoihin amah gamta ahih manin nungta ding hi. “Ahi zongin na mipihte in, ‘ Topa’ hihna zia thutang lo hi,’ ci-in ngaihsun uh hi. Tua bang hi lozaw a, amau’ ngaihsutna zia a man lohna hang hizaw hi. Mihoih khat in a gamtat hoih khawlin gamtatsiat ding hong kipan leh, tua a gamtatsiatna hangin amah si ding hi. Migilo khat in a gitlohna khawlin a man a hoihin gamta leh, tua thu hangin amah suakta ding hi. Ahi zongin Israel mite in keima hihna zia a thutang loin a gen uh hi. Keimah in amaute’ gamtatna tawh kizui-in thu a khen ding ka hi bek hi,” hong ci hi. Salin ka omzawh uh a kum sawm le nih kum, a kha sawmna a ni masa ni-in Jerusalem panin a hong suakta mi khat kei kiangah hong pai-in, “Jerusalem khuapi kila khinta hi,” ci-in thu hong ko hi. Tua ama hong tun ni ding a zan nitakin Topa’ vangliatna ka sungah hong omlam ka kiphawk a, tua mipa hong tun ni zingsangin Topa in kei hong pau theisakkik hi. Topa in kei kiangah thu hong gen a, “Mihing ahi Ezekiel aw, Israel gam khuapi siate sungah a teng mite in, ‘Abraham, mi khat bek hinapi-in gambup kipia hi. Tu-in eite a tampi ihih ciangin hih gam pen eima a’ hi taktak hi,’ ci uh hi. Tua ahih ciangin Topa Pasian ahi keima thugen, hih bangin amaute kiangah gen in: Note in sasi, a sa tawh na nekhawm uh a, milim zong na bia uh hi. Mi zong na that lai uh hi. Tua ahih manin bangci-in hih gam pen kote a’ hi, ci thei na hi uh hiam? Note in namsau suanin na nei uh a, na gamtatnate uh kihhuai mahmah hi. Mi khempeuh in nulepa mawhna na gamta uh hi. Tua bangpi-in hih gam luah thei ding na hi uh hiam, ci-in gen in. Amaute kiangah hih bangin gen in: Kei pen a nungta Topa Pasian ka hih mah bangin, khuapi siate sungah a teng mite galin si ding uh a, khuaneu-ah a teng mite khempeuh gamsate in ne ding uh hi. Dum muanhuai sung leh leihawm sungah a bute khempeuh zong pulnatna tawh si veve ding uh hi. Gam sung khempeuh gamkhing ka suaksak ding a, amaute’ kisaktheihpih vangliatna teng bei ding hi. Israel mualtungte gamkhing suak ding ahih manin kuamah in kantan ngam lo ding uh hi. A mawhna hangun a mite gim pia-in, a gam uh gamkhing ka suahsak ciangin Topa ka hihna thu hong thei ding uh hi. “Mihing ahi Ezekiel aw, khuapi kulh gei-ah ahi a, a inn kong gei uhah ahi zongin na mipihte a kimuh uh ciangin nangma thu tawh kisai thu gen uh a, ‘Pai un, Topa in bang thu gen hiam, va ngai ni,’ ci-in khatlekhat kizawn uh hi. Tua ciangin nangma thugen a za dingin ka mite hong kisutuah uh a, ahi zongin nangma gen bangin amaute gamta lo uh hi. Amaute a kamun hoih khem napi-in, a lungsim uhah amau’ meetna ding bek ngaihsun uh hi. Amaute a dingin nang pen mite’ lungnop nadingin zawl la sa-in lasaknate a tum mipa tawh na kibang lel hi. Na thugen khempeuh hong ngai napi uh, khat beek zui lo uh hi. Ahi zongin a tung takpi ding ahih mah bangin, na thugente a tun ciangin amaute lakah kamsang khat omngei ahihlam hong thei ding uh hi,” hong ci hi. Topa in kei kiangah thu hong gen a, “Mihing ahi Ezekiel aw, keima tuuhon ahi Israel mi a cingte mawhsakna thu gen in. Amaute kiangah thu gen inla, Topa Pasian ahi keima thugen, amaute kiangah hih bangin gen in: Israel mi a cing note aw, gimna na thuak ding uh hi. Nomau mahmah na kivak uh a, tuute na don kei uh hi. Tuunawi ne-in, tuumul silhin, tuu thaute go-in a sa na ne uh hi. Ahi zongin tuute na vak kei uh hi. Tuu zawngkhalte na khoi kei uh a, a cinate damsak loin, a liamnate na tuamsak kei uh hi. A lampialte na khiang kei uh a, a mangte na zong kei uh hi. Tua bang bek hi loin, ngong bawlin na ukgawp zawsop uh hi. Tua tuute in a cing ding nei lo uh ahih manin kithehthang gawp uh a, gamsate’ an a suak lel uh hi. Tua ahih manin ka tuute kithehthang gawp uh a, mualtungte le mual sang tung khempeuhah vakmang uh hi. Leitung gam khempeuhah ka tuute kithehthang uh a, kuamah in zon ding kan dingin ngaihsun lo uh hi. “Tua ahih manin no tuucingte aw, Topa ahi keima thugen ngai un: Kei pen a nungta Topa Pasian ka hih takpi mah bangin, keima thu nong ngaihzawk ding uh hinapi-in, tu-in a cing om lo ahih manin gamsate in ka tuute manin thatin a ne uh hi. Ka tuu a cingte in a tuu uh zong lo uh a, amau pumpi bek mah kivakin ka tuute vak lo uh hi. Tua ahih manin no tuucingte aw, keima thugen ngai un. Topa Pasian ahi keimah, note’ lang ka hihna thu tu-in kong pulak hi. Note’ khutsung panin ka tuute ka la ding a, tuute don loin note bek a kidon no tuucingte’ khut sungah ka tuute ka omsakkik nawn kei ding hi. Note’ khutsung panin ka tuute ka honkhia ding a, ka tuute, note’ nekin ka omsak nawn kei ding hi. “Topa Pasian keimah in note kiangah kong genin-ah: Kei mahmah in ka tuute zongin ka kem ding hi. Tuucingte in a kithehthang tuute kaikhawmin a kep bangin keimah in donin ka kem ding hi. Tua bang a lauhuai siatna ding hun laitakin a kithehthangna uh mun khempeuh panin ka kaikhawm ding hi. Gamdang panin amaute lakhia-in ka kaikhawm ding a, amaute’ leitangah ka tunpihkik ding hi. Israel mualtungte, lui geite, le mite’ tenna mun khempeuhah amaute ka gamtasak ding hi. Lungmuang takin Israel mualtung lonona le guam sung munnuamte le Israel gam lonona mun khempeuhah ka gamtasak ding hi. Kei mahmah in ka tuute ka cing ding a, nuamtakin a omna ding uh mun ka zonsak ding hi. Topa Pasian keimah in hih thu ka gen khin hi. Keimah in a mangte zongin, a lampialte kaikhawmin, a liamte a liamma tuamsakin, a cinate damsakin, a cidam a thahatte zong a kibangin ka en ding hi. Bang hang hiam cih leh kei pen a manin a gamta tuucingpa ka hi hi. “No ka tuuhonte aw, Topa Pasian ahi keima thugen ngai un: Note a tuamtuam ciatin thu kong khen ding a, note sung panin a hoih le a hoih lo hong khenin, tuu le keel zong kong khen ding hi. Note pawlkhat, lopa limci na nek bek uh tawh na lungkim kei uh a, na nek lohte nangawn uh na tuancilgawp uh hi. Tui a siang na dawn uh a, na dawn lohteng uh na siknin uh hi. Ka tuu dangte in na tuatcilsa uh lopa ne-in na sikninsa uh tuite a dawn uh kul hi. “Tua ahih ciangin Topa Pasian keimah in ka thugen ngai un: No tuu thaute le tuu gawngte kong khen ding hi. Note in a cidam lote na ki uh tawh si gawpin, a hon lak panin na nawtkhia uh hi. Keimah in ka tuuhonte ka hon ding a, a dangte ka bawlsiasak nawn kei ding hi. Ka tuute khatlekhat kikalah thu ka khen ding hi. Amaute a cing dingin ka nasempa David ka koih ding a, amah in amaute hoihtakin an vakin a kem ding hi. Topa ahi keimah, amaute’ Pasian ka hi ding a, ka nasempa David, amaute a ukpa hi ding hi. Topa ahi keimah in hih thu ka gen khin hi. Amaute lungmuang takin a om theih nadingun amaute tawh thuciamna khat ka bawl ding hi. Gam sung panin a lauhuai gamsa khempeuh ka beisak ding a, gamlakah nuamtakin gamta-in a lum thei ding uh hi. “Amaute thupha pia-in ka mual siangtho kiimah ka omsak ding hi. A kisap hunhunin thupha guahtui ka zusak ding hi. Singkungte tampi tak gahin, lo-ah an tampi piang ding a, mi khempeuh a leitang ciat uhah nuamtakin teng ding uh hi. Sal ahihna panun ka mite suakta sakin, a kikhihna kolte uh ka sutsak khit ciangin, Topa ka hihna thu amaute in hong thei ding uh hi. Gamdang mite in hih gawpgawp nawn lo ding uh a, gamsate in thatin ne nawn lo ding uh hi. Amaute lungmuang takin om ding uh a, kuamah in lausak nawn lo ding uh hi. Amaute tungah logam hoih pia ding ka hih manin gam sungah gilkial dangtak om nawn lo ding hi. Minam dangte in amaute simmawhbawl nawn lo ding uh hi. Israel mite ka hutna le amaute pen keima mi ahihna thu mi khempeuh in thei ding uh hi. Topa Pasian in hih thu ka gen khin hi. “No ka ta ahi tuute aw, an ka hong vak tuuhon ahi keima mite na hi uh a, kei pen note’ Pasian ka hi hi. Topa Pasian ahi keimah in hih thu kong gen khin hi,” hong ci hi. Topa in kei kiangah thu hong gen a, “Mihing ahi Ezekiel aw, Seir Mual lam nga inla, Edom mite mawhsakna thu gen in. Topa Pasian ahi keima thugen, hih bangin gen in: “Seir Mualtung gam aw, kei, nangma lang ka hi hi. Nang a gamkhingin ka hong bawl ding hi. Na khuapite ka siasak ding a, na gam sungteng gamkhing ka suaksak ding hi. Tua ciangin Topa ka hihna thu na thei ding hi. “Nang pen Israel mite’ gal na hi tawntung a, a mawhna hangun gim a tuah ni a nunung pen, a lungkham thuak hun laitakun Israel mite na siasakmang hi. Tua ahih ciangin kei pen a nungta Topa Pasian ka hih takpi mah bangin, nangma sih nading ka bawl ding a, na si takpi ding hi. Nangmah in mi sisak na hih manin nangma tungah sihna hong tung ding hi. Seir Mualtung gam khempeuh gamkhing ka suaksak ding a, tua gam sunga a vak mi khempeuh ka that ding hi. Mualtung khempeuh si luanghawm tawh ka kidimsak ding a, mual le guam khempeuh dimin galsung a a site’ luanghawm a om ding hi. A gamkhingin kong bawl paisuak ding a, na khuapite sungah kuamah tengkik nawn lo ding hi. Tua ciangin Topa ka hihna thu na hong thei ding hi. “Kei pen Israel le Judah mite’ Topa Pasian hinapi-in, hih minam nihte nangma a’ in ngaihsunin a luah dingin na kigen hi. Tua ahih manin kei pen a nungta Topa Pasian ka hih takpi mah bangin, hih ka minam nihte tungah na heh gamtatna, na muhdah bawlna, le na hazat bawlna tawh kizui-in nangma tungah kong thukkik ding hi. Amaute tungah na gamtatnasa hangin gim hong pia ka hihna thu amaute in thei ding uh hi. Tua ciangin nangmah in, ‘Israel mualtungte gamkhing suak ta a, keima a’ ding hita hi,’ ci-in simmawhna tawh na kampaunate, Topa ahi keimah in a za ka hihlam na thei ding hi. Kei hong gensia-in na kiphatsak paunate khempeuh a vekin ka za khin hi. “Tua ahih ciangin Topa Pasian in hih bangin ka ci hi: Leitung buppi a lungdam theih nadingin nang a gamkhing pha mahmahin kong bawl ding a, keima mi Israel-te a siatgawp manin na lungdamna zah tawh kizui-in nangma tungah kong bawl ding hi. Seir Mualtung gam ahi Edom leitang khempeuh, gamkhing suak ding hi. Tua ciangin Topa ka hihna thu mi khempeuh in hong thei ding uh hi,” hong ci hi. Topa in kei kiangah, “Mihing ahi Ezekiel aw, Israel mualte tungah thu gen inla, Topa Pasian ahi keimah in amaute tungah gen ding ka neih thute hih bangin gen in: Israel-te’ galte in, ‘Hih tangtawng mualtung gamte tu-in eima a’ hita hi,’ ci vial uh hi. Tua ahih ciangin mailam thu ding gen inla, Topa Pasian ahi keima thugen hih bangin pulak in: Na kimkot uhah a om minam dangte in no Israel mualtung gamte hong la-in na neihsate uh a hong suh uh ciangin, mite khempeuh in no Israel mite hong simmawh bawlin hong ciamnuihbawl lel uh hi. Tua ahih manin no Israel mualtung gamte aw, Topa Pasian ahi keimah in mual lian le mual neute, lui le guamte, a kisia-in a kinusia munte, le a kiima minam dangte in luhgawpin a ciamnuihbawl khuapite tungah ka gen thute ngai un. “Topa Pasian ahi keimah in a kimkotah a om minam dangte, le a diakdiakin Edom mite tungah ka hehluatna tawh thu ka gen hi. Amaute in lungdamin nuihna le simmawhna tawh keima leitang la-in a tang uh hi. Tua ahih ciangin Israel gam tawh kisai-in mailam thu genkhol inla, a kimkotah a om minam dangte in a simmawh bawlna hangun Topa Pasian ahi keimah in hehna tawh ka thugente, mual lian, mual neu, lui le guamte tungah gen in. Topa Pasian ahi keimah in a kimkotah a om minam dangte ka mindaisak ding khauhtakin ka kiciam hi. Ahi zongin Israel mualtung gamte-ah no ka mi Israel-te a dingin singkungte in teh le gah hong neikik ding uh a, a sawt loin note, inn-ah a hong ciahkik ding na hi uh hi. Kei pen note’ lamah kong pang ding a, pel loin na gam uh lo-in kikho kikin khaici kituhkik ding hi. A mi-in zong kong pungsak ding a, khuapite sungah tengkikin a sia khempeuh na puahkik ding uh hi. A mihing a ganhingin kong pungsak ding a, a nidang sangin tam na phazaw ding uh hi. Ta tampi tak na nei ding uh hi. Nidangin na om ngei bangun kong omsakkik ding a, a nidang sangin a cithei zaw-in kong bawl ding hi. Tua ciangin Topa ka hihna thu na hong thei ding uh hi. No ka mi Israel-te, na leitang uhah kong gamtangsakkik ding hi. Note’ leitang suak ding a, tua leitang in na tate uh gilkialin puksisak nawn lo ding hi. “Topa Pasian ahi keimah in kong genin-ah: Israel mualtung gamte, mihing sane hi a, tua mualtung gamte in a gam sung mite’ tate laksak hi, ci-in a beisa hunah hong kigennate a man ahi hi. Ahi zongin tu a kipanin mihing sa a ne, gam sung mite’ tate a laksak gam hi nawn lo ding hi. Topa Pasian in hih thu ka gen khin hi. Minam dangte’ hong kobawlna za nawn loin, a hong mindaisakna uh na thuak nawn kei ding uh a, na sung uhah a teng mite’ tate zong no Israel mualtung gamte in na laksak nawn kei ding uh hi. Topa Pasian in hih thu ka gen khin hi,” hong ci hi. Topa in kei kiangah thu hong gen a, “Mihing ahi Ezekiel aw, Israel mite amaute’ gamah a ten lai-un amaute’ gamtatna le a sepnate uh tawh tua gam ninsak uh hi. Amaute’ gamtatnate pen numeite’ neih nin zahin a ninin ka ngaihsun hi. Tua ahih manin gam sungah amaute’ mi thahna le a milimte uh tawh gam sungteng a nitsakna hangun ka hehnateng ka thuaksak hi. Amaute’ nuntakna zia le a gamtatna ziate uh tawh kizui-in amaute tungah thu ka khen a, gamdang mun citengah amaute ka thehthang hi. Ahi zongin midangte in, ‘Hih mite pen Topa’ mite hinapi-in, Pasian in amaute’ tungah a piak gam panin taikhia uh hi,’ ci-in a paina peuhpeuh uhah na kigen ahih manin, ka min siangtho hong daisak uh hi. Israel mite in a paina peuhpeuh uh gamdang mite lakah ka min siangtho hong daisak kawikawi uh ahih manin tua thu in ka lung hong himawhsak hi. “Tua ahih ciangin Topa Pasian keimah in Israel mite tungah ka gen ding thute hih bangin gen in: Israel mite aw, tu-a ka sep ding thu pen note kong khualna hang hi loin, minam dang khempeuhte’ lakah na daisak kawikawi uh ka min siangtho ka khualna hang hizaw hi. Note in minam dangte’ lakah na daisaksa uh a lian ka min siangtho pen tu-in minam dangte’ lakah a sianthona ka langsak ding hi. Keimah in minam dangte’ lakah ka sianthona ka lah nadingin note kong zang ding hi. Tua ciangin Topa ka hihna thu amaute in hong thei ding uh hi. Topa Pasian ahi keimah in hih thu ka gen khin hi. Gam khempeuh le minam khempeuhte lak panin note hong kaikhawm kikin na gam uhah kong tunpih kik ding hi. Note tungah tui siangtho kong theh ding a, na milim biakna uh le note hong ninsak na dang khempeuh panin kong siangsak ding hi. Note sungah lungtang thak le lungsim thak kong guan ding a, na suang lungtang uh hong lakkhiatsakin mihing lungtang kong guan ding hi. Note sungah keima kha kong guang ding a, note tungah kong piak ka thukhamte le ka thupiakte limtakin kong zuisak ding hi. Tua ciangin na pu na pate uh tungah ka piaksa gamah na teng ding uh a, note pen keima mi hi-in, kei pen note’ Pasian ka hi ding hi. Note hong ninsak thei ding na khempeuh panin kong hu ding hi. An tampi ka piangsak ding a, gilkial na thuakkha nawn kei ding uh hi. Na singgah kungte uh le na lolai ante uh tampi tak ka phasak ding a, minam dangte lakah gilkial a mindaina na thuakkha nawn kei ding uh hi. Na gamtatnasa uh na gitlohnate uh le na hoih lohnate uh na phawk kik ding uh a, na mawhna uh le na khialhnate uh hangin nomau mahmah na kimudahtawm ding uh hi. Israel mite aw, hih thute khempeuh, note’ lungdam nadingin a bawl ding ka hihlohna thu na theih ding uh ka deih hi. Na gamtatnasate uh hangin maizumin na mindai ding uh ka deihna hizaw hi. Topa Pasian in hih thu kong gen khin hi. “Na mawhna khempeuh panun note kong siansak khit ciangin na khuapite uh sungah hong tengsakkikin, a sia khempeuh kong puahsakkik ding hi. Na lote uh a nawkkha ngei mite’ muhna-ah gammang tulak a bat ngei hangin, tu-in tua lote kho-in note kong puahsakkik ta ding hi. Hih leitang pen gammang tulak a bang ngei hinapi-in tu-in Eden Huan a batna le a kisusia, a kiluhgawp, a kinusiacip khuapite pen tu-in a muanhuai kulh tawh ki-umin a sungah mi a tenna thu mi khempeuh in gen belin nei ding uh hi. Tua ciangin note’ kimkotah a om a suakta lai minam dangte in a siasa khuapite lamkikin, a kinusia lote a puahkik pa pen Topa ahi keimah ka hihna thu hong thei ding uh hi. Topa ahi keimah in hih thu ka gen khin a, ka gen bangin ka gamta ding hi. “Tu-a tengbek hi loin adang zong ka hih lai ding hi. Keima tung pan Israel mite huhna ka ngensak ding a, tuuhonpi bangin Israel mite ka tamsak ding hi. Tuhunin a sia-in a omcip khuapite pen a kiseh pawi hun ciangin biak nadingin a kipaipih, Jerusalem-a tuuhonpi om muamua bangin, mi tampi tawh kidim ding uh hi. Tua ciangin Topa ka hihna thu hong thei ding uh hi,” hong ci hi. Ka sungah Topa’ vangliatna hong om lamtak ka kiphawk a, ama kha in kei hong paipihin, misi guh tawh a kidimin a om kuampi khatah hong koih hi. Tua guhte lakah hong vakpih kawikawi a, tua guhte a tam mahmahna le a keu mahmahna ka mu hi. Amah in kei kiangah, “Mihing ahi Ezekiel aw, hih misi guhte a nungtakik thei ding hiam?” ci-in hong dong hi. Kei zong, “Topa Pasian aw, hih thu nang bek in na thei ding hi,” ci-in ka dawng hi. Tua ciangin amah in, “Hih guhte tungah thu hilh inla, hih guhkeute in Topa’ thu a ngaih nadingun gen in. Topa Pasian ahi keimah in amaute tungah ka gen thu hih bangin gen in: Note sungah hu kong guan ding a, note kong nungtasakkik ding hi. Thagui le sazang kong guan ding a, vun tawh kong tuam ding hi. Tua ciangin na sung uhah hu hong guan in kong nungtasakkik ding hi. Tua ciangin Topa ka hihna nong thei ding uh hi, ci-in gen in,” hong ci hi. Tua ahih ciangin hong sawl bangin thu ka gen hi. Tua bangin thu ka gen laitakin a kigawi zuazua a ging ka za a, tua guhte khatlekhat kizomkik uh hi. Tua bangin ka et laitakin thagui le sazang in tua guhte tuam a, tua ciangin a vun in zong hong tuam hi. Ahi zongin tua pumpite sungah hintheihna hu om nai lo hi. Tua ciangin amah in kei kiangah, “Mihing ahi Ezekiel aw, huihte tungah thu gen inla, hih a sisa pumpite sungah hu sangin a hingkiksak dingin mun khempeuh panin hong pai un, ci-in Topa Pasian in thu hong pia hi, ci-in gen in,” hong ci hi. Tua ahih ciangin hong sawl bangin ka gen hi. Tua pumpite sungah hintheihna hu hong lut a, tua ciangin amaute hingin a khe-un hong ding uh hi. Galkap honpi khat zah pha-in tam mahmah uh hi. Tua ciangin Pasian in kei kiangah, “Mihing ahi Ezekiel aw, Israel mite pen hih guhte tawh kibang uh hi. Amaute in, ‘I keucip a, i lamet ding bangmah om nawn loin i nuntakna guipi beita hi,’ ci uh hi. Tua ahih ciangin ka mi Israel-te tungah thu gen inla, Topa Pasian in hih bangin ci hi, ci-in gen in: Ka mite aw, tu-in note’ hankhuk kong honsak ding a, note hong paikhiatpihin, Israel gam kong tunpihkik ding hi. Note na kiphumna uh hankhuk hong honsakin kong paikhiatpih ciangin Topa ka hihna thu nong thei ding uh hi. Note sungah keima nuntakna hu kong guan ding a, note hong hingsakkikin, na gam uhah kong tengsakkik ding hi. Tua ciangin Topa ka hihna thu nong thei ding uh hi. Hih bangin kong hihna ding thu ka kiciamzo a, ka kiciam bangin kong hih ding hi. Topa ahi keimah in hih thu ka gen khinzo hi, ci-in gen in,” hong ci hi. Topa in kei kiangah thu hong gen a, “Mihing ahi Ezekiel aw, sing ciangkhut khat la inla a tungah, ‘Judah kumpi gam,’ ci-in gelh in. Tua ciangin adang khat la leuleu inla a tungah, ‘Israel kumpi gam,’ ci-in gelh leuleu in. Tua ciangin tua ciangkhut tegel ciangkhut khat a battheihna dingin na khut sungah tawikhawm in. Bang a cihnopna ahi hiam, ci-in na mipihte in hong dot uh ciangin amaute kiangah, Topa Pasian in hih bangin ci hi: Israel ciangkhut la-in Judah ciangkhut tawh ka koihkhawm ding hi. Tua ciangkhut nihte ciangkhut khatin ka bawl ding a, ka khut sungah ka tawi ding hi, ci hi, ci-in gen in. “Tua na gelh ciangkhut nihte mite’ muhin na khut sungah tawi-in amaute kiangah, Topa Pasian in hih bangin ci hi, ci-in gen in: Amaute’ omna minam dangte’ lak panin Israel mite la-in ka kaikhawm ding a, amaute’ gamah ka paipihkik ding hi. Israel mualtung gamah, amaute minam khatin ka gawmkik ding hi. Amaute a uk ding kumpi khat nei ding uh a, amaute minam nihin kikhen nawn lo ding uh a, kumpi gam nihin zong kikhen nawn lo ding uh hi. Amaute pen a muhdahhuai milimte tawh kininsak nawn lo ding uh a, mawhnate tawh zong kininsak nawn lo ding uh hi. Amaute’ mawhna le kei hong lehheknate panin ka suaktasak ding hi. Amaute a siangtho mi-in ka bawl ding a, amaute keima mi hi-in, kei, amaute’ Pasian ka hi ding hi. Ka nasempa David pen amaute’ kumpi hi ding a, mi khat’ ukna nuai-ah amaute kigawmin, ka thukhamte hoihtakin zui ding uh hi. A pu a pate uh a tennasa ahi ka nasempa Jakob tungah ka piak leitangah amaute teng ding uh a, amaute bek hi loin a suan a khak dongun tengsuak ding uh hi. Ka nasempa David in amaute uk tawntung ding hi. Amaute lungmuangin a om tawntungna ding uh thuciamna khat ka bawl ding a, amaute thupha pia-in a mi ka pungsak ding hi. Amaute’ lakah a om tawntung dingin ka biakinnpi ka phut ding hi. Amaute tawh tengkhawmin, amaute’ Pasian ka hi ding a, amaute pen keima mite hi ding uh hi. Amaute’ lakah a om tawntung dingin ka biakinnpi ka koih ciangin, Topa ahi keimah in keima mi dingin Israel mite ka bawl khitna thu, minam dangte khempeuh in thei ding uh hi,” hong ci hi. Topa in kei kiangah thu hong gen a, “Mihing ahi Ezekiel aw, Magog gam a om Gog kumpipa mawhsakna thu gen in. Amah pen Meshek minamte le Tubal minamte a ukpa ahi hi. Amah mawhsakna thu gen inla, Topa Pasian in hih bangin ci hi, ci-in gen in: Meshek le Tubal minamte a ukpipa Gog aw, kei pen nangma langah ka pang hi. Nang hong lehhei-in, na khaguh-ah sikkawi kong bulh ding a, na galkap honpite khempeuh tawh kong kaikhia ding hi. Na galkap honpite pen a sakolte uh le a sakol tung tuangte uh tawh tam mahmah a, na galkap khempeuh in lum le namsau nei kim uh hi. Persia gam, Kush gam, le Put gammite in zong nang hong panpih uh a, amaute in lum le siklukhu nei kim uh hi. Leilu lam gam peka om Gomer gam a galkapte khempeuh le Bethtogarmah gam a galkapte khempeuh in nang hong panpih uh a, minam dang tampite in zong nang hong pawlpih uh hi. Tua ahih manin tu-in nang le na pawlte khempeuh a kigalging sa-in om unla, na thupiakna bangin a gamtang pah lian dingin na galkapte khempeuh omsak in. Minam tuamtuamte lak panin kikaikhawm kikin a gam uh a kitutkik zawh gallauna nei loin a om Israel mite’ gam a sim dingin kum tampi khit ciangin kong sawl ding hi. Sauveipi sung kinusia-in gamkhing a suak ngei hinapi-in, tu-in a mite khempeuh lungmuang takin a omna Israel mualtung gamte a sim ding na hi hi. Nang le na galkap honpite le nang hong pawlpih minam tampite in khuapi huih bangin na simgawp ding uh a, meiipi bangin a gam sung khempeuh na tuamcip ding uh hi. “Topa Pasian ahi keimah in nang Gog tungah kong genin-ah: Tua hun ding hong tun ciangin na lungsim sungah gitloh gamtat ding ngaihsut na kipan ding hi. A khuapite in galnanna ding kulh nei loin, lungmuang takin a om hithiat, a kihutawm zo lo ding gam khat, simgawp ding na ngaihsun ding hi. A sia ngeisa khuapite sungah a teng mite luhin a nate uh na sutgawp ding hi. Tua mite pen minam tuamtuamte lak panin a kikaikhawm kik, tu-in ganhing le neihsa van zong nei kikin, leitung lam khempeuh a kituahna lamkabom sanah a teng mite ahi uh hi. Sheba mite le Dedan mite, le Tarshish khuapite-ah a teng sumbukte in nang kiangah, ‘Ngun le khamte, ganhingte le vante na ngah nadingin luhgawpin a sutgawp ding le genzawh loh van tampi tawh a ciahkhia dingin galsim dingin na galkapte na kaikhawm nai hiam?’ ci-in hong dong ding uh hi, ci-in gen in,” hong ci hi. Tua ciangin Topa Pasian in kei kiangah, “Mihing ahi Ezekiel aw, hih bangin thu gen in hong ci hi: Keima mi Israel-te lungmuang takin a om hun laitakin nangmah na kihanthawntawm ding a, leilu lam peka na omna gam panin sakol tung vive-ah a tuang, minam tampite kiang panin na kaihkhop a thahat galkap hon tampite masuanin na kuankhia ding a, khuapi huih in gam sung a nawkgawp bangin keima mi Israel-te na sim ding hi. A hun a tun ciangin, nangmah zangin na ka sepna tawh minamte lakah ka sianthona ka lahtheih nadingin keima gam a sim dingin kong sawl ding hi. Ni khat ni ciangin Israel mite a sim dingin mi khat ka sawl ding hi, ci-in keima nasem Israel kamsangte tungtawnin, sawtpek lai-in ka gengen niloh mipa pen nang na hi hi. Hih thu Topa Pasian in gen khinzo hi. “Ahi zongin Gog in Israel gam a sim ni ciangin ka heh suak mahmah ding hi. Tua ni ciangin ka hehluatna tawh Israel gamah nakpitakin zin ling hen, ka ci ding hi. Ngasate le vasate, ganhing a neu a lian, le leitung a om mi khempeuh, keimah kihtakna hangin lau-in ling ding uh hi. Mualte pukin, keente cimin, kulh le phung khempeuh kicimmang ding uh hi. Gimna a tuamtuamte tawh Gog ka lausakgawp ding hi. Topa Pasian in hih thu ka gen khin hi. Ama mite khatlekhat namsau tawh kisatgawp ding uh hi. Pulnatna le sisan luanna tawh amah gim ka pia ding hi. Amah le a galkap honte le amah a panpih minam tampite tungah guahpi, gialpi, meikuang le kaat kuang, ka zusak ding hi. Hih bangin hihna tawh a lian a siangtho ka hihna thu, keimah in minam khempeuh tungah ka langsak ding a, tua ciangin Topa ka hihna thu amaute in hong thei ding uh hi,” hong ci hi. Topa Pasian in kei kiangah, “Mihing ahi Ezekiel aw, Gog mawhsakna thu gen inla, Topa Pasian in hih bangin ci hi, ci-in gen in: Meshek le Tubal minamte a ukpipa Gog aw, kei pen nangma langkhatah a pang ka hi hi. Mundang khatah nang kong paisak ding a, leilu lam gam pek panin Israel mualtung gamah kong tunpih ding hi. Tua lai mun panin na veilam khutah na tawi na thal hong betkhiatsakin, na taklam khutah na tawi na thaltangte zong kong betkhiatsak ding hi. Nang le na galkap honte le nang hong panpih minam khempeuhte pen Israel mualtung gamah na simang ding uh a, vasa nam khempeuh le gamsate in na sa uh ne ding uh hi. Topa Pasian in hih thu gen khin ka hih manin gamlakah na tuk zeizai ding uh hi. Kuamah in nawngkaisak loin nuamtakin mite a om hithiatna Magog gam sung le tuipi gei-a gamte ka hal ding a, tua ciangin Topa ka hihna thu mi khempeuh in hong thei ding uh hi. Keima mi Israel-te lakah ka min siangtho ka kitheisak ding a, keima min a daii dingin ka omsak nawn kei ding hi. Tua ciangin keimah pen a Siangtho, Israel-te’ Pasian ahi Topa ka hihna thu minam khempeuh in hong thei ding uh hi,” hong ci hi. Topa Pasian in, “Tua ka gengen ni hong tung takpi ding hi. Israel gam khuapite-ah a teng mite kuankhia-in, tua a kinusia galhiamte ansing dingin khawm ding uh hi. Tua a kinusia lumte, thal le thaltangte, molhtumte le teipite, mei-in cih ding uh a, kum sagih sung kikhom ding hi. Amaute in mei cih dingin a kinusia galhiamte nei uh ahih manin gamlakah sing tom kullo ding a, tulakah sing phuk ding zong kisam lo ding hi. Amaute in amau’ na a sutte’ na sutin, a suksiatsakte’ na suksiatsak ding uh hi. Topa Pasian in hih thu ka gen khin hi,” hong ci hi. Topa in, “Hih thu hong pian’ ni ciangin Israel gam sung Si Tuipi nisuahna lamah a om Khualzin Mite’ Kuam a cihna sungteng, a kivui nadingun Gog ka pia ding hi. Gog le a galkap honpite, tua lai munah kivui ding ahih manin khualzin mite’ lampi khaktan ding a, tua mun pen, ‘Gog Galkapte’ Kuam,’ kici ding hi. Israel mite in a gam sung uh a siansakkik nadingin misi vuina-in kha sagih sung hun bei ding hi. Gam sunga om mi khempeuh in misi vuina-ah huh ding uh a, tua bangin a huhna hangun ka gualzawh ni-in pahtawina ngah ding uh hi. Topa Pasian ahi keimah in hih thu ka gen khin hi. Kha sagih a cin khit ciangin, a gam sungteng uh a siangthosak theih nadingun a kimangngilhkha siluanghawmte zongin a phum dingin gam sungteng a zong kawikawi ding mi pawlkhat a seh ding uh hi. Gam sungteng a zon kawikawina uhah misi guh a muh simun, misi vuite in hong tawmin Gog Galkapte’ Kuam-ah a vui hun ma sungteng uh a kitheih nadingin a gei-ah ciaptehna khat bawl pahpah uh hi. (Tua galkap honpite’ min tamin a gei-ah khuapi khat om hi.) Tua bangin gam sung siangsak ding uh hi,” hong ci hi. Topa Pasian in kei kiangah, “Mihing ahi Ezekiel aw, amaute a dingin ka bawlsak biakpiakna sa a ne dingin mun khempeuh panin vasa khempeuh le ganhing khempeuh hong pai nadingun sam in. Israel mualtung gamah pawi lianpi khat om ding a, a duh zahzahun sa ne-in si dawn ding uh hi. Tuutalte, tuunote, keelte le bawngtal thaute a kigawh bangin a kigo ahi galkapte’ sate ne-in, leitung gam ukte’ site a dawn ding uh ahi uh hi. Biakna dinga gawh bangin hih mite ka gawh ciangin vasate le ganhingte in a nekzawh zahzah uh a thaute ne ding uh a, a kham dongun a si dawn ding uh hi. Amaute in ka sabuai tungah, sakolte le a tunga tuangte, galkapte le galkapmangte’ sa, a nekzawh zahzah uh ne ding uh hi. Topa Pasian in hih thu ka gen khin hi,” hong ci hi. Topa in kei kiangah, “Minamte lakah ka minthanna ka lak ding a, thu a tangin ka khennate ka sepkhiat theih nadingin ka vangliatna ka zatna dan amaute tungah ka lak ding hi. Tua khit a kipanin amaute’ Topa Pasian ka hihna thu, Israel mite in hong thei ding uh hi. Tua ciangin kei tungah hong khialhna uh hangin Israel mite sal suak uh a, amaute nungngatin, a galte uh khut sungah pia-in gal sungah a vekun a sisak ka hihna, le amaute’ nitna le a gitlohna uh tawh kituakin amaute tungah bawlin, amaute a nungngat ka hihna thu, minam dangte in thei ding uh hi,” hong ci hi. Topa Pasian in kei kiangah, “Tu-in Jakob suanlekhak Israel mite ka hehpih ding a, amaute a cithei-in ka bawlkik ding hi. Keima min siangtho ka hu ta ding hi. Amaute’ gam sungah kuamah in su loin lungmuangin a omkik uh hun ciangin, kei hong lehbawlnate uh le a mindainate uh mangngilh theita ding uh hi. Kei a siangtho ka hihna thu, minam tampite tungah ka lah nadingin a galte uh a omna gamdang khempeuh panin amaute lakhia-in ka kaikhawm kik ding hi. Tua ciangin, minam dangte’ khut sungah salin amaute puakin, tua khit ciangin amaute khat zong siit loin kaikhawm kikin a gam sung uh ka tunpih kimna hangin amaute’ Topa Pasian ka hihna thu, keima mite in hong thei ding uh hi. Israel mite tungah ka kha ka sung ding a, amaute ka nungngat nawn kei ding hi. Topa Pasian in hih thu ka gen khin hi,” hong ci hi. Jerusalem khuapi a kilak zawh a kum sawm le lina kum, salin hong kipaipih zawh a kum sawmnih le ngana, a kha masa a ni sawm ni-in ka sungah Topa’ vangliatna hong om lamtak ka kiphawk a, amah in kei hong paikhiatpih hi. Ka maang sungah, Pasian in Israel gamah hong paipih a, mual sang khat tungah hong koih hi. Khuapi tawh a kibang inn honpi bang khat ka mai-ah ka mu hi. Amah in tua khuapi nai-ah hong paipih a, sumngo bangin a tee mi khat ka mu hi. Tua mipa in pikhau khat le piciang khat tawi a, kongpi gei-ah a ding hi. Tua mipa in kei kiangah, “Mihing ahi Ezekiel aw, tu-a kong lah ding nate, na mit tawh limtakin enin, na bil tawh limtakin ngai inla, limtakin ngaihsun in. Hih lai-ah nang kong paipihna pen hih thu hang mah ahi hi. Na muh na khempeuhte, Israel mite tungah a gen ding na hi hi,” hong ci hi. Ka muh pen biakinn na hi a, a kimkotah kulh om hi. A mipa in pi sawm a pha tehna piciang la-in a kulh a teh hi. A teh ciangin pi sawm sahin, pi sawm mah sang hi. Tua ciangin nisuahna lama om kulhkongpi-ah amah pai a, a kahlei-ah kahto-in a khung a tun ciangin kulh kongvang teh a, pi sawm mah sang hi. Tua banah lampi khat om a, a lampi pang tuakah galvilna inndei neu thum tuak om hi. Inndei neute a dung a vai kikim a, pi sawm mah ahi hi. Inndei neu khatlekhat kikal pi giat sah hi. Tua galvilna inndei neute banah pi sawm mah a sau lampi khat om a, biakinnpi lam a maingat inndei golzaw sung a tung hi. Hih inndei golzaw a teh ciangin pi sawm le li pha hi. Hih inndei pen biakinn tunna ding lampi tawpna hi a, a biakinn lam neh pena om kawm pen pi li a sah hi. (Hih lampi pang tuak a om galvilna inndei neute pen a golna kikim a, a kikal-a kawmte zong a sahna kikim hi.) Tua ciangin a mipa in a lampi teh a, pi sawm le guk zai-in pi sawmnih le nih a sau hi. Tua galvilna inndei neu mai ciatah letmat sawmnih sangin letmat sawmnih a sah kidalna khat a om hi. (Hih galvilna inndei neute pen a dung a vai pi sawm tuak ahi hi.) Tua ciangin inndei neu kawm nung panin lampi kantanin a gal sana inndei neu kawm nung dong teh a, pi sawm le nih a pha hi. Inndei nunung pen zomah biakinn tual om a, tua tual a teh ciangin pi sawmthum le li a pha hi. Kulhkong pua panin inndei nawlnung kawm pua dong lampi sauna pi sawmgiat le li a pha hi. Hih inndei neute’ kawm a pualam pangah tawlet neu om a, inndei kikal-a om kawm tungah zong a vang neu om hi. Lampi omna lampang, inndei kikal-a kawmte tungah nisuh kung lim kibawl hi. Tua ciangin a mipa in kongpi tawnin a tualah hong paipih hi. A tual pualam kawm tawh kizomin inndei sawmthum om a, tua inndeite mai-ah suang a kiphah lampi om hi. Hih suangphah pen a tual kimkotah om a, hih a pualama tual pen a sunglam a om tual sangin niamzaw hi. Tua ciangin a sunglam tual lut nadingin a sangzaw-ah kongpi khat om hi. A mipa in hih kongpi nih kikal a teh ciangin pi zakhat sawmguk giat a pha hi. Tua ciangin a mipa in a pualam tual paina ahi, leilu lampangah a om kongpi lampi hong teh hi. Tua bangin a teh ciangin lampi pang tuak a om galvilna inndei neu thumte, a kikal-a om kawmte, le a inndei golzaw pen, nisuahna kongpi-ate mah bangin a dung a vai kikim ciat hi. Tua kongpi lampi pen pi sawmgiat le li sau a, pi sawmlinih zai hi. A inndei golzaw, a tawlette, le nisuh kung lim a kibawlte pen nisuahna lam kongpi-a omte mah tawh kibangin kikim hi. Hih lai-ah zong kongpi lampi tun nadingin kahlei dawl sagih om a, a nawlnung a om a inndei golzaw pen in a tual lam maingat hi. Nisuahna lampang a om bang teek mahin, leilu lam kongpi pana lutna-a a tual galkhatah tual sungnung lutna kongpi lampi khat mah a om hi. Tua kongpi nih kikal a teh ciangin pi za le sawmguk giat a sau hi. Tua ciangin a mipa in leitaw lampangah hong paipih a, tua lai-ah kongpi lampi khat mah na om leuleu hi. A teh ciangin a dangte mah tawh kikim hi. Kongpi dang a omte mah bangin hih lai-ah zong inndeite in tawlet nei uh hi. A kongpi lampi pen pi sawmgiat le li sau-in pi sawmlinih zai hi. Tua kongpi lampi tun nadingin kahlei cial sagih mah om a, a inndei golzaw pen a nawlnung mahah omin a tual lam a nga hi. Lampi omna lampang, kawm sungnungte’ tungah nisuh kung lim mah kibawl hi. Hih lai-ah zong tual sungnung paina kongpi lampi khat mah om hi. A mipa in konglekong kikal a teh ciangin pi za le sawmguk giat a pha hi. Tua ciangin leitaw lam kongpi tawnin tual sungnungah hong paipih hi. A lampi a teh ciangin a dangte mah tawh kikim hi. A inndei golzaw pen tual puanung lam a nga hi. Lampi pang tuak a kawmte tungah nisuh kung lim kibawl a, hih kongpi lampi tun nadingin kahlei cial giat a om hi. Tua ciangin nisuahna lam kongpi tawnin a tual sungnungah hong paipih hi. A lampi a teh ciangin a dangte mah tawh kikim hi. A galvilna inndei neute, a inndei golzaw, le a kawm sungnungte zong, kongpi dangate mah tawh kikim hi. A kimkotah tawlette om a, a inndei golzaw-ah zong a om hi. A lampi, pi sawmgiat le li sau a, pi sawmlinih zai hi. A inndei golzaw pen a tual puanung lam nga hi. Lampi pang tuakah a om kawmte tungah nisuh kung lim kibawl a, hih kongpi lampi tunna dingin kahlei cial giat a om hi. Tua ciangin leilu lam kongpi lampi-ah hong paipih a, a teh ciangin a dangte mah tawh kibang hi. A dangte mah bangin hih in zong galvilna inndei neute, kawmsung lam tung kizemte, inndei golzaw pen, le a kimkotah tawlette a nei hi. A lampi pi sawmgiat le li sau a, pi sawmlinih zai hi. A inndei golzaw pen a tual puanung lam nga hi. Lampi pang tuakah a om kawmte tungah nisuh kung lim kibawl a, hih kongpi lampi tunna dingin kahlei cial giat a om hi. Tual puanung sungah lampi tawh a kimatin inndei gol khat om a, a inndei pen a tual lam a nga hi. Hih lai munah, biakna-in a pum-a a hal ding uh ganhing luangte silsiang uh hi. Hih inndei gol sungah sabuai li om a, a lang tuakah nih tuakin kikoih hi. Meihal biakna-a piak ding ahi a, mawhna le khialhna hanga biakna-in piak ding ganhingte ahi zongin, hih sabuaite tungah go uh hi. Hih inndei pualam, leilu lam kongpi lutna pang tuakah zong sabuai nih tuak, a vekin sabuai li mah om hi. Tua ahih manin inndei sungah sabuai li, a pua-ah sabuai li, a vekpi-in giat om a, hih sabuaite pen, biakna-in piak ding ganhingte gawhna-in a kizang ahi hi. Meihal biakna-in piak ding ganhingte bawl nadingin a kizang sabuai lite pen suang a kiseek ahi hi. Tua sabuaite letmat sawmnih sang a, a dung a vai letmat sawmthum tuak ahi hi. Biakna-in piak ding gan gawhna-in a zat uh na khempeuh, hih sabuaite tungah koih uh hi. Hih sabuaite’ kimkotah khutpeek cia bang a zai geihual kibawl hi. Biakna-in piak ding sa khempeuh hih sabuaite tungah kikoih hi. Tua ciangin a pualam panin a tual sungnungah hong paipih a, a tual sungnungah inndei nih na om hi. Khat pen leilu lam kongpi lampangah omin leitaw lam nga a, a khat pen leitaw lam kongpi lampangah omin leilu lam nga hi. A mipa in kei kiangah hih bangin hong gen hi: Leitaw lam a nga inndei pen biakinn sungah na a sem siampite a’ ding hi a, leilu lam a nga inndei pen biakna tau-ah na a sem siampite-a’ ding ahi hi. Tua siampite khempeuh pen Zadok’ suan Levi mite vive ahi uh hi. Ama na a sem dingin Topa’ omna-ah amaute bek kipaisak hi, hong ci hi. A mipa in hih tual sungnung a teh ciangin a dung a vai pi zakhat sawmguk giat tuak a pha hi. A biakinn mai-ah biakna tau khat a om hi. Tua ciangin biakinn sung lutna inndei-ah hong paipih hi. Amah in a sung lutna lampi teh a, pi kua sau-in pi sawmnih le li zai a, a pang tuak a kawmte pi nga tuak a sah hi. Innsung lutna inndei pen pi sawmthum le li sau a, pi sawmnih zai a, tua lai tun nadingin kahlei cial sawm a om hi. Innsung lutna inndei pang tuakah khuampi khat tuak a om hi. Tua ciangin a mipa in a laizang a om inndei-ah hong paipih hi. Tua inndei lutna lampi teh a, pi sawm le giat zai a, a pang tuak a om kawmte pi giat tuak a sah hi. A laizang a om inndei sung a teh ciangin pi sawmguk giat sau a, pi sawmthum le li zai hi. Tua ciangin inndei sungnungah amah pai a, tua sung lutna lampi a teh ciangin pi thum sau-in pi sawm zai a, a pang tuak a om kawmte pi sawm le nih tuak a sah hi. Tua inndei sungnung a teh ciangin a dung a vai pi sawmthum le li tuak a pha hi. Tua ciangin amah in kei kiangah, “Hih lai pen Siangtho Pen Mun ahi hi,” hong ci hi. Tua ciangin amah in biakinn kawm puanung teh a, pi sawm tak a sah hi. Hih kawm tawh a kimatin biakinn kimkotah inndei neuneu om a, tuate pi sagih vive a zai hi. Hih inndei neute dawl thum pha a, dawl khat gual paiphei suakah inndei neu sawmthum om hi. Tua inndei neute a dawl sanna tawh kizui-in a biakinn kawm pa to tektek a, tua inndei neute a nang dingin khuam a tuamin kul loin a biakinn kawm kimang toto hi. Tua biakinn kawm pang bela kibawl inndei neute sungah kahlei omto a, a dawl nuainung panin a tungnung dongin kizomto hi. A inndei neute a dawl sanna lamah a biakinn kawm a pat tektek mah bangin a sang lama om inndei neute a sung zai semsem hi. Biakinn kimkotteng a lei kitawito a, a mundangte sangin pi sawmin sangtozaw hi. Tua mun panin biakinn kawm le a kimkota inndei neute kipanto pan hi. Inndei neute a kawm sahna pi giat pha a, biakinn kimkotah suangphah bangin a kitawito-in a kibawl a zaina pi sawmthum le li ahi hi. Biakinn kimkotah a om inndei neute-ah pai nading kongvang, leilu lamah khat omin, leitaw lamah khat om hi. Tua biakinn kimkotah pi giat paisuak a zai cial khat a om leuleu hi. Tua ciangin nitumna lamah biakinn lam a nga inn khat om hi. A inn dung pi zakhat sawmnga hi a, a vai pi zakhat sawm le guk hi a, a kimkota a kawm pi kua a sah hi. Tua ciangin mipa in biakinn teh a, pi zakhat sawmguk giat a pha hi. A kimkota mun awng, a innsung le a kawm tawh kigawmin pi zakhat sawmguk giat ahi hi. Nisuahna lampang biakinn mailam a vailam zong a mun awng tawh kigawmin pi zakhat sawmguk giat mah ahi hi. Tua ciangin biakinn nitumna lampangah a om, a tual lam a nga inn a sauna teh a, a kawm tegel tawh kigawmin pi zakhat sawmguk giat mah a pha hi. Biakinnsung lutna ding inndei, le a inndeipi, le Siangtho Pen Mun sungte pen a sual panin a kongvangneute ciang dong singpeek tawh kidap hi. A tawlette pen a pualam a kihui-in a kibawl ahi hi. Biakinn sunglam kawmte pen kongkhak zang ciang dong lim kibawlte tawh kidim a, nisuh kungte le kherub limte vive ahi hi. A masa-in nisuh kung, tua ciangin kherub, nisuh kung, kherub cih bangin a kimkot khempeuhah kihelhto dimdiam hi. Tua kherub-te in maitang nih ciat nei uh hi. A mihing maitang pen a pangkhat lama om nisuh kung lam nga a, a humpinelkai maitang pen a pang langkhat lama om nisuh kung lam a nga hi. A biakinnsung kimkotah hih bangin kibawl a, sual panin kongkhak zang kikal sung khempeuhah a dimin a om hi. Biakinn deipi kongkhak khuamte pen a siik kikim vive ahi hi. Tua ciangin Siangtho Pen Mun mai-ah sing tawh a kibawl biakna tau bang pian khat a om hi. Pi nga sang a, a dung a vai pi li ahi hi. A khete, a kingaknate, le a zawlte sing tawh a kibawl ahi hi. A mipa in kei kiangah, “Hih pen Topa’ mai-ah a kikoih sabuai ahi hi,” hong ci hi. Inndeipi sung lutna ding le Siangtho Pen Mun lutna dingah kongkhak a om hi. Tua kongkhakte pen a laizangah a kituah, kongkhak peek nih nei-in a kibawl ahi hi. Biakinnsung kawmte tungah a kibawl mah bangin hih biakinn deipi sung lutna-a kongkhakte tungah zong nisuh kung le kherub mah a kibawl hi. Kongkhak pualam, innsung lutna ding inndei sanah singpeek tawh liimsun khat a kibawl hi. Hih inndeipi sung kawmte tungah a pualam a kihui tawlette om a, nisuh kungte tawh zepna zong a kibawl hi. Tua ciangin mipa in a tual puanungah hong paipih a, biakinn nitumna lam mongah a om inn tawh a kigamla lo, biakinn leilu lama om inn khatah hong tunpih hi. Leilu lampang hih inn dung pi zakhat sawmguk giat hi a, a vai pi sawmgiat le li ahi hi. Tua inn pangkhat pen biakinn gei-a mun awng pi sawmthum le li a zai a omna lam nga a, a pang langkhat pen tual puanunga suangphah lam a nga hi. Tua inn pen cial thum a pha a kitawito tungah kilam a, a tunga a cialte pen a nuai-ate sangin neuto zaw tektek hi. Hih inn leilu lampangah pi sawm le guk zai-in, pi zakhat sawmguk giat a sau lampi khat tung a, a lutna kong zong tua lam mahah a om hi. A cial tungnungah a om inndeite pen a nuai-ate sangin neuzaw hi. Bang hang hiam cih leh tuate pen a sangto zaw, a kawcik zaw-ah om uh hi. Biakinn tuala a inn dangte mah bangin tua inndei dawl thumte pen a cial tungah kinga uh a, a tuamin khuam nei lo uh hi. Leilu lampang a om mah bangin hih inndeite mai-ah zong lampi khat a om hi. A sauna, a pianzia le a kongte zong leilu lama om mah tawh kibang hi. Nisuahna lampang a kulh a kipatna mun a inn leitaw lamah kongkhakte a om hi. Tua ciangin a mipa in kei kiangah, “Leilu lama om leh leitaw lama om hih inn nihte pen biakna inn siangtho ahi hi. Topa’ omna-ah a lut siampite in biakna-in a kipia a siangtho pente, hih innte sungah ne uh hi. Hih inndeite a siangtho ahih manin, a kipia nate an tawh biaknate le mawhna le khialhna hangin biakna-in a kipia sate, a sungah koih uh hi. Siampite in Topa tungah biakna pia-in biakinn sungah a lut khit uh ciangin a pualamah a pusuah nop uhleh, Topa tungah biakna a piak laitakun a silh uh puante suahin hih inndeite sungah koih ding uh hi. Tua lai panin puan dang silhin midangte omna-ah pai thei pan uh hi,” hong ci hi. A mipa in biakinn sunglamteng a teh a zawh khit ciangin nisuahna lam kongpi tawnin hong pusuahpih a, biakinn pualamteng a teh hi. Amah in a tehna piciang la-in nisuahna lampang teh a, pi zagiat sawmli a pha hi. Tua ahih manin a umna kulh a pang li-in a teh ciangin a pang li mahin kikim a, pang khat ciangin pi zagiat sawmli vive pha a, tua deina kulh pen biakna-a a siangtho le a mawkmawkte a kikhenna ahi hi. Tua khit ciangin a mipa in biakinn nisuahna lama om kongpi-ah hong paipih a, nisuahna lam panin Israel-te’ Pasian’ minthanna vang hong pai ka mu hi. Pasian’ awging pen tuipi ging tawh kibang a, ama minthanna vang in leitung taangsak lela hi. Hih ka maangmuhna pen, Pasian in Jerusalem khuapi a susia dingin a pailai a ka muh leh Khebar Gun gei-a ka muh tawh kibang hi. Tua ciangin thakhatin leilak kidenna-in ka boksuk hi. Topa’ minthanna vang in nisuahna lam kongpi tawnin biakinn sungah a lut hi. Tua ciangin Topa’ kha in hong la-in a tual sungnungah hong paipih a, tua lai panin, Topa’ minthanna vang tawh biakinnsung a kidimna ka mu hi. Tua lai mun panin kei kiangah a mipa a din laitakin biakinnsung panin Topa in kei hong hopihna ka za a, “Mihing ahi Ezekiel aw, hih lai munah ka kumpi tokhom om hi. Israel mite lak hih lai munah ka teng ding a, amaute ka uk tawntung ding hi. Israel mite le a kumpite un pasian dang biakna tawh ahi a, a kumpi sisate uh phawkna ding mual bawlna tawh ahi zongin ka min siangtho daisak ngei nawn lo ding uh hi. Bang hang hiam cih leh a kumpite un a kongkhuam uh le a kongzawlte uh keima biakinn kongkhuam le kongzawlte tawh kimatin bawl uh a, ka kikal uh kawm bek in hong hal hi. A muhdahhuai a gamtatnate khempeuh uh tawh ka min siangtho hong daisak uh a, kei zong ka heh manin amaute ka susiamang hi. Ahi zongin tu-in amaute in pasian dangte bia nawn loin, a kumpi sisate uh phawkna a mual uh a phiat ding uh ahi hi. Tua bangin a gamtat nak-uhleh amaute lakah ka teng paisuak tawntung ding hi,” hong ci hi. Tua ciangin Topa in a thugen hong zomlai a, “Mihing ahi Ezekiel aw, Israel mite tungah biakinn thu le a geelna khempeuh cingtakin lak inla, amaute’ mawh gamtatna hangin maizumsak in. Amaute a gamtatnasate uh hangin hong maizum theih uhleh, biakinn geelna, a lim, a lutna le a pusuahna, a buppi lim, a na khempeuh a kigeelna, le a zat dan ding khempeuh a cingtakin amaute tungah laktel in la, amaute in a kigelnate thei-in a zat dan ding bangin a zuih theihna dingun amaute a dingin lai-in gelhsak in. Biakinn tawh kisai ngeina in: Mualtung a om biakinn kimkot mun khempeuh pen biakna tawh kisai-in a siangtho ahi hi. “Biakna tau golna pen hih bang hi ding hi. A teh nadingin biakinn tehna a kizang ngeite mah hi ding hi. A biakna tau bul kimkot pen letmat sawmnih sangin, letmat sawmnih mah zai ding a, a tau kimkotah letmat sawm a sangin geivial nei ding hi. A tau bul panin a tau zawl nuainung ciang pi li hi ding a, a sahna letmat sawmnih hi ding hi. Tua ban siah pi sagih sangto ding a, letmat sawmnih sah ding hi. A tungnung pen, ganhing kihalna mun pi sagih sang ding a, a kiu li-ah letmat sawmnih a sang ki om ciat ding hi. A biakna tau dawnzang pen a dung a vai a kikim hi ding a, pi sawmnih sau-in pi sawmnih mah zai ding hi. Biakna tau a paito a laizang santeng pen a dung a vai a kikim, pi sawmnih le li hi ding a, a nuai dawl sangin letmat sawm pai-in neuzaw ding hi. Tua a dinna a nuai gual kimkot letmat sawmnih pai-in zai ding hi. Biakna tau tung kahna ding kahlei pen nisuahna lampangah om ding hi,” hong ci hi. Tua ciangin Topa Pasian in kei kiangah, “Mihing ahi Ezekiel aw, hih biakna tau zatna ding ngeinate hih bang hi ding hi: Biakna tau a kizawh khit ciangin a tungah meihal biakpiakna le biakpiakna ganhing site thehna tawh apna a bawl ding na hi hi. Zadok’ suanlekhak Levi siampite pen keima na a sem dingin ka omna-ah a hong pai dingte ahi uh hi. Topa Pasian keimah in hih thu kong pia hi. Mawhna hangin biakna-a piak dingin amaute tungah bawngtal khat na pia ding hi. Nangmah in a sisan pawlkhat la-in biakna tau kiu li-a om ki lite, biakna tau paito a laizang kiute, le a kimkotah a om a geihualte na nuh ding a, hih bangin hihna tawh biakna tau siansuahin na ap ding hi. Mawhna hangin biakna-in a kipia bawngtal pen la-in biakinn huang pualam, a mun hong kigenna sanah a hal ding na hi hi. A zing ciangin paubaanna a om lo keeltal khat la-in mawhna hangin biakna-in na pia ding hi. Bawngtal si tawh na siansuah mah bangin hih keeltal si tawh zong biakna tau na siansuah ding hi. Hih bangin siansuahna na man khit ciangin, paubaanna a om lo bawngtal khat le tuutal khat na la ding a, Topa ahi keima kiangah nong paipih ding hi. Siampite in tua ganhingte tungah ci thehin, keimah hong biakna-in tua ganhingte hal ding uh hi. Mawhna hangin biakpiakna-in ni sagih sung nisimin, paubaanna a om lo keeltal khat, bawngtal khat, le tuutal khat a pia ding na hi uh hi. Siampite in ni sagih sung biakna tau apna bawlin zattheih dingin a baihsa-in omsak ding uh hi. Hih bangin ni sagih sung a hih khit uh ciangin, a ni giat ni-a kipanin siampite in meihal biakna le thunuama biakpiaknate, biakna tau tungah piak ding kipan ding uh hi. Tua ciangin note tungah kei ka lungkim ding hi. Topa Pasian keimah in hih thu ka gen khin hi,” hong ci hi. Tua ciangin a mipa in nisuahna lam biakinn huang kongpi pua-ah hong paipih a, a kongpi na kikhak hi. Topa in kei kiangah, “Hih kongpi kikhak paisuak ding a, kihong kik ngei lo ding hi. Israel-te’ Topa Pasian keimah in hih kongpi tawn khin ka hih manin kuamah dang in tawn thei nawn lo ding a, a kikhak den ding ahi hi. Ahi zongin hih lai-ah gam uk na a sem laitak ulianpa pen keima omna-ah biakna an siangtho a ne dingin hong pai thei ding hi. Amah hong pai ciangin inndeipi tawnin inndei sungnung kongvangah hong lutin tua lai mahah pusuak ding hi,” hong ci hi. Tua ciangin a mipa in leilu lam kongpi tawnin biakinn mai-ah hong paipih a, ka khuadak leh, Topa’ biakinnsung khempeuh ama minthanna vang tawh na kidim hi. Kei zong leilak kidenna-in ka boksuk hi. Tua ciangin Topa in kei kiangah, “Mihing ahi Ezekiel aw, tu-a na muh ding nate le na zak ding thute khempeuh hoihtakin ciamteh in. Ka biakinn a zatna ding ngeina om khempeuh tu-in a hong gen ding ka hi hi. Biakinn sungah a pai thei dingte le Siangtho Pen Munah a pai thei lo dingte khempeuh limtakin ciamteh in. A lehdo thei hih Israel mite tungah Topa Pasian keimah in ka gen thute, hih bangin gen in: No Israel mite aw, a beisa huna a muhdahhuai na gamtatnate khempeuh uh khawl un. Keimah biakna-in sathaute le sasite nong piak uh ciangin, keima thu a mang lo, vun a ki-at lo gamdang mite a sungah na lutsak uh a, ka biakinn na ninsak uh hi. Tua bangin a muhdahhuai na gamtatnate uh tawh ka thuciamna na siasak uh hi. Ka biakinn sungah biakna ngeinate na zui kei uh a, ka biakinn sungah gamdang mite peuh na na semsak uh hi. “Tua ahih ciangin Topa Pasian in tu-in kong genin-ah: Vun ki-at lo gamdang mite peuhmah ka biakinn sungah lut lo ding uh a, note lakah a teng gamdang mite nangawn lut lo ding uh hi. No Israel midangte bangin kei hong nusia-in milim a bia Levi mite in zong gim thuak ding uh hi. Amaute in biakinn kongcin, biakinnsung nasepte sem thei ding uh hi. Meihal biakna-a kipia ganhingte le mite in biakna-in a piak ganhingte go thei ding uh a, mite’ na a sepsak dingin tavuan la ding uh hi. Ahi zongin amaute in milim biakna lamah Israel mite makai-in mawhna sungah Israel mite tunpih uh ahih ciangin, amaute gim ka piak ding, Topa Pasian keimah nakpitakin ka kiciam hi. Amaute in keima siampi na sem loin, keima biakna na a siangtho nate nai-ah pai thei loin, Siangtho Pen Munah zong lut thei lo ding uh hi. Hihte pen, a muhdahhuai a gamtatnasate uh hangin a hamsiatna uh ahi hi. Ahi zongin biakinn sunga nasep a kisam dangte a sem dingin amaute ka seh thei ding hi, ci-in gen in,” hong ci hi. Tua ciangin Topa Pasian in keima kiangah, “Zadok’ suanlekhak Levi mi siampite ahihleh, Israel mi adangte in kei hong nusiat laitakun, amaute in citakin biakinn sungah keima na hong sem uh ahih manin, tu-in amaute in keima na hong semin, keimah biakna-in sathaute le sasite keima kiangah hong pia ding uh hi. Ka biakinn sungah amaute lutin, ka biakna tau-ah na semin, biakinn sunga biaknate-ah makai ding uh hi. A tual sungnung paina kongpi-ah a lut uh ciangin saihadial puan silh ding uh hi. Tual sungnung sung le biakinn sungah na a sep laitakun samul puan peuhmah silhlo ding uh hi. Amaute in saiha dial puan khimin, saihadial puan tengin, khua-ul a suaksak thei kawnggak gak lo ding uh hi. Midangte a omna biakinntual puanungah a pusuah ma-un, biakinn sungah na a sep laitakun a zat uh puante suahin inndei siangtho sungah nusia ding uh hi. Tua lai panin amaute in puan dangte silhin pusuak ding uh hi. Tua hikeileh a biakna puan siangthote un midangte lawhkha ding hi. “Amaute in a sam uh mettol lo ding uh a, a saulua-in zong hawi lo ding uh hi. A kilawm ciang bekin met ding uh hi. Biakinntual sungnungah a lut ma-un siampite in leenggahzu ne lo ding uh hi. Meigong numei ahi a, a kimasa numei ahi zongin zi-in nei lo ding uh a, Israel nungak, ahih kei leh siampite’ zi meigongte bek tenpih thei ding uh hi. “Amaute in ka mite tungah, biakna na a siangtho le a mawkmawk nate, le a nin le a siang nate a kilamdanna hilh ding uh hi. Thunei khat peuhpeuh a om ciangin, keima ngeina omsa tawh kizui-in thu khen ding uh hi. A kiseh pawite a ngeina omsa bangin bawl ding uh a, Sabbath-te siangthosak ding uh hi. Siampite pen misi lawnna tawh kininsak lo ding uh hi. Ahi zongin, a nu uh ahi a, a pa uh ahi a, a sanggam pasal uh ahih kei leh pasal a nei nai lo a sanggam numeite uh hangin kininsak thei ding uh hi. Amaute a kisiansuah khit uh nipikal khat ciang bekin, biakinntual sungnungah pai-in biakinn sungah na a sepkik theih nadingun kisiansuahna biakna pia ding uh hi. Topa Pasian in hih thu ka gen khin hi. “Israel mite tungah ka piak, khang khat pan khang khatah a kiluah suksuk ding sung panin siampite’ tanh pen siampi nasep za ahi hi. Amaute in Israel mite lakah neihsa gamh nei lo ding uh hi. Amaute’ kisapna khempeuhah kei a kicing khin ka hi hi. An tawh biakna, mawhna le khialhna hanga biakna, le Israel mite lak panin keima a dingin a kipiakhiate khempeuh amaute in ne ding uh hi. Anpal sung panin a limci penteng le kei tungah hong kipia na khempeuh, amaute in tang ding uh hi. Israel mite’ inn sungah ka thupha a tuntheih nadingin amaute in anlum a em simun, biakna-in siampite tungah a em masak penpen uh pia ding uh hi. Siampite in vasa ahi a, ganhing ahi zongin, sa’ nek baang hitaleh ama thu-in a sitawm mawkte hitaleh, ne lo ding uh hi. “Israel minamte tungah piak dingin leitang a kihawm ciangin, Topa’ tanh dingin seh khat kituamkoih ding hi. Tua a kituamkoih leitang pen a dung tai sawm hi ding a, a vai tai giat hi ding hi. Tua sung khempeuh a siangtho biakna leitang hi ding hi. Hih leitang sung panin biakinn ding tawh kisai-in a dung pi zagiat sawmli, a vai pi zagiat sawmli mah kisehin, tua banah a kimkot pi sawmgiat le li paisuak mun awng tawh hi lai ding hi. Hih biakna leitang siangtho sung panin siangtho pen mun le biakinn mun dingin a saulam tai sawm, a zailam tai li kisehkhia ding hi. Hih a kisehkhia mun sungteng pen biakna leitang siangtho hi ding a, Topa’ biakinn sungah na a sem siampite a’ ding hi ding hi. Hih mun sungteng pen siampite’ inn lamna ding mun le biakinn lamna ding mun siangtho hi ding hi. Hih banah, a dung tai sawm, a vai tai li a pha sehkhat kibawl leuleu ding a, biakinn sungah na a sem Levi mite a’ ding hi ding hi. Tua sungtengah amaute’ tenna ding khua om ding hi. Khuapi huangsung dingin a dung tai sawm, a vai tai nih a pha leitang khat kisehkhia ding hi. Hih mun pen a siangtho leitang tawh kizom pah ding a, Israel mite khempeuh a’ ding hi ding hi. “Gam sung a uk uliante a dingin zong leitang kisehkhia ding hi. A siangtho leitang le khuapi huang panin kipanin nitumna lamah a gamgi ciang, nisuahna lamah zong a gamgi ciang mah hi ding a, nitumna pan nisuahna gamgi pen Israel minamte khat in a ngahzah tan mah hi ding hi. Hih munteng pen Israel gam sung panin Israel uliante’ neih hi ding hi. Tua ahih manin amaute in Israel mite bawlsia nawn lo ding uh a, mun a omlaiteng khempeuh, a minam zui-in Israel minamte a tangsak ding uh hi. “Topa Pasian in hih bangin ci hi: No Israel a uk uliante aw, na mawh gamtatna uh sauveizo lua ta hi. Na ngongtatnate uh le mi na nenniamnate uh khawl unla, thuman thutangin na sem un. Amau’ leitang panun ka mite notkhia nawn kei un. Topa Pasian keimah in hih thu kong gen hi. “Mi khempeuh in tawisuang man le tehna man zang ding uh hi. An tehna bung le tui tehna bung kikim ding a, a kizang ding etkakna pen beem hi ding hi. Beem khatah an bung sawm, tui bung sawm mah hi ding hi. A gik tehna pen, gerah sawmnih ciang shekel khat, shekel sawmguk ciangin mina khat hi ding hi. “Biakna na piakna ding zia uh pen, mangbuh na neihzah uh pan sawmguk-ah khat, mangbuhham zong sawmguk-ah khat mah, sathau na neihzah uh sung pan seh za-ah khat (bung tawh tehin bung sawm ciangin beem khat-a seh), tuu na neih sung uh panin zanih ciangin khat hi ding hi. Hihte pen an tawh biakna, meihal biakna, thunuama biakpiaknate hi a, na mawhnate uh a maitheihna ding ahi hi. Topa Pasian in hih thu kong pia hi. Israel mi khempeuh in hihte pen biakna-in a piak dingin, amau a uk ulianpa tungah puak ding uh hi. Gam uk ulianpa in biakna-in piak ding ganhingte, an tawh biakna-in zat dingte, le pawi khempeuh, Khadet ni, Sabbath nite-in Israel mibuppite a dingin tuiphih biaknate a piak ding ama nasep ahi hi. Israel mite’ mawhna a maitheih nadingin mawhna hanga biakna, an tawh biakna, meihal biakna, le thunuama biakpiakna-in a zat dingte khempeuh amah in a si ding ahi hi. “Topa Pasian in hih bangin ci hi: Kha khatna a ni masa ni-in paubaanna a om lo bawngtal khat biakna-in pia-in biakinn a siangsak ding na hi uh hi. Siampipa in mawhna hanga biakpiakna ganhing si pawlkhat la-in biakinn kongkhuamte, biakna tau ki lite, le tual sungnung lutna kong khuamte nuh ding hi. Tua bangmahin tua kha a ni sagih ni-in zong, tup lohpi le theih lohna hangin a khialkha mite a dingin siansuahna a bawl ding na hi uh hi. Tu-a bang danin biakinn a siangthosak ding na hi uh hi. “A kha masa a ni sawm le li ni-in Paisan Pawi na kipan ding uh a, mi khempeuh in ni sagih sung silngo sawh loh anlum na ne ding uh hi. Tua pawi bawl a kipat ni-in gam uk ulianpa in amah le mi khempeuh a dingin mawhna hanga biakpiakna-in bawngtal khat pia ding hi. Tua pawi ni sagih sung nisimin paubaanna a om lo bawngtal sagih le tuutal sagih la-in Topa tungah meihal biakna-in pia ding a, tua banah mawhna hanga biakna-in nisimin keeltal khat zong a pia ding ahi hi. Bawngtal le tuutal a kipiazah tawh kizui-in an tawh biak nadingin an bung khat pai le sathau biing khat pai tawh piakhawm ding hi. “A kha sagihna a ni sawm le nga ni-in nipikal khat sung a kibawl ding Buk Pawi kipan ding a, mawhna hanga biakpiakna, meihal biakna, le an tawh biakna-in piak dingin an le sathaute, nisimin a kisamzah, gam uk ulianpa in pia ding hi. “Topa Pasian in hih bangin ci hi: Nisuahna lama om, tual sungnung kongpi pen nasep ni guk sung kikhakcip ding a, ahi zongin Sabbath ni le Khadet ni-in kihong ding hi. Siampite in meihal biakna le thunuama biakna a piak laitakun, gam uk ulianpa pen tual puanung lam panin inndei lianpi kongpi-ah pai-in kongpi khuamte gei-ah ding ding a, tua kongpi-ah bia-in tua khit ciangin pusuak kik ding hi. Nitak mateng tua kongpi kikhak lo ding hi. Sabbath ni le Khadet nisimin mi khempeuh in zong tua kongpi mai-ah Topa bia-in kun ding uh hi. Gam uk ulianpa in Sabbath ni-in meihal biak nadingin paubaanna a om lo tuuno guk le tuutal khat pia ding hi. Tua ganhingte tawh a piakkhawm ding an tawh biakpiak nadingin zong, tuutal khat ciangin an bung khat kizuisak ding a, tuunote tawh piakkhop ding pen ama piaknop zahzah hi ding hi. An bung khat a piakna-ah sathau biing dim khat tawh kizuisak ding hi. Khadet ni ciangin paubaanna a om lo bawngtal khat, tuuno guk, le tuutal khat hi ding hi. Tuate tawh piakkhop dingin an tawh biakpiak nadingin bawngtal le tuutalte khat ciangin an bung khat pai, le tuunote tawh piakkhop ding pen ama piaknop zahzah hi ding hi. An bung khat a piakna-ah sathau biing dim khat tawh kizuisak ding hi. Gam uk ulianpa in a kuanlamin a tot lampiteng mah a ciah ciangin tawnin, inndeipi kongpi mahah pusuak ding hi. “A kiseh pawi hunte-ah Topa a bia dingin a hong pai mite khempeuh pen a hong lutna kongpi zui-in kileh kik lo ding uh a, tangtakin paisuak ding uh hi. Leilu lam kongpi panin a lutte, leitaw lam kongpi-ah ciah ding uh a, leitaw lam kongpi panin a lutte, leilu lam kongpi-ah ciah ding uh hi. Gam uk ulianpa zong mihonte mah tawh lutin, amaute mah tawh pusuak khawm ding hi. Pawi nite le a kiseh pawi hunte-ah an tawh biakna-in piak ding pen, bawngtal ahi a, tuutal ahi zongin khat ciangin an bung khat in zui ding a, tuunote tawh piakkhawm ding pen a mite’ piaknop zahzah hi ding hi. An bung khat a kipiak ciangin sathau biing dim khat in zui ding hi. Gam uk ulianpa in ama utthu-in biakpiakna, meihal biakna ahi a, thunuama biakna ahi zongin khat peuhpeuh a piak ciangin, ama lut nadingin nisuahna lama om tual sungnung kongpi kihonsak ding hi. Amah in Sabbath ni-in biakpiakna a bawl mah bangin pia ding hi. Amah a ciahkik khit ciangin a kongpi kikhak ding hi. “Gam uk ulianpa in meihal biakna-in piak dingin paubaanna a om lo kum khat a pha tuuno khat, zingsang simin Topa’ tungah biakna-in pia ding hi. Hih pen nisimin a kipia ding ahi hi. Mangbuhnel lawh dim khat le a meek khoppih ding sathau hai khat tawh, an tawh biakna-in zong, nisimin pia ding hi. Hih meihal biakpiakna ngeina pen a kip paisuak ding ahi hi. Tua bangin tuuno, mangbuhnel, le sathau, zingsang simin Topa tungah a kipia ngitnget ding ahi hi. “Topa Pasian in hih bangin ci hi: Gam uk ulianpa in ama neihsa leitang mun khat peuhpeuh, a tapate khat peuhpeuh tungah a piak leh, tua leitang a ngah a tapa in a luah gamh-in nei paisuak ding hi. Ahi zongin gam uk ulianpa in ama nasemte khat peuhpeuh tungah leitang a piak leh, suahtakna kum a tun ciangin tua leitang pen a pia gam ukpa’ neihsa suakkik ding hi. Bang hang hiam cih leh tua leitang pen ama neihsa hi a, amah le a tapate bek in nei paisuak thei ding uh hi. Gam uk ulianpa in midangte’ neihsa leitang laksak ngei lo ding hi. Ama tungah a kipia leitang sung panin a tapate khenkhia bek ding hi. Ka mite’ leitang laksakin, bawlsia lo ding hi, ci-in gen in,” hong ci hi. Tua ciangin a mipa in biakinntual sungnung leitaw lamah a om kongpi gei-a inndeite-ah hong paipih hi. Hih inndeite pen siampite’ zat ding a siangtho inndeite ahi hi. Amah in tua inndeite’ omna nitumna lampang mong hong kawk a, “Hih mun pen, siampite in mawhna le khialhna hangin biakna-in a kipia sate a huanna mun le an tawh biakpiaknate a emna ding mun ahi hi. Hih pen, tual puanungah biakna sa le ante paipihkha loin, tua a siangtho nate tawh tual puanunga om mite a lawhsakkhak loh nading uh ahi hi,” hong ci hi. Tua ciangin tual puanungah hong pusuahpih a, a tual kiu lite hong lak hi. Tua tual kiu lite’ kiu-ah tualno khat ciat na om hi. Tua tualnote pi sawmguk giat sau-in pi sawmli le giat zai a, a vekin a golna kikim hi. Tua tualno lite a umna kawm dingin suang kiciang ciat a, tua a kawmte belin meikhuk a om hi. A mipa in, “Hihte pen, mite in biakna-in a piak sate, biakinnsung nasemte in a huanna anbuk ahi hi,” hong ci hi. Tua ciangin biakinn lutna kongkhakah hong paipih kik hi. Biakinn kongkhak sangkil nuai panin tui luang a, biakinn ngatna nisuahna lamah luang sukin, biakna tau leitaw lampang tawn suk hi. Tua ciangin a mipa in leilu lam kongpi tawnin hong pusuahpih a, nisuahna lam kongpi pualamah hong paipih hi. Leitaw lam kulhkongpi-ah a tui hong luangkhia hi. A mipa in a tehna piciang tawi-in a tui luanna nisuahna lam pi tulkhat zaguk sawmgiat ciang dong tehsuk a, a tui kei hong ngaptansak hi. A tui pen siakmit ciang bek thuk hi. Tua ciangin pi tulkhat zaguk sawmgiat ciang tehsuk leuleu a, tua lai-ah a tui hong ngaptansak a, khuk ciang tum hi. Tua ciangin pi tulkhat zaguk sawmgiat ciang tehsuk leuleu-in a tui hong ngaptansak a, ka kawng ciang tum hi. Tua ciangin pi tulkhat zaguk sawmgiat ciang mah tehsuk lai leuleu a, a tui thuklua ta ahih manin ka ngapzo kei hi. Thuklua ahih manin a tui i peek loh buangin a kikantan zo ding hi lo hi. Tua ciangin amah in, “Mihing ahi Ezekiel aw, hihte khempeuh hoihtakin ciamteh in,” hong ci hi. Tua ciangin a mipa in tua gun gei mahah hong paipih kik a, tua lai mun ka tun ciangin a gun lang nih tuakah singkung tampi tak a po ka mu hi. Amah in kei kiangah, “Hih tui pen nisuahna lam manawhin gam sung nawkin Jordan Kuam-ah luangsukin Si Tuipi sungah tung hi. Si Tuipi a tun ciangin hih tui in tuipi tui pen, tuisiang suaksakkik hi. Hih tui a luanna mun peuhpeuhah ganhing namkim le ngasa tampi om hi. Hih tui in Si Tuipi tui siangsakkikin, a luanna peuhpeuhah nuntakna omsakkik ding hi. Engedi khua panin Eneglaim khua ciang dong tuipi dungah ngasa bengte omin, tua dungah a ngen uh zalin phokeu ding uh hi. Mediterranean Tuipi sungah ngasa a omzah mah bangin ngasa nam tampi om ding hi. Ahi zongin tuipi dunga om nawnglakte le bualte-a om tuite siang lo ding a, cikhuk dingin a tuaci mahin omlai ding uh hi. Hih gun pang tuakah a gah nek dingin singkung nam khempeuh po ding hi. A tehte pulh ngei lo ding a, a gah tawh zong kilawi ngei lo ding hi. Biakinn panin a luangkhia tui ngah ding uh ahih manin khasimin a gah thak gah tawntung ding uh hi. A singgahte an ding hi ding a, a tehte zatui-in kizang ding hi,” hong ci hi. Tua ciangin Topa Pasian in kei kiangah, “Israel minam sawm le nihte’ gamh dingin leitang hawm ding a gamgi ding hih bang hi ding hi. Josef minamte in a dangte’ ngahzah nih ngah ding uh hi. Hih gam na pu na pate uh tanh dingin ka piakna ding thu, amaute tungah thupi takin ka kiciam khinzo hi. Tua ahih manin tu-in note’ lakah a kikim dimdiamin hawm un. “Leilu lam gamgi pen, Mediterranean Tuipi panin kipanin Hethlon khuapi-ah, Hamath khua lutna-ah, Zedad khuapi-ah, tua panin Berothah le Sibraim khuapite-ah (hih khuate pen Damaskas kumpi gam le Hamath kumpi gam kikalah om hi), tua panin Hazerhattikon khuapi (Hauran kumpi gamgi gei-a om) hi ding hi. Leilu lam gamgi pen Mediterranean Tuipi a kipanin nisuahna lam manawhin Damaskas le Hamath gamgi a om Hazarenan khuapi ciang hi ding hi. “Nisuahna lam gamgi pen, Damaskas le Hauran gamgi kituahna panin hong kipan sukin, Jordan Gun zuisuk a, Jordan Gun nitumna lampangteng Israel gam hi-in, nisuahna lampangteng Gilead gam hi a, tua panin Si Tuipi kimang sukin Tamar khuapi ciang hisuk ding hi. “Leitaw lam gamgi pen, Tamar khuapi panin hong kipanin Meribathkadesh bual hong nawkin, tua panin sak nitumna lam manawhin Egypt gamgi zuito-in Mediterranean Tuipi sun ding hi. “Nitumna lam gamgi pen, Mediterranean Tuipi hito-in, Hamath khualutna tawh a kitang ciang hito ding hi. “Tua ahih ciangin hih gam sungteng, no Israel minamte lakah hawm un. Note a dingin na neih kip tawntung ding uh gamh hi ding hi. Hih leitang na hawm uh ciangin note lakah hong tengin ta a nei khinsa minam dangte zong note mah bangin tanh na pia ding uh hi. Amaute pen Israel minam taktakte mah bangin na ngaihsun ding uh a, Israel minam dangte mah bangin leitang hawmna-ah ai sawk thei ding uh hi. Note’ lakah a teng gamdang mite in amau’ tenna minamte tawh leitang ngahkhawm ding uh hi. Topa Pasian in hih thu kong gen khin hi. “Leilu lam gamgi pen, Mediterranean Tuipi panin kipanin Hethlon khuapi-ah, Hamath khua lutna-ah, tua panin Damaskas le Hamath gamgi kituahna sana om Hazarenan khuapi ciang sun ding hi. Minam khat in leitang khen khat ciat ngah ding uh a, a kikal uh gamgite pen gambup nisuahna gamgi panin gambup nitumna gamgi ciang hi ding a, leilu lam panin a hawm uh kipan suk ding uh hi. Leilu lam a khungnung penah Dan minamte, a zomah Asher Minamte, a zomah Naftali Minamte, a zomah Manasseh Minamte, a zomah Efraim Minamte, a zomah Reuben Minamte, a zomah Judah Minamte hi ding hi. “Tuate zomah Pasian a dingin a kipia leitang hi ding a, a zaina pen leilu lam panin a kipan leitaw lam tai sawm hi ding hi. A dunglam pen gambup nisuahna gamgi panin gambup nitumna gamgi dong, minam dangte’ ngahzah tan mah hi ding a, a laizang sanah biakinn om ding hi. Topa a dingin a kipia leitang a sauna tai sawm hi ding a, a zaina tai giat hi ding hi. Siampite in hih a siangtho leitang sung panin tanh ngah ding uh a, leilu lampang le leitaw lampang tai sawm tuak hi-in, nisuahna lam le nitumna lampang tai li tuak hi ding hi. Siampite’ ngahna sung hih leitang laizangah Topa’ biakinn om ding hi. Hih munteng pen Zadok’ suanlekhak siampite a’ ding ahi hi. Bang hang hiam cih leh Israel midangte a gamtat khialh uh ciangin Levi midangte bangin va zui lo uh a, hih mite in citakin keima na hong sem uh hi. Tua ahih manin Levi midangte zomah hih bangin a mun tuam diak khat nei ding uh a, tua mun a siangtho pen mun khat hi ding hi. Hih siampite’ zomah Levi mite in leitang ngah ding uh a, a sauna tai sawm hi-in, a zaina tai li hi ding hi. Topa tungah a kipia hih leitang siangtho pen, leitang khempeuh panin a hoihpen mun hi a, hih leitang sung panin mun khat peuhpeuh, kizuak thei lo, adang tawh zong kikhek thei lo, midang tungah zong kipia thei lo ding hi. Hih leitang pen a siangtho leitang hi a, Topa -a’ ahi hi. “A omlai leitang, a sauna tai sawm le a zaina tai nih pen a siangtho leitang hi loin a mawkmawk leitang hi ding a, mite’ taang zat ding mun hi ding hi. Tenna ding le a mun awngthawl hi ding a, a laizangah khuapi om ding hi. A khuapi golna a dung a vai-in a kikim hi ding a, a pang li-in pang khat ciangin pi tulsagih zanga sawmguk hi ding hi. Khuapi kimkot paisuakah pi zali sawmnih paisuak a zai mun awng om ding hi. Khuapi a kilam khit ciangin a siangtho leitang lamah a awng lai, nisuahna lam tai li, nitumna lam tai li a omlaiteng pen khuapi sungah a teng mite in a khawh ding leitang hi ding hi. Khuapi sungah nasemin a om mi peuhmah in Israel minam sung panin kuamah kideidanna om loin hih leitang kho thei ding uh hi. Hih a kisehkhia leitang buppi pen a pang li-in tai sawm pai hi ding a, hih pen leitang siangtho le khuapihuam sung kigawm hi ding hi. “Hih leitang panin leitaw lampangah, Israel minam a omlaite in leitang ngah ding uh a, a kikal uh gamgite pen gambup nisuahna gamgi panin gambup nitumna gamgi ciang hi ding a, leilu lam panin a hawm uh kipan suk ding uh hi. Leilu lam a khungnung penah a ngah ding Benjamin Minamte, a zomah Simeon Minamte, a zomah Issakhar Minamte, a zomah Zebulun Minamte, a zomah Gad Minamte hi ding hi. “Leitaw lam panin Gad Minamte a kipia leitang banah gambup gamgi om ding a, Tamar khuapi panin kipanin Meribathkadesh bual nawk ding a, tua panin sak nitumna lam manawhin Egypt-te’ gamgi zui ding a, Mediterranean Tuipi-ah tawp ding hi. Tu-a ka gen bangin Israel minamte in a khang a khangin a luah suksuk ding uh leitang dingin amaute tungah a kipia ding leitang ahi hi. Topa Pasian in hih thu kong gen khin hi. Khuapi kimkot a sauna pi tul sawmthum zanih sawmli pha a, tu a kipanin hih khuapi min pen, ‘Hih lai-ah Topa om hi,’ kici ding hi,” hong ci hi. Judah kumpipa Jehoiakim kumpi a suahzawh a kum thumna kumin, Babylon kumpipa Nebukhadnezzar in Jerusalem khuapi simin a umcih hi. Topa in kumpi Jehoiakim le biakinnpi na manphate kumpi Nebukhadnezzar a mansak hi. Amah in a mi matte Babylon gam ama pasian biakinn-ah paipih a, na manpha a matte sumkoihna inn-ah a koih hi. Kumpipa in Israel salte sunga kumpi nam le milian namte lak pan mi pawlkhat a teelkhia dingin innsungmang lian pen Ashpenaz thu a pia hi. Tua mite, kumpi innsunga nasem siamte a suahtheih nadingun a melhoih, pumpi tung poina a nei lo, a navak, hoihtakin pilna a kisinsak, na a thei baih, a lungsim navak ngentang ding ahi hi. Ashpenaz in amaute Babylon lai le a pau a hilh ding ahi hi. Amaute pen kumpi innsunga nasem dangte mah bangin nisimin an le leenggahzu tawh a vak dingin kumpipa in thu a pia hi. Tua bangin kum thum sung sinna a neih khit uh ciangin kumpipa mai-ah amaute a kilak kik ding uh ahi hi. Tua bangin a kiteelte, Judah mite vive hi a, Daniel, Hananiah, Mishael, le Azariah-te ahi uh hi. Innsungmang lianpen pa in amaute min thak phuah a, Daniel’ min dingin Belteshazzar, Hananiah’ min dingin Shadrak, Mishael’ min dingin Meshak, Azariah’ min dingin Abednego a phuak hi. Daniel in kumpi innsunga an le leenggahzu tawh a pumpi a thanghuaisak loh nadingin a lungsim a khensat hi. Amah in innsungmang lianpen Ashpenaz kiangah tua bang an a kipiak loh nadingin a ngen zaw hi. Tua ciangin Pasian in Daniel tungah Ashpenaz in ngaihsut siamna a neih theih nadingin a bawlsak hi. Ahih hangin Ashpenaz in Daniel kiangah, “Kumpipa in na annek ding uhleh na dawn ding uh sehsa-in nei khinzo ahih ciangin, khangno dangte banzo kei kha zenzen leteh a hong thah ding ka lau hi,” a ci hi. Tua ciangin Daniel zong Ashpenaz in amah le adang thumte a cing dingin a koihpa kiangah a pai hi. Amah in, “Ni sawm sung hong ze-etin, anteh bek hong nesak inla, tui bek hong dawnsak in. Tua ciangin kumpipa’ an a ne khangnote tawh hong enkak khawm in la, nong muhna bangbangin thu khenta in,” a ci hi. Amah in amau’ ngetna bang mangin ni sawm sung ze-et dingin a thukim hi. Ni sawm a cin khit ciangin amaute pen kumpi an nete sangin cidamzaw uh a, a ci a sa uh a hoihzaw hi. Tua ciangin a cing pa in kumpi an le leenggahzu pia loin amaute anteh an a pia hi. Pasian in tua khangno lite laitheih siamna le pilna thukte a pia hi. Daniel pen maangmuhna le mangkhiat siamna a pia hi. Kumpipa’ sehsa kum thum a cin khit ciangin Ashpenaz in khangnote khempeuh kumpipa kiangah a paipih hi. Kumpipa in amaute khempeuh hopih a, Daniel, Hananiah, Mishael, le Azariah-te adangteng khempeuh sangin a hoihzawk tuanlam uh a mu hi. Tua ahih ciangin kumpi inn-a vaihawm ulian pawl a suak uh hi. Kumpipa in bangbang thuhaksa nono a dot hangin, hih mi lite pen ama gam sung khempeuha mitphial siamte le aisan theite khempeuh sangin a zah sawmin a siamzawklam uh a mu hi. Sairas, Babylon kumpi a suah hun dong, kumpi inn-ah Daniel omto paisuak hi. Nebukhadnezzar kumpi a suahzawh a kum nihna kumin mang khat a man hi. A lungsim pataulua mahmah ahih manin a ihmu thei kei hi. Tua ahih ciangin bang mang man cih a hilh dingin mitphial siamte, mibum theite, le khongkhai siamte a samsak hi. Amaute hong pai-in kumpipa mai-ah a din uh ciangin kumpipa in, “Mang khat ka man a, tua ka mang pen bang hiam cih theinuam ka hih manin ka lungsim a patau mahmah hi,” a ci hi. Amaute in Aram pau tawh, “Kumpipa aw, na khansau hen! Na mang hong gen leteh a khiatna zong kong gen ding uh hi,” a ci uh hi. Kumpipa in, “Ka mangmat le a khiatna nong gen theih kei uhleh note kong semnengawp ding a, na inn uh suksiatgawp dingin ka ngaihsun khinzo hi. Ahi zongin ka mangmat le a khiatna nong gen theih uhleh, letsong le minphatna lianpi ka hong pia ding hi. Tua ahih ciangin tu-in ka mangmat bang hi a, a khiatna bang ahi hiam cih hong gen un,” a ci hi. Amaute in, “Kumpipa aw, na mang hong gen phot leteh a khiatna ka hong gen thei pan ding uh hi,” ci-in a dawngkik uh hi. Kumpipa in, “Ka ngaihsutsa teng hong zasak khinzo ka hih manin hun sau theihtheihna ding a zong na hihlam uh teltakin kithei hi. Ka mangmat nong gen theih kei uhleh note khempeuh thukhenna khat bek ka hong pia ding hi. Noteng khempeuh in lungsim kikhatin zuauthu gengen leeng a ngaihsutna hong kikheel ding hi, a ci nuam na hi tazen uh hi. Tua ahih ciangin ka mangmat hong gen phot un. Tua hileh a khiatna zong hong gen thei ding ci-in ka hong muang pan ding hi,” a ci hi. Khongkhai theite in, “Kumpipa aw, na deihna bang a hong gen thei ding hih leitungah mihing khat beek om lo ding hi. Kumpi gen loh milian pen le mi thupi pen khat beek in, a aisan theite, a mitphial siamte, le a khongkhai theite tungah tua bang thu a dong ngei kuamah om nai lo hi. Kumpipa’ thudotna pen haksa lua mahmah ahih manin, mihing ahi lo pasian-te longal a gen thei ding kuamah om lo hi,” a ci uh hi. Tua thu hangin kumpipa heh mahmah a, Babylon sunga kumpi’ thudot mipilte khempeuh thahlup khit dingin thu a pia hi. Tua ahih ciangin mipilte khempeuh thahlup khitna ding thu kipia a, tua thahlup dingte sungah Daniel le a lawmte zong a kihel uh ahi hi. Tua ciangin Daniel zong Babylon gam sunga mipilteng a thatlum dingin a kisawl kumpi cing a ukpa Ariok kiangah kampau kidawm takin a va pai hi. Amah in Ariok kiangah, “Bang dingin kumpipa in hih zahtakin thukhauh suaksak ahi hiam?” ci-in a dong hi. Ariok in a thupiang khempeuh a gen hi. Tua ciangin kumpipa kiangah Daniel pai a, a mangmat a khiatna a hilh theih nadingin hun tawmvei sung a kingak lai nadingin phalna a ngen hi. Tua ciangin Daniel a inn-ah ciah a, a thupiangteng khempeuh a lawmte Hananiah, Mishael, le Azariah-te kiangah a ko hi. Amah in, vantung Pasian in eite hong hehpihin, tua thuthukpi genkhia thei-in, Babylon gam sunga mipil dangte tawh thahna i thuakkhawm loh nadingin thu i ngen ding hi, ci-in a gen hi. Tua ciangin tua zan sungin maangmuhna tawh tua thuthukpi Daniel’ tungah kihilh a, amah in vantung Pasian’ min a phat hi. “Pasian’ min kiphat tawntung ta hen; amah pilin a vanglian hi. Amah in hun le khuahunte kheel a, kumpite koihin lah a lakhia hi. Amah in mite tungah pilna le theihna a pia hi. Amah in thuthukpite le thusimte a lakkhia hi. Amah in khuamial sunga kiseelte thei a, khuavak in amah a umcih hi. Nang pen ka pu ka pate’ Pasian na hi a, ka hong phat a, ka hong zahtak hi. Nangmah in pilna le thahatna na hong piazo hi. Ka thungetna nong za a, kumpipa kianga ka gen ding thu nong lakzo hi,” a ci hi. Tua ahih ciangin kumpipa in Babylon mipilte a that dingin a sawl pa Ariok kiangah Daniel pai a, “Babylon gam sunga mipilte that kei in. Kumpipa kiangah hong paipih in; tu-in a mangmat a khiatna ka gen ding hi,” a ci hi. Tua ciangin Ariok in thakhatin kumpipa kiangah Daniel paipih pah a, “Kumpipa aw, na mangmat a khiatna a hong gen thei ding Jew mi salte khat ka va mu hi,” ci-in a gen hi. Kumpipa in Belteshazzar a kici Daniel kiangah, “Ka mangmat bang hi a, a khiatna bang hiam cih hong gen thei ding na hi hiam?” ci-in a dong hi. Daniel in, “Kumpipa aw, tua na theihnop thu a hong gen thei ding khongkhai thei, mitphial siam, aisan siam kuamah om lo hi. Ahih hangin thusim a lak thei vantungah Pasian khat a om hi. Amah in mai lamah bang thu hong piang ding cih nangmah Nebukhadnezzar kumpipa tungah a hong hilhzo hi. Kumpipa na ihmut laitakin mailam a hong piang ding mang khat na man a, thuthukpi a lakkhia Pasian in a piang ding thu a hong lakkholzo hi. Tu-in midangte sangin ka pilzawk manin kei tungah tua thu a hong kilak hi loin, Kumpipa in na mangmat a khiatna le na ngaihsut thu na theih nadingin a hong kilak ahi zaw hi. “Kumpipa aw, na mangin a tee daldal milim lian mahmah khat na mu a, kihtakhuai mahmahin na mai-ah a ding hi. Tua milim lutang pen kham hoih mahmah tawh a kibawl ahi hi. A awm le a bante ngun tawh kibawl a, a gil le a pheite sumngo tawh kibawl hi. A khete sik tawh kibawl a, a khepekte khen khat sik, khen khat tungman kigawm ahi hi. Tua banga na et laitakin mualtung panin suangtumpi khat kuama khuk lohin hong tuk a, sik le tungman kigawm milim khete dengtanin a kithehthang hi. Thakhatin sik, tungman, sumngo, ngun le khamte kitamnen gawp a, khuakhal lai-a ansi zap bangin a leengmang hi. Huih in leenmang khin ahih manin themkha beek a kimu nawn kei hi. Ahih hangin tua suangtum hong khangkhang a, mual cia hong pha-in leitung khempeuh a dim hi. “Na mangmat pen tu-a teng ahi hi. Tu-in a khiatna ka hong gen ding hi. Kumpipa aw, kumpi khempeuh lak pan nang a lianpen na hi hi. Vantung Pasian in kumpi-in nang hong koih a, vangliatna, thahatna, le zahtakna a hong pia hi. Amah in mi’ tenna leitungteng, ganhingteng le vasate a uk dingin nang a hong koih hi. Tua kham lutang pen nangmah na hi hi. Nang’ khit ciangin nang’ kumpi gam sangin a neuzaw kumpi gam adang khat hong piang ding a, tua khit ciangin sumngo ahi kumpi gam a thumna in leitung khempeuh uk ding hi. Tua khit ciangin kumpi gam lina hong piang ding a, sik bangin a khauh ding hi. Sik in na khempeuh satnenin a gawivui bangin, a masa kumpi gamteng khempeuh a sukham ding hi. A khepek le a khemete khen khat sik le khen khat tungman kigawm ahi na mu hi. Tua pen kumpi gam kikhenthang ding hi, cihna ahi hi. Tungman le sik kigawm ahih mah bangin sik bangin a hoih khopkhat ciang khauhna a nei ding hi. A khemete khenkhat sik hi a, a khenkhat tungman ahih mah bangin kumpi gam khenkhat thahatin khenkhat a thahat kei ding hi. Sik le tungman kigawm na muh mah bangin tua kumpi gam ukte in kigawm ding hanciamin zileta-in a kimat ding uh hi. Ahih hangin sik le tungman a kimat theih loh mah bangin a kigawm thei kei ding uh hi. Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo zo lo ding a, tua gam in gamdang khempeuhte zogawpin a kip tawntung ding hi. Kuama lawn lohpi-in mualtung pan hong tuksuk suangtum in sik, sumngo, tungman, ngun, le kham tawh kibawl milim a denpaih na mu hi. A lian Pasian in mai lamah bang hong piang ding cih Kumpipa tungah a hong hilh ahi hi. Na mangmat pen ahi bang teekteekin kong gen a, a khiatna zong a man bangin kong genzo hi,” a ci hi. Tua ciangin kumpi Nebukhadnezzar zong Daniel’ mai leilakah kunsukin, Daniel tungah sagawh biakna le a namtui biakpiakna bawl dingin thu a pia hi. Kumpipa in, “Hih thuthukpi hong genthei na hih manin na Pasian pen thuthuk a lak, pasian khempeuh sung pan a lianpen, kumpite’ tunga Topa ahi hi,” a ci hi. Tua ciangin kumpipa in Daniel letsong hoih tampi pia a, a za liansak a, Babylon gamteng uksakin, Babylon mipil thudotte a ukpipa dingin a koih hi. Kumpipa in Daniel’ ngetna mah bangin Shadrak, Meshak, le Abednego-te Babylon gam khen tuamtuamte a uk dingin koih a, Daniel pen kumpi inn sungah a omsak hi. Kumpi Nebukhadnezzar in a tun pi sawmkua a sang, a vailam pi kua a gol kham milim golpi khat bawlsak a, Babylon gam sung Dura zanglei-ah a koih hi. Kumpipa in a milian khempeuh, kumpi tapate, gam ukpite, gam ukpi huhte, mangpite, sumkem mangte, thukhen mangte, khuapi uk mangte le milian dangte khempeuh, kumpipa’ milim bawl apna ah a paikim ciat dingin sapna thu a pia hi. Tua ahih ciangin tua mangliante khempeuh milim ap nadingin milim mai-ah a ding uh hi. Tua ciangin nakpitakin taangkona khat kibawl a, “Minam tuamtuamte le paunam tuamtuamte khempeuh aw! Peengkul ging na za ding uh a, tua khit ciangin tamngaite, laiza lasakna gingte, harp lasakna gingte, gawsemte, le tumtheih a tuamtuamte a hong kitum ciangin Kumpi Nebukhadnezzar’ koih kham milim mai-ah kunin na bia ding uh hi. A kun lo, a bia lo peuhmah thakhat thu-in mei phualpi sungah kikhul pah ding hi,” a ci hi. Tua mah bangin minam kimte, minam tuamtuamte le paunam tuamtuamte khempeuh in tumtheih gingte a zak phetun kunsukin Kumpi Nebukhadnezzar’ kham milim koih a bia uh hi. Tua ciangin Babylon mite pawlkhat pai-in Jew mite a heksim uh hi. Amaute in Kumpi Nebukhadnezzar’ kiangah, “Kumpipa aw, na khansau hen! Kumpipa in, tumtheihte a hong kitum khit phetin mi khempeuh kham milim mai-ah kunin bia ding uh hi, ci-in thu na pia khinzo hi. Tua milim mai-ah kun loin, a bia lo khempeuh mei phualpi sungah a kikhul ding ahi hi. Babylon gam a khen liante a uk dingin na koih Shadrak, Meshak, le Abednego a kici Jew mi pawlkhat a om uh hi. Amaute in kumpipa’ thupiakna a mang kei uh hi. Amaute in na pasian bia nuam loin, na milim koih mai-ah a kun nuam kei uh hi,” a ci uh hi. Tua thu hangin kumpipa heh mahmah a, tua mi thumte ama mai-ah a kipaipihna ding thu a pia hi. Amah in, “Shadrak, Meshak, le Abednego-te aw, ka pasian bianuam loin, ka kham milim koih mai-ah kun nuam lo na hi uh hiam? Tua ahih ciangin tu-in peengkulte, tamngaite, laiza lasakna gingte, harp lasakna gingte, gawsem, le tumtheih dang a gingte na zak khit phet uh ciangin kunin milim na bia ding uh hi. Na biak kei uhleh thakhatin mei phualpi sungah hong kikhul ding ahih ciangin a hong honkhiazo ding pasian omin um na hi uh hiam?” a ci hi. Shadrak, Meshak, le Abednego-te in Kumpi Nebukhadnezzar kiangah, “Kumpipa aw, hih thu kong dawng kei ding uh hi. Mei phualpi sung panin a hong honkhia thei pasian a om leh ka biak ka Pasian uh hi ding a, na khutsung panin a hong honkhia ding hi. Kumpipa aw, a hong hotkhiat kei zenzen leh zong, na pasian lah ka bia tuan kei ding uh a, na kham milim mai-ah zong ka kun kei ding uh hi, ci-in theita in,” a ci uh hi. Tua ciangin Kumpi Nebukhadnezzar pen Shadrak, Meshak, le Abednego-te tungah heh mahmah ahih manin a mai a san pempam hi. A sat ngeinazah sangin a zah sagihvei a sazaw mei phualpi a cih dingin a mite thu a pia hi. Tua ciangin Shadrak, Meshak, le Abednego-te a hencip ding le mei phualpi sungah a khul dingin galkap thahat khempeuh thu a pia hi. Tua ciangin amaute puanak le puantualpi silhsa le lukhu khusa-in hencip uh a, mei phualpi sungah a khul uh hi. Bang hang hiam cih leh kumpipa’ thupiakna kinawh lua mahmah a, mei phualpi lah sa lua mahmah ahih manin a khulte nangawn meikuang in hullum hi. Tua ahih ciangin Shadrak, Meshak, le Abednego-te hencipsa-in meikuangpi laizangah a kiasuk uh hi. Tua ciangin Nebukhadnezzar in lamdangsa mahmahin a ding vat hi. Amah in a thudotte kiangah, “Mihing thum hencipsa-in mei phualpi sungah khul hi lo ihi hiam?” ci-in a dong hi. Amaute in, “Hi mah hi, Kumpipa aw,” ci-in a dawngkik uh hi. “Tua ahihleh bang hangin meikuang sungah mihing li a kawi paipai mu ka hi hiam? Amaute lah kihencip lo a, liam zong liam tuak beek lo uh hi. A lina pen pa hoh pasian-te khat tawh a kibang hi,” ci-in a dong hi. Tua ahih ciangin Nebukhadnezzar zong mei phualpi kong gei-ah paito a, “Shadrak! Meshak! Abednego! A lianpen Pasian’ nasemte hong paikhia un,” ci-in a sam hi. Tua ciangin amaute zong thakhatin a hong paikhia pah uh hi. Kumpi tapate, gam ukpite, gam ukpi huhte, le kumpipa’ thudotte khempeuh kikhawm uh a, mei in a kat loh mite a en uh hi. A sam uh zang khat beek mei in kanghul lo a, a puan uh zong kang loin meikhu gim zong a nam beek kei uh hi. Tua ciangin kumpipa in, “Shadrak, Meshak, le Abednego-te’ Pasian phat un. Amah in a vantung mite sawl a, amah a muang ama nasem hih mite a honkhia hi. Amaute in ka thupiakna mang loin, amau’ Pasian longal pasian dang’ mai-ah kun nuam lo, bia nuam lo uh ahih manin mei phualpi sungah khul ding a utzaw uh ahi hi,” a ci hi. “Tu-in minam kimte, minam tuamtuamte, paunam tuamtuamte, mi khat peuhpeuh in Shadrak, Meshak, le Abednego-te’ Pasian gensiatna kampau a om leh kibalnengawp ding a, a inn uh kisuksiatsak ding hi, ci-in thukham ka bawl hi. Bang hang hiam cih leh hih bangin a hon thei pasian dang om peuhmah lo hi,” a ci hi. Tua ciangin kumpipa in Shadrak, Meshak, le Abednego-te Babylon gam khen liante-ah a golzaw ukna za a pia hi. Nebukhadnezzar kumpipa in leitung a om minam kimte, minam tuamtuamte, paunam tuamtuamte khempeuh tungah a nuai-a thute hih bangin a khak hi: “Note tungah nopna om ta hen! A Lianpen Pasian in kei tungah lim le nalamdang a hong lahna thute ka hong gen nuam hi. “Pasian’ hong lah na lamdangte, bangzahin lian ahi hiam? A bawl na lamdangte, bangzahin vanglian ahi hiam? A tawntungin Pasian kumpi hi ding a, amah in a tawntungin a uk paisuak ding hi. “Keimah Nebukhadnezzar lungnuam takin kumpi inn-ah ka teng a, nuamsa mahmahin ka om hi. Ahih hangin ka ihmut laitakin a lauhuai mang khat ka man a, a dipkuathuai maang ka mu hi. Ka mangmat a khiatna a hong hilh dingin Babylon gam kumpi thudotte khempeuh a hong pai nadingun thu ka pia hi. Tua ciangin aisan theite, mitphial siamte, khongkhai theite, aksi et siamte khempeuh hong pai uh a, amaute kiangah ka mang ka gen hi. Ahih hangin a khiatna a hong gen thei kei uh hi. Tua ciangin Daniel (a min ding Betashazzar, ka pasian’ min tamin a kiphuak pa) a hong pai hi. Pasian’ kha ama sungah om ahih ciangin ama kiangah ka mangmat ka gen hi. Ama kiangah, aisan theite lak a a lianpen Betashazzar aw, Pasian’ kha na sungah om ahih manin thuthuk khempeuh na theih theihlam ka thei hi. Hih ka mang a khiatna hong gen in, ka ci hi. “Ka ihmut laitakin maangmuhna khat ka nei a, leitung laizangah a po singkung sang mahmah khat ka mu hi. Tua singkung pen khangkhangin gol semsem a, vantung dong banto ahih ciangin leitung mi khempeuh in a mu thei uh hi. A tehte hoih mahmah a, leitung bup khamkhop ding gah a gah hi. Gamsate in a liim beel uh a, vasate in a hiang kawmah bu bawl uh a, a nungta thei khempeuh in a gah a ne uh hi. “Ka maangmuhna ngaihsunin ka om laitakin ka khuadak leh a vil, a patau vantungmi khat vantung pan a hong tuaksuk ka mu hi. Amah nakpi-in kiko-in, ‘A singkung phuk inla, a hiangteng sattan in. A tehteng heuhsiang inla, a gahteng thehthang in. A nuai-a ganhingteng le a hiang tunga vasateng hawlkhia in. Ahih hangin a bul le leisung a a zungte nusia in. Sik le sumngo kual tawh vial inla, gamlak lopate tawh nusia khawm in. Hih mipa tungah daitui kai hen la, ganhingte le lopate tawh omkhawm hen. Amah in mihing lungsim nei nawn loin, kum sagih sung ganhing lungsim a nei ding hi. Hih pen a vil, a patau vantungmi’ thukhenna ahi hi. Tua ahih ciangin mun khempeuhah a om mi khempeuhte in, a Lian Pasian in mite’ kumpi gamah vai a hawm hi, cih a thei ding uh hi. Amah in a teel peuhpeuh a neupente nangawn kumpi a suaksak thei ding hi,’ a ci hi. “Beltashazzar aw, keimah Nebukhadnezzar Kumpipa in ka mangmat pen hih bang ahi hi. Tu-in a khiatna hong gen in. Ka thudot mite khat beek a khiatna a hong gen thei a om kei uh hi. Ahi zongin nang’ sungah Pasian’ kha om ahih manin na hong gen thei ding hi,” a ci hi. Tua ciangin Beltashazzar zong a kici Daniel lungmang lua ahih manin tawmvei sung bangmah gen thei loin a om hi. Kumpipa in, Beltashazzar aw, mang le a khiatna huhau-in na lung mangsak zenzen kei in, a ci hi. Beltashazzar in, Kumpipa aw, nang mangmat le a khiatna pen na galte tungah tungzaw hen, a ci hi. Singkung sang mahmah na muh pen hong khangkhang a, khauh mahmah a, vantung dong banto a, leitungah a teng mi khempeuh in a mu thei uh hi. A tehte hoih mahmah a, leitung bup a vakzo ding gah a gah hi. Gamsate, a nuai-ah tawlnga uh a, vasate in a hiang kawmah bu a bawl uh hi. Kumpipa aw, nang pen tua singkung na hi hi. Nang na lian a, na thahat hi. Nakpi takin khangin lian mahmah na hih manin vantung dong na banto a, leitung khempeuhah na vangliatna kizel hi. Kumpipa in na et laitakin, vantungmi khat vantung panin hong paisuk a, “A singkung phuk inla susia in; ahih hangin lei sungah a bul le a zungte nusia in. A bulah sik le sumngo kual vial inla, gamlak lopate tawh nusiakhawm in. A tungah daitui kia hen la, kum sagih sung ganhingte tawh omkhawm ta hen,” a ci hi. Kumpipa aw, a khiatna pen hih bang ahi hi. A Lian Pasian in nang tungah a hong tung ding a thukhennasa a hong lak ahi hi. Mite sung panin hong kihawlkhia ding a, gamsate tawh na tengkhawm ding hi. Bawngtal bangin lopa na ne ding a, a pualamah lumin, kum sagih sung na tungah daitui a hong kia ding hi. Tua ciangin a Lian Pasian in mihingte’ kumpi gam uk a, a teel mi peuhpeuh kumpi suaksak thei hi, na ci ding hi. Vantung mi in singbul le a zungte lei sungah nusiat dingin thu a pia hi. Tua pen, Pasian in leitung khempeuh uk hi, cih na theih ciangin kumpi na suakkik ding hi, a cihnopna ahi hi. Tua ahih ciangin kumpipa aw, kong thuhilhna hong mang in. Mawhna bawl nawn kei inla, diktakin gamta in. Mizawngte hehpih leteh, tua in a sia-a na gamtatnasate hong puahsak ding a, na nuamsa toto ding hi, a ci hi. Hih thuteng khempeuh kumpi Nebukhadnezzar’ tungah hong tung hi. Tua zawh kha sawm le nih khit ciangin kumpipa zong Babylon khua kumpi innkhumzang huan sungah vak a, Babylon khua bangzah takin lian ahi hiam? Kumpi khuapi ding le, ka vangliatna ka thahatna a kilat nadingin ka lam ahi hi, a ci hi. Tua thute a kamsung pan a pusuah ma-in vantung panin aw khat hong ging a, “Kumpi Nebukhadnezzar aw, ka thugen na ngai in. Na kumpi gam hong kilakkhiatsak zo hi. Mite lak pan hong kihawlkhia ding a, gamsate tawh na tengkhawm ding hi. Bawngtal bangin kum sagih sung lopa na ne ding hi. Tua ciangin, Pasian in mihingte’ kumpi gam uk a, a teel mi peuhpeuh kumpi a suaksak thei hi, na ci ding hi,” a ci hi. Tua hun lianin Nebukhadnezzar’ tungah tua thukhenna a hong tung hi. Mite lak panin Nebukhadnezzar kihawlkhia a, bawngtal bangin lopa a ne takpi hi. A pumpi tungah daitui kia a, a pumpi tunga a multe keelmul bangin sau a, a khutcinte muvanlai khecin bangin a hong sau hi. Tua ciangin kumpipa in, “A kisehsa hun a cin ciangin keimah Nebukhadnezzar in vantung lam ka ento a, ka khuatheihna a hong tungkik hi. A nungta tawntung a Lianpen Pasian’ min phatin, zahtakna le minthanna ka pia hi. “Amah in a tawntungin uk ding a, ama gam kip tawntung ding hi. Amah in leitung mite bangmahin a sim kei a, vantung mite le leitung mite ama khutnuai ahi hi. Ama deihna kuamah in nial thei lo a, a bawlnate kuamah in a hang a kan thei kei hi. “Ka khuatheihna a hong tunkik ciangin ka kumpi za, ka minthanna, le ka gam minthannate a hong kipia kik hi. Ka miliante le ka thudot mite in hong muak uh a, nidang sangin a lianzaw minthanna le ka kumpi za a hong kipia kik hi. Tu-in keimah Nebukhadnezzar in Vantung Kumpipa phatin, zahtakin a min ka thangsak hi. Ama bawlna khempeuh a man hi. Amah a tawntungin thuman a, a kiphasakin a gamtate a neusak hi,” a ci hi. Kumpi a suah ciangin Belshazzar in pawi lianpi khat bawl a, a mi liante tulkhat samin amaute tawh zu a ne uh hi. Zu a nek laitakun, Belshazzar in a pa Nebukhadnezzar in Jerusalem biakinnpi panin a puakkhiat ngun hai, kham hai, le kuangte a va la dingin thu a pia hi. Kumpipa in a miliante le a zite le a zineute in tua haite tawh zu a nektheih nadingun hai la dingin thu a pia hi. Thakhatin kham haite, kuangte hong paipih uh a, a vekpi-un tua haite tawh zu a ne uh hi. Amaute in zu ne uh a, kham tawh, ngun tawh, sumngo tawh, sik tawh, sing tawh, suang tawh a kibawl pasian-te a phat uh hi. Thakhat thu-in kumpi innsung meivak a taan penna lam kawm tungah mihing khut khat hong kilangin lai a hong gelh hi. Tua khut in lai a gelh laitak kumpipa in a mu hi. Tua ciangin kumpipa lau lua mahmah a, a mai daang gawpin a khut a ling kauhkauh hi. Amah in mitphial siamte, aisan siamte, aksi et siamte va sam pak un, ci-in a kiko hi. Tua mite a hong tun uh ciangin kumpipa in, “Hih lai kigelh a sim thei, a khiatna a hong gen thei peuhmah kumpi puanpi silhsakin, minphatna khamkhi a ngawngah ka oksak ding a, kumpi gam sungah a za lian a thumna-in ka koih ding hi,” a ci hi. Kumpipa’ thudot mite hong tung uh a, ahih hangin tua lai a sim thei le kumpipa tungah a khiatna a gen thei kuamah a om kei uh hi. Tua tak ciangin kumpi Belshazzar lungkham mahmahin a mel daang semsem a, a miliante in a cih nading mel a thei kei uh hi. Kumpipa le a miliante gamlum ngeingai-in a om laitakun, pawi inn sungah kumpinu hong lut a, “Kumpipa aw, sauveipi nungta in. Bang hangin lungkham lua-in na mai daangsak zenzen na hi hiam? Na gam sungah Pasian’ kha a nei mi khat a om hi. Na pa kumpi ahih laitakin, tua mipa in pasian-te’ pilna tawh a kibang pilna, theihna le lungsim navakna a nei hi. Tua hi a, kumpi ahi na pa Nebukhadnezzar in tua pa pen aisan theite, mitphial siamte, khongkhai siamte, le aksi et siamte’ ukpi dingin a koih hi. Amah in a kanzaw siamna nei a, mangkhiat siamna, thudotna haksa nonote dawntheihna, le thuthukpite gentel theihna a nei hi. Tua ahih ciangin kumpipa in Beteshazzar ci-in a min a phuah Daniel samsak in. Tua hileh amah in a hong gen thei pah ding hi,” a ci hi. Tua ciangin thakhatin kumpipa kiangah Daniel a paipih uh hi. Kumpipa in, “Nang Daniel pen kumpi ahi ka pa in Judah gam panin a hong lakkhiat Jew mi salte khat hi lo na hi hiam? Nangma sungah Pasian’ kha om ahih manin siamna nei-in, lungpilna le theihna na neihlam ka thei hi. Ka thudot mite le mitphial siamte, hih lai kigelh a sim ding le a khiatna a gen dingin a hong pai uh hinapi, a khiatna a theizo kei uh hi. Ahih hangin nangmah in thuthukpi le kuama theih zawh loh thute gen thei hi, ci-in kong zazo hi. Hih lai kigelh sim thei-in a khiatna nong gen theih leh kumpi puansan kong silhsak ding a, minphatna khamkhi na ngawngah hong oksakin, kumpi gam sungah a za lian thumna-in ka hong koih ding hi,” a ci hi. Daniel in kumpipa kiangah, “Letsong pen kei hong pia kei inla, midang khatpeuh piazaw in. Ahi zongin tua lai kigelh hong simsakin a khiatna kumpipa kong hilh ding hi. A Lianpen Pasian in na pa Nebukhadnezzar kumpi lianin koih a, zahtakna le vangliatna a pia hi. Amah lianlua mahmah ahih manin gam khempeuh, nam khempeuh, pau khempeuhte in kihta-in a ling uh hi. Mi khatpeuh a thahnop leh that a, a nuntaksaknop leh a nungtasak hi. A ut leh mi khatpeuh pahtawi-in, a ut leh a daisak thei hi. Ahih hangin amah a lung khauhin kiphasak a, gilo lua ahih manin a kumpi tokhom panin kilakhia a, a minthanna a taan hi. Mihingte lak panin amah kihawlkhia a, ganhing lungsim a nei hi. Gam sakolte tawh tengkhawmin, bawngtal bangin lopa ne a, daitui dal ding nei loin a pualamah a lum hi. A tawpkhakna-ah a Lianpen Pasian in mihingte’ kumpi gamte uk a, a teel peuhpeuh kumpi suak hi, ci-in a phawk thei hi. “Ahih hangin a tapa ahi nangmah Belshazzar in hih thu khempeuh na theih hangin na kiniamkhiat tuan kei hi. Vantung Topa’ langah na pang hi. A biakinnpi hai le kuangte la-in sabuai tungah nangmah tawh, na miliante tawh a zineute le na zite uh tawh zunekna-in na zang uh hi. Theihna a nei lo, a mu thei lo, khua a za thei lo ngun, kham, sumngo, sik, sing, le suang tawh a kibawl pasian-te’ min na phat uh hi. Na nuntakna le na hihna khempeuh a hong uk Pasian na zahtak kei hi. “Tua ahih ciangin Pasian in hih laimalte tua khut a hong gelh sak hi. Tua a kigelh laimal pen hih bang ahi hi: Mene, Mene, Tekel, Parsin. A khiatna zong hih bang ahi hi: Mene pen kisim a cihna hi a, Pasian in na gam ukna hong simsak a, a beisak ta hi, cihna ahi hi. Tekel pen kitawikhai a cihna hi a, nang hong kitawikhai-in na lek zo kei hi, a cihna ahi hi. Parsin pen kikhen cihna hi a, na gam kikhen khamin Media le Persia-te a kipiazo hi, a cihna ahi hi,” a ci hi. Tua ciangin Belshazzar in Daniel pen kumpi puansan a silhsak dingin thu pia pah a, minphatna khamkhi a ngawngah a oksak hi. A gam sungah a za lian thum nadingin a koih hi. Tua zan mahmahin Babylon kumpipa Belshazzar kithat a, Media mi Darias kumpi a suak hi. (Tua laitakin Darias kum sawmguk le kum nih a pha hi.) Darias in gam sung khempeuh a uksawn dingin gam ukpi za le sawmnih dingin a ngaihsun hi. Tua ahih ciangin amah in tua gam ukpite tungah a vaihawmpi ding le kumpi deih bang a sem dingin Daniel le adang mi nih a teel hi. Gam ukpi dangte le vaihawmpi dangte sangin Daniel nasep siamzaw diak se hi. Tua bangin siamzaw diak se ahih manin kumpipa in gam buppi ukin koih ding a ngaihsun hi. Tua ahih ciangin vaihawmpi dangte le gam ukpite in Daniel’ nasepna encikin a mawhna zon ding a hanciam uh hi. Ahih hangin Daniel pen a thuman le a citak khat ahih manin a mawhna le a simtatna a muzo kei uh hi. Tua banga nasep kizen lohna le a tatkhialhna a muh loh uh ciangin, “Hih Daniel pen a biakna tawh kisai-in thu i muh kei ngal leh mawhsakna ding dang i mu kei ding hi,” ci-in a kikum uh hi. Tua ciangin kumpipa kiangah amaute pai uh a, “Darias kumpipa aw, sauveipi nungta in! Ngattakin zuih ding thukham khat kumpipa in na bawl ding, gam sung nasem ko vaihawmpite, gam ukpite, gam ukpi huhte, le kumpipa’ thudot mite khempeuh ka thukim uh hi. Tuzawh ni sawmthum sungin nang kumpipa kiang longal, pasian kiang ahi a, midang khat peuhpeuh kiangah ahi zongin thungen om thei lo ding hi, ci-in na kham ding hi. Hih na thupiakna a mang lo peuhmah humpinelkai kikhumna sungah kikhia ding hi. Tua ahih ciangin kumpipa aw, thupiakna lai hawmkhia-in a tungah na min gelh in. Tua hileh Media-te le Persia-te upadi pen kikheel thei lo ding a, ngattakin a kizuih kul ding hi,” a ci uh hi. Tua mah bangin kumpi Darias in a min gelhin thupiakna lai a hawmkhia hi. Tua bang thupiakna lai kihawmkhia khinzo ta hi, ci-in Daniel in a theih ciangin a inn-ah a ciah hi. A inn dawl tungnungah Jerusalem lam a nga tawlet thum a om hi. Tua laitakah tawlet honsa-in a hih ngei bangin khukdinin ni khatin thumvei ta Pasian kiangah thu a ngen hi. Tua ciangin amah a encik mite in Daniel in Pasian kiangah thu a nget a mu uh hi. Amaute khempeuh kumpipa kiangah Daniel a heek dingin a pai uh hi. Amaute in, “Kumpipa aw, tuzawh ni sawmthum sungin kumpipa kiang longal, pasian kiang ahi a, mi khat peuhpeuh kiangah ahi zongin thungen a om leh humpinelkai kikhumna sungah kikhia ding hi, ci-in thupiakna lai hawmkhia-in na min gelh hi lo na hi hiam?” a ci uh hi. Tua ciangin kumpipa in, “Hi mah hi; Media-te le Persia-te’ upadi bangin a kikheel thei lo ding a ngat thupiakna ka bawl hi,” a ci hi. Tua ciangin amaute in kumpipa kiangah, “Judah gam panin a hong pai Jew mi salte khat ahi Daniel in kumpipa hong zahtak lo a, na thupiakna a mang nuam kei hi. Nisimin thumveita thu a ngen tawntung hi,” a ci uh hi. Kumpipa in hih thu a zak ciangin lungmang a, Daniel a suahtak theih nading lampi hanciamin nitum dong a ngaihsun hi. Tua ciangin kumpipa kiangah tua mite hong paikik uh a, “Kumpipa aw, Media le Persia-te’ upadi bangin kumpipa in a hawmkhiatsa thupiakna kikhelkik thei lo hi, cih na thei hi,” a ci uh hi. Tua ciangin kumpipa in humpinelkai kikhumna sungah Daniel a khiat dingun thu a pia hi. Amah in Daniel kiangah, “Thuman takin na biak tawntung na Pasian in hong honkhia ta hen,” a ci hi. Tua ciangin humpinelkai kikhumna sungah Daniel a khia uh hi. Amaute in suangtum khat la uh a, humpinelkai kikhumna gong a hu uh hi. Kuamah in Daniel a hotkhiat theih loh nadingin kumpipa in ama ciaptehna le a miliante’ ciaptehna tawh a ciamteh hi. Kumpipa a inn-ah ciahkik a, tua zan tawntung an ngawlin gualnopna zong a bawl kei hi. Tua zanin a ihmu thei peuhmah kei hi. Zingsang khuavaktung phetin kumpipa tho-in humpinelkai kikhumna-ah a va paipah hi. Humpinelkai kikhumna a tun dektak laitakin aw ling kawmin, “Daniel, a nungta Pasian’ nasempa! Thuman takin na biak tawntung na Pasian in humpinelkai kamsung panin a hong honkhia thei hiam,” ci-in a kiko hi. Daniel in, “Kumpipa aw, sauveipi nungta in. Pasian in a vantungmi hong sawl a, ka liam loh nadingin humpinelkaite’ kam a humcipsak hi. Kumpipa aw, mawhna ka bawl lohlam leh, nang tungah zong khialhna ka bawl lohna amah in hong thei ahih manin tua bangin a hong bawl hi,” a ci hi. Kumpipa lungdam mahmah a, humpinelkai kikhumna sung pan Daniel kaihkhiat dingin thu a pia hi. Tua ahih ciangin Daniel kaikhiato uh a, liamna themcik zong a neih lohlam a mu uh hi. Bang hang hiam cih leh amah in Pasian muang hi. Tua ciangin kumpipa in Daniel a hekteng khempeuh a zi a ta ciat uh tawh humpinelkai kikhumna sungah khiat dingin thu a pia hi. Amaute humpinelkai kikhumna taw a tun ma-un humpinelkaite in bakkhat suahin a guh a tangin a balzan gawp uh hi. Tua ciangin Kumpi Darias in leitung a om minam kimte, minam tuamtuamte, le paunam tuamtuamte khempeuh tungah hih bangin lai a khak hi: “Note tungah nopsakna thupha om tahen. Ka gam sunga om mi khempeuh in Daniel’ Pasian kihta-in a zahtak nadingun thu ka pia hi. “Bang hang hiam cih leh amah a nungta Pasian hi a, a tawntungin a uk ding hi. Ama gam kisia ngei lo ding a, a vangliatna a bei ngei kei ding hi. Amah pen a honkhia pa le a suaktasak pa hi a, vantung le leitungah lim le na lamdangte a bawl hi. Humpinelkaite’ thahatna panin Daniel a suaktasak hi,” a ci hi. Tua ahih manin Darias kumpi ahih laitak leh Persia mi Sairas kumpi ahih laitakin Daniel nuamsa-in a om hi. Belshazzar, Babylon kumpi a suahzawh a kum masa kumin keimah Daniel in mang khat ka man a, zanin maang ka mu hi. Ka mangmat lai-in ka gelh a, tua zan a ka maangmuhnate ka ciaptehna hih bang ahi hi: Mun khempeuh panin huihpi hong nungin tuipi tung a seemgawp hi. Tua ciangin tuipi sung panin a kibang lo sa golpi li hong pusuakto uh hi. A masa pen humpinelkai tawh kibang a, ahi zongin muvanlai kha tawh a kibang kha a nei hi. Ka et laitakin a kha tegel a hong kibotkhia hi. Leitung panin tua ganhing kidomkaang to-in, mihing bangin a khe nihin kidingsak a, mihing lungsim ama tungah a kipia hi. Tua ciangin a nihna sapi vompi tawh a kibang khat ka mu hi. A nunglam khe tawh dingin a ha tawh nakguh thum pet a, “Na duh zahzah sa tampi ne in,” cihna aw khat a hong ging hi. Ka et lai leh kamkei tawh a kibang sapi dang khat ka mu hi. A nungzangah vasa kha tawh a kibang kha li a nei hi. Tua sapi in lutang li nei a, ukna aana ama tungah a kipia hi. Ka et lai leh sapi lina ka mu hi. Tua sapi kihtakhuai mahmah a, lipkhaphuai-in a thupi mahmah hi. Amah in a gol mahmah sik-ha a nei hi. Amah in nene-in a nek valteng a khe tawh a tuancilgawp hi. Sapi dangte tawh kibang loin amah in ki sawm a nei hi. Tua kite ka et laitakin tuate’ lakah adang ki neu khat hong po a, a omsa sung pan ki thumte a botkhia hi. Tua ki’ tungah mihing mittang tawh a kibang mittang le kam om a, kiphatsakna kam tampi a pau hi. Ka et laitakin kumpi tokhomte a hong kikoih hi. A nungta tawntung mipa tua tokhomte khat tungah a tu hi. A puante vuk bangin ngo a, a samte tuumul hoih tawh a kibang hi. A tokhom pen meikuang leengpei tungah kinga-in mei kuang zuazua a, tua sung panin meikuang a hong leengkhia niloh hi. Ama nasem ding mihing tul za tampi om a, a mai-ah mihing tul za sawm tampi a ding uh hi. Thukhenna ding hun kipan a, laibute a kiphen hi. Ka et laitakin tua ki neu in kiphatsakna kamsia a pau ka za hi. Ka et lailai leh tua sapi lian a lina kithat a, a pumpi meikuang sungah kikhulin a kisusia hi. Sapi dangte ahihleh a vangliatna uh kilak khiatsak a, ahih hangin a nuntak laina ding uh hun ciangtan khat a kipia hi. Zan ka maangmuh hun sungin ka khuadak leh mihing tawh a kibang mi khat meii tungah a hong pai ka mu hi. A nungta tawntung mipa kiangah pai-in, ama kiangah a kipia hi. Amah in vangliatna, minthanna, le kumpi za ngah ahih manin minam kimte, minam tuamtuamte, paunam tuamtuamte khempeuh in ama na a sem ding uh ahi hi. Amah in a tawntungin uk ding a, a kumpi gam a bei ngei kei ding hi. Ka maangmuhnate in hong linglawng sakin a hong patausak mahmah hi. Ka pama ding mite khat kiangah pai-in hihte khempeuh a khiatna hong hilh in, ci-in ka thum hi. Tua ciangin amah in a khiatna a hong hilh hi. “Hih sapi lite pen leitung panin a hong khangkhia ding kumpi gam li ahi hi. Ahih hangin a Lianpen Pasian’ mite in kumpi za ngah ding uh a, a tawntungin a nei paisuak ding uh hi,” hong ci hi. Tua ciangin a dangte tawh a kibang lo a kihtakhuai sik-ha le sumngo khecin a nei sapi lina thu ka thei nuam hi. Amah in nene-in na khempeuh tuancilgawp hi. Tua ciangin a lu tungah ki sawm le, a nung ciangin ki khat hong po a, a omsa kite sung pan ki thum a kitanna thu ka thei nuam hi. Amah in mittang le kiphatsakna kamsia pauna ding kam a nei hi. A dangte sangin nakpitakin kihtakhuai zaw hi. Ka et laitakin, tua ki in Pasian’ mite galin do a, amaute a zogawp hi. Tua ciangin a nungta tawntung mipa hong pai a, a Lianpen Pasian’ mite a’ ding a hoih thukhenna a hong gen hi. Pasian’ mite in kumpi za a ngahna ding uh hun a hong tung hi. Hih bangin hilhtelna kei a hong kipia hi: “Sapi lina pen leitung a hong om ding kumpi gam lina ding hi a, kumpi gamdangte tawh kilamdang mahmah ding hi. Amah in leitung buppi valhtum ding a, tuancil gawpin a sukham ding hi. “Ki sawmte pen tua kumpi gam sung panin a hong piang ding kumpi sawmte ahi uh hi. Tua ciangin kumpi dang khat hong piang leuleu ding a, amah in a omsate tawh a kilamdang mahmahin kumpi thum a nuaisiah ding hi. “Amah in a Lianpen Pasian langpangin thu gen ding a, Pasian’ mite a bawlsia ding hi. Amah in amaute’ biakna tawh kipawl thukhamte le pawi bawlna hunte kheelsak ding hanciam ding a, ama khut sungah kum thum le alang sung Pasian’ mite a om ding uh hi. “Tua ciangin thukhenna hun hong kipan ding a, ama vangliatna lakkhiat sakin, amah a kisusia maimang ding hi. “Hih leitung kumpi gam, vangliatna, le liatna khempeuh a Lianpen Pasian’ mite tungah a kipia ding hi. Amau’ kumpi za cikmah hunin bei ngei lo ding a, leitung ukna za a nei khempeuhte in a thu uh mangin amaute’ na a sem ding uh hi,” hong ci hi. Hih tangthu a beina hita hi. Hih thu ka ngaihsut ciangin keimah Daniel ka lau mahmah a, ka mel a daanggawp hi. Ahih hangin hih thu keima lungsim sung bekah ka koih hi. Belshazzar kumpi a suahzawh a kum thumna kumin keimah Daniel in a nihveina maang ka mu hi. Ka maangmuhna ah thakhatin Elam gam sunga om Susa khuapi kulh sungah a omin ka kingaihsun a, Ulai gun gei-ah ka ding hi. Ka khuadaktoh leh gun gei-ah tuutal khat a dingin a om ka mu hi. Amah in a sau mahmah ki nih nei a, a ki po nunung pen a po masa sangin a sauzaw hi. Tua tuutal in a ki tawh nitumna lam, saklam, le khanglam a si kawikawi ka mu hi. Ama ut bangin kiphasakin gamta ahih manin amah a khozo ding le a thahatna pan a suaktazo ding ganhing khat beek a om kei hi. A bangci hi ding hiam, ci-in ngaihsun thei loin ka om laitakin nitumna lam panin keeltal khat a hong tai veva hi. Hat lua mahmah ahih manin a khe in lei a sukha kei hi. A mit tegel kikalah a tuampian ki lamdang khat a nei hi. Ki nih a nei gun gei-a a ding ka muh tuutal kiang a hong phak ciangin a thaneih zahin a si hi. Hehlua mahmah ahih manin tua tuutal laigawp a, a ki tegel a suktansak hi. Tuutal in nang zo lo ahih manin lei kidenna a, a huhzo ding kuamah a om kei hi. Tua keeltal a thahatna hong khangto semsem a, ahih hangin a thahat pen laitakin a ki a kitan hi. Tua a ki pona munah a lamdang ki li hong poto kik a, mun tuamtuam a kawk hi. Tua ki lite lak pan khat’ tungah ki neu dang khat hong po a, khanglam, nisuahna lam, le Thuciamna Gam lamah a vangliatna a lak hi. Vantung galkapte nangawn a dozo zah dong dingin a thahatna hong khangto a, aksi pawlkhatte leitungah lawnkhia-in, a tuancilgawp hi. Amah in vantung galkap kumpipa nangawn do-in, ama tunga kipia tawntung biakpiaknate nangawn khawlsakin, biakinnpi biaknate a beisak hi. Nisim biakpiaknate ah mawhna dim a, biakna man pen leilakah a kipaikhia hi. A sepna peuhpeuhah tua ki thahat mahmah hi. Vantung mi khat in adang vantungmi khat kiangah thu a dot ka za a, “Hih maangmuhna bang tanvei sawt ding a, a muhdahhuai mawhna in nisim biakpiakna bang tanvei khaktan ding ahi hiam? Vantung galkapte le biakinnpi bang tanvei kituancil ding ahi hiam?” a ci hi. Amah in, “Zingsang le nitak biakpiakna tulnih le zathum vei a cin khit ciangin biakinnpi kipuahkik ding hi,” a ci hi. Keimah Daniel in maangmuhna a khatna thei nuamin ka hanciam hi. Thakhat thu-in mihing mel tawh a kibang khat ka mai-ah a hong ding hi. Ulai gungal panin mihing’ aw khat hong ging a, “Gabriel aw, a muh nate ama kiangah a khiatna hilh in,” a cihna ka za hi. Gabriel hong pai-in ka kiangah hong ding a, laulua mahmah ka hih manin leitungah ka puk hi. Amah in, “Leitung mi aw, a khiatna thei in. Maangmuhna pen hun beina ding lahna ahi hi,” ci-in ka kiangah a hong gen hi. Amah in thu a hong gen laitakin sibupin leilakah ka tuk hi. Ahih hangin amah in hong domto-in a hong dingsak hi. Amah in, “Pasian’ hehna hangin thupiang dingte ka hong lak ding hi. Na maangmuh pen hun beina ding lahna ahi hi. Na muh ki nih a nei tuutal pen Media le Persia gam kumpite a cihnopna ahi hi. Keeltal pen Grik kumpi gam hi a, a mit kikal-a a po ki pen kumpi masa pen a cihnopna ahi hi. Ki po masa pen a kitan khit ciangin a nunga hong po ki lite pen tua gam panin kumpi gam li hong piang ding a cihnopna ahi hi. Ahih hangin tua gamte ahihleh a masa pen kumpi gam zahin a thahat kei ding uh hi. “Tua kumpi gamte a bei ding hun a nai ciangin gilo lua mahmah ding uh ahih manin gim a kipia ding hi. Tua ciangin ama thu bek thu a sa, mawhna pawlpawl tawh a kidim, zuauphuah hat kumpi khat a hong om ding hi. Amah thahat mahmah ding a, ahih hangin ama thahatna ahi kei ding hi. Amah in a dipkuathuai siatna piangsak ding a, a hihna khempeuhah a thahat mahmah ding hi. Amah in mi thahatte le Pasian’ mite a susia ding hi. A lungsim daplan lua ahih manin zuauphuah siamna tawh a hih khempeuh a tangtun ding hi. Amah kiliansak lua-in theihkholh lohin mi tampi susia-in, a lianpen kumpite’ kumpipa nangawn a langpan’ ding hi. Ahih hangin mihing thahatna kizang loin amah a kisusia ding hi. Hih zingsang le nitak biakpiakna maangmuhna thu a hong kihilh telna pen a man ahi hi. Tu-in hih maangmuhna thu a hong tun ding hun sawtpi hi lai ding ahih manin imcip phot in,” hong ci hi. Keimah Daniel, ni tawmvei sung thazaw gawpin ka ci a na hi. Tua ciangin tho-in ka nasep ngei a semkik dingin kumpi inn-ah ka pai hi. Ka maangmuhna thu thei zo lo ka hih manin cih nading mel thei loin daptakin ka om hi. Media mi ahi Ahasueras’ tapa Darias in Babylon gamteng a uk hi. Amah kumpi a suah a kum masa kumin keimah Daniel in, Topa in kamsang Jeremiah tungah Jerusalem kum sawmsagih sung kisia ding hi, ci-in a genna thu ngaihsunin biakna laibute ka sim hi. An ngawlin, puanhampi silhin, vut lakah tu-in, Topa’ kiangah deih takin thu ka ngen hi. Topa ka Pasian’ kiangah thu ngenin ka mite’ mawhna ka pulak hi. Keimah in, “Topa Pasian aw, nang na lian a, ka hong zahtak uh hi. Nang na thuman a, na thuciamna le na thupiakna a mangte le a hong itte a tawntungin na it hi. “Kote ka hih uhleh ka gilo uh a, mawh khinin ka khial khin uh hi. Na hong sawlna bang ka mang kei uh a, na thupiakna le na thukhamte ka taisan khin uh hi. Ka kumpite uh, ko hong ukte, ka pu ka pate uh, le minam khempeuh tungah na min tawh thu a hong gen na nasem kamsangte’ thu ka ngai kei uh hi. Topa, nang na hih leh na siangtho a, ahih hangin kote ka hih uhleh a zumhuai-in ka gamta uh hi. Judah gam le Jerusalem khuasunga teng Israel mite khempeuh thuman lo uh ahih manin, a nai a gamla gam tuamtuamah na thehthangzo hi. Ka kumpite uh, ko hong ukte, le ka pu ka pate uh a zumhuai-in gamta uh a, a hong uk Topa nangma tungah hong khial khin uh hi. Nang pen hehpihna tawh kidimin mawhna na maisak a, ahih hangin kote in nang ka hong langpan’ uh hi. Topa Pasian aw, na nasem kamsangte tungtawnin kote’ zuih ding thukhamte nong piak hangin, tua thu ka mang tuan kei uh hi. Israel-te khempeuh in na gensa thute le na thukhamte khempeuh a palsat khinzo uh hi. Na tungah khialhna ka hong bawl manun, na nasem Moses’ thukham sunga kigelh bangin kote’ tungah samsiatna a hong tung hi. Na gensa bangin kote tung le ko hong ukte tungah na hong bawlzo hi. Leitung a om khuapi dang khatpeuh sangin Jerusalem khuapi a nasia zaw-in gim na pia hi. Moses’ thukham sunga kigen gimna khempeuh ka thuak uh hi. Topa Pasian aw, tu nangawnin zong nang kong lungdamsakna ding uh hanciam loin, na thuman ka zuih theih nadingun mawhna ka kisik kei uh hi. Topa Pasian aw, nangmah in kote gim a pia dingin nong kithawi a, na hong pia takpi hi. Bang hang hiam cih leh na hihna khempeuh a thuman hi a, kote in na thu ka hong mang kei uh hi. “Kote’ Topa Pasian aw, na mihingte Egypt gam panin na hong lakhia a, na vangliatna tu dongin kiphawk lai hi. Ka mawh khin uh a, ka khial khin uh hi. Nang na siangtho hi. Tua ahih ciangin Jerusalem tungah hong heh nawn peuhmah kei in. Tua pen na khuapi hi a, na mual siangtho ahi hi. Kote le ka pate uh khialhna le gitlohna hangin, ka kiim ka pam uha mite khempeuh in Jerusalem le na mite a hong simmawh uh hi. Pasian aw, kong thungetna le kong thumna hong za in. A kisiasa na biakinnpi hong puahkik in. Mi khempeuh in nangmah Pasian na hihlam a theihtheih nadingun hong puahkik in. Pasian aw, kong thungetnate uh hong ngai inla hong za in. Hong en inla, kote’ siatna le na min a pua khuapi a siatna hong mu in. Kote’ gamtatna pha a suang hi loin nangma migitna suangin thu ka hong ngen uh hi. Topa aw, kong thungetna uh hong za inla, ka mawhna uh hong maisak in. Topa aw, hong ngai inla hong sem in! Mi khempeuh in Pasian na hihlam a hong theih nadingun hong zekai kei in. Hih khuapi le hih mite na neihsa ahi hi,” ka ci hi. Keima mawhna le ka mipih Israel-te’ mawhna pulakin, ka Topa Pasian kiangah a biakinn siangtho a hong puahkik nadingin thumin ka ngenngen hi. Thu ka nget laitakin ka maangmuh masak sunga ka muh mipa Gabriel, ka omna munah a hong leengsuk hi. Tua hun pen nitak lam biakpiak hun laitak ahi hi. Amah in, “Daniel aw, hilhkholhna thu a theisak dingin a hong pai ka hi hi. Pasian tungah thum dingin na kisak laitakin amah in a hong zazo hi. Pasian in nang hong it ahih manin, tua thu a gen dingin ka hong pai hi. Tu-in, tua maangmuhna thu ka hong hilhtel laitakin ciamteh in. “Na mite le khuapi siangtho, a mawhna le a gamtat khialhnate a beina ding hun kum sawmsagih mun sagih sung a kisehzo hi. Tua ciangin mawhna kimaisak ding a, a tawntung thutang thu a hong tung ding hi. Genkholhna le maangmuhna thu a mantakin hong tangtung ding a, a Siangtho Pen Mun biakinnpi kisiansuah ding hi. Hih thu ciamteh inla thei in: Jerusalem lamkikna ding thu a kipiak hun a kipan sathau kinilh pa hong pai dong kum sagih mun sagih sung hi ding hi. Jerusalem kongzing lampi nei le kulhpi nei-in kilamkik ding a, kum sawmguk le nih mun sagih sung kip ding a, ahih hangin buai hun sung ahi ding hi. Tua hun a bei khit ciangin sathau kinilh pa thuman lopi-in a kithat ding hi. Galsim dingin a hong pai galkapmang lianpa in khuapi le biakinnpi a susia ding hi. A beina pen tuiciin tun bang hi ding a, a tawp dongin galdona le kisiatna vive ahi dingin Pasian in thu a khenzo hi. Tua makai pa in mi tampite tawh kum sagih sung thuciamna kip bawl ding uh hi. Gangawh biakna le biakpiakna, hih hunlang sung a khawlsak ding hi. Biakinn dawn sangpen munah a Lipkhaphuai na kikoih ding hi; ahi zongin Pasian in tua a koihpa’ thuak dingin a geelsa thu a koihpa in a thuak hun ciang dong, a Lipkhaphuai na pen a koihna mun mahah omlai phot ding hi,” hong ci hi. Sairas, Persia gam kumpi a suahzawh kum thum a phak laitakin Beteshazzar zong a kici Daniel tungah thu khat a kipia hi. Tua thu pen theihtelhak mahmah ahih manin maangmuhna tawh teltakin a kilak hi. Tua hun laitakin keimah Daniel, nipikal thum sung khakunin dahin ka om hi. Zu le sa ahi a, anlim ahi zongin bangmah ka ne kei a, nipikal thum a bei mateng ka sam zong ka hiat kei hi. Tua kum a kha masa, ni sawmnih le li ni-in Tigris gunpi gei-ah ka ding hi. Ka nunglam ka ettoh leh puanpak silhin kham kawnggak tawh a kawng a gak mi khat ka mu hi. A pumpi, suangmanpha tawh kibangin a taang hi. A maitang, khuaphialep bangin taang a, a mittangte mei bangin a kuang zalzal hi. A ban le a khete sumngo zutsiang bangin tee daldal hi. A aw, mihonpi kiko tawh kibangin a ging zuazua hi. Tua maangmuhna keimah bek in ka mu hi. Ka gei-a om midangte in bangmah a mu kei uh hi. Amaute lau uh ahih manin taimangin a bu uh hi. Kei guak bek hong kinusia ahih manin tua a lamdang maangmuhna keimah guak bek mah in ka mu hi. Ka thaneihteng beikhin a, ka mel kikhelgawp ahih manin kei ka hihlam mel kuamah in a hong thei nawn kei uh hi. Tua mipa’ kampau ka zak ciangin ka khuplamin leilakah tuksukin khua ka phawk nawn kei hi. Tua laitakin ka khut khatin hong phongto a, ka khut le ka khukin ka thoto a, ling kankan kawmin ka om hi. Amah in, “Daniel aw, Pasian in nang hong it hi. Ding inla kong thugente limtakin ciamteh in. Na kiangah thu a gen dingin kei hong kisawlzo hi,” a hong ci hi. Amah in hih thuteng a hong gen khit ciangin ling kankan kawmin ka ding hi. Tua ciangin amah in, “Daniel aw, lau kei in. Kiniamkhiat dingin na lungsim na khensat masak pen ni a kipan, tua thu na theihtheih nadingin Pasian in na thungetna a hong zazo hi. Na thungetna bang a hong pia dingin ka hong pai hi. Persia gam a cing vantungmi in ni sawmnih le khat sung kei a hong nial hi. Tua ciangin kei a hong huh dingin vantungmi thupite khat ahi Mikhael a hong pai hi. Bang hang hiam cih leh Persia gam sungah keimah guak bek ka om hi. Mailam hunah na mipihte’ tunga hong tung ding thu a hilhkhol dingin a hong pai ka hi hi. Hih pen mailam a hong piang lai ding maangmuhna ahi hi,” a hong ci hi. Amah in hih thu a hong gen ciangin kei bangmah pau thei loin lei ka ensuk gega mawk hi. Tua ciangin pasal mel tawh a kibang mi khat thakhatin ka mai-ah hong om a, ka muk a hong lawnsak hi. Tua ciangin thugen dingin ka kisa hi. Ka mai-a a ding pa kiangah, “Topa aw, ka maangmuhna in ka tha hong zawsak lua ahih manin ka ci-lin a pha thei kei hi. A topa’ mai-ah a ding sila khat tawh ka kibang hi. Bangci bangin thu hong gen thei ding ka hi hiam? Husan’ zawhna ding thatang nangawn ka nei kei hi,” ka ci hi. Ahih hangin khatvei hong lenkik leuleu a, ka tha a hong khauhkik zawdeuh hi. Amah in, “Lunghimawh kei inla, lau kei in. Kihangsak in. Pasian in nang hong it hi,” a hong ci hi. Tuateng a hong gen khit ciangin ka tha hong khauhzaw a, “Topa aw, na gen ding peuhpeuh hong gen in; tu-in ka ci a hong damzaw diak hi,” ka ci hi. Israel a cing vantungmi pen kei hong huhpa le a hong dal pa ahi hi,” a hong ci hi. Tua ciangin amah in, “Tu-a na tunga kong gen ding thu, a thuman ahi hi. Kumpi thum in Persia gam uk lai ding a, tua banah a lina hong khang ding hi. Tua pa, a dangteng sangin a hauzaw ding hi. Amah in a hauh penpen laitak le a thahat pen laitakin Grik kumpi a to ding hi. Tua ciangin a minthang kumpi khat a hong kilang ding hi. Amah in gam zaipi tak uk ding a, ama thuthu-in a gamta ding hi. Ahih hangin a thahat pen laitakin a gam hong kitam ding a, khen li a kisuah ding hi. A suan a khakte in ama gam a ukkha kei ding uh hi. Midangte in uk ding uh a, ahi zongin amah zahin vang a neizo kei ding uh hi. “Egypt kumpipa a hong thahat ding hi. Ahi zongin a galkapmang lianpente khat thahat pen ding a, gam lianzaw a uk ding hi. Kum sauvei sim khit ciangin Egypt kumpipa in a kipawlkhawm theih nadingin Syria kumpipa le ama tanu a kitengsak ding hi. Ahih hangin tua kipawlkhawmna kip lo ding a, tua numei le a tonpih a silate le a ta le a pasal a kithatlum ding hi. “A sawt loin tua numei’ behte khat in Syria kumpi sim ding a, a kulhpi sungah tumin amaute a zogawp ding hi. Amah in amaute’ milim pasian-te le a na manpha ngun le khamte Egypt gamah a pua ding hi. Kum tawmvei sung bek kilemna a om ding hi. Syria kumpipa in Egypt gam sim ding a, ahih hangin zo zo loin a nungkik ding hi. “Syria kumpipa’ tate, galsim dingin kithawi-in galkap ding mi tampi a kaikhawm ding uh hi. Tua galkapmangte khat thahat diakin tuikhang bang ding a, galte’ kulhpi a luhzo ding hi. Egypt kumpipa zong heh mahmahin Syria kumpipa simgawp ding a, a galkapte tampi tak a matsak ding hi. A galhatna hang le galkap tampi a thahna hangin kisathei mahmah ding a, ahih hangin a gualzo tawntung kei ding hi. Syria kumpipa khatvei kuankikin a masa sangin galkap a tamzaw a kaikhawm ding hi. A hun kicingta a sak ciangin galkap tampi le galhiam kicing piikpeek tawh a kuankhia ding hi. “Tua hun ciangin mi tampi tak in Egypt kumpipa a lehdo ding uh hi. Daniel’ mipihte ahi, mihoih lo pawlkhat in zong a muhsa uh maangmuhna hangin a lehdo ding uh a, ahih hangin a guallel ding uh hi. Tua ahih ciangin Syria kumpipa in kulhpi tawh a ki-umcih khuapite luhzo-in a la khin ding hi. Egypt galkapte in gal dosuakzo nawn lo ding uh a, galkap thahat pente a thaneem ding uh hi. Galdo zo ding om nawn lo uh ahih manin a galte uh a ututin a gamta ding uh hi. Thuciam Gamah zong lutin a khut sungah tua gam a om ding hi. “Syria kumpipa in a galkap neih khempeuh zangin galsim ding a ngaihsun ding hi. Olno takin a gualzawh theih nadingin a tanu le a galte tensak ding a ngaihsun ding hi. Ahih hangin a tangtungzo kei veve ding hi. Tua khit ciangin tuipi tungtawnin minam dangte sim ding a, tampi tak mah a zo ding hi. Ahih hangin gamdang makai khat in amah zogawp ding a, a minthanna teng a beisak ding hi. Kumpipa a kulhpi a zuankik dingin a gamah hong ciah ding a, ahih hangin gal lel khinta ahih manin amah a beita ding ahi hi. “Tua ciangin kumpi dang khat in ama nung hong zuikik leuleu ding a, a gam sung khantoh nadingin phiangsiah tampi a dong dingin mi khat a sawl ding hi. Tawlno khat khit ciangin tua kumpipa kithatlum ding a, ahih hangin galsung a si ahi kei ding hi. “Ama zomah Syria kumpi ding pen migilo, kumpi dingin a kilawm lo mi khat ahi ding hi. Ahih hangin amah pen thakhat thu-in zuausiamna tawh kumpi a hong suakvat ding hi. Ama thu a nial galkap honpite le Pasian’ siampi liante khempeuh a mangthangsak ding hi. Zuaugen siamna zangin minam dangte tawh kilemna a bawl ding hi. Minam tawmno khat bek a uk hangin a thahatna a khang semsem ding hi. Amah in a pu a pate’ hih ngei loh, gam hau, gam kilemte nangawn a sim ding hi. Tua ciangin galsung a a lak vante le nate a nungzuite tawh a hawm ding uh hi. Amah in galdalna kulhpite khempeuh luh ding hanciam ding a, ahih hangin tawmvei sung bek hun a nei ding hi. “Egypt gam hangtakin a sim theih nadingin galkap tampi a kaikhawm ding hi. Egypt-te in zong galkap tampi tawh nasia takin a na do ding uh hi. Ahi zongin Egypt kumpipa in khemna thuak ding ahih manin gal a zo kei ding hi. Ama muan pen a thudot mipilte in amah lehbawlin a siasak ding uh hi. A galkapte tampi tak si ding ahih manin gal a lel ding hi. Tua kumpi tegel in sabuai khat tungah tu-in an a nekhawm ding uh hi. Ahih hangin a ngaihsutna uh a hoih zawsang om tuan lo ahih manin a kikhem tuak ding uh hi. A hun tung nai lo ahih manin a deih bang uh a ngahzo kei uh hi. Tua ciangin Syria kumpipa, a galvan lakteng tawh a gamah ciahkik ding a, Pasian mite’ biakna suksiatsak ding a lungngai ding hi. A utbang peuhin gamta ding a, tua ciangin a gam lamah a ciahkik ding hi. “Tua nung ciangin Egypt gam simkik leuleu ding a, ahih hangin a masa-a bangin a piang kei ding hi. Rom mite, teembaw tawh hong pai-in amah do ding uh ahih manin a lau ding hi. Tua ciangin amah kilehkik ding a, a thangpaihna tawh Pasian’ mite’ biakna suksiat ding a hanciam ding hi. Amah in tua biakna a nusia mite’ zolsimna a mang ding hi. A galkapte pawlkhat in biakinnpi le biakinnpi huang a ninsak ding uh hi. Amaute in nisim biakpiaknate khawlsak ding uh a, a Lipkhaphuai na a suang ding uh hi. Kumpipa in tua biakna a nusia mite a thuzawh theih nadingin zuaugen siamna a zang ding hi. Ahih hangin Pasian’ nung a zui mite ahih uhleh thahatin a gualzo ding uh hi. Pilna a nei mite in a pilna uh midang tampite tawh a neikhawm ding uh hi. Ahih hangin tawlkhat sung mi pawlkhat in galsung a sihna le meikuang sunga thahna a thuak ding uh hi. Mi pawlkhatte in lawkgawpna le thongkiatna a thuak ding uh hi. Tua bangin thahna a thuak laitakun, pawlkhat in huhna a ngah ding uh hi. Mi tampi in huhna a piak uh hangin amau’ meetna ding ngaihsutna bek ahi hi. Mi pawlkhat in thahna a thuak ding uh hi. Tua bangin a pianna thu pen beina a tun mateng sianthosakna le mipha le misia khentelna, Pasian’ sehsa hun a tunna ahi hi. “Syria kumpipa a ut bangbangin a gamta ding hi. Amah in, pasian-te sangin ka lianzaw a, a Lianpen Pasian sangin zong ka thupizaw lai hi, ci-in a kisathei ding hi. Pasian in amah gim a piak mateng tua bangin a om ding hi. Kumpipa in a pu a pate’ biak pasian le numeite in a it pasian a thusim kei ding hi. Pasian a kici peuhmah khat beek a thusim kei ding hi. Bang hang hiam cih leh tuate sangin amah a lianzaw-in a kingaihsun hi. Tua pasian-te sangin kulhpi a dal pasian a thupisim zaw ding hi. Amah in kham, ngun, suangmanpha, le a thupi letsongte, a pu a pate’ biak ngei loh pasian kiangah a pia ding hi. Amah in a kulhpi a ciang dingin pasian dang a biate a sawl ding hi. Amah in amah kumpi-in a sang mite minphatna, zaliatna pia-in, leitang nangawn letsongin a pia ding hi. “Syria kumpipa’ hun a bei dektak ciangin, Egypt kumpipa in amah a sim ding hi. Syria kumpipa in a thaneihteng siit loin tuikhang bangin sakol tawh, sakol galkapte tawh, teembaw tampi tawh Egypt a do ding hi. Amah in Thuciamna Gam zong sim ding a, mi tul tampi tak a that ding hi. Ahih hangin Edom gam, Moab gam, le Ammon gam sungah a omlai sunteng a suakta ding uh hi. Amah in gam tampi tak sim ding a, Egypt nangawn zong a suakta kei ding hi. Amah in Egypt gam sunga kiseel ngun le kham le a neihsa uh na manphateng khempeuh a la ding hi. Amah in Libya le Ethiopia gam zong a zo ding hi. Tua ciangin, nisuahna lam le saklam panin thupiang in amah patausak ding a, thangpaihna tawh galdo-in mi tampi tak a that ding hi. Amah in a kumpi puanbuk lianpite biakinn dinna mualtung le tuipi kikalah a lam ding hi. Ahih hangin amah a si ding hi. Bang hang hiam cih leh amah a huh ding kuamah a om kei hi,” a hong ci hi. Tua ciangin saihadial puan a silh vantungmi in, “Na mite a cing, a lian vantungmi Mikhael hong kilang ding hi. Tua ciangin leitungah mihing a pianzawh a kipan a nasia penpen gimna hun hong tung ding hi. Tua hun a hong tun ciangin Pasian’ laibu sungah a min a kigelh na mite khempeuh kihonkhia ding hi. A sisa mi tampite in nuntakna a ngahkik ding uh hi. Pawlkhatte nungta tawntung ding uh a, pawlkhatte in a tawntung zumna le minsiatna a ngah ding uh hi. A pilte ahih uhleh vantung khuavak tawh a taangkhawm ding uh hi. A pha-in gamtat ding mi tampi a hilhte pen aksi bangin a taang tawntung ding uh hi. Tu-in Daniel aw, beina hun a tun mateng laibu khupcip inla, a tungah ciaptehna koih in. A kallakah mi tampite in bang thu piang hiam cih theitel nuamin a hanciam ding uh hi,” a hong ci hi. Tua ciangin keimah Daniel in gun pang tuak a ding mi nih ka mu hi. Tua mite khat in puanpak silh a, gungal a gamlazaw deuhin a ding pa kiangah, “Hih na lamdangte a beina ding bang tanvei sawt ding ahi hiam?” ci-in a dong hi. Puanpak silhpa in a khut tegel vantung lamah laamto-in, Tawntung Pasian’ min tawh thuciamna a bawl hi. Amah in, “Kum thum le alang hi ding hi. Pasian’ mite a kibawlsiatna a bei ciangin hih thute khempeuh hong piang ding hi,” ci-in a gen ka za hi. A thugen za napi-in teltakin ka thei kei hi. Tua ahih ciangin, “Topa aw, bangci bangin beina hong piang ding ahi hiam,” ci-in ka dong hi. Amah in, “Daniel aw, tu-in ciah in; bang hang hiam cih leh hih thute pen beina hun a tun mateng selcipin ipcip ding ahi hi. Mi tampite kisiansuahin a hoih le a hoih lo a kikhentel ding uh hi. Migilote in bangmah theitel thei lo uh ahih manin a gilo semsem ding uh hi. Ahih hangin mipilte in theihtel theihna a nei ding uh hi. Amaute in nisim biakpiakna a khawlsak, a Lipkhaphuai na a hong pian’ ciangin ni tulkhat zanih sawmkua sung a sawt ding hi. Ni tulkhat zathum sawmthum le nga sung muanhuai takin a ngakzo kenkante in thupha a ngah ding uh hi. Nang Daniel na hih leh a tawp dong muanhuai takin om in. Tua ciangin na si ding a, ahi zongin hun a bei ciangin thaman a sang dingin na hingkik ding hi,” a hong ci hi. Judah kumpite Uzziah, Jotham, Ahaz, Hezekiah, le Israel kumpi Joash’ tapa Jeroboam’ hun lai-in Beeri’ tapa Hosea tungah Topa in thu na gen hi. Topa in Hosea tungtawnin Israel-te tungah thu a na gen cil lai-in, amah in Hosea kiangah, “Hih gammite kei tungah citak loin pasian dangte bia uh ahih manin, nang zong hong tulpih lo ding numei paktat khat tenpih inla, tua nu tawh ta nei in,” a ci hi. Tua ahih ciangin Hosea in zong Diblaim’ tanu Gomer tenpih a, tua nu hong gai-in tapa khat hong nei hi. Tua ciangin Topa in Hosea kiangah, “Na tapa’ min dingin Jezreel phuak in; bang hang hiam cih leh ama pute Jehu in Jezreel khua-ah a mi thahna hangin Israel kumpipa tungah gim ka pia baih ding a, Israel mite tungah Jehu’ suanlekhakte’ ukna ka beisak ding hi. Tua ciangin Jezreel kuam-ah Israel mite’ galhiam khempeuh ka sumai ding hi,” a ci hi. Tua ciangin Gomer gaikikin tanu khat nei hi. Topa in zong Hosea kiangah, “Na tanu’ min dingin hehpih loh, a cihnopna Loruhamah phuak in; bang hang hiam cih leh Israel mite ka hehpih nawn kei ding a, a mawhna uh ka maisak het kei ding hi. Ahi zongin Judah mite ka hehpih ding a, namsau le thal, sakol le sakol tung tuangte, le galsimna tawh hi loin, amaute’ Topa Pasian ahi kei mahmah in amaute ka honkhia ding hi,” a ci hi. Loruhamah a tei khit ciangin Gomer gai-in tapa khat nei leuleu hi. Tua ciangin Topa in, “Na tapa’ min dingin ka mi hi lo a cihnopna Loammi phuak in; bang hang hiam cih leh no Israel mite, ka mi na hi nawn kei uh a, kei zong note’ Pasian ka hi kei hi,” a ci hi. Ahi zongin, tehzawh loh, simzawh loh zah dongin tuipi sehnel bangin Israel mite tampi pha ding uh a, tua hunin, “Note ka mi hi lo,” a kicih hangin ni khat ni ciangin, “A nungta Pasian’ tate,” kici ding hi. Judah mite le Israel mite kigawmkik ding uh a, amaute a makai dingin mi khat a seh ding uh hi. Amaute khangin citheikik ding uh a, tua Jezreel hun pen a nuam mahmah hun hi ding hi. Tua ahih ciangin na Israel mipihte, “Pasian’ mi,” ci inla, “ Topa in a hehpih mite,” zong ci in. Tate aw, na nu uh zolbawl un. Amah ka zi hi nawn lo a, kei zong ama pasal ka hih nawn loh hangin a paktatna le midang tawh a mawhnate a khawl nadingin zol un. A gamtat hoih lohna a khawl kei leh, a nu sung pan a suah laitakin a guaktangin a ommah bangin, a puanteng hawkkhiatsakin a guaktangin ka omsak ding a, a keu, bangmah a po zawh lohna gamlak bangin ka bawl ding a, dangtakin a si ding hi. Ama tate, paktatna panin a piang tate ahih manin, tua a tate zong ka hehpih kei ding hi. A nu uh a paktat hi a, tua ahih manin amaute a paii numei, zumna mel thei loin a gamta ahi hi. Amah in, “Ka it pasal dangte kiangah ka pai ding hi. Amaute in anletui, samul puan le saihadial puan, oliv thau le zu hong pia uh hi,” a cizaw lai hi. Tua ahih ciangin amah a paikhiat zawh loh nadingin ling ka kaihnelh ding a, a kimkotah kulh ka ciang ding hi. Amah in a pasal dangte delh ding a, ahi zongin amaute kiang tung zo lo ding hi. Amah in amaute zong niloh ding a, ahi zongin mu zo lo ding hi. Tua ciangin amah in, “Ka pasal masa kiangah ciahkik ning; tu-a bangin ka om sangin ama kiang nuamzaw ding hi,” a ci ding hi. Ama tungah an, leenggahzu, le oliv thau ka piakna, le Baal pasian biak nadingin a zat ngun le kham tampi tak a piapa ka hihlam hong phawkkha lo hi. Tua ahih manin anlak hun ciangin ama tungah ka piak ngei an le leenggahzute ka pia nawn kei ding a, a silh dingin ka piak samul puan le saihadial puante ka pia nawn kei ding hi. Tua ciangin ama it pasal dangte’ muhna-ah a puante hawkkhiatsakin a guaktangin ka omsak ding a, kuamah in kei’ khutsung panin honkhia zo lo ding hi. Ama lungdam theihna, a kumsim pawite, a khasim pawite, a nipisim pawite, a biakna kikhop khempeuh ka beisak ding hi. Ka pasal it dangte in thamanin hong piak hi, ci-in a gen a leengguite le a theikungte ka susia ding a, gamsate in tuate suksiatsakin gamlakpi a suak ding hi. Kei hong mangngilh tanvei sung, Baal pasian tungah paknamtui a hal tanvei sung, le a pasal it dangte tawh a kikhawl dingin a manpha kizepna a tuamtuamte tawh a kizep hun tanvei sungzah mah gim ka pia ding hi. Tua ahih ciangin sehnel gamah amah ka paipihkik ding a, itna kam tawh hopihin ka zolkik ding hi. Tua lai panin a leenggui lote ka piakik ding a, Lungkhamna Kuam a cihnopna Akhor Kuam pen lametna kongpi ka suaksak ding hi. Egypt panin a paikhiat, a nungakno hun lai mah bangin ka thugennate hong ngai ding hi. Tua ciangin kei pen, ka pasal, hong ci kik ding a, kei pen, ka Baal pasian, hong ci nawn lo ding hi. Ama kam panin Baal pasian min ka pulaksak nawn kei ding a, a min kilokha nawn lo ding hi. Tua ciangin, ka mite a suksiat loh nadingun gamlak a om gamsate, huih lak a leeng vasate le leitungah a bokvak ganhingte tawh thuciamna ka bawl ding a, thalte, namsaute, galhiam khempeuh, leitung panin ka phiatkhia ding hi. A lungmuang hithiatin ka mite ka omsak ding hi. Israel aw, nang, zi-in kong neikik ding a, nang tungah thuman thutangin kong gamta kik ding hi. Nang hong itin kong hehpih tawntung ding a, keima-a’ na hi tawntung ding hi. Kei-a’ ahi tawntung dingin nang kong la ding hi. Tua ciangin Topa ka hih lamtak nong thei ding hi. Tua ni ciangin keima mi Jezreel-te’ thungetna ka pia ding a, leitungah guah ka zusak ding hi. Leitung in an, leenggahzu le sathaute piangsak ding hi. Leitungah ka mite kipsakin a cithei-in ka bawl ding a, hehpih loh, a kici mite ka hehpih ding a, ka mi hi lo, a kici mite, ka mi na hi uh hi, ka ci ding a, amaute in, “Nang pen kote’ Pasian na hi hi,” hong ci ding uh hi, Topa in a ci hi. Topa in kei kiangah thu hong genkik a, “Lawm a ngai khinsa, pasal tawh a lumkhawmsa numei khat tawh va kingai in. Israel mite, pasian dangte kiangah pai uh a, leenggahphehkeu tawh a va biak uh hangin, amaute ka it lai veve mah bangin tua numei va it in,” hong ci hi. Tua ahih ciangin ngun shekel sawm le nga le mangbuhham seu sawm le nga tawh zi lei-in ama kiangah, “Sauveipi sung keima zi bangin na om ding a, midang tawh na paktat nawn kei ding hi. Midang tawh na lupkhop loh mah bangin kei nangawn tawh zong i lumkhawm kei ding hi,” ka ci hi. Hih pen kumpi ahi a, makai ahi zongin, biakpiakna le biakpiakna khuampite ahi zongin, siampi puanpi le milim pasian-te nei loin hun saupi sung Israel mite om ding a cihna ahi hi. Tua khit ciangin Israel mite in Topa amau’ Pasian le a kumpipa uh David lamah hong kiheikik ding uh hi. Tua hun ciangin amaute in Topa zahtakin, ama letsongte a ngah ding uh hi. Israel mite aw, Topa’ thugen ngai un. Hih gam sungah a teng mite tungah Topa lungkim lo ahih manin hih bangin mawhsak hi: Hih gam sungah cihtakna ahi a, itna ahi zongin om lo a, mite in kei pen Pasian-in hong ngaihsun lo uh hi. Mite in thuciamna bawl napi-in a thuciamte uh palsat uh hi. Zuau genin, mi thatin, guta-in, nulepa mawhna bawl uh hi. A sia khat khit a sia khat a banbanin gamta-in a mawhna uh behlaplap uh hi. Tua ahih ciangin leitang keugaw-in a tunga teng khempeuh si ding a, leitung a om gamsa khempeuh le huihlaka leeng vasa khempeuh tawh si mang ding uh a, tuipi sunga om ngasate nangawn si mang ding hi. Kuamah in mihonte mawhsak kei hen la, mihonte taii kei hen. Kei’ lungkim lohna no siampite’ tung ahi hi. A sun a zan cih om loin na nasepnate uh a kimanna mel om lo hi; kamsangte zong note bangmah hi lel hi. Na nu uh Israel ka susia ding hi. Ka mite in kei hong phawk lo uh ahih manin ka susia ding hi. No siampite in kei hong phawknuam loin, ka thuhilhnate nial na hih manun ka siampi dingin kong deih nawn kei a, na tate uh zong siampi-in ka zang kei ding hi. Siampi tam semsem leh kei tungah a khialhna uh tam semsem hi. Amau’ minthanna pen mindaina ka suaksak ding hi. Ka mite’ mawhna amaute in hauhlawh uh a, ka mite a mawh semsem ding uh a ut uh hi. Mite’ thuak dingin a kilawm gimna mah siampite in zong thuak ding uh a, amau’ gamtatna bangin gim pia-in amau’ siatna bangin ka thukkik ding hi. Amaute, pasian dangte a bia dingin kei kiang panin kiheikhia uh ahih manin biakpiakna a sa tanhte uh a nek hangun a gil uh vah tuan lo ding hi. Mi punna ding deihna-in biakpiakna-in numei tawh mawhna a bawl uh hangin mi pung tuan lo ding hi. Leenggahzu in ka mite’ thungaihsut theihna beisak hi. Ka mite in aisanin singthem peuh thudotin nei uh a, amau’ thu theihnopte, ciangkang peuh in gen tazen hi. Amaute in kei hong taisan uh a, a paktat numei bangin pasian dangte a zuan uh hi. Amaute in mualsangte dawna biakna munte-ah biakna pia uh a, a nuai liim hoih ahih manin mual neute tungah a po tawsaw kung, poplar kung, le terebinth kungte nuai-ah paknamtui halin a bia uh hi. Tua thu hangin na tanute uh numei paktat suak uh a, na mote un midang tawh mawhna a bawl uh hi. Na tanute uh a paktat manin gim ka pia kei ding a, na mote uh midang tawh a mawh manin zong gim ka pia tuan kei ding hi; bang hang hiam cih leh note mahmah numei paktatte tawh na mawh uh a, biakinn numeite tawh nulepa mawhna biakna na bawl uh hi. Paunak-ah, “Thuhoih phawktheihna a nei lo mite in siatna thuak ding hi,” kici hi. Kei tungah no Israel mite citak loin nong taisan hangun, note bangin Judah mite khial kei tahen. Gilgal-ah ahi a, Bethaven-ah ahi zongin pai kei unla, tua lai munah Topa’ min tawh na kiciam kei un. A kizualsak zo lo bawngla bangin Israel mite phengphi uh ahih manin, lonona munah tuunote anvak bangin amaute bangci vak ding ka hi hiam? Israel mite, milim biak uuklua uh a, cihtheih hi lo hi. Amaute, zukham honpi hi uh a, nulepa mawhna a bawlbawl uh hi. Minphat ding sangin minsiat ding utzaw uh hi. Huihpi nung in a mutkhiat bangin amaute a phiatkhiamang ding lungsim a nei uh hi. Amau’ biak pasian-te in amaute huh lo ding hi. No siampite aw, hih thu ngai un! No Israel mite aw, thudon un. Kumpipa’ innkuante aw, ngai un! Note in midangte tungah thu a khen ding hinapi-in, note tungah thukhenna hong tung ding hi. Bang hang hiam cih le note in mite’ awk nadingin Mizpah mualah thang na siah uh a, mite’ awk nadingin Tabor mualah ngenthang na hi uh hi. Note in mite’ kiat nadingin Shittim-ah gum a thukpi-in na to uh hi; hih thu hangin note kong thuhilh ding hi. Israel-te’ gamtatna khempeuh ka thei khin a, kei tungah bangmah hong im thei lo ding uh hi. Kei tungah hong citak lo uh a, amaute, misia a suak khinta uh hi, a ci hi. Amaute’ gamtatna in a Pasian kiang uh zuansak thei lo hi. Amaute in nakpitakin milim biaknopna lungsim nei uh ahih manin Topa phawk kha lo uh hi. Israel-te’ kiphatsakna pen amau mah’ siatna ding ahi hi. Amau’ mawhna in amaute puksak ding a, Judah mite in zong pukpih ding uh hi. Topa tungah biakna-in piak dingin a tuute uh le a bawngte uh paipih ding uh a, ahi zongin a mawkna suak ding hi. Topa in amaute nusia khin ahih manin amah mu zo lo ding uh hi. Topa’ tungah amaute citak lo uh a, midangte tawh zawlta nei uh hi. Tu-in amaute le a neihsa khempeuh uh kisusia ding hi. Galdona ding zaksakna-in Gibeah khua-ah tuutal ki tum unla, Ramah khua-ah peengkul tum un. Bethaven khua-ah pataukohna gingsak un. Benjamin mite aw, kithawi un! Gimthuak ni hun hong tun ciangin Israel mite in siatna thuak ding uh hi. A tung taktak ding thu, Israel mite lakah a gen ka hi hi. Topa in hih bangin ci hi: Judah mi uliante in gisuang khinin midangte’ leitang keeksak uh ahih manin amaute tungah ka heh a, amaute tungah tuikhang bangin gimna ka tungsak ding hi. Israel in zong gimna thuakin a cimawh hita hi; bang hang hiam cih le kei kiangah hong pai nuam loin piak ding bangmah a nei lote kiangah huhna ngen dingin pai hamtang hi. Tua ahih manin Israel ka beitumsak ding a, Judah ka beimangsak ding hi. Israel in ama cinatna kithei-in, Judah in ama liamna a kimuh ciangin kumpi lianpa kiangah huh ngen dingin Assiria gamah Israel va pai hi. Ahi zongin amah in amau’ natna damsak thei lo a, a liamna uh zong na damsak thei tuan lo hi. Humpinelkai’ sukgawp bangin Israel le Judah ka sugawp ding hi. Keimah teekteek in amaute balgawpin ka paisan ding hi. Amaute ka talkaihgawp ding a, kuamah in hon zo lo ding hi, a ci hi. Ka mite in a mawhna hangun gimna thuakin kei hong zonkik mateng ka tuaci nusiat phot ding hi. A lungkham uh ciangin kei hong zong ding uh hi. Amaute in, “Hong pai un, Topa kiangah ciahkik ni; amah in eite hong balgawp hangin hong damsakkik ding a, eite hong liamsak hangin i liammate hong tunsakkik ding hi lo ahi hiam? Ni nih sungin eite hong thahatsak ding a, ni thum sungin i ngei hong bangsak ding hi. Tua ciangin amah tawh i kikhawl ding hi. Topa i theihzawh nadingin hanciam ni. Zingsang sialin pel loin khua a vak mah bangin pel loin eite kiangah amah hong pai ding a, lei a kawtsak khuapi guah pel loin hong zuk bangin eite kiangah amah hong pai hamtang ding hi,” a ci ding uh hi. Israel le Judah aw, note bang hong cih thei nawn ding ka hi hiam? Note’ hong itna pen zingsang meiilum bangin thengpak a, a mangthangpak daitui tawh kibang lel hi. Tua ahih manin note a hong thuhilh ding le note a hong taii dingin ka kamsangte kong sawl hi. No ka mite’ gamtat ding ka deih zia kitel sinsen hi. Keima deih pen nong it tawntung ding uh hizaw a, gan tawh nong biakna uh ka deih pen hi lo zaw hi. Gan tawh nong biakna uh sangin kei nong theih ding uh ka deihzaw hi. Ahi zongin ka ciamna gam a tun uh ciangin amaute in Adam khua-ah ka thuciamna palsat uh a, kei tungah hong thuman lo uh hi. Gilead pen migilo hontangte’ omna khuapi hi a, mi thahna sisan luang tawh amau’ sul a kidim hi. Zawhthawh thu-in mi’ na a sut dingin a pangsim mite bangin siampite gamta uh a, biakna a pia dingin Shekhem khua-ah a pai mite nangawn, lamkalah a that uh hi. Amau gamtatna siahuai mahmah hi. Israel mite lakah siatna lianpi khat ka mu hi. Milim biakna tawh amaute kininsak uh hi. No Judah mite zong gim kong piak ding hun kiseh khinzo hi. Ka mihingte a ngei uh bangsakkik ning, Israel-te a ci uh damsakkik ning, ci-in ka ngaihsut ciangin, amau’ mawhna le amau’ siatna bekbek kimu thei hi. Amaute in mi khemin, inn luhin na gu uh a, konglak nangawnah mi’ na sut uh hi. Amau’ gamtatsiatna khempeuh ka phawk lamtak amaute in ngaihsutin neikha lo uh hi. Amau’ mawhna in amaute gakcip a, ka muhna mahmahah om gige uh hi. Amaute in a zuaupiteng uh tawh kumpipa lungdamsak uh a, a khemnateng uh tawh a uliante uh nuamsak uh hi. Amaute zuautatin citak lo uh hi. Amaute pen, mohbawl pa in a anlom meek a pawm mateng, moh emna meikhuk sunga a tawhsa, mut loh seem lohin a koih phot mei tawh kibang uh hi. Kumpipa in pawi a Sbawl ni-in amaute in uliante zu khamsakin haisak uh a, amau’ ngimna a thei lopi-in kumpipa zong tua lakah hong kihel hi. Tua bangin amau’ sawmsimna mei bangin hong kuang hi. Zanthapai-in a hehna uh mei bangin khukhu a, zingsangin mei bangin hong kuangkhia hi. A hehluatna uh tawh amau a ukte a thatlum uh hi. A kumpite uh khat khit khat a banbanin kithat a, ahi zongin kuamah in kei kiangah huhna hong ngen lo uh hi. Israel, a kiima om minam dangte tawh kipawlin tua mite muanin nei a, a kihei lo moh ki-em tawh kibang uh hi. A kipawlpih minam dangte in a thahatnateng uh teeptum a, ahi zongin a kiteeptumlam phawkkha lo uh hi. A lu tung uha om a sam uh a kanlam nangawn phawkkha lo uh hi. Israel mite’ kiphatsakna in amau’ langkhatah teci pang hi. Ahi zongin hih thu khempeuhah zong, amau’ Topa Pasian ahi kei’ lamah hong kihei tuan lo uh a, kei hong zong lo uh hi. Israel pen a khemnop kawl vakhu hai tawh kibang hi. Egypt-te kiangah huhna va ngen masa uh a, tua ciangin Assiria-te kiangah a va tai uh hi. Amaute a va pai laitakun ka ngen tawh amaute ka na siah ding a, vasa mat bangin ka ngen tawh amaute ka man ding hi. Amau’ gamtatsiatna hangin gim ka pia ding hi. Amaute in kei hong taisanin hong lehdo uh ahih manin gimna ngahin siatna tuak ding uh hi. Amaute ka hotkhiat nop hangin amaute in kei hong lehgen zawsop uh hi. Amaute in lungsim takpi tawh kei tungah huhna hong ngen lo uh a, dawibia mite bang lelin a gamta uh hi. An le leenggahzu a nget uh ciangin zong lawkite bangin a ngen uh hi. Amaute in kei hong lehdo uh hi. Amaute khoi-in a thahat mite suaksak napi-in, amaute in kei hong lehsawm zawsop uh hi. Amaute, kei’ lam hong nga loin, Baal pasian’ lam nga tawntung uh hi. A khakna ding san a kha thei lo thalpeu tel tawh kibang uh hi. Amau’ kiphatsak pauna hangun a uliante uh namsau-in si ding uh a, Egypt mite in amaute nuihsan lel ding uh hi. Pataukohna peengkul tum in. Galte in muvanlai bangin ka gam a leenlak dingin hong kithawi uh hi. Bang hang hiam cih leh ka mite in ka thuciamna uh pelhin, ka thuhilhnate hong nial uh hi. Amaute in kei pen amau’ Pasian, hong ci-in, nangma mite hi ung, hong ci napi-in, amaute in a hoih nate paaikhia uh ahih manin a galte un delh ding uh hi. Amaute in kei hong dong loin kumpi ding vaihawm uh a, kei’ theihpih lohin ulian koih uh hi. A ngun a khamte uh tawh amau’ siatna ding milim a bawl uh hi. Samaria khuapi mite in a biak kham bawngno ka deih kei hi. Tua a bia mite tungah ka heh hi. Amaute in mihoih a suahna ding uh bang tanvei ngak lai ding ahi uh hiam? Israel sunga om mi khat in tua milim bawl a, tua milim pen Pasian hi lo hi. Samaria mite in a biak milim kisuzan ding hi. Paunak-ah, Huih a tuhte in huih ngahkik ding a, a vui om lo an kung in annek ding piangsak lo hi, kici hi. A vui om lo an kung panin an kingah mah taleh zong gamdang mite in netum ding hi. Israel khempeuh kinawmvalhin kisusia ding a, tu nangawnin minam dangte in bangmahin ngaihsun nawn lo uh hi. A hon lak panin a taikhia, a thumang lo gam la bangin Assiria mite tung panin huhna a ngen dingin va tai uh hi. A huh ding uh a deihna-in midangte tungah amau pumpi a va zuak uh hi. Tua bangin minam dangte a cial hangun keimah in amaute kaikhawmin gim ka pia veve ding hi. Assiria kumpipa’ bawlsiatna tawh a sawt loin gimna a ngah ding uh hi. Israel mite in mawhmaisakna ding mun biakna tau tam bawl semsem leh mawhna ding mun tam a behlap semsem a suak zawsop uh hi. Amaute hilhna ding simzawh loh thukham tampi gelh taleng zong, amaute in don loin thu lamdangpi khatin ngaihsun lel uh hi. Amaute in gan tawh biak ding utin, a biakna sate ne nuam uh hi. Ahi zongin Topa ahi keimah ka hih leh amaute tungah ka lungkim kei a, amaute’ mawhnate phawkin tua mawhnate hangin amaute gim ka pia ding hi. Egypt-ah amaute ka sawlkik ding hi. Bang hang hiam cih leh Israel mite in amau a Piangsak pa mangngilh uh a, inn lianpipite a lam uh hi. Judah mite in zong kulhnei khuapi tampi a lamthuah uh hi. Keimah in tua khuapite mei tawh halin a inn lianpite uh ka kangtumsak ding hi, ci hi. Israel mite aw, midangte bangin lungdamin kipak kei un. Na Pasian uh na nusia uh a, ama tungah na citak kei uh hi. Numei paktatte bangin mun citengah Baal tungah na kizuak uh a, a hong leina ante hangin na lungdam uh hi. Ahi zongin tua ante, oliv thaute, le leenggahzute na khamtakun na nekha kei ding uh hi. Bang hang hiam cih leh Topa’ gam sungah na omsuak kei ding uh a, Egypt gamah paikikin, Assiria gam sungah an siang lo na ne ding uh hi. Gamdangah na om laitakun Topa tungah leenggahzu tawh biakna na pia kei ding uh a, gan gawh biakna zong na bawl kei ding uh hi. Sihna phuala annek bangin, na annekte un zong a neteng hong ninsak ding hi. Na ante uh zong na gilvahna ding bek uh hi ding a, Topa’ inn-ah khat zong na tun kei ding uh hi. A kiseh pawi hunte le Topa’ pawi hun hong tun ciangin bangcih ding na hi uh hiam? Lungkhamna hun hong tungin, mite na kithehthang uh ciangin, Egypt mite in note hong kaikhawm ding a, amau gam Memfis khuapi-ah vui ding bek na hi uh hi. Na inn na lote uh, kiak le lopa in khuhcip lel ding hi. Gimthuakna hun hong tungta a, thukkikna hun hong tungta hi. Tua hun ciangin Israel mite in na thei ding uh hi. Note’ mawhna hang le note in kei nong muhdahluat manun, “Hih kamsangpa mihai hi; hih thumu pa lungsim kicing lo hi,” nong ci uh hi. Ama mi Israel-te a vil dingin kamsang nasemin Pasian in kei hong sawl hi napi-in, ka paina khempeuhah vasa bangin thang nong siah uh a, Pasian’ gam sung teekteek mahah mite pen kamsangpa’ gal a suak mawk hi. A gamtatna uh gentheih lohin siahuai uh a, Gibeah khua-a a gamtat ngeite uh tawh kibang hi. Pasian in amau’ mawhnate thei-in gim a pia ding hi. Topa in hih bangin gen hi: Israel kong muh cil-in hoih mahmah a, sehnel gam sunga a gah a zun kiuhkeuh leenggah tawh kibang hi. Na pu na pate uh ka muh cil-in hoih mahmah a, a hun ciangin a min a zun sitset theigah muh tawh kibang hi. Ahi zongin Baalpeor a tun uh ciangin amaute in Baal milim bia pah uh ahih manin, amau’ biak milimte ka muhdah zahin amaute nangawn ka mudah pah hi. Israel-te’ minliatna teng vasa bangin leengmang ding a, amau’ sung panin ta suak nawn loin, nupi gai, naupaii cih zong om nawn lo ding hi. Amaute in ta khoi mah ta le-uh zong, suanlekhak a neihtheih ma-un ka khansihsak khin ding hi. Hih mite ka nungngat ciangin amaute tungah a lungkhamhuai lianpite a tung ding hi. Tu-in ka mukhol khin hi. Mite in sabet-a a bet ding le, a thah ding bekin, Israel mite in a naupangte uh khahkhia ding uh hi, a ci hi. Topa aw, hih mite tungah na piak ding bang hong ngen ding ka hi hiam? Amaute tatolhsak inla, a nawizu uh kangsak in. Topa in hih bangin gen hi: Amau’ gamtatsia khempeuh Gilgal phual pan a kipan hi a, tua mun a kipanin amaute ka muhdah a kipan ahi hi. Amaute’ gamtatsiatna hangin gam sung panin ka hawlkhia ding hi. Amaute ka it nawn kei ding hi. A uliante un kei hong langpang uh hi. Israel mite ahihleh a zung a keu, gah a gah lo ding singkung tawh kibang hi. Amaute in ta nei ta mah le-uh zong, amau’ it mahmah tua a tate uh ka thahsak veve ding hi, ci hi. Amaute in a thu ngai lo uh ahih manin ka Pasian in a mite a nial ding hi. Minam dangte lakah a vakvai mite a suak ding uh hi. Israel mite ahihleh a gahpha mahmah leenggui tawh kibang hi. Cithei semsem leh biakna tau tam lam semsem uh hi. A gam sung uh cithei semsem leh biakna song a hoihbawl semsem uh hi. A lungsim uh man lo ahih manin tu-in a mawhna uh thuak ding uh hi. Topa Pasian in amau’ biakna taute suzanin, a biakna songte uh suksiatsak ding hi. A sawt loin hih mite in, “ Topa kihta lo ihih manin kumpi i nei kei hi. Kumpi khat lel in eite a’ ding bang hong hihsak thei ding ahi hiam?” ci ding uh hi. Amaute a kampi bek uh hi a, a kampi bekun thu genin thuciamna a bawl uh hi. Lolai-a tu-ma-kuakte sungah gunei kiak a po mah bangin thusia neihna hong khang hi. Bethaven khua-a bawngno milim a taanna uh hangin Samaria khuapi sunga a teng mite lau-in ling ding uh a, amaute le tua milim na a sem siampite a thum ding uh hi. A etlawmna teng a maiman’ ciangin a tau ding uh hi. Bang hang hiam cih leh Assiria gam a kumpi lianpa tungah siah a piak dingin tua milim kipuakhia ding hi. Thu kigen zui-in milim a biakna hangun Israel-te mindai-in maizum ding uh hi. Tui tunga tuiphuan laam bangin a kumpite uh maimang ding hi. Israel-te in milim bia-in mawhna a bawlna munte kisusia ding a, a biakna taute uh tungah ling le kiak a po ding hi. Tua ciangin mite in mual liante kiangah, “Hong vukcip un,” ci ding uh a, mual neute kiangah, “Hong dengcip un,” a ci ding uh hi. Gibeah khua-ah a khialh uh a kipanin kei tungah hong khialhna uh Israel mite tawp nai lo hi. Tua ahih manin Gibeah khua-ah gal in amaute pha ding hi. Hih mimawhte thuhilh nadingin gim ka pia ding a, a thuapthuapin a mawhna hangun thuhilh nadingin minam dangte in amaute hong sim ding uh hi. Israel pen limtakin a kihilhsa, an a cil nuam bawngla tawh kibang hi. Ahi zongin a etlawm a ngawngzangah kol bulhin lo khawhsak ding ka ngaihsun hi. Lokhawhna leeng, Judah ka kaisak a, lei kalhkhapna singka, Israel ka kaisak hi. Khai tuh bangin thuman tuhin, kei nong itna hangun a piang thuphate at un. Note’ Topa keima lamah nong kihei ding uh a hun hita ahih manin lo thak lei kalkham un. Tua hileh kei hong pai-in note tungah thupha kong pia ding hi, ka ci hi. Ahi zongin note in thusia na tuh zawsop uh a, thusia gah na at uh hi. Na zuauna uh hangin a piang gahte na ne uh hi. Note in na sakol leengte uh le na galkap tamna uh muangkha na hih manun, gal in na mite uh hong sim ding a, na kulh muanhuaite uh kisusia ding hi. Kumpi Shalman in a galsimna ah Betharbel khua sugawpin, nupite le a tate leilak denna-in a sih mangsak hun lai mah a bang ding hi. Israel mite aw, note’ gamtat hoih lohna hangin tu-a bang teekin note tungah thu hong piang ding hi. Galdo a kipat phetin Israel kumpipa si pah ding hi. Israel a neu lai-in ka it mahmah a, Egypt gam panin ka tapa ka samkhia hi. Ahi zongin limsap semsem leng gamla pai semsem hi. Ka mite in Baal tungah biakna pia uh a, milim biakna-in paknamtui a hal uh hi. Ahi zongin Israel mite lam a paitheihna ding a hilh pa keimah ka hi a, ka ang sungah amaute ka tawi hi. Ahi zongin amaute ka don lamtak phawkkha lo uh hi. Amaute, itna le hehpihna tawh ka len a, domto-in ka biang ciangah ka tawi a, awn sukin an ka pia hi. Tua bang hinapi, kei lamah amaute hong kihei nuam lo uh ahih manin Egypt gamah paikik ding uh a, Assiria mite, amau’ kumpi hi ding hi. Galte in a khuapi sung uh luhin, a khuapi kulhkongpi zawlte uh suktansak ding hi. Ka mite in thu hoih lo zuikha uh ahih manin gal in susiamang ding hi. Ka mite in kei kiang panin pial ding ngaihsun tawntung uh ahih manin amaute in kolbulhna thuak ding uh a, kuamah in a kol sutsak lo ding hi. Israel mite aw, bangci-a hong nusia thei ding a, bangci-a hong paidak thei ding ka hi hiam? Admah khua ka suksiat bangin kong susia nuam kei a, Zeboiim khua ka bawl bangin kong bawl nuam kei hi. Note hong khasiat mahmah ka hih manin tua banga hih ding ka lungsimah om lo hi. Ka heh manin gim kong pia kei ding a, no Israel-te kong susia kei ding hi. Bang hang hiam cih leh keimah, mihing hi loin, Pasian ka hi hi. Kei a Siangtho Pa, note tawh kong omkhawm a, a hehsa-in note kiangah kong pai kei ding hi. Humpinelkai bangin a galte uh ka hawksan gawp ding a, tua ciangin ka mite in kei hong zui ding uh hi. Nitumna lam gam panin kei kiangah hong nawhtai ding uh hi. Egypt gam panin vasa bangin lawptakin hong leeng ding uh a, Assiria gam panin vakhu bangin hong leeng ding uh hi. Tua ciangin keimah in amaute’ inn ngeisa-ah ka tunpih kik ding hi, Topa in ci hi. Topa in hih bangin ci hi: Israel mite in zuauna le khemna bekbek tawh kei hong khuhcip uh hi. Judah mite in zong a citak a Siangtho Pa keimah hong langpang lai uh hi. Israel mite, a nung kawikawi huih tawh kibang a, sun thapai a a nasepna uh a mawkna ahi hi. Zuauna le siatna lamsang bekbek khangsak uh hi. Assiria-te tawh kipawlna bawl uh a, Egypt-te tawh kizopna nei uh hi. Topa in Israel mite a mawhsakna ding a thu om hi. Jakob a gamtatna tawh kizui-in gim pia ding a, ama gamtatna bangin thukkik ding hi. Jakob in a nu sung nangawn pek panin a sanggampa sawk pah a, a khangham ciangin zong Pasian tawh kilai hi. Vantung mi tawh kilai-in a lel hi. Tua ciangin Jakob zong kapin ama tung panin hehpihna a ngen hi. Pasian in Bethel munah amah mu-in a hopih hi. Ama min pen Topa, Vanglian Topa Pasian ahi hi. Pasian’ huhna tawh note khempeuh kiheikik unla, thuman thutangin gamta un. Pasian muang tawntung un. Sumbukte in tawitehna man lo zang uh a, amaute in mi khem ding nuam a sa uh hi. Israel mite in, “Tu-in ka hau uh a, kote a dingin neihsa tampi ka ngah uh hi,” ci uh hi. Ahi zongin a hauhnateng un a mawhnateng uh loh zo lo hi. Egypt gamah na omlai pek uh a kipanin kei pen note’ Topa Pasian ka hi a, ahi zongin tu-in tanglai hun bangin puanbuk sungah note kong tengsakkik ding hi. Kamsangte tungah thu ka gen hi. Maangmuhna a banbanin pia-in, kamsangte tungah thugentehna tawh thu a gen pa zong keimah ka hi hi. Gilead gamah milim biakna om a, tuate a kimanna om lo hi. Gilgal gamah bawngtal tawh bia uh a, lokhote in a suang deih lohteng uh a phualphualin a cian kawikawi tawh kibangin, a biakna taute uh bangmahin kimang lo ding hi. Aram gamah Jakob tai a, Israel in tua lai-ah zi khat thalawhin na sem a, zi thalawhna-in tuu a cing hi. Topa in kamsang khat zangin Egypt panin Israel-te paikhiatpih a, kamsang khat’ nasepna tawh amaute suakta-in a nungta uh hi. Heh mahmah theih nadingin Israel mite gamta uh ahih manin amaute’ Topa in amau’ tung mahah a mawhna uh tungsak ding a, amaute’ mawhna mah a thuaksak ding hi. Efraim-te beh in thu a gen ciangin a dangte lau uh a, Israel minam beh dangte in Efraim-te beh tung et uh hi. Ahi zongin Baal milim biakna hangin amaute khial uh hi; tua thu hangin si ding uh hi. Tua hinapi-in amaute khialthuah semsem uh a, a biak ding uh milim a bawl uh hi. Amau’ ngunte milimin bawl uh a, a hoihtakin khutsiamte a bawlsak uh hi. Tua ciangin, “Hihte tungah biakna pia un,” a ci uh hi. Mihing in milim bia-in nam tazen uh hi. Tua ciangin amaute pen zingsang a kaai meiilum, a maimangpak daitui, ancilna panin huih in a letkhiat ansi, meikhu suahna-a a pai meikhu bangin a maimang ding uh hi. Kei pen Egypt gam panin note a hong paikhiatpih note’ Topa Pasian ka hi hi. Tua hun lai-in kei simloh Pasian dang na thei kei uh a, note a hong honkhia pa kei bek ka hi hi. Sehnel gam keuna sungah note a hong kem pa keimah ka hi hi. Ahi zongin gam hoihna mun tungin na gil uh a vah ciangin na lungsim uh kiphasakin kei nong mangngilh uh hi. Tua ahih manin humpinelkai bangin note hong sugawpin, kamkei bangin na pai nading uh lampi-ah kong pang hi. A no a kilaksak vompi bangin note hong sugawpin kong balgawp ding hi. Humpinelkai bangin hong phualnek pahin, gamsate bangin kong balthanggawp ding hi. No Israel-te kong sugawp ding hi. Kua in note hong huhzo ding ahi hiam? Na kumpi ding uh le na makai dingte uh nong ngen uh hi. Tu-in note hong hon dingin na hong nget uh na kumpipa uh koi-ah om a, note hong hu ding na makaite uh koi lai tung khin ahi hiam? Na kumpi dingte uh kong ngawhpiak a, ka hehluatna hangin amaute ka lakhiakik khin hi. Israel mite’ mawhna le a khialhnateng uh limtakin kiciamteh a, tua ciamtehnate limtakin kikem hi. Israel mite, naungek bangin a suahkhiat hun tung napi-in, a hailuat manun suakkhia loin a nu uh sung mahah omom lai uh hi. Leinuai-a misite’ omna-ah a pai nading uh panin honin, sih nading panin suaktasak ding ka hi hiam? Sihna aw, gimna na piakna-ah amaute ka hehpih kei hi. Leinuai-a misite’ gam aw, na suksiatna-ah amaute ka khasiat kei hi. Israel mite kiak bangin a pung ahi zongin sehnel gam panin nisuahna huih sa mahmah ka nungsak ding a, a tuikhukte uh le a tuinakte uh a kangsak ding hi. Tua huih in a manpha nate le deih theih peuhpeuh leenmang ding hi. Israel-te in a Pasian uh lehdo uh ahih manin a mawhna uh thuak ding uh hi. Gal sungah amaute si ding uh a, a naungekte uh lei kidenna ding a, a nupi naupaiite uh kikuikham ding hi, a ci hi. Israel-te aw, note’ Topa Pasian’ lamah kihei kik un. Na mawhna hangun note na puk khin uh hi. Topa’ lamah kihei unla, “Ka mawhna khempeuh uh hong maisak inla, kong thumna uh hong ngai in. Ka kampauna bangun kong gamta ding uh hi. Assiria mite in hong honkhiazo ngei lo ding a, sakol galkapte in zong hong huzo ngei lo ding uh hi. Kote’ bawlsa milimte pen Pasian hi, ka ci nawn kei ding uh hi. A cimawh mite in nangma tung panin hehpihna a ngah lamtak uh ka thei uh hi,” ci-in thu ngen un. Tua ciangin Topa in, “Ka mite tungah heh nawn lo ka hih manin ka kiangah ka mite ka samkik ding a, lungsim takpi tawh amaute ka it ding hi. Gam keuna mun a guahzu bangin Israel mite tungah nuntakna guah ka hi ding hi. Paak bangin amaute palh ding uh a, Lebanon gam a singkungte bangin zung thuk khakin a kip ding uh hi. Amaute meeng thakin oliv kung bangin melhoih ding uh a, Lebanon Mual bangin namtui ding uh hi. Keima liim nuai-ah khatvei hong omkik ding uh hi. Huan hoih sunga a po ankung hoihte bang ding uh a, leenggui gahpha bangin tampi a pha ding uh hi. Lebanon gam leenggahzu bangin minthang ding uh hi. Israel mite in milim biakha nawn lo ding uh hi. Amaute’ thungetna pia-in amaute ka kem ding hi. Amaute, a hing tawntung singkung kep bangin ka kem ding hi; amaute’ thupha ngah khempeuh keima kiang pan ahi hi,” a ci hi. Mipil, thu ngaihsun theite in hih thute theitelin limtakin ciamteh tahen. Topa’ lampi tang mahmah a, a thutang mite in tua lampi a tawn uh hi. Mawhneite in tua lampi tawn lo ahih manin a puk uh hi. Pethuel’ tapa Joel tungah hih bangin Topa’ thu hong tung hi: No khangham zawdiakte aw, ngai un; Judah gammi khempeuh aw, na bil uh ngat un. Note’ khansung ahi a, na pu na pate uh khansung ahi zongin, hih bang thu piang ngei peuhmah ahi hiam? Hih thute khempeuh na tate uh kiangah gen unla, na tate un amau’ tate’ tungah na gensawn uh hen la, amaute in a khangsawnte tungah na gensawn leuleu uh hen. A pettan kauphete’ nek bangteng, kauphe honte in netum a, kauphe honte’ nek bangteng, a tuan kauphete in netum a, a tuan kauphete’ nek bangteng, a susia kauphete in nemang khin uh hi. No zukhamte aw, tho unla kap un. No leenggahzu nete aw, thumin tau un. Na zunek ding teng uh beimang khinta hi. Kauphe honpi in i gam hong sim a, amaute tam mahmah uh a, hat mahmah uh hi. A ha uh humpinelkai ha bangin hiam a, humpinelkaipi ha bangin gupha mahmah hi. Amaute in i leengguiteng susiamang khin a, i theikungteng khempeuh netummang khin uh hi. A hawng khempeuh netum uh a, a hiangte kang sengsang hi. Nungak khat, a tenpih ding a lawmpa in a sihsan ciangin a kah bangin note zong kapin thum un. Topa’ biakinn-ah biakna-in piak ding an le leenggahzu om nawn lo a, Topa’ na a sem siampite thumin a tau uh hi. Lo ante kisusia a, leengguite keutum hi. Oliv kungte keugaw a, lolai-ah bangmah om nawn lo ahih manin leitang lungzuangin a thum hi. Lokhote aw, dah un; leenggui ciingte aw, kap un; mangbuh le mangbuhham, lo an khempeuh a beita hi. Leengguite keu a, theikungte vuai ta hi. Mang kawlsingte, nisuhte, epel kungte a kipan singkung khempeuh keumang khin hi. Mihingte a lungdamna dingteng zong a maimang ta hi. Siampite aw, puanhampi silhin kap un; biakna tau-a nasemte aw, thumin tau un. Ka Pasian’ na a semte aw, biakinn sungah tum unla, zanthapai-in dahna lim puanhampi silh un. Note’ Pasian’ biakinn sungah piak ding an le leenggahzu khat zong om nawn lo hi. An tan’ ding thu pia unla, a thupi biak kikhopna bawl un. Note’ Topa Pasian’ biakinn sungah makaite le gammi khempeuh kaikhawm unla, Topa’ tungah kiko-in thum un. Kalai! A hun hong naita! Topa’ ni hong naita a, Vanglianpa’ suksiatna hun hong naita hi. Eima muh mahmahin lo ante kisusia a, eite’ Pasian’ biakinn sungah lungdamna a beita hi. Guahtui om lo ahih manin khai kituhte khempeuh lei sungah keucip a, an khol ding bangmah om nawn lo ahih manin ansalte khempeuh a vekin kisia khinta hi. A gilkial tuu le bawngte cimawhin tau uh a, lonona mun om nawn het lo ahih manin ganhing honte cimawh uh a, tuuhonte in zong haksatna thuak uh hi. Topa aw, nangma tungah kong kiko hi. Bang hang hiam cih leh mei in a kattum tawh kibangin, lonona leitang khempeuh le singkung khempeuh keumang khinta hi. Luitui luang khempeuh kangcip khinta a, mei’ kattum bangin lonona khempeuh keucip khin ahih manin nangma tungah gamsate nangawn hong kiko uh hi. Zion mualtungah peengkul tum unla, Pasian’ mual siangtho tungah pataukohna tum un. Topa ni hong naita ahih manin gam sung mi khempeuh lau ta uh hen. Tua ni pen a mial, a lungzinhuai, meii kai-in khuazin’ ni ahi ding hi. Mualtung a meiipi kai bangin simzawh lohin kauphe honpi hong leeng muaimuai hi. Cikmahin hih bang thu omngei nai lo a, cikmah ciangin zong omkik nawn lo ding hi. A madawkte, a haltum thei meikuang bang a, a nungdalte, mei-am alh tawh kibang hi. Amau hong tun ma-in gam sung teng khempeuh Eden huan a bang hi a, amau’ khit ciangin a kinusiacip keugaw gam tawh kibang hi. Amaute kiang pan a suakta bangmah om lo hi. Amaute’ mel sakolte tawh kibang a, sakol galkapte bangin a tai uh hi. Mualtung tengah a tuan zuazua laitakun sakol leeng ging zuazuate le gamlak a lopa omte kangin a puak ziazua tawh kibang uh a, galsim dingin a kithawi, galkap honpi tawh kibang uh hi. Amaute hong pai ciangin mi khempeuh lau uh a, a maitang uh daanggawp hi. Galte bangin hong sim uh a, galkapte bangin kulh tungah hong kah uh hi. A vekpi-in tangtakin mai hong nawt uh a, a hong heempai kuamah om lo hi. Amau’ lampi san ciat hong tawn uh a, a kiphukha kuamah om lo uh hi. Amau mah dal nadingin a kibawlte hong phugawp uh a, khawl hetloin hong paisuak uh hi. Khuapi sung hong kidenna uh a, kulh tung khawngah tai zaizai uh hi. Inn tung khawngah kahto ngeingai uh a, gutate bangin tawlet-ah hong lut uh hi. Amau’ mai-ah leipi ling a, vanpi nangawn ling damdam hi. Ni le kha zong mialta a, aksite zong taang nawn lo hi. Ama mihonpite tam mahmah uh ahih manin amaute thu pia-in a mai uhah Topa awng a, ama thupiakna bangin a semte hat mahmah uh hi. Topa’ ni ding kihtakhuai mahmah ahih manin a thuakzo ding kua om ding ahi hiam? Topa in hih bangin ci hi: “Tu mahmah nangawnin lungsim tak tawh kisik kikin, an tangin, kapin, thumna tawh kei kiangah hong paikik un. Na dah taktakna uh lungkhamna tawh langsak unla, na puante uh a balkek bek hi kei un,” hong ci hi. Topa, note’ Pasian kiangah ciahkik un. Amah migi mahmahin hehpihna a nei hi a, a lungduai-in hong huh nuam tawntung a, gim hong pia loin hong maisak nuam tawntung hi. Topa, eite’ Pasian in a lungsim hong kheelin an hauhsakna tawh thupha hong piakha ding hi. Tua hileh ama tungah an le leenggahzu tawh biakna i pia thei ding hi. Zion mual tungah peengkul tumin an tanna ding thu pia unla, biak kikhopna khat nei un. Mite kaikhawm unla, amaute siansuah un. A khangham mite sam unla, naupangte zong kaikhawm un. Nawine lai naungekte zong paipih un. A kiteng cil nungak le tangvalte nangawn in a omna uh nusia-in hong pai uh hen. Topa’ na a sem siampite, biakinn sung innliim le biakna tau kikalah kapin thu ngen uh hen la, “ Topa aw, na mite hong hehpih in. Minam dangte in, ‘Na Pasian uh koi-ah om ahi hiam,’ ci-in kote hong simmawhsak kei in. Amaute’ nuihsatin kote hong omsak kei in,” ci uh hen. Tua ciangin Topa in ama leitang hong donin, ama mite hong hehpih hi. Topa in ama mite’ thungetna dawng a, “Tu-in note tungah an, leenggahzu le sathau ka hong pia a, na kham takun na ne ding uh hi. Minam dangte’ simmawhin na om nawn kei ding uh hi. Leilu lam gam panin a hong pai mite, note kiang panin sehnel gamah ka hawlkhia ding a, a madawkte uh nisuahna tuipi sungah khia-in, a nungdalte uh nitumna tuipi sungah ka khia ding a, amaute in note tungah hong bawlna hangin a luanghawmte uh uihgawp ding hi. “Lote aw, lau nawn kei unla, lungdam kipakin om un. Topa in note a dingin a lianpi hong bawlsak zo hi. Ganhingte aw, lau nawn kei un. Gam sung tengah lo nota a, singkungte gahta-in, theigah le leenggah tampi a om hi. “Zion mite aw, kipak unla, Topa na Pasian uh tungah lungdam ta un. Note in an na hauh theih nadingun nidanga bangin khuapi guah, tuk guah le phalbi guah, a hoihbekzah hong zusak hi. Na ancilna phual uh an tawh kidim ding a, na koihna uh umlebeel khempeuh leenggahzu le sathau tawh kidim ding hi. Note a hong sim dingin ka hong sawl kauphe honpi, a tuan kauphe, a susia kauphe, a pettan kauphe, hih ka galkap honte in a hong neksak kum sungin a piang ding teng tang kong piakik ding hi. Tu-in nek ding tampi nei-in na gil uh vah ding a, note a dingin a lamdang nate a hong bawlsak Topa na Pasian uh na phat ding uh hi. Tua ciangin ka mite hong kisimmawh nawn lo ding hi. Tua ciangin no Israel mite lakah kei ka omna thu, keimah Topa pen note’ Pasian ka hihna thu, kei simloh kuamah dang a om lohna na thei ding uh hi. Ka mite hong kisimmawh nawn lo ding hi. “Tua khit ciangin mi khempeuh tungah ka kha ka sung ding a, na puteekte un mang manin na tangvalte un maang mu ding uh hi. Tua hun ciangin nasem numei le nasem pasalte tung nangawnah ka kha ka sung ding hi. “Tua ciangin vantung le leitungah hilhkholhna lim ahi, sisan kiluansakna, meikatna le meikhu lompi hong om ding hi. Topa’ ni, tua a lauhuai hun a hong tun ma-in ni hong mialin, kha, sisan hong bang ding hi. Ahi zongin Topa’ tungah huhna a ngen khempeuh in hotkhiatna a ngah ding uh hi. Topa’ gensa bangmahin Zion Mual le Jerusalem khua sungah a suakta mi om ding uh hi. Topa in a teel mite, suakta ding uh hi. “Tua hun ciangin Judah le Jerusalem, a nidang hun lai mah uh ka bangsakkik ding hi. Minam dang khempeuh kaikhawmin Jehoshafat Kuam-ah ka paipih ding hi. Ka mihingte tungah a bawlnasa uh hangin tua munah amaute thu ka khen ding hi. Amaute in Israel mite, gam dangah thehthang uh a, ka gam sung teng phelhawm mangkhin uh hi. A galmatte uh kua in ngah ding, ci-in ai san uh a, zu le numei lei nadingin numeino le naupangnote sila-in a zuak uh hi. “Taia khua, Sidon khua, le Filistia gam khempeuh aw, kei bang hong cih nuamin a kinei na hi uh hiam? Bang khat peuhpeuh hangin hong thukkik nuamin a kinei na hi uh hiam? Kei a hong thukkik na hih uhleh, kei zong manlang takin kong thukkik pah ding hi. Ka ngun, ka kham, le ka na manpha tampite la-in, na biakinn sung uhah na puak uh hi. Judah le Jerusalem mite, amau’ gam panin gamlapi-ah paipihin, Grik mite tungah na zuak uh hi. Tu-in amaute na zuakna uh mun panin a lakhia kik ding ka hi a, amaute tungah na bawl bangun note tungah kong bawl ding hi. Na tanute uh le na tapate uh Judah mite tungah ka zuak ding a, amaute in a gamlapi-a om Seba minamte tungah zuaksawn ding uh hi. Bang hang hiam cih leh Topa in gen khinzo hi. “Minam dangte tungah hih bangin thuzaksakna bawl in: Galhang mite sam unla, galdo dingin kithawi un. Galkap khempeuh kaikhawmin hong kuan un! Lokhawhna tute namsau-in seek unla, singhiang heuhna temkawite teipi-in seek un. A thahat lote nangawn in do uh hen. Kimkotah a om minam dang khempeuh aw, manlangin hong kuan unla, tua kuamah hong kikhawm un. Topa aw, na galhangte hong paipih suk in. “Minam dangte hong kithawi hen la, Jehoshafat Kuam-ah hong kuan suk uh hen. Kimkotah a om minam dang khempeuh’ thu a khen dingin Topa ahi keimah, tua munah ka tu ding hi. Amaute gilo mahmah uh ahih manin anlak huna buhsi bangin at gawp unla, leenggahtui dawhna a dim letin a luang, leenggah cilna kuang sunga om leenggah bangin tuancil gawp un,” a ci hi. Thukhenna Kuam-ah a tul a thenin om uh hi. Bang hang hiam cih leh tua lai munah Topa’ ni hong tung baih ding hi. Ni le kha mialta a, aksite zong taang nawn lo hi. Zion Mual panin Topa hong hawksuk a, Jerusalem panin hong awngkek a, vanpi le leipi a ling damdam hi. Ahi zongin Topa pen ama mite’ belh pa hi a, Israel mite a hu ding hi. Tua ciangin Topa in, “Israel-te aw, ka mual siangtho Zion tungah a teng keimah pen Topa note’ Pasian ka hihna na hong thei ding uh hi. Jerusalem pen a siangtho biakna khuapi hi ding a, gamdang mite in zokik nawn lo ding uh hi. Tua hun ciangin mualtung khempeuh leenggui lo hi ding a, mual neute khempeuh tungah bawnghon dim ding a, Judah gam sung khempeuhah tui tampi om ding hi. Topa’ biakinn panin luitui khat hong luangkhia ding a, Shitthim kuamsung khempeuh a kawtsak ding hi. “Amaute in Judah gam simin, mawhnei lo mite that uh ahih manin, Egypt gam, sehnel gam suakin, Edom gam, gam sia suak ding hi. Tekoa khua-a a teng tuucingte lakah Amos a kici mi khat om hi. Uzziah pen Judah kumpi hi-in Joash’ tapa Jeroboam in Israel kumpi a sep laitak, zinlin’ ma kum nih hun laitakin Pasian in Amos tungah hih thute kilangsak hi. Amos in, “Zion Mual panin Topa hong hawksuk a, Jerusalem khua panin hong awngkek hi. Tua ahih manin lonona gamteng keugawp a, Karmel mualdawn dum dide teng kausan ta hi,” a ci hi. Topa in hih bangin ci hi: Damaskas khuamite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in an gawina suang tawh gawizan bangin, Gilead gammite gawigawp uh hi. Tua ahih manin Hazael innkuante mei tawh ka hal ding a, a meikuang in Kumpi Benhadad’ munmuanhuaite kangtum ding hi. Damaskas khuakulhpi zawlte ka sutan ding a, Aven Kuama teng mi khempeuh le Betheden Kuam sungah a om gam ukte khempeuh keimah in ka susia ding a, Syria mite ahihleh Kir gamah salin kipaipih ding hi. Topa in hih bangin ci hi: Gaza khuamite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in minambup khat sal dingin manin, Edom mite tungah ap uh hi. Tua ahih ciangin Gaza khuapikulh ka kangsak ding a, a munmuanhuai teng a kangtummang ding hi. Ashdod khuapi-ah a teng mite ka lakhia ding a, Ashkelon khuapi ukte ka beisak ding hi. Ekron khuapi ka sugawp ding a, Filistia mi a omlaite si ding uh hi. Topa in hih bangin ci hi: Taia khuamite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in minambup khat Edom mite tungah ap uh a, lawmta dinga a thuciamna uh zui lo uh hi. Tua ahih ciangin Taia khuapikulh ka kangtumsak ding a, a munmuanhuai teng kangtummang ding hi. Topa in hih bangin ci hi: Edom mite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in a sanggam uh Israel-te namsau tawh delh uh a, hehpihna lungsim nei lo uh hi. A hehna uh damsak ngei lo uh a, a tawntungin heh niloh uh hi. Tua ahih ciangin Teman gam sung khempeuh ka kangtumsak ding a, Bozrah khuapi munmuanhuai teng kangtum ding hi. Topa in hih bangin ci hi: Ammon mite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in huaihamin gam a deihthuah manun Gilead gam simgawp uh hi. Tua ahih ciangin Rabbah khuapikulh ka haltum ding a, a munmuanhuai teng khempeuh kangtum ding hi. Galdo a kikona aw ging ding a, tua kidona awging khuapi huihnung bang ding hi. A kumpipa uhleh a uliante uh salin kiman ding hi. Topa in hih bangin ci hi: Moab mite thumvei a khialh khit, a liveina hangin pel loin amaute gim ka pia ding hi. Bang hang hiam cih leh leiseek cianna-ah a kizang leikang a zat dingin Edom kumpipa’ guhte a hal uh hi. Tua ahih ciangin Moab gam sung khempeuh ka kangtumsak ding a, Kerioth khuapi munmuanhuai teng a kangtum ding hi. Galkapte’ otna le peengkul kitumna lak, galkidona gamlum sungah Moab mite si ding uh hi. Tuate lakah Moab gam ukte ka sisak ding a, a uliante ka that ding hi. Topa in hih bangin ci hi: Judah mite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in ka thukhamte nialin ka thuhilhnate zui lo uh hi. A pu a pate un a na biaksa pasian man lote mah in amaute lam pialsak uh hi. Tua ahih ciangin Judah gam sung teng ka kangtumsak ding a, Jerusalem munmuanhuai teng a kangtum ding hi. Topa in hih bangin ci hi: Israel mite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in leiba a loh zawh loh man bekun midik kimlai zuak uh a, khedap bu khat man a loh zawh loh man bekun mi cimawhte sila-in a zuak uh hi. Amaute in mizawngte’ lutang leivui lakah tuancil uh a, keima min siangtho a ninsak dingin biakinn-a numei paktatte kiangah tangvalte le papite a pai uh hi. Biakna tau gei khempeuhah amaute lum uh a, sum leitawina hangin a puan kepsakte uh a phah uh hi. Amaute in a Pasian uh’ biakinn sungah leibate kiang pan a laksak uh leenggahzu a dawn uh hi. Ahi zongin amaute ka khualna hangin taamtak sing bangin a sang mahmah, tawsaw kung bangin a khauhtuak mahmah Amor mite amau a dingin ka suksiatsak a, a dawn pan a kipan a zung dongin ka sukmaisak hi. No ka mihingte, Egypt gam pek panin hong paikhiatpihin, gamlakah kum sawmli sung kong makaih a, note a dingin Amor mite’ gam kong pia hi. Na tapate uh pawlkhat kamsang dingin ka teel a, na tangvalte uh pawlkhat Nazir mi dingin ka teel hi. Israel aw, tu-a ka gen bangmah hi lo ahi hiam, Topa in kong ci khin hi. Ahi zongin note in Nazir mite leenggahzu na dawnsak uh a, kamsangte in ka thu a gen lohna dingun thu na pia uh hi. Tu-in buhlomte in a pua bawngleeng a netcipsuk bangin note na omna mun uhah kong nengcipsuk ding hi. A tai hatte nangawn suakta zo lo ding a, a thahatte a hatna bei ding a, galhangte in amau’ nuntakna hu zo lo ding uh hi. Thaltawite nangawn in do zo lo ding a, a tai hatte nangawn kisuahtak zo lo ding a, sakol tung tuangte nangawn in a nuntakna suahtak zo lo ding hi. Tua ni ciangin galhang pente nangawn taimang ding uh hi, Topa in ci hi. Israel mite aw, note’ langkhat a Topa’ thugen, hih thu limtakin ngai un: Egypt gam panin na minam bupun note kong paikhiatpih hi. Leitung minam khempeuh lakah note bek hong thei-in, note bek ka hong don hi. Tua ahih manin na khialhna khempeuh uh hangin note gim ka hong pia ding hi. Mi nih, thukimna om masa lopi-in lampi-ah tonkhawm thei uh ahi hiam? A samat ding mu lopi-in, gamlakah humpinelkai mawk hawk ahi hiam? Samat nei lopi-in, a kua sungah humpinelkai khanglai mawk hawk ahi hiam? Thang antah om lopi-in leilaka thangah vasa mawk awk ahi hiam? A su khat om lopi-in, thang kimawksai ahi hiam? Khuapi sungah pataukohna gal peengkul a kitum ciangin mite lau loin ommawk thei ahi hiam? Topa’ tunsak lohpi-in khuapi sungah lauhuaina mawk tun ahi hiam? Topa Pasian in ama nasem kamsangte tungah ama geelna theisak masa lopi-in bangmah hih het lo hi. Humpinelkai a hawk ciangin lau loin ki-om thei ahi hiam? Topa Pasian in thu a gen ciangin kua in ama thu gen loin om thei ding ahi hiam? Samaria gam munmuanhuai-ah a om mite le Egypt gam munmuanhuai-ah a om mite tungah thu zasak unla, “Samaria-ah hong kikhawm unla, tua lai-a buaina lianpite le kinenniamnate hong mu un,” ci un. Topa in hih bangin ci hi: Hih mite in a manin gamtat ding thei lo uh a, gilo mahmah uh a, mi’ na a suh uh vante tawh a inn lianpipite uh kidimsak uh hi. Tua ahih ciangin galte in a gam uh umcihin, a panmun muanhuai teng uh susiagawp ding a, a inn lianpipite uh luhgawp ding uh hi, Topa in ci hi. Topa in hih bangin ci hi: Humpinelkai’ nek baang tuu khebom nih ahi a, a bil themkhat bek ahi zongin tuucingpa in a ngah tei mah bangin, tutphah nip kiu khat le lupna themkhat tawh a kibang, Samaria sungah a om Israel mi tawmno khat suakta tei ding hi. Tu-in ngai un: Jakob’ suanlekhakte hilhkhol un, Vanglian Pasian ahi, Topa Pasian in ci hi. Amau’ khialhna hangin Israel gim ka piak ni ciangin, Bethel-a biakna taute zong ka susia ding a, biakna tau kite kitanin leilakah kia ding hi. Keimah in phalbi le khuakhal innte ka susia ding a, saiha tawh a kibawl inn hoihte zong kisia-in, inn lian khempeuh beimang ding hi, Topa in ci hi. Bashan gam bawngpi bangin a thau mahmah, mizawngte nengniamin mi cimawhte a sugawp, na pasalte uh kiangah, “Ka dawn ding bang khatpeuh hong puak in,” ci-in a vaikhak no Samaria numeite aw, hih thu limtakin ngai un: Topa Pasian a siangtho ahih mah bangin, amah in kamciamna khat bawlkhin a, “Amaute in sikkawi tawh note hong kaihkhiat hun ding, ni khat ni ciangin hong tung taktak ding a, note khempeuh sikkawi-ah a awk ngasa na bang ding uh hi. Na omna uh tawh a kinai pen kulhvang tawnin, ganhing sisa kaihkhiat bangin hong kikaikhia ding a, ninlom lakah hong kilawnkhia ding hi,” Topa in ci hi. Israel mite aw, Bethel-a mun siangtho-ah va pai unla, tua lai-ah khialhna va bawl un. Gilgal-ah va pai unla, va khial semsem un. Zingsang simin biakna va pia unla, ni thum simin sawm-ah-khat pia un. Lungdam kohna-in silngo sawh anlum va pia unla, utthu-a biakpiaknate va pia-in va kisial un. Hihte pawl pen note’ hihnop pawl ahi hi, Topa in ci hi. Na khuapi khempeuh uhah kial tungsakin, annek ding nei loin note a hong koihpa pen keimah hinapi-in, keima lamah nong kihei tuan kei uh hi, Topa in ci hi. Tua ahih manin anlak hun ding kha thum bek in a sap laitak, lolai-a om ante in guahtui a sap mahmah laitakin guah ka zusak kei a, khuapi khat bekah zusakin a dangte-ah ka zusak kei hi. Lo khat bekah guah zu a, a zuk lohna lote a keutum hi. Dangtak manin thaneemin khuapi nih khuapi thum mite tui zong dingin a khuavengte kiangah pai uh a, ahi zongin tuidawn tawm ding nangawn a kicing om lo hi. Tua hinapi-in kei kiangah nong kihei tuan kei uh hi, Topa in ci hi. Na ankungte uh lung nesakin ka vulsak a, na ankungte uh cinasakin a kang dikdekin ka bawl hi. Na huante uh le na leenggui lote uh a hawmguakin ka koih hi. Na theikungte uh le na oliv kungte uh kauphe in gai khin hi. Tua bang hinapi-in kei lamah nong kihei kei uh hi, Topa in ci hi. Egypt gamah ka hong tunsak bangin note lakah gimna kong tungsak hi. Gal sungah na tangvalteng uh ka sisak a, na sakolte uh kong paihkhiatsak hi. Na giahphual sungte uh a uih mahmahna tawh na nakngek uh kong zensak hi. Tua bang hinapi-in kei lamah nong kihei kei uh hi, Topa in ci hi. Sodom le Gomorrah khuapite ka suksiat bangin note pawlkhat kong susia hi. Meikhuk panin a kiteenkhia singkhuah khat tawh na kibang uh hi. Tua bang hinapi-in kei lamah nong kihei kei uh hi, Topa in ci hi. Tua ahih ciangin Israel mite aw, hih bangin note tungah kong bawl ding hi. Hih bangin hong hih ding ka hih manin Pasian’ thukhenna a thuak dingin kiging un. Bang hiam cih leh mualte bawlin huihte a piangsak pa, ama ngaihsutna mihingte tungah kilang sakin, sun nitaang kimlai zanin a bawlpa, leitung khempeuh a ukpa’ min, Topa, Vanglian Pasian ahi hi. Israel mite aw, kap kawmin kong thugenna, limtakin ngai un: Nungak Israel puk khin a, thokik ngei nawn lo ding hi. Leilakah lum dildel a, a phongto ding kuamah om lo hi. Tua ahih manin Topa in hih bangin ci hi: Israel khuapi khat in galkap tulkhat kuankhiasak a, ahi zongin zakhat bek hong ciahkik hi. Khuapi dang khat in galkap zakhat kuankhiasak a, ahi zongin sawmkhat bek hong ciahkik hi. Tua ahih manin Topa in Israel mite tungah hih bangin ci hi: Kei hong zong un; tua hileh na nungta ding uh hi. A bia dingin Beersheba-ah pai kei un. Bethel-ah kei hong zong kei un; a mawkna suak ding hi. Gilgal-ah zong lut kei un; Gilgal mite, sal a suak ding hi lel hi. Topa zong un; tua hileh na nungta ding uh hi. Amah na zon kei uhleh Josef mite tungah meikuang bangin amah hong kuang ding a, tua mei in Bethel-a om mite kangtumin, tua mei a phelh ding kuamah om lo ding hi. Thutang lumletin thuman mite lei a denna, note a dingin bangzahin nasia ding ahi hiam? Vana om aksi Seguk le Zawlzawngte bawlin, khuamial pen khuavak suaksak a, sun pen zan suaksakin, tuipi panin tuite samkhia a, leitungah tua tui a buakhia pa a min pen Topa ahi hi. Amah in kulh muanhuaite le munmuanhuaite thakhatin susia thei hi. Note in thukhen zumah thutang a deih pa na mudah uh a, thuman a gen pa na hua uh hi. Note in mizawngte tuancilin, a an neihteng khempeuh uh laksak na hih manun, suangseek inn na lam hangun tua suang inn sungah na tengkha kei ding uh a, leenggui lo hoih na neih hangun a leenggahzu na dawnkha kei ding uh hi. Bang hang hiam cih leh na khialhna tampite uh le na mawhna tampite uh a vekin ka thei khin hi. Thuman mite gimsakin, sumgolh na la uh a, thukhenna zumah mizawngte’ thu a manin na khen kei uh hi. Tua ahih manin hih bang hunsiat hun laitakin thu ngaihsun thei mite, pau loin a om khikhe, lamdang sak ding hi lo hi. Note na nuntak theih nadingun siatna gamta loin, thumanin gamtat ding hanciam un. Tua hileh na gensa uh mah bangin Topa, Vanglian Pasian in note hong ompih ding hi. Thusia mudahin thupha deih unla, thukhen zumah a manin thu khen un. Tua hileh Josef minam a suakta sunte tungah Topa, Vanglian Pasian hong thunuam khathei ding hi. Tua ahih ciangin Topa, Vanglian Pasian in hih bangin ci hi: Mihon omna lamkabom khempeuhah mite in na sa-in thumin tau ding uh a, kongzing khempeuhah kap ding uh hi. Khuaneu a mite a thum dingin kisam ding a, a kah siam mite a kap dingin kicial ding hi. Note gim a pia dingin hong pai ding ka hih manin leenggui lo khempeuhah kahna aw ging ding hi, Topa in ci hi. Topa’ ni hong tun ding a ngaklah note a dingin bangzah takin lauhuai ding ahi hiam? Note a dingin tua ni a hoihna hong om ding ahi hiam? Tua ni pen lungzin’ ni hi a, lungtaii ni hi lo hi. Humpinelkai kihta-in vompi a tuakpa tawh kibang ding hi. Tua ahih kei leh mi khat a inn-ah hong tai a, a kawmah a khut a ngak ciangin gul in a tuk tawh kibang ding hi. Topa’ ni pen khuavak ni hi loin khuamial ni hi a, maitaina a om lo lungzin’ ni ahi hi. Na biakna pawite uh mudahin ka deih kei a, na biak kikhopnate uhah ka lung a kim kei hi. Meihal biakna le an tawh biakna nong paipih uh hangin tuate kong sang kei ding hi. Thunuama biakpiak nadingin na hong paipih uh a thau mahmah ganhingte zong et-in ka nei vet kei ding hi. La sa-in na gamlumnate uh khawl un; na lasakna uh a gingte ka za nuam kei hi. Thutang, tui bangin luangkhiasak unla, thuman, a kang ngei lo tui bangin luangsak un. Israel mite aw, gamlakah kum sawmli na om sungun gan go-a biakna le keima tungah piakna bangmah nong bawl kei uh hi. Tua hinapi tu-in note a dingin na bawltawm uh aksi pasian-te ahi Sakkuth le Kaivuan milimte na biak manun Damaskas khengin gamdang khatah sal dingin note kong paisak ding hi, Vanglian Pasian min a nei Topa in ci hi. Israel minamte in muanin a hong neih, i minam lakah ulian ahi, Zion-ah nuamtakin a om hithiat, Samaria-ah lungmuang takin a om note a dingin zumhuai mahmah hi. Kalneh khua-ah pai unla limtakin va en un. Tua ciangin Hamath khuapi lian ah va paisuak unla, Filistia-te’ khuapi Gath khua dong va paisuk un. Judah le Israel kumpi gamte sangin hoihzaw tuan a, amaute’ gam pen note’ gam sangin lianzaw tuan ahi hiam? Note’ tungah siatna hong tun ni ding, a kipelh theih nading na hanciam uh a, ahi zongin tua bang na hihnate un, siatna khangsak semsem zawsop hi. Saiha kibawl lupna tungah a lum hithiat, tutphah nip tungah a kizia hiathiat, tuuno sa le bawngno sa, duhduhin a ne note in gimna na thuak ding uh hi. David bangin la phuah nuam na sa uh a, lasaknate na tum nuam uh hi. Leenggahzu hai lianpipi-in na dawn uh a, sathau hoihpente tawh na kizut uh hi. Ahi zongin Josef minamte’ siatna hangin themkhat zong na dah het kei uh hi. Tua ahih ciangin note pen salin a pai masa pente na hi ding uh a, na nopsakna teng uh a beita ding ahi hi. Topa Pasian thupi takin kiciam khin a, Topa, Vanglian Pasian in hih bangin ci hi: Israel-te’ kiphatsakna ka hua a, a munmuanhuaite uh ka mu nuam kei hi. Tua ahih manin a khuapi le a sunga a omteng, galte’ khut sungah ka pia ding hi. Inn khat sungah mi sawm bek nangawn a suakta a om laina a om leh, tuate khempeuh zong a si khin veve ding hi. Mi khatpeuh a sihna inn panin a vui dingin a si puakhia-in, a behte khatpeuh hong pai ciangin, innsung tawngah a bu mi khatpeuh kiangah, “Hih lai-ah a si dang a om hiam?” ci-in a dot ciangin, “Om lo hi; pau kei in. Topa’ min na lawhkhak ding kidawm in,” ci-in kidawngkik ding hi. Topa in thu a piak ciangin inn liante kisatzanin inn neute kisatnen ding hi. Sakolte, suangkeen tungah tai thei ngei a, bawngtalte tawh tuipi tung kikho thei ahi hiam? Tua hinapi-in note in thutang, gu na suaksak uh a, thuman, a khial na suaksak uh hi. Lodebar khua bang lel na lakzawhna uhah na lungdam uh a, “Eima thahatna tawh Karnaim khua i lazo hi,” na ci uh hi. Topa, Vanglian Pasian in hih bangin ci hi: No Israel mite a do dingin minam khat ka khangsak ding a, leilu lamah, Hamath khua lutna ciangka panin, leitaw lamah Arabah lui kikal dong, note hong nuaigawp ding uh hi, a ci hi. Topa Pasian in hih bangin hong musak hi: Kumpipa’ gan an ding lopa a ki-at khit phet, selkik dingin a kisak laitakin Topa in kauphe honpi a piangsak hi. Kauphe in gam sung lopate a gaih khit ciangin, keimah in Topa tungah ka thum a, “Topa Pasian aw, na mihingte’ mawhna maisak in. Amaute minam tawm hi a, zawngkhal uh ahih manin bangci-in thuakzo ding ahi uh hiam?” ka ci hi. Topa in zong a lungsim hong kheelkik a, “Tua na muh bangin hong piang nawn lo ding hi,” hong ci hi. Tua ciangin Topa Pasian in hih bangin hong musak leuleu hi: Meikuang tawh a mite gim a pia dingin amah hong kithawi a, tuipite keutum sakin leitung zong a haltum dingin a hong kipan hi. Tua ciangin Topa Pasian kiangah ka thum a, “ Topa aw, khawl dih in. Na mite, minam tawm hi a, zawngkhal mahmah uh ahih manin bangci-in thuakzo ding uh ahi hiam?” ka ci hi. Tua ciangin Topa in zong a lungsim hong kheelkik a, “Na muh bangin hih zong hong piang nawn lo ding hi,” Topa Pasian in hong ci hi. Tua ciangin Topa in hih bangin hong musak hi: Khaukhai zangin a kiciang kulh gei khatah, Topa a ding ka mu a, a khut sungah khaukhai khat a tawi hi. Tua ciangin Topa in kei kiangah, “Amos aw, bang na mu hiam?” hong ci hi. Kei zong dawngin, “Khaukhai khat mu ing,” ka ci hi. Tua ciangin Topa in, “En in, ka mi Israel-te a khialhna uh a kitheih nadingin hih khaukhai tawh ka en hi. Amaute gim ka piak ding ka khiakik nawn kei ding hi. Isaac’ suanlekhakte’ biakna munte kinusiacipin, Israel mite’ siangtho munte kisusia ding a, Kumpi Jeroboam’ innkuante a simgawp dingin gal ka kuansak ding hi,” a hong ci hi. Bethel-ah a om siampi nasem Amaziah in Israel Kumpi Jeroboam kiangah thu puak a, “Amos in Israel mite lakah nang hong sawm hi. Ama thugen in i gam sung siasak ding hi. Amah in hih bangin thu gen a, ‘Gal sungah Jeroboam si ding a, Israel mite amau’ gam panin salin kipaikhiatpih ding hi,’ ci hi,” ci-in a khia hi. Tua ciangin Amaziah in Amos kiangah, “Kamsang kineih pa aw, na Judah gamah ciah inla, tua lai-ah na nuntakna ding na semin, thu va gen in. Hih lai pen kumpipa’ biakinn mun, minam bup biakinn mun ahih manin Bethel-ah thu hong gen nawn kei in,” a ci hi. Amos in Amaziah dawng a, “Kei pen kamsang ka hi kei a, kamsangte’ ta zong ka hi beek kei hi. Kei pen tuucing ka hi a, theithek huan puah tawh a thuahkhawm ka hi hi. Ka tuucinna panin Topa in kei hong samkhia a, ama mi Israel-te tungah thugen dingin a hong sawl hi. Tu-in Topa’ thugen ngai in. Israel mite’ langkhatah thu ka gen ding na hong kho a, Isaac’ suanlekhakte’ langkhatah thu ka gen ding na hong kham hi. Amaziah aw, tua bangin kampau na hih manin Topa in nang kiangah, ‘Na zi pen khua sungah numei paktat suak ding a, gal sungah na tate si ding uh hi. Na gam kiphelkhamin midang tungah kipia ding a, lawkite’ gam sungah nang na si ding hi. Israel mite, galmatin kipaipih ding hi,’ ci hi,” a ci hi. Topa in hih bangin hong musak hi: Seeng sunga kikoih singgah min ka mu hi. Topa in, “Amos aw, bang na mu hiam?” hong ci hi. “Seeng sunga kikoih singgah min ka mu hi,” ci-in kei zong ka dawng hi. Tua ciangin Topa in, “Ka mi Israel-te a dingin a bei hun uh tungta hi. Amaute gim ka piak ding ka khawl nawn kei ding hi. Tua ni ciangin kumpi inn-ah lungdam lasakna awgingte, kahna awging suak ding hi. Mun khempeuhah misi dim ding a, mun citengah kipaithangin gamdai ding hi,” Topa in ci hi. Mi cimawhte tuancil gawpin, gam sung mizawngte a susiagawp mite aw, hih thu ngai un: Note in na lungsim sung uhah, “I ante i zuak theih nadingin zumkhak hun bei ding i ngaklah hi. I mangbuhte i zuaktheih nadingin cik ciangin Sabbath ni bei ding ahi hiam? I antehna seu neuseekin sum tampi i ngen nuam a, tawikhaina man lo zangin a hong leite i khem nuam hi. Khedap bu khat man dingin mizawngte sila-in i zuak nuam a, i mangbuh hoih lote sum tampi i khawng nuam hi,” na ci uh hi. Topa, Israel Pasian kiciam a, “Na gamtatsiatnate uh ka mangngilh ngei kei ding hi. Tua ahih manin zin hong ling ding a, leitung a om mi khempeuh a kap ding uh hi. Nail Gunpi bangin leitung khempeuh khangto-in kiamsuk ding hi. Tua ni ciangin sunkim laipi mahin ni ka tumsak ding a, sunkim laipi mahin leitung khempeuhah khua ka mialsak ding hi. Topa Pasian ahi keimah in hih thu kong gen khin hi. Na lungdam pawite uh dahna ka suaksak ding a, na lasaknate uh kahna awging ka suaksak ding hi. Dahna limin puanhampi na silh ding uh a, na sam uh zong na mettol ding uh hi. A tapa khat neihsun a sihsuah nupa na bang ding uh hi. Tua hun pen a tawp dongin nasia semsem ding hi. “Keimah in leitungah kialpi kong tunsak hun hong tung ding hi. Tua kialpi pen anletui duhna kialpi hi lo ding a, Topa’ thu zaknop mahmahna kialpi hi ding hi. Topa Pasian ahi keimah in hih thu kong gen khin hi. Mihingte, leilu pan leitaw dong, Topa’ thu kanin vak kawikawi ding uh a, ahi zongin mu zo lo ding uh hi. Tua ni ciangin nungakte le tangvalte dangtakin puk ding uh hi. Samaria milim pasian Ashimah min tawh kiciam a, ‘Dan khuapi pasian a nungta ahih mah bangin,’ le ‘Beersheba khuapi pasian a nungta ahih mah bangin,’ a ci mite pukin thokik nawn lo ding uh hi,” a ci hi. Biakna tau gei-ah Topa a ding ka mu a, hih bangin thu hong pia hi: “Biakinn bulpi khempeuh a kilin’ theih nadingin biakinn khuampiluzang nakpitakin satgawp in. Tuate satkham inla, mite’ luzang tusak in. Tua lai panin a suakta teng gal sungah ka sisak ding hi. A taikhia, a suakta, kuamah om lo ding hi. Lei tosukin misite’ omna Leinuai-ah a va tun uh hangin tua lai-ah amaute ka su ding a, vantungah a kahtoh uh hangin zong, tua lai mahah amaute ka su veve ding hi. Karmel mual dawnah a buk uh hangin, amaute zongin ka mankhia ding a, keima kiang panin tuipi tawng sungah bu ta le-uh zong, tuipi gulpite in a tukna ding thu ka pia ding hi. Galte in a sal dingin hingmat ta le-uh zong, namsau tawh a thah nadingun thu ka pia ding hi. Amaute’ hoihna ding ngaihsun hetloin, amaute suksiat ding ka sawm hi,” a ci hi. Vanglian Topa Pasian in leitung a lawn’ ciangin tuisuak a, leitung a om mi khempeuh a kap uh hi. Nail Gunpi bangin leitung buppi khangto-in kiamsuk ding hi. Topa in vantungah a inndeite bawl a, van kuumpi tawh leitung a khuhsuk hi. Amah in tuipi panin tuite samkhia a, leitung khempeuhah tua tuite a sung hi. Hih bangin a bawlpa’ min pen Topa ahi hi. Topa in hih bangin ci hi: Israel mite aw, Ethiopia mite tawh a kibangin note ka hong bawl a, Egypt gam panin note kong paikhiatpih bangin, Kaftor gam panin Filistia mite ka paikhiatpih a, Kir gam panin Syria mite ka paikhiatpih hi. Keimah in hih a khial Israel kumpi gam ka encik a, hih leitung panin amaute ka susia ding hi. Ahi zongin a vekpi-un susiamang loin pawlkhat ka sitlai ding hi. Keimah in thu ka pia ding a, anhaihna ciang tawh an a kihaih mah bangin keimah in Israel mite ka lok niloh ding hi. A hoih lo teng a kipaihkhiat theih nadingin minam dangte lakah ka haih ding hi. Keima mite’ sung panin, “I tungah siatna hong tung ngei lo ding hi,” a ci mawhneite khempeuh, gal sungah si ding uh hi. Tua ciangin inn tawh kibangin a siasa David ukna gam keimah in ka puahkik ding a, a vang teng hu-in, a sia teng ka puahkik ding a, a nidanga a ngeina lui mah uh ka bangsakkik ding hi. Tua ciangin Israel mite in Edom gam a omlaiteng le keima mi ahi ngei minam khempeuh zo-in ngahkik ding uh hi, Topa in ci hi. Topa in hih bangin ci hi: An a kihauh luat manin, anlak a kizawh ma-in lo khawhkik hun tungin, leenggahte, leenggahzu a bawl a kizawh ma-in a suankik hun hong tun ding, hun nuam hong tungta ding hi. Mual lian khempeuh panin leenggahzu khum hong taakkhia-in, mual neu khempeuh tungah leenggahzu a luang ding hi. Ka mi Israel-te, amau’ gam ka tunkik ding a, a kisia a khuapite uh hoihtakin lampha kikin a sungah a teng ding uh hi. Amaute in leenggui suanin, huan bawlin, a sunga piangte a ne ding uh hi. Amaute a dingin ka piak gam sungah amaute ka koihkik ding a, tua ka piaksa gam panin kuamah in amaute lakhia kik nawn lo ding hi, Topa, note’ Pasian in ci hi, a ci hi. Obadiah’ genkholhna: Edom gam tawh kisai-in Topa Pasian in hih bangin gen hi: Minamte lakah kamtai khat kisawlzo a, “Kithawi un! Edom mite a simgawp dingin kuankhia ni,” a cihna thu ka zazo hi. En un, minamte lakah note kong neusak ding a, nakpitakin hong kisimmawh ding hi. Na lungsim kiphatsakna un note a hong khemzo hi. Note in suang kulhpi beelin mual dawnah na ten manun, “Kua in eite hong puksakzo ding ahi hiam?” ci-in na ngaihsun uh hi. Muvanlai bangin sangpi-ah leengin, aksite lakah bu na bawl hangun no kong khiasuk veve ding hi, Topa in a ci hi. Zanin na kiangah gutate le misuamte hong pai-in supna tampi na thuak hangin a deihteng bek uh hong guksak ding hi lo ahi hiam? Leenggah late in lolai-ah a sangte nusia laitei hi lo ahi uh hiam? Ahih hangin Esau kibuluh khinzo a, a sum a pai khempeuh a kilaksak zo hi. Na pawl teng in nang hong khemzo uh a, gamgi ciang dong hong hawlkhiazo uh a, na pawl teng in a hong zo khinta uh hi. Na ankuang umpihte in na nuai-ah thang hong siah khin uh a, “A pilna koi-ah om ahi hiam?” a hong ci uh hi. Topa in: “Tua ni ciangin Edom sung pan a mipilte ka susia ding a, Esau’ gamah pilna ka beisak ding hi,” a ci hi. Teman khua aw, Esau’ gamah mi khempeuh a kithahlup khit nadingin na galhangte a meidawi ding uh hi. Bang hang hiam cih leh na sanggampa Jakob bawlsia-in na thahna hangin maizumna in nang hong khuh ding a, na khantawnin na mangthang ding hi. Namdangte in a neihsateng a puakkhiat ni-in gamdang mite a kongpi sungah a lut ni-in, Jerusalem-a vante hawmna ding ai a san ni-in, nangmah in gal et bek na hih manin nang zong a thukimpih na hi hi. Na sanggamte uh a tuahsiat ni-in mu nuam dah hoh un. Judah mite a kisiat ni-in lungdamin nuam kei un. A kisiat ni-in lungdam kei un. A cihmawh ni-in nuihsan kei un. Ka mite in haksatna a tuah ni-in a kongpi sungah tum kei un. A tuahsiat ni-in a thuaknate uh mu nuam kei un. A tuahsiat ni-in a sum a paite uh laksak kei un. A suakta sunte a khaktan dingin na ding kei ding uh hi. A cihmawh ni-in a hinglai sunteng, a galte’ khut sungah na pia kei ding uh hi. Bang hang hiam cih leh minam kimte tungah ka thukhenna ding ni a naizo hi. Nang bawl bangin nangma tungah hong kibawl ding hi. Na hih bangin na lu bukah hong tukik ding hi. Bang hang hiam cih leh ka mual siangtho tungah na thuak mah bangun, na kiim na pama om minamte khempeuh in zong ka gimpiakna a thuak ding uh hi. Thuak tawntung ding uh a, maimang ding uh hi. Ahih hangin Zion mualah pawlkhat va tai ding uh a, tua mun pen a siangtho suak ding hi. Jakob innkuante in amau’ gam mah luahkik ding uh hi. Tua ciangin Jakob innkuante mei bang ding uh a, Josef innkuante meikuang bang ding uh hi. Esau innkuante ninpa bang hi ding uh a, amaute in a hal ding uh hi. Amaute kangtum khin ding uh a, Esau innkuante khat zong a suakta kei ding hi. Bang hang hiam cih leh Topa in a genzo hi. Negeb gammite in Esau’ gam luah ding uh a, Shefelah mite in Filistia gam luah ding uh hi. Amaute in Efraim gam le Samaria gam luah ding uh a, Benjamin in Gilead gam luah ding hi. Israel mi salin a omte in Kanaan gam Zarefat ciang dong luah ding uh a, Jerusalem mi, Sardis khua-ah salin a omte in Negeb gam khuapite a la ding uh hi. A gualzo Jerusalem khuamite in Esau’ gam simin uk ding uh a, tua gam pen Topa’ gam ahi ding hi. Topa in Amittai’ tapa Jonah tungah, “Kithawi inla, a lian mahmah Nineveh khuapi-ah va pai-in thu va hilh in; bang hang hiam cih leh amau’ gitlohna thu ka za khinzo hi,” a ci hi. Ahih hangin Topa’ kiang pan Jonah taikhia-in Tarshish khua lamah a taisim dingin a kithawi zawsop hi. Joppa khua-ah paisuk a, Tarshish khua a zuan ding teembaw khat a mu hi. A sap man ding pia-in a tungah kah a, Topa’ kiang pan a taikhia dingin teembaw hawlte tawh Tarshish khua-ah a pai hi. Ahih hangin Topa in tuipi tungah huih nakpi-in nungsak a, huihpi hatlua ahih manin teembaw a kisia dekdek hi. Tua ciangin teembaw hawlte lau uh a, a pasian ciat uh’ kiangah a kiko ciat uh hi. Teembaw a zantuam nadingin a sunga vante tuipi sungah a paai uh hi. Tua bang hinapi-in teembaw sungtawng lamah Jonah na lutsukin a na ihmu hithiat hi. Teembaw ukpa in amah a muh ciangin, “Ihmu pa aw, bang na cihna ahi hiam? Tho inla na pasian kiangah thu ngen in. I sih loh nadingin amah in eite hong ngaihsun khathei ding hi,” a ci hi. Tua khit ciangin teembaw hawlte in, “Hong pai dih un. Kua’ hangin hih bang gimna ei’ tungah hong tung ahi hiam, cih i theih nadingin ai san dih ni,” ci-in khatlekhat a kikum uh hi. Ai a san uhleh Jonah tung a tu hi. Tua ciangin amaute in, “Bang hangin hih gimna ei’ tungah hong tung ahi hiam, hong gen in. Na nasep bang ahi hiam? Koi lai pana hong pai na hi hiam? Na gam bang ahi hiam? Kua minam na hi hiam?” ci-in a dong uh hi. Amah in, “Kei pen Hebru mi ka hi hi; tuipi le leitang a bawl, vantungte’ Pasian ahi Topa ka bia hi,” a ci hi. Tua ciangin tua mite lau mahmah uh a, “Bang hangin hih bangin gamta mawk na hi hiam?” a ci uh hi. Bang hang hiam cih leh Topa’ kiang pan amah a taikhiasim ahihlam a gen khitsa ahih manin a thei khinzo uh hi. Tua ciangin amaute in, “Ei a dingin tuipi a hong daihtheih nadingin nang bang kong cih ding uh hiam?” ci-in a dong uh hi. Bang hang hiam cih leh huihpi lauhuai semsem hi. Amah in, “Hong domto unla, tuipi sungah hong khia un; tua hileh no a dingin tuipi a hong dai ding hi; bang hang hiam cih leh hih huihpi na thuakna uh keima hang ahi hi, cih ka thei hi,” ci-in a dawngkik hi. Tua bang a cih hangin amaute in teembaw a khawlsak dingin hahkatin lei lamah a hot teitei uh hi. Ahih hangin a hihzo kei uh hi; bang hang hiam cih leh huihpi a hat semsem hi. Tua ahih ciangin Topa’ kiangah amaute kiko-in, “ Topa aw, hih mipa ka sihsak manun kote hong sisak kei inla, mi that hi, ci-in hong ngawh kei ta in, ci-in kong thum uh hi; bang hang hiam cih leh Topa aw, nangmah in pha na sak banga na bawl ahi hi,” ci-in thu a ngen uh hi. Tua ciangin Jonah domto-in tuipi sungah a khiat uhleh tuipi a dai pah hi. Tua ciangin tua mite in Topa kihta mahmah uh a, Topa’ tungah biakna pia-in thuciamna a bawl uh hi. Ahih hangin Jonah a nawmvalh dingin Topa in ngapi khat a geelkholhsa hi a, tua ngapi’ gil sungah Jonah sun thum le zan thum sung a om hi. Tua ciangin Jonah in tua ngapi’ gil sung panin Topa a Pasian kiangah thu ngen a, “Ka cihmawhna panin Topa ka sam a, amah in kei hong dawng hi. Sihna gam Sheol panin kong kiko a, nangmah in ka aw nong za hi. Tuipi thuk sungah kei nong khia a, tui in kei hong tuumcip hi. Na tuihualte khempeuh in kei hong tum hi. Tua ciangin keimah in, ‘Na omna panin kei hong kihawlkhia hi. Na biakinn siangtho hong koici et kik thei ding ka hi hiam?’ ka ci hi. Tui in kei hong tuamcip a, ka kimkotah hong umcih hi. Tuipi tunga lopate in ka lu hong vialcip hi. Mualte’ bul tuipi taw dong ka va paisuk a, kong hong kikhaknelh tawntungna mun ka tun hangin tua Leihawmpi sung panin a nungta-in nong lato veve hi, Topa ka Pasian aw. Kei ka lung a kiat ciangin Topa kong phawk a, ka thungetna, na biakinn siangtho sung, nangma kiang hong tung hi. Kimanna a nei lo milim a biate in nangmah hong taisan uh hi. Ahih hangin ke’n ahihleh lungdamna aw tawh biakna kong pia ding a, ka ciamsa thu ka tangtungsak ding hi. Topa’ kiang pan hotkhiatna hong pai hi,” a ci hi. Tua ciangin Topa in tua ngapi sawl a, amah in lei keu tungah Jonah a luakhia hi. Tua ciangin Topa in Jonah tungah a nihveina thu gen a, “Kithawi inla, a lian mahmah Nineveh khuapi-ah va pai-in kong gensa thu taangko in,” a ci hi. Jonah zong kithawi pah a, Topa’ cih bangin Nineveh khua-ah a pai hi. Nineveh khua pen khuapi lian mahmah khat hi a, ni thum sung tak kikantan hi. Jonah zong khuasung lam manawhin kipan a, ni khat sung lam a pai khit ciangin, “Ni sawmli khit ciangin hih Nineveh khuapi kisusia ding hi,” ci-in a kiko hi. Nineveh khuamite kisikin Pasian um uh a, antan’ ding thu thangsakin, a golpen pan a kipan a neupen dongin puanhampi a silh uh hi. Nineveh khua kumpipa in tua thu a zak ciangin a kumpi tokhom tung pan dingkhia-in a kumpi puan suahkhia a, puanhampi silhin vut lakah a tu hi. Tua ciangin amah in Nineveh khuasung khempeuhah thu thangsakin taangkosak a, “Kumpipa le uliante’ thu tawh: Mihing ahi a, ganhing ahi zongin, bawnghon ahi a, tuuhon ahi zongin, kuamah in bangmah ciam thei lo ding, an ne thei lo ding, tui dawn thei lo ding uh hi. Mihing le ganhingte in puanhampi silhin Pasian’ tungah nakpi-in kiko ta uh hen. Mi khempeuh, a khialhnate uh le a gitlohnate uh panin kihei ta uh hen. Eite i sih loh nadingin Pasian kisikin a hehna damsak lo ding hi, kua in ci thei na hi uh hiam?” a cisak hi. Pasian in amau’ hihnate mu a, a khialhna uh panin a kihei uh a muh ciangin kisik a, amau tungah hih dingin a cihsa siatna a tungsak nawn kei hi. Ahih hangin tua thu hangin Jonah lungkim hetloin a heh hi. Topa’ kiangah thu ngen a, “Kong thum hi, Topa aw; ka gam sungah ka omlai pekin hici mah in teh, ci hi lo ka hi hiam? Hanciamin Tarshish khua-ah ka taisimna zong tua hang mah ahi hi; bang hang hiam cih leh nang pen a hehpih thei Pasian, a hehhak, a migi mahmah, siatna tunsak ding a kisiknuam Pasian na hihna kong thei hi. Tua ahih ciangin Topa aw, tu-in ka nuntakna hong la in, ci-in kong thum hi. Bang hang hiam cih leh ka nuntak sangin sileng kei a dingin a hoihzaw hi,” a ci hi. Topa in zong, “Na heh ding kilawm sa na hi hiam?” a ci hi. Tua ciangin khuapi pualamah Jonah paikhia a, nisuahna lamah ama a’ ding bukno khat lamin tua lai-ah a tu hi. Tua khuapi bang hong ci ding hiam, cih a en dingin a buk liim nuai-ah tu-in a ngak hi. Topa Pasian in zong Jonah a liah ding le a lungkhamna a tawldamsak dingin umgui khat a tungah a zaamsak hi. Tua ahih ciangin tua umgui hangin Jonah lungdam mahmah hi. Ahih hangin a zingsang khuavak ciangin Pasian in tua umgui lungno khat nesak ahih manin a keu hi. Ni hong suah ciangin Pasian in nisuahna lam panin huih a sa mahmah nungsak a, ni in zong Jonah’ luzang kapsuk veva ahih manin a gim mahmah hi. Tua ciangin amah in, “Ka nuntak sangin si leng kei a dingin hoihzaw hi,” ci-in a sih nading thu a ngen hi. Ahih hangin Pasian in Jonah kiangah, “Tua umgui hangin na heh ding kilawm sa na hi hiam?” a ci hi. Jonah in, “Ka heh ding kilawm sa tham loin hehlua-in ka si zongin kilawm ka sa veve hi,” a ci hi. Tua ciangin Topa in, “Nang in na gimpih lohpi, na khansak lohpi, zan khat thu-in hong piangin zan khat thu mahin a si tua umgui pammaih na sa hi. Tua ahihleh keimah in ganhing tampi tham lo, a taklam khut le a veilam khut nangawn a khenthei nai lo naupang tul za le tul sawmnih sangin a tamzawte’ tenna, a lian mahmah Nineveh khuapi pammaih sa lo ding ka hi hiam?” ci-in a dawngkik hi. Judah gam kumpi Jotham, Ahaz, le Hezekiah-te’ hun laitakin, Moresheth khuami Mikah tungah Topa in thu a pia hi. Samaria le Jerusalem tawh kisai-in Topa in Mikah tungah hih thute a lak hi. No minam khempeuhte aw, hih thu za un: Leitungah a teng mi khempeuhte aw, hih thu ngai un: Note’ langkhatah Topa Pasian in teci pang a, a vantung biakinn panin thu hong gen hi. Ama mun siangtho panin Topa hong pai a, amah in leitung mualsang dawnte hong siksuk ding hi. Meikhuk sungah khuainun a kikoih bangin ama khenuai-ah mualliante tuisuak ding a, mualtung panin tui a luangsuk bangin, guam sungah tua mualte luangsuk ding hi. Pasian’ tungah Israel-te’ mawhna le a khialhnate uh hangin hih thute khempeuh a piang ahi hi. Israel-te’ khialhna kua ngawh ding ihi hiam? Samaria mite ngawh ding ihi hiam? Judah gam sungah milim bia-in a khial kua ahi hiam? Jerusalem mite ahi hi. Tua ahih ciangin Topa in hih bangin ci hi: Samaria khuapi, gamlak a ninkholna mun, leenggui suanna mun lel dingin ka bawl ding hi. A khuasunga suangte zong guam sungah ka nilsuk ding a, a khuapi bulpite ka dawksak ding hi. A milim manphate khempeuh kisuzan gawp ding a, mei tawh kisusia ding hi. Pasian’ tungah a thuman lohna hangun mihingte in hih milimte nei uh ahih manin, a thuman lohna uh tawh kizui-in tu-in thuakkik ding uh hi, ci hi. Tua ahih manin kei kapin ka thum ding a, ka dahna thu ka lah nadingin khe guak le guaktangin ka vak ding hi. Gam-ui bangin ka ham ding a, vasa-kalaoh bangin ka tau ding hi. Bang hang hiam cih leh Samaria’ meima kidamsak thei lo hi; Judah in zong tua bangmah a thuak ding ahi ta hi. Ka mite’ tenna Jerusalem khua mahmah, tua siatna in hong ban ta hi. I guallelhna thu Gath khuamite theisak kei unla, na kahna uh amaute musak kei un. Bethleafrah khua sungah na lungkhamna uh langsakin, leivui lakah kikhuk un. Shafir khua-ah a teng mite aw, guaktangin maizumna tawh salin pai un. Zanaan khua-a teng mite, a hingin paikhia ngei lo ding hi. Bethezel khuamite’ kahna le thumna na zak uh ciangin, tua khua sungah belh ding munmuanhuai a om lohna na thei ding uh hi. Topa in Jerusalem kulhpi dongah gimna lianpi tungsak ta ahih manin Maroth khuamite nakpitakin patau uh hi. Lakhish khua-ah a teng mite aw, na sakol galkapte uh a leeng bulh pak un. Note in Israel-te’ khialhnateng zuikha na hih manun, Jerusalem zong a khialsakte na hi uh hi. Tu-in no Judah mite aw, Moresethgath khua, mangpha khak un. Israel kumpite in Akzib khua panin huhna ngah lo ding hi. Mareshah khuamite aw, note a hong zong ding pa ka hong paisak ding hi, Topa in ci hi. Adullam leihawm sungah Israel kumpipa bu ding hi. Judah mite aw, na it mahmah na tate uh, sal a suak dingin hong kilaksak ding ahih manin, amaute’ hangin na dahna limun na sam uh met unla, musane bangin na lu uh tolsak un. A lupna tungah lumin gitlohna a geelgeelte in gimna ngah tahen. Zingsang khua a vak ciangin, hihtheih ding hun a ngah phetun, a ngaihsutsa uh gitlohna a semkhia uh hi. Lo deih le-uh, mi-a’ sut uh a, inn deih le-uh, mi-a’ mah sut uh hi. Mite bawlsia-in, a inn le a neihsa uh a sut uh hi. Tua ahih ciangin Topa in hih bangin ci hi: Note’ tungah gimna tunsak ding ka ngaihsun a, tua gimna tawh na kipelh thei kei ding uh hi. Note a dingin hun hoih lo hi ding ahih manin kiphatsakna tawh na gamta nawn kei ding uh hi. Tua bang hun hong tun ciangin mite in note’ gim ngahna thugentehna-in zangin, dah la phuakin sa ding uh a, “Eite i sia khin taktak hi. Topa in i gam hong laksak a, ei a hong mante tungah hong piaksak hi,” ci ding uh hi. Tua ahih ciangin Topa’ mite lakah leitang a kihawm ciangin, kuamah in leitang na ngah kei ding uh hi. Amaute in kei kiangah, “Tua bang thu hong gen kei in. Tua bang thu gen dingin kilawm lo hi. Tua bangin Pasian in hong minsiasak lo ding hi,” hong ci uh hi. Israel mite aw, “ Topa a lung tom ta a, hihte khempeuh, ama hong bawl mah ahi hiam?” na cih ding uh kilawm lo hi. Ka thugenna kammalte, a thuman mite a dingin a hoih hi lo ahi hiam? Ahi zongin Topa in hih bangin hong ci hi: Note pen ka mite’ gal na suak uh a, galsung panin a hong ciahkik, lungmuang a a inn-ah a om mite’ puantualpi ngahte na sut uh hi. Ka mihingte’ numeite, amau’ inn nuam panin na hawlkhia uh a, a tate un a ngah ding keima thuphate na taansak paisuak uh hi. Tu-in ding unla paikhia un. Na khialhna hangun a lauhuai suksiatna tuak ding na hih manun, hih lai mun pen note a dingin mun nuam hi lo hi. Zuau genin khemna tawh thu gen kawikawi a, “Note a dingin leenggahzu le khamtheihzu tampi tak hong om ding hi,” a hong ci kamsangte pawl, note’ deih kamsangte ahi hi. Ahi zongin no Israel mi a omlaite khempeuh pel hetloin kong kaikhawm kik ding hi. Tuubuk sunga tuu khum bangin, gankhawk sungah tuuhon kaihkhop bangin note kong kaikhawm kik ding a, na gam sung uh, mi tampite’ husa tawh kidimkik ding hi, ci hi. Pasian in note a’ ding lampi hong honsakin hong paikhiatpih ding hi. Salsuahna khuapikulh panin paikhia-in na suakta ding uh hi. Kumpi ahi Topa mahmah in note hong makai ding hi. Israel a uk makaite aw, hih thu ngai un: Note in thutang thuman a deih dingin a kilawm hinapi-in, thuhoih deih loin thusia na deih zawsop uh hi. Note in mite’ vun na hing hawkkhiat uh a, a guh uh na hing kheuh uh hi. Ka mite’ sa na netum uh hi. A vun uh hawkin, a guh uh na satkham uh a, beel-a meh huan ding bangin na satnen gawp uh hi. Topa’ tungah huhna ngenin na kiko hun uh hong tung ding a, ahi zongin amah in note hong dawng lo ding hi. Note gamtatsia na hih manun, na ngetna uh hong ngai lo ding hi. Sum a piazo mite kiangah thunuam gen a, a pia lo mite kiangah gal tuah ding a gen kamsangte in mite lam a khialsak uh hi. Topa in tua bang kamsangte kiangah, “Keima mite lam khialsak na hih manun mailam thu gentheihna maang na mu nawn kei ding uh a, mailam thu peuhmah na gen thei nawn kei ding uh hi. Kamsangte aw, note’ hun beita ding a, ni in hong tumsan ta ding hi,” ci hi. Hih bang thugen kamsangte, a thugen kholhna uh Pasian in a tunsak loh manin maizumin mindai ding uh hi. Ahi zongin kei ahihleh, Israel mite tungah a mawhna uh a genkhia dingin Topa’ kha le a vang tawh ka kidim a, thutang gen ngamna ding lungsim ka nei hi. Ngai un! Israel a uk makaite aw. Note in thutang deih loin, thuman kimlai a khialin na hei uh hi. Mi thahna le thuman lohna tawh, Pasian’ khuapi, Jerusalem na lam uh hi. Khuapi ukte in sumgolh ngahtheihna ding ngaihsutna bek tawh thu khen a, siampite in sum ngahtheihna ding ngaihsutna bek tawh thu gen a, kamsangte in zong sum ngahtheihna ding ngaihsutna bek mah tawh mailam thu genkhol uh hi. Tua bang hinapi-in amaute in Topa, muanin nei uh a, “ Topa in eite hong ompih a, eite tungah siatna hong tung lo ding hi,” a ci uh hi. Tua ahih manin note’ hangin lo khawh bangin Zion kikho-in, Jerusalem, nin kipaihna phualpi hong suak ding a, biakinn omna mual, gamlak a suak ding hi. Mailam hunah Topa’ biakinn a omna mual, a sangpen mual hong suak ding a, minam tampi in hong zuan ding uh hi. Minam tampite hong pai-in, “Israel mite’ Pasian’ biakinn, Topa’ mualah va paito ni. Tua lai-ah ama deihna hong hilh ding a, ama deihna bangin i gamta ding hi,” ci ding uh hi. Bang hang hiam cih leh Zion panin thuhilhna hong gingkhia a, Jerusalem panin Topa’ thu hong paikhia hi. Amah in minam tampite’ thu khensak ding a, Israel gam panin a gamla pekah a om, minam vangliante’ thu khensak ding hi. Amaute in a namsaute uh lokhawhna tu-in seek ding uh a, a teipite uh singhiang heuhna temkawi-in seek ding uh hi. Minam khatlekhat kido nawn lo ding uh a, galkidona theikha nawn lo ding uh hi. A kuamah peuh lungnuamin a leenggui phung le a theikung nuai-ah tu hithiat ding a, kuamah in patausak nawn lo ding hi. Bang hang hiam cih leh Vanglian Topa mahmah in hih thu hong gen khinta hi. Bang hang hiam cih leh midangte in amau’ pasian ciat bia-in a thu mang ding uh a, ahi zongin eite in ahihleh eima Topa Pasian mah a tawntungin bia-in ama thu i mang ding hi. Topa in hih bangin ci hi: Keimah in gim ka piak ahi, sala om gimna a thuak mite, ka kaihkhop kik hun hong tung ding hi. Amaute, a cimawhin gamlapi-ah om uh a, ahi zongin keimah in amaute pansa kikin, minam vanglian khatin ka bawlkik ding hi. Tua hun a kipan a tawntungin Zion mual panin amaute ka uk paisuak ding hi. Pasian in a mite a etna Jerusalem khuapi aw, nidanga na vangliatna na ngahkik ding a, kumpi khuapi na suakkik ding hi. Bang hangin tu-in nakpitakin kap a, numei nausuak ding bangin na sa na hi hiam? Kumpi nei lo a, na thulamlakte si ahi hiam? Jerusalem khuamite aw, numei nausuak ding bangin na tha uh san un. Tu-in kumpi khuapi nusia-in, gam sung khua-ah a teng ding na hita uh a, Babylon khuapi a zuan ta ding na hi uh hi. Ahi zongin tua lai panin note hong kihonkhia-in, na galte uh khutsung panin Topa in hong khahkhia ding hi. Note a hong sim dingin minam tampi hong kikhawm uh hi. Amaute in, “Jerusalem kisusia ding a, i mit in hih khuapi a siasa-in mu ding hi,” a ci uh hi. Ahi zongin hih minamte in Topa’ lungsim tawng thei lo uh a, ancilna phualah anphalte kaihkhop bangin amaute kaikhawmin, a cilgawp ding ahihlam phawk lo uh hi. Topa in hih bangin ci hi: Jerusalem khuamite aw, kipan unla, na galte uh sugawp un. Sumngo khe le sik ki a nei bawngtal bangin note kong thahatsak ding hi. Minam tampite na sugawpzo ding uh a, amau’ neihsa teng keima-a’ na suaksak ding uh a, amau’ hauhna teng leitung buppi’ Topa’ neihsa na suaksak ding uh hi. Jerusalem khuamite aw, na kulh sung uhah lut un. Eite hong ki-umcih a, Israel makai pa a hong sim uh ahi hi. Bethlehem Efrathah khua aw, nang pen Judah gamah khua neupen khat na hi a, ahi zongin nang sung panin Israel-te a uk ding khat ka piangsak ding hi. Ama gui pen tangtawng pek tawh kizom hi. Tua ahih ciangin, numei naupaii nu, a nau a suah khit mateng, amau’ galte’ khut sungah Topa in a mite a pia phot hi. Ama hong khan ciangin sala a om a gammite a mipihte uh tawh hong kigawmkik ding hi. Amah in Topa’ thahatna tawh a mite uk ding a, Topa ama Pasian’ vangliatna tawh a uk ding hi. Leitung mi khempeuh in ama liatna phawk ding uh ahih manin ama mite lungmuang takin om thei ding uh hi. Amah in lungnopna hong omsak ding hi. Assiria mite in i gam hong simin i galdalna teng hong suk ciangin, amaute a do dingin i makai hatpen teng i sawl ding hi. A namsau uh tawh Nimrod’ gam ahi, Assiria gam zo ding uh a, Assiria mite in i gam hong sim ciangin amaute’ kiang panin eite hong honkhia ding uh hi. Tua ciangin a omlai Israel mite pen Topa in minam tampite a dingin a piak, lopate a nosak zing daitui, lopate a khangsak guahtui, a bang ding uh hi. Amaute in mihingte muanin nei loin Pasian bek a muang ding uh hi. A omlai Israel mite pen minam dangte’ lakah, gamlakah sa a beng, tuute a tuah ciangin manin balnen gawp a, a kam sung pan a honkhiazo a om lo, humpinelkai a bang ding uh hi. Israel-te in a gal khempeuh uh zogawpin a susiamang ding uh hi. Topa in hih bangin ci hi: Tua hun ciangin na sakolte uh hong paihkhiat sakin, na leengte uh ka susia ding hi. Na gam sung uha om khuapite susia-in, na galpanna munte uh ka phelkhia ding hi. Na mitphial siamte uh susia gawpin, ai a san thei mi kong omsak nawn kei ding hi. Note’ biak milimte le na biakna songte uh ka susia gawp ding a, note’ bawlsa nate na bia nawn kei ding uh hi. Na gam sung uha a om Asherah nusian milimte hong bawhkhiat sakin, na khuapite uh ka susia ding hi. Keima thu a hong mang lo minamte tungah hehna tawh phu ka la ding hi. Topa le Israel a kitotna ngai un. Topa aw, kipan inla, mual liante le mual neute mai-ah na thu sung in. No mual liante le a kip tawntung leitung bulpite aw, Topa’ thu ngai un. Topa in ama mite tawh thu nei a, Israel tawh thu kisel ding hi. Topa in hih bangin thu sung a, “Ka mite aw, note bang hong cihkha ka hi hiam? Tu-in hong dawng dih un! Bang hang hiam cih leh Egypt gam panin note kong paikhiatpih a, salsuahna panin ka hong honkhia hi. Note a hong makai dingin Moses, Aaron, le Miriam ka hong sawl hi. Ka mite aw, Moab Kumpi Balak in note sukna ding a vaihawmna teng, Beor’ tapa Balaam in ama nget bangin a sepna teng limtakin phawkkik un. Note hotkhiat nadingin ka sepna thu na theih nadingun Shittim le Gilgal kikal-a thupiangte ngaihsun kik un,” a ci hi. Vantung Pasian, Topa biak nadingin bang va keng ding ka hi hiam? Amah biakna-in hal dingin bawngno thaute va paipih ding ka hi hiam? Topa kiangah tuu a tul tulin va puakin, guntui bangin sathau va luangsak leng, tuate tawh amah lungdam ding ahi hiam? Ka mawhnate maisak nadingin ka ta upa pen tawh va bia ding ka hi hiam? Mun khempeuhah a om no mihingte aw, Topa in a hoih nate hong gen khinzo hi. Topa in note tung panin hong kalh thu in: Thuman thutang sem ding a, itna kip nei tawntungin, kiniamkhiatna tawh Pasian’ thu man’ ding ahi hi. Topa, zahtak ding kilawm hi. Khua sungah amah hong kiko a, “Ngai un, khuapi sungah a hong kikhawm mite aw. Thuman lopi-in a ngah uh, migilote’ innsunga van omte, keima deih loh tawitehna man lo zatnate, mangngilh thei ding ka hi hiam? Tawikhaina man lo le tawisuang man lo a zangte, khahkhong ding ka hi hiam? Na mihaute uh mizawngte tungah tatsia mahmahin, na khuasung mi khempeuh uh zuaugen vive ahi uh a, a kam un khemna thu bekbek gen hi. Tua ahih ciangin na mawhna hangun note suksiat ding ka kipan ta hi. An na nek hangun na kham kei ding uh a, na gil uh kiallai veve ding hi. Na na koihcing uh hangin phatuam lo ding hi. Galte in tua na koihcing uh nate susia veve ding hi. Khai na tuh uh hangin an na la kei ding uh hi. Oliv gah na cil uh hangin a thau na zangkha kei ding uh a, leenggah na cil uh hangin a zu na dawnkha kei ding uh hi. Bang hang hiam cih leh Kumpi Omri’ gamtatna zui-in, ama tapa Kumpi Ahab’ sep khempeuh na sem uh a, amau’ gamtat khempeuh na zui uh hi. Tua ahih manin note kong susia ding hi. Minam dangte in note hong nuihsanin, amaute’ simmawhna na thuak ding uh hi. Kei a kamsia hi’ng! Singgah le leenggah a heu hun laitakin a gilkial mipa tawh ka kibang hi. Leenggah nek ding om nawn lo a, ka lunggulhgulh theigah beita hi. Leitungah mihoihteng bei khinta a, Pasian’ tungah a thuman mi kuamah om nawn lo hi. Mihoihteng si khinta hi. Mi khempeuh in mi thah ding bek ngaihsun uh a, a kuamah peuh in a mipihte thah ding bek hanciam uh hi. A sia lama gamtat ding siam mahmah uh a, uliante le thukhente in sumgolh ngenin, miliante in amau’ deihteng pulak uh a, kipawlin vaihawm khawm uh hi. Amaute lakah a hoihpenin a kineite, lingkung bang hi a, a thutang pena kineite, ling hiam bang hi lel uh hi. Pasian in amaute a hilhkholh bangin, gim a piak ding hun hong tungta a, a lungman’ hun ding uh hong hita hi. Na vengte’ thu upin nei kei inla, na lawmte zong muanin nei kei in. Na ang a lum na zi kiang nangawnah thu na gen ding kidawm in. Tuhun ciangin tapate in a pate haibawl a, tanute in a nute langpan’ uh a, mote in a teeknu uh langneih uh hi. Mi khat a dingin ama innkuanpihte mah a gal a suak mawk hi. Ahi zongin ke’n ahihleh Topa mah ka en ding a, kei hong suaktasak Pasian ka ngak ding hi. Ka Pasian in ka thu hong ngai ding hi. Ka galte aw, kei tungah lungdam kei un. Ka puk hangin ka thokik veve ding hi. Khuamial sungah ka om hangin Topa in khuavak hong pia ding hi. Topa tungah khialkhin ka hih manin ama hehna tawlkhat ka thuak ding hi. Ahi zongin a tawpna-ah kei hong huh ding a, a man lopi-in a hong kibawlna teng hong bawlphat sakin, amah in hong honkhia ding hi. Tua hun ciangin ka galte in hih thu hong mu ding uh a, “Na Topa Pasian, koi-ah om ahi hiam?” ci-in a hong tawng ka galte a maizum ding uh hi. Amaute guallel ding uh a, kongzing buannawng bangin a kisikgawp mu-in, kei ka nuam ding hi. Jerusalem khuamite aw, na khuapi kulh uh a kiciankik ding hun hong tung ding a, tua hun ciangin na gamgi uh nakpitakin kikhan ding hi. Nisuahna lam Assiria gam pan hitaleh, leitaw lam Egypt gam pan hitaleh, a gamlapi tuipi khen’ pan le a gamlapi mualte- mun khempeuh panin na mite uh hong ciahkik ding uh hi. Ahi zongin a tungah a teng mite’ gitlohna hangin, leitung pen sehnel gamkhing a suak ding hi. Topa aw, nangma tuu ahi na mite hong cing in. Gamnuam leihoihna sungah amau guakin om uh hi. Tanglai huna mah bangin, Bashan le Gilead gam nuamah amaute gamtasak in. Egypt gam pan na paikhiat hun lai uh bangin, amau a dingin a lamdang nate ka bawl ding hi. Minam dangte in hih thu mu ding uh a, minam thahat hinapi-in a maizum ding uh hi. Lamdang sa-in kam khat zong pau lo ding uh a, hih thu a zakzakna-un a bil uh ngong liang ding hi. Amaute in gul bangin leivui namin, a bokvak ganhingte bangin hong awmtal ding uh a, a bukna uh munmuanhuaite panin lau-in a lingsa-in hong pusuak ding uh a, Topa Pasian hong kihta ding uh hi. Topa aw, nang tawh a kibang Pasian dang om lo a, a omlai na mite’ mawhna nangmah in na maisak hi. Nang na heh paisuak kei a, na itna kip nong lak hi. Kote nong khasiat kik ding a, ka mawhnate uh hong sawpkhiat sakin, tuipi taw-ah nong paihsak ding hi. Ka pu ka pate uh tungah na ciamsa bangin, Abraham’ suanlekhakte ahi nangma mite tungah na cihtakna le nong itna kip nong lak ding hi. Hih pen Nineveh khua tawh kisai thu genna hi a, Elkosh khuami Nahum’ maangmuhna a kiciamtehna lai ahi hi. Topa Pasian in amah a demte koihkhong lo a, amah a langpangte gim pia-in a galte thukkik hi. Topa lungduai mahmah a, a vang zong lian mahmah a, ahih hangin mimawhte khahkhong ngei lo hi. A paina peuhpeuhah huihpi nungin pingpei kipei a, ama paina hanga leivui leeng meiipi kai tawh kibang hi. Amah in tuipi a tai ciangin tuipi kangcip pah a, gunpite zong kangcipsak hi. Bashan gam keugawpin Karmel Mual kausan a, Lebanon Mual a om pakpalhte a vul hi. Ama mai-ah mual liante ling a, mual neute a tuisuak hi. Ama mai-ah leitang kicim a, leitung le a tunga om khempeuh a ling uh hi. Ama hehna kua in nangzo ding a, ama lunghamna kua in thuakzo ding ahi hiam? A hehna, meikuang bangin hong khahkhia a, ama mai-ah suangtumpite kitamzan hi. Topa hoih hi; lungkham hunin a mite huh a, amah a beel mite limtakin a kem hi. Tuikhang in a suksiat bangin a langte susiagawp a, a galte khempeuh khuamial sungah a nawtkhia hi. Bang hangin Topa sawm ngam na hi hiam? Amah in nang hong susia ding hi. Amah a su peuhpeuh a dingkikzo om ngei lo hi. Amaute, linglom bangin om uh a, zulesa tawh kidiahin a om laitakun ham bangin kihaltum ding hi. Nineveh khuapi aw, gitlohna tawh thu vaihawmin, Topa a sawm mite, nang’ sungah om hi lo ahi hiam? Topa in ama mite tungah hih bangin thu gen a, “Assiria mite thahatin a tam mahmah hangin, amaute kisusia-in maimang ding uh hi. No ka mite na hih uhleh, khatvei lai-in kong gimsak khit hangin tu-in note kong gimsakkik nawn kei ding hi. Note’ tungah Assiria mite’ aana neihna ka beisak ding a, note hong khihna sikkhaute ka sutat ding hi,” ci hi. Topa in Assiria mite tawh kisai-in hih bangin thu pia hi: “Note na cimang ding uh a, na pasian-te uh biakinn sunga om milimte ka susia ding hi. Note siahuai lua na hih manun na hankhuk ding uh a bawlbawl ka hi ta hi,” a ci hi. En un, mualtungah kamtai pa hong tai a, gualzawhna ding thupha hong gen ding ahi hi. Judah mite aw, pawi bawl unla, Pasian’ tungah na ciam bangun gamta un. Bang hang hiam cih leh migilote kisusiacip khin a, na gam uh hong simkik nawn lo ding hi. Nineveh khuapi aw, nang hong kisim ta a, nang hong sugawp ding pa hong tungta hi. Na kan uhah pang unla, lampi vil un. Kithawi unla, galdo dingin kiging un. (Israel mite, a galte’ sukgawp ma, a nidang ngeina bangun Topa in a omsakkik ding a kipan ahi hi.) A galkapte in lum san hong keng uh a, puan zong a san mah hong silh uh hi. A sim dingin hong kipan uh a, a sakol leengte uh khuaphia bang a, a sakolte uh hong koplen’ uh hi. Sakol leengte kongzing lakah kilehsuk kilehto uh a, lamkabom khempeuh nawkin leeng kawikawi uh hi. Meikuang bangin kikhawh uh a, khuaphia bangin leeng uh hi. Galkap mangte kikaikhawm a, a galkapte uh thu pia uh hi. Amaute, kan phung lam kidenna uh a, a lum uh tawh kidal uh hi. Tui luanna gei-ah a om kulhkongpite kisatkham a, kumpi inn sungah patauhna om hi. Kumpinu kimanin kipuakhia a, a nasemte thumin kap uh a, dahin dip hum uh hi. Tuibeem kitam panin tui a kikhawhkhia bangin, Nineveh khuapi panin mite a taikhia uh hi. “Khawl un, khawl un,” a kicih hangin khat beek nunghei lo uh hi. Ngunte la un! Khamte la un! Khua sungah sum manpha bei cih om thei lo a, van manpha zong bei cih om thei lo hi. Nineveh khuapi kisusia a, kinusiacipin gamkhing suak hi. Launa lungsim tawh kidimin khukte ling kelkel a, mi khempeuh lunggimin a mai-ah sisan teng lo hi. Humpinelkai note an a kivakna mun, humpinelkai le a note lungmuang a a omna mun, humpinelkaite’ kua tawh a kibang koi-ah omta ahi hiam? Humpinelkai in sa manin a zi le a tate a dingin a sa balnensak a, a kua sung khempeuh sa tawh kidimsak ngei hi. Vanglian Topa in hih bangin ci hi: “Kei pen note’ gal ka hi a, na sakol leengte uh ka haltum ding hi. Na humpinelkai note uh namsau in vatmai ding a, midangte’ na na suh teng uh ka susiamang khin ding hi. Na tangmite uh’ awging koi mahah kiza nawn lo ding hi,” ci hi. Zuauna le mi thahna tawh a kidim khuapi, van top ding tampi a omna khuapi, tu-in a siacip ding hita hi. Ngai un! Sakol kisatna a ging, leengpei kigawi, sakol koplenna kheging, sakol leeng a tuan lauhlauh gingte! Sakol tung tuangte’ galsimna, namsau phia zalzal! Teipi tee zalzal! Misi luanghawmte simzawh ding hi lo, kiciangin vum venvan! Tuate tung mah tawnin gal kido! Nineveh khuapi in a paktatna hangin gim thuak hi. Ngaihbaang mel pua-in bum siamna nei a, minamte zolin a khem hi. Tua ahih manin Vanglian Topa in hih bangin ci hi: “Nineveh khuapi aw, gim kong pia ding hi. Na nik kong hawkkhiatsak ding a, minamte in na guak omna hong mu ding uh a, na zumhuaina teng hong mu ding uh hi. Nang hong huatbawlin ninbulom tawh kong kidimsak ding a, mite in lamdangsakna tawh nang hong en ding uh hi. Nang hong mu khempeuh nungkik gaihin, ‘Nineveh khuapi siacip ta hi; kua in khasiat ding ahi hiam?’ ci ding uh hi. Ahi zongin nang a hong hehnem nuam kuamah om lo ding hi,” ci hi. Nineveh aw, Thebes khuapi sangin a ginazaw kisa zenzen na hi hiam? Amah zong, a kimkotah tui in umcih a, amah a dal ding nei a, a kulh dingin a kimkotah tui om hi. Nail Gun dung, gam khempeuh uk khin ahih manin genzawh lohin a vang lian hi. Put mite le Libya mite zong ama pawl ahi hi. Tua bang hinapi-in, Thebes khuamite kipuakhia-in sal a suak uh hi. Konglak mun citengah a tate uh kisatlum hi. A miliante, sikkol kibulhin kipuakhia a, amau a man a galte un amaute a hawm uh hi. Nineveh khuapi aw, nang zong zukham bangin khua na phawk kei ding a, na galte kiang panin tai-in bukna na zong ding hi. Na kulh muanhuaite pen theigah min zun mahmah tawh kibang ding a, a kung sing lecin a gah na kamsung a hong tu tawh kibang ding hi. Na galkapte, numei bang hi lel ding a, na galte a lut zawh loh nadingin na gam sung kihu zo lo ding hi. Na kulhkongpi zawlte mei in kangtum ding hi. Hong ki-umcihna na nan nadingin tui tawi-in na kulhte ciang beh inla, leiseek-a seek dingin buan cilin, leiseekna kuang a baihsa-in nei talecin zong, tua bang na hih laitakin mei in hong kangtumin galte in hong vatlum ding hi. Kauphe honpite in an a nektum bangin nang na beimang ding hi. Kauphe bangin tampi tak na pha khin uh hi. Vana aksi sangin a tamzaw sumbawl mi na om khinta uh hi. A kha zalin a leengmang kauphe honpi bangin tu-in amaute om nawn lo uh hi. Na uliante uh ahihleh, phalbi hun lai-in kulh tungah a bawm miamua, ni a suah ciangin leengkhia mangin, a omna mel a kithei nawn lo kauphe hon tawh kibang uh hi. Assiria kumpipa aw, na gam sung a ukte si ta a, na uliante ihmu paisuak uh hi. Na mite, mualtung tengah kithehthang a, inn-ah a kaikhawm ding kuamah om nawn lo hi. Na liammate, a dam theih nading om lo a, na meimate a dam thei lo pawl ahi hi. Na thuakna thu a za mi khempeuh in lungdamin a khut uh beeng ding uh hi. Bang hang hiam cih leh na gitlohna a thuak kha lo kuamah om lo hi. Hih pen kamsang Habakkuk tungah Topa in maangmuhna sungah a gen thu ahi hi. Topa aw, bang tanvei huhna hong ngen ding a, hong za loin om niloh ding na hi hiam? Gimna thuak ung, ci-in bang tanvei hong kiko ding a, hong hon loin, om niloh ding na hi hiam? Bang hangin hih bang siatnate le lungkhamnate hong musak na hi hiam? Kisuksiatna le kisukgawpna in hong umcih a, kitotna le kiselna, mun citengah om hi. Thukham in thu neizo loin a mawkna suak a, thu a manin kisem ngei lo hi. Thutang thute kilehhei-in, migilote in thuman mite zo zawsop hi. Tua ciangin Topa in a mite kiangah thu gen a, “No, a thuman lo ka minamte aw, na kiim uha a om minam dangte en dih un; lamdang na sa mahmah ding uh hi. Note kiangah thu hong kigen ciangin na up zawh hetloh ding uh thu lamdang khat tu-in a bawl ding ka hi hi. A omkhong thei lo, a kihtakhuai Khaldea mite, a vang ka liansak ding a, leitung khempeuhah amaute pai-in gam khempeuh a zo mangkhin ding uh hi. Amaute lauhuai-in, kihtakhuai mahmah uh a, a gen khempeuh uh nial theih hi lo hi. “A sakolte uh kamkei sangin tai hatzaw a, keivom gilkial sangin kihtakhuai zaw hi. Gamlapi pek panin a sakol tung tuangte hong kipan uh a, a sakolte un lei-ah a khe phut uh hi. Muvanlai in sa a bawh bangin a galte a leenlak uh hi. “A susiagawp dingin hong kuankhia uh a, a sukkhak ding uh mi khempeuh lau mahmah uh hi. A galmatte uh tam mahmah a, sehnel zahin kisim zo lo hi. Kumpite, simmawhbawl uh a, uliante nuihsan lel uh hi. Kulh muanhuaite zong nuihsan lel uh a, a kulhpua-ah lei sungvumin tua tungtawnin khuapi a la uh hi. Tua ciangin huihnung bangin paisuak uh a, amau’ hatna bek a suang uh hi,” a ci hi. Topa aw, a cil pek a kipan a tawntungin Pasian na hi a, nang pen a tawntungin keima Pasian, a Siangtho Pa na hi hi. Topa aw, kote gim a hong pia dingin amaute na seh hi bek hi. Ka belh Suangpi aw, kote nong thuhilhna ding bekin amaute’ tungah vang a pia bek na hi hi. Ahi zongin hih a gilo a zuautat mite bangci thuakzawh na hi hiam? Hih bang siatna a mu dingin na mit siangtho lua a, a gamtatsia mite na thuakzo kei hi. Tua ahih manin amaute sangin a dikzaw mite a suksiatna-ah bang hangin daicip na hi hiam? Bang hangin tuipi ngasa bang lelin mihingte bawl a, a uk ding a om lo ganhing note bangin omsak na hi hiam? Amaute in ngasa mat bangin sikkawi tawh mite man uh a, a ngen uh tawh khuhin manin a ngenpi uh tawh kaikhia a, tua bangin a matna hangun lungdamin a awng uh hi. A ngente un amau’ deih peuhpeuh ngahsak ahih manin, amaute in a ngente uh bia-in biakpiakna zong a pia uh hi. Amaute in a namsau uh zangin, hehpihna mel nei loin mi that ding ahi uh hiam? Ka khuadakna tausang tungah kahto-in, Topa in kei tungah bang hong gen ding a, ka lungkim lohna teng hong bangci dawn hiam, cih ka ngak hi. Tua ciangin Topa in hih bangin hong dawng a, “Nangmah ka hong muhsak thu khempeuh a simnop mahmah dingin tungman peek tungah gelh in. Hih thu a tunna ding hun hi pah nai lo ahih manin lai-in ciamteh in. Ahi zongin hong tung baihta ding a, kong lah khempeuh a manin hong tung ding hi. A tung hak tawh a kibangkha ahi zongin ngak keikai in. Ka seh hun a cin ciangin hong tung takpi ding a, zekai lua nawn lo ding hi. Tua a hong tung ding thu pen ‘A gilo mite suakta lo ding a, thuman mite ahihleh Pasian tungah a cihtak manun nungta ding hi,’” a hong ci hi. Hauhna pen zuaupi hi a, a huaiham mite kiphasakin omkhong thei lo uh a, hankhuk mah bangin, phazo, cih omsak thei lo uh a, lungkim hun cih nei thei lo uh hi. Tua ahih manin minam dangte a ban banin simin a uk uh hi. A zawhna gammite in amau a zo mite simmawh bawlin, “No a’ ahi lopi kimlai no a dingin na la uh a, ahi zongin tu-in gimna na thuak ding uh hi. Note tungah lei hong bate khem bawlin, bang tanvei na hauhna uh behlap nuam lailai na hi uh hiam?” ci ding uh hi. Note in na phawk ma-un note mahmah leiba neite na suak ding uh a, na leiba uh a meet hong kisungsak ding hi. Galte in note hong lingsak keuhkeuh ding a, na nate uh hong laksakmang khin ding hi. Note in minam dang tampite’ na na sut uh a, tu-in a omlai mite in note’ na hong sut ding uh hi. Bang hang hiam cih leh note in mi thatin, khuapite le a sunga teng mite na bawlsia uh hi. Mi’ van na suhna uh tawh na mite uh hausakin, lauhuaina le siatna a ngah loh nadingin na innkuan uh bawl na hih manun gim na ngah ding uh hi. Note’ vaihawmna mah in na mite uh tungah maizumna hong tun a, minam dangte na suksiatna uh tawh, note mahmah’ siatna ding a bawl na hi uh hi. Note a hong langpan’ dingin kulh suangte nangawn hong kiko ding a, innkamte in zong kikopih ding uh hi. Note in mi thahna tawh khuapi satin, mawhna tawh khuapi phut na hih manun gimna na ngah ding uh hi. Na zawh uh minamte’ nasepnate a mawkna suakin, amau’ sepsateng khempeuh a khu-in leengmang hi. Hih thu pen Vanglian Topa in a piansak ahi hi. Tuipi, tui tawh a kidim mah bangin Topa ’ minthanna theihna tawh leitung kidim ding hi. Na hehna uh tawh na gamvengte uh niamkhiatin na mindaisak uh a, zukham bangin amaute hoisak na hih manun gimna na ngah ding uh hi. Tua ahih manin note in zong minthanna ngah loin maizumin mindaina tawh na kidiah ding uh hi. Note mahmah in na hoi dongun na dawn ding uh hi. Topa in gimpiakna hai, note hong dawnsak ding a, na minthanna uh mindaina a suak ding hi. Note in Lebanon gam singkungte phuk na hih manun note zong hong kiphuk ding a, a ganhingte zong that na hih manun tu-in ganhingte in note hong lausak ding uh hi. Gam sung khempeuhah mi thatin na bawlsiatna hang uh le khuapite le a sunga tengte na suksiatna hangun note tungah hih bangin a hong piang ding ahi hi. Milim, banga kimang ahi hiam? Mihingte’ bawltawm na khat hi lel a, thuman hong gen thei lo hi. Tua bangin a pau thei beek lo pasian a bawlpa in muanin a neih bang phatuam ahi hiam? Sing khatpeuh a kibawl na khat kiangah, “Khanglo in,” ci-in, a pau thei lo suangtum kiangah, “Tho in,” ci na hih manun gimna na ngah ding uh hi. Hih bang milim in note hong hilh thei ding ahi hiam? Ngun le kham tawh limtakin a kizut hangin a sungah nuntakna om lo hi. Topa, a biakinn siangtho sungah om hi; leitung mi khempeuh ama mai-ah dai dide-in om ta uh hen. Kamsang Habakkuk in hih bangin thu ngen hi: Topa aw, nangma sepsa thute ka za a, lamdang ka sa mahmah hi. Na hih ngeisa na liante, kote’ hunin zong hong hih kik in. Na heh hun ciang nangawnin zong hehpihna lungsim hong nei in. Teman khua panin Pasian hong pai a, Paran Mual panin Siangtho Pa hong pai hi. Ama minthanna vang in vanpi tuam a, leitung khempeuh, amah phatna tawh kidim hi. Khuaphialep taang bangin amah hong pai a, a khutsung panin khuavak taangkhia a, tua pen a vangliatna a koihna mun ahi hi. Ama mai-ah cinatna tungsak a, tua nungah sihna zuisak pah hi. Amah a khawl ciangin leitung ling a, amah in a et ciangin minam khempeuh ling uh hi. Tangtawng lai-in a totsa, tanglai mual liante kitam kham a, a om tawntung mual neute kimetcip hi. Kush gammite a lau mahmahna, Midian gammite a linna ka mu hi. Topa aw, na sakolte tungah nang hong tuangin, na gualzawhna leengte tawh nong pai nadingin, gunpite tungah na heh suak a, tuipi tungah thangpai na hi hiam? Na thal a lawn dingin na kithawi a, na thallawng sungah na thaltang a dimin om a, na keek in leitung kapkham hi. Mual liante in nang hong muh ciangin ling uh a, van panin guah tampi hong zu hi. Leinuai-a om tuite ging zuazua a, tuihualte in a sangpipi banto hi. Na thaltang leeng a muh ciang, na teipi tee zalzal a muh ciangin, ni le kha a omna sanah a khawlcip uh hi. A hehsa-in leitungah na pai a, a sinso sa-in minamte na tuancil hi. Na mite a honkhia dingin na paikhia a, na teel kumpipa, a honkhia dingin na kuankhia hi. Migilote’ makai pa na sugawp a, a nungzui khempeuh tawh zong na sumai hi. Mi cimawhte, mun simthamah a sukgawp bangin, kote a hong suthang dingin huihpi bangin hong pai laitakin na thal tawh a galkap mangpa na kaplet hi. Nangmah in na sakolte tawh tuipi na tuancil a, tui lianpite phuan zuazua hi. Hih thute khempeuh ka zak ciangin ka pumlin’ a, lau lua-in ka muk ling sapsap hi. Ka guh ka taang hong zen a, guh nei lo bangin ka pukcipsuk hi. Ko hong simgawp mite Pasian in gim a piak ding hun daitakin ka ngak khikhe ding hi. Theigahte a hut khin a, leengguite a gah kei zongin, oliv kungte gah lo a, lo-ah an a piang kei zongin, tuu khempeuh a si khin a, ganbuk khempeuh a hawm khin zongin, Topa Pasian pen hong honkhia pa ahih manin lungdamin ka kipak lai veve ding hi. Topa Pasian, keima thahatna ahi hi; sakhi khe bangin ka khe hong zaptelsak a, mun sangna-ah lungmuang takin kei hong paisak hi. Amon’ tapa Josiah, Judah gam kumpi ahih laitakin, Topa in Zefaniah’ tungah hih thu a pia hi. Zefaniah’ pa Kushi hi a, Kushi’ pa Gedaliah hi a, Gedaliah’ pa Amariah hi a, Amariah’ pa pen Kumpi Hezekiah ahi hi Topa in hih bangin thu gen a, “Leitung a om na khempeuh ka susia ding hi. Mihing le ganhing, vana leeng vasa le tui sunga ngasa, a vekpi-in ka susia ding hi. Migilote ka susia ding a, leitung a om mihing khempeuh ka susia ding hi. Topa ahi keimah in hih thu ka gen khin hi. “Judah gammi khempeuh susia mangin, Jerusalem khuami khempeuh ka sumai ding hi. Baal milim biakna a them banglai khempeuh le tua milim na a sem siampite ahi a, keima siampite ahi zongin, a vekpi-in ka sumai ding hi. Innkhum zangah kahto-in, ni, kha, le aksi a bia mi khempeuh ka susia ding a, keimah hong bia-in, keima tungah thuman ding gen napi-in, Milkom pasian’ min tawh a kiciam teiteite zong, ka susia ding hi. Lam pialin, kei hong zui nawn lote, thudong dingin kei kiangah hong pai nawn lote, ka susia ding hi,” a ci hi. Topa Pasian’ mai-ah gamdai takin om un! Topa’ ni hong naita hi. Topa in biakna-a sa gawh bangin a mite a go dingin kithawi a, a gawh ding mite siansuah khin hi. Topa in hih bangin thu gen a, “Tua bangin mite a kigawh ni-in, uliante le kumpipa’ tapate, le gamdangte’ ngeina a zuite khempeuh, gim ka pia ding hi. Lawki mite bangin biakinn sungah a lamte, khemna le thahna tawh a ngah uh vante tawh, a topa uh’ inn a dimsakte khempeuh, tua ni mahin gim ka pia ding hi,” a ci hi. Topa in hih bangin thu gen a, “Jerusalem khua-a om Ngasa Kulh kongpi-ah mite’ kikona na za ding uh a, tua khuapi Veng Nihna sungah mite’ kahna le mual neute tungah a puak zaizai na za ding uh hi. Khuapi Veng Nuainung sungah a teng mite aw, hih bang gamlumna na zak uh ciangin kapin thum un. Bang hang hiam cih leh sumbukte khempeuh si ding uh hi. “Tua laitakin Jerusalem khuasung meivak tawh ka zong ding a, thuphawk loin, a ngeina bangun omcip a, ‘ Topa in a pha hitaleh a sia hitaleh bangmah bawl ngei lo hi,’ a ci mite, gim ka pia ding hi. Amau’ neihsa khempeuh kisut ding a, a innte uh kisuksiatsak ding hi. Inn a lam hangun a sungah teng kha lo ding uh a, leenggui a suan hangun a leenggahzu dawn kha lo ding uh hi,” a ci hi. Topa’ ni hong naita a, nai mahmahin hong tung hathat hi. Tua Topa’ ni hong tun ciangin galhang pente nangawn cimawhin kap ding uh hi. Tua ni pen heh mahmah ni, lungkham sinkham ni, tuahsia-in kisuksiat gawp ni, khua zingin mai mial ni, meiipi kai-in huihpi nun’ ni, galdona ding peengkul a kitum ni, kulhnei khuapite le a tausangte a kisimna-in galkapte a kiko ni hi ding hi. Topa in hih bangin thu gen a, “Mihingte tungah lungkhamna lianpi ka tungsak ding a, amaute in mittaw bangin khua a zawt ding uh hi. Keima tungah amaute hong khial uh ahih manin, a sisan uh tui bangin kithehthang ding a, a luanghawm uh leilakah muatcip ding hi,” a ci hi. Topa’ heh thuk ni hong tun ciangin a ngun le a khamte un amaute honkhia zo lo ding hi. Ama hehna meikuang in leitung khempeuh kangtum ding a, thakhat thu-in leitung a teng mi khempeuh a sumai ding hi. A maizum thei lo minam aw, hoihtakin thu ngaihsun in. Ansi bangin hong kizapkhiat ma, Topa’ hehna na tungah hong tuk ma, Topa in a hehna hong lah hun a tun ma-in thu ngaihsunin kikheel in. Kiniamkhiatin, Topa’ thupiakna a mang Judah gammi khempeuh aw, Topa’ kiang zuan un. A manin gamta unla, kiniamkhiat un. Tua hileh Topa’ hehna hong kilat ciangin, tua hehna hangin gimna panin na peng khathei ding uh hi. Gaza khuapi-ah kuamah om nawn lo ding a, Ashkelon khuapi kisusia ding hi. Ashdod khuamite suntangpi-in kihawlkhia ding a, Ekron khuamite kipaikhiatpih mang ding hi. Tuipi gei-ah a gual ten, no Filistia gammite aw, gimna na ngah ding uh hi. Filistia mite’ tenna Kanaan leitang aw, Topa in nang tungah thu hong khenzo hi. Mi khempeuh a beimang dongin hong susia ding hi. Tuipi gei-a om leitang aw, tuute’ gamtatna mun, gamlak na suak lel ding hi. Judah mi a omlaite in na gam sung luah ding uh a, amaute in tuucinna-in nei-in, Ashkelon khuasunga om innte sungah zanin lum ding uh hi. Topa ahi amaute’ Pasian in amaute ompih ding a, citheisakkik ding hi. Vanglian Topa in hih bangin thu gen a, “Moab mite in ka mite a simmawhna, Ammon mite in ka mite a zahkona le ka mite’ gam a sutgawp dingin, a kisaktheih paunate uh ka za khin hi. Kei pen a nungta Israel Pasian ka hih mah bangin, Moab mite, Sodom mite bangin kisusia-in, Ammon mite, Gomorrah mite bangin kisusia-in, a gam sung uhah lingkung bek pozo-in, a gam uh cikhuk tawh kidimin a sia tawntung suakin, a suaktalai ka mite in a neihsa uh sutin, a gam uh a laksak tak kei leh, ci-in ka kiciam hi,” a ci hi. Amaute in Vanglian Topa’ mite simmawhin kihisak uh ahih manin, a kiphatsakna hangun Moab mite le Ammon mite in hih bangin gim thuak ding uh hi. Topa in amaute lausakgawp ding a, leitung pasian-te, neubawl gawp ding hi. Tua ciangin minam khempeuh in amau’ gam ciat panun amah bia ding uh hi. No Ethiopia mite zong, Topa in hong that ding hi. Topa in leilu lamah a khut hong zanin Assiria gam susia ding a, Nineveh khuapi susia gawpin sehnel gam a suaksak ding hi. Tuu le bawnghonte tua khua sungah lumin, gan namkim khawk a suak ding hi. Gunva le gunvapite bangtung zawlah tuangin, tawlet-ah keising khuangin, sangkil tungah va-ak ham ding hi. Taamtak sing tawh a kilam innte maimang ding hi. A vangliatna a kisaktheihpih, lungmuang takin a om khuapi, tu-a bangin piang ding hi. Leitungah amau’ khuapi a lian penin ngaihsun uh hi. Tua hinapi-in gamlak suakin, gamsate’ omna suak ta hi. A mu mi khempeuh in lamdang sa-in kigaih ding uh hi. Ama mite mah nengniamin, thumang loin a tatsia, Jerusalem khuapi in gimna ngah ding hi. Topa’ thu ngai nuam lo a, a thuhilhna sang nuam lo hi. Topa muang nuam lo a, a Pasian naih nuam lo hi. A uliante, humpinelkai gilkial bang a, a thukhente, keivom gilkial bang uh hi. Zingsang khuavak mateng a saguh nek a nusia nuam lo, a huaiham gamsate tawh kibang uh hi. A kamsangte kihisak uh a, kamsang citak hi lo uh hi. A siampite in a siangtho nate ninsak uh a, amau angsung ding bek a khualna-un Pasian’ thukham lehhei uh hi. Ahi zongin tua khuapi sungah Topa omin, a thuman na bek sem a, a khialin gamta ngei lo hi. Zingsang simin mihingte tungah pelh ngei loin thutang lak hi. Ahi zongin tua lai-a mihing thuman lote, a sia-in gamta teitei uh a, maizumna mel theithei lo uh hi. Topa in hih bangin thu gen a, “A kiphasak mite ka nilkhia a, a gal panmunte uh ka susia hi. A kongzing lampite uh ka kinusiacipsak a, tua lampi kuamah in tawn nawn lo hi. A khuapi uh kisia gawpin kinusia a, a sungah kuamah om nawn lo hi. Tua ahih manin ka mite in kei hong zahtakin ka thuhilhna ngai ding uh a, mangngilh lo ding uh hi, ci-in ka ngaihsun hi. Ahi zongin a gamtatsiat ngei bangun gamtalai veve uh hi,” a ci hi. Topa in hih bangin thu gen a, “Tua ahih ciangin minamte ka mawhsak ni hun dong kei hong ngak phot dih un. Minamte le kumpi gamte kaikhawmin, ka hehna ka thuaksak ding, ka lungsim ka khensat khin hi. Ka hehluatna meikuang tawh leitung khempeuh kangtum ding hi. “Tua ciangin minamte’ lungsim ka hei ding a, amaute in keima tung bekah thu hong ngenin, lungsim kikhatin ka na hong sem ding uh hi. A gamlapi Ethiopia gam pekah a om, a kithehthang ka mite nangawn in biakna hong puak ding uh hi. Tua hun ciangin ka mite in kei nong lehdona hangun maizumna ding bangmah om nawn lo ding hi. Note lak panin a kiphasak, a kihisak mite ka hawlkhia ding a, Jerusalem khua-a ka mual siangtho tungah kei nong lehdo nawn kei ding uh hi. Note lakah a kiniamkhiat, mineute bek, ka suaktasak lai ding a, keima tungah huhna hong ngen ding uh hi. Israel mi a omlai sunte, midangte tungah gilo nawn lo ding uh a, zuauthu gen nawn loin, mi khem ding zong ngaihsun nawn lo ding uh hi. Amaute cithei-in lungmuangin om ding uh a, kuamah kihta nawn loin om ding uh hi,” a ci hi. Zion tanu aw, nakpitakin la sa inla, Israel aw, lungdamin kiko in. Jerusalem tanu aw, na lungsim khempeuh tawh lungdam in. Topa in na galte hong phiatkhiatsak khin a, hong langpang khempeuh hong hawlkhiatsak khin hi. Topa ahi Israel kumpipa nang tawh hong om a, na launa ding bangmah om nawn lo hi. Tua ni ciangin Jerusalem khuapi kiangah, “Zion khuapi aw, lau kei in. Na khut thazawsak kei in,” kici ding hi. Topa na Pasian un note hong ompih a, ama vangliatna in hong gualzosak hi. Note tungah Topa lungkim ding a, ama hong itna tawh hong thakbawl ding hi. Note’ hangin Topa lungdamin la sa ding a, pawi hun sungah mi a lungdamte bang ding hi. Topa in hih bangin thu gen a, “Note a dingin a lauhuai thu ka beisak khin a, na mindaina teng uh kong paihkhiatsak khin hi. En un, tua hun ciangin no a hong bawlsiate gim ka pia ding a, a khebaite honkhia-in, a kipaikhiatpih mite ka ciahpihkik ding hi. Amau’ maizumna uh minthanna ka suaksak ding a, mi khempeuh in amaute a phat ding uh hi. Tua hun ciangin, a kithehthang na mite uh kong kaikhawm ding a, leitung mi khempeuh in note hong phat ding uh hi. A tawpna-ah note na cithei kik ding uh hi,” Topa in ci hi, a ci hi. Persia gam uk kumpi Darias in a uk a kum nihna kum, a kha gukna a ni masa ni-in, kamsang Haggai tungah Topa in thu gen hi. Tua a thugen pen, Shealtiel’ tapa Zerubbabel, Judah gam ukpa le Jehozadak’ tapa Joshua, siampi lianpen pa tungah gen ding ahi hi. Vanglian Topa in thu gen a, “Hih mite in, biakinn lamkik ding hun nai lo hi, ci uh hi,” a ci hi. Tua ciangin kamsang Haggai tungah Topa in hih bangin thu gen a, “Ka mite aw, ka biakinn a siacipin a om laitakin, inn hoihpipi sungah note na om ding uh kilawm sa na hi uh hiam? Tua ahih ciangin Vanglian Topa in ka hong cihin-ah: Tu laitak a na omzia uh limtakin ngaihsun un. Khaici tampi na tuh uh hangin an tawm bek na la uh a, annek ding na neih tei uh hangin na kham ding uh na nei kei uh hi. Dawn ding leenggahzu na neih tei uh hangin na kham ding uh na nei kei uh hi. Puansilh ding na neih tei uh hangin a lumkhop ding na nei kei uh hi. Sum thalawhte in zong a khamkhop ding uh thalawh zo lo uh hi. Tua ahih ciangin Vanglian Topa in ka hong cihin-ah: Tu laitak a na omzia uh limtakin ngaihsun un. Tu-in mualtungah kuanto unla, sing sui un. Tua singte tawh biakinn lamkik le-uhcin kei ka lungkim ding a, nong biak ding uha kilawm bangin kei nong bia thei ding uh hi. “An hau dingin na kilamet uh hangin tawmcik bek na nei uh hi. Na neihsunte nangawn uh inn na tunpih uh hangin kong mutkhiatsak mang khin hi. Bang hangin tuacih ka hi hiam? Note khempeuh, nomau’ inn ding ciat lamin na manlah uh a, ka biakinn a siapi-in na koihdakna hang uh ahi hi. Tua thu hangin guah zu lo a, leitang panin bangmah khangkhia zo lo hi. Keimah in gam sung teng, mualtung khempeuh, leitang pana a piang kung khempeuh, mihing, ganhing, le mite’ nasepna khempeuhah keuna ka tungsak hi,” a ci hi. Tua ciangin Sheatiel’ tapa Zerubbabel, Jehozadak’ tapa Joshua ahi siampi lianpen pa, le salsuahna panin hong ciahkik mi khempeuh in Topa ahi amau’ Pasian’ thu mang uh a, Topa Pasian’ kamtai ahi kamsang Haggai’ gen bangin gamta-in, Topa zahtakin a lau uh hi. Tua ciangin Topa’ kamtai Haggai in mite tungah Topa’ thugente gensawn a, “ Topa in note kong ompih hi,” ci hi, ci-in a gen hi. Tua hi a, Topa in Judah gam ukpa Zerubbabel, siampi lianpen pa Joshua, le salsuahna panin a hong ciahkik mi khempeuh’ sungah biakinn lamnopna lungsim a guan hi. Vanglian Topa, amau’ Pasian’ biakinn a lam dingin hong kithawi uh a, Darias in kumpi a sep a kum nihna kum, a kha gukna a ni sawmnih le ni li ni-in biakinn lam hong kipan uh hi. Tua kum mah, a kha sagihna, a ni sawmnih le ni khat ni-in kamsang Haggai tungah Topa in thu gen a, Judah gam ukpa Zerubbabel, siampi lianpen pa Joshua, le mi khempeuh tungah thu a gen dingin sawl a, “Nidanga biakinn a hoihna dan a ciamteh theilai na om uh hiam? Tu-in bangci na sa uh hiam? Note’ muhna-ah a gen taak het lo tawh kibang ding hi. Tu-in note kuamah lungkia kei un. Note tawh hong omkhawm ka hih manin nasep kipan un. Egypt gam panin na paikhiat lai-un, note kong ompih tawntungna ding thu kong ciam hi. Tu-in zong note hong ompihlai ka hih manin lau kei un. “A sawt loin vanpi le leipi, tuipi le leitung ka lokgawp ding hi. Minam dang khempeuh lokgawp ding ka hih manin a neihsa uh sum le paite, hih munah hong kipuak ding a, biakinn sungah a dimin van hong om ding hi. Leitung a a om ngun le kham khempeuh keima-a’ ahi hi. Biakinn thak pen a lui sangin hoihzaw-in thupizaw ding hi. Hih biakinn-ah cihtheihna le nopsakna kong pia ding hi,” cisak hi. Gam uk kumpipa Darias in a uk a kum nihna mah, a kha kuana a ni sawmnih le ni li ni-in kamsang Haggai tungah Topa in thu gen leuleu a, “Hih thu tawh kisai-in siampite’ ngaihsutna dong in: Mi khatpeuh in biakna-a a kipia sa siangtho themkhat, a puantualpi thep kawmah puakha hen la, tua a puantualpi tawh anlum khat peuhpeuh ahi a, a kihuan an khat peuhpeuh ahi a, leenggahzu, ahih kei le oliv thau, ahih kei leh an nam khat peuhpeuh ahi zongin sukha leh, tua a sukkhak an pen biakna an siangtho a suak ding hiam?” ci-in a dongsak hi. Tua bangin a kidot ciangin siampite in, “Tua puantualpi in a sukkhak ante, biakna an siangtho suak tuan lo ding hi,” ci-in a dawng uh hi. Tua ciangin Haggai in, “Mi khat in, misi tawh a kisukkhak manin mi nin a suah khit ciangin hih ante khat peuhpeuh lawngkha leh tua a lawnkhak ante a nin a suak ding hiam?” ci-in a dong hi. Siampite in, “A nin suak ding hi,” ci-in a dawng uh hi. Tua ciangin Haggai in thu gen a, “ Topa in hih bangin ci hi: Tu-a nong dawnna uh mah bangin hih minam dangte’ sepna khempeuhah tua bangin piang ahih manin, biakna tau tungah a piak uh na khempeuh a nin suak hi. “Note tungah a piangsa thute limtakin ngaihsun un. Topa’ biakinn lam ding na kipat ma-un bangci na hi uh hiam? An seu sawmnih pha ding ci-in ansal-ah na pai uh ciangin seu sawm bek na pha a, leenggahzu thawlpi sawmnga pha ding ci-in leenggahzu kholna beelpi-ah na pai uh ciangin thawlpi sawmnih dim bek a na pha hi. Na an ciin khempeuh uh cingteek sakin ka kausansak a, tuate nangawn a susia dingin gialpi ka kiatsak hangin note na kisik nuam kei lailai uh hi. Tu-in, kha kuana a ni sawmnih le ni li ni, biakinn bulpi a kiphuh khit, tuni a kipanin limtakin ngaihsun un. Na ansal uhah na upmawhzah sangun an na tawmzaw lai ding ahi hiam? Leenggui le theikung, mang kawlsing le oliv kungte gah nai lo lai ding ahi hiam? Tua bang hi nawn lo ding a, tuni a kipanin note thupha kong pia ding hi, ci hi,” a ci hi. Tua kha a ni sawmnih le ni li ni mahin Topa in Haggai tungah a nihveina thu genkik a, “Vanpi le leipi a lokgawp ding ka hihna thu, Judah gam ukpa Zerubbabel kiangah gen in. Kumpipa’ gam khempeuh lumletin a vangliatna uh a beisak ding ka hi hi. Leengte le leeng hawlte ka lawnthal ding a, sakol leengte le a tung tuangte puk ding uh a, amaute khatlekhat kithatlum ding uh hi. Ka nasem Zerubbabel aw, tua ni ciangin nang hong la-in ka mite’ kumpi dingin kong bawl ding hi. Bang hang hiam cih leh nang pen ka hong teelpa na hi hi, Vanglian Topa in ci hi, ci-in gen in,” a ci hi. Persia gam uk Kumpipa Darias in a uk a kum nihna, a kha giatna sungin Topa in kamsang Zekhariah tungah thu a gen hi. Zekhariah pen Berekhiah’ tapa hi a, ama pu Iddo ahi hi. Topa in Zekhariah kiangah, “Mite tungah hih bangin thu gen in: ‘Na pu na pate uh tungah Topa ahi keimah ka heh mahmah hi. Ahi zongin tu-in kei kiangah hong ciahkik le-uhcin, kei zong note kiangah kong paikik ding hi. Na pu na pate uh bang nawn kei un. Nidanga kamsangte in amaute kiangah ka thu gen uh a, gamtatsia gamta loin, a mawh nawn loh nading hilh uh hi. Ahi zongin amaute in ka thu ngainuam loin, ka thu hong mang lo uh hi. Tu-in na pu na pate uh koi-ah om ahi hiam? Tua kamsangte nungtalai sa na hi uh hiam? Ahi zongin ka nasem ahi kamsangte’ tungtawnin ka hilhkholhna le ka thupiaknate in note dongin hong sukhalo ding sa na hi uh hiam, ka ci hi. Tua ahih ciangin a tawpna-ah amaute kisik uh a, hih dinga ka lungsimah ka geelsa bangin amau’ gamtatna tawh kizui-in gim a pia ka hihna thu a phawk uh hi,’ ci in,” a ci hi. Darias in a uk a kum nihna kum, kha sawm le khatna ahi Shebat kha ni sawmnih le ni li ni-in Topa in kei tungah thu hong gen a, zanin maang hong musak hi. Topa’ vantungmi khat sakol san khat tungah a tuang ka mu hi. Kuam sunga a om mui singkungte lakah amah khawl a, ama nungah sakol dang a san, a gial, a kang om hi. Tua ciangin keimah in, “Sia aw, hih sakolte bang a cihnopna ahi hiam?” ci-in ka dong hi. Amah in hong dawng a, “Bang a cihnopna hiam cih kong lak ding hi. Hih sakol tung tuangte pai kawikawi-in leitung a en dingin Topa in a sawl ahi hi,” hong ci hi. Tua ciangin mui kung lakah a khawl Topa’ vantung mite kiangah amaute in, “Leitung khempeuh ka en kawikawi khin uh a, leitung khempeuh khuaphawk loin nuamtakin om uh hi,” ci-in thu a zasak uh hi. Tua ciangin Topa’ vantungmi in, “Vanglian Topa aw, Jerusalem khuapi le Judah gam khuapite tungah kum sawmsagih sung na heh khinta hi. Amaute hehpih loin bang tanvei omlai ding na hi hiam?” ci hi. Tua ciangin Topa in dikna le hehnepna kam tawh vantung mite dawng a, Vanglian Topa in ama tungah a gensa thute khempeuh keimah in ka taangko sawn nadingin tua vantungmi in kei hong sawl a, “Ka khuapi siangtho Jerusalem, nakpitakin itin ka lunghimawh hi. Tua bangin nuamtakin a om hithiat minamte tungah ka heh mahmah hi. Ka mite tungah ka hehna ki-ip tentanin ka om laitakin, hih minam dangte in ka mite’ gimna nasiasak semsem uh hi. Tua ahih ciangin Jerusalem khuapi tungah ka hehpihna a lak dingin ka hong paikik hi. Tua khuapi sungah ka biakinn kilamkik ding a, khuapikulh zong kiciangkik ding hi, Vanglian Topa in ci hi, ci-in gen in,” hong ci hi. Tua ciangin vantungmi in ka taangkona ding hong genkik leuleu a, “Ama khuapite nakpitakin cithei kikin, Jerusalem khuapi a hehnep kikna ding, le ama khuapi-in a neihkikna ding, Vanglian Topa in gen hi, ci-in gen in,” hong ci hi. Ka khuadak leh saki li ka mu hi. Bang a cihnopna ahi hiam, ci-in vantungmi kiangah ka dong hi. Amah in hong dawng a, “Judah mite le Jerusalem mite a thehthang gawp leitung vangliatnate a cihnopna ahi hi,” hong ci hi. Tua ciangin Topa in sek tawi mihing li hong lak hi. Hih mite, bang hih ding ahi hiam, ci-in ka dong hi. Amah in hong dawng a, “Hih saki lite in Judah mite thehthang gawp a, a lang uhah kuamah pang ngam lo ahih manin, Judah gam sugawpin a mite a thehthang gawp minamte, tu-in hih sek tawi lite in lausakin a lawnthal ding ahi hi,” hong ci hi. Ka muhna dang khat leuleu-ah, a khut sungah tehna khau a tawi mi khat ka mu hi. Koi-a pai ding na hi hiam, ci-in ka dot ciangin amah in, “Jerusalem khuapi a sauna ka theih nadingin a teh dingin a pai ding ka hi hi,” hong ci hi. Tua ciangin vantung mipa hong paikhia a, vantung midang khat in amah na dawntuah hi. Tua ciangin vantungmi a masa pa in a dawntuah pa kiangah, “Va tai inla, tehna khau a tawi tangvalpa kiangah hih thu va gen in. Jerusalem khua sungah mihing le ganhing tam mahmah ding ahih manin Jerusalem kulhhuam sungah ta zo lo ding uh hi. Tua khuapi a hu dingin meikulh bangin Topa mahmah a omna ding, le tua khua sungah a minthanna tawh a tenna ding thu, Topa in kam ciamzo hi, ci-in va gen in,” a ci hi. Topa in ama mite kiangah, “Mun khempeuhah note kong thehthang khin hi. Ahi zongin tu-in Babylon panin taikhia-in Jerusalem-ah ciahkik un. Babylon-ah a om mite aw, Zion-ah tai un,” ci hi. Hih bangin maang ka muh khit ciangin, ama mite’ na a sutgawp minam dangte kiangah thu a gen dingin Vanglian Topa in kei hong sawl a, Topa’ mite a su mi peuhpeuh in a mit nauta bangin a manphapen khat a su ahi hi. Topa mahmah in note hong su ding a, nidanga note’ na hong sepsak mite in tu-in note’ nate hong lehsuh kik ding uh hi, hong cisak hi. Hih bangin thu hong pian’ ciangin Vanglian Topa in kei hong sawl ahih lamtak na thei ding uh hi. Topa in hih bangin hong ci hi: “Jerusalem mite aw, lungdamin la sa un. Note tawh a hong omkhawm ta ding ka hi hi,” ci hi. Tua hun ciangin Topa kiangah minam tampi hong pai ding uh a, ama mite a suak ding uh hi. Topa in note hong ompih ding a, tua ciangin note kiangah kei a hong sawl ahihna thu na thei ding uh hi. Judah mite pen gam siangtho sungah Topa’ neihtuam hong suakkik ding a, Jerusalem khua pen ama it penpen khuapi hong hi kik ding hi. Mi khempeuh aw, Topa’ mai-ah gamdai-in om un. Bang hang hiam cih leh a siangtho ama omna mun panin amah hong paikhia ta hi. Topa in maang hong musak a, Topa’ vantungmi mai-ah siampi lianpen pa Joshua’ mawhna a zong dingin a kiangah Satan zong a om ka mu hi. Topa’ vantungmi in Satan kiangah, “Satan aw, Topa in nang hong mawhsak hi. Jerusalem a it Topa in nang hong mawhsak hi. Hih Joshua pen meikhuk sung panin a kiteenkhia singkhuah tawh kibang hi,” a ci hi. Joshua ahihleh vantungmi mai-ah ding a, puan a nin mahmah a silh hi. Vantung mi in ama sawltak van midangte kiangah, “Hih mipa’ silh a puan ninte suahkhiatsak un,” ci-in thu a pia hi. Tua ciangin vantungmi in Joshua kiangah, “Na mawhna teng kong paihkhiatsak khin a, tu-in na silh dingin puan thak ka hong pia ding hi,” a ci hi. Tua ciangin a sawltak van mite thu pia a, Joshua’ lu tungah dial siangtho a khipsak ding uh a sawl hi. Topa’ vantungmi tua munah a din sung mahin, amaute in zong Joshua, dial siangtho khimsakin, tua khit ciangin puan siangtho zong a silhsak uh hi. Tua ciangin Topa’ vantungmi in Joshua kiangah limtakin thu gen a, Vanglian Topa in hih bangin ci hi: “Ka thukhamte zui-in kong sawl thute na sep leh, ka biakinn sung le biakinn huang sungteng na uk ding a, hih ka kianga om vantung mite’ thu ka ngaih bangin nangma thu zong ka hong ngai ding hi. Tua ahih ciangin siampi lianpen pa Joshua aw ngai in: Ama siampipih ahi no a dangte in zong ngai un. Note pen mailam thuhoihna ding lim na hi uh hi. Sing bangin A Sel a kici min nei khat kong paisak ding hi. Joshua’ omna mai-ah, mai sagih a nei suang khat ka koih hi; tua suang tungah lai ka gelh ding a, ni khat sungin hih gammite’ mawhna ka paihkhiatsak ding hi. Tua ni ciangin note khempeuh in leenggui le theikungte hau-in nuam na sa ding uh a, na vengte ciat un hong nekpihin hong lungdampihna dingun na sam ding uh hi, Vanglian Topa in ci hi,” a ci hi. Kei tawh a kiho vantungmi mah hong paikik a, a ihmu kimlai a kiphong bang keekin kei hong khanglosak hi. Amah in, “Bang na mu hiam?” ci-in hong dong hi. Kei zong, “Kham tawh a kibawl meivakkhuam khat ka mu hi. Tua meivakkhuam in meivak sagih nei a, meivaktui koihna ding hai khat zong a khuam dawnah om hi. Tua meivak sagihte in meivakkhau nei ciat uh hi. Meivakkhuam gei-ah oliv kung nih zong om a, meivakkhuam lang tuakah om uh hi,” ci-in ka dawng hi. Tua ciangin kei zong vantungmi kiangah, “Sia aw, hihte bang a cihnopna ahi hiam?” ci-in ka dot ciangin amah in, “A cihnopna thei lo na hi hiam?” ci-in hong dawng a, kei zong, “Sia aw, ka thei kei hi,” ci-in ka dawngkik hi. Tua ciangin vantungmi in kei kiangah, “ Topa in Zerubbabel tungah hih bangin thu gen hi: Galkap tam neihna hang hi lo, nangma vangliatna hang zong hi lo, keima tung panin na ngah vangliatna bek tawh na ma na tunzo ding hi. Thuhaksa pente nangawn in na ma hong khaktan zo lo ding hi. Biakinn na lamkik ding a, mite in, ‘Hoih mahmah hi,’ ci-in a ot ngeingai laitakin a khupna suang na ciang ding hi, hong ci hi,” a ci hi. Topa in kei tungah thu hong gen hi. Amah in, “Zerubbabel in biakinn bulpi phut khin a, biakinn lam zong a zo ding hi. Tua ciangin ka mite in, amaute kiangah nang kong sawlna thu hong thei ding uh hi. A maa uh a telh loh manun ka mite lungkia uh a, ahi zongin Zerubbabel in biakinn lam nasep a makaihna a muh uh ciangin a lung uh damkik ding hi,” hong ci hi. Vantung mi in, “Meivak sagihte pen, leitung khempeuh a etna Topa’ mittang sagih ahi hi,” hong ci hi. Tua ciangin kei zong ama kiangah, “Meivakkhuam pang tuak a om oliv kung nihte bang a cihnopna ahi hiam? Oliv thau a luankhiatna kham tuizawl nihte’ gei-a om oliv hiang nihte bang a cihnopna ahi hiam?” ci-in ka dong hi. Amah in, “Thei lo na hi hiam?” ci-in hong dong a, kei zong, “Sia aw, thei kei ing,” ci-in ka dawng hi. Tua ciangin amah in, “Leitung khempeuh’ Topa’ na a sem dingin Pasian in teelin sathau a nilh mi nihte a cihnopna ahi hi,” hong ci hi. Ka khuadak kik leh huihlakah a leeng laizial khat ka mu hi. Vantung mi in, “Bang na mu hiam?” ci-in hong dong a, kei zong, “Laizial a leeng khat ka mu a, a dung pi sawmthum pha-in, a vai pi sawm le pi nga pha hi,” ci-in ka dawng hi. Tua ciangin amah in kei kiangah, “Leitung gam khempeuhah a tung ding hamsiatnate, hih lai tungah kigelh hi. Guta khempeuh, gam sung panin kisiakmang ding hi, ci-in laizial dal lang khatah kigelh a, a man lopi-in ka min tawh thuciam mi khempeuh zong kisiakkhia mang ding hi, ci-in a lang khatah kigelh hi. Vanglian Topa in hih samsiatna a khahkhiatna ding thu gen a, guta mite khempeuh le a man loin ka min tawh thuciam mite khempeuh’ inn sungah lut ding hi. Tua bang mite’ inn sungah a tawntungin hamsiatna omin, amaute a kipan a sing a suang, a vekpi-in sumai ding hi,” hong ci hi. Tua ciangin vantungmi hong kilang kikin kei kiangah, “Tu-a a hong pai ding en in,” hong ci hi. Kei zong, “Bang ahi hiam?” ci-in ka dong hi. Amah in hong dawng a, “Tua pen ciangpi hi a, gam sung khempeuh’ mawhna lim ahi hi,” hong ci hi. Tua ciangpi siin pen haknaw tawh a kibawl ahi hi. Tua bangin ka et laitakin haknaw kibawl tua ciangpi siin pen kidomto a, tua ciangpi sungah numei khat a tu hi. Tua ciangin vantungmi in, “Hih numei pen gitlohna lim ahi hi,” hong ci hi. Tua ciangin vantungmi in ciangpi sungah tua numei hensuk kik a, a siin tawh tua ciangpi a siinkik hi. Tua ciangin ka khuadak leh numei nih ka mu a, gun vapi bangin kha nei-in, keima lamah hong leeng uh hi. Van lamah tua ciangpi a leenpihto uh hi. Tua ciangin vantungmi kiangah, “Koi lai-ah leenpih ding ahi uh hiam?” ci-in ka dot leh amah in, “Biakinn khat a lamsak dingin Babylon gamah a leenpih ding ahi uh hi. Biakinn a lamsak uh a zawh uh ciangin, biak dingin tua ciangpi kikoih ding hi,” ci-in a hong dawng hi. Tua ciangin maang adang khat ka mu leuleu hi. Sumngo mual nih kikal panin sakolleeng li hong paikhia ka mu hi. A leeng masa pen sakol san in kai a, a nihna, sakol vom in kai a, a thumna, sakol kang in kai a, a lina, sakol gial in kai hi. Tua ciangin vantungmi kiangah, “Sia aw, hih sakolleengte bang a cihnopna ahi hiam?” ci-in ka dong hi. Tua ciangin amah in hong dawng a, “Hihte pen huihleeng li a cihnopna hi a, leitung khempeuhte’ Topa’ kiang panin a hong paikhia ahi uh hi,” hong ci hi. Sakol vomte in a kaih leeng pen leilu lam Babylon-ah a pai ding hi a, sakol kangte, nitumna lam, sakol gialte, leitaw lam, sakol sante, nisuahna lam gamah a pai ding ahi hi. Tua sakolte, paikhia-in leitung teng a et ding uh ngaklah mahmah uh hi. Tua ahih manin vantungmi in, “Pai unla, leitungteng va en un,” ci-in thu a pia hi. Amaute zong pai-in va en uh hi. Tua ciangin vantungmi in kei hong otsan a, “Leilu lam Babylon gamah a paite in Topa’ hehna damsak hi,” hong ci hi. Topa in kei tungah thu hong gen hi. Amah in, “Babylon gam salsuahna pan a hong ciahkik Heldai, Tobijah, le Jedaiah te’ hong piak leengte la inla, tua na lak ni mahin Zefaniah’ tapa Josiah’ inn-ah paipih in. Amaute’ hong piak ngun le khamte zangin kumpi lukhu khat bawl in la, Jehozadak’ tapa, siampi lianpen a sem Joshua khusak in. Ama kiangah, ‘Vanglian Topa in hih bangin ci hi: “Hih mipa pen sing bangin A Sel a kici mipa ahi hi. A omna peuhpeuhah amah cithei ding a, Topa’ biakinn lamkik ding hi. Amah pen Topa’ biakinn a lam ding pa hi a, kumpite’ ngah theih minliatna ngahin, ama mite uk ding hi. Ama kumpi tokhom gei-ah siampi khat om ding a, kithutuakin, kilemin na semkhawm ding uh hi,” ci hi,’ va ci in. Tua kumpi lukhu pen Heldai, Tobijah, Jedaiah, le Josiah-te pahtawi-in phawk nadingin biakinn sungah om ding hi,” hong ci hi. Gamlapi-a a teng mite hong pai-in Topa’ innlam nasep hong huh ding uh hi. Tua biakinn a kilamkik ciangin Vanglian Topa in note kiangah kei a hong sawl ahihna thu na thei ding uh hi. Topa na Pasian uh’ thupiaknate cingtakin na zuih nak-uhleh tu-a ka gen bangin a hong piang ding ahi hi. Kumpi Darias in a uk a kum lina, a kha kuana Khislev kha a ni li ni-in Topa in Zekhariah tungah thu gen hi. Tua ahih ciangin Topa in kei tungah thu hong gen a, “Gam sung mi khempeuh le siampite tungah hih bangin gen in: Amaute in a beisa kum sawmsagih sung kha ngana le kha sagihna sungin an tangin a kahna uh, kei hong pahtawina uh hi lo hi. A annek a tuidawnte uh zong, amau’ duh man bek ahi hi,” hong ci hi. Jerusalem cithei-in a khua sungah mi tampi om a, leitaw lam gam, nitumna lam gam, a kiim a pam khuapite-ah mi tampi tengin a om hun laitakin, tu-a bangmahin Topa in a kamsang masate’ tungtawnin a gensa thu ahi hi. Topa in Zekhariah tungah thu gen a, “Note in thu a tangin khenin, khatlekhat tungah itna le hehpihna kilakin, note lakah a om meigong, tagah, gamdang mite, ahih kei leh mizawngte gim pia loin, khatlekhat kiliatsakna ding na ngaihsut lohna ding uh thu ka hong piazo hi,” a ci hi. Ahi zongin amaute in mang nuam het lo uh a, hih thute ngaihsutin zong nei nuam lo uh hi. Amaute in a lungsim uh suangtum bangin saksak uh a, Vanglian Topa in tanglai kamsangte’ tungtawnin a gen thuhilhnate ngai nuam lo uh hi. Tua ahih manin Topa heh mahmah hi. Amaute ka hopih ciangin hong ngai nuam lo uh hi; kei zong amaute’ hong thungetna ka ngai kei ding hi, Vanglian Topa in ci hi. Tua ahih manin Topa in, “Huihpi’ mutkhiat bangin amaute thehthang gawpin, a theihngei nai lohna uh gam dangah amaute teng ding uh hi. Amau’ nusiat leitang hoih zong gamkhing suak ding a, a tungah kuamah om nawn loin daicip ding hi,” a ci hi. Vanglian Topa in kei tungah thu hong genin amah in, “Jerusalem mite ka itluatna hangin Jerusalem khuapi ka huh nuam mahmah a, hih banga ka itluatna in a galte tungah ka heh hong suaksak hi. Ka khuapi siangtho Jerusalem-ah ciahkikin ka teng ding hi. A citak khuapi, ci-in minthang ding a, Vanglian Topa’ mual pen mual siangtho kici ding hi. Jerusalem khuapi kongzing le lamkabomte-ah a tu dingin puteekte omkik ding a, teeklua kisa-in ciangkhut khunin pai ding uh hi. Kongzing khempeuhah numei naupang kimawlin phezaizai ding uh hi. “Tu-a a omlai note a dingin hih thu ahi thei lo ding tawh a kibat hangin kei a dingin ahi mawh ding thu hi lo hi. Nisuahna le nitumna gamte panin ka mite ka honkhia ding a, Jerusalem khua sungah ka tunpihkik ding hi. Amaute pen keima mi hi-in, kei zong amau’ Pasian ka hi ding a, amau tawh ka thuciamnate limtakin ka zui ding hi. “Thakhauhin lungsim hang un. Ka biakinn a kilamkikna ding a bul a kiphuh laitakin kamsangte in a gen thute mah a za na hi uh hi. Tua hun ma-in mi ahi a, ganhing ahi zongin na a sem dingin kuamah in cial zo lo a, galte kihtakna hangin kuamah a ututin om thei lo hi. Mi khatlekhat ka kidosak hi. Ahi zongin tu-in a suaktalai hih minamte, nidang ate ka bangsak kei ding hi. Lungnuam takin lokho singpua-in nuam a sa ding uh hi. Leengguite gahpha ding a, guah tampi zu-in lo-ah an tampi piang ding a, a suaktalai ka minamte tungah hih bang thupha khempeuh ka tungsak ding hi. A beisa hunah, Judah gammite le Israel gammite pen, minam dangte in kihamsiatna-in zang uh a, ‘Judah le Israel-te’ thuak bangin thuak un,’ kici uh hi. Ahi zongin note kong honkhia ding a, tu-in midangte in, ‘Judah le Israel bangin thupha ngah un,’ ci-in thupha kipiakna-in zang ding uh hi. Tua ahih manin na lungsim uh hangsak unla lau kei un. “Na pu na pate un kei hong hehsak ciangin amaute tungah siatna tunsak ding ka ngaihsun a, ka lungsim ka khiam het kei hi. Ahi zongin tu-in Jerusalem khua mite le Judah gammite tungah thupha piak ding ka ngaihsun hi. Tua ahih ciangin lunghimawh kei un. Hih bangin note gamta un: Note khatlekhat tungah thuman thutak kam kipau un. Thukhenna zumah, kilemna a piangsak ding thutang zang un. Khatlekhat kisiatsakna ding vaihawm kei unla, a man lopi-in teci pangin kiciam kei un. Zuauna, thuman lohna, le kibawlsiatnate ka deih kei hi,” hong ci hi. Vanglian Topa in kei tungah thu hong genin amah in, “Kha lina, kha ngana, kha sagihna, le kha sawmna sunga antannate pen, Judah gammite a dingin lungdamin kipakin pawi bawlna hun suak ta ding hi. Tua ahih manin thuman le kilemna deih pha un,” hong ci hi. Vanglian Topa in hih bangin ci hi: “Minam liante le khuapi liante panin Jerusalem-ah mi hong pai hun hong tung ding hi. Khuapi khat-a om mite in khuapi dang a om mite kiangah, ‘Vanglian Topa bia-in ama tung panin thupha ka ngen ding uh hi. Hong zui un,’ ci ding uh hi. A vanglian a thahat minamte zong Vanglian Topa a bia ding le ama tung panin thupha a ngen dingin Jerusalem-ah hong pai ding uh hi. Tua hun ciangin minam tuamtuamte sung panin mi sawm, Jew mi khat kiangah hong pai-in, ‘Pasian in nang hong ompihna thu za ka hih manun na nung hong zuisak in,’ ci-in thum ding uh hi,” a ci hi. Topa’ thugenna: Hadrak gammite’ gimtuahna ding Topa in thu khenzo a, Damaskas khuapi in zong tuak ding hi. Israel minam khempeuh, Topa -a’ ahih mah bangin leitung minam khempeuh zong Topa -a’ mah ahi hi. Hadrak tawh a kigizawng Hamath zong, Topa -a’ mah hi a, siamna a nei Taia khuapi le Sidon khuapite zong, ama a’ mah ahi hi. Taia khuapi in galnanna kulh bawl a, leivui zahin ngun le kham hau a, kongzing nin zahin kiciang venvan hi. Ahi zongin Topa in a neih khempeuh laksakin tuipi sungah paihsak ding a, a khuapi a haltumsak ding hi. Ashkelon khuapi in hih thu mu-in lau ding a, Gaza khuapi in zong gimlawh ding hi. A lametna teng bei ding ahih manin Ekron khuapi in zong gimlawh ding hi. Gaza khuapi in a kumpipa taan ding a, Ashkelon khuapi kinusiacip ding hi. Ashdod khuapi-ah minam dangte zong teng ding a, a kiphasak Filistia mite ka beisak ding hi. Amaute in sa, a si tawh ne nawn lo ding uh a, a kikham ante zong tang ding uh hi. A suakta sunteng, keima mite suak ding uh a, Judah mite lakah beh khat bang ding uh hi. Jebus mite mah bangin Ekron khua mite zong keima mi suak ding uh hi. Tua ciangin ka gam sung ka hu ding a, galte ka nawksak nawn kei ding hi. Ka mihingte’ thuakna mu khin ka hih manin migilote, ka bawlsiasak nawn kei ding hi. Zion mite aw, nakpitakin lungdam un. Jerusalem mite aw, lungdamin awng un. En un, na kumpipa uh hong pai hi. Amah, gualzawhna tawh hong pai hi. Ahi zongin kiniamkhiatna tawh hong pai a, sin nai loh lano tungah hong tuang hi. Galkidona leengte Israel gam pan beisakin, sakol galkapte, Judah gam pan ka lakhia ding a, galdona a kizang thalte kisusia ding hi. Na kumpipa un minam dangte lakah kilemna thu gen ding a, amah in tuipi mong khat pan tuipi mong khat dong, Eufratis Gunpi panin leimong dongin a uk ding hi. Sisan tawh a kikipsak, note tawh ka thuciamna hangin na salsuahna uh keugaw gam panin note ka hong suaktasak ding hi. Lametna a om no salte aw, ciahkik unla, a muanhuai mahmah na mun ngei uh zuankik un. Note’ thuaknasa a zah nihin thupha ka hong piakna ding tuni-in note kiangah ka hong gen hi. Grik mite, sim nadingin Judah, thal bangin keekin, Israel thaltangin ka zang ding a, Zion mite, namsau-in ka zang ding hi. Ama mite tungah Topa kilang ding a, a thaltang lotte khuaphia bang ding hi. Topa Pasian in peengkul tum ding a, leitaw lam panin a hong pai huihpi tawh a va kuankhia ding hi. Vanglian Topa in ama mite hu ding a, ama mite in a galte uh susia ding hi. Galdona sungah zukham bangin awng gawp ding uh a, a galte uh’ sisan luangsakgawp ding uh hi. Biakna site, biakna tau tungah hai a sun tawh kibangin a luangsak ding uh hi. Tuucingpa in a tuuhonte lauhuaina panin a hotkhiat bangin, tua ni ciangin Topa, amau’ Pasian in a mite a honkhia ding hi. Kumpi lukhu tungah a om suangmanphate bangin ama gam sungah a mite taang ding uh hi. Tua thu bangzah takin hoihin nuam ding ahi hiam? Anlim nekna in tangvalte thahatsak ding a, zulim nekna in nungakte thadimsak ding hi. Singkung lopa a sel hunin Topa kiang pan guah ngen un. Meii kaisakin, guah zusak a, ankung khempeuh a dumsak pa, Topa ahi hi. Mihingte in milim peuh thudotin nei uh a, a thu ngahte uh zuauthu le a mawkna hi lel hi. Mang khiathei-a kineite in lam lakkhial uh a, amau’ hehnepnate a mawknapi hi lel hi. Tua ahih manin tuu bangin mite mangthang uh a, makai a neih loh manun gimna a ngah uh hi. Ka mi a makaite tungah ka heh suak mahmah a, amaute gim ka pia ding hi. Judah mite pen Vanglian Topa ahi keima a’ hi a, amaute limtakin kemin, ka sakol galkap thahatte a suak ding uh hi. Amaute sung pan mi makaite, galkapmangte, gam ukte, hong khangkhia ding uh hi. Kongzing buannawng lakah a galte uh a tuancilgawp galkapte bangin amaute gualzo ding uh a, Topa in a ompih manin amaute in gal a sim uh ciangin a galte’ sakol galkapte zogawp ding uh hi. Judah mite ka thahatsak ding a, Israel mite ka honkhia ding hi. Amaute ka khasiat ding a, inn-ah ka ciahpih ding hi. Amaute cikmah hunin ka nial ngei loh bang keekin nuamtakin a om ding uh hi. Kei pen Topa, amau’ Pasian ka hi a, amau’ thungetnate ka pia ding hi. Israel mite, galkap hatte bang ding uh a, zukham lungnuam, bang ding uh hi. A suan a khakte un hih gualzawhna phawkin lungdam ding uh a, Topa’ bawlna hangin kipak ding uh hi. Amaute samin ka kaikhawm ding a, amaute honkhia-in a nidang zahin mi tampi ka phasak ding hi. Minam dangte lakah amaute ka thehthang hangin a gamlapi panin kei hong phawk ding uh hi. Amaute le a tate uh suakta-in, a vekpi-un inn zuanin hong ciahkhawm ding uh hi. Egypt le Assiria gam panin amaute ka ciahpih kik ding a, a gam a lei uhah ka tengsak ding hi. Gilead gam le Lebanon gamah zong ka tengsak ding a, gam khempeuhah mi a dim ding hi. Amaute in lungkhamna tuipi a phutkhak uh ciangin keimah in tuihualte ka vatmai ding a, Nail gun tuithukte kangcip ding hi. Assiria mite ka niamkhiat ding a, Egypt in a vangliatna taan ding hi. Ka mite ka thahatsak ding a, amaute in kei hong bia-in ka thu hong mang ding uh hi, Topa in ci hi. Lebanon aw, mei in na taamtak kungte a kattheih nadingin na kongpite hong in. Taaksan kungte aw, kapin thum un. Taamtak kungte puk khin a, a minthang singkungte kisia ta hi. Bashan tawsaw kungte aw, kapin thum un; gammang tupi singteng kiphukmang khinta hi. Tuucingte a minthanna uh bei khinta ahih manin dahin a kap uh hi. A tuulak inn uh kisusia khin ahih manin humpinelkaite’ hawkna za un. Topa ka Pasian in kei tungah thu hong gen a, “Gawh dingin a kikoih tuuhonte va cing in. Tuu neite in a tuute go uh a, ahi zongin amaute gim kipia lo hi. Amaute in a tuusa zuak uh a, ‘ Topa in thupha ngah tahen. Tu-in i hauta hi,’ ci uh hi. A tuucingte mahmah in a tuute uh hehpihna nei lo uh hi. Tua ahih ciangin hih gamah a teng mite ka hehpih nawn kei ding hi. Amaute a ukpa le a kumpipa’ khutnuai-ah mi khempeuh ka koih ding hi. Gam uk mite in gam sungteng susiagawp ding a, amau’ suksiatna panin kuamah ka honkhia kei ding hi,” hong ci hi. Tuu summeet bawlte in kei hong cial uh a, a kigo ding tuute a cing pa ka suak hi. Kei zong ciangkhut nih la-in khat pen “Hehpihna” ci-in min ka phuak a, a khat pen “Kipawlna” ci-in min ka phuak hi. Tua hi a, tuute a cingin kei ka om hi. Kha khat sungin tuucing adang thumte ka notkhia hi. Bang hang hiam cih leh amaute tungah ka lungduaizo nawn kei a, amaute in kei hong mudah uh hi. Tua ciangin kei zong tuuhonte kiangah, “Note ka hong cing nawn kei ding hi. A si dingteng si unla, a kisusia dingteng siacip un. A omlaisun teng khatlekhat kisanek un,” ka ci hi. Tua ciangin “Hehpihna” a kici ciangkhut la-in ka kuaitan a, minam khempeuh tawh ka bawl thuciamna ka phiat hi. Tua ahih manin tua ni-in thuciamna kiphiat hi. Tuu summeet bawlte in hong en giaugiau uh a, hih banga ka gamtatna panin Topa’ thugen ahihlam a phawk uh hi. Tua ciangin kei zong amaute kiangah, “Hoih na sak uhleh ka tuucin thaman hong pia un. Hoih na sak kei uhleh lah tang lel un,” ka ci hi. Tua ciangin ka thaman dingin ngun shekel sawmthum hong pia uh hi. Tua ciangin Topa in kei kiangah, “Biakinn sumkoihna sungah tuate koih in,” hong ci hi. Tua ciangin kei zong, kei tawh kituakin tam a sak mahmah uh tua dangka sawmthum la-in biakinn sumkoihna sungah ka koih hi. Tua ciangin “Kipawlna” a kici ciangkhut la-in ka kuaitan leuleu a, Judah le Israel a kipawlna kiphiat hi. Tua ciangin Topa in kei kiangah, “Khatvei tuucing nasep semkik inla, tutungin kimanna a nei lo tuucing nasep sem in. Ka tuuhonte a cing dingin tuucing khat ka koih a, ahi zongin ka tuu a sia dingte huh loin, a mangthangte zong loin, a liamte bawl loin, a cidamte zong an vak lo hi. Amah in tua tuu thau pente’ sate ne-in a khecinte nangawn hawkkhiatsak zawsop hi. “Kimanna a nei lo tuucingpa, a tuuhonte a nusia pa in gimna ngah ta hen! Namsau in a khut bantan hen la, a taklam mit satkham hen. A khut beimang hen la, a taklam mit tawcip hen!” hong ci hi. Vanpi zalin leitung piangsak a, mihingte tungah nuntakna a pia Topa in Israel mite tawh kisai-in thu gen a, “Leenggahzu bangin Jerusalem khuapi ka bawl ding a, a kiima om minam dangte in a nek ciangin khamin a hoi ding uh hi. Jerusalem khuapi a umcih uh ciangin Judah gam khuapi dangte zong umcih ding uh hi. Tua hun hong tun ciangin suangtumpi gik mahmah bangin Jerusalem khuapi ka bawl ding a, likkhiat a sawm minam khat peuhpeuh in liamlawh ding hi. Leitung minamdang khempeuh kipawlin Jerusalem a sim ding uh hi. Tua ni ciangin a sakolte uh ka lausak ding a, a sakol tung tuangte uh ka haisak ding hi. Ahi zongin Judah mite ka kem ding a, a galte uh’ sakolte, a mit ka tawsak ding hi. Tua ciangin Judah minamte in, ‘Jerusalem-a a teng mite, Vanglian Topa ahi amau’ Pasian’ hangin thahat uh hi,’ ci ding uh hi. “Tua ni ciangin Judah minamte, tulak kang le buhphual kang ka bangsak ding a, a kiima om minamdangte khempeuh a susia ding uh hi. Ahi zongin Jerusalem mite, a khuapi sungah lungmuangin a om hithiat ding uh hi. “Tua ciangin Judah galkapte tungah gualzawhna ka pia masa ding a, David’ suanlekhakte le Jerusalem khuamite’ minthanna pen Judah midangte’ minthanna sangin lianzaw tuan lo ding hi. Tua ni ciangin Topa in Jerusalem-a a teng mite hu ding a, a ginalo pente nangawn David zahin thahat ding hi. David’ suanlekhakte in Topa’ vantungmi le Pasian mahmah bangin amaute a makai ding uh hi. Jerusalem sim ding a hanciam minam khempeuh tua ni ciangin ka susia ding hi. “David’ suanlekhakte le Jerusalem khuamite’ tungah hehpihna lungsim le thungetna lungsim ka guan ding hi. Amaute in a sutlup uh mipa enin, ta khat neihsun a sihsuah mite bangin kap ding uh a, tacil a khuaisuahte bangin nakpitakin kapin thum ding uh hi. Tua hun laitakin Jerusalem khua sungah kapin thumna pen Megiddo zanglei-a Hadadrimmon pasian’ sihna hangin kahna le thumna zah mahin nasia ding hi. Gam sung khempeuhah a innkuankuanin dahin kap ding uh hi. David’ suanlekhakte sung panin a innkuankuanin kapin, a zite uh zong a tuam mahin kap ding uh hi. Nathan’ suanlekhakte zong a innkuankuanin kapin, a zite uh zong a tuam mahin kap ding uh hi. Levi’ suanlekhakte le a zite, Shimei’ suanlekhakte le a zite, le beh dang khempeuhte zong a behbehin, a zite uh tawh a tuam ciatin kapin a thum ding uh hi. “Tua ni hong tun ciangin David’ suanlekhakte le Jerusalem khuamite’ mawhna le nitnateng khempeuh a silsiang dingin tuinak khat hong phul ding hi. Tua ni ciangin gam sung panin milim khempeuh ka phiatsiang ding a, kuamah in a milim min nangawn uh phawkkha nawn lo ding uh hi. Kamsang zuautheite zong phiatin, milim biaknopna lungsim ka beisak ding hi. Mi khatpeuh kamsang a kineihlai teitei leh, a pianna a nu le a pa mahmah in kho ding uh a, ‘ Topa’ min paulamin zuauthu gen na hih manin na si ding hi,’ ci ding uh hi. Tua bangin thu a gen teitei le, a nu le a pa mahmah in tem tawh sunlum ding uh hi. Tua ni hong tun ciangin kamsangte in a maangmuh theihna uh kisialhpih ngam nawn loin, kamsangte bangin zong puan silh ngam nawn loin, kamsang zong kineih ngam nawn lo ding uh hi. Kamsang ka hi kei hi; lokho mi ka hi a, ka khan tawnin lokho-in a om ka hi hi, ci zawsop ding uh hi. Mi khatpeuh in, ‘Na awm a na liammate bang ahi hiam?’ ci-in a dot ciangin, ‘Ka lawmte’ inn khatah zukham sulin kitotna-a a liam ka hi hi,’ ci-in a dawng ding hi. “Namsau aw, ka tuucingpa a su dingin kipan inla, kei tawh nasem khawm pa langpang in. Tuucingpa sat in. Tuute kithehthang ding a, ka tuute gim ka pia ding hi. Leitung khempeuhah, sehthum suah sehnih si ding a, seh khat bek suaktalai ding hi. Tua a suakta sehkhatte pen meikhukah ngun a kisiansak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ thungetna ka pia ding hi. Keima mi ahihna uh amaute tungah ka gen ding a, amaute in kei pen amau’ Pasian ka hihna thu a kam uh tawh pulak ding uh hi,” a ci hi. Topa in na hong sep hun hong tung ding hi. Jerusalem khuapi kiluh gawpin, note’ muh mahmahin a na lakte uh hawm ding uh hi. Jerusalem khuapi a sim dingin Topa in minam khempeuh kaikhawm ding hi. A khuapi kila-in, a innte kiluh gawpin, a numeite zong kibuan gawp ding hi. Mi alang bang salin kipaikhiatpih ding a, adangte ahihleh kipaikhiatpih lo ding hi. Tua ciangin Topa hong kuankhia ding a, a beisa hunah a sim ngei bangin hih minam dangte hong sim ding hi. Tua ciangin Jerusalem nisuahna lamah a om Oliv Mual tungah Topa a ding ding hi. Tua ciangin nisuahna lam pan nitumna lamah Oliv Mual kitamin phel nih suak ding a, a kikalah kuampi om ding hi. A mual kimkhat leilu lamah kikhinin, kimkhat leitaw lamah kikhin ding hi. Hinnom kuam sung kivukcip ding a, Judah kumpi Uzzah’ hun lai-in zinlinna-a a kivukcip mah bang ding hi. Tua ciangin Topa ka Pasian hong pai ding a, a mi siangthote khempeuh hong tonpih ding hi. Tua ni hong tun ciangin khuadam, vukkiat cihte om nawn lo ding a, khuamial hun cih zong om lo ding hi. Zan hun nangawnin sun khuavak bek om ding hi. Hih thu a pian’ ding hun, Topa bek in a thei hi. Tua ni hong tun ciangin Jerusalem khua panin tuicim hong luangkhia ding a, kimkhat, nisuahna lamah a om Si Tuipi-ah luang ding a, kimkhat, nitumna lamah a om Mediterranean Tuipi-ah luang ding hi. Tua tui in kan’ hun cih nei loin luang tawntung ding hi. Tua ciangin Topa pen leitung khempeuh’ kumpi suak ding a, mi khempeuh in amah bek thei-in bia ding uh hi. Leilu lam Geba khua panin leitaw lam Rimmon khua dong, leitung khempeuh, zanglei suak ding hi. Ahi zongin Jerusalem khuapi pen bangmah ci loin a sangpi-in om ding a, Benjamin Kongpi pan a kipan nidanga kongpi a omnasa Kiu Kongpi dong, le Hananel Tausang panin kumpipa’ leenggah cilna phual ciang dong a ban ding hi. Tua khuapi sungah lungmuang takin mi teng ding uh a, lauhuaina tuakkha nawn lo ding uh hi. Tua ciangin Jerusalem khuapi a sim minam dang khempeuhte tungah Topa in gimna lianpi tungsak ding hi. A khe-un a ding thei kimlai mahin a sa uh muatmang ding a, a mitkua sung uhah a mittangte uh muatin, a kam sung uhah a leiite uh muat ding hi. Tua ni ciangin Topa in amaute amkhamsak gawp ding a, mite in a gei-a a matkhak mite manin khatlekhat kilaithang gawp ding uh hi. Judah mite in Jerusalem khuapi hutna-in galte do ding uh a, minam dang khempeuhte’ neihsa kham, ngun, le puante tampi tak a laksak ding uh hi. Galte’ phuala om sakolte, la-sakolte, kalaohte, late, le ganhing om khempeuh tungah gimna lianpi a tung ding hi. Tua bangin galte a kizawhgawp khit ciangin, galte sung panin a nungtalai mite in Vanglian Topa, kumpi ahihna hangin a bia ding le ama gualzawhna pawi a bawl dingin kumsimin Jerusalem-ah pai tawntung ding uh hi. Minam khat peuhpeuh, Vanglian Topa ahi kumpipa a bia dingin Jerusalem-ah a painop kei leh amau’ gam sungah guah zu lo ding hi. Tua gualzawhna pawi a bawl dingin Egypt mite a painop kei leh, tua bangin a pai nuam lo minamte’ thuak ding gimnate mah, amau’ tungah a tung ding hi. Gualzawhna pawi a bawl dingin a pai nuam lo Egypt mite le minam dang khempeuhte tungah a tung ding gimna pen tu-a bang ahi hi. Tua ni ciangin sakol khilongte khempeuh tungah, “ Topa -a’ dingin A Kipia,” ci-in ciaptehna kibawl ding hi. Biakinn sunga a om beelte khempeuh pen biakna tau mai-ah a kikoih kuangte mah bangin a siangtho-in kinei ding hi. Jerusalem khuasung le Judah gam sungah a om beelte khempeuh, Vanglian Topa biakna-in zat dingin a tuamin kikoih ding hi. Biakna a pia dingin a hong pai mi khempeuh in tua beelte zangin, biakna sa huanna-in a nei ding uh hi. Tua ni hong tun ciangin Vanglian Topa’ biakinn-ah sumzuak vanzuak cihte om nawn lo ding hi. Topa in Malakhi tungtawnin Israel-te tungah thu gen hi. Topa in, “Note kong it hi,” ci hi. Ahi zongin note in, “Kote hong bangci it na hi hiam?” na ci uh hi. Topa in hong dawng a, “Esau le Jakob unau hi a, ahi zongin Jakob le a suan a khakte itin, Esau le a suan a khakte ka mudah hi. Esau’ neih mualtung gamte ka susia a, gamsate tungah ka pia hi,” ci hi. Esau’ suanlekhak Edom mite in, “I khuapite a kisiat khit hangin i lamkik ding hi,” ci le-uh, Topa in, “A ut uhleh lam uh hen; ahi zongin ka susia kik veve ding hi. Midangte in, ‘Gam gilo, Topa’ heh tawntungna minamte,’ ci-in ko ding uh hi,” ci-in a dawng ding hi. Note’ mit mahmah tawh hih thupiang na mu ding uh a, “Israel gam pualam nangawnah Topa in vangliatna nei hi,” na ci ding uh hi. Vanglian Topa in siampite tungah hih bangin hong ci hi: “Tapa in a pa zahtak a, nasempa in a topa kihta hi. Kei pen na pa uh hinapi, bang hangin hong zahtak lo a, na topa uh hinapi, bang hangin hong kihta lo na hi uh hiam? No siampite in kei hong simmawh napi-in, ‘Bang hong ci simmawh ka hi uh hiam?’ na cilai uh hi. Note in ka biakna tau tungah keimah biakna-in an ginalopite hong pia hinapi-in, ‘Kong zahtak bawl lohna uh bang om ahi hiam?’ na ci uh hi. Ka biakna tau simmawhbawl na hih manun hong zahtak bawl lo na hi uh hi. Ganhing a mittawpite tawh kei nong biak uh ciangin, a hoihmahin kingaihsun na hi uh hiam? A khebai, a cina ganhingte tawh nong biak uh ciangin, a hoihmah kisa na hi uh hiam? Tua bang ganhing khat peuhpeuh, note hong ukpa kiangah va puak dih un. Note tungah nuamin hong pakta ding ahi hiam?” a ci hi. Tua ahih ciangin no siampite aw, Pasian in eite hong hehpih theih nadingin ama kiangah thum un. Na hih ngeisa bangun na nget uh hangin na ngetnate uh hong pia lo ding hi; tua pen nomau’ khialhna ahi hi. Vanglian Topa in, “Ka biakna tau tungah, bangmah-a kimang lo mei na tawh mawkmawk theih loh nadingun, note khatpeuh in biakinn kongkhakte khak le-uh cin ka ut hi. Note tungah ka lungkim kei a, nong piak uh biakpiaknate kong sang kei ding hi. Leitung khempeuhah a om minam khempeuh in kei hong zahtak uh a, kei a dingin mun khempeuhah paknamtui halin, a kisangthei ding biakpiakna hong pia uh hi. Mi khempeuh in kei hong zahtak uh hi. Ahi zongin note in keima biakna tau bangmah a man nei loin genin, tua biakna tau tunga na piak uh ante na thupi ngaihsut loh uh ciangin, keimah a hong simmawh na hi uh hi. Note in, ‘Hihte cimtak khin hang,’ ci-in nong nap nitsan lel uh hi. Keimah biak nadingin a kigu ganhing khatpeuh ahi a, a liam a bai, ahih kei leh a cina peuh nong paipih uh hi. Tua bangte, a sang dingin hong ngaihsun na hi uh hiam? A tuuhon lakah tuutal cidam nei napi-in, a kamciamsa bangin kei tungah hong piak ciangin, a sitbaang ganhing a hong pia mi khempeuh in samsiatna thuak tahen. Bang hang hiam cih leh kei pen a lian mahmah Kumpipa ka hi a, minam khempeuh in kei hong zahtak uh hi,” a ci hi. Vanglian Topa in hih bangin ci hi: “Siampite aw, note a dingin hih lai-ah thupiakna khat om hi. Na gamtatna uh tawh kei nong zahtak ding uh hi. Ka thugente ngai loin, thupi takin na lak kei uhleh note tungah samsiatna ka hong tungsak ding a, siampi hihna tawh na ngah uh thuphate tungah samsiatna ka tungsak ding hi. A taktakin ci lehang, note in ka thupiaknate thupi lak lo na hih manun na thupha ngahte uh tungah samsiatna ka tungsakzo hi. Na suanlekhakte uh nakpitakin ka thuhilh ding a, note ahihleh, na biakpiakna ganhing uh a ekte tawh na maitang uh hong zut gawpin tuate tawh kong lawnkhia khawm ding hi. Tua ciangin Levi’ suanlekhakte ahi siampite tawh ka thuciamna a kip nawn lo ahihna thu, hih thu kong genna-ah na thei ding uh hi. “Amaute a nuntakna ding le a nopsakna ding thu ka ciam a, amaute in kei hong zahtak theih nadingun hih ka thuciamte khempeuh ka pia hi. Amaute in kei hong zahtakin hong kihta takpi uh hi. Amaute in thuman taktakte mah hilhin gen uh a, amaute’ kam panin zuauthu gingkhia lo hi. Ka deihna bangin amaute gamta uh a, a khial ding mi tampite, thuman lamah a paisak uh hi. Siampite’ nasep pen Pasian a manin theih nading a hilh ding uh ahi hi. Amaute pen, Vanglian Topa’ kamtaite ahih manun, mite in keima deihna a theih nadingun amaute’ tungah thu a dot ding uh ahi hi. “Ahi zongin, no siampite na hih uhleh lampi man panin na pial khin uh hi. Na thuhilhnate un mi tampi tak khialsak hi. Note tawh ka bawl thuciamna na palsat khin uh hi. Tua ahih manin, note in ka thuhilhna zui loin, keima thu na hilh uh ciangin zong a kibangin hilh loin mi na deidan mah uh bangin, kei zong mi khempeuh mai-ah simmawhna le niamkhiatna kong ngahsak ding hi,” a ci hi. Eite khempeuh in, eite a hong piangsak Pasian ahi Pa khat bek nei hi lo ihi hiam? Tua hinapi-in bang hangin eite khatlekhat tungah citak loin, i pu i pate tawh a bawl, Pasian’ thuciamna palsat ihi hiam? Judah mite citak loin, Pasian tungah a thuciamna uh palsat uh a, Israel mite’ lak le Jerusalem khua sungah siatna tampi gamta uh hi. Topa in a it mahmah biakinn ninsak uh hi. Topa ahi lo, pasian dang a bia numeite, zi-in la-in a tenpih uh hi. Hih bangin a gamta mi peuhmah, a kua a kua hitaleh, Topa in sugawp hen la, Vanglian Topa tungah biakna a paipih ei minamte tawh hong kigawmsak nawn kei hen. Note’ gamtatna adang khat omlai hi. Tua pen, note’ paipih biaknate hong sang nawn lo ahih manin Topa’ biakna tau, khitui tawh na kawtsak uh a, kapin thumin na om uh hi. Bang hangin hong sang lo hiam, na ci uh hi. Na khangnolai uha na tenpih na zite uh tungah na cihtak lohna uh amah in hong thei a, na zite uh tungah na cihtak tawntungna ding uh Pasian tungah thu ciamin, na zite uh zong na lawmnu mah uh hinapi-in amaute tawh na thuciamna uh na pelhna hang uh ahi hi. Pasian in na zite uh tawh pumkhat, lungsim khat ahi dingin hong bawl hi lo ahi hiam? Hih bangin a hong bawlna pen bang a deihna ahi hiam? Pasian’ mi taktak ahi ding tate i neih theih nading ahi hi. Tua ahih manin na khangno lai-un na tenpih na zi uh tawh na thuciamna uh na palsatkhak loh nadingun kidawm un. Vanglian Topa in hih bangin ci hi: “Zi makna ka deih kei a, mi khatpeuh in a khangno lai-a a tenpih a zi tungah tua bang gitlohna a gamtatna ka mudah hi. Tua ahih ciangin hoihtakin kidawm unla, a citak dingin na zite uh tungah na thuciamna uh palsat kei un,” ci hi, a ci hi. Thu na gengenna uh tawh Topa na gimsak uh hi. Note in, “Bangci gimsak ka hi uh hiam?” na ci uh hi. “ Topa in a sia-in a gamtate a hoihin ngaihsun a, zong itin amaute tungah lungkim takpi hi,” na cihna khawng uhleh, “Thutang a gen Pasian koi lai-ah om ahi hiam?” ci-in na dotnate uh tawh na gimsak uh hi. Hih bangin na thugenna uh tawh kisai-in Vanglian Topa in hong dawng a, “Ka pai nading lampi a bawlkhol dingin ka kamtai pa ka sawl ding hi. Tua ciangin na ngakngak uh Topa a biakinn sungah thakhat thu-in hong pai ding hi. Na muhnop uh kamtai pa hong pai-in ka thuciamna hong taangko ding hi,” ci hi. Ahi zongin ama hong pai ni ciangin kua in thuakzo ding a, amah hong kilaak ciangin kua nungtazo ding ahi hiam? Amah pen, sikte a siangthosak mei, le puante a siangthosak satpiang tawh kibang hi. A ninte kangtumsakin, ngunte a siangsak pa bangin thukhen dingin hong pai ding hi. Ngun le khamte a kisiansak bangin amah in Levi suanlekhak ahi siampite siangsak ding hi. Tua ciangin Topa’ tungah a kilawm biakna a pia ding uh hi. Tua ciangin Judah mite le Jerusalem mite’ piak biaknate pen nidang ate mah bangin Topa’ mai-ah a lungkimhuai hi ding hi. Vanglian Topa in hih bangin ci hi: “Note tungah thukhen dingin ka hong pai ding hi; ai tawite, numei tawh a mawhte, a man lopi a teci pangte, numeite’ thaman piakna-ah khemna a zangte; meigong, tagah, le gamdang mite a zawhthawh bawlte, le kei hong zahtak lo mi khempeuhte’ langkhatah thakhatin teci pangin thu ka khen ding hi. “Kei, Topa ka hi a, lungsim a kheel lo mi ka hi hi. No Jakob suanlekhakte aw, a siacimit na hi nai kei uh hi. Na pu na pate uh mah bangin ka thukhamte panin note na pialkhia uh a, ka thukhamte na zui kei uh hi. Ahi zongin keima lamah hong kihei kik un; kei zong note lamah kong kihei ding hi. Ahi zongin note in, ‘Nang lamah hong bangci kihei ding ka hi uh hiam?’ na ci uh hi. Keimah in note kong dotnop thu pen, mi khatpeuh in Pasian’ na guksak ding kilawm ahi hiam? Kilawm lo hinapi-in note in nong guksak uh hi. Ahi zongin note in, ‘Bang hong guksak ka hi uh hiam?’ na ci uh hi. Sawm-ah-khat piakna le biakpiaknate ah nong guksak uh hi. Na minam bupun keima neihsa hong guksak na hih manun note khempeuh tungah samsiatna hong tung hi. Ka biakinn-ah an a om theih nadingin sawm-ah-khat a kimin hong paipih un. Kei hong ze-et un; vantung kongkhakte hongin, note a dingin na hoih tampi kong piakna na mu ding uh hi. Lo panin a piang na ante uh, kauphe ka nesak nawn kei ding a, na leenggui uh gahpha mahmah ding hi. Tua ciangin na gam uh, ten nadingin a hoih mahmah leitang hong suak ding ahih manin, minam dang khempeuh in note pen a nuamsa minam hong ci ding uh hi,” a ci hi. Topa in hih bangin ci hi: “Kei tawh kisai-in na kampaunate uh khauh mahmah hi. Note in, ‘Bang kam pau ka hi uh hiam?’ na ci uh hi. Note in, ‘Pasian’ na i sep a mawkna hi. Ama hong sawl bangin i sep hangin bang a kimanna om a, i gamtatnasate hangin i dahna lim, Vanglian Topa’ mai-ah i lah hangin bang phattuamna om ahi hiam? I muhna bang leh, mi kiphasakteng mah in thupha ngahin nuamsa uh hi. Mi gamtatsiate ahihleh citheibek loin, a gamtatsiatnate uh tawh Pasian ze-et napi-un bangmah tuak se lo uh hi,’ na ci uh hi,” a ci hi. Topa a zahtak mite khatlekhat tua bangin thu kigen uh a, amaute’ thugennate, Topa in ngai-in za hi. Topa in laibu khat nei a, amah zahtakin a thupi ngaihsut mite khempeuh tua sungah kiciamteh hi. Vanglian Topa in hih bangin ci hi: “Tua a kiciamteh mite pen keima mite hi ding uh hi. Keimah in na ka sep ni ciangin amaute pen keima neihtuam taktak mite hi ding uh hi. Pa in ama thu a mang a tapa a hehpih mah bangin kei zong amaute ka hehpih ding hi. Tua ciangin midikte le migilote, le keima na hong semte le hong sem lote a kilamdanna na mukik ding uh hi,” a ci hi. Vanglian Topa in hih bangin ci hi: “En un, mi kiphasak khempeuh le migilo khempeuh, a zung a hiang cih om loin buhtu bangin a kattum ding hun hong tung ding hi. Tua ni ciangin khat zong suakta loin a vekpi-in kangtum khin ding uh hi. Ahi zongin ka thu a hong mang note tungah dikna ni hong taang ding a, tua in nizang bangin note tungah cidamna hong tun ding hi. Bawng khumna panin a kikhah bawngnote bangin suakta-in nuam na sa ding uh hi. Keimah in na kong sep ni ciangin note in migilote nuaisiahin leivui bangin na tuancil ding uh hi. “Israel mite khempeuh in a zuih dingin Horeb Mual panin ka nasem Moses tungah ka piak ahi, Moses’ thukhamte, ngeinate, le biakna ngeina kipte khempeuh limtakin phawk un. “Ahi zongin tua a lauhuai lian mahmah Topa’ ni hong tun ma-in note kiangah kamsang Elijah kong paisak ding hi. Amah in pate le tate lemtuahin a kilemsakkik ding hi. Tua bang hikeileh keimah hong pai-in na gam khempeuh uh ka susiagawp ding hi,” ci hi, a ci hi. Abraham’ suan David, David’ suan Jesuh Khrih’ khang ciaptehna hih bang ahi hi. Abraham ta Isaac, Isaac ta Jakob, Jakob ta Judah, le a sanggamte ahi uh hi. Judah ta Perez le Zerah hi a, Tamar tawh a neih a ta ahi uh hi. Perez ta Hezron, Hezron ta Ram, Ram ta Amminadab, Amminadab ta Nahshon, Nahshon ta Salmon, Salmon ta Boaz, Rahab tawh a neih a ta ahi hi. Boaz ta Obed, Ruth tawh a neih a ta ahi hi. Obed ta Jessi, Jessi ta kumpi David ahi hi. David ta Solomon, Uriah’ zi Bathsheba tawh a neih pen ahi hi. Solomon ta Rehoboam, Rehoboam ta Abijah, Abijah ta Asa, Asa ta Jehoshafat, Jehoshafat ta Joram, Joram ta Uzziah, Uzziah ta Jotham, Jotham ta Ahaz, Ahaz ta Hezekiah, Hezekiah ta Manasseh, Manasseh ta Amon, Amon ta Josiah, Josiah ta Jekhoniah le a sanggamte hi a, Babylon gamah Israel mite salin a kipaipih hun pawlin a suak ahi uh hi. Jekhoniah ta Shealtiel, Shealtiel ta Zerubbabel, Zerubbabel ta Abiud, Abiud ta Eliakim, Eliakim ta Azor, Azor ta Zadok, Zadok ta Akhim, Akhim ta Eliud, Eliud ta Eleazer, Eleazer ta Matthan, Matthan ta Jakob, Jakob ta Josef hi a, Josef pen Khrih a kici Jesuh’ nu Mary’ pasal ahi hi. Hih bang ahih manin Abraham panin David ciang dong khang sawm le li pha a, David panin Babylon gamah salin a kipaikhiatpih dong khang sawm le li mah pha a, Babylon gamah salin a kipaikhiatpih a kipanin Khrih a suah hun ciang dong khang sawm le li mah a pha hi. Jesuh Khrih a hong suahna zia hih bang ahi hi. Mary pen Josef a dingin zuthawl piaksa hi a, ahi zongin a kiten taktak ma-un Kha Siangtho in amah a gaisakna thu Mary in a thei hi. A lawmpa Josef pen a manin a gamta nuam mi khat ahih manin a lawmnu maizumsak nuam lo a, kuama theih lohin maksim dingin a ngaihsun hi. Ahi zongin hih bangin thu a ngaihsut laitakin a mang sungah Topa’ vantungmi khat hong kilang a, “David suan Josef aw, Mary sunga nau pen Kha Siangtho in a gaisak ahih manin amah tenpih ngamlah kei in. Amah in tapa khat hong nei ding a, tua tapa in ama mite a mawhna uh panin honkhia ding ahih manin ama min dingin Jesuh na phuak ding hi,” ci-in thu a gen hi. Topa in kamsangpa tungtawnin a gensa thu a tun theih nadingin hih thute a piang ahi hi. Tua a genna-ah, “Nungak khat gai-in tapa khat nei ding a, ama min dingin Emmanuel kiphuak ding hi,” ci hi. Emmanuel a khiatna in, eite tawh Pasian hong omkhawm hi, a cihna ahi hi. Josef zong a khanlawh ciangin Topa’ vantungmi’ sawl bangin a zi a la hi. Ahi zongin tua tapa a suah hun dongin a zi luppih lo a, a suah ciangin a min dingin Jesuh a phuak hi. Herod in Judea gamah kumpi a sep hun laitakin tua gam sung Bethlehem khua-ah Jesuh a suak hi. A suah khit phetin aksi thu lamsang a siam mi pawlkhat, nisuahna lam panin Jerusalem-ah hong tung uh a, “Jew mite’ kumpi ding ahi naungek a hong suak pen koi lai-ah om ahi hiam? Nisuahna lam pan ama aksi hong suah ciangin ka mu uh a, amah a bia dingin a hong pai ka hi uh hi,” hong ci uh hi. Kumpi Herod in hih thu a zak ciangin lamdangsa mahmah a, Jerusalem khuami khempeuh in zong lamdang a sa ciat uh hi. Tua ahih manin Herod in siampi liante le Thukham hilh siate khempeuh kaikhawm a, “Koi lai-ah Khrih suak ding ahi hiam?” ci-in a dong hi. Tua ciangin Herod in tua mipilte samsim a, aksi a kilat hun teltakin a dot khit ciangin, Bethlehem khua-ah a pai nadingun sawl a, “Tua naungek limtakin va zong unla, kei zong hong pai-in amah ka biak theih nadingin na muh khit uh ciangin kei kiangah thu hong zasak un,” ci-in a vaikhak hi. Amaute in kumpipa’ vaikhak thuteng a zak khit uh ciangin paikhia uh a, nisuahna lamah a muh uh aksi mah, lam a pai laitakun mu uh a, naungek omna tung santak a tun matengin amaute mai-ah tua aksi na pai hi. Tua aksi a muh uh ciangin a lungdamna uh kigen thei lo hi. Inn sungah amaute lut uh a, naungek le a nu Mary a mu uh hi. Amaute khukdinin tua naungek a biak khit uh ciangin a vanpuakte uh suahkhia uh a, kham, saledi paknamtui, le myrrh paknamtuite, letsongin a pia uh hi. Herod kiangah a kihilkik loh nadingun a mang sung uhah Pasian in hilh ahih manin, lampi dang tawnin a gam uhah a ciahkik uh hi. Tua mipilte a ciah khit uh ciangin Josef’ mang sungah Topa’ vantungmi khat hong kilang a, “Kithawi-in naungek le a nu, Egypt gamah taipih in. Pai khia un, ci-in kong genkik matengin tua gamah va om un. Herod in naungek thah dingin hong zong ding hi,” a ci hi. Josef zong kithawi pah a, Egypt gam a zuan dingin naungek le a nu tawh zanpi mahin ding khia uh a, Herod a sih hun ciang dong tua gamah a va om uh hi. Kamsangpa tungtawnin Topa in, “Egypt gam panin ka Tapa ka samkhia hi,” ci-in a genna thu a tun nadingin hih bangin a piang ahi hi. Nisuahna lam panin a hong pai mipilte in amah a khem lamtak Herod in a theih ciangin a heh suak mahmah hi. Tua mipilte tung panin aksi a kilat hun a dotna tawh kizui-in, Bethlehem khua le a kiima om naungek kum nih ciang le a nuaisiah khempeuh a that dingin a galkapte a sawl hi. Hih bangin thu hong pian’ ciangin kamsangpa Jeremiah in, “Nakpi taka kahna awging Ramah gam sungah kiza hi. Rachel in a tate kah a, a tate khempeuh si khin ahih manin a kah a tawp nadingin kikhem zo lo hi,” ci-in a genna thu a tun nading ahi hi. Herod a sih khit ciangin Egypt gam a om Josef kiangah Topa’ vantungmi khat hong kilang a, “Naupang a that nuam mite si khinta ahih ciangin kithawi inla, naupang le a nu tawh Israel gamah ciah un,” a ci hi. Josef zong kithawi-in, naupang le a nu tawh Israel gamah a ciah uh hi. Ahi zongin Arkhelaus in a pa Herod’ za laihin Judea gam uk mahin a omna thu a zak ciangin tua gamah Josef ciah ngam lo hi. Tua ahih manin a mang sung mahah a kihilna bangin Galilee gam sungah lutin, Nazareth khua-ah a teng uh hi. Kamsangte in, “Amah pen Nazareth khuami kici ding hi,” ci-in a genkholhna a tun nadingin hih bangin a piang ahi hi. Tua hun laitakin tuiphumpa Johan hong pai-in, Judea gam sungah thuhilh hong kipan a, “Vantung ki-ukna hun hong naita ahih manin na mawhnate uh kisik kik un,” a ci hi. Kamsang Isaiah in, “Gam sungah mi khat kiko a, ‘Topa’ pai nading lampi bawl unla, a tot ding lampi tangsak un,’ ci hi,” ci-in a gen ciangin hih Johan’ thu a gen ahi hi. Johan in kalaoh mul kigan puan silhin, savun kawnggak tawh a kawng gak a, kauphe le gamlak khuaizu tawh a kivak hi. Jerusalem khua, Judea gam sung, le Jordan Gun kiim gam panin mite hong pai uh hi. Amaute in a mawhnate uh hong pulak uh a, Johan in Jordan Gun sungah amaute a tuiphum hi. Ahi zongin Farisi mite le Saddusi mite tampi tak tui a kiphum dingin a hong pai a muh ciangin Johan in amaute kiangah, “Gul bangin ngian a zang note aw, a hong tung ding Pasian’ hehna panin na suahtak theih nading uh kua in hong hilhkhol ahi hiam? Na kisik kikna uh a kilangsak ding gamtatna gamta unla, ‘Abraham’ suante ihi ngawn hi,’ cihna lungsim nei mawk kei un. Ke’n kong cihin-ah, Pasian in hih suangte nangawn Abraham’ suanlekhakte-in a bawl thei hi lel hi. Tu mahmahin sing a bulphuk dingin hei tawh kingim zo hi. Tua ahih manin gah hoih a gah lo sing khempeuh kiphukin meikhuk sungah kikhul ding hi. Na kisikkik khitna uh a kilat nadingin tui sungah note ka hong phum a, ahi zongin kei nungah a hong pai pa in Kha Siangtho le mei sungah note hong phum ding hi. Tua a hong pai ding pa pen kei sangin nakpitakin lianzaw a, ama khedap a tawisak ding nangawnin ka kilawmzo nai kei hi. Amah in a khutah anzapna tawi-in a ante zap a, a taksate khawmin a ansal sungah koih ding a, a ansite ahihleh a mit ngei lo mei sungah a khul ding hi,” ci-in thu a hilh hi. Tua laitakin Galilee gam panin Jesuh hong pai a, Johan’ khut sungah a kituiphum dingin ama omna Jordan Gun-ah a hong tung hi. Ahi zongin Johan in na tuiphum nuam lo a, “Nang in kei nong tuiphum dingin a kilawmzaw kimlai, kei’ phum dingin nang hong pai zawsop na hi hiam?” a na ci hi. Ahi zongin Jesuh in, “Pasian in hih dingin kisam a sak khempeuh i hih ding a kilawm thu ahih manin tu-in hong phum hoh in,” a cih ciangin Johan in zong a mang hi. Jesuh a kituiphum khit phetin tui sung panin a paikhia pah hi. Tua laitakin vantung hong kihong a, vakhu bangin Pasian’ Kha Siangtho hong kumsukin ama tungah a khawl a mu hi. Tua sung mahin vantung panin aw khat hong ging a, “Hih pen ka it mahmah ka Tapa hi a, ama tungah ka lungkim mahmah hi,” a hong ci hi. Tua ciangin Dawimangpa’ ze-etna a thuak dingin Kha Siangtho in gamlakah Jesuh a paipih hi. Jesuh in sun sawmli le zan sawmli sung an ne loin omkhin ahih manin a gil a kial hi. Tua ciangin ama kiangah Dawimangpa hong pai a, “Pasian’ Tapa na hih takpi le hih suangte anlum a suah nadingin thu pia in,” a ci hi. Ahi zongin Jesuh in, “Lai Siangtho sungah, ‘Anlum bek tawh mite nungta lo a, Pasian genkhiat thute tawh nungta zaw hi,’ ci-in kigelh hi lo ahi hiam?” ci-in a dawng hi. Tua ciangin Dawimangpa in gamlak panin Jerusalem khua-ah Jesuh paipih a, biakinn khumzang a sangpen munah a kahtohpih khit ciangin, “Pasian’ Tapa taktak na hih le Lai Siangtho sungah, ‘Pasian in nang a hong kem dingin a vantung mite hong sawl ding hi. Na khete le suang a kitahkhak loh nadingin vantung mite in a khut uh tawh nang hong dom ding hi,’ ci-in kigelh ahih manin, hih lai panin tuaksuk in,” a ci hi. Jesuh in, “Lai Siangtho mahah, ‘Na Topa Pasian na ze-et kei in,’ ci-in gen hi lo ahi hiam?” ci-in a dawng hi. Tua ciangin Dawimangpa in mual sang mahmah khatah Jesuh paipihto a, leitung kumpi gam khempeuh le a hoihna teng a lah khit ciangin, “Ka mai-ah kunin kei hong bia lecin hihte khempeuh nangma tungah kong pia ding hi,” a ci hi. Jesuh in, “Satan aw, taikhia in. Lai Siangtho in, ‘Na Topa Pasian bek bia inla, ama na bek sem in,’ ci hi lo ahi hiam?” ci-in a dawng hi. Tua ciangin Dawimangpa paikhia a, vantung mite hong pai-in Jesuh huhin an a vak uh hi. Jesuh in Johan a kimatna thu a zak ciangin Galilee gam sungah va kihem hi. Galilee gam Nazareth khua-ah omsuak loin paikhia leuleu a, Zebulun le Naftali gam sung Galilee Tuili gei-a om Kapernaum khua-ah a va teng hi. Tua bangin a va tenna pen kamsangpa Isaiah thugen a tun nading ahi hi. Tua a genna-ah, “Gentail mite’ tenna Galilee gam sung, Jordan Gun galkhat, Tuipi lampangah a om Zebulun le Naftali gam! Khuamial sunga a teng mite in khuavak lianpi mu ding uh hi. Sihna gam khuamial sungah a teng mite tungah khuavak hong taang ding hi,” ci hi. Tua hun a kipan Jesuh in thuhilh ding kipan a, “Vantung ki-ukna hong naita ahih manin kisikin na omzia uh kheel un,” ci-in thu a hilh hi. Galilee Tuili gei-ah Jesuh a pai laitakin ngabeng Peter a kici Simon le a nau Andru, ngen tawh nga khuhin a om a mu hi. Jesuh in amaute kiangah, “Kei hong zui un; nga mat bangin pawl tampi a ngah thei mi kong suaksak ding hi,” ci hi. Amau tegel in zong a ngente uh nusia-in Jesuh a zui pah uh hi. Tua lai panin a paikhiat khit uh ciangin Zebedi tapa James le Johan-te unau, a pa uh tawh gunkuang sungah ngen puahin a om mu leuleu a, amau tegel zong a sam hi. Amau tegel in zong gunkuang le a pa uh nusia-in Jesuh a zui pah uh hi. Galilee gam sung khempeuhah Jesuh pai kawikawi a, amau’ kikhopna innte-ah thu hilhin, vantung ki-ukna hangin lungdamna thute hilh a, natna tuamtuam a nei cina khempeuh a damsak hi. Syria gam sung khempeuhah ama thu kizel ahih manin dawivei mi, sibup mi, khutzaw khezaw mi a kipanin natna satna a tuamtuam a nei mi khempeuh ama kiangah hong kipuak a, amah in a vekpi-in a damsak hi. Galilee gam, Khuapi Sawmte gam, Jerusalem khua, Judea gam le Jordan Gun galkhat gam panin mi tampi tak in Jesuh a zui uh hi. Jesuh in tua bangin mihon tampi tak a muh ciangin mualtung lamah kahto-in tusuk a, a nungzuite zong ama nai-ah hong tu uh hi. Tua ciangin a kam ka-in amaute tungah thu hilh ding kipan a, “Kha thu lamah zawngkhal a kisate sungah vantung ki-ukna thu om ahih manin thupha ngah mi ahi uh hi. Dahin a thum a tau mite Pasian in amaute hehnem ding ahih manin thupha ngah mi ahi uh hi. A lungnem mite in Pasian’ ciamsa leitang ngah ding uh ahih manin thupha ngah mi ahi uh hi. Pasian’ deihteng sep ding a hanciamte Pasian in lungkimna ngahsak ding ahih manin thupha ngah mi ahi uh hi. Midang a hehpih mite tungah Pasian in hehpihna pia ding ahih manin thupha ngah mi ahi uh hi. Lungsim takpi tawh Pasian a zong mite in Pasian mu ding ahih manin thupha ngah mi ahi uh hi. Kilem nading deihin a hanciam mite in Pasian’ tate cihna ngah ding uh ahih manin thupha ngah mi ahi uh hi. Pasian’ deihna bangin a gamtat manin bawlsiatna a thuak mite vantung ki-ukna sungah a omte ahih manin thupha ngah mi ahi uh hi. “Midangte in keima hangin a man lopi-in hong simmawhin hong bawlsia a, a nam tuamtuamin hong gensiat uh ciangin thupha ngah mi na hi uh hi. Note a dingin vantungah thaman lianpi hong kikoih kholhsak ahih manin tua bang na tuah uh ciangin nuamin na lungdam un. Note’ hun ma-a kamsangte zong tua bangmahin a na kibawlsia ngei ahi hi. “Note pen leitung mite a dingin ci tawh na kibang uh hi. Ahi zongin ci a alna bei leh i alsakkik theih nading lampi om nawn lo hi. A kizat nading bangmah om nawn lo a, mite’ tuatcilgawp dingin kipaai lel hi. “Note pen leitung mite a dingin khuavak tawh na kibang uh hi. Mual dawnah a om khua kiseelcip thei lo hi. Mei a vak khit ciangin kuamah in lawh khuhlo hi. Meivakna mun sangah koihzaw a, innsung khempeuh a taangsak hi. Midangte in na gamtatna hoihte uh a muh ciangin vantungah a om na Pa uh min a phat theih nadingun mite mai-ah na gamtat hoihna uh khuavak bangin na kilangsak un. “Moses Thukham le kamsangte’ thuhilhnate a phiat dingin hong pai hi, ci-in hong ngaihsun kei un. Tuate a phiat dingin a hong pai hi loin, amaute’ hilhna a kicingsak dingin a hong pai ka hizaw hi. Hoihtakin na phawk ding uh thu panin: Van le lei a bei mateng, hih thukhamte a neupen khat nangawn’ deihna tangtung lopi-in mawkmai lo ding hi. Tua ahih manin hih thukhamte lakpan a neupente khat bek nangawn zuikha loin, midangte in zong a zuih loh nadingin a gen mite pen vantung ki-ukna sungah mi neupen hi ding uh hi. Ahi zongin hih thukhamte zui-in, midangte in zong a zuih nadingin a hilh mite pen vantung ki-ukna sungah milian hi ding uh hi. Tua ahih manin Pasian’ deihna bangin gamtat nading thu-ah Thukham hilh siate le Farisi mite sangin na cihtakzawk uhleh vantung ki-ukna sungah a om thei bek ding na hi uh hi. “Tanglai mite tungah, ‘Mi that kei un. Mi that peuhmah in sihna thuak ding hi,’ ci-in a kigenna thu na zaksa uh ahi hi. Ahi zongin ke’n note kiangah kong genin-ah: A sanggampa tungah a heh mi in thukhenna thuakkha thei ding hi. A sanggampa kiangah, ‘Bangmah a kimang lo,’ ci-in a ko bawl mi in uliante mai-ah thusitna thuak thei ding a, a sanggampa kiangah, ‘Mi hai,’ ci-in a simmawh mi in hell meikuang sungah khulna thuak thei ding hi. Tua ahih manin Pasian tungah biakna a pia dingin biakna tau mai-ah na om laitakin na sanggamte khat peuhpeuh na tungah a lungkim lohna thu na phawk leh, Pasian na biak nading nate, a biakna tau mai-ah nusia photin, pai-in na sanggampa tawh va kilem phot inla, tua khit ciangin hong paikikin Pasian biakna pia in. Nangma tungah mi khatpeuh lungkim loin zumah hong khiat leh, zum na tun ma-un hun om lai-in na kilem pak nadingin hanciam in. Tua hikeileh zum na tun uh ciangin thukhente khutsung na tung ding a, thukhente in palikte khut sungah hong apin, palikte in thong sungah hong khum ding hi. A mantakin kong genin-ah: Na liau sum na piak khit dong matengin thong sung panin na suakta ngei kei ding hi. “‘Mi zi tungah na mawh kei ding hi,’ ci-in a kigenna thu na zaksa uh ahi hi. Ahi zongin ke’n kong genin-ah: Mawhpih nopna lungsim tawh numei khat a en mi peuhmah in a lungsimah tua numei tawh a mawh ahi hi. Tua ahih manin na mit taklam in na mawh nading hong piansak leh khelkhia inla paai in. Na pumpi bupin hell khuk sungah hong kikhul sangin na pumpi na khat pelem leh nang a dingin hoihzaw lai hi. Na taklam khut in na mawh nading hong piansak leh sattan inla paai in. Na pumpi bupin hell khuk sungah hong kikhul sangin na pumpi na khat pelem leh nang a dingin hoihzaw lai hi. “‘A zi a ma mi peuhmah in a zi tungah makna lai pia ta hen,’ ci-in a kigenna zong na zak khitsa uh ahi hi. Ahi zongin ke’n note kiangah kong genin-ah: Mi khat peuhmah in pasal dang tawh a mawhna hang lobuang, a zi a mak peuhmah a, a zi in pasal a neihkik leh mi tawh a mawh dingin a bawl a suak hi. Tua a kima numei a tenpihte, numei tawh a mawh mah ahi hi. “Tanglai-in mite tungah, ‘Pasian tungah na kiciamnate uh pelh kei unla, ama tungah na kiciam bangun tungsak un,’ ci-in a kigenna na zaksa uh ahi hi. Ahi zongin ke’n note kiangah kong genin-ah: Hih ding khat peuhpeuh na neih uh ciangin kiciamna na zang vet kei un. Kiciamna-in vantung na zang kei un - Pasian’ tokhom hi veve hi. Leitung zong kiciamna-in na zang kei un - Pasian’ khengakna mah hi veve hi. Jerusalem khuapi zong kiciamna-in na zang kei un - Kumpi lian ahi Pasian’ khuapi mah hi veve hi. Kiciamna-in na lutang zong na zang kei in. Na lu tunga om samzang khat bek nangawn a kangsa vomsak thei loin, a vom pen na kangsak thei kei hi. Na gen peuhmah ahi ahihleh, ‘Hi,’ ci inla, ahi lo ahihleh, ‘Hilo,’ cihna tawh kicingsak in. Tua bang hi loin kiciamna kam na zat ciangin Dawimangpa tawh kizomin thuman lo na hih lamtak hong kilang hi. “Note in, ‘Mittang khat tang ding mittang khat, ha khat tang ding ha khat,’ ci-in a kigenna na zaksa uh ahi hi. Ahi zongin note kiangah ke’n kong genin-ah: A gilote na thukkik kei un. Mi khatpeuh in na paang taklam hong bet leh a langkhat zong na dawh lai zaw in. Mi khatpeuh in na puansungsilh a ngahnop manin zumah hong khia-in hong laksak leh na puantungsilh zong na piathuah lai in. Galkapte khatpeuh in tai khat sung a van pua dingin hong sawl leh a valin tai khat sung mah na puaksak lai in. Mi khat peuhpeuh in na khat peuhpeuh hong nget leh na pia inla, nang kiang panin na a hong leitawi mite na pia in. “Note in, ‘Na vengte uh na it unla, na galte uh na mudah un,’ ci-in a kigenna thu na zaksa uh ahi hi. Ahi zongin ke’n note kiangah kong genin-ah: Na galte uh na it unla, no hong bawlsiate a dingin thu na ngetsak un. Tua hileh vantungah a om na Pa uh tate na hi thei ding uh hi. Bang hang hiam cih leh amah in mihoihte le misiate tungah a kibangin ni taangsak khawm a, a gamtat phate le a gamtat siate tungah zong a kibang mahin guah zusak khawm hi. Tua ahih manin no hong itte bek na it uhleh Pasian in bang thaman hong pia zenzen ding ahi hiam? Siahdongte nangawn in amau a itte it thei uh hi. Na lawmte bek uh hopihin thupha na piak uhleh mi mawkmawkte sangin na hoihzawkna uh bang om ahi hiam? Gentail mite nangawn in tua bang ciang lel hih thei uh hi. Tua ahih manin vantungah a om na Pa uh a cingtaak mah bangin note zong lungsim citakin na cingtaak nading uh na hanciam un. “Biakna tawh kizomin na hoih khat peuhpeuh na sep uh ciangin mite’ phat ding deihna tawh a kilang theithei dingin na sepkhak loh nadingun na kingaihsun un. Tua bangin gamta le-uhcin, vantungah a om na Pa uh kiang panin thaman na ngah kei ding uh hi. “Tua ahih manin mi cimawhte tungah huhna na piak uh ciangin, mite in a phat ding uh a deihna tawh a kineihkhem mite in kikhopna innsung le kongzing lakah a kilang theithei-in a hih uh bangin na hih kei un. Tua bangin a hih mite in thaman a ngah khinta ahihna thu limtakin na phawk un. Ahi zongin note in mi cimawhte citna tawh na huh uh ciangin na lawm naihuai pente uh nangawn in hong theih loh nadingun pia unla, kuamah theisak kei un. Tua hileh kuama muh lohin na gamtatna uh a mu na Pa un note tungah thaman hong pia ding hi. “Note in thu na nget uh ciangin mite’ muh theih dingin a kineihkhem mite in kikhopna innsung le kongzing lamka lai-ah a ngetnop se uh bangin na gamta kei un. Tua bangin a gamtate in thaman a ngah khinta ahihna uh limtakin phawk un. Ahi zongin thu na nget uh ciangin na innsung uhah tumin kong khak unla, na muh theih loh uh na Pa uh kiangah na ngen un. Tua hileh kuama muh lohin na gamtatna uh a hong mu na Pa un note’ tungah thaman hong pia ding hi. “Thu na nget uh ciangin i thunget sau leh Pasian in hong pia deuh ding hi, ci-in a ngaihsun Gentail mite bangin khiatna a nei tum lo kam tampi na luilui kei un. Tua na thunget ma nangawnun na Pa un note’ kisapna teng hong theikhin ahih manin Gentail mite na bang kei un. Tua ahih manin thu na nget uh ciangin hih bangin na ngen un: ‘Vantunga om kote’ Pa aw, na min siangtho kizahtak hen. Na ukna hun hong tung hen la, vantung bangin leitungah zong na deih bangin kigamta hen. Nisim khamkhop an hong pia in. Kote tungah a hong mawhte mawh maisakna ka neih bangun ko’ mawhna zong hong maisak in. Ze-etna lian hong thuaksak ke’n. Gilo’ kiang pan hong honkhia in,’ (Uk zawhna, vangliatna, minthanna, na nei tawntung hi. Amen.) ci-in na ngen ding uh hi. Note in midangte’ hong mawhna na maisak uhleh vantungah a om na Pa un zong note’ mawhna hong maisak ding hi. Ahi zongin note in midangte’ hong mawhna na maisak kei uhleh vantungah a om na Pa un zong note’ mawhna hong maisak lo ding hi. “An na tan’ uh ciangin a kineihkhem mite bangin maikhingin om kei un. Amaute in an a tanlam uh mite in a theih ding uh a ut manun gilkial mai pua-in a om uh hi. Amaute in a antan’ thaman uh a ngah khinta ahih lamtak limtakin thei un. Ahi zongin an na tan’ uh ciangin na mai uh phiatin na sam uh hiat un. Tua hileh midangte in na an tanlam uh a theih loh hangin na muh theih loh na Pa un hong thei veve ding a, kuama theih lohin na tanlam uh a hong thei na Pa un note’ tungah thaman hong pia ding hi. “Nget in ne-in a kekseu theihna, gutate in luhin a guktheihna hih leitungah na sum uh khol kei un. Nget in a nek theih lohna, a kekseu theih lohna, gutate in luhin a guk theih lohna mun vantungah note a dingin kholzaw un. Bang hang hiam cih leh na sum omna uhah na lungsim uh om tawntung ding hi. “Mittang pen pumpi a dingin meivak tawh kibang hi. Na mit uh ciim leh na pumpi un hoihtakin khua mu thei hi. Ahi zongin na mit uh maang leh na pumpi uh a dingin khua a mial hi. Tua ahih manin note’ sunga a om khuavak pen a mial hileh tua mialna pen nasia mahmah ding hi. “Kuamah, to nih’ sila hikhawm thei lo hi. Khat mudahin khat it ding a, khat tungah thumanin khat simmawhbawl ding hi. Note in Pasian’ na le leitung sum na na semkhawm zo kei ding uh hi. “Tua ahih ciangin note kiangah kong genin-ah: Na nuntak nadingun bang ne-in bang dawn ding cih ahi a, na pumpi uh a dingin bang silh ding cih ahi zongin lunghimawh lua kei un. Nuntakna pen an sangin thupizaw a, pumpi pen puan sangin thupizaw hi lo ahi hiam? “Vanah a leeng vasate ngaihsun dih un: Amaute in khai tuh lo, an zong la lo, sal sungah zong khol lo napi-in vantungah a om na Pa un tuate a nek ding uh tasamsak lo hi. Tua vasate sangin note manphazaw thampek hi lo na hi uh hiam? Na lunghihmawh manun kua in na khan uh kum bangzah sotto thei na hi uh hiam? Bang hangin puansilh ding lunghimawh na hi uh hiam? Gamlak a om paakte a nuntakzia ngaihsun dih un: Amaute in amau a dingin na lah sem lo, khau zong kheek lo napi-in, a hau mahmah Solomon nangawn a hoihpenin a kizep ciangin zong hih paakte banzo nai lo lai hi. Tua ahih ciangin tuni-in hingin, a zing ciang mahin meikhukah a kikhultum lel hih gamlak lopate Pasian in puansilh guan ahihleh note hong lim guatzaw ding ahih manin na upna uh a neu mahmah ahi hi. Tua ahih manin bang ne ding a, bang dawn ding a, bang silh ding ihi hiam, ci-in lunghimawh lua kei un. (Gentail mite in lunghihmawh penin a neihte uh hih bangte ahi hi.) Hih nate khempeuh na kisap lamtak uh vantungah a om na Pa un a thei hi. Thudang khempeuh sangin Pasian’ ukna le ama deihna na zuih theih nading uh thupi ngaihsut masazaw un. Tua hileh hih na kisapna dangte khempeuh uh zong hong piathuah veve ding hi. “Tua ahih manin zing ciang huna ding ma lungkham masa kei un. Zing ciang thu ding ama thu-in omsak lel un. Tuni thu pen tuni thu mah tawh beisak unla, lungkham ding behlap se kei un. “Pasian in note hong mawhsak loh nadingin midangte va mawhsaksak nawn kei un. Bang hang hiam cih leh midangte’ thu na khenzia uh tawh kizui-in note tungah hong khen ding a, midangte tungah na zat uh ngeina mah note tungah hong zang ding hi. Bang hangin na lawmte’ mit sunga ninthem tang muhsak thei napi-in nangma mit sunga singluang tang phawk thei lo na hi hiam? Nangma mit sungah singluang a tang kimlai, bangci-in na lawmte kiangah, ‘Na mit sunga ninthem tang hong lakkhiatsak ning,’ ci thei ding na hi hiam? No a kineihkhem mite aw, note’ mit sunga singluang tang lakhia masa le-uhcin, na lawmte uh mit sunga ninthem tang na lakkhiat theihna dingun hoihtakin khua na mu thei pan ding uh hi. “Uite tungah a siangtho nate pia kei un. Pia le-uhcin hong pet zawsop ding hi. Vokte mai-ah na suangmanphate uh lot kei un. Lot le-uh cin sikcip lel ding uh hi. “Ngen un; na nget uhleh hong kipia ding hi. Zong un; na zon uh leh na mu ding uh hi. Kongkhak na kiu un; na kiuh uhleh hong kihon ding hi. Bang hang hiam na cih uhleh a ngente khempeuh in ngah ding uh a, a zongte khempeuh in mu ding uh a, a kiute khempeuh a’ ding kong kihon ding hi. Pa ahi note khatpeuh in na tate un anlum hong ngen leh suangtum pia ding na hi uh hiam? Ngasa hong ngen leh gul pia ding na hi uh hiam? Note mihoih lo hinapi-in na tate uh tungah na hoih piak ding ngaihsun thei na hih uhleh vantungah a om na Pa un a ngen mite tungah na hoihte hong piazaw mahmah ding hi lo ahi hiam? Tua ahih manin note tungah hong kibawl ding na deih bangun midangte tungah na bawl un. Moses Thukhamte le kamsangte’ thuhilhnate pen hih mah a deihna ahi hi. “Kong kawcik bek tawnin lut un. Hell khuk tun nading kongvang pen lianin a lampi baih a, mi tampi in a zui uh hi. Ahi zongin nuntak tawntungna tun nading kong kawcikin a lampi haksa a, mi tawmno bek in a zuizo uh hi. “Kamsang taktak a hilote na muh uh ciangin limtakin kikem un. Amaute in a tungthamah tuu lim hong pua-in, ahi zongin a sungtawng taktak uh ngia hangsan bang ahi uh hi. Amaute’ gamtatna tawh amau’ pianzia na thei ding uh hi. Lingvom kung panin leenggah kilo ngei a, sialtalling kung panin theigah kilo ngei ahi hiam? Tua ahih manin singkung cidamte in gah limci gah a, singkung ginalote in gah ginalo gah uh hi. Singkung cidamte in gah ginalo gah ngei lo a, singkung ginalote in gah limci gah ngei lo hi. Gah limci a gah lo singkungte kiphukin meikhuk sungah kikhul hi. Tua ahih manin amau’ gamtatna tawh amau’ pianzia na thei ding uh hi. “Kei kiangah, ‘Topa, Topa aw,’ hong ci mi khempeuh, vantung ki-ukna sungah lutthei kim lo ding uh a, vantungah a om ka Pa’ deihna bangin a gamtateng bek lutthei ding uh hi. Tua ni ciangin mi tampi in kei kiangah, ‘Topa, Topa aw, nangma min tawh thu hilhin, nangma min tawh dawite hawlkhia-in, nangma min tawh nalamdang lian tampi bawl hi lo ka hi uh hiam?’ hong ci ding uh hi. Tua ciangin keimah in amaute kiangah, ‘Note ka hong thei ngei kei hi. Siatna a gamta mite aw, kei kiang panin kihemkhia un,’ ka ci ding hi. “Ka thuhilhna za-in a zui mi khempeuhte pen suang tungah a inn a lam mipil pa tawh kibang ding hi. Guah hong zu-in, tui hong khangin, huihpi hong nung a, tua inn a nawkgawp uh hangin suang tungah kilam ahih manin kisia zo lo hi. Hih ka thugente za napi-in a zui nuam lote pen sehnel tungah a inn a lam mihai pa tawh kibang ding hi. Guah hong zu-in, tui hong khangin, huihpi hong nung a, tua inn a nawkgawp uh ciangin a kisia hi. Tua inn naksiat mahmah hi,” ci-in thu a gen hi. Jesuh in hih a thugente a man khit ciangin, ama thugenna hangin mihonpite in lamdangsa mahmah uh hi. Amah in Thukham hilh siate bangin thu gen loin, aana neite bangin thu a genzaw hi. Tua mual panin Jesuh hong paisuk ciangin mihon tampi in amah a zui uh hi. Tua laitakin miphak khat hong pai-in ama mai-ah hong khukdin a, “Topa aw, nong damsaknop nakleh nong damsak thei ding hi,” a ci hi. Jesuh in zong a khut zanin tua mipa lawng a, “Ka hong damsaknuam hi; dam ta in,” a cih khit phetin a phakna a dampah hi. Tua ciangin Jesuh in ama kiangah, “Hih thupiang kuama kiangah gen masa loin siampipa kiangah va paisuak pahin va kivelsak inla, na damkhitna thu mi khempeuh in a theih nadingin Moses thupiakna tawh kizui-in biakna va pia in,” ci-in a vaikhak hi. Kapernaum khua a tun ciangin Rom mi galkapbu khat ama kiangah hong pai-in, “Topa aw, ka nasempa cina-in inn-ah lupna ngakin om a, gim mahmahin taangzo het lo ahih manin hong damsak in,” ci-in a thum hi. Jesuh in, “Hong pai-in ka damsak ding hi,” a ci hi. Ahi zongin galkap bupa in, “Topa aw, keima inn-ah nangpipi nong pai dingin kilawm lo ka hih manin a dam nadingin thu pia lel lecin zong ka nasempa dam ding hi. Kei zong uliante khutnuai-ah nasem mi ka hi a, keima khutnuai-ah zong galkapte a om hi. Tua galkapte khat kiangah, ‘Pai in,’ ci-in sawl leng pai a, adang khat kiangah, ‘Hong pai in,’ ci-in sam leng hong pai a, ka nasempa kiangah, ‘Hih sem in,’ ci-in sawl leng a sem hi,” a ci hi. Jesuh in hih bupa thugen a zak ciangin lamdangsa a, amah a zui mihonte kiangah, “A mantak a kong genin-ah Israel mite lak nangawnah hih bang upna a nei ka mu nai kei hi. Nisuahna le nitumna panin mi tampi tak hong pai-in vantung ki-ukna sungah Abraham, Isaac, le Jakob-te tawh an ne-in sabuai-ah tukhawm ding uh hi. Ahi zongin vantung ki-ukna sungah a om dingin a kingaihsun Israel mite ahihleh pualam khuamialna-ah kilawnkhia ding a, tua lai-ah kapin a hagawi ding uh hi,” a ci hi. Tua ciangin Jesuh in galkap bupa kiangah, “Na inn-ah ciah in. Na up bangin hong piang ding hi,” a ci hi. Tua hun laitak teek mahin a nasempa a dam hi. Peter’ inn-ah Jesuh va pai a, Peter’ sungnu nattunin lupna tungah a lum a mu hi. Jesuh in ama khut va lawnsak hi. A natna dampah a, amah zong tho-in a zinte a dozo pah hi. A nitak ciangin mite in Jesuh kiangah dawivei mi tampi tak hong paipih uh hi. Jesuh in kam khat pauna bek tawh dawite hawlkhia-in cina khempeuh a damsak hi. Kamsang Isaiah in, “Amah in eite’ natna teng thuakin, eite’ gimna teng puakhia hi,” ci-in a genna thu a tun nadingin hih bang a piang ahi hi. Jesuh in ama kiangah mi tampi tak a hong omlam a theih ciangin a nungzuite kiangah, “Tuili galkhatah pai ni,” ci-in a gen hi. Tua laitakin Thukham hilh siate khat in ama kiangah, “Sia aw, na paina peuhpeuhah ka hong zui ding hi,” a cih leh Jesuh in, “Ngiate in lup nading kua nei uh a, vasate in zong giah nading bu nei uh hi. Ahi zongin Mihing Tapa in a luptheih nading mun koimahah nei lo hi,” ci-in a dawng hi. Tua ciangin amah a zui midang khat in, “Topa aw, kei hong ciahsak inla, ka pa hong vuisak masa in,” a cih leh Jesuh in, “Nangmah in kei hong zui inla, misi bang ahi mite in misite a vui dingun nusiat in,” ci-in a dawng hi. Gunkuang tungah Jesuh a tuan ciangin a nungzuite in zong a zui uh hi. Thakhat thu-in huihpi hong nung ahih manin tuihualte in gunkuang tum dekdek a, ahi zongin Jesuh a ihmu hi. Nungzuite in Jesuh va phong uh a, “Topa aw, ka si dektak uh hi; hong hon in,” a va ci uh hi. Jesuh in, “Bang hangin tuaci lau na hi uh hiam? Na upna uh neu mahmah hi,” a cih khit ciangin tho-in huihpi le tuihualte thu pia a, a dai dide pah hi. A nungzuite in lamdangsa mahmah uh a, “Huihpi le tuihualte nangawn in ama thu mang ahih manin hih mipa a bangci mi hi ding ahi hiam?” a ci uh hi. Tuili galkhat, Gadara gam a tun ciangin han panin dawivei mi nih hong paikhia-in Jesuh a na dawn uh hi. Tua mi nihte kihtakhuai mahmah ahih manin amaute omna lam tawnin kuamah pai ngam lo uh hi. Amaute nakpitakin hong kiko uh a, “Pasian’ Tapa aw, kote bang hong nuammawh na hi hiam? A hun tung nai lopi-in kote gim a pia dingin hong pai na hi hiam?” a ci uh hi. Tua laitakin tua san panin a gamla lo mun khatah vok honpi gamta-in a om hi. Tua ciangin dawite in Jesuh kiangah, “Kote hong hawlkhia ding na hih leh hua vokte sungah hong lutsak in,” ci-in a thum uh ciangin Jesuh in, “Pai un,” ci ahih manin amaute zong paikhia-in vokte sungah a lut uh hi. Tua vok honte, keen luvum panin tuaksuk gawpin tuili sung tu uh ahih manin a vekpi-in tuikia-in a si khin hi. Tua vokcingte zong tai-in khuasung tuh uh a, tua dawivei mite’ thu le a thupiang khempeuh a gen uh hi. Tua ciangin khuasung mi khempeuh, Jesuh kiangah hong pai-in amah a muh uh ciangin, amau gam panin a paikhiat nadingin a thum uh hi. Tua lai panin gunkuangah tuang leuleu-in tuili galkhat lama om ama khua-ah a va tungkik hi. Mi pawlkhat in khutlekhezaw mi khat, a lupna pheek tawh hong pua-in Jesuh kiang a hong tunpih uh hi. Jesuh in amaute’ upna a muh ciangin a cina mipa kiangah, “Ka ta aw, na lungsim kinuamsak in; na mawhna hong kimaisak khinta hi,” a ci hi. Tua ciangin Thukham hilh siate pawlkhat in a lungsim uhah, “Pasian tawh a kikim bangin kampau ahih manin hih mipa in Pasian a dem ahi hi,” ci-in a ngaihsun uh hi. Ahi zongin Jesuh in amaute’ ngaihsutna thei ahih manin, “Bang hangin a sialamin ngaihsun na hi uh hiam? ‘Na mawhna hong kimaisak hi,’ cih ding le, ‘Tho inla pai in,’ cih ding koi baihzaw ahi hiam? Kampau lel pen baih mahmah hi. Ahi zongin Mihing Tapa in leitungah mawhmaisak theih nading thu nei hi, ci-in na theih nadingun kong lak ding hi,” a cih khit ciangin khutlekhezaw mipa kiangah, “Tho in; na lupna pheek pua inla na inn-ah ciah in,” a ci hi. Amah zong tho-in a inn-ah a ciahpah hi. Mihonte in hih thu a theih uh ciangin lau mahmah uh a, Pasian in mihingte tungah hih bang vangliatna a piakna hangin ama min a phat uh hi. Tua lai mun panin Jesuh a paikhiat ciangin siahdongpa Matthai a zumah tu-in a om mu a, “Hong zui in,” a cih leh amah zong dingin a zuipah hi. Jesuh in Matthai’ inn-ah nitak an a nek laitakin siahdong dangte le thukham a khial midang tampite in zong Jesuh le a nungzuite tawh an a nekhawm uh hi. Farisi mite in hih thu a muh uh ciangin Jesuh nungzuite kiangah, “Bang hangin na siapa un siahdongte le thukham khialte tawh an nekhawm ahi hiam?” a ci uh hi. Jesuh in hih thu a zak ciangin, “Cidamte in siavuan kisam lo uh a, cina mite bek in kisam uh hi. Lai Siangtho sungah, ‘Ganhing tawh biak ding ka deih kei a, migitna ka deihzaw hi,’ ci-in a genna pen bang a cihnopna ahi hiam, va kan un. Mite in a zahtak mihoihte a sam dingin a hong pai ka hi kei a, mite in a pampaih mite a sam dingin a hong pai ka hi hi,” a ci hi. Tua ciangin Jesuh kiangah Tuiphumpa Johan’ nungzuite hong pai uh a, “Bang hangin kote le Farisi mite in an tang zelzel napi-in, na nungzuite in tang lo se ahi uh hiam?” ci-in a dong uh hi. Jesuh in amaute kiangah, “Mopina pawi khatah, a zineipa a om sungin a mopawi simte dah dingin um na hi uh hiam? Dah het lo ding uh hi. Ahi zongin amaute kiang panin zineipa a kilakkhiat ding hun hong tung ding a, tua hun ciangin amaute in an a tang ding uh hi. Kuamah in a ton nai lo puanbek thak tawh puan lui a phop kei hi. Tua bangin phop leh puanbek thak a ton ciangin a lui kaigawmin a vang a gol semsem ding hi. Kuamah in savun um lui sungah leenggahzu thak thun lo hi. Kithun leh a savun um phukham ding a, a leenggahzu bua-in a savun um zong a sia a suak ding hi. Leenggahzu thak pen savun um thak sungah kithun bek hi. Tua ahih manin a nihin a sia om lo hi,” ci-in a dawng hi. Tua bangin Jesuh in thu genin a om laitakin Jesuh kiangah Jew mi ulian khat hong pai-in ama mai-ah hong khukdin a, “Tu mahmahin ka tanu a si hi. Ahi zongin nang hong pai-in ama tungah na khut hong nga lecin amah hingkik ding hi,” ci-in a thum hi. Jesuh zong dingpah a, a nungzuite tawh tua mipa a zui uh hi. Tua laitakin kum sawm le nih tawntung a si a luang numei khat Jesuh’ nungah hong pai-in a puan mongteep a lawngsim hi. Tua numei in, “A puan va lawng bek leng zong ka dam ding hi,” ci-in a lungsimah ngaihsun hi. Jesuh zong hong kihei a, tua numei a muh ciangin, “Ka tanu aw, na lung kinuamsak in. Na upna in nang hong damsak khinta hi,” a cih khit phetin tua numei a dampah hi. Jew mi ulianpa’ inn-ah Jesuh a tun ciangin tamngai tum mite le mihonpi a gamlum henhan a muh ciangin, “Na vekpi-un paikhia un. Hih numeino a si hi lo a, a ihmu bek ahi hi,” a ci hi. Ahi zongin amaute in Jesuh zahpihin a nuihsan uh hi. Ahi zongin mihonpite a pualamah a kipaikhiatsak khit ciangin tua numeino omna-ah Jesuh tumin a khut a va let ciangin tua numeino hong tho hi. Hih thupiang tua gam khempeuhah a kizel hi. Tua lai panin Jesuh a paikhiat ciangin mittaw mi nih in a nungah hong zui-in nakpitakin kiko uh a, “David’ suan Jesuh aw, kote hong hehpih in,” ci-in a thum uh hi. Inn-ah Jesuh a lut ciangin mittaw mi nihte in zong hong zui uh hi. Tua ciangin Jesuh in, “Na mit uh khua hong musak thei dingin hong um na hi uh hiam?” ci-in a dot ciangin amaute in, “Topa aw, ka hong um uh hi,” ci-in a dawng uh hi. Tua ciangin Jesuh in amaute’ mit lawnsak a, “Na upna uh tawh kizui-in note tungah hong piang ta hen,” a ci hi. Tua ciangin amaute in khua mukik uh a, Jesuh in amau tegel kiangah, “Hih thupiang kuamah theisak kei un,” ci-in khauh takin a gen hi. Ahi zongin amaute paikhia uh a, tua gam sung khempeuhah hih thu a zasak uh hi. Tua mi nihte a paikhiat laitakun mi pawlkhat in dawi a veina hangin a pauthei lo mi khat, Jesuh kiangah a hong paipih uh hi. Ama sung panin dawi a kihawlkhiat khit phetin tua mipa hong pautheikik pah hi. Mihonpite in lamdangsa mahmah uh a, “Israel gam sungah hih bang thu piang ngei nai lo hi,” a ci uh hi. Ahi zongin Farisi mite in, “Dawimang lianpen pa min tawh hih bangin dawi a hawlkhia ahi hi,” a ci uh hi. Tua bangin khuapite le khuaneute-ah Jesuh pai kawikawi a, a kikhopna uh innte-ah thu hilhin, Pasian’ ukna hangin a lungdamhuai thute gen a, natna nam khempeuh a damsak hi. Mihonte a muh ciangin, a cing nei lo tuuhon bangin gimna ngahin lungkhamin om uh ahih manin hehpihhuai a sa hi. Tua ahih manin a nungzuite kiangah, “Anlak ding tampi om napi-in anlak na a sem ding mi tawmbek a om hi. Tua ahih manin ama an a la dingin an nei Topa in nasem tampi hong sawl nadingin thu ngen un,” a ci hi. Jesuh in a nungzui sawm le nihte sam a, dawite a hawlkhiat theih nading uh le natna nam khempeuh a damsak theih nadingun amaute tungah vangliatna a pia hi. Tua sawltak sawm le nihte’ min in: A masa-in Simon (Peter zong a kici pa) le a naupa Andru, Zebedi’ tapa James le a naupa Johan, Filip le Bartholomew, Thomas le siahdongpa Matthai, Alfeas’ tapa James, Thaddeas, Simon (gam khual pa), le Jesuh a lehhek Iskariot’ tapa Judas ahi uh hi. Jesuh in hih mi sawm le nihte sawl a, “Gentail mite gam sung ahi a, Samaria mite khua sungah ahi zongin lut kei un. Tuu bangin a mangthang Israel mite lakah va paizaw un. Na paina peuh uhah, ‘Vantung ki-ukna hong naita hi,’ ci-in thu va hilh un. Cinate damsakin, misite hingsakin, miphakte damsakin, dawite va hawlkhia un. Man piak kul loin hih vangliatna na ngah uh bangin hih vangliatna na zatna uhah zong man va ngen kei un. Kham ahi a, ngun ahi a, sumngo ahi zongin sum peuhmah na ip sung uhah keng kei un. Khualzinna-ah an ngenin puak nading ip ahi a, khedap ahi a, ciangkhut ahi zongin keng kei unla, puanak zong a val kengthuah kei un. Nasem mite pen amau sapnateng mite in a piak ding a ngeina ahi hi. “Khuapi ahi a, khuaneu ahi zongin khua khat peuhpeuh na tun uh ciangin tua khua sungah note zin hong tungsak nuam kua om ahi hiam, ci-in zong unla, na muh uh ciangin tuate’ inn-ah tungin, tua khua na nusiat mateng uh tua lai mahah omsuak pah un. Inn khat peuhpeuhah na lut uh ciangin a mite hopihin thupha na pia un. Tua na hopihna uh innsunga mite in note hong tunsaknop leh na hopihna thupha uh amaute tungah kip ding a, ahi zongin hong tunsaknop kei uhleh na hopihna thupha uh na dokkik ding uh hi. Inn khat peuhpeuh in ahi a, khua khat peuhpeuh in ahi zongin note hong tunsaknop kei a, na thugen uh hong ngaihnop kei leh tua lai panin paikhia unla, na khe uha leivui bangte sinkhiat un. Thukhen ni ciangin tua khuamite’ thuakna sangin Sodom khua le Gomorrah khuamite’ thuakna olzaw lai ding ahihna thu hoihtakin phawk un. “Ngiahon lakah tuu a kikhah bangin note hong sawlkhia ka hih manin gul bangin pilvang unla, vakhu bangin migi un. Mi pawlkhatte in note hong manin zumah hong paipih ding uh a, amaute’ kikhopna inn sungah hong satgawp ding uh ahih manin hoihtakin kidawm un. Keima hangin gam ukte le kumpite mai-ah thu hong kisit ding hi. Hih bang na tuah uh ciangin thu hong sit mite le Gentail mite tungah Lungdamna Thu gentheih nading hunhoih a nei na hi uh hi. Tua bangin thusitna a thuak dingin hong kipaipih ciangin, bang gen ding ihi hiam, ci-in lunghimawh kei un. A hun a tun ciangin na gen ding teng uh hong kihilh ding hi. Thu na gen uh ciangin note’ gen hi loin, na Pa uh’ Kha Siangtho in note tungtawnin thu a gen ding ahi hi. Unau le unau, pa in a ta, tate in a nu a pate langpangin sihna a thuak dingin khatlekhat kiheek ding uh hi. Keima hangin Gentail mi khempeuh in note hong mudah ding uh hi. Ahi zongin a tawp dongin a thuakzo mite in hotkhiatna a ngah ding uh hi. Khua khatah note hong kibawlsiat leh khuadang khatah tai un. Note kiangah kong genin-ah: Israel khua khempeuh na khit ma-un Mihing Tapa hong pai ding hi. “A siapa sangin a sang naupangte lianzaw ngei lo a, a topa sangin a silate lianzaw ngei lo hi. Tua ahih manin sang naupangte pen a siapa uh tawh a kibat uhleh a lungkim ding uh hi a, silate pen a tote uh tawh a kibat uhleh a lungkim ding uh ahi hi. Innteek lutang pa pen Beelzebul hong ci uh ahihleh a innkuanpih mite tua sangin min siazaw tawh hong kozaw lai ding uh hi lo ahi hiam? “Tua ahih manin kuamah kihta kei un. A kiseelte khatvei teitei kimu ding a, thusimte khatvei teitei thulang suak ding hi. Zan khuamial sunga kong gente, sun khuavak sungah taangko unla, a simthamin kong huau thute, innkhumdawn zangah na taangko un. Pumpi a thah khit ciangin kha a that thei lote na kihta kei un. Hell khuk sungah pumpi le kha a nihin a susia thei pa na kihtazaw un. Gitta nih ciangin mat khatin kizuak lel hi lo ahi hiam? Tua hinapi-in na Pa uh’ thukim lohin tua gittate khat nangawn lei-ah mawkkiat lo hi. Note ahihleh na lu tung uha na sammal phazah nangawn uh hong kiciamtehsak hi. Tua ahih manin lau kei un. Gitta tampi sangin note na manphazaw uh hi. “Keima mi ahihna thu mite’ theihin a genkhia mite, kei zong vantungah ka Pa’ mai-ah keima mi ahihna thu ka gen ding hi. Ahi zongin keima mi ahihna thu mite’ theihin a genkhia nuam lote, kei zong vantungah ka Pa’ mai-ah keima mi ahihna thu ka genkhia nuam kei ding hi. “Leitungah kilemna a omsak dingin hong pai hi, ci-in hong ngaihsun kei un. Kilemna a omsak dingin a hong pai ka hi kei a, kido nading namsau a khah dingin a hong pai ka hizaw hi. Tate le pate a kidosak ding, tanute le nute a kidosak ding, monute le teeknute a kidosak dingin a hong pai ka hi hi. Mi khat a dingin a gal lian penpen ama innkuanpih mite mah hong hi ding hi. “Kei sangin a nu a pa a itzawte kei tawh kilawm lo a, kei sangin a tapa a tanu a itzawte kei tawh kilawm lo hi. Ama singlamteh mah puatawm lopi-in ka nung hong zuite kei tawh kilawm lo hi. Hih leitung nuntakna a hon nuamte in a nuntakna taktak taanlawh ding a, keima hangin a nuntakna a taanlawhte in a nuntakna taktak a ngah ding uh hi. “Na thugen uh a hong sangte in kei’ thu a hong sang hi a, kei a hong sangte in kei a hong sawl pa zong a sang ahi uh hi. Pasian’ thugen ahihna hangin Pasian’ thugen mi a sangte in Pasian’ thugente’ thaman ngah ding a, mihoih hihna hangin mihoih a sang mite in mihoihte’ thaman ngah ding uh hi. Keima nungzui mi a neupen khat nangawn, keima nungzui ahihna hangin tuivot hai khat bek a suahte nangawn in pel loin thaman a ngah ding lamtak phawk un,” ci-in a vaikhak hi. Jesuh in a nungzui sawm le nihte a vaikhakna a man khit ciangin tua kiimnai-a om khuate-ah thuhilh ding le thugen dingin tua mun panin a paikhia hi. Tuiphumpa Johan in thong sung panin Jesuh’ nasepnate a zak ciangin Jesuh kiangah a nungzuite sawl a, “Nang pen a hong pai ding pa na hi hiam, tua ahih kei leh adang na lamen lai ding ka hi uh hiam?” ci-in a dongsak hi. Jesuh in amaute kiangah, “Va ciahkik unla, tu-a na zakte uh le na muh uh thute va gen un: Mittawte in khua mukik a, khebaite paithei kikin, miphakte damkik a, bilngongte in khua za kikin, misite hingkik a, mizawngte tungah Lungdamna Thu a kihilhnate va gen un. Kei hong umte pen a lungdamhuai mahmah ahi hi,” ci-in a dawng hi. Tua thudong mite a ciahkhiat khit ciangin Jesuh in mihonte kiangah Johan’ thu gen a, “Gamlakah Johan kiangah na pai uh ciangin bang a mu dingin kilamen na hi uh hiam? Huih in a mut awn diamdiam lopakungte a en ding maw? Tua hi lo ahihleh bang a mu dingin kilamen na hi uh hiam? Puan hoihnono a silhpa a mu dingin kilamen maw? A taktakin ci lehang, puan hoihnono a silhte pen kumpi inn sungah om uh hi. Tua ahih kei leh bang a en dingin pai na hi uh hiam? Kamsangpa a en ding maw? Hi hi; kamsangpa a en dingin na pai uh a, tua na muhpa uh kamsang mawkmawk ciang bek hi loin a lianzaw khat ahi hi. Bang hang hiam cih leh Lai Siangtho in Johan’ thu a genna-ah, ‘Na pai nading lampi a hongkhol dingin nangma mai-ah ka kamtai pa ka sawl hi,’ ci-in Pasian in gen hi, ci-in kigelh hi. Leitung mi khempeuh sung pan Tuiphumpa Johan a lianpen ahi hi. Ahi zongin vantung ki-ukna sungah a neupen i cihte nangawn Johan sangin lianzaw lai hi. Tuiphumpa Johan’ thuhilh hun a kipan tu ciang dong, mite in vantung ki-ukna thu hong kituhteh gawp uh a, thahatthu hong ciam uh hi. Bang hang hiam cih leh Tuiphumpa Johan thuhilh a kipat hun ciang dong, kamsangte khempeuh le Moses Thukham khempeuh in hih vantung ki-ukna thu gen belin a nei uh hi. Tua thu kigensa na upnop uhleh, a kigenkhol bangin a hong pai ding Elijah a kici pen Tuiphumpa Johan ahi hi. Tua ahih manin bil neite in na za ta un. “Ahi zongin tuhun mite bang tawh genteh ding ka hi hiam cih leh: Mihon omna lamkabomah a tu naupang a kimawlte tawh kibang uh hi. Naupang honkhat in a lawmte kiangah, ‘Lam nading khuang kong tumsak uh hangin na lam nuam kei uh a, kah la ka sak uh hangin lah na kap nuam tuan kei uh hi,’ a kicite tawh a kibang uh hi. Bang hang hiam cih leh Tuiphumpa Johan hong pai a, amah in zu le an tangin a om ciangin, ‘Dawivei hi,’ a ci uh hi. Mihing Tapa hong pai leuleu a, zune anne-in a om ciangin, ‘Zuhai anhai pa; siahdongte le midangte in a kikholhpih nop loh mite tawh a kikhawlpa,’ ci leuleu uh hi. Ahi zongin Pasian’ pilna a man taktakna thu a gah panin hong kilang hi,” a ci hi. Tua ciangin Jesuh in nalamdang tampi a bawlna mun khuapi mite kisik nuam lo uh ahih manin taiibawl ding kipan a, “Khorazin khuapi mite le Bethsaida khuapi mite aw, gimna lianpi na thuak ding uh hi. Bang hang hiam cih leh note khua sungah a hong kilak na lamdangte, Taia le Sidon khua sungah kilak hileh amaute in kisikna limin sawtpekin puanhampi silhin vut kinuh ding uh hi. Tua ahih manin thukhen ni ciangin note’ thuakna sangin, Taia le Sidon khuamite’ thuakna baihzaw lai ding ahihna thu phawk ta un. Kapernaum khuapi mite aw, van a sangna munah hong kipahtawi ding sa na hi uh hiam? Hell khuk sungah hong kilawnsuk ding hi. Bang hang hiam cih leh note’ khuasunga hong kibawl na lamdangte, Sodom khua sungah kibawl hileh tuni dongin tua khua kip lai ding hi. Tua ahih manin thukhen ni ciangin note’ thuakna sangin Sodom khuamite’ thuakna baihzaw lai ding ahihna thu phawk ta un,” a ci hi. Tua ciangin Jesuh in, “Vantung le leitung Topa ahi ka Pa aw, mipilte le misiamte tungah na ip hih thute, bangmah a thei lo hih mite tungah lak na hih manin ka nuam hi. Pa aw, hih pen nangma deihna le na lungkimna bangin na hih ahi hi. “Ka Pa in kei tungah na khempeuh hong pia khin hi. Pa simloh Tapa a thei kuamah om lo a, Tapa le Tapa in a theihsaknop mite simloh, pa a thei kuamah om lo hi. “Na semin vangik pua-in a gim mite khempeuh aw, ka kiangah hong pai ta un. Note tungah lungsim tawldamna ka hong pia ding hi. Keima hakkol zamin kisuan unla, kei kiangah hong kisin dih un. Kei pen kiniamkhiatin nem hithiat ka hih manin ka kiangah na tawl uh a dam ding hi. Bang hang hiam cih leh note kong suat ding ka hakkol nuam a, na puak ding uh van zong a zang mah ahi hi,” ci-in a genkhia hi. Tua zawh a sawt loin Sabbath ni khatin mangbuh lo nawkin Jesuh a pai hi. A nungzuite a gil uh kial ahih manin mangbuhvuite zutin a ne uh hi. Farisi mite in a muh uh ciangin Jesuh kiangah, “En in, Sabbath ni-in i hih dingin a kilawm lo gamtatna na nungzuite gamta uh hi,” a ci uh hi. Jesuh in amaute kiangah, “David le a kikholhpihte a gilkial laitakun David’ gamtatna thu sim ngei lo na hi uh hiam? Pasian’ inn sungah amah lut a, siampite lobuang, amah le a kikholhpihte in a nektheih ding ahi lo Ompihna Anlum la-in amah le a kikholhpihte in a ne uh hi. Tua ahih kei leh zong siampite in Sabbath sim mahin biakinn sungah Sabbath thukham khial napi-in mawhsakna a ngah tuan lohna thu uh, Moses Thukham sungah sim ngei lo na hi uh hiam? Note kiangah kong genin-ah: Tua biakinn sangin a lianzaw khat hih lai-ah hong om hi. Lai Siangtho sungah, ‘Ganhing tawh biak ding ka deih kei a, migitna ka deihzaw hi,’ a cihnopna thu teltakin thei le-uhcin a mawh lopi kimlai na mawhsak kei ding uh hi. Bang hang hiam cih leh Mihing Tapa pen Sabbath ni a ukpa ahi hi,” ci-in a dawng hi. Tua lai panin Jesuh paisuakin amau kikhopna inn sungah a lut hi. Tua lai-ah a khut langkhat a zaw mi khat a na om hi. Jesuh gamta khial hi, ci-in a mawhna a zong nuam mi pawlkhat tua lai-ah om uh ahih manin tua mite in Jesuh kiangah, “Sabbath ni-in cina damsak ding a kilawm mah ahi hiam?” ci-in a dong uh hi. Jesuh in amaute kiangah, “Note khatpeuh in tuu khat nei unla, Sabbath ni-in dum sungah tua tuu kia leh, tua tuu va lenin kaikhiato ding hi lo na hi uh hiam? Mi pen tuu sangin nakpitakin manphazaw ahih manin Sabbath ni-in a hoih sep ding a kilawm ahi hi,” ci-in a dawn khit ciangin a mipa kiangah, “Na khut zan in,” a ci hi. A mipa in zong a khut zanpah a, midangte mah bangin hoihtakin a damkik hi. Ahi zongin Farisi mite paikhia uh a, Jesuh a thahtheih nading uh vai a hawm uh hi. Jesuh in amah a kisawmna thu a theih ciangin tua mun panin a paikhia hi. Mi tampi in amah hong zui uh hi. Amah in cina mi khempeuh damsak a, “Keimah in ka teelsa ka nasempa, ka it mahmah, ka lungkimna pa en un. Keima Kha ama tungah ka pia ding a, Gentail mite tungah upna man a pulak ding hi. Amah in thu seel loin, a aw sangsak lo ding a, konglakah zong a awging kiza lo ding hi. Amah in a zawngkhal mite dopbawl ding a, a cimawh mite tungah migi ding hi. Thuman thutang a gualzawhsak mateng khawl ngei lo ding hi. Gentail mite in amah bek mah lametin nei ding uh hi,” ci hi. Tua ciangin mi pawlkhat in Jesuh kiangah mittawt le pau theih loh a thuah dawivei mi khat hong paipih uh hi. Jesuh in amah damsak ahih manin amah hong pauthei-in khua zong hong muthei hi. Tua ciangin mi khempeuh in lamdangsa mahmah uh a, “Hih pa, i lametet David’ suan hi lo ding ahi hiam?” a ci uh hi. Ahi zongin Farisi mite in hih thu a zak uh ciangin, “Dawimangpa Beelzebul min tawh dawi a hawlkhia hi lel hi,” a ci uh hi. Jesuh in amaute’ ngaihsutna thei ahih manin amaute kiangah, “Gam khat peuhpeuh, a gammite kiphelkhamin pawlkhat le pawlkhat kido le-uh tua gam a sia suak ding hi; khua khat ahi a, innkuan khat ahi zongin kiphelkhamin kido le-uh kip lo ding hi. Tua mah bangin Satan le Satan kihawlkhia le-uh a ukna bangci kip theih ding ahi hiam? Keimah in Beelzebul vangliatna tawh dawite hawlkhia ka hih leh na mipihte un a kua’ vangliatna tawh hawlkhia ahi uh hiam? Na mipihte un na ngaihsut khialhna uh hong kilangsak hi. Note’ ngaihsut bang hi loin, Pasian’ Kha in dawi hawlkhiat nading vangliatna kei tungah hong pia ahih manin note lakah Pasian’ ukna hun hong kipan khin ahihna hong kilang hi. Mi khatpeuh in mi thahat khat pa’ inn sungah lutin a neihsate a laksak theih nadingin tua inn nei a thahatpa a hencip masak phot ding kisam hi. A hencip zawh khit ciang bekin a inn-ah lutin a neihsate lathei pan hi. Kei hong pawlpih lo peuhmah keima lang hi uh a, kei hong kaihkhoppih lo peuhmah a thehthang ahi uh hi. Tua ahih manin note kiangah kong genin-ah: Mihingte’ kampau khialhna le gamtat khialhnate kimaisak thei ding a, ahi zongin Kha Siangtho langpangin a gensiate kimaisak lo ding hi. Mihing Tapa langpangin a gensiate a mawhna uh kimaisak thei ding a, ahi zongin Kha Siangtho langpangin a gensiate pen tuhun a kipan a tawntungin a mawhna uh kimaisak lo ding hi. “Singgah limci a gahtheih nadingin a kung a cidam phot ding kisam a, a kung gina kei leh a gah limci lo hi. Tua ahih manin singkung khat a pianzia pen a gahin hong kithei hi. Gul bangin ngian a zang note aw, migilo na hih uh ciangin bangci-in thuhoih genthei mah ding na hi uh hiam? Bang hang hiam cih leh lungsim sunga thu om pen kam in a genkhia hi bek hi. Mihoihte in a hoih a kholteng suahkhia a, migilote in gitlohna a kholteng a suahkhia ahi hi. Note kiangah kong genin-ah: Thukhen ni ciangin mi khempeuh in phattuamna a om lo a kampaunate uh khempeuh bangin thusitna a thuak ding uh hi. Bang hang hiam cih leh nomau kampauna tawh kizui-in thu hong kikhen ding a, dik hi, cihna ahi a, mawh hi, cihna ahi zongin na ngah nadingun nomau kampau mah hong kibulphuh ding hi,” a ci hi. Tua ciangin Thukham hilh siate le Farisi mi pawlkhat in Jesuh kiangah, “Sia aw, nalamdang khat nong lah ding ka deih uh hi,” ci-in a ngen uh hi. Ahi zongin Jesuh in, “Tuhuna mite bangzahin giloin, Pasian’ thu thei lo ahi uh hiam? Na lamdang ka bawl ding na hong ngen tazen uh hi. Jonah thu tawh kisai nalamdang longal adang hong kilaklo ding hi. Ngasa gilpi sungah sun thum le zan thum sung Jonah a om mah bangin Mihing Tapa zong sun thum le zan thum sung mah lei sungah om ding hi. Jonah in amaute kiangah thu a hilh ciangin a mawhna panun kisikkik uh ahih manin thukhen ni ciangin Nineveh khuamite in note mawhsakna thu hong gen ding uh hi. Note kiangah kong genin-ah: Tu mahmahin note kiangah Jonah sangin a lianzaw khat a om hi. Leitaw lam gam kumpinu in Solomon’ pilna thu a ngai dingin leitung phelkhat kantanin hong pai ahih manin thukhen ni ciangin amah in note mawhsakna thu hong gen ding hi. Note kiangah kong genin-ah: Tu mahmahin hih lai-ah Solomon sangin a lianzaw khat a om hi. “Mi khatpeuh sung panin dawi a kihawlkhiat khit ciangin a ten nading mun keuna zongin a vak kawikawi hi. Ahi zongin a ten nading mun a muh zawh loh ciangin, ‘Ka paikhiatnasa inn mahah ciahkik ning,’ ci hi. A hong paikik ciangin tua inn na awng lai a, kipuah siangin hoihtakin a om a mu hi. Tua ciangin va paikik a, amah sangin a siahuaizaw dawi sagih hong tunpihin tua mipa sungah a teng uh hi. Tua ahih manin tua mipa pianzia pen a masa huna sangin a siazaw hi. Tua ahih ciangin tuhuna migilote zong hih mipa’ pianzia mah tawh kibang ding uh hi,” a ci hi. Tua bangin mite kiangah thu genin a om laitakin a pualamah a nu le a naute in Jesuh hopih nuamin a om uh hi. Tua ahih manin tua lai-ah a om mite khat in Jesuh kiangah, “Na nu le na naute in nang hong hopih nuamin a pualamah om uh hi,” a ci hi. Ahi zongin Jesuh in tua mipa kiangah, “Ka nu kua bangte hi a, ka naute kua bangte ahi uh hiam?” a cih khit ciangin a nungzuite lam kawk a, “Hihte pen ka nu le ka sanggamte ahi uh hi. Vantungah a om ka Pa’ deihna bangin a gamta mi peuhmah ka sanggam pasal, ka sanggam numei, ka nu ahi uh hi,” ci-in a dawng hi. Tua ni mahin tua inn panin Jesuh paikhia a, tuili gei-ah pai-in thuhilh dingin a tu hi. Ama kiimah a hong kikhawm mi tamlua ahih manin amah gunkuang tungah pai-in tu a, mihonte ahihleh tuili gei-ah a omsak hi. Amah in thugentehna a tuamtuam zangin thu tampi hilhin a genin-ah: “Khaici vawhpa khaici vawh dingin a kuankhia hi. Khaici a vawh ciangin pawlkhatte lo lai lam dungah tu a, vasate hong leengin a ne uh hi. Pawlkhatte, suang a kitawphahna leidaina mun a tu hi. Lei thuk loin lum ahih manin a khaici popah hi. Ahi zongin ni hong sat ciangin ankungte in zung thuk kha zo lo uh ahih manin tua ankungnote vulin a keu hi. Pawlkhatte, lingbulsum a omna mun leilak tu a, lingbulsumte hong selin hong khang ahih manin ankungte a depgawp hi. Ahi zongin pawlkhatte, lei hoihna mun tu-in hong khang hi. Pawlkhatte in a zah zakhat, pawlkhatte in a zah sawmguk, adangte in a zah sawmthum a gah hi,” ci-in a gen khit ciangin, “Zak nading bil a neite in hih thu na za ta un,” ci-in Jesuh in a thugen a khum hi. Tua ciangin nungzuite in Jesuh va naihin ama kiangah, “Bang hangin thugentehna zangin amaute tungah thu gen na hi hiam?” ci-in a dong uh hi. Jesuh in, “Vantung ki-ukna tawh kisai thusim note tungah hong kihilh a, ahi zongin amaute tungah kihilh lo hi. Bang hang hiam cih leh a neisate tungah kipia thuahin hau semsem ding a, a nei lote tung panin a neihsa sunsun nangawn kilaksak ding hi. Amaute in enen napi-in mu thei lo uh a, ngaingai napi-in za thei lo, tel thei lo uh ahih manin thugentehna zangin thu a gen ka hi hi. Kamsang Isaiah’ thugenkholhna, hih thu tawh kisai-ah amau a dingin tung taktak hi. Tua a genna-ah, ‘Na zakzak uh hangin na tel kei ding uh a, na etet uh hangin na mu kei ding uh hi. Hih mite’ lungsim mawl mahmah hi; a bil uh bingsak uh a, a mit uh a si uh hi. Tua bang hi kei le-uh, a mit uh tawh mu-in, a bil uh tawh za-in, a lungsim un tel ding a, kei lamah amaute hong kihei-in, amaute ka damsak ding hi, ci-in Pasian in gen hi,’ ci-in kigelh hi. Ahi zongin note’ mit in mu-in na bil un za ahih manin a hampha mahmah na hi uh hi. Ahi taktakin note kiangah kong genin-ah: Kamsangte le Pasian’ mi tampite in note’ muhte munuam mahmah napi-in mu lo uh a, note’ zakte zanuam mahmah napi-in za lo uh hi. “Tua ahih ciangin tu-in khaici vawhpa thugentehna thu na ngai un. Mi pawlkhat in Pasian’ hong ukna tawh kisai a lungdamhuai thu za napi-in a thu theitel lo uh ahih manin Dawimangpa hong pai-in amau lungsim sunga a kivawh thu a lakkhiatsak hi. Hih bangte pen lolai lampi dung a tu khaicite tawh kibang hi. Suang kitawphah leilak a tu khaicite pen Pasian’ thu a zak ciangun lungdam takin a sangpahte a cihnopna ahi hi. Ahi zongin amaute sungah thuktum zo lo ahih manin tawlkhat sung bek um uh hi. Tua ahih manin Pasian’ thu hangin haksatna ahi a, bawlsiatna ahi zongin khat peuhpeuh a tun ciangin tawpkikpah uh hi. Lingbulsum omna leilakah a tu khaicite pen Pasian’ thu za napi-in amau nuntakna sung uhah leitung lunghihmawhna le hauh nopnate in Pasian’ thu vuknelh ahih manin bangmah a suakkhia zo lote a cihnopna ahi hi. Lei hoihna munah a tu khaicite pen Pasian’ thu a zak ciangin a tel mite a cihnopna ahi hi. Tua bang mite a dingin Pasian’ thu in man nei a, pawlkhatte a dingin a zah zakhat, pawlkhatte a dingin a zah sawmguk, pawlkhatte a dingin a zah sawmthumin Pasian’ thu in man a nei hi,” a ci hi. Tua ciangin Jesuh in thugentehna dang khat gen a, “Vantung ki-ukna pen bang tawh kibang hiam cih leh: A lo-ah taangci hoih a vawhpa tawh kibang hi. Ahi zongin zan khat, mite a ihmut kalun galte khat hong pai-in taang lakah tahum tang vawhin a paikhia hi. Taangte hong po-in a vuih hun ding ciangin tahum kungte zong hong lianin hong kilang hi. Tua ciangin lonei pa’ nasemte ama kiangah hong pai-in, ‘Na lolai-ah na vawh khaici pen taangci hoihte ahi hi. Hih tahumte koi pana hong piang ahi hiam?’ a cih ciangin amah in, ‘Galte’ vawh ahi hi,’ ci-in a dawng hi. A nasemte in ama kiangah, ‘Tua ahihleh kote va kuanin ka va bot ding uh hiam?’ ci-in a dong uh hi. Ahi zongin amah in, ‘Va bot kei un. Tahumte bot le-uhcin taang tawh na botkhawm kha ding uh hi. Anlak hun mateng a nam nihin tuaci om phot hen. Anlak hun ciangin anlate kiangah, “Tahumte bot masa unla, meikhukah khul dingin lomhen un. Ahi zongin taangte la-in ka ansal-ah hong sung un,” ka ci ding hi,’ ci hi,” a ci hi. Tua ciangin Jesuh in thugentehna dang khat gen leuleu a, “Vantung ki-ukna pen bang tawh kibang hiam cih leh, mi khat in a lo sungah a vawh ankam tang tawh kibang hi. Khaici khempeuh lak panin ankam tang a neupen ahi hi. Ahi zongin a khankhit ciangin ankung lakah a golpen suak ahih manin vasate in a hiang tungah bu a tomtheihna zah ding ciang hong suak thei hi,” a ci hi. Tua ciangin thugentehna khat mah gen leuleu a, “Vantung ki-ukna pen bang tawh kibang hiam cih leh, nupi khat in annel seu thum dim meek manin silngo sawh a, a vekpi-in silngo in zelin a pawmsak tawh kibang hi,” a ci hi. Jesuh in hih thute khempeuh, thugentehna vive zangin thu hilh a, thugentehna zang loin thu khat beek a gen kei hi. Hih bangin thugentehna a zatna pen kamsang Isaiah in, “Thugentehna zangin thu ka gen ding a, leitung piancil a kipan a kithei lo thute ka gen ding hi,” ci-in a genkholhsakna thu a tun nading ahi hi. Tua ciangin mihonte lak panin Jesuh paikhia-in inn sungah a lut hi. A nungzuite ama kiangah hong pai uh a, “Lolai-a om Tahum Thugentehna a khiatna hong gen in,” a cih uh ciangin Jesuh in, “Taangci hoih a vawhpa pen Mihing Tapa ahi hi. Lolai pen leitung hi a, taangci hoih i cih pen Pasian’ ukna sungah a om mite ahi uh hi. Tahumte pen Gilopa tawh a kipawl mite hi a, tahum tang a vawh gal pa pen Dawimangpa ahi hi. Anlak hun pen leitung bei nading hun hi a, anla nasemte pen vantung mite ahi hi. Tahumte kikaikhawmin meikhuk sungah a kikhultum mah bangin leitung bei hun ciangin tua bangmahin kihih ding hi. Mihing Tapa in a vantung mite hong sawl ding a, ama ukna sungah a om migilote le mi a mawh nadingin a bawl mi khempeuh kaikhawmin meikhukpi sungah tua bang mite lawn ding uh a, tua lai-ah amaute kapin a hagawi ding uh hi. Tua hun ciangin Pasian’ mite ahihleh a Pa uh Ukna sungah ni bangin a taang ding uh hi. Zak nading bil a neite in hih thu na za ta un. “Vantung ki-ukna pen lolai-ah a kiseel sum tawh kibang hi. Mi khat in a muh ciangin limtakin a seelpha hi. Amah lungdam mahmahin a inn-ah ciahpah a, a neih khempeuh a zuak khit ciangin tua lo a lei hi. “Vantung ki-ukna pen sumbawlpa in a zon kep hoihpente tawh zong kibang hi. Sumbawlpa in a manpha diak pawl kep khat a muh ciangin ciahpahin a neih khempeuh a zuak khit ciangin tua kep a lei hi. “Vantung ki-ukna pen tui sungah kipaai-in ngasa namkim a awkna ngen tawh zong kibang hi. Ngasa tampi tak a awk ciangin ngabengte in tui gei-ah a ngen uh kaikhia-in tusuk uh a, nektheih ding ngasate, paipel sungah guangin, nektheih loh ding ngasate, a lawnkhia uh hi. Leitung hun bei ciangin zong tua bangmah hi ding hi. Vantung mite hong pai-in mihoihte lak panin migilote lakhia-in, meikhukpi sungah tua migilote a khul ding uh hi. Tua lai-ah kapin a hagawi ding uh hi. “Hih ka thugente khempeuh a khiatna na thei uh hiam?” ci-in Jesuh in a dot ciangin amaute in, “Ka thei uh hi,” ci-in a dawng uh hi. Tua ciangin Jesuh in amaute kiangah, “Vantung ki-ukna sungah a hong lut Thukham hilh siate khempeuh pen, a sumkholna panin a thak le a lui, a ut utin a lakhia thei ziauziau sumnei pa tawh kibang uh hi,” a ci hi. Jesuh in hih thugentehnate a gen khit ciangin tua lai panin paikhia-in ama khua-ah pai a, kikhopna inn sungah thu a hilh hi. Ama thugen a za mite in lamdangsa mahmah uh a, “Hih mipa in hih bang pilna koilai panin ngah a, bang hangin hih bang na lamdangte bawlthei ahi hiam? Khutsiam pa’ tapa hi lel a, a nu zong Mary a kici nu hilel hi lo ahi hiam? Ama naute zong James, Josef, Simon le Judas hi lo ahi uh hiam? A nau numeite zong hih lai mah a om hi lo ahi uh hiam? Tua bang hinapi-in hih mipa in koi lai panin hih bang thuteng ngahthei ahi hiam?” a ci uh hi. Tua ahih manin amah a sangzo kei uh hi. Tua ciangin Jesuh in amaute kiangah, “Kamsang khat pen, ama khua, ama behte, le ama innsung longal-ah kizahtakin pahtawina a ngah hi,” a ci hi. Nazareth khuamite in amah a up lohna hangin tua khua-ah nalamdang tampi a bawl kei hi. Tua hun laitakin Galilee gam sungteng a uksawn kumpi Herod in Jesuh’ thu a za hi. Amah in a nuai-a uliante kiangah, “Hih pa pen Johan hi a, sihna panin a hingkik hi ding hi. Tua ahih manin hih bang nalamdang bawlna ding vangliatna nei hi ding hi,” a ci hi. Herod in Johan that nuam hi. Ahi zongin mite in kamsangin ngaihsun uh ahih manin mite a kihtakna hangin thatsak ngam lo hi. Ahi zongin Herod’ suah ni pawi bawl hun hong tun ciangin mihonte mai-ah Herodias’ tanu hong laam ciangin Herod lungdam mahmah ahih manin, “Na hong nget peuhpeuh ka hong pia ding hi,” ci-in a kiciam hi. Tua numei in zong a nu’ ngaihsut piakna zui-in, “Kuangdai khat sungah Tuiphumpa Johan’ lutang, hih lai mahmahah hong pia in,” ci-in a ngen hi. Kumpipa dah mahmah hi. Ahi zongin a kiciamnasa ahihna hang leh a leenglate’ maitang a zahtakna hangin a ngetna a kipiak nadingin thu a pia hi. Tua ahih manin mi sawlin thongah Johan’ lutang a tansak hi. Kuangdai khat tawh tua a lutang hong kipaipihin numei kiangah kipia a, tua numei in a nu kiangah a paipih hi. Tua ciangin Johan’ nungzuite hong pai uh a, a luang la-in a vui khit uh ciangin Jesuh kiangah hih thu a ko uh hi. Jesuh in tua thu a zak ciangin tua mun panin kihemkhia-in gamdaihna mun a zuan dingin gunkuang tawh a pai hi. Mite in ama paikhiatna thu a theih uh ciangin a khua ciat panun lei lam tawnin Jesuh nung hong zui uh hi. Tui gei-ah Jesuh a tun ciangin mihon tampi a na om a mu hi. Amaute hehpihhuai sa a, a cinate a damsak hi. Ni a tum kuan ciangin nungzuite in Jesuh kiangah, “Hih lai mun gamlak hi a, ni zong tum dektak ta hi. Hih kiimnai-a om khuate-ah mite va pai-in a an ding uh a lei nadingun sawlkhia in,” a ci uh hi. Ahi zongin Jesuh in, “Amaute a paikhiat ding kisam lo hi. Amaute’ nek ding bangkhat peuhpeuh pia un,” ci-in a dawn ciangin amaute in, “Anlum nga le ngasa tawn nih lobuang bangmah dang om lo hi,” a ci uh hi. Jesuh in, “Tuate hong paipih un,” ci-in a sawl khit ciangin, lopa tungah mihonte a tut nadingun a sawl hi. Tua ciangin anlum nga le ngasa tawn nih la-in vantung lam ento a, Pasian tungah a lungdamna a ko hi. Tua ciangin anlum balnenin a nungzuite pia a, a nungzuite in mihonte mai-ah a lui uh hi. Mi khempeuh in ne-in a kham khit uh ciangin a khamvalte uh khawmkik uh a, paipel sawm le nih a dim hi. Tua an a ne mite, numei le naupang simloh, pasal cingteng mi tul nga bang a pha hi. Tua ciangin Jesuh in mihonpite a ciahsak laitakin a nungzuite gunkuangah tuangsak a, tuili gal khatah a pai dingin ama mai-ah a ma paisak hi. Mihonte a ciah khit ciangin thungen dingin mual tunglamah a paito hi. Khuamial ciangin Jesuh guakbek gamlakah om a, ahi zongin nungzuite pen lei tawh gamlapi kihal khinta uh a, huih in amaute lehmut ahih manin gunkuang a kilokgawp hi. Zingsang lam nai thum le nai guk kikal khawng ciangin a nungzuite kiang lam manawhin tui tungah Jesuh hong pai hi. Ahi zongin nungzuite in tui tungah hong pai a muh uh ciangin lau mahmah uh a, “Sikha hi,” ci-in ngaihsun uh ahih manin a lau manun a awng uh hi. Jesuh in amaute hopihpah a, “Na lungsim uh hangsak un. Keimah ka hi hi. Lau kei un,” a ci hi. Tua ciangin Peter in, “Topa aw, nang na hihtakpi leh, tui tung tawnin nang kiangah kei zong hong paisak in,” a ci hi. Jesuh in, “Hong pai in,” a cih ciangin Peter zong gunkuang tung panin kumkhia a, Jesuh’ omna lam manawhin tui tungah a pai hi. Ahi zongin huihpi nung a muh ciangin lau a, tui sungah tum dektak ahih manin, “Topa aw, hong hon in,” a ci hi. Jesuh in zong a khut tawh Peter zamin len a, “Upna cingtaak lopa aw, bang ci-a hong tuaci muanlah na hi hiam?” a ci hi. Gunkuang tungah a kahtoh khit uh ciangin huihpi nung a dai hi. Tua ciangin gunkuang sungah a om nungzuite in Jesuh bia uh a, “Pasian’ Tapa taktak na hi hi,” ci-in a gen uh hi. Tui a kantan khit uh ciangin Gennesaret gamah a tung uh hi. Tua gam mite in Jesuh ahihlam a theih uh ciangin tua gam kiim khempeuhah thu zasak uh a, cina khempeuh Jesuh kiangah a hong paipih uh hi. Ama puanmongteep beek a lawnkhak theih nadingun Jesuh kiangah ngen uh a, a puanmongteep a lawng mi khempeuh in damna a ngah uh hi. Tua ciangin Jerusalem khua panin Farisi mite le Thukham hilh siate, Jesuh kiangah hong pai uh a, “Bang hangin na nungzuite in tangtawng pek panin a hong kihilh suksuk i pupa ngeinate zui lo uh ahi hiam? Amaute in an a nek ma-un a ngeina ding bangin a khut uh sil masa lo uh hi,” a ci uh hi. Jesuh in, “Bang hangin note in na pupa ngeina uh zui-in, Pasian’ thupiakna palsat zawsop na hi uh hiam? Pasian in, ‘Na nu le na pa na zahtak in,’ ci a, tua banah, ‘A nu ahi a, a pa ahi zongin a gensiate in thahna thuak ding hi,’ ci lai hi. Ahi zongin note in, ‘Mi khatpeuh in a nu ahi a, a pa ahi zongin a huh theih nading na khat peuhpeuh a neih leh, tua na pen Pasian a’ ding hi, ci peuh leh, a nu le a pa piak kul nawn lo hi,’ ci-in thu na hilh uh hi. Tua ahih manin na pupa ngeina uh na zuihna uh hangin Pasian’ thu na palsat uh hi. Na tungthamun mihoih a kineihkhem mite aw, Isaiah in note’ thu a genna man mahmah hi. Tua a genna-ah, ‘Hih mite in a kampi bek uh tawh kei hong zahtak bawl uh a, ahi zongin a lungsim taktak uh kei tawh kigamla hi. Mihingte’ bawltawm thukhamte, Pasian’ thukham zahin mite tungah hilh uh ahih manin kei hong biak hangun a kimanna om lo hi,’ ci hi,” ci-in a dawng hi. Tua ciangin Jesuh in ama kiangah mihonte sam a, “Ka thugen na ngai unla, hoihtakin na theitel un. Kam sungah a tumsuk nate in mi ninsak lo a, kam sung panin a pusuak nate in mi a ninsak hizaw hi,” a ci hi. Tua ciangin nungzuite in Jesuh kiangah, “Farisi mite in hih na thugen a zak uh ciangin na a sak mahmahna thu uh na thei hiam?” a ci uh hi. Jesuh in, “Vantungah a om ka Pa’ suan ahi lo kung khempeuh kibotkhia ding hi. Hih mite lunghihmawh ngaihsut kei un. Amaute pen mittaw makai ahi uh hi. Mittaw khat in mittaw dang khat makaih leh a nihun hawkguam sungah kiakhawm ding uh hi,” ci-in a dawng hi. Ahi zongin Peter in Jesuh kiangah, “Hih thugentehna a khiatna kote hong hilh in,” a ci hi. Jesuh in, “Note nangawn in thei lo a, tel lo na hi uh hiam? Kam sungah a tumsukte pen gil sung tawnin tua panin paikhiasuak hi lo ahi hiam? Ahi zongin kam sung panin a pusuakte pen lungsim panin hong kipankhia hi a, hihte in mi ninsakthei hi. Bang hang hiam cih leh lungsim panin mi thahnopna, mi zi tawh mawhnopna, nungak tawh mawhnopna, guktakna, zuau genna, mi gensiatna, le ngaihsut hoih lo a tuamtuam hong piangkhia hi. Hih bang nate in mi ninsak a, khut sil loin annekna in mi ninsak lo hi,” ci-in a dawng hi. Tua lai panin Jesuh paikhia a, Taia khuapi le Sidon khuapi gam sung tengah a zin hi. Tua gamah a teng Kanaan nupi khat hong pai-in hong kiko a, “David’ suan, Topa aw, kei hong hehpih in. Ka tanu in dawi vei a, nasia mahmah hi,” ci-in a hong thum hi. Ahi zongin Jesuh in kam khat beek paupih lo hi. Tua ciangin a nungzuite in Jesuh kiangah, “Hih nupi i nung zui-in kikoko ahih manin a ciah nadingin sawl in,” ci-in a thum uh hi. Jesuh in, “Tuu bangin a mangthang Israel mite lak bekah kei hong kisawl hi,” ci-in a dawng hi. Ahi zongin tua nupi hong pai-in Jesuh’ mai-ah khukdin a, “Topa aw, kei hong huh in,” a ci hi. Jesuh in, “Tate’ annek ding laksakin ui khawite piak ding kilawm lo hi,” ci-in a dawng hi. Nupi in, “Hi mah hi, Topa aw; a topa sabuai tung panin a kia annengte, ui khawite in zong ne buang hi lo ahi hiam?” a ci hi. Tua ciangin Jesuh in tua nupi kiangah, “Nupi aw, na upna lian taktak hi. Na deihna bangin hong piang ding hi,” ci-in a dawn khit ciangin a tanu thakhatin a dampah hi. Tua lai panin Jesuh paikhia-in Galilee Tuili kiimah a pai hi. Mualtung lamah kahto-in a tu hi. Ama kiangah mihon tampi tak hong pai uh a, khebaite, khezawte, mittawte, a pau thei lote, le cina dang tampi, Jesuh kiangah hong koih uh hi. Jesuh in tuate khempeuh a damsak hi. A pau thei lote pau thei-in, khezawte damin, khebaite hoihtakin lam paithei-in, mittawte in khua a muh theihkikna thu mihonpite in a muh uh ciangin lamdangsa mahmah uh a, Israel mite’ Pasian a phat uh hi. Tua ciangin Jesuh in a nungzuite sam a, “Kei kiangah hih mite ni thum bang hong omkhin uh a, amaute in annek ding nei nawn lo uh ahih manin hehpihhuai ka sa hi. Lamkalah cimawh kha ding uh ahih manin gilkialin ka ciahsak nuam kei hi,” a ci hi. Nungzuite in, “Mihon hih zah i piak ding, hih gamlakah koi panin an ngah ding ihi hiam?” a ci uh hi. Jesuh in, “Anlum bangzah nei na hi uh hiam?” a cih ciangin, “Lum sagih le ngasa neu tawm khat om hi,” a ci uh hi. Tua ciangin Jesuh in leilakah mihonte a tut nadingin a sawl hi. Anlum sagih le a ngasate la-in Pasian tungah lungdamna a koh khit ciangin balnenin a nungzuite tungah pia a, a nungzuite in mihonpite mai-ah a lui uh hi. Mihonte in ne-in a kham khit uh ciangin a khamval a neng a themte tawmkik uh a, paipel lian sagih a dim hi. Tua an a ne mite, numei le naupang simloh, pasal cingteng mihing tulli ahi hi. Jesuh in mihonte a ciahsak khit ciangin gunkuang tungah tuangin Magadan gamah a pai hi. Jesuh kiangah Farisi mite le Saddusi mite pawlkhat a hong pai uh hi. Amaute in Jesuh a mawhsak theih nading uh a deihna-in Pasian tawh a kipawl ahihna a lah nadingin lim khat a lah ding a ngen uh hi. Ahi zongin Jesuh in, “Ni a tum khit nitak ciangin, ‘Van san ahih manin khua pha ding hi,’ na ci uh hi. Zingsang hun ciangin, ‘Van sanin khua niim ahih manin guah zu ding hi,’ na ci thei uh hi. Note in van maitang na et uh ciangin khua pha ding le khua sia ding khenthei napi-in tuhun thute na theithei kei uh hi. Tulai hun mite giloin, Pasian tawh kipawl lo uh hi. Lim a nget uh hangin Jonah lim simloh a dang kilaklo ding hi,” ci-in a dawng hi. Tua ahih manin amaute nusia-in a paisan hi. Tui galkhat a tun uh ciangin nungzuite in anlum a puak mangngilh lam uh a phawk uh hi. Jesuh in amaute kiangah, “Farisi-te le Saddusi-te’ silngo hoihtakin kidawm un,” a ci hi. Tua ciangin nungzuite in, “Anlum i puak mangngilh manin hih thu hong gen hi ding hi,” ci-in amaute khatlekhat a kikum uh hi. Jesuh in hih amaute’ kihona thu thei ahih manin, “Upna neu mite aw, anlum na puak loh manun bang hangin kikum na hi uh hiam? Tu ciang dong phawkthei nai lo lai na hi uh hiam? Anlum nga tawh mi tulnga a kivak khit ciangin paipel bangzah dim val lai cih thu phawk nawn lo na hi uh hiam? Tua ahih kei leh zong, anlum sagih tawh mi tulli a kivak khit ciangin a kikhamval na kaihkhop uh paipel lian bangzah dim cih phawk nawn lo na hi uh hiam? Hih thu ka gen ciangin anlum thu a gen ka hihlohlam bangci-in phawk thei lo lawmlawm na hi uh hiam? Farisi-te le Saddusi-te’ silngo hoihtakin kidawm un,” a ci hi. Tua bangin thu a gen ciangin anlum a kisawh silngo thu a gen hi loin, Farisi-te le Saddusi-te’ thuhilhna a gen ahihlam a phawk pan uh hi. Sisaria Filippi gam a tun uh ciangin Jesuh in a nungzuite kiangah, “Mite in Mihing’ Tapa kei kua hi hong ci uh ahi hiam?” ci-in a dong hi. Amaute in, “Pawlkhat in Tuiphumpa Johan hi, hong ci uh hi; pawlkhat in Elijah hi, hong ci uh hi; pawlkhat in Jeremiah ahih kei leh kamsang khat peuhpeuh hi ding hi, hong ci uh hi,” ci-in a dawng uh hi. Tua ciangin Jesuh in amaute kiangah, “Tua ahihleh note in kei kua hi hong ci na hi uh hiam?” ci-in a dot ciangin Simon Peter in, “Nang pen a nungta Pasian’ Tapa, Khrih na hi hi,” ci-in a dawng hi. Tua ciangin Jesuh in ama kiangah, “Jonah’ tapa Simon aw, hoih mahmah hi. Hih thu, leitung pilna tawh na theihtawm hi lo a, vantungah a om ka Pa in nangma tungah hong hilh ahi hi. Ke’n kong genin-ah: Nang pen suangneu a cihnopna Peter na hi hi. Hih suangpi tungah ka pawlpi ka lam ding a, sihna nangawn in zo zo ngei lo ding hi. Vantung ki-ukna sung lut nading tawhtangte, nangma tungah ka hong pia ding a, hih leitungah hoih lo na cihte, vantungah zong a hoih lo hi ding a, hih leitungah hoih hi na cihte, vantungah zong a hoih hi ding hi,” a ci hi. Tua ciangin amah Khrih ahih lamtak, kuama kiangah a gen loh nadingun a nungzuite kiangah khauhtakin thu a pia hi. Tua hun a kipanin Jesuh in a nungzuite kiangah, “Jerusalem khua-ah ka pai ding hi. Upate, siampi liante, le Thukham hilh siate tung panin gimna tampi ka thuak ding hi. Kei hong kithat ding a, ni thum ni-in hong kihing kiksak ding hi,” ci-in teltakin gen a kipan hi. Tua ciangin Peter in Jesuh paikhiatpih a, “Topa aw, hih bangin Pasian in piangsak kei hen. Nang tungah hih bang piang thei ngei peuhmah lo ding hi,” ci-in a taii bawl hi. Ahi zongin Jesuh kihei-in Peter kiangah, “Satan aw, ka nungah om in. Hih na ngaihsutnate Pasian’ ngaihsutna hi loin mihingte’ ngaihsutna ahih manin ka lam a hong khaktan ding a suak hi,” a ci hi. Tua ciangin Jesuh in a nungzuite kiangah, “Mi khatpeuh ka nungzui a suahnop leh, ama deihna bangin gamta nawn loin, a singlamteh kisuanin hong zui ding hi. Hih a leitung nuntakna a hu nuamte in a nuntakna bulpi nangawn tawh suplawh ding a, keima hangin hih a leitung nuntakna a suplawhte in a nuntakna bulpi huzo ding hi. Mi khatpeuh in hih leitung khempeuh a ngah hangin a nuntakna bulpi suplawh leh bang phattuamna om ahi hiam? A nuntakna bang tawh leikik thei nawn ding ahi hiam? A Pa’ minthanna vang le a vantung mite tawh Mihing Tapa hong paikik ding a, mi khempeuh amau’ gamtatna ciat tawh a kizui-in a thuk ding hi. Hih lai-a a om mi pawlkhatte a sih ma-in Mihing Tapa, Kumpi-in hong pai ding ahih lamtak phawkkhial kei un,” a ci hi. Tua zawh ni guk ciangin Jesuh in Peter, James le a nau Johan-te samin mual sang khat dawnah a tuamin a paipih hi. Tua lai mun panin amaute’ muhtangpi mahin Jesuh a mel kikheel a, a maitang ni bangin taangin, a puante khuavak bangin a ngo hi. Tua lai-ah Moses le Elijah hong omvat uh a, Jesuh tawh a kiho a mu uh hi. Tua ciangin Peter in Jesuh kiangah, “Topa aw, hih lai-ah i om, nuam mahmah hi. Hoih na sak leh, nang a’ ding buk khat, Moses a’ ding buk khat, Elijah a’ ding buk khat, buk thum ka hong lamsak ding uh hi,” a ci hi. Tua bangin a pau laitakun meiingo hong kaai vatin amaute hong khuh a, tua meii lak panin aw khat hong ging vatin, “Hih pa pen ka it, ka lung a kim mahmahna ka Tapa ahi hi. Ama thu na ngai un,” a hong ci hi. Nungzuite in hih awging a zak uh ciangin leilakah boksuk uh a, lamdang a sa mahmah uh hi. Ahi zongin Jesuh hong pai-in amaute va lawng a, “Tho un, lau kei un,” a va ci hi. Amaute a khuadak uh ciangin Jesuh simloh kuamah dang a mu nawn kei uh hi. Mualtung panin amaute a ciahsuk laitakun Jesuh in nungzuite kiangah, “Sihna panin Mihing Tapa a kithawhkiksak matengin hih na muhte uh kuama kiangah gen kei un,” ci-in thu a pia hi. Tua ciangin nungzuite in Jesuh kiangah, “Bang hangin Thukham hilh siate in, Elijah hong pai masa ding hi, ci uh ahi hiam?” ci-in a dong uh hi. Jesuh in, “Na khempeuh a bawlkhol dingin Elijah hong pai masa takpi hi. Ahi zongin note kiangah kong genin-ah: Elijah hong pai khin napi-in mite in amah thei lo uh ahih manin a ututun a bawl uh hi. Tua mah bangin Mihing Tapa in zong bawlsiatna thuak ding hi,” ci-in a dawng hi. Tua ciangin Tuiphumpa Johan’ thu a gen ahih lamtak nungzuite in a thei uh hi. Mihonte omna a tunkik uh ciangin Jesuh kiangah mi khat hong pai-in ama mai-ah hong khukdin a, “Topa aw, nong hehpihna-in ka tapa hong damsak in. Amah in sihbup natna nei-in gim mahmah hi. Meikhuk sungah ahi a, tui sungah ahi zongin a puk zel hi. Na nungzuite kiangah ka paipih hangin amaute in damsak thei lo uh hi,” a ci hi. Jesuh in, “Upna nei lo, a ngaihsun khial mite aw, note bang tanvei hong ompih ding a, bang tanvei hong kikholhpih ding ka hi hiam? A naupang hong paipih un,” a ci hi. Jesuh in tua naupang’ sung panin dawi a paikhiat nadingin thu pia a, a naupang thakhatin a dampah hi. Tua ciangin amau guak a om laitakun nungzuite in Jesuh kiangah, “Bang hangin kote in tua dawi hawlkhia thei lo ka hi uh hiam?” ci-in a dot uh ciangin Jesuh in, “Na upna uh a cingtaak lohna hang ahi hi. Ahi taktakin note kiangah kong genin-ah: Ankam tang cia bang upna na neih nak-uhleh, hih mual kiangah, ‘Hih lai panin hua lai-ah kin in,’ ci le-uhcin kinkhia ding hi. Na hih theih loh uh khat zong om lo ding hi. Thungetna le antanna tawh lobuang, thudang tawh hih bangte kihawlkhia thei lo hi,” ci-in a dawng hi. Galilee gam sungah a om laitakin Jesuh in a nungzuite kiangah, “Mihingte khut sungah Mihing Tapa kipia ding a, mite in a that ding uh hi. Ahi zongin a ni thum ni-in kihing kiksak ding hi,” a ci hi. Tua thu a zak uh ciangin nungzuite a dah mahmah uh hi. Kapernaum khua-ah a tun uh ciangin biakinn siahdongte in Peter kiangah, “Na siapa in biakinn siah hamu a piak ngei mah ahi hiam?” ci-in a dot uh ciangin, “A piak ngei mah ahi hi,” ci-in a dawng hi. Innsungah Peter a lut ciangin Jesuh in na paupih masa zaw a, “Simon aw, nang na bangci ngaihsut hiam? Leitung kumpite in kuate tung panin siah kai ahi uh hiam? Amau tate tung panin siah kai ahi uh hiam, tua ahih kei leh midangte tung panin kai ahi uh hiam?” ci-in a dot ciangin Peter in, “Midangte tung panin siah a kai uh hi,” ci-in a dawng hi. Tua ciangin Jesuh in, “Tua ahihleh siah piak ding panin a tate a peng ahi hi. Ahi zongin amau’ nasepna a nawngkaisak i suahkhak loh nadingin tuili-ah nga siahna sikkawi va khia inla, a awk masa penpen hong kaikhia in. Tua a ngasa kam sung en lecin dangka tang peek khat na om ding hi. Tua sum la inla, ei tegel a dingin biakinn siah va pia in,” a ci hi. Tua laitakin Jesuh kiangah nungzuite hong pai uh a, “Vantung ki-ukna sungah kua lianpen ding ahi hiam?” ci-in a dot uh ciangin, Jesuh in naupang khat samin amaute mai-ah dingsak a, “A man mahmahin note kiangah kong genin-ah: Note kikheelin naupang na bat kei uhleh vantung ki-ukna sungah na lut ngei kei ding uh hi. Hih naupang bangin a kiniamkhiat mite, vantung ki-ukna sungah a lianpen hi ding hi. Keima min hangin hih bang naupang khat a limbawl mi in kei zong hong limbawl ahi hi. “Ahi zongin kei a hong um hih naupangnote khatpeuh a khialsak mi pen a ngawngah an gawina suang lianpi khat kikhihin tuipi thuk sungah kikhiasuk le ama a dingin hoihzaw thampek ding hi. “Tua bangin mi a khialsak thei ding om ahih manin leitung mite a dingin a dahhuai mahmah thu ahi hi. Tua bang pen a piang tawntung ding hi a, ahi zongin tua bangin khialhna a piangsak mite a dingin dahhuai pha mahmah diak hi. “Na khut ahi a, na khe in ahi zongin hong khialhsak leh sattan inla paikhia in. Meikuang tawntung sungah khut kim khe kimin hong kikhiat sangin nuntakna sungah khut sam khe samin lut lecin nang a dingin hoihzaw ding hi. Na mit in hong khialhsak leh khelkhia inla paikhia in. Mit kim nei-in hell khuk sungah hong kikhul sangin mit langkhat bek tawh nuntakna sungah lut lecin nang a dingin hoihzaw ding hi. “Hih naupangnote khatpeuh na simmawhkhak loh nadingun kidawm un. Note kiangah kong genin-ah: Amaute a kem vantung mite pen vantungah ka Pa kiangah om tawntung uh hi. Bang hang hiam cih leh Mihing Tapa pen a mangthang mite a hon dingin a hong pai ahi hi. Note in bangci ngaihsut na hi uh hiam? Mi khat in tuu zakhat nei hen la, a tuute khat mang leh, mualtungah a gamta adang sawmkua le kuate nusia-in tua a mang pen a zong dingin kuankhia ding hi lo ahi hiam? Note kiangah kong genin-ah: Tua a mang tuu a muh ciangin a mang lo tuu sawmkua le kuate tungah a lungdamna sangin a mang pen tungah a lungdamna lianzaw hi lo ahi hiam? Tua mah bangin vantungah a om na Pa un hih naupangnote khat zong a sih ding a deih kei hi. “Na sanggamte uh na tung uhah hong khialh leh pai-in no tegel bek theihin a khialhna va gen un. Na thu uh a hong man’ leh na sanggampa uh a ngahkik na hi uh hi. Ahi zongin na thu uh a hong mannop kei leh, Lai Siangtho sungah, ‘Mi nih ahih kei leh mi thum’ theihna bek tawh mawhsakna khat peuhpeuh man pan hi,’ a cih mah bangin midang khat ahi a, nih ahi zongin tonpih un. Amah in tua mite’ thu a mannop kei leh pawlpite tungah a thu ko un. Pawlpite’ thu nangawn a mannop kei leh Gentail mite le siahdongte bangin na ngaihsun un. “Note kiangah a taktakin kong genin-ah: Leitungah na kham peuhmah uh vantungah zong kikham ding a, leitungah na phal peuhmah uh vantungah zong kiphal ding hi. Leitungah note nih thukimin na nget uh na khat peuhpeuh, vantungah a om ka Pa in hong pia ding hi. Bang hang hiam cih leh keima minin mi nih le thum bek nangawn a kikhopna peuhpeuhah kei ka om hi,” a ci hi. Tua ciangin Peter in Jesuh va naih a, “Topa aw, ka sanggamte khatpeuh ka tungah hong khialh ciangin bangzah vei maisak ding ka hi hiam? Sagihvei dongtak maisak ding ka hi hiam?” ci-in a dot ciangin Jesuh in, “Sagihvei ciangbek maisak in kong ci kei hi. Sawm sagih mun sagihvei maisak in kong ci hi. Bang hang hiam cih leh vantung ki-ukna zia pen a nasemte in sum bangzah a ba hiam, ci-in a sazian a en kumpipa’ hihna zia tawh kibang hi. Kumpipa in a sum ba sazian a et a kipat ciangin ama sum mak tampi a ba nasem khat hong kipaipih hi. Tua nasempa in a sum lohzo lo ahih manin amah a kipan a zi a tate le a neih khempeuh zuakin a leiba a loh nadingin kumpipa in thu a pia hi. Tua ahih manin a nasempa zong a mai-ah hong bokin thum a, ‘Topa aw, hong ngak lai in; a vekpi-in ka hong loh ding hi,’ ci-in a thum hi. Kumpipa in khasiathuai sa ahih manin a leiba teng maisakin a khah hi. “Ahi zongin tua nasempa a paikhiat ciangin ama sum ngun peek zakhat khawng a ba a naseppih dang khat tawh a kituak hi. Tua pa a gawlin manin, ‘Na leiba hong loh in,’ a ci hi. A naseppih pa zong a mai-ah bokin hong thum a, ‘Hong ngak lai in; ka hong loh ding hi,’ a ci hi. Ahi zongin ama thumna sang nuam lo hi. A leiba a lohkhit matengin thongah a kia dingin a khumsak hi. A naseppih dangte in hih thupiang a theih uh ciangin dahhuaisa mahmah uh ahih manin, a thupiang khempeuh kumpipa kiangah a ko uh hi. Tua ciangin kumpipa in tua nasempa sam a, ‘A gilo nasempa aw, kei kiangah hong thum na hih manin na leiba khempeuh ka hong maisak hi. Nang ka hong hehpih mah bangin na naseppih pa zong na hehpih ding kilawm hi lo ahi hiam?’ a ci hi. Kumpipa zong a heh suak ahih manin a leiba khempeuh a lohkhit matengin thong sungah a kikhum nadingin thu a pia hi. “Tua mah bangin note in zong na lungsim uhah na sanggamte uh mawhna na maisaknop kei uhleh vantungah a om ka Pa in note tungah zong tua bangmahin a hong bawl ding ahi hi,” a ci hi. Jesuh in a thugen a man khit ciangin Galilee gam panin paikhia-in Judea gam Jordan gun galkhatah a pai hi. Mihon tampi in amah zui uh a, tua munah cinate a damsak hi. Farisi mite pawlkhat Jesuh kiangah hong pai uh a, amah a mawhsak theih nading uh a deihna-un, “Thu khat peuhpeuh hangin zi maktheih ding mah ahi hiam?” ci-in a dong uh hi. Jesuh in, “Lai Siangtho sungah, ‘A kipat cil-in a Piangsak pa in numei le pasal a bawl hi,’ ci hi. Tua ciangin, ‘Hih thu hangin pasal in a nu le a pa nusia-in a zi tawh kigawm ding a, amau tegel pumkhat a bang ding uh hi,’ ci-in na kigelh hi. Tua ahih manin amaute nih hi nawn loin khat ahi ta uh hi. Tua ahih manin Pasian in a gawmsa mite, kuamah in khen kei ta hen,” ci-in a dawng hi. Tua ciangin Farisi mite in, “Tua ahihleh bang hangin Moses in mi khatpeuh makna lai gelh sakin a zi masak thei ahi hiam?” ci-in a dot uh ciangin Jesuh in, “Note, hilhzawhin na om loh manun Moses in hih bangin ngeina a omsak thei ahi hi. Ahi zongin a kipat cil-in tua bang na hi lo hi. Note kiangah kong genin-ah: Mi khatpeuh in midang tawh a zi a mawhna lobuang, a zi a mak a, numei dang tawh a ten leh numei tunga mawh ahi hi,” ci-in a dawng hi. Tua ciangin a nungzuite in Jesuh kiangah, “Nupa thu tua bang ding ahihleh kiteng vet kei lehang hoihzaw ding hi,” a ci uh hi. Ahi zongin Jesuh in, “Hih ngeina pen mi khempeuh in a zuihzawh ding hi lo a, Pasian in a tuaci dingin a sehte bek in a zuizo ding uh ahi hi. Mi pawlkhat a pianpihin gehsa bang om a, pawlkhatte a kigettawm om a, pawlkhatte pen vantung ki-ukna hangin geh bangin a om hi. Geh bangin a omzote om ta hen,” a ci hi. Tua ciangin mi pawlkhat in a naupangte uh tungah Jesuh in a khut nga-in thu a ngetsak nading deihin a naupangte uh a hong paipih uh hi. Ahi zongin a nungzuite in tua mite na taii uh hi. Jesuh in, “Vantung ki-ukna pen naupangte tawh a kibang mite a’ ding ahih manin, tua naupangte ka kiangah hong paipihsak unla, khaktan kei un,” a ci hi. Tua ciangin Jesuh in naupangnote tungah a khut nga-in thupha a piak khit ciangin a paikhia hi. Khatvei, Jesuh kiangah mi khat hong pai a, “Sia aw, nuntak tawntungna ka ngah nadingin bang gamtat hoih gamta ding ka hi hiam?” ci-in a hong dong hi. Jesuh in, “Bang hangin bang hoih hiam cih thu hong dong na hi hiam? A hoih khat bek om hi. Nuntak tawntungna sungah na lutnop leh thukhamte na zui in,” ci-in a dawng hi. Amah in, “Bang thukhamte ahi hiam?” ci-in a dot ciangin Jesuh in, “Mi that kei in; numei tungah mawh kei in; mi neihsa gu kei in; zuauthu gen kei in; na nu na pa zahtak in; nang na ki-it bangin na vengte na it in, cihnate ahi hi,” a ci hi. Tua ciangin tangvalpa in, “Hihte khempeuh ka zuihsa ahi hi; bang kisam lai ding ka hi hiam?” a cih ciangin Jesuh in, “Mi cingtaak na hihnop leh pai-in na neihsate va zuak inla, na sum khotte, mizawngte tungah va pia lecin, vantungah sum na hau ding hi. Tua ciangin hong pai inla kei hong zui in,” a ci hi. Tangvalpa in hih thu a zak ciangin, amah hau mahmah ahih manin, mai khingin a paikhia hi. Tua ciangin Jesuh in a nungzuite kiangah, “A mantak a kong genin-ah: Mihau khat pen vantung ki-ukna sungah a lut ding haksa mahmah ding hi. Adang khat hong gen leuleu ning: Pasian ukna sungah mihau khat a lut ding sangin phim bilvang sungah kalaoh khat a lut ding baihzaw lai hi,” a ci hi. Nungzuite in hih thu a zak uh ciangin lamdangsa mahmah uh a, “Kua in hotkhiatna ngahzo ding ahi hiam?” a ci uh hi. Ahi zongin Jesuh in amaute enin, “Mihingte’ hihzawh ding hi lo mah hi; ahi zongin Pasian in na khempeuh hihthei hi,” a ci hi. Tua ciangin Peter in, “Kote in na khempeuh nusia-in nang ka hong zui uh hi. Tua ahih ciangin bang ngah ding ka hi uh hiam?” ci-in a dot ciangin Jesuh in amaute kiangah, “Ke’n limtak a kong genin-ah: A hong tung ding hun thak sungah a minthanna tokhom tungah Mihing Tapa a tut hun ciangin kei a hong zui note zong, tokhom sawm le nihte tung mahah tu-in Israel minam sawm le nihte tungah thukhenin na om ding uh hi. Keima hangin a inn, a sanggam numei, a sanggam pasal, a nu, a pa, a tate, a leitang, khat peuhpeuh a nusiate in a zah zakhat ngahkikin, nuntak tawntungna zong a ngah ding uh hi. Ahi zongin tuhun laitakin a lian mi tampite tua hun ciangin a neu suak ding a, tuhun laitakin a neu tampite tua hun ciangin a lian hi ding uh hi. “Bang hang hiam cih leh vantung ki-ukna sung omzia pen a leenggah lo-ah na a sem ding a cial dingin zing tungin a kuankhia leenggah lo nei pa tawh kibang hi. Ni tha ngeina ngun peek khat piak dingin a kithukim khit uh ciangin a leenggah lo-ah na a sem dingin pawlkhat a kuansak hi. Zingsang nai kua hun ciangin mihon omna sumbukah pai leuleu a, mi pawlkhat bangmah sem loin a mawk om a muh ciangin, ‘No zong leenggah lo-ah va kuan un; a kilawm zah khat ka hong pia ding hi,’ a cih ciangin pawlkhat a kuan uh hi. Tua ciangin sun sawm le nih ciangin pawlkhat cial leuleu a, nitak nai thum ciangin pawlkhat a cial lai hi. Nitak nai nga ciangin mihon omna sumbukah a pai leh mi pawlkhat a mawk om mu ahih manin, ‘Bang hangin bangmah sem loin sunthapai mawk om na hi uh hiam?’ ci-in a dot ciangin amaute in, ‘Kuamah in nasem dingin hong cial lo hi,’ ci-in a dawng uh hi. Tua ciangin amaute kiangah, ‘No zong leenggah lo-ah va kuan un,’ a ci hi. “Nitak ciangin lo nei pa in a nuai-a nasem ukpa kiangah, ‘Lo khote sam inla, a kicial nunung pen a kipanin a kicial masa pente dongin a ni tha uh pia in,’ a ci hi. Nitak nai nga hunin a kipan nasemte ngun peek khat ciat kipia hi. A kuan masa pente, ni tha sang dingin hong pai uh ciangin adangte sangin tam ngahzaw ding ci-in amau kilamen napi-in amaute zong ngun peek khat ciat mah kipia veve hi. A sum a san uh ciangin lo nei pa tungah phun uh a, ‘A nunungte in nai khat sung bek sem napi-in, sunthapai-in nisa thuakin na a sem kote tawh na kikimsak hi,’ a ci uh hi. Tua ciangin lo nei pa in amaute khat kiangah, ‘Lawm aw, nang ka hong khem het kei hi. Ni khat sung nasep thaman dingin ngun peek khat piak dingin na thukimsa hi lo ahi hiam? Hih na thalawhsa sum la inla ciah in. Nang ka hong piakzah mah, hih a kicial nunungte tungah zong ka pia nuam hi. Keima sum pen keima ut bangin ka zattheih ding hi lo ahi hiam? Tua ahih kei leh kei ka cit manin na heh suak ahi hiam?’ a ci hi. Tua ahih manin a neute lian ding a, a liante neu ding hi,” a ci hi. Jerusalem khua manawhin Jesuh a paitoh laitakin, a paikawmun sawm le nihte tawh tuamtonin thu genpih a, “Tu-in Jerusalem khua-ah a paito ding ihi hi. Siampi liante le Thukham hilh siate tungah Mihing Tapa kiheek ding a, amaute in a si dingin thu a khenkhit uh ciangin Gentail mite in simmawh bawlin, satin, singlamteh tungah a khai dingin amaute khut sungah a pia ding uh hi. Ahi zongin a ni thum ni-in kihing kiksak ding hi,” ci-in a tuamin thu a hilh hi. Tua ciangin Zebedi tate James le Johan’ nu, a ta tegel tawh Jesuh kiangah hong pai-in a mai-ah khukdinin hong thum hi. Jesuh in tua nupi kiangah, “Bang deih na hi hiam?” ci-in a dot ciangin amah in, “Kumpi-in na om ciangin hih ka tate khat na taklamah, khat na veilamah a tut nadingin thu pia lecin ka ut hi,” a ci hi. Ahi zongin Jesuh in, “Na nget uh na thei kei uh hi. Ka thuak ding gimna note in thuakzo ding na hi uh hiam?” ci-in a dot ciangin amaute in, “Ka thuakzo ding uh hi,” a ci uh hi. Jesuh in amaute kiangah, “Keima thuak mah bangin note in na thuak takpi ding uh a, ahi zongin ka taklam le ka veilama tutding pen kei’ hong piaktheih hi lo hi. Ka Pa in a sehsa mite a’ ding bek ahi hi,” a ci hi. Nungzui dang sawmte in hih thu a zak uh ciangin hih unau nihte tungah a heh uh hi. Ahi zongin Jesuh in amaute sam a, “Mi a uk Gentail-te in mite tungah aana nei uh a, mi a makai Gentail-te in thuneihna tawh a ukna thu na thei uh hi. Ahi zongin note lakah tua bang hi lo ding hi. Note lakah a lian ahi dingte note’ nasem hi ding a, note’ lakah a lianpen ahi dingte note’ sila hi ding hi. Mihing Tapa zong nasem nei dingin hong pai hi loin mi dangte a’ ding na semin, mi tampi tat nading a si dingin a hong pai ahih mah bangin note zong a tuaci ding na hi uh hi,” a ci hi. Jerikho khua panin a paikhiat uh ciangin mi tampi in Jesuh a zui uh hi. Lampi gei-ah a tu mittaw mi nih in tua lampi tawnin Jesuh hong pai hi, ci-in a zak uh ciangin nakpitakin kiko uh a, “David’ suan Topa aw, kote hong hehpih in,” a ci uh hi. Mihonpite in tua mi tegel a kikoko loh nadingun a taii uh hi. Ahi zongin amaute kiko pha semsem uh a, “David’ suan Topa aw, kote hong hehpih in,” a ci teitei uh hi. Tua ciangin Jesuh khawlin amaute sam a, “Bang ka hong hihsak ding deih na hi uh hiam?” a cih ciangin amaute in, “Topa aw, ka mit uh khua hong musakkik in,” a ci uh hi. Jesuh in amaute hehpihhuai sa ahih manin a mit uh lawnsak a, thakhat thu-in a mit un khua a mukik pah hi. Tua ciangin amau tegel in zong Jesuh nung a zuipah uh hi. Jerusalem khuanai, Bethfage khua a omna Oliv Mual a tun uh ciangin Jesuh in a nungzuite nih ma sawl a, “Mai-a a om khua-ah va pai un. Na tun uh ciangin la nuta khau a kikhih na mu ding uh hi. Hong sut unla hong kai un. Mi khatpeuh in hong paupih leh, ‘Topa in deih hi,’ ci le-uhcin hong paisak pah ding hi,” ci-in a vaikhak hi. Hih thu pen kamsangpa’ thugenna a tun nadingin a piang ahi hi. Tua a genna-ah, “En un, na kumpipa uh hong pai hi. Kiniamkhiatna tawh lapi tung le lano tungah tuangin hong pai hi, ci-in Zion khuamite kiangah gen un,” a ci hi. Nungzui tegel zong Jesuh sawl bangin va pai uh hi. Amaute in a la nuta hong paipih uh a, a tungah a puante uh a phah khit uh ciangin Jesuh a tuang hi. Mihon tampite in ama pai nading lampi-ah a puante uh na phah uh a, adangte in nisuh hiangte satin lampi-ah a na phah uh hi. A mai-a pai mihonte le a nunga zui mihonte awng uh a, “David’ suan Jesuh in phatna ngah ta hen! Topa’ min tawh hong pai pa in thupha ngah ta hen! A sangpena om Pasian in phatna ngah ta hen!” a ci uh hi. Jerusalem khuasung a tun uh ciangin khuasung mi khempeuh gamlum henhan uh a, “Hih pa kua ahi hiam?” ci-in khatlekhat a kidong uh hi. Mihonpite in, “Galilee gam Nazareth khua pana kamsang Jesuh hi,” ci-in a dawng uh hi. Tua ciangin Pasian biakna innpi huang sungah Jesuh lut a, tua sungah van zuak van lei-a a om mi khempeuh a hawlkhia hi. Sumkhek nasemin a om mite’ sabuai le vakhu zuakte’ tutnate a lumletsak gawp hi. Amaute kiangah, “Pasian in Lai Siangtho sungah, ‘Ka inn pen thungetna inn kici ding hi,’ ci napi-in, note in guktakna phualpi na suaksak uh hi,” a ci hi. Biakinn sung Jesuh kiangah mittawte le khebaite hong pai uh a, amah in amaute a damsak hi. Ahi zongin siampi liante le Thukham hilh siate in a nalamdang bawlte mu-in, biakinn sungah naupangte in, “David’ suan Jesuh in phatna ngah ta hen!” ci-in a kikona a zak uh ciangin heh uh ahih manin Jesuh kiangah, “Hih naupangte’ otna na za hiam?” ci-in a dong uh hi. Jesuh in, “Ka za hi. Lai Siangtho sungah, ‘Naungekte le naupangte’ kam tawh a cingtaak phatna na gen sak hi,’ a cihna thu sim ngei lo na hi uh hiam?” ci-in a dawng hi. Tua ciangin Jesuh in amaute nusia a, khuapi sung pan paikhia-in Bethany khua-ah a giak hi. A zingsang ciangin khuapi zuanin hong paikik laitakin Jesuh a gil a kial hi. Lam gei-ah theikung khat mu ahih manin a gei-ah va pai a, ahi zongin a teh simloh bangmah a mu kei hi. Jesuh in tua theikung kiangah, “Gah ngei nawn kei in!” a cih khit phetin a theikung a sipah hi. Nungzuite in a muh uh ciangin lamdangsa uh ahih manin, “Bang hangin theikung tuaci sihpah ahi hiam?” a cih uh ciangin Jesuh in, “Note kiangah a mantak a kong genin-ah: Note in uplahna nei hetloin, upna taktak na neih nak-uhleh hih theikung tungah a piang bang na hih theih uh banah, hih mual kiang nangawnah, ‘Na omna pan paikhia-in tuipi sung kidenna in,’ ci le-uhcin na cih bangun piang ding hi. Upna na neih nak-uhleh na nget peuhpeuh uh na ngah ding uh hi,” a ci hi. Biakinn tual sungah Jesuh lutkik a, thuhilhin a om laitakin siampi liante le upate ama kiangah hong pai uh a, “Hih nate kua thu tawh bawl a, na bawl nading kua in aana hong pia ahi hiam?” ci-in a dot uh ciangin Jesuh in, “Kei zong thu khat kong dong masa ding hi. Na hong dawn nak-uhleh kei zong kua thu tawh bawl cih ka hong gen ding hi. Johan in tuiphum theih nading thu koi lai panin ngah ahi hiam? Pasian kiang panin thu ngah ahi hiam, ahih kei leh mihingte kiang panin thu ngah ahi hiam?” a ci hi. Amaute khatlekhat kiseel uh a, “Pasian kiang pan hi,” ci lehang, “Bang hangin um lo na hi uh hiam?” hong ci ding hi. Ahi zongin, “Mihingte kiang pan hi,” ci leuleu lehang, mi khempeuh in Johan pen kamsang hi, ci-in ngaihsun uh ahih manin mihonte i kihta zel hi, kici uh hi. Tua ahih ciangin Jesuh kiangah, “Ka thei kei uh hi,” ci-in a dawng uh hi. Jesuh in zong amaute kiangah, “Kei zong hih nate, kua thu tawh ka bawl cih ka hong gen kei ding hi,” a ci hi. Tua ciangin Jesuh in amaute kiangah, “Note in bangci ngaihsut na hi uh hiam? Mi khat in tapa nih nei hi. A ta uzaw kiangah, ‘Ka ta aw, tuni-in leenggah lo-ah va kuan in,’ ci-in a sawl ciangin amah in, ‘Kuan nuam kei ing,’ ci napi-in a lungsim kikheelin a kuankik hi. Tua ciangin a ta nauzaw kiangah tua mah bangin va ci a, ‘Pa aw, va kuan mah ning,’ ci napi-in a kuan kei hi. Hih tapa nihte sung panin a koi bel pen a pa’ deih bangin gamta ahi hiam?” a ci hi. Amaute in, “A ta uzaw a ta hi,” a ci uh hi. Tua ciangin Jesuh in amaute kiangah, “Note kiangah a mantak a kong genin-ah: Pasian’ ukna sungah note sangin siahdongte le numei paktatte lut masazaw ding hi. Bang hang hiam cih leh note kiangah Tuiphumpa Johan hong pai-in thuman lampi hong lak napi-in na um kei uh a, ahi zongin siahdongte le numei paktatte in a um uh hi. Hih thu na theih khit uh ciang nangawnin na lungsim uh na kheel nuam tuan kei uh a, na um kei veve uh hi. “Thugentehna dang khat na ngai lai un. Mi khat in lo zuanin leenggui suan a, a kimkot umin, leenggah cil nading bawl a, a honna ding tausang khat a lam khit ciangin lo khawhlawhte khawhlawh sakin gam dangah a pai hi. Leenggah min hun a tun ciangin ama ngah ding teng a va la dingin lo khawhlawhte kiangah a nasemte a paisak hi. Lo khawhlawhte in a nasemte na manin khat na satgawp uh a, khat na thatin, khat suang tawh na denggawp uh hi. Tua ciangin lo nei pa in a masa-a sangin nasem a tamzaw va paisak leuleu a, ahi zongin a masa-a mah bangin a nasemte a na bawlsia veve uh hi. Tua khit ciangin ka tapa paisak leng na zahtak ding uh hi, ci-in ngaihsun ahih manin a tapa a paisak hi. Ahi zongin lo khawhlawhte in a tapa a muh uh ciangin, ‘Hih pa pen a gamhluah ding pa ahi hi. Hong pai un; amah thatin a luah dingteng eite inla ni,’ a kici uh hi. Tua ahih manin amah manin that uh a, lo nawlah a paai uh hi. Tua ahih ciangin leenggah lo nei pa hong pai ciangin a lo khawhlawhte bangci bawl ding ahi hiam?” ci-in a dong hi. Amaute in, “Tua migilote thatgawp ding a, a hun hunin leenggah a pia ding lo khawhlawh dangte khosak ding hi,” a ci uh hi. Jesuh in amaute kiangah, “Lai Siangtho sungah, ‘Innlamte in a nilkhiat suang pen innkiu suang bulpi suak khinta hi. Hih pen Topa’ bawl hi a, i muh ciangin lamdang i sa hi,’ ci-in a kigelhna sim ngei lo na hi uh hiam? Tua ahih ciangin note kiangah kong genin-ah: Note pen Pasian hong ki-uksak nawn lo ding a, a kilawmin a gamta ding mite bek Pasian in uk ding hi. Hih suang tungah a kia mi khempeuh kizan gawp ding a, mi khatpeuh tungah tua suang a kiat leh zong dengzan gawp ding hi,” a ci hi. Siampi liante le Farisi mite in hih thugentehna a zak uh ciangin amaute a cihnopna-in a gen ahihlam a phawk uh hi. Jesuh a man dingin kithawi uh a, ahi zongin mihonte in kamsang khatin ngaihsun uh ahih manin mihonte a kihtak manun a man ngam kei uh hi. Jesuh in amaute kiangah thugentehna dang khat zangin thu hilh a, “Vantung ki-ukna zia pen a tapa a dingin mo pawi a bawl kumpipa’ gamtatzia tawh kibang hi. Mopawi siim dingin a khohsa mite a sam dingin a nasemte sawl a, ahi zongin kuamah pai lo hi. Tua ciangin nasem dangte sawl leuleu a, ‘Ka khohsaksa mite kiangah hih bangin va gen un: Ka bawngtalte le ka bawngno thaute kigo khin a, nitak an a minsa-in a om banah, na khempeuh a mansa-in om khinta hi. Mopawi an ne dingin hong pai ta un, ci hi, ci-in va gen un,’ a ci hi. Ahi zongin a khohsa mite in na thusim lo uh a, pawlkhat in lo na kuansanin, pawlkhat in a sumbukah na paisanin, adangte in a nasemte manin a na satgawp khit uh ciangin a na that uh hi. Kumpipa zong heh mahmah a, a galkapte kuansakin tua mi thatte a thahsak khit ciangin a khua a haltumsak hi. Tua ciangin a nasemte kiangah, ‘Mopawi an a baihsa-in om a, ahi zongin ka sap mite a ne dingin a kilawm lo mi a suak uh hi. Tua ahih manin lamlianpi-ah va pai unla, mi na muh zahzah uh hong sam un,’ a ci hi. Nasemte zong lamlianpi-ah va pai uh a, mihoih mi hoih lo ci loin a muh khempeuh uh va kaikhawm uh ahih manin mo pawi bawlna innsung dimin leengla hong om hi. “Kumpipa, a leenglate a en dingin a hong lut ciangin mo pawi siimna puan a silhlo mi khat a mu hi. Ama kiangah, ‘Lawm aw, mo pawi siimna puan silhlopi-in hih lai-ah hong bangci luttheih na hi hiam?’ a cih ciangin tua mipa in a cih nading a thei kei hi. Tua ciangin kumpipa in a nasemte kiangah, ‘A khut a khe hen unla, pualam khuamialna lakah lawnkhia un; tua lai-ah kapin a hagawi ding hi,’ a ci hi. “Bang hang hiam cih leh mi tampi a kisap hangin tawm bek a kiteel hi,” a ci hi. Tua ciangin Farisi mite paikhia uh a, a kampauna tawh Jesuh a mat theih nadingun thu a kikum uh hi. Amau’ nungzuite le Herod mi pawlkhat, Jesuh kiangah a paisak uh hi. Amaute in, “Sia aw, thu ahi bang a gen tawntung na hihna thu ka thei uh hi. Mite kuamah zahtaktuam nei lo na hih manin midangte’ pau ding bangmah phamawhsa loin Pasian in mite’ gamtat ding a deihna bangin tangtakin thu na hilh tawntung hi. Tua ahih ciangin Rom kumpipa Sisar tungah siah i piak ding kilawm hiam, na ngaihsutna nong gen nadingin ka deih uh hi,” a ci uh hi. Ahi zongin Jesuh in amau’ gitloh geelna thei ahih manin, “Mihoih a kineihkhem mite aw, bang hangin kei hong thangsiah se na hi uh hiam? Siahin na piak ding uh sum hong lak dih un,” a cih ciangin sumtang peek khat hong paipih uh hi. Tua ciangin Jesuh in amaute kiangah, “Hih sum tungah kua lim le kua min om ahi hiam?” ci-in a dot ciangin amaute in, “Sisar’ lim le a min kigelh hi,” a ci uh hi. Tua ciangin Jesuh in amaute kiangah, “Sisar’ nate Sisar’ tungah na pia unla, Pasian’ nate Pasian’ tungah na pia un,” a ci hi. Amaute in hih thu a zak uh ciangin lamdangsa mahmah uh a, ama kiang panin a paikhia uh hi. Tua ni mahin, misite thawhkikna om lo hi, ci-in a um Saddusi mite pawlkhat Jesuh kiangah hong pai uh a, “Sia aw, Moses in, ‘Mi khat ta nei loin a sih leh tua a si mipa’ khang a kizop theih nadingin a naupa in a u’ zi luah ta hen,’ ci hi. Tu-in kote lakah unau pasal sagih om ngei hi. A u pen in zi nei a, ta nei loin si ahih manin ama zi a naupa in a luah hi. Tua mah bangin a nihna, a thumna a kipan a sagihna dongin ta nei loin a si uh hi. Tua unau pasal sagihte a sih khit ciangin a numei zong a si hi. Tua ahih manin tua unau pasal sagihte in tua nu tenpihkim uh ahih manin, thawhkik hun ciangin a koi pen’ zi hi ding ahi hiam?” ci-in a dong uh hi. Ahi zongin Jesuh in, “Note in Lai Siangtho thu ahi a, Pasian’ vangliatna ahi zongin thei lo na hih manun na ngaihsunkhial uh hi. Bang hang hiam cih leh misite a thawhkik uh ciangin vantungah a om vantung mite tawh kibang ding uh a, zinei pasalnei cih om lo ding hi. Misite thawhkikna thu tawh kisai-in note tungah a gen thute sim ngei lo na hi uh hiam? Pasian in, ‘Kei pen Abraham’ Pasian, Isaac’ Pasian, Jakob’ Pasian ka hi hi,’ ci hi. Pasian pen a si mite’ Pasian hi loin a nungta mite’ Pasian ahi hi,” a ci hi. Mihonte in hih thu a zak uh ciangin ama thuhilhna hangin lamdang a sa uh hi. Ahi zongin Farisi mite in, Saddusi mite’ thudotna Jesuh in dongkhakin, Saddusi mite in a cih nading mel uh a theih nawn lohna thu a zak uh ciangin Jesuh kiangah a hong pai uh hi. Amaute sung panin Thukham hilh siate khat in Jesuh a thangsiahna-in thu hong dong a, “Sia aw, thukham khempeuh sung panin bang thukham lianpen ahi hiam?” ci-in a dong hi. Jesuh in, “Na Topa Pasian na lungsim khempeuh, na nuntakna khempeuh, le na pilna khempeuh tawh na it ding hi, cihna ahi hi. Hih pen a masapen, a lianpen thukham ahi hi. A nihna pen a masa mah tawh kibang a, nangma pumpi na it bangin na vengte na it in, cihna ahi hi. Hih thukham nihte tung panin thukham dang khempeuh le kamsangte’ thuhilhna khempeuh a hong meengkhia ahi hi,” ci-in a dawng hi. Tua bangin Farisi mite hong kikaihkhop laitakin Jesuh in amaute kiangah, “Note in Khrih kua hi ci a, kua’ suan hi, ci-in ngaihsun na hi uh hiam?” ci-in a dong hi. Amaute in, “David’ suan hi,” ci-in a dawng uh hi. Tua ciangin Jesuh in amaute kiangah, “Tua ahihleh bang hangin David mahmah in Pasian’ Kha’ sawlna tawh, ‘Topa in keima Topa tungah thu gen a: Na galte, na khe nuai-ah ka koih matengin ka taklamah na tu in,’ ci hi, ci-in thu na gen a, Khrih pen ka Topa ci ahi hiam? David in Khrih pen Topa ci ahihleh bang hangin Khrih pen David’ suan hi thei ding ahi hiam?” ci-in thu a dong hi. Kuamah in ama thudotna kamkhat beek dawng thei lo uh hi. Tua hun a kipanin kuamah in Jesuh kiangah thu a dong ngam nawn kei uh hi. Tua ciangin Jesuh in mihonte le a nungzuite kiangah thu gen a, “Thukham hilh siate le Farisi mite, Moses’ aana a nei-in thugente ahih manun, amaute’ gen khempeuh zui-in sem unla, ahi zongin amaute pen a gen bangun gamta lo uh ahih manin amaute’ gamtat bangin gamta kei un. Amaute in midangte tungah vangik mahmah suanin khihcip uh a, ahi zongin tua van a puakpih dingin a khutmeno khat nangawn uh a taangsak nuam kei uh hi. Amaute in a sepna khempeuh uh mite’ muhtheih dingin a hih se uh hi. Amaute in a talsuan le a banbulhte uh a gol pipi-in bawlin, a puanmongteep uh a sau theithei-in a bawl uh hi. Pawi sungah a om uh ciangin uliante’ tutna dinga a kibawl munah tunuam se uh a, kikhopna inn sungah zong uliante tutna tutphah nuampente tungah a tunuam diak uh hi. Mihon lakah mite in hopihin, ‘Sia aw,’ a cih ding uh a ut uh hi. Ahi zongin note pen, ‘Sia,’ na kicih ding uh hi lo hi. Sia khat bek na nei uh a, no adangte khempeuh unau khat na hi uh hi. Vantungah Pa khat bek nei na hih manun leitungah kuamah dang, Pa, na ci kei un. Topa dingin Khrih bek nei na hih manun note khatlekhat, ‘Topa,’ na kici kei un. Note lakah a lianpen pa, na nasem uh hi ding hi. A kiliansakte khempeuh in niamkhiatna thuak ding uh a, a kiniamkhiatte khempeuh a lianin kibawl ding hi. “Mihoih a kineihkhem, no Thukham hilh siate le Farisi mite in gimna na thuak ding uh hi. Note in vantung ki-ukna sungah mite a lut theih loh nadingin kong na khakcip uh hi. Note lah na lutnuam kei uh a, a lutnuamte lah na lutsak kei uh hi. “Mihoih a kineihkhem, no Thukham hilh siate le Farisi mite in gimna na thuak ding uh hi. Meigong numeite tungah nuamtak sa-in a neihsa teng uh laksakin na zangmang uh a, mite in mihoih hong saktheih nading na deihna-un thu saupipi na ngen uh hi. Hih bangin na gamtatna uh hangin na gim thuak ding uh nasiazaw kan lai ding hi. “Mihoih a kineihkhem, no Thukham hilh siate le Farisi mite in gimna na thuak ding uh hi. Note in mi khat bek nangawn na ngah zawh nading uh na hanciamna un leitung tuitung lumletin khual na zin uh a, na ngahsunte uh zong note zah nihin a siahuai, hell khuk tung ding mi na suah uh hi. “Mittaw a bang lamhilhte aw, note in gimna na thuak ding uh hi. Bang hang hiam cih leh note in, ‘Mi khat biakinn tawh a kiciam leh phamawh lo a, ahi zongin biakinn sunga a om kham tawh a kiciam leh a kiciamna in len hi,’ na ci uh hi. Note pen mihai mittaw lamlak taktak na hi uh hi. Kham thupizaw ahi hiam, ahih kei leh tua kham a siangtho a suaksak biakinn thupizaw ahi hiam? Note in, ‘Mi khat, biakna tau tawh kiciam leh phamawh lo a, ahi zongin biakna tau tungah a kipia letsongte tawh a kiciam leh a kiciamna in len hi,’ na ci uh hi. Mittaw mite aw, a kipia nate thupizaw ahi hiam, ahih kei leh tua nate a siangtho a suaksak biakna tau thupizaw ahi hiam? Tua ahih manin biakna tau tawh a kiciam mite pen a tunga a om nate khempeuh tawh zong a kiciam ahi hi. Biakinn tawh a kiciam mite pen a sungah a tengpa tawh zong a kiciam ahi hi. Vantung tawh a kiciam mite zong Pasian’ kumpi tokhom tawh a kiciam hi a, tua tokhom tungah a tupa tawh zong a kiciam ahi hi. “Mihoih a kineihkhem, no Thukham hilh siate le Farisi mite in gimna na thuak ding uh hi. Note in Pasian tungah lengmasel, masala, le kummin sing namtui a kipanin meh namtui nam khempeuh, sawm-ah-khat pia napi-in, thukham sungah a thupizaw ahi thutang, hehpihna, le thumante na don kei uh hi. Adangte nusia tuan loin hih thute na zuih ding uh ahi hi. A makai ding hinapi-in, mittaw bangin bangmah tum loteng thupi ngaihsutin, a thupiteng na nusiakha uh a, tui tawh na dawnkhop khak loh nadingun thovai khaih napi-in kalaoh a nawmvalhkha tawh na kibang uh hi. “Mihoih a kineihkhem, no Thukham hilh siate le Farisi mite in gimna na thuak ding uh hi. Note in hai le kuangte a pualam na siangsak uh a, ahi zongin tuate sungah, thatanghat thu le huaihamna tawh mi-a’ na suh uh nate a om hi. A mittaw Farisi mite aw, a pualam zong a siangtho a suahtheih nadingin hai le kuang sunga a om nate a siangtho hisak phot un. “Mihoih a kineihkhem, no Thukham hilh siate le Farisi mite in gimna na thuak ding uh hi. Note pen leikang tawh a kizut manin a pualam a hoih mahmah tawh kibang napi-in a sungah misi guh le a kihhuai nin nam khempeuh a omna hankhuk tawh na kibang uh hi. Tua mah bangin note zong mite’ muhin mihoih mahmah bang napi-in na sung tawng taktak uhah mawhna le kineihkhemna bek a om hi. “Mihoih a kineihkhem, no Thukham hilh siate le Farisi mite in gimna na thuak ding uh hi. Note in a sisa kamsangte’ han, a hoih mahmahin bawlin, a nuntakna uh a hoih, a sisate’ mualsuangte hoihtakin na zem uh a, ‘I pu i pate’ khan lai-in eite a om hi lehang, kamsangte a thah bangun eite in i that kei ding hi,’ na ci uh hi. Note pen kamsangte a that mite’ suanlekhakte mah na hih manun na zuaupi uh a gen na hi uh hi. Tua ahih manin i pu i pate’ maban zomto vet un. Gul a bang mite’ suanlekhak mite aw, hell khuk tun nading thukhenna panin a suakta dingin bangci-in kilamen thei na hi uh hiam? Note kiangah kamsangte, mipilte, le siate ka hong paisak ding hi. Note in pawlkhatte thatin, pawl khatte singlamteh tungah khai-in, pawlkhatte na kikhopna uh inn sungah na sat ding uh a, khua khat pan khua khatah a banbanin na bawlsia ding uh hi. Tua thu hangin, mawh nei lo Abel a kithah hun a kipanin biakinn le biakna tau kikal-a na thah uh, Barakhiah’ tapa Zekhariah hun ciang dongin, mawhna nei lo a kithat mite khempeuh hangin gimna note in na thuak ding uh hi. Note kiangah kong genin-ah: Tuhuna mite tungah hih gimna hong tung takpi ding hi. “Jerusalem, Jerusalem aw, kamsangte na that a, Pasian’ sawl kamtaite na denglum hi. Akpi in a kha tawh a note a huai mah bangin na mite ka huainuam tawntung a, ahi zongin na ut kei hi. Tu-in na innte kisusiacip ding hi. Nang kiangah kong genin-ah: ‘Topa’ min tawh a hong pai mipa in thupha ngah ta hen,’ na cih hun hong tun matengin kei nong mu nawn kei ding hi,” a ci hi. Biakinn panin Jesuh a paikhiat laitakin ama kiangah a nungzuite hong pai-in, tua biakinn a thupina zia a lak uh hi. Ahi zongin Jesuh in amaute kiangah, “Hihte khempeuh na mu khinta uh hi. Ke’n a mantak a kong genin-ah: Hih inn lamna-a a kiciang suangte a kithuapin a om nangawn a om nawn lo zah dongin kilawnkeek mang ding hi,” ci-in a dawng hi. Oliv Mual tungah Jesuh tu-in a om laitakin a nungzuite guak a tuamin hong pai uh a, “Hih thute cik ciangin hong piang ding a, nang na hong pai ding hun le hun bei nading bang lim hong om ding ahi hiam, hong gen in,” a ci uh hi. Jesuh in amaute kiangah, “Kidawm unla, mite’ khemsa-in ta kei un. Bang hang hiam cih leh keimah a kineih mi tampi hong pai ding a, ‘Kei, Khrih ka hi hi,’ ci-in mi tampi tak umkhialsak ding uh hi. A nai, a gamla-ah galkidona thu na za ding uh hi. Hihte a piang mah ding hi a, ahi zongin a bei nading hi nai lo ahih manin patau kei un. Gam khat le gam khat, kumpi khat le kumpi khat hong kido ding a, mun tuamtuamah kialpi hong tungin, zin hong ling ding hi. Hihte khempeuh pen gimna kipat nading hi pan hi. “Tua ciangin note hong kibawlsia-in hong kithat ding a, keima hangin Gentail mi khempeuh in note hong mudah ding uh hi. Tua hun ciangin mi tampi in a upna uh khahsuah ding a, khatlekhat kimudahin khatlekhat kilehhek ding uh hi. Kamsang kineihkhem mi tampi hong piang ding a, mi tampi tak umkhialsak ding uh hi. Gitlohna khang mahmah ding ahih manin ki-itna hong kiam ding hi. Ahi zongin a bei dongin a thuakzote in hotkhiatna ngah ding uh hi. Tua ciangin mi khempeuh tungah teci ahi dingin Pasian’ hong ukna hangin a lungdamhuai thu, leitung khempeuhah kihilh ding hi. Tua khit ciangin beina hong tung ding hi. “Tua ciangin kamsang Daniel in, ‘A lipkhaphuai zehphitna,’ ci-in a gen pen a siangtho munah hong om ciangin (hih lai a simte in Jesuh’ cihnopna thei ta un), Judea gam a om mite, mualtungah tai hen la, inn tungah a om mite zong, inn sungah van a la dingin lut nawn kei uh hen. Lo-ah a omte zong puan la dingin inn-ah ciah nawn kei hen. Tua hun laitakin naupaiite le naungek neite a dingin haksa mahmah ding hi. Tua galtai hun pen phalbi laitak le Sabbath ni ahih khak loh nadingin thu na ngen un. Bang hang hiam cih leh leitung piancil a kipan tuhun dong, cikmahin tua bang haksatna a om ngei lo, nidang ciangin zong a om ngei nawn lo ding, tua hun laitakin hong tung ding hi. Pasian in tua gimna hun a ni khiam lo hileh a suaktazo kuamah om lo ding hi. Ahi zongin ama teel mite a khualna-in a ni a khiam ding hi. “Tua laitakin mi khatpeuh in, ‘Hih lai-ah Khrih om hi, hua lai-ah Khrih om hi,’ ci-in hong gen leh, um kei un. Bang hang hiam cih leh Khrih a kineihkhemte le kamsang a kineihkhemte hong piang ding a, ahih zawh leh a teelsa mite nangawn a khem nadingun lim le nalamdang lianpipi hong bawl ding uh hi. A hun ma-in hong genkholkhin ka hih manin limtakin kidawm un. “Tua ahih kei leh zong mite in, ‘Gamlakah Khrih om hi,’ hong cih leh zong va paikha kei un. ‘Innsungah Khrih bu hi,’ hong cih leh zong umkha kei un. Bang hang hiam cih leh Mihing Tapa hong pai ciangin khuaphialep in van mong khat panin mong khat dong a taanzaihsak mah bangin kitheikim ding hi. “Sapul omna peuhah musane kikaikhawm ding hi.” “Tua gimna hun a tunkhit phetin ni hong mialin kha hong taang nawn lo ding a, vantung panin aksite hong kia ding a, vantung a om nate a pai ngei-in pai thei loin lampialgawp ding hi. Tua ciangin Mihing Tapa’ lim vantungah hong kilang ding hi. Tua ciangin leitung minam khempeuh dahin kap ding uh a, vangliatna le minthanna tawh meii lakah Mihing Tapa a hong pai a mu ding uh hi. Nakpi takin peengkul hong ging ding a, leitung mun khempeuhah a vantung mite hong paisakin, leimong khat pan mong khat dongin, a teelsa mite a kaikhawmsak ding hi. Thei kung tung panin thu phawk un. Thei a hiang hong meengin a teh hong no ciangin khuakhal hun hong naita hi, ci-in na thei uh hi. Tua mah bangin hih ka thugente khempeuh na muh uh ciangin Mihing Tapa hong tun ding hun hong nai mahmah ta hi, ci-in na thei un. A mantak a kong genin-ah: Hih lai-a a om mite a sihkhit ma-in hih ka thugen khempeuh hong tung ding hi. Van le lei a maimang zongin ka thugente maimang ngei lo ding hi. Ahi zongin a ni le a nai hun ding pen kuamah in thei lo hi. Vantungah a om vantung mite ahi a, Tapa nangawn in ahi zongin thei lo a, Pa Pasian bek in thei hi. Noah hun lai-in up hun lohpi khatin tuiciin a tun bangin Mihing Tapa zong up hun lohpi khatin hong pai ding hi. Tuiciin a tun ma hunin, teembaw sungah Noah a tum ni hun ciang dong, mite in anne zune-in om uh a, mo kipi, mo kikha-in nuntak ngeina bangin om uh hi. Tuiciin hong tungin tui in mi khempeuh a tupcip hun ciang dong, kuamah in bangmah a theih loh mah bangin Mihing Tapa hong pai ciangin zong kuamah in theikhol lo ding uh hi. Tua hun laitakin lo a kuankhawm mi nih, khat kila-in khat kinusia ding hi. An a sukhawm numei nih, khat kila-in khat kinusia ding hi. Tua ahih ciangin bang hunin na Topa uh hong pai ding cih thei lo na hih manun na pilvang un. Ahi zongin na phawk ding uh thu in: Inn nei pa in zan laitakin guta pa a pai ding hun theikhol leh amah in na pangin a inn luhsak lo ding hi. Tua ahih manin Mihing Tapa zong, note’ upmawh loh hun laitakin hong pai ding ahih manin note zong na kiging tawntung ta un. “A pil a citak nasem i cih a bangcite ahi hiam? A naseppih dangte ukin a hun manmanin amaute’ nekzah ding ciat an a pia dingin a topa in a seh a nasempa ahi hi. A topa hong ciah ciangin ama sawl bangin na semin a om a muhpa pen mi hampha mahmah khat ahi hi. Ke’n kong genin-ah, ama neihsa khempeuh a uk dingin a topa in tua nasempa a koih ding hi. Ahi zongin tua nasempa nasem hoih lo hi hen la, a lungsim sungah, ‘Ka topa hong ciahhak ding hi,’ ci-in, a naseppih a lawmte satgawp hen la, zukham thei mite tawh anne zune-in na om leh, a topa tung dingin a uploh ni hun khatpeuhin a topa hong tung ding a, a topa in nakpitakin gim pia-in, mihoih a kineihkhemte’ gimthuak dingteng thuaksak ding a, amah kapin a hagawi ding hi. “Tua hun ciangin vantung ki-ukna zia pen zinei thak pa a uap dingin a meivak uh tawh a pai nungak sawmte tawh kibang ding hi. Nungak sawmte sung panin nga pil uh a, nga hai uh hi. Tua a haite in a meivak sung uhah a tui thunthuah lopi-in pai uh a, ahi zongin a pil nungak ngate in a dimtakin thunin a pai uh hi. Zineipa hong tunghak ahih manin a vekpi-un lusu-in a ihmu uh hi. Ahi zongin zankim tak ciangin, ‘Zineipa hong tungta ding hi. Va dawn un,’ ci-in hong kiko hi. Tua nungakte zong tho-in a meivak uh hong puah ciat uh hi. Tua ciangin a haite in a pilte kiangah, ‘Ka mei uh mitta ahih manin na meitui uh hong hawm un,’ a cih ciangin a pilte in, ‘Hong hawm le ung ko a’ ding tawh kicing nawn lo ding ahih manin no a’ ding va leitawm zaw un,’ ci-in a dawng uh hi. Meitui lei dingin amaute a paikhiat kal sungin zineipa hong tung hi. A kigingsa-in a om nungakte in zineipa dawnin mopawi bawlna sungah a lutkhawm pah uh hi. Tua khit ciangin kong kikhak hi. Tua khit ciangin nungak haite zong hong tung uh a, ‘Topa, Topa aw, kong hong hon in,’ a cih uh ciangin amah in, ‘Note ka hong thei het kei hi,’ na cihsan hi.” “Tua ahih manin a ni le a hun thei lo na hih manun na pilvang un.” “Inn panin khualzin dingin a paikhia mipa tawh zong kibang hi. Amah in a nasemte samin, a neihsateng a nasemte’ kep dingin a ap hi. Amau’ siamna tawh kizui-in khat tungah tulnga, khat tungah tulnih, khat tungah tulkhat a ap khit ciangin a zinkhia hi. Tul nga a ngah pa in sum bawlna-in zangpah a, a meet tulnga mah a ngahthuah hi. Tul nih a ngah pa in zong a meet tulnih mah a ngahthuah hi. Ahi zongin tulkhat a ngah pa in leisung to-in a topa’ sum a seelcip hi. “Hun sawtpi khit ciangin tua nasemte’ topa hong ciahkik a, a nasemte tawh a sum thu a siangsak uh hi. Tul nga a ngah pa in a dang tulnga mah hong tawithuahin, ‘Topa aw, kei tungah tulnga nong ap hi. Hih lai-ah tulnga mah ka meetsak hi,’ hong cih ciangin a topa in, ‘Hoih mahmah hi; a hoih a citak nasempa aw, a tawmno na zekna-ah siam na hih manin a tampi tak ka hong zeksak ding hi. Hong pai in; kei tawh nuamsa khawm ni,’ a ci hi. Tua ciangin tulnih a ngah pa zong hong pai-in, ‘Topa aw, kei tungah tulnih nong ap hi. Hih lai-ah tulnih mah ka na meetsak hi,’ hong cih ciangin a topa in, ‘Hoih mahmah hi; a hoih a citak nasempa aw, a tawmno na zekna-ah siam na hih manin a tampi tak ka hong zeksak ding hi. Hong pai in; kei tawh nuamsa khawm ni,’ a ci hi. Tul khat a ngah pa zong hong pai-in, ‘Topa aw, nang pen na sep loh na bawl lohnapi-ah na a deih, mi genhak mahmah na hihna ka hong thei hi. Tua ahih manin ka hong kihta a, lei sungah na sum tulkhat ka seel hi. Tu-in hih lai-ah na sumzah mah om hi,’ a hong cih ciangin a topa in, ‘A hoih lo, a thadah nasempa aw, ka sep loh ka bawl lohnapi-ah ka deihlam hong thei na hih leh, sumkholna-ah ka sum na koihsak lecin hoih ding hi. Tua hileh tu-a ka hong tunkik ciangin a bulpi le a meet ka ngahkhawm ding hi. Tua ahih manin ama tung panin a tulkhat laksak unla, tul sawm a nei pa tungah piathuah un. Bang hang hiam cih leh a neisate kipiathuah ding a, hau semsem ding hi. Ahi zongin a nei lote tung panin a neihsa sunsun nangawn kilaksak ding hi. Bangmahin a kimang lo hih nasempa ahihleh pualam khuamialna lakah lawnkhia un. Tua lai-ah kapin a hagawi ding hi,’ ci hi. “Mihing Tapa a vantung mite tawh Kumpi-in hong paikhawm uh ciangin a kumpi tokhom tungah hong tu ding hi. Ama mai-ah leitung minam khempeuh hong kikhawm ding hi. Gancing pa in tuu le keelte a khen mah bangin mi khempeuh khen nihin hong koih ding hi. Tuu a bang mite a taklamah koihin, keel a bang mite a veilamah koih ding hi. Tua ciangin Kumpipa in a taklamah a om mite kiangah, ‘Ka Pa in thupha a piak mite aw, hong pai ta un. Leitung piancil a kipanin note a dingin a kibawlkholsa gamnuam hong luah un. Bang hang hiam cih leh ka gilkial laitakin an nong pia uh a, ka dangtak laitakin tui nong pia uh a, khualmi ka hih laitakin zin nong do uh a, puan nei loin ka om laitakin puan nong guan uh a, ka cinat laitakin nong veh uh a, ka thongkiat laitakin nong hawh uh hi,’ a ci ding hi. Tua ciangin mihoihte in, ‘Topa aw, cikin na gilkial hong mu-in an hong pia a, cikin na dangtak hong mu-in tui hong pia ka hi uh hiam? Cikin khualmi na hih laitakin hong mu-in zin hong do a, cikin puan nei lo na hih laitakin hong mu-in puan hong guan ka hi uh hiam? Cikin cina na hih laitakin hong mu-in hong veh a, cikin thongkia na hih laitakin hong mu-in hong hawh ka hi uh hiam?’ a ci ding uh hi. Tua ciangin Kumpipa in amaute kiangah, ‘Note kiangah kong genin-ah: Hih ka sanggamte a neupen khat nangawn na limbawl uh ciangin kei tungah a hong bawl na hi uh hi,’ ci-in a dawng ding hi. “Tua ciangin a veilamah a om mite kiangah, ‘Pasian in a samsiat mite aw, keima kiang panin paikhia unla, Dawimangpa le a nungzuite a dingin a kibawl meikuang tawntung sungah pai un. Bang hang hiam cih leh ka gilkial laitakin an nong pia kei uh a, ka dangtak laitakin tui nong pia kei uh a, khualmi ka hih laitakin zin nong do kei uh a, puan ka neih loh laitakin puan nong guan kei uh a, ka cinat laitakin nong veh kei uh a, ka thongkiat laitakin nong hawh kei uh hi,’ a ci ding hi. Tua ciangin amaute in zong, ‘Topa aw, cikin na gilkial hong mu a, cikin na dangtak hong mu a, cikin khualmi na hih hong mu a, cikin na puan neih loh hong mu a, cikin na cinat hong mu a, cikin na thongkiat hong mu a, cikin kote in nang hong huh nuam lo ka hi uh hiam?’ a ci ding uh hi. Tua ciangin amah in, ‘Note kiangah kong genin-ah: Hih mite a neupen khat nangawn na huh loh uh ciangin kei a hong huh lo na hi uh hi,’ ci-in a dawng ding hi. Tua ahih ciangin tawntung gimthuakna sungah amaute pai ding uh a, mihoihte ahihleh nuntak tawntungna sungah lut ding uh hi,” a ci hi. Jesuh in hih thute a hilh khit ciangin a nungzuite kiangah, “Na theihsa uh mah bangin tuzawh ni nih khit ciangin Paisan Pawi hun hong tungta ding hi. Tua ciangin singlamteh tungah thah dingin Mihing Tapa kipia ding hi,” a ci hi. Tua ciangin siampi lianpen Kaiafas inn-ah siampi liante le upate kikhawm uh a, kuama theih lohin Jesuh simmatin a thahtheih nading uh a vaihawm uh hi. Amaute in, “Buaina lianpi hong omkha thei ding ahih manin hih pawi hun sungin hih kei ni,” a ci uh hi. Bethany khua-a miphak ahi ngei Simon inn-ah Jesuh a om laitakin, numei khat in a manpha mahmah sathau namtui suangngo thawl a dim khat hong tawi-in Jesuh kiangah hong pai a, Jesuh an ne-in a tut laitakin a lu tungah a buaksuk hi. Ahi zongin nungzuite in a muh uh ciangin heh uh a, “Bang hangin hih sathau namtui mawk beisak ahi hiam? Hih sathau kizuak leh sum tampi tak kikhawng ding a, mizawngte huhna-in kipia thei ding hi,” a ci uh hi. Ahi zongin Jesuh in hih thu phawk ahih manin amaute kiangah, “Hih numei bang nuammawh na hi uh hiam? Kei tungah a kilawm mahmahin amah hong gamta hi. Mizawngte pen note tawh hong omkhawm tawntung ding a, ahi zongin note tawh kei ka hong omkhawm tawntung kei ding hi. Keima tungah hih bangin sathau hong buak ciangin ka luanghawm kivui nadingin a hong bawlbawl ahi hi. Note kiangah a mantak a kong genin-ah: Keima hangin a piang ding lungdamna thu a kigenna leitung khempeuhah hih numei kiphawkin a gamtatnate kigengen ding hi,” a ci hi. Tua ciangin sawm le nihte sung panin Iskariot’ tapa Judas a kici mipa siampi liante kiangah va pai a, “Note’ khut sungah amah hong pia leng, note in kei bang tawh hong guai ding na hi uh hiam?” a cih ciangin ngun peek sawmthum a pia uh hi. Tua hun a kipanin amah a lehhek theih nading hunhoih a zongpah hi. Silngo Sawh loh Anlum Pawi a kipat ni-in nungzuite in Jesuh kiangah, “Paisan Pawi annek ding koilai takah hong bawlsak le ung deih na hi hiam?” ci-in a dong uh hi. Jesuh in, “Jerusalem khua sungah va pai unla, tua mipa kiangah, ‘Siapa in, “Ka hun hong naita hi. Na inn-ah ka nungzuite tawh Paisan Pawi an ka hong ne ding uh hi,” ci hi,’ va ci un,” a ci hi. Nungzuite zong Jesuh gen bangin gamta uh a, Paisan Pawi an ding a bawl uh hi. A nitak ciangin Jesuh le sawm le nihte an ne dingin a tukhawm uh hi. Amaute an ne-in a om laitakun Jesuh in, “Note khat in kei na hong lehhek ding uh hi,” a cih ciangin amaute dah mahmah uh a, amaute in a banbanin, “Topa aw, kei ka hi hiam?” ci-in a dong uh hi. Jesuh in, “Ankuang ka sawk khawmpih pa in kei hong lehhek ding hi. Mihing Tapa ahihleh Lai Siangtho sungah a kigelhsa mah bangin a si ding ahi hi; ahi zongin Mihing Tapa a lehhek pa in gimna thuak ding hi. Tua mipa pen a piang vet lo hileh ama a dingin hoihzaw ding hi,” a ci hi. Jesuh a lehhek pa Judas in, “Topa aw, kei ka hi hiam?” a cih ciangin, “Na ci khin hi,” ci-in Jesuh in a dawng hi. Tua bangin an a nek laitakun, Jesuh in anlum la-in lungdamna a kohkhit ciangin balnen a, a nungzuite kiangah pia-in, “La unla ne un; hih pen ka pumpi ahi hi,” a ci hi. Tua ciangin hai la a, lungdamna a kohkhit ciangin amaute tungah pia-in, “Na vekpi-un dawn un. Mi tampite’ mawhna a mai nadingin a luangkhia, Pasian’ thuciamna a kipsak, ka sisan ahi hi. Note kiangah kong genin-ah: Ka Pa’ Ukna sungah note tawh leenggahzu thak ka dawnkik ni matengin leenggahzu ka dawnkik nawn kei ding hi,” a ci hi. Tua ciangin la khat sa uh a, Oliv Mual tungah a pai uh hi. Tua ciangin Jesuh in amaute kiangah, “Lai Siangtho sungah, ‘Tuucingpa ka satlum ding a, a tuute kithehthang ding hi,’ ci-in a kigelh mah bangin note khempeuh in tu nitakin kei na hong taisanmang khin ding uh hi. Ahi zongin hong kithawh kiksak khit ciangin Galilee gam sung note mai-ah ka pai ding hi,” a ci hi. Peter in, “Adang khempeuh in hong taisan zongin ke’n kong nusia ngei kei ding hi,” a ci hi. Jesuh in, “Tuzan mahmahin ak a khuan’ ma-in kei, thumvei tak na hong nial ding lamtak phawk in,” a ci hi. Ahi zongin Peter in, “Nang tawh sihkhawm nading ciang dong ahi zongin kong nial ngei het kei ding hi,” a ci veve hi. Tua mah bangin nungzui dang khempeuh in zong a ci ciat uh hi. Tua ciangin Jesuh a nungzuite tawh Gethsemane a kici munah pai-in amaute kiangah, “Hua lamah pai-in thu ka va nget kal sungteng hih lai-ah na om un,” a ci hi. Tua ciangin Peter le Zebedi tapa tegel tonpih a, dahin a lunggim hun ding a kipan hi. Amaute kiangah, “Ka lungsim dahna hangin ka si dektak hi. Hih lai-ah na om unla hong ngak un,” a cih khit ciangin tawmkhat pai lai-in leilakah bokin thu ngen a, “Pa aw, ahi thei ding ahihleh hih thuak nading tawh hong kipelhsak in. Ahi zongin kei’ deihna bang hi loin nangma deihna bang hizaw ta hen,” a ci hi. A nungzui thumte kiangah hong paikik ciangin amaute na ihmu uh hi. Amah in Peter kiangah, “Nai khat sung nangawn hong ngakzo lo liang na hi uh hiam? Ze-etna-ah na puk khak loh nadingun thu ngen un. Lungsim in ze-etna nang nuam napi-in pumpi in nangzo lo hi,” a ci hi. Tua ciangin a nihveina va paikikin thu ngen a, “Pa aw, keima thuak lohin ahi thei lo ding ahihleh nangma deihna bang hi ta hen,” a ci hi. A nungzuite kiangah hong paikik ciangin, a ihmut uh suaklua mahmah ahih manin na ihmu leuleu uh hi. Tua ahih manin amaute kiang panin paikhia kikin, a kibang mahin a thumveina thu a ngen hi. Tua ciangin a nungzuite kiangah hong paikik a, “Ihmu-in tawlnga hithiat lailai na hi uh hiam? Mawhnei mite’ khut sungah Mihing Tapa a kipiak ding hun hong tungta hi. Tho un, pai ta ni. Kei hong lehhek ding pa hong naita hi,” a ci hi. Tua bangin Jesuh in thu a gen laitakin sawm le nihte sung panin Judas hong tung a, siampi liante le upate in a hong sawl, namsau le molhtum a tawi mihonpi tawh hong tonkhawm hi. A lehhek pa in mihonte kiangah thu na ma gen a, “Ka nap pen pa amah hi ding hi; man un,” ci-in a lim ding a hilhkhol hi. Judas zong Jesuh kiangah hong paipahin, “Topa aw, thupha ngah ta in,” ci-in hopihin limnap mahmah hi. Jesuh in, “Lawm aw, hih dingin na ngim pen hihpak in,” ci-in a dawng hi. Tua ciangin mihonte in Jesuh manin a lencip uh hi. Jesuh tawh a omkhawm mite khat in a namsau dokin siampi lianpen pa’ nasempa a sat leh, a bil a satkhia hi. Tua ciangin Jesuh in ama kiangah, “Na namsau a paai-ah siatkik in. Namsau a zangte namsau mah tawh si ding hi. Ka Pa kiangah ngen hi leng, vantung galkapte hon sawm le hon nih val, thakhat thu-in hong puakpah theih ding lamtak thei lo na hi hiam? Tua bangin kivaikhak hi zenzen leh Lai Siangtho in tu-a bangin a pian nading a gen pen bangci tuntheih ding ahi hiam?” a ci hi. Tua ciangin Jesuh in mihonte kiangah, “Gal le sa bangin hong ngaihsun a, keimah a man dingin namsau le molhtum tawh hong kuan na hi uh hiam? Nisimin biakinn sungah thu ka hilh niloh a, ahi zongin kei nong man kei uh hi. Ahi zongin Lai Siangtho sungah kamsangte’ thugente a tuntheih nadingin hih bangin a hong gamta na hi uh hi,” a ci hi. Tua ciangin a nungzuite khempeuh in Jesuh nusia-in a taisan uh hi. Tua ciangin Jesuh a man mite in siampi lianpen pa Kaiafas kiangah hong paipih uh a, tua lai-ah Thukham hilh siate le upate a kikhawm uh hi. Peter in siampi lianpen pa’ inntual ciang dong Jesuh’ nung galzuih a, bang thu a piang hiam cih a theih nadingin inntualah palikte kiangah a om hi. Siampi liante le uliante in Jesuh a thahtheih nadingun zuau teci a pang ding mi a zong uh hi. Teci tampi in hong gen hangin thahtheih nading zuau teci pang ding kimu lo hi. A tawpna ciangin mi nih in thu hong gen a, “Hih mipa in, ‘Pasian’ Biakinn susia-in ni thum sungin ka lamkik thei ding hi,’ ci hi,” a hong ci uh hi. Tua ciangin siampi lianpen pa hong dingin, “Hih hong mawhsakna thu tawh kisai-in na gen ding om lo ahi hiam?” ci-in a dot hangin Jesuh pau loin a om hi. Tua ciangin siampi lianpen pa in, “Pasian’ Tapa, Khrih na hih leh na hihloh nong gen nadingin a nungta Pasian’ min tawh khauhtakin ka hong sawl hi,” a ci hi. Tua ciangin Jesuh in, “Nangmah in tua mah na ci khin hi. Ahi zongin note khempeuh kiangah ka hong genin-ah: Vanglianpa’ taklamah Mihing Tapa omin meii tungah a hong pai na mu ding uh hi,” a ci hi. Tua ciangin siampi lianpen pa in a puan balkek a, “Pasian’ tungah a paukhial zo hi. Bang thudang kisam nawn ahi hiam? A paukhialhna na za uh hi. Note in tu-in bangci ngaihsut na hi uh hiam?” ci-in a dot ciangin amaute in, “Thah dingin a kilawm hi,” ci-in a dawng uh hi. Tua ciangin amaute in a maitang cilphih uh a, “Nang Khrih aw, kua in hong beeng ahi hiam, hong gen dih in,” a ci uh hi. Tua bangin inntualah Peter a tut laitakin siampi lianpen pa’ nasem numei khat in ama kiangah, “Nang zong Galilee mi Jesuh tawh a kikhawl na hi hi,” a ci hi. Ahi zongin Peter in nial a, “Na thugen ka thei kei hi,” ci-in a dawng hi. Tua ciangin Peter zong inntual pualamah a paikhiat leh numei dang khat mah in mu ahih manin a gei-a omte kiangah, “Nazareth khuami Jesuh tawh hih mipa kikhawl hi,” a ci hi. Peter in zong nialkik a, “Hua mipa ka theih taak leh,” ci-in a kiciam hi. Tuazawh a sawt loin a gei-a omte khat in Peter kiangah, “Na kampau zia uh kibang ahih manin nang zong hua mite tawh a kipawl mah na hi takpi hi,” a ci leuleu hi. Tua ciangin Peter kiciam a, “Hua mipa ka thei kei hi. Zuauthu ka gen taak leh Pasian in kei hong dawm kei ta hen!” a ci hi. Tua khitzawh phetin ak hong khuangta hi. Tua ciangin, “Ak a khuan’ ma-in kei thumvei na hong nial ding hi,” ci-in Jesuh in a gen thu, Peter in phawkkik ahih manin paikhia-in nakpitakin a kap hi. A zingsang ciangin siampi liante le upate in Jesuh a thah nading uh a vaihawm uh hi. Sikkhau tawh khihin paipih uh a, tua gam sungteng a uk Pilat mangpa khut sungah a ap uh hi. A lehhek pa Judas in Jesuh a si dingin thu a kikhenna a muh ciangin kisikkik ahih manin siampi liante le upate kiangah a ngun peek sawmthumte va paipih kik a, “Mawhna a nei lo mipa a si dingin lehhek kha ka hih manin ka mawh hi,” a va ci hi. Ahi zongin amaute in, “Kote tawh bang kisai nawn ding ahi hiam? Nangma tavuan ahi hi,” a na cihsan uh hi. Tua ciangin amah in biakinn sungah a ngun peekte lawnin paikhia a, amahmah a gui-awk hi. Ahi zongin siampite in tua ngun peekte tawm uh a, “Hih sumte pen mi thah nadingin a kipia sum ahih manin biakinn sumkholna-ah koih dingin kilawm lo hi,” a ci uh hi. Tua ahih manin amaute a kikup khit uh ciangin khualmi a site a kivui nadingin beelseek pa’ lo a lei uh hi. Tua ahih manin tu dongin tua lo pen, “Mi Thahna Lo,” a kici hi. Tua ahih manin kamsang Jeremiah in, “Israel mite pawlkhat in ama man dingin a seh tua ngun peek sawmthum la uh a, Topa in kei tungah a hong gen mah bangin, beelseek pa’ lo lei nadingin a pia uh hi,” ci-in a genkholhna a tung ahi hi. Tu-in gam ukpa Pilat mai-ah Jesuh kidingsak ahih manin amah in, “Nang, Jew mite’ Kumpipa na hi hiam?” ci-in a dot ciangin Jesuh in, “Nang zong tua mah nong ci hi,” ci-in a dawng hi. Ahi zongin siampi liante le upate in mawhsakna thu a gen hangun Jesuh in a dawng kei hi. Tua ciangin Pilat in Jesuh kiangah, “Amaute in nang a hong mawhsaknate za lo na hi hiam?” a ci hi. Ahi zongin Jesuh in amah a kimawhsaknate kam khat beek dawng het lo ahih manin Pilat in lamdang a sa mahmah hi. Paisan Pawi hun simin Rom gam ukpa in mihonte’ deih thongkia mi khat a khah a ngeina ahi hi. Tua hun laitakin a gilo mahmah Barabbas a kici mi khat thongkia-in a om hi. Tua ahih manin mihonte hong kikhop ciangin Pilat in amaute kiangah, “Barabbas le Khrih a kici Jesuh, koizaw ka khah ding deih na hi uh hiam?” ci-in a dong hi. Bang hang hiam cih leh Jesuh a hazat man bekun ama kiangah a paipih ahihna thu teltakin a thei hi. Tua banah, thukhen zumah thusitin a om hunsung mahun, a zi in thu zasak a, “Tuzan ka mang sungin ama hangin nakpitakin gimna thuak ka hih manin, mawhna nei lo tua mipa bangmah cihkha kei in,” a ci hi. Barabbas khahin Jesuh a thah nadingin Pilat kiangah a nget nadingun siampi liante le upate in mihonte a hanthawn uh hi. Tua ciangin Rom gam ukpa in mihonte kiangah, “Hih mi nihte, koi pen ka khah ding deih na hi uh hiam?” ci-in a dot leuleu ciangin amaute in, “Barabbas,” a ci uh hi. Tua ciangin Pilat in, “Tua ahihleh Khrih a kici Jesuh pen bangcih ding ka hi hiam?” a cih ciangin amaute khempeuh in, “Singlamteh tungah thatsak in,” a ci uh hi. Tua ciangin amah in, “Amah in bang gamtat khialhna nei ahi hiam?” ci-in a dot ciangin, “Singlamteh tungah thatsak in,” ci-in a awng ngeingai uh hi. A gengen hangin bangmah phattuamna om loin buaina piangzaw kha ding, ci-in Pilat in a theih ciangin, tui la-in mihonpi’ muhin a khut sil a, “Hih mipa a sihna thu-ah kei ka kihel kei hi. Note in thei ta un,” a ci hi. Tua ciangin mi khempeuh in, “Hih mipa’ sihna hangin gimthuakna, kote a kipanin ka suan ka khakte dongun ka thuak ding uh hi,” ci-in a dawng uh hi. Tua ciangin amaute’ deihna bangin Barabbas khah a, Jesuh ahihleh a sat khit ciangin singlamteh tungah thah dingin a piakhia hi. Tua ciangin Pilat’ galkapte in ama omna kumpi inn-ah Jesuh paipih uh a, tua lai-ah galkap khempeuh a hong kikaikhawm uh hi. Tua lai panin Jesuh’ puan suahkhiatsak uh a, puansan khat a silhsak uh hi. Kumpi lukhu lim dingin ling vialin a lu-ah khusak uh a, a khut taklamah pumpeeng khat a tawisak uh hi. Tua ciangin ama mai-ah khukdin uh a, “Jew mite’ Kumpipa aw,” ci-in zahpihna tawh a hopih uh hi. Tua ciangin cilphih uh a, a pumpeeng tawisak uh la-in a lutang a sat uh hi. Tua bangin a simmawh bawl khit uh ciangin a puansan silhsak uh suahkhia leuleu-in ama puan mah silhsakkik uh a, singlamteh tungah thah dingin a paikhiatpih uh hi. Tua bangin a pai laitakun Sairin khuami Simon kici mi khat tawh kituak uh a, amah lammatin Jesuh’ singlamteh a puasak uh hi. Lutang guh a cihnopna Golgotha a kici mun a tun uh ciangin, zatui kha tawh a kihel leenggahzu a dawn dingin a pia uh hi. Ahi zongin Jesuh in a ciapkhit ciangin a dawn nuam kei hi. Singlamteh tungah Jesuh a khai khit uh ciangin a puante kua in a koi ngah ding cih a theih nadingun suang lawnin ai san uh a, a puan teng a hawm uh hi. Tua ciangin amaute tu-in Jesuh a en uh hi. Tua ciangin amah a mawhsakna uh, “Hih pa, Jew mite’ Kumpi Jesuh ahi hi,” cihna lai gelhin ama lutang sanah a suang uh hi. Tua ciangin mi that nih, Jesuh’ taklamah khat, a veilamah khat tawh zong a khaikhawm uh hi. Tua ciangin amah a va mukha mi peuhmah in a lu uh peisanin, “Biakinn susia-in ni thum sungin a lamkik ding pa aw, nang le nang kihonkhia in. Pasian’ Tapa na hihtakpi leh singlamteh tung panin hong kumsuk in,” ci-in a zahko uh hi. Tua bangmahin siampi liante in Thukham hilh siate le upate tawh zahko-in, “Amah in midangte honkhia thei napi-in amahmah kihonkhia thei lo hi. Amah, Israel mite’ Kumpi ahi hi. Tu-in singlamteh tung panin hong kumsuk leh i um ding hi. Amah in, ‘Kei, Pasian’ Tapa ka hi hi,’ ci ahih manin, amah in Pasian muanin a nei hi. Pasian in a hotnop leh tu-in honkhia ta hen,” a ci uh hi. Tua mah bangin amah tawh a kikhai khawm mi thatte in zong a zahko uh hi. Sun nai sawm le nih hun a kipanin nitak nai thum dong, nai thum sung, tua gam sung khempeuhah khim a zing hi. Nitak nai thum hun pawl laitakin Jesuh nakpitakin kiko a, “Ka Pasian, ka Pasian, bang hangin kei hong nusia na hi hiam?” a cihna ahi, “Eloi, Eloi, lama sabakthani,” a ci hi. A gei-ah a om a pauna a za mite pawlkhat in, “Hih mipa in Elijah a sam ahi hi,” a ci uh hi. Tua ciangin amaute khat va tai-in tuihupna la-in leenggahzu-hau sungah a diahkhit ciangin pumpeeng dawnah henin Jesuh’ hup dingin a tahto hi. Ahi zongin adangte in, “Khawl dih un; amah a honkhia dingin Elijah hong pai hiam ngak dih ni,” a ci uh hi. Tua ciangin Jesuh nakpitakin kiko kikin a si ta hi. Tua laitakin biakinn sung deina puan, a lu panin a taw dongin kikekin phelnih a suak hi. Zin zong lingin suangtumpite kitam hi. Hankhukte zong kihong a, Pasian’ mi a sisa tampite zong kithokiksak hi. Hankhuk panin amaute paikhia uh a, sihna panin Jesuh a thawhkik khit ciangin, amaute zong khuapi siangtho sungah hong lut uh a, mi tampi in a mu uh hi. Jesuh enin a om galkap bupa le galkapte in zinlinna le a thupiangte a muh uh ciangin lamdangsa mahmah uh a, “Hih pa, Pasian’ Tapa taktak mah ahi hi,” a ci uh hi. Galilee gam panin Jesuh hong zui-in amah a huh, a gal et numei tampi zong a om hi. Tua numeite lakah Magdala khuami Mary, James le Josef’ nu Mary, le James le Johan’ nu ahi, Zebedi’ zi, a kihel uh ahi hi. A nitak ciangin Arimathea khuami, Jesuh thu a um, mihau ahi Josef a kici mi khat, Pilat kiangah va pai-in Jesuh’ luang a va ngen hi. Pilat in Josef’ ngetna bangin Jesuh’ luang a kipiak nadingin thu a pia hi. Josef in zong Jesuh’ luang la-in, dialpuan thak tawh a tun khit ciangin, suang a kikhuak thak ahi ama hankhuk sungah a vui hi. Tua ciangin suangtum lianpi khat hualin a han kongvang hucipin a ciah hi. Magdala khuami Mary le adang Mary zong a hankhuk mai ngatin a tu uh hi. A zing ciang, Sabbath ni-in Pilat kiangah siampi liante le Farisi mite hong pai uh a, “Topa aw, hih mi khem pa in a nuntak lai-in, ‘Ni thum khit ciangin ka hingkik ding hi,’ ci-in a thugenna ka thei uh hi. Tua ahih ciangin ni thum sung a han hoihtakin a kicin nadingin thu pia in. Tua hikeileh a nungzuite in a luanghawm gukhia-in mite kiangah, ‘Sihna panin hingkik khin hi,’ cikha ding uh ahih manin a mi khem masakna uh sangin a khem nunungna uh hong husiazaw lai kha ding hi,” a ci uh hi. Pilat in amaute kiangah, “Galkapte cingsak unla, a muanhuai theithei dingin na siam bangun hih un,” a ci hi. Tua ahih ciangin amaute pai uh a, a han hukna suang limtakin a ciamteh khit uh ciangin galkapte a cingsak uh hi. Sabbath ni khit, Nipi ni zingsang khua hong vak kuan ciangin Magdala khuami Mary le adang Mary, daihawh dingin a va pai uh hi. Thakhatin zin nakpitakin hong ling hi. Topa’ vantungmi khat, vantung panin hong paisuk a, han hukna suang a likkhiat khit ciangin a tungah a tu hi. Ama mel, khuaphialep tawh kibang a, a puan zong vuk bangin a pak hi. Hancingte in kihtalua uh ahih manin lingin a sibup uh hi. Ahi zongin tua vantungmi in numeite kiangah, “Lau kei un. Singlamteh tungah a kithat Jesuh a zong na hihlam uh ka thei hi. Hih lai-ah amah om nawn lo hi. A gensa bangin thokik khinta hi. Hong pai unla, amah a kisialna mun hong en un. Tu-in manlang takin va ciah unla, a nungzuite kiangah, ‘Sihna panin Jesuh kithosak khin a, Galilee gam note mai-ah a pai ding hi. Tua lai-ah amah na mu ding uh hi,’ ci-in va gen un. Hih ka hong gen thute hoihtakin ciamteh un,” a ci hi. Tua ahih manin numeite zong laukawm, nuamkawmin nungzuite kiangah hih thu a ko dingin a taipah uh hi. Jesuh in lampi-ah tua numeite na dawntuahin, “Lungnuam un!” ci-in a na hopih hi. Numeite in zong Jesuh a khe-ah lenin a bia uh hi. Tua ciangin Jesuh in amaute kiangah, “Lau kei un. Pai unla, Galilee gamah ka sanggamte a pai nadingin va gen un. Tua lai-ah kei hong mu ding uh hi,” a ci hi. Tua bangin numeite a pai laitakin han a cing galkapte pawlkhat khua sungah hong ciah uh a, siampi liante kiangah a thupiang khempeuh a ko uh hi. Siampi liante in upate tawh thu kikupna khat nei-in vai a hawm khit uh ciangin sum tampi tawh galkapte golhguk uh a, “Mite kiangah, ‘A nungzuite, zanin ka ihmut kalun hong pai-in a luang a gukhia uh hi,’ ci-in gen un. Gam ukpa Pilat in hih thu a zak ciangin ama lungkim zawh nading dongin ka na genpih ding uh a, note a dingin bangmah lunghihmawhna om lo ding hi,” a ci uh hi. Tua ahih manin galkapte in a sum sang uh a, a kisawl bangin a gamta uh hi. Tua ahih manin tuni dongin Jew mite lakah tu-a bangin hih thu a kigengen lai ahi hi. Nungzui sawm le khatte zong, Jesuh in a gensa bangin Galilee gam a mualtungah a pai uh hi. Amaute in Jesuh a muh uh ciangin bia uh a, ahi zongin pawlkhat in umzo taktak lo uh hi. Tua ciangin amaute mai-ah Jesuh hong pai a, “Leitungah ahi a, vantungah ahi zongin vangliatna khempeuh kei tungah hong kipia khinta hi. Tua ahih ciangin note pai unla, midang khempeuh, keima nungzui mi suaksakin, Pa min, Tapa min, le Kha Siangtho min tawh tui sungah na phum un. Tua ciangin note tungah ka hong gen thute khempeuh a zuih nadingun na hilh un. Hun bei dongin note a hong ompih tawntung ding ka hihna thu phawk ta un,” a ci hi. Pasian’ Tapa Jesuh Khrih tawh kisai Lungdamna Thu hih bang ahi hi. Kamsang Isaiah Lai Siangtho sungah, “Nangma mai-ah ka kamtai pa ka sawl a, amah in na pai nading lampi a bawlkhol ding hi. Gam sungah mi khat kiko a, ‘Topa’ pai nading lampi bawl unla, a tot ding lampi tangsak un,’ ci hi,” ci-in a kigelhna tawh hong kipankhia hi. Tua mah bangin gam sungah Johan hong vak a, mawhna kisikin tui kiphum un; tua hileh na mawhna uh Pasian in hong maisak ding hi, ci-in thu a hilh hi. Johan’ thuhilhna a ngai dingin Jerusalem khua a kipan Judea gam sunga om mi khempeuhte a hong pai uh hi. Amaute in a mawhnate uh va pulak uh a, Jordan Gun sungah Johan in amaute a tuiphum hi. Johan in kalaoh mul kigan puan silhin, savun kawnggak tawh a kawng gak a, kauphe le gamlak khuaizu tawh a kivak hi. Amah in mite tungah thu hilh a, “Ka nungah hong pai ding pa pen kei sangin nakpitakin lianzaw a, kunin a khedap khau a sutsak ding nangawnin ka kilawmzo kei hi. Keimah in tui sungah note kong phum a, amah in Kha Siangtho sungah note hong phum ding hi,” a ci hi. Tua laitakin Galilee gam sunga om Nazareth khua panin Jesuh hong pai a, Jordan Gun sungah Johan in amah a tuiphum hi. Tui sung panin Jesuh a thawhkhiat khit phetin vantung kihongin, ama tungah vakhu bangin Kha Siangtho a hong kumsuk a mu hi. Vantung panin aw khat hong ging a, “Nang pen ka it mahmah ka Tapa na hi a, nang tungah ka lungkim mahmah hi,” a ci hi. Thakhat thu-in Kha Siangtho in gamlakah Jesuh a paisak hi. Gamlakah ni sawmli sung om a, Satan in tua hun sungteng a ze-et hi. Tua lai-ah gamsa gilote zong om a, ahi zongin vantung mite hong pai-in amah huhin an a vak uh hi. Thong sungah Johan a kikhiat khit ciangin Galilee gam sungah Jesuh hong pai a, Pasian kiang panin hong pai Lungdamna Thuthak gen a, “A hunhoih hong tungta a, Pasian’ Uk ding hun hong kipanta hi. Na mawhna uh kisikkik unla, hih Lungdamna Thuthak um un,” ci-in a hilh hi. Galilee Tuili gei tawnin Jesuh a pai laitakin, Simon le a nau Andru, ngabengte ahih manun, ngen tawh nga khuhin a om a mu hi. Jesuh in amau tegel kiangah, “Kei hong zui un; nga mat bangin mi tampi a huaite kong suaksak ding hi,” a ci hi. Amau tegel in zong a ngen uh nusia-in Jesuh a zuipah uh hi. Tawmkhat a pai khit ciangin Zebedi’ tapa James le a nau Johan zong, a gunkuang tung uhah a ngen uh khui-in a om a mu leuleu hi. Jesuh in amaute a muh phetin sampah a, amau tegel in zong a pa uh Zebedi le a thacialte uh nusia-in Jesuh’ nung a zui uh hi. Tua ciangin Kapernaum khua tung uh a, a Sabbath ni-in kikhopna inn sungah Jesuh pai-in thu hilh ding a kipan hi. A thuhilhna a za mi khempeuh in ama thugenna zia hangin lamdang a sa uh hi. Amah in Thukham hilh siate bangin thu gen loin aana nei mite bangin thu a genzaw hi. Tua laitakin kikhopna inn sungah dawivei mi khat hong lut a, “Nazareth khuami Jesuh aw, kote tawh nang bang kisai ihi hiam? Kote a susia dingin hih lai-ah hong om na hi hiam? Pasian’ mi siangtho na hihlam kong thei hi,” ci-in a kiko hi. Jesuh in, “Pau kei in; hih mipa sung panin paikhia in,” ci-in tua dawi tungah thu a pia hi. Dawi gilo in tua mipa kongkaw sakin a linsakgawp khit ciangin nakpitakin awngin ama sung panin a paikhia hi. Mi khempeuh in lamdangsa uh a, khatlekhat in, “A bangci thu ahi hiam? Bang thuthak hilh tuan ahi hiam? Hih mipa in dawi gilote thupiak nading aana nei a, dawi gilote in ama thu a mang uh hi,” ci-in a kikum uh hi. Tua ahih ciangin hih Jesuh’ thu in Galilee gam sung khempeuh thakhatin a zelpak hi. Tua ciangin kikhopna inn panin amaute paikhia-in Simon le a nau Andru’ inn-ah paisuakpah uh a, James le a nau Johan in zong a zui uh hi. Simon’ sungnu nattunin lupna ngak a, Jesuh a tunphetin tua nu’ natna thu ama kiangah kigen hi. Amah zong tua nu kiangah pai a, a khutin lenin a phongto hi. A natna dam a, a zinte zong a dozo pah hi. Tua nitak lam, ni a tum khit ciangin mite in Jesuh kiangah cina khempeuh le dawivei khempeuh a hong paipih uh hi. Tua khuami khempeuh a inntualah hong kikhawm uh hi. Jesuh in natna namkim a vei mi tampi damsak a, dawi tampi tak zong a hawlkhia hi. Dawite in Jesuh thei uh ahih manin, Jesuh in dawite thu gensak lo hi. A zing ciang phalvak ma-in Jesuh tho-in gamdaihna mun khatah na pai-in thu a ngen hi. Ahi zongin Simon le a lawmte in Jesuh a zong dingin nungzuih uh a, amah a muh uh ciangin, “Mi khempeuh in nang hong kan uh hi,” a ci uh hi. Ahih hangin Jesuh in, “Hih kiimnai-a om khuadangte-ah pai ni. Keima hong paina pen thuhilh ding ahih manin tua khuate-ah thu ka hilh ding hi,” a ci hi. Tua ahih ciangin Galilee gam sung khempeuhah amah zin a, a kikhopna uh innte-ah thu hilhin dawite a hawlkhia hi. Miphak khat Jesuh kiangah hong pai-in khukdin a, “Topa aw, hong damsak nuam peuh lecin nong damsak thei ding hi,” ci-in a thum hi. Jesuh in hehpihhuaisa ahih manin a khut zanin lawng a, “Nang kong damsak nuam hi,” a ci hi. Thakhat thu-in a phaknatna bei-in a damsiang hi. Tua ciangin Jesuh in khauhtakin ama tungah thu genin paikhiasak pah a, “Hih thu kuama kiangah gen kei in. Siampipa kiangah paisuak pahin amah kivelsak in. Tua ciangin na damsiangna thu mi khempeuh in a theih nadingin Moses thupiaksa bangin biakpiakna bawl in,” a ci hi. Ahih hangin a mipa paikhia-in a paina khempeuhah hih thupiang khempeuh gen belin a nei hi. Hih thu nakgen lua-in kitheithang gawp ahih manin, tua hun a kipanin mite’ theihin khua sungah Jesuh lut thei nawn lo hi. Tua ahih manin gamdaihna munah amah om a, mun khempeuh panin ama kiangah mite a hong pai uh hi. Tuazawh ni tawmkhat khit ciangin Kapernaum khua-ah Jesuh hong paikik a, inn-ah a omna thu hong kitheithang hi. Mi tampi tak hong kikhawm uh ahih manin innsung khempeuh, kongkhak pualam nangawnah mi a dim hi. Jesuh in amaute kiangah Pasian’ thu hilhin a om laitakin, mihing li in Jesuh kiangah khutlekhezaw mi khat a paipih dingin hong pua uh hi. Ahi zongin mihonpi kinehlua ahih manin Jesuh kiangah paipih thei lo uh hi. Tua ahih manin Jesuh’ omna san inn tungkhum hongletin, a lupna pheek tawh a mipa a khaisuk uh hi. Jesuh in hih mite’ up mahmahna thu a muh ciangin khutlekhezaw mipa kiangah, “Ka ta aw, na mawhnate hong kimaisak hi,” a ci hi. Tua lai-ah a om, Thukham hilh siate pawlkhat in a lungsim sung uhah, “Bang hangin hih mipa, Pasian tawh a kikim bangin kingaihsunin hih bangin pau ngam ahi hiam? Pasian simloh kuamah in mawhna maisak thei lo hi,” ci-in a ngaihsun uh hi. Jesuh in a lungsim sung uha amau ngaihsutna theipah ahih manin amaute kiangah, “Bang hangin tua bangin ngaihsun na hi uh hiam? Hih khutlekhezaw mipa kiangah, ‘Na mawhna hong kimaisak khin hi,’ cih ding le, ‘Tho-in na lupna pheek la inla pai dih in,’ cih ding koi baihzaw ahi hiam? Ahi zongin Mihing Tapa in leitungah mawhmaisak theih nading thu nei hi, ci-in na theih nadingun kong lak ding hi,” a ci hi. Tua ahih manin khutlekhezaw mipa kiangah, “Tho-in na lupna pheek la inla, na inn-ah ciah in,” a ci hi. Tua mipa zong amaute khempeuh’ muhin tho a, a lupna pheek la-in a paikhia pah hi. Amaute khempeuh in lamdangsa mahmah uh a, Pasian phatin, “Hih bang mahmah i mu ngei nai het kei hi,” a ci uh hi. Tua ciangin Galilee Tuili gei-ah Jesuh a paikik hi. Ama kiangah mihonpi hong pai uh a, Jesuh in tua mihonte thu a hilh hi. Tua bangin a paina-ah Alfeas tapa Levi, a siahdonna zumah tu-in a om a mu hi. Jesuh in ama kiangah, “Kei hong zui in,” a ci hi. Levi zong dingin Jesuh’ nung a zuipah hi. Tua nung ciangin Jesuh in Levi’ inn-ah an a va ne hi. Siahdong mi tampi le thukham a khial mi tampite in Jesuh zui uh a, amaute tampi in Jesuh le a nungzuite tawh an a nekhawm uh hi. Hih thukham khialte le siahdongte tawh Jesuh in an a nekkhopna Farisi mite sung panin Thukham hilh siate pawlkhat in a muh uh ciangin a nungzuite kiangah, “Bang hangin hih bang mite tawh an nekhawm ahi hiam?” ci-in a dong uh hi. Jesuh in hih thu a zak ciangin amaute kiangah, “Cidamte in siavuan kisam lo uh a, cina mite bek in kisam uh hi. Mite in a zahtak mihoihte a kisik nadingun a sam dingin a hong pai ka hi kei a, mite in a pampaih mite a kisik nadingun a sam dingin a hong pai ka hi hi,” a ci hi. Tua hun laitakin Tuiphumpa Johan’ nungzuite le Farisi mite in an a tang uh hi. Jesuh kiangah mi pawlkhat hong pai-in, “Bang hangin Tuiphumpa Johan’ nungzuite le Farisi mite’ nungzuite in an tang uh a, nangma nungzuite in tang lo se ahi uh hiam?” ci-in a dong uh hi. Jesuh in, “Mopawi a siim mite in an ne lo dingin um na hi uh hiam? Zineipa tawh a omkhawm sung uh an ne loin om lo ding uh hi. Ahi zongin amaute kiang panin zineipa a kipaikhiatpih hun hong tung ding a, tua hun a tun ciangin an ne loin a om ding uh hi. “Kuamah in puantungsilh lui phop nadingin a ton nai lo puanbek a thak zang ngei lo hi. Zang zenzen leh a puanbek thak in a puan lui balkek ding a, a vang gol zawsop ding hi. Kuamah in savun um lui sungah leenggahzu a thak thun ngei lo hi. Thun zenzen leh leenggahzu in savun um phukham ding a, a leenggahzu le a savun um, a nih tuakin a kisia suak ding hi. Tua ahih manin leenggahzu thak koih nadingin savun um thak kizang hi,” ci-in a dawng hi. Khatvei, Sabbath ni khatin Jesuh le a nungzuite, mangbuh lo nawkin a pai uh hi. A paikawmun a nungzuite in mangbuhvui a zut uh hi. Tua ahih ciangin Farisi mite in Jesuh kiangah, “Bang hangin Sabbath ni-in gamtat loh dingpi, na nungzuite gamta uh ahi hiam?” a ci uh hi. Jesuh in, “David in annek ding a kisap laitakin a gamtatna thu sim ngei lo na hi uh hiam? Amah le a mite a gilkial uh hi. Tua ahih ciangin Pasian’ biakinn sungah lutin Pasian biakna-a a kipia anlumte a ne uh hi. Abiathar in siampi lianpen a sep laitakin hih thu piang hi. I Thukham tawh kizui-in ci lehang, hih anlumte pen siampite bek in a nektheih ding hinapi-in David in ne-in, a mite nangawn a pia lai hi,” ci-in a dawng hi. Tua ciangin Jesuh in, “Sabbath ni, mihingte’ phattuam nadingin a kibawl hi a, mihing pen Sabbath ni a phattuam nadingin a kibawl hi lo hi. Tua ahih ciangin Mihing Tapa pen Sabbath ni nangawn a ukpa ahi hi,” ci-in a thugen a khum hi. Tua ciangin kikhopna inn sungah Jesuh paikik a, tua lai-ah a khut a langkhat a zaw mi khat na om hi. Jesuh gamtakhial hi, ci-in a mawhsak nuam mi pawlkhat tua lai-ah om uh a, Sabbath ni-in hih mipa a damsakkha hiam, ci-in vil gige uh hi. Jesuh in khutzaw mipa kiangah, “Hih a mai lamah hong ding in,” a ci hi. Tua ciangin mite kiangah, “Sabbath ni-in bang i hih ding i Thukham in hong deih ahi hiam? Huh ding maw, gimsak ding; mi khat a nuntakna hot ding maw, thah ding; koi hong deihzaw ahi hiam?” ci-in a dong hi. Ahih hangin kuamah in dawng lo hi. Jesuh in hehmai tawh a kiim a pam en kawikawi a, ahi zongin a khialhna uh le a thuphawk theih lohna uh hangin mite khasiathuai a sa zel hi. Tua ciangin a mipa kiangah, “Na khut zan in,” a ci hi. Amah in zong a khut zan a, damin a ngeina bangkik hi. Tua ahih ciangin kikhopna inn panin Farisi mite paikhia-in Herod pawlte kimkhat tawh kikhopna neipah uh a, Jesuh a thahtheih nading uh a vaihawm uh hi. Tua lai panin Galilee Tuili-ah Jesuh le a nungzuite pai uh a, Galilee gam, Judea gam, Jerusalem khua, Idumia gam, Jordan galkhat, Taia khuapi kiim le Sidon khuapi kiima om gamte in ama hihsa thute zakhin uh ahih manin, hih gamte panin mihon tampi tak, ama kiangah hong pai uh hi. Mihonte tamlua mahmah ahih manin amaute in Jesuh a nehcipgawp khak loh nadingin ama om nading gunkuang khat a koih nadingun a nungzuite a sawl hi. Amah in cina mi tampi damsakkhin ahih manin, Jesuh a lawntheih nadingun cina khempeuh in amah hong naih ciat uh hi. Tua laitakin mite’ sunga lut dawite in Jesuh a muh uh ciangin a mai-ah pukin kiko uh a, “Nang pen Pasian’ Tapa na hi hi,” a ci uh hi. Dawite in amah kua mi ahi cihna thu a genkhiat loh nadingun Jesuh in nakpitakin dawite a kham hi. Tua lai panin a mualtung lamah Jesuh paito a, mi a deihteng ama kiangah a sam hi. Tua a sap mite ama kiangah hong pai uh a, amah in mi sawm le nih teelin, sawltakte, ci-in min a phuah hi. Jesuh in, “Kei tawh a kikhawl dingin noteng ka hong teel hi. Thu a hilh dingin zong ka hong sawl ding a, dawi hawlkhiat nading vangliatna na nei ding uh hi,” a ci hi. Tua a teel mi sawm le nihte: Simon (Jesuh in a min thak dingin Peter a phuah pa), Zebedi’ tapa James le a naupa Johan (Jesuh in hih unaute pen “Vanging bang,” a cih nopna Boanerges min a phuahte), Andru, Filip, Bartholomew, Matthai, Thomas, Alfeas’ tapa James, Thaddeas, Simon (gam khual pa), le Jesuh a lehhek Iskariot’ tapa Judas ahi uh hi. Tua lai panin inn-ah Jesuh ciah a, ama kiangah mihonpi hong kikhawmkik zel ahih manin Jesuh le a nungzuite in an nangawn ne thei lo uh hi. A innkuanpihte in hih thu a zak uh ciangin Jesuh a la dingin hong kuankhia uh hi. Bang hang hiam cih leh, “Jesuh mihai suakta hi,” a kicihna thu a za uh hi. Jerusalem khua pan a hong pai Thukham hilh siate pawlkhat in, “Hih pa sungah Beelzebul lut hi. Dawimangpa in ama tungah dawi hawlkhiat theih nading vangliatna pia hi,” a ci uh hi. Tua ahih ciangin Jesuh in ama kiangah mite samin thugentehna tawh thu hilh a, “Satan in Satan bangci hawlkhiat theih ding ahi hiam? Gam khat peuhpeuh phelnih kisuahin kido le-uh tua gam kip lo ding hi. Innkuan khat peuhpeuh phelnih kisuahin kido le-uh tua innkuan kipzo lo ding hi. Satan le Satan kikhenin kido le-uh kipzo lo ding uh a, a bei ding uh hita uh hi. Mi thahatpa hencip masa lopi-in kuamah in mi thahatpa’ innsung pan a neihsate laksak zo lo ding hi. A hencip khit ciang bekin laksakzo pan bek ding hi. “Tua ahih ciangin hih thu phawk un! Mihingte’ mawhna le a kampau siatnate uh kimaisak thei ding hi. Ahi zongin Kha Siangtho langpangin thu a gente in mawhna kip sukha uh ahih manin a mawhna uh kimaisak ngei lo ding hi,” a ci hi. (Mi pawlkhatte in, “Jesuh in dawi vei hi,” ci uh ahih manin hih bangin thu a gen ahi hi.) Tua laitakin a nu le a naute hong tung uh a, inn pualamah ngakin, Jesuh a sam dingin mi a sawl uh hi. Ama kiimah a tu mihonpite in, “Na nu le na naute, inn pua-ah om uh a, nang hong sam uh hi,” a ci uh hi. Jesuh in, “Ka nu le ka naute i cih kuate ahi hiam?” ci-in a dong hi. Ama kimkotah a tu mite en a, “Hih lai-ah ka nu le ka sanggamte om uh hi. Pasian’ deihna bangin a gamta mi khempeuh ka nu le ka sanggamte ahi uh hi,” a ci hi. Jesuh in Galilee Tuili gei-ah thuhilh ding kipankik leuleu hi. Ama kiimah a kikhawm mite tamlua ahih manin gunkuang sungah pai-in a tu hi. A gunkuang pen tui tungah om a, mihonpite ahihleh tuigei leilakah om uh hi. Amah in thugentehna tawh thu tampi hilh a, a thuhilhna-ah: “Ngai un! Khaici vawhpa, khaici vawh dingin a kuankhia hi. Khaici a vawh ciangin pawlkhatte lamdung tu a, vasate hong leengin tawmin a ne uh hi. Pawlkhatte leihoih a sah lohna mun, suang a kitawphah tung tu a, lei sah lo ahih manin thakhatin popah hi. Tua ankungnote in zung thuk kha zo lo ahih manin nisa in a kat ciangin a keutumpah uh hi. Pawlkhatte lingbulsum omna lak tu a, lingte hong selin depgawp ahih manin bangmah gahzo lo hi. Adangte ahihleh leihoihna mun tu ahih manin hong po-in khang a, a zah sawmthum, a zah sawmguk, a zah zakhat dongin an hong piang hi,” a ci hi. Tua ciangin Jesuh in, “Zak nading bil a neite in hih thu za ta un,” ci-in a thugen a khum hi. Mihonpite a ven’, amah guak a om ciangin nungzui sawm le nihte le ama thugen a za mite in, na thugentehna a khiatna hong gen in, ci-in a ngen uh hi. Jesuh in, “Pasian’ Ukna tawh kisai thusim, Pasian in note tungah hong gen khinzo hi. Ahi zongin a pualama om mite tungah na khempeuh, thugentehna bek tawh kigen hi. Bang hang hiam cih leh, ‘En en napi-un a muh nai loh nading, za za napi-un a tel nai loh nading; amaute in mu-in tel le-uh Pasian’ lamah kihei ding uh a, Pasian in amaute’ mawhna maisak ding hi,’” ci-in a dawng hi. Tua ciangin Jesuh in, “Note in hih thugentehna thei lo na hi uh hiam? Thei lo na hih uhleh, thugentehna khat peuhpeuh bangci theih ngei ding na hi uh hiam? Khaici vawhpa in khaici vawh bangin Pasian’ thu a vawh hi. Khat veivei lamdung a tu khaici bang a, mite in a thu za napi-in, a zakkhit phetun Satan hong pai-in amaute sunga a kivawh thute lakkhiatsak hi. Mi pawlkhatte, khaici pawlkhat a tukna suang kitawphah leilak tawh kibang uh hi. Thu a zak phetun lungdam takin sang uh hi. Ahi zongin amaute sungah thuktum lo ahih manin sauveipi kip lo hi. Tua thu hangin lungkhamna ahi a, bawlsiatna ahi zongin a tun ciangin a pukpah uh hi. Mi pawlkhatte, khaici pawlkhat a tukna mun lingbulsum a omna leilak tawh kibang uh hi. Hih bang mite in Pasian’ thu a zak hangun, hih leitung lunghihmawhna, hauhnopna, le deihna dang a tuamtuamte in a thu khuhcip ahih manin bangmah suakkhia zo lo hi. Ahi zongin midangte ahihleh khaici pawlkhat a tukna mun leihoih tawh kibang uh hi. Amaute in Pasian’ thu za-in sang uh a, pawlkhatte a dingin a zah sawmthum, pawlkhatte a dingin a zah sawmguk, pawlkhatte a dingin a zah za khatin man a nei hi,” a ci hi. Tua ciangin Jesuh in, “Mi khatpeuh in mei a kivak hong la-in lawh peuh khuh a, ahih kei leh lupna nuai peuhah koih ngei ahi hiam? A kimuh theih nading meivakna kho sang tungah koih hi lo ahi hiam? Thusimin a kikoih peuhmah khatvei teitei thulang a suak ding, a kiseel peuhmah khatvei teitei a kipholak ding, cih deihna simloh bang dang om ahi hiam? Zak nading bil a neite in hih thu za ta un,” a ci hi. Tua ciangin amaute kiangah, “Na zak uh thu limtakin ngaihsun un. Midangte tungah na piakna uh tawh kizui-in note tungah Pasian in hong pia ding a, a tamzaw-in hong piathuah ding hi. A neisa mipa tungah Pasian in piathuah ding a, a nei lo mipa tung panin themkhat a neihsun nangawn laksak ding hi,” a ci hi. Tua ciangin Jesuh in, “Pasian’ Ukna pen mi khat in a lolai-ah a vawh khaici tawh kibang hi. Khaici vawhpa zanin ihmu a, zingsangin tho-in sunin a nasep ngeiteng a sem hi. Tua kikal sungin a khaici na po-in na khang a, ahi zongin tua a khantheihna zia amah in a thu thei lo hi. Leitang in ama thu-in na khangsaktawm a, a masa-in a tehno, tua ciangin a kung, tua ciangin a tak a om dongin na khangsak hi. An a min ciangin anlak ding hun ahih manin amah in a phiaukawi tawh an at ding a kipan hi,” a ci hi. Tua ciangin Jesuh in, “Pasian’ Ukna bang tawh kibang ci ding a, i gentel nadingin bang thugentehna zang ding ihi hiam? Leitung a om khaici khempeuh lakah a neu penpen ankam tang tawh kibang hi. Mi khat in tua ankam tang lei-ah vawh a, tawlkhat khit ciangin hong po-in hong khangto a, khaikung khempeuh lakah a golpen pawl hong suak hi. A kung golin a hiangte zaai ahih manin ama liim sung a hiang kawmah vasate in bu a tom uh hi,” a ci hi. Jesuh in hih bang thugentehnate zangin mite tungah thu hilh a, amaute’ telzawh zah ciangciang thu a gen hi. Thugentehna lo tawh thu hilh ngei lo hi. A nungzuite guak tawh a omkhawm ciangin a thu khempeuh a gentel zel hi. Tua ni mah a nitak ciangin Jesuh in a nungzuite kiangah, “Tui kantanin galkhat lamah pai ni,” a ci hi. Tua ahih ciangin a nungzuite in mihonpite nusia-in Jesuh a na tuannasa gunkuang tungah kahin a gunkuang tawh a paikhiatpih uh hi. Gunkuang dangte in zong amau a zui uh hi. Tua laitakin nakpitakin huihpi hong nung a, tuihual hong omin gunkuang sungah tui hong dim dektak hi. Jesuh pen gunkuang nung lamah lukham khamin ihmu-in a om hi. A nungzuite in amah phongin, “Sia aw, kote sita le ung phamawh hong sa lo na hi hiam?” a ci uh hi. Jesuh zong tho-in, “Nung nawn kei in,” ci-in huihpi thu pia a, tuihualte kiangah, “Kilok nawn kei un,” a ci hi. Tua ciangin huihnung khawlin dai khipkhep pah hi. Tua ciangin Jesuh in a nungzuite kiangah, “Bang hangin lau na hi uh hiam? Tu ciang dong upna nei nai lo na hi uh hiam?” a ci hi. A nungzuite in lamdangsa mahmah uh a, “Huihpi le tuihualte nangawn, ama sawl bangin a gamta uh hi,” a ci uh hi. Tua ciangin Jesuh le a nungzuite Galilee Tuili galkhat, Gadara mite’ gam sung a tung uh hi. Gunkuang tung panin Jesuh a kumsuk khit phetin, han lak panin a hong pai mi khat in na dawntuah hi. Hih mipa dawivei hi a, han lakah a teng hi. Kuamah in hih mipa, sikkhau tawh henzo nawn lo uh hi. Tamveipi tak, a khut le a khe, sikkhau tawh kihen khin ngei a, ahi zongin a kihen simin a sikkhaute botsatin, a khe-a kibulh kolte a sukham gawp hi. Amah hatlua ahih manin kuamah in hih zo lo hi. Sun le zanin han lak le mualtung tengah vak kawikawi a, awng gawpin, suang hiamte tawh amah a kikuiliam hi. Hih mipa in Jesuh a gal muh ciangin hong delhin ama mai-ah khukdin a, nakpitakin kiko-in, “A Lianpen Pasian’ Tapa Jesuh aw, kei bang hong nuammawh na hi hiam? Kei, gim hong pia kei in, ci-in Pasian’ min tawh kong thum hi,” a ci hi. (Hih bangin a cihna pen, Jesuh in, “Dawi aw, hih mipa sung panin paikhia in,” a cihna hang ahi hi.) Jesuh in, “Na min bang ahi hiam?” ci-in a dong hi. Mipa in, “Kote tampi pha ka hih manun ka min pen A Honpi ahi hi,” ci-in a dawng hi. Tua gam panin mundangah dawite a hawlkhiat loh nadingin tua mipa in a thum lailai hi. Tua laitakin tua nai-a om mualpangah vok hon tampi gamta-in a om hi. Dawite in, “Hua vokte kiang beekah hong paisak inla, a sungah hong tumsak in,” ci-in a thum uh hi. Tua ahih manin Jesuh in dawite a pai nading uh thu pia a, dawite zong mipa sung panin paikhia-in vokte sungah a lut uh hi. Tua vok honpite a vekpi-in tulnih bang pha hi. Mualtung panin taisuk henhan uh a, tuili sung kidenna-in tuikia mangkhin uh hi. Tua ciangin tua vokcingte tai-in khuasung le gam sung tengah hih thupiang a gen uh hi. Tua thupiangte a en dingin mite zong hong pai uh hi. Jesuh kiang a tun uh ciangin dawi tampi a vei ngei mipa zong a mu uh hi. Tua mipa hoihtakin om a, a lungsim pilin, puan silhin a om a muh uh ciangin lamdangsa-in lau mahmah uh hi. Hih thupiang a mu mi khempeuh in dawivei pa tunga thupiang le vokte thu, mi khempeuh kiangah a gen kawikawi uh hi. Tua ahih ciangin amau gam panin a paikhiat nadingin mipite in Jesuh a sawlkhia uh hi. Tua lai panin gunkuang tungah Jesuh a kahtoh kik ciangin dawi a vei ngei mipa in, “Kei zong hong zuisak in,” ci-in a thum hi. Ahi zongin Jesuh in amah zuisak lo a, “Na innkuanpihte kiangah ciahkik inla, Topa in nang a hong hehpihna le nangma tunga a hong bawlnate va gen in,” ci-in a sawlzaw hi. Tua ahih ciangin a mipa ciah a, tua kiima om Khuapi Sawmte sungah, Jesuh in ama a dingin a sepnate gen a, tua thu a za mi khempeuh in lamdang a sa uh hi. Jesuh, gunkuang tuangin a galkah khit ciangin, tuili gei ama kiangah mi tampi tak hong kikhawm leuleu uh hi. Tua laitakin kikhopna inn a uk, Jairas a kici mi khat hong pai a, Jesuh a muh ciangin a khe phungah bokin, “Ka tanu si dektak ta hi. Amah a cidam kikin a nuntak theih nadingin hong pai inla, ama tungah na khut hong ngaksak in,” ci-in a thum hi. Jesuh zong, tua mipa tawh a paikhia khawm hi. Mi tampi tak in zong zui uh ahih manin Jesuh a nehcip uh hi. Tuate lakah, kum sawm le nih sung tawntung siluang natna a nei numei khat a om hi. Siavuan tampi in amah bawl a, a sum neih khempeuh zangkhin napi-in noptuamzaw loin gim semsemzaw hi. Tua numei in Jesuh’ thu za ahih manin mihonte kawmah Jesuh’ nung a zui hi. Tua nu in, “A puan mong nangawn va lawngkha leng, dam ning,” ci-in a ngaihsun hi. A va lawnkhit phetin a siluang khawlpah a, ama sunga a natna a damlam a kiphawk hi. Jesuh in ama sung panin a vangliatna a paikhiatlam phawkpah ahih manin mihonpite lakah khuadakin, “Kua in ka puan hong lawng na hi uh hiam?” a ci hi. A nungzuite in, “Mihonpite in nang hong nehcihlam na thei hi. Bang hangin kua in hong lawng na hi uh hiam, ci mawk na hi hiam?” a ci uh hi. Ahi zongin amah a lawngte a theih nadingin Jesuh khuadak kawikawi lai hi. Tua numei in ama tunga thupiang thei ahih manin laukawm lingkawmin hong pai-in a khephungah hong bok a, a thupiang khempeuh ahi bangbangin a hong gen hi. Jesuh in zong tua nu kiangah, “Ka tanu aw, na upna in nang hong damsakzo hi. Cidamsuak inla, lungnuam takin va ciah in,” a ci hi. Tua laitakin kikhopna inn ukpa’ inn panin kamtaite hong tung uh a, “Na tanu si khinta hi. Bang hangin Siapa mawk gimsak nawn ding na hi hiam?” a ci uh hi. Ahi zongin Jesuh in amau thu kigen don loin kikhopna inn ukpa kiangah, “Lunghimawh kei in; upna nei peuh in,” a ci hi. Tua lai panin Jesuh in Peter le James le a nau Johan longal kuamah dang kizuisak nawn lo hi. Kikhopna inn ukpa’ inn a tun uh ciangin mite’ kahna le thumna, a gamlumna uh a mu hi. Amah sungtumin, “Bang hangin hici gamlum na hi uh hiam? Bang hangin kap na hi uh hiam? Numeino a si hi lo hi; a ihmu hibek hi,” a ci hi. Amaute in Jesuh zahpih bawlin nuihsan uh ahih manin Jesuh in amaute khempeuh pusuaksak a, numeino’ pa le a nu, le a nungzui thumte tawh, numeino’ lupna inndei-ah a pai uh hi. Tua ciangin numeino’ khut lenin, “Numeino aw, tho in,” a cihna, “ Talitha kumi,” a ci hi. Numeino zong thakhatin tho-in lam a paipah hi. (Amah kum sawm le nih pha ta hi.) Tua ciangin amaute in lamdangsa mahmah uh hi. Hih thu, kuama kiangah a gen loh nadingun Jesuh in nakpitakin amaute kham a, tua ciangin, “Numeino an pia un,” ci-in a sawl hi. Tua lai panin ama pianna khua Nazareth-ah Jesuh pai a, a nungzuite in a zui uh hi. A Sabbath ni ciangin kikhopna inn-ah thu a hilh hi. Ama thuhilh a za mi tampite in lamdangsa-in, “Hih pa in hih thute koi panin a ngah ahi hiam? Hih pa tungah a kipia pilna a bang pilna ahi hiam? Bangci-in nalamdang hici bawltheih ahi hiam? Amah khutsiampa hilel a, Mary’ tapa hi lo ahi hiam? James, Josef, Judas, le Simon-te’ u hi lo ahi hiam? A nau numeite zong hih lai mah a om hi lo ahi uh hiam?” a ci uh hi. Tua hi a, amah sangzo lo uh hi. Tua ciangin Jesuh in amaute kiangah, “Kamsang khat pen, ama khua, ama behte, le ama innsung longal-ah kizahtakin pahtawina a ngah hi,” a ci hi. Tua hi a, cina tawmkhatte tungah khut nga-in a damsak cih simloh, tua lai-ah nalamdang lian bawl thei lo hi. Amaute in amah a uploh manin lamdang a sa mahmah hi. Tua ciangin tua kiima om khuaneute-ah thuhilhin a pai kawikawi hi. Jesuh in sawm le nihte sam a, amaute tungah dawi hawlkhiat nading vangliatna pia-in, amaute nih nihin a sawlkhia hi. Amaute kiangah, “Ciangkhut simloh, na khualzinna uhah bangmah keng kei un. An ahi a, ip ahi a, sum ahi zongin keng kei un. Khedap bulh unla, ahi zongin puanak nih silhthuah kei un. A zin dingin a hong deih inn khat peuhpeuhah tung unla, tua khua panin na paikhiat mateng uh tua inn mahah om paisuak un. Na paina uh khua khatpeuh in note hong sang loin, na thuhilhna uh hong ngaihnop kei uhleh, tua khua nusia-in, na khe uha leivui bangte sinsan un. Tua pen amaute a dingin hilhkholhna ahi hi,” ci-in a vaikhak hi. Tua ahih ciangin amaute kuankhia uh a, mite a mawhna panun a kisik nadingun thu a hilh uh hi. Dawi tampi hawlkhia uh a, cina mi tampi sathau zutin a damsak uh hi. Kumpi Herod in Jesuh thu a kigengenna thu a za hi. Mi pawlkhat in, “Tuiphumpa Johan, sihna panin hingkik hi. Tua ahih manin hih vangliatnate nei hi,” a ci uh hi. Ahi zongin a dangte in, “Elijah hi,” ci uh a, pawlkhat leuleu in, “Tanglai-a kamsangte mah bangin kamsang khat hi,” a ci uh hi. Herod in Jesuh’ nasepnate a zak ciangin, “A lutang ka tankhiat sak Johan hong hingkik hi,” a ci hi. Tua ahih manin Herodias in Johan mudahin thatnuam a, ahi zongin that zo lo hi. Bang hang hiam cih leh Johan pen a thuman mihoih khat hi, ci-in Herod in ngaihsun ahih manin amah zahtakin siatna a thuak nading panin hu hi. Ama thugente in a lungsim nuam losak hi; ahi zongin a thugen zanuam veve hi. Ahi zongin a tawpna-ah Herodias in hunhoih ngah hi. Herod a suah ni hun a tun ciangin kumpi uliante, galkapmangte, le Galilee gam sunga om ulian khempeuh a dingin pawi a kham hi. Tua pawi bawlna sungah Herodias’ tanu hong pai-in hong laam a, Herod le a leenglate khempeuh lungdam mahmah uh hi. Tua ahih ciangin kumpipa in, “Bang deih na hiam; na deih peuhpeuh kong pia ding hi,” a ci hi. Amah in kamciam pia a, “Ka kumpi gam phelkhat ciang dong nangawnin, nong nget peuhpeuh kong piak nading kong kiciam hi,” a ci hi. Tua ahih ciangin tua numeino va paikhia-in a nu kiangah, “Bang ngen ding ka hi hiam?” ci-in a va dong hi. A nu in, “Tuiphumpa Johan’ lutang ngen in,” ci-in a dawng hi. Numeino zong kumpipa kiangah hong paikik pahin, “Kuangdai khat sungah Tuiphumpa Johan’ lutang nong piakpah ding ka deih hi,” a va ci hi. Hih thu a zak ciangin kumpipa dah mahmah hi. Ahi zongin a kiciamnasa hang le a leenglate’ maitang a zahtakna hangin nial ngam lo hi. Tua ahih ciangin Johan’ lutang a hong paipih nadingin galkapte khat a sawlpah hi. Amah zong pai-in thong sungah Johan’ lutang tankhia a, kuangdai khat sungah a lutang hong paipihin numeino tungah a pia hi. Johan’ nungzuite in hih thu a zak uh ciangin hong pai-in a luanghawm la uh a, hanah a vui uh hi. Tua khit ciangin Jesuh kiangah sawltakte hong ciahkik uh a, a sepna khempeuh uh le a thuhilhna khempeuh uh a zasak uh hi. Mi a ciah leh a kuan kiphamat uh ahih manin Jesuh le a nungzuite in annek nading hun nangawn nei man lo uh hi. Tua ahih manin Jesuh in, “Ei guak i om theih nading mun khatah paikhia ni; tua lai-ah na tawlnga thei ding uh hi,” a ci hi. Tua ahih ciangin gunkuang tuangin gamdaihna mun a zuan dingin a pai uh hi. Ahi zongin a paikhiatlam uh le amaute ahihlam uh, mi tampi in thei uh ahih manin khuapi khempeuh panin a hong pai mite, lei lam tawnin na pai uh a, Jesuh le a nungzuite a tun ma-in a na ma tun uh hi. Jesuh, tuigei a tun ciangin mi tampi a na omkhin mu a, amaute, a cing om lo tuute tawh kibang sa ahih manin a khasiat mahmah hi. Tua hi a, amaute thu tampi tak a hilh hi. Nitak lam ciangin a nungzuite in Jesuh kiangah, “Tu-in nitak hita a, hih lai mun lah gamlak ahi hi. Hih kiima om khuate-ah amaute pai-in a annek ding uh a lei nadingun hih mihonte sawlkhia in,” a ci uh hi. Ahi zongin Jesuh in, “Amaute’ nek ding bangkhat peuhpeuh pia un,” a ci hi. A nungzuite in, “Ngun peek zanih tawh anlum va lei-in amaute’ nek dingin pia ding ka hi uh hiam?” ci-in a dong uh hi. Tua ciangin Jesuh in, “Anlum bangzah nei na hi uh hiam, va en dih un,” a ci hi. Amaute in, “Anlum nga le ngasa tawn nih om hi,” ci-in a hong genkik uh hi. Tua ciangin Jesuh in, “Mihonte a pawl a pawlin khen unla, lopa hing tungah tusak un,” a ci hi. Tua ahih manin mihonte zong pawlkhatah za, pawlkhatah sawmnga, cih bangin a honhonin a gualtut uh hi. Tua ciangin Jesuh in a anlum nga le a ngasa tawn nihte la a, vantung lam ento-in Pasian tungah lungdamna a ko hi. A anlumte balnen a, mite tungah a piak dingin nungzuite a pia hi. Tua mah bangin ngasa tawn nihte zong amaute khempeuh a hawmsak hi. Amaute khempeuh in ne-in a kham uh hi. Tua ciangin nungzuite in a kikhamval anlum le ngasa khawm uh a, paipel sawm le nih a dim hi. Tua an a ne mi sung panin pasal cingteng tulnga a pha hi. Tua khit phetin Jesuh in a nungzuite gunkuangah tuangsakin, a galkhat a om Bethsaida khua-ah mapaisak a, amah in mihonte a khua ciatah a ciah dingin a sawl hi. Amaute tawh a kikhen khit ciangin thungen dingin mualtungah a kahto hi. Khuamial ciangin tui laizang dong gunkuang tungta a, Jesuh ahihleh leitungah amah guakin omlai hi. Huih in a nungzuite lehmut ahih manin gunkuang hot zo loin haksa a sakna thu uh Jesuh in a thei hi. Tua hi a, zingsang lam nai thum pan nai guk kikal khawngin a nungzuite kiang lamah tuitung tawnin Jesuh a pai hi. Amaute a khengsuak ding bangin pai a, ahi zongin a nungzuite in tuitung a mi pai a muh ciangun, “Sikha hi,” ci-in ngaihsun uh ahih manin a awngkek gawp uh hi. Bang hang hiam cih leh amah a muh uh ciangin lau mahmah uh hi. Ahih hangin Jesuh in thakhatin amaute hopihpah a, “Lungnuamin om un. Keimah ka hi hi; lau kei un,” a ci hi. Tua ciangin amaute omna gunkuang tungah Jesuh kahto a, huihpi zong a daipah hi. Nungzuite in lamdang a sa mahmah uh hi. Bang hang hiam cih leh lungsim navak lo uh ahih manin anlum tawh kisai thupiang tel thei lo uh hi. Tui a kantan khit uh ciangin Gennesaret gam tung uh a, tuigei-ah a gunkuang uh a khih uh hi. Gunkuang panin a paikhiat khit phetun mite in Jesuh ahihlam a theipah uh hi. Tua gam sung tengah mite tai kawikawi uh a, Jesuh om hi, ci-in a kigenna mun peuhpeuhah cinate a lupna pheek uh tawh hong pua uh hi. Khuapi, khuaneu, le khuakehte a a paina khempeuhah, mite in mihon kikhopna munah cinate hong pua uh a, a puanmongteep beek a lawnsak nading deihin Jesuh kiangah a thum uh hi. A puanmongteep a lawngkha mi khempeuh cidam pahpah uh hi. Tua laitakin Jerusalem panin a hong pai Farisi mite le Thukham hilh siate, Jesuh kiangah hong kikhawm uh hi. A nungzuite pawlkhat in khanglui ngeina zui loin, khut silloin an a neklam uh a mukha uh hi. (Farisi mite le Jew mite khempeuh in khanglui ngeina zui-in khut silloin an ne lo uh hi. Nektheih zuakna panin a kilei nate zong amau teek mah in a sawp kei uhleh ne lo uh hi. Khanglui ngeina a zuih uh, hai khawng, beel khawng, sumngo kibawl beellekuang khawngte sawp ding cih ngeina a zuih uh tampi om hi.) Tua ahih manin Farisi mite le Thukham hilh siate in Jesuh kiangah, “Bang hangin na nungzuite in, khanglui laipek panin tuni dongin a kizui pulepa ngeinate zui loin, khut silloin an ne ahi uh hiam?” ci-in a dong uh hi. Jesuh in amaute dawng a, “A tungthama a hoihin a kilangkhem note’ thu, Isaiah in a genkholhna man mahmah hi. Ama genna-ah, ‘Pasian in hih bangin gen hi: Hih mite in a kampi bek uh tawh kei hong zahtakbawl uh a, a lungsim taktak uh kei tawh kigamla hi. Mihingte’ bawltawm thukhamte, Pasian’ thukham zahin mite tungah hilh uh ahih manin, kei hong biak hangun a kimanna om lo hi,’ ci hi. Note in Pasian’ thukham nawlkhinin, mihingte’ thuhilhna na zui zawsop uh hi,” a ci hi. Tua ciangin Jesuh in a thugen zomlai a, “Na khanglui ngeina uh na zuihtheih nadingun Pasian’ thukhamte a nawlkhinzia na siam mahmah uh hi. Moses in, ‘Na nu le na pa zahtak un. A nu a pa a samsiate kithat hen,’ ci hi. Ahi zongin note in, ‘Mi khatpeuh in a nu a pa a piaktheih ding na khat peuhpeuh a neih hangin, hih pen korban (Pasian a’ ding) hi, ci peuh leh, a nu le a pa a huh nading panin suakta thei hi,’ ci-in thu na hilh uh hi. Hih bang danin mite thu na hilhna uh tawh Pasian’ thu na pampaih uh hi. Hih bangzia-in na gamtatna uh adang tampi zong omlai hi,” a ci hi. Tua ciangin Jesuh in mihonpite samin amaute kiangah, “Mi khempeuh aw, ka thugen hong ngai unla, ka thugente theitel un. A pualam panin mite sungah tumin mi a ninsakthei bangmah om lo hi. Ahi zongin mite sung panin a pusuak khiate in mi ninsakthei hi. (Zak nading bil a neite in hih thu za ta un,” a ci hi.) Mihonpite nusia-in inn sungah a lut khit ciangin a nungzuite in hih thugentehna thu a dong uh hi. Jesuh in, “Note in zong bangmah a thei lo himawk hi lo na hi uh hiam? A pualam panin mite sungah a tum nate in mi ninsak thei lo hi. A lungsimah tum loin a gil sung bekah tum ahih manin tua panin kithakhia lel hi. (Hih bang a gen ciangin an khempeuh nek dingin a siangtho ahi hi, ci-in Jesuh in a gen ahi hi.) Mihingte sung panin a pusuak khiate in mihing ninsak hi. Bang hang hiam cih leh mihingte’ lungsim sung panin nungak-tangval mawhnopna, guktakna, mi thahna, zilepasal neisate tawh mawhnopna, huaihamna, gitlohna, khemna, gamtat hoih lohna, enna, mi gensiatna, kisialhna, le haitatna a piangsakthei ngaihsutna hoih lote khempeuh, mihingte sung panin pusuakin mite ninsak ahihlam thei lo na hi uh hiam?” a ci hi. Tua lai panin Jesuh dingkhia-in Taia khuakiim gamah a pai hi. Inn khat sungah lut a, kuamah in a theih loh ding a ut hangin a busim thei kei hi. A tanu dawi a vei nupi khat in Jesuh’ thu a zak ciangin hong pai-in ama khe phungah hong bok hi. Tua nupi pen Grik mi hi a, Syria gam Foenisia khua-a a suak ahi hi. A tanu sung panin dawi a hawlkhiatsak nadingin a hong thum hi. Ahih hangin Jesuh in, “Naupangte an nesak masa ni. Naupangte’ nek ding kimlai ui khawite piak masak ding kilawm lo hi,” ci-in a dawng hi. Ahi zongin nupi in, “Hi mah hi, Topa aw; sabuai nuai-a uite in naupangte’ khamvalteng ngahbuang hi lo ahi hiam?” a cih ciangin, Jesuh in nupi kiangah, “Hih banga na kampauna hangin na inn-ah ciah ta in; na tanu sung panin dawi a paikhiazo hi,” a ci hi. Amah zong a inn-ah ciahpah a, a tanu nuamtakin lum hithiatin a om mu ahih manin dawi a paikhiat khitna thu a thei hi. Tua ciangin Taia khuakiim gam panin Jesuh paikhia a, Sidon khuapi nawkin pai a, Khuapi Sawmte gam lam tawnin Galilee Tuili-ah a tung hi. Mi pawlkhat in a bilngongin a pau thei lo mi khat, Jesuh kiangah hong paipih uh a, ama tungah a khut a ngaksak nadingin a thum uh hi. Jesuh in zong mihonte omna panin tua mipa paikhiatpih a, a mipa’ bil tegel sungah a khutmete guang a, tua ciangin a khutmete cil nuhin a leii lawnsakin vantung lam ento a, khuisa-in, “Kihong in,” a cihnopna ahi “ Effatha” a ci hi. Thakhatin a mipa’ bil kihongin, a leii zong hong kol a, nuamtakin a pauthei hi. Kuama kiangah hih thute a gen loh nadingun Jesuh in kham a, ahi zongin nakkham le nakgen semsem zawsop uh hi. Amaute in genzawh loh dongin lamdangsa mahmah uh a, “Hih mipa in septheih loh bangmah nei lo hi. Bilngongte nangawn khua zasak thei a, a pau thei lote nangawn pau theisak hi,” a ci uh hi. Tua khit a sawt loin Jesuh kiangah mihon tampi tak hong kikhawm leuleu uh a, amaute in annek ding nei nawn lo uh ahih manin Jesuh in a nungzuite samin amaute kiangah, “Hih mite, kei kiangah ni thum bang hong omkhin uh a, tu-in nek ding nei nawn lo uh ahih manin hehpihhuai ka sa hi. Amaute pawlkhat gamlapi panin a hong pai uh ahih manin gilkialin ciahsak leng, lamkalah cimawh kha ding uh hi,” a ci hi. A nungzuite in, “Hih mite piak ding, hih gamlakah an bangci ngah ding ihi hiam?” a cih uh ciangin Jesuh in, “Anlum bangzah nei na hi uh hiam?” ci-in a dot leh, “Sagih nei ung,” ci-in a dawng uh hi. Tua ciangin Jesuh in leilakah mihonte tusak a, a anlum sagih la-in Pasian tungah lungdamna a kohkhit ciangin balnenin, mihonpite a lui dingin a nungzuite tungah a pia hi. A nungzuite in zong mihonte a lui uh hi. Ngasa neu tawmkhat zong nei uh ahih manin Pasian tungah lungdamna a kohkhit ciangin hihte zong mipite mai-ah a lui nadingun a nungzuite a sawl hi. Amaute in ne-in a khamkhit uh ciangin a khamvalte uh khawm uh a, paipel lian sagih a dim hi. Hih lai-ah mi tulli bang om hi. Tua ciangin mihonpite ciahkhiasak a, a nungzuite tawh gunkuang tungah tuangpahin Dalmanutha gamah a pai uh hi. Farisi mite hong pai-in Jesuh tawh thu kinial uh a, amah a mawhsak theih nading uh a deihna-in Pasian tawh kipawl ahihna a lah nadingin lim khat a lah ding a ngen uh hi. Tua ciangin Jesuh nakpitakin a sung tawngah khuisa-in, “Bang hangin hih mite in lim hong ngen ahi uh hiam? Hih mite tungah lim kilak peuhmah lo ding hi,” a ci hi. Tua ciangin amaute nusia-in gunkuang sungah tuangin a galkhat lamah a pai hi. A nungzuite in anlum a puakthuah ding uh mangngilh uh ahih manin gunkuang sungah anlum khat bek a nei uh hi. Jesuh in, “Farisi-te’ silngo le Herod pawlte’ silngo kidawm un,” ci-in a hilhkhol hi. Anlum i neih loh manin hih thu hong gen hi ding hi, ci-in a nungzuite a kikum uh hi. Jesuh in amaute thugen thei ahih manin amaute kiangah, “Anlum na neih loh manun bang hangin thu kikum na hi uh hiam? Theithei nai lo, telthei nai lo na hi uh hiam? Na lungsim uh tua zahin navak lo ahi hiam? Mit nei napi-in mu lo na hi uh hiam? Bil nei napi-in za lo na hi uh hiam? Mihing tul ngate’ nek dingin anlum nga ka balnen thu mangngilh ta na hi uh hiam? Tua hun lai-in a kikhamval na khop uh paipel bangzah dim ahi hiam?” a cih ciangin, “Sawm le nih,” a ci uh hi. “Mihing tul lite a dingin lum sagih ka balnen lai-in a khamval uh paipel lian bangzah dim khawm na hi uh hiam?” a cih leuleu ciangin, “Sagih,” a ci uh hi. Tua ciangin Jesuh in, “Theitel nai lo na hi uh hiam?” a ci hi. Tua ciangin Bethsaida khua tung uh hi. Mi pawlkhat in Jesuh kiangah mittaw khat hong paipih uh a, amah a lawn nadingun a thum uh hi. Jesuh in tua mittaw pa’ khut lenin khuanawlah a paipih hi. A mipa’ mitah a cil a phih khit ciangin a khut tawh lawng a, “Na khat peuhpeuh na mu thei hiam?” ci-in a dong hi. A mipa zong khuadak a, “Mite ka mu thei hi; ahi zongin singkung a lam pai tawh kibang uh hi,” ci-in a dawng hi. Tua ciangin a khut tawh a mit lawnsak leuleu hi. Hih hun ciangin a mipa nakpitakin hak ahih manin khua mu theikik a, na khempeuh a kitel takin a mu thei hi. Tua ciangin Jesuh in, “Na khua-ah ciahsuakpah inla, hih khua sungah lutkik kei in,” ci-in a vaikhak hi. Tua ciangin Jesuh le a nungzuite, Sisaria Filippi gam sung khuaneute-ah a zin dingin a ding khia uh hi. Lam a pai laitakun a nungzuite kiangah, “Mite in kei kua hi, hong ci uh hiam?” ci-in a dong hi. Amaute in, “Pawlkhat in, Tuiphumpa Johan hi, hong ci uh hi. Pawlkhat in, Elijah hi, hong ci uh a, pawlkhat in, kamsang khat peuhpeuh hi ding hi, hong ci uh hi,” ci-in a dawng uh hi. “Tua ahihleh note in kei kua hi, nong ci uh hiam?” ci-in amaute a dot ciangin Peter in, “Nang pen Khrih na hi hi,” ci-in a dawng hi. Tua ciangin Jesuh in, “Kua mi ka hi cih thu kuama kiangah gen kei un,” ci-in a nungzuite thu a pia hi. Tua ciangin Jesuh in, “Mihing Tapa in tampi tak thuak ding hi; upate, siampi liante, le Thukham hilh siate in amah nial ding uh hi. Amah kithat ding a, ni thum khit ciangin hingkik ding hi,” ci-in a nungzuite hilh ding a kipan hi. Hih thu a kitel takin amaute kiangah a gen hi. Peter in Jesuh paikhiatpihin, “Hih bangin thu gen kei in,” ci-in a taii hi. Ahi zongin Jesuh kihei-in a nungzuite a etkawmin Peter lehtai a, “Satan aw, ka nungah om in. Nang in Pasian’ ngaihsut bangin thu ngaihsun loin, mihing’ ngaihsut bangin na ngaihsun hi,” a ci hi. Tua ciangin Jesuh in mihonpite le a nungzuite ama kiangah sam a, “Mi khatpeuh ka nungzui a suahnop leh ama deihna bangin gamta nawn loin a singlamteh kisuanin hong zui ding hi. Hih a leitung nuntakna a hu nuamte in a nuntakna bulpi nangawn tawh suplawh ding a, keima hang le lungdamna thu hangin a nuntakna a suplawhte in a nuntakna bulpi huzo ding hi. Mi khatpeuh in hih leitung khempeuh a ngah hangin a nuntakna bulpi suplawh leh bang phattuamna om ahi hiam? Ama nuntakna bang tawh leikik thei nawn ding ahi hiam? Pasian thei loin a gilo hih mite lakah keima hang le ka thuhilhte hangin maizumin kei hong pulak ngam lo mi peuhmah, a Pa’ minthanna vang le a siangtho vantung mite tawh a minthangin hong paikik ciangin Mihing Tapa zong ama hangin maizumin pulak ngam lo ding hi,” a ci hi. Tua ciangin Jesuh in a thugen zomlai a, “Hih lai-a a om mi pawlkhatte a sih ma-in vanglianpi tawh Pasian’ Ukna hong tung taktak ding ahihna thu phawk un,” a ci hi. Tua zawh ni guk khit ciangin Jesuh in Peter, James, le Johan-te samin amauteng guak mualtung khatah a paipihto hi. Amaute’ muhtangpi mahin Jesuh a mel hong kikheel a, leitung a puansawpte kuamah in a paaksak zawh loh dong ding zahin a puante pakin a tee hi. Tua lai-ah Elijah le Moses hong omin, Jesuh tawh a kiho a mu uh hi. Peter zong hong pau-in Jesuh kiangah, “Sia aw, hih lai-a i om, nuam mahmah hi. Nang a’ ding buk khat, Moses a’ ding buk khat, Elijah a’ ding buk khat kong lamsak ding uh hi,” a ci hi. Amah le a lawmte naklau mahmah uh ahih manin a cih ding mel a theih loh man ahi hi. Meii hong kai-in a liim in amaute hong liah a, tua meii sung panin aw khat hong gingin, “Hih pa, ka it ka Tapa ahi hi; ama thu na ngai un,” a hong ci hi. A kiim a pam a khuadak uhleh Jesuh simloh kuamah dang na om nawn lo hi. Mualtung panin a paisuk kawmun Jesuh in amaute kiangah, “Sihna panin Mihing Tapa a thawhkik matengin hih na muhte uh kuama kiangah gen kei un,” ci-in a kham hi. Ama cih mah bangin im uh a, ahi zongin, “Sihna panin thokik,” a cih bang a cihnopna hi ding ahi hiam, ci-in a lungsim sung uhah a ngaihsun uh hi. Tua ciangin Jesuh kiangah, “Bang hangin Thukham hilh siate in, Elijah hong pai masa ding, ci uh ahi hiam?” ci-in a dong uh hi. Jesuh in, “Na khempeuh a bawlkhol dingin Elijah hong pai masa takpi hi. Mihing Tapa in gimna tampi thuakin simmawhna ngah ding hi, ci-in Lai Siangtho in gen hi lo ahi hiam? Ahi zongin ke’n kong cihin-ah, Elijah hong paikhin takpi a, Lai Siangtho in ama thu a gensa mah bangin mi pawlkhatte in a ututun amah a bawl uh hi,” ci-in a dawng hi. Nungzui dangte’ omna-ah a tunkik uh ciangin tua lai-ah mi tampi tak na om uh hi. Thukham hilh sia pawlkhatte le nungzuite thu na kisel uh hi. Mihonte in Jesuh a muh phetun lamdangsa-in ama kiangah va tai-in a hopih uh hi. Jesuh in a nungzui dangte kiangah, “Amaute tawh bang thu kisel na hi uh hiam?” ci-in a dong hi. Mihon lak panin mi khat in hong dawng a, “Sia aw, ka tapa in dawi vei-in pau thei lo ahih manin nangma kiangah kong paipih hi. Dawi in amah a mat simin leilak denna a, a cilphuan bua-in a ha gawi-in kongkawcip hi. Na nungzuite in dawi hong hawlkhiatsak nading ka ngen a, ahi zongin hawlkhia thei lo uh hi,” a ci hi. Jesuh in amaute kiangah, “Upna nei lo mite aw, note bang tanvei hong ompih ding a, bang tanvei hong kikholhpih ding ka hi hiam? A naupang hong paipih un,” a ci hi. Amaute in zong Jesuh kiangah a naupang hong paipih uh hi. Dawi in Jesuh a muh phetin naupang kongkawsak ahih manin leilakah pukin kikhuk a, a cilphuan a bua hi. Jesuh in, “A nat zawh bang tanvei sawtta ahi hiam?” ci-in a pa kiangah a dong hi. “A neutung a kipan ahi hi. A sih nadingin meikhuk sung le tui sungah tamveipi puksakzo hi. Na hihtheih leh kote hong hehpih inla hong huh in,” ci-in a dawng hi. Jesuh in, “Bang hangin na hihtheih leh, ci na hi hiam? A umte a dingin na khempeuh hithei hi lo ahi hiam?” a ci hi. Thakhatin naupang’ pa kiko a, “Ka um hi; ka upna a kicin nadingin hong huh in,” a ci hi. Mihonte amau kiangah a hong kikhawm dingin a hong taina uh Jesuh in a muh ciangin, “A pau thei lo, a bilngong dawi aw, hih naupang sung pan paikhia inla, tumkik ngei nawn kei in,” ci-in a taii hi. A dawi nakpitakin kiko-in naupang a kongkawtsak khit ciangin a taikhia hi. Naupang pen misi tawh kibangin omcip ahih manin mi khempeuh in, “Si ta hi,” a ci uh hi. Ahi zongin Jesuh in naupang a khutin lenin a phottoh leh a ding hi. Innsungah Jesuh a tumkhit ciangin a nungzuite in, “Bang hangin kote in dawi hawlkhia thei lo ka hi uh hiam?” ci-in a dongsim uh hi. “Thungetna simloh a dang in hih bangte hawlkhia thei lo hi,” ci-in Jesuh in a dawng hi. Tua lai panin dingkhia-in Galilee gam sung nawkin pai uh a, ahi zongin mite’ theih ding Jesuh a ut kei hi. Bang hang hiam cih leh a nungzuite kiangah thu hilh a, “Mihing Tapa, mihingte’ khut sungah kipia-in amaute in that ding uh a, ahi zongin ni thum khit ciangin hingkik ding hi,” a ci hi. A nungzuite in hih ama thuhilhna thei lo uh a, ahi zongin amah dong ngam lo uh hi. Tua ciangin Kapernaum khua tung uh a, inn sungah a lutkhit uh ciangin a nungzuite kiangah, “Lampi-ah bang thu kisel na hi uh hiam?” ci-in a dong hi. Kua lianpen ihi hiam, ci-in lampi-ah amau khatlekhat kisel uh ahih manin kuamah in dawng ngam lo uh hi. Tua ciangin Jesuh tu a, a kiangah nungzui sawm le nihte samin, “Mi khat peuhpeuh a lianpen a suahnop leh a neupen suak photin mi khempeuh’ nasem hi masa ding hi,” a ci hi. Tua ciangin Jesuh in naupang khat la a, amaute laizangah paipihin a ang-ah tawi a, “Keima hangin hih bang naupangno khat a limbawl mi in kei hong limbawl hi a, kei hong limbawl mi in kei hong limbawl hi loin kei hong sawl pa a limbawl ahi hi,” a ci hi. Johan in, “Sia aw, nangma min zangin dawi a hawlkhia mi khat ka mu uh hi. Amah, ei’ pawl hi lo ahih manin ka kham uh hi,” a ci hi. “Amah kham kei un. Keima min zangin nalamdang a bawl mipa in keimah gensiat tawh thuahpah cih om thei lo ding hi. Eite hong langpang lo peuhmah i pawl ahi hi. Khrih pawl na hihna hangun tui hai khat hong suah mi peuhmah in thaman ngah hamtang ding ahihna phawk un,” ci-in Jesuh in a gen hi. Jesuh in, “Mi khatpeuh in kei hong um hih naupangno khat a khialsak ding ahihleh a ngawngah an gawina suang lianpi khat kikhihin tuipi sungah kikhia leh ama a dingin hoihzaw thampek hi. Tua ahih manin na khut in hong khialhsak leh sattan in. Mei a mih ngei lohna hell khuk sungah khut kim tawh na lut sangin khut langkhat bui-in nuntakna sungah lut lecin nang a dingin hoihzaw hi. (Tua lai-ah thante si ngei lo a, a mei zong mit ngei lo hi.) Na khe in hong khialhsak leh sattan in. Khe kim nei-in hell sungah hong kikhiat sangin khe langkhat bui-in nuntakna sungah lut lecin nang a dingin hoihzaw hi. (Tua lai-ah thante si ngei lo a, a mei zong mit ngei lo hi.) Na mit in hong khialhsak leh khelkhia in. Mit kim tawh hell khuk sungah hong kikhiat sangin mit langkhat taw-in Pasian’ Ukna sungah om lecin nang a dingin hoihzaw hi. Tua hell khuk sungah thante si ngei lo a, a mei zong mit ngei lo hi. Bang hang hiam cih leh biakpiakna sa pen ci a kisawh ciangin Pasian’ santheih a suah bangin ze-etna haksa thuakzawhna in Pasian’ santheih hong suaksak ding hi. Ci hoih hi; ahi zongin a alna mang leh bangci alsakkik thei ding na hi uh hiam? Note in ci al bangin hoihna nei unla, khatlekhat kilem un,” a ci hi. Tua lai panin Jesuh dingkhia-in Judea gam le Jordan Gun gal gam tengah a pai hi. Ama kiangah mihon tampi hong kikhawmkik uh a, a hilh ngeisa bangin amaute tungah thu a hilh hi. Farisi mi pawlkhat hong pai uh a, amah a mawhsak theih nading uh a deihna-in, “Mi khat in a zi a mathei ding mah ahi hiam?” ci-in a dong uh hi. Jesuh in, “Moses in bang thu hong pia ahi hiam?” ci-in a dot ciangin amaute in, “Moses in kimakna lai gelhsakin masak thei hi,” ci-in a dawng uh hi. Jesuh in amaute kiangah, “Note, hilhzawhin om lo na hih manun Moses in hih ngeina a bawl ahi hi. Ahi zongin piancil lai-in, ‘Pasian in numei le pasal a bawl hi. Tua ahih manin pasal in a nu le a pa nusia-in a zi tawh kigawm ding a, amau nihte pen pumkhat bang ahi ding uh hi,’ na kici hi. Tua ahih manin amaute nih hi nawn loin khat hita uh hi. Tua ahih manin Pasian’ gawmsa mite, kuamah in khen kei ta hen,” a ci hi. Innsungah a tumkhit uh ciangin nungzuite in hih thu tawh kisai Jesuh kiangah a dongkik uh hi. Amah in, “A zi ma-a numei dang tawh a teng mi peuhmah a zi a palhngulh ahi hi. A pasal ma-a pasal dang tawh a teng mi peuhmah in zong a pasal a palhngulh ahi hi,” a ci hi. Mi pawlkhat in a naupangte uh Jesuh in a lawnsak ding deih uh ahih manin hong paipih uh a, ahi zongin a nungzuite in na kham uh hi. Jesuh in tua thu a phawk ciangin a heh suak a, a nungzuite kiangah, “Naupangte kham kei unla, ka kiangah hong paisak un. Bang hang hiam cih leh Pasian’ Ukna sungah hih bang mite a om ahi hi. Hih naupangno khat’ man’ bangin Pasian’ Ukna a mang lo mi peuhmah Pasian’ Ukna sungah om lo ding ahihna thei un,” a ci hi. Tua ciangin naupangnote la-in a ang-ah tawi a, a tung uhah a khut nga-in thupha a pia hi. Jesuh in a khualzinna a zom dingin a paikhiat ding laitakin mi khat hong tai-in a mai-ah hong khukdin a, “A dik siapa aw, nuntak tawntungna ka ngah nadingin bang hih ding ka hi hiam?” a ci hi. Jesuh in, “Bang hangin kei midik hong ci na hi hiam? Pasian simloh kuamah a diktatzo om lo hi. Mi that kei in; numei tungah mawh kei in; mi’ neihsa gu kei in; mi khem kei in; na nu na pa zahtak in, cihna thukhamte thei lo na hi hiam?” a ci hi. Amah in, “Sia aw, ka neutung a kipanin hih thukhamte khempeuh ka zuikhin hi,” a ci hi. Tua ciangin Jesuh in itna tawh tua mipa enin, “Na khat bek na kisam lai hi. Pai inla, na neih khempeuh na zuak khit ciangin mizawngte tungah na sumkhotte va pia in. Tua hileh vantungah sum na hau ding hi. Tua khit ciangin ka nung hong zui in,” a ci hi. Tua mipa mihau khat ahih manin hih thu a zak ciangin, maikhingin a dahsa-in a paikhia hi. Jesuh in a kiima om a nungzuite enin amaute kiangah, “Pasian’ Ukna sungah mihaute a lut ding uh bangzah takin haksa ahi hiam?” a ci hi. Nungzuite in hih thu a zak uh ciangin lamdangsa uh a, ahi zongin Jesuh in a thugen zomlai-in, “Tate aw, Pasian’ Ukna sungah lut ding bangzah takin haksa ahi hiam? Pasian’ ukna sungah mihau khat a lut ding sangin phim bilvang sungah kalaoh khat a lut ding baihzaw lai hi,” a ci hi. Tua ciangin amaute in lamdangsa mahmah uh a, “Tua bang hileh kua in hotkhiatna ngahzo ding ahi hiam?” a ci uh hi. Jesuh in amaute enin, “Mihingte a dingin hi zo lo mah hi; ahi zongin Pasian a dingin ahi mawh thu hi lo hi; Pasian a dingin na khempeuh hithei hi,” a ci hi. Tua ciangin Peter in ama kiangah, “Ko zong na khempeuh nusia-in nang kong zui uh hi,” ci-in a gen ciangin Jesuh in amaute kiangah, “Hi mah hi; ke’n kong cihin-ah, keima hang le lungdamna thu hangin a inn, a sanggam pasalte, a sanggam numeite, a nu, a pa, a tate, le a leitang, khat peuhmah a nusiate in tukhang hunin a zah zakhat innte, sanggam pasalte, sanggam numeite, nute, tate, leitangte ngah ding uh a, bawlsiatna zong ngah ding uh hi. Hong tung ding hunah zong nuntak tawntungna ngahlai ding uh hi. Ahi zongin tuhun laitakin a lian ahi mi tampite tua hun ciangin a neu hi ding uh a, tuhun laitakin a neu ahi mi tampite a lian hi ding uh hi,” a ci hi. Jerusalem khua manawhin a paitoh laitakun a nungzuite mai-ah Jesuh na ma pai hi. A nungzuite patau uh a, amaute a zui mihonpite zong a lau uh hi. Jesuh in nungzui sawm le nihte tuamsap kik leuleu a, ama tunga piang ding thute genin, “Na ngai un. Tu-in Jerusalem khua-ah a paito ding ihi hi; tua lai mun panin siampi liante le Thukham hilh siate’ khut sungah Mihing Tapa kipia ding hi. Amaute in a sih nadingin thu a khen khit uh ciangin Gentail mite’ khut sungah a ap ding uh hi. Tua mite in amah simmawh bawlin, cilphihin, satin a that ding uh hi. Ni thum khit ciangin amah thokik ding hi,” a ci hi. Tua laitakin Zebedi’ tapa James le Johan in Jesuh hong naih uh a, “Kong nget peuhpeuh uh nong vaihawmsak ding ka deih uh hi,” a ci uh hi. Jesuh in, “Bang kong vaihawmsak ding deih na hi uh hiam?” ci-in a dot ciangin amaute in, “Minthangin kumpi tokhom tungah na tut ciangin na taklamah khat, na veilamah khat hong tusak lecin ka ut uh hi,” a ci uh hi. Ahi zongin Jesuh in, “Note in na hong nget uh na thei kei uh hi. Keimah in ka thuak ding gimna note in thuakzo ding a, ka kiphum nading gimna-ah kiphumzo ding na hi uh hiam?” ci-in a dot ciangin amaute in, “Ka hizo ding uh hi,” ci-in a dawng uh hi. Tua ciangin Jesuh in amaute kiangah, “Keimah in gimna ka thuak ding mah bangin na thuak takpi ding uh a, ka thuak ding kiphumna zong na thuak takpi ding uh hi. Ahi zongin ka taklama tut ding le ka veilama tut ding pen kei’ hong piaktheih hi lo a, a tu dingin Pasian in a vaihawmsaksate a’ ding ahi hi,” a ci hi. Hih a kihona uh thu, nungzui dang sawmte in a zak uh ciangin James le Johan tungah a heh suak uh hi. Ahi zongin Jesuh in amaute samin, “Leitung mi a ukte in mite tungah aana nei-in, mi a makaite in thuneihna tawh a ukna thu na thei uh hi. Ahi zongin note lakah tua bangin hi lo ding hi. Note lakah a lian nuam khat peuhpeuh, adangte khempeuh’ nasem hi ding a, a makai ahi nuam khat peuhpeuh, adangte khempeuh’ sila hi ding hi. Bang hang hiam cih leh Mihing Tapa zong, midangte ama na a semsak dingin a hong pai hi lo hi. Midangte’ na a sem ding le mi tampi a tatkhiat nading ama nuntakna a pia dingin a hong pai ahi zaw hi,” a ci hi. Tua ciangin Jerikho khua a tung uh hi. Tua khua panin a nungzuite le mihonpite tawh a paikhiat laitakun, Timias’ tapa a mittaw khutdawhin a ngen Bartimias, lampi gei-ah na tu hi. Nazareth khuami Jesuh ahihna thu a theih ciangin nakpitakin awng a, “David’ suan Jesuh aw, kei hong hehpih in,” a ci hi. A kiima om mihonte in amah taii-in, a pau loh nadingin a kham uh hi. Ahi zongin amah nakpitakin awngzaw semsem a, “David’ suan aw, kei hong hehpih in,” a ci hi. Tua ciangin Jesuh khawlin a nungzuite kiangah, “Va sam un,” a ci hi. Amaute in mittaw pa samin ama kiangah, “Na lung nuamsak in; ding in; amah in nang a hong sam hi,” a ci uh hi. Amah in zong a puan lawnkhia a, dingto pahin Jesuh kiangah a pai hi. Jesuh in, “Bang kong hihsak ding deih na hi hiam?” ci-in a dot ciangin mittaw pa in, “Sia aw, khua ka mukik thei nuam hi,” a ci hi. Tua ciangin Jesuh in, “Na ciah thei ta ding hi; na upna in nang hong damsakzo hi,” a cihkhit phetin amah in khua mukik theipah a, tua a paina lampi-ah Jesuh’ nung a zui hi. Jerusalem khuanai, Bethfage le Bethany khuaneute a omna Oliv Mual a tun uh ciangin Jesuh in a nungzuite nih ma sawl a, “Mai-a om khua-ah va pai un. Khua na tun phetun, kuamah a tuan ngei nai lohna lano khat khau a kikhih na mu ding uh hi. Hong sut unla hong kai un. Mi khatpeuh in, ‘Bang hangin tua la khau sut na hi uh hiam?’ hong cih leh, ‘Topa in deih hi; hih lai mahah kong kaikikpah ding uh hi,’ ci-in gen un,” a ci hi. Amau tegel zong paipah uh a, kongzing a kong gei khatah lano a kikhih khat mu uh ahih manin a khau a sutpah uh hi. Tua kiima om mite in, “Bang hangin tua lano khau sut na hi uh hiam?” ci-in a dot uh ciangin, Jesuh’ vaikhak thuteng gen uh a, bangmah cih nawn lo uh hi. Jesuh kiangah a lano tunpih uh a, a lano tungah a puan uh phahin a tungah Jesuh a tuang hi. Mi tampite in ama pai nading lampi-ah a puan uh na phah uh a, mi pawlkhat in lolai panin a sat uh sawlpangte na phah uh hi. Jesuh’ mai-a a pai mite le a nunga a zui mite in, “Pasian phat un! Topa’ tangin a hong pai mipa, Pasian in thupha pia ta hen! A hong tung ding i pu David’ ukna, Pasian in thupha pia ta hen! Pasian phat un!” ci-in a awng uh hi. Tua bangin Jerusalem khua sungah Jesuh lut a, biakinn sungah pai-in na khempeuh a en kawikawi hi. Tua ciangin ni niam khinta ahih manin sawm le nihte tawh Bethany khua-ah a pai hi. A zing ciangin Bethany khua pan paikhia uh a, Jesuh a gil a kial hi. A teh a no theikung khat galmuh ahih manin a gahkhak leh ci-in a lo dingin a va pai hi. Thei min hun hi lo ahih manin, a phung a tun ciangin a teh simloh bangmah na om lo hi. Tua ciangin theikung kiangah, “Nang tung panin kuamah in theigah loin ne nawn kei ta hen,” a ci hi. Hih thu, a nungzuite in a za uh hi. Jerusalem khua a tun uh ciangin, biakinn huang sungah Jesuh lutin tua sungah sumzuak sumlei-a a omte hawlkhiat ding kipan a, sumkhekte’ sabuaite lumlet sakin, vakhu zuakte’ tutphahte sawnpaih sak hi. Biakinn huang sungah kuamah bangmah paipihsak lo hi. Tua ciangin mite kiangah thu hilh a, “Ka inn pen mi khempeuh a dingin thungetna inn kici ding hi,” ci-in Pasian in a genna thu Lai Siangtho sungah kigelh hi lo ahi hiam? Ahi zongin note in guta buluhte’ bukna mun na suaksak uh hi, ci-in thu a hilh hi. Siampi liante le Thukham hilh siate in hih thu a zak uh ciangin Jesuh a thahtheih nading uh lampi a zong uh hi. Ahi zongin mihonpi in ama thuhilhna lamdangsa uh ahih manin amaute in Jesuh a kihta uh hi. A nitak ciangin khuapi panin Jesuh le a nungzuite a paikhia uh hi. A zingsang ciangin tua lampi mah zui-in a paikik ciangun tua theikung a zung dongin a sihna a mu uh hi. Peter in a thu phawk ahih manin, “Sia aw, na theikung samsiat a sita hi,” a ci hi. Jesuh in amaute kiangah, “Upna nei un. Upna na neih nak-uhleh hih mual kiangah, ‘Na omna panin paikhia-in tuipi sung kidenna in,’ ci le-uhcin, na lungsim sung uhah uplahna om loin na gen bangun piang taktak ding hi, ci-in na up nak-uhleh, na cih bangun hong piang ding hi. Tua ahih manin note kiangah kong genin-ah: Na khat peuhpeuh na nget uh ciangin ngah ding ci-in um un; tua hileh na nget peuhpeuh uh na ngah ding uh hi. Thungen dingin na din uh ciangin midang tungah na hehna uh a om khat peuhpeuh maisak un; tua hileh vantungah a om na Pa un note’ mawhna hong maisak ding hi. (Midangte’ mawhna na maisak kei uhleh vantungah a om na Pa un note’ mawhna zong hong maisak lo ding hi,” ci-in a dawng hi.) Tua ciangin Jerusalem tungkik leuleu uh hi. Biakinn kiimah Jesuh a vak kawikawi laitakin siampi liante, Thukham hilh siate, le upate hong pai uh a, “Hih nate, kua’ thu tawh bawl a, na bawl nadingin kua in aana hong pia ahi hiam?” ci-in a dot uh ciangin Jesuh in, “Keimah in note tungah thu khat kong dong masa ding hi; nong dawn uhleh kei zong kua thu tawh ka bawl, cih kong gen ding hi. Johan in tui a phumtheih nading thu Pasian kiang panin a ngah ahi hiam, ahih kei leh mihingte tung panin a ngah ahi hiam, hong gen un,” a ci hi. Tua ciangin amaute khatlekhat kikum uh a, “Pasian kiang pan hi,” ci lehang, “Tua ahihleh bang hangin Johan’ thu um lo na hi uh hiam?” hong ci ding a, “Mihingte’ tung pan hi,” cih ding lah, mi khempeuh in Johan pen kamsang taktakin ngaihsun uh ahih manin mite i kihta zel hi, a ci uh hi. Tua ahih ciangin, “Ka thei kei uh hi,” ci-in a dawng uh hi. Jesuh in zong, “Hih nate kua thu tawh ka bawl cih thu kei zong kong gen kei ding hi,” a ci hi. Tua ciangin Jesuh in amaute kiangah thugentehna zangin thu hilh a, “Mi khat in lo zuanin leenggui suan a, a kimkot umin leenggah cil nading bawl a, a hon nading tausang khat a lam khit ciangin, lo khawhlawhte khawhlawhsak a, amah gam dangah a pai hi. Leenggah lawh hun a tun ciangin ama ngah ding tangteng a la dingin lo khawhlawhte kiangah a nasemte khat a paisak hi. Lo khawhlawhte in tua a nasempa manin satgawp uh a, a guak ciahsakkik uh hi. Tua ciangin lo nei pa in a nasem dang khat a sawl hi. Amaute in tua pa a lutang na liamsakgawp uh a, a na simmawh bawl uh hi. Tua ciangin adang khat sawl leuleu a, a na that uh hi. Tua bangin adang tampi sawl a, pawlkhat na satgawp uh a, pawlkhat na that uh hi. Tua ciangin a sawltheih ding a it mahmah a tapa khat bek omlai ahih manin, ‘Amaute in ka tapa na zahtakbawl ding uh hi,’ ci-in a nunung penin a sawl hi. Ahi zongin lo khawhlawhte in, ‘Hih pa pen a gamhluah ding pa ahi hi. Pai un; amah va that huan ni; tua hileh hih ama luah ding gamh eima a’ suak ding hi,’ a kici uh hi. Tua ahih manin amah manin that uh a, lo nawlah a pai uh hi. “Tua ahihleh lonei pa in bangci bawl ding ahi hiam? Amah hong pai-in lo khawhlawhte that ding a, a lo, midangte a khawhlawhsak ding hi. ‘Innlamte in a nilkhiat suang pen innkiu suang bulpi suak khinta hi. Hih thu Topa’ bawl hi a, i muh ciangin lamdang i sa hi,’ ci-in Lai Siangtho sungah a kigelh sim ngei lo na hi uh hiam?” a ci hi. Hih thugentehna pen amaute a cihnopna a a gen ahihlam Jew makaite in thei uh ahih manin Jesuh a kimat theih nading a hanciam uh hi. Ahi zongin mihonpite kihta uh ahih manin Jesuh bangmah cih loin a paisan uh hi. Tua ciangin Jesuh ama kampauna tawh a kimat theih nadingin Farisi mi pawlkhat le Herod mi pawlkhat Jesuh kiangah thudong dingin hong kisawl hi. Amaute in, “Sia aw, nangmah in thutang genin, midangte’ pau ding phamawh na sak lohna, uliante’ maitang zahtak tuan loin, Pasian in mite a gamtat dingin a deihna thute tangtakin na hilhna ka thei uh hi. Tua ahih manin Rom Kumpipa Sisar tungah siah i piak ding kilawm ahi hiam, kilawm lo ahi hiam? Pia ding ihi hiam, pia lo ding ihi hiam?” ci-in a dong uh hi. Ahi zongin Jesuh in amau lungsimtawng thei ahih manin, “Bang hangin kei hong thangsiah se na hi uh hiam? Ka et dingin dangka peek khat hong la dih un,” a ci hi. Amaute in zong dangka peek khat hong paipih uh a, tua ciangin Jesuh in, “Hih dangka tunga om kua’ lim hi a, kua’ min ahi hiam?” ci-in a dot ciangin, “Rom Kumpipa Sisar’ lim le a min ahi hi,” ci-in a dawng uh hi. Tua ciangin Jesuh in, “Tua ahihleh, Sisar’ neihsate Sisar’ tungah pia unla, Pasian’ neihsate Pasian’ tungah pia un,” a ci hi. Tua ama thudawnna hangin lamdang a sa mahmah uh hi. Tua ciangin, thawhkikna om lo hi, a ci Saddusi mi pawlkhat hong pai leuleu uh a, “Sia aw, ‘Mi khat in ta nei loin a zi a sihsan leh tua a si mipa’ khang a kizop theih nadingin a naupa in tua meigongnu tenpih ding hi,’ ci-in Moses in eite a dingin ngeina a koih hi. Khatvei, unau pasal sagih om uh hi. A u pen in zi nei a, ta nei loin a si hi. A nau in a upa’ zi luah hi; amah zong ta nei loin si leuleu hi. A thumna pa, le adangte khempeuh, a sagihna dong in tua nu tenpih uh a, ta nei lo vive mahin a si uh hi. A tawpna ciangin tua numei zong a si hi. Tua ahihleh, hih unau pasal sagihte in hihnu tenpih kim ciat uh ahih manin, mi khempeuh a thawhkik ni ciangin a kua pen’ zi hi ding ahi hiam?” ci-in a dong uh hi. Jesuh in, “Na khial mahmah uh hi. Lai Siangtho ahi a, Pasian’ vangliatna ahi zongin na theih lohna hang uh ahi hi. Sihna panin mite a thawhkik ciangin vantungah a om vantung mite mah bangin zinei pasalnei cih om lo ding uh hi. Thawhkikna thu tawh kisai-in ci lehang, Moses’ laigelhna sung sawlpang kuang thu a genna munah Pasian in Moses kiangah, ‘Kei pen Abraham’ Pasian, Isaac’ Pasian, Jakob’ Pasian ka hi hi,’ a cihna mun sim ngei lo na hi uh hiam? Tua bang a cih ciangin Pasian pen misite’ Pasian hi loin mihingte’ Pasian hi, a ci nuam ahi hi. Tua ahih manin na ngaihsun khial mahmah uh hi,” ci-in a dawng hi. Tua thukidotna a za Thukham hilh siate khat in, Saddusi mite’ dotnate limtakin Jesuh in a dawntheihna a muh ciangin Jesuh hong neh a, “Thukham khempeuh lakah bang thukham a lianpen ahi hiam?” ci-in a dong hi. Jesuh in, “Thukham a lianpen in: Israel mite aw, ngai un: I Topa Pasian bek mah Topa ahi hi. Na Topa Pasian uh, na lungsim khempeuh, na nuntakna khempeuh, na pilna khempeuh, le na thahatna khempeuh uh tawh na it un, a cihna ahi hi. A nihna in: Nangma pumpi na it bangin na vengte na it in, cihna ahi hi. Hih tegel sangin thukham a lianzaw a dang om nawn lo hi,” ci-in a dawng hi. Tua ciangin Thukham hilh siapa in, “Sia aw, na gen mah bangin hi ka sa mahmah hi. Topa bek mah Pasian hi a, amah simloh pasian dang kuamah om lo hi. Mite in a lungsim khempeuh, a pilna khempeuh, le a hatna khempeuh uh tawh Pasian itin, amau pumpi a it bangin a vengte a it ding uh ahi hi. Pasian biak nadingin biakna tau tunga gan gawhnate le biakna dang khempeuh sangin hih thukham nihte zuih ding thupizaw takpi hi,” a ci hi. Jesuh in hih mipa’ thugenzia hoihsa ahih manin, “Pasian’ Ukna sungah a om dektak mahmah na hi hi,” a ci hi. Tua khit a kipanin Jesuh kiangah kuamah in thu dong ngam nawn lo uh hi. Jesuh in biakinn sungah thu a hilh laitakin, “Bang hangin Thukham hilh siate in Khrih pen David’ suan hi lel hi, ci thei uh ahi hiam? Kha Siangtho’ sawlna tawh David mahmah in thu gen a, ‘Topa in keima Topa tungah thu gen hi: Na galte, na khe nuai-ah ka koih matengin, ka taklamah na tu in,’ ci hi. David mahmah in Khrih pen ‘Topa,’ ci hi. Tua ahihleh Khrih pen David’ suan hi lel, cih mawkmawk ding hithei ding ahi hiam?” a ci hi. Mihonte in hih thu a zak uh ciangin a lungdam mahmah uh hi. Jesuh in a thuhilhna-ah, “Thukham hilh sia pawlkhatte na bat khak loh nadingun na kidawm un. Amaute in puantualpi silhnuam uh a, mite lakah mite in a zahtak hopih ding a deih uh hi. Kikhopna inn sungah, uliante a dingin a kikoihcing tutphah nuamte tungah tunuam uh a, pawi sungah zong uliante’ tutna mun hoihte bekah a tunuam uh hi. Meigong numeite tungah nuamtaksa-in a neihsate laksakin zangmang uh a, mite in mihoih a saktheih nading uh a deihna hangun thu saupipi a ngen uh hi. Amau’ kineihkhemna tawh kizui-in a gimthuak ding uh lianzaw ding hi,” a ci hi. Biakinn sumpi khiatna kuang gei-ah Jesuh tu a, mihonte in sumpi a khiat laitakun a en hi. A haute in tampipi hong khia uh hi. A zawng meigong numei khat zong hong pai a, sumnen tang nih hong khia hi. Tua ciangin a nungzuite sam a, “Adangte khempeuh sangin hih mizawng meigongnu in tam khia zaw hi. Bang hang hiam cih leh adangte in a neihval a lamval sung panun a khia uh ahi hi; ahi zongin amah zawng mahmah napi-in ama kivak nading nangawn siit loin a neih khempeuh a khiakhin ahi hi,” a ci hi. Biakinn panin Jesuh a pusuah laitakin a nungzuite khat in, “Sia aw, hih biakinnte bangzah takin lian a, a suangte bangzah takin gol ahi hiam?” a ci hi. Jesuh in, “Hih innte liansa-in thupi na sa mahmah hi. Ahi zongin hih innte lamna-a a kiciang suangte nih bek nangawn a kithuapna a om lo zah dongin a kiphelkek gawp hun hong tung ding hi,” ci-in a dawng hi. Biakinn galkhatah a om Oliv Mual tungah Jesuh tu-in a om laitakin Peter, James, Johan, le Andru hong pai-in amauteng guak a om laitakin, “Hih na thugen cik ciangin hong tung ding a, hih na thugente khempeuh hong tun ding ciangin bang lim hong om ding ahi hiam?” ci-in a dong uh hi. Jesuh in amaute kiangah, “Kuamah in hong khem zawh loh nadingin na kidawm un. Keima min pua-in mi tampi hong pai ding uh a, ‘Keimah, Khrih ka hi hi,’ ci-in mi tampi a khemzo ding uh hi. A gamla a galkidona thute le a nai-a galkidona huging na zak uh ciangin patau kei un. Tuate a piang ding mah hi a, hun beina ding hi nai lo hi. Minam khat le minam khat, kumpi khat le kumpi khat kido ding uh hi. Mun tuamtuamah zin hong ling ding a, kial zong hong tung ding hi. Hihte khempeuh pen gimna kipatna hi pan hi. “Limtakin kidawm un. Note hong kimanin thukhen zumah hong kipaipih ding a, kikhopna inn sungah zong hong kisat ding hi. Ukpite le kumpite mai-ah keima thu gen nading hun na ngah ding uh hi. Ahi zongin hun beina a tun ma-in mi khempeuh tungah Lungdamna Thu kihilh masa phot ding hi. Note hong kimanin, thusitna a thuak dingin thukhen zumah hong kipaipih ciangin bang gen ding ihi hiam, ci-in ma lunghihmawh kei un. A thugen ding pen note hi loin Kha Siangtho ahih manin a hun tak ciangin na gen dingun a hong kisawl peuhpeuh na gen un. Unau khatlekhat a sih nadingun kikhia ding uh a, pa in a ta khia-in, ta in a nu le a pate khia-in a thatsak ding uh hi. Keima hangin Gentail mi khempeuh in note hong mudah ding uh a, ahi zongin a sih dongun a thuakzote in hotkhiatna a ngah ding uh hi. “Ama om loh nading pi-ah a lipkhaphuai zehphitna a hong om na muh uh ciangin (hih lai a simte in Jesuh’ cihnopna thei ta un!) Judea gam a om mite mualtungah tai un. A innkhum zangah a om laitak ahi khate zong, a kumsuk ciangin a neihsate a taipih dingin a la dingin a inn sungah lut nawn kei hen. Lolai-ah a om laitak ahi khate zong, a puan la dingin a inn uh zuan nawn kei hen. Tua laitakin nupi naupaiite le naungek neite a dingin haksa mahmah ding hi. Phalbi laitakin hih thu hong piankhak loh nadingin thu na ngen un. Bang hang hiam cih leh Pasian in leitung a piansak cil a kipanin tuhun dong, cikmahin tua bang haksatna a om ngei lo, nidang ciangin zong a om ngei nawn lo ding, tua hun laitakin hong tung ding hi. Topa in tua gimna hun a ni khiam lo hileh a suaktazo kuamah om lo ding hi. Ahi zongin ama teel mite a khualna-in a ni a khiam hi. “Tua laitakin mi khatpeuh in, ‘Hih lai-ah Khrih om hi; hua lai-ah Khrih om hi,’ ci-in hong gen leh, um kei un. Bang hang hiam cih leh Khrih kineihkhemte le kamsang kineihkhemte hong piang ding a, ahih zawhleh, a teelsa mite nangawn a khem nadingun lim le na lamdangte hong bawl ding uh hi. Tua ahih manin kidawm un! A hun ma-in kong genkhin hi. “Tua haksatna hun khit ciangin ni hong mial ding a, kha hong taang nawn lo ding hi. Van panin aksite hong kia ding a, vantung a om nate a omngei bangin omthei nawn lo ding hi. Tua ciangin Mihing Tapa, vangliatna le minthanna tawh meii lakah a hong paisuk kimu ding hi. Tua ciangin leitung mun khempeuhah vantung mite sawl ding a, leimong khat pan mong khat kikalah a om a teel mite khempeuh a kaikhawmsak ding hi. Thei kung tung pana thupiang panin thu thei un. A hiangte hong meeng a, a teh hong no ciangin khuakhal hun hong naita ding hi, ci-in na thei un. Tua mah bangin hih thute hong tun ciangin amah hong naita a, hong tung dektak hi, ci-in na thei un. Hih thu limtakin phawk un. Tu laitakin a nungta mi khempeuh a sihkhit ma-in hih thute hong tung ding hi. Van le lei mangthang ding a, ahi zongin ka thugente mangthang ngei lo ding hi. “Ahi zongin tua ni le tua nai hun ding kuamah in thei lo hi. Vantunga om vantung mite ahi a, Tapa ahi keimah in ahi zongin ka thei kei a, ka Pa bek in a thei hi. Tua hun ding thei lo na hih manun kikemin pilvang un. Mi khat khualzin dingin paikhia a, a dinkhiat ding ciangin amau’ sep ding ciat a nasemte tungah tavuan pia a, kongcing pa in limtakin a cin ding a sawl mipa tawh kibang hi. Inn nei pa, nitak ahi a, zankim ahi a, zingsang ak khuankuan ahi a, zingsang khuavak khit ahi zongin a bang hunin hong tung ding cih thei lo na hih manun ngakin na pilvang un. Tua hikeileh amah thakhatin hong tungin na ihmut laitakun hong tuakkha ding hi. Note tungah kong gen mah bangin mi khempeuh tungah zong, ‘Ngakin na pilvang un,’ ka ci hi,” a ci hi. Paisan Pawi le Silngo Sawh loh Anlum Pawi a tun ma ni nih ni-in siampi liante le Thukham hilh siate in Jesuh simmatin a thahtheih nading uh lampi a zong uh hi. Ahi zongin, “Mihonpite hong buai kha ding ahih manin hih pawi hun sungin hih kei ni,” a ci uh hi. Bethany khua-ah, miphak ahi ngei Simon’ inn-ah Jesuh in an a nek laitakin, numei khat in a manpha mahmah nard paknamtui citak suangngo thawl dimin a om khat hong tawi a, a suangngo thawl sukhamin Jesuh’ lu tungah a paknamtui a sungsuk hi. Tua lai-a om mi pawlkhat a heh suak a, “Bang hangin hih paknamtui mawk beisak ahi hiam? Kizuak le ngun peek zathum val kikhawng ding a, a sum mizawngte tungah kipia thei ding hi,” ci-in nakpitakin tua numei a mawhsak uh hi. Ahi zongin Jesuh in, “Bangmah cih se kei un! Bang hangin nawngkaisak na hi uh hiam? Amah pen a kilawm a hoihin kei tungah hong gamta hi. Mizawngte ahihleh note tawh omkhawm tawntung ding a, na huhnop hun peuhpeuhun na huh thei ding uh hi. Ahi zongin kei pen note tawh kong omkhawm tawntung kei ding hi. Amah in ka luang a kivui nadingin paknamtui a hong ma nuhkhol hi a, a hihtheih zahzah ciang a hih khinta ahi hi. Hih thu limtakin phawk un! Lungdamna thu a kihilhna leitung mun khempeuhah hihnu’ thu kiphawkin kei tungah hong sepnate kigengen ding hi,” a ci hi. Tua laitakin sawm le nihte sungpan Iskariot’ tapa Judas in amaute tungah Jesuh a piaktheih nadingin siampi liante kiangah a va pai hi. Siampi liante in a thu a zak uh ciangin lungdam mahmah uh a, sum tawh kong guai ding uh hi, ci-in thu a ciam uh hi. Tua ahih manin Judas in Jesuh a lehhek theih nading a hunhoih a zong hi. Paisan Pawi an dingin tuuno a kigawh ni, Silngo Sawh loh Anlum Pawi ni masa ni-in a nungzuite in Jesuh kiangah, “Koi lai-ah pai-in Paisan Pawi an ding hong bawlsak ding ka hi uh hiam?” ci-in a dong uh hi. Tua ciangin Jesuh in a nungzuite nih sawlin amaute kiangah, “Jerusalem khua sungah va pai le-uhcin, tuibeel a pua mi khat na mu ding uh hi. Amah zui unla, ama tumna innteek pa kiangah, ‘Siapa in hih bangin ci hi: Ka nungzuite tawh Paisan Pawi an ka nek nading uh zintun nading inndei koilai ahi hiam, ci hi,’ va ci un. Amah in a baihsa-in a na kikoihsa inndei tungnung a zai khat hong lak ding hi. Tua lai-ah na bawl un,” a ci hi. Nungzui tegel zong khua sungah va pai uh a, Jesuh’ gen bangin a va mu uh hi. Tua lai-ah Paisan Pawi an ding a bawl uh hi. A nitak ciangin a nungzui sawm le nihte tawh tua munah Jesuh a om hi. An a nek laitakun Jesuh in, “Tu laitakin kei tawh an a nekhawm mi khat in kei hong lehhek ding hi,” a ci hi. A nungzuite in lamdangsa uh a, a banbanin, “Kei nong cihna hi kei buangin teh,” a ci ciat uh hi. Jesuh in amaute kiangah, “No sawm le nihte sung, kei tawh an kuang a sawkkhawmte mah sungpan ahi hi. A kigelhsa mah bangin Mihing Tapa ahihleh si ding a, ahi zongin a lehhek pa’ thuakna nasia mahmah ding hi. Tua mipa a piang ngei het lo hileh ama a dingin hoihzaw tham ding hi,” a ci hi. Tua bangin an a nek laitakun Jesuh in anlum la-in lungdamna a kohkhit ciangin balnenin a nungzuite tungah pia a, “Ne un; hih pen keima pumpi ahi hi,” a ci hi. Tua ciangin hai la a, lungdamna a kohkhit ciangin a nungzuite tungah pia a, tua hai panin a dawnkim uh hi. Tua ciangin amaute kiangah, “Hih pen mi tampite a dingin a luang, thuciamna thak a kipsak keima sisan ahi hi. Pasian’ Ukna sungah leenggahzu thak ka dawnkik ni matengin leenggahzu a dawn nawn lo ding ka hihna thu limtakin thei un,” a ci hi. Amaute inla khat a sakkhit uh ciangin Oliv Mual-ah a pai uh hi. Tua ciangin Jesuh in amaute kiangah, “‘Tuucingpa ka satlum ding a, tuute a kithehthang ding hi,’ ci-in Lai Siangtho sungah a kigelh mah bangin note in kei nong taisan ding uh hi. Ahi zongin hong kithawh kiksak khit ciangin Galilee gam note mai-ah ka pai ding hi,” a ci hi. Tua ciangin Peter in, “Adang khempeuh in nang hong taisan ahi zongin ke’n kong nusia ngei kei ding hi,” a ci hi. Jesuh in, “Tuzan mahmahin ak nihvei a khuan’ ma-in thumvei tak kei na hong nial ding lamtak phawk in,” a ci hi. Ahi zongin Peter in, “Nang tawh sihkhawm nading ciang dong ahi zongin kong nial ngei het kei ding hi,” ci-in khauhtakin a gen hi. Tua mah bangin a vekpi-un a ci kim uh hi. Tua lai panin Gethsemane a kici munah pai-in a tun uh ciangin Jesuh in a nungzuite kiangah, “Thu ka va nget hun sungteng hih lai-ah na om un,” a ci hi. Tua ciangin Peter, James, le Johan-te paipih lai a, nakpitakin lungkhamin a dahna hong kipan hi. Amah in, “Ka lungsim dahna lianlua mahmah ahih manin ka si dektak hi. Hih lai-ah om unla na ngak un,” a ci hi. Amah tawmkhat pailai-in leilakah boksuk a, ahi thei ding ahihleh hih thuakna hun tawh a kipelh nadingin thu a ngen hi. “Pa aw, na khempeuh na hihthei hi. Hih ka thuak ding gimna tawh hong kipelhsak in. Ahi zongin kei’ deihna bang hi loin nangma deihna bang hizaw hen,” a ci hi. Tua ciangin hong pai a, a nungzui thumte ihmu-in om a muh ciangin Peter kiangah, “Simon aw, ihmu na hi uh hiam? Nai khat sung nangawn hong ngak zo lo liang na hi uh hiam?” a ci hi. Tua ciangin amaute kiangah, “Ze-etna-ah na pukkhak loh nadingun pilvangin thu ngen un. Lungsim in ze-etna nangnuam napi, pumpi in nang zo lo hi,” a ci hi. Tua ciangin paikhia leuleu-in thu a nget ngeiteng mah va ngen leuleu hi. Hong paikik ciangin a nungzuite na ihmu leuleu uh hi. A ihmut uh suak mahmah hi. Jesuh kiangah a gen ding uh bangmah thei lo uh hi. A thumveina a hong ciahkik ciangin amaute kiangah, “Ihmu-in na tawlnga hithiat lailai na hi uh hiam? Phazo hi. A hun hong tungta hi. Mihing Tapa mawhnei mite’ khut sungah hong kipia khinta hi. Tho un; pai ta ni. Kei hong lehhek pa hih lai-ah hong tungta hi,” a ci hi. Tua bangin Jesuh in thu a gen laitakin sawm le nihte sung panin Judas hong tung a, siampi liante, Thukham hilh siate, le upate in a sawl mihonte in namsau le molhtum tawi-in hong zui uh hi. A lehhek pa in mihonte tungah, “Ka nap pa pen Jesuh hi ding hi. Tua pa man unla limtakin cingin paikhiatpih un,” ci-in a genkhol hi. Tua ahih manin hong tun phetin Jesuh kiangah paipah a, “Sia aw,” ci-in limnap mahmah hi. Tua ahih ciangin amaute in Jesuh manin limtakin a lencip uh hi. Tua laitakin a gei-a dingte khat in a namsau dokin siampi lianpen pa’ nasempa a sat leh a bil a satkhiatsak hi. Tua ciangin Jesuh in amaute kiangah, “Guta buluhte a man ding bang keekin, kei a man dingin namsau le molhtum tawh hong kuan na hi uh hiam? Nisim nisimin biakinn sungah thuhilhin note tawh ka omkhawm a, ahi zongin nong man kei uh hi. Ahi zongin hih thu pen Lai Siangtho sunga a kigelh thu a tun nading ahi hi,” a ci hi. Tua ciangin a nungzuite khempeuh in Jesuh a taisan uh hi. Puanza kang khat bek a silh tangval khat in zong Jesuh a zui hi. Amaute pawlkhat in amah a mat ciangin, a puanza kang nusia-in a guaktangin a tai hi. Mihonte in siampi lianpen pa’ inn-ah Jesuh paipih uh a, siampi liante, upate, le Thukham hilh siate hong kikhawm uh hi. Peter in zong Jesuh’ nung galzuih a, siampi lianpen pa’ inntual ciangah a om hi. Tua lai-ah palikte tawh mei awi-in a tukhawm hi. Siampi liante a kipan uliante khempeuh in Jesuh a thahtheih nadingin thu zong uh a, ahi zongin bangmah mu lo uh hi. Mi tampi in amah a mawhsak nadingun zuauthu gen uh a, ahi zongin a genna uh khatlekhat kituak lo hi. Tua ciangin mi pawlkhat hong dingin amah a mawhsak nadingun zuauthu hong gen uh a, “Mihingte’ lam hih biakinn ka susia ding a, ni thum khit ciangin mihingte’ lam ahi lo adang khat ka lam ding hi,” a cihna ka za uh hi, ci-in hong gen uh hi. Amaute nangawn zong a thugenzia uh kituak lo hi. Tua ciangin amaute khempeuh mai-ah siampi lianpen pa hong dingin Jesuh thu dong a, “Nangmah mawhsakna-in a gen uh thute na dawn nading om lo ahi hiam?” ci-in a dong hi. Ahi zongin Jesuh pau loin a omcip hi. Tua ciangin siampi lianpen pa in, “Phatna a ngah Pasian’ Tapa, Khrih na hi hiam?” ci-in a dongkik leuleu hi. Jesuh in, “Ka hi hi; Vanglian Pasian’ taklamah Mihing Tapa omin meii lakah a hong pai na mu ding uh hi,” a ci hi. Tua ciangin siampi lianpen pa in a puan balkek a, “Thudang kisam nawn lo hi. Pasian’ tungah a paukhialhna na zazo uh hi. Bangci ngaihsut na hi uh hiam?” a ci hi. Hih mipa thah dingin kilawm hi, ci-in amaute khempeuh in thu a khen uh hi. Tua ciangin mi pawlkhat in cilphih uh a, a mai tunsakin beeng uh a, “Kua in hong beng ahi hiam, gen in,” a ci uh hi. Palikte in zong amah paipihin a beeng uh hi. A nuai-a inntualah Peter a om laitakin siampi lianpen pa’ nasem numeite khat hong pai a, Peter mei awi-in om a muh ciangin limtakin en a, “Nang zong, Nazareth khuami Jesuh tawh na kikhawl ngei hi,” a ci hi. Ahi zongin Peter in nial a, “Ka thei kei hi; bang na cihna ahi hiam, cih zong ka tel kei hi,” ci-in dawngin tual pualam paina lampi lamah a pai hi. Tua laitakin ak a khuang hi. Tua numei mah in a omna-ah Peter mu a, a gei-a omte kiangah, “Hih pa, hua mite khat hi takpi hi,” a cikik leuleu hi. Ahi zongin Peter in nial leuleu hi. Tawlkhat khit ciangin a gei-a omte in Peter kiangah, “Nang zong Galilee gammi na hih manin huate khat na hi takpi hi,” a ci leuleu uh hi. Tua ciangin Peter in, “Na gen mipa uh ka theih taak leh Pasian in kei hong dawm kei ta hen,” ci-in a kiciam hi. Tua khit phetin ak nihveina a khuang hi. Tua ciangin, “Ak nihvei a khuan’ ma-in kei thumvei na hong nial ding hi,” ci-in Jesuh in ama tungah a gensa thu Peter in phawkkik a, dahlua-in a kap hi. A zingsang ciangin siampi liante in upate, Thukham hilh siate, le ulian dang khempeuh tawh thu kikupna khat nei uh a, Jesuh a henkhit uh ciangin paikhiatpihin Pilat tungah a ap uh hi. Pilat in, “Nang, Jew mite’ Kumpipa na hi hiam?” ci-in a dot ciangin Jesuh in, “Nang zong tua mah nong ci hi,” ci-in a dawng hi. Siampi liante in Jesuh a mawhsakna tampi gen uh ahih manin Pilat in Jesuh kiangah, “Na dawn nading om lo ahi hiam? Nang hong mawhsakna thute na zazo hi,” a ci hi. Ahi zongin Jesuh in amah a kimawhsaknate kamkhat beek dawng het lo ahih manin Pilat in lamdang a sa mahmah hi. Paisan Pawi hun simin mite in Pilat tungah a nget peuhpeuh mi khat, thong panin a khah a ngeina ahi hi. Kumpi a lehdo laitakun mi a that, thong sunga kikhumte lakah Barabbas a kici mi khat zong kihel hi. Pilat kiangah mihonte hong paito uh a, hih bang hun pawlin a hih ngei bangin mi khat a khah nading a hong ngen uh hi. Pilat in amaute kiangah, “Jew mite’ Kumpipa ka khah ding hong deih na hi uh hiam?” ci-in a dong hi. Bang hang hiam cih leh siampite in Jesuh a hazatna hangin hih bangin ama kiangah a paipihna thu teltakin a thei hi. Ahi zongin Barabbas hong khahsak zaw in, ci-in mihonte in a nget nadingun siampite in mihonte a hanthawn uh hi. Tua ciangin Pilat in mihonte tungah, “Jew mite’ Kumpipa na cih pa uh bangcih ding ka hi hiam?” ci-in a dot ciangin amaute in, “Singlamteh tungah that in,” ci-in a awng uh hi. Tua ciangin Pilat in, “Bang hangin tua ci na hi uh hiam? Bang siatna bawl ahi hiam?” a cih ciangin, “Singlamteh tungah that in,” ci-in a kinakko zaw semsem uh hi. Pilat in mihonte lungkimsak nuam ahih manin Barabbas khah a, Jesuh a satsak khit ciangin singlamteh tungah thah dingin galkapte’ khut sungah a ap hi. Tua ciangin galkapte in gam ukpa’ inntualah Jesuh paipih uh a, galkap dang khempeuh zong kikhawmsak uh hi. Jesuh, puansan silhsak uh a, ling lukhu bawlin a lu tungah a khusak uh hi. A zahtakbawl bang keekin hopih uh a, “Jew mite’ Kumpipa aw, na khansau ta hen!” a ci uh hi. Tua ciangin pumpeeng tawh a lu satin cilphih uh a, a zahtakbawl kineihin a mai-ah a kun uh hi. Tua bangin a simmawhbawl khit uh ciangin a puansan suahkhiatsak uh a, ama puan ngeite a silhsakkik uh hi. Tua ciangin singlamteh tungah thah dingin a paikhiatpih uh hi. Tua bangin a pai laitakun, Alexander le Rufas’ pa, Sairin khuami Simon a kici mi khat, gam sung panin khuapi sunga hong pai tawh kituak uh a, Jesuh’ singlamteh a pua dingin lammat uh hi. Lutang guh a cihnopna Golgotha munah paipih uh a, tua lai-ah myrrh a kici zatui a sawhsa uh leenggahzu pia uh a, ahi zongin Jesuh in ne nuam lo hi. Tua ciangin singlamteh tungah amah khai uh a, a puante kua in a koi ngah ding cih a theih nadingun suang lawnin ai san uh a, amauteng in a puante a hawm uh hi. Jesuh, singlamteh tungah a khai hun pen zingsang nai kua laitak ahi hi. “Jew mite’ Kumpipa,” ci-in amah a mawhsakna uh lai kigelh hi. A taklamah khat, a veilamah khat, mi thatte nih tawh a kikhai khawm hi. (Hih bangin a hihna uh tawh, “Khialhna a nei mite tawh kisim khawm hi,” ci-in Lai Siangtho sungah a kigelh thu a tung ahi hi.) Amah a va mukha mi peuhpeuh in a lu uh singin zahpihbawl uh a, “A! Biakinn susia-in ni thum sungin a lamkik ding pa! Singlamteh tung panin hong kumsuk inla, nangmah kihonkhia tawm in!” a ci uh hi. Tua bangmahin siampi liante le Thukham hilh siate in zong zahpih bawlin, “Midangte honkhiazo napi, amah le amah kihonkhia zo lo! Israel mite’ kumpipa Khrih tu-in singlamteh tung panin hong kumsuk leh amah um ni!” a kici uh hi. Jesuh tawh a kikhai khawm mi nihte in zong a simmawhbawl uh hi. Tua ciangin sunkim nai sawm le nih laitak a kipanin nai thum sung leitung khempeuhah khim a zing hi. Nitak nai thum laitakin Jesuh nakpitakin kiko a, “Ka Pasian, ka Pasian aw, bang hangin kei hong nusia na hi hiam?” a cihna ahi, “Eloi, Eloi, lama sabakthani?” a ci hi. Tua a kikona a zak uh ciangin tua lai-a om mi pawlkhatte in, “Elijah a sam hi,” a ci uh hi. Tua laitakin mi khat va tai a, leenggahzu-hau sungah tuihupna diahin pumpeeng dawnah a henkhit ciangin Jesuh’ hup dingin tahto a, “Khawl dih un, singlamteh tung panin a sutkhia dingin Elijah hong pai hiam, en dih ni,” a ci hi. Tua ciangin nakpitakin Jesuh kiko-in a laitat hi. Biakinn sunga kidalna puan a tung lam pan a taw dongin kikekin phelnih a kisuah hi. Jesuh’ mai-ah a ding galkap mangpa in tua bangin kiko-in a laitah a muh ciangin, “Hih pa, Pasian’ ta taktak ahi hi,” a ci hi. Jesuh a gal et numei pawlkhat zong a om hi. Tuate lakah Magdala khuami Mary, a nauzaw James le Josef’ nu Mary, le Salome ahi uh hi. Galilee gam sungah Jesuh a om lai-in hih numeite in Jesuh zui-in a huh uh hi. Jerusalem ciang dong Jesuh a hong zui numei dang tampi zong a om hi. Tua ni pen Sabbath ni ma, Kigin’ ni ahih manin nitak lam ciangin, mite in a zahtak, ulian vaihawmte lakah a kihel, Pasian’ Uk ding hun zong a lamen, Arimathea khuami Josef, hangtakin Pilat kiangah hong pai-in Jesuh’ luang a hong ngen hi. Pilat in a lungsimah, Jesuh a si khin takpi mah hi ding ahi hiam, ci-in ngaihsun ahih manin galkap mangpa samsak a, si khinta ahi hiam, ci-in a dong hi. Galkap mangpa’ genna panin a sihkhitna thu a theih ciangin a luang a laktheih nadingin Josef tungah thu a pia hi. Josef in zong puanpak lei a, singlamteh tung panin Jesuh’ luang lakhia-in, a puan lei tawh hoihtakin vialin tuam a, tawhsa-in a om suang han sungah a sial hi. Tua ciangin suangtum khat hualin a kongvang a hu hi. Magdala khuami Mary le Josef’ nu Mary in, Jesuh a kivuina mun a thei uh hi. Sabbath ni a bei khit ciangin Magdala khuami Mary, James nu Mary, le Salome-te in Jesuh’ luang a va zut nadingun paknamtui a va lei uh hi. Nipi ni zingsang tung nisuah phetin hanah a pai uh hi. Amaute khatlekhat kikum uh a, “Han kongvang hukna suangtum kua’n hong likkhiatsak ding ahi hiam?” a ci uh hi. Tua laitakin a khuadak uhleh a suangtum a kilikkhia khinsa-in a mu uh hi. (Tua suangtum a gol mahmah khat ahi hi.) Han sungah a lut uhleh, a taklam pang uhah, puanpak a silh tangval khat a tu mu uh a, lamdangsa-in a lau uh hi. Tua tangvalpa in, “Lamdangsa kei un. Singlamteh tungah a kithat Nazareth khuami Jesuh na zong uh hi. Amah kithokiksak khin a, hih lai-ah om nawn lo hi. Amah a kisialna mun hong en un. Tu-in pai unla, Peter le Jesuh’ nungzui dangte kiangah hih thu va gen un. Note tungah hong gensa bangin Galilee gam amaute mai-ah pai hi; tua lai-ah amah na mu ding uh hi, ci hi, ci un,” a ci hi. Amaute in lamdangsa-in lau uh ahih manin han panin taisuak pah uh a, kuamah dang kiangah hih thu gen lo uh hi. (Sihna panin Jesuh a thawhkik khit ciangin ama sung pan dawi sagih a hawlkhiatna, Magdala khuami Mary tungah Nipi ni zingsang tungin kilang masa hi. Tua nu zong hong pai-in a dah a kapin a om Jesuh’ lawm luite kiangah hih thu a va gen hi. Ahi zongin Jesuh a nuntakna thu le tua nu mahmah in a muh khitna thu a genna a zak uh hangin, a thugen um zo lo uh hi.) (Tua khit ciangin khuapi panin khuaneu-ah nungzui nihte a pai laitakun amaute tungah a mel tuam khatin Jesuh kilang hi. Hih tegel zong kileh kikin a lawm dangte uh kiangah gen uh a, ahi zongin amau’ thugen, na um lo uh hi.) (Tua khit ciangin a tawpna-ah, an a nek laitakun nungzui sawm le khatte mahmah kiangah a kilang hi. A kithawhkiksak khit ciangin amah a mu mite’ thugen um lo uh ahih manin a lungkhauhna uh le a up lohna hangun amaute a taii hi. Tua khit ciangin amaute tungah, “Leitung khempeuhah note pai kawikawi unla, mi khempeuh tungah Lungdamna Thu na hilh ta un. Lungdamna Thu umin tui a kiphum mi peuhpeuh in hotkhiatna ngah ding a, a um lo mi peuhpeuh in mawhsakna thuak ding uh hi. A um mite tungah hih vangliatna limte kipia ding hi: Keima hangin dawi hawlkhia thei ding uh a, pau dangte pau thei ding uh hi. Gul a lawn’ hangun bangmah ci lo ding uh a, gu tui a dawn hangun zong bangmah ci lo ding uh hi. Cinate tungah a khut uh nga ding uh a, cinate dam ding uh hi,” a ci hi.) (Tua bangin Topa Jesuh in amaute tungah thu a gen khit ciangin vantungah kilato-in Pasian’ taklamah a tu hi. Nungzuite zong mun khempeuhah pai-in thu a hilh uh hi. Topa in zong amaute’ nasep seppih a, a thuhilhnate uh man hi, ci-in a lahna-in amaute tungah vangliatna limte a pia hi.) A lian mahmah Theofilas aw: Eite lakah a piang ngeisa thu a kigente, mi tampi in amau siamna zah ciat tawh lai-in a gelh uh hi. A kipat cil a kipanin amau’ mit mahmah tawh a mu mite in hong gente uh a gelh uh ahi hi. Kei zong, hih thute khempeuh a kipat cil a kipanin limtakin kantel khin ka hih manin, a thu a kizomzomin nang a dingin hong gelhsak leng hoih ding hi, ci-in ka ngaihsun hi. Nang tungah a hong kigensa thute khempeuh a man taktak na theih nading deihsakna tawh ka hong gelh ahi hi. Judea gam a hong uksawn kumpi Herod hun laitakin siampi Abijah’ pawlte’ sung panin Zekhariah minnei siampi khat a om hi. A zi’ min Elizabeth hi a, amah zong Aaron’ suan ahih manin siampi nam mah ahi hi. A nih tuakun Pasian’ muhna-ah a manin gamta uh a, Topa’ thukhamte le a ngeina khempeuh a zui uh hi. Ahi zongin Elizabeth ciing ahih manin amau nupa in ta nei lo uh a, a nih tuakun zong a teekta uh ahi hi. Nikhat, ama pawlte’ sep hun ding a tun ciangin Zekhariah in Pasian’ mai-ah siampi nasep a sem hi. Siampite’ hih ngeizel bangin biakna tau tungah, paknamtui kua in hal ding, ci-in ai a kisan ciangin Zekhariah in a ngah hi. Tua ahih manin Topa’ biakinn sungah amah lut a, amah in paknamtui halin a om laitakin mihonpi dangte a pualamah thungenin na om uh hi. Tua laitakin Topa’ vantungmi khat ama kiangah hong kilang a, paknamtui a kihalna biakna tau taklam pangah a ding hi. Zekhariah in vantungmi a muh ciangin lamdangsa mahmah a, a lau mahmah hi. Ahi zongin vantungmi in ama kiangah, “Zekhariah aw, lau kei in. Pasian in na thungetna hong zakhin a, na zi Elizabeth in tapa khat a nei ding hi. A min dingin Johan na phuak ding hi. Amah hong suah ciangin nang na lungdam mahmah ding a, midang tampite in zong hong lungdampih ding uh hi. Topa’ muhna-ah amah milian khat hi ding hi. Amah in leenggahzu ahi a, khamtheihzu khat peuhpeuh ahi zongin ne lo ding hi. A suah phet a kipanin Kha Siangtho tawh kidim ding hi. Amah in Israel mi tampi tak, amau’ Topa Pasian’ kiangah tunpihkik ding hi. Amah pen kamsang Elijah mah bangin thahatna le vangliatna tawh Pasian mai-ah hong mapai ding hi. Pate le tate kilemsakkikin, mihoihte’ lungsim bang a neih nadingun thumang lo mite’ lungsim heisak ding a, Topa a dingin a kilawm dingin mite a bawlkhol ding hi,” a ci hi. Tua ciangin Zekhariah in vantungmi kiangah, “Hih na thugen a manna bangci theih ding ka hi hiam? Kei ka teekta a, ka zi zong lah a teek mahmah ahi hi,” a cih ciangin vantungmi in dawng a, “Kei pen Pasian’ na a sem Gabriel ka hi hi. Nang kiangah thu hong genin, hih lungdamna thu a ko dingin a hong sawl ka hi hi. Ahi zongin, a hong tung ding ka thugen a hun lai-in um lo na hih manin nangma tunga kong thugen a tun matengin pau thei loin na om ding hi,” a ci hi. Tua hun sungteng, mihonte in Zekhariah na ngak uh a, biakinn sungah sauveipi a om manin lamdang a sa uh hi. Amah hong pusuah ciangin pau thei lo ahih manin, biakinn sungah maang mu hi, ci-in a thei uh hi. Pau thei lo ahih manin a khut tawh a lim a lak hi. Biakinn sungah ama nasep ding hun a bei ciangin a inn-ah a ciah hi. Tua khit ciangin a zi Elizabeth gai a, kha nga sung inn panin koimahah a paikhia kei hi. “Tu petpetin Topa in hih bangin kei hong huh a, mi lakah ka maizumna teng hong paihkhiatsak ta hi,” a ci hi. Elizabeth a gaizawh kha guk a cin ciangin Pasian in Galilee gam Nazareth khua-ah vantungmi Gabriel a paisak hi. Kumpi David’ suan Josef in zuthawl a piaksa Mary tungah thu a gen dingin a sawl ahi hi. Vantung mi in Mary kiangah, “Na lungdam mahmah ding ahi hi. Topa in nang hong ompih a, thupha lianpi hong piazo hi,” a ci hi. Mary in vantungmi’ thugen a zak ciangin, bang a cihnopna hi ding ahi hiam, ci-in lamdang a sa mahmah hi. Tua ciangin vantungmi in, “Mary aw, lamdangsa-in lunghimawh kei in. Pasian’ maipha a ngah na hi hi. Nang gai-in tapa khat na nei ding a, a min dingin Jesuh na phuak ding hi. Amah milian hi ding a, A Lianpen Pasian’ Tapa kici ding hi. Topa Pasian in ama pu David mah bangin kumpi-in bawl ding a, Jakob suanlekhakte’ kumpi hi paisuak ding a, ama ukna bei hun cih om ngei lo ding hi,” a ci hi. Tua ciangin Mary in vantungmi kiangah, “Kei, pasal tawh a lumkhawm ngei nai lopi, hih thu bangci piantheih ding ahi hiam?” a ci hi. Vantung mi in, “Nangma tungah Kha Siangtho hong tung ding a, nangma tungah Pasian’ vangliatna hong om ding hi. Tua ahih manin a hong suak ding a siangtho naungek pen Pasian’ Tapa kici ding hi. Na behnu Elizabeth zong thei in. A ciing hi, kici napi-in a teek mahmah zawh nungin naupaii a, tu-in a naupaii zawh kha guk pha ta hi. Tua ahih manin Pasian in a bawl theih loh khat zong om lo hi,” ci-in a dawng hi. Tua ciangin Mary in, “Kei pen Topa’ nasemnu ka hi hi. Na gensa bangin keima tungah hong piang ta hen,” a ci hi. Tua ciangin ama kiang panin vantungmi a paikhia hi. Tua khit a sawt loin Mary kithawi a, Judea mualtung gam a khua khatah a va paipah hi. Zekhariah’ inn-ah lutin Elizabeth a hopih hi. Elizabeth in Mary’ hopihna awging a zak ciangin a sunga a naupaii a hong diang hi. Elizabeth zong Kha Siangtho tawh hong kidim a, nakpitakin kiko-in, “Numei khempeuh lakah thupha ngah pen nu na hi a, na neih ding naungek in thupha ngah ding hi. Ka Topa’ nu kei kiangah hong hawh nadingin, bang hangin hih bang thu lian kei tungah hong tung ahi hiam? Bang hang hiam cih leh nong hopihna awging ka zak phetin ka sunga naungek nuamin a diang hi. Topa in nang tungah a hong gen thute hong tung taktak ding hi, ci-a upna pen nang a dingin a lungdamhuai mahmah ahi hi,” a ci hi. Tua ciangin Mary in, “Ka lungsim in Topa phat a, hong Hon Pasian’ hangin ka nuam mahmah hi. Bang hang hiam cih leh a neu mahmah a nasemnu, keimah a hong phawk hi. Tu a kipanin a khangkhangin mi khempeuh in thupha ngah nu hong ci ding uh hi. Bang hang hiam cih leh Vanglian Pasian in keima a dingin na lianpi hong sepsak hi. Ama min siangtho a, amah a zahtak mite tungah a khangkhangin hehpihna a lak hi. Amah in a hat mahmah a khut zan a, kiliatsakna lungsim a nei mite a thehthang hi. Kumpi vangliante, a tokhom panun khiasuk a, mineute, milianin a bawl hi. Bangmah a nei lote tungah na manpha tampi pia a, mihaute, khuthawm guakin a paikhiasak hi. I pu i pate tungah a kiciamna tungsak a, a nasempa Israel a huh hi. Abraham le a suanlekhak khempeuh tungah hehpihna a piak tawntung ding a phawk hi,” a ci hi. Elizabeth kiangah kha thum sung bang Mary taam a, tua khit ciangin a inn-ah a ciah hi. Elizabeth a suah ding hun hong tungta a, tapa khat hong nei hi. Topa in amah a hehpih mahmahna thu a zak uh ciangin a vengte le a behte khempeuh in a lungdampih uh hi. Naungek nipikal khat a phak khit ciangin a vun a at dingin hong pai uh a, a naungek’ min dingin zong a pa’ min mah ahi Zekhariah phuah ding a sawm uh hi. Ahi zongin a nu in, “Hilo ding hi; ama min dingin Johan i phuak ding hi,” a ci hi. Tua ciangin amaute in Elizabeth kiangah, “Na beh sung uhah hih bang min a nei om nai lo hi,” a ci uh hi. Tua ciangin hih nau min bang phuak ding ihi hiam, ci-in a pa kiangah lim tawh a dong uh hi. Zekhariah in zong laidal khat ngen a, tua tungah, “Ama min Johan hi ding hi,” ci-in a gelh ciangin amaute khempeuh in lamdang a sa mahmah uh hi. Tua laitakin Zekhariah hong pauthei kik a, Pasian a phat hi. A vengte khempeuh in lamdangsa-in lau uh a, Judea mualtung gam sung khempeuhah hih thu a kitheithang hi. Hih thu a za mi khempeuh in, “Hih naungek a bangci mi hong hi ding hiam?” ci-in a lungsim sung uhah a ngaihsun ciat uh hi. Bang hang hiam cih leh Topa in amah a huhna thu teltakin kilang hi. Tua ciangin Johan’ pa Zekhariah, Kha Siangtho tawh kidimin Pasian’ thu gen a, “Israel mite’ Topa Pasian phat ciat ni. A mite a huh dingin hong pai-in amaute a suaktasak hi. A nasempa David’ suante sung panin eite a dingin Vanglian Honpa hong pia hi. Amah in tanglai-in a kamsang mi siangthote tungtawnin thu hong gen a, i galte kiang panin hong hotkhiat nading le hong mudahte’ khutsung panin hong hotkhiat nading thu a hong ciam hi. I pu i pate a hehpih nading le ama thuciam siangtho hong mangngilh loh nading, amah in hong gen hi. I pu Abraham tungah kamciamna kho khat bawl a, i galte kiang panin eite hong hotkhiat nading le launa om loin amah bia-in, i khang tawnin ama mai-ah a siangtho, a thumanin i om tawntung theih nading thu hong ciam hi. “Nang, ka tapa na hi a, Lianpen Pasian’ kamsangpa hong kici ding hi. Ama pai nading lampi a bawlkhol dingin Topa’ mai-ah na mapai ding hi. Na mawhna uh hong kimaisak khit ciangin, hotkhiatna na ngah ding uh hi, ci-in ama mite kiangah na gen ding hi. I Pasian lungnem mahmah a, hehpihna hong nei hi. Eite tungah hotkhiatna khuavak hong taangsak ding a, sih ding lauhuaina sungah a om mi khempeuh tungah vantung khuavak hong taangsak ding a, nopsakna lampi-ah hong kha ding hi,” a ci hi. Tua naungek a pumpi le a lungsim siamna hong khang a, Israel mite lakah a kilaak hun matengin sehnel gam sungah a om hi. Tua hun laitakin gam tampi a uk Sisar Augustas in ama ukna gam sung mi a phazah a kitheih nadingin mi khempeuh min sazian a kilak nadingin thu a pia hi. Kuirinias in Syria gam a uksawn hun laitakin hih bangin mi phazah kisimna thu hong piang hi. Tua ahih manin amau khua ciatah min pia dingin mi khempeuh a pai uh hi. Josef zong David’ suante khat ahih manin Galilee gam sung Nazareth khua panin David’ suahna khua ahi Judea gam Bethlehem khua-ah a pai hi. Tua bangin min sazian kikhumsak dingin a pai ciangin tenpih dingin zuthawl a piaksa a lawmnu Mary tawh a paikhawm uh hi. A lawmnu naupaii hi a, Bethlehem khua-ah a tam sungun a nausuah ding hun hong tung hi. Zintun nading mun dang khempeuh mi dim khinta ahih manin ganbukah tung uh a, a tacil ahi ta pasal khat nei-in, puan tawh tunin gan annekna kuang sungah a sial hi. Tua hun laitakin gamlakah a tuuhonte a giahpih tuucing pawlkhat a om uh hi. Amaute kiangah Topa’ vantungmi khat hong kilang a, Topa’ minthanna vang in amaute hong taan ahih manin a lau mahmah uh hi. Ahi zongin vantungmi in, “Lau kei un. Mi khempeuh a lungdamsak ding thuthak hoih khat note a’ ding ka hong puak hi. Tuni-in David khuapi sungah, note a hong honkhia ding Khrih Topa a suak hi. Amah na theih nading uh a lim hih bang hi ding hi: Puan tawh kitun naungek khat, gan annekna kuang sungah a kisial na mu ding uh hi,” a ci hi. Tua khit phetin tua vantungmi tawh vantung mihonpite thakhatin hong omin Pasian phatna la sa uh a, “Van a sang belna-ah a om Pasian’ min thang hen la, ama pahtak leitung mite tungah nopna om ta hen,” a ci uh hi. Vantung mite vantungah a ciahkik khit uh ciangin tuucingte in, “Bethlehem khua-ah pai-in, Topa’ hong gen hih thupiang va en ni,” a kici uh hi. Amaute nawhpai mahmah uh a, Mary le Josef le gan annekna kuang sungah a kisial naungek a mupah uh hi. Tua bangin naungek a muh uh ciangin, vantungmi in amaute kiangah hih naungek tawh kisai thu a gente a gensawn uh hi. Hih tuucingte’ thugen a za mi khempeuh in lamdang a sa uh hi. Mary in ahihleh a lungsimah hih thute ciamtehin a ngaihsunsun hi. Tuucingte zong ciahkik uh a, amaute tungah a kigensa bangin a zaksa le a muhsa uh thute hangin Pasian’ min a phat uh hi. Naungek a vun a ki-at ni hun nipikal khat a cin khit ciangin, amah a kipaii ma-in a min dingin vantungmi in a piaksa ahi Jesuh, a min dingin a phuak uh hi. Moses Thukham sungah a kigelhna tawh kizui-in Josef le Mary a kisiansuah ding uh hun hong tung hi. Tua ahih manin Topa tungah naungek a ap dingin Jerusalem-ah a paipih uh hi. Bang hang hiam cih leh Topa’ Thukham sungah, “Ta pasal masa peuhmah Topa tungah ki-ap ding hi,” ci-in kigelh hi. Topa Thukham sungah a kigelhna tawh kizui-in biakna-in vakhu nih ahi a, kawl vakhuno nih ahi zongin a pia dingin zong a pai uh ahi hi. Jerusalem khua sungah Simeon a kici mi khat na om hi. Amah a thuman, a biakna mi mahmah khat hi a, Israel mite a kihotkhiat hun ding a ngakngak mi khat ahi hi. Kha Siangtho in a ompih mi khat hi a, Topa’ hong ciamsa Khrih a muh matengin a sih loh nading thu zong ama tungah Kha Siangtho in na genkhin hi. Kha Siangtho’ makaihna tawh biakinn sungah Simeon a pai hi. A nu le a pate in thukham sunga om ngeina bangin Topa tungah naungek a ap dingin biakinn-ah a hong paipih uh ciangin, Simeon in naungek la-in a ang-ah tawi-in Pasian’ tungah lungdamna ko a, “Topa aw, na thuciamna tu-in nong tungsak a, na nasempa keima lungsim nong nuamsak hi. Ka mit mahmah tawh nong hotkhiatna ka mukhin a, minam khempeuh’ muhin nong tungsak a, Gentail mite in khuavak a muh nading le nangma mi Israel-te a minthan nadingin na vaihawm hi,” a ci hi. Naungek’ nu le pate in, hih bangin Simeon in naungek’ thu a genna a zak uh ciangin lamdang a sa mahmah uh hi. Tua ciangin Simeon in amaute thupha a piak khit ciangin naungek’ nu Mary kiangah, “Hih naungek pen, Israel mite sungah mi tampi in siatna a ngah nading, le mi tampi in hotkhiatna a ngah nading ahi hi. Mi tampi in hih naungek nial ding uh a, mite’ lungsimtawng a kilatna hong hi ding hi. Dahna lungkhamna in namsau hiam bangin nangma lungsim mahmah zong hong sunkham ding hi,” a ci hi. Tua laitakin Asher minamte sung panin Fanuel’ tanu Anna minnei kamsang numei khat a om hi. Amah a khangham mahmah khat hi a, a nungak laitakin a neih a pasal tawh kum sagih sung a tenkhop khit ciangin, kum sawmgiat le kum li sung meigongin a om ahi hi. Amah pen biakna a nusia ngei lo mi khat hi a, a sun a zanin Pasian bia-in an tangin thu a ngenngen mi khat ahi hi. Tua bangin Jesuh a ki-ap hun laitakin hih kamsangnu hong pai-in Pasian tungah lungdamna ko a, Jerusalem a suahtak nading lamenin a ngak mi khempeuh tungah hih naungek’ thu a gen hi. Amaute in Topa’ Thukham tawh kizui-in hih ding a kisam khempeuh a bawl khit uh ciangin Galilee gam, amau khua Nazareth-ah a ciahkik uh hi. Tua naupang hong khangin hong thahat hi. Lungpilna tawh kidim a, Pasian in thupha a pia hi. Kumsimin Jerusalem khua-a Paisan Pawi a kibawlna-ah Jesuh’ nu le pa a pai zel uh ahi hi. Jesuh, kum sawm le nih a phak ciangin a ngeina bangin tua pawi-ah a thumun a pai uh hi. Tua pawi vengin a ciahkik uh ciangin Jerusalem khua-ah naupang Jesuh kinusia kha hi. A nu le a pa in a nusiatlam uh thei lo uh hi. Amaute’ honlak mahah a omomin ngaihsun uh ahih manin ni khat lam paikhin uh a, tua ciangin a lawmte le a tanaute lak khawng a zong pan uh hi. Amah a muh zawh loh uh ciangin Jerusalem-ah kileh kikin a zong uh hi. A ciahzawh uh a ni thum ni ciangin biakinn sungah amah mu uh a, siate lakah tu-in a thugen uh ngai-in, thu zong dong zelin a om a mu uh hi. Amah in pilna tawh thu genin a dawnna a za mite khempeuh in lamdangsa mahmah uh hi. A nu le a pa in a muh uh ciangin lamdangsa uh a, a nu in, “Ka ta aw, bang hangin hong hici bawl na hi hiam? Na pa tawh lungkham mahmahin nang ka hong zong uh hi,” a ci hi. Jesuh in a nu le a pa kiangah, “Bang hangin kei hong zong na hi uh hiam? Ka Pa’ inn sungah ka om ding lamtak thei lo na hi uh hiam?” ci-in a dawng hi. Ahi zongin bang a cihnopna ahi hiam, ci-in a nu le a pa in thei lo uh hi. Tua ahih ciangin a nu le a pa zui-in Nazareth khua-ah ciahkik a, amaute’ thu mangin tua lai-ah hoihtakin a om hi. A nu in hih thu khempeuh a lungsim sungah ngaihsunsun hi. Jesuh a pumpi le a pilna khang a, ama gamtatna in Pasian le mite a lungkimsak semsem hi. Gam tampi a uk Sisar Tiberius in a ukzawh a kum sawm le ngana, Pontias Pilat in Judea gam ukin, Herod in Galilee gam ukin, a nau Filip in Iturea gam le Trakhonitis gam ukin, Lysanias in Abilene gam uk a, Annas le Kaiafas in siampi lianpen a sep laitakin sehnel gamah a om, Zekhariah’ tapa Johan’ tungah, Pasian’ thu hong tung hi. Tua ahih ciangin Jordan Gun kiim gam khempeuhah Johan pai kawikawi a, kamsang Isaiah in Lai Siangtho sungah a gelh mah bangin, “Na mawhna panun kisik unla tui kiphum un. Tua hileh Pasian in na mawhnate uh hong maisak ding hi,” ci-in thu a hilh hi. Isaiah in hih bangin na gelh hi: “Gam sungah mi khat kiko a, ‘Topa’ pai nading lampi bawl unla, a tot ding lampi tangsak un. Kuam thuk khempeuh kivukdim ding a, mual lian mual neu khempeuh kitotam ding hi. Lam kawite kitangsak ding a, a leihumte kinelsak ding hi. Mi khempeuh in Pasian’ hotkhiatna ngah ding uh hi,’” ci-in a kigelh hi. Ama tuiphum ding utin a hong pai mi tampite kiangah Johan in, “Gul bangin ngian a zang note aw, hong tung ding Pasian’ hehna panin na suahtak theih nading uh kua in hong gen ahi hiam? Na kisikna uh a kilat nadingin gamta un. Note khatlekhat in, ‘Abraham’ suante ihi ngawn hi,’ mawkcih kei un. Ke’n kong cihin-ah, Pasian in hih suangte nangawn Abraham’ suanlekhakte-in bawl thei lel hi. Tu mahmahin sing a bulphuk dingin hei tawh kingimzo hi. Gah hoih a gah lo singkung khempeuh kiphukin meikhuk sungah kikhul ding hi,” a ci hi. Tua ciangin mihonpite in, “Tua bang ahihleh bangci gamtat ding ka hi uh hiam?” ci-in a dot uh ciangin Johan in, “Puanak nih a nei mipa in a nei lote hawm unla, annek ding a neite in a nei lote hawm un,” ci-in a dawng hi. Siahdongte pawlkhat zong tui a kiphum dingin hong pai-in Johan kiangah, “Sia aw, bangci gamtat ding ka hi uh hiam?” ci-in a dong uh hi. Amah in, “Na don’ dingun a kilawm zahval na dong kei un,” ci-in a dawng hi. Galkap pawlkhatte in zong ama kiangah, “Kote, bangci gamtat ding ka hi uh hiam?” ci-in a dot uh ciangin, “Zawhthawh thu tawh ahi a, a man lopi-in mawhsakna tawh ahi zongin kuama sum sut kei unla, na khasum ngahzah uh tawh lungkim un,” ci-in a dawng hi. Thulian khat peuhpeuh hong piang ding hi, ci-in mite’ lawpna hong khang semsem a, hih pa pen Khrih hi kha ding hi, ci-in mite in a lungsim uhah a ngaihsun uh hi. Tua ahih ciangin Johan in amaute kiangah, “Keimah in tui sungah note ka hong phum hi; ahi zongin kei sangin nakpitakin a lianzaw khat hong pailai ding hi. Ama khedap khau a sutsak ding nangawnin kei ka kilawmzo nai kei hi. Amah in Kha Siangtho le mei sungah note hong phum ding hi. A buh cilsate a zapsiang nadingin amah in a khut sungah lawhpi tawi a, a takteng ansal sungah koihin, a siteng a mit ngei lo mei sungah a khul ding hi,” ci-in a gen hi. Tua bangin a lam tuamtuamin Johan in mite hanthawnin Lungdamna Thu a hilh hi. Ahi zongin, gam ukpa Herod in ama naupa’ zi Herodias a tenpihna hang le a gamtat hoih lohna a tuamtuamte’ hangin Johan in Herod a taii hi. Tua ciangin Herod in thong sungah Johan khia a, a gamtatsiatna a behlap lailai hi. Mi khempeuh a kituiphum khit uh ciangin Jesuh zong a kituiphum hi. Jesuh in thu a nget laitakin vantung kihong a, vakhu pumpi lim nei-in Kha Siangtho ama tungah hong kumsuk hi. Tua laitakin vantung panin aw khat hong ging a, “Nang pen ka it ka Tapa na hi a, nangma tungah ka lungkim mahmah hi,” a ci hi. Nasep a kipat ciangin Jesuh ama khan kum sawmthum bang a pha hi. Mite in ama pa Josef hi, ci-in a ngaihsun uh hi. Josef’ pa Heli, Heli’ pa Matthat, Matthat’ pa Levi, Levi’ pa Melkhi, Melkhi’ pa Jannai, Jannai’ pa Josef, Josef’ pa Mattathias, Mattathias’ pa Amos, Amos’ pa Nahum, Nahum’ pa Esli, Esli’ pa Naggai, Naggai’ pa Maath, Maath’ pa Mattathias, Mattathias’ pa Semein, Semein’ pa Josek, Josek’ pa Joda, Joda’ pa Joanan, Joanan’ pa Resa, Resa’ pa Zerubbabel, Zerubbabel’ pa Shealtiel, Shealtiel’ pa Neri, Neri’ pa Melkhi, Melkhi’ pa Addi, Addi’ pa Kosam, Kosam’ pa Elmadam, Elmadam’ pa Er, Er’ pa Joshua, Joshua’ pa Eliezer, Eliezer’ pa Jorim, Jorim’ pa Matthat, Matthat’ pa Levi, Levi’ pa Simeon, Simeon’ pa Judah, Judah’ pa Josef, Josef’ pa Jonam, Jonam’ pa Eliakim, Eliakim’ pa Melea, Melea’ pa Menna, Menna’ pa Mattatha, Mattatha’ pa Nathan, Nathan’ pa David, David’ pa Jessi, Jessi’ pa Obed, Obed’ pa Boaz, Boaz’ pa Salmon, Salmon’ pa Nahshon, Nahshon’ pa Amminadab, Amminadab’ pa Admin, Admin’ pa Hezron, Hezron’ pa Perez, Perez’ pa Judah, Judah’ pa Jakob, Jakob’ pa Isaac, Isaac’ pa Abraham, Abraham’ pa Terah, Terah’ pa Nahor, Nahor’ pa Serug, Serug’ pa Reu, Reu’ pa Peleg, Peleg’ pa Eber, Eber’ pa Shelah, Shelah’ pa Kainan, Kainan’ pa Arpakshad, Arpakshad’ pa Shem, Shem’ pa Noah, Noah’ pa Lamek, Lamek’ pa Methuselah, Methuselah’ pa Enok, Enok’ pa Jared, Jared’ pa Mahalaleel, Mahalaleel’ pa Kainan, Kainan’ pa Enos, Enos’ pa Seth, Seth’ pa Adam, Adam’ pa Pasian ahi hi. Kha Siangtho tawh a kidimin Jordan gun panin Jesuh hong ciahkik a, Kha Siangtho in gamlakah paipihin, Dawimangpa in ni sawmli sung a ze-et hi. Tua hun sung Jesuh in bangmah ne lo a, tua ze-etna hun a bei ciangin a gil kial mahmah hi. Dawimangpa in Jesuh kiangah, “Pasian’ Tapa na hih takpi leh hih suang anlum suaksak in,” a ci hi. Jesuh in, “Lai Siangtho sungah, ‘Anlum bek tawh mite nungta zo lo hi,’ ci-in kigelh hi lo ahi hiam?” ci-in a dawng hi. Tua ciangin Dawimangpa in Jesuh paipihto a, thakhat thu-in leitung kumpi gam khempeuh a lah khit ciangin, “Hihte khempeuh keima tungah hong kipia khin ahih manin, ka piaknop peuhpeuh tungah ka pia thei hi. Hih vangliatna le hauhnate khempeuh nangma tungah kong pia ding hi. Keima mai-ah kunin hong bia lecin hihte khempeuh nangma a’ hi ding hi,” a cih ciangin Jesuh in, “Lai Siangtho in, ‘Topa Pasian na bia inla, ama na bek sem in,’ ci hi lo ahi hiam?” ci-in a dawng hi. Tua ciangin Dawimangpa in gamlak panin Jerusalem khua-ah Jesuh paipih a, biakinn khumzang a sangpenna munah a kahtohpih khit ciangin, “Pasian’ Tapa taktak na hih leh hih lai panin tuaksuk in. Bang hang hiam cih leh Lai Siangtho in, ‘Pasian in nang a hong kem dingin a vantung mite hong sawl ding hi,’ ci-in a gen banah, ‘Na khete nangawn suang tawh kitatin a liam khak loh nadingin vantung mite in a khut uh tawh nang hong dom ding uh hi,’ zong ci lai hi,” a cih ciangin Jesuh in, “Lai Siangtho in, ‘Topa na Pasian na ze-et kei in,’ ci hi,” ci-in a dawng hi. Dawimangpa in a hihtheihna khempeuhah Jesuh a ze-et khit ciangin tawlkhat sung a nusia phot hi. Tua ciangin Kha Siangtho vangliatna tawh a kidimin Galilee gamah Jesuh a ciahkik hi. Tua kiima om gam khempeuhah ama thu kizakim hi. Jesuh in amaute’ kikhopna innte-ah thu hilh a, mi khempeuh in amah a phatkim uh hi. Tua ciangin ama khanna Nazareth khua-ah Jesuh pai a, Sabbath ni ciangin a paingei bangin kikhopna inn-ah a pai hi. Lai Siangtho a sim dingin amah ding a, a nget bangin a sim dingin kamsang Isaiah Lai Siangtho bu a kipia hi. A laibu lemin a simnopna mun a zon ciangin a nuai-a bangin a kigelhna mun mu-in a sim hi. Tua munah, “Gimna a thuak mite tungah Lungdamna Thu a hilh dingin Topa in kei hong sehkhin ahih manin keima sungah Topa’ kha hong om hi. Salin a kimante tungah suahtakna thu a gen ding, mittawte in khua a muhkik theih nading, a kinengniamte a suaktasak ding le Topa in a mite a hotkhiat ding kum a pulak dingin kei hong sawl hi,” ci-in a kigelh hi. Hih thu a kigelhna munteng a simkhit ciangin a laibu khupin biakinn nasempa tungah pia kikin a tu hi. Kikhopna inn sungah a om mi khempeuh in limtakin amah a en uh hi. Tua ciangin amaute tungah thugen ding kipan a, “Note’ zakin a hong kisim Lai Siangtho thu, tuni-in a hong tung hi,” a ci hi. Amaute khempeuh in Jesuh thupi sa mahmah uh a, thugen siam sa mahmah uh ahih manin, “Hih pa, Josef’ tapa hi lel hi lo ahi hiam?” a ci uh hi. Tua ciangin Jesuh in amaute kiangah, “Paunak khatah, ‘Zato pa aw, nangmah kidamsak tawm in,’ a cihna thu kei tungah nong cihnop ding uh ka thei hi. ‘Kapernaum khua-ah na bawl thu ka zakte uh zong hih lai na khua-ah hong bawl in,’ zong nong cinuam ding uh hi,” a ci hi. Tua ciangin Jesuh in a thugen zomlai a, “Ke’n kong cihin-ah, kamsang a kuamah peuh ama khua-ah kipakta ngei lo hi. A taktakin ci lehang, Elijah’ hun lai-in kum thum le alang sung guah zu lo a, gam sung khempeuhah kialpi a tun hun laitakin Israel gam sungah meigong numei tampi tak om hi. Ahi zongin tua numei tampite khat beek kiangah Elijah kisawl lo a, Sidon gam Zarefath khua-a om meigongnu kiang bekah kisawl hi. Kamsang Elisha’ hun laitakin Israel gam sungah miphak tampi om a, ahi zongin kuamah in damna ngah loin, Syria mi Naaman bek in damna ngah hi,” a ci hi. Hih thu a zak uh ciangin kikhopna innsunga om mi khempeuh a heh mahmah uh hi. Amaute dingin khuanawlah Jesuh paipih uh a, khuanawl keenah a bungbu sawnkhiat dingin a paipih uh hi. Ahi zongin amaute’ lak nawkin Jesuh a paikhia hiau hi. Tua ciangin Galilee gam Kapernaum khua-ah paisuk a, Sabbath ni-in thu a hilh hi. Amah in aana neite bangin thu gen ahih manin amaute in lamdang a sa mahmah uh hi. Kikhopna inn sungah dawivei mi khat om a, nakpitakin kiko-in, “Nazareth khuami Jesuh aw, kote tawh bang kisai ihi hiam? Kote a susia dingin hong pai na hi hiam? Pasian’ mi siangtho na hih lamtak ka hong thei uh hi,” a ci hi. Jesuh in tua dawi taii a, “Pau kei inla, ama sung panin paikhia in,” ci-in thu a pia hi. Dawi in a mipa mihon lakah a puksak khit ciangin ama sung panin paikhia a, ahi zongin liamsak lo hi. Kikhopna innsunga a om mi khempeuh in lamdangsa mahmah uh a, “Hih a kampaute a bangci kampau ahi hiam? Aana le vang neihna tawh dawi thu pia a, dawite a taikhia uh hi,” a ci uh hi. Hih Jesuh’ thu tua gam mun khempeuhah a kiza hi. Kikhopna inn panin Jesuh paikhia-in Simon’ inn-ah a lut hi. Simon’ sungnu nattunin na gim mahmah a, hih ama natna thu Jesuh kiangah a gensak uh hi. Jesuh zong pai-in a lupna gei-ah ding a, a cinatna a taii ciangin a nattutna dampah a, amah zong thozo pahin a zinte a dozo pah hi. Ni a tumkhit ciangin natna tuamtuam a nei mi khempeuh Jesuh kiangah hong paipih uh a, Jesuh in amaute khempeuh tungah a khut nga-in a damsak hi. Mi tampi sung panin dawite zong taikhia uh a, “Nang pen Pasian’ Tapa na hi hi,” ci-in a kiko uh hi. Amah pen Khrih ahihlam thei uh ahih manin amaute taii-in pausak lo hi. Khua a vak ciangin khuasung panin gamdaihna munah Jesuh a paikhia hi. Mite in amah zong uh a, a muh uh ciangin amah a taam lai nadingin a kho uh hi. Ahi zongin amah in, “Pasian’ Ukna hangin Lungdamna Thu a hilh ding mahin a hong kisawl ahih manin khua dangte-ah zong ka va hilh ding hi,” a ci hi. Tua ahih manin Galilee gam sunga om kikhopna innte-ah thuhilhin a om hi. Khatvei, Gennesaret Tuili gei-ah Jesuh dingin a om laitakin, mite in Pasian’ thu zanuamin Jesuh hong nehcip uh hi. Jesuh in tui gei-ah gunkuang nih a om a mu hi. Tua gunkuang nei ngasa bengte a gunkuang panun tuakkhia-in tui sungah a ngente a sawp uh hi. Tua gunkuangte sung panin Simon’ gunkuang sungah Jesuh tuang a, lei tawh tawm a kigamla zek dingin a gunkuang tawm a hawh nadingin Simon kiangah a gen hi. Tua ciangin gunkuang sungah tu a, tua lai panin thu a hilh hi. Thuhilh a tawp ciangin Simon kiangah, “Tui thukna lamah na gunkuang hot inla, na ngen tawh ngasa khuh in,” a ci hi. Tua ciangin Simon in, “Sia aw, tu zanthapai ngasa ka khuh uh hangin khat zong ka man kei uh hi. Ahi zongin khuh in, nong cih leh, ka khuh ding hi,” ci-in a dawng hi. A ngen a khuh le ngasa tampi tak awk a, a ngen kikeek dektak hi. A gunkuang dang khatah a om a lawmte hong pai-in a huh nadingun a khut uh a van uh hi. Amaute zong hong pai uh a, gunkuang tegel sungah ngasa a dimtakin guang uh ahih manin a gunkuang tum dektak hi. Simon Peter in hih thu a muh ciangin Jesuh’ mai-ah khukdin a, “Topa aw, kei mawhnei mi ka hih manin ka kiang panin paikhia in,” a ci hi. Tua zahin ngasa tampi a matna hangun amah le a lawmte in lamdang a sa mahmah uh hi. Tua mah bangin Simon’ lawmte ahi, Zebedi’ tapa James le Johan-te in zong lamdang a sa uh hi. Jesuh in Simon kiangah “Lau kei in. Tu a kipanin ngasa mat bangin mi tampi a huai pa na suak ding hi,” a ci hi. Tui gei-ah a gunkuangte uh a tunpih khit uh ciangin a na khempeuh uh nusia-in Jesuh a zui uh hi. Khatvei, khuasung khatah Jesuh a om laitakin tua khua sungah a pumtangin phaknatna a vei mi khat a om hi. A phakpa in Jesuh a muh ciangin a mai-ah bokin, “Topa aw, hong damsak nuam peuh lecin kei nong damsak thei ding hi,” ci-in a thum hi. Jesuh in zong a khut zanin amah lawng a, “Kong damsak nuam hi; dam ta in,” ci-in a dawng hi. Tua khit phetin a phaknatna a dampah hi. Tua ciangin Jesuh in ama kiangah, “Hih thu kuamah dang kiangah gen kei in. Siampipa kiangah paisuakpah inla kivelsak in. Tua ciangin na damna thu a kilat nadingin Moses thupiak mah bangin biakna pia in,” ci-in thu a pia hi. Ahi zongin Jesuh’ thu kitheithang semsem zawsop a, ama thu a ngai ding le a natna panun damna a ngah nadingun mi tampi tak a hong pai uh hi. Ahi zongin gamdaihna munah Jesuh paikhia-in thu a ngen hi. Khatvei, Jesuh in thu hilhin a om laitakin Galilee gam, Judea gam, le Jerusalem khua panin a hong pai Farisi mi pawlkhat le Thukham hilh siate pawlkhat hong om hi. Cina damsak theih nading Topa’ vangliatna, Jesuh tungah kipia hi. Mi pawlkhat in khutlekhezaw mi khat a lupna pheek tawh hong pua uh a, inn sungah paipihin Jesuh mai-ah koih ding a hanciam uh hi. Mihon tamlua ahih manin a lutpih nading uh lampi om lo hi. Tua ahih ciangin innkhum zangah kahpihto-in innkhum hong let uh a, mihonte’ lak, Jesuh’ omna mai sanah a lupna pheek tawh a khaisuk uh hi. Jesuh in amaute’ upna a muh ciangin a mipa kiangah, “Lawm aw, na mawhnate hong kimaisak khinta hi,” a ci hi. Tua ciangin Thukham hilh siate le Farisi mite in a lungsim sung uhah, “Hih bangin Pasian tawh a kikimin a pau ngam mipa kua ahi hiam? Mihing kuamah in mawhna maisak thei lo a, Pasian bek in maisak thei hi,” a ci uh hi. Jesuh in amaute’ ngaihsutna thei ahih manin amaute kiangah, “Bang hangin tua bangin ngaihsun na hi uh hiam? ‘Na mawhnate hong kimaisak hi,’ cih ding baihzaw ahi hiam, tua ahih kei leh, ‘Tho inla, lam pai in,’ cih ding baihzaw ahi hiam? Mihing Tapa in mawhna maisak theih nading leitungah vangliatna nei hi, ci-in na theih nadingun kong lak ding hi,” a ci hi. Tua ahih ciangin khutlekhezaw mipa kiangah, “Tho inla na lupna pheek pua-in na inn-ah ciah in,” a ci hi. Thakhat thu-in amaute khempeuh’ muhin a mipa zong tho-in a lupna pheek la a, Pasian phatkawmin a inn-ah a ciah hi. Tua ciangin amaute khempeuh in lamdangsa mahmah uh a, lau mahmah kawmin Pasian phatin, “Tuni-in a lamdang mahmah na khat i mu hi,” a ci uh hi. Tua khit ciangin Jesuh paikhia a, siahdongpa Levi, a zumah a tu a mu hi. Jesuh in, “Kei hong zui in,” a ci hi. Levi zong dingpah a, a na khempeuh nusia-in Jesuh a zui hi. Tua ciangin Levi in ama inn-ah Jesuh vakna annek pawipi bawl a, annekna sabuai-ah siahdong dang tampite le midangte zong tawh a tukhawm uh hi. Farisi mite le amau sung panin Thukham hilh siate, nungzuite tungah phun uh a, “Bang hangin siahdongte le thukham khial mite tawh an nekhawm na hi uh hiam?” a ci uh hi. Tua ciangin Jesuh in, “Cidamte in siavuan kisam lo uh a, cina mite bek in kisam uh hi. Mite in a zahtak mihoihte a kisik nadingun a sam dingin hong pai ka hi kei a, mite in a pampaih mite a kisik nadingun a sam dingin a hong pai ka hi hi,” ci-in a dawng hi. Tua ciangin amaute pawlkhat in Jesuh kiangah, “Johan’ nungzuite in an tangin thu ngen zelzel uh a, Farisi mite’ nungzuite zong tua bangmahin gamta napi-in, bang hangin nangma nungzuite in tang loin om se uh ahi hiam?” ci-in a dong uh hi. Jesuh in amaute kiangah, “Mopawi-ah zineipa le pawisimte a omkhawm laitakin a pawisimte an tangsak thei ding na hi uh hiam? Amaute kiang panin zineipa a kipaikhiatpih hun hong tung ding a, tua hun ciangin tang ding uh hi,” ci-in a dawng hi. Tua ciangin Jesuh in thugentehna dang khat zong gen a, “Mi khat in puan thak khat eukhia-in puan lui thuapna-in nei lo hi. Tua bangin hih leh a puan thak pen a keeksak suak ding a, a puan thak eukhiat zong a puan lui tawh etlawm lo ding hi. Kuamah in savun um lui sungah leenggahzu a thak thun ngei lo hi. Thun zenzen leh leenggahzu thak in a savun um phukham ding a, a leenggahzu bua-in, a savun um zong kisia ding hi. Tua ahih manin savun um thak sungah leenggahzu thak a kikoih ding ahi hi. Kuamah in leenggahzu lui a nek khit ciangin a thak nenuam nawn lo hi. Bang hang hiam cih leh amah in, ‘A lui khumzaw hi,’ ci hi,” a ci hi. Sabbath ni khatin mangbuh lo nawkin Jesuh le a nungzuite a pai uh hi. A nungzuite in mangbuhvuite zut uh a, a khutsung uhah nuai-in a ne uh hi. Amaute lakah a om Farisi mite pawlkhat in, “Sabbath ni-in i hih dingin a kilawm lo gamtatna bang hangin gamta na hi uh hiam?” a ci uh hi. Tua ciangin Jesuh in amaute kiangah, “David le a kikholhpihte a gilkial laitakun David’ gamtatna thu sim ngei lo na hi uh hiam? Pasian’ inn sungah amah lut a, siampite lobuang midangte’ nek ding ahi lo Ompihna Anlum la-in ne a, ama kikholhpihte zong a nesak hi,” ci-in a dawng hi. Tua ciangin Jesuh in, “Mihing Tapa pen Sabbath ni a Ukpa ahi hi,” ci-in a thugen a khum hi. Sabbath a ni dang khatin kikhopna inn khatah Jesuh pai-in thu a hilh hi. A khut taklam a zaw mi khat tua lai-ah na om hi. Thukham hilh siate le Farisi mite pawlkhat in Jesuh a mawhsak theih nading uh thu zong nuam uh ahih manin, Sabbath ni-in hih mipa a damsak hiam, ci-in na encik gige uh hi. Ahi zongin Jesuh in amau’ ngaihsutna thei ahih manin a khutzaw mipa kiangah, “Ding inla, mihonte mai hih lai munah hong pai in,” a ci hi. A mipa zong hong pai-in mihon mai-ah a hong ding hi. Tua ciangin Jesuh in amaute kiangah, “Note tungah thu khat kong dong nuam hi. Sabbath ni-in a pha bawl ding le a sia bawl ding koi kilawmzaw a, mi khat’ nuntakna suahtaksak ding le siatsak ding koi hoihzaw ahi hiam?” a ci hi. Amaute khempeuh a et kawikawi khit ciangin a mipa kiangah, “Na khut zan in,” a ci hi. Amah in zong a khut zan a, a ngeina bangin a khut hong damkik hi. Ahi zongin amaute heh mahmah uh a, Jesuh a suktheih nading uh khatlekhat a kikumpah uh hi. Ni khat, thungen dingin mualtungah Jesuh pai a, zan tawntung Pasian kiangah thu ngenin a om hi. Khua a vak ciangin a nungzuite sam a, amaute sung panin sawm le nih teelkhia-in sawltakte ci-in min a phuak hi. Tuate in: Simon (Peter ci-in min a phuah pa) le a naupa Andru, James le a nau Johan, Filip, Bartholomew, Matthai, Thomas, Alfeas’ tapa James, Simon (gam khual pa), James’ tapa Judas, le Jesuh a lehhek pa Iskariot’ tapa Judas ahi uh hi. Tua mualtung panin Jesuh le a nungzui teelte paisuk uh a, a nung a zui midang tampite tawh mun zang khatah a ding hi. Jerusalem khua le Judea gam khempeuh le tuipi gei-a om Taia khua le Sidon khuapite panin a hong pai mihon tampi zong hong om uh hi. Tua mite pen ama thuhilhna a ngai ding le a natna uh panin damna a ngahnop manun a hong pai uh ahi hi. Dawi a vei mite zong hong pai uh a, damna a ngah uh hi. Jesuh’ tung panin vangliatna paikhia-in mi khempeuh damsak ahih manin mi khempeuh in amah lawn’ ding a hanciam uh hi. Tua ciangin Jesuh in a nungzuite en a, “No mizawngte Pasian’ Ukna sungah om na hih manun thupha ngah mi na hi uh hi. Tuhunin a gilkial note nidang ciangin na gil uh a vah ding hi. Tuhunin a dah note nidang ciangin na nuam ding uh hi. “Mihing Tapa’ hangin mite in hong mudahin hong tuamkoih a, hong simmawhin migiloin hong seh ciangin thupha ngah na hi uh hi. Vantungah na thaman ding uh lian mahmah ahih manin tua bang na tuah uh ciangin nuamin lungdamin na diang un. Bang hang hiam cih leh a pu a pate un zong tua bangmahin kamsangte tungah a bawl uh hi. “Ahi zongin tuhunin a hau note in nopsakna ngahkhin na hih manun gimna na thuak ding uh hi. Tuhunin a gilvah note in gilkial gimna na thuak ding uh hi. Tuhunin a lungdam note dahin na kap ding uh hi. “Mi khempeuh in note hong pahtakbawl ciangin gimna a thuak ding na hi uh hi. Bang hang hiam cih leh a pu a pate un zong tua bangmahin kamsang zuaute a pahtakbawl uh hi. “Ahi zongin ka thugen a za note kiangah kong cihin-ah: Na galte uh na it unla, no hong mudah mite tungah a pha na bawl un. No hong phuisamte thupha na pia unla, no hong bawlsiate a’ ding thu na ngetsak un. Na paang langkhat a hong bengte, a langkhat zong na dawhlai un. Na puantungsilh uh a hong sutte tungah, na puansungsilh uh zong na piathuah lai un. A hong ngente peuhmah na pia unla, na na uh a hong laksakte tung panin lakik kei un. Note tungah a hong kibawl ding na deih uh bangin midangte tungah na bawl un. “No hong itte bek it le-uhcin bang hangin thupha ngah ding na hi uh hiam? Mawhnei mite nangawn in amau a itte a it uh hi. No tungah a hoihin a hong gamtate tung bekah a hoihin gamta le-uh cin bang hangin thupha ngah ding na hi uh hiam? Mawhneite nangawn tua bangmahin gamta uh hi. Ngahkik ding na lametna uh mite tung bekah leitawi na piak uhleh bang hangin thupha ngah ding na hi uh hiam? Mawhneite nangawn in zong a piakzah mah uh a ngahkik dingin khatlekhat kileitawi uh hi. Tua bang lelin note na gamta kei ding uh hi. Na galte uh itin amaute tungah thupha bawl unla, lohkik ding lamen loin leitawi pia un. Tua hileh na thaman uh lian ding a, a Lianpen Pasian’ tate na hi ding uh hi. Bang hang hiam cih leh lungdamna mel a theithei lo mite le a huaiham mite tungah amah migi hi. Tua ahih manin na Pa un hehpihna a neih bangin note in zong hehpihna lungsim nei ta un. “Midangte’ thu khen kei un. Tua hileh no tungah zong Pasian in thu hong khen lo ding hi. Midangte mawhsak kei un. Tua hileh Pasian in note zong hong mawhsak lo ding hi. Midangte’ mawhna maisak un. Tua hi leh Pasian in note’ mawhna zong hong maisak ding hi. Midangte tungah pia un. Tua hileh Pasian in note tungah zong hong pia ding hi. Bang hang hiam cih leh midangte na piakna uh tawh kizui-in a henhen, a tahtah, a dimletin Pasian in note tungah hong pia ding hi,” a ci hi. Tua ciangin Jesuh in amaute kiangah thugentehna khat zong gen a, “Mittaw khat in mittaw dang khat lam paipih thei lo hi. Paipih zenzen leh a nih tuakun hawkguamah kiakhawm ding uh hi. Sang naupang khat a siapa sangin lianzaw ngei lo hi; a sin ding khempeuh a theihkhit ciangin a siapa tawh kikim pan bek ding hi.” “Bang hangin na mit sungah singluang a tang phawkkha loin na lawmte’ mit sunga ninthem tang etsak na hi hiam? Na mit sunga singluang hong tang nangawn mu lo napi-in, ‘Lawm aw, na mit sunga ninthem tang hong lakkhiatsak ning,’ ci-in na lawmte kiangah bangci gentheih ding na hi hiam? No a kineihkhemte aw, na mit sung uha singluang tang lakhia masa le-uhcin, na lawmte uh mit sunga ninthem tang mu-in na lakhia thei pan ding uh hi.” “A cidam singkung in gah ginalo gah ngei lo a, a ginalo singkung in gah limci gah ngei lo hi. Singkung khempeuh a gah tawh kithei thei hi. Sialtalling kung panin theigah kilo ngei lo a, lingvom kung panin leenggah kilo ngei lo hi. Mihoih pa in a lungsim sunga thuhoih omteng hong suahkhia a, migilo pa in a lungsim sunga a gitlohna teng hong suahkhia hi. Bang hang hiam cih leh mite pen amau’ lungsim sunga a om bangbang a hong paukhia uh ahi hi. “Bang hangin, ‘Topa aw, Topa aw,’ hong ci napi-in ka hong gente zui lo na hi uh hiam? Ka kiangah hong pai a, ka thuhilhna za-in a zuite khempeuh pen kua tawh kibang hiam cih leh, suang tungah inn lamin, a khuamkua ding suangsung thukpi tak to-in a phut pa tawh kibang hi. Tui a khan ciangin tui in tua inn a nawk hangin limtakin kilam ahih manin susia zo lo hi. Ahi zongin ka thuhilhna za napi-in a zui lote pen bulkip a nei lo, leilak mawkmawkah inn a lam pa tawh kibang hi. Tuikhang in tua inn a nawk ciangin thakhat thu-in siagawppah a, tua inn pen naksiat mahmah hi,” a ci hi. Jesuh in mite kiangah a thugen dingteng a man khit ciangin Kapernaum khua-ah a pai hi. Tua khua sungah Rom mi galkapbu khat om a, tua bupa in a it mahmah nasem khat a nei hi. Tua a nasempa a ci na-in a si dektak hi. Tua bupa in Jesuh’ thu a zak ciangin, ama kiangah Jew mi upate pawlkhat sawl a, Jesuh hong pai-in a nasempa a damsak nading a thumsak hi. Jesuh kiangah Jew mi upate a tun uh ciangin nakpitakin thum uh a, “Amah na huh dingin a kilawm mahmah mi khat ahi hi. Amah in ei minam hong it mahmah a, kikhop nading inn khat zong hong lamsak hi,” a ci uh hi. Tua ahih manin Jesuh in zong amaute sapna bangin a va zui hi. Jesuh a tun madiakin galkap bupa in Jesuh kiangah a lawmte pawlkhat sawl a, “Topa aw, ka inn-ah nong pai nadingin kei kilawm zo lo ka hih manin hong pai dah hoh in. Nangmah tawh a kimu dingin zong kilawmzo kisa lo ka hih manin keima pumpi kong pai kei hi. Thu pia peuh lecin ka nasempa dam lel ding hi. Kei zong uliante’ khutnuai-ah hong kikoih mi khat ka hi a, keima khutnuai-ah zong galkapte a om hi. Khat kiangah, ‘Pai in,’ ci leng a pai hi. Khat kiangah, ‘Hong pai in,’ ci leng a hong pai hi. Ka nasempa kiangah, ‘Hih na sem in,’ ci leng zong sem hi,” a ci hi. Jesuh in hih thu a zak ciangin lamdangsa mahmah a, amah a zui mihonte lamah kihei-in, “Israel mite lak nangawnah hih bang upna ka mu nai kei hi,” a ci hi. A kamtaite, galkap bupa inn-ah hong tunkik ciangin a nasempa a na damsiang khinta hi. Tua khit a sawt loin Nain khua-ah Jesuh pai a, a nungzuite le mihonpite in zong a zui uh hi. Tua khua kulhkongpi a tun laitakun misi vui-a hong pai mihon tawh a kituak uh hi. A misi pen meigong khat’ tapa khat neihsun hi a, tua khuasung mihon tampite in tua si vuina-ah meigongnu hong zui uh hi. Topa in tua meigongnu a muh ciangin a khasiat suak a, “Kap kei in,” ci-in a khem hi. Tua ciangin pai-in a hankuang va len a, si puate zong a khawlpah uh hi. Tua ciangin Jesuh in, “Tangval aw, tho in, kong ci hi,” a ci hi. Misi pa zong hong tuto-in hong paupah hi. Tua ciangin Jesuh in a nu kiangah a ap hi. Amaute khempeuh in lamdangsa mahmah uh a, Pasian min phatin, “Eite lakah kamsang lian khat hong om khinta a, a mite a honkhia dingin Pasian hong pai khinta hi,” a ci uh hi. Hih Jesuh thu pen Judea gam sung le a kiim gam khempeuhah kizel hi. Johan’ nungzuite in hih Jesuh’ thu khempeuh Johan kiangah a gen uh hi. Johan in zong ama nungzuite nih sam a, Topa kiangah amaute paisakin, “Johan in hong pai ding a cih pa mah na hi hiam, tua ahih kei leh adang na lamen lai ding ka hi uh hiam?” ci-in a dong dingin a sawl hi. Jesuh kiangah amaute a tun uh ciangin, “‘Hong pai ding ka cih pa mah na hi hiam, tua ahih kei leh adang na lamen lai ding ka hi uh hiam?’ ci-in a dong dingin Tuiphumpa Johan in hong sawl hi,” a ci uh hi. Tua hun laitak mahmahin natna a tuamtuamte tampi damsakin, dawivei mite sung panin dawite hawlkhia a, mittaw mi tampi khua a musak hi. Tua ahih manin Johan’ kamtaite kiangah, “Va ciahkik unla, na muhsa uh le na zaksa uh thute khempeuh Johan kiangah va gen un. Mittawte in khua muthei a, khebaite lam paithei a, miphakte damkik a, bilngongte in khua zathei kik a, misite kihingsakkik a, mizawngte tungah Lungdamna Thu kihilh hi. Kei hong umte pen a lungdamhuai mahmah ahi hi,” ci-in a dawng hi. Johan’ kamtaite a ciahkik khit ciangin Jesuh in mihonte tungah Johan’ thu gen a, “Johan kiang gamlakah na pai uh ciangin bang a en dingin a pai na hi uh hiam? Huih in a mut awn diamdiam lopa kungte a en ding maw? Tua ahih kei leh bang a en dingin a pai na hi uh hiam? Puan hoihnono a silh mi khat a en ding maw? A taktakin ci lehang tua bangin puan hoih silh a, nuamtakin a omte pen inn lianpipi sungah teng uh hi. Tua ahihleh bang a en dingin a pai na hi uh hiam? Kamsangpa khat a en dingin a pai na hi uh hiam? Hi hi, kamsangpa a en dingin na pai uh a, kamsang ciang bek hi loin a lianzaw khat na mu uh hi. Bang hang hiam cih leh Lai Siangtho in Johan thu a genna-ah, ‘Hih lai-ah ka kamtai pa om hi. Nangma lampi a hong dingin na mai-ah ka mapaisak ding hi, ci-in Pasian in gen hi,’ ci-in kigelh hi. Johan pen leitung mihing sung khempeuh panin a lianpen ahi hi. Ahi zongin Pasian’ Ukna sunga a om mi a neupen i cihte nangawn Johan sangin lianzaw lai hi,” a ci hi. Siahdongte le midangte khempeuh in hih thu a zak uh ciangin Pasian’ deihna zui-in Johan’ khut sungah tui a kiphum uh hi. Ahi zongin Farisi mite le Thukham hilh siate in Pasian’ deihna nialin Johan khut sungah tui kiphum ding ut lo uh hi. Tua ciangin Jesuh in, “Tuhuna mite bang tawh genteh ding a, bang tawh kibang ci ding ka hi hiam? Mihon omna lamkabomah a tu naupang a kimawlte tawh kibang uh hi. Naupang honkhat in a lawmte kiangah, ‘Lam nading khuang kong tumsak hangun na lam nuam kei uh a, kahna la ka sak hangun lah na kap nuam tuan kei uh hi,’ a cihte tawh a kibang uh hi. Bang hang hiam cih leh Tuiphumpa Johan hong pai a, amah in zu le an tangin a om ciangin, ‘Dawivei hi,’ a ci uh hi. Mihing Tapa hong pai leuleu a, zune anne-in a om ciangin, ‘Zuhai, anhai pa, siahdongte le midangte in a kikholhpih nop loh mite tawh a kikhawlpa,’ ci leuleu uh hi. Ahi zongin Pasian’ pilna a man ahih lamtak, ama thu a zui mite in kilangsak hi,” a ci hi. Farisi mite khat in a inn-ah an ne dingin Jesuh sam a, Jesuh zong pai-in an ne dingin a tu hi. Tua khua sungah a paktat numei khat om hi. Farisi mipa’ inn-ah Jesuh in an ne-in a omna thu a zak ciangin paknamtui suangngo thawl a dim khat hong paipihin, Jesuh’ nungah tu-in kap a, a khitui tawh Jesuh’ khete kawtsakin a sam tawh nulsak a, a khete namin a sathau puak a nuh hi. Jesuh a sam Farisi mipa in a muh ciangin a lungsim sungah, “Hih pa pen kamsang taktak hileh amah a lawng hih numeinu a bangci mi ahi hiam cih thei ding a, ama gamtat hoih lohna teng zong thei ding hi,” a ci hi. Tua ciangin Jesuh in, “Simon aw, kong gennop khat om hi,” a ci hi. Simon in, “Sia aw, bang hong gennuam na hi hiam?” a cih ciangin Jesuh in, “Lei a ba mi nih om hi. Khat in ngun peek zanga ba a, a khat in sawmnga ba hi. Amau tegel in a loh zawh loh ciangin a batna pa un a nih tuakun a maisak hi. Hih mi nihte sung panin kua in amah itzaw ding ahi hiam?” a ci hi. Simon in, “Leiba tam a maisakna pa in itzaw dingin ka um hi,” ci-in a dawn ciangin Jesuh in, “Na genna man mahmah hi,” a ci hi. Tua ciangin numei lamah Jesuh kihei a, Simon kiangah, “Hih numei’ gamtatna na mu hiam? Na inn-ah kong pai a, ka khe sil nading tui nong pia kei hi. Ahi zongin amah in a khitui tawh ka khe hong silsak a, a sam tawh hong nulkeusak hi. Nang in napna tawh leengla na hong do kei a, ahi zongin amah in hih lai-ah kong tun a kipanin tu dongin ka khe a nap khawl nai lo hi. Nang in ka lu sathau nong nilhsak kei a, ahi zongin amah in ka khe nangawn sathau namtui hong nuhsak hi. Tua ahih ciangin nang kiangah kong genin-ah, ama mawhna tampi tak a omte kimaisak khin ahih manin amah in a itna nakpitakin a lak hi. Ahi zongin tawmno bek a kimaisakte in a itna uh tawmno bek mahin a lak uh hi,” a ci hi. Tua ciangin Jesuh in numei kiangah, “Na mawhnate hong kimaisak khin hi,” a ci hi. Tua ciangin Jesuh tawh sabuai-ah an a nekhawm midangte in a lungsim sung uhah, “Mawhna nangawn a maisak hih mipa kua ahi hiam?” a ci uh hi. Tua ciangin Jesuh in numei kiangah, “Na upna in nang hong damsak khinta hi; lungnuam takin va ciah in,” a ci hi. Tuazawh tawlkhat khit ciangin khuapite le khuaneute-ah a ban banin Jesuh pai a, Pasian’ Ukna hangin Lungdamna Thu hilhin a vak kawikawi hi. Tua a vak kawikawina-ah nungzui sawm le nihte, le a sungpan dawi a hawlkhiatsakte le natna tuamtuam pan a damsak numei pawlkhat in zong a zui uh hi. Tua numeite: A sung panin dawi sagih a kihawlkhiatna Mary (Magdala khuami Mary a kici nu), Herod’ khutnuai-a ulian Khuza’ zi Joanna, Susanna, le numei dang tampite hi uh a, amau’ neihsa tawh Jesuh le a nungzuite a huh uh hi. Khua khat khit khua khat panin Jesuh kiangah a hong pai mi hong kibehlaplap a, mi tampi tak hong om ciangin Jesuh in thugentehna khat gen a, “Khaici vawhpa khaici vawh dingin a kuankhia hi. Khaici a vawh ciangin pawlkhatte lampidung tu a, khe tawh kisik gawpin vasate in a ne hi. Pawlkhatte, suang kitawphahna leilak tu a, a po tei hangin leisung a nom tam lo ahih manin a vulkik pah hi. Pawlkhatte, lingbulsum omna leilak tu a, lingte a khan ciangin a deplum hi. Pawlkhatte, leihoihna lak tu-in khang a, a zah zakhat ciang dong a piang hi,” a ci hi. Tua ciangin Jesuh nakpitakin kiko a, “Zak nading bil a neite in hih thu za ta un,” ci-in a thugen a khum hi. Hih thugentehna bang a cihnopna ahi hiam, ci-in a nungzuite in a dot ciangin Jesuh in, “Pasian’ Ukna thu tawh kisai thusim, note tungah hong kigen hi. Ahi zongin midangte in, en en napi-un a muh loh nading za za napi-un a tel loh nadingun amaute tungah thugentehna tawh thu kigen hi,” a ci hi. Tua ciangin Jesuh in, “Thugentehna a khiatna pen hih bang ahi hi: Khaici pen Pasian’ thu hi. Lamdungah khaici a tukna munte pen Pasian’ thu a zate a cihnopna ahi hi. Tuate in Pasian’ thu a zak hangun a thu um loin, hotkhiatna a ngah loh nadingun Dawimangpa hong pai-in a lakkhiatsak hi. Suang kitawphah leilak a tukna munte pen Pasian’ thu a zak ciangin lungdam takin a sangte a cihna ahi hi. Ahi zongin amaute sungah thuktum lo ahih manin tawlkhat sung bek um uh a, ze-etna hun a tun ciangin a puk uh hi. Lingbulsum omna a tukna munte pen Pasian’ thu za napi-in a nuntakna sung uhah leitung lunghihmawhna, hauhna, le nopsaknate in depgawp ahih manin bangmah a suakkhia zo lote a cihnopna ahi hi. Leihoih a tukna munte pen Pasian’ thu a zak ciangin lungsimtak tawh a thu mangin kip tawntung uh ahih manin amau a dingin man a neite a cihnopna ahi hi,” a ci hi. Tua ciangin Jesuh in, “Mei a vak khit ciangin lawh a khuh ahi a, lupna nuai-ah a koih ahi zongin kuamah om lo hi. Innsungah a lut uh ciangin mite in khua a muhtheih nadingin meivak koihna kho sangah koih bek uh hi. Bang hang hiam cih leh, thusimin a kikoih peuhmah, khatvei teitei thulang a suak lo ding, a kiselcip peuhmah, khatvei teitei a kipholak lo ding, bangmah om lo hi. Tua ahih ciangin thu na ngaih uh ciangin limtakin kingaihsun un. Bang hang hiam cih leh a neisa mipa tungah Pasian in piathuah ding a, a nei lo mipa tung panin themkhat nei-a a kingaihsut nangawn lakkhiatsak ding hi,” a ci hi. Tua laitakin Jesuh’ nu le a naute hong pai uh a, ahi zongin mihon kinehlua uh ahih manin ama kiangah pai thei lo uh hi. Tua ahih manin mi khat in Jesuh kiangah, “Na nu le na naute in nang hong munuam uh a, innpua-ah om uh hi,” a ci hi. Tua ciangin Jesuh in a dawnna-in mihon khempeuh tungah, “Pasian’ thu za a, a zuite khempeuh pen ka nu le ka sanggamte ahi hi,” a ci hi. Nikhat, Jesuh a nungzuite tawh gunkuang tungah tuang a, amaute kiangah, “Tuili galkhatah pai ni,” ci-in a pai uh hi. Tua bangin a pai laitakun Jesuh a ihmu hi. Tui tungah nakpitakin huihpi hong nungin gunkuang sungah tui dim dingin hong kipan a, lauhuai mahmah hi. Nungzuite in Jesuh hong naihin phong uh a, “Topa aw, Topa aw, kote ka si dektak uh hi,” a ci uh hi. Jesuh zong tho-in huihpi le tui kilok a daih nadingin thu pia a, a thupiak bangin hong dai dide pah hi. Tua ciangin Jesuh in a nungzuite kiangah, “Na upna uh koi-ah om khinta ahi hiam?” a ci hi. Ahi zongin amaute lau-in lamdangsa uh a, khatlekhat in, “Hih pa kua ahi hiam? Thu a piak ciangin huihpi le tuihualte nangawn in a thu mang uh hi,” a kici uh hi. Tua ciangin Galilee Tuili galkhat, Gadara gam a tung uh hi. Gunkuang tung panin leilakah Jesuh hong paisuk laitakin tua khuasunga om dawivei mi khat in a na dawn hi. Tua dawivei pa pen sauveipi sung puan silhloin omkhin a, inn-ah zong om loin han lak khawngah om tawntung hi. Jesuh a muh ciangin nakpitakin awngin a mai-ah khukdin a, “A Lian Pasian’ Tapa Jesuh aw, kei bang hong nuammawh na hi hiam? Kei, gim nong piak loh nadingin ka hong thum hi,” ci-in nakpitakin a kiko hi. Hih bangin a cihna pen, ama sung panin dawi a paikhiat nadingin Jesuh in thu a piakna hang ahi hi. Dawi in tua mipa tamveipi tak man a, a khut le a khete sikkhau tawh khihin a kikepcip hangin a sikkhaute peksat a, dawi in gamlakah a paikhiatpih hi. Jesuh in ama kiangah, “Na min bang ahi hiam?” ci-in a dot ciangin, ama sungah dawi tampi lut ahih manin, “A Honpi,” ci-in a dawng hi. Leihawm thukpi sungah amaute a khiat loh nadingin Jesuh kiangah a thum uh hi. Tua laitakin tua kiim mualpang to-ah vok honpi khat gamta-in a om hi. Tua vokte sungah a luttheih nadingun dawite in Jesuh kiangah thum uh a, Jesuh in zong amau’ ngetna bangin a pia hi. Tua ahih manin dawite zong mipa sung panin paikhia-in vokte sungah lut uh a, vokte zong tui gei keen tung khawngah tuaksuk gawpin a vekpi-in tui a kia hi. Vokcingte in hih thupiang a muh uh ciangin amaute tai-in khuasung le gam sung tengah a zasak uh hi. Hih thupiang a en dingin mite hong pai uh a, Jesuh kiang a tun uh ciangin dawi a paikhiatna mipa Jesuh kiangah omin, puan silhin, a pilkikna thu a muh uh ciangin a vekpi-un lamdangsa-in a lau uh hi. Tua thupiang a mu masa mite in dawivei pa a damnazia thute, amaute tungah a na gen uh hi. Tua ciangin Gadara gam kiima om khempeuh lau mahmah uh ahih manin Jesuh a paikhiat nadingin a sawl uh hi. Jesuh zong gunkuang tungah tuangin a ciah hi. Dawi a paikhiatna mipa in Jesuh kiangah, “Kei zong hong zuisak in,” ci-in a thum hi; ahi zongin Jesuh in, “Na inn-ah ciah inla, Pasian in nang a dingin bangzah takin na hong sepsak hiam, cihna thu va gen in,” ci-in a sawlkhia hi. A mipa zong ciah a, ama a dingin Jesuh’ sepsakna thu khempeuh, khuasung tengah a gengen hi. Tuili galkhatah Jesuh hong ciahkik ciangin, ama hong ciahkik ding ngakin om niloh uh ahih manin mite na nuam mahmah uh hi. Tua laitakin kikhopna inn ukpi Jairas a kici mi khat hong pai-in Jesuh’ khe phungah hong khukdin a, ama inn-ah a pai nadingin a thum hi. Bang hang hiam cih leh kum sawm le nih a pha tanu khat a neihsun pen a ci na-in a si dektak hi. Jesuh zong tua inn zuan dingin a pai laitakin mihonpite in zui-in a nehcip uh hi. Tua laitakin kum sawm le nih tawntung siluang natna vei-in, a neih khempeuh siavuante cialna-in a zat hangin kuamah in a damsak zawh loh numei khat, mihonte lak Jesuh nungah hong pai-in Jesuh’ puanmongteep lawngsim a, thakhatin a siluang a kangpah hi. Tua ciangin Jesuh in, “Kua in hong lawng na hi uh hiam?” a ci hi. Kuamah in, “Hong lawng ing,” a cih loh ciangin Peter in, “Topa aw, mi khempeuh in nang hong umcihin hong nehcip uh hi,” a ci hi. Ahi zongin Jesuh in, “Ka sung panin vangliatna a paikhiat lamtak phawk ka hih manin mi khat in hong lawng hi,” a ci hi. Numei in amah a kiphawkna thu a theih ciangin a lingsa-in hong pai-in Jesuh mai-ah hong bok a, Jesuh a lawnna thu le amah a dampahna thuteng, tua lai-a om mi khempeuh’ zakin Jesuh kiangah a pulak hi. Tua ciangin Jesuh in numei kiangah, “Ka tanu aw, na upna in nang hong damsakzo hi; lungnuam takin na ciah in,” a ci hi. Tua bangin thu a gen laitakin kikhopna inn ukpa’ inn panin kamtai khat hong tung a, “Na tanu si khinzo ta hi. Siapa gimsak nawn kei in,” a hong ci hi. Ahi zongin Jesuh in hih thu a zak ciangin, kikhopna inn ukpa kiangah, “Lunghimawh kei in; upna nei peuh lecin na tanu a hingkik ding hi,” a ci hi. Tua inn-ah Jesuh a tun ciangin Peter, Johan, le James le numeino’ nu le pa simloh kuamah dang, inn sungah zuisak lo hi. Tua lai-a om mi khempeuh, tua numeino’ sihna hangin kapin, thumin na om uh hi. Ahi zongin Jesuh in, “Kap nawn kei un, amah a si hi lo hi; a ihmu bek ahi hi,” a ci hi. Amah a sihkhitna thei uh ahih manin Jesuh a nuihsan lel uh hi. Ahi zongin Jesuh in numeino a khutin lenin, “Numeino aw, tho in,” a ci hi. Numeino zong hingkik a, thakhatin a thopah hi. Tua ciangin numeino’ nek ding an pia un, ci-in Jesuh in a sawl hi. Numeino’ nu le pa in lamdangsa mahmah uh a, ahi zongin hih thupiangte kuama kiangah a gen loh nadingun Jesuh in a kham hi. Tua ciangin Jesuh in nungzui sawm le nihte sam a, dawite a hawlkhiat theih nading uh le cinate a damsak theih nadingun vangliatna le aana a pia hi. Tua ciangin Pasian’ Ukna thu a hilh ding le cinatnate a damsak dingin kuankhia sakin amaute kiangah, “Tu-a na khualzinna uhah bangmah keng kei un. Ciangkhut ahi a, ip ahi a, an ahi a, sum ahi zongin keng kei unla, puan-ak zong a valin kengthuah kei un. Khua khatpeuhah na lut uh ciangin tua khua panin na paikhiat matengun a inn-ah hong tungsakte’ inn mahah om paisuak un. A inn uhah a hong tunsak nop lohna khua peuhpeuh panin na paikhiat uh ciangin amaute hilhkholhna-in na khe uha leivui bangte sinsan un,” ci-in a vaikhak hi. Nungzuite zong kuankhia uh a, khua khempeuhah pai-in Lungdamna Thu hilh uh a, a paina khempeuh uhah cinate a damsak uh hi. Galilee gam sungteng a uk Herod in hih thupiangte a zak ciangin lungmang mahmah hi. Bang hang hiam cih leh mi pawlkhat in, “Johan hong hingkik hi,” ci uh hi. Pawlkhat in, “Elijah hong kilangkik hi,” ci uh a, pawlkhat in, “Tanglai kamsangte khat hong hingkik hi,” a ci uh hi. Herod in, “Johan a ngawng ka tansak khitsa ahi hi; hih a thu ka zak mipa kua hi ding ahi hiam?” a ci hi. Tua ahih manin Jesuh tawh kimuh ding a hanciam hi. Sawltakte a khualzinna panun a hong tunkik uh ciangin a sepna teng uh Jesuh kiangah a gen uh hi. Jesuh in zong amauteng bek a om theih nadingun amaute samkhia a, Bethsaida khua lamah a paipih hi. Mihonte in hih thu a theih uh ciangin Jesuh nungdelh uh a, Jesuh in zong amaute na nolh loin, amaute tungah Pasian’ Ukna thu na hilh a, natna a neite zong a damsak hi. Ni a tum kuan ciangin nungzui sawm le nihte in Jesuh kiangah, “Hih lai mun gamlak ahih manin, hih kiima om khuate-ah mite va pai-in annek ding le giah nading a zon nadingun mihonte sawlkhia in,” a ci uh hi. Ahi zongin Jesuh in amaute kiangah, “A nek dingun nektheih khat peuhpeuh pia un,” a cih ciangin amaute in, “Kote va pai-in hih mi khempeuhte a dingin an va lei ding ka hih kei buang uhleh, anlum nga le ngasa tawn nih cih simloh bangmah dang om lo hi,” ci-in a dawng uh hi. Tua lai-ah mi tulnga bang a om hi. Tua ciangin Jesuh in a nungzuite kiangah, “Mite sawmnga, sawmnga-in a pawlpawlin tusak un,” ci-in a sawl hi. A nungzuite in zong tua a sawl mah bangin mite a tusak uh hi. Tua ciangin Jesuh in anlum nga le ngasa tawn nih la-in vantung lam nga a, Pasian tungah lungdamna ko-in balnen a, mite tungah a lui dingin a nungzuite tungah a pia hi. Mi khempeuh in ne-in a khamkhit uh ciangin, a nungzuite in a kikhamval teng khawm uh a, paipel sawm le nih a dim hi. Khatvei, Jesuh guak thungenin a om laitakin a nungzuite zong ama kiangah om uh hi. Jesuh in a nungzuite kiangah, “Mite in kei kua hi, hong ci uh ahi hiam?” ci-in a dong hi. Amaute in, “Pawlkhat in, Tuiphumpa Johan hi, hong ci uh hi. Pawlkhat in Elijah hi, hong ci uh a, pawlkhat in, tanglai kamsangte khat peuhpeuh hong hingkik hi ding hi, hong ci uh hi,” ci-in a dawng uh hi. Tua ciangin Jesuh in, “Tua ahihleh note in kei kua hi, hong ci na hi uh hiam?” ci-in a dong hi. Tua ciangin Peter in, “Nang pen Pasian’ Khrih na hi hi,” ci-in a dawng hi. Tua ciangin Jesuh in, “Hih thu kuama kiangah gen kei un,” ci-in a nungzuite thu a pia hi. Tua ciangin Jesuh in a nungzuite kiangah, “Mihing Tapa in tampi tak thuak ding a, upate, siampi liante, le Thukham hilh siate in amah nial ding uh hi. Amah kithat ding a, a ni thum ni-in kihing kiksak ding hi,” a ci hi. Tua ciangin Jesuh in a nungzuite le mi khempeuh kiangah, “Mi khatpeuh in kei hong zuihnop leh ama deihna bangin gamta nawn loin nisimin a singlamteh pua-in hong zui ding hi. Hih leitung nuntakna a hu nuamte in a nuntakna bulpi nangawn tawh suplawh ding a, kei’ hangin a nuntakna a suplawhte in a nuntakna bulpi hu zo ding hi. Mi khat in leitung khempeuh a ngah hangin a nuntakna bulpi suplawh leh bang phattuamna om ding ahi hiam? Keima hang le ka thuhilhnate hangin a maizum peuhmah, a Pa’ minthanna vang le a siangtho vantung mite’ minthanna tawh a minthangin hong paikik ciangin Mihing Tapa zong ama hangin a maizum ding hi. Ke’n kong cihin-ah, hih lai-ah a om mi pawlkhatte in Pasian’ Ukna a muh khit uh matengin si lo ding uh ahihna phawk un,” a ci hi. Hih thu a genkhit nipikal khat bang khit ciangin Jesuh in Peter, Johan, le James te sam a, mualtungah thungen dingin a paipihto hi. Jesuh in thu a nget laitakin a mel hong kikheel a, a puante zong pakin tee mahmah hi. Thakhat thu-in mihing nih tawh a kiho-in hong omvat hi. Tua mi nihte pen Moses le Elijah hi a, vantung minthanna vang lim nei uh a, Jerusalem khua-ah pai-in sihna tawh Pasian’ deihna a tunsak nading thu a kikumkum uh ahi hi. Peter le a lawm tegel lusu-in ihmu uh a, ahi zongin amaute hong khanglo-in, Jesuh’ minthanna vang le amah tawh a dingkhawm mi nihte a mu uh hi. A mite, Jesuh kiang panin a paikhiat laitakin Peter in bang gen ka hi hiam, cih mel zong a thei lopi-in Jesuh kiangah, “Topa aw, hih lai-a i om, nuam mahmah hi. Nang a’ ding buk khat, Moses a’ ding buk khat, Elijah a’ ding buk khat, buk thum kong lamsak ding uh hi,” a ci hi. Hih bangin thu a gen laitakin meii hong kai a, a liim in amaute hong liah hi. Meii in a tuamcip ciangin nungzuite a lau uh hi. Tua ciangin meii lakah aw khat hong ging a, “Hih pa, ka Teelsa ka Tapa ahi hi; ama thu na ngai un,” a ci hi. Tua awging a bei khit ciangin Jesuh guak bek hong om hi. Nungzuite in hih a muhsa uh thu tua hun sawngteng kuama kiangah gen loin a imcip uh hi. A zing ciangin mualtung panin hong paisuk uh a, mi tampi in Jesuh na dawn uh hi. Mihon lak panin mi khat hong kiko a, “Sia aw, ka tapa nong etsak nadingin kong thum hi. Amah bek ta a ka neih ahi hi. Dawi in amah man a, thakhat thu-in kikogawp hi. A cilphuan a buak dongin kongkawcipsak a, gimsak gawp a, nusia nuam lo hi. Na nungzuite in a dawi hong hawlkhiatsak nading uh ka thum a, ahi zongin hong hawlkhiatsak thei lo uh hi,” a ci hi. Jesuh in, “Note in bangzahin upna nei lo a, bangzahin khial na hi uh hiam? Note bang tanvei hong ompih ding a, bang tanvei hong kikholhpih ding ka hi hiam?” a ci hi. Tua ciangin a mipa kiangah, “Na tapa hong paipih in,” ci-in a dawng hi. A naupang hong pai laitakin dawi in leilakah tuksakin a kongkawcipsak hi. Ahi zongin Jesuh in a dawi taii a, naupang damsakin, a pa kiangah a piakik hi. Hih bangin Pasian a vang a liatna hangin mi khempeuh in lamdang a sa uh hi. Mite in Jesuh’ hihnate khempeuh lamdangsa-in a om laitakin Jesuh in a nungzuite kiangah, “Mihingte’ khut sungah Mihing Tapa kipia ding ahihna thu mangngilh het kei un,” a ci hi. Ahi zongin amaute in a cihnopna thei lo uh hi. Amaute in a theihtel loh nading mahun a kibawl hi a, bang a cihnopna hiam, ci-in Jesuh kiangah lah a dong ngam kei uh hi. Kua lianpen ding ihi hiam, ci-in nungzuite lakah kiselna khat hong om hi. Jesuh in amaute’ lungsim ngaihsutna a phawk ciangin naupang khat la-in a gei-ah omsak a, a nungzuite kiangah, “Keima hangin hih naupang a limbawl mi peuhmah in kei hong limbawl hi a, kei hong limbawl mi peuhmah in kei hong sawl pa zong a limbawl ahi hi. Note khempeuh lakah a neupen pa a lianpen pa ahi hi,” a ci hi. Tua ciangin Johan in, “Topa aw, nangma min tawh dawi a hawlkhia mi khat ka mu uh a, amah pen eima pawl sungah a om hi lo ahih manin ka kham uh hi,” a hong ci hi. Ahi zongin Jesuh in ama kiangah, “No hong langpang lote note’ pawl ahih manin kham kei un,” a ci hi. Jesuh vantungah a kilaktoh ding hun a nai kuan ciangin Jerusalem khua manawh dingin a ngaihsun hi. Ama mai-ah nungzui pawlkhat mapaisak a, Jesuh a dingin a kisam khempeuh a vaihawmsak dingin Samaria khua khatah a lut uh hi. Ahi zongin Jesuh in Jerusalem khua manawh sawm ahih manin tua khuamite in Jesuh na tungsak nuam lo uh hi. A nungzuite sung pan James le Johan in hih thu a theih uh ciangin Jesuh kiangah, “Topa aw, vantung panin meikuang ngenin amaute kangtumsak le ung nong awi hiam?” a ci uh hi. Ahi zongin Jesuh kihei-in amaute a taii hi. Tua ciangin khua dang khatah a paisuak uh hi. Lampi-ah a pai laitakun mi khat in Jesuh kiangah, “Na paina khempeuhah kong zui ding hi,” a ci hi. Jesuh in, “Ngiate in lup nading kua nei uh a, vasate in zong giah nading bu nei uh hi. Ahi zongin Mihing Tapa in a luptheih nading mun koimahah nei lo hi,” a ci hi. Tua ciangin Jesuh in midang khat kiangah, “Kei hong zui in,” a ci hi. Ahi zongin amah in, “Topa aw, kei hong ciahsak inla, ka pa hong vuisak masa in,” a ci hi. Ahi zongin Jesuh in, “Misi bang ahi mite in misite na vui tahen. Nang ahihleh va pai inla Pasian’ Ukna thu va hilh in,” a ci hi. Tua ciangin midang khat in, “Topa aw, nang ka hong zui ding hi. Ahi zongin ka inn-ate, mangpha hong khasak masa in,” a ci hi. Jesuh in ama kiangah, “Bawng lokhawhna lenkawmin a nunglam a en mi pen Pasian’ Ukna tawh kituak lo hi,” ci-in a dawng hi. Tua khit ciangin Jesuh in ama pai nading khua le mun khempeuhah nih nihin a na pai dingin mi sawmsagih seh a, ama mai-ah a mapaisak hi. Amaute kiangah, “Anlak ding tam mahmah a, ahi zongin mi tawm bek in anlak na sem uh hi. Tua ahih manin an nei pa in a ante a la dingin mi hong sawl nadingin thu ngen un. Note va kuan un. Ngiahon lakah tuuno khah bangin note ka hong sawl hi. Sum ahi a, ip ahi a, khedap a val ahi zongin keng kei un. Lamkalah mi tawh kimawk hoho kei un. Inn khat peuhpeuhah na lut uh ciangin, ‘Hih inn-ah nopsakna hong tung ta hen,’ ci-in hopih masa un. Tua inn sungah nopsakna a ngahthei ding mi a om leh kip paisuak ding a, a om kei leh na hopihna thupha uh na dokkik ding uh hi. Nasemte in a thaman a ngah ding a kilawm ahih mah bangin na zintunna inn mah uhah omsuak unla, a hong piak peuhpeuh uh na ne un. Na zintunna inn uh kheel themthum kei un. Khua khat peuhpeuhah na lut uh ciangin note hong tunsak leh, amaute’ hong lui peuhpeuh ne unla, tua khuasunga cinate damsak un. A khuamite kiangah, ‘Pasian’ Uk nading hun note a dingin hong naita hi,’ ci-in gen un. Ahi zongin khua khat peuhpeuhah na lut uh ciangin note hong tunsaknop kei leh a khuasung kongzingah pai unla, ‘Na khuasung uha leivui, ka khe tung uhah a hong bangte nangawn, note hilhkholhna-in ka nulkhia uh hi. Ahi zongin Pasian’ Uk nading hun a hong naina thu thei ta un,’ ci-in gen un. Ke’n kong cihin-ah, Thukhen Ni ciangin Sodom khuamite’ thuak ding sangin tua khuamite’ thuak ding haksazaw lai ding hi,” a ci hi. Tua ciangin Jesuh in, “Khorazin khuapi mite le Bethsaida khuapi mite aw, gimna lianpi na thuak ding uh hi. Bang hang hiam cih leh note khua sungah a hong kilak na lamdangte, Taia le Sidon khua sungah kilak hileh amaute in kisikna limin sawtpekin puanhampi silhin vut kinuh ding uh hi. Tua ahih manin Thukhen Ni ciangin Taia le Sidon khuapi mite’ thuak ding sangin note’ thuak ding haksazaw lai ding hi. No Kapernaum khuapi mite aw, van a sangna munah hong kipahtawi ding sa na hi uh hiam? Hell khuk sungah hong kilawnsuk ding hi,” a ci hi. Tua ciangin Jesuh in a nungzuite kiangah, “Note’ thu a hong zuite khempeuh, kei’ thu a hong zui hi a, note’ thu a hong zui lote khempeuh, kei’ thu a hong zui lo ahi uh hi. Kei’ thu a hong zui lote khempeuh pen kei a hong sawl pa’ thu a zui lo ahi uh hi,” a ci hi. Sawmsagihte lungdam mahmahin hong ciahkik uh a, “Topa aw, nangma min tawh dawite nangawn ka hawlkhiazo uh hi,” a hong ci uh hi. Jesuh in amaute kiangah, “Vantung panin keekkia bangin Satan a kiatna ka mu hi. Tu-in thei un. Gulpi le momaite na sikgawp nading uh le na galte uh na zawh nadingun note tungah vangliatna ka hong piazo a, amaute in note bangmah hong cih zo lo ding uh hi. Ahi zongin dawite in na thu uh hong manna hangin lungdam kei unla, vantungah na min uh a kigelh manin lungdamzaw un,” a ci hi. Tua laitakin Kha Siangtho in lungdamna tawh Jesuh kidimsak hi. Jesuh in, “Vantung le leitung Topa ahi ka Pa aw, mipilte le misiamte tungah na ip thute, bangmah a thei lo hih mite tungah lak na hih manin ka nuam hi. Bang hang hiam cih leh hih thu pen nangma deihna bang ahi hi,” a ci hi. Tua ciangin Jesuh in amaute kiangah, “Hih nate khempeuh ka Pa in kei tungah hong ap khinzo hi. Pasian simloh, Tapa a thei kuamah om lo hi. Tapa le Tapa in a theihsaknop mite simloh, Pa a thei kuamah om lo hi,” a ci hi. Tua ciangin nungzuite lamah kihei a, “Tu-a na muh uh nate na muh manun a hampha mahmah na hi uh hi. Ke’n kong cihin-ah, kamsang tampite le kumpi tampite in tu-a note’ muhte a muhnop uh hangin mu ngei lo uh a, a zaknop uh hangin za ngei lo uh hi,” ci-in a tuamin a gen hi. Jesuh a ze-et dingin Thukham hilh siate khat hong ding a, “Sia aw, nuntak tawntungna ka ngahtheih nadingin bang sem ding ka hi hiam?” ci-in a dong hi. Jesuh in, “Thukham sungah bang kigelh a, bang sim na hi hiam?” a ci hi. Amah in, “Na Topa Pasian na lungsim khempeuh, na nuntakna khempeuh, na hatna khempeuh, le na pilna khempeuh tawh na it inla, nangmah na ki-it bangin na vengte na it in,” ci-in kigelh hi, ci-in a dawng hi. Tua ciangin Jesuh in, “Na dawnna man mahmah hi. Tua bangin gamta lecin nuntak tawntungna na ngah ding hi,” a ci hi. Ahi zongin Thukham hilh siapa amah kitangsak nuam ahih manin Jesuh kiangah, “Ka vengte i cih kuate ahi hiam?” ci-in a dong hi. Jesuh in dawng a, “Jerusalem panin Jerikho khua-ah mi khat paisuk a, lamkalah migilote in na suam a, a neih khempeuh laksakin a satgawp khit uh ciangin nusia uh a, a si dektaksa-in a paisan uh hi. Tua laitakin siampi khat tua lampi tawnin hong paisuk a, amah a muh ciangin lamnawl lam tawnin a paisan hi. Tua ciangin Levi mi khat zong tua mah bangin hong pai a, amah a muh ciangin lamnawl lam tawnin a paisan leuleu hi. Ahi zongin Samaria mi khualzin khat, tua lai mun hong tungin a liam pa a muh ciangin hehpihhuaisa a, a kiangah va pai-in a liammate sathau le leenggahzu a nuhsak khit ciangin a tunsak hi. Tua ciangin a la tungah tuangsak a, zintun inn khatah paipihin tua lai-ah a khoi hi. A zingsang ciangin zintun inn nei pa kiangah sum peek nih pia a, ‘Hih mipa limtakin na khoi in. Na beina dang khempeuh, kong paikik ciangin kong loh ding hi,’ ci hi. Hih mihing thumte sung panin, a kisuampa a dingin a koi pen a vengpa hi dingin na um hiam?” a ci hi. Amah in, “A hehpih pa hi ding hi,” a ci hi. Tua ciangin Jesuh in ama kiangah, “Nang zong pai inla, tua bangmahin gamta in,” a ci hi. Amaute a pai laitakun khua khatah Jesuh bang a, Martha kici numei khat in a inn-ah na tungsak hi. Martha in Mary kici nau numei khat nei a, Topa’ thugente ngai-in Mary a om hi. Martha bek in na semin manlah mahmah ahih manin a heh suak a, “Topa aw, ka naunu in kei bek na hong sepsak niloh phamawh sa lo na hi hiam? Kei hong huh nadingin hong sawl in,” a ci hi. Ahi zongin Topa in, “Martha, Martha aw, nang na lunghihmawhna tam hi. Ahi zongin a kisam taktak khat bek om a, Mary in tua a kisam na pen a semsem ahih manin, a nasep kikhawlsak lo ding hi,” ci-in a dawng hi. Khat vei, Jesuh in mun khatah thu a ngen hi. A thunget a mankhit ciangin a nungzuite khat in, “Topa aw, Johan in a nungzuite a hilh bangin kote zong thungetzia hong hilh in,” a ci hi. Jesuh in amaute kiangah, “Hih bangin na ngen ding uh hi: ‘Pa aw, na min siangtho kizahtak hen la, na Ukna hun hong tung tahen. Nisim khamkhop an hong pia in. Kote tungah a hong mawhte mawh maisakna ka neih bangun ko’ mawhna zong hong maisak in. Ze-etna lian hong thuaksak ke’n,’ ci-in na ngen ding uh hi,” a ci hi. Tua ciangin Jesuh in a nungzuite kiangah, “Note khatpeuh, na lawmte uh khat inn-ah zankim laitakin pai-in, ‘Lawm aw, anlum lum thum khawng hong leitawi sak in. Ka lawmte khat zin hong tung a, ka piak ding ka nei het kei hi,’ ci le-uhcin, amah in a innsung panin, ‘Hong nawngkaisak dah in. Kong ka kalhkhin uh a, ka naupangte tawh ka lum khinzo uh hi. Kong thokhia thei kei a, bangmah kong pia thei kei ding hi,’ ci-in hong dawng ding hi. Tua ahihleh ke’n kong cihin-ah, a lawm ahihna hangin amah tho tuan loin bangmah a piak loh hangin, a nget teiteina hangin amah tho-in a kisapna teng a pia ding hi. Tua ahih manin note kiangah kong cihin-ah: Ngen un; na ngah ding uh hi. Zong un; na mu ding uh hi. Kiu un; kongkhak hong kihon ding hi. Bang hang hiam cih leh a ngente khempeuh in ngah ding a, a zongte khempeuh in mu ding a, a kiute khempeuh a dingin kong kihon ding hi. Note lakah pa ahi mi khatpeuh in, a tapa in ngasa ngen leh ngasa tangin gul a pia ding, aktui ngen leh aktui tangin momai a pia ding kua om na hi uh hiam? Note mihoih lo hinapi-in na tate uh tungah a hoih piak ding theithei na hih uhleh, vantung a om na Pa un a ngente tungah Kha Siangtho piazaw kan ding hi lo ahi hiam?” a ci hi. Jesuh in a pau thei lo mi khat sung panin dawi hawlkhia a, dawi a paikhiat khit ciangin a mipa pauthei a, mite in lamdang a sa mahmah uh hi. Ahi zongin mi pawlkhat in, “Dawimangpa Beelzebul in dawi hawlkhiat theih nading vangliatna ama tungah a pia ahi hi,” a ci uh hi. Mi pawlkhat leuleu in amah a ze-etna-in, Pasian’ thukimpihna a kilat nadingin nalamdang a bawl ding a ngen uh hi. Ahi zongin Jesuh in amaute’ ngaihsutna thei ahih manin, “Gam khat peuhpeuh, a gammite kiphelkhamin pawlkhat le pawlkhat kido le-uh tua gam sauvei kip lo ding a, innkuan khat peuhpeuh a mite kiphelkhamin kido le-uh kikhenthang ding uh hi. Tua mah bangin Satan ukna sunga om mite zong khatlekhat kido le-uh a ukna bangci kip ding ahi hiam? Kei pen, Beelzebul’ vangliatna tawh dawi hawlkhia hi, nong ci uh hi. Ke’n Beelzebul’ vangliatna tawh dawi hawlkhia ka hih leh, na mipihte un kua’ vangliatna tawh hawlkhia ahi uh hiam? Na ngaihsut khialhna uh amaute in hong langsak ding hi. Note’ ngaihsut bang hi loin, ke’n Pasian’ vangliatna tawh dawite hawlkhia ka hih manin, note kiangah Pasian’ Ukna hun hong tungta ahihna phawk un. “Mi thahat khat in a hiam neih khempeuh tawh ama inn a cin ciangin a neihsa khempeuh suakta hi. Ahi zongin amah sangin a hatzaw mi khat in amah simin a zawhgawp khit ciangin, ama muan a hiam khempeuh laksakin a pawlte tawh a hawm hi. Kei hong pawlpih lo peuhmah keima lang hi uh a, tuute hong kaihkhoppih lo peuhmah tuute a thehthang gawpte ahi uh hi,” a ci hi. Tua ciangin Jesuh in, “Mi khatpeuh sung panin dawi a kihawlkhiat khit ciangin a ten nading mun keuna zongin a vak kawikawi hi. A om nading mun a muh loh ciangin, ‘Hong kihawlkhiatna inn mahah lutkik ning,’ ci hi. A hong tunkik ciangin hoihtakin kiphiat siangin a hoih linlianin a mu hi. Tua ciangin amah paikhia kikin, amah sangin a siazaw dawi sagih hong paipih a, a sungah lutin a teng uh hi. Tua mipa’ pianzia pen a masa sangin hong siazaw hi,” a ci hi. Jesuh in hih thu a genkhit ciangin mihon lak panin numei khat hong paukhia a, “Nang hong paii numei, a nawi na teep numei, mi hampha mahmah ahi hi,” a ci hi. Ahi zongin Jesuh in, “Pasian’ thu za-in a zuite hamphazaw lai hi,” ci-in a dawng hi. Mihonte in Jesuh hong neh semsem uh a, Jesuh in zong a thugen zomlai-in, “Tuhun mite gilo mahmah uh hi. Amaute in lim lamdang ngen uh a, ahi zongin Jonah lim simloh a dang kipia lo ding hi. Nineveh khua mite a dingin kamsang Jonah pen lim khat ahih mah bangin tuhun mite a dingin Mihing Tapa zong, lim ahi ding hi. Thukhen Ni ciangin leitaw lam gam pana hong pai Kumpinu hong dingin tuhun mite mawhsakna thu hong gen ding hi. Bang hang hiam cih leh Solomon’ pilna thu a za dingin leimong khat panin amah hong pai a, ahi zongin Solomon sangin a lianzaw khat hih lai-ah om hi. Thukhen Ni ciangin Nineveh khuamite hong dingin note mawhsakna thu hong gen ding uh hi. Bang hang hiam cih leh amaute in Jonah’ thuhilhna a zak uh ciangin a mawhnate uh kisik uh a, ahi zongin Jonah sangin a lianzaw khat hih lai-ah a om hi,” a ci hi. Tua ciangin Jesuh in, “Kuamah in meivak a vakkhit ciangin a munbu ah koih lo a, lawh zong khuhlo hi. Innsungah a lut mi khempeuh in khua a muhtheih nadingin meivak koihna tungah a koihzaw hi. Na mittang uh note’ pumpi a dingin meivak tawh kibang hi. Na mit uh ciim leh na pumpi khempeuh un hoihtakin mu thei a, na mit uh maang leh na pumpi uh a dingin khuamial ahi hi. Tua ahih ciangin na pumpi sung uha om khuavak pen khuamial ahih khak loh nading limtakin kingaihsun un. Tua bang hi peuh leh, meivak a taan ciangin khua na muh uh mah bangin na pumpi uh a dingin khuamialna mun om loin a vekpi-in a taangkim ding hi,” a ci hi. Jesuh in a thugen a mankhit ciangin Farisi mi khat in an nekpih dingin Jesuh a sam hi. Amah zong pai-in an ne dingin a tu hi. Jesuh in khut sil masa loin an a neklam a muh ciangin Farisi mipa in lamdangsa mahmah hi. Tua ciangin Topa in ama kiangah, “No Farisi mite in hai leh kuangte a pualam na siangsak uh a, ahi zongin note na lungsim sung uhah huaihamin na gi kei uh hi. No mihaite aw, a pualam a bawlpa in a sunglam zong bawl hi lo ahi hiam? Ahi zongin na hai leh na kuang sung uhah a omte pen itna tawh mizawngte tungah pia le-uhcin, note a dingin na khempeuh hong siang ding hi. “No Farisi mite in gimna na thuak ding uh hi. Note in Pasian tungah lengmasel, thuambuak a kipan anteh theipuam dongin sawm-ah-khat pia napi-in, mite tungah thuman ding le Pasian it ding na donkha kei uh hi. Hihte khempeuh na hihkim ding uh hi a, paihkhiat na neih ding uh hi lo hi. “No Farisi mite in gimna na thuak ding uh hi. Kikhopna inn sungah tutphah nuampen ah na tunuam uh a, mihon lakah hong kizahtak hopih ding na ut uh hi. A kiciamteh lo hankhuk, mite in a theih loh manun a va sikkhakna munte tawh na kibang uh hi,” a ci hi. Tua ciangin Thukham hilh siate khat in Jesuh kiangah, “Sia aw, hih bang thu na gen ciangin kote zong a hong ko bawl na hi hi,” a ci hi. Jesuh in, “No Thukham hilh siate in zong gimna na thuak ding uh hi. Note in a puak hak mahmah ding van, mite tungah na suan uh a, ahi zongin tua van a puakpih dingin na khutmeno khat nangawn uh na tangsak nuam kei uh hi. Note in gimna na thuak ding uh hi. Na pu na pate un a thahsa kamsangte’ han a hoihin na bawl uh hi. Tua ahih manin na pu na pate uh gamtatnate a thukimpih, a tecite na hi uh hi. Bang hang hiam cih leh amaute in kamsangte thatin, note in a han na bawl uh hi. Tua thu hangin Pasian’ Pilna a kici laibu sungah, ‘Amaute kiangah kamsangte le sawltakte ka sawl ding a, amaute in tua mite pawlkhat bawlsia-in na that ding uh hi,’ ci-in kigelh hi. Tua ahih manin leitung piancil a kipan kamsang a kithatte khempeuh hangin tuhuna mite gim kipia ding a, Abel a kithah a kipan biakna tau le siangtho mun kikalah a kithat Zekhariah a sihna ciang dong, tua mi thahna hangin gimna a thuak ding uh hi. Ke’n kong cihin-ah, hih thute khempeuh hangin tuhuna mite gim hong kipia taktak ding hi. No Thukham hilh siate in gimna na thuak ding uh hi. Note in pilna ngah theih nading konghonna tawhtang nei napi-in a sungah note na lut tuan kei uh a, a tum dingin a paite zong lah na khaktan uh hi,” a ci hi. Tua mun panin Jesuh a paikhiat khit a kipanin Thukham hilh siate le Farisi mite in nakpitakin Jesuh mawhzon ding kipanin thu tampi tak dong uh a, a kampau khialhnate a mattheih nadingun thangsiahin a hanciam uh hi. Mi a tul tampite hong kikhawmin khatlekhat a kisikkha gawp dongin kinehcipin a om laitakin Jesuh in a nungzuite kiangah thu gen masa a, “Farisi mite’ kineihkhemna ahi, a silngo uh limtakin kidawm un. A kiseelte khatvei teitei kimu ding a, thusimte khatvei teitei thulang suak ding hi. Zan khuamial sunga na gente uh sun khuavak sungah kigenkik ding a, innsung tawngah na kihuau simnate uh mi khempeuh in theithang ding uh hi. “Lawmte aw, note kiangah kong genin-ah, pumpi a thahkhit ciangin a siazaw a hihthei nawn lote na kihta kei un. Kuate kihta ding na hi uh hiam cih leh, mite in a thah khitsa mipa pen hell khuk sungah a khiathuah theilai Pasian na kihta un. Gitta nga ciangin hamu-in kizuak lel hi lo ahi hiam? Tua bang hi lel napi-in Pasian in gitta khat beek mangngilh lo hi. Na lutung uha om na sammal zah ciat nangawn uh Pasian in thei khin hi. Note lunghimawh kei un. Gitta tampi sangin na manphazaw ciat uh hi. “Note kiangah kong cihin-ah, keima mi ahihna mi’ theihin a genkhiate, Mihing Tapa in zong Pasian’ vantung mite’ mai-ah, keima mi hi, ci-in genkhia ding a, ahi zongin keima mi ahihna mi’ theihin a genkhia nuam lote, Pasian’ vantung mite mai-ah zong keima mi hi, ci-in Mihing Tapa in genkhia nuam lo ding hi. Mihing Tapa a langpangte a mawhna uh kimaisak thei ding a, Kha Siangtho a langpangte a mawhna uh kimaisak lo ding hi. Thusitna a thuak dingin kikhopna inn-ah ahi a, hausa zumah ahi zongin hong paipih uh ciangin bang gen ding a, bangci kihut ding ka hi hiam, ci-in lunghimawh kei un. Bang hang hiam cih leh a hun a tun ciangin Kha Siangtho in na gen dingteng uh hong hilh ding hi,” a ci hi. Tua laitakin mihon lak panin mi khat in Jesuh kiangah, “Sia aw, ka pa un a hong sihsan gamh pawlkhat tawh ka u in kei hong inntuan nadingin hong gensak in,” a ci hi. Ahi zongin Jesuh in a mipa kiangah, “No unau’ gamh a hawm dingin kua in kei hong seh ahi hiam?” ci-in a dawng hi. Tua ciangin Jesuh in amaute khempeuh kiangah, “Hoihtakin kidawm unla, na huaiham loh nadingun kikem un. Bang hang hiam cih leh bangzahta-in mi khat a hauh hangin a neihsa tawh a nuntakna taktak kicing zo lo hi,” a ci hi. Tua ciangin Jesuh in amaute kiangah thugentehna khat gen a, “Mi hau pa khat’ lo-ah an tampi a piang hi. Tua ciangin amah in a lungsim sungah, ‘Ka an khempeuh ka koih nading mun kicing lo ahih manin bangcih ding ka hi hiam? Tua ahih manin hih bangin ka gamta ding hi: Ka ansalte phelin a lianzaw ansalte ka lam ding a, tuate sungah ka ante le ka neih khempeuh ka seng ding hi. Tua ciangin keimah in: Mi hampha mahmah ka hi hi. Kum tampi sung ka khom ding annek tuidawn le na hoih tampi ka nei hi. An ne, zu ne-in, a nuam theithei-in ka om hithiat ding hi,’ ci hi. Ahi zongin Pasian in ama kiangah, ‘Mihai pa aw, tuzan mahmahin na si ding hi. Hih na neihsa teng kua’n zang nawn ding ahi hiam?’ ci hi,” a ci hi. Tua ciangin Jesuh in a thugen a khupna-in, “Tua mah bangin amau a’ ding bekin a kholcipte pen Pasian’ muhna panin mihau hi lo uh hi,” a ci hi. Tua ciangin Jesuh in a nungzuite kiangah, “Tua ahih ciangin note kiangah kong genin-ah: I nuntak nadingin bang ne ding a, i pumpi tungah bang silh ding ihi hiam, ci-in lunghimawh kei un. Nuntakna pen an sangin thupizaw a, pumpi pen puan sangin thupizaw hi. Vasate ngaihsun dih un: Amaute in khai tuh lo uh a, anlak cih zong nei lo uh hi. Amaute in beemlepang zong nei lo napi-in Pasian in annek tasamsak lo hi. Vasate sangin note nakpitakin na manphazaw uh hi. Note na lunghihmawh manun na nuntak hun uh nai khat sung bek a sotto thei kua om na hi uh hiam? Tua bang a themno khat nangawn hih thei lo na hih uhleh bang hangin adangte lunghimawh se na hi uh hiam? Gamlak a paakte ngaihsun dih un. Tuate in a nek ding uh na sem lo uh a, a silh ding uh puan zong gan lo uh hi. Ahi zongin note kiangah kong genin-ah: Bangzahin a hauh hangin Solomon nangawn, hih paakte khat zahin a hoihin kizem zo lo lai hi. Upna neu mite aw, tuni-in om a, zing ciangin keutumin meikhuk sungah a kikhultum lopa kungte, Pasian in puansilh guan ahihleh note hong guanzaw kan ding hi lo ahi hiam? Tua ahih manin bang ne ding, bang dawn ding, ci-in lunghimawhin om tawntung kei un. Gentail mi khempeuh in hih nate lunghihmawh penin nei uh hi. Hih nate na kisap lamtak uh zong na Pa un hong thei hi. Tua ahih manin Pasian’ Ukna ngaihsutin nei masazaw un. Tua hileh hih na kisapna dangte uh zong Pasian in hong piathuah ding hi,” a ci hi. Tua ciangin Jesuh in, “Tuuhon tawmnote aw, lau-in lunghimawh kei un. Na Pa un ama Ukna sungah ukna thu a nei dingin a hong sehsa ahi hi. Na neihsa uh zuak unla, mizawngte tungah tua sumte na pia un. Note a dingin a sia thei lo sumkholna na bawl unla, gutate in a luh zawh lohna, leikha in zong a nek zawh lohna, cikmahin a kiam ngei hetloh nading mun vantungah na sumte uh na khol un. Bang hang hiam cih leh na sum uh a omna munah na lungsim uh om tawntung ding hi,” a ci hi. Tua ciangin Jesuh in, “Na kawng uh gakin, na mei uh vakin a kigingsa-in om unla, a topa uh mopawi simna panin hong tungin kongkhak a kiuh ciangin thakhatin kong a honpah theih nadingun a topa’ ciah ding a ngak nasemte bangin om un. A topa hong ciah ciangin a kigingsa-in amah ngakin a om uh a muh nasemte pen mi hampha mahmah ahi uh hi. Note kiangah kong genin-ah, a topa zong hong kithawi-in a nasemte an vak dingin tusak ding a, amahmah in a nasemte an thukin na a sem ding hi. Zankim laitak ahi a, zingsang khuavakkuan lam ahi zongin a hong ciah hun peuhpeuh ciangin amah ngakin a om a muh nasemte pen mi hampha mahmah ahi uh hi. Ahi zongin na phawk ding uh thu khat om hi. Mi khat in guta pa’ hong pai ding hun theikhol leh a inn luhsak lo ding hi. Tua mah bangin Mihing Tapa zong na upmawh loh uh hun laitakin hong pai ding ahih manin note zong a kigingsa-in om tawntung un,” a ci hi. Peter in, “Topa aw, hih thugentehna ko bek nong cihna ahi hiam, ahih kei leh mi khempeuh a’ ding na cihna ahi hiam?” ci-in a dong hi. Topa in, “A pil a citak nasempa i cih a bangcite ahi hiam? A naseppih dangte ukin a hun manmanin amaute’ nekzah ding ciat a pia dingin a topa in a seh nasempa ahi hi. A topa hong ciah ciangin hih ama sawl bangin a sem a muh nasempa pen mi hampha mahmah ahi hi. Ke’n kong cihin-ah, a neihsa khempeuh a uk dingin a topa in tua nasempa koih takpi ding hi. Ahi zongin tua nasempa in a lungsim sungah, ‘Ka topa hong ciahkik hak ding hi,’ ci-in ngaihsunin a naseppih numei le pasalte satgawp hen la, zukham ankhamin ommawk leh, tua nasem pa’ topa pen ama upmawh loh ni, a theihkholh loh hunin hong tung ding hi. A topa in nakpitakin amah gim pia ding a, a thumang lo mite tawh a kibangin a thuaksak khawm ding hi. A topa’ deihna thei napi-in a topa’ deih bangin a gamta nuam lo nasem pa pen nakpitakin kisat ding hi. Ahi zongin a topa’ deihna a theih lohna hangin satthuak nading a gamtakha nasem pa pen kidamsat zawdeuh ding hi. Tampi a kipiakna pa tung pan tampi kikal ding a, a tamzaw a ki-apna pa tung pan a tamzaw kikal ding hi,” ci-in a dawng hi. Tua ciangin Jesuh in, “Leitungah meikuang a khah dingin a hong pai ka hi a, tu mahmahin a meikuang kipan khinta hileh ka ut hi. Gimna sungah ka kiphum nading khat om a, tua thu a kikhit matengin ka lungsim a nuam thei kei hi. Leitungah kilemna a omsak dingin a hong pai hong sa na hi uh hiam? Hilo hi. Ke’n kong cihin-ah, kikhenna a omsak dingin a hong pai ka hizaw hi. Tu a kipanin innkuan sungah mihing nga a phate, a langah thum, a langah nihin kikhenin kido ding uh hi. A pa in a tapa do-in, a tapa in a pa do ding a, a nu in a tanu do-in, a tanu in a nu do ding a, a teeknu in a monu do-in, a monu in a teeknu do ding hi,” a ci hi. Jesuh in mihonte kiangah zong, “Nitumna lamah meiipi hong kai na muh uh ciangin, ‘Guah hong zu ding hi,’ ci-in thakhatin na genthei pah uh a, tua mah bangin guah hong zu takpi hi. Leitaw lam panin huih hong nun’ ciangin, ‘Ni hong sa ding hi,’ na ci uh a, tua mah bangin ni hong sa takpi hi. No a kineihkhem mite aw, vanlelei na et uh ciangin a piang ding thu thei na hih uhleh, tuhun thute bang hangin theithei lo na hi uh hiam?” a ci hi. Tua ciangin Jesuh in, “Bang hangin na gamtat nading uh a manin khen thei lo na hi uh hiam? Mi khatpeuh in na tungah thu hong bawlin zum-ah hong paipih leh, zuma thukhente mai-ah hong kaigawpin, thukhente in palikte kiangah hong apin, palikte in thong sungah a hong koih loh nadingin, na lang pa uh tawh na thu uh a siantheih nadingin na siam tawpun lamkalah hanciam un. Ke’n kong cihin-ah, tua bangin gamta kei le-uhcin, na liausum uh na piak khit matengun thong panin na suakta kei ding uh hi,” a ci hi. Tua laitakin tua lai-a om mi pawlkhat in Jesuh kiangah, Galilee mite in Pasian kiangah biakna pia-in a om laitakin Pilat in a thah mite’ thu a gen uh hi. Jesuh in amaute kiangah, “Tua bangin hih Galilee mite kithat ahih manin, Galilee midangte khempeuh sangin hih a kithat mite a mawhna uh lianzaw hi, ci-in ngaihsun na hi uh hiam? Hilo hi. Ke’n kong cihin-ah, na mawhna panun na kisik kei uhleh amaute mah bangin note zong na si ding uh hi. Tua ahih kei leh, Siloam Tuibeem gei-a tausang a puk lai-in a denlup mi sawm le giatte bangci ngaihsut na hi uh hiam? Hih bangin a sih manun Jerusalem khuasunga a teng midangte sangin a mawhna uh lianzaw hi, ci-in ngaihsun na hi uh hiam? Hilo hi. Ke’n kong cihin-ah, na mawhna panun na kisikkik kei uh leh note zong amaute mah bangin na si ding uh hi,” a ci hi. Tua ciangin Jesuh in amaute kiangah thugentehna khat gen a, “Mi khat in a lolai-ah theikung khat a suansak hi. Theigah a lo dingin a pai ciangin bangmah na gah lo hi. Tua ahih manin amah in a lokho pa kiangah, ‘A beisa kum thum sung theigah lo dingin ka pai zelzel a, ahi zongin gah lo hi. Tua ahih manin phuk in. Bang hangin lo sung mawk nawngkaisak ding ahi hiam?’ ci hi. Tua ciangin lokho pa in, ‘Topa aw, tu kum sung zong hih bangmahin omsaklai phot in. A phung kimkot to-in eklei ka sung ding hi. Kum kik ciangin hong gah leh a hoih hi pah ding hi. Ahi zongin hong gah kei veve leh i phuk ding hi,’ ci-in a dawng hi,” a ci hi. Sabbath ni khatin Jesuh in kikhopna inn khat sungah thu hilhin a om hi. Dawivei numei khat tua lai-ah om a, tua dawi in kum sawm le giat sung tua numei cina sakin a nung kulsak a, dingtang thei hetloin a om hi. Jesuh in tua numei a muh ciangin a kiangah sam a, “Lawm aw, na natna panin na damta hi,” a ci hi. Tua ciangin numei tungah a khut nga a, thakhat thu-in amah dingtang thei-in Pasian a phatpah hi. Ahi zongin Jesuh in Sabbath ni-in cina a damsakna hangin kikhopna inn ukpa a heh suak a, mite kiangah, “Na a kisep theih nading hun ni guk sung om hi. Tua hun sungin hong pai-in kidamsak unla, ahi zongin Sabbath ni-in hong pai kei un,” a ci hi. Tua ciangin Topa in amah dawng a, “No a kineihkhem mite aw, note in Sabbath ni mahin zong na bawngte uh ahi a, na late uh ahi zongin a buk panin na khihna khaute uh sutin, tui pia dingin paipih hi lo na hi uh hiam? Tua mah bangin Satan in Abraham’ suante khat ahi hih numei pen kum sawm le giat sung hencip hi. Hih a kihencipna panin Sabbath ni-in hih numei khahkhiat ding kilawm hi lo ahi hiam?” a ci hi. Hih Jesuh’ dawnna in alangte khempeuh maizumsak a, Jesuh’ sep hih na lamdangte khempeuh hangin midang khempeuh a lungdam mahmah uh hi. Tua ciangin Jesuh in, “Pasian’ Ukna bang tawh kibang a, bang tawh genteh ding ka hi hiam cih leh: Mi khat in a lo-ah a vawh ankam tang khat tawh kibang hi. Tua ankam tang hong khangin kung golpi hong suak a, vasate in a hiang tungah bu a tom thei uh hi,” a ci hi. Tua ciangin Jesuh in, “Pasian’ Ukna bang tawh genteh leuleu ding ka hi hiam cih leh: Nupi khat in annel lom sungah a sawh silngo tawh kibang hi. Tua silngo in a annel lom khempeuh a pawmsak hi,” a ci hi. Tua ciangin khuapite le khuaneute nawkin Jesuh paisuak a, Jerusalem khua manawhin a paikawmin thu a hilh hi. Tua laitakin mi khat in, “Siapa aw, hotkhiatna a ngah mi tawmno khat bek hi ding ahi hiam?” ci-in a dong hi. Jesuh in amaute kiangah, “Kong kawcik tawnin na lut nadingun hanciam un. Note kiangah kong genin-ah, mi tampi tak in lut ding a hanciam uh hangin lut zo lo ding uh hi. Inn nei pa hong tho-in kong hong khak ciangin, note kong pualamah dingin kongkhak na kiu ding uh a, ‘Topa aw, kote zong kong hong hon in,’ na ci ding uh hi. Amah in, ‘Note koilai panin a hong pai na hi uh hiam kong thei kei hi,’ ci-in hong dawng ding hi. Note in, ‘Nangmah tawh anne tuidawn khawmin i om a, ka khuasung uhah thu nong hilh hi,’ na ci ding uh hi. Ahi zongin amah in, ‘Note koi panin a hong pai cih kong thei kei hi. A giloin a gamta note khempeuh aw, kei kiang panin paikhia un,’ hong ci ding hi. Pasian’ Ukna sungah Abraham, Isaac, Jakob, le kamsangte khempeuh a omna mu napi-in, note a pualamah hong kihawlkhiat ciangin tua huna na kahna uh le na ha gawina uh bangzah takin nasia ding ahi hiam? Nisuahna le nitumna, leilu le leitaw lam panin mite hong pai-in Pasian’ Ukna sung sabuai kiimah tukhawm ding uh hi. Tua hi a, tuhuna mineute tuahun ciangin milian hi ding a, tuhuna miliante tuahun ciangin mineu hi ding hi,” a ci hi. Tuahun laitakin Farisi mi pawlkhat hong pai-in Jesuh kiangah, “Herod in nang thah hong sawm ahih manin hih lai panin mun dang khatah paikhia in,” a ci uh hi. Jesuh in, “Pai unla, ngia bangin ngian a zang tua Herod kiangah hih bangin va gen un: ‘Tuni le zing ciang sung dawi hawlkhia-in cina ka damsak ding a, thai ciangin ka nasep ka man ding hi, ci hi,’ va ci un. Ahi zongin tuni, zing le thai sungteng ka ma nawtsuakin ka pai ding hi. Bang hang hiam cih leh Jerusalem khuasung lobuang mun dangah kamsangpa a kithah ding kilawm lo hi. “Jerusalem, Jerusalem aw, kamsangte na that a, Pasian’ hong sawl kamtaite na denglum hi. Akpi in a kha tawh a note a huai mah bangin na mite ka huainuam tawntung a, ahi zongin na ut kei hi. Tu-in na innte kinusiacip ding hi. ‘Topa min tawh a hong pai mipa, Pasian in thupha pia ta hen,’ na cih hun hong tun matengin kei nong mu nawn kei ding hi,” a ci hi. Sabbath ni khatin Farisi mi upa khat’ inn-ah an ne dingin Jesuh pai a, mite in amah encik uh hi. Tua laitakin a khut le a khe a bawk mi khat Jesuh kiangah hong pai a, Jesuh in zong Thukham hilh siate le Farisi mite kiangah, “Sabbath ni-in cina damsak ding i Thukham in hong hiam, khak hiam?” ci-in a dong hi. Ahi zongin kuamah in dawng loin omcip uh hi. Jesuh in zong tua mipa samin a damsak khit ciangin a ciahsak hi. Tua ciangin Jesuh in amaute kiangah, “Note khatpeuh’ tapa ahi a, na bawngtal uh ahi zongin tuikhuk thukpi sungah Sabbath ni-in kia leh, Sabbath ni hinapi-in kaikhia veve ding hi lo na hi uh hiam?” a ci hi. Ahi zongin kuamah in hih thu dawng thei lo uh hi. Tua annekna ah a kisam mite pawlkhat, uliante’ tut nading munah a tutnopna uh a muh ciangin amaute kiangah thu khat gen a, “Mopawi khatpeuhah hong kisap ciangin uliante’ tut nading munah tu kei un. Tua pawi siim dingin a kisamte lakah note sangin a ulianzaw khat hong omkha thei ding a, innteek pa in note kiangah, ‘Hih lai-ah amah tusakzaw ni,’ hong ci ding hi. Tua ciangin minautangte’ tutna munah maizumpi in na tusuk ding uh hi. Note pen tua bangin a hong kisap ciangin minautangte’ tutna munah na tuzaw un. Innteek pa hong pai-in, ‘Lawm aw, hih tutphah nuamah hong tuzaw in,’ hong ci ding hi. Tua bangin leengla dangte khempeuh lakah hong cih ciangin nang a dingin angtanhuai mahmah hi. Bang hang hiam cih leh a kiliansakte khempeuh in niamkhiatna thuak ding uh a, a kiniamkhiatte khempeuh a lianin kibawl ding hi,” a ci hi. Tua ciangin Jesuh in a innteek pa kiangah, “Sun-an nekna-ah ahi a, nitak-an nekna-ah ahi zongin mi na sap ciangin, na lawmte ahi a, na sanggamte ahi a, na behte ahi a, mihau na vengte ahi zongin sam kei in. Amaute in zong an ne ding mahin nang hong samkik ding uh a, hih bangin hong sapna hangin na anvakna thaman a ngahkik na hi ding hi. Tua bangin anvakna pawi na bawl ciangin mizawngte, khezawte, khebaite, le mittawte sam in. Amaute in nang hong thukkik zo lo ding uh ahih manin nang a dingin a lungdamhuai hong hi ding hi. Bang hang hiam cih leh sihna panin mihoihte a thawhkik hun ciangin Pasian in nang tungah hong thukkik ding hi,” a ci hi. An ne-a a tutpih mite khat in hih thu a zak ciangin Jesuh kiangah, “Pasian’ Ukna sungah an ne-a a tu mite bangzahin mi hampha ahi uh hiam?” a ci hi. Jesuh in ama kiangah, “Khatvei mi khat in pawi lianpi khat bawlin mi tampi a sam hi. Annek ding hun ciangin a nasempa sawl a, ‘Tu-in na khempeuh a baihsa-in omkhin ahih manin hong paita un,’ ci-in a khohsa mite a samsak hi. Ahih hangin a khohsa mite in a pai theih loh nading uh paulap zong ciat uh hi. A masa pen pa in, ‘Lo khat ka lei a, ka va et ding kisam ahih manin kong pai thei kei ding hi,’ na ci hi. Adang khat in, ‘Bawngtal kap nga ka lei a, a va sin ding ka hih manin kong pai thei kei ding hi,’ na ci hi. Adang khat leuleu in, ‘Ka zi ding a kila khin phet ahih manin kong pai thei kei ding hi,’ na ci hi. Tua ahih ciangin a nasempa hong ciahin a topa kiangah hih thute hong zasak hi. Tua ciangin innteek pa a heh suak a, a nasempa kiangah, ‘Khuasung kongzing khempeuhah va pai inla, mizawng, khezaw, mittaw, le khebai mite hong paipih in,’ ci-in a sawl leuleu hi. Tua khit a sawt loin a nasempa in, ‘Topa aw, na cih bangin ka sam khin a, ahi zongin om nading mun omlai hi,’ a ci hi. Tua ciangin a topa in a nasempa kiangah, ‘Gam sung lamliante le lamneute-ah va pai inla, ka inn-ah mi a dim theih nadingin mi khempeuh hong paipihmang khin in. Ke’n kong cihin-ah, ka sap masak mite khat beek in ka an ciamkha lo ding uh hi,’ ci hi,” a ci hi. Mi tampi tak in Jesuh hong zui uh a, Jesuh zong kihei-in amaute kiangah, “Kei kiangah a hong pai mite peuhmah in a nu le a pa, a zi le a ta, a sanggam numeite le a sanggam pasalte, le ama pumpi mahmah a nial ngam kei leh keima nungzui suak thei lo ding hi. Ama singlamteh mah puatawmin ka nung hong zui lote, keima nungzui hi thei lo hi. Mi khatpeuh in inn lianpi khat lamding a sawm le, ka zozo ding hiam cih a theih nadingin a bei dingzah tuat masa hi. Tua bangin tuat masa kei leh tua inn a khuampite a phuhkhit ciangin zawh lohpi-in khawl ding a, tua inn a kizo lo a mu mite khempeuh in amah nuihsan ding uh hi. ‘Hih mipa in inn lamding kipan napi-in zozo lo hi,’ ci ding uh hi. Galkap tul sawm a nei kumpi khat in galkap tul sawmnih tawh a hong kuan kumpi khat do dingin a kithawi leh, tua kumpipa a dozo ding mahin i hat takpi hiam ci-in ngaihsun masa ding hi. A zozo ding ahih vet kei leh, tua kumpipa a hong tun ma, a gamla-ah a om lai-in, ama kiangah kamtaite sawl ding a, kilem nading thu gensak ding hi. Tua mah bangin mi khat in a neih khempeuh a piakkhiat ngam kei leh keima nungzui suak thei lo ding hi. “Ci hoih hi; ahi zongin a alna bei leh i al kiksak theih nading lampi om lo hi. Lei hoihsak nadingin kizang thei lo a, eklei dingin zong kibawl thei lo ahih manin paihmawk a kul hi. Tua ahih manin zak nading bil a neite in za ta un,” a ci hi. Khatvei, Jesuh’ thugen a ngai dingin siahdongte le mawhneite tampi tak a hong pai uh hi. Farisi mite le Thukham hilh siate phun uh a, “Hih mipa, mawhneite tawh kikhawlin an nangawn nekhawm hi,” a ci uh hi. Tua ahih manin Jesuh in amaute kiangah thugentehna khat gen a, “Note sung panin khatpeuh in tuu zakhat nei-in, tua sung panin khat mansuah leh bangcih ding ahi hiam? Lopa ne-in a gamta tuu sawmkua le kuate nusia-in, a muh matengin tua a mang tuu khat a zong dingin kuankhia ding hi. A muh ciangin lungdam mahmahin a liangko-ah pua-in ciahpih ding hi. Inn a tun ciangin a lawmte le a vengte samin, ‘A mangsa ka tuu mukik ka hih manin ka nuam mahmah hi. Lungdamna pawi bawl ni,’ a ci ding hi. Tua mah bangin kisikkik ding a kisam lo mihoih sawmkua le kuate tungah lungdamna sangin mawhnei mi khat a kisikna hangin vantungah lungdamna lianzaw ding hi,” a ci hi. Tua ciangin Jesuh in tua ahih kei leh zong, “Numei khat in sum peek sawm a neih sung panin khat mansuah leh bangcih ding ahi hiam? Meivak vakin, a innsung teng phiatin, a muh matengin mun khempeuh limtakin zong ding hi. A muh ciangin a lawmte le a vengte samin amaute kiangah, ‘Ka sum mansuahsa mukik ka hih manin ka nuam mahmah hi. Lungdamna pawi bawl ni,’ ci ding hi. Tua mah bangin mawhnei mi khat a kisikkikna hangin Pasian’ vantung mite lungdam mahmah uh hi,” a ci hi. Tua ciangin Jesuh in thugentehna khat gen leuleu a, “Mi khat in tapa nih a nei hi. A nauzawpa in, ‘Pa aw, neihsa kei’ ngah ding tangteng tu-in hong pia in,’ a ci hi. Tua ahih manin a pa in zong, a ta tegel a hawmsak hi. Ni tawmkhat khit ciangin a nauzawpa in ama neihsateng zuakin a sum tawh inn panin a gamlapi-ah paikhia a, a sumte a phengzat gawp hi. A sum neih khempeuh a zatmang khit ciangin tua ama omna gamah kialpi tung a, ahi zongin amah in bangmah nei nawn lo hi. Tua ahih manin tua gammite khat kiangah nasem dingin va pai a, a innteek pa in vokcing dingin ama lo-ah a sawl hi. Vokte’ begap nekte nangawn a duhgawh ciang dongin om a, ahi zongin kuamah in an pia lo hi. A tawpna-ah thu ngaihsun thei a, ‘Ka pa’ nasemte khempeuh in gaih zawh lohin an khamval nei uh a, tu-in hih lai-ah gilkialin a puksi ding ka hita hi. Kei kithawi-in ka pa kiangah ka ciah ding a, “Pa aw, Pasian tung le nangma tungah ka khial khin hi. Na tapa cih dingin zong kilawm nawn lo ka hih manin na nasemte khat bangin hong bawl lel in,” ka ci ding hi,’ a ci hi. Tua ahih manin amah kithawi-in a pa kiangah a ciahkik dingin a pai hi. Ahi zongin inn a tun ma-in a pa in na galmuh a, hehpihhuaisa mahmah ahih manin va delhin, a tapa ngawng kawi-in a nam hi. A tapa in, ‘Pa aw, Pasian tung le nangma tungah ka khialkhin hi. Na tapa cih dingin zong ka kilawm nawn kei hi,’ a ci hi. Ahi zongin a pa in a nasemte sam a, ‘Hong manlang un. Puan hoihpen hong la unla silhsak un. A khutme-ah zungbuh butsak unla, a khe-ah khedap zong bulhsak un. Tua ciangin i bawngno limcipen hong go unla, lungdam pawi bawl ni. Bang hang hiam cih leh ka tapa a sisa hong nungta a, ka tapa a mangsa hong tungkik hi,’ a ci hi. Tua ahih manin lungdamna pawi bawl a kipan uh hi. “Tua laitakin a tapa uzaw pen lo kuan hi a, vaiciah inn hong tun kuan ciangin lamna le lasakna gingte a za hi. Amah in zong nasemte khat sam a, ‘Bang thu om ahi hiam?’ ci-in a dong hi. ‘Na naupa hong tungkik hi. Cidamin hong tungkik ahih manin na pa in i bawngtalno limcipen go hi,’ ci-in a nasempa in a dawng hi. A ta uzaw pen a heh suak mahmah ahih manin inn sungah zong hong tum nuam lo hi. Tua ahih manin a pa va pusuakin, a ta hong sungtumna dingin a zol hi. A tapa uzaw in, ‘Tu a beisa hunsung khempeuh, nasemte khat bangin nangma a dingin na ka sem a, na thu zong kong nial ngei het kei hi. Tua hinapi, kei bang hong pia ngei na hi hiam? Ka lawmte tawh pawi ka bawl nadingin keel khat nangawn nong pia kei hi. Ahi zongin hih na tapa in na neihsa khempeuh numei paktatte tungah zangmang khin a, hong ciahkik ciangin bawngtalno limcipen na gawh lai hi,’ a ci hi. A pa in, ‘Ka ta aw, nang pen hih lai-ah kei tawh a omkhawm tawntung na hi a, keima neih khempeuh nangma a’ ahi hi. Tu-in na naupa a sisa hong hingkik a, a mangsa hong tungkik ahih manin lungdamin pawi i bawl ding ahi hi,’ ci-in a pa in a dawng hi,” a ci hi. Tua ciangin Jesuh in a nungzuite kiangah, “Sum hau pa khat om a, a neihsateng a uk dingin ama khutnuai-ah mi khat a koih hi. Tua a neihsateng a uk dingin a koih mipa in a topa’ sumteng phengzat gawp hi, ci-in kikhia hi. A topa in zong amah sam a, ‘Na gamtatna ka zak a bangci thu ahi hiam? Keima neihsa a uk dingin hong koih thei nawn lo ding ka hih manin a beisa hun sungah ka neihsate na zeekna sazian a kimtakin hong pia in,’ a ci hi. Tua ciangin a nasempa in lungngai a, ‘Ka topa in ka nasepna panin hong tawpsak ding ahih manin bangci gamtat ding ka hi hiam? Thatang nasep lah ka ngap kei a, nektawm ding mi kiangah nget ding lah ka maizum hi. Tu’n ka gamtat nading ka theita hi. Tua ka ngaihsut bangin gamta leng, ka nasepna panin ka tawp ciangin lawm nei-in, amaute in a inn-ah kei hong tungsak ding uh hi,’ ci hi. Tua ahih manin a topa’ sum a bate khat khatin sam a, a masa pen pa kiangah, ‘Ka topa tungah bangzah ba na hi hiam?’ a ci hi. Amah in, ‘Sathau tambong zanih dim ba ing,’ ci hi. Tua ciangin amah in, ‘Na leibatna lai va la in,’ ci hi; tua ciangin, ‘Na leiba om lai sathau tambong zakhat hi. Tu mahmahin tusuk inla, tambong za khatin ciamteh in,’ ci hi. Tua ciangin adang khat pa kiangah, ‘Nang bangzah ba na hi hiam?’ ci-in a dot ciangin, ‘Mangbuh seu zakhat ba ing,’ ci hi. Tua ciangin amah in, ‘Na leibatna lai va la in,’ ci hi; tua ciangin, ‘Na leiba om lai seu sawmgiat hi. Seu sawmgiat, ci-in ciamteh in,’ ci hi. A diktat lo nasempa pen ama ngiansiamna hangin a topa in a pakta hi. Bang hang hiam cih leh Pasian thu a zui mite sangin leitung mihingte pen a nasepna uhah ngiansiam zaw uh hi. “Note kiangah kong genin-ah, hih na leitung sum uh a bei ciangin tawntung nuntakna inn-ah hong kilutsak theih nadingin lawm zonna-in hih leitung sumte na zang un. “A tawmno-ah a diktatte pen a tamah zong diktat uh a, a tawmno-ah a citak lote pen a tamah zong citak lo uh hi. Hih leitung sumte-ah na cihtak kei uhleh kua in no tungah vantung sum hong ap ngam ding ahi hiam? Midangte’ neihsa tungah na cihtak kei uhleh, kua in no tungah nomau gamhluah ding hong ap ngam ding ahi hiam? “To nih’ na a semkhawmzo nasem kuamah om lo hi. A to khat mudahin khat it ding a, khat beelin khat a simmawh ding hi. Pasian’ na le leitung sum na na semkhawmzo kei ding uh hi,” a ci hi. Sum a deih phadiak Farisi mite in hih thute a zak uh ciangin Jesuh a nuihsan uh hi. Jesuh in amaute kiangah, “Mite in note a man penin hong ngaihsut theih nadingin na om uh a, ahi zongin Pasian in na lungsimtawng uh a hong thei hi. Bang hang hiam cih leh mihingte in a manpha mahmahin a ngaihsutte pen Pasian in bangmahin sim lo hi. “Tuiphumpa Johan’ hun ciang dong Moses Thukham le kamsangte’ thugente pen zuih belin kinei a, ahi zongin Pasian’ Ukna hangin Lungdamna Thu a kihilh hun a kipanin hih thu-ah mi khempeuh hong kituhteh uh hi. Ahi zongin Thukham a neupen themno khat nangawn a maiman’ ding sangin van le lei a manthan ding olzaw lai hi. “Pasal khat in a zi ma-in numei dang a tenpih leh tua numei tawh a mawh hi a, a kima numei a tenpih pasal zong numei tawh a mawh mah ahi hi. “Khatvei, mihau mahmah khat om a, nisimin puan manpha nono silhin, anlim nono ne-in a om hi. Tua ciangin a pumtangin meima a vei, Lazaras a kici mizawng khat zong, mihau pa’ kongbiangah hong kikoih a, mihau pa’ sabuai tung panin a kia annengte nenuamin a ngak hi. Tua bangin a om laitakin uite hong pai-in a meima hong liahliah sak uh hi. Tua ciangin mizawng pa hong si a, vantung a Abraham kiangah a om dingin vantung mite in a paipih uh hi. Mihau pa zong hong si leuleu-in a kivui hi. Ahi zongin hell khuk sungah gimna thuakin a om hi. A khuadak leh, gamlapi mun khatah Abraham le Lazaras a omkhawm a galmuh hi. Tua ahih manin nakpitakin kiko a, ‘Pa Abraham aw, kei hong hehpih in. Meiphual sungah omin nakpitakin gimna thuak ka hih manin Lazaras in a khutme dawn tui diahin ka leii hong votsak nadingin hong sawl in,’ a ci hi. Ahi zongin Abraham in, ‘Ka ta aw, leitungah na nuntak laitakun nang nopsakna namkim na ngah laitakin Lazaras in haksatna namkim a thuak hi. Ahi zongin tu-in amah in hih lai-ah nopsakna a ngah laitakin nangmah in haksatna a thuak na hi hi. Tua tham loin, i kikalah kuam thukpi khat om a, hih lai panin nang kiangah hong pai nuamte kuamah pai zo lo a, nangma omna panin hih lai-ah zong kuamah hong pai zo lo hi,’ ci-in a dawng hi. Tua ciangin mihau pa in, ‘Pa aw, tua bang ahihleh zong, ka inn uhah Lazaras nong sawlsak nadingin ka hong thum hi. Inn-ah nau pasal nga ka nei lai a, ke’n gim ka thuakna hih lai munah hong tunkhak loh teitei nadingun kei’ gamtat bangin a gamtat loh nadingun hong hilhsak hen,’ a ci hi. Ahi zongin Abraham in, ‘Na sanggamte a hilh dingin Moses le kamsangte om uh ahih manin tuate’ thugen na ngai ta uh hen,’ a ci hi. Tua ciangin mihau pa in, ‘Pa Abraham aw, tua nong gen zong a kicing khin hi mah hi. Ahi zongin a sisa mi khat hingkikin amaute kiangah va paikik leh a mawhna panun ka naute kisik hamtang ding uh hi,’ a ci hi. Ahi zongin Abraham in, ‘Amaute in Moses le kamsangte’ thu a mannop kei uhleh, mi khat hong hingkikin amaute kiangah a va gen hangin umsakzo tuan lo ding hi,’ ci-in a dawng hi,” a ci hi. Tua ciangin Jesuh in a nungzuite kiangah, “Mite a puktheih nading ze-etna hong piang hamtang ding hi. Ahi zongin tua puk nading a piangsak mipa in gimna ngah ding hi. Hih naupangno khat a khialh nading a piansak sangin a ngawngah an gawina suang lianpi khat khihin tuipi sungah kikhia leh ama a dingin hoihzaw thampek ding hi. Note hoihtakin kingaihsun un. Na sanggampa uh no tungah hong khialh leh amah taii unla, a kisik leh a mawhna maisak un. Nikhat sungin sagihvei ciang dong hong khialh hangin zong, a sagihvei mahin no kiangah hong pai-in, ‘Ka kisik hi,’ hong cih nakleh na maisak khin ding uh hi,” a ci hi. Nikhat, sawltakte in Topa kiangah, “Ka upna uh hong liansak in,” a ci uh hi. Topa in, “Ankam tang cia a pha upna nei le-uhcin, hih nailung kung kiangah, ‘Kizunglot inla tuipi sungah va po in,’ ci le-uhcin na cih bangun piangzo ding hi. “Note khatpeuh in na lo uh hong khawhsak ahi a, na tuu uh a hong cinsak ahi zongin nasem khat nei le-uhcin, inn-ah a hong tun ciangin, ‘Hong pai inla na an ne pah in,’ na ci uh hiam? Na ci kei uh hi. Ama kiangah, ‘Ka nitak-an ding hong bawl inla, na puan silhin ka annek sungteng hong vil in. Ka man khit ciangin na ne thei ding hi,’ na cizaw uh hi. Tua bangin a sawlteng a sepna hangin a nasempa tungah, ‘Ka nuam mahmah hi,’ ci tuan lo hi. Tua mah bangin note in zong hong kisawlteng na sepkhit uh ciangin, ‘Nasem mawkmawkte mah ihi a, i tavuanteng bek mah a sem khin ihi hi,’ na ci uh hi,” ci-in a dawng hi. Jerusalem khua manawhin Jesuh a pai laitakin Samaria le Galilee gam kikal tawnin a pai hi. Khuaneu khatah a lut dektak laitakin miphak sawm in a dawntuah uh hi. Jesuh tawh a kigamla munah ding uh a, nakpitakin kiko-in, “Topa Jesuh aw, kote hong hehpih in,” a ci uh hi. Jesuh in amaute a muh ciangin, “Pai unla siampite va kivelsak un,” a ci hi. Amaute a va pai uh ciangin lamkalah a dam uh hi. Amaute sung panin a damlam a kitheih ciangin khat hong lehtai kik a, nakpitakin Pasian a phat hi. Tua ciangin Jesuh’ khe mai-ah bokin a lungdamna a ko hi. Hih mipa pen Samaria mi ahi hi. Tua ciangin Jesuh hong paukhia a, “Mihing sawm kidamsak hi lo ahi hiam? Adang kuate koi lai-ah om ahi uh hiam? Bang hangin hih gamdang mipa bek Pasian’ tungah lungdamna a ko dingin hong kileh ahi hiam?” a ci hi. Tua ciangin Jesuh in ama kiangah, “Tho inla ciah in. Na upna in nang hong damsak hi,” a ci hi. Khatvei Farisi mite pawlkhat in, cik ciangin Pasian’ Ukna hun hong tung ding ahi hiam, ci-in Jesuh dong uh a, Jesuh in, “Pasian’ Ukna pen mit tawh muhtheihin hong tung lo ding hi. Hih lai-ah om hi, hua lai-ah om hi, cih bangin kuama gentheih hi lo hi. Bang hang hiam cih leh note lakah Pasian’ Ukna hong om khinzo hi,” ci-in a dawng hi. Tua ciangin Jesuh in nungzuite kiangah, “Nikhat ni ciangin Mihing Tapa nikhat sung bek nangawn na muhnop hun uh hong tung ding a, ahi zongin na mu kei ding uh hi. Mite in, ‘Hih lai-ah om hi,’ hong ci ding uh hi. Ahi zongin amau’ cihna mun a en dingin paikhia kei un. Amah hong pai taktak ciangin khuaphialep in van mong khat pan mong khat dong hong taanzaih mah bangin kitheikim ding hi. Ahi zongin amah in gimna tampi tak thuak masa ding a, ama huna mite in amah nial ding uh hi. Noah hunin up lohpi-in tuiciin a tun bangin Mihing Tapa zong uploh hun khatin hong tung ding hi. Teembaw sungah Noah lutin Tuiciin in mi khempeuh a sihsak ni ciang dongin tua huna mite in anne zune-in om uh a, mo kipi mo kikha-in a om uh hi. Lot huna mah tawh zong hong kibang ding hi. Tua hun lai-in zong anne zune-in om uh a, sumlei sumzuak, lokho, inn lamin a omom laitakun, Sodom panin Lot a paikhiat ni-in van panin kaat leh meikuang hong kiasuk a, amaute khempeuh a kangtum hi. Mihing Tapa hong kilat ni ciangin zong tua mah tawh hong kibang ding hi. “Tuani a hong tun ciangin a innkhum zangah a om mipa in a innsunga a om a neihsate a la dingin kumsuk kei hen. Tua mah bangin lo-ah a om mipa zong a inn-ah ciahkik kei hen. Lot’ zi na phawk un. A nuntakna a hu nuamte in a nuntakna bulpi taanlawh ding a, a nuntakna a taanlawhte in a nuntakna bulpi huzo ding hi. Ke’n kong cihin-ah, tuahun laitakin zanin lupna tungah a lumkhawm mi nih sung panin khat kila-in khat kinusia ding hi. An a sukhawm numei nih, khat kila-in khat kinusia ding hi. Lo a kuankhawm mi nih, khat kila-in khat kinusia ding hi,” a ci hi. Tua ciangin a nungzuite in Jesuh kiangah, “Topa aw, koi laitakah tua thute hong piang ding ahi hiam?” ci-in a dot uh ciangin Jesuh in, “Sapul omna peuhah musane a om mah bangin mi omna peuhah hong piang ding hi,” ci-in a dawng hi. Tua ciangin amaute in thu ngen tawntungin a lungkiat ngei loh nading uh a hilh nopna-in Jesuh in a nungzuite kiangah thugentehna khat gen a, “Khuapi khat sungah Pasian a zahtak lo, mi zong a don lo thukhen mang khat a om hi. Tua khuasung mahah meigong numei khat zong om a, ama kiangah hong pai tawntungin, ‘Ka thu uh hong khensak in,’ ci-in a thum tawntung hi. Tawlkhat sung thudon loin om a, ahi zongin a nung ciangin, ‘Pasian zahtak loin, mite zong ka donnop kholloh hangin, hih meigongnu in hong nawngkaisak niloh ahih manin, a thu khensak kei leng, hong pai nilohin hong lunggimsak ding hi,’ ci-in ngaihsun hi,” a ci hi. Tua ciangin Topa in, “Hih mihoih lo thukhen pa’ kampauna ngaihsun un. A sun a zanin ama tungah a thumthum ama mite’ thu a manin Pasian in khensak lo ding ahi hiam? Amaute a huh ding kizekaisak ding ahi hiam? Ke’n kong cihin-ah, amaute’ thu a manin manlang takin khensak ding hi. Ahi zongin Mihing Tapa hong pai ciangin leitungah amah a um mi a mu ding hiam?” ci-in a genthuah hi. Amaute hoih kisa mahmahin, midang khempeuh a simmawhbawl mite tungah Jesuh in zong thugentehna khat gen a, “Thungen dingin biakinn-ah mi nih a pai uh hi. Khat pen Farisi mi hi a, a khat pen siahdongpa ahi hi. Farisi mipa dingin thu ngen a, ‘Pasian aw, kei pen midangte bangin a huaiham, a thuman lo, numei tungah a mawh mi ka hi kei hi; hua lai-a siahdongpa bang hi lo ka hih manin nangma tungah ka nuamna kong pulak hi. Nipikal khatin ni nih sung an ka tang a, ka ngah khempeuh sung panin sawm-ah-khat nang tungah kong pia hi,’ a ci hi. Ahi zongin siahdongpa pen a gamla simah ding a, vantung lamah zong dak ngam loin a dip humin kuncip a, ‘Pasian aw, kei mimawh mi khial pa hong hehpih in,’ ci-in a ngen hi. Ke’n kong cihin-ah, hih mipa pen Pasian tawh a kilemsa-in a inn-ah ciah a, a khat pa pen tua bangin ciah lo hi. Bang hang hiam cih leh a kiliansakte pen kiniamkhiatsuk ding a, a kiniamkhiatte pen a lianin kibawl ding hi,” a ci hi. Jesuh in thupha a piaksak ding a deihna-un mi pawlkhat in a naupangnote nangawn uh Jesuh kiangah hong paipih uh hi. A nungzuite in hih thu a theih uh ciangin amaute na taii uh hi. Ahi zongin Jesuh in naupangnote sam a, “Naupangte hong pai ding khaktan kei un; ka kiangah hong paisak un. Bang hang hiam cih leh naupang a bang mite pen Pasian’ Ukna sungah om thei bek hi. Ke’n kong cihin-ah, naupang bangin Pasian’ Ukna a mang lo peuhmah Pasian’ Ukna sungah om thei lo ding hi,” a ci hi. Jew mi ulian khat in Jesuh kiangah, “A dik siapa aw, nuntak tawntungna ka ngah nadingin bang hih ding ka hi hiam?” ci-in a dong hi. Jesuh in, “Bang hangin kei midik hong ci na hi hiam? Pasian simloh kuamah a diktatzo om lo hi. Numei tungah mawh kei in; mi that kei in; mi’ neihsa gu kei in; zuauthu gen kei in; na nu na pa zahtak in, cihna thukhamte thei lo na hi hiam?” a ci hi. Tua ciangin amah in, “Ka neutung a kipanin hih thukhamte khempeuh ka zuihsa ahi hi,” ci-in a dawng hi. Jesuh in hih thu a zak ciangin ama kiangah, “Na khat na kisam lai hi. Na neihsa khempeuh zuak inla, mizawngte tungah na sum khotte pia in. Tua hileh vantungah na hau ding hi. Tua khit ciangin ka nung hong zui in,” a ci hi. Ahi zongin tua mipa in hih thu a zak ciangin amah hau mahmah ahih manin a dah a suak hi. Jesuh in ama dahna a muh ciangin, “Pasian’ Ukna sungah mihaute a lut ding bangzah takin haksa ahi hiam? Pasian’ Ukna sungah mihau khat a lut ding sangin phim bilvang sungah kalaoh khat a lut ding baihzaw lai hi,” a ci hi. Tua thu a za mite in, “Tua bang ahihleh kua in hotkhiatna ngahzo ding ahi hiam?” ci-in a dong uh hi. Ahi zongin Jesuh in, “Mihingte’ hih zawh loh pen Pasian in hihzo hi,” ci-in a dawng hi. Tua ciangin Peter in, “Ko zong ka inn ka lo uh nusia-in nang ka hong zui uh hi,” a cih ciangin Jesuh in amaute kiangah, “A mantakin kong genin-ah, Pasian’ Uk ding a deihna hangin a inn a lo, a zi a ta, a nu a pa, ahih kei leh a sanggamte a nusiate in, tuhunin a zah tampi, le hong tung ding hunah nuntak tawntungna a ngah lo ding kuamah om lo hi,” a ci hi. Tua ciangin Jesuh in nungzui sawm le nihte a tuamin paikhiatpihin amaute kiangah, “Tu-in Jerusalem khua-ah a pai ding ihi a, kamsangte in Mihing Tapa’ thu a gelh khempeuh, tua lai munah a hong tung ding hi. Pasian in Gentail mite’ khut sungah amah ap ding a, amaute in zahpihin, simmawhin, cilphih ding uh hi. Tua ciangin amah satin that ding uh a, ahi zongin a ni thum ni-in hingkik ding hi,” a ci hi. Ahi zongin nungzuite in hih ama thugente tel zo lo uh hi. Amaute’ tel zawh loh dingin kihem gen ahih manin, Jesuh’ gente bang a cihnopna ahi hiam, ci-in a thei kei uh hi. Jerikho khua kiang Jesuh a tun ciangin lampi gei-ah khutdawh a ngen mittaw khat a na tu hi. Mihon a paina a zak ciangin bang ahi hiam, ci-in a dong hi. Mite in, “Nazareth khuami Jesuh hong pai hi,” a na ci uh hi. Tua ciangin nakpitakin amah kiko a, “David’ suan Jesuh aw, kei hong hehpih in,” a na ci hi. A mai-a om mite in amah taii uh a, pau kei in, ci-in a kham uh hi. Ahi zongin amah kinakko semsem a, “David’ suanpa aw, kei hong hehpih in,” ci veve hi. Tua ahih manin Jesuh zong khawl a, ama kiangah mittaw pa a kipaipih nadingin thu a pia hi. A geinai hong tun ciangin Jesuh in, “Bang kong hihsak ding deih na hi hiam?” ci-in a dot ciangin, “Topa aw, khua ka mukik thei nuam hi,” ci-in a dawng hi. Tua ciangin Jesuh in, “Na upna in nang hong damsak khinta hi,” a ci hi. Amah in zong thakhatin khua muthei pah a, Jesuh zui-in Pasian tungah a lungdamna a ko hi. Mihonpite in zong a muh ciangin a vekpi-un Pasian a phat uh hi. Jerikho khua-ah Jesuh lut a, a paisuak dingin khuasung a nawk laitakin, Zakkhias a kici siahdong ukpa khat na om a, amah mihau khat ahi hi. Amah in Jesuh kua hiam cih a muh nadingin hanciam hi; ahi zongin amah mi tuntom khat ahih manin mihon lakah a mu zo kei hi. Tua ahih manin amah na matai a, Jesuh a muhtheih nadingin a tot nading lampi gei-a theithek kung tungah a na kah hi. Jesuh, tua mun a tun ciangin khuadak to-in ama kiangah, “Zakkhias aw, manlangin hong kumsuk in. Na inn-ah tuzan kong taam ding hi,” a ci hi. Tua ahih manin Zakkhias zong hong kum mengmeng a, lungdam mahmahin a inn-ah Jesuh a tungsak hi. Hih thu a thei mi khempeuh phun uh a, “Mimawh pa’ inn-ah a giak dingin Jesuh a pai hi,” a ci uh hi. Tua ciangin Zakkhias dingin Topa kiangah, “Topa aw, ka neihsa a kimkhat mizawngte tungah ka pia ding hi. Mi khatpeuh khemin a na ka laksak leh a zah li-in ka lohkik ding hi,” a ci hi. Tua ciangin Jesuh in ama kiangah, “Tuni-in hih innkuan in hotkhiatna a ngah hi. Hih mipa pen Abraham’ suante khat zong hi lai hi. Bang hang hiam cih leh a mangthangte a zong ding le a honkhia dingin Mihing Tapa a hong pai ahi hi,” a ci hi. Jesuh pen Jerusalem khua a tung dektak hi a, Pasian’ Ukna hun hong tung kuanta ding hi, ci-in mite in zong ngaihsun uh ahih manin, mite in ama thugen a na ngaih laitakun Jesuh in amaute kiangah thugentehna khat genthuah lai a, “Khatvei, ulian khat om a, kumpi za a lakkhit ciangin a ciahkik dingin gamlapi gamah a pai dingin a ding khia hi. A dinkhiat ma-in ama nasem mihing sawmte sam a, amaute tungah sum zakhat ciat pia-in, ‘Ka om loh sungin hih sumte tawh na siam bang bangun sum na bawl ciat un,’ ci-in a vaikhak hi. Ahi zongin ama gammite in hih ulianpa mudah uh ahih manin ama nungah kamtai sawl uh a, ‘Ka kumpi dingun nang kong deih kei uh hi,’ cisak uh hi. “Ahi zongin hih ulianpa kumpi za ngahsa-in hong tunkik ciangin, sum a ap a nasemte in bangzah ciat a na meetsak uh hiam ci-in a theih nadingin a kiangah a nasemte hong pai nadingun thu a pia hi. A nasem khat hong pai masa a, ‘Topa aw, nong sum piak zakhat tawh tulkhat ka meetsak hi,’ hong ci hi. Amah in, ‘Hoih mahmah hi; nang pen nasem gina na hi hi. Thuneu-ah citak na hih manin khuapi sawm na uk ding hi,’ a ci hi. Tua ciangin a nasem nihna pa hong pai a, ‘Topa aw, nong sum piak zakhat tawh zanga ka meetsak hi,’ hong ci hi. Amah in, ‘Khuapi nga na uk ding hi,’ a ci hi. Tua ciangin a nasem dang khat hong pai a, ‘Topa aw, hih lai-ah na sum zakhat om hi. Mainul khat tawh tunin ka seelcip hi. Nang pen mi sit hak khat na hih manin kong kihta hi. Sum lam lopi-in sum deih pa na hi a, lokho lopi-in an la nuampa na hi hi,’ a hong ci hi. A topa in ama kiangah, ‘Nasem ginalopa aw, nangma kampau mah tawh nang na kiman hi. Sum lam lopi-in sum ka deihlam, lokho lopi-in an la nuamin, mi sit hak ka hihlam nong thei hi. Tua bangin hong thei na hih leh bang hangin sumkholna-ah ka sumte na koih lo na hi hiam? Na koih hi lecin, kong tunkik ciangin a pi le a meet kigawm ka ngahkik ding hi,’ a ci hi. Tua ciangin a kiangah a ding a nasemte kiangah, ‘Ama tung panin a sum zakhat la unla, sum tulkhat a nei nasempa tungah pia un,’ a ci hi. Amaute in a topa kiangah, ‘Topa aw, amah in sum tulkhat neikhin hi lo ahi hiam?’ a ci uh hi. A topa in, ‘Ke’n kong cihin-ah, a neisate tungah kipiathuah ding a, ahi zongin a nei lote tung panin themkhat a neihsun nangawn kilaksak ding hi. Tu-in, kumpi dingin kei a hong deih lo ka galte pen hih lai-ah hong paipih unla, keima muhna-ah that un,’ ci hi,” a ci hi. Jesuh in hih thuteng a genkhit ciangin amah masa-in Jerusalem khua manawhin a paisuak hi. Oliv Mual tunga a om Bethfage le Bethany khuanai a tun ciangin a nungzuite nih masawlin amaute kiangah, “Mai-a om khua-ah va pai un. A khuasung na lut uh ciangin kuamah a tuan ngei nai lohna lano khat khau a kikhih na mu ding uh hi. A khau sut unla, hih lai-ah hong kai un. Mi khatpeuh in, ‘Bang hangin sut na hi uh hiam?’ hong cih leh, ‘Topa in deih hi,’ ci-in dawng un,” ci-in a vaikhak hi. Amau tegel zong paipah uh a, Jesuh’ gen bang teekteek mahin a na om hi. A la khau a sut laitakun la neite in, “Bang hangin sut na hi uh hiam?” ci-in a dot ciangin, “Topa in deih hi,” ci-in a dawng uh hi. Amaute in Jesuh kiangah a la paipih uh a, a lano tungah a puan uh phahin Jesuh a tuangsak uh hi. La tungah tuangin Jesuh a pai laitakin a lampi tungah mite in a puante uh na phah uh hi. Jerusalem khua a tunkuan, Oliv Muala lam suktuah a kipatna panin Jesuh’ nung a zui mihonpite khempeuh in amau muhsa nalamdang liante hangin, nakpitakin a gingin Pasian’ tungah lungdamna ko-in amah phat ding kipan uh a, “Pasian in Topa’ tangin a hong pai kumpipa, thupha pia tahen. Vantungah nopna om hen la, Pasian’ min thang ta hen,” ci-in a awng uh hi. Tua ciangin mihon lak panin Farisi mi pawlkhat in Jesuh kiangah, “Sia aw, hih bangin a awng na nung hong zuite kham in,” a cih ciangin Jesuh in, “Ke’n kong cihin-ah, hih mite in hong phat loin khawl ta le-uh zong, hih lamdung a suangte in phatin awng veve ding uh hi,” ci-in a dawng hi. Jerusalem khua hong nai semsem a, a khuapi a muh ciangin Jesuh in tamlawh a, “Nopsak tawntung theih nading bang kisam hiam, ci-in tuni-in thei lecin ut mahmah ing. Ahi zongin nang na theithei kei hi. Na kimkotah na galte in a panmun ding uh hong to-in, hong umcihin hong nehcih hun hong tung ding hi. Nang le na kulh sunga om mi khempeuh hong sumai ding uh a, a omna ngei munah suang khat zong om nawn lo ding hi. Hih bang a pianna pen nang a hu dingin Pasian hong pailam na phawk lohna hang ahi hi,” a ci hi. Tua ciangin biakinn sungah Jesuh lutin a sunga om sumbukte hawlkhiat ding kipan a, “‘Ka inn pen thungetna inn kici ding hi,’ ci-in Pasian in a genna thu Lai Siangtho sungah kigelh hi. Ahi zongin note in gutate’ bukna phualpi na suaksak uh hi,” ci-in amaute kiangah a gen hi. Jesuh in nisimin biakinn sungah thu a hilh hi. Siampi liante, Thukham hilh siate, le upate in amah thatnuam uh hi; ahi zongin mi khempeuh in a thugente mal khat zong khahsuah nuam loin a thu ngai tawntung uh ahih manin a suktheih nading uh a hun om thei lo hi. Nikhat, Jesuh in biakinntual sungah mite kiangah thu hilhin, Lungdamna Thu genin a om laitakin, siampi liante, Thukham hilh siate, le upate hong paikhawm uh a, Jesuh kiangah, “Kua’ thu tawh hih bangin gamta a, kua in thu hong pia ahi hiam, hong gen dih in,” ci-in a dot uh ciangin Jesuh in, “Kei zong thu khat ka hong dong ding hi. Hong gen dih un. Johan’ tuiphumna pen Pasian’ tung panin thu ngah ahi hiam, ahih kei leh mihing tung panin thu ngah ahi hiam?” ci-in a dawng hi. Tua ciangin amaute khatlekhat kikum uh a, “Pasian’ tung panin thu ngah hi,” ci lehang, “Bang hangin ama thu um lo na hi uh hiam?” hong ci ding a, “Mihing tung panin a ngah hi,” ci leuleu lehang, Johan pen kamsang taktak hi, ci-in mi khempeuh in um uh ahih manin suang tawh hong denglum ding uh hi, a kici uh hi. Tua ahih manin Johan’ tuiphumna pen kua thu tawh hiam, cih thei kei ung, ci-in a dawng uh hi. Tua ciangin Jesuh in amaute kiangah, “Hih bangin ka nasepnate kua’ thu tawh ka sep hiam cih kei zong kong gen kei ding hi,” a ci hi. Tua ciangin Jesuh in mite kiangah thugentehna khat gen a, “Mi khat in lo zuanin leenggui suan a, lo khawhlawhte khawhlawh sakin, amah gam dangah pai-in sauveipi a tam hi. Leenggah min hun a tun ciangin ama ngahzah tang ding a va la dingin lo khawhlawhte kiangah a nasemte khat a sawl hi. Ahi zongin lo khawhlawhte in amah na satgawp uh a, khut hawmguakin a ciahsak uh hi. Tua ciangin nasem dang khat sawl leuleu a, lo khawhlawhte in tua pa zong na satgawpin maizumsak gawp uh a, khut hawmguak mahin a ciahsak uh hi. Tua ciangin a thumveina dongin a nasem dang khat mah sawl leuleu a, lo khawhlawhte in amah zong na liamsak gawpin na sawnkhia uh hi. Tua ciangin leenggah lonei pa in, ‘Bang cih ding ka hi hiam? Ka it mahmah ka tapa ka sawl ding hi. Amaute in amah na zahtakbawl kha ding uh hi,’ a ci hi. Ahi zongin lo khawhlawhte in a tapa a muh uh ciangin khatlekhat in, ‘Hih pa, a gamhluah ding pa ahi hi. Ama gamhluah ding teng i ngahtheih nadingin amah that ni,’ a ci uh hi. Tua ahih manin amaute in lo nawlah amah sawnkhia-in a that uh hi. “Tua ahihleh lonei pa in hih lo khawhlawhte bang cih ding ahi hiam? Amah hong pai-in hih lo khawhlawhte that ding a, midangte khawhlawhsak ding hi,” a ci hi. Amaute in hih thu a zak uh ciangin, “Hih bangin piang kei ta peuh hen,” a ci uh hi. Tua ciangin Jesuh in amaute enin, “‘Innlamte in a nilkhiat suang pen innkiu suang bulpi suak khinta hi,’ ci-in Lai Siangtho in a gen pen bang a cihnopna ahi hiam? Tua suang tungah a kia mi khempeuh kizangawp ding a, mi khatpeuh tungah tua suang a kiat leh zong dengvuigawp ding hi,” a ci hi. Jesuh in hih thugentehna a gen pen amaute a cihnopna hi, ci-in Thukham hilh siate le siampi liante in thei uh ahih manin Jesuh manpah nuam uh hi; ahi zongin mihonte kihta uh ahih manin manpah ngam lo uh hi. Tua ahih manin a hunhoih ngakin vil gige uh a, ukna aana a neite’ khut sungah Jesuh a aptheih nadingun ama kampau tawh a mat nopna-un, lungsim takpi tawh thudong a va kineihkhem dingin mi pawlkhat thukan dingin a cial uh hi. Hih thukante in Jesuh kiangah, “Sia aw, na thuhilhnate le na thugente man mahmah hi. Nang in miliante zahtakbawl tuan loin, Pasian’ thu a mantakin na hilhna ka thei uh hi. Rom Kumpipa Sisar’ tungah siah i piak ding a kilawm mah ahi hiam, kilawm lo ahi hiam?” ci-in a dong uh hi. Ahi zongin Jesuh in amau’ ngianbawlna thei ahih manin, “Sum peek khat hong lak dih un. Hih sum tunga om lim le min kua-a’ ahi hiam?” a cih ciangin, “Kumpipa’ lim le min hi,” ci-in a dawng uh hi. Tua ciangin Jesuh in, “Tua ahihleh, Kumpipa a’ teng Kumpipa tungah na pia unla, Pasian a’ teng Pasian’ tungah na pia un,” a ci hi. Ama kampauna tawh mihon lak panin a mat nadingun thu om thei lo ahih manin ama thudawnna hangin lamdangsa-in a om khikhe uh hi. Tua ciangin, “Thawhkikna om lo hi,” a ci mi pawlkhat Jesuh kiangah hong pai uh a, “Sia aw, Moses in eite a dingin ngeina khat hong koihsak a, ‘Mi khat in ta nei loin a zi a sihsan leh, tua a sipa’ khang a kizop theihna dingin a naupa in tua meigongnu tenpih ta hen,’ ci hi. Khatvei, unau pasal sagih om hi. A u pen in zi nei a, ta nei loin a si hi. Tua ciangin a naupa in tenpih a, tua banah a nausawn in tenpih leuleu hi. Tua bangin a unau sagih dongin tenpih uh a, ta nei lo vive-in a si khin uh hi. A tawpna-ah numei zong hong si hi. A unau sagih mahin hihnu tenpih ciat khin uh ahih manin thawhkik ni ciangin hih numei pen a kua pen’ zi hi ding ahi hiam?” ci-in a dong uh hi. Tua ciangin Jesuh in, “Tu huna hih leitung mite in numei le pasal kitenna nei uh hi. Ahi zongin sihna panin thokikin a hong tung ding hunah a nungta dingin a kilawm mite in kitenna cihte nei lo uh hi. Amaute pen vantungmi tawh kibang uh a, sithei nawn lo uh hi. Sihna panin a thokik khinte ahih manin amaute pen Pasian’ tate ahi uh hi. Tua tham loin Moses in zong misite a thawhkikna thu teltakin hong lak hi. Sawlpang kuang thu a genna munah Topa pen, ‘Abraham Pasian, Isaac Pasian, Jakob Pasian,’ ci-in a na gen hi. Amaute khempeuh hing uh ahih manin, Pasian pen mihingte’ Pasian hi a, misite’ Pasian hi lo hi, a cihnopna ahi hi,” ci-in a dawng hi. Tua ciangin Thukham hilh siate pawlkhat in, “Sia aw, na dawnna hoih mahmah hi,” a ci uh hi. Tua ahih manin Saddusi mite in thu a dong ngam nawn kei uh hi. Ahi zongin Jesuh in amaute kiangah, “Bang hangin Thukham hilh siate in Khrih pen David’ suan hi, ci zenzen ahi uh hiam? David in Khrih pen, ‘Topa,’ ci ahih manin bang hangin Khrih pen David’ suan hi thei ding ahi hiam?” a ci hi. Tua ciangin Jesuh in mi khempeuh zakin a nungzuite kiangah, “Thukham hilh siate na batkhak loh nadingun kidawm un. Amaute in puantualpi silhnuam uh a, mihon lakah a kizahtak hopih ding deihin, kikhopna innsung le pawi lakah a om uh ciangin uliante’ tutna mun hoihte bekah tunuam uh hi. Meigong numeite tungah nuamtaksa-in, khemin a neihsateng uh laksak uh a, mite in mihoih a sak nading uh a deihna-un thu saupipi a ngen uh hi. Amau’ kineihkhemna tawh kizui-in a gimthuak ding uh lianzaw ding hi,” a ci hi. Jesuh a khuadak leh mihaute in biakinn sumkuang sungah a letsong uh a khiatna, le a zawng meigong khat in zong sumnen tang nih a khiat a mu hi. Tua ciangin amah in, “Ke’n kong cihin-ah, hih a zawng meigongnu in a dangte khempeuh sangin tamzaw a khia hi. Bang hang hiam cih leh adangte in a zatval uh sumte a khia uh ahi hi. Ahi zongin hih numei a zawng mahmah hinapi-in a nuntak nading khempeuh a khia khin ahi hi,” a ci hi. Mi pawlkhat in suang hoih mahmahte tawh kilamin tua biakinn hoihin a thupi mahmahna le Pasian tungah letsong tampi a kipiaknate a gen uh ciangin Jesuh in, “Tu-a na muh uh hih nate khempeuh a siatgawp ding hun hong tung ding hi. Inn lamna-a a kiciang suangte a kithuapin a om nangawn om nawn loin kiphelkekmang ding hi,” a ci hi. Tua ciangin amaute in, “Cik ciangin hih thu hong piang ding a, hih thu a pian ding ciangin bang lim hong om ding ahi hiam?” ci-in a dot uh ciangin Jesuh in, “Kidawm unla, mi’ khemsa-in ta kei un. Bang hang hiam cih leh keimah a kineih mi tampi hong pai ding uh a, ‘Keimah, Khrih ka hi hi; a hun hong tungta hi,’ hong ci ding uh hi. Tua bang mite’ nung zuikha kei un. Gal thu ahi a, gam kilumlet nading thu ahi zongin na zak uh ciangin lau kei un. Hih bang thute a hong piang masa ding mah hi a, ahi zongin bei nading hong naita hi, a cihnopna hi nai lo hi,” a ci hi. Tua ciangin Jesuh in a thugen zomlai a, “Gam khat le gam khat hong kido-in, kumpi khat le kumpi khat hong kido ding hi. Mun khempeuhah nakpitakin zin hong lingin, kialpi le pulnatna zong hong tung ding hi. A kihtakhuai a tuamtuamte le lim lianpipi vanah hong kilang ding hi. Ahi zongin hihte khempeuh hong pianma-in keima hangin note hong kimanin hong kibawlsia ding hi. Kikhopna innte-ah thusitna thuakin thongah khiat dingin hong ki-ap ding a, ukpite le kumpite mai-ah hong kipaipih ding hi. Hih hun sung pen note in Lungdamna Thu na gentheih nading uh hunhoih ahi hi. Tua hun ciangin eite in bangci gen ding cih lunghihmawhin nei kei un. Bang hang hiam cih leh tua hun ciangin note’ gen ding thu le pilna kong guan ding a, na galte uh khat beek in note’ thugen hong nialzo loin, zong hong sel zo lo ding uh hi. Na nu na pate, na sanggamte, na behte, le na lawmte mahmah un note hong khia ding a, note pawlkhat in thahna na thuak ding uh hi. Mi khempeuh in keima hangin note hong mudah ding uh hi. Ahi zongin na samzang khat nangawn uh mangthang lo ding hi. Hih bangin thuakzo le-uhcin nuntakna taktak ngah ding na hih manun kiptakin om un. “Galkapte in Jerusalem khuapi a umcihna na muh uh ciangin tua khuapi a siat nading naita hi, ci-in na thei ding uh hi. Tua ciangin Judea gam sunga omte mualtungah tai un. Jerusalem khuasunga omte zong taikhia unla, gam sung khuaneu-a om mite, Jerusalem khua sungah lut nawn kei un. Bang hang hiam cih leh Lai Siangtho sungah a kigelh mah bangin, ‘Gim Piak Ni,’ ahi hi. Tua huna naupaiite le naungek neite a dingin haksa mahmah ding hi. Hih leitungah gimna lianpi hong tung ding a, Pasian in hih mite gim a pia ding hi. Mi pawlkhat, namsau tawh kithat ding a, pawlkhat, galmatin gam dangah kiciahpih ding hi. Tua ciangin Gentail mite’ uk hun a bei matengin Jerusalem khuapi a siacipin om ding hi. “Ni, kha, le aksite tungah lim hong om ding hi. Tuipi ging le tuihual liante kihtakna hangin leitung mi khempeuh lau-in lunggim ding uh hi. Leitungah tu-in bang hong piang ding, ci-in a ngaihsut kawmun mite lau-in sibup ding uh hi. Vantunga om nate a pai ngei bangin pai nawn loin lampial mangkhin ding uh hi. Tua ciangin Mihing Tapa hong kilang ding a, minthanna le vangliatna tawh meii lakah hong pai ding hi. Hih thute a pian ding hong kipat ciangin, note hong kihotkhiat ding hun hong naita ahih manin, dingin nuamna lungsim tawh khuadak un,” a ci hi. Tua ciangin Jesuh in amaute kiangah thugentehna khat gen a, “Thei kung a kipan singkung khempeuh en dih un. A teh hong no na muh uh ciangin khuakhal hong naita hi, ci-in na thei uh hi. Tua mah bangin hih thute hong piang na muh uh ciangin Pasian’ Ukna hun hong tungta ding hi, ci-in na thei ding uh hi. Hih lai-a om mite a sihkhit ma-in hih thute hong piang ding ahihna phawk un. Van le lei a mangthang zongin ka thugente maimang ngei lo ding hi. “Limtakin kidawm un. Thakhat thu-in tua Ni hong tung kha ding ahih manin zune anne le leitung nuntakna lunghimawhin thamang kei un. Theihkholh lohin thang kisai bangin leitung mi khempeuh tungah hih thu hong piangvat ding hi. Hih thupiang khempeuh thuakzawh nading thahatna na neih nading uh, le Mihing Tapa mai-ah na dintheih nadingun a tawntungin thu ngenin vil niloh un,” a ci hi. Tua sungteng nisimin Jesuh in biakinn-ah thu hilh a, nitak ciangin paikhia-in Oliv Mual tungah a giak zel hi. Ama thuhilhna a ngai dingin mi khempeuh zingsang simin biakinn-ah hong pai baih uh hi. Tu-in Paisan Pawi a kici Silngo Sawh loh Anlum Pawi hun hong naita hi. Siampi liante le Thukham hilh siate in mihonpite kihta uh ahih manin kuama theih lohin Jesuh a kithah theih nading lampi a zong uh hi. Tua ciangin sawm le nihte sung panin Iskariot tapa Judas sungah Satan hong lut hi. Tua ahih manin Judas va paikhia a, siampi liante le biakinncing palikmangte tawh va kiho uh a, amaute’ khut sungah Jesuh a piaktheihna dingzia a kikum uh hi. Amaute na nuam mahmah uh a, sum tawh guaih dingin thuciam a na pia uh hi. Judas zong thukim a, mihonte’ theih lohin amaute’ khut sungah Jesuh a piaktheih nading lampi zon ding a kipan pah hi. Tua ciangin Silngo Sawh loh Anlum Pawi hun sungin Paisan Pawi an-a nek ding tuuno gawh ni hun hong tung hi. Jesuh in Peter le Johan kiangah, “Va pai unla, eite’ Paisan Pawi annek ding va vaihawm un,” ci-in a sawl hi. “Koi lai-ah va bawl le ung hong deih na hi hiam?” ci-in a dong uh hi. Amah in, “Jerusalem khuasung na lut uh ciangin tuibeel a pua pasal khat na mu ding uh hi. Ama lutna inn-ah zui unla, a innteek pa kiangah, ‘Siapa in: Ka nungzuite tawh Paisan Pawi an ka nektheih nading uh inndei koi lai hiam, ci hi,’ ci-in va dong un. Amah in a baihsa-in a na kikoihsa inndei tungnung a zai khat hong lak ding hi. Tua lai-ah a kisam khempeuh a baihsa-in na koih un,” a ci hi. Amau tegel zong pai uh a, Jesuh’ gensa bang teekteekin va mu uh a, tua lai-ah Paisan Pawi annek ding a bawl uh hi. A hun a tun ciangin Jesuh zong sawltakte tawh sabuai-ah a tu hi. Tua ciangin Jesuh in amaute kiangah, “Sihna ka thuakma-in note tawh hih Paisan Pawi an i nekkhop ding ka ut mahmah khat ahi hi. A mantakin kong genin-ah, Pasian’ Ukna sungah a cingtaak Paisan Pawi hun hong tun mateng, Paisan Pawi an ka ne ngei nawn kei ding hi,” a ci hi. Tua ciangin Jesuh in a hai sang a, Pasian’ tungah lungdamna a kohkhit ciangin, “Hih hai hong sang unla, na vekpi-un na gual dawn un. Bang hang hiam cih leh Pasian’ Ukna hun hong tun mateng, tu a kipanin leenggahzu ka dawn nawn kei ding hi,” a ci hi. Tua ciangin anlum la-in Pasian tungah lungdamna a kohkhit ciangin amaute tungah pia a, “Hih pen note a dingin a hong kipia keima pumpi ahi hi. Keimah nong phawk nadingun na ne un,” a ci hi. Tua mah bangin an a nekkhit uh ciangin amaute tungah hai pia a, “Hih leenggahzu pen note a dingin a luangkhia, Pasian’ thuciamna thak a kipsak ka sisan ahi hi. Ahi zongin kei hong lehhek ding pa’ khut in sabuai-ah kei tawh an a sawkkhawmna thu thei un. Bang hang hiam cih leh Pasian’ sehsa bangin Mihing Tapa si ding a, ahi zongin amah a lehhek pa in gimna thuak ding hi,” a ci hi. Tua ciangin hih bangin a gamta ding eite lakah kua hi ding ihi hiam, ci-in amaute khatlekhat a kidong uh hi. Nungzuite lakah kua a lianpenin kingaihsun ding, ci-in kiselna thu hong piang hi. Tua ciangin Jesuh in amaute kiangah, “Gentail mi hih leitung kumpite in a mite uh tungah ukna aana zang uh a, tua bangin mi a uk Gentail-te in amaute pen, ‘Mite’ nopsak nadingin nasemte,’ a kicih ding deih lai uh hi. Ahi zongin note lakah tua bang hi lo ding hi; a lianpen pa a neupen bangin om ding a, a makai pen pa a nungzui nunungpen bangin om ding hi. Anne dingin sabuai-ah a tupa le an a piapa kua lianzaw ahi hiam? Anne dingin a tupa lianzaw mah hi. Ahi zongin kei pen note lakah anpia-in na a sempa bangin ka hong om hi. “Gimna ka thuak sung khempeuh note in kei nong ompih uh hi. Ka Pa in uk nading aana kei tungah hong piak mah bangin kei zong note tungah ka hong pia ding hi. Keima Ukna sungah anne tuidawnin sabuai kiimah na tu ding uh a, Israel minam sawm le nihte tungah thu a khen dingin thukhenna tokhom tungah na tu ding uh hi,” a ci hi. Tua ciangin Jesuh in, “Simon, Simon aw, lokho pa in buhhum a haih bangin note khempeuh hong ze-et nadingin Satan in thu a ngah khitna thu phawk in. Ahi zongin, Simon aw, na upna na khahsuah loh nadingin nang a dingin thu kong ngetsak khin hi. Kei kiangah nong kiheikik ciangin nungzui na lawmte na hanthawn in,” a ci hi. Tua ciangin Peter in, “Topa aw, nang tawh thong a kiakhawm ding le a sikhawm dingin a kigingsa-in ka om hi,” ci-in a gen hi. Tua ciangin Jesuh in, “Peter aw, ke’n a mantakin kong genin-ah, ‘Amah ka thei kei hi,’ ci-in thumvei nong nialkhit matengin tuni-in ak khuang lo ding hi,” a ci hi. Tua ciangin Jesuh in amaute kiangah, “Note in sumbawm, ip, le khedap keng loin kong sawlkhiat lai-in kitangsapna na nei uh hiam?” ci-in a dot ciangin, “Bangmah ka kitangsapna uh om lo hi,” ci-in a dawng uh hi. Tua ciangin Jesuh in, “Ahi zongin, tu-in ahihleh, sumbawm ahi a, ip ahi zongin a neite in keng unla, namsau a nei lo peuhmah in na puansilh uh zuak unla khat lei un. Bang hangin hih bangin hong gen ka hi hiam cih leh, Lai Siangtho in, ‘Mawhneite lakah amah kihelsak hi,’ ci-in keima thu a genna pen hong tung ding hi,” a ci hi. Amaute in, “Topa aw, en in; hih lai-ah namsau nih om hi,” ci-in a gen uh ciangin Jesuh in, “Tua ahihleh phazo hi,” ci-in a dawng hi. Tua ciangin Jesuh a pai ngei zel bangin, khuasung nusia-in Oliv Mual tungah pai a, a nungzuite in zong a zui uh hi. Ama painopna mun a tun ciangin amaute kiangah, “Ze-etna na tuahkhak loh nadingun thu ngen un,” ci-in a gen hi. Tua ciangin amaute kiang panin suanglot khat tan bang pailai a, khukdinin thu ngen a, “Pa aw, nangma ngaihsutna bang ahihkhak leh hih ka thuak ding gimna tawh hong kipelhsak in. Ahi zongin kei deihna bang hi loin nangma deihna bang hi ta hen,” a ci hi. Tua ciangin vantung panin ama kiangah vantungmi khat hong pai a, Jesuh’ tha a hatsak hi. Lunggim mahmah ahih manin nakpitakin thu ngen semsem a, leilak a si mal gol taak bangin a khua-ul a taak hi. A thungetna panin dingin a nungzuite kiangah paikik a, amaute a dahna hangun gimin ihmu-in a om a mu hi. Jesuh in, “Bang hangin ihmu na hi uh hiam? Tho unla ze-etna-ah na pukkhak loh nadingun thu ngen un,” a ci hi. Tua bangin thu a gen laitakin mihonpi khat hong pai a, sawm le nihte sung panin Judas a kici mipa hong makai-in Jesuh a nam dingin hong naih hi. Ahi zongin Jesuh in ama kiangah, “Judas aw, napna tawh Mihing Tapa lehhek na hi hiam?” a na ci hi. Jesuh’ kiima om mite in a thupiang ding a muh ciangun, “Topa aw, ka namsau uh tawh ka sat ding uh hiam?” a ci uh hi. Amaute khat in siampi lianpen pa’ nasempa sat a, a taklam bil a satkhia hi. Ahi zongin Jesuh in, “Tua bangin gamta nawn kei un,” ci-in a mipa’ bil lawnsakin a damsak hi. Tua ciangin Jesuh in amah a man dingin a hong pai siampi liante, biakinncing palikmangte, le upate kiangah, “Namsau le molhtum tawh kei hih dingin nong kuan nadingun kei pen gal le sa ka hi hiam? Nisimin biakinn-ah note tawh ka omkhawm a, bangmah nong cih kei uh hi. Ahi zongin hih hun pen nomau’ hun hi a, khuamial sung a uk Satan’ vangliat hunsung ahi hi,” a ci hi. Tua ciangin Jesuh manin paikhiatpih uh a, siampi lianpen pa’ inn a tunpih uh hi. Peter in zong a kihalin nungzuih hi. Inntualah meiphual kicih a, tua meiphual kiima tute lakah Peter zong a kihel hi. Mei awi-a omte lakah Peter a omlam, nasem numei khat in a muh ciangin limtakin Peter en a, “Hih pa zong Jesuh tawh a kikhawlte khat hi,” a ci hi. Ahi zongin Peter in, “Ka nau aw, amah ka thei kei hi,” ci-in a nial hi. Tua khit a sawt loin midang khat in amah hong mu leuleu a, “Nang zong amaute tawh pawlkhat na hi hi,” a ci hi. Ahi zongin Peter in, “Lawm aw, ka hi kei hi,” a ci hi. Tua khit nai lang bang ding ciangin midang khat in, “Hih mipa Galilee mi ahih manin amah zong Jesuh tawh a kipawlte hi taktak hi,” hong ci teitei hi. Ahi zongin Peter in, “Lawm aw, na thugen ka thei kei hi,” ci-in a dawng hi. Tua bangin a pau laitakin thakhatin ak hong khuang hi. Jesuh zong kihei-in Peter hong en a, “Tuni-in ak a khuan’ ma-in thumvei nong nial ding hi,” ci-in Topa’ kampauna thu Peter in hong phawkvat hi. Tua ciangin Peter paikhia-in nakpitakin a kap hi. Jesuh a cingte in simmawh bawlin a sat uh hi. Puan tawh a mit tuamsak uh a, “Kua’n hong sat ahi hiam, thei dih in,” a ci uh hi. Amah simmawh bawlna kam tampi a pau uh hi. Khua a vak ciangin upate, siampi liante, le Thukham hilh siate hong kikhawm uh a, uliante mai-ah Jesuh hong kipaipih hi. Amaute in, “Khrih na hi hiam, hong gen in,” ci-in a dot uh ciangin Jesuh in, “Kong gen hangin nong um kei ding uh a, thu kong dot hangin zong nong dawng kei ding uh hi. Ahi zongin tu a kipanin a Vanglian Pasian’ taklamah Mihing Tapa tu ding hi,” ci-in a dawng hi. Tua ciangin a vekpi-un, “Tua ahihleh Pasian’ Tapa na hi hiam?” a cih uh ciangin, “Pasian’ Tapa hi, nong ci uh hi,” ci-in a dawng hi. Tua ciangin amaute in, “Thudang bangmah kisam nawn lo hi. Ama kam mahmah panin i za khinta hi,” a ci uh hi. Tua ciangin a vekpi-in ding khia uh a, Pilat mai-ah a paipih uh hi. Tua lai panin amah mawhzon ding kipan uh a, “Hih mipa in ka mipihte uh lam khialsakin, kumpipa tungah siah piak loh dingin thu gen a, amahmah zong Khrih ahi kumpi khat ahihna a kigenna zong ka za uh hi,” a ci uh hi. Tua ciangin Pilat in, “Nang, Jew mite’ kumpipa na hi hiam?” ci-in a dot ciangin, “Nang zong tua mah nong ci hi,” ci-in a dawng hi. Tua ciangin Pilat in siampi liante le mihonte kiangah, “Hih mipa mawhsak nading thu bangmah ka mu kei hi,” a ci hi. Ahi zongin amaute in nawhsa takin nakpau semsem uh a, “Amah in mite a buai nadingin thu hilh a, Galilee gam pan hong kipanin Judea gam sung khempeuhah hong hilh a, tu-in hih lai mun hong tungta hi,” a ci uh hi. Pilat in hih thu a zak ciangin, “Hih mipa Galilee mi ahi hiam?” ci-in a dong hi. Jesuh pen Herod’ ukna sung mi ahihlam a theih ciangin, tua laitakin Herod mah zong Jerusalem-ah om ahih manin ama kiangah a paisak hi. Herod in Jesuh’ thu zaza a, amah a muhnop sawt mahmah khinta ahih manin Jesuh a muh ciangin a nuam mahmah hi. Jesuh in nalamdang a bawlte a mu dingin kilamen hi. Tua ahih manin Herod in thu tampi tak dong a, ahi zongin Jesuh in kam khat beek dawng lo hi. Siampi liante le Thukham hilh siate in hong neh uh a, Jesuh mawhsakna thu nakpitakin hong gen uh hi. Tua ciangin Herod le galkapte in Jesuh zahko-in simmawh bawl uh a, kumpi puantualpi a silhsak khit uh ciangin Pilat kiangah a puakkik uh hi. Hih hun ma-in Herod le Pilat kilem loin kigalbawl uh a, ahi zongin tua ni mahmahin amau tegel kilem kikin kipawlbawl uh hi. Pilat in zong siampi liante, upate, le mihonpite sam khawmin amaute kiangah, “Hih mipa in i mipihte lam khialsak hi, ci-in mawhsakin kei kiangah nong paipih uh hi. Note khempeuh mai mahah amah thu ka sit a, amah na mawhsakna uh thute khat beekah a mawhna ka mu kei hi. Tua mah bangin Herod in zong ama mawhna mu lo a, eite kiangah amah hong puakkik hi. Hih mipa in sihna a thuak nadingin ama gamtatna bangmah om lo hi. Tua ahih manin amah satna tawh thuhilhin ka khah ding hi,” a ci hi. (Paisan Pawi hun simin Pilat in amaute’ deih thongkia khat a khah ding ahi hi.) Tua ciangin mihon khempeuh kiko uh a, “Amah that in! Barabbas hong khahsak in!” a ci uh hi. Barabbas pen khua sungah mi a buaisakna hang, le mi a thahna hangin thong sungah a kikhum ahi hi. Pilat in Jesuh khahnuam ahih manin mihonpite tungah khatvei a genkik hi. Ahi zongin mihonpite in, “Singlamteh tungah that in, singlamteh tungah that in,” ci-in a kiko uh hi. Tua ciangin amaute tungah a thumveina thu gen a, “Amah in bang mawhna bawl ahi hiam? Sihna a thuak nadingin ama gamtatna bangmah ka mu kei hi. Tua ahih manin amah satin ka khah ding hi,” a ci hi. Ahi zongin a aw neihzah uh tawh amaute awng semsem uh a, singlamteh tungah Jesuh a thah nading gen uh ahih manin a tawpna-ah a zo uh hi. Tua ahih manin amaute’ ngetna bangin piak dingin Pilat in thu a khen hi. Mi buaisakna le mi thahna hangin thong sungah a kikhia mipa amau’ ngetna bangin khah a, amau’ deihna bangin a bawl dingun Jesuh a piakhia hi. Tua ciangin amaute in Jesuh paikhiatpih uh a, gam sung panin khuapi sungah a hong pai, Sairin khuami Simon a kici mi khat tawh a kituak uh hi. Amaute in tua pa manpah uh a, a singlamteh suanin Jesuh’ nung zui-in a puasak uh hi. Jesuh’ nung zui-in mi tampi tak pai uh a, tuate lakah Jesuh kahin a tamlawh numei pawlkhat zong a kihel hi. Jesuh zong amaute lamah kihei a, “Jerusalem khua numeite aw, kei hong kah kei unla, note le na tate uh a dingin kap un. Bang hang hiam cih leh mite in, ‘Ta a nei ngei lo, naungek nawi a teepsak ngei lo numei ciingte mi hampha mahmah ahi hi,’ a cih hun hong tung ding hi. Tua hun hong tun ciangin mite in, ‘Mual lian mual neute in hong cipnelhin a si khin hi lehang utzaw hang,’ ci ding uh hi. Singkung hing bang ahi kei tungah hih bangin hong bawl uh ahihleh singkung keu bang ahi note tungah hong nak hihzaw kan ding uh hi lo ahi hiam?” a ci hi. Mi that ahi, thonga kikhum mi nih zong, Jesuh tawh thahkhawm dingin a paipih uh hi. “Lutang Guh,” a kicihna mun a tun uh ciangin singlamteh tungah Jesuh kilhcip uh a, tua mi that mi nihte zong, Jesuh’ taklamah khat, a veilamah khat kilhcip uh hi. Ahi zongin Jesuh in, “Pa aw, amaute in bang hih ihi hiam cih thei lo uh ahih manin a mawhna uh na maisak in,” a ci hi. Tua ciangin amau’ ngah ding ciat a theih nadingun ai sanin a puante a hawm uh hi. Jew mi upate in Jesuh zahko-in, “Amah in midangte honkhia hi. Pasian teelsa Khrih ahih takpi leh amah le amah kihonkhia ta hen,” ci-in a simmawhbawl laitakun tua lai-a ding mite in a enen uh hi. Galkapte in zong zahpihbawl uh a, a kiangah hong pai-in leenggahzu thuk pia uh a, “Jew Mite’ Kumpipa na hih takpi leh nang le nang kihonkhia in,” a ci uh hi. “Jew Mite’ Kumpipa hi,” ci-in a kigelh lai zong ama tung sanah kisuang hi. Amah tawh a kikhai khawm mi that pa khat in zong Jesuh zahko a, “Nang Khrih hi lo na hi hiam? Nangmah kihonkhia inla, tua ciangin kote zong hong honkhia in,” a ci hi. Ahi zongin a khat pa in a lawmpa taii a, “Pasian nangawn kihta lo na hi hiam? I vekpi-in gim hong kipiakna kibangkim hi. Ei tegel pen i gamtatna tawh kizui-in thu hong kikhen ahih manin ahi ding mah ahi hi. Ahi zongin amah in khialhna bangmah nei lo hi,” a cih khit ciangin Jesuh kiangah, “Jesuh aw, Kumpi-in nong pai ciangin kei zong hong phawk in,” a ci hi. Jesuh in ama kiangah, “A mantakin ke’n kong cihin-ah: Tuni-in Paradais-ah kei tawh na omkhawm ding hi,” a ci hi. Tua hun laitak pen sunkim nai sawm le nih pawl hi a, ni mial ahih manin nitak lam nai thum ciang dong leitung khempeuhah khua mial a, tua hun sungin biakinn sung dalna puan kikekin phelnih a suak hi. Tua ciangin nakpitakin Jesuh kiko a, “Pa aw, nangma khut sungah keimah kong ki-ap hi,” a cih khit ciangin a si ta hi. Galkap mangpa in hih thupiang a muh ciangin Pasian phat a, “Hih pa, mihoih taktak khat ahi hi,” a ci hi. Hih thute a en dingin a hong pai mihonpite in a thupiang teng a muh uh ciangin dahin dip humsa-in a ciah uh hi. Galilee gam panin Jesuh a hong zui amah a thei ngei mite le numeite in gal et uh ahih manin a thupiang khempeuh a thei uh hi. Hih mipa Pilat kiangah va pai-in Jesuh’ luang a ngen hi. Tua ciangin Jesuh’ luang la suk a, puankang tawh a tun khit ciangin kuamah a kivui ngei nai lohna suang kikhuak hankhuk sungah a vui hi. Tua ni pen nipi zawh ni nga ni hi a, Sabbath ni hong hi dektak ta hi. Galilee gam panin a hong zui numeite in zong a kivuina-ah zui uh ahih manin a hanphual le a luang kisialzia khempeuh zong a mu uh hi. Tua ciangin amaute ciah uh a, Jesuh’ luang a nuh dingun paknamtui le sathau a bawlkhol uh hi. Thukham zui-in Sabbath ni tawlnga-in a om uh hi. Nipi ni zingsang tungin numeite in a bawlsa uh paknamtui tawi-in hanah va pai uh hi. Han phual a tun uh ciangin hankhuk hukna suang a kilikkhia mu uh ahih manin a sungah tumpah uh a, ahi zongin Topa Jesuh’ luang na om lo hi. Amaute in lamdangsa-in a om laitakun amaute gei-ah puanpak a silh mi nih hong dingvat uh hi. Numeite lau mahmah uh ahih manin lei lam nga-in kuncip uh hi. Tua mi nihte in, “Bang hangin misite lakah mihing zong na hi uh hiam? Hih lai-ah om nawn lo hi; kithosak zo hi. Galilee gamah a om lai-in note kiangah thu hong genin, ‘Mawhnei mite’ khut sungah Mihing Tapa kipia ding a, singlamteh tungah kithatin, a ni thum ni-in hingkik ding hi,’ a cih thute phawk un,” a ci uh hi. Tua ciangin amaute in Jesuh’ thugente phawkkik uh a, han panin ciahkikin, nungzui sawm le khatte le midangte kiangah hih thute a gen uh hi. Sawltakte kiangah hih thu a gen numeite pen Magdala khuami Mary, Joanna, James’ nu Mary, le numei dangte ahi uh hi. Ahi zongin hih numeite’ thugen pen thu phuahtawm bangin ngaihsun uh a, um lo uh hi. Ahi zongin Peter dingin hanah va tai a, han sung a etsuk ciangin a kitunna puan bek na om hi. Tua ciangin amah in zong tua thupiang lamdangsa-in inn-ah a ciahkik hi. Tua ni mahin, Jesuh’ thu a zui mi nih, Jerusalem khua panin tai sagih bang a gamla Emmaus kici khua-ah a pai uh hi. A paikawmun hih thupiangte kikumkum uh hi. Tua bangin kiho-in thu kikumin a om laitakun Jesuh mahmah in hong naihin amaute tawh hong tonkhawm hi. Amau tegel in a muh hangun Jesuh ahihlam thei lo uh hi. Jesuh in, “Na lam paikawmun bang gengen na hi uh hiam?” ci-in a dong hi. Amau tegel zong dinkhawl pah uh a, a maisuah uh dahmai mahmah lai hi. Tua ciangin amau tegel sung panin Kleopas a kici pa in, “Jerusalem-a hawhte lakah tusawng tenga tua lai-a thupiang a thei lo nang bek na hi ding hi,” ci-in a dawng hi. Tua ciangin Jesuh in amaute kiangah, “Bang thu ahi hiam?” ci-in a dot ciangin amaute in, “Nazareth khuami Jesuh tunga thupiang ahi hi. Amah pen kamsang khat hi a, Pasian le mite khempeuh in a thugen le a nasepna-ah vang a nei mahmah khatin a ngaihsut uh ahi hi. Ahi zongin ka siampi liante uh le ka uliante un sihna thukhenna a thuak dingin Pilat tungah ap uh a, singlamteh tungah kithat hi. Amah pen Israel mite a honkhia ding pa hi, ci-in ka lamet uh ahi hi. Tua bang hinapi-in hih thuteng hong piang a, tu-in a thu pianzawh a ni thumna hita hi. Ko pawlte’ sung panin numei pawlkhat in lamdang ka sak uh thu hong gen uh hi. Amaute, tu zingsang tungin hanah va pai uh a, ahi zongin ama luang na om nawn lo hi. Tua ciangin amaute hong ciahkik uh a, vantung mite a muhna uh le tua vantung mite in Jesuh a hinkik khitna thu a gennate uh hong gensawn uh hi. Tua ciangin ka lawmte uh pawlkhat zong hanah va pai uh a, numeite’ gen bang teekteekin va mu uh a, ahi zongin Jesuh mu lo uh hi,” ci-in a dawng hi. Tua ciangin Jesuh in amau tegel kiangah, “Bangzah takin hai a, bang dingin kamsangte’ thugen um thei lo na hi uh hiam? Khrih in minthanna a ngah nadingin hih bangteng a thuak ding kisam hi lo ahi hiam?” a ci hi. Tua ciangin Jesuh in Lai Siangtho sungah ama thu a kigennate khempeuh, Moses laibu a kipanin kamsangte’ laibu khempeuh a khiatna a gen hi. Tua khua a tun uh ciangin Jesuh a paisuak ding bangin hong om a, ahi zongin amau tegel in kho-in, “Tu-in nitak lam hita a, ni tum dektak ahih manin ko tawh hong tamkhawm in,” a ci uh hi. Tua ahih manin Jesuh zong amaute tawh a tam hi. Amaute tawh an ne dingin a tut ciangin Jesuh in anlum la a, Pasian tungah lungdamna a kohkhit ciangin balnenin amaute a pia hi. Tua laitakin a haktawm bangin Jesuh ahih lamtak mu-in thei uh a, ahi zongin amau’ muhna panin Jesuh a mangpah hi. Amau tegel in, “Lampi-ah i paikawmin Lai Siangtho khiatna hong gen laitakin i lungsim hong lawpsak mahmah hi mah lo ahi hiam?” a kici uh hi. Amau zong thakhatin ding pahin Jerusalem-ah paikik uh a, nungzui sawm le khatte le adangte na kikhawmin, “Topa hingkik khin takpi hi. Simon kiangah na kilak khinzo hi,” ci-in a kigengen laitak uh a tuak uh hi. Tua ciangin tua mi nihte in zong a lam pai laitak uha thupiang teng le anlum a balnen ciangin Topa ahih lamtak a theihnate uh a gen uh hi. Amaute hih thu kikumin a om laitakun thakhat thu-in Jesuh mahmah amaute lakah hong ding a, “Nopna ngah ta un,” ci-in amaute a hopih hi. Ahi zongin amaute lau-in linglawng gawp uh a, sikha a mu hi ni, ci-in a ngaihsun uh hi. Tua ciangin Jesuh in amaute kiangah, “Bang hangin lungmang a, bang hangin lungka na hi uh hiam? Ka khut le ka khete en un; kei mahmah ka hi hi. Hong lawng unla hong thei un. Tu-a keima neih bangin sikha in pum le tak nei ahi hiam?” a cih khit ciangin a khut le a khete a lak hi. Amaute nuamlua kisa-in lamdangsa-in um zo lo phialin a om laitakun, “Nektheih khat peuhpeuh na nei uh hiam?” ci-in a dot ciangin amaute in zong ngasa haankeu khat pia uh a, Jesuh in saangin amaute’ muhin a ne hi. Tua ciangin Jesuh in amaute kiangah, “Tu-a thupiang khempeuh pen note tawh kong omkhawm lai-a ka gengen thute mah ahi hi. Moses Thukham laibu sung, kamsangte laibu sung le Late sungah a kigelh thu khempeuh a tung ding ahi hi,” a ci hi. Tua ciangin Lai Siangtho sung thu a theih nadingun a lungsim uh honsak a, amaute kiangah, “Khrih in sihna thuakin, a ni thum ni-in sihna panin hingkik ding a, Jerusalem khua a kipan minam khempeuh tungah a mawhna uh kisikin a kimaisak nading thu, ama min tawh kihilh ding hi, ci-in kigelh hi. Note pen hih thu khempeuh a thei teci na hi uh hi. Ka Pa’ hong ciamsa thu, note tungah ka hong pia ding hi. Ahi zongin vantung panin tua vangliatna na ngah mateng uh hih Jerusalem khuapi-ah na ngak un,” a ci hi. Tua ciangin Jerusalem khuasung panin Bethany khuagei ciang amaute paipih a, tua lai panin a khut laamto-in amaute thupha a pia hi. Amaute thupha a piak laitakin amaute kiang panin paikhia-in vantungah amah a kilato hi. Amaute in amah bia uh a, lungdam mahmahin Jerusalem khua-ah a ciahkik uh hi. Tua ciangin Pasian tungah lungdamna a ko dingin biakinn-ah a pai tawntung uh hi. A kipat cil-in Thu na om a, tua Thu, Pasian tawh na omkhawm a, tua Thu, Pasian ahi hi. Tua hi a, a kipat cil a kipanin Thu le Pasian na omkhawm hi. Pasian in Thu tawh na khempeuh piangsak a, a kipiangsak na khempeuh, Thu tawh loin a kipiangsak khat beek om lo hi. Nuntakna a nei khempeuh in tua Thu tung panin a nuntakna uh ngah a, tua nuntakna in mi khempeuh tungah khuavak hong tunpih hi. Tua khuavak pen khuamial lakah taang a, khuamial in tua khuavak a zo kei hi. Pasian in Johan kici mi khat kamtai dingin hong paisak a, mi khempeuh in ama thugenna za-in tua khuavak a uptheih nadingun tua khuavak thu a gen dingin a hong pai ahi hi. Tua Johan mahmah pen khuavak hi lo a, khuavak thu a gen dingin a hong pai ahi hi. Ama gen khuavak taktak pen zong leitungah hong tung khin a, mi khempeuh a taan khin hi. Amah, leitungah om a, amah tawh leitung a kibawl hinapi-in leitung mite in amah na thei kha lo uh hi. A khua le a tui-ah va pai a, ahi zongin a khuapih a tuipihte in ama thugen na ngai lo uh hi. Tua bang hitaseleh ama thu ngai-in amah a um mite khempeuh tungah Pasian’ tate suahtheih nading thu a pia hi. Tua bangin Pasian’ tate suahna pen leitung ngeina nute pate sung panin suahna tawh hi loin Pasian sung panin suahna ahi hi. Tua Thu mihing hong suakin kote lakah hong om a, itna nei-in citak mahmah ahih manin Pasian’ pianzia a neihna ka mu cian uh hi. Hih pianzia pen Pasian’ Tapa khat bek hihna tawh a neih pianzia ahi hi. Johan in ama thu gen a, “Keima nungah hong pai hinapi-in keima suah ma-in amah omkhin ahih manin kei sangin amah lianzaw hi,” ci-in ka gen pa pen hih pa ahi hi, ci-in a kiko hi. A kicing ama hong itna hangin eite khempeuh tungah thupha a banbanin hong pia hi. Pasian in Moses tungtawnin Thukham hong pia a, ahi zongin Jesuh Khrih hangin itna le cihtakna thu hong pai hi. Kuamah in Pasian mu ngei lo hi. Pasian tawh a kinai pen, Pasian mah ahi Tapa khat bek in Pasian hong kilangsak hi. Jerusalem khua-a Jew mi uliante in Johan kiangah siampite le Levi mite paisak uh a, “Nang kua na hi hiam?” ci-in a dongsak uh hi. Johan in zong na ipbawl loin a siangtakin na genkhia a, “Kei pen Khrih ka hi kei hi,” a na ci hi. Tua ciangin amaute in, “Tua ahihleh kua na hi hiam? Elijah na hi hiam?” a cih uh ciangin, “Ka hi kei hi,” na ci hi. Kamsangpa na hi hiam, ci-in a dot uh ciangin, ka hi kei hi, a na ci leuleu hi. Tua ciangin amaute in, “Tua ahihleh kua na hi hiam? Kote hong sawlte kiangah ka gen ding uh thu hong gen in. Nang, kua kici na hi hiam?” ci-in a dot uh ciangin Johan in, “Kamsang Isaiah in a na gen mah bangin, ‘Topa’ tot ding lampi na tangsak un,’ ci-in gam sungah a kikopa ka hi hi,” ci-in a dawng hi. Hih thu a dong mite pen Farisi mite in a sawl uh ahi hi. Amaute in Johan kiangah, “Nang pen Khrih lah hi lo, Elijah lah hi lo, kamsang lah hi lo na hih leh bang hangin tuiphum mawk na hi hiam?” ci-in a dot uh ciangin Johan in, “Keimah in tui sungah mite a phum lel ka hi hi. Ahi zongin tu mahmahin note’ muh ngei loh mipa, note’ lak mahah hong om hi. Keima khit ciangin note lakah amah in nasep hong kipan ahih hangin, kei pen ama khedap khau a sutsak ding nangawnin ka kilawmzo nai kei hi,” ci-in a dawng hi. Hih bang thu kidotna a pianna mun pen Johan in mite tui phumin a omna, Jordan Gun nisuahna lam gal-a om Bethany khua ahi hi. A zing ciangin Johan in ama kiangah Jesuh hong pai a muh ciangin, “En un, leitung mawhna a lakhia Pasian’ Tuuno hih lai-ah hong pai hi. Keima nungah mi khat hong pai ding a, keima suah ma-in amah omkhin ahih manin kei sangin amah lianzaw hi, ci-in ka gen pa ahi hi. Amah a bangci mi hi ding cih thei lo napi-in, Israel mite in amah a theih nadingun tui sungah mite a phum dingin a hong pai ka hi hi,” a ci hi. Johan in hih mipa thu teci na pang a, “Vantung panin vakhu bangin Kha hong paisukin ama tungah a om ka mu hi. Keimah in amah ka theih nai loh hangin, tui sungah mite a phum dingin kei a hong sawl Pasian in, ‘A tungah Kha hong paisukin a omna mipa pen Kha Siangtho sungah mite a phum ding pa ahi hi,’ ci-in hong genkhol hi. Tua ahih manin hih mipa pen Pasian’ Tapa hi, ci-in thei ka hih manin teci ka pang hi,” a ci hi. A zing ciangin Johan le a nungzuite nih ding khawmin a om laitakin, amaute gei-ah Jesuh hong pai a muh ciangin Johan in limtakin enin, “Hih lai-ah Pasian’ Tuuno hong pai hi,” a ci hi. A nungzui tegel in hih a kampauna za uh ahih manin Jesuh a zui pah uh hi. Jesuh kihei a, amau tegel in a zuihlam a muh ciangin, “Bang zong na hi uh hiam?” ci-in a dong hi. Amaute in, “Sia aw, koi lai-ah om na hi hiam?” ci-in a dawng uh hi. Jesuh in, “Hong pai unla, ka omna mun hong mu un,” a na ci hi. Amau tegel in zong Jesuh va zui uh a, a omna mun a va mu uh hi. Tua hun pen nitak nai li hun pawl ahih manin ama kiangah a giak uh hi. Johan kampauna za-in Jesuh a zui nihte sung panin khat pen Simon Peter’ naupa Andru ahi hi. A zing ciangin a u Simon zongpahin ama kiangah, “Messiah ka mu zo uh hi,” a ci hi. Tua pen Khrih a cihnopna ahi hi. Tua ciangin Jesuh kiangah a u Simon a paipih hi. Jesuh in amah enin, “Nang pen Johan’ tapa Simon na hi hi. Tu a kipanin Sifas hong kici ding hi,” a ci hi. Sifas pen Peter tawh a kibang hi a, suangtum a cihna ahi hi. A zing ciangin Jesuh in Galilee gamah pai ding ngaihsun hi. Filip tawh kituak a, ama kiangah, “Hong zui in,” a ci hi. Filip pen Andru le Peter’ tenna Bethsaida khuami mah ahi hi. Nethanel tawh a kituah ciangin Filip in, “Moses in Thukham laibu sungah a gelh mipa, le kamsangte in zong a gelh mipa ka mu khin uh hi. Amah Jesuh hi a, Nazareth khuami Josef’ tapa ahi hi,” a ci hi. Nethanel in, “Nazareth khua panin bang hong piang peuhmah ding ahi hiam?” na cihsan hi. Ahi zongin Filip in, “Hong pai inla, hong mu dih in,” a ci hi. Jesuh in ama kiangah Nethanel hong pai a muh ciangin, “En un, hih mipa, Israel mi taktak hi a, a lungsimah zuauthu om het lo hi,” a ci hi. Nethanel in, “Kei hong bangci theih na hi hiam?” ci-in a dot ciangin Jesuh in, “Filip in nang hong sap ma-in theikung nuai-ah na om laitakin ka hong mu hi,” ci-in a dawng hi. Tua ciangin Nethanel in, “Sia aw, nang, Pasian’ Tapa na hi hi. Israel mite’ Kumpi zong na hi hi,” a cih ciangin Jesuh in, “Theikung nuai-ah ka hong mu hi, ka hong cih manin Pasian Tapa le Israel mite Kumpi ka hihlam hong um na hi hiam? Hihte sangin a thu lianzaw na mu lai ding hi,” a ci hi. Tua ciangin Jesuh in, “Ke’n a mantak kong genin-ah, vantung a kihong na mu ding uh a, Mihing Tapa le vantung kikalah Pasian’ vantung mite a kumsuk a kahto na mu ding uh hi,” a ci hi. Tua zawh ni nih khit ciangin Galilee gam Kana khua-ah mo pawi om a, Jesuh’ nu zong tua pawi-ah a om hi. Jesuh le a nungzuite zong tua pawi-ah a kisam hi. Leenggahzu a bei ciangin Jesuh’ nu in, “Leenggahzu om nawn lo hi,” ci-in Jesuh kiangah a gen hi. Tua ciangin Jesuh in, “Nu aw, bang hangin na lunghihmawhna hong ko zenzen na hi hiam? Keima hun tung nai lo hi,” ci-in a dawng hi. Ahi zongin Jesuh’ nu in nasemte kiangah, “Ama hong gen bangbangin gamta un,” a ci hi. Jew mite in amau biakna ngeina-ah kisilsiang nading ngeina nei uh ahih manin tua lai-ah tui tambong guk tambong sagih bang a ta thei thambelpi guk a om hi. Jesuh in nasemte kiangah, “Tua thambelpite sungah tui a dimin koih un,” ci-in a sawl mah bangin a dim sitsetin tui a koih uh hi. Tua ciangin Jesuh in, “Tu-in tui pawlkhat suak unla, zuphung pa kiangah va paipih un,” a ci hi. Amaute in zong tua mah bangin a va paipih uh hi. Zuphung pa in leenggahzu a suak tui a ciap ciangin, (tui a sung nasemte in a theih hangin) koi panin kingah ahi hiam, ci-in thei lo ahih manin zinei tangvalpa samin, “Midangte in leenggahzu khumte hawm masakin nei uh a, mite in a khamgawp khit uh ciangin a ngeinate hawm pan uh hi. Ahi zongin nangmah in a khum pen teng tu dong na sitlai hi,” a ci hi. Jesuh in nalamdang a bawl masak pen Galilee gam Kana khua-ah hih bangin Pasian’ pianzia a neihna kilangsak a, a nungzuite in zong amah a um uh hi. Tua khit ciangin Jesuh le a nu, a sanggamte le a nungzuite, Kapernaum khua-ah pai-in tua lai-ah ni tawmkhat a taam uh hi. Jew mite’ Paisan Pawi hun hong naita ahih manin Jerusalem khua-ah Jesuh a pai hi. Biakinn huangsung a lut ciangin bawng, tuu, le kawl vakhu zuakte mu a, sumkhekte zong a sumkhekna sabuai-ah a tu mu hi. Amah in zong khauteep bawlin biakinn huangsung panin tuu le bawng a kipan ganhing khempeuh hawlkhia a, sumkhekte’ sabuai zong sawnpaih sakin a sum khempeuh a thehthang sak hi. Tua ciangin kawl vakhu zuakte kiangah, “Na kawl vakhute uh hih lai panin paikhiatpih un. Ka Pa’ inn pen sumzuakna inn phualpi-in nei kei un,” a ci hi. Hih bangin a gamtatna hangin, “Nangma inn ka deihluatna in ka lungsim hong uklah sak hi,” ci-in Lai Siangtho sungah a kigelhna thu, a nungzuite in a phawk uh hi. Tua ciangin Jerusalem khua-ah a om Jew uliante Jesuh kiangah hong pai uh a, “Hih bangin na gamtat theih nading thu na neihna bang lim tawh hong lakthei ding na hi hiam?” ci-in a dot uh ciangin Jesuh in, “Hih biakinn susia le-uhcin ni thum sungin ka dingsakkik ding hi,” ci-in a dawng hi. Tua ciangin Jew uliante in, “Hih biakinn kum sawmli le kum guk sung a kilam ahi hi. Ni thum sungin dingsakkikzo ding na hi hiam?” a ci uh hi. Ahi zongin Jesuh in biakinn a cih ciangin ama pumpi a cihna ahi hi. Tua ahih manin sihna panin amah a kithawhkiksak ciangin a nungzuite in Jesuh’ thugen phawkkik uh a, Lai Siangtho le Jesuh’ thugente a um uh hi. Paisan Pawi hun laitakin Jerusalem khua sungah Jesuh a om sungin Jesuh in vangliatna tawh nalamdang a bawlte mu uh ahih manin mi tampi in amah a um uh hi. Ahi zongin Jesuh in mi khempeuh limtakin theitel ahih manin amaute muang lo hi. Amah in mite’ lungsimtawng dong thei ahih manin mite a bangci mi ahi hiam cih thu midangte in ama kiangah a gen ding kisam lo hi. Nikodemas a kici Jew mi ulian khat om a, amah pen Farisi a kici mite pawl ahi hi. Khatvei zan khuamial laitakin Jesuh kiangah va pai a, “Sia aw, mi khat peuhpeuh Pasian in ompih lo hileh hih na lamdangte kuamah in bawl thei lo ding ahih manin nang pen Pasian’ hong sawl siapa na hihna ka hong thei uh hi,” a ci hi. Jesuh in, “A mantakin kong genin-ah, mi khatpeuh a suahkik kei leh Pasian’ Ukna sungah lut thei lo ding hi,” a ci hi. Tua ciangin Nikodemas in, “Mi khat a teek khit ciangin bangci suahkik thei ding ahi hiam? A nu’ sungah lutkikin suakkik thei ding ahi hiam?” ci-in a dot ciangin Jesuh in, “A mantakin kong genin-ah, mi khatpeuh tui le Kha Siangtho tawh a suahkik kei leh Pasian’ Ukna sungah lut thei lo ding hi. Mihing sung panin a suakte mihing mah hi bek a, Kha tawh a suakte pen kha mi ahi hi. Tua ahih manin, ‘Na suahkik ding ahi hi,’ ka hong cihna hangin lamdangsa kei in. Huih zong a utna peuhpeuhah nung a, a huging na zaktheih hangin koi lam panin hong nung a, koi lamah nung ahi hiam, cih na mu thei kei hi. Kha tawh a suak mite zong tua mah bang ahi hi,” ci-in a dawng hi. Tua ciangin Nikodemas in, “Hih thu bangci piantheih mawk ding ahi hiam?” ci-in a dot ciangin Jesuh in, “Israel mite’ sia hinapi-in hih thu theithei lo na hi hiam? A mantakin kong genin-ah, kote in ka theihsa uh thu bek genin, ka muhsa uh thu bek teci a pang ka hi uh a, ahi zongin note kuamah in ka thugente uh nong um nuam kei uh hi. Hih leitung thute tawh a kisai thu kong gen ciangin um lo na hih uhleh vantung thute ka hong gen ciangin bangci up mah ding na hi uh hiam? Vantung panin a hong paisuk Mihing Tapa keimah simloh vantungah a paito ding kuamah om lo hi,” a ci hi. Moses in gamlak khuam tungah sumngo gul a khai mah bangin Mihing Tapa zong hong kikhai ding a, amah a um mi khempeuh nungta tawntung ding hi. Pasian in leitung mite hong it mahmah ahih manin ama Tapa a um mi khempeuh si nawn loin a hin tawntung theih nadingun a Tapa neihsun a hong piak dongin a hong itna a hong lak hi. Pasian in leitungah a Tapa hong sawlna pen mawhsakna thukhen dingin a hong paisak hi loin, leitung mite a honkhia dingin a hong paisak hizaw hi. Amah a um mite in mawhsak thukhenna thuak lo ding uh hi. Amah a um lote pen Pasian’ Tapa neihsun um lo uh ahih manin mawhsak thukhenna a thuak khinta uh ahi hi. Tua bangin mawhsak thukhenna a thuakna uh a hang in: Leitungah khuavak hong tungkhin napi-in a gamtatna uh hoih lo ahih manin leitung mite in khuavak sangin khuamial deihzaw uh hi. A gamtat hoih lo mite in a siatna uh a kilatkhak ding ut lo uh ahih manin khuavak deih lo uh a, khuavakah pai nuam lo uh hi. Ahi zongin thumanin a gamta mite ahihleh a gamtatnate uh Pasian’ deihna tawh kituak hi, ci-in a kilatsak theih nadingun khuavak sungah a pai uh hi. Hih thute khit ciangin Jesuh le a nungzuite Judea gamah pai uh a, tua gamah a nungzuite tawh omin mite tui a phum hi. Tua laitakin biakna vai-in kisian’ suahna tawh kizomin Johan’ nungzuite le Jew mi pawlkhat thu kiseel uh hi. Tua ahih manin Johan nungzuite a kiangah hong pai uh a, “Sia aw, Jordan Gun galkhatah na om khawmpih ngei pa, ama thu na genna na phawk lai hiam? Tu-in amah in mi tuiphumphum a, mi khempeuh in amah zuan uh hi,” ci-in a gen uhleh Johan in, “Pasian in hih theih nading thu pia kei leh kuamah in bangmah hih thei lo hi. Kei pen Khrih ka hi kei a, ama mai-ah a hong kisawlpa ka hi lel hi, ci-in ka genna thu note mahmah in na zaksa uh ahi hi. Mo pen zinei ding tangvalpa a’ ding bek ahi hi. Zineipa kiangah a ding a lawmpa in ama kampau ding bek ngai a, ama awging a zak ciangin nuam mahmah hi. Tua mah bangin tu-in ama hangin ka nuam a, keima lungdamna kicingta hi. Amah lian semsem ding a, kei ka hih leh ka neu semsem ding hi. “Vantung pan hong pai pa pen adang khempeuh sangin lianzaw hi. Leitung panin a piang mi pen leitung mi hi a, leitung thute bek mah a gen hi. Tua ahih manin vantung panin a hong pai pa ahihleh adang khempeuh sangin a lianzaw ahi hi. Amah in a muhsa leh a zaksa thu a gen hinapi-in kuamah in ama thugen um lo uh hi. Ama thugen a umte pen, Pasian’ thugen man hi, ci-in a um ahi uh hi. Pasian in a sawl mipa tungah ama Kha a kicingin pia ahih manin a sawl mipa in Pasian’ thugente mah a gen ahi hi. Pa in Tapa it ahih manin ama khut sungah na khempeuh a pia hi. Tua ahih manin Tapa a um mi peuhmah nungta tawntung ding a, Tapa’ thu a mang lote in nuntak mu lo ding a, amaute tungah Pasian heh tawntung ding hi,” a ci hi. Jesuh in Johan sangin mi tam ngahzaw in a tuiphumna thu Farisi mite in a za uh hi. (A taktakin Jesuh mahmah in tui phum loin a nungzuite bek in a phum ahi hi.) Jesuh in tua thu a phawk ciangin Judea gam panin paikhia-in Galilee gamah a paikik hi. Tua a paina-ah Samaria gam a nawk ding kisam hi. Tua bangin a nawk ciangin Samaria gam sungah Saikhar a kici khua khat a tung hi. Tua khua gei-ah Jakob in a tapa Josef a piak lo khat om hi. Tua lo sungah tuikhuk khat om a, a khualzinna-in Jesuh gim ahih manin a tuikhuk gei-ah a tu hi. Tua hun pen sunkim laitak ahi hi. Tua laitakin Samaria numei khat tuitawi dingin tuikhukah a hong pai hi. Jesuh in tua numei kiangah, “Na tui hong dawnsak in,” a ci hi. Tua laitakin khua sungah an lei dingin Jesuh nungzuite paikhia khin uh hi. Jew mite in buah tang uh a, Samaria mite’ na zatte zanglo uh ahih manin, Samaria numei in Jesuh kiangah, “Bang hangin nang Jew mi in kei Samaria numei kiangah tui hong ngen na hi hiam?” a ci hi. Jesuh in, “Pasian’ hong piaktheih dingte le tuidawn ding hong ngen pa theitel hi lecin, ama kiang pan tui a ngen ding na hizaw a, amah in nuntakna tui nang hong pia ding hi,” a ci hi. Tua ciangin numei in, “Sia aw, tuikhuk thuk mahmah a, ahi zongin tui khai nading bangmah na nei kei hi. Koi panin tua nuntakna tui ngah thei ding na hi hiam? Tua tham loin, i pupi Jakob sangin lianzaw ding na hi hiam? Amah a kipan a tate le a ganhingte in a nek hih tui sangin a limcizaw koi-ah ngah ding na hi hiam?” a cih ciangin Jesuh in, “Hih tui a dawn khempeuh dangtak kik ding uh a, ahi zongin keima piak ding tui a dawn khempeuh dangtak kik nawn lo ding uh hi. Tua ka piak tui a dawnte sungah nuntakna tuinak piang ding a, a nungtasak paisuak ding hi,” a ci hi. Tua ciangin numei in, “Sia aw, tua bang ahihleh ka dang a tak nawn loh nading le hih lai-ah tuitawi-in ka pai nawn loh nadingin kei zong tua tui hong pia in,” a ci hi. Tua ciangin Jesuh in, “Va ciahin na pasal va sam inla, hih lai-ah hong paikik un,” a ci hi. Numei in, “Pasal ka nei kei hi,” a cih ciangin Jesuh in, ” ‘Pasal ka nei kei hi,’ na cih pen man mahmah hi. Pasal nga na nei khin ngei a, tu-a na ompih zong na pasal hi lo hi. Tua ahih manin na thugen man mahmah hi,” a ci hi. Tua ciangin numei in, “Sia aw, nang pen kamsang khat na hihna thu ka hong thei hi. Ko Samaria mite’ pupite in hih lai mualtungah Pasian bia uh a, ahi zongin no Jew mite in Pasian biakna mun pen Jerusalem khua ahi hi, na ci uh hi,” a cih ciangin Jesuh in, “Lawm aw, hih ka thugen ding hong um in: Mite in hih mualtung hitaleh Jerusalem hitaleh ah Pa Pasian a biak nawn loh hun hong tung ding hi. No Samaria mite in na theih taktak lohpi uh na bia uh a, ahi zongin ko Jew mite tungtawnin hotkhiatna thu hong pai ahih manin kote in ka theih uh a bia ka hi uh hi. Ahi zongin Pasian a bia taktakte in Pasian’ Kha’ lamlahna le thuman tak tawh a biak hun hong tung ding a, tu-in zong a hong tung khinta ahi hi. Pa Pasian in tu-a bangin amah i biak ding a hong deih ahi hi. Pasian pen Kha ahi hi; amah a biate in tua Kha’ lamlahna le thuman taktak tawh a bia ding uh hi,” a ci hi. Tua ciangin numei in, “Khrih a kici Messiah hong pai nading thu ka thei hi. Amah hong pai ciangin thu khempeuh hong gen ding hi,” a cih ciangin Jesuh in, “Tu-a nang tawh a kiho keimah pen tua na gen pa ka hi hi,” a ci hi. Tua laitakin Jesuh nungzuite hong tung uh a, ahi zongin kuamah in, “Numei aw, bang deih na hi hiam?” cihna ahi a, “Bang hangin tua numei tawh kiho na hi hiam?” cihna ahi zongin dong ngam lo uh hi. Tua ciangin numei in a tuibeel nusia-in khua sungah ciah a, a khuapih mite kiangah, “Hong pai un. Ka gamtatnasa a hong thei pa va en ni. Amah Khrih hi kha ding hi,” a va ci hi. Tua ahih manin a khuapihte zong Jesuh kiangah a va pai uh hi. Mite a hong tunma hunsung tengin a nungzuite in, “Sia aw, an ne in,” ci-in a kun uh hi. Ahi zongin Jesuh in, “Note in na theih loh uh nek ding an ka nei hi,” a na ci hi. Tua ahih manin a nungzuite khatlekhat kiho-in, “Mi khatpeuh in an na puak khin hi ding ahi hiam?” a kici uh hi. Tua ciangin Jesuh in, “Keimah hong sawl pa’ deihna bangin na semin, sep dingin hong piak nasep zawhna pen ka nuntakna an ahi hi. Note in na paunak uhah, ‘Khai tuh khit kha li ciangin anlak hun hi,’ na ci uh hi. Tu-in note khuadakin lote en un. An khempeuh min khinta a, lak ding bek in sam hi. Khaituh pa le anla pa a lungdam khawm theih nadingin anla pa thaman a kipiak mah bangin anla pa in zong a nungta tawntung dingin mi a khawm ding hi. Tua ahih manin, ‘Khat in khai tuhin, adang khat in a an la,’ ci-in paunak a om pen thuman mahmah hi. Tua ahih manin note in na khawh loh uh lo-ah an a la dingin ka hong sawl hi. Midang in tua lo na kho a, note in a lak bek a si na hi uh hi,” a ci hi. Tua numei in, “Ka gamtatnasate khempeuh hong thei hi,” ci-in a thugenna hangin tua khuasunga om Samaria mi tampi tak in Jesuh a um uh hi. Tua ahih manin Jesuh kiangah Samaria mite a va tun uh ciangin amaute’ khua-ah a taam nadingin kun uh a, Jesuh zong tua khua-ah ni nih a taam hi. Tua ahih manin tua numei’ thugenna hangin Jesuh a um mi tampi tak kibehlap hi. Tua thu um mite in tua numei kiangah, “Nangma thugenna hangin a um ka hi nawn kei uh a, komau mahmah in a thugen za-in, leitung mite a Honkhia ding pa taktak hi, ci-in thei ka hih manun a um ka hi uh hi,” a ci uh hi. Tua lai-ah ni nih a taam khit ciangin Galilee gamah a pai hi. Jesuh mahmah in zong, “Kamsang a kuamah peuh ama gamah kipakta ngei lo hi,” ci-in a gen ngei hinapi-in, Paisan Pawi hun laitakin Jerusalem-ah Galilee mite va pai-in, tua pawi sungah Jesuh’ septe khempeuh mu khin uh ahih manin, Jesuh a tun ciangin Galilee mite in na limbawl mahmah uh hi. Tui, leenggahzu a suahsakna Galilee gam Kana khua-ah Jesuh paikik hi. Tua laitakin Kapernaum khua-ah kumpi nasem ulian khat om a, a tapa a ci a na hi. A tapa gim mahmahin si dektak ahih manin, Judea gam panin Galilee gamah Jesuh hong paina thu a zak ciangin ama kiangah va pai a, Kapernaum khua-ah Jesuh hong pai-in a tapa a damsak nadingin a va thum hi. Jesuh in ama kiangah, “Note in lim le nalamdang lian ka bawl na muh kei uhleh Topa ka hihna thu na hong um kei ding uh hi,” a cih ciangin ulianpa in, “Sia aw, ka ta a sih ma-in hong pai ta peuh in,” ci-in a thum hi. Tua ciangin Jesuh in, “Va ciah in. Na tapa nungta ding hi,” a ci hi. Tua ulianpa in Jesuh’ thugen um ahih manin a ciah hi. Lampi-ah a nasemte in na dawntuah uh a, “Na tapa nungta ding hi,” ci-in na ko uh hi. Amah in, “Bang hunin a noptuam hong kipan ahi hiam?” ci-in a dot ciangin amaute in, “Zan sun nai khat pawlin a cisa hong kiamvat hi,” ci-in a dawng uh hi. Jesuh in, “Na tapa nungta ding hi,” a cih hun tawh a kituak lian ahihna thu a pa in thei a, amah a kipan a innkuanpihte khempeuh in Jesuh a um uh hi. Hih nalamdang pen Judea gam panin Galilee gamah hong pai khit a kipanin Jesuh in nalamdang a bawl a nihna ahi hi. Tua khit ciangin, Jerusalem khua-ah Jew mite biakna pawi kibawl ahih manin Jesuh zong a pai hi. Jerusalem khuasung Tuu Kongpi a kici gei-ah Hebru pau-in Bethzatha a kici bual khat om a, tua bual kimkotah talap nga a om hi. Hih talapte sungah a mittaw, a khebai, khutlekhezaw, cina tampi lum phengphang uh hi. (Amaute in tua bualtui a kilawh ding ngakin a om uh ahi hi. Bang hang hiam cih leh Topa’ vantungmi khat in tua bual tui lok thei zel a, tui a kilawh khit ciangin tua lai a tung masa penpen ama natna panin a dam hi.) Tua talapte sung khatah kum le kum giat sung a cina khin mi khat a om hi. Jesuh in tua cina pa mu a, tua munah sauveipi a lupkhitna a theih ciangin ama kiangah, “Na dam nuam hiam?” ci-in a dot leh cina pa in, “Sia aw, bualtui a kilawh ciangin kei hong pua ding kuamah om lo ahih manin, kei ka tun ma-in midang khat a bual sung na tungkhin pahpah hi,” ci-in a dawng hi. Tua ciangin Jesuh in, “Tho inla, na lupna pheek pua-in pai in,” a cih ciangin, tua cina pa thakhatin dampah a, a lupna pheek la-in a paipah hi. Tua ni pen Sabbath ni hi citciat ahih manin, Jerusalem khuasunga om Jew mi uliante in cina damkik pa kiangah, “Tuni pen Sabbath ni ahih manin lupna pheek na puak ding ngeina hi lo hi,” a cih uh ciangin amah in, “Kei hong damsak pa in, ‘Na lupna pheek la inla pai in,’ hong ci hi,” ci-in a dawng hi. Tua ciangin amaute in, “‘Na lupna pheek la inla pai in,’ hong ci kua ahi hiam?” ci-in a dong uh hi. Ahi zongin tua munah mi tampi om a, Jesuh paikhia ziau ahih manin cina damkik pa in amah a damsak kua ahi hiam, cih a thei kei hi. Tua khit ciangin Jesuh in biakinn sungah tua cina dam pa mukik a, ama kiangah, “Tu-in na dam khinta hi. Mawhna bawl nawn kei in. Tua hikeileh a siazaw khat na thuak ding hi,” a ci hi. Tua ciangin amah zong pusuak a, Jerusalem khua-a Jew mi uliante kiangah, “Keimah hong damsak pa pen Jesuh ahi hi,” ci-in a va ko hi. Tua ahih manin Jesuh in Sabbath ni-in cina a damsakna hangin amaute in Jesuh bawlsiat ding a kipan uh hi. Ahi zongin Jesuh in amaute kiangah, “Ka Pa in tuni dongin na sem tawntung ahih manin kei zong ka sep ding mah ahi hi,” a ci hi. Hih bangin ama kampauna hangin amaute in Jesuh thatnuam semsem uh hi. Amah in Sabbath thukham a palsat bek hi loin, Pasian nangawn ka Pa ci ahih manin Pasian tawh a kikimin kiseh hi, ci-in a mawhsak uh hi. Tua ahih manin Jesuh in amaute kiangah, “A mantakin gen lehang: Tapa in ama thu bek tawh bangmah sem lo a, a Pa in a sep a muhteng bek a sem ahi hi. Tua hi a, a Pa in a septeng mah a Tapa in zong a sem ahi hi. Pa in a Tapa itin, ama septeng mah lak a, mailam hunah zong hih sangin a lianzaw a sep ding lak lai ding ahih manin lamdang na sa mahmah ding uh hi. Pa in mi sisate nangawn thosakin a nuntaksak mah bangin Tapa in zong a ut peuhpeuh nungtasak thei hi. “A mantakin kong genin-ah: Ka thugennate za-in kei hong sawl pa a um khempeuh a nungta paisuak ding hita hi. Mawhsak thukhenna ngah nawn loin, sihna panin a hingkik ta ahi hi. A taktakin ci lehang: A si mite in Pasian’ Tapa’ aw a zak hun uh hong tung ding hi bek loin tu-in a hun hong tungkhin hita a, ama aw a za mi khempeuh nungta ding uh hi. Pa in nuntakna a piaktheih mah bangin Tapa in zong a piaktheih nadingin Pa in a bawl hi. Amah pen Mihing Tapa ahih manin thu khentheih nading aana ama tungah a pia hi. Hih thu ka hong gen ciangin lamdangsa kei un. Han sungah a om misi khempeuh in ama aw za-in, han sung panin a hong paikhiat uh hun hong tung ding hi. A gamtat hoih mite pen a nungta tawntung dingin hong thokik ding uh a, a gamtat siate ahihleh mawhsak thukhenna a thuak dingin hong thokik ding uh hi. “Keima thu guak tawh ka hihtheih bangmah om lo hi. Pasian’ hong genna bang bekin thu ka khen hi. Keima ut bangin sem loin kei hong sawl pa’ deih bangin sem ka hih manin ka thukhenna thuman hi. “Keima thu tawh kisai-ah kei mahmah in teci pang leng kuamah in a thumanin sang thei lo ding hi. Tua ahih manin keima a’ ding teci a pang ding mi khat om a, keima thu genin teci a panna thuman hi, ci-in ka thei hi. Note in Johan kiangah thu a dong dingin mi na sawl uh a, amah in note kiangah a thuman hong genzo hi. Keimah in mihingte’ teci panna a kisam ka hi kei a, note in hotkhiatna na ngahtheih nadingun note a’ ding ngaihsutna tawh hih thuteng a hong gen ka hizaw hi. Johan pen meivak bangin kuangin a taang hi a, ama khuavak sungah tawlkhat nuamsa-in om ding na ut uh hi. Ahi zongin Johan’ teci panna sangin a lianzaw teci khat ka nei a, tua in: Ka Pa in sep dingin a hong piak tu-a ka sep thute in kei a dingin teci a pang hi a, Pa in kei a hong sawl taktak ahihna hong kilangsak hi. Nuntak tawntung ngahtheih nading lametna tawh Lai Siangtho sung na lim sim mahmah uh a, tua na sim uh Lai Siangtho in keima thu mah genin teci pang napi-in, na nuntak theih nadingun kei kiangah nong painuam kei veve uh hi. “Hih bangin kong gen ciangin mihingte in hong pahtak ding ka deihna hi lo a, note’ lungsim sungah Pasian itna na neih hetlohna uh ka theihna hang hizaw hi. Ka Pa’ thu tawh kei hong pai napi-in na hong sangnuam kei uh hi. Tua hinapi-in midang khatpeuh ama thu tawh hong paitawm leh na sang ding uh hi. Pasian’ pahtak theih nading hanciam nuam loin, note khatlekhat na kiphat theih nading uh a hanciam mite’ thugen, a bang hangin um zawsop na hi uh hiam? Hih bangin ka hong gen ciangin ka Pa kiangah note a hong mawhsak ding pa hi, ci-in hong ngaihsun kei unla, note in suan belin na neih uh Moses pen a hong mawhsak ding pa ahih zawkna thu thei ta un. Moses in keima thu gen belin nei ahih manin Moses um taktak hi le-uhcin kei zong na hong um ding uh hi. Ahi zongin Moses’ laigelh thute um lo na hih manun kei hong bangci uptheih mah ding na hi uh hiam?” a ci hi. Tua khit ciangin Tiberias zong a kici Galilee Tuili galkhat lamah Jesuh a pai hi. Jesuh in cinate damsakin nalamdang lianpipi a bawlte mi tampi in mukhin uh ahih manin mi tampi tak in Jesuh nung a zui uh hi. Jesuh zong a mualtung lamah kahto-in a nungzuite tawh a tukhawm hi. Jew mite’ Paisan Pawi hun nai mahmah ta hi. Jesuh khuadak a, ama lamah mihonpi hong pai muaimuai a muh ciangin Filip kiangah, “Hih mihonpite’ nek ding an koici ngahtheih ding ihi hiam?” ci-in a dong hi. (Jesuh in a hih ding thei napi-in Filip a ze-etna-in hih bangin a dong lel ahi hi.) Filip in, “Ngun peek zanih tawh an i lei hangin tawmno bekin cing pan ding uh hi,” ci-in a dawng hi. Tua laitakin a nungzuite sung panin Simon Peter’ nau Andru in Jesuh kiangah, “Hih lai-ah mangbuhham kibawl anlum nga le ngasa tawn nih sun-an a pua tangval khat om sam hi; tuate lah mihing hi zah lakah cihtaak ding ahi hiam?” ci hi. Ahi zongin Jesuh in a nungzuite kiangah, “Mihonte tusak un,” a ci hi. (Tua lai-ah lopa tampi om hi.) Tua ahih manin mihonte tu uh a, pasal tulnga bang pha uh hi. Jesuh in anlum la-in Pasian tungah lungdamna a kohkhit ciangin mihon a tute lakah a hawm hi. Tua mah bangin ngasa zong hih a, mi khempeuh in a duh zahzah uh a ne ciat uh hi. Mi khempeuh in a khamkhit uh ciangin a nungzuite kiangah, “A kikhamvalte kaikhawm kik un; bangmah mawk valsak kei ni,” a ci hi. Tua ahih manin mihonpi in anlum nga a nekkhit uh ciangin a khamvalte uh kaikhawm uh a, paipel sawm le nih dim a pha hi. Jesuh’ nalamdang bawl a muh uh ciangin tua lai-a om mihonpite in, “Leitungah kamsang hong pai ding a kici pa pen hih pa hi taktak hi,” a ci uh hi. Mihonte in thatanghat thu tawh kumpi-in amah a koih sawmna thu Jesuh in a theih ciangin mualtung lamah amah guak a kihemkhia hi. A nitak ciangin tui gei-ah a nungzuite paisuk uh a, gunkuang tungah tuangin Kapernaum khua lam manawhin a pai uh hi. Khua hong mialta a, ahi zongin amaute kiangah Jesuh hong tung nai lo hi. Huih nakpi-in hong nung ahih manin tui hong kilokgawp hi. Tuigei panin tai thum tai li bang gunkuang a hawhkhit uh ciangin tuitungah Jesuh hong pai-in gunkuang lam a hong naih a mu uh hi. Amaute na lau mahmah uh ahih manin Jesuh in amaute kiangah, “Keimah ka hi hi; lau kei un,” a ci hi. Tua ciangin amaute nuam mahmah uh a, gunkuang tungah Jesuh kahto sakin, a sawt loin a pai nading mun uh a tungpah uh hi. A zing ciangin tui galkhatah a omlai mihonte in tui gei-ah gunkuang khat a omlai mu uh a, a zan nitakin gunkuang tungah a tuan uh ciangin a nungzuite lakah Jesuh a om lohna thu zong thei uh ahih manin a nungzuite bek a pai-in a ngaihsun uh hi. Ahi zongin Tiberias khua panin gunkuang dang tampi hong pai a, Jesuh in lungdamna a kohkhit ciangin an a nekna uh munah hong tung uh hi. Tua lai-ah Jesuh le a nungzuite a om nawn lohna thu mihonte in a theih uh ciangin gunkuang tungah tuangin Jesuh a zong dingin Kapernaum khua lamah a pai uh hi. Tui galkhatah Jesuh a muh uh ciangin, “Sia aw, bang hunin hih lai na tung na hi hiam?” a ci uh hi. Jesuh in, “A mantakin ci lehang: Ka nalamdang bawlte na muh uh ciangin kei hong umin a hong zong na hi kei uh a, an na khamtakun na nek uh manin a hong zong na hi bek uh hi. A ningthei ante ngaihsutin nei masa kei unla, nuntak tawntungna an kan masa zaw un. Pa Pasian in tua an a pia dingin kei hong sehsa ahih manin keimah in note tungah nuntak tawntungna an ka hong pia ding hi,” ci-in a dawng hi. Tua ciangin amaute in, “Tua ahihleh Pasian ka lungkimsak theih nadingun bangci gamtat ding ka hi uh hiam?” ci-in a dot uh ciangin Jesuh in, “Pasian in a hong sawl pa um le-uhcin Pasian a lungkim nadingin a gamta na hi uh hi,” ci-in a dawng hi. Tua ciangin amaute in, “Kote in mu-in ka hong uptheih nadingun bang nalamdang hong bawl ding a, bang hong sem ding na hi hiam? Lai Siangtho sungah, ‘Amaute’ nek dingin van panin an a pia hi,’ ci-in a kigelh mah bangin ka pu ka pate un gam sungah manna an ne uh hi,” a cih uh ciangin Jesuh in, “A mantakin ci lehang: Moses in a piak an pen vantung an hi lo hi. Vantung an taktak pen ka Pa in hong pia hi. Pasian in a hong piak an pen vantung panin hong pai-in leitung mite a nungtasak pa ahi hi,” a ci hi. Tua ciangin amaute in, “Sia aw, kote tungah tua an hong pia tawntung in,” a ci uh hi. Tua ciangin Jesuh in, “Kei pen nuntakna an ka hi hi. Ka kiangah hong paite gilkial ngei nawn lo ding a, kei hong umte dangtak ngei nawn lo ding hi. Ahi zongin note tungah ka hong gennop thu in: Note in kei hong mukhin napi-in na hong um nuam kei uh hi. Ka Pa in kei tungah a hong piak mi peuhmah ka kiangah hong pai ding a, ka kiangah a hong pai mi peuhmah ka hawlkhia kei ding hi. Bang hang hiam cih leh keima ut bangin a sem ding hi loin kei hong sawl pa’ deihna bangin a sem dingin vantung panin a hong pai ka hi hi. Kei hong sawl pa’ deihna in: Ka khut sungah a hong piak mi khempeuh khat zong khahsuah loin nitawp ni ciangin ka hinsakkik ding ahi hi. Tua ahih manin Tapa mu-in a um mi khempeuh in nuntak tawntungna ngahin, nitawp ni ciangin ka hinsak ding, ka Pa in hong deih ahi hi,” a ci hi. Jesuh in, “Kei pen vantung panin a hong pai an ka hi hi,” a cihna hangin mihonte phun ngeingai uh a, “Hih Jesuh pen a nu le a pa i theih hi a, Josef’ tapa hi lel hi lo ahi hiam? Tua hinapi-in bang hangin, ‘Vantung panin ka hong pai,’ cithei peuhmah ahi hiam?” ci-in a kiphunsan uh hi. Tua ciangin Jesuh in, “Note khatlekhat kiphunsan kei un. Kei hong sawl Pa in a kaih loh mite ka kiangah hong pai thei lo ding a, ka kiangah hong pai mite nitawp ni ciangin ka hingsak ding hi. Kamsangte in a lai gelhna uhah, ‘Pasian in mi khempeuh a hilh ding hi,’ na ci uh hi. Tua ahih manin Pa kiang panin thu za-in a thei mi khempeuh ka kiangah a hong pai ahi hi. Hih bang ka cih ciangin Pa tawh a kimu khin ngei om hi, ka cihna hi lo hi. Pasian kiang panin hong pai pa bek in Pa a mu ngei ahi hi. A mantakin kong genin-ah, kei hong umte bek in nuntak tawntungna ngah hi. Kei pen nuntakna an ka hi hi. Na pu na pate un gam sungah manna ne uh a, a vekpi-un si veve uh hi. Ahi zongin vantung panin a hong pai an a ne mi peuhmah si lo ding hi. Kei pen vantung panin a hong paisuk nuntakna an ka hi hi. Tua an a ne mi peuhmah nungta tawntung ding hi. Leitung mite a nuntak nadingin ka piak ding an pen keima sa ahi hi,” a ci hi. Hih bangin a thugenna hangin mihonpite khatlekhat kitawng uh a, “Bangci-in hih mipa in nek dingin ama sa hong piathei ding ahi hiam?” a kici uh hi. Tua ahih manin Jesuh in amaute kiangah, “A mantakin kong genin-ah, Mihing Tapa’ sa na nek kei uh a, a sisan na dawn kei uhleh note sungah nuntakna om lo ding hi. Ka sa ne-in ka si a dawnte a nungta tawntung hi a, nitawp ni ciangin ka hingsak ding hi. Bang hang hiam cih leh ka sa, an taktak hi a, ka sisan, dawn ding tui taktak ahi hi. Ka sa ne-in ka si a dawnte pen kei tawh pumkhat ka hi uh hi. A nungta Pa Pasian in kei hong sawl ahih manin ama hangin ka nuntak mah bangin keima sa a ne mite zong keima hang mahin nungta ding hi. Tua ahih manin kei pen vantung panin a hong pai an ka hi a, na pu na pate un ne-in a sih veve-na ante tawh kibang lo hi. Hih kei’ hong piak an a nete ahihleh nungta tawntung ding hi,” a ci hi. Hih thute pen Kapernaum khua-a kikhopna innsunga a thuhilhna-ah a gen ahi hi. A nungzuite nangawn un hih thu a zak ciangun, “Hih thugen haksa lua hi. Kua in zuizo ding ahi hiam?” a ci uh hi. Ahi zongin Jesuh in hih thu-ah a nungzuite’ phunna thei ahih manin, “Hih ka thugenna in note hong lungkiasak ahi hiam? Mihing Tapa ama omna ngei-ah a ciahto kik a mu hi le-uhcin bang na ci ding uh hiam? Nuntakna a piathei pen Pasian’ Kha hi a, mihingte’ hihtheih bangmah om lo hi. Keima hong gen thute pen nuntakna a hong piathei tua Kha thu ahi hi. Tua hinapi-in note pawlkhat in na um kei uh hi,” a ci hi. (Jesuh in a kipat cil pek a kipanin kuateng in ama thu um ding a, kuateng in amah lehpei ding cih thu thei khinzo hi.) Tua ciangin Jesuh in, “Ka Pa in ahi thei dingin bawl kei leh ka kiangah kuamah hong pai thei lo ding hi, ka cihna thu pen hih thu hang mah ahi hi,” ci-in a genthuah lai hi. Hih bangin a thugenna hangin a nung a zui a thungai mi tampi kileh kikin Jesuh zui nawn lo uh hi. Tua ahih manin Jesuh in a nungzui sawm le nihte kiangah, “Note zong na ciahkik nuam mai uh hiam?” a cih ciangin Simon Peter in, “Topa aw, ciah le ung kua kiang zuan mawk ding ka hi uh hiam? Nangmah in nuntak tawntung nading thu na nei hi. Tu-in nang ka hong um uh a, Pasian kiang panin a hong pai a Siangtho Pa na hihna thu ka hong thei uh hi,” ci-in a dawng hi. Tua ciangin Jesuh in, “Note na sawm le nih mahun ka hong teel hinapi-in khat pen dawi na suakmawk uh hi,” a ci hi. Sawm le nihte sung panin amah a lehpei ding ahih manin Simon Iskariot’ tapa Judas thu a genna ahi hi. Tua khit ciangin Galilee gam sungah Jesuh zin kawikawi hi. Jerusalem khua-a om Jew mi uliante in amah thatnuam uh ahih manin Judea gam sungah zin nuam nawn lo hi. Jew mite’ Buk Pawi hun hong naita ahih manin, ama sanggamte in Jesuh kiangah, “Na nung hong zui mihonte in na nasepna a muhtheih nadingun hih lai panin paikhia-in Judea gamah va pai in. Mite’ theih ding a ut pa in a simthamin na sem ngei lo hi. Hih bangin na semsem na hih manin na sepna thu mi khempeuh theisak vet in,” ci-in zahpihna tawh thu gen uh a, ama sanggamte mahmah in zong Jesuh um lo uh hi. Ahi zongin Jesuh in, “Kei a dingin pai ding a hunhoih hi nai lo hi; ahi zongin note a dingin a hunhoih hi tawntung hi. Leitung mite’ gamtatnate hoih lo hi, ci-in gen tawntung ka hih manin amaute in kei hong mudah uh hi; ahi zongin note hong mudah lo uh hi. Tua ahih manin pawisiim dingin note va pai un. Kei a dingin a hunhoih hi nai lo ahih manin kei ka hong pai kei ding hi,” ci-in dawng a, amah pai loin Galilee gam sung mahah a omlai hi. Ahi zongin a sanggamte a dinkhiat khit ciangin Jesuh zong Jerusalem-ah Buk Pawi siim dingin a nungpai hi. Ahi zongin a kilang lua-in pai loin a simpai ahi hi. Jerusalem-a om Jew mi uliante in tua pawi lak khawng Jesuh zong uh a, “Koi-ah om ahi hiam?” a ci uh hi. Ama thu hangin mihonte lakah kam kihona tampi om a, “Amah mi hoih mahmah khat hi,” ci uh a, pawlkhat in, “Mi khemin a lam khialhpih ding pa ahih manin mihoih hi het lo hi,” a ci uh hi. Ahi zongin Jerusalem khua-a Jew mi uliante a kihtakna hangun kuamah in Jesuh thu a kilangin gen ngam lo uh hi. Pawi kham hunsung alang bang a bei khit ciangin biakinn sungah Jesuh lutin thuhilh ding a kipan hi. Jew mi uliante in lamdangsa mahmah uh a, “Hih mipa cikmah a sang kah ngei lo kimlai bang hangin thu hih zah thei ahi hiam?” a ci uh hi. Tua ahih manin Jesuh in, “Ka thugente pen keima thu hi lo a, kei a hong sawl Pasian kiang panin a hong pai thu ahi hi. Pasian’ deihna bangin a gamta nuam mi peuhmah in, ka thugente pen Pasian’ kiang panin a hong pai thu a gen ka hihna leh keima thu bek tawh a gen ka hihna khenthei ding uh hi. Amau’ thu bek tawh thu a gente in amau’ minthan nading a zong hi a, ahi zongin a hong sawl pa’ minthan nading a zong keimah in thuman thutak gen ka hih manin zuauthu kihel lo hi. Moses in note tungah Thukham hong pia napi-in kuamah in na zui kei uh hi. Tua hinapi, bang hangin thah dingin kei hong sawm na hi uh hiam?” a ci hi. Tua ciangin mihonte in, “Dawivei hi teh! Kua in nang thah hong sawm ahi hiam?” a ci uh hi. Jesuh in, “Sabbath ni-in cina damsakna nalamdang khat ka bawlna hangin lamdang na sa mahmah uh hi. Moses in na tapate uh vun na at ding uh thu hong pia a, (a taktakin Moses thupiak mapekin na pu na pate un a palsat thu ahi hi) vun at ni ding le Sabbath ni a kituahkhak ciangin a vun na at veve uh hi. Moses thupiakna a kipelh loh nadingin Sabbath ni-in vun at na hih uhleh Sabbath ni-in mi khat ka damsak manin bang hangin kei tungah heh na hi uh hiam? A tungthama kimu nate siksanin thu khen kei unla, thu taktak siksanin thu khenzaw un,” a ci hi. Jerusalem khuami pawlkhat in, “Thah dingin a sawm pa uh hih pa hi lo ahi hiam? Tua hinapi, mihon lakah thu gengen napi-in kuamah in bangmah cih lo uh hi. Uliante in Khrih hi, ci-in theihtelna nei uh hi ding hiam? Tua ding lah, hih mipa hong piankhiatna i theih hi a, Khrih hong pai ciangin ama piankhiatna kuamah in a theih ding hi lo hi,” a ci uh hi. Tua ahih manin biakinn sungah a gen mah bangin mi khempeuh zakin genkhia a, “Kei hong theitel taktak a, ka hong piankhiatna mun a thei takpi mah na hi uh hiam? Keima thu tawh a hong paitawm ka hi kei hi; kei a hong sawl a thuman pa a thei lo na hi uh hi. Ahi zongin amah in kei hong sawlin, ama kiang panin a hong pai ka hih manin ke’n ka thei hi,” a ci hi. Tua ciangin amaute in Jesuh mat ding hanciam uh hi; ahi zongin ama hun tung nai lo ahih manin kuamah in va su lo hi. Ahi zongin mihon lak panin mi tampi mah in amah um uh a, “Khrih hong pai ciangin hih mipa sangin nalamdang tamzaw hong bawl tuan ding ahi hiam?” a ci uh hi. Hih bangin mihonpite a kihona thu Farisi mite in za uh ahih manin amaute le siampi liante in Jesuh a man dingin biakinncing palikte pawlkhat a sawl uh hi. Jesuh in tua mite kiangah, “Note lakah tawlkhat ka om lai ding a, tua ciangin kei hong sawl pa kiangah ka pai ding hi. Keima omna munah note hong pai thei lo ding na hih manun tua hun ciangin kei nong zon uh hangin nong mu kei ding uh hi,” a na ci hi. Tua ciangin Jew mi uliante khatlekhat kiho uh a, “I muh zawh loh dingin hih mipa koi lai-ah paisawm hi ding ahi hiam? Jew mite omna Grik khuapi tuamtuamte-ah pai-in Grik mite kiangah thu hilhsawm hi ding ahi hiam? ‘Kei nong zon uh hangin nong muzo kei ding uh hi,’ a cihna leh ‘Keima omna munah nong pai thei kei ding uh hi,’ a cih ciangin bang a cihnopna hi ding ahi hiam?” ci-in a kikum uh hi. Pawi bei ni ding pen a thupi pen ni hi a, tua ni-in mihon lakah Jesuh dingin nakpitakin kiko a, “A dangtak na om uhleh ka kiangah hong pai unla tui hong dawn un. Lai Siangtho sungah, ‘Kei hong um mite sung panin nuntakna tui luangkhia ding hi,’ a cih mah bangin kei hong um mite ka kiangah hong pai-in hong dawn ta un,” a ci hi. Jesuh in hih bang a gen ciangin amah a umte in a ngah ding Kha Siangtho thu a genna hi a, tua hun laitakin Pasian’ pianzia nei-in sihna panin Jesuh kithokiksak nai lo ahih manin Kha Siangtho kipiakhia nai lo hi. Hih thu a zak uh ciangin mihon pawlkhat in, “Hih pa pen Kamsangpa taktak hi,” ci uh a, pawlkhat in, “Hih pa, Khrih ahi hi,” a ci uh hi. Ahi zongin pawlkhat in, “Galilee gam panin Khrih hong piang ding ahi hiam? Khrih i cih pen David’ suan hi ding a, David’ suahna Bethlehem khua-ah suak ding hi, ci-in Lai Siangtho sungah kigelh hi lo ahi hiam?” a ci uh hi. Tua ahih manin Jesuh thu tawh kisai-ah mihonte’ lungsim kituak lo hi. Mi pawlkhat in Jesuh man nuam uh hi; ahi zongin kuamah in su ngam lo hi. Tua ciangin siampi liante le Farisi mite kiangah palikte a va ciahkik uh ciangin, “Bang hangin amah hong kai lo na hi uh hiam” a na ci uh hi. Palikte in, “Hih mipa’ thugen bangin a gen kuamah om nai lo hi,” a cih uh ciangin Farisi mite in, “Note zong hong khem khinzo ta ahi hiam? Jew mi uliante hitaleh Farisi mite hitaleh sung panin amah a um, na theih uh omnai ahi hiam? Hih mihonte in ahihleh Moses Thukham thei lo uh ahih manin Pasian’ samsiatna a thuak dingte hi lel uh hi,” a ci uh hi. Tua hun ma-in Jesuh kiangah a va hawhsim ngei Nikodemas zong uliante sungah kihel ahih manin amah in, “Mi khat peuhmah a thu dongin ama gamtatnate i theih masak mateng mawhsakna thu i khen ding pen i Thukham tawh kituak lo hi,” a ci hi. Tua ciangin amaute in, “Nang zong Galilee gammi na hi hiam? Lai Siangtho sung sim lecin Galilee gam sung panin kamsang khat beek a pian’ ngei lohna thu na thei ding hi,” a ci uh hi. (Tua ciangin mi khempeuh a inn ciat uhah ciah uh a, Jesuh ahih leh Oliv Mual tungah a paito hi. Ahi zongin a zing ciang zingsang tungin biakinn-ah paikik a, mihon tampi ama kiangah hong kikhawm uh ahih manin amaute tungah thuhilh ding a kipan hi. Tua laitakin Thukham hilh siate le Farisi mite in pasal tawh a mawh laitakin a kiman numei khat hong paipih uh a, amaute mai-ah a dingsak uh hi. Tua ciangin Jesuh kiangah, “Sia aw, pasal tawh a mawh laitakin hih numei a kiman ahi hi. Hih bang mite pen suang tawh denlup dingin i Thukham sungah Moses in na gen hi. Tu-in nangmah in bangci ngaihsut na hi hiam?” ci-in a dong uh hi. Hih bangin a dot uh ciangin Jesuh a mawhsak theih nadingun a thangsiahna uh ahi hi. Jesuh zong kunsuk a, a khutme tawh leilak a gelh hi. Amaute in Jesuh kiangah dong teitei uh ahih manin amah zong dingin amaute kiangah, “Note lakah mawhna a nei het lo pa in deng masa un,” a cih khit ciangin, kunin leilak a gelh leuleu hi. Ahi zongin hih kammal a zak uh ciangin amaute a khangham pen panin khat khatin paikhia uh a, a tawpna-ah Jesuh le a mai-ah a ding numei bek a omlai hi. Tua ciangin Jesuh khuadakto-in numei kiangah, “Numei aw, amaute koilai tungkhin uh ahi hiam? Nang mawhsakin thu hong khen ding kuamah om nawn lo ahi hiam?” a cih ciangin numei in, “Topa aw, kuamah in thu hong khen lo hi,” ci-in a dawng hi. Tua ciangin Jesuh in, “Kei zong nang tungah thu kong khen kei hi. Ciah inla, mawhna bawl nawn kei in,” a ci hi.) Tua khit ciangin Jesuh in mihonte kiangah a thugenna khatah, “Kei pen leitung khuavak ka hi hi. Kei hong zuite in khuavak nuntakna nei ding uh a, khuamial gamtatna nei lo ding uh hi,” a ci hi. Tua ciangin Farisi mite in, “Nang le nang a kigentawm na hih manin na thugente a manin kisang thei lo hi,” a cih uh ciangin Jesuh in, “Kei le kei a kigentawm ka hih hangin ka thugente a man mah hi veve hi. Bang hang hiam cih leh koi panin hong pai-in koi lai-ah pai ding cih ka kithei a, note in kei ka hong paikhiatna le ka pai nading a thei lo na hizaw uh hi. Thu a thei lopi-in kei na hong mawhsak uh hi; ahi zongin ke’n kuamah ka mawhsak kei hi. Mi mawhsakin thu a khen hita mah leng zong, a thukhen pen kei bek hi loin kei a hong sawl Pa Pasian le keimah in a khenkhawm ka hih manun ka thukhennate a man taktak ahi hi. Na Thukham sung uhah zong, ‘Thu khat peuhpeuhah mi nih in a manna teci pangin a gen leh a genna uh thuman hi,’ ci-in na kigelh ahih mah bangin, keima a’ ding teci ka pang a, kei hong sawl Pa Pasian in zong keima a dingin teci a pang hi,” ci-in a dawng hi. Tua ciangin amaute in, “Na pa koi-ah om ahi hiam?” ci-in dong uh a, Jesuh in, “Kei ka hi a, ka Pa ahi zongin na hong thei kei uh hi. Kei hong thei hi le-uhcin ka Pa zong na thei ding uh hi,” ci-in a dawng hi. Jesuh in hih thute pen sumpi khiatna kuang a kikoihna biakinn dei sungah a gen hi a, ahi zongin ama hun tung nai lo ahih manin kuamah in amah man lo uh hi. Tua ciangin Jesuh in amaute kiangah, “Kei ka paikhia ding hi. Note in kei na hong zong ding uh a, ahi zongin na mawhna uh na sihpih ding uh hi. Ka paina-ah note na hong pai thei kei ding uh hi,” a ci hi. Tua ahih manin Jew mi uliante in, “‘Ka paina-ah note na hong pai thei kei ding uh hi,’ ci ahih manin amahmah kithattawm ding a cihna hi ding hiam?” a ci uh hi. Tua ciangin Jesuh in amaute kiangah, “Note pen nuailam mi na hi uh a, kei pen tunglam mi ka hi hi. Note pen hih leitung mi na hi uh a, kei pen hih leitung mi ka hi kei hi. Kei pen, ‘Kei ka hihlam na hong up kei uhleh na mawhna uh a sihpih ding na hih manun, na mawhna uh na sihpih ding uh hi,’ ci-in ka hong genna pen hih thu hang ahi hi,” a ci hi. Tua ciangin amaute in, “Nang kua na hi hiam?” ci-in a dot uh ciangin Jesuh in, “A kipat cil a kipan ka hong gensa mah ka hi hi. Note’ thu genin, note’ thu ka khen ding tampi tak om hi. Kei a hong sawl pa a thuman a thutak hi a, ama tung panin ka zaksa thute bek leitung mite tungah a pulak ka hi hi,” ci-in a dawng hi. Jesuh in Pa Pasian’ thu a gengen ahih lamtak amaute in thei lo uh hi. Tua ahih manin Jesuh in, “Mihing Tapa na khai khit uh ciangin ‘Kei kua ka hi hiam?’ cih thu na hong thei ding uh hi. Tua hun ciangin kei’ thu bek tawh bangmah hih loin, ka Pa’ hong hilhsa teng bek a gen ka hihna thu na thei ding uh hi. Kei a hong sawl pa’ lungkimna bang bekin gamta tawntung ka hih manin amah in kei guak hong nusia loin, hong ompih tawntung hi,” a ci hi. Tua bangin Jesuh in thu a gen ciangin mi tampi in amah a um uh hi. Tua ahih manin amah a um Jew mite kiangah Jesuh in, “Ka thuhilhnate na zuih paisuak nak-uhleh ka nungzui taktakte na hi ding uh hi. Tua ciangin thuman na thei ding uh a, tua thuman in note hong suaktasak ding hi,” a cih leh amaute in, “Kote Abraham’ suanlekhakte ka hi uh a, cikmahin kuama salin ka om ngei kei uh hi. Tua ahih manin bang hangin, ‘Note suakta ding,’ hong cithei na hi hiam?” a ci uh hi. Tua ciangin Jesuh in, “A mantakin ci lehang mawhna a bawl mi peuhmah mawhna’ sila ahi uh hi. Silate pen innkuan mite tawh omkhawm paisuak lo a, tapa ahihleh om paisuak hi. Tua ahih manin Tapa in note hong khah le a suakta takpi na hi uh hi. Note pen Abraham’ suanlekhakte na hihna uh ka thei hi. Ahi zongin ka thugente hong um lo na hih manun kei thah dingin nong sawm uh hi. Tua ahih manin keimah in ahihleh ka Pa’ hong lahsa thute bek a gen ka hi a, ahi zongin note ahihleh na pa uh hong sawl bangin a gamta na hi uh hi,” a ci hi. Amaute in, “Kote’ pa Abraham ahi hi,” ci-in a dawn uh ciangin Jesuh in, “Abraham’ tate taktak hi le-uhcin Abraham’ gamtat bangin na gamta ding uh hi. A taktakin ci lehang, ka hihna khempeuh Pasian’ kiang panin ka zaksa thuman thu ka hong gen hinapi-in note in kei thah ding na hong sawm uh hi. Hih note’ gamtat bangin Abraham gamta lo hi. Note pen na pa uh gamtat bangin a gamta na hi uh hi,” a ci hi. Tua ciangin amaute in, “Kote pen zawlta ka hi kei uh a, ka Pa uh Pasian ahi hi,” a cih uh ciangin Jesuh in, “Kei pen Pasian kiang panin hong pai-in hih lai-ah hong om ka hih manin, Pasian pen na pa taktak uh hileh kei na hong it ding uh hi. Keima thu-in a hong paitawm ka hi kei a, ama hong sawl ka hi hi. Bang hangin ka thugente theithei lo na hi uh hiam? Ka thugente na ngaih nop loh man uh ahi hi. Note pen na pa uh Dawimangpa’ tate na hi uh a, na pa uh deihna bangin a gamta nuam na hi uh hi. A kipat a kipanin na pa uh mi that hi a, thuman gen ngei lo ahih manin thuman tawh kipawl thei lo hi. Amah pen zuauna khempeuh a pianna a zuaugen pa ahih manin zuau a gen ciangin ama ngeina hi lel hi. Tua ahih manin thuman ka hong gen ciangin na hong um thei kei uh hi. Note lakah kua in ka mawhna na hong lakthei uh hiam? Hong lak thei lo na hih manun thuman ka gen ciangin bang hangin hong um lo na hi uh hiam? Pasian kiang panin a paite in Pasian’ thugen za thei hi. Ahi zongin note pen Pasian kiang pan hi lo na hih manun Pasian’ thu na ngai nuam kei uh hi,” ci-in a dawng hi. Tua ciangin Jew mihonte in, “Nang Samaria mi hi-in, dawivei hi teh, ka hong cih uh a man mah hi lo ahi hiam?” a cih uh ciangin Jesuh in, “Kei dawivei ka hi kei hi. Keimah in ka Pa ka zahtakbawl a, ahi zongin note in kei nong simmawhbawl uh hi. Kei ka minthan’ theih nading ka hanciam kei a, ahi zongin keima minthan nading zongin, kei a hong angvan ding thukhen ding Khat om hi. A mantakin ci lehang, keima thuhilhna a zui peuhpeuh si nawn lo ding hi,” ci-in a dawng hi. Tua ciangin mihonte in, “Dawivei taktak na hihna thu tu-in ka hong thei uh hi. Kamsangte khempeuh le Abraham zong si napi-in, ‘Keima thuhilhna a zui peuhpeuh si nawn lo ding,’ na ci lailai hi. Kote’ pupi Abraham zong si ahih manin amah sangin a lianzaw dingin ki-um na hi hiam? Tua banah kamsangte khempeuh zong si ahih manin nang a kua-in kingaihsun na hi hiam?” a cih uh ciangin Jesuh in, “Kei le kei a kipahtawi hi leng ka kipahtawina a mawkna hi ding hi. Ahi zongin kei hong pahtawi pa pen ka Pasian uh ahi hi, na cih uh keima Pa ahi hi. Note in amah na thei ngei kei uh a, ahi zongin ke’n ka thei hi. Amah ka thei kei hi, a ci hi leng, note mah bangin kei zong a zuau ka hi ding hi. Ahi zongin ke’n amah thei ka hih manin ama thu ka mang hi. Note’ pupi Abraham in keima hun a tun ding lawp mahmah a, amah in tua hun mu-in nuam mahmah hi,” ci-in a dawng hi. Tua ciangin amaute in, “Nang pen kum sawmnga zong pha nai lo na hih manin Abraham mu ding na hi hiam?” a cih uhleh Jesuh in, “A taktakin ci lehang, Abraham a pian’ ma-in kei ka omkhin hi,” ci-in a dawng hi. Tua bang a cih ciangin amaute in amah a den nading suang tawm uh a, ahi zongin biakinn sung panin Jesuh a gelkhia hi. Tua bangin Jesuh a paikhiat ciangin a pianpih mittaw mi khat a mu hi. A nungzuite in, “Sia aw, hih pa a mittawtna ama mawhna hang ahi hiam, a nu a pate’ mawhna hang ahi hiam?” ci-in a dong uh hi. Jesuh in, “A mittawtna pen ama mawhna le a nu le a pate’ mawhna hang hi lo a, ama tungah Pasian’ vangliatna a kilat theih nadingin a mittaw ahi hi. Sun khuavak laiteng kei hong sawl pa’ na i sem ding hi. Kuamah in na a sep theih loh zan hun zong hong tung ding hi. Leitungah ka om laiteng kei pen leitung mite a dingin khuavak ka hi hi,” ci-in a dawng hi. Tua khit ciangin leilakah a cil sia-in buannawi bawl a, a mipa’ mitah tua buannawi a nuhkawmin, “Siloam Bual-ah na mai va phiat in,” ci-in a sawl hi. (Siloam a cih ciangin, Sawl, a cihna a hi hi.) Tua ahih manin mittaw pa zong va pai-in a mai va phiat a, khua mutheisa-in hong paikik hi. Tua hun ma-in amah ngettawm suangin a om a mu a vengte le amah a mu ngei mite in khua a muhtheihna a muh uh ciangin, “Ngettawm suangin a tutu mipa hi lo ahi hiam?” a ci uh hi. Mi pawlkhat in, “Amah hi mah hi,” ci uh a, ahi zongin pawlkhat in, “Amah hi lo hi; a kisun lel ahi hi,” a ci uh hi. Ahi zongin amah in, “Kei pen tua mipa ka hi hi,” a cih ciangin amaute in, “Tua pa na hih leh bangci-in khua mu theikik na hi hiam?” ci-in a dong uh hi. Amah in, “Jesuh a kici mi khat in a cil tawh buan bawlin ka mitte hong nuhsak a, ‘Siloam Bual-ah pai inla na mai va phiat in,’ hong ci ahih manin kei zong va pai-in ka mai ka phiat leh khua ka mu theikik hi,” ci-in a dawng hi. Tua ciangin amaute in, “Tua mipa koi-ah om ahi hiam?” ci-in a dot uhleh, “Ka thei kei hi,” ci-in a dawng hi. Amaute in Farisi mite kiangah tua mittaw ngei pa a paipih uh hi. Jesuh in buan bawlin a mit a vaksak ni pen Sabbath ni ahi hi. Farisi mite in tua mipa in khua a muhtheih kikna zia thu dong leuleu uh hi. Amah in, “Tua mipa in ka mitah buan hong nuh a, ka mai ka phiat leh khua ka mu theikik hi,” a ci hi. Farisi mi pawlkhat in, “Amah in Sabbath ni tang lo ahih manin Pasian kiang panin hong pai mi hi lo ding hi,” a ci uh hi. Ahi zongin pawlkhatte in, “A gamta khial mi in bang hangin hih bangin nalamdang bawlthei ding ahi hiam?” ci leuleu ahih manin mite’ ngaihsutna kituak lo hi. Tua ahih manin Farisi mite in mittaw pa kiangah, “Ka mit khua hong musak hi, ci na hih manin amah kua hi dingin ngaihsun na hi hiam?” ci-in a dotkik uh ciangin, “Amah kamsang khat hi ding hi,” ci-in a dawng hi. Jerusalem khua-a om Jew mi uliante in hih mipa a mittaw ngei hinapi-in tu-in khua mukik thei hi, cih pen um thei lo uh ahih manin a mittaw pa’ nu le pate sam uh a, amaute kiangah, “A pianpih-a mittaw na cih uh na tapa uh hih pa mah ahi hiam? Tua ahih kei leh bangci-in khua mukik thei ahi hiam?” ci-in a dot uh ciangin a nu le a pate in, “Hih mipa pen ka tapa uh ahihna le a pianpih mittaw ahihna thu ka thei uh hi. Ahi zongin bangci-in khua mukik thei hiam cihna le kua in khua mu theisakkik hiam cih thu ka thei kei uh hi. Amah naupang hi nawn lo ahih manin amahmah dong le-uhcin hong gen thei ding hi,” ci-in a dawng uh hi. Jesuh pen Khrih hi, ci-in a gen peuhpeuh, kikhopna inn panin hawlkhia ni, ci-in Jew mi uliante in thukimna neikhin uh ahih manin, Jew mi uliante a kihtakna uh hangin a nu le a pate in hih bangin a gen uh ahi hi. Tua ahih manin a nu a pate in, “Amah naupang hi nawn lo ahih manin amahmah dong un,” a ci uh ahi hi. Tua ciangin a mittaw ngei pa mah samkik leuleu uh a, “Pasian’ mai-ah kiciamin a man taktak hong gen in. Kote in hih mipa thukham palsatin a gamta pa hi, ci-in ka thei uh hi,” a cih uh ciangin amah in, “Amah a gamta khial ahihleh ahihloh bangmah ka thei kei hi. Keima theih thu in: Nidangin a mittaw kimlai, tu-in khua ka mukik theita hi,” ci-in a dawng hi. Tua ciangin amaute in, “Amah in nang bang hong cih a, na mit khua hong bangci muhsak ahi hiam?” ci-in a dot uh ciangin, “A thuteng ka hong gen khitsa hinapi, ka thugen na um kei uh hi. Bang dingin za kikkik nuam na hi uh hiam? Note zong ama nungzui suak nuam na hi uh hiam?” ci-in a dawng hi. Tua ciangin amaute in mittaw ngei pa kobawlin, “Nang pen ama nungzui na hi a, kote ka hih uhleh Moses’ nungzui ka hi uh hi. Pasian in Moses a hopihna thu ka thei uh a, hih mipa ahihleh koi lai panin hong piang ahi hiam cih nangawn ka thei kei uh hi,” a ci uh hi. Tua ciangin mittaw ngei pa in, “Amah in kei khua hong musak thei napi, amah koi pana hong piang ahi hiam cih na theih loh uh lamdang mahmah hi. Pasian in thukham a palsat mite’ thu ngai lo a, amah bia-in, ama deih bangin a gamta mite’ thu ngai hi, ci-in ko ka thei uh hi. Leitung pian’ cil a kipanin pianpih mittaw khua a musak thei a omlam kiza ngei nai lo hi. Tua ahih manin Pasian kiang panin hong pai hikeileh hih bang hih thei lo ding hi,” ci-in a dawng hi. Tua ciangin amaute in, “Mawhna bulomtang sung panin suakin a khangkhia mipa in kote tungah thu hong hilhsawm na hi hiam?” ci-in tua mittaw ngei pa a hawlkhia uh hi. Hih mipa a kihawlkhiatna thu Jesuh in za ahih manin amah a muh ciangin, “Mihing Tapa na um hiam?” ci-in a dong hi. Amah in, “Amah ka uptheih nadingin amah kua ahi hiam?” a ci hi. Jesuh in, “Amah na mukhin a, nang tawh a kiho mipa ahi hi,” a cih ciangin amah in, “Topa aw, ka hong um hi,” ci-in Jesuh a bia hi. Tua ciangin Jesuh in, “Mittawte in khua a muhtheih nading le khua mu thei a kineite mittaw a battheih nadingin leitungah thukhen dingin a hong pai ka hi hi,” a ci hi. Ama kiangah a om Farisi mi pawlkhat in hih bangin a thugenna a zak uh ciangin, “Kote zong a mittaw-in hong ngaihsun na hi hiam?” ci-in a dong uh hi. Jesuh in, “A mittaw hi le-uhcin mawhna tawh na kipelh ding uh hi. Ahi zongin khua mu thei ung, ci na hih manun na mawhna uh a ngei mahin a omlai ahi hi,” ci-in a dawng hi. Tua ciangin Jesuh in, “A mantakin ci lehang, tuukulh kongah lut loin a mun dang panin kahin a lut mite pen a guta a buluh ahi hi. Ahi zongin tuukulh kong tawnin a lut mipa ahihleh a tuute a cing pa ahi hi. Tua ahih manin tuukong cing pa in a kong hon a, a tuute a min ciatin a sap ciangin a tuute in a thu mang a, amah in tuukulh panin a tuute a pusuah khiatpih hi. A tuute khempeuh a pusuah khiat khit ciangin tuate mai-ah a cing pa pai a, a cing pa’ aw thei uh ahih manin tuute in amah a zui uh hi. Tuute in midangte’ nung zui lo uh hi; midangte’ aw theithei lo uh ahih manin lau-in taisanzaw uh hi,” a ci hi. Jesuh in hih thugentehna tawh thu a gen hangin amaute in Jesuh’ gennop thu a theithei tuan kei uh hi. Tua ahih manin Jesuh in amaute kiangah thu genkik leuleu a, “A mantakin ci lehang, kei pen tuute’ paina kongpi ka hi hi. Keima hun ma-in a hong pai mite ahihleh guta buluhte ahih manun tuute in amaute don lo uh hi. Kei, kongpi ka hi hi. Keimah tawnin a pai tuu khempeuh in lauhuaina tuakkha loin, a ututun sungtumin pusuakin lonona mun a mu ding uh hi. Gutate pen a gu ding, a that ding, le a siasak ding bekin hong pai hi. Kei ka hih leh tuute a nungta maimai bek hi loin nuntakna cingtaak a neihtheih nadingun a hong pai ka hi hi. “Kei, tuucing hoih ka hi hi. Tuucing hoih in a tuute sihpih ngam hi. Tuu nei taktak ahi lo, a kicialtawm tuucingpa in ngia khawng a muh ciangin a tuute nusia-in taisan ahih manin ngia in tuute man a, tuute a kithehthang gawp hi. Amah a kicial tawm ahih manin a tuute khualna lungsim nei loin a taisan ahi hi. Hih tuukulh sungah a om lo tuu dang ka nei lai hi. Tuate zong tuukulh sungah ka khum ding a, amaute in keima thu ngai-in, keima khut sungah ka tuu omsate tawh honkhat suakkhawm ding uh hi. Ka nuntakkik theih nadingin si ngam ka hih manin ka Pa in kei hong it hi. Kuamah in ka nuntakna hong laksak thei lo a, keima utthu tawh ka piak hizaw hi. Ka nuntakna piakkhiat theih nading le lakkik theih nading thu ka Pa in kei tungah a hong piak ahi hi,” a ci hi. Hih bangin thu a gen ciangin Jew mihonte a ngaihsutna uh kituak lo leuleu hi. Mi tampi tak in, “Hih pa pen dawivei, mihai hi lel ahih manin a thugen ngaih taak lo hi,” ci uh a, pawlkhat in, “Dawiveite in hih bangin thu gen thei lo hi. Dawi in mittawte khua musak thei ding ahi hiam?” a ci uh hi. Jerusalem-ah Biakinn Apkikna Pawi bawl hun hong tung a, phalbi hunsung ahi hi. Biakinn huangsung Solomon’ Talap a kici sungah Jesuh vak kawikawi-in a om laitakin Jew mihonte ama kiangah hong kikhawm uh a, “Thu kitel loin bang tanvei koih hong sawm na hi hiam? Khrih na hih leh zong teltakin hong gen in,” ci-in a dot uh ciangin Jesuh in, “Hong genkhin napi ing-in Topa ka hihna thu na hong um kei uh hi. Ka Pa’ thu tawh na ka septe in hong kilangsak khinzo hi. Ahi zongin note pen keima tuu hi lo na hih manun Khrih ka hihlam na hong um kei uh hi. Keima tuute in ka aw za-in thei uh ahih manin kei hong zui uh hi. Tua ahih manin amaute tungah nuntak tawntungna pia ka hih manin si ngei nawn lo ding uh a, keima khutsung panin kuamah in amaute hong sut zo lo ding uh hi. Ka khut sungah a hong pia ka Pa sangin a lianzaw kuamah om lo ahih manin ka Pa’ khutsung panin kuamah in lakhia zo lo ding hi. Kei le ka Pa pumkhat ka hi uh hi,” ci-in a dawng hi. Tua ciangin Jew mihonte in amah deng dingin suang tawm leuleu uh ahih manin Jesuh in, “Ka Pa’ hong sawl bangin note’ muhna-ah na hoih tampi ka hong sepna hangin suang tawh den hong sawm na hi uh hiam?” a cih ciangin mihonte in, “Nasep hoih na sep manin hong dengnuam ka hi kei uh a, Pasian na simmawhbawl manin hong dengnuam ka hi uh hi. Nang pen mi hi lel hinapi-in Pasian na kineihnuam hi,” ci-in a dawng uh hi. Tua ciangin Jesuh in, “Na Thukham sung uhah Pasian in, ‘Note pen pasian-te na hi uh hi,’ ci hi. Lai Siangtho sungah a kigelh thute a tawntungin a thuman hi a, Pasian’ thu a ngah mite pen Pasian in, ‘pasian-te,’ na ci hi. Tua ahih manin kei pen Pa Pasian in hong teelin leitungah a hong sawl ka hih manin, ‘Pasian’ Tapa ka hi hi,’ ka cih ciangin bang hangin Pasian simmawhbawl hong cithei na hi uh hiam? Ka Pa’ na a sem lo hi leng na hong uploh mah ding uh ahi hi. Ahi zongin keimah in ka Pa’ na sem ka hih manin keima thu na hong um nuam lo uh ahi ta zongin, Pa tawh pumkhat ka hihna thu na theih nadingun ka nasepnate na up dingun kilawm buang hi,” a ci leuleu hi. Tua ciangin amaute in Jesuh matsawm uh hi; ahi zongin amaute’ khutsung panin Jesuh a suakta hi. Tua ciangin Jordan Gun kantanin amah pai leuleu a, Johan in mite a tuiphum masakna munah tungin tua lai-ah a om hi. Ama kiangah mi tampi tak hong kikhawm uh a, “Johan in nalamdang bangmah bawl lo hi. Ahi zongin Johan in hih mipa thu a gen khempeuh a vekpi-in mankim hi,” a ci uh hi. Tua ahih manin tua lai-ah mi tampi in Jesuh a um uh hi. Tua laitakin Mary le a unu Martha’ omna Bethany khua-ah Lazaras a kici mi khat a ci na hi. Mary i cih pen Jesuh sathau nuhin a sam tawh a nulsaknu hi a, Lazaras pen ama u ahi hi. Tua ahih manin a nau numei tegel in Jesuh kiangah, “Topa aw, na it mipa a ci na hi,” ci-in thu a zasak uh hi. Ahi zongin Jesuh in tua thu a zak ciangin, “Hih natna pen sihna ding natna hi lo a, Pasian’ Tapa in Pasian’ pianzia a neihna mite in a theih nading, le Pasian a phattheih nadingin a na ahi hi,” a ci hi. Jesuh in Martha-te unau le Lazaras it mahmah hi. Tua hinapi-in a cinat a zakkhit ciangin tua lai-ah ni nih taam lai veve hi. Tua khit ciangin a nungzuite kiangah, “Judea gamah paikik ni,” a cih leh a nungzuite in, “Sia aw, zan mah deuhin Judea gam mite in nang denlup hong sawm uh ahih manin tua gamah paikik sawm na hi hiam?” a cih uh ciangin Jesuh in, “Sun khuavak hun nai sawm le nih sung hi lo ahi hiam? Mi khatpeuh tua khuavak sungah lampai leh pukkha cih om lo hi. Ahi zongin zan khuamial sungah lampai leh khuavak nei lo ahih manin pukthei hi,” a cih khit ciangin a nungzuite kiangah, “I lawmpa Lazaras ihmu zo hi. Ahi zongin amah a phong dingin ka pai ding hi,” a ci hi. Tua ciangin a nungzuite in, “Topa aw, amah ihmu ahihleh a nuamtuam hita ding hi,” a ci uh hi. Jesuh in amah si hi, a cinuam hinapi-in, a nuamtuamin a ihmu hi, a ci-in a nungzuite in ngaihsun uh hi. Tua ahih manin Jesuh in a teltakin gen a, “Lazaras si khinta hi. Ahi zongin note in na uptheih nadingun tua lai-ah kei om kha lo ka hih manin note kong khualna-in ka nuam mahmah hi. Ahi zongin tu-in ama kiangah va pai ni,” a ci hi. Tua ciangin, “Unau Peeng,” minno a nei Thomas in, “Ei zong amah tawh a sikhawm dingin va zui ni,” ci-in a nungzuihpihte a zawn hi. Jesuh a tun ciangin Lazaras a kivui zawh ni li a phak khitna thu a thei hi. Bethany le Jerusalem kikal tai nih bang bek kigamla ahih manin, a upa uh Lazaras a sihna hangin Martha le Mary a hehnem dingin Jew mi tampi zong hong pai uh hi. Jesuh hong paina thu Martha in a zak ciangin a dawn dingin va paikhia a, Mary ahihleh a inn mahah omlai hi. Martha in Jesuh kiangah, “Topa aw, hih lai-ah a om hi lecin ka u si het lo ding hi. Tu nangawnin na nget peuhpeuh Pasian in hong piak ding ka thei hi,” a ci hi. Jesuh in, “Na u hong thokik ding hi,” a cih leh Martha in, “Nitawp ni-a thawhkik ni ciangin hong thawhkik ding ka thei hi,” a ci hi. Tua ciangin Jesuh in, “Keimah in a sisa mite thosakin a hingsak thei pa ka hi hi. Kei hong um mi peuhmah a sih hangin nungta ding hi. A nungta a kei hong um mite si ngei nawn lo ding hi. Hih thu na um hiam?” a cih ciangin, “Ka um hi, Topa aw; leitungah a hong pai ding Pasian’ Tapa, Khrih na hihna thu ka um hi,” ci-in a dawng hi. Tua khit ciangin Martha a inn-ah va tai-in a naunu Mary va huausim a, “Siapa hong pai a, nang hong sam hi,” a ci hi. Tua thu a zak ciangin Mary dingin Jesuh a dawn dingin a paikhia hi. Jesuh, khuasung hong tung nai lo a, Martha tawh a kimuhna mun mahah na omlai hi. Amah hehnemin inn-ah a ompih mite in Mary dingin a paikhiatna a muh uh ciangin, hanah a kap dingin a pai ding hi, ci-in ngaihsun uh ahih manin a zui uh hi. Jesuh omna munah Mary tungin amah a muh ciangin ama khe mai-ah bok a, “Topa aw, nang hong om hi lecin ka u si het lo ding hi,” ci-in a kap hi. Jesuh in Mary le amah hong zui Jew mite a kahna a muh ciangin a lungsim nakpitakin sukha-in lunggim mahmah ahih manin, “Koi-ah vui na hi uh hiam?” a ci hi. Amaute in, “Topa aw, hong pai inla hong en in,” a ci uh hi. Tua ciangin Jesuh zong a kap hi. Tua ahih manin amaute in, “Jesuh in zong Lazaras nak it mahmah hi,” a ci uh hi. Ahi zongin pawlkhatte in, “Mittawte khua a musak thei hih mipa in amah a sih loh nadingin bawl thei lo ahi hiam?” a ci uh hi. Jesuh a dah hong suak mahmah kik ahih manin leihawm sungah kivui-in suangtum tawh a gong a kihukna hanah a pai hi. A phual a tun ciangin, “Suangtum likkhia un,” ci-in thu a pia hi. Tua ciangin misi pa’ naunu Martha in, “Topa aw, a kivui zawh ni li phakhin ahih manin uihta ding hi,” a cih leh Jesuh in, “Na up nakleh Pasian’ vangliatna na mu ding hi, ci-in hong genkhin hi lo ka hi hiam?” a ci hi. Tua ahih manin a suangtum a likkhia uh hi. Jesuh zong van lam dakto-in, “Pa aw, ka thungetna hong ngai na hih manin ka nuam mahmah hi. Ka thungetna na hong ngaih tawntungna thu ka thei a, ahi zongin hih lai-ah a om mite in kei na hong sawlna thu a uptheih nadingun tu-a bangin kam a hong pau ka hi hi,” a cih khit ciangin nakpitakin kiko-in, “Lazaras aw, hong pusuak in,” a ci hi. Tua ciangin a misi pa a khut a khe dial tawh kituamin, a maitang puan tawh a kitunsa-in hong pusuak hi. Jesuh in amaute kiangah, “A dial le a puante phelkhia un,” a ci hi. Tua ahih manin Mary kiangah hawhin Jesuh’ hihna a mu Jew mi tampi in amah a um uh hi. Ahi zongin amaute pawlkhat Farisi mite kiangah pai-in Jesuh’ sep nate a va ko uh hi. Tua ahih manin siampi liante le Farisi mite in thu vaihawm uliante tawh kikupna khat nei uh a, “Hih mipa in nalamdang tampi bawl ahih manin bangcih ding ihi hiam? Hih bangin omom sak lehang mi khempeuh in amah um ding uh a, Rom kumpite in i Biakinnpi hong suksiat sakin i minambup zong hong sugawp ding uh hi,” a kici uh hi. Tua laitakin amaute sung panin tua kumin siampi lianpen a sem Kaiafas a kici mipa in, “Note in bangmah na thei kei uh hi. I minambup in siatna a thuak sangin i minambup tangin mi khat si leh a hoihzawkna thu phawk lo na hi uh hiam?” a ci hi. Hih bangin thu a gen ciangin ama lungsim a gen hi lo a, tua kumin siampi lianpen a sem ahihna tawh Jew mite’ tangin Jesuh a si ding ahihna thu a genkhol ahi hi. Jew mite a’ ding bek hi loin a kithehthang Pasian’ mi khempeuh pumkhat a suah nadingin a kikaihkhop nading thu zong a genkhol ahi hi. Tua ahih manin tua hun a kipanin Jesuh a thahtheih nadingun a vaihawm uh hi. Tua ahih manin Judea gam sungah a kilangin Jesuh khualzin nawn lo a, amah paikhia-in sehnel gam gei-a om Efraim a kici khua-ah tungin tua lai-ah a nungzuite tawh a om hi. Jew mite’ Paisan Pawi hun hong nai ciangin, tua pawi kipatma hun sungin biakna vai-in kisiansuahna a bawl dingin gam sung khuate panin Jerusalem khuapi-ah mi tampi hong pai uh hi. Biakinn sungah kikhawmin a om laitakun Jesuh a mu dingin amaute khuadak kawikawi-in kiho uh a, “Jesuh hong pai dingin na um hiam?” ci-in khatlekhat kidong uh hi. Bang hang hiam cih leh siampi liante le Farisi mite in Jesuh a mattheih nadingun, “Jesuh a omna a thei na om uhleh hong ko un,” ci-in thupiakna nei khinzo uh hi. Paisan Pawi hun a tun ding ni guk in a sap ni-in sihna panin a thawhsak Lazaras a tenna Bethany khua-ah va tung hi. Amaute in nitak an na vak uh a, Lazaras ahihleh Jesuh tawh an ne-in tukhawmin, Martha pen anpia-in a manlah hi. Tua laitakin Mary in a manpha mahmah nard sathau namtui thawl khat hong paipih a, Jesuh’ khe a nuhkhit ciangin a sam tawh a nulsak hi. Tua innsung khempeuh sathau namtui gim hong nam hi. Tua laitakin Jesuh’ nungzuite sung panin amah a lehhek ding Judas Iskariot in, “Bang hangin hih sathau namtui ngun peek za thumin kizuakin a sumte mizawngte tungah kipiazaw lo ahi hiam?” a ci hi. Hih bangin kam a pauna pen mizawngte a khualna hang hi lo a, amah sumkem ahih manin a sumte gu-in a ututin a zang zel pa ahihna hang hizaw hi. Tua ahih manin Jesuh in, “Bangmah cih se dah un! Ama neih laite zong ka kivui cianga dingin kemsak hoh un. Mizawngte pen note tawh hong omkhawm niloh ding a, kei ka hih leh note tawh ka hong omkhawm tawntung kei ding hi,” a ci hi. Bethany khua-ah Jesuh a omna thu a zak uh ciangin mihon tampi hong pai uh hi. Jesuh a mu nuamin hong pai hi bek lo uh a, Jesuh in sihna panin a thawhsakkik Lazaras zong a mu nuam kawm uh ahi hi. A zing ciangin Paisan Pawi a siim mihonpite in Jerusalem khua-ah Jesuh hong pai nading thu a za uh hi. Tua ahih manin amah a dawn dingin Jerusalem panin mihonpi paikhia-in nisuh hiangte tawikawmin, “Pasian phat un! Pasian in Topa’ min tawh hong pai pa thupha pia ta hen! Pasian in Israel Kumpipa thupha pia ta hen!” ci-in a kiko uh hi. Tua hun laitakin a nungzuite in hih thu a khiatna thei lo uh hi. Ahi zongin Pasian’ pianzia nei-in Jesuh a thawhkik khit ciangin Lai Siangtho in amah a gen ahihna le ama a dingin hih bangin a piang ahihna thu a nungphawk uh hi. Jesuh in han sung panin Lazaras samin, sihna panin a thawhsakkik a mu mihonte in tua thu mah gen belin a nei uh hi. Jesuh in tua bang nalamdang lian a bawlna thu mihonte in za khin uh ahih manin amah a dawn dingin a pai uh hi. Tua ciangin Farisi mite khatlekhat kiho uh a, “Bangmah i cihzo het kei hi. En un, mi khempeuh in amah a zui khinta uh ahi hi,” a kici uh hi. Pawi hun sungin Pasian bia dingin Jerusalem khua-ah a hong pai mite lakah Grik mi pawlkhat a om uh hi. Galilee gam Bethsaida khuami Filip kiangah amaute hong pai-in, “Sia aw, kote in zong Jesuh ka mu nuam uh hi,” ci-in a gen uh ciangin Filip in Andru kiangah a gen hi. Tua ciangin Andru le Filip paikhawmin Jesuh kiangah a gen uh hi. Tua ciangin Jesuh in, “Mihing Tapa in Pasian’ pianzia a ngah ding hun hong tungta hi. A mantakin ci lehang, mangbuhhum tang khat leilakah kituhin si masa kei leh tang khat bek mah hi ngitnget hi; ahi zongin si masa leh tang tampi tak hong nei thei hi. Tua ahih manin hih leitung nuntakna a itte in a nuntakna taktak taanlawh ding a, hih leitung nuntakna a it lote in nuntakna taktak nei tawntung ding hi. Ka nasemte keima omna-ah a omtheih nadingin ka na a sem nuam peuhmah in kei hong zui ding uh a, ka Pa in ka na a sem mite a pahtawi ding hi,” a ci hi. Tua khit ciangin Jesuh in, “Tu-in ka lunggim mahmah hi. Bangcih ding ka hi hiam? ‘Pa aw, hih hun tawh hong kipelhsak in,’ ci ding ka hi hiam? Tua bang cih ding lah hih bang a thuak ding mahin a hong pai ka hi hi. Pa aw, nangma min thangsak ta in,” a ci hi. Tua ciangin vantung panin aw khat hong ging a, “Ka thangsakzo a, khatvei ka thangsakkik ding hi,” a ci hi. Tua kiima ding mihonte in a awging za uh a, “Vanging bang hi,” a ci uh hi. Pawlkhatte in, “Vantung mi in amah hopih hi,” a ci uh hi. Tua ciangin Jesuh in, “Hih awging pen keima a’ ding ngaihsutna hi lo a, note a’ ding ngaihsutna-in hong ging hizaw hi. Tu-in leitung thukhen ding hun hong tungta a, hih leitung a ukpa kilawnkhia ding hi. Leilak panin kei hong kikhai toh ciangin ka kiangah mi khempeuh ka kai ding hi,” a ci hi. (Hih bangin a gen ciangin ama sihna dingzia a genna ahi hi.) Tua ciangin mihonte in, “Khrih nungta tawntung ding hi, ci-in Thukham sungah kigen hi. Bang hangin Mihing Tapa kikhaito ding ci na hi hiam? Hih Mihing Tapa kua ahi hiam?” a cih uh ciangin Jesuh in, “Note kiangah tawmvei sung khuavak hong omlai ding hi. Khuamial sungah a pai mi in a paina mun thei lo ahih manin khuamial in note hong phak loh nadingin khuavak na neih sungun na gamtat ngei uh zom paisuak un. Khuavak mite na suahtheih nadingun khuavak na neih hun sungun tua khuavak um un,” a ci hi. Jesuh in hih thuteng a genkhit ciangin paikhia-in amaute kiang panin a bu hi. Amaute’ muhin Jesuh in hih nalamdang khempeuh a bawl hangin amaute in um lo uh hi. Kamsang Isaiah in, “Topa aw, kua in ka thugente um a, Topa’ vangliatna kua tungah kilak ahi hiam?” ci-in a genna thu a tun nading ahi hi. Tua ahih manin amaute in um nuam lo uh hi. Bang hang hiam cih leh Isaiah mah in, “Amaute’ natna ka damsak loh nadingin a mit un mu loin, a lungsim un a theihtheih loh nadingun amaute’ mit ka tawsak a, a lungsim uh ka mawlsak hi, Pasian in ci hi,” ci-in zong na gen lai hi. Isaiah in Jesuh’ neih Pasian’ pianzia mu ahih manin hih bangin thu a gen ahi hi. Tua bang hitaseleh Jew mi ulian tampi in Jesuh a um uh hi. Ahi zongin Farisi mite in kikhopna inn panin a hawlkhiat ding lau uh ahih manin a kilangin genkhia ngam lo uh hi. Pasian’ pahtak ding sangin mite’ pahtak ding utzaw uh ahih manin a tuaci om ahi uh hi. Tua ciangin Jesuh nakpitakin kiko a, “Kei hong um khempeuh in kei bek hong um hi loin kei hong sawl pa zong a um ahi hi. Kei hong mu khempeuh in kei hong sawl pa zong a mu ahi hi. Kei hong um mi khempeuh, khuamial sungah a om nawn loh nadingun leitung khuavak bangin ka hong pai hi. Ka thugenna za napi-in a zui lo mite tungah thu ka khen kei ding hi. Leitung mite mawhsakin thukhen dingin a hong pai ka hi kei a, a honkhia dingin a hong pai ka hizaw hi. Kei hong nialin ka thugen a sang lo mite in thukhen ding khat nei uh hi. Nitawp ni ciangin keima thugente pen amaute’ thukhen ding ahi hi. Bang hang hiam cih leh keima utthu tawh thu a mawkgen ka hi kei a, kei hong sawl Pa Pasian in ka gen ding thuteng a hong piak ahi hi. Gen dingin a hong sawl thute in nuntak tawntung a piangsak thei ahihna thu ka thei hi. Tua ahih manin Pa in gen dingin a hong sawlteng bek a gen ka hi hi,” a ci hi. Tu-in Paisan Pawi hun ding ni khat bek in sam a, Jesuh in hih leitung nusia-in a Pa kiangah a pai ding hun a tunna thu a thei hi. Hih leitungah a om ama mite it mahmah ahih manin a hih theihna zah ciang tawh a itna a lak hi. Jesuh le a nungzuite nitak an ne-in a tukhawm uh hi. Tua hun laitakin dawimangpa in Simon Iskariot’ tapa Judas’ lungsim sungah Jesuh lehhek nading ngaihsutna koih khinzo hi. A Pa in ama khut sungah vangliatna khempeuh a piakna le Pasian in amah a sawl mah bangin tu-in Pasian kiangah a paikik ding ahihna thu zong a thei hi. Tua ahih manin a annekna sabuai panin Jesuh dingkhia-in a puantungsilh suahkhia a, a kawngah a mainulpi a teeng hi. Tua ciangin kuangpi sung khatah tui sung a, a nungzuite’ khe silsakin a kawngah a teen a mainulpi tawh a nul keusak dingin a kipan hi. Simon Peter’ khe silsak dingin a kipat ciangin Peter in, “Topa aw, ka khe hong silsak zenzen ding na hi hiam?” a na ci hi. Jesuh in, “Tu-a ka gamtatna thu na theih loh hangin nidang ciangin na thei ding hi,” a ci hi. Peter in, “Nang peuhmah ka khe ka hong silsak ngei buang kei ding hi,” a cih ciangin, “Na khe hong silsak kei leng, kei tawh na kipawl thei nawn kei ding hi,” a ci hi. Tua ciangin Simon Peter in, “Topa aw, tua bang ahihleh ka khe bek hong silsak kei inla, ka khutte le ka lu zong hong silsak in,” a na ci leuleu hi. Jesuh in, “A kipumsil khinsa mite siangthota ahih manin a khe simloh silkik ding kisam nawn lo hi. Note sung panin khat simloh na vekpi-un na siang khin uh hi,” a ci hi. Jesuh in amah a lehhek ding pa theikhin ahih manin, “Note sung panin khat simloh na siangkhin uh hi,” a ci ahi hi. Jesuh in amaute’ khe a silsak khit ciangin a puan silhkik a, annek sabuai-ah a tutnasa mun hong zuanin, “Tu-a note tungah ka hong gamtatna thu na thei uh hiam? Note in kei pen Siapa, le Topa, na hong ci uh hi. Na hong cih uh mah bangin a man ka hi hi. Note’ Topa le Siapa in na khe uh hong silsak ka hih leh note khatlekhat na kisilsak kan ding uh kilawm hi. Note tungah ka hong gamtat bangin note na gamtat theih nadingun a lim a hong lak ka hi hi. A mantakin ci lehang, sila pen a topa sangin lianzaw ngei lo a, a kisawlpa zong a sawl pa sangin lianzaw ngei lo hi. Hih thu thei-in na zuih uhleh na lung uh nuam mahmah ding hi. “Hih bangin ka hong genna in note khempeuh hong huam kim lo hi. Ka teelsa mite ka thei hi. Lai Siangtho in, ‘Ka an a ne pa in kei hong langpang hi,’ a cihna thu a tun ding kisam hi. Hih thu hong tun taktak ciangin, ‘Kei kua ka hihna,’ na hong theih nadingun a hun ma-in a hong ma gen ka hi hi. A mantakin ci lehang, keima hong sawl mite a sangte in kei zong a hong sang ahi uh a, kei a hong sangte in kei a hong sawl pa zong a sang ahi uh hi,” a ci hi. Jesuh in hih thuteng a genkhit ciangin lungkham mahmah ahih manin, “A mantakin ci lehang, note khat in kei nong lehhek ding uh hi,” ci-in a kilangin a genkhia hi. Kua a cihnopna hi ding ahi hiam, ci-in a nungzuite khatlekhat a ki-en uh hi. Jesuh in a itdiak a nungzuite khat ama kiangah tu ahih manin, Simon Peter in a mitheek tawh amah hopih a, “Kua a cihnopna ahi hiam?” dong in, ci-in a sawl hi. Tua ahih manin tua nungzui pa in zong Jesuh nehphei lai deuhin, “Topa aw, kua ahi hiam?” ci-in a dong hi. Jesuh in, “Anlum, meh sungah diahin ka piak ding pa ahi hi,” a cih khit ciangin a anlum diahin Simon Iskariot’ tapa Judas a pia hi. Judas in tua an a nek khit phetin ama sungah Satan hong lutpah hi. Tua ahih manin Jesuh in ama kiangah, “Na hih ding peuhpeuh hihpak in,” a ci hi. Ahi zongin sabuai-ah a tutkhawmpih mite in hih bangin a cihna thu thei lo uh hi. Amah sumkem ahih manin hih pawi a zat ding a kisam na pawlkhat a lei dingin a sawl hi ding hi; tua ahih kei leh zong mizawngte pawlkhat tungah sum a pia dingin a sawl hi ding hi, ci-in nungzui pawlkhat in a ngaihsun uh hi. Tua hi a, Judas in a an a sankhit ciangin a paikhia pah hi. Tua hunin khua mial khinta hi. Judas a paikhiat khit ciangin Jesuh in, “Tu-in Mihing Tapa in Pasian’ pianzia a neihna hong kilang ding hita hi; ama hangin Pasian in minthanna a ngah ding ahi hi. Ama hangin Pasian in minthanna a ngah mah bangin Pasian in zong ama pianzia amah ngahsak ding a, a sawt loin ngahsak pah ding hi. Ka tate aw, note tawh sauvei ka hong omkhawm nawn kei ding hi. Note in kei na hong zong ding uh a, ahi zongin Jerusalem khua-a Jew uliante kiangah, ‘Ka paina munah na hong pai thei kei ding uh hi,’ ci-in ka gen mah bangin note kiangah zong tu-in ka hong gen hi. Note tungah ka hong piak thak thu in: Note khatlekhat na ki-it ding uh ahi hi. Note ka hong it mah bangin note khatlekhat na ki-it un. Note khatlekhat ki-it le-uhcin keima nungzuite na hihna uh mi khempeuh in hong thei ding uh hi,” a ci hi. Tua ciangin Simon Peter in, “Topa aw, koi-ah pai ding na hi hiam?” ci-in a dot ciangin Jesuh in, “Ka paina dingah tu-in na hong zui thei nai kei ding hi; ahi zongin nidang ciangin na hong zui ding hi,” ci-in a dawng hi. Peter in, “Bang hangin tu-in hong zui thei lo ding ka hi hiam? Nang ka hong sihpih ding hi,” a cih ciangin Jesuh in, “Kei hong sihpih ngam ding na hi hiam? A mantakin kong genin-ah, kei thumvei na hong nialkhit matengin ak khuang lo ding hi,” ci-in a dawng hi. Tua ciangin Jesuh in a nungzuite kiangah, “Note lunghimawh kei un. Pasian um unla, kei zong hong um un. Note’ om nading mun a bawlkhol dingin a pai ding ka hi hi. Ka Pa’ inn sungah om nading mun tampi om hi. A om lo ding hileh hih bangin thu ka hong gen kei ding hi. Kei va pai-in note’ om nading mun ka va bawlkholh khit ciangin keima omna munah note na hong om theih nadingun note a hong la dingin ka hong paikik ding hi. Ka pai nading mun tuntheih nading lampi na thei uh hi,” a ci hi. Tua laitakin Thomas in, “Topa aw, na pai nading mun thei lo ka hih manun a lampi ding bangci theih ding ka hi uh hiam?” a cih ciangin Jesuh in ama kiangah, “Keimah in Lampi ka hi a, Thuman, le Nuntakna zong ka hi hi. Kei hong suang loin Pa kiangah kuamah tung thei lo ding hi. Note in kei na hong theih nak-uhleh ka Pa zong a thei na hi uh hi. Tua ahih ciangin tu a kipanin Pa thei-in a mu khinta na hi uh hi,” a ci hi. Tua ciangin Filip in, “Topa aw, Pa hong lak lecin ka lung uh kim pah ding hi,” a cih leh Jesuh in, “Filip aw, hih tanvei omkhawm khin napi kei hong thei nai lo lai na hi hiam? Kei a hong mu khinte in Pa a mu khin ahih manin bang hangin, ‘Pa hong lak in,’ ci thei na hi hiam? Kei pen Pa tawh pumkhat ka hih lamtak um lo na hi hiam? Note tungah ka hong gen thute keima thu bek tawh a hong gen ka hi kei a, kei tawh a om Pa Pasian in na semin a hong gen ahi hi. Pa tawh pumkhat ka hihna thu hoihtakin hong um un. Na hong up nai kei uhleh zong ka nalamdang bawlnate hangin hong um beek un. A mantakin ka hong genin-ah, kei hong umte in keima sep nate mah sem ding hi. Pa kiangah kei ciah ding ka hih manin keima sep sangin zong a lianzaw sem lai ding uh hi. Tapa’ hangin Pasian’ pianzia a kilat theih nadingin keima min paulamin na hong nget khempeuh uh ka hong pia ding hi. Keima min paulamin na hong nget nak-uhleh ka hong pia ding hi,” a ci hi. Tua ciangin Jesuh in, “Kei na hong it uhleh ka thupiakte zong na zui ding uh hi. Keimah in Pa kiangah ka ngen ding a, note tawh a omkhawm tawntung dingin Thuman a hong lak Kha Siangtho, note hong Huhpa ding a hong pia ding hi. Leitung mite in tua Kha Siangtho mu thei lo, theithei lo uh ahih manin sang thei lo ding uh hi. Ahi zongin note sungah tua Kha Siangtho hong om ding ahih manin note in na thei ding uh hi. “Note a cimawh dingin ka hong nusia kei ding hi. Note kiangah ka hong paikik ding hi. Tawlkhat khit ciangin leitung mite in kei hong mu nawn lo ding uh hi. Ahi zongin kei ka nuntak mah bangin note zong nungta ding na hih manun note in kei na hong mu ding uh hi. Tua hun ciangin Pa sungah kei ka omna thu, le note sungah ka hong om mah bangin keima sungah na omna thu uh na thei ding uh hi. Keima thupiakte sangin a zuite in keimah hong it ahi uh hi. Kei hong it mite pen ka Pa in zong it ding a, keimah in zong itin amaute tungah ka kilang ding hi,” a ci hi. Tua ciangin Judas Iskariot ahi lo Judas dang khat in, “Topa aw, leitung mite tungah kilang loin kote tungah bangci-in hong kilangtuam thei ding na hi hiam?” ci-in a dot ciangin Jesuh in, “Kei hong itte in ka thu zui ding uh hi. Ka Pa in zong it ding a, ka nihun tua mite kiangah pai-in amaute tawh ka omkhawm ding uh hi. Kei hong it lote in ka thugente zui lo ding uh hi. Tu-a na zak uh thute pen keima thu hi lo a, kei hong sawl Pa Pasian kiang panin a hong pai thu ahi hi. “Note tawh ka hong omkhawm hun sungin hih thute a hong gen ka hi hi. Ahi zongin Pa in keima tangin a hong sawl ding Huhpa Kha Siangtho a hong tun ciangin note tungah thu khempeuh hong hilh ding a, note tungah ka hong gensa thu khempeuh zong hong phawksakkik ding hi. Note tungah keima neih bang lungnopna ka hong pia ding hi. Tua ka hong piak ding lungnopna pen leitung mite in a piaktheih a kip lo lungnopnate pawl hi lo hi. Tua ahih manin lau kei unla, zong lungkham kei un. ‘Ka va paikhia ding a, ahi zongin note kiangah ka hong paikik ding hi,’ ka cihna thu na za khin uh hi. Kei sangin a lianzaw Pa Pasian kiangah a va pai ding ka hih manin kei na hong it nak-uhleh ama kiangah ka paina hangin na nuamzaw ding uh hi. A thu hong pian’ taktak ciangin ka thugente na uptheih nadingun a pian’ ma-in a hong genkhol ka hi hi. Tu-in hih leitung a ukpa hong tungta ahih manin note kiangah thu kong gen man nawn kei ding hi. Amah in keima tungah aana nei lo hi. Ahi zongin leitung mite in Pa Pasian ka itna thu a theih nadingun Pa’ vaihawmna bangbangin a gamta ding ka hi hi. Tua ahih manin kithawi un; hih lai mun panin paikhia ta ni,” a ci hi. Tua ciangin Jesuh in, “Kei pen leenggui taktak ka hi a, ka Pa pen leenggui lonei pa ahi hi. Amah in gah a nei lo ka hiang khempeuh satkhia a, gah a nei hiangte ahihleh a gah semsem theih nadingin a puah hi. Note tungah ka hong thugennate hangin note a siang na suak khinzo uh hi. Kei tawh hong kizom paisuak le-uhcin kei zong note tawh a kizom paisuak ka hi ding hi. A hiang pen a gui tawh kizom kei leh gah a gah theih loh mah bangin note zong kei tawh na kizop kei uhleh gah na gah thei kei ding uh hi. “Kei pen leenggui ka hi a, note pen a hiang na hi uh hi. Note in kei tawh loin bangmah hih thei lo ding na hih manun kei tawh a kizomte in gah tampi na gah ding uh hi. Kei tawh a kizom lo mite pen leenggui hiang bangin kipaai khia-in keutum hi. Tua bang hiangte meikhuk sungah kilawnin a kangtum hi. Kei tawh na hong kizop uh a, note sungah ka thu a om nakleh na deih peuhpeuh uh hong ngen le-uhcin hong kipia ding hi. Gah tampi gah le-uhcin ka Pa’ minthanna a kilangsak na hi ding uh a, keima nungzui na hihna uh kilang ding hi. Ka Pa in kei hong it zahin note hong it ka hih manin keima hong itna sungah om un. Ka Pa’ hong thupiakte zui-in ama itna sungah ka om mah bangin note in zong ka thupiaknate na hong zuih uhleh ka itna sungah a om na hi ding uh hi. Note hangin kei ka lungdam theih nading le note’ lungdamna a cingtaak a suahtheih nadingin hih thute a hong gen ka hi hi. “Note tungah ka hong piak thu in: Note ka hong it zahin note khatlekhat na ki-it un. Lawmte’ tang ding sih ngamna sangin lawmte itna a lianzaw om nawn lo hi. Ka hong thupiak bangin na gamtat uhleh ka lawmte na hi uh hi. Nasemte in a tote’ nasepna bangmah thei lo ahih manin note pen nasemte ka hong ci nawn kei ding hi. Ka Pa’ tung panin ka zak thu khempeuh note kiangah hong genkhin ka hih manin note, lawm, ka hong ci zaw ding hi. Note in kei na hong teel kei uh a, ahi zongin keimah in note ka hong teel a, note va pai-in a kimang tawntung ding gah a gah dingin ka hong seh hi. Tua ahih manin keima min suangin Pa kiangah na nget peuhpeuh uh hong pia ding hi. Tua hi a, note ka hong thupiak in: Khatlekhat na ki-it un, cihna ahi hi. “Leitung mite in note hong muhdah leh kei a hong mudah masa ahihna thu na thei un. Hih leitung mite tawh a kipawl hi le-uhcin leitung mite in amau pawlte hong it ding hi. Ahi zongin hih leitung mite lak panin note ka hong teelkhia a, amaute tawh kipawl nawn lo na hih manun a hong mudah ahi uh hi. ‘Sila pen a topa sangin lianzaw lo hi,’ ci-in ka hong thugenna phawk un. Amaute in kei hong bawlsiat uhleh note zong hong bawlsia ding hi. Ka thugente hong zuih uhleh note’ thugente zong hong zui ding hi. Ahi zongin amaute in kei hong sawl pa thei lo uh ahih manin keima mi na hihna uh hangin amaute in hih bangin hong bawl ding uh ahi hi. Kei hong pai kei-in amaute tungah thu a gen lo hi leng amaute in mawh pualo ding uh hi. Ahi zongin tu-in ahihleh a mawhna thu uhah kiphel nading a paulap ding uh bangmah om nawn lo hi. Kei hong mudahte in ka Pa zong a mudah ahi hi. Kuamah in a bawl ngei loh na lamdangte amaute lakah a bawl lo hi leng amaute in mawh pualo ding uh hi. Ahi zongin amaute in ka nalamdang bawlte mu khin uh ahih manin kei le ka Pa a hong mudah khawm uh ahi hi. Amaute’ Thukham sungah, ‘Thu om lopi-in kei hong mudah uh hi,’ ci-in a kigelhna thu a tuntheih nadingin a hici mah ding ahi hi. “Ahi zongin Thuman a hong lak ding Huhpa ahi Kha Siangtho ka Pa kiang panin ka hong sawl ding hi. Amah hong tun ciangin keima thu hong gen ding hi. A kipat cil a kipanin kei tawh omkhawm na hih manun note in zong keima thu na gen ding uh hi. “Note na pukkhak loh nadingun hih thute a hong gen ka hi hi. Amaute in a kikhopna uh innte panin note hong hawlkhia ding uh hi. Note hong that mite pen Pasian’ nasemin a kingaihsut ding uh hun hong tung ding hi. Amaute in ka Pa ahi a, kei ahi zongin hong thei lo uh ahih manin tu-a bangin note a hong bawl ding uh ahi hi. Hih bangin a hong gamtat hun uh hong tun ciangin ka hong gen thute na phawk theih nadingun a hong genkhol ka hi hi. “Note tawh hong omkhawm ngawn ka hih manin a kipattung lamin hih thute ka hong gen kei hi. Tu-in ahihleh kei hong sawl pa kiangah a ciahkik ding ka hi hi. Tua hinapi-in, ‘Koi-ah pai ding na hi hiam?’ ci-in kuamah in na hong dong kei uh hi. Ahi zongin hih thute ka hong gen ciangin na lungsim uh dah mahmah hi. A taktakin ci lehang, kei paikhia kei leng note hong Huh ding pa hong pai lo ding a, kei paikhia leng note hong Huh ding pa hong sawl ding ka hih manin kei va paikhia leng note a dingin hoihzaw tham hi. Amah hong tun ciangin leitung mite tungah mawhna thu, thuman thu leh thukhenna thu laktel ding hi. Amaute in kei hong uploh manun a mawhna uh lak ding a, Pa kiangah pai ding ka hih manin kei na hong mu nawn kei ding uh hi, ka cihna thu a manna lak ding a, hih leitung a ukpa pen thukhenna a thuakkhin ahihna thu zong lak ding hi. “Ka hong gen ding tampi tak omlai hi; ahi zongin hong gen lai leng note a dingin tamlua ding hi. Tua ahih manin thuman hong lak ding Kha Siangtho hong tun ciangin thu khempeuh a manin hong hilh ding hi. Ama ngaihsuttawm thu hong gen ding hi lo a, ama tungah a kigen thute le a hong tung ding thute a hong gen ding ahi hi. Amah in keima gen ding thute note tungah hong gen ding ahih manin Pasian’ pianzia ka neihna hong kilangsak ding hi. Ka Pa’ neihsa khempeuh keima-a’ suakkhin ahih manin keima gen ding thute le a gen dingin ka sawlteng Kha Siangtho in note kiangah hong gen ding hi,” a ci hi. “Tawlkhat khit ciangin na hong mu nawn kei ding uh a, tawlkhat khit ciangin na hong mukik ding uh hi,” a cih ciangin, a nungzuite pawlkhat kidong uh a, “Tawlkhat khit ciangin kei na hong mu nawn kei ding uh a, tawlkhat khit ciangin na hong mukik ding uh hi, a cihna le Pa kiangah a ciahkik ding ka hi hi, a cihnate bang a cihnopna ahi hiam?” a kici uh hi. Tawlkhat a cihcih pen bang a cihnopna ahi hiam, i thei kei hi, a kici uh hi. Jesuh in amaute’ theihnop lamtak phawk ahih manin amaute kiangah, “Note khatlekhat na kidot uh, ‘Tawlkhat khit ciangin na hong mu nawn kei ding uh a, tawlkhat khit ciangin na hong mukik ding uh hi,’ ka cihnopna a kidong na hi uh hiam? A taktakin ka hong genin-ah, note dahin na kap ding uh a, ahi zongin leitung mite lungdam ding uh hi. Note na dah ding uh a, ahi zongin na dahna uh lungdamna hong suak ding hi. Numei in a ta a suahhun a tun ciangin na sa ahih manin a dah hi. Ahi zongin a ta a suahkhit ciangin leitungah naungek khat a piangsak khin ahihna hangin lungdamin a natna teng a mangngilh ta hi. Note zong tua mah tawh na kibang ding uh hi. Note zong tu-in na dah uh hangin note tawh kimukik ding ihih manin na lung uh dam mahmah ding a, tua na lungdamna uh kuamah in hong beisak thei lo ding hi. “Tua hun ciangin kei kiangah bangmah nong ngen nawn kei ding uh hi. A mantakin kong genin-ah, keima min suangin na nget peuhpeuh uh Pa in hong pia ding hi. Tuni ciang dong keima min suangin bangmah na ngen nai kei uh hi. Tua ahih manin ngen le-uhcin hong kipia ding ahih manin na lungdamna uh hong cingtaak ding hi. “Tuhun ciang dong hih thute thugentehna zangin ka hong gen hi. Ahi zongin thugentehna ka hong zat nawn loh hun hong tung ding a, tua hun ciangin a teltakin Pa Pasian’ thu ka hong gen ding hi. Tua hun hong tun ciangin, Pa Pasian kiangah ka hong ngetsak ding hi, ka hong ci nawn kei ding a, nomau mahmah in ka min suangin Pa kiangah na ngenpah ding uh hi. Bang hang hiam cih leh note in kei hong itin, Pa kiang panin a hong pai ka hihna thu um na hih manun Pa mahmah in note hong it ahihna hang ahi hi. Pa kiang panin hong pai-in leitung a hong tung ka hi a, tu-in leitung nusia leuleu-in Pa kiang a zuankik ding ka hi hi,” a ci hi. Tua ciangin a nungzuite in, “Tu-in thugentehna zang nawn loin a kitel takin thu na hong gen hi. Tu-in na khempeuh na theihkhitna thu ka phawk uh a, ka theihnop uh thute kote in ka hong dot ding uh zong kisam nawn lo ahih manin Pa kiang panin a hong pai na hihna thu ka hong um uh hi,” a ci uh hi. Jesuh in, “Tu-in hong umta na hi uh hiam? Note khempeuh kithehthangin na inn ciat uh zuanin kei bek na hong nusiat ding uh hun a hong tung ding hi bek loin tu-in a hong tung hita hi. Ahi zongin kei guak a hong kinusia hi lo a, Pa in kei hong ompih hi. Keimah tawh na hong kipawlna uh hangin lungnopna na neihtheihna dingun hih thu a hong gen ka hi hi. Leitung gimna na thuak ding uh hi. Ahi zongin keimah in leitung nate zo khinta ka hih manin lungnuamin om un,” a ci hi. Jesuh in hih thute a genkhit ciangin vantung lam ento-in, “Pa aw, a hun hong tungta ahih manin na Tapa in na pianzia hong kilatsak theih nadingin tu-in na Tapa’ pianzia hong kilangsak ta in. Bang hang hiam cih leh Tapa tungah na piak mi khempeuh tungah Tapa in nuntak tawntungna a piaktheih nadingin mi khempeuh tungah ukna aana a neih nadingin Tapa tungah na hong piaksa ahi hi. Nang bek a man Pasian na hihna thu le nangmah in na hong sawl Jesuh Khrih hong theihna pen amaute a dingin nuntak tawntung ngah nading lampi ahi hi. Nangmah in sep dingin na hong piak nasep khempeuh sem khinta ka hih manin leitungah na min a thangsak ka hi hi. Pa aw, leitung a kipiansak ma-in nang tawh i neihkhawm na pianzia mah tu-in nangma omna munah hong pia ta in. “Leitung mite sung panin keima khut sungah na hong piak mite tungah nangma min ka pulak khinzo ta hi. Tua mite in nangma thu mangin nangma mi hi uh a, ahi zongin keima khut sungah amaute na hong pia hi. Tu-in amaute in keima neih khempeuh nangma hong piak ahihna thu a thei uh hi. Bang hang hiam cih leh gen dingin na hong sawl thu khempeuh amaute kiangah ka gen ciangin um uh a, nangma kiang panin a pai ka hihna thu hong thei uh a, nangma hong sawl ka hihna thu zong hong um uh hi. “Amaute a dingin thu ka hong ngetsak hi. Leitung mite a dingin a hong ngetsak hi loin keima khut sungah na hong piak mite nangma mi ahih manin tua mite a dingin a hong ngetsak ka hi hi. Keima neih khempeuh nangma a’ hi a, nangma neih khempeuh keima-a’ ahih manin, tua mite’ hangin nangma pianzia ka neihna hong kilang hi. Tu-in nangma kiangah kei a hong paita ding ka hih manin leitungah ka om nawn kei ding a, ahi zongin amaute a omlai ding uh ahi hi. Tua ahih manin a Siangtho ka Pa aw, nang le kei pumkhat ihih mah bangin amaute zong pumkhat ahih nadingun na vangliatna tawh hoihtakin na kem in. Amaute tawh ka omkhawm hun lai-in nangma hong piak na min vangliatna tawh amaute ka kem hi. Amaute ka hu a, a maimang ding pa simloh khat zong ka kisamsak kei hi. Tua a maimang pa lah Lai Siangtho sung thu a tun nading ahi hi. Tu-in nangma kiangah a hong paita ding ka hih manin keimah bangin amaute in lungdamna cingtaak a neihtheih nadingun leitungah ka om lai-in hih thute a gen ka hi hi. Amaute tungah na thu ka gen khin hi. Ahi zongin keimah bangin amaute zong hih leitung mite tawh kipawl lo uh ahih manin leitung mite in a mudah uh hi. Leitung panin amaute na lakkhiat ding a hong ngetsak ka hi kei a, a Gilopa’ bawlsiat nading panin na kep ding a hong ngen ka hi hi. Hih leitung tawh kei ka kipawl loh mah bangin amaute zong a kipawl lo uh ahi hi. Nangma thuman hilhna tawh amaute a siangtho nangma zat dingin na bawl in. Leitungah kei na hong sawl mah bangin kei zong leitung mahah amaute ka sawl hi. Nangma tungah thuman takin amaute zong hong ki-ap theih nadingun amaute ka khualna-in nangma tungah kei ka hong ki-ap hi. “Hih mite a’ ding bek thu a hong ngetsak ka hi kei a, amaute’ thugenna hangin kei hong um mite a’ ding zong a hong ngetsak ka hi hi. Pa aw, amaute khempeuh pumkhat a suahtheih nadingun ka hong ngetsak hi. Nangmah in kei na hong sawlna thu leitung mite in a uptheih nadingun ei tegel pawlkhat ihih mah bangin amaute zong eite tawh pawlkhat hong hi tahen. Nang le kei pumkhat ihih mah bangin amaute zong pumkhat a suah theih nadingun keima tungah na hong piak pianzia mah amaute tungah ka pia hi. Leitung mite in kei na hong sawlna thu a theih nading le kei na hong it mah bangin amaute na itna thu a theihna hangun amaute pumkhat a suah taktak theih nadingun amaute lakah kei ka om a, kei tawh nang na hong omkhawm hi. Pa aw, leitung a pianma pekin kei na hong itna hangin na hong piak pianzia a mu dingin keimah na hong piak mite zong ka omna-ah a hong pai theih nading ka deihsak hi. A Thuman ka Pa aw, leitung mite in nang hong thei lo uh hi. Ahi zongin keimah in nang ka hong thei a, kei na hong sawlna thu hih mite in zong a thei uh hi. Kei na hong itna zah itna mah amaute sungah omin, amaute tawh kei ka omkhawm theih nadingin amaute tungah nangma min ka gen khin a, mai lamah zong ka gen lailai ding hi,” ci-in thu a ngen hi. Jesuh in tu-a bangin thu a nget khit ciangin a nungzuite tawh Kidron lui kantanin a pai hi. Tua lai-ah huan khat om a, tua huan sungah a nungzuite tawh a lut hi. Jesuh le a nungzuite tua munah pai zelzel uh ahih manin Jesuh a lehhek Judas in zong tua mun a thei hi. Tua ahih manin Judas zong, siampi liante le Farisi mite in a sawl galkap honkhat le biakinncing palik pawlkhat tawh hiam tawi-in lalcin leh meilah de-in tua huanah a hong pai uh hi. Jesuh in zong ama tungah a piang ding thu khempeuh theikhin ahih manin hong paikhia-in amaute kiangah, “Kua zong na hi uh hiam?” ci-in a dong hi. Amaute in, “Nazareth khuami Jesuh a zong ka hi uh hi,” a ci hi. Jesuh a lehhek Judas zong tua mihonte tawh hong dingkhawm hi. Jesuh in, “Keimah ka hi hi,” a cih ciangin amaute nungkinin a puk uh hi. Jesuh in, “Kua zong na hi uh hiam?” ci-in a dotkik ciangin amaute in, “Nazareth khuami Jesuh a zong ka hi uh hi,” a ci leuleu uh hi. Tua ciangin Jesuh in, “Keimah ka hi hi, ci-in ka hong gen khinzo hi. Kei hong zong na hih uhleh hih adangte khah lel un,” a ci hi. Hih bang a cihna pen, “Kei na hong piaksate khat zong ka kisamsak kei hi,” ci-in a thugenna a tun nading ahi hi. Simon Peter in namsau kuah ahih manin a namsau dokin siampi lianpen pa’ silapa a sat leh a taklam bil a satkhia hi. Tua silapa’ min Malkhus ahi hi. Tua ciangin Jesuh in Peter kiangah, “Na namsau a paai-ah siat in. Ka Pa in thuak dingin a hong piak thu thuak lo ding ka hi hiam?” a ci hi. Tua ahih manin galkapte le a bute le Jew mi palikte in Jesuh manin hen uh a, tua kumin siampi lianpen a sem Kaiafas’ sungpa Annas kiangah a paipih masa uh hi. Mihonte’ tangin mi khat a sih ding kilawm zaw hi, ci-in Jerusalem khua-a Jew mi uliante kiangah thu a gen pa Kaiafas ahi hi. Simon Peter le a nungzui dang khat in zong Jesuh a zui uh hi. Hih a nungzui dang khat pa le siampi lianpen pa kithei uh ahih manin siampi lianpen pa’ inntual dongah Jesuh tawh a lutkhawm hi. Ahi zongin Peter ahihleh kong pualamah a khawl hi. Tua ahih manin siampi lianpen pa tawh a kithei nungzui dang khat pa zong va pai kikin kongcing numei a hopih khit ciangin Peter zong a tumpih hi. Kongcing numei in Peter kiangah, “Hih mipa’ nungzuite khat hi lo na hi hiam?” a cih leh, “Ka hi kei hi,” ci-in a dawng hi. Khua dam mahmah ahih manin nasemte le palikte in meihol cih a, tua mei awi-in a kiimah ding uh ahih manin Peter zong va pai-in mei awi-in amaute tawh a dingkhawm hi. Siampi lianpen pa Annas in Jesuh kiangah ama nungzuite thu le a thuhilhna tawh kisai thu a dong hi. Jesuh in, “Mi khempeuh’ theihin thu ka gen tawntung hi. Jew mihonpi a kikhopna innte le Biakinn sungah thu ka hilh a, thu ka sim genna om ngei lo hi. Tua ahih manin bang hangin kei kiangah hong dong se na hi hiam? Ka thugen a za mite kiangah dong lecin ka genteng amaute in hong genthei ding uh hi,” ci-in a dawng hi. Hih bangin Jesuh a pau ciangin biakinncing palikte khat in Jesuh beeng a, “Bang hangin hih bangin siampi lianpen pa tungah kampau ngam na hi hiam?” a ci hi. Ahi zongin Jesuh in, “A man loin kampau khial ka hih leh ka khialhna hong lak in. Ka thugen a man ahih manin bang hangin hong beeng zenzen na hi hiam?” ci-in a dawng hi. Tua ciangin Annas in Jesuh a kikhihsa mahin siampi lianpen pa Kaiafas kiangah a puak hi. Tua bangin mei awi-in Simon Peter a din laitakin a kiima om midangte in, “Nang, hua mipa’ nungzuite khat hi lo na hi hiam?” a cih uhleh Peter in, “Ka hi kei hi,” ci-in a nial leuleu hi. Tua ciangin siampi lianpen pa’ nasem, Peter in a bil a sat khiatsak pa’ behte khat in, “Huan sungah amah tawh na omkhawm lai-un hong mu hi lo ka hi hiam?” a cih ciangin, Peter in nialkik leuleu a, tua khit phetin ak a khuang hi. Tua ciangin Kaiafas’ inn panin gam ukpa Pilat’ omna kumpi inn-ah Jesuh a paipih uh hi. Tua hun pen zingsang tung ahi hi. Jew mite ahihleh Paisan Pawi annekna sungah kihel nuam uh ahih manin biakna vai-in a siang a suahtheih nadingun kumpi inn huang sungah lut lo uh hi. Tua ahih manin amaute kiangah Pilat hong pusuakin, “Hih mipa na mawhsakna uh bang ahi hiam?” ci-in a dot ciangin amaute in, “Hih mipa a gamtat a sialo hileh nang kiangah ka hong paipih kei ding uh hi,” ci-in a dawng uh hi. Tua ciangin Pilat in, “Jerusalem khua-a om no Jew mi uliante mah in paikhiatpih unla, nomau Thukham tawh kizui-in ama tungah thu khen un,” ci-in a gen ciangin Jew mite in ama kiangah, “Kote in mi thahtheih nading thu ka nei kei uh hi,” ci-in a dawng uh hi. (Jesuh in ama sihna dingzia a gensa thu a tuntheih nadingin hih bangin a piang ahi hi.) Tua ciangin kumpi huang sungah Pilat ciahkik a, Jesuh samin, “Nang Jew mite’ kumpi na hi hiam?” ci-in a dot leh Jesuh in, “Nang’ lungsimah a piangtawm hong dong na hi hiam, tua ahih kei leh midangte in keima thu hong gen ahi hiam?” ci-in a dawng hi. Pilat in, “Kei, Jew mi hong sa na hi hiam? Na Jew mipihte le na siampi liante un kei kiangah nang hong ap uh hi. Bang gamta khial na hi hiam?” a ci hi. Tua ciangin Jesuh in, “Keima ukna pen hih leitung gam hi lo hi. Keima ukna hih leitung gam hileh Jerusalem khua-a Jew mi uliante’ khut sungah hong kipiak loh nadingin ka nungzuite in a do ding uh hi. Tua ahih manin keima ukna pen hih leitung tawh kizom lo hi,” a ci hi. Tua ciangin Pilat in, “Tua ahihleh nang kumpi hi lo na hi hiam?” a cih leh Jesuh in, “Kumpi hi, nangmah in na hong ci hi. Hih thuman a genkhia dingin mi hong suakin leitungah a hong pai ka hi hi. Hih thuman tawh a kizom mi peuhmah in keima thugen hong zui uh hi,” a cih ciangin Pilat in, “Thuman na cih bang ahi hiam?” ci-in a dong hi. Tua ciangin Jew mihonte kiangah Pilat va paikhia kikin amaute kiangah, “Ama khialhna bangmah ka mu kei hi. Tua ahih manin na Paisan Pawi hun uh ciangin note a dingin mi khat ka khahkhiat a ngeina ahih manin note a dingin hih Jew kumpipa hong khahkhia leng na ut uh hiam?” ci-in a dot ciangin, amaute awng gawpin, “Hih mipa khah kei in! Barabbas hong khah in!” ci-in a dawng uh hi. (Barabbas pen mi suamin thongkia khat ahi hi.) Tua ciangin Pilat in ama kiangah Jesuh paipih sakin a satsak hi. Galkapte in a kumpi lukhu dingin ling vialin Jesuh khusak uh a, a kumpi puan dingin puansan a silhsak khit uh ciangin ama kiangah nehin, “Jew mite Kumpipa, na khansau ta hen!” ci-in hopihin a khut uh tawh a beeng uh hi. Pilat zong khatvei hong pusuak kikin mihonte kiangah, “Ama khialhna bangmah a mu lo ka hihna thu na theih nadingun note kiangah Jesuh ka hong paikhia sak hi,” a ci hi. Tua ahih manin Jesuh zong ling lukhu khukawm leh puansan silhkawmin hong pusuak a, Pilat in mihonte kiangah, “En un, hih lai-ah na mipa uh om hi,” a ci hi. Siampi liante le biakinncing palikte in a muh uh ciangin “Singlamteh tungah that in, singlamteh tungah that in!” ci-in a kiko uh hi. Pilat in amaute kiangah, “Na ut uhleh paipih unla, singlamteh tungah that un! Ke’n ama khialhna ka mu kei hi,” a cih ciangin Jew mihonte in, “Amah Pasian’ Tapa-in kigen ahih manin a kithah theih nading Thukham ka nei uh hi,” ci-in a genna uh Pilat in a zak ciangin a lunghimawh semsem hi. Tua ahih manin kumpi inn huang sungah lutkikin Jesuh kiangah, “Koi lai panin a hong pai na hi hiam?” ci-in a dong hi. Ahi zongin Jesuh in dawng lo ahih manin, “Hong dawng lo ding na hi hiam? Nang thahtheih nading le khahtheih nading thu ka neihlam phawk lo na hi hiam?” a cih ciangin Jesuh in, “Pasian in nang tungah hong pia lo hileh kei tungah thu na nei het kei ding hi. Tua ahih manin nangma khut sungah kei hong apte’ mawhna lianzaw hi,” ci-in a dawng hi. Pilat in hih thu a zak ciangin Jesuh a khahtheih nading lampi zongin a hanciam hi. Ahi zongin Jew mihonte awngin kiko uh a, “Hih mipa na khah peuhmah leh Rom gam khempeuh a uk Kumpipa tawh a kipawl lo na hi ding hi. Kumpi hi’ng, a ci khempeuh pen gam khempeuh a uk Kumpipa a langpang ahi hi,” a ci uh hi. Pilat in hih bangin mite’ kikona a zak ciangin Jesuh paikhiatpih a, Hebru pau-in Gabbatha a kici Suangphahpek tunga thukhenna tokhom tungah a tu hi. Tua ni pen Paisan Pawi hun ding Kigin’ ni hi a, sunkim laitak hun ahi hi. Pilat in Jew mihonte kiangah, “Hih lai-ah na Kumpipa uh om!” a cih ciangin amaute in, “That in, that in, singlamteh tungah that in,” ci-in a kiko uh hi. Pilat in, “Na Kumpipa uh that mawk ding ka hi hiam?” a cih ciangin siampi liante in, “Rom gam khempeuh a uk Kumpipa simloh kumpi dang ka nei kei uh hi,” ci-in a dawng uh hi. Tua ahih ciangin singlamteh tungah thah dingin amaute’ khut sungah Jesuh a pia ta hi. Tua ahih manin amaute in Jesuh la-in paikhiatpih uh a, ama kikhai nading singlamteh mah puasakin Hebru pau-in Golgotha a kici Lutang Guh mualah a paipih uh hi. Tua lai mun panin singlamteh tungah khai uh a, ama langtuakah zong midang khat tuak mah khai-in a laizangah Jesuh a kikhai hi. Pilat in lai khat gelhsakin, “Jew mite’ Kumpipa, Nazareth khuami Jesuh,” cisak a, singlamteh tungah a suangsak hi. Jesuh a kikhaina mun pen Jerusalem khuapi tawh kinai ahih manin Judea gammi tampi in hih lai kigelh a sim uh hi. Tua lai pen Hebru lai, Latin lai, le Grik lai-in a kigelh hi. Tua ciangin Jew siampi liante in Pilat kiangah, “‘Jew mite’ Kumpipa,’ ci-in gelh kei inla, ‘Hih mipa in Jew mite’ kumpi ka hi hi, ci hi,’ ci-in gelh in,” a cih uhleh Pilat in, “Ka gelhsa pen ka gelhsa bangbangin kip hi,” ci-in a dawng hi. Galkapte in singlamteh tungah Jesuh a khai khit uh ciangin a puante la uh a, khenkhat ciatin a ngah dingun khen li a suah uh hi. Mong a nei lo, a kiphan a puantualpi zong a la uh hi. Ahi zongin amaute in, “Hih puan balkek kei ni. A ngah ding i theih nadingin ai san ni,” a kici uh hi. Lai Siangtho sungah, “Amaute in ka puante hawm uh a, ka puantualpi ngah nadingin ai a san uh hi,” ci-in a kigelhna a tun nadingin hih bangin galkapte a gamta ahi uh hi. Jesuh’ singlamteh gei-ah ama nu; ama nuno ahi, Klopas’ zi Mary; le Magdala khuami Mary a ding uh hi. Jesuh in ama nu le a it a nungzui pa a dingkhawm a muh ciangin a nu kiangah, “Nu aw, tua lai-ah na tapa om hi,” a ci hi. Tua ciangin a nungzui pa kiangah, “Na nu tua lai-ah om hi,” a ci leuleu hi. Tua ahih manin tua hun a kipanin nungzui pa in ama inn-ah Jesuh’ nu Mary a kem hi. Tua hun ciangin Jesuh in na khempeuh kicingta hi, ci-in thei ahih manin Lai Siangtho sungah a kigelh thu a tuntheih nadingin, “Ka dangtak hi,” a ci hi. Tua lai-ah beel khat dimin leenggahzu-hau om ahih manin amaute in tua sungah tuihupna diahin puknah hiang dawnah a koih khit uh ciangin Jesuh’ kamah a va tahto uh hi. Jesuh in tua leenggahzu-hau ciamin, “Man khinta hi,” a cih khit ciangin a lu puksukin a si ta hi. Tua ni pen Kigin’ ni hi a, a zing ciang Sabbath ni thupi diak ahih manin tua ni-in singlamteh tungah a luangte a omlai ding deih lo uh ahih ciangin Jerusalem khua-a Jew mi uliante, Pilat kiangah va pai-in a khete uh kuaitanin a luangte a lakkhiat nadingun a ngen uh hi. Tua ahih manin galkapte hong pai uh a, a tuah masak pa uh a khe a kuaihtansak khit uh ciangin a langkhat a om pa a’ zong a kuaihtansak uh hi. Ahi zongin Jesuh’ khe kuaitan dingin a kithawi uh ciangin amah a na sihkhitna thei uh ahih manin a khe a kuaihtansak nawn kei uh hi. Ahi zongin galkapte khat in a teipi tawh Jesuh’ pangpi a sut leh sisan le tui hong leengkhia hi. (Note in na uptheih nadingun hih thupiang a mu pa in ama muhna bang a hong gen ahi hi. Ama thugente a man thu hi a, a gen pa in a mantaktak a gen ahihna thu zong a thei hi.) Lai Siangtho sungah, “Ama guhte khat zong kitan lo ding hi,” ci-in a genna thu a tuntheih nadingin hih bangin a piang ahi hi. Tua banah Lai Siangtho mun dang khatah, “Teipi tawh a sut pa uh a en ding uh hi,” na kici lai hi. Tua ciangin Arimathea khuami Josef in Jesuh’ luang a lakkhiat theih nadingin Pilat kiangah va pai-in a ngen hi. (Josef i cih pen Jesuh’ nung a zui khat hi a, ahi zongin Jerusalem khua-a Jew uliante a kihtakna hangin a simzuih khat ahi hi.) Josef in Jesuh’ luang a lakkhiat theih nadingin thu ngah ahih manin va pai-in Jesuh’ luang a lakhia hi. Jesuh kiangah a zan hawh ngei Nikodemas zong hong pai a, Jesuh’ luang a siatloh nadingin a bawl nading myrrh le aloes paknamtui kigawm tawi sawmnih bang a gik a hong pua hi. Tua mi nihte in si a vui uh ciangin a bawl ngeina bangun a paknamtuite nuhin puan tawh a tun uh hi. Jesuh, singlamteh tungah a kithahna mun tawh kinai-ah huan khat om a, tua huan sungah kuamah a kivui ngei nai lohna hankhuk thak khat a om hi. Tua ni pen Kigin’ ni hi a, Jew mite’ Sabbath ni hong naita ahih manin, tua hankhuk a nai ahihna hangin nawhsa thu-in tua lai munah Jesuh a vui uh hi. Nipi ni zingsang khuavak ma-in Magdala khuami Mary zong hanah va pai-in a et ciangin hankhuk kihukna suangtum a kilikkhia khin a mu hi. Amah zong tai-in Simon Peter le Jesuh in a it a nungzui pa kiangah, “Amaute in hankhuk panin i Topa lakhia khin uh a, koi lai-ah koih ahi uh hiam, cih ka thei kei uh hi,” a ci uh hi. Tua ciangin nungzui dang khat pa tawh Peter zong paikhia-in han lam a manawh uh hi. A nih tuakun taikhawm uh a, ahi zongin nungzui dang khat pa in Peter makhelhin hanah a tung masa hi. Hankhuk sung a etsuk ciangin a kitunna puante a om mu a, ahi zongin lutsuk lo hi. Ama nungah Simon Peter hong tungin han sungah a lutsukpah hi. A luang tunna puan mu a, a lu tunna puan pen a luang tunna tawh omkhawm loin a tuamin a kizialin a om a mu hi. Tua ciangin han a tung masa nungzui dang pa zong lutsukin a thupiangte mu ahih manin a um hi. (Sihna panin thokik ding hi, ci-in Lai Siangtho in a genna thu a theithei nai lo uh ahi hi.) Tua ciangin nungzuite a inn uhah a ciah uh hi. Ahi zongin han pualamah Mary kap a, a kahkawmin hankhuk sung lamah kunin en a, Jesuh’ luang a kisialna a lu lamah khat, a khe lamah khat, puanpak silhin a tu vantungmi nih a mu hi. Tua vantung mite in Mary kiangah, “Bang hangin kap na hi hiam?” ci-in a dot uh ciangin amah in, “Amaute in ka Topa paikhiatpih uh a, koi lai-ah koih ahi uh hiam, cih ka thei kei hi,” ci-in a dawng hi. Tua khit ciangin a kihei leh Jesuh mu a, ahi zongin Jesuh ahihlam thei lo hi. Jesuh in, “Numei aw, bang hangin kap na hi hiam? Kua zong na hi hiam?” ci-in a dot ciangin Mary in huan cing pa sa ahih manin, “Sia aw, amah na puakkhiat leh koi lai-ah koih na hi hiam hong gen in. A luang ka la nuam hi,” a ci hi. Tua ciangin Jesuh in, “Mary!” a cih leh Mary zong ama lamah kihei a, “Rabboni,” ci-in a dawng hi. (Rabboni pen Hebru pau hi a, “Siapa,” a cihna ahi hi.) Tua ciangin Jesuh in, “Kei hong lenlen nawn kei in. Ka Pa kiangah a paito nai lo ka hi hi. Ka sanggamte kiangah va pai inla, ‘Keima Pa le note’ Pa, keima Pasian le note’ Pasian’ kiangah ka pai ding hi,’ ci hi, ci-in va gensak zaw in,” a ci hi. Tua ahih manin Magdala khuami Mary zong nungzuite kiangah pai-in Topa a muh khitna thu va gen a, hih a kam vaikhakte zong a zasak hi. Tua ni pen Nipi ni nitak lam hi a, nungzuite zong a nitakin innsung khatah a kikhop laitakun Jerusalem khua-a Jew mi uliante a kihtakna uh hangin inn a kikalhnelh uh hi. Tua bang hinapi-in amaute lakah Jesuh hong ding a, “Nopna ngah ta un,” ci-in a hopih hi. Tua bangin a hopih khit ciangin a khutte le a pangpi zong a lak hi. Topa a muhna hangun nungzuite a nuam mahmah uh hi. Tua ciangin Jesuh in amaute kiangah, “Note in nopna ngah ta un. Pa in kei a hong sawl bangin note zong ka hong sawl hi,” ci-in a vaikhak leuleu hi. Tua khit ciangin amaute lamah a hu sang a, “Kha Siangtho na sang un. Mite’ mawhna na maisak uhleh amaute’ mawhna a mai hi ding a, na maisak kei uhleh amaute’ mawhna a mai lo hi ding hi,” a ci hi. Nungzuite kiangah Jesuh a kilah laitakin sawm le nihte sung panin Unau Peeng minno a nei Thomas om lo hi. Tua ahih manin nungzui dangte in ama kiangah, “Topa ka mu uh hi,” a cih uhleh amah in, “A khut, siktukkilh tawh a kikilhna mate mu-in, tua a siktukkilh ma vangah ka khutmete ka va khum teek kei a, ama pangpi zong ka khut tawh ka lawn’ teek kei leh ka um kei ding hi,” a ci hi. Tua zawh nipikal khat ciangin nungzuite zong innsung khatah kikhawm leuleu uh a, tua hunin Thomas zong a om hi. Amaute kong kikhaknelh uh hinapi-in Jesuh hong pai-in amaute lakah hong ding a, “Nopna ngah ta un,” ci-in a hopih khit ciangin Thomas kiangah, “Na khutme tawh hong lawng inla ka khutte en in. Na khut zan inla ka pangpi zong lawng in. Umlah nawn kei inla, um taktak in,” a ci hi. Thomas in zong, “Ka Topa, ka Pasian!” ci-in a dawn ciangin Jesuh in, “Kei na hong muhkhit ciang bekin hong um pan na hi hiam? Kei hong mu lo napi-in hong umte a dingin lungdamhuai mahmah zaw ding hi,” a ci hi. Jesuh in a nungzuite’ muhna-ah nalamdang lian tampi bawl a, ahi zongin hih laibu sungah a kigelh lo tampi tak omlai hi. Hih laibu sungah a kigelh thute pen Jesuh, Pasian’ Tapa, Khrih ahihna thu na uptheih nading uh le ama min hangin tua upna tawh nuntakna na ngahtheih nading uh deihna tawh a kigelh ahi hi. Tua khit ciangin a nungzuite omna Tiberias Tuili gei-ah Jesuh kilang leuleu a, a thu pianzia hih bang ahi hi: Simon Peter, Unau Peeng minno a nei Thomas, Galilee gam Kana khuami Nethanel, Zebedi’ tapate, le nungzui dang nihte mun khatah a omkhawm uh hi. Simon Peter in a lawmte kiangah, “Kei, ngasa bengin kuan ning,” ci-in a gen leh a lawmte in, “Ko zong hong kuan nung,” ci uh ahih manin, amaute kuankhia-in gunkuang tungah a tuang uh hi. Ahi zongin tua zanin ngasa khat zong man lo uh hi. Zingsang khua a vak ciangin tui gei-ah Jesuh ding a, ahi zongin a nungzuite in amah ahihlam thei lo uh hi. Jesuh in amaute kiangah, “Tangvalte aw, ngasa na man uh hiam?” ci-in a dot leh amaute in, “Bangmah ka man kei uh hi,” ci-in a dawng uh hi. Tua ciangin amah in, “Na gunkuang taklam pang uhah na ngen uh paai le-uhcin na man ding uh hi,” a ci hi. Amaute in zong a ngen uh paai uh a, ngasa tam awk lua ahih manin a ngen uh a kaizo kei uh hi. Tua ciangin Jesuh in a it nungzui pa in Peter kiangah, “Topa hi!” a ci hi. Simon Peter in Topa ahihna thu a zak ciangin (a nga betna uhah a puante uh suahkhia uh ahih manin) a puan silh buatbuatin tui sungah a leengkhia hi. Nungzui dangte ahihleh gunkuang mahah tuangin a ngen uh tawh ngasa a dimtakin a hong kai uh hi. Tua lai mun le a tui gei pen pi zathum bang bek kigamla hi. Tui gei a tun uh ciangin mei-am tungah ngasa le anlum a ki-em a mu uh hi. Jesuh in amaute kiangah, “Tu-a na ngasa matte uh pawlkhat hong paipih un,” ci-in a gen ciangin Simon Peter zong gunkuang tungah va kahin ngasa a dimin a om ngen va kai a, ngasa a vekpi-in za le sawmnga le thum pha-in tam mahmah napi-in a ngen uh themkhat zong kikeek lo hi. Tua ciangin Jesuh in amaute kiangah, “Hong pai un; zing an ne ni,” a ci hi. Amah pen Topa ahih lamtak thei uh ahih manin, “Nang kua na hi hiam?” ci-in a nungzuite khat beek in dong ngam lo uh hi. Jesuh hong pai-in anlum la-in amaute tungah pia a, tua mah bangin ngasa zong a pia hi. Hih pen sihna panin Jesuh a kithawhkiksak khitzawh nungzuite tungah a kilah a thum veina hita hi. An a nekkhit uh ciangin Jesuh in Simon Peter kiangah, “Johan’ tapa Simon aw, hih adang khempeuhte’ hong it sangin kei na hong nak itzaw hiam?” ci-in a dot ciangin amah in, “Topa aw, ka hong itzaw hi. Nang ka hong itna na thei hi,” ci-in a dawng hi. Tua ciangin Jesuh in, “Ka tuunote na kem in,” a ci hi. Tua ciangin Jesuh in a nihveina dong leuleu a, “Johan’ tapa Simon aw, kei na hong it hiam?” ci-in a dot ciangin, “Topa aw, nang ka hong it a, ka hong itna thu na thei hi,” a cih ciangin, “Ka tuute na kem in,” a ci leuleu hi. Jesuh in a thumveina dong leuleu a, “Johan’ tapa Simon aw, kei na hong it hiam?” a cih ciangin, “Kei na hong it hiam?” ci-in thumvei tak a dotna hangin Peter zong a dah suak hi. Tua ahih manin, “Topa aw, nangmah in na khempeuh na thei a, nangmah ka hong itna thu zong na thei hi,” ci-in a dawn ciangin Jesuh in, “Ka tuute na kem in. A mantakin ci lehang, na khangno lai-in na kawnggak gakin na utna peuhah na pai zialzial thei hi. Ahi zongin na khangham ciangin na khutte na zan ding a, midangte in na khutte hong henin na ut loh napi ah hong paipih ding uh hi,” a ci hi. (Hih bangin a thugenna pen Peter a sih nading zia le Pasian’ min a thansak nading thu a gen nopna ahi hi.) Tua ciangin Jesuh in Peter kiangah, “Hong zui un,” a ci hi. Peter a kihei ciangin, nitak an a nek lai-un Jesuh’ gei-ah tu-in, “Topa aw, nang kua in hong lehhek ding ahi hiam?” ci-in a dong, Jesuh’ it a nungzui pa ama nungah a om a mu hi. Peter in amah a muh ciangin Jesuh kiangah, “Topa aw, hih mipa bangci ding ahi hiam?” ci-in a dot leh Jesuh in, “Ka hong paikik mateng amah a nungta dingin ka deih nakleh nang bang phamawh sa na hi hiam? Nangmah in ka nung hong zui peuh in,” ci-in a dawng hi. Tua ahih manin hih nungzui pa si lo ding hi, ci-in a nungzuite lakah a kigen hi. Ahi zongin Jesuh in, “Amah si lo ding hi,” a ci hi loin, “Ka hong paikik mateng amah a nungta dingin ka deih nakleh nang bang phamawh sa na hi hiam?” a ci bek ahi hi. Jesuh in tua a cih nungzui pa pen hih thute genin lai sungah a gelh pa hi a, ama thugente a mantaktak hi, ci-in ka thei uh hi. Jesuh in a sep thute tampi tak omlai hi. A sep khempeuh a ban banin laibu sungah a kigelh hileh a laibute pen leitungah ta zo lo ding hi, ci-in ka um hi. Ama sih khitzawh ni sawmli sung amaute tungah tam veipi kilang a, amah a nungta taktak ahihna teltakin a kithei ahi hi. Amaute in amah mu uh a, Pasian’ Ukna thu amaute tungah a gen hi. Amaute tawh a omkhawm laitakin amah in amaute kiangah, “Jerusalem khua panin paikhia kei unla, note kiangah ka hong gensa ka Pa’ hong kamciam thu na ngak un. Johan in tui sungah mite phum a, ahi zongin a sawt loin Pasian in Kha Siangtho tawh note hong kidimsak ding hi,” ci-in thu a pia hi. Tua bangin Jesuh tawh a omkhawm laitakun sawltakte in Jesuh kiangah, “Topa aw, tutungin Israel minamte tungah ukna aana na piakik ding hiam?” ci-in a dot uh ciangin Jesuh in, “Ka Pa in ama thu tawh a sehsa hun le nite, cik ciangin hong tung ding cih thu note’ theih ding thu hi lo hi. Ahi zongin note tungah Kha Siangtho hong tun ciangin vangliatna tawh na kidim ding uh a, Jerusalem khuasung, Judea gam sung, Samaria gam sung, le leimong dongin note in keima thu na gen ding uh hi,” ci-in a dawng hi. Hih thu a genkhit ciangin amaute’ muhtangpi mahin vanah Jesuh kilato a, meiipi in liah ahih manin amah mu thei nawn lo uh hi. Tua bangin Jesuh a kilaktoh ciangin amaute in vantung lam enenin a om laitakun amaute kiangah puanpak a silh mi nih hong dingvat a, “Galilee mite aw, bang hangin vantung lam enin ding niloh na hi uh hiam? Note kiang panin vantungah a kilato hih Jesuh pen, vantungah a paitoh na muh uh bang teekteek mahin khatvei hong paisuk kik ding hi,” a ci uh hi. Tua ciangin Jerusalem pan tai lang bang a gamla tua Oliv Mual tung panin Jerusalem-ah sawltakte a ciahkik uh hi. Jerusalem a tun uh ciangin amauteng, Peter, Johan, James le Andru, Filip le Thomas, Bartholomew le Matthai, Alfeas’ tapa James, Simon (gam khual pa), le James’ tapa Judas a tunna uh inn dei-ah a kahto uh hi. Numeite, Jesuh’ nu Mary, le Jesuh’ naute tawh thungen khawm dingin a kikhawm zelzel uh hi. Tua khit a sawt loin thu um mi zakhat le sawmnih bang a kikhop khawm laitakun Peter hong dingin thu hong gen a, “Lawmte aw, Jesuh a mante lam a lak Judas thu, Kha Siangtho in David’ kam panin a genkholhna Lai Siangtho sung thu a tun ding kisam hi. Judas pen eite tawh na a semkhawm dingin a kiteelkhia ahih manin eima pawl mi ahi hi. (“Tu-in hih mipa in a gitloh gamtatna thamanin a ngah sum tawh amah in lo khat lei a, tua lo sungah kia-in a si hi. Amah kitamzan a, a sungkua khempeuh kithehkek hi. Jerusalem khuasunga teng mi khempeuh in hih thu za uh a, amau’ pau-in tua lo pen ‘Akeldama,’ ci uh hi. Akeldama a khiatna in, ‘Mi Thahna Lo,’ a cihna ahi hi.) “Bang hang hiam cih leh Late Laibu sungah, ‘Ama tenna mun gamdai hen la, tua munah kuamah teng kei hen,’ kici a, tua banah, ‘Ama nasep midang khat in sem ta hen,’ ci-in kigelh hi. Tua ciangin amaute in Josef (min dang nih a nei, Barsabbas le Justas zong a kici pa) le Matthias a pulak uh hi. Tua ciangin a teel nadingun lai ai san uh a, Matthias in ngah ahih manin sawltak sawm le khatte tawh a kisim khawm pah hi. Pentekos ni hong tun ciangin Jesuh a um mi khempeuh mun khatah kikhawm uh hi. Tua laitakin huihpi nung bangin huging khat hong tungvat a, amaute’ kikhopna innsung khempeuh hong dim hi. Tua ciangin leii tawh a kibang meikuang bang pian amaute lakah hong kithehthang a, tuate in mi khempeuh sukha kim hi. Amaute khempeuh Kha Siangtho tawh kidim uh a, tua Kha in minam dangte’ pau tawh amaute a pau theisak hi. Tua laitakin biakna pawi siim dingin gam tuamtuam panin a hong pai Jew mi biakna hahkat mi tampi tak, Jerusalem khua sungah a om uh hi. Hih huging a zak uh ciangin mihon tampi tak hong kikhawm uh a, hih Jesuh a um mite’ thugen pen amau’ pau ciatin za uh ahih manin lamdang a sa mahmah uh hi. Amaute in hih thu lamdangsa mahmah uh ahih manin, “Hih thugen mite pen Galilee mi vive hi lo ahi hiam? Tua hinapi-in bang hangin amaute’ thugen pen eima pau ciatin za ihi hiam? Eite pen Parthia gam, Media gam, Elam gam, Mesopotamia gam, Judea gam, Kappadosia gam, Pontas gam, Asia gam, Frigia gam, Pamfilia gam, Egypt gam, le Sairin khuapi gei-a om Libya gamte pan ihi a, pawlkhatte Rom gam pan ihi hi. Jew mite le Gentail mi Jew biakna a zuite ihi a, pawlkhatte pen Krete gam le Arabia gam pan ihi hi. Tua bang hinapi-in, Pasian’ sep na lamdang liante a kigenna eima pau ciatin i za hi,” a ci uh hi. Amaute in lamdangsa-in lungmang mahmah uh a, “A bangci thu ahi hiam?” ci-in khatlekhat a kidong uh hi. Ahi zongin mi pawlkhatte in hih Jesuh a umte simmawhbawl uh a, “Zukham ahi uh hi,” ci-in a zahko uh hi. Tua ciangin sawltak sawm le khatte tawh a omkhawm Peter hong dingto-in, mihonte tungah nakpitakin thu hong gen a, “Ka mipih ahi Jew mite le Jerusalem khuasunga om mi khempeuhte aw, hih thupiang hong gen ding ka hih manin limtakin na ngai un. Tuhun pen zingsang nai kua hi pan ahih manin, note’ ngaihsut bangin hih mite zukham hi lo uh hi. Hih thupiang pen kamsang Joel in a gensa thu hi a, tua sungah, ‘Pasian in hih bangin gen hi: Nitawp ni ciangin, mi khempeuh tungah ka Kha ka sung ding a, na tanute uh le na tapate un keima thu taangko ding uh hi; na tangvalte un maang mu ding uh a, na puteekte un mang man ding uh hi. Tua ni ciangin ka nasem numeite le ka nasem pasalte’ tung nangawnah ka Kha ka sung ding a, amaute in keima thu gen ding uh hi. Tua ciangin vantung le leitungah hilhkholhna lim le nalamdang ka bawl ding hi. Sisan kiluansakna, meikatna le meikhu sahpi hong om ding hi. Topa’ ni, a lian thupi ni, hong tunma-in ni hong mialin, kha, sisan hong bang ding hi. Ahi zongin Topa tungah huhna a ngen khempeuh in hotkhiatna ngah ding uh hi,’ ci-in a kigelh hi. “Ka mipih Israel-te aw, hih ka thugen na ngai un: Nazareth khuami Jesuh tungtawnin Pasian in lim le na lamdangte bawlin na hong sem ahih manin, Jesuh pen Pasian’ sawl nasem ahihna teltakin na thei uh hi. Hih thu pen note lakah a piang thu ahih manin nomau mahmah in na thei uh hi. Pasian in thu a ma theihkholhna le ama geelna tawh kizui-in note’ khut sungah tua Jesuh a hong piak ding a ngaihsutsa hi a, note in singlamteh tungah khai-in migilote’ khut tawh amah na that uh hi. Ahi zongin Pasian in misite lak panin amah hingkiksak a, sihna in amah lencip zo lo ahih manin sihna hanga gimna panin amah a suaktasak hi. Bang hang hiam cih leh David in ama thu a genna-ah, “‘Topa ka maingat tawntung a, ka taklamah amah om ahih manin lungkhamna ka thuak kei ding hi. Tua ahih manin ka lungdam a, kei ka nuam hi. A si thei mihing ka hih lel hangin lungmuang takin ka om ding hi. Bang hang hiam cih leh misite’ gamah kei nong nusiacip kei ding a, na nasem keimah muatna nong thuaksak kei ding hi. Nangmah in nuntakna lampi na hong lak khin a, nong ompihna tawh kei nong lungdamsak hi,’ ci hi. “Sanggamte aw, note’ theih dingin i pupi David’ thu a teltakin kong gen ding hi. Amah si-in kivui a, a han zong tu mahmahin eite kiangah omlai hi. David pen kamsang hi a, ama tunga Pasian’ thuciam a thei hi. Ama suante khat, amah bang teek mahin kumpi-in a bawl nading Pasian in thu a ciam hi. Pasian in a sep ding thu David in mukhol ahih manin, ‘Mi site gam sungah amah kinusia lo a, a sa a muat kei hi,’ ci-in a gen ciangin, Khrih’ thawhkik nading thu a gengen ahi hi. Pasian in sihna panin hih Jesuh hingkiksak a, kote khempeuh pen hih thu a thei teci vive ka hi uh hi. Amah in Pasian’ taklamah omna dongin liatna ngah a, ama tungah Pasian in a ciamsa Kha Siangtho zong a ngahkhin hi. Tu laitak a na muh na zak uh nate pen kote tungah a hong piak tua Kha Siangtho ahi hi. “Tua ahih ciangin singlamteh tungah na thah uh hih Jesuh pen Pasian in Topa le Khrih in a bawl khitna thu, Israel mi khempeuh in teltakin thei ta un,” a ci hi. Amaute in hih thu a zak uh ciangin a lungsim uh nakpitakin sukha a, Peter le sawltak dangte kiangah, “Sanggamte aw, bangci gamtat ding ka hi uh hiam?” ci-in a dong uh hi. Tua ciangin Peter in amaute kiangah, “Na mawhna uh kisik unla, na mawhna uh hong kimaisak theih nadingin Jesuh Khrih min tawh tui kiphum ciat un. Tua hileh Pasian’ piakkhong Kha Siangtho na ngah ding uh hi. Bang hang hiam cih leh Pasian in ama kamciamna pen note tung, na suan na khakte uh tung le gamlapi-a om mi khempeuh, i Topa Pasian in a sap mi khempeuh tungah a hong bawl ahi hi,” ci-in a dawng hi. Tua ciangin Peter in amaute tungah thu tampi genthuahin hanthawn a, “Hih migilote’ gimthuak ding na tuahkhak loh nadingun nomau mah in na suahtak nading uh lampi zong ciat un,” a ci hi. Mi tampi in ama thugen umin tui kiphum uh a, tua ni-in mihing tulthum bang kibehlap uh hi. Amaute in sawltakte tung panin thu sinin amaute tawh kikhawl uh a, amaute tawh an nekhawmin, thu zong a ngenkhawm uh hi. Sawltakte in lim le nalamdang tampi bawl uh a, mi khempeuh in lamdang sa mahmah uh hi. Thu um khempeuh kikhawlin omkhawm uh a, a neihsate uh zong a neikhawm uh hi. Amaute in a neih a lamteng uh zuak uh a, a sumte pen amau kisapna tawh kizui-in amaute lakah a hawm uh hi. Nisimin biakinn-ah kikhawm uh a, a innte uhah an nekhawmin, lungdamna le kiniamkhiatna tawh a ne ciat uh hi. Pasian phat uh a, khatlekhat thupha kideihsakin a om uh hi. Pasian in nisimin hotkhiatna a ngah mi kibehlapsak tawntung hi. Nikhat, thunget hun nitak nai thum laitakin biakinn-ah Peter le Johan a pai uh hi. Kongpi Hoih a kici gei-ah a suahtung a kipan a khebai mi khat na om hi. Biakinn-ah a pai mite tung panin sum a ngen dingin nisimin hih kongpi gei-ah amah hong kikoih zel hi. Peter le Johan, biakinn-ah a hong pai a muh ciangin sum a na ngen hi. Amau tegel in tua mipa limtakin en uh a, Peter in, “Kote hong en dih in,” a ci hi. Bang khat peuhpeuh ngah ding, ci-in kilamen ahih manin amaute a en hi. Peter in ama kiangah, “Sum ka nei peuhmah kei hi; ahi zongin ka neih kong pia ding hi. Nazareth khuami Jesuh Khrih min tawh, dingin lam na pai nadingin thu ka hong pia hi,” a cih khit ciangin, a taklam khutin lenin kaito a, thakhat thu-in a khe le a siakmitte hong khauhpah hi. Tua ciangin amah hong diangin dingto a, lam a pai kawikawi hi. Tua ciangin biakinn-ah amaute zui a, lam paikawm diangkawmin Pasian a phat hi. Mi khempeuh in amah lam pai-in Pasian a phatna mu uh a, biakinn Kongpi Hoih gei-ah sum ngenin a tupa hi, ci-in a thei uh hi. Ama tunga thupiang a muh uh ciangin lamdang a sa mahmah uh hi. Tua mipa in Peter le Johan beel cinten a, mi khempeuh in hih thupiang lamdangsa uh ahih manin amaute’ omna Solomon’ Talap a kici-ah mite a hong tai uh hi. Peter in hih mite a muh ciangin amaute kiangah, “Ka mipih Israel mite aw, bang hangin hih thupiang lamdangsa a, bang hangin ko hong hici et na hi uh hiam? Hih mipa lam ka paisak theihna uh, komau’ vang le komau’ hoihna hang sa na hi uh hiam? I pupite Abraham, Isaac, le Jakob Pasian in a nasem Jesuh tungah ama vangliatna a pia hi. Note in aana neite khut sungah tua Jesuh na pia uh a, Pilat mangpa in amah khah dingin a ngaihsut khit ciang nangawnin Pilat’ maitang mahah amah na nial teitei uh hi. Amah mi hoih mi siangtho hinapi-in, amah na nial zawsop uh a, mi that khat a khahkhiat nadingin Pilat kiangah na ngen uh hi. Tua ahih ciangin mite tungah nuntakna a piapa na that uh a, ahi zongin sihna panin Pasian in amah hingkiksak hi. Ko tegel pen hih thu a thei teci ka hi uh hi. Hih Jesuh min’ vangliatna in hih khebai mipa tungah thahatna a pia ahi hi. Note khempeuh in na theih uh mah bangin hih mipa bangzah takin khebai ahih hangin Jesuh upna le ama min hangin hih mipa in dam sianthona a ngah ahi hi. “Tua ahih ciangin sanggamte aw, note le na makaite uh hih bangin Jesuh tungah na gamtatna uh na theih lohna hang uh hi, ci-in ka thei hi. Ama Khrih in a thuak nading thu, Pasian in tanglai pekin kamsangte khempeuh tungtawnin genkhol a, tu-in hih bangin a thugen kholhna a hong tungsak ahi hi. Pasian in ama kamsang mi siangthote tungtawnin tanglai-in a genkholhsa bangin, na khempeuh a thakin a kibawl hun dong mateng vantungah Jesuh a om ding ahi hi. Bang hang hiam cih leh Moses in, ‘Kei a hong sawl mah bangin note sung mah panin note a’ ding kamsang khat Topa na Pasian un note kiangah hong sawl ding hi. Ama hong thugen khempeuh na mang ding uh hi. Tua kamsangpa’ thugen a mang lo khempeuh, a Jew mipihte kiang panin kikhen khia-in kisusia ding hi,’ ci hi. Samuel a kipan ama nunga hong piang kamsang khempeuh in tu laitak a thupiangte mah genkhol ciat uh hi. Pasian in Abraham kiangah, ‘Na suan na khakte thupha ka piak bangin leitung mi khempeuh thupha ka pia ding hi,’ ci ahih manin, Pasian in ama kamsangte tungtawnin a thuciamte khempeuh eite a’ ding hi a, Pasian in i pu i pate tawh a thuciamte, eite in zong a ngah ding ihi hi. Eite khempeuh i gitlohna panin kikheelin thupha a hong piaktheih nadingin Pasian in a Nasem dingin Jesuh teelin, eite kiangah a hong sawl masa ahi hi,” ci-in thu a gen hi. Peter le Johan omkhawmin, tua bangin Peter in mite kiangah thu a gen laitakin siampite, biakinn upate, le Saddusi mite hong pai uh hi. Hih sawltak nihte in misite thokik ding hi, cih a lahtel nadingun sihna panin Jesuh thokik hi, ci-in mite kiangah thu hilh uh ahih manin nawngkai a sa uh hi. Tua ahih manin amau tegel man uh a, ni tum kuanta ahih manin a zing ciang dong thong sungah a khum uh hi. Ahi zongin amaute’ thugen a za mi tampi in um uh a, thu um mi tulnga bang a pha ta uh hi. A zing ciangin Jew mi makaite, upate, le Thukham hilh siate, Jerusalem-ah hong kikhawm uh hi. Siampi lianpen a semngei Annas, siampi lianpen a sem Kaiafas, Johan, Alexander, le siampi lianpente beh mi khempeuh tawh kikhopna khat a bawl uh hi. Amaute’ mai-ah sawltak tegel dingsak uh a, “Kua’ vangliatna le kua’ min tawh hih bangin na sem na hi uh hiam?” ci-in a dong uh hi. Tua ciangin Kha Siangtho tawh kidimin Peter in dawng a, “Makaite le upate aw, hih khebai mipa tungah thuhoih a kibawlna le ama damna thu tawh kisai-in kote thu hong sit na hih uhleh, note in singlamteh tungah na thah uh, Pasian in sihna panin a thawhkiksak Nazareth khuami Jesuh Khrih min vangliatna tawh hih mipa a ci damin hih lai-ah ding ahihna thu, note le Israel mi khempeuh in na theih dingun a kilawm thu khat ahi hi. Lai Siangtho in, ‘No innlamte in na nilkhiat uh suangtum pen innkiu suang bulpi a suak hi,’ ci-in a gen pen hih Jesuh ahi hi. Ama hang bek tawh hotkhiatna kingah thei ding hi. Bang hang hiam cih leh eite in hotkhiatna i ngahtheih nadingin leitung khempeuhah Pasian in hong piak min dang khat zong om lo hi,” ci-in a gen hi. Uliante in Peter le Johan a han’ mahmahna thu le amaute pilna sang a nei lo mi mawkmawk ahihna thu a theih uh ciangin lamdang a sa mahmah uh hi. Tua ciangin Jesuh tawh a kikhawl khin ngeite ahihna uh a phawk uh hi. Ahi zongin a kidamsak mipa pen Peter le Johan-te gei-ah om gige ahih manin a nial nading uh thu mu zo lo uh hi. Tua ahih manin tua innsung panin amaute pusuaksak phot uh a, tua khit ciangin amaute thu kikumin, “Hih mite bangcih ding ihi hiam? Jerusalem khuasunga om mi khempeuh in hih mite’ bawl a lamdang mahmah nate thei ciat uh a, i nial theih nading bangmah om lo hi. Ahi zongin mite lakah hih thute a kitheihthang thuah loh nadingin, Jesuh’ min tawh kuama kiangah thu a gen ngei nawn loh nadingun taii ni,” a kici uh hi. Tua ciangin sawltakte samkik uh a, Jesuh’ min tawh thugen ahi a, thuhilh ahi zongin a hih nawn hetloh nadingun thu a pia uh hi. Ahi zongin Peter le Johan in, “Note’ thu manzawk ding le Pasian’ thu manzawk ding, Pasian’ muhna panin koi pen manzaw ding cih thu nomau mah in zong ngaihsun ciat un. Tua ahih manin kote in ka muhsa uh le ka zaksa uh thute gen loin ka om thei kei ding uh hi,” ci-in a dawng uh hi. Ahi zongin uliante in a khauhzaw-in thu a gen khit uh ciangin a khah uh hi. Hih thupiang hangin mi khempeuh in Pasian phat uh ahih manin hih mite gim a piak nading uh a thu mu thei lo uh hi. Bang hang hiam cih leh hih nalamdang a kibawlna mipa pen a khan kum sawmli val a pha khinsa mi khat ahi hi. Peter le Johan a kikhahkhiat khit phetin a lawmte uh kiangah pai-in siampi liante le upate in amaute tungah a thugente khempeuh a zasak uh hi. A lawmte un hih thu a zak uh ciangin a vekpi-un lungsim kikhatin Pasian’ kiangah thu ngen uh a, “Van le lei, tuipi tuineu le a sunga om khempeuh a piangsak Topa aw, kote’ pupi, na nasempa David tungah na Kha Siangtho tawh thu na gen a, amah in, ‘Bang hangin Gentail mite heh mahmah a, a tangtung lo dingpi vaihawm uh ahi hiam? Topa le ama Khrih a do dingin leitung kumpite kithawi uh a, gam ukte kikaikhawm uh hi,’ ci hi. A cih mah bangin Herod le Pontias Pilat in hih khuapi sung teek mahah Gentail mite le Israel mite tawh kikupna nei uh a, nangmah in Khrih dingin na bawl, a siangtho na Nasempa Jesuh thah dingin a vaihawm uh hi. Nangmah in na deihna bangin a piang dingin na vangliatna tawh na khensatsa thu khempeuh a sem dingin amaute kikhawm uh hi. Tua ahih ciangin Topa aw, amaute in kote hong tawnnate thei inla, nangma nasem kote in lungsim han’ mahmahna tawh nangma thu ka gentheih nadingun hong huh in. Cinate damsak theih nading vangliatna hong pia inla, a siangtho na Nasempa Jesuh’ min tawh nalamdang kibawl ta hen,” a ci uh hi. Tua bangin thu a nget khit uh ciangin amaute’ kikhopna mun hong kilinggawp hi. Amaute khempeuh Kha Siangtho tawh kidim uh a, hang takin Pasian’ thu gen ding a kipan uh hi. Thu um mi khempeuh a lungsim uh le a ngaihsutna uh kikhat uh a, kuamah in ama neihsa kei-a’ tuam ci loin, a neih khempeuh uh a neikhawm ciat uh hi. Topa Jesuh’ thawhkikna thu, sawltakte in vangliatna tawh teci pang uh a, Pasian in amaute khempeuh tungah thupha tampi a pia hi. Tua hi a, Saipras tuikulh-a suak, Levi mi Josef, sawltakte in Barnabas (Hanthawn Siampa a cihnopna) min a phuah pa in, ama neih a lo zuak a, a sum hong paipihin sawltakte khut sungah a ap hi. Ahi zongin Ananias a kici pasal khat le a zi Sapfira a kici, nupa kop khat om uh hi. A neihsa uh pawlkhat zuak uh a, ahi zongin a zi tawh thukimin a sumte pawlkhat im-in, a dangteng sawltakte kiangah a va ap hi. Peter in, “Ananias aw, bang hangin Satan’ thu-in gamta a, na lo zuak man sumte pawlkhat kem simin, Kha Siangtho khem na hi hiam? Tua lo na zuakma-in nangma a’ hi a, na zuakkhit ciangin a sum zong nangma a’ mah ahi hi. Tua hinapi-in bang hangin tua bangin gamtat ding ngaihsun peuhmah na hi hiam? Mite a khem hi loin Pasian a khem na hi hi,” a ci hi. Ananias in hih thu a zak phetin thakhatin si-in puksukpah a, hih thu a za mi khempeuh a lau mahmah uh hi. Tua ciangin tangvalte hong kipanin puan tawh a luang tun uh a, puakhia-in a va vui uh hi. Tua khit nai thum bang ding ciangin a zi hong pai a, ahi zongin tua lai-a thupiang bangmah thei lo hi. Peter in tua nu kiangah, “Nang le na pasal in na lo zuak man uh sum pen a vekpi-in hih zah mah ahi hiam, hong gen dih in,” ci-in a dong hi. Amah in, “Hi hi, tua zah mah hi,” ci-in a dawng hi. Tua ciangin Peter in tua nu kiangah, “Bang dingin na nupa-un Topa’ Kha Siangtho ze-et ding thukim khawm na hi uh hiam? En in, na pasal a vuite kongkhak gei mahmahah om uh a, nang zong hong puakhia ding uh hi,” a ci hi. Amah zong thakhat thu-in si-in Peter khe kiangah a puksuk hi. Tua ciangin tangvalte hong lut uh a, a sih khitlam a muh uh ciangin puakhia-in a pasal’ gei-ah a phum uh hi. Pawlpi mi khempeuh le hih thu a za mi khempeuhte nakpitakin a lau uh hi. Sawltakte in mite lakah lim le nalamdang tampi a bawl uh hi. Thu um mi khempeuh Solomon’ Talap-ah kikhawmin a om uh hi. Midangte in thupi sa-in hoihsa mahmah uh a, ahi zongin amaute pawlpih taktak ngam lo uh hi. Topa’ thu a um numei pasal tampi tak hong kibehlaplap uh hi. Hih bangin sawltakte’ nasepna hangin kongzingah cinate hong kipua a, Peter hong pai ciangin a liim in cinate a liahkhak theih nading deihin a lupna le a lupna pheekte uh tawh lam gei-ah a koih uh hi. Jerusalem khua kiima om khuapite panin mite hong pai-in, cinate le dawivei mite hong paipih uh a, a vekpi-in damna a ngah uh hi. Tua ciangin siampi lianpen pa le amah tawh a kipawl tua lai-a Saddusi mite in sawltakte haza-in thangpai uh ahih manin thu bawl ding a ngaihsun uh hi. Tua ahih manin sawltakte manin thong sungah a khum uh hi. Ahi zongin tua zanin Topa’ vantungmi khat in thong kongkhakte hong a, sawltakte a paikhiatpih khit ciangin amaute kiangah, “Biakinn-ah pai unla, hih nuntak thakna thu mite kiangah va gen un,” ci-in a vaikhak hi. Ama gen mah bangin sawltakte zong zingsang ciangin biakinn-ah pai-in thuhilh ding a kipan uh hi. Siampi lianpen pa le ama kikholhpihte in ulian kikhopna a cingtaak khat a omtheih nadingin Jew mi upa khempeuh a kikhop nadingun a sam uh hi. Tua khit ciangin thong panin sawltakte va kai-in uliante mai-ah a hong paipih nadingun palikte a sawl uh hi. Ahi zongin thongah palikte a va tun uh ciangin sawltakte na om lo hi. Tua ahih manin uliante kiangah kileh kikin, “Thongah ka tun uh ciangin a kongkhakte limtak mahin tawh kikalh a, thongcingte in zong kongpi-ah limtak mahin a na cing ka mu uh hi. Ahi zongin thong kong ka hon uh ciangin a sungah kuamah na om lo hi,” ci-in a zasak uh hi. Biakinn ukpa le siampi liante in hih thu a zak uh ciangin hih sawltakte a bangci thu hi ding hiam, ci-in lamdang a sa mahmah uh hi. Tua laitakin mi khat hong pai-in amaute kiangah, “Thong sungah na khum uh mite in tu mahmahin biakinn sungah thuhilhin om uh hi,” ci-in a hong gen hi. Tua ciangin biakinn ukpa le a mite va pai-in sawltakte hong paipih kik uh hi. Mihonte in suang tawh amaute a dengawp khak ding lau uh ahih manin sawltakte ngongbawl loin thudam tawh a paipih uh hi. Tua ciangin uliante mai-ah sawltakte dingsak uh a, siampi lianpen pa in sawltakte kiangah thu genin, “Hih mipa’ min tawh thu na hilh nawn loh nadingun khauhtakin thu kong pia uh hi. Tu-in na gamtatnasate uh thei un. Jerusalem khuasung khempeuhah thu na genthang uh a, ama sihna pen kote nong ngawh nuam uh hi,” a ci hi. Ahi zongin Peter le sawltak dangte in, “Mite’ thu sangin Pasian’ thu ka mangzaw ding uh hi. Note in singlamteh tungah Jesuh khai-in na thah khit uh ciangin i pu i pate’ Pasian in sihna panin amah hingkiksak khinzo hi. Israel mite kisik kikin Pasian in a mawhna uh a maisak theih nadingin Ukpi le Honpa-in tua Jesuh bawlin ama taklamah a tusak hi. Hih thute thei-in teci a pangte pen ko sawltakte bek hi loin Kha Siangtho tawh zong ka hi uh a, tua Kha Siangtho pen amah a um mite tungah Pasian in a khongin a piak ahi hi,” ci-in a dawngkik uh hi. Uliante in hih thu a zak uh ciangin heh mahmah uh ahih manin sawltakte thah dingin a ngaihsun uh hi. Ahi zongin amaute sung panin Farisi mi Gamaliel, Thukham hilh sia khat ahi, mi khempeuh in zong a zahtakbawl mipa khat hong ding a, tawlkhat sung sawltakte a kipusuahpih nadingin thu pia a, tua khit ciangin a lawm uliante kiangah, “Israel mite aw, hih mite na bawl nading uh tawh kisai-in limtakin kidawm un. Tuma lam tawlkhat lai-in Thudas a kici mi khat hong khang hi. Mi lian khat ka hi hi, ci-in gen a, mihing zali ding bang in amah pawlpih uh hi. Ahi zongin amah kithatin, a nungzui khempeuh kithehthang a, ama vai beita hi. Hih thu a pian’ khit ciangin, mi bangzah pha hiam, ci-in gam sung mi khempeuh a kisim laitakin Galilee mi Judas a kici mi khat hong khang leuleu a, amah in zong nungzui mihonpi mah a nei hi. Amah zong kithat leuleu a, a nungzuite kithehthangin maimang hi. Tu-in zong tua bangmahin thu hong piang leuleu hi. Note kiangah kong gennop thu in: Hih mite bangmah cih kei unla, hici omsak lel un. Mihingte’ bawltawm vaihawmna ahihleh ama thu-in hong bei lel ding hi. Ahi zongin Pasian kiang panin a hong pai thu ahihleh na zo zo ngei kei ding uh hi. Pasian tawh a kido na hi ding uh hi,” ci-in a gen hi. Tua ahih manin uliante in Gamaliel’ thugen a mang uh hi. Sawltakte samkik sak uh a, a sat khit uh ciangin Jesuh’ min tawh thu a hilhkik ngei loh nadingun thu a pia uh hi. Tua khit ciangin sawltakte a khah uh hi. Uliante omna panin sawltakte paikhia uh a, Jesuh’ hangin mindaina a thuak dingin Pasian in kilawm hong sa hi, ci-in ngaihsun uh ahih manin a lungdam mahmah uh hi. Nisimin biakinn sung le mite inn-ah thu hilh uh a, Jesuh, Khrih hi, cih Lungdamna Thu a gengen uh hi. Tua khit ciangin thu um mi hong tam tektek a, Jew mite le Grik pau a zang Jew mite kikalah kiphunsanna thu hong om hi. Grik pau a zang Jew mite in, “Annek tuidawn, sumlepai hawmna-ah ka meigong numeite uh hong kipiaksak lo hi,” ci-in lungkim lo uh hi. Tua ahih manin sawltak sawm le nihte in thu um mi khempeuh samin kaikhawm uh a, “Kote in Pasian’ thu hilh ding don man lo liangin annek tuidawn sumlepai vai-ah kong manlah ding uh kilawm lo hi. Tua ahih ciangin sanggamte aw, note lak panin pilna le Kha Siangtho a nei mihing sagih hong kitengkhia unla, hih thute a vaihawm dingin i koih ding hi. Tua hileh kote in ka hun khempeuh uh thungetna le thuhilhna-in kong zang thei ding uh hi,” a ci uh hi. A vekpi-un sawltakte’ thugente thukimpih uh ahih manin, Kha Siangtho tawh kidimin upna a nei Stefen, Filip, Prokhoras, Nikanor, Timon, Parmenas, le Antiok khua pan Gentail mi ahi Jew biakna a zui Nikolas a teel uh hi. Amaute in sawltakte kiangah hih mite paipih uh a, sawltakte in a lu tung uhah a khut uh nga-in thu a ngetsak uh hi. Tua bangin Pasian’ thu kizelin hong khang semsem hi. Jerusalem khua sungah thu um mi tampi tak hong kibehlap a, siampi tampi tak in zong Lungdamna Thu a hong um uh hi. Pasian in Stefen’ tungah thupha tampi tak pia-in vangliatna lianpi neisak a, amah in mite lakah lim le nalamdang lianpipi a bawl hi. Ahi zongin mi pawlkhat in Stefen langpan’ uh hi. Tua mite pen mite in, “Sal Suakta Mite,” a cihte pawl uh hi a, Sairin khua le Alexandria khua panin a hong pai Jew mite ahi uh hi. Hih Jew mite, Silisia le Asia gam pan a hong pai Jew mite tawh kipawlin Stefen tawh thu kisel dingin hong kipan uh hi. Ahi zongin Kha Siangtho in Stefen tungah pilna guan ahih manin amaute in thusel zo lo uh hi. Tua ciangin amaute in mi cialin sumgolh pia uh a, “Moses le Pasian langpangin thu a genna ka za uh hi,” cisak uh hi. Amaute in hih bangin zuauna tawh mihonte, upate, le Thukham hilh siate a holhthawh uh hi. Tua ahih manin amaute hong pai-in Stefen man uh a, uliante mai-ah a hong paipih uh hi. Tua ciangin zuauthu a gen dingin mi pawlkhat hong paipih uh a, “Hih mipa in a siangtho i biakinnpi le Moses Thukham gensia tawntung hi. Hih Nazareth khuami Jesuh in biakinnpi phelgawpin, Moses tung pek panin a hong kipan ngeina khempeuh khelmang ding hi, ci-in a thuhilhna ka za uh hi,” a cisak uh hi. Ulian kikhopna sunga a kihel mi khempeuh in Stefen en uh a, a maitang pen vantungmi maitang tawh kibang hi, ci-in a mu kim uh hi. Tua ciangin siampi lianpen pa in Stefen kiangah, “Tu-a amaute’ gen bang takpi mah ahi hiam?” ci-in a dot ciangin Stefen in, “Ute pate aw, ka thugen hong ngai un. I pupi Abraham, Haran khua-ah a tenma, Mesopotamia gamah a om lai-in, ama kiangah a minthang Pasian kilang a, ‘Na gam na lei, na beh na phungte kiang panin paikhia inla, nangma tungah kong lah ding gamah pai in,’ ci hi. Amah zong Khaldea gam panin paikhia-in Haran khua-ah teng hi. A pa a sih khit ciangin Pasian in tu-a na tenna uh hih gamah amah na lalsak leuleu hi. Pasian in Abraham tungah ama aituam dingin leitang khutpeek cia nangawn pia lo napi-in, amah le a suan a khakte tungah hih gam a piak nading thu a ciam hi. Pasian in tua thuciamna a piak laitakin Abraham in ta nei nai lo hi. Tua bang hinapi-in, Pasian in Abraham kiangah, ‘Na suan na khakte gam dangah tengin salin om ding uh a, kum zali sung nakpitakin gimna thuak ding uh hi. Ahi zongin sila-in a nei gam mite tungah thu ka khen ding a, na suan na khakte tua gam panin paikhia-in hih lai gamah kei hong bia ding uh hi,’ ci hi. Tua ciangin Pasian in Abraham tungah kiciamna limin vun-atna ngeina na pia hi. Tua ahih manin Abraham in a tapa Isaac a suahzawh nipikal khat khit ciangin a vun at a, Isaac in a tapa Jakob’ vun at leuleu a, Jakob in eite’ pupite ahi a tapa sawm le nihte’ vun na at leuleu hi. “I pupi dangte in Josef na haza uh a, mi tungah na zuakin, a leite in Egypt gamah sal dingin a na zuaksawn uh hi. Ahi zongin Pasian in i pupi Josef na huh a, a thuakna khempeuh panin na honkhia hi. Egypt kumpipa Faro’ mai-ah Josef a tun ciangin Pasian in ama tungah pilna le a deihhuai gamtat hoih na guan hi. Tua ahih manin Faro in ama khutnuai-ah a gam a uksawn ding le a kumpi innsung khempeuh a van dingin a koih hi. Tua ciangin Egypt gam le Kanaan gam khempeuhah kialpi tung a, mi khempeuh in haksatna thuak uh ahih manin i pupite in zong annek ding muzo nawn lo uh hi. Tua ahih manin Egypt gamah an om hi, ci-in Jakob in thu a zak ciangin i pupite ahi a tapate a khatveina na na paisak hi. A nihveina a pai uh ciangin a sanggamte tungah i pupi Josef na kipulak a, tua hun a kipanin Faro in zong Josef innkuansung thu na thei hi. Tua ciangin Josef in a pa Jakob kiangah mi sawl a, amah a kipan a innkuan mi khempeuh Egypt-ah a pai nadingun a gensak hi. Tua hun laitakin Jakob innkuan mi sawmsagih le nga pha uh hi. Tua ahih manin Jakob zong Egypt gamah pai a, amah a kipan i pupite khempeuh tua gamah a si uh hi. Amau’ luanghawmte, Shekhem khua-ah kipua a, Abraham in Hamor-te beh tung panin han dingin sum tawh a lei leitangah kiphum hi. “Pasian in Abraham tungah a thuciamna a tunsak ding a nai kuan ciangin Egypt gamah ei mite tampi tak na pha ta uh hi. A tawpna-ah Josef a thei lo kumpi dang khat, Egypt gam sung a uk dingin hong kipan hi. I mipihte na khemgawpin na khelbawl a, a ta ngeekte uh a sih nadingin inn panin mun dangah a koihkhia sak hi. Hih hunin naungek melhoih mahmah khat na suak hi. Inn-ah kha thum sung kikem a, inn panin a kikoihkhiat ciangin Faro’ tanu in a ta dingin la a, ama tapa bang teekteek mahin bawlin a khansuah hi. Egypt gam sunga pilna om khempeuh ama tungah kihilh a, thugenna le nasepna-ah milian mahmah khat a suak hi. “Amah kum sawmli a phak ciangin Israel’ suan a mipihte lakah painopna lungsim a nei hi. Tua bangin a mipihte lakah a va pai ciangin Egypt mite khat in a Israel mipihte khat a bawlsiatna mu a, a mipih pa a hutna-in Egypt mipa a satlum hi. Amah pen eite hong honkhia dingin Pasian in a zat ding mipa hi, ci-in a mipihte in a thei ding sa a, ahi zongin a mipihte in na thei lo uh hi. A zing ciangin Israel mi nih a kilai mu leuleu a, amaute a phelh dingin kipanin, ‘Lawmte aw, minam khat hi lo na hi uh hiam? Bang hangin khatlekhat tuaci kibawl na hi uh hiam?’ ci hi. A lawmpa a bawlsia pa in Moses sawnkhia-in, ‘Kote a hong uk ding le thu a hong khen dingin kua in nang hong koih ahi hiam? Zan-a Egypt mipa na thah bangin kei zong a hong thatnuam na hi hiam?’ a na ci hi. Moses in hih thu a zak ciangin Egypt gam panin taikhia-in Midian gamah ten ding kipan a, tua gamah tapa nih a nei hi. “Tua gamah kum sawmli a ten khit ciangin, Sinai Mual tung gamlakah sawlpang lak a meikuang sungah vantungmi khat ama kiangah hong kilang hi. Moses in a muh ciangin lamdangsa a, a nai takin a muhtheih nadingin sawlpang kuang kiangah a va pai hi. Ahi zongin Topa’ awging za a, ‘Kei pen na pu na pate uh ahi Abraham, Isaac, le Jakob-te’ Pasian ka hi hi,’ a na ci hi. Moses zong lau-in linggawp a, en ngam lo hi. Tua ciangin Topa in Moses kiangah, ‘Na dinna mun pen a siangtho leitang ahih manin na khedap suah in. Ka mite in Egypt gamah bawlsiatna a thuaknate teltakin ka mukhin hi. Amaute’ tauna awging ka za a, amaute a honkhia dingin a hong paisuk ka hi hi. Hih lai-ah hong pai in; Egypt gamah nang ka hong paisak ding hi,’ na ci hi. “Moses pen Israel mite in deih loin, ‘Kote a hong uk ding le thu a hong khen dingin kua in hong koih ahi hiam?’ a cih pa uh ahi hi. Ahi zongin Moses pen sawlpang kuang sung pan ama kiangah a kilang vantungmi’ huhna tawh ukpa le honkhia pa ahi dingin Pasian in a sawl pa ahi hi. Amah in Egypt gam le San Tuipi-ah lim le na lamdangte bawlin, Egypt gam panin Israel mite paikhiatpih a, gamlakah kum sawmli sung amaute a makaih hi. Hih Moses pen Israel mite tungah, ‘Pasian in kei hong sawl mah bangin, i mipihte sung mah panin note a’ ding kamsang khat hong sawl ding hi,’ a ci pa ahi hi. Amah pen Israel mite tawh gamlakah a om pa hi a, Sinai Mual tunga ama kiangah thu a gen vantungmi le i pute tawh a kikhawlpa ahi hi. Eite tungah hong gensawn dingin Pasian kiang panin a tul ngei lo thu a ngah ahi hi. “Ahi zongin i pute in ama thu na mang nuam loin, amah na nawlkhin uh a, Egypt gamah ciahkik nopna lungsim na nei uh hi. Tua ahih manin amaute in Aaron kiangah, ‘Egypt gam panin eite a hong paikhiatpih tua Moses tungah bang thu piang hiam cih thei lo ihih manin, eite’ mai-ah i paisak ding milim pasian pawlkhat hong bawlsak in,’ ci uh hi. Tua ahih manin amaute in bawngno tawh a kibang lim khat bawl uh a, ganhing tawh tua milim bia-in, amaute’ bawltawm pasian hangin lungdamin pawi a na bawl uh hi. “Gamlakah a omlai-un i pute in Pasian’ ompihna puanbuk nei uh a, Pasian in Moses tungah a gensa, a lim ding a lahsa bang teekteekin a kibawl ahi hi. Tua khit ciangin i pute in amau’ pate tung panin a ngah uh tua puanbuk pen amau’ ten nading gam a la dingin a kuan uh ciangin na pua uh a, Pasian in amaute’ mai-ah tua gam mite hawlkhiatsak ahih manin tua gam a luah uh ciangin a puanbuk zong a na tunpih uh hi. Tua ahih manin David’ hun ciang dong tua puanbuk na om hi. David in Pasian’ maipha ngah ahih manin, Jakob Pasian a dingin biakinn khat a vaihawm sak nadingin Pasian kiangah a ngen hi. Ahi zongin Pasian a dingin biakinn a lamsak pen David hi loin a tapa Solomon ahi hi. “Na lungsim uh khauh mahmah a, lawki lungsim paii-in, Pasian’ thu-ah bilngong na bang uh hi. I pu i pate mah bangin Kha Siangtho thu na mang nuam kei uh hi. I pu i pate in kamsang a bawlsiat loh khat beek om lo hi. Pasian’ deihna bangin a gamta a Nasempa a hong pai nading thu a genkhol Pasian’ kamtaite na that uh a, tu-in note in tua nasempa lehhekin na that leuleu uh hi. Note in vantungmi tungtawnin Pasian’ hong piak thukham ngah napi-in na mang nuam kei uh hi,” a ci hi. A kikhawm uliante in Stefen’ thugen a zak uh ciangin nakpitakin heh uh a, a ha uh gawisan uh hi. Ahi zongin Stefen ahihleh Kha Siangtho tawh kidimin vantung lam ento a, Pasian’ minthanna vang le Pasian’ taklamah Jesuh a ding mu ahih manin, “En un! Vantung kihong a, Pasian’ taklamah Mihing Tapa a ding ka mu hi,” a ci hi. Ahi zongin amaute in a bil uh humsanin nakpitakin kiko-in Stefen bawhhuan uh a, khua pualamah kaikhia-in suang gol pipi a khiat uh hi. Hih thu-ah teci pangin Stefen a deng mite in a puantungsilh uh suahin Saul a kici tangval khat kiangah lawnin a kemsak uh hi. Tua bangin suang a khiat thuahthuah laitakun Stefen in thu ngen a, “Topa Jesuh aw, ka kha hong la in,” a ci hi. Tua ciangin amah kunin nakpitakin kiko a, “Topa aw, hih mite’ mawhna na maisak in,” a cih khit ciangin a si ta hi. Hih Stefen thahna thu-ah Saul in zong thukimpih hi. Tua ni a kipanin Jerusalem khua-a om pawlpite in nakpitakin bawlsiatna thuak ding kipan uh hi. Sawltakte simloh, thu um midang khempeuh, Judea gam le Samaria gamah kithehthang gawp uh hi. Thu um mi pawlkhat in Stefen vui uh a, nakpitakin dahin a kap uh hi. Ahi zongin Saul in pawlpi suksiat ding hanciam a, inn khat pan inn khatah pai kawikawi-in, thu um numei le pasalte kai-in thong sungah a khia hi. Tua bangin a kithehthang mite pai kawikawi-in thu a hilh uh hi. Filip zong Samaria gam khuapi-ah pai-in Khrih thu a hilh hi. Mihonte in Filip’ thugen le a nalamdang bawlte a muh uh ciangin a thugen khempeuh limtakin a ngai uh hi. Mi tampite sung panin dawite nakpitakin kiko-in paikhia uh a, khutzaw khezaw mite zong kidamsak hi. Tua ahih manin tua khuapi sunga om mite lungdam mahmah uh hi. Tua khua sungah Simon a kici mi khat om a, amah mitphial bawl siampi hi a, Samaria mite in lamdangsa mahmah uh hi. Amah milian mahmah khatin kigen a, tua khuasunga om milian mineu a om khempeuh in a thu limtakin ngai-in, “Vang Lianpa,” a kici Pasian pen amah ahi hi, a ci uh hi. Amah in sauveipi sung mitphial bawl a, mite in lamdangsa mahmah uh ahih manin a thu a um uh hi. Ahi zongin Pasian’ Ukna Lungdamna Thu le Jesuh Khrih thu, Filip’ gente a up uh ciangin, numei pasal a um khempeuh tui a kiphum uh hi. Simon mahmah in zong um a, tui a kiphum khit ciangin Filip zui tawntung a, lim le nalamdang lianpipite a bawl a muh ciangin lamdang a sa mahmah hi. Samaria mite in Pasian’ thu a sankhitna uh, Jerusalem-a om sawltakte in a zak uh ciangin amaute kiangah Peter le Johan a paisak uh hi. Amaute a tun uh ciangin tua lai-a om thu um mite in Kha Siangtho a ngah nadingun thu a ngetsak uh hi. Bang hang hiam cih leh amaute pen Topa Jesuh min tawh a kituiphum hi pan bek uh a, amaute khat beek in Kha Siangtho ngah nai lo uh hi. Peter le Johan in amaute lu tungah a khut uh a ngak khit uh ciangin Kha Siangtho a ngah uh hi. Sawltakte in amaute tungah a khut uh a ngak ciangin Kha Siangtho a ngahna uh mu ahih manin Simon in Peter le Johan kiangah sum pia a, “Kei zong ka khut ka ngakna mi peuhpeuh in Kha Siangtho a ngahtheih nadingin hih bang vangliatna kei zong hong pia un,” a ci hi. Ahi zongin Peter in, “Pasian’ piakkhong na pen sum tawh lei theih dingin ngaihsun na hih manin na sumteng tawh sikhawm in. Pasian in na lungsim man hong sa lo ahih manin kote’ nasepna-ah nang nong kihel thei kei ding hi. Tua ahih manin na ngaihsut hoih lohna panin kisikkik inla, hih bang na ngaihsutna thu-ah na mawhna hong maisak theih nadingin Topa kiangah thu ngen in. Bang hang hiam cih leh nangmah in enluatna lungsim nei-in, mawhna in hong valhcip mi khat na hih lamtak ka hong thei hi,” a ci hi. Tua ciangin Simon in Peter le Johan kiangah, “Tu-a na thugente uh kei tungah khat beek hong tun loh nadingin thu hong ngetsak un,” a ci hi. Amaute in Jesuh Khrih thu a theihte uh genin Topa’ thugente a hilh khit uh ciangin Jerusalem khua-ah a ciahkik uh hi. A ciahkik kawmun Samaria khuaneu lampite-ah Lungdamna Thu a hilh uh hi. Topa’ vantungmi khat in Filip kiangah, “Kithawi inla, Jerusalem khua panin Gaza khua paina lampi zuan dingin leitaw lam manawhin pai in,” a ci hi. (Tua lampi tu-in kizang pha nawn lo hi.) Filip zong kithawi-in a pai hi. Lampi-ah Ethiopia mi mang lian khat tawh kituak hi. Tua mangpa pen Ethiopia kumpinu Kandeis khutnuai-a mang lian khat hi a, kumpinu neihsa khempeuh a ukpa ahi hi. Jerusalem khua-ah Pasian bia dingin a va pai hi a, inn zuan dingin leeng sungah a tuan kawmin kamsang Isaiah laibu a sim hi. Tua laitakin Kha Siangtho in Filip kiangah, “Pai inla tua leeng mai-ah va om in,” ci-in a sawl hi. Filip zong ama kiangah va tai a, kamsang Isaiah laibu a simna za ahih manin, “Na laisim a khiatna na thei hiam?” ci-in a dong hi. Amah in, “Mi khatpeuh in hong hilhtel lohpi-in bangci theih ding ka hi hiam?” ci-in dawng a, ama leeng tungah Filip a tuang dingin a sam hi. Tua a sim Lai Siangtho mun pen, “A kigo dingin a kikai tuuno ham lo a, a mul a kimeetsak tuuno a ham loh mah bangin, amah kam khat beek pau lo hi. Mite in amah simmawhbawl gawp a, amah a huh kuamah om lo hi. Ama nuntakna leitungah bei ahih manin, a suan a khakte’ thu, ci-a gen ding om lo hi,” ci-in a kigelhna mun ahi hi. Tua ciangin mangpa in Filip kiangah, “Hih kamsangpa in amah a kicihna ahi hiam, tua ahih kei leh midang khatpeuh a cihna ahi hiam, hong gen dih in,” a ci hi. Filip zong a kam ka-in thugen ding kipan a, tua a Lai Siangtho simna mun a kipanin Jesuh thu ciang dong a gen hi. Lampi-ah a pai laitakun tui omna mun tung uh a, mangpa in, “Hih lai-ah tui om hi. Tui kiphum nuam peuh leng kua’n hong kham thei ding ahi hiam?” a ci hi. Filip in, “Na lungsim takpi tawh na up nakleh tui na kiphum thei ding hi,” a cih ciangin, “Jesuh Khrih pen Pasian’ Tapa hi, ci-in ka um hi,” ci-in a dawng hi. Tua ciangin a leeng a khawlsak nadingin mangpa in thu pia a, Filip tawh a nihun tui phualah pai-in Filip in amah a tuiphum hi. Tui sung panin a paikhiat khit uh ciangin Topa’ Kha Siangtho in Filip paikhiatpih hi. Mangpa in Filip mu nawn lo hi; ahi zongin lungdam takin a lampai a zom hi. Tua ciangin Filip pen Azotas khua-ah a om ahih lamtak amah kiphawk a, tua khua a kipanin Sisaria khua a tun dongin khua khempeuhah Lungdamna Thu a hilh hi. Tua hun sungteng Saul in Topa’ thu a um mite thah dingin a hanciamna zomlai hi. Siampi lianpen pa kiangah pai a, Topa’ thu a zui mi numei pasal a muh peuhpeuh manin Jerusalem khua-ah a ciahpih theih nadingin Damaskas khua-a Jew mi kikhopna inn ukte kiangah a lah dingin lai a ngen hi. Damaskas khua a zuan dingin pai a, a tun dektak ciangin thakhat thu-in van panin ama kimkotah a hong taangzaih khat a om hi. Saul, leilakah puksuk a, tua laitakin awging khat in ama kiangah, “Saul, Saul aw, bang hangin kei hong bawlsia na hi hiam?” a ci hi. Saul in, “Topa aw, kua na hi hiam?” ci-in a dot ciangin, “Nangmah in na hong bawlsiat Jesuh ka hi hi. Ahi zongin tho-in khuapi sungah lut in; tua lai panin na gamtatna dingteng hong kigen ding hi,” a ci hi. Saul tawh a tonkhawm mite in a awging a zak uh hangin kuamah mu lo uh ahih manin lamdangsa lua-in pau thei lo liangin a om uh hi. Saul zong leilak panin thoto a, a mit a hah hangin khua mu thei lo hi. Tua ahih manin a kikholhpihte in a khutin lenin Damaskas khua-ah a paipih uh hi. Ni thum sung khua mu thei loin, anletui zong a ne kei hi. Tua laitakin Damaskas khua-ah Ananias min nei thu um mi khat a om hi. Amah in maang mu a, a maang sungah Topa in, “Ananias aw,” ci-in a sam hi. Ananias in, “Topa aw, ka om hi,” ci-in a dawng hi. Tua ciangin Topa in Ananias kiangah, “Kithawi-in Kongzing Tang gei-a Judas inn-ah va pai inla, Tarsas khuami Saul min nei mi khat va kan in. Tua Saul in thu ngen a, khua a muhkik theih nadingin Ananias min nei mi khat hong pai-in ama lu tungah a khut a ngakna thu, a maang muhna sungah a mu hi,” a ci hi. Ahi zongin Ananias in, “Topa aw, hih mipa in Jerusalem khua-a om nangma mite a bawlsiatna thu khempeuh, mi tampi tak in kei tungah hong gen khinzo uh hi. Tu-in zong nangmah a hong bia mi khempeuh a mattheih nadingin siampi liante tung panin thu a ngahkhit ciangin Damaskas khua-ah a hong tung ahi hi,” a ci hi. Ahi zongin Topa in Ananias kiangah, “Gentail mite, kumpite, le Israel mite tungah keima min a kitheisak ding, keima na a sem dingin teelkhin ka hih manin ama kiangah va pai in. Keima hangin a thuak ding thu khempeuh zong, kei mahmah in ama tungah ka gen ding hi,” a ci hi. Tua ahih manin Ananias zong pai a, inn sungah a lutkhit ciangin Saul lu tungah a khut nga a, “Sanggam Saul aw, hih lai-ah nong pai lai-in nangma tungah a hong kilang Jesuh mahmah in kei hong sawl hi. Nangmah in khua muthei kikin, Kha Siangtho tawh na kidim theih nadingin nangma kiangah a hong paisak ahi hi,” a ci hi. Tua laitakin Saul’ mit panin ngasalip tawh a kibang na pawlkhat kia a, khua a mukik thei hi. Saul zong tui kiphumpah a, an a nekkhit ciangin a tha hong hatkik hi. Damaskas khua-ah a om thu um mite tawh tawlkhat sung a omkhawm hi. Kikhopna innte-ah va pai-in, “Jesuh pen Pasian’ Tapa ahi hi,” ci-in thu hilh ding a kipan hi. Ama thuhilh a za mi khempeuh in lamdangsa uh a, “Pasian a bia mi peuhpeuh, Jerusalem khua sungah a that pa hi lo ahi hiam? Hih lai-ah zong thu um mite manin siampi liante kiangah a ciahpihkik dingin a hong pai hi lo ahi hiam?” a ci uh hi. Ahi zongin a thuhilhna-ah Saul hong siam semsem a, Jesuh pen Khrih hi, ci-in teltakin lakthei ahih manin, Damaskas khua-a om Jew mite in a nial nading uh om thei lo hi. Tuazawh ni tampi khit ciangin Jew mite kikaikhawmin Saul thahsawm uh a, ahi zongin Saul in amah a kisawm lamtak na phawk hi. Jew mite in Saul a thahtheih nadingun a sun a zanin khua kongpi-ah a pang uh hi. Ahi zongin Saul’ nungzuite in zanin khuakulh tungah kahtohpihin kulh pualamah bawm tawh a khaisuk uh hi. Jerusalem khua-ah Saul pai a, thu um mite tawh kipawl dingin a vaihawm hi. Ahi zongin amaute in Saul pen thu um dingin na ngaihsun zo lo uh ahih manin na kihta mahmah uh hi. Tua ciangin Barnabas in Saul hong huh a, sawltakte kiangah Saul a va paipih hi. Lam a pai laitakin Saul in Topa a muhna thu, Topa in Saul kiangah a thugennate, le Damaskas khua-ah Saul in hangtakin Jesuh’ min tawh thu a hilhnate khempeuh sawltakte kiangah a gensak hi. Tua ahih manin Saul zong sawltakte tawh kikhawl a, Jerusalem khua sungah vak kawikawi-in, Topa’ min tawh hangtakin thu a hilh hi. Grik pau a zang Jew mite tawh zong thu genkhawmin kisel uh a, amaute in Saul thah dingin a vaihawm uh hi. A lawmte in hih thu a phawk uh ciangin Sisaria khua-ah Saul paipihsuk uh a, tua lai panin Tarsas khua-ah a ciahsak uh hi. Tua ahih manin Judea gam, Galilee gam, le Samaria gam sunga om pawlpite in bawlsiatna thuak nawn loin nuamtakin om uh a, Topa zahtakna tawh gamta uh ahih manin Kha Siangtho huhna tawh a mi khangin a kibehlap uh hi. Peter khualzinin pai kawikawi a, khatvei Lydda khua-a teng Pasian’ mite kiangah a hawh hi. Tua khua a tun ciangin a khutlekhe a zaw, kum giat sung tawntung lupna ngakin a om, Aineas kici mi khat a mu hi. Peter in tua pa kiangah, “Aineas aw, Jesuh Khrih in nang hong damsak hi; tho-in na lupna zial in,” a ci hi. Amah zong thakhatin thoto pah hi. Tua khua-a teng mi khempeuh le Sharon zanglei-a teng mi khempeuh in Aineas mu uh ahih manin Topa a um uh hi. Joppa khua-ah Pasian’ thu a um, Tabitha min nei numei khat a om hi. (Tua nu’ Grik min pen Dorkas hi a, sakhi a cihnopna ahi hi.) Tua nu a tawntungin a hoihin gamta-in mizawngte a huh hi. Tua laitakin amah a ci na-in a si hi. Amah a silkhit uh ciangin inndei tungnungah a sial uh hi. Joppa khua le Lydda khua kigamla lo ahih manin, Joppa khua-a teng thu um mite in Lydda khua-ah Peter om hi, ci-in thu a zak uh ciangin Peter kiangah mi nih sawl uh a, “A manlang theithei-in ko kiangah hong pai in,” ci-in a samsak uh hi. Peter zong kithawi-in a samte tawh paikhawm pah a, tua khua a tun ciangin inndei tungnungah a na paipihto pah uh hi. Tua lai-ah a na om meigong numei khempeuh in Peter na umcih uh a, Dorkas a hin lai-in amaute a dingin a bawlsak puanakte le puantungsilhte, a kahkawmun Peter kiangah a lak uh hi. Peter in innsung panin amaute khempeuh a pusuahsak khit ciangin khukdinin thu a ngen hi. Tua ciangin misi nu lamah kihei a, “Tabitha aw, tho in,” a cih ciangin a mit hong hak a, Peter a muh ciangin a tuto hi. Peter in a khut khakin a dingtosak hi. Tua ciangin thu um meigong numeite a kipanin thu um khempeuh samkikin amaute kiangah Dorkas a nungta-in a lak hi. Joppa khuasung khempeuhah hih thu kitheikim a, mi tampi in Topa a um uh hi. Joppa khua-ah ni tampi sung Peter tamlai a, savunnim nasepin a nei Simon a kici mipa tawh a omkhawm hi. Sisaria khua-ah Kornelias a kici mi khat om a, Rom galkap honte sung panin “Italy Galkapte,” a kici sungah galkapbu a sem ahi hi. Amah biakna a hahkat mahmah mi khat hi a, a innkuan bupun Pasian bia uh hi. Amah in Jew mizawngte huh nadingin nakpitakin na sem a, Pasian kiangah thu a ngen tawntung mi khat ahi hi. Khatvei nitak nai thum pawlin maang mu a, Pasian’ vantungmi khat hong pai-in ama kiangah, “Kornelias aw,” ci-in a sapna teltakin a thei hi. Amah in zong laukawmin vantungmi en a, “Topa aw, bang thu ahi hiam?” a cih ciangin, “Pasian in na thungetna hong za a, mizawngte na huhna zong hong thei-in nang hong phawk hi. Tu-in Joppa khua-ah mi sawl inla, Simon Peter a kici mipa samsak in. Tua mipa pen, tuipi gei-a teng savunnim nasepin a nei Simon inn-ah zin tungin a om ahi hi,” a ci hi. Tua khit ciangin ama kiangah thu a gen vantungmi paikhia a, Kornelias in zong ama innsung nasemte nih le biakna a hahkat mahmah, ama sawltakin a neih galkapte khat sam a, a thupiang khempeuh amaute kiangah a genkhit ciangin Joppa khua-ah a paisak hi. A zing ciangin Joppa khua-ah amaute a tun dektak laitakun, thungen dingin sun laitakin innkhumzangah Peter a kahto hi. Peter a gil kialin an duh mahmah hi. A zinte in an a huanhuan laitakin Peter in maang a mu hi. Vantung kihong a, sikli a nei a peek deda khat a kiu ciatah khau kivawhin leitungah a hong kikhaisuk a mu hi. Tua a peek tungah ganhing namkim, a bokvak namkim, le vasa namkim a om hi. Awging khat in ama kiangah, “Peter aw, tho inla tuate go-in ne in,” a ci hi. Ahi zongin Peter in, “Topa aw, tuate go-in ka ne het kei ding hi. A ninin a kingaihsun peuhmah ka ne ngei het kei hi,” ci-in a dawng hi. A awging in ama kiangah, “Pasian in a siangin a gensa khat peuhpeuh a ninin ngaihsun kei in,” a ci leuleu hi. Tu-a bangin a thumveina dong a cihkhit ciangin vantung lamah tua a peek deda a kilato kik hi. Peter in tua a maangmuhna bang a cihnopna hi ding ahi hiam, ci-in lamdangsa-in a om laitakin, Kornelias in a sawl mite in Simon’ inn hong kan kawikawi uh a, a inn hong thei uh ahih manin a kongbiang hong tungta uh hi. Amaute in, “Simon Peter a kici mi khat, hih lai-ah zin hong tung kha hiam,” ci-in a hong dong uh hi. Tua bangin Peter in a maang muh lungngaingai-in a om laitakin Kha Siangtho in, “En in, mihing thum in nang hong zong uh hi. Amaute nang kiangah a hong pai dingin ka hong sawl ahih manin kithawi-in kumsuk inla, lunghiang loin amaute zuipah in,” a ci hi. Tua ciangin Peter zong amaute kiangah paisuk a, “Kei pen na zon pa uh ka hi hi. Bang thu ahi hiam?” ci-in a dong hi. Amaute in, “Galkap bupa Kornelias in nang kiangah kote hong sawl hi. Amah pen Pasian a bia mihoih mahmah khat hi a, Jew mi khempeuh in zong a zahtak mahmah khat uh ahi hi. Amah in nangma thugente a zaktheih nadingin a inn-ah nang a hong sap nadingin Pasian in a vantung mite khat ama kiangah gensak hi,” ci-in a dawng uh hi. Tua ahih manin amah tawh a giakkhawm dingin Peter in amaute a sam hi. A zing ciangin Peter zong kithawi-in amaute tawh paikhawm a, Joppa khua-a om thu um mi pawlkhatte in zong a zui uh hi. A zing ciangin Sisaria khua a tung uh hi. Kornelias in zong amaute’ tun ding lamen ahih manin, a beh a phungte le a lawm itteng a inn-ah a na samkhol hi. Peter hong tun ciangin Kornelias in na dawn a, a khe kiangah bokin a bia hi. Ahi zongin Peter in amah kaito a, “Ding in; kei zong mihing mah ka hi lel hi,” a ci hi. Tua bangin a kiho kawmin Peter zong inn sungah tum a, mi tampi tak a na om a muh ciangin amaute kiangah, “Note mahmah in zong limtakin na theih ciat uh mah bangin Jew mite pen minam dangte kiangah hawhin a kikholh ding a ngeina hi lo hi. Ahi zongin mi khat peuhpeuh a nin hi, ci-in ka ngaihsut loh nadingin Pasian in kei tungah a thu hong lakkhin zo hi. Tua ahih manin kei nong sap uh ciangin nial loin kong pai hi. Tu-in bang thu-a hong sam na hi uh hiam?” ci-in a dong hi. Kornelias in, “Tuni tawh sim tuma ni li lai-in tubang hun nitak nai thum laitakin ka inn-ah thungenin ka om hi. Tua bangin thungenin ka om laitakin puanpak mahmah a silh mi khat ka mai-ah hong dingvat a, ‘Kornelias aw, Pasian in na thungetnate hong za a, mizawngte na huhnate zong a hong thei hi. Simon Peter a kici mipa a sam dingin Joppa khua-ah mi sawl in. Amah pen savunnim nasepin nei-in tuipi gei-ah a teng Simon’ inn-ah zin tungin a om hi,’ hong ci hi. Tua ahih manin nang kong samsakpah a, midik na hih manin hih lai ciang a hong tung na hi hi. Topa in na gen dingin a hong sawl thu khempeuh na hong gen ding ngakin Pasian’ omna hih lai munah a om ka hi uh hi,” ci-in a dawng hi. Tua ciangin Peter a kam ka-in thu hilh ding kipan a, “Pasian in kuamah angvan’ tuam nei loin, kua mi kua mi hitaleh amah zahtakin a manin a gamta mi khempeuh a sanna thu teltakin ka thei hi. Mi khempeuh’ Topa ahi Jesuh Khrih hangin a kingah Lungdamna Thu, Israel mite tungah Pasian in a puakna thu na thei uh hi. Johan in tuiphumna thu a hilh khit a kipanin Galilee gam a kipan Judea gam khempeuhah a piang thu lianpite na thei uh hi. Nazareth khuami Jesuh tungah Pasian in Kha Siangtho le vangliatna pia a, Pasian in a ompihna hangin tua Jesuh in a paina khempeuhah na hoih semin, Dawimangpa in a gimsak mite khempeuh a damsakna thu zong na thei uh hi. Amah in Jerusalem khua le Jew mite omna mundang khempeuhah a septe khempeuh a thei tecite ka hi uh hi. Jew mite in sing tungah amah khai-in a that uh hi. Ahi zongin Pasian in a ni thum ni-in amah hingkik sakin hong kilangsakkik hi. Mi khempeuh tungah kilangsak loin, a thei teci dingin Pasian in a hong teelsa kote bek tungah hong kilangsak hi. Sihna panin a hinkik khit ciangin kote in amah tawh an nekhawm tui dawnkhawmin ka om uh hi. Kote in mite kiangah thu ka hilh nading uh le mihing le misite tungah thu a khen dingin Pasian in amah a sehna thu teci a pang dingin a hong sawl hi. Amah a um mite khempeuh in ama min hangin a mawhna uh a mai nading thu, kamsangte khempeuh in zong gen belin a neih khat uh ahi hi,” a ci hi. Tua bangin Peter in thu a hilh laitakin tua thuhilhna a ngai mite khempeuh tungah Kha Siangtho hong tungsuk hi. Gentail mite tungah zong Pasian in a Kha Siangtho a piakkhongna thu a muh uh ciangin Joppa khua panin Peter tawh a hong paikhawm Jew mi thu umte in lamdang a sa mahmah uh hi. Bang hang hiam cih leh amaute in pau lamdang pau-in Pasian’ liatna a phatnate uh amau bil mahmah tawh a za uh hi. Tua ciangin Peter in, “Eite mah bangin hih mite in zong Kha Siangtho ngah uh hi. Tui sungah a kiphum ding uh kua’n kham thei ding ahi hiam?” ci-in a gen khit ciangin, Jesuh Khrih min tawh amaute tui a kiphum nading uh a sawl hi. Tua ciangin amaute kiangah Peter a tam lai nadingin a thum uh hi. Gentail mite in zong Pasian’ thu a upna uh, Judea gam sunga om sawltakte le thu um mite in a za uh hi. Tua ahih manin Jerusalem khua-ah Peter a pai ciangin Gentail mite zong vun a ki-at ding uh ahi hi, ci-in a ngaihsun mite in Peter mawhsak uh a, “Bang hangin vun a ki-at lo Gentail mite’ inn-ah tung a, amaute tawh an nangawn nekhawm na hi hiam?” a ci uh hi. Tua ahih manin Peter in a thupiang khempeuh a patna panin a ban banin gen a, “Joppa khua-ah thungenin ka om laitakin maang ka mu hi. A peek deda khat a kiu li-ah khau kivawhin vantung panin hong kikhaisuk ka mu a, keima mai sanah hong khawl hi. Tua a peek deda tung, limtakin ka et ciangin ganhing, gamsa, a bokvak ganhing le vasate ka mu hi. Tua ciangin awging khat in kei kiangah, ‘Peter aw, tho inla tuate go-in ne in,’ hong cihna ka za hi. Ahi zongin keimah in, ‘Topa aw, tuate go-in ka ne het kei ding hi. Bang hang hiam cih leh a ninin a kingaihsun an peuhmah ka kam ka tun ngei kei hi,’ ka ci hi. Ahi zongin van panin a awging in, ‘Pasian in a siangin a gensa khat peuhpeuh a nin na ci kei ding hi,’ hong ci kik hi. Tu-a bangin a thumveina dong hong cih khit ciangin vantungah tua a peek deda kilato kik hi. Tua laitakin Sisaria khua panin kei kiangah a hong kisawl mihing thumte, ka zintunna inn-ah hong tung uh hi. Lunghiang loin amaute ka zuihpah nadingin Kha Siangtho in kei tungah hong gen khinzo hi. Joppa khua panin hih i sanggam gukte in zong Sisaria khua-ah hong zui uh a, ka vekpi-un Kornelias inn-ah ka lut uh hi. Tua ciangin amah in vantungmi khat a inn sungah a ding mu-in, tua vantungmi in ama kiangah, ‘Simon Peter a kici mipa a sam dingin Joppa khua-ah mi sawl in. Amah in nang le na innkuan khempeuh un hotkhiatna na ngah nading uh thu hong gen ding hi,’ a cihna thu a hong gen hi. Tua thu gen dingin ka kipat laitakin eite in Kha Siangtho i ngah cil huna mah bangin amaute tungah Kha Siangtho hong tung hi. Tua ciangin Topa in, ‘Johan in tui sungah hong phum a, ahi zongin Pasian in Kha Siangtho tawh note hong kidimsak ding hi,’ a cihsa thu ka phawkkik hi. Eite in Topa Jesuh Khrih i up ciangin eite tungah hong piak mah bangin Pasian in hih Gentail mite tungah zong a kibangin a piakna teltakin kithei ahih manin, hih Pasian’ nasepna a khaktanzo dingin kei kua ka hi hiam?” ci-in a gen hi. Amaute in hih thu a zak uh ciangin mawhsakna thu gen nawn lo uh a, “Gentail mite zong kisikin a nuntak theih nadingun Pasian in hunhoih pia hi,” ci-in Pasian a phat uh hi. Stefen a kithah huna bawlsiatna hangin thu um mite tampi kithehthang uh hi. Mi pawlkhatte Foenisia gam, Saipras gam, le Antiok khua ciang dong tung uh a, Jew mite kiang bekah Pasian’ thu a hilh uh hi. Ahi zongin Saipras gammi le Sairin khuami thu um mi pawlkhatte Antiok khua-ah pai uh a, Topa Jesuh hanga Lungdamna Thu, Gentail mite kiangah zong a gen uh hi. Topa in nakpitakin amaute huh ahih manin mi tampi in thu umin Topa lamah a kihei uh hi. Jerusalem-a om pawlpite in hih thu a zak uh ciangin Antiok khua-ah Barnabas a paisak uh hi. Barnabas a tun ciangin Pasian in amaute thupha a piakna mu-in lungdam mahmah a, amaute citakin a lungsim khempeuh uh tawh Topa tungah a thuman nadingun a hanthawn hi. Barnabas pen mihoih mahmah, upna nei-in, Kha Siangtho tawh a kidim mi khat ahi hi. Mi tampi in Pasian a um uh hi. Tua ciangin Saul a zong dingin Barnabas pai a, Tarsas khua-ah a tung hi. Saul a muh ciangin Antiok khua-ah a paipih hi. Kum khat sung tawntung tua lai-a om pawlpi mite tawh amau tegel omkhawm uh a, mi tampi tak thu a hilh uh hi. Thu um mite pen Khristian ci-in min a kiphuah masakna mun in Antiok khua ahi hi. Tua hun pawl laitakin Jerusalem khua panin Antiok khua-ah kamsang pawlkhat paisuk uh hi. Amaute sung panin Agabas a kici kamsangpa hong ding a, leitung khempeuhah kialpi hong tung ding hi, ci-in Kha Siangtho sawlna tawh a genkhol hi. (Tua kialpi pen Klaudias in Gam uk Kumpi a sep laitakin a tung hi.) Tua lai-a om thu um mite in amau hihzawh zah ciat hanciamin Judea gam a om thu um mite kiangah huhna a puak nading uh a vaihawm uh hi. Amaute in huh nading sum a kaihkhop khit uh ciangin pawlpi upate tungah a na piak dingun Barnabas le Saul a puasak uh hi. Hih hun pawl laitakin Herod Kumpipa in pawlpi mite pawlkhat bawlsiat ding kipan hi. Johan’ u James pen namsau tawh thatsak hi. Hih bangin thahna hangin Jew mite a lungdamna a theih ciangin Peter zong mansak leuleu hi. (Hih pen Silngo Sawh loh Anlum Pawi hunsung ahi hi.) Peter a kimat khit ciangin thongah kikoih a, galkap li ciat a om galkap pawl lite in a cin dingin ki-ap hi. Herod in Paisan Pawi a ven’ ciangin mipi mai-ah Peter thu sit dingin a ngaihsut ahi hi. Tua ahih manin thong sungah Peter kikhum a, ahi zongin pawlpi mite in lungsim takpi tawh ama a dingin Pasian kiangah thu a ngetsak uh hi. Herod in Peter thu sit dingin a lakkhiat ding ma a zan sungin, Peter a khut nih tuakin sikkhau kikhihin a langtuakah galkapte in lenin tua galkap nih kikalah kilumsak a, tua banah thongcingte in a kongah cing lai uh hi. Thakhatthu-in Peter gei-ah Topa’ vantungmi khat hong omin thong sung khempeuh khua a vak hi. Vantung mi in Peter’ liangko lokin phong a, “Manlangin tho in,” a ci hi. Thakhatin Peter’ khut panin a sikkhaute kitolkhia hi. Tua ciangin vantungmi in, “Na kawng hoihtakin gakin na khedap bulh in,” ci-in a gen bangin Peter zong a gamta hi. Tua ciangin vantungmi in, “Na puan silh inla hong zui in,” a cih mah bangin, thong sung panin Peter in amah zui-in a paikhia hi. Ahi zongin tua vantungmi’ gamtatna pen ahi takpi mah ahi hiam cih thei lo ahih manin maang a mu-in kingaihsun hi. Thongcingte’ vilna mun a khatna le a nihna a khenkhit uh ciangin khuapi sung lut nading sik kibawl thong kongpi a tung uh hi. Tua kongpi pen ama thu-in hong kihongtawm a, amaute a paikhia uh hi. Khuasung lampi-ah a pai laitakun thakhatin vantungmi in Peter guak a nusia hi. Tua ciangin Peter in khua phawk a, “Maang a mu ka kisak leh a takpi na hi mawk! Topa in a vantungmi kei kiangah hong sawl a, Herod in hong gimsak nading le Jew mite in gimna hong thuaksak nading panin kei hong honkhia hi,” a ci hi. Hih thu a phawk khit ciangin Johan Marka nu Mary’ inn-ah a pai hi. Tua lai-ah mi tampi kikhawmin thu a na ngen uh hi. Peter in inntual kongpi hong kiu a, a en dingin nasem numei Roda va pai hi. Peter hi, ci-in a aw-in a theih ciangin nuamlua ahih manin inntual kong nangawn hong loin inn sungah va tai a, inntual kongah Peter ding hi, ci-in a va gen hi. Amaute in, “A hai hi teh!” na cihsan lel uh hi. Ahi zongin amah in, “Peter a om taktak mah hi,” a cih teitei ciangin amaute in, “Amah a cing vantungmi hi ding hi,” ci-in a dawng uh hi. Tua sungtengin Peter in a kong mah hong kiukiu lai a, a tawpna-ah a hon uh ciangin Peter ahihlam thei uh ahih manin lamdang a sa mahmah uh hi. Amaute a pau nawn loh nadingun Peter in a khut van a, thong sung panin Topa in amah a paikhiatpihna zia teng a gen hi. Tua ciangin, “James le pawlpi midangte kiangah hih thu na gen un,” ci-in a vaikhak khit ciangin mundangah a paikhia hi. Zingsang khua a vak ciangin Peter bangci ahi hiam, ci-in thongcingte lakah buaina lianpi hong om hi. Peter a zon nadingun Herod in thu pia a, ahi zongin mu zo lo uh hi. Tua ahih manin thongcingte thu kisit a, thah dingin thu a khen nadingun thu a pia hi. Tua ciangin Judea gam panin Sisaria khua-ah Herod paisuk a, tua lai-ah tawlkhat sung a om hi. Taia khuamite le Sidon khuamite tungah Herod heh mahmah ahih manin Herod tawh a kimu dingin hih khua nih mite hong paikhawm uh hi. A masa-in kumpi innsunga ulian nasem ahi Blastus a pawlmat phot uh hi. Hih khua nihte’ annek tuidawn pen hih kumpipa’ gam panin a ngah uh ahih manin Blastus makai sakin Herod kiangah va pai-in kilem nading thu a va gen uh hi. Kumpipa in a thugen hun ding a ciamkholh ni a tun ciangin a kumpi puan silhin a kumpi tokhom tungah tu a, mite tungah thu a gen hi. Mite in a thugen a zak uh ciangin, “Hih thugen pen mihing hi loin pasian ahi hi,” ci-in a awng uh hi. Herod in mite, Pasian phatsak loin amah phatsak ahih manin thakhatin Topa’ vantungmi in Herod cinasak a, a hut in amah netumin a si hi. Ahi zongin Pasian’ thu kizelin a khang semsem hi. Barnabas le Saul in a nasep a man khit uh ciangin Jerusalem khua panin ciahkik uh a, Johan Marka zong a ciahpih uh hi. Antiok khua pawlpi sungah kamsang pawlkhat le sia pawlkhat om uh hi. Tuate pen Barnabas, Mi Vom pa zong a kici Simon, Sairin khuami Lusias, gam ukpipa khutnuai-ah gam a uksawn Herod tawh a khangkhawm Manaen, le Saul ahi uh hi. Amaute in an tangin Pasian bia-in a om laitakun Kha Siangtho in amaute kiangah, “Keima na a sem dingin ka sapsa ahih manin kei a dingin Barnabas le Saul hong piakhia un,” a ci hi. Amaute in zong an tangin, a lu tung uhah a khut uh nga-in thu a ngetsak khit uh ciangin a kuankhia sak uh hi. Kha Siangtho’ sawlna mah bangin Seleusia khua-ah paisuk uh a, tua khua panin teembaw tuangin Saipras tuikulh-ah a pai uh hi. Saipras tuikulh-a om Salamis khua a tun uh ciangin Jew mite’ kikhopna innte-ah Pasian thu a hilh uh hi. Tua a nasepna uhah a huh dingin Johan Marka zong amaute tawh a omkhawm hi. Tua tuikulh tung khempeuhah zin kawikawi-in Pafos khua a tun uh ciangin mitphial a bawl, kamsang a kineih, Barjesuh min nei Jew mi khat a tuak uh hi. Tua mipa pen tua tuikulh a uksawn, a pil mahmah Sergius Paulus tawh a kithei mahmah mi khat ahi hi. Tua gam ukpa in Pasian’ thu zanuam ahih manin Barnabas le Saul a sam hi. Ahi zongin tua mitphial siampa Elymas (a Grik min) in Barnabas le Saul na nial a, gam ukpa in Pasian’ thu a up theih loh nadingin a na hanciam hi. Tua ciangin Saul (Paul zong a kici pa) Kha Siangtho tawh kidimin tua mipa limtakin en a, “Dawimangpa tawh a kibang mipa aw, thuhoih khempeuh nialin, gitlohna ngian tuamtuam na nei a, Topa’ thuman pen zuau suahsak ding na hanciam tawntung hi. Tu-in Topa in nang hong su ding a, na mit taw-in tawlkhat sung khua na mu kei ding hi,” a cih khit phetin, meii vom in Elymas’ mit tuamcip a, a khut lenin amah a paipih ding mi a zawt kawikawi hi. Gam ukpa in hih thupiang a muh ciang le Topa thu a kigente a zak ciangin lamdangsa mahmahin Pasian a um hi. Tua ciangin Pafos khua panin Paul le a lawmte teembaw tuangin Pamfilia gam Perga khua a tung uh hi. Tua khua panin Johan Marka in amaute nusia-in Jerusalem khua-ah a ciahkik hi. Ahi zongin Perga khua panin amaute paisuak uh a, Pisidia gam Antiok khua a tung uh hi. Sabbath ni-in kikhopna inn-ah pai-in a tu uh hi. Kikhopna inn ukte in Moses Thukham Laibu sung le kamsangte’ laibute a sim khit uh ciangin amaute kiangah, “Sanggamte aw, mihonte tungah hanthotna kam na gennop uhleh thu nong gen ding uh ka deih uh hi,” a cisak uh hi. Tua ahih manin Paul hong ding a, a khut vanin thugen ding hong kipan a, “Israel mipihte le hih lai-ah Pasian a bia Gentail mite aw, ka thugen na ngai un. Hih Israel mite’ biak Pasian in ko Israel mite’ pu le pate na na teel a, Egypt gamah peemta-in a om sungun minam lian khatin a na bawl hi. Pasian in ama vangliatna tawh Egypt gam panin amaute na paikhiatpih a, kum sawmli sung gam sungah amaute na ompih kenkon hi. Pasian in Kanaan gam sungah mi nam sagih a suksiat khit ciangin kum zali le kum sawmnga sung bang ama mite a luahsak hi. “Tua khit ciangin kamsang Samuel hun ciang dong amaute’ vai a hawm dingin ukpite a pia hi. Amaute in kumpi ding a nget uh ciangin Pasian in Benjamin minam sung pan Kish’ tapa Saul, kum sawmli sung amaute’ kumpi dingin a pia hi. Pasian in kumpi dingin Saul a zat nawn loh ciangin amaute’ kumpi dingin David a semsak hi. Pasian in David’ thu genin, ‘Ka sawl khempeuh a sem ding, ka deih bang mi khat, Jessi’ tapa David ka mukhin hi,’ a cihsa thu ahi hi. Pasian in ama ciamsa bangin Israel mite a honkhia dingin hih David’ suan sung pan Jesuh a bawl hi. Jesuh in nasep a kipat ma-in, a mawhna panun kisikin tui a kiphum nadingun Johan in Israel mi khempeuh tungah thu a hilh hi. Johan in ama nasep a zawh kuan ciangin mite kiangah, ‘Kei kua hi hong ci na hi uh hiam? Kei pen note’ ngak pa ka hi kei hi. En un, kei nungah na ngak pa uh hong pai a, ama khedap khau a sutsak ding nangawnin ka kilawmzo nai kei hi,’ ci hi. “Abraham’ suan ka behte le Pasian a bia Gentail mi khempeuh aw, hih hotkhiatna thu pen eite a dingin Pasian in a hong puak ahi hi. Jerusalem khua-a a teng mite le a makaite un Jesuh pen Honpa ahih lamtak na thei lo uh a, Sabbath nisimin a kisim niloh kamsangte’ thu zong na tel lo uh hi. Amaute in Jesuh na mawhsak uh ahih manin kamsangte’ thugente a manin hong tung hi. Amaute in Jesuh in sihna a thuak nadingin thukhenna a ngah nading thu mu zo lo napi uh, Pilat in thah nading thu a piak nadingin na ngen teitei uh hi. Lai Siangtho in Jesuh’ thu a gen bang teekteekin a bawlkhit uh ciangin singlamteh tung panin lakhia sukin han sungah a koih uh hi. Ahi zongin Pasian in sihna panin amah hingkiksak a, Galilee gam le Jerusalem khua kikalah amah tawh khual a zinzin khawm ngei mite tungah tam veipi a mun tuamtuamah na kilang hi. Muatna a thuakkik ngei nawn lo dingin sihna panin amah a hinkiksakna tawh kisai-in Pasian in a thugenna-ah, ‘David tungah ka ciamsa mah bangin note tungah thupha siangtho kong pia takpi ding hi,’ ci hi. Tua mah bangin Late a gelh pa in zong, ‘Nang tungah a hong thuman na nasempa muatna na thuaksak kei ding hi,’ a ci hi. David in ama hun lai-in Pasian’ deihna bangin na sem a, a sih ciangin a pu a pate gei mahah kisialin muatna a thuak hi. Ahi zongin Pasian in sihna panin a hinkiksak Jesuh in muatna thuak lo hi. Tua ahih ciangin sanggamte aw, hih Jesuh hangin mawhmaisakna thu note tungah hong kihilh ahihna teltakin na theih ding uh ahi hi. Tua tham loin Jesuh a um mite khempeuh pen Moses Thukham in a suahtaksak zawh loh mawhna khempeuh panin a suakta ahihna thu na theih ding uh ahi hi. Kikhopna inn panin Paul le Barnabas a ciah ding uh ciangin, Sabbath ni kik ciangin hih thute mah hong gen lai un, ci-in mite in a vaikhak uh hi. Kikhopna inn panin a ciahkhiat uh ciangin Jew mi tampite le Jew biakna a zui Gentail mi tampite in Paul le Barnabas zui uh a, amau tegel in zong tua mite hanthawnin, Pasian’ hehpihna suangin kiptakin a om nadingun a gen uh hi. A Sabbath ni kik ciangin Pasian’ thu a ngai dingin a khuazang phialun hong kikhawm uh hi. Jew mite in mi tampi tak a hong kikhawm a muh uh ciangin Paul le Barnabas haza uh ahih manin Paul’ thugente a man lopi hi, ci-in Paul a gensia uh hi. Tua ciangin Paul le Barnabas in hangtakin thu gen uh a, “No Jew mite tungah Pasian’ thu kong gen masak ding mah uh ahi hi. Ahi zongin note in Pasian’ thu nialin, nuntak tawntungna a ngah dingin kilawmzo kisa lo na hih manun, note kiang panin paikhia-in Gentail mite kiangah ka pai ding uh hi. Bang hang hiam cih leh Topa in kote kiangah thu hong pia khinzo a, ‘Leitung mi khempeuh in hotkhiatna a ngahtheih nadingin Gentail mite’ khuavak ahi dingin ka hong koih hi,’ hong ci hi,” a ci uh hi. Gentail mite in hih thu a zak uh ciangin lungdam mahmah uh a, Pasian’ thu hoih mahmah hi, ci-in a phat uh hi. Nuntak tawntungna a ngah dingin Pasian in a teelsa mite in Pasian’ thu hong um uh hi. Tua gam kiim khempeuhah Topa’ thu kizel hi. Ahi zongin Jew mite in tua khuasung uliante le Gentail mi numei citheite holhthawh uh a, Paul le Barnabas bawlsiat ding kipanin, tua gam panin a taikhia sak uh hi. Sawltakte in zong a khe uha leivui bangte sinkhiat sanin Ikonium khua-ah a pai uh hi. Antiok khua-a om thu um mite ahihleh Kha Siangtho tawh kidimin lungdam mahmahin a om uh hi. Ikonium khua a tun uh ciangin Paul le Barnabas zong Jew mite kikhopna inn-ah pai uh a, amaute’ thuhilhna hangin Jew mi le Gentail mi tampi tak in Pasian thu um uh hi. Ahi zongin thu um lo Jew mite in Gentail mite holhthawh uh a, thu um mite a mudahsak uh hi. Tua lai-ah sawltakte sauveipi tam uh a, Topa Jesuh thu hangtakin a hilh uh hi. Ama dikna thu a hilhnate uh man hi, ci-in a lah nadingin Topa in amaute tungah lim le nalamdang bawltheih nading vangliatna a pia hi. Tua khuasunga om mite pawl nih pha uh a, pawlkhat in Jew mite panpihin, pawlkhat in sawltakte a panpih uh hi. Gentail mi le Jew mite in a uliante uh tawh kopin sawltakte bawlsia-in suang tawh den ding a vaihawm uh hi. Sawltakte in tua thu a theih uh ciangin Likaonia gam sunga om Lystra khua, Derbe khua, le tua gam kiima om khuate-ah tai uh a, tua a taina uh khuate-ah Lungdamna Thu a hilh uh hi. A suahtung a kipanin lam a pai thei lo khezaw mi khat Lystra khua-ah a om hi. Amah in Paul’ thuhilhte limtakin a ngai hi. Tua mipa in damna a ngahzawh nading zahin upna nei hi, ci-in Paul in a muh ciangin limtakin amah en a, “Na khe-in dingto in!” nakpitakin a ci hi. Tua mipa zong dingin lam pai kawikawi dingin a kipan hi. Mihonte in Paul’ nasepna a muh uh ciangin amau’ Likaonia pau tawh, “Mihing mel pua-in pasian-te i kiangah hong pai hi,” ci-in a kiko uh hi. Barnabas pen Zeus ci-in min phuah uh a, Paul pen a thugenpi pen ahih manin Hermes ci-in min a phuah uh hi. Zeus pasian biakna inn tua Lystra khua nawl ah a om hi. Tua Zeus pasian’ na a sem siampipa in khuapi nawla a biakinn kongah bawngtalte le pakkualte hong paipih hi. Amah le mihonte in sawltakte a biak nadingun tua bawngte go-in pakkualte a pianuam uh hi. Ahi zongin Barnabas le Paul in hih thu a zak uh ciangin mihonte’ vaihawmna a nialna limun a puan uh balkekin mihon lakah tai-in kiko uh a, “Lawmte aw, bang hangin hih bangin gamta na hi uh hiam? Kote pen note mah bangin mihing ka hi lel uh hi. Bangmahin a kimang lo hih milimte na biakna uh panin kihei-in, vantung, leitung, tuipi le tuate tung le a sunga om khempeuh a bawl a nungta Pasian na biak nadingun Lungdamna Thu note kiangah a gen dingin hih lai-ah a hong om ka hi uh hi. A beisa hun sungah Pasian in mi khempeuh amau utbang ciatin hong gamtasak hi. Ahi zongin amah in a bangci Pasian hiam cih hong lahna-in mite a dingin na hoihnono a hong pia hi. Amah in van panin guah hong zusakin, a hun hunin anlak hun ding hong tungsak hi. Amah in note’ nek ding an hong pia a, lungdamin a hong omsak hi,” a ci uh hi. Hih bangin thu a genna uh tawh mihonte in amaute a biak loh nadingun a khozo liailiai uh ahi hi. Ahi zongin Pisidia gam a om Antiok khua le Ikonium khua panin Jew mite hong pai uh a, mihonte hong holhthawh gawpin suang tawh Paul denggawp uh a, si khin hi, ci-in ngaihsun uh ahih manin khuanawlah a kaikhia uh hi. Ahi zongin thu um mite in amah umcihin a om laitakun amah hong tho-in khua sungah a lutkik hi. A zing ciangin Barnabas tawh Derbe khua-ah a pai uh hi. Paul le Barnabas in Derbe khua-ah Lungdamna Thu hilh uh a, mi tampi in Pasian a um uh hi. Tua lai panin kileh kikin Lystra khua, Ikonium khua, le Pisidia gam a om Antiok khua-ah a pai uh hi. Thu um mite a upna uhah citakin a om nadingun hanthawnin tha pia uh a, “Pasian’ Ukna sungah i omtheih nadingin haksatna tampi thuak ding hi hang,” ci-in a hilh uh hi. Khua pawlpi simah pawlpi upa ding sehsak uh a, an tangin thungetna tawh amaute’ muan ahi Topa’ khut sungah tua mite a ap uh hi. Pisidia gam a khenkhit uh ciangin Pamfilia gam a tung uh hi. Tua gam sunga om Perga khua-ah thu hilh uh a, tua khua panin Attalia khua-ah a paisuk uh hi. Attalia khua panin teembaw tuang uh a, tu-a a zawh uh nasep a kipat nadingun Pasian’ khut sungah amaute a ki-apna Antiok khua a zuankik uh hi. Antiok khua a tun uh ciangin amaute in pawlpi mite khawm uh a, a khualzinna uhah Pasian in na a seppihna khempeuh le Gentail mite in zong thu a uptheih nadingun Pasian in lam a honsaknate khempeuh a gen uh hi. Tua khua-ah thu um mite tawh sauveipi sung a omkhawm uh hi. Judea gam panin Antiok khua-ah mi pawlkhat hong pai uh a, innkuan khat bangin a om thu um mite kiangah, “Moses Thukham sungah a kigen bangin na vun uh na at kei uhleh hotkhiatna na ngah kei ding uh hi,” ci-in thu hilh ding hong kipan uh hi. Hih thu huhau-in Paul le Barnabas, le hih mite kikalah nakpitakin thu kinialna omin thu kisel uh ahih manin, Paul le Barnabas le Antiok khua-a a om mi pawlkhatte Jerusalem khua-ah va pai-in, hih thu tawh kisai-in tua lai-a om sawltakte le upate tawh a kimuh nadingun a vaihawm uh hi. Amaute a pai uh ciangin pawlpi mite in khuanawl ciang va kha uh a, Gentail mite zong Pasian lamah a kiheina thu, a nawkna uh Foenisia gamah gen kawikawi uh ahih manin thu um mite khempeuh a nuam mahmah uh hi. Jerusalem khua a tun uh ciangin sawltakte, upate, le pawlpite in limtakin zin na do uh a, Pasian in na a seppihna thu, amaute kiangah a gen uh hi. Ahi zongin Farisi mite sung panin thu um mi pawlkhat in, “Amaute in Moses Thukham zui-in, a vun uh a ki-at nading uh gen ding kisam hi,” a ci uh hi. Tua ahih manin hih thu a kikum dingin sawltakte le upate a kikhawm uh hi. Sauveipi a kisel khit uh ciangin Peter hong ding a, “Lawmte aw, Gentail mite in Pasian’ thu za-in a uptheih nadingun amaute tungah Lungdamna Thu a hilh dingin sawtpi lai pekin note lak panin Pasian in kei hong teelkhiatna thu na thei uh hi. Mihingte’ lungsim sungthu a thei Pasian in Gentail mite in zong thu a uptheih ding mah hi, cih a lahna-in eite tungah a hong piak mah bangin amaute tungah zong Kha Siangtho a pia hi. Pasian in eite le Gentail mite deidanna hong nei lo a, amaute in zong a up manun mi siangtho-in a bawl hi. Tua ahih ciangin i pute i pate a kipan ei mahmah in i puak zawh loh vangik pen Pasian’ heh theihtheih nadingin bang hangin thu um mite tungah suan ding ihi hiam? Tua bangin i gamta het kei ding hi. Amaute mah bangin eite in zong i up manin Topa Jesuh hehpihna tawh hotkhiatna i ngah hi,” ci-in thu a gen hi. Tua ciangin Barnabas le Paul in Gentail mite lakah amau tungtawnin Pasian in lim le nalamdang a bawlnate khempeuh a gen laitakun mi khempeuh pau loin a om uh hi. A thugen uh a man khit ciangin James in thu hong gen a, “Lawmte aw, ka thugen hong ngai dih un. Pasian in Gentail mite lak panin ama mi dingin mi pawlkhat a lakna tawh Gentail mite a kin ahih lamtak a hong lahna thu, Simon’ genna i za zo hi. Kamsangte’ thugente zong tu-a tawh kituak mahmah hi. Lai Siangtho sungah, Tua ahih ciangin keima ngaihsutna-ah, Pasian’ lamah a kihei hih Gentail mite nawngkaisak lo zaw-in, milim biakna-a kizang an khempeuh a siang lo suak ahih manin a nek loh nading uh, numei tawh khialhnate panin a kikep nading uh, a si luangkhiasak loin a kigawlmek sate, le sasi khat peuhpeuh a nekloh nadingun lai i gelhzawk ding hoih ka sa hi. Bang hang hiam cih leh Sabbath nisimin kikhopna innte-ah Moses Thukhamte kisim ngitnget a, khua khempeuhah Moses thugente mah hilh belin kinei hi,” a ci hi. Tua ciangin sawltakte, upate, le pawlpi buppi in amau sung panin mi pawlkhat teelin Paul le Barnabas tawh Antiok khua-ah a paikhawmsak ding uh a vaihawm uh hi. Amaute tawh a paikhawm dingin thu um mite in a zahtakbawl mahmah mi nih, Barsabbas Judas le Silas teelkhia uh a, a nuai-a kigelh bangin lai a puasak uh hi. Tua a lai puaksak uh sungah, “Sawltakte le upate ahi ko na sanggamte un, Antiok khua, Syria gam, le Silisia gam a om thu upna sungah sanggam ahi Gentail mite tungah hopihna kam kong khak uh hi. Kote’ hong sawl lohpi-in ko kiang panin mi pawlkhat hong pai-in a thugenna uh tawh note hong buaisakin hong lung-amsak hi, ci-in ka za uh hi. Tua ahih manin ka teel uh Judas le Silas kong paisak uh a, hih lai sunga ka gelh uh thute mah amau kam mahmah tawh hong gen ding uh hi. A kisam mahmah hih a nuai-a thute simloh, note tungah vangik dang suat ding pen Kha Siangtho le kote ka thukim kei uh hi. Tua a kisam thute in: Milim biakna-in a kipiasa an khat peuhpeuh na nek loh nading uh, sasi na nek loh nading uh, a si luangkhiasak loin a kigawlmek sa khat peuhpeuh na nek loh nading uh, le numei tawh khialhna panin na kikep nading uh ahi hi. Hih thute hoihtakin zui le-uhcin note a dingin hoih ding hi. Na cidam ta un,” ci-in kigelh hi. Tua bangin amaute paisak uh a, Antiok khua a tun uh ciangin thu um mi khempeuh khawmin amaute tungah a lai puak uh a pia uh hi. Mite in tua laikhak a sim uh ciangin a thu kigelhte hangin amaute thanuamin lungdam mahmah uh hi. Judas le Silas zong kamsangte mah hi uh a, thu um mite tawh sauveipi thu kikum uh a, amaute’ lungsim thanuam sakin a thahatsak uh hi. Tua lai-ah tawlkhat a taam khit uh ciangin thu uppih lawmte in lungdam takin Judas le Silas, amau a sawlte kiangah a ciahkik sak uh hi. Tawlkhat khit ciangin Paul in Barnabas kiangah, “Topa’ thu i hilhnasa khua tuamtuama i sanggamte kiangah va hawhkikin bang a cici uh hiam cih va en ni,” a ci hi. Tua bangin a pai ding uh ciangin Barnabas in Johan Marka tonpih nuam a, ahi zongin Johan Marka in a khualzin masakun a tawp dongin zui loin Pamfilia gam panin ciahsan ahih manin Paul in hoihsa lo hi. Hih thu hangin amau tegel nakpitakin kinial uh ahih manin kikhenlawh uh a, Barnabas in Johan Marka zawnin Saipras tuikulh gam a zuan dingin teembaw tawh a pai hi. Paul in zong Silas teel a, thu um mite in Topa’ khut sungah a ap khit uh ciangin, Syria gam le Silisia gam nawkin pai-in pawlpite hanthawnin a thahatsak hi. Paul paisuak lai-in Derbe khua tung a, tua panin Lystra khua a tung hi. Tua Lystra khua-ah Timoti a kici thu um mi khat om a, a nu zong thu um Jew mi hi a, a pa pen Grik mi ahi hi. Lystra khua le Ikonium khua-a om thu um mite in Timoti pen a zahtak mahmah uh mi khat ahi hi. Paul in Timoti tonpih nuam ahih manin a vun a atsak hi. Tua gam a om Jew mi khempeuh in Timoti’ pa pen Grik mi ahih lamtak theikim uh ahih manin tua bangin a atsak ahi hi. Thuhilhin a paina uh khua khempeuha thu um mite kiangah Jerusalem khua-a om sawltakte le upate in zuih dingin a khensat uh ngeinate gen kawikawi uh a, tua ngeinate a zuih nadingun a hanthawn uh hi. Tua ahih manin pawlpi mite a upna uhah kip semsemin, a nini-in mi a kibehlaplap hi. Asia gam sungah thu a hilh ding uh Kha Siangtho in phal lo ahih manin Frigia le Galatia gam sungtengah a zin uh hi. Mysia gamgi a tun uh ciangin Bithynia gam sungah lut dingin kithawi uh a, ahi zongin tua gamah a pai ding uh Jesuh’ Kha Siangtho in phal lo hi. Tua ahih manin Mysia gam nawkin pai uh a, Troas khua-ah a tung uh hi. Troas khua-ah a tunni zanin Paul in maang mu a, Masedonia gammi khat in ama kiangah, “Masedonia gamah hong pai inla, kote hong huh in,” ci-in a thum hi. Paul in maang a muhkhit phetin, tua lai-a om mite kiangah Lungdamna Thu a hilh dingin Pasian in eite hong sam hi, ci-in ngaihsun ka hih manun Masedonia gamah a pai dingin ka kithawi pah uh hi. Tua ahih manin Troas khua panin teembaw tuangin Samothrasia tuikulh ka tung uh a, a zing ciangin Neapolis khua ka tung uh hi. Tua khua panin khe tawh pai-in Masedonia gam sunga om Rom mite a tenna Filippi khua ka tung uh a, tua khua-ah ni tampi sung ka taam uh hi. A Sabbath ni ciangin Jew mite’ thungetna mun om ding hi, ci-in ka upna uh khua pualama gun gei-ah ka pai uh a, tua lai-ah tu-in a kikhawm numeite tungah thu ka hilh uh hi. Tua ka thuhilhna uh a za mite lakah Thiatira khuami, a manpha mahmah puansan a zuak, Lydia kici numei khat a om hi. Tua nu pen Pasian a bia numei khat hi a, Paul’ thugente a sangthei dingin Pasian in a lungsim a honsak hi. Amah le a innsunga om mi khempeuh tui kiphum uh a, “Topa thu a um mi taktak hi, ci-in na hong ngaihsut nak-uhleh hong pai unla, ka inn-ah hong tung un,” ci-in hong samin a hong zol hi. Nikhat, thungetna mun a zuan dingin ka pai laitakun mailam thu a genthei dawivei nasem numei khat in kote hong dawntuah hi. Tua numei in mailam thu a genna tawh a tote a dingin sum tampi a ngahsak hi. Tua numei in Paul le kote hong zui-in, “Hih mite, A Lianpen Pasian’ nasemte ahi uh hi. Note a hong kihotkhiat theih nading thu a hong gen uh ahi hi,” ci-in a kiko hi. Tua bangin ni tampi sung awng ngitnget ahih manin a sawtna ciangin Paul in nawngkaisa ahih manin kihei-in a dawi kiangah, “Hih numei sung panin na paikhiat nadingin Jesuh Khrih min tawh thu kong pia hi,” a cihkhit phetin, tua numei sung panin dawi a paikhia pah hi. Tua numei’ tote in a sumngah nading uh beita hi, ci-in a phawk uh ciangin Paul le Silas man uh a, thukhente omna sumbuk tualah a kai uh hi. Rom ulian thukhente kiangah paipih uh a, “Hih mite, Jew mi hi a, i khua sungah nawngkaina hong piangsak hi. Amaute in kote’ ngeina tawh kituak lo thute hong hilh uh a, kote Rom mi ka hih manun amau thugente ka sang thei kei uh a, ka zui thei kei uh hi,” a ci uh hi. Mihonte in zong amau tegel vuakpih ngeingai uh a, uliante in Paul le Silas’ puan balkeksak uh a, tua mi tegel a sat nading uh thu a pia uh hi. Nakpi takin a kisat khit ciangin thong sungah koihsak uh a, limtakin tawh a kalh nadingin thongcing pa kiangah thu a pia uh hi. Tua bangin thu a ngah ciangin thongcing pa in thong sung tawngnungah amaute koihin, singkol lianpi sungah a khe uh a gakcipsak hi. Zankim laitakin Paul le Silas in Pasian kiangah thu ngenin la sa uh a, thongkia dangte in amau’ thungetna le lasaknate a ngai uh hi. Thakhatin nakpitakin zin hong ling a, thonginn a bulpi dongin a lokgawp hi. Thakhatthu-in thong kongkhak khempeuh kihong a, thongkiate a kikhihna sikkhau khempeuh a kiphelkhia hi. Thongcing pa zong khanglo a, thong kongkhakte a kihong a muh ciangin thongkia mi khempeuh taikhia mangkhin hi, ci-in ngaihsun ahih manin a namsau dokin amahmah a kithat dingin a kithawi hi. Ahi zongin a aw neihzah tawh Paul kiko a, “Bangmah kicih kei in! Ka vekpi-un kim ung!” a ci hi. Thongcing pa in zong meivak a la dingin mi khat sawl a, thong sungah tai-in laukawm lingkawmin Paul le Silas khe kiang va kidenna-in a va boksuk hi. Tua ciangin amaute pusuahpih a, “Tote aw, hotkhiatna ka ngah nadingin bangci gamtat ding ka hi hiam?” ci-in a dong hi. Amaute in, “Topa Jesuh um in. Tua hileh nang le na innkuanpihte in hotkhiatna na ngah ding uh hi,” ci-in a dawng uh hi. Tua ciangin amaute in amah le a innsunga om mi khempeuh tungah Topa’ thu a hilh uh hi. Tua zankim laitakpi mahin thongcing pa in amaute’ liammate sawpsiangsak a, amah le a innkuanpih mi khempeuh a kituiphum pah uh hi. Tua ciangin a inn-ah amaute ciahpihin an a pia hi. Tu-in Pasian thu um uh ahih manin amah a kipan a innkuanpih khempeuh a lungdam mahmah uh hi. A zingsang ciangin Rom thukhen uliante in palikbute samin, “Tua mite va khah un,” a ci uh hi. Tua ahih manin thongcing pa in zong Paul kiangah, “Thukhen uliante in nang le Silas kong khah nading uh thu hong piakhin ahih manin lungnuam takin na ciahkhia theita ding uh hi,” a ci hi. Ahi zongin Paul in palikbute kiangah, “Kote in khialhna bangmah gamta lo napi-in mihon mai-ah hong kisatgawp hi. Kote pen Rom gammi hi ung! Hong kisat khit ciangin thong sungah hong kikoih lai hi. Tu-in kuama theih lohin kote hong khahsim nuam ahi uh hiam? Tua bang mawk hithei peuhmah lo ding hi. Rom thukhen uliante mahmah hih lai-ah hong pai uh hen la, kote hong khahkhia ta hen,” a ci hi. Palikbute in zong Rom thukhen uliante kiangah hih thu va ko uh hi. Paul le Silas pen Rom gammi ahih lamtak a phawk uh ciangin lunghimawh uh a, amau mahmah va pai-in a va thum khit uh ciangin thong sung panin khahkhia uh a, tua khua panin a paikhiat nadingun a thum uh hi. Paul le Silas zong thong panin paikhia-in Lydia’ inn a zuan uh hi. Tua lai-ah thu um mite tawh kikhawm uh a, hanthotna kam a genkhit uh ciangin tua khua panin a ding khia uh hi. Amfipolis khua le Apollonia khua nawkin amaute zin uh a, Jew mite kikhopna inn a omna Thesalonika khua a tung uh hi. A pai ngei zel mah bangin Paul zong kikhopna inn-ah pai a, Sabbath ni thum sung Lai Siangtho siksanin mite tawh thu kikum a, Khrih in sihna thuakin, sihna panin a thawhkik ding a kisam ahi hi, ci-in a laktel hi. Tu-a note kiangah kong pulak Khrih pen Lai Siangtho sunga kigen Khrih ahi hi, ci-in Paul in a gen hi. Mi pawlkhat in a thugen uh man sa uh ahih manin Paul le Silas pawlpih uh a, tua mah bangin Pasian a bia mi tampi tak le uliante’ zi tampi mah in zong a pawlpih uh hi. Tua bangin mi tampi in Paul’ thugen a up uh ciangin Jew mite thangpai uh a, kongzing lakah a vakvai migilo honkhat kaikhawmin a pawlmat uh hi. Khuasung khempeuh buaisak henhanin, mihonte lakah Paul le Silas a kaihkhiat theih nadingun Jason’ inn a va simgawp uh hi. Tua inn-ah Paul le Silas a muh loh uh ciangin a innteek pa Jason le midang pawlkhat kaikhia-in uliante kiangah paipih uh a, “Hih mite in mun khempeuhah buaina piangsak uh hi. Tu-in i khuasung hong tung uh a, Jason in a inn-ah amaute tungsak hi. Amaute in gam khempeuh a uk Kumpipa’ thu palsat uh a, Jesuh kici kumpi dang khat om hi, ci-in gen uh hi,” ci-in a awnggawp uh hi. Hih thu a zak uh ciangin mihonte le khuasung uliante heh mahmah uh a, Jason le a lawmte a kitat nading uh sum a piaksak khit uh ciangin tua khuasung uliante in amaute a khah pan uh hi. Tua zan ciangin thu um mite in Berea khua-ah Paul le Silas a paisak uh hi. Tua khua a tun uh ciangin Jew mite kikhopna inn-ah a pai uh hi. Thesalonika khuamite sangin Berea khuamite in mipi lungsim neizaw uh hi. Amaute in lawp mahmahna tawh Paul’ thugente ngai uh a, Paul’ thugente man taktak hiam ci-in a theih nadingun nisimin Lai Siangtho a sim uh hi. Mi tampi in Pasian’ thu um a, tuate sungah a cithei Grik numei tampi le Grik mi pasal tampi a kihel uh hi. Berea khua-ah zong Paul in Pasian thu a hilhna a zak uh ciangin Thesalonika khua panin Jew mite hong pai-in Berea khua-ah zong mite hong holhthawh gawp uh hi. Tua ciangin thu um mite in tuipi gei-ah Paul paikhiatpih uh a, ahi zongin Silas le Timoti pen Berea khua-ah a taam lai uh hi. Tuipi gei-ah Paul a paipih thu um mite in Athen khua ciang dong a va zui uh hi. Athen khua panin Berea khua-ah hong ciahkik uh ciangin, Silas le Timoti in a manlang theithei-in hong delh uh hen, ci-in Paul’ kam vaikhak thu a hong pua uh hi. Paul in Athen khua-ah Silas le Timoti ngakin a om laitakin tua khua sungah milim a dimin a om lamtak mu ahih manin a lungsim ommawk thei lo hi. Tua ahih manin Pasian a bia Jew mite le Gentail mite tawh kikhopna inn sungah thu kikupna nei uh a, mihon kikhopna munah hong pai mi khempeuh tawh zong nisimin a kikum uh hi. Epikuras thu ngaihsutzia le Stoik thu ngaihsutzia a um mite pawlkhat, Paul tawh thu kinial uh a, “Hih mi kipilsak thu mawk gengen pa in bang gennuam ahi hiam?” cihsan uh a, pawlkhat in, “Minam dangte’ pasian thu a gen tawh kibang hi,” a ci uh hi. Paul in Jesuh thu le a thawhkikna thu hilh ahih manin hih bangin a gen uh ahi hi. Tua ahih manin amaute in Paul samin, Areopagas mualbo-ah paipih uh a, “Tu-a na gengen thuthakte ka theinuam uh hi. Tu-a na gengen ka zak uh thu pawlkhatte, ko a dingin a lamdangpi khat hi a, a thu a cingin ka theinuam uh hi,” a ci uh hi. (Athen khuamite le tua khua-a om gamdang mite in thu thak la thak ngaihsunin kikup ding simloh thudang ngaihsutin nei lo uh hi.) Tua ahih manin Paul zong kikhopna mun Areopagas a kici mualbo tungah dingin, “Athen khua mite aw, biakna a hahkat mahmah mite na hihna uh ka thei hi. Na khuasung uhah ka pai kawmin na biakna munte uh ka et ciangin, ‘A Kithei lo Pasian a’ ding,’ ci-in biakna tau tungah lai a kigelh nangawn ka mu hi. Tu laitakin kei’ hong pulak Pasian pen, thei lo napi-in na biakbiak uh Pasian ahi hi. Tua Pasian pen leitung buppi le a tunga om khempeuh a piangsak Pasian hi a, van le lei a uk Topa ahih manin mihingte’ lamsa biakinn sungah teng lo hi. Amah pen mi khempeuh tungah nuntakna le na khempeuh a piapa ahih manin mihingte in ama a dingin na khat peuhpeuh a sepsak ding a kisam ahi kei hi. Mihing khat tung panin leitung minam khempeuh hong piangsakin, leitung khempeuhah a omsak hi. Amah in mihingte a piansakma pekin, mihingte’ nuntak tanvei ding le a ten nading uh mun a sehsa ahi hi. Hih bangin a hihna pen mite in amah zongin a muhtheih nading uh a deihna ahi hi. Ahi zongin eite kiang panin Pasian gamla om het lo hi. Mi khat in, ‘Pasian hangin eite piangin, hingin i gamtang hi,’ ci-in gen a, note sung panin laphuah siampa khat in zong, ‘Eite zong ama tate ihi hi,’ na na ci hi. Eite pen Pasian’ tate ihih manin, mihing khutsiamte in bawlin a zep ngunte, khamte, suang milimte tawh a kibang dingin Pasian i ngaihsun kei ding hi. Pasian in mihingte’ theih loh hun lai-a a gamtatnate uh phamawh a sak loh hangin, tu-in mun khempeuha om mi khempeuhte a gamtat siatna panun a kihei nadingun thu a hong pia khinzo hi. Amah in leitung mi khempeuh thu a mantakin ama teel mipa a hong khensak nading ni a sehkhol khinzo hi. Tua a ngaihsutna a man taktak hi, ci-in mi khempeuh tungah a hong lah nadingin a teel mipa, sihna panin a hingkiksak zo hi,” ci-in thu a hilh hi. Sihna panin thawhkikna thu Paul in a gen a zak uh ciangin mi pawlkhat in zahpihbawl uh a, ahi zongin mi pawlkhat in, “Hih thu khatvei zakik nuam lai ung,” a ci uh hi. Tua ciangin tua kikhopna panin Paul a paikhia hi. Mi pawlkhat in thu umin Paul pawlpih uh a, tuate lakah Areopagas mualbo a thu vaihawm pawl sungah a kihel Dionisias, le Damaris a kici numei khat, le mi pawlkhat ahi uh hi. Tua khit ciangin Athen khua panin Paul paikhia-in Korin khua-ah a tung hi. Tua lai-ah Pontas gam a suak, Jew mi Aquila a kici mi khat tawh a kimu hi. Gam uk Kumpipa in Jew mi khempeuh Rom khua panin a taikhiat nadingun thu pia ahih manin Aquila le a zi Prisilla pen Italy gam panin Korin khua a hong tun uh a sawt nai lo ahi hi. Tua nupate tawh a kimu dingin Paul zong a inn uhah va hawh a, tua nupate mah bangin Paul zong puanbuk bawl nasep tawh a nungta ahih manin amaute tawh omkhawmin na a semkhawm uh hi. Sabbath ni simin kikhopna inn-ah limtakin thu gen a, Jew mi le Grik mite in thu a up nadingun a hanciam hi. Masedonia gam panin Silas le Timoti hong tun ciangin Paul in a hun neih khempeuh thuhilhna-in zang a, Jesuh pen Khrih ahi hi, ci-in Jew mite kiangah teltakin a gen hi. Jew mite in ama thuhilhna nialin a gensiat uh ciangin Paul in a puan tunga leivui bangte sinsanin, “Pasian tawh kikhenin siatna na tuah uhleh nomau khialhna hi a, kei nong ngawh nading uh om lo hi. Tu a kipanin Gentail mite kiangah thu ka hilh ding hi,” a ci hi. Tua ahih ciangin Paul in tua Jew mite nusia-in Pasian a bia Gentail mi Titus Justas’ inn-ah a tung hi. Tua mipa’ inn pen kikhopna inn gei mahmah ahi hi. Kikhopna inn ukpa Krispas le a innsunga om mi khempeuh in Topa thu um uh a, Korin khua-a om midang tampite in zong thuhilhna ngai-in um uh a, tui a kiphum uh hi. Zan khat, Paul in maang mu a, a maang sungah Topa in, “Lau kei in. Lungkia kei inla, na thugen zom in. Hih khua sungah keima mi tampi om a, nang hong ompih ka hih manin kuamah in nang bangmah hong cih lo ding hi,” a ci hi. Tua ahih manin tua khua-ah kum khat le alang sung omlai-in mite kiangah Pasian thu a hilh hi. Rom khutnuai-ah Akhaia gam sung a uk dingin Gallio a kikoih ciangin Jew mite hong kikaikhawm uh a, Paul manin zumah a paipih uh hi. Amaute in, “Hih mipa in ngeina om lopi-in mite in Pasian a biak nadingin zol ding hanciam hi,” a ci uh hi. Paul in a kam ka-in thugen dingin a kipat laitakin Gallio in Jew mite kiangah, “Hih thu pen gamtat khialhna ahi a, gitloh tatna ahi zongin a gamtatna hang hileh no Jew mite’ thugente limtakin kong ngaih ding a kilawm mah ahi hi. Ahi zongin hih thu pen kam zatzia, min le na ngeina uh a kituh na hih manun nomau mah in khentawm un. Tua bang thute keimah in ka hong khen kei ding hi,” a cih khit ciangin, zum panin amaute a hawlkhia hi. Amaute in kikhopna inn ukpa Sosthenes manin, zum mai-ah satgawp uh a, ahi zongin Gallio in themkhat zong phamawh sa lo hi. Korin khua-ah ni tampi sung thu um mite tawh Paul omkhawm lai a, tua khit ciangin amaute mangpha khakin Syria gam a zuan dingin Prisilla le Aquila tawh teembaw a tuang uh hi. Paul in Pasian tungah thuciamnasa nei ahih manin teembaw a tuan ma-un Korin khuapi teembaw khawlna Kenkhrea munah a sam a metsak hi. Tua bangin a pai uh ciangin Efesa khua tung uh a, Paul zong kikhopna inn-ah pai-in Jew mite tawh thu a kisel uh hi. Tua khua-ah Prisilla le Aquila-te nupa a taam lai nading Paul in a gen hi. Thu um mi pawlkhatte in ni tampi sung Paul a taam nadingin gen uh a, ahi zongin amah taam nuam lo hi; a dinkhiat ding ciangin, “Pasian deihna ahih nakleh note kiangah ka hong hawhkik ding hi,” ci-in vaikhakin, Efesa khua panin teembaw tawh a ding khia hi. Sisaria khua a tun ciangin Jerusalem khua-ah pai-in pawlpite va hopih a, tua ciangin Antiok khua-ah a pai hi. Antiok khua-ah tawlkhat a taam khit ciangin Galatia gam le Frigia gam sungah pai-in thu um mi khempeuh a va thakhauhsak hi. Alexandria khuami Apollos a kici Jew mi khat, Efesa khua-ah hong pai hi. Amah thugen siam mahmah a, Lai Siangtho zong a thei mahmah khat ahi hi. Amah in Topa’ zia thei a, lawp mahmahna tawh Jesuh’ thu a mantakin a hilh hi. Ahi zongin amah in Johan’ tuiphumna thu bek a thei hi. Amah in kikhopna inn sungah hangtakin thu hilh ding kipan a, Prisilla le Aquila in ama thuhilhna a zak uh ciangin a omna uh inn-ah Apollos ciahpihin, Pasian’ thu paiziate a mantakin a hilhtel uh hi. Akhaia gamah Apollos pai ding a sawm ciangin, Akhaia gam a om thu um mite in limtakin a na pawlbawl nading uh deihna tawh Efesa khua-a om thu um mite in lai a khak uh hi. Amah a tun ciangin Pasian hehpihna hangin Jesuh thu a um tua lai-a om mite a dingin nuamtuam mahmah hi. Bang hang hiam cih leh amah in Lai Siangtho sung siksanin Jesuh pen Khrih ahi hi, ci-in mihon lakah Jew mite tawh thu kiselin a zogawp hi. Korin khua-ah Apollos a om laitakin Paul khual hong zinin Efesa khua hong tung hi. Tua khua-ah thu um mi pawlkhat tawh kimu a, “Thu na up uh ciangin Kha Siangtho na ngah uh hiam?” ci-in a dot leh, “Kha Siangtho a omlam nangawn ka za nai kei uh hi,” ci-in a dawng uh hi. Tua ciangin Paul in, “Tua ahihleh na kituiphumna dan uh bangci bang ahi hiam?” ci-in a dot ciangin, “Tuiphumpa Johan’ thugen bang pawl ahi hi,” ci-in a dawng uh hi. Tua ciangin Paul in, “Johan’ hilh tuiphumna pen mawhna a kisik mite a’ ding ahi hi. Amah in Israel mite kiangah, ‘Keima nunga hong pai ding pa Jesuh um un,’ ci-in gen hi,” a ci hi. Amaute in hih thu a zak uh ciangin Topa Jesuh’ minin tui a kiphum uh hi. Paul in amaute tungah a khut a ngakkhit ciangin amaute tungah Kha Siangtho hong tung hi. Amaute in pau lamdang hong paupah uh a, Pasian’ thu zong a gen uh hi. Tua mite sawm le nih a pha uh hi. Tua ciangin Paul in kikhopna inn sungah hangtakin kha thum sung thu hilh a, mite in Pasian’ Ukna thu a upzawh nadingun nakpitakin a gen hi. Ahi zongin mi pawlkhat in kin hetloin um nuam lo uh a, mipi’ zakin Topa’ thu paiziate gensia gawp uh ahih manin Paul in amaute nusia-in thu um mite paikhiatpih a, Tirannas in thugenna-in a neih innpi sungah nisimin thugenna hun a zang hi. Hih bangin kum nih sung tawntung thu gen niloh ahih manin Asia gam sunga om Jew mi le Gentail mi khempeuh in Topa’ thu a za uh hi. Pasian in Paul’ tungtawnin nalamdang lianpipi a bawl hi. Ama zat mainul ahi a, a puante ahi zongin cinate kiangah a kipaipih ciangin a natnate uh damin, a sunga om dawite zong a taikhia uh hi. Dawi hawlkhia-in a vak kawikawi Jew mi aitawi pawlkhat in zong Topa Jesuh’ min zangin dawi hawlkhiat ding a sawm uh hi. Amaute in dawite kiangah, “Paul in a gengen Jesuh’ min tawh thu kong pia uh hi,” a ci uh hi. Siampi lianpen Skeva’ tapa sagihte in tu-a bang danin na sem uh hi. Ahi zongin dawite in amau kiangah, “Jesuh ka thei uh a, Paul zong ka thei uh hi. Note kua na hi uh hiam?” a cihkhit uh ciangin, dawilutna mipa in amaute buan gawpin zogawp ahih manin, a liam a bai, puan keksa-in tua mipa’ inn panin a taikhia uh hi. Efesa khua-a om Jew mi le Gentail mi khempeuh in hih thu za-in lau mahmah uh a, Topa Jesuh’ min nakpitakin a kiphat semsem hi. Thu a um midang tampi tak zong hong pai uh a, mipi’ zakin a gamtatnasate khempeuh uh hong pulak uh hi. Ai a san ngei mi tampi tak in zong a aisanna laibute uh hong paipih uh a, mi khempeuh’ muhin a haltum uh hi. Tua laibu mante a gawm uh ciangin ngun peek then nga man bang ahi hi. Tu-a bang danin Topa thu nakpitakin hong khangin hong kizel semsem hi. Hih bang thuteng a piankhit ciangin Masedonia gam le Akhaia gamah Paul zinin Jerusalem-ah paisuak ding a ngaihsun hi. Tua khit ciangin Rom khua-ah zong pai ning, a ci hi. Tua ahih manin amah a huh Timoti le Erastas, Masedonia gamah paisak a, amah in Asia gam sungah tawlkhat hun a zang hi. Tua hun laitakin Topa’ thu hangin Efesa khua-ah buaina lianpi khat a hong piang hi. Demetrias min nei ngunseek mipa khat in Artemis nusian biakna inn lim ngun tawh bawl a, tua nasepna in amah le a naseppih mite a dingin hauhna lianpi a piangsak hi. Tua ahih manin amaute’ sep bang a sem midang khempeuh kaikhawmin, “Lawmte aw, hih nasepna hangin a hau ihihna thu na thei uh hi. Nomau mahmah in hih Paul’ thugen khempeuh za-in na thei uh hi. Amah in mihingte’ bawl pasian-te pen pasian hi het lo hi, ci-in thu hilh a, hih Efesa khua le Asia gam sung khempeuhah mi tampi tak a umsak hi. Tua ahih manin i nasepna a siatkhak ding lauhuai hi. Tua bek hi loin, Asia gam sung mi le leitung mi khempeuh in a biak Artemis nusian biakna innpi a mawkna hong suahkhak ding, le a liatna teng a maimankhak ding nak lauhuai mahmah hi,” a ci hi. Mihonte in hih thu a zak uh ciangin heh mahmah uh a, “Efesa khuamite’ Artemis lianpen hi,” ci-in awngkekgawp uh hi. Khuasung khempeuhah tua buaina hong kizel a, mihonte in Paul tawh a kikhawl Masedonia mi Gaias le Aristarkhas manin mihon kikhopna innpi-ah a kai uh hi. Paul zong tua innsung mihonte mai-ah thugen dingin painuam a, ahi zongin thu um mite in a pai ding a phal kei uh hi. Paul’ lawm ahi tua gam a ulian pawlkhatte in Paul kiangah kamtai paisak uh a, hih kikhopna munah hong kilak het kei in, ci-in nakpitakin a khosak uh hi. Tua innpi sungah mihonpi buai ngeingai uh a, mi a tamzaw in a paina thu uh thei lo uh ahih manin, pawlkhat in thu khat genin awnggawp uh a, adang pawlkhat in a thu tuampi khat na awng leuleu uh hi. Jew mite in mihonpi mai-ah Alexander hong dingsak uh ahih manin, mi pawlkhat in hih thupiang ama hang hi, ci-in ngaihsun uh hi. Alexander in mihonte a gamdaih nadingin a khut hong van a, a mawh lohna uh thu a gen dingin hong kipan hi. Ahi zongin Jew mi ahih lamtak a theih uh ciangin, “Efesa khuamite’ Artemis lianpen hi,” ci-in a kituakin nai nih sung a awng uh hi. A tawpna ciangin khuasung lai-at pa in mihonte a gamdaih nadingin khozo a, “Efesa khuapi mite aw, Efesa khuapi pen, a lian mahmah Artemis biakna innpi le van panin a hong kia biakna suang a kem khuapi ahihna thu mi khempeuh in a theihsa ahi hi. Hih thu pen kuamah in hong nial thei lo ding hi. Tua ahih manin gamdai takin om unla, a kilawm lo na khat peuhpeuh gamta kei un. Hih mite in i biakna inn lah bangmah cih lo, i nusian zong bangmah gensiatna nei lo napi-in hih lai-ah na hong paipih uh hi. Tua ahih ciangin Demetrias le a pawlte in mi khatpeuh tungah lungkim lohna nei uh ahihleh thu sit ni ding hun om a, thukhen uliante zong om uh ahih manin tuate mai-ah thu kineih ta uh hen. Ahi zongin hih thu-ah lungkimzo nai lo na hih uhleh zong a ngeina cingin a kikhop uh ciangin gen ding ahi hi. Tuni-a thupiang hangin eite buaina piangsak, ci-in hong kimawhsak khak ding lauhuai hi. Hih bangin buaina a om nading bangmah a thu om lopi hi a, i siksan ding bangmah thu om het lo hi,” a ci hi. Hih thuteng a genkhit ciangin mihonte a ciahsak hi. Hih buaina thu a ven’ ciangin Paul in thu um mite kaikhawmin, hanthotna kam genin amaute mangpha khak a, Masedonia gam a zuan dingin ding khia hi. Hih gam sungah khualzinin hanthotna tampi a genkhit ciangin Grik gamah pai a, tua gamah kha thum sung a tam hi. Syria gam manawh dingin a kithawi laitakin tua gam a om Jew mite in lamkalah amah a thahsawmna thu za ahih manin Masedonia gam tawn kikin khualzin ding a ngaihsun hi. Berea khuami Pirras’ tapa Sopater, Thesalonika khuami Aristarkhas le Sekundus, Derbe khuami Gaias, Timoti, le Asia gam sung panin Tikhikas le Trofimas-te in zong a zui uh hi. Amaute na mapai uh a, Troas khua-ah kote hong ngak uh hi. Silngo Sawh loh Anlum Pawi a ven’ khit ciangin Filippi khua panin teembaw tawh ka ding uh a, ni nga khit ciangin Troas khua tungin amaute tawh ka kimu uh a, tua lai-ah nipikal khat sung ka taam uh hi. Sani nitakin an nekhawm dingin ka kikhawm uh a, a zing ciangin a ding khia ding ahih manin Paul in a thuhilh zankim ciang dong a zomsuak hi. Ka kikhopna uh inn dawl tungnung sungah meivak tampi a kivak hi. Tawlet gei-ah Eutikhas a kici tangval khat tu a, Paul in a thugen zomzom ahih manin tua tangvalpa a ihmut suakin lusu a, a sawtna ciangin ihmusip kha-in inn dawl thumna panin leilakah a kiasuk hi. Amaute in a va phot uh ciangin amah na si khinta hi. Paul zong va kumsukin tangvalpa tungah bokin kikhuangin kawi a, “Lunghimawh kei un, hinglai hi,” a ci hi. Tua ciangin inn dawl tungnungah kahto kikin anlum balnenin thu um mite tawh a nekhawm hi. Zingsang khuavak dong amaute tawh thu kikum uh a, tua ciangin a ding khia hi. Amaute in tua tangvalpa a inn-ah va kha uh a, a lungsim uh nuamkik mahmah hi. Tua ciangin Paul in, Assos khua ciang dong khe-in pai ning, ci-in ko kiangah hong gen ahih manin, Troas khua panin teembaw tuangin Assos-ah ka pai uh a, tua khua-ah Paul tawh a kituah ding ka hi uh hi. Assos khua ka tun uh ciangin Paul in zong teembaw hong man a, Mitylene khua-ah ka paisuak uh hi. Tua panin ding leuleu-in a zing ciangin Khios tuikulh khengin Samos tuikulh ka tung uh hi. Tua panin a zing ciangin Miletas khua ka tung uh hi. Paul in Jerusalem khua-ah Pentekos Pawi hun lapnuam ahih manin Asia gam sungah ban man dingin ngaihsun lo a, Efesa khua-ah taam sawm lo hi. Paul in Miletas khua panin Efesa khua-ah thu puak a, Efesa pawlpi upate in a na dawntuah nadingin a vaikhak hi. Efesa pawlpi upate hong tun ciangin Paul in amaute kiangah, “Asia gam sung kong tun ni a kipanin note tawh ka om sungteng ka nasepna khempeuh note in na thei uh hi. Jew mite in kei hong thahsawmna hangin kiniamkhiatna le khitui naptui tawh haksapi-in Topa’ na ka sem hi. Mihon lak ahi a, note’ inn sungah ahi zongin ka hong thuhilhna khempeuhah note’ phattuam nading a om khempeuh siit nei loin kong gen khin hi. Jew mi le Gentail mite a mawhna panun Pasian’ lamah kihei-in i Topa Jesuh a up nadingun thu ka gen khinzo hi. Tu-in ahihleh Kha Siangtho’ hong sawlna mangin, kei tungah bang thu hong piang ding hiam, cih thei lopi-in Jerusalem khua-ah a pai ding ka hi hi. Thongkiatna le gimna ka thuak nading thu bekbek, ka omna khua khempeuhah Kha Siangtho in hong gen tawntung hi. Ahi zongin Topa Jesuh in kei sep dingin a hong piak, Pasian hehpihna hangin Lungdamna Thu, mite kiangah gen ding nasep ka tangtut zawh nakleh kei nuntakna-ah bangbang hong piang taleh a thupi-in ka ngaihsun kei hi. “A beisa hunah Pasian’ Ukna thu a hilhin note lakah kong vak kawikawi a, ahi zongin tu-in kuamah in nong muhkik nawn loh ding uh ka thei hi. Tua ahih ciangin tuni mahmahin note tungah limtakin kong gennop thu in: Note khat peuhpeuh Pasian tawh kikhenin siatna na tuah uhleh kei’ tavuan hi nawn lo hi. Bang hang hiam cih leh note tungah Pasian’ thu kong gen loh khat zong om nawn lo hi. Kha Siangtho in note’ khut sungah a hong koih pawlpi mite le nomau pumpi mahmah limtakin na kem un. Pasian in a Tapa a sihna tawh a ngah a pawlpi hoihtakin a kemte na hi ta un. Kei ka om nawn loh ciangin, sa gilote in gannote a phialgawp bangin, mi pawlkhat in thu um mite hong phialgawp ding lamtak ka thei hi. Note sung mahmah panin zong mi pawlkhat in thu um mite khemin a zolkhiat hun hong tung ding hi. Tua ahih ciangin limtakin kiging unla, kum thum sung tawntung khitui naptui tawh note khempeuh ka hong thuhilhna na ciamteh un. “Tu-in Pasian’ khutsung le ama dikna thu sungah note ka hong ap hi. Amah in note hong khangtosak thei-in, ama mite khempeuh a dingin a koih thuphate note tungah hong pia thei hi. Kuama neihsa, ngun, kham, le puante en’ dingin ka ngaihsun ngei kei hi. Kei le ka kithuahpihte’ kisapna khempeuh ka ngahtheih nadingin keima khut mahmah tawh na ka sepna thu note in na thei uh hi. Topa Jesuh mahmah in, ‘Ngahna sangin piak khiatna-ah lungdamna lianzaw hi,’ a cihna phawkkawmin nakpitakin nasepna tawh na khempeuhah a zawngkhalte huh ding hi hang, ci-in note kiangah kong lak khinzo hi,” ci-in a vaikhak hi. Paul in hih bangin a kam vaikhak a man khit ciangin a vekpi-un khukdin uh a, Paul in thu a ngen hi. Amaute a kikhen dingin mangpha a kikhak uh ciangin khatlekhat kilen kikawi-in a kap uh hi. Paul in, “Kuamah in nong mukik nawn kei ding uh hi,” a cihna hangin a dah mahmah uh hi. Amaute in teembaw tung ciang dong Paul a hong kha uh hi. Amaute tawh ka kikhen khit uh ciangin teembaw tawh paisuakin Kos tuikulh ka tung uh hi. A zing ciangin Rods tuikulh ka tung uh a, tua lai panin a zing ciangin Patara khua ka tung uh hi. Tua lai panin Foenisia gamah a pai ding teembaw khat na om ahih manin tua teembaw tuangin ka pai uh hi. Saipras tuikulh a kigal muhna mun ka tun uh ciangin tua tuikulh leitaw lampang kantanin Syria gam lam manawhin ka paisuak uh a, Taia khua ka tun uh ciangin teembaw in a van puakte suah ahih manin teembaw tung pan ka tuakkhia uh hi. Tua khua-ah ka kan uhleh thu um mi pawlkhat na om uh a, amaute kiangah nipikal khat sung ka taam uh hi. Jerusalem khua-ah Paul a pai loh nadingin Kha Siangtho’ lamlahna tawh amaute in a gen uh hi. Amaute kiang panin ka ciahkhiat ding uh hun hong tun ciangin ka ding khia uh a, a zite a tate uh tawh a vekpi-un khuanawl ciang hong zui uh hi. Tuipi gei ka tun uh ciangin khukdinin thu ka ngen uh hi. Tua ciangin khatlekhat mangpha kikhakin teembaw tungah ka tuang uh a, amaute zong a inn uhah a ciah uh hi. Taia khua panin teembaw tawh pai-in Tolemais khua ka tung uh a, tua lai-ah thu um mite kiangah sun khat kulhin amaute tawh ka kiho uh hi. A zing ciangin ding leuleu-in Sisaria khua ka tung uh a, Pasian thu a hilh Filip’ inn-ah tungin tua lai-ah ka taam uh hi. Tua pa pen Jerusalem khua-a a kiteel mi sagihte sungah a kihel ahi hi. Amah in Pasian thu a hilh tanu-ngak li nei hi. Tua lai-ah tawlkhat ka taam khit uh ciangin Judea gam panin Agabas min nei kamsang khat hong tung hi. Kote’ kiangah amah hong pai-in Paul’ kawnggak hong laksak a, tua kawnggak tawh ama khut le a khete a gakcip khit ciangin, “Kha Siangtho in, ‘Jerusalem khua sungah hih bangin Jew mite in hih kawnggak nei pa hencip ding a, Gentail mite’ khut sungah pia ding hi,’ ci hi,” a hong ci hi. Hih thu ka zak uh ciangin kote le tua lai-a om thu um mite in Jerusalem-ah Paul a pai loh nadingin ka thum uh hi. Ahi zongin Paul in, “Bang hangin hih bangin kapin ka lungsim a tapkhap nadingin gamta na hi uh hiam? Jerusalem khua-ah khihcipna a thuak ding bek hi loin, Topa Jesuh hangin a si ding ciang dongin a kithawisa ka hi hi,” ci-in a hong dawng hi. Thu ka genpihpih uh hangin hong mang zo lo ahih manin, ka cih nading uh thei nawn loin, “Topa’ deihna bangbang hi ta hen,” ci-in ka omta uh hi. Tua lai-ah tawlkhat ka taam khit uh ciangin ka vante uh kithawi-in Jerusalem khua a zuan dingin ka dinkhiat uh ciangin, Sisaria khua panin thu um mi pawlkhat in zong hong zui uh a, ka tun nading uh Mnason’ inn-ah hong paipih uh hi. Mnason pen Saipras tuikulh gammi hi a, sawt pek a kipanin thu um mi a na hi khinsa ahi hi. Jerusalem khua ka tun uh ciangin thu um mite in lungdam mahmahin a hong hopih uh hi. A zing ciangin James kiangah Paul tawh ka hawh uh a, tua lai-ah pawlpi upa khempeuh a na om uh hi. Paul in amaute hopih a, Pasian in amah Paul tungtawnin Gentail mite lakah na a sepna khempeuh a banbanin a cingtakin a gen hi. Ama thugen teng a zakkhit uh ciangin a vekpi-un Pasian a phat uh hi. Tua ciangin Paul kiangah, “Sanggam aw, hih lai-ah na theih ding thu khat om hi. Hih lai-ah thu um Jew mi tampi tak om a, amaute in thukham nakzuih mahmah uh hi. Gentail mite lak a om Jew mi khempeuh tungah na thuhilhna, amaute in Moses thukham zui loin, Jew ngeina zui nawn loin, a tate uh zong vun a at loh nadingun na thugente khempeuh, hih lai-a om Jew mite tungah kigen hi. Hih lai nong tunkhitna thu amaute in pel loin zakhin ding uh ahih manin bangcih ding ihi hiam? Tua ahih manin kong gen bangun gamta in. Pasian tungah thuciamna a bawl khinsa mihing li om hi. Tua mite tawh va kipawl inla, a kisiansuahna uhah nang zong va kihelin, a sum beiteng khempeuh nangmah in sik in. A kisiansuah khit uh ciangin amaute in a sam uh met thei ta ding uh hi. Hih bangin gamta lecin a beisa huna nangma thu a kigente khempeuh a man khat zong om loin, nangmahmah zong Moses Thukham a zui na hihna thu mi khempeuh in hong thei ding uh hi. Thu um Gentail mite tawh kisai-in ahihleh, amaute in milim biakna an khat peuhpeuh, sasi, le a si kiluangkhiasak loin gawlmek a kigo sate a nek loh nading uh, le numei tawh khialhna panin a kikep nading uh hoih hi, ci-in thu khensatin lai ka khak khinzo uh hi,” a ci uh hi. Tua ahih ciangin Paul, a zing ciangin tua mi lite tawh va pai khawmin kisiansuahna a va bawl uh hi. Tua ciangin biakinn sungah amah va pai a, a kisiansuah hun sung uh a hun sawt ding tan, tua mi lite a dingin biakna a kipiak ding ni a va zasak hi. Tua ni sagih hunsung a bei dektak ciangin Asia gam panin a hong pai Jew mite pawlkhat in, biakinn sungah Paul a omna a mu uh hi. Amaute in mihonte sosuahin Paul man uh a, “Israel mite aw, hong huh un. Mun khempeuhah thu hilh kawikawi-in, Moses Thukham, le hih biakinn langpangin mi khempeuh kiangah Israel mite a hong gensia pa ahi hi. Tu-in Gentail mite nangawn biakinn sungah hong paipihin hih biakinn siangtho a ninsak hi,” ci-in a awng uh hi. (Hih bang a cih theihna uh pen khua sungah Paul le Efesa khuami Trofimas a kikhawl mu uh a, Paul in biakinn sungah tua mipa a lutpih a sa kha uh ahi hi.) Tua ciangin hih thu in khuasung khempeuh hong zel a, mite hong tai-in hong kikhawmin Paul man uh a, biakinn pualamah kaikhia-in, biakinn kongkhakte a khakpah uh hi. Mihonte in Paul that dingin a kithawi laitakun Jerusalem khuasung buai mahmah hi, ci-in Rom galkap mangpa kiangah thu na kipuak hi. Galkap mangpa in zong thakhatin galkapbute le galkapte samin mihonte lak a va kidenna uh hi. Mihonte in galkapte tawh hong pailam a muh uh ciangin Paul a sat nawn kei uh hi. Paul kiangah galkap mangpa hong pai-in man a, sikkhau nih tawh Paul a khih nadingun thu a pia hi. Tua ciangin, “Hih mipa kua hi a, bang gamta ahi hiam?” ci-in a dot ciangin, mihonte sung panin pawlkhat in thu khat genin, pawlkhat in adang khat a gen hi. Mihon kibuai lua a, bang teng taktak hiam, cih theikhia zo lo ahih manin galkap inn-ah a paipih nadingun a mite thu a pia hi. Galkap huangsung lutna kahlei a tun uh ciangin mihonte in nehcip lua uh ahih manin galkapte in Paul laamto-in a paipih uh hi. Bang hang hiam cih leh mihonte in hong nungzuihin, “Amah that un,” ci-in a awng uh hi. Amaute in galkap huang sungah Paul a lutpih dektak laitakun Paul in galkap mangpa kiangah, “Nang tung thu tawmkhat kong genthei ding hiam?” ci-in a dot ciangin galkap mangpa in, “Grik pau siam hi lo na hi hiam? Tua ahih manin tuma lamin kumpi lehdo dingin mihing tulli tawh gam sungah a pai Egypt mipa hi buang kei ni teh maw?” a ci hi. Paul in, “Kei pen Silisia gam Tarsas khua-a suak Jew mi ka hi a, khua thupi sungah a teng mi ka hi hi. Nong hehpihna-in hih mihonte tungah thu hong gensak in,” a ci hi. Galkap mangpa in zong thu a gen ding phal ahih manin kahlei cial tungah Paul ding a, mite a gamdaih nadingin a khut a van hi. Mite a gamdaih khit ciangin Paul in Hebru pau-in mite tungah thu gen a, “Pate, ute, khangualte aw, hih thu-ah bangmah ka mawh lohna thu kong gen laitakin na ngai un,” a ci hi. Hebru pau-in thu a genna mihonte in a zak uh ciangin amaute gamdaizaw kan uh ahih manin Paul in a thugen zomin, “Kei pen Silisia gam Tarsas khua-a suak Jew mi ka hi a, ahi zongin hih lai Jerusalem khua-ah Gamaliel’ khut sungah sangnaupang hi-in a khangto ka hi hi. I pu i pate’ Thukham limtakin hong kihilh a, tu-a note zah mahin Pasian tungah a kipia mi khat ka hi hi. Hih Thu a zui numei pasal a kuamah peuh manin thong sung ka denna a, sihna ciang dongin amaute ka bawlsia hi. Hih ka thugente a man ahihna thu, siampi lianpen pa le upa khempeuh in hong genthei ding uh hi. Damaskas khua-a om i Jew mipihte ka lah dingin amaute in lai hong pia uh ahih manin, upate in gim a piaktheih nadingun tua khua-a om thu um mite manin sikkhau khihin Jerusalem khua-ah a ciahpih dingin ka va pai hi. “Damaskas khua a zuan dingin pai-in ka tun dektak sunkim pawl laitakin, thakhatthu-in van panin ka kimkot hong taangzaih hi. Leilakah pukin ka om laitakin awging khat ka za a, ‘Saul, Saul! Bang hangin kei hong bawlsia na hi hiam?’ hong ci hi. Kei zong, ‘Topa aw, kua na hi hiam?’ ci-in ka dot ciangin, ‘Nangmah in na hong bawlsiat, Nazareth khuami Jesuh ka hi hi,’ a hong ci hi. Ka tonpih mite in a khuavak taang mu uh a, ahi zongin kei’ tungah thu hong gen pa’ awging za lo uh hi. Tua ciangin kei zong, ‘Topa aw, bangci gamtat ding ka hi hiam?’ ci-in ka dot ciangin amah in, ‘Tho inla, Damaskas khua-ah pai in. Nang’ hih dingin Pasian in a sehsa thu khempeuh, tua khua panin hong kigen ding hi,’ a hong ci hi. Tua khuavak taanglua hangin khua muthei nawn lo ka hih manin ka tonpihte in ka khutin hong lenin Damaskas khua-ah a hong paipih uh hi. “Tua khua-ah Ananias min nei, Thukham limtakin zui-in biakna hahkat mahmah, Damaskas khua-a om Jew mite in a zahtak mahmah mi khat a na om hi. Amah hong pai-in ka kiangah hong ding a, ‘Sanggam Saul aw, khua mukik in,’ hong cih phetin ka mit hong vakin amah ka muthei pah hi. Tua ciangin amah in, ‘I pu i pate’ Pasian in ama deihna a thei ding, a thuman a Nasempa a mu ding, le ama kam mahmah tawh a thugen a za dingin nang hong teel khinzo hi. Tua ahih manin na muhsa le na zaksa thu khempeuh, mi khempeuh tungah genin teci a pang ding na hi hi. Tu-in bang ngak lai ding na hi hiam? Tho inla, Pasian kiangah thu ngenin kituiphum inla, na mawhnate silsiangsak in,’ hong ci hi. “Tua ciangin Jerusalem khua-ah ka ciahkik a, biakinn sungah thu ngenin ka om laitakin maang ka mu hi. Tua ka maang sungah Topa in kei kiangah, ‘Hih lai-a om mite in keima thu na gennate hong um lo ding uh ahih manin Jerusalem khua panin kuankhia mengmeng in,’ hong ci hi. Kei zong, ‘Kikhopna innte-ah pai kawikawi-in nangma thu hong um mite manin ka satgawpna thu amaute mahmah in teltakin hong thei uh hi. Nangma thu a gen Stefen a kithah laitakin kei mahmah zong ka om a, tua a kithahna thukimpihin a thatte’ puante nangawn ka kepsak hi,’ ci-in ka dawng hi. Tua ciangin Topa in kei kiangah, ‘Gentail mite omna gamlapi-ah hong sawl ding ka hih manin pai peuh in,’ hong ci hi,” a ci hi. Paul in Gentail mite kianga pai nading thu a gen matengin mite in limtakin a ngai uh hi. Ahi zongin tu-a thu a pulak ciangin a aw neihzah uh tawh mite kiko-in, “Leitungah hih bang mi omsak kei un! That un! A hing dingin kilawm lo!” ci-in a awng uh hi. Mihonte hehlua-in awngkekgawp uh a, a puan uh suahin vanah lawnin, leivui zong van lamah a lawn uh hi. Tua ciangin Rom galkap mangpa in galkap huang sungah Paul a paipih nadingun thu pia a, bang hangin Jew mite hih bangin ama tungah hehin awngkekgawp uh ahi hiam, ci-in a theih nadingin a satsak hi. Amaute in sat dingin a hen khit uh ciangin Paul in a gei-a ding galkap bupa kiangah, “Khial hi, ci-in thu nangawn a kisit nai lo Rom mi khat na sat ding uh ngeina ahi hiam?” a ci hi. Galkap bupa in hih thu a zak ciangin galkap mangpa kiangah pai-in, “A bangci na hi hiam? Hua mipa, Rom gammi ahi hi,” a cih ciangin, galkap mangpa zong Paul kiangah va pai-in, “Rom gammi na hi hiam, hong gen dih in,” a cih leh Paul in, “Ka hi mah hi,” ci-in a dawng hi. Tua ciangin galkap mangpa in, “Hih Rom gammi suah nadingin sum tampi tawh ka lei hi,” a ci hi. Paul in, “Kei ka pianin Rom mi-a piang ka hi hi,” a ci hi. Tua ahih manin Paul thu a dong dingin a gei-a om mite a paikhia uh hi. Sikkhau tawh a khih khit ciangin Paul pen Rom gammi ahihna a phawk ciangin galkap mangpa zong lau-in a lunghimawh hi. Jew mite in bang hangin Paul mawhsak ahi uh hiam, ci-in teltakin galkap mangpa in theinuam ahih manin a zing ciangin Paul a khihsakna sikkhaute sutsak a, siampi liante le upate thu kikupna a nei dingin a samsak hi. Tua ciangin Paul paikhiatpihin uliante mai-ah a dingsak hi. Paul in ulian kikhawmte limtakin enin, “Lawmte aw, tuni ciang dong ka nuntak sung tawntung, Pasian mai-ah kisuanna ka nei het kei hi,” a cih leh siampi lianpen pa Ananias in Paul gei-a omte kiangah, “A muk na betsak un,” a ci hi. Paul in, “Leikang tawh a kizut kulh tawh a kibang pa aw, Pasian in nang hong beenggawp taktak ding hi. Keimah thusitna-ah Thukham a zui ding pa hinapi-in Thukham zui loin kei hong kibet nadingin thu na pia hi,” a ci hi. Paul gei-a om mite in, “Pasian’ siampi lianpen pa na zahko hi,” a cih ciangun Paul in, “Lawmte aw, siampi lianpen pa ahihlam ka thei kei hi. Lai Siangtho in, ‘Na mite uh a ukpa na gensia kei ding uh hi,’ ci hi,” ci-in a dawng hi. Paul in tua uliante lakah Saddusi mi le Farisi mi a omlam a muh ciangin amaute kiangah, “Lawmte aw, kei pen Farisi mite’ suan ahi Farisi mi ka hi hi. Mi site hingkik ding hi, ci-in lamenin upna ka neih manin hih lai-ah thusitna ka thuak hi,” a ci hi. Tua thu a gen khit phetin Saddusi mite le Farisi mite kitawngpah uh a, tua uliante khen nih a pha uh hi. (Bang hang hiam cih leh Saddusi mite in mi a sih khit ciangin hingkik nawn lo ding hi. Vantung mi ahi a, kha ahi zongin om lo hi, ci uh hi. Ahi zongin Farisi mite in hih thu thumte om hi, ci-in a um uh hi.) Amau’ kitotna awging hupha semsem a, Farisi mite pawlsung a om Thukham hilh siate pawlkhat hong dingin nakpitakin hong pau uh a, “Hih mipa tungah khialhna themkhat zong om lo hi. Vantung mi ahi a, Pasian’ sawl khat peuhpeuh in ahi zongin ama tungah thu a gen hi khathei ding hi,” a ci uh hi. Amaute’ kitotna hong husia semsem ahih manin amaute in Paul balthanggawp kha ding hi, ci-in galkap mangpa lunghimawh hi. Tua ahih manin galkapte in Paul va kaikhia-in galkap inn-ah a paipih nadingun thu a pia hi. Tua zanin Paul kiangah Topa hong ding a, “Hang takin om in. Hih Jerusalem khua sungah keima thu genin teci na pan’ mah bangin Rom khuapi-ah zong keima thu genin teci na pang ding hi,” a ci hi. A zing ciangin Jew mite pawlkhat kikhawm uh a, Paul i thahkhit ciang bekin anne tuidawn pan ding hi hang, ci-in kiciamna a nei uh hi. Hih bangin a vaihawm mihing sawmli val bang a pha uh hi. Siampi liante le upate kiangah pai uh a, “Paul ka thahkhit mateng uh anletui ka nekloh nadingun khauhtakin thuciamna khat ka nei khin uh hi. Tu-in note le uliante in galkap mangpa tungah thu zasak unla, Paul’ thu a cingin a theinuam kineihin, note kiangah Paul hong paipihsak nadingin na ngen un. Hih lai mun hong tunma-in kote in lamkalah ka na that ding uh hi,” a ci uh hi. Ahi zongin hih a thahsawmna thu uh, Paul sanggamnu’ tapa in za ahih manin galkap inn-ah va pai-in Paul kiangah a va gen hi. Tua ciangin Paul in galkapbute khat samin ama kiangah, “Galkap mangpa kiangah hih tangvalpa va paipih in. Amah in thugen ding khat a nei hi,” a ci hi. Galkap bupa in zong galkap mangpa kiangah va paipih a, “Hih tangvalpa in nang tungah gennop khat hong nei ahih manin nang kiangah kong paipih nadingin thongkia Paul in a hong sawl hi,” a ci hi. Galkap mangpa in zong a khutin tua pa lenin amau gel guak paikhia uh a, “Bang hong gennuam na hi hiam?” ci-in a dong hi. Tangvalpa in, “Uliante in Paul’ thu a cingin a theinuam kineihin, zing ciangin amaute kiangah Paul na paisak nadingin Jew mi aana neite in nget ding a thukim uh hi. Ahi zongin lamkalah Paul a pangsim dingin mihing sawmli val bang om uh ahih manin amaute’ hong ngetna pia kei in. Tua mihing sawmlite in Paul a thahkhit mateng uh anletui a nekloh nadingun kiciamna khat bawlkhin uh hi. Amaute a kithawisa-in om uh a, nangma thupiak ding bek a ngak uh ahi hi,” a ci hi. Tua ciangin galkap mangpa in tangvalpa kiangah, “Kei kiangah hih thu nong kohna thu kuamah theisak kei in,” ci-in a vaikhak khit ciangin a ciahsak hi. Tua ciangin galkap mangpa in galkapbute nih samin, “Sisaria khua-ah a pai ding galkap zanih sam unla, sakol tung tuang galkap sawmsagih le teitawi galkap zanih tawh zong pai unla, tuzan nai kua hunin ding khia un. Paul’ tuan nading sakol pawlkhat zong keng unla, Menzipa Feliks kiangah hoihtakin va tunpih un,” a ci hi. Tua ciangin galkap mangpa in hih a nuai-a bangin lai khat gelh hi: “A Lian Menzipa aw, Keimah Klaudias Lysias in hopihna lai ka hong gelh hi. Jew mite in hih mipa manin that dektak uh hi. Rom gammi ahihlam ka theih ciangin ka galkapte tawh pai-in ka va honkhia hi. Amaute’ mawhsakna bang thu ahi hiam, ci-in theinuam ka hih manin thusit dingin amau’ uliante kiangah ka paipih hi. Thong khiat nading le sihna thuak nadingin khialhna a bawlna bangmah ka mu kei hi. A mawhsaknate uh amau’ thukham ngeina tawh kisai hi lel hi. Jew mite pawlkhat in amah a thahsawmna thu hong kikoh ciangin nangma kiangah puak dingin ka ngaihsun hi. Amah a mawhsakte in nangma mai-ah thu a hong gen nadingun amaute kiangah ka gen hi,” ci-in a gelh hi. Galkapte zong a thu ngahna bangun gamta uh a, tua zanin Paul paikhiatpihin Antipatris khua dong a paipih uh hi. A zing ciangin khe galkapte kilehkik uh a, sakol tung tuang galkapteng bek a kha suaksak uh hi. Amaute in Sisaria khua-ah Paul tunpih uh a, menzipa kiangah a lai puak uh pia-in, ama tungah Paul a ap uh hi. Menzipa in tua laikhak sim a, koi lai gammi na hi hiam, ci-in Paul a dong hi. Amah in Sisaria gammi ahihlam a theih ciangin, “Na langte hong tun ciangin thu kong sit ding hi,” ci-in a gen khit ciangin, Herod in a lam inn sungah Paul koihin a cin nadingun thu a pia hi. Tua khit ni nga ciangin siampi lianpen pa Ananias le upate, amau’ thu a gensak ding Tertullas a kici mipa tawh Jerusalem khua panin Sisaria khua-ah hong tung uh a, menzipa Feliks kiangah pai-in Paul a mawhsakna uh thute a va gen uh hi. Thugen dingin Tertullas a kisawl ciangin hih a nuai-a bangin mawhsakna thu a gen hi: “A Lian Menzipa! Nangma hong makaih siamna hangin hun saupi sung nuamtakin ka omkhin uh a, kote’ gam sung a hoih nadingin puahphatna zong tampi tak kibawl khin hi. Hih thute hangin nang tungah mi khempeuh ka lungdam mahmah uh hi. Na hun tampi tak hong beisak nuam lo ka hih manun thu a tom theithei a kong gennate uh hehpihna tawh nong ngaih nadingin ka hong thum uh hi. Hih mipa, buaina a piangsak, a kihtakhuai mi ahihna ka mu uh hi. Mun khempeuha om Jew mite lakah buaina piangsak a, Nazareth mi pawl a kicite a makai pa ahi hi. Biakinn nangawn thusim loin min siatsak sawm ahih manin amah ka man uh hi. (Komau’ thukham tawh kizui-in ama tungah thu khen ka sawm uh hi. Ahi zongin galkap mangpa Lysias hong pai-in kote kiang panin amah hong kaikhia hi. Tua ciangin amah a mawhsakte, nangma kiangah hong pai nadingin Lysias in thu a pia hi.) Tu-in hih mipa thu sit lecin, ka mawhsakna uh thu khempeuh nangmah in na thei ding hi,” a ci hi. Jew mite in zong panpih uh a, hih a gen khempeuh a man mah ahi hi, ci-in a gen uh hi. Paul in thu a gen nadingin menzipa in a khut tawh a lah ciangin Paul in, “Hih minamte tungah thukhenin sauveipi na omkhitna thu ka hong thei hi; kei hong kimawhsaknate nangma mai-ah pheltheih nading hun ngah ka hih manin ka nuam mahmah hi. Nangmahmah in na theih ding mah bangin, Jerusalem khua-ah Pasian bia dingin ka paina pen ni sawm le ni nih khawng pha pan hi. Biakinnsung ahi a, kikhopna innsung ahi a, khuasung mun khat peuhpeuhah ahi zongin mi khat peuhpeuh tawh ka kitotna ahi a, mihon in thusia a bawl nadingin ka hanthotna ahi zongin, hih Jew mite in hong mu het lo ding uh hi. Tu-a kei hong mawhsaknate uh zong a manna thu hong lakthei het lo ding uh hi. Ahi zongin nangma kiangah kong pulaknop thu in: Amaute in man lo hi, a cih uh tua Thu zui-in kote’ pu le pate’ Pasian ka bia hi. Moses’ Thukham laibu sunga a kigelh thu khempeuh le kamsangte’ laibu sunga a kigelhte khempeuh zong ka um hi. Amaute’ up le lamet mah bangin, Pasian in miphate le misiate a kibangin sihna panin hingkiksak khawm ding hi, ci-in umin ka lamen hi. Tua ahih manin Pasian mai le mite mai-ah lungsim kisuanna a om het lo dingin a tawntungin ka gamta hi. “Jerusalem panin kum tampi sung ka paikhiat khit ciangin ka mipihte a kihuhna sumte a puak ding le gan go-in Pasian a bia dingin Jerusalem-ah ka pai hi. Biakinn sungah keimah kisiansuahna ka bawlkhit hun ciangin amaute in kei hong mu uh a, buaina zong bangmah om lo hi. Tua laitakin Asia gam panin a hong pai Jew mite pawlkhat om uh hi. Kei mawhsak nading thu a neih uhleh amaute mahmah hong pai-in nangma mai-ah hong gen ding uh a kilawm ahi hi. Tua ahih kei leh zong, uliante mai-ah thusitna thuakin ka om laitakin ka mawhna bang mu uh ahi hiam, cih thu hih mite gensak in. Amaute’ mai-ah, ‘Mi site hingkik ding hi, ci-in ka upna hangin kei tungah thu nong khen uh hi,’ ci-in ka gen simloh amaute’ heh nading bangmah om lo hi,” ci-in thu a gen hi. Tua ciangin tua Thu paizia teltakin a thei Feliks in a thusitna hialbawl a, “Galkap mangpa Lysias hong tun ciangin na thu uh kong khensak ding hi,” ci-in a genkhit ciangin, Paul cin ding tavuan a la bupa kiangah thu pia a, “Paul hoihtakin cingsak inla, ahi zongin a lawmte in a kisapna peuhpeuh a piaktheih nadingun kimuh theih nading hun pia zel in,” ci-in a vaikhak hi. Tua zawh a sawt loin Feliks le Jew mi ahi a zi Drusilla, Paul a kikhumna-ah hong pai-in amah samkhiasak uh a, Paul in Jesuh Khrih upna thu a gennate a nupa-un a ngai uh hi. Ahi zongin Paul in thu gengenin, a hoihin a gamtat nading, pumpi ki-uk zawh nading, le hong tung ding Thukhenna Hunte a gen tohtoh ciangin, Feliks hong lau a, “Va paikik phot in. Hun ka ngah ciangin kong samkik ding hi,” ci-in a gen hi. Paul in sumgolh zong hong pia thei leh ci-in ngaihsunkawm ahih manin Paul kiangah va pai zelin a kiho zelzel uh ahi hi. Ahi zongin tua zawh kum nih hong bei ciangin Feliks sepna pen Porsias Festas in hong laih hi. Feliks in Jew mite’ pahtak ding ut ahih manin thong sungah Paul a omsak suak hi. Tua gam a uk dingin Festas hong tunzawh ni thum ciangin Sisaria khua panin Jerusalem khua-ah a va zin hi. Festas in, “Sisaria khua-ah Paul kikhum a, kei zong ciahkik baih ding ka hih manin, Paul in khialhna khat peuhpeuh gamta kha ahihleh zong ama khialhna thu a gen dingin na makaite un kei hong zui uh hen,” ci-in a dawng hi. Tua lai-ah Festas ni giat, ni sawm bang a taam khit ciangin Sisaria khua-ah a ciah hi. A zing ciangin thukhen tokhom tungah tu a, ama mai-ah Paul a kipaipih nadingin thu a pia hi. Paul hong kipaipih ciangin Jerusalem khua panin a hong pai Jew mite in amah umcih a, thu lianpipi tawh Paul a mawhsakna uh tampi gen uh a, ahi zongin a mawhsaknate uh man hi, ci-in a lahtel theih uh bangmah om lo hi. Paul in, “Jew mite’ Thukham ahi a, Rom gam uk kumpipa tungah ahi zongin ka khialhna bangmah om het lo hi,” ci-in a kisut hi. Jew mite’ pahtak ding ut ahih manin Festas in Paul kiangah, “Jerusalem khua-ah va pai-in, keima mai mahah hih thute tawh kisai-in thusitna hong kinei leh na ut hiam?” ci-in a dot ciangin Paul in, “Keimah thu hong kisit nading munin a kilawmna, gam uk kumpipa thukhenna mai-ah ka va ding ding hi. Nangmahmah in zong teltakin na theih ding bangmahin Jew mite tungah bangmah siatna ka bawl kei hi. Thukham palsatin sihna thuak nading thu khat peuhpeuh a gamta hi leng, suahtak nading thu ka gen het kei ding hi. Hih amaute’ hong mawhzonnate a man lo ahihleh zong kuamah in amaute’ khut sungah hong ap zo lo ding uh hi. Gam uk kumpipa tungah a zu ka khan hi,” ci-in a dawng hi. Tua ciangin Festas in, “Gam uk kumpipa tungah a zu khan khin na hih manin ama kiangah na pai ding hi,” a ci hi. Tua zawh tawlkhat khit ciangin gam uk kumpipa’ khutnuai mahah a uksawn Agrippa le a sanggamnu Bernis, a hong tung thak Festas kiangah a hawh dingin Sisaria khua-ah a hong pai uh hi. Tawlkhat a taam khit uh ciangin Festas in tua kumpipa’ kiangah Paul’ thu gen a, “Feliks in thong sunga a na nusiat mi khat hih lai-ah a om hi. Jerusalem khua-ah ka va pai ciangin Jew siampi liante le upate in amah a mawhsakna uh thu tampi gen uh a, amah mawhsakin thu ka khen nading hong gen uh hi. Ahi zongin ke’n ka dawnna-ah, ‘Mi khat peuhpeuh in mawhsakna a thuak ciangin, mawhsakna a thuak pa le a mawhsakte maitang kimu-in thu kisel a, mawhsakna a thuak pa in amah a kiphel theih nading thugenna hun a ngah matengin, mawhsak thukhenna piak ding pen Rom ngeina hi lo hi,’ ka ci hi. Ka cih mah bangin hih lai-ah amaute a hong tun uh a zing ciangin thukhenna tokhom tungah tu pahin, a mipa hong kipaipih nadingin thu ka pia hi. Alangte hong ding uh a, a mawhna a lianpipi hong gen ding uh hi, ci-in ka up leh, tua bang hong hi lo hi. Amau’ thu kituhna pen amau’ biakna thu, le a si khinsa hinapi-in Paul in, ‘Hing hi,’ a cih Jesuh’ thu peuh na hi lel hi. Hih bang thu ka kankhiatna dingzia thei lo ka hih manin Paul kiangah, ‘Hih thute tawh kisai-in thu kisit dingin Jerusalem-ah va pai lecin na ut hiam?’ ci-in ka dot leh amah ut lo hi. Amah in a zu khan a, thong mahah kikoih lai-in gam uk kumpipa in ama thu a khensak nading a ngen hi. Tua ahih manin gam uk kumpipa kiangah ka puakkhiat theih mateng thong sungah a khum nadingun thu ka pia hi,” a ci hi. Tua ciangin Agrippa in Festas kiangah, “Kei mahmah in hih mipa’ thugen zanuam ing,” a cih ciangin, “Zing ciangin na za ding hi,” ci-in a dawng hi. Tua ahih manin a zing ciangin a thupi takin lian bawl mahmahna tawh Agrippa le Bernis hong pai uh a, galkapmangte le khuasung uliante tawh kikhopna inn lianpi sungah a hong lut uh hi. Tua ciangin Festas in Paul hong kitumpih nadingin thu a pia hi. Tua ciangin Festas in, “Kumpi Agrippa le hih lai-a om mi khempeuh aw, hih lai khua hitaleh Jerusalem khua-ah hitaleh Jew mi khempeuh in kei tungah amah mawhsakna thu hong gen uh hih mipa na mu uh hi. Hih mipa hinkhawi ding kilawm lo hi, ci-in amaute awnggawp uh hi. Ahi zongin sihna thuak nadingin ama gamtat khialhna bangmah ka mu het kei hi. Amahmah in gam uk kumpipa tungah a zu khan khin ahih manin kumpipa kiangah puak dingin ka ngaihsutsa ahi hi. Ahi zongin kumpipa tungah bangteng taktak gelh ding cih ka thei kei hi. Tua ahih manin ama thu a kikan khit ciangin ka gelh ding thu ka theih nadingin note mai-ah, a diakdiakin kumpipa Agrippa mai-ah amah kong paipih hi. Bang hang hiam cih leh ama mawhna hih bangteng hi, ci-in gentelna om lopi-in thongkia mi khat, kumpipa kiangah ka puak ding, a thu kicing ka sa zo kei hi,” a ci hi. Tua ciangin Agrippa in Paul kiangah, “Tu-in thugen theih nading hun na nei hi,” ci-in a gen ciangin Paul in a khut zanin a kiphel nading thu hong gen a, “Kumpi Agrippa aw, Jew mite in kei hong mawhsakna thu ka kiphelna dingin nangma mai-ah tuni-in hun ngah ka hih manin hampha ka kisa mahmah hi. Nangmah in Jew mite’ nuntakzia le amau’ thu kituh theihna thute khempeuh limtakin na theih khitsa ahih manin hampha ka kisa diak hi. Tua ahih manin lungduai takin ka thugente nong ngaih nadingin ka hong thum hi. “Jew mite khempeuh in ka neutung a kipan, keima pianna gam le Jerusalem khua-a ka omzia khempeuh hong thei uh hi. Kote’ biakna sungah a hahkat phadiak Farisi pawl a kicite sunga ka om cil a kipanin ka nuntakzia khempeuh, a gennop nak-uhleh hong genthei ding uh hi. Bang hangin no Jew mite in Pasian in misite a thawhkik sakna thu um thei lo na hi uh hiam? “Nazareth khuami Jesuh’ min a siattheih nadingin langpangin nial ding hi, ci-in kei mahmah in ka ngaihsun ngei hi. Tua mah bangin Jerusalem khua sungah ka sempah a, siampi liante tung panin thu ngahna tawh Pasian’ mi tampi thong sungah ka khum hi. Tua mite a sih nadingun thu a kikhen ciangin zong a thukimpih pawl ka hi hi. Kikhopna inn khempeuhah amaute gim ka thuaksak zelzel a, a thu upnate uh ka khawlsak hi. Amaute tungah hehlua mahmah ka hih manin gamdang nangawnah pai-in thu umte ka bawlsia hi. “Hih thu hang mahin siampi liante tung panin thu ngahna lai tawh Damaskas khua-ah ka va pai hi. Tua hi a, kumpipa aw, Damaskas khua ka tunma sun laitakin kei leh ka tonpih mite’ kiimah sun sangin a taangzaw khuavak khat vantung panin hong taangzaih hi. Ka vekpi-un leilakah ka puk uh a, tua laitakin kei kiangah Hebru pau tawh thu hong kigen a, ‘Saul, Saul aw, bang hangin kei hong bawlsia na hi hiam? Bawngtal in a hawlte’ ciangzum peek le na a sakzawk bangin kei’ thu nong nial manin nang a dingin nazaw hi,’ hong ci hi. ‘Topa aw, kua na hi hiam?’ ci-in ka dot ciangin Topa in, ‘Na hong bawlsiat Jesuh ka hi hi. Tu-in tho-in na khe-in ding in. Keima na a sem dingin a hong sawl dingin nang tungah a hong kilang ka hi hi. Tuni-a kei nong muhna thuteng le nang tungah ka hong lah lai ding thu khempeuh, midangte tungah a gen ding na hi hi. Israel mite le Gentail mite lakah nang kong sawl ding a, amaute in nang hong suksiat loh nadingun ka hong kem ding hi. Pasian’ teel mite’ omna mun a amau om nading mun sanah hong om theih nadingun keimah hong upna uh tawh a mawhna uh a kimaisak theihna dingin Satan’ khutsung panin Pasian’ khut sungah a heikhia ding le khuamial panin khuavak lamah hei-in a mit uh khua a musak ding pa na hi hi,’ a hong ci hi. “Tua bang hi a, kumpi Agrippa aw, ka maangmuhna sunga vantung pana hong pai pa’ thugen ka mang hi. Mite a mawhna uh panin kisikin Pasian kiang a zuat nading uh le a kisikna uh a kilatsak nadingun a gamtat ding uh a masa-in Damaskas khua-ah thu hilhin, a zomin Jerusalem khua-ah, tua ciangin Jew mite omna gam khempeuh le Gentail mite lakah thu ka hilh hi. Hih bangin ka thuhilhna hangin biakinn sungah ka om laitakin Jew mite in hong manin thah hong sawm uh hi. Ahi zongin Pasian in tuni ciang dong hong huh ahih manin milian mineu, a kuamah peuh tungah thu a hilh ka hi hi. Keima thuhilhte pen kamsangte le Moses in hong tung ding hi, ci-in a gen thute mah ahi hi. Tua thu in: Khrih pen sihna thuakin a hingkik masa pa hi ding a, Jew mite le Gentail mite tungah hotkhiatna khuavak thu a hong gen pa hi ding hi, cihna thu ahi hi,” a ci hi. Hih bangin amah kiphelna thu Paul in a gen ciangin Festas in, “Paul aw, mihai na hita hi. Na pil sinnateng in mihai hong suaksak ta hi,” ci-in nakpitakin a kiko hi. Ahi zongin Paul in, “Menzi Festas aw, mihai ka hi kei a, lungsim pilin thuman a gen ka hi hi,” ci-in a dawn khit ciangin, “Kumpi Agrippa aw, hih thu khempeuh na theihsa ahih manin nangma mai-ah hangtakin thu ka gen ngam hi. Hih thu pen kuama theih lohna munsimtham a thupiang hi lo ahih manin, a vekpi-in theikhin dingin ka hong um hi. Kumpi Agrippa aw, kamsangte’ thugente um hi lo na hi hiam?” a ci hi. Tua ciangin Agrippa in Paul kiangah, “Hih hun tomno sungin Khristian hong suaksakzo dingin kingaihsun na hi hiam?” a cih ciangin Paul in, “Nangmah a kipan tuni-a ka thugen a za mi khempeuh hun tomno sung ahi a, hunsau sungin ahi zongin, hih bangin sikkhau hong kikhihna simloh, keimah nong batkim nadingun Pasian kiangah thu ka ngen hi,” a ci hi. Tua ciangin kumpi Agrippa le menzi Festas hong ding uh a, Bernis le a tutpih midangte zong hong ding khia uh hi. Amaute a paikhiat khit uh ciangin, “Hih mipa in thongkiat nading ahi a, sih nading ahi zongin a thuak nadingin bangmah om lo hi,” a kici uh hi. Tua ciangin Agrippa in Festas kiangah, “Gam uk kumpipa Sisar’ tungah a zu na khan khin hikeileh khah ding hi lel hi,” a ci hi. Italy gamah teembaw tawh ka pai ding uh thu a khenkhit uh ciangin Paul le thongkia dangte pawlkhat, “Kumpipa’ Galkapte,” a kici Rom galkapte a uk bu Julias’ khut sungah a ap uh hi. Adramittium khua teembaw khawlna panin Asia gam lam manawh dingin a kithawi teembaw-ah tuangin ka ding khia uh hi. Masedonia gam Thesalonika khuami Aristarkhas in zong kote hong zui hi. A zing ciangin Sidon khua ka tung uh a, Paul tungah bu Julias dik mahmah ahih manin a lawmte tawh a kimu ding le a lawmte in a kisapnate a piaktheih nadingin a paikhiasak hi. Tua lai panin ka ding leuleu uh a, huih in hong maiphut ahih manin Saipras tuikulh pang beelin ka pai uh hi. Silisia le Pamfilia gam tawh a kizom tuipi kantanin ka pai uh a, Lysia gam Myra khua ka tung uh hi. Tua lai panin bupa in Alexandria khua pan Italy gam a manawh ding teembaw khat hong mu ahih manin tua teembaw tungah kote hong tuangsak hi. Tua lai panin ni tampi sung damdamin ka pai uh a, haksapipi-in Nidas khuapi santak ka tung uh hi. Tua lai panin ka paisuaknop uh hangin huih kiphuzo nawn lo ahih manin Krete tuikulh beelin ka sukpai uh a, Salmone leidawk gei tawnin ka paisuak uh hi. Tuipi gei neh cintenin ka pai uh a, Lasia khua tawh a kigamla lo, Khawlmun Nuam a kici khua khat, haksapipi-in ka tung leuleu uh hi. Tua lai-ah ni tampi sung taam ka hih manun Mawhmaisak Ni hun nangawn khengkhin ahih manin teembaw tawh pai lai ding lauhuai ta hi. Tua ahih manin Paul in amaute kiangah, “Lawmte aw, tu-in teembaw tawh khualzin ding lauhuai ta a, teembaw le a vanpuakte a siat gen loh, mihing mahmah in zong i sihlawh ding lauhuai hi,” ci-in a ngaihsutna a gen hi. Ahi zongin galkap bupa in Paul’ thugen sangin teembaw ukpa le teembaw nei pa’ thugen umzaw hi. Phalbi hun sungteng tua ka khawlna mun uh belh dingin hoih lo ahih manin, mi tampite’ ngaihsutna-ah, paikhia-in ahih theih le Foenik teembaw khawlna ciang tunzawh nading hanciam ding hoihsa uh hi. Tua lai mun pen Krete tuikulh-ah teembaw khawlna khat hi a, khang nitumna pan sak nitumna lam a nga teembaw khawlna ahih manin phalbi hun sungteng nuamtakin tua lai-ah a ki-om thei ding ahi hi. Leitaw lam panin huih hong nun’ hiauhiau ciangin ei’ deihna bang hi, ci-in ngaihsun uh ahih manin teembaw khihna sikkawipi kaikhiato uh a, Khawlmun Nuam panin Krete tuikulh a kineh thei zahzahin nehkawmin ka pai uh hi. Ahi zongin a sawt kihal loin, “Leilu Nisuahna Huihpi,” a kici huihpi hat mahmah khat tuikulh lam panin hong nung hi. Teembaw hong mutgawpsak ahih manin nangzo nawn lo a, cih nading kithei nawn lo ahih manin ama hong mutna tuipi lamah ka zui lel uh hi. Kauda tuikulh leitaw lampang san ka tun uh ciangin tua tuikulh in huihpi tawm khat hong dal ahih manin, teembaw tawh a kikhihkhawm gunkuang a siatloh nadingin haksapipi-in ka huzo uh hi. Teembaw tungah gunkuang a koih khit uh ciangin, teembaw a kitapkhak leh cihna-in a kimkotah khauhual tawh a gak uh hi. Libya gam tui daina sehnel lakah awk kha ding, ci-in lau uh ahih manin teembaw puanzaak khiasuk uh a, huih mutna tawh damdamin a paisak uh hi. Huihpi dai thei tuan lo ahih manin a zing ciangin teembaw puak vante tui sungah a lawnkhia uh hi. A thai ciangin teembaw vanzatte pawlkhat, a khut mahmah uh tawh tui sungah khia leuleu uh hi. Ni tampi sung ni ahi a, aksi ahi zongin mu loin huihpi nakpitakin hong nung tawntung ahih manin suahtak zawh nading lametna peuhmah om nawn lo hi. Teembaw hawlte an ne loin sauveipi a omkhit uh ciangin amaute mai-ah Paul hong ding a, “Lawmte aw, keima thugen hong mangin Krete tuikulh panin a paikhia lo hi lehang, hih siatna le supna khempeuh tawh i kipelh ding hi. Ahi zongin tu-in note lunghimawh kei un. Teembaw sia bek ding a, mihing a si kuamah om lo ding hi. Bang hang hiam cih leh kei tawh a kipawl ka biak Pasian’ vantungmi, tuzanin ka kiangah hong pai a, ‘Paul aw, lunghimawh kei in. Gam uk kumpipa mai-ah na ding ding a, Pasian in nang hong hehpih ahih manin nang le na khualzinpihte khempeuh na suakta ding uh hi,’ hong ci hi. Tua ahih manin lawmte aw, kuamah lunghimawh kei un. Kei tungah hong gen bangin hong piangsak ding hi, ci-in Pasian ka muang hi. Tuikulh gei khat peuhpeuhah huih in hong tun hamtang ding hi,” a ci hi. Tua bangin huihpi’ mutin Mediterranean tuipi tungah teembaw tawh ka laam zawh uh a zan sawm le li zankim laitakin lei tawh kinaita hi hang, ci-in teembaw hawlte in a ummawh uh hi. Khau mongah sik khihin tui thukna a teh uh ciangin pi za le sawmnih thuk a, a den zek ciangin teh leuleu-in pi sawmkua a thuk hi. Ka teembaw uhleh suang a kitahkhak ding lau uh ahih manin teembaw nunglam panin teembaw khawlsakna sikkawipi li khiasuk uh a, khuavak ding ngakin ka om uh hi. Teembaw panin teembaw hawlte taikhiat sawm uh ahih manin teembaw tung panin gunkuang khiasuk uh a, teembaw mailam panin a khawl nading sikkawipi a khiasuk ding kineih uh hi. Ahi zongin Paul in galkap bupa le galkapte kiangah, “Teembaw hawlte teembaw tungah hong om nawn kei leh na suaktazo kei ding uh hi,” a ci hi. Tua ahih manin galkapte in gunkuang a kikhihna khau sattatin a khahkhia uh hi. Khua a vak kuan ciangin mite in an a nek nadingun Paul in hanthawn a, “An ne lo tui dawn loin lungkhamin na omzawh uh tu-in ni sawm le li a phak ni hi ta hi. An na nek nadingun ka hong thum hi. An ne loin na nungta zo kei ding uh hi. Tutungin bangmah na ci peuhmah kei ding uh hi,” a ci hi. Hih bangin thu a gen khit ciangin Paul in anlum la a, amaute khempeuh mai-ah Pasian tungah a lungdamna ko-in a anlum balnenin ne dingin a kipan hi. Amaute khempeuh zong a lungsim uh hong nuam a, an a ne ciat uh hi. Tua teembaw sunga om mi a vekpi-in zanih le sawmsagih le guk ka pha uh hi. Mi khempeuh in an a kinek khit ciangin teembaw a zan nadingin a sunga mangbuhte a lawnkhia uh hi. Khua hong vak ciangin koi lai gam hiam, cih teembaw hawlte in thei tuan lo uh hi. Ahi zongin tuidawk le a gei-a leilak mu uh a, ahih theih leh tua lai-ah teembaw khawlsak dingin a ngaihsun uh hi. Tua ahih ciangin teembaw khihna sikkawipi khaute sattatin tui sungah khiasuk uh a, teembaw heina a kizang sing peekpi khihna khaute zong a sut uh hi. Tua ciangin huih in hong mutin tui gei lamah ka pai theih nadingun a mailam a teembaw puan a sang khai uh hi. Ahi zongin teembaw in sehnel hong phukha-in a tum hi. Teembaw mailam lei sungah tumin taang thei nawn lo a, teembaw nunglam pen tuihual in hong satkham gawp hi. Thongkia mi khempeuh tui peekin a taimang ding uh lau uh ahih manin galkapte in thongkiate thah a sawm uh hi. Ahi zongin galkap bupa in Paul suaktasak nuam ahih manin tua bangin a thah ding uh a kham hi. Tua ahih manin tuipeek thei khempeuh in teembaw panin a nawlah tui va peekin, adangte in teembaw sing kitamte lenin a om nadingin thu a pia zaw hi. Tua bangin ka vekpi-un tui gei-ah ka suakta uh hi. Leilak ka tunkim khit uh ciangin tua mun pen Malta tuikulh ahihna thu ka thei uh hi. Tua lai-a teng mite ko tungah hong nuam mahmah uh hi. Guahzu-in khua dam mahmah ahih manin meiphualpi hong cihsak uh a, limtakin zin hong do uh hi. Paul in singkang pawlkhat khawmin meipi tungah hong koih a, a mei sa sa ahih manin gul khat hong taikhia-in Paul’ khut a vial hi. Tua lai-a teng mite in Paul’ khut tunga gul kivial a muh uh ciangin, “Hih mipa pen mi that hi takpi ding hi. Hih tuipi lauhuai panin a suahtak hangin a thuman pasian in hingsak tuan lo ding hi,” ci-in khatlekhat a kikum uh hi. Ahi zongin Paul in meikhuk sungah tua gul singkhia a, bangmah a ci kei hi. Paul pen a ci hong bawkgawp ding hi. Tua ahih kei leh zong hong si-in pukgawp ding hi, ci-in um uh ahih manin a en gige uh hi. Ahi zongin sauveipi enenin, Paul tungah thu lamdang a piang bangmah a muh loh uh ciangin a lungsim uh kikheel a, “Hih mipa pen pasian ahi hi,” a ci leuleu uh hi. Tua lai panin a gamla lo mun khatah tua tuikulh hausa pa Publias’ lo a om hi. Amah in limtakin kote zin hong do a, ni thum sung ama zinin ka om uh hi. Publias’ pa cisa nat leh gilsan thuahin cina-in lupna tungah a lum hi. Paul zong ama lupna-ah va pai-in thu ngetsak a, a tungah a khut nga-in a damsak hi. Hih bangin a damsak khit ciangin tua tuikulh tunga om cina dang khempeuh zong hong paipih uh a, Paul in amaute a damsak hi. Amaute in na tampi tak hong pia uh a, teembaw tungah ka tuankik uh ciangin lamkal a zat ding a kisam khempeuh hong puak uh hi. Tua lai-ah kha thum ka omkhit uh ciangin Alexandria khua panin a hong pai, tua tuikulh tungah phalbi sung a taam, “Pasian Nih,” lim a kisuang teembaw tungah ka tuang leuleu uh a, Sirakus khua ka tun uh ciangin tua lai-ah ni thum sung ka taam uh hi. Tua panin pai leuleu-in Regium khua ka tung uh hi. A zing ciangin leitaw lam panin huih nun ding hong kipan a, ni nih sungin Puteoli khua ka tung uh hi. Tua khua-ah thu um mi pawlkhat tawh ka kimu uh a, nipikal khat sung hong taam un, ci-in hong kho uh hi. Tua bang danin Rom khua ka tung uh hi. Rom khua-a om ulenaute in kote’ thu na za uh ahih manin pawlkhat in, “Appias Sumbuk,” ciang dong hong dawn uh a, pawlkhat in “Ansai Thumna,” ciang hong ban uh hi. Paul in amaute a muh ciangin Pasian tungah a lungdamna ko a, a lungsim hong nuam mahmah hi. Rom khua ka tun khit uh ciangin Paul pen ama ututna-ah a om theih nadingin thu kipia a, a taikhak loh nadingin galkap khat bek kicingsak hi. A tunzawh ni thum khit ciangin Paul in Jew makaite sam a, amaute hong kikhop ciangin amah in, “Ute naute aw, i mipihte tung ahi a, i pu i pate’ ngeina tawh kisai-in ahi zongin khialhna bangmah nei lo napi-in Jerusalem khua-ah hong kimanin thongah hong kikoih a, Rom kumpite’ khut sungah hong ki-ap hi. Kei thu hong sit uh ciangin sihna ka thuak nading thu bangmah om lo ahih manin hong khahkhia nuam uh hi. Ahi zongin kei hong kikhah ding thu-ah i Jew mipihte a lungkim loh uh ciangin i mipihte tungah mawhsak nading thu bangmah ka neih loh hangin gam uk kumpipa Sisar tungah a zu ka khan loh hong phamawh hi. Israel mite in a lamet uh mipa’ hangin sikkhau khihna thuakin thongkia mi ka suak hi. Hih thute khempeuh note kiangah hong gennuam ka hih manin a hong samsak ka hi hi,” a ci hi. Tua ciangin amaute in, “Judea gam panin nangma thu tawh kisai-in lai bangmah ka ngah kei uh a, tua gam panin a hong pai i mipihte tung panin zong nang hong kimawhsakna kam ahi zongin bangmah ka za kei uh hi. Ahi zongin tu-a nangma kipawlna mite’ thu pen a koimah peuhah mi khempeuh in gensia uh ahih manin nangma ngaihsutna taktak ka zanuam uh hi,” a ci uh hi. Tua ahih manin Paul tawh a kimuh nading uh a ni khat seh uh a, tua a kiciam ni-un Paul a zintunna munah Jew mite tampi tak a kikhawm uh hi. Paul in zingsang a kipan nitak dongin amaute tungah Pasian’ Ukna thu gentel a, Jesuh’ thu man hi, ci-in a uptheih nadingun Moses Thukham le kamsangte’ laigelhte siksanin a gen hi. Pawlkhatte in Paul’ thugente um uh a, ahi zongin pawlkhat in um lo uh hi. Tua ciangin Paul in, “Tua ahihleh tu-in Gentail mite tungah Pasian’ hotkhiatna thu kigen ta ding hi. Amaute in um ding uh hi. Hih thu hoihtakin thei un,” ci-in a thugenna a khum hi. (Paul in hih thu a gen khit ciangin Jew mite khatlekhat kitawng gawpin a ciah uh hi.) Paul kum nih sung ama saptawm inn sungah amah bekin om a, ama kiangah a hawh khempeuh tawh thu a kikum hi. Amah in Pasian’ Ukna thu le Topa Jesuh Khrih’ thu, hangtakin a ututin genin a hilh hi. Pasian kiang panin a hong pai Lungdamna Thu a hilh dingin Pasian’ teelna tawh sawltak ahi, Jesuh Khrih’ sila keimah Paul in lai ka hong khak hi. Pasian in kamsangte tungtawnin hih Lungdamna Thu a gensa hi a, Lai Siangtho sungah a omsa thu ahi hi. Tua thu pen eite’ Topa Jesuh Khrih ahi ama Tapa’ thu ahi hi. Tua Tapa pen leitung silesa lam panin David’ suan hi a, Kha Siangtho thu lamsangah ci lehang misite lak panin vangliatna tawh a thawhsakkikna hangin Pasian’ Tapa ahihna thu Pasian in a kilangsak hi. Minam khempeuh in ama thu umin a zuihtheih nadingun Khrih hangin sawltak nasep sep theih nading hamphatna thu Pasian in Khrih’ na sep nadingin kote a hong pia hi. Pasian’ sapna za-in Jesuh Khrih tawh a kipawl Rom khua-a a om note khempeuh zong tua minamte sungah a kihel na hi uh hi. Tua ahih manin Pasian in hong it a, ama mi dingin a hong sap, no Rom khua-a a om Khristiante khempeuh tungah lai ka hong khak hi. I Pa Pasian le Topa Jesuh Khrih in note tungah dikna le nopsakna thupha hong tungsak tahen. Jesuh na upna thu uh leitung mi khempeuh in gen belin nei uh ahih manin tua Jesuh hangin Pasian tungah ka lungdamna thu koh belin ka nei hi. Ama Tapa hangin Lungdamna Thu ka lungsim khempeuh tawh hilhin a na ka sep Pasian in hih ka thugente a man taktak ahihna thu hong thei hi. Thu ka nget simin note ka hong phawk tawntungna le ama deihna ahih nakleh khatvei teitei ciangin note kiangah ka hong paitheih nading ka utna thu Pasian in a thei hi. Kha thu-ah note na thahat theih nadingun Pasian in a hong piak thuphate hong genpih nuam ka hih manin note tawh kimuh ding ka ut mahmah hi. Tua bang ka cih ciangin kei’ upna in note hong thakhauh sakin, note’ upna in zong kei hong thakhauh sakin, phattuamna i ngah tuak theih nading ka deihna ahi hi. Khrih sungah sanggamte aw, Gentail midangte lakah thu um mi ka ngah mah bangin note lakah zong ngah ding lametna tawh note kiangah pai ding tam veipi ka geel zel hangin ka hong pai theih lohna thu nong theih ding uh ka ut hi. Nuntakna sang mite le nuntakna niam mite, mipilte le mihaite, a kuamah peuh ka huh ding ka tavuan ahih manin, Rom khua-a a om note tungah zong Lungdamna Thu hilh ding ka lawp mahmah hi. Lungdamna Thu ka muang mahmah hi. Tua thu pen a masa-in Jew mi, tua zomin minam dangte, thu um mi khempeuh a honkhiazo Pasian’ vangliatna ahi hi. Lai Siangtho sungah, “Pasian a upna hangin amah tawh pawlkhat ahi mite nungta ding hi,” ci-in a kigelh mah bangin Pasian in amah tawh a kipawl theih nadingin mite a bawlna zia, lungdamna thu in hong kilangsak hi. Tua pen, a patna panin a tawp dongin upna hang bek tawh ahihna thu hong laktel hi. Mihingte in a mawhna le a gitlohna hangun Pasian’ thuman seelcip uh ahih manin van panin a hehna hong kilang sakin a gimpiakna dingzia hong kilangsak hi. Pasian mahmah in amaute tungah limtakin laktel ahih manin Pasian’ thu teltakin a theih khit uh ciangin a gamtatna uh ahih manin Pasian in gim a pia ahi hi. Pasian in leitung a piansak cil a kipanin a kimu thei lo ama pianzia ahi tawntung vanglianpa le Pasian ahihna thute ama bawlsa nate tung panin teltakin hong kilang hi. Tua ahih manin, “Thei kei ing,” ci-in paulap a zontheih nading uh om lo hi. Amaute in Pasian thei napi-in a zahtak dingun a kilawm bangin zahtak loin, a tungah a lungdam dingun a kilawm bangin lungdam lo uh hi. Amaute in thuhoih ngaihsun nuam lo uh a, a ngaihsutnate uh a mawknapi a suak hi. Amaute pil a kisak mahmah uh hangin a hai mahmah uh ahi hi. A hing tawntung Pasian bia loin, mi, vasa, ganhing, ahih kei leh a bokvak ganhingte tawh a kibang limte a bia zawsop uh hi. Mihingte tua zahta-in hailua uh ahih manin amau ututin a gamtat theih nadingun Pasian in khahkhong vet a, a zumhuai mahmahpi-in a gamta uh hi. Amaute in a man ahi Pasian’ thu um nuam lo uh a, a tawntungin phat dingin a kilawm a Piangsak pa bia loin, Pasian’ bawlsa nate bia-in a zui uh hi. Tu-a bangin hi takpi uh hi. Tua ahih manin amau utna bangin a zumhuaipi-in a gamtat theih nadingun Pasian in a khahkhong hi. A numeite un pasal tawh lupkhop ngeina zang loin a numeipihte mah uh lunggulhin lumkhawm uh a, a pasalte uh zong numei tawh lumkhawm loin pasalte mah lunggulhin lumkhawm uh a, a zumhuaipi-in a gamta uh hi. Tua ahih manin amaute’ gamtatsiatna tawh kituakin Pasian in gim a pia hi. Mite in a man ahi Pasian’ thu ngaihsutin nei nuam lo uh ahih manin amaute’ ngaihsut hoih lo bangin a gamtat theih nadingun Pasian in a khahkhia hi. Tua ahih manin a gamtat dingun a kilawm lopipi-in a gamta uh hi. Siatna nam khempeuh ahi, hoih lohna, huaihamna, khatlekhat kisiatsak nopna, hazatna, mi thahna, kitotna, khemna, a sialam bekbek ngaihsutna, zuau genna, mi gensiatna, Pasian muhdahna, midangte a heh theih a maizum theih nadingin gamtatna, kiphatsakna, kisialhna, thusia bawlna, nu le pate’ thu man lohna, gamtatsiatna, ciampelna, midangte khual lo, hehpihna nei loin, a sia namkim a gamta uh hi. Tua bangin a gamtate in sihna thuak ding hi, ci-in Pasian’ thukhenna thei napi-in, tua bangin amaute a gamtat uh banah, tua bangin a gamtate pakta-in a awi zawsop lai uh hi. Tua ahih ciangin midangte’ thu a khen note pen kuakua hita le-uh cin na suakta tuan kei ding uh hi. Midangte na mawhsakna uh thute mah note zong gamta veve na hih manun, no zong a mawh mah na hi uh hi. Tua bang mawhna a gamtate, Pasian in gim a piak pen a man mah ahihna i thei ciat hi. Midangte a mawhna hangin thu khenin, no zong tua amau mawhnate mah na bawl veve uh ciangin Pasian’ thukhenna tawh kipelh tuan dingin ki-um peuhmah na hi uh hiam? Pasian migi-in thu a diah hithiatna pen na kisikkik theih nading uh a deihna ahih lamtak phawkkha loin, a migitna, a lungduaina, a hong thuaknate neu ngaihsutkha na hi uh hiam? Lungsim khauhin na kisik nop lohna hangun Pasian’ hehna le a manin a thukhenna a hong kilat Ni ding ciangin na gimthuak ding uh a nasia semsem dingin a bawl na hi uh hi. Bang hang hiam cih leh Pasian in mi khempeuh a gamtatna uh tawh kizui-in thukkik ding hi. Pahtakna, minthanna, le hin tawntungna deihin a gamtat hoih tawntung mite tungah Pasian in nuntak tawntungna pia ding a, ahi zongin ama deihna bek zui-in, a gamtat dingin a kilawm bangin gamta loin, a man loin a gamta mite tungah Pasian in ama hehna hangin gimna tungsak ding hi. Jew mi a kipan Gentail mi dongin a gamtat sia mi khempeuh in gimna le lungkhamna thuak ding uh hi. Tua mah bangin Jew mi a kipanin Gentail mi dongin a gamtat hoih mi khempeuh in minthanna, pahtawina, le nopsakna ngah ding uh hi. Bang hang hiam cih leh Pasian in kuamah deidan loin mi khempeuh tungah a kibangin thu a khen hi. Moses Thukham a nei lo Gentail mite a khialh uh ciangin thukham nei lopi mahin siatna thuak uh a, Moses Thukham a nei Jew mite a khialh uh ciangin tua thukham tawh kizui-in amaute tungah thu kikhen hi. Thukham zakna bek hangin Pasian tawh kipawlna a piang hi lo a, thukham sunga Pasian’ genna bangin a gamtate bek Pasian tawh a kipawl thei ahi hi. Gentail mite in thukham a neih loh uh hangin amau’ ngaihsut tawmna tawh thukham’ deihna bang a gamtat uh ciangin tua thukham’ deihna a zui uh hi a, thukham a neih loh uh hangin a gamtat dingun a kilawm amau mahmah in a thei tawm uh ahi hi. Amau’ lungsim sungah thukham’ deihnate omkhin ahihna thu a gamtatna un hong kilangsak hi. Amau mahmah zong khat veivei hoih kisa, khat veivei sia kisa uh ahih manin, amau’ lungsim sungah thukham’ deihnate theihna omkhin ahihna thu, hih amau’ kiphawk tawmna lungsim in nakpitakin hong kitelsak hi. Tua ahih ciangin Pasian in mihingte lungsim sunga a ngaihsutnate uh, Jesuh Khrih thu a khensak Ni ciangin, tu-a ka hong gen bang teekteekin a hong piang ding ahi hi. Tu-in Jew mi ka hi uh, a ci note in thukham suan belin nei-in Pasian na theihna uh na kisialhpih uh hi. Thukham thei na hih manun Pasian’ deihnate na thei uh a, a man le a man lo na khenthei uh hi. Mittawte lam a lak ding, khuamial sunga om mite khuavak a musak ding, mihaite a hilh ding, naupangte a hilh dingte ihi a, thukham sunga om thu khempeuh thei-in i gen khempeuh man mahmah hi, ci-in na kimuang uh hi. Midangte a hilh note in, nomau mah kihilh lo ding na hi uh hiam? “Guta kei un,” ci-in mi hilh napi-in nomau mahmah guta hi lo na hi uh hiam? “Numei tawh mawh kei un,” ci-in mi hilh napi-in nomau mahmah mawh hi lo na hi uh hiam? Milimte mudah napi-in milim biakna inn sunga nate gu hi lo na hi uh hiam? Note in thukham kisaktheihpih napi-in thukham palsatin Pasian’ min na daisak uh hi. Tua ahih manin Lai Siangtho sungah, “No Jew mite’ hangin Gentail mite lakah Pasian kigensia hi,” ci-in kigelh hi. Thukham zui le-uhcin na vun atna uh man nei takpi mah hi. Ahi zongin thukham na zuih kei uhleh na vun atna uh a mawkna a suak ahi hi. Tua ahih manin vun ki-at lo Gentail mite in thukham a zuih nak-uhleh Pasian in vun at mah bangin ngaihsun ding hi lo ahi hiam? Tua ahih manin thukham nei-in vun ki-at napi-in tua thukham a zui lo no Jew mite pen vun ki-at lo thukham a zui Gentail mite in thu hong khen ding hi lo ahi uh hiam? Bang hang hiam cih leh a pualam beka Jew mi hihna le a pualam vun ki-atna lel bek in Jew mi taktak suaksak zo lo hi. Jew mi taktak i cihte pen, a sunglamah Jew mi ahite ahi hi. A vun ki-atna uh lungsim vun atna hi a, kha thu tawh a kisai ahi hi. Thukham zui-in pumpi tung vun atna pawl hi lo hi. Hih bang mite pen mihingte in phat loin Pasian in phatin a pakta hi. Tua ahihleh Jew mite in Gentail mite sangin bang hamphatna neizaw a, vun ki-atna in bang phattuamna nei ahi hiam? Lam tampi-ah a phattuamna a om hi. A masa penin, Pasian in Jew mite tungah ama thute a gen hi. Ahi zongin Jew mi pawlkhatte in Pasian’ thuciamna zui lo uh hi. Hih mi pawlkhatte’ thu palsatna hangin Pasian in a thuciamna maimangsak dingin ngaihsun na hi uh hiam? Tua bang hi het lo hi. Lai Siangtho sungah, “Thu na gen peuhmah ciangin a man na genna thu mite in hong thei ding uh a, mite in nang hong mawhsakna na genkik ciangin na kiphellah ding khat beek om lo ding hi,” ci-in a kigelh mah bangin mi khempeuh in zuau a gen zongin Pasian in thuman gen veve ding hi. Pasian a manin gamta ahihna eite’ gamtat khialhna in kilangsak semsem ahih ciangin eite in bang gen ding nei nawn ihi hiam? Pasian in eite gim a hong piak ciangin a thuman lo ahi hiam? (Hih bangin thu ka gen ciangin leitung mihingte’ kammal zat ngeite a zang ka hi hi.) Gim hong piakna-ah a thuman lo hi het lo hi. A thuman lo hi zenzen leh bangci-in leitung mi khempeuh’ thu khenthei ding ahi hiam? Keima zuautatna in Pasian a thumanna kilangsakin a min thangsak semsem ahihleh bang hangin mawhnei-in kei hong kiseh lailai ahi hiam? Thupha a pian nadingin gamtat sia gamta ni, ci ding ihi hiam? Mi pawlkhatte in tu-a bang teek mahin gen hi, ci-in hong mawhsak uh a, ka heh theihtheih nadingin kam a pau se uh hi. Tua bang mite in amau thuak dingin a kilawm gimna a thuak ding uh hi. Tua ahihleh Gentail mite sangin ko Jew mite hamphazaw ka hi uh hiam? Bangmah hamphatna nei tuan lo hi ung. Jew mite le Gentail mite a kibangin mawhna khut sungah om uh hi, ci-in ka gen khinzo hi. Lai Siangtho sungah zong, “Pasian’ muhna-ah mi man kuamah om lo a, a man a thei kuamah om lo a, Pasian tawh kipawl ding a hanciam kuamah om lo hi. Kuamah in Pasian ngaihsutna nei lo uh a, na-a kimang kuamah om lo a, a hoih gamtat kuamah om lo hi. A kam uh tawh mi that uh a, a kam uh tawh zuauthu gen uh a, a kampaute uh gulgu tawh kibang hi. A kam uh tawh mi samsia uh a, gitlohna bek tawh a kidim uh hi. Mi that pakpak uh a, a paina khempeuh uhah lungkhamna a piangsak uh hi. Nopna a pian nadingin gamta ngei lo uh a, Pasian zahtak ding ngaihsutin nei lo uh hi,” ci-in a kigelh hi. Tua ahih manin kuamah in paulap a zon theih loh nading le mi khempeuh in Pasian’ thukhenna a thuak theih nadingin Thukham a nei mite khempeuh in tua Thukham a zuih ding uh ahihna thu i thei hi. Thukham in mihingte a mawhna kilangsak thei bek ahih manin thukham zuihna hangin kuamah in Pasian tawh kipawl theihna ngah zo lo hi. Ahi zongin tu-in thukham zuihna hang hi loin thudang khat hangin Pasian tawh kipawl theih nading lampi hong kilangzo a, Thukham le kamsangte in zong hih thu-ah teci a pang uh hi. Tua thu in: Jew mi le Gentail mi kuamah a kilamdanna om loin Jesuh Khrih upna hangin mi khempeuh in Pasian tawh kipawl theihna a ngah hi. Mi khempeuh mawh ciat uh a, a hong honkhia Pasian tawh kigamla uh hi. Ahi zongin Pasian in a hong hehpihna hangin Khrih Jesuh tawh hong tatkhiat manin amah tawh i kipawlthei kik hi. Ama hong sihna hangin mawhna a kimaisak theih nadingin Pasian in Jesuh hong pia a, amah a umte in mawhmaisakna a ngah uh hi. Amah tawh i kipawl theih nading zia hong lahna-in hih bangin Pasian a hong gamta ahi hi. Pasian a lungduaina hangin a beisa hunah i mawhnate hong en khong phot hi. Ahi zongin tuhun ciangin Jesuh a um mi khempeuh Pasian tawh a kipawl theih nading le amah thuman ahihna a kilatsak nadingin mihingte’ mawhna tawh kisai-in na hong sem hi. Tua ahihleh mihingte in i kisialhpih ding bang om ahi hiam? Bangmah om lo hi. Bang bulphuh ding ihi hiam? Thukham zuihna bulphuh ding ihi hiam? Hi lo hi. I upna a bulphuh ding ihi hi. Bang hang hiam cih leh mi khatpeuh Pasian tawh a kipawl theihna pen Thukham zuihzawhna hang hi loin upna hang hi, ci-in i genzo hi. Pasian, Jew mite’ Pasian bek hi a, Gentail mite’ Pasian hi lo ahi hiam? Gentail mite’ Pasian zong hi veve hi. Pasian khat bek hi a, a upna uh hangin Jew mite amah tawh a kipawl thei-in a bawl mah bangin Gentail mite zong a upna uh hang mah tawh amah tawh a kipawl thei-in a bawl hi. Tua ahihleh hih upna thu i gen ciangin Thukham a phiat ihi hiam? Hi lo hi; a kipsak semsem ihi hi. Tu-in eite’ pianna i pupi Abraham’ thu ngaihsun ni. Ama tunga thupiang hih bang ahi hi: Abraham in a sepna hangin amah tawh a kipawl dingin Pasian in sang hileh Abraham in kisialhpih ding thu a nei ahi hi. Ahi zongin Pasian’ mai-ah Abraham a kisialh nading bangmah thu om lo hi. Bang hang hiam cih leh Lai Siangtho sungah, “Abraham in Pasian um a, tua a upna hangin Pasian in mihoihin a sang hi,” ci-in kigelh hi. Na a sem mipa a sep thaman kipia hi. Tua a nasepna thaman pen a thalawhsa ahih manin piakkhongin kingaihsutsak lo hi. Ahi zongin Pasian’ maipha ngah nadingin nasepna suang loin upna a suang mipa pen Pasian in mimawh kimlai midik hi, ci-in sang ahih manin, amah tawh a kipawl theih nadingin Pasian in tua mipa’ upna thupi san hi. Tua ahih manin nasepna hang tawh hi loin Pasian in mi khat midikin a sanna hangin David in zong a lungdamna thu na gen a, “Pasian in a mawhnate maisakin a khialhnate a seelcipsak mite thupha ngah ahi uh hi. Topa in a mawhnate a ciamtehsak loh mipa, thupha ngah ahi hi,” a ci hi. David in a gen hih thupha pen vun ki-atte bek in ngahthei ahi hiam? Hi lo hi; vun ki-at lote in zong ngahthei uh hi. Lai Siangtho in, “Abraham in Pasian um a, tua a upna hangin Pasian in mihoihin a sang hi,” ci hi, ci-in i gen khinzo hi. Hih mihoihin a san bang hun ahi hiam? Abraham a vun a ki-at ma ahi hiam, a ki-at zawh ahi hiam? A vun a ki-at khit hi loin a ki-at ma ahi hi. Abraham a vun a ki-at ma-in a upna hangin Pasian in mihoihin a sanna lahtel nadingin a vun a kinung-at ahi hi. Tua ahih manin vun a ki-at loh hangin a upna uh hangin mihoihin a kisang mite khempeuh a dingin Abraham pen kha thu lamah pupi ahi hi. A vun a ki-at ma-in i pupi Abraham a upna hangin a gamtat mah bangin a gamta, a vun a ki-at mite a dingin zong Abraham pen pupi mah ahi hi. Tua pen vun ki-at lelna hang hi loin upna hang ahi hi. Abraham le a suan a khakte in leitung luah ding hi, ci-in Pasian in thu a ciamna pen Abraham in Thukham a zuihna hang hi loin, a upna hangin Pasian in mihoihin a sanna hang ahi hi. Thukham zuihna hangin Pasian’ thuciamnate a kingah ding hileh mite’ upna pen a kimanna om loin, Pasian’ thuciamnate zong a mawkna suak ding hi. Thukham in Pasian’ heh nading piangsak hi. Ahi zongin thukham om kei leh thukham zui lo cih zong om thei lo hi. Tua ahih manin Abraham’ suanlekhakte khempeuh tungah Pasian’ hehpihna piakkhong a suahtheih nadingin Thukham a zuite bek in ngah loin, Abraham’ up bangin a umte in zong a ngahtheih nadingun upna bulphuhin thuciamna kipia hi. Bang hang hiam cih leh Abraham pen kha thu lamah eite khempeuh’ pupi ahi hi. Lai Siangtho sungah zong, “Minam tampite’ pupi dingin ka hong bawl khin hi,” ci-in a kigelh hi. Tua hi a, bangmah a om nai lopi a thupiakna tawh a omsak thei, a site a hingsak thei, Abraham in a up Pasian’ muhna-ah hih thuciamna kipin a kizang ahi hi. Lai Siangtho sungah, “Na suanlekhakte aksi zahin tam ding hi,” ci-in a kigelh mah bangin tua bang a piantheih nading lametna a om nai lopi mahin Abraham in umin lamen ahih manin minam tampite’ pupi a suak hi. Abraham kum zakhat bang pha dektak ta a, a si dektak ta ahihna le a zi Sarah a ciinna thute a theih hangin a upna kiam tuan lo hi. Amah in Pasian’ thuciamna muanlah dingin ngaihsun lo a, a upna khahsuah het lo hi. A upna hangin thakhauh semsemin Pasian a phat hi. Pasian in a thuciamsa tungsakzo taktak ding hi, ci-in a muang hi. Tua ahih manin, “A upna pen hoihna-in Pasian in a sang hi,” ci-in kigelh hi. “A upna pen hoihna-in kisang,” ci-in a kigelh ciangin ama a’ ding bekin a kigelh hi lo hi. Sihna panin i Topa Jesuh a hingsak pa a um eite khempeuh zong i upna hangin mihoihin hong kisang ding hi, ci-in eite a dingin zong a kigelh ahi hi. Eite’ mawhna hangin a si dingin Jesuh kipia a, Pasian tawh eite i kipawl theih nadingin kihingkiksak hi. Tu-in upna hangin Pasian tawh kipawl khinta ihih manin i Topa Jesuh Khrih hangin Pasian tawh a kilemkik ta ihi hi. Ama hangin upna tawh tu-a i omna Pasian hehpihna sungah a tung ihi a, Pasian tawh minthanna ngahkhawm ding, ci-in lamen ihih manin i lung a dam hi. Haksatna i thuak laitak nangawnin i lungdam veve hi. Bang hang hiam cih leh haksatna in thuakzawh hatna piangsak a, thuakzawh hatna in Pasian’ pahtakna hong ngahsak a, ama hong pahtakna in lametna lianpi hong neisak ahihna thu i thei hi. Pasian in eite tungah a hong piak a Kha Siangtho tawh eite sungah ama itna hong guang ahih manin hih lametna in eite hong lungkiasak ngei lo hi. Eite cimawhin i om laitakin Pasian’ hoihsak hunin ei mi gilote a dingin Khrih hong si hi. Mihoih khat a dingin a si ngam a omkha ahi zongin thukham zuizo mipa a dingin sih ngam nading a thu haksa mahmah khat ahi hi. Ahi zongin eite mawhna nei ihih laitakin eite a dingin Khrih hong si ahih manin Pasian in eite hong it mahmahna thu hong lak khin hi. Ama sihna hangin tu-in Pasian tawh kipawlthei ihih manin Pasian’ hehna hangin gimna panin zong hong suaktasak zaw kan lai ding hi. Pasian tawh eite i kilangneih laitakin ama Tapa’ sihna hangin amah tawh hong kilemsak ahihleh tu-in Pasian tawh kipawl khinta ihih manin Khrih nuntakna in eite hong honkhiazo zaw kan ding hi lo ahi hiam? Tuateng bek hi lo lai a, Pasian tawh hong kilemsak i Topa Jesuh Khrih hangin Pasian tungah i nuam mahmah hi. Mi khat hangin leitungah mawhna hong om a, tua mawhna hangin sihna hong piang hi. Mi khempeuh mawh uh ahih manin tu-a bangzia-in mi khempeuh tungah sihna hong tung hi. Thukham a om mapekin leitungah mawhna na omkhin a, thukham a om lohna munah Pasian in mawhna a ciaptehna laibu nei lo hi. Ahi zongin Adam hun a kipan Moses hun dongin sihna in mite uk a, Adam in Pasian’ thupiak a man loh manin a khialh bangin a khial nai lo mite nangawn sihna khutnuai mah hi veve uh hi. Adam pen a hong pai lai ding mipa’ lim ahi hi. Ahi zongin Pasian’ hong piak letsong pen Adam’ mawhna tawh kibang lo ahih manin tua tegel tehkak theih ding hi lo hi. Tua mi khat a khialhna hangin mi tampi a sihna pen a man mah ahi hi. Ahi zongin Pasian’ hong itna le hong hehpihna nakpitakin lianzaw lai a, mi khat ahi tua Jesuh Khrih’ hehpihna hangin mi tampi tak tungah hong kipia letsong lian mahmah hi. Pasian’ letsong le mi khat’ mawhna a hatna zia kilamdang hi. Khialhna khat a om khit ciangin, “Mawh hi,” ci-in thukhenna kipia a, ahi zongin khialhna tampi tak a om khit ciangin a kilawm lopi mahin, “Dik hi,” cihna piakkhong thupha a om hi. Mi khat bek’ mawhna hangin sihna in hong uk ahihleh mi khat mah ahi Jesuh Khrih hangin nakpitakin a lian Pasian’ hehpihna le mihoih-a sanna a ngah mite nungta-in thahatzaw kan ding uh hi. Tua hi a, khialhna khat in mi khempeuh tungah thukhenna tungsak ahih mah bangin gamtatna hoih khat mah in mi khempeuh khahin nungtasak hi. Mi khat in thu a man loh manin mi tampi mimawh a suahsak mah bangin mi khat in thu a manna hangin mi tampi in Pasian tawh kipawl theihna a ngah ding uh ahi hi. Khialhna a tam semsem nadingin thukham hong kipia hi. Ahi zongin khialhna a tamna munah Pasian’ hehpihna hong lianzaw zel hi. Tua ahih manin mawhna thahatin hong sihsak mah bangin, i Topa Jesuh Khrih hangin Pasian’ hehpihna thahat zaw lai a, mihoihin hong sangin nuntak tawntungna sung a hong tunpih hi. Tua ahihleh Pasian’ hehpihna a liattheih nadingin mawhna bawlbawl ding ihi hiam? Tua bang hi dek lo ding hi. Mawhna thu-ah a si eite in bangci-in mawhna bawl thei nawn ding ihi hiam? Khrih Jesuh tawh i kipawl theih nadingin ama sungah a kiphum eite pen ama sihna mahah zong a sikhawm ihihlam thei lo na hi uh hiam? I Pa’ vangliatna tawh sihna panin Khrih a kithawhkiksak mah bangin eite zong nuntakna thak i nuntak theih nadingin tui i kiphum ciangin amah tawh kiphum khawmin a sikhawm ihi hi. Bang hang hiam cih leh ama sihna-ah sikhawmin pawlkhat i suah leh amah a thawhkikna-ah zong pawlkhat suakin i thokhawm ding hi. Mawhna khutnuai-ah eite i om nawn loh nadingin mawhnopna lungsim i neihnateng i sucip a, singlamteh tungah Khrih a sih laitak mahin i ngeina luiteng a sisak khawm ihihna thu i thei hi. Bang hang hiam cih leh mi khat a sih ciangin mawhna vangliatna panin a suakta ahi hi. Ahi zongin Khrih tawh i sihkhawm leh amah tawh ei zong i hingkhawm ding hi, ci-in i um hi. Bang hang hiam cih leh sihna panin Khrih kihingkiksak khin a, si kik ngei nawn lo ding hi. Ama tungah sihna in vangliatna nei nawn lo hi, ci-in i thei hi. Ama sihna pen mawhna thu tawh kisai-a sihna hi a, sih kikkik kul loin a kuamah peuh zong khatvei bek a kisi ahi hi. Tu-a a nuntakna pen Pasian’ thu tawh kisai-a nuntakna ahi hi. Tua mah bangin note zong Khrih Jesuh tawh kipawlin mawhna thu-ah si-in, Pasian’ thu-ah a nungta-in na kingaihsut ding uh ahi hi. Tua ahih ciangin na pumpi uh deihna na zuih loh nadingun na pumpi uh, mawhna na uksak nawn kei ding uh hi. Mawhna gamtat nadingin na pumpi nate uh khat beek na zang nawn kei ding uh hi. Note pen misi hinapi-in a kihingkiksak mite bang na hih manun, a hoihin a hong zattheih nadingin na pumpi bup uh Pasian’ tungah na piazaw ding uh hi. Note pen thukham’ sawlna hangin nasem hi loin Pasian’ hong lah thuhoihte’ hangin nasem na hih uh manin mawhna’ sawlna mangin na gamta nawn kei un. Eite pen thukham’ uk hi loin Pasian’ hehpihna in hong uk ahih manin mawhna i gamta kei ding hi. Mi khatpeuh’ thu a mang dingin ama khut sungah na kipiak uh ciangin a thu na mante uh’ sila na hi uh hi. Mawhna na bawl uhleh sihna a thuak ding na hi uh a, thumangin na om uhleh Pasian tawh pawlkhat a suak ding na hi uh hi. Nidangin silate bangin mawhna’ thu a mang hinapi-in, tu-in note tungah a hong kipia thuhilhna kipte, na lungsim khempeuh uh tawh zui na hih manun Pasian tungah i lungdam mahmah hi. Mawhna’ vangliatna panin na suakta khinta uh a, a manin a gamta ding mite na hita uh hi. Note’ theihtheih nadingin nisim nuntakna ziate tawh a hong genteh ka hi hi. Nidang lai-in hoih lohna le gitlohna a gamta dingin na pumpi uh na buppiak uh mah bangin, tu-in a man nate a sem dingin na pumpi uh buppiak unla, nuntakna siangtho nei ta un. Mawhna khut sungah na om laitakun Pasian’ deihna bangin na gamtat ding uh kisam lo hi. Ahi zongin, tuhunin gamtat dingin zumhuai na sakte uh, tuahun lai-in na gamtat manun bang thaman ngah na hi uh hiam? Tua na gamtatna thaman uh sihna ahi hi. Ahi zongin tu-in mawhna bawlnopna panin suakta-in Pasian’ khutsung mi na hita uh hi. Tua thu hangin na ngah uh na pen Pasian a dingin a kipia khin nuntakna hi a, a tawntung nuntakna tawh a kizom ahi hi. Bang hang hiam cih leh mawhna in thaman hong piak pen sihna hi a, ahi zongin i Topa Jesuh tawh i kipawl manin Pasian’ hong piakkhong pen nuntak tawntungna ahi hi. Lawmte aw, note khempeuh in thukham thei na hih manun tu-a kong gen dingte na tel mahmah ding uh hi. Mi khat a nuntak sungteng bek thukham in uk thei hi. Gentehna-in, pasal nei numei khat pen a pasal a nuntak sungteng bek, tua thukham in a pasal tawh lencip hi. Ahi zongin a pasal a sih ciangin tua a pasal tawh a lencip thukham panin a suakta hi. Tua ahih manin a pasal a nuntak hun sungin pasal dang tawh a lupkhop leh mi tawh a mawh kici hi. Ahi zongin a pasal a si hileh thukham tawh kisai-in a suakta hi a, pasal dang a tenpih hangin mi tawh a mawh hi lo hi. Sanggamte aw, note zong tua mah tawh a kibang na hi uh hi. Khrih tawh pumkhat na hihna uh hangin thukham tawh kisai thu-ah a sikhin na hi uh a, Pasian’ nasepna-ah eite a man nei i suahtheih nadingin sihna panin a kithokiksak Khrih tawh nupa na hi uh hi. I leitung lungsim tawh i nuntak laiteng, thukham hangin i hihnop semsem mawhnopnate i gamta a, tuate khempeuh sihna tawh a kizom ahi hi. Ahi zongin nidangin a hong lencip thukham panin Pasian in eite hong suaktasak khin ahih manin tua thukham tawh kisai-ah eite a sikhin ihi hi. Lai sungah a kigelh thukham lui sungah nungta nawn loin, Kha Siangtho’ hong piak nuntakna thakah a nungta ihi hi. Tua ahihleh Thukham mahmah pen a siahuai ahi hiam? A sia hi lo hi. Mawhna bang hiam cih Thukham in hong theitel sak hi. Thukham in, “Hazatna lungsim nei kei in,” ci-in gen lo hileh, haza i cih bang ahi hiam, ci-in ka thei kei ding hi. Thukham a omna hangin mawhna in nuamtak sa-in hazatna a tuamtuam ka neihtheih nading hong piangsak hi. Thukham om kei leh mawhna in bangmah sem thei lo hi. Thukham ka theih ma-in mi nungta ka hi ngei a, thukham ka theih ciangin mawhnopna lungsim hong khangin kei ka si hi. Nuntak ngah nadingin a kibawl thukham pen keima a dingin sihna hong hi zawsop hi. Bang hang hiam cih leh thukham a om manin mawhna in nuamtaksa a, kei hong khemin tua thukham tawh a hong that hi. Tua ahih ciangin Thukham mahmah hitaleh thupiaknate hitaleh hoihin man a, siangtho hi. Tua ahihleh a hoih na khat in kei’ sih nading hong piangsak ahi hiam? Hi lo hi. Tua sihna pen mawhna’ nasepna hi a, mawhna pianzia bangci bang taktak hiam, cih a kitheih nadingin a hoih na khat zangin kei tungah sihna a hong piangsak ahi hi. Tua ahih manin thukham a om manin mawhna a siahuai mahmah ahihna hong kilangzaw kan lai hi. Thukham pen i kha thu tawh kisai hi, ci-in i thei hi. Ahi zongin kei pen leitung pumpi tawh a nungta mi ka hi a, mawhna thu mangin a sal a suak ka hi hi. Ka hihnopteng hihkha loin ka hih nop loh tengkeek mah hih zawsop ka hih manin keima gamtatna mahmah zong ka tel thei kei hi. Ka hih nop lohteng ka hih veve ciangin Thukham a deihhuai khat hi, ci-in ka ngaihsutna hong langsak hi. Tua ahih manin tua bangin a gamta taktak pen kei hi loin ka sunga om mawhna hizaw hi. Ka leitung pumpi sungah a hoih na khat beek om lo hi, ci-in ka thei hi. Ka sungah a hoih gamtatnopna lungsim a om hangin ka hihzo kei hi. A hoih ka gamtatnop teng gamta loin, ka hihnop loh siatnate ka gamta zawsop hi. Ka gamtat nop lohteng ka gamtat veve ciangin tua a gamta pen kei hi nawn loin ka sunga om mawhna a gamta ahihna a hong kilang hi. Tua ahih ciangin a hoih gamta nuam hinapi-in a sia bekbek a gamtakha ka hihna ka thei hi. Ka lungsim tawng taktakah Pasian’ thukham hoih ka sa hi. Ahi zongin kei’ deih loh thudang khat in ka lungsimah na hong sem hi. Tua ka sunga na hong sem pen in mawhna thu-ah kei hong mancip hi. Kei pen a lungkham mi ka hita hi. Kei a hong sisak ding hih lungsim lui panin kua in kei hong honkhiazo ding ahi hiam? I Topa Jesuh Khrih in hong honkhiazo ding ahih manin Pasian tungah ka lung a dam hi. Kei’ omzia taktak ahihleh: Ka lungsim tawh Pasian’ thu ka zui a, ka pumpi in mawhna a piangsak thu a zui hi. Ahi zongin tu-in ahihleh Khrih Jesuh tawh kipawlin a nungta mite pen mawhna thukhenna tawh kipelh hi. Bang hang hiam cih leh Khrih Jesuh tawh a hong kipawlsak Kha Siangtho in mawhna le sihna a piangsak thukham panin kei hong suaktasak khinta hi. Mihingte thahat lo ihih manin Thukham in ahih zawh loh thute Pasian in a hihzo hi. Mawhna a beisak theih nadingin mihingte sunga om mawhna tungah thu a khenna-in ama Tapa hong sawl a, amah pen mihingte’ mawhna lungsim mah a nei-in a hong pai hi. Eite’ deihna bangin nungta loin Pasian’ Kha Siangtho’ deihna bangin a nungta eite sungah Thukham’ deihna teng a kicin theih nadingin Pasian in a Tapa a hong sawl ahi hi. Amau pumpi deihna bangin a nungtate, amau pumpi deihna in a lungsim uh a uk hi; Kha Siangtho deihna bangin a nungtate, Kha Siangtho in amau lungsim a uk hi. I ngaihsutna, i pumpi deihna uksak lehang sihna tawh kizom hi; i ngaihsutna, Kha Siangtho uksak lehang nuntakna le nopsakna tawh a kizom hi. Mi khatpeuh in ama pumpi deihna a ki-uksak ciangin Pasian’ thukhamte zui lo ahih manin Pasian’ gal suak a, a zuihnop hangin zong zui thei lo hi. Amau pumpi deihna bangin a gamtate in Pasian lungdamsak thei lo uh hi. Note sungah Pasian’ Kha Siangtho hong om nakleh nomau pumpi deihna bangin gamta loin Kha Siangtho deihna bangin na gamta ding uh hi. Khrih lungsim a nei lote Khrih tawh kipawl lo hi. Ahi zongin note sungah Khrih hong om leh mawhna hangin na pumpi uh a si veve ding ahi zongin, note pen Pasian tawh kipawlkhin na hih manun note a dingin Kha Siangtho pen nuntakna ahi hi. Sihna panin Jesuh a thokiksak Pasian’ Kha Siangtho note sungah hong om leh sihna panin Khrih a hingkik sakpa mah in note sungah a om ama Kha Siangtho mah tawh a sithei pumpi a hong nungtasak ding hi. Tua ahih ciangin lawmte aw, i pumpi deihna bang zui-in gamtat ding a kiphamawh hi lo hi. Na pumpi uh deihna zui-in na gamtat uhleh na si ding uh a, ahi zongin Kha Siangtho huhna tawh na mawh gamtatnate uh na sihsak uhleh na nungta ding uh hi. Pasian’ Kha Siangtho in a makaih mite, Pasian’ tate ahi uh hi. Note tungah Pasian in a hong piak a Kha Siangtho in note na lau nadingun sila-in a hong bawl hi lo a, Kha Siangtho in Pasian’ tate a hong suaksak ahi zaw hi. Tua Kha Siangtho mah in Pasian pen, “Pa aw, Pa aw,” hong ci theisak hi. Eite, Pasian’ tate ihihna thu eima lungsim bek in a gen hi loin Pasian’ Kha Siangtho in zong hong genpih hi. Eite pen ama ta ihih manin mite a dingin a koih thuphate i ngah banah Khrih a dingin a koihte zong i ngahkhawm lai ding hi. Bang hang hiam cih leh Khrih in a thuak mah bangin i thuak nakleh amah a minthan’ mah bangin ei zong i minthang ding hi. Tuhuna i thuaknate pen Pasian in a hong piak ding minthanna tawh ka ngaihsut khawm ciangin gentham ka sa het kei hi. Pasian’ bawlsa khempeuh in Pasian’ tate a hong kilahkhiat hun ding lawp mahmahin a ngak uh hi. Pasian’ bawlsate, amau utthu tawh hi loin siatna a thuak dingin Pasian mahmah in a ngaihsutsa ahi hi. Ahi zongin lametna omlai hi. Pasian’ bawlsate, nikhat ni ciangin muattheih nading thu panin suakta-in Pasian’ tate tawh a nuam suahtakna a ngahkhawm ding uh hi. Tuhun ciang dong Pasian’ bawlsa khempeuh nupi nausuak ding bangin na sa-in a tauna uh i thei hi. Pasian’ bawlsa nate bek hi lo a, Pasian’ hong piakkhong Kha Siangtho maleep a ngah eite mahmah nangawn in zong, Pasian in ama tate-in hong bawlin i buppi-in a hong suahtaksak ding i ngakkawmin thumin tau-in i om hi. Hih bangin lamenin i upna in eite hong honkhia khin hi. Ahi zongin i lamet pen i muh ciangin tua pen lamet hi nawn lo hi. Kua in a muhsa nate lamen nawn ahi hiam? I muh lohte i lamet ciangin lungduaitakin i ngak thei hi. Tua ahih manin eite bangzahin ginalo hitalehang eite a hong huh dingin Kha Siangtho a hong pai hi. Eite in a kilawm bangin thunget ding nangawn i thei kei a, ahi zongin Kha Siangtho mah in tauna tawh eite a dingin a hong thumsak hi. Kha Siangtho in Pasian’ deihna tawh kizui-in Pasian’ mite a dingin hong thumsak ahih manin mihingte’ lungsimtawng thu a thei Pasian in Kha Siangtho’ ngaihsutna a thei hi. Ama deihna bang a sem dingin Pasian in a hong sap, amah a it eite a dingin na khempeuh a hoihlamin piangsak hi, ci-in i thei hi. Pasian’ Tapa mi khempeuh lakah a upa pen a suahtheih nadingin Pasian in a teelkholhsa mite, a Tapa tawh a kibang dingin a sehsa ahi hi. Tua ahih manin ama sap mite a sehsa hi a, a sap mite amah tawh a kipawlin bawl a, amah tawh a kipawlin a bawl mite ama minthanna zong a hawm hi. Hih teng bang ahih khit ciangin bang gen ding om nawn ahi hiam? Pasian in eite hong koppih peuh leh kua in eite hong zozo ding ahi hiam? Ama Tapa nangawn siit loin eite khempeuh a dingin hong piakhia ahih manin, na dang khempeuh zong hong piazaw kan ding hi lo ahi hiam? Pasian in mawh lo hi, ci-in a gen khitsa ahih manin, Pasian’ teelsa mite tungah kua in mawhna guanthei nawn ding ahi hiam? Tua ahih manin kua in amaute tungah thu khenthei nawn ding ahi hiam? Eite a dingin a hong thumsak pa pen Pasian’ taklamah a tu, a sih khit ciangin sihna panin a kihingkiksak Khrih Jesuh hi lo ahi hiam? Tua ahih manin bangin Khrih’ itna tawh hong kikhensakzo ding ahi hiam? Haksatna, lungkhamna, bawlsiatna, gilkialna, zawnna, lauhuaina, sihnate khat peuhpeuh in hong khenzo ding ahi hiam? Lai Siangtho sungah zong, “Note hangin sunthapai-in siat nading lauhuaina ka thuak uh a, gawh ding tuu bangin a hong kibawl hi,” ci-in a kigelh hi. Eite a hong it pa’ hangin hih thu khempeuhah a gualzo pente ihi hi. Bangmah in ama hong itna tawh hong kikhensakzo het lo ding hi, ci-in ka thei hi. Sihna, nuntakna, vantung mite, vantung vangliatnate, tuhun nate le a hong tung ding nate, leitung a om nate, leinuai-a om nate, Pasian’ bawlsa nate khat peuhpeuh in i Topa Khrih Jesuh hangin Pasian in eite hong itna tawh hong khenzo het lo ding hi. Kei, Khrih tawh kipawl ka hih manin zuauthu ka gen thei kei hi. Kha Siangtho lamlahna tawh, ka lungsim kitheihna-ah zuau gen hetloin a mantakin ka gen thu in: Leitung silesa ah ka mipihte a dingin nakpitakin dahin ka lunggimna a khang hi. Hi thei ding hileh amaute’ hoih nadingin keimah in Pasian’ samsiatna thuakin Khrih tawh kikhen nading ciang dong nangawnin amaute ka huhnuam hi. Amaute pen Pasian’ teel Israel mite hi a, Pasian in ama ta-in bawlin a minthanna a hopte, amaute tungah thuciamna bawlin Thukham a piakte, a man taktakin biaktheihna nei-in thuciamna a ngahte, le a thupi pupite’ suanlekhakte hi uh a, leitung silesa tawh kisai-in Khrih zong amau minam sung panin a piang ahi hi. Hih thute hangin mi khempeuh in na khempeuh a uk Pasian phat tawntung ta uh hen! Amen. Ahi zongin Pasian’ thuciamnate a mawkna a suak hi sam lo hi. Bang hang hiam cih leh Israel mi khempeuh Pasian’ teel mi hi khin lo hi. Abraham’ suanlekhak khempeuh zong Pasian’ tate hi kim lo hi. Pasian in Abraham kiangah, “Na ta Isaac’ suanlekhakte bek nangma suanlekhakin kisim ding hi,” ci hi. Tua ahih manin leitung ngeina tawh a suak tate pen Pasian’ ta hi lo a, Pasian’ thuciamna tawh kizui-a a suakte bek suanlekhak taktakin a kisim pan hizaw hi. Bang hang hiam cih leh Pasian in hih bangin thuciamna bawl a, “A hun a tun ciangin kong paikik ding a, Sarah in tapa khat a nei ding hi,” ci hi. Tua bek zong hi lo lai hi. Rebekah in eite’ pupi Isaac tawh tapa nih nei hi. Pasian’ teelna pen a teel mite’ nasepna hang hi loin Pasian’ sapna tawh kisaizaw hi, ci-in a kilat nadingin a tate a sia a pha a gamtat theihma, a suahma pek mahin Rebekah kiangah Pasian in, “A uzaw in a nauzaw’ na sem ding hi,” na ci khinzo hi. Tua mah bangin Lai Siangtho sungah, “Jakob ka it a, Esau ka mudah hi,” ci-in kigelh hi. Tua bang ahihleh Pasian thutang lo hi, a kici thei ding hiam? Kici thei lo ding hi. Bang hang hiam cih leh Pasian in Moses kiangah, “Ka hehpih nopte ka hehpih ding a, ka khasiat nopte ka khasiat ding hi,” ci hi. Tua ahih ciangin mite’ utna le sepna tawh kisai lo a, Pasian’ hehpihna bek tawh kisaizaw hi. Bang hang hiam cih leh Lai Siangtho sungah Pasian in Faro kiangah, “Ka vangliatna lah nading le leitung khempeuhah ka min a kitheih nadingin kong zatnop manin kumpi a hong suaksak ka hi hi,” ci hi. Tua ahih manin Pasian in a hehpih nopte hehpih a, a paupeensak nopte paupeengsak hi. Note in, “Tua bang ahihleh bang hangin Pasian in mi mawhsak thei ahi hiam? Pasian’ cihsa kua in kheelzo ding ahi hiam?” na cinuam kha ding uh hi. Lawmte aw, ahi zongin kua in Pasian’ thu nialngam ding na hi uh hiam? Beel in amah a seekpa kiangah, “Bang hangin tua bangin hong seek na hi hiam?” ci ngei lo hi. Beelseek pa in tungman lomkhat sung panin hun thupi diakin zat ding beel le zat mawkmawk ding beelin a ututin seektheih nading thu a nei hi. Tua mah bangin Pasian in zong a beisa hunah siatna a thuak dingin a kilawm mite susia loin a ki-ipipna mite tungah a hehna le a vangliatna a lahtheih nading thu a neih mah bangin, ama minthanna a lahtheih nadingin ama minthanna a ngah dingin a hong sehsa eite tungah zong ama hehpihna a hong piaktheih nading thu a nei hi. Tua bangin a hong sap eite pen Jew mite sung bek pan hi loin Gentail mite sung panin zong ahi hi. Hosea Lai Siangtho sungah, “Keima mi a hilote, ‘Keima mi,’ ka ci ding a, ka it loh mite, ‘Ka itte,’ ka ci ding hi. ‘Ka mite hi kei uh teh,’ a kicihna leitang teekteek mahah, ‘A nungta Pasian’ tate na hi uh hi,’ kici ding hi,” ci-in kigelh hi. Isaiah in Israel mite’ thu a genna-ah, “Israel mite, tuipi gei-a sehnel zahin a tam hangin mi tawmno khat bek suakta ding uh hi. Bang hang hiam cih leh Topa in leitung mite thu hong khen baih ding hi,” ci hi. Hih thu pen Isaiah mah in, “Vanglian Topa in eite’ suanlekhak ding hong siitsak lo hileh Sodom khua le Gomorrah khuamite i bang ding hi,” ci-in a genkholhsa thu ahi hi. Tua ahihleh Pasian tawh kipawl theih nading hanciamna a nei lo Gentail mite pen upna hangin Pasian tawh kipawlthei a, Pasian tawh a kipawl theih nadingin thukham zuihna tawh hanciam napi-in a zuih zawh lohna hangun Israel mite kipawl thei lo ahihleh a bangci thu ahi hiam? Amaute in upna suang loin nasepna a suan hang uh ahi hi. Amaute pen Lai Siangtho in a gen mah bangin, “Puk nading suang,” a kici tungah a pukkha uh ahi hi. Lai Siangtho in, “En un, keimah in Zion-ah mite a muktuk theih nading, mite a puktheih nading suang khat ka koih hi. Ahi zongin amah a muang mite khempeuh tavai cih om ngei lo ding hi,” ci hi. Sanggamte aw, i mipihte in hotkhiatna a ngah nading deihsakin lungsim takpi tawh Pasian kiangah thu ka ngetsak hi. Amaute in Pasian a kin mahmah lamtak uh thei-in teci-in ka pang ngam hi. Ahi zongin amaute in a man lampi tawh kin kha lo uh hi. Amaute in Pasian tawh kipawl theih nading lampi man thei loin amau theihtawmna tawh hanciam kha uh ahih manin amah tawh kipawl theih nadingin lampi a khun’ zui kha lo uh hi. Bang hang hiam cih leh upna a nei mi khempeuh Pasian tawh a kipawl theih nadingin Khrih in Thukham a beisak hi. Moses in a laigelhna sungah, “Thukham deihna bangin a gamtazo mi khempeuh a nungta ding hi,” ci-in Thukham zuihna hangin Pasian tawh kipawl theih nading thu a na gen hi. Tua bang a cih ciangin, “Pasian’ thu pen nai mahmahin note kam sung le na lungsim sung uhah om hi,” a cihnopna ahi hi. Tua Pasian’ thu pen kote’ hilhhilh, “Pasian um un,” cihna thu ahi hi. Jesuh pen Topa hi, ci-in mite kiangah genin, Pasian in sihna panin amah hingkiksak zo hi, ci-in na lungsim sung uhah na up taktak uhleh hotkhiatna na ngah ding uh hi. Bang hang hiam cih leh i lungsim ah i up taktakna hangin Pasian tawh kipawl theihna kingah a, i kamin i genna hangin hotkhiatna a kingah ahi hi. Lai Siangtho in, “Amah a um mi peuhmah tavai lo ding hi,” ci hi. Bang hang hiam cih leh Jew mi le Gentail mi a kideidanna om lo ahih manin Topa pen mi khempeuh’ Topa hi kim a, ama kiangah a ngen khempeuh tungah thupha tampi tak a pia hi. Lai Siangtho in zong, “Topa tungah huhna a ngen khempeuhte in hotkhiatna a ngah ding uh hi,” ci hi. Ahi zongin a up loh pa uh tungah kua in thu ngen thei ding ahi hiam? Ama thu za ngei kei leh kua in a thu um thei ding ahi hiam? Ama thu kigen kei leh kua in za thei ding ahi hiam? A gen dingin kisawl kei leh kua in a thu gen thei ding ahi hiam? Tua ahih manin Lai Siangtho sungah, “Lungdamna thu a hilh dingin a hong pai mite hangin kinuam mahmah hi,” ci-in kigelh hi. Ahi zongin Isaiah in, “Topa aw, ka thugente uh kua in um ahi hiam?” a cih mah bangin Lungdamna Thu a za mi khempeuh in um kim lo uh hi. Tua ahih ciangin zakna panin upna hong piangthei a, Khrih thu up nading pen hilhna panin hong piangthei pan hi. Tua ahihleh amaute in thu za lo uh ahi hiam? Lai Siangtho sungah, “Amau’ awgingte leitung khempeuh ah kizel a, a thugente uh in mun khempeuh a ban hi,” ci-in a kigelh mah bangin amaute in thu za khinzo uh hi. Tua ahihleh Israel mite in a thei uh hiam? Moses mahmah in Pasian’ min tawh thu na gen a, “Keima mi pawl a hilote thupha pia-in, note’ hazat dingin ka bawl ding a, tua mihaite’ hangin note na heh nadingun ka hong bawl ding hi,” a cih mah bangin Israel mite in a thu a thei lo uh hi lo hi. Tua banah Isaiah in Pasian’ min tawh hangtakin thu na gen a, “Kei hong zong lo mite in kei hong mu uh a, kei hong kan lo mite tungah ka kilak hi,” ci-in na gen hi. Tua ciangin Israel mite tawh kisai-in, “Ka thu a mang lo, kei hong langpang mite tawh ka kilemkik theih nadingin a tawntungin ka hanciam hi,” ci-in a na gen hi. Tua ahihleh Pasian in ama mi Israel-te nialin nusia mangkhin ahi hiam? Tua bang hi dek lo hi. Kei mahmah zong Abraham’ suan Israel mite ka hi a, tua sung panin Benjamin’ suan ka hi hi. Pasian in tanglai panin a teelsa mite nusia lo hi. Elijah in Israel mite mawhsakin Pasian kiangah nakpitakin thu a genna Lai Siangtho sungah a kigelh thei lo na hi uh hiam? Tua sungah, “Topa aw, Israel mite in na kamsangte thatin nangma biakna taute phelin susiagawp uh a, kei bekbek ka omlai hi. Kei nangawn thah hong sawm lai uh hi,” ci-in kigelh hi. Ahi zongin Pasian in, “Baal milim a bia nai lo mihing tulsagih ka nei lai hi,” ci-in a dawng hi. Tua mah bangin tuhunin zong Pasian in ama hehpihna tawh a teelsa mi tawmkhat omlai hi. A teelna ah mite’ nasepna bulphuhin a teel hi loin ama dikna hangin a teel hizaw hi. Pasian in mihingte’ nasepna bulphuhin a teel hileh Pasian’ dikna pen dikna kici thei lo ding hi. A thu omzia taktak hih bang ahi hi. Israel mi a tamzaw in a hanciamciam uh ngah lo uh hi. Pasian’ teel mi tawmkhat bek in ngah uh a, adangte in Pasian’ sapna thudon lo uh hi. Tua ahih manin Lai Siangtho sungah, “Pasian in thu a ngaihsun thei lo, khua a phawk thei loin amaute bawl a, amaute in tuni dongin khua mu thei lo, khua za thei loin a om uh hi,” ci-in a kigelh hi. Tua ciangin David in zong, “Amaute in a pawi bawlnate uh awklawh uh hen la, kiat lawhin gimna ngahlawh uh hen! Khua a muh loh nadingun a mit uh taw hen la, lungkhamna vangik lelin awn tawntung ta uh hen!” ci-in a gen lai hi. Jew mite a puk uh ciangin sia paisuak ahi uh hiam? Sia paisuak lo uh hi. Amau’ mawhna hangin Gentail mite in hotkhiatna ngah uh hi. Gentail mite in hotkhiatna a ngah pen Jew mite in enna lungsim a neihtheih nading uh deihna ahi hi. Jew mite’ mawhna pen leitung khempeuh thupha ngahna suak a, amau’ gitnat lohna pen Gentail mite’ hamphatna suak ahihleh Jew mi khempeuh in hotkhiatna a ngahkim uh ciangin bangzahin hoihkan ding ahi hiam? Tu-in no Gentail mite tungah thu ka hong gennuam hi: No Gentail mite a dingin sawltak ka sep sungteng ka nasep a thupi mahmahin ka ngaihsun ding hi. Bang hang hiam cih leh ka mipihte in note hong entheih nading uh piangsak thei-in, tua manin amaute pawlkhat in hotkhiatna a ngah nading uh piangsakzo kha dingin ka kilamen hi. Amaute a kinialna hangin Pasian tawh leitung mi khempeuh kipawl theihna piang ahihleh amaute a kisan’ hun ciangin a sisate nangawn a hinkikna hong hita ding hi. Anlum a ki-em masa sung panin a themkhat Pasian biakna-in a kipiak ciangin a anlum buppi zong Pasian-a’ mah hi pah a, singkung khat’ zung zong Pasian a kipiak ciangin a hiang khempeuh zong Pasian-a’ mah ahi hi. A kiciing oliv kung a hiangte kisatkhia-in gamlak oliv hiangte tawh kipeh hi. No Gentail-te pen tua gamlak oliv hiangte tawh a kibang na hi uh a, Jew mite’ hamphatna teng a ngahkhawm na hi uh hi. Tua ahih manin oliv hiang a kisatkhia tawh a kibang Jew mite simmawhbawl kha kei un. Note na kiphatsak theih nading uh a thu om lo hi. Note pen a hiang tawh a kibang lel na hi uh a, note in a zungpi a hingsak hi loin, a zungpi in note a hong hingsak ahi zaw hi. Note in, “Eite tawh hong kipeh theih nadingin a hiangte a kisatkhia ahi hi,” na cinuam ding uh hi. Tua pen thuman ahi hi. Amaute in a up lohna hangun a kisatkhia hi a, note in na upna hangun amaute’ munah a om na hi uh hi. Tua ahih manin kiphatsakna lungsim nei kei unla, lamdangsakna tawh om khikhe zaw un. Pasian in oliv hiang ngeite dawm lo ahihleh note hong dawm tuan lo ding hi. Hih thu-ah Pasian a migit mahmahna le a khauh mahmahna i mu hi. A khial mite tungah khauh mahmah a, ama migitna a kizop paisuak theih nadingin na up paisuak nak-uhleh note tungah hong migi mahmah hi. Ahi zongin na zop paisuak kei uhleh note zong hong kisatkhia ding hi. Tua ciangin Jew mite in zong a lungsim uh kheelin Pasian a up uhleh Pasian in a pehkik theih nading vangliatna nei ahih manin amaute zong amau’ mun ngei mahah pehkik ding hi. Note pen na pianngei uh gamlak oliv kung panin hong kisatkhia-in note’ pianngei ahi lo a kiciing oliv kung tungah hong kipehthei ahihleh a kiciing oliv kung panin a kisatkhia tawh a kibang Jew mite pen Pasian in amau omna ngei-ah a pehkik ding olzaw mahmah lai ding hi. Sanggamte aw, note in na theih dingun ka deih thusim khat om hi. Thei le-uhcin, “A pil mahmah hi hang,” na kici nawn kei pah ding uh hi. Tua thu in: Israel mite in a up nop lohna pen a tawntung ding thu hi lo hi. Pasian kiangah Gentail mite a pai dingzah in Pasian a zuat hun ciang dong ding bek ahi hi. Tua hi a, Lai Siangtho sungah a kigelh mah bangin Israel mite khempeuh in hotkhiatna ngah ding uh hi. Lai Siangtho in, “Zion panin Honpa hong pai ding a, Jakob’ suanlekhakte sunga om gitlohna khempeuh maisak ding hi. Amaute’ mawhna ka maisak ciangin hih ka thuciamna ka pia ding hi,” ci-in gen hi. Jew mite in Lungdamna Thu um loin Pasian’ gal ahihna pen no Gentail mite’ hamphat nading hi a, ahi zongin Pasian’ teelna tawh kisai-in a pupite uh tungah a thuciamna huhau-in Pasian’ pawlte mah hi lai veve uh hi. Bang hang hiam cih leh Pasian in a teel mite le thupha a piak mite tawh kisai-in a thu dokkik lo hi. No Gentail mite in a beisa hunah Pasian’ thu na mang kei uh a, ahi zongin Jew mite’ thuman lohna hangin tu-in Pasian’ hehpihna na ngah uh hi. Tua mah bangin amaute’ thuman lohna hangin note in Pasian’ hehpihna na ngahna uh pen Jew mite in zong Pasian’ hehpihna a ngahkik theih nading uh ahi hi. Bang hang hiam cih leh Pasian in mi khempeuh tungah hehpihna a piaktheih nadingin a thuman lohna hangun mi khempeuh thongkia a bangsak hi. Tua ahih manin Pasian’ hong hehpihna nakliat mahmah a, a pilna le a thu theihnate nakthuk mahmah hi. Ama thukhennate kua’ gentheih ding hi lo a, a nasepna ziate kua’ telzawh ding hi lo hi. Tua ahih manin Lai Siangtho in, “Kua in Topa’ lungsim thei ding a, kua in ngaihsutna va pia thei ding ahi hiam? Amah in hong thukkik theih nadingin kuamah in ama tungah thupha va bawl ngei lo hi,” na ci hi. Bang hang hiam cih leh na khempeuh ama piansak hi a, na khempeuh ama hang le ama minthan nading bekin a om ahi hi. Mi khempeuh in Pasian phat tawntung ta hen! Amen. Tua ahih ciangin sanggamte aw, Pasian in eite tam veipi tak hong hehpih ahih manin ama lungkim nading le ama nasep nadingin nomau mahmah a hingtangin Pasian tungah na kipiak nadingun ka hong thum hi. Tua banga kipiakna pen Pasian biakna man taktak ahi hi. Leitung mihingte’ gamtat bangin gamta kei unla, na lungsim uh kikheelin Pasian kipuahphasak un. Tua hileh a hoih nate bang hi a, bangte in amah lungkimsakin, bangte a kicing hiam ci-in thei-in Pasian’ deihna na phawk thei ding uh hi. Pasian in kei tungah hehpihna hong piakkhongna hangin note tungah kong gennop thu in: Note tawh a kituakzah valin kilian ngaihsutzaw kha kei un. Pasian in note tungah upna hong piakzah tawh kizui-in kingaihsun bek zaw unla, a kilawm ciang khat bekin kingaihsun un. I pumpi tungah zong na tampi i nei a, tua nate’ nasep a tuamtuam ahi hi. Tua mah bangin eite mi tampi ihih hangin pumkhat ihi a, pumpi nate bangin khatlekhat a kizom ciat ihi hi. Tua ahih manin Pasian in hehpihna hong piakkhongna tawh kizui-in i siamna a tuamtuamte zang ciat ni. I siamna pen Pasian’ thu gentheih nading siamna ahih leh i upna neihzah tawh kizui-in gen ni. Nasep nading siamna a nei ihih leh na sem ni. Hilh nading siamna a nei ihih leh hilh ni. Midangte hanthot theih nading siamna a nei ihih leh midangte hanthawn ni. Midangte hop theih nading a nei ihih leh citna taktak tawh hawm ni. Makaih theih nading siamna a nei ihih leh hoihtakin na sem ni. Midangte hehpih theih nading a nei ihih leh maitai takin hih ni. Na ki-itnate uh lungsim takpi tawh hi sak unla, a siate mudahin a hoihte lenkip un. Unau ki-itna lungsim nei unla, khatlekhat kizahtak bawl ding lamsang kidem un. Thadah kei unla, nakpitakin na sem un. Lawp mahmahna lungsim tawh Topa’ na sem un. Lamet na neihna hangun lungdamin om tawntung unla, lungkhamna na thuak uh ciangin lungduai-in thu na ngen tawntung un. Na Khristian pihte uh a kisapna bangin na neihsate uh na hawm unla, zin le leengla do a siam mite na hita un. No a hong bawlsia mite, Pasian in thupha a piak nadingin thu ngetsak unla, tua bang mite samsia loin thupha piazaw un. A lungdam mite lungdampih unla, a dah mite dahpih un. Mi deidan loin a kibangin en un. Kiphasak loin mineute tawh kikhawlthei unla, kipilsak se kei un. Midangte’ gitlohnate thukkik kei unla, mi khempeuh in hoih hi, ci-in a ngaihsut ding bangin gamta un. Ahih theih laiteng mi khempeuh tawh na kilem nadingun hanciam un. Lawmte aw, na hehna uh kuama tungah thukkik kei unla, Pasian’ thukkik dingin koih lel un. Bang hang hiam cih leh Lai Siangtho sungah, “Keimah in amaute tungah ka thuk ding a, midangte a gimsak bangun ka gimsak ding hi, Topa in ci hi,” ci-in kigelh hi. Tua ahih ciangin Lai Siangtho sungah, “Na galte uh a gil a kial leh an na pia un. A dang a taak leh tui na pia un. Tua bangin na gamtat uhleh amaute’ maizum nadingin a bawl na hi uh hi,” ci-in a kigelh bangin gamtazaw un. Tua ahih manin gitlohna kizosak kei unla, a pha gamtatna tawh gitlohnate a zo na hi ta un. A kuamah peuh in hong ukte’ thu na mang ciat un. Bang hang hiam cih leh Pasian’ thukimpih lohin kuamah in ukna thu nei lo hi; ukna thu nei i cih mite pen Pasian’ koih mite ahi hi. Tua ahih manin ukna thuneite a nialte pen Pasian’ koihsa mite a nial suak a, tua bang mite in thukhenna a thuak ding uh hi. Bang hang hiam cih leh gam uk mite pen a gamtat hoih mite’ kihtak ding hi lo a, mi tatsiate’ kihtak ding hi bek hi. Ukna thu a neite kihta loin na omnop uhleh a hoihin gamta un. Tua hileh amaute in note hong pakta-in hong phat ding uh hi. Ukna thuneite pen note’ hoih nadingin Pasian’ nasemte ahi uh hi. Ahi zongin a sia-in na gamtat uhleh gim hong pia taktak ding uh ahih manin na lau ding uh ahi hi. Bang hang hiam cih leh amaute pen Pasian’ nasemte hi a, a sia-in a gamta mite tungah Pasian’ hehna bangin gim a pia dingte ahi uh hi. Tua ahih manin Pasian’ gimpiak ding kihtakna hang bek hi loin, ahi ding thu mah hi, ci-a theihna tawh ukna thu a neite’ thu na man’ ding uh ahi hi. Ukna thu a neite in amau’ sep dingteng a kimtakin a sep uh ciangin Pasian a dingin na a semte hi uh ahih manin tua thu hang mahin zong mangmu a pia na hi uh hi. Tua ahih manin phiangsiah piak dingte tungah pia-in, mangmu piak dingte tungah pia-in, zahtak dingte zahtak bawlin, pahtawi dingte pahtawi ta un. Khatlekhat ki-it ding cih lohbuang, kuama tungah leiba nei kei un. Midang a itte in Thukham deihna teng a zuikhin ahi hi. Thukham sungah, “Nulepa mawhna bawl kei in, mi that kei in, guta kei in, hazatna lungsim nei kei in,” cihna le adang khempeuhte pen, “Nang na ki-it bangin na vengte na it in,” cihna thu in huam khinmang hi. Midangte a it mi peuhmah in amaute tungah siatna bawl het lo ahih manin itna i neih ciangin Thukham buppi a zui khinta ihi hi. Tuhun pen bang hun hita ahi hiam, ci-in theita na hih manun tu-a bangin na gamtat ding uh ahi hi. Tu-in note in khua phawkin na khanlawh ding uh hun hita hi. Bang hang hiam cih leh Jesuh Khrih i up cil lai hun sangin tu-in Pasian in leitung haksatna panin eite hong hotkhiat ding hun hong naizaw hi. Zan khuamial bei dektak a, sun khuavak hong tung dektak ta hi. Khuamial sunga gamtatnate khawlin khuavak sunga nazatte zam ta ni. Sun khuavak sunga om mite bangin a kilawmin gamta ni. Gualnopna le zukhamna, mawhna le thangtatna, kitotna le kihazatnate-in i hun beisak kei ni. Kidal nadingin, Topa Jesuh Khrih’ hong piak galhiamte zang unla, na pumpi uh deihna bangin gamtat nading hun omsak nawn kei un. Upna neu mite pawlbawl unla, na ngaihsutna uh a kituah kei leh zong mawhsak kei un. Mi pawlkhat in na khempeuh ka nektheih ding hi, ci-in ngaihsun uh hi; ahi zongin upna neute in anteh bek ne ngam uh hi. Tua ahih manin a ne mite in a tang mite simmawhbawl kei hen la, a tang mite in zong a ne mite simmawhbawl kei hen. Bang hang hiam cih leh a ne mite zong Pasian in a san mite mah ahi hi. Mi khat’ nasemte tungah kua in thu khen thei ding na hi uh hiam? A gina le a ginalo a khen ding pa pen amau’ Topa ahi hi. A Topa un hoih hi, a cih leh a kipsak zawh nading vangliatna nei ahih manin a kip hi lel ding uh hi. Mi pawlkhatte in ni khatpeuh adang sangin thupi zaw hi, ci-in ngaihsun uh a, pawlkhatte in ni khempeuh kibangkim hi, ci-in ngaihsun uh hi. Tua ahih manin a kuamah peuh in amau’ hoihsakna thu ciantakin thei ta uh hen. Ni khatpeuh thupi diak hi, ci-in a tang mite in Topa a pahtawina-in a tang ahi uh hi. An khempeuh a ne mi in zong Pasian’ tungah lungdamna ko-in ne uh ahih manin Topa a pahtawina mahin a ne uh ahi hi. Nek dingin kilawm lo hi, ci-in a ne lo mite in zong Pasian tungah lungdamna mah ko ahih manin Topa a pahtawina mahin a ne lo uh ahi hi. Ama a’ ding bekin kuamah nungta lo a, ama a’ ding bekin kuamah si lo hi. I nuntak leh Topa a dingin a nungta ihi a, i sih leh zong Topa a’ ding mahin a si ihi hi. Tua ahih manin i si a, i hing zongin Topa a’ ihi hi. Hih thu hangin Khrih pen a site le a hingte’ Topa ahih theih nadingin hong si-in hong nungtakik hi. Tua ahihleh bang hangin na Khristianpihte uh tungah thu khen a, bang hangin simmawhbawl thei na hi uh hiam? Thukhenna a thuak dingin Pasian’ mai-ah eite khempeuh a ding ciat ding ihi hi. Lai Siangtho sungah, “Kei pen a nungta ka hih mah bangin ka mai-ah mi khempeuh hong kun ding a, Pasian ka hihna thu mi khempeuh in pulak taktak ding uh hi, Topa in ci hi,” ci-in a kigelh hi. Tua ahih manin a kuamah peuh in i gamtatna ciat Pasian’ mai-ah a va kigentel ciat ding ihi hi. Tua ahih manin khatlekhat kimawhsakin thu kikhen kei unla, i Khristianpihte i puksak khak loh nading, a dongtangsak ihih khak loh nadingin ngaihsun ciat ni. Topa Jesuh tawh kipawlin a lungsim ka theihna tawh, na khat peuhpeuh ama thu-in a dawizek om het lo hi, ci-in teltakin ka thei hi. Ahi zongin mi khatpeuh in dawizek hi, ci-in a ngaihsut leh ama a dingin a dawizek hi pah hi. An khatpeuh na nekna uh hangin na Khristianpihte’ lungnopmawhna na piansak uhleh itna lungsim tawh a gamta na hi nawn kei uh hi. Na an nekna uh tawh, Khrih in a sihlawh mite’ siat nading piangsak kei un. Tua ciangin note in hoih na sak uh thute, midangte in a sia-in a genkhak loh theih nadingun na gamta un. Bang hang hiam cih leh Pasian’ Ukna pen nekledawn tawh a kisai thu hi lo a, Kha Siangtho hangin i ngah Pasian’ deih bangin gamtatna, kilemna, lungdamna, cihte hizaw hi. Hih bang danin Khrih’ na a sem mite in Pasian lungdamsak a, mite zong a lungkimsak uh hi. Tua ahih ciangin mi tawh kilem theih nading le kha thu-ah khatlekhat thahatna i kipiak theih nading thute hanciam ciat ni. Annek huhau-in Pasian’ sepsa thute susia kei ni. An khempeuh a kine thei ding ahi hi; ahi zongin tua nekna hangin mi khat peuhpeuh a pukding ahihleh a khial ihi hi. Midangte in a puklawh theih annekna, zunekna, le na khat peuhpeuh i kikep ding a man pen ahi hi. Hih thu-ah no’ upna le no’ ngaihsutnate, Pasian tawh note’ kikal thu hisak un. Amau lungsim sungah man a sak bangun a gamta zote pen a lung uh nuam mahmah hi. Ahi zongin lunghimawh pipi-in a ne a om leh, a upna uh tawh kizui-in a gamta hi lo uh ahih manin Pasian in tua bang mite a mawhsak ding hi. I upna bangin gamtat lohna peuhpeuh mawhna ahi hi. Upna lamah a thahat eite in upna zawngkhalte’ ginat lohna i thuakpih ding kilawm hi; eima ut bangin i gamta kei ding hi. Midangte a upna uh hong khangin, mihoih hong suahtheih nadingun i gamta ciat ding hi. Bang hang hiam cih leh Khrih zong ama nopsak theih nadingin gamta lo zaw hi. Lai Siangtho sungah, “Note hong kisimmawhna thute kei tungah hong tu hi,” ci-in a kigelh hi. Lai Siangtho sungah a om thu khempeuh pen eite hilh nading, eite in lametna nei-in i thuakzawh nading, le i thahat theih nadingin a kigelh ahi hi. Tua ahih ciangin Khrih in note hong san mah bangin midangte in Pasian a phattheih nadingun note khatlekhat na kisang un. Hih banga kong genna pen, Pasian thuman hi, ci-in a kilat nadingin pupite tungah Pasian’ thuciamna a tungsak dingin, Jew mite hoih nading, le Gentail mite in zong ama hehpihna hangin Pasian a phattheih nadingun Khrih a hong paina hang ahi hi. Bang hang hiam cih leh Lai Siangtho sungah, “Tua ahih ciangin Gentail mite lakah ka lungdamna nang tungah ka hong ko ding a, nangma min phatna late ka sa ding hi,” cihna le tua ciangin, “Gentail mite aw, ama mite tawh lungdam khawm un,” cihna le tua ciangin, “Gentail mi khempeuh aw, Topa phat un; mi khempeuh aw, amah phat un,” cihna le tua ciangin Isaiah in, “Jessi’ suante khat hong khang ding a, Gentail mite a uk dingin milian hong suak ding a, ama hangin Gentail mite in lamet lungmuanna nei ding uh hi,” cihnate a kigelh hi. Kha Siangtho’ huhna tawh note’ lametna a khan semsem theih nadingin, lametna a hong piathei Pasian in, amah na upna uh hangin lungdamna le nopsakna tawh note hong kidimsak tahen. Thu upna sungah sanggamte aw, note mihoih hi-in, bangci gamtat ding cih thei-in, khatlekhat zong a kihilhthei dingin kong muang mahmah hi. Ahi zongin hih kong laikhakna sungah note’ phawkkik dingin thu ka hong genna pawlkhatte-ah kong telkheh mahmah hi. Tua bangin ka hong telkhehna thu pen, Gentail mite tungah na a sem dingin Khrih Jesuh sawltak hih theih nading hamphatna lianpi Pasian in kei a hong piakna hang ahi hi. Gentail mite pen Kha Siangtho in Pasian’ tungah a piak, ama santheih biakpiaknate a suahtheih nadingin Pasian kiang panin a hong pai Lungdamna Thu ka hilhna-ah siampi bangin na ka sem hi. Tua ahih manin Khrih tawh kikopin Pasian a’ ding na ka sepna-ah kei ka kisathei mahmah hi. A tawntungin keima tup thu in: Mi khatpeuh in a patsa nasep maban, oltakin zomin a sem mi ka suahkhak loh nadingin Khrih thu a kizak ngei nai lohna munte bekah Lungdamna Thu hilh ding keima utna ahi hi. Lai Siangtho sungah zong, “Ama thu a kigen ngei nai lohna mite in mu ding uh a, ama thu a za ngei nai lote in teltheih ding uh hi,” na kici hi. Note kiangah ka hong paipak theih lohna pen tu-a kong genna thu hang ahi hi. Ahi zongin hih gam kiimteng a ka nasepna man khinta ing a, note tawh ka kimuhnop zong kum tampi tak pha khinta ahih manin, tu-in note tawh kimu theita dingin ka kilamen hi. Spain gam ka paikawmin note kiang ka hong nawk nuam a, note tawh tawlkhat i kikholh khit ciangin Spain gam ka paina dingah nong huh ding uh ka ut hi. Ahi zongin tu laitakin ahihleh Jerusalem khua-a Pasian mite a kihuhna a puak dingin ka va pai masa ding hi. Bang hang hiam cih leh Masedonia gam le Grik gam sunga om pawlpite in Jerusalem khua-a om Pasian’ mi a zawngte huh nadingin sum piak ding amau thu-in a vaihawmtawm uh hi. Hih pen amau ngaihsut tawmna tawh lawptakin a huh uh ahi hi. A taktakin ci lehang hih mizawngte a huh dingun a kilawm mah ahi hi. Bang hang hiam cih leh Jew mite in kha thu tawh kisai nate Gentail mite hawm uh ahih manin Gentail mite in zong leitung nate tawh Jew mite a huh dingun a kilawm khat ahi hi. Amaute a dingin a kikaikhawm hih sumte a cingin amaute tungah apin, hih nasep ka man khit ciangin Spain gam manawh dingin ka hong paikhia ding a, note kiangah kong baang ding hi. Note kiang ka hong tun ciangin Khrih kiang panin thupha tampi tak ka hong puak ding lamtak ka thei hi. Lawmte aw, kei a dingin Pasian kiangah thu na hong ngetsak nadingun i Topa Jesuh Khrih i upna hang le Kha Siangtho in a hong piak itna tawh a hong thum ka hi hi. Judea gam sunga a om thu um lo mite in kei hong gimsakkhak loh nading le Jerusalem khua-a a om Pasian mite a dingin nasepnate lungdam takin a hong santheih nadingun thu hong ngetsak un. Tua bangin thu hong ngetsak le-uhcin, Pasian’ deihna ahih nakleh note kiangah lungdam takin ka hong tung ding a, note tawh nuamtakin i kimu ding hi. Nopsakna a hong pia Pasian in note khempeuh hong ompih tahen. Amen. Kenkhrea khua-a om pawlpite lakah na a sem, thu upna sungah i sanggamnu Foebe pen mihoih mahmah khat ahihna thu note’ theih dingin ka deih hi. Amah pen keimah a kipan mi tampi a dingin lawm hoih mahmah khat ahih manin, Pasian’ mite in a hih dingin a kilawm ahih mah bangin Topa’ thu sungah mihoihin na sang unla, note’ huh ding a kisapna khempeuhah hoihtakin na huh un. Khrih Jesuh sungah na ka sepkhoppih Prisilla le Aquila na hopih sak un. Amaute pen kei a dingin a si ngam uh ahi hi. Amaute tungah a lungdam kei guak bek zong hi loin, Gentail pawlpi mi khempeuh zong a lungdam ahi hi. Amau’ inn-a kikhawm pawlpi mi khempeuh zong na hopih sak un. Asia gam sungah Khrih thu a um masa pen pa ahi ka lawm it mahmah Epainetas zong na hopih sak un. Note a dingin nakpitakin na a sem Mary zong na hopih sak un. Jew mipih ahih banah ka thongkiatpih ahi Andronikas le Junias zong na hopih sak un. Amaute pen kei’ Khristian suahma pekin a na suak khinsate na hi uh a, sawltakte khempeuh in a theihkim uh mite ahi uh hi. Topa thu sungah ka lawm it mahmah ahi Ampliatas zong na hopih sak un. Khrih nasepna sungah na ka sepkhoppih uh ahi Urbanas, le ka lawm Stakhus zong na hopih sak un. Khrih tungah mi citak mahmah ahi Apelles zong na hopih sak un. Aristobulas innkuanpih mite zong na hopih sak un. Jew mipih Herodion le Narsissas innkuan sunga i Khristian sanggamte zong na hopih sak un. Topa’ na a sem Trifana le Trifosa, le Topa a dingin na tampi tak a sem ka lawm it Persis zong na hopih sak un. Topa’ nasepna sungah a kikhai mahmah Rufas, le ta bangin kei a hong bawl tawntung ama nu zong na hopih sak un. Asinkritas, Flegon, Hermes, Patrobas, Hermas, le amaute tawh a kikhawm khawm Khristian sanggamte zong na hopih sak un. Filologas le Julia, Nereas le a sanggamnu le Olympas le amaute tawh a kikhawm khawm Pasian’ mi khempeuh zong na hopih sak un. Sanggam ki-itna taktak tawh note khatlekhat kinamin na kihopih un. Khrih pawlpi khempeuh in zong hopihna kam hong khak uh hi. Lawmte aw, note’ theihsa thute gensia langpangin, mite’ upna nawngkaisakin pawl a kikhensak mite kidawm un. Tua bang mite tawh kikhawl vet kei un. Tua bang mite in i Topa Khrih’ na a sem hi loin, gilpi vai bek a sem uh ahi hi. Amaute in mite phatin kamkhum nono zang uh ahih manin mihoih pawlkhat a khemzo uh hi. Lungdamna thu tawh kisai-ah na cihtakna uh mi khempeuh in thei ahih manin hih thu-ah kong lungdampih mahmah hi. A hoih bang hiam, ci-in theih nading pilna nei-in, a sia peuhmah tawh na kizopkhak hetloh nading uh kong deihsak hi. Tua hileh eite tungah nopsakna a hong pia thei Pasian in Satan tuancilin note’ khenuai mi hong hisak baih ding hi. I Topa Jesuh Khrih hong hehpihna thupha, note tungah om tahen. Ka naseppih Timoti in note hong hopih a, Jew mipih Lusias, Jason, le Sosipater-te in zong hong hopih uh hi. Hih lai a gelhsak keimah Tertias in zong upna kikhat ihihna tawh ka hong hopih hi. Keima zintunna pa le pawlpite’ kikhopna inn nei pa zong ahi Gaias in zong hong hopih hi. Ka omna khuapi sumkem pa Erastas le i Khristian sanggam Kuartas in zong hong hopih uh hi. (I Topa Jesuh Khrih hehpihna thupha note khempeuh tungah hong om tahen. Amen.) Eite khempeuh in Pasian phat ni. Keima hilh Jesuh Khrih thu ahi Lungdamna Thu le tanglai-in a ki-imcip, tu-in a kipholak thu-ah, amah pen note’ upna a hong kipsak thei pa ahi hi. Ahi zongin mi khempeuh in Pasian umin a zuihtheih nadingin tu-in kamsangte’ laigelhnate le a nungta tawntung Pasian’ thupiakna tawh tua thu ki-imcip pen a hong kipholak ta ahi hi. Thu khempeuhah pilna a nei, amah bek ahi Pasian in Jesuh Khrih hangin a tawntungin phatna ngah ta hen! Amen. Khrih Jesuh’ sawltak dingin Pasian in a hong teel keimah Paul le thu upna sungah i sanggam Sosthenes in, Jesuh Khrih tawh kipawlna hangin Pasian’ mi suakin, Pasian’ mi siangtho cihna a ngah, Korin khua-a om Pasian’ pawlpi mite le eite’ Topa bek hi loin, amaute’ Topa zong ahi, i Topa Jesuh Khrih tungah thu a ngen, mun khempeuhah a om mite tungah lai ka hong khak uh hi. I Pa Pasian le Topa Jesuh Khrih in note tungah dikna le nopsakna thupha hong tungsak tahen. Jesuh Khrih hangin note tungah Pasian in hehpihna thupha hong pia ahih manin ka lungdamna thu, Pasian tungah ka ko tawntung hi. Bang hang hiam cih leh Khrih tawh na kipawlna hangun, thugen siamna le thu theihtel siamna a kipan siamna nam khempeuh na neikim uh hi. Note sungah Khrih thu kiptakin om ahih manin, i Topa Jesuh Khrih hong kilatkik ding ngakin na om hun sungun thupha na ngah loh uh khat beek om lo hi. Ama hong kilatkik hun ciang dong, a tawp dongin mawhna le kisuanna nei loin na om nadingun i Topa Jesuh Khrih mah in note hong huh ding hi. Ama Tapa ahi i Topa Jesuh Khrih tawh a kikhawl dingin a hong sam Pasian pen a citak Pasian hi a, a gensa bangin a hong tungsak takpi ding ahi hi. Sanggamte aw, note khatlekhat kithutuakin, pawl kikhenna omkha loin, na lungsim, na ngaihsutna uh le na ngimna uh na kikhatsak nadingun i Topa Jesuh Khrih min tawh ka hong thum hi. Bang hang hiam cih leh sanggamte aw, note lakah kitot kiselna a omna thu, Khloe’ innkuanpih mite in kei kiangah hong gen uh hi. Tua bang ka cih ciangin note pawlkhat in, “Kei, Paul’ pawl ka hi hi,” cihna ahi a, pawlkhat in, “Kei, Apollos’ pawl ka hi hi,” cihna ahi a, pawlkhat in, “Kei, Peter’ pawl ka hi hi,” cihna ahi a, pawlkhat in, “Kei, Khrih’ pawl ka hi hi,” cihna ahi zongin na kampaunate uh ka cihna ahi hi. Note in Khrih na phelsuah zenzen uh hi. Note a dingin Paul in singlamteh tungah khaina thuak ahi hiam? Note, Paul’ nungzui dingin tui kiphum na hi uh hiam? Krispas le Gaias cih simloh note khat beek hong tuiphum lo ka hih manin ka nuam mahmah hi. Tua bang hikeileh keima min tawh a kiphumin na kigen kha ding uh hi. (Eh! Stefanas-te innkuan zong ka tuiphum mah hi. Tuate cih simloh kuamah dang ka tuiphum lam ka thei kei hi.) Khrih in tuiphum nasep a sem dingin kei hong sawl lo a, Lungdamna Thu a hilh dingin a hong sawl bek ahi hi. Ka thuhilhna-ah zong thugen siamna le pilna a nei ka hi kei hi. Tua bang hi kei hen la, pilna le gen siamna a nei hi leng, Khrih in singlamteh tunga a thuakna thu in vangliatna a neihna hang kisa lo kha ding hi. Bang hang hiam cih leh sihna a thuak mite a dingin singlamteh tungah Khrih sihna thu pen a haihuai thu ahi hi. Ahi zongin hotkhiatna a ngah eite a dingin Pasian’ vangliatna ahi hi. Bang hang hiam cih leh Lai Siangtho sungah, “Mipilte’ pilna ka susia ding a, miteite’ teina ka heikhiatsak ding hi,” ci-in kigelh hi. Tua ahih manin tuhuna mipilte, miteite, le thusel a siamte, bangin kimang ahi hiam? Hih leitung pilna pen haina a suahsak khitna kilang khinzo hi. Pasian in ama pilna hong zang a, mihingte in amau’ pilna tawh pasian a theih zawh loh nadingun a bawl hi. Tua ahih manin mite in, “A haihuai thu,” ci-in a ngaihsut uh i thuhilhna a umte, Pasian in hotkhiatna a piazaw hi. A uptheih nadingun Jew mite in nalamdang kal uh a, Grik mite in pilna a thupisak uh hi. Ahi zongin kote in singlamteh tungah a kikhai Khrih’ thu ka hilh uh a, tua thu pen Jew mite a dingin a hehhuai thu hi a, Gentail mite a dingin a haihuai thu ahi hi. Ahi zongin Pasian in a hong sap ei Jew mite le Gentail mite a dingin Khrih pen Pasian’ vangliatna le Pasian’ pilna ahi hi. Bang hang hiam cih leh Pasian’ haina pen mite’ pilna sangin sangzaw lai a, Pasian’ thaneemna pen mite’ hatna sangin hatzaw lai hi. Sanggamte aw, Pasian in note hong sap laitakin na omzia uh ngaihsun un. Leitung mite’ hong muhna panin note a tamzaw, mipil na hi kei uh a, mi vanglian zong na hi kei uh a, mi thupi zong na hi kei uh hi. Ahi zongin Pasian in mipilte a maizumsak nadingin mihaite hong teel a, mi thahatte a maizumsak nadingin mi thaneemte a hong teel hi. Leitung mite in thupi a sakte uh a suksiat theih nadingin Pasian in leitung mite’ simmawh a niamte, bangmahin a ngaihsut loh uh mite a teel hi. Tua ahih manin Pasian’ mai-ah mite a kisaktheih nading thu om lo hi. Ahi zongin Pasian in Jesuh Khrih hangin note tungah nuntakna hong pia a, tua Jesuh Khrih pen eite’ pilna, Pasian tawh i kipawl theihna, Pasian’ mi siangtho suakin, hotkhiatna i ngah theihna ahi hi. Tua ahih ciangin Lai Siangtho sungah, “A kisathei mite, Topa’ hang bekin kisathei ta hen,” ci-in na kigelh hi. Sanggamte aw, Pasian’ thu hilhin note kiangah kong pai lai-in, mipilte’ zat kam thukpipi le pilna kamte ka zang kei hi. Bang hang hiam cih leh note kiangah ka om laitakin singlamteh tungah Jesuh Khrih a sihna thu simloh thudang peuhmah ngaihsut loh dingin ka ngaihsutsa ahi hi. Tua ahih manin note kiangah kong pai lai-in thaneemin, launa tawh ka ling a, thu ka hong hilh ciangin zong leitung mipilte’ zat kammalte le siamnate ka zang kei a, Pasian’ Kha Siangtho vangliatna tawh thu ka hong hilh hi. Tua ahih manin note’ thu upna pen mihingte’ pilna hang hi loin, Pasian’ vangliatna hangin a um na hi uh hi. Ahi zongin kha thu lamah a khangham mite tungah pilna thu ka gen hi. Tua ka gen pilna pen tu-in a maimang kuankuanta ding hih leitung mite’ pilna le vangliatna thu hi lo hi. Tua ka gen pilna thu pen mite’ theih lo dingin Pasian in a ipcip Pasian’ pilna thusim hi a, eite’ minthan nadingin leitung pianma pekin Pasian in a na koihsa thu ahi hi. Hih leitung a uk mite kuamah in hih pilna thu thei lo uh hi. Thei hi le-uh, a minthang Topa pen singlamteh tungah na that lo ding uh hi. Tua ahih manin Lai Siangtho sungah, “Kuamah in a muh ngei loh, a zak ngei loh, piangthei dingin zong a ngaihsut loh uh thu pen Pasian in amah a it mite a dingin a bawlkholh saksa ahi hi,” ci-in na kigelh hi. Ahi zongin Pasian in a Kha Siangtho tawh eite tungah tua thusim a hong langsak hi. Tua Kha Siangtho in na khempeuh kankhia a, Pasian’ ngimna a ki-imcip a thutawng dongtakin a kankhia hi. Mihing khat’ ngaihsutna pen ama lungsim bek mah in a theih mah bangin Pasian’ Kha Siangtho bek mah in Pasian’ thu a cingin a thei hi. Eite’ ngah lungsim pen leitung mite’ lungsim hi lo a, Pasian in eite tungah a hong piak na khempeuh i theih nadingin Pasian’ hong piak Kha Siangtho lungsim ahi hi. Tua ahih manin hih bangin thu ka hong gen uh ciangin zong, mihingte’ hong hilh pilna kamte a zang hi loin, Kha Siangtho a nei mite tungah kha tawh kisai thu ka gen uh ciangin Kha Siangtho in a hong hilh kammalte zangin a gen ka hi uh hi. Ahi zongin Kha Siangtho a nei lo mite in Pasian’ Kha Siangtho in a hong piak nate sang thei lo uh hi. Kha Siangtho a nei mite bek in theithei uh ahih manin amaute in tel thei lo uh a, amau a dingin a haihuai thu khat ahi lel hi. Kha Siangtho a nei mite in na khempeuh theithei uh a, ahi zongin leitung mite in bangmah thei lo uh ahih manin a lungmang uh hi. Tua ahih manin Lai Siangtho in, “Kua in Topa’ lungsim thei a, ama gamtat nading lam lak thei ahi hiam?” na ci hi. Ahi zongin eite in Khrih lungsim i nei hi. Sanggamte aw, a taktakin ci lehang, kha nuntakna a nei mite tungah thugen bangin ka hong gen thei kei hi. Leitung mite tungah thugen bang le Khrih upna sungah naungek a bangte tungah thugen bangin ka hong gen ding kisam hi. Note in antak nezo nai lo na hih manun nawitui ka hong tulh hi. Tu mahmahin zong nawi bek mah tulh ding a kisam lai na hi uh hi. Bang hang hiam cih leh Pasian’ deihna bangin gamta loin, leitung lungsim deihna bangin gamta lai na hih manun upna sungah naungek bang ahi lai na hi uh hi. Note khatlekhat kihaza-in kitawng kiselin na om uh ciangin hih leitung mite mah a bang lel na hihna uh hong kilang hi. Pawlkhat in, “Keimah, Paul’ pawl ka hi hi,” ci-in, pawlkhat in, “Apollos’ pawl ka hi hi,” na cih uh ciangin leitung mi mawkmawkte mah bangin a gamta na hi uh hi. A taktakin ci lehang, Apollos i cihte, Paul i cihte, bangpi hi zenzen ka hi uh hiam? Note in thu na uptheih nadingun Pasian’ nasemte ka hi lel uh hi. Topa in kote’ sep dingin a hong piak nasep tuak a sem ka hi lel uh hi. Keima nasep pen khaici vawh hi a, Apollos’ nasep pen tuibuah hi a, ahi zongin a khangsak pa ahihleh Pasian ahi hi. Khaici vawh pa le tuibuak pa a thupi hi lo a, a khangsak Pasian a thupi hi bek hi. Khaici vawh pa le tuibuak pa a kizakim ahi hi. Pasian in komau sepna tuak tawh kizui-in thaman hong pia ding hi. Kote pen Pasian a dingin na a semkhawm mite ka hi uh a, note pen Pasian’ lo na hi uh hi. Note pen Pasian’ inn zong na hi uh hi. Pasian in kei tungah a hong piak siamna zangin, innlam siamte’ nasepteng semin, a khuam thupiteng ka phut a, Apollos in tua khuam phuhsa tungah innlam a zom hi. Tua khuam tungah inn a lam pa a kingaihsut mahmah ding kisam hi. Keima phuhsa khuam thupiteng ahi Jesuh Khrih cih simloh kuamah dang in khuam thupi dang phutthei nawn lo ding hi. Ahi zongin tua khuam tungah kham, ngun, suangmanpha, sing, bi, lopa, a nam tuamtuam kilam thei hi. Tua a kilam nate mei tawh a kize-et ding Ni hong tung ding a, tua nasepnate a bangci hiam, ci-in mei in ze-et ding ahih manin a lam mite’ nasep ciat hong kilang ding hi. Mi khat in tua khuamte tungah a lam nate bangmah a cihzawh kei leh a nasep thaman a ngah ding hi. Ahi zongin mi khat in a lam nate a kattum leh amah a sum hi ding hi. Tua nate a lam pa ahihleh meikat nading panin a suakta bang keekin a suakta bek ding hi. Note pen Pasian’ biakinn na hihna uh le note sungah Pasian’ Kha Siangtho a teng ahih lamtak na theihsa uh ahi hi. Mi khatpeuh in Pasian’ biakinn susia leh Pasian in tua mipa susia ding hi. Bang hang hiam cih leh Pasian’ biakinn a siangtho hi a, note zong tua biakinn siangtho na hi uh hi. Note khatpeuh hih leitung ngeina-ah a pilin na kingaihsut uhleh a pil taktak na hih theih nadingun a hai na suak phot un. Hih leitung mite in pilna hi, ci-in a ngaihsutte, Pasian a dingin a haihuai thu ahi hi. Bang hang hiam cih leh Lai Siangtho in, “Mipilte amau’ ngian mahah awksak hi,” a na ci hi. Tua ciangin, “Mipilte’ ngaihsutna a mawkna hi, ci-in Topa in a thei hi,” ci-in zong na gen lai hi. Tua ahih manin kuamah in midangte’ siamna kisialhpih kei un. A taktakin ci lehang na khempeuh nomau a’ hizaw hi. Paul, Apollos, Peter cihte ahi a, hih leitung, nuntakna, sihna, tuhun le mailam hun, cihte a kipan na khempeuh nomau a’ ahi hi. Note pen Khrih a’ na hi uh a, Khrih pen Pasian a’ ahi hi. Kote pen Khrih’ nasem, le Pasian’ thusim a zeekte-in nong ngaihsut ding uh ahi hi. Nasem i cih mite pen a topa uh tungah citakin a thuman ding uh kisam hi. Note na hi uh a, leitung mite in ahi zongin kei tungah mawhna hong zongin thu nong khen uh hangin bangmah phamawh ka sa kei hi. Kei mahmah zong kimawhsakin thu ka kikhen kei hi. Ka kisuan nading thu bangmah ka thei het kei hi. Ahi zongin tua pen ka dik hi, cihna hi pah lo hi. Keima thu a hong khen ding pa pen Topa ahi hi. Tua ahih manin a hun a tunma-in kuamah mawhsakin thu khen kei un. Topa hong pai ciangin a tawpna thukhenna hong om ding a, amah in thusimte hong pholakin, mihingte in a lungsim sung uhah a ipcip uh thute hong telkheh ding hi. Tua ciangin mi khempeuh in amau’ ngah dingin a kilawm phatna, Pasian’ kiang panin a ngah ciat ding uh hi. Sanggamte aw, note a’ ding ka ngaihsutna-in hih thu khempeuh Apollos le keima pumpi tungah ka zat uh thu ahi hi. “A khengvalin gamta kei un,” cihna thu na theih nadingun ko tegel, etteh dingin ka hong zang hi. Note in mi khatpeuh kisaktheihpihin mi khatpeuh na simmawhbawl kei ding uh hi. Note in bang kisaktheihpih na hi uh hiam? Tu-a na neih khempeuh uh Pasian’ hong piak hi lo ahi hiam? Tua ahihleh hong kipiasa bek ahih manin a bang kisaktheihpih na hi uh hiam? Na deih khempeuh uh neikhin na kisa uh a, haukhin na kisa uh hi. Kote’ om loh kalin kumpi a suak khinin na kingaihsun uh hi. Note tawh kumpi hikhawm ding ihih manin kumpi taktak a suak takpi na hi le-uhcin ka ut mahmah hi. Ko sawltakte pen vantungmi le leitung mi khempeuh in a et dingin mipi’ mai-ah thahna a thuak dingin thukhenna a kipia mi bangin Pasian in a zaneu penin hong koih tawntung tawh kibang ka sa hi. Khrih hangin mite mai-ah kote mihai ka suak uh a, ahi zongin note pen Khrih sungah mipil na kisa uh hi. Kote ka thaneem uh a, ahi zongin note a hat na kisa uh hi. Kote hong kisimmawhbawl a, ahi zongin note hong kizahtakbawl na kisa uh hi. Tuni ciang dong gilkial dangtakin puansilh ding nangawn nei loin ka om uh hi. Inn le lo zong nei loin hong kinotsuk hong kinotto kawikawi hi. Kote’ nektawm ding ka thatang mahmah uh tawh nakpitakin ka sem uh hi. Hong kisamsiat ciangin thupha ka lehpiak uh a, hong kibawlsiat ciangin ka gumthuak uh hi. Zahpihna kam tawh hong kihopih ciangin kamkhum tawh ka dawng uh hi. Mite’ muhna-ah tuni ciang dong ninbulom le leivuithem bang bek ka hi uh hi. Hih bangin lai ka hong gelh ciangin na maizum nading uh ka deihna hi lo a, ta itte thuhilh bangin a hong thuhilh ka hi hi. Khrih thu hong hilh ding mi a tul a za-in na nei uh ahi zongin pa-a na neih ding uh kei bek a om ka hihna thu na phawk un. Bang hang hiam cih leh note kiangah lungdamna thu ka hong hilhna hangin Jesuh Khrih sungah nomau’ pa ka suak hi. Tua ahih manin keima gamtatzia na hong zuih nadingun ka hong thum hi. Tua thu hangin note kiangah, ka it mahmah, Topa thu sungah a citak mahmah, ka tapa Timoti ka hong paisak hi. Amah in, Jesuh Khrih thu sungah ka nuntakna ziate le pawlpi a tuamtuamte kiangah ka thuhilhte khempeuh, note tungah hong hilh ding hi. Note kiangah kei hong hawh lo ding, ci-in ngaihsun kha uh ahih manin mi pawlkhat a kiphasak uh hi. Ahi zongin Topa in hong thukimpih nakleh kei ka hong hawhbaih ding a, tua a kiphatsak pau mawkmawkte in bang ciang taktak a hihzo ngap uh hiam, cih thu keima pumpi tawh ka mu ding hi. Bang hang hiam cih leh Pasian’ Ukna thu i cih pen kampi bek tawh genna hi lo a, Pasian’ vang tawh nungta-in gamtatna ahi hi. Tua ahih manin note taii-in gim a hong pia dingin ka hong pai ding le itna le lungnemna lungsim tawh ka hong pai ding koi deihzaw na hi uh hiam? Note lakah numei tawh paktatna nasia mahmahin, lawkite nangawn a gamtat lohte na gamtatna uh hong kigen a, mi khat in ama nukik nangawn a luppihna thu ka za hi. Tua bang kimlai bangci kisaktheih ding na hi uh hiam? Note na dah mahmah ding uh hizaw a, tua bang mite pen note lak panin na hepkhiat ding uh ahi hi. Note tawh ka pumpi-in ka hong omkhop loh hangin note tawh ka lungsim hong omkhawm a, ka pumpi-in note tawh a hong omkhawm zah mah bangin tua bang a gamta mite tungah i Topa Jesuh’ min tawh mawhsakna thu ka khen khinzo hi. Note na kikhop khawm uh ciangin i Topa Jesuh Khrih vangliatna in eite hong ompih ahih manin, note tawh ka lungsimin ka hong omkhawm hi. Topa’ Ni hong tun ciangin tua bang mite’ kha in hotkhiatna a ngahtheih nadingin Satan in amau pumpi a gimsak dingin na piakhia ta un. Note lakah hih bang gamtatna om napi-in na kisaktheih uh dahhuai mahmah hi. Silngo themkhat in annel lompi a pawmsak theih lamtak thei lo na hi uh hiam? Note na siangtho theih nadingun mawhna silngo luite na paikhia un. Tua hileh silngo sawh loh annel lom thak na hi ding uh a, zong ahi takpi mah na hi uh hi. Bang hang hiam ci leh i Paisan Pawi hun hong tungta a, eite’ Paisan Tuuno ahi Khrih kigo khinzo ta hi. Tua ahih ciangin mawhna le gitlohna ahi silngo lui a kisawh anlum tawh Paisan Pawi bawl loin, silngo a kisawh lo, sianthona le thutakna tawh bawlzaw ni. Lai ka hong gelhna sungah, numei tawh a paktat mite tawh na kikholh loh nading uh ka hong gen hi. Tua bang ka hong cih ciangin numei tawh a paktat, a huaiham, a guta, milim a bia lawkite tawh na kikhawl kei un, ka cihnopna hi lo hi. Tuate tawh kikhawl lo ding ci lehang, leitung panin paikhia un, cihna suak ding hi. Tua ka hong laigelhna sungah ka cihnopna pen, thu upna sungah unau khat hi hang, ci napi-in numei tawh a paktat, a huaiham, milim a bia, mi gensia, zukham, ahih kei leh a guta theite tawh kikhawl kei un, cihnopna ahi hi. Tua bang mite tawh an ne ding nangawnin zong na tukhawm kei un. Note khatlekhat thu na kineih uh ciangin Pasian’ mi siangthote khensakzaw loin lawki thukhente’ mai na kitun ngam uh hi. Pasian’ mite in leitung mite’ thu a khensakzaw ding ahihlam thei lo na hi uh hiam? Note pen leitung mite’ thu a khensak ding na hih uh ciangin tua bang thu neute khen thei lo lawmlawm na hi uh hiam? Eite pen vantung mite’ thu nangawn a khensak ding ihih lamtak thei lo na hi uh hiam? Tua ahih manin hih leitung a no’ thu neuneute leltak na khentheih zawk kan ding uh ahi hi. Tua bang hinapi-in hih bang thu themthem hong pian ciangin pawlpi sungah bangmahin a kisim lo mite’ mai kitun ding na hi uh hiam? Note a dingin zumhuai mahmah hi. Note khatlekhat na kithuneihnate uh a khenthei ding note lakah mipil khat beek om buang ding hi. Tua hinapi, khatlekhat thu kineihin zum na kitun uh a, lawki thukhente na khensak tazen uh hi. Note khatlekhat zum na kitut mahmah uh zong a gina het lo na hihna uh hong kilangsak hi. Bang hangin thuakzaw mai lo a, sum ngamzaw mai lo na hi uh hiam? Note khatlekhat kisu-in, khatlekhat na kisut zawsop uh a, na sanggamte teekteek nangawn uh tawh thu na nei uh hi. Migilote, Pasian’ Ukna sungah a lut hetloh nading thu na thei uh hi. Note kihaibawl kei un. Numei tawh a paktatte, milim biate, mi zi ahih kei leh mi pasal tawh a mawhte, pasal le pasal a khialte, a gutate, a huaihamte, zukhamte, mi gensiate, ahih kei leh mi’ na a sutte khat beek, Pasian’ Ukna sungah lutthei het lo ding hi. Note pawlkhat, tua bangin na gamta uh hi. Ahi zongin note pen i Topa Jesuh Khrih le i Pasian’ Kha Siangtho hangin mawhna panin a hong kisiangsak khinsa, Pasian’ tungah a kipiasa, Pasian tawh a kipawlsa mite na hi uh hi. “Ka ut peuhpeuh ka hihtheih nading thu om hi,” a ci omkha ding hi. Ahi zongin na khempeuh hih ding kilawm lo hi. Kei zong ka ut khempeuh ka hih theih hangin tua bang gamtatna khat peuhpeuh’ sila ka suak nuam kei hi. “An pen i gilpi a’ ding hi a, gilpi zong an a’ ding mah hi lo ahi hiam?” a ci zong omkha ding hi. Ahi zongin Pasian in tua tegel a beisak hun hong tung ding hi. Pumpi pen paktatna-in zat ding hi lo a, Topa’ na sepna-in zat ding hizaw hi. Topa in pumpi a’ ding na hong sem hi. Pasian in sihna panin Topa thokiksak hi. Tua mah bangin eite zong ama vangliatna tawh hong thokiksak ding hi. Na pumpi uh, Khrih pumpi nate khat ahih lamtak thei lo na hi uh hiam? Khrih pumpi nate khat la-in numei tawh paktatte’ pumpi nate khat suaksak ding ihi hiam? Tua cih ngei ding hi peuhmah lo hi. Numei paktat tawh a pumpi a kizomsak pa pen tua numei tawh pumkhat sakhat a suak ahih lamtak thei lo na hi uh hiam? Bang hang hiam cih leh Lai Siangtho in, “Tua mi nihte pumkhat a suak ding uh hi,” na ci hi. Ahi zongin Topa tawh a kizomte pen kha thu tawh kisai-in amah tawh pumkhat ahi uh hi. Numei tawh mawhna na pelh un. Mi khat in a bawl mawhna tuamtuamte in ama pumpi sukha lo hi, a ci om hi. Ahi zongin numei tawh a mawhte, ama pumpi tungah a khial ahi hi. Na pumpi uh, Pasian in a hong piak, note’ sungah a teng Kha Siangtho’ biakinn ahih lamtak thei lo na hi uh hiam? Note’ pumpi, nomau’ neihsa hi lo a, Pasian a’ ahi hi. Note pen Pasian in a hong leisa na hih manun na pumpi uh Pasian’ minthan nadingin na zang un. Tu-in nong laigelhna uh thu tawh kisai-in: Pasal in zi nei kei leh hoihzaw lo ding ahi hiam, na ci uh hi. Ahi zongin numei tawh paktatna tamlua ahih manin pasal in ama zi tuam nei hen la, numei in ama pasal tuam nei leh hoih hi. Pasal in a zi a luppih dingin a kilawm zahin luppih ding a, a zi in zong a pasal a luppih dingin a kilawm zahin a luppih ding ahi hi. Zi in ama pumpi a ut bangin zangthei nawn loin a pasal’ zat ding hi a, tua mah bangin a pasal in zong ama pumpi a ut bangin zangthei nawn loin a zi’ zat ding ahi hi. Thungetna-in hun na zattheih nadingun tawlkhat sung tuam om ding thukim khawm masa lopi-in lupkhop ding kinialkha kei un. Tua bangin tawlkhat sung na tuam om khit uh ciangin note’ pumpi’ deihna hangin Satan’ ze-etna sungah na pukkhak loh nadingun a ngeina bangin lupkhop ding kipan kik un. Hih bangin kong gen ciangin a hoihpen hi, ci-in thugenna hi lo a, note’ pianzia tawh kizui-in hithei tei hi, cihna lel ahi hi. Mi khempeuh keimah bangin om ciat le-uh hoih ka sa hi. Ahi zongin mi khempeuh in Pasian’ piak hihzawhna a tuamtuam nei a, khatlekhat kibang lo hi. Pasal nei nai lote le meigongte pen keimah bangin tanggawl om paisuak le-uh hoih ka sa hi. Ahi zongin a pumpi uh a ki-ukzawh kei ding uhleh pasal nei le-uh hoihzaw hi. Nei nuampipi a neih loh tentan sangin pasal neih hoihzaw hi. A neisate tungah, kei’ ngaihsutna hi lo, Topa’ ngaihsutna ka gennop thu in: Zi in a pasal ciahsan kei tahen. A ciahsan leh zong pasal nei loin om paisuak hen. A om paisuakzawh kei leh a pasal ngei mah zuankik hen. Pasal in a zi ma kei tahen. Adangte tungah, Topa’ cih hi lo, keima ngaihsutna ka gennop thu in: Mi khatpeuh in thu um lo mi khat zi-in a neih leh, pasal mahin neih ding a zi a lungkim ahih nakleh ma kei tahen. Numei khat in thu um lo mi khat pasalin a neih leh, zi mahin neih ding a pasal a lungkim ahih nakleh ma tuan kei tahen. Bang hang hiam cih leh thu um lo pasal pen a zi’ hangin thu um mi suakthei ding a, thu um lo zi pen a pasal’ hangin thu um mi suakthei ding hi. Tua bang hileh a tate uh thu um mi suakthei ding uh hi. Ahi zongin tua bang hi kei le-uh a tate uh thu um mi suakthei lo ding uh hi. Ahi zongin thu um lo zi in ahi a, thu um lo pasal in ahi zongin kikhen ding a ut leh kikhen ta uh hen. Tua bang thute-ah thu um zi ahi a, thu um pasal ahi zongin a awk nading thu om lo hi. Pasian in nuamtakin a nungta dingin a hong sap ahi hi. Thu um zi in, “Ka pasal honkhiazo kei ning,” bangci-in cithei ding a, thu um pasal in, “Ka zi honkhiazo kei ning,” bangci-in cithei zenzen ding ahi hiam? Mi khempeuh, Pasian in amau’ nuntak nadingin a sehna, le Pasian in a sap laitakin a omzia bangbangun nungta uh hen. Hih bangzia-in om ding pen pawlpi khempeuhah hilhin ka neih ngeina khat ahi hi. Vun ki-atsa mi khat Pasian in a sap leh, a vun ki-atna lim phiat tuan kei tahen. Bang hang hiam cih leh vun atna le vun at lohna a thupi hi lo a, Pasian’ thupiakte zuih ding a thupi ahi hi. Tua ahih manin a kuamah peuh, Pasian in a sap laitakun a omzia bangbangun a om paisuak ding uh ahi hi. Sila ahi mi khat Pasian in a sap leh phamawh lo hi; sila mahin ki-om thei veve hi. Ahi zongin suahtak theih nading lampi a om leh tua hunhoih hamphatna zang tahen. Bang hang hiam cih leh Topa in a sap sila ahi mi pen Topa a dingin mi suakta hi a, tua mah bangin Khrih in a sap a suakta mi pen Khrih a dingin sila ahi hi. Note pen Pasian’ hong leisa na hih manun mite’ sila suak kei un. Tua ahih manin sanggamte aw, hong kisap laitakin na omzia uh mah bangin Pasian’ sungah na om paisuak un. Tu-in a nungak lai a tangval laite thu tawh kisai-in: Topa kiang panin thu ngahna ka neih loh hangin Topa’ hehpihna tawh a muantaak ahi keima ngaihsutna ka hong gen ding hi. Tu laitakin a om bangun om paisuak leh hoihzaw ding hi, cihna thu tawh kisai-in, tu laitak a lungkhamhuai thu ka ngaihsut ciangin tu laitakin a om bangun om paisuak leh hoihzaw mah dingin ka ngaihsun hi. Ahi zongin zineite in kikhen ding ngaihsutin nei kei tahen. Nungak lai tangval laite in lawm zong kei tahen. Ahi zongin pasal in zi a neih hangin a khial hi lo a, numei in zong pasal a neih hangin a khial hi lo hi. Ahi zongin zi nei, pasal neite in leitung lungkhamna tampi thuak uh ahih manin tuate tawh kipelhzaw le-uh hoih ka sa hi. Sanggamte aw, tua bang ka cih ciangin a kiseh hun hong nai mahmah ta hi, ka cihnopna ahi hi. Tua ahih manin zi neite pen zi nei lo mah bangin kingaihsun uh hen la, a dahte pen a dah lo mah bangin kingaihsun uh hen la, a lungdamte pen a lungdam lo mah bangin kingaihsun uh hen la, na a leite pen bangmah a nei lo mah bangin kingaihsun uh hen la, leitung na nuamtakin a zangte pen a zang lo mah bangin kingaihsun ta uh hen. Bang hang hiam cih leh hih leitung pen sauveipi kip nawn lo ding hi. Note, lunghihmawhna tawh na kipelh ding uh ka hong deihsak hi. Zi a nei lote in Topa a lungdamsak theih nadingun Topa’ thu bek kinin nei uh hi. Ahi zongin zi neite in a zi a lungdamsak theih nadingun hih leitung vai kinin nei uh a, a ngaihsutna uh khen nih pha hi. Pasal a nei lo numeite in a lungsim le a pumpi uh Topa a dingin zangnuam uh ahih manin Topa’ nasep bek kinin nei uh hi. Ahi zongin pasal a nei numeite in a pasal uh a lungdamsak theih nadingun hih leitung vai kinin nei uh hi. Hih bangin ka hong gen ciangin note’ haksat nading deihna hi loin note’ hoih nading ka deihna ahi hi. Note a kilawm a kituakin gamta-in, lungsim le thatang siit nei loin Topa’ na na septheih nading uh ka hong deihsakna ahi hi. Tenpih dingin lawm dongkhin napi-in kiten nawn loh ding a ngaihsunte’ thu panin: Tenpih kei leng a numei tungah a thuman lo hi ding cihna ahi a, zi a deihna lungsim a lianlua ahi a, tenpih ding mah hoih hi, ci-in ngaihsutna ahi zongin a neih leh a lungkimna bangun gamta-in tenpih uh hen. Tua thu-ah bangmah khialhna om lo hi. Ahi zongin kuama sawl hi loin zi nei lo dingin a lungsimah khauhtakin khentatin, a lungsim ki-ukzo taktakin a ngaihsutsa ahih nakleh a neih loh hangin phamawh lo hi. Tua ahih manin a neite zong hoih a, a nei loin a kikem zote hoihzaw lai hi. Pasal a nei numei pen a pasal a nuntak laiteng suakta lo hi. A pasal a sih leh a deih peuhpeuh tawh kitengthei ding a, ahi zongin thu um mi bek tenpih ding hi. Ahi zongin keima ngaihsutna-ah pasal a neihse sangin tuaci om leh lungdamzaw dingin ka um a, Pasian’ Kha Siangtho’ ngaihsutna mah zong hi-in ka um hi. Tu-in milim biakna sa tawh kisai thu panin: Amaute in, “Ka thei uh hi,” a cih mah bangin eite khempeuh in theihna i neih ciatna thu i thei hi. Tua bang theihna in mite kisatheisak a, ahi zongin itna in mite kipsak hi. Mi khat in thu a thei-in a kingaihsut leh a taktakin a theih dingin a kilawmzah a thei nai lo ahi hi. Mi khat in Pasian a it leh Pasian in tua mipa a na thei hi. Tua ahih manin biakna sa tawh kisai thu panin: Milim i cih pen bangmah a om lopi khat lim dingin a kibawl na hi a, Pasian khat bek a om ahihna thu i theih ciat ahi hi. Leitung le vantungah pasian le topa a kici tampi a om ahi zongin, eite a dingin Pasian khat bek, Pa khat bek a om hi. Ama a dingin i nuntakna pa, na khempeuh a piangsak pa ahi hi. Eite tungah nuntakna a hong pia, na khempeuh a piangsak Topa Jesuh Khrih khat bek a om hi. Ahi zongin mi khempeuh in hih thu theikim lo uh hi. Mi pawlkhatte, milim biakna thu-ah kingeinaseh lua khin uh ahih manin tuhun mahmahin zong biakna sate a nek uh ciangin tua milim tawh kisai sa mahin ngaihsunsun lai uh hi. Amaute lungsim thaneem uh ahih manin tua sate a nek uh ciangin a zehphi mahin kingaihsun uh hi. Ahi zongin tua i nek ante in Pasian tawh i kizopna hong hoihsak tuan lo hi. I nekloh hangin siatna om tuan lo a, i nek hangin zong phatna om tuan sam lo hi. Ahi zongin note’ utbangin gamtat theih nading thu na neihna uh hangin upna a neu laite a puksak na suahkhak loh nadingun hoihtakin kidawm un. No thuthei-a a kineite, milim biakna inn sungah milim biakna sa na neklam uh, hih thu tawh kisai-ah a lungsim hatzo nai lote in hong mukha zenzen leh milim biakna sa nek ding a hanthawn na suakkha ding uh hi. Tua ahih manin note’ thutheihna hangin, Khrih in sihna a thuakpih, thu upna sungah i sanggamte a siasak na suak ding uh hi. Tua bangin lungsim thaneemte gimsakin, thu upna sungah na sanggamte uh tungah na khialh uh ciangin Khrih tung mahmahah a khial na hi uh hi. Tua ahih manin nekna in thu upna sungah ka sanggamte khat a khialsak ding ahihleh, amah a pukkhak loh nadingin milim biakna sa ka ne ngei het kei ding hi. Kei pen sawltak ka hi a, mihingte’ khutnuai-a nasem ka hi kei hi. I Topa Jesuh tawh a kimu mi ka hi a, Topa a dingin na ka sepna hangin note pen thu um a suak na hi uh hi. Midangte in sawltakin hong ngaihsun ta kei le-uh, note in sawltakin na hong ngaihsut uh a kul ahi hi. Bang hang hiam cih leh Topa sungah na omna uh pen sawltak ka hihlam a kilatna ahi hi. Mite in kei hong mawhsak uh ciangin ka gen thu in: Ka nasepna hangin annek tuidawn hong kipiak ding mah ahi hi. Sawltak dangte, Topa’ naute, le Peter mah bangin ka khualzinna-ah thu um mi ka zi a tonpih thei ding ka hi hi. Kei le Barnabas bek, nektawmzon tawh a thuah ding ka hi zenzen kei uh hi. Kuamah in ama sum bei-in galkap na sem lo uh hi. Leenggui suan napi-in a leenggah a ne lo kuamah om lo hi. Tuu cing napi-in a tuunawi a ne lo kuamah om lo hi. Hih ka hong gente pen mihingte’ zat ngeina hi a, Thukham in zong a tuaci ding mahin a gen thu ahi hi. Bang hang hiam cih leh Moses Thukham sungah, “Buh a cil bawngtal a muk na tuam kei in,” ci hi. Hih bang a gen ciangin Pasian’ lunghihmawh pen bawngtalte hi zenzen lo hi. Hih bang a gen ciangin ei mihingte hong cihnopna hi a, eite a dingin a kigelh thu ahi hi. Lo a khopa le an a lapa in amau’ ngah dingin a kilawm an a ngah dingin lametna tawh nasem ahi uh hi. Note lakah kha thu tawh kisai khaici hong vawh ka hih manun, note tung panin leitung nate ka ngah uh hangin a lianlua hi lo hi. Midangte in note tung panin ngahtheih nading thu nei uh ahihleh ko ka nei phazaw lai uh hi. Ahi zongin note tung panin ngahtheih nading thu a om hangin bangmah ka hong la kei uh a, Khrih hangin Lungdamna Thu a dongtangsak ka suahkhak loh nadingun na khempeuhah ka thuak tentan uh hi. Biakinn-ah nasem dingin a kicial mite in biakinn mah panin an ngah uh a, biakna tau-ah na a semte in biakna sa mah a ngahna uh thei lo na hi uh hiam? Tua mah bangin lungdamna thu a hilhte in tua nasepna mah panin nuntakna a ngah nading uh Topa’ thupiak ahi hi. Ahi zongin hih ngahtheih ding hamphatnate khempeuh ka la kei a, tu-in zong ka ngahtheih nadingin hih lai a hong gelh ka hi kei hi. Hih ka kisialhna teng a mawkna a suah ding sangin ka si nuamzaw hi. Lungdamna thu ka hilh hangin kisialh nading thu bangmah om lo hi. Bang hang hiam cih leh tua thu a hilh ding mahin a hong kisawl ahi hi. Tua ahih manin lungdamna thu hilh kei leng kei a dingin a dahhuai mahmah ahi hi. Keima utthu tawh a sem hi leng sep thaman ka lamen ding hi. Ahi zongin Pasian in a sem dingin hong sawl ahih manin ka sep ding nasep a sem ka hi hi. Tua ahihleh ka sep thaman bang ahi hiam? Ka thaman pen, lungdamna thu tawh kisai ka sepna-ah thaman ngen loin, a khongin Lungdamna Thu hilh ding hamphatna ka neihna ahi hi. Kei pen kuama khutnuai mi hi loin a suakta mi hinapi-in, mi a tam theithei ka ngahzawh nadingin mi khempeuh’ khutnuai mi-in ka kibawl hi. Jew mite lakah na ka sep ciangin amaute ka ngahzawh nadingin Jew mite khat mah bangin ka gamta a, Moses Thukham ka zuih ding a kisap loh hangin a zuite ka ngahzawh nadingin amaute lakah na ka sep ciangin amaute mah bangin ka gamta hi. Tua mah bangin Jew mite’ Thukham in a huam loh Gentail mite lakah na ka sep ciangin amaute ka ngahzawh nadingin Gentail mite bangmahin ka gamta hi. Hih bangin ka gen ciangin Pasian’ thukham a zui lo, cihna hi loin Khrih’ thukham zui-in a gamta ka hi hi. Upna neu mite lakah na ka sep ciangin amaute ka ngahzawh nadingin amaute mah bangin ka gamta hi. Tua ahih manin ahih theihna lam peuhpeuhah mite ka ngahzawh nadingin mi khempeuh’ ngeina ka zui hi. Hih bangin ka gamtatna pen amaute tungah Lungdamna Thu ka tuttheih nading le keima nasep hoihtakin ka septheih nading ka deihna ahi hi. Tai kidemna-ah mi khat bek in thaman a ngah ding hinapi-in a vekpi-un tai veve uh hi. Tua ahih manin thaman na ngahzawh nadingun na tai un. Kimawlna sungah a kihel mi khempeuh in thu khempeuhah a pumpi uh uk ciat uh hi. Amaute pen a kisiathei pak a ngah nadingun a hanciam uh hi a, eite pen a kisia thei lo i ngah nadingin a hanciam ihi hi. Tua ahih manin ngimna nei lopi-in a mawktai ka hi kei a, huihlak khawng a mawktuptup ka hi kei hi. Kimawlna sungah midangte a kihel dingin a sam hinapi-in tua kimawlna-ah a kihel zo lo mi ka suahkhak loh nadingin ka pumpi seekin hoihtakin ka ki-uk hi. Sanggamte aw, Moses a zui i pu i pate tungah a piang thu na phawk ding uh ka deih hi. Meiipi in amaute khempeuh na hu a, a vekpi-un nuamtakin San Tuipi na kantanzo uh hi. Meiipi sung le tuipi sungah ama nungzui a suak dingin Moses sungah amaute na kiphum uh hi. A vekpi-un kha tawh kisai an ne uh a, a vekpi mahun kha tawh kisai tui na dawn uh hi. Bang hang hiam cih leh amaute a tonpih, kha tawh kisai suangpi panin tui na dawn uh a, tua suangpi pen Khrih ahi hi. Ahi zongin amaute a tamzaw tungah Pasian lungkim lo ahih manin gam sung tengah amaute’ luanghawm kithehzak hi. Amaute tungah a piangte khempeuh, eite a dingin hilhkholhna ahi hi. Amaute bangin a sia nate i deih kei ding a, amaute pawlkhat in a biak bangin milim i bia kei ding hi. Lai Siangtho in, “Anne zune dingin mite tu uh a, tua khit ciangin a lam dingin a ding uh hi,” na ci hi. Amaute pawlkhat bangin numei tawh paktatna i gamta kei ding hi. Nikhat thu-in mi tul sawmnih le tulthum a si uh hi. Amaute pawlkhat bangin Topa i ze-et kei ding hi. Gul in amaute na tulum hi. Amaute pawlkhat bangin Pasian i phunsan kei ding hi. Vantung mite in amaute na sulum hi. Leitung beikuan hun sungah a om eite a dingin hih thupiangte i etteh ding thu hi a, eite hilhkholh nadingin lai sungah a kiciamteh ahi hi. Lungkip takin ka omzo hi, ci-in a kingaihsun mite a pukkhak loh nadingun kikem uh hen. Na tuah uh ze-etnate khempeuh pen mite’ tuah ngeingeite mah ahi hi. Pasian in citakin a thuciamna lenkip ahih manin note’ thuak zawh loh ding ze-etna hong tuaksak lo ding hi. Ze-etna na tuah hun uh ciangin zong na thuakzawh nading uh thahatna hong guan ding ahih manin na suahtak zawh nading uh lampi hong honsak ding hi. Tua ahih manin lawm itte aw, milim biakna pelh un. Thu ngaihsun thei mite tungah thugen bangin a hong gen ka hi hi. Ka thugente nomau mah in na ngaihsun tawm un. Nekkhawm bawlna-ah leenggahzu hangin Pasian tungah lungdamna ko-in i dawn ciangin Khrih sisan hangin thuphate eite in zong a ngahkhawm cihna hi lo ahi hiam? I balnen anlum i nek ciangin zong Khrih pumpi hangin thuphate mah a ngahkhawm cihna hi lo ahi hiam? Anlum khat bek hi a, eite mi tampi hinapi-in tua lum khat bek mah nekhawm ihih manin eite pumkhat bek mah ihi hi. Israel mite’ thu ngaihsun dih un. Biakna sa a ne khempeuh pen biakna tau tungah Pasian biakna thu-ah a kipawl hi lo ahi uh hiam? Hih bang ka cih ciangin bang ka cihnopna ahi hiam? Milim ahi a, milim biakna sa ahi zongin thupi hi, a cinuam ka hi kei hi. Ka cihnopna pen, lawkite in gan a gawh uh ciangin dawi a biakna uh hi a, Pasian a biakna uh hi lo hi. Dawi biakna-ah note na kihel ding uh ka hong deih kei hi. Note in Topa tawh nekkhawmna hai sung pan le dawi tawh nekkhawmna hai sung panin na dawnkhawm thei kei ding uh hi. Topa tawh nekkhawmna an leh dawi tawh nekkhawmna an zong na nekhawm thei kei ding uh hi. A nih tuakah kihelkhawm lehang Topa a heh nadingin a gamta ihi ding a, eite pen Topa sangin i hatzaw het kei hi. “Ka ut peuhpeuh ka hihtheihna ding thu om hi,” a ci omkha ding hi. Ahi zongin na khempeuh ka hih ding kilawm lo hi. Na khempeuh hihtheih nading thu a om hangin a kihihthei khempeuh hihna in midangte’ hoih nading piangsak lo hi. A kuamah peuh in note’ angsung ding bek zong kei unla, midangte’ phattuam nading zongzaw un. Na lungsim uhah kisuanna a om loh nadingin sa zuakna-ah a kizuak sa peuhpeuh bang sa ahi hiam, ci-in dong se loin na ututun na nethei ding uh hi. Bang hang hiam cih leh Lai Siangtho in, “Leitung le a sungah a om khempeuh pen Topa a’ ahi hi,” na ci hi. Thu um lo mi khat in an nekpih dingin hong samin tua an ne dingin na pai leh, na lungsimah kisuanna a om loh nadingin bang sa ahi hiam, ci-in dong se loin ne lel in. Ahi zongin mi khatpeuh in, “Milim biakna sa hi,” hong cih leh, tua a hong gen mipa na khualna le nangma lungsim nopmawhna a om loh nadingin ne kei pah in. Nangma lungsim nuam lo ding cihna hi loin a hong gen pa’ lungsim nuam lo ding ahih manin ne kei in, a ci ka hi hi. Mi pawlkhat in, “Bang hangin kei’ gamtat nading mite’ ngaihsutna in hong khaktan thei ding ahi hiam? Keimah in Topa tungah lungdamna ko-in ne ka hih manin tua ka lungdamkohna thu-ah bang hangin hong kimawhsak thei ding ahi hiam?” cithei kha ding hi. Tua ahih manin keimah in ka hong gennop thu in: Na hihna khempeuh uh, nekna dawnna-ah ahi zongin Pasian’ minthan nadingin na hih un. Jew mi ahi a, Gentail mi ahi a, Pasian’ pawlpi mi ahi zongin na lungnopmawhsak loh nadingun na gamta un. Mite in hotkhiatna a ngahtheih nadingin ka sepna khempeuhah keima angsung ngaihsun loin mi khempeuh phattuam nading hanciamin, a kuamah peuh a lungkim nadingin ka gamtat mah bangin note zong na gamta un. Keimah in Khrih gamtatzia ka zuih mah bangin note in zong keima gamtatzia hong zui ta un. Note in kei hong phawk tawntungin ka hong hilh thu khempeuh zui na hih manun ka hong phat mahmah hi. Ahi zongin na theih ding uh ka deih thu in: Mi khempeuh’ lutang pen Khrih hi a, numei’ lutang pen pasal hi a, Khrih’ lutang pen Pasian ahihna thu ahi hi. Pasal khatpeuh in mihon biakna sungah a lukhu lakhia lopi-in thungen ahi a, Pasian’ thugen ahi zongin a om leh Khrih’ min a daisak ahi hi. Tua mah bangin mihon biakna sungah numei khatpeuh in a lu khuh lopi-in thungen ahi a, Pasian’ thugen ahi zongin a om leh a pasal’ min a daisak hi a, a lu a met numei mah tawh a kilamdanna a om lo ahi hi. Numeite in a lu a khuh kei ding uhleh a sam uh met vet uh hen. Tua ahih manin numeite in a sam uh a met ding a zumhuai mahmah khat ahih mah bangin a lu uh khuh ta uh hen. Pasalte pen Pasian’ lim le a minthanna a kilangsak ahih manin a lu uh a khuh ding uh kilawm lo hi. Ahi zongin numeite pen pasalte’ minthanna a kilangsak ahi hi. Bang hang hiam cih leh numei tung panin pasal kipiangsak lo a, pasal tung panin numei kipiangsak zaw hi. Numei hangin pasal a kipiangsak hi lo a, pasal hangin numei a kipiangsak hizaw hi. Tua ahih ciangin a pasalte uh ukna nuai-ah a om ahihna a lah nadingun vantung mite’ muhna-ah numeite in a lu uh a khuh ding uh kilawm hi. Ahi zongin Topa thu sunga i nuntakna-ah numeite pen pasal tawh loin a tangdinzo hi lo a, pasalte zong numei tawh kop loin a tangdinzo hi tuan lo hi. Bang hang hiam cih leh numei pen pasal tung panin a kipiangsak hi a, pasal pen numei sung panin a suak ahi hi. Tua hi a, na khempeuh, Pasian kiang panin a hong pai ahi hi. Hih thu nomau mah in ngaihsun tawm un. Numeite in a lu uh khuh lopi-in mihon biakna lakah Pasian kiangah thu a nget ding uh kilawm ahi hiam? I pianpih ngeina mahmahah zong pasalte in sam sau a khawi pen amau a dingin a zumhuai thu ahihna, le numeite in samsau a neih pen a minthanna uh ahihna thu hong kilangsak hi lo ahi hiam? Numeite’ samsau pen a lu uh a tuam nadingin a kipia ahi hi. Hih thu a nialnuam a omkhak zenzen leh eite a kipan Pasian pawlpi mi a kuamah peuh in tu-a ka hong gen ngeina lobuang adang a thei om lo hi, ci-in gen ding lobuang bangmah dang om lo hi. Ahi zongin a nuai-a thu tawh kisai-in note ka hong pakta kei hi. Bang hang hiam cih leh pawlpi kikhopna na neih uh ciangin phatna sangin siatna na piangsakzaw uh hi. A masa penin, pawlpi na kikhop uh ciangin note lakah pawl kikhenna om hi, ci-in ka za hi. Hih ka zak thu a manna omkha dingin ka um hi. Bang hang hiam cih leh kuateng pawlpi mi citak ahi hiam, ci-in a kilat nadingin kikhenna a ommah ding ahi hi. Nekkhawmna a bawl dingin note na kikhop uh ciangin Topa’ Nekkhawmna a ne dingin na pai kei uh hi. Bang hang hiam cih leh nekkhawmna ne dingin na pai uh ciangin pawlkhatte amau’ an tawh na tung masa-in ne pah uh ahih manin, pawlkhatte a kham mahmahin na om uh hangin pawlkhatte gilkialin a om uh hi. Hih bangin na gamtat uh, anletui na nek nading uh inn nei lo na hi uh hiam? Tua ahih kei leh Pasian’ pawlpi simmawh bawlin pawlpi mizawngte na maizumsak nopna uh ahi hiam? Hih thu tawh kisai-ah hong pakta ding nong sak uhleh note ka hong pakta het kei hi. Bang hang hiam cih leh note kiangah ka hong gen thu pen Topa kiang panin ka ngah thu hi a, tua thu in: Topa Jesuh a kilehhek ding nitakin anlum la-in, Pasian tungah lungdam a kohkhit ciangin balnen a, “Hih pen note a dingin a hong kipia keima pumpi ahi hi. Kei na hong phawk nadingun na ne un,” ci hi. Tua mah bangin nitak an a nekkhit uh ciangin hai la a, “Hih hai sunga om leenggahzu pen keima sisan tawh a kikipsak Pasian’ thuciamna thak ahi hi. Hih bangin na dawn simun, kei na hong phawk nadingun na dawn un,” ci hi. Bang hang hiam cih leh hih bangin anlum ne-in hai sung panin leenggahzu na dawn simun, Topa a hong paikik matengin ama sihna thu a gengen na hi uh hi. Tua ahih manin a kilawm lopi-in Topa’ anlum ne-in, a hai panin leenggahzu a dawn mi peuhmah pen Topa’ pumpi le a sisan a mindaisak hi-in a mawh ahi uh hi. Tua ahih manin a kuamah peuh ki-entel masa phot uh hen la, tua khit ciangin Topa’ anlum ne-in a hai panin leenggahzu dawn pan tahen. Bang hang hiam cih leh Topa’ pumpi a khiatna thei lopi-in anlum ne-in hai panin leenggahzu a dawn mi pen amahmah mawhsak thukhenna a kipiatawm ahi hi. Tua bang mawhna hangin note tampi tak cina-in na zawngkhal uh a, pawlkhat zong na si uh hi. Eite hoihtakin ki-entel masa peuh lehang Pasian’ mawhsak thukhenna i thuak kei ding hi. Ahi zongin eite in hih leitung mite tawh mawhsakna i thuakkhawm loh nadingin Topa in eite hong thuhilhin gim hong pia hi. Tua ahih ciangin sanggamte aw, nekkhawm ne dingin na kikhop uh ciangin kingakkim dimdiam un. Tua bangin na kikhop uh ciangin Pasian’ thukhenna na thuakkhak loh nadingun a gilkial na om uhleh zong na inn uhah an ne masa un. Thu dangdangte ahihleh ka hong pai ciangin ka hong gen ding hi. Sanggamte aw, Kha Siangtho’ hong piak siamna a tuamtuamte tawh kisai thu na theih loh khak ding uh ka deih kei hi. Lawki na hih lai-un a pau thei lo milimte’ thu-in na gamta uh a, na lungsim uh tua milimte in hong zo mahmah hi. Tua ahih manin Kha Siangtho in lam a lah mite in, “Jesuh in samsiatna ngah ta hen,” a cih lohna, le Kha Siangtho in lamlak kei leh kuamah in, “Jesuh pen Topa hi,” a cih theih loh nading thu na theih ding uh ahi hi. Tu-in siamna a nam tuamtuam om a, ahi zongin a hong pia Kha Siangtho a kibang ahi hi. Nasepna a nam tuamtuam om a, ahi zongin a na i sepsak Topa a kibang ahi hi. Nasep nading siamna a nam tuamtuam om a, ahi zongin septheih nading siamna a hong pia Pasian a kibang ahi hi. Mi khempeuh a dingin phattuamna a omtheih nadingin Kha Siangtho’ hong ompihna a nam tuamtuamin hong kilang hi. Kha Siangtho in mi khat tungah thuthuk pilna hong guan a, tua Kha Siangtho mah in adang khat tungah thugen siamna hong guan hi. Adang khat tungah upna hong guan a, adang khat tungah cina damsak theihna hong guan hi. Adang khat tungah nalamdang bawl theihna, adang khat tungah Pasian’ thu hilh ding siamna, adang khat tungah Kha Siangtho piak siamna ahi leh ahi lo khentheih nading siamna, adang khat tungah pau lamdang pau theihna, adang khat tungah tua pau lamdang tuamtuam paunate a khiatna gentheihna hong pia hi. Hih siamna a tuamtuamte a hong pia pen Kha Siangtho a kibang khat bek mah hi a, mi a tuamtuamte tungah ama hoihsak bangin a hong piak ahi hi. Pumpi pen khat bek hinapi-in na a tuamtuam a nei hi. Pumpi in na a tuamtuam tampi a neih hangin pumpi khat bek mah ahih veve mah bangin Khrih zong pumpi na a tuamtuam a nei pumpi khat ahi hi. Jew mi ihi a, Gentail mi ihi zongin, sila ihi a, sila ahi lo ihi zongin, eite minam tuamtuam ihih hangin Kha Siangtho khat bek mah in Jesuh’ pumpi a suak dingin ama sungah hong phum a, eite khempeuh tungah a hong kipia pen tua a kibang Kha Siangtho khat bek mah ahi hi. Pumpi in na khat bek nei loin nam tampi tak a nei hi. Khe in, “Kei, khut hi lo ka hih manin pumpi tawh ka kizom kei hi,” a cihmawk hangin pumpi na khat ahihna a bei hi tuan lo hi. Bil in, “Kei, mit hi lo ka hih manin pumpi tawh ka kizom kei hi,” a cihmawk hangin pumpi na ahihna a bei hi tuan lo hi. Pumpi khempeuh mit suakkhin leh bang tawh khua za ding ahi hiam? Pumpi khempeuh bil suakkhin leh bang tawh a gimnam thei ding ahi hiam? Ahi zongin tu-a i neih bang tektekin, Pasian in ama deih bangin pumpi na a tuamtuam a hong bawlsak hi. A vekpi-in pumpi na nam khat bek hi khin leh a pumpi ding koi-ah om nawn ding ahi hiam? Ahi zongin tu-a i neih bangin pumpi khat bek om a, na tampi a nei hi. Tua ahih manin mit in khut kiangah, “Nang ka hong kisam kei hi,” ci thei lo a, lutang in zong khe kiangah, “Nang ka hong kisapna om lo hi,” ci thei lo hi. Pumpi na a ginalo tawh a kibangte a kimanna lian mahmah zawsop a, pumpi na bangmah gentaak lo i sakte pawl limtakin kep kul zawsop hi. I pumpi na hoih i sak khollohte pen, pumpi na hoih i sakte i lim et ding a kisap kholloh bang hi loin, limkep diak peuh kulzaw se hi. Ahi zongin i pumpi na thupi i sak khollohte limtakin i kepdiak ding a kisamin i pumpi a na bawl se hi. Tua ahih manin i pumpi nate khatlekhat kithutuak lo cih om loin a vekpi-in a kilemkim uh hi. Khat in natna ngah leh a vekpi-un thuakkhawm uh a, khat in pahtakna ngah leh a vekpi-un lungdam khawm uh hi. Tu-in note khempeuh pen Khrih pumpi na hi uh a, na vekpi-un a pumpi na khat ciat na hi uh hi. Tua ahih manin Pasian in pawlpi sungah mi khempeuh ama panmun ciat dingah a hong bulh hi. A masa-in sawltakte, a nihna-ah kamsangte, a thumna-ah laihilhte, tua ciangin nalamdang bawltheite, cina damsak theite, midang a huhtheite, thu vaihawm a siamte, le pau lamdang a pau theite ahi uh hi. A vekpi-un sawltak hi lo a, a vekpi-un kamsang zong hi lo uh hi. A vekpi-un laihilh, thuhilh hi lo uh a, a vekpi-un nalamdang zong bawl lo uh hi. A vekpi-un cina damsak nading siamna nei lo uh a, a vekpi-un pau lamdang pau thei lo uh a, a vekpi-un tua pau lamdangte a khiatna gen thei lo uh hi. Tua ahih manin Pasian’ hong piak siamna a hoihpente deih belin na nei ta un. Tu-in a hoihpen thu khat ka hong gen ding hi. Keimah in mihingte pau a tuamtuamte le vantung mite’ pau nangawn ka pautheih hangin itna ka neih kei leh a bil-aphuai zam le daltuah kitum tawh a kibang lel ka hi hi. Thuhilh siamna nei-in, thusim khempeuh thei-in, na khempeuh thei-in, mualte kinsak zawh nading upna ka neih hangin itna ka neih kei leh ka kimanna bangmah om lo hi. Ka neih khempeuh midangte tungah pia-in, Pasian’ nasepna hangin kihaltumna ka thuak ahi zongin itna ka neih kei leh ka phattuamna bangmah om lo hi. Itna neite a lungduai-in migi hi. Itna neite in hazatna lungsim nei loin, zong kisathei lo hi. Itna neite a kilawm loin gamta lo, heh pakpak lo, mite’ mawhna ciamteh lo hi. Thuman lote-ah lungdam ngei lo uh a, thumante bekah lungdam uh hi. Itna neite lungkia cih om ngei lo hi; a upna, a lametna, lungduai takin a ngaknate uh a mawkna cih om ngei lo hi. Itna pen a tawntungin a kip ahi hi. Thuhilh siamna a om tei hangin tawlkhat sung bek kimangin, pau lamdang pautheih siamnate a om hangin bei ding a, thutheih siamna a om hangin maimang ding hi. Bang hang hiam cih leh eite’ neih thutheih siamnate le i thuhilh siamnate a kicing hi lo hi. Ahi zongin a kicing thu hong tun ciangin a kicingtaak lo thuteng maimang ding hi. Naupang ka hih hun lai-in naupang mah bangin kampau-in, thu ngaihsunin, ka gamta hi. Ahi zongin tu-in khangham ka hih manin naupang vaite ka zang nawn kei hi. Dal limlang sunga et bangin tu laitakin a kitel pha loin i mu milmial a, ahi zongin mai lamah maitang kituahin i mu ding hi. Tu laitakin i theihnate kicing lo a, ahi zongin mai lamah Pasian in eite hong theih mah bangin a kicing takin amah i thei ding hi. Tu laitakin a omlai thu thumte pen upna, lametna, le itna hi a, tua thumte sung panin itna mah a thu lianpen ahi hi. Na deih lianpen uh ki-itna na hisak un. Kha Siangtho’ hong piak siamna a tuamtuamte sung panin thuhilh siamna neih ding na hanciam phapen un. Bang hang hiam cih leh pau lamdang a paute pen mite’ tungah thugen hi loin Pasian’ tungah thugen ahi hi. Amaute’ pau kuamah in thei lo a, Kha Siangtho’ vangliatna tawh Pasian’ thusimte a gengen ahi uh hi. Ahi zongin Pasian’ thu a hilhte pen mite tungah thugen hi a, mite tungah huhna, hanthotna, le hehnepna a pia ahi hi. Pau lamdang a paute pen amau mahmah a phattuam nadingin a pau hi a, Pasian’ thu a hilhte ahihleh pawlpi’ phattuam nadingin nasem ahi hi. Note khempeuh pau lamdang na pautheih ding uh kong deihsak hangin Pasian’ thu hilh ding siamna na neih ding uh ka hong deihsakzaw hi. Pawlpi in phattuamna a ngahtheih nadingin note lakah a khiatna a genthei pah ding om ahih kei buang leh, pau lamdang a paute sangin Pasian’ thu a hilhte a lianzaw ahi hi. Sanggamte aw, note kiangah hong pai-in pau lamdang tawh thu hong gen leng, bangin kimang ding ahi hiam? Note-a’ in Pasian’ thu theihna, pilna le siamna a hong piansak kei leh a kimanna themkhat zong om het lo hi. Nuntakna a nei lo tamngai le harp lasaknate nangawn, a aw a kitelin ging sensen kei leh bang la kisa ahi hiam, ci-in kua in theithei ding ahi hiam? Galdo nading peengkul a tum pa in a aw a kitelin tum kei leh galdo dingin kua kithawi thei ding ahi hiam? Tua mah bangin na thugenna uh kammal kitel sinsen kei leh kua in note’ thugen theithei ding ahi hiam? Na thugen uh huihlakah a maimang suak lel ding hi. Leitungah pau nam tampi om a, ahi zongin khiatna a nei lo khat beek om lo hi. Ahi zongin a kipau paunam thei kei leng, kei pen a pau pa a dingin mi namdangpi ka hi ding a, a pau pa zong kei a dingin mi namdangpi khat hi ding hi. Note in zong Kha Siangtho’ hong piak siamnate deih belin nei na hih manun pawlpi a dingin phattuamna taktak a piangsak ding siamnate mah nget belin na nei ta un. Tua ahih manin pau lamdang a paute in, amau paute a khiatna a gen theih nading uh siamna a neih nadingun thu ngen ta uh hen. Bang hang hiam cih leh pau lamdang tawh thu ka nget ciangin lungsim takpi tawh thungen ka hih tei hangin bang ngen ka hi hiam cih ka ngaihsun thei kei hi. Tua ahihleh bangci gamtat ding ka hi hiam? Ka lungsim tawh thu ka ngen ding a, ka ngette ka theih nading tawh zong ka ngen ding hi. Ka lungsim tawh la ka sa ding a, ka sakte ka theih nading tawh zong ka sa ding hi. Na lungsim bek tawh Pasian tungah lungdamna na koh ciangin kikhopna sungah a om midangte in bangci-in nang’ thungetna, “Amen,” hong cihpih thei ding ahi hiam? Nangma thungette a theihtheih nading uh bangmah om lo hi. Pasian tungah lungdam ko-in na thungetna a hoih mahmah hangin midangte in bangmah phattuamna ngah het lo hi. Note khempeuh sangin pau lamdang pau theizaw ka hih manin Pasian tungah ka lungdam hi. Ahi ta zongin pawlpite’ biak kikhopna sungah pau lamdang kam tul sawm bang ka pau sangin midangte’ phattuam nadingin a theih ding uh kammal nga bek ka pauzaw ding hi. Sanggamte aw, na thu ngaihsutnate uhah naupang bang kei un. Gitlohna lamah naupang bang unla, ahi zongin thu ngaihsutna-ah a khangham hi ta un. Lai Siangtho sungah, “A lamdang kampau tawh amaute hopihin, minam dangte’ pau tawh thu ka gen ding a, tua bang nangawnin hih mite in keima thugen hong ngai lo ding uh hi, ci-in Topa in a gen hi,” ci-in na kigelh hi. Tua ahih manin pau lamdang pen thu um mite a’ ding hi loin, thu um lo mite in a uptheih nading uh lim ahi hi. Tua mah bangin Pasian’ thuhilhna pen thu um mite a’ ding hi a, thu um lo mite a’ ding hi lo hi. Tua ahih manin pawlpi mi khempeuh na kikhopna uhah na vekpi-un pau lamdangin pau-in, mi mawkmawkte ahih kei leh thu um lo mite in hong mu zenzen leh, note pen mihai hontang hi, hong ci ding hi lo ahi uh hiam? Ahi zongin na vekpi-un hoihtakin Pasian’ thu na gen laitakun mi mawkmawkte ahih kei leh thu um lote hong pai leh, a zak uh thute hangin a mawhna uh kiphawkin a hoih lohna uh kithei ding uh hi. A lungsim sung uhah a ipcipte uh kipholak ding a, khukdinin Pasian bia-in, “Hih mite lakah Pasian om taktak hi,” ci ding uh hi. Tua ahih ciangin sanggamte aw, ka hong gennop thu a tomin: Pasian bia dingin note na kikhop uh ciangin khat in la sak ding nei, khat in Pasian’ thu a gen ding nei, khat in pau lamdang tawh thugen ding nei, khat in tua a kigente a khiatna gentheih nading nei cih bangin na om ding uh hi. Hih a tuamtuamte khempeuh, pawlpi’ phattuam nading ahih ding kisam hi. Pau lamdang tawh thugen nuam a om leh zong, nih bang, ahih kei leh a tam penin thum bang in gen bek ding a, tua bangin a gen uh ciangin zong khat a man khit ciangin khat in a banbanin gen ding uh hi. Ahi zongin a khiatna a genthei ding a om kei leh zong, kikhopna sungah pau lamdangin a pau nuam pa gamdai takin om ding a, amah le Pasian tawh kikal bekah kigen ding uh hi. Pasian thu gen ding a neite sung panin nih le thum bang bek in a banbanin gen ding uh a, adangte in limtakin na tel ngaih ding uh hi. A kikhawm mite sung panin mi khatpeuh in Pasian thu gen ding hong neih leh tua a thugen lai pa khawl phot ding hi. Na vekpi-un a thu thei-in thahatna na ngahtheih nadingun no thugen ding a neite khempeuh in khatkhatin thu na ban gen ding uh hi. mihon biak kikhopna sungah numeite pau loin om uh hen. Numeite a kiniamkhiat nading thu Jew Thukham in a gen mah bangin amaute in mihon lakah thu a gen ding uh kiphal lo hi. Amaute in a theihnop uh thu a om leh, inn panin a pasalte uh dong ta uh hen. Bang hang hiam cih leh mihon lakah numeite kam a pau ding zumhuai hi. Note kiang bek panin Pasian’ thu hong kipan a, note tung bekah a hong tung sa zenzen na hi uh hiam? Mi khatpeuh in Kha Siangtho hong piak siamna a nei, Pasian thugen ka hi hi, ci-in a kingaihsut leh hih lai ka hong gelhte pen Topa’ thupiakna tawh a gelh ka hihlamtak a phawk ding kisam hi. Hih ka thugente a don kei leh amah zong don kei pah un. Tua ahih ciangin sanggamte aw, Pasian’ thu hilh ding ngaihsut lian penin na nei unla, ahi zongin pau lamdang a paute na kho dah hoh un. Na khempeuh a kilawm a kituakin na hih un. Sanggamte aw, note kiangah ka hong hilh, note in hong sangin kiptakin na let uh thu, na phawkkik ding uh ka deih hi. Kei’ hong hilh thu pen lungdamna thu ahi hi. Note in kiptakin tua lungdamna thu na let nak-uhleh hotkhiatna a ngah na hi uh hi. Tua hikeileh na upna uh a mawkna ahi hi. Kei tungah a hong kihilh a thupi pen note tungah ka hong gensawn a, tua in: Lai Siangtho sungah a kigelh mah bangin eite’ mawhna tang dingin Khrih hong si-in kivui a, Lai Siangtho sungah a kigelh mah bangin a ni thum ni-in Pasian in hingkiksak hi. Tua ciangin Peter kiangah kilang a, a zomah sawltak sawm le nihte kiangah kilang hi. Tua ciangin thu um mi zanga val tungah thakhatin kilang hi. Tua mi zanga valte, pawlkhat a sih khit tei hangin a tamzaw nungta lai uh hi. Tua ciangin James tungah kilang a, tua banah sawltak sawm le nihte tungah kilang leuleu hi. A tawpna penah, kei pen a ngeina bangin a suak lo naungek tawh a kibang hinapi-in kei tungah zong hong kilang hi. Bang hang hiam cih leh kei pen Pasian’ pawlpi a bawlsia mipa ka hih manin sawltak cih dingin zong a kilawm lo zah dongin sawltakte lakah a neupen ka hi hi. Tua bang hitaseleh Pasian’ hehpihna tawh tu-a ciangah ka om a, kei tungah a hong piak ama hehpihna a mawkna suak lo hi. Sawltak dangte khempeuh sangin na nakpitakin ka sem zawsop hi. Tua ka sepzawhna pen keima hatna hang hi loin Pasian’ hong hehpihna hang ahi hi. Tua ahih ciangin kei ka hi a, sawltak dangte in ahi zongin hong hilh thu pen Khrih’ thawhkikna thu mah hi a, note’ up zong tua thu mah ahi hi. Tu-in gen penin a kinei thu in: Sihna panin Khrih kihingkiksak hi, cihna thu ahih manin, bang hangin note pawlkhat in, misite thokik lo ding hi, ci thei na hi uh hiam? Tua bangin misite a thokik lo hileh Khrih zong a kithokiksak lo hi ding hi. Khrih a kithokiksak lo hileh kote’ thuhilhna a mawkna hi ding a, note’ thu up zong a mawkna mah suak ding hi. Tua bek zong hi lo lai-in, misite a kihingkiksak lo ding hileh Pasian in Khrih hingkiksak hi, ci-in teci pang ka hih manun, mite kiangah Pasian’ thu a man lopi-in a gen ka suak ding uh hi. Bang hang hiam cih leh misite a kihingkiksak lo ding hileh Khrih zong kihingkiksak lo ding hi. Khrih a kihingkiksak lo hileh note’ upna a mawkna hi ding a, na mawhna sung mah uhah note a omlai na suak ding uh hi. Khrih thu a um, a sisa mite zong a mawkna mah hi lai ding hi. Khrih hangin i lamet thu pen hih i leitung nuntak sung thu ding bek hi takpi leh leitung midang khempeuhte sangin a hehpihhuai zaw ihi ding hi. Ahi zongin a thuman taktak ci lehang, a sisa mite zong hingkik takpi ding hi cih a kitel theih nadingin sihna panin Khrih kihingkiksak khinzo hi. Bang hang hiam cih leh mi khat hangin sihna a om mah bangin mi khat hang mahin misite zong hinkikna om hi. Bang hang hiam cih leh Adam tawh a kizop manin mi khempeuh si a, tua mah bangin Khrih tawh a kizom khempeuh zong kihingkiksak ding hi. Ahi zongin tua hinkikna pen ama hun tawh kizui-in a banbanin hi ding hi. A masa penin Khrih hi a, Khrih hong paikik ciangin ama pawlte khempeuh hingkik ding hi. Tua ciangin Khrih in ukna, vangliatna, aana a nei ama galte khempeuh a zawhgawp khit ciangin Pa Pasian tungah ukna aana ap ding a, tua ciangin hih leitung hun beina hong tung ding hi. Bang hang hiam cih leh Pasian in a galte khempeuh zo-in a khenuai-ah a koihkhit hun dong mateng Khrih in uk ding hi. A tawpna-ah suksiat ding a gal nunung pen in sihna ahi hi. Bang hang hiam cih leh Lai Siangtho in, “Pasian in na khempeuh ama khenuai-ah koih hi,” na ci hi. “Na khempeuh,” a cih ciangin Khrih’ khutnuai-ah na khempeuh a koih Pasian mahmah simloh a vekpi-in a huamkhin ahihna kitel hi. Khrih’ khutnuai-ah na khempeuh a kikoih ciangin ama khutnuai-ah na khempeuh a koihsak Pasian’ khutnuai-ah Tapa mahmah zong om ding a, Pasian pen na khempeuh le a kuamah peuh tungah a lianpen hi ding hi. Tua ciangin thu khatah, a sisa mite’ tang dingin tui a kiphum mite in bang a deihna uh ahi hiam? Misite kihingkiksak het lo ding ahihleh bang hangin a sisate’ tang dingin tui kiphum ahi uh hiam? A site hinkikna om lo ding hileh bang hangin kote in nisimin gimna le sihna zah dong dingin lauhuaina thuakin na sem nuam ding ka hi uh hiam? Sanggamte aw, i Topa Jesuh Khrih thu-ah note hangin ka kisaktheih zah mah bangin nisim mahin sihna a thuakthuak ka hi hi. Hih leitung a phattuam nading bekin ngaihsun ni ci lehang, sahang tawh kilai bang keekin Efesa khuamite tawh ka kihihna uhah gim thaman bang ngah ka ahi hiam? Misite hinkikna om lo ding hileh, “Zing ciangin si kha ding ihih manin i duhduhin an ne zu ne-in nuamtakin om ni,” ci-in paunak a om bangin gamtat lel ding ahi hi. Sanggamte aw, mi’ khemsa-in ta kei un. Kikholhpih hoih lote in mi siasak thei hi. Hoihtakin thu ngaihsun phakik unla, mawhna gamta nawn kei un. Note pawlkhat in Pasian thei het lo na hih manun maizumhuai mahmah hi. Mi pawlkhatte in, “A sisa mite bangci thawhkik ding a, bang pumpi tawh thokik ding ahi hiam?” cikha thei hi. Tua bang ngaihsutna haihuai mahmah hi. Khaici na tuh uh ciangin a muat lopi-in hong po thei lo hi. Mangbuhci ahi a, khaici dang khat peuhpeuh ahi zongin na tuh uh ciangin hong po-in a khankhit ciangin a kung omzia dingteng tawh a tuh na hi kei uh a, a khaici bek a tuh na hi uh hi. Ahi zongin Pasian in ama hoihsak bangin a kung ding na pia a, khaici nam tuamtuamte a’ ding kung nam tuamtuam a guan hi. Tua mah bangin sa a nei nuntakna nam khempeuh zong a sa kibang kim lo hi. Mihing sa, ganhing sa, vasa sa, ngasa sa, cih bangin a nam tuamtuam a om hi. Vantung pumpi om a, leitung pumpi zong om hi. Vantung pumpi a hoihna a tuam khat hi a, leitung pumpi a hoihna zong a tuam khat mah ahi hi. Ni a hoihna a tuam khat hi a, kha a hoihna a tuam khat hi a, aksite a hoihna a tuam khat mah ahi hi. Aksite nangawn a hoihna a tuamtuamin omlai hi. Misite a thawhkikna zong hihte mah tawh kibang hi. A kiphum pen a muat thei hi a, a thokik pen a muat thei lo ahi hi. A kiphum laitakin hat loin melsia a, a kithawhkiksak ciangin thahatin a melhoih hi. A kiphum laitakin leitung pumpi hi a, a kithawhkiksak ciangin kha pumpi ahi hi. Leitung pumpi a om mah bangin kha pumpi zong a om ding ahi hi. Tua ahih manin Lai Siangtho in, “A masa Adam pen leitung nuntakna a nei mihing hong suak hi,” na ci hi. Ahi zongin a nunung Adam pen nuntakna a pia thei Kha ahi hi. Ahi zongin kha pumpi a om masa hi loin leitung pumpi a om masa hi a, leitung pumpi a omkhit ciangin kha pumpi a omthei pan ahi hi. A masa Adam pen leitung leivui tawh a kibawl hi a, a nunung Adam pen vantung panin a hong pai ahi hi. Leitung tawh a kipawl mite pen lei tawh a kibawl mite tawh a kibang hi a, vantung tawh a kipawl mite pen vantung panin a hong pai mipa tawh a kibang ahi hi. Eite in lei tawh a kibawl mite’ lim i puak mah bangin vantung panin a hong pai Mipa’ lim zong a pua ding ihi hi. Sanggamte aw, note kiangah ka hong gennop thu in: Pasian’ Ukna sungah hih leitung silesa pumpi lut thei lo ding a, a siathei pumpi pen a siathei lo pumpi suak thei lo ding hi. Kuamah kim in a theih loh thusim khat na ngai un. Eite khempeuh a si khin ding ihi kei a, thakhatthu-in a kikhelvat ding ihi hi. Peengkul nunung hong gin’ ciangin mitphiat kikal sungin i kikhelpak ding hi. Bang hang hiam cih leh peengkul hong gin’ ciangin misite a sithei nawn lo dingin hong tho ding a, i vekpi-in i kikheel ding hi. A muatthei pumpi pen a muat thei lo pumpi-in hong kikheel ding a, a sithei pumpi pen a sithei lo pumpi-in hong kikheel ding hi. A muatthei pen a muat thei lo hong suakin, a sithei pen a sithei lo hong suah ciangin Lai Siangtho thu hong tung taktak ding hi. Lai Siangtho in, “Sihna maimangin gualzawhna in khuplet hi. Sihna aw, na gualzawhna koi-ah om a, midangte na suksiat zawh nading na thahatna koi-ah omta ahi hiam?” na ci hi. Sihna a pianna mawhna hang hi a, mawhna a kitheihna Thukham hang ahi hi. Ahi zongin i Topa Jesuh Khrih hangin gualzawhna a hong pia Pasian tungah i lung a dam hi. Tua ahih ciangin ka hong it sanggamte aw, Topa’ hangin na nasepnate uh a mawkna hi ngei het lo hi, ci-in na theih uh mah bangin Topa a dingin a tawntungin na sem unla, ling hetloin lungsim kiptakin na om ta un. Tu-in Judea gam a om Pasian mite huh nading sum kaihkhop nading thu tawh kisai-in: Galatia gam a pawlpite in a hih ding zia uh ka gen bangin note in zong na hih un. Kei ka hong pai ciangin sumpi kaihkhop tawm a om loh nadingin na ngahna uh tawh kizui-in Nipi simin na tuamkoih unla, na na khol un. Kei ka hong tun ciangin Jerusalem khua-ah na huhna uh sumte a puak dingin hoih na sak uh mite sawlin, lai tawh i paisak ding hi. Kei mahmah zong ka va pai ding hoih i sak leh amaute tawh ka va paikhawm ding hi. Masedonia gam nawkin khualzin sawm ka hih manin tua gam sung ka zin khit ciangin no kiangah ka hong pai ding hi. Note kiang panin mundang ka zin nading peuhpeuhah kei na hong huh theih nadingun note kiangah tomno sung bek hi loin phalbi hun sung tawntung bang ka hong taamthei kha ding hi. Bang hang hiam cih leh Topa in hong thukimpih nakleh khualzin kawmin a hong nawk bek hi loin, note kiangah hun hoihkhop khat ka om nuam hi. Ahi zongin hih Efesa khua mahah Pentekos Pawi hun ciang dong ka om ding hi. Hong langpang tampi a om tei hangin limtakin na septheih nading lam tampi tak a om hi. Note kiangah Timoti hong pai zenzen khak leh, amah pen keimah bangin Topa’ na a sem ahih manin nuam a sak theihtheih nadingin na bawl un. Kuamah in na simmawhbawl kha kei unla, kei kiang a hong tunkik theih nadingin nuamtakin a khualzin a hong zoptheih nadingin na huh un. Thu uppih i sanggam dangte tawh kei kiangah a hong pai dingin ka lamet ahi hi. I sanggam Apollos ahihleh, thu uppih sanggam dangte tawh no kiangah hong hawh nadingin ka hanthot zel hangin tu tadihin hong hawhpah ding lungtungzo nai lo hi. Ahi zongin hunhoih a ngah peuhpeuh ciangin hong pai ding hi. Kiging tawntungin na upna uhah kip unla, thahatin hang un. Na sepna khempeuh uhah ki-itna tawh na gamta un. Sanggamte aw, Stefanas-te innkuan pen Akhaia gam sunga thu um masa pente ahihna le Pasian’ mite a dingin nasem dingin a kipia mite ahihna thu na thei uh hi. Tua bang mite le amaute tawh tua bangmahin na a semkhawm mite’ thu na man nadingun ka hong thum hi. Stefanas, Fortunatas le Akhaikas-te hong paina hangin ka nuam mahmah hi. Note tawh ka kimuh mah tawh hong kibangsak a, note hong lungnopsak mah bangin kei zong ka lung hong nuamsak hi. Hih bang mite, limtakin na phawk ding uh ahi hi. Asia gam a om pawlpi a tuamtuamte in note hopihna kam hong khak uh hi. Aquila le Prisilla-te in zong amau’ inn-a kikhawm pawlpite tawh Topa’ hangin lungsim taktak tawh hopihna kam hong khak uh hi. Hih lai-ah a om thu upna sungah i sanggamte khempeuh in zong hopihna kam hong khak uh hi. A siangtho kinapna tawh note khatlekhat na kihopih un. Keimah Paul in ka hong hopih hi, cihna kamte ka khut mahmah tawh ka gelh ahi hi. Topa a it lo mi peuhmah in samsiatna ngah tahen. I Topa hong pai tahen. Topa Jesuh hong hehpihna thupha, note tungah hong tung tahen. Jesuh Khrih sungah note ka hong itna, note tungah hong kip ta hen. Amen. Jesuh Khrih’ sawltak ahi dingin Pasian in a hong seh keimah Paul le thu upna sungah i sanggam Timoti in, Korin khua-ah a om Pasian’ pawlpi mite le Akhaia gam sungah a om Pasian’ mite khempeuh tungah lai ka hong khak uh hi. I Pa Pasian le Topa Jesuh Khrih in note khempeuh tungah dikna le nopsakna thupha hong tungsak tahen. Eite’ Topa Jesuh Khrih’ Pa ahi, hehpihna a nei Pa, i kisapna khempeuhah a hong huh Pasian in thupha ngah tahen. Amah in kote’ haksatna khempeuhah hong huh ahih manin, kote in zong Pasian’ tung panin ka ngah uh tua huhna mah zangin haksatna a nam tuamtuam a thuakte ka huhsawn thei leuleu uh hi. Khrih hangin gimna tampi ka thuak uh mah bangin amah in zong kote tungah huhna tampi mah a hong pia hi. Kote in gimna ka thuak uhleh note’ phattuam nading le hotkhiatna na ngah nading uh ahi hi. Kote in huhna ka ngah uhleh zong, note zong a hong kihuh hi a, kote’ thuak bang gimnate na thuak uh ciangin lungduai takin na thuakzawh nading uh thahatna a hong kipia ahi hi. Note ka hong muanna uh kiam tuan lo hi. Kote’ thuak bangin na thuak uhleh Pasian in kote hong huh mah bangin note zong hong huh ding hi. Sanggamte aw, Asia gam sunga ka thuaknate uh na hong phawkpih ding uh ka deih uh hi. Ka thuakna uh lianlua mahmah ahih manin nuntak zawh nading lametna om lo hi. A si ding taktak hi ta hang, ci-in ka kingaihsun uh hi. Ahi zongin tua zahin ka thuakna uh pen kote’ thatang kimuang loin sihna panin misite a hingkiksak Pasian ka muantheih nadingun a piang ahi hi. Tua zahin a lauhuai sih nading panin hong honkhia khinzo a, zong hong honkhia lai ding hi. Mailam hunah zong hong honkhia kikkik ding hi, ci-in amah ka muang uh hi. Kote a dingin thu hong ngetsak un. Tua hileh mi tampi in kote a dingin thu a hong ngetsaknate uh Pasian in a hong piakna hangin mi tampi mah in kote’ tang dingin Pasian tungah lungdamna ko thei ding uh hi. Kote’ kisialhpih thu in: hih leitung a ka gamtatnate uh le a diakdiakin note tungah kong gamtatnate uhah, mihingte’ pilna a zang hi loin Pasian hehpihna vang tawh, Pasian’ deihna bangin lungsim takpi tawh a gamta hi ung, ci-in ka kitheihna lungsim uh ahi hi. Bang hang hiam cih leh note in simthei-in a thu na theihtheih dingte bek uh a hong gelh ka hi uh hi. Tuhunin a cingin na theih lohte uh zong, Topa Jesuh hong paikik Ni ciangin a cingtakin thei ding na hih manun note hangin ka kisialh uh mah bangin note zong kote hangin na kisial ding uh hi. Tu-a bangin piang taktak ding ci-in teltheih ka hih manin note in hamphatna nihvei na ngah nadingun ka geel a, Masedonia gam ka pai ciangin hong nawk masa-in, Masedonia gam panin ka kilehkik ciangin zong Judea gam a ka paina dingah nong huh theih nadingun hong nawk leuleu dingin ka ngaihsun masa phot hi. Hih bangin ka ngaihsutna pen a mawkkheel themthum hong sa na hi uh hiam? Leitung mihingte bangin angsung phattuam nading a om kei leh a gensa thu a kheel themthumte bang hong sa na hi uh hiam? Pasian a thuman a citak ahih mah bangin note tungah ka hong gente uh zong a kheel themthum ka hi kei uh hi. Bang hang hiam cih leh Silvanas, Timoti, le keimah in note lakah a thu ka hong hilhhilh uh Pasian’ Tapa Jesuh Khrih pen hih ding a cihte hihlo ding ci-in a thu a kheel themthum pa hi lo a, hih ding a cihte hih ding mah hi pah hi. Pasian’ thuciamte khempeuh a hih pa pen amah ahi hi. Tua ahih manin Jesuh Khrih hangin Pasian phatin, “Amen,” i cihna zong hih thu hang mah ahi hi. Khrih sungah kote le note a hong kipsak pa, le nasem dingin kote a hong sawl pa pen Pasian ahi hi. Amah in eite pen ama a’ ihihna ciaptehna eite tungah hong bawl a, ama a’ ihihna le eite tungah a hong piak ding na khempeuh a hong pia takpi ding ahihna a kitel nadingin eite’ lungsim sungah Kha Siangtho a hong mapiak hi. Note kiangah kong pai lohna pen note ka hong dopna hizaw hi. Hih thu hong theihpih ka teci pen Pasian ahi hi. Hih bangin um un, ci-in thatanghat thu tawh a hong gen ding ka hi kei uh hi. Note na upna uhah kipkhin na hih manun note’ lungdam nadingin note tawh na a semkhawm ka hi uh hi. Tua ahih manin hong pai leng note’ dah nading hong piang ding ahih manin ka hong pai loh nadingin ka lungsim ka khensat hi. Kei a hong lungdamsak ding note ke’n hong dahsak leng, kei kua in hong lungdamsak nawn ding ahi hiam? Kei lungdam leng note khempeuh zong a lungdam ding na hihna uh teltakin thei ka hih manin, kei a hong lungdamsak ding note in kei’ dahna nong piansakkhak loh nading uh ka deihna tawh kei hong pai loin tua lai a hong gelh ka hi hi. Tua lai ka gelh laitakin, note’ dah nading piangsakkha loin note ka hong it mahmahna na phawk nading uh ka deihna tawh ka gelh hi a, lungkham sinkhamna le khitui naptui kai-in a gelh ka hi hi. Mi khatpeuh in heh nading a piansak ciangin kei bek a hong hehsak hi loin note khempeuh zong a hong hehsak ahi hi. Tua ahih manin tua bang mi tungah khauhtat lua nawn kei un. Note’ gimpiaknasa pen kicing khinzo ka sa hi. Tua ahih manin a mawhna maisak ta unla hehnemzaw un. Tua hikeileh dahlua-in siatlawh kha ding hi. Amah na itkik ding uh ka hong thumna thu zong amah na theisak un. Note in ze-etna bangzah ciang thuakzo-in, ka thugente na hong mangzo uh hiam cih ka theih nadingin tua lai a hong gelh ka hi hi. Note in mawhna na maisak uh ciangin kei zong a maisak ka hi hi. Mawhna maisak ding om ahihleh zong, mawhna ka maisak ciangin Khrih hang le note’ phattuam nadingin a maisak ka hi hi. Mawhna maisak kei lehang Satan in nuamtaksa-in eite tungah hong gualzo kha ding ahih manin mawhna a maisak ihi hi. Satan’ nasepna zia a thei lo ihi kei hi. Khrih hangin lungdamna thu a hilh dingin Troas khua ka tun ciangin tua lai-ah nasep theih nadingin Topa in lampi hong honsakna thu ka mu hi. Ahi zongin tua lai-ah i sanggampa Titus na om lo ahih manin ka lungsim om thei nawn lo hi. Tua ahih manin tua lai-a om mite nusia-in Masedonia gamah ka paisuak hi. Ahi zongin Pasian tungah lungdam mahmah nading thu a om hi. Khrih tawh ka kipawlna hangun gualzawhna tawh Khrih a paina khempeuhah Pasian in kote hong zuisak hi. Mun khempeuhah paknamtui a kizelh bangin Khrih thu theihna a kizelsak dingin Pasian in kote hong zang hi. Hotkhiatna a ngah mite le a ngah lo mite lakah kote pen Khrih in Pasian tungah a piak paknamtui tawh ka kibang uh hi. Tua a nam pen, thu um lo mite a dingin mi a sisakthei a nam khauh mahmah hi a, hotkhiatna a ngah mite a dingin mi a hingsakthei a namtui mahmah ahi hi. Hih nasep a sem dingin kua kilawm ahi hiam? Ahi zongin kote pen, van gina tum lo a zuak mite tawh a kibang ahi, Pasian’ thu a gen mawkmawk midangte bang ka hi kei uh a, Pasian in a nasem dingin kote hong sawl ahih manin Khrih nasem hihna tawh ama mai-ah lungsim takpi tawh thugente ka hi uh hi. Hih bangin thu ka gen uh ciangin koleko a kiphattawm ka bang zel uh hiam? Midang pawlkhatte bangin note kiangah lah ding mihoih hihna lai ka kisam kei uh a, note in zong kote nong lah ding uh mihoih hihna lai a kisam na hi kei uh hi. Note mahmah pen mihoih ka hihna uh lah nadingin kote’ lai na hi uh a, mi khempeuh in simin a theih nadingun kote’ lungtang tungah a kigelh lai na hi uh hi. Hih lai pen Khrih mahmah in gelhin kote a hong puasak ahihna thu kitel mahmah hi. Laidal le suangpek tungah laitui le laikung tawh a kigelh hi lo a, mihing lungtang tungah a nungta Pasian Kha Siangtho tawh a kigelh ahi hi. Khrih hangin Pasian muang ka hih manun hih bangin a hong gen ka hi uh hi. Hih bang sepzawh nadingin kote in siamna nei ung a ci hi loin, sepzawh nading siamna pen Pasian hong piak ahi hi. Thuciamna thak nasem thei dingin kote tungah siamna a hong pia hi. Tua hong piakna pen lai-a kigelh thukham tawh hi loin Kha Siangtho tawh ahi hi. Bang hang hiam cih leh lai-a kigelh thukham in sihna piangsak a, ahi zongin Kha Siangtho in nuntakna hong pia hi. Thukham pen suangpek tungah a kigelh laimal hi a, a kipiak hunin Pasian’ minthanna tawh hong tonkhawm hi. Moses’ maitang a taang mahmah pen mualkhin tei napi-in, nak taanlua mahmah ahih manin Israel mite in Moses’ maitang en zo lo lai uh hi. Sihna a piangsak thei bek Thukham hong kipiak ciangin tuazah minthanna vangtaang tawh hong kizui ahihleh, nuntakna a pia Kha Siangtho nasepna bangzahin minthanna lian tawh hong kizuizaw kan ding ahi hiam? Mite mawhsakin thukhen nasepna-ah tuazahin minthanna vangtaang om ahihleh mite dik hi, ci-in genkhiat nasepna-ah a minthanna vangtaang lianzaw kan lai ding hi. Tuhunin a taang phazaw minthanna vang hong omta ahih manin nidangin minthangin a vangtaang mahmah i cih pen a bei hong suak mai hi. Tawlkhat sung bek a kimang na in minthanna nei ahihleh a kip tawntung na in minthanna lianzaw nei kan ding hi. Hih bang lametna nei ka hih manun hangtakin a om ka hi uh hi. A maitang panin a vangtaang a beilam Israel mite in a muhkhak ding uh a deih lohna-in Moses in a maitang puan tawh a liah bangin a gamtate ka hi kei uh hi. Amaute’ lungsim khauh ahih manin tu dongin bangmah thei tuan loin om uh a, thuciamna lui laibu a sim uh ciangin puan tawh liah bangmahin bangmah mu thei lo, theithei lo uh hi. Bang hang hiam cih leh mi khatpeuh Khrih tawh a kipawl ciang bekin a muhtheih nadingin a kiliahna puan a kilakhia pan ahi hi. Tuhun dongin amaute in Moses Thukham laibu a sim uh ciangin liahna puan in a lungsim uh a liah lai hi. Ahi zongin Lai Siangtho in, “Topa’ mai-ah Moses a pai ciangin a kiliahna puan a lakhia hi,” a cih mah bangin Topa lamah mi khatpeuh a kihei ciangin a liah puan kilakhia hi. Hih lai munah Topa a cih pen Kha Siangtho hi a, Topa’ Kha Siangtho a omna mun peuhpeuhah suahtakna om hi. Tua ahih manin eite khempeuh i maitang hong kiliah nawn loin Topa’ minthanna vangtaang i kilangsak hi. Topa kiang panin a hong pai Kha Siangtho ahi tua minthanna vang in amah tawh a kibang dingin eite hong bawlpha a, minthanna khat panin minthanna sangzaw-ah hong omsak hi. Pasian in hong hehpihna tawh hih nasep hong pia ahih manin ka thaneem hetkei uh hi. Ka thuhilhna uhah mite khembawl loin, Pasian thu zong a man lopi-in ka gen kei uh a, tua bang a zumhuai simtham tatnate ka zang hetkei uh hi. Pasian muhna-ah a langtangin thuman takin ka gamta uh a, mi khempeuh a lungkim theih nadingin ka hanciam uh hi. Lungdamna thu ka hilhte uh kitel lo ahihleh zong siatna a thuak mite a’ ding bekin a kitel lo hi ding hi. Tua bang mite pen hih leitung pasian gilote in a lungsim mit uh tawsak ahih manin um lo uh a, Pasian tawh a kibang teekteek Khrih minthanna hangin amaute tungah a hong taang lungdamna thu khuavak mu thei lo uh hi. Bang hang hiam cih leh kote’ hilh thu pen komau’ thu hi lo a, Khrih Jesuh pen Topa ahi hi, ci-in a hilh ka hi uh a, kote pen Khrih hangin nomau’ na a semte ka hi uh hi. “Khuamial sung panin khuavak taang hen,” a ci Pasian mah in Jesuh’ maitang a taangsak Pasian’ vangliatna thu theih nading khuavak ka ngahtheih nadingun kote lungsim sungah khuavak hong taangsak hi. Ahi zongin vangliatna taktak Pasian a’ hi a, kote a’ hi lo hi, ci-in a kilat nadingin kha tawh kisai na manpha a nei kote pen na kikoihna leibeel tawh a kibang bek ka hi uh hi. Gimna ka tuah zelzel uh hangin ka si kei uh a, lunghihmawhna ka tuah zelzel uh hangin ka lungkia kei uh a, gal tampi ka neih uh hangin pawl ka kitasam ngei kei uh a, liamna baina ka tuah uh hangin ka si kei uh hi. Kote’ pum tung panin Jesuh’ nuntakna a kilat theih nadingin hih ka leitung pumpi nuntakna mahmah uhah zong Jesuh’ sihna bangmah ka thuak zelzel uh hi. Tua ahih manin kote’ leitung pumpi-ah Jesuh Khrih nuntakna a kilat nadingin Jesuh hangin ka leitung nuntak sungun sih nading lauhuaina ka phukha tawntung uh hi. Tua ahih manin kote a dingin sih nading a kisepsep laitakin note’ nuntak nading a kisem niloh ahi hi. Lai Siangtho in, “Um ka hih manin ka gen hi,” a cih mah bangin kote in zong um ka hih uh manin a gen ka hi uh hi. Topa Jesuh a hingkik sakpa in Jesuh mah tawh kote zong hong hingkiksak khawmin note tawh ama omna-ah hong paipih khawm ding hi, ci-in ka thei uh hi. Hih thute khempeuh note a’ ding a kikhualna hi a, Pasian’ hehpihna in mi tam ban semsem leh mi a tam semsem mah in Pasian’ minthan nadingin lungdam ko-in thu ngen ding uh hi. Tua thu hangin ka lungkia tuan kei uh hi. Kote’ leitung pumpi in damdamin muatlam ding a manawh ahi zongin ka kha nuntakna uh a nini-in thaksuak semsem hi. Tuhun laitakin tomno sung lungkhamna ka thuakte uh in ka thuakna uh sangin nakpitakin a lianzaw tawntung minthanna sung hong tunpih ding hi. Bang hang hiam cih leh a kimuthei nate a mitsuan ka hi kei uh a, a kimu thei lo nate a mitsuan ka hi uh hi. A kimuthei nate tomno sung bek kimang a, a kimu thei lo nate a tawntungin a kip ahi hi. Bang hang hiam cih leh hih ka tenna ka leitung pumpi uh a sih ciangin mihingte bawl ahi lo, Pasian in a kip tawntung dingin kote a dingin a hong bawlsak inn, vantungah a nei ding ka hihna uh ka thei uh hi. Tu laitakin ka vantung inn uhah ka omnopna uh lianlua mahmah ahih manin ngaklahin ka khuisasa uh hi. Vantung inn-ah ka om uh ciangin pumpi nei loin guak om ding ka hi kei uh hi. Hih leitung pumpi tawh ka om uh laitakin lungkhamin ka khuisasa uh hi. Hih ka leitung pumpi uh ka nusiat nopna hang uh hi loin a sithei pumpi pen a sithei nawn lo pumpi tawh a kilaih theih nadingin ka vantung pumpi uh ka deihna hang uh ahi hi. Hih kikheel nading a hong vaihawmsak pa pen Pasian hi a, kote a hong piak dingte khempeuh hong pia taktak ding cih a lahna-in kote tungah ama Kha Siangtho a hong pia hi. Tua ahih manin lungmuang takin ka om tawntung uh hi. Hih ka leitung pumpi uhah ka om laiteng uh Topa’ hong piak ding pumpi tawh a omkhawm nai lo ka hi uh hi. Muhna hang tawh lungmuangin a om hi loin upna hang tawh lungmuang takin a om ka hi uh hi. Lungmuang takin a ki-om hithiat hi a, hih leitung pumpi nusia-in Topa tawh omkhawm ding a ki-utzaw ahi hi. Tua ahih manin hih lai inn-ah a ki-om ahi a, hua lai vantung inn-ah a ki-om ahi zongin thudang khempeuh sangin Topa lungdamsak ding ngaihsutpi-in a kinei ahi hi. Bang hang hiam cih leh Khrih mai-ah thusitna a thuak dingin eite khempeuh a kilak ding ihi a, leitung i pumpi-in i omlai-in i gamtatna tawh kizui-in eite tawh a kituak ciatin a sia ahi a, a pha ahi zongin a ngah ciat ding ihi hi. Pasian zahtak nading thu ka lungsim uhah om tawntung ahih manin mite ka zolzawh nadingun ka hanciam uh hi. Pasian in kote’ lungsim teltakin hong thei a, note in zong na lungsim uhah kei hong thei dingin ka hong um hi. Note in na hong thupi ngaihsut theih nadingun koleko a hong kiphattawm zel ka hi kei uh a, lungsimtawng hoih lo napi-in a puatham siamna hangin a kisial mite nial thei-in, kote’ hangin note na kisaktheih nading uh deihna hizaw hi. Mihai ka hih uhleh zong Pasian’ minthan nading hi a, mipil ka hih uhleh zong note’ phattuam nading mah hi veve hi. Mi khempeuh a dingin mi khat si khin ahih manin mi khempeuh zong a ngeina lui uhah si khinta hi, ci-in ka theihna hangun tua Khrih’ itna in kote’ nuntakna hong uk hi. Ama hangin a nungtate, amau a dingin nungta nawn loin, amau’ hangin si-in a kihingkik sakpa a dingin a nuntak theih nadingun mi khempeuh a dingin amah a hong si hi. Tua ahih manin kote in mihingte’ ngeina zia tawh kuamah ka en nawn kei uh hi. Khrih mahmah zong mihing lungsim ngaihsutna zia tawh ka et ngei uh hangin tu-in tua bangin ka ngaihsun nawn kei uh hi. Tua ahih manin mi khatpeuh, Khrih tawh a kipawl ciangin mi thak suak a, a mi lui ngeina bei-in a mi thak ngeina a neita ahi hi. Hih thu khempeuh Pasian’ vaihawm hi a, eite pen Pasian’ gal hinapi-in Khrih hangin amah tawh a kilem mi hong hisak a, kote tungah tua kilem nading nasep hong pia hi. Tua ahih manin kote’ thugen bulpi in: Pasian in mite’ mawhnate ngaihsun nawn loin, Khrih hangin leitung mi khempeuh le amah a kilemin hong bawl a, tua kilemna thu a gen dingin kote hong seh hi. Tua ahih ciangin kote pen Khrih tangin nasem ka hi uh a, Pasian in kote zangin note tungah thu a hong gen ahi hi. Pasian tawh kilemin pawlkhatin na om nadingun Khrih tangin a hong thum ka hi uh hi. Khrih tawh i kipawlna hangin eite zong Pasian tawh a kibangin midik i suahtheih nadingin mawhna a nei lo Khrih pen eite’ tang dingin Pasian in mawhnei mi a suaksak hi. Tua bangin Pasian tawh na semkhawmin om ka hih manun Pasian’ hong hehpihna thu a mawkna na suahsakkhak loh nadingun ka hong thum uh hi. Bang hang hiam cih leh Pasian in, “A hunhoih a tun ciangin note’ hong ngetna ka hong ngai a, kong hotkhiat ni ding ciangin note ka hong huh hi,” na ci hi. Tua hi a, tuhun pen a hunhoih hi a, tuhun pen hotkhiat ni hun hita hi. Ka nasepna uhah mite in mawhna hong zon ding uh ut lo ka hih manun kuamah ka nawngkaisak khak loh nadingun ka hanciam uh hi. Tua ahih manin ka sepna khempeuh uhah Pasian’ nasemte ka hihna uh ka kilangsak uh a, lungduai takin gimna, haksatna, lungkhamnate ka thuak uh hi. Kote hong kisatin, thongah hong kikhia-in, mihonpi in hong hihgawp uh hi; nakpitakin na semin, an ne lo, ihmu lo liangin ka om uh hi. Siangtho takin nuntakna, thu theihna, lungduaina, migitna, Kha Siangtho’ huhna, itna taktak neihna, thuman genna, le Pasian’ nasemte ka hihna uh, Pasian’ vang tawh ka kilangsak uh hi. Kote in kihut nading le galsim nadingin hiamin thuman ka zang uh hi. Kote hong kipahtawi-in hong kimindaisak zel a, hong kisimmawh bawlin zong hong kiphat zel hi. Thuman gen hinapi-in zuaugen bangin hong kingaihsun a, mi khempeuh in hong theih hinapi-in theih loh mi bangin hong kibawl a, nong theih uh mah bangin kote a nungta hinapi-in misi bangin hong kingaihsun hi. Dahna ka thuak uh hangin ka lungdam uh a, kote a zawng tawh kibang napi-in mi tampi ka hausak uh a, bangmah a nei het lo tawh kibang napi-in a taktakin ka neih loh uh bangmah om lo hi. Korin khua-a om lawmte aw, kote in bangmah ip nei loin lungsim takpi tawh thu ka hong gen uh hi. Kote in ka lungsim uh a hong pia lo hi loin note in na lungsim uh a hong pia lo na hizaw uh hi. Tua ahih manin tate tungah thugen bangin thu ka hong gen hi. Kote’ ngaihsut bangin note in zong hong ngaihsun unla, na lungsim uh hong taanzausak ta un. Thu um lo mite tawh na na semkhawm kei un. Midik le mimawh bangci-in kipawlthei ding a, khuavak le khuamial bangci-in omkhawm thei ding ahi hiam? Khrih le Dawimangpa bangci-in kithutuak thei ding a, thu um mi le thu um lo mi bangci-in a ngaihsutna uh kibang thei ding ahi hiam? Pasian’ biakinn le lawkite’ milim bangci kilem theih ding ahi hiam? Bang hang hiam cih leh Pasian in, “Ka mite lakah tengin amaute tawh ka omkhawm ding hi. Kei pen amaute’ Pasian ka hi ding a, amaute, keima mi ahi ding uh hi. Tua ahih manin Vanglian Topa keimah in kong genin-ah: Amaute tawh kikhenin amaute kiang panin paikhia unla, a siang lo peuhmah sukha kei un. Tua hileh note ka hong ngai ding hi. Kei pen note’ Pa hong hi-in, note, keima tate na hi ding uh hi,” na ci hi. Tua ahih manin ka hong it lawmte aw, pumpi le lungsim a ninsak theite khempeuh panin kisiansuahin, Pasian zahtakna tawh nungta-in siangtho sinsenin om ni. Kuama tungah kote hong khial lo, kuamah hong siasak lo, noptaksa-in kuama tungah hong gamta lo ka hih manun na lungsim uh hong pia un. Hih bang ka hong cih ciangin note mawhsak nopna tawh thu a hong gen ka hi kei hi. Bang hang hiam cih leh ka hong gensa mah bangin note hong it mahmah ka hih manun note na hin uhleh hingkhawm, na sih uhleh zong a sikhawm ngam ka hi uh hi. Note hong muang mahmahin note hangin ka kisathei a, lungkhamna a tuamtuam ka tuah hangin lunghimawh loin ka lungnuam mahmah hi. Masedonia gam ka tunkhit uh ciang nangawnin tawldam cih om thei tuan lo a, a koimah peuhah kitotna le lungkhamna om kawikawi ahih manin lungsim patauhna hi tawntung hi. Ahi zongin a lungkia mite a hanthawn Pasian in Titus hong tunna tawh kote hong thakhauhsak hi. Ama hong tunna hang bek zong hi loin ama lungsim a thahat nadingin note’ gamtatna zong a hong zasak hi. Note in kei na hong muhnopna thu uh, note na dahna thu uhleh kei na hong hutnopna thu uh hong gen ahih manin ka lung a dam semsem hi. Ka hong laigelhna in note tawlkhat sung a hong dahsak manin ka lungsim nuam lo ahi tei ta zongin tua ka hong laigelhna hangin ka kisik kei hi. Bang hang hiam cih leh tu-in ka lung a dam hi. Note ka hong dahsak khakna hangin a lungdam hi loin note na dahna hangun na ngaihsutna uh kheel thei na hih manun a nuam ka hi hi. Tua na dahna uh Pasian in a hoihlamin hong zang ahih manin note a dingin siatna a hong piangsak ka hi kei zaw uh hi. Tua na dahna uh hotkhiatna ngahtheih nadingin na lungsim uh na kheel nadingun Pasian in hong zang ahih manin dah nading bangmah om lo hi. Ahi zongin hih leitung dahna lelte in ahihleh sihna piangsak hi. Hih note’ dahna pen Pasian in a hoihlamin hong zatsak ahih manin mawk om nawn loin lungsim takpi tawh kinna na nei uh a, hoih lo hi, ci-in ka hong gente lunghimawhin siansak nopna lungsim na nei uh hi. A thupiangsate hangin lau-in lunghimawhin a hoih lote gim na pianuam uh hi. Hih thu khempeuhah note na paubaan nading uh a om lo hong suaksak hi. Tua bangin lai ka hong gelh hangin a khial pa ahih kei leh a thuak pa ngaihsutna tawh hong gelh hi lo zaw-in, Pasian’ thu sungah kote’ thu bangzahin na hong mang uh hiam cih a kitheih nadingin a hong gelh ka hizaw uh hi. Tua ahih manin tu-in ka lung uh nuam mahmah hi. Kote’ lungsim hong nuamsak bek hi loin, Titus lungsim a noptheihna dingin ama tungah na gamta na hih manun ama lungdamna in zong kote’ lungdamna hong behlapto sawnsawn hi. Titus mai-ah note ka hong kisialhpih ngei a, note in ka kisialhna thu-ah kei na hong zahhuaisak kei uh hi. Note tungah thuman bekbek a hong gen ka hih mah bangun Titus tungah ka kisialhna uh zong a kisial khial ka hihlohna uh hong kilang hi. Note in ama thu mangin, launa le linna tawh amah na zindona uh a ngaihsut ciangin Titus in note hong itna khang semsem hi. Note hong muang mahmah ka hih manin ka lungsim a nuam hi. Sanggamte aw, Masedonia gam pawpite-ah Pasian’ hehpihna hangin a piang thute ka hong theisak nuam uh hi. Amaute in haksatna a tuamtuam phukha-in nakpitakin ze-etna thuakin, amaute zawng mahmah hita se le-uh lungdam mahmah uh ahih manin piakna lamsangah cingh thei mahmah uh hi. Amaute in amau ngahna tawh kituak bekin a pia hi loin, a piak zawhzah dingun a kilawm sangin a tamzaw a piakna uh ka thei taktak uh hi. Kuama sawl hi loin amau lungsimah a uttawmna uh tawh, Judea gam a Pasian mite, ko zong hong huh sak un, ci-in hong thumthum uh hi. Hih bangin a gamtatna uh kote’ lamet sangin sangzaw pek hi. Amaute pen Topa tungah kipia masa uh a, tua ciangin Pasian’ deihna bangin kote tungah zong a hong kipia uh ahi hi. Tua mah bangin Titus in zong hih bang nasep nading hong pat khit ahih mah bangin midang huh nading na sepnate uh note lakah hong zawhpih vet dingin ka hanthawn uh hi. Note pen thu upna, thugenna, thutheihna, midang huh ding lawpna, le kote nong itna uh a kipanin na khempeuhah midang sangin ginazaw na hih mah bangun midang huh nading hih nasepna-ah zong na cingh mahmah ta un. Hih bang ka hong gen ciangin thupiakna tawh a hong gen hi loin, midangte in tua zahin mi huh nading kin ahihleh note in zong midang na itna uh bangzah taktak ahi hiam, ci-in ka theihnopna ahi hi. Bang hang hiam cih leh i Topa Jesuh zong hau mahmah napi-in ama zawnna tawh note mihau na suahtheih nadingun note’ hangin mizawngin hong kibawl ahih manin i Topa Jesuh Khrih hong itna bangzah takin lian hiam, cih thu na thei uh hi. Hih thu tawh kisai-in keima ngaihsutna panin: Note in ni kumin hih bang nasep ding utna lungsim a nei bek hi loin a pankhia masate na hih uh mah bangin na tangtut ding uh hoihpen hi. Tua ahih manin na patsa uh thu a bei dongin zomsuak unla, na geelsa uh na tangtunsak theih nadingun na neihsa uh tawh lawptakin na sem un. Piaknopna lungsim na neih nak-uhleh na neih lohnate uh siksan hi loin na neihna uh tawh kizui-in na piak uh Pasian in hong sang ding hi. Hih bangin ka hong gen ciangin midangte in noptuamna a ngah nadingin note in haksapi-in tuam gimpih ding ka cihna hi lo hi. Tu laitakin note cithei na hih manun amau cihmawhnate-ah huh le-uhcin, note in haksat na tuah hun uh ciangin zong amaute in hong huh ding uh ahih manin note khatlekhat na kihuh diamdiam ding uh ka deihna ahi hi. Bang hang hiam cih leh Lai Siangtho in zong, “An tampi a lapa in an hau lua tuan lo a, tawmno a lapa zong zawng lua tuan lo hi,” na ci hi. Kote’ hong kin zahin Titus in note hong kin nadingin Pasian in lungsim guan ahih manin Pasian tungah ka nuam mahmah uh hi. Amah in kote hong sawlna a hong mang ciang bek hi loin, amah in note huhnopna lungsim neitawm ahih manin note kiangah pai ding hong ngaihsun hi. Lungdamna thuhilh nasepna-ah pawlpi khempeuh in a zahtak mahmah, thu upna sungah ka sanggampa uh tawh zong ka hong kithuahsak uh hi. Tua tham loin, Pasian’ minthan nading le midangte ka huhnopna uh a kilat nadingin hih bangin mi huh nading vaihawmin ka khualzinna peuh uhah a hong zui dingin pawlpite in teelin a seh pa uh zong ahi hi. Citna tawh mi huh nadingin a kipia hih sum ka zeekna uh tawh kisai-in mi a phunkhak loh nadingun a kidawm mahmah ka hi uh hi. Bang hang hiam cih leh Topa’ hoihsak ding bek hi loin mite in zong hoih a sak ding bangin na a semnuam ka hi uh hi. Amau tegel tawh hong kithuah dingin thu upna sungah ka sanggam uh adang khat tawh zong ka hong tonsak uh hi. Amah pen na khempeuhah thuman mahmah hi, ci-in ka theih khitsa uh hi a, note hong muan mahmahna hangin note hong huh ding a lawpna khang semsem hi. Titus ahihleh note a’ ding ka nasepna-ah ka kikholhpih ka naseppih mi hi a, amah tawh hong kithuah ka sanggam tegel uh ahihleh pawlpite’ tang hi uh a, Khrih’ min a thangsakte ahi uh hi. Tua ahih manin note ka hong kisialhpihna uhah a kisial khial ka suah loh nading uh le pawlpi khempeuh in a theihtel nadingun hih ka sanggamte uh limtakin na limbawl un. Judea gam a om Pasian mite huh nading tawh kisai-in lai kong gelh ding kisam nawn lo hi. Note’ huhnopna thu ka theih khitsa hi a, Masedonia gam a pawlpite kiangah zong note ka hong kisialhpih khitsa ahi hi. “Akhaia gam a pawlpite in ni kum a kipanin huh dingin a kithawisa uh ahi hi,” ci-in ka na gen hi. Tua banga note’ lawpna in amaute tampi tak thanuamsak hi. Ahi zongin note ka hong kisialhpihna uh a mawkna a suahkhak loh nadingin na huh nading uh na kiging khol un, ka hong cih mah bangin na kiginkholh theih nadingun ka sanggamte uh ka hong ma paisak hi. Tua bang hikeileh kei ka hong pai ciangin Masedonia gam a ka lawmte in hong zuikha zenzen hen la, note a kiging lopi-in a om hong tuakkha leh, note ka hong muan gen mahmahsa ahih manin note’ maizum ding gen loh, kote bangzah takin maizum ding ka hi uh hiam? Tua ahih manin piak dingin na kamciamsa uh huhna sumte a baihsa-in a omtheih nadingin hih ka sanggamte a hong mapai ding kisam ka sa hi. Tua hileh kei ka hong tun ciangin a baihsa-in na om ding a, note in piak loh phamawh cihna lungsim tawh hi loin utna lungsim tawh a pia na hihna uh hong kilang ding hi. Note in na phawk ding uh thu panin: Khaici tawm a vawhte in tawm mah la ding a, tampi a vawhte in tampi mah la ding uh hi. Pasian in piaknopna lungsim tawh a pia mite bek deih ahih manin, a kuamah peuh in na lungsim sung uhah na ngaihsutsa zah ciat uh na pia unla, pia nuam lopipi le sawlzawh thu bek tawh na pia kei un. Note in na kisap khempeuh uh na neihtheih nading uh le midangte huh nading zong na neihthuah theih nadingun Pasian in hong pia thei hi. Bang hang hiam cih leh Lai Siangtho in, “Amah in citna tawh mizawngte pia zuahzuah a, ama migitna kip tawntung hi,” na ci hi. Tua ahih manin vawh ding khaici le nek ding an hong pia Pasian in note’ cit piakna hangin nopsakna lian tampi na ngahtheih nadingun note tungah a kisam khaici hong guanin a pungsak ding hi. Kote tungtawnin note’ huhna sumte a ngahna uh hangin mi tampi in Pasian a phattheih nadingin note na cit gamtatzawh tawntung nadingun Pasian in hong hausak tawntung ding hi. Bang hang hiam cih leh note’ huhna sumte in Pasian’ mi a cimawhte’ dong a hu bek hi loin, Pasian’ tungah lungdamkoh nading zong a piangsak ahi hi. Note in na up uh Jesuh hangin lungdamna thu-ah na cihtakna uh le amaute le midang khempeuh tungah na cit piakna hangun mi tampite in Pasian’ min phat ding uh hi. Note tungah Pasian in hehpihna thupha a val a kanin hong piakna hangin amaute in note hong munuam mahmahin thu zong hong ngetsak ding uh hi. A manphatna a kigen zo lo Pasian’ hong piak hih thupha hangin Pasian tungah i lungdamna ko ciat ni. Keimah Paul in Khrih migitna le lungduaina tawh note kiangah ka hong thum hi. Kei pen note tawh ka hong omkhawm laitakin a meidawi, note tawh ka omkhawm loh ciangin a tapkual han in hong kigen hi. Note kiangah ka hong pai ciangin ka hong hangsankhak loh nadingin na om nadingun ka hong thum hi. Bang hang hiam cih leh leitung ngaihsutna tawh nasem hi, ci-in kote a hong ngaihsunte tungah hangtakin ka gamta ding hi. Kote pen leitungah a teng mi ka hi mah uh hi; ahi zongin leitung lungsim ngimna tawh galdo ka hi kei uh hi. Kote’ zat galdona hiam pen leitung galhiam lelte hi lo a, galte’ panmun phualpi a susiazo ding Pasian’ galhiam khauhte ahi hi. Mite’ ngaihsutna a man lote ka thalnial gawpzo uh a, Pasian’ thu theih nading a khaktan thei nate ka susiagawp uh a, mi khempeuh’ ngaihsutna zo gawpin Khrih’ thu a mang dingin ka bawl uh hi. Note thumanin na cihtakna uh a kitheihtel khit ciangin a thuman lo a citak lo khempeuh gimpiak ding ka kipan ta ding uh hi. Note in na khatpeuh na ngaihsut uh ciangin a tungthamah a kimu theiteng na siksankha thei uh hi. Mi khatpeuh in Khrih tawh ka kipawl hi, ci-in a kingaihsut leh, amah a kipawl ahih zah mah bangin kote zong Khrih tawh a kipawl ka hihna thu uh limtakin ngaihsun tahen. Bang hang hiam cih leh note’ siat nading hi loin note’ hoihna dingin Topa in kote tungah hong piak thuneihna hong nakzat lua-in ka kisialhpih hangin themkhat zong ka maizum kei hi. Hih bangin lai ka hong gelhna tawh note a hong laugawpsak nuam ka hi kei hi. Mi pawlkhat in, “Paul’ laigelhte khauhin nasia mahmah a, ahi zongin eite kiangah amah a om ciangin bangmah thupi khollo hi,” hong ci uh hi. Tua ahih manin lai ka hong gelhna sung uhah ka thugente uh le note kiangah ka hong pai uh ciangin ka sepna dingte uh bangmah a kilamdang het lo ding ahihna thu tua mite in teltakin thei ta uh hen. Kote ahihleh tua bangin a kiliansak mahmah mite tawh a kikimin ka kingaihsun ngam buang kei ding uh hi. Amaute khatlekhat ki-en kakin thupi kisa mahmah uh ahih manin mihai taktak ahi uh hi. Ahi zongin kote ka kisialh nading uh kiciangtan a, note lakah na ka hong sep nadingun Pasian in a hong sehsaksa thu sung ciang bekah ka kisial thei uh hi. Note kiangah Khrih hangin lungdamna thu a hong hilh masate ka hih manun note kiangah thu ka hong hici gen uh ciangin a ciangtan khengvalin a gamta ka hi kei uh hi. Tua ahih manin Pasian in kote a dingin a hong sehsaksa khengvalin midangte’ nasepna-ah a kisial ka hi kei uh a, Pasian’ hong piak kote’ huam sungah note’ upna khangin note lakah ka nasepna uh a tangzaizaw a suah nading a lamen ka hi uh hi. Tua hileh note’ gam banah gam dangah Lungdamna Thu ka hilh thei ding uh a, midangte’ nasepnasa sungah zong ka kisialh ding uh kullo ding hi. Lai Siangtho in, “Mi khat peuhpeuh a kisialh nop leh Topa’ nasepnate bek kisialhpih hen,” na ci hi. Bang hang hiam cih leh mi khat peuhpeuh amah a kiphattawm ciangin a kipakta hi lo a, Topa in a phat ciangin a kipakta hi pan hi. Ka hai ahi phial zongin ka haina mah hong thuakpih le-uhcin ka ut hi. Hong thuakpih taktak ta un. Pasian in hong aam mahmah bangin note ka hong aam mahmah hi. Nungak le tangval nupa dingin a kigawm mah bangin khat bek ahi Khrih tawh a kigawm dingin nungak siangtho bang na hi uh hi. Ahi zongin gulpi in ama zuau ngian tawh Eve a khemzawh bangin na lungsim uh kihei-in Khrih tungah na kipiaknate uh na nusiatkhak ding uh ka lunghimawh hi. Bang hang hiam cih leh kote’ hilh a hi lo adang Jesuh’ thu a hilh hong pai ciangin lungdam takin na sang pahpah uh a, kote’ hong hilh Kha Siangtho le lungdamna thu tawh a kibang lo kha thu le lungdamna thu hong hilh a om ciangin na sang pahpah uh hi. Note in sawltak thupi mahmahte hi, ci-in na ngaihsut uh mite sangin themkha zong a neuzaw-in ka kingaihsun het kei hi. Thugen siamna le pilna thuk ka nei kei kha mah ding hi. Hih thu tawh kisai-in ahihleh, a tawntungin na khempeuhah ka hong gensa uh ahi hi. Note kiangah Pasian hangin Lungdamna Thu ka hong hilh ciangin note tung panin thaman bangmah ka hong ngen het kei a, note a thupi na suah ding uh ka deihna-in kei ka kiniamkhiat hi. Hih thu tawh kisai-in a sialamin kei hong lehngaihsut zawsop na hi uh hiam? Note kiangah na ka sep laitakin pawlpi dangte in kei hong vak uh ahih manin, note huh nadingin midangte’ na a kisut ahi hi. Note lakah na ka sep laitakin Masedonia gam panin a hong pai pawlpi mite in ka sapna khempeuh hong puak uh ahih manin note khat beek ka hong gimsak kei hi. A beisa hunah note ka hong gimsakkhak loh mah bangin mailam hunah zong ka hong gimsakkha het kei ding hi. Khrih thuman keima sungah om ahih mah bangin no Akhaia gam sungah hih ka kisialhna thu mah kizom paisuak ding hi, ci-in ka kiciam hi. Hih bangin kam ka pau ciangin note ka hong it loh man ahi hiam? Note ka hong itna hang hizaw hi. Hih thu Pasian in thei hi. Tua sawltak dangte in, “Kote in zong amau’ sepzia mah bangin ka sem uh hi,” ci-in a kisialh theih loh nadingun tuhunin nasep thaman bangmah ka hong lak loh mah bangin mai lamah zong ka hong la kei ding hi. Amaute pen sawltak taktak hi loin, sawltak a kineihkhemte hi uh a, a nasepna uhah zong zuau-in, Khrih’ sawltak taktak a battheih nadingun a mel kiseel ahi uh hi. Tua pen lamdangsak ding hi lo hi. Satan nangawn Pasian’ vantungmi tawh a kibangin kibawltawm thei hi. Tua ahih manin Satan’ sawltakte pen thuman nasem bangin a kibawl manin lamdangsak ding hi lo hi. Hun bei ni ciangin amau gamtatna bangun thuak ngawn ding uh hi. Kuamah in mihai-in hong ngaihsun kei hen, ka ci kikkik nuam hi. Ahi zongin a hai-in hong ngaihsun na om uhleh zong tawmkhat ka hong kisialh theih nadingin ka haisapi mahin hong sang veve un. Tu-in ka hong gen ding thute pen Topa’ hong sawl hi lo hi. Tu-a kisialhna kam ka hong pau ciangin mihai taktak mah bangin a pau ka hi hi. Mi tampi in hih leitung ngeinate kisialhpih thei uh ahih manin kei zong ka hong kisial ding hi. Note pil kisa mahmah na hih manun lungdam takin mihaite na sang pahpah uh hi. Note, sila-in hong bawlin, note hong thangsiahin, na haina uh nuamtaksa-in hong hih thopthopin, note hong simmawh bawlin, na paang uh a hong bengbengte na sang uh hi. Tua bangin na om uh zumhuai mahmah hi. Kote ahihleh note tungah ka hong tuaci gamtat ngam kei uh hi. Ahi zongin a kisial ngam om ahihleh kei zong mihai bangin ka hong kisial ngam ding hi. Amaute Hebru mi ahihleh kei zong Hebru mi mah ka hi hi. Amaute Abraham’ suan Israel mite ahihleh kei zong Abraham’ suan Israel mi mah ka hi hi. Amaute Khrih nasem ahihleh kei zong hong hai pau mai ning. Khrih nasem a hoihzaw pekpek ka hi hi. Amaute sangin na ka nak sepzaw a, satna tamvei ka thuakzaw a, sih dektakna tamvei ka tuakzaw hi. Jew mite’ khut sungah sawmthum le kua vei satna nga vei tak ka thuak hi. Rom mite in thumvei hong sat a, khatvei suang tawh hong deng uh hi. Teembaw siatna thumvei ka tuak a, sun khat le zan khat tawntung tui tungah ka laam ngei hi. Khual ka zinzinna lamin tuikhang lauhuaina, misuamte lauhuaina, ka mipihte’ suk ding lauhuaina, Gentail mite’ suk ding lauhuaina, khuapi sung le gamlakah lauhuaina, tuipi tungah lauhuaina, lawm man lote’ hih ding lauhuaina a tuamtuamte ka phukha hi. Nasem silbawlin ki-om tawntung a, ihmu man lo liangin zong ka om zel hi. Gilkial dangtakin ka om zel a, annek ding nei lo, giah nading om lo, puansilh ding nei loin ka om hun tampi a om hi. Tua bang haksatna a tuamtuam ka thuak banah nisimin pawlpi a tuamtuamte a dingin lunghimawhin ka lunggimpih lai hi. A thaneem a om ciangin lungkhampihin kei zong ka thaneem a, mawhna-ah a pukkha a om ciangin dahin ka lunggimpih hi. Ka kisialh leh zong ka ginat lohna hong kilangsak nate hangin ka kisial bek hi. Topa Jesuh’ Pa Pasian in thupha ngah tawntung tahen. Amah in ka zuau hetloh lamtak a hong thei hi. Damaskas khuapi sungah ka om laitakin Kumpi Aretas khutnuai-a gam ukpa in kei hong mattheih nadingin Damaskas khuakulh kongpi cingsak a, ahi zongin kulh tawlet vang panin hong kikhaikhia suk ahih manin ama khutsung panin ka suakta hi. Bangmah phattuamnapi a om khollo ahi zongin ka kisialsial lai ding hi. Tu-in Topa in maang hong muhsakna le ka muhte ka hong gen ding hi. Tuma kum sawm le li hun lai-in vantung a dawl tungnung penah Khristian khat kilato hi. A pumpi taktak hiam, maangmu ahi hiam ka thei kei hi. Pasian in thei hi. Tua mipa pen Paradais-ah a om ahi hi. A pumpi taktak tawh ahi hiam, maangmu ahi hiam ka thei kei a, Pasian in thei hi. Mite kiangah genkhiatsawn dingin a kiphal lo a lamdang mahmah thu a za hi. Tua bang thu pen a kisialh taak mahmah thu hinapi-in ka kisialhpih kei hi. Kei a ginalo hinapi ama minthan nadingin Pasian in hong zang ahih manin tua thu pen a kisialh taak mahmah thu hinapi-in ka kisialhpih kei hi. Kei a ginalo hinapi ama minthan nadingin Pasian in hong zang ahih manin tua thu ka kisialhpih bek hi. Hih ka muh thu pen thuman ahih manin a kisialhpih hita leng zong mihai ka hi kei hi. Ahi zongin mite in keima sepna le keima genna a muh a zak banah a valin hong thupi ngaihsutkhak ding uh ut lo ka hih manin hih thu ka kisialhpih nuam kei hi. Ahi zongin hih a lamdang na tampite ka muhna hangin kisialin ka kisaktheih khak loh nadingin Satan’ sawltak bangin na a sem, keima pumpi sungah natna khat hong kipia ahih manin ka kisaktheih luat loh nadingin a hong kham hi. Tua natna tawh ka kipelh theih nadingin Topa kiangah thumvei tak thu ka ngen hi. Ahi zongin Topa in kei kiangah, “Na tha a nem ciangin keima vangliatna hat mahmah ahih manin nangma kisapna pen keima hehpihna hi bek hi,” ci-in hong dawng hi. Tua ahih manin keima sungah Khrih vangliatna hong omtheih nadingin lungdam takin ka thaneemna ka kisialhpih semsem hi. Kei ka thaneem mahmah laitakin a thahat mahmah suak ka hih manin Khrih hangin ka thaneemna, simmawh ka thuakna, haksatna, bawlsiatna le lungkhamna ka thuaknate tawh ka lung a kim mahmah hi. Note in kei a hong pakta ding hinapi-in hong pakta lo na hih manun note’ bawlin mihai bangin kisialin ka gamta hi. Bang hang hiam cih leh kei pen bangmahpi ka hihloh hangin sawltak thupi mahmahin na ngaihsutte uh sangin themkhat zong ka neuzaw tuan het kei hi. Sawltak man taktak ka hihna lim a kilangsak nate, note lakah lungduai takin hong kisem a, lim, nalamdang, le na a tuamtuamte note lakah hong kibawl hi. Note lakah na ka sepna hangin huhna bangmah kong nget loh cih simloh, pawlpi dangte sangin kong hamsiatsak zawkna bangmah om het lo hi. Tua bangin note kiang panin bangmah kong nget lohna hangin midang tawh hong kibangsak lo suak ka hih manin, tua khialhna hong maisak ta un. Tu-in kong hawh nading pen a thumvei nading hita a, note’ gim nadingin bangmah ka hong ngen het kei ding hi. Keima deih pen note’ sumlepaite hi loin note mahmah na hi uh hi. A taktakin ci lehang, tate in nu le pate a huh ding hi lo a, nu le pate in tate a huh ding hizaw hi. Note ka hong huhtheih nadingin lungdamtakin ka neih khempeuh kong piaknop banah keima pumpi mahmah zong ka hong kipia nuam hi. Tuazah takin ka hong itna pen it lohna tengin hong nei zawsop ding na hi uh hiam? Sumlepai vai-in note themkhat zong ka hong gimsak hetlohna na theihsa uh ahi hi. Ahi zongin mi pawlkhatte in, kei pen ngian zangin khemna tawh a lamdang khatah sum tamzaw ka ngah nading a vaihawmin hong gen uh hi. Note kiangah ka hong paisak mite tungtawnin note kiang panin keima hamphat nading bang la ka hi hiam? Note kiangah Titus a hong pai nading ka hahsawl a, amah tawh a kithuah dingin thu upna sungah ka sanggampa uh zong ka hong paisak hi. Titus in nuamtaksa-in note tungah bang hong ngen zenzen ahi hiam? Kote in lungsim kibangin na semin ka kalsuanna zia uh zong a kibang hi lo ahi hiam? Note mai-ah ka mawhna uh a kiphelphel bang khatin na hong ngaihsut khak uhleh tua bang hi lo hi. Lawmte aw, ka hihna khempeuh uh note’ phattuam nading ka deihna uh tawh Khrih in kote’ gen ding a hong deih bangin Pasian’ mai-ah thu genin nasem ka hi uh hi. Bang hang hiam cih leh note kiangah ka hong tun ciangin note’ omzia ding ka deih bangin na om loh khak ding uh le note in keima maisuah na muhnopzia bangun na hong muh loh khak ding uh ka lunghimawh hi. Note lakah kitotna, hazatna, hehna, huaihamna, mi zahpihna, mi gensiatna, kiphatsakna, le buaina a omkhak ding ka lunghimawh hi. Note kiangah ka hong tun ciangin a beisa hunah note tampi tak thangtatin, numei tawh mawhna, hukna, lannate hangin na khialhnate uh na kisik loh manun keimah dahin kapin, note’ muhna-ah ka Pasian in kei hong maizumsak khak ding ka lunghimawh mahmah hi. Tu-a ka hong pai nading pen a thumveina hita hi. Lai Siangtho sungah, “Mawhna a bawl khat peuhpeuh a thei mi nih le thum a om ciang bekin a mawh hi, ci-in kingaihsun pan ding hi,” ci-in a kigelh mah bangin tua bangin ka hong sem ding hi. A beisa hunah mawhna a gamtate le adangte khempeuh kiangah, a nihveina ka hong hawh lai-in keima kam tawh ka hong gen bangin tu-in zong lai tawh ka hong gelhnop thu in: Ka hong paikik ciangin kuamah hong zah nawn lo ding ka hih manin gim na thuak pelmawh ding uh hi. Khrih in keima tungtawnin thu hong gen taktak mah ahi hiam, ci-in theihtelna na deih uh mah bangin tu-in na deihdeih uh na theita ding uh hi. Note tungah amah in na hong sep ciangin hong dam hih hetloin khauhtakin hong hih ding hi. Bang hang hiam cih leh thaneemna hangin singlamteh tungah a kikhai ahi zongin a hinkikna pen Pasian’ vangliatna hang ahi hi. Amah tawh ka kipawl manun kote zong ka tha uh nem a, ahi zongin note tungah na ka hong sep uh ciangin Pasian’ vangliatna zangin ka hong semkhawm ding uh hi. Thu um taktak mah ihi hiam, ci-in nomau mahmah na ki-entel ciat un. Na ki-ettelna uhah a cingtaak lo na hih kei nak-uhleh note sungah Khrih om ahih manin thu phawk un. Na ki-ettel uh ciangin a cingtaak mi hikim dingin ka hong lamen hi. Kote in ka nasepna uh a tangtun zo lo tawh ka kibangkha uh ahi zongin, kote’ nasepna a tangtun ding deih hi lo zaw-in, note gamta khialkha loin a manin na gamtat nading uh ka deihna uh tawh thu ka hong ngetsakzaw uh hi. Bang hang hiam cih leh kote pen thuman nasepna a khaktan thei dingte hi loin a khan nadingin nasemte ka hi uh hi. Kote’ deih bulpi pen note na cingtaak theih nading uh ahih manin note’ thahat laitakin kote ka thaneemna uh zong ka nuam veve uh hi. Note’ siat nading hi loin note’ phattuam nadingin Topa in kei tungah a hong piak thuneihna pen note tungah khauhtakin ka hong zatkhak loh nadingin lai a hong gelh ka hi hi. Sanggamte aw, tu-in mangpha na man un. Na omzia uh na kipuahpha-in ka hong thugente na zui unla, khatlekhat kithutuak kilem takin na om un. Itna le kilemna a piathei Pasian in note hong ompih tahen. Unau ki-itna tawh khatlekhat kihopihin na kinam un. Hih lai-a om Pasian’ mite khempeuh in note hong hopih uh hi. Topa Jesuh Khrih hong hehpihna thupha, le Pasian’ hong itna, le Kha Siangtho tawh kikholh theihna, note khempeuh tungah hong tung tahen. Mihingte’ hong sehna le hong sawlna tawh sawltak na a sem hi loin, Jesuh Khrih le sihna panin tua Jesuh a thosakkik Pasian’ hong sawlna tawh sawltak na a sem keimah Paul in Galati gam a om pawlpi tuamtuamte tungah lai ka hong khak hi. Kei tawh a omkhawm i Khristianpihte in zong note hong hopih uh hi. Eite’ Pa Pasian le Topa Jesuh Khrih in note khempeuh tungah dikna le nopsakna thupha hong tungsak tahen. A siahuai tuhun sung panin eite a hong suahtaksak nadingin eite’ Pa Pasian’ deihna tawh kizui-in i mawhna hangin tua Jesuh Khrih amahmah a hong kipiatawm ahi hi. Pasian’ min thang tawntung ta hen! Amen. A hong hehpihna tawh Khrih hangin note a hong sam Pasian nusiakik pakin lungdamna thudang khat na sang malam na hih manun lamdang ka sa mahmah hi. A taktakin ci lehang lungdamna thu adang a om hi lo a, mi pawlkhatte in note’ lungsim hong toknawi-in, Khrih hanga lungdamna thu hei-in thudang tawh laihnuam uh ahih manin, tua amau’ deih thu pen lungdamna thu a cihsak mawkmawk ka hi hi. Note tungah ka hong hilhsa uh lungdamna thu tawh a kilehngatin, kote a kipan vantungmi dongin thudang a hong hilh a om leh tua a hong hilh mipa hell khuk sungah tung ta hen! Ka hong gen ngeisa mah bangin ka hong gen kikin-ah: Note’ sansa lungdamna thu tawh a kilehngatin thudang a hong hilh mi peuhpeuh hell khuksung tung ta hen! Hih bangin thu ka gen ciangin mite’ hong pahtak theih nading a zong tawh kibang na hong sa uh hiam? Mite’ pahtak ding a ut ka hi kei a, Pasian’ hong pahtak ding a hanciam ka hi hi. Mihingte’ hong pahtak theih nadingin a gamta hi zenzen leng, Khrih’ nasem ka hi kei ding hi. Sanggamte aw, keima hilh lungdamna thu pen mihingte tung panin a hong kipan ahihlohna thu na theih ding uh ka deih hi. Mi khatpeuh tung panin ka ngah hi lo a, mi khatpeuh in hong hilh zong hi lo hi. Jesuh Khrih in kei tungah a hong lahna hang bekin hih thu a thei ka hi hi. Jew biakna sungah ka omlai hunin Pasian’ pawlpi tuamtuamte bawlsiat ding kin mahmahin, a beimang nading uh ka hanciamna, le ka khangualte lakah Jew biakna lamah a makai pen ka hihna thu, le ka pu ka pate uh tang ngeinate a nakkin mahmah ka hihna a kipanin ka pianzia ngeisate khempeuh na zaksa na theihsa uh ahi hi. keima hun ma-in sawltak na a sem khinsa mite tawh a kimu dingin zong Jerusalem khua-ah ka pai tuan kei hi. Arabia gamah ka paizaw a, tua lai panin Damaskas khua-ah ka kileh hi. Tuazawh kum thum khit ciangin Peter kiangah a hawh dingin Jerusalem khua-ah ka pai a, ama kiangah kha lang sung ka taam hi. Tua hun laitakin Topa’ sanggam James simloh sawltak kuamah dang ka mu kei hi. Hih ka thugente a man vive hi a, zuau gen het lo ka hih lamtak Pasian in hong thei hi. Tua lai panin Syria le Silisia gamah ka pai hi. Tua hun ciang dong Judea gam a om Khrih pawlpi tuamtuamte in ka melin hong thei nai lo uh a, “Ei a hong bawlsia ngei mipa in a maimansak nop Khrih upna thu mah a hilhhilh hi,” ci-in a kigenna thu a zak bek uh ahi hi. Tua hi a, keima tunga thupiang hangin amaute in Pasian’ min a phat uh hi. Tuazawh kum sawm le li khit ciangin Barnabas tawh Jerusalem khua-ah ka paikik a, Titus zong ka tonpih hi. Pasian’ hong sawlna tawh tua lai-ah a pai ka hi hi. Ka nasepnate a mawkna a suahkhak ding ut lo ka hih manin makai lian a kineite tawh a tuamin kimuhna khat ka nei a, Gentail mite lakah ka hilh lungdamna thute amaute kiangah gentelna khat ka nei hi. Kei tawh a kithuah Titus nangawn Grik mi hinapi-in a vun ki-atsak tuan lo hi. Ahi zongin mi pawlkhat in atsak nuam sam uh hi. Khrih Jesuh tawh ka kipawlna hangun suahtakna ka ngahna thu uh a kansim dingin amaute thu um mi kineihkhemin kote lakah hong kihel uh hi. Amaute in kote pen sila hong suaksak nuam uh ahi hi. Lungdamna thuman taktak pelem hetloin note a dingin a kipsuak theih nadingin amaute’ deihna themkhat zong ka zui het kei uh hi. Jerusalem khua-a om makai lian a kinei mite in kei’ nasepna tawh kisai thu-ah bangmah genthuah ding nei lo uh hi. (Pasian in maitang zahtak tuam nei tuan lo ahih manin hih bangin thu a gen ngam ka hi hi.) Amaute in genthuah ding a neih gen loh, Jew mite tungah lungdamna thu hilh ding nasep, Pasian in Peter tungah a piak mah bangin, Gentail mite tungah lungdamna thu hilh nading nasep, Pasian in kei tungah a hong piakna thu a muzaw uh hi. Bang hang hiam cih leh Jew mite lakah sawltak nasep a sem dingin Peter a koih mah bangin Gentail mite lakah sawltak nasep a sem dingin Pasian in kei a hong koih hi. Makai a kinei James, Peter, le Johan-te in Gentail mite lakah nasem dingin Pasian in kei hong sehna thu thei uh ahih manin, Pasian sungah nasemkhawm khat ihi hi, cih hong lahna uh limin kei le Barnabas tawh khut kiletna hong bawl uh hi. Kei le Barnabas in Gentail mite lakah na semin amaute in Jew mite lakah na a sep nading uh thukimna ka nei uh hi. Kote in amaute lakah a om mizawngte ka phawk ding uh hong kal bek a, tua lah kei zong ngaihsut penin ka neihsa thu mah ahi hi. Antiok khua-ah Peter hong hawh sungin a gamtat khialhna hangin thu uppih mite lak mahah amah ka taii hi. James in a hong sawl mi pawlkhatte, tua khua-ah a hong tunma-in Peter in thu um Gentail mite tawh an nekhawm napi-in, Gentail mite vun at ding hi, a ci mite a kihtakna hangin tua mite hong tun ciangin Gentail mite tawh an nekhawm ngam nawn loin hong kihemkhia hi. Thu um Jew midangte zong hong meidawisuah a, amaute’ gamtatna hangin Barnabas nangawn meidawi-in amaute bangin hong gamta hi. Lungdamna thu tawh kizui-in a mantakin gamta lo uh hi, ci-in ka muh ciangin amaute khempeuh’ zakin Peter kiangah, “Nang pen Jew mi hinapi-in Jew mi bangin gamta loin Gentail mite bangin a gamta khinsa na hi hi. Tua bangin a gamta khinsa hinapi-in bang hangin tu-in Gentail mite, Jew mite bangin a gamtat nadingun na gamtatna tawh lakkik na hi hiam?” ka ci hi. A taktakin ci lehang kote pen ka pian’ ka patun Jew mi ka hi uh a, “Mawhnei Gentail mi,” ka cih pawlte uh ka hi kei uh hi. Ahi zongin Jesuh Khrih upna hang bek tawh Pasian tawh kipawl theihna kingahin, Thukham zuihna hang tawh kingah ngei lo hi, ci-in ka thei uh hi. Kote mahmah in zong, Khrih hangin Pasian tawh ka kipawl theih nadingun Jesuh Khrih ka um uh a, Thukham deihna ka zuihna hang uh tawh hi lo hi. Bang hang hiam cih leh Thukham zuihna hang tawh kuamah in Pasian tawh kipawl theihna ngah zo lo hi. Tua ahihleh Khrih ka upna hangun Pasian tawh kipawl theih nading ka hanciam uh ciangin mimawh mah ka hihna uh ka thei uh hi. Tua ahihleh Khrih pen mawhna a piangsak a suak ding hiam? Suak het lo ding hi. Thukham zuihna hang hi lo hi, ci-in ka phiatsa uh thu tu-in pankik leuleu leng kei mahmah Thukham khial pa ka suakkik zel ding hi. Thukham tawh kisai-in ahihleh Pasian a dingin ka nuntak theih nadingin tua Thukham mah in kei hong thatkhin ahih manin Thukham tawh kisai thu-ah misi bang ka hi hi. Singlamteh tungah Khrih a kithah lai-in kei zong amah tawh a sikhawm ka hi hi. Tua ahih manin tuhuna ka nuntakna zia pen kei hang hi nawn loin ka sungah a hong om Khrih hang ahi hi. Tua hi a, keimah hong itin, keima a dingin a nuntakna a hong pia Pasian’ Tapa ka muanna tawh tu laitakin a nungta ka hi hi. Hih bang ka gen ciangin Pasian’ hehpihna thupha ka deih lohna ahi kei a, Thukham zuihzawhna hangin Pasian tawh kipawl theihna om hileh, singlamteh tungah Khrih sihna a mawkna hi lel ding hi, a cinuam ka hizaw hi. Galati mihaite aw, singlamteh tungah Jesuh Khrih a sihna thu teltakin na theihsa uh ahih manin kua’ khemsa-in hici thei mawk na hi uh hiam? Thukham na zuihna hangun Pasian’ Kha Siangtho ngah na hi uh hiam, ahih kei leh lungdamna thu za-in na upna hang uh hizaw ahi hiam? Pasian’ Kha Siangtho tawh na patkhit uh ciangin nomau’ thatanghat thu tawh khup a sawm ding zahin hici hai lawmlawm na hi uh hiam? A beisa huna na tuahsa uh thute khempeuh a mawkna suakkhin zen ding ahi hiam? Tawmkhat beek phattuamna hong pia thei tei dingin ka um hi. Note in Thukham na zuihna hangun Pasian in Kha Siangtho hong pia-in nalamdang hong bawl ahi hiam, ahih kei leh lungdamna thu za-in na upna hang uh hizaw ahi hiam? Abraham tunga thupiang ngaihsun dih un. Lai Siangtho in, “Abraham in Pasian um a, tua a upna hangin Pasian in amah tawh a kipawlthei dingin mihoihin a sang hi,” na ci hi. Tua ahih manin Abraham’ suanlekhak a man taktak i cihte pen upna a nei mite ahihna thu na theih ding uh ahi hi. Jew mite mah bangin Gentail mite in zong a upna uh hangin amah tawh a kipawlthei dingin Pasian in a bawl nading thu, Lai Siangtho in na ma theih hi. Tua ahih manin Lai Siangtho in Abraham tungah Lungdamna Thuthak na ma hilhkhol a, “Pasian in leitung mi khempeuh thupha a piak nadingin nangmah hong zang ding hi,” na ci hi. Abraham in a up manin Pasian in thupha a piak mah bangin Pasian a um midang khempeuh in zong thupha a ngah ahi uh hi. Hih thu tawh kisai-in Lai Siangtho in, “Thukham laibu sunga kigelh khempeuh a vekpi-in a zuikhin tawntung lote in Pasian’ samsiatna thuak hi,” ci ahih manin Thukham a suangte pen samsiatna a ngah mite ahi uh hi. Tu-in Lai Siangtho in, “Upna hangin Pasian tawh a kipawlthei mite bek nungta ding hi,” na ci ahih manin Thukham hangin kuamah in Pasian tawh kipawl theihna a ngah lohna thu teltakin hong kilang hi. Lai Siangtho in, “Thukham’ deih bangin a gamta zote nungta ding hi,” na ci ahih manin Thukham zuihna le upna thu na kimemat kha lo hi. Lai Siangtho in, “Sing tungah a kikhai mi peuhmah Pasian’ samsiat mi ahi hi,” na ci ahih manin eite a dingin Khrih in samsiatna a thuak manin Thukham zuihlahna hangin samsiatna panin eite a hong tankhia ahi hi. Khrih in eite a hong tatna pen, eite in i upna hangin Pasian in a hong ciam Kha Siangtho ngahin, Pasian in Abraham tungah a ciam thuphate zong, Jesuh Khrih hangin Gentail mite tungah a kipiak theih nading a deihna ahi hi. Khrih sungah sanggamte aw, i theihtheih ngei gentehna khat ka hong zang ding hi. Mi nih in thu khatpeuhah thukimna nei-in letmat a thuhkhit uh ciangin kuamah in tua thukimna nungphiat thei lo, zong behlap thei lo hi. Tu-in Pasian in Abraham le ama suan pa tungah thuciamna nei hi. Lai Siangtho sungah a kigelhna-ah, mi tampi a cihnopna ahi, “Na suan le na khakte,” cih kammal na zanglo a, mi khat bek ahi Khrih a cihnopna-in, “Na suan pa,” ci-in na gen hi. Tu-in ka hong gennop thu in: Pasian in Abraham tawh thuciamna bawl a, tua a thuciamna peksat sawm lo hi. Tua ahih manin tua thuciamna a kibawlzawh kum zali le kum sawmthum khit ciangin a kinung piak Thukham in tua thuciamna peksatin phiat thei lo ding hi. Pasian’ hong piakkhong pen Thukham zuihna hang tawh a kingah hi mawk leh piak ding hong ciamna hangin a kingah hi nawn lo ding hi. Ahi zongin Pasian in Abraham tungah letsong a piakna pen a thuciamnasa tawh kizui-in a piak ahi hi. Tua ahihleh Thukham bangin a kimang ding ahi hiam? Khialhna cih bang ahi hiam, cih a kitheih nadingin thuciamna banah hong kipiathuah hi a, thuciam a kipiakna, Abraham’ suan pa’ hun ciang dong bek a kimang dingin a kingaihsun ahi hi. Mihingte tungah Thukham hong kipiak lai-in vantungmi hong kisawlsawn a, mihing ahi Moses tungah hong kipiasawn hi. Ahi zongin Pasian in Abraham tungah thuciamna a bawl laitakin kuamah sawlsawn nei loin amah bek in a piak ahi hi. Tua ahihleh Thukham le Pasian’ thuciamnate a kilehngat ahi uh hiam? Hi het lo hi. Mihingte tungah hong kipia Thukham in nuntakna taktak hong pia thei hileh tua Thukham zuihna hangin mi khempeuh in Pasian tawh kipawl theihna ngah ding uh hi. Ahi zongin Jesuh Khrih a um mite tungah a upna hangun Pasian’ thuciam a kipiak theih nadingin Lai Siangtho in, “Mawhna khutnuai-ah leitung mi khempeuh a om hi,” na ci hi. Tua ahih manin upna thu hong tunma hun sungteng, upna thu a kilahkhiat ding ngakna-in Thukham in eite a hong hencip phot ahi hi. Tua hi a, i upna hangin Pasian tawh kipawl theihna i ngahna dingin Khrih a hong pai hun ciang dong, Thukham in eite a hong uk ahi hi. Tu-in ahihleh upna hun hita ahih manin Thukham in eite hong uk thei nawn lo hi. Khrih Jesuh tawh na kipawl manun note khempeuh Pasian’ tate na suahtheihna uh pen na upna hang uh ahi hi. Khrih sungah a kiphum note in Khrih’ pianzia a nei khinta na hi uh hi. Tua ahih manin Jew mi le Gentail mi, sila le sila ahi lo, numei le pasal cih bangin kideidanna om nawn lo a, note khempeuh Khrih tawh na kipawlna hangun pawlkhat hi-in, a kibangkim na hi uh hi. Khrih tawh na kipawl nak-uhleh Abraham’ suante na hita uh a, Pasian’ hong khap thute a ngah ding na hi uh hi. Ahi zongin gamhluah ding tapa in a pa’ neihsa khempeuh a luah ding hinapi-in a neulai hun sungteng silate mah bangin bangmah thu nei lo hi. A pa in ama gamhluah dingteng a piakma, a neulai hun sungteng, midang in tua naupang kemin a vai ding a hawmsak hi. Tua mah bangin eite zong kha thu-ah i neulai hun sungteng huihlak a uk vangneite’ khutnuai-ah a om ihi hi. Note pen ama tate na hihna uh a hong lah nadingin Pasian in ama Tapa’ Kha Siangtho, eite sungah hong tumsak a, tua Kha Siangtho in Pasian pen, “Pa aw, pa aw,” hong cisak hi. Tua ahih manin note pen sila hi nawn loin Pasian’ tate na hih manun Pasian in ama tate a dingin a koih khempeuh, note tungah hong pia ding hi. A beisa hunah Pasian thei lo na hih manun Pasian ahi lo vangliatna a neite’ sila-in na om uh hi. Ahi zongin note in tu-in Pasian meltheih khinin, tua ahih kei leh Pasian in note hong meltheih khinta ahih manin, a bang hangin bangmah a hih zo lo, a ginalo tua bangte lamah kiheikik nuam a, sila va suakkik nuam na hi uh hiam? Note in nite, khate, hunte, kumte a kipan pawi tuamtuamte limtakin tan ding na hah ngaihsut mahmah uh hi. Tua ahih manin note a dingin ka nasepna khempeuh a mawkna a suahkhak ding ka hong lunghihmawhsak mahmah hi. Sanggamte aw, Thukham thu tawh kisai-in note’ gamtat bangin ka hong gamtat mah bangin kei’ gamtat mah bangin na hong gamtat ding uh ka hong thum hi. A beisa hunah kei tungah na hong gamta khial nai kei uh hi. Note kiangah lungdamna thu hilh ding ka hong kipatna pen ka pumpi cidam lohna hang ahihna thu na theihsa uh ahi hi. Ka pumpi cidam lohna pen note a dingin thu haksapi hinapi-in kei na hong simmawhbawl tuan kei uh a, zong na hong nolh tuan kei uh hi. Vantung panin a hong pai vantungmi zin do bang le Khrih Jesuh mahmah zin a do bangin na hong limbawl uh hi. Tua hun laitakin lungdam mahmah napi-in tu-in a bangci ta na hi uh hiam? A hithei khat hileh, tua hunin na mittang nangawn uh khelkhia-in kei a hong pianuamte na hihna uh teltakin ka thei hi. Note kiangah thuman ka hong genna hangin kei a hong galbawl na hi uh hiam? Tua mi pawlkhatte in note hong engin hong kin mahmah uh hi; ahi zongin amaute’ ngimna a hoih hi khol lo hi. Amaute’ hong kin bangin note in zong amaute kinin na kipawl theih nadingun kei kiang panin note a hong khenkhia nuam ahi lel uh hi. Ngimna hoih nei ahih nak-uhleh note’ phattuam nading kinna pen note tawh ka hong omkhawm sung bek hi loin, a tawntungin kin ding a hoih ahi hi. Taneute aw, note in Khrih’ pianzia bang na neih dong uh, naupaii nupi in ta a suah ding a gimpih bangin note ka hong lunggimpih ding hi. Note in ka maisuah na muhtheih nadingun hithei hileh note tawh ka omkhawm nuam mahmah hi. Tu-in note ka hong lunghimawh mahmah hi. Thukham nuai-ah a omnuam mite aw, Thukham in a gen thu a tel taktak mah na hi uh hiam? Lai Siangtho sungah hih bangin na kigelh hi: Abraham in tapa nih nei a, khat pen a zi’ silanu tawh a neih a tapa hi a, a khat pen a zi tawh a neih a tapa ahi hi. Silanu tawh a neih a tapa pen leitung ngeina bangin a suak mawkmawk hi a, ahi zongin a zi tawh a neih a tapa pen Pasian’ thuciamna tawh kizui-in a suak ahi hi. Hihte pen gentehna lim ahi hi. Hih nupi nihte pen thuciamna nam nih a lahna ahi hi. Sila a suak tate a hingkhia nu Hagar hi a, Sinai Mual tunga kipia thuciamna a lahnopna ahi hi. Arabia gam a om Sinai Mual lim ahi Hagar pen tu laitakin a mite tawh salin a om Jerusalem khuapi a cihnopna ahi hi. Ahi zongin vantung Jerusalem pen sal hi lo a, eite’ pianna nu ahi hi. Bang hang hiam cih leh Lai Siangtho sungah, “A ciing nupi aw, lungdam in. Nausuah natna a thei ngei lo nupi aw, nuamin kiko in. Bang hang hiam cih leh a pasal in a nusiat nupi in a pasal tawh a om tawntung nupi sangin ta hauzaw ding hi,” ci-in na kigelh hi. Tu-in eite zong, Isaac mah bangin Pasian’ thuciamna hangin a piang tate ihi hi. Tua hun laitakin leitung ngeina bangin a piang mawkmawk tapa in Pasian Kha Siangtho hangin a piang tapa a bawlsiat mah bangin, tuhunin zong eite hong kibawlsia hi. Ahi zongin Lai Siangtho sungah, “Sila numei’ tapa in sila ahi lo numei’ tapa tawh gamh luahkhawm thei lo ding ahih manin, sila numei le a tapa hawlkhia in,” na kici hi. Tua ahih manin sanggamte aw, eite pen sila numei’ tate ihi kei a, sila ahi lo numei’ tate ihi hi. Khrih in eite hong khahkhiat khitna hangin mi suaktate hi khinta ihih manin tua suahtakna thu-ah kipin om unla, sila va suakkik nawn kei un. Tu-in keimah Paul in ka hong gen ding thu limtakin na ngai un: Note in vun-atna na zat uhleh note a dingin Khrih’ nasepna a kimanna a om het lo ahi hi. Vun-atna a zang mi khempeuh in Thukham dang khempeuh zong a vekpi-in a zuih ding a tavuan ahihna thu teltakin phawk ta uh hen. Thukham zuihna hangin Pasian tawh kipawl theih nading a hanciamte pen Khrih tawh a kikhen na hi uh a, Pasian’ hehpihna in note hong huam thei lo hi. Kote ahihleh Pasian in amah tawh a kipawlthei dingin hong bawl ding hi, ci-in lamenin, kote’ upna hangin Kha Siangtho’ vangliatna tawh hong piang ding hi, ci-in a om ka hi uh hi. Bang hang hiam cih leh Jesuh Khrih tawh i kipawl ciangin vun-atna le vun-at lohna a thupi tuan om lo a, Khrih i upna hangin midangte i itna a thupi hi bek hi. A beisa hunah hoihtakin a gamtate na hi uh hi. Tu-in a manin na gamtat loh nadingun kua in lam hong pialsakin Pasian’ thu hong mang losak ahi hiam? Note a hong sam Pasian in note na pial nadingun hong zolkhia het lo ding hi. Silngo themno khat in annel lom buppi tawk thei hi, na kici hi. Eite, Topa tawh a kipawl khawmte ihih manin kei tawh a kilamdangin note in bangmah ngaihsut tuam nei het lo ding, ci-in ka hong muang a, a kua a kua hitaleh note hong nawngkaisakte pen Pasian in gim pia ding hi, ci-in ka um hi. Sanggamte aw, vun-atna kisam hi, ci-in a hilh lai hi leng, bang hangin bawlsiatna thuak zenzen ding ka hi hiam? Tua bangin thu a hilh hi leng, singlamteh tunga Khrih’ sihna thu ka hilhna hangin bangmah buaina a om kei ding hi. No hong lungkhamsak mite in a maban uh nawtsuak uh hen la, a ut leh a pasal nateng nangawn uh atkhia mangkhin vet uh hen! Sanggamte aw, note ahihleh a suakta mi ahi dingin Pasian in a hong sap ahi hi. Ahi zongin tua suahtakna pen na pumpi uh ut bangbangin gamtat theih nadingin paulam zonna-in nei kei unla, itna tawh khatlekhat kikhualna-in zangzaw un. Bang hang hiam cih leh Thukham khempeuh thu khatin kigawm thei a, “Nangmah na ki-it bangin na vengte na it in,” cihna tawh kitomlak thei hi. Ahi zongin note pen gamsa bangin khatlekhat kiphuai-in kipetkha le-uhcin na vekpi-un na siatlawhkhak ding uh lauhuai ahih manin hoihtakin na kidawm un. Note kiangah ka hong gen thu in: Kha Siangtho’ hong sawlna bangin gamta unla, na pumpi uh utna bangin gamta kei un. Bang hang hiam cih leh ei’ pumpi ut bangin gamta lehang Kha Siangtho’ deihna tawh na kituak lo a, Kha Siangtho’ deihna bangin gamta lehang ei’ pumpi deihna tawh na kituak lo zel ahih manin hih nih tegel a kilangpang niloh na hi a, note’ ut bangin a gamta thei lo na hi uh hi. Kha Siangtho’ deihna bangin na gamtat uhleh Thukham khutnuai-ah na om nawn kei uh hi. Tu-in mihing pianzia hong kitel a, tuate pen: Numei tawh mawhna, thangtatna, lanluat mana khialhna, milim biakna, mi bumna, kilangbawlna, kitotna, hazatna, hehna, huaihamna, kikhenna, pawltuam lungsim neihna, enna, zukhamna le biakna pawi-ah zukhamna a kipan adangdangte ahi hi. A beisa hunah ka hong hilhkholhsa bangin tu-in ka hong genkikin-ah: Hih bangin a gamta mite pen Pasian’ Ukna sungah omkha het lo ding hi. Ahi zongin Kha Siangtho’ sawlna bangin gamtatnate pen: Itna, lungdamna, lungnopna, lungduaina, migitna, hoihna, cihtakna, dikna le pumpi ki-ukzawhna hi a, hih bangin a gamta mite, Thukham in bangmah cih thei lo hi. Tua hi a, Jesuh Khrih a zui mite in a leitung lungsim pianzia uh le a leitung lungsim deihna khempeuh uh a phiat khitsa ahi hi. Kha Siangtho in eite hong nungtasak khinta ahih manin ama hong sawlna bangin eite a nungta ding ihi hi. Kuamah kiphasak loin, khatlekhat kiphin loin, kuamah i kihaza kei ding hi. Sanggamte aw, mi khatpeuh a gamta khial a om ciangin, Kha Siangtho’ deihna bangin a nungta note in tua a khial pa a manin a gamtatkik theih nadingin thunem zangin na huh un. Note in zong amah bangin ze-etna na tuahkhak loh nadingun na kikem un. Thu haksa na tuah uh ciangin khatlekhat na kihuh un. Tua hileh Khrih’ thukham a zui na hi uh hi. Mi khatpeuh, bangmah hi lo napi-in amah a kithupi ngaihsut mawkmawk leh amah le amah a kikhem ahi hi. A kuamah peuh in ama gamtatna ciat entel henla, kisialh nading a om leh ama gamtatna siksanin kisial henla, midangte tawh ki-ettehin kisial kei hen. Bang hang hiam cih leh a kuamah peuh in i gamtatna bang ciatin a ngah ding ihi hi. Pasian thu hilhna a za mipa in ama neih na hoihte khempeuh zong, amah a hilh pa tawh zangkhawm tahen. Pasian a kikhemzo dingin ngaihsunkha kei un. Mi khempeuh in ama vawh nam khaici mah ngahkik ding hi. Mi khatpeuh in ama leitung pumpi deihna khaici a vawh leh sihna ngah ding a, Kha Siangtho deihna khaici a vawh leh Kha Siangtho tung panin nuntak tawntungna ngah ding hi. Tua ahih manin na hoih sep ding cimtak kei ni. Lungkia loin i sep nakleh a hun ciangin thaman i ngah ding hi. Tua ahih ciangin hunhoih i ngah simin midangte tungah a hoihin i gamta ding a, a diakdiakin thu upna sungah i innkuanpihte khempeuh tungah i hoih gamtat ding i phawk ding hi. Tu-in keima khut mahmah tawh laimal gol pipi-in lai ka hong gelh na mu uh hi. Note in na vun uh na at nadingun a hong hahbawl mite in mihoih ahihna uh kilangsak nuamin, a kimuthei nate a kisialhpih mite ahi uh hi. Singlamteh tungah Khrih a sihna thu hangin amaute in bawlsiatna a ngah loh nadingun a tuaci gamtat ahi uh hi. Vun-atna a zang mite nangawn in Thukham zuinuam tuan lo uh hi. Hih a pualam gamtatna thu note in na zuihna hangun kisialnuam uh ahih manin note in vun-atna na zat ding uh a hong deih uh ahi hi. Ahi zongin keimah in ahihleh, singlamteh tungah i Topa Jesuh a sihna thu bek ka kisialhpih ding hi. Bang hang hiam cih leh singlamteh tungah ama sihna hangin kei a dingin leitung thute misi bang a, kei zong, leitung thu-ah misi mah ka bang hi. Vun ki-atna le ki-at lohna a thupi om tuan lo a, mi thak nam pawl hih ding bek a thupi ahi hi. Hih ka thugenna a zui mite a kipanin Pasian’ mite khempeuh tungah Pasian in nopsakna le hehpihna thupha hong pia tahen. A tawpna-ah ka gennop thu in: Ka pum tunga om meimapawn pen Khrih sila ka hihna lim ahih manin kuamah in kei hong nawngkaisak nawn kei tahen. Sanggamte aw, note khempeuh tungah i Topa Jesuh Khrih hehpihna thupha hong tung tahen. Amen. Pasian’ sawlna tawh Jesuh Khrih’ sawltak ahi keimah Paul in, Efesa khua-ah a om thu um mite tungah lai ka hong khak hi. Eite’ Pa Pasian le Topa Jesuh Khrih in note tungah dikna le nopsakna thupha hong tungsak tahen. Khrih tawh eite i kipawlna hangin vantung gam panin kha tawh kisai letsong namkim hong pia ahih manin eite’ Topa Jesuh Khrih’ Pa ahi Pasian tungah i lungdamna ko ciat ni. Ama mai-ah eite pen paubaanna a nei lo, mi siangthote ahi ding le Khrih hangin ama mite ahi dingin leitung a pianma pek nangawnin Pasian in a hong teelsa ihi hi. Pasian in Jesuh Khrih hangin ama mite ahi dingin eite a hong bawl ding a sehkholhsa hi a, tua bangin a hong bawl ding pen ama tupna le a utna ahi hi. Ama it Tapa hangin hih bangin letsong hong pia ahih manin ama hong hehpihna hangin Pasian phat ni. Pasian in a pilna le a thumuhnate zangin ama geelsa bangin hong sem a, Khrih zangin a sepnop thusimteng eite tungah hong kilangsak hi. Tua a geel thu pen, a hunhoih a tun ciangin Khrih khutnuai-ah, vantung le leitungah a om khempeuh gawm ding ahi hi. Na khempeuh, Pasian’ ngaihsutna le a geelsa bangin a piang hi. A cil pek a kipanin a ngaihsutsa thu tawh kizui-in Khrih tawh i kipawlna hangin Pasian’ tate ihih nadingin Pasian mah in a hong sehsa ihi hi. Tua ahih manin Khrih a muang masa eite in Pasian phatin a minthanna vang kilangsak ni. Note in zong hotkhiatna a hong ngahsakthei Lungdamna Thu a man za-in Khrih na up uh ciangin, Pasian in a hong ciamsa bangin ama mi na hihna uh a kilat nadingin note tungah Kha Siangtho hong piakna tawh a hong ciamteh hi. Tua Kha Siangtho pen, Pasian in piak dingin a hong ciamsa thu eite khempeuh in i ngah taktak ding a kician ahihna thu a hong lahna hi a, ama mi ahi taktak eite khempeuh pen a suakta takpi mite ihihna a kilat nading ahi hi. Tua ahih manin a kuamah peuh in Pasian phat ciat ni. Note in Topa Jesuh na muanna thu uh le thu umte khempeuh na itna thu uh ka zak hun a kipanin, tawlnga loin note’ tangin Pasian’ tungah lungdamna ka na pulak tawntung hi. Ka thungetna-ah zong note ka hong phawk tawntung a, i Topa Jesuh Khrih’ Pasian ahi, a minthang Pa Pasian in note tungah Kha Siangtho hong pia-in, tua Kha Siangtho in note tungah lungpilna hong pia-in, note in Pasian na theih nadingun note tungah Pasian hong kilatsak nadingin thu ka hong ngetsak niloh hi. Vantungah ukna, aana, vangliatna a neite khempeuh tungah Khrih in ukna aana nei lai a, hih leitung bekah hi loin a hong tung ding leitungah zong amah a lianpen ahi hi. Pasian in Khrih’ khenuai-ah na khempeuh koih a, thu khempeuhah pawlpi’ lutang dingin Khrih a bawl hi. Tua pawlpi pen Khrih’ pumpi hi a, tua pawlpi a dingin amahmah kipia-in, mun khempeuha om pawlpite, thu khempeuhah a cingtaaksak hi. A beisa hunah na thuman lohna uh le na mawhna uh hangin kha thu tawh kisai-ah a si na hi uh hi. Tuahun lai-in leitung gitloh gamtatnate na zui uh a, Pasian thu a um lo mite sungah tu laitakin na a sem, huihlak a ukte’ thu na mang uh hi. A taktakin eite khempeuh zong amaute mah i bang ngei a, i pianpih lungsim zui-in nungta-in, i pumpi le i lungsim deihna bangin i gamta hi. Tua ahih manin eite khempeuh zong Pasian’ hehna hangin gim a thuak dingte ihi hi. Tua bang hinapi-in Pasian’ hong hehpihna le eite hong itna lian mahmah ahih manin, i mawhna hangin kha thu tawh kisai-in misi ihih laitakin Khrih tawh eite hong nungtasak hi. Pasian’ hehpihna hangin hotkhiatna a ngah thei ihi hi. Khrih Jesuh tawh eite i kipawlna hangin vantungah amah tawh i ukkhawm theih nadingin sihna panin Pasian in a hong thokhawmsak hi. Khrih Jesuh tungtawnin a hong lah ama hehpihna le a hong itna bangzah takin lianin lamdang ahi hiam, ci-in a hong tung ding hunah a hong lah tawntung theih nadingin hih bangin a hong thokhawmsak ahi hi. Note’ upna hangin Pasian’ hong hehpihna tawh hotkhiatna a ngah na hi uh hi. Note’ thalawhna hangin a ngah hi loin Pasian’ hong piakkhong ahi hi. Note’ hanciamna tawh a ngah hi lo na hih manun na kisialh nading uh a thu om lo hi. Eite a hong bawlpa pen Pasian hi a, Jesuh Khrih tawh i kipawl ciangin i nuntakna-ah gamtat hoih a nei dingin a hong bawl ihi hi. Hih pen eite’ omzia dingin a na ngaihsut kholhsa ahi hi. Amau mahmah in amau pumpi tungah a hihna uh tawh vun a ki-at mite ka hi uh a ci Jew mite in, vun a ki-at lo mite a hong cih uh, na pian’ na patun Gentail mi ahi note in nidanga na omzia uh phawkkik dih un. Tuahun lai-in Khrih tawh na kikhen uh a, Pasian’ teel Israel minamte hi loin a pualam mite na hi uh hi. Pasian in ama mite tungah piak dingin a ciam thute zong a ngah dingte na hi kei uh a, Pasian a nei lo, lamet ding bangmah nei loin leitungah a om na hi uh hi. Ahi zongin a gamlapi-ah a om ngei hinapi-in tu-in Khrih Jesuh tawh na kipawlna hangun ama sihna in Pasian kiang hong tunpih hi. Khrih mahmah in Gentail mite le Jew mite pawlkhatin hong bawl ahih manin eite tungah nopsakna a hong piapa ahi hi. Hih minam nihte khenin gal a piangsak dalna pen Khrih in ama pumpi tawh a satkham hi. Amah tawh kipawlna hangin minam nihte pawlkhat a suahtheih nadingin minam a dei Jew Thukham le a ngeinate khempeuh phiatin, eite pawlkhat hong suahin a hong kilemsak hi. Singlamteh tungah a sihna tawh Khrih in kilangneihna beisak a, tua singlamteh hangin minam nihte pawlkhat suahin Pasian kiang a tunpih hi. Tua hi a, Khrih in Pasian tawh a kigamla no Gentail mite tung le Pasian tawh a kinai Jew mite tungah kilem nading Lungdamna Thuhoih a hong hilh hi. Khrih hangin Jew mi le Gentail mi ahi eite khempeuh, Kha Siangtho huhna tawh Pa Pasian kiangah i paithei hi. Tua ahih ciangin no Gentail mite pen a pualam mi, gamdang mite na hi nawn kei uh a, Pasian mite tawh minam khat hita-in, Pasian innkuan sung mite na hita uh hi. Note zong, sawltakte le kamsangte in a phuhsa innkhuam tungah a kilam na hi uh a, tua inn sutpi pen Jesuh mahmah ahi hi. Tua inn sutpi Khrih pen inn-a a kilam khempeuh a puapi pen hi a, Topa a dingin biakinn siangtho a suah dongin tua inn a khangsak hi. Note zong midangte tawh kigawmin ama tungah na kilam uh a, Kha Siangtho-in Pasian a ten nading inn na suak uh hi. No Gentail mite hangin Jesuh Khrih thu tawh kisai-in thongkia keimah Paul in Pasian kiangah thu ka ngen hi. Note’ phattuam nadingin Pasian in hong hehpihna tawh hih nasep a sem dingin a hong sawlna thu na theihsa uh ahi hi. Lai ka hong khaksate sungah a tomno-in kong gensa bangin Pasian in ama thusim kei tungah hong hilh khinzo hi. Tua ka laigelh na sim le-uhcin Khrih tawh kisai a thusim ka theihna thu na phawk ding uh hi. A beisa hunah tua thusim pen kuama tungah kigen lo a, ahi zongin Pasian in tu-in a siangtho a sawltakte le a kamsangte tungah Kha Siangtho a hilhsak hi. Tua thusim pen: Lungdamna thu a kihilhna hangin Gentail mite in Jew mite tawh Pasian’ thupha ngahkhawm thei a, amaute tawh pawlkhat suakin, Pasian in piak dingin a ciam thute, Khrih hangin a ngahkhop theihna uh ahi hi. Tua lungdamna thuhilh a sem dingin Pasian in a tuam vilvelin ama vangliatna tawh kei a hong seh hi. Pasian’ mi khempeuh lakah kei a neupen hinapi-in, Khrih hangin a kigen zo lo thu manpha ahi Lungdamna Thu, Gentail mite lakah a gen ding, Pasian in a tawntungin a ngimna a omsa bangin i Topa Khrih Jesuh nasepna tawh a ngimna a hong tungsak hi. Amah tawh i kipawlna le amah i muanna hangin kimuang takin Pasian kiangah paitheih nading hun i nei hi. Tua ahih manin note hangin ka thuakna pen note’ phattuam nading ahih manin tua ka thuakna thu hangin lungkiatna-in na nei kei un. note’ lungsim a thahat nadingin Pasian in a kicing ama vangliatna sung panin a Kha Siangtho tawh note hong thakhauh sakin, na upna hangun note lungsim sungah Khrih hong tengin, itna thu-ah zung thuk kha-in bulkip na neih nadingun thu ka ngen hi. Tua hileh note in Pasian mi ahi midangte khempeuh tawh Khrih hong itna bangzah takin sau-in zai a, bangzah takin thukin sang ahi hiam, cih na theikhawm ding uh hi. Khrih hong itna a kicing takin theihkhit zawh loh ding ahi ta zongin note in thei-in, Pasian thu a cingin na theih nadingun thu ka hong ngetsak hi. Eite a dingin na a hong sepsak, eite’ ngetzah val, le i ngaihsut zawh loh zah dongin a vangliatna tawh tampi tak a hong hihsak thei eite’ Pasian pen, pawlpi mite khempeuh le Khrih Jesuh tawh a kipawl mi khempeuh in a khang khangin a tawntungin phat ciat ta uh hen. Amen. Tua ahih ciangin Topa’ na ka sepna hangin thong a kia keimah in note’ nuntakzia dingin a hong deihna tawh a kilawm a kituakin na nuntak nadingun ka hong hanthawn hi. Kiniamkhiatin, thunemin, lungduai-in om tawntung un. Khatlekhat kihuhna tawh na ki-itna uh kilangsak un. Kha Siangtho kimakai sakin, khatlekhat kilemin pawlkhat na hihna uh na kipsak tawntung un. A kibang lametna khat bek a ngahkhawm dingin Pasian in note hong sap mah bangin eite khempeuh pumkhat bek hi-in Kha Siangtho zong khat bek mah a neikhawm ihi hi. Topa khat bek, upna khat bek, tuiphumna khat bek mah a zangkhawm ihi hi. Mi khempeuh’ Pa ahi Pasian khat bek om a, mi khempeuh’ Topa hi-in, na khempeuh hih kimin, mun citengah a om hi. Ahi zongin eite khempeuh in Khrih hong piakna tawh kizui-in siamna a tuam khat ciat i ngah hi. Tua ahih manin Lai Siangtho sungah, “A sangna munah a paitoh ciangin matsa salte tampi paipih a, mite tungah letsong a pia hi,” ci-in na kigelh hi. “Paito,” a cih ciangin bang a cihnopna ahi hiam cih leh, lei sung a thukpenna munah paisuk masa khinzo, a cihnopna ahi hi. Tua ahih manin mun khempeuhah a omkim khit theih nadingin a paisuk mipa pen mah vantung a sangpen dawn nangawn khengto-in na paito hi. Amah in mite tungah siamna a tuamtuam hong pia a, pawlkhatte sawltak nasep a sem ding, pawlkhatte kamsang nasep a sem ding, pawlkhatte thuhilh kawikawi nasep a sem ding, pawlkhatte pawlpi kem nasep a sem ding, le pawlkhatte laihilh nasep a sem dingin a hong seh hi. Hih nasep a tuamtuamte khempeuh a sem dingin Pasian’ mi khempeuh kigingkhol sakin Khrih a dingin na semin Khrih pumpi a khansak theihna ding deihna ahi hi. Tua hileh Pasian’ Tapa i theihna le i thu upna-ah kithukhatin, eite a khangcing suakin, Khrih’ cingtaakna ciang i banto ding hi. Tuahun ciangin thu upna lamah naupang ihi nawn kei ding a, mite khemin a khialsak theite’ mutna hangin i suk hoi i to hoi nawn kei ding a, itna lungsim tawh thutak genin, lutang ahi Khrih tawh i kibat dongin i khangto ding hi. Ama ukna mangin pumpi na a tuamtuamte a kituak takin kizom a, amaute limtakin a kizop dimdiamna hangin pumpi pen pumkhat a suak thei hi. Pumpi na a tuamtuamte in amau’ sep ding ciat hoihtakin a sep uh ciangin itna hangin pumpi khangin a cingtaak a suak thei hi. Tu-in Topa’ min tawh limtakin note kiangah ka hong gennop thu in: Thu um lo dawibiate bangin gamta nawn kei un. Amaute’ thu ngaihsutte a kimang bangmah om lo a, a ngaihsutnate uh khuamial tawh kibang hi. Amaute’ lungsim khauhin bangmah thei het lo uh ahih manin Pasian’ hong piak nuntakna neikha het lo uh hi. Amaute in maizumna mel thei nawn lo uh a, siatna sung tungin, a ututun a kilawm lopipi-in gamta uh hi. Tua bang gamtatnate pen Khrih thu panin na theihkhak uh hi lo hi. Note in Khrih thu na zaksa uh hi a, ama nungzui na hih manun Jesuh’ thutakna na theihsa uh ahi hi. Zuauna lungsim in a suksiat khitsa, nidangin na nuntakna ngei uh ahi na pianlui uh paikhia unla, na lungsim uh le na ngaihsutna uh thaksuak sak un. A thutang a siangtho ahihna thu, nuntakna mahmah panin a kilangsak, Pasian’ pianzia tawh kibangin a kibawl na ngeina thak uh bangin na nungta un. Tua ahih manin zuau gen nawn kei unla, Khrih pumpi nate ihihna hangin pawlkhat ihih manin khatlekhat tungah thuman kigen ni. Na heh uh ciangin, tua hehna hangin khialkha kei unla, a tawntungin heh paisuak kei un. Dawimangpa in hong suksiat theih nading hun omsak kei un. Guta ngeite in gu nawn loin, ama nuntak nading thuman takin thalawhin, mizawngte zong a huhtheih lai nadingin thatang tawh nasep ding kipan ta uh hen. Na kiho uh ciangin kamguh zang kei unla, na pauna uh a za mite in phattuamna a ngahtheih nadingin na-in a kimang kam hoihte bek na pau un. Ni khat ni ciangin Pasian in note hong tatkhiat taktak nading thu a ciantakin hong lahna le Pasian’ neihsa na hihna uh hong ciamtehna-in Kha Siangtho hong pia ahih manin, tua Pasian’ Kha Siangtho na dahsak kei un. Kimuhdahna, hehna, thangpaihna, kitotna, kikona, kilungsim neihna khempeuh beisak unla, khatlekhat kihehpihin, lungsim nem tawh na kihozaw unla, Khrih’ hangin Pasian in note’ mawhna hong maisak mah bangin khatlekhat na mawhna uh na kimaisak ta un. Note pen Pasian in a hong it a tate na hih manun amah tawh na kibat nadingun hanciam un. Khrih in eite a hong it manin Pasian in eite’ mawhna hong maisak theih nadingin a namtui biakna-in Pasian kiangah a kipiak mah bangin note zong itna tawh na gamta un. Note pen Pasian’ mi na hih manun note lakah nulepa khialhna, a kilawm lo-a gamtatna, huaihamna cihte genin zong na nei vet kei un. A kilawm lo-a kampauna, le ciamnuih hoih lo cihte zong na zang kei unla, Pasian tungah lungdamkohna kam na pauzaw un. Nulepa khialhna a gamta mi, a kilawm lo-a a gamta mi, le a huaiham (huaihamna zong milim biakna zahin sia hi) mite in Khrih Ukna le Pasian Ukna sungah bangmah ngah nei het lo ding ahihna uh teltakin thei ta un. Hih bang mawhnate i bawl hangin phamawh kei, ci-in a mawk gen mite’ khemsa-in ta kei un. Pasian thu mang loin hih bangin a gamta mite in Pasian’ hehna a thuak ding uh ahi hi. Tua ahih manin tua bangin a gamta mite tawh kisukha vet kei un. Note pen khuamial sungah a omngei hinapi-in, Topa’ mi na suahkhit uh ciangin khuavak sungah a om hita na hih uh manin khuavak sungah a om mite bangin na gamta un. Bang hang hiam cih leh khuavak sunga omna in a hoih, a man, a thutakte hong piangsak hi. Bangteng in Topa lungkimsak ahi hiam, ci-in kan un. Khuamial gamtatna, bangmahin a kimang lo nasepnate su vet kei unla, tua bang gamtatnate a hoih lohna pholak zaw un. Kuama theih lohin a simthamin a hihte uh gen ding nangawnin zong zumhuai lua hi. Na khat peuhpeuh khuavakah pusuah lehang a pianzia man taktak hong kilang hi. Tua ahih manin la sungah, “A ihmu mi aw, khanglo inla, sihna panin tho in. Tua hileh Khrih in nang hong taan ding hi,” kici hi. Tua ahih ciangin hoihtakin kingaihsunin gamta unla, mihaite bang hi loin mipilte bangin gamta un. Tuhun pen hun hoih lo hun ahih manin na hun neih khempeuh uh a hoih lamin zang un. Tua ahih manin hai ommawk kei unla, Topa in bang a sem dingin hong deih ahi hiam, ci-in kan un. Zu in mi siasak thei ahih manin zu ne kei unla, Kha Siangtho tawh a kidimin omzaw un. La a tuamtuamte genin sakna tawh Topa’ thu gen belin nei unla, na lungsim khempeuh uh tawh Topa phatna la sa un. I Topa Jesuh Khrih hangin thu khempeuhah Pa Pasian tungah lungdamna ko ta un. Khrih na zahtakna uh hangin na thu uh na kimang tuak un. Zite aw, Topa’ thu na man’ uh mah bangin na pasalte uh thu na mang un. Bang hang hiam cih leh Khrih pen ama pumpi ahi pawlpi a honkhia pa hi-in, pawlpi tungah ukna thu a neih mah bangin pasal in a zi tungah ukna thu a nei ahi hi. Pawlpi pen Khrih’ khutnuai ahih mah bangin zite zong thu khempeuhah a pasalte uh khutnuai hi ding uh hi. Pasalte aw, Khrih in pawlpi itin a pumpi a piak mah bangin na zite uh na it un. Tua mah bangin pasalte in zong amau pumpi zah mah bangin a zite uh a it ding uh ahi hi. A zi a it mi pen amah a ki-it mi ahi hi. Tua ahih manin Lai Siangtho in, “Hih thu hangin pasal in a nu le a pa nusia-in a zi tawh kigawm ding a, amau tegel khat a suak ding uh hi,” na ci hi. Tate aw, na nu na pate uh thu na man ding uh Khristian ngeina hi a, ahi ding mah ahi hi. Pate aw, na tate uh a hehtheih nadingin bawl kei unla, Khristiante ngeina tawh kituakin taii-in hilhin pantah un. Silate aw, launa le linna tawh na leitung tote uh thu mang unla, Khrih’ na na sep uh mah bangin lungsim takpi tawh na na sepsak un. A hong pahtak ding uh deihna tawh amaute’ muhsung bekin tuaci gamtat kei unla, Khrih’ sila na hihna hangun Pasian’ hong deih bangin lungsim takpi tawh na sem un. Mihingte’ na a sem bang lelin kingaihsun loin Topa’ na a sem bangin kingaihsun unla, thanopna tawh sem un. Salte ahi a, sal ahi lote ahi zongin na hoih a sem mi khempeuh, Topa in thaman a piak ding lamtak na thei un. Tote aw, silate in note hong bawl mah bangin note in zong amaute limbawl unla, tawn’ gawpgawpnate zang nawn kei un. Note le na silate uh vantung panin To khat khutnuai-ah a om na hihna uh le tua Topa in kuamah maitang zahtak tuam nei loin a kibangin mi khempeuh thu a khen ahihna thu na phawk ta un. Tu a kipanin Topa tawh na kipawlna uh le ama vangliatna hangin na tha uh khauhsak ta un. Dawimangpa’ hong hih nading khempeuh na dalzawh nadingun Pasian’ galvan namkim na zang un. Eite’ do pen leitung mite hi lo a, vantung huihlakah a om ukna, aana a neite, hih leitung khuamial a uk a tuamtuamte ahi hi. Tua ahih manin hun haksat hun hong tun ciangin galte’ hong suknateng khempeuh nangzo-in, a tawpna-ah a gualzo na hih theih nadingun Pasian’ galvan namkim na zang un. Tua ahih ciangin kawnggak gak bangin thutak zang unla, awmdal bulh bangin thuman zang unla, kithawi a khedap bulh bangin Lungdamna Thu a hilhkhia dingin kiging un. Tua banah, dawimangpa’ hong kapna thaltang kuangte na sukmit nadingun lum puak bangin upna na nei tawntung un. Siklukhu khuk bangin hotkhiatna nei unla, Kha Siangtho in a hong piak Pasian’ thu pen namsau zat bangin na zang un. Kha Siangtho tawh kopin a tawntungin Pasian kiangah na kisapna khempeuh uh ngenin na thum unla, tatsat loin Pasian mi khempeuh a dingin thu na ngetsak un. Thu ka hilhtheih hun ding ciangin lungdamna thusim hangtakin ka hilhkhiat theih nadingin Pasian in ka thugen ding hong hilh nadingin kei a dingin zong thu na ngetsak ta un. Pasian’ thu genin taangmi ka sepna hang mahin sikkhau khihna thuakin thongkia ka hih manin ka hilh dingin a kilawm bangin hangtakin ka gen ngam nadingin thu hong ngetsak ta un. Ka septe le ka omzia khempeuh na theih nadingun Topa thu sungah i sanggam, thuman takin na a sem Tikhikas in note kiangah thu khempeuh a cingin hong gen ding hi. Kote’ omzia na theih nading uh le amah in note’ lungsim hong thahatsak theih nadingin amah a hong paisak ka hi hi. Pa Pasian le Topa Jesuh Khrih in ulenaute khempeuh tungah nopsakna le itna, thu upna tawh hong piakhawm tahen. Tatsat loin i Topa Jesuh Khrih a it tawntung mi khempeuh tungah hehpihna thupha hong tung tahen. Jesuh Khrih’ sila keimah Paul le Timoti in Filippi khua-a om Khrih tawh a kipawl Pasian’ mite, siate, le upate khempeuh tungah lai ka hong khak uh hi. I Pa Pasian le Topa Jesuh Khrih in note tungah dikna le nopsakna thupha hong pia tahen. Note ka hong phawk simin ka biak Pasian tungah ka lungdamna ka ko hi. Note sungah hih nasep hoih a hong pankhia Pasian in Jesuh Khrih hong paikik hun ciang dong, mi cingtaak na hih nadingun hong huh ding hi, ci-in teltakin ka thei hi. Lungdamna thu hangin ka thongkiatna le lungdamna thu man hi, ci-in pangin ka kipsak nading hun ka ngahna-ah kei tawh a hong pangkhawm na hih manun ka lungsim sungah note na om tawntung uh a, hih zahta-in note ka hong phawk ding a kilawm thu mah ahi hi. Jesuh Khrih lungsimzah mahin note ka hong it taktakna thu Pasian in a hong thei hi. Note a’ ding deihsakna tawh thu ka hong ngetsak thu in: Note’ lungsimah itna khang semsemin, a sia le a pha a mantakin khenthei-in a hoihpen na teeltheih nading uh ahi hi. Tua hileh Khrih hong paikik ni ciangin paubaanna om loin a siangtho na hi ding uh hi. Jesuh Khrih in note mihoih a hong suahsak theihna le mite in Pasian pahtawi-in a phattheihna thu, note’ gamtat hoih in midangte tungah kilangsak ding hi. Sanggamte aw, kei tungah a piang thu in lungdamna thu mai a nawtsakzaw ahihna thu na theih ding uh ka deih hi. Bang hang hiam cih leh Khrih nasem ka hihna hangin thongkia ka hihna thu, inncing galkapte a kipanin mi khempeuh in a thei uh hi. Tua banah keima thongkiatna hangin hih lai-a om Khristiante a tamzaw in Topa muanna-in nei uh a, lau hetloin Pasian’ thu gen ngamna-in neizaw uh hi. Mi pawlkhatte in ahihleh hong hazatna le hong langpan’ nopna tawh Khrih thu hilh uh a, ahi zongin mi pawlkhatte in lungsim hoihtak mah tawh a hilh uh hi. Hih bang mite in, Pasian’ hong sawlna tawh lungdamna thu ka hutna hangin thongkia ka hihna thu thei-in, itna lungsim tawh Pasian’ thu a hilh uh hi. Pawlkhatte in ahihleh lungsim hoih tawh hi loin ka thongkiatna-ah na ka sak semsem theih nadingin kei hong demna-in Khrih thu a hilh uh hi. Ahi zongin phamawh ka sa kei hi. Lungsim hoih tawh a kihilh a, lungsimkhem tawh a kihilh ahi zongin, bangbang hitaseleh Khrih’ thu gen uh ahih nungsang, kei ka lungdam hi. Note hong thungetsakna le Jesuh Khrih Kha Siangtho huhna tawh suakta ding hi ing, ci-in thei ka hih manin ka lungdam hi. Ka si a, ka hing zongin, a diak diakin tu a kipanin a tawntungin midangte in Khrih phat theih nading lungsim hanna a neih theih nadingun ka lungsim le ka pumpi tawh keima tavuan ka lelh hetloh nading pen ka deihdeih, ka lametet bulpi ahi hi. Bang hang hiam cih leh Khrih a’ ding bekin a nungta ka hi a, si taleng zong kei a dingin hoihzaw semsem lai hi. Leitung pumpi nungta lai hi leng na a manpha tampi semthei ding ka hih manin, sih ding le hin ding ka teelsawn ding ka thei kei hi. Hih thu nih khentat hak ka sa mahmah hi. Kei a dingin hoihzaw thampek ahih manin leitung pumpi si-in Khrih tawh omkhawm ding ka ut hi. Ahi zongin note a dingin kei ka hin lai ding kisam phazaw hi. Hih thu a hoihpen ding hi, ci-in theitel ka hih manin note’ khantoh nading le upna hangin na lungdamna uh a khangsak dingin note ka hong hinpih lai ding hi. Tua ahih manin note kiangah ka hong hawhkik ciangin Jesuh Khrih tawh kipawlin na nuntakna uhah kei nong kisialhpih nading uh thu tampi hong omlai ding hi. Note tawh a omkhawm dingin ka hong paithei a, ka hong paithei kei zongin note in lungdamna thu tawh kipawl upna thu-ah ngimna kikhatin kiptakin na om nading uh le deihna kikhatin na dokhawmna thu uh ka zak theih nadingin Khrih hanga lungdamna thu tawh a kilawm a kituakin na nuntak ding uh a thupi pen ahi hi. Note a hong gualzosak ding pa pen Pasian ahih manin na galte uh na kihta kei un. Hangtakin om tawntung le-uhcin, note a gualzo ding hi-in, na galte uh a guallel ding ahihna thu, na galte un hong thei ding hi. Bang hang hiam cih leh Khrih’ na sep nading hunpha zong note tungah a hong kipia hi a, Khrih upna tawh ama na a sem hi bek loin, thuakna tawh zong a sem ding na hi uh hi. Tua ahih ciangin tu-in note in na hong muh uh ka galdona le tu mahmahin ka do lailai na zak uh thute-ah kei na hong dopih thei ding uh hi. Note, Khrih tawh kipawlin na nuntakna uh in note hong thahatsak hi. Kha Siangtho tawh kikhawlin, khatlekhat kihehpihin, dikna na kibawl uh hi. Tua ahih manin kei tawh ngaihsutna kibangin note khatlekhat ki-itin, khatlekhat lungsim kituakin na omna uh tawh keima lungdamna na hong cingtaaksak nadingun ka hong kun hi. Huaihamna lungsim le kisialh nopna lungsim tawh bangmah gamta kei un. Kiniamkhiat ciat unla, midangte thupi ngaihsutzaw un. Note’ phattuam nading bek ngaihsun kei unla, midangte’ phattuam nading ngaihsutsak zaw un. Note in Jesuh Khrih lungsim puakzia na nei un. Tua lungsim puak zia in: Jesuh Khrih in Pasian’ pianzia nei napi-in, Pasian tawh a kizakim theihna dingin thatanghat thu a suang kei hi. Amah kiniamkhiat tawm zaw a, nasem lim a hong puazaw hi. Mihing bangin amah hong kibawl a, mihing teekteek mah a hong sun hi. Amah hong kiniamkhiat tawm a, singlamteh tung nangawnah sih ding a ut hi. Hih thu hangin Pasian in a lianpenin amah koih a, min lian dang khempeuh sangin a min lianzaw-in a koih hi. Tua ahih manin vantung, leitung, leinuai-a om mi khempeuh in Jesuh pahtawi-in khukdin ding uh a, Jesuh Khrih in Topa ahi hi, ci-in taangko-in Pa Pasian a min thangsak ding uh hi. Tua ahih ciangin ka hong it sanggamte aw, note tawh ka hong omkhawm lai-in ka thu na hong man’ tawntung uh mah bangin, tu-in note tawh ka hong omkhawm loh hun ciangin zong ka thu na hong man’ ding uh thupizaw lai hi. Pasian kihtakna le zahtakna tawh na maa uh nawt unla, amah in note hong hotkhiatna thu a cingtaak suaksak un. Bang hang hiam cih leh note in utna lungsim na neih nading uh le ama deihna na zuihzawh nadingun note sungah Pasian in a tawntungin na a hong sem ahi hi. Na khempeuh phun lo, thu nial loin sem un. Tua hileh a lungsim kawi, a hoih lo leitung mite lakah paubaanna a nei lo a siangtho, Pasian’ tate na hi ding uh a, nuntakna thu na genna uh hangin leitung mite lakah khuavak bangin na hoihna uh a kilang mite na hi ding uh hi. Tua hileh a beisa hunah ka sepna le ka hanciamnate a mawkna suak lo ding ahih manin Khrih hong paikik ni ciangin kei ka kisial thei ding hi. Note’ upna hangin biakpiakna-in keimah hong kigo hitaleh zong, note khempeuh mah bangin kei zong ka lungdam veve ding hi. Tua mah bangin note in zong hong lungdampih ta un. Note kiang panin thu ka zakna hangin ka lung a noptheih nadingin note kiangah Timoti ka hong paisak baih nadingin Topa Jesuh in hong huh ding hi, ci-in ka lamen hi. Note ka hong lunghihmawh zahin amah bek mah in note hong lunghihmawhpih hi. Adangte in ahihleh Jesuh Khrih thu kinloin, amau’ aituam vai bek lunghimawh uh hi. Ahi zongin Timoti ahihleh lungdamna thu nasepna-ah pata bang ka hih manun manpha mahmah hi. Keima pianzia ding ka theihkhit phetin note kiangah Timoti ka hong paisak pah ding hi. A sawt loin kei mahmah zong ka hong paitheih nadingin Topa in hong huh ding hi, ci-in ka muang hi. Note in kamtai ding le keimah hong huh dingin na hong sawl uh, kei tawh na semkhawmin gal hong simpih, i sanggampa Epafroditas pen note kiangah ka hong ciahsakkik ding kisam hi, ci-in ka ngaihsun hi. Amah in note hong munuam mahmah a, ama natna na zak manun amah zong lunghimawh mahmah hi. Amah a ci na takpi a, zong si dektak hi. Ahi zongin Pasian in amah hehpih hi. Amah hehpih kei leh keima dahna kibehlapto sawnsawn ding ahih manin amah bek a hehpih hi loin kei zong a hong hehpih ahi hi. Tua ahih manin amah na muh uh ciangin na lungdam theih nading uh le kei’ lunghihmawhna a kiam nadingin amah ka hong ciahsak ding ka kin semsem hi. A tawpna-ah, sanggamte aw, Topa in note tungah lungdamna hong tungsak tahen. Ka hong gelhsa thute ka hong gelhkik ding cimtakhuai ka sa kei a, note a dingin lungmuanhuai zaw lai hi. Ui bangin a miginalo, a gitloh gamtat, vun at ding a ci teiteite kiang panin na kidawm un. Bang hang hiam cih leh eite in Kha Siangtho’ hong huhna tawh Pasian bia-in, Jesuh Khrih tawh i kipawl manin lungdamin, a tung lama kilang vun-atna limte muanin nei lo ihih manin, amaute hi loin, eite pen vun-atna man taktak a zang mite ihi zaw hi. Kei mahmah zong, tua bang nate muantheih ding a nei pa ka hi hi. A puatham a ciaptehna muantheih ding nei ing, a ci a om leh, ke’n ka limneih zaw lai hi. Ka suahzawh a ni giat ni-in ka vun a ki-at hi. Kei pen Hebru minam citak ka hi a, Israel mite sung panin Benjamin’ suante ka hi hi. Jew Thukham zuihna tawh kisai-in Farisi mi pawl ka hi a, nak hahkatlua kisa-in pawlpite nangawn ka bawlsia hi. Thukham zuihna tawh midik kitang ding hileh paubaanna mahmah ka nei kei hi. Ahi zongin hamphatna-in ka neih theih ding tua bangte khempeuh, Khrih hangin supngam dingin ka ngaihsun hi. Hih bang nate bek hi loin, ka Topa Jesuh Khrih ka theihna manphazaw lua sa ka hih manin na dang khempeuh ka sum ngamzaw lai hi. Khrih hangin na dang khempeuh ka nusia khin a, Khrih tawh ka kipawl theih nadingin na dang khempeuh ninneng bang lelin ka ngaihsun hi. Khrih tawh kiptakin kipawl khin ka hih manin Thukham zuihna tawh a kingah thei keima hanciamna tawh dik ngahna cihte ka nei nawn kei hi. Tu-in, Jesuh Khrih upna hangin Pasian in a hong piak diksakna ka ngah a, tua pen upna siksanin a hong kipia ahi hi. Ahi zongin ka utna tungkhin ing, cingtaak khinta ing, a ci ka hi kei hi. Khrih Jesuh in kei a dingin a hong sepsak hamphatnate kimtakin ka ngahtheih nadingin a hanciam lai ka hi hi. Sanggamte aw, tua hamphatna a ngah khinin ka kingaihsun kei hi. Tua ahih manin a beisa thute mangngilh bawlin mainawtin ka hanciam a, Khrih Jesuh nasepna tawh vantung nuntakna-ah Pasian’ hong sapna ahi hamphatna ka ngahtheih nadingin, a kung lam zuanin tangtakin ka tai hi. Kha thu-ah a khangham eite in hih bang lungsim pua ciat ni. Hih bang lungsim a nei lo i omkhak leh zong, Pasian in a kitel takin hong kilangsak ding hi. Bangbang hitaleh ang, i tunna ciangciang panin mainawt ciat ni. Sanggamte aw, keima gamtat bangin hong gamta niloh un. Note’ etteh dingin a hoihin kote hong gamta ka hih manun, kote’ gamtat bangin a gamtate na etteh un. Singlamteh tungah Khrih a sihna thu tawh a kilehngatin a nungta mi tampi tak a omna thu, a beisa hunah tamveipi ka hong genkhin a, tu-in zong khitui tawh ka hong genpha kikkik hi. Amaute in amau pumpi deihnate Pasian zahin ngaihsun uh a, a maizum nading uh thute-ah kisial zawsopin, leitung nate bek ngaihsutin nei uh ahih manin Hell khuksung a tung ding uh ahi hi. Ahi zongin eite ihih leh vantung gam mite ihi a, vantung panin a hong pai ding Topa Jesuh Khrih, eite’ Honpa, lawptakin a ngakte ihi hi. Amah in na khempeuh ama khutnuai-ah koihna-in a zat vangliatna mah tawh a ginalo i leitung pumpi pen ama a’ mah bangin a minthang pumpi tawh hong kheelsak ding hi. Tua ahih manin sanggamte aw, note ka hong it mahmah a, nakpitakin ka hong goih hi. Note in nakpitakin kei na hong lungnuamsak uh a, note ka hong angtanpih mahmah hi. Tua hi a, sanggamte aw, Topa sungah kiptakin nungta un. Euodia le Sintikhe, Topa’ hangin a kilemkik ding uh ka thum nuam hi. Hih numei nihte in Klement le a nungta mite a kikhumna Pasian’ laibu sungah a kikhum, ka naseppih dangte khempeuh tawh, lungdamna thu a kizelh nadingin nakpitakin kei tawh na hong semkhawm uh ahih manin, citakin kei tawh na a semkhawm note in zong amau tegel na huh nadingun ka hong thum hi. Topa sungah lungdam tawntung un, ka hong cihsa bangin tu-in zong lungdam un, ka hong ci kik hi. Mi khempeuh tungah na dik un. Topa hong pai baih ta ding hi. Thu khat peuhpeuhah lunghimawh lua kei unla, na kisap bangbang uh, lungdamna tawh Pasian kiangah na ngen un. Mihingte in a theihtel zawh loh Pasian’ hong piak lungsim nopna in, Khrih Jesuh tawh na kipawlna uh hangin note hong lungnuamsak ding hi. Sanggamte aw, a tawpna-ah ka hong gennop thu in, a hoih le a phattaak thute tawh na lungsim uh na kidimsak un. Tuate in: A man, a dik, a tang, a siangtho, a deihhuai, le a pahtakhuai thute ahi hi. Keima genna le ka gamtatna panin thei-in na san uh thute, nomau pumpi mahmah tawh na zui un. Tua hileh nopsakna a hong piathei Pasian in note hong ompih ding hi. Topa’ hangin ka lungdamna lian mahmah hi. Hun sauveipi khit ciangin kei na hong phawkna uh na hong langsakkik thei uh hi. Kei hong kin loin omngei uh teh, a ci ka hi kei a, na hong kinna uh na hong lah nading uh hun om thei lo, ka cihna ahi hi. Bangbangin om taleng a lungkim thei dingin a kisinsa ka hih manin hih bang ka hong gen ciangin ka kitangsapna a hong pulak nuam ka hi kei hi. Cihmawhna le cihtheihna a sinsa ka hi hi. Tua ahih manin ka hau a ka zawng zongin, ka vah a ka kial zongin, koi mun koi mun hitaleh ah a lungkimthei dingin a kisinsa ka hi hi. Khrih in a hong piak vangliatna tawh hihte khempeuh nawkzawh nading thahatna a nei ka hi hi. Ahi zongin ka lungkham laitakin na hong huh manun hoih mahmah hi. Na theihsa uh mah bangin Lungdamna Thu ka hilh cil lai-in note’ gam Masedonia panin ka paikhiat hunin no Filippi pawlpite bek mah in kei na hong huh uh a, ka ngahna le ka piakkhiatnate, note bek mah in a hong theihpih na hi uh hi. Thesalonika khua-ah cimawhin ka om lai-in huhna nong puak uh khatvei bek hi lo hi. Note tung panin na tampi ka ngahnop man hi lo a, note’ hamphatna a kibehlap nading ka deihna hizaw hi. Note’ hong piak nate kicing piikpeek hi. Epafroditas in note’ hong na khakte hong tunpih ahih manin ka kitangsapna khempeuh kicingkim hi. Hih nate pen Pasian biakna-in na piak uh, lungdam takin a hong san, a namtui nate ahi hi. A na ka sep i Topa Pasian in ama hauhna tawh kizui-in Khrih Jesuh hangin note’ kitangsapna khempeuh hong pia ding hi. I Pa Pasian in a tawntungin minthanna ngah tahen. Amen. Khrih Jesuh sungah a om mi siangthote khempeuh na na hopihsak un. Kei tawh a omkhawm kamsangte khempeuh in zong note hong hopih uh hi. Hih lai-a om Khristian khempeuh, a diakdiakin kumpi nasem i lawmte in note hong hopih uh hi. Topa Jesuh Khrih hehpihna thupha, note khempeuh tungah hong tung tahen. Pasian’ deihna tawh Jesuh Khrih’ sawltak dingin a hong kiseh keimah Paul le i sanggam Timoti in, Kolose khua-ah a om Pasian’ mi ahi, Khrih sungah kiptakin a om sanggamte tungah lai ka hong khak uh hi. I Pa Pasian in note tungah dikna le nopsakna thupha hong tungsak tahen. Thu dang na zakma un, lungdamna thuman taktak na zak uh ciangin lametna na nei uh hi. Note a dingin vantungah a hong kikoihsak tua lametna hangin note in muanna le itna a nei na hi uh hi. Note in Pasian hong hehpihna thu za-in, ahi bangbangin na theih hun uh a kipanin thupha na ngah uh bangin leitung midang khempeuh tungah zong lungdamna thu in thupha tunin, leitung khempeuhah a kizel ahi hi. Hih thu pen, Khrih nasepna sungah kote’ tangin citakin na a sem, kote’ naseppih Epafras tung panin na zak uh ahi hi. Amah in, Kha Siangtho’ piak itna na neihna uh zong, kote kiangah a hong gen hi. Tua bangin note’ thu ka zak uh hun a kipanin Pasian kiangah thu ka hong ngetsak uh a, kha thu tawh kisai pilna le theihtelnate nei-in, Pasian’ deihna na theihtheih nadingun ka hong ngetsak uh hi. Tua bang hileh Topa’ deihna bangin nungta-in, amah a lungkimsak ding thute bek na sem tawntung ding uh a, na gamtatnate uh a hoih bekbek hong hi-in, Pasian’ thu na theihna uh hong khang semsem ding hi. Amah in khuamial vangliatna panin eite hong honkhia-in, a lungmuanhuaina mun, a it a Tapa’ ukna sungah hong koih a, tua a Tapa in eite hong khahkhia a, i mawhna hong kimaisak khinta hi. Khrih pen a kimu thei lo Pasian’ lim hi a, a kipiangsak khempeuh lakah tapa upa pen ahi hi. Vantung le leitungah a om na khempeuh, kha thu tawh kisai vangliatna, tote, mi ukte, aana neihnate a kipan a kimuthei hitaleh a kimu thei lo hitaleh na khempeuh, Pasian in amah zangin a piangsak hi. Leitung a kipanin huih lakah a om khempeuh dongin, Pasian in Khrih a dingin amahmah zangin a piangsak hi. Na khempeuh khat beek a om ma-in amah om khinta a, amah tawh a kipawl manin na khempeuh ama mun sansanah hoihtakin a omthei hi. Na khempeuhah amah a lianpen ahih theih nadingin, amah pen pawlpi ahi ama pumpi lutang hi a, pawlpi’ nuntakna a kipatna hi a, sihna panin a kithokiksak Tapa cil ahi hi. Tua Tapa in Pasian’ pianzia a kimin a neih nading, Pasian mahmah in a sehsa ahi hi. Pasian in a Tapa zangin na khempeuh ama kiangah a kaihkik ding a sehsa ahi hi. Tua ahih manin singlamteh tungah a Tapa a sihna hangin amah tawh kilemkik theih nading hong omsak ahih manin, leitung, vantung a om khempeuh ama kiangah a hong tunkik ahi hi. A beisa hunah note’ lungsim gitlohna le gamtatsiatna hangin Pasian tawh kigamla-in Pasian’ gal na hi uh hi. Ahi zongin, a Tapa a pumpi mahmahin a hong sihna hangin note, a cidam, a siangtho, paubaanna om hetloin ama kiangah hong laktheih nadingin Pasian in note ama lawmin a hong bawl khinta ahi hi. Ahi zongin note in lungdamna thu na zak cil lai-un na neih uh lametna panin ling hetloin, bulkip nei-in citakin na om paisuak ding uh ahi hi. Tua lungdamna thu mah keimah Paul in hilhin ka sepbel hi a, leitung mun khempeuhah a kihilh lungdamna thu mah ahi hi. Tu-in ka pumpi-in ka thuakna tawh Khrih in ama pumpi ahi pawlpi a dingin a thuak ding a kisam laiteng a kitangcingsak suak ka hih manin note a dingin ka thuakna thu-ah ka lung a dam hi. Pasian’ thu a kicing takin note’ phattuam nadingin a hilh dingin pawlpi nasem dingin Pasian in kei a hong bawl hi. Tua thuhilh ding pen a beisa hunah a ki-imcip thu hi a, ahi zongin tu-in Pasian’ mite tungah a kipholak ta ahi hi. Pasian in mi khempeuh a dingin a koihcing hih a thupi a deihhuai a thusim pen ama mite tungah pholak ding a sawm ahi hi. Tua thusim in: Khrih tawh a kipawlte in Pasian tawh minthanna ngahkhawm ding hi, cihna ahi hi. Tua ahih manin a milip tungah Khrih’ thu ka hilh uh a, Khrih tawh a kipawlna uh hangin a milipin a khangcingin Pasian’ omna-ah ka tunpih theih nadingun a milip tungah hilhin ka genkhol uh hi. Hih bang a tangtun theih nadingin Khrih in kei tungah a hong piak ka thahatna khempeuh zangin, nakpitakin na semin ka hanciam hi. Note a kipan Laodisia khuamite le kei a hong thei ngei nai lo mi khempeuhte a’ ding nangawnin hahkat takin na ka sem hi. Note, lungsim hanna tawh kidimin, thu a man taktakin na theihna hangun lungkip takin omin, itna tawh pumkhat na suahtheih nading uh ka deihna ahi hi. Tua hileh Pasian’ thusim ahi Khrih mahmah na thei ding uh hi. Khrih pen Pasian’ pilna le a thuthuk khempeuh a kitheihtheih nading ahi hi. Kuamah in note a hong khem zawh loh nadingin hih bang thu a hong gen ka hi hi. Bang hang hiam cih leh note tawh ka hong omkhawm loh hangin ka lungsimin note tawh ka hong omkhawm a, Khrih na upna uh hangin kiptakin na omkhawmna uh ka theih manin ka nuam mahmah hi. Note hong honpa dingin Topa Khrih na sansa uh ahih mah bangin amah tawh hoihtakin kipawlin nungta un. Note tungah a hong kihilhsa bangin ama sungah zungthuk kha unla, ama deihna bangin nungta-in, na upna uhah khauh semsemin, lungdam takin om un. Khrih thu tawh a kituak lopi-in, tangthu tuanthu ahi a, huihlak a ukte’ thu siksanin ahi zongin, bangmahin a kimang lo leitung pilna tawh mite’ khemsa-in sila na suahkhak loh nadingun kingaihsun un. Bang hang hiam cih leh mihing hong suahna sungah Khrih in Pasian’ pianzia khempeuh a kimtakin nei a, Khrih tawh na kipawlna hangun nuntakna kicing na nei uh hi. Huihlak a ukte le aana neite khempeuh tungah amah a lutangpi hi lai hi. Amah tawh na kipawlna uh hangin mihingte in pumpi vun a at uh bang hi loin, Khrih’ vun-atna ahi mawhnopna lungsim tawh kipelhna a ngah khinta na hi uh hi. Note tui na kiphum uh ciangin Jesuh tawh kiphum khawmin, misite’ lak panin Khrih a thosak Pasian’ vangliatna na up manun Khrih mah tawh tuiphumna panin a thokhawm leuleu na hi uh hi. A beisa hunah na mawhna uh hangin kha thu tawh kisai-in misi na hi uh a, Gentail mi na hih manun Thukham nei lote na hi uh hi. Ahi zongin Khrih hangin Pasian in note hong hingsak a, i mawhna khempeuh hong maisak khinta hi. Eite a dingin a hoih lo, i mawhna a kiciamtehna khempeuh, hong phiatsak a, tuate khempeuh singlamteh tungah kilhcipin a beisak ta hi. Amah in huihlak a ukte le vangliatna a nei khempeuh, singlamteh tungah zogawp khin a, galzote in a sal matte a kaih uh bangin mi khempeuh muhin a gualzawhna a lak hi. Tua ahih manin annek tuidawn, biakna pawite, Khadet pawi, le Sabbath ni tawh kisai-in kuamah in ngeina zuih ding bawl kei un. Hihte pen mailam ah a hong piang ding nate’ lim hi lel a, ahi zongin tu-in a taktak ahi Khrih hong omta hi. Maang a muhna hangun a thupi diakin kingaihsunin, a kilawm lo zah dongin kiniamkhiat nading le vantung mite biak ding a hong hanthawn mite’ khemsa-in ta kei un. Tua bang mite pen amau’ ngaihsut tawmna tawh a kihisak mawk hi a, lutang ahi Khrih a len nawn lo uh ahi hi. Lutang ahi Khrih’ ukna tawh pumpi na khempeuh kizom dimdiam uh ahih manin pumpi in thahatna ngah a, Pasian’ deih bangin a khangto hi. Khrih tawh sikhawm khin na hih manun huihlak a ukte’ khutsung panin a suakta khin na hi uh hi. Tua hinapi-in, bang hangin hih leitung mite bangin gamta na hi uh hiam? Bang hangin ngeina a tuamtuamte, “Lawng kei un, ciam kei un, su kei un,” cihte zuihin nei na hi uh hiam? Hih nate pen i nek, i zat khit ciangin a maimang hi lel a, mihingte’ bawltawm thuhilhna le ngeina hi lel hi. Hih bang gamtatnate pen a tungthamin i et ciangin limtakin biaknopna lungsim a piangsak ding, kiniamkhiatna a piangsak ding, pumpi ki-ukzawhna a piangsak ding tawh kibang hi. Ahi zongin a taktakin hihte khat beek in pumpi ki-ukzawhna piangsak zo lo hi. Note pen Khrih tawh a thokik khinte na hih manun, Pasian’ taklam a kumpi tokhom tungah Khrih a tutna mun vantung thute ngaihsutin nei un. Vantungah a om thute ngaihsutin nei unla, leitungah a om thute ngaihsutin nei kei un. Note a sikhin na hi uh a, note’ nuntakna pen Khrih tawh Pasian’ sungah a kiseelkhawm ahi hi. Note’ nuntakna taktak Khrih ahih manin amah hong kilat ciangin note zong amah tawh hong kilang khawmin amah tawh na minthang khawm ding uh hi. Tua ahih manin nulepa mawhna, a kilawm lo gamtatna, hukna lanna, a hoih lo lunggulhna, le milim biakna nam khat ahih manin huaihamna ahi note sungah a om leitung lungsimte na sisak un. Ama thu a mang lo mite tungah hih bang gamtatna hangin Pasian’ hehna hong tung ding hi. Note pen hih bangin gamta-in a nungta ngeite na hi uh hi. Ahi zongin tu-in hehna, thangpaihna, muhdahna, gensiatna, kam hoih lo pauna cihte nei nawn kei un. Ngeina lui le gamtatna lui khempeuh a beisakkhin na hihna uh kithei-in khatlekhat tungah zuauthu kigen nawn kei unla, ngeina thak tawh kituakin gamta un. Eite a hong piangsak Pasian a kicing takin i theih semsem nadingin amah a sun dingin a hong thakbawl tawntung ahi hi. Tua ahih manin Gentail mi le Jew mi, vun-at mi le vun-at loh mi, khuapi mi le khuaneu mi, sila le sila ahi lo, cih bangin a kilamdanna om lo a, Khrih pen mi khempeuh a’ ding hi thei a, thu khempeuh a’ ding hi thei a, thu khempeuhah amah bek ahi hi. Pasian in note hong itin, hong teelin, ama mi siangthote hikhin na hih manun note pen hehpihna nei-in, migi-in, kiniamkhiatin, dikin, na lungduai ding uh ahi hi. Note lakah khatlekhat a kilungkim lo na om uh ciangin khatlekhat na mawhna uh kimaisakin na kihuh ciat un. Topa in note’ mawhna hong maisak bangin note zong khatlekhat na mawhna uh na kimaisak ding uh hi. Hihte khempeuh banah, mi khempeuh kilem takin a hong om khawmsak thei ahi ki-itna na bulphuh un. Note pumkhat suakin a lungdam khawm dingin Pasian in a hong sap ahih mah bangin Khrih hong piak nopsakna in note’ lungsim hong uk ta hen la, lungdamin om ta un. Khrih thu a cingtakin note lungsimah hong om hen la, pilna tawh khatlekhat thu kihilhin na kitai un. Pasian tungah lungdam kohna-in Thuciam Lui sunga late, la thakte, le biakna late na sa un. Na kampauna, na gamtatnate khempeuh uhah, Topa Jesuh hangin Pa Pasian tungah lungdam kohna-in Jesuh min paulamin na hih ding uh hi. Zite aw, Khristiante gamtat dingin a kilawm ahih mah bangin na pasalte uh thu na mang un. Pasalte aw, na zite uh it unla, amaute tungah ngongtat kei un. Tate aw, na nu na pate uh thu man’ tawntung ding pen na Khristian nasep uh ahi hi. Tua bang thumanna in Pasian lungdamsak hi. Pate aw, na tate un a thuak zawh loh zah dong dingin thuhilhin taii niloh kei un. Silate aw, thu khempeuhah na leitung topa uh thu na mang un. Amau’ hong pahtak ding deihna tawh a hong muh sung bekin a hoihtatte hi kei unla, Topa na zahtakna uh hangin lungsim tak tawh gamta un. Mite’ nasem bangin kingaihsun loin, Pasian’ nasem bangin kingaihsun unla, na sep peuhpeuh uh lungsim takpi tawh lawpin sem un. Topa in note tungah thaman a hong piak ding lamtak phawk gige un. Tua bangin na sepna uhah Khrih Topa’ na a semsem na hi uh hi. A man loin a gamtate in ahihleh a gamtatna bangun thuak ding uh hi. Pasian in kuamah deidan loin amau’ gamtatna bang ciatin thu a khen ahi hi. Tote aw, note in zong vantungah To khat na neihna uh phawk unla, na silate uh a kilawm a kituakin bawl un. Lungsim takpi tawh thu ngen tawntung unla, kidawm kawmin lungdamna tawh thu ngen un. Mite kiangah Khrih’ thusim hilhtheih nadingin Pasian in kote tungah hunpha hong piaktheih nadingin thu hong ngetsak un. Ka thongkiatna pen hih thu hang mah ahi hi. Mite’ teltheih dingin a kitel takin ka gentheih nadingin thu hong ngetsak un. A pualam mite tungah a kilawm a kituakin gamta unla, hunhoih na ngah khempeuh uh na valkhongsak ngei kei un. Kam na pau uh ciangin mi’ zaknop, mi’ ngaihnop dingin na pau un. Tua hileh na kihopih uh mite khempeuh a dingin phattuamna a nei kam a pau na hi ding uh hi. Topa’ nasepna-ah citakin a manpha mahmah ka naseppih uh ka sanggam uh Tikhikas in kei’ thu a kicing takin note kiangah hong gen ding hi. Hih lai-a kote’ omzia hong gen ciangin note’ lungsim a noptheih nadingin amah a hong paisak ka hi hi. Note’ khuapih mi, a citak i sanggam it pa Onesimas zong ka hong zuisak hi. Amau tegel in hih lai-a thupiang khempeuh note kiangah hong gen ding uh hi. Kei tawh thong a kiakhawm Aristarkhas in note hong hopih hi. Barnabas’ sanggamnu’ tapa Marka in zong hong hopih hi (amah hong pai ciangin hoihtakin na pawlbawl un, ci-a hong kigen pa ahi hi). Justas zong a kici zel Jesuh in zong note hong hopih hi. Vun-atna a zang Jew mi Khristian a hong suakte lak panin hih mi thumte bek, Pasian thu-ah ka naseppih lakah a hong kihel ahi hi. Ka nasepna-ah amaute in nakpitakin hong huh uh hi. Jesuh Khrih nasem, note’ makai Epafras in zong hong hopih hi. Pasian’ deihna bangin note nungta-in, lungsim khanghamin kiptakin na omtheih nadingun amah in thu hong ngetsak tawntung hi. Amah in note-a’ ding a kipan Laodisia khua le Hierapolis khua mite a dingin nakpitakin na a sepna thu ka thei hi. I it siavuanpa Luka le Demas in zong hong hopih uh hi. Laodisia khua-a om i sanggamte le Nymfas le ama inn-a a kikhawm pawlpi mite na hopihsak un. Hih ka hong laikhak na sim khit uh ciangin Laodisia khua-a om pawlpite zong na simsak unla, Laodisia khua pawlpite kiang pan hong pai ding lai zong note in na sim hamtang un. Tua ciangin Arkhippas kiangah, “Pasian a dingin nasepna nang tungah hong kipia pen hoihtakin na zo in,” ci-in na gen un. Keimah Paul’ khut mahmah tawh, Note ka hong hopih hi, cihna lai ka gelh ahi hi. Sikkhau khihna ka thuakna thu mangngilh kei un. Note khempeuh tungah Pasian’ hehpihna thupha hong tung tahen. Keimah Paul, le Silas, le Timoti in Pa Pasian le Topa Jesuh Khrih sungah a om Thesalonika khua-a om pawlpi mite tungah lai ka hong khak uh hi. Pasian in note tungah dikna le nopsakna thupha hong tungsak tahen. Note khempeuh hangin Pasian tungah lungdamna ko tawntungin, ka thungetna uhah note ka hong phawk tawntung uh hi. Bang hang hiam cih leh i Pa Pasian kiangah thu ka nget simun note’ upna hangin na nuntakziate uh, itna na neih manun nakpitakin na nasepnate uh le i Topa Jesuh Khrih hong paikik ding lametna na neih manun kiptakin na omnate uh ka phawk tawntung uh hi. Sanggamte aw, Pasian in note hong itin ama mi dingin a hong teel khitna thu ka thei uh hi. Bang hang hiam cih leh note kiangah Lungdamna Thu ka hong hilh lai-un kam bek tawh a hong gen hi loin, Kha Siangtho’ vangliatna le Lungdamna Thu a man taktak hi, ci-in theihna tawh a hong pai ka hi uh hi. Note kiangah ka om laitakun note’ phattuam nadingin ka sep ka bawlna khempeuh uh na thei uh hi. Kote le Topa’ gamtat bangin note na gamta uh a, note in gimna nakpitakin thuaklawh napi-in Kha Siangtho’ huhna tawh lungdam takin thu umin na om uh hi. Tua ahih manin Masedonia gam le Akhaia gam sung khempeuhah thu um mi khempeuhte a dingin etteh hoih na suak uh hi. Note’ gamtatna ziate’ hangin Masedonia le Akhaia gam sungteng bekah Topa’ thu a kithei hi loin, note in Pasian na upna thu uh mun khempeuhah kiza ahih manin kote’ gen ding bangmah kisam nawn lo hi. Note kiangah ka hong pai lai-un kote na hong limbawlna thu uh, le a nungta a man Pasian’ thu zui-in a bia ding le, a hong tung ding Pasian’ hehna panin eite a hong honkhia, sihna panin Pasian in a thawhsakkik a Tapa Jesuh, van panin a hong pai ding ngak dingin milim paisanin Pasian’ lamah na kiheina uh thute mi khempeuh in gen belin a nei uh hi. Sanggamte aw, note kiangah ka hong painasa thu a mawkna a suahlohna thu nomau mahmah in na thei uh hi. Note in na theihsa uh mah bangin Thesalonika khua ka hong tun ma-un Filippi khua-ah simmawh bawlna le maizumna ka thuak uh hi. Tua bangin nakpitakin hong kilangbawlna hangin Pasian kiang panin a hong pai Lungdamna Thu note kiangah gen ngam nadingin i Pasian in kote sungah lungsim hanna a hong guan hi. Kote in thu ka hong hilh uh ciangin thuman lo, ngimna hoih lo le khemnopna lungsim tawh a hong hilh ka hi kei uh hi. Pasian in kote hong thei-in Lungdamna Thu a hilh dingin kilawm hong sa ahih mah bangin mite’ lungdam theih nadingin thu a hilh hi loin kote’ lungsim ngimna a hong thei Pasian’ lungkim nadingin thu a hilh ka hizaw uh hi. Tua ahih manin note in na theih uh mah bangin mite’ lungdam theih nading phatna kamte ka zang kei uh a, kote’ phattuam nading ngaihsutna tawh zong bangmah ka sem het kei uh hi. Hih bang ka hihna uh Pasian in hong thei hi. Khrih sawltakte ka hihna uh hangin phatna ka ngah ding uh a kilawm hinapi-in note le midangte, a kuamah peuh’ hong phat ding a zong ka hi kei uh hi. Note kiangah ka hong om lai-un nupite in a tate uh itna tawh a bawl bangin note ka hong bawl uh hi. Note hong it mahmah ka hih manun Pasian kiang panin a hong pai Lungdamna Thu bek hong gen loin, kote’ nuntakna mahmah zong note a dingin a pia ngamin ka om uh hi. Tua ahih manin kote’ hong muhna-ah note a manpha mahmah na hi uh hi. Sanggamte aw, ka nasep ka silbawlnate khempeuh uh note in na thei uh hi. Pasian kiang panin a hong pai Lungdamna Thu note kiangah ka hong hilhna hangun note in themkhat beek na gimlawhkhak loh nadingun a sun a zanin nakpitakin na ka sem uh hi. Note in hih thu na theih uh mah bangin Pasian in zong hong thei hi. Thu um note tungah kong gamtatnate uh siangtho-in thuman a, paubaan nading bangmah om het lo hi. Pa in a tate a bawl bangin note ka hong bawlna uh na thei uh hi. Note hong hehnemin ka hong hanthawn uh a, amah tawh ukna le minthanna a ngahkhawm dingin a hong sam Pasian’ lungkimna bangin na gamtat theih nadingun ka hong gengen uh hi. Note kiangah Pasian’ thu ka hong gen uh ciangin no thu um mite sungah ama thu tawh kisai-in Pasian in na hong sem ahih manin kote’ thugente pen Pasian’ thu taktak ahih mah bangin kote’ thugenna na zak uh ciangin mihing’ thu bangin ngaihsun loin Pasian’ thu taktak mahin hong sang na hih manun, hih thu hangin zong Pasian’ tungah ka lungdamna uh ka ko uh hi. Tua ahih manin sanggamte aw, Judea gam sunga om, Khrih Jesuh thu a um, Pasian’ mi ahi mite in a thuak bangin note in zong a thuak na hi uh hi. Amaute in Jew mite’ bawlsiatna a thuak uh mah bangin note in zong note’ gam mite mah’ bawlsiatna na thuak uh hi. Tua Jew mite in Topa Jesuh le kamsangte that uh a, kote zong hong bawlsia uh hi. Pasian’ lungkim loh nadingin gamta uh a, mi khempeuh langbawl uh hi. Gentail mite tungah hotkhiatna thu ka gen ding uh hong khaktan uh ahih manin amau’ mawhnasate a behlap niloh a suak uh hi. Ahi zongin a tawpna-ah Pasian’ hehna amaute tungah a tungta hi. Sanggamte aw, kote ahihleh no tawh i lungsim a kikhen loh hangin tawlkhat sung i pumpi a kikhen sungin note ka hong phawk mahmah uh a, note kiangah hawhkik ding nakpitakin ka hanciam uh hi. Note kiangah hong hawhkik nuam ka hih manun note kiangah hawhkik ding ka hanciam zelzel hangun kong pai ding uh Satan in hong khaktan hi. Tua banga kong painopna uh pen, note bek mah kote’ lamet, ka lungdamna uh le kote’ gualzawhna lukhu na hi uh a, Topa Jesuh hong pai ciangin ama mai-ah kong kisialhpih ding uh na hi uh hi. Kote’ thupi suahna le lungdamna pen note bek mah na hi takpi uh hi. A tawpna-ah ka thuakzawh nawn loh uh ciangin Athen khua-ah kei le Silas omin, Khrih Lungdamna Thu hilhna-ah Pasian a dingin kote tawh na a semkhawm i sanggampa Timoti hong paisak le-ung hoihpen ding hi, ci-in ka ngaihsun uh hi. Amah in note hong hanthawnin na upna uhah hong kipsakin, hih bawlsiatna hangin note khat beek na puk loh nading uh deihna tawh a hong paisak ka hi uh hi. Hih bang bawlsiatna pen i thuak ding mah hi, ci-in note in zong na theih uh ahi hi. Bang hang hiam cih leh note tawh kong omkhawm lai-un zong, na theihsa uh bangin tu-a na thuak bangte teekteek mah uh a thuak ding hi hang, ci-in ka hong genkholhsa uh ahi hi. Tua ahih manin ka thuakzawh nawn loh ciangin note’ upna zia a thei dingin Timoti ka hong sawl hi. Dawimangpa’ ze-etna in note hong puksakkha-in, kote’ nasepna a mawkna suakkha ding hi, ci-in ka lunghimawh uh hi. Ahi zongin tu-in note kiang panin Timoti hong tungkhin a, note’ upna le nong itna uh thute a hong gen hi. Kote na hong lim ngaihsutnate uh le kote in ka hong muhnop uh mah bangin note in zong kote na hong muhnopna uh thute khempeuh a hong gen hi. Tua ahih manin sanggamte aw, note’ upna thu ka zak uh ciangin lungkham sinkhamna ka thuak laitakun ka tha uh hong hatsak hi. Topa’ thu-ah kiptakin om na hih manun tu-in ka husang theita uh hi. Tu-in note hangin Pasian tungah ka lungdamna uh ka ko theita uh a, note hangin ka lungdamna khempeuh uh, Pasian tungah ka ko uh hi. Pasian in eite maitang kimu-in hong omsak theih nading le note’ upna ka hong kicinsak theih nadingun a sun a zanin lungsim takpi tawh thu ka ngenngen uh hi. Tu-in eite’ Pa ahi Pasian le i Topa Jesuh in note kiangah ka hong paitheih nading uh lampi hong honsak tahen. Kote in note ka hong it zahun, note khatlekhat na ki-itna uh le mi khempeuh na itna uh, hong liansak semsem tahen. Tua hileh i Topa Jesuh a mi siangthote khempeuh tawh hong pai ciangin eite’ Pa ahi Pasian’ mai-ah kisuanna om hetloin lungsim siangtho takin na om thei ding uh hi. Tu-in sanggamte aw, Pasian’ deihna le ama lungkim nadingin bangci nuntak ding cih thu kote kiang panin na theihsa uh thute tawh kizui-in na nuntaksa uh ahih mah bangin a kicingzaw semsemin na nuntak nadingun i Topa Jesuh min tawh hong thumin ka hong hanthawn uh hi. Bang hang hiam cih leh Topa Jesuh min tawh ka hong thuhilhnate uh na theihsa uh ahi hi. Note a siangtho-in nungta-in numei tunga mawhna tawh na kipelh siangtho nading uh Pasian in hong deih hi. Hih bang thute-ah kuamah in Khrih sungah na sanggamte uh tungah na khialh loh nading uh le na khasiatsak loh nading uh hong deih hi. Pasian in hih bangin a gamta mite gim pia ding hi, ci-in khauhtakin note kiangah ka hong genkhol khinzo uh hi. Eite a thanghuai gamtat dingin Pasian in a hong sam hi lo a, a siangtho-in a nungta dingin a hong sam ahi hi. Tua ahih manin hih thute a thudon lo mi in mite a thudon lo hi loin, note tungah ama Kha Siangtho a hong pia Pasian a thusim lo ahi hi. Ahi zongin thu uppih mite it ding tawh kisai-in bangmah gelh ding na kisam nawn kei uh hi. Khatlekhat na ki-it nading uh Pasian in note tungah hong hilh khinzo hi. Masedonia gam sunga om thu um mi khempeuh na it khin takpi uh hi. Tua ahih manin sanggamte aw, itna na neih semsem nadingun ka hong thum uh hi. Tu ma-a ka hong gensa uh mah bangin kamtam nuam se loin hoihtakin om hithiatna, no tawh a kisai thu bek ngaihsutna, le note’ nuntak nading na na sep nading uh hanciamin nei un. Tua bangin gamta le-uhcin thu um lo mite in note hong zahtak ding uh a, mite’ neihsa na duhgawh kei ding uh hi. Sanggamte aw, lametna a nei lo mite bangin na dahluat loh nadingun a sisa mite’ omzia ding thu na theih ding uh ka deih hi. Jesuh si-in thokik hi, ci-in i up mah bangin Pasian in Jesuh hong paipih kik ciangin amah umin a si mite zong hong tonpih ding hi, ci-in i um hi. Topa’ thugen note kiangah ka hong gen uh thu in: Topa hong paikik ni ciangin a nungta lai eite pen a sisa mite tawh i kimuh ma-in Topa tawh i kimu kei ding hi. Pasian’ thupiakna awging lianpi, vantungmi mangpa’ thugenna, le Pasian’ peengkul hong ging ding a, vantung panin Topa mahmah hong paisuk ding hi. Tua ciangin tua hun laitakin a nungta lai eite pen vankim lai-ah Topa a dawn dingin amah a um a sisa mite tawh hong kilakhawm ding a, Topa tawh i omkhawm tawntung ding hi, cihna ahi hi. Tua ahih ciangin note khatlekhat hih thu tawh na kihehnem un. Ahi zongin sanggamte aw, hih thu hong pian ding hun tawh kisai kong gelh ding uh kisam lo hi. Bang hang hiam cih leh Topa hong pai ding Ni pen zan a gutate bangin theihkholh lohin hong tung ding hi, ci-in note in teltakin na theihsa uh ahi hi. Mite in, “Thu khempeuh a hoih laitak hi a, bangmah patauh nading om lo hi,” a cih laitakin thakhatthu-in amaute tungah siatna hong tungvat ding hi. Nausuah natna bangin gimna thuak ding uh a, kuamah suakta lo ding uh hi. Ahi zongin sanggamte aw, note ahihleh khuamial gamtatnate gamta lo na hih manun guta bangin tua Ni hong tunvat ciangin lamdang na sa kei ding uh hi. Bang hang hiam cih leh note khempeuh, khuavak gamtatna a nei, sun khuavak mite na hi uh a, eite pen khuamial gamtatna a nei, zan khuamial mite ihi kei hi. Tua ahih ciangin midangte bangin eite mawk om hithiat loin khua phawkin pilvang ni. Zan khuamial pen mite’ ihmut hithiat hun le zukham hun ahi hi. Ahi zongin eite pen khuavak gamtatna a nei sun khuavak mi ihih manin pilvang ni. Awmdal bangin upna le itna bulhin, siklukhu bangin i lamet hotkhiatna khu ni. Pasian in ama hehna a thuak dingin eite a hong teel hi lo a, i Topa Jesuh Khrih hangin hotkhiatna a ngah dingin a hong teel ahi hi. Amah a hong paikik ciangin a hing ihi a, a si ihi zongin amah tawh i omkhawm theih nadingin eite a dingin amah a hong si ahi hi. Tua ahih manin tu laitakin na omzia uh mah bangin khatlekhat kihanthawnin na kihuh ciat ta un. Sanggamte aw, Topa in note lam a hong lak ding le a hong makai dingin a seh, note lakah na a hong sem mite, a kilawm a kituakin zahtakbawl un. Amau’ nasepna hangin amaute nakpitakin itbawlin zahtak un. Note khatlekhat kilem takin na om un. Sanggamte aw, a thadah mite hilh unla, a meidawite hanthawnin, a zawngkhal mite huh unla, hih bang mite ngongbawl kei un. Gitlohna lamsang kuamah kithuk loin, note khatlekhat tung le mi khempeuh tungah a pha kibawl ding ngaihsutpi-in na nei un. Lungdam tawntungin, thu ngen niloh unla, bangbang hong piang taleh na lungdamna uh Pasian tungah ko tawntung un. Khrih Jesuh tawh kipawlin na nuntakna sung uhah hih bangzia-in na om ding uh Pasian in a hong deih ahi hi. Kha Siangtho nasepna dongtangsak kei unla, thuhilhnate simmawhbawl kei un. Thu khempeuh entel pha unla, a hoihte kemin, a sia lamsang peuhmah pelh un. Nopsakna a hong pia Pasian in na khempeuhah sianthona le kicinna hong pia hen la, na kha uh, na nuntakna uh, le na pumpi uh hoihtakin hong kem hen la, i Topa Jesuh Khrih hong pai ciangin mawhna khat zong a nei het lo dingin hong bawl tahen. Note a hong sam i Pa Pasian a thutak hi a, a thuciamte khempeuh hong tungsak taktak ding hi. Sanggamte aw, kote a’ ding thu hong ngetsak un. Thu uppih mi khempeuh khatlekhat a siangtho ki-itna lungsim tawh kinamin na kihopih un. Thu um mi khempeuh’ zak dingin hih lai na sim nadingun Topa’ min tawh ka hong thum hi. I Topa Jesuh Khrih hehpihna thupha note tungah hong tung tahen. Keimah Paul, le Silas, le Timoti-te in: Pasian le Topa Jesuh Khrih sungah a om, Thesalonika khua-a om pawlpi mite tungah lai ka hong khak uh hi. Pa Pasian le Topa Jesuh Khrih in note tungah dikna le nopsakna thupha hong tungsak tahen. Sanggamte aw, note’ upna nakpitakin khang a, note khatlekhat na ki-itna uh lian semsem ahih manin Pasian tungah lungdamna koh ding a kilawm ahih mah bangin, note hangin ama tungah lungdamna ka ko tawntung uh hi. Bawlsiatna le gimna na thuakna khempeuh uhah na upna uh khahsuah loin thuakzo paisuak na hih manun midangte kiangah Pasian’ pawlpi ka na kisialhpih uh hi. Tu-a na thuaknate uh hangin Pasian’ Ukna sungah a om dingin a kilawm mi suak na hih manun Pasian’ thukhenna a man ahihna hong kilangsak hi. Pasian in a manin na sem ding ahih manin note a hong gimsak mite tungah Pasian in gimna pia ding a, tu-a gimna a thuak note le kote tungah zong nopsakna hong pia ding hi. Vantung panin Topa Jesuh le a vanglian a vantung mite, meikuang tawh hong kilat ciangin, Pasian a thei lo mite, le i Topa Jesuh tawh kisai Lungdamna Thu a um lo mite tungah gimna a tungsak ding hi. Tua ahih manin ama hong sapna tawh a kilawm a kituak nuntakna na nuntak theih nading uh le ama vangliatna tawh a hoih na hihnop khempeuh uh hihzo-in, na upna uh hangin na khempeuh na zawhtheihna dingun Pasian kiangah thu ka hong ngetsak tawntung uh hi. Tua hileh, eite’ Pa Pasian le Topa Jesuh Khrih hong hehpihna hangin note in ama tung panin minthanna ngahin, ama min zong a thangsak na hi ding uh hi. Sanggamte aw, i Topa Jesuh Khrih hong pai nading thu le amah a dawn dingin eite i kikhop nading thu tawh kisai-in note kiangah kong thum nopna uh panin: Topa’ hong pai ding ni hong tung khinta hi, ci-a thu kigenna hangin lunghimawhin lungmangin om kei un. Thuhilh khat peuhpeuh in hih bang thu hong genkha thei ding a, tua thu pen kote’ gen leh gelh hi, ci-in zong genkha ding uh hi. Ahi zongin kuama khemsa-in ta kei un. Bang hang hiam cih leh nakpitakin Pasian langpanna lianpi le hell khuksung a tung ding ahi A Gilopa hong kilat matengin tua Ni hong tung lo ding hi. Tua A Gilopa in mite’ biak pasian a kici khempeuh le na khempeuh nialgawp ding hi. Tuate khempeuh sangin a lianzaw-in a kingaihsut banah, Pasian ka hi hi, ci-in Pasian’ biakinn sung mahmahah pai-in va tu ding hi. Note tawh ka hong omkhawm lai-in hih thute khempeuh hong genkhin ka hih manin na phawk lai ding uh hi. Ahi zongin tu laitakin tua bang a pian loh nadingin a kham khat om ahihna thu na thei uh hi. A hun a tun ciangin A Gilopa hong kilang ding hi. Kuamah kim in a phawk loh Gitloh Gamtatna kigamta khinta a, ahi zongin hih thu a pian ding a khamcip pa a kilakkhiat khit matengin a hong piang ding thu hong piang nai lo ding hi. A khamcip pa a kilakkhiat khit ciangin A Gilopa hong kilang ding a, Topa Jesuh hong pai ciangin tua A Gilopa mutlum ding a, vanglian minthangin hong kilatna tawh a maimangsak ding hi. Satan’ vangliatna tawh A Gilopa hong pai-in, lim le nalamdang a tuamtuamte hong bawl ding a, gitloh khemna a nam tuamtuam zangin, siatna a thuak ding mite a khem ding hi. Tua bang mite in a suahtak nadingun thuman sang nuam lo, deih lo uh ahih manin siatna a tuak uh ahi hi. Tua ahih manin Pasian in amaute lakah nasem dingin zuau thahatna paisak ahih manin amaute in a man lo thu um uh hi. Tua ahih manin thuman um loin, mawhna sungah nuam a sa khempeuh in mawhsak thukhenna thuak ding uh hi. Ahi zongin sanggamte aw, Topa in note hong it a, Kha Siangtho vangliatna hang le note in thuman na upna uh hangin ama mi siangthote na suah nadingun nopsakna a ngah masa dingin Pasian in note hong teel ahih manin note hangin Pasian tungah lungdamna ka ko tawntung uh hi. Topa Jesuh Khrih tawh minthanna na ngahkhawm theih nadingun note tungah ka hong hilh uh Lungdamna Thu tawh hih nopsakna ah Pasian in note a hong sam ahi hi. Tua ahih ciangin sanggamte aw, kam tawh ahi a, lai tawh ahi zongin ka hong hilh uh thumante limtakin zui unla, kiptakin om un. I Topa Jesuh Khrih mahmah leh, eite hong itin, a hong hehpihna tawh thakhauhna le lametna a hong pia tawntung eite’ Pa Pasian in note lungsimah thakhauhna hong guan hen la, a hoih thu khempeuh genin a semzo dingin na tha uh hong hatsak tahen. Sanggamte aw, tu-in note lak mah bangin mun dangah zong Topa’ thu manlang takin kizel pakin lungdam takin a kisan’ theih nadingin kote a’ ding thu hong ngetsak un. Mi khempeuh in thu um nai lo uh ahih manin a gilo a siahuai mite panin Pasian in kote hong hotkhiat nadingin zong hong ngetsak un. Note ahihleh, Topa citak mahmah ahih manin hong thahatsak ding a, A Gilopa kiang panin hong honkhia ding hi. Note kiangah ka hong gen uh thute a kipat cil a kipanin na zuih uh mah bangin zui paisuak taktak ding, ci-in note muanna lungsim kote sungah Topa in hong guan hi. Pasian bangin itna nei-in Khrih thuak bangin na thuakzawh nadingun Topa in note lungsim hong bawlsak tahen. Sanggamte aw, i Topa Jesuh Khrih min tawh kong sawlnop uh thu panin: Note tungah ka hong hilhsa uh thute a zui lo, a thadah gamtat thu uppih mite tawh na kikhawl kei un. Kote’ gamtatzia bangin a gamta ding na hihna uh teltakin na thei uh hi. Note tawh ka hong omkhawm lai-un ka thadah om kei uh hi. Kuama an a khongin ka ne kei uh hi. Note khat peuhpeuh in nong suplawhkhak loh nadingun a sun a zanin hahkat takin na ka sem uh hi. Hih bangin ka gamtatna uh pen note’ hong piakte a khongin ne-in a zang dingin a kilawm mah hinapi-in, note’ etteh ding gamtatzia a hong lak ka hizaw uh hi. Note tawh ka hong omkhawm lai-un, “Na a sem nuam lo mi peuhmah an nesak kei un,” ci-in ka hong gen uh hi. Hih bangin thu ka hong genna uh pen note lakah mi pawlkhatte thadahin na sem nuam lo uh a, midangte’ nasepna va nawngkaisak zawsop hi, ci-in ka zakna hang uh ahi hi. Tu-in tua bang mite in kuamah nawngkaisak nawn loin man manin na sem hiathiatin amau’ nuntak nadingun na a sep nadingun Topa Jesuh Khrih min tawh hanthawnin thu ka hong pia uh hi. Sanggamte aw, note in a hoihin gamtat ding na cimtak ngei het kei ta un. Hih lai sunga ka hong gente uh a zui nuam lo mi khatpeuh a om leh tua mipa limtakin ciamteh unla, amah a maizum theih nadingin kikholhpih nawn kei un. Ahi zongin amah galbawl kei unla, thu uppih mi khat hihna tawh hilhbawl zaw un. Eite tungah nopsakna a hong pia thei Topa in note tungah a tawntungin nopsakna hong pia hen la, amah in note khempeuh hong ompih tahen. Keimah Paul in kong hopih hi, cihna kammal teng keima khut tawh ka hong gelh ahi hi. Keima laikhak khempeuh hih bangzia-in ciamtehin ka hih ngeina ahi hi. I Topa Jesuh Khrih hong hehpihna thupha note khempeuh tungah hong tung tahen. Eite a hong Hon Pasian le eite’ lamet Khrih Jesuh’ thupiakna tawh Khrih Jesuh’ sawltak ahi keimah Paul in, Thu upna sungah ka tapa taktak ahi Timoti tungah lai ka hong khak hi. Pa Pasian le eite’ Topa Khrih Jesuh in dikna, hehpihna le nopsakna thupha, nangma tungah hong tungsak tahen. Masedonia gam lam manawhin ka pai lai-in Efesa khua-ah na om ding ka hong sawl mah bangin tu-in zong tua khua mahah na omlai inla, thu upna man lo a hilh mite, a thuhilh a khawl nadingun thu na pia in. Phuahtawm tangthute le min tampipi kizom deudau-a khangsimnate in upna tawh i ngahtheih Pasian’ vaihawmnate tangtungsak loin, khatlekhat kitotna piangsak lel ahih manin, tua bang thute a manlahpih loh nadingun na gen in. Hih bangin thupiakna pen, upna taktak le kisuanna om hetloin lungsim siangtho taktak tawh ngaihsutna panin a hong piangkhia ki-itna a khantheih nading deihna ahi hi. Mi pawlkhatte, hih bang ngaihsutna panin peukhia-in bangmahin a kimang lo thu kikupna tawh nitum uh hi. Thei kisa ngelin a gen kankan uh thute le amau kampauna mahmah zong bang gen ka hi hiam cih a thei het lo hinapi-in amaute pen Pasian’ thukhamte a hilh dingin utzaw lai uh hi. Thukham pen a kizat nading a kilawm ciang ah zangthei lehang a hoih thu khat hi, ci-in i thei hi. Ahi zongin i phawk dingah, mi hoihte a dingin thukham a kibawl hi lo a, thukham zui lote, thumang lote, Pasian’ deih bangin a gamta lote le mawhneite, biakna lungsim a nei lote le kam kilawm lo a paute, nute pate a thatte, midang a thatte, nulepa mawhna a gamtate, palepa mawhna a bawlte, mi a gute, zuauthu a gente, mite’ siat nading thu a gente, le thuman tawh a kilehbulhin a gamta mite a dingin thukham a kibawl ahi hi. Thuman ka cih pen thupha tawh kidimin a minthang Pasian in ka hilh dingin kei tungah a hong piak Lungdamna Thu ahi hi. Hih bangin na sepzawh nadingin thatang hatna a hong pia i Topa Khrih Jesuh tungah ka lungdam hi. Ama nasem dingin kei hong muangin hong seh ahih manin ka nuam hi. A beisa hunah amah gensia-in, simmawh bawlin, ama mite a bawlsia pa ka hih ngei tei hangin ama thu ka up nai loh manin theih lohna tawh a gamta ka hih manin Pasian in kei hong hehpih hi. Pasian in genzawh lohin kei hong hehpih a, Khrih Jesuh tawh kipawlna hangin i ngahtheih upna le itna a hong guan hi. Khrih Jesuh, mawhneite a honkhia dingin leitungah hong pai hi, cihna thu a man hi a, a uphuai a sanhuai thu ahi hi. Keimah zong tua mawhnei mite lakah a mawhpha bel ka hi hi. A mawhnei pha bel ka hihna thu hang mahin, nidang ciangin amah umin nuntak tawntungna a ngah ding mite’ etteh theih dingin Khrih Jesuh in a lungduaina cingtakin kei tungah hong lahtheih nadingin Pasian in kei a hong hehpih ahi hi. Amah bek Pasian ahi, a kimu thei lo, a si ngei lo, tawntung Kumpipa in minthanna le pahtawina ngah tawntung tahen. Amen. Ka ta Timoti aw, tanglai pek a kipanin nang bang mite a dingin a kigensa thu tawh kizui-in nang tungah a thu ka hong ap hi. Hoihtakin gal na dozawh nadingin galhiamin tua thute zang inla, na upna le lungsim kisuang loin na omna thu kiptakin len paisuak in. Mi pawlkhatte in a lungsim kitheihna uhah man a kisakna bangun gamta lo uh ahih manin a thu upna uh a mawkna a suah uh hi. Tua bang mite lakah Hymenaias le Alexander kihel uh a, Pasian gensiat nawn loh nading thu a phawktheih nadingun Satan’ khut sungah amaute ka ap hi. A masa penin kong gennop thu in: Mi khempeuh a dingin Pasian tungah ngetna, thungetna, thumna le lungdamkohna na neih ding uh ahi hi. Eite nuamtakin omthei-in, biakna lungsim nei-in a kilawm takin i nuntak theih nadingin kumpite le uliante a dingin thu na ngetsak un. Hih bang gamtatnate pen eite hong Hon Pasian’ muhna-ah a hoih a kilawm thu ahi hi. Mi khempeuh in hotkhiatna ngahin, thuman a theihkim ding Pasian in deih hi. Bang hang hiam cih leh Pasian khat bek om a, Pasian le mite a hong kilemsakkik thei Khrih Jesuh khat bek om hi. Mi khempeuh a tankhia dingin tua Jesuh hong kipiatawm a, a hun lian laitakin a hong kipiakna pen Pasian in mi khempeuh a hotkhiat nopna thu a kilatna ahi hi. Hih ka gen thu pen zuau ahi lo, thu taktak a gen ka hi a, Gentail mite lakah upna thu le hih thuman a gen dingin sawltak na semin thu a hilh dingin kei a hong kisawl ahi hi. Mun khempeuhah a om pasal khempeuh in kuamah tawh kitotna le lungsim kinopmawhna nei hetloin, lungsim siangtho tawh a khut uh lamin thu a nget ding uh ka deih hi. Tua mah bangin numeite zong a kilawm a kituak bekin kizemin kipuahin, sam khawng a uanglua-in bawl loin, a khengvalin kizepna a tuamtuamte zang loin, biakna lungsim neite a dingin a kilawm ahih mah bangin gamtat hoih a neih ding uh ka deih hi. Numeite in gamdai takin kiniamkhiatna tawh thu ngai-in a sin ding uh ahi hi. Numeite in pasalte tungah aana nei-in thu a hilh ding ka phalkei hi. Gamdai takin a om ding uh ahi hi. Bang hang hiam cih leh a masa-in Adam kipiangsak a, tua ciangin Eve kipiangsak pan hi. Adam in khemna thuak masa lo a, numei in thuakin a khial masa a suak hi. Ahi zongin numei in a kilawm a kituakin upna, itna le sianthona thu-ah kiptakin a om nakleh nausuah gimna sihpih lo ding hi. Mi khatpeuh, pawlpi sia nasep a ut leh a hoih mahmah ahi hi, a cihna thu a man ahi hi. Tua ahih manin siate pen paubaanna a nei lo mi, zi khat bek a nei mi, lungsim hoih hithiat mi, thu a ngaihsun thei mi, a kilawm a kituakin a gamta mi, zin le leengla do a siam mi, thuhilh a siam mi, zu a kham lo mi, a ngongtat lo mi, lungsimnem mi, kitot a uk lo mi, sum a deihlua lo mite hi ding uh hi. A innkuan sung hoihtakin a ukzo mi, a tate thumangsak thei-in, na khempeuhah a kilawm a kituakin a gamtasak thei mi hi ding uh hi. Bang hang hiam cih leh mi khatpeuh in a innkuan sung ukzia ding a theih kei leh Pasian’ pawlpi kem thei lo ding hi. Khristian a suaktungte zong hi lo ding hi. Tua bang mi thakte kiphasak thei a, Dawimangpa mah bangin thukhenna a thuak mite hikha thei ding hi. Pawlpi mi ahi lo midangte in zong a zahtak mite hi ding hi. Tua hileh mindai kha lo ding a, Dawimangpa’ thangah awk kha lo zawdeuh ding hi. Pawlpi upa dingte zong a gamtat hoih, a lungsim citak, leenggahzu tam a ne lo, sum thu-ah a huaiham mi hi lo ding uh hi. Lungsim kisuanna a om lo, upna thu-ah a kip mite hi ding uh hi. A masa-in kize-et phot ding a, paubaanna a om kei leh sem thei pan ding uh hi. A zite uh zong a gamtat hoih mi hi-in, mi gensiat a hat lote hi ding uh a, lungsim citak, thu khempeuhah a thuman mi hi ding uh hi. Upate pen zi khat bek a nei mi, a tate le a innkuansung hoihtakin a ukzote hi ding hi. Pawlpi upa hoihtakin a semthei mite pen mite in zahtak uh a, Khrih Jesuh a upna thu uh kisuanna om hetloin hangtakin gen ngam uh hi. Nang kiangah hong pai-in nang tawh kimu baih ding cih lametna tawh hih lai a hong gelh ka hi hi. Ahi zongin ka hong zekai khak zenzen leh thuman thutak khuampi le bulpi, a nungta Pasian’ pawlpi ahi Pasian’ innkuan sungah bangci gamtat ding cih na theih nadingin hih ka hong laikhak in lam hong lak ding hi. I biakna pen a thuthuk a thulian taktak ahihna thu hih bangin i thei hi: Mihing lim pua-in amah hong kilang a, a man taktak ahihna thu Kha Siangtho in kilangsak a, vantung mite in a mu uh hi. Mi khempeuh tungah ama thu kihilh a, mun khempeuhah ama thu ki-umin, vantungah amah kilato hi. Nidang ciangin a upna panun mi pawlkhat pialin, zuauthu gente le dawi thu a kigente a zuih nading uh Kha Siangtho in teltakin a gen hi. Tua bang zuau thuhilhnate pen zuau genin mi a khem, sik emsa tawh tatgawp bangin a lungsim un a hoih le a hoih lo a khenthei nawn lote’ kam panin hong gingkhia ding hi. Tua bang mite in zi neih le pasal neih ding le an pawlkhat nek ding hoih lo hi, ci uh hi. Ahi zongin thu umin, thuman thutak a thei mite in lungdamna ko-in a nek dingin Pasian in tua ante a bawl ahi hi. Pasian’ bawlsa na khempeuh a hoih hi a, nial loin, lungdamna pulakin san ding ahi hi. Pasian’ thu le thungetna hang tawh tuate a hoih a suak ahi hi. Nang in na zuihsa upna thu le thuhilhna man na zuih kawmin hih ka hong thugente, i sanggamte kiangah na gen nakleh Khrih Jesuh’ nasem a hoih khat na hi ding hi. Pasian’ thu tawh a kituak lo, a haihuai tangthu phuahtawmte ngaihsutin na nei vet kei in. Pasian’ deihna tawh a kituakin na nuntak zawh nadingin na kisin in. Pumpi kisekin kisinna manpha hi. Ahi zongin kha thu-ah kisekin kisinna pen tuhun laitak le a hong tung ding hunah nuntakna hong piathei ahih manin manphazaw lai hi, ci-a kigen pen a man taktak thu hi a, umin sin dingin a kilawm thu ahi hi. A diakdiakin ei thu umte in mi khempeuh a Honkhia, a nungta Pasian muangin lamen ihih manin nakpitakin hanciamin na a sem ihi hi. Ka hong gensa thute na hilhsawn in. Khangno lai na hihna thu hangin mite’ simmawh dingin na om kei inla, kampauna, gamtatna, itna, upna, le sianthona-ah thu um mite’ etteh dingin na om in. Kei ka hong pai matengin mipi mai-ah Lai Siangtho simna, a khiatna genna, le hanthotnate-ah tavuan na la in. Kamsangte’ thugennate le upate in na tungah a khut uh nga-in thu hong ngetsakna ahi nangma hihtheih siamnate na valkhongsak kei in. Mi khempeuh in na khantohna hong muhtheih nadingin hih thute limtakin ngaihsun inla, hahkatin na sem in. Na gamtatna le na thuhilhnate-ah hoihtakin kidawmin om lecin nangmah a kipan na thugen a za mite a dingin phattuamna om ding ahih manin na nasepna-ah hoihtakin om in. Nang sangin a uzaw mite taiibawl kei inla, na pa bangin ngaihsunin hanthawn in. Nang sangin a nauzawte na nau bangin bawl in. Nang sangin a uzaw numeite na nu bangin bawl inla, nang sangin a nauzaw numeite, lungsim siangtho tak tawh na nau numei bangin bawl in. Meigong taktak ahi numeite zahtakbawl in. Meigong numei khatpeuh in tate ahi a, tute ahi zongin a neih leh innkuan sungah biakna tawh kisai-in tavuan a neihna uh hilh inla, a nu a pa, a pu a pite a huh nadingun gen in. Hih bang gamtatna pen Pasian’ muhna-ah a hoih thu ahi hi. A kem a khoi ding a om lo meigong taktak ahi numeite in Pasian bek mah muan le suanin nei-in, a sun a zanin Pasian’ huh ding deihin thu ngen tawntung uh hi. Ahi zongin a pumpi uh deihna zui-in a gamta meigong numeite pen a pumpi uh a nuntak hangin kha thu-ah a sikhin ahi uh hi. Amaute paubaanna a om loh nadingin hih ka hong thupiaksate amaute tungah gensawn in. Mi khatpeuh in a beh a phung, a diakdiakin a innkuansung mite a vak nop kei leh a upna a nusia hita a, thu um lo mite sangin siazaw lai hi. Meigong numei khat peuhpeuh a khan kum sawmguk a cingsate, le pasal khatvei bek a nei ngeite bek, meigong sazian sungah koih in. Tua banah a gamtat hoihna a kitheite, a tate hoihtakin a khansuahsate, a inn-ah zin le leengla do a siam mite, kiniamkhiatin Pasian’ mite’ khe a silsakte, a lungkham mite a huhte, le thu khempeuhah a hoih gamtat mite hi lai ding uh hi. A khangno lai meigong numeite, sazian sungah hel kei in. A pumpi uh deihna zui-in pasal a neihkik nop uh ciangin Khrih taisan uh ahih manin, a thuciam masak uh palsat uh ahih manin a mawh a suak uh hi. Tua bek zong hi loin, bangmah sem loin inn khat pan inn khatah vak kawikawi-in a hun uh mawk beisak uh a, a vakmawk uh tawh maisak loin mi gensia kawikawi-in midangte va nawngkaisak uh a, a gen lohpi ding teng uh genin va nei uh hi. Tua ahih manin, i langte’ hong gensiat nading a om loh nadingin, a khangno lai meigong numeite in pasal nei-in, ta nei-in, amau innkuansung ukin a om ding uh ka deihzaw hi. Bang hang hiam cih leh meigong numei pawlkhat, Satan’ nung a zui dingin kipan khinta uh hi. Thu um innkuan sungah meigong numei a nei a om leh pawlpite in a kisam meigong taktakte a huhtheih nadingin pawlpi tungah tavuan hong guan kei hen la, amau’ meigong numeite na huh ta uh hen. Pawlpi sungah ukna le makaihna siamin, thuhilh le thugen hahkat tawh a thuah upate pen thaman a zah nih piak dingin kilawm hi. Bang hang hiam cih leh Lai Siangtho in, “Buh a cil bawngtal muk na tuam kei in,” a cih banah, “Nasempa in a thaman a ngah ding a kilawm ahi hi,” na ci hi. Upa khat peuhpeuh a mawhsak mi nih le thum a om kei buang leh thu-in na sim kei in. A khial takpi upa a om leh upa dangte a lautheih nadingin a lawmte mai-ah tua a khial pa taii-in thuhilh in. Hih ka hong gen thute na zatna-ah kuamah guptuam paihtuam nei hetloin hoihtakin hong mangin na zat nadingin Pasian, Khrih Jesuh, le a siangtho vantung mite’ muhna-ah limtakin a hong gen ka hi hi. Topa’ na a sem dingin kipsakna-in khut nga-in thungetna pen kuama tungah zang mengmeng kei in. Midang a khialte tawh khialkhawm kha kei inla, siangtho takin na omtheih nadingin limtakin kikem in. Na gil sung natna le na nat mun zelzelna hangin tui bek zang nawn loin leenggahzu tawmtawm na zang in. Mi pawlkhatte’ khialhnate kimu pahpahin mawhsakna thuakpah uh a, pawlkhatte’ khialhna pen damdamin hong kinung theih hi. Tua mah bangin gamtat hoihnate zong kilangin, kimu-in, a kithei pah kei zongin ki-imcip suak thei lo hi. Kuamah in Pasian’ min le i thuhilhnate hong gensiatsak lohna dingin sila khempeuh in a tote uh zahtakbawl ta uh hen. Thu um mi to-in a nei silate in upna sungah sanggam khat hi hang, ci-in ngaihsutna tawh a tote uh zahtakbawl loin omkha kei uh hen. Amaute’ nasepna hangin hamphatna a ngah mite pen thu um mi le a it uh mite ahih manin a hoihzaw-in a sepsak ding uh a kilawmzaw ahi hi. Tu-a ka hong gen ding thute mi khempeuh tungah hilhin gen in. Topa Jesuh Khrih thu tawh a kituak lo, i biakna paizia tawh a kilehngatin thu tuamdang a hilh mite pen, a kiphasak mawkmawk hi uh a, bangmah a thei het lo ahi uh hi. Tua bang mite in thu kisel thu kinial cihte ut belin nei uh a, hazatna, lungsim kituah lohna, kizahkona, a sia lamin ki-upmawhnate piangsak uh a, thuman thutak zui loin, a lungsim paizia uh a man nawn lo, biakna pen hauhtheih nading lampi bekin a ngaihsun mite in a tawntungin kitot kiselna a piangsak uh ahi hi. Pasian biakna hangin a neihsateng tawh a lungkim mite pen biakna in mihau a suaksak takpi mah ahi hi. A taktakin ci lehang, leitungah mihingin i suah laitakin sumlepai tawh i suak kei a, i sih ciangin zong leitung panin bangmah i keng thei tuan kei hi. Tua ahih manin annek tuidawn, nikten puansilh i neih nakleh a phazo ahi hi. Ahi zongin a haunuam mite in ze-etna a tuamtuam thuak a, duhhopna, huaihamna a haivai thute-ah awkcipin, haksatna le siatna a tuahlawh uh hi. Sum deihluatna in siatna namkim piangsak hi. Mi pawlkhat in sum deihlua liang uh ahih manin a upna panun pialkhia-in gimna lungkhamna tampi a thuaklawh uh hi. Ahi zongin Pasian’ mi ahi nangmah in tua thute khempeuh pelh inla, thuman thutak, Pasian’ deih bangin nuntakna, upna, itna, kipna, le lungnemna na neihzawh nadingin hanciam in. Upna thu-ah hoihtakin nawksuak inla, mi tampi’ zakin na pulaksa, Pasian in nangmah a hong piak nuntak tawntungna lenkip in. Na khempeuh tungah nuntakna a pia Pasian, le Pontias Pilat mai-ah hangtakin thu a gen ngam Khrih Jesuh’ mai-ah nang ka hong thupiakna in: I Topa Jesuh hong kilatkik Ni dongin paubaanna le mawhsakna om hetloin nang hong kipia thute na zui in. Kumpite’ Kumpi, topate’ Topa, thupha ngahin amah bek a lianpen ahi Pasian in hun a sak khatpeuh ciangin Jesuh hong kilangsakkik ding hi. Tua i Pasian bek mah a si thei lo hi a, khuavak pha mahmah sungah om ahih manin kuamah in a kiang neh thei lo hi. Kuamah in amah mu ngei lo a, zong mu thei lo hi. A tawntungin amah kipahtawi hen la, vanglian tawntung tahen. Amen. Tuhuna a hau mite kisatheikha loin, a kip lo hauhnate muan le suanin neikha loin, eite in nuamtakin i zat theih dingin citna tawh a hong pia Pasian a muan a suan nadingun na hilh in. A hoih nate semin, gamtat pha-in, citna lungsim nei-in midangte a hopnop nadingun na hilh in. Tua hileh mai lamah amaute’ nuntak nading bulpi taktak ahi neihsate, amau a dingin a khol mite ahi ding uh hi. Timoti aw, nang tungah a hong kipia thute hoihtakin na zui in. Mi pawlkhatte in, “Thu theihna,” ci-in a ngaihsutkhak uh, Pasian’ thu tawh a kituak lo, thu kihai selnate na pelh in. Mi pawlkhatte in tua bang pilna a nei-in kingaihsun uh a, upna thu bulpi khahsuahna-in a nei uh hi. Note khempeuh tungah Pasian’ dikna thupha hong tung tahen. Khrih Jesuh tawh i kipawlna hangin hong kipia ding nuntakna thu a gen dingin Pasian’ deihna tawh Khrih Jesuh’ sawltak nasep a sem dingin a hong kisawl keimah Paul in Ka it ka ta Timoti tungah lai ka hong khak hi. Pa Pasian le i Topa Khrih Jesuh in dikna, hehpihna, le nopsakna thupha nang tungah hong tungsak tahen. A sun a zanin ka thungetna-ah nang ka hong phawk tawntung a, ka pu ka pate’ sep mah bangin kisuanna lungsim om hetloin a na ka sep Pasian tungah ka lungdamna ka ko hi. Na khitui luannate phawk ka hih manin ka lung a dam theih nadingin nang tawh kimu nuamin a sun a zanin ka ngaihsun tawntung hi. Na pi Lois le na nu Eunis in a neih upna bangte pawl mah, lungsim takpi tawh na upna thu ka phawk a, tu-in zong nang sungah tua bang upna om hi, ci-in ka ngaihsun hi. Tua ahih manin nang tungah ka khut nga-in thu ka hong ngetsak lai-in nangma tungah Pasian in hong piak siamna na sosuah nadingin ka hong phawksak hi. Bang hang hiam cih leh Pasian in eite tungah meidawina lungsim hong guan lo a, thahatna, ki-itna, pumpi ki-ukzawhna lungsim hong guan hizaw hi. Tua ahih manin i Topa’ thu gen nading thu-ah ahi a, ama thu hangin thong a kia keima thu-ah ahi zongin maizum het kei in. Pasian in nangma tungah thahatna hong pia ahih mah bangin Lungdamna Thu hangin thuakna-ah zong a thuaknuam hizaw in. Eite’ sepzawhna hang hi loin ama ngimnasa bang leh a dikna hangin Pasian in eite hong honkhia-in ama mi dingin a hong sam hi. Pasian in leitung a pianma pekin Khrih Jesuh tungtawnin tua dikna a hong piak hi a, tuhun ciangin eite hong Honpa Khrih Jesuh tungtawnin a dikna hong langsak ta hi. Tua Jesuh in sihna beisak a, lungdamna thu hangin sih nawn lohna thu a hong kilangsak hi. Hih a thak Lungdamna Thu hilhin a taangko ding le sawltak na a sem dingin kei a hong kikoih ahi hi. Tua ahih manin hih bangteng a thuak ka hi hi. Ahi zongin ka up pa ka thei a, ama tungah ka apte tua Ni dong hong kepsakzo ding hi, ci-in thei ka hih manin ka maizum het kei hi. Keima tung panin na zaksa a man thute zui inla, Khrih Jesuh tawh i kipawlna hangin i ngah upna le itna thu-ah kiptakin om in. Eite sungah a hong teng Kha Siangtho in a hong ap thuhoihte limtakin kem in. Na theihsa bangin Asia gam sunga om mi khempeuh in kei hong nusia uh a, tuate lakah Figelas le Hermogenes-te zong kihel uh hi. Onesiforas in tamveipi kei hong lungnuamsak ahih manin Pasian in a innkuan bupun hehpihna thupha pia tahen. Ka thongkiatna hangin amah maizum lo a, Rom khua hong tun ciangin kei hong muh matengin hong zong pah hi. Topa in tua Ni ciangin ama tungah hehpihna thupha pia tahen. Efesa khua-ah ka omlai-in nakpitakin kei a hong huhnate khempeuh na theihsa ahi hi. Ka ta aw, nang na hih leh Khrih Jesuh tawh i kipawl manin i ngah hehpihna hangin thahatin om in. Mi tampite’ theihin ka thuhilh, na zaksa thu khempeuh, midangte a hilhsawn thei dingin a citak mite tungah hoihtakin a zuih dingun na hilh in. Khrih Jesuh’ galkap hoih hihna tawh thuak dingin a kisam khempeuh na na thuak in. Galkap a semlai mipa in ama tungah a om bupa a lungkimsak theih nadingin na sem ahih manin tualsung mite’ nasep tawh thuahkhawm lo hi. Kimawl kidemna-ah a kihel mi khatpeuh in kimawlna ngeina zui lopi-in gualzawh pahtawina ngah thei lo hi. Hahkat takin lo a khopa in anlak hun ciangin a tampen a ngah dingin a kilawm ahi hi. Topa in thu khempeuh na theih nadingin hong huh ding ahih manin hih ka thugente khempeuh limtakin na ngaihsun in. Lungdamna Thu ka hilhna sungah ka gen mah bangin David’ suan, sihna panin a kithosak Jesuh Khrih na na phawk in. Ama hangin a kingah Lungdamna Thu ka hilh manin gimna ka thuak a, mithat bangin sikkol hong kibulh hi. Pasian’ thu ahihleh sikkol kibulh thei lo hi. Tua ahih manin Pasian’ teel mite in zong Khrih Jesuh hangin hotkhiatna le tawntung minthanna a ngahkhawm theih nadingun amaute’ hangin na khempeuh ka thuak hi. Tua ahih manin, “Amah tawh i sihkhawm le amah tawh i nungta khawm ding hi. Eite in gimna i thuak paisuakzawh leh amah tawh i ukkhawm ding hi. Amah i nial leh amah in zong eite hong nial ding hi. Amah le amah kikhem thei lo ahih manin eite i citak kei zongin amah citak veve ding hi,” ci-in a kigenna thu man mahmah hi. Na mite thu kinialin a kitot loh nadingun Pasian’ mai-ah thupi takin na hilhkhol in. Tua bang thu kinialna in a za mite phattuamna ngahsak loin a siasak bek ahi hi. Pasian’ thuman a mantakin hilhin, na nasepna-ah maizumna thuak loin, Pasian’ pahtakna na ngahtheih nadingin na siam tawpin hanciam in. Pasian tawh mite a kigamlasak semsem thei thu ginalo, a haihuai thu kikup thu kiselnate na pelh in. Tua bangin amau’ thugennate in mite siasak a, tua banga thugente lakah Hymenaias le Filetas a kihel uh hi. Thuman lampi panin amaute pialkhin uh a, thawhkikna thu pen a beisa thu hi ta hi, ci-in thu um mi pawlkhat lungmangsak uh hi. Ahi zongin Pasian in a phuhsa sutpi kilokzo ngei lo ding hi. Tua sutpi tungah, “Topa in ama mi kua teng hiam cih thei hi,” cihna le, “Topa tawh kipawl ing, a ci peuhmah in mawhna sukhalo ding hi,” cihna kigelh hi. Inn lian khat peuhpeuh sungah umlebeel a nam tuamtuam a om hi. Pawlkhatte ngun tawh kibawl a, pawlkhatte kham tawh kibawl a, pawlkhatte sing tawh, pawlkhatte tungman tawh kibawl hi. Pawlkhatte a thupi diakin zattheih ding, pawlkhatte nisimin a mawkmawkin zattheih ding ahi hi. Mi khatpeuh a hoih lo na khempeuh panin kikemin a siangtho takin a om nakleh na hoih nam khempeuh a sem dingin a Topa tungah ki-apin, a Topa tungah a manpha suak ahih manin a thupi diakte-ah amah kizang ding hi. Tua ahih manin khangno lunggulhna hoih lote pelh inla, lungsim takpi tawh Topa tungah huhna a ngen mite tawh thuman thutak, upna, itna, kilemna na neihtheih nadingun hanciam khawm un. Thu kihai seelna, thei lo pi-a thu kinialnate na pelh in. Tua bangte in kitotna a piansak lamtak na theihsa ahi hi. Topa’ na a sem mite, kitot a hatte hi lo ding a, mi khempeuh tungah lungsim nemin, thugen siamin, thuakzawhna nei-in, thunem tawh a langte’ hoih lohna a puahtheite hi ding hi. Tua bang hileh Pasian in amaute kisiksak thei ding a, thuman thutak hong thei-in, Dawimangpa in ama deihna bangin a gamta dingin a mat khit hangin ama thang panin amaute suakta khathei ding uh hi. Nitawp ni hun pen a lauhuai hun ahih ding lamtak phawk in. Tuahun ciangin mite in amau angsung ding bek ngaihsunin, huaihamin, kisialin, kihisakin, mi zahko-in, nu le pate’ thu mang loin, lungdam theihna mel nei loin, biakna lungsim nei loin, mi khual loin, hehpihna nei loin, mi gensia-in, ngongtatin, kihtakhuai-in, thuhoih deih loin, ciampelin, thu khual loin, kiphasak gawpin, Pasian don loin pumpi nopsakna bek deihin, biakna thu a puathamteng zui napi-in biakna hangin vangliatna thu a omte deih lo ding uh hi. Tua bangin a gamta mite na pelh in. Tua bang mite pawlkhat, mite inn-ah va hawh khiankhianin, deihna nam tuamtuam le mawhna lungsim tawh a kidim numeite na thuzawh uh hi. Tua bang numeite in thu a zakzak uh hangin a man le a man lo khen thei lo uh ahih manin thuman thutak thei zo lo uh hi. Jannes le Jambres-te in Moses thu a nial mah bangin upna paizia a man lo hih thuhilh mite in zong thuman thutak a nial uh hi. Ahi zongin Jannes le Jambres-te tungah a piangsa thu mah bangin mi khempeuh in amaute’ haina mu ding uh ahih manin a nasepna uh sau tung khollo ding hi. Ahi zongin nangmah in ahihleh ka thuhilhna, ka gamtatna, le ka nuntakna-ah ka ngim ka tup thute na hong zui hi. Ka upna, ka lungduaina, itna ka neihna, ka lungkipna, bawlsiatna ka thuakna, gimna ka thuakna, le Antiok, Ikonium, le Lystra khuate-ah kei tunga thupiang, nasia takin bawlsiatna ka thuaknate na theih na phawksa ahi hi. Ahi zongin Topa in hih haksatnate khempeuh panin kei hong suaktasak hi. Khrih Jesuh tawh kipawlin Pasian’ deihna bangin a nungta nuam khempeuh in bawlsiatna a thuak ding mah hi a, migilote le thuthei kineihin mi khem theite zong siattat semsemin, amaute in mi khemkhemin, amaute mah in zong khemna a thuak ding mah uh ahi hi. Ahi zongin nang na hih leh na theihsa na upsa thute ah kip paisuak in. Nang tungah thu hong hilhte kua mi ahi hiam cih na theihsa hi a, Khrih Jesuh upna hangin hotkhiatna a hong ngahsak thei ding pilna a hong pia Lai Siangtho pen na neutung a kipanin a theisa na hihna thu zong na theihsa thu mah ahi hi. Pasian’ mai, le a hingte hitaleh a site hitaleh mi khempeuh’ thu a khen ding Khrih Jesuh’ mai-ah nakpitakin ka hong hanthawn hi. Amah Kumpi-in hong paikikin ukna hong kipan ding ahih manin, hunhoih hunsia cih khen tuan loin Pasian’ thu hilh ding na kin ngaihsut nading, lungduaina tawh mite’ lungsim zo-in, mite taii-in, hanthawnin na hilh nadingin thu a hong pia ka hi hi. Mite in thuman a ngaih nop loh hun, amaute’ deihna bek a zuihnop hun, amaute’ zaknop thute bek a gen ding sia a cial thuahthuah hun hong tung ding hi. Amaute in thuman thutak ngainuam nawn loin tangthu phuahtawm peuh ngaihsutpi-in nei ding uh hi. Ahi zongin nang na hih leh thu khempeuhah na lungsim ki-ukin haksatnate na thuak inla, Pasian’ thugen nasep semin, na nasepna-ah maa na tun in. Kei ka hih leh Pasian biakna-in hong kipiak ding hun hong tungta hi. Hih leitung nuntakna ka nusiat ding hun hita hi. Kidemna-ah ka hat tawpin ka hih khin a, a mong dongin ka tai khin a, upna thu khotakin lenin ka zokhin hi. Thu a manin a khen Topa in tua Ni ciangin kei a hong piak ding thuman lukhu ahi gualzawhna thaman in tu-in kei hong ngak gige hi. Kei tung bekah a hong pia ding hi lo a, ama hong paikik ding itna tawh a ngakte khempeuh tungah zong a pia ding ahi hi. Kei kiangah na hong pai baih theih nadingin hong hanciam in. Demas in hih leitung thu kinzaw ahih manin kei hong nusia-in Thesalonika khua-ah a pai hi. Kresen, Galatia gamah pai a, Titus, Dalmatia gamah pai hi. Luka bek kei kiangah om hi. Marka in nasepna-ah nakpitakin hong huhthei ahih manin na hong pai ciangin amah hong tonpih in. Tikhikas ahihleh Efesa khua-ah ka paisak khin hi. Na hong pai ciangin Troas khua-ah Karpas kianga ka nusiat ka puantualpi hong pua inla, laibute zong, a diakdiakin savun laidalte tawh zong hong pua in. Sikseekpa Alexander in kei tungah siatna lianpi hong bawl hi. Ama gamtatna tawh kizui-in Topa in thuk ding hi. Amah in i thuhilhna nakpitakin nial ahih manin amah tawh kisai-ah nangma pumpi kidawm mahmah in. Keimah kihut nading thu ka gen masak ni-in kuamah in hong koppih loin hong taisanmang uh hi. Tua thu hangin mawhsakna thuak kei beek uh hen! Ahi zongin Topa in kei hong ompih a, Gentail mi khempeuh tungah Pasian’ thu a kicingin ka gentheih nadingin thahatna a hong pia hi. Tua ahih manin sih nading thukhenna pan hong suaktasak hi. Topa in siatna khempeuh panin kei hong honkhia ding a, ama vantung gamah muanhuai takin hong tunpih ding hi. Amah in a tawntungin minthanna ngah tahen. Amen. Prisilla, Aquila, le Onesiforas-te innkuan na hopihsak in. Erastas, Korin khua-ah omlai hi. Trofimas, Miletas khua-ah a cina-in ka nusia hi. Phalbi tunma-in nong pai theih nadingin hong hanciam in. Eubulas, Pudens, Linas, Klaudias, le i sanggam dangte khempeuh in zong hong hopih uh hi. Topa in nangmah hong ompih tahen. Note khempeuh tungah Pasian’ hehpihna thupha hong tung tahen. Thu upna-ah ka ta taktak ahi Titus tungah lai ka hong khak hi. Pa Pasian le eite hong Hon Khrih Jesuh in nangma tungah hehpihna le nopsakna thupha hong tungsak tahen. Krete Tuikulh gam sung tengah a manin puahphat ding a kisam lai a omte a sem ding le khua simah pawlpi upa a koih dingin tua gamah a hong nusia ka hi hi. Nang tungah ka hong gensa thute hoihtakin na phawk in: Upate pen paubaanna a om lote hi ding a, zi khat bek nei-in, a tate zong thu um mi hi-in, a thumang lo, a phengtat gawpte hi lo ding uh hi. Pawlpi siate pen Pasian’ nasem ahih manin paubaanna a om lo, a kiphasak lo, zukham thei mi ahi lo, a ngongtat lo, a huaiham lo, zinleleeng do a siam mi, thuhoih a deih mi, a pumpi a ki-ukzo mi, a thutang mi, a siangtho mi, le a kisekzo mi hi ding uh hi. Upna bulpi tawh a kituak thute limtakin lenkip ding uh hi. Tua hileh thuhilhna man tawh midangte hanthawn thei ding uh a, thuman a nial mite’ khialhna zong laktel thei ding uh hi. Bang hang hiam cih leh thu a mang lo, thu a mawk gengen, mi a khem thei, a diakdiakin Jew ngeina bangin vun-at nading thu a gen tampi tak a om uh hi. Sum ngahtheih nading bekin a kilawm lopi-in thu hilhin biakna innkuan buppi nawngkaisak uh ahih manin thu a gen nawn loh nadingun khaktan ding ahi hi. Amau Krete gam mite sung panin a kamsang uh khat in, “Krete gam mite a zuauthei tawntung, ganhing bangin a gilo, a thadah a uisan mi ahi uh hi,” na ci hi. Hih ama thugen a man mahmah ahi hi. Tua ahih manin thu upna man nei thei-in, Jew mite’ tangthu phuahtawmte ahi a, thuman a nial mite’ thupiaknate ahi zongin a don nawn loh nadingun khauhtakin taii-in na thuhilh in. Lungsim siangthote a dingin na khempeuh a siang hi a, ahi zongin thu um lote a lungsim ngaihsutnate uh siakhin ahih manin amaute a dingin a siang bangmah om lo hi. Pasian a thei-in a kigen uh hangin a gamtatnate uh tawh kilehbulh hi. Amaute a muhthadahhuai, a thumang lo, na hoih sem dingin a kilawmna a om lo mite ahi uh hi. Ahi zongin nangmah in upna man tawh a kituak thu na hilh in. Pasal khanghamte a kilawm a kituakin a omtheih nading, thu ngaihsun thei mi ahih nading, a kikemzo mite ahih theih nading, upna man a neihtheih nading, itna man a neihtheih nading uh le a manin lungkipin a thuakzawh nadingun na gen in. Tua mah bangin mite in Pasian’ thu a gensiatkhak loh nadingun numei khanghamte zong a gamtat a khuahek uh a zahtakhuai ahih nading, mi gensiate ahih loh nading, zunek kiphamawhte ahih loh nading, thuhoih thupha hilhin, amaute sangin a nauzaw nupite in a pasalte uh le a tate uh a it nadingun a hilh ding, thu ngaihsun thei, a gamtat siangtho, inn nasep a kizen, a migi, le a pasalte uh thu a mang thei mi ahih nadingun na gen in. Tua mah bangin khangnote zong amau pumpi a ki-ukzawh nadingun na hanthawn pha in. Nangma pumpi mahmah gamtat hoihna a kipan thu khempeuhah etteh hoih dingin na om in. Lungsim takpi tawh mite’ zahtaktheih dingin thu na hilh inla, mite’ mawhmat theih loh ding kamhoihte na zang in. Tua hileh i langte in hong gensiat theih nading mu loin a mai uh zum lel ding hi. Silate in zong a tote uh thu mangin, thu khempeuhah a tote uh a lungkimsak nading, a tote uh thu seelloin, a guktak loh nading, a tawntungin hoih gamtatin a cihtakna uh a kilatsak nadingun na hanthawn in. Tua hileh eite hong Hon Pasian’ thu a hoihna a kilangsakte ahi ding uh ahi hi. Bang hang hiam cih leh mi khempeuh in hotkhiatna a ngahtheih nadingun Pasian in ama hehpihna hong lak khinzo hi. I mawhna khempeuh panin hong honkhia ding le ama neihtuam i suahtheih nadingin Jesuh amahmah hong kipumpiak a, eite pen gamtat hoih gamtat ding a lawp mahmah ihi hi. Hih ka hong thugente hilh inla, mite taii-in na hanthot ciangin na aana neihteng khempeuh zang kawm in. Mite’ simmawhin om kei in. Na mite in hong uk kumpite le aana neite’ thu mangin, thuhoih khempeuh a sem dingin a kigingsa-in a om ding uh phawksak inla, kuamah gensia loin, mite tawh kilemin kikhawl thei-in, lungsim nemin, mi khempeuh tungah a dik nading uh na gen in. Bang hang hiam cih leh eite zong nidangin haitatin, thumang loin, vakvai-in, duhna deihna a tuamtuamte thuaklahin, thusia le enna lungsim tawh a gamtate, mite in hong mudahin, eite khatlekhat zong a kimudah ngeite ihi hi. Ahi zongin eite hong Honpa ahi Pasian’ itna le a migitna thu hong kilat ciangin, amah in eite hong honkhia hi. Eite in na hoih i sepzawhna hangin hong honkhia hi loin eite tungah suahtakna le nuntakna thak a hong pia Kha Siangtho in hong sawpsiangna hangin a hong hehpihna tawh a hong honkhia ahi hi. Pasian in eite hong Hon Jesuh Khrih hangin eite tungah a kicing takin Kha Siangtho hong pia ahih manin, ama hong hehpihna hangin Pasian tawh kilemin i lamet nuntak tawntungna a ngah thei ihi hi. Hih ka thugente a man mahmah ahi hi. Tua ahih manin Pasian’ thu a um mite in gamtat hoih a neihtheihna dingun hih ka hong thugente na lim ngaihsut ding ka deih hi. Ka hong thugente a hoih hi a, mite a dingin a manpha vive ahi hi. Ahi zongin a haihuai thu kiselna, min kigual deudau khangsimna, kitotna, thukham kitotlawhna cihte na pelh in. Tuate a kimanna a om lo, a mawkna thu hi lel hi. Kitot, kikhen nading a piangsak mite pen khatvei nihvei bang na hilh khit ciangin kisukha nawn vet kei in. Tua bang mite a kisiakhin hi a, a mawhna un a khialhna uh a kilangsak ahihna thu na thei in. Artemas ahi a, Tikhikas ahi zongin khat peuhpeuh nang kiangah ka hong paisak ciangin, Nikopolis khua-ah phalbi sung omsawm ka hih manin, kei omna tua khua-ah nong paitheih nadingin hong hanciam in. Sitni Zenas le Apollos-te a khualzinna uh manlang takin a paisuak theih nadingun na hihtheih bangin na huh inla, lamkalah kisapna bangmah a neihkhak loh nading uh zong na thei in. I mite ommawk loin, thu kisam a phamawhte huh thei-in, na hoih na phate a septheih nadingun na hilh in. Kei tawh a om mi khempeuh in nang hong hopih uh hi. Thu upna sungah ei hong itte khempeuh na na hopihsak in. Note khempeuh tungah Pasian’ hehpihna thupha hong tung tahen. Khrih Jesuh hangin thong a kia keimah Paul le i sanggampa Timoti in, Ka hong it uh, ka naseppih uh ahi Filemon, le na inn-ah a hong kikhawm pawlpite le i sanggamnu Apfia le thu upna-ah galkap khawmpih Arkhippas-te tungah lai ka hong khak uh hi. I Pa Pasian le Topa Jesuh Khrih in note tungah dikna le nopsakna thupha hong tungsak tahen. Thu umte ihihna hangin Khristian sungah eite i kikholh manin, Khrih hangin i nuntakna sungah i ngah thupha a hoih khempeuh na theihna a kicin semsem nadingin thu ka ngen hi. Sanggam aw, nangma hangin Pasian’ mite in lungnopna ngah uh ahih manin tua bang itna na neihna hangin ka lungdamin ka tha a nuam mahmah hi. Tua ahih manin Khrih hangin unau khat ihihna tawh hih dingin a kilawm bangin na gamtat nadingin thu ka hong gen ngam hi. Hih bangin ka hong genna pen itna i neihna hang ahi hi. Tu lai takin Khrih taangmi ahi keimah Paul zong, Khrih Jesuh hangin thongkia-in a om ka hi hi. Tua ahih manin Khrih hangin ka ta ahi Onesimas a dingin ka hong thumsak hi. Thong sungah ka om sungun kha thu tawh kisai-ah ama pa ka suak hi. Nidangin nang a dingin amah a kimanna bangmah om lo a, ahi zongin tu-in ei tegel a dingin mi manpha mahmah ahi hi. Keima pumpi zahin ngaihsutna tawh nang kiangah amah ka hong puakkik hi. Lungdamna Thu hangin thongkia-in ka om sungin nangma tangin kei a hong huh dingin ka kiangah ka omsak nuam hi. Ahi zongin nangma nasep hoihna pen keima hong kalh hi loin nangma uttawmna tawh na sep a suahtheih nadingin nangma lungkimna om masa lopi-in bangmah ka hih nuam kei hi. A tawntungin nang kiangah amah hong om paisuak theih nadingin tawlkhat sung nang kiang panin Onesimas a paikhia zong hi khathei ding hi. Tu-in amah sal bek hi nawn loin sal sangin a thupizaw, Khrih hangin i sanggam hong hita hi. Kei a dingin amah a manphat mah bangin sal hihna le Topa thu sungah sanggam hihna tawh nang a dingin zong hong manphazaw kan ding hi. Tua ahih manin nasepna-ah pawlkhat taktakin kei na hong ngaihsut nakleh kei na hong limbawl ding zahin amah na limbawl in. Nang tungah hong khialh a, leiba thangba hong neih leh zong keima khialh, keima batin na seh in. Keimah Paul in ka hong loh ding hi, cihna thu keima khut mahmah tawh a lai ka gelh ahi hi. Nangma nuntakna bulpi mahmah zong keima hang ahihna thu gen kullo hi. Tua ahih manin sanggam aw, Topa’ hangin hih ka hong thumna hong pia in. Khrih sungah unau khat ihih manin ka lungsim hong nuamsak in. Ka hong genna sangin a hoihzaw a phazaw-in na gamta ding, ci-in muan mahmahna tawh hih lai a hong gelh ka hi hi. Tua banah, Pasian in note khempeuh’ thungetna hong pia-in, note kiangah kei hong paikik thei dingin kilamen ka hih manin ka om nading inndei zong a baihsa-in na bawl un. Khrih Jesuh hangin thong ka kiatpih Epafras a kipan, ka naseppih Marka, Aristarkhas, Demas, le Luka-te in hong hopih uh hi. Topa Jesuh Khrih hehpihna thupha, note tungah hong tung tahen. A beisa hunah Pasian in kamsangte zangin i pupite tungah a lam tuamtuam tawh a khen khenin thu na gen ngeizo hi. Ahi zongin tuhun nunung ciangin leitung vantung na khempeuh a bawlin a zat, a tawpna-ah na khempeuh a luah dingin a seh a Tapa zangin eite tungah thu hong gen hi. Tua Tapa in Pasian’ minthanna vang hong taangkhiasak a, Pasian’ lim taktak mah hong pua-in, ama kampauna tawh leitung vantung buppi pai-in a kip hi. Mihingte a mawhna panun a siansak khit ciangin Vanglian pipa Pasian’ taklam, vantungah a tu hi. Vantung mite’ ngah minthanna sangin Tapa tungah Pasian in a piak min a liatzawk mah bangin vantung mite sangin Tapa lianzaw thampek hi. Bang hang hiam cih leh Pasian in vantungmi khat peuhpeuh tungah, “Ka Tapa na hi hi. Tu ni-in na Pa ka suak hi,” ci ngei lo hi. Tua mah bangin, “Kei, ama Pa ka hi ding a, amah, ka Tapa ahi ding hi,” ci-in zong kam pau ngei lo hi. Tua banah, Pasian in leitungah a Tapa neihsun hong paisak ding ciangin, “Pasian’ vantungmi khempeuh in amah bia ding uh hi,” na ci hi. Ahi zongin vantung mite’ thu a gen ciangin, “Pasian in a vantung mite huih bangin bawl a, a nasemte meikuang bangin bawl hi,” na ci hi. Ahi zongin Tapa’ thu a gen ciangin Pasian in, “Pasian aw, na kumpi tokhom khang tawntungin kip ding a, thuman thutang tawh na gam sung na uk ding hi. Thuman na deih a, khialhna na mudah hi. Tua ahih manin nangma Pasian in nangmah hong teelin, na lawmte tungah a piak sangin a lianzaw, a lungdamhuai pahtawina nang hong pia hi,” a ci hi. Tua banah, “Topa ahi nangmah in a kipat cil-in leitung na piangsak a, na khut tawh vantungte na bawl hi. Tua nate khempeuh mangthang ding a, nang na hih leh na om paisuak ding hi. Tua nate puan bangin luisuak thei ding a, puan khep bangin na khep ding a, tua nate khempeuh kikhelkhel ding uh hi. Ahi zongin nang na kibang tawntung ding a, teek hun cih na nei ngei kei ding hi,” na ci lai hi. Ahi zongin Pasian in ama vantung mite kiangah, “Na galte na khenuai-ah ka hong sikcipsak matengin ka taklamah hong tu in,” ci ngei lo hi. Vantung mite pen Pasian’ na a sem, a kimu thei lo khate hi uh a, hotkhiatna a ngah ding mite a huh dingin Pasian in a hong sawl ahi hi. Tua ahih manin i zaksa thuman thutakte i khahsuahkhak loh nadingin kiptak khotakin i letkip ding kisam hi. Vantung mite in hong gen thute thuman hi a, tua thu a palsatte in a kilawm bangin gim thuak ding uh hi. Tua ahih manin a thupi mahmah hih hotkhiatna thudon loin i om leh suahtakna om thei ngei lo ding hi. A masa-in Topa mahmah in hotkhiatna thu hong pulak a, tua thu a za mite in thuman ahihna thu eite tungah hong gen leuleu uh hi. Amaute’ thugenna banah Pasian in vangliatna lim, le nalamdang a tuamtuamte bawlna tawh hong genbeh lai hi. Tua banah ama hoihsak bangin Pasian in Kha Siangtho zong hong hawm lai hi. Eite in genbelin i neih a hong tung ding leitung pen Pasian in vantung mite’ khut sungah koih lo hi. Lai Siangtho mun khatah a kigenna-ah, “Pasian aw, nangma ngaihsut tham dingin mi pen bang hi a, na phawk tham dingin mihing’ ta bang hi lel ahi hiam? Ahi zongin vantung mite sangin a neuzaw deuhin na bawl a, minthanna le pahtawina na guan a, na khempeuh na uk sak hi,” na ci hi. “Pasian in na khempeuh a uk dingin bawl,” a cih ciangin na khempeuh a huamkhin hita hi. Mihing in na khempeuh a uklam i thei nai kei hi. Ahi zongin Pasian’ hehpihna hangin mi khempeuh a dingin Jesuh a sih theih nadingin tawlkhat sung vantung mite sangin a neuzaw-in a kibawlna i mu a, sihna a thuakna hangin minthanna le pahtawina a ngahna thu i thei hi. Na khempeuh ama a dingin a piangsak Pasian in tate tampi minthanna a ngahsak theih nadingin a thuakna tawh hotkhiatna thu-ah a makai dingin Jesuh a bawl ding a kilawm mah ahi hi. Mawhna panin mite a siangthosakpa le sianthosakna a ngah mite in, Pa, a kibang a neikhawm uh hi. Tua hi a, Jesuh in mite, “Sanggam,” a cih ding zum ngaihsut lo ahih manin, “Pasian aw, ka sanggamte kiangah nangma thu ka gen ding a, mi khempeuh mai-ah nangmah ka hong phat ding hi,” na ci a, tua ciangin, “Pasian muanin ka nei ding hi,” na ci kik a, tua ciangin, “Pasian in hong piak ta dangte tawh hih lai-ah ka om hi,” na ci leuleu hi. Tate a cih mite pen leitung cilesa a nei mite ahih manin, ama sihna hangin sihna a uk Dawimangpa a sukgawp theih nadingin Jesuh in mihing pianzia mah hong nei phot hi. Tua ahih manin sihna a kihtak manin sal bangin a om mite amah in hong suaktasak hi. Ama lunghihmawh pen vantung mite hi lo a, Abraham’ suanlekhakte a lunghimawh ahihna thu hong kitel hi. Tua ahih manin mihingte’ mawhna a kimaisak theih nadingin Pasian’ na a sepna-ah mite a dingin hehpihna le cihtakna tawh Siampi Lianpen a suahtheih nadingin a sanggamte tawh a kibangin mihing lim a hong puak ding a kisam ahi hi. Ama pumpi mahmah in ze-etna le gimna thuak ahih manin tuhun ciangin tua bang a thuakte a hong huhthei hi. Tua ahih manin Pasian’ sapna a ngah mi siangthote aw, eite’ upna thu tawh kisai-ah Siampi Lianpen a sem dingin Pasian’ sawltak Jesuh’ thu ngaihsun dih un. Pasian’ inn sungah na a sepna-ah Moses a cihtak mah bangin hih siampi nasep a sem dingin a seh Pasian’ tungah Jesuh a citak hi. Ahi zongin inn a lam pa pen a inn sangin a minthanzawk mah bangin Moses sangin Jesuh pahtawizawk ding ahi hi. Inn khempeuh a lam na om ciat sam a, ahi zongin na khempeuh a piangsak pa pen Pasian ahi hi. Moses pen nasem khat hihna tawh Pasian’ inn sungah thu khempeuhah citak a, mailam hunah Pasian in a gen ding thute a gen hi. Ahi zongin Khrih pen Pasian’ innsung a uk Tapa ahihna tawh a citak ahi hi. I lametna thu tawh kisai-in lungsim hanna le muanna tawh i omsuak nakleh eite pen Pasian’ inn ihi hi. Tua ahih ciangin Lai Siangtho sungah, “Tu ni-in Pasian’ aw na zak uhleh gamlakah na om lai-un amah ze-etin, Pasian na lehdo lai hun uh bangin na lungsim uh khauhsak nawn kei un. Na pu na pate un kum sawmli sung ka nasepnate mu napi-in kei hong ze-et veve uh hi. Tua ahih manin amaute tungah ka heh a, ‘Amaute citak lo niloh uh a, ka thukhamte zui nuam lo uh hi,’ ka ci hi. Ka heh manin ka kiciam a, ‘Ka tawlngakna munah hong pai-in kei tawh hong tawlnga khawm ngei lo ding uh hi,’ ka ci hi,” na ci hi. Sanggamte aw, a nungta Pasian kiang panin a paikhia zah dingin thu um lo, a gilo na omkhak loh nadingun na kingaihsun un. Lai Siangtho in, “Tu ni,” a cih pen eite tungah zong hong cihna hi lai ahih manin mawhna’ khemsa-in ta-in na lungsim uh na khauhsakkhak loh nadingun khatlekhat kihanthawnin na kihuhzaw un. A kipat tungin i neih lungmuanna kiptakin i let ciat nakleh i vekpi-in Khrih tawh pawlkhat ihi hi. Lai Siangtho in, “Tuni-in Pasian’ aw na zak uhleh Pasian na lehdo lai uh hun bangin na lungsim uh khauhsak nawn kei un,” na ci hi. Pasian’ aw za napi-in amah a lehdo kuate ahi hiam? Moses in Egypt gam panin a paikhiatpih mi khempeuh ahi uh hi. Kum sawmli sung kuate tungah Pasian heh ahi hiam? Mawhna bawlin, gamlakah a si mite tung ahi hi. Thupi takin Pasian kiciamin, “Ka tawlngakna munah hong pai-in, kei tawh tawlnga ngei lo ding uh hi,” a cih ciangin kuate a cih nopna ahi hiam? Amah a lehdote a cihna ahi hi. Tua ahih manin a up lohna uh hangin tawlngakna munah a lutzawh lohna uh i thei hi. Ahi zongin tu-in eite va pai-in amah tawh i tawlngak khawm theih nadingin Pasian in thuciam hong nusiat khin ahih manin tua tawlngakna munah a lutlah na suahkhak loh nadingun lau-in kidawm ni. Bang hang hiam cih leh amaute in Lungdamna Thu a zak uh mah bangin eite in zong i za hi. Amaute in Lungdamna Thu a zak uh ciangin upna tawh na sang lo uh ahih manin a thuzak uh amaute a dingin a phattuamna om lo hi. Ahi zongin eite ihih leh amah in, “Ka heh manin ka kiciam a, ‘Hih leitangah hong lut lo ding uh a, ka tawlngakna munah hong pai-in kei tawh hong tawlnga khawm ngei lo ding uh hi,’ a cihte bang hi loin ei thu umte pen Pasian tawh a tawlnga khawm ihi hi. Leitung a piansak cil pek a kipanin a nasep a mankhin hinapi-in tu-a bangin thu gen veve lai hi. Lai Siangtho mun khatah, “A ni sagih ni-in a nasepna khempeuh panin Pasian tawlnga hi,” ci-in ni sagihna thu tawh kisai na gen hi. Hih thu mah na kigenkik a, “Ka tawlngakna munah hong pai-in kei tawh hong tawlnga ngei lo ding uh hi,” na ci kik hi. Lungdamna Thu a za masate in um lo uh ahih manin Pasian tawh va tawlnga khawm thei lo uh hi. Tua ahih manin va pai-in Pasian tawh a tawlnga khawm ding mi pawlkhat omlai hi. “Tuni,” cihna kammal na omlai ahih manin Pasian in nidang khat seh lai ahihna thu hong kilang hi. Lai Siangtho sungah, “Tuni-in Pasian’ aw na zak uhleh na lungsim uh khauhsak nawn kei un,” a cihna mun i mat khitsa mah bangin tuazawh kum tampi khit ciangin David tungtawnin thu hong genkik hi. Joshua in Pasian’ tawlngakna munah mite tunpih khin hileh Pasian in a nidang khat thu nunggen nawn lo ding hi. Tua ahih manin tu-a thu om zia-ah ci lehang ni sagih ni-in Pasian a tawlngak mah bangin Pasian’ mite a tawlngak nading omlai hi. Bang hang hiam cih leh a nasepna panin Pasian a tawlngak mah bangin va pai-in Pasian tawh a tawlngate khempeuh zong a nasepna panun khawl ding uh hi. Tua ahih manin amaute in a uploh manun Pasian’ tawlngakna munah a lut zawh loh uh bang hi loin va pai-in Pasian tawh i tawlngak khawm theih nadingin hanciam ciat ni. Pasian’ thu nungta-in a gamtang hi a, langnih a hiam namsau sangin hiamzaw lai hi. Kha le lungsim, guh le taang kituahna, guh le guhngek dongin khenkhia thei hi. Mihingte’ lungsim ngimna le a ngaihsutnate zong theithei hi. Pasian’ mai-ah seelcip theih ding bangmah om lo hi. Eite khempeuh i dinna ding pa’ mai-ah a kipiangsak na khempeuh a kiliah a ki-im thei om loin kimu sinsen hi. Tua ahih manin eite in Pasian’ omna vantung a va tung khinsa, Siampi Lianpen ahi Pasian’ Tapa Jesuh neikhin ihih manin i sansa upna thu kiptakin len ni. Eite’ neih Siampi Lianpen pa in i ginat lohna-ah eite a hong hehpih thei lo ding hi lo hi; eite mah bangin ze-etna khempeuh a thuak hi a, ahi zongin mawhna a bawl lo ahi hi. Tua ahih manin a kisap hunin, eite a hong huh dingin hehpihna le dikna thupha i ngahtheih nadingin, kimuanna lungsim tawh hehpihna tokhom va zuan ciat ni. Siampi lianpen ahi peuhpeuh mipa pen a mite’ mawhna hangin Pasian’ tungah biakna le letsong a piaksak dingin ama mipihte lak panin kiteelin nasep a kiguan’ ahi hi. Amah zong lam tampi-ah a ginalo thei mi mah ahih manin thu thei lo mite le a khial mite tungah lungnem takin na sem thei hi. Amah zong miginalo mi mah ahih manin mite’ mawhna hangin biakna a pia hi bek loin ama mawhna mahmah hangin zong biakna a pia ahi hi. Tua bangin pahtawina a nei siampi lianpen nasep pen a sem dingte amau utthu tawh a kisehtawm mawk hi lo hi; siampi lianpen a sem dingin amahmah a kisehtawm hi lo a, Aaron a kisap mah bangin Pasian in amah a seh ahi hi. Tua mah bangin Khrih zong, amahmah in siampi lianpen nasep a semtawm mawk hi loin Pasian in ama kiangah, “Nang, ka Tapa na hi hi. Tuni-in na Pa ka suak hi,” na ci hi. Mun dang khatah zong, “Melkhizedek siampi gui zui-in a tawntungin siampi na hi ding hi,” na ci lai hi. Leitungah mihingin Jesuh a omlai-in sihna panin amah a honkhia thei ding Pasian tungah thu ngenin khitui naptui tawh thumin na kiko hi. Amah, Pasian’ Tapa hinapi-in a thuakna tawh thumang ahih theih nading a na kisin hi. Tua bangin a cingtaak mi a suahkhit ciangin ama thu a mang mite khempeuh a dingin tawntung hotkhiatna a kipatna hong suak a, Melkhizedek gui zui-in siampi lianpen dingin Pasian in a bawl hi. Hih thu tawh kisai-in i gen ding tampi a om hangin note in thu thei hak mahmah na hih manun i gentel theih nading haksa hi. Tu-in note pen midang a hilh dingin sia na suahtheih ding uh hun hikhin napi-in note mahmah pen Pasian’ thu a bulpite hilh ding na kisam lai uh hi. Antak nethei nai loin nawi bek a nethei lai na hi uh hi. Nawi bek a ne laite pen naungek ahih manin a man le a man lo thu bangmah phawkthei nai lo uh hi. Ahi zongin antak i cih pen a sia le a pha a khenthei, a lim le a lim lo a khentheita, a khangham khinsa mite a’ ding ahi hi. Tua ahih manin Khrih thu a kipat cilna lelte nusia-in a thuthuk zawte ngaihsutin nei ni. Bangmahin a kimang lo nasepnate nusiat ding, Pasian upna thu, tuiphumna le khut ngakna thu, misite thawhkikna le tawntung gimthuakna, cih thute genpha sansan nawn kei ni. Eite in mainawt ni. Pasian in hong thukimpih ahih nakleh i mainawt ding ahi hi. A tawpkik khinsate a kisik kik nadingin kibawl zo lo hi. Pasian’ khuavak sungah amaute om khinin, vantung nopna ciam khinin, Kha Siangtho ngah khinin, Pasian’ thu a hoihna phawk khinin, a hong tung ding vangliatna thu zong thei khin uh ahih manin, amaute a tawpkik leh, amau utthu tawh singlamteh tungah Pasian’ Tapa thatkikin a zumhuai dingin a pholak kikkik suak uh ahih manin a kisik theih nading uh lampi om nawn lo hi. A tungah a kia guahtuite hupin, a kikhawhsak mite a dingin a kimang thei kungte a khangsak leitang pen Pasian in thupha a pia hi. Ahi zongin tua leitang in lingkungte le sialtalling kungte hong posak leh Pasian in samsia-in, mei tawh kihaltum ding hi. Lawm itte aw, hih bangin thu i gen hangin note ka hong muang mahmah uh a, hotkhiatna tawh kizomin thupha a hoihzaw ngah taktak uh hi, ci-in ka hong ngaihsun uh hi. Pasian, a man loin gamta ngei lo ahih manin na Khristianpihte uh a beisa hunah na huhna uh le tu dongin na huh laina uh tawh ama a dingin na nasepna uh le amah na itna uh na lahnate uh hong mangngilh het lo ding hi. Note khat ciat’ lametna thu hong tun taktak theih nadingin a tawp dongin lawpin na thanop paisuak nading uh ka hong deihsak pha uh hi. Note thadah loin upna le lungduaina a nei mite bangin, Pasian’ hong ciamsa thu na ngah nadingun ka hong deihsak uh hi. Pasian in Abraham’ tungah thu a ciam ciangin a tunsak takpi ding bek thu a ciam hi. Thu a ciam ciangin zong amah sangin a lianzaw kuamah om nawn lo ahih manin ama min tawh thu ciam a, “Nang thupha hong pia-in suanlekhak tampi a nei dingin ka hong ciam hi,” a ci hi. Abraham in lungduai takin na ngak ahih manin Pasian’ thuciam a ngah hi. Mi khat peuhpeuh in thu a ciam ciangin amah sangin a lianzaw khat’ min tawh kiciam ahih manin, thu kituhnate-ah tua thuciamna pen a tawpna hita hi. Pasian in ama geelnasa a kheel ngei het lo ding ahihna thu a thuciamna a ngah ding mite tungah teltakin theisak nuam ahih manin a thuciam banah kiciamna khat a bawl lai hi. Tua hi a, a kikheel thei lo thu nih kithuap ahih manin Pasian in zuau gen thei lo ding hi. Tua hi a, amah a beel eite in eite mai-ah hong kikoih lametna thu kiptakin i letcip nadingin i tha hong nuamsak hi. I lungsim a hong kipsak dingin tu-a bang lametna a nei ihi hi. Tua i lametna kician mahmah a, vantung biakinn siangtho tawngnung sung ciang dong tung khinta hi. Tua lai munah eite’ tangin Jesuh na ma tun khinta a, siampi Melkhizedek gui zui-in a om tawntung ding siampi lianpen a suak hi. Abraham in a galsimna ah kumpite thatin gualzo-in a hong ciah ciangin A Lianpen Pasian’ siampi ahih banah Jerusalem khua kumpi zong ahi Melkhizedek in Abraham na dawnin thupha a pia hi. Abraham in a na ngah khempeuh sung panin Melkhizedek tungah sawm-ah-khat a pia hi. Melkhizedek min a khiatna in, “Thuman Kumpi,” a cihna hi phot a, tua banah Jerusalem khua kumpi zong hi lai ahih manin ama min pen, “Kilemna Kumpi,” cihna zong ahi hi. Melkhizedek’ pa le a nu a kipanin a suahna thu, a sihna thu, le a khang tangthu peuhmah a kiciamtehna om lo ahih manin Pasian’ Tapa tawh a kibang hi a, siampi mah hi tawntung paisuak hi. Tua ahih manin bangzah takin milian ahihna thu na thei uh hi. I pupi Abraham nangawn in zong gal sungah a ngah nate sung panin ama tungah sawm-ah-khat na pia hi. Levi suanlekhak sung panin siampi a sem mite pen Abraham’ suanlekhak mah hinapi-in, amau mipih Israel-te tung panin sawm-ah-khat a lak nadingun Thukham a na kibawl hi. Ahi zongin Melkhizedek ahihleh Levi’ suanlekhak hi lo napi-in Abraham’ tung panin sawm-ah-khat na la-in thuciamna a ngah mipa zong thupha a na pia lai hi. A lianzawte in a neuzawte thupha a na piakna pen a man thu hi a, sel theih ding hi lo hi. Siampite’ lakna tawh kisai-in ahihleh a sithei mi mah ahi siampite in mite tung panin sawm-ah-khat a la uh hi. Ahi zongin Melkhizedek’ lakna tawh kisai-in ahihleh Lai Siangtho in a gen mah bangin a nungta tawntung mipa in sawm-ah-khat a la ahi hi. Abraham in Melkhizedek tungah sawm-ah-khat a piak ciangin ama suan Levi in zong ama pupi Abraham tungtawnin a pia mah kici thei hi. Bang hang hiam cih leh Melkhizedek in Abraham a na dawn laitakin Levi suak nai lo ahih manin a pupi Abraham’ sung mahah a omlai ahi hi. Israel mite in Levi’ suanlekhak siampite tungtawnin Thukham ngah uh hi. Levi’ suanlekhak siampite’ nasepna kicingtaak hileh Melkhizedek siampi nam zui-in siampi namdang a pian ding kisam nawn lo ding a, Aaron gui zui-in siampi omsa a kimangpah ding ahi hi. Siampi nam kikheel ahih manin a thukham zong a kikheel ding kisam hi. Hih bang thute a kigenna i Topa pen a namtuam khat hi a, ama phung sung panin biakna tau-ah siampi na a sem khat beek om lo hi. I Topa pen Judah suan sung panin a piang ahih manin Moses in siampi thu a na gen ciangin hih Judah minam genin na nei lo hi. Melkhizedek tawh a kibang siampi namtuam khat hong pian’ ciangin hih thu hong kitelpha semsem hi. Amah pen mihingte’ bawl ngeina zui-in siampi a suak hi lo a, a si thei lo nuntak tawntungna vang tawh siampi a suak ahi hi. Bang hang hiam cih leh Lai Siangtho in, “Melkhizedek nam bangin tawntung siampi na hi hi,” na ci hi. Ngeina lui pen ginaloin, a kimanna om lo ahih manin kinawlkhin hi. Moses Thukham ahi ngeina lui in a cingtaaksak zawh bangmah om lo ahih manin eite in Pasian i naih theih nading lametna ahi ngeina thak hong kithun hi. Tua banah Pasian’ kiciamna zong hong omlai hi. Midangte siampi-in a kibawl laitakin tua bang kiciamna na om lo hi. Ahi zongin Pasian in Jesuh kiangah, “Topa in a lungsim a kheel loh nading limtakin kiciam khin a, ‘Nang, tawntung siampi na hi hi,’” na ci ahih manin kiciamna tawh Jesuh siampi a na suak ahi hi. Hih bangin a kilamdang diakin a kibawlna in Jesuh pen kiciamna hoihzaw ahihna thu hong kilangsak hi. A kilamdanna a dang khat in: Siampi dangte pen sithei-in a nasep zom paisuak thei lo ahih manin a mi malin tampi pha uh hi. Ahi zongin Jesuh nungta tawntung ahih manin midang tungah a nasep ki-ap nawn loin amahmah in siampi nasep sem paisuak hi. Tua hi a, mite a dingin a thumsak thei dingin amah nungta tawntung ahih manin ama tungtawnin Pasian kiang a zuante khempeuh, tu a kipanin a tawntungin a honkhia thei ahi hi. Tua bangin a siangtho, paubaanna a nei lo, vantungah a lian penin a kikoih Siampi Lianpen Jesuh i neih a hoih mahmah ahi hi. Siampi lianpen dangte in nisimin amau’ mawhna hangin biakna pia masa-in, tua ciangin midangte’ mawhna hangin a piak niloh bang hi loin, amah khatvei bek a kipiakna tawh a tawntung adingin a kimang paisuak ahi hi. Moses Thukham in siampi lianpen a sem dingin cingtaakna a nei thei lo mihing mah na seh a, ahi zongin tua Thukham nungah a hong piang Pasian’ thuciamna in a tawntungin a cingtaakin a kibawl Tapa, Siampi Lianpen dingin kiciamna tawh a na seh hi. Tu-in i gennop thu pen hih bang ahi hi: Vantungah Pasian’ tokhom taklamah a tu tua bang Siampi Lianpen khat a nei ihi hi. Amah in, mite’ bawl ahi lo, Topa mahmah in a bawl a taktak puanbuk ahi a Siangtho Pen mun sungah siampi lianpen nasep a sem ahi hi. Pasian tungah letsong a tuamtuamte a pia ding le ganhing tawh biakna a pia dingin siampi lianpen a sem peuhpeuhte a kiseh ahih mah bangin eite’ Siampi Lianpen pa in zong bangkhat teitei a piak ding kisam hi. Jew Thukham tawh kizui-in Pasian tungah letsongte a pia ding siampite om khinta ahih manin leitungah Jesuh a omlai hileh siampi hithei het lo ding hi. Leitung a siampite’ sepsepte pen vantungah a om thu, a limin a sem uh ahi hi. Bang hang hiam cih leh Moses in Puanbuk lam ding a kipat ciangin Pasian in, “Mual tungah i om lai-in a lim ding khempeuh kong lah bang teekteekin a kihih nadingin na thei in,” na ci hi. Tua ahih manin Pasian le mite kikalah Jesuh in a bawl thuciamna pen na a hoihzaw piak nading thuciamna ahih mah bangin Jesuh tungah a kipia siampi nasep pen siampi dang khempeuhte’ sep sangin a lianzaw ahi hi. Thuciamna a masa kimang thei hileh thuciamna a nihna kisam nawn lo ding hi. Tua ahih manin Pasian in ama mite mawhsakna thu na gen a, “Topa in hih bangin ci hi: Israel mite le Judah mite tawh thuciamna thak ka bawl ding hun hong tung ding hi. Egypt gam panin a paikhiatpih dingin a pu a pate uh ka khut tawh ka kaih lai a, amaute tawh ka bawl thuciamna bang hi lo ding hi. Amaute tawh ka bawl thuciamna zui lo uh ahih manin kei zong amaute ka don kei hi. Ahi zongin tu-in Israel mite tawh ka bawl ding thuciamna hih bang ahi hi. Amaute sungah ka thukham ka guang ding a, amaute lungtang tungah gelhin, amaute’ Pasian ka hi ding a, amaute pen keima mi ahi ding uh hi. A neupen pan a lianpen dongin mi khempeuh in hong thei ding uh ahih manin ‘Topa thei in,’ ci-in a ulenau le a mipihte kiangah kuamah in a hilh ding kisam nawn lo ding hi. A mawhna a khialhna uhah amaute ka hehpih ding a, tua bangte phawkin ka nei nawn kei ding hi,” na ci hi. Pasian in thuciamna thak a gen ciangin thu ciamna lui pen a bei-in a seh ahi hi. Tua a bei thuciamna pen a maimangta ahi hi. A masa thuciamna nangawn in biakna zia ding le biak nading mun tawh kisai ngeina na nei tei sam hi. Puanbuk khat kibawl a, a puanung dei pen Siangtho Mun kici a, tua sungah meivak, sabuai, le Ompihna Anlum kikoih hi. Tua Siangtho Mun a kideina zomah Siangtho Pen Mun a kici a dei dang khat om leuleu hi. Tua sungah paknamtui hal nading kham kibawl biakna tau le kham tawh a kizut Thuciamna Singkuang om hi. Tua Thuciamna Singkuang sungah manna anlum a kikoihna kham beel, tehno nei-in a hing Aaron’ ciangkhut le thukhamte a kigelhna suangpek nihte kikoih hi. Tua Thuciamna Singkuang tung sanah Pasian’ ompihna lim ahi kherub nihte om a, tua kherub nihte in hehpihna tokhom liimsun uh hi. Hih nate’ thu tu-in a neng a tawngin i gen khinzo kei hi. Hih bang tengin a kibawl khit ciangin a dei puanung sungah nisim a nasep uh a sem dingin siampite a lut hi. Ahi zongin a dei sungnung sungah Siampi Lianpen pa bek kum khatin khatvei pai a, theih loh man a, amah le mite’ khialhna hangin ganhing sisan tawh biakpiakna a bawl hi. A puanung inndei a om laiteng a sungnung ahi, a Siangtho Pen Mun a kihong nai lo ahihna thu Kha Siangtho in hong kilangsak hi. Hih bang omzia pen tuhun lai thu a lahna ahi hi. Bang hang hiam cih leh Pasian tungah a kipia letsongte le ganhing tawh biaknate in a bia mite’ lungsim siangsak zo lo hi. Zu le an, le pumpi siansuahna ngeina tuamtuamte hi bek a, Pasian in na khempeuh a puahphat hun ma kikal sungteng zat ding ngeina ahi hi. Ahi zongin tu-in a hoihzaw thu a sem ding Siampi Lianpen Khrih hong tung khinta a, ama lutna biakbuk pen a kipiangsak tawm, khut tawh a kibawl biakbuk hi loin a lianzaw, a cingtaakzaw mun ahi hi. Siangtho Pen Mun ah a tawntungin a kimang dingin khatvei bek Khrih a va lut ciangin biakpiak nadingin keel sisan le bawngno sisante va keng loin ama sisan va keng a, eite a dingin tawntung hotkhiatna a hong ngahsak hi. Keel sisan, bawngtal sisan, le bawngla kihaltum vute, biakna vai-in a siang lo mite tungah a kitheh ciangin biakna vai-in mite’ pum tung siangthosak thei ahihleh, tawntung Kha Siangtho hangin Pasian tungah a cingtaak biakpiak nadingin Khrih in a piak ama sisan in na tam semkhia zozaw ding a, a nungta Pasian’ na i septheih nadingin bangmahin a kimang lo nasepna panin ama sisan in i lungsim hong siangsak ding hi. Thuciamna masa in a huamkhak mite, a mawhna panun a suahtak theih nading uh ngeina om pen a si suak khinta ahih manin, Pasian’ sap mite in a ciamsa tawntung thupha a ngahtheih nadingun Khrih in thuciamna thak a hong vaihawm ahi hi. Mi khat in a sih khit ciangin a gamhluah dingin a deih pa lai-in ciamtehin a koih leh a laibawl pa a sih phot ding kisam hi. A laibawl pa a hin laiteng tua lai kizang thei lo a, a sih khit ciangin kizang thei bek hi. Tua mah bangin thuciamna masa zong sisan a kizat ciangin thu suak thei pan hi. Moses in zong mite tungah Thukham sunga om thute a piak lai-in bawngno sisan, keel sisan, le tui sungah puknah le tuumul san diahin, tuate tawh Thukham laibu le mite theh a, “Pasian in note tungah a hong piak thuciamna sisan ahi hi,” a ci hi. Tua banah Moses in Biakbuk le biakna-in a kizang a sunga na om khempeuh zong sisan a theh hi. Thukham kizatna sungah na khempeuh sisan tawh kisiansuah a, sisan a kiluansak khit ciang bekin mawhna kimaisak thei pan hi. A taktak ahi lo vantung limte pen hih bangin siansuahna kibawl hi. Ahi zongin vantung nate in hih sangin a hoihzaw biakpiakna kisam hi. Tua ahih manin a lim ahi mihingte’ bawl Siangtho Mun sungah Jesuh pai lo a, vantung mahmahah va pai-in Pasian’ omna-ah eite’ tangin tu-in amah a va kilaak ahi hi. Kum simin Siangtho Pen Munah Jew Siampi Lianpente amau’ sisan ahi lo, ganhing sisan tawh a pai zelzel bangun amah va pai themthum lo hi. Tua bangin va pai zelzel hileh leitung piancil a kipanin a va thuak zelzel ding ahi hi. Ahi zongin amah biakna-in a va kipiakna hangin a kimang paisuak a suahtheih nadingin mawh maisak nadingin hun bei kuan ciangin amah khatvei a va kipia hi. Mi khempeuh khatvei si-in, tua khit ciangin Pasian’ thukhenna a thuak ding ahih mah bangin, mi tampite’ mawhna a thuak dingin Khrih zong khatvei bek a kipia hi. A nihveina hong kilatkik ciangin mawhna thu tawh kisai nasem ding hi nawn loin, lawptakin amah a ngak mite a honkhia ding ahi hi. Jew Thukham pen mailam hunah a taktak a hong tung ding lim lahkholhna hi bek ahih manin tua Thukham tawh kizui-in a kum a kumin a kipia biakpiakna in Pasian kiang a zuan mite mi cingtaak suahzo ngei lo hi. Thukham zui-in Pasian a bia mite in mawhna panin siansuahna ngahzo uh hileh a lungsim uhah kisuanna lungsim om nawn lo ding ahih manin biakpiakna piak kikkik kul nawn lo ding hi. Tua ahih manin biakpiakna a kipiak simin a kum kumin mite a mawhna uh a kiphawksak kikkik ahi hi. Tua hi a, bawngtal sisan le keel sisan in mawhna siangsakzo ngei lo hi. Tua ahih manin leitungah Khrih hong pai ciangin Pasian kiangah, “Ganhing le khawhsa tawh biakna na deih kei a, nang kong biak nadingin pumpi khat nong vaihawmsak hi. Meihal biakna le mawh maisak nadingin biaknate tawh nang na lungkim kei hi. Tua ahih manin, ‘Thukham laibu sungah keima thu a kigelh bang teekteek mahin keima hih ding nong deih bang teekteek mah ahih dingin ka hong pai hi, Pasian aw,’ ka ci hi,” a ci hi. “Ganhing le khawhsa tawh biakna na deih kei a, meihal tawh biakna le mawhmaisak nadingin biaknate tawh na lungkim kei hi,” a cih ciangin hih biakpiaknate khempeuh Thukham tawh kizui-in hih bangin kam na pau veve lai a, tua banah, “Nangma deih bang ahih dingin ka hong pai hi,” na ci thuah lai hi. Tua ahih manin Pasian in Khrih tawh biakna a kipsak theih nadingin ganhing le khawhsa tawh biakna luite na beisak phot hi. Pasian’ deihna bangin Jesuh Khrih gamta a, a tawntungin a kimang paisuak dingin ama pumpi biakna-in khatvei a kipiakna hangin eite khempeuh i mawhna panin a siang ihi hi. Jew siampite nisimin a nasepna uh munah dingin a kibang biakpiakna mah pia niloh uh a, ahi zongin tua a piak uh biakpiaknate in mawhna maisak thei lo hi. Ahi zongin Khrih in mawhna hangin khatvei a piakkhit ciangin a tawntung a dingin kimang ahih manin Pasian’ taklam ah tu hithiat a, Pasian in ama khenuai-ah a galte khempeuh a koihsak nading hun ngakin a om hi. Mawhna panin a sianthosak mite, khatvei bek biakpiakna a bawlna tawh siangtho paisuaksak hi. Kha Siangtho in zong hih thu hong theihpih ahih manin, “Topa in hih bangin ci hi: Mailam hunah amaute tawh thuciamna khat ka bawl ding a, amaute sungah ka thukhamte guanin, amaute lungtang tungah ka gelh ding hi,” a cih khit ciangin, “Amaute’ mawhna le a gitloh gamtatnate uh ka ciamteh nawn kei ding hi,” ci hi, ci-in a na gen hi. Tua hi a, mawhna a kimaisak khit ciangin mawh maisak nadingin biakna piak ding kisam nawn lo hi. Tua ahih ciangin sanggamte aw, Jesuh hong sihna hangin Siangtho Pen Munah ut utin luttheih nading thu i neita hi. Ama pumpi mahmah ahi dalna puan tawnin nuntakna lampi-ah i pai theih nadingin amah in lampi thak hong honsak hi. Pasian’ innsung a uk siampi lianpen zong i nei hi. Tua ahih manin mawhna thu-ah kisuanna lungsim om nawn loin, tui siangtho tawh i pumpi a kisawpsa-in muanna le lungsim takpi tawh Pasian kiang zuan ni. Pasian in piak dingin a hong ciam thu muangngam ihih manin i lametna thu kiptakin len ni. Khatlekhat ki-itin a hoih nate i sep nadingin kihanthawn ciat ni. Mi pawlkhatte in kikhop a pelh bang hi loin, eite in kikhop khawmnate pelh loin om ni. Topa’ hong pai ding Ni hong naina thu thei ihih manin khatlekhat kihanthawn semsemzaw ni. Thuman thutak i theih khit ciangin mawhna i bawl hamtang lai leh i mawhna a kimaisak nadingin biakpiakna dang om nawn lo a, a kihtakhuai thukhenna le Pasian’ thu a nial mite a kangtum ding meikuangpi bek omlai hi. Moses Thukham a zui lote pen mi nih le thum in mawh mah hi, ci-in teci a pan’ khit nakleh kihehpih hetloin sihna kithuaksak hi. Tua bang ahihleh Pasian’ Tapa a simmawh, mawhna a hong maisak Pasian’ thuciamna sisan a thudon lo, Pasian’ hehpihna a hong puak Kha Siangtho a hehsakte’ thuak ding bangzah takin lianzaw kan ding ahi hiam? Bang hang hiam cih leh, “Phulakna keima a’ hi a, ka thukkik ding hi,” a ci pa le, “Topa in ama mite thu a khen ding,” a ci pa i theih ahi hi. A nungta Pasian’ khut sungah thumang loin i tunkhak ding a lauhuai mahmah ahi hi. A beisa hun a note tungah thupiangte phawkkik un. Pasian’ khuavak sungah na om khit uh ciangin haksatna tampi thuak napi-in tuate na lel kei uh hi. Mipi’ mai-ah hong kisimmawhin hong kibawlsia a, tua bang a thuakte na pawlpih ngam uh hi. Note in a hoihzaw, a kipzaw nate a nei na hihlam uh kithei na hih manun thongkia mite thuakpih ngamin, na neihsa uh hong kilaksak hangin zong lungdam takin na om thei veve lai uh hi. Tua ahih manin thaman lianpi a hong ngahsak thei na lungsim hanna uh na khahsuah kei un. Pasian’ deihna bangin gamta-in, ama thuciam na ngahtheih nadingun lungduai-in thuakzawhna na kisam uh hi. Bang hang hiam cih leh Lai Siangtho sungah, “A sawt loin, a hong pai ding pa hong tung ding a, hong zekai nawn lo ding hi. Ahi zongin keima mi a thuman mite in ka thu umin nungta ding uh a, a nungkik a om uhleh tua mite tungah ka lungkim kei ding hi,” na ci hi. Eite pen nungkikin a maimang mite ihi kei a, upna nei-in hotkhiatna a ngah mite ihi hi. Upna nei i cih ciangin i muhtheih nai loh i lamette ngah takpi ding, ci-in muanna lungsim neihna ahi hi. Tanglai mite in upna a na neih manun Pasian in a na pakta hi. Pasian’ kampauna tawh leitung le vantung piang a, tu-a i muhtheih nate a om nai lopi panin hong piang hi, ci-in i upna bek mah tawh a thei ihi hi. A upna hang mah tawh Abel in Kain’ piakna sangin a santheih huaizaw biakpiakna Pasian’ tungah a na pia hi. Pasian in ama biakna na sang ahih manin a upna hangin mihoih hi, ci-in Pasian’ pahtakna a na ngah hi. Abel a sihzawh a sawtpi hikhin napi-in tu dong mahin upna thu a hong gengen lai a suak hi. A upna hang mahin Enok zong sihna tawh kipelh hi. Pasian in ama kiangah lato ahih manin kuamah in Enok mu nawn lo hi. Amah a kilaktoh ma-in Enok in Pasian’ lungkimna ngah hi, ci-in Lai Siangtho in a na gen hi. Upna lo tawh kuamah in Pasian lungkimsak zo lo hi. Pasian kiang a zuan mi peuhmah in Pasian a om takpi ahihna thu le amah a zongte Pasian in thaman pia hi, ci-in a up ding kisam hi. Noah in zong a upna hang mah tawh mailam a thupiang ding a muh theih lohpi mahin Pasian’ thugenna na mang a, teembaw khat bawlin a innkuanpihte tawh na suakta hi. Hih bangin a gamtatna tawh leitung midangte a mawh ahihna kilangsak a, a upna hangin mihoih hihna thu Pasian kiang panin a ngah hi. Pasian in ama tungah piak dingin a ciam leitangah Abraham a pai dingin a sap lai-in Abraham in Pasian’ sapna a manna pen a upna hang mah ahi hi. A pai nading mun nangawn thei lopi-in a gam le a lei nusia-in a ding khia hi. Pasian in piak dingin a ciam gamah a upna hang mah tawh gamdangpi hinapi-in peemta-in va om phot a, ama ngah bangin thuciamna a ngah a ta Isaac le a tu Jakob tawh puanbuk peuhah a om phot uh hi. Pasian in geelin a lam, bulkip a nei khuapi, Abraham in a ngakna-in tua bangin a om ahi hi. Sarah a ta neihtheih ding hun beikhin napi-in ama tungah thuciam pa zuau lo ding, ci-in Abraham in upna a neihna hang mahin Sarah gai-in ta a nei ahi hi. A cimang khinin a kingaihsun hih mi khat’ suanlekhakte pen vana aksi zah leh tuipi gei-a sehnel zahin a tam hi. Hih mite khempeuh in amaute tungah piak dingin Pasian’ ciam thute ngah nai lo uh a, gamlapi-ah a omlai galmuhin hopih thei bek uh a, hih leitungah khualmi peemta hi lel hang, ci-in kitheihna tawh omin a upna mah uh tawh a si uh hi. Tua bang mite in amau a dingin a gam a lei ding uh a zong ahihna uh hong kilang hi. Amaute in a nusiat uh leitung ngaihsutpi penin a nei uh hileh hong ciahkik theih nading uh hun ngah ding uh hi. Ahi zongin amaute’ lunggulh pen leitung sangin a hoihzaw vantung gam ahi hi. Pasian in amaute a dingin khuapi khat na vaihawmsak ahih manin, tua bang mite in amah pen ka Pasian uh hi, ci-in a gen ding uh Pasian in maizumna in na ngaihsun lo hi. Pasian in Abraham a ze-et laitakin Abraham in a upna hang mah tawh Pasian biak nadingin a tapa Isaac na pia ngam hi. Pasian mah in Abraham tungah tapa ka hong pia ding ci-in a ciam hinapi-in, Pasian’ ciamna bangin a neih tua a tapa neihsun mah, Pasian biak nadingin Abraham in pia dingin na kithawi hi. Tua a piak ding tapa pen Pasian in, “Na tapa Isaac tungtawnin suanlekhak na nei ding hi,” a cih pa ahi hi. Pasian in a sisa nangawn hingkiksak thei ding hi, ci-in Abraham in a up mah bangin Abraham in a sisa a tapa Isaac a limin a ngahkik ahi hi. A tapa Jakob le Esau in mai lamah thupha ngah ding hi, ci-in Isaac in a na gen ngamna pen a upna hang mah ahi hi. Jakob a sihkuan ciangin a ciangkhut dawnah kingamin Pasian bia a, Josef’ tapa tegel thupha a piakna pen Pasian in na pia takpi ding hi, ci-in a upna hang mah ahi hi. Josef a sih ding ciangin Egypt gam panin Israel mite a paikhiat nading thu le ama luanghawm a bawl nading zia a vaikhaknate zong a upna hang mah ahi hi. Moses a suah ciangin a nu le a pa in hoihsa mahmahin, kumpipa’ thupiakna kihta tuan loin kha thum sung a seelcip ngamna uh zong a upna hang mah uh ahi hi. Moses a gol ciangin Faro’ tanu’ tapa kicih ding a ut nawn loh ngamna zong a upna hang mah ahi hi. Tomno sung mawhna sungah nuamtakin om ding sangin Pasian’ mite tawh gimna thuakkhawm ding a utzaw hi. Mailamah a thaman ding mukhol thei ahih manin Egypt gam sunga hauhna le nopsaknate khempeuh sangin Khrih hangin simmawhna thuak taakzaw tham hi, ci-in a ngaihsun hi. Moses pen kumpipa’ heh ding lau hetloin Egypt gam panin paikhia a, a kimu thei lo Pasian a mu bang keekin a nungkik hetlohna zong a upna hang mah ahi hi. Mi That Vantungmi in Israel mite ta upa pen khempeuh a thahkhak loh nadingin Paisan Pawi kipiangsakin, inntual kongtungzawl khempeuh sisan a kizutna zong upna hang mah ahi hi. Lei keu tunga pai bang keekin Israel mite in San Tuipi a kantan theihna uh zong a upna hang mah uh ahi hi. Amaute’ pai bangin Egypt mite in pai ding a sawm uh ciangin tui in a tuumcip hi. Israel mite in Jerikho khuapi ni sagih sung a kimvel khit uh ciangin a kulhpi a cipna zong a upna uh hang mah ahi hi. Numei paktat Rahab in thukante limtakin na zindo a, Pasian’ thu a mang lo mite tawh a sihkhawm lohna zong a upna hang mah ahi hi. Tu-a bangin gengen lai ding ihi hiam? Gideon, Barak, Samson, Jefthah, David, Samuel, le kamsangte’ thu i gen nading hun om lo hi. Hih mite khempeuh in zong a upna uh hang mah tawh kumpi gam tuamtuamte zo-in, thumanin a gamtat manun Pasian’ thuciam a ngah uh hi. Upna hang mah tawh humpinelkai kamte hucip uh a, meikuangpi mitsak thei-in, sih nading panin suakta uh a, ginalo napi-in thahat uh a, gal sungah thahatin gamdang galkapte a zogawp uh hi. Numeite in a sihsuah mite uh, thawhkikna tawh a ngahna uh zong a upna uh hang mah ahi hi. Mi pawlkhatte in a hoihzaw nuntakna-ah a thawhkik theih nadingun leitungah suahtak ding ut tuan loin bawlsiatna thuakin a si uh hi. Mi pawlkhat in simmawhna, satna, sikkol bulhna le thongkiatna zong a thuak uh hi. Suang tawh a kidenglum, sing-at tawh a kiphelkham, namsau tawh a kisatlum a om hi. Tuuvun peuh, keelvun peuh silhzo bekin, cimawhin zawng uh a, gimna le bawlsiatna a thuak uh hi. Amaute a dingin leitung mite kilawm zo lo uh ahih manin galtai bangin gamlak le mualtung khawngah vak kawikawi-in, leihawm suanghawm sung peuhah a om uh hi. Hih mite’ upna lian mahmah hi, ci-in a kitheih hangin piak dingin Pasian in a ciamsa thute a ngah nai kei uh hi. Bang hang hiam cih leh Pasian in eite a dingin a hoihzaw-in thu hong vaihawmsak a, amaute tawh eite i kikop ciangin amaute a cingtaak ahih theih phing nading uh Pasian’ geelna ahi hi. Tua hi a, eite in i kiim i pamah hih zahin a tam teci nei ihih ciangin eite a hong dongtangsak thei nate khempeuh le eite a hong gakcip mawhna le khialhnate khempeuh paikhia-in, i mai-ah a om tai nading lampi a mong dongin lungsim kiptakin tai ni. Eite hong makai-in i upna a hong cingtaaksak Jesuh mitsuanin nei ni. Mailamah a ngah ding lungdamna hangin maizumna kihta loin singlamteh tungah sihna hong thuak a, tu-in Pasian tokhom taklamah a tu hi. Tua zahta-in mawhnei mite’ langbawlna a thuaknate ngaihsun unla, note lungkia loin khauhtakin om un. Tu ciang dong mawhna tawh na kidona uhah sihna zah ciang dongin na dona uh om nai lo hi. Pasian in note, tate, hong ci-in hong hanthotna thu mangngilh khinta na hi uh hiam? Pasian in note kiangah, “Ka ta aw, Topa’ hong thuhilhna zangkhai ngaihsut kei inla, gim a hong piak ciangin lungkia kei in. Bang hang hiam cih leh Topa in a it mite thuhilh a, ta taktakin a ngaihsut mite a taii hi,” hong ci hi. Pasian’ hong thuhilhna na thuak ding mah uh ahi hi. Pasian in note ta-in hong ngaihsun ahih manin a thuak na hi uh hi. Pate’ thuhilhna le taiina a thuak lo ta kuamah om lo hi. Tate’ thuak bangin thuhilhna le taiina thuak loin hong kikoih mawk leh ta taktak hi loin zawlta na hi lel ding uh hi. Tua banah, i leitung pate in gim hong pia a, zong i zahtak lai hi. Tua ahihleh kha thu tawh kisai-ah i Pa’ thu mang phazaw-in i nuntak ding kisam hi. I leitung pate in amau’ hoihsak bangin nuntak tomno sung ngaihsutna-in hong thuhilhin gim hong pia a, ahi zongin Pasian in amah tawh kibangin siangtho-in i omtheih nadingin eite hong khualna-in hong thuhilhin gim hong pia hi. Thuhilhna tawh gim hong kipiak ciangin nuam kisa hetloin na kisa mahmah sam a, ahi zongin tua thuhilhna a mangzote in thuman nuntakna hangin nopsakna thaman a nung ngah uh hi. Tua ahih ciangin a zaw nuangnuang na khutte uh le a no dakdak na khukte uh khauhsak un. Bai luangluangin a paite, na guh na taang uh a kipelh loh nadingin lampi tang zui-in na pai un. Mi khempeuh tawh na kilem theih nading uh hanciam un. Nuntak siangtho lo tawh kuamah in Topa mu zo lo ding ahih manin nuntak siangtho na nungta un. Pasian’ hehpihna a ngahlah na hihkhak loh nadingun na kidawm un. Zungkha a nei singkung hong khangin mi tampi gimsakin a siatsak bangin mite a siasak na hihkhak loh nadingun na kidawm un. Numei tawh a mawh mite suakkha kei unla, Esau bangin annek khat tawh innluah za a zuak mi na suahkhak loh nadingun kidawm un. Bang hang hiam cih leh Esau in a pa kiang panin thupha ngahkik nuamin khitui naptui tawh a nget hangin a gamtatnasa a bawlkik theih nading lampi om nawn lo ahih manin bangmah ngahthei tuan nawn lo hi. Israel mite in a tuahsa bangin note in Sinai Mual tunga meikuang, khuamial le lungzinna, huihpi, peengkul tumna awging le a kihtakhuai awgingte na za nai kei uh hi. Israel mite in awging a zak uh ciangin kihta lua uh ahih manin a zakkik nawn loh nadingun a thum uh hi. “Ganhing nangawn in tua mual a sukkhak le kidenglum ding hi,” ci ahih manin thuakngap lo uh hi. Tua pen naklauhuai mahmah ahih manin Moses in zong, “Lau-in ka ling hi,” a na ci hi. Ahi zongin note pen Zion Mual, a nungta Pasian’ khuapi, vantung Jerusalem, simzawh loh vantung mite a omna, vantungah a min a kikhum Pasian’ ta upate a kikhopna, mi khempeuhte’ thu a khen Pasian’ kiang, a cingtaakin a kibawl midikte’ kha a omna, thuciamna thak a hong vaihawm Jesuh kiang, Abel’ sisan sangin thu hoihzaw a gen sisan a kithehna mun na tungzo uh hi. Tua ahih manin note tungah thu a hong gen pa’ thugen na ngaih loh khak ding uh kidawm un. Hih leitungah thu a gen pa’ thu a ngai lote suakta lo ahih manin vantung panin thu a hong gen pa’ thugen ngai kei lehang i suakta kei zaw kan lai ding hi. Tuahun lai-in thu a gen ciangin leitung kiling a, ahi zongin tu-in amah in thu hong ciam a, “Leitung bek lingsak loin vantung tawh zong khatvei ka lingsak lai ding hi,” hong ci hi. “Khat vei lingsakkik lai ding,” a cih ciangin a kipiangsak nate kilingsakin kipaikhia ding a, a kilingsak lo nate kip lai ding ahihna thu hong kilangsak hi. Tua ahih manin a kilingsak zo lo Pasian’ gam i ngah manin lungdamin, zahtakna le lamdangsakna tawh Pasian’ lungkimna bangin amah bia ni. Bang hang hiam cih leh eite’ Pasian pen a kangtum thei meikuang tawh a kibang ahi hi. Khrih sungah unau bangin na ki-itna uh na zomsuak un. Khualmite hoihtakin zin na do ding uh na phawk un. Mi pawlkhat in vantung mite zindo ahihlam a phawk lopi-in a do na hi gige uh hi. Amaute tawh thong a kiakhawm bangin kingaihsunin thong sunga om mite na phawk un. Note zong leitung pumpi mah tawh a nungta lai na hih manun gimna a thuak mite na phawk un. Mi khempeuh in nupa thu thupi ngaihsut uh hen la, zite pen pasalte tungah citakin, pasalte zong a zite uh tungah citak uh hen. Pasian in a thangtat mite le nulepa mawhna a gamta mite tungah thu khen ding hi. Sum deihluatna tawh na kipelh nadingun na nuntakna uhah kikem unla, na neihzah uh tawh lungkim un. Pasian in, “Note ka hong nusia ngei kei ding a, ka hong tamasak ngei kei ding hi,” hong ci hi. Tua ahih manin kimuanna lungsim tawh hangtakin, “Topa, kei hong huhpa hi a, ka lau kei ding hi. Kua in bang hong cihzo ding ahi hiam?” ci ngam ni. Note tungah Pasian’ thu a hong gen, nidanga na makai masate uh phawk un. Amaute’ nuntakna le a sihna ziate uh ngaihsun unla, amaute’ upna bang na neih nadingun hanciam un. Jesuh Khrih pen zani, tuni, a tawntungin kibang ngitnget hi. Thuhilhna lamdang a tuamtuamte zui-in lam man panin pialkha kei un. A zui mite tungah bangmah phattuamna a piangsak thei lo annek tuidawn tawh kisai ngeina zuihna in thahatna hong pia thei lo a, Pasian’ hehpihna bek in i lungsim hong thahatsak thei hi. Jew biakbuk-ah na a sem siampite in biakna tau tungah a kipia biakna sate nek nading thu nei lo uh hi. Jew Siampi Lianpen pa in mawhna hangin biak nadingin Siangtho Pen Munah a ganhing sisan paipih a, ahi zongin a ganhing pumpi pen giahphual pualamah kihaltum hi. Tua mah bangin Jesuh in zong ama sisan tawh mite’ mawhna a siansak theih nadingin khuapi pualamah a si hi. Tua ahih manin eite zong a pualamah pai-in Jesuh tawh maizumna thuakkhawm ni. Eite a dingin hih leitungah a kip khuapi om lo ahih manin a hong piang lai ding khuapi a zong ihi hi. Tua ahih manin Jesuh tungtawnin amah i biakna-in i kam tawh ama min pulakin Pasian phat tawntung ni. Khatlekhat tungah thuhoih kibawlin na kihuh ding uh mangngilh kei un. Hih bang gamtatnate pen Pasian a lungkimsak thei biakna ahi hi. Na makaite uh thu na mang unla, a genna uh bangin na gamta un. Pasian kiangah amaute in a nasepnate uh a pulak ding uh ahih manin tawlnga loin note hong lunghimawh tawntung uh hi. Amaute’ thu mang le-uhcin a nasepna uhah lungdam mahmah ding uh a, mang kei le-uhcin dah pipi-in na sem ding uh hi. Dah pipi-in a nasepna uh note a dingin zong phattuamna a om tuan hi lo hi. Kote a dingin thu hong ngetsak niloh un. A tawntungin na a manin sepnopna lungsim nei ka hih manun ka lungsim uhah kisuanna om loin siang mahmah hi. Note kiangah Pasian in kei hong paisakkik baih theih nadingin nakpitakin thu na na nget nading uh ka hong thum pha nuam hi. Ama sihna hangin Tuucing Lianpa suakin, a sisan tawh tawntung thuciamna a kipsak i Topa Jesuh pen sihna panin a thokiksak, eite tungah nopsakna a hong pia Pasian in, ama deihna bangin na na septheih nadingun a kisam thuhoihte khempeuh note tungah hong guanin, ama lungkimna bangin i gamtat theih nadingin Jesuh Khrih hangin eite sungah na hong sem hen la, Khrih in a tawntungin minthanna ngah paisuak tahen. Amen. Sanggamte aw, hih ka hong laigelh pen sau khollo ahih manin hih ka hong hanthotna thute limtakin na ngaih nadingun ka hong thum hi. I sanggampa Timoti zong thong panin a suahtak khitna thu ka hong theisak nuam hi. Amah hong pai baih nakleh note kiangah ka hong pai ciangin ka hong tonpih ding hi. Na makaite uh le Pasian’ mi khempeuh na hopihsak un. Italy gam panin a hong pai mite in note hong hopih uh hi. Note khempeuh tungah Pasian’ hehpihna thupha hong tung tahen. Amen. Pasian le Topa Jesuh Khrih sila keimah James in Leitung mun khempeuhah kithehthangin a om minam sawm le nihte tungah hopihna lai ka hong gelh hi. Sanggamte aw, thuhaksa a tuamtuam na thuak uh ciangin lungdam nadingin na ngaihsun zaw un. Tua bangin na upna uh hong kize-etna na thuakzawh uh ciangin na kipna uh hong kilangsak ahihna thu na thei uh hi. A kisam bangmah om loin a cingtaak na suahtheih nadingun na thuakna uh hangin a tawntungin na kip paisuak nadingun na ngaihsun un. Pilna kisam na om uhleh Pasian kiangah ngen un. Mi khempeuh tungah Pasian dikin cingh mahmah ahih manin hong pia ding hi. Ahi zongin na nget uh ciangin hong pia takpi ding hi, ci-in muanna tawh na ngen un. A muanglah mite pen huih nunna lam peuhah a kinil kawikawi tuihualte tawh kibang lel hi. Miniamte in liatna a ngah ciangin lungdam uh hen. Mihaute zong a niam uh ciangin lungdam veve uh hen. Lopa pak bangin a mangthang veve ding ahi uh hi. Ni hong suakin a sat ciangin lopate vul a, a paakte pulhin a hoihnateng a bei mah bangin a haute zong manlahin a om laitakun siatna a thuak ding uh ahi hi. A hoih takpi mah hiam, ci-in sinna a thuak ciangin a nangzote a hampha mahmah ahi hi. Tua bangin a nangzote in, amah a itte tungah Pasian in a piak dingin a ciam nuntakna lukhu a ngah ding uh hi. Mi khat peuhpeuh in tua bang ze-etna a thuak ciangin, “Pasian in kei hong ze-et hi,” ci-in ngaihsun kei hen. Siatna in Pasian ze-et ngei lo a, mite a siat nadingin Pasian in zong ze-et ngei lo hi. Mi khatpeuh in ama deihna zui-in a gamtat ciangin mawhna a piangsak ahi hi. Lungsim utna a gol semsem ciangin mawhna hong piang a, mawhna hong cingtaak ciangin sihna hong piang hi. Sanggamte aw, mite’ khemsa-in om kei un. A hoih thu le na khempeuh, Pasian kiang panin hong pai hi a, vantung khuavak a Piangsak pa ahih manin amah kikheel ngei lo a, amah a kihei manin khua zong mial tuan lo hi. Ama piansakte khempeuh lakah eite a masa pen i suahtheih nadingin thuman thutak zangin ama utthu tawh eite a hong piangsak tawm ahi hi. Sanggamte aw, note in na theih ding uh ka deih thu in: Thu kigen khempeuh hoihtakin ngai pahpah un. Ahi zongin pau pahpah kei unla, heh pakpak kei un. Mihingte’ hehna in Pasian’ sep ding thuhoihte khaktan hi. Tua ahih manin ngeina hoih lote le gamtat siate khempeuh nusia unla, Pasian’ thu mangin note’ lungsim sungah a hong koih thu zui un. Tua thu in note hong honkhia thei hi. Nomau kikhem tawmin thu zak bek tawh maisak kei unla, na zak bangun zui-in semzaw un. Mi khat in thu a zak bek tawh maisakin a zakna bangin a zuih kei leh limlangah a maitang a ki-en mipa tawh kibang bek hi. Limlangah a ki-en mipa in amah hoihtakin a kimuh khit ciangin paikhia a, bangci pian ka hi hiam cih a mangngilh pah hi. Ahi zongin mite a suaktasak thei thukham cingtaak hoihtakin a et khit ciangin a thu ngai-in a mangngilh pah hi loin, hoihtakin ngaihsun tawntungin a zuite pen a sepna khempeuh uhah Pasian in thupha a pia ding hi. Mi khatpeuh in Khristian ka hi hi, ci napi-in kampau a kidopzawh kei leh amahmah a kikhemtawm hi lel a, ama biakna neih a mawkna ahi hi. Pa Pasian in a siangtho biakna citakin a ngaihsut thu in: Tagahte le meigong numeite a haksatna uhah hoihtakin kemin, leitung siatnate tawh kisawhkha loin siangtho takin omna ahi hi. Sanggamte aw, minthanna vang tawh a kidim i Topa Jesuh Khrih umin na om laitakun a pualama kilang pianziate siksanin mi na deidan kei un. Gentehna-in, kham zungbuh bulhin puan manpha a silh mihau khat le puan siasa a silh mizawng khat, note’ kikhopna-ah hong paikhawm leh, limtakin a kizem mipa zahtakbawl zaw-in, “Hih lai-ah tutna nuamah hong tu in,” ci le-uhcin a, ahi zongin mizawng pa kiangah, “Tua lai-ah na ding phot in,” cihna ahi a, “Sual tung hih ka khe kiang khawngah hong tu in,” cihna ahi zongin kam na zat uhleh, mi a deidan na hi uh a, ngaihsutna hoih lo nei-in a gamta na hi uh hi. Sanggamte aw, hoihtakin na ngai un. Pasian a it mite tungah piak dingin a ciam vantung gam a ngah ding le upna thu-ah mihau a suak dingin Pasian in leitung mizawngte a teel hinapi-in, note in mizawngte na simmawhbawl uh hi. Note hong bawlsia-in thukhen zum hong tun pahpahte, mihaute hizaw uh hi. Pasian in note a hong phuah min hoih a gensiate, mihaute mah ahi uh hi. Lai Siangtho sungah, “Nangmah na ki-it bangin na vengte na it in,” ci-in a genna Topa’ Thukham zui le-uhcin a hoih hi pah hi. Ahi zongin mi na deidan uhleh note a khial na hi uh a, Thukham a palsat na hi veve uh hi. Mi khatpeuh in thukham dang khempeuh a zuih hangin khat a khialh nakleh a vekpi-in a khial mah ahi hi. Bang hang hiam cih leh, “Nulepa mawhna na bawl kei in,” a ci pa mah in, “Mi na that kei in,” cithuah lai veve hi. Nulepa mawhna na gamtat loh hangin mi na thah nakleh thukham palsat mah na hi veve hi. Tua ahih manin mi a khahkhia thei thukham tawh kizui-in thukhenna a thuak ding mi bangin kampau-in na gamta un. Bang hang hiam cih leh hehpihna lungsim a nei lote tungah Pasian in thu a khen ciangin hehpih lo ding a, hehpihna lungsim a neite tungah Pasian in thu a khen ciangin a hehpihna in zozaw ding hi. Sanggamte aw, mi khat in, “Upna ka nei hi,” a cih hangin a sepna in a zuih kei leh bang phattuamna om ding ahi hiam? Tua a upna bek in amah honkhia ding ahi hiam? Gentehna-in, na mipih khat peuhpeuh uh annek tuidawn, nikten’ puansilh nei loin haksapi-in om hen la, note khat peuhpeuh in, ama pumpi kisapna bangmah pia lopi-in, “Khualum gilvah takin om in,” ci mawk lel le-uhcin bang phattuamna om ding ahi hiam? Tua ahih ciangin gamtatna in a zui lo upna guak pen a si ahi hi. Ahi zongin mi khatpeuh in, “Mi khat in upna nei a, adang khat in gamtatna nei hi,” ci zenzen leh, gamtatna in a zui lo upna hong lak dih in; keimah in ahihleh ka upna ka gamtatna tawh ka hong lak ding hi, ka ci ding hi. Pasian khat bek om hi, ci-in na um hi. Tua pen hoih mahmah hi. Dawite nangawn in zong tua bangin umin lau-in ling deldel uh hi. Lawmte aw, gamtatna in a zui lo upna pen a hawmpi ahihna thu ka hong lak ding hi. Eite’ pupi Abraham in biakna tau tungah a tapa Isaac a piakna hangin Pasian tawh kipawl thei hi. Tua ahih manin upna le sepna kizom khawm a, sepna in upna a kicinsakna thu na thei uh hi. Lai Siangtho in, “Abraham in Pasian um a, a upna hangin Pasian in mihoihin a sang hi,” ci-in a genna thumanin tung takpi a, Abraham pen Pasian’ lawmpa kici hi. Tua ahih manin, mi khatpeuh in a upna bek tawh hi loin, a sepna tawh a kizuih ciangin Pasian tawh kipawl theihna ngah pan ahihna thu na thei uh hi. Numei paktat Rahab zong tua bangmah ahi hi. Israel mi thukante hoihtakin zin na do-in, lampi dangah ciahsakin na suaktasak a, ama nasepna hangin Pasian tawh kipawl theihna a ngah ahi hi. Tua ahih manin hu a diik lo, hu a sang lo pumpi pen a si ahih mah bangin sepna tawh a kizom lo upna zong a si ahi hi. Sanggamte aw, mite tungah thu a hilh eite pen midangte sangin a khauhzaw-in thu hong kikhen ding ahih manin note tampi sia na suaknuam se kei un. Eite khempeuh a khialthei zelzelte vive ihi hi. Kampauna-ah a khial ngei lo mi a om leh a cingtaak mahmah hi a, a pumpi zong a ukzo mi ahi hi. Sakol in i thu hong mantheih nadingin kamkaih i bulh a, a sakol pumpi buppi i ukzo hi. Teembawte ngaihsun dih un. Teembaw lian mahmah a, huihpi in nakpitakin a mut hangin a hawlpa’ deihna bangin a heina neu khat tawh ki-ukzo hi. Tua mah bangin leii zong i pumpi na sung panin a neu mahmah khat hinapi-in thusia lianpipi piangsak zo hi. Gam khempeuh zong mei-ek neuno khat pan kipanin a kangtum thei hi. Leii pen mei tawh kibang hi. I pumpi na sung panin a neuno khat hinapi-in i pumpi buppi a sia suahthei a, hell khuk sung panin a hong piang mei tawh i nuntakna buppi hong kangtumsak thei hi. Mihingte in gamsa, vasa, a bokvak ganhing le tui sunga om ngasate a kipan ganhing khempeuh zualsakin ukzo uh hi. Ahi zongin siattheih nading gukhal tawh a kidim, a omkhong thei lo leii pen zualsakin a ukzo kuamah om lo hi. I leii tawh eite’ pa ahi Topa i phat thei a, Pasian tawh a kisunin a kibawl i mipihte zong tua i leii mah tawh i samsia thei hi. Kam khat sung panin thupha le thusia pusuak khawm hi. Sanggamte aw, hih bang ahi ding hi het lo hi. Tuinak khat panin tui lim le tui lim lo hong luangkhia khawm thei ahi hiam? Sanggamte aw, theikung in oliv hong gahthei a, leenggui in theipum hong gahthei ahi hiam? Tui-al in tuilim piangsak ngei lo hi. Note lakah pilin thuthei a kisa a om leh kiniamkhiatin pilin, nuntak hoih le gamtat hoih tawh a lahkhiat ding ahi hi. Ahi zongin na lungsim uhah enna, gitlohna, le huaihamna a om leh a zuaugen na hi uh a, pil ing, ci-in kisialh nading bangmah om lo hi. Tua bang pilnate vantung panin a hong pai hi lo a, leitung pilna, kha thu tawh a kisai lo, a dawivai ahi hi. Enna le huaihamna a om nakleh buaina le siatna nam khempeuh tawh kizom pahpah hi. Ahi zongin tunglam panin a kingah pilna a siangtho ahi hi. Mi tawh kilem thei-in dik a, mi tawh kikhawl thei a, hehpihna lungsim nei-in gamtat hoih a, mi lang-et lo a, kineihkhem cihte om lo hi. Kilemna a piangsak mite in lungnuam takin a tuh khaici in hoihna le dikna a piangsak hi. Note lakah a om kitotna le kilaina koi panin hong piang ahi hiam? Deihluatna lungsim na neih manun note’ pumsung a kitoktok niloh ahi hi. Na na deih uh a, ahi zongin nei lo na hih manun mi na thatnuam uh hi. Nate deihna lungsim na nei uh a, ahi zongin ngah zo lo na hih manun kitawngin na kilailawh uh hi. Pasian kiangah na deih uh ngen lo na hih manun a ngah lo na hi uh hi. Pasian kiangah na nget sun uh ciangin zong note’ nopsak nading bek ngenin, na ngaihsutna uh man lo ahih manin a ngah lo na hi uh hi. A citak lo mite aw, leitung tawh kipawlna pen Pasian tawh kigalneihna ahih lamtak thei lo na hi uh hiam? Leitung tawh a kipawl mite pen Pasian tawh a kigalneih dingin a kibawlbawl ahi uh hi. Lai Siangtho sungah, “Eite sungah a hong guat kha pen Pasian in ngai mahmah hi,” ci-in a kigelhna a mawkna-in a kigelh sa na hi uh hiam? Lai Siangtho in, “Pasian in a kihisakte nial a, a kiniamkhiatte a hehpih hi,” a cih mah bangin Pasian’ hong hehpihna lianzaw hi. Tua ahih manin Pasian’ thu na mang un. Dawimangpa na nial un. Nial le-uhcin no kiang panin taikhia ding hi. Pasian kiang nai un. Amah in zong hong nai ding hi. Mawhneite in na khut uh silsiang unla, a kineihkhemte in na lungsim uh siangsak un. Dahin, thumin, kap un. Na nuihnate uh kahna suaksak zaw unla, na lungdamnate uh maigumna suaksak zaw un. Topa mai-ah kiniamkhiat un. Tua hileh amah in hong lian bawl ding hi. Sanggamte aw, khatlekhat kigensia kei un. A mipihte gensia-in thu a khente in Thukham gensia-in thu a khen ahi hi. Thukham na gensiat uhleh Thukham a zui hi loin thu a khen na hi uh hi. Thukham a pia pa le thu a khen pa pen Pasian bek hi a, amah bek in hong honkhiazo a, hong susiazo hi. Tua ahih manin bang hangin na mipihte uh gensia-in thu a khenthei dingin kingaihsun zenzen na hi uh hiam? Tuni ahih kei leh zing ciangin tua khua tua khua-ah va pai-in, kum khat bang va omin, sumbawlin a meet tampi va ngah ni, a ci mite aw, ka thugen hong ngai dih un. Zing ciangin na nuntakna uh bangci ding cih nangawn na thei kei uh hi. Meiilum tawlkhat sung kaii-in a mangthang pak tawh a kibang lel na hi uh hi. Note in, “Topa in hong thukimpih nakleh nungta-in tua bang tua bang i sem ding hi,” na cih ding uh hi bek hi. Ahi zongin note kihisakin na kisial uh hi. Tua bangte hoih het lo hi. A hoih a manin gamtat ding thei napi-in a gamta lote a khial ahi hi. A haute aw, tu-in ka thugen hong ngai dih un. Note tungah a hong tung ding lungkhamna hangin kapin thum un. Na neihsate uh muattumta a, na puante uh nget in netum khinta hi. Na ngun le na khamte uh kekseu khinta hi. Hih kekseuna pen note langah teci suak a, mei in a kattum bangin na sa uh hong netum ding hi. Hih a hun nunung ciangin tu-a bangin a piang dingin neihsa a khol na hi uh hi. Na lo uh a hong khawhsakte a thaman pia lo na hih manun tu-in amaute’ phunna za un. Anla dingin na sawl uh mite’ phunna Vanglian Topa in za khinta hi. Hih leitung na nuntak sungun uang nekin na noptat mahmah uh hi. Note hong kigawh hun ding kiginna-in a kithausak phitphet na hi uh hi. A thuman mite mawhsakin na that uh a, amaute in na thu uh hong nial zo lo uh hi. Tua ahih ciangin sanggamte aw, Topa hong pai matengin lungduai takin om un. Lo khote in zong a lo panun an a ngahtheih nadingun lungduai takin khuapi guah le tuk guah a ngakna thu thei un. Note zong na lungduai un. Topa hong pai ding hun naita ahih manin na lungsim uh na thahatsak un. Sanggamte aw, Pasian in note tungah thu hong khenkhak loh nadingin khatlekhat na kiphunsan kei un. Thukhen ding pa hong nai mahmah ta a, hong tung dektak ta hi. Sanggamte aw, Topa’ min tawh thu a gen kamsangte na phawk un. Gimna a thuak laitakun lungduai-in a thuaknate uh na etteh un. Tua bangin a thuak mite a hampha mahmah hi, i ci hi. Job in a thuakna-ah a lungduaina na thei uh a, Topa in dikna le hehpihna nei ahih manin a tawpna-ah Job tungah a piak thuphate na thei uh hi. Hih thute khempeuh banah, sanggamte aw, thu khat peuhpeuh na gen uh ciangin kiciam se kei un. Vantung ahi a, na khat peuhpeuh tawh ahi zongin kiciam kei un. Pasian’ thukhenna na thuakkhak loh nadingun a hite, “Hi,” ci lel unla, a hilote, “Hilo,” na ci lel un. Lungkhamna a thuak na om uhleh thu na ngen un. A lungdam na om uhleh phatna la na sa un. A cina na om uhleh pawlpi upate sam un. Amaute in thu hong ngetsakin Topa min tawh sathau hong zut ding uh hi. Upna tawh thu a kinget ciangin Topa in cinate noptuamsakin, damsak ding a, mawhna nei ahihleh zong a mawhna maisak ding hi. Tua ahih manin na ci uh a dam nadingin khatlekhat tungah na mawhna uh kipulakin thu na kingetsak ta un. Mihoihte’ thungetna in vang nei a, na lianpi semzo hi. Elijah zong eite mah bangin mi mawkmawk hinapi-in, guah a zuk loh nadingin lungsim takpi tawh thu a nget ciangin kum thum le kum lang sung tua gam sungah guah zu lo hi. Tua ciangin guah a zuk nadingin thu ngenkik leuleu a, van panin guah hong zu-in, leitungah nektheih ding gah le teh hong piangkik hi. Sanggamte aw, note khatpeuh thuman lampi panin pialkha-in, adang khatpeuh in thuman lampi-ah a tun pihkik theih leh, tua bangin a khial mite lam manah a tunpihkik mipa in a khial mite a sih nading panin honkhia-in, mawhna tampi a mai nadingin na a sempa ahihna thu na phawk un. Jesuh Khrih sawltak keimah Peter in Pontas gam, Galatia gam, Kappadosia gam, Asia gam, le Bithynia gamah kithehthangin peemta-in a om mite kiangah lai ka hong khak hi. Pa Pasian in ama ngimnasa bangin note hong teel a, note in Jesuh Khrih’ thu mangin, ama sisan tawh sianthona a ngah dingin a Kha Siangtho tawh note mi siangtho-in a hong bawl hi. Note tungah hehpihna le nopsakna thupha hong tam tun semsem tahen. I Topa Jesuh Khrih’ Pa Pasian tungah lungdam ni. Ama hong hehpih mahmahna hangin sihna panin Jesuh Khrih a thawhkik sakna tawh eite tungah nuntakna thak a hong pia hi. Tua ahih manin i lametna kiam ngei lo a, Pasian in ama mite a dingin a koih thuphate i ngah nadingin lamenin i om hi. Tua thuphate sia ngei lo, nin ngei lo, mual ngei loin a om tawntungna vantungah note a dingin a hong koihsak hi. Note’ upna hangin nitawp ni ciangin na ngah ding uh hotkhiatna nomau-a’ ahihna a kilatsak nadingin Pasian in ama vangliatna tawh a hong kepsak ahi hi. Tua ahih manin tu laitakin mite’ bawlsiatna a tuamtuam na thuak manun tawlkhat na lungkham uh ahi zongin hih bang thuakna hangin lungdamzaw un. Hih bang thuaknate in a um takpi mah na hihna uh hong kilangsak hi. A siathei khamte nangawn, a hoih taktak mah ahi hiam, ci-in mite in mei tawh sin uh ahih manin, kham sangin a manphazaw note’ upna zong a kiptak mah ahi hiam, ci-in Pasian in hong sin ding mah ahi hi. Tua bangin na thuakzawh uhleh Khrih hong kilat Ni ciangin phatna, minthanna, le pahtawina na ngah ding uh hi. Amah mu ngei lo napi-in na it uh a, amah mu ngei lo napi-in a thu umin kama genzawh loh zah dongin nakpitakin na lungdam uh hi. Tua bangin na upna uh hangin kha thu-ah hotkhiatna a ngah na hi uh hi. Kamsangte in hih hotkhiatna thu mah kanin ngaihsut belin nei uh a, Pasian in note tungah a hong piak ding thupha mah, kamsangte in gen belin a neih uh ahi hi. Khrih in gimna thuakin, tua khit ciangin minthanna a ngah nading thu Kha Siangtho in a gen ciangin, amaute sungah a om tua Khrih’ Kha Siangtho in kua a cihna hi a, bang hun ciang hi ding hiam, ci-in a kankan uh pen tuhun thu a gen ahi hi. Vantung panin a hong kisawl Kha Siangtho’ vangliatna tawh thu a gen thupuakte’ tung panin na zak uh Thute mah kamsangte in a gen laitakun, tua a thugente uh amaute a’ ding hi loin note a’ ding ahihna thu, Pasian in tua kamsangte tungah a na genzo hi. Vantung mite nangawn in hih thute a theihtelnop khat uh ahi hi. Tua ahih manin na lungsim uh ki-ukin a kigingsa-in om unla, Jesuh Khrih hong kilat ni ciangin na ngah ding uh hehpihna thupha ngaihsutin nei un. Pasian’ thu na mang unla, na theih nai loh uh hun lai-in na gamtat ngei uh bangin na gamta nawn kei un. Note a hong sampa a siangtho ahih mah bangin note zong na gamtatna khempeuh uhah na siangtho un. Lai Siangtho sungah zong, “Keimah siangtho ka hih manin note zong na siangtho un,” na kici hi. Mi khempeuh amau gamtatna tawh kizui-in a kibang kimin thu a khen Pasian kiangah thu na nget uh ciangin, “Pa aw,” ci na hih manun hih leitungah na om laiteng uh amah zahtakin om un. Na pu na pate uh nuntakzia, bangmahin a kimang lo nuntakna panin a hong suahtaksak nadingin Pasian in note’ man dingin a piak pen a man a kiam thei ngun le khamte bang hi lo a, tuuno bangin paubaanna a om lo, a manpha mahmah Khrih, biakna-in a hong kipiakna tawh Pasian in note a hong suaktasak ahi hi. Pasian in hih bang dingin leitung pianma pekin Khrih a teelsa hi a, note a hong khualna-in tuhun nunung ciangin Pasian in note kiangah amah a hong lakkhia pan ahi hi. Sihna panin amah hingkiksakin minthanna a pia Pasian, ama hangin muang thei na hih uh manin, na up na muan na lamet uh Pasian ahi hi. Tu-in lungdamna thuman na zuihna hangun note kisiansuah khinin, na thu uppih mite uh lungsim tak tawh itthei khinta na hih manun na lungsim khempeuh uh tawh limtakin na ki-it un. A sithei nu le pate sung pan hi loin a sithei lo nu le pate sung panin a nungta tawntung Pasian’ thu tawh naungek bangin a suakkik na hi uh hi. Tua ahih manin Lai Siangtho sungah, “Mihingte, lopa tawh kibang a, a minthannate uh lopa pak tawh kibang hi. Lopate vulin paakte pulh a, ahi zongin Topa’ thu kip tawntung hi,” ci-in na kigelh hi. Note kiangah a hong kihilh Lungdamna Thu pen tua Topa’ thu ahi hi. Tua ahih manin gitlohna, zuauna, kineihkhemna, huaihamna, le kigensiatnate na omsak nawn kei un. Naungek suakcilte na bang unla, note khangto-in hotkhiatna na ngahtheih nadingun kha thu tawh kisai nawizu siangtho duh belin na nei tawntung un. Bang hang hiam cih leh note in Topa’ hoihna thu na thei khinzo uh hi. Mite in bangmahin kimang lo hi, ci-in a nilkhiat hangin Pasian in a manpha hi, ci-in a teel, nuntakna a piathei suangpi ahi Topa kiangah na pai un. Note zong nuntakna a piathei suangpi mah bangin kha thu tawh kisai biakinn lam nadingin na kizang unla, Jesuh Khrih hangin Pasian’ santheih biaknate a pia dingin a siangtho siampi na suak un. Bang hang hiam cih leh Lai Siangtho sungah, “A manpha suang khat ka teelkhia a, innkiu suang dingin Zion-ah ka koih hi. Amah a umte, zahhuai ngei lo ding hi,” ci-in na kigen hi. Tua ahih manin no a um mite a dingin amah pen a manpha suang hi a, ahi zongin amah a um lote a dingin, “Innlamte in a nilkhiat suang, innkiu suang bulpi a suak khinta hi,” a cihna leh, “Hih suang pen mite’ hoina suak ding a, hih suangpi pen a pukna uh suak ding hi,” a cihna bang hi ding hi. Amaute in lungdamna thu um lo uh ahih manin a puk uh ahi hi. Pasian in a tuaci ding mahin a deih ahi hi. Ahi zongin note pen Pasian in a hong teelkhiat minam, Kumpi siampi pawl, a siangtho minam, Pasian’ mite na hi uh a, khuamial sung panin a lamdang mahmah ama khuavak sungah a hong samkhia pa’ nasepna a lamdangte a genkhia dingin Pasian in a hong teel mite na hi uh hi. Nidangin Pasian’ mi na hihloh uh hangin tu-in ama mi na hi uh a, nidangin Pasian’ hehpihna na theih loh uh hangin tu-in ama hehpihna na ngah uh hi. Ka itte aw, hih leitungah gamdang mi, a peempak bangin kingaihsun unla, na kha nuntakna uh tawh a kilehngat pumpi’ deihnate na kikham un. Gentail mite in note mi hoih lo hi, ci-in hong gensia nuamin mawhna hong zon ciangin, note’ hoihna bekbek mu-in, Pasian a hong pai Ni ciangin a phattheih nadingun amaute lakah na gamtatna uh hoihsak tawntung un. Topa’ hangin leitung ukna aana neite’ thu na mang un. Kumpipa’ thu ahi a, a gamtat siate gim pia-in, a gamtat hoihte a pahtawi dingin kumpipa in a sawl thuneite khempeuh’ thu ahi zongin na mang un. Bang hang hiam cih leh thu thei loin a mot paupau mihaite, na gamtat hoihna un a daihsak ding, Pasian’ deihna ahi hi. Sila ahi lo mi bangin gamta unla, ahi zongin gitloh gamtat nadingin na suahtakna uh zang loin Pasian’ sila bangin na gamtazaw un. Mi khempeuh zahtak bawlin thu uppih mite na it unla, Pasian zahtak bawlin kumpipa zong na zahtak un. Nasemte aw, na tote uh thu na mang un. A thudik a migi na tote bek uh a zahtak hi loin a gilo na tote uh thu zong na mang un. Pasian’ thu na ngaihsutna uh tawh a kilawm lopi mahin gimna na thuak uhleh na thuakna uh hangin Pasian in thupha hong pia ding hi. Note na gamtat khialhna uh hangin hong kisat ciangin lungduai takin na thuak manun bangmah phattuamna om lo hi. Ahi zongin a manin gamta napi-in gimna na thuak uh ciangin lungduai takin na thuak uhleh Pasian in thupha hong pia ding hi. Khrih mahmah in zong note a dingin thuakin, ama khekhap na zuihtheih nadingun etteh ding lim hong nusiat ahih manin hih bangin a thuak ding mahin Pasian in note a hong sam ahi hi. Khialhna bangmah gamta lo a, zuau a gen lam zong kiza ngei lo hi. Amah a kizahko ciangin na ko thuk lo hi. Gimna a thuak ciangin na tawnggawp lo a, a manin thu a khen Pasian muanin a na nei hi. Eite, mawhna lamah misi bangin, thuman lamah nungta-in i gamtat theih nadingin Khrih mahmah in eite’ mawhna ama pumpi mahmah tawh singlamteh tungah a pua hi. Ama liamna hangin note in damna na ngah uh hi. Note, tuu bangin a gammang na hi uh a, ahi zongin note’ kha nuntakna hong Cingin hong Kem pa a zui dingin a hong kiciahpih kik khin na hi uh hi. Tua mah bangin zite aw, na pasalte uh Pasian thu um lo ahihkhak leh na gamtatna hangun Pasian thu a uptheih nadingun na pasalte uh thu na mang un. Kampau kul sese loin, na gamtat hoihna uh a muh uh ciangin Pasian thu hong um ding uh hi. Na hoih nadingun puatham kizepna ahi sambawlna, kham le suangmanpha tawh kizepna, puan hoihnono silhnate na bulphuh kei unla, Pasian’ muhna-ah a manpha mahmah ahi lungsim puakzia, a tul thei lo sunglam hoihna na bulphuh zaw un. A beisa hunah Pasian muangin thu um numeite in a pasalte uh thu mangin, tu-a bang danin a hoih nadingun a kibawl uh hi. Sarah zong tu-a bangmahin gamta a, a pasal Abraham’ thu mangin, “Topa aw,” a ci hi. Note zong a hoihin gamta-in, bangmah launa nei loin na om nak-uhleh tu-in Sarah’ tanute na hita uh hi. Tua mah bangin pasalte aw, note sangin na zite uh a thahat lo zawdeuh ahihna thu na phawk un. Note mah bangin Pasian’ piak nuntakna a ngahte ahih uh manin na zite uh zahtak bawl un. Tua hileh na thungetna uh bangmah in hong nawngkaisak lo ding hi. A tawpna-ah kong gennop thu in: Lungsim le ngaihsutna kikhat nei-in unau ki-itna lungsim nei unla, migi-in kiniamkhiat un. Hong bawlsiate siatna tawh thukkik loin hong samsia mite samsia kik kei unla, Pasian in note a hong sap lai-in thupha a hong piak dingin hong ciamsa ahih manin, hong siat bawlte thupha tawh na thukzaw un. Bang hang hiam cih leh Lai Siangtho in, “Nuntak nuam deihin, hunhoih a zang nuamte in kamsia pau kei uh hen la, zuauthu gen kei ta uh hen. Gitlohna pelhin hoih gamtat uh hen la, mi tawh kilem ding hanciamin kilem theih nadingin hahkat ta uh hen. Topa in a thuman mite mu a, amaute’ thungetna pia tawntung hi. Ahi zongin a gamtatsia mite Topa in a langbawl hi,” na ci hi. Note in a hoih gamtat ding utin hanciam le-uhcin kua in hong bawlsia ding ahi hiam? A hoihin na gamtat manun gimna na thuak uhleh zong Pasian in thupha hong pia ding hi. Mite kihta kei unla, lunghihmawh ngaihsut kei un. Na lungsim sung uhah Khrih zahtakbawl unla, amah Topa-in nei un. Note’ lametna thu a hong dong a omkhak leh hoihtakin a genthei dingin kiging tawntung unla, ahi zongin lungnemna le zahtakna lim tawh gen un. Khrih nungzui na hihna hangun na gamtat hoihna uh hong gensia-in hong simmawhbawl a om ciangin a maizum theih nadingun na lungsim uhah kisuanna a om het lo dingin na siangtho om un. Gamtatsia-in i om sangin Pasian’ deihna ahih nakleh i gamtat hoihna hangin gimna i thuak hoihzaw hi. Khrih mahmah zong note a dingin si a, Pasian’ kiangah hong tunpih theih nadingin mihoih khat pen mihoih lote’ mawhna hangin khatvei a si hi. Mite in ama leitung pumpi that a, ahi zongin Pasian in kha nuntakna a pia hi. Tua kha nuntakna tawh va pai-in thongkia-in a om khate kiangah thu a va hilh hi. Noah in teembaw a bawl hun laitakin Pasian in lungduai takin ngak hinapi-in hih kha a nei mite pawlkhat in Pasian’ thu mang lo uh hi. Teembaw sungah a om mi giat bek, tui in a suaktasak hi. Tui pen note a hong honkhia tuiphumna lim hi a, pumpi panin nin sawpkhiatna lim hi loin, Jesuh Khrih thawhkikna hangin lungsim siantho nadingin Pasian’ tungah kamciamna lim ahi hi. Tua Jesuh thawhkikna in note hong honkhia ahi hi. Tu-in vantungah tua Khrih pai khin a, Pasian’ taklamah omin, vantung mite le ukna aana a neite khempeuh tungah a ukin a om hi. Khrih in ama pumpi-in thuak ahih manin note in zong tua bang lungsim mah nei-in na kithakhauhsak ding uh ahi hi. Bang hang hiam cih leh pumpi-in a thuak mite peuhmah, mawhna tawh kisawhkha nawn lo uh hi. Tua ahih manin tu a kipanin na leitung nuntak sung uh mihingte’ deihna bangin gamta loin Pasian’ deihna bangin na gamtat ding uh ahi hi. A beisa hunah dawibiate’ gamtat bangin a hoihkhop khat na gamta khinta uh a, a kilawm loin gamtatna, hukna lanna, zunekna, uangtatna, zukham luatna le a muhdahhuai milim biakna-in na hun uh na beisak uh hi. Tu-in note in dawibiate pawlpih nawn loin ut utin na phengtat loh uh ciangin lamdangsa-in note hong kosia uh hi. Ahi zongin amaute in a site le a hingte’ thu a khen dingin a om Pasian’ mai-ah thudotna thuak ding uh hi. Tua thu hang mahin, midang khempeuh thu a khen mah bangin a leitung nuntakna uhah Pasian in thu a khen khit tei hangin kha nuntakna-ah Pasian mah bangin a nuntak theih nadingun mi sisate kiangah Khrih in Lungdamna Thu a hilh ahi hi. Na khempeuh a bei nading hun hong naita hi. Nomau pumpi ki-uktawm thei-in pilvang unla, hoihtakin thu a ngen thei-in om ta un. Itna in mawhna tampi khuhcip thei ahih manin lungsim takpi tawh khatlekhat ki-it ding thupi ngaihsut pha pen un. Khatlekhat maitai takin zinleleeng na kido un. Pasian’ piak na a zatsiamte bangin Pasian’ kiang panin na ngah uh nate, midangte’ phattuam nadingin na zang un. Minthanna le vangliatna a nei tawntung Pasian in Jesuh Khrih hangin thu khempeuhah phatna a ngah theih nadingin thuhilhte in Pasian’ thu na hilh unla, na a semte in Pasian’ piak thahatna tawh na sem un. Amen. Ka itte aw, note’ upna hong kize-etna-in gimna haksate na thuak manun a thu lamdangpi-in ngaihsun kei unla, na lungkham ngaihsut kei un. Tua bangin Khrih tawh thuakkhawm le-uhcin ama minthanna hong kilat ciangin note lungdam mahmah ding na hih manun, tua banga na thuakna uhah na lungdamzaw un. Khrih nungzui hihna hangin mite’ kosiatna na thuak uhleh note sungah a minthang Kha Siangtho ahi Pasian’ Kha Siangtho hong om ahihna lim ahih manin a hampha mahmah na hi uh hi. Ahi zongin mi thahna, guktakna, gamtat khialhna, le thusia bawlna hangin gimna a thuakte na hikha kei un. Ahi zongin Khristian hihna hangin gimna na thuak uhleh kuamah in maizum ngaihsut kei unla, Khrih min hangin na thuak manun Pasian tungah na lungdam un. Tu-in thukhen kipat hun ding hong tungta-in Pasian’ mi eite tungah hong kipan ahihleh Pasian kiang panin hong pai Lungdamna Thu a um lo mite a dingin bangzahin lungkhamhuai ding ahi hiam? Lai Siangtho in, “Mi hoihte kihonkhia zo liailiai bek ahihleh Pasian a um lo mawhnei mite bang suak ding ahi hiam?” na ci hi. Tua ahih ciangin Pasian’ deihna bangin gimna a thuak mite gamtat hoihin, a kamciam a tangtungsak tawntung hong Piangsak pa muangin ama khut sungah a ki-ap ding uh ahi hi. Keima pumpi mahmah zong pawlpi upa hi-in, Khrih thuakna zong ka mit tawh mu-in, mailam hunah a hong kilang ding minthanna zong a ngah ding pa ka hihna tawh note lakah a om pawlpi upate kiangah ka hong thum nop thu in: Pasian in note’ khut sungah a hong piak tuuhonte hoihtakin na cing unla, ut lo pipi hi loin, Pasian’ hong deih bangin utna lungsim takpi tawh na cing un. Sum ngahnopna bek tawh a sem hi loin utna lungsim tawh a semte na hi un. Note’ kep dingin a hong kipia tuute, aana neihna tawh a cing hi loin tuute’ etteh dingin a gamtate na hi un. Tuucing pipa hong pai ciangin a mual ngei lo minthanna lukhu a hong pia ding hi. Tua mah bangin no khangnozaw deuhte in zong a khanghamte’ thu na mang un. Lai Siangtho in, “Pasian in a kiphasak mite nial a, a kiniamkhiat mite a hehpih hi,” a cih mah bangin na vekpi-un kiniamkhiatna puan bangin silhin, khatlekhat na na kisepsak un. Pasian in ama hoihsak hun ciangin note hong laptoh theih nadingin a thahat Pasian’ khutnuai-ah kiniamkhiatin na om un. Pasian in note hong kem ahih manin na lungkhamnate khempeuh uh ama kiang tunpih un. Note pilvangin khua phawk un. Na gal uh ahi Dawimangpa, humpinelkai bangin a nektheih ding zongin vak kawikawi hi. Leitungah thu um dang khempeuh in zong note’ thuak mah bangin a thuak ahihna thu thei unla, na upna uhah kipin Dawimangpa na nial un. Tawlkhat na thuak khit uh ciangin, Khrih tawh na kipawlna hangun tawntung minthanna a ngah dingin note a hong sam, hehpihna kicingin a nei Pasian in note a cingtaakin hong bawl ding a, kipna, thahatna, bulkip kician hong pia ding hi. Tua Pasian in a tawntungin ukna vangliatna nei paisuak tahen. Amen. Thu upna sungah mi citakin ka ngaihsut Silas’ huhna tawh hih lai tomno gelhin amah ka hong puasak hi. Hih thute pen Pasian’ hong hehpihna taktak hi, ci-in teci pangin note ka hong hanthawn hi. Tua ahih manin hih thute-ah kipin om un. Note mah bangin Pasian in a teel, Babylon khua-a om pawlpi mite in hopihna kam hong khak uh a, ka tapa Marka in zong note hopihna kam mah hong khak hi. Khristian ki-itna tawh khatlekhat kinamin na kihopih un. Khrih thu um note khempeuh tungah nopsakna thupha hong tung tahen. Jesuh Khrih nasem le sawltak ahi keimah Simon Peter in: Eite’ Pasian le Honpa ahi Jesuh Khrih a thumanna hangin kote’ upna zah mahin upna manpha a nei mite tungah lai ka hong khak hi. Pasian le i Topa Jesuh na theihna uh hangin hehpihna le nopsakna thupha note tungah tampi tak hong tung tahen. Ama minthanna le a hoihnate a neikhawm dingin a hong sampa i theihna hangin Pasian’ deih bangin biakna mantak i nuntak theih nadingin ama vangliatna in eite’ kisap na khempeuh a hong pia hi. Amah in piak dingin a hong ciam a manpha mahmah nate hih bangzia-in hong pia a, hih ama hong piak nate hangin leitungah a om siatna a piangsak thei duhluatna le deihluatnate panin na suakta uh a, Pasian’ pianziate na nei uh hi. Hih thu hangin na upna ban uhah gamtat hoihna na behlap unla, na gamtat hoihna uh thutheihna tawh na behlap un; na thutheihna uh pumpi ki-ukzawhna tawh na behlap unla, na pumpi ki-ukzawhna uh thuakzawhna tawh na behlap un; na thuakzawhna uh Pasian’ deih bangin gamtatna tawh na behlap unla, Pasian’ deih bangin na gamtatna uh sanggam ki-itna tawh na behlap un; na sanggam ki-itna uh itna thukpi tawh na behlapzawh nadingun na hanciam un. Hih bang hoihnate a kicingin na neih uhleh i Topa Jesuh Khrih na theihna uhah thahatin kimanna na nei ding uh hi. Ahi zongin hih bang hoihna a nei lo mite pen mittaw-in a gamla a mu thei lo mite hi a, a mawhna lui uh panin a siangkhin ahihlam uh zong a mangngilh ta ahi uh hi. Tua ahih manin sanggamte aw, Pasian in note hong sapna le hong teelna-ah a kip taktak na hih nadingun hahkat mahmah un. Tua bangin hahkat le-uhcin na puk ngei kei ding uh hi. Tua hileh eite’ Topa le Honpa Jesuh Khrih Uk tawntungna sungah nuamtakin na lut thei ding uh hi. Tua ahih manin note in hih thute thei khinin, na theihsa uh thumanah kiptakin na omkhin uh ahi zongin a hong phawksakkikkik ka hi hi. Ka nuntak laiteng hih thute ka hong phawksakkikkik ding thuhoih khat hi, ci-in ka ngaihsun hi. I Topa Jesuh Khrih in teltakin hong genkhin ahih manin hih leitung pumpi ka nusiat baih nading thu ka thei hi. Tua ahih manin ka sih khit ciangin hih thute na phawkkik kik theih nadingun ka hihtheih zahin ka hanciam ding hi. I Topa Jesuh Khrih a vangliatna le a hong paikik nading thute note kiangah ka hong gen uh ciangin mihingte’ phuahtawm tuanthute siksanin a hong gen hi loin, ka mit mahmah uh tawh ka muh uh a vangliatnate a hong gen ka hi uh hi. Vanglian Minthang pa in, “Hih pen ka it ka Tapa hi a, ama tungah ka lung a kim mahmah hi,” ci-in genin, Pa Pasian in ama tungah minthanna vang le pahtawina a piak laitakin komau pumpi mahmah tawh a om ka hi uh hi. Mual siangtho tungah amah tawh ka omkhawm laitakun vantung panin hong ging awte komau mahmah in ka za uh hi. Tua ahih manin kamsangte’ gen thute a man taktak ahihna thu ka teltheih uh hi. Note’ lungsimah Zingsol hong suakin khua a hong vak matengin khuamial lak a mei taang bangin hih thute ngaihsun le-uhcin hoih mahmah ding hi. Na phawk ding uh a thupi mahmah khat in: Lai Siangtho sunga om thugen kholhnate, kuamah in ama pilna tawh a khiatna gen thei lo hi. Bang hang hiam cih leh mihingte in a deih manin mailam thugenkholh theihna a kingah hi lo a, Kha Siangtho’ sawlna tawh Pasian’ kiang panin a hong pai thute a kigen ahi zaw hi. Mite lakah kamsang man lo a omngei mah bangin note lakah sia man lo hong om ding hi. Siatna a piangsak thei thuhilhna a man lo hong lutpih simin, amaute mahmah a tankhia Topa nangawn nial ding uh hi. Tua ahih manin thakhat thu-in siatna thuaklawh ding uh hi. Tua bang hinapi-in mi tampi tak in amau’ gamtat hoih lohna zui ding uh a, tua bangin amau gamtatna hangin mite in thuman lampi gensia ding uh hi. Hih sia man lote in a huaiham manun note kiang panin sum a ngahtheih nadingun phuahtawm thu hong gen ding uh hi. Ahi zongin sawtpek a kipanin amaute’ thu a Khen ding pa a kigingsa-in om niloh a, amaute a Susia ding pa in en gige hi. Bang hang hiam cih leh vantung mite nangawn in khialhna a neih ciangin Pasian in khahkhong loin hell khuk sungah khia a, Thukhen Ni hun dong ngakin khuamial sungah kol bulhsa-in a omsak hi. Pasian in tanglai mite khahkhong loin amah a um lo mite, tuiciin tumsak a, thuman thutak a hilh Noah le adang mi sagih bek suaktasak hi. Pasian in Sodom le Gomorrah khuapite tungah thu khenin mei tawh haltum a, Pasian a um lo mite’ thuak nading limin a bawl hi. Ngeina bangin a gamta lo mite in Lot a lungkhamsakna panun Pasian in mihoih Lot a honkhia hi. Tua mihoih pa, amaute lakah teng a, nisimin amaute’ gamtat hoih lohnate za-in mu tawntung ahih manin lunggim mahmah hi. Tua ahih manin Topa in tua bang mihoihte a gimna uh panin suakta sakin, tua bang migilote Thukhen Ni hun dongin gimna pia-in a koihcip theih nading siamna a nei hi. Pasian’ thu nialin amau pumpi deihna zui-in a gamta mite gim pia phadiak hi. Hih sia man lote kiphasakin hangsan mahmah uh a, minthanna a nei vantung a omte zahtak hetloin gensia ngam uh hi. Hih sia man lote sangin hatzaw-in a vanglianzaw vantung mite nangawn in Topa’ mai-ah minthanna a nei vantung mite gensia ngam lo, mawhsak ngam lo uh hi. Ahi zongin mat ding le thah dingin a piang gamlak ganhing gilote bangin a pianpih lungsim uh zui-in gamta uh a, a theih loh uh thute a gensia uh hi. Tua ganhingte mah bangin amaute kisusia ding a, mite a gimsak mah bangun amaute tungah gimna kipia ding hi. A ut bangbangun suntangpi-in gamtat ding nuam a sa uh hi. Tua bang mite in note tawh ankuang hong umkhawmin, a zuau gamtatnate uhah nuamsa-in a om uh pen amaute a dingin a zumhuai mahmah ahi hi. Numei bekbek etnopin nei uh a, a mawhnopna lungsim uh kam thei lo hi. Upna cingtaak lo mite zol belin nei uh a, huaihamna lungsim bekbek a nei uh hi. Tua bang mite, Pasian’ samsiat mite ahi uh hi. Thuman lampi nusia-in gammang uh a, a man loin gamtatna tawh sum a ngah nuam Beor’ tapa Balaam’ gamtat bangin gamta uh hi. Balaam in ama mawhna hangin taiina a thuak hi. A pau thei lo la, mihing bangin hong pau a, kamsang Balaam’ haitatna a khawlsak hi. Hih bang mite pen a kangcip khinsa ciktui, huih in a mutkhiat meiipi tawh kibang uh a, Pasian in amaute’ om nadingin khuamial sahpi omna mun a koih kholhsak hi. Amaute kiphasakin haipau uh a, a khial gamtat mite sung panin a suakta khin liailiai zo mite, leitung pumpi deih bangin a gamtat nadingun a zol uh hi. Amaute pen siatna a piangsak thei zongsatna lelin sila hinapi-un mite tungah suahtak nading thu a gen uh hi. Bang hang hiam cih leh mite pen, a hong zo peuhpeuhte’ sila ihi hi. I Topa le Honpa Jesuh Khrih theihna hangin leitung siatna sung panin suakta khin napi-un, leitung siatna-ah awk kikin a lelte pen, a masa a pianzia uh sangin a nunung a pianzia uh siahuaizaw hi. Tua bang mite in amaute tungah a kipia thu siangthote thei-in a nusiat kik sangun thuman lampi a thei ngei het lo uh hileh amau a dingin hoihzaw thampek ding hi. Paunak-ah, “Ui in a luak nekik hi,” a cihna le, “Vok a kisilsiang khit ciangin buannawng lak mahah bualkik veve hi,” a kicihna thu, amaute tungah a piang ahi hi. Ka itte aw, hih ka hong laigelh a nihveina hi a, lungsim siangtak tawh thu na ngaihsut phatkik theih nadingun a nihvei mahin ka hong phawksakkik hi. Tanglai peka kamsang siangthote’ thugen kholhte le note lakah sawltak na a semte in Topa le Honpa’ thupiakte a hong gensawn uh thute na phawkkik ding uh ka deih hi. A masa penin na theih ding uh panin: Hun nunung lam ciangin amau pumpi deihna zui-in a gamta mi pawlkhat hong om ding a, amaute in note hong zahpih bawlin, “Amah a hong paikik nading a thuciamna a bangci ahi hiam? I pu i pate zong si khinta uh a, leitung piancil a kipanin tu dong na khempeuh a kibang mahin omom lai hi,” hong ci ding uh hi. Amaute in a kitheihmawh bawl uh thu pen: Tanglai pekin Pasian in ama kampauna tawh vantung le leitung na piangsak hi. Tui sung panin tui mah tawh leitung na piangsak a, tui tawh a piansak leitung pen tui mah tawh na susia leuleu hi. Tu-in tua Pasian’ kampauna mah tawh, mei tawh haltum dingin tu-in a om vantung le leitung a kikoihcing hi a, Pasian a um lo mite thu kikhenin a kisuksiat hun ding bek ngakin a om ahi uh hi. Ahi zongin ka itte aw, na mangngilh loh ding uh ka deih thu in: Topa a dingin ni khat le kum khat, kum tulkhat le ni khat a kilamdan’ luatna om lo hi. Mi pawlkhatte’ ngaihsut bangin Topa in a kamciamna a hong tungsak hak hi zenzen lo hi. Note khat beek in siatna na thuakkhak ding uh deih loin na vekpi-un na kisik ding uh deih ahih manin hong pai nai lohna pen note hong khualna hizaw hi. Ahi zongin theihkholh lohpi-in guta bangin Topa hong pai ding Ni hong tung ding hi. Tua Ni ciangin nakpitakin a ging in vantungte maimang sakin, vantung nate mei in kangtumin maimang ding a, leitung le a tunga om na khempeuh a mangthang ding hi. Hih nate khempeuh hih bangin kisusia mangkhin ding ahih manin note a bangci mi dingin kilawm cih limtakin na ngaihsun un. A siangtho nuntakna nei-in Pasian’ deihna bangin na gamta unla, vantungte mei in kangtumin, vantung nate sa lua-in a tuimang ding hun Pasian’ Ni hong tunbaih theih nadingin na hihtheih zahun hanciam unla, na ngak un. Eite in Pasian’ hong ciamsa, thuman bekbek a kizat nading mun van thak le lei thak a ngak ihi hi. Tua ahih ciangin ka itte aw, hih Ni ding ngakin na om laitakun Pasian’ muhna-ah paubaanna om hetloin amah tawh nuamtakin na omkhawm theih nadingun hanciam un. I sanggam Paul in Pasian’ piak pilna zangin note kiangah lai a hong gelhnate sungah a gen mah bangin note khempeuh in hotkhiatna na ngahtheih nading uh hun hong piakna-in Topa hong zekai ahihna thu na phawk un. Lai a hong gelhna sungah a thugente tu-ate mah a gennuam ahi hi. A laigelhna sungah a telhak thu tampi om a, theihna kicing loin lungsim kip lo mi pawlkhatte in Lai Siangtho sung thu a ututun a kawihei uh bangin Paul’ thugente zong a man lopi-in khia uh ahih manin siatna a tuaklawh uh hi. Tua ahih ciangin ka itte aw, hih thute theikhol unla, ngeina man zui lo mite’ khemna zuikha-in na bulkip panun na pukkhak loh nadingun na kidawm un. Hehpihna thu le i Topa le Honpa Jesuh Khrih theihna thu-ah na khangto semsem zaw un. Tuhun a kipanin a tawntungin amah in minthanna ngah paisuak tahen. Amen. Leitung piancil lai pek a kipanin a omsa ahi nuntakna a piathei Thu tawh kisai, note kiangah ka hong gelh uh hi. Kote mahmah in ama thugen ka za uh a, ka mit mahmah uh tawh amah mu-in, limtakin ka ettel uh hi a, ka khut mahmah uh tawh ka lawn’ uh ahi hi. Hih nuntakna pen a kimuthei a hong suah ciangin kote mahmah in ka mu uh hi. Tua ahih manin kote tungah a hong kilak, Pa Pasian tawh a omkhawm tua nuntak tawntungna pen genbelin nei-in, note tungah zong a hong gen ka hi uh hi. Pa Pasian le a Tapa Jesuh Khrih tawh kote pawlkhatin ka om uh mah bangin note zong kote tawh pawlkhat nong suahtheih nading uh deihna-in ka muhsa uh le ka zaksa uh thute a hong gen ka hi uh hi. Kote’ lungdamna a cingtaak theih nadingin hih lai a hong gelh ka hi uh hi. Ama kiang panin za-in note tungah ka hong gen uh thu in: Pasian, khuavak hi a, khuamial tawh kizopna themkhat zong nei het lo hi. Tua ahih manin Pasian tawh ka kipawl hi, ci napi-in khuamial tawh kisai gamtatnate i gamtat le i kampauna le i gamtatna tawh zuauthu a gen ihi hi. Ahi zongin amah, khuavak ahih mah bangin eite in zong khuavak gamtatnate i gamtat takpi leh eite pawlkhat ihi a, ama Tapa Jesuh’ sisan in i mawhna khempeuh panin eite hong siangsak hi. Mawhna ka nei kei hi, i cih leh eite a kineihkhem ihi a, eite a thutak lo ihi hi. Ahi zongin Pasian kiangah i mawhnate va pulak lehang, amah citakin thuman ahih manin, i mawhnate hong maisakin i hoih lohnate khempeuh hong siangsak ding hi. Pasian in a mawh hi, hong ci ahih manin eite in ka mawh ngei kei hi, i cih leh Pasian pen zuaugen a suaksak ihi a, i sungah ama thu a om het lo ahi hi. Ka itte aw, note na khialhkhak loh nading uh ka deihna-in hih lai a hong gelh ka hi hi. Ahi zongin mi khatpeuh a khialh ciangin eite a dingin Pa Pasian kiangah a hong thumsak dingin a thuman Jesuh Khrih i nei hi. Tua Jesuh hangin eite’ mawhna hong kimaisak a, eite a’ ding bek hi loin leitung mi khempeuh’ mawhna zong a mai nading ahi hi. Eite in ama thupiaknate i zuih leh amah a thei taktak ihihna hong kilang hi. Mi khatpeuh in, “Pasian ka thei hi,” ci napi-in a thupiaknate a zuih kei leh tua mi a zuaugen mi hi a, a thutak lo mi ahi hi. Ahi zongin ama thu a zui mite pen Pasian a itna a kicingtaak taktak mi ahi hi. Hih bangin i gamtat leh Pasian tawh a kipawl taktak ihihna i thei hi. Pasian tawh ka kipawl hi, a ci mi khempeuh, Jesuh Khrih a gamtat bangin a gamtat ding ahi hi. Kong it lawmte aw, hih ka hong gelh thupiaknate pen a thak hi lo a, a kipat cil a kipanin na neihsa uh thupiakna lui mah ahi hi. Tua thupiakna lui pen note in na zakzaksa uh thu ahi hi. Ahi zongin note kiangah ka hong gelh thupiakna pen na zak ngei loh uh thuthak hi a, Khrih gamtatna le note’ gamtatnate in tua thu a man taktak ahihna hong kilangsak hi. Tu-in khuamial beita a, khuavak taktak hong taang khinta hi, cihna pen thuthak ahi hi. Mi khatpeuh in khuavak gamtatna ka gamta hi, ci napi-in a Khristian mipihte a muhdah leh khuamial gamtatna mah a gamta lai ahi hi. A Khristian mipihte a it mite pen khuavak gamtatna a gamta hi a, tua bang mite a puktheih nading thu om lo hi. Ahi zongin a Khristian mipihte a mudah mite pen khuamial sungah omin khuamial gamtatna a gamta uh hi a, tua khuamial in bangmah ngaihsunsak thei lo ahih manin a gamtat nading mel uh thei lo uh hi. Ka tate aw, Khrih hangin note’ mawhna hong kimaisak ahih manin lai a hong gelh ka hi hi. Pate aw, a kipat cil a kipanin a na om pa thei na hih manun lai a hong gelh ka hi hi. Tangvalte aw, Dawimangpa zokhin na hih manun lai a hong gelh ka hi hi. Tate aw, Pa Pasian thei taktak na hih manun lai a hong gelh ka hi hi. Pate aw, note tungah lai ka hong gelhna pen a kipat cil a kipanin a na om pa na theihna hang uh ahi hi. Tangvalte aw, note tungah lai ka hong gelhna pen note na lungsim uh thahatin, Pasian’ thu zui-in, Dawimangpa zokhin na hihna hang uh ahi hi. Hih leitung nate le Pasian tawh a kizom lo thute deihluatin nei kei un. Mi khatpeuh in hih leitung nate a deihluat leh amah in Pa Pasian it taktak thei lo hi. Bang hang hiam cih leh pumpi deihna, mit tawh mu-in i deihte, le mite’ kisaktheihpih nate ahi leitung nate khempeuh pen Pa Pasian tawh a kizom thu hi lo a, leitung tawh a kizom thu ahi hi. Leitung nate le leitung deihnate a beibei ding hita a, ahi zongin Pasian’ deihna bangin a gamta mite pen kip tawntung ding hi. Tate aw, tu-in huntawpna hong naita hi. Khrih’ Gal hong pai ding hi, ci-in na zaksa uh mah bangin tu-in Khrih’ gal tampi tak hong tung khinta hi. Tua ahih ciangin bei nading nai taktakta hi, ci-in i thei hi. Khrih’ gal ahi hih mite pen ei’ pawl hi ngei napi-in hong taisan uh hi. Ei’ pawl taktak hileh eite tawh omkhawm paisuak ding uh ahih manin, tu-in amaute paikhia uh ahih ciangin ei’ pawl taktak ahihlohna uh hong kilang hi. Ahi zongin Khrih in note tungah Kha Siangtho hong piakhin ahih manin note khempeuh in a man na thei uh hi. Tua ahih manin note kiangah lai ka hong gelhna pen note in a man na theih lohna hang uh hi loin, note in a man thei-in, zuauthu pen thuman panin hong piang ngei lo hi, ci-in zong na theihna uh hangin a hong gelh ka hizaw hi. Tua ahihleh zuau thugen i cihte kuate ahi hiam? Jesuh pen Khrih hi lo hi, a cite ahi hi. Hih bangin thugente pen Khrih’ Gal hi a, amaute in Pa le Tapa a nihin nial uh hi. Tapa a nialte in Pa zong a nial hi a, Tapa a sangte in Pa zong a sang ahi hi. Note in ahihleh a kipat cil a kipan na zak uh thute hoihtakin na zui un. A kipat cil a kipan na zak uh thute hoihtakin na zuih nak-uhleh Tapa tawh kipawlin, Pa Pasian tawh zong a kipawl na hi ding uh hi. Khrih in eite tungah piak dingin a hong ciamsa thu pen hih nuntak tawntungna ahi hi. Note khempeuh a hong sawm mite’ thu tu-a zah tawh khin phot ni. Khrih in note tungah ama Kha Siangtho hong piakhin a, tua Kha Siangtho na neih laiteng uh kuamah in note hong hilh ding kisam nawn lo hi. Bang hang hiam cih leh Kha Siangtho in note tungah thu khempeuh hong hilh a, tua a hong hilh thute a man vive hi a, zuauthu khat zong om lo hi. Tua ahih manin Kha Siangtho’ hilhnate zui unla, Khrih sungah kiptakin om un. Ka itte aw, Khrih hong kilatkik ciangin lungmuang takin i omtheih nading le ama hong pai Ni ciangin i bukbuk loh nadingin amah tawh kiptakin kipawl ni. Khrih, thuman hi, ci-in na theih uh mah bangin a manin a gamta mi khempeuh zong Pasian’ tate hi, ci-in na theih ding uh ahi hi. Pa Pasian in eite bangzah takin hong itna thu thei un. Ama hong itna lian mahmah ahih manin eite pen Pasian’ tate hong kici a, hong kicih mah bang ihi takpi hi. Leitung mite in tuhun ciang dong Pasian thei lo uh ahih manin eite zong a hong thei lo uh ahi hi. Ka lawm itte aw, eite’ pianzia ding taktak a telin hong kilat nai loh hangin tu-in Pasian’ tate ihi hi. Ahi zongin Khrih hong kilat ciangin ama pianzia ahi bang teekteekin mu ding ihih manin amah i bat nading thu teltakin i thei hi. Khrih a siangtho mah bangin amah tawh kibat ding a lamen khempeuh in zong a nuntakna uh siangthosak ding hi. Mawhna i cih pen thukham palsatna ahih manin a mawh mi khempeuh thukham palsat ahi uh hi. Khrih pen mawhna a nei het lo hi a, mite’ mawhna a lakhia dingin Khrih hong kilang ahihna thu na thei uh hi. Tua ahih manin Khrih tawh a kipawl mite in mawhna bawl nawn lo uh a, mawhna a bawl lai teiteite pen Pasian a mu ngei lo, a thei ngei lo ahi uh hi. Ka it tate aw, mite’ khemsa-in ta kei un. Khrih a thuman ahih mah bangin a manin a gamtate khempeuh a thuman ahi hi. A kipat cil a kipanin Dawimangpa in mawhna bawl tawntung ahih manin mawhna a bawl mi khempeuhte zong Dawimangpa’ mi ahi hi. Hih Dawimangpa’ nasepna a beisak dingin Pasian’ Tapa a hong pai hi. Pasian’ tate in mawhna bawlbawl lo uh hi. Pasian’ tate hi a, Pasian’ lungsim paii uh ahih manin mawhna zong bawl nuam lo uh hi. Hih pen Pasian tate le Dawimangpa’ tate a kilamdanna ahi hi. A manin gamta loin, a Khristian mipihte a it lo mi peuhmah, Pasian’ tate hi lo uh hi. A kipat cil a kipanin na zak tawntung uh thu pen khatlekhat i ki-it nading thu ahi hi. Dawimangpa’ mi ahi, a naupa mahmah a that Kain bang kei ni. Kain a gamtatna man lo a, a naupa’ gamtatna man ahih manin Kain in a naupa a that ahi hi. Tua ahih manin lawmte aw, leitung mite in hong muhdah leh lamdang sa kei un. Ei Khristiante khatlekhat ki-it ihih manin sihna khutsung panin paikhia-in nuntakna khut sungah a lut khinta ihihna thu i thei khinzo hi. Itna lungsim a nei lote pen sihna khutsung mahah a omlai uh ahi hi. A Khristian mipih a mudah mi peuhmah mi that hi a, mi thatte in nuntak tawntungna a neih lohna thu na thei uh hi. Itna i cih bangci theih ding ihi hiam cih leh: Khrih in eite a dingin a nuntakna hong pia hi. Ei zong i Khristian mipihte a dingin i nuntakna i piak ngam ding ahi hi. Mi khat hau mahmah hen la, a Khristian mipih a cimawhte mu napi-in huhna bangmah pianuam hetkei leh, bang hangin amah in Pasian ka it hi, ci thei ding ahi hiam? Ka it tate aw, i kampi bek tawh ki-it loin, lungsim takpi tawh ki-itin i gamtatna tawh kilangsak ni. Tua ahih manin tu-a bangin i om leh a thuman Pasian tawh a kipawl ihihna le ama mai-ah lungmuang takin a omthei ding ihihna i thei ding hi. I lungsimah ei mawh i kisak leh zong, eite’ lungsim theihna sangin Pasian’ theihna kicingzaw a, na khempeuh a thei ahihna zong i thei hi. Tua ahih manin ka it lawmte aw, i lungsimah kisuanna i neih hetkei leh Pasian’ mai-ah lungmuang takin i om ding hi. Ama thupiaknate zui-in ama lungkim nadingin gamta ihih manin ama kiang panin i nget peuhpeuh i ngah hi. Ama hong thupiakna in: A Tapa Jesuh Khrih umin zui-in, Khrih’ hong sawl bangin eite khatlekhat i ki-it ding ahi hi. Pasian’ thupiakna a zui mi khempeuh, Pasian tawh om uh a, Pasian in zong amaute a ompih hi. Pasian in eite tungah a hong piak Kha Siangtho hangin Pasian in eite a hong ompihna thu i thei hi. Ka it lawmte aw, kha ka nei a ci mi khempeuh’ thugen um kei unla, tua thute Pasian kiang pan mah ahi hiam, ci-in kantel un. Bang hang hiam cih leh leitungah kamsang a kineihkhem tampi hong om khinta hi. Pasian’ Kha sawlna tawh thugente le adangte bangci khentheih ding na hi uh hiam cih leh: Jesuh Khrih pen mihing bangin hong pai hi, ci-in a gente khempeuh Pasian Kha’ lamlahna tawh thugen ahi hi. Ahi zongin hih thu a nial mi peuhmah, Pasian Kha’ sawlna tawh thugen hi lo uh hi. Hih bang mite pen Khrih’ Gal hi a, hong pai ding hi, ci-in na zaksa uh mah bangin tu-in leitungah a hong om khinta ahi uh hi. Ka it tate aw, note, Pasian’ mite na hi uh a, tua bang kamsang kineihkhemte a zokhin na hi uh hi. Bang hang hiam cih leh leitung mite a panpih dawimangpa sangin note hong ompih Pasian vanglian zaw hi. Kamsang a kineihkhemte in leitung thu gen uh a, amaute pen Pasian a thei lo hih leitung mite tawh kipawl uh ahih manin leitung mite in amau’ thugen a ngai uh hi. Ahi zongin note pen Pasian’ mite na hi uh hi. Pasian a thei mi peuhmah in kote’ thugen hong ngai uh a, Pasian’ pawl ahi lo mi peuhmah in kote’ thugen hong ngai lo uh hi. Tua ahih manin hih bangin thuman Kha le zuau kha a kilamdanna i theithei hi. Ka it lawmte aw, Pasian pen itna hong piankhiatna bulpi ahih manin eite khatlekhat ki-it ni. Itna a nei mi peuhmah, Pasian’ tate hi a, Pasian a thei uh hi. Pasian pen ki-itna ahih manin itna a nei lo mite in Pasian thei lo uh hi. Pasian in eite hong itna hong bangci lah hiam cih leh: Ama hangin eite in nuntakna i ngahtheih nadingin a Tapa neihsun Pasian in leitungah a hong paisak hi. Hih ka gen itna pen eite in Pasian i itna thu hi lo a, Pasian in eite hong itin, i mawhna a maitheih nadingin a Tapa a hong paisakna thu ahi hi. Ka it lawmte aw, Pasian in tua zahta-in eite hong it ahihleh eite zong khatlekhat i ki-it ding a kilawm ahi hi. Kuamah in Pasian mu ngei lo hi. Ahi zongin eite khatlekhat i ki-it leh eite tawh Pasian hong omkhawm a, ama itna eite lakah a cingtaakin a om ahi hi. Pasian in eite tungah a hong piak Kha Siangtho hangin Pasian le eite a omkhawm ihihna leh Pasian in eite hong ompih ahihna thu i thei hi. Pa Pasian in leitung mite a honkhia dingin a Tapa a hong paisakna thu kote in thei-in midang kiangah genbelin ka nei uh hi. Jesuh pen Pasian’ Tapa hi, ci-in umin a sang mite, Pasian in ompih a, tua mite pen Pasian tawh a omkhawm ahi uh hi. Tua hi a, Pasian in eite a hong itna thu, eite mahmah in thei-in i um hi. Pasian pen ki-itna hi a, itna a nei mite pen Pasian tawh omkhawm uh a, Pasian zong amaute tawh a omkhawm hi. Thukhen Ni ciangin kisuanna nei hetloin i omtheih nadingin eite in a cingtaak itna a nei ihi hi. Khrih mah bangin hih leitung i nuntakna-ah nungta-in gamta ihih manin tua bang kisuanna a nei lo ding ihi hi. Itna nei lehang launa om lo a, itna cingtaak nei peuh lehang launa beimangta hi. Bang hang hiam cih leh launa i cih pen gimthuak ding kihtakna hi a, gimthuak ding a laute pen itna cingtaak a nei lote ahi hi. Pasian in eite hong it masa ahih manin eite in itna i nei thei hi. Mi khatpeuh in, “Pasian ka it hi,” ci napi-in a Khristian mipihte a muhdah le a zuaupi a gen ahi hi. Bang hang hiam cih leh a muhtheih a Khristian mipih a it lo mi in a muhtheih loh Pasian it thei lo ding hi. Khrih in eite tungah hong thupiakna in: Pasian a it mi in a Khristian mipihte zong it ding hi, cihna ahi hi. Jesuh, Khrih hi, ci-in a um mi khempeuh Pasian’ tate hi a, pa a it mi peuhmah in a ta zong a it hi. Pasian itin ama thupiakte i zuihna tawh Pasian tate a it ihihlam i kithei ding hi. Pasian i it ciangin ama thupiakte a zui ihi hi. Eite a dingin ama thupiakte zuih ding a haksa lua hi lo hi. Pasian’ ta ahite peuhmah in leitung nate zo uh a, i upna tawh leitung nate tungah a gualzo ihi hi. Kuate in leitung nate zo ding ahi hiam i cih leh, Jesuh pen Pasian’ Tapa hi, ci-in a umte bek in zo ding uh hi. Hih Jesuh Khrih pen tui tawh kiphumna le a sisan luangin sihna tawh a hong pai hi a, tui bek tawh a hong pai hi loin tui le sisan tawh a hong pai ahi hi. Kha mahmah in hih thu a manna teci a pang hi. Kha pen thuman gen ahi hi. Hih thu-ah teci a pang thum om a, tuate pen Kha, tui, le sisan ahi uh hi. Hih thumte’ teci panna kibang kim hi. Mihingte’ teci panna sangthei ihih leh Pasian’ teci panna i santheih ding thupizaw hi. Pasian in ama Tapa’ thu tu-a bangin teci hong pang hi. Tua ahih manin Pasian’ Tapa a um mi peuhmah in Pasian’ teci panna a sang ahi hi. Ahi zongin Pasian’ thugen a um lo mi peuhmah in ama Tapa thu teci pangin a gennate a um lo uh ahih manin Pasian pen zuaugen a suaksak ahi uh hi. Tu-in Pasian’ teci panna in: Pasian in ama Tapa tungtawnin eite tungah nuntak tawntungna a hong pia hi. Pasian’ Tapa tawh a kipawl peuhmah in nuntak tawntungna nei a, Pasian’ Tapa tawh a kipawl lote in nuntak tawntungna nei lo uh hi, cihna ahi hi. Pasian’ Tapa a um mite in nuntak tawntungna a nei na hih lamtak uh na theih nadingun hih lai a hong gelh ka hi hi. Eite in ama deihna tawh kituakin i nget nakleh i nget khempeuh Pasian in hong pia ding hi, ci-in kimuanna lungsim i nei hi. Eite’ ngetna khempeuh amah in na za hi, ci-in thei ihih manin ama kiang panin i nget khempeuh zong hong pia ding hi, ci-in i thei hi. Mi khatpeuh in a Khristian mipihte a sih nading zah ciang ahi lo mawhna a gamta a muh leh ama a dingin thu ngetsak tahen. Ama thungetna bangin Pasian in a nuntakna suksak lo ding hi. Hih pen sihna zah ciang mawhna a hilote ka cihna ahi hi. Ahi zongin sih nading zah ciang ahi mawhna om a, tuate a’ ding ngetsak un, a ci ka hi kei hi. Gamtat khialhna khempeuh mawhna hi a, ahi zongin mawhna khempeuh in sihna ciang dong piangsak khin lo hi. Pasian’ tate in mawhna bawlbawl lo uh hi. Pasian’ Tapa in amaute kem a, Dawimangpa in amaute susia zo lo hi. Leitung midang khempeuh Dawimangpa’ khut sungah a om ahi zongin eite pen Pasian’ mi ihihna thu i thei hi. Pasian’ Tapa hong pai-in eite thu hong theisak ahih manin Pasian taktak a thei ihihna thu i thei hi. A Tapa Jesuh Khrih tawh i kipawlna hangin Pasian taktak mah tawh a kipawlthei ihi hi. Tua Jesuh pen Pasian taktak mah hi a, nuntak tawntungna a piathei ahi hi. Ka itte aw, milim na biakkhak loh nadingun na kidawm un. A khangham bel keimah Johan in Teeltuam ahi, kong it taktak tonu le na pawlpi mite kiangah lai ka hong gelh hi. Kei bek in a hong it hi loin thuman a thei taktakte khempeuh in zong hong it uh hi. Thuman thei ihih manin a tawntungin tua thu-ah i kip ding hi. Pa Pasian le a Tapa Jesuh Khrih in dikna, hehpihna, le nopsakna, eite tungah hong pia hen la, thuman le itna tawh tua thuphate khempeuh eite a’ hong hi tahen. Pa Pasian in eite hong thupiakna bangmahin na pawlpi mite pawlkhat in thu a mantakin a zuihna uh mu ka hih manin ka nuam mahmah hi. Tua ahih ciangin ka hong it tonu aw, ka hong thum nopna panin: Eite khempeuh khatlekhat ki-it ni, cihna ahi hi. Hih ka hong gen thu pen thuthak hi lo a, a kipatcil pek a kipanin i neihsa thupiakna ahi hi. Itna thu ka hong gen ciangin Pasian’ thupiakte zui ding cihna ahi hi. A kipat cil a kipan na zaksa uh ahi hih thupiakna pen na khan tawntungun zui-in itna na nei ta un. Bang hang hiam cih leh leitungah midangte a khem tampi hong omta a, tua mite in Jesuh Khrih, mihing banga hong paina thu a nial uh hi. Tua bang mite pen mi khemte hi a, Khrih’ Gal ahi uh hi. Tua ahih ciangin na sepsa uh thuman taankha loin, a kimtakin na ngahtheih nadingun limtakin kidawm un. Khrih’ thuhilhna zui loin a khengvalin a pai mite pen Pasian tawh a kipawl lo ahi hi. Ahi zongin a thuhilhna a zuite pen Pa Pasian le a Tapa tawh a kipawl ahi uh hi. Tua ahih manin Khrih’ hilh ahi hih thute a hilh lo midang khatpeuh note kiangah a hong pai leh na inn uhah zong na tungsak kei unla, zong na hopih kei un. Bang hang hiam cih leh tua bang mite a’ ding thupha a deihsak mite pen amau’ nasep hoih lohna-ah zong a kipawl ahi uh hi. Gen ding tampi ka neihlai hangin lai-in hong gelh lo zaw-in, eite’ lungdamna a kicinzawk theih nadingin kei hong pai-in khatlekhat maitang kimu-in thu genkhawm dingin ka kingaihsun hi. Teeltuam ahi hih lai-a om pawlpi mite in hopihna kam hong khak uh hi. A khangham bel keimah Johan in Lungsim takpi tawh ka hong it ka lawm Gaias tungah lai ka hong khak hi. Ka lawm it Gaias aw, nang na ci damin na vai khempeuh zong na maa pai ding hi, ci-in ka lamen hi. Kha thu tawh kisai lamsangah zong bangmah lungkhamna om lo ding hi, ci-in ka thei hi. Nang a mantakin a gamta na hih takpi mah bangin, i Khristian mipih hih lai-a hong pai peuhpeuh in a mantakin na nuntakna thu hong gen uh ahih manin ka nuam mahmah hi. Tate bangin ka hong neih mite a mantakin a gamtatna uh ka zakna hangin ka lungdamna sangin adang lungdamna lianzaw bangmah om lo hi. Ka hong it lawm Gaias aw, na theih ngei loh hinapi-in i Khristian mipihte lungsim takpi tawh na na huh hi. Amaute na limbawlna thu, hih lai-a pawlpite kiangah hong gen uh hi. I biak Pasian’ deihna tawh kituakin a khualzinna uh nuamtakin a zoptheih nadingun na huh in. Amaute pen Pasian’ nasem dingin a khualzin khia uh hi a, thu um lo mite tung panin bangmah huhna ngah lo uh hi. Tua ahih manin Pasian thuman nasepna-ah nasem khawm mite ihih theih nadingin ei Khristiante in hih bang mite i huh ding ahi hi. Na pawlpite kiangah lai ka gelh ngei hi. Ahi zongin na pawlpi sungah milian pen a ut Diotrefes in ka thugen hong mang nuam lo hi. Tua ahih manin kong pai ciangin kote hong gensiatna, zuauthu a genna, le a gamtatna khempeuh ka pholak ding hi. Tua bang mi gensiatna ciang bek hi loin, i Khristian mipihte zin nangawn tungsak nuam lo a, zin a tungsak nuamte nangawn khamin, pawlpi panin hawlkhiat ding hanciam lai hi. Ka hong it lawm Gaias aw, mi hoih lote’ gamtatna zui kei inla, mihoihte’ gamtatna zui in. A gamtat hoih mite pen Pasian tawh a kipawl mi hi a, a gamtat hoih lo mite pen Pasian a thei nai lo ahi uh hi. Mi khempeuh in Demetrias phatkim uh a, a manin ama gamtatna mahmah in hih thu a manna hong kilangsak hi. Kote in zong ama hoihna ka thei uh a, tua ama hoihna ka gennate uh a thuman ahi hi. Gen ding tampi ka neih hangin lai-in gelhkhiat ding kong sawm kei zaw hi. Nang tawh kimu baih thei dingin kilamen ka hih manin, tuahun ciangin maitang kimu-in i kiho ding hi. Nangma tungah nopsakna thupha hong tung tahen. Hih lai-a om i lawmte in hong hopih uh hi. Tua lai-a om i lawmte khempeuh a milipin na hopihsak in. Jesuh Khrih’ sila ka hih banah James’ nau keimah Jude in: Pasian’ sapna hangin Jesuh Khrih kepna sungah Pasian itna tawh a om mite tungah lai ka hong khak hi. Note khempeuh tungah hehpihna, le itna thupha tampi tak hong tung tahen. Ka itte aw, eite in i ngahkhawm hotkhiatna thu, note kiangah gelh nuam mahmahin ka om laitakin Pasian in ama mite tungah a tawntungin a kimang dingin khatvei bek a hong piak upna thu-ah note in na nawksuak nadingun hanthotna gelh ding a kisapna thu ka phawk hi. Bang hang hiam cih leh Pasian’ thu a ngaihsun lo mi pawlkhat, eite lakah kuama phawk lohin hong lutsim uh a, amaute’ mawh gamtat ngamnate a seelna-un Pasian’ hehpihna thupha a lehlamin hei-in, eite in khat bek i neih i Mangpa le i Topa ahi Jesuh Khrih a nial uh hi. Hih bang mite’ gimthuak ding thu tanglai pekin Lai Siangtho in a gensa thu ahi hi. Note in na theihsa uh ahi ta zongin ka hong phawksak nop thu in: Topa in Egypt gam panin Israel mite honkhia khin napi-in amah a um lo mite a nung ciangin susiagawp hi. Amau’ aana neih huamsung bekah om loin a omna panun a paikhia vantung mite zong leinuai khuamial sungah sikkol kibulhin amau’ thu a kikhen ding Ni lianpi ngakin Pasian in a koihcip hi. Sodom khua le Gomorrah khua le a kiima om khuapi mite zong tua vantung mite mah bangin gamta uh a, numei tawh mawhnopna bek tham loin pasal le pasal kilunggulhna ciang dong nei uh ahih manin midangte’ etteh dingin tawntung meikuang a thuak uh hi. Tua mite mah bangin hih mite zong thumu-in kinei-in amau pumpi thanghuaisak uh a, Pasian’ thu nialin tunglam a om minthanna a neite a simmawhbawl uh hi. Vantung milian pa Mikhael nangawn tua bangin gamta ngam lo hi. Moses’ luanghawm kituhin Dawimangpa tawh a kitot laitakin Mikhael in Dawimangpa zahkona kammal zang ngam loin, “Topa in nang hong taii ta hen,” ci bek hi. Ahi zongin hih mite in a theihtel loh uh thute simmawhbawl uh a, ganhing bangin a pianpih lungsim uh tawh gamta uh ahih manin siatna thuaklawh uh hi. Hih mite a dingin dahhuai mahmah hi. Bang hang hiam cih leh Kain’ gamtat bangin gamta-in, sum ngaihsutna-in Balaam’ khialh bangin khial uh a, Korah’ lehdo bangin lehdo-in siatna thuak uh hi. Note’ annek khopna-ah zumna mel nei loin hong omgawp uh ahih manin hong siatsuah uh a, amau’ pumpi bek ngaihsun uh hi. Amaute pen cikmahin guah a zusak ngei lo, huih in a letkhiatmang meiipi, tuk hun laitak nangawnin a gah a gah lo, kizunglotin a keutum singkungte, a sepna uh tawh amau mah’ maizum nading a piangsak tuipi hualte, le Pasian in amaute’ om nadingin leisung khuamial thukpi a koihsak tawntung, a lampial aksite tawh kibang bek uh hi. Tanglai pekin Adam pan khang sagihna Enok in zong hih thu mah na genkhol a, a genna-ah, “En un, Topa, a mi siangtho honpite tawh hong pai ding a, Pasian’ deihna bangin a gamtat lohna hang uh le kam hoih lopipi zangin Pasian a gensiatnate uh hangin Pasian’ deihna bangin a gamta lo mite tungah thu khenin mawhsakna pia ding hi,” na ci hi. Hih mite a tawntungin phunin khatlekhat mawhna kizong uh a, amau pumpi deihna bangun gamta-in kiphasak uh a, phattuamna a ngah theih nadingun midangte a phat uh hi. Ahi zongin ka itte aw, i Topa Jesuh Khrih’ sawltakte in note tungah hong gensa thute na phawk un. Amaute in note kiangah, “Hun nunung lam ciangin Pasian’ deihna tawh a kituak lo amau pumpi deihna zui-in note a hong simmawhbawl mi pawlkhat hong piang ding hi,” hong ci uh hi. Hih mite in pawl kikhenna piangsakin, amau pumpi deihna bangin gamta uh a, Kha Siangtho zong nei lo uh hi. Ahi zongin ka it note ahihleh a siangtho na upna uhah na kip semsem unla, Kha Siangtho vangliatna tawh thu na ngen un. I Topa Jesuh Khrih in a hong hehpihna tawh nuntak tawntungna hong piak ding na ngakkawmun Pasian’ itna sungah na kip un. A um taktak zo lote hehpih unla, meiphual sung panin dawhkhiat bangin midangte na honkhia un. Mi pawlkhatte’ mawhna-ah note zong na siatkhak loh nadingun kidop kawmna tawh na huh unla, amau’ gamtat hoih lo mawhnate na mudah un. Ama minthanna mai-ah paubaanna om hetloin lungdam takin a hong paipih theih nadingin note na pukkhak nading panun a hong kem, khat bek ahi eite a hong Hon Pasian in, tuma, tu laitak, le a tawntungin, minthanna, vangliatna, uk zawhna, le aana nei tawntung tahen. Amen. Hih laibu pen a piang baih ding thute, Pasian’ nasemte tungah a lah dingin Pasian in Jesuh tungah a thu pia a, Jesuh in maang sungah a lah thute ahi hi. Khrih in ama vantungmi sawl a, a nasempa Johan kiangah hih thute a kilangsak hi. Johan in zong a muhsa thu khempeuh na gen leuleu hi. Hih thute pen Johan in Pasian kiang panin hong pai thute le Jesuh Khrih in ama tungah a lahkhiat thuman thutakte a genna thu ahi hi. Hih laibu a sim mite mi hampha hi a, hih thu kigente ngai-in, hih laibu sungah a kigelh thu a zuite zong mi hampha mah ahi uh hi. Bang hang hiam cih leh hih thu kigente a tun ding hun hong naita hi. Johan in Asia gam sungah a om pawlpi sagihte tungah a khak lai ahi hi. A beisa hun, tuhun, le mailam hunah a om tawntung Pasian kiang pan le ama tokhom mai-ah a om Kha Siangtho sagihte tung pan le, thuman takin teci a pang, sihna panin a kithokiksak Tapa upa, leitung kumpite tungah ukna aana a nei Jesuh Khrih kiang panin note tungah hehpihna le nopsakna thupha hong tung tahen. Tua Jesuh Khrih in eite hong it a, ama sihna tawh i mawhna panin eite hong suaktasak a, ama Pa Pasian’ na a sem dingin siampi le kumpi za-ah a hong koih hi. Tua Jesuh in minthanna le vangliatna nei tawntung tahen. Amen. En un, amah hong paita ding a, meiipi tawh hong tonkhawm ding hi. Teipi tawh amah a sunte a kipan mi khempeuh in a mu ding uh hi. Amah a hong pai ciangin leitung mi khempeuh lau-in a kap ding uh hi. Hih ka gen bangin hong piang takpi ding hi. Amen. A beisa hun, tuhun, le mailam hunah zong a om tawntung ding a Vanglian Topa Pasian in, “Kei pen na khempeuh a Kipatna le a Tawpna ka hi hi,” a ci hi. Note’ sanggam keimah Johan in Jesuh tawh kipawlna hangin note mah bangin bawlsiatna thuakin, Pasian’ Ukna sungah omin, lungduai takin a thuak mipa ka hi hi. Pasian’ thu le Jesuh’ hong gen thumante ka genna hangin Patmos a kici tuikulh-ah kei hong kikoih hi. Topa’ ni-in Kha Siangtho tawh kidimin ka om laitakin peengkul bangin a gingpha mahmah khat ka nung lamah ka za a, “Na muhte khempeuh laibu sungah gelh inla, Efesa pawlpi, Smyrna pawlpi, Pergamum pawlpi, Thiatira pawlpi, Sardis pawlpi, Filadelfia pawlpi, Laodisia pawlpi, hih pawlpi sagihte kiangah khak in,” hong ci hi. Kua in kei hong hopih ahi hiam, ci-in a en dingin ka kihei leh kham kibawl meivakna sagih ka mu hi. Tua meivakte lakah, puantualpi khat silhin a awm-ah kham kibawl awmgak a gak, mi tawh a kibang khat ka mu hi. A samte tuumul bangin kangin, khuavak bangin pak a, a mittangte meikuang a bang hi. A khete, pumbukah a kihalsan sumngo bang a, a awging ahihleh tuipi ging a bang hi. A taklam khutah aksi sagih tawi-in, a kam sung panin langnih a hiam namsau khat hong pusuak a, a maitang sun nitaang a bang hi. Amah ka muh ciangin misi bangin ama khe phungah ka puk hi. Ahi zongin amah in ka tungah a taklam khut hong nga a, “Lau kei in; kei pen a kipatna le a tawpna ka hi a, a nungta mipa zong ka hi hi. Kei ka si ngei hi. Ahi zongin tu-in hong en in, a nungta tawntung ka hi hi. Sihna le misite omna gam keima khutnuai ahi uh hi. Tua ahih ciangin tu-a na muh, tu laitakin a om thute le tu nung ciangin a hong piang ding thute, lai sungah gelh in. Tu-in ka taklam khut sungah na muh aksi sagihte le kham kibawl meivakna sagihte a khiatna in: Aksi sagihte pen pawlpi sagihte’ vantung mite a cihna hi a, meivakna sagihte pen pawlpi sagihte a cihna ahi hi. “Efesa khua-a pawlpi vantungmi kiangah lai gelh inla, a taklam khutah aksi sagih tawi-in, kham kibawl meivakna lakah a pai kawikawi Jesuh’ thugenna hih bang ahi hi: “Note’ nasepna, na gimna uh le lungduai takin na thuakna uh, le migilote koihmawk loin, sawltak hi lo napi-in sawltak hi ung, a ci mite dongtelin sawltak ahihlohna uh na muhkhiatnate uh ka thei hi. Note in lungduai takin thuakin, keima min hangin thuakzo-in, lungkia hetloin na omna uh ka thei hi. Ahi zongin note ka hong mawhsakna khat om a, tua in: A masa lai-a kei na hong it bangun tu-in na hong it nawn kei uh hi. Tua ahih manin na lampialna uh phawkin, na mawhna uh panin kihei unla, na gamtat ngeisa bangun gamta kik un. Na mawhna panun kihei-in na kisikkik kei uhleh note kiangah hong pai-in na meivakna uh ka hong lakkhiatsak ding hi. Ahi zongin note ka hong pahtakna khat om a, tua in: Keima muhdah mah bangin Nikolas pawlte na mudah uh hi. Tua ahih manin zak nading bil a neite in Kha Siangtho in pawlpite kiangah a gen thute na za un. A gualzo mite tungah, Pasian’ Huan sunga om nuntakna singgahte a nektheih nadingun thu ka pia ding hi. “Smyrna khua pawlpi vantungmi kiangah lai gelh inla, a kipatna le a tawpna, si ngei napi-in a hingkik pa’ thugen in: Na lungkhamnate uh le na zawnnate uh ka thei hi. A taktakin note a hau na hi uh hi. Jew mi hi lo napi-in Jew mi ka hi uh hi, ci-in note a hong gensiatnate uh ka thei hi. Tua bang mite pen Satan’ pawlte ahi uh hi. Na thuak ding uh haksatnate kihta kei un. Dawimangpa in note pawlkhat thong sungah hong khia-in hong ze-et ding hi. Gimna na thuak hun ding uh ni sawm sung bek hi ding hi. Na sih dongun kei tungah hong citak un. Tua hileh nuntakna lukhu ka hong pia ding hi. Tua ahih manin zak nading bil a neite in Kha Siangtho in pawlpite kiangah a gen thute na za un. A gualzo mite, nihvei sihna in gimsakkha nawn lo ding hi. “Pergamum khua pawlpi vantungmi kiangah lai gelh inla, a langnihin a hiam mahmah namsau a nei pa’ thugen in: Satan in a kumpi tokhom a phuhna munah a om na hih lamtak uh ka thei hi. Keima thu citakin teci a pang cinten Antipas, Satan’ omna munah a kithah hun laitak nangawnin kei na hong upna uh na khahsuah kei uh hi. Ahi zongin note ka hong mawhsak nading thu tawmkhat a om hi. Milim biakna ante nesakin, nulepa paktatna piangsak a, Israel mite mawhna a gamtasak Balak tungah thu a hilh Balaam’ thuhilhnate a um mi pawlkhat note lakah a om hi. Tua mah bangin Nikolas pawlte’ thuhilhna a um mi pawlkhat zong note lak mahah a om hi. Tua ahih manin na mawhna panun kisikkik un. Na kisik kei uhleh note kiangah kei hong pai baihin, ka kam panin a pusuak namsau tawh amaute ka do ding hi. Tua ahih manin zak nading bil a neite in Kha Siangtho in pawlpite kiangah a gen thute na za un. A gualzo mi tungah a kiselcip manna an pawlkhat le min thak a kigelhna suangkang khat ka pia ding hi. Tua suangkang pen a ngahte simloh kuamah dang in thei lo ding hi. “Thiatira khua pawlpi vantungmi kiangah lai gelh inla, meikuang tawh a kibang mittang nei-in sumngo kihalsan tawh a kibang khe a nei Pasian’ Tapa’ thugen in: Note’ gamtatna, itna na neihna, upna na neihna, na nasepna, lungduai takin na thuakna uh, le a kipatcil lai sangin a nunung lamah na hoihzawknate uh ka thei hi. Ahi zongin note ka hong mawhsak nading thu khat om hi. Kamsang numei ka hi, ci-in thu a gen Jezebel na nial kei uh hi. Ama thuhilhna hangin ka nasemte in numei-pasal paktatna gamta-in milim biakna ante a ne uh hi. Tua numei a kisikkik nading hun ka piak hangin a paktatna panin kihei nuam lo hi. Tua ahih manin tu-in tua numei tawh a paktatna uh panin a kisikkik kei uhleh tua numei le amah tawh a paktat mi khempeuh, lupna ngaksakin nakpitakin gimna ka thuaksak ding hi. Tua numei’ thu a zui mi khempeuh ka that ding hi. Tua hileh, mihingte’ ngaihsutna le lungsim a kantel pa ka hihna thu pawlpi khempeuh in thei ding uh hi. Note’ gamtatna ciat tawh kizui-in ka hong thukkik ding hi. Ahi zongin Thiatira khua-a om note pawlkhat in tua numei’ thuhilhna hoih lote na zui kei uh a, mite in, ‘Satan’ thu thukpite hi,’ a cih thute na sukha kei uh hi. Note tungah vangik bangmah ka hong suan kei ding hi. Ka hong pai matengin na neihsateng uh na lenkip ta un. Amaute tungah zingsol zong ka pia ding hi. Tua ahih manin zak nading bil a neite in Kha Siangtho in pawlpite kiangah a gen thute na za un. “Sardis khua pawlpi vantungmi kiangah lai gelh inla, Pasian Kha Siangtho sagih le aksi sagih a nei pa’ thugen in: Note’ gamtatnate ka thei a, note a si hinapi-in a hing min na pua uh hi. Tua ahih manin khua phawk unla, na neihlai sunte uh a beimang ma-in thasanpha kik un. Bang hang hiam cih leh na nasepnate uh Pasian’ muhna-ah a cingtaak nai het lo ahihna thu ka thei hi. Tua ahih manin note a hong kihilh na zaksa uh thute phawkkik unla, tua thute zui-in na mawhna panun kisik kik un. Khua na phawk kei uhleh note kiangah guta bangin ka hong pai ding a, ka hong tunlam nangawn na thei kei ding uh hi. Ahi zongin Sardis khuasunga om note lakah a puan a ninsak nai lo tawmkhat na om uh hi. Tua bang mite kilawm uh ahih manin kei tawh puanpak silhin ka tonkhawm ding uh hi. A gualzo mite in tua bangin puanpak silh ding uh a, a nungta mite a kikhumna laibu sung panin amaute’ min ka phiat kei ding hi. Ka Pa le ama vantung mite kiangah zong keima mite ahihna uh ka pulak ding hi. Tua ahih manin zak nading bil a neite in Kha Siangtho in pawlpite kiangah a gen thute na za un. “Filadelfia khua pawlpi vantungmi kiangah lai gelh inla, David’ tawhtang kemin, ama honsa kong kuamah in a khak zawh loh, ama khaksa kong kuamah in a hon zawh loh, a thuman a siangthopa’ thugen in: Note’ nasepnate ka thei hi. Na tha uh a hat loh hangin ka thu zui-in kei tungah na hong cihtakna uh ka thei hi. Tua ahih manin kuamah in a khak zawh loh ding kong, note’ mai-ah honsa-in ka koih hi. Jew mi hi lo napi-in Jew mi hi ung, ci-in zuau a gen Satan’ pawlte, note’ mai-ah hong paisakin na khephung uhah ka boksak ding a, note ka hong itna thu amaute ka theisak ding hi. Note in lungduai takin na thuak nading uh ka hong thupiakna zui na hih manun leitung a a om mi khempeuh ze-et nadingin leitung bupah a hong tung ding lungkhamna panin kei zong note ka hong suaktasak ding hi. Keimah ka hong pai baih ding hi. Kuamah in, na ngah ding uh gualzawhna lukhu hong tuhkhak loh nadingun na neihsate uh hoihtakin na lenkip un. A gualzote pen ka Pasian’ sutpi-in ka bawl ding a, amaute paikhia ngei nawn lo ding uh hi. Amaute tungah ka Pasian’ min le ka Pasian kiang vantung panin a hong paisuk ding Jerusalem khua thak min ka gelh ding a, amaute tungah keima min thak zong ka gelh ding hi. Tua ahih manin zak nading bil a neite in Kha Siangtho in pawlpite kiangah a gen thute na za un. “Laodisia khua pawlpi vantungmi kiangah lai gelh inla, thuman le citakin teci a pang, Pasian’ piansakte khempeuh a kipatna ahi Amen’ thugen in: Note’ gamtatnate ka thei a, vot lah vot vet lo, sa lah sa vet loin na omna uh zong ka thei hi. A vot na hih kei uhleh a sa hi vet le-uhcin ka ut hi. Ahi zongin note pen vot lah vot vet lo, sa lah sa vet loin a laklawhin om na hih manun ka kam sung panin ka hong siakhia ding hi. Note a zawng, a mittaw, puansilh ding a nei lo, a hehpihhuai, a lungkhamhuai na hih lamtak uh thei loin, kote hau-in ka cithei uh a, bangmah kisapna ka nei kei uh hi, na ci uh hi. Tua ahih manin na hauhtheih nadingun kei kiang panin kham citak hong lei-in a zumhuaipi-in guaktanga na omna uh na kisel nadingun puanpak hong lei unla, khua na muhtheih nadingun mit zatui hong lei un. Ka it mite thuhilhin ka taii hi. Tua ahih manin lungsim tak tawh na mawhna panun kisik kik un. Kongkhakah dingin kong ka hong kiu hi. Ka aw za-in kong hong honte kiangah lutin an ka nekhawm ding uh hi. Keimah zong gualzo-in ka Pa’ tokhomah ka tutkhawm uh mah bangin a gualzote khempeuh zong kei tawh ka tokhom tungah hong tutkhawm theih nadingun thu ka pia ding hi. Tua ahih manin zak nading bil a neite in Kha Siangtho in pawlpite kiangah a gen thute na za un, ci-in gen in,” a hong ci hi. Hih thuteng khit ciangin ka khuadak leh vantungah kong a kihongsa-in a om ka mu hi. Peengkul awging tawh a kibang, kei kiangah thu a hong gensa awging mah in, “Hih lai-ah hong paito in. Tunung ciangin thupiang dingte ka hong lak ding hi,” hong ci hi. Thakhat thu-in Kha Siangtho tawh ka kidim a, tua vantung a tokhom tungah mi khat a tu ka mu hi. Tua tokhom tungah a tupa pen Jasper le Karnelian suangmanpha bangin taang ziazua a, a tokhom kimkot pen Emerald suangmanpha bangin suum pempam hi. Tua tokhom kimkotah tokhom sawmnih le li om a, tuate tungah puanpak silhin kham lukhu a khu upa sawmnih le lite tu uh hi. Tua tokhom panin khuaphialep hong taangkhia-in, awging le vanging hong kipankhia a, a tokhom mai-ah Pasian’ kha ahi meivak sagih a kivak hi. A tokhom mailam tengah Kristal suangmanpha bangin a siang kilkel, limlang peekpi kiphah tuipi bangin a dum dide hi. Tua tokhom kiim a pang ciatah a nung le a mai-ah mit a dimin a nei ganhing li a om hi. A ganhing a khatna pen humpinelkai tawh kibang a, a nihna bawngtal tawh kibang a, a thumna in mihing maitang nei a, a lina pen muvanlai a leeng lai tawh kibang hi. Tua ganhing lite in kha guk ciat nei-in, tua a khate’ sunglam le a pualamah mittang a dimtakin om a, a sun a zan tawlnga loin la sa uh a, “A beisa, tuhun, le a tawntungin a om Vanglian Topa Pasian, siangtho hi, siangtho hi, siangtho hi,” a ci uh hi. Tua ganhingte in a nungta tawntung, tokhom tungah a tupa tungah a lungdamna uh ko-in pahtawi-in a phat simun nungta tawntungin tokhom tungah a tupa mai-ah tua upa sawmnih le lite zong bokin amah bia uh a, tua tokhom mai-ah a lukhute uh lawnin la sa uh a, “Kote’ Topa Pasian aw, nangmah in na khempeuh piangsakin, nangma deihna bangin na khempeuh omin, na khempeuh kipiangsak ahih manin, minthanna, pahtawina, le vangliatna na ngah tawntung dingin a kilawm hi,” a ci uh hi. Tua ciangin, tokhom tungah a tupa in a taklam khutah a tawi laizial tawn khat ka mu hi. Tua a laidal tung a langnih tuakah lai kigelhin a kizialcip khit ciangin a kiphel theih loh nadingin mun sagih-ah kiciamteh hi. Tua ciangin a thahat vantungmi khat ka mu a, amah in nakpitakin, “Hih laizial a ciamtehnate lakhia-in a laizial a phel dingin a kilawm kua om ahi hiam?” hong ci hi. Ahi zongin tua laizial a phel ding mi, vantung, leitung, leinuai-ah kuamah kimu lo hi. Tua laizial phelin a sung a en dingin a kilawm kuamah kimu lo ahih manin nakpitakin ka kap hi. Tua laitakin upate khat in kei kiangah, “Kap kei in. Judah minam sung panin Humpinelkai, David suan sung panin a lianpa gualzo khinta a, tua laizial ciaptehna sagihte lakhia-in a laizial phelthei ding hi,” a hong ci hi. Tua upate’ huamsung, ganhing lite le kumpi tokhom kikalah Tuuno a ding ka mu hi. Tua Tuuno pen a kigo lumsa tawh kibang a, leitung khempeuhah a kisawlkhia, Pasian’ khate’ lim ahi ki sagih le mittang sagih a nei hi. Tua Tuuno va pai a, tokhom tungah a tupa in a taklamah a tawi laizial a va la hi. Tua laizial a lak khit ciangin ganhing lite le upa sawmnih le lite, Topa’ mai-ah a kun uh hi. Amaute in harp lasakna khat ciat le Pasian’ mi siangthote in thungetna-in a zat uh paknamtui a dimin a om paknamtui beel khat ciat a tawi uh hi. Amaute inla thak khat sa uh a, “Nang Tuuno, tua laizial a lakhia ding le a ciamtehnate a lakhia dingin na kilawm hi. Nang hong kigo khin ahih manin mi namkim le pau namkim a pau mite sung panin na sisan tawh Pasian a dingin mite na lei khin a, Pasian’ na a sem dingin siampi za le kumpi za na pia a, amaute in leitung ukin a om ding uh hi,” a ci uh hi. Tua ciangin ka khuadak leh tokhom le ganhing lite le upate’ kimkotah atul-amakin a ding miaimuai vantung mite’ awging ka za hi. Amaute in nakpitakin la sa uh a, “A kigo Tuuno in vangliatna le hauhna, pilna le thahatna, pahtawina, minthanna, le phatna, a ngah dingin kilawm hi,” a ci uh hi. Tua ciangin vantung, leitung, leinuai, tuipi sung le mun khempeuhah a om nuntakna a nei khempeuh inla a sakna uh ka za a, amaute in, “Tokhom tungah a tupa le Tuuno in phatna, pahtawina, minthanna le vangliatna, ngah tawntung ta hen,” a ci uh hi. Tua ciangin ganhing lite in zong, “Amen,” na ci uh a, upate in zong khukdinin Pasian a bia uh hi. Tua ciangin Tuuno in tua ciaptehna sagih sung panin khat a honkhiat ka mu hi. Tua laitakin ganhing lite sung panin khat in vanging bangin nakpitakin, “Hong pai in,” a cihna ka za hi. Ka khuadak leh sakol kang khat hong pai a, a tungah a tuang pa in thal khat a tawi hi. Ama tungah lukhu khat kipia a, a gualzo pa hihna tawh a gualzo dingin a kuankhia hi. Ciamtehna a nihna a hon ciangin ganhing a nihna in, “Hong pai in,” a cihna ka za hi. Sakol a ausan khat hong pai a, mite khatlekhat a kithah theih nadingun a sakol tung tuang pa in leitungah galkidona a piansak theih nading vangliatna kipia a, ama tungah namsau lian mahmah khat zong kipia lai hi. Ciamtehna a thumna a hon ciangin ganhing a thumna in, “Hong pai in,” a cihna ka za hi. Sakol vom khat hong pai ka mu a, a tungah a tuang pa in a khutah tawitehna a tawi hi. Tua ganhing lite lak panin awging bang khat ka za a, “Mangbuh lawhta khat in ni khat tha man a, mangbuhham lawhta thum in ni khat tha mah man hi. Ahi zongin oliv huan le leenggui huan susia kei in,” a ci hi. Ciamtehna a lina a hon ciangin ganhing a lina in, “Hong pai in,” a cihna ka za hi. Ka khuadak leh sakol puang khat ka mu a, a tungah a tuang pa’ min pen Sihna hi a, a nungah Hell in a zui hi. Amaute in namsau, kialpi, pulnatna, le gamsate tawh leitung mi sehlisuah sehkhat a thahtheih nadingun thu a kipia hi. Ciamtehna ngana a hon ciangin Pasian’ thu a genna hang le Pasian’ thu citakin teci a panna uh hangin a kithat mite’ kha, biakna tau nuai-ah a om ka mu hi. Amaute nakpitakin kiko uh a, “A thuman, a siangtho, a Vanglian Topa aw, leitungah a omlai, kote a hong that mite tungah cik ciangin thu khenin, kote hong thahna hangin cik ciangin phu la ding na hi hiam?” a ci uh hi. Tua ciangin amaute tungah puantualpi a kang khat ciat kipia a, amaute a kithah mah bangin a kithat lai ding a naseppihte uh le a sanggamte uh a kim matengin tawlkhat sung a tawlngak lai nading uh kigen hi. Ciamtehna gukna a hon ciangin ka khuadak le nakpitakin zin hong ling a, ni pen puanvom bangin hong vomin, kha pen sisan bangin a hong san hi. Aksite ahihleh huihpi in theipuam a mutkhiat bangin van panin kia zaizai uh hi. Laidal a kizial bangin vanpi kizialin maimang a, mual le tuikulhte khempeuh a omna uh panin maimangta hi. Tua ciangin leitung kumpite le miliante, galkapmangte, mihaute le mi vangliante, silate le sila ahi lote a kipanin a kuamah peuh, mualtung a leihawmte sungah bu uh a, mualte le suangtum lianpite kiangah, “Kote tungah hong kiasuk unla, tokhom tungah a tupa’ maitang le Tuuno’ hehna panin kote hong liah un. Amaute’ hehna hangin gimna hun hong tungta ahih manin kua in thuakzo ding ahi hiam?” a ci uh hi. Tua khit ciangin leitung kiu li-ah vantungmi li, kiu khatah khat ciat dingin leitung, tuipi tung, le singkung khat peuhpeuh a mutkhak loh nadingin leitung huih lite lencipin a om uh ka mu hi. Tua ciangin a nungta Pasian’ ciaptehna a tawi vantungmi khat, nisuahna lam panin hong paito ka mu hi. Leitung le tuipi suksiat theih nading vangliatna a kipia vantungmi lite kiangah amah in nakpitakin gen a, “I Pasian’ nasemte, a taltang uhah ciaptehna i bawl khit matengin leitung, tuipi, le singkungte susia nai kei in,” a ci hi. Israel mite sung panin a nam namin Pasian’ ciaptehna tawh a taltang uhah a kiciamteh mi a vekpi-in 144,000 pha hi, ci-in hong kigen hi. Tua khit ciangin ka khuadak leh mi namkim, pau namkim panin kuama sim zawh loh dingin a tam mahmah mihonpite, tokhom mai le Tuuno mai-ah ding uh a, puanpak silhin a khut uhah nisuh hiang a tawi uh ka mu hi. Amaute nakpitakin awngin, “Tokhom tungah a tu i Pasian le Tuuno pen eite a hong honkhia ahi uh hi,” a ci uh hi. Tokhom, upate, le ganhing lite kimkotah vantungmi khempeuh dingin tokhom mai ngatin kunin Pasian bia uh a, “Amen! Eite’ Pasian in phatna, minthanna, pilna, lungdamkohna, pahtawina, vangliatna, le hatna a tawntungin nei ta hen! Amen,” a ci uh hi. Tua laitakin upate khat in keima kiangah, “Hih puanpak a silh mite kuate hi a, koi lai panin hong pai ahi uh hiam?” ci-in hong dot ciangin, “Ka thei kei hi, topa aw. Nangmah in na theizaw ding hi,” ka ci hi. Tua ciangin amah in keima kiangah, “Hih mite pen bawlsiatna lianpi thuakin a hong suakta mite ahi uh hi. Amaute in a puan uh sawpsiangin Tuuno sisan tawh a paaksak uh ahi hi. Tua ahih manin Pasian’ tokhom mai-ah amaute ding uh a, sun le zanin a biakinn sungah ama na sem uh hi. Tokhom tungah a tupa in amaute ompihin a hu ding hi. Amaute gilkial cih om nawn lo ding a, a dang uh zong taak nawn lo ding hi. Nisa zong thuakkha nawn lo ding uh a, a sa in zong kangkha nawn lo ding hi. Bang hang hiam cih leh Tokhom laizangah a om Tuuno, amaute a kem pa hi ding a, nuntakna tui omna-ah amaute paipih ding a, Pasian in a khitui khempeuh uh nulsak ding hi,” hong ci hi. Tuuno in ciaptehna sagihna a hon ciangin vantungah nai lang sung bang kidai dide hi. Tua ciangin Pasian mai-ah a ding vantungmi sagihte ka mu a, amaute tungah peengkul sagih a kipia hi. Tua ciangin kham kibawl paknamtui kuang a tawi vantungmi adang khat hong pai-in biakna tau mai-ah a ding hi. Pasian’ mite in thungetna-in a zat paknamtuite tawh hal beh ding le tokhom mai-ah a om kham kibawl biakna tau tungah piak dingin amaute tungah paknamtui tampi tak a kipia hi. Pasian’ mai-ah a ding vantung mipa’ khutsung panin paknamtui khu le Pasian’ mite’ thungetna van lam manawhin kizialto hi. Tua ciangin tua vantungmi in paknamtui kuang la a, biakna tau panin mei-am la-in a sungah a koih khit ciangin leitungah lawnsuk a, nakpitakin van gingin zin ling a, khua phia-in keek a kia hi. Tu-in peengkul sagih a tawi vantungmi sagihte a peengkul uh a tum dingin hong kithawi uh hi. A masa vantungmi in a peengkul hong tum a, gialpi le mei, sisan tawh kihelin leitungah a kiasuk hi. Leitung sehthumsuah sehkhat, le lopa hing sehthumsuah sehkhat a kangtum hi. A nihna vantungmi in a peengkul hong tum a, mual lianpi tawh a kibang, mei in kangin a kuang zuazua khat, tuipi sungah kilawnsuk hi. Tuipi sehthumsuah sehkhat sisan suakin, tuipi sunga om ganhingte sehthumsuah sehkhat si a, teembaw sehthumsuah sehkhat a kisia hi. A thumna vantungmi in a peengkul hong tum a, vantung panin aksi lian khat meikuang bangin hong kiasukin gunte le tuinakte sehthumsuah sehkhat tungah a tu hi. Tua aksi a min Gamsai hi a, tui sehthumsuah sehkhat gamsai tui suak a, tua tui khasak ahih manin a dawn mi tampi tak a si uh hi. A lina vantungmi in a peengkul hong tum a, ni sehthumsuah sehkhat kisatkhia-in, kha zong sehthumsuah sehkhat mah kisatkhia a, aksi zong sehthumsuah sehkhat mah kisatkhia ahih manin a taanna uh sehthumsuah sehkhat ciat a bei hi. Sunin hun sehthumsuah sehkhat tang khua vak lo a, zanin zong hun sehthumsuah sehkhat tang mah kha le aksi taang lo hi. Tua ciangin ka khuadak leh vankim lai-ah muvanlai khat a leenkawmin nakpi-in ham a, “Vantung mi adang thumte in a hong tum lai ding peengkulte hangin leitungah a teng mi tungah gimna, gimna, gimna lianpi hong tung ding hi,” a cihna ka za hi. Tua ciangin a ngana vantungmi in a peengkul hong tum a, vantung panin leitungah aksi khat a leengsuk ka mu hi. Tua aksi tungah kuahawm thukpi honna tawhtang a kipia hi. Amah in tua kuahawm thukpi a hon ciangin meiphualpi panin meikhu bangin meikhu tampi hong pusuak a, tua meikhu hangin ni mialin khim a zing hi. Tua meikhu sung panin kauphete hong pusuakin leitungah pai uh a, momaite’ neih bangin a gupha mahmah amaute tungah a kipia hi. Amaute in lopate, singkungte a kipan a hing khat peuhpeuh bangmah cih loin, a taltang uhah Pasian’ ciaptehna a om lo mite bek a gimsak nadingun thu a kipia hi. Amaute in tua bang mite that loin kha nga sung a bawlsiat nading uh thu kipia a, amaute’ bawlsiatna pen momai in mi a deh ciangin a na tawh kibangin a na velval ahi hi. Tua hun ciangin mite in a sihtheih nading uh a zonzon uh hangin sihtheih nading lampi mu lo ding uh a, sinuam mahmah napi-un sithei het lo ding uh hi. Tua kauphete’ pianzia pen galsim dingin a kithawi sakolte tawh kibang uh hi. A lu tung uhah kham lukhu tawh a kibang khu uh a, a maitang uh mihing maitang tawh a kibang hi. A sam uh numei sam tawh kibang a, a ha uh humpinelkai ha tawh a kibang hi. A awm uh, sik-awmdal tawh a kibang pian in tuam a, a khazap uh a gingte pen galkido laitakin sakol in a kaih leeng tampite’ gin’ tawh a kibang hi. Momai bangin mei nei-in mi dehthei uh a, tua a mei uh tawh mihingte kha nga sung gimsak theih nading gu a nei uh hi. Amaute in tua kuahawm thukpi a uk vantungmi pen kumpi-in nei uh a, tua vantungmi a min pen Hebru pau-in Abaddon hi a, Grik pau-in Apollion hi a, “A Susia pa,” a cihnopna ahi hi. Tu-in gimna khatna a beina hita a, ahi zongin gimna nam nih hong tung lai ding a om hi. Tua ciangin a gukna vantungmi in a peengkul hong tum a, Pasian’ mai-ah a om kham kibawl biakna tau kiu lite panin awging khat ka za hi. Tua awging in peengkul a tawi vantungmi a gukna kiangah, “Eufratis Gun lianpi-ah a kihencip vantungmi lite khahkhia in,” a ci hi. Tua ahih manin leitung mi khempeuh sehthumsuah sehkhat a thah ding uh a kum, a kha, a ni, a nai hun ngakin a kigingsa-in a om tua vantungmi lite a kikhahkhia hi. Mi a that ding sakol tung tuang galkap mak sawmnih pha hi, ci-in hong kigen hi. Ka maang sungah ka muh sakolte le a tungah a tuangte pen hih bang ahi hi: Sakol tung tuangte in mei bangin a san, sapfaia suangmanpha bangin a dum, kat bangin a eng, awmdal a bulh uh hi. A sakol lutangte pen humpinelkai lutang tawh kibang a, a kam uh panin meikuang, meikhu, le kat a pusuak hi. Hih sakolte’ kam panin a hong pusuak meikuang, meikhu, le kat, hih gimna nam thumte in leitung mi sehthumsuah sehkhat a sisak hi. Hih sakolte in a kam le a mei uhah gu nei uh a, a meite un gul tawh kibangin lutang nei ahih manin a meite uh tawh mi a liamsak uh hi. Hih gimna tawh a si lo midangte pen amau’ gamtatnasa panin kikhelkik nuam lo uh hi. Dawi a biaknate uh, khua a mu thei lo, khua a za thei lo, lam a pai thei lo ngun, kham, sumngo, suang, le sing a kibawl milim a biakte uh khawl tuan lo uh hi. A mi thahna, a aisanna, a paktatna, le a guktaknate uh zong khawl tuan lo uh hi. Tua ciangin a thahat vantungmi khat, meiipi in tuamin, a lu tungah sakhituihup khimin, a maitang nitaang tawh kibangin, a khete meikuang khuampi tawh a kibang khat, vantung panin a hong kumsuk ka mu hi. A khut sungah laizial neu khat phelsa-in a tawi hi. A taklam khe in tuipi sung sikin, a veilam khe in leitung sik a, nakpitakin kiko ahih manin humpinelkai hawk tawh a kibang hi. Tua bangin a kiko ciangin van sagih a gingte in a dawng hi. Tua van sagih a gingte’ thugen a mankhit phetin tua a thugente lai-ah a gelh dingin ka kithawi hi. Ahi zongin vantung panin awging khat ka za a, “Tua thute lai-ah gelh kei inla, tua van sagih a gingte’ thugen imcip in,” hong ci hi. Tua ciangin tuipi le leitung kalkakin a ding ka muh vantungmi in vantung lamah a taklam khut laamto-in, a nungta tawntung, vantung le a sunga om khempeuh, leitung le a sunga om khempeuh, le tuipi le a sunga om khempeuh a bawl Pasian’ min tawh kiciam a, “Tu-in zekai nawn het lo ding hi. A sagihna vantungmi in a peengkul a tum ciangin ama nasem kamsangte tungah a gensa bangin Pasian in ama ip thusim a geelte hong semkhia ding hi,” a ci hi. Tua ciangin vantung panin awging ka zak in kei kiangah thu hong genkik a, “Tuipi le leitung kalkakin a ding vantungmi’ khut sungah a om laizial kiphelsa pen va la in,” hong ci hi. Tua ahih manin vantungmi kiangah va pai-in tua laizial neu a hong piak nadingin ka va gen leh amah in, “La inla, ne in. Na gil sung a tun ciangin thuk mahmah ding a, ahi zongin na kam sungah khuaizu bangin khum mahmah ding hi,” hong ci hi. Kei zong tua vantungmi’ khutsung panin a laizial neu la-in ka ne hi. Ka kamah khuaizu bangin khum dekdak a, ahi zongin ka nekkhit ciangin ka gil sung thuk velvalsak hi. Tua ciangin keima kiangah, “Minam tuamtuam, pau nam tuamtuam a zangte le kumpite tungah a piang ding thu na gen ding kisam lai hi,” hong kici hi. Tua ciangin ciangkhut tawh a kibang teh nading ciang khat kei kiangah hong kipia a, “Pai inla, Pasian’ biakinn le biakna tau le tua lai-ah Pasian a bia mite va teh in. Ahi zongin biakinn pualam tualte teh kei in. Minam dangte’ khut sungah kipia khin a, amaute in kha sawmli le nih sung Khuapi Siangtho tuancilgawp ding uh ahih manin tua a tualte teh loin nusia lel in. Ka teci nihte puanhampi silhin ka paisak ding a, amaute in ni tulkhat zanih sawmguk sung Pasian’ thu a gen ding uh hi,” hong ci hi. Tua teci nihte pen leitung Topa mai-ah a om oliv kung nihte le meivakna nihte ahi uh hi. Mi khatpeuh in amaute suksiat ding hanciam leh amaute’ kam panin meikuang pusuakin a galte a kangtum hi. Amaute suksiat ding a hanciam peuhpeuh tua bangin kisusia hi. Amaute’ ut hunhunin a thugen laitakun guah zu losak thei uh a, tuite sisan a suahsak theih nadingun vangliatna nei uh a, leitungah gimna a tuamtuam tungsak thei uh hi. Amaute in Pasian’ thu genin a teci panna a zawhkhit uh ciangin kuahawm thukpi sung panin a hong paikhia ganhing in tua teci pangte simin zogawpin that ding a, singlamteh tungah amaute’ Topa a kithahna mun Sodom ahih kei leh Egypt minkhem a pua khuapi kongzingah a luanghawm uh kipaidak ding hi. Mi namkim, pau namkim a zang mi tuamtuamte in ni thum le ni lang sung amaute’ luanghawm en ding uh a, a luanghawmte a kivui ding phal lo ding uh hi. Teci a pang tua kamsang nihte in leitung mite tungah gimna nakpitakin tungsak uh ahih manin hih mi nihte a sihna hangin lungdamin pawi bawl ding uh a, a nuamna uh hangin khatlekhat letsong kipia ding uh hi. Ahi zongin ni thum le ni lang a cinkhit ciangin amaute sungah Pasian kiang panin nuntakna hu lutin, amaute a khe-un hong ding uh ahih manin a mute khempeuh nakpitakin lau mahmah uh hi. Tua ciangin tua teci pang nihte in, “Hih lai-ah hong pai un,” ci-in vantung panin a kisapna awging a za uh hi. Tua ahih manin a galte uh’ muhin vantung meiipi sungah paito uh hi. Tua hun laitakin nakpitakin zin ling a, a khuapi sehsawmsuah sehkhat tang ding kisiacip a, tua zinling in mi tulsagih a sisak hi. A si lo a hing laite lau mahmah uh a, vantung Pasian a liatna thu a phat uh hi. Gimna nihna a bei hita a, ahi zongin gimna a thumna hong tung baih ta ding hi. Tua ciangin a sagihna vantungmi in a peengkul hong tum a, vantungah nakpitakin aw hong ging a, “Leitung uk nading aana neihna pen i Topa Khrih a’ hong suakkhin a, amah in a tawntungin uk paisuak ding hi,” hong ci hi. Pasian mai-a a tokhom ciat uhah a tu upa sawmnih le lite zong mai pukin Pasian bia uh a, “A beisa hun le tu hunah a om tawntung a Vanglian Topa Pasian aw, tu-in na vangliatna zangin uk ding hong kipan khin na hih manin nangma tungah ka nuamna uh ka hong ko uh hi. Na hehna hong kilat hun hong tungta a, misite thukhen nading hun hong tungta ahih manin minam dangte heh mahmah uh hi. Nangma nasem kamsangte, a lian a neu, nang hong kihta mi khempeuhte thaman na piak ding hun hi ta a, leitung a susia mite na suksiat ding hun hi ta hi,” a ci uh hi. Tua ciangin vantungah a om Pasian biakna innpi kihong a, a Thuciamna Singkuang zong biakinn sungah a om a kimu hi. Tua ciangin nakpitakin khua phia-in a ging lianpi om a, van gingin zin ling a, gialpi a kia hi. Tua ciangin vanah lim lamdang lian khat hong kilang hi. Puan silh bangin ni silhin, a khe nuai-ah kha omin, aksi sawm le nih a kisuanna lukhu, a lu tungah a khu numei khat om hi. Tua numei naupaii hi a, nausuah natna tungta ahih manin na sa-in a kiko hi. Tua ciangin lim lamdang adang khat mah vanah hong kilang leuleu hi. Gulpi san a lian mahmah khat om a, lutang sagih le ki sawm nei a, a lutang sagihte-ah lukhu mah nei ciat hi. A mei tawh vanah a om aksi sehsawmsuah sehkhat vatkhia-in leilak a denna hi. A nau a suah phetin a ne pah dingin nausuak dingin a kithawi tua numei’ mai-ah a ding hi. Tua ciangin tua numei in leitung minam khempeuh sik ciangkhut tawh a uk ding ta pasal khat hong nei hi. Ahi zongin tua naungek pen thakhatin kilakhia-in Pasian a tutna a tokhomah a kipaipih hi. A numei pen Pasian in ama a dingin a bawl kholhsakna mun gamlakah tai a, tua munah ni tulkhat zanih sawmguk sung kikhoi ding hi. Tu-in vantungah galkidona hong om a, Mikhael le a vantung mite in gulpi le a vantung mite a do uh hi. Ahi zongin tua gulpi guallel ahih manin tua gulpi le a vantung mite, vantungah ki-om sak nawn lo hi. Tua ciangin tua tanglai gulpi, Dawimangpa ahih kei leh Satan a kici, leitung mi khempeuh a khem pa pen a vantung mite tawh leitungah kilawnsuk hi. Tua ciangin vantungah nakpitakin awging khat ka za a, “Tu-in Pasian in hong honkhia khinta a, kumpi vangliatna a neihna hong lakkhia khinta a, ama Khrih in aana a neihna thu lakkhia khinta hi. Bang hang hiam cih leh a sun a zanin eite’ Pasian’ mai-ah dingin i sanggamte mawhsakna a gen tawntungpa, tu-in vantung panin kilawnkhia khinta hi. I sanggamte in Tuuno sisan le thuman a genna uh tawh amah na zo uh a, a nuntakna nangawn uh na pia ngam uh hi. Tua ahih manin vantungte le tuate sungah a teng mi khempeuh aw, lungdam un! Ahi zongin vantung panin Dawimangpa hong kilawnkhia suk a, hun tomno bek a neilai ahihlam thei ahih manin leitung le tui tungah a omte a dingin lauhuai mahmah ding hi,” hong ci hi. Gulpi in leitungah a kilawnkhia khin ahihlam a kitheih ciangin ta pasal a nei nupi a delh dingin hong kithawi hi. Ahi zongin tua gulpi in a sukkhak theih loh nadingin kum thum le alang sung gamlakah a kikep nading munah a leentheih nadingin muvanlai gol mahmahte’ kha tawh a kibang kha nih tua numei a kiguan’ hi. Gulpi in zong tuikhang tawh tua numei a taihsak theih nadingin a kam panin gunpi luang bangin tua numei’ nungah tui a luangsak hi. Ahi zongin leitung in tua numei na huh a, gulpi kam panin a luang tuite a kam tawh na hupkang hi. Tua ciangin tua numei tungah gulpi heh mahmah a, tua numei’ suanlekhak dangte ahi, Pasian’ thupiakna zui-in, Jesuh thu-ah kiptakin a om mite a sim dingin kuankhia a, tuipi gei-ah dingin a om hi. Tua laitakin tuipi sung panin ganhing khat a hong pusuak ka mu hi. Tua ganhing in ki sawm le lutang sagih nei a, a ki sawmte tungah lukhu khat ciat om a, a lutang sagihte tungah min hoih lo khat ciat a kigelh hi. Tua ka muh ganhing pen kamkei tawh kibang a, a khete vom khe tawh kibang a, a kam pen humpinelkai kam tawh a kibang hi. Gulpi in tua ganhing tungah ama vangliatna, ama tokhom, le aana lianpi a pia hi. A lutang khat in sih nading zahin liamma lianpi nei ngei napi-in damkik a, leitung mi khempeuh in lamdang sa-in tua ganhing a zui ngeingai uh hi. Gulpi in tua ganhing tungah ama aana pia ahih manin mite in tua gulpi a bia uh hi. A ganhing zong bia uh a, “Hih ganhing tawh a kibang kua om a, kua in amah suzo ding ahi hiam?” ci uh hi. Tua ganhing, kiphatsakna le kam khel nono a pautheih nading le kha sawm le nih sung aana a zattheih nadingin thu kipia hi. Tua ahih manin Pasian, ama min, a omna mun, le vantungah a omte khempeuh samsia-in a ko gawpgawp hi. Pasian’ mite simin a zawhgawp theih nading zong kiphal hi. Minam tuamtuam, pau nam tuamtuam a zang mite khempeuh tungah uktheih nading aana a kipia hi. Tua ahih manin a kigo Tuuno laibu sungah a nungta ding mite’ min, leitung pianma pekin a kikhumna-ah a kihel lo leitung mi khempeuh in tua ganhing bia ding uh hi. Tua ciangin leisung panin a hong pusuak ganhing adang khat ka mu hi. Tua ganhing in tuu bangin ki nih nei a, a kampau zia pen gulpi kampau tawh kibang hi. Tua ganhing masa a omna mahah ganhing masa’ aana khempeuh zang a, a liamma a damsa tua ganhing masa pen leitung le a tunga om mi khempeuh, aana tawh a biasak hi. Tua ganhing nihna in nalamdang lianpipi bawl a, mi khempeuhte’ muhin van panin leitungah meikuang nangawn a kiasak thei hi. Ganhing masa omna-ah nalamdang bawltheih nading thu ngah ahih manin a nalamdang bawlna tawh leitungah a om mi khempeuh khem a, namsau tawh a si ding zahin a kisat liamsa hinapi a nungta lai ganhing pahtawi nading milim khat a bawl nadingun a gen hi. Tua ganhing nihna in ganhing masa lim dingin a kibawl milim sungah a hu a muap ciangin hong pauthei a, tua milim a bia lo khempeuh a thahtheih nadingin thu a ngah hi. Tua ganhing in a lian a neu, a hau a zawng, sila le sila ahi lo, mi khempeuh in a taklam khut tung uh ahih kei leh a taltang uhah ciaptehna a neih nadingun thu a pia hi. Tua ahih manin tua ganhing min ahih kei leh a min tangin a nambat ciaptehna a tungah a nei lo mi peuhmah, vanlei vanzuakin paikhia thei lo uh hi. Hih thu-ah pilna kisam hi. Hih nambat pen 666 hi a, mihing khat min tangin a ding hi a, mipil mitei peuhpeuhte in hih ganhing nambat a cihnopna thei ding uh hi. Tua ciangin ka khuadak leh Zion Mual tungah Tuuno a dingin a om ka mu hi. Amah tawh mi tul za le tul sawmli le tulli dingkhawm uh a, tua mite’ taltangah Tuuno le a pa’ min kigelh hi. Tua laitakin tuizeu lianpi le vanging tawh a kibang a gingpha mahmah aw khat vantung panin a hong ging ka za hi. Tua awging pen harp lasakna a kitum a ging tawh kibang hi. Tokhom, ganhing lite, le upate’ lam nga-in tua mihonpite inla thak khat a sa uh hi. Tua la pen leitungah a kitankhiasa mi tul za le tul sawmli le tul lite simloh kuamah dang in sa thei lo uh hi. Hih mite in numei tawh paktatna gamta ngei nai lo uh a, paubaanna a nei lote ahi uh hi. Amaute in Tuuno a paina peuhpeuhah zui uh a, midang khempeuh sung panin a kitankhiasa, Pasian le Tuuno tungah a kipia masa mite ahi uh hi. Amaute, paubaanna om kiuhkeuh lo uh ahih manin zuauthu gen ngei het lo uh hi. Tua ciangin leitungah a teng mi namkim, pau namkim a zang mite tungah a tawntungin Lungdam nading Thu gen ding a nei vantungmi khat vankim lai-ah a leeng ka mu hi. Amah nakpitakin kiko a, “Amah in mihingte thu a khen ding hun hong tungta ahih manin Pasian kihta unla amah phat un. Van le lei, tuinak le tuipite a bawlpa hong bia ta un,” a ci hi. Tua ciangin vantungmi a nihna in hong zui a, “A Lian Babylon khuapi kicim, kicim! Amah a huk a lanna leenggahzu, mi khempeuh tungah pia-in khamsak a, gimna thuaksak hi,” a ci hi. Tua ciangin vantungmi a thumna in a masa tegel hong zui leuleu-in nakpitakin, “Tua ganhing le a lim bia-in a taltang ahih kei leh a khut tungah ciaptehna a ngah mi peuhmah in, Pasian’ leenggahzu zong dawn ding uh hi. Pasian in ama hehna ahi leenggahzu khauh pen ama hehna hai sungah a dimtakin sung khinzo ta hi. Tua bang mite pen a siangtho vantung mite le Tuuno mai-ah meikuang le kat khu tawh gimna kipia ding hi. Amaute a kibawlsiatna mei, khu tawntung a, ganhing le a lim bia-in, a min kigelhna a nei mi peuhmah in a sun a zanin tatsat loin gimna thuak paisuak uh hi,” a ci hi. Pasian’ thupiakna zui-in Jesuh tungah a citak Pasian’ mite a dingin thuakzawhna kisam hi. Tua ciangin vantung panin awging khat ka za a, “Tu a kipanin Topa thu-ah a si mite mi hampha mahmah ahi hi, cihna gelh in,” a ci hi. Tua ciangin Kha Siangtho in, “Hi takpi hi. Amaute’ nasepna thaman in amaute zui ding ahih manin a nasep gimna panun tawlnga-in nuamsa-in om ding uh hi,” ci-in a dawng hi. Tua ciangin ka khuadak leh meiipi a bang a kang biakbuak om a, tua meiipi tungah mihing tawh a kibang khat tu-in, kham lukhu khu-in, a khutah phiaukawi hiam khat a tawi ka mu hi. Biakinn sung panin vantungmi khat hong paikhia a, meiipi tungah a tu mipa nakpitakin samin, “Leitung mite lak dingin min mahmah a, a lak hun hong tungta ahih manin na phiaukawi tawh at in,” a ci hi. Tua ahih manin meii tungah a tupa in leitungah a phiaukawi hong van a, leitung mite a at hi. Tua ciangin vantung biakinn panin vantungmi adang khat hong paikhia leuleu a, amah in zong phiaukawi hiam khat mah a tawi hi. Tua ciangin biakna tau panin vantungmi adang khat hong paikhia leuleu hi. Tua vantungmi pen mei a ukpa hi a, phiaukawi hiam a tawipa kiangah nakpitakin, “Leitung mite leenggah bangin minta ahih manin leitung mite na phiaukawi tawh atin a lom lomin kaikhawm in,” a ci hi. Tua ahih manin vantungmi in zong leitungah a phiaukawi hong van a, leitung mite kaikhawmin Pasian’ hehna lian leenggah cilna phualah a kaikhawm hi. Khuapi pualamah kicil a, a cilna panin sisan vive luangkhia-in, pi nga bang thukin, tai zanih ciang bangah tuikhang bangin a luang hi. Tua ciangin vanah nalamdang lian mahmah khat ka mu hi. Gimna nam sagih a hong keng vantungmi sagih om uh a, Pasian’ hehna a lah tawpna uh ahih manin a nunung pente ahi uh hi. Tua ciangin mei tawh a kihel limlang peekpi kiphah tuipi tawh a kibang ka mu hi. Ganhing, a lim, le a min nambat tawh a kipiasa a zote, Pasian’ lasakna harpte tawi-in tuipi tawh a kibang gei-ah a ding uh hi. Amaute in Pasian’ nasem Moses la le Tuuno la sa uh a, “A Vanglian Topa Pasian aw, na nasepnate lamdangin lian mahmah hi. Khang tawntung a Kumpipa aw, na nasepnate-ah thumanin na thutang hi. Topa aw, nang, kua in hong kihta lo ding a, na liatna hong phat lo ding ahi hiam? Nang bek na siangtho hi. Thumanin na sepnate mi khempeuh in mu uh ahih manin minam khempeuh nang kiangah hong pai-in, na mai-ah hong bia ding uh hi,” a ci uh hi. Tua khit ciangin ka khuadak leh a sungah Pasian’ Ompihna Mun a om vantung biakinn a kihong ka mu hi. Tua biakinn sung panin vantungmi sagih, gimna sagih tawh hong pusuak uh a, puanpak silhin, kham awmgak tawh a awm uh a gak uh hi. Ganhing lite sung panin khat in a nungta tawntung Pasian’ hehna a dim hai sagih, vantungmi sagihte kiangah a pia hi. Tua biakinn sungah Pasian’ minthanna le a vangliatna khu kidim ahih manin, vantungmi sagihte in hong paipih gimna sagih a ven’ matengin biakinn sungah kuamah lut thei lo uh hi. Tua ciangin biakinn panin awging khat in vantungmi sagihte kiangah, “Leitungah va pai unla, hai sungah a om Pasian’ hehnate va sungkhia un,” ci-in awging lianpi tawh a genna ka za hi. Tua ahih manin a khatna vantungmi va pai-in leitungah hai va bung a, a tungah ganhing ciaptehna a neite le a lim a bia mite tungah a kihhuai meima a na mahmah hong piang hi. A nihna vantungmi in tuipi tungah a hai hong bung a, tuipi tuite misite’ sisan tawh kibang hong suak ahih manin tuipi sungah a om nuntakna a nei khempeuh a si hi. A thumna vantungmi in gunte le tuinakte tungah a hai hong bung a, a tui khempeuh sisan a hong suak hi. Tua ciangin tuite a uk vantungmi in, “A beisa hun a kipanin tuhun dongin a om a Siangtho Pa aw, hih bangin na thukhenna-ah nang na thuman hi. Amaute in mi siangthote le kamsangte’ sisan luangsak uh ahih manin tu-in amaute’ dawn dingin sisan a pia na hi hi. Hih pen amaute’ ngah dingin a kilawm ahi hi,” a cihna thu ka za hi. Tua ciangin biakna tau panin aw khat hong ging a, “A Vanglian Topa Pasian aw, na thukhennate thumanin thutang hi,” a cihna ka za hi. A lina vantungmi in ni tungah a hai hong bung a, ni in a satna tawh mite a kanggawp hi. Nisa in mite kanggawp ahih manin mite in hih gimna tawh kisai-ah thu a nei Pasian a samsia uh hi. Ahi zongin a mawhna uh panin kisikin Pasian a phat ding uh ut lo uh hi. A ngana vantungmi in ganhing tokhom tungah a hai hong bung a, tua ganhing’ ukna gam sung tengah khua hong mial hi. Mite in na a sak manun a leii pet uh a, a meimate uh na a sak manun vantung Pasian a samsia uh hi. Ahi zongin a gamtat siatna uh panin kisik nuam lo uh hi. A gukna vantungmi in Eufratis Gun lianpi tungah a hai hong bung a, nisuahna lam kumpite hong pai nading lam a bawlkholhna-in a tuite hong kangcip hi. Tua ciangin gulpi kamsung, ganhing kamsung, le a man lo kamsangpa’ kamsung panin uiphuk tawh a kibang kha gilo thum a hong pusuak ka mu hi. Tuate pen dawite’ kha hi a, nalamdang a bawl uh hi. A Vanglian Pasian’ Ni hong tun ciangin gal a do dingin leitung gam khempeuhah a om kumpite a kaikhawm dingin a kuankhia uh hi. (“Na ngai un! Guta bangin kei ka hong pai hi. Mihon lakah guaktangin pai-in maizumna a ngahkhak loh nadingun a puante uh kemin, pilvang khuaphawkin a om mite a hampha ahi uh hi.”) Tua khate in Hebru pau-in Armageddon a kici munah kumpite a kaikhawm uh hi. A sagihna vantungmi in huihlakah a hai hong bung a, biakinn sung tokhom panin nakpitakin aw khat hong gingin, “Man khinta hi,” a ci hi. Tua ciangin khua hong phia-in, a ging lianpi hong om a, van hong gingin nakpitakin zin hong ling hi. Zinling khempeuh lakah a husia pen ahih manin mihing a pianzawh hih bang zinling omngei nai lo hi. Khuapi phelthum kisuah a, gam sunga om khuapi dang khempeuh kisia hi. Pasian in Babylon khuapi mangngilh lo a, ama hehna ahi leenggahzu a hai sung panin Babylon khuapi a dawnsak hi. Tuikulh khempeuh mangthang a, mual khempeuh maimang hi. Gial gol pipi, khat ciangin tawi sawmthum val a gik, van panin mite tungah hong kia hi. Tua gimna nasialua ahih manin tua gialte hangin mite in Pasian a samsia uh hi. Tua ciangin hai sagih a tawi vantungmi sagihte sung panin kei kiangah khat hong pai a, “Hong pai in; gun tampi gei-ah a kilam a paktat mahmah khuapi gimna a kipiakzia ding ka hong lak ding hi. Leitung kumpite in tua a paktat mahmah nu tawh gamtat hoih lo gamta uh a, leitung mite in ama paktatna leenggahzu dawnin a kham uh hi,” hong ci hi. Kha Siangtho tawh kidimin ka om a, vantungmi in gamlak mun khatah hong tunpih hi. Tua lai-ah, a tungah min hoih lo nam tuamtuam a dimin a kigelh ganhing a san khat tungah numei khat a tu ka mu hi. Tua ganhing in lutang sagih le ki sawm a nei hi. Tua numei in puan a dupsan le a ausan silh a, kham, suangmanpha, le kep kibawl kizepna a tuamtuamte tawh a pumpi dimin kizem a, a paktatna hangin a kihhuai a nin mahmah nate a dimin a omna kham hai khat a tawi hi. A taltang tungah, “A paktat numeite le leitung kihhuainate khempeuh a pianna, A Lian Babylon Khuapi,” ci-in khiatna tuamkhat a nei min a kigelh hi. Tua ciangin mi siangthote le Jesuh tungah a cihtak uh manin a kithat mite’ sisan dawnin zukham a batna ka mu hi. Tua numei ka muh ciangin lamdang ka sa mahmah hi. Ahi zongin vantungmi in keima kiangah, “Bang hangin lamdangsa na hi hiam? Tua numei le amah a pua, lutang sagih le ki sawm a nei ganhing a cihnopna thu ka hong gen ding hi. Tua na muh ganhing nidangin a om hangin tu-in om nawn lo hi. Ahi zongin tu-in kuahawm thukpi panin hong pusuakin sihna a thuak dingin paikhia ding hi. Tua ganhing nidangin omngei a, tu-in om nawn lo napi-in khatvei hong kilangkik ding ahih manin, a nungta mite’ min a kikhumna laibu sungah leitung pianma-in a kigelh nai lo, tu laitakin leitungah a om mite in tua ganhing a et uh ciangin lamdangsa ding uh hi. Hih thu-ah pilna le thutheihna kisam hi. Lutang sagihte pen tua numei a tutna mual sagih ahi hi. Tua lutang sagihte pen kumpi sagihte zong a cihna ahi hi. Tua kumpi sagihte lakah nga beizo a, khat in ukna aana neilai a, khat pen a hong piang lai ding ahi hi. Amah a hong kilat ciangin tomno sung bek om ding hi. Nidangin omngei a, ahi zongin tu-in a om nawn lo ganhing pen kumpi sagihte tawh a kipawl a kumpi giatna hi a, sihna thuak dingin a pai ding ahi hi. Ki sawmte pen gam uk dingin a hong kipan nai lo kumpi sawm hi a, ahi zongin a ganhing tawh kumpi aana a neikhawm dingin nai khat sung bek a hun kipia ding hi. Hih mi sawmte in ngimna khat nei uh a, vangliatna le aana a neihteng uh a ganhing tungah a pia uh hi. Amaute in Tuuno a sim ding uh hi. Ahi zongin Tuuno pen kumpite’ Kumpi, topate’ Topa ahih manin, amah le ama sap, a teel, citakin amah a zuite in tua kumpi sawmte a zogawp ding uh hi,” hong ci hi. Tua ciangin vantungmi in hong genthuah lai a, “A paktat numei a tutna gun tuite pen minam tuamtuam, pau nam tuamtuam a zang mihonpite ahi hi. Tua na muh ganhing le a ki sawmte in a paktat numei mudah ding uh hi. Ama neih khempeuh laksakin a pumguakin koih ding uh a, a sa ne-in mei tawh haltum ding uh hi. Bang hang hiam cih leh Pasian in ama thugente a tuntheih nadingin ama deihna bangin amaute in a sepnop nading uh lungsim guan a, lungsim kikhatin ganhing tungah amau’ ukna aana a piasak hi. Na muh numei pen leitung kumpi khempeuh tungah ukna a nei khuapi ahi hi,” hong ci hi. Tua khit ciangin vantung panin vantung midang khat a hong paisuk ka mu hi. Amah in aana a lian mahmah nei a, ama vang in leitung buppi a taan hi. Amah nakpitakin kiko a, “A Lian Babylon khuapi kicim, kicim! Tu-in dawite’ kua suak khinta-in, kha gilote’ omna suak khinta a, a kihhuai, a muhdahhuai vasa namkim in omna-in neita uh hi. Bang hang hiam cih leh ama hukna leenggahzu mi khempeuh dawnsak a, leitung kumpite tawh paktat a, ama hukna hangin leitung sumbawlte in a hauhlawh uh hi,” a ci hi. Tua ciangin vantung panin aw dang khat ka za a, “Keima mite aw, a mawh gamtatna-ah kihel kha-in a gimthuakna thuakpih kha ding na hih manun hong paikhia un. Ama mawhna in van ban a, a gamtat hoih lohnate Pasian in phawk gige hi. Amah in note hong bawl bangin ama tungah gamta unla, ama tungah a zah nihin thukkik un. Amah in note a hong dawnsak a zah nihin a khauh leenggahzu ama dawn dingin a hai sungah sung un. Amah kisialin a kiphatsakna zah tawh a kizui-in dahna le lungkhamna thuaksak un. Amah in, ‘Kei kumpinu ka hi a, meigong numei lah ka hi kei a, dahna ka thuak ngei kei ding hi,’ ci ahih manin, gimna in ni khatthu-in ban ding a, pulnatna, kahna, le kialpi in vatgawp ding hi. Ama tungah thu a khen Topa Pasian vanglian ahih manin mei tawh kihaltum ding hi,” a ci hi. Amah tawh paktatin a kiphasak khawm leitung kumpite in tua khuapi a katna meikhu a muh uh ciangin dahin a kap ding uh hi. Ama thuakna kihta-in a gamlapi-ah om ding uh a, “Hih a vanglian Babylon khuapi in a thuakna, bangzah takin lauhuai-in, bangzah takin nasia! Nai khat sung bekin hih zah gimna thuak!” ci ding uh hi. Amaute’ na zuakte kuamah in lei nawn lo ahih manin leitung sumbawlte zong tua khuapi’ thuakna hangin dahin a kap uh hi. A khamte, a ngunte, a suangmanphate, a kepte, a puanpakte, a puansante, a nai puante, a khausante, a singnamtuite, a sing manphate, a saihate, a sumngote, a sikte, a suangkangte, a sinnamon singnamtuite, a singteh namtuite, a myrrh paknamtuite, a saledi-te, a leenggahzute, a sathaute, a annelte le mangbuhte, a bawngte le a tuute, a sakolte le a leengte, le mihing ahi a silate uh kuamah in lei nawn lo hi. Tua ahih manin sumbawlte in tua khuapi kiangah, “Deihin na lunggulhgulh na khempeuh maimangta a, na hauhna le na nopcitna teng beita a, cikmah ciangin na ngahkik nawnkei ding hi,” a ci uh hi. Tua khuapi sungah sumbawlin a hauhlawh mite in ama thuakna a muh uh ciangin lau-in a gamlapi-ah dingin kapin thum ding uh a, “Hih a lian khuapi in a thuakna, bangzah takin lauhuai, bangzah takin nasia! Puan hoihnono, a dupsan le a sante silhin, kham, suangmanpha, le kepte tawh a kizem ngei khuapi! Nai khat sungin a hauhna khempeuh maimang ta!” a ci uh hi. Teembaw ukte le a tungah a tuangte, teembaw hawlte le tuipi tungah nuntakna a zongte a gamlapi-ah ding uh a, a khuapi katna khu a muh uh ciangin, “Hih zahin a lian khuapi koi lai-ah om ahi hiam?” ci-in a kiko uh hi. A kah a thum kawmun a lu tung uhah leivui thehin kap uh a, “Tuipi teembaw a nei khempeuh in a hauhlawh uh hih khuapi bangzah takin lauhuai-in nasia ahi hiam? Nai khat sungin maimangta hi. Vantung aw, ama siatna hangin lungdam in. Mi siangthote, sawltakte, le kamsangte aw, note tungah hong gamtatna hangin Pasian in ama tungah thukhenna pia khinta ahih manin lungdam ta un,” a ci uh hi. Tua ciangin a thahat vantungmi khat in angawina suang tawh a kibang suang lianpi khat la-in tuipi sung denna a, “A lian Babylon khuapi hih bangin kilawn ding a, kimukik ngei nawn lo ding hi. Harp lasakna a ging le la sate’ awging, tamngai le peengkul awgingte, nang sungah kiza nawn lo ding hi. Nasem a tuamtuamte nang sungah kimu nawn lo ding a, angawina a ging zong kiza nawn lo ding hi. Na sungah meivak taang zong kimu nawn lo ding a, a kiteng nungak le tangval a lungdamte’ awging kiza nawn lo ding hi. Bang hang hiam cih leh na sumbawlte, leitungah a thahat pen hi a, na ai tawh leitung mi khempeuh na khem hi. Nang Babylon khuapi, hih bangin gim hong kipiakna pen kamsangte le mi siangtho a kithatte’ sisan le leitungah a kithat mi khempeuh’ sisan nangma sungah a kimuhna hang ahi hi,” a ci hi. Tua khit ciangin vantungah mihonpi a kikona awging tawh a kibang khat ka za a, “Pasian phat un! Hotkhiatna, minthanna le vangliatna pen eite’ Pasian-a’ ahi hi. A thukhennate thumanin thutang a, a paktatna tawh leitung mi khempeuh a siasak, a paktat nu tungah thu khen khinta a, ama nasemte a thahsakna hangin ama tungah a phu la khinta hi,” a ci uh hi. Tua ciangin khatvei kiko kik leuleu uh a, “Pasian phat un! Tua khuapi a katna khu tatsat loin van lamah khuto tawntung hi,” a ci uh hi. Tua ciangin upa sawmnih le lite le ganhing lite in tokhom tungah a tu Pasian mai-ah kunin bia uh a, “Amen! Pasian phat un!” a ci uh hi. Tua ciangin tokhom panin aw khat hong ging a, “Amah a kihta a lian a neu mite, le ama nasem khempeuhte aw, eite’ Pasian phat un,” a ci hi. Tua ciangin tuizeu ging le vanging tawh a kibang mihonpi kikona awging bang khat ka za a, “A Vanglian eite’ Topa Pasian kumpi suakkhin ahih manin Pasian phat un. Tuuno’ zineih ding hun hong tungta a, a Lawmnu a kithawisa-in omkhin ahih manin lungdam kipakin amah phat ni. Puan hoih mahmah, siangin a pak mahmahte, ama silh dingin kipia hi,” a ci uh hi. Tua puan hoih pen Pasian’ mi siangthote’ gamtatna mante ahi hi. Tua ciangin vantungmi in keima kiangah, “Hih thu gelh in: Tuuno’ zineihna pawi-ah a kisam mite a hampha mahmah ahi hi,” hong cihkhit ciangin, “Hihte pen Pasian’ gen taktak kammal ahi hi,” hong cithuah lai hi. Tua ciangin amah a bia dingin a khe phungah ka kunsuk a, ahi zongin amah in, “Kei hong bia kei in. Kei pen Jesuh’ hong thugente a lenkip nang le na sanggamte khempeuh tawh nasemkhawm khat ka hi hi. Pasian bia in!” hong ci hi. Jesuh’ thugen in kamsang nasep sepnop nading lungsim a guan ahi hi. Tua ciangin vantung a kihong ka mu a, sakol kang khat a om hi. A tungah a tuang pa pen a Citak a Thuman pa kici hi. Amah in thumanin thu khenin gal a do hi. A mittangte meikuang tawh kibang a, lukhu tampi a khu hi. Amah simloh kuamah dang in a theih loh min khat ama tungah a kigelh hi. Sisan sungah a kidiah puantualpi khat silh a, amah pen, “Pasian’ Thu,” cihna min tawh a kisam hi. Vantung galkapte a siangtho puanpak hoih tawh kizem uh a, sakol kangte tungah tuangin amah a zui uh hi. Minam dangte a zawhgawp nading namsau hiam khat a kam sung panin a pusuak hi. Amah in sik ciangkhut tawh minam dangte ukin, a Vanglian Pasian’ heh mahmahna tawh leenggah cilna-ah leengtui a sukkhia ding hi. A puan tung le a phei tungah, “Kumpite’ Kumpi, topate’ Topa,” ci-in a min kigelh hi. Tua ciangin ni sungah vantungmi khat a ding ka mu a, amah in vankim lai-ah a leeng vasa khempeuh nakpitakin samin, “Pasian’ pawi lianpi-ah a kikhawm dingin hong pai un. Hong pai unla, kumpite’ sa, galkapmangte le galkapte’ sa, sakolte le a tungah a tuangte’ sa, a lian a neu, silate le sila ahi lo mi khempeuhte’ sa hong ne un,” a ci hi. Tua ciangin sakol tungah a tuang pa le a galkapte a sim dingin ganhing le leitung kumpite a galkapte uh tawh a kikaikhawm ka mu hi. Tua ciangin a ganhing le tua ganhing omna-ah nalamdang a bawl kamsang zuau pa kiman khawm hi. Ganhing ciaptehna a neite le ganhing lim a biate pen tua na lamdangte tawh a kikhem ahi hi. Ganhing le kamsang zuau pa, a nihun kat kikhulna meiphualpi sungah a hingtangun kilawn hi. Sakol tungah a tuang pa’ kam panin a hong pusuak namsau in amaute’ galkap khempeuh thatlum khin a, vasate khempeuh in a nekzawh zahzahun amaute’ sa a ne uh hi. Tua ciangin vantung panin vantungmi khat hong paisukin, kuahawm thukpi honna tawhtang le sikkhau khainiang golpi khat a tawi ka mu hi. Amah in tanglai gulpi, Dawimangpa ahih kei leh Satan zong a kici pa manin kum tulkhat sung a hencip hi. Tua ciangin kuahawm thukpi sungah khiasuk a, kum tulkhat a cin mateng minam tuamtuamte a khemtheih nawn loh nadingin a tawh kalhin a ciamteh hi. Kum tulkhat a cinkhit ciangin tawlkhat sung a kikhah ding ahi hi. Tua ciangin tokhom tungah a tu mi pawlkhat ka mu a, tua mite tungah thukhen nading aana a kipia ahi hi. Jesuh thu a genna le Pasian thu hangin a kithat mite’ kha zong ka mu hi. Tua mite in ganhing ahi a, a lim ahi zongin bia lo uh hi; a taltang uhah ahi a, a khut tung uhah ahi zongin ganhing ciaptehna nei lo uh hi. Amaute hong hingkik uh a, Khrih tawh kum tulkhat sung ukna aana a neikhawm uh hi. Kum tulkhat a cin mateng a si dangte hingkik lo uh hi. Hih pen sihna panin thawhkikna a masa ahi hi. Hih thawhkikna masa sungah a kihel mite pen Pasian’ mi siangtho hi a, a hampha mahmah ahi uh hi. Nihvei sihna in tua bang mite bangmah cihzo nawn lo ding a, amaute pen Pasian le Khrih’ siampite hi ding uh a, amah tawh kum tulkhat sung ukna aana nei ding uh hi. Kum tulkhat a cin ciangin a thongkiatna panin Satan kikhah ding a, Gog le Magog a kici leitung gam khempeuhah a om minam khempeuh a khem dingin kuankhia ding hi. Satan in a galsimpih dingin tuipi gei-a sehnel zahin a tam mihonpi kaikhawm ding hi. Leitung khempeuhah amaute pai uh a, Pasian’ mi siangtho omna mun le Pasian in a it khuapi umcih uh hi. Ahi zongin vantung panin meikuang hong paisukin amaute a kangtum hi. Amaute a khem Satan pen ganhing le kamsang zuau pa a omna mun, kat a kikhulna meiphualpi sungah kilawn a, a sun a zanin tua lai munah amaute in gimna a thuak tawntung ding uh ahi hi. Tua ciangin tokhom kang a lian khat le a tungah a tupa ka mu hi. Ama omna panin lei le van lengkhiamang a, a tunna mel uh kithei lo hi. A lian a neu misite tua tokhom mai-ah dingin laibute a kilem ka mu hi. Tua ciangin a nungta mite a kigelhna laibu a dang khat zong a kilem ka mu hi. Amaute’ gamtatna tua laibute sungah a kigelhna tawh kizui-in misite tungah thu a kikhen hi. Tuipi sungah a om misite, tuipi in hong pusuah a, Sihna le Misite’ Gam in zong amau sungah a om misite hong pusuah uh hi. Tua ciangin a vekpi-in amaute’ gamtatnasa tawh kizui-in thu a kikhen hi. Tua ciangin Sihna le Misite’ Gam, meiphualpi sungah a kilawn hi. Hih meiphualpi pen sihna nihna ahi hi. A nungta mite a kigelhna laibu sungah a min a om lo peuhmah meiphualpi sungah kilawn hi. Tua ciangin van thak khat le lei thak khat ka mu hi. Van masa le lei masa maimang khin a, tuipi zong om nawn lo hi. Mothak khat a pasal tawh a kituah dingin a kizem bangin vantung Pasian kiang panin Khuapi Siangtho ahi Jerusalem khua thak a hong paisuk ka mu hi. Tokhom panin nakpitakin awging khat ka za a, “Tu-in Pasian omna inn pen mite tawh omkhawm ta hi. Pasian in amaute ompih ding a, amaute pen ama mite hi ding uh hi. Pasian mahmah amaute tawh omkhawm ding a, amah pen amaute’ Pasian hi ding hi. Amaute’ mit panin khitui khempeuh nulsak ding hi. Thu luisate maimang khinta ahih manin sihna, dahna, le na sa-a kahna cihte om nawn lo ding hi,” a ci hi. Tua ciangin tokhom tungah a tupa in, “Tu-in na khempeuh a thakin ka bawl hi,” ci hi. Tua ciangin, “Hih thute thumanin muantaak ahih manin lai-ah gelh in,” hong ci lai hi. Tua ciangin amah in, “Tu-in man khinta! Kei pen a kipatna le a tawpna a cihna Alfa le Omega ka hi hi. A dangtak mi khempeuh tungah nuntakna tuinak panin a khongin tui ka pia ding hi. A gualzo mi khempeuh in kei tung panin a ngah ding thu in: Kei pen amaute’ Pasian ka hi ding a, amaute keima ta ahi ding uh hi. Ahi zongin a meidawite, a lehtatte, a lampialte, mi thatte, a paktatte, aisante, milim biate, le zuaugente om nading mun pen sihna nihna ahi kat a kikhulna meiphualpi kuang sung ahi hi,” a ci hi. Tua ciangin gimna nunung sagihte a dimin a om hai sagih a tawi vantungmi sagihte sung panin khat kei kiangah hong pai-in thu hong gen a, “Hong pai in; Tuuno zi, a Mothak ka hong lak ding hi,” hong ci hi. Tua laitakin Kha Siangtho tawh ka kidim a, tua vantungmi in mual sang mahmah khat dawnah hong paipih hi. Vantung Pasian kiang panin a hong paisuk Khuapi Siangtho ahi Jerusalem khua a hong lak hi. Tua khuapi pen Pasian’ vang tawh tee ziazua a, Jasper suangmanpha bangin taang a, Kristal suangmanpha bangin siang kilkel hi. A kulh sahin sang mahmah a, kulhkongpi sawm le nih nei-in, a kongpite-ah vantungmi sawm le nih om a, a kulhkongpite tungah Israel minam sawm le nihte’ min kigelh hi. Nisuahna lamah kongpi thum, leilu lamah thum, leitaw lamah thum, nitumna lamah thum mah om hi. Tua khuapikulh pen kulh tawphah suang sawm le nih tungah a kiciang hi a, tua suangtawphahte tungah Tuuno sawltak sawm le nihte’ min kigelh hi. Keima kiangah thu a hong gen vantungmi in tua khuapi, a kulhkongpite le a kulh a teh nadingin kham kibawl tehna ciang khat a nei hi. Tua khuapi a pang kikim linlian a, a dung a vai a kikim ahi hi. A ciang tawh khuapi a teh ciangin tai tul le zanga bang pha a, a dung, a vai le a sanna kikim hi. A kulhpi zong ama zat tehna tawh a teh ciangin pi zanih sawmkhat guk a sang hi. A kulhpi dingin jasper suangmanpha kiciang a, a khuasung pen kham citak tawh a kibawl hi a, limlang bangin siang kilkel hi. Tua khuapi kulh suangtawphahte pen suangmanpha namkim tawh kizem hi. A masa-in jasper suangmanpha, a nihna-ah sapfira suangmanpha, a thumna-ah agate suangmanpha, a lina-ah emerald suangmanpha, a ngana-ah onik suangmanpha, a gukna-ah karnelian suangmanpha, a sagihna-ah khrisolait suangmanpha, a giatna-ah beryl suangmanpha, a kuana-ah topaz suangmanpha, a sawmna-ah khrisoprase suangmanpha, a sawm le khatna-ah jakinth suangmanpha, a sawm le nihna-ah amethyst suangmanpha tawh a kizem hi. A kongpi sawm le nihte kep sawm le nih tawh a kibawl hi a, kongpi khat ciangin kep sabit khat ahi hi. A khuapi sung lampite kham citak vive hi a, limlang bangin a sung kimu paisuak thei hi. A Vanglian Topa Pasian le Tuuno pen khuapi biakinn hita ahih manin tua khua sungah biakinn dang ka mu kei hi. Pasian’ minthanna vang pen khuavak hi a, Tuuno zong meivak hi khin ahih manin tua khuapi in nitaang le khataang cihte kisam lo hi. Tua a taang sungah leitung mite lam pai ding uh a, leitung kumpite in a neihsa khempeuh uh hong paipih ding uh hi. Zan khuamial hun cih om lo ding ahih manin kulhkongpite khak hun cih om loin a tawntungin kihong paisuak ding hi. Leitung mite’ hauhna le liatnateng tua khuapisung hong kitunpih ding hi. Ahi zongin a siang lo, a hoih loin a gamta mi, zuau a gen mite kuamah lut thei lo ding uh a, a nungta mite a kigelhna Tuuno laibu sungah a min a omte bek tua khuapi sungah lutthei ding uh hi. Tua ciangin vantungmi in Pasian le Tuuno tokhom panin a hong luangkhia, kristal suangmanpha bangin a tee selsel gun tui hong lak a, khuapi sung lampi laizangah a luang hi. Tua gun pang tuakah nuntakna singkung po a, kha simin gah ahih manin kum khat sungin sawm le nih vei a gah hi. A tehte zong natna dam nading zatui-in kizang hi. Pasian’ samsiatna a ngah peuhpeuh tua khua sungah om lo hi. Tua khuapi sungah Pasian le Tuuno’ tokhom om ding a, ama nasemte in amah a bia ding uh hi. Amaute in ama maitang mu ding uh a, a taltang tung uhah ama min kigelh ding hi. Topa Pasian pen amaute’ khuavak hi-in, a tawntungin amaute in uk paisuak ding uh ahih manin khuamial hun cih om nawn lo ding a, khua a vaksak ding meivak le nitaang cihte kisam lo ding uh hi. Tua ciangin vantungmi in kei kiangah, “Hih thute muantaak a, thuman ahi hi. Kamsangte tungah a Kha Siangtho a pia Topa Pasian in a hong piang baih ding thute, a nasemte tungah a lak dingin a vantung mite a hong sawl hi,” hong ci hi. Jesuh in, “Kei a hong pai baihta ding ka hi hi. Hih laibu sunga kigelh thu a zui mite mi hampha ahi hi,” a hong ci hi. Keimah Johan in hih thute za-in ka muh ahi hi. Hih thute za-in ka muh ciangin hih thute kei tungah a hong lak vantungmi a bia dingin a khe phungah ka boksuk hi. Ahi zongin amah in, “Kei hong bia kei in. Kei pen nang le na sanggamte, le hih laibu sungah a om thu a zui mite tawh nasemkhawm khat ka hi hi. Pasian bia in,” hong ci hi. Tua ciangin vantungmi in kei kiangah, “Hih laibu sungah a kigelh thute a tun ding hong naita ahih manin imcip kei in. A gilo mite gilo lailai hen la, a kihhuai gamtatte kihhuai gamtat lailai hen la, a hoih gamtatte hoih gamtat lailai hen la, a siangtho mite a siangtho mah hi lailai ta hen!” hong ci hi. Tua ciangin Jesuh in, “Kei ka hong pai baihta ding a, mi khempeuh a gamtatna uh tawh kizui-in a thaman ding uh ka hong puak ding hi. Kei pen a masa le a nunung, a kipatna le a tawpna a cihnopna ahi Alfa le Omega ka hi hi,” a hong ci hi. Khuapi kulhkongpi sungah a luttheih nading le nuntakna singgah a nektheih nadingun a puan uh a siangin a sawp mite, mi hampha ahi uh hi. Ahi zongin a lampial mite, aisan mite, a paktat mite, mi thatte, milim biate, le zuaugen nuamsa-in zuau a gengen mite, khuapi pualamah a om uh hi. “Keimah Jesuh in pawlpite a dingin hih thute nang kiangah a hong gen dingin ka vantungmi ka hong sawl hi. Kei pen David’ zung le a suan ahi, zingsol ka hi hi,” a hong ci hi. Kha Siangtho le Mothak in Jesuh kiangah, “Hong pai in,” a ci uh hi. Hih thu a za mi khempeuh in zong Jesuh aw, “Hong pai in,” ci ta uh hen. A dangtak mi khempeuh hong pai uh hen la, a deih khempeuh in nuntakna tui a khongin hong la ta uh hen. Keimah Johan in hih laibu sungah a kigelh thu a za mi khempeuh ka hong hilhkholh nopna panin: A thu a behlap na om uhleh Pasian in zong hih laibu sungah a kigelh gimnate note tungah hong behlap ding a, hih laibu sungah a kigelh thute a hemkhia na om uhleh Pasian in zong hih laibu sungah a kigelh nuntakna singgah le Khuapi Siangtho sungah na ngah ding uh hamphatnate note kiang panin hong hepkhiatsak ding hi. Hih thu khempeuh hong genin teci a pang mipa in, “Ka hong pai baih taktak ding hi,” hong ci hi. Na cih bangin hi ta peuh hen. Topa Jesuh aw, hong pai ta in! Topa Jesuh hong hehpihna thupha, note khempeuh tungah hong om tahen. Amen.