A kipat cil-in Pasian in vantung leh leitung a piangsak hi. Leitung in lim leh meel nei loin a awngthawlpi ahi hi. A thuk tuipi tung tengah khuamialna om a, tua tuitung teng ah Pasian’ Kha a gamtang hi. Pasian in, “Khuavak om ta hen,” ci hi; tua ciangin khuavak om pah hi. Pasian in khuavak hoih hi ci-in mu hi; Pasian in khuamial panin khuavak khenkhia hi. Pasian in khuavak pen Sun ci a, khuamial pen Zan ci hi. Nitak hong bei-in, zingsang hong tung a, ni khat ni ahi hi. Pasian in, “Tuite’ laizang-ah van kuumpi om hen la, tua van kuumpi in tui leh tui kikhensak hen,” ci hi. Pasian in van kuumpi bawl a, van kuumpi tunga om tuite leh van kuumpi nuai-a om tuite khen hi. Tua mah bangin piang pah hi. Pasian in van kuumpi pen Vantung ci hi. Nitak hong bei-in, zingsang hong tung a, ni nihna ahi hi. Pasian in, “Vantung nuai-a om tuite mun khatah kikhawm hen la, lei keu kidawk hen,” ci hi. Tua mah bangin piang pah hi. Pasian in lei keu pen Leitung ci a, a kikaikhawm tuite pen Tuipite ci hi. Pasian in tua pen hoih hi ci-in mu hi. Pasian in “Leitung in kung tuamtuamte piangsak hen la, tang a nei kungnote, a gah sungah tang a om singgah kungte, amau’ nam ciatin leitungah piangsak hen,” ci hi. Tua mah bangin piang pah hi. Leitung in kung tuamtuamte piangkhiasak a, kungnote in amau’ nam ciatin tang piangsakin, singkung in a sungah tang a om gahte piangsakin, amau’ nam ciatciat-in piangsak hi. Pasian in tua pen hoih hi, ci-in mu hi. Nitak hong bei-in, zingsang hong tung a, ni thumna ahi hi. Pasian in, “Sun leh zan a khen dingin vantungah khuavakte om hen; tuate pen pawi hun leh khua hun, ni leh kumte khen nading limte hi hen la, leitung khua a vaksak dingin vantungah khuavak hi uh hen,” ci hi. Tua mah bangin piang pah hi. Pasian in khuavak lian nih bawl a, khuavak lianzaw pen sun a uk ding, khuavak neuzaw pen zan a uk dingin bawl hi; amah in aksite zong a bawl hi. Nitak hong bei-in, zingsang hong tung a, ni lina ahi hi. Pasian in, “Tuite in a nungta ganhing honpite piangsak hen la, vantung kan tanin huih lakah vasate leeng ta hen,” ci hi. Tua ahih ciangin Pasian in tuipi ganhing golpite leh amau nam ciatin tuipi sungah tampi a pha, nuntakna a nei a gamtang thei ganhing namkim leh kha a nei vasate khempeuh amau nam ciatin piangsak hi. Pasian in tua pen hoih hi, ci-in mu hi. Pasian in amaute thupha pia a, “Ci pha-in tampi pha-in, tuipi tuisung dim un la, leitungah vasate tampi pha un,” ci hi. Nitak hong bei-in, zingsang hong tung a, ni nga-na ahi hi. Pasian in, “Nuntakna a nei ganhingte amau nam ciatin leitung in piangsak hen: innsa, gamsa, leh a bokvak ganhingte amau nam ciatin piang hen,” ci hi. Tua mah bangin piang pah hi. Innsa, gamsa, leh a bokvak ganhing khempeuh amau’ nam ciatin Pasian in piangsak hi. Pasian in tua pen hoih hi, ci-in mu hi. Tua ciangin Pasian in, “Eima' lim, eimah hong suunin mihing bawl ni; tuipi ngasate' tung, huih lak vasate' tung, ganhingte' tung, leitung khempeuh' tung, leitunga a bokvakte khempeuh' tungah ukna neisak ni,” ci hi. Tua ahih ciangin Pasian in ama' lim bangin mihing piangsakin, Pasian’ lim bangin amah piangsak hi; amah in pasal leh numei piangsak hi. Pasian in amaute thupha pia a, Pasian in amaute' tungah, “Ci pha-in tampi pha un la, leitung dimin zo un; tuipi ngasate' tung, huih lak vasate' tung, leitungah a gamtaang, a nungtate khempeuh' tungah ukna nei ta un,” ci hi. Pasian in, “En un, leitung maitang khempeuh ah a om, tang a piangsak kungnote khempeuh leh a gah sungah tang a om singkung khempeuh note' tungah kong pia khin ta hi; tuate an-in na nei ding uh hi. Leitung ganhing khempeuhte' tung, huih lak vasate khempeuh'tung, leitungah a bokvakte khempeuh' tung, nuntakna hu a neite khempeuh' tungah an dingin kung hing khempeuh ka pia khin ta hi,” ci hi. Tua mah bangin piang pah hi. Pasian in a bawlsate khempeuh mu hi, en un, hoih mahmah hi. Nitak hong bei-in, zingsang hong tung a, ni gukna ahi hi. Tua ahih ciangin vantung leh leitung leh a sunga omte khempeuh kiman khin hi. Ni sagih ni-in ama' sep khitsate Pasian in zo a, ama' hihsa nasep khempeuh panin ni sagih ni-in amah tawlnga hi. Tua ahih ciangin Pasian in ni sagih ni thupha pia-in siangthosak hi. Bang hang hiam cih leh pian’sak nasepna ama nasep khempeuh panin tua ni-in Pasian tawlnga hi. Hihte pen, a kipian’sak lai-a vantung leh leitung tangthu ahi hi. Topa Pasian in leitung leh vantung a bawlin, Topa Pasian in leitungah guah zusak loin, leitang a kho ding mi om lo ahih manin gamsung kungnote lei tungah om nai loin, lo sung ankungte a po khiat ma hun, leitung panin meiilum kaaito-in lei maitang khempeuh a buah hunin Topa Pasian in leilak pan-a leivui tawh mihing bawl a, a nak sungah nuntakna hu sangsuk hi; mi in nuntakna a nei mihing hong suak pah hi. Topa Pasian in nisuahna lam, Eden-ah huan khat bawl hi; tua lai munah ama' bawlsa mipa koih hi. A deihhuai, nek dinga a hoih singkung nam khempeuh lei sung panin Topa Pasian in khangsak hi. Huan laizangah zong nuntakna singkung leh a pha leh a sia theihna singkung a om hi. Huan sung a kawtsak dingin Eden panin gun khat luang khia a, tua mun panin gun hong kikhenin lii hong pha hi. A masa pen gun a min in Pishon hi a, kham a omna, Havilah gambup kimkot-a luang pen ahi hi; tua gam-a khamte hoih hi; tua munah bedolak singnai leh onik suang om hi. A nihna gun min in Gihon hi a Kush gam kimkot-a luang pen ahi hi. Assiria gam nisuahna lama a luang a thumna gun min in Tigris ahi hi. A lina gun in Eufrates gun ahi hi. Topa Pasian in mipa la-in Eden huan kho-a a kem dingin koih hi. Topa Pasian in mipa thu pia a, “Na ut utin huan sung singkung khempeuh na nethei ding hi; ahih hangin a pha leh a sia theihna singkung pen na ne kei ding hi; bang hang hiam na cih leh tua na nek ni-in na si taktak ding hi,” ci hi. Tua ciangin Topa Pasian in, “Mipa amah guak a om ding hoih lo hi; ama adinga kituak a huh ding ka bawlsak ding hi,” ci hi. Tua ahih ciangin Topa Pasian in gamsung ganhing khempeuh leh huih lak vasate khempeuh lei tawh bawl a, mipa in tuate bang a ci hiam ci-in a theih nadingin mipa' kiangah tuate paipih hi; nuntakna a nei ganhing khempeuhte pen mipa’ cih bangbang a min hi pahpah hi. Mipa in ganhing namte khempeuh, huih lak vasate khempeuh gamsung ganhing khempeuh min vawh hi; ahih hangin mipa’ adinga a kilawm, a huh ding kimu lo hi. Tua ahih ciangin Topa Pasian in mipa ihmut suak mahmah sak a, ama' ihmut kalin a nakguhte khat la-in tua mun pen satak tawh dimsak hi; Topa Pasian in mipa’ tung panin a lakkhiat nakguh pen numei khatin bawl a, mipa kiangah tua nu paipih hi. Tua ciangin mipa in, “Tu pet petin hih in keima guhte leh keima sate ahi hi; amah pen mipa' sung panin a kilakhia ahih manin Numei kici ding hi,” ci hi. Tua ahih ciangin mipa in a nu leh a pa nusia-in a zi beel a, amaute in sakhat suak uh hi. Mipa leh a zi guaktangin om uh a, maizum lo uh hi. Tu-in gulpi pen, Topa Pasian’ bawlsa gamlak ganhing dangte khempeuh sangin ngiansiam zaw hi. Amah in numei kiangah, “Pasian in, ‘Huan sung sing khatpeuh peuh ne lo ding,’ hong ci ahi hiam?” ci hi. Numei in gulpi' kiangah, “Huan sung singgahte ka ne thei ding uh hi; ahih hangin Pasian in, ‘Huan laizang-a om singgah na ne kei ding uh hi, zong na lawng kei ding uh hi, tua bang hih le uhcin na si ding uh hi’ hong ci hi,” ci hi. Ahih hangin gulpi in numei kiangah, “Na si taktak kei ding uh hi. Bang hang hiam na cih leh tua singgah na nek ciangun na mitte uh kihong ding a, a pha leh a sia thei-in Pasian tawh na kibat ding lamtak uh Pasian in thei hi,” ci hi. Tua ahih ciangin singkung a hoihna, mi a pilsak dingin tua singkung a deihhuaina a muh ciangin, a singgah lo-in a ne hi; amah in zong singgah kimkhat a pasal pia a, a pasal in zong ne hi. A nek khit phetun amaute gel in khua phawk uh a, a guaktangun a om lam uh kithei uh hi; amaute in thei tehte khuituah-in puansilh dingin bawl uh hi. Khuavot hunin huan sungah Topa Pasian a paina ging amaute in za uh a, Topa Pasian’ muhna panin mipa leh a zi, huan sung singte' lakah bu uh hi. Ahih hangin Topa Pasian in mipa samin ama kiangah, “Koi lai-ah om na hi hiam?” ci hi. Amah in, “Nangma' gin’na, huan sungah ka za a, ka lau hi, bang hang hiam cih leh ka guaktangin ka om hi; keimahmah ka butawm hi,” ci hi. Amah in, “Na guaktanga na omna kua in hong gen ahi hiam? Na nek loh dinga kong thupiak singgah ne na hi hiam?” ci hi. Mipa in, “Kei tawh a om dinga nong piak numei in singgah hong pia a, ke’n ka ne hi,” ci hi. Tua ciangin Topa Pasian in numei kiangah, “Bangcia hici gamtat na hi hiam?” ci hi. Numei in, Gulpi in kei hong khem a, ka ne hi,” ci hi. Tua ciangin Topa Pasian in gulpi kiangah, “Nang in hih bangin gamta khin na hih manin, ganhing khempeuhte leh gamlak ganhing khempeuhte sangin ciamsiatna na ngah zaw hi; na gilpi-in lam na pai ding a, na nuntak sung tawntungin leivui na ne ding hi. Nang leh numei' kikal, na suan-le-khakte leh ama’ suan-le-khakte' kikalah kilangneihna ka koih ding hi; amah in na lutang hong tuankham ding a, nang in ama' khetul na tu ding hi,” ci hi. Tua ciangin numei' kiangah, “Naupaina-ah na gimna nakpi takin ka khangsak ding a, gimna tawh nau na suak ding hi. Ahi zongin na pasal mah na deih ding a, amah in nang' tungah hong uk ding hi,” ci hi. Tua ciangin mipa’ kiangah, “Nangmah in na zi’ thu mangin, ‘Nang in na ne kei ding hi,’ ci-a nang’ tungah kong thupiak singgah ne khin na hih ciangin, nangma’ hangin leitang in samsiatna ngah hi; na nuntak tawntung gimpi-in nasemin, na annek ding na zong ding hi. Leitang inling leh kiakte nang’ adingin hong pokhiasak ding a, nang in gamlak kungte na ne ding hi. Lei-ah na ciahkik matengin na maitang-ah khua-ul tawh an na ne ding hi, bang hang hiam cih leh tua sung panin nang hong kipiangsak a, nang in leivui na hi hi, leivui-ah na ciahkik ding hi,” ci hi. Adam in a zi’ min pen Evua ci hi, bang hang hiam cih leh amah in mihing khempeuh’ nu ahi hi. Topa Pasian in mipa leh a zi’ adingin savun puan bawl a, amaute silhsak hi. Tua ciangin Topa Pasian in, “En un, mipa pen eite khat tawh kibang a, apha leh asia thei hi; amah in nuntakna singgah ne-in, hin’ tawntungna ngah kha lo ding hi,” ci hi. Tua ahih ciangin Topa Pasian in amah a kipiansakna leitang a kho dingin Eden huan panin amah sawlkhia hi. Amah in mipa hawlkhia hi; kherubte leh mun khempeuh a nga thei meikuang namsau pen Eden huan nisuahna lamah nuntakna singkung lampi a cing dingin koih hi. Tu-in Adam in ama’ zi Evua luppih a, amah gai-in Kain nei a, “ Topa ’ huhna tawh mi khat ka ngah khin hi,” ci hi. Tua ciangin a sanggampa Abel nei leuleu hi. Tu-in Abel in tuu kempa hi a, Kain in lo khopa ahi hi. Tua hun sungin Kain in lei pan-a piang gah piakna Topa tungah paipih a, Abel in a tuuhon tacilte leh a sa limcite paipih hi. Topa in Abel leh ama piakna thusim a, ahih hangin Kain leh ama piakna thusim lo hi. Tua ahih ciangin Kain heh mahmah a, a mai sia hi. Topa in Kain tungah, “Bang hangin nang heh a, bang hangin na mai sia ahi hiam? Lim takin hih lecin, nang hong kisang lo ding ahi hiam? Lim takin na hih kei leh nang hong hih nuamin mawhna in na kongah hong buk a, nang hong uk nuam hi. Ahih hangin nang in tua mawhna na zawh ding ahi hi,” ci hi. Kain in a sanggampa Abel kiangah, “Gamlakah vak ni,” ci hi. Amaute gamlakah a om ciangun Kain in a sanggampa Abel gal bawlin that hi. Tua ciangin Topa in Kain tungah, “Na sanggampa Abel koi-ah om ahi hiam?” ci hi. Amah in, “Ka thei kei hi; keimah in ka sanggam a kempa ka hi hiam?” ci hi. Topa in, “Nang’ bang hih na hi hiam? Na sanggampa’ sisan, leilak panin keitungah hong kiko hi. Na khut sung panin na sanggampa’ sisan a hup dingin a kam a ka leitang tung panin tu-in nang hong kisamsiat hi. Lo na khawh ciangin leitang in nang’ adingin an hong piangsak nawn lo ding hi; nang pen a galtai, leitunga a vakvai na hi ding hi,” ci hi. Kain in Topa ’ tungah, “Keimah hong kidantahna in ka thuak zawh ding hi lo hi. En in, tu ni-in nangmah in leitung panin kei nong notkhia a, nang’ kiang panin kei nong notkhia hi; kei pen a galtai, leitungah a vakvai ka hi ding a, kei hong mu peuhmah in hong that ding hi,” ci hi. Tua ciangin Topa in ama kiangah, “Tua bang hi lo ding hi. Khatpeuh in Kain a thah leh tuapa' tungah a zah sagihin kithuk ding hi,” ci hi. Amah a tuak peuh in a thah khak loh nadingin Topa in Kain tungah ciamtehna khat koih hi. Tua ciangin Topa ’ omna panin Kain pai khia a, Eden nisuahna lam Nod gamsungah teng hi. Kain in ama’ zi luppih a, amah gai-in Enok nei hi; amah in khuapi khat sat a, tua khuapi min dingin ama' tapa' min Enok phuak hi. Enok sung panin Irad suak hi; Irad in Mehujael’ pa hi, Mehujael in Methushael’ pa hi, Methushael in Lamek’ pa hi. Lamek in zi nih nei hi; a khat’ min in Adah hi a, a dang khat’ min in Zillah ahi hi. Adah in tapa Jabal nei hi; amah pen puanbukte' sungah tengin ganhing a neite’ pian’na pupi ahi hi. A sanggampa’ min in Jubal hi; amah in laiza la sakna leh tamngai tumte khempeuh’ pian’na pupi ahi hi. Zillah in Tubal-kain nei hi; amah in sumngo leh sik na-zat khempeuh a bawlte’ pian’na pupi ahi hi. Tubal-kain’ sanggamnu in Na-amah ahi hi. Lamek in a zite' kiangah: “Adah leh Zillah aw, ka aw ngai un; Lamek’ zite aw, ka thugen ngai un: Kei hong liamsak manin mi khat, kei hong sat manin khanglai mi khat ka that khin hi. Kain a kithah manin a sagih vei-in a kithukkik leh, Lamek a kithah manin sawmsagih mun sagih vei-in kithukkik taktak ding hi,” ci hi. Adam in a zi luppih leuleu hi. Amah in tapa khat nei a, ama' min Seth ci hi, bang hang hiam cih leh, “Kain in amah that ahih manin Abel’ tangin naupang khat Pasian in kei’ adingin hong sehsak hi,” amah in ci hi. Seth in zong tapa khat nei a, ama min Enosh ci hi. Tua hun-a kipanin mite in Topa bia-in a min lawh ding kipan uh hi. Hih in Adam’ suan-le-khakte’ tangthute ahi hi. Pasian in mi a piansakin, amah tawh a kisunin a bawl hi. Amah in pasal leh numei piangsak hi, amaute a kipian’ sak khit ciangin amah in amaute Mi ci a, thupha a pia hi. Adam kum za leh kum sawmthum a nuntak khit ciangin, ama' lim tawh a kibang, amah a sun tapa khat’ pa suak a, amah pen Seth ci-in a min phuak hi. Seth a suah khit cianga Adam’ khan’ sung in kum zagiat ahi hi; amah in tapa leh tanu dang nei hi. Tua ahih ciangin Adam’ nuntak khan sung teng in kum zakua leh kum sawmthum ahi hi; tua ciangin amah si hi. Seth kum za leh kum nga a nuntak khit ciangin Enosh kici tapa khat nei hi. Enosh a suah khit ciangin Seth kum zagiat leh kum sagih nungta a, tapa leh tanu dang nei lai hi. Tua ahih ciangin Seth’ khan sung teng in kum zakua leh kum sawm-le-nih ahi hi; tua ciangin amah si hi. Enosh kum sawmkua a nuntak khit ciangin, amah in Kenan kici tapa khat nei hi. Kenan a suah khit ciangin Enosh kum zagiat leh kum sawm-le-nga nungta hi; tapa leh tanu dang nei lai hi. Tua ahih ciangin Enosh’ khan’ sung teng in kum zakua leh kum nga ahi hi; tua ciangin amah si hi. Kenan kum sawmsagih a nuntak khit ciangin, Mahalalel kici tapa khat nei hi. Mahalalel’ suah khit ciangin Kenan kum zagiat leh kum sawmli nungta a, tapa leh tanu dang nei lai hi. Tua ahih ciangin Kenan’ khan sung teng in kum zakua leh kum sawm ahi hi; tua ciangin amah si hi. Mahalalel kum sawmguk-le-nga a nuntak khit ciangin Jared kici tapa khat nei hi. Jared’ suah khit ciangin Mahalelel kum zagiat leh kum sawmthum nungta a, tapa leh tanu dang nei lai hi. Tua ahih ciangin Mahalalel’ khan’ sung teng in kum zagiat leh kum sawmkua-le-nga ahi hi; tua ciangin amah si hi. Jared kum za leh kum sawmguk-le-nih a nuntak khit ciangin Enok kici tapa khat nei hi. Enok’ suah khit ciangin Jared kum zagiat nungta a, tapa leh tanu dang nei lai hi. Tua ahih ciangin Jared’ khan’ sung teng in kum zakua leh kum sawmguk-le-nih ahi hi; tua ciangin amah si hi. Enok kum sawmguk-le-nga a nuntak khit ciangin, Methuselah kici tapa khat nei hi. Methuselah’ suah khit ciangin Enok in kum zathum sung Pasian tawh lam paikhawm a, tapa leh tanu dang nei lai hi. Tua ahih ciangin Enok’ khan’ sung teng in kum zathum leh kum sawmguk-le-nga ahi hi. Enok in Pasian tawh lam paikhawm hi; Enok kimu nawn lo hi, bang hang hiam cih leh Pasian in amah la hi. Methuselah kum za leh kum sawmgiat-le-sagih a nuntak khit ciangin Lamek kici tapa khat nei hi. Lamek’ suah khit ciangin Methuselah kum zasagih leh kum sawmgiat-le-nih nungta a, tapa leh tanu dang nei lai hi. Tua ahih ciangin Methuselah’ khan’ sung teng in kum za kua leh kum sawmguk-le-kua ahi hi; tua ciangin amah si hi. Lamek kum za leh kum sawmgiat-le-nih a nuntak khit ciangin, tapa khat nei a, ama min Noah phuakin, “ Topa in a ciamsiatsa leitang panin hihpa in i nasepna leh i gimnate panin eite hong khahkhia ding hi,” ci hi. Noah’ suah khit ciangin Lamek kum zanga leh kum sawmkua-le-nga nungta a, tapa leh tanu dang nei lai hi. Tua ahih ciangin Lamek’ khan’ sung teng in kum za sagih leh kum sawmsagih-le-sagih ahi hi; tua ciangin amah si hi. Noah kum za nga a phak khit ciangin, amah in Shem, Ham, leh Jafeth-te, tapa thum nei hi. Lei maitang tungah mite tam dingin hong kipanin, amau’ sung panin tanute hong suah ciangin, Pasian’ tapate in mite’ tanute hoih hi, ci-in mu uh hi; amaute in a deih bangun tuate zi-in la uh hi. Tua ciangin Topa in, “Ka Kha inmi tawh buai paisuak lo ding hi, bang hang hiam cih leh mihing pumpi in a si thei ci-le-sa hi a, a khan’ in kum za leh kum sawmnih hi ding hi,” ci hi. Pasian’ tapate in mihing' tanute luppihin, amaute in ta a neih hun laitak hita leh tua khit hita leh, amau’ suan-le-khak Nefilim a kici mite leitungah om hi. Hih mite in tang lai-a mi thahat, mi minthangte ahi uh hi. Leitungah mihing’ gitlohna a liatna leh mihing' lungsim ngaihsutna peuhmah a sia a hih ngitngetna thu Topa in mu hi. Leitungah mihing a bawl pen Topa khial kisa a, tua thu in ama' lungsim dahsak hi. Tua ahih ciangin Topa in, “Ka piansaksa mihing, ganhing, a bokvak ganhingte leh huih lak vasate, lei maitang panin ka phiatkhia ding hi, bang hang hiam cih leh amaute ka bawl ka khial hi,” ci hi. Ahih hangin Noah in Topa ’ maipha mu hi. Hihte in Noah’ suan-le-khakte tangthu ahi hi. Noah in a thuman mi khat hi a, ama' khang-ah paubang lo hi; Noah in Pasian tawh lam paikhawm hi. Noah in tapa thum, Shem, Ham, leh Jafeth nei hi. Tu-in Pasian’ muhna-ah leitung sia a, leitung in ngongtatna tawh kidim hi. Pasian in leitung mu hi, en un, kisia hi; bang hang hiam cih leh leitungah mi khempeuh a sia-in a gamta lo kuamah om lo hi. Pasian in Noah’ kiangah, “Mi khempeuh beisak ding ka khentat zo hi; bang hang hiam cih leh amau’ hangin leitung in ngongtatna tawh kidim hi; en in, leitung tawh amaute ka susia khawm ding hi. Nang adingin noah-taaksing tawh teembaw khat bawl in; teembaw sungah a deite bawl in la, a sung leh a pua kultal tui tawh zut in. Na bawl nading dan in hih bang ahi hi: teembaw a sauna tong zathum, a zaina tong sawmnga, a san’na tong sawmthum hi ding hi. Teembaw adingin kongvangneu khat bawl in la, tua tung tong khat ciangah zawl bawl in; a pang-ah teembaw kongkhak bulh in; a dawl nuainung, a dawl nihna leh a dawl thumnate bawl in. Bang hang hiam cih leh, en in, vantung nuai-a om nuntak husan’na a nei khempeuh susia dingin leitungah tuiciin ka tungsak ding hi; leitunga om khempeuh si ding hi. Ahih hangin nang tawh ka thuciamna ka kipsak ding hi; teembaw sungah nang na hong pai ding hi, nang, na tapate, na zi leh na natapate' zite tawh na paikhawm ding hi. Nuntakna a nei khempeuh nang tawh a nungta dingin nam khatah nih ciat teembaw sungah na paipih ding hi; tuate pen a nu leh a pa hi ding hi. Vasate amau’ nam ciatin, ganhingte amau’ nam ciatin, lei lak-a a bokvak ganhingte peuhmah amau' nam ciatin, a suakta dingin nam khatah nih ciat nang' kiangah hong pai ding uh hi. A kine an nam khempeuh zong la in la, khol in; tuate pen nang leh amaute’ adingin an ding ahi hi,” ci hi. Noah in tua mah bangin hih hi; amah in Pasian’ thupiak khempeuh hih hi. Tua ciangin Topa in Noah kiangah, “Nang leh na innkuanpihte khempeuh teembaw sungah pai un, bang hang hiam cih leh nang in hih khang mite' sung panin a thuman na hihna ka mu khin hi. Ganhing siangtho kop sagih, a nu leh a pa, ganhing a siang lote kop khat, a nu leh a pa; huih lak vasate zong kop sagih, a nu leh a pa, lei maitang tung khempeuh ah amau’ nam a man’than’ loh nadingin la in. Bang hang hiam cih leh ni sagih sungin sun sawmli leh zan sawmli sung leitungah guah ka zusak ding hi; ka bawlsa nuntakna a nei peuhmah lei maitang panin ka phiatkhia ding hi,” ci hi. Noah in Topa ’ thupiak khempeuh hih hi. Leitungah tuiciin a tun’in, Noah kum zaguk pha hi. Tuiciin pelh dingin Noah, a tapate, a zi leh a tapate’ zite teembaw sungah pai uh hi. Ganhing siangthote, a siangtho lo ganhingte, vasate, leitunga a bokvak peuhmah, nih nih-in, a nu leh a pa, Pasian in Noah a thu piaksa bangin teembaw sungah Noah tawh pai uh hi. Ni sagih khit cianginleitungah tuiciin tung hi. Noah’ nuntak kum zaguk kum, a kha nihna, tua kha ni sawm-le-sagih ni-in van-a om a thuk mahmah tuikhukte puakkhamin, vantung kongvangneute kihong hi. Sun sawmli leh zan sawmli sung leitungah guah zu hi. Tua ni teekteekin Noah leh a tapate, Shem, Ham, Jafeth leh Noah’ zi leh a tapate’ zi thumte, amaute tawh teembaw sungah tum uh hi. Amaute leh gamsa peuhmah ama' nam ciat, leitungah a bokvak peuhmah ama' nam ciat, leh vasa peuhmah, ama' nam ciat, vasa namkim ama' nam ciatin tum uh hi. Nuntak husan’na a nei khempeuh nih nihin Noah tawh teembaw sungah pai uh hi. Pasian’ thupiaksa bangin nuntakna a nei khempeuh teembaw sungah a lut khit ciangin Topa in amah kong khaknelh hi. Leitungah tuiciin ni sawmli sung om den hi; tui tam semsem a, teembaw laamto-in, leitung' tungah khangin sang to hi. Tui khang to-in leitungah tam mahmah hi; tui tungah teembaw laam hi. Leitungah tui khangkhang ahih manin van buppi nuai-a mual lian a sangte khempeuh tuumcip hi; mual liante tungah tui om a, amau tungah tong sawm-le-nga thukin tuam hi. Leitunga a nungta khempeuh, vasate, innsate, gamsate, a hon honin leitungah a hon om ganhingte khempeuh leh mi khempeuh si uh hi; leikeu tunga a om, a nak sungah nuntakna hu a om peuhmah si hi. Mihing, ganhing, a bokvakte leh huih lak vasate, lei maitang tunga om nuntakna a nei peuhmah amah in phiatkhia hi; leitung panin amaute kiphiatkhia hi. Noah leh amah tawh teembaw sunga a om teng bek suakta hi. Ni za leh ni sawmnga sung leitungah tui om hi. Ahih hangin Pasian in Noah leh amah tawh teembaw sungah a om gamsate leh innsate khempeuh phawk hi. Pasian in leitungah huih nungsak a, tui kiam hi; tui thukte leh vantung kongvangneute kikhak a, vantung pan-a guahte kikhawlsak hi. leitung panin tuite kiamkiam hi. Ni za leh ni sawmnga a phak ciangin tuite kiam khinta hi; kha sagihna, tua kha ni sawm-le-sagih ni-in Ararat mual tungah teembaw kinga hi. A kha sawmna ciang dong tuite kiamkiam lai hi; kha sawmna, tua kha ni khat ni-in mual dawnte kidawk hi. Ni sawmli a cin’ ni ciangin Noah in ama bawlsa teembaw kongvangneu hong a, va-ak khat khah hi; leitung pan in tuite a keu mateng leeng kawikawi hi. Tua ciangin, lei maitang panin tuite a kiam khin nai hiam cih a theihna dingin amah in vakhu khat khah hi; ahih hangin, leitung maitang khempeuhah tuite om lai-in a khawl nading mu lo ahih manin teembaw-ahhong ciahkik hi. Tua ahih ciangin amah in a khut zan-in vakhu man a, teembaw sungah paipih hi. Amah in ni sagih sung ngakin, teembaw panin vakhu khah leuleu hi; nitak ciangin ama kiangah vakhu hong ciahkik a, en in, oliv teh a tukkhiat thak khat a kam sungah hong tunpih hi; tua ahih ciangin leitung panin tuite kiam khinta hi ci-in Noah in thei hi. Tua ciangin ni sagih sung ngak leuleu-in vakhu khah hi; tua vakhu pen ama kiangah hong ciahkik nawn lo hi. Noah a khan’ kum zaguk leh a kum khatna, a kha masa, tua kha ni masa ni-in leitung panin tuite keu hi; Noah in teembaw khuhna lakhia a, khuadak hi, en in, lei maitang keu hi. A kha nihna, tua kha ni sawmnih-le-sagih ni-in leitung keu hi. Tua ciangin Pasian in Noah’ kiangah, “Nang leh na zi, na tapate leh na tapate’ zite teembaw sung panin paikhia un, Nang tawh a omkhawm nuntakna a nei khempeuh vasate, ganhingte leh leitunga a bokvak peuhmah –leitungah tampi suakin, pungin leitungah a tam theih nadingin nuntakna a nei peuhmah paikhiatpih in,” ci hi. Tua ahih ciangin Noah pai khia a, a tapate leh ama zi leh a tapate’ zite amah tawh paikhia khawm hi. Ganhing khempeuh, a bokvak khempeuh, vasa khempeuh, leitunga a gamtang khempeuh a innkuan kuanin teembaw panin paikhia uh hi. Tua ciangin Noah in Topa ’ adingin biakna tau khat lam a, a siangtho ganhing khempeuh leh a siangtho vasa khempeuh lak pan khat ciat la-in, biakna tau tungah meihal biakna pia hi. Topa in a namtui gimnam a nap ciangin, a lungsim sungah, “Mi’ hangin leitang ka samsiat kik ngei nawn kei ding hi, bang hang hiam cih leh mi’ lungsim ngaihsutna pen a neucil panin gilo hi; tu-a ka hih bangin nuntakna a neite khempeuh zong ka susia ngei nawn kei ding hi. Leitung a om lai tengin, lo pawi hun leh anlak hun, a vot leh a sa, khuakhal leh phalbi, sun leh zan bei lo ding hi,” ci hi. Pasian in Noah leh a tapate thupha pia a, amaute' tungah, “Pung un la, tampi pha-in, leitung dim un. Note hong kizahtakna leh note hong kikihtakna pen leitung ganhing khempeuh huih lak vasa khempeuh, lei lak-a a bokvak khempeuh leh tuipi ngasa khempeuh tungah om ding hi; na khut sungah amaute hong kipia hi. A nungta a gamtang peuhmah nang adingin an hi ding hi; kung hing khempeuh nang kong piak bangin na khempeuh nang kong pia hi. A nuntakna, a sisan pen, a sa tawh na ne khawm kei bek ding hi. Mi khatpeuh in nang hong thah leh ama' tungah sihna dan ka pia ding hi. Nang a hong that ganhing peuhmah ka that ding a, a mipihte a that mi peuhmah daan ka pia ding hi. Mi a that peuhmahte pen, midangte in amah that ding hi; bang hang hiam cih leh Pasian in ama' lim bangin mi bawl hi. Note, pung-in khang un la; leitungah tampi tak piangkhia un la, tampi pha-in khang un,” ci hi. Tua ciangin Pasian in Noah leh amah tawh a om a tapate’ kiangah, “En un, note leh note’ khit-a na suan-le-khakte uh leh, note tawh a om nuntakna a neite peuhmah, vasate, innsate, note tawh a om leitung gamsa peuhmah, teembaw sung pan-a a paikhia zahzah peuhmah tawh ka thuciamna ka kipsak hi. Tuiciin tawh nuntakna a nei khempeuh susia kik ngei nawn loin, leitung asusia dingin tuiciin a om kik ngei nawn loh nadingin note tawh ka thuciamna ka kipsak hi,” ci hi. Pasian in, “Hih in, kei leh note leh note tawh a om nuntakna a neite khempeuh kikal-ah mai lam khang tawntung adingin thuciamna lim ahi hi. Meii sungah ka sakhituihup ka kaisak a, tua in kei leh leitung kikal-ah thuciamna lim hi ding hi. Leitung’ tungah meii kong kaisak ciangin meii sungah sakhituihup a kimuh leh, kei leh note leh nuntakna a nei khempeuh kikal-ah a om ka thuciamna ka phawk ding hi; tuite pen, nuntakna a nei khempeuh a susia ding tuiciin suak kik ngei nawn lo ding hi. Meii sungah sakhituihup a om ciangin keimah in ka en ding a, Pasian leh leitunga a om nuntakna a nei khempeuh kikal-ah tawntung thuciamna ka phawk ding hi,” ci hi. Pasian in Noah’ kiangah, “Hih in, kei leh leitunga a om nuntakna a nei khempeuh kikal-ah ka kipsaksa thuciamna lim ahi hi,” ci hi. Teembaw sung panin a paikhia Noah’ tapate in Shem, Ham leh Jafeth ahi hi. Ham in Kanaan’ pa ahi hi. Hih thumte in Noah’ tapate ahi uh hi; hihte panin leitung buppi ah a kithehthang mite hong piang hi. Noah in lokho masa pa ahi hi. Amah in leenggui lo khat bawl hi; amah in leenggahzu ne-in kham a, a puanbuk sungah bangmah silh loin lum hi. Kanaan’ pa Ham in a pa guaktangin a omna mu a, a pua lam-a om a sanggam nihte kiangah gen hi. Tua ciangin Shem leh Jafeth in puan khat la-in amaute gel’ liangko tuak-ah baang uh a, a nung leh lam-un pai-in a pa uh’ guaktang omna khuh uh hi; amaute in maingat lo uh ahih manin a pa uh’ guaktang omna mu lo uh hi. Noah a zukhamna pan a pilvan’ ciangin ama' tunga a tapa tum pen’ gamtatna thei a, amah in, “Kanaan in ciamsiatna ngah ta hen la, a sanggamte' tungah silate’ sila hita hen,” ci hi. Amah in, “ Topa ka Pasian in Shem thupha pia hen la, Kanaan pen Shem’ sila hisak hen. Pasian in Jafeth tamsak hen la, Shem’ puanbukte sungah amah teengsak hen; Kanaan ama' sila hisak hen,” zong ci hi. Tuiciin tun’ khit ciangin Noah kum zathum leh kum sawmnga nungta hi. Noah’ khan sung teng in kum zakua leh kum sawmnga ahi hi; tua ciangin amah si hi. Hihte in, Noah’ tapate Shem, Ham leh Jafethte’ suan-le-khakte’ tangthu ahi hi; tuiciin khit ciangin amau' sung panin tapate hong piang hi. Jefeth’ tapate: Gomer, Magog, Madai, Javan, Tubal, Meshek, leh Tiras ahi hi. Gomer’ tapate: Ashkenaz, Rifath, leh Togarmah ahi hi. Javan’ tapate: Eilishah, Tarshish, Kittim, leh Rodanim ahi hi. Hihte pen tuipi gei-a teeng mite’ pu leh pa ahi uh hi. Amaute’ leitang-ah amau’ kampau ciat zangin, a beh, a minamin om uh hi. Ham’ tapate: Kush, Izipt, Put, leh Kanaan ahi hi. Kush’ tapate: Seba, Havilah, Sabtah, Raamah, leh Sabteka ahi hi. Raamah' tapate: Sheba leh Dedan ahi hi. Kush in Nimrod’ pa hi a, Nimrod in leitungah a vanglian masa mi ahi hi. Amah in Topa ’ mai-ah a vanglian sabengpa zong ahi hi; tua ahih ciangin, “Nimrod bangin Topa ’ mai-ah a vanglian sabengpa,” ki ci hi. Ama' kumpi gam kipatna in Babilon, Erek, Akkad leh Kalneh hi a, tuate khempeuh Shinar gamsungah om hi. Tua gam panin Assiria gamsungah amah pai a, Nineveh, Rehoboth-Ir, Kalah leh Nineveh leh Kalah kikal-a om Resen khuapite sat hi; tua in khuapi lian ahi hi. Izipt in Lud mite, Anam mite, Lehab mite, Naftuh mite, Pathru mite, Kasluh mite, (Filistia mite’ pian’na), leh Kaftor mite’ pian’na pupi ahi hi. Kanaan in ama' sung pan a suak masa Sidon, Heth leh Jebus mite, Amor mite, Girgash mite, Hiv mite, Arki mite, Sin mite, Arvad mite, Zamari mite leh Hamath mite’ pian’na pupi ahi hi. Tua khit ciangin Kanaan mite kizelthang hi. Kanaan mite’ gam in Sidon panin kipanin Gerar lam manawhin Gaza ciang dong ban a, Sodom lam panin, Gomorrah, Admah, Zeboi-im, Lasha ciang dong ban hi. Hihte in, a innkuan, a kam pau, a leitang, a minamin Ham’ suan-le-khakte ahi uh hi. Eber mi khempeuh’ pian’na pupi, Jafeth’ u, Shem’ sung panin zong tate hong piang hi. Shem’ tapate: Elam, Asshur, Arpakshad, Lud, leh Aram ahi hi. Aram’ tapate: Uz, Hul, Gether leh Mash ahi hi. Arpakshad in Shelah kici tapa nei hi; Shelah in Eber kici tapa nei hi. Eber’ sung panin tapa nih suak hi: khat’ min in Peleg ahi hi, bang hang hiam cih leh ama' hunin leitung kikhen hi, a sanggampa’ min in Joktan ahi hi. Joktan in Almodad, Shelef, Hazarmaveth, Jerah, Hadoram, Uzal, Diklah, Obal, Abimael, Sheba, Ofir, Havilah, leh Jobab’ pian’na pa ahi hi; hihte khempeuh in Joktan’ tapate ahi uh hi. Amau’ ten’na gamsung in Mesha panin kipanin Sefar lamah nisuahna gam mual tung dong ban hi. Hihte in, a innkuan, a kampau, a leitang, a minamin Shem’ suan-le-khakte ahi uh hi. Hihte in Noah’ tapate’ innkuan, a khangsimna tawh kizui-in amau’ minam ahi uh hi; tuiciin khit ciangin hihte’ tung panin leitungah minamte kizelthang hi. Tu-in leitung buppi in kampau khat leh kammal tawm nei hi. Amaute nisuahna lamah lal uh a, Shinar gamsungah zanglei mun khat mu uh a, tua lai-ah teng uh hi. Amaute khat leh khat kiangah, “Hong pai un, leiseek seekin lim takin hal ni,” kici uh hi. Amaute in suang taangin leiseek nei uh a, a buan dingin kultal tui nei uh hi. Tua ciangin amaute in, “Hong pai un, leitung buppi maitang-ah eite i kithehthang gawp loh nadingin ei’ adingin khuapi khat bawlin, a dawn in vantung a ban ding tausangpi khat lamin, eite’ min ding khat bawl ni,” ci uh hi. Mihingte’ lamsa khuapi leh tausangpi a en dingin Topa hong paisuk hi. Topa in, “En un, amaute in mikhat hi uh a, amaute khempeuh in kampau khat nei uh hi; hih in amau’ sep ding a kipatna bek ahi hi; tu-in sep dinga amau vaihawmte amau’ adingin hi thei nawn lo ding hi. Hong pai un, amaute khat leh khat’ thugen a kitheih loh nadingun eite paisukin amau’ kampau va kitukalhsak ni,” ci hi. Tua ahih ciangin Topa in tua lai panin leitung maitang khempeuhah amaute thehthang a, amaute in akhuapi bawl uh tawp uh hi. Tua ahih ciangin a min Babel kici hi, bang hang hiam cih leh Topa in tua munah leitung khempeuh kampau kitukalhsak hi; tua lai mun panin Topa in leitung maitang khempeuh' tungah amaute thehthang hi. Hihte in Shem’ suan-le-khakte' tangthu ahi hi. Shem kum zakhat a phak, tuiciin khit kum nih ciangin, amah in Arpakshad kici tapa khat nei hi; Arpakshad a suah khit ciangin Shem kum zanga nungta a, tapa leh tanu dang nei lai hi. Arpakshad kum sawmthum-le-nga a nuntak khit ciangin, amah in Shelah kici tapa khat nei hi; Shelah a suah khit ciangin Arpakshad kum zali leh kum thum nungta a, tapa leh tanu dang nei lai hi. Shelah kum sawmthum a nuntak khit ciangin amah in Eber kici tapa khat nei hi; Eber’ suah khit ciangin Shelah kum zali leh kum thum nungta a, tapa leh tanu dang nei lai hi. Eber kum sawmthum-le-li a nuntak khit ciangin amah in Peleg kici tapa khat nei hi; Peleg suah khit ciangin Eber kum zali leh kum sawmthum nungta a, tapa leh tanu dang nei lai hi. Peleg kum sawmthum a nuntak khit ciangin amah in Re-u kici tapa khat nei hi; Re-u a suah khit ciangin Peleg kum zanih leh kum kua nungta a, tapa leh tanu dang nei lai hi. Re-u kum sawmthum-le-nih a nuntak khit ciangin amah in Serug kici tapa khat nei hi; Serug’ suah khit ciangin Re-u kum zanih leh kum sagih nungta a, tapa leh tanu dang nei lai hi. Serug kum sawmthum a nuntak khit ciangin amah in Nahor kici tapa khat nei hi; Nahor’ suah khit ciangin Serug kum zanih nungta a, tapa leh tanu dang nei lai hi. Nahor kum sawmnih-le-kua a nuntak khit ciangin amah in Terah kici tapa khat nei hi; Terah’ suah khit ciangin Nahor kum za leh kum sawm-le-kua nungta a, tapa leh tanu dang nei lai hi. Terah kum sawmsagih a nuntak khit ciangin amah in tapa Abram, Nahor, leh Haran nei hi. Tu-in hihte in Terah’ suan-le-khakte tangthu ahi hi. Terah in Abram, Nahor leh Haran’ pa ahi hi; Haran in Lot’ pa ahi hi. Ama' pa Terah’ a sih ma-in ama suahna gam ahi Khaldea gam Ur khua-ah Haran si hi. Abram leh Nahor in zi nei uh hi; Abram’ zi’ min in Sarai hi a, Nahor’ zi’ min in Milkah hi-in Haran’ tanu ahi hi. Haran in Milkah leh Iskah-te’ pa ahi hi. Tu-in Sarai ciing hi; amah in ta nei lo hi. Terah in ama' tapa Abram leh Haran’ tapa Lot, ama' tupa leh a tapa Abram’ zi ahi a monu Sarai la-in, Kanaan gamsungah pai dingin Khaldea gam Ur khua panin amaute paikhia khawm uh hi; ahih hangin amaute Haran a tun’ uh ciangin tua munah teng uh hi. Terah’ khan’ sung in kum zanih leh kum nga ahi hi; Haran-ah Terah si hi. Tu-in Topa in Abram’ kiangah, “Na gam leh na beh leh na pa’ inn panin nang kong lah ding gamah pai in. Thupha a ngah dingin minam lian khatin nang hong bawlin, thupha hong pia-in, na min kong liansak ding a, nang in thupha na hi ding hi. Nang thupha hong piate thupha ka pia ding a, nang hong samsia mi ka samsia ding hi; nang’ tung tawnin leitung innkuan khempeuh in thupha ngah ding uh hi,” ci hi. Tua ahih ciangin Topa ’ gensa bangin Abram pai hi; Lot in zong amah zui hi. Haran panin a paikhiat-in Abram kum sawmsagih-le-nga pha hi. Abram in ama’ zi Sarai, a sanggampa’ tapa Lot, amau’ kaihkhopsa neihsa khempeuh leh Haran-a amau’ neih mi khempeuh sam a, Kanaan gamah pai dingin amaute dingkhia uh hi. Amaute Kanaan gam a tun’ uh ciangin, Abram in tua gam nawkin Shekhem mun, Moreth tawsaw phung tung hi. Tua hunin tua gamah Kanaan mite teng lai hi. Tua ciangin Abram’ tungah Topa kilang a, “Na suan-le-khakte' tungah hih leitang ka pia ding hi,” ci hi. Tua ahih ciangin amah in ama' tunga kilang Topa adingin biakna tau khat bawl hi. Tua ciangin Beth-el panin nisuahna lam mual-ah amah kin kikin, a puanbuk lam a, nitumna lamah Beth-el, nisuahna lamah Ai om hi; tua lai munah zong amah in Topa ’ adingin biaknatau khat bawl a, Topa ’ tungah thungen hi. Abram in a khualzin zom lai a, Negeb gam lam manawhin pai lai hi. Tu-in gamsungah kialpi tung hi. Tua ahih ciangin tua gamah kialpi nasia ahih manin Abram tawlkhat sung a om dingin Izipt-ah paisuk hi. Izipt gam a tum ding ciangin amah in a zi Sarai’ kiangah, “Nang pen, a melhoih numei khat na hihna ka thei hi; Izipt mite in nang hong muh ciangin amaute in, ‘Hih nu in ama zi ahi hi,’ ci ding uh hi; tua ciangin amaute in kei hong that ding uh a, ahi zongin amaute in nang hong nungtasak ding uh hi. Nang pen ka sanggamnu ci lehang, nangma’ hangin kei’ adingin thu hong hoihzaw ding a, nangma’ hangin ka suakta thei kha ding hi,” ci hi. Izipt gamsungah Abram a tun ciangin Izipt mite in tua nu pen melhoih mahmah hi ci-in mu uh hi. Faro’ uliante in amah a muh uh ciangin Faro’ kiangah amah phat uh hi. Faro’ inn sungah tua nu kila hi. Tua nu’ hangin amah in Abram limbawl mahmah hi; amah in tuu, bawngtal, la-tal, pasal-nasem, numei-nasem, la-nu, leh kalaohte pia hi. Ahih hangin Topa in Abram’ zi Sarai’ huhau-in Faro leh a innkuanpihte gimna lianpi thuaksak hi. Tua ahih ciangin Faro in Abram samin, “Kei tunga nong bawlna hih thu in bang ahi hiam? Amah na zi a hihna bang hang in kei kiangah hong gen lo na hi hiam? Ka zi dingin amah ka lak theih nadingin, ‘Amah in ka sanggamnu hi,’ bang hangin ci na hi hiam? Tu-in hih lai-ah na zi om hi, amah la in la pai un,” ci hi. Faro in amah tawh kisai-in a mite' tungah thupia hi; amaute in a zi leh ama' neih khempeuh tawh lampi-ah amah kha uh hi. Tua ahih ciangin Abram, Izipt panin amah leh a zi, ama’ neih khempeuh leh Lot tawh zong Negeb gam lamah paito hi. Tu-in Abram in ganhing, ngun, leh kham hau mahmah hi. Amah Negeb gam pan kipanin Beth-el ciang dong, a kipat cil-a ama’ puanbuk a omna-sa mun Beth-el leh Ai kikal, a masa-a biakna tau khat a bawlnasa munah khualzinin paisuak hi; tua lai munah Abram in Topa ’ tungah thungen hi. Abram tawh a pai khawm Lot in zong tuuhon leh ganhon leh puanbukte nei a, tua ahih manin mun khat-a teng khawm dingin leitang in amaute gel vak zo lo hi; bang hang hiam cih leh amau’ neihsate tam mahmah ahih manin amaute teng khawm thei lo uh a, Abram’ gancingte leh Lot’ gancingte kitawng zel hi. Tua hun lai takin Kanaan mite leh Perez mite tua gamah teng uh hi. Tua ciangin Abram in Lot kiangah, “Nang leh kei’ kikal, nang’ gancingte leh kei’ gancingte’ kikal-ah kitotna omsak kei ni; bang hang hiam cih leh eite a kibeh i hi hi. Na mai-ah gam buppi om hilo ahi hiam? Kei’ kiang panin nangmah paikhia tawm in. Nang in veilam na lak leh, kei taklam-ah ka pai ding hi; tua ahih kei leh zong, nang in taklam na lak leh, kei veilam-ah ka pai ding hi,” ci hi. Lot zong khuadak a, Jordan gun kuam mun khempeuh in lim takin tui ngahin, Topa ’ huan hita leh, Zoar lam-a Izipt gam tawh hita leh kibang hi ci-in mu hi; hih pen Topa in Sodom leh Gomorrah a suksiat hun ma ahi hi. Tua ahih ciangin Lot in ama adingin Jordan kuam khempeuh teel a, Lot nisuahna lamah pai hi; tua ahih manin amaute kikhen tuak uh hi. Kuam sunga khuapite' lakah Lot tengin a puanbukte Sodom ciang dongah khinin a om laitakin Kanaan gamsungah Abram teng hi. Tu-in Sodom mite mi gilo uh a, Topa ’ tungah nakpi tak-a a khialte ahi uh hi. Ama’ kiang panin Lot a paikhiat khit ciangin Topa in Abram’ kiangah, “Khuadak to in la, nangma' omna panin leilu lam, leitaw lam, nisuahna lam leh nitumna lam en in; bang hang hiam cih leh na muh gam khempeuh nang leh na suan-le-khakte’ tungah kong pia paisuak ding hi. Na suan-le-khakte leitung leivui zahin ka bawl ding hi; mi khatpeuh in leitung leivui a sim theih leh na suan-le-khakte zong kisim thei ding hi. Tho in la, gam dung gam vai kan tanin pai in, bang hang hiam cih leh nang’ tungah kong pia ding hi,” ci hi. Tua ahih ciangin Abram in a puanbuk khinin, Hebron gamsung, Mamre tawsawte’ gei-ah hong pai-in teng hi; tua lai munah Topa adingin biakna tau khat a bawl hi. Shinar kumpipa Amrafel, Ellasar kumpipa Ariok, Elam kumpipa Khedorla-omer, Goi-im kumpipa Tidalte’ hun lai-in, hih kumpite in Sodom kumpipa Bera, Gomorrah kumpipa Birsha, Admah kumpipa Shinab, Zeboi-im kumpipa Shemeber leh Bela (Zoar) kumpipa ahi kumpi ngate va sim uh hi. Hih kumpi ngate in kipawlna bawlin Siddim Kuam (Ci Tuipi)—ah a thahatna uh gawm hi. Amaute in kum sawm-le-nih sung Khedorla-omer’ khut nuai-ah om uh a, ahih hangin a kum sawm-le-thumna ciangin amaute in lehdo uh hi. A kum sawm-le-li-na ciangin Khedorla-omer leh amah tawh a kipawl kumpite hong pai-in gamlak gamgi Elparan ciang dongah Ashteroth-Karnaim gam-a Refaim, Hamgam-a Zuzim, Shavehkiriathain gam-a Emin, leh amau’ gam Seir Mual tunga Hori mite sehnel gamgei a, om El-paran dong hong zo uh hi; tua ciangin amaute kihei kikin Enmishpat (Kadesh) ah hong pai uh a, Amalek mite’ gam khempeuhleh Hazazontamar gam-a a teng Amor mite zong zo uh hi. Tua ciangin Sodom kumpipa, Gomorrah kumpipa, Admah kumpipa, Zeboi-im kumpipa leh Bela (Zoar) kumpipa kuankhia uh a, amaute kipawlin Siddim Kuam-ah Elam kumpipa Khedorla-omer, Goi-im kumpipa Tidal, Shinar kumpipa Amrafel leh Ellaser kumpipa Ariok tawh kido uh hi, kumpi li kigawm leh kumpi nga kigawm kido uh hi. Tu-in Siddim Kuam in kultal khukte tawh kidim hi; Sodom leh Gomorrah kumpite a tai uh ciangin pawl khat tua khukte sungah kia uh a, a om lai teng mual tungah tai uh hi. Tua ahih ciangin galte in Sodom leh Gommorahte’ na khempeuh leh a an khempeuh uh la-in ciah uh hi; amaute in Sodom-a a teng Abram’ sanggampa’ tapa Lot leh ama na khempeuh zong la uh a, pai khia uh hi. Tua ciangin a suakta mi khat hong pai-in, Hebru mi Abram’ kiangah hong gen hi. Amah pen Eshkol leh Aner’ sanggampa ahi hi. Amor mi hi a, Mamre’ tawsawte gei-ah teng hi; hih mite pen Abram’ kipawlpihte ahi hi. Ama’ behpa sal-in a kimatna Abram in a zak ciangin, ama inn sunga a suak, a kihilhsa ama' mi zathum leh sawm-le-giatte makaihin Dan ciang dong a delhin pai uh hi. Amah in amaute do dingin zan hunin ama' pawlte, amah leh a nasemte khenin amaute zo a, Damaskas leilu lam Hobah ciang dong delh uh hi. Tua ciangin amah in na khempeuh, Lot leh ama na khempeuh, numeite leh mihingte ngahkikin ciahpih hi. Abram in Khedorla-omer kumpipa leh a pawlte a zawhna panin a ciahkik ciangin Sodom kumpipa in amah dawn dingin Shaveh Kuam (Kumpipa’ Kuam)-ah na pai hi. Tua ciangin Salem kumpipa Melkhizedek in an leh leenggahzu hong pusuah hi; amah in Sang Pen Pasian’ siampi zong ahi hi. Amah in Abram thupha pia a, “Vantung leh leitung a bawl, Sang Pen Pasian in Abram thupha pia hen; na galte na khut sungah a hong pia, Sang Pen Pasian in thupha ngah hen!” ci hi. Abram in na khempeuh seh-sawm-suah-seh-khat ama' tungah pia hi. Sodom kumpipa in Abram kiangah, “A mite hong pia in la, ahih hangin a nate nang adingin la in,” ci hi. Ahih hangin Abram in Sodom kumpipa' kiangah, “Vantung leh leitung a bawl, Sang Pen Topa Pasian' tungah ka kiciam khin zo hi, nangmah in, ‘Abram ka hausak hi,’ ci kha ding na hih manin mimkhau ahi a, khedap khau ahi a, nangma’ aa ahi na khatpeuh peuh ahi zongin ka la kei ding hi. Tangvalte’ neksakte leh kei tawh hong kuan mite’ tanh dingte lo buang bangmah ka la kei ding hi; Aner, Eshkol leh Mamre-te amau’ tanh ding la sak in,” ci hi. Hih thute khit ciangin mang sungah Topa ’ thu Abram’ tungah hong tung a, Abram aw, lau kei in, keimah in nangma' lum ka hi hi; na thaman lian mahmah ding hi,” ci hi. Ahih hangin Abram in, “ Topa PASIAN aw, bang hong pia ding na hi hiam? Ta nei loin ka om lai hi, ka inn a luah dingpa in Damaskas mi Eliezer ahi hi. Ta nong pia kei a, ka inn sunga a suak sila in keima gamhluah hi ding hi,” ci hi. En in, ama tungah Topa ’ thu hong tung a, “Hih mipa in nangma gamhluahpa hilo ding hi; nangma' tapa mahmah na gamhluahpa hi ding hi,” ci hi. Amah in a pua lamah paipih a, “Vantung lam enin aksite sim in, na sim zo hiam?” ci hi. Tua ciangin amah in, “Na suan-le-khakte tua mah bang ding hi,” ci hi. Amah in Topa um hi; tua ahih manin ahi ding bangin Abram gamta hi, ci-in Topa in ciamteh hi. Tua ciangin ama kiangah, “Hih leitang na neih nadinga nangma’ tungah a hong pia dingin Khaldea gam Ur khua panin a hong paikhiatpihpa in keimah Topa ka hi hi,” ci hi. Ahih hangin amah in, “ Topa PASIAN aw, keimah in tua ka neih nading bangci theih ding ka hi hiam?” ci hi. Amah in, “Kum thum a pha bawngla khat, kum thum a pha keelnu khat, kum thum a pha tuutal khat, vakhu khat leh kawl vakhu khang lai khat hong paipih in,” ci hi. Amah in ama' kiangah hihte khempeuh paipih a, tuate phel nih suahin, phel khat pen a phel khat tungah koih ciat hi; ahih hangin vasate phel nih suah lo hi. Sasialne vasate tua sate' tungah hong tuksuk ciangin Abram in tuate hawlkhia hi. Ni a tum ciangin Abram a ihmut nak suah mahmah hi; en in, ama' tungah a kihtakhuai khuamial sahpi om hi. Tua ciangin Topa in Abram kiangah, “Na suan-le-khakte amau’ leitang ahi lo munah tawl khat omin, tua lai-ah amaute sila hi ding uh a, amaute kum zali sung kinengniam ding a hihna thu a kitel theihna thei in; ahih hangin na a sepsak uh minam’ tungah thukhenna ka tungsak ding a, tua khit ciangin neihsa tampi tawh amaute paikhia ding uh hi. Nangma pumpi ading ahih leh, nuamtakin na pate’ kiang na zuan ding hi; nang pen khan’ kicingin hong kivui ding hi. Khang lina ciangin hih lai munah amaute hong paikik ding uh hi; bang hang hiam cih leh Amor mite’ mawhna kicing nai lo hi,” ci hi. Ni tumin khua a mial khit ciangin, en in, hih sate kikal-ah mei beel khu leh a kuang meivak pai hi. Tua ni-in Topa in Abram tawh thuciamna khat bawl a, “Na suan-le-khakte tungah hih leitang, Izipt gun panin a lian gunpi ahi Eufrates gun ciang dong, Ken mite, Kenaz mite, Kadmon mite Hit mite, Perez mite, Refaim mite, Amor mite, Kanaan mite, Girgash mite leh Jebus mite’ leitang ka pia hi,” ci hi. Tu-in Abram’ zi Sarai in ta nei lo hi. Amah in Hagar min nei Izipt mi numei- nasem khat nei hi; Sarai in Abram’ kiangah, “Tu-in en in, Topa in ka ta neih ding hong khaktan hi; ka numei-nasem nu’ kiangah lum in; ama' sung panin keimah in ta a nei ding ka hi kha ding hi,” ci hi. Abram in Sarai’ thu mang hi. Tua ahih ciangin, Kanaan leitangah Abram kum sawm a ten’ khit ciangin Abram’ zi Sarai in Izipt mi a numei-nasem Hagar la-in a pasal Abram’ tungah zi-in pia hi. Amah in Hagar luppih a, Hagar gai hi; amah a gai lam a kitheih ciangin kiphasakin a tonu simmawh bawl hi. Sarai in Abram’ kiangah, “Keimatungah a man lo-a hong kibawlna nangma' tungah hong tung ta hen! Nangma’ kawi dingin ka numei-nasem kong pia a, amah a gai khitna a kitheih ciangin kei hong simmawh bawlin, Topa in nang leh kei’ kikalah thu hong khen ta hen!” ci hi. Ahih hangin Abram in Sarai’ kiangah, “En in, na numei-nasemnangma’ khut sungah om hi; na ut bangin ama' tungah bawl in,” ci hi. Tua ciangin Sarai in amah gawt bawl a, Hagar zong taikhia hi. Topa ’ vantungmi in Shur paina lampi-a cik ahi, gamlak-a ciktui gei khatah amah mu hi. Amah in, “Sarai’ numei-nasem Hagar aw, koi pan hong pai a, koi-ah pai ding na hi hiam?” ci hi. Amah in, “Ka tonu Sarai’ kiang panin a taikhia ka hi hi,” ci hi. Topa ’ vantungmi in ama kiangah, “Na tonu' kiangah ciahkik in la, ama' tungah ki-ap in,” ci hi. Topa ’ vantungmi in ama' kiangah, “Na suan-le-khakte nakpi takin tamsak ding ka hih manin amaute kisim zo lo ding hi,” zong ci lai hi. Topa ’ vantungmi in ama' kiangah, “En in, nau na paai a, tapa khat na nei ding hi; ama' min Ishmael na phuak ding hi; bang hang hiam cih leh Topa in nangma' thuakna hong mu khin hi. Amah in mipa’ laa zual nai lo bang hi ding a, amah in mi khempeuh langpang-in mi khempeuh in ama' langpang ding hi; ama' behte khempeuh a langkhat lamah amah om ding hi,” ci hi. Tua ahih ciangin ama' tungah thu a gen Topa pen, “Nang in a mu thei Pasian khat na hi hi,” ci hi. Bang hang hiam cih leh amah in, “Keimah in Pasian mu khin taktakin amah ka muh khit ciangin hing lai hilo ka hi hiam?” ci hi. Tua ahih ciangin tua tuikhuk pen Be-erlahairoi kici hi; Kadesh leh Bered kikal-ah om hi. Hagar in Abram tawh tapa khat nei hi; Abram in Hagar’ sung pan-a a suak ama’ tapa min Ishmael ci hi. Hagar in Abram tawh a neih Ishmael a suah ciangin Abram kum sawmgiat-le-guk pha ta hi. Abram kum sawmkua-le-kua a phak ciangin ama’ tungah Topa kilang a, “Keimah in Vanglian Pasian ka hi hi; hoih takin gamta in la, paubaang kei in. Kei leh nang' kikal-ah ka thuciamna ka bawl ding a, nang tampi tak kong phasak ding hi,” ci hi. Tua ciangin Abram mai kun suk hi; Pasian in ama' kiangah, “En in, nang' tungah hih thuciamna kong bawl hi: Nang in minam honpite’ pa na hi ding hi. Na min in Abram hi nawn lo ding a, Abraham hi ding hi; bang hang hiam cih leh minam honpite’ pa-in nang kong bawl khin hi. Keimah in suan-le-khak tampi kong neisak ding hi; nang' sung panin minamte ka piangsak ding a, nang' sung panin kumpite hong piangkhia ding hi. Nang leh nang’ khit cianga na suan-le-khakte' tungah Pasian ka hihna ding tawntung thuciam nadingin kei leh nang leh nang’ khit cianga na suan-le-khakte’ kikal-ah amau' khang tawntungin ka thuciamna ka kipsak ding hi. Nangma' tung leh nang’ khit cianga na suan-le-khakte’ tungah tawlkhat na omna Kanaan leitang khempeuh na neih tawntung dingun kong pia ding hi; keimah in amaute’ Pasian ka hi ding hi,” ci hi. Pasian in Abraham’ kiangah, “Nang leh nang’ khit cianga na suan-le-khakte in zong ka thuciamna na zuih ding uh nong thukim ding uh ahi hi. Hih in kei leh nang leh nang’ khit cianga na suan-le-khakte’ kikalah note’ zuih ding keima thuciamna ahi hi: Note’ lak panin pasal peuhmah vun ki-at ding hi. Note’ vun dawn ki-at ding a, tua in kei leh note’ kikalah thuciamna lim khat hi ding hi. Note' lak panin ni giat a pha peuhmahpa’ vun ki-at ding hi; note’ khang tawntungin pasal peuhmah, note’ inn sunga suak hita leh, note’ ta ahi lo, gamdang mi khatpeuh kiang panin na sum uh tawh na lei uh hita leh, na inn sunga suak hita leh, na sum tawh a kileipa hita leh vun ki-at tuak ding hi. Tua ahih ciangin tawntung thuciamna ahi keima thuciamna in nomau’ satak sungah om ding hi. Ama vun dawn a ki-at lo, vun a ki-at lo pasal peuhmah ama mite kiang panin kikhenkhia ding hi; amah in keima thuciamna palsat hi,” ci hi. Pasian in Abraham’ kiangah, “Na zi Sarai ahih leh, ama' min Sarai na ci nawn kei ding a, ama' min Sarah hi ding hi. Amah thupha ka pia ding a, amah tawh tapa khat kong pia ding hi; amah thupha ka pia ding a, amah in minamte’ nu hi ding hi; mihingte’ kumpite ama' sung pan hong piangkhia ding hi,” ci hi. Tua ciangin Abraham mai kun sukin nui a, amahmah' tungah, “Kum za a pha pasal khat in ta nei ding ahi hiam? Kum sawmkua a pha Sarah in ta nei ding ahi hiam?” kici hi. Abraham in Pasian’ kiangah, “Ishmael hong nungtasak peuh lecin,” ci hi. Pasian in, “Hi lo hi, na zi Sarah in nang’ adingin tapa khat nei ding a, ama' min Isaak na ci ding hi. Ama' khit cianga a suan-le-khakte adingin tawntung thuciamna dingin ka thuciamna amah tawh ka kipsak ding hi. Ishmael’ ading na ngetna ahih leh ka za khin hi; en in, amah thupha pia-in ka pungsak ding a, tampi tak ka phasak ding hi; amah in ulian sawm-le-nihte’ pa hi ding a, minam lian khatin amah ka bawl ding hi. Ahih hangin, kum kik tu hun ciangin Sarah sung panin nang adinga hong suak ding Isaak tawh ka thuciamna ka kipsak ding hi,” ci hi. Amah tawh a kiho a man khit ciangin Abraham' kiang panin Pasian paikhia to hi. Tua ciangin Abraham in a tapa Ishmael leh ama' sum tawh a lei hita leh ama' inn sunga suak hita leh a sila khempeuh, ama' inn sunga om mite' lak panin pasal khempeuh samin, Pasian in ama' tunga a gensa bangin tua ni mahmahin amaute’ vun dawn atsak hi. Ama' vun dawn a ki-atin Abraham kum sawmkua-le-kua pha hi; ama' vun dawn a ki-at hunin a tapa Ishmael kum sawm-le-thum pha hi. Tua ni mahmahin Abraham leh a tapa Ishmaelte a vun uh ki-at hi; ama' inn sunga pasal khempeuh, inn sunga suak hita leh gamdang mite’ tung pan-a sum tawh a kilei mite hita leh, amah tawh a vun uh ki-at khawm hi. Abraham a puanbuk kongkhak-ah sun nisat laitak, tu-in a om lai takin Mamre tawsawte' gei-ah ama' tungah Topa kilang hi. Amah khuadak to hi, en in, mi thum ama' mai-ah na ding hi. Amah in amaute a muh ciangin amaute' dawn dingin puanbuk kongkhak panin va tai a, lei lakah kun sukin, “Ka Topa aw, nong hehpihna-in na nasempa hong kheng kei in. - Na nasempa' kiang hong tung khin na hih buangun—na thahat kik nadingun an tawm khat ka va lak kikal sungin tui tawmkhat la sakin na khe uh sil un la, sing nuai-ah khawl un, tua khit ciangin paisuak un,” ci hi. Tua ahih ciangin amaute in, “Na cihbangin hong hih in,” ci uh hi. Puanbuk sunga Sarah’ kiangah Abraham pai mengmeng a, “Annel hoihte lawh thum hong bawl mengmeng in la, meek manin mohin hong bawl in,” ci hi. Abraham bawnghon lakah tai-in bawngno a dawng a hoih khat la a, a nasempa' tungah manlang tak-a a na bawl pah dingin pia hi. Tua ciangin, amah in bawngnawi-thaukhal, bawngnawi, a minsa bawngno sa la-in amau’ mai-ah lui hi; amaute in a nek lai takun sing nuai-a amau' kiangah amah ding hi. Amaute in ama' kiangah, “Na zi Sarah koi-ah om ahi hiam?” ci uh hi. Amah in, “Puanbuk sungah om hi,” ci hi. Topa in, “Tu zawh kum khat, kumkik ciangin kong pai kik taktak ding a, na zi Sarah in tapa khat nei ding hi,” ci hi. Sarah in ama' nung puanbuk kong-ah na ngai hi. Tu-in Abraham leh Sarah teek uh a, a kum uh ham hi; Sarah a numei ngeina teng tawpta hi. Tua ahih ciangin Sarah amahmah nui-in, “Kei ka teek khit, ka topa zong a teek khitin nopsakna nei ding ka hi hiam?” ci hi. Topa in Abraham' tungah, “Bang hangin Sarah nui-in, ‘Tu-in kei teek ka hih ciangin ta nei takpi ding ka hi hiam,’ ci ahi hiam? Na khatpeuh peuh Topa ’ adingin haksa lua ahi hiam? A kisehsa kumkik ciangin nang' kiangah kong pai kik ding a, Sarah in tapa khat nei ding hi,” ci hi. Ahih hangin Sarah in nialin, “Ka nui kei hi,” ci hi; bang hang hiam cih leh amah lau hi. Amah in, “Hi lo hi, na nui mah hi,” ci hi. Tua ciangin tua mun panin mite paikhia a, amaute in Sodom lam en uh hi; amau’ pai nading lampi-ah a kha dingin Abraham in amaute va zui hi. - Topa in a lungsimah, “Abraham a lian a thahat minam suakin, leitung minam khempeuh in ama' tung tawnin thupha ngah ahih manin, tu-a ka hih ding thu Abraham’ tungah im ding ka hi hiam? Im kei ning. Bang hang hiam cih leh Topa in Abraham’ tunga a ciamsa thu a tun’sak theih nadingin ama' khit-a a tate leh a innkuanpihte in thuman leh thutang-a nasepna tawh Topa ’ thupiakte a zuih theih nadingun a hilh dingin amah ka teel khin hi,” ci hi. Tua ciangin Topa in, “Sodom leh Gomorrah a kimawhsakna lianin amaute’ khialhna nasia mahmah hi, kici ahih manin, kei' tunga hong kigen bangin amaute gamta takpi uh hiam ci-in a thei dingin ka paisuk ding hi; tua bang ahih kei leh, ke’n ka thei ding hi,” ci hi. Tua ahih ciangin tua panin mite kihei-in Sodom lamah pai uh hi; ahih hangin Topa ’ mai-ah Abraham ding lai hi. Tua ciangin Abraham in hong naihin, “Thuman mite mi gilote tawh susia khawm takpi ding na hi hiam? Gentehna-in, khuapi sungah thuman mi sawmnga om leh; tua sunga om thuman mi sawmngate’ hangin khah loin tua mun susia teitei ding na hi hiam? Thuman mite in mi gilote tawh a kibat nadingin mi gilote tawh thuman mite thah khawm ding, hi thei ahi hiam? Tua pen hi thei lo ding hi. Leitung khempeuh Thukhenpa a manin gamta lo ding ahi hiam?” ci hi. Topa in, “Sodom khuapi sungah thuman mi sawmnga ka muh leh, amaute’ hangin tua mun buppi ka khah ding hi,” ci hi. Abraham in thu gen a, “En in, leivui leh vut ahi lel keimah in Topa ’ tungah thu kong gen ngamna hong maisak in. Gentehna-in, thuman mi sawmnga sung panin nga om kei leh? Tua nga a om loh manin khuapi buppi na susia veve ding hiam?” ci hi. Amah in, “Tua sungah sawmli-le-nga ka muh nak leh ka susia kei ding hi,” ci hi. Ama' kiangah thu gen kikin, “Gentehna-in, tua sungah sawmli kimu leh,” ci hi. Amah in dawngin, “Sawmlite’ hangin ka hih kei ding hi,” ci hi. Tua ciangin amah in, “ Topa heh kei in, thu kong gen ding hi. Gentehna-in, tua lai-ah sawmthum kimu leh,” ci hi. Amah in dawngin, “Sawmthum ka muh leh ka hih kei ding hi,” ci hi. Amah in, “En in, Topa tungah thu kong gen ngam lailaina hong maisak in. Gentehna-in, tua lai-ah sawmnih kimu leh,” ci hi. Amah in dawngin, “Sawmnihte’ hangin ka susia kei ding hi,” ci hi. Tua ciangin amah in, “ Topa heh kei in, hih khat vei bek thu hong gensak lai in. Gentehna-in, tua lai-ah sawm kimu leh,” ci hi. Amah in dawngin, “Sawmte’ hangin ka susia kei ding hi,” ci hi. Abraham' tungah a thugen ding a man khit ciangin ama' paina dingah Topa pai a, Abraham zong ama' innah ciahkik hi. Vantungmi nihte Sodom-ah nitakin hong tung uh hi; Sodom khua kulh kongpi-ah Lot na tu hi. Lot in amaute a muh ciangin, amaute dawn dingin ding a, lei lakah a mai ngatin kunin, “Ka tote aw, kong thum hi, na nasempa’ inn lamah hong kihei un la, hong giak un, na khete uh sil un; tua ciangin zingsangin tho baihin na pai nading lam uhah pai pan un,” ci hi. Amaute in, “Hi lo hi; khua sung tualpi-ah ka giak ding uh hi,” ci hi. Ahih hangin amah in amaute nakpi takin kun hi; tua ahihciangin amaute ama' lamah kihei a, ama' innah lut uh hi; amah in amaute adingin an bawl a, silngo sawh loh anlum em hi, amaute in ne uh hi. Ahih hangin amaute’ lup ma-in khua sung mi, Sodom khuamite, a moi a ham-in mi khempeuh in a inn umcih uh hi; amaute in Lot sam a, “Tu nitak-a nang’ kianga hong tung mite koi-ah om ahi hiam? Amau’ taw ka luk theih nadingun ko kiangah amaute hong paikhiatpih in,” ci uh hi. Kongkhak pualam-a mite' kiangah Lot pai-in kong lehkhak a, “Ka sanggamte aw, tua banga na gitloh gamtat loh nading uh kong thum hi. En un, ta nungak nih ka nei hi; no' kiangah amaute hong paikhiat pihsak un la, na ut bangun amaute' tungah bawl un; hih mite' tungah bangmah bawl kei bek un, bang hang hiam cih leh amaute keima' inn sung hong tung khin uh hi,” ci hi. Ahih hangin amaute in, “Taikhia in!” ci uh hi. Amaute in, “Kote’ kiangah hong peem pak a, tu-in nang thukhen hong kineih! Tu-in amaute' sangin nang kong siatbawl zaw ding uh hi,” ci hi. Tua ciangin amaute in nakpi takin Lot’ lam hong neh uh a, kongkhak a phukham zah dongin hong neh uh hi. Ahih hangin mi nihte in amau’ khut hong zan-in inn sung amau' kiangah Lot paipih uh a, kong khak uh hi. Inn kongkhak-a om mi a neu a liante amaute in a mit uh tawsak a, tua ahih ciangin kongkhak a zawt zawt hangun mu zo lo uh hi. Tua ciangin mi nihte in Lot kiangah, “Hih lai-ah tanau dang na nei hiam? Makte, tapate, tanute, ahih kei leh khua sunga nang’ mi peuhpeuh hih mun panin paikhiatpih in; bang hang hiam cih leh hih mite a kimawhsakna thu lianpi Topa ’ tungah tung khin a, a susia dingin Topa in kote hong sawl khin ahih ciangin hih mun a susia ta ding ka hi uh hi,” ci uh hi. Tua ahih ciangin Lot paikhia-in a tanute a ten’pih ding a mak dingte' kiangah, “Tho un, hih mun panin paikhia un; bang hang hiam cih leh Topa in khuapi a susia ding hi ta hi,” ci hi. Ahih hangin amah a mak dingte tungah a ciamnui bang lel hi. Zingsang khua vak ciangin vantungmite in, “Khuapi dan piakna sungah kangtum kha ding na hih uh ciangin tho in la, hih lai-a om na zi leh na tanute la in,” ci-in Lot sawl hamtang uh hi. Ahih hangin amah lungka-in om lai veve hi; tua ahih ciangin, Topa in ama' tungah hehpihna nei ahih manin, mite in amah leh a zi leh a tanu nihte a khut uh tawh manin, amaute in amah paikhiatpih-in khua pua lamah koih uh hi. Amaute in a paikhiatpih khit uh ciangin, “Na nuntak nadingin tai un; nunghei kei un la, kuam sungah zong khawl kei un; note hong kangtum kha ding ahih manin mual tungah tai to un,” ci uh hi. Lot in amaute' tungah, “Hi lo hi, ka tote aw; en un, note’ muhna-ah na nasempa in maipha mu zo a, ka nuntakna nong hutna uhah migitna lianpi kei' tungah nong lak khin uh hi; ahih hangin mualtung gamla ahih manin ka tun’ ma-in siatna in kei hong pha-in ka si ding hi. En un, gal-a om khuapi tai nadingin nai a, a neu khuapi khat ahi hi. Tua lai-ah hong taisak un—a neu khat hilo ahi hiam?—tua hi leh ka suakta ding hi,” ci hi. Amah in ama' kiangah, “En in, na gensa khuapi ka lumlet loh nading, hih ngetna zong nang kong pia hi. Kinawh in la, tua lai-ah tai in; bang hang hiam cih leh tua lai-ah nang na tun’ mateng ke’n bangmah ka hih thei kei hi,” ci hi. Tua ahih ciangin tua khuapi min Zoar kici hi. Zoar-ah Lot a tun ciangin tua lai-ah ni suak khin ta hi. Tua ciangin Topa in vantung panin Sodom leh Gomorrah tungah kaat leh meikuang zusak hi; amah in tua khuapite, kuamte khempeuh, khuapite sunga mi tengte khempeuh leh leitunga a po khempeuh susia hi. Ahih hangin a nunga om Lot’ zi nunghei a, amah cikhuam suak hi. Topa mai-ah a dinnasa munah zingsang tungin Abraham va pai hi; amah in Sodom leh Gomorrah leh kuamte khempeuh lam nga sukin khuadak hi, en in, leitang khu pen meiphualpi khu bangin kahto hi. Pasian in kuam sunga khuapite a suksiat lai-in, Pasian in Abraham phawk a, amah in Lot’ ten’na khuapite a suksiat ciangin tua bang a suksiatna sung panin Lot sawlkhia a, tua bangin a piang ahi hi. Tu-in Zoar panin Lot paikhia to-in a tanu nihte tawh mual tungah teng hi, bang hang hiam cih leh Zoar-ah a ten’ ding lau hi; tua ahih ciangin a tanu nihte tawh suanghawm sung khatah teng uh hi. A u pen in a nau' tungah, “I pa teek a, leitung khempeuh ngeina bangin eite hong luppih ding pasal khat zong om lo hi. Hong pai in, i pa leenggahzu khamsak ni, i pa tawh suan-le-khak i kizopsak theih nadingin amah tawh lum khawm ni,” ci hi. Tua ahih ciangin amaute in tua nitakin a pa uh leenggahzu khamsak uh hi; a u nu pai-in a pa tawh lum hi; a tanu a lup lam hita leh a thawh lam hita leh amah in thei lo hi. A zing ciangin a u in a nau tungah, “En in, zan zan-in i pa tawh ka lum hi; tu nitakin zong amah leenggahzu khamsak ni; tua ciangin nang pai in la, i pa tawh suan-le-khak i kizopsak theih nadingin amah tawh lum khawm in,” ci hi. Tua ahih ciangin amaute in tua nitakin zong a pa uh leenggahzu khamsak uh hi; a nau pai-in amah tawh lum hi; a tanu a lup lam hita leh a thawh lam hita leh amah in thei lo hi. Tua ahih ciangin Lot’ tanute gel in a pa uh tawh ta nei uh hi. A u in tapa khat nei-in ama min Moab phuak hi; amah in tu hun-a Moab mite’ pian’na pupi ahi hi. A nau in zong tapa khat nei a, a min Ben-ammi phuak hi; amah in tu donga Ammon mite’ pian’na pupi ahi hi. Tua mun panin Negeb gamah Abraham paisuk a, Kadesh leh Shur kikal Gerar-ah tawl khat sung teng hi. Abraham in a zi Sarah pen, “Ka sanggamnu hi,” ci hi. Gerar kumpipa Abimelek in mi sawl-in Sarah samsak hi. Ahih hangin zan-in mang sungah Abimelek kiangah Pasian pai a, ama' kiangah, “En in, na laksa numei’ hangin nang in a si ding na hi hi; bang hang hiam cih leh amah in mi khat’ zi ahi hi,” ci hi. Tu-in Abimelek in amah zuan nai lo hi; tua ahih ciangin amah in, “Topa aw, nang in mi dikpa that ding na hi hiam? Amahmah in kei kiangah, ‘Amah in ka sanggamnu ahi hi,’ hong ci hilo ahi hiam? A numei mahmah in zong, ‘Amah in ka sanggampa ahi hi,’ hong ci hi. Tua ahih ciangin lungsim kisuang het loin a gamta ka hi a, khial ka kisa kei hi,” ci hi. Tua ciangin Pasian in mang sungah ama' kiangah, “Hi hi, lungsim kisuan’na om loin hih bangin na gamtatna thu ka thei a, kei' tungah na khialh loh nadinga hong kempa in keimah ka hi hi; tua ahih ciangin nangmah kong lawngsak kei hi. Tua ahih ciangin tu-in mipa’ zi pia kik in; bang hang hiam cih leh amah in kamsangpa khat hi a, amah in nang’ adingin thu hong ngetsak ding a, nang na nungta ding hi. Ahih hangin nang in tua numei na piak kik kei leh nang leh na neih khempeuh na sih taktak ding uh thei in,” ci hi. Tua ahih ciangin zingsangin Abimelek tho baih a, a nasemte samin hih thute khempeuh amaute' kiangah gen hi; amaute nak lau mahmah uh hi. Tua ciangin Abimelek in Abraham samin ama' kiangah, “Kote tungah bang hong bawl na hi hiam? Kei leh ka kumpigamsungah khialhna lianpi khat nong tut nadingin nang' tungah bang hong ci khialh ka hi hiam? Hih dinga kilawm lo nate kei’ tungah nong hih hi,” ci hi. Tua ciangin Abimelek in Abraham kiangah, “Hih banga na gamtat nadingin bang ngaihsun na hi hiam?” ci hi. Abraham in, “Hih lai munah Pasian zahtakna om het lo hi, ka zi’ hangin amaute in kei hong that ding hi, ci-in ngaihsun kha ka hih manin hih bangin ka gamta hi. Tua tham loin a taktakin amah in ka sanggamnu mah ahi hi, pa kikhat, nu tuam ka hi uh hi; amah ka tenpih hi. Pasian in ka pa’ inn panin hong paikhiatsak ciangin ama' kiangah, ‘Hih in kei tunga nong hih ding na migitna ahi hi: I paina peuhpeuh-ah kei pen, ka sanggampa hi,’ hong ci-in, ka ci hi,” ci hi. Tua ciangin Abimelek in tuu leh bawngtalte, pasal-sila leh numei-silate la-in Abraham pia a, ama' tungah a zi Sarah piakik hi. Abimelek in, “En in, ka leitang in na mai-ah om hi; nangmah in hoih nasakna munah teng in,” ci hi. Sarah’ kiangah, “En in, na sanggampa’ tungah ngun shekel tul khat ka pia khin hi; nang tawh a om mite khempeuh’ mai-ah nangma' dikna a kilatna ahi hi; mi khempeuh’ mai-ah nang a manin hong kibawl hi,” amah in ci hi. Tua ciangin Abraham in Pasian' tungah thungen a, Pasian in Abimelek damsak hi. Amaute in ta a neih theih nadingin a zi leh a numei-silate zong damsak hi. Bang hang hiam cih leh Topa in Abraham’ zi Sarah’ hangin Abimelek’ innkuan’ naubu khempeuh khakcipsak khin hi. A gensa bangin Topa in Sarah' tungah thupha pia a, a gensa bangin Sarah’ tungah Topa in hih hi. Sarah gai hi, ama' tunga Pasian in a gensa hunin a teek zawhin Abraham tawh tapa khat nei hi. Abraham in Sarah tawh a neih ama' tapa’ min Isaak phuak hi. Pasian in ama' tunga a thu piaksa bangin amah in ni giat a phak ciangin Abraham in a tapa Isaak a vun at hi. A tapa Isaak a suah ciangin Abraham kum za pha hi. Sarah in, “Pasian in kei’ adingin nuam-a nuihzak nading hong bawlsak khin hi; a za peuhmah in nuamin hong nuihpih ding uh hi,” ci hi. Amah in, “Sarah in nau nawi pia ding ci-in kua in Abraham’ tungah gen ngei ding ahi hiam? Ahi zongin a teek khitin amah tawh tapa khat ka nei hi,” ci hi. Naupang khang a, nawi tawh hong kikhen ta hi; Isaak nawi tawh a kikhen ni ciangin Abraham in pawi lianpi khat bawl hi. Ahih hangin, Abraham tawh a neih Izipt-nu Hagar’ tapa in ama' tapa Isaak a simmawh bawlna Sarah in mu hi. Tua ahih ciangin amah in Abraham’ kiangah, “Hih sila-numei a tapa tawh lawnkhia in; bang hang hiam cih leh sila-numei’ tapa in ka tapa Isaak tawh gamhluah lo ding uh hi,” ci hi. Ama' tapa’ hangin Abraham’ tungah thu nuam het lo hi. Ahih hangin Pasian in Abraham tungah, “Tangvalpa leh na sila-numei hangin lungkim loin om kei in; Sarah in nang' tunga hong gen peuhmah ama' hong gen bangin gamta in, bang hang hiam cih leh Isaak tawh na suan-le-khakte’ min kilo ding hi. Amah pen nangma' ta ahih manin, sila-numei’ tapa zong minam khat in ka bawl ding hi,” ci hi. Tua ahih ciangin zingsangin Abraham tho baihin an leh tuithawl la-in Hagar pia a, ama' liangko tungah naupang tawh suanin amah sawl khia hi. Amah pai khia a, Be-ersheba gam sungah vak kawikawi hi. Thawl sunga tui a bei ciangin amah in sawlbawk nuai khatah naupang lawn hi. Tua ciangin amah pai-in a hoih khop khat a gamla, thal lot khat tan bangah a ta nungngatin tusuk hi; bang hang hiam cih leh amah in, “Naupang’ sih hong musak kei in,” ci hi. Amah nungngatin a tut lai takin naupang in a aw sangsakin kap hi. Pasian in tangvalpa’ aw za hi; Pasian’ vantungmi in vantung panin Hagar sam a, ama kiangah, “Hagar aw, bang in hong lungkhamsak hiam? Lau kei in; bang hang hiam cih leh tangvalpa a omna mun-a a kahna awging Pasian in za hi. Ding in, tangvalpa la in la, na khut tawh kip takin len in; bang hang hiam cih leh minam lian khatin amah ka bawl ding hi,” ci hi. Tua ciangin Pasian in ama' mit haksak a, amah in tuikhuk khat mu hi; amah pai-in tui tawh tuithawl dimin tangvalpa dawnsak hi. Pasian in tangvalpa ompih a, amah khangto hi; amah gamlakah teng a, thal lot siampa khat hong suak hi. Amah Paran gamsungah teng hi; a nu in Izipt gam panin ama ading zi khat la hi. Tua hun lai takin Abimelek leh a galkap mangpa Fikol in Abraham’ kiangah, “Na’ sepna khempeuhah Pasian in nang hong ompih hi; tua ahih ciangin tu-in kei hita leh ka tate hita leh ka suan-le-khakte hita leh tungah a man lopi-in hong bawl loin, nang' tungah thuman tak tawh kong gamtat bangin keima' tung leh tawl khat na omna leitang tungah nong gamtat nadingin Pasian tawh kei tungah hong kiciam in,” ci hi. Abraham in, “Ka kiciam ding hi,” ci hi. Abimelek’ nasemte in a suhsa tuikhuk tawh kisai thu Abraham in a lungkim lohna Abimelek' kiangah a gen ciangin, Abimelek in, “Kua in hih hiam ka thei kei hi; nang nong gen kei a, keimah in tu ni dong ka za nai kei hi,” ci hi. Tua ahih ciangin Abraham in tuu leh bawngtalte la-in Abimelek pia a, tua mi nihte in thuciamna khat bawl uh hi. Abraham in a tuuhon sung panin tuu-nu-no sagih tuam koih hi. Abimelek in Abraham' kiangah, “Hih na koih tuam tuu-nu-no sagihte bang a cih nopna ahi hiam?” ci hi. Amah in, “Keimah in hih tuikhuk ka tawhna thu-ah nang in keima adingin teci na hih theih nadingin nangmah in ka khut sung panin hih tuu-nu-no sagihte na la ding hi,” ci hi. Tua ahih ciangin tua mun Be-ersheba kici hi; bang hang hiam cih leh amaute gel in tua munah thu kiciam uh hi. Tua ahih ciangin amaute in Be-ersheba-ah thuciamna khat bawl uh hi. Tua khit ciangin Abimelek leh a galkap mangpa Fikol, Filistia mite’ leitang-ah ciahkik uh hi. Abraham in Be-ersheba-ah makeng kung khat suan a, tua lai munah Tawntung Pasian, Topa ’ tungah thungen hi. Filistia mite’ leitangah Abraham, sau veipi sung peemta-in om hi. Hih thute khit ciangin Pasian in Abraham ze-et a, ama kiangah, “Abraham!” ci hi. Amah in, “Hiah om ing,” ci hi. Amah in, “Na it, na tapa khat bek ahi Isaak, la in la Moriah gamah pai in, tua lai mun-a nang' kiangah kong gen ding mual khat tungah meihal biak piakna-in amah hong pia in,” ci hi. Tua ahih ciangin zingsangin Abraham tho baih a, a la tutphah vawhin, ama' mihingte tangval nih leh a tapa Isaak paipih hi; amah in meihal biak piak nadingin sing ek a, ama' tunga Pasian’ gen sa munah pai hi. A ni thum ni ciangin Abraham khuadak to-in a gamla-ah tua mun mu hi. Tua ciangin Abraham in a tangvalte' kiangah, “Hi lai-ah la tawh na om un; kei leh tangvalpa hua lamah pai-in ka va bia ding uh a, note kiangah ka hong paikik ding uh hi,” ci hi. Abraham in meihal biakna sing la-in a tapa Isaak’ tungah suan hi; amah in a khut sungah mei leh temta tawi hi. Tua ahih ciangin amaute gel paikhawm uh hi. Isaak in a pa Abraham kiangah, “Pa aw,” ci hi. Amah in, “Hiah om ing, ka ta,” ci hi. Amah in, “En in, mei leh sing om hi; ahih hangin meihal biakpiak nadingin tuuno koi-ah om ahi hiam?” ci hi. Abraham in, “Pasian in meihal biakpiak nadingin ama ading tuuno hong pia ding hi, ka ta aw,” ci hi. Tua ahih ciangin amaute gel paikhawm uh hi. Ama' kiangah Pasian’ gennasa mun amaute a tun’ uh ciangin, Abraham in tua lai-ah biakna tau khat bawlin, a ngei nading bangin sing koihin, a tapa x Isaak henin biakna tau tunga sing tungah amah koih hi. Tua ciangin Abraham in a tapa that dingin tem la hi. Ahih hangin Topa ’ vantungmi in vantung panin, “Abraham, Abraham!” ci-in amah sam hi. Amah in, “Hiah om ing,” ci hi. Amah in, “Tangvalpa su kei in, ama' tungah bangmah hih kei in; bang hang hiam cih leh nang in Pasian na zahtakna tu-in ka thei a, na tapa, na tapa khat bek ahi, keima adingin na humcip lohna ka mu hi,” ci hi. Abraham in a lu phongto-in khuadak hi, en in, khaumang lakah a ki-a a awk tuutal khat a nungah om hi; Abraham pai-in tuutal kai a, ama tapa, tangin meihal biak piakna-in pia hi. Tua ahih ciangin Abraham in tua mun pen, tu ni dongin, “ Topa ’ mual tungah hong kisikh ding hi,” a kicih mah bangin, Topa in hong sikh ding, ci hi. Topa ’ vantungmi in vantung panin Abraham a nih veina sam a, “Keimahmah ka kiciam hi, Topa in ci hi, bang hang hiam cih leh nang in hih thu na bawl khin a, na tapa, na tapa khat bek na humcip kei hi, nang thupha kong pia taktak ding hi, na suan-le-khakte van-a aksite leh tuipi gei-a sehnel bangin tampi ka phasak ding hi. Na suan-le-khakte in amau’ galte’ khuapite luah ding uh a, na suan-le-khakte thupha ka piak bangin, leitung minam khempeuh in thupha a ngah nadingun hong ngen ding uh hi, bang hang hiam cih leh nang in ka thu na mang hi,” ci hi. Tua ahih ciangin tangvalte’ kiangah Abraham ciahkik a, Be-ersheba-ah paikhawm uh hi; Abraham Be-ersheba-ah teng hi. Hih thute khit ciangin Abraham kiangah, “En in, Milkah in zong na sanggampa Nahor tawh tate nei hi: Uz in a u pen hi, a sanggamte in Buz, Aram’ pa Kemuel, Khesed, Hazo, Pildash, Jidlaf leh Bethuel ahi hi,” kici hi. Bethuel in Rebekah’ pa ahi hi. Milkah in Abraham’ sanggam Nahor tawh hih mihing giatte nei hi. Tua tham loin Reumah min nei a zi-neu in ta Tebah, Gaham, Tahash leh Ma-akah nei hi. Sarah kum za leh kum sawmnih-le-sagih nungta a, Kanaan mite’ gamsung Kiriatharba (Hebron) ah Sarah si hi. Abraham dahin kap a, a vui nading vaihawm hi. Abraham in a misi nusia-in Hit mite' kiangah va pai a, “Keimah in note’ lakah khual mi hi-in peemta ka hi hi; ka zi ka vui theih nadingin note’ lakah vuina ding mun leitang hong pia un,” ci hi. Hit mite in Abraham dawngin, “Topa aw, kote’ thu hong ngai in; nang in kote’ lakah a vanglian ulian khat na hi hi. Kote’ han na deih pen munah na zi vui in; kote kuamah in nang’ adingin a han it lo ding a, na zi vui ding hong khaktan lo ding hi,” ci uh hi. Abraham dingin tua gam mi ahi Hit mite' lamah kun hi. Amah in amaute' kiangah, “Hih gamah ka zi ka vui ding nong deih uh leh, ka thu hong ngai un, Zohar, tapa Efron in ama' neih Makpelah leihawm kei' tungah hong piak theih nadingin hong thumsak un; tua pen ama' lo nawl-ah om hi. Vuina ding munin ka neih dingin a man ding cing tak-a piakna tawh note’ muhna-ah kei' tungah amah hong piasak un,” ci hi. Tu-in Hit mite' lakah Efron tu hi; khuapi kulh kongpi-ah a hong pai Hit mite khempeuh’ zakna-ah Hit mi Efron in Abraham dawng a, “Hilo hi, ka Topa aw, hong ngai in; nang' tungah lo kong pia hi, tua sunga leihawm nang' tungah kong pia hi; ka mipihte’ muhna-ah nang' tungah kong pia hi; na misi vui in,” ci hi. Tua ciangin Abraham tua gam mite’ maiah kun hi. Tua gam mite’ zakna-ah amah in Efron’ kiangah, “Lungsim takpi tawh na cih ahih leh hong ngai in; lo man ding kong pia ding hi; tua lai-ah ka misi ka vui theih nadingin kei' tung panin a man hong sang in,” ci hi. Efron in Abraham dawngin, “Ka Topa aw, ka thu hong ngai in; leitang bek khat in ngun shekel zali man hi, nang leh kei' kikal-ah bang thudang om nawn ahi hiam? Na misi vui in,” ci hi. Efron’ cih bangin Abraham thukim hi; Abraham in Efron’ adingin, Hit mite’ zakna-ah a min lawh zah, tua hun lai tak-a sumbukte lak-a kizang a gik zah tawh kizui-in ngun shekel zali teh khia hi. Tua ahih ciangin Makpelah-a Efron’ lo, Mamre nisuahna lam-a a om, a sunga om leihawm leh a lo, leh tua mun khempeuh-a a om lo sunga singte pen khuapi kulh kongpi-ah a pai mite khempeuh' mai, Hit mite’ omna-ah Abraham’ neih dingin kipia hi. Hih bangin a kihih khit ciangin, Kanaan gamsunga om Mamre (Hebron) nisuahna lam-a a om Makpelah lo sunga leihawm sungah Abraham in a zi Sarah vui hi. Lo leh a sunga om leihawmte si vui nading munin neih dingin Abraham tungah Hit mite in pia uh hi. Tu-in Abraham teek a, a kum tam mahmah ta hi; Topa in na khempeuhah Abraham thupha pia hi. Abraham in ama' neih khempeuh a uk, a inn sungah a lianpen a nasempa' kiangah, “Ka phei nuai-ah na khut koih in, - nangmah in amau' lakah ka ten’na Kanaan mite’ tanute’ lak panin ka tapa’ zi ding la loin, keima' gam leh ka behte' kiangah va pai-in ka tapa Isaak zi ding na lak nadingin vantung leh leitung Pasian ahi Topa tawh nang kong kiciamsak ding hi,” a ci hi. Nasempa in ama' kiangah, “A numei in hih gamah kei hong zui nuam kei kha leh nangma' hong paikhiatna gamah na tapa ka paipih kik ding hiam?” ci hi. Abraham in ama' kiangah, “Tua lai-ah ka tapa na paipih kik loh ding thei in. Ka pa’ inn leh ka suahna leitang panin kei hong la-in, kei' kiangah thu hong genin kei' tungah hong kiciam a, ‘Na suan-le-khakte' tungah hih leitang ka pia ding hi,’ a hong ci vantung Pasian, Topa in nangma' mai-ah a vantungmi sawl ding a, tua lai mun panin nangmah in ka tapa ading zi khat na la ding hi. Ahih hangin a numei in nang hong zuih nop kei leh keima' thuciamna panin nang na suakta ding hi; bangbang hi leh tua lai-ah ka tapa na paipih kik kei ding hi,” ci hi. Tua ahih ciangin nasempa in a topa Abraham’ phei nuai-ah a khut koih a, hih thu tawh kisai-in ama' tungah kiciam hi. Tua ciangin nasempa in a topa’ kalaohte sawm la-in paikhia a, a topa' tung panin letsong hoih nono a namkim la hi; amah ding-in Mesopotamia gam Nahor’ khuapi-ah pai hi. Numeite in tui a tawi nitak hun lai takin khuapi pua lam tuikhuk gei-ah amah in a kalohte boksak hi. Amah in, “Ka topa Abraham’ Pasian, Topa aw, tu ni-in ka ma hong vangsak in, Nang' tungah thu kong ngen hi, ka topa Abraham’ tungah itna kip hong lak in. En in, tuikhuk gei-ah kei ka ding a, khuapi nungakte tuitawi dingin hong pai uh hi. Keimah in, ‘Tui ka dawn theih nadingin na beel hong ngasuk in,’ ka cih ciangin, ‘Dawn in, na kalaohte zong tui ka pia ding hi,’ hong ci nu na nasempa Isaak’ adingin na sehsa numei hisak in. Nangmah in ka topa' tungah itna kip na lahna hih thu tawh ka thei ding hi,” ci hi. Tua banga a thunget a khit ma-in, en in, Abraham’ sanggampa Nahor leh a zi Milkah tawh a neih a tapa Bethuel’ tanu Rebekah a liangko tungah a tuibeel pua-in hong paikhia hi. Tua nu pen kuamah tawh a lumkhawm nai lo, nungak, a ngaihbaang mahmah khat ahi hi. Amah tuikhuk-ah paisukin a beel dim a, hong paito hi. Tua ciangin amah dawntuah dingin nasempa tai a, “Dawn ding tui tawm khat na beel sung panin hong pia dih in,” ci hi. Amah in, ‘Dawn in, ka topa aw,” ci hi; tua nu in a khut tungah a beel niamsuksakin amah dawnsak hi. Amah in tua mipa' tui a dawnsak khit ciangin, “Amaute in a kham matengun na kalaohte ading zong tui kong tawisak ding hi,” ci hi. Tua ahih ciangin amah in tuikuang sungah a tui bung pak a, tui tawi dingin tui khuk-ah tai-in a kalaohte khempeuh adingin tui tawi hi. Topa in ama' khualzinna ma vangsak ding hiam vangsak lo ding hiam cih theih dingin mipa in dap takin tua nu en hi. Kalaohte in tui a dawn khit ciangin mipa in shekel lang a gik kham nakbah khat leh shekel sawm a gik kham tau nih tua nu’ khut adingin la a, “Kua’ tanu na hi hiam hong gen in. Na pa’ innah kote’ giah nading a awng ding hiam?” ci hi. Tua nu in ama' kiangah, “Nahor leh a zi Milkah’ tapa Bethuel’ tanu ka hi hi,” ci hi. Amah in, “Buhkung leh gan-an a kicing ka nei uh a, giah nading mun zong ka nei uh hi,” ci thuah lai hi. Mipa in a lu kunin Topa bia a, “Ka topa’ tungah a itna kip leh a thumanna a pelh lo, ka topa Abraham’ Pasian, Topa in thupha ngah ta hen. Kei ka hih leh, ka topa’ behte’ inn zuatna lampi-ah Topa in hong paipih hi,” ci hi. Tua ciangin nungaknu a innah tai-in hih thute khempeuh a innkuanpihte' tungah gen hi. Rebekah in Laban min nei sanggam pasal khat nei hi; Laban zong tuikhuk-a mipa' kiangah tai hi. Amah in nakbah leh a sanggamnu’ khut tunga taute a muh ciang leh, “Mipa in kei tungah hih bangin hong gen,” ci-a a sanggamnu Rebekah’ kam gen a zak ciangin, mipa' kiangah amah pai hi; en in, tuikhuk-a kalaohte' kiangah amah na ding hi. Amah in, “Hong pai in, Topa ’ thupha piakpa aw; bang hangin a pua-ah ding na hi hiam? Bang hang hiam cih leh inn leh kalaohte’ ading mun ka bawl khin zo hi,” ci hi. Tua ahih ciangin mipa inn sungah hong pai hi; Laban in kalaoh vante suah a, kalaohte adingin buhkung leh gan-an pia a, amah leh a kikholhpih mite’ khe sil nadingin tui pia hi. Tua ciangin nek dingin a mai-ah an kilui hi; ahih hangin amah in, “Ka thu ka gen khit matengin an ka ne kei ding hi,” ci hi, Amah in, “Gen in,” ci hi. Tua ahih ciangin amah in, “Keimah in Abraham’ nasem ka hi hi. Topa in ka topa nakpi takin thupha pia a, amah a lian mahmah suak khin hi; amah in ama tungah tuuhon, bawnghon, ngun leh kham, pasal-nasem leh numei-nasem, kalaoh leh late pia khin hi. Ka topa’ zi Sarah in a teek khitin ka topa tawh tapa khat nei hi; amah in a neihsa khempeuh ama' tungah pia hi. Ka topa in kei hong kiciamsak a, ‘Nangmah in amau’ gamah ka ten’na Kanaan x numeite' lak panin ka tapa’ zi ding la loin; ka pa’ inn leh ka behte' kiangah pai-in ka tapa’ ading zi khat na la ding hi,’ hong cisak hi. Keimah in ka topa' kiangah, ‘A numei in kei hong zui nuam kei kha leh,’ ka ci hi. Ahih hangin amah in kei' tungah, ‘A thu ka man’ Topa in nang tawh a vantungmi hong sawlin na lampi hong vangsak ding hi; nang in ka behte leh ka pa’ inn panin ka tapa’ ading zi khat na la ding hi; ka behte' kiangah na pai ciangin ka thuciamna panin nang na suakta ding hi; amaute in nang hong piak kei leh ka thuciamna panin nang na suakta ding hi,’ hong ci hi. “'Tu ni-in tuikhuk-ah pai-in, "Ka topa Abraham’ Pasian, Topa aw, tu-a ka paina lampi nong van’ sak ding leh, en in, tuikhuk gei-ah kei ka ding hi; tui tawi dinga hong paikhia nungak' tungah, 'Na beel panin tui dawn ding tawm khat hong pia in,' ka cih ciangin, 'Dawn in, na kalaohte’ ading zong kong tawisak ding hi,' hong ci nu pen, ka topa’ tapa’ adingin Topa in a sehsa numei hisak in," ka ci hi. “Ka lungsim sungah thu ka nget khit ma-in, en in, a liangko tungah a tui beel pua-in Rebekah hong paikhia hi; amah tui khuk-ah paisukin tuitawi hi. Keimah in ama' kiangah, ‘Tui hong dawnsak in,’ ka ci hi. Amah in a liangko panin a beel hong khia-suk pahin, ‘Dawn in, na kalohte zong tui ka dawnsak ding hi,’ hong ci hi. Tua ahih ciangin keimah in ka dawn a, amah in kalaohte zong tui pia hi. Tua ciangin, ‘Kua’ tanu na hi hiam?’ ci-in amah ka dong hi. Amah in, ‘Nahor leh a zi Milkah’ tapa Bethuel, tanu ka hi hi,’ hong ci hi. Tua ahih ciangin a nak tungah nakbah ka batsak a, a khut tungah taute ka butsak hi. Tua ciangin ka lu kunin Topa ka bia a, a tapa’ adingin ka topa’ behpa’ tanu la dingin lampi man-ah kei a hong paipih, ka topa Abraham’ Pasian, Topa ka phat hi. Tua ahih ciangin tu-in, tak lamah ahi zongin vei lamah ahi zongin ka kihei theih nadingin ka topa' tungah hoih tak leh thuman takin na gamtat ding uh leh hong gen un; tua ahih kei leh zong hong gen un,” ci hi. Tua ciangin Laban leh Bethuel in dawng a, “Hih pen Topa ’ kiang panin hong pai ahi hi; a sia ahi zongin a pha ahi zongin nang' tungah kong gen thei kei uh hi, En in, Rebekah na mai-ah om hi, amah la in la pai un, Topa ’ gensa bangin na topa’ tapa’ zi hisak un,” ci uh hi. Abraham’ nasempa in amau’ kammalte a zak ciangin Topa ’ mai lei lakah kun suk hi. Nasempa in ngun leh kham kizepnate leh puante hong suahkhia-in Rebekah pia hi; a sanggampa leh a nu zong a manpha kizepnate pia hi. Amah leh amah tawh a omkhawmte in ne-in dawnin, tua lai-ah tua zan giak uh hi. Amaute zingsangin a thawh uh ciangin amah in, “Ka topa' kiangah hong ciahsak kik un,” ci hi. A sanggampa leh a nu in,” A tawm penin ni sawm bang, ko tawh numei hong omsak lai in; tua khit ciangin amah hong pai thei ding hi,” ci uh hi. Ahih hangin amah in amaute' kiangah, “ Topa in ka lampi ma-vangsak khin ahih nungsang kei hong zekaisak nawn kei un; ka topa' kiangah ka ciah theih nadingin hong paisak un,” ci hi. Amaute in, “A numei sam-in amah i dong ding hi,” ci uh hi. Amaute in Rebekah sam uh a, ama' kiangah, “Hih mipa tawh na pai ding hiam?” ci uh hi. Amah in, “Ka pai ding hi,” ci hi. Tua ahih ciangin amaute in a sanggamnu uh Rebekah leh a cingnu, Abraham’ nasempa leh a mihingte ciah khiasak uh hi. Amaute in Rebekah thupha pia-in ama' kiangah, “Kote’ sanggamnu aw, a tul-tul a then-thente’ nu hi ta in; na suan-le-khakte in amau a mudahte’ khuapite luah ta uh hen!” ci uh hi. Tua ciangin Rebekah leh a numeite dingin, kalaohte' tungah tuangin mipa zui uh hi; tua ahih manin nasempa in Rebekah la-in a pai nading lam-ah pai hi. Tua kikalin, Isaak, Be-erlahairoi panin hong pai-in Negeb gamah na teng hi. Isaak in thu a lungngai dingin nitakin gam lakah paikhia hi; amah in a lu sangsakin khuadak hi, en in, kalaohte hong pai hi. Rebekah in a lu sangsakin Isaak a muh ciangin, kalaoh tung panin amah kumin, nasempa' kiangah, “Hua lai-a mipa, eite hong dawn dinga gam lak-a hong pai kua ahi hiam?” ci hi. Nasempa in, “Ka topa hi,” ci hi. Tua ahih ciangin amah in a kikhuhna puan la-in kikhuh hi. Nasempa in Isaak' kiangah a gamtatnasa khempeuh gen hi. Tua ciangin Isaak in a nu Sarah’ puanbuk sungah tua nu paipihin, Rebekah la a, amah pen a zi suak hi; amah in tua nu it hi. Tua ahih ciangin a nu’ sih khit ciangin Isaak in hehnepna ngah hi. Abraham in Keturah min nei zi dang khat la hi. Amah in tua nu tawh ta Zimran, Jokshan, Medan, Midian, Ishbak leh Shuah nei hi. Jokshan in Sheba leh Dedan’ pa ahi hi. Dedan’ tate in Asshurim, Letushim leh Leummim ahi hi. Midian’ tate in Efah, Efer, Hanok, Abida, leh Elda-ah ahi hi. Hihte khempeuh in Keturah’ suan-le-khakte ahi hi. Abraham in a neih khempeuh Isaak pia hi. Ahih hangin Abraham in a zi-neu tawh a tate' tungah letsong pia a, ama' nuntak lai mahin nisuahna gam lamah ama' tapa Isaak kiang panin amaute sawlkhia hi. Abraham, kum za leh kum sawm-sagih-le-nga a phak ciangin, a nunung pen ama' hu sang a, a teek, kum tampi a pha, a khangham-in si a, ama' mite tawh kivui khawm hi. - Ama' tapate Isaak leh Ishmael in, Abraham in Hit mite' tung pan-a a lei lo, Mamre nisuahna lam-a om, Hit mi Zohar’ tapa Efron’ lo sung, Makpelah leihawm sungah amah vui uh hi. Tua lai mun-ah a zi Sarah tawh Abraham kivui hi. Abraham’ sih khit ciangin Pasian in a tapa Isaak thupha pia hi. Be-erlahairoi-ah Isaak teng hi. Hihte in, Abraham in Sarah’ numei-sila ahi, Izipt mi Hagar tawh a neih, Abraham’ tapa Ishmael’ suan-le-khakte' tangthu ahi hi. Hihte in a suahna tawh kizui-in Ishmael’ tate’ min ahi hi; Ishmael’ ta upa in Nebaioth ahi hi; tua ciangin Kedar, Adbe-el, Mibsam, Mishma, Dumah, Massa, Haddad, Tema, Jetur, Nafith leh Kademah ahi hi. Hihte in a khua, a phual, a beh-in ulian sawn-le-nihte ahi Ishmael’ tate leh amaute’ min ahi hi. (Ishmael, kum za leh kum sawmthum-le-sagih a phak ciangin a nunung pen ama' hu sangin si a, a behte tawh kivui khawm hi.) Amaute Izipt nisuahna, Assiri lam Havilah panin Shur dongah teng uh hi; ama sanggamte khempeuh panin amah tuam ten’ hi. Hihte in Abraham’ tapa Isaak’ suan-le-khakte tangthu ahi hi. Abraham in Isaak’ pa hi a, Aram mi Laban’ Sanggamnu, Paddanaram gam-a Aram mi Bethuel’ tanu Rebekah zi-in a lak lai-in Isaak kum sawmli pha hi. Isaak in Topa ’ tungah a zi adingin thungen hi, bang hang hiam cih leh amah ciing hi; Topa in ama' thungetna pia a, a zi Rebekah gai hi. Ama' sungah a naute kilaigawp hi; amah in, ‘Hih bang ahih leh bang hangin nungta se ka hi hiam?” ci hi. Tua ahih ciangin Topa ’ kiangah thu kan dingin amah pai hi. Topa in ama kiangah, “Na gil sungah minam nih om hi, Nang’ sung pan a suak mihing nihte kikhen ding hi; khat in a dang khat sangin hatzaw ding hi, a u-zaw in a nauzaw’na sem ding hi,” ci hi. Ama' suah ni hun a tun’ ciangin, en in, a gil sungah tapeeng om hi. A masa pen a san-in hong suak a, a pumpi khempeuh mul a nei puan tawh kibang hi; tua ahih ciangin ama' min Esau phuak uh hi. Tua khit ciangin a sanggampa hong suakkhia a, ama' khut in Esau’ khetul len hi; tua ahih ciangin ama' min Jakob kiphuak hi. Amau’ suah ciangin Isaak kum sawmguk pha hi. Tua naupangte a khan’ ciangin, Esau in gamsung mi sabet siam khat hi a, Jakob in puanbuk sunga a teng a cingkam khat ahi hi. Isaak in Esau it hi, bang hang hiam cih leh amah in ama' sa matsa ne hi; ahih hangin Rebekah in Jakob it hi. Khat vei Jakob in meh huan hi, Esau gamlak panin hong ciahin phukhong vei hi. Esau in Jakob kiangah, “Tua meh san tawm khat hong nesak in, bang hang hiam cih leh phukhong vei ing!” ci hi. (Tua ahih ciangin ama' min Edom kici hi.) Jakob in, “Na innluahza hong pia lecin, tua meh kong pia ding hi,” ci hi. Esau in, “A si ding ka hi ta hi; kei’ adingin innluahza bang-a kimang ahi hiam?” ci hi. Jakob in, “Kei' tungah hong kiciam masa in,” ci hi. Tua ahih ciangin ama' tungah amah kiciamin, Jakob' tungah a innluahza zuak hi. Tua ciangin Jakob in an leh bemeh Esau pia hi, amah in ne-in dawn a, dingin a pai nadingah pai hi. Tua ahih manin Esau in a innluahza tua bang ciang bekin ngaihsun hi. Abraham’ hun lai-a kialpi ban-ah, tu-in gamsungah kialpi tung hi. Filistia mite’ kumpipa Abimelek omna Gerar-ah Isaak pai hi. Ama' tungah Topa kilang a, “Izipt-ah paisuk kei in;kong gen ding leitangah teng in. Hih leitang-ah tawl khat om in, nang tawh kong omkhawm ding a, thupha kong pia ding hi; bang hang hiam cih leh nang leh na suan-le-khakte' tungah hih leitangte kong pia ding a, na pa Abraham’ tungah ka thuciam ka tungsak ding hi. Na suan-le-khakte van-a aksi bangin tampi ka phasak ding a, na suan-le-khakte' tungah hih leitang khempeuh ka pia ding hi; na suan-le-khakte thupha ka piak bangin leitung minam khempeuh in thupha a ngah nadingun hong ngen ding uh hi: Bang hang hiam cih leh Abraham in ka thu mangin, ka sawlna, ka thupiakna, ka ngeina kip leh ka thu zui hi,” ci hi. Tua ahih ciangin Gerar-ah Isaak teng hi. Tua mun a mite in ama' zi tawh kisai thu a dot uh ciangin amah in, “Ka sanggamnu hi,” ci hi; bang hang hiam cih leh, “Rebekah’ hangin tua mun mite in hong that kha ding ahih ciangin,” ci-in ngaihsun ahih manin, “Ka zi,” a cih ding lau hi; bang hang hiam cih leh amah ngaihbaang hi. Tua lai-ah amah sau veipi a om khit ciangin, Filistia mite’ kumpipa Abimelek kongvangneu panin khuadak a, Isaak in a zi Rebekah a noh laitak mu kha hi. Tua ahih ciangin Abimelek in Isaak samin, “En in, amah na zi hi; tua ahih ciangin bangci-in nang in, ‘Amah ka sanggamnu hi,’ ci thei na hi hiam? ci hi. Isaak in ama' kiangah, “Ama hangin si kha ding ka hih ciangin,’ ci-in ngaihsun ka hihna hang hi,” ci hi. Abimelek in, “Ko’ tungah bang ci-a hih bang hong hih na hi hiam? Mite khatpeuh peuh na zi tawh lum khawm pak thei ding a, kote’ tungah mawhna hong tun’na hi ding hi,” ci hi. Tua ahih ciangin Abimelek in mi khempeuh thu zasak a, “Hih mipa ahi zongin a zi ahi zongin a su-kha peuhmah kithat ding hi,” ci hi. Isaak in tua leitangah khai tuh a, tua kum mahin a zah zakhat la hi. Topa in amah thupha pia a, tua mipa a hau suakin, a hau mahmah a suah matengin ngah behbeh hi. Amah in tuuhon leh bawnghon, innkuan mi tampi nei a, Filistia mite in amah eng uh hi. (Ama' pa Abraham’ hun lai-a a pa’ nasemte in a tawh tuikhuk khempeuh tu-in Filistia mite in hucipin lei vuk uh hi.) Abimelek in Isaak’ kiangah, “Kote’ kiang panin paikhia in; bang hang hiam cih leh kote sangin nang na vanglian zaw hi,” ci hi. Tua ahih ciangin tua mun panin Isaak paikhia a, Gerar kuam sungah phual satin tua mun-ah teng hi. Isaak in a pa Abraham’ hun lai-a a kitosa tuikhukte to kik hi; bang hang hiam cih leh Abraham’ sih khit ciangin Filistia mite in tuate vukcip uh hi; amah in a pa’ phuahsa minte mah phuak hi. Ahih hangin Isaak’ nasemte in tua kuam sung to-in tuikhuk a muh uh ciangin, Gerar gancingte leh Isaak’ gancingte kitawng uh a, “Tui, ko aa hi,” ci uh hi. Tua ahih ciangin amah in tua tuikhuk Esek ci-in min phuak hi, bang hang hiam cih leh amaute leh amah kitawng uh hi. Tua ciangin amaute in tuikhuk dang khat to uh a, tua tungtang-ah zong amaute kitawng uh hi; tua ahih ciangin amah in tua pen Sitnah ci-in min phuak hi. Tua mun panin amah kiin-in tuikhuk dang khat to hi, tua tungtangah amaute kitawng lo uh hi; tua ahih ciangin amah in a min Rehboth ci-in phuak hi, “Bang hang hiam cih leh tu-in Topa in eite’ adingin omna hong bawlsak khin a, eite hih gamah i pung ding hi,” ci hi. Tua lai mun panin amah Be-ersheba-ah paito hi. Tua zan mahin ama' tungah Topa kilang a, “Keimah in na pa Abraham’ Pasian ka hi hi; lau kei in, bang hang hiam cih leh ka nasempa Abraham’ huhau-in nang tawh kong om a, nang leh na suan-le-khakte thupha hong pia-in kong pungsak ding hi,” ci hi. Tua ahih ciangin amah in tua lai mun-ah biakna tau khat lamin Topa ' tungah thungen a, tua munah a puanbuk lam hi. Tua lai-ah Isaak’ nasemte in tuikhuk khat to uh hi. Tua ciangin Isaak' kiangah Gerar panin Abimelek, amah thu lamlakpa Ahuzzath leh a galkap mangpa Fikol tawh pai hi. Isaak in amaute' kiangah, “Note in kei hong mudahin note' kiang panin hong hawlkhia na hih uh ciangin bang hangin kei' kiangah hong hawh na hi uh hiam?” ci hi. - Amaute in, “Nang tawh Topa a omna tel takin ka mu uh hi; tua ahih ciangin, kote in nang hong sukha loin, nang' tungah bangmah hong hih loin, a hoihin gamta-in lungnuam takin kong sawlkhiat mah bangun kote' tungah nang in siatna nong bawl loh nadingin nang leh kote' kikal-ah kiciamna khat om hen la,nang tawh thuciamna khat bawl ni, a ci hi ung. Nang in tu-in Topa ’ thupha piak na hi hi,” ci uh hi. Tua ahih ciangin amah in amaute’ adingin pawi khat bawl a, amaute in ne-in dawn uh hi. Zingsangin amaute thobaih uh a, khat leh khat kiciamna bawl uh hi; Isaak in amaute a lampi ding uhah kha a, ama' kiang panin amaute lungnuam takin pai khia uh hi. Tua ni mahin Isaak’ nasemte hong pai-in amau’ tawhsa tuikhuk thu ama' kiangah hong gen uh a, ama' kiangah, “Tui ka mu zo uh hi,” ci uh hi. Amah in tua pen Shibah ci-in min phuak hi; tua ahih ciangin tua khuapi min pen tu ni dongin Be-ersheba kici hi. Esau kum sawmli a phak ciangin, Hit mi Be-eri’ tanu Judith leh Hit mi Elon’ tanu Basemath zi-in la hi; amaute in Isaak leh Rebekah’ nuntakna haksasak uh hi. Isaak teek-in a mitte mang-in khua a muh theih loh ciangin a tapa upa zaw Esau samin ama' kiangah, “Ka tapa aw,” ci hi; amah in dawngin, “Hiah om ing,” ci hi. Amah in, “En in, kei ka teek hi; ka sih ni ding hun ka thei kei hi. Tua ahih ciangin tu-in, na hiamte ahi na thallawng leh na thal la in la, gam lakah pai-in kei adingin sa va beng in, ka sih ma-in nang thupha kong piak theih nadingin kei’ duh bangin an lim hong bawl in la, ka nek dingin hong paipih in,” ci hi. Isaak in a tapa Esau a hopih lai takin Rebekah in na ngai sim hi. Sa beng-in a ciahpih dingin Esau gam lakah a kuan ciangin, Rebekah in a tapa Jakob kiangah, “Na sanggampa Esau tungah na pa’ thugen ka za a, ‘Ka sih ma-in Topa ’ mai-ah nang thupha kong piak theih nadingin ka nek dingin sa matsa hong paipih in la, kei’ adingin an lim hong bawl in,’ ci hi. Tua ahih ciangin tu-in ka ta aw, kong thupiak bangin ka thu hong mang in. Ama' duh bangin na pa adingin an lim ka bawl theih nadingin keelhon lakah va pai in la, keelno a hoih nih hong paipih in; a sih ma-in amah in nang thupha hong piak theih nadingin nek dingin na pa' kiangah, na va paipih ding hi,” ci hi. Ahih hangin Jakob in a nu Rebekah' kiangah, “En in, ka sanggampa Esau in mul nei mi hi a, keimah in ci neel mi ka hi hi. Ka pa in kei hong lawng kha leh, amah ka khemna hong thei ding a, kei' tungah thupha hi loin samsiatna hong tung zawsop ding hi,” ci hi. A nu in ama' kiangah, “Nangma' thuak ding samsiatna kei' tungah hong tung ta hen, ka ta aw; ka thu hong mang peuh in la, pai-in tuate kei' kiangahhong puak in,’ ci hi. Tua ahih ciangin amah pai-in tuate va la-in a nu' kiangah paipih hi; a pa’ duh bangin a nu in an lim bawl hi. Tua ciangin Rebekah in inn-a a kep, ama' ta upa zaw Esau’ puan hoih pente la-in, a ta nauzaw Jakob silhsak hi; amah in keelnote’ vun ama' khut tung leh a neelna mun a ngawng san-ah silhsak hi; amah in a bawlsa meh lim leh an a tapa Jakob pia hi. Tua ahih ciangin a pa kiangah amah pai a, “Ka pa aw,” ci hi; amah in “Hiah om ing; ka ta aw, kua na hi hiam?” ci hi. Jakob in a pa' kiangah, “Keimah in na ta upa Esau ka hi hi. Nong gen bangin ka hih khin hi; kei thupha nong piak theih nadingin tu-in tu to in la ka sa matsa ne in,” ci hi. Ahih hangin Isaak in a tapa' kiangah, “Ka ta aw, bang ci-a hong hici manlan’ pak na hi hiam?” ci hi. Amah in dawngin, “ Topa nangma' Pasian in kei hong tuahphasak hi,” ci hi. Tua ciangin Isaak in Jakob' kiangah, “Ka ta aw, nang in ka ta Esau taktak na hi hiam, na hi kei hiam kong lawn’ theih nadingin ka nai-ah hong pai in,” ci hi. Tua ciangin a pa Isaak' kiangah Jakob pai a, amah in lawngin, “A aw in Jakob’ aw hi, ahih hangin a khutte in Esau’ khut hi,” ci hi. A khutte in a sanggampa Esau’ khut bangin mul nei ahih manin amah in thei lo hi; tua ahih ciangin amah in thupha pia hi. Amah in, “Ka ta Esau taktak na hi hiam?” ci hi. Amah in dawngin, “Ka hi hi,” ci hi. Tua ciangin amah in, “Ka tapa’ sa matsa ne-in nang thupha kong piak theih nadingin ka kiangah hong paipih in,” ci hi. Tua ahih ciangin amah in a kiangah paipih-in, amah in ne hi; amah in leenggahzu paipih-in, amah in dawn hi. Tua ciangin a pa Isaak in ama' kiangah, “Ka kiangah hong pai in la hong nam in, ka ta aw,” ci hi. Tua ahih ciangin amah a nai-ah pai-in a pa nam hi; amah in a puan gimnamte nam a, amah thupha pia-in, “En in, ka tapa’ gimnam in Topa in thupha a piak-sa gam lak gimnam tawh kibang! Pasian in na tungah vantung daitui hong pia hen la, na lote hoihsak ta hen. An leh leenggahzu tampi hong pia ta hen. Mite in nangma' na hong sem hen la, minamte na mai-ah hong kun ta uh hen. Na sanggamte' tungah topa hi in la, na sanggamte’ suan-le-khakte, na mai-ah hong kun uh hen. Nang hong samsia peuhmah in samsiatna ngah hen la, nang thupha hong pia peuhmah in thupha ngah ta hen!” ci hi. Isaak in Jakob a thupha piak a man khit, a pa Isaak' omna panin Jakob a paikhiat khit phetin, a sa betna panin a sanggampa Esau hong tung hi. Amah in zong an lim bawlin a pa’ kiangah hong paipih hi. Amah in a pa’ kiangah, “Nang in kei thupha nong piak theih nadingin na tapa’ sa matsa ne dingin ka pa tho in,” ci hi. A pa Isaak in ama kiangah, “Kua na hi hiam?” ci hi. Amah in dawngin, “Keimah in na tapa, a suak masa Esau ka hi hi,” ci hi. Tua ciangin Isaak nakpi takin liingin, “Tua ahih leh, nang’ hong pai ma-in sa matsa hong paipihin, a vekin ka nek khit phetin, amah thupha ka piakpa kua ahi hiam?—hi hi, amah in thupha ngah ding hi,” ci hi. Esau in a pa’ kammalte a zak ciangin nakpi takin, nasia takin amah kiko khia a, a pa' kiangah, “Kei thupha hong pia in, kei zong, aw ka pa!” ci hi. Ahih hangin amah in, “Na sanggampa in khemna tawh hong pai-in amah in na thupha lakhia khin ta hi,” ci hi. Esau in, “Amah Jakob kici mah hilo ahi hiam? Amah in kei nih vei hong suankhia khin hi. Amah in ka innluahza hong sut hi; en in, tu-in amah in ka thupha hong sut leuleu hi,” ci hi. Tua ciangin amah in, “Kei adingin thupha siit lo na hi hiam?” ci hi. Isaak in Esau dawngin, “En in, amah nangma' topa-in, ka bawl khin a, a sanggamte khempeuh ama' tungah nasem-in ka pia khin a, an leh leenggahzu tawh amah ka hingsak hi. Tua ahih ciangin ka ta aw, nang’ adingin bang hih thei nawn ding ka hi hiam?” ci hi. Esau in a pa' kiangah, “Pa aw, thupha khat beek nei lo na hi hiam? Kei thupha hong pia in, kei zong, ka pa aw,” ci hi. Tua ciangin Esau a kap hi. Tua ciangin a pa Isaak in: “En in, leitung pan-a piang an leh leenggahzu na nei kei ding a, na lo adingin vantung pan vandaituite na ngah kei ding hi. Na namsau tawh nang na nungta ding a, na sanggampa’ na na sem ding hi; ahih hangin nangmah in na langpan’ ciangin na ngawng panin ama' hakkol na sutan ding hi,” ci hi. A pa in amah thupha pia khin ahih amnin tua thupha hangin tu-in Esau in Jakob mudah a, Esau in “Ka pa’ sihna hangin dah nading hun hong nai ta hi; tua khit ciangin ka sanggampa Jakob ka that ding hi,” ci-in ngaihsun hi. Ahih hangin a ta upa zaw Esau’ ngimna, Rebekah tungah kigen hi; tua ahih ciangin amah in a ta nauzaw Jakob sam a, ama' kiangah, “En in, na sanggampa Esau in nangmah thah ding vaihawmna tawh amah kihehnem hi. Tua ahih ciangin tu-in ka ta aw, ka thu hong mang in; Haran-a ka sanggampa Laban' kiangah va tai in la, na sanggampa’ hehna a bei mateng tua lai-ah amah tawh tawl khat sung va om in; na sanggampa’ sinsona a daih mateng, ama tunga na gamtatna a mangngilh mateng va om in; tua ciangin mi hong sawlin hih lai munah nang kong lasak ding hi. Bang hangin note gel tawh ni khat thu-in kei kikhen ding ka hi hiam?” ci hi. Tua ciangin Rebekah in Isaak kiangah, “Esau’ zi Hit numeite’ hangin ka lunggim a, ka cimtak hi. Jakob in hih gam numeite khat ahi, Hit numeite khat ten’pih leh kei adingin bang nuntak tham nawn ding ahi hiam?” ci hi. Tua ciangin Isaak in Jakob samin amah thupha pia-in thuhilh a, “Nang in Kanaan numeite na ten’pih kei ding hi. Ding in la, na nu’ pa Bethuel’ inn, Paddan-aram-ah pai in; tua lai munah na nu’ sanggampa Laban’ tanute khat na zi dingin la in. Nang in mi honpi khat na suah theih nadingin Vanglian Pasian in nang thupha hong pia-in hong pungsakin, tampi hong phasak hen. Pasian in Abraham’ tunga a piak, tawl khat sung na omna leitang na neih theih nadingin nang leh na suan-le-khakte' tungah amah in Abraham’ thupha hong pia ta hen!” ci hi. Tua ahih ciangin Isaak in Jakob sawlkhia hi; Jakob leh Esau’ nu Rebekah’ sanggampa, Aram mi Bethuel’ tapa Laban’ omna Paddan-aram-ah amah pai hi. Isaak in Jakob thupha pia-in, zi la dingin Paddan-aram-ah sawl a, thupha a piak kawmin amah thuhilhin, “Kanaan numeite na ten’pih kei ding hi,” a cihna leh, Jakob in a nu leh a pa’ thu mangin Paddan-aram-ah a paina thu tu-in Esau in thei hi. Tua ahih ciangin Kanaan numeite in a pa Isaak lungkimsak lo cih Esau in a theih ciangin, Ishmael kiangah Esau pai-in, ama' zi neihsa banah, Nebaioth’ sanggamnu, Abraham’ tapa Isahmael’ tanu Mahalath zi-in la hi. Jakob in Be-ersheba khua nusia-in, Haran lamah pai hi. Amah mun khat tungin, ni tum khin ahih manin tua lai-ah tua zan giak hi. Tua mun-a suangte khat la-in, amah in lukhamin zang a, ihmu dingin tua munah lum suk hi. Amah in mang man a, leitungah kahlei khat kiphutin, kahlei dawn in van ban hi; en in, Pasian’ vantungmite tua kahlei tungah kahto-in kumsuk uh hi. En in, tua tung san-ah Topa ding a, “Keimah in na pa Abraham’ Pasian leh Isaak’ Pasian, Topa ka hi hi; nang leh na suan-le-khakte' tungah tu-a na lupna leitang kong pia ding hi; na suan-le-khakte lei lak leivui bang ding a, nitumna lam leh nisuahna lam, leilu lam leh leitaw lamah na kizelthang ding uh hi; nang leh na suan-le-khakte thupha kong piak bangin leitung innkuan khempeuh in thupha a ngah nadingun hong ngen ding uh hi. En in, keimah in nang tawh omin na paina peuhah kong kem ding a, hih leitangah nang kong paipih kik ding hi; bang hang hiam cih leh nang' tunga kong gensa thute ka hih khit matengin nang kong nusia kei ding hi,” ci hi. Tua ciangin a ihmutna panin Jakob khanglo a, “Hih lai munah Topa om taktak hi; keimah in tua thu ka thei kei hi,” ci hi. Amah lau a, “Hih mun bangzahin lamdang! Hih in Pasian’ inn lo a dang hilo a, hih in vantung kongpi ahi hi," a ci hi. Tua ahih ciangin zingsangin Jakob tho baih a, amah in lukham-a a zat suang la-in khuam-in phut a, a tungah sathau sung hi. Amah in tua mun Beth-el ci hi; ahih hangin a masa-in tua khuamin pen Luz ahi hi. Tua ciangin Jakob in thuciamna khat bawlin, “Pasian in kei tawh hong om khop a, hih ka paina lampi-ah kei hong kep a, nek ding an leh silh ding puan hong piak a, lungnuam takin ka pa’ innah ka ciahkik leh, Topa in keima' Pasian hi ding a, khuam ka phuhsa hih suang in Pasian’ inn hi ding hi; keima' tungah nangmah in nong piak khempeuh seh-sawm-suah-seh-khat nang' tungah kong pia ding hi,” ci hi. Tua ciangin Jakob in a khualzinna zom a, nisuahna lam mite’ gam tung hi. A khuadak leh gam lakah tuikhuk khat mu hi, en in, tua gei-ah tuuhon thum lum hi; bang hang hiam cih leh tua tuikhuk panin tuuhonte tui kipia hi. Tuikhuk gong-a suang lian hi, tua lai munah tuuhonte khempeuh a kikaihkhop khit ciangin, tuucingte in tuikhuk kong panin suang khukkhia uh a, tuute tui pia-in, tuikhuk kong ama' omna ngei-ah suang koih kik uh hi. Jakob in amaute' kiangah, “Sanggamte aw, koi pan-a hong pai na hi uh hiam?” ci hi. Amaute in, “Haran pan hi ung,” ci hi. Amah in amaute' kiangah, “Nahor’ tapa Laban na thei uh hiam?” ci hi. Amaute in, “Thei mah ung,” ci hi. Amah in amaute' kiangah, “Amah a cidam hiam?” ci hi. Amaute in, “Dam hi; en in, a tanu Rachael zong tuu tawh hong pai!” ci uh hi. Amah in, “En un, ni sang lai hi, gan kaihkhop hun hi lo hi; tuute tui pia un la, pai-in an nesak un,” ci hi. Ahih hangin amaute in, “Tuute kikaikhawm a, tuikhuk gong panin suang a kikhuk mateng ka hih thei kei uh hi; tua ciangin tuute tui ka pia thei pan uh hi,” ci uh hi. Amah in amaute tawh a kiho lai takin a pa’ tuute tawh Rachel hong tung hi; bang hang hiam cih leh amah in tuate kem hi. Tu-in Jakob in a nu’ sanggampa Laban’ tanu Rachel leh a nu' sanggampa Laban’ tuute a muh ciangin, Jakob paito-in tuikhuk gong panin suang khukkhia a, a nu’ sanggampa Laban’ tuuhonte tui pia hi. Tua ciangin Jakob in Rachel nam a, a gingin kapkhia hi. Jakob in Rachel’ kiangah amah in a pa’ behte hi a, amah in Rebekah’ tapa a hihna kigen hi; tua ciangin Rachel tai-in a pa’ kiangah gen hi. Laban in a sanggamnu’ tapa Jakob’ thu a zak ciangin amah dawn dingin hong tai a, amah kawi-in nam a, a innah ciahpih hi. Jakob in Laban’ tungah hih thute khempeuh gen a, Laban in ama' kiangah, “Nang in keima si keima sa na hi takpi hi,” ci hi. Tua hi a, amah tawh kha khat om hi. Tua ciangin Laban in Jakob kiangah, “Nang in keimah' beh na hih ciangin, man nei lopi-in kei’ na hong sem ding na hi hiam? Hong gen in, na thaman ding bang hi ding hiam?” a ci hi. Tu-in Laban in tanu nih nei hi; a u-zaw min Leah hi a, a nauzaw’ min Rachel ahi hi. Leah’ mit-hah neem a, ahih hangin Rachel mel hoih-in deihhuai hi. Jakob in Rachel ngai hi; amah in, “Na tanu a nauzaw Rachel thalawh nadingin nangma' na kum sagih kong sem ding hi,” ci hi. Laban in, “Mi dang' tungah amah ka piak ding sangin nang' tungah amah kong piak ding hoih zaw hi; kei tawh om in,” ci hi. Tua ahih ciangin Jakob in Rachel ngah nadingin kum sagih na sem a, amah a itna hangin tua hunte ni tawmno khat tawh kibang sa hi. Tua ciangin Jakob in Laban' kiangah, “Ka hun cingta ahih ciangin amah tawh ka lupkhawm theih nadingin ka zi hong pia in,” ci hi. Tua ahih ciangin Laban in tua mun-a mi khempeuh kaikhawmin pawi khat bawl hi. Ahih hangin a nitak ciangin amah in a tanu Leah la-in Jakob' kiangah paipih hi; amah in tua nu luppih hi. (Laban in ama' numei-nasem Zilpah a tanu Leah tungah a numei-nasem dingin pia hi.) A zingsang ciangin, en in, Leah na hi mawk hi; Jakob in Laban’ kiangah, “Kei' tungah bang hong bawl na hi hiam? Rachel ngah nadingin na na hong sem hilo ka hi hiam? Tua ahih leh bang hangin kei hong khem na hi hiam?” ci hi. Laban in, “A u’ ma-in a nauzaw piak ding ko’ gamah kizang lo hi. Hih nu’ adingin nipi khat sung pawi beisak phot in la, a dang kum sagih ka na nong sepsak thaman-in a khat pen zong kong pia ding uh hi,” ci hi. Tua mah bangin Jakob gamta a, tua nu’ pawi hun sung beisak phot hi; tua ciangin Laban in a tanu Rachel a zi dingin pia hi. (Laban in ama' numei-nasem Bilhah a tanu Rachel' tungah a numei-nasem dingin pia hi.) Tua ahih ciangin Jakob in Rachel zong luppih a, amah in Leah sangin Rachel it zaw hi; Laban’ na a dang kum sagih sung sem hi. Topa in Leah a kimuhdahna a theih ciangin, amah in a naubu hon’ sak hi; ahih hangin Rachel ciing hi. Leah gai-in tapa khat nei a, amah in a min Reuben ci hi; bang hang hiam cih leh amah in, “ Topa in ka thuakna hong en zo hi; tu-in ka pasal in kei hong it taktak ding hi,” ci hi. Amah gai kikin tapa khat nei a, amah in, “Keimah hong kimuhdahna thu Topa in za khin ahih manin, amah in hih tapa zong hong pia hi,” ci hi; amah in a min Simeon ci hi. Amah gai leuleu-in tapa khat nei a, “Amah tawh tapa thum nei ta ka hih manin tu-in ka pasal in kei hong pawl ding hi,” ci hi; tua ahih ciangin ama' min Levi kici hi. Amah gai leuleu-in tapa khat nei a, “Tu hunin Topa ka phat ding hi,” ci hi; tua ahih ciangin amah in a min Judah phuak hi; tua ciangin ta neih tawp hi. Rachel in Jakob tawh ta a neih lohna a kimuh ciangin, amah in a sanggamnu eng hi; amah in Jakob' kiangah, “Ta hong pia in, tua ahih kei leh si ning!” ci hi. Rachel’ tungah Jakob heh mahmah a, amah in, “Nang' tungah ta hong pia lo Pasian’ munah om ka hi hiam?” ci hi. Tua ciangin amah in, “Hih lai-ah ka numei-nasem Bilhah om hi; ka khuk tungah ka tawi ding ta hong neih nading, leh ama sung panin suan-le-khak ka neih theih nadingin amah tawh lumkhawm in,” ci hi. Tua ahih ciangin a numei-nasem Bilhahtungah zi-in pia hi; Jakob in tua nu luppih hi. Bilhah gai-in Jakob tawh tapa khat nei hi. Tua ciangin Rachel in, “Pasian in kei' tungah thu hong khen zo a, amah in ka aw zong za zo-in tapa khat hong pia hi,” ci hi; tua ahih ciangin amah in a min Dan phuak hi. Rachel’ numei-nasem Bilhah gai kikin Jakob tawh a nihna tapa nei hi. Tua ciangin Rachel in, “Nakpi tak-a hanciamna tawh ka sanggamnu ka zo hi,” ci hi; tua ahih ciangin ama in Naftali phuak hi. Leah in ta neih a tawp lam a kimuh ciangin, amah in a numei-nasem Zilpah la-in Jakob tungah zi-in pia hi. Tua ciangin Leah’ numei-nasem Zilpah’ in Jakob tawh tapa khat nei hi, Leah in, “Kaam pha!” ci hi; tua ahih ciangin ama' min Gad phuak hi. Leah’ numei-nasem Zilpah in Jakob tawh a nihna tapa nei hi. Leah in, “Kei lungdam ing! Bang hang hiam cih leh numeite in kei a lungdam hong ci ding hi,” ci hi; tua ahih ciangin ama min' Asher phuak hi. Mangbuh lak hun lai takin Reuben pai-in gam lakah zawl-ai kungte va mu a, tuate a nu Leah’ kiangah ciahpih hi. Tua ciangin Rachel in Leah’ kiangah, “Na tapa’ zawl-aikungte kimkhat kei hong pia in, hong thum ing,” ci hi. Ahih hangin Leah in, “Ka pasal nong suh thuneu sa na hi hiam? Ka tapa’ zawl-ai kungte zong hong sut lai ding na hi hiam?” ci hi. Rachel in, “Tua ahih leh na tapa’ zawl-ai man dingin tu zan-in amah in nang tawh hong lumkhawm thei ding hi,” ci hi. Nitakin lo panin Jakob hong ciah ciangin, amah dawn dingin Leah paikhia a, “Kei kiangah hong lum in; bang hang hiam cih leh ka tapa’ zawl-ai kungte tawh nang kong cial zo hi,” ci hi. Tua ahih ciangin tua zan amah tawh lum khawm hi. Pasian in Leah thu ngai a, amah gai-in Jakob tawh tapa a ngana nei hi. Leah in, “Ka pasal' tungah ka numei-nasem pia ka hih manin Pasian in ka thacial hong pia hi,” ci hi; tua ahih ciangin ama' min Issakhar phuak hi. Leah gai kik a, Jakob tawh a gukna tapa nei hi. Tua ciangin Leah in, “Pasian in mo-ken hoih kei hong guan hi; tu-in ka pasal in kei hong pahtawi ding hi, bang hang hiam cih leh amah tawh tapa guk ka nei khin hi,” ci hi; tua ahih ciangin ama' min Zebulun phuak hi. Tua khit ciangin amah in tanu khat nei a, a min Dinah phuak hi. Tua ciangin Pasian in Rachel phawk a, Pasian in ama' thu ngai-in a naubu hon’sak hi. Amah gai-in tapa khata nei a, “Pasian in kei hong kikona teng lakhia khin ta hi,” ci hi; amah in a min Josef phuak a, “ Topa in tapa khat hong pia beh hen!” ci hi. Rachel in Josef a neih khit ciangin Jakob in Laban' kiangah, “Keima' inn leh ka gamah ka ciah theih nadingin kei hong sawl in. Nang' tunga kong thalawhsa ka zite leh ka tate hong pia in la, hong paisak in; bang hang hiam cih leh nangma' na kong sepsaksa na thei hi,” ci hi. Ahih hangin Laban in ama' kiangah, “Na maipha ka ngah leh hehpihna tawh om dih in. Topa in nangma' hangin kei thupha hong piakna ka thei hi; na thamante a min hong lo in la, nang kong pia ding hi,” ci hi. Jakob in ama' kiangah, “Nangma' na kong sepsak khitna leh keima' kep sungin na ganhingte tampi a phakna nangmahmah in na thei hi. Bang hang hiam cih leh kei hong pai ma-in nang in tawm bek na nei a, tu-in tampi takin khang hi; ka kiheina peuhah Topa in nang thupha hong pia hi. Ahih hangin tu-in keima' innkuan ading cik ciangin ke’n vaihawm ding ka hi hiam?” ci hi. Amah in, “Nang bang hong pia ding ka hi hiam?” ci hi. Jakob in, “Bangmah nong pia kei ding hi; hih bangin nong hih nak leh na tuuhonte vak kikin ka kem ding hi: tu ni-in na tuuhonte khempeuh lakah hong paisak in la, tua sung panin tuu a puang leh a gial khempeuh leh tuuno a vom khempeuh leh keel lak panin a gial leh a puang khempeuh hong khen khiasak in; tuate in keima thaman hi ding hi. Tua ahih ciangin nang' tung pan-a ka thaman en dinga nong pai ciangin ka thumanna in kei adingin hong kinung latsak ding hi. Keel lakah a puang lo leh a gial lo khempeuh leh tuuno lakah a vom lo khempeuh, kei' kiangah a kimuh zenzen leh, guk-in kiseh pah ding hi,” ci hi. Laban in, “Hoih hi! Na cihsa bangin hisak in,” ci hi. Ahih hangin Laban in tua ni-in keeltal a dung gial leh a bem gialte, keelpi a puang leh a gialte, a tungah a kang mun a om khempeuh leh tuuno a vom khempeuh lakhia-in, ama' tapate’ kep dingin tuate koih hi; Jakob kiang panin ni thum paina a gamlapi-ah tuute paipih hi. Jakob in Laban’ tuuhon a om lai teng an vak hi. Tua ciangin Jakob in poplar kung, almond kung leh hiangpa kungte' tung pan ciangkhut ding a thak satin la a, a ciangkhutte a kang mun a om dingin kheh a, a ciangkang kaangte kidawksak hi. Amah in a khehsa ciangkangte tui luang, tui piakna tuikuang, tuuhonte tui dawn dinga hong paina mun, tuuhonte' mai-ah koih hi. Amaute nisa nuai-ah om-in tuidawn dingin hong pai uh ciangin a nu leh a pa omkhawm uh ahih manin, tuuhonte tua ciangkangte' mai-ah omkhawm uh a, tua ahih ciangin tuuhonte in a dung gial, a puang leh a gial tuuno ta nei uh hi. Jakob in tuunote khenkhia a, tuuhon a dung gialte leh Laban’ tuuhon sunga a vom khempeuhte’ kimai ngatsak hi; amah in ama aa honte a tuamin koih khia-in, Laban’ tuuhonte tawh koihkhawm lo hi. Tuuhon sung panin a thahatzawte a huk ciangin, amaute tua ciangkangte lakah a gai theih nadingin Jakob in tuuhonte’ mit mai, tui luang sungah a ciangkangte koih hi, ahih hangin tuuhon a gina lote’ mai-ah tua ciangkangte koih lo hi; tua ahih ciangin a gina lo zawte Laban’ aa hi a, a thahat zawte Jakob’ aa ahi hi. Tua ahih ciangin a hauhna nakpi takin khang a, tuuhon lianpi, numei-nasem, kalaoh leh late nei hi. Laban’ tapate in, “Jakob in i pa’ aa khempeuh la khin hi; i pa’ neihsa tung panin amah in hih hauhna ngah hi,” a cihna tu-in Jakob in za hi. Laban in nidang bangin maipha tawh amah a don lohna Jakob in mu hi. Tua ciangin Topa in Jakob' kiangah, “Na pate leh na behte’ gamah ciahkik in, keimah in nang tawh kong om ding hi,” ci hi. Tua ahih ciangin Jakob in mi sawlin ama' tuuhon a omna gam lakah Rachel leh Leah samsak a, amaute' kiangah, “Na pa un nidang bangin maipha tawh kei hong don lohna ka mu hi. Ahih hangin ka pa’ Pasian in kei tawh om hi. Ka tha neih khempeuh tawh na pa’ na ka sepna na thei uh hi; ahi zongin na pa un kei hong khemin, ka thaman sawm vei khel khin a, ahih hangin kei hong gimsak ding Pasian in amah phal lo hi. Amah in, ‘A gialte na thaman hi ding hi,’ ci leh tua ciangin tuuhon khempeuh in a gial ta nei hi; amah in, ‘A dung gialte na thaman hi ding hi,’ ci leh tua ciangin tuuhon khempeuh in a dung gial ta nei hi. Tua ahih ciangin Pasian in na pa’ ganhing khempeuh lakhia-in tuate keima' tungah hong pia zo hi. Ganhonte ta nei dingin a kikholh hunin ka khuadak to a, a honte tunga a diang keeltal khempeuh dung gial, bem gial, puangin a omna ka mangin ka mu hi. Tua ciangin Pasian’ vantungmi in ka mang sungah, ‘Jakob,’ hong ci a, ke’n ‘Hiah om ing!’ ka ci hi. Amah in, ‘Khuadak to in la en in, a honte tunga a diang keelte khempeuh dung gial, bem gial-in puang uh hi; bang hang hiam cih leh Laban in nang' tunga hong bawlna ka mu khin hi. Keimah in nang in khuam khat sathau nuhin kei' tungah thuciamna nong bawlna mun Beth-el Pasian ka hi hi. Tu-in tho in la, hih gam panin paikhia-in, na suahna gam-ah ciahkik in,’ hong ci hi,” ci hi. Tua ciangin Rachel leh Leah in amah dawngin, “I pa’ inn sungah ei tanh ding ahi a, ei luah ding ahi zongin om ahi hiam? Amah in eite gamdang mi bangin hong ngaihsun hilo ahi hiam? Bang hang hiam cih leh amah in eite hong zuak khin a, eite adinga hong kipia sum amah in zang mang khin hi. I pa’ tung panin Pasian in a lakkhiatsa neihsa khempeuh eite leh i tate’ aa ahi hi; tua ahih ciangin tu- in, nang' tunga Pasian’ hong cih peuhpeuh hih in,” ci uh hi. Tua ahih ciangin Jakob ding-in a tapate leh a zite kalaohte' tungah tuangsak hi; amah in a ganhing khempeuh, a ngahsa khempeuh, Paddanaram gamsunga a ngah ama neihsa ganhing khempeuh, a pa Isaak’ omna Kanaan gamah pai dingin hawl khia hi. Laban a tuu mul met dingin pai khia a, Rachel in a pa’ inn sung pasiante gu hi. Jakob in Aram mi Laban khem a, tai ding a sawmna amah in gen lo hi. Amah a neihsa khempeuh tawh tai-in, Eufrates gun kantan a, Gilead gam mualtung lam ma-nawh hi. Jakob tai hi, ci-in a ni thum ni-in Laban’ tungah a kigen ciangin, amah in a behte zawnin ni sagih sung amah delh a, Gilead gam mualtungah amah pha dekdek uh hi. Ahih hangin Aram mi Laban' kiangah zan-in mang sungah Pasian hong pai a, ama' kiangah, Jakob' tungah a pha hita leh a sia hita leh kam khat beek na pau loh nadingin kidawm in,” ci hi. Tua ciangin Laban in Jakob pha hi. Tu-in Jakob in Gilead mualtung gamah a puanbuk lam a, Laban leh a behte in Gilead gam mual tungah phual sat uh hi, Laban in Jakob' kiangah, “Nang bangci tat na hi hiam? Kei hong khemin, gal mat bangin ka tanute bang hangin paikhiatpih na hi hiam? Bang hangin tai simin kei hong khem a, hong gen lo na hi hiam? Tua ci kei lecin, lungdamna leh lasakna, khuang leh laiza tawh kong kha ding hi. Bang hangin ka tapate leh ka tanute mangpha khakna hong namsak lo na hi hiam? Tu-in na hai gamtat khin hi. Nang kong siatsak ding keima' thu ahi hi; ahih hangin na pa’ Pasian in zan zan-in kei' kiangah thu hong gen a, ‘Jakob' tungah a pha hita leh a sia hita leh na gen ding kidawm in,’ hong ci hi. Tu-in nang in na pa’ inn nakpi takin lunggulh na hih manin na paikhia khin ta hi, ahih hangin bang hangin ka pasiante gu na hi hiam?” ci hi. Jakob in Laban dawngin, “Kei' kiang panin na tanute thakhat thu-in nong suh khak ding ka launa hang ahi hi. Na pasiante na muhna mi peuhpeuh nungta lo ding hi. I behte’ muhna-ah nang aa ahi, kei' neih a om leh kawkkhia in la, la in,” ci hi. Tu-in Rachel in tuate a na guk lam Jakob in thei kha lo hi. Tua ahih ciangin Laban in Jakob’ puanbuk, Leah’ puanbuk, numei-nasem nihte’ puanbuk sungah pai a, ahih hangin amah in tuate mu lo hi. Leah’ puanbuk panin amah paikhia a, Rachel’ puanbuk sungah lut hi. Tu-in Rachel in innsung pasiante la khin a, kalaoh tutphah sungah koihin, tuate' tungah tu hi. Laban in puanbuk sung teng khempeuh zawt a, ahih hangin tuate mu lo hi. Amah in a pa' kiangah, “Nang' mai-ah hong ding thei lo ka hih manin ka topa heh kei in, bang hang hiam cih leh numei ngeina ka nei hi,” ci hi. Tua ahih ciangin amah in mun dang khempeuh zong a, ahih hangin inn sung pasiante mu lo hi. Tua ciangin Jakob a heh suak a, Laban mawhsak hi; Jakob in Laban' kiangah, “Ka mawhna bang ahi hiam? Nasia tak-a kei nong delh nadingin ka khialhna bang ahi hiam? Ka na khempeuh na zawt kim khit hangin na innsung nate khempeuh bang mu na hi hiam? Eite gel' kikal-ah amaute in a khen theih nadingin keima' behte leh nangma' behte' mai-ah koih khia in. Hih kum sawmnih sung nang tawh ka om khin hi; na tuupi leh na keelpite ta-tolh nai lo a, na tuuhonte' sung pan tuutalte ka ne kei hi. Gamlak ganhingte’ balzante nang' kiangah kong puak kei hi; tua supna keimahmah in ka thuak hi; sun-a kigu hita leh zan-a kigu hita leh kei nong lohsak hi. Keimah in tua bang ka hi hi; sun-in a sa in hong kang a, zan-in a vot in hong tawp a, ka ihmu ngei kei hi. Hih kum sawmnih sung na inn sungah kong om khin hi; na tanu nihte kum sawm-le-li sung kong thalawh a, na tuuhonte kum guk sung kong thalawh a, nangmah in ka thaman sawm vei na kheel hi. Ka pa’ Pasian, Abraham’ Pasian leh Isaak’ Zahtakpa in kei hong ompih lo hi leh, tu-in nangmah in khuthawm guakin kei nong sawlkhia taktak ding hi. Pasian in ka thuakna leh ka khutte’ nasepna mu a, zan zan-in nang hong thuhilh hi,” ci hi. Tua ciangin Laban in dawngin Jakob kiangah, “Tanute in keima' tanu hi, naupangte in keima' naupang hi, tuuhonte in keima' tuuhon hi, na muh khempeuh keima aa ahi hi. Ahih hangin tu ni-in hih ka tanute hita leh amau' sung pan-a piang naupangte' tung hita leh ke’n bang hihsak thei ding ka hi hiam? Tu-in hong pai in, nang leh kei in thuciamna khat bawl ni; nang leh kei’ kikal-ah teci hisak ni,” ci hi. Tua ahih ciangin Jakob in suang khat la-in khuamin phut hi. Jakob in a behte' kiangah, “Suang khawm un,” ci a, amaute in suang la-in suangcian khat bawl uh hi; tua suangcian' gei-ah amaute in an ne khawm uh hi. Laban in Jegarsahadutha ci hi; ahih hangin Jakob in Galeed ci hi. Laban in, “Hih suangcian in tu ni-in nang leh kei' kikal-ah teci ahi hi,” ci hi. Tua ahih ciangin amah in Galeed ci-in min phuak a, a khuam pen Mizpah ci hi, bang hang hiam cih leh amah in, “Eite khat leh khat i tuam om ciangin Topa in nang leh kei’ kikal hong encik hen. Ka tanute na bawlsiat a, ka tanute’ ban-ah zi na lak beh leh, eite tawh kuamah a om loh hangin nang leh kei' kikal-ah Pasian in teci a hihna phawk in,” ci hi. Tua ciangin Laban in Jakob' kiangah, “Nang leh kei’ kikal-ah ka phuhsa hih suangcian leh khuam mu in. Siatna bawl dingin keimah in hih suangcian kheng-in nang' kiangah kong pai loh nading, nang in hih suangcian leh khuam kheng-in kei' kiangah nong pai loh nadingin hih suangcian in teci khat ahi hi, khuam in teci khat ahi hi. Abraham’ Pasian leh Nahor’ Pasian, amau pate’ Pasian in eite' kikal-ah thu khen ta hen,” ci hi. Tua ahih ciangin Jakob in ama' pa Isaak' Zahtakpa tawh kiciam hi, Jakob in mualtungah biak piakna pia-in an ne dingin a behte sam hi; amaute in an ne-in zan tawntung mualtungah om uh hi. Zingsang tungin Laban tho-in, a tute leh a tanute namin amaute thupha pia hi; tua ciangin amah pai khia-in innah ciahkik hi. Jakob ama' lampi-ah paisuak a, Pasian’ vantungmite in amah dawn hi; Jakob in amaute a muh ciangin amah in, “Hih in Pasian’ galkapte hi!” ci hi. Tua ahih ciangin tua mun pen Mahanaim ci-in min phuak hi. Jakob in Edom gam, Seir leitangah a om a sanggampa Esau' kiangah kamtaite ma sawl a, amaute hilhin, “Note in ka topa Esau' kiangah hih bangin na ci ding uh hi: Na nasempa Jakob in, 'Laban' kiangah peemta-in ka om a, tu ciang dong ka om hi; keimah in bawng-tal, la, tuuhon, pasal-nasem leh numei-nasemte ka nei hi; na mai-ah maipha ka muh theih nadingin ka topa’ tungah a gen dingin kong sawl hi,’ ci un,” ci hi. Kamtaite Jakob kiangah hong ciahkik uh a, “Na sanggampa Esau' kiangah ka va pai uh hi, nangmah dawn dingin amah hong pai a, amah tawh mihing za li om hi,” ci-in gen uh hi. Tua ciangin Jakob nakpi takin lau-in lungkham hi; amah in ama' kianga om mite, tuuhonte, bawnghonte leh kalaohte pawl nih-in khen hi, “Pawl khatah Esau pai-in a suksiat leh a pawl khat suakta ding hi,” ci-in ngaihsun hi. Jakob in, “Ka pa Abraham’ Pasian leh ka pa Isaak’ Pasian, keimah' kiangah, ‘Na gam leh na behte' kiangah ciahkik in, nang' tungah hoihna kong bawl ding hi,’ hong ci Topa aw, Keimah in na itna kip khempeuh lak pan a neu pen leh na nasempa' tunga nong lahsa na thumannate khempeuh tawh ka kilawm kei hi, bang hang hiam cih leh ka ciangkhut guak tawh hih Jordan ka kantan hi; tu-in pawl nih ka cing khin ta hi. Ka sanggampa Esau’ khut sung pan, kei hong khahkhia in, kong thum hi, bang hang hiam cih leh amah hong pai-in kei leh, nute, naupangte tawh hong thah khit khak ding ka lau hi. Ahih hangin nangmah in, ‘Nang' tungah hoihna kong bawl ding a, a honpi a kisim thei loin na suan-le-khakte tuipi sehnel zahin ka bawl ding hi,’ na ci hi,” ci hi. Tua ahih ciangin amah tua zan-in tua lai-ah giak a, ama' neih sung panin a sanggampa Esau’ ading letsong keelpi za nih leh keeltal sawmnih, tuupi za nih leh tuutal sawmnih, kalaoh nawi-suk sawmthum leh a note, bawngpi sawmli leh bawngtal sawm, lapi sawmnih leh latal sawm la hi. Amah in hihte a nasemte’ khut sungah amau’ hon ciatin pia a, ama' nasemte' kiangah, “Ka mai-ah na paisuak un la, hon khat leh hon khat kikal kihalsak un,” ci hi. Amah in a masa pente' tungah thuhilh a, “Ka sanggampa Esau in note hong dawnin, ‘Kua’ aa na hi uh hiam? Koi-a pai ding na hi uh hiam? Na mai uh-a om hihte kua aa ahi hiam?’ ci-in hong dot ciangin, note in, ‘Na nasempa Jakob aa ahi hi; hihte in ka topa Esau’ tungah letsong a hong kipuak ahi hi; tua tham loin amah ka nung uhah om hi,’ ci un,” ci hi. Amah in tua mah bangin a nihna, a thumna leh ganhing honte a zuite khempeuh' kiangah, “Amah tawh na kituah uh ciangin Esau' kiangah a kibangmah-in na gen ding uh hi, note in, ‘Tua tham loin na nasempa Jakob ka nung uhah om hi,’ na ci ding uh hi,” ci hi. Bang hang hiam cih leh amah in, “Ka mai-a pai letsong tawh amah ka lungdamsak zo kha ding a, tua khit ciangin ama' mai ka mu ding hi; amah in kei hong sang kha ding hi,” ci-in ngaihsun hi. Tua ahih ciangin ama' mai-ah letsong paisak hi; amahmah tua zan-in giahphual-ah giak lai hi. Tua zan mahin amah tho-in a zi nihte, a numei-nasem nihte, leh a ta sawm-le-khatte la-in, Jabbok ngahmun kantan hi. Amah in amaute la-in lui gal khatah puak hi, tua mah bangin a neih khempeuh zong galkahsak hi. Jakob amah guak bek om lai hi; zingsang khuavak dong mi khat in amah lai hi. Tua mipa in Jakob a zawh lohna a muh ciangin amah in a khelkom sung suksak hi; tua banga amah tawh a kilaina-in Jakob’ khelguh kilawi hi. Tua ciangin amah in, “Khuavak ta ahih ciangin hong khah in,” ci hi. Ahih hangin Jakob in, “Kei thupha nong piak kei leh kong khah kei ding hi,” ci hi. Amah in ama' kiangah, “Na min bang ahi hiam?” ci hi. Amah in, “Jakob,” ci hi. Tua ciangin amah in, “Na min Jakob kici nawn loin Israel kici ding hi, bang hang hiam cih leh Pasian leh mite tawh na kilai khin a, na zo hi,” ci hi. Tua ciangin Jakob in amah dongin, “Na min hong gen in, hong thum ing,” ci hi. Ahih hangin amah in, “Bang hanga ka min hong dong na hi hiam?” ci hi. Tua lai-ah amah in thupha pia hi. Tua ahih ciangin Jakob in tua mun Peniel ci-in phuak hi, “Bang hang hiam cih leh maitang kituahin Pasian ka mu khin a, ahi zongin kei hong kihing khawi lai hi,” ci hi. A khelpi’ hangin amah bai kawm-in Peniel a kantan lai takin ni hong suak hi. Tua ahih ciangin tu ni dongin Israel mite in khelkom tunga a om khel thagui ne lo uh hi, bang hang hiam cih leh amah in Jakob’ khelkom, a khel thagui tung a sukna hang ahi hi. Jakob khuadak a, en in, Esau hong pai a, amah tawh mihing zali hong pai mu hi. Tua ahih ciangin amah in Leah leh Rachel leh numei-nasem nihte lakah naupangte khen hi. Amah in numei-nasemte leh a tate a masa penin, tua ciangin Leah leh a tate leh Rachel leh Josef a nunung penin koih hi. Amahmah pen amaute' mai-ah pai-in, a sanggampa' kiang nai a tun’ matengin lei lak lamah sagih vei kun hi. Ahih hangin amah dawn dingin Esau hong tai-in, amah ngawng kawi a, pom cipin nam a, amaute kap uh hi. Esau khuadak to-in nupite leh naupangte a muh ciangin, amah in, “Nang tawh a om hihte kuate ahi hiam?” ci hi. Jakob in, “Pasian in hehpihna tawh na nasempa a piak tate ahi hi,” ci hi. Tua ciangin numei-nasemte hong nai uh a, amau leh a tate hong kun uh hi; Leah leh a tate zong tua bangmahin hong nai a, kun uh hi; a nunung penin Josef leh Rachel hong nai uh a, amaute kun uh hi. Esau in, “Ka kituahpih hih a honte khempeuh bang na cih nopna ahi hiam?” ci hi. Jakob in dawngin, “Ka topa’ muhna-ah maipha zon’ nading,” ci hi. Ahih hangin Esau in, “A kicing nei ing, sanggam aw; nang’ neihte nangma adingin kem in,” ci hi. Jakob in, “Hilo hi, nang' tungah hong thum ing, na muhna-ah maipha ngah ka hih leh ka khut sung panin ka letsongte hong sang in; bang hang hiam cih leh hih banga maipha tawh kei nong san’na, na maitang ka muh ding pen, Pasian’ maitang muh tawh kibang taktak hi. Nang' kianga hong kipaipih ka letsong nong san’ nadingin hong thum ing, bang hang hiam cih leh Pasian in kei' tungah hehpih mahmahna tawh hong gamta a, a kicing ka nei hi,” ci hi. Tua bangin amah in kun teitei ahih manin amah in zong sang hi. Tua ciangin Esau in, “I lampi-ah pai ni, na mai-ah kei ka pai ding hi,” ci hi. Ahih hangin Jakob in ama kiangah, “Naupangte a hat lohna ka topa in na thei hi, tuuhonte leh bawnghonte a no ngek neite ka lung phamawh hi; ni khat sung kinak hawl lua leh gan honte khempeuh si ding uh hi. Ama' nasempa’ mai-ah ka topa na pai in la, Seir-ah ka topa kiang kong tun matengin ka mai-a om ganhingte’ thahatna tawh kituak leh, naupangte’ hatna tawh kituakin dam damin kong makaih ding hi,” ci hi. Tua ahih ciangin Esau in, “Kei tawh a om mite pawl khat nang' kiangah hong nusia ning,” ci hi. Ahih hangin amah in, “A kisapna bang om ahi hiam? Ka topa’ muhna-ah kei maipha hong musak in,” ci hi. Tua ahih ciangin Esau in tua ni-in ama' lampi zui-in Seir-ah ciahkik hi. Ahih hangin Sukkot lamah Jakob pai a, ama ading inn leh a ganhingte’ ading hampheng lam hi; tua ahih ciangin tua mun min Sukkot kici hi. Paddan-aram panin hong paina lampi, Kanaan gamsunga om, Shekhem khuapi-ah lungmuang takin Jakob hong tung hi; khuapi mai-ah amah in phual sat hi. Amah in Shekhem’ pa Hamor’ tapate tung panin a puanbuk lamnasa leitang dangka zakhat tawh lei hi. Tua lai-ah amah in biakna tau khat phut a, El-Elohe-Israel ci-in min phuak hi. Tu-in Jakob leh Leah’ tanu Dinah tua gam numeite' kiangah hawh dingin paikhia hi; Hiv mi Hamor’ tapa Shekhem,tua gam ulianpa in amah a muh ciangin, amah in manin luppih a, siasak hi. Ama' lungsim Jakob’ tanu Dinah’ lamah pai hi; amah in tua numei itin ama' tungah kamkhum takin pau hi. Tua ahih ciangin Shekhem in a pa Hamor kiangah, “Hih numei ka zi dingin hong laksak in,” ci hi. Tu-in Jakob in amah in a tanu Dinah a siatsakna za hi; ahih hangin a tate a ganhingte tawh gam lakah om ahih manin amaute hong tun’ matengin Jakob in bangmah gen loin om hi. Shekhem’ pa Hamor amah tawh kimu dingin Jakob kiangah va pai hi. Jakob’ tapate in tua thu a zak uh ciangin gam lak panin hong ciah uh hi; amaute lungkim loin heh mahmah uh hi, bang hang hiam cih leh Jakob’ tanu tawh a lup khop manin amah in Israel sungah haigamtatna hong tun’ hi, bang hang hiam cih leh tua bang hih ding a kilawm lo na ahi hi. Ahih hangin Hamor in amaute tawh thu gen a, “Ka tapa Shekhem in na tanu ngai mahmah hi; a ten’pih dingin ama' tungah pia in, kong thum hi. Kote tawh kiten’na hong bawl un; na tanute kote' tungah hong pia un la, no’ adingin ka tanute uh la un. Kote' lakah nong teeng ding uh hi; no adingin leitang hong kipia ding hi; tua sungah teengin sum bawl un la, tua sungah neihsa lam un,” ci hi. Shekhem in a numei’ pa leh a numei’ sanggamte kiangah, “Note’ mit-ah maipha hong musak un la, kei' tunga nong cih peuhpeuh uh kong pia ding hi. Kei' kiang panin mo-man leh letsong tampi hong ngen un, kei' tunga nong cih zah uh kong pia ding hi; ka zi dingin a numei hong pia hoh un,” ci thuah lai hi. Amah in a sanggamnu uh Dinah siasak khin ahih manin Jakob’ tapate in Shekhem leh a pa Hamor khemna tawh dawng uh hi. Amaute in amau' kiangah, “Vun ki-at lopa' tungah ka sanggamnu uh ka piak ding uh ka ngaihsun thei kei uh hi, bang hang hiam cih leh tua bang hihna in ko adingin mindaina hi ding hi. Hih bangin nong gamtat uh leh ka thukim bek ding uh hi: note' sung pan pasal khempeuh vun ki-at le uh cin kote mah bang na suak ding uh hi. Tua ciangin ka tanute uh note' tungah hong pia-in, na tanute uh kote’ adingin kong la ding uh a, note tawh kote hong tengin mikhat i suak ding hi. Ahih hangin note in ka thu uh hong ngai loin vun na ki-at kei uh leh, ka sanggamnu uh ka la ding uh a, kote ka paikhia ding uh hi,” ci hi. Amau’ thugennate in Hamor leh Hamor’ tapa Shekhem lungdamsak hi. Tangvalpa tua banga a gamtat ding zekai lo hi, bang hang hiam cih leh amah in Jakob’ tanu deih hi. Tu-in amah in a innkuan khempeuh sung panin a kipahtawi pen ahi hi. Tua ahih ciangin Hamor leh a tapa Shekhem amau’ khuapi kulhpi kongpi-ah hong pai-in a khuapih mite uh kiangah thu gen a, “Hih mite in eite' tungah nop mahmah uh hi; i gamsungah tengsakin sum bawlsak ni, bang hang hiam cih leh en un, amau’ ading a kicing dingin leitang zai hi; amau’ tanute zi-in ten’pih ni, eite’ tanute zong amau pia ni. Hih thu khat bek tawh eite tawh ten’ khop ding, mikhat suah ding amau thukim uh hi: amaute vun a ki-at bangin eite' lakah pasal khempeuh vun ki-at ding hi. Amau’ bawngte, amau, neihsate leh amau’ ganhingte khempeuh ei ading hi lo ahi hiam? Amaute tawh eite thukim hoh ni, tua hi leh amaute in eite tawh hong teng khawm ding uh hi,” ci uh hi. Khuapi kulh kongpi-ah a pai mi khempeuh in Hamor leh a tapa Shekhem’ thu mang uh hi; khuapi kulh kongpi-ah a paikhia pasal khempeuh vun ki-at uh hi. A ni thum ni, amaute meima vei-in a om ciangun, Jakob’ tapa nihte, Dinah’ sanggamte Simeon leh Levi in amau’ namsau la-in theih kholh lohin khuapi va sim uh a, pasal khempeuh that uh hi. Amaute in Hamor leh a tapa Shekhem namsau tawh that uh a, Shekhem’ inn sung panin Dinah lakhia-in, paikhia uh hi. Jakob’ tapa dangte in a kithat mite’ tung tawnin khuapi susia uh hi, bang hang hiam cih leh a sanggamnu uh kisiasak hi; amaute in a tuuhonte leh a bawnghonte, a late leh khuapi sunga om peuhmah leh lo sunga om peuhmah laksak uh hi; amau’ hauhna khempeuh, a naupangte khempeuh leh a zite khempeuh, inn sunga om na khempeuh, matsak uh a, amau' neihsa suaksak uh hi. Tua ciangin Jakob in Simeon leh Levi kiangah, “Hih leitang-a teng, Kanaan mite leh Perez mite' tungah kei a muhdahhuai-in nong bawlna uh tawh kei' tungah haksatna nong tun’ uh hi; kei’ pawl mite tawm hi, amaute kei langah kikaikhawmin kei hong sim leh, kei leh ka innkuanpihte hong susia ding hi,” ci hi. Ahih hangin amaute in, “Amah in ka sanggamnu uh numei paktat bangin a bawl ding kilawm ahi hiam?” ci uh hi. Pasian in Jakob' kiangah, “Tho in, Beth-el-ah paito in la, tua lai-ah teng in; na sanggampa Esau kiang panin na tai hun lai-a nang' tungah a hong kilang Pasian adingin biakna tau khat bawl in,” ci hi. Tua ahih ciangin Jakob in a innkuanpihte leh amah tawh a omte khempeuh' kiangah, “Note' lakah a om gamdang pasiante koih khia un la, nomau kisian’suahin, na puante uh kheek un; tua ciangin ka lungkham hunin hong huhin, ka paina khempeuhah a hong ompih Pasian’ adingin biakna tau khat ka bawl theihna dingin eite kipanin Beth-el-ah paito ni,” ci hi. Tua ahih ciangin amaute in Jakob’ tungah amau’ neih gamdang pasian khempeuh leh a bil-uh a, om bilbahte pia uh hi; Jakob in Shekhem khua gei-a tawsaw nuai-ah tuate seel hi. Amaute khualzinin a pai lai takun amau’ kiim-a om khuapite' tungah Pasian' kiang panin lauhuaina lianpi khat tung ahih manin amaute in Jakob’ tapate delh lo uh hi. Kanaan gam sunga om Luz (Beth-el)-ah amah leh amah tawh a om mi khempeuh tawh Jakob tung a, tua lai-ah amah in biakna tau khat lamin, tua mun Elbethel ci-in min phuak hi, bang hang hiam cih leh a sanggampa' kiang panin a tai lai-in tua munah ama' tungah Pasian mahmah kilang hi. Tua ciangin Rebekah a cingnu Deborah si a, Beth-el khang tawsaw nuai-ah amah kivui hi; tua ahih ciangin tua mun min in Allon-bakuth kici hi. Paddan-aram panin amah hong pai ciangin Jakob' tungah Pasian kilang kik a, amah thupha pia hi. Pasian in ama' kiangah, “Na min in Jakob ahi hi; ahi zongin tu-a kipanin nangma min in Jakob kici nawn lo ding a, Israel in nangma' min hi ding hi,” ci hi. Tua ahih ciangin ama min Israel kici hi. Pasian in ama kiangah, “Keimah in Vanglian Pasian ka hi hi: pung in la, tampi pha in; minam khat leh minamte honkhat nang' sung panin piang ding a, nang' sung panin kumpite piang ding hi. Abraham leh Isaak tunga ka piak leitang nangma' tungah kong pia ding a, nang' khit cianga na suan-le-khakte' tungah tua leitang ka pia ding hi,” ci hi. Tua ciangin amah tawh a kihona mun ama' kiang panin Pasian paito hi. Jakob in amah tawh a kihona munah suang khuam khat phut hi; amah in tua tungah leenggahzu tawh biak piakna sungkhia hi, tua tungah sathau zong sung hi. Tua ahih ciangin Jakob in Pasian in amah a hopihna mun a min Beth-el ci hi. Tua ciangin Beth-el panin amaute khualzin hi; amaute Efrat panin a gamla sim lai mun a tun’ lai takun Rachel a nausuah hun tung a, amah nakpi takin gim hi. Amah a gim mahmah lai takin naudomnu in ama' kiangah, “Lunghimawh kei in; bang hang hiam cih leh tu-in tapa dang khat na nei ding hi,” ci hi. Amah a bei lai takin amah in a min Ben-om ci hi; ahih hangin a pa in ama' min Benjamin ci-in phuak hi. Tua ahih ciangin Rachael si-in, Efrat (Bethlehem) paina lampi-ah kivui a, Jakob in ama' han tungah khuam khat phut hi; tua in tu ni dongin tua lai-a a om Rachel’ han khuam ahi hi. Israel in a khualzin zom lai a, Eder tausang gal khatah a puanbuk lam hi. Tua gamah Israel a ten’ lai takin Reuben in a pa’ zi-neu Bilhah luppih hi; Israel in tua thu za hi. Tu-in Jakob’ tapate in sawm-le-nih ahi hi. Leah’ tapate: Reuben (Jakob’ ta u pen), Simeon, Levi, Judah, Issakhar leh Zebulun ahi hi. Rachel’ tapate: Josef leh Benjamin ahi hi. Rachel’ numei-nasem Bilhah’ tapate: Dan leh Naftali ahi hi. Leah' numei-nasem Zilpah’ tapate: Gad leh Asher ahi hi. Hihte in Paddan-aram gamah ama' sunga suak Jakob’ tapa sawm-le-nihte ahi hi. Abraham leh Isaak tawl khat a omna Mamre ahih kei leh Kiriatharba (Hebron) a, a pa Isaak a omna-ah Jakob hong pai hi. Tu-in Isaak’ khan’ sung in kum za leh kum sawmgiat ahi hi. Isaak in a nunung pen a hu sang hi; amah a teek, kum tampi pha-in si a, ama' mite kiangah kigawm hi; ama' tapa Esau leh Jakob in amah vui hi. Hihte in Esau' (Edom) tangthu ahi hi. Esau in Kanaan mite zi-in la hi; Hit mi Elon’ tanu Adah, Hiv mi Zibeon’ tapa Anah’ tanu Oholibamah, leh Nebaioth’ sanggamnu, Ishmael’ tanu Basemath ahi hi. Adah in Esau tawh Efifaz nei hi; Basemath in Re-u-el nei hi; Oholibamah in Jeush Jalam leh Korah nei hi. Hihte in Kanaan gamsunga ama' neih Esau’ tapate ahi hi. Tua ciangin Esau in a zite, a tapate, a tanute, leh ama' innkuan sunga mi khempeuh, a bawngte, a ganhingte khempeuh, leh Kanaan gamsunga a lam a neihsa khempeuh la hi; a sanggampa Jakob' kiang panin gam khatah paikhia hi. Bang hang hiam cih leh ten’ khop theih dingin amau’ neihsate tam lua hi; a ganhingte uh hangin tawl khat a omna uh leitang in amaute vaak zo lo hi. Tua ahih ciangin Seir mual tung gamah Esau teng hi; Esau in Edom ahi hi. Hihte in Seir mual tung gam-a Edom mite’ pa Esau’ tangthu ahi hi. Esau’ tapate’ min in: Esau’ zi Adah’ tapa Elifaz, Esau’ zi Basemath’ tapa Re-u-el Elifaz’ tapate in Teman, Omar, Zefo, Gatam, leh Kenaz ahi hi. (Timna in Esau’ tapa Elifaz’ zi-neu ahi hi; amah in Elifaz tawh Amalek nei hi.) Hihte in Esau’ zi Adah’ tapate ahi hi. Re-u-el’ tapate in: Nahath, Zerah, Shammah, leh Mizzah ahi hi. Hihte in Esau’ zi Basemath’ tapate ahi hi. Esau’ zi, Zibeon’ tapa Anah’ tanu Oholibamah’ tapate in: amah in Esau tawh Jeush, Jalam leh Korah nei hi. Hih-te in Esau’ tapate' sung pan ukpite ahi uh hi. Esau’ ta masa Elifaz’ tapate in: ukpite Teman, Omar, Zefo, Kenaz, Korah, Gatam leh Amalek ahi uh hi; hihte in Edom gamsungah Elifaz’ suan ukpite ahi uh hi; amaute in Adah’ tapate ahi uh hi. Esau’ tapa ahi Re-u-el’ tapate in: ukpite Nahath, Zerah, Shamah, leh Mizzah ahi uh hi: hihte in Edom gamsungah Re-u-el’ sung pan ukpite ahi uh hi; amaute in Esau’ zi, Basemath’ tapate ahi uh hi. Esau’ zi, Oholibamah’ tapate in: ukpite Jeush, Jalam, leh Korah ahi uh hi; hihte in Esau’ zi, Anah’ tanu Oholibamah sung panin a suak ukpite ahi uh hi. Hihte in Esau’ (Edom) tapate hi a, hihte in amaute’ sung pan ukpite ahi uh hi. Tua gam-a teng Hori mi Seir’ tapate in: Lotan, Shobal, Zibeon, Anah, Dishon, Ezer leh Dishan ahi hi; hihte in Edom gamsunga Seir’ tapate ahi Hori mite’ sung pan ukpite ahi uh hi. Lotan’ tapate in Hori leh Homan ahi uh hi; Lotan’ sanggamnu in Timna ahi hi. Shobal’ tapate in: Alvan, Manahath, Ebal, Shefo, leh Onam ahi uh hi. Zibeon’ tapate in: Ai-ah leh Anah ahi hi; amah in a pa Zibeon’ late a cin’ lai takin gam lakah a sa ciktui a mupa Anah ahi hi. Anah’ tate in: Dishon leh Anah’ tanu Oholimah ahi hi. Dishon’ tapate in: Hemdan, Eshban, Ithran leh Kheran ahi hi; Ezer’ tapate in: Bilhan, Za-avan leh Akan ahi uh hi. Dishan’ tapate in: Uz leh Aran ahi uh hi. Hori mite’ ukpite in: ukpite Lotan, Shobal, Zibeon, Anah, Dishon, Ezer, leh Dishan ahi uh hi; hihte in Seir gamsungah amau’ beh ciatin Hori mite’ sung pan ukpite ahi uh hi. Hihte in Israel mite' tungah kumpi khat beek in a uk ma-in Edom gamsunga kumpite ahi uh hi. Beor’ tapa Bela in Edom gamsung uk hi, ama' khuapi min in Dinhabah ahi hi. Bela si a, Bozrah khuami Zerah’ tapa Jobab in ama' tangin uk hi. Jobab si a, Teman mite’ gam mi Husham in ama' tangin uk hi. Husham si a, Moab gam sungah Midian mite a zo Bedad’ tapa Hadad in ama' tangin uk hi, ama' khuapi min in Avith ahi hi. Hadad si a, Masrakah khuami Samlah in ama' tangin uk hi. Samlah si a, Eufrates gun gei-a Rehoboth khuami Shaul in ama' tangin uk hi. Shaul si a, Akbor’ tapa Baalhanan in ama' tangin uk hi. Akbor’ tapa Baalhanan si a, Hadad in ama' tangin uk hi, ama' khuapi min in Pau ahi hi; ama zi’ min in Mehetabel hi a, Mezahab’ tanu Matred, Matred’ tanu Mehetabel ahi hi. Amau’ innkuan leh a ten’na, amau’ min tawh kizui-in, Esau’ sung pan ukpite’ min in: ukpite Timna, Alvah, Jethheth, Oholibamah, Elah, Pinon, Kenaz, Teman, Mibzar Magdiel leh Iram ahi uh hi; hihte in amau’ neih leitang tungah amau’ ten’na tawh kizui-in Edom’ (Edom’ pa Esau’) sung pan ukpite ahi uh hi. Kanaan gam, a pa tawl khat a omna gamah Jakob teng hi. Hih in Jakob' innkuante’ tangthu ahi hi. Josef kum sawm-le-sagih pha ahih manin a sanggamte tawh tuuhon cing hi; a pa’ zite Bilhah leh Zilpahte’ tapate tawh amah tangval ahi hi; Josef in a pa uh kiangah amaute siat gen hi. Tu-in Israel in a ta dangte khatpeuh peuh sangin Josef it zaw hi; bang hang hiam cih leh amah in a teek khit-a a neih a tapa ahi hi; amah in ama' adingin puantualpi bansau khat bawlsak hi. Ahih hangin a pa un a sanggamte khempeuh sangin amah a it zawkna a sanggamte in a muh uh ciangin, amaute in Josef mudah uh a, nuamtakin amah hopih thei lo uh hi. Tu-in Josef in mang khat man a, amah in a sanggamte' kiangah a gen ciangin amaute in amah muhdah semsem na-in nei uh hi. Amah in amaute' kiangah, “Keima' mat hih mang ngai un: en un, eite in lo lai-ah buhlom i hen a, en un, keima' buhlom tho-in ding tang hi; en un, tua kiim-ah note’ buhlomte kikhawm a, keima' buhlom mai-ah kun uh hi,” ci hi. A sanggamte in ama' kiangah, “Kote' tungah nang in hong uk ding na hi hiam?” Kote’ tungah ukna nei ding na hi hiam?” ci uh hi. Tua ahih ciangin amaute in a mangte leh a thugente hangin amah mudah kan uh hi. Tua ciangin amah in mang dang khat man a, tua mang a sanggamte' kiangah genin, “En un, mang dang khat ka man hi; en un, ni, kha, leh aksi sawm-le-khatte kei' mai-ah hong kun uh hi,” ci hi. Ahih hangin amah in a pa leh a sanggamte' kiangah a gen ciangin, a pa in amah tai-in, ama' kiangah, “Nangma' mat hih mang in bang ahi hiam? Kei leh na nu leh na sanggamte in nangma' mai lei lakah a kun dingin hong pai ding ka hi uh hiam?” ci hi. A sanggamte in amah haza uh a, ahih hangin a pa in hi thugenna ciamteh hi. Tu-in a pa uh’ tuuhonte cing dingin Shekhem gei-ah a sanggamte pai hi. Israel in Josef kiangah, “Na sanggamte in Shekhem-ah tuuhon cing hilo ahi hiam? Hong pai in, amau' kiangah hong sawl ning,” ci hi. Amah in a kiangah, “Hiah om ing,” ci hi. Tua ahih ciangin amah in a kiangah, “Tu-in va pai in la, na sanggamte leh tuuhonte a cidam hiam va thei in; kei' kiangah thu hong zasak kik in,” ci hi. Tua ahih ciangin amah in Hebron kuam panin amah sawl a, Shekhem-ah amah tung hi. Gam lakah a vak kawi kawina mi khat in mu hi; mipa in amah dongin, “Bang zong na hi hiam?” ci hi. “Ka sanggamte a zong ka hi hi, amaute in koi lai-ah tuuhon cing uh hiam, hong gen in, hong thum ing,” amah in ci hi. Mipa in, “Amaute paikhia zo uh hi, bang hang hiam cih leh, ‘Dothan-ah pai ni,’ a cih uh ka za hi,” ci hi. Tua ahih ciangin a sanggamte’ nungah Josef pai a, Dothan-ah amaute mu hi. Amaute in gamlapi-ah amah na mu uh a, amaute' nai-ah amah hong tun’ma-in amaute in amah thah ding na vaihawm uh hi. Amaute khat leh khat in “Hih lai-ah mangmanpa hong pai hi. Tu-in hong pai un, amah that-in dum sung khatah lawn ni; tua ciangin gamsa khat in amah netum khin hi, i ci ding hi, a mangte bang a suak hiam i mu ding hi,” kici uh hi. Ahih hangin Reuben in tua thu a zak ciangin, “Ama' nuntakna la kei ni,” ci-in, amau’ khut sung panin amah honkhia hi. A pa’ kiang a tun’pih kik theih nadingin amau' khut sung panin hotkhiat theih nading—Reuben in amaute' kiangah, “Amah that kei un; hih gamlak dum sungah amah lawn un, ahih hangin ama' tungah khut nga kei un,” ci hi. Tua ahih ciangin a sanggamte' kiangah Josef hong tun’ ciangin, puantualpi bansau ama' silh lai ahi a puanpi hawkkhiatsak uh hi; amaute in amah la-in dum sung khatah lawn uh hi. A dum pen a hawm hi a, a sungah tui om lo hi. Tua ciangin amaute an ne dingin tu uh hi; a khuadak toh uh leh Gilead panin Ishmael mite a kalaohte uh tawh singnai, lingsi, Mirrah paknamtui pua-in Izipt-ah puak suk dinga a pai mu uh hi. Tua ciangin Judah in a sanggamte' kiangah, “I sanggampa that-in amah i thahna iim lehang bang metna om ahi hiam? Hong pai un, Ishmael mite' kiangah amah zuak ni, ama' tungah eite’ khut kinga kei hen, bang hang hiam cih leh a mah in i sanggampa, eima ci-le-sa ahi hi,” ci hi. A sanggamte in ama' thu mang hi. Tua ciangin Midian mi sum bawlte in hong nawk hi; amaute in Josef kai to-in dum sung panin domkhia to uh a, Ishmael mite' tungah ngun shekel sawmnih-in amah zuak uh hi; amaute in Izipt-ah Josef paipih uh hi. Reuben dum-ah pai kikin dum sungah Josef a om lohna a muh ciangin, amah in a puan balkeek a, a sanggamte' kiangah ciahkik-in, “Tangvalpa om lo hi; kei bangci ding ka hi hiam?” ci hi. Tua ciangin amaute in Josef' puan la-in, keel khat go uh a, a sisan sungah a puan diah uh hi; amaute in puantualpi bansau puakin a pa uh’ kiangah paipih uh a, “Hih ka mu uh hi; na tapa’ puan hi hiam hilo hiam tu-in thei in,” ci uh hi. Amah in a hih lam thei a, “Ka tapa’ puan ahi hi; gamsa khat in amah netum khin zo hi; Josef kibalnen gawp a hihna up lohna ding om lo hi,” ci hi. Tua ciangin Jakob' in ama' puan balkeekin, a kawng-ah puanhampi teng a, a tapa' hangin ni tampi sung kap hi. A tapate leh a tanute khempeuh in amah hehnem dingin kipan uh hi; ahih hangin amah in hehnep ding nial a, “Hi lo hi, a kapsa-in ka tapa' kiang Leinuai-ah ka pai ding hi,” ci hi. Tua ahih ciangin ama' hangin a pa kap hi. Tua kikal sungin Midian mite in Izipt gamsunga inncing mang, Faro’ nuai-ah ulian ahi Potifar' tungah Josef zuak uh hi. Tua hun lai takin Judah a sanggamte' kiang panin paisukin, Adullam mi Hirah min nei mi khat tawh omkhawm hi. Tua lai-ah Judah in Kanaan mi Shua’ tanu mu hi; amah in tua nu ten’pihin luppih a, tua nu gai-in tapa khat nei a, amah in a min Er phuak hi. Tua nu gai leuleu-in tapa khat nei a, tua nu in a min Onan phuak hi. Tua nu in tapa khat nei leuleu-in a min Shelah phuak hi. Tua nu in amah tawh Shelah a neih lai takin Khezib-ah amah om hi. Judah in a ta masa Er’ adingin zi khat la a, tua nu’ min in Tamar ahi hi. Ahih hangin Judah’ ta masa Er pen Topa ’ muhna-ah gilo hi; Topa in amah that hi. Tua ciangin Judah in Onan' kiangah, “Na sanggampa’ zi tawh lumkhawm in la, tua nu’ tungah pasal’ sanggamte’ tavuan sem in la, na sanggampa adingin ta nei in,” ci hi. Ahih hangin Onan in a tate pen ama aa a hih loh ding thei hi; tua ahih ciangin a sanggampa’ zi tawh a lupkhawm ciangin a sanggampa tungah ta pia kha ding ahih manin a na tui lei lakah buasak hi. Ama' gamtatna in Topa ’ muhna-ah lungkimhuai lo a, Amah in amah zong that hi. Tua ciangin Judah in a monu Tamar’ tungah, “Ka tapa Shelah a gol mateng na pa’ innah meigongnu-in va om in,” ci hi—bang hang hiam cih leh a sanggamte mah bangin amah si kha ding ci-in lau hi. Tua ahih ciangin Tamar pai-in a pa’ innah om hi. Tua hun sungin Judah’ zi, Shua’ tanu si hi; Judah a dahna hun a ven’ ciangin, amah leh Adullam mi a lawm Hirah tawh Timnah-a ama' tuumul a mette kiangah paito hi. “Na teekpa a tuute mul met dingin Timnah-ah paito hi,” ci-in Tamar' kiangah a kigen ciangin, a meigong numei puan suahkhia-in, a kituamna silhin amah kituam a, Timnah paina lampi gei-a Enaim paina munah na tu hi; bang hang hiam cih leh Shelah a khang cing khin a hihna amah in mu a, ahi zongin amah tawh kitengsak nai lo hi. Judah in tua nu a muh ciangin amah in a mai tuam ahih manin numei paktat dingin ngaihsun hi. Lampi gei-a tua nu kiangah amah pai a, “Hong pai in, lumkhawm ni,” ci hi, bang hang hiam cih leh tua nu pen a monu a hih lam thei lo hi. Tua nu in, “I lup khop man dingin kei bang hong pia ding na hi hiam?” ci hi. Amah in dawngin, “Keelhon panin keelno khat hong puak ning,” ci hi. Tua nu in, “Nong puak mateng khapna khat nong pia ding hiam?” ci hi. Amah in, “Bang khapna nang hong pia ding ka hi hiam?” ci hi. Tua nu in dawngin, “Na min gelhna leh na khauhual leh na khut sunga om na ciangkhut,” ci hi. Tua ahih ciangin amah in tua nu' tungah tuate pia-in, amah luppih a, amah tawh tua nu gai hi. Tua ciangin amah dingin paikhia a, a kikhuhna puan suahkhia-in meigong numei hihna puansilh hi. Numei’ khut tung panin a khapna a lakik dingin Judah in Adullam mi a lawmpa a ganno tawh a sawl ciangin, amah in tua nu mu zo lo hi. Amah in tua lai mun mite dong a, “Lam gei Enaim-a om numei paktat nu koi-ah om ahi hiam?” ci hi. Amaute in, “Hih lai-ah numei paktat om ngei lo hi,” ci uh hi. Tua ahih ciangin Judah kiangah amah ciah kikin, “Amah ka mu kei hi; tua lai mun mite in, ‘Hih lai-ah numei paktat om ngei lo hi,’ zong hong ci uh hi,” ci hi. Judah in dawngin, “Eite hong kinuihsan kha ding ahih ciangin a nate ama adingin kem mai hen; hih ganno ka puak a, nang in tua nu na muh lohna na thei hi,” ci hi. Tua zawh kha thum ciangin Judah tungah, “Na monu Tamar paktat-in gamta hi; tua tham loin paktatna tawh nau nei hi,” ci-in kigen hi. Judah in, “Amah paikhiatpih un la, amah kihaltum hen,” ci hi. Amah a kipaikhiatpih lai takin amah in a teekpa kiangah kam vaikhak a, “Hih nate a neipa tawh nau ka nei hi,” ci hi. Tua nu in, “Ciamteh in, hong thum ing, min gelhna leh khauhual leh ciangkhut, hih nate kua’ aa ahi hiam?” ci hi. Tua ciangin Judah in tua nate thei a, “Ka tapa Shelah tawh gawm lo ka hih ciangin, tua numei in kei sangin thuman zaw hi,” ci hi. Tua nu tawh amah lumkhawm kik nawn lo hi. Tua nu a suah hun a tun’ ciangin a naubu sungah nih om hi. Nausuak dingin a nat ciangin, khat in a khut dawksak hi; naudomnu in khausan khat la-in a khut tungah khih a, “Hih pen hong pai masa,” ci hi. Ahih hangin a khut a dawh tum kik lai takin, en in, a sanggampa hong paikhia hi; amah in, “Nang’ adingin a vang nangmahmah in bawl tawm!” ci hi. Tua ahih ciangin ama min Perez kiphuak hi. Tua khit ciangin a khut tunga khausan tawh a sanggampa hong paikhia hi; ama min Zerah kiphuak hi. Tu-in Izipt-ah Josef kipaipih suk a, tua lai-a a paipih suk Ishmael mite' tung panin Izipt mi, inncing mangpa, Faro’ nuai-a mangpa Potifar in amah lei hi. Topa in Josef tawh om a, amah nasep a zo mi khat suak hi; amah in Izipt mi a topa’ inn sungah om a, Topa in amah a ompihna leh Topa in ama khut sungah a hih khempeuh a ma-van’sakna a topa in mu hi. Tua ahih ciangin Josef in ama' mai-ah maipha ngahin ama na sem a, amah in a inn sung ukpa-in bawlin a neih khempeuh a uk dingin koih hi. Amah in a inn sung uk leh a neih khempeuh a uk-in a bawla kipan Topa in Josef hangin Izipt mipa’ innkuan thupha pia hi; inn sung hita leh lo sung hita leh a neih khempeuh tungah Topa ’ thupha om hi. Tua ahih ciangin amah in a neih khempeuh Josef khut sungah ap hi; Josef nei khin ahih manin amau nupa' sung thu lo buang lung hihmawh dingin ngaihsun lo hi. Tu-in Josef ngaih baangin a mel hoih hi. Tawl khat khit ciangin a topa’ zi in Josef zawl mit a, “Kei tawh hong lumkhawm in,” ci hi. Ahih hangin amah in nialin a topa’ zi’ kiangah, “En in, kei hong nei ahih manin ka topa in inn sungah bangmah lungphatmawhna nei lo hi, ama' neih khempeuh ka khut sungah hong koih khin hi; hih inn sungah kei sangin amah lianzaw lo hi; nang in ama' zi na hih manin, nang lo buang kei kiang panin amah in a keptuam bangmah om lo hi; tua ahih ciangin bangci-in hih gitlohna lianpi bawlin Pasian’ tungah khial ding ka hi hiam?” ci hi. Amah in ni khat khit ni khat Josef a zol hangin, amah tawh lupkhop ding hita leh omkhop ding hita leh amah in tua nu’ thu ngai lo hi. Ahih hangin ni khat, amah a nasep sem dingin inn sungah pai a, inn sungah inn sung mite khat zong a om loh lai takin, tua nu in a puan-in amah man a, “Kei tawh hong lumkhawm in,” ci hi. Ahih hangin amah in tua nu' khut sungah a puan nusia-in, tai-in inn panin paikhia hi. Tua nu in amah in a khut sungah puan nusia-in inn panin a tai khiatna a muh ciangin, ama' inn sung mite samin amaute' kiangah, “En un, amah in eite hong no dingin Hebru mi khat eite' lakah hong paipih hi; kei tawh lumkhawm dingin amah hong sungtang a, nakpi takin kei ka kiko hi; ka aw sangsakin ka kikona amah in a zak ciangin amah in ka kiangah a puan nusia a, tai-in inn panin paikhia hi,” ci hi. Tua ciangin amah in a topa innah hong ciah mateng a kiangah a puan koih hi. tua nu in ama' kiangah tua thu mah gen a, “Kote' kianga nong paipih Hebru mi nasempa keimah no dingin hong sungtang hi; ahih hangin ka aw sangsakin ka kiko phetin amah in a puan kei' kiangah nusia-in inn panin taikhia hi,” ci hi. “Nasempa in kei hong bawlna dan hih bang hi,” ci-in a zi in ama' kianga a genna a topa in a zak ciangin nak heh mahmah hi. Josef' topa in amah manin, kumpipa’ thongkiate a kikhumna thong sungah amah koih a, tua thong sungah amah om hi. Ahih hangin Topa in Josef ompihin ama' tungah itna kip lak a, thong kempa’ muhna-ah amah maipha pia hi. Thong kempa in thong sunga thongkia mi khempeuh Josef' et dingin ap hi; tua lai-a a kisem khempeuh ama' hih ahi hi; Topa in amah tawh om ahih manin Josef' etna sunga om peuhmah thong kempa in don lo hi; ama' hih peuhmah Topa in daupaisak hi. Hih hun khit tawl khat ciangin, Izipt kumpipa’ an piapa leh a an huanpa in Izipt kumpipa ahi amau’ topa hehsak uh hi. An piapipa leh an huanpipa ahi, ama' nuai-a mangte nih' tungah Faro heh a, Josef a kikhumna thong sung, inncing mangpa’ inn sungah amah in amaute koih hi. Inncing mangpa in amaute Josef kemsak a, amah in amaute’ na sem hi; kikhumna sungah amaute tawl khat om uh hi. Zan khat amaute gel in mang man uh hi—thong sunga a om an piapa leh an huanpa—amau’ mang a tuam tuak, a mang khiatna a tuam tuak ahi hi. Zingsangin amaute' kiangah Josef pai-in amaute a muh ciangin amaute lungkham uh hi. Tua ahih ciangin a topa’ inn sunga amah tawh a kikhuma om Faro’ nuai-a mangte amah in dong a, “Bang hangin tu ni-in mai mial na hi uh hiam?” ci hi. Amaute in ama' kiangah, “Mang ka man uh a, tuate a khia ding om lo hi,’ ci uh hi. Josef in amaute' kiangah, “Khiatnate Pasian’ gen hilo ahi hiam? Kei' kiangah hong gen un, hong thum ing,” ci hi. Tua ahih ciangin an piapipa in Josef' kiangah a mang genin, ama' kiangah, “Ka mangin ka mai-ah leenggui khat om a, leenggui tungah hiang thum om hi; a sel phetin pak khia pah a, a bomte leenggah suakin min pah hi. Ka khut sungah Faro’ hai om hi; keimah in leenggahte lo-in Faro’ hai sungah ka suk a, Faro’ khut tungah a hai ka pia hi,” ci hi. Tua ciangin Josef in ama kiangah, “Hih in a khiatna ahi hi: hiang thumte in ni thum ahi hi; ni thum sungin Faro in nang hong khah ding a, na za-ah nang hong koih kik ding hi; ama' an piapa na hih lai-a mah bangin ama' khut tungah Faro’ hai na pia ding hi. Ahih hangin kei hong phawk in, nang' tungah thu hong hoih ciangin kei tungah hehpihna hong bawl in, kong thum hi, Faro’ tungah kei’ thu genin, hih inn panin kei hong lakhia in. Bang hang hiam cih leh Hebru mite’ gam panin kei hong kigu-khia hi; hih lai-ah zong amaute in thong mial sungah kei hong koihna dingin bangmah mawhna ka bawl kei hi,” ci hi. An huanpipa in a khiatna a hoih lam hi ci-in a muh ciangin, amah in Josef kiangah, “Kei zong mang khat ka man hi; ka lu tungah moh-lawh thum om a, a lawh tungnung pen sungah an huansa namkim Faro’ adingin om hi, ahih hangin ka lu tunga lawh sung panin vasate in ne uh hi,” ci hi. Josef in dawngin, “Hih in a khiatna ahi hi: lawh thumte in ni thum ahi hi; ni thum sungin Faro in nang hong la khia-in na lu hong tan ding a, sing tung khatah nang hong khai ding hi; vasate in na sa ne ding uh hi,” ci hi. A ni thum ni, Faro’ suah ni hunin, amah in a nasemte khempeuh’ adingin pawi khat kham a, an piapipa leh an huanpipa la khia hi. Amah in an piapipa anpiak nasep-ah koih kik a, amah in Faro’ khut tungah hai pia hi; ahih hangin Josef khiat mah bangin an huanpipa khailum hi. Ahi zongin an piapipa in Josef phawk nawn loin, amah mangngilh hi. Tua zawh kumnih bit khit ciangin Faro in mang manin amah Nail gun gei-ah ding hi, en in, Nail gun sung panin bawngpi a zol a thau sagih hong paikhia a, amaute in phai lopate ne uh hi. En in, amaute’ khit ciangin Nail gun sung panin a gulhgawng a gawng bawngpi dang sagih hong paikhia a, Nail gun gei-a bawngpi dangte' kiangah ding uh hi. Tua ciangin a gulhgawng bawngpi sagihte in a zol a thau bawngpi sagihte netum uh hi. Tua ciangin Faro khanglo hi. Tua ciangin ihmu-in a nih veina mang man hi; en in, a taksa a hoih buhvui sagih kung khat tungah vui hi. En in, tuate’ khit ciangin nisuahna huih in theemsakin a hawm vui sagih hong po khia hi. A vui hawmte in a taksa a dim vui sagihte valh tum uh hi. Tua ciangin Faro khanglo a, en in, tua pen a mang na hi hi. Tua ahih ciangin zingsangin a lungkham hi; amah in mi sawlin Izipt mitphial siamte khempeuh leh a mi pil khempeuh samsak hi; Faro in amaute kiangah a mang gen a, ahih hangin Faro tungah a khiatna a gen thei kuamah om lo hi. Tua ciangin an piapipa in Faro' kiangah, “Tu ni-in ka khialhnate ka phawk hi. Faro ama' nasemte' tungah heh a, kei leh an huanpipa inncing mangpa’ inn sungah hong khum lai-in, amah leh keimah in zan khat sungin mang ka man uh a, a mangte in a khiatna tuam ciat nei hi. Inncing mangpa’ nasem ahi Hebru mi tangval khat tua lai-ah kote tawh om hi; ama' kiangah ka gen uh ciangin, amah in ka mangte uh hong khiatsak a, ka mang uh tawh a kizui tuakin a khiatna hong gen hi. Amah in kote' tungah a khiatna hong gen bangin hong tung hi; kei pen ka za-ah hong kikoih kik a, an huanpa kikhai lum hi,” ci hi. Tua ciangin Faro in mi sawlin Josef samsak a, amaute in manlang takin thongmial sung panin amah paikhiatpih uh hi; amah in a mul kiatin a puan a khek khit ciangin, Faro' mai-ah hong pai hi. Faro in Josef' kiangah, “Mang khat ka man a, a khiatna a gen thei kuamah om lo hi; nang in mang na zak ciangin a khiatna gen thei ci-in hong kigenna ka za hi,” ci hi. Josef in Faro dawngin, “Tua in kei' sungah om lo hi; Pasian in Faro' tungah a hoih lamin dawn’na hong pia ding hi,” ci hi. Tua ciangin Faro in Josef' kiangah, “En in, ka mangin Nail gun gei-ah ka ding hi; a thau a zol bawngpi sagih Nail gun panin hong paikhia a, phai lopate ne uh hi; tuate’ khit ciangin a hehpihhuai a gulhgawng Izipt gamsung khempeuh-a tua bang ka muh ngei loh bawngpi dang sagih hong pai hi. A gawng a gulhgawng bawngpite in a masa a thau bawngpi sagihte netum hi, ahih hangin amaute in tuate a nek khit ciangun, a nek khit lam uh kuamah in thei lo hi, bang hang hiam cih leh amaute pen a tunga mah bangin gulhgawng lai uh hi. Tua ciangin ka khanglo hi. Ka mang-in kung khat tungah a dim a hoih buhvui sagih a vuikhia zong ka mu hi: tuate khit ciangin nisuahna huihpi in a keusak, a hawm, a theem vui sagihte hong po a, a vui hawm in a vui hoih sagihte valh tum hi. Mitphial siamte' kiangah ka gen a, ahih hangin kei' kiangah hong gentel thei khat beek om lo hi,” ci hi. Tua ciangin Josef in Faro’ kiangah, “Faro’ mang in khat ahi hi; Pasian in ama' bawl ding Faro’ tungah hong kilangsak khin hi. A hoih bawngpi sagihte in kum sagih hi a, a hoih buhvui sagihte in zong kum sagih mah ahi hi; a mang pen khat ahi hi. Tuate khit ciangin a hong paikhia a gawng a gulhgawng bawngpi sagihte in kum sagih hi a, nisuahna huihpi in a theemsak buhvui hawm sagihte in zong kialpi kum sagih ahi hi. Faro' kianga kong gen bangin Pasian in Ama' hih ding Faro' tungah hong lak khin ahi hi. Izipt gamsung khempeuhah kum sagih sung hauhna hong tung ding a, ahih hangin tua khit ciangin kialpi kum sagih sung hong tungin, hauhna ngeisa khempeuh Izipt gamsungah kimangngilh ding hi; kialpi in gamsung netum ding a, nasia mahmah ding ahih manin, tua hong tung ding kialpi’ huhau-in gamsungah hauhna kithei lo ding hi. Faro’ mang nih a phakna pen tua thu in Pasian’ sehsa hi, a cih nopna hi a, Pasian in tomno sungin hong tungsak ding hi. Tua ahih ciangin tu-in Faro in thu ngaihsut siam mipil khat tengkhia in la, Izipt gamsung uk dingin amah koih in. Faro in gamsungah vaihawm ulian seh in la, a kihauh kum sagih sungin Izipt gam leitang pan-a piang seh-nga-suah-seh-khat la in. Hong tung ding kum hoih sunga an khempeuh amaute khawmsak in la, khuapite' sungah annek dingin Faro’ ukna nuai-ah antangte kholin, amaute kemsak in. Kialpi hangin gamsung a siat loh nadingin Izipt gamsungah a hong tung ding kum sagih kialpi dal nadingin a kikoihcing an hi ding hi,” ci hi. Hih a thugen pen Faro leh a nasem khempeuhte in hoih sa uh hi. Faro in a nasemte' kiangah, “Ama' sungah Pasian’ Kha Siangtho a omna, hih bang mi mu ding i hi hiam?” ci hi. Tua ahih ciangin Faro in Josef' kiangah, “Pasian in hihte khempeuh nang hong lak khin ahih manin, nang banga thu ngaihsut siam leh a pil om lo hi; nang in ka inn sungah ulian na hi ding a, nangma thupiak bangin ka mite khempeuh gamta ding uh hi; kumpi tokhom tawh kisai-in kei in nang' sangin ka lianzaw bek ding hi,” ci hi. Faro in Josef' kiangah, “En in, Izipt' leitang tung khempeuhah nang kong koih khin zo hi,” ci hi. Tua ciangin Faro in a min gelhna zungbuh ama' khut tung panin suahkhia-in Josef' khut-ah bulhsak a, puan hoih mahmah tawh amah zemin, a ngawng-ah kham khainiang khat oksak hi; ama' zom-a ulian ahihna tawh ama' leeng nihna tungah amah tuangsak hi; ama' mai-ah amaute kiko a, “Khuk din un!” ci hi. Tua ahih ciangin Izipt leitang tung khempeuh a ukin amah koih hi. Tua tham loin Faro in Josef' kiangah, “Keimah in Faro ka hi hi, nangma' thukim lohin Izipt leitang tung khempeuhah kuamah in a khut a khe nangawn uh liik lo ding uh hi,” ci hi. Faro in Josef' min Zefenath-paneah phuak hi; amah in On khua siampipa Potifera’ tanu Asenath tawh kiteengsak hi. Tua ahih ciangin Izipt gamsungah Josef zin kawikawi hi. Izipt kumpipa Faro’ nasemin a tum ciangin Josef kum sawmthum pha hi. Faro’ omna panin Josef paikhia a, Izipt gamsung khempeuhah pai hi. A kihauh kum sagih sungin leitang in tampi piangsak a, Izipt gamah tampi a om lai takin amah in tua kum sagih sunga ante khempeuh khawm a, khuapite sungah an khol hi; a kiim-a lote panin khuapi sim-ah amah in an khol hi. A teh ding a khawl dong zahin Josef in tuipi sehnel zahin antang tampi khol hi, bang hang hiam cih leh kiteh khin zo lo hi. Kialpi kum hong tun’ ma-in Josef in On khua siampipa Potifera’ tanu Asenath tawh tapa nih nei hi. Josef in a ta masa Manasseh phuak hi; amah in, “Bang hang hiam cih leh Pasian in ka haksatna khempeuh leh ka pa’ innkuan khempeuh a mangngilhin hong bawl hi,” ci hi. A nihna amah in Efraim phuak hi; “Bang hang hiam cih leh ka thuakna gamsungah kei a pungin hong bawl hi,” ci hi. Izipt gamsunga a om kum sagih sung hauhna bei ta hi; Josef' gensa bangin kum sagih kialpi hong kipan hi. Gam dang khempeuhah kialpi om hi; ahih hangin Izipt gamsung tengah an om hi. Izipt gam khempeuh a kial ciangin, an ngenin mite Faro' tungah kiko uh hi; Faro in Izipt mite khempeuh' tungah, “Josef kiangah pai un; note tunga ama' hong cih bangin gamta un,” ci hi. Tua ahih ciangin gam khempeuhah kialpi a tun’ kim ciangin Josef in ankholna innte khempeuh hongin, Izipt mite' tungah zuak hi, bang hang hiam cih leh Izipt gamah kialpi nasia hi. Tua tham loin, leitung khempeuhah kialpi nasia ahih manin, antang lei dingin Josef' kiangah leitung mi khempeuh hong pai uh hi. Izipt-ah an a omna thu Jakob in a theih ciangin, amah in a tapate kiangah, “Bang hangin khat leh khat ki-en na hi uh hiam?” ci hi. Amah in, “En un, Izipt-ah an om hi ci-in ka za zo hi; eite si loin i nuntak nadingin paisuk un la, ei’ ading an va lei un,” ci hi. Tua ahih ciangin Izipt-ah an lei dingin Josef sanggamte sawm paisuk uh hi. Ahih hangin Jakob in Josef’ sanggampa Benjamin, a sanggamte tawh paisak lo hi, bang hang hiam cih leh ama' tungah siatna tung kha ding ci-in lau hi. Tua ahih ciangin Kanaan gam sungah kial tung ahih manin a hong pai dangte tawh Israel’ tapate zong an lei dingin hong paikhawm uh hi. Tu-in Josef in tua gamah a ukpa ahi hi; gam mi khempeuh tunga an a zuakpa amah ahi hi. Josef' sanggamte hong pai-in, a maitang uh lei lam ngatin ama mai-ah hong kun uh hi. Josef in a sanggamte mu-in thei a, ahih hangin amah in mi dang bangin bawlin amaute' tungah khauh pau hi. “Koi pan-a hong pai na hi uh hiam?” amah in ci hi. Amaute in, “An lei dingin Kanaan gam panin hong pai hi ung,” ci uh hi. Tua ahih ciangin Josef in a sanggamte thei a, ahih hangin amaute in amah thei lo uh hi. Josef in a mangin amaute a mat khitna a mangte phawk hi; amah in amaute' kiangah, “Note in thukan na hi uh a, hih gam thanemna en dingin hong pai na hi uh hi,” ci hi. Amaute in ama' kiangah, “Hi lo hi, topa aw, an lei dingin na nasemte a hong pai hi ung. Kote khempeuh in mi khat’ ta ka hi uh a, kote in a thutak ka hi uh hi, na nasemte in thukan hi lo uh hi,” ci uh hi. Amah in amaute' kiangah, “Hi lo hi, hih gam ginat lohna en dinga hong pai na hi uh hi,” ci hi. Amaute in, “Ko, nangma nasemte in sanggam pasal sawm-le-nih ka hi uh a, Kanaan gamsungah mi khat’ ta ka hi uh hi; en in, a moi pen tu ni hunin ka pa uh tawh om a, khat pen om nawn lo hi,” ci uh hi. Ahih hangin Josef in amaute' kiangah, “Note’ tunga kong gen bangin a hi mah hi, note in thukan na hi uh hi. Hih thu tawh note hong kithei ding hi: Faro in a nungta ahih mah bangin na sanggam moi pen uh hih lai-ah hong pai kei leh hih lai mun panin note na paikhia thei kei ding uh hi. Note’ sungah thuman om hiam ci-in a kimuh nading, na thugente uh a kitel nadingin note thong sungah na om lai takun note khat kisawl un la, na sanggampa uh hong paipihsak un; tua ahih kei leh Faro in a nungta ahih mah bangin note in thukan na hi taktak uh hi,” ci hi. Amah in thong sungah ni thum sung amaute koih hi. A ni thum ni-in Josef in amaute' kiangah, “Keimah in Pasian zaktak ka hih manin hih bangin gamta un, tua hi leh na nungta ding uh hi: note in thuman mi na hih uh leh na thong sung uhah na sanggamte uh khat omsak lai un la, a dangte pai-in na innkuan a gilkialte’ adingin an pua un la, na sanggam moi pen uh kei' kiangah hong paipih un; tua ciangin na kam gente uh kitel ding a, note na si kei ding uh hi,” ci hi. Amaute tua mah bangin gamta uh hi. Tua ciangin amaute khat leh khat in, “A taktak i sanggampa tawh kisai-in eite i mawh hi, amah in eite' kiangah hong thumin eite in a thu i ngaih loh ciangin amah a lungkhamna i mu hi; tua ahih ciangin hih lungkhamna eite' tungah hong tung hi,” kici uh hi. Reuben in amaute dawng a, “Tangvalpa' tungah khial kei un ci-in note' tungah hong gen hi lo ka hi hiam? Ahih hangin nong ngai kei uh hi. Tua ahih ciangin tu-in ama' sisan man hong tung ahi hi,” ci hi. Amaute’ kikal-ah kamphen khat om ahih manin Josef in amau’ paute a tel lam amaute in thei lo uh hi. Tua ciangin amaute' kiang panin amah kihei-in kap hi; amah amaute' kiangah hong pai kikin amaute hopih hi. Amah in amau' kiang panin Simeon la-in amau’ muhna-ah amah hen hi. Amau' ipte antang tawh dipsakin, a van sung uhah amau’ sum ciat koih kikin, lampi-a a nek ding uh an a piak nading Josef in thupia hi. Tua mah bangin amau’ adingin kihihsak hi. Tua ciangin amaute in a late uh antang suan-in paikhia uh hi. Amaute khat in a giahna panun a la gan-an pia dingin a van a suah leh, a van gong-ah a sum mu hi; amah in a sanggamte' kiangah, “Ka sum kikoih kik hi; hih lai-ah ka van gong-ah om!” ci hi. Hih thu hangin amaute lungsi uh a, liingin amaute khat leh khat ki-en uh a, “Pasian in eite hih banga hong bawl bang ahi hiam?” ci uh hi. Kanaan gamah a pa uh Jakob' kiang a tun’ uh ciangin, amaute tunga thu piang khempeuh gen uh a, “Mipa, tua gam topa kote' tungah hong khauh pau-in, tua gam thukan-in kote hong ngaihsun hi. Ahih hangin kote in ama' kiangah, ‘Kote thuman mi ka hi uh a, kote thukan ka hi kei uh hi; kote in ka pa uh' tapa, sanggam pasal sawm-le-nih ka hi uh hi; khat pen om nawn lo a, tu ni hunin a moi pen Kanaan gamah ka pa uh tawh om hi,’ ka ci uh hi. Tua ciangin mipa, tua gam topa in kote' tungah, ‘Note thuman mi na hihna uh hih tawh ka thei ding hi: na sanggamte uh khat kei' kiangah nusia un la, na innkuan gilkialte adingin antang la un la, na lampi uhah pai un. Na sanggam moi pen uh kei' kiangah hong paipih un; tua ciangin note thukan hi loin thuman mi na hihna uh ka thei ding a, note' kiangah na sanggampa uh hong khah-in hih gamsungah sum na bawl thei ding uh hi,’ hong ci hi,” ci-in gen uh hi. Amau’ vante a suah ciangun, en in, a milip-un a sumte uh a van sung ciat uhah om hi; amaute leh a pa un amaute’ sum kihente a muh uh ciangin, lungkham uh hi. A pa uh Jakob in amaute' kiangah, “Ka tate tawh kei nong kikhensak zo uh hi: Josef om nawn lo, Simeon om nawn lo, tu-in note in Benjamin na la ding uh hi; hihte khempeuh kei tungah hong tung khin hi,” ci hi. Tua ciangin Reuben in a pa' kiangah, “Na kiangah amah kong paipih kik kei leh ka tapa nihte that in; kei hong ap in, nang' kiangah amah kong ciahpih kik ding hi,” ci hi. Ahih hangin amah in, “A sanggampa si a, amah bek om ahih manin note tawh ka tapa hong paisuk lo ding hi. Note’ pai nading na khualzinna uhah ama' tungah siatna tung khazenzen leh, dahna tawh ka sam kangte Leinuai-ah na paipih suk ding uh hi,” ci hi. Tu-in gamsungah kialpi nasia semsem hi. Izipt gam panin a puak uh antang amaute in a gaih khit uh ciangin, a pa un amaute' kiangah, “Pai kik un la, eite’ ading an tawm khat va lei un,” ci hi. Ahih hangin Judah in ama' kiangah, “Mipa in thupi takin kote hong hilhkhol a, ‘Na sanggampa uh tawh nong ton kei uh leh ka mai na mu kei ding uh hi,’ hong ci hi. Ka sanggampa uh hong zuisak lecin kote paisukin nang’ ading an ka lei ding uh hi; ahih hangin amah nong zuihsak kei leh kote ka paisuk kei ding uh hi, bang hang hiam cih leh mipa in kote' kiangah, ‘Na sanggampa uh tawh nong ton kei uh leh ka mai na mu kei ding uh hi,’ hong ci hi,” ci hi. Israel in, “Mipa kiangah sanggam dang khat nei ung, ci-in genin bang hangin kei hong hici bawlsiat na hi uh hiam?” ci hi. Amaute in dawngin, “Mipa in kote’ thu leh ka sanggamte uh’ thu lim takin hong dong a, ‘Na pa uh a nungta lai hiam? Sanggam dang na nei uh hiam?’ hong ci hi. Ama' kianga ka gen uh hih dotnate ka dawnna uh ahi hi; ‘Na sanggampa uh hong tonpih suk un,’ amah in hong cih ding lam kote in bangci theih kholh ding ka hi uh hiam?” ci uh hi. Judah in a pa Israel' kiangah, “Tangvalpa hong zuisak in la, nang leh ko leh i tate si loin i nuntak theih nadingin kote ding-in ka va pai ding uh hi. Keimah in ama' adingin a kikham ka hi ding hi; kei’ khut sung panin amah nong kal ding hi. Keimah in amah nang' kiangah hong ciahpih kik loin na mai-ah kong koih kik kei leh, tua mawhna kei hong thuaksak tawntung in; bang hang hiam cih leh zekai lo hi lehang tu-in nih vei i tung kik khin ta ding hi,” ci hi. Tua ciangin a pa uh Israel in amaute' kiangah, “A tuaci bang ding a hih leh hih bangin gamta un: gamsunga singgah limci pente na ip sung uhah pua un la, mipa' tungah letsong-in lingsi tawm, khuaizu tawm, singnai, mor paknamtui, pistakhio gah leh almond gahte puaksuk un. Na sum uh a zah nih pua un; na van gong uh a, a kikoih kik sumte pua kik un; a kikhial hi kha ding hi. Na sanggampa uh zong sam-in ding un la, mipa' kiangah pai kik un; amah in na sanggampa uh leh Benjamin hong ciahsak kik theih nadingin Vanglianpen Pasian in mipa’ mai-ah note hehpihna hong pia ta hen. Ka tate tawh ka kikhen leh a kikhen ka hi ding hi,” ci hi. Tua ahih ciangin amaute in letsong la-in, amaute in sum a zah nih leh Benjamin la uh hi; amaute ding-in Izipt-ah manlangin paisuk uh a, Josef' mai-ah ding uh hi. Josef in amaute tawh Benjamin a muh ciangin, amah in a inn sung nasempa’ kiangah, “Mite inn sungah paipih in la, gan khat go-in an bawl in, bang hang hiam cih leh mite in sun ciangin kei tawh an ne ding uh hi,” ci hi. Josef' sawl bangin mipa in sem a, mite Josef' innah paipih hi. Josef’ innah kipaipih ahih manin lau uh a, amaute in, “Eite sila-in hong bawlin i late a mat theih nading, eite’ tungah thu hong zongin eite hong hih theih nadingin, a masa lai-a i van sunga sum kikoihte’ hangin eite hong kipaipih hi,” ci uh hi. Tua ahih ciangin amaute Josef’ inn sung nasempa kiangah paito uh a, inn kongkhak-ah amah tawh kihoin, “Aw, topa aw, an lei dingin khat vei kong pai uh hi; ka giahna mun uh ka tun’ uh ciangin ka vante ka hong uh a, ka sumte uh a cingin ka van sung ciat uhah om hi; tua ahih ciangin kote in tua sumte kong puakik uh a, an lei nadingin sum dang zong kong pua uh hi. Ka van sung uhah kua in sum koih ahi hiam ka thei kei uh hi,” ci uh hi. Amah in dawng a, “Nuam takin om un, lau kei un; na Pasian leh na pa’ Pasian in note adingin na van sung uhah sum koih hi ding hi; keimah in note’ sum a cingin ka ngah khin hi,” ci hi. Tua ciangin amah in amaute' kiangah Simeon paikhiatpih hi. Mipa in Josef' innah amaute paipihin, amaute tui pia-in, amaute in a khe uh sil khinin, amah in amaute’ late gan-an a piak khit ciangin, amaute in tua lai-ah an ne ding uh ci-in za uh ahih manin sun-in Josef hong pai ciangin a piak ding uh letsong bawl khol uh hi. Innah Josef hong pai ciangin amau' puak letsongte inn sungah ama' kiangah paipih uh a, ama' mai-ah lei lakah kun uh hi. Amah in amau’ omzia dong a, “Na gen uh puteek, na pa uh a dam hiam? Amah a nungta lai hiam?” ci hi. Amaute in, “Nangma' nasem ka pa uh dam hi, amah nungta lai hi,” ci uh hi. Amaute in a lu uh kun uh a, zahtakna pia uh hi. Amah khuadak to a, a nu' tapa Benjamin mu a, “Hih in kei' kianga nong gen uh na sanggam moi pen uh ahi hiam? Pasian in nang hong hehpih hen, ka ta!” ci hi. Tua ciangin a lungsimin a sanggampa ngai lua ahih manin Josef manlangin paikhia a, a kah nading mun zong hi. Amah a inn dei sungah pai-in tua lai-ah kap hi. Tua ciangin amah in a mai phiatin hong paikhia hi; amah ki-ip tawmin, “An hong pia un,” ci hi. Amaute in amah, amah guakin nesakin, amaute amau guakin nesakin, amah tawh a ne Izipt mite in amau guak mahin ne hi, bang hang hiam cih leh Izipt mite in Hebru mite tawh an ne khawm lo hi, tua bang hihna in Izipt mite’ adingin a kihhuai ahi hi. Ama' mai-ah amaute a suah hun tawh kizui leh a suak masapen pan a moi pen dong a khangnona tawh kizui-in tu uh hi; lamdangsakna tawh amaute khat leh khat ki-en uh hi. Josef' sabuai tung panin amau tanh ciat kipia-in, ahih hangin Benjamin’ tanh pen amaute’ aa zah nga pha hi. Tua ahih ciangin amaute in ne-in dawn-in amah tawh lungdam uh hi. Tua ciangin amah in a inn sung nasempa thupia a, “Mite’ van sungah amau’ puak zawh zakzah guang in la, amau’ sum ciat a van gong ciatah koih in la, ka ngun hai pen an lei nadingin a sum tawh a moi pen’ van gong-ah koihsak in,” ci hi. Amah in Josef’ gen bangin hih hi. Zingsang khua a vak phetin a late uh tawh mite kisawlkhia hi. Amaute a pai khit, ahih hangin khuapi panin a nai lai-in, Josef in ama' inn sung nasempa' kiangah, “Kithawi in la, mite va delh in; amaute na phak ciangin amaute' kiangah, ‘Bang hangin a hoih pen a sia tawh hong thuk na hi uh hiam? Bang hangin ka ngun hai gu na hi uh hiam? Ka topa in hih hai sung panin dawnin, hih tawh amah in thu thei hilo ahi hiam? Hih bangin na gamtat manun na khial uh hi,’ va ci-in,” ci hi. Amah in amaute a phak ciangin amah in amaute' kiangah hih thute gen hi. Amaute in ama' kiangah, “Bang hangin ka topa in thu hih bang gen ahi hiam? Nasemte tua banga gamta ding hi dek peuhmah lo hi. En in, ka van gong uh a, ka muh uh sumte Kanaan gam panin nang' kiangah kong puakkik uh hi; tua ahih leh na topa’ inn panin ngun hita leh kham hita leh bangci guk ding ka hi uh hiam? Na nasemte' sung pan tua hai a kimuhna penpen kithat hen la, kote zong ka topa’ sila ka hi ding uh hi,” ci uh hi. Amah in, “Na cih bang uh hi ta hen: a kimuhna penpen ka sila hi ding a, no a dang teng mawhna na baang kei ding uh hi,” ci hi. Tua ciangin a milip-in a van uh lei lakah nga suk uh a, a milip-in a van uh suah uh hi. Nasempa in zong a, a ham pen panin kipanin a moi pen tawh tawp hi; Benjamin’ van sungah a hai kimu hi. Tua ciangin amaute in a puan uh balkeek-in, a late uh a van suan ciatin, amaute khuapi-ah hong paikik uh hi. Judah leh a sanggamte Josef' innah a tun’ ciangin, amah tua lai-ah na om lai hi; ama' mai lei lakah amaute puk uh hi. Josef in amaute' kiangah, “Note’ gamtatna a bangci gamtat ahi hiam? Kei bang mi in hih bang thu ka theihna theilo na hi uh hiam?” ci hi. Judah in, “Ka topa' tungah bang hong ci gen ding ka hi uh hiam? Bang thu gen ding ka hi uh hiam? Tua ahih kei leh ko bangci kiphel theih ding ka hi uh hiam? Pasian in na nasemte’ mawhna mukhia hi; en in, kote leh hai a kimuhna-pa zong, ka topa’ sila ka hi uh hi,” ci hi. Ahih hangin amah in, “Tua bangin hi dek lo ding hi. Hai a kimuhna mipa bek ka sila hi ding hi; note ahih leh, na pa’ kiang uhah nuam takin ciah un,” ci hi. Tua ciangin ama' kiangah Judah paito-in, “Ka topa aw, hong thum ing, na nasempa nang' tungah kam khat thu hong gensak in la, na nasempa' tungah na hehna hong sosak kei in; bang hang hiam cih leh nang in Faro mahmah tawh a kibang na hi hi. Ka topa in a nasemte nong dong a, ‘Pa hita leh sanggam pasal hita leh na nei uh hiam?” nong ci hi. Kote in ka topa' kiangah, ‘Kote in a teek pa khat leh a teek zawh-a a neih sanggam pasal moi khat ka nei uh hi; ama' sanggampa si a, a nu’ tate sung pan amah bek om lai hi; a pa in amah it mahmah hi,’ kong ci uh hi. Tua ciangin nangmah in na nasemte' kiangah, ‘Ka mit tawh amah ka muh theih nadingin kei' kiangah amah hong tonpih suk un,’ na ci hi. Kote in ka topa' kiangah, ‘Tangvalpa in a pa nusia thei lo ding hi, bang hang hiam cih leh a pa nusia leh a pa si ding hi,’ kong ci uh hi. Tua ciangin nangmah in na nasemte' kiangah, ‘Note tawh na sanggam a moi pen hong paisuk khop kei leh ka mai nong mu nawn kei ding uh hi,’ nong ci hi. Tua ciangin na nasemte ka pa' kiangah ka paikik uh ciangin ka topa’ thugente ama' kiangah ka gen uh hi. Ka pa un, ‘Pai kik-in eite’ ading an tawm va lei un, hong cih ciangin kote in, “Ka paisuk thei kei uh hi. Ka sanggam moi pen uh ko tawh hong pai leh ka paisuk ding uh hi; bang hang hiam cih leh ka sanggam moi pen uh ko tawh hong pai kei leh mipa’ mai ka mu kei ding uh hi,’ ka ci uh hi. Tua ciangin na nasempa ka pa un kote' kiangah, ‘Ka zi in kei tawh tapa nih a neih na thei uh hi; khat in kei hong nusia a, amah kibalzan khin taktak hi, ka ci hi; tua huna kipan amah ka mu nawn kei hi. Hih a khat zong kei' kiang panin na lak uh a, ama' tungah siatna a tun’ leh, dahna tawh ka sam kangte Leinuai-ah na paipih suk ding uh hi,’ hong ci hi. Tua ahih ciangin tu-in, na nasempa ka pa' kiangah ka pai ciangin, tangvalpa kote tawh hong ciah kei leh, ama' lungsim khempeuh tangvalpa’ tungah om ahih manin, kote tawh tangvalpa a ciah lohna a muh ciangin amah si ding hi; na nasemte in na nasempa ka pa uh’ samkangte dahna tawh Leinuai-ah ka paipih suk ding uh hi. Bang hang hiam cih leh na nasempa in tangvalpa’ adingin ka pa tungah a kikham ka hi a, ‘Nang' kiangah amah kong paipih kik kei leh tua mawhsakna ka pa’ muhna-ah ka nuntak tawntungin ka thuak ding hi,’ ka ci hi. Tua ahih ciangin tu-in kong thum hi, ka topa’ sila dingin tangvalpa’ tangin na nasempa hong omsak in; a sanggamte tawh tangvalpa ciahkiksak in. Bang hang hiam cih leh tangvalpa kei tawh hong ton kei leh ka pa' kiangah bangci ciahkik theih ding ka hi hiam? Ka pa’ tungah a tung ding siatna ka en ngam kei ding hi,” ci hi. Tua ciangin ama' kianga dingte khempeuh’ mai-ah Josef ki-ip zo nawn lo hi; “Ka kiang panin mi khempeuh paikhiasak un,” ci-in amah kiko hi. Tua ahih ciangin Josef in a sanggamte' tungah amah a kipulak ciangin kuamah dang om lo hi. Amah a ging-in kap khia ahih manin Izipt mite in za hi; Faro’ innkuante in zong za hi. Josef in a sanggamte' kiangah, “Keimah in Josef ka hi hi; i pa a nungta lai hiam?” ci hi. Ahih hangin ama omna-ah amaute maizum uh ahih manin a sanggamte in amah dawng thei lo uh hi. Tua ahih ciangin Josef in a sanggamte' kiangah, “Ka nai-ah hong pai un, hong thum ing,” ci hi. Amaute a nai-ah hong pai uh hi. Amah in, “Keimah in Izipt-ah na zuak uh na sanggampa Josef ka hi hi. Tu-in hih lai-ah kei nong zuak manun lungkham kei un, nomau' tungah kihehtawm kei un; bang hang hiam cih leh nuntakna a hingsak dingin note’ mai-ah Pasian in kei hong sawl hi. Bang hang hiam cih leh gamsungah hih kum nih sung kialpi tung zo hi; lo khawh loh, an lak loh ding kum nga om lai hi. Note adingin leitungah a om lai mi a hingsak ding leh note adingin a suakta mi tampi a kem dingin note’ mai-ah Pasian in kei hong sawl hi. Tua ahih ciangin hih lai-ah a hong sawl mi in note na hi kei uh hi, Pasian ahi hi; amah in Faro’ pa-in kei hong bawlin, ama' inn khempeuh’ topa leh Izipt gam khempeuh ukpa-in amah in kei hong bawl khin hi. Manlangin i pa' kiangah ciah to un la, ama' kiangah, ‘Na tapa Josef in hih bangin ci hi, Pasian in Izipt khempeuh’ topa-in kei hong bawl khin hi; ka kiangah hong paisuk hen, zekai kei hen; Goshen leitangah na teng ding a, nang leh na tate leh na tate’ tate leh na tuuhonte leh na bawnghonte leh na neih khempeuh tawh, nangmah in kei tawh na kinai ding hi; hong tung ding kialpi kum nga om lai ahih manin tua lai-ah nang kong vaak ding hi; tua hi kei leh nang leh na innkuanpite leh na neih khempeuh in zawn’na na ngah ding uh hi,’ ci hi, ci un. Note' kianga thu hong gen in keima' kam ahihna tu-in note’ mit-in nong mu uh hi, ka sanggampa Benjamin’ mit in zong hong mu hi. Izipt-ah keima' liatna khempeuh leh note’ muhsa khempeuh i pa’ kiangah na gen ding uh hi. Manlang un la, hih lai-ah i pa hong paipih suk un,” ci hi. Tua ciangin a sanggampa Benjamin ngawng kawi-in a kap hi; Benjamin in zong amah ngawng kawi-in a kap hi. Tua ciangin a sanggamte khempeuh ngawng kawi-in a kap hi; tua khit ciangin a sanggamte in amah hopih uh hi. “Josef’ sanggamte hong pai,” cihna thu Faro’ inn sungah a kizak ciangin, tua thu in Faro leh a nasemte lungdamsak mahmah hi. Faro in Josef' kiangah, “Na sanggamte' kiangah, ‘Hih bangin gamta un: na ganhingte uh van suan un la, Kanaan gamah paikik un; i pa leh na innkuanpihte uh la un la, kei' kiangah hong pai un, Izipt gam a hoihpen mun note kong pia ding a, note in gam hoih sunga piangte na ne ding uh hi.’ Amaute zong thu pia in la, ‘Hih bangin gamta un: na tate leh na zite’ adingin Izipt gam panin leeng la un la, i pa hong paipihin hong pai un. Izipt gam khempeuh a hoih penna nomau’ aa ahih ciangin na vante uh ngaihsutin nei kei un,’ ci in,” a ci hi. Israel’ tapate tua mah bangin gamta uh hi; Josef in Faro’ thupiak mah bangin amaute leeng pia a, lampi-a a nek ding uh zong an pia hi. Amah in amaute khempeuh tungah puan hoih silh khat ciat pia hi; ahih hangin Benjamin' tungah ngun shekel za thum leh puan hoih silh nga pia hi. Amah in a pa' kiangah a nuai-ate khak hi: Izipt na hoihte a pua la sawm, antang, anlum leh lampi-a a pa’ nek ding an a pua lapi sawm puak hi. Tua ciangin amah in a sanggamte sawl khia a, amaute a paikhiat ciangin amah in maute' kiangah, “Lampi-ah kitawng kei un,” ci hi, Tua ahih ciangin amaute Izipt panin paito uh a, a pa uh Jakob' kiang Kanaan gamah ciah uh hi. Amaute in ama' kiangah, “Josef nungta lai a, amah in Izipt gam khempeuh tungah a ukpa ahi hi,” ci uh hi. Amah in amaute’ thugen um lo ahih ciangin a lung si hi. Ahih hangin amaute’ tunga Josef gen kammalte ama' kiangah a gen ciang uh leh Josef in amah puak nadinga a khak leengte a muh ciangin, a pa uh Jakob’ lungsim hing kik hi; Israel in, “Pha zo hi; ka tapa Josef nungta lai hi; ka sih ma-in pai-in amah ka mu ding hi,” ci hi. Tua ahih ciangin Israel in a neih khempeuh tawh a khualzin kipanin Be-ersheba tungin, a pa Isaak’ Pasian’ tungah biak piakna pia hi. Pasian in Israel tungah zan-in thu gen a, “Jakob, Jakob,” ci hi. Amah in, “Hiah om ing,” ci hi. Tua ciangin Amah in, “Keimah in na pa’ Pasian ahi, Pasian ka hi hi; Izipt-ah paisuk ding lau kei in; bang hang hiam cih leh minam lian khatin tua lai-ah nang kong bawl ding hi. Izipt-ah nang tawh kong paisuk ding a, tua ciangin zong keimah in nang kong paipih to kik ding hi; Josef' khut sungah na si ding hi,” ci hi. Tua ciangin Be-ersheba panin Jakob ding khia hi; Israel’ tapate in a pa uh Jakob, a tate uh, a zite uh, amah puak nadinga Faro in a khak leeng sungah pua uh hi. Amaute in zong Kanaan gamsunga a lam uh a ganhingte uh leh a nate uh la-in, Jakob leh ama' suan-le-khakte ahi, a tapate, ama tapate’ tapate, a tanute, a tapate’ tanute tawh Izipt-ah pai uh hi; amah in a suan-le-khakte khempeuh Izipt-ah paipih hi. Tu-in hihte in Israel’ suan-le-khak, Izipt-ah a pai Jakob leh a tate’ min ahi hi. Jakob’ ta u pen Reuben leh Reuben’ tapate: Hanok, Pallu, Hezron leh Karmi ahi hi. Simeon’ tapate: Jemuel, Jamin, Ohah, Jakhin, Zohar leh Kanaan numei’ tapa Shawl ahi hi. Levi’ tapate: Gershon, Kohath leh Marari ahi hi. Judah' tapate: Er, Onan, Shelah, Perez leh Zarah (ahih hangin Kanaan gamah Er leh Onan si hi); Perez' tapate in Hezron leh Hamul ahi hi. Isaakhar’ tapate: Tola, Puvah, Iob leh Shimron ahi hi. Zebulun’ tapate: Sered, Elon leh Jahle-el (hihte in Paddan-aram-ah Jakob tawh a neih Leah’ tapate hi a, a tanu Dinah tawh ahi hi; a tapa leh a tanute a vekpi in sawmthum-le-thum ahi hi). Gad’ tapate: Zifion, Haggi, Shuni, Ezbon, Eri, Arodi, leh Areli ahi hi. Asher’ tapate: Imnah, Ishvah, Ishvi, Beriah leh a sanggamnu uh Serah ahi hi. Beriah’ tapate: Heber leh Malkhiel (hihte in Laban in a tanu Leah tungah a piak Zilpah’ tapate ahi hi; amah in Jakob tawh hihte nei hi—mi sawm-le-guk ahi hi). Jakob’ zi Rachel’ tapate: Josef leh Benjamin ahi hi. Josef in Izipt gamah On khua siampipa Potifera’ tanu Asenath tawh Manasseh leh Efraim nei hi. Benjamin’ tapate: Bela, Bekher, Ashbel, Gera, Naaman, Ehi, Rosh, Muppim, Huppim leh Ard (hihte in Jakob tawh a neih Rachel’ tapate hi a, a vekpi-in mi sawm-le-li ahi hi). Dan’ tapa in Hushim ahi hi. Naptali’ tapate: Jahze-el, Guni, Jezer, leh Shillem (hihte in Laban in a tanu Rachel’ tungah a piak Bilhah in Jakob tawh a neih tapate ahi hi—a vekpi in mi sagih ahi hi). Izipt gamah a pai Jakob’ aa ahi ama' suan-le-khak, Jakob’ tapate’ zite a kisim loin, a vekpi in mi sawmguk-le-guk ahi hi; Josef in Izipt gamah a neih a tapate in nih ahi hi; Izipt gamah a pai Jakob’ innkuan khempeuh sawmsagih ahi hi. Amah in ama' mai Goshen-ah amah lam a lak dingin Josef' kiangah Judah ma sawl hi; amaute Goshen gamah hong pai uh hi. Tua ciangin Josef in a leengte kithawisakin Goshen-ah a pa Israel dawn dingin paito hi; a pa a muh phetin ngawng kawi-in tawl khat sung kap hi. Israel in Josef' kiangah, “Na maitang mu khinin nang na nuntak lai thei ka hih manin tu-in ka si zongin phamawh nawn lo hi,” ci hi. Josef in a sanggamte leh a pa’ innkuanpite kiangah, “Kei paito-in Faro’ kiangah ka va gen ding a, ama' tungah, ‘Kanaan gam-a a om ka sanggamte leh ka pa’ innkuanpihte kei' kiangah hong pai hi; amaute in gankemte ahih manin tuucing ahi uh hi; amaute in a tuuhonte uh leh a bawnghonte uh leh a neih khempeuh uh hong paipih uh hi,’ ka va ci ding hi. Faro in note hong samin note' kiangah, ‘Na nasep uh bang ahi hiam?’ hong cih ciangin, Goshen leitangah na ten’ theih nadingun note in, ‘Kote hita leh ka pate uh hita leh ko, na nasemte in ka neu uh a, kipan tu hun dongin gankemte ka hi uh hi,’ na ci ding uh hi; bang hang hiam cih leh Izipt mite’ adingin tuucing peuhmah a kihhuai ahi hi,” ci hi. Tua ahih ciangin Josef pai-in Faro kiangah, “Ka pa leh ka sanggamte a tuuhon uh leh a bawnghon uh leh a neih khempeuh uh tawh Kanaan gam panin hong pai uh hi; amaute tu-in Goshen gamah om uh hi,” ci-in gen hi. A sanggamte' lak panin amah in mi nga la-in Faro’ kiangah paipih hi. Faro in a sanggamte' kiangah, “Na nasep uh bang ahi hiam?” ci hi. Amaute in Faro’ kiangah, “Ka pate uh mah bangin na nasem kote in tuucingte ka hi uh hi,” ci uh hi. Amaute in Faro’ kiangah, “Hih gamah tawl khat a om dingin kong pai uh hi; bang hang hiam cih leh Kanaan gamah kialpi nasia lua ahih manin tua lai-ah na nasemte’ tuuhonte ading lonona om nawn lo hi; tu-in kong thum uh hi, na nasemte Goshen gamah hong teengsak in,” ci uh hi. Tua ciangin Faro in Josef' kiangah, “Na pa leh na sanggamte na kiangah hong tung khin hi. Izipt leitang khempeuh nangma' thu ahi hi; na pa leh na sanggamte lei hoihna penah teengsak in; Goshen leitangah amaute teengsak in; amaute' lakah a hih thei mi na muh leh ka ganhingte a kem dingin koih in,” ci hi. Tua ciangin Josef in a pa Jakob tumpihin Faro’ mai-ah koih a, Jakob in Faro thupha pia hi. Faro in Jakob' kiangah, “Na nuntak kum bangzah pha ta a hi hiam?” ci hi. Jakob in Faro' kiangah, “Tawl khat ka khualzin hun in kum za leh kum sawmthum ahi hi; ka nuntak hun tomin siatna bek om a, ka pate tawl khat a om sung uh a nuntakna hunte ban nai lo hi,” ci hi. Jakob in Faro thupha pia a, Faro’ omna panin paikhia hi. Tua ciangin Faro’ thu piaksa bangin Josef in leitang a hoih pen, Rameses leitang, Izipt gamsungah neihsa pia-in a pa leh a sanggamte teengsak hi. Josef in a pa, a sanggamte leh a pa’ innkuanpihte khempeuh a ne ding zah tawh kizui-in an pia hi. Tu-in gam khempeuhah an om lo hi; bang hang hiam cih leh kialpi nasia mahmah a, kialpi hangin Izipt mite leh Kanaan mite vul gawp uh hi. Amaute in antang a leina hangin, Izipt gamsung leh Kanaan gamsunga sum om khempeuh Josef in ngah khin hi; Josef in Faro’ innah sum paipih hi. Izipt gamsung leh Kanaan gamsunga sum a bei khit ciangin Izipt mite khempeuh Josef' kiangah hong pai-in, “Kote an hong pia in; bang hangin na muhna-ah si ding ka hi uh hiam? Bang hang hiam cih leh ka sum uh bei ta hi,” ci uh hi. Josef in dawngin, “Na ganhingte uh hong pia un, na sum uh bei ahih leh na ganhing khekna-in an kong pia ding hi,” ci hi. Tua ahih ciangin amaute in Josef' kiangah a ganhingte uh paipih uh hi; Josef in sakolte, tuuhonte, bawnghonte, late khekna-in amaute an pia hi; a ganhingte uh khekna-in Josef in tua kum sung amaute an pia hi. Tua kum a bei ciangin, a kum kik ciangin amaute ama' kiangah pai-in, ama' kiangah, “Ka sum uh a beikhitna ka topa uh tungah kong im kei ding uh hi; ganhing honte ka topa’ aa ahi hi; ka pumpi uh leh ka leitang uh cih sim loh ka topa’ muhna-ah bangmah om lo hi. Bang hangin kote si-in ka leitang uh nangma' muhna-ah maimawk ding ahi hiam? Kote leh ka leitang uh an tawh hong lei in la, kote leh ka leitang uh Faro’ sila ka hi ding uh hi; leitang mawk val loin, kote si loin ka hin’ theih nadingun khaici hong pia in,” ci uh hi. Tua ahih ciangin Josef in Izipt gam khempeuh Faro’ adingin lei hi; bang hang hiam cih leh kialpi nasia lua ahih manin Izipt mi khempeuh in a lote uh zuak uh hi. Leitang in Faro’ aa suak hi; mihingte ahi leh, Izipt gam mong khat panin a mong khat dongin amah in sila-in bawl hi. Siampite’ leitang bek amah in lei lo hi; bang hang hiam cih leh siampite in Faro’ tung panin a kiciangtan zah an ngah uh a, amaute' tungah Faro in a piak tawh amaute nungta uh hi; tua ahih ciangin amaute in a leitang uh zuak lo uh hi. Tua ciangin Josef in mite' kiangah, “En un, tu ni-in note leh na leitang uh Faro’ adingin kong lei hi. Tu-in hih lai-ah no adingin khaici om a, note in leitang tungah na vawh ding uh hi. An lak ciangin Faro' tungah seh-nga-suah-seh-khat na pia ding uh a, seh-nga-suah-seh-li pen lo-ah khaici ding, note leh na innkuanpihte uh leh na tate uh’ an dingin na tang ding uh hi,” ci hi. Amaute in, “Nang in ka nuntakna uh nong honkhia khin zo hi: ka topa uh lungdam hen la, kote in Faro’ sila ka hi ding uh hi,” ci uh hi. Tua ahih ciangin Faro in seh-nga-suah-seh-khat nei ding hi cihna, tu ni donga a om, Izipt leitang tawh kisai-in Josef in ngeina kip khatin bawl hi; siampite’ leitang bek Faro’ aa suak lo hi. Tua ahih ciangin Goshen gam, Izipt leitangah Israel teeng hi; tua sungah amaute in neihsa ngah uh a, pungin tampi tak pha uh hi. Izipt gamah Jakob kum sawm-le-sagih nungta hi; tua ahih ciangin Jakob’ nite, a nuntak kumte in kum za leh kum sawmli-le-sagih ahi hi. Israel a sih ding hun a nai ciangin, amah in a tapa Josef samin ama' kiangah, “Tu-in na muhna-ah maipha ka ngah leh, ka phei nuai-ah na khut koih in la, hehpih tak leh citakin kei nong bawl ding thu ciam in. Izipt-ah kei hong vui kei in la, ka pate tawh ka tawlngak khawm ciangin Izipt panin kei hong puakhia in la, amau’ kivuina munah kei hong vui in,” ci hi. Amah in dawngin, “Na gensa bangin ka hih ding hi,” ci hi. Amah in, “Kei' tungah hong kiciam in,” ci hi; amah ama' tungah kiciam hi. Tua ciangin Israel a ciangkhut dawnah amahmah kingam suk hi. Hih hun khit ciangin, “En in, na pa a ci na hi,” ci-in Josef' kiangah kigen hi; tua ahih ciangin amah in a tapa nihte Manasseh leh Efraim paipih hi. Jakob kiangah, “Na tapa Josef na kiangah hong pai hi,” ci-in kigen hi; tua ciangin Israel in a tha saan-in lupna tungah tu hi. Jakob in Josef' kiangah, “Kanaan gam Luz-ah Vanglian Pasian kei' tungah hong kilangin kei thupha hong pia a, kei' kiangah, 'En in, nang hong pungsakin, tampi hong phasakin, mihing hon khatin hong bawlin, nang’ khit cianga na suan-le-khakte tunga a neih dingin hih leitang ka pia ding hi,’ hong ci hi. Tu-in, Izipt-ah nang' kiangah kong pai ma-in Izipt gam sungah nang' sung pan-a a suak na tapa nihte keima’ aa ahi hi; Reuben leh Simeonte mah bangin Efraim leh Manasseh in keima’ aa hi ding hi. Amaute khit ciangin nang’ sung pan-a suak tate in nangma’ aa hi ding hi; amau’ gamh luahna-ah amau’ sanggamte’ min tawh amaute kilo ding hi. Bang hang hiam cih leh Paddan panin ka pai lai-in, Efrath tun’ madiak, Kanaan gam lam kal-ah ka dah nadingin Rachel si hi; Efrah (Bethlehem) paina lampi-ah amah ka vui hi,” ci hi. Israel in Josef' tapate a muh ciangin amah in “Hihte kua ahi hiam?” ci hi. Josef in a pa’ kiangah, Pasian in hih lai-ah kei hong piak ka tapate ahi hi,” ci hi. Amah in, “Kong thum hi, amaute thupha ka piak theih nadingin ka kiangah hong paipih in,” ci hi. Tu-in Israel’ mitte a khanghamna hangin mang a, amah in khua mu thei lo hi. Tua ahih ciangin Josef in ama' kiangah amaute paipih hi; amah in amaute nam-in kawi hi. Israel in Josef kiangah, “Na maitang mu dingin ka kingaihsun kei hi; en in, Pasian in na tate zong kei hong musak hi,” ci hi. Tua ciangin Josef in amaute a khuk panin lakhia-in, amahmah lei lam nga-in kun hi. Josef in amaute gel la-in, Efraim ama khut tak lam Israel’ vei lam khutah, Manasseh ama veilam khut, Israel’ tak lam khutah paipih hi. Israel in a taklam khut zanin a nauzawpa Efraim’ lutang tungah nga a, Manasseh a ta upa ahih manin, a khut kipaih pehsakin Manasseh’ lutang tungah a veilam khut nga hi. Amah in Josef thupha pia-in, “Ka pate Abraham leh Isaak in a na a sep sak Pasian, tu ni dongin ka nuntak tawntung tuu bangin lam hong pi Pasian, siatna khempeuh panin kei hong tankhia vantungmi in hih tangvalte thupha pia in; amaute' sungah keima' min leh ka pa Abraham leh Isaak’ min kizomsak in; leitung laizang ah amaute mi honpi khatin khangsak in,” ci hi. A pa in a tak lam khut Efraim’ lutang tungah a koih Josef in a muh ciangin tua in amah lungkim losak hi; Efraim lutang panin Manasseh’ lutang tungah koih dingin amah in a pa’ khut la hi. Josef in a pa' kiangah, “Hilo hi, ka pa aw; bang hang hiam cih leh hih pen a suak masa ahi hi; na taklam khut ama' lu tungah koih in,” ci hi. Ahih hangin a pa in nial a, “Ka thei hi, ka ta aw, ka thei hi; amah zong mi khat suak ding a, amah zong lian ding hi; ahi zongin a naupa amah sangin lianzaw ding a, a suan-le-khakte in minam lianpi khat suak ding hi,” ci hi. Tua ahih ciangin amah in tua ni-in amaute thupha pia a, “Note in Israel sungah thupha na kipia ding uh a, ‘Pasian in Efraim leh Manasseh bangin note hong bawl hen,’ kici ding hi,” ci hi. Tua ahih ciangin amah in Manasseh’ mai-ah Efraim koih hi. Tua ciangin Israel in Josef kiangah, “En in, kei a si ding ka hi ta hi, ahih hangin Pasian in nang tawh hong om ding a, na pate’ leitangah nang hong paipih kik ding hi. Tua tham loin, ka namsau leh ka thal tawh Amor mite’ khut tung panin ka lak mual pang khat, na sanggamte’ tung sangin nang' tungah kong pia zaw hi,” ci hi. Tua ciangin Jakob in a tapate sam a, “A hong tung ding hunte ah note tunga hong tung ding thu kong gen theih nadingin note hong kikhawm un. Jakob’ tapate aw, hong kikhawm un la za un, na pa Israel’ thu ngai un. Reuben, nang in ka ta upa, ka vangliatna leh ka thahatna gah, kiphatsakna ah ka tungtuan’na, vangliatna ah ka tungtuan’na na hi hi. Tui bangin kip loin, na tungtuang kei ding hi, bang hang hiam na cih leh na pa’ zi na luppih hi; tua ciangin na ninsak hi – ka lupna ah na paito hi. Simeon leh Levi-te in unau hi a, a hiam uh ngongtat nadingin zang uh hi. Amau’ kikhopna-ah ka pai kei ding a, amau’ pawl tawh ka kizom kei ding hi; bang hang hiam cih leh a hehna uhah amaute in mi that uh a, amau' kiphatsakna tawh amaute in bawngtalte zagui sattat uh hi. Amau’ sinsona in lauhuai a, amau’ hehna kihtak huai hi, ciamsiatna ngah ta uh hen! Jakob sungah amaute ka khenthang ding a, Israel sungah amaute ka thehthang ding hi. Judah, na sanggamte in nang hong phat ding a, na galte’ ngawng na heek ding a, na sanggamte na mai-ah hong kun ding uh hi. Judah in humpinelkai tawh kibang hi; ka ta aw, na matsa ganhing na nekna panin na paito hi. Amah kun suk a, humpinelkai-pa leh humpinelkai-nu bangin lum hi; kua in amah phong ngam ding ahi hiam? Judah kiang pan kumpi ciangkhut paikhia lo ding, ukpa’ ciangkhut zong a khe kikal pan paikhia lo ding, a neipa' kiangah a tun’ mateng, mite’ thuman’na ama' tungah om ding hi. A sakolno leenggui-ah khihin, a lano leenggui hoih pen-ah khihin, amah in a puante leenggah zu sungah sawpin a puansilhte leenggah tuisan sungah sawp hi; ama' mitte leenggahzu sangin vom zaw ding a, a hate bawngnawi sangin paak zaw ding hi. Zebulun in tuipi gei-ah teeng ding hi; amah in teembaw khawlmun suak ding a, Sidon ciangah a gamgi om ding hi. Issakhar in a hat la hi a, vangik nih kikal-ah lum hi; tawlngakna mun a hoihna leh leitang a nopna mu hi; tua ahih ciangin a pua dingin a liangko niamsak a, sawl zawh thu-a nasepna tawh sila suak hi. Israel minamte khat bangin Dan in a mite thu khen ding hi. Dan in lampi-ah gulpi hi ding a, sul gei-ah gulgu nei hi ding hi, sakol’ khetul petin a tuangpa nungkiat hi. Na hotkhiatna ka ngak hi, Topa aw. A buluhte in Gad sim ding a, ahih hangin amah in amaute khetul su ding hi. Asher’ an lim ding a, amah in kumpi anlimte bawl ding hi. Naftali in a kikhah sakhipi hi a, sakhino suakkhiasak hi. Josef in a gah pha leenggui hi a, cik tui gei-a a gah pha hiang ahi hi; a hiangte kulh tungah zam hi. Thal tawite in nakpi takin amah sim-in, amah thal tawh kap a, nasia takin gimsak hi; ahih hangin ama' thal liing loin om a, a khutte kizaptel sak hi, Jakob’ Vanglian Pa’ khut (Israel Suangpi, Tuucingpa’ min), nang hong huh ding na pa’ Pasian’ tunga om vantung thuphate, nuai-a tuithukna sunga om thuphate, ang sung leh gil sung thuphate tawh nang thupha hong pia ding Vanglian Pasian tawh. Na pa’ thuphate in tawntung mual liante’ thupha, tawntung mual neute’ tamna sangin vanglian zaw hi; tuate in Josef’ lutang tung leh a sanggamte' kiang panin a tuamkoihpa’ tungah om ta hen. Benjamin in a ne bakbak keivom hi a, zingsangin a sa matsa ne-in, nitakin a ngahsa teng hawm hi,” ci hi. Hihte khempeuh in Israel minam sawm-le-nihte ahi hi; hih in amau tawh kituak ciatin thupha a piak, a pa in amaute thupha pia-in a gente ahi hi. - Tua ciangin amah in amaute thu hilh a, amaute’ kiangah, “Kei in ka mipihte’ kiangah a kigawm ding ka hi ta hi; kivui nading mun-in neih dingin Abraham in Hit mi Efron’ tung panin a lo tawh a lei khop, Kanaan gam, Mamre nisuahna lam-a om, Makpelah lo-a leihawm, Hit mi Efron’ lo-a leihawm sungah ka pate tawh hong vui un. Tua lai munah amaute in Abraham leh a zi Sarah vui uh hi; tua lai munah amaute in Isaak leh a zi Rebekah vui uh hi; tua lai munah keimah in Leah ka vui hi – lo leh tua sunga om leihawm Hit mite' tungpanin a kilei ahi hi,” ci hi. Jakob in a tapate thuhilh a man khit ciangin’ a lupna tungah lai-tat a, a nunung pen a hu sang a, ama' mihingte kiangah kigawm hi. Tua ciangin Josef a pa' tungah pukin, ama' tungah kap a, amah nam hi. A pa a muat loh nadingin a bawl dingin Josef in a nasem zatui siamte thu pia hi. Tua ahih ciangin zatui siamte in zatui tawh Israel bawl uh hi; zatui tawh bawlna nasep hun tampi kisam ahih manin tua nasep ni sawmli sung sep ding kisam hi. Izipt mite ama' hangin ni sawmsagih sung kap uh hi. Ama' hangin kahna hun a bei ciangin Josef in Faro’ innsung upate' kiangah, “Tu-in note' mai-ah maipha ka ngah leh Faro’ kiangah thu nong va gensak ding uh kong thum hi. Ka pa in kei hong kiciamsak a, ‘Kei a si ding ka hita hi: Kanaan leitangah kei adingin ka khuatsa han sungah kei nong vui ding hi,’ hong ci hi. Tua ahih ciangin tu-in kei hong paitosak in la, ka pa hong vuisak in, ci-in kong thum hi; tua ciangin kei kong ciahkik ding hi, va cihsak un,” ci hi. Faro in dawngin, “Paito in la, nang hong kiciamsak bangin na pa vui in,” ci hi. Tua ahih ciangin a pa vui dingin Josef paito hi; amah tawh Faro’ uliante khempeuh, a inn sung upate, Izipt gam upate khempeuh zong, Josef innkuante khempeuh, a sanggamte, a pa’ innkuante mah bangin paito uh hi; a tate uh, a tuuhonte uh leh a ganhing honte bek uh Goshen gamah kinusia hi. Tua lai munah amah tawh leengte leh sakol tuangte zong paikhawm to uh hi; tua lai-a paite tam mahmah hi. Amaute Jordan gun gal khat, Atad’ buhcilna phual a tun’ uh ciangin, nakpi takin dahna tawh thuum uh hi; amah in a pa hangin ni sagih sung dahna hun bawl hi. Tua gam-a teeng Kanaan mite in, Atad’ buhcilna-ah tua banga kahna a muh uh ciangin, amaute in, “Hih in Izipt mite’ adingin a nasia thuumna ahi hi,” ci uh hi. Tua ahih ciangin tua mun in Abelmizraim kici hi; tua in Jordan gungal khat ahi hi. Tua ahih ciangin amah in amaute a thupiak bangin ama' tapate in ama adingin bawlsak uh hi; bang hang hiam cih leh ama' tapate in Kanaan gamah amah pua-in, kivui nading mun-a neih dingin Abraham in Hit mi Efron’ tung panin a lo tawh a lei khop, Mamre nisuahna lam-a om, Makpelah mun-a lo sunga leihawm sungah vui uh hi. Amah in a pa a vui khit ciangin, a sanggamte leh a pa vui dingin amah tawh a pai khempeuhte tawh Izipt-ah Josef ciahkik hi. Josef' sanggamte in a pa uh a sih khitna a muh uh ciangin, amaute in, “Josef in eite hong mudahin ama' tunga siatna i bawl khempeuh amah in hong thukkik kha ding hi,” ci uh hi. Tua ahih ciangin amaute in Josef' kiangah thu puak uh a, “I pa in a sih ma-in hih bangin thu hong pia a, ‘Josef' kiangah hih bangin ci un. Na sanggamte’ thupalsatna leh a khialna na maisak in, kong thum hi, bang hang hiam cih leh nang' tungah amaute in siatna hong bawl uh hi,’ ci hi. Tua ahih ciangin tu-in nang' tungah kong thum uh hi, i pa’ Pasian’ nasemte’ thupalsatna hong maisak in,” ci uh hi. Amaute in ama' kiangah thu a gen ciangin Josef kap hi. A sanggamte zong hong pai-in ama mai-ah puk uh a, “En in, kote in nangma' nasemte ka hi uh hi,” ci uh hi. Ahih hangin Josef in amaute' kiangah, “Lau kei un, bang hang hiam cih leh keimah in Pasian’ za-ah om ka hi hiam? Note in ahih leh, kei’ tungah a sia dingin na ngaihsun uh hi; ahih hangin Pasian in tu ni hun-a mah bangin mi tampite a nuntak theihna a pian’ nadingin a hoih dingin a ngaihsut ahi hi. Tua ahih ciangin lau kei un; note leh na tate uh adingin an kong pia ding hi,” ci hi. Amah in tua bangin kip gen pha kikin amaute hehnem hi. Tua ahih ciangin Josef, amah leh a pa’ innkuan tawh Izipt-ah teeng uh hi; Josef kum za leh kum sawm nungta hi. Josef in khang thumna ahi Efraim’ tate mu hi; Manasseh’ tapa Makhir’ tate zong Josef’ inn sung mahah suak uh hi. Josef in a sanggamte' kiangah, “Kei a si ding ka hi ta hi; ahih hangin note’ kiangah Pasian hong pai-in hong huh ding a, hih leitang panin amah in Abraham, Isaak leh Jakob' tunga a ciamsa leitang-ah note hong paikhiatpih to ding hi,” ci hi. Tua ciangin Josef in Israel tapate’ kiciamna bawlin, “Note' kiangah Pasian hong hawh ding a, note in hih lai panin ka guhte na pua to ding uh hi,” ci hi. Tua ahih ciangin kum za leh kum sawm pha-in Josef si hi; amaute in zatui tawh amah a muat loh nadingin bawl uh a, Izipt hankuang sung khatah amah kikoih hi. Jakob tawh Izipt-ah a hong pai, amau’ innkuan ciat tawh ahi, Israel’ tapate’ minte in: Reuben, Simeon, Levi, leh Judah, Issakhar, Zebulun, leh Benjamin, Dan leh Naftali, Gad leh Asher ahi hi. Jakob’ suan-le-khakte khempeuh mihing sawmsagih ahi hi; Josef pen Izipt-ah na om khin zo hi. Tua ciangin Josef leh a sanggamte leh tua khang mi khempeuh si uh hi. Ahih hangin Israel suan-le-khakte pung-in nakpi takin khang uh hi; amaute tampi pha-in nakpi takin a vangliatna uh khang hi; tua ahih ciangin amaute tua gamah dim uh hi. Tu-in Josef a thei lo kumpi thak khat Izipt gamah hong khang hi. Amah in a mihingte' kiangah, “En un, Israel mite eite’ adingin tam lua-in thahat lua uh hi. Hong pai un, amaute hong tam kha ding uh ahih manin ngaihsut siamna tawh amaute hih ni, eite' tungah gal hong om leh amaute in i galte pawlin eite hong do-in hih gam panin taikhia kha ding uh hi,” ci hi. Tua ahih ciangin amaute nasepna tawh a gimsak dingin amaute' tungah nasem ukte koih uh hi; amaute in Faro’ adingin vankoihna Pithom leh Ra-amses khuapite lam uh hi. Ahih hangin amaute a kinenniam ciangin amaute tampi pha zaw-in kizelhthang zaw uh hi. Izipt mite in Israel mite kihta uh hi. Tua ahih ciangin amaute in Israel mite gim mahmahin nasemsak uh a, buan leh leiseek tawh a haksa nasepna leh lo sungah nasep namkim khempeuh tawh amau’ nuntakna haksasak uh hi; amaute’ sepna khempeuhah amaute in gim mahmahin semsak uh hi. Tua ciangin Izipt kumpipa in khat’ min in Shifrah kici-in a dang khat min in Puah a kiciHebru mi naudomte' kiangah, “Hebru numeite nau domin, nausuahna tutphah tungah a tu na muh uh ciangun, tapa ahih leh a naungek na that ding uh hi; ahih hangin tanu ahih leh na nungtasak ding uh hi,” ci hi. Ahih hangin naudomte in Pasian zahtak uh a, Izipt kumpipa in amaute a thupiak bangin gamta lo uh hi, nau pasalte nungtasak uh hi. Tua ahih ciangin Izipt kumpipa in naudomte sam in, amaute' kiangah, “Bang hangin hih bangin gamta-in, nau pasalte nungtasak na hi uh hiam?” ci hi. Naudomte in Faro’ kiangah, “Hebru numeite in Izipt numeite tawh a kibat loh hang ahi hi; bang hang hiam cih leh amaute thadim uh a, amau' kiangah naudomte a tun’ ma-in amaute na suak khin pahpah uh hi,” ci hi. Tua ahih ciangin Pasian in naudomte lim bawl hi; mite khangin a thahatna uh khang hi. Naudomte in Pasian zahtak ahih manin amah in amaute' tungah suan-le-khak a pia hi. Tua ciangin Faro in ama' mihing khempeuh thupia a, “Hebru mite sung panin tapa a suak khempeuh Nail gun sungah na khia ding uh a, ahih hangin tanu khempeuh na nungtasak ding uh hi,” ci hi. Tu-in Levi’ suan-le-khakte khat in Levi numei khat zi-in la hi. Numei gai-in tapa khat nei hi; amah in nau hoih khat hi ci-in a muh ciangin, kha thum sung seel hi. Amah in naungek a seel zawh nawn loh ciangin ama adingin pumpeng tawh kibawl lawh khat phansak a, tua lawh pen buan leh kultal tui tawh zut hi; amah in tua sungah naungek sialin gun gei-a phaikungte' lakah koih hi. Amah bang a kicih hiam cih a thei dingin a gamla mun khatah a sanggamnu ding hi. Tu-in Faro’ tanu kisil dingin gun-ah hong pai a, a numei-nasemte gun gei-ah pai uh hi; amah in phaikungte' lakah a lawh mu a, tua lawh la dingin a numei-nasem sawl hi. Amah in a hon’ ciangin naungek mu hi; en in, naungek kap hi. Tua nu in amah hehpih a, “Hih in Hebru mite’ ta khat ahi hi,” ci hi. Tua ciangin a sanggamnu in Faro' tanu' kiangah, “Keimah pai-in Hebru numeite’ lak panin nang adingin naupang hong khoisak dingin naucing khat ka va sapsak ding hiam?” ci hi. Faro’ tanu in ama' kiangah, “Pai in,” ci hi. Tua ahih ciangin numeino pai-in naupang’ nu va sam hi. Faro’ tanu in ama' kiangah, “Hih naupang la in la, kei adingin hong khoisak in, na thaman kong pia ding hi,” ci hi. Tua ahih ciangin nupi in naupang la-in khoi hi. Naupang khang a, amah in Faro’ tanu' kiangah paipih a, amah in tua nu’ tapa suak hi; amah in a min Moses phuak hi, bang hang hiam cih leh amah in, “Tui sung panin amah ka kaikhia hi,” ci hi. Ni khat, Moses a khan’ khit ciangin, ama' mipihte' kiangah pai-in amau’ nasep haksatnate mu hi; Izipt mi khat in ama' mipihte khat ahi Hebru mi khat a sat mu hi. Amah khuadak kawikawi-in, kuamah mu lo ahih manin amah in Izipt mipa thatin sehnel sungah seel hi. A zing ciangin amah a paikhiat ciangin, en in, Hebru mi nih na kilai uh hi; amah in a gamta khial mipa' kiangah, “Bang hangin na lawm sat na hi hiam?” ci hi. Amah in dawngin, “Kote' tungah ulian ding leh thukhen dingin kua in nang hong koih ahi hiam? Izipt mipa na thah bangin nang in keimah thah ding hong sawm na hi hiam?” ci hi. Tua ciangin Moses lau a, “A thu kithei taktak hi,” ci-in ngaihsun hi. Faro in tua thu a zak ciangin Moses thah dingin zong hi. Ahih hangin Faro’ kiang panin Moses tai-in Midian gamah om hi; amah tuikhuk gei khatah tu hi. Tua lai takin Midian siampipa in tanu sagih nei hi; amaute hong pai-in tuitawi uh a, a pa uh’ tuuhonte tui pia dingin kuangzawn dim uh hi. Tuucingte hong pai-in amaute hawlkhia hi; ahih hangin Moses dingto-in amaute huh a, a tuuhonte uh tui piaksak hi. A pa uh Re-u-el kiangah amaute a tun’ ciangun amah in, “A bangci-a tu ni-a hong hici ciah baih na hi uh hiam?” ci hi. Amaute in, “Izipt mi khat in tuucingte khut sung panin kote hong honkhia-a, ko adingin tui nangawn hong tawisakin tuuhonte tui pia hi,” ci uh hi. Amah in a tanute' kiangah, “Amah koi lai-ah om ahi hiam? Bang hangin tua mipa nusia na hi uh hiam? Amah in an hong nek theih nadingin va sam un,” ci hi. Tua mipa tawh a om khop dingMoses lungkim a, amah in Moses' tungah a tanu Zipporah pia hi. Tua nu in tapa khat nei a, amah in a min Gershom phuak hi; bang hang hiam cih leh amah in, “Gam dangah peemta ka hi hi,” ci hi. Tua ni tampi hun sung kikalin Izipt kumpipa si hi. Israel mite a salsuahna sung uh-ah thumin, huhna ngenin kiko khia uh a, a salsuahna sung uh-ah amau’ kikona Pasian' kiang tung hi. Pasian in amau’ thumna za-in, Pasian in Abraham, Isaak leh Jakob tawh a thuciamna phawk hi. Pasian in Israel mite mu a, Pasian in amaute’ omzia lunghimawh hi. Tu-in Moses in Midian siampi ahi, a sungpa Jethro’ tuuhon kem hi; amah in a tuuhon gamlak nisuahna lamah paipih a, Pasian’ mual ahi Horeb tung hi. Sawlbawk meikuang sung panin ama' tungah Topa ’ vantungmi in kilang hi; amah khuadak a, en in, sawlpang kuang hi, ahih hangin kangtum lo hi. Moses in, “Bang hangin sawlpang kangtum lo hiam, kei pai-in hih a lamdang ka muh ka va en ding,” ci hi. Tua thu thei dingin amah a paina Topa in a muh ciangin, sawlpang kawm panin Pasian in amah sam a, “Moses, Moses!” ci hi. Amah in, “Hiah om ing,” ci hi. Tua ciangin amah in, “A nai-ah hong pai kei in; na khe panin na khedapte suahkhia in, bang hang hiam cih leh nangma' din’na mun in lei siangtho ahi hi,” ci hi. Tua ciangin amah in, “Keimah in na pa’ Pasian, Abraham’ Pasian, Isaak’ Pasian, leh Jakob’ Pasian ka hi hi,” ci hi. Moses in ama' maitang hum hi, bang hang hiam cih leh Pasian a et ding amah lau hi. Tua ciangin Topa in, “Izipt-ah a om ka mihingte’ gimna mu khinin a uk nasem ukte hangin amau’ kikona ka za khin hi; amau’ thuaknate ka lunghimawh a, Izipt mite’ khut sung panin amaute khahkhia-in, tua leitang panin amaute lakhia-in a hoih a tanzau leitang, bawngnawi leh khuaizu a luan’na leitang, Kanaan mite, Hit mite, Amor mite, Perez mite, Hiv mite leh Jebus mite’ omna-ah amaute paipih dingin kong paisuk hi. Tu-in, en in, Israel mite’ kikona kei' kiang hong tung khin a, Izipt mite in amaute a netniamna ka mu khin hi. Hong pai in, nang in ka mihingte ahi Israel' tapate Izipt panin na paikhiatpih theih nadingin Faro’ kiangah nang kong sawl ding hi,” ci hi. Ahih hangin Moses in Pasian' kiangah, “Faro' kiangah pai-in Izipt panin Israel mite a paikhiatpih dingin kei in kua ka hi hiam?” ci hi. Amah in, “Nang tawh kong om taktak ding hi; hih in nangma adingin nangmah kong sawlna lim hi ding hi: nangmah in Izipt panin mihingte na paikhiatpih khit ciangin, nang in hih mual tungah Pasian’ na na sem ding hi,” ci hi. Tua ciangin Moses in Pasian' kiangah, “Israel mihingte' kiangah kei va pai-in amaute' kiangah, ‘Na pate uh Pasian in note' kiangah kei hong sawl hi,’ va ci leng, amaute in, ‘Ama' min bang ahi hiam?’ ci-in hong dong leh, amaute’ tungah bang ci ding ka hi hiam?” ci hi. Pasian in Moses’ kiangah, “K EIMAH ka hi hi,” ci hi. Tua ciangin amah in, “Israel mihingte' tungah hih thu gen in, ‘K EIMAH a kici pa in note' kiangah kei hong sawl hi,’ ci in,” ci hi. Pasian in zong Moses' kiangah, “'Hih thu Israel mihingte' tungah gen in, " Topa, na pate’ Pasian, Abraham’ Pasian, Isaak’ Pasian, leh Jokob’ Pasian in note' kiangah kei hong sawl hi," ci in: hih in keima' min hi tawntung a, tua ahih manin keimah in khang tawntunga phawk ding ka hi hi. Pai in la, Israel upate kaikhawmin amaute' kiangah, ''T OPA, na pate uh’ Pasian, Abraham, Isaak leh Jakob’ Pasian keima' tungah hong kilang khinin, 'Note leh Izipt gam sungah note' tungah hong kibawlna ka mu khin hi; Izipt gimna panin note hong lakhia-in Kanaan mite, Hit mite, Amor mite, Pere mite, Hiv mite leh Jebus mite’ leitang, bawngnawi leh khuaizu a luan’na leitangah note kong paipih ding ka kiciam hi,' ci hi," va ci in. Amaute in nangma' thu hong ngai ding uh hi; nang leh Israel upate Izipt kumpipa' kiangah pai-in ama' tungah, " Topa ahi Hebru mite’ Pasian in kote hong dawntuah zo hi; tu-in kong thuum uh hi, Topa ka Pasian uh tungah biakna ka piak theih nadingun ni thum khualzinna gam lakah kote hong paisak in," va ci un. Khut vanglian khat in thatang hat thu tawh a hih kei buang leh Izipt kumpipa in note hong paisak loh ding ka thei hi. Tua ahih ciangin keimah in ka khut zan-in tua sunga ka hih ding nalamdangte tawh Izipt ka vat gawp ding hi. Tua khit ciangin amah in note hong paisak ding hi. Keimah in Izipt mite’ muhna-ah hih mihingte maipha ka pia ding hi; note na paikhiat uh ciangin, a hawm guakin na pai kei ding uh hi, numei peuhmah in a vengte leh ama' inn sunga om pak mite' kiang panin ngun leh kham tawh kibawl kizepnate leh puante ngen ding uh a, na tapate uh leh na tanute uh tungah tuate na koih ding uh hi, tua bangin note in Izipt mite’ na na sut ding uh hi,”' ci hi. Tua ciangin Moses in dawngin, “Ahih hangin en in, amaute in kei hong um loin ka thu hong ngai lo ding uh hi, bang hang hiam cih leh amaute in, ‘Nang' tungah Topa hong kilang lo hi,’ hong ci ding uh hi,” ci hi. Topa in ama' kiangah, “Na khut sunga om bang ahi hiam?” ci hi. Amah in, “Ciangkhut,” ci hi. Tua ciangin amah in, “lei lakah lawn in,” ci hi. Tua ahih ciangin amah in lei lakah lawn a, gulpi khat suak hi; tua gulpi' kiang panin Moses tai hi. Ahih hangin Topa in Moses' kiangah, “Na khut zan in la, a mei-in man in,” ci hi—tua ahih ciangin amah in a khut zanin man a, ama' khut sungah ciangkhut suakkik hi— “Amaute in a up theih nadingun Topa, amaute’ Pasian, Abraham’ Pasian, Isaak’ Pasian leh Jakob’ Pasian in nang' tungah hong kilang khin zo hi,” ci hi. Tua ciangin Topa in ama' kiangah, “Na khut na ang sungah koih in,” ci kik hi. Amah in a khut a ang sungah koih hi; amah in a lakkhiat ciangin, en in, a khut phak a, vuk bangin pak hi. Tua ciangin Pasian in, “Na khut na ang sungah koih kik in,” ci hi. Tua ahih ciangin amah in a khut a ang sungah koih kik hi; amah in a lak khiat ciangin, en in, ama' ci-le-sa dangte mah bangin dam kik hi. Pasian in, “Amaute in nang hong up kei a, lim masa a thudon kei leh zong, amaute in lim nunung um kha ding uh hi. Amaute in hih lim nihte nangawn um loin na thu hong thudon kei leh, nangmah in Nail gun panin tui pawl khat la-in lei keu tangah na sung ding hi; Nail gun panin na lak ding tui in lei keu tungah sisan suak ding hi,” ci hi. Ahih hangin Moses in Topa' kiangah, “Oh, ka Topa aw, tu-ma-siah hita leh, na nasempa' tungah thu na gen-a kipan hita leh, keimah in thugen ka siam kei hi; ka kam pau ol-in, ka pau awk hi," ci hi. Tua ciangin Topa in ama' kiangah, "Kua in mipa’ kam bawl ahi hiam? Kua in amah pau thei losak, bilngongsak, musak, mittawsak ahi hiam? Topa ahi keimah hilo ka hi hiam? Tua ahih ciangin tu-in pai in, keimah in na thugenna-ah kong huh ding a, na thugen ding nang kong hilh ding hi,” ci hi. Ahih hangin amah in, “Oh, ka Topa aw, hong thum ing, mi dang khat sawl zaw in,” ci hi. Tua ciangin Moses’ tungah Topa heh a, amah in, “Levi mi na sanggampa Aaron om hilo ahi hiam? Amah in hoih takin thu a gen theihna ka cian theih hi; en in, nangmah dawn dingin amah hong paikhia a, amah in nang hong muh ciangin a lungsim sungah amah kipak ding hi. Nangmah in ama' kiangah thu na gen ding a, a thugen dingte ama' kam sungah na koih ding hi; keimah in na thugenna uh-ah kong huh ding a, na hih ding uh kong hilh ding hi. Amah in nang' tangin mite' tungah thu gen ding hi; amah in nang adingin kam hi ding a, nang in ama' tungah Pasian bang na hi ding hi. Nangmah in limte na bawl nading ahi hih ciangkhut na khut sungah na tawi ding hi,” ci hi. A sungpa Jethro' kiangah Moses pai-in ama' kiangah, “Hong thum ing, Izipt-ah ka sanggamte' kiangah kei hong ciahkik sakin amaute a nungta lai uh hiam hong musak in,” ci hi. Jethro in Moses' kiangah, “Nuam takin pai in,” ci hi. Midian gam sungah Topa in Moses' kiangah, “Izipt-ah paikik in; bang hang hiam cih leh nangma' nuntakna hong that nuam mite khempeuh si khin ta uh hi,” ci hi. Tua ahih ciangin Moses in a zi leh a tapate la a, la khat tungah amaute tuangsakin, Izipt gamah paikik hi; Moses in ama' khut sungah Pasian’ ciangkhut tawi hi. Topa in Moses' kiangah, “'Izipt-ah na ciahkik ciangin, nangma' hih theih dingin vangliatna kong piaksa nalamdangte khempeuh Faro’ mai-ah na hih ding thei in; ahih hangin keimah in ama' lungsim ka khauhsak ding a, amah in mite paisak lo ding hi. Nangmah in Faro' kiangah, " Topa in hih bangin ci hi, Israel in ka tapa a suak masa hi a, nangma' kiangah, 'Amah in kei hong biak theih nadingin ka tapa paisak in,' kong ci hi; amah paisak ding na nial leh, en in, na tapa a suak masa ka that ding hi,’ ci in,"'" a ci hi. Lampi-ah a giahna khatah Topa in Moses dawntuah a, thah dingin amah zong hi. Tua ciangin Zipporah in meisuang khat la-in a tapa’ vun dawn atkhiat sakin, tua tawh Moses’ khe nuh a, “Nang in kei' tungah sisan tawh zipipa na hi taktak hi!” ci hi. Tua ahih ciangin amah in amah tuaci omsak hi. Tua ciangin tua nu in, "Vun-atna hangin sisan tawh zipipa na hi hi,” ci hi. Topa in Aaron kiangah, “Moses dawn dingin gam lakah pai in,” ci hi. Tua ahih ciangin amah pai-in, Pasian’ mual-ah amah dawnin amah nam hi. Topa in amah a sawlna thute khempeuh leh ama' sep dinga a sawl limte khempeuh Moses in Aaron’ tungah gen hi. Tua ciangin Moses leh Aaron pai-in Israel mite’ upate khempeuh kaikhawm uh hi. Topa in Moses' kianga a gensa thute khempeuh Aaron in gen a, mite’ muhna-ah limte bawl hi. Mite in um uh hi; Israel mite' kiangah Topa lungnuam loin, amau’ thuaknate amah in a muh khitna thu amaute in a zak uh ciangin, amaute in a lu uh kunin bia uh hi. Tua khit ciangin Faro kiangah Moses leh Aaron pai-in, “Israel Pasian, Topa in hih bangin ci hi, ‘Amaute in gam lakah kei adingin pawi khat a kham theih nadingun ka mite paisak in,’ ci hi,” ci uh hi. Ahih hangin Faro in, “Ama' aw ngai-in Israel ka paisak dingin Topa in kua ahi hiam? Topa ka thei kei hi, tua tham loin Israelte ka paisak kei ding hi,” ci hi. Tua ciangin amaute in, “Hebrute’ Pasian in kote hong dawntuah zo hi; hong thum ung, amah in natna ahih kei leh namsau tawh kote hong hih kha ding ahih manin, ni thum paina gam lakah kote hong paisakin Topa ka Pasian uh tungah biakna hong piasak in,” ci uh hi. Ahih hangin Izipt kumpipa in amaute' kiangah, “Moses leh Aaron aw, bang hangin amau’ nasepna panin mite paikhiasak ding na hi uh hiam? Na nasepnate uh-ah pai un,” ci hi. Tua ciangin Faro in, “En un, tu-in hih gam mite tam a, amau’ nasepnate panin amaute natawlngasak uh hi!” ci hi. Tua ni mahin Faro in nasem ukte leh a nasem mapite thu pia a, “Tu-ma-siah-a bangin, leiseek bawl nadingin mite' tungah buhtu na pia nawn kei ding uh hi; amaute paisak un la, amau mah buhtu khawm tawmsak un. Ahih hangin tu-ma-siah-a a leiseek bawl zah uh amaute na bawlsak ding uh hi, bangbang hita leh na khiam kei ding uh hi; bang hang hiam cih leh amaute thadah uh hi; tua ahih ciangin amaute kiko-in, ‘Kote hong paisakin ka Pasian uh tungah biakna hong piasak un,’ ci uh hi. Amaute in na semin zuauthute a don loh nadingin mihingte' tungah nasep haksa zaw suan un,” ci hi. Tua ahih ciangin nasem ukte leh nasem mapite paikhia-in mite' tungah, “Faro in hih bangin ci hi, ‘Note buhtu kong pia kei ding hi. Note pai un la, na muhna peuhpeuh uh-ah na buhtu ding uh va zong tawm un; ahih hangin na nasep uh them khat zong hong kikhiam lo ding hi,’ ci hi,” ci uh hi. Tua ahih ciangin a buhtu dingun buhkung a kaikhawm dingin Izipt gam khempeuhah mite kikhenthang uh hi. Nasem ukte in kin ngaihsut uh a, “Buhtu a om hun mah bangin na nasep uh ahi na nisim nasep uh zo un,” ci uh hi. Israel mi nasem mapi, Faro’ nasem ukte in amaute uk dingin a koih mite kisatin, “Bang hangin tu ciang dong, leiseek bawl ding na nasep khempeuh uh hih khin nai lo na hi uh hiam?” ci-in kidong hi. Tua ciangin Israel mi nasem mapite hong pai-in Faro' kiangah, “Bang hangin na nasemte hih bangin hong bawl na hi hiam? Na nasemte' tungah buhtu hong kipia lo hi, ahi zongin amaute in ko tungah, ‘Leiseek bawl un!’ hong ci hi. En in, na nasemte hong kisat hi; ahih hangin khialhna pen nangma' mite’ tung mah-ah om hi,” ci uh hi. Ahih hangin amah in, “Note na thadah uh hi, note na thadah uh hi; tua ahih ciangin note in, ‘Hong paisak un la, Topa' tungah biakna hong piasak un,’ na ci uh hi. Tu-in pai un la, nasem un; bang hang hiam cih leh note buhtu hong kipia lo ding hi, ahi zongin leiseek a mal ngeina zah mah na piakhia ding uh hi,” ci hi. Amaute in, “Bangbang hi ta leh ni sim-a leiseek na seek zah uh khiam lo ding,” a cih ciangin, amaute thu haksapi sungah om a hih lam uh Israel mi nasem mapite in mu uh hi. Amaute Faro’ kiang panin a paikhiat ciangun, amaute a na ngak Moses leh Aaron tawh kituak uh hi; amaute in, “ Topa in note hong enin thu hong khen hen, bang hang hiam cih leh Faro leh a nasemte’ muhna-ah kote a khial nong suaksak uh a, kote thah nadingin amau' khut sungah namsau khat na koih uh hi,” amaute tungah ci uh hi. Tua ciangin Topa' lamah Moses kihei kikin, “ Topa aw, bang hangin nangmah in hih mite' tungah siatna bawl na hi hiam? Bang hangin kei hong sawl peuhmah na hi hiam? Bang hang hiam cih leh nangma' min suangin Faro’ kiangah thugen dingin ka pai khit-a kipan, amah in hih mite' tungah siatna bawl a, nangmah in na mihingte na honkhia het kei hi,” ci hi. Ahih hangin Topa in Moses kiangah, “Tu-in Faro’ tungah ka bawl ding na mu ding hi; bang hang hiam cih leh a thahat ka khut hangin amah in ut lopipi-in amaute sawlkhia ding hi, hi hi, amah in ut lopipi-in a thahat ka khut hangin ama' leitang panin amaute hawlkhia ding hi,” ci hi. Pasian in Moses' kiangah, “Keimah in Topa ka hi hi. Abraham, Isaak leh Jakobte' tungah Vanglian Pasian-in ka kilang a, ahih hangin Topa ahi keima' min tawh amaute' tungah kei ka kitheisak kei hi. Amaute tawl khat sung a teen’na leitang ahi Kanaan gam amaute' tungah pia dingin amaute tawh ka thuciamna zong ka kipsak hi. Tua tham loin Izipt mite in sal-a a neih Israel mite’ thumna ka za zo a, ka thuciamna ka phawk zo hi. Tua ahih ciangin Israel mite' tungah, ‘Keimah in Topa ka hi hi, Izipt mite’ na nasepna uh panin note kong paikhiatpih ding hi, amau’ sal hih na panin note kong khahkhia ding hi, a kizan khut leh thukhenna nasep lian tawh note kong tanh ding hi, keima' mi dingin note kong la ding a, keimah in note’ Pasian ka hi ding hi; Izipt mite’ vangik nuai panin note a hong paikhiatpihpa, Topa na Pasian uh ka hihna note in na thei ding uh hi. Abraham, Isaak, leh Jakobte’ tungah khutlaam a, ka ciam leitangah note kong paipih ding hi; note' tungah tua leitang na neih dingun kong pia ding hi. Keimah Topa ka hi hi,’ ci in,” a ci hi. Moses in tua mah bangin Israel mite' tungah gen hi; ahih hangin amau’ lungsim kitapzanna leh gitlohna sungah a salsuahna uh hangin amaute in Moses’ thu ngai lo uh hi. Topa in Moses kiangah, “Pai-in va tum in la, ama leitang panin Israel mite a paikhiatsak nading Izipt kumpipa Faro’ kiangah gen in,” ci hi. Ahih hangin Moses in Topa kiangah, “En in, Israel mite in ka thu hong ngai lo uh hi; tua ahih ciangin bangci-in thugen a siam lo keima' thu Faro in hong ngai ding ahi hiam?” ci hi. Ahih hang in Topa in Moses leh Aaron' tungah thugen a, Izipt gam panin Israel mite a paikhiatpih nadingin Israel mite leh Izipt kumpipa Faro' tungah thu a gen ding hanthawn hi. Hihte in amau’ innkuan lutangte ahi hi; Israel’ ta a suak masa Reuben’ tapate: Hanok, Pallu, Hezron leh Karmi hihte in Reubente beh ahi hi. Simeon’ tapate: Jamuel, Jamin, Ohad, Jakhin, Zohar leh Kanaan numei’ tapa Shawl; hihte in Simeonte beh ahi hi. Hihte in amau khang tawh kizui-in Levi tapate min ahi hi: Gershon, Kohath leh Merari hi a, Levi nuntak kumte in kum za leh sawm-thum-le-sagih ahi hi. Gershon’ tapate: amau’ innkuan tawh kizui-in Libni leh Shimei ahi hi. Kohath’ tapate: Amram’ Izhar, Hebron leh Uzziel hi a, Kohath’ nuntak kumte in kum za leh sawmthum-le-thum ahi hi. Merari’ tapate: Mahli leh Mushi ahi hi. Hihte in amau’ khang tawh kizui-in Levite beh ahi hi. Amram in ama' pa’ sanggamnu Jokhebed zi-in la a, tua nu in amah tawh Aaron leh Moses nei hi. Amram’ nuntak kumte in kum za leh sawmthum-le-sagih ahi hi. Izhar’ tapate: Korah, Nefeg leh Zikri ahi hi. Uzziel’ tapate: Mishael, Elzafan leh Sithri ahi hi. Aaron in Amminadab’ tanu, Nahshon’ sanggam nu ahi Elisheba zi-in la hi; tua nu in amah tawh Nadab, Abihu, Eleazar leh Ithamar nei hi. Korah’ tapate: Assir, Elkanah leh Abiasaf; hihte in Korahte beh ahi hi. Aaron tapa Eleazar in Putiel’ tanute khat zi-in la hi; tua nu in amah tawh Finehas nei hi. Hihte in a innkuan kuanin Levi mite’ beh lutangte ahi hi. “Izipt gam panin Israel mite ami’ honpi-in paikhiatpih in,” Topa in a cihna mite in hih Aaron leh Moseste ahi hi. Izipt panin Israel mite paikhiatpih nading thu Izipt kumpipa Faro tunga thugente in amaute hi a, hih Moses leh hih Aaron zong ahi hi. Izipt gamah Moses kiangah Topa in thu a gen ni-in, Topa in Moses kiangah, “Keimah in Topa ka hi hi; nang' tunga kong gen khempeuh Izipt kumpipa Faro tungah gen in,” ci hi. Ahih hangin Moses in Topa' kiangah, “En in, keimah in thugen a siam lo mi ka hi hi; tua ahih ciangin bangci-in Faro in ka thu hong ngai ding ahi hiam?” ci hi. Topa in Moses kiangah, “Thei in, Faro’ tungah Pasian bangin nang kong bawl hi; na sanggampa Aaron in na kamsangpa hi ding hi. Nang kong thupiak khempeuh na gen ding hi; ama' leitang panin Israel mite a paikhiatsak nadingin Faro' tungah na sanggampa Aaron in gen ding hi. Ahih hangin keimah in Faro’ lungsim ka khauhsak ding a, Izipt gamah ka limte leh nalamdangte ka tamsak hangin, Faro in nang' thu hong ngai lo ding hi; tua ciangin keimah in Izipt tungah ka khut ka nga ding a, thukhenna nasepna lianpite tawh Izipt gam panin ka mi honpi, Israel mite ahi ka mihingte ka paikhiatpih ding hi. Keimah in Izipt' tungah ka khut zan-in amaute' lak panin Israel mite ka paikhiatpih ciangin Izipt mite in keimah in Topa ka hihna thei ding uh hi,” ci hi. Moses leh Aaron in tua mah bangin hih uh hi; Topa in amaute a thupiak bangin amaute in hih uh hi. Tu-in amaute in Faro' tungah thu a gen lai takun Moses kum sawmgiat pha a, Aaron kum sawmgiat-le-thum pha hi. Topa in Moses leh Aaron kiangah, “Faro in note' kiangah, ‘Note a thutak na hihna uh nalamdang khat tawh hong lak un,’ hong cih ciangin nangmah in Aaron’ kiangah, ‘Gulpi khat a suah theih nadingin na ciangkhut la in la, Faro’ mai-ah khiasuk in,’ ci in,” a ci hi. Tua ahih ciangin Faro kiangah Moses leh Aaron pai-in Topa ’ thupiak bangin hih uh hi; Aaron in Faro leh a uliante' mai-ah a ciangkhut lawn suk a, gulpi khat suak hi. Tua ciangin Faro in mi pilte leh aisan siamte sam hi; amau’ Izipt mitphial siamte in zong amau’ siamna tawh tua bang teek mahin bawl thei uh hi. Bang hang hiam cih leh a milip in a ciangkhut uh khiasuk ciat a, tuate gulpi vive suak hi. Ahih hangin Aaron’ ciangkhut in amau’ ciangkhutte valh tum hi. Topa ’ gensa bangin Faro’ lungsim khauh lai a, amah in amaute’ thu ngai lo hi. Tua ciangin Topa in Moses kiangah, “Faro’ lungsim khauh hi, amah in mite paisak nuam lo hi. Amah gun-ah a pai lai takin zingsangin Faro kiangah pai in; Nail gun gei-ah amah ngak in la, gulpi a suak na ciangkhut pen mah na khut sungah tawi in. Nangmah in ama' kiangah, ‘ Topa, Hebrute’ Pasian in nangma' kiangah kei hong sawl a, “Gam lakah amaute in keimah hong biak theih nadingun ka mite paisak in; en in, nangmah in na mang nai kei hi,” ci hi. Tua ahih ciangin Topa in hih bangin ci hi, “Keimah in Topa ka hihna hih tawh na thei ding hi: en in, ka khut sunga om ciangkhut tawh Nail gun sunga om tui ka sat ding a, tua tui in sisan suak ding hi, Nail gun sunga ngasa si-in, Nail gun uih ding a, Izipt mite in Nail gun panin tui dawn ding kih ding uh hi,’ ci hi, ci-in gen in,” ci hi. Topa in Moses' kiangah, “Aaron' kiangah hih bangin gen in, ‘Na ciangkhut la in la, sisan a suah theih nadingin Izipt tuite, amau’ gunte, amau’ luite, amau’ bualte' tung leh amau’ tuili khempeuhte' tungah na khut zan in; Izipt gam sunga sing beel leh suang beel khempeuh sung nangawnah sisan om ding hi,’ ci in,” ci hi. Moses leh Aaron in Topa ’ thupiak bangin hih uh hi; Faro leh ama uliante’ muh-in amah in ciangkhut vik to-in Nail gun sunga om tui sat a, Nail gun sunga om tui khempeuh sisan suak hi. Nail gun sunga ngasate si hi; Nail gun uih a, Izipt mite in Nail gun panin tui dawn thei lo uh hi; Izipt gamsung khempeuhah sisan om hi. Ahih hangin Izipt mitphial siamte in amau’ siamna tawh tua bangmah bawl thei uh hi; tua ahih ciangin Faro’ lungsim a khauh ngei mahin khauh a, Topa ’ gensa bangin amah in amaute’ thu ngai lo hi. Faro kihei-in a inn sungah pai a, amah in a lungsim nangawnah tua thu ngaihsutin nei nawn lo hi. Amaute in Nail gun tui dawn thei lo uh ahih manin Izipt mite khempeuh in Nail gun kiim tengah tui dawn ding to uh hi. Topa in Nail gun a sat zawh ni sagih pha ta hi. Tua ciangin Topa in Moses' tungah, “Faro kiangah pai in la ama' tungah, ‘ Topa in hih bangin ci hi, “Amaute in keimah hong biak theih nadingin ka mite paisak in. Ahih hangin amaute na paisak kei leh, en in, na gam khempeuh uiphukte tawh ka gimsak ding hi; Nail gun in uiphukte tawh kidim ding a, tuate in na inn sung, na lupna inndei sung, na lupna tung, na nasemte leh na mihingte’ innte sung, na meikhukte leh na annel mekna kuang sungte-ah hong pai ding uh hi; uiphukte in nang' tung leh na mite leh na nasemte khempeuh' tungah hong pai ding hi,” ci hi,’ ci-in gen in,” a ci hi. Topa in Moses' tungah, “Aaron kiangah hih bangin gen in, ‘Gunte, luite, tuilite' tungah na ciangkhut tawh na khut zan in la, Izipt leitang tungah uiphukte paisak in!’ ci-in gen in,” a ci hi. Tua ahih ciangin Aaron in Izipt tuite' tungah a khut zan hi; uiphukte hong pai-in Izipt leitang tuam hi. Ahih hangin mitphial siamte in amau' siamna tawh tua bangmah bawl thei uh a, Izipt leitang tungah uiphukte omsak uh hi. Tua ciangin Faro in Moses leh Aaron samin, “Kei leh ka mite' kiang panin uiphukte a lakkhiat nadingin Topa' tungah thum un; Topa' tungah biakna pia dingin mite ka paisak ding hi,” ci hi. Tua ciangin Moses in Faro' kiangah, “Nail gun sung cih sim loh, nangma' kiang leh na innte panin uiphukte a bei nadingin nang leh na nasemte leh na mite’ adingin ka thum theih nadingin a hun khat seh in,” a ci hi. Amah in, “Zingciang,” ci hi. Moses in, “ Topa ahi kote’ Pasian tawh a kibang kuamah om lo hi ci-in na theih nadingin nangma' cih bang hi ta hen. Nang leh na innte leh na nasemte leh na mite' kiang panin uiphukte paikhia ding uh hi; Nail gun sung bekah om ding uh hi,” ci hi. Tua ahih ciangin Faro kiang panin Moses leh Aaron paikhia uh hi; Faro' tungah a tun’saksa uiphuk tawh kisai thu Moses in Topa' tungah ko hi. Topa in Moses’ thugen bangin hih hi; innte leh huang sung leh lote panin uiphukte si hi. Amaute in a lom lomin tuate khawm uh a, gamsung teng uih hi. Ahih hangin nopna a om kik lam Faro in a muh ciangin, amah in a lungsim khauhsak a, Topa ’ gensa bangin amau’ thu ngai lo hi. Tua ciangin Topa in Moses' tungah, “Aaron' kiangah hih bangin gen in, ‘Izipt gamsung khempeuhah thokang a om dingin na ciangkhut zan in la leivui sat in,’ ci in,” a ci hi. Amaute in tua mah bangin hih uh hi; Aaron in a ciangkhut tawh a khut zan-in, leivui sat a, mihing' tung leh ganhing' tungah thokang hong om hi; Izipt gamsung khempeuhah leivui teng thokang suak hi. Mitphial siamte in amau’ siamna tawh thokang pian’sak ding sin uh a, ahih hangin amaute in hih thei lo uh hi. Tua ahih ciangin mihing leh ganhing' tungah thokangte om hi. Mitphial siamte in Faro' kiangah, “Hih in Pasian’ nasepna ahi hi,” ci uh hi. Ahih hangin Faro’ lungsim khauh a, Topa ’ gensa bangin amah in amaute’ thu ngai lo hi. Tua ciangin Topa in Moses' kiangah, ‘Zingsangin tho baihin amah gun-ah hong pai ding Faro ngak in, ama' kiangah, ‘ Topa in hih bangin ci hi, “Amaute in keimah a hong biak theih nadingun ka mite paisak in. Tua bang hi loin, ka mite na paisak kei leh, en in, nang leh na nasemte leh na mite' tung leh na innte' sungah tho honpite kong sawl ding hi; Izipt mite’ innte leh tuate’ din’na leitang zong tho honpite tawh kidim ding hi. Ahih hangin tua ni ciangin keimah in hih leitungah Topa ka hihna na theih nadingin tho honpite a om loh nadingin ka mihingte a ten’na Goshen leitang keimah in ka tuam koih ding hi. Tua bangin keima' mite leh nangma' mite a kilamdan’na khat ka bawl ding hi. Zing ciangin hih lim hong om ding hi,” ci hi,’ ci-in gen in,” a ci hi. Topa in tua mah bangin hih hi; Faro' innsung leh ama' nasemte' innte sungah tho honpite hong pai a, Izipt gamsung khempeuh thote’ hangin leitang kisia hi. Tua ciangin Faro in Moses leh Aaron sam a, “Pai un, hih gamsungah na Pasian' tung uh-ah biakna pia un,” ci hi. Ahih hangin Moses in, “Tua banga hih ding kituak lo hi; bang hang hiam cih leh Izipt mite’ adingin a deihhuai lo biaknate kote in Topa ka Pasian uh tungah ka pia ding uh hi. Izipt mite’ adingin a deihhuai lo biaknate amau’ muhna-ah pia le ung, amaute in kote suang tawh hong deng ding uh hilo ahi hiam? Kote in ni thum paina gam lakah pai-in ama' hong thupiak ding bangin Topa ka Pasian uh tungah biakna ka va pia ding uh hi,” ci hi. Tua ahih ciangin Faro in, “Gam lakah Topa na Pasian uh tungah biakna pia dingin note kong paisak ding hi; ahih hangin gamlapi-ah na pai kei ding uh hi. Kei adingin hong thumsak in,” ci hi. Tua ciangin Moses in, “En in, nang' kiang panin kei paikhia-in Faro' kiang pan, a nasemte' kiang pan leh a mite' kiang panin tho honpite zingciang a paikhiat theih nadingin Topa' tungah thu ka ngen ding hi; ahi zongin Topa' tungah biakna pia dingin mite paisak lohna tawh Faro hong zuau-tat kik nawn kei in,” ci hi. Tua ahih ciangin Faro' kiang panin Moses paikhia-a Topa' tungah thungen hi. Topa in Moses’ nget bangin hih a, Faro' kiang, a nasemte' kiang leh a mite' kiang panin tho honpite lakhia hi; khat zong om nawn lo hi. Ahih hangin Faro in hih hunin zong a lungsim khauhsak lai a, mite paisak lo hi. Tua ciangin Topa in Moses' tungah, “Faro' kiangah pai in la ama' kiangah, ‘ Topa, Hebrute’ Pasian in hih bangin ci hi, “Amaute in keimah a hong biak theih nadingin ka mite paisak in. Bang hang hiam cih leh nang in amaute paisak ding nialin amaute na let lai leh, en in, lo sunga om ganhingte ahi, sakolte, late, kalaohte, bawnghonte leh tuuhonte' tungah a nasia mahmah gimna Topa ’ khut in tungsak ding hi. Israel mite aa khempeuh khat beek a sih loh nadingin Israel’ ganhingte leh Izipt’ ganhingte kikalah Topa in a kilamdan’na khat bawl ding hi,” ci hi, ci-in gen in,” a ci hi. Topa in a hun khat seh a, “Zing ciangin Topa in gamsungah hih na hong sem ding hi,” ci hi. A zing ciangin Topa in hih na bawl hi; Izipt mite’ ganhing khempeuh si a, ahih hangin Israel mite’ ganhing khat zong si lo hi. Faro in a en dingin mi sawl hi, en in, Israel’ ganhing khat zong si lo hi. Ahih hangin Faro’ lungsim khauh lai a, amah in mite paisak lo hi. Topa in Moses leh Aaron' kiangah, “Meiphualpi panin khut dimin vut la un la, Faro’ muh-in vantung lamah Moses in lawn hen. Tua in Izipt gam khempeuhah leivui nel suakin, Izipt gamsung khempeuhah mihing leh ganhing tungah meimatum suakin puakkham ding hi,” ci hi. Tua ahih ciangin amaute in meiphualpi panin vutte la-in, Faro mai-ah ding uh a, Moses in tuate vantung lamah lawnin, tuate in mihing leh ganhing tungah meimatum suakin puakkham hi. Mitphial siamte in meimatum hangin Moses dem zo nawn lo uh hi, bang hang hiam cih leh mitphial siamte leh Izipt mite khempeuh in meimatum vei uh hi. Ahih hangin Topa in Faro’ lungsim khauhsak a, Topa in Moses' tunga a gensa bangin amah in amaute’ thu ngai lo hi. Tua ciangin Topa in Moses' kiangah, “Zingsangin tho baih in la, Faro’ mai-ah ding-in ama' kiangah, “Hebru mite’ Pasian, Topa in hih bangin ci hi, “Amaute in keimah a hong biak theih nadingin ka mihingte paisak in. Bang hang hiam cih leh leitung khempeuhah kei tawh a kibang khat beek om lo hi ci-in na theih nadingin hih hunin na sungtawng dong leh na nasemte leh na mihingte' tungah ka gimnate khempeuh kong tungsak ding hi. Bang hang hiam cih leh tu-in keimah in ka khut zanin natna tawh nang leh na mihingte hong vat gawpin, leitung panin note hong kibeisak thei hi; ahih hangin leitung khempeuhah keima' min a kipulak theih nadingin nang' tungah ka vangliatna lah ding deihna-in nang kong nungtasak hi. Ka mihingte' tungah nang kiliansak lai-in amaute na paisak kei hi. En in, zing ciang tu bang hunin Izipt gam a kisat-a kipanin tu hun dongin tua bang a kimu ngei lo a tam mahmah gialpi ka kiasak ding hi. Tua ahih ciangin tu-in mi sawl in la, na ganhingte leh gamlak-a na neihte khempeuh a muanhuai bukna-ah koih in; bang hang hiam cih leh gialpi in inn-ah a kipaipih lo, gamlak-a om mihing leh ganhing tungah kia ding a, amaute si ding uh hi,” ci hi,’ ci-in gen in,” a ci hi. Tua ciangin Faro’ nasemte’ lak panin Topa ’ thu a zahtak mi in ama' silate leh a ganhingte inn-ah taisak hi; ahih hangin Topa 'thu a don lo mi in ama' silate leh a ganhingte gamlakah nusia hi. Topa in Moses' kiangah, “Izipt gamsung khempeuh a, mihing leh ganhing leh gamlak kungte khempeuh' tungah gialpi a kiat theih nadingin vantung lamah na khut zan in,” ci hi. Tua ciangin Moses in vantung lamah a ciangkhut zan hi; Topa in vanging leh gialpi puak a, leitungah meikuang tai suk hi. Topa in Izipt gamsungah gialpi zusak hi; Izipt gam minam khat a suah khit-a kipanin tua bang a om ngei lo, a tam mahmah gialpi leh gialpi lakah mei a kuangzalzal tawntung om hi. Gialpi in Izipt gam sunga a om mihing leh ganhing, na khempeuh deeng gawp hi; gialpi in gamlak kung khempeuh deeng gawp a, gamlak singkung khempeuh deengtan hi. Israel mite a omna Goshen gam bekah gialpi kia lo hi. Tua ciangin Faro in mi sawlin Moses leh Aaron samsak a amaute' kiangah, “Tu tungin ka khial hi; Topa man hi, kei leh ka mihingte ka khial uh hi. Topa' tungah thum in; bang hang hiam cih leh hih vanging leh gialpi kicing zo hi; note kong paisak ding a, note na khawl nawn kei ding uh hi,” ci hi. Moses in ama' kiangah, “Khuapi panin ka paikhiat khit phetin Topa ’ lamah ka khut ka zan ding hi; leitung in Topa ’ aa hi ci-in na theih nadingin vanging tawpin gialpi om nawn lo ding hi. Ahih hangin nang leh na nasemte in ahih leh, Topa Pasian na zahtak nai lohna uh ka thei hi,” ci hi. (Anthul kungte leh mangbuhham kisia hi, bang hang hiam cih leh mangbuhhamte a vuih laitak hi a, anthul kungte a pak laitak ahi hi. Ahih hangin mangbuh leh mangbuhmante sia lo hi, bang hang hiam cih leh tuate khangham nai lo hi.) Tua ahih ciangin Faro' kiang pan khuapi pua-ah Moses paikhia a, Topa ’ lamah a khut zan hi; vanging leh gialpi tawp a, leitungah guah bua nawn lo hi. Ahih hangin guah leh gialpi leh vanging a khawlna Faro in a muh ciangin amah khial lai a, amah leh a nasemte in a lungsim uh khauhsak uh hi. Tua ahih ciangin Topa in Moses'tung tawn-a a gensa bangin Faro’ lungsim khauh a, amah in Israel mite paisak lo hi. Tua ahih ciangin Faro' kiangah Moses leh Aaron pai uh a ama' kiangah, “Hebru mite’ Pasian, Topa in hih bangin ci hi, ‘Ka mai-ah nang na kiniamkhiat nading bang tan vei nial ding na hi hiam? Amaute in keima' na hong sep theih nadingin ka mite paisak in. Bang hang hiam cih leh ka mite paisak ding na nial leh, en in, zing ciangin na gam sungah kauphete kong paipih ding a, kuamah in leitang a muh theih loh nadingin tuate in lei maitang khempeuh tuam ding uh hi; gialpi khit cianga nang adinga a om laite amaute in ne ding uh hi; amaute in gamlak-a a po nangma singkung khempeuh ne ding uh hi, nangma innte leh na nasemte khempeuh leh Izipt mite’ innte khempeuh-ah dim ding uh hi; na pu na pate uh leitungah a pian uh a, kipan tuni donga tua bang a muh ngei lohte uh hi ding hi,’ ci hi,” ci-in a gen hi. Tua ciangin amah kihei-in Faro’ kiang panin paikhia hi. Faro’ nasemte in ama' kiangah, “Eite' tungah hih mipa bang tan vei thangzak hong hi ding ahi hiam? Amaute in amau’ Pasian, Topa a biak theih nadingun mite paisak in; Izipt a siatna thei tel nai lo na hi hiam?” ci uh hi. Tua ahih ciangin Faro' kiangah Moses leh Aaron kipaipih kik hi; amah in amaute' kiangah, “Pai un, Topa, na Pasian uh va bia un; ahih hangin kua teng pai ding na hi uh hiam?” a ci hi. Moses in, “Ka khangnote uh leh ka khanghamte uh tawh ka paikhawm ding uh hi; ka tapate uh, ka tanute uh, ka tuuhonte uh leh ka bawnghonte uh tawh ka pai ding uh hi; bang hang hiam cih leh Topa ’ adingin pawi khat ka kham ding uh hi,” a ci hi. Amah in amaute' kiangah, “Note leh na naupangte uh kong paisak taak leh note tawh Topa om ta ve! En un, note in ngimna hoih lo na nei uh hi. Tua bang hilo ding! Note’ lak panin pasalte pai un la, Topa va bia un, bang hang hiam cih leh tua pen nomau’ ut ahi hi,” a ci hi. Faro’ omna panin amaute kihawlkhia hi. Tua ciangin Topa in Mose' kiangah, “Amaute Izipt leitang tungah hong omin, gialpi in a deen’ baang kung khempeuh a nek theih nadingin kauphete sapna-in Izipt leitang tungah na khut zan khia in,” ci hi. Tua ahih ciangin Moses in Izipt leitang tungah a ciangkhut zan a, Topa in tua sun tawntung leh tua zan tawntung leitang tungah nisuahna huih nungsak hi; zingsang ciangin nisuahna huih in kauphete hong tun’ khin hi. Tua ma-siah kauphe hon tua banga a tam a om ngei lo, cik mah ciangin zong a omkik ngei lo ding, Izipt leitang tung khempeuhah kauphe hong om a, Izipt gam buppi-ah om uh hi. Bang hang hiam cih leh amaute in leitang bup maitang tuam uh a, leitang mial hi, amaute in leitang tunga kung khempeuh leh gialpi’ deen’ baang sing gah khempeuh ne uh hi; Izipt leitang tung khempeuhah gamlak singkung hita leh kungno hita leh a hing khat beek om lo hi. Tua ciangin Faro in Moses leh Aaron nawh sap a, “ Topa na Pasian' tung leh nangma' tungah ka khial khin hi. Tua ahih ciangin tu-in ka khialhna hong maisak in, tu-a khat vei bek, kong thum hi, keima' tung panin hih sihna a lakkhiat ding Topa na Pasian tungah thum in,” a ci hi. Tua ahih ciangin Faro' kiang panin amah pai khia-in Topa' tungah thum hi. Topa in nitumna huihpi hat mahmah khat nungsak a, tua huih in kauphete laamto-in San Tuipi sung den’na hi; Izipt gam sungah kauphe khat zong om nawn lo hi. Ahih hangin Topa in Faro’ lungsim khauhsak a, amah in Israel mite paisak lo hi. Tua ciangin Topa in Moses' kiangah, “Mite in khuamial sung a zawt nading, Izipt leitang tungah khuamial a om theih nadingin vantung lamah na khut zan in,” ci hi. Tua ahih ciangin Moses in vantung lamah a khut zan a, Izipt leitang tung khempeuhah ni thum sung khuamial sahpi om hi; ni thum sung amaute khat leh khat kimu thei lo uh a, ama' omna panin kuamah tho khia thei lo hi; ahih hangin Israel mite in amau’ ten’na-ah khuavak nei uh hi. Tua ciangin Faro in Moses samin, “Pai in, Topa va bia un; na tate uh zong note tawh hong pai thei ding hi; na tuuhonte uh leh na bawnghonte uh omsak lai un,” a ci hi. Ahih hangin Moses in, “ Topa ka Pasian'tung uh-ah ka piak theih nadingun biak piakna leh meihal biakna kote nong neihsak kul hi. Ka ganhingte uh zong kote tawh a pai kul hi; ganno khat zong kinusia lo ding hi, bang hang hiam cih leh Topa ka Pasian uh ka biak nadingun tuate ka paipih ding uh hi, a mun ka tun’ matengun bang pen tawh Topa bia ding cih ka thei kei uh hi,” a ci hi. Ahih hangin Topa in Faro’ lungsim khauhsak a, amah in amaute paisak lo hi. Tua ciangin Faro in ama' kiangah, “Kei' kiang panin kihem in; nang kidawm in: ka maitang hong mukik nawn kei in; bang hang hiam cih leh ka maitang nong muh ni-in nang na si ding hi,” a ci hi, Moses in, “Na cih bang hi ta hen! Na maitang kong mukik nawn kei ding hi,” a ci hi. Topa in Moses' kiangah, “Faro leh Izipt tungah gimna khat ka tungsak lai ding hi; tua khit ciangin hih lai mun panin amah in note hong paisak ding hi; amah in note hong paisak ciangin note hong hawlkhia mang khin ding hi. Pasal peuhmah in a vengte' kiang pan, numei peuhmah in zong a vengte' kiang panin ngun leh kham kizepnate a nget theih nadingun mite’ zakin thugen in,” a ci hi. Topa in Izipt mite’ muhna-ah mipa maipha pia hi. Tua tham loin, Moses pen Izipt leitang tung, Faro’ nasemte’ muhna leh mite’ muhna-ah lian mahmah hi. Moses in, “ Topa in hih bangin ci hi. Zankim pawl-in Izipt mite' lakah ka pai ding hi; kumpi tokhom tunga a tu Faro’ tacil-a kipanin an gawina nung-a a om numei-nasem’ tacil dong leh ganhing tacil khempeuh, Izipt gam sungah tacil khempeuh si ding hi. Cik mah-a tua bang a om ngei lo, cik mah ciangin zong a omkik ngei lo ding kahna lianpi Izipt leitang tung khempeuhah om ding hi. Ahih hangin Izipt mite leh Israel mite a kilamdangin Topa in bawl hi ci-in na theih nadingun Israel mite, mihing hita leh ganhing hita leh, ui khat zong tau lo ding hi. Hih nangma'nasemte khempeuh keima' kiangah hong paisukin, keima' kiangah hong kunsuk ding uh a, ‘Nang leh nangmah hong zui mi khempeuh paikhia un,’ hong ci ding uh hi. Tua khit ciangin kei ka paikhia ding hi,” a ci hi. Faro' kiang panin amah heh mahmahin paikhia hi. Tua ciangin Topa in Moses' kiangah, “Izipt leitang tungah ka nalamdangte a tam theih nadingin Faro in na thu hong ngai lo ding hi,” a ci hi. Moses leh Aaron in hih nalamdangte khempeuh Faro’ mai-ah bawl uh hi; Topa in Faro’ lungsim khauhsak a, amah in Israel mite a leitang panin paikhiasak lo hi. Izipt gam sungah Topa in Moses leh Aaron kiangah, “Tu kha in note' adingin kum kipatna hi ding hi; note' adingin kum khat sungah a kha masa hi ding hi. Israel mihon khempeuhte' tungah gen in, tu kha ni sawm ni-in innkuan khat adingin tuuno ahih kei leh keelno khat, amau’ innkuan pha zah tawh kituakin amaute in ganno khat ciat la ding uh hi; ganno khat’ adingin innkuan a tawm luat leh mipa khat in ama' inn zom a vengte tawh a mi tawh kituakin la ding hi; a mi tamna leh a nek zah uh tawh kizui-in ganno man pia ding uh hi. Na ganno uh a sitbang lo hi ding a, kum khat a pha a pa hi ding hi; tua pen tuu ahi a, keel ahi zongin, khat peuhpeuh hi thei ding hi; tua pen, Israel mihonte khempeuh in a gannote uh a gawh ding hun nitak khuamui, tua kha ni sawm-le-li dong na kem ding uh hi. Tua ciangin amaute in a sisan kimkhat la-in a nekna uh inn kongkhak khuam nihte leh bangtungzawl nuh ding uh hi. Amaute in tua zanin a sa hangin ne ding uh hi; silngo sawhloh anlum leh a kha mehteh tawh amaute in ne ding uh hi. A sate mun khat peuhpeuhah a sial ahi a, tui tawh huanin ahi zongin ne loin, a lu leh a khete leh a sungkuate tawh hangin na ne ding uh hi. Zingsang dong a khing na omsak kei ding uh a, zingsang cianga a khing om lai peuhmah na haltum ding uh hi. Hih bang zia-in na ne ding uh hi: na kawng uh gakin, na khedapte uh na khe uh-ah bulhin, na ciangkhut uh na khut uh-ah na tawi ding uh hi; na nawh nek ding uh hi. Tua in Topa ’ Pasian pawi ahi hi. Bang hang hiam cih leh keimah in tua zanin Izipt gam ka nawk ding a, Izipt leitang tungah mihing hita leh ganhing hita leh tacil khempeuh ka vat gawp ding hi; Izipt pasiante khempeuh' tungah thu ka khen ding hi; keimah in Topa ka hi hi. Note’ omna inn tunga sisan in note adingin lim hi ding hi; sisan ka muh ciangin note kong paisan ding a, Izipt leitang ka vat gawp ciangin note hong susia ding gimna note' tungah hong tung lo ding hi. “Hih ni in note adingin phawkna ni hi ding hi, note in Topa' tungah pawi bawlna ni-in na nei ding uh hi; na khang tawntungun note in biakna ngeina kip khatin na nei tawntung ding uh hi. Note in ni sagih sung silngo sawhloh anlum na ne ding uh hi; a ni masa ni-in note in na inn panun silngo na hemkhia ding uh hi, bang hang hiam cih leh khat peuh in a ni masa ni panin a ni sagih ni dong silngo sawh a nek leh, Israel sung panin tua mipa kikhenkhia ding hi. A ni masa ni-in note in a siangtho kikhopna khat na nei ding uh a, a ni sagih ni-in zong a siangtho kikhopna khat mah na nei ding uh hi, tua sung tengin na bangmah kisem lo ding hi; ahih hangin na milip-un na huansa bek mah na ne thei ding uh hi. Note in silngo sawhloh anlum pawi na bawl ding uh hi, bang hang hiam cih leh hih ni teekteekin Izipt leitang panin na mihonte uh ka paikhiatpih hi: tua ahih ciangin note in na khan tawntungun hih ni pen biakna ngeina kip khatin na nei tawntung ding uh hi. Kha masa, tua kha ni sawm-le-li nitakin note in silngo sawhloh anlum na ne ding uh a, tua kha ni sawmnih-le-khat nitak dong na ne ding uh hi. Bang hang hiam cih leh ni sagih sung na inn sung uh-ah silngo kimu lo ding hi; bang hang hiam cih leh mi khat peuh, peemta hita leh gam mi hita leh in silngo sawh a nek leh, Israel mi honpi panin tua mipa kikhenkhia ding hi. Silngo a kisawh peuhmah nane kei ding uh hi; na omna khempeuh uh-ah silngo sawhloh anlum na ne ding uh hi,” a ci hi. Tua ciangin Moses in Israel upate khempeuh samin amaute' kiangah, “Nomau’ adingin na innkuan uh tawh a kituakin tuunote teel un la, paisan tuuno go un. Puknah lom khat la un la, kuang sunga a om sisan sungah diahin, kuang sunga a om sisan tawh bangtungzawl leh kongkhak khuam nihte nuh un; zingsang matengin a inn kongkhak pua-ah kuamah paikhia lo ding hi. Bang hang hiam cih leh Izipt mite that dingin Topa in hong nawk ding hi; amah in bangtungzawl leh kongkhak khuam nih tunga sisan a muh ciangin Topa in kongkhak paisan ding a, a susia ding pen note that dingin na inn sung uh-ah tumsak lo ding hi. Note leh na tapate in hih pen biakna ngeina kip-in na nei tawntung ding uh hi. Amah in hong ciamsa bangin Topa in note hong piak ding leitang na tun’ uh ciangin hih nasep na zui ding uh hi. Na tate un note' kiangah, ‘Hih bang hihna bang a cih nopna ahi hiam?’ hong cih ciangin note in, ‘ Topa ’ paisanna biak piakna ahi hi, bang hang hiam cih leh amah in eite’ innkuante hong khawi-in Izipt mite a thah lai-in Izipt gam sungah Israel innkuante paisan hi,’ na ci ding uh hi,” a ci hi. Mite in a lu uh kunin bia uh hi. Tua ciangin Topa in Moses leh Aaron a thupiak bangin Israel mite gamta uh hi. Ama' kumpi tokhom tunga a tu Faro’ tacil-a kipanin thongmial sunga a om a kiman mite’ tacil leh ganhing tacil khempeuh, Izipt gam sunga a om tacil khempeuh, zankim lai takin Topa in vat gawp hi. Tua zanin Faro leh a nasemte khempeuh leh Izipt mite khempeuh tho uh hi; Izipt gam sungah kahna lianpi om hi, bang hang hiam cih leh khat beek a sih lohna inn khat zong om lo hi. Amah in Moses leh Aaron zan sap a, “Ding un, keima' mihingte lak panin note leh Israel mite paikhia un; pai un la, na gensa bangun Topa va bia un. Na gensa bangun na tuuhonte uh leh na bawnghonte uh la un la, pai un; kei zong thupha hong pia un,” a ci hi. Tua gam panin mite manlangin a sawl khiat nading uh-ah Izipt mite nawhtat mahmah uh hi; bang hang hiam cih leh amaute in, “Eite khempeuh misi i hi hi,” a ci uh hi. Tua ahih ciangin mite in silngo sawh nai loh a annel lom uh la-in, annel mekna amau’ kuangte puan tawh tunin a liangko uh-ah pua uh hi. Moses in amaute' tunga a gen bangin Israel mite zong gamta uh hi, bang hang hiam cih leh amaute in Izipt mite'tung panin ngun leh kham kizepnate leh puante ngen uh hi; amau’ ngette a piak nadingun Topa in Izipt mite’ muhna-ah mite maipha pia hi. Tua bangin amaute in Izipt mite’ na sut uh hi. Israel mite numei leh naupang kisim loin pasal tul za guk Rameses panin Sukkoth-ah khe-in pai uh hi. Minam dang tampi leh tuuhon leh bawnghon, ganhing tampi zong amau tawh pai uh hi. Izipt panin a ken’ uh annel lom panin amaute in silngo sawhloh moh em uh hi, tuate silngo kisawh lo hi, bang hang hiam cih leh, Izipt panin amaute kisawnkhia a, zia-ol tat thei loin amau’ annek ding zong kiging man lo uh hi. Israel mite Izipt-ah a om uh hun sung in kum za li leh kum sawmthum ahi hi. Kum za li leh kum sawmthum a cin’ ni teekteekin Izipt leitang panin Topa ’ mihonpite paikhia uh hi. Amaute Izipt leitang panin a paikhiatpih nadingin hih in Topa ’ zan vilna ahi hi; tua mah bangin Israel mite khempeuh in amau khang tawntungin Topa ’ adingin hih zan mah zan vilna-in nei uh hi. Topa in Moses leh Aaron' kiangah, “Hih in paisan biakna ngeina kip ahi hi; gamdang mi kuamah in ne lo ding hi; ahih hangin sum tawh a kilei sila peuhmah in a vun na at khit uh ciangin ne thei ding hi. Peemta hita leh a kicial nasem hita leh in ne thei lo ding hi. Inn khat sungah kine ding hi; inn pua-ah a sa na paikhiatpih kei ding uh hi; a guh na kuaitan kei ding uh hi. Israel mihon khempeuhin hih ding uh hi. Khual mi khat note' kiangah hong peem a, Topa ’ adingin paisan a bawl leh, ama mipih pasal khempeuh a vun ki-at sak un, tua ciangin amah a nai-ah hong pai-in bawl thei ding hi; amah in gam mi khat tawh kibang ding hi. Ahih hangin vun ki-at lo mi kuamah in ne lo ding hi. Gam mi leh note' lakah hong peem khual mi’ adingin ngeina khat bek om ding hi,” a ci hi. Tua bangin Israel mite khempeuh in hih uh hi; Topa in Moses leh Aaron a thupiak bangin amaute in hih uh hi. Tua ni teekteekin Topa in Israel mite a honpi-un Izipt gam panin paikhiatpih hi. Topa in Moses' kiangah, “Keima' tungah tacil khempeuh hong ap in; Israel mihingte' lakah, mihing hita leh ganhing hita leh, naubu a hong masa pen peuhpeuh in keima aa ahi hi,” a ci hi. Moses in mite' tungah, “Salsuahna gam, Izipt panin na paikhiat uh hih ni phawk un, bang hang hiam cih leh Topa in vangliatna khut tawh hih mun panin note hong paikhiatpih hi; silngo sawh anlum kine lo ding hi. Abib kha, tu ni-in note a paikhia ding na hi uh hi. Amah in note' tungah piak dinga na pate’ tungah a ciam, bawngnawi leh khuaizu a luan’na leitang, Kanaan mite, Hit mite, Amor mite, Hiv mite leh Jebus mite’ leitangah Topa in note hong paipih ciangin hih kha sungin hih bangin pawina hih ding uh hi. Note in silngo sawhloh anlum ni sagih sung na ne ding uh a, a ni sagih ni-in Topa adingin pawi khat om ding hi. Silngo sawhloh anlum ni sagih sung kine ding hi; note' tungah silngo sawh anlum kimu lo ding hi, note’ huang sung khempeuhah note’ tung panin silngo kimu lo ding hi. Tua ni-in na tapa kiangah, ‘Izipt panin ka paikhiat lai-in Topa in kei adinga hong hihsakna hang hi,’ ci-in na gen ding hi. Na kam in Topa ’ thu kham a gen tawntung theihna dingin hih in na khut tungah lim, na mitte kikalah phawkna khat hi ding hi; bang hang hiam cih leh Topa in a vangliatna khut tawh hih mun panin nang hong paikhiatpih hi. Tua ahih ciangin note in a kiseh hunin kum khat pan kum khat, hih biakna ngeina kip na zui ding uh hi. “Amah in note leh na pate uh tungah a ciam bangin, Topa in Kanaan leitangah note hong paipih hun ciang leh note' tungah tua gam hong piak ciangin, note in naubu a hong masa khempeuh Topa ’ adingin na tuam koih ding uh hi. Na ganhing uh a tacil a pa khempeuh in Topa aa hi ding hi. La a tacil peuhmah tuuno khat tawh na tanh ding uh hi, tua bang hi loin na tat kei ding uh leh a ngawg na kuaitan ding uh hi. Note’ tapate lak panin tacil peuhmah na tanh ding uh hi. Hong pai ding hunah na tapa in, ‘Hih in bang a cih nopna ahi hiam?’ ci-in nang hong dot ciangin, nangmah in ama' kiangah, ‘Salsuahna, Izipt panin Topa in vangliatna tawh eite hong paikhiatpih hi. Bang hang hiam cih leh Faro in eite paisak ding a nial tentan ciangin Izipt gamsunga tacil khempeuh, mihing tacil leh ganhing tacil khempeuh Topa in that hi. Tua ahih ciangin naubu a hong masa a pa khempeuh Topa' tungah biakna-in ka pia uh hi; ahih hangin ka tapate uh sung pan tacil khempeuh ka tanh uh hi,’ na ci ding hi, Tua in na khut tung-a om ciamtehna lim ahih kei leh na mitte kikal-a talsuante bang hi ding hi; bang hang hiam cih leh Topa in a vangliatna tawh Izipt panin eite hong paikhiatpih hi,” a ci hi. Faro in mite a paisak ciangin, lampi tom pen hita se leh, Pasian in Filistia gam tawnin amaute paipih lo hi; bang hang hiam cih leh Pasian in, “Amaute in gal a tuah ciangin mite kisikin Izipt-ah ciahkik kha ding hi,’ a ci hi. Ahih hangin Pasian in San Tuipi lam manawhin gamlak lamah mite kot paipih hi. Israel mite galdo dingin kithawisa-in Izipt leitang panin pai to uh hi. Moses in Josef' guhte paipih hi; bang hang hiam cih leh Josef in Israel mite' tungah thupi takin ciam a, “Note' kiangah Pasian hong hawh ding hi; tua ciangin note in hih lai panin keima' guhte na pua ding uh hi,” a ci hi. Sukkoth panin amaute pai lai uh a, gamlak nawl, Etham-ah giahphual sat uh hi. Amaute in sun hita leh zan hita leh khualzinin a pai theih nadingun sun-in amaute lam a lak dingin meii khuam khat tawh, zan-in amaute khuavak a pia dingin mei khuam khat tawh, amaute’ mai-ah Topa pai hi; sun-a meii khuam leh zan-a mei khuamte in mite’ mai panin paikhia lo hi. Tua ciangin Topa in Moses' kiangah, “Israel mite kihei kikin Migdol leh tuipi kikal, Pihahiroth-mai, Baalzefon nisuahna lamah giahphual a sat ding gen in; tuipi gei, tua gal khatah giahphual na sat ding hi. Bang hang hiam cih leh Faro in Israel’ thu tawh kisai genin, ‘Gam sungah amaute tangciak uh hi; gamlak in amaute khuhcip khin hi,’ ci ding hi. Keimah in Faro’ lungsim khauhsakin, amah in amaute delh ding a, Faro leh a mi honpite khempeuh ka zawhna hangin minthan’na ka ngah ding hi; keimah in Topa ka hihna thu Izipt mite in thei ding uh hi,” a ci hi. Amaute tua mah bangin gamta uh hi. Mite tai khin zo hi, ci-in Izipt kumpipa kiangah a kigen ciangin, Faro leh ama nasemte’ ngaihsutna kikhel a, amaute in, “Eite’ na hong sep nading panin Israel i pai khiatsak, hih banga i gamtat bang himawk ahi hiam?” ci uh hi. Tua ahih ciangin amah in a leeng kithawi sakin ama galkapte la-in, a kitengkhia leeng za guk leh Izipt leeng khempeuh a ukte tawh kuan khawm hi. Topa in Izipt kumpipa Faro’ lungsim khauhsak a, amaute kithamuanna tawh a paikhiat laitakun amah in Israel mite delh hi. Izipt mite ahi, Faro’ sakolte, leengte, ama sakol tuangte leh a galkapte in amaute delh uh a, amaute giahphual satin tuipi-ah a omna uh, Pihahiroth gei, Baalzefon nisuahna lam munah pha uh hi. Faro hong nai ciangin Israel mite khuadak to uh hi, en in, amaute' nungah Izipt mite hong kuan hi; amaute lau mahmah uh hi. Topa' tungah Israel mite kiko uh hi; amaute in Moses' kiangah, “Izipt-ah han a om loh manin gamlakah a si dingin kote hong paikhiatpih na hi hiam? Izipt panin paikhiatpihna tawh kote' tungah bang hong bawl na hi hiam? ‘Kote hong hici omsak in la, Izipt mite’ na hong semsak in,’ ci-in Izipt-ah nang' tungah hong gen hi lo ka hi uh hiam? Bang hang hiam cih leh gamlak-a sih sangin Izipt mite’ na sep ding pen kote’ adingin hoih zaw ding hi,” a ci uh hi. Moses in mite' tungah, “Kihta kei un, kip takin ding un, amah in note adingin tu ni-a hong sep ding Topa ’ hotkhiatna mu un; bang hang hiam cih leh tu ni-a na muh uh Izipt mite, note in na mukik nawn kei ding uh hi. Topa in note adingin hong dosak ding a, note ahih leh na om hithiat ding uh hi bek hi,” a ci hi. Topa in Moses' kiangah, “Bang hangin kei' tungah hong kiko na hi hiam? Israel mite mainawt-in a pai ding gen in. Israel mite in leikeu tung tawnin tuipi a kantan theih nadingin na ciangkhut laamto in la, tuipi tungah na khut zan-in khenkham in. Amau’ nungah amaute hong pai-in, keimah in Faro leh a mi honpite khempeuh, a leengte, a sakol tuangte ka zawhna hangin minthan’na ka ngah nading hi. Keimah in Izipt mite’ lungsim ka khauhsak ding a, amaute in hong nungdelh ding uh hi. Faro leh ama' leengte leh ama' sakol tuangte ka zawhna hangin minthan’na ka ngah khit ciangin keimah in Topa ka hihna thu Izipt mite in thei ding uh hi,” a ci hi. Tua ciangin Israel honpite' mai-ah a pai Pasian’ vantungmi kikhin-in amaute' nungah pai hi; amaute' mai panin meii khuam kikhinin amaute' nung-ah ding a, Izipt honpite leh Israel honpite' kikal-ah pai hi. Tua lai-ah meii leh khuamial om hi; zan tawntung khat leh khat kinai kha loin zingsang khua hong vak hi. Tua ciangin Moses in tuipi tungah a khut zan hi; Topa in zan tawntung nisuahna huihpi hat tawh tuipi leh luan’sakin, tuipi pen leikeu-in bawl a, tuite kikhen hi. Israel mite tuipi laizang leikeu tungah pai uh a, amau' taklam leh veilam-ah kawm bangin tuite om hi. Izipt mite ahi, Faro’ sakolte khempeuh, ama' leengte, leh ama' sakol tuangte in delh in tuipi laizang amaute' nungah pai uh hi. Zingsang ciangin Topa in mei leh meii khuam sung panin Izipt mi honpite en sukin, Izipt mi honpite phial gawp a, amau’ leeng peite tumsak ahih manin man bekbak-in hawl uh hi; Izipt mite in, “Israel’ mai panin tai ni; bang hang hiam cih leh Izipt mite' lang pangin Topa in amau’ adingin do hi,” ci uh hi. Tua ciangin Topa in Moses' kiangah, “Izipt mite'tung, amau' leengte' tung, amau' sakol tuangte' tungah tui hong luan’ kik theih nadingin tuipi tungah na khut zan in,” a ci hi. Tua ahih ciangin Moses in tuipi tungah a khut zan a, a zingsang khuavak ciangin a luan’ ngei bangin tuipi luangkik hi; tua sungah Izipt mite tai uh a, Topa in tuipi laizangah Izipt mite tui tumsak hi. Tui hong luangkikin leengte leh sakol tuangte leh tuipi sungah amaute a delh Faro’ mi honpite khempeuh tuum hi; amaute khat zong suakta lo hi. Ahih hangin tuipi kantanin leikeu tungah Israel mite pai uh a, amau' taklam leh veilam-ah kawm bangin tuite om hi. Topa in tua bangin Izipt mite’ khut sung panin tua ni-in Israelte honkhia hi; tuipi gei-ah Izipt mi a site Israel mite in mu uh hi. Israelte in Izipt mite' tungah Topa ’ bawl nasepna lianpi mu uh a, mite in Topa zahtak uh hi; amaute in Topa leh ama' nasem Moses um uh hi. Tua ciangin Moses leh Israel mite in Topa' tungah hih la sa uh a, “ Topa tungah la ka sa ding hi, amah in minthangin zo khin a, amah in sakol leh a tuangpa tuipi sungah lawn hi. Topa in ka hatna leh ka lungdamna hi a, amah in keima' kihotkhiatna suak khin hi; hih in keima' Pasian hi, amah ka phat ding hi, ka pa’ Pasian hi, amah ka liansak ding hi. Topa in gal hang mi hi a, Topa in ama' min ahi hi. “Faro’ leengte leh a galkap honpite amah in tuipi sungah lawn a, a kitengkhia ama uliante San Tuipi sungah tum hi. Tui in amaute tuum a, suangtum bangin a thukna sungah amaute kiasuk uh hi. Topa aw, na taklam khut, vangliatna-ah minthang hi, Topa aw, na taklam khut in galte thehthang hi. Nangma' vangliatna tawh nangmah in na langte na lawnthal hi; nang in na hehna na khah khia a, tua in amaute buhkung bangin kangtum hi. Na nak ging tawh tuite kiciangto a, tuite a lom-in kawm bangin ding to hi; tuipi sungah tui thukpi khal hi. Galte in, ‘ka delh dinga, ka pha ding hi. A nate uh ka hawm ding a, ka deih zahzah-in tuate ka tang ding hi. Ka namsau ka dok ding a, ka khut in amaute susia ding hi,’ ci hi. Nang in na huih tawh na mut a, tuipi in amaute tuum hi; a kihtakhuai tui sungah haknaw bangin amaute tum uh hi. “ Topa aw, pasiante' lakah kua in nang tawh kibang ahi hiam? Kua in nang tawh kibangin, siangthona-ah lianin, minthang nasepna-ah kihtakhuai-in, nalamdang sem ahi hiam? Nang in na taklam khut na zan a, leitung in amaute nawmvalh hi. “Nangmah in na ciamsa zui-in na tatkhiatsa mite na paipih hi, nangmah in na hatna tawh a siangtho na omna-ah amaute lam na lak hi. Mite in za khin uh a, amaute liing uh hi; Filistia-ah a teng mite gimna in mancip hi. Tu-in Edom ukpite lungkia uh a, Moab makaite, liin’na in mancip hi; Kanaan-ah a teeng mite khempeuh tuisuak khin uh hi. Launa leh kihtakna amau' tungah tung a, nangmah' thahat vangliatna hangin amaute suangtum bangin taang loin om uh a, Topa aw, nangma' mite in a khen’ mateng, nangma' leisa mite in a khen’ mateng, amaute khikcip uh hi. Nang in amaute hong paipihin nangma' mual tungah amaute na suan ding a, Topa aw, nangma' om nading mun-a na bawlsa munah, Topa aw, na khutte in a phuhsa na biakinn-ah, na koih ding hi. Topa in uk tawntung ding hi,” a ci uh hi. Bang hang hiam cih leh Faro’ sakolte ama' leengte tawh, a sakol tuangte tuipi sungah a pai ciangin, Topa in tuipi tuite amaute tuumsak kik hi; ahih hangin Israel mite tuipi laizang leikeu tungah pai uh hi. Tua ciangin Aaron’ sanggamnu, numei kamsang, Miriam in a khut-ah khuang khat tawi hi; ama' nungah numeite khempeuh lamin khuang tawh zui uh hi. Miriam in amaute la sak hi: “ Topa la sak un, amah in minthangin zo khin, amah in sakol leh a tuangpa tuipi sungah lawn hi,” a ci hi. Tua ciangin Moses in San Tuipi panin Israel mite paipih suak a, amaute Shur gamlakah pai uh hi; gamlak-ah amaute ni thum pai uh a, tui mu lo uh hi. Amaute Marah a tun’ uh ciangin a tui kha ahih manin Marah tui dawn thei lo uh hi; tua ahih manin Marah ci-in min kiphuak hi. Moses' tungah mite phun uh a, “Bang dawn ding i hi hiam?” ci uh hi. Topa ’ tungah amah kiko hi; Topa in singkung khat amah lak a, amah in tui sungah tua sing lawn a, tui lim hong suak pah hi. Topa in tua lai munah amaute adingin thukham khat leh ngeina kip khat bawl a, tua lai mun-ah amah in amaute' tungah ze-et hi. Amah in, “Note in Topa na Pasian’ thu lim takin na ngaih uh a, ama' maiah a man nate hih-in, ama' thupiakte don a, ama' ngeina kipte khempeuh na zuih uh leh, Izipt mite' tungah ka tun’sak natnate khat beek note' tungah kong tungsak kei ding hi; bang hang hiam cih leh keimah in Topa, note hong damsakpa ka hi hi,” a ci hi. Tua ciangin amaute ciktui sawm-le-nih leh nisuh kung sawmsagih a omna mun Elim tung uh hi; tui gei tua mun-ah amaute in giahphual sat uh hi. Amaute Elim panin ding khia uh a, Izipt leitang panin a paikhiat zawh uh a kha nihna ni sawm-le-nga ni-in Elim leh Sinai kikal-a om Sin gamlakah Israel mi honpite khempeuh tung uh hi. Gamlakah Moses leh Aaron' tungah Israel mihon buppi phun uh a, amaute' tungah, “Kote sabeel phungah tu-in ka kham takun an ka nek lai-un Izipt leitangah Topa in hong that khin hi zaw ta leh; bang hang hiam cih leh mihon buppi gilkialna tawh a that dingin note in gamlakah nong paikhiatpih uh hi,” a ci uh hi. Tua ciangin Topa in Mose' kiangah, “En in, note adingin vantung panin an kong zusak ding hi; keima' thu a zuih uh leh a zuih loh uh ka theihtel nadingin mite paikhia-in ni simin ni khat kham khop ding kaikhawm ding uh hi. A ni guk ni-in mite in amau’ ciahpihte a bawl uh ciangin nisim-a a khop ngei zah nih pha ding hi,” a ci hi. Tua ahih ciangin Moses leh Aaron in Israel mite' tungah, “Nitak ciangin Izipt leitang panin note hong paikhiatpihpa in Topa a hihna na thei ding uh a, Topa ’ tunga na phunna uh amah in za khin ahih manin zingsang ciangin Topa ’ minthan’na na mu ding uh hi. Bang hang hiam cih leh kote’ tungah na phun theih nadingun kote in a bang hi mawk ka hi uh hiam?” a ci uh hi. Moses in, “Ama' tungah na phunnate uh Topa in a zakna hangin, Topa in note' tungah nitakin nek ding sa, zingsangin kham tak-a na nek ding uh an hong piak ciangin—kote in a bang hi mawk ka hi uh hiam? Note’ phunnate in kote’ tung hi loin Topa ’ tung ahi hi,” a ci hi. Moses in Aaron’ kiangah, “Israel mihon buppi' tungah, ‘Amah in note’ phunnate za khin ahih manin Topa ’ mai a nai-ah hong pai un,’ ci in,” a ci hi. Israel mihon buppi' tungah Aaron in thu a gen lai takin, amaute in gamlak lam en uh hi, en in, meii sungah Topa ’ minthan’na hong kilang hi. Topa in Moses' kiangah, “Israel mite’ phunnate ka za khin hi; amaute' kiangah, ‘Khuamui ciangin note in sa na ne ding uh a, zingsang ciangin an na kham ding uh hi; tua ciangin keimah in Topa na Pasian uh ka hihna na thei ding uh hi,’ ci in,” a ci hi. Nitak ciangin vamimte hong tungin giahphual tuam hi; zingsang ciangin giahphual kiim-ah daitui kia hi. Daitui a kap ciangin gamlak lei maitang tungah a pa dildel a, a khal, vukkhal banga a pa dildel leitungah om hi. Israel mite in a muh uh ciangin amaute khat leh khat in, “Bang ahi hiam?” kici uh hi. Bang hang hiam cih leh amaute in tua pen bang hiam cih thei lo uh hi. Moses in amaute' kiangah, “ Topa in nek dinga note' tungah hong piak an ahi hi. Topa ’ thupiak in hih bang hi: ‘Note in na milip-un na kham zah ding uh khawm un; note in na puanbuk sung uh-ah a om mi zah tawh kituakin mi khat in lawhta khat ciat na la ding uh hi,’ ci hi,” ci-in a gen hi. Tua mah bangin Israel mite gamta uh hi; amaute in kaikhawm uh a, kimkhat in tam, kimkhat in tawm kaikhawm hi. Ahih hangin amaute in lawhta khat tawh a teh uh ciangin a tam a kaikhawmpa aa dim val lo a, tawm a kaikhawmpa’ aa dim lah lo hi; a milip-in a kham zah ding khawm uh hi. Moses in amaute' kiangah, “Kuamah in zingsang dong koih kei hen,” a ci hi. Ahih hangin amaute in Moses’ thu ngai lo uh hi; mi pawl khat in zingsang dong koih uh a, than omin ning hi; amaute' tungah Moses heh hi. Zingsang simin amaute in a kham zah ding ciat uh khawm uh hi; ahih hangin ni a sat ciangin tuisuak hi. A ni guk ni-in amaute in an a zah nih, lawhta nih ciat, khawm uh hi; mihon makaite khempeuh hong pai-in Moses' kiangah a gen uh ciangin, amah in amaute' kiangah, “Hih in Topa ’ hong thupiak ahi hi: ‘Zing ciang pen a thupi-a tawlngak ni, Topa ’ adingin sabbath siangtho ni ahi hi; na em dingte uh em-in, na huan dingte uh huan un la, a om lai teng zingsang ciang dong koih un,’ ci hi,” ci-in a gen hi. Tua ahih ciangin amaute in Moses’ sawl bangin zingsang dong koih uh hi; ning lo a, a sungah thante om lo hi. Moses in, “Tu ni-in ne un, tu ni-in Topa adingin sabbath ahi hi; tu ni-in gamlakah na mu kei ding uh hi; Note in ni guk sung na khawm ding uh hi; ahih hangin sabbath ni ahi a ni sagih ni-in bang mah om lo ding hi,” a ci hi. A ni sagih ni-in a kaikhawm dingin mi pawl khat kuan khia uh a, amaute in bangmah mu lo uh hi. Topa in Moses' kiangah, “Ka thupiakte leh ka thute zuih ding bang tan vei nial ding na hi hiam? Thei in! Topa in nang' tungah sabbath hong pia zo hi, tua ahih ciangin a ni guk ni-in amah in nang' tungah ni nih ading an hong pia hi; note na milip-un nomau' omna ciatah om un, a ni sagih ni-in ama' omna panin kuamah paikhia kei hen,” a ci hi. Tua ahih ciangin a ni sagih ni-in mite tawlnga hi. Tu-in Israel mite in a min manna ci uh hi; tua pen nannan tang tawh kibangin, a meel kang a, a limna pen, khuaizu tawh a kibawl mohpheng tawh kibang hi. Moses in, “Hih in Topa ’ thupiaksa ahi hi: ‘Izipt leitang panin note kong paikhiatpih lai-in gamlakah note kong vakna an amaute in a muh theih nadingun na khang tawntungun lawhta dim khat kem un,’ ci hi,” ci-in a gen hi. Moses in Aaron’ kiangah, “Beel khat la in la, tua sungah manna lawhta dim khat koih in la, na khang tawntungun a kikem dingin Topa ’ mai-ah koih in,” a ci hi. Topa in Moses a thupiak bangin Aaron in kep dingin Tecipan’na mai-ah koih hi. Amaute' teen’ theih nading leitang a tun’ mateng, kum sawmli sung Israel mite in manna ne uh hi; amaute Kanaan gamgi a tun’ matengun manna ne uh hi. (Lawhta khat in seu khat seh-sawm-suah-seh-khat ahi hi.) Topa ’ thupiak bangin Israel mihon khempeuh Sin gamlak panin giahphual a ban banin sat uh a, Refidim-ah phual sat uh hi; ahih hangin mite’ dawn ding tui om lo hi. Tua ahih ciangin mite in Moses’ mawhna zong uh a, “Tui dawn ding hong pia in,” ci uh hi. Moses in amaute' kiangah, “Bang hangin kei tungah mawhna hong zong na hi uh hiam? Bang hangin Topa ze-et na hi uh hiam?” ci hi. Ahih hangin tua mun-ah tui duhin mite dangtak uh a, Moses tungah mite phun-in, “Kote leh ka tate uh leh ka ganhingte uh dangtakin a si dingin bang hangin Izipt panin kote hong paipih to na hi hiam?” ci uh hi. Tua ahih ciangin Topa' tungah Moses kiko a, “Hih mite bang cih ding ka hi hiam? Suang tawh kei hong deeng dingin amaute kithawi uh hi,” a ci hi. Topa in Moses' kiangah, “Israel upate pawl khat samin mite mai-ah pai in; Nail na satna ciangkhut na khut-in tawi in la, pai in. En in, Horeb-a suangpi-ah nangma' mai-ah ka ding ding hi; nang in suangpi na sat ding a, mite in tui a dawn theih nadingin tua suang panin tui hong phul khia ding hi,” a ci hi. Isarel upate’ muhna-ah tua mah bangin Moses gamta hi. Israel mite’ mawh zon’na leh amaute in Topa ze-etin, “Eite' lakah Topa om hiam om lo hiam?” a cihna hangun, amah in tua mun pen Massah leh Meribah ci-in min phuak hi. Tua ciangin Amalek mite hong pai-in Israel mite tawh Refidim-ah kido uh hi. Moses in Joshua' kiangah, “Eite adingin mi teel in la, paikhia-in Amalek mite tawh kido in; zing ciangin ka khut sungah Pasian' ciangkhut tawh mual dawn-ah ka ding ding hi,” a ci hi. Tua ahih bangin Joshua gamta a, Amalekte tawh kido uh hi, Moses, Aaron leh Hurte mual dawn ah paito uh hi. Moses in a khut a san’sak peuhmah ciangin Israel in neh hi; amah in a khut a niamsak peuhmah ciangin Amalekte in neh hi. Ahih hangin Moses a khut kham hi; tua ahih ciangin amaute in suangtum khat la-in ama' nuai-ah koih uh a, tua tungah amah tu a, Aaron leh Hur in a pang khat tuak panin ama' khutte len uh hi; tua ahih ciangin nitum mateng ama' khutte kip hi. Joshua in Amalek leh ama' mite namsau tawh vat maai hi. Topa in Moses' kiangah, “Keimah in vantung nuai khempeuh panin Amalek mite a kiphawkna ka phiat siangtho nading thu phawk nadingin hih thu laibu sung khatah gelh in la, Joshua’ kiangah genkik in,” a ci hi. Moses in biakna tau khat lamin a min dingin Topa in keima' zawhna lim ahi hi, ci-in phuak a, “ Topa ’ dial len in! Topa in a khang khangin Amalek mite do ding hi,” a ci hi. Moses’ sungpa, Midian siampi Jethro in Moses leh ama' mi Israelte’ adingin Pasian’ bawlsa khempeuh, Topa in Izipt panin Israel mite a paikhiatpihna thu za hi. - Tu-in Moses' sungpa Jethro in, amah in a sawl kik khit-a kipanin Moses’ zi Zipporah leh ama' tapa nihte kem a, a khat min in Gershom ahi hi (Bang hang hiam cih leh amah in, “Gam dangah peemta ka hi hi,” ci hi), a dang khat’ min in Eliezer ahi hi (bang hang hiam cih leh amah in, “Ka pa’ Pasian in keimah hong huhpa hi a, Faro’ namsau panin kei hong honkhia hi,” ci hi.) Pasian’ mual tungah giahphual a satna gamlak Moses' kiangah ama' tapate leh a zi tawh, Moses' sungpa Jethro hong pai hi. Mi khat in Moses' kiangah, “En in, na zi leh a tapa nihte tawh nang' kiangah na sungpa Jethro hong pai hi,” a cih ciangin a sungpa dawn dingin Moses paikhia a, zahtakna pia-in amah nam hi; amaute khat leh khat omzia kidong tuak uh a, puanbuk sungah pai uh hi. Tua ciangin Moses in a sungpa' kiangah Topa in Israel mite hangin Faro tung leh Izipt mite' tungah a bawlte khempeuh, lampi-ah amau' tungah a tung haksatna khempeuh leh Topa in amaute a hotkhiatna thu gen hi. Izipt mite’ khut sung panin amah in amaute a khahkhiatna, Israel mite' tungah Topa in a hoih a bawlte khempeuh hangin Jethro lungdam hi. Jethro in, “Izipt mite leh Faro' khut sung panin note hong khahkhia Topa in thupha ngah ta hen. Topa in pasian khempeuh sangin a liat zawkna tu-in ka thei hi, bang hang hiam cih leh mite' tungah kiphatsakna tawh Izipt mite a gamtat lai takin amah in Iziptte’ khut nuai panin mite khahkhia hi,” a ci hi. Moses’ sungpa Jethro in Pasian' tungah meihal biakna leh biak piakna bawl hi; Pasian’ mai-ah Moses’ sungpa tawh an a ne dingin Israel upate khempeuh tawh Aaron hong pai hi. A zing ciangin mite thukhen dingin Moses tu a, zingsang a kipan nitak dongin Moses’ kiim-ah mite ding uh hi. Mihingte adingin ama' hihte khempeuh Moses’ sungpa in a muh ciangin, amah in, “Mihingte' adinga nang' sep hih in bang ahi hiam? Bang hangin nang bek tu a, zingsanga kipan nitak dongin na kiim-ah mite khempeuh ding ahi uh hiam?” a ci hi. Moses in a sungpa' kiangah, “Bang hang hiam cih leh Pasian’ deihna kan dingin kei' kiangah mite hong pai hi; amaute in thu a neih uh ciangin kei' kiangah hong pai uh a, mi khat leh a vengpa' kikal-ah thu ka khen a, Pasian’ ngeina kipte leh ama' thukhennate amaute ka theisak hi,” a ci hi. Moses’ sungpa in ama' kiangah, “Nangma' hih zia hoih lo hi. Nang leh nangmah tawh a om mite in na zawngkhal lawh ding uh hi, bang hang hiam cih leh tua nasep in nang’ ading gik lua hi; nang bek in na sem khin zo kei hi. Tu-in ka thu hong ngai in; thu kong lak ding hi, Pasian in nang tawh hong om ta hen; Nangmah in Pasian' mai-ah mite' tangin pai-in, amau’ thute Pasian' kiangah na gen ding hi; nangmah in ngeina kipte leh thukhennate amaute na hilh ding a, amau' lam pai nading leh amau' sep dingte amaute na theisak ding hi. Tua tham loin, mi khempeuh lak panin Pasian a zahtak mi, a muanhuai mi leh sumgolh a mudah mi, misiamte na teelkhia ding hi; tua bang mite pen mi a tul, a za, a sawmnga, a sawmte' tungah a uk dingin na koih ding hi. Mite’ thu amaute khensak tawntung in; amaute in thu lian peuhmah ' kiangah hong puak ding uh hi, ahih hangin thu neute amau mah in khen tawm ding uh hi; tua hi leh nang adingin baih zaw ding hi, amaute in vangik hong puakpih ding uh hi. Hih bangin hih lecin Pasian in thahatna hong pia ding a, nangmah in na sem paisuak zo ding hi; tua tham loin hih mite khempeuh zong amau' omna-ah lungnuam takin ciah thei ding uh hi,” a ci hi. Tua ahih ciangin Moses in a sungpa’ thu ngai-in ama' gen khempeuh hih hi. Israel khempeuh' sung panin Moses in mipil misiamte teel a, mite a tul, a za, a sawmnga, a sawmte' tungah a uk-in mite lutang-in amaute bawl hi. Amaute in mite' tungah a tawntungin thukhen uh hi; amaute in thuhaksate Moses' tungah puak uh a, ahih hangin thu neute amaute in khen tawm uh hi. Tua ciangin Moses in a sungpa ciah khiasak a, Jethro zong ama' gamah a ciah hi. Israel mite Izipt leitang panin a paikhiat zawh kha thumna a khadet ni-in amaute Sinai gamlak tung uh hi. Amaute Refidim panin ding khia-in Sinai gamlak a tun’ uh ciangin, amaute in gamlak tua mual mai-ah giahphual sat uh hi. Pasian' kiangah Moses pai to a, Topa in mual panin amah sam a, “Jakob’ suan-le-khak Israel mite' tungah hih bangin na gen ding hi; Izipt mite tungah ka bawlna leh muvanlai in a kha tawh a note a puak bangin note hong pua-in keima' kiangah kong paipihna na mu khin uh hi. Tua ahih ciangin tu-in note in ka thu mang-in ka thuciamna na zuih uh leh mite khempeuh lak panin note in keima' neihsa na hi ding uh hi; bang hang hiam cih leh leitung khempeuh keima aa hi a, Note in keima' siampi nasep a sem minam, leh minam siangtho na hi ding uh hi. Israel mite' tungah na gen ding in hih thute ahi hi,” a ci hi. Tua ahih ciangin Moses hong pai-in mite’ upate samin, Topa in amah a thupiak hih thute khempeuh amaute’ mai-ah sung hi. Mi khempeuh in, “ Topa ’ gensa khempeuh ka hih ding uh hi,” ci-in dawng khawm uh hi. Moses in mite’ thugente Topa ’ tungah gen hi. Topa in Moses' tungah, “En in, nang kong hopih ciangin mite in a zak theih nading leh nang zong hong up tawntung nadingun meii sahpi sungah nang' kiangah kong pai ding hi,” a ci hi. Tua ciangin Moses in mite’ thugente Topa' tungah gen hi. Topa in Moses' kiangah, “Mite' kiangah pai in la tu ni leh zingciang sung teng amaute siangthosakin, amau’ puante amau mah sawp sakin, a ni thum ni-in a baihsa-in om in; bang hang hiam cih leh a ni thum ni-in Sinai Mual tungah mite khempeuh’ muhna-ah Topa hong paisuk ding hi. Nangmah in mite’ adingin dalna khat a kimkotah na koih ding a, ‘Mual tungah pai loin, a gamgi na lawn’ khak loh nadingun kidawm un; mual a lawng peuhpeuh kithat ding hi; khut peuhmah in tua mipa lawng kha lo ding a, amah suang tawh kideng lum ahih kei leh kikap lum ding hi; ganhing hita leh mihing hita leh kihing khawi lo ding hi,’ na ci ding hi. Peengkul sau veipi hong kitum ciangin amaute mual tungah hong paito ding uh hi,” a ci hi. Tua ahih ciangin Moses mual tung panin mite' kiangah paisuk a, mite siangthosak hi; amaute in a puante uh sawp uh hi. Amah in mite' kiangah, “Ni thum ni ciangin a baihsa-in om un; numei tawh lumkhawm kei un,” a ci hi. A ni thum ni zingsang ciangin vangingte leh khuaphialepte omin, mual tungah meii sahpi om a, nakpi takin a ging peengkul kitum ahih manin giahphual-a om mi khempeuh liing uh hi. Tua ciangin Moses in giahphual panin Pasian a dawn dingin mite paikhiatpih hi; amaute a om nading uh mual bul-ah om uh hi. Sinai Mual meikhu in tuamcip hi, bang hang hiam cih leh Topa in mei sungah tua mual tungah kum hi; a khu in meiphualpikhu bangin kahto a, a mual buppi nakpi takin liing hi. Peengkul aw a nak gin’ semsem laitakin Moses pau a, Pasian in vanging sungah amah dawng hi. Sinai Mual dawn-ah Topa hong paisuk hi; Topa in tua mual dawnah Moses sam a, Moses zong paito hi. Topa in Moses' kiangah, “Amaute in Topa a en dingin hong kantanin amaute tampi tak si kha ding ahih manin paisuk in la mite hilhkhol in. Amaute' tungah Topa heh lua kha ding ahih manin, Topa' kiangah hong pai siampite zong amaute mah kisiangtho tawmsak hen,” a ci hi. Moses in Topa ’ tungah, “Sinai Mual dongah mite hong pai thei lo hi; bang hang hiam cih leh nangmahmah in kote nong thuhilh a, ‘Mual kimkotah dalnate bawl in la siangthosak in,’ nong ci hi,” a ci hi. Topa in ama' kiangah, “Paisuk in la, Aaron hong paipih to in; ahih hangin amaute' tungah amah heh lua kha ding ahih manin Topa' kiang dongah a pai dingin siampite leh mite paisuaksak kei in,” a ci hi. Tua ahih ciangin mite' kiangah Moses paisukin amaute' kiangah gen hi. Pasian in hih thute khempeuh gen a, “Keimah in salsuahna, Izipt leitang panin nang a hong paikhiatpih Topa na Pasian ka hi hi. “Keimah longal pasian dang na nei kei ding hi. “A kiseek milim hita leh, tunga vantung hita leh, nuai-a lei sung hita leh, lei nuai-a om tui sungah hita leh a om na khat peuhpeuh a sun khat peuhpeuh nang adingin na bawl kei ding hi; amaute' mai-ah kun loin, amaute na bia kei ding hi; bang hang hiam cih leh keimah Topa na Pasian in a aam Pasian ka hi a, kei hong mudahte' tungah pate’ mawhna tate tungah khang thum khang lina dongin thukin, ahih hangin kei hong it-in ka thupiakte a zui mi a khang tul tampite' tungah itna kip a lakpa ka hi hi. “ Topa na Pasian’ min na zangkhai ngaihsut kei ding hi; bang hang hiam cih leh Topa in ama' min a zangkhai ngaihsut mi a mawh lo hi, ci lo ding hi. “Sabbath ni a siangtho-a zat ding phawk in. Ni guk sung nangma' na semin na nasep ding khempeuh na hih ding hi; ahih hangin a ni sagih niin Topa na Pasian’ sabbath ahi hi; tua ni-in nang, na tapa, na tanu, na nasempa, na nasem nu, na ganhing ahi a, na huang sung a om peemtate in ahi zongin na bangmah na sem kei ding uh hi; bang hang hiam cih leh a ni guk sung tengin Topa in van leh lei, tuipi leh tuate' sunga om khempeuh bawl a, a ni sagih ni tawlnga hi; tua ahih ciangin Topa in sabbath ni thupha pia-in siangthosak hi. “ Topa na Pasian in nang hong piak leitang tungah na khan’ a sau theihna dingin na nu leh pa zahtak in. “Mi na that kei ding hi. “Nu-le-pa mawhna na bawl kei ding hi. “Na na gu kei ding hi. “Na vengte' lang khatah a man lo teci na pang kei ding hi. “Na vengte’ inn na deihgawh kei ding hi; na vengte’ zi hita leh, ama' nasempa hita leh, ama' nasem nu hita leh, ama' bawngtal hita leh, ama' la hita leh, na vengte aa ahi na khat peuhpeuh na deihgawh kei ding hi,” a ci hi. Tu-in mite khempeuh in vangingte, khuaphialepte, peengkul aw leh mual meikhu thu a theihtel uh ciangin, mite lau-in liing uh hi; amaute a gamla-ah ding uh a, Moses' kiangah, “Nangmah in kote' kiangah thu hong gen in, kote in ka ngai ding uh hi; ahih hangin, kote si kha ding ka hih ciangun kote' tungah Pasian hong gensak kei in,” a ci uh hi. Moses in mite' kiangah, “Lau kei un; bang hang hiam cih leh note na khialh khak loh nadingun note in amah na kihtak theih nadingun note a entel dingin Pasian hong pai ahi hi,” a ci hi. Pasian’ omna meii sah' kiang ah Moses a pai lai takin mite a gamla-ah ding uh hi. Topa in Moses' kiangah, “Nangmah in Israel mite' tungah hih bangin na gen ding hi: ‘Vantung panin note kong hopihna note mahmah in na thei khin uh hi. Note in kei tawh nong biak khop dingun ngun pasiante na bawl kei ding uh a, note’ adingin kham pasiante zong na bawl kei ding uh hi. Note in keima' adingin lei tawh kibawl biakna tau khat na bawl ding uh a, tua tungah na meihal biaknate uh leh thunuam-a na biaknate uh, na tuute leh na bawngtalte uh pia un; keima' min a kiphawk nading mun-a ka bawlna peuhmah-ah note' kiangah keimah hong pai-in note thupha kong pia ding hi. Note in keima' adingin suang tawh biakna tau na bawl uh leh, a kiseek suang tawh na bawl kei ding uh hi; bang hang hiam cih leh na na-zatte uh tawh na va suk uh leh a ninsak na hi uh hi. Tua' tungah na selsim uh a kidawk loh nadingin ka biakna tau tung kahtoh nading kahlei a kul-in tausang na bawl kei ding uh hi,’ ci in. “Tu-in hihte in amaute’ tungah na piak ding biakna ngeina kipte ahi hi. Hebru mi sila khat na lei ciangin, amah in kum guk sung nasem ding a, a kum sagihna ciangin bangmah pia loin suakta-in amah paikhia ding hi. Amah guakin hong pai ahih leh amah guak mahin paikhia ding hi; zi neisa-in hong pai leh amah tawh a zi zong paikhia ding hi. A topa in amah zi guan a, tua nu in amah tawh tapate ahi a, tanute ahi zongin a neih leh, a zi leh a tate in a topa’ aa hi ding a, amah guakin paikhia ding hi. Ahih hangin sila in a kitel takin genin, ‘Ka topa, ka zi, leh ka tate ka it hi; a suakta-in ka paikhia kei ding hi,’ a cih leh, tua ciangin a topa in Pasian' kiangah amah paipih ding hi, amah in kongkhak ahi a, kongkhak khuam-ah ahi zongin amah paipih ding hi; a topa in phimpi khat tawh ama bil vuhsak ding hi; amah in a nuntak tawntung ama' na sepsak ding hi. “Mi khat in a tanu sila-in a zuak ciangin, tua nu in pasal-silate bangin paikhia lo ding hi. A topa in ama' zi dingin a sehsa tua numei in amah a lungkimsak kei leh, amah in tua nu kitanhsak ding hi; amah in tua nu' tungah citakin gamta lo ahih manin, amah in gamdang mi khat' tungah tua nu a zuak theih nading thu nei lo ding hi. Amah in a tapa’ adingin tua nu a seh leh, amah in tanu bangin tua nu bawl ding hi. Amah in ama' adingin zi dang khat a lak leh, amah in a masa numei’ annek, a puansilh, ahih kei leh lup khopna ding thu neihna khiam lo ding hi. Amah in hih thu thumte tua nu’ adingin a bawl kei leh, sum piak kul lo, bangmah a kul loin tua nu paikhia thei ding hi. “Mi khat sat-in a sisak mi peuhpeuh kithat ding hi. Ahih hangin amah in a pan’sim hi lo a, ama' khut sungah Pasian in a puksak ahih leh, amah a tai theih nadingin note’ ading mun khat ka seh ding hi. Ahih hangin mi khat in zuauna tawh mi dang khat thah ding tumin a hih leh, amah na thah theih nadingun note in ka biakna tau nangawn panin amah na la teitei ding uh hi. “Ama' pa hita leh, ama' nu hita leh, a sat peuhmah kithat ding hi. “Mi khat gu a, amah in a zuak ahi a, amah in a neih lam ahi zongin a kimuhna mi peuhmah kithat ding hi. “Ama' pa hita leh, ama' nu hita leh, a samsia mi peuhmah kithat ding hi. “Mite kitawng a, khat in a dang khat suangtum khat tawh ahi a, ama' khuttum tawh ahi zongin tumin, mipa a sih loh hangin lupna ngakin, tua ciangin mipa tho zo-in ama' ciangkhut tawh a vak khiat kik zawh nak leh, amah a tumpa siang ding hi; amah in ama' hun bei sung teng tangding bek ama' tungah loh ding a, amah dam siangsak ding hi. “Mi khat in molhtum khat tawh ama' sila ahi pasal hita leh numei hita leh satin a phual-ah a sih pah leh, amah kidantat ding hi. Ahih hangin ni khat ahi a, ni nih khit ciang ahi zongin sila hong thawhzawh leh, amah dantah ding hilo hi; bang hang hiam cih leh sila in ama' neihsa ahih manin sila a sih ciangin a kidantah zah ding tang a sumh khin ahi hi. “Mite kitawngin numei naupaii khat liamsak a, ta-tolh-in; ahi zongin siatna in a zuih beh kei nak leh, tua nu’ pasal in ama' tunga a cih zah tawh kituakin tua numei a liamsak mi kigam ding hi; amah in thukhente’ khenna bangin liau ding hi. Siatna khat peuh in a zuih beh leh, tua ciangin nuntakna tangding nuntakna, mit tangding mit, ha tangding ha, khut tangding khut, khe tangding khe, meikang tangding meikang, liamna tang ding liamna, satna tangding satna pia ding hi. “Mi khat in ama' sila ahi pasal hita leh numei hita leh a mit sat-in a suksiat leh amah in tua mit’ hangin sila suaktasakin paikhiasak ding hi. Amah in a sila ahi pasal hita leh numei hita leh a ha a tup khiat leh, amah in tua ha’ hangin sila suaktasakin paikhiasak ding hi. “Bawngtal khat in pasal hita leh numei hita leh a ki tawh a sik lup ciangin, a bawngtal kideng lum ding a, a sa kine lo ding hi; ahih hangin bawngtal neipa siang ding hi. Ahih hangin a hun beisa-ah bawngtal in mi si thei a, a neipa kihilh napi-in a khum cip kei a, tua bawngtal in pasal ahi a, numei ahi zongin a thah leh, bawngtal kideng lum ding a, a neipa zong kithat ding hi. Ama'tung pan tatkhiatna sum a kinget leh, ama' nuntakna tatkhiat nadingin ama' tungah a kingen zahzah amah in pia ding hi. Tua bawngtal in mi’ tapa ahi a, tanu ahi zongin a ki tawh a sik leh hih ngeina tawh kizui-in kigamta ding hi. Bawngtal in sila ahi pasal hita leh numei hita leh khat a ki tawh a sik leh, a neipa in amau’ topa tungah ngun shekel sawmthum pia ding a, bawngtal kideng lum ding hi. “Mi khat in dum honsa-in a nusia ahi a, mi khat in dum a tawh ciangin sin loin om ahi zongin, bawngtal hita leh la hita leh tua dum sungah a kiat leh, dum neipa in loh ding hi; amah in a neipa' tungah sum pia ding a, ganhing luang pen ama aa hi ding hi. “Mi khat’ bawngtal in a dang khat’ bawngtal liamsakin a sih leh, tua ciangin amaute in bawngtal a hing pen zuak ding uh a, tua man hawm ding uh hi; a ganhing si pen zong amaute in hawm ding uh hi. Tua bang hi lo a, bawngtal in a beisa hunin mite si ngei hi ci-in kithei-a, a neipa in a khumcip kei leh, amah in bawngtal tangding bawngtal pia ding a, a si ganhing pen 'a hi ding hi. “Mi khat in lo khat ahi a, leenggui lo-ah ahi zongin gan tasak a, a ganhing khah-in mi dang khat’ lo-ah a tat leh, amah in ama' lo leh ama' leenggah lo panin a hoih pen tawh ditkikna bawl ding hi. “Mei kuang in gam kang a, a kikhol an ahi a, a ding lai an ahi a, lo ahi zongin a kat leh, mei a kangsakpa in a cing takin ditkikna bawl ding hi. “Mi khat in a vengte' kiangah sum ahi a, van ahi zongin kep dingin pia a, tua mipa’ inn panin a kiguk leh, a gupa a kimuh leh amah in a zah nih pia ding hi. A gupa a kimuh kei leh a vengpa’ vante amah in gu hiam gu lo hiam cih a kitel nadingin thukhente' mai-ah inn neipa kipaipih ding hi. “Thu neihna khat peuhpeuh, bawngtal ahi a, la ahi a, tuu ahi a, puansilh ahi zongin, a mang na khat peuhpeuh, mi khat in, ‘Hih pen kei aa hi,’ a cihna thu-ah, a lang nihte’ thu pen thukhente’ mai-ah tung ding hi; thukhente in a mawhsak mipa in a vengpa' tungah a zah nih pia ding hi. “Mi khat in ama vengte' tungah la ahi a, bawngtal ahi a, tuu ahi zongin, ganhing khat peuhpeuh kep dingin a piak a, kuama' muh lohin tua ganhing a si a, a liam a, a kihawl khia ahi zongin ahih leh, amah in a vengpa’ neihsa a gu kha hiam cih a kitheih nadingin amaute gel’ kikal-ah Topa tawh kiciamna om ding hi; a neipa in tua kiciamna saang ding a, amah in ditkikna bawl lo ding hi. Ahih hangin ama' tung panin a kigu ahih leh, a neipa' tungah amah in ditkikna bawl ding hi. Gamsa in a balzan ahih leh, lahtel nadingin tua ganhing paipihsak in; a kibalzan ganhing ditkikna amah in bawl lo ding hi. “Mi khat in a vengte’ na khat peuhpeuh kawm a, a neipa om loin a liam a, a si zongin, amah in a kicingin ditkikna bawl ding hi. A neipa tawh a omkhawm ahih leh amah in ditkikna bawl lo ding hi; a kikawm ahih leh a kikawm bangin pai ding hi. “Mi khat in a kidong nai lo nungak khat zolin amah tawh a lup khop leh, amah in tua nu’ man ding moman letsong pia ding a, ama' zi hisak ding hi. A numei’ pa in ama' tungah tua nu piak ding a nial leh, tua mipa in nungak moman letsong zah numei’ pa’ tungah sum pia veve ding hi. “Numei aisannu na hing khawi kei ding uh hi. “Ganhing tawh a mawh peuhmah kithat ding hi. “ Topa bek sim loh pasian khat peuhpeuh' tungah biakna a pia peuhmah kisusia mang ding hi. “Khual mi khat' tungah khialhna na bawl kei ding uh a, amah na nengniam kei ding uh hi, bang hang hiam cih leh note in Izipt leitangah khual mite na hi ngei uh hi. Meigong numei ahi a, tagah ahi zongin na gimsak kei ding uh hi. Note in amaute na gimsak uh a, amaute keima' tungah hong kiko leh, keimah in amau’ kikona ka za taktak ding hi; ka hehna so-in namsau tawh note kong that ding a, na zite uh meigong numei leh na tate uh pa nei lo suak ding uh hi. “Note tawh a om, a zawng keima' mite khat peuhpeuh' tungah sum leitawi na piak uh leh, ama' tungah sum leitawi a piapa bangin na om kei ding uh a, ama' tung panin a meet na dok kei ding uh hi. Khapna ahi na vengpa’ puansilh na lak ngei khak leh nitum ma-in ama' tungah na piakik ding hi; bang hang hiam cih leh ama' kituamna in tua bek hi a, tua in ama' pumpi adingin puansilh ahi hi; amah bang dang tawh lum ding ahi hiam? Amah kei' tungah hong kiko leh ke’n ka za ding hi, bang hang hiam cih leh keimah in hehpihna ka nei hi. “Pasian na simmawh kei ding uh a, na mite uh a ukpa zong na samsia kei ding uh hi. “Na anlakna pan leh na suknate panun a leetkhiate piak ding na zekai kei ding uh hi. “Na tapa cilte uh keima' tungah nong pia ding uh hi. Na bawngtalte leh na tuute uh tawh tua mah bangin na hih ding uh hi; ni sagih sung a pi tawh om ding hi; a ni giat ni-in kei' tungah nong pia ding uh hi. “Note in kei' tungah hong ki-ap mite na hi ding uh hi; tua ahih ciangin gamlakah gamsate in a balzan sa peuhmah note in na ne kei ding uh hi; note in tua sa uite na lot ding uh hi. “Thu manlo na gen khia kei ding uh hi. Elna tawh teci pang dingin mi gilopa tawh na kipawl kei ding uh hi. Siatna bawl dingin mihon na zui kei ding uh hi; thutang a heikhia dingin mi honpi' nungah kihei-in thu neihna-ah teci na pang kei ding uh hi; ama' thu neihna-ah mi zawngpa na lang neih kei ding uh hi. “Na galte’ bawngtal ahi a, a la ahi zongin a gammang na tuah uh leh ama' kiangah na hawl kik ding uh hi. Nangmah a hong mudahpa’ la a van tawh a puk na muh leh a la tawh amah na nusia kei ding a, tua la phot toh ding na huh ding hi. “Ama'thu neihna-ah na mi zawngpa’ thutan’na na heikhiatsak kei ding hi. A man lopi-a mi mawhsak ding panin kikem un la, a dikpa leh thumanpa that kei un, bang hang hiam cih leh gilo mi ka khah kei ding hi. Sumgolh na la kei ding uh hi, bang hang hiam na cih leh sumgolh in uliante mit tawsak a, thuman mite’ thu hei khiatsak hi. “Khual mi na nengniam kei ding uh hi; khual mi’ lungsim na thei uh hi, bang hang hiam cih leh note in Izipt leitangah khual mi na hi ngei uh hi. “Note in na leitang uh-ah kum guk sung khai tuhin a piangte na kaikhawm ding uh hi; ahih hangin a kum sagihna ciangin, nomau' mi a zawngte in a nek theih nadingin leitang tawlnga sakin lokhul-in na omsak ding uh hi; gamlak ganhingte in amau’ nusiatte ne thei ding uh hi. Na leenggui lote uh leh na oliv lote uh zong tua mah bangin na hih ding uh hi. “Ni guk sung na nasep uh na sem ding uh hi, ahih hangin na bawngtal leh na la in tawlngakna a neih theih nading leh, na numei-nasem’ tapa leh khual mite in thathak a ngah theih nadingin a ni sagih ni-in na tawlnga ding hi. Nang' tunga kong gente khempeuh thudon in; pasian dangte’ min genin nei kei in la, na kam sung panin zong tua bangte kizasak kei in. “Kum khat in thum vei, keimah adingin pawi na bawl ding uh hi. Silngo sawhloh anlum pawi na bawl ding uh hi; keimah in note kong thupiak bangin Abib kha sung a kisehsa hun ciangin ni sagih sung silngo sawhloh anlum na ne ding uh hi, bang hang hiam cih leh tua kha sungin Izipt panin note na paikhia uh hi. Khut hawm guak tawh keima' maiah kuamah hong kilaak lo ding hi. Note in lo-a na tuh uh, na nasepna uh a gah masa, anlak pawi na bawl ding uh hi. Note in lo panin na nasepna uh a gah na kaihkhop uh kum bei ciangin kaihkhopna pawi na bawl ding uh hi. Topa PASIAN ’ mai-ah pasal khempeuh kum khat in thum vei kilaak ding uh hi. “Note in silngo sawh anlum tawh keimah biak piakna si na pia khawm kei ding uh a, ka pawi’ sathau zong zingsang dong na omsak kei ding uh hi. “Note in na anpalte uh lakah a tung masa pen Topa na Pasian uh’ innah na paipih ding uh hi. “Note in a pi’ nawizu tawh keelno na huan kei ding uh hi. “En un, keimah in ka bawlsa mun-ah note hong paipih ding leh lam kal-ah note hong cing dingin note’ mai-ah vantung mi khat ka sawl hi. Amah thudon-in ama' aw ngai un la amah lehdo kei un, bang hang hiam cih leh amah in note’ thu palsatna hong maisak lo ding hi; bang hang hiam cih leh keima' min tawh nasem ahi hi. “Ahih hangin note in ama' aw lim takin ngai-in keima' gen bangin na gamtat uh leh na galte uh’ tungah gal ka hi ding a, na langte uh’ tungah lang ka hi ding hi. “Note’ mai-ah ka vantungmi pai-in Amor mite, Hit mite, Perez mite, Kanaan mite, Hiv mite leh Jebus mite' kiangah note hong paipihin, keimah in amaute ka phiatkhiat ciangin, amau’ pasiante’ mai-ah note kun loin, amaute bia loin, amau' gamtat bangin na gamta kei ding uh a, note in amaute lawnthal mang kiuhkeuh-in amau’ milim khuampite na satnen gawp ding uh hi. Note in Topa na Pasian uh’ na nasem ding uh a, keimah in na an uh leh na tui uh thupha ka pia ding hi; keimah in note’ lak panin cinatna ka lakhia ding hi. Note’ leitangah kuamah nausia om lo ding a, a ciing zong om lo ding hi; note kong teek sihsak ding hi. Keimah hong kikihtakna note’ mai-ah paisakin note’ phut khak ding mi khempeuh ka kitokgawpsak ding a, na galte khempeuh uh kinung hei-in note' kiang panin ka taisak ding hi. Note’ mai panin Hiv mi, Kanaan mi leh Hit mi a hawlkhia dingin note’ mai-ah tunpi ka sawl ding hi. Leitang gamkhing suakin gamlak ganhingte note’ lang khatah tampi pha kha ding ahih ciangin note’ mai panin kum khat sungin amaute ka hawlkhia kei ding hi. Note khangin tampi pha-in leitang na luah matengun note’ mai panin tawm tawmin amaute ka hawlkhia ding hi. Keimah in San Tuipi panin Filistia mite’ tuipi ciang leh gamlak panin Eufrates gun ciang dongah na gamgite uh ka phut ding hi; bang hang hiam cih leh tua gam-a teeng mite note’ khut sungah kong pia ding a, note in na mai uh-ah amaute na hawlkhia ding uh hi. Amaute ahi a, amau’ pasiante tawh ahi zongin thuciamna na bawl kei ding uh hi. Amaute in kei' tungah note hong khialsak kha ding ahih ciangin note’ leitang tungah amaute teeng lo ding uh hi; bang hang hiam cih leh note in amau' pasiante’ na nasep uh leh note’ tungah thangzak khat hong hi taktak ding hi,” a ci hi. Tua ciangin amah in Moses' kiangah, “Nang leh Aaron, Nadab, Abihu leh Israel upate' sung pan sawmsagih tawh Topa' kiangah hong pai to un la, a gamla panin hong bia un. Topa ’ nai-ah Moses bek in hong nai ding hi; ahih hangin a dangte a nai-ah hong pai loin, mite amah tawh hong pai to khawm lo ding hi,” a ci hi. Moses hong pai-in Topa ’ thugente khempeuh leh biakna ngeinate khempeuh mite' kiangah gen hi; mite khempeuh in aw kikhatin dawng uh a, “ Topa ’ gensa thute khempeuh ka hih ding uh hi,” a ci uh hi. Moses in Topa ’ thugente khempeuh gelh hi. Zingsangin amah tho baih a, mual bul-ah biakna tau khat lamin, Israel minam sawm-le-nihte tawh kituakin khuam sawm-le-nih phut hi. Amah in Israel mi tangvalte sawlin, tuate in meihal biakna leh thu-nuam-a biakna bawngtalte tawh Topa' tungah pia uh hi. Moses in sisan kimkhat la-in, kuangte sungah koih a, sisan kimkhat biakna tau tungah theh hi. Tua ciangin amah in thuciamna laibu la-in, mite’ zak-in tua laibu sim hi; amaute in, “ Topa ’ gensa khempeuh kote in ka hih ding uh a, kote ka thumang ding uh hi,” ci uh hi. Moses in sisan la-in mite' tungah theh a, “Hih thute khempeuh tawh kizui-in Topa in note tawh a bawlsa thuciamna sisan en un,” a ci hi. Tua ciangin Moses leh Aaron, Nadab, Abihu leh Israel upate' sung pan sawmsagih pai to uh a, amaute in Israel Pasian mu uh hi; ama' khe nuai-ah a siangthona van meel tawh a kibang, suangmanpha tawh a kibawl suangphahpek bang pian om hi. Amah in Israel mi makaite gimna ngahsak lo hi; amaute in Pasian mu uh a, tua ciangin an ne-in tui dawn uh hi. Topa in Moses kiangah, “Keima' kiang mual tungah hong paito in la, tua lai-ah ngak in; amaute a kihilh nadingin keima' gelhsa, thukham leh thupiakna tawh, suangpeekte nang' tungah kong pia ding hi,” a ci hi. Tua ahih ciangin ama' nasempa Joshua tawh Moses kithawi uh a, Pasian' mual tungah paito uh hi. Amah in upate' kiangah, “Note' kiangah kong paikik matengun hih lai-ah kote hong ngak un; en un, note tawh Aaron leh Hur om hi; kitotna a nei peuhpeuh amaute' kiangah paisak un,” a ci hi. Tua ciangin mual tungah Moses paito a, meii in mual tuam hi. Topa ’ minthan’na in Sinai Mual tungah kinga a, meii in ni guk sung tua mual tuam hi; a ni sagih ni-in amah in meii lak panin Moses sam hi. Tu-in Topa; minthan’na a maipuakzia in, Israel mite’ muhna-ah mualvum dawn-ah a kangtum thei meikuang tawh kibang hi. Meii sungah Moses tum a, mual tungah paito hi. Moses sun sawmli leh zan sawmli sung mual tungah om hi. Topa in Moses kiangah, “Amaute in kei adingin biakna hong paipih nadingin Israel mite' kiangah gen in; ama' lungsim in a utsak mi peuhmah tung panin kei adingin biakna na sang ding hi. Amaute' tung panin na san’ ding biakna in hih ahi hi: kham, ngun, sumngo, a dum, a dupsan, a ausan puante leh a kop-a kikhuk khau tawh kigan puan hoih, keel mul, a kisansak tuutal vunte, keel vunte, singkha sing, meivakte ading sathau, nilh sathau ding leh paknamtui dingin a namtui nate, siampipuan leh awmdal-a bulh dingin onik suangte ahi hi. Amaute' lakah kei ka om theih nadingin kei adingin biakinn khat amaute bawlsak in. Biakbuk leh a na-zatte’ lim ding tawh kisai-in nang' tungah kong lahsate khempeuh tawh kituakin nangmah in na bawl ding hi. “Amaute in singkha sing tawh singkuang khat bawl ding uh hi; a dung tong nih leh khap, a vai tong khat leh khap, a san’na tong khat leh khap hi ding hi. Nangmah in kham citak tawh tua singkuang na zut ding a, a sung leh a pua na zut ding hi, a tung kimkot-ah kham tawh a geihual na bawl ding hi. Nangmah in tua singkuang adingin kham kual li sungin a singkuang khe li' tungah tuate na bulh ding a, a pang khatah kual nih, a pang lang khatah kual nih na bulh ding hi. Nangmah in singkha sing zawl na sui ding a, tuate kham tawh na zut ding hi. Singkuang puak nadingin singkuang pang-a kualte' sungah zawlte na khum ding hi. Singkuang’ kualte' sungah a zawlte om suak ding hi; tuate kila khia lo ding hi. Nang' tunga kong piak ding tecipan’na nangmah in singkuang sungah na koih ding hi. Tua ciangin kham citak tawh hehpihna tokhom khat na bawl ding hi; a dung tong nih leh khap, a vai tong khat leh khap hi ding hi. Nangmah in kham tawh kherub nih na bawl ding hi; hehpihna tokhom mong tuak-ah a kiseek tua kherubte na bawl ding hi. Mong khatah kherub khat, a mong lang khatah kherub khat mah bawl in; hehpihna tokhom tawh a kizomin a mong tuak-ah kherubte na bawl ding hi. Kherubte in a khate uh a tungah zal ding uh a, amau’ khate tawh hehpihna tokhom liim sunin amaute khat leh khat kimai-ngat ding uh hi; hehpihna tokhom lamah kherubte’ mai nga ding uh hi. Singkuang tungah hehpihna tokhom na koih ding hi; singkuang sungah nang kong piak ding tecipan’na na koih ding hi. Hehpihna tokhom tung, tecipan’na singkuang tunga om kherub nihte' kikal panin nang tawh ka kituah ding a, Israel mite’ adingin nang' tungah thupiakna kong piak dingte khempeuh nang' tungah kong gen ding hi. “Nangmah in singkha sing tawh sabuai khat na bawl ding hi; a dung tong nih, a vai tong khat, a san’na tong khat leh khap hi ding hi. Kham citak tawh na zut ding a, a kimkotah kham tawh a geihual na bawl ding hi. Nangmah in khut peek cia a zai zawlpeek khat a kimkotah na bawl ding a, tua a zawlpeek kimkot ah a geihuai na bawl ding hi. Nangmah in tua sabuai’ adingin kham kual li na bawl ding a, tuate pen a kiu li, a khe lite-ah na gak ding hi. Sabuai puak nading zawlte a len dingin a zawlpeek gei-ah a kualte om ding hi. Nangmah in singkha sing zawlte bawlin kham tawh na zut ding a, hihte tawh sabuai kipua ding hi. Biak piakna-a a kipiate buak nading paknamtui’ adingin a kuangdaite leh a pakante, tuiphih nadingin a thawl gongbakte leh a kung-ukte na bawl ding hi; kham citak tawh tuate na bawl ding hi. Keima' mai sabuai tungah Ompihna Anlum na koih tawntung ding hi. “Kham citak tawh meivakkhuam khat na bawl ding hi. Meivakkhuam bul leh a kungte pen a kiseek nate tawh kibawl ding hi; a haite, a nunte leh a pakte in tua tawh sa-khat hi khawm ding uh hi; a pangte panin hiang guk meengkhia ding a, a pang khat ah meivakkhuam hiang thum meengkhia-in, a pang lang khatah meivakkhuam hiang thum mah meengkhia ding hi; hiang khat ciat tungah a nun leh a pak a om, almond gah tawh a kibang hai thum leh a dang hiang khat ciat tungah a nun leh a pak a om, almond tawh a kibang hai thum leh a dang hiang khat ciat tungah a nun leh a pak a om, almond tawh a kibang hai thum mah kibawl hi—tua ahih ciangin hiang gukte meivakkhuam panin meengkhia hi; a meivakkhuam tung mahmahah a nunte leh a pakte tawh a om, almond bangin a kibawl hai li om-in, meivakkhuam panin hiang guk a kopte’ bul-ah tua tawh sakhat ahi nun khat om hi Amau’ nunte leh a hiangte in sakhat hi ding a, a vekpi-in kham citak a kiseek sakhat hi ding hi. Nangmah in ama' adingin meivak sagihte na bawl ding hi; ama' omna mai teng khua a vaksak dingin meivakte kikoih ding hi. A taitehte leh a kuangte kham citak hi ding hi. Kham citak talen khat tawh hih nazatte khempeuh kibawl ding hi. Mual tungah nang' tunga hong kilak hih nate pen amau’ lim ding bangin na bawl ding thei in. “Tua tham loin a kop-a kikhuk khau hoih tawh kigan dalna puan sawm leh a dum, a dupsan leh a ausan khaute tawh biakbuk na bawl ding hi; hoih taka a kibawl kherubte tawh tuate na bawl ding hi. Dalna puan a dung tong sawmnih-le-giat hi ding a, dalna puan a vai tong li hi ding hi; dalna puan khempeuh kikim ciat ding hi. Dalna puan ngate khat leh khat kikhuituah ding hi; dalna puan a dang ngate zong khat leh khat kikhuituah ding hi. A kikhuituah a masa dalna puan a nawlnung pen’ nawl dung suk-ah khau dum tawh a bilvangte na bawl ding hi; tua mah bangin a kikhuituah a nihna dalna puan nawlnung pen’ nawl dung suk mah-ah a bilvangte na bawl ding hi. Dalna puan khat tungah bilvang sawmnga bawlin, a kikhuituah a nihna dalna puan nawl-ah bilvang sawmnga mah na bawl ding hi; a bilvangte khat leh khat kitang ding uh hi. Biakbuk pen bup khat a suah theih nadingin nangmah in kham kilhna sawmnga bawlin, kilhnate tawh dalna puan khat leh khat na kimatsak ding hi. “Biakbuk tungah a puanbuk dingin keel mul tawh puante zong na bawl ding hi; puan sawm-le-khat na bawl ding hi. Tua puan a dung tong sawmthum, a vaitong li ciat hi ding hi; puan sawm-le-khatte kikim ding hi. Tua puan ngate amau leh amau khuituahin, puan gukte zong amau leh amau mah na khuituah ding a, a gukna puan pen puanbuk mai-ah na khep ding hi. A kikhuituah puan khat nawl-ah a bilvang sawmnga bawlin, a kikhuituah a nihna puan nawlnung pen nawl-ah a bilvang sawmnga mah na bawl ding hi. “Tua pen bup khat a suah theih nadingin nangmah in sumngo kilhna sawmnga bawlin, a bilvangte sungah kilhnate guangin, puanbuk na kimatsak ding hi. Puanbuk puan a valkhia, puan a lang a val pen, biakbuk nungah kaisuk ding hi. Puanbuk puan a dung lam, pang khatah tong khat, a pang lang khatah tong khat a val pen, a khuh dingin biakbuk hih lam pang leh hua lam pangte-ah kaisuk ding hi. A kisansak tuutal vunte leh keel vunte tawh puanbuk khuhna khat na bawl ding hi. “Biakbuk adingin a po to ding khuampeekte singkha sing na bawl ding hi. A khuampeek khat a tun’ tong sawm hi ding a, a vai tong khat leh khap vive hi ding hi. A bulh nadingin a khuampeek khatah a zang nih ciat om ding hi: Biakbuk khuampeekte na bawl ding hi; leitaw lam pang adingin khuampeek sawmnih hi ding hi; a khuampeek sawmnihte' bul-ah bullen sawmli ngun tawh na bawl ding a, a zang nihte’ adingin khuampeek dang khat bul-ah bullen nih a khuampeek dang khat bul-ah a zang nihte adingin bullen nih mah hi ding hi; biakbuk a pang nihna lam, leilu lam panga a khuampeek sawmnihte leh nguntawh kibawl a bullen sawmlite’ adingin, khuampeek khat bul-ah bullen nih, a dang khuampeek khat bul-ah bullen nih mah hi ding hi; nitumna lam, biakbuk nung lam adingin khuampeek guk na bawl ding hi. Biakbuk nung lam kiute’ adingin a khuampeek nih na bawl ding hi; tuate a bul lamah kikak ding a, ahih hangin a kual masa-ah a dawn kimat ding hi; a nih-in tua bang hi ding hi; tuate in a kiu nihte piangsak ding uh hi. Ngun tawh kibawl amau’ bullen, bullen sawm-le-gukte tawh a khuampeek giat pha ding hi; khuampeek khat bul-ah bullen nih, a dang khuampeek khat bul-ah bullen nih mah om ding hi. “Singkha sing, zawl-in na bawl ding hi, biakbuk pang khat-a khuampeek adingin nga, biakbuk a pang lang khat-a khuampeek adingin zawl nga, nitumna lam biakbuk nung lam pang-a a khuampeekte’ adingin zawl nga hi ding hi. A zawl laita, a khuampeek kim ciang a banto pen mong khat pan mong khat paisuak ding hi. A khuampeekte kham tawh zut-in, zawlte a len dingin amau kualte kham tawh na bawl ding hi; zawlte kham tawh na zut ding hi. A lim ding geelna, mual tungah nang' tungah hong kilak mah tawh kizui-in biakbuk na lam ding hi. “A dum, a dupsan, a ausan nate leh a kop-a kikhuk khau hoih tawh dalna puan khat na bawl ding hi; hoih taka a kibawl kherubte tawh kibawl ding hi; ngun tawh kibawl bullen lite' tungah a om kham kibawl vankhaina nei-in, kham tawh a kizut singkha khuampi lite' tungah na khai ding hi. A kilhnate-ah dalna puan khai sukin, dalna puan sung tua lai mun-ah tecipan’na singkuang na koih ding hi; dalna puan in siangtho pen mun panin siangtho mun khen ding hi. Siangtho pen mun sunga om tecipan’na singkuang tungah hehpihna tokhom na koih ding hi. Dalna puan pua lamah sabuai koih-in, sabuai tawh a kisan biakbuk leitaw lam pangah meivakkhuam na koih ding hi; leilu lam pangah sabuai na koih ding hi. “Puanbuk kongkhak dingin, a dum, a dupsan, a ausan khaute leh a kop-a kikhuk khau hoih tawh a kigan, phim tawh kikhui-in a kizem kongpuankhai khat na bawl ding hi. Kongpuankhai adingin singkha khuampi nga bawlin kham tawh na zut ding hi; a vankhainate kham hi ding a, tuate’ adingin sumngo bullen nga na bawl ding hi. “Biakna tau singkha sing tawh bawlin, tong nga sau-in tong nga na zaisak ding hi; biakna tau a ning kim ding a, a tun’ tong thum hi ding hi. A kiu lite-ah ki na bawl ding hi; a kite in a biakna tau tawh sakhat hi ding a, sumngo tawh na zut ding hi. Ama adingin vut koihna ding beelte leh kawbiate, kuangte, sikkeute leh vut luahna peekte na bawl ding hi; a nazat khempeuh sumngo tawh na bawl ding hi. Ama adingin siklen, a vang simsiam zong sumngo tawh na bawl ding hi; siklen tung, a kiu lite-ah sumngo kual li na bawl ding hi. Siklen in biakna tau kim ciang a bat suk theih nadingin biakna tau zawl nuai panin na bulh ding hi. Biakna tau adingin zawl, singkha sing zawl bawlin sumngo tawh tuate na zut ding hi; a kipuak ciangin biakna tau pang nihte-ah a zawlte a om theih nadingin a kualte’ vang sungah a zawlte kikhum ding hi. Singpekte tawh a kuakin na bawl ding hi; mual tunga nang' tungah hong kilaksa bangin kibawl ding hi. “Biakbuk tual na bawl ding hi. A tual in leitaw lam pangah pangkhat adingin tong za a sau, a kop-a kikhuk khau hoih tawh a kigan a kikhaisukte nei ding hi; a khuamte sawmnih leh a bullente sawmnih pen sumngo tawh a kibawl hi ding hi, ahih hangin khuampi tunga vankhainate leh a gaknate in ngun tawh a kibawl hi ding hi. Leilu lam panga ding zong a sauna tua bangmah hi-in, a kikhaisukte tong za sau ding a, a khuamte sawmnih leh a bullente sawmnih in sumngo tawh a kibawl hi ding hi, ahih hangin khuampi tunga vankhainate leh a gaknate in ngun tawh a kibawl hi ding hi. Nitumna lam pangah buk tual a vai lam adingin khuampi sawmte leh bullen sawmte tawh tong sawmnga a sau a kikhaisukte om ding hi. A mai lam, nisuahna lam buk tual a vai in tong sawmnga hi ding hi. Kongpi pang khat ading a kikhaisukte in tong sawm-le-nga hi ding a, khuampi thumte leh bullen thumte tawh hi ding hi. A pang lang khatah a kikhaisukte in tong sawm-le-nga hi ding a, khuampi thumte leh bullen thumte tawh hi ding hi. Buk tual-a kongpi dingin a dum, a dupsan, a ausan khaute leh a kop-a kikhuk khau hoihte tawh a kigan, phim tawh khui-in a kizem, tong sawmnih a sau kongpuankhai khat om ding hi; tua in khuampi lite leh bullen li nei ding hi. Buk tual kiim-a khuampi khempeuh ngun tawh kibawl gakna tawh kigak ding hi; a vankhainate ngun hi-in a bullente sumngo hi ding hi. Buk tual a dung tong za khat, a vai tong sawmnga, a san’na tong nga hi-in, a kop-a kikhuk khau hoih tawh a kigan a kikhaisukte leh sumngo bullente tawh hi ding hi. Biakbuk na zat ahi a kizang ding peuhmahte leh a khetphimte khempeuh leh buk tual a, khetphimte khempeuh sumngo tawh a kibawl hi ding hi. “Meivak a kuang tawntung dingin a kikoih theih nading, a vak dingin amaute in a kisuzan oliv gah thau siangtho nang' kiangah hong paipih nadingin Israel mite thu na pia ding hi. Kikhopna buk sung, tecipan’na mai-a dalna puan pua lam-ah, Aaron leh ama' tapate in nitak-a kipan zingsang dong Topa ’ mai-ah meivakte kuangsak ding uh hi. Tua pen, Israel mite in amau' khang tawntungin a zuih ding uh ngeina kip khat hi ding hi. “Tua ciangin keimah' tungah siampi na a sem dingin Israel mite' lak panin na sanggampa Aaron leh amah tawh a tapate—Aaron leh Aaron’ tapate, Nadab leh Abihu, Eleazar leh Ithamar, nangma' kiangah la in. Minthan’na leh hoihna tawh a kidim nadingin na sanggampa Aaron ading biakna puan siangtho na bawl ding hi. Keima' siampi nasepna-ah amah a ap dingin amaute in Aaron’ puante a bawl nading, hih theih ciimna ka guatsa, siamna a nei mite khempeuh tungah gen in. Hihte in amaute’ bawl ding puante ahi hi: awmdal khat, siampipuan khat, puantualpi khat, sikli nei-a a gial puantungsilh khat, dialpi khat leh kawnggak khat ahi hi; keima' tungah siampi na a sem ding na sanggampa Aaron leh ama' tapate’ adingin amaute in biakna puan siangthote bawl ding uh hi. “Amaute in kham, a dum, a dupsan, a ausan khaute leh a kop-a kikhuk tawh a kigan puan hoihte zang ding uh hi. Amaute in siampipuan pen, kham, a dum, a dupsan, a ausan khaute leh a kop-a kikhuk a kigan puan hoihte tawh bawlin hoih takin a kibawl hi ding hi. A kizop khawm theih nadingin a mong nihte-ah a kimat liangkaihna puan nih nei ding hi. Amah a gak dinga hoih tak-a a kigan tua tunga puan om pen, kham, a dum, a dupsan, a ausan khaute leh a kop-a kikhuk puan hoihte tawh kibawlin, a sepna zia leh a nate a kibang hi ding hi. Nangmah in onik suang nih la-in tuate' tungah Israel tapate’ min na gelh ding a, amau’ suahna tawh kizui-in amau' min gukte suang khat tungah gelhin, a om lai gukte’ min a suang dang khat tungah na gelh ding hi. Kizepna a bawlpa in min gelhna a bawl bangin Israel tapa sawm-le-nihte’ minte tawh suang nihte na gelh ding hi; tuate pen kham-a zepna tawh na um ding hi. Israel tapate phawkna suang dingin siampi puan’ liangkaih puan tungah tua suang nihte na bulh ding hi; Aaron in ama' liangko nihte' tungah phawk nadingin Topa ’ mai-ah amaute’ min pua ding hi. Kham tawh kibawl a kiphut kizepna leh khau banga a kihual, kham citak khainiang nih na bawl ding hi; a kihual khainiangte pen a kiphutte' tungah na bulh ding hi. “Hoih tak-a a kibawl thukhenna awmdal khat na bawl ding hi; siampipuan a kibawl mah bangin na bawl ding hi; kham, a dum, a dupsan, a ausan khaute leh a kop-a kikhuk puan hoih tawh na bawl ding hi. A ning kikim-in thuap nih hi ding a, a dung khap khat, a vai khap khat hi ding hi. Tua sungah suang gual li-in na bulh ding hi. Sardis suang, topaz suang leh karbankel suang gual khat in a gual masa hi ding hi; a gual nihna in emerald suang, sapfeiros suang leh diamond suang hi ding hi; a gual thumna in jakinth suang, agate suang leh amethist suang hi ding hi; a gual lina in khrysolite suang, onik suang leh jasper suang hi ding hi; kham tawh zepna sungah tuate kibulh ding hi. Israel tapate’ min tawh kituakin amaute’ min a omna suang sawm-le-nih om ding hi; tuate in minam sawm-le-nihte’ adingin amau’ min ciat kigelhin, min gelhna tawh kibang ding hi. Awmdal adingin khau tawh a kibang, a kihual kham citak khainiang na bawl ding hi; awmdal adingin kham kual nih na bawl ding a, awmdal mongah tua kual nihte na bulh ding hi. Awmdal mong a kual nihte' sungah kham khau nihte na khum ding hi; khau mong nihte zepna tawh na zom ding a, siampipuan’ liangkaih puan mai lamah tua bangin na zom ding hi. Kham kual nih na bawl ding a, awmdal mong nih, siampi puan tawh a kizom a sung lamah na bulh ding hi. Kham kual nih na bawl ding a, siampipuan liangkaih nihte’ nuai a mai lam, hoih taka a kigan siampi puankhau a kizopna tung sanah na bulh ding hi. Hoih taka a kigan siampipuan’ khau tungah a om theih nading leh siampipuan tung panin awmdal a kol theih loh nadingin amaute in siampipuan’ kual-ah khau dum khat-in a kual tawh gak ding uh hi. Tua ahih ciangin Topa ’ mai-ah phawk tawntung nadingin amaute paipih dingin siangtho munah amah a pai ciangin, Aaron in ama' lungtang tunga a om thukhenna awmdal sungah Israel tapate’ minte pua ding hi. Thukhenna awmdal sungah Urim leh Thummim na koih ding a, Topa ’ mai-ah a pai ciangin Aaron’ lungtang tungah tuate om ding hi; tua bangin Aaron in ama' lungtang tungah Israel mite’ thukhenna Topa ’ mai-ah pua tawntung ding hi. “Siampi puantualpi puan dum bek tawh na bawl ding hi. Puan ngawng bangin a kikeek loh nadingin a ngawng kimkotah a kigan tawh a kizim, lutang thawl a vang nei ding hi. A mong-ah a dum, a dupsan, a ausan khaute tawh a kizem mang kawlsing gah bawlin, a mong kiim-ah amaute’ kikal-ah kham siklong bawlin puantualpi mong kimkotah a gah bangin na bawl ding hi. Amah in biakna na a sep ciangin Aaron in tua puan silh ding a, amah a sih khak loh nadingin Topa ’ mai a siangtho munah a tum ciang leh a pusuah ciangin a gingte kiza ding hi. “Nangmah in kham citak tawh a peek khat na bawl ding a, min gelhna a kibawlte mah bangin tua tungah, ‘ Topa ading siangtho’ ci-in na gelh ding hi. Tua pen, khau dum khat tawh dialpi tungah na gak ding hi; dialpi mai lamah om ding hi. Tua pen Aaron’ taltang-ah om ding a, Israel mite in letsong siangtho a piakna uh ahi, a siangtho biak piakna-ah mawhna a om peuhmah Aaron in ama' tungah khu ding hi; Topa ’ mai-ah amaute a kisan’ theih nadingin ama' taltang tungah tua a peek om tawntung ding hi. “A puantungsilh khau hoih tawh sikli nei a gial-in na gan ding a, khau hoih tawh dialpi khat na bawl ding a, phim tawh kikhui-in a kizem kawnggak khat na bawl ding hi. “Aaron’ tapate' adingin puantungsilhte, kawnggakte, lukhute na bawl ding hi; minthan’na leh hoihna tawh a kidim nadingin tuate na bawl ding hi. Amaute in keima' tungah siampi na a sep theih nadingun na sanggampa Aaron leh amah tawh a om ama' tapate' tungah tuate na silhsak ding a, amaute sathau nilhin, nasem dingin kipsakin, na siangthosak ding hi. A ci guak-a a omna uh a tuam dingin amau adingin puan hoihte tawh pheituamte na bawlsak ding hi; tuate in kawng panin phei ciang ban ding hi; amaute kikhopna buk-ah a pai ciang uh ahi a, siangtho mun-ah nasem dingin biakna tau nai-ah a pai ciang uh ahi zongin, Aaron leh ama' tapate in tuate silh ding uh hi; tua hi kei leh amaute in amau' tung mah-ah mawhna a kisuantawm suakin si ding uh hi. Hih in amah leh ama khit cianga a suan-le-khakte adingin a om tawntung ngeina kip khat hi ding hi. “Tu-in hih in, amaute in keima' tungah siampi na a sep theih nadingun amaute na sian’thosak nadingin amaute' tunga na hih ding ahi hi. Bawngtalno khat leh a sitbang lo tuutal nih, leh silngo sawhloh anlum, sathau tawh a kihel silngo sawhloh mohte, sathau tawh a kizut silngo sawhloh mohphengte la in. Tuate pen mangbuh nel tawh na bawl ding hi. Lawh khat sungah tuatekoihin tuate a lawh-in paipih-in, a bawngtal leh a tuutal nih zong na paipih ding hi. Aaron leh a tapate kikhopna buk kongkhak-ah na paipih ding a, amaute tui tawh na sil ding hi. Nangmah in puante la-in, Aaron’ tungah puantungsilh leh siampi puantualpi, siampipuan leh awmdal koihin, hoih taka a kigan siampipuan gakna tawh amah na gak ding hi; ama' lu tungah dialpi khimsakin, dialpi tungah kumpi lukhu siangtho na khusak ding hi. Nangmah in nilh sathau la-in, ama'lu tungah sungin amah na nilh ding hi. Tua ciangin nangmah in ama' tapate paipihin, amaute puantungsilh na silhsak ding a, kawnggakte tawh amaute gakin amau' tungah a lukhute uh na gak ding hi; siampi nasepna in a kip tawntung ngeina ahih manin amau aa hi ding hi. Tua bangin Aaron leh a tapate na koih ding hi. “Tua ciangin kikhopna buk mai-ah bawngtal na paipih ding hi. Aaron leh a tapate in bawngtal lu tungah amau’ khut nga ding uh a, Topa ’ mai, kikhopna buk kongkhak-ah nangmah in bawngtal na go ding hi, bawngtal sisan tawmkhat la-in biakna tau kite na khutme tawh na nuh ding a, a om lai si teng biakna tau bul-ah na sung khia ding hi. A gilpi tuam a thau khempeuh leh a sin tunga autok leh a kal nihte a tuam a thau tawh na la ding a, biakna tau tungah tuate na hal ding hi. Ahih hangin bawngtal sa leh a vun leh a ekte, giahphual pua lam-ah mei tawh na hal ding hi; tua in khialhna hanga biakna ahi hi. “Tua ciangin nangmah in tuutalte khat la-in, Aaron leh a tapate in tuutal' lu tungah amau’ khut nga ding uh a, nangmah in tuutal go-in, a si la-in biaknatau kimkotah na theh ding hi. Tua ciangin nangmah in tuutal sem nenin, a sungkua leh a khete silin, a sa-bakte leh a lu tawh tuate koihin, biakna tau tungah tuutal a bup-in na hal ding hi; tua in Topa ’ tungah meihal biakna ahi hi; tua in a gim namtui, Topa ’ tungah mei tawh kihal biakna ahi hi. “Nangmah in tuutal a dang khat na la ding hi; Aaron leh a tapate in tuutal' lu tungah amau khut nga ding uh a, nangmah in tuutal go-in, a si tawmkhat la-in Aaron’ taklam bil dawn leh ama' tapate’ taklam bil dawnte leh amau' taklam khutpi dawnte leh amau’ taklam khepi dawnte nuhin, a om lai si teng biakna tau kimah na theh ding hi. Tua ciangin nangmah in biakna tau tunga a om si tawmkhat leh nilh sathau la-in Aaron leh ama' puante' tung leh amah tawh a om ama' tapate' tung leh ama' tapate’ puante' tungah na theh ding hi; amah leh a puante leh amah tawh a om a tapate leh ama' tapate’ puante siangtho ding hi. “Nangmah in tuutal thau, a mei, a gilpi tuam a thau, a sin pan a utok, a kal nihte leh a tuam leh a taklam phei (bang hang hiam cih leh tua inkipsakna tuutal ahi hi), leh Topa' mai-ah a om silngo sawhloh anlum lawh sung panin anlum lum khat, sathau tawh a kibawl anlumbek khat, mohpheng khat, zong na la ding hi; nangmah in hihte khempeuh Aaron' khut sung leh a tapate’ khut sungah na koih ding a, Topa' mai-ah veii-a piak nadingin na veii ding hi. Tua ciangin nangmah in amau' khut sung panin tuate na la ding a, Topa' mai-ah a gim namtui dingin biakna tau tungah meihal tawh kihal biakna ban-ah na hal ding hi; tua in Topa' tungah mei tawh kihal biakna ahi hi. “Nangmah in Aaron a kikipsakna tuutal sa-iik la-in Topa ’ mai-ah veii-a piak nadingin na veii ding hi; tua in nangma' tanh hi ding hi. Tua in Aaron leh ama' tapate ading ahih ciangin, kipsakna tuutal pan-a a kipia, a kiveii, siampite’ tanh a phei leh veii-a piakna sa-iikte na siangthosak ding hi. Tua in Aaron leh ama' tapate adingin Israel mite’ tung panin a kaih tawntung ding uh ahi hi, bang hang hiam cih leh thunuam-a amau biakna panin Israel mite in a piak ding siampite’ tanh ahi hi; tua in Topa ’ tungah amau’ piakna ahi hi. “Aaron’ biakna puan siangthote pen ama' sih khit ciangin a tapate’ tungah kipia ding a, amaute kinilhin a kikipsak nading ahi hi. Ama' za luahin siampi a sem a tapa in siangtho munah nasem dingin kikhopna buk-ah a pai ciangin ni sagih sung tuate silh ding hi. “Nangmah in kipsakna tuutal la-in a siangtho mun khatah a sa na huan ding hi; Aaron leh a tapate in kikhopna buk kongkhak-ah tuutal sa leh lawh sunga om anlum ne ding uh hi. Amaute in amaute kipsak ding leh a siangthosak dingin kilemna a kibawlna tua ante ne ding uh hi, ahih hangin a pualam mi in tuate ne thei lo ding hi, bang hang hiam cih leh tuate a siangtho ahi hi. Kipsakna sate khat peuhpeuh ahi a, anlum ahi zongin, zingsang ciang dong a om lai leh nangmah in a om laite mei tawh na hal ding hi; tuate kine lo ding hi, bang hang hiam cih leh tuate a siangtho ahi hi. “Tua bangin nang kong thupiakte khempeuh tawh kituakin Aaron leh ama' tapate' tungah na hih ding hi; ni sagih sung tawntung amaute kipsakna na bawl ding hi, kilem nadingin mawhna hanga biakna-in ni simin bawngtal khat na pia ding hi. Siangthosak dingin sathau na nilh ciang leh kilemna na bawl ciangin biakna tau adingin khialhna hanga biakna khat zong na pia ding hi. Biakna tau adingin ni sagih sung kilemna bawlin, na siangthosak ding hi, biakna tau in a siangthopen hi ding hi; biakna tau a lawng peuhpeuh a siangtho suak ding hi. “Tu-in hih in biakna tau tungah na piak ding ahi hi; ni simin a kizomin kum khat a pha tuuno nihta hi ding hi. Tuuno khat zingsang lamin na pia ding a, adang tuuno khat nitak lamin na pia ding hi; tuuno a masa tawh an nel seu seh-sawm-suah-seh-khat leh a kisatzan singgah thau bung seh-li-suah-seh-khat tawh a kihel leh tui-buah dingin leenggahzu bung seh-li-suah-seh-khat hi ding hi. Tuuno a dang khat nitakin na pia ding a, zingsang-a mah bangin a gim namtui ding, Topa ’ tungah mei tawh kihal biakna-in an tawh biakna leh tuibuah tawh na pia ding hi. Nang' tunga thu kong genna ding, nang tawh ka kituahna ding mun, Topa ’ mai kikhopna buk kongkhak-ah na khang tawntungun a om tawntung ding tawh meihal biakna hi ding hi. Tua lai-ah Israel mite tawh ka kituah ding a, keima' minthan’na in tua mun siangthosak ding hi; keimah in kikhopna buk leh biakna tau ka siangthosak ding hi; keima' tungah siampi na a sem dingin Aaron leh a tapate zong ka siangthosak ding hi. Israel mite' lakah keimah teengin amau’ Pasian ka hi ding hi. Keimah in amaute’ lakah ka ten’na hangin Izipt leitang panin amaute a paikhiatpih Topa amau’ Pasian ka hihna amaute in thei ding uh hi; keimah in Topa amau' Pasian ka hi hi. “Nangmah in a tungah paknamtui hal nading biakna tau khat na bawl ding hi; singkha sing tawh na bawl ding hi. A dung tong khat, a vai tong khat hi ding hi; a kikim sikli nei hi ding a, a san’na tong nih hi ding hi; a kite a tak tawh sakhat hi ding hi. Nangmah in kham citak tawh zut-in, a tung leh a pang kimkot leh a kite na zut ding hi; a kimkot-ah kham tawh a geihual na bawl ding hi. Tua adingin kham kual nih na bawl ding hi; a geihual nuai a kigalsai a pang tuakah tuate na bawl ding a, a puak nading zawlte a len dingte hi ding uh hi. Nangmah in singkha sing tawh a zawlte na bawl ding a, kham tawh tuate na zut ding hi. Nangmah tawh ka kituah nading mun, tecipan’na tunga a om hehpihna tokhom mai, tecipan’na singkuang kiangah a om dalna puan mai-ah biakna tau na koih ding hi. Aaron in tua tungah a namtui paknamtui hal ding hi; amah in zingsang simin meivakte a puah ciangin hal ding hi, Aaron in nitakin zong meivakte a koih ciangin tuate hal ding a, na khang tawntungun Topa ’ mai-ah a namtui hi tawntung ding hi. Tua tungah a siangtho lo a dang paknamtui hita leh, meihal biakna hita leh, an tawh biakna hita leh na pia kei ding hi; tua tungah tui-buah na sung kei ding hi. Aaron in a kite' tungah kum khatin khatvei kilemna bawl ding hi; amah in kilem nading khialhna hanga biakna si tawh na khang tawntungun kum khatin khatvei kilemna bawl ding hi; tua in Topa' tungah a siangtho pen ahi hi,” a ci hi. Topa in Moses' kiangah, “Israel mite misimna bawl-a, amaute na sim ciangin amau' lakah gimna a tun’ loh nadingin, amaute na sim ciangin a milip in a kitatkhiatna uh Topa' tungah pia ding uh hi. Misimna-ah a kisim mi peuhmah in a piak ding in: biakinn shekel tawh kituakin shekel lang (shekel khatah gerah sawmnih om), Topa ’ tungah biakna-in shekel lang hi ding hi. Misimna-a akisim, kum sawmnih panin a tungsiah peuhmah in Topa biakna pia ding hi. Note’ ading kilemna bawl nadingin Topa biakna na piak uh ciangin a haute in shekel lang sangin tamzaw pia lo, a zawngte in tawmzaw pia lo ding hi. Nomau adingin kilemna bawl nading, Topa ’ mai-ah Israel mite phawkna a hisak dingin Israel mite tung panin kilemna sum na la ding a, kikhopna buk nasep nadingin na seh ding hi,” a ci hi. Topa in Moses kiangah, “Kisil nadingin sumngo kuang khat, a ngakna sumngo tawh akibawl khat zong bawl in. Nangmah in kikhopna buk leh biakna tau kikal-ah na koih ding a, tua sungah tui na koih ding hi. Aaron leh a tapate in a khut uh leh a khe uh tua tui tawh sil ding uh hi. Amaute kikhopna buk-ah a pai ciangin ahi a, Topa' tungah mei tawh kihal biakna hal ding a nasem dingin biakna tau nai-ah a pai ciang uh ahi zongin, amaute a sih loh nadingun amaute tui tawh kisil ding uh hi. A sih khak loh nadingun a khut uh leh a khe uh sil ding uh hi; tua in na khang tawntungun amaute'tung, ama' tung nangawn leh ama' suan-le-khakte' tungah ngeina kip khat hi ding hi,” a ci hi. Tua tham loin, Topa in Moses' kiangah, “A hoih pen a namtui nate la in: mirrah paknamtui shekel za nga leh a namtui thaksing tua zah lang, shekel zanih leh sawmnga gik, leh a khum a namtui paknamtui zanih leh sawmnga, biakinn shekel tawh kituakin thaksing nam khat za nga, leh oliv thau bung khat; nangmah in paknamtui bawlte’ bawl mah bangin a siangtho sathau nilh dingin hihte na gawm ding hi; tua in a siangtho sathau nilh hi ding hi. Nangmah in tua tawh kikhopna buk leh tecipan’na singkuang, sabuai leh a nazat khempeuh, meivakkhuam leh a nazatte leh paknamtui biakna tau, meihal biakna tau a nazat khempeuh tawh, kuang leh a ngakna na zut ding hi; tuate a siangtho pen ahih theih nadingin na siangthosak ding hi; tuate a lawng peuhmah a siangtho suak ding hi. Amaute in keima' tungah siampi na hong sep theih nadingun Aaron leh a tapate nangmah in sathau nilhin, amaute na siangthosak ding hi. Nangmah in Israel mite' kiangah, ‘Hih in na khang tawntungun a siangtho keima' sathau nilh hi ding hi. Mi mawkmawkte’ pumpi tungah tua sathau kisung lo ding a, tua banga a kigawm sathau dang na bawl kei ding uh hi; tua in a siangtho hi a, note' tungah a siangtho hi ding hi. Tua tawh a kibangin a bawl mi peuhmah ahi a, a pualam mi khat peuh tuate a nilhsak mi peuhmah ahi zongin ama' mite' kiang panin kikhenkhia ding hi,’ ci in,” a ci hi. Topa in Moses' kiangah, “A namtui nate, stakte, onikh leh galbanum, paknamtui citak tawh a namtui nate (a tamna a kikim ciatin) la in la, paknamtui bawlte’ hih bangin ci sawhin a nin bang lo, biakna paknamtui bawl in; nangmah in kimkhat a neu mahmahin na satnen ding a, nang tawh ka kituah nading mun kikhopna buk sunga tecipan’na mai-ah pawl khat na koih ding hi; tua in nangma adingin a siangtho pen hi ding hi. A kigawmpih ngei teng tawh na bawl ding paknamtui pen note' adingin na bawl kei ding hi; tua in note’ adingin Topa' tungah a siangtho hi ding hi. Tua tawh a kibangin paknamtui a bawl mi peuhmah ama' mite' kiang panin kikhenkhia ding hi,” a ci hi. Topa in Moses' kiangah, “Thei in, Judah minam, Hur’ tapa ahi Uri’ tapa Bezalel a min-in ka sam khin hi; En in, amah tawh, Dan minam, Ahisamak’ tapa Oholiab ka seh khin zo hi; amaute in nang kong thupiak khempeuh a bawl theih nadingun a hih thei mi khempeuh' tungah siamna ka pia khin zo hi. Amau sep dingte in; kikhopna buk, leh tecipan’na singkuang, leh a tunga om hehpihna tokhom leh buk sung na khempeuh, sabuai leh a nazatte leh a siangtho meivakkhuam leh a nazatte khempeuh, paknamtui biakna tau, leh meihal biakna tau a nazatte khempeuh tawh, kuang leh a ngakna, leh amau’ siampi nasep nadingin siampi Aaron’ puan siangthote leh ama' tapate’ puante ahi, hoih tak-a kigan puante, leh siangtho mun adingin nilh sathau leh a namtui paknamtui ahi hi. Ka thupiakte khempeuh tawh kituakin nangmah in na bawl ding hi,” a ci hi. Topa in Moses' kiangah, “Israel mite' tungah gen in, ‘Note in keima' sabbathte na tang ding uh hi, bang hang hiam cih leh hih in keimah, Topa in note a hong siangthosak ka hihna na theih nadingun na khang tawntungun keimah leh note' kikal-ah lim khat ahi hi. Note in sabbath na tang ding uh hi, bang hang hiam cih leh note adingin siangtho hi; tua ni a ninsak mi peuhmah kithat ding hi; tua ni-in na a sem mi peuhmah ama' mite' kiang panin kikhenkhia ding hi. Ni guk sungin nasep kizo ding hi, ahih hangin a ni sagih ni in thupi-a tawlngakna sabbath ni hi a, Topa' tungah siangtho hi; sabbath ni-in nasep khat peuhpeuh a sem mi peuhmah kithat ding hi. Tua ahih ciangin a tawntungin thuciamna-in amau’ khang tawntungin sabbath tangin, Israel mite in sabbath kem ding uh hi. Ni guk sungin Topa in van leh lei bawlin, a ni sagih ni-in amah tawlnga a, a tha dimkiksak hi; keimah leh Israel mite' kikal-ah hih sabbath in lim khat hi tawntung hi, ci hi,’ci in,” a ci hi. Sinai Mual tungah thugenna a man khit ciangin, Pasian’ khutme tawh a kigelh suangpeek ahi tecipan’na suangpeek nihte, amah in Moses pia hi. Mual tung panin Moses hong tun’suk hakna mite in a theih uh ciangin, Aaron kiangah mite amau mah kikaikhawm tawmin, ama' kiangah, “Kithawi in, kote’ mai-ah a pai ding pasiante hong bawlsak in; Izipt leitang panin eite hong paikhiatpih to mite hih Moses ahih leh, amah bang suak khin cih i thei kei hi,” a ci uh hi. Aaron in amaute' kiangah, “Na zite, na tapate leh na tanute uh’ bil tungah a om kham bilbahte sutkhia un la, kei' kiangah tuate hong paipih un,” a ci hi. Tua ahih ciangin mi khempeuh in amau’ bil-a om kham bilbahte sutkhia-in Aaron’ kiangah tuate paipih uh hi. Amah in amaute’ tung panin kham saangin, sumtui sun’na sungah sungin, a kisung milim bawngno khat bawlsak hi; tua ciangin mite in, “Israel mite aw, hihte in Izipt leitang panin note hong paikhiatpih to na pasiante uh a hi hi!” ci uh hi. Aaron in hih thu a muh ciangin, amah in tua mai-ah biakna tau khat lam hi; “Zing ciang pen Topa ading pawibawl ni hi ding hi,” ci-in Aaron in zaksakna bawl hi. Amaute zingsangin tho baih uh a, meihal biakna pia-in thu-nuam-a biakna paipih uh hi; a ne a dawn dingin mite tu suk uh a, gualnuam mahmah uh hi. Topa in Moses' kiangah, “Pai suk in; bang hang hiam cih leh Izipt leitang panin nangmah in na paikhiatpih toh mite amau leh amau kisiasak uh hi; amaute ka thupiakna lampi panin kiheikhia pak uh hi; amau’ adingin amaute in a kisung milim bawngno khat bawlin, tua bia-in a tungah biakna pia uh a, ‘Israel mite aw, hihte in Izipt leitang panin note hong paikhiatpih to na pasiante uh ahi hi!’ ci uh hi,” a ci hi. Topa in Moses' kiangah, “Hih mite ka mu zo hi, en in, a lungkhauh mite ahi uh hi; tua ahih ciangin tu-in amaute'tungah ka hehna so-in amaute ka beisak theih nadingin kei guak hong omsak in; ahih hangin minam lian khatin nang kong bawl ding hi,” a ci hi. Ahih hangin Moses in Topa ama' Pasian' tungah thuum a, “ Topa aw, a vanglian leh a thahat khut tawh Izipt leitang panin na paikhiatpih ahi nangma' mihingte' tungah bang hangin na hehna so ding ahi hiam? Bang hangin Izipt in, ‘Mual tungah amaute a that ding leh leitung panin amaute a beisak dingin siatna ngaihsutna tawh amah in amaute paikhiatpih hi,’ ci ding ahi uh hiam? A kihtak-huai na hehna daaisak in la, na lungsim khelin na mite' tungah hih siatna tungsak kei in. Amaute' tungah nangmahmah kiciamin amaute' tungah, ‘Na suan-le-khakte uh vantung aksi bangin tamsakin, keimah in ka ciamsa hih leitang khempeuh na suan-le-khakte uh' tungah ka pia ding a, amaute in luah tawntung ding uh hi,’ na cihna na nasemte Abraham, Isaak leh Israel phawk in,” a ci hi. Tua hi a, Topa in a lungsim khel a, ama' mite' tungah a tun’sak ding siatna tungsak nawn lo hi. Tua ciangin Moses kihei-in, a khut sungah tecipan’na suangpeek nih, a pang lang nih tuak-a kigelh suangpeekte tawh mual tung panin paisuk hi. A peekte in Pasian’ bawl hi a, a kigelhte in Pasian’gelh, a peekte' tungah a gelh ahi hi. Joshua in amaute’ kikona gamlumna a zak ciangin Moses' kiangah, “Giahphual-ah kidona gamlumna om hi,” ci hi. Ahih hangin Moses in, “Tua in zawhna kikona aw ahi a, lelhna kikona aw ahi zongin hi lo hi, ahih hangin tua ka zak pen la sakna aw-ging ahi hi,” a ci hi. Giahphual nai-ah amah tungin bawngno leh lamna a muh phetin, Moses’ hehna so a, amah in ama' khut sung panin suangpeekte lawn a, mual bul-ah tuate sukham hi. Amah in amaute’ bawlsa bawngno la-in, mei tawh hal a, gawi vui-in, tui tungah theh a, Israel mite a tui dawnsak hi. Moses in Aaron' kiangah, “Amaute' tungah khialhna lianpi khat na tun’pih nadingin hih mite in nang' tungah bang hong hih ahi uh hiam?” a ci hi. Aaron in, “Ka Topa ’ hehna sosak kei in; nangmah in mite na thei hi, amaute in siatna ngaihsun uh hi. Bang hang hiam cih leh amaute in keima' kiangah, “Kote' mai-ah a pai ding pasiante hong bawl sak in; Izipt leitang panin eite hong paikhiatpih to mipa hih Moses ahih leh, amah bang suak khin cih i thei kei hi,’ ci uh hi. Keimah in amaute' kiangah, ‘Kham a nei peuhpeuh sutkhiasak un,’ ka ci hi; tua ahih ciangin amaute in kei' tungah hong pia uh a, keimah in mei sungah tuate ka lawn a, hih bawngno hong suak hi,” a ci hi. Mite a tatkhialhna Moses in a muh ciangin (bang hang hiam cih leh Aaron in amau’ maizum nadingin amau’ galte lakah amaute takhialsak hi), giahphual kongpi sungah Moses ding a, “ Topa ’ lamah kua om hiam? Kei kiangah hong pai un,” a ci hi. Levi mite khempeuh ama' kiangah kikaikhawm uh hi. Amah in amaute' kiangah, “Israelte’ Topa Pasian in hih bangin ci hi, ‘A milip in a namsau a pangah tawi-in, kongpi khat pan kongpi khat giahphual khempeuhah pai kawi kawi-in, a milip in a sang-gampa, a milip in a kikholhpihpa, a milip in a vengpa that hen,’ ci-in a gen hi. Levi mite in Moses’ thugen bangin hih uh hi; tua ni-in mihing tul thum bang si hi. Moses in, “Tu ni-in note' tungah thu pha hong tun’ theih nadingin ama' tapa leh a sanggamte ciat supna thuakin Topa ’ na sep nadingin note na kikipsak tawm uh hi,” a ci hi. A zing ciangin Moses in mite kiangah, “Note in khialhna lianpi khat na bawl khin uh hi. Tu-in Topa' kiangah kei ka pai ding hi; note’ khialhna thu-ah kilemna ka va bawl thei kha ding hi,” a ci hi. Tua ahih ciangin Topa' kiangah Moses pai kikin, “Ala, hih mite in khialhna lianpi khat bawl khin uh hi; amaute in amau’ adingin kham pasiante bawl khin uh hi. Ahih hangin tu-in nangmah in amau' khialhna maisak in; tua ahih kei leh, hong thum ing, nangma' gelhsa laibu panin keimah hong phiat in,” a ci hi. Ahih hangin Topa in Moses' kiangah,“Kei' tungah hong khial peuhmah, ka laibu panin ka phiat ding hi. Ahih hangin tu-in pai in, nang' tunga kong gensa mun-ah mite paipih in; en in, na mai-ah ka vantungmi pai ding hi. Ahi zongin ka thukkik ni ciangin amau' khialhna amau' tungah ka thuk ding hi,” a ci hi. Aaron in a bawlsa bawngno amaute in bia uh ahih manin Topa in mite' tungah gimna tungsak hi. Topa in Moses' kiangah, “Pai khia un la, Abraham, Isaak, leh Jakob' tungah ‘Na suan-le-khakte uh tungah ka pia ding hi,’ ci a ka ciam leitangah nangmah leh Izipt leitang panin na paikhiatpih toh mite tawh hih lai panin paito un. Note’ mai-ah vantungmi khat ka sawl ding a, Kanaan mite, Amor mite, Hit mite, Perez mite, Hiv mite leh Jebus mite ka hawlkhia ding hi. Bawngnawi leh khuaizu a luanna leitangah paito un; ahih hangin lampi-ah note hong sisak kha ding ka hih ciangin note' lakah kei kong paito kei ding hi, bang hang hiam cih leh note in lungkhauh mi na hi uh hi,” a ci hi. Mite in hih thusiate a zak uh ciangin amaute thuum uh hi; kuamah kizem lo uh hi. Bang hang hiam cih leh Topa in Moses' kiangah, “Israel mite' tungah gen in, ‘Note in lungkhauh mi na hi uh hi; note' lakah tomno khat sung hong paito leng note kong beisak ding hi. Tua ahih ciangin note kong bawl nading ka theih nadingin note'tung panin na kizepnate uh suahkhia un,’ ci in,” ci-in gen khinzo hi. Tua ahih ciangin Israel mite in Horeb Mual pan-a kipanin amau’ kizepnate suahkhia uh hi. Tu-in Moses in puanbuk la-in giahphual pualam, giahphual panin a gamla pekah lam thei zel hi; amah in tua pen kikhopna buk ci hi. Topa' tungah thu a dong nuam mi peuhmah giahphual pua lam-a om kikhopna buk-ah paikhia uh hi. Puanbuk-ah Moses a pai peuhpeuh ciangin mi khempeuh ding to-in, a milip-in a puanbuk kong-ah ding a, puanbuk sungah a paikhit mateng Moses’ nung en uh hi. Puanbuk-ah Moses a tum ciangin meii khuam hong kumsukin puanbuk kongkhak-ah ding a, Topa in Moses tawh kiho hi. Mi khempeuhte in a puanbuk kongkhak ah meii khuam a ding a muh ciangin a milip-in a puanbuk kongkhak ah mi khempeuh ding to-in bia uh hi. Tua bangin, mi khat in a lawmpa a hopih bangin maitang kituahin Topa in Moses hopih zel hi. Giahphual-ah Moses a ciahkik ciangin, Nun’ tapa, ama' nasem tangval Joshua, puanbuk panin hong ciahkik lo hi. Moses in Topa' kiangah, “Thei in, nangmah in keima' kiangah, ‘Hih mite paipih to in,’ nong ci hi; ahih hangin kei tawh nong sawl khop ding mi kei nong theisak nai kei hi. Ahi zongin nangmah in, ‘Na min-in nang kong thei a, ka mai-ah maipha zong na mu khin hi,’ nong ci khin hi. Tua ahih ciangin tu-in nang' tungah kong thum hi, na muhna-ah maipha ka ngah leh keimah in nang hong thei-in na muhna-ah maipha ka ngah theih nadingin tu-in nangma' geelnate kei hong lak in. Hih minam in nangma' mite ahihna zong ngaihsun in,” a ci hi. Amah in, “Nang tawh kong pai ding a, lungsim tawlngakna hun nang kong pia ding hi,” a ci hi. Amah in ama' kiangah, “Nang nong paipih kei ding leh, hih lai panin kote hong paikhia tosak kei in. Bang hang hiam cih leh keimah leh nangma' mite, keimah in nangma' muhna-ah maipha ka ngahna bang ci-in kithei ding ahi hiam? Leitung maitang tunga om mite khempeuh panin keimah leh nangma' mite, kote ka tungnun’na uh in kote tawh nang nong paikhopna hilo ahi hiam?” a ci hi. Topa in Moses' kiangah, “Nangma gensa hih thu mahmah keimah in ka hih ding hi; bang hang hiam cih leh ka muhna-ah nang in maipha na ngah zo a, na min-in nang kong thei hi,” a ci hi. Moses in, “Kong thum hi, na minthan’na kei hong lak in,” a ci hi. Amah in, “Keima' hoihna khempeuh na mai-ah ka paisak ding a, na mai-ah keima' min ‘ Topa ’ cihna ka pulak ding hi; ka diknopna mi' tungah ka dik ding a, hehpihna ka lahnopmi' tungah hehpihna ka lak ding hi. Ahih hangin, amah in, “Nang in ka maitang na mu thei kei ding hi; bang hang hiam cih leh mi in kei hong mu leh tua mi nungta lo ding hi,” a ci hi. Tua ciangin Topa in, “En in, suang tungah na din’ nading keima' kiangah mun khat om hi; keima' minthan’na a pai laitakin suanghawm sungah nang kong koih ding a, kei ka paikhit mateng ka khut tawh nang kong hum ding hi; tua ciangin keimah in ka khut ka lakhia ding a, nangmah in ka nung na mu ding hi; ahih hangin ka maitang kimu lo ding hi,” a ci hi. Topa in Moses' kiangah, “A masa tawh a kibangin suangpeek nih sui in; nangmah in na sukkhap a masa peekte' sunga om thute tua a peekte' tungah ka gelh ding hi. Zingsangin kithawi-in Sinai Mual tungah zingsangin hong paito in la, mualdawn tua mun-ah keima' kiangah nangmah hong kilak in. Nang tawh kuamah hong paito khawm lo ding hi, mual tung tengah kuamah omsak kei in; tua mual mai-ah tuuhon ahi a, bawnghon ahi zongin gamta sak kei in,” a ci hi. Tua ahih ciangin Moses in a masa bangin suangpeek nih sui hi; zingsang ciangin amah tho baihin Topa in amah a thupiaksa bangin Sinai Mual tungah paito a, a khut sungah suangpeek nih tawi hi. Meii sungah Topa kum sukin tua lai-ah amah tawh Moses ding a, Topa ’ min pulak hi. Ama' mai-ah Topa pai-in, “ Topa, Topa, hehpihna nei-in a dik Pasian, lungduai-in itna kip leh thutakna tawh a dim, mi tul tampite adingin itna kip a nei, mawhna, thupalsatna leh khialhna maisakin, ahih hangin bang bang hita leh mawhna a siangsak ngei lo, pate’ mawhna tate tung leh tute tung, khang thum, khang lina dongin a thukpa,” ci-in pulak hi. Moses in lei lak lamah a lu kunsuk pak a, bia hi. Amah in, “Tu-in na muhna-ah maipha ka muh leh, Topa aw, kong thum hi, lungkhauh mite ka hita zongun kote' kiangah Topa hong pai in; kote’ mawhna leh kote’ khialhna hong maisak in la, nangma' luah dingin kote hong la in,” a ci hi. Amah in, “En in, keimah in thuciamna khat ka bawl hi. Nangma' mite khempeuh' mai-ah, leitung khempeuh hita leh minam khat peuh sungah hita leh cik mah-a tua bang a kibawl ngei lo nalamdangte ka bawl ding hi; note’ lakah a om mite khempeuh in Topa ’ nasepna mu ding uh hi; bang hang hiam cih leh note' tungah kong bawl dingin a kihtakhuai na ahi hi. “Tu ni-a nang kong thupiak zui in. En in, na mai-ah Amor mite, Kanaan mite, Hit mite, Perez mite, Hiv mite leh Jebus mite ka hawlkhia ding hi. Na paina leitanga a teng mite tawh thuciamna bawl kha loin, tua pen note’ laizangah thangzak a suah khak loh nadingin nangmahmah kidawm in. Nangmah in amau’ biakna taute phelin, amau’ khuamte kuaitanin, amau’ Asherah milimte na phukpai ding hi. (bang hang hiam cih leh pasian dang na bia kei ding hi, bang hang hiam cih leh Topa ama' min Aam a hipa in a aam Pasian ahi hi), nangmah in leitanga a teng mite tawh thuciamna bawlin, amaute in amau’ pasiante’ nungah paktatna bawlin amau’ pasiante' tungah biakna pia-in khat peuh in note hong sap ciangin, note in ama' biak piakna ne-in, note in amau’ tanute na tapate uh zi dingin la in, amau’ tanute in amau’ pasiante’ nungah paktatna bawlin, amau’ pasiante’ nungah na tapate uh paktatna bawlsak kha ding uh hi. “A kisung pasiante note’ adingin na bawl kei ding uh hi. “Silngo sawhloh anlum pawi na bawl ding uh hi. Abib kha, a kisehsa hun sung teng, nang kong thupiak mah bangin ni sagih sung silngo sawhloh anlum na ne ding uh hi; bang hang hiam cih leh Abib kha sungin Izipt panin note na paikhia uh hi. Naubu a hong khempeuh, na ganhing a pa khempeuh, bawng leh tuu a tacilte keima aa ahi hi. La a tacilte tuuno khat tawh na tanh ding hi, tua bang hi loin na tat kei leh a ngawng na kuaitan ding hi. Na tapa cilte khempeuh uh na tanh ding uh hi. Keima' mai-ah a guakin kuamah hong kilaak lo ding hi. “Ni guk sung na na sem ding uh hi, ahih hangin a ni sagih ni-in na tawlnga ding uh hi; lo khawh hun leh anlak hunin na tawlnga ding uh hi. Nipi kalte’ pawi, mangbuh a tung masa leh kum bei ciangin an kaihkhop pawi na bawl ding uh hi. Pasal khempeuh Israel Pasian, Topa Pasian' mai-ah kum khatin thum vei kilaak ding uh hi. Bang hang hiam cih leh note' mai-ah minamte ka hawlkhia ding a, na gamgite uh nomau’ adingin ka keek ding hi; Topa na Pasian uh mai-ah kum khatin thum vei a kilaak dingin na paitoh sungun na leitang uh mi khat peuhpeuh in hong deih gawh khak ding lunghihmawhna om lo ding hi. “Note in silngo tawh keimah biakpiakna si na piakhawm kei ding uh hi; paisan pawi biakpiakna zong zingsang dong na omsak kei ding uh hi. Note in na anpalte uh lakah a tung masa pen Topa na Pasian uh’ inn-ah na paipih ding uh hi. Note in keelno a pi’ nawizu tawh na huan kei ding uh hi,” a ci hi. Topa in Moses' kiangah, “Hih thute gelh in; hih thute tawh kizui-in nang leh Israel tawh thuciamna khat ka bawl zo hi,” a ci hi. Tua lai-ah Topa tawh amah sun sawmli leh za sawmli sung om hi; amah in an ne lo, tui zong dawn lo hi. Amah in suangpeek tungah thuciamna kammalte ahi thupiakna sawmte a gelh hi. A khut sungah tecipan’na suangpeek nih tawh Sinai Mual tung panin Moses hong paisuk ciangin, Pasian tawh amah kiho khin ahih manin a maitang vun a taan’ lamtak Moses in thei lo hi. Aaron leh Israel mite khempeuh in Moses a muh ciangin, en in, ama' maitang vun taang a, ama' mai-ah a pai ding uh amaute lau uh hi. Ahih hangin amaute' kiangah Moses pai hi; Aaron leh mihon makaite khempeuh ama' kiangah hong paikik uh a, Moses in amaute hopih hi. Tua khit ciangin Israel mite khempeuh a nai-ah hong pai uh a, Topa in Sinai Mual-ah ama' tunga a gen thupiakna khempeuh amaute' tungah pia hi. Moses in amaute tawh thugen a man khit ciangin, amah in a maitang-ah kiliahna puan khat koih hi; ahih hangin amah tawh kiho dingin Topa ’ mai-ah Moses a tum peuhpeuh ciangin, amah a pusuah kik mateng a kiliahna puan lakhia hi; amah hong paikhia-in ama' tunga thu kipiaknate Israel mite' kiangah a gen ciangin, Israel mite in Moses’ maitang, vun a taang mu uh hi; amah tawh kiho dingin a pai matengin Moses in kiliahna puan tawh a maitang khuhkik hi. Moses in Israel mi honpi khempeuh khawmin amaute' tungah, “Hihte in note in na hih ding uh Topa ’ hong thupiak ahi hi. Ni guk sungin nasep kiman ding hi, ahih hangin a ni sagih ni-in thupi-a tawlngakna sabbath siangtho Topa ’ tungah na nei ding uh hi; tua ni-in na khat peuhpeuh a sem peuhmah kithat ding hi; sabbath ni-in na ten’na khempeuh uh-ah mei na cih kei ding uh hi,” a ci hi. Moses in Israel mi honpite khempeuh' tungah, “Hih in Topa ’ hong thupiak ahi hi. Note' lak panin Topa ading piakna la un; lungsim citna a nei peuhmah Topa' tungah piakna paipihsak un. Tuate in: kham, ngun leh sumngo; a dum, a dupsan, a ausan khaute leh a kop-a kikhuk puan hoihte, keelmul, a kisansak tuutal vunte leh keelvunte; singkha sing, meivak ading sathau, nilh sathau leh a paknamtui dingin a namtui nate, siampi puan leh awmdal-ah bulh dingin onik suang leh suangte ahi hi. “Note' lak panin siamna a nei mi peuhmah hong paisak un la, Topa ’ thupiaksa khempeuh bawlsak un: biakbuk, a puan-buk leh a khuhna, a vankhainate leh a khuampeekte, a zawlte, a khuampite, a bullente; singkuang a zawlte tawh, hehpihna tokhom leh kongkhak dalna puan; sabuai a zawlte leh a nazatte khempeuh tawh, Ompihna Anlum; khuavak dingin meivakkhuam zong, a nazatte leh a meivakte tawh, meivak dingin sathau’ paknamtui biakna tau, a zawlte tawh, nilh sathau leh a namtui paknamtui leh biakbuk kongah, kongkhak ading kongpuankhai; meihal biakna tau, a sumngo siklen, a zawlte, a nazatte khempeuh, kuang leh a ngakna tawh; buk tual-a a kikhaite, a khuampite leh a bullente tawh, tual kongpi ading puankhai; biakbuk khetphimte leh huang khetphimte, leh amau’ khaute; siangtho mun-ah zat dingin lim takin a kigan puante, amaute’ siampi nasep nadingin siampi Aaron ading puan siangtho leh ama' tapate’ puante bawlsak un,” a ci hi. Tua ciangin Israel mi honpi khempeuh Moses’ omna panin paikhia uh hi. A lungsim-ah piaknopna a nei mi khempeuh hong paitawm uh a, kikhopna buk leh a nasep nading khempeuh leh puan siangthote-a zat dingin Topa ading a piakte uh hong puak uh hi. Tua ahih ciangin pasalte leh numeite, amaute hong pai uh hi; utna lungsim a neite khempeuh in tukkilhte, bilbahte, min gelhna zungbuhte, leh banbuhte ahi kham tawh a kibawl na namkim hong paipih uh a, a milip in Topa' tungah kham tawh piakna ap uh hi. A dum, a dupsan, a ausan khaute, puan hoih, keelmul, a kisansak tuutal vunte, savunte ahi zongin a nei mi peuhmah in tuate paipih hi. Ngun ahi a, sumngo ahi zongin piakna a bawl thei mi peuhmah in Topa ’ tungah a kipia nate paipih uh hi; nasep nadinga kimang thei ding singkha sing a nei mi peuhmah in hong paipih hi. A hih thei numei khempeuh in a khut uh tawh khau khuk uh a, amau’ khuksate a dum, a dupsan, a ausan khaute leh a kop-a a kikhuk khaute hong paipih uh hi; hih theih siamna in a phut lungsim a nei numei khempeuh in keelmul khuk uh hi. Makaite in siampi puan leh awmdal-a bulh dingin onik suang leh suangte, meivak ding leh nilh sathau ding leh paknamtui dingin a namtui nate leh sathau hong paipih uh hi. Israel mi, pasal leh numei, Topa in Moses' tunga a thupiaksa nasep nadingin na khat peuhpeuh paipih ding lungsim in a phut mi khempeuh in ut thu-a biakna-in Topa' tungah paipih hi. Moses in Israel mite' kiangah, “Thei un, Topa in a min-in Judah minam, Hur’ tapa ahi Uri tapa Bezalel sam khin hi; Amah in a hilh dingin amah leh Dan minam Ahisamak’ tapa Oholiab hilh khin hi. Amah in, khutsiamte' nasep, a geel siamte' hih, a dum, a dupsan, a ausan khaute leh a kop-a kikhuk puanzep siamte'sep, siam gante' gat—nasep nam khat peuhpeuh a semte, a geel siamte’ septe ahi zongin, nasep namkim a sem dingin siamna tawh amaute kidimsak hi. Bezalel leh Oholiab leh biakinn lamna-ah nasep khat peuhpeuh sep nading zia a thei dingin Topa in siamna leh pilna a guat mi peuhmah in Topa ' thupiaksa khempeuh tawh kituakin sem ding uh hi,” a ci hi. Moses in Bezalel leh Oholiab leh Topa in amau’ ngaihsutna-ah siamna a guat mi, nasem-a pai dingin a lungsim in a phut mi peuhmah sam hi; amaute in Moses'tung panin Israel mite in biakinn sep nadinga ut thu-a a piak uh piakna a paipih khempeuh uh sang hi. Amaute in zingsang simin ut thu-a piakna ama' tungah paipih uh ahih manin, biakinn nasep a namkim a sem mi khempeuh amau’ nasepna ciat panun hong pai uh a, Moses' kiangah, “ Topa in eite sep dinga hong sawl nasep nadingin a kicing ding zah val tampi mite in hong paipih uh hi,” a ci uh hi. Tua ahih ciangin Moses in thupia-in giahphual khempeuhah thu kizasakin, “Pasal hita leh numei hita leh kuamah in biakinn adingin piathuah nawn kei un,” kici hi. Tua ahih ciangin a piak ding uh mite kikho hi; bang hang hiam cih leh amau’ piaksa nate in nasepna khempeuh hih nadingin kicing a, val zaw lai hi. Nasem mite' lak panin a hih thei mi khempeuh in puan dal sawm tawh biakbuk bawl uh hi; tuate pen a kop-a kikhuk a kigan puan hoih leh a dum, a dupsan, a ausan khaute tawh kibawlin hoih taka a kibawl kherubte tawh bawl uh hi. Tua puan a dung tong sawmnih-le-giat, a vai tong li ciat ahi hi; a puan khempeuh kikim hi. Amah in puan dal ngate khat leh khat khuituahin, puan a dang ngate zong khat leh khat khuituah hi. Amah in a kikhuituah masa puan a nawlnung pen nawl dung suk-ah khuadum tawh a bilvangte bawl hi; tua mah bangin amah in a kikhui tuah a nihna puan a nawlnung pen nawl dung suk-ah zong tuate mah bawl hi; amah in puan khat tungah bilvang sawmnga bawlin, amah in a kikhuituah a nihna puan nawlah bilvang sawmnga mah bawl hi; a bilvangte khat leh khat kitang hi. Amah in kham kilhna sawmnga bawlin, kilhnate tawh puante khat leh khat kimatsak hi; tua ahih ciangin biakbuk in bup khat ahi hi. Amah in biakbuk tungah puanbuk dingin keelmul tawh kibawl puante zong bawl hi; amah in puan dal sawm-le-khat bawl hi. Tua puan a dung tong sawmthum, a vai tong li ciat ahi hi; tua puan sawm-le-khatte kikim hi. Amah in puan dal ngate khat leh khat khuituahin, a puan gukte zong khat leh khat mah khuituah hi. Amah in a kikhuituah puan khat a nawlnung pen nawl-ah a bilvang sawmnga bawlin, puan dal a zom nawlah a bilvang sawmnga mah bawl hi. Tua pen bup khat a suah theih nadingin puanbuk a kimatsak dingin amah in kilhna sawmnga sumngo tawh bawl hi. Amah in puanbuk adingin a kisansak tuutal vunte leh keelvunte tawh khuhna khat bawl hi. Tua ciangin amah in biakbuk adingin singkha sing tawh a po to khawm ding khuampeekte bawl hi. A khuampeek khat a tun’ tong sawm hi a, a vai tong khat leh khap ciat ahi hi. A bulh nadingin khuampeek khat in zang nih ciat nei hi; amah in biakbuk khuam khempeuh adingin hih bawl hi. Amah in biakbuk adingin hih bangin khuampeekte bawl hi: leitaw lam pang adingin khuam sawmnih; amah in a khuampeek sawmnihte bul-ah bullen sawmli ngun tawh, a zang nihte’ adingin khuampeek khat bul-ah bullen nih, leh a khuampeek dang khat bul-ah a zang nihte’ adingin bullen nih mah bawl hi. Biakbuk a pang nihna lam, leilu lam pang adingin amah in khuampeek sawmnih leh ngun tawh kibawl a bullen sawmli, khuampeek khat bul-ah bullen nih mah bawl hi. Nitumna lam biakbuk nunglam adingin amah in khuampeek guk bawl hi. Amah in biakbuk nung lam kiute’ adingin a khuampeek nih bawl hi. Tuate a bul lam-ah kikak a, ahih hangin a kual masa-ah a dawn kimat hi; amah in a kiu nihte’ adingin tua bangin nih bawl hi. Ngun tawh kibawl amau’ bullente tawh khuampeek giat om hi: bullen sawm-le-guk om-in, khuampeek khat bul-ah bullen nih ciat om hi. Amah in singkha sing zawl, biakbuk pang khat-a khuampeekte’ adingin nga, biakbuk a pang lang khat-a khuampeekte’ ading zawl nga, nitumna lam biakbuk nung lam panga a khuampeekte’ ading zawl nga bawl hi. Amah in a khuampeekte kim ciang takah mong khat panin mong khat dongin a zawl laita paisuaksak hi. Amah in khuampeekte kham tawh zutin, zawlte a len dingin a kualte kham tawh bawlin, zawlte kham tawh zut hi. Amah in a dum, a dupsan, a ausan khaute leh a kopa-a kikhuk a kigan puan hoih tawh dalna puan bawl hi; hoih taka a kibawl kherubte tawh amah in tua dalna puan bawl hi. Tua adingin amah in singkha khuampi li bawl a, tua khuampite kham tawh zut hi, a vankhainate in kham hi a, amah in tuate’ adingin ngun bullen li sung hi. Amah in puanbuk kongkhak adingin a dum, a dupsan, a ausan khaute leh phim tawh kikhui-in a kizem, a kop-a kikhuk a kigan puan hoih tawh kongpuankhai khat leh; a khuampi ngate a vankhainate tawh bawl hi. Amah in tuate’ luzepnate zutin, a gaknate kham hi a, ahih hangin a bullen ngate in sumngo ahi hi. Bezalel in singkha sing tawh singkuang bawl hi; a dung tong nih leh khap, a vai tong khat leh khap, a san’na tong khat leh khap ahi hi. Amah in kham citak tawh a sung leh a pua zutin a kimkotah kham geihual khat bawl hi. Amah in a kiu lite’ adingin kham kual li, a pang khatah kual nih, a pang lang khat adingin kual nih sung hi. Amah in singkha sing zawlte bawl a, tuate kham tawh zutin, singkuang puak nadingin singkuang pang-a kualte' sungah zawlte khum hi. Amah in kham citak tawh hehpihna tokhom khat bawl hi; a dung tong nih leh khap, a vai tong khat leh khap ahi hi. Amah in sek tawh a kiseek kham tawh kherub nih bawl hi; hehpihna tokhom mong tuak-ah tuate bawl hi, kherub khat mong khatah, kherub khat a mong lang khatah om hi; amah in a mong nihte-ah hehpihna tokhom tawh sakhatin kherubte bawl hi. Kherubte in a khate uh a tungah zalin, amau’ khate tawh hehpihna tokhom liim sunin, amaute khat leh khat kimaingat uh hi; hehpihna tokhom lamah kherubte’ mai nga hi. Amah in singkha sing tawh sabuai zong bawl hi; a dung tong nih, a vai tong khat, a san’na tong khat leh khap ahi hi; amah in kham citak tawh zut a, a kimkotah kham tawh a geihual khat bawl hi. Amah in khut peek cia a pha zawl khat a kimkotah bawl a, a zawl kimkotah kham geihual khat bawl hi. Amah in tua sabuai adingin kham kual li sungin, a kiu li, a khe lite-ah a kualte gak hi. Sabuai puak nading zawlte a len dingin a zawl gei-ah a kualte om hi. Amah in sabuai puak nadingin singkha sing zawlte bawl a, tuate kham tawh zut hi. Amah in sabuai tunga om ding beel leh kuangte, paknamtui’ adingin kuangdaite leh pakante, tui-buah nadingin kuang-ukte leh thawl gongbakte kham citak tawh bawl hi. Amah in kham citak tawh meivakkhuam zong bawl hi. Meivakkhuam a bul leh a kungte in a kiseek nate tawh kibawl hi; a haite, a nunte leh a pakte in tua tawh sakhat ahi hi. A pangte panin hiang guk meengkhia a, a pang khatah meivakkhuam hiang thumte omin a pang lang khatah meivakkhuam hiang thumte om hi; hiang khat ciat tungah a nun leh a pak a om, almond gah tawh a kibang hai thum leh a dang hiang khat ciat tungah a nun leh a pak a om, almond gah tawh a kibang hai thum mah kibawl hi—tua ahih ciangin a hiang gukte meivakkhuam panin meengkhia hi. A meivakkhuam tung mahmah-ah a nun leh a pak tawh a om, almond gah bangin a kibawl hai li omin, meivakkhuam panin hiang guk a kopte’ bul-ah tua tawh sakhat ahi mun khat om hi. Amau’ nunte leh a hiangte in tua tawh sakhat ahi hi; a buppi-in kham citak a kiseek sakhat ahi hi. Amah in a meivak sagihte leh a taitehte leh a kuangte kham citak bawl hi. Amah in kham citak talen khat tawh tua leh a nazatte khempeuh bawl hi. Amah in singkha sing tawh paknamtui biakna tau bawl hi; a dung tong khat, a vai tong khat ahi hi; tua pen a ning kikim a, a san’na tong nih ahi hi; a kite in tua tawh sakhat ahi hi. Amah in a tung zang, a kimkotah a pangte leh a kite kham citak tawh zut hi; amah in a kimkotah kham geihual khat leh a puak nadingin zawlte a len dingin a pang lang tuak, a geihual nuai tak-ah kham kual nih bawl hi. Amah in singkha sing tawh zawlte bawlin, tuate kham tawh zut hi. Amah in paknamtui bawlte’ gawm bangin a siangtho nilh sathau leh a siangtho a namtui paknamtui zong bawl hi. Amah in meihal biakna tau zong singkha sing tawh bawl hi; a dung tong nga, a vai tong nga ahi hi, a ning kikim a, a san’na tong thum ahi hi. Amah in tua tau adingin a kiu lite-ah kite bawl hi; a kite in a tau tawh sakhat hi a, amah in sumngo tawh zut hi. Amah in biakna tau nazat khempeuh, beelte, kawbiate, kuangte, sikkate leh vut luahna peekte bawl hi: a nazat khempeuh amah in sumngo tawh bawl hi. Amah in biakna tau adingin a zawl nuai-ah, a kim ciang a ban suk, a vang simsiam, sumngo siklen khat bawl hi. Amah in zawlte a len dingin sumngo siklen kiu lite tung ading kual li sung hi; amah in singkha sing tawh zawlte bawl a, tuate sumngo tawh zut hi. Amah in puak nadingin biakna tau pangte-a om kualte sungah zawlte khum hi; amah in singpekte tawh a kuak-in biakna tau bawl hi. Amah in kikhopna buk kongkhakah na a sem numeite’ limlangte panin sumngo tawh kisilna kuang leh a ngakna bawl hi. Amah in buk tual bawl hi; leitaw lam pang buk tual-a kikhaite in a kop-a kikhuk a kigan puan hoih hi a, tong za khat sau hi; a khuampite sawmnih hi a, a bullente zong sawmnih hi, sumngo tawh kibawl hi, ahih hangin a vankhainate leh a gaknate in ngun ahi hi. Leilu lam pang ading tong za khat, a khuampite sawmnih, a bullente sawmnih, sumngo tawh kibawl hi, ahih hangin a vankhainate leh a gaknate in ngun ahi hi. Nitumna lam pang adingin a kikhaisukte tong sawmnga hi a, a khuampite sawm hi-in, a bullente in sawm ahi hi; a vankhainate leh a gaknate in ngun ahi hi. A mai lam, nisuahna lam adingin tong sawmnga ahi hi. Kongpi pang khat ading a kikhaisukte in tong sawm-le-nga hi a, khuampi thum leh bullen thum tawh ahi hi. A pang khat ading tua bangmah ahi hi; buk tual kongpi hih lam leh hua lam-ah khuampi thum leh bullen thum tawh a kikhaisukte tong sawm-le-nga om hi. Buk tual kimkot-a a kikhaisukte khempeuh in a kop-a kikhuk a kigan puan hoih ahi hi. Khuampite’ ading a bullente in sumngo ahi hi, ahih hangin a vankhainate leh a gaknate in ngun ahi hi; a khuamlu zepnate a kizutna zong ngun hi a, buk tual-a khuamte khempeuh ngun tawh kibawl gakna tawh kigak hi. Buk tual kongpi kongpuankhai pen a dum, a dupsan, a ausan khaute leh a kop-a kikhuk a kigan puan hoihte phim tawh kikhui-in a kizem ahi hi; buk tual-a kikhaisukte tawh kizui-in tong sawmnih sau-in, a vai lam tong nga sang hi. A khuampite in li ahi hi; a bullen lite in sumngo hi a, a vankhainate ngun hi a, a khuamlu zepnate leh a gaknate a kizutna in ngun ahi hi. Biakbuk leh buk tual kimkot ading khetphimte khempeuh in sumngo ahi hi. Hih in siampi Aaron’ tapa Ithamar’ vaihawmna nuai-ah Levi mite’ sep ding tecipan’na biakbuk ahi biakbuk adingin Moses’ thupiakna tawh a kisim ciangin a kigawmna nate ahi hi. Judah minam Hur’ tapa ahi Uri’ tapa Bezalel in Topa in Moses a thupiak khempeuh bawl hi; a khut siam, a geel siam, a dum, a dupsan, a ausan khaute leh a kop-a kikhuk a kigan puan hoihte a zem, Dan minam, Ahisamak’ tapa Oholiab zong amah tawh om hi. Nasep nadinga a kizang kham khempeuh, biakinn lamna-a a kizang khempeuh, a kipia khamte in, biakinn shekel-in talen sawmnih-le-kua leh shekel za sagih sawmthum ahi hi. A kisim mihonte tung panin ngunte in biakinn shekel-in talen za khat leh shekel tul khat za sagih sawmsagihnga ahi hi: mi khat ciangin beka khat pai pia a, (biakinn shekel-in shekel lang), a pia mi, kum sawmnih a pha panin a tungsiah mi kisimna-a a kisim peuhmah tul zaguk leh tul thum leh zanga leh sawmnga ahi hi. Ngun talen za khatte in biakinn khuam bullente leh dalna puan khuam bullente dingin sun’ ding ahi hi; talen za khatte bullen za khat, bullen khat ciangin talen khat ahi hi. Amah in shekel tul khat za sagih sawmsagihnga pen khuampi tunga vankhai nadingin bawlin, a khuamlu zepnate zut-in tuate’ ading gakna bawl hi. A kipia sumngote in talen sawmsagih leh shekel tul nih leh za li ahi hi; amah in tua tawh kikhopna buk kongkhakte’ adingin khuam bullente, sumngo biakna tau leh a sumngo siklen leh biakna tau nazat khempeuh, buk tual kimkot-a khuam bullente buk tual kongpi khuam bullente, biakbuk khetphimte khempeuh leh buk tual kimkot-a khetphim khempeuh bawl hi. Topa in Moses a thupiaksa bangin, siangtho mun-ah nasep nadingin amaute in a dum, a dupsan, a ausan khaute tawh limtak-a kigan puan bawl uh hi; amaute in Aaron’ adingin biakna puan siangthote bawl uh hi. Amah in siampi puan pen, kham, a dum, a dupsan, a ausan khaute leh a kop-a kikhuk a kigan puan hoihte tawh bawl hi. Hoih taka a kigeel, a dum, a dupsan, a ausan khaute leh a kop-a kikhuk a kigan puan hoihte-ah zat dingin kham peek kiseekin khau-in kizem hi. Amaute in siampi puan’ adingin liangkaih puan bawl uh a, a mong nihte gel-ah zom uh hi. Topa in Moses a thupiaksa bangin, amah a gak dinga hoih taka a kigan tua tunga puan om pen, kham, a dum, a dupsan, a ausan khaute leh a kop-a kikhuk a kigan puan hoihte tawh kibawlin, a nate leh a sepna zia a kibang ahi hi. Israel tapate’ minte tawh kizui-in onik suangte kitaat a, kham tawh a kizepna sungah kikoihin, min gelhna a kibawl bangin kibawl hi. Topa in Moses a thupiaksa bangin Israel tapate phawkna suang dingin amah in siampi puan’ liangkaih puan tungah bulh hi. Amah in kham, a dum, a dupsan, a ausan khaute leh a kop-a kikhuk a kigan puan hoihte tawh, siampi puan a kibawl bangin hoih takin awmdal bawl hi. Tua in a ning kikim hi; thuap nih-in awmdal kibawl a, a kikhep ciangin a dung khap khat, a vai khap khat ahi hi. Amah in tua sungah suang gual li bulh hi. Sardis suang, topaz suang, leh kabankel suang gual khat in a gual masa ahi hi; a gual nihna in, emerald suang, sapfeiros suang leh diamond suang ahi hi; a gual thumna in, Jakinth suang, agate suang leh amethist suang ahi hi; a gual lina in, beril suang, onik suang leh jasper suang ahi hi; kham tawh zepna suangah tuate kikoih hi. Israel tapate’ min tawh kituakin amaute’ min a omna suang sawmlenih om hi; tuate in min gelhnate tawh kibang a, minam sawmlenihte amau’ min ciat kigelh hi. Amaute in awmdal tungah khau tawh a kibang, a kihual kham citak khainiang bawl uh hi; amaute in kham tawh a kibawl zepna nih leh kham kual nih bawl uh a, awmdal mong nihte-ah kham kual nihte koih uh hi; amaute in awmdal mongte-ah a om kual nihte' sungah kham khau nihte koih uh hi. Amaute in zepna nihte' tungah khau mong nihte zom uh hi; tua bangin amaute in siampi puan’ liangkaih puan tung a mai lamah bulh uh hi. Tua ciangin amaute in kham kual nih bawl uh a, siampi puan tawh a kizom a sung lam nawl, awmdal mong nihte-ah koih uh hi. Amaute in kham kual nih bawl uh a, siampi puan’ liangkaih puan nihte’ nuai a mai lam, hoih taka a kigan siampi puante’ puankhau a kizopna tung tak-ah bulh uh hi. Topa in Moses a thupiaksa bangin, hoih taka a kigan siampi puan khau tungah a om theih nading leh siampi puan tung panin awmdal a kol theih loh nadingin amaute in siampi puan’ kualte-ah khau dum khat-in a kualte tawh awmdal gak uh hi. Amah in khau dum bek tawh a kigan siampi puantualpi zong bawl hi; a kikeek loh nadingin puantualpi ngawng pen puan ngawng vang bangin a ngawng kimkot-ah a zimna om hi. Puantualpi mongte-ah amaute in a dum, a dupsan, a ausan khaute leh a kop-a kikhuk a kigan puan hoih tawh mang kawlsing gahte bawl uh hi. Topa in Moses a thupiaksa bangin, amaute in kham citak siklongte zong bawl uh a, mang kawlsing gahte’ kikal, puantualpi mong kimkot tunga mang kawlsing gahte' kikal-ah siklongte koih uh hi; biak nasep nadinga puantualpi mong kimkot tungah siklong khat, mang kawlsing gah khat, cih bangin om hi. Topa in Moses a thupiaksa bangin, amaute in Aaron leh a tapate’ adingin khau hoih tawh a kigan puantungsilhte leh khau hoih tawh a kigan dialpi leh khau hoih tawh a kigan lukhute, a kop-a kikhuk a kigan puah hoihte tawh a kibawl pheituam hoihte, leh a kop-a kikhuk a kigan puan hoihte tawh a kibawl puan kawnggak leh phim tawh kikkhui-in a kizem a dum, a dupsan, a ausan puante zong bawl uh hi. Amaute in kham citak tawh a siangtho kizepna peek khat bawl uh a, min gelhna a kibawl mah bangin tua tungah thu gelhin, “ Topa ’ tungah siangtho,” ci uh hi. Topa in Moses a thupiaksa bangin, amaute in a tunga dialpi tungah a gak dingin tua tungah khau dum khat vawh uh hi. Tua bangin kikhopna buk ahi biakbuk nasep khempeuh kiman hi; Topa in Moses a thupiaksa khempeuh bangin Israel mite in sem khin hi; tua ahih ciangin amaute mankhin hi. Amaute in Moses' kiangah biakbuk, a puanbuk leh a nazat khempeuh, a vankhainate, khuampeekte, a zawlte, a khuampite leh a bullente; a kisansak tuutal vunte leh savunte tawh a kibawl khuhna leh kongpuankhai dalna puan’ tecipan’na singkuang a zawlte leh hehpihna tokhom tawh; sabuai leh a nazat khempeuhte leh Ompihna Anlum; kham citak meivakkhuam leh meivak a kibulhsa tawh a meivakte leh a nazatte khempeuh leh meivak ading sathau; kham biakna tau, nilh sathau leh a namtui paknamtui leh puanbuk kongkhak ading kongpuankhai; sumngo biakna tau leh a sumngo siklen, a zawlte leh a nazat khempeuh; kisilna kuang leh a ngakna; buk tual-a a kikhaite, a khuampite, a bullente lehbuk tual kongpi adinga kongpuankhai, a khaute leh a khetphimte; leh kikhopna buk ahi biakbuk nasaepna-a a nazat khempeuh; siampi nasep nadingin siangtho mun-a zat ding hoih taka a kibawl puante, siampi Aaron ading biakna puan siangthote leh ama' tapate’ puante paipih uh hi. Topa in Moses a thupiaksa khempeuh tawh kituakin Israel mite in nasep khempeuh hih uh hi. Moses in nasep khempeuh mu a, en in, amaute in sem khin hi; Topa ’ thupiaksa bangin amaute in sem khin hi. Moses in amaute thupha pia hi. Topa in Moses' kiangah, “Kha masa a ni masa ni-in nangmah in kikhopna buk ahi biakbuk na lam ding hi. Nangmah in tua sungah tecipan’na singkuang na koih ding a, nangmah in dalna puan tawh singkuang na dal ding hi. Nangmah in sabuai na tumpih ding a, a om ding bangin na koih ding hi; nangmah in meivakkhuam na tumpih ding a, a meivakte na bulh ding hi. Nangmah in tecipan’na singkuang mai-ah paknamtui adingin kham biakna tau na koih ding a, biakbuk kongkhak dingin kongpuankhai na khai ding hi. Nangmah in kikhopna buk ahi biakbuk kongkhak mai-ah meihal biaknatau koihin, kikhopna buk leh biakna tau kikal-ah kisilna kuang na koih ding a, tua sungah tui na koih ding hi. Nangmah in a kimkotah buk tual na bawl ding a, buk tual kongpi dingin kongpuankhai na khai to ding hi. Tua ciangin nangmah in nilh sathau la-in, biakbuk leh a sunga om khempeuh na nuh ding a, biakbuk leh a innsung van khempeuh na ap ding hi; tua in a siangtho suak ding hi. Nangmah in meihal biakna tau leh a nazat khempeuh zong sathau nuh-in biakna tau na ap ding hi; biakna tau in a siangtho pen hi ding hi. Nangmah in kisilna kuang leh a ngakna zong sathau nuh-in na ap ding hi. Tua ciangin nangmah in kikhopna buk kongkhak-ah Aaron leh ama' tapate paipihin, amaute tui tawh na sil ding a, amah in keima' tungah siampi na a sep theih nadingin puan siangthote Aaron silh sakin, amah sathau nilhin na ap ding hi. Nangmah in ama' tapate zong paipihin amaute puantungsilhte na silhsak ding a, amaute in keima' tungah siampi na a sep theih nadingun amaute’ pa sathau na nilh bangin amaute sathau na nilh ding hi: amau’ sathau kinilhna in amau’ khang tawntungin siampi hih tawntungna piangsak ding hi,” a ci hi. Tua mah bangin Moses in hih hi; Topa in amah a thupiaksa khempeuh tawh kituakin amah in hih hi. A kum nihna a kha masa, tua kha a ni masa ni-in biakbuk kilam hi. Moses in biakbuk lam hi; amah in a bulllente koihin, a khuampeekte phut a, a zawlte khumin, a khuampite phut hi; amah in biakbuk tungah puanbuk zal a, Topa in Moses a thupiaksa bangin a tungah puanbuk khuh hi. Topa in Moses a thupiaksa bangin amah in tecipan’na la-in singkuang sungah koih a, singkuang tungah zawlte koihin, singkuang tungah hehpihna tokhom nga hi; amah in biakbuk sungah singkuang paipihin, kongpuankhai dalna puan khai a, Topa’ thupiak bangin tecipan’na singkuang dal hi. Topa in Moses a thupiaksa bangin, amah in biakbuk leilu lam pang, dalna puan pua lam, kikhopna buk sungah sabuai koih a, Topa ’ mai tua sabuai tungah a om ding bangin anlum koih hi. Topa in Moses a thupiaksa bangin, amah in biakbuk leitaw lam pang, sabuai tawh a kigalsai-in, kikhopna buk sungah meivakkhuam koih a, Topa ’ mai-ah meivak koih hi. Topa in Moses a thupiaksa bangin, amah in kikhopna buk sung, dalna puan mai-ah kham biakna tau koih a, tua tungah a namtui paknamtui hal hi. Amah in biakbuk kongkhak ding kongpuankhai a mun-ah khai hi. Topa in Moses a thupiaksa bangin amah in kikhopna buk ahi biakbuk kongkhak-ah meihal biakna tau koih a, tua tungah meihal biakna leh an tawh biakna pia hi. Amah in kikhopna buk leh biakna tau kikal-ah kisilna kuang koih a, tua sungah kisil nading tui koih hi. Moses leh Aaron leh a tapate in amau’ khut leh a khete uh tua tui tawh sil uh hi; Topa in Moses a thupiaksa bangin amaute kikhopna bukah a pai ciang leh biakna tau nai-ah a pai uh ciangin amaute kisil uh hi. Amah in biakbuk leh biakna tau kiim-ah a buk tual bawl a, buk tual kongpi kongpuankhai khai hi. Tua ahih ciangin Moses in nasep man ta hi. Tua ciangin meii in kikhopna buk tuam a, Topa ’ minthan’na in biakbuk dim hi. A tungah meii a omna hangin kikhopna buk sungah Moses tum thei lo a, Topa ’ minthan’na in a biakbuk dim hi. A khualzin sung tawntung uh biakbuk tung panin meii a kilakkhiat toh peuhpeuh ciangin Israel mite mai lam nawtin pai uh hi; ahih hangin meii a kilakkhiat kei leh a kilakkhiat ni mateng amaute paikhia lo uh hi. Bang hang hiam cih leh a khualzin sung tawntung uh Israel mi khempeuh' muhna-ah biakbuk tungah sunin Topa ’ meii omin, zan-in tua sungah mei om hi. Topa in Moses samin, kikhopna buk panin amah hopih-in hih bangin ci hi. “Israel mite tungah gen in la, amaute tungah hih bangin ci in: Note khatpeuh in Topa tungah biakna na paipih uh ciangin, ganhing tawh na biakna pen bawnghon panin hi taleh tuuhon panin hi taleh na paipih ding uh hi. “Ama biakna in bawnghon panin meihal biakna ahih leh, amah in a sitbang lo a pa khat pia ding hi; Topa ’ mai-ah a kisan’ theih nadingin kikhopna buk kong-ah pia ding hi; amah in meihal biakna ganhing lu tungah a khut nga ding a, a ma adingin kilemna bawl nadingin kisang ding hi. Tua ahih ciangin amah in Topa ’ mai-ah a bawngtal go ding hi; Aaron’ suan siampite in a si hong paipihin, kikhopna buk kong-a om biakna tau tung kimkotah a si theh ding hi. Tua ciangin amah in meihal biakna ganhing a vun hawk-in semnen ding hi; tua ciangin Aaron’ suan siampite in biakna tau tungah mei koihin, mei tungah a ngeina bangin sing koih ding hi; tua ciangin Aaron’ suan siampite in a sanente, a lutang leh a thaute, biakna tau tunga om mei tunga sing tungah a ngeina bangin koih ding hi; ahih hangin a sungkuate leh a khete tui tawh sil ding hi. Tua ciangin siampipa in mei tawh kihal biakna, Topa adingin a gim namtui, meihal biakna-in biakna tau tungah tuate a vekpi-in hal ding hi. “Meihal biak nadingin ama letsong in tuu hita leh keel hita leh a hon lak panin ahih leh, amah in a sitbang lo a pa khat pia ding hi; tua ciangin amah in Topa ’ mai biakna tau tung leilu lam pangah go ding a, Aaron’ suan siampite in biakna tau tung kimkotah a si theh ding hi. Tua ciangin amah in semnen ding a, biakna tau tunga om mei tunga sing tungah a ngeina bangin siampipa in a lutang leh a thau tawh koihkhawm ding hi; ahih hangin a sungkuate leh a khete amah in tui tawh sil ding hi. Siampipa in a vekpi-in pia-in, biakna tau tungah tuate hal ding hi; tua pen Topa adingin a gim namtui, mei tawh kihal biakna, meihal biakpiakna ahi hi. “ Topa tungah ama biakna in vasa tawh meihal biakna ahih leh, amah in vakhu tawh ahi zongin kawl vakhuno tawh a hi zongin a biakna hong paipih ding hi. Tua ciangin siampipa in biakna tau-ah paipihin a lu heektat ding a, biakna tau tungah hal ding hi; biakna tau pangah a si taakkhia sak ding hi; amah in a tangkhai leh a multe botkhia-in, vut koihna, biakna tau pang nisuahna lamah paaikhia ding hi; amah in a khate-in balkeek ding a, ahih hangin baltat lo ding hi. Tua ciangin siampipa in mei tunga om sing tung, biakna tau tungah hal ding hi; tua pen Topa adingin a gim namtui, mei tawh biakna, meihal biakna ahi hi. “Mi khatpeuh in Topa tungah biakna-in an tawh biakna hong paipih leh, ama biakpiakna in annel hi ding hi; amah in tua tungah sathau sungin, paknamtui koihin, tua ciangin Aaron’ suan siampite kiangah paipih ding hi. Tua ciangin amah in annel khut dim khat leh sathau, a paknamtui khempeuh tawh la ding hi; siampipa in hih pen Topa ’ adingin a gim namtui, mei tawh biakna, phawkna-in biakna tau tungah hal ding hi. An tawh biakna a val teng pen Aaron leh a tapate ading hi ding hi; tua in Topa ’ tungah mei tawh biakna sung panin a siangthopen ahi hi. “Nangmah in biak nadingin meibung sunga ki-em an tawh biakna na paipih ciangin, tua in silngo sawh loh sathau tawh a kizut mohpheng hi ding hi. Na biakna in belpei dai tunga ki-em an tawh biakna ahih leh, silngo sawhloh, sathau tawh a kibawl annel hi ding hi; nang in bal nenin a tungah sathau na sung ding hi; tua in an tawh biakna ahi hi. Na biakna in sikbel dai sunga kihuan an tawh biakna ahih leh, sathau tawh a kibawl annel hi ding hi. Nangmah in hih nate tawh a kibawl an tawh biakna Topa kiangah na paipih ding hi; tua pen siampipa kiangah a kipaipih ciangin amah in biakna tau-ah paipih ding hi. Siampipa in an tawh biakna panin a phawkna biakna teng la-in, Topa tungah a gim namtui, mei tawh biakna-in biakna tau tungah hal ding hi. An tawh biakna a val teng pen Aaron leh a tapate ading hi ding hi; tua in Topa tungah mei tawh biakna sung panin a siangtho pen ahi hi. “ Topa ’ tungah na paipih an tawh biakna in silngo tawh kibawl lo ding hi; bang hang hiam na cih leh silngo hita leh khuaizu khatpeuh peuh hita leh Topa ’ tungah meihal biakna-in na hal kei ding hi. Anpal tawh biakna ahih leh Topa ’ kiangah na paipih thei ding hi; ahih hangin a gim namtui dingin biakna tau tungah kipia lo ding hi. An tawh na biaknate khempeuh ci na sawh ding hi; an tawh na biakna-ah na Pasian tawh na thuciamna ci hel loin na om kei ding hi; na biakna khempeuh ci tawh na pia ding hi. “Anpal tawh Topa tungah biakna na piak leh, anpal tawh na biakna dingin a vui thak panin kila-in a kigawivui, mei tawh a kihangkeu na pia ding hi. Nang in a tungah sathau sungin, paknamtui na buak ding hi; tua in an tawh biakna ahi hi. Siampipa in phawk nadingin a kigawivui an pawlkhat leh a sathau leh a paknamtui khempeuh hal ding hi; tua in Topa tungah meihal biakna ahi hi. “Mi khat’ biakna in thunuam-a biakna ahih a, amah in a nu hita leh a pa hita leh bawnghon lak panin ganhing khat a piak leh, amah in Topa mai-ah a sitbang lo pia ding hi. Tua ciangin amah in a biakna ganhing lu tungah a khut nga-in kikhopna buk kongah go ding hi; tua ciangin Aaron’ suan siampite in biakna tau kimkot tungah a si theh ding hi. Thunuam-a biakna panin Topa tungah mei tawh biakna-in amah in a gilpi tuam a thaute leh asungkuate tunga a om a thau khempeuh tawh, a kawng-a om a kal nihte athau leh a kalte tawh a lakkhiat khop ding ahi a sintuamte pia ding hi. Tua ciangin Aaron’ suante in singkuang tunga om meihal biakpiakna tau tung mah ah hal ding uh hi; tua in Topa adingin a gim namtui, mei tawh kihal biakna ahi hi. “ Topa tungah thunuam-a a piak ding ama biakna in tuu leh keelhonte sung panin anu hita leh apa hita leh ganhing khat ahi leh, amah in a sitbang lo pia ding hi. Amah in a biak nadingin tuuno khat a piak leh, Topa mai-ah pia-in, a biakna ganhing lu tungah a khut nga-in kikhopna buk mai-ah tua ganhing go ding hi; tua ciangin Aaron’ suante in biakna tau kimkot tungah a si theh ding uh hi. Tua ciangin thunuam-a biakna panin Topa tungah meihal biakna in amah in a thau, a nungguh ciangah a ki-attan a mei thau buppi leh a gilpi tuam a thaute leh a sungkuate tunga om a thau khempeuh tawh, a kawng-a om a kal nihte a thau tawh, a kalte tawh a lakkhiat khop ding ahi a sintuamte pia ding hi. Tua ciangin siampipa in Topa tungah mei tawh kihal an tawh biakna-in biakna tau tungah hal ding hi. “Ama biakna in keel ahih leh, amah in Topa ’ mai-ah pia ding a, a lu tungah a khut nga-in kikhopna buk mai-ah go ding hi; tua ciangin Aaron’ suante in biakna tau kimkot tungah a si theh ding uh hi. Tua ciangin amah in tua sung panin Topa tungah mei tawh kihal biakna-in a piak dingin a gilpi tuam a thau leh a sungkuate tunga om a thau khempeuh tawh, a kawng-a om a kal nihte a thau tawh, a kalte tawh a lakkhiat khop ding ahi a sintuamte pia ding hi. Tua ciangin siampipa in a gim namtui dingin mei tawh kihal an tawh biakna-in biakna tau tungah hal ding hi. A thau khempeuh Topa’ aa ahi hi. Tua in na khang tawntungun na ten’na khempeuh uhah note in a thau leh a si na nek loh nadingun a tawntungin ngeina kip hi ding hi,” a ci hi. Topa in Moses kiangah, “Israel mite tungah hih bangin gen in: Hih lo ding ci-in Topa in a thupiakte khatpeuh peuh mi khatpeuh in theih lohna hangin khial a, tuate khatpeuh a hih a, a khialpa pen sathau a kinilh siampipa ahih a, mihingte tungah tua bangin mawhna hong tut leh, ama gamtatnasa a khialhna hangin a sitbang lo bawngtalno khat Topa mai-ah khialhna biakna-in amah pia sak un. Amah in Topa mai kikhopna buk kongah bawngtal paipihin, bawngtal lu tungah a khut nga-in, Topa ’ mai-ah a bawngtal go ding hi. Tua ciangin sathau a kinilh siampipa in bawngtal si tawmkhat la-in, kikhopna bukah paipih ding hi; tua ciangin siampipa in si sungah a khutme diahin, biakinn dalna puan mai Topa mai-ah a si kimkhat sagih vei theh ding hi. Tua ciangin siampipa in kikhopna buk sung Topa mai-a om paknamtui biakna tau kite, a si kimkhat nuhin kikhopna buk kongah a om meihal biakna tau bul-ah bawngtal’ si a om lai teng sungkhia ding hi. Tua ciangin amah in khialhna hanga biakna bawngtal thau khempeuh a gilpi tuam a thau leh a sungkuate tunga om a thau khempeuh tawh, a kawng-a om a kal nihte a thau tawh, a kalte tawh a lakkhiat khop ding ahi a sintuamte (thunuam biakna bawngtal panin hihte a kilak mah bangin) la ding a, siampipa in meihal biakna tau tungah tuate hal ding hi. Ahih hangin bawngtal vun leh a sa khempeuh, a lutang, a khete, a sungkuate, leh a ek tawh, a bawngtal buppi puakhia-in vut kibuakna, giahphual pua lam mun siangtho khat-a sing a kicih mei tungah amah in hal ding hi; vut a kibuakna-ah kihal ding hi. “Israel mihonte khempeuh in theih lohna hangin khialhna khat gamta-in tua pen mihonte in a phawk kei a, hih lo ding ci-in Topa in a thupiakte khatpeuh peuh amaute in hihin a mawh uh leh; amau’ gamtatnasa khialhna a kitheih ciangin, khialhna hanga biak nadingin mihonte in bawngtalno khat pia-in kikhopna buk mai-ah paipih ding uh hi; tua ciangin mihonte’ upate in Topa mai, bawngtal lu tungah amau’ khut nga ding uh a, Topa mai-ah bawngtal kigo ding hi. Tua ciangin sathau a kinilh siampipa in kikhopna bukah bawngtal sisan kimkhat paipihin, tua ciangin siampipa in a sisan sungah a khutme diahin dalna puan mai Topa mai-ah sagih vei theh ding hi. Tua ciangin amah in Topa mai kikhopna buk sunga om biakna tau kite tungah a sisan kimkhat nuh ding hi; amah in kikhopna buk kongah a om meihal biakna tau bulah sisan a om lai teng sung ding hi. Tua ciangin amah in a thau khempeuh la-in biakna tau tungah hal ding hi. Tua bangin a bawngtal hih ding hi; amah in khialna hanga biakna bawngtal a hihsa mah bangin hih zong hih ding hi; siampipa in amau adingin kilemna bawl sak ding hi; amaute kimaisak ding hi. Amah in giahphual pua-ah bawngtal puakhia ding a, a masa bawngtal a hal mah bangin a hal ding hi; tua in mihonpi adingin khialhna hanga biakna ahi hi. “Ukpa khat khialin, hih lo ding ci-in Topa ama Pasian in a thupiakte khempeuh lakah khatpeuh peuh theihlohna hangin hih kha a, a mawh ciangin, ama gamtatnasa khialhna ama tungah a va kihilh leh, amah in biakna-in a sitbang lo keel pa khat paipih ding a, keel lu tungah a khut nga-in, amaute in Topa mai, meihal biakna a gawhna mun uhah a go ding hi; tua in khialhna hanga biakna ahi hi. Tua ciangin siampipa in a khutme tawh khialhna hanga biakna si tawm la-in meihal biakna tau kite nuh-in, meihal biakna tau bulah si a om lai teng sung ding hi. Thunuam-a biakna sathaute mah bangin amah in biakna tau tungah a thau khempeuh hal ding hi; tua ahih ciangin siampipa in ama khialhna hangin ama adingin kilemna bawlsak ding hi; amah kimaisak ding hi. “Hih lo ding ci-in Topa ’ thupiakte khatpeuh peuh mi mawkmawk khat in theih lohna hangin hihin a khialh leh a mawh ahi hi.  Ama gamtatnasa a khialhna ama tungah a va kihilh ciangin amah in a gamtatnasa a khialhna hangin biak nading a sitbang lo keel a nu khat paipih ding hi. Amah in khialhna hanga biakna lu tungah a khut nga-in, meihal biakna munah khialhna biakna pen go ding hi. Siampipa in a khutme tawh a si tawm la-in meihal biakna tau kite nuh ding a, biakna tau bulah a si a om laiteng sung ding hi. Thunuam-a biakna panin a thaute a kilakkhiat mah bangin amah in a thau khempeuh lakhia ding a, Topa ading a gim namtui dingin siampipa in biakna tau tungah hal ding hi; siampipa in ama adingin kilemna bawlsak ding hi; amah kimaisak ding hi. “Amah in khialhna hanga biakna-in a piak dingin tuuno khat a paipih leh, a sitbang lo a nu khat paipih ding a, khialhna hanga biakna lu tungah a khut nga-in, amaute in meihal biakna a gawhna mun uhah khialhna hanga biak nadingin go ding hi. Tua ciangin siampipa khialhna hanga biakna si tawmkhat a khutme tawh la-in meihal biakna tau kite nuh ding a, biakna tau bulah si a om lai teng sung ding hi. Thunuam-a biakpiakna panin tuuno thau a kilak khiat mah bangin amah in a thau khempeuh lakhia ding a, Topa ’ tungah mei tawh kihal biakna, biakna tau tungah siampipa in hal ding hi; siampipa in ama gamtatnasa a khialhna hangin kilemna bawlsak ding hi; amah kimaisak ding hi. “Mi khatpeuh in teci pang dingin kiciamna za-in, amah teci hi napi-in a muhsa a theihsa na hita leh gen loin a ip leh, amah in tua mawhna pua ding hi. Tua ahih kei leh mi khatpeuh in gamlak ganhing nin a sisa hita leh inn ganhing nin a sisa hita leh a bokvak a nin ganhing a sisa hita leh, a muh loh a nin khatpeuh peuh lawngkha leh amah a nin suakin a mawh hi ding hi. Tua ahih kei leh amah in mihing nitna hita leh, amah a ninsak ding na khatpeuh mu loin a lawn’ khak leh, a theih ciangin a mawh hi ding hi. Tua ahih kei leh mi khatpeuh in asia bawl ding hita leh a pha bawl ding hita leh mite a kiciam theih ngei kiciamna nam khatpeuh peuh ama kam tawh a theih lohin a kiciam pak khak leh, a theih ciangin hihte khatpeuh peuhah a mawh hi ding hi. Hihte khatpeuh peuhah mi khat a mawh ciangin, amah in a gamtatnasa a khialhna pulak ding a, amah in mawhna biakna-in tuuhon pan ahi a, keelhon pan ahi zongin a nu khatpeuh peuh tuuno hita leh keel hita leh, a gamtatnasa a khialhna hangin Topa tungah a khialhna hanga biakna paipih ding hi; siampipa in a khialhna hangin kilemna bawlsak ding hi. “Ahih hangin amah in tuuno khat a piak zawh kei leh, a gamtatnasa a khialhna hangin Topa ’ tungah mawhna biakna-in vakhu nih ahi a, kawl vakhu no nih ahi zongin, khat khialhna hanga biakna, a khat meihal biak nadingin paipih ding hi. Amah in siampipa tungah tuate paipih ding a, siampipa in khialhna hanga biak nading pen pia masa ding hi; amah in a ngawng panin a lu heek ding a, ahih hangin heeksat lo ding hi; amah in khialhna hanga biakna si tawmkhat biakna tau pangah theh ding a, biakna tau bulah si a om lai teng taak sak ding hi; tua in khialhna hanga biakna ahi hi. Tua ciangin amah in ngeina kip om bangin meihal biak nadingin a khat pia ding hi; siampipa in a gamtatnasa a khialhna hangin kilemna bawlsak ding hi; amah kimaisak ding hi. “Ahih hangin amah in vakhu nih ahi a, kawl vakhu no nih ahi zongin a piak zawh kei leh, amah in a gamtatnasa khialhna hangin a biakna-in an nel seu khat sehsawm suah sehkhat khialhna hanga biak nadingin paipih ding hi; tua in khialhna hanga biakna ahih manin amah in tua tungah sathau sawh loin, paknamtui zong hel lo ding hi. Amah in siampipa kiangah paipih ding a, siampipa in phawkna-in khut dim khat la-in Topa tungah mei tawh kihal biakna, biakna tau tungah hal ding hi; tua in khialhna hanga biakna ahi hi. Tua bangin siampipa in hihte khatpeuh peuh a gamtatnasa a khialhna hangin kilemna bawlsak ding hi; amah kimaisak ding hi. An tawh biakna-a mah bangin a om lai teng siampipa’ ading ahi hi,” a ci hi. Topa in Moses kiangah, “Mi khatpeuh in theih lohna hangin thu palsatin Topa ’ na a siangtho khatpeuh peuhah a khialh leh, a mawhna hanga biakna-in tuuhon sung panin a sitbang lo tuutal khat, biakinn shekel tawh kizui-in ngun shekel-in nangmah in a man sehin, amah in Topa ’ kiangah paipih ding hi; tua in mawhna biakna ahi hi. Amah in a siangtho na a hih khialhna-ah lohkikna zong bawl ding a, sehnga suah sehkhat gawm behin siampipa tungah pia ding hi; siampipa in mawhna hanga biakna tuutal tawh ama adingin kilemna bawlsak ding hi; amah kimaisak ding hi. “Mi khatpeuh peuh in hih lo ding ci-in Topa ’ thupiakte khatpeuh peuh hihin a khialh leh, a theih lohna hang hita leh zong, amah a mawh hi veve-in ama mawhna mah pua ding hi. Tuuhon lak panin a sitbang lo tuutal khat, mawhna hanga biakna man zah ding nangmah in seh in la, amah in siampipa kiangah paipih ding hi; theih lohna hanga ama gamtatnasa khialhna hangin siampipa in ama ading kilemna bawlsak ding hi; amah kimaisak ding hi. Tua in mawhna hanga biakna ahi hi; amah in Topa ’ mai-ah a mawh ahi hi,” a ci hi. Topa in Moses kiangah, “Mi khatpeuh khialin, Topa ’ thu palsatin na kepsakna thu-ah ahi zongin khapna nate thu ah ahi zongin a vengpa khemin, ahih kei leh a na sutin, a vengpa nenniamin, tua ahih kei leh a mang na khat mu-in tua thu-ah zuau-in, a man loin kiciam a– mite a khialh theih ngei na khatpeuh peuh ah mi khat khialin a mawh ciangin amah in a suhte hita leh, a nenniamna tawh a ngahte hita leh, amah a kikemsak na hita leh, a mang na a muh hita leh, a man loin a kiciamnasa na khatpeuh peuh hita leh loh ding hi; amah in a cingin lohin sehnga suah sehkhat piak beh ding a, a mawhna hanga biakna piak beh ding a, a mawhna hanga biakna a piak ni-in a neipa tungah pia ding hi. Tua ciangin amah in Topa tungah a mawhna hanga biakna tuuhon lak panin a sitbang lo tuutal khat, mawhna hanga biakna man ding nangma seh zah siampipa kiangah paipih ding hi. Siampipa in Topa mai-ah ama ading kilemna bawlsak ding a, mi khat a mawh theih ngeina khatpeuh peuhte ah amah kimaisak ding hi,” a ci hi. Topa in Moses kiangah, “Aaron leh a tapate thu pia in la, hih bangin ci in: Hihte in meihal biaknate ngeina ahi hi. Meihal biakna in biakna tau tunga meikhuk tungah zingsang mateng zan tawntung om ding a, tua tungah biakna tau, mei kikuangsak den ding hi. Siampipa in a saihadial puan silhin, pum tungah a saihadial pheituam tengin, biakna tau tungah meihal biakna mei in a kattum vutte la-in biakna tau pangah koih ding hi. Tua ciangin amah in a puante suahin puan dang silh ding a, gialphual pua lam a siangtho mun khatah vutte puakhia ding hi. Biakna tau tunga mei kikuangsak den ding hi; kimitsak lo ding hi; siampipa in zingsang simin a tungah sing cihin, meihal biakna a ngeina bangin a tungah koihin, thunuam-a biakna thau a tungah hal ding hi. Biakna tau tungah mei kikuangsak tawntung ding hi; kimitsak lo ding hi. “Tua ciangin hihte in an tawh biakna ngeinate ahi hi. Aaron’ suante in biakna tau mai, Topa ’ mai-ah pia ding uh hi. Siampipa in, an tawh biakna tungah a om an tawh biakna annel khut dim khat, a sathau leh a paknamtui khempeuh tawh la-in, Topa ’ adingin a gim namtui, phawkna-in biakna tau tungah hal ding hi. Aaron leh a tapate in a om lai teng ne ding uh hi; a siangtho mun khatah silngo sawh loh kine ding hi; kikhopna buk tual ah ne ding uh hi. Tua pen silngo sawh-a ki-em hilo ding hi. Meihal biakna hong kipiakna sung panin amau’ tanh dingin ka piaksa ahi hi; tua in khialhna hanga biakna leh mawhna hanga biakna bangin a siangthopen na ahi hi. Na khang tawntung uh adingin thu hong kipiak mah bangin, Topa tungah meihal biakna a kipiakna panin Aaron’ suante lakah pasal peuhmah in tuate ne thei ding hi; tuate a lawng peuhmah a siangtho suak ding hi,” a ci hi. Topa in Moses kiangah, “Hih in amah sathau a kinilh ni-in Aaron leh a suante in Topa tungah a piak ding biakna ahi hi; an tawh biakna ngeina bangin annel seu khat sehsawm suah sehkhat, a lang zingsangin a lang nitakin pia ding hi. Tua pen belpei tung khatah sathau tawh kibawl ding hi; an tawh biakna mah bangin lim takin helsa leh balnensa-in na paipih ding a, Topa ading a gim namtui dingin na pia ding hi. Aaron’ suante sung panin amah a laih dingin sathau a kinilh siampipa in, a tawntung dingin thu a kipiaksa mah bangin Topa tungah pia ding hi; a vekpi-in kihal ding hi. Siampipa in an tawh a biakna peuhmah a vekpi-in kihal ding hi; kine lo ding hi,” a ci hi. Topa in Moses kiangah, “Aaron leh a tapate tungah hih bangin gen in: Hih in khialhna hanga biakna ngeina ahi hi. Meihal biakna a kigawhna mun Topa mai-ah khialhna hanga biakna kigo ding hi; tua in a siangthopen ahi hi. Khialhna hanga biakna a pia siampipa in ne ding hi; kikhopna buktual sung a siangtho mun khatah kine ding hi. A sa a lawng peuhmah a siangtho suak ding hi; puan tungah a si a kitheh khak ciangin, a siangtho mun khatah tua si a kitheh kha pen na sawp ding hi. Tua ciangin a kihuanna leibeel kisukham ding hi; ahih hangin tau beel tawh a kihuan ahih leh a beel kikiatin tui sungah kisawp siang sitset ding hi. Siampite lak panin pasal peuhmah in ne thei ding uh hi; tua in a siangthopen ahi hi. Ahih hangin siangtho munah kilemna bawl nadingin kikhopna buk sungah a kipaipih si a kilak khiatna khialhna hanga biakna sa kine lo ding hi: tua pen mei tawh kihal ding hi. “Hih in mawhna hanga biakna ngeina ahi hi. A siangthopen ahi hi; amaute in meihal biakna a gawhna mun uhah mawhna hanga biakna go ding uh a, biakna tau tung kimkotah a si kitheh ding hi. Tua ciangin a thau khempeuh a mei thau, a gilpi tuam a thau, a kawnga om a kal nihte a thau tawh, a kalte tawh a lakkhiat khop ding ahi a sintuamte kipia ding hi: Topa tungah meihal biakna-in siampipa in biakna tau tungah hal ding hi; tua in mawhna hanga biakna ahi hi. Siampite lakah pasal peuhmah in ne thei ding hi; a siangtho mun khatah kine ding hi; tua in a siangthopen ahi hi. Mawhna hanga biakna in khialhna hanga biakna tawh kibang a, tuate ading a ngeina a kibang ahi hi; kilemna a bawlsak siampipa in tua biakna sa ngah ding hi. Mi khatpeuh’ meihal biakna a piaksak siampipa in ama piaksak tua meihal biakna sa a vun ngah ding hi. Meibung sunga a ki-em an tawh biakna peuhmah leh sikbel dai ahi a, belpei tung ahi zongin a kibawl khempeuhte a pia siampipa in ngah ding hi. An tawh biakna khempeuh, sathau a kihel hita leh a kihel lo hita leh, Aaron’ suan khempeuh in a kikim-in hawm ding uh hi. “Hih in, mi khatpeuh in Topa tungah a piak theih ding thunuam-a biakna ngeina ahi hi. Amah in lungdam kohna-in a piak leh, silngo sawh loh sathau tawh a kihel moh, silngo sawhloh mohpheng sathau tawh a kizut, an nel moh sathau lim tak-a kihelte lungdam biakna tawh piakhawm ding hi. Amah in lungdamkoh nadingin thunuam-a ama biakpiakna tawh silngo kisawh anlum mohte ama biakna-in paipih khawm ding hi. Amah in Topa biak nadingin tua biakna sung panin moh khat ciat pia ding hi; thunuam-a biakna si a theh siampipa in tua moh ngah ding hi. Lungdam kohna-in thunuam-a ama biakpiakna a sa pen a piak ni-in kine ding hi; amah in a zingsang dong bangmah sit lo ding hi. Ahih hangin ama biakna piakna in thuciamna biakpiakna ahi a, ut thu-a biakpiakna ahi zongin ahih leh, amah in a biakpiakna a piak ni-in kine ding a, a om lai teng a zing ciangin kine ding hi; ahih hangin a nithum ni-in biakpiakna sa a om lai teng mei tawh kihal ding hi. A ni thum ni-in thunuam-a ama biakpiakna sa khatpeuh peuh a kinek leh, tua biakpiakna a piapa kisang lo ding a, tua pen ama’ aa-in zong kiciamteh lo ding hi; tua in a kihhuai hi ding a, a nepa in ama mawhna pua ding hi. “A nin na khatpeuh peuh tawh a kisawh kha sa kine lo ding hi; mei tawh kihal ding hi; a siang mi khempeuh in a sa ne thei ding uh a, ahih hangin ama tungah nitna om napi-in thunuam-a Topa tungah biakpiakna sa a nepa ama mite lak panin kihawlkhia ding hi. Mi khat in a nin na khat, mihing’ nitna hita leh ganhing nin khat hita leh a kihhuai a nin khatpeuh peuh hita leh lawng a, tua khit ciangin thunuam-a Topa tungah biakpiakna sa a nek leh, ama mite lak panin tua mipa kihawlkhia ding hi,” a ci hi. Topa in Moses kiangah, “Israel mite tungah hih bangin gen in: Note in bawngtal ahi a, tuu ahi a, keel ahi zongin a thau na ne kei ding uh hi. A mawk sih ganhing thau leh gamsate in a balgawp ganhing thaute na dangin kizang thei ding a, ahih hangin bangbang hita leh na ne kei ding uh hi. Bang hang hiam cih leh Topa tungah mei tawh kihal biakna ganhing thau a ne mi peuhmah ama mite lak panin kihawlkhia ding hi. Tua tham loin note in na ten’na uh mun khatpeuh peuh ah vasa namte’ aa hita leh ganhingte’ aa hita leh a sisan peuhmah na ne kei ding uh hi. Sisan khatpeuh peuh a ne mi peuhmah ama mite lak panin kihawlkhia ding hi,” a ci hi. Topa in Moses kiangah, “Israel mite tungah hih bangin gen in: Topa tungah thunuam-a ama biakpiakna a piapa in Topa kiangah ama biakna paipih ding hi; thunuam-a ama biakpiakna panin amah in meihal biakna Topa tungah a khut-in paipih ding hi; Topa ’ mai-ah veii-a biak nadingin a iik a kiveii theih nadingin amah in athau a iik tawh paipih ding hi. Siampipa in biakna tau tungah a thau hal ding a, ahih hangin a iik pen Aaron leh a suante ading hi ding hi. Thunuam-a biakpiakna panin biakna-in siampipa tungah a taklam phei na pia ding uh hi; Aaron’ suante sung panin thunuam-a biakna sisan leh athau a piapa in a taklam phei ngah ding hi. Bang hang hiam cih leh a kiveii a iik leh a kipia a phei pen keimah in Israel mite tung, thunuam-a, amau’ biakpiakna sung panin lakhia-in, Israel mite tung panin a tawntungin a ngah dingun siampi Aaron leh a suante tungah ka pia khin zo hi. Hih in, Topa ’ siampi nasem dingin amaute a kipiak ni-in, Topa tungah meihal biakna sung panin amau tungah a kipia, Aaron leh a suante’ tanh ahi hi; Israel mite in amaute tungah a piak nadingin amaute sathau a kinilh ni-in Topa in hih thu pia hi; tua in a khang tawntungun amau’ ngeina kip ahi hi,” a ci hi. - Hih in, amau biaknate Topa tungah a piak nadingun amah in Israel mite Sinai gam lakah a thu piak ni-in Topa in Sinai Mual tungah Moses a thupiak, meihal biakna, an tawh biakna, khialhna hanga biakna, mawhna hanga biakna, ki-apna leh thunuam-a biakna ngeina ahi hi. Topa in Moses kiangah, “Aaron leh amah tawh a om a tapate, a puante, a nilh sathau, khialhna hanga biakna a bawngtal, a tuutal nihte leh silngo sawhloh anlum lawh la in; kikhopna buk kongah Israel mihonte khempeuh khawm in,” a ci hi. Topa in amah a thupiak bangin Moses in hih hi; kikhopna buk kongah mihonte kikhawm hi. Moses in mihonte kiangah, “Hih in Topa in hih dinga a thupiak na ahi hi,” a ci hi. Moses in Aaron leh a tapate paipihin tui tawh amaute a sil hi. Amah in a puantungsilh amah silhsak a, a kawnggak tawh gakin, a puantualpi silh sak a, a siampi puan silh sakin, siampi puan’ khau, hoih taka a kigan tawh gak a, tua tawh ama tungah khih hi. Amah in ama tungah a awmdal bulhin, a awmdal sungah Urim leh Thummim koih hi. Amah in ama lu tungah a dialpi koihin, a dialpi tung a mai lamah, Topa in Moses a thupiak bangin amah in kham peek, a siangtho kumpi lukhu koih hi. Tua ciangin Moses in nilh sathau la-in, biakbuk leh a sunga om khempeuh nuhin tuate a ap hi. Amah in biakna tau tungah tuate kimkhat sagih vei thehin, biakna tau leh a nazat khempeuh leh kuang leh a ngaknate, ap dingin sathau nuh hi. Amah in nilh sathau kimkhat Aaron’ lu tungah sung a, ap dingin amah sathau nilh hi. Topa in Moses a thupiak bangin, Moses in Aaron’ tapate paipihin, puantungsilhte silh sakin, kawnggakte tawh amaute gakin, amau’ tungah lukhute khih hi. Tua ciangin amah in khialhna hanga biakna bawngtal paipih hi; Aaron leh a tapate in khialhna hanga biakna bawngtal’ lu tungah amau’ khut nga uh hi. Kilemna bawl nadingin Moses in goin, a si la-in a kiim-a biakna tau kite a khutme tawh nuhin, biakna tau siangtho sakin, biakna tau bulah a site sung khia-in, ap hi. Amah in a sungkuate tunga om a thau khempeuh leh a sintuamte leh a kal nihte a thau tawh la-in, Moses in biakna tau tungah tuate hal hi. Ahih hangin, Topa in Moses a thupiak bangin a bawngtal leh a vun, a sa leh a ek, amah in giahphual pua lamah mei tawh hal hi. Tua ciangin amah in meihal biakna tuutal pia hi; Aaron leh a tapate in tuutal lu tungah amau’ khut nga uh hi. Moses in goin, biakna tau tung kimkotah a si theh hi. Tuutal a kisem nen ciangin, Moses in a lu leh a ki-at nente leh a thau hal hi. Topa in Moses a thupiak bangin, a sungkuate leh a khete tui tawh a kisawp khit ciangin, Topa tungah mei tawh kihal biakna a gim namtui, meihal biakna-in Moses in biakna tau tungah tuutal buppi hal hi. Tua ciangin amah in a tuutal dang, kipsakna tuutal pia hi; Aaron leh a tapate in tuutal lu tungah amau khut nga uh hi. Moses in goin a si tawmkhat la-in Aaron’ taklam bilteep leh a taklam khutpi leh a taklam khepi nuh hi. Aaron tapate hong kipaipihin, Moses in amau’ taklam bil teepte leh amau’ taklam khutpite leh amau’ taklam khepite a si tawmkhat nuh hi; Moses in biakna tau tung kimkotah a si theh hi. Tua ciangin amah in a thau, a mei thau leh a sungkuate tunga om a thau khempeuh leh a sintuamte, a kal nihte leh a thau, leh a taklam phei la hi; Topa mai-ah a om silngo sawhloh anlum lawh sung panin amah in silngo sawhloh moh khat leh sathau sawh anlum moh khat leh moh pheng khat la-in, a thau tung leh a taklam phei tungah tuate koih hi. Amah in hihte khempeuh Aaron’ khut sung leh ama tapate’ khut sungah koihin, veii-a biakna-in Topa mai-ah tuate veii hi. Tua ciangin Moses in amaute’ khut sung panin tuate la-in, Topa tungah meihal biakpiakna, a gim namtui, kipsakna biakna-in biakna tau tungah meihal biakna tawh tuate hal hi. Moses in a iik la-in veii a, biakna-in Topa mai-ah veii hi; Topa in Moses a thupiak bangin tua in kipsakna tuutal panin Moses tanh ahi hi. Tua ciangin Moses in nilh sathau kimkhat leh biakna tau tunga om a si la-in, Aaron leh ama puante tung, leh ama tapate tung leh ama tapate puante tungah zong theh hi; tua ahih ciangin amah in Aaron leh ama puante leh ama tapate leh ama tapate’ puante amah tawh ap khawm hi. Moses in Aaron leh a tapate’ kiangah, “Keimah in thu pia-in, ‘Aaron leh a tapate in ne ding uh hi,’ ka cih mah bangin, kikhopna buk kongah a sa huan un la, tua lai munah tua sa leh kipsakna biakna lawh sungah a om anlum ne un; a sa leh anlum a om laite mei tawh na hal ding uh hi. Note hong kikipsak nading ni sagih bei ding ahih manin, note hong kikipsakna ni a cin’ mateng, kikhopna buk kong pua-ah ni sagih sung na paikhia kei ding uh hi. Tu ni-a a kibawl bangin, note adingin kilemna bawl nadingin Topa in thupia khin hi. Kikhopna buk kongah ni sagih sung sun leh zan na om ding uh a, Topa ’ hong sawlte na hih ding uh hi; tua hi kei leh note na si ding uh hi; bang hang hiam cih leh tua bang dingin keima tungah thu hong kipia hi,” a ci hi. Aaron leh a tapate in Topa in Moses tung tawnin a thupiaknate khempeuh hih uh hi. A ni giat ni-in Moses in Aaron leh a tapate leh Israel upate sam hi; amah in Aaron kiangah, “Khialhna hanga biak nadingin bawng pano khat leh meihal biak nadingin tuutal khat, a nih tuakin a sitbang lo, la in la, Topa ’ mai-ah tuate pia in. Israel mite kiangah, ‘Khialhna hanga biak nadingin keel apa khat, leh meihal biak nadingin bawngno khat leh tuuno khat, a nih tuakin kum khat pha-in a sitbang lo, leh thunuam-a biakna-in Topa ’ mai-ah piak dingin bawngtal khat leh tuutal khat leh, sathau tawh a kibawl an tawh biakna la in; bang hang hiam cih leh tu ni-in note tungah Topa hong kilang ding hi,’ ci in,” a ci hi. Amaute in kikhopna buk mai-ah Moses thupiak teng hong paipih uh hi; mihonpite khempeuh a nai-ah hong pai-in Topa mai-ah ding uh hi. Moses in, “Note hih dinga Topa ’ hong thupiak ahi hi; Topa ’ minthan’na note tungah hong kilang ding hi,” a ci hi. Tua ciangin Moses in Aaron kiangah, “ Topa thupiaksa bangin biakna tau nai-ah pai-in khialhna hanga biakna leh meihal biakna pia in la, nangma ading leh mite’ adingin kilemna bawl in; mite’ biakna paipih in la, amaute adingin kilemna bawlsak in,” a ci hi. Tua ahih ciangin Aaron in biakna tau naihin ama’ aa mahmah ding ahi khialhna hanga biakna bawngno go hi. Aaron’ tapate in ama tungah a sisan pia uh a, amah in a sisan sungah a khutme diahin biakna tau kite nuh a, biakna tau bulah a sisan sung khia hi; ahih hangin, Topa in Moses a thupiak bangin khialhna hanga biakna panin a thau leh a kalte leh a sintuamte biakna tau tungah amah in hal hi. A sa leh a vunte amah in giahphual pua lamah mei tawh hal hi. Amah in meihal biakna go hi; Aaron’ tapate in ama tungah a si pia uh a, amah in biakna tau tung kimkotah theh hi. Amaute in meihal biakna ama tungah a nen nenin a lutang tawh pia uh hi; amah in biakna tau tungah tuate hal hi. Amah in a sungkuate leh a khete sawp a, biakna tau tungah meihal biakna tawh tuate halkhawm hi. Tua ciangin a masa a, khialhna hanga biakna mah bangin amah in mite’ biakna pia-in, mite’ ading ahi khialhna hanga biakna keel la-in go a, khialhna hanga biakna dingin pia hi. Amah in meihal biakna paipihin ngeina kip omsa bangin pia hi. Amah in zingsang meihal biakna banah an tawh biakna paipihin, tua sung panin a khut dim la-in, biakna tau tungah hal hi. Moses’ thupiak bangin amah in mite adingin thunuam-a biakna bawngtal leh tuutal zong go hi; Aaron’ tapate in ama kiangah a sisan paipih uh a, amah in biakna tau tung kimkotah theh a, bawngtal leh tuutal thau, leh a mei thau, leh a gilpi tuam, leh a kalte, leh a sintuamte leh a thau, amaute in a iikte tungah koihin, amah in biakna tau tungah a thau hal-in, ahih hangin Aaron in a iikte leh a taklam pheite Topa ’ mai-ah veii-a biakna in veii hi. Tua ciangin Aaron in mite’ lamah a khutte lamto-in amaute thupha pia hi; tua ciangin khialhna hanga biakna leh meihal biakna leh thunuam-a biakna a piakna panin amah hong pai suk hi. Moses leh Aaron kikhopna buk sungah pai uh hi; amaute hong paikhiat ciangun amaute in mite thupha pia-in, mi khempeuh tungah Topa ’ minthan’na kilang hi. Topa mai panin mei hong piang khia-a meihal biakna leh biakna tau tunga om sathau kang hi; mi khempeuh in a muh uh ciangin, amaute awng uh a, lei maingatin puksuk uh hi. Tu-in Aaron’ tapate Nadab leh Abihu in amau’ paknamtui beel tuak la-in, tua sungah mei koih uh a, a tungah paknamtui koihin, amah in amaute’ tungah tua banga thu a piak ngei loh a siangtho mei Topa ’ mai-ah pia uh hi. Topa ’ omna mun panin mei hong pai khia-in amaute kang a, Topa mai-ah a si uh hi. Tua ciangin Moses in Aaron’ kiangah, “ Topa in ‘Ka kiang nai-a a omte kiangah keimah a siangthoin ka kilak ding a, mite khempeuh mai-ah keimah hong kiminthangsak ding hi,’ a ci hi,” ci-in a gen hi. Aaron pau loin om hi. Moses in Aaron’ pa’ sanggampa Uzziel tapate Mishael leh Elzafan sam a, amaute kiangah, “Hong pai un la, biakinn mai panin giahphual pua lamah na sanggamte uh puakhia un,” a ci hi. Tua ahih ciangin amaute in hong nai-in, Moses’ cihsa bangin giahphual pua lamah amau’ puantungsilh mah uh tawh amaute puakhia uh hi. Moses in Aaron leh a tapate Eleazar leh Ithamar kiangah, “Na lu uh a, na sam uh phiahsak kei un la, na puante uh balkeek kei un, na hih uh leh note si-in, mihonte khempeuh tungah Topa ’ hehna hong tung ding hi; ahih hangin na sanggamte uh, Israel innkuan buppi pen, Topa ’ tawhkuangsa mei katna hangin thuum thei ding uh hi. Kikhopna buk kong panin a pua lamah paikhia kei un, na pai uh leh na si ding uh hi; bang hang hiam cih leh Topa ’ nilh sathau note tungah om hi,” a ci hi. Moses’ gen bangin amaute gamta uh hi. Topa in Aaron kiangah, “Nang hita leh na tapate hita leh kikhopna bukah na pai uh ciangin leenggahzu hita leh kham theih zu hita leh dawn kei un, na dawn uh leh na si ding uh hi; tua in na suan na khakte tungah khang tawntungin ngeina kip khat hi ding hi. Note in a siangtho leh a mawkmawk, leh a nin leh a siang a khen ding na hi uh hi; Topa in Moses’ tung tawnin amaute tunga a gensa thukhamte khempeuh note in Israel mite a hilh ding na hi uh hi,” a ci hi. Moses in Aaron leh a om lai a tapate Eleazar leh Ithamar kiangah, “ Topa tungah meihal biakna sung panin a val lai ahi an tawh biakna la un la, tua in a siangthopen ahih manin silngo sawhlohin biakna tau gei-ah ne un; tua in Topa tungah meihal biaknate lak panin nang leh na tapate’ kaih ding ahih manin a siangtho mun khatah na ne ding uh hi; tua bang ding mahin kei tungah thu hong kipia hi. Ahih hangin a kiveii a iik leh a kipia a pheite pen nang leh na tapate leh na tanute in a siangtho mun khatpeuhah na ne ding uh hi; bang hang hiam cih leh tuate pen Israel mite in thunuam-a a biakpiakna panun nang leh na tapate’ kaih dinga hong kipia ahi hi. Topa in a thupiaksa bangin kipia a phei leh a kiveii a iikte ahih leh Topa ’ mai-ah veii-a biakna-in veii dingin amaute in meihal biakna sathau tawh hong paipih ding uh a, tua in nang leh na tapate in a tawntungin na kaih ding uh ahi hi,” a ci hi. Tu-in Moses in khialhna hanga biakna keel tawh kisai lim takin kan a, en un, na kihal mawk hi. Aaron’ tapate a om lai Eleazar leh Ithamar tungah amah heh a, “Note in mihonte’ adingin Topa mai-ah kilemna bawlin, amau’ mawhna a pua dingin note tungah hong kipiasa a siangtho sa pen khialhna hang a biakna hi napi, bang hangin biakinn ah ne lo na hi uh hiam? En un, biakinn sungah a sisan kipaipih lo hi. Ka thupiaksa bangin note in biakinn sungah na nek ding uh a kilawm ahi hi,” a ci hi. Aaron in Moses kiangah, “En in, tu ni-in amaute in Topa mai-ah amau’ khialhna hanga biakna leh amau’ meihal biakna pia khin zo uh hi; tua bang hi napi hih bang nate kei tungah hong tung veve hi. Khialhna hanga biakna tu ni-in a ne hi leng, Topa ’ muhna ah san’ huai ding ka hi hiam?” a ci hi. Moses in tua thu a zak ciangin a lungkim hi. Topa in Moses leh Aaron’ tungah, “Israel mite kiangah hih bangin gen un: Hihte in leitunga om ganhing khempeuh lak panin na nek theih ding uh a nungta ganhing ahi hi. Ganhingte lak panin a khecin a ka, eknel a hai peuhmah na ne thei ding uh hi. Ahi zongin eknel haite lak pan hita leh khecin kate lak pan hita leh, note in hihte na ne kei ding uh hi; Kalaoh in eknel a hai hangin a khecin ka lo ahih ciangin note’ adingin a nin ahi hi. Sakikh ganhing in eknel a hai hangin a khecin ka lo ahih ciangin note’ adingin a nin ahi hi. Bilpi in eknel a hai hangin a khecin ka lo ahih ciangin note’ adingin a nin ahi hi. Vok pen a khecin a kat hangin eknel hai lo ahih ciangin note’ adingin a nin ahi hi. Note in tuate’ sa na ne kei ding uh a, a site zong na lawng kei ding uh hi; tuate in note’ adingin a nin ahi hi. “Tua sunga omte sung panin hihte khempeuh na ne thei ding uh hi. Tuipi sung hita leh gun sung hita leh tui sungah a om phe leh lip a neite peuhmah na ne thei ding uh hi. Ahih hangin tuipi sung, gun sunga om phe leh lip a nei lo, tui sunga a hontat ganhingte leh tui sunga a nungta ganhingte pen note adingin a kihhuai ahi hi. Tuate pen note adingin a kihhuai hi ding hi; note in tuate’ sa na ne kei ding uh a, a sisate zong na kih ding uh ahi hi. Tui sunga a omte sung panin phe leh lip a nei lo peuhmah note adingin a kihhuai ahi hi. “Vasate lak panin note in na kih ding uh, a kine lo ding, a kihhuaite in: muvanlai, mupi, luimu, mu-meika, musan nam khempeuh, va-ak nam khempeuh, kalaoh-vasa, pengpelep, vatawt, musi nam khempeuh, keising tuimu, gun vakang, gam vatawt, tui vatawt, musane, gun vapi, gun vazonei nam khempeuh, huihtun leh bak ahi hi. “Khe li tawh a pai, kha a nei ganhing khempeuhte note’ adingin a kihhuai ahi hi. Ahi zongin khe li tawh a pai kha a nei ganhingte khempeuh lak panin leitungah a tuan nadingun a khepek uh tawh kizom ngaltak tawn a neite na ne thei ding uh hi. Tuate lak panin na nek theih dingte un: kauphe kitom nam khempeuh, kauphe zol nam khempeuh, khuangbai nam khempeuh, leh kauphe kisau nam khempeuh ahi hi. Ahih hangin khe li nei-in kha a nei ganhing dangte khempeuh note’ adingin a kihhuai ahi hi. “Hite tawh note a nin na suak ding uh hi; a sisa a lawng peuhmahte nitak mateng a nin hi ding a, a sisa themkhat a pua peuhmah in a puan sawpin, nitak mateng a nin hi ding hi. A khecin a ka ahih hangin eknel a hai lo ganhing peuhmah note adingin a nin ahi hi; tuate a lawng peuhmah a nin hi ding hi. Khe li tawh a pai ganhingte khempeuh lak panin amau’ khebom tawh a paite khempeuh note adingin a nin ahi hi; tuate a sisa a lawng peuhmahte nitak mateng a nin hi ding a, a sisa a puapa in a puan sawpin, nitak mateng a nin hi ding hi; tuate note’ adingin a nin ahi hi. “Leitunga a vak a pai thei ganhingte lak panin note’ adingin a ninte in: savokphual, zusa, innhikpi nam khempeuh, tawlbawkpi, tang, tangteuh, sehnel gam tangteuh leh thankik ahi hi. A hon tat ganhing khempeuhte’ lak panin hihte in note’ adingin a nin ahi hi; tuate a sih ciangin a lawng peuhmah a nitak mateng a nin hi ding hi. Tuate a sisa khatpeuh peuh a tukna nate, sing nazat, puan, savun ippi leh na khatpeuh peuh a, kizang beel khatpeuh peuh hita leh a nin hi ding hi; tua na pen tui sungah kidiah ding a, a nitak mateng a nin hi ding hi; tua khit ciangin siang ding hi. Tuate khatpeuh peuh leibeel khatpeuh peuh sungah a kiat leh, tua sunga om khempeuh a nin hi ding a, note in tua beel na sukham ding uh hi. Tua lei beel sungah a om a kine thei ding an tungah tua bang tui a tuk leh a nin hi ding hi; tua bang beel sunga om dawn theih ding peuhmah a nin hi ding hi. Tuate a sisa themkhat a tukna peuhmah a nin hi ding hi; meibung hita leh belpei hita leh kisuzan ding hi; tuate a nin ahi hi; note’ adingin a nin hi ding hi. Ahi zongin tuinak leh tuibeem ahih leh siang ding hi; ahih hangin a sisate a lawng peuhmah nin ding hi. Tuate a sisa themkhat a kivawh ding khaici tungah a tuk leh, tua khaici a siang hi; ahih hangin khaici tui kidiah a, tuate a sisa themkhat tua khaici tungah a tuk leh note’ adingin tua khaici a nin ahi hi. “Note’ nek theih ding ganhing khatpeuh peuh a sih leh, a sisa a lawngpa pen nitak mateng a nin hi ding a, a sisa a ne pa in ama puante sawpin nitak mateng a nin hi ding hi; a sisa a puapa in zong ama puante sawpin nitak mateng a nin hi ding hi. “Leitungah a hontat ganhing peuhmah a kihhuai ahi hi; tuate kine lo ding hi. A awmtal peuhmah leh khe li-a a pai peuhmah, ahih kei leh khe tampi a nei, leitungah a pai a hontat ganhing khempeuh, note in na ne kei ding uh hi; bang hang hiam cih leh tuate in a kihhuai ahi hi. A hontat ganhing khatpeuh peuh tawh nomau mah a kihhuai-in na kibawl tawm kei ding uh hi; tuate tawh nomau na kinin tawmsak kei ding uh hi; na kinit tawmsak uh leh a nin na suak ding uh hi. Bang hang hiam cih leh keimah in Topa na Pasian uh ka hi hi; tua ahih ciangin note ki-ap un la, kei siangtho ka hih manin note zong siangtho un. Leitunga bokvak a, a hontat ganhing khatpeuh peuh tawh note na kinin tawmsak kei ding uh hi. Bang hang hiam cih leh note’ Pasian a hi dingin Izipt gam panin note hong paikhiatpihpa in keimah Topa ka hi hi; tua ahih ciangin kei siangtho ka hih manin note na siangtho ding uh hi,” a ci hi. - Hih in a nin leh a siang a nungta ganhing nek theih ding leh a nungta ganhing nek theih loh ding khen nadingin ganhing leh vasa, tui sunga a pai a nungta ganhing khempeuh leh leitungah a hontat ganhing khempeuh tawh kisai-in ngeina ahi hi. Topa in Moses kiangah, “Israel mite tungah hih bangin gen in: Nupi khat gai-in ta pasal a neih leh ni sagih sung tua nu nin ding hi; a nin neih huna mah bangin amah a nin ding hi. A ni giat ni-in a naungek vun dawn ki-at ding hi. Tua ciangin nupi in ama sisan sian’sak ding a kipsakna hangin ni sawmthum leh nithum sung om lai ding hi; amah in a kisian’suahna ni a cin’ mateng a siangtho na khatpeuh peuh lawng loin, biakinn sungah zong tum lo ding hi. Ahih hangin amah in ta numei a neih leh, ama nin neih huna mah bangin nipi kal nih sung a nin hi ding hi; ama sisan sian’sak ding a kipsakna hangin ni sawmguk leh ni guk sung om lai ding hi. “Amah a kisian’ suahna hun a cin’ ciangin, tapa’ ading hita leh tanu’ ading hita leh, tua nu in kikhopna buk konga siampipa kiangah meihal biak nadingin kum khat a pha tuuno khat, leh khialhna hanga biak nadingin kawl vakhuno khat ahi a, vakhu khat ahi zongin pia ding a, siampipa in Topa mai-ah pia in, ama adingin kilemna bawlsak ding hi; tua ciangin ama si luan’na panin tua nu a siang hi ding hi. Hih in ta pasal hita leh ta numei hita leh a nei nu’ adingin ngeina ahi hi. Tua nu in tuuno a piak zawh kei leh vakhu nih ahi a, kawl vakhu no nih ahi zongin paipih ding a, khat in meihal biak nading hi a, adang khat pen khialhna hanga biak nading ahi hi; siampipa in ama adingin kilemna bawlsak ding a, tua nu siang ding hi,” a ci hi. Topa in Moses leh Aaron kiangah, “Mi khat in ama pumpi vun tungah a bawk ahi a, a meima ahi a, a mel tuampian ahi zongin a neih a, tua pen ama pumpi vun tungah phak natna a suah leh, tuapa pen siampi Aaron kiang ahi a, ama tapate siampi khatpeuh peuh kiangah ahi zongin kipaipih ding a, siampipa in ama pumpi vun tunga natna mun vel ding hi; a natna munah a om a multe kaang-in ama vun sangin a natna thuk tumzaw-in a kimuh leh, tua in phak natna ahi hi; siampipa in a vel khit ciangin amah a nin hi, ci-in gen ding hi. Ahih hangin ama pumpi vun sungah a natna mun kaang napi-in, a vun sangin a thuk lozaw bangin omin, tua sungah a multe kaang loin a om leh, siampipa in ni sagih sung cinapa khumcip ding hi; siampipa in a ni sagih ni-in amah vel ding a, a natna noptuamin a natna in a vun sung lawh lo hi ci-in a muh leh, siampipa in ni sagih sung mah khumcip lai ding hi; siampipa in a ni sagih ni-in amah vel kik dinga, a natna mun mual-in a vun sung a lawh kei leh, siang hi, ci-in siampipa in gen ding hi; tua pen a meima mawkmawk lel ahi hi; amah in a puante sawpin a siang hi ding hi. Ahih hangin amah a sian’ nadingin siampipa kiangah a kilah khit ciangin a meima in a vun sung a lawh leh siampipa mai-ah kilak kik ding hi; siampipa in vel ding a, a meima in a vun sung a lawh leh siampipa in amah in nin hi, ci-in gen ding hi; tua in phak natna ahi hi. “Mi khat in meima a neih ciangin siampipa kiangah kipaipih ding hi; siampipa in vel ding a, a vun sungah a bawk kaang omin tua in a multe kangsakin a bawk sungah ma thak a om leh, tua in ama pumpi vun sungah a om luisa phak natna hi a, siampipa in amah a nin hi, ci-in gen ding hi; amah a nin ahih manin khumcip lo ding hi. Siampipa’ muh theihna ciangah tua natna in a vun phukhamin tua natna in a veipa’ vun khempeuh a lutang panin a khe dongin a lawh khit leh, siampipa in vel ding a, a natna in ama pumpi khempeuh a lawh khit leh siampipa in tua natna tawh kisai-in amah siang hi, ci-in gen ding hi; a pumpi-in kaang khin hi, amah siang hi. Ahih hangin ama tungah ma thak a kilat ciangin amah a nin hi ding hi, Siampipa in a ma thak velin, amah a nin hi, ci-in gen ding hi; bang hang hiam cih leh a ma thak in phak natna ahih manin a nin ahi hi. Ahih hangin a ma thak pen kikhel kikin a kaang a suah leh, siampipa kiangah pai ding a, siampipa in amah velin a natna pen a kaang a suah leh, siampipa in natna veipa a siang hi, ci-in gen ding hi; amah a siang ahi hi. “Mi khatpeuh’ pumpi vun sungah a damsa meimatum khat om a, a meimatum munah a bawk kaang ahi a, a sankang mun ahi zongin a om leh, siampipa kiangah kilak ding hi;   siampipa in vel ding a, tua pen a vun sangin thuk zaw-in a multe a kang a suah leh, siampipa in amah a nin hi, ci-in gen ding hi; tua in phak natna hi a, meimatum sung tawnin hong phukhia ahi hi. Ahih hangin siampipa in velin, tua tunga a multe kaang loin a vun sangin a thuk zawk kei a, mual-in a om leh, siampipa in ni sagih sung khumcip ding hi; tua in a vun sung a lawh leh siampipa in amah a nin hi, ci-in gen ding hi; tua in phak natna ahi hi. Ahih hangin a natna mun pen mun khat bekah omin a kilawh kei leh meimatum pawn ahi hi; siampipa in amah a siang hi, ci-in gen ding hi. “Tua ahih kei leh, pumpi in a vun tungah meikangma khat nei-in tua meikangma a thak mun pen a sankang ahi a, a kaang ahi zongin hong suah leh, siampipa in vel ding hi; tua mun-a om a multe kang-in a vun sangin a natna a thuk zawk leh, tua in phak natna ahi hi; tua pen meikangma tawnin hong phukhia hi a, siampipa in amah in nin hi, ci-in gen ding hi; tua in phak natna ahi hi. Ahih hangin siampipa in velin, tua mun a multe kaang loin a vun sangin a thuk zawk kei a, mual-in a om leh, siampipa in ni sagih sung khumcip ding hi; siampipa in a ni sagih ni-in amah vel ding hi; tua in a vun sung a lawh leh siampipa in amah a nin hi, ci-in gen ding hi; tua in phak natna ahi hi. Ahih hangin a natna mun pen mun khat bekah omin a vun sung lawh loin mual-in a om leh, tua in meikangma pan-a bawk hi a, siampipa in amah siang hi, ci-in gen ding hi; bang hang hiam cih leh tua in meikangma pawn ahi hi. “Pasal ahi a, numei ahi zongin a lutang tung ahih kei leh a kha-ah natna khatpeuh a neih ciangin, siampipa in tua natna vel ding hi; tua natna pen a vun sangin thukzaw-in a kimuh a, a sunga a multe eng-in a mal a neu leh, siampipa in amah a nin hi, ci-in gen ding hi; tua in cithak ahi, lu-phak ahih kei leh kha-phak natna ahi hi. Siampipa in cithak natna velin, a vun sangin thukzaw lo bangin kimu in tua sungah mul vom a om kei leh, siampipa in ni sagih sung cithak natna tawh tuapa khumcip ding a, a ni sagih ni-in siampipa in a natna vel ding hi; a cithak kilawh loin, a sungah mul eng om loin, a cithak pen a vun sangin thuk zaw-in a kimuh leh, tua ciangin amah leh amah a mul kikiat dinga, ahih hangin a cithak san kiat lo ding hi; siampipa in adang ni sagih sung mah cithak natna tawh tuapa khum ding hi; a ni sagih ni-in siampipa in a cithak vel ding a, a cithak in a vun sung lawh loin, a vun sangin a thukzaw loin a kimuh leh, siampipa in amah a siang hi, ci-in gen ding hi; amah in ama puante sawp ding a, a siang hi ding hi. Ahih hangin amah a kisian’sak khit ciangin a cithak in a vun sung a lawh leh, siampipa in vel ding a, a cithak in a vun sung a lawh leh, siampipa in mul eng a zon’ ding kisam lo hi; amah a nin ahi hi. Ahih hangin ama mai-ah, cithak noptuam zo hi, ci-in mu a, a sungah mul vom po-in, a cithak a dam leh, amah a siang ahi hi; siampipa in amah a siang hi, ci-in gen ding hi. “Pasal ahi a, numei ahi zongin a pumpi vun tungah a mel tuampian a kang mun a neih leh, siampipa in vel ding a, a pumpi vun tunga om a tuampian munte pen a kang milmial ahih leh, tua in vun a phukhia meima ahi hi; amah a siang hi. “Mi khat a sam pulh a, a lu a tol hangin amah a siang ahi hi. Mi khat a sam a taltang leh a paang panin a pulh leh, amah a tal kolh hi a, ahih hangin amah a siang ahi hi. Ahih hangin a lu tol tung hita leh a tal kolh tung hita leh, tua tungah a sankang natna a om leh, tua in a lu tol tung ahih kei leh a tal kolh tunga a suakkhia phak natna ahi hi. Tua ciangin siampipa in amah vel ding a, a bawk natna pen a lu tol tung hita leh a tal kolh tung hita leh, tua tungah pumpi vun tunga phak om tawh kibangin a sankang ahih leh, amah in miphak hi a, a nin ahi hi; siampipa in amah a nin hi, ci-in a gen kul hi; a lu tangah ama natna om ahi hi. “Tua natna a nei miphakpa in puan keekte silhin a sam phiahsak ding a, amah in a muk humin, ‘Nin, nin,’ ci-in kiko ding hi. Amah in a natna a neih lai teng a nin hi ding hi; amah a nin ahi hi; giahphual pua lam mun khatah amah guak teeng ding hi. “Samul puan hita leh saiha dial puan hita leh, puan tungah phak natna a om ciang, tua saiha dial puan, samul puante, a tung leh a pheite tung hita leh, savun leh savun tawh a kibawl na khatpeuh peuh tungah a om ciangin, tua natna in a hing meel-in ahi a, a san meel-in ahi zongin puan tungah a kilat ciang, puan a tung a phei tung hita leh savun leh savun tawh a kibawl na khatpeuh peuh tungah a om ciangin tua in phak natna hi a, siampipa kiangah kilak ding hi. Siampipa in a natna vel ding a, tua natna a ban’na na pen ni sagih sung koihcip ding hi; tua ciangin amah in a ni sagih ni-in a natna vel ding hi. A natna pen puan tungah kizelhin puan a tung a phei-ah hita leh, savun leh savun a kizatna na khatpeuh peuh tungah a om leh, tua natna in a lauhuai phak natna ahi hi; tua in a nin ahi hi. Amah in a puan hal ding hi; tua natna pen puan a tung a phei-ah hita leh, samul puan saiha dial puan hita leh savun tawh a kibawl na khatpeuh peuh tungah a om leh hal ding hi; bang hang hiam cih leh tua in a lauhuai phak natna ahi hi; tua pen mei sungah kihal ding hi. “Siampipa in velin, a natna pen puan tung, a tung a phei-ah hita leh savun tawh a kibawl na khatpeuh peuh tungah a kizelh kei leh, tua ciangin siampipa in tua natna a ban’na na pen amaute in a sawp nading uh thupia ding a, amah in adang ni sagih sung mah tua na koihcip ding hi; siampipa in tua natna a ban’na na pen a kisawp khit ciangin vel ding hi. Tua natna a ban’na mun a meel a kikhel kei leh, a natna a kizelh loh hangin tua in a nin ahi hi; tua natna pen a sung lamah ahi a, a pua lamah ahi zongin a ban’ leh mei sungah tua puan na hal ding hi. “Ahih hangin siampipa in vel a, a kisawp khit ciangin a natna a mualh leh, amah in a puan tung pan hita leh a savun tung pan hita leh a puan a tung a phei tung pan hita leh natna a ban’na mun balkhia ding hi; tua ciangin a puan tung hita leh puan a tung a phei tungah hita leh savun tawh a kibawl na khatpeuh peuh tungah a kilat kik leh, tua in a kizelh ahi hi; natna a ban’na na pen mei tawh na hal ding hi. Ahih hangin a puan hita leh puan a tung a phei hita leh savun tawh a kibawl na khatpeuh peuh a kisawp khit ciangin tua natna a paikhiatna na pen, a nih veina kisawp kikin, a siang hi ding hi,” a ci hi. Hih in samul puan hita leh saiha dial puan hita leh puan a tung hita leh a phei hita leh, savun tawh a kibawl na khempeuh tungah a om phak natna tawh kisai-in siang hiam nin hiam ci-in khen nading ngeina ahi hi. Topa in Moses kiangah, “Hih in, amah a kisian’sak ni-in mi phakpa’ zuih ding ngeina hi ding hi. Siampipa kiangah amah kipaipih ding hi; giahphual pua lamah siampipa pai khia-in vel ding hi. Tua ciangin a phak natna pen a phakpa tung pan a dam leh, a kisiangsak ding mipa’ adingin a hing vasa siang nih leh taamtaak sing leh a ausan puan leh puknah a la dingin siampipa in amaute sawl ding hi; amaute in tuiluang tungah leibeel khat sungah a vasa khat a gawh nading uh siampipa in thu pia ding hi. Amah in a hing lai vasa pen taamtaak sing leh a ausan puan leh puknah tawh la khawmin, tuate leh a hing lai vasa pen tui luang tunga kithat vasa’ si sungah diah ding hi; amah in phak natna panin a kisiangsak dingpa tungah sagih vei theh ding hi; tua ciangin amah siang hi, ci-in gen ding a, a hing vasa pen gam lakah khah ding hi. A kisiangsak ding mipa in a puante sawpin, a mul khempeuh met khia-in, tui sungah amahmah kisilin, amah in a siang hi ding hi; tua khit ciangin amah giahphual ah hong ciah ding a, ahih hangin ama puanbuk pua lamah ni sagih sung om ding hi. A ni sagih ni-in amah in a sam khempeuh met ding hi; a khamul leh a mitkhu mul, a mul khempeuh met khia ding hi. Tua ciangin amah in a puante sawpin, tui sungah a pumpi silin, amah a siang hi ding hi. “A ni giat ni-in amah in a sitbang lo tuuno apa nih, leh a sitbang lo kum khat a pha tuuno anu khat, leh an tawh biakna ahi sathau tawh a kibawl annel seu sehsawm suah sehthum leh sathau biingta khat la ding hi. Amah a siangsak siampipa in a kisiangsak ding mipa leh hih nate kikhopna buk kong-a Topa mai-ah koih ding hi. Siampipa in tuuno apa khat la-in sathau biingta khat tawh mawhna hanga biakna-in pia-in veii-a biakna-in Topa mai-ah tuate veii ding hi; amaute in siangtho mun sunga khialhna hanga biakna leh meihal biakna a gawhna mun uhah amah in tuuno go ding hi; bang hang hiam cih leh mawhna hanga biakna pen khialhna hanga biakna mah bangin siampipa’ aa ahi hi; tua in a siangthopen ahi hi. Siampipa in mawhna hanga biakna si tawmkhat la-in amah in tua si pen a kisiangthosak ding mipa’ taklam bil teep, a taklam khutpi, leh a taklam khepi nuh ding hi. Tua ciangin siampipa in sathau biingta panin kimkhat la-in amahmah’ veilam khut sungah sungin, a veilam khut sunga om sathau sungah a taklam khutme diahin, a khutme tawh a sathau kimkhatte Topa mai-ah sagih vei theh ding hi. Ama khut sungah a om lai sathau kimkhatte pen siampipa in a kisiangthosak ding mipa’ taklam bil teep, a taklam khutpi, leh a taklam khepi nuhin, mawhna hanga biakna si tungah koih ding hi; siampipa in a khut sunga sathau om lai teng a kisiangthosak ding mipa’ lu nilh ding hi. Tua ciangin siampipa in ama adingin Topa mai-ah kilemna bawlsak ding hi. Ama nitna panin a kisiangthosak ding mipa adingin kilemna bawl nadingin siampipa in khialhna hanga biakna pia ding hi. Tua khit ciangin amah in meihal biakna go ding hi; siampipa in meihal biakna leh an tawh biaknate biakna tau tungah pia ding hi. Tua bangin siampipa in ama adingin kilemna bawlsak ding a, amah a siang hi ding hi. “Ahih hangin amah zawngin tua zah a piak zawh kei leh, ama adinga kilemna bawl nadingin a kiveii ding mawhna hanga biakna-in tuuno apa khat, an tawh biak nadingin sathau tawh a kibawl annel seu sehsawm suah sehkhat leh sathau biingta khat pia ding hi; vakhu nih ahi a, kawl vakhu no nih ahi zongin, a piak zawh bangbang pia ding hi; khat in khialhna hanga biak nading hi a, a khat in meihal biak nading ahi hi. A ni giat ni-in amah in Topa mai, kikhopna buk kong, siampipa kiangah ama kisian’thosak nadingin tuate paipih ding hi; siampipa in mawhna hanga tuuno, leh a sathau biingta khat la-in, siampipa in veii-a biakna-in Topa ’ mai-ah tuate veii ding hi. Amah in mawhna hanga biakna tuuno go ding hi; siampipa in mawhna hanga biakna si tawmkhat la-in, a kisiangthosak ding mipa, taklam bil teep, a taklam khutpi, leh a veilam khepi nuh ding hi. Siampipa in amahmah’ veilam khut sungah a sathau kimkhat sung ding hi; a veilam khut sunga om sathau tawmkhat a taklam khutme tawh Topa mai-ah sagih vei theh ding hi; siampipa in ama khut sunga a om sathau tawmkhat a kisiangthosak ding mipa’ taklam bil teep, taklam khutpi, leh a taklam khepite mawhna hanga biakna si a kikoihna munah va nuh ding hi; siampipa in a khut sunga a om lai sathau teng a kisiangthosak ding mipa’ ading Topa ’ mai-ah kilemna bawl nadingin a lu nilhsak ding hi. Amah in vakhu hita leh kawl vakhu no hita leh, a piak zawh bangbang pia-in, khat pen khialhna hanga biak nading, a khat pen meihal biak nadingin an-a biakna tawh piakhawm ding hi; siampipa in a kisiangthosakpa adingin Topa mai-ah kilemna bawlsak ding hi. Hih in phak natna a vei, a kisian’ thosak nadingin biakna a pia zo lopa’ adingin ngeina ahi hi,” a ci hi. Topa in Moses leh Aaron kiangah, “Note adinga kong piak Kanaan gamah na om ciangun note’ leitang-a inn khat sungah phak natna kong tun’sak ciangin, inn neipa pai-in siampipa kiangah, ‘Ka inn sungah natna nam khat a om ding tawh kibang,’ ci ding hi. Tua ciangin, inn sunga om na khempeuh a nin hi, a kicih khak loh nadingin a natna vel dingin siampipa a pai ma-in amaute in tua inn a na hawmsak nading uh thu pia ding hi; tua khit ciangin inn vel dingin siampipa pai ding hi. Amah in a natna vel ding hi; a natna pen tua inn kawm tungah omin a hing meel ahih kei leh a san meel na pua-in tua natna kawm maitang sangin a thuk zawk tuak leh, inn sung panin inn kongah siampipa paikhia ding a, ni sagih sung inn khakcip ding hi. A ni sagih ni-in siampipa hong pai kikin, en ding hi; tua inn kawm tungah a natna a kizelh leh, natna a ban’na suang lakhia-in khuapi pua lam a nin mun khatah a paih nadingun siampipa in thu pia ding hi; amah in a inn sung kimkot kiat sakin, amaute in a kiat khiat a kizutna themte khuapi pua lam a nin mun khatah bua ding uh hi; tua ciangin amaute in suang dang la-in tua suangte’ omna munah koihin, amah in zutna dang la-in inn zut ding hi. “Amah in a suangte lakhia-in a inn kiatin a zut khit ciangin tua inn sungah a natna hong suah kik leh, siampipa pai-in en ding hi; inn sungah a natna a kizelh leh, tua in inn sunga om a lauhuai phak natna ahi hi; tua in a nin ahi hi. Amah in tua inn, a suang a sing leh inn a kizutnate khempeuh phel ding hi; amah in khuapi pua lam a nin mun khatah tuate puakhia ding hi. Tua tham loin tua inn a kikhakcip sung teng a sungah a lut mipa a nitak dong a nin hi ding hi; tua inn sunga a lum mipa in ama puante sawp ding hi; tua inn sunga an ne mipa in ama puante sawp ding hi. “Ahih hangin siampipa hong pai-in a vel a, a inn a kizut khit ciangin inn sungah natna a kizelh kei leh, tua ciangin siampipa in a natna a dam ahih manin inn siang hi, ci-in gen ding hi. Tua inn sian’ thosak nadingin amah in vasa neu nih, taamtaak sing leh a ausan khau leh puknah tawh la khawmin, tui luang tungah leibeel sungah a vasa khat go ding a, taamtaak sing leh puknah leh a ausan khau pen a vasa hing tawh la khawmin, tuate pen a kigo vasa’ si leh tui luang sungah diahin, tua inn sagih vei theh ding hi. Tua bangin amah in vasa’ si tawh, tui luang tawh, a hing vasa tawh, taamtaak sing leh puknah leh a ausan puan tawh a inn siangsak ding hi; amah in vasa hing pen khuapi pua lam gam lakah khahkhia ding hi; tua bangin amah in tua inn adingin kilemna bawlsak ding a, tua inn a siang hi ding hi,” a ci hi. Hih in phak natna khatpeuh peuh tawh kisai-in ngeina ahi hi: cithak tawh kisai, puan tung hita leh inn sung hita leh a om phak natna tawh kisai, a bawk hita leh meima hita leh a tuampian mun tawh kisai-in, bang hunin nin a, bang hunin siang hiam ci-a lah nading ahi hi. Hih in phak natna tawh kisai-in ngeina ahi hi. Topa in Moses leh Aaron kiangah, “Israel mite tungah hih bangin gen in: Pasal khatpeuh a na tui a paikhiat ciangin tua a paikhia a na tui pen a nin ahi hi. Amah a ninsak a na paikhia tawh kisai-in ngeina hih bang ahi hi: a na tui a paipai a, a khawl zongin, ama sungah nitna mah hi veve hi. A na tui a paikhia mipa’ lupna peuhpeuh a nin hi ding hi; ama tutna peuhpeuh a nin hi ding hi. Ama lupna a lawng peuhmah in a puante sawpin, amahmah tui sungah kisilin, a nitak mateng a nin hi ding hi. A na tui a paikhia mipa’ tutnasa na khatpeuh peuh tungah a tu mi peuhmah in a puante sawpin, amahmah tui sungah kisilin, a nitak mateng a nin hi ding hi. A na tui a paikhia mipa’ pumpi a lawng mi peuhmah in a puante sawpin, amahmah tui sungah kisilin, a nitak mateng a nin hi ding hi. A na tui a paikhia mipa in a siang mipa tungah cil a siat leh, tuapa in a puante sawpin, amahmah tui sungah kisilin, a nitak mateng a nin hi ding hi. A na tui a paikhia mipa a tutna tutphat khatpeuh peuh in a nin hi ding hi. Ama nuai-ah a om na khatpeuh peuh a lawng mipa pen a nitak mateng a nin hi ding hi; tua bang na a tawm mipa in a puante sawpin, amahmah tui sungah kisilin, a nitak mateng a nin hi ding hi. A na tui a paikhia mipa in tui sungah a khut sil lopi-in a lawn’ mi peuhpeuh in ama puante sawpin, amahmah tui sungah kisilin, a nitak mateng a nin hi ding hi. A na tui a paikhia mipa in a lawn’ lei tawh kibawl um-le-beelte kisukham ding hi; sing tawh kibawl kuang-le-keute ahih leh tui sungah kisawp ding hi. “A na tui a paikhia mipa a na tui paikhiatna hangin a kisian’sak ciangin, ama kisian’sak nadingin amah in ni sagih dong sim to-in a puante sawp ding hi; amah in tui luang sungah a pumpi silin, a siang hi ding hi. A ni giat ni-in amah in vakhu nih ahih kei leh kawl vakhu no nih la-in, Topa ’ mai kikhopna buk kongah pai-in, siampipa tungah tuate pia ding hi; siampipa in tuate, khat khialhna hanga biak nading leh adang khat meihal biak nadingin pia ding hi; a na tui a paikhia mipa adingin siampipa in Topa mai-ah kilemna bawlsak ding hi. “Mi khat in a na tui a teh leh, amah in a pumpi khempeuh tui sungah sil ding a, a nitak mateng a nin hi ding hi. A tungah a na tui a tukna puan leh savun peuhmah tui tawh kisawp ding a, a nitak mateng a nin hi ding hi. Pasal khat in numei khat tawh a lupkhawm khit ciangin, amaute gel tui sungah kisil ding uh a, a nitak mateng a nin hi ding uh hi. “Numei khat in nin a neih ciangin, ni sagih sung a ninin om ding a, a mah a lawng mi peuhmah a nitak mateng a nin hi ding hi. Amah a nit hun sunga a lupna peuhpeuh a nin hi ding hi; amah a tutna peuhpeuh zong a nin hi ding hi. Ama lupna a lawng peuhmah in a puan sawpin, amahmah tui sungah kisilin, a nitak mateng a nin hi ding hi. Ama tutna a lawng peuhmah in ama puante sawpin, tui sungah amahmah kisilin, a nitak mateng a nin hi ding hi; ama tutna ahi lupna hita leh na khatpeuh peuh hita leh, mi khat in a lawn’ ciangin a nitak mateng amah a nin hi ding hi. Pasal khatpeuh mah tua nu tawh lumin, tua nu’ nitna ama tungah a om leh, ni sagih sung tuapa a nin hi ding hi; tuapa’ lupna peuhpeuh a nin hi ding hi. “Numei khat in ama nin hun hilo napi-in ni tampi sung a si suak ahi a, ama nit hun sung khengin nin nei-in ahi zongin a om leh, a nin neih ni sung khempeuh amah a nin-in om ding hi; ama nit hun sung mah bangin amah a nin hi ding hi. Ama nin neih hun sung tenga a lupna khempeuh a nit sunga ama zat lupna tawh kibang ding hi; amah in a nin ahih mah bangin a tutna khempeuh zong a nin hi ding hi. Hih nate a lawng peuhmah a nin hi ding a, a puante sawpin, amahmah tui sungah kisil ding a, a nitak mateng a nin hi ding hi. Ahih hangin tua nu a nin a kisian’sak leh, amah in ni sagih dong sim to-in tua khit ciangin amah a siang hi ding hi. A ni giat ni-in tua nu in vakhu nih ahih kei leh kawl vakhu no nih la-in, kikhopna buk kong, siampipa kiangah tuate paipih ding hi. Siampipa in khialhna hanga biakna dingin khat pia-in, meihal biak nadingin adang khat pia ding hi; siampipa in a siang lo ama nin hangin Topa mai-ah ama ading kilemna bawlsak ding hi. “Amau’ laizanga om ka biakbuk nitsakna hangin amau’ nitna sungah amaute si kha ding uh ahih ciangin, tua bangin note in Israel mite amau’ nitna panin khenin na kem ding uh hi,” a ci hi. Hih in a na tui a paikhia mipa ahih kei leh a na tui tehin, tua tawh mi nin a suakpa adingin ngeina ahi hi; nin a neinu ading zong ahi hi; tua-in, pasal hita leh numei hita leh a na tui paikhia mi, leh a nin numei tawh a lum mipa’ ading ngeina ahi hi. Aaron’ tapa nihte in Topa mai-ah ngeina lopi-in mei tawh va nai uh a, a sih khit uh ciangin Topa in Moses kiangah thu gen hi; Topa in Moses kiangah, “Thuciamna singkuang tunga om hehpihna tokhom mai, dalna puan sung lam a siangtho munah hong pai ngitnget nawn loh nadingin na sanggampa Aaron kiangah gen in; hong pai leh amah si ding hi; bang hang hiam cih leh hehpihna tokhom tunga meii sungah kei ka kilang ding hi. Ahih hangin siangtho munah hih bangin Aaron hong pai ding hi: khialhna hanga biak nadingin bawngtal no khat leh meihal biak nadingin tuutal khat hong paipih ding hi. Amah in a siangtho saihadial puantungsilh silhin, a pum tungah saihadial pheituam teengin, saihadial kawnggak tawh kigakin, saihadial dialpi khim ding hi; hihte in a siangtho puante ahi uh hi. Amah in tui sungah a pumpi sil ding a, tua ciangin tua puante silh ding hi. Amah in Israel mihonte tung panin khialhna hanga biak nadingin keeltal nih leh meihal biak nadingin tuutal khat la ding hi. “Aaron in amahmah adingin khialhna hanga biakna-in a bawngtal pia-in, amah leh innkuanpihte adingin kilemna bawl ding hi. Tua ciangin amah in keeltal nih la-in, Topa ’ mai kikhopna buk kongah tuate koih ding hi; Aaron in tua keel nihte tungah ai sanin, khat pen Topa ’ ading, adang khat pen Azazel ading ahi hi. Aaron in Topa ’ adingin ai a pha keel paipihin, khialhna hanga biakna-in pia ding hi; ahih hangin Azazel adingin ai a pha keel pen gam lakah Azazel kiangah a kipuak theih nadingin kilemna bawl nading a hing-in Topa ’ mai-ah kipaipih ding hi. “Aaron in amahmah adingin khialhna hanga biakna-in a bawngtal pia-in, amah leh a innkuanpihte adingin kilemna bawl ding hi; amah in amahmah adingin khialhna hanga biakna-in a bawngtal go ding hi. Amah in Topa ’ biakna tau panin mei-am a dim paknamtui beel khat leh a kisunen paknamtui khut nih dim khat la ding hi; amah in dalna puan sungah paipihin teci pan’na tungah a om hehpihna tokhom pen paknamtui khu in a tuam theih nading Topa ’ mai-ah a om mei tungah a paknamtui koih ding hi, tua hi kei leh amah si ding hi; amah in bawngtal si tawmkhat la-in, a khutme tawh hehpihna tokhom amai lam tungah thehin, hehpihna tokhom mai-ah a khutme tawh a si sagih vei theh ding hi. “Tua ciangin amah in mite ading ahi khialhna hanga biakna keel go-in, dalna puan sungah a si paipih ding a, bawngtal si a theh mah bangin a si thehin, hehpihna tokhom tung leh hehpihna tokhom mai-ah theh ding hi; amah in tua bangin Israel mite’ nitna hang, leh amau’ thu palsatnate hang amau’ khialhna khempeuh hangin siangtho mun adingin kilemna bawl ding hi; amah in amau’ nitna sungah amau tawh a omkhawm kikhopna buk adingin tua mah banga bawl ding hi. Siangtho munah kilemna bawl dingin amah tumin ama ading leh a innkuanpihte ading leh Israel mi honte khempeuh adingin kilemna a bawl khit hong paikhiat matengin kikhopna buk sungah kuamah om lo ding hi. Tua ciangin Topa ’ mai-ah a om biakna tau-ah amah va pai-in, biakna tau sian’ suahna bawl ding a, bawngtal’ si tawmkhat leh keel’ si la-in, biakna tau kimkot a, a kite nuh ding hi. Amah in a khutme tawh a si tawmkhat biakna tau tungah sagih vei thehin, siangsakin, Israel mite’ nit sakna panin siangtho sak ding hi. “Amah in siangtho mun, leh kikhopna buk leh biakna tau sian’ suahna a bawl khit ciangin, amah in keel hing pen paipih ding hi; Aaron in keel hing’ lu tungah a khut tegel nga-in, Israel mite’ mawhna, amau’ thupalsatna, amau’ khialhnate khempeuh, keel tungah pulak ding hi; amah in keellu tungah tuate suan-in, a paikhiatpih dingin a kithawisa mipa khut tawh gam lakah sawlkhia ding hi. Keel in amau mawhnate khempeuh pua-in gam daihna-ah pai ding hi; amah in gam lakah a keel khah ding hi. “Tua ciangin kikhopna bukah Aaron hong pai-in, siangtho munah a tum huna a silh saihadial puante suahin, tua lai-ah a puante nusia ding hi; amah in a siangtho mun khatah a pumpi tui sungah silin, a puante silh ding a, hong paikhia-in, ama meihal biakna leh mite’ meihal biakna pia-in, ama ading leh mite’ adingin kilemna bawl ding hi. Amah in biakna tau tungah khialhna hanga biakna sathau hal ding hi. Azazel’ kiangah keel a pai sakpa in a puante sawpin a pumpi tui sungah silin, tua khit ciangin giahphual ah amah hong ciah thei ding hi. Siangtho munah kilemna bawl nadingin hong kipaipih si a kilakna khialhna hanga biakna bawngtal leh khialhna hanga biakna keel pen giahphual pua lamah kipuakhia ding hi; amau vun leh a sa leh a ekte mei tawh kihal ding hi. Tuate a halpa in ama puante sawpin tui sungah a pumpi silin, tua khit ciangin giahphual ah hong ciah thei ding hi. “Hih in, a kha sagihna, tua kha a ni sawm ni-in note’ adingin a tawntungin thukham hi ding a, tual sung mi hita leh note lakah a hong peem khual mi hita leh, nomau mah kigawt tawmin, na na sem kei ding uh hi; bang hang hiam cih leh hih ni-in note sian’sak nadingin note’ ading kilemna kibawl ding hi; na khialhna khempeuh panun Topa ’ mai-ah na siang ding uh hi. Tua in note’ adingin a thupi tawlngakna sabbath hi a, nomau mah na kigawt ding uh hi; tua in a tawntunga thukham ahi hi. A pa’ tanga siampi dingin sathau kinilh a ki-ap siampipa in kilemna bawlin, a siangtho saihadial puante silh ding hi; amah in biakinn sian’ suahna bawlin, kikhopna buk leh biakna tau sian’ suah ding a, siampite leh mihonte khempeuh adingin kilemna a bawl ding hi. Hih in, Israel mite’ adingin amau’ khialhnate khempeuh hangin kum khatin khat vei kilemna a kibawlsak theih nadingin note’ adingin a om tawntung ngeina kip khat hi ding hi,” a ci hi. Topa in amah a thupiak bangin Moses a gamta hi. Topa in Moses kiangah, “Aaron leh ama tapate leh Israel mite khempeuh tungah hih bangin gen in. Hih in Topa ’ thupiaksa na ahi hi. Israel mi khatpeuh in bawngtal ahi a, tuuno ahi a, keel ahi zongin giahphual ah go a, tua ahi kei leh giahphual pua-ah a go ahi zongin, Topa ’ biakbuk mai Topa tungah letsongin piak dingin kikhopna buk kongah a paipih kei leh, tua mipa thu palsat hi ding hi; amah in sisan luangsak hi; ama mite lak panin tua mipa kihawl khia ding hi. Hih in, gam lakah Israel mite in a gawh uh amau’ biakpiaknate hong paipih theih nading, kikhopna buk kongkhak a, siampipa kiang, Topa ’ tungah amaute in tuate hong paipih theih nading, leh thunuam-a biakpiakna in Topa a hong gawh theih nading deihna ahi hi; siampipa in kikhopna buk kong-a Topa ’ biakna tau tungah a si thehin, Topa ’ tungah a gim namtui dingin a thau hal ding hi. Tua ahih ciangin amaute in a biak uh keel milimte adingin amau’ biakpiaknate go nawn lo ding uh hi. Hih in amau’ khang tawntungin amaute tungah ngeina kip khat hi ding hi. “Nangmah in amaute tungah hih bangin na gen ding hi: Israel mite sung pan hita leh, amaute lakah a peem khual mite sung panin meihal biakna ahi a biakpiakna ahi zongin a pia mipa in, Topa tungah piak dingin kikhopna buk kongah a paipih kei leh, ama mipihte kiang panin tua mipa kihawlkhia ding hi. “Israel mite sung pan hita leh, amau’ lakah a peem mi khualte sung pan hita leh mi khat in sisan khatpeuh peuh a nek leh, sisan a ne mipa ka maisiat ding a, ama mite lak panin amah ka khen khia ding hi. Bang hang hiam cih leh a pumpi nuntakna in sisan sungah a om hi; note ading kilemna bawl nadingin note adingin biakna tau tungah tua sisan ka pia zo hi; bang hang hiam cih leh sisan in nuntakna ahih manin kilemna a piangsak na ahi hi. Tua ahih ciangin keimah in Israel mite tungah hih bangin ka ci khin hi: Note lakah kuamah in sisan ne lo ding hi; note lakah hong peem khualmi khatpeuh in zong sisan ne lo ding hi. Israel mite khatpeuh hita leh, amaute lakah a peem khualmi khatpeuh hita leh in zong, sa betna-ah, a kine thei ding gamsa khatpeuh hita leh vasa hita leh a manpa in a sisan bua khia-in leivui tawh vuk ding hi. “Bang hang hiam cih leh ganhingte khempeuh’ nuntakna in a sisan ahi hi; tua ahih ciangin Israel mite tungah hih bangin ka ci khin zo hi: Ganhing khatpeuh peuh’ sisan na ne kei ding uh hi; bang hang hiam cih leh ganhing khempeuh nuntakna in a sisan ahi hi; sisan a ne mi peuhmah a mipihte kiang panin kihawlkhia ding hi. A mawk sih hita leh gamsate in a balgawp hita leh a ne mi peuhmah, tual sung mi hita leh, peemta hita leh, amah in a puante sawpin, amahmah tui sungah kisilin, a nitak mateng a nin hi ding hi; tua ciangin amah siang ding hi. Ahih hangin amah in tuate sawp loin ahi zongin kisil loin ahi zongin a om leh amah in a ama mawhna pua ding hi,” a ci hi. Topa in Moses kiangah, “Israel mite tungah hih bangin gen in: Keimah in Topa na Pasian uh ka hi hi. Note na ten’na uh Izipt gamah amaute a gamtat bangin note na gamta kei ding uh a, note kong paipihna Kanaan gamah amaute a gamtat bangin zong note na gamta kei ding uh hi. Note in amau’ tatziate na zui kei ding uh hi. Note in keima biakna ngeina kipte semin ka thukhamte lenin tuate na zui ding uh hi. Keimah in Topa na Pasian uh ka hi hi. Tua ahih ciangin note in ka thukhamte leh ka biakna ngeina kipte na zui ding uh hi; tuate a zui mi-in nungta ding hi. Keimah in Topa ka hi hi. “Note kuamah in na kinaipih na behte uh mawhpih dingin na naih kei ding uh hi. Keimah in Topa ka hi hi. Na nu mawhpihna tawh na pa tungah maizumna na tun’ kei ding hi; amah in na nu ahi hi, amah na mawhpih kei ding hi. Nangmah in na pa’ zi na mawhpih kei ding hi; tua in na pa’ maizum nading ahi hi. Nangmah in na sanggamnu, na pa’ tanu, ahih kei leh na nu’ tanu, inn-a suak hita leh gam-a suak hita leh na mawhpih kei ding hi. Nangmah in na tapa’ tanu ahih kei leh na tanu’ tanu na mawhpih kei ding hi; bang hang hiam cih leh amau’ maizumna in nangma maizumna mah ahi hi. Nangmah in na pa’ zi tanu, na pa’ tanu in na sanggam nu ahih ciangin na mawhpih kei ding hi. Nangmah in na pa’ sanggamnu na mawhpih kei ding hi; tua nu in na pa tawh a kinai beh numei ahi hi. Nangmah in na nu’ sanggamnu na mawhpih kei ding hi; bang hang hiam cih leh amah in na nu tawh a kinai beh numei ahi hi. Nangmah in na pa’ sanggampa tungah mindaina na tun’ kei ding hi; tua in ama zi na naih kei ding hi cih nopna hi; tua nu in nangma innlak nu ahi hi. Nangmah in na monu na mawhpih kei ding hi; tua nu in na tapa’ zi ahi hi; na mawhpih kei ding hi. Nangmah in na sanggampa’ zi na mawhpih kei ding hi; tua in na sanggampa’ maizum nading ahi hi. Nangmah in na luppih nupi khat’ tanu na mawhpih kei ding a, nangmah in nupi’ tapa’ tanu hita leh tua nupi tanu’ tanu hita leh, luppih dingin na la kei ding hi; amaute in nangmah tawh a kinai beh numei ahi uh hi; tua in gitlohna ahi hi. Nangmah in a sanggamnu hing suan dingin numei khat zi-in na la kei ding hi; a sanggamnu hing lai pi-in amah na luppih kei ding hi. “Nangmah in numei khat nin nei-a a nit hun sungin luppih dingin na naih kei ding hi. Nangmah in na vengpa’ zi tawh na lumkhawm kei ding a, tua nu tawh na kininsak kei ding hi. Nangmah in Molek tungah mei halna tawh biakpiak nadingin na tate khatpeuh peuh napia kei ding a, tua bangin Pasian’ min na daisak kei ding hi; keimah in Topa ka hi hi. Nangmah in numei khat tawh lupkhop bangin pasal khat tawh na lumkhawm kei ding hi; tua in a kihhuai ahi hi. Nangmah in ganhing khatpeuh tawh mawhin tua tawh na kininsak kei ding a, numei khatpeuh in zong ganhing khatpeuh tawh a mawh dingin kipia lo ding hi; tua in ngeina hilo hi. “Hih nate khatpeuh tawh note kininsak kei un: bang hang hiam cih leh note’ mai-a ka paihkhiat ding minamte in hihte khempeuh tawh amau kininsak uh hi; leitang a nin suak ahih ciangin keimah in a leitang mawhna daan pia-in, leitang in ama tunga teeng mite luakhia hi. Ahih hangin, tual sung mi hita leh note lakah hong peem khualmi hita leh note in keima thukhamte leh keima biakna ngeina kipte na zui ding uh a, hih a kihhuai nate khat beek na hih kei ding uh hi. (bang hang hiam cih leh note’ ma-a a om gam mite in hih kihhuainate khempeuh hih uh a, tua ahih manin leitang a nin suak hi); tua bang hi kei leh leitang in note ma-a a om minamte a luakkhiat bangin note in amah na nitsak uh ciangin note hong luakhia ding hi. Bang hang hiam cih leh hih kihhuainate khatpeuh a hih ding peuhmah, tua bang mite pen amau’ mite lak panin kihawlkhia ding hi. Tua ahih ciangin note ma-a a kizang hih a kihhuai ngeinate khatpeuh peuh na gamtat ngei loh nading uh leh tuate tawh nomau na kinitsak ngei loh nadingun kong thuhilh zui un: keimah in Topa na Pasian uh ka hi hi,” a ci hi. Topa in Moses kiangah, “Israel mi honte khempeuh kiangah hih bangin gen in: Note na siangtho ding uh hi; bang hang hiam cih leh Topa note’ Pasian keimah in ka siangtho hi. Note a kuamah peuh in na nu leh na pa uh zahtakin, note in ka sabbath-te na tang ding uh hi; keimah in Topa na Pasian uh ka hi hi. Milimte lamah kihei kei un la, note in a kisung tawm pasiante nomau adingin bawl kei un: keimah in Topa na Pasian uh ka hi hi. “Note in Topa tungah thunuam-a biak piakna na piak uh ciangin, note hong kisan’ theih nadingin na pia ding uh hi. Tua pen na piak ni mah uh ahih kei leh a zing ciangin kine ding hi; a ni thum ni ciang dong a om lai peuhmah mei tawh kihal ding hi. A ni thum ni-in a kinek peuhmah leh, tua in a kihhuai ahi hi; kisang lo ding hi; tua a ne mi peuhmah in ama mawhna pua ding hi; bang hang hiam cih leh amah in Topa ’ na a siangtho ninsak hi; tua mipa ama mite sung panin kihawlkhia ding hi. “Na leitang tung panun an na lak uh ciangin, na lo uh a nawl dongin an na la kei ding uh a, an na lak khit uh ciangin a sang zong na khawm kei ding uh hi. Note in na leenggui lo uh hawk mai loin, a kia leenggahte zong na leenggui lo panun na tawm kei ding uh hi; note in mi zawngte leh peemtate adingin tuate na nusia ding uh hi; keimah in Topa na Pasian uh ka hi hi. “Note na guta kei ding uh hi; khat leh khat na kikhem kei ding uh a, khat leh khat tungah thuzuau na kigen kei ding uh hi. Note in a man lopi-in keima min tawh na kiciam kei ding uh a, tua bangin na Pasian uh’ min na daisak kei ding uh hi: keimah in Topa ka hi hi. “Note in na vengte uh na nengniam kei ding uh a, a na na sut kei ding uh hi. A kicial nasempa’ thaman pen a zingsang dong zan tawntung na kemcip kei ding uh hi. Note in bil ngongte phuisam loin mittawte mai-ah puk theih nading na koih kei ding uh a, note in na Pasian uh na zaktak ding uh hi: keimah in Topa ka hi hi. “Note in thukhenna ah thuman lo na hih kei ding uh hi; note in mizawngte langgen loin, a liante thu zui loin, thumanna tawh na vengte thu na khen ding uh hi. Note in na mihingte lak uhah mi gensia-in vaksuk vakto loin, na vengpa uh a sih nadingin na langpang kei ding uh hi: keimah in Topa ka hi hi. “Note in na lungsim sung uhah na sanggampa uh mudah loin, na vengte uh tawh na thu kituah lohna uh kikum khawmin na siangsak ding uh hi; tua hi kei leh ama hangin khialhna na pua ding uh hi. Note in nomau’ mipihte tungah phu la loin, amau na lungsim neih kei ding uh a, nomau na ki-it uh bangin na vengte na it ding uh hi: keimah in Topa ka hi hi. “Note in ka thukhamte na zui ding uh hi. Note in na ganhingte uh a namdang tawh ta na neisak kei ding uh hi; note in na lo uhah khaici nam nih na pawi kei ding uh hi; khau nam nih a kigan puan zong note tungah kibaang lo ding hi. “Sila ahi numei, midang khat in zuthawl a piaksa, kitankhia nai loin amah suahtakna a kipia nai lo nu, pasal khat in a lup khoppih leh, thukanna kinei ding hi. Amaute kithat lo ding hi; bang hang hiam cih leh tua nu suakta lo hi; ahih hangin tua pa in amahmah adingin mawhna hanga biak nadingin tuutal khat, kikhopna buk kong, Topa kiangah hong paipih ding hi. Siampipa in tuapa a gamtatnasa a khialhna hangin mawhna hanga biakna tuutal tawh Topa mai-ah ama adingin kilemna bawlsak ding hi; amah a gamtatnasa a khialhna kimaisak ding hi. “Note tua gamah tungin an dingin kung nam khempeuh na suan uh ciangin, note in amau’ gahte a kikham-in na seh ding uh hi; note adingin kum thum sung tua gah a kikham hi ding a, kine lo ding hi. A kum lina ciangin amau’ gah khempeuh siangtho-in, Topa tungah phatna biakna hi ding hi. Ahih hangin a kum ngana ciangin tuate in note adingin hong gah semsem nadingin tuate gah na ne thei ding uh hi: keimah in Topa na Pasian uh ka hi hi. “Note in sa khatpeuh peuh a sunga sisan tawh na ne khawm kei ding uh hi. Note in mai lam thu genkholhna ahih kei leh ai saanna na sem kei ding uh hi. Note in na baa samte uh met loin na khamul mongte uh zong na tan kei ding uh hi. Note in a site’ hangin na ci tung uh liamsak loin note tungah ciamtehna khatpeuh peuh na sun kei ding uh hi: keimah in Topa ka hi hi. “Na tanu uh biakinn sunga paktat dinga piakna tawh siasak kei un; tua bang hi leh pasian dangte biakna sungah na tung ding uh a, gam sung khempeuh, mawhna tawh a kidim suak kha ding hi. Note in ka sabbath-te tangin ka biakinn na zahtak ding uh hi: keimah in Topa ka hi hi. “Vankahte leh ai saante lamah kihei kei un; amaute tawh a kininsak dingin amaute zong kei un: keimah in Topa na Pasian uh ka hi hi. “Note in sam kangte mai-ah na kun ding uh a, puteekpa’ maitang zahtak-in note in na Pasian uh na kihta ding uh hi: keimah in Topa ka hi hi. “Na gam sung uhah note lakah khualmi khat hong peem leh, note in ama tungah a man loin na gamta kei ding uh hi. Note lakah a hong peem khual mite tual sung mi mah bangin na ngaihsun ding uh a, nomau mah bangin amah na it ding uh hi; bang hang hiam cih leh note in Izipt gam sungah khualmi na hi ngei uh hi: keimah in Topa na Pasian uh ka hi hi. “Note in thukhenna, asau tehna, agik tehna, atam tehnate ah a man loin na gamta kei ding uh hi. Note in tawi khaina maan, tawisuang maan, seu maan, bung maan, na nei ding uh hi: keimah in Izipt gam panin a hong paikhiatpih Topa na Pasian uh ka hi hi. Note in ka thukhamte khempeuh leh ka biakna ngeina kipte khempeuh zui-in tuate na kem ding uh hi: keimah in Topa ka hi hi,” a ci hi. Topa in Moses kiangah, “Israel mite kiangah hih bangin gen in: Israel mite khatpeuh peuh hita leh Israel sunga a peem khual mite hita leh, a tate khatpeuh peuh Molek pasian tungah a pia mipa kithat ding hi; gam sung mite in suang tawh amah deenglum ding uh hi. Keimah mah in tua mipa ka maisiat ding a, ama mite lak panin ka hawlkhia ding hi; bang hang hiam cih leh amah in a tate Molek tungah pia-in, ka biakinn ninsakin, ka min siangtho daisak hi. Amah in Molek tungah a tate khat a piak ciangin gam sung mite in tuapa kimuhmawh bawlin amah a thah kei uh leh, keimah in tua mipa leh ama innkuanpihte maisiatin, amah leh Molek biakna ah amah a zuite khempeuh amau’ mite lak panin ka hawlkhia ding hi. “Mi khat vankahna leh ai saanna lamah kihei-in tuate thu a dot leh, keimah in tua mipa ka maisiat ding a, ama mite lak panin amah ka hawlkhia ding hi. Tua ahih ciangin note ki-ap un la, siangtho un; bang hang hiam cih leh keimah in Topa na Pasian uh ka hi hi. Ka thukhamte zui un la, tuate sem un; note hong siangthosak Topa in keimah ka hi hi. Bang hang hiam cih leh a nu ahih kei leh a pa a samsia mi peuhmah kithat ding hi; amah in a nu ahih kei leh a pa samsia khin a, ama sihna ah amahmah ngawh ding ahi hi. “Pasal khat in ama vengpa’ zi tawh a mawh leh, tua a khialpa leh a khialnu kithat khawm ding hi. A pa’ zi tawh a lumkhawm mipa in a pa a mindaisak suak hi; amau tegel kithat ding hi, amau’ sihna amau mah ngawh ding ahi hi. Pasal khat a monu tawh a lupkhop leh, amau tegel kithat ding hi; amaute si kinai lua mi tawh khialhna bawl uh hi; amau’ sihna amau mah ngawh ding ahi hi. Pasal khat in numei khat tawh lupkhop bangin pasal dang khat tawh a lupkhop leh, amau tegel kihhuaina a gamta khin uh ahi hi; amaute kithat ding hi, amau’ sihna amau mah ngawh ding ahi hi. Pasal khat in zi la-in a zi’ nu tawh zong a lak thuah leh, tua in gitlohna ahi hi; note lakah gitlohna a om loh nadingin tuapa leh a nutate, mei tawh kihallum ding hi. Pasal khat in ganhing khat tawh a mawh leh, amah kithat ding hi; note in a ganhing na that ding uh hi. Numei khat in ganhing khat naih-in tua tawh a mawh leh, note in a numei leh a ganhing na that ding uh hi; amaute kithat ding hi, amau’ sihna amau mah ngawh ding ahi hi. “Pasal khat in ama sanggamnu, a pa’ tanu ahih kei leh a nu’ tanu la-in, tua nu tawh mawhin, tua nu in tuapa tawh a mawh leh, tua in a zumhuai hi a, amau’ mipihte’ omna panin amaute kihawlkhia ding hi; tuapa in ama sanggamnu tawh mawh khin hi, tuapa in ama mawhna pua ding hi. Pasal khat in nin nei numei khat tawh lumkhawmin, tua nu tawh a mawh leh, amau tegel in sian’tho nading ngeina palsat uh ahih manin, amau’ mipihte lak panin kihawlkhia ding hi. Note in na nu’ sanggamnu ahih kei leh na pa’ sanggamnu tawh na mawh kei ding uh hi; bang hang hiam cih leh tua in a nai behte tawh mawhna ahi hi; amaute in amau’ mawhna pua ding hi. Pasal khat in a pa’ sanggampa’ zi tawh a lupkhop leh, amah in a pa’ sanggampa a mindaisak ahi hi; amaute in amau khialhna thuak ding uh hi; amaute ta nei loin si ding uh hi. Pasal khat in a sanggampa’ zi a lak leh, tua in nitna ahi hi; amah in a sanggampa a mindaisak ahi hi; amaute in ta nei lo ding uh hi. “Tua ahih ciangin note in ka thukham khempeuh leh ka biakna ngeina kipte khempeuh zui-in, tuate na sem ding uh hi; tua in note na ten’ nading uh kong paipih nading leitang in note hong luakkhiat loh nading ahi hi. Note’ mai-ah keimah in ka paihkhiat ding minamte’ ngeinate na zui kei ding uh hi; bang hang hiam cih leh amaute in hih nate khempeuh gamta uh ahih ciangin amaute ka kih hi. Ahih hangin keimah in note tungah, ‘Note in amau leitang na luah ding uh hi; bawngnawi leh khuaizu a luan’na leitang, na neih dingun note’ tungah kong pia ding hi,’ kong ci khin zo hi. Keimah in mite kiang panin note a hong khenkhia Topa na Pasian uh ka hi hi. Tua ciangin note in a siang ganhing leh a nin ganhing, a nin vasa leh a siang khentelna na bawl ding uh hi; note in nin hi ci-in na seh dingun keimah in ka tuam koihsa ahi ganhing hita leh vasa hita leh leitunga a pai thei khatpeuh peuh tawh hita leh note a kihhuai-in na kibawl kei ding uh hi. Note in keima adingin na siangtho ding uh hi; bang hang hiam cih leh Topa ahi keimah in ka siangtho a, note in keima’ aa na hih theih nadingun mite kiang panin note kong tuamkoih zo hi. “Pasal ahi a, numei ahi zongin van a kah a, ai a saan mi kithat ding hi; suang tawh amaute kidenglum ding hi; amau’ sihna amau mah ngawh ding ahi hi,” a ci hi. Topa in Moses kiangah, “Aaron’ tapa siampite tungah thu gen in la, amaute lak panin kuamah in ama beh nai pen ahi, a nu, a pa, a tapa, a tanu, a sanggampa, ahih kei leh nungak ahi a sanggamnu (tua nu in pasal nei nai lo ahih manin amah tawh a kinai ahi hi; tua nu’ hangin amah kininsak thei ding hi) longal ama mite lakah misite’ hangin kininsak lo ding hi. Amah in pasal neisa numei khatpeuh hangin ama mite lakah va kininsakin, tua bangin kidaisak lo ding hi. Amaute in a lu uh mettol loin, amau’ khamul nawlhui zong kiat loin, a ci tung uh liamsak lo ding uh hi. Amaute in amau’ Pasian adingin siangtho ding uh a, amau’ Pasian min daisak lo ding uh hi; bang hang hiam cih leh amaute in amau’ Pasian anlum ahi, Topa ’ tungah meihal biakna pia uh hi; tua ahih ciangin amaute siangtho ding uh hi. Amaute in numei paktat ahih kei leh a kininsaksa numei ten’pih lo ding uh hi; a pasal in a maksa numei zong ten’pih lo ding hi; bang hang hiam cih leh siampipa in ama Pasian adingin siangtho hi. Amah in note’ Pasian’ anlum pia ahih manin note in amah na ap ding uh hi; amah in note’ adingin siangtho ding hi; bang hang hiam cih leh Topa ahi keimah, note hong siangtho sakpa, ka siangtho hi. Siampi khatpeuh peuh’ tanu in paktatna tawh amah leh amah a kidaisak leh, ama pa a daisak ahi hi; tua nu, mei tawh kihal lum ding hi. “Ama sanggamte lakah a lianpen, a lu tungah nilh sathau a kisun’napa leh a puante silh dingin a ki-ap khin siampipa in a samte phiahsak loin, a puante zong balkek lo ding hi; amah in a nu leh a pa luang nangawn ahi zongin si luang khatpeuh peuh kiangah pai loin, amahmah zong kininsak lo ding hi; biakinn panin zong pai khia loin, ama Pasian’ biakinn zong daisak lo ding hi; bang hang hiam cih leh ama Pasian’ aa ahi ki-apna nilh sathau in ama tungah om hi; keimah in Topa ka hi hi. Amah in a zi dingin nungak la ding hi. Meigong numei, a kimasa numei, a kininsaksa numei, numei paktat, amah in hih bangte ten’pih lo ding hi; ahih hangin amah in ama mite lak panin nungak khat zi-in la ding hi; tua in ama mite lakah a tate a daisak loh nading ahi hi; bang hang hiam cih leh amah a siangthosakpa in keimah Topa ka hi hi, ci in,” a ci hi. Topa in Moses tungah, “Aaron kiangah hih bangin gen in: Na suan leh khakte sung panin a khang a khangin poina a nei mi in ama Pasian’ anlum pia dingin hong neh thei lo ding hi. Bang hang hiam cih leh poina a nei, mittaw, khelbai, mai hem leh khut-leh-khe sau lua, khut hoih lo, khe hoih lo, elkul leh mi cingtak lo, mit hoih lo leh cithak a vei, meima nei leh ciltang kitam mi in hong naih lo ding hi; siampi Aaron’ suan leh khakte sung panin poina a nei mi khatpeuh in Topa ading meihal biakna a pia dingin a nai-ah hong pai lo ding hi; amah in poina nei ahih manin, ama Pasian’ anlum pia dingin a nai-ah hong pai lo ding hi. Amah in ama Pasian’ anlum, a siangtho pen leh a siangtho nate ne thei ding hi; ahih hangin amah in poina nei ahih manin, ka biakinnte a daisak loh nadingin dalna puan gei ahi a biakna tau nai-ah ahi zongin hong pai lo ding hi; bang hang hiam cih leh amaute a siangthosakpa in keimah Topa ka hi hi,” a ci hi. Tua ahih ciangin Moses in Aaron leh a tapate leh Israel mite khempeuh tungah a gen hi. Topa in Moses kiangah, “Aaron leh a tapate in keima min siangtho a daisak loh nadingun amaute in keima tungah a hong ap uh ahi, Israel mite’ na a siangthote panin a kikep nadingun gen in; keimah in Topa ka hi hi. Amaute kiangah, ‘Na suan leh khakte uh sung panin a khang a khangin khatpeuh in a nit lai takin Israel mite in Topa tungah a ap a siangtho nate a naih leh, keima omna panin tuapa kihawlkhia ding hi: keimah in Topa ka hi hi. Aaron’ gui sung panin meima leh a na tui a paikhia mi peuhmah in amah a sian’tho mateng a siangtho nate ne thei lo ding hi. Misi lawn’na hita leh a na tui a tehpa lawn’na hita leh a nin na khatpeuh peuh a lawngpa, amah a nit theih nadingin a bokvak ganhing khat hita leh nitna a ngah theih nading mi khat hita leh a lawngpa, ama nitna in bangbang hita leh— tua bang na a lawng mipa pen a nitak mateng a nin hi ding a, amah in tui sungah a pumpi a sil kei leh a siangtho nate ne lo ding hi. Ni a tum ciangin amah siang ding hi: tua khit ciangin amah in a siangtho nate ne thei ding hi; bang hang hiam cih leh tua bangte pen ama nek ding mah ahi hi. A mawk sihte hita leh gamsate in a balgawpte hita leh amah in ne-in tua tawh amah kininsak lo ding hi`: keimah in Topa ka hi hi,’ ci in. Tua ahih ciangin amaute in ka thuhilhna zui ding uh hi; tua hi kei leh amaute in tua thu a daisak uh ciangin khialhna thuakin sihpih ding uh hi: amaute a siangthosakpa in keimah Topa ka hi hi. “A pua lam mi in a siangtho na ne lo ding hi. Siampipa’ innah a om peemta ahi a kicial nasemte ahi zongin a siangtho na ne lo ding hi; ahih hangin siampi khat in ama adingin sum tawh sila khat a lei leh, tua a sila in ne thei ding hi; ama inn sunga a suak mite in ama an ne thei ding uh hi. Siampipa’ tanu khat in a pualam mi khat tawh a kiten’ leh tua nu in a siangtho biakna nate ne thei lo ding hi. Ahih hangin siampipa’ tanu pen meigong ahi a, a kima ahi zongin, ta nei loin, a nungak lai mah bangin a pa’ innah a ciahkik leh, tua nu in a pa’ an ne thei ding hi; ahi zongin a pualam mi kuamah in tua an ne thei lo ding hi. Mi khat in theih lohna hangin a siangtho na khat a nek leh, tua a na man zah sehnga suah sehkhat behlapin, siampipa tungah a siangtho na pia ding hi. Israel mite in Topa ’ tungah a piak ahi, amaute’ na siangthote pen siampite in ninsak lo ding uh a, tua bangin amau’ na a siangthote nekna tawh mawhna leh khialhna amaute pua sak lo ding uh hi; bang hang hiam cih leh keimah in amaute a siangthosak Topa ka hi hi,” a ci hi. Topa in Moses kiangah, “Aaron leh a tapate leh Israel mi khempeuh tungah hih bangin gen in: Israel mite sung panin ahi zongin Israel sungah a peem mite lak pan ahi zongin mi khatpeuh in biakna a piak ciangin, thuciamna a tun’sakna hita leh meihal biakna-in Topa tungah a kipia ut thu-a biakna hita leh, hong kisan’ theih nadingin bawngtal hita leh tuu hita leh keel hita leh, a sitbang lo apa khat na pia ding uh hi. Note in a sitbang khatpeuh peuh na pia kei ding uh hi; bang hang hiam cih leh hong kisang zo lo ding hi. Mi khatpeuh in bawnghon panin ahi zongin a tuu leh keel hon panin ahi zongin thuciamna tun’sak nading hita leh ut thu-a biakna-in hita leh Topa tungah thunuam-a biakna a piak ciangin, a kisan’ theih nadingin a ganhing a cidam hi ding hi; ama tungah sitban’na om lo ding hi. Ganhing a mittaw, a gamtang theilo, ahem, meima nai a nei, cithak ahih kei leh meima a neite pen, note in Topa tungah pia loin, Topa tungah mei tawh kihal biakna-in biakna tau tungah tuate na zang kei ding uh hi. Bawngtal hita leh tuuno hita leh a na khatpeuh a saulua ahih kei leh a tom luate pen note in ut thu-a biakna-in na pia thei ding uh hi; ahih hangin thuciamna biak nadingin kisang zo lo hi. A ciltangte a sanim, a kisukham, a kikeek ahih kei leh a ki-at ganhing khatpeuh peuh, note in Topa tungah pia loin, na gam sung uhah biakna-in na zang kei ding uh hi; gamdang mite khatpeuh peuh tung pana kingah tua ci bang ganhingte zong na Pasian uh’ adingin note in na pia kei ding uh hi. Amaute sitbang a, hem ahih manin tuate hong kisang zo lo ding hi,” a ci hi. Topa in Moses kiangah, “Bawng ahih kei leh tuu ahih kei leh keel khat a suah ciangin a pi tawh ni sagih sung omkhawm ding hi; a ni giat ni-a kipanin tua ganno pen Topa ’ tungah mei tawh kihal biakna-in kisang thei ding hi. A pi pen bawng hita leh tuu hita leh, note in a pi leh a no ni khat sungin na gokhawm kei ding uh hi. Note in Topa tungah lungdam koh biakna na piak uh ciangin, note hong kisan’ theih nadingin na pia ding uh hi. A tua ni mahin kine ding a, note in a zingsang dong siit na nei kei ding uh hi: keimah in Topa ka hi hi. “Tua ahih ciangin note in ka thupiaknate zui-in tuate na sem ding uh hi: keimah in Topa ka hi hi. Note in keima min siangtho na daisak kei ding uh hi; Israel mite lakah kei hong kisiangthosak ding hi; keimah in note a hong siangthosak Topa, note’ Pasian ahi dingin Izipt gam panin note a hong paikhiatpihpa ka hi hi: keimah in Topa ka hi hi,” a ci hi. Topa in Moses kiangah, “Israel mite tungah hih bangin gen in: Note in a siangtho biak kikhopnate hi ci-a na gen ding uh a kiseh Topa ’ pawi ahi a kiseh keima pawite in hihte ahi hi. Ni guk sungin nasep kizo ding hi; ahih hangin a ni sagih ni in a thupi tawlngakna sabbath, a siangtho kikhopna ahi hi; note in tua ni-in na na sem kei ding uh hi; tua in note’ ten’na khempeuh ah Topa ’ adingin sabbath ahi hi. “Hihte in amaute adingin a kiseh hunin note in na gen ding uh ahi Topa ’ pawi a kisehte a siangtho biak kikhopnate ahi hi. A kha masa, tua kha ni sawm-le-li ni ni takin Topa ’ Paisan Pawi ahi hi. Tua kha mah a ni sawm-le-nga ni in Topa tungah silngo sawhloh anlum pawi ahi hi; ni sagih sung note in silngo sawh loh anlum na ne ding uh hi. A ni masa ni-in note in a siangtho kikhopna khat na nei ding uh hi; note in thatang nasep na sem kei ding uh hi; Ahih hangin note in Topa tungah meihal biakna ni sagih sung na pia ding uh hi; a ni sagih ni in a siangtho kikhopna khat ahi hi; note in thatang nasep na sem kei ding uh hi,” a ci hi. Topa in Moses kiangah, “Israel mite tungah hih bangin gen in: Note tungah ka hong piak leitangah note tungin an na lak uh ciangin, note in na anpal lakte uh lom khat siampipa kiangah na paipih ding uh hi; note hong kisan’theih nadingin amah in Topa mai-ah anlom veii ding hi; a zing ciang sabbath khit ciangin siampipa in tua anlom veii ding hi. Note in anlom na veii ni-un, Topa tungah meihal biakna-in a sitbang lo kum khat a pha tuuno a pa khat na pia ding uh hi. Tua tawh a kipia khawm ding an tawh biakna in sathau tawh a kibawl annel seu seh sawmsuah seh nih hi ding a, a gim namtui dingin Topa tungah meihal biakna-in kipia ding hi; tua tawh a kipiakhawm ding leenggahzu tawh biakna in leenggahzu thawl khat hi ding hi. Note in na Pasian uh biakna na paipih ma, hih ni matengin anlum hita leh a ki-em an hita leh a sial hita leh na ne kei ding uh hi; tua in note’ khang tawntungin na ten’na khempeuh uhah thukham khat hi tawntung hi. “Note in a zing ciang sabbath khit ciang, veii-a biakna anlom na paipih ni uh a, kipan ni na sim to ding uh hi; nipi kal sagih bit hi ding hi; a sabbath sagihna khit a zing ciang dong ni sawmnga na sim ding uh hi; tua ciangin note in an thak ahi an tawh biakna Topa tungah na paipih ding uh hi. Note in na ten’na uh panin veii dingin seu seh sawmsuah seh nih a kibawl anlum lum nih nong paipih ding uh hi; tuate in annel kibawl, silngo sawh a, ki-em, Topa tungah anpal a, a kipia hi ding hi. Note in anlum tawh a sitbang lo kum khat a pha tuuno sagih, leh bawngtalno khat, leh tuutal nih na pia ding uh hi; tuate Topa tungah a gim namtui mei tawh kihal biak nadingin an tawh biakna leh leenggahzu tawh biaknate tawh Topa tungah meihal biakna hi ding hi. Note in khialhna hanga biakna-in keel a pa khat leh thunuam-a biakpiakna-in kum khat a pha tuuno a pa nih na pia ding uh hi. Siampipa in Topa mai-ah veii-a biakna-in anpal anlum leh tuuno nih tawh tuate veii ding hi; tuate in siampipa adingin Topa mai-ah a siangtho hi ding hi. Note in tua ni mahin genthangna na bawl ding uh hi; note in a siangtho kikhop khat na nei ding uh hi; note in thatang nasep na sem kei ding uh hi; tua in note ten’na khempeuh ah na khang tawntungun thukham khat hi tawntung hi. “Note in na leitang panun an na lak uh ciangin, na lo nawl dongun la loin, na an lak khit uh ciangin a sangte zong na khawm kei ding uh hi; note in mizawngte leh khualmi adingin tuate na nusia ding uh hi: keimah in Topa na Pasian uh ka hi hi,” a ci hi. Topa in Moses kiangah, “Israel mite tungah hih bangin gen in: A kha sagihna, tua kha a ni masa ni-in note in thupi tawlngakna ni khat, peengkul tumna tawh a kibawl phawkna, a siangtho kikhopna khat na nei ding uh hi. Note in thatang nasep na sem kei ding uh hi; Note in Topa ’ tungah meihal biakna na paipih ding uh hi,” a ci hi. Topa in Moses kiangah, “Hih a kha sagihna ni sawm ni in kilemna ni ahi hi; tua in note’ adingin a siangtho kikhopna hun hi ding a, note kigawt tawmin Topa ’ tungah meihal biakna na pia ding uh hi. Note in tua ni-in na na sem kei ding uh hi; bang hang hiam cih leh tua in Topa note Pasian’ mai-ah note adingin kilemna bawl nadingin kilemna bawl ni ahi hi. Bang hang hiam cih leh tua ni-in amahmah a kigawt tawm lo peuhmah ama mite kiang panin kihawlkhia ding hi. Tua ni-in na khatpeuh peuh a sem mi peuhmah keimah in ama mite lak panin ka susia ding hi. Note in na na sem kei ding uh hi; tua in na khang tawntungun na ten’na khempeuh uhah thukham khat hi tawntung ding hi. Tua in note adingin thupi tawlngakna sabbath khat hi ding a, nomau mah na kigawt tawm ding uh hi; tua kha ni kua ni a nitak akipan, a nitak panin a nitak kik dong note in na sabbath uh na tang ding uh hi,” a ci hi. Topa in Moses kiangah, “Israel mite tungah hih bangin gen in: Hih kha sagihna a ni sawm-le-nga ni akipan ni sagih sung in Topa ading buk pawi ahi hi. A ni masa ni-in a siangtho kikhopna khat hi ding hi; note in thatang nasep na sem kei ding uh hi. Ni sagih sung note in Topa tungah meihal biakna na pia ding uh hi; a ni giat ni-in note in a siangtho kikhopna khat nei-in Topa ’ tungah meihal biakna na pia ding uh hi; tua in a thupi kikhopna khat ahi hi; note in thatang nasep na sem kei ding uh hi. “Hihte in Topa tungah mei tawh kihal biakna, meihal biakna leh an tawh biakna, biakpiakna leh leenggahzu tawh biaknate, amau’ ni ciatin piak dingin a siangtho kikhopna hunin na gen ding uh, Topa ’ pawi a kisehte ahi hi; note in Topa tungah na piak uh Topa ’ Sabbath-te, note’ letsongte, thuciamna na biaknate khempeuh uh leh ut thu-a na biaknate khempeuh uh banah piak ding ahi hi. “Note in leitanga piangte na kaihkhop khit uh, kha sagihna a ni sawm-le-nga ni akipan ni sagih sung Topa ’ pawi na bawl ding uh hi; a ni masa ni in a thupi tawlngakna khat hi a, a ni giat ni zong a thupi tawlngakna khat mah hi ding hi. Note in a ni masa ni-in singkung hoih gahte, nisuh hiangte, a teh tam singhiang paipite, leh lui-a gialhekte na la ding uh hi; Topa na Pasian uh mai-ah ni sagih sung note na lungdam ding uh hi. Note in tua pen kum simin ni sagih sung pawi-in na nei ding uh hi; tua in note’ khang tawntungin thukham khat hi tawntung ding hi; note in kha sagihna sungah na bawl ding uh hi. Note in ni sagih sung buk sungah na teeng ding uh hi; Israelte lakah tualsung mi khempeuh buk sungah teeng ding hi; tua pen keimah in Izipt gam panin amaute ka paikhiapih lai-in Israel mite buk sungah ka teen’sakna thu note suan leh khakte in a theih nading ahi hi; keimah in Topa na Pasian uh ka hi hi,” a ci hi. Tua bangin Moses in Israel mite tungah Topa ’ pawi a kisehte a gen hi. Topa in Moses kiangah, “Meivak khat a tawntungin a kivak suak theih nadingin meivak adingin oliv gah a kisuzante panin sathau siangtho nang kiangah hong paipih nading uh Israel mite thu pia in. Kikhopna buk sung, tecipan’na dalna puan pua lamah, Aaron in nitak-a kipanin zingsang dongin Topa mai-ah a tawntungin tua meivak a ngeina bangin koih ding hi; tua in na khang khangun thukham khat hi tawntung ding hi. Amah in kham citak meivak khuam tungah meivakte a ngeina bangin Topa mai-ah om sak tawntung ding hi. “Nangmah in annel la in la, tua panin moh sawm-le-nih bawlin em in; moh khat ciangin annel seu seh sawmsuah seh nih hi ding hi. Nangmah in kham citak sabuai tungah tuate gual nih-in na koih ding a, gual khatah guk om ding hi. Phawkna-in Topa tungah mei tawh biakna-in piak dingin anlum tawh a paikhawm theih nadingin nangmah in a gual nihte-ah paknamtui siangtho na koih ding hi. Sabbath ni simin Aaron in a tawntunga thuciamna-in Israel mite tangin Topa mai-ah a ngeina bangin koih tawntung ding hi. Tua in Topa tungah mei tawh kihal biakna sung panin amah in a tawntunga a ngah ding a siangtho pen ama kaih ahih manin, Aaron leh ama suante ading hi a, amaute in a siangtho mun khatah ne ding uh hi,” a ci hi. Tu-in Israel mite khat’ tapa, a pa Izipt mi ahi khat, Israel mite lakah paikhia hi; Israel numei’ tapa leh Israel mi khat giahphual ah kitawng uh a, Israel numei’ tapa in Min Siangtho gensia-in samsia hi. Amaute in Moses kiangah amah paipih uh hi. Ama nu’ min in Shelomith hi a, Dan minam, Dibri’ tanu ahi hi. Topa ’ deihna amaute tungah a kigen mateng amaute in tua mipa khumcip uh hi. Topa in Moses kiangah, “A samsia mipa pen giahphual pua lamah paipih in; ama samsiat a za mi khempeuh ama lu tungah amau’ khut nga sak in la, mihonte khempeuh amah deng sak in. Israel mite tungah hih bangin gen in: ama Pasian a samsia mi peuhmah in ama khialhna thuak ding hi. Topa ’ min a gensia mipa kithat ding hi; mihonte khempeuh in amah deng ding uh hi; peemta hita leh tualsung mi hita leh, Min Siangtho a gensiat ciangin kithat ding hi. Mi a thatpa kithat ding hi. Ganhing a thatpa in a ganhing mah-in loh ding hi. Mi khat in a vengte khat a poisak leh, ama hih bangin ama tung mahah kithuk kik ding a, guh kitan tang ding guh kitan, mittang tang ding mittang, ha tang ding ha kihih ding hi; amah in mi khat a poisak bangin amah kipoisak ding hi. Ganhing a thatpa in loh ding hi; mi a thatpa kithat ding hi. Note in peemta leh tualsung mi adingin ngeina a kibang khat na nei ding uh hi; bang hang hiam cih leh keimah in Topa na Pasian uh ka hi hi,” a ci hi. Tua ahih ciangin Moses in Israel mite tungah thu gen hi; amaute in a samsia mipa giahphual pua lamah paipih uh a, suang tawh a deng uh hi. Topa in Moses a thupiak bangin Israel mite in hih uh hi. Topa in Sinai Mual tungah Moses kiangah, “Israel mite tungah hih bangin gen in: Note kong piak leitangah na tun’ uh ciangin, leitang in Topa adingin sabbatth tang ding hi. Kum guk sung note in na lo uh na pawi ding uh hi; kum guk sung note in na leenggui lo uh hah-in a gahte na kaikhawm ding uh hi; ahih hangin a kum sagihna ah, leitang ading a thupi tawlngakna sabbath, Topa ading sabbath om ding hi; note in na lo uh na pawi kei ding uh a, na leenggui lo uh na hah kei ding uh hi. A li pote note in na kaikhawm kei ding uh hi; a kipuah lo leenggui gahte note in na kaikhawm kei ding uh hi; leitang’ adingin a thupi tawlngakna kum hi ding hi. Leitang sabbath kum-a piang tawmte in note ading, note leh na sila pasal leh numeite ading leh a kicial na nasemte uh ading leh note tawh a teeng a peem mi ading an hong sik ding hi; a piang khempeuhte in na bawngte uh ading leh na leitang uhah a om ganhingte an ding ahi hi. “Kum nipi sagih hun in note adingin kum sawm-li-le-kua ahih theih nadingin note in kum nipi sagih, kum sagih mun sagih vei na simto ding uh hi. Tua ciangin note in kha sagihna a ni sawm ni-in nakpi-in peengkul na tum ding uh hi; kilemna ni-in note in na gam khempeuh uhah peengkul aw na gingkhia sak ding uh hi. Note in a kum sawmngana siangtho sakin, gam sunga a teeng mi khempeuhte tungah suahtakna na genthang ding uh hi; note in nomau neihsa ciatah pai kikin note in nomau innkuanpihte ciat kiangah na ciahkik uh ciangin note adingin jubili hi ding hi. Tua a kum sawmngana in note adingin jubili hi ding hi; tua kum sungin note in lo pawi loin, a li pote zong la loin, a kihah lo leengguite panin zong leenggah na khawm kei ding uh hi. Bang hang hiam cih leh tua in jubili ahi hi; tua in note adingin siangtho ding hi; note in lo pan-a piangsate na ne ding uh hi. “Hih Jubili kum sungin note khempeuh in nomau neihsa ciat na ngah kik ding uh hi. Note in na vengte tungah na zuak uh ahi zongin na vengte kiang panun na lei uh ahi zongin note khat leh khat na kikhem kei ding uh hi. Jubili khit ciangin a kum pha zah tawh kituakin note in na vengte uh kiang panin lei-in, a an piang ding kum zah tawh kituakin amau in note tungah hong zuak ding uh hi. A kum a tam leh a man na khangsak ding uh hi; a kum a tawm leh a man na kiamsak ding uh hi; bang hang hiam cih leh no tungah hong zuak pen a tuk tung ding zah ahi hi. Note khat leh khat kikhem loin na Pasian uh na zahtak ding uh hi; bang hang hiam cih leh keimah in Topa na Pasian uh ka hi hi. “Tua ahih ciangin note in ka thukhamte hihin, ka biakna ngeina kipte zui-in tuate na sem ding uh hi; tua hi leh note lungmuang takin gam sungah na teeng ding uh hi. Leitang in gah gahin, note in na kham takun ne-in, tua sungah lungmuang takin na teeng ding uh hi. Note in, ‘Lo lah pawi loin an lah la kei lehang, a kum sagihna ah bang ne ding i hi hiam?’ na cih uh leh keimah in a kum gukna ah note tungah thupha kong pia ding a, kum thum sung ading gah hong gah ding hi. A kum giatna ah lo na pawi uh ciangin, note in anlui na ne ding uh hi; anthak hong tun’ a kum kua mateng note in a lui na ne ding uh hi. Leitang in keima’ aa ahih manin neih suak dingin leitang kizuak lo ding hi; bang hang hiam cih leh note in kei tawh a omkhawm mikhual leh peemtate na hi uh hi. Note in na neih uh leitang khempeuh na kitanh kik sak thei ding uh hi. “Na sanggampa zawngin a neihsa leitang khenkhat a zuak leh, tua ciangin amah tawh a kinai a behpa hong pai-in a sanggampa zuaksa tanh ding hi. Mi khat in tua na a tatsak ding mi a neih kei a, amahmah hong hau kikin a tanh zo dingin a pian’ leh, amah in tua na a zuak zawh a kumte sim hen la, a zuakna mipa tungah a val-a piak dingte pia kik hen; amah in a neihsa ngah kik ding hi. Ahih hangin amah in ama adingin ngah kik zawh nading lampi a neih kei leh, tua ama zuak na pen jubili kum mateng a leipa’ khut sungah om ding hi; jubili ciangin tua na kipia khia-in, amah in a neihsa ngah kik ding hi. “Mi khat in khuapi kulh sungah ten’na inn khat a zuak leh, a kizuak khit kum khat bit sungin amah in tanh kik thei ding hi; kum khat bit sung amah in tatkik theih nading thu nei ding hi. Tua pen kum khat khit bit sungin a kitatkik kei leh, khuapi kulh sunga om tua inn pen a leipa in khang tawntungin a neih dingin kibawlsak ding hi; jubili ciangin kipiakik lo ding hi. Ahih hangin a kimkotah kulh a nei lo khua neu-a innte pen gam sung lote tawh a kibangin kingaihsun ding hi; tuate kitanh kik thei ding hi; jubili ciangin tuate kipiakhia ding hi. Ahi zongin Levi mite’ khuapite, amau neihsa khuapite-a innte ahih leh, Levi mite in khat vei peuh ciangin tanh thei ding uh hi. Levi mi khatpeuh in ama tat kik theih ding hi napi a tat kei leh, amau neihsa khuapi sunga tua inn pen jubili ciangin kipia khia ding hi; bang hang hiam cih leh Levi mite’ khuapi sunga innte pen Israel mite lakah amau neihsa ahi hi. Ahih hangin amau khuapi taang gamte kizuak thei lo ding hi; bang hang hiam cih leh tua in amau’ neih tawntung na ahi hi. “Na sanggampa uh zawng-in, note bangin amah a kivak zawh kei leh, note in amah na vaak ding uh hi; mikhual leh peemta bangin amah in note tawh om ding hi. Na sanggampa uh no kiangah hong ten’ theih nadingin ama tung panin ameet akhang la kei un la, na Pasian uh zahtak un. Note in ama tungah a meet-in sum leitawi pia loin, ama tungah a meet-in na an uh zong na pia kei ding uh hi. Keimah in note’ Pasian ahi ding leh, note tungah Kanaan leitang a hong pia dingin Izipt gam panin note a hong paikhiatpih Topa na Pasian uh ka hi hi. “Na gei-a na sanggampa zawngin, nangma tungah amahmah hong kizuak leh, sila bangin na na sem sak kei ding hi: amah in nang kiangah a kicial nasem leh peemta bangin om ding hi. Amah in jubili kum mateng nang tawh na hong sem ding hi; tua ciangin nang kiang panin amah leh amah tawh a om a tate paikhia-in, ama innkuan zuan kikin, a pate’ neihsa ngah kik ding hi. Bang hang hiam cih leh amaute in Izipt gam panin ka paikhiatpih keima nasemte ahi uh hi; a amaute sila-in kizuak lo ding hi. Note in hih gawpgawpna tawh amah na uk kei ding uh a, na Pasian uh na zahtak ding uh hi. Note in na neih theih ding uh sila pasal leh sila numeite in: note in na kimkot uh a, om minamte lak panin sila pasal leh sila numei na lei thei ding uh hi. Note in na gam sung uhah a suak, note lakah a hong peem mi khualte leh note tawh a om amau’ innkuante lak panin zong na lei thei ding uh hi; amaute in nomau’ aa hi thei ding uh hi. Note in amaute pen note khit ciangin na tapate uh tungah amau’ neih tawntung dingin a luah dingin na pia thei ding uh hi; note in sila-in amaute na nei thei ding uh a, ahih hangin na sanggam uh Israel mite khat leh khat hih gawpgawpna tawh na ki-uk kei ding uh hi. “Note tawh a om khualmi ahih kei leh peemta khat hong hau a, ama kianga om na sanggampa uh zawngin, no tawh a om khualmipa tung ahi a, peemta-pa tung ahi zongin, tua ahih kei leh khualmipa innkuan khatpeuh peuh tungah amah a kizuak leh, amah in a kizuak khit ciangin amah kitanh kik thei ding hi; ama sanggamte khatpeuh peuh in amah tanh thei ding hi; ama innlak pa ahih kei leh a innlak sanggampa in tanh thei ding hi; ama innkuan sunga a kinai pih a beh khatpeuh in amah tanh thei ding hi; tua ahih kei leh zong amah a hauh leh amahmah kitanh kik thei ding hi. Amah in ama tungah amahmah a kizuak-a kipan jubili kum dong amah a leipa tawh tuat ding a, ama suahtak nading sum pen a kum phazah tawh kituak hi ding hi; a topa tawh a omkhawm hun sung teng pen a kicial nasem khat thaman zah-in seh ding hi. Kum tampi in a sap lai leh, amah in tuate tawh kituakin ama thaman ding a kipiakna sung panin ama kitatkhiat nadingin pia kik ding hi. Ahih hangin jubili kum ding kum tawmkhat in a sap leh amah in a topa tawh tuatna khat nei ding hi; ama sepsak ding kum a om lai tawh kituakin ama kitatkhiat nadingin sum pia kik ding hi. Amah in a topa tungah a kum kum-a kicial nasempa tawh kibang ding hi; a topa in note’ muhna ah hih gawpgawpna tawh amah uk lo ding hi. Hih bang danin amah a kitatkhiat kei leh, jubili kum ciangin amah leh amah tawh a om a tate’ kikhahkhia ding hi. Bang hang hiam cih leh Israel mite in kei adingin nasemte ahi uh hi; amaute pen Izipt gam panin keimah in ka paikhiatpih keima nasemte ahi uh hi: keimah in Topa na Pasian uh ka hi hi. “Note in nomau adingin a mai-ah na kun dingun milim bawl loin, a kiseek milim hita leh khuam hita leh ding sak loin, na gam sung uhah suang milim na phut kei ding uh hi; bang hang hiam cih leh keimah in Topa na Pasian uh ka hi hi. Note in ka sabbath-te tangin ka biakinn na zahtak ding uh hi: keimah in Topa ka hi hi. “Note in ka thukham zui-in ka thupiaknate mangin tuate na sep uh leh, keimah in note guahtui amau’ hunin kong pia ding a, leitang in ama gahte hong piangsakin, lo-a kungte in amau’ gah gah ding uh hi. Na cil uh ante lenggah lawh hun dong kimang ding a, leenggah minte in lo pawi hun dong kimang ding hi; note in na kham takun na an uh na ne ding uh a, lungnuam takin na gam sung uhah na teeng ding uh hi. Keimah in gam sungah nopsakna hong pia-in, note lungdam takin na lum ding uh a, bangmah in note hong lausak lo ding hi; keimah in gam sung panin ganhing gilote ka hawlkhia ding a, gal kidona in na gam uh hong nawk lo ding hi. Note in na galte uh na delh ding uh a, note mai-ah namsau in amaute puksak ding hi. Note nga in zakhat zo-in, note zakhat in tulsawm na zo ding uh hi: note’ mai-ah namsau in na galte uh puksak ding hi. Keimah in note ka hong pingaihsut ding a, note hong pung sakin, tampi hong phasakin, note tawh ka thuciamna ka kipsak ding hi. Note in sau veipi a kikhol a luite ne-in, note in a thak koih nadingin alui na hahsiang masa ding uh hi. Keimah in note lakah omna ka bawl ding a, keimah in note kong kih kei ding hi. Keimah in note lakah omin note’ Pasian hi-in, note in keima mite na hi ding uh hi. Note in amau sila na hih loh nadingun Izipt gam panin note a hong paikhiatpih Topa na Pasian uh ka hi hi; keimah in note’ hakkolte kuaitanin note a dingtangin kong pai sak hi. “Ahih hangin note in ka thu ngai loin, hih thupiaknate khempeuh na hih kei uh a, note in ka thukhamte nialin, note in ka biakna ngeina kipte kih a, ka thupiaknate khempeuh sem loin, ka thuciamna na palsat uh leh, keimah in note tungah hih bangin kong hih ding hi: note tungah hong tung dingin keimah in thakhat thu-a dipkuatna, zawngkhalna, leh mite siasakin nuntakna a kiamsak ding cisa natna kong tung sak ding hi. Note’ lo pawi in a mawkna hi ding hi; bang hang hiam cih leh na galte un tuate ne ding hi; Keimah in note kong maisiat ding a, na galte uh mai-ah, lelhna na thuak ding uh hi; note hong mudah mite in note hong uk ding a, kuamah in note hong delh lo napi-in na tai ding uh hi. Tua bang hi napi-in note in ka thu nong ngaih kei uh leh, keimah in na khialhna hangun a zah sagih vei-in note kong thuhilh kik ding a, keimah in na kiphatsakpih uh note’ vangliatna susia-in, na vantungte uh sik bangin bawlin na leitung uh sumngo bangin ka bawl ding hi; na leitang un ama gah piangsak loin, na gam sung uh a, kungte in amau gah gah lo ding ahih manin note’ thatang a mawkna-a bei hi ding hi. “Tua ciangin kei tawh kilehngatin pai-in, keima thu na ngaih kei uh leh, keimah in note’ khialhna a zah sagih vei-in note tungah gimna kong tung sak ding hi. Keimah in note lakah gamsate hong khahin, amaute in na tate uh hong neksak ding a, na ganhingte uh susia-in, note mi tawmno khat hong suah ding a, note’ lampite in gamkhing suak ding hi. “Hih banga hihna tawh kei lamah note hong kihei loin, kei tawh kilehngatin na pai lai uh leh, kei zong note tawh a kilehngatin pai-in, keimahmah in na khialhnate uh hangin a zah sagih vei-in note kong sat ding hi. Keimah in thuciamna omsa bangin phulakna na a sem ding namsau khat note tungah kong tung sak ding hi; na khuapi sung uhah note na kikhaihkhop uh leh zong keimah in note’ lakah natna kong tung sak ding a, galte khut sungah note hong kipia ding hi. Keimah in note’ nuntakna an ka suksiat ciangin, nupi sawm in meibung khat sungah na anlum uh em ding a, na anlum uh a tawi tehin hong pia kik ding hi; note in na ne ding uh a, na kham zo kei ding uh hi. “Tua bang hi napi-in note in keima thu ngai loin, kei tawh kilehngatin na pai lai uh leh, note tawh a kilehngatin ka heh ngawh pah ding a, note’ khialhna hangin keimahmah in a zah sagih vei-in kong thuhilh ding hi. Note in na tapate uh a sa na ne ding uh a, na tanute uh sa zong na ne ding uh hi. Keimah in mual dawn-a na biaknate uh susia-in, na paknamtui biakna taute uh phukin, na milim’ siluang hawmte uh tungah na luanghawmte uh ka paii ding hi; keimah in note kong kih ding hi. Keimah in na khuapite uh siasakin, na biakinnte uh gamkhing ka suaksak ding a, nomau’ gim namtuite ka diik kei ding hi. Keimah in leitang ka siasak ding a, tua tungah a teeng na galte un lamdang sa ding uh hi. Keimah in minamte lakah note kong thehthang ding a, keimah in namsau a paai panin dokin note kong delh ding hi; na leitang uh gamkhing hi ding a, na khuapite uh a sia hi ding hi. “Tua ciangin na galte uh leitangah na om tan vei uh, gamkhing-a a om sung teng, leitang in a sabbath-te a ngah hi ding hi; tua ciangin leitang tawlnga-in, a sabbath-te ngah ding hi. Ama tungah na ten’ lai takun a ngah loh tawlngakna ahi na sabbath-te uh, gamkhing a, a om sung teng a tawlnga hi ding hi. Note sung panin galte leitangah a om lai mite tungah lungsim gimna ka tungsak ding hi; nahthel ging in amaute tai sak ding a, namsau mai-ah mi khat a tai bangin amaute tai ding uh a, kuamah in a delh lohpi-in amaute puk ding uh hi. Kuamah in delh lo napi-in namsau mai pan a taikhia bangin amaute khat leh khat kiphupai ding uh hi; note in na galte uh nan’ zawh nading vangliatna na nei kei ding uh hi. Minamte lakah note na sia ding uh a, na galte uh leitang in note hong nemang ding hi. Note sung panin galte’ leitangah a om laite amau’ mawhna hangin kiam ding uh hi; amau’ pute pate’ mawhna hangin amau zong amaute mah bangin kiam ding uh hi. - “Ahih hangin kei tungah khemna tawh hong gamtatnasa uh leh kei tawh kilehngatin a paina uh hangin amaute tawh kilehngatin pai-in, amau galte’ leitangah amaute ka paipihna thu ahi, amau’ mawhna leh, a pu a pate’ mawhna pulakin a lungsim uh niamkhiatin, amaute in a mawhna a kipuahphat uh leh;   tua ciangin keimah in Jakob tawh ka thuciamna ka phawk ding a, keimah in Isaak tawh ka thuciamna leh Abraham tawh ka thuciamna ka phawk ding a, keimah in leitang zong ka phawk ding hi. Ahih hangin amaute in leitang nusia-in, amaute om loin gamkhingin a om sung teng leitang in a sabbath-te na ngah ding hi; amaute in ka biakna ngeina kipte nialin, amaute in ka thukhamte mudah ahih manin, amaute in a mawhna uh thuak ding uh hi. Bang bang ahi zongin, amaute a galte uh gam sungah a om sung teng uh keimah in amaute nilkhia loin, amaute a susia maimang zah ding leh amaute tawh ka thuciamna a pelh zah dingin amaute ka mudah kei ding hi; bang hang hiam cih leh keimah in Topa amau Pasian ka hi hi; ahih hangin keimah in amaute ka ngaihsutna-in keimah in amau’ Pasian ka hih theih nadingin, minamte’ muhna ah Izipt gam panin ka paikhiatpih amau’ pu leh pate tawh ka thuciamna ka phawk ding hi: keimah in Topa ka hi hi,” a ci hi. Hihte Moses tung tawnin Sinai Mual tungah Topa in amah leh Israel mite kikalah a bawl thukhamte leh biakna ngeina kipte leh thute ahi hi. Topa in Moses kiangah, “Israel mite tungah hih bangin gen in: Mi khat in a tuam vilvel-in kiciamna a bawl ciangin, tua a kiciamna a bawl ciangin, tua a kiciamna mite pen nangmah in Topa’ aa dingin na seh ding hi; pasal kum sawmnih panin kum sawmguk a phate a man na sehna pen, biakinn shekel tawh kizui-in mi khat ciangin ngun shekel sawmnga hi ding hi. Tua mi in numei ahih leh, na sehna in shekel sawmthum hi ding hi. Tua mi in kum nga pan kum sawmnih ciang a pha mi ahih leh, a man na sehna in pasal shekel sawmnih hi ding a, numei shekel sawm hi ding hi. Tua mi in kha khat pan kum nga ciang a pha mi ahih leh, a man na sehna in pasal ngun shekel nga hi ding a, numei na sehna in ngun shekel thum hi ding hi. Tua mi in kum sawmguk pan a tungsiah ahih leh, pasal na sehna in shekel sawm leh nga hi ding a, numei shekel sawm hi ding hi. Mi khat zawng lua-in nangma seh zah a piak zawh kei leh, amah in siampipa kiangah a mi hong paipih ding a, siampipa in ama man seh ding hi; a kiciam mipa a siamna tawh kizui-in siampipa in ama man seh ding hi. “Mite in Topa tungah biakna-in a piakte in ganhing ahih leh, mi khatpeuh in Topa tungah a piak tua bang ganhingte khempeuh a siangtho ahi hi. Amah na khatpeuh peuh, ahoihte ahoih lo tawh ahi zongin, ahoih lote ahoih tawh a hi zongin, laih lo, kheek lo ding hi; amah in ganhing khat ganhing adang khat tawh a kheek leh, tua ganhing leh a kheekna ganhing a siangtho hi ding hi. Tua pen Topa tungah biakna-in kipia thei lo ganhing nin khat ahih leh, mipa in siampipa mai-ah a ganhing paipih ding a, siampipa in hoih hi ci-in ahi zongin sia hi ci-in ahi zongin a man zah seh ding hi; nang siampipa in a seh bangin hi pah ding hi. Ahih hangin amah in tua ganhing a tat nop leh, a kisehna banah seh nga suah seh khat behlap ding hi. “Mi khat in a siangtho dingin Topa tungah a inn a ap ciangin, siampipa in hoih hi ci-in a hi zongin sia hi ci-in ahi zongin a man zah seh ding hi; siampipa in a seh bangin kip ding hi. A appa in ama inn a tat nop leh, a kisehna banah sehnga suah sehkhat sum tawh behlap ding a, tua inn ama’ aa hi ding hi. “Mi khat in a luah ahi ama leitang phel khat Topa tungah a ap leh, nangma sehna pen khaici tawh kizui hi ding hi; mangbuhham beem khat a pawina leitang pen ngun shekel sawmnga-in kiseh ding hi. Amah in jubili kum a, kipanin a lo a ap leh, nangma sehna zahzah bit ding hi; ahih hangin jubili khit ciangin amah in a lo a ap leh, siampipa in jubili kik dong a om lai kumte tawh kizui-in a man zah sum seh ding a, nangma sehna zah panin kikhiam ding hi. Lo a appa in a tat nop leh, a kisehna banah sehnga suah sehkhat sum tawh behlap ding a, tua in ama’ aa hi suak ding hi. Ahih hangin amah in a lo tanh nuam lo ahi a, amah in midang khat tungah a lo a zuak ahi zongin ahih leh, tua pen amah in tanh kik thei nawn lo ding hi; a lo pen, jubili huna piak khiat ciangin, a ki-apsa lo mah bangin Topa tungah a siangtho hi ding hi; siampipa in tua lo tang ding hi. Amah in a luahna tawh a neih a hilo, a leisa lo pen Topa tungah a ap leh, siampipa in jubili kum ciang dong ding tua mah seh ding a, a mipa in tua ni-in a kiseh zah, Topa tungah a siangtho-in pia ding hi. Jubili kum ciangin a lo pen a kileina-pa, gamluahna tawh tua leitang a nei mipa tungah pia kik ding hi. A kisehna peuhmah biakinn shekel tawh kizui hi ding hi: gerah sawmnih ciangin shekel khat hi ding hi. “Ahih hangin tacil pen Topa’ aa ahih mah bangin, kuamah in ganhing tacilte ap thei lo ding hi; bawng hita leh tuu hita leh Topa’ aa ahi hi. Ganhing nin ahih leh, nangma sehna bangin amah in lei kikin, tua banah seh nga suah seh khat behlap ding hi; tua hi lo a, a kitat kei leh, a kisehna bangin kizuak ding hi. “Ahih hangin mi khat in a neih, Topa tungah a ap, a ki-apsa nate, mi hita leh ganhing hita leh, a luah ama lo hita leh, kizuak lo ding, kitanh lo ding hi; a ki-ap na peuhmah Topa tungah siangthopen hi. Mite lak panin a kisusia mang ding a, ki-apsa mi peuhmah, kitanh lo ding hi; kithat ding hi. “Leitung pana piang seh sawmsuah seh khat khempeuh khaici hita leh singgah hita leh, Topa’ aa ahi hi; Topa adingin siangtho hi. Mi khatpeuh in seh sawmsuah seh khat a, a piak na khatpeuh peuh a tat nop leh, amah in tua banah seh nga suah seh khat behlap ding hi. Bawnghon leh tuu, keelhon seh sawm suah seh khat khempeuh leh a cingpa’ ciangkhut nuai-a a pai ganhing khempeuh seh sawmsuah seh khat peuhmah Topa adingin a siangtho hi ding hi. Mi khat in pha hiam sia hiam ci-in kantel lo ding a, khek lo ding hi; a khek leh, tua leh a khekna pen a siangtho hi ding hi; tua pen kitanh lo ding hi,” a ci hi. Hihte in Sinai Mual tungah Topa in Israel mite ading Moses tungah a piak thupiakte ahi hi. Amaute in Izipt gam panin a paikhiat zawh uh a kum nihna, a kha nihna a ni masa ni-in, Sinai gamlak kikhopna puanbuk sungah Topa in Moses hopihin, hih bangin ci hi, “Israel mi honte khempeuh a mi pha zah tawh kizui-in a innkuankuan, a beh beh-in, pasal peuhmah a milip-in sim in; nang leh Aaron in Israel sungah kum sawmnih panin a tungsiah a pha, galdo dingin a kuan thei ding mi khempeuh a hon a honin na sim ding uh hi. A minam simin a beh sungah a lutang ahi mi khat ciat nang tawh hong om ding uh hi. Hihte in no hong huh dingte min ahi hi. Reuben sung panin Shedeur’ tapa Elizur; Simeon sung panin Zurishaddai’ tapa Shelumiel; Judah sung panin Amminadab’ tapa Nahshon; Issakhar’ sung panin Zur’ tapa Nethanel; Zebulun, sung panin Helon’ tapa Eliab; Josef tapate, Efraim sung panin Ammihud’ tapa Elishama, leh Manasseh sung panin Pedahzur’ tapa Gamaliel; Benjamin sung panin Gideoni’ tapa Abidan; Dan sung panin Ammishaddai’ tapa Ahiezer; Asher’ sung panin Okran’ tapa Pagiel; Gad sung panin De-uel’ tapa Eliasaf; Naftali sung panin Enan’ tapa Ahira ahi hi,” a ci hi. Hihte in mihon sung panin a kiteel, amau’ phung sung panin a makaite, Israel behte’ lutangte ahi uh hi. Israel tacil, Reuben mi, a suan a khakte, kum sawmnih panin a tungsiah a pha pasal peuhmah, a milipin, a min phazah tawh kizui-in a innkuankuan, a beh beh-in, galdo dingin a kuan thei khempeuh: Reuben minam tul sawmli leh tulguk leh zanga pha hi. Simeon mi, a suan a khakte, kum sawmnih panin a tungsiah a pha pasal peuhmah, a milipin, tua a kisimte a min phazah tawh kizui-in a innkuankuan, a beh beh-in, galdo dingin a kuan thei khempeuh: Simeon minam tul sawmnga leh tulkua leh zathum pha hi. Gad mi, a suan a khakte, kum sawmnih panin a tungsiah a min phazah tawh kizui-in a innkuankuan, a beh beh-in galdo dingin a kuan thei khempeuh: Gad minam tul sawmli leh tulnga leh zaguk leh sawmnga pha hi. Judah mi, a suan a khakte, kum sawmnih panin a tungsiah a min pha zah tawh kizui-in a innkuankuan, a beh beh-in, galdo dingin a kuan thei pasal peuhmah: Judah minam tul sawmsagih leh tulli leh zaguk pha hi. Issakhar mi, a suan a khakte, kum sawmnih panin a tungsiah a min phazah tawh kizui-in a innkuankuan, a beh beh-in, galdo dingin a kuan thei pasal peuhmah: Issakhar minam tul sawmnga leh tulli leh zali pha hi. Zebulun mi, a suan a khakte, kum sawmnih panin a tungsiah a min phazah tawh kizui-in a innkuankuan, a beh beh-in, galdo dingin a kuan thei pasal peuhmah: Zebulun minam tul sawmnga leh tul sagih leh zali pha hi. Josef mi, Efraim mi a kicite, a suan a khakte, kum sawmnih panin a tungsiah a min phazah tawh kizui-in a innkuankuan, a beh beh-in, galdo dingin a kuan thei pasal peuhmah: Efraim minam tul sawmli leh zanga pha hi. Manasseh mi, a suan a khakte, kum sawmnih panin a tungsiah a min phazah tawh kizui-in a innkuankuan, a beh beh-in, galdo dingin a kuan thei pasal peuhmah: Manasseh minam tul sawmthum leh tulnih leh zanih pha hi. Benjamin mi, a suan a khakte, kum sawmnih panin a tungsiah a min phazah tawh kizui-in a innkuankuan, a beh beh-in, galdo dingin a kuan thei pasal peuhmah: Benjamin minam tul sawmthum leh tulnga leh zali pha hi. Dan mi, a suan a khakte, kum sawmnih panin a tungsiah a min phazah tawh kizui-in a innkuankuan, a beh beh-in, galdo dingin a kuan thei pasal peuhmah: Dan minam tul sawmguk leh tulnih leh za sagih pha hi. Asher mi, a suan a khakte, kum sawmnih panin a tungsiah a min pha zah tawh kizui-in a innkuankuan, a beh beh-in, galdo dingin a kuan thei pasal peuhmah: Asher minam tul sawmli leh tulkhat leh zanga pha hi. Naftali mi, a suan a khakte, kum sawmnih panin a tungsiah a min phazah tawh kizui-in a innkuankuan, a beh beh-in, galdo dingin a kuan thei pasal peuhmah: Naftali minam tul sawmnga leh tulthum leh zali pha hi. Hih mite, Moses leh Aaron in Israel makai, amau’ beh ciat taangin a ding mi sawm-le-nihte’ huhna tawh a sim uh ahi hi. Tua ahih ciangin Israel mi vekpi, kum sawmnih panin a tungsiah, a beh beh-in, Israel sung pan galdo dingin a kuan thei pasal peuhmah— a vekpi in tul zaguk leh tulthum leh zanga leh sawmnga pha hi. Ahih hangin Levi mite ahih leh amau’ nam min pua-in adangte tawh kisim khawm lo hi. Bang hang hiam cih leh Topa in Moses kiangah, “Levi minamte na sim kei ding hi, Israel mite lakah amaute na sim khawm kei ding hi; ahih hangin Levi mite pen teci pan’na biakbuk leh a sung nazat khempeuh, leh tua tawh a kisai na khempeuh a uk dingin seh in; amaute pen biakbuk leh a nazat khempeuh a pua dingte hi a, amaute in a biakbuk semin, a kimkotah phual sat ding uh hi. Biakbuk a kikhin ding ciangin Levi mite in phel ding uh hi; biakbuk a kilam ding ciangin Levi mite mah in lam ding uh hi. Midang khatpeuh peuh a kiang nai-ah hong pai leh, tua mi kithat ding hi. Israel mite in a milip-un amau’ giahphual ciat leh a dialkhai gei ciat uhah a pawl pawlin a puanbuk uh lam ding uh hi; ahih hangin Israel mi honte tungah hehna a om loh nadingin teci pan’na biakbuk kiim-ah Levi mite in phual sat ding uh hi; Levi mite in teci pan’na biakbuk kem ding uh hi,” a ci hi. Tua bangin Israel mite in hih uh hi; Topa in Moses a thupiak bangin amaute gamta uh hi. Topa in Moses leh Aaron kiangah, “Israel mite in amau’ dialkhai gei ciatah a beh dialkhaite tawh phual sat ding uh hi; amaute in a pang simah kikhopna buk mai ngatin phual sat ding uh hi. Nisuahna lam pangah phual a sat dingte in Judah’ giahphual dialkhai a neite hi ding hi, Judah mite makaipa in Amminadab’ tapa Nahshon ahi hi, ama pawl tul sawmsagih leh tulli leh zaguk pha hi. Ama zomah phual a sat dingte in Issakhar minam hi ding hi, Issakhar mite makaipa in Zuar’ tapa Nethanel ahi hi, ama pawl tul sawmnga leh tulli leh zali pha hi. Tua ciangin Zebulun minam hi ding hi. Zebulun mite makaipa in Helon’ tapa Eliab ahi hi, ama pawl tul sawmnga leh tul sagih leh zali pha hi. Judah’ phual a, a pawl pawl-a omte a vekpi in tul za leh tul sawmgiat leh tulguk leh zali pha hi. A kipai khiat ciangin amau masa ding uh hi. “A leitaw lam pangah a pawl pawlin Reuben’ giahphual dialkhai a neite ahi ding hi, Reuben mite makaipa in Shedeur’ tapa Elizur ahi hi, ama pawl tul sawmli leh tulguk leh zanga pha hi. Ama zomah phual a sat dingte in Simeon minam hi ding hi, Simeon mite a makaipa in Zurishaddai’ tapa Shelumiel ahi hi, ama pawl tul sawmnga leh tulkua leh zathum pha hi. Tua ciangin Gad minam hi ding hi, Gad mite a makaipa in Re-u-el’ tapa Eliasaf ahi hi, ama pawl tul sawmli leh tulnga leh zaguk leh sawmnga pha hi. Reuben giahphual a, a pawl pawl-a omte a vekpi in tul za leh tul sawmnga leh tul khat leh zali leh sawmnga pha hi. Amaute a nihna-ah paikhia ding hi. “Tua ciangin kikhopna buk in, giahphualte laizangah a om Levi mite’ phual tawh kikhin khawm ding hi; a phual sat hun mah bangun amau’ san ciat ciatah a dialkhai uh tawh paikhia ding uh hi. “A nitumna lam pangah a pawl pawlin Efraim giahphual dialkhai a neite hi ding hi, Efraim mite a makaipa in Ammihud’ tapa Elishama ahi hi, ama pawl tul sawmli leh zanga pha hi. Ama zomah Manasseh minam hi ding hi, Manasseh mite a makaipa in Pedahzur’ tapa Gamaliel ahi hi, ama pawl tul sawmthum leh tulnih leh zanih pha hi. Tua ciangin Benjamin mite a makaipa in Gideoni’ tapa Abidan ahi hi, ama pawl tul sawmthum leh tulnga leh zali pha hi. Efraim giahphual-a a pawl pawl-a omte a vekpi in tulza leh tulgiat leh zakhat pha hi. Amaute a thumna ah paikhia ding uh hi. “A leilu lam pangah a pawl pawlin Dan giahphual dialkhai a neite hi ding hi, Dan mite a makaipa in Ammishaddai’ tapa Ahiezer ahi hi, ama pawl tul sawmguk leh tulnih leh za sagih pha hi. Ama zom-ah phual a sat dingte in Asher minam hi ding hi, Asher mite a makaipa in Okran’ tapa Pagiel ahi hi, ama pawl tul sawmli leh tulkhat leh zanga pha hi. Tua ciangin Naftali minam hi ding hi, Naftali mite a makai-pa in Enan’ tapa Ahira ahi hi, ama pawl tul sawmnga leh tulthum leh zali pha hi. Dan’ giahphual a, om mi vekpi in tul za leh tul sawmnga leh tul sagih leh zaguk pha hi. Amaute a dialkhai tawh kizui-in pai nunung ding uh hi,” a ci hi. Hihte in Israel mite a beh zui-a kisim ahi hi; a pawl pawl-a giahphual-a om mi vekpi in tul za guk leh tulthum leh sawmnga pha hi. Ahih hangin Topa in Moses a thupiak bangin Israel mite lakah Levi mite kisim khawm lo hi. Tua bangin Israel mite in hih uh hi. Topa in Moses a thupiak bangin a beh tawh kizui-in a innkuankuan-in amau dialkhaite gei-ah giahphual sat uh a, tua mah bangin paikhia uh hi. Hite in Sinai Mual tungah Topa in Moses tawh a thugen hun lai-a Aaron leh Moses’ huna mite ahi hi. Hihte in Aaron’ tapate’ min ahi hi: A ta upa Nadab, Abihu, Eleazar, leh Ithamar ahi hi: hihte in sathau a kinilh siampi, siampi za-ah na sem dingin a kipsak, Aaron’ tapate’ min ahi hi. Ahih hangin Sinai gamlak Topa mai-ah mei siangtho lo a zat uh ciangin Topa mai-ah Nadab leh Abihu si hi; amaute in ta nei lo uh hi. Tua ahih ciangin Eleazar leh Ithamar in a pa uh Aaron’ nuntak sung teng siampi na sem uh hi. Topa in Moses kiangah, “Levi minamte va paipih in la, amaute in siampi Aaron’ na a sep theih nadingin a mai-ah koih in. Amaute in biakbuk ah a sep uh ciangin amah leh mi honpi’ adingin kikhopna buk mai-ah na sem ding uh hi; amaute in kikhopna buk sung nazat khempeuh vaan ding uh a, biakbuk ah a sep uh ciangin Israel mite adingin na sem ding uh hi. Nangmah in Aaron leh a tapate tungah Levi mite na pia ding hi; amaute pen Israel mite lak panin ama tungah a kipiate ahi hi. Nangmah in Aaron leh a tapate na seh ding a, amaute in a siampi nasep uh don ding uh hi; ahih hangin midang khatpeuh a nai-ah a pai leh, tua mi kithat ding hi,” a ci hi. Topa in Moses kiangah, “En in, Israel mite lakah naubu a hong tacil khempeuh tangdingin Israel mite lak panin Levi mite ka la khin hi. Levi mite in keima’ aa hi ding hi. Bang hang hiam cih leh tacil khempeuh keima’ aa ahi hi; Izipt gam sungah tacil khempeuh ka thah ni-in, Israel sungah tacil khempeuh, mihing tacil leh ganhing tacil khempeuh, keima adingin ka ap hi; amaute in keima’ aa hi ding hi: keimah in Topa ka hi hi,” a ci hi. Topa in Sinai gamlakah Moses kiangah, “Levi mite, a behbeh a innkuan kuanin sim in; pasal kha khat a pha panin a tungsiah peuhmah na sim ding hi,” a ci hi. Tua ahih ciangin Moses thu a kipiak bangin amah in Topa ’ thupiakna tawh kizui-in amaute sim hi. Levi’ tapate’ min in: Gershon, Kohath, leh Merari ahi hi. Gershon’ tapate’ min in: Libni leh Shimei ahi hi. Kohath’ tapate’ min: Amram, Izhar, Hebron leh Uzziel ahi hi. Merari tapate’ min in: Mahli leh Mushi ahi hi. Hih mite in Levi mite beh lutang ahi hi. Gershon beh in Libni mite leh Shimei mite ahi hi; hihte in Gershonte beh ahi hi. Amaute, kha khat pan a tungsiah a pha pasal peuhmah tul sagih leh zanga ahi hi. Gershonte beh in nitumna lam biakbuk nungah giahphual satin, tua Gershon mite sung pan a beh ukpi in Lael’ tapa Eliasaf ahi hi. Gershonte beh in kikhopna buk sungah a et dingte in, a biakbuk, puanbuk a tuamna tawh, kikhopna buk kongkhak puankhai, buktual-a a kikhaite, biakbuk kiim-a om buktual-a kongkhak puankhai leh biakna tau, leh a khaute leh hihte tawh a kizom na zat khempeuh ahi hi. Kohathte beh in Amram mite, Izhar mite, Hebron mite, leh Uzziel mite ahi hi; hihte in Kohathte beh ahi hi. Pasal khempeuh kha khat pan tungsiah, biakinn nasep a sem peuhmah tulgiat leh zaguk ahi hi. Kohathte beh in biakbuk leitaw lam pangah giahphual satin, Kohath mite sung pan a beh ukpi in Uzziel’ tapa Elizafan ahi hi. Amau’ et dingte in thuciamna singkuang, a sabuai, a meivakkhuam, a biak taute, siampite in nasepna-in a zat uh biakinn nazatte, kidalna puan leh hihte tawh a kizom na zat khempeuh ahi hi. Siampi Aaron’ tapa Eleazar in Levi mi makaite tungah a ukpi hi ding a, biakinn a en mite’ nasepna vaan ding hi. Merari-te beh in Mahli mite leh Mushi mite ahi hi; hihte in Merari-te beh ahi hi. Amaute kha khat panin a tungsiah pasal peuhmah tulguk leh zanih ahi hi. Merari-te beh sung pan a beh ukpi in Abihail’ tapa Zuriel ahi hi; amaute biakbuk leilu lam pangah giahphual sat dingte ahi hi. Merari-te beh et dinga a kisehte in biakbuk khuampeekte, a zawlte, a khuampite, khuam bullente, a nengneng teng leh hihte tawh a kizom na zat khempeuh ahi hi. Buktual kimkot-a khuampite leh a bullente tawh, khetphimte leh khaute zong ahi hi. Nisuahna lam pang biakbuk mai, kikhopna buk mai-ah giahphual a sat dingte in, Israel mite adingin bang khatpeuh peuh sep nadingin biakinn sungah thu a nei Moses leh Aaron leh a tapate ahi hi; midang khatpeuh a nai-ah hong paite kithat ding hi. Moses leh Aaron in Topa ’ thupiakna tawh a innkuan kuanun a sim Levi mi pasal kha khat panin a tungsiah peuhmah tul sawmnih leh tulnih pha hi. Topa in Moses kiangah, “Israel mite sung panin tacil pasal khempeuh sim in la, kha khat panin a tungsiah peuhmah a mi a min la in, Israel mite lak panin tacil khempeuh tangdingin Levi mite nong lak sak ding a, Israel mite’ ganhing tacil khempeuh tangdingin Levi mite’ ganhing nong laksak ding hi— keimah in Topa ka hi hi,” a ci hi. Tua ahih ciangin Moses in Topa ’ thupiak bangin Israel mite lakah tacil khempeuh a sim hi. Kha khat panin a tungsiah tacil pasal a kisim peuhmah tul sawmnih leh tulnih leh zanih leh sawmsagih leh thum ahi hi. Topa in Moses kiangah, “Israel mite lakah tacil khempeuh leh a ganhingte uh tangdingin Levi mite leh a ganhingte uh la in; Levi mite keima’ aa hi ding hi: keimah in Topa ka hi hi. Levi mi pasal khempeuh sangin Israel mi tacil khempeuh zanih leh sawmsagih leh thum-in tam zaw ahih manin, tuate tat nadingin shekel khatah gerah sawmnih a pha biakinn shekel zangin mi khat ciangin shekel nga pai na la ding a, tua a tamzaw teng a kitatna uh sumte Aaron leh a tapate tungah pia in,” a ci hi. Tua ahih ciangin Moses in Levi mite banah a val lai mite tung panin kitatkhiatna sum la hi; amah in biakinn shekel zangin Israel mi tacilte tung panin sum shekel tulkhat leh zathum leh sawmguk leh nga la hi; tua ciangin, Topa in Moses a thupiak mah bangin Topa ’ thu tawh kizui-in kitatkhiatna sumte Aaron leh a tapate tungah Moses in pia hi. Topa in Moses leh Aaron kiangah, “Levi mite lak panin Kohath mite amau’ innkuankuan leh a beh beh-in, kikhopna buk sungah na sem dingin na a sem thei ding kum sawmthum pan kum sawmnga a pha tapa khempeuh sim in. Kikhopna buk sungah Kohath mite nasep ding in a siangtho pen nate ahi hi. Giahphual a kisuan ding ciangin, Aaron leh a tapate tumin kidalna puan khia ding uh a, tua puan tawh teci pan’na singkuang tun ding uh hi; tua ciangin amaute in savun tawh tuam ding uh a, tua tungah puan a dum tawh khuhin, a zawlte bulh ding uh hi. Ompihna Anlum sabuai tungah amaute in puan a dum phah ding uh a, tua tungah a kuangdaite, paknamtui pakante, kuang-ukte, tuibuahna thawl gongbakte koih ding uh hi; a kikoih tawntung anlum zong a tungah om ding hi; tua ciangin amaute in a ausan puan tawh tuate khuh ding uh a, savun tawh khuh thuahin, a zawlte bulh ding uh hi. Mei vakna meivak khuam pen, a meivakte, a taitehte, a kuangte, leh sathau piakna nazatte khempeuh tawh puan a dum khat-in tun ding uh hi: amaute in a nazat khempeuh tawh savun-in tunin a puak nading tal tungah koih ding uh hi. Puan a dum khat tawh kham biakna tau khuh ding uh a, savun tawh tua mah tuam thuahin, a zawlte bulh ding uh hi; amaute in biakinn sungah a kizang nazat khempeuh la-in puan a dum khat tawh tunin, savun tawh tuate tun thuah ding uh a, a puak nading tal tungah koih ding uh hi. Amaute in a sumngo biakna tau panin a vutte luak khia ding uh a, a tungah puan a dupsan khat phah ding uh hi; tua lai-ah nasep nadinga a kizang, biakna tau nazat khempeuh, a vut luahna peek, a tu-ka, a kawbia, leh a kuang, biakna tau nazat khempeuh, a tungah koih ding uh hi; tua tungah savun tawh tuam ding uh a, a zawlte bulh ding uh hi. Aaron leh a tapate in biakinn leh biakinn nazat khempeuh a tun khit uh giahphual a kisuan ding ciangin, tuate a pua dingin Kohath mite pai ding uh a, ahih hangin amaute in a siangtho nate lawng kha lo ding uh hi; lawng leh si ding uh hi. Hihte in Kohath’ mite puak ding kikhopna buk nate ahi hi. “Siampi Aaron’ tapa Eleazar in meivak tui, a namtui paknamtui, a kikoih tawntung an tawh biakna, nilh sathau, leh biakbuk leh a sunga om khempeuh, biakinn leh a nazatte khempeuh uk ding hi,” a ci hi. Topa in Moses leh Aaron’ kiangah, “Levi mite lakah Kohath minamte a siat loh nadingin hih in; a siangtho pen nate nai-ah amaute a pai ciangin si loin a hin’ na dingun hih un: Aaron leh a tapate pai-in a nasep ding uh leh a van puak ding ciat uhah amaute seh ding uh hi, ahih hangin a siangtho nate tom khano sung bek nangawn a en dingin amaute tum lo ding uh hi, tum leh si ding uh hi,” a ci hi. Topa in Moses kiangah, “Gershon mite zong, amau’ innkuankuan leh a beh beh-in sim in, kikhopna buk sungah nasem dingin na a sem thei ding kum sawmthum pan kum sawmnga a pha tapa khempeuh na sim ding hi. Nasep leh van puak ciangin Gershonte beh nasep ding; amaute in biakbuk dalna puante, kikhopna buk a tuamna tawh, a tung zang a, om a khuhna tuuvun, kikhopna buk kongkhak-a puankhai, buktual-a a kikhaite, biakbuk leh biakna tau kimkotah a om buktual kongpi puankhaite, a khaute, leh amau’ nasepna dinga nazat khempeuh pua ding uh hi; amaute in tuate tawh a kizom nasep kisam khempeuh sem ding uh hi. Gershon beh pasalte nasep ding, a puak ding leh a hih dingte khempeuh uh Aaron leh a tapate’ thupiakna bang hi ding hi; a puak ding khempeuh uh amaute na ap ding hi. Hih in kikhopna buk sungah, Gershon beh pasalte nasep hi a, amau’ nasep in siampi Aaron’ tapa Ithamar’ ukna nuai hi ding hi. “Merari mite zong amau’ innkuankuan leh a beh beh-in na sim ding hi; kikhopna buk sungah na a sem thei ding kum sawmthum pan kum sawmnga a pha tapa khempeuh na sim ding hi. Kikhopna buk sungah amau’ nasep dingte khempeuh biakbuk khuampeekte, a zawlte, a khuampite, khuam bullente tawh, a kimkot-a om buktual-a khuampite a bullente tawh, khetphimte, a khaute, a nazatte khempeuh leh a nengnengte ahi hi; amaute’ puak dinga a kiseh nate a minin na lo ding hi. Hih in siampi Aaron’ tapa Ithamar’ khut nuai-ah Merari mite in kikhopna buk sungah a sep ding teng uh ahi hi,” a ci hi. Moses leh Aaron leh mi honte’ makaite in Kohath mi tapate a innkuankuan leh a beh beh-in, kikhopna buk sungah na sem dingin na sem thei ding kum sawmthum pan kum sawmnga a pha mi khempeuh a sim uh hi; a beh tangun tulnih leh za sagih leh sawmnga pha hi. Topa in Moses a thupiakna bangin Moses leh Aaron in a sim, kikhopna buk sungah na a sem, Kohathte beh in hih zah ahi hi. Gershon mite a innkuankuan leh a beh beh-in, kikhopna buk sungah na sem dingin na a sem thei ding kum sawmthum pan kum sawmnga a pha tapa khempeuh— a innkuankuan leh a beh beh-in tulnih leh zaguk leh sawmthum pha hi. Topa ’ thupiakna bangin Moses leh Aaron in a sim, kikhopna buk sungah na sem Gershonte beh in hih zah ahi hi. Merari mite a innkuankuan leh a beh beh-in, kikhopna buk sungah na sem dingin na a sem thei kum sawmthum pan kum sawmnga a pha tapa khempeuh— a beh tangun tul thum leh zanih ahi hi. Topa in Moses a thupiakna bangin Moses leh Aaron in a sim, Merari beh in hih zah ahi uh hi. Moses leh Aaron leh Israel makaite in a sim, Levi mi a kisim peuhmah, a innkuankuan leh a beh beh-in, kikhopna buk sungah van puak nasep leh nasep a sem thei ding kum sawmthum pan kum sawmnga a pha, a kisim tapa khempeuh tulgiat leh zanga leh sawmgiat pha hi. Moses tung tawnin Topa ’ thupiakna bangin a sep ding a puak ding ciat uh kiseh hi; Moses in Topa ’ thupiak bangin amaute sim hi. Topa in Moses kiangah, “Amaute in mi phakte, nin neite leh mi si tawh kisukha a, a ninte khempeuh giahphual pua-ah a omsak nadingun Israel mite thu pia in; a laizangah keima omna ahi amau’ giahphual a nitsak loh nadingun hih bangin a nin numei leh pasal paikhia sakin giahphual pua-ah na omsak ding hi,” a ci hi. Tua mah bangin Israel mite in hih uh a, giahphual pua-ah amaute hawl khia uh hi; Topa in Moses kiangah a gen bang in Israel mite in hih uh hi. Topa in Moses kiangah, “Israel mite tungah hih bangin gen in, Topa tungah mite a khialh theihna ahi khialhna khatpeuh peuh, numei ahi a, pasal ahi zongin gamta-in a mawh leh, a gamtatnasa a khialhna pulak ding hi; amah in a tatkhialhna-ah a kicingin din kik ding a, tua tungah sehnga suah sehkhat behlapin, a khialhnapa tungah pia ding hi. Ahih hangin a mipa in, tua khialhna hanga ditkikna a sang ding tanau a neih kei leh, a khialpa’ adingin kilemna a kibawlsakna ahi kilemna tuutal banah, khialhna hanga tua ditkikna pen siampipa’ adingin Topa tungah tung ding hi. Amaute in siampipa tungah a paipih uh biakna peuhmah, Israel mite’ na siangthote khempeuh, ama’ aa hi ding hi; mi khempeuh’ na a siangthote zong ama’ aa hi ding hi; mi khatpeuh in siampipa tungah a piak peuhmah ama’ aa hi ding hi,” a ci hi. Topa in Moses kiangah, “Israel mite kiangah hih bangin gen in, Mi khatpeuh’ zi vak vai-in a pasal palhngulh a, pasal khat in tua nu luppihin, tua thu a pasal in a theih kei a, tua nu kininsak napi-in kuamah in phawk loin, a khialh lai takin tua nu kiman lo ahih manin a langah a pang ding teci a om kei leh; a pasal in upmawhna lungsim nei-in, a kininsak tawm a zi a up mawh leh; tua ahih kei leh zong, a numei kininsak lo napi-in, a pasal in upmawhna lungsim nei-in, a zi a up mawh leh; tuapa in siampipa kiangah a zi paipihin, tua nu adingin a kisam biakna, mangbuhham seu khat sehsawm suah sehkhat zong paipih ding hi; tuapa in a tungah sathau sung loin, paknamtui zong koih lo ding hi, bang hang hiam cih leh tua in upmawhna hanga an tawh biakna, mawhna phawkkik nadinga an tawh biakna ahi hi. “Siampipa in tua nu va paipihin, Topa ’ mai-ah koih ding hi; siampipa in lei beel khat-in tui siangtho la ding a, biakbuk sual tunga om leivui tawm khat la-in tua tui sungah khah ding hi. Siampipa in Topa ’ mai-ah tua numei koih ding a, numei’ sam phelin, upmawhna hanga an tawh biakna ahi phawkkikna an tawh biakna tua nu tawi sak ding hi. Siampipa in ama khut sungah tuisia tawi ding hi. Tua ciangin siampipa in amah kiciam sakin, ‘Na pasal’ ukna nuai-ah na om sungin, kuamah in nang hong luppih loin, nitna lamah a kihei lo na hih leh, hih tuisia panin suak ta in. Ahih hangin na pasal’ ukna nuai-ah om napi-in nangmah vak vai a, nang leh nang kininsakin, na pasal hilo mi dang khat in nang hong luppih leh, (siampipa in tua numei kiciam sak ding a, tua nu kiangah) Topa in na pheipi teem sakin na pumpi a pawmsak ciangin, na mite lakah hamsia leh kiciamna-a zat dingin Topa in nang hong bawlin, hih tuisia in na gil sung zui hen la, na pumpi pawm sakin na pheipi teem sak hen,’ ci ding hi. Tua ciangin numei in, ‘Amen, Amen,’ ci ding hi. “Tua ciangin siampipa in hih hamsiate laibu khat sungah gelhin tuisia sungah sil khia ding hi; amah in tua numei a tuisia dawnsak ding a, tua nu’ sungah tuisia tumin na sak velval ding hi. Siampipa in numei’ khut sung panin upmawhna hanga an tawh biakna lakhia ding a, Topa mai-ah tua an tawh biakna veii-in biakna tau-ah paipih ding hi; siampipa in phawk nadingin an tawh biakna khut dim khat la-in, biakna tau tungah hal ding a, tua khit ciangin a tui pen numei dawn sak ding hi. Amah in a tui a dawnsak khit ciangin, tua nu amahmah kininsakin a pasal tungah thuman loin gamta ahih leh, tua tuisia in ama sungah tumin na sak velval ding a, a pumpi pawm-in, a pheipi teem ding a, tua numei in a mite lakah hamsiatna-in kizang ding hi. Ahih hangin amahmah kininsak hi loin a siang ahih leh, tua nu suakta-in ta nei ding hi. “Zi khat in a pasal’ ukna nuai-ah om napi-in vak vai-in amahmah a kinitsak ciangin, ahih kei leh pasal khat in upmawhna lungsim nei-in a zi a upmawh ciangin, upmawhna thute ah zat ding ngeina in hih ahi hi; tua ciangin amah in Topa mai-ah numei koih ding a, siampipa in numei tungah hih ngeina khempeuh zang ding hi. Pasal in mawhna panin suakta ding a, ahih hangin a mawh leh, numei in ama mawhna thuak ding hi,” a ci hi. Topa in Moses kiangah, “Israel mite tungah hih bangin gen in; numei ahi a, pasal ahi zongin, Topa adingin amahmah kituam koih nadingin Nazir kiciamna ahi, a tuam mahmah kiciamna a bawl ciangin, leenggahzu leh kham theih zu panin a pumpi kikem ding hi; leenggahzu pan ahih kei leh kham theih zu pan a kibawl tuithuk dawn lo ding a, leenggah tui khatpeuh peuh dawn loin, leenggah a hing hita leh a keu hita leh ne lo ding hi. Amah a kituam koih hun sung teng leenggui panin a piang bangmah ne lo ding hi, a tang ahi a, a hawng nangawn ahi zongin ne lo ding hi. “Tuam om dingin a kiciam hun sung teng ama lu tungah mul kiatna kitah lo ding hi; Topa adingin a tuam om hun a cin’ mateng amah a siangtho hi ding hi; amah in a sam a sau-in khawi ding hi. “ Topa adingin a tuam om hun sung teng mi si luang kiangah pai lo ding hi. A nu, a pa ahi a, a sanggamnu a sanggampa ahi zongin a sih leh tuate khatpeuh hangin amah kininsak lo ding hi: bang hang hiam cih leh Pasian’ adingin a tuam omna ama lu tungah om hi. A tuam om hun sung teng Topa ’ adingin a siangtho ahi hi. “Mi khatpeuh ama gei-ah thakhatin si-in, amah in a ki-ap ama sam a nitsak leh, a kisian’suah ni-in a sam met ding hi; a ni sagih ni-in met ding hi. A ni giat ni-in amah in siampipa kiang kikhopna buk kongah vakhu nih ahih kei leh kawl vakhu no nih paipih ding a, siampipa in khialhna hanga biak nadingin khat pia-in, meihal biak nadingin a khat pia ding a, ama adingin kilemna bawlsak ding hi, bang hang hiam cih leh mi si luang hangin amah khial hi. Amah in tua ni mahin ama lutang ap pha ding a, a tuam om ding hun sung teng Topa adingin amah tuam omin, mawhna hanga biak nadingin kum khat a pha tuuno a pa khat paipih ding hi; ahih hangin ama tuam omna kininsak khin ahih manin hun pen a mawkna hi ding hi. “A tuam om hun a cin’ ciangin zuih ding Nazir ngeina in hih ahi hi: kikhopna buk kongah amah kipaipih ding a, amah in Topa tungah a letsong ahi meihal biak nadingin kum khat a pha sitbang lo tuuno a pa khat, khialhna hanga biak nadingin kum khat a pha a sitbang lo tuuno a nu khat, leh thunuam-a biak nadingin a sitbang lo tuutal khat, leh silngo sawhloh anlum lawh khat, sathau tawh a kibawl annel mohte, leh silngo sawhloh sathau tawh a kizut mohphengte, leh an tawh a biaknate leh leenggahzu tawh a biaknate uh paipih ding hi. Siampipa in Topa ’ mai-ah tuate paipihin a khialhna hanga biakna leh a meihal biakna pia ding a, a tuutal pen Topa tungah thunuam-a biakna-in silngo sawhloh anlum lawh tawh pia khawm ding hi; an tawh biakna leh leenggahzu tawh a biakna zong siampipa in pia ding hi. Tua Nazir mipa in kikhopna buk kongah a ki-ap a sam met ding a, a ki-ap ama lutang panin a samte la-in a thunuam-a biak piakna nuai-ah a om mei sungah hal ding hi. Siampipa in a kihuansa tuutal liang, leh lawh sung panin silngo sawhloh moh khat, leh silngo sawhloh mohpheng khat la-in, a ki-ap hun sunga a sam a met khit ciangin tua Nazir mipa’ khutah tuate koih ding a, Topa mai-ah veii-a biak nadingin siampipa in tuate veii ding hi; tuate in, a kiveii a sa-iik leh a kipia a phei tawh siampipa’ adingin a siangtho ama tanh ahi hi; tua khit ciangin tua Nazir mipa in leenggahzu dawn thei ding hi. “Hih in kiciamna a la Nazir mipa adingin ngeina ahi hi. Ama piak zawh zah a piak banah, Topa tungah ama piakna pen Nazir hihna tawh a kiciamna bang hi ding hi; a ma kiciamna mah bangin amah in Nazir hihna tawh tuam om nading ngeina zui-in a gamta ding hi,” a ci hi. Topa in Moses kiangah, “Aaron leh a tapate tungah hih bangin gen in: Note in hih bangin Israel mite thupha na pia ding uh hi. Amaute tungah hih bangin na ci ding uh hi, Topa in note thupha hong pia-in hong kem ta hen: Topa in note tungah ama maipha hong taangsak hen la, note hong hehpih ta hen: Topa in note tungah ama maipha hong pia hen la, note nopsakna hong pia ta hen, ci-in thupha pia uh hen. “Amaute in tua bangin Israel mite tungah keima min lo ding uh a, keimah in amaute thupha ka pia ding hi,” a ci hi. Moses in biakbuk ding sakin, tua biakbuk leh a nazatte khempeuh sathau nuhin ap a, biakna tau leh a nazatte khempeuh sathau nuhin a ap a man ni-in, Israel makaite, a beh ukpite, minam makaite ahi a kisim mite a ukte in, buk a nei leeng guk leh bawngtal sawm-le-nih Topa ’ mai-ah paipih uh hi; leeng khatah makai nih, mi khatah bawngtal khat ciatin seh-in a biakna uh pia uh hi; amaute in biakbuk mai-ah tuate pia uh hi. Tua ciangin Topa in Moses kiangah, ”Kikhopna buk nasepna ah zat dingin amah tung panin tuate sang in la, a nasep ciat uh tawh kizui-in Levi mite pia in,” a ci hi. Tua ahih ciangin Moses in leengte leh bawngtalte sangin Levi mite pia hi. Amau’ nasep tawh kizui-in Gershon mite tungah leeng nih leh bawngtal li pia hi; siampi Aaron’ tapa Ithamar’ ukna nuai-ah na a sem Merari mite tungah amau’ nasepna tawh kizui-in leeng li leh bawngtal giat pia hi. Ahih hangin Kohath mite tungah bangmah pia lo hi, bang hang hiam cih leh liangko ah puak ding a siangtho nate kep ding amaute tavuan kipia hi. Biakna tau sathau a kinuh ni-in a ap nadingin makaite in biakna pia uh hi; makaite in a biakna uh biakna tau mai-ah pia uh hi. Topa in Moses kiangah, “Biakna tau ap nadingin makai khat in ni khat tek a biakna uh pia ding uh hi,” a ci hi. A ni masa ni-a biakna a piapa in Judah minam, Amminadab’ tapa Nahshon ahi hi; ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak; shekel sawm a gik kham pakan khat paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Amminadab’ tapa Nahshon’ piak ahi hi. A ni nih ni-in Issakhar mite a makai, Zuar’ tapa Nethanel in biakna pia hi; a biak nadingin amah in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Zuar’ tapa Nethanel’ piak ahi hi. A ni thum ni-in Zebulun mite a makai, Helon’ tapa Eliab ahi hi: ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Helon’ tapa Eliab piak ahi hi. A ni li ni-in Reuben mite a makai, Shedeur’ tapa Elizur ahi hi: ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Shedeur’ tapa Elizur’ piak ahi hi. A ni nga ni-in Simeon mite a makai, Zurishaddai’ tapa Shelumiel ahi hi: ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biak nadingin bawngtal no khat, tuutal khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biak piakna dingin bawngtal nih, tuutal nga, keel a pa nga, leh kumkhat a pha tuuno a pa nga ahi hi. Hih in Zurishaddai’ tapa Shelumiel’ piak ahi hi. A ni guk ni-in Gad mite a makai, De-uel’ tapa Eliasaf ahi hi: ama piakte in biakinn shekel tawh kizui-in shekel za leh, sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biakna dingin keel a pa khat; leh thunuam-a biakpiak nadingin bawngtal nih, tuutal nga, keel a pa nga,leh kum khat a pha tuuno a pa nga ahi hi. Hih in De-uel’ tapa Eliasaf piak ahi hi. A ni sagih ni-in Efraim mite a makai, Ammihud’ tapa Elishama ahi hi: ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biak nadingin bawngtal no khat, tuutal khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Ammihud’ tapa Elishama’ piak ahi hi. A ni giat ni-in Manasseh mite a makai, Pedahzur’ tapa Gamaliel ahi hi; ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biakna dingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Pedahzur’ tapa Gamaliel’ piak ahi hi. A ni kua ni-in Benjamin mite a makai, Gideoni’ tapa Abidan ahi hi: ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Gideoni’ tapa Abidan’ piak ahi hi. A ni sawm ni-in Dan mite a makai, Ammishaddai’ tapa Ahiezer ahi hi; ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biakna dingin keel a pa khat; leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Ammishaddai’ tapa Ahiezer’ piak ahi hi. A ni sawm-le-khat ni-in Asher mite a makai, Okran’ tapa Pagiel ahi hi; ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh, meihal biak nadingin bawngtalno khat, tuutal pa khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biak piak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Okran’ tapa Pagiel piak ahi hi. A ni sawm-le-nih ni-in Naftali mite a makai, Enan’ tapa Ahira ahi hi: ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak; shekel sawm a gik kham pakan khat, paknamtui a dim tawh; meihal biak nadingin bawngtalno khat, tuutal khat, kum khat a pha tuuno a pa khat; khialhna hanga biak nadingin keel a pa khat; leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Enan’ tapa Ahira’ piak ahi hi. Hih in biakna tau sathau a kinuh ni-in Israel makaite apna biakna ahi hi: ngun kuangdai sawm-le-nih, ngun kuang sawm-le-nih, kham pakan sawm-le-nih, ngun kuangdai khat ciangin shekel za leh sawmthum gikin ngun kuang khat ciangin shekel sawmsagih gik a, ngun kuangte khempeuh in biakinn shekel tawh kizui-in shekel tulnih leh zali gik hi, paknamtui tawh a kidim kham pakan sawm-le-nihte in biakinn shekel tawh kizui-in khat ciangin shekel sawm gik a, kham khempeuh in shekel za leh sawmnih gik hi; meihal biak nadingin ganhing khempeuh in bawngtal sawm-le-nih, tuutal sawm-le-nih, kum khat a pha tuuno a pa sawm-le-nih, an-a a biaknate tawh; khialhna hanga biakna-in keel a pa sawm-le-nih, leh thunuam-a biak piakna-in ganhing khempeuh in bawngtal sawmnih leh li, tuutal sawmguk, keel a pa sawmguk kum khat a pha tuuno a pa sawmguk ahi hi. Hih in biakinn tau sathau a kinuh khit ciangin apna biakna ahi hi. Topa tawh kiho dingin kikhopna buk sungah Moses a pai ciangin, kherub nihte’ kikal, teci pan’na singkuang tungah a om hehpihna tokhom tung san teng panin amah a hopih awging khat a za hi; tua awging in amah hopih hi. Tu-in Topa in Moses kiangah, “Aaron tungah hih bangin gen in. Meivakte na koih ciangin, meivak sagihte in meivakkhuam mai teng a taan dingin koih-in, ci-in gen in,” a ci hi. Aaron in tua mah bangin hih hi; Topa in Moses a thupiak bangin, meivakkhuam mai teng a taan’ dingin meivakte a koih hi. Hih in meivakkhuam a kibawlna zia hi a, kham a kiseek ahi hi; a bul akipan a pakte dongin a kiseek ahi hi; Topa in Moses tungah a lahsa lim tawh kizui-in amah in meivakkhuam bawl hi. Topa in Moses kiangah, “Israel mite panin Levi mite la khia in la, amaute siangsak in. Amaute sian’sak nadingin hih bangin na hih ding hi: sian’suahna tui amaute tungah theh in la, a pumpi khempeuh mulkiatna tawh amau mah kiat sak in la, a puante uh sawpin amau mah na kisiang tawm sak ding hi. Tua ciangin bawngtalno khat leh sathau leh annel a kibawl an tawh biakna amaute na la sak ding a, nangmah in khialhna hanga biak nadingin bawngtalno adang khat na la ding hi. Kikhopna buk mai-ah Levi mite paipihin, Israel mihon buppi na khawm ding hi. Topa mai-ah Levi mite na paipih ciangin, Israel mite in Levi mite tungah a khut uh nga ding uh a, amaute in Topa ’ na a sep theih nadingun Aaron in Israel mite sung panin Levi mite Topa mai-ah veii-a biakna-in a pia ding hi. Tua ciangin Levi mite in bawngtalte lu tungah a khut uh nga ding uh hi; Levi mite’ ading kilemna bawlsakna dingin khialhna hanga biakna-in khat, meihal biakna-in a khat, Topa tungah na pia ding hi. Aaron leh a tapate’ mai-ah Levi mite na koih ding a, Topa tungah amaute veii-a biakna-in na pia ding hi. “Tua ciangin Israel mite lak panin Levi mite na khenkhia ding a Levi mite in keima’ aa hi ding hi. Amaute siangsakin veii-a biakna-in na piak khit ciangin kikhopna bukah nasem dingin Levi mite pai ding uh hi. Bang hang hiam cih leh Israel mite’ lak panin kei tungah amaute hong kipia khin hi; naubu a hong, Israel mite tacil khempeuh tangdingin keima adingin amaute ka la khin hi. Bang hang hiam cih leh Israel mite lakah tacil khempeuh, mihing hita leh ganhing hita leh keima’ aa ahi hi; Izipt gam sungah tacil khempeuh ka thah ni-in keima adingin amaute ka tuam koih a, Israel mite lak panin tacil khempeuh tangdingin Levi mite ka la khin hi. Kikhopna bukah Israel mite adingin na a sem ding leh, biakinn nai-ah Israel mite a paikhak ciangin Israel mite lakah gimna a tun’ loh nadingin Israel mite’ adingin kilemna a bawl dingin Israel mite’ lak panin Aaron leh a tapate tungah letsong-in Levi mite ka pia khin hi,” a ci hi. Tua bangin Moses leh Aaron leh Israel mi honpite khempeuh in Levi mite tungah hih uh hi; Topa in Levi mite tawh kisai-in Moses tungah a thupiak khempeuh tawh kizui-in Israel mite in amaute tungah hih uh hi. Levi mite in khialhna panin amaute kisiangthosak tawm uh a, a puante uh sawp uh hi; Aaron in veii-a biakna-in Topa ’ mai-ah amaute pia a, amaute sian’sak nadingin Aaron in amau’ ading kilemna bawlsak hi. Tua khit ciangin Aaron leh a tapate omna kikhopna buk sungah nasem dingin Levi mite pai uh hi; Topa in Levi mite tawh kisai-in Moses a thupiak bangin amaute in Levi mite tungah a hih uh hi. Topa in Moses kiangah, “Hih in Levi mite tawh a kisai thu ahi hi; kum sawmnih leh kumnga pan a tungsiah a phate in kikhopna buk nasepna sungah na a sem dingin pai ding uh hi; kum sawmnga a phak uh cianga kipan nasepna panin amau kihemkhia-in na sem nawn lo ding uh hi; ahih hangin kikhopna buk sungah a sanggamte huh ding uh a, amaute in a na taktak sem lo ding uh hi. Tua bangin Levi mite’ nasep ding na seh ding hi,” a ci hi. Amaute Izipt gam panin a paikhiat zawh uh a kumnihna a kha masa sungin Sinai gamlakah Topa in Moses kiangah, “A kiseh hunin Paisan pawi, Israel mite kham sak in. A kiseh hun, tu kha ni sawm leh nili ni nitakin na kham ding uh hi; a thukhamte leh a ngeina kipte bangin na kham ding uh hi,” a ci hi. Tua ahih ciangin amaute in Paisan pawi a kham nadingun Moses in Israel mite tungah a gen hi. Amaute in a kha masa, a ni sawm leh nili nitakin Sinai gamlakah Paisan pawi a kham uh hi; Topa in Moses a thupiak bangin Israel mite gamta uh hi. Misi luang a lawn’na uh hangin a nin mi pawlkhat om uh a, tua ni-in amaute in Paisan pawi kham thei lo uh hi; tua ni-in amaute Moses leh Aaron mai-ah pai uh hi; tua mite in ama kiangah, “Misi luang lawn’na hangin ka nin uh hi; bang hangin a kiseh hunin Israel mite lakah Topa biakna hong kipiasak lo ahi hiam?” a ci uh hi. Moses in amaute kiangah, “Note’ thu tawh kisai Topa ’ thupiak ka zak dong na ngak dih un,” a ci hi. Topa in Moses kiangah, “Israel mite tungah hih bangin gen in. Note lakah mi khatpeuh ahi a, na suan na khakte uh khatpeuh ahi zongin si luang lawn’na hangin a nin ahi a, khualzinin gamlapi-ah a om ahi zongin, Topa adingin Paisan pawi kham veve ding hi. A kha nihna a ni sawm leh nili ni nitakin amaute in kham ding uh hi; amaute in silngo sawhloh anlum leh a kha meh tawh ne ding uh hi. Amaute in a zingsang dong bangmah siit lo ding uh a, a guh khat zong su-tan lo ding uh hi; Paisan pawi thukhamte tawh kizui-in amaute in a kham ding uh hi. Ahih hangin a siang mi khat khualzin lo napi-in Paisan pawi a kham kei leh, amah in a kiseh hunin Topa biakna pia lo ahih manin a mite lak panin tua mipa kikhenkhia ding hi; tua mi in ama khialhna mah thuak ding hi. Note lakah khualmi khat hong peemin, Topa ading Paisan pawi a kham leh Paisan pawi thukhamte leh a ngeina kipte bangin hih ding hi; peemta leh tual sung mite’ adingin thukham khat na nei khawm ding uh hi,” a ci hi. Biakbuk a kidin’sak ni-in meii in teci pan’na puanbuk ahi, biakbuk tuam hi; nitak-a kipan a zingsang dong meikuang tawh kibangin biakbuk tung san-ah om hi. Tua bangin om den hi; sun-in meii in tuam a, zan-in mei tawh kibang khat in tuam hi. Puanbuk tung san panin meii a kilak toh khit ciangin Israel mite ding khia uh hi; meii a kiphuhna munah Israel mite in giahphual a sat uh hi. Topa in thu a piak ciangin Israel mite a ding khia uh a, Topa in thu a piak ciangin amaute in giahphual a sat uh hi; biakbuk tung sanah meii a khawl lai teng, amaute zong giahphual ah om uh hi. Biakbuk tungah ni tampi tak meii a om khin ta zongin Israel mite in Topa ’ thupiakna zui-in ding khia lo uh hi. Biakbuk tungah ni tawmno sung meii om thei zel hi; tua bang ciangin Topa ’ thupiak bangin giahphual ah amaute om uh hi; tua ciangin Topa ’ thupiakna mah tawh amaute a ding khia uh hi. Khat veivei nitak-a kipan zingsang dong tua meii om hi; zingsangin meii a kilak toh ciangin amaute a ding khia uh hi; tua hi kei leh, sun khat leh zan khat a om lai leh zong, meii a kilak toh hun hunin amaute ding khia uh hi. Ni nih ahi a, kha khat ahi a, a hun sau zaw ahi zongin biakbuk tung san-ah meii a khawl lai teng Israel mite giahphual ah om-in ding khia lo ding uh hi; ahih hangin a kilak toh ciangin amaute ding khia uh hi. Topa ’ thupiakna tawh amaute in giahphual sat uh a, Topa ’ thupiakna mah tawh amaute ding khia uh hi; Topa in Moses a thupiak bangin amaute in Topa ’ thu a mang uh hi. Topa in Moses kiangah, “Ngun peengkul nih bawl in; tuate na bawl ciangin na seek ding hi; mi honte khop nading leh giahphual nusiat nadingin na zang ding hi. A nih-in a kitum ciangin kikhopna buk kong nangma kiangah mihon khempeuh hong kikhawm ding uh hi. Ahih hangin amaute in khat bek a tum leh Israel minamte’ lutangte ahi makaite nangma kiangah hong kikhawm ding uh hi. Theihsakna na tum ciangin nisuahna lam panga giahphualate ding khia ding uh hi. Theihsakna a nih veina na tum ciangin leitaw lam panga giahphual a, omte ding khia ding hi. Amaute a din’ khiat ding peuhpeuh ciangun theihsakna kitum ding hi. Mihonte a kikaih khop ding ciangin na tum ding a, ahih hangin theihsakna na gingsak kei ding hi. Aaron’ tapa siampite in peengkulte tum ding uh hi. Peengkul zatna in na khang tawntungun note adingin a kip den ngeina khat hi ding hi. Na gam sung uhah no hong nengniam na galte uh tawh na kido ding uh ciangin, Topa na Pasian uh mai-ah note hong kiphawk nadingin peengkulte tawh pataukohna aw na gingsak ding uh a, na langte panun note hong kihon ding hi. Na lungdam hun uh, a kiseh na pawi hunte uh, leh kha kipat hunte-in, note in na meihal baiknate uh leh thunuam-a na biak piaknate uhah zong peengkulte na tum ding uh hi; tuate in na Pasian uh mai-ah phawkna-in kimang ding hi; keimah in Topa na Pasian uh ka hi hi,” a ci hi. A kum nihna, a kha nihna, tua kha ni sawmnih ni-in teci pan’na biakbuk tung san panin meii kilakhia to a, Sinai gamlak panin Israel mite phual khat pan phual khatah ding khia uh hi; Paran gamlakah meii khawl hi. Moses tung tawnin Topa ’ thupiakna tawh khualzin cilna kipan uh hi. Judah mite’ giahphual dialkhai a neite a pawl pawlin ding khia masa uh hi; tua mihonte Amminadab’ tapa Nahshon in uk hi. Issakhar minam honte Zuar’ tapa Nethanel in uk hi. Zebulun minam honte Helon’ tapa Eliab in uk hi. Biakbuk a kiphel khit ciangin, biakbuk a pua Gershon mite leh Merari mite ding khia uh hi. Reuben’ giahphual dialkhai a neite a pawl pawlin ding khia uh hi; tua mihonte Shedeur’ tapa Elizur in uk hi. Simeon minam honpite Zurishaddai’ tapa Shelumiel in uk hi. Gad minam honpite De-uel’ tapa Eliasaf in uk hi. Tua ciangin a siangtho nate pua-in Kohath mite ding khia uh a, amaute a tun’ ma-in biakbuk na kidingsak khin hi. Efraim mite’ giahphual dialkhai a neite a pawl pawlin ding khia uh hi; tua mihonte Ammihud’ tapa Elishama in uk hi. Manasseh minam honte Pedahzur’ tapa Gamaliel in uk hi. Benjamin minam honte Gideoni’ tapa Abidan in uk hi. Tua ciangin giahphualte khempeuh’ nung dalin Dan mite’ giahphual dialkhai a neite a pawl pawlin ding khia uh hi; tua mi honte Ammishaddai’ tapa Ahiezer in uk hi. Asher minam honte Okran’ tapa Pagiel in uk hi. Naftali minam honte Enan’ tapa Ahira in uk hi. Hih in Israel mite a din’ khiat uh ciangin amau’ mihonte tawh kizui-in a paina zia uh ahi hi. Moses in ama zi sanggampa ahi, Midian mi Re-u-el’ tapa Hobab kiangah, “ Topa in, ‘Note tungah kong pia ding hi,’ a cihna mun zuanin a ding khia ding ka hi uh hi; ko hong zui in, nang kong limbawl ding uh hi; bang hang hiam cih leh Topa in Israelte hong limbawl ding hong ciam hi,” a ci hi. Ahih hangin amah in, “Kong zui kei ding hi; ka leitang leh ka behte kiangah ka pai ding hi,” a ci hi. Amah in, “Kote hong nusia kei in, kong thuum hi, nangmah in gamlakah giahphual sat nading zia thei na hih manin, kote adingin lam hilh nong hi ding hi. Kote hong zui lecin, Topa in kote hong limbawl ding bangbangin nang zong kong limbawl ding uh hi,” a ci hi. Tua ahih ciangin Topa ’ mual panin ni thum lam a pai uh hi; a tawlngak nading mun uh a zon’sak dingin Topa ’ thuciamna singkuang in amau mai ni thum lam na pai khol hi. Giahphual panin a din’ khiat peuhmah uh ciangin sun-in amaute tungah Topa ’ meii a om hi. Singkuang a din’ khiat peuhmah ciangin Moses in, “ Topa aw, ding in la, na galte kithehthang sak in; nang hong mudahte na mai-ah tai sak in,” a ci hi. A khawl ciangin, “ Topa aw, Israel tul sawm tampite kiangah hong ciah kik in,” a ci hi. Mi honte in amau’ tuahsiatna thu hangin Topa ’ zakin phun uh hi; Topa in tua thu a zak ciangin ama hehna so a, amaute lakah Topa ’ mei kuangin, giahphual nawl kimkhat kangtum hi. Tua ciangin Moses’ zak dingin mite kiko uh hi; Moses in Topa tungah thu ngen a, mei a mit hi. Tua ahih manin tua mun pen Taberah kici hi, bang hang hiam cih leh amaute lakah Topa ’ mei kuang hi. Tu-in amaute’ lakah a om gamdang mite in anlim a lunggulh mahmah uh hi; Israel mite zong kap kik uh a, “Sa nek ding nei hi leeng maw! Izipt ah man pia loin i nek ngasate, tangmaite, dawnpawlte, lo-uih neute, lo-uih sante, leh lo-uih kangte i phawk hi; ahih hangin tu-in i tha bei ta a, hih manna sim loh bangmah om peuhmah lo hi,” ci uh hi. Manna pen nannan tang tawh kibang a, a meel in bedolak singnai tawh kibang hi. Mite pai kawikawi-in khawm uh a, an gawina tawh gawi-in, tua ahih kei leh sum sungah su-in, beel-in huan uh a, moh-in bawl uh hi; a limna pen sathau tawh a kibawl moh ki-em tawh kibang hi. Zan-in giahphual tungah daitui a kiat ciangin manna tawh kia khawm hi. Mite a innkuankuan-un, a milip-in a puanbuk kongah a kahna uh Moses in za hi; Topa ’ hehna sa mahmahin so a, Moses lungkim lo hi. Moses in Topa kiangah, “Bang hangin na nasempa hong hici bawlsiat na hi hiam? Bang hangin na maipha hong musak loin, hih mi khempeuhte’ vangik kei tungah hong suan na hi hiam? Keimah in hih mite khempeuh paii ka hi hiam? Nangmah in kei kiangah, ‘Naucingnu in nawi ne naungek a puak bangin, nangmah in amau’ pate piak dingin ka ciam leitangah amaute ang puakin paipih in,’ nong cih theih nadingin kei sunga piang ahi uh hiam? Hih mite khempeuh piak ding koi lai-ah sa ngah ding ka hi hiam? Bang hang hiam cih leh ka mai-ah amaute kap-in, ‘Ka nek ding uh sa hong pia in,’ hong ci uh hi. Kei guak in hih mite khempeuh ka si zo kei hi, kei adingin vangik lua hi. Hih bangin kei hong bawl ding na hih leh, ka gentheihna ka kimuh loh nadingin nong hehpih zawh leh, thakhatin hong that in,” a ci hi. Topa in Moses kiangah, “Mite’ upa leh ulian hi ci-a na theih, Israel upate’ sung panin mi sawmsagih hong khopsak in; kikhopna bukah amaute paipih in la, tua lai-ah nang tawh ding khawmsak in. Keimah hong pai sukin tua munah nang tawh i kiho ding hi; keimah in nang sunga om lungsim pawl khat la-in amaute sungah ka guang ding hi; nang guak in na puak loh nadingin amaute in mite’ vangik hong puakpih ding uh hi. Mite tungah, ‘Zing cianga dingin note ki-ap pha un, sa na ne ding uh hi; bang hang hiam cih leh Topa ’ zakin na kap uh a, “Sa nek ding kua in hong pia ding ahi hiam? Bang hang hiam cih leh Izipt gamah nuam i sa hi,” na ci uh hi. Tua ahih ciangin note tungah Topa in sa hong pia ding a, note in na ne ding uh hi. Note in ni khat sung, ahih kei leh ni nih sung, ahih kei leh ni nga sung, ahih kei leh ni sawm sung, ahih kei leh ni sawmnih sung bek ne loin, na ikkhiat dong uh leh na kih dong matengun kha khat tawntung na ne ding uh hi, bang hang hiam cih leh note lakah a om Topa nialin a mai-ah na kap uh a, “Bang hangin Izipt panin paikhia i hi hiam?” na ci uh hi,’ ci in,” a ci hi. Ahih hangin Moses in, “Kei tawh a kisim khawm mi tul zaguk om hi; nangmah in, ‘Kha khat tawntung a nek dingun amaute sa pia ning!” na ci hi. Amaute’ kham zah dingin tuu honte leh bawng honte amau’ adingin kigo ding ahi hiam? Tua ahih kei leh tuipi ngasate khempeuh amau’ kham zah ding kiman ding ahi hiam?” a ci hi. Topa in Moses kiangah, “ Topa ’ hih theih ding zah kiciangtan sa na hi hiam? Ka thugen a manin hong tun’ leh hong tun’ loh tu-in na mu ding hi,” a ci hi. Tua ahih ciangin Moses paikhia-in mite tungah Topa ’ thugente gen sawn hi; amah in mite a makai mi sawmsagih kaikhawmin, puanbuk kimkotah amaute om sak hi. Tua ciangin meii sungah Topa hong pai sukin amah hopih a, ama sunga om lungsim pawl khat la-in upa sawmsagihte sungah a guang hi; amaute sungah tua lungsim a om ciangin, amaute in thu a genkhol uh hi. Ahih hangin amaute in tua khit zawh hih nawn lo uh hi. Giahphual ah mi nih om uh a, khat Eldad kici-in, a khat Medad kici a, amaute sungah tua lungsim a lut hi; amaute in a kiciamtehte lakah a kihelte hi uh a, ahih hangin puanbukah pai loin, giahphual ah thu a genkhol uh hi. Tangval khat va tai-in Moses kiangah, “Eldad leh Medad-te in giahphual ah thu a genkhol uh hi,” va ci hi. Ama teel mite lakah khat ahi, Moses’ nasem, Nun’ tapa Joshua in, “Ka topa Moses aw, amaute kham in,” a ci hi. Ahih hangin Moses in ama kiangah, “Keima tangin hong hazatsak na hi uh hiam? Topa ’ mi khempeuh kamsang hi hen la, Topa in amau sungah ama lungsim guan leh ka cih lai tak hi!” a ci hi. Moses leh Israel upate giahphual ah a ciahkik uh hi. Topa kiang pan huih nungin, tuipi panin vamimte hong puak a, giahphual kiang hih lam pang ni khat paina ciang, hua lam pang ni khat paina ciang mah’ giahphual kimkotah kia sak hi, lei maitang tungah tong nih bang sah hi. Tua sun tawntung leh a zan tawntung leh a zing ciang tawntung mite ding-in vamimte khawm uh hi; tawm a khawm pen mipa in beem sawm dim khawm hi; amaute in amau adingin giahphual kimkotah tuate pho uh hi. Sa a kigaih ma, amau ha kawmah sa baang laipi mahin, mite tungah Topa ’ hehna so-in, Topa in gimna lianpi khat tawh mite vatgawp hi. Tua ahih ciangin tua mun pen Kibrothhattavah kici hi, bang hang hiam cih leh amaute in sa a lunggulh mite tua lai munah a vui uh hi. Kibrothhattavah panin Hazeroth munah mite zin uh hi; Hazeroth ah amaute taam uh hi. Moses in Kush numei khat ten’pih ahih manin, ama ten’pih Kush numei’ hangin Miriam leh Aaron in amah gensia uh hi; amaute in, “ Topa in Moses’ tung bek tawnin thu gen takpi ahi hiam? Eite’ tung tawnin zong hong gen lo ahi hiam?” a ci uh hi. Topa in tua thu za hi. Pasalpa Moses lungnem mahmah a, leitunga om mi khempeuh sangin lungnem zaw hi. Topa in thakhat thu-in Moses leh Aaron leh Miriam kiangah, “Kikhopna bukah no mihing thumte hong pai un,” a ci hi. Amau thumte pai uh hi. Meii khuam sungah Topa hong kum sukin, kikhopna buk kongah ding a, Aaron leh Miriam sam hi; amaute gel mai lam nehin hong pai uh hi. Amah in, “Ka thu za un: Note lakah kamsang a om leh Topa keimah in ama tungah mangmuhna tawh ka kilak a, amah tawh mang sungah ka kiho hi. Ka nasem Moses tawh tua bang hi lo hi; ka inn sung thu khempeuh amah ki-ap hi. Amah tawh kam leh kam kiho-in a kitel lo kampaute tawh hi loin, a kitel takin thu ka gen uh hi; amah in Topa ’ mel mu hi. Tua bang ahih ciangin bang hangin ka nasem Moses gensiat ding lau lo na hi uh hiam?” a ci hi. Topa ’ hehna amau tungah so a, amah paikhia hi; puanbuk tung san panin meiipi a kilakkhiat ciangin Miriam phak a, vuk bangin pak hi. Miriam lamah Aaron kihei a, tua numei na phak hi. Aaron in Moses kiangah, “Ka topa aw, kote hai gamtatin ka khialhna hangun daan hong pia kei in, a nu’ sung panin a suahkhiat ciangin a pum phel lang khat a bei mi si bangin Miriam hi sak kei in,” a ci hi. Tua ciangin Moses in Topa tungah, “Amah dam sak in, Pasian aw, kong thuum hi,” ci-in kiko hi. Ahih hangin Topa in Moses kiangah, “Tua numei’ maitangah a pa in cil phih leh tua numei ni sagih sung maizum ding hi lo ahi hiam? Giahphual pua lamah ni sagih sung kikhumcip sak in la, tua khit ciangin amah hong kipaipih kik thei ding hi,” a ci hi. Tua ahih ciangin giahphual pua lamah ni sagih sung Miriam kikhumcip hi; Miriam a kipaipih kik mateng khualzin a zom dingin mite ding khia lo uh hi. Tua khit ciangin Hazeroth panin mite ding khia uh a, Paran gamlakah giahphual a sat uh hi. Topa in Moses kiangah, “Israel mite tungah ka piak Kanaan leitang a vaan dingin mi sawl in; amaute lakah makai ahi, nam khat sung panin mi khat ciat sawl in,” a ci hi. Tua ahih ciangin Moses in Topa ’ thupiakna tawh kizui-in Paran gamlak panin Israel mite lutang ahi mi khempeuh a sawl hi. Hihte in amaute’ min ahi hi: Reuben minam panin Zakkur’ tapa Shamua; Simeon minam panin Hori’ tapa Shafat; Judah minam panin Jefunneh’ tapa Kaleb; Issakhar minam panin Josef’ tapa Igal; Efraim minam panin Nun’ tapa Hoshea; Benjamin minam panin Rafu’ tapa Palti; Zebulun minam panin Sedi’ tapa Gaddel; Josef minam (Manasseh minam) panin Susi’ tapa Gaddi; Dan minam panin Gemalli’ tapa Ammiel; Asher minam panin Mikhael’ tapa Sethur; Naftali minam panin Vofsi’ tapa Nahbi; Gad minam panin Makhi’ tapa Ge-uel ahi hi. Hihte in gam vaan dinga Moses in a sawl mite’ min ahi hi. Moses in Nun’ tapa Hoshea pen Joshua ci hi. Moses in Kanaan gam vaan dingin amaute sawl a, amaute kiangah, “Negeb gam gal khatah pai to-in, mual tung gamah paito un la, leitang bang ci hiam, tua leitangah a teeng mite thahat hiam, thanem hiam, amaute tawm hiam, tam hiam, amau’ ten’na gam in nuntak olna gam hiam haksatna gam hiam, amaute’ ten’na khuapite in giahphual hiam, mun muanhuai hiam, a leitang a lei hoih hiam lei sia hiam, sing om hiam om lo hiam va thei un. Na siam tawp-un va hih un la, tua leitanga gah pawl khat hong ciahpih un,” a ci hi. Tua hun in leenggah a palte a min hun ahi hi. Tua ahih ciangin amaute pai to-in Zin gamlak panin Hamath khua lutna gei, Rehob mun dong gam vaan uh hi. Amaute Negeb lamah paito uh a, Hebron tung uh hi; Anak’ suan leh khakte ahi Ahiman mite, Sheshai mite leh Talmai mite, tua lai-ah na om uh hi. (Hebron pen Izipt gamah Zoan a kisat ma kum sagih lai-in kisat hi). Amaute Eshkol Kuam tung uh a, tua lai panin leenggah bawk khat bek a hiang tawh lo-in, mi nih in zawl khat-in zawng uh hi; amaute in mang kawlsing leh thei zong tawm khat pua uh hi. Tua lai panin Israel mite in leenggah bawk a lawhna hangin tua mun pen Eshkol Kuam kici hi. Ni sawmli a cin’ ciangin gam vaanna panin amaute hong ciahkik uh hi. Paran gamlak Kadesh muna Moses leh Aaron leh Israel mi honte khempeuh kiangah amaute hong tung uh hi; amaute leh mihon khempeuh tungah thu puak kik uh a, tua leitanga gahte amaute lak uh hi. Amaute in ama kiangah, “Kote nong sawlna leitangah ka va tung uh hi; tua lai-ah bawngnawi leh khuaizu luang a, hih in tua gama gah ahi hi. Ahi zongin tua gama teeng mite thahat uh a, a khuapite uh kulh tawh ki-uumin lian mahmah hi; tua banah Anak’ suan leh khakte tua lai-ah ka mu uh hi; Amalek mite Negeb gamah teeng uh hi; Hih mite, Jebus mite, leh Amor mite mual tung gamah teeng uh hi; Kanaan mite tuipi gei leh Jordan dungah teeng uh hi,” ci-in gen uh hi. Ahih hangin Kaleb in Moses mai-ah mite gamdai sakin, “Thakhatin pai to-in va luah ni; bang hang hiam cih leh eite pen a zo thei mahmah ding i hi hi,” a ci hi. Tua ciangin amah tawh a paito mite in, “Mite do dingin i pai ngam kei ding hi; bang hang hiam cih leh eite sangin amaute hatzaw uh hi,” a ci uh hi. Tua ahih ciangin amaute in amau’ vaansa gam thu Israel mite tungah a sia lamin hong puak uh a, “Kote in a vaan dingin ka va paina uh gam in a tunga teeng mite a valhtum thei ding gam ahi hi; tua lai-a ka muh uh mite khempeuh mi tha liante ahi hi. Tua lai-ah Nefilim mite (Nefilim pana hong piang Anak mite) ka mu uh hi; kote pen kauphe bang lelin ka kingaihsun uh a, amau’ muhna ah zong tua bangmah ka hi uh hi,” a ci uh hi. Tua ciangin mihon khempeuhte nakpi takin kiko uh hi; mite tua zan sung kap uh hi. Israel mite khempeuh in Moses leh Aaron phunsan uh hi; mihon buppi in amaute tungah, “Izipt gamah a si khin hi zaw hoh le-ung! Tua ahih kei leh zong hih gamlakah a si khin hi zaw hoh le-ung! Namsau tawh a si dingin bang hangin Topa in hih gamah kote hong paipih ahi hiam? Ka zite leh ka tate uh galte’ mat suak ding uh hi; Izipt ah ciahkik ding ko adingin hoihzaw ding hilo ahi hiam?” a ci hi. Amaute khat leh khat kiangah, “Makai khat teelin Izipt ah ciahkik ni,” kici uh hi. Tua ciangin Israel mihon kikhawmte khempeuh’ mai-ah Moses leh Aaron boksuk uh hi. Gam vaante lakah a kihel Nun’ tapa Joshua leh Jefunneh’ tapa Kaleb-te in a puan uh balkeekin, Israel mi honpite khempeuh tungah, “A vaan dingin kote ka va painasa uh leitang in leitang hoih mahmah ahi hi. Eite tungah Topa a lungkim leh, bawngnawi leh khuaizu a luan’na hih leitangah eite hong paipihin eite tungah tua leitang hong pia ding hi. Topa lehdo kei hamtang un; amaute pen zialmang pak ding i hih manin tua gam mite kihta kei un; amau’ kiang panin amau’ kidalna kilakhia a, eite tawh Topa hong om hi; amaute kihta kei un,” ci uh hi. Ahih hangin mi honte khempeuh in amaute suang tawh deng un, ci uh hi. Tua ciangin Israel mite khempeuh tung kikhopna buk-ah Topa ’ minthan’na kilang hi. Topa in Moses kiangah, “Hih mite in bang tanvei kei hong simmawh ding ahi hiam? Amaute lakah ka hihsa limte khempeuh om napi-in, amaute in bang tanvei kei hong um lo ding ahi hiam? Pul natna tawh amaute vat gawpin ka lawnkhia kik ding a, amaute sangin a lianzaw a thahat zaw minamin nang kong bawl ding hi,” a ci hi. Ahih hangin Moses in Topa kiangah, “Tua bang hi leh Izipt mite in hih thu za ding uh hi; bang hang hiam cih leh amaute’ lak panin na thahatna tawh hih mite na paikhiatpih hi. Amaute in hih gama teeng mite tungah gen ding uh hi. Topa aw, hih mite laizangah nang na omna thu hih mite in za khin zo uh hi; bang hang hiam cih leh Topa aw, maitang kituahin nang hong kimu a, amaute tungah nangma meii a ding hi. Nangmah in amaute mai-ah sun-in meii khuam sungah, zan-in mei khuam sungah na pai hi. Tu-in hih mite mihing khat thah bangin that lecin, nangma minthan’na a zasa minamte in, ‘Amaute tungah piak dinga a kiciam leitangah Topa in hih mite paipih zo lo ahih manin, amah in gamlakah amaute that hi,’ ci ding uh hi. - Tu-in, nang tungah hong thuum ing, nangmah in thuciamin, ‘ Topa heh hak a, a itna kip lianin, mawhna leh thu palsatna maisak a, ahih hangin a mawhte siangsak ngei loin, pate’ mawhna tate tungah, khang thum khang lina dongin thuk hi,’ na cih mah bangin Topa ’ vangliatna liansak in. A lian nangma itna kip tawh a kizui leh Izipt panin tu hun dong hih mite na maisakna tawh kizui-in hih mite’ mawhna maisak in, kong thuum hi,” a ci hi. Tua ciangin Topa in, “Nangma gen bangin ka maisak hi; ahih hangin a tak takin, ka nun’tak lai teng, Topa ’ minthan’na tawh leitung kidim ding ahih mah bangin, Izipt leh gamlakah ka hihsa ka minthan’na leh ka limte mu khin napi-in sawm vei kei hong ze-etin keima aw a ngai lo mite, amau’ pate tungah piak dinga ka kiciam leitang a mu kuamah om lo ding uh hi; kei hong simmawh mi kuamah in tua leitang mu lo ding hi. Ahih hangin ka nasem Kaleb ahih leh, amah in lungsim tuam nei-in lim takin kei hong zui ahih manin, amah in a zuat leitangah ka tun’ pih ding a, ama suan leh khakte in tua leitang luah ding uh hi. Tu-in tua kuam sungah Amalek mite leh Kanaan mite teeng uh ahih manin, San Tuipi paina lampi tawnin zing ciangin gamlakah pai un,” a ci hi. Topa in Moses leh Aaron kiangah, “Hih a gilo mihonte in bang tanvei kei hong phunsan ding ahi uh hiam? Amaute in kei hong phunsanna uh ahi Israel mite’ phunna ka za khin hi. Amaute tungah hih bangin gen in. Topa in, ‘Keimah in a nungta ka hih mah bangin zakna ah na gente uh no tungah ka hong hih ding hi: na luang hawmte uh hih gamlakah lum ding hi; note khempeuh, kum sawmnih pan a tungsiah, kei hong phunsante, Jefunneh’ tapa Kaleb leh Nun’ tapa Joshua sim loh, note teengsak dingin ka kiciamna leitangah khat beek na tung kei ding uh hi. Ahih hangin galte in man ding na cih uh na tate uh, keimah in ka tumpih ding a, note in na thusim loh uh leitang amaute in mu ding uh hi. Ahih hangin note ahih leh, na luang hawmte uh hih gamlakah lum ding hi. Na luang hawmte uh a nunung pen gamlakah a kisial mateng, gamlakah kum sawmli sung na tate uh tuucing hi ding uh a, note’ ginat lohna thuak ding uh hi. Na gam vaan sung uh ni phazah tawh kizui-in, ni sawmli, ni khat ciangin kum khat, note in na mawhna uh kum sawmli sung na thuak ding uh a, keima lungkim lohna na thei ding uh hi,’ a ci hi. Topa ahi keimah in thu ka gen hi; keimah langpangin a kikaikhawm hih a gilo mi honte khempeuh tungah hih thu ka hih taktak ding hi: hih gamlakah amaute bei mang ding uh a, amaute si ding uh hi,” a ci hi. Moses in gam vaan dingin a sawl mite hong ciahkikin a gam thu a sia lamin gen ahih manin mi honte amah a phunsan sak, a gam thu a sia lam a, a gen tua mite, Topa ’ mai-ah gimna in si sak hi. Ahih hangin gam vaan dingin a pai mite lak panin Nun’ tapa Joshua leh Jefunneh’ tapa Kaleb-te hing lai uh hi. Moses in Israel mite khempeuh tungah hih thute gen a, nakpi-in mite thuum uh hi. Amaute zingsangin tho baih uh a, gamlak mual dawnah pai to-in, “Thei un, hih lai-ah i om hi. Topa ’ ciamnasa munah i paito ding hi; bang hang hiam cih leh i khial khin hi,” ci uh hi. Ahih hangin Moses in, “Bang hangin tu-in Topa ’ thupiakna palsat na hi uh hiam, tangtung lo ding hilo ahi hiam? Na galte uh mai-ah note hong kisat puk kha ding ahih ciangin kuanto kei un, bang hang hiam cih leh note lakah Topa om lo hi. Amalek mite leh Kanaan mite na mai uhah om ahih ciangin namsau tawh note na puk ding uh hi; Topa zuihna panin nungkik na hih uh ciangin note tawh Topa om lo ding hi,” a ci hi. Ahih hangin Topa ’ thuciamna singkuang hita leh Moses hita leh giahphual panin dingkhia lo napi-in gamlak mual dawnah kuantoh ding amaute in ngaihsun veve uh hi. Tua ciangin mual tung gamah a teeng Amalek mite leh Kanaan mite hong paisuk uh a, amaute zoin Hormah ciang dong na ngawn ah amaute delh uh hi. Topa in Moses kiangah, “Israel mite tungah hih bangin gen in. Note kong piak leitangah a teeng dingin note tungin, bawnghon pan hita leh tuuhon pan hita leh thuciamna tun’sak nadingin Topa ’ tungah meihal biakna ahi a, biak piakna ahi zongin na piak ciang uh hita leh, Topa tungah a gim namtui bawl nadingin ut thu-a biakna hita leh, a kiseh pawi hunte-ah hita leh na piak uh ciangin, biakna a paipih mipa in annel seu khat sehsawm suah sehkhat sathau bung khat sehli suah sehkhat tawh a kibawl an tawh biakna Topa tungah pia ding hi; tuuno khat tawh piak khawm dingin meihal biakna ahih kei leh biak piakna tawh, tui-buah dingin leenggahzu bung khat sehli suah sehkhat na bawl ding hi. Tua ahih kei leh tuutal khat tawh piak khawm dingin annel seu khat sehsawm suah sehnih sathau bung khat sehthum suah sehkhat tawh a kibawl an tawh biak nading na bawl ding hi; Topa ’ tungah a gim namtui-in tuibuah dingin leenggahzu bung khat sehsawm suah sehkhat na pia ding hi. Meihal biak nading ahi a, thuciamna tun’sakna-in biakpiak nading ahi a, Topa ’ tungah thunuam-a biak nading ahi zongin bawngtal na bawl uh ciangin, mi khat in a bawngtal tawh annel seu khat sehsawm suah sehthum sathau bung lang tawh a kibawl an tawh biakna pia ding a, Topa ’ tungah a gim namtui, mei tawh kihal biakna-in tuibuah dingin leenggahzu bung lang na pia ding hi. “Bawngtal ahi a tuutal ahi zongin, tuuno a pa ahi a keelno a pa tawh ahi zongin piak khawm dingin tua bangin kihih ding hi. Na bawl ganhing khempeuh a pha zahzah tua bangin na bawl kim ding hi. Topa tungah a gim namtui, mei tawh kihal biakna a piakna uhah tual sung mi khempeuh in hih nate tu-a bangin hih ding uh hi. Note kiangah khualmi khat hong peem ahi a, na khang tawntungun note lakah mi khatpeuh hong om leh ahi zongin, amah in Topa ’ tungah a gim namtui, mei tawh kihal biakna a piak nop leh, note’ hih mah bangin hih ding hi. Mi honpi’ adingin ngeina khat om ding hi; note leh note lakah hong peem mi’ adingin tawntung ngeina khat na khang tawntungun om ding hi. Topa ’ mai-ah note leh peemta mite na kibang ding uh hi. Note leh note lakah hong peem mi’ adingin a kibang thu khat, ngeina kip khat om ding hi,” a ci hi. Topa in Moses kiangah, “Israel mite tungah hih bangin gen in. Note kong paipihna gamah tungin tua gama piang ante na nek uh ciangin Topa tungah biakna na pia ding uh hi. Na an-ham uh a masa pen sung panin biakna in moh khat na pia ding uh hi; an cilna pana biakna-in na pia ding uh hi. Na khang tawntungun na an-ham uh a masa pen Topa ’ tungah biakna ah na pia ding uh hi. “Ahih hangin note khialin, Topa in Moses tungah a gensa hih thupiaknate khempeuh, Topa in a thupiak-a kipanin na khang tawntungun, Moses tung tawnin Topa in note hong thupiaknate khempeuh na zuih kei uh leh, theih lohna hangin mi honte’ phawk lohin a kikhial ahih leh, mi honte khempeuh in Topa tungah a gim namtui, meihal biakna dingin bawngtal no khat, ngeina kip om bangin an tawh biakna leh a tuibuah tawh, leh khialhna hanga biakna-in keel a pa khat pia ding hi. Siampipa in Israel mihonte khempeuh adingin kilemna bawlsak ding a, amaute kimaisak ding hi; bang hang hiam cih leh tua in tatkhialhna hi a, amaute in tua amau’ tatkhialhna hangin Topa ’ tungah mei tawh kihal amau’ biakna leh khialhna hanga amau’ biakna uh Topa ’ mai-ah hong paipih khin uh hi. Tua tatkhialhna in amaute khempeuh huamkha ahih manin Israel mihonte khempeuh leh amau lakah a peem khualmi zong kimaisak ding hi. “Theih lohna hangin mi khat a khialh leh, khialna hanga biak nadingin kum khat a pha keel a nu khat pia ding hi. Mi khat in theih lohna hangin a khialh ciangin, ama ading kilemna bawlsak nadingin siampipa in tua a khial mipa’ adingin Topa ’ mai-ah kilemna bawl sak ding hi; amah kimaisak ding hi. Theih lohna hangin na khatpeuh peuh a hih, Israel mi lakah a om tual sung mipa leh amaute lakah a peem khual mipa’ adingin ngeina a kibang khat na nei ding uh hi. Ahih hangin tual sung mi hita leh peemta hita leh, na khatpeuh peuh a hih teitei mipa in Topa a simmawh hi a, ama mite kiang panin tua mipa kikhenkhia ding hi. Amah in Topa ’ thu simmawhin, a thupiakna siasak ahih manin, tua mipa kikhenkhia siang ding hi; ama mawhna ama tung mahmah om ding hi,” a ci hi. Israel mite gamlakah a om sungun, sabbath ni-in sing a tom mi khat mu uh hi. Sing a tom laitak a mu mite in Aaron leh Moses, leh mihonte khempeuh kiangah amah paipih uh hi. Amah bang kicih ding cih tel takin kigen lo ahih manin amaute in khumcip uh hi. Topa in Moses kiangah, “Tua mipa kithat ding hi; mihonte khempeuh in giahphual pua-ah suang tawh amah deng ding uh hi,” a ci hi. Mi honte khempeuh in giahphual pua-ah amah paipih uh a, Topa in Moses a thupiak bangin suang tawh amah deng lum uh hi. Topa in Moses kiangah, “Israel mite tungah gen in la, a khang tawntungun a puan mongte uhah a teep bawlin, a puan mong-a a teep tungah khau dum khat a khih dingun sawl in; tua in, note in ut luatna tawh na zuih theih zel uh ahi nomau’ lungsim leh nomau’ mittang deihna zui loin, note in na et ding uh puanmongteep leh Topa ’ thupiakte khempeuh phawkin na sep ding uh ahi hi. Tua ahih ciangin note in ka thupiakte khempeuhte phawkin na sem ding uh a, na Pasian uh tungah na siangtho ding uh hi. Keimah in, note’ Pasian a hi dingin Izipt gam panin note a hong paikhiatpih Topa na Pasian uh ka hi hi: keimah in Topa na Pasian uh ka hi hi,” a ci hi. Tu-in Levi mite sung pan Levi’ tapa Kohath, Kohath’ tapa Izhar, Izhar’ tapa Korah leh Reuben mite sung Reuben’ tapa Eliab, Eliab’ tapa Dathan leh Abiram leh Peleth’ tapa On, hih mite in pawl kai uh hi; Israel mite sung panin mi’ theihkim, mihon sung panin a kiteel, mihonte a makai mi zanih leh sawmnga tawh Moses’ mai-ah ding uh hi; Moses leh Aaron langpangin amaute kikaikhawm uh a, amaute kiangah, “Khengval lua uh teh! Mihon khempeuhte a milip-in siangtho uh a, amaute lakah Topa om hi; bang hangin Topa ’ mi honpite’ tungah nomau kiliansak tawm na hi uh hiam?” ci uh hi. Moses in tua thu a zak ciangin boksuk hi; amah in Korah leh a pawlte khempeuh kiangah, “Zing ciangin Topa in a siangtho ahi mi, ama’ aa ahi mi hong lakin, ama kiangah pai sak ding hi; amah in a teel ding mipa ama kiangah pai sak ding hi. Hih bangin gamta un: Korah leh a pawlte khempeuh in paknamtui beel la un; zing ciangin Topa ’ mai-ah tua beelte’ sungah mei koihin, mei tungah paknamtui koih un; tua ciangin Topa ’ teel mi in a siangtho hong hi ding hi. Levi’ tapate aw, khengval lua uh teh!” a ci hi. Moses in Korah kiangah, “No Levi mite aw, tu-in za un; Israel mite’ Pasian in ama kiangah hong paipih ding, Topa ’ biakbuk sungah nasep sem ding, mi honte’ na sem dingin amau’ mai-ah a ding dingin Israel mi honte kiang panin hong khenkhiatna leh nang leh na sanggamte ahi Levi’ mite ama kiangah hong paipihna, hawmthawh lai na hi hiam? Siampi nasepna zong deih lai na hi hiam? Tua ahih ciangin nang leh na pawlte khempeuh hih lai-ah na kikaihkhopna uh in Topa langpan’na ahi hi; note in na phunsan uh Aaron pen bang mi hi mawk ahi hiam?” a ci hi. Moses in Eliab’ tapa Dathan leh Abiramte sam sak hi; amaute in, “Kong pai kei ding uh hi. Kote tungah nangmah ulian-in kibawl tawmin, gamlakah kote hong that dingin bawngnawi leh khuaizu a luan’na gam panin nong paikhiatpihna thu hawmthawh lai na hi hiam? Tua tham loin nangmah in bawngnawi leh khuaizu a luan’na gamah kote hong paipih loin, lote leh leenggui lote zong nong luah sak kei hi. Hih mite’ mit khel khia ding na hi hiam? Kong pai kei ding uh hi,” a ci hi. Moses heh mahmah a, Topa kiangah, “Amau’ biakna thupi ngaihsut kei in. Amaute tung panin la khat zong la loin, amaute khat zong ka siasak kei hi,” a ci hi. Tua ciangin Moses in Korah’ kiangah, “Nang leh na pawlte, nang leh amaute, Aaron tawh zing ciangin Topa ’ mai-ah hong om un; note in na milip-un na paknamtui beel ciat uh la-in, a sungah paknamtui koih un la, Topa ’ mai-ah na paknamtui beel ciat uh, paknamtui beel zanih leh sawmnga paipih un; Aaron leh nangmah in zong na paknamtui beel tuak uh paipih un,” a ci hi. Tua ahih ciangin a milip-un a paknamtui beel ciat uh la a, tuate sungah mei koihin a tungah paknamtui koih uh a, kikhopna buk kongah Moses leh Aaron tawh ding uh hi. Tua ciangin Korah in amaute’ lang khat, kikhopna buk kongah mihonte khempeuh khawm hi. Topa ’ minthan’na mihon khempeuhte tungah kilang hi. Tua ciangin Topa in Moses leh Aaron kiangah, “Amaute tomno sungin ka beisak theih nadingin hih mihonte lak panin kihem un,” a ci hi. Amaute boksuk uh a, “Pasian, mi khempeuhte tungah nuntakna a pia Pasian aw, mi khat khial ding a, mihon khempeuhte tungah nang heh ding na hi hiam?” a ci uh hi. Topa in Moses kiangah, ”Mihonte tungah hih bangin gen in, Korah, Dathan leh Abiramte’ omna kiim panin paikhia un, ci in,” a ci hi. Tua ciangin Moses ding-in Dathan leh Abiram kiangah pai hi; Israel upate in amah zui hi. Amah in mihonte kiangah, “Amaute’ khialhna khempeuh tawh note hong kiphiat khia kha ding ahih manin, hih migilote’ puanbuk panin paikhia un la, amau’ na khat beek lawng kha kei un, hong thuum ing,” a ci hi. Tua ahih ciangin Korah, Dathan leh Abiramte’ omna kiim panin, amau paikhia uh hi; Dathan leh Abiramte a zite uh leh a tapate uh leh a taneute uh tawh hong pusuakin a puanbuk kong uhah ding khawm uh hi. Tua ciangin Moses in, “Hih na khempeuh a sem dingin Topa in kei hong sawlin, tua pen keima ut thu a hih lohna, hih thu tawh na thei ding uh hi. Mi khempeuh a sih ngei bang danin hih mite si a, tua ahih kei leh mi khempeuh in a tuah ngeite a tuah leh, Topa in kei hong sawl loh ahi hi. Ahih hangin Topa in a thak khat hong piangsakin, leitang a kam ka-in amaute’ neih khempeuh tawh hih mite valh tumin, a hing tangun Leinuai-ah a tumsuk uh leh, hih mite Topa a simmawhna thu na thei ding uh hi,” a ci hi. Hih thute a gen khiat phetin amau’ nuai-ah lei kiphel kham hi; leitang in a kam ka-in, Korah tawh a kipawl mi khempeuh leh a innkuanpihte uh leh a neihsa khempeuh uh valh tum hi. Tua ahih ciangin amaute leh a neihsa khempeuh uh a hing tangun Leinuai-ah tumsuk uh hi; leitang in amaute khup nelh a, mi honpite laizang panin amaute bei uh hi. Amaute’ kikona hangin a kiim uh a, a om Israel khempeuh tai uh hi; bang hang hiam cih leh amaute in, “Leitang in hong valh tum kha in teh!” ci uh hi. Topa kiang panin mei hong paikhia a, paknamtui a pia mi zanih leh sawmngate kangtum hi. Tua ciangin Topa in Moses kiangah, “Siampi Aaron’ tapa Eleazar in meikuang sung panin paknamtui beelte a lak khiat ding gen in; tua ciangin a gamlapi-in mei thehthang in. Bang hang hiam cih leh tua nate, amau’ nuntakna a beina dongin a khial hih mite’ paknamtui beelte siangtho hi; tua ahih ciangin biakna tau sitna kuangdai dingin seek un; bang hang hiam cih leh amaute in Topa mai-ah tuate pia uh hi; tua ahih ciangin tua nate siangtho hi. Israel mite tungah tua bangin hih nate in lim khat hi ding hi,” a ci hi. Tua ahih ciangin siampi Eleazar in mei tawh a kang tum mite’ piak paknamtui sumngo beelte la-in biakna tau sitna-in seek hi— Topa in Moses tung tawnin Eleazar tungah a gen bangin Korah leh a pawlte tawh a kibang kha lo dingin, siampi ahi lo, Aaron, suan leh khakte ahi lo mi peuhmah in Topa ’ mai-ah paknamtui hal dingin a pai loh nading, Israel mite tungah phawksakna khat ahi hi. Ahih hangin a zing ciangin Israel mi hon khempeuh in Moses leh Aaron phunsan uh a, “ Topa mite na that uh hi,” a ci uh hi. Moses leh Aaron langpangin mihonte a kikhop uh ciangin, kikhopna buk lamah amaute kihei uh hi, en in: meii in tuam a, Topa minthan’na kilang hi. Kikhopna buk mai lamah Moses leh Aaron pai a, Topa in Moses kiangah, “Tomno sungin amaute ka siatsak theih nadingin hih mihonte laizang panin paikhia un,” a ci hi. Amaute boksuk uh hi. Moses in Aaron kiangah, “Na paknamtui beel la-in, biakna tau pan-a mei a sungah koih in la, a tungah paknamtui koihin, mihonte lakah paipih mengmeng in la, amaute’ adingin kilemna bawlsak in; bang hang hiam cih leh Topa kiang panin hehna hong paikhia khin a, gimna kipan khin hi,” a ci hi. Tua ahih ciangin Moses’ gen bangin Aaron in la-in mihonte lakah tai hi, en in: mite lakah gimna kipan khin hi; amah in paknamtui koihin mite’ adingin kilemna bawlsak hi. A si leh a hing-te kikalah amah ding a, gimna veng hi. Tu-in Korah’ tungtangah a site sim loh, hih gimna tawh a si mi tulsawm leh tulli leh za sagih ahi hi. Gimna a ven’ ciangin kikhopna buk kong Moses kiangah Aaron ciahkik hi. Topa in Moses kiangah, “Israel mite tungah thu gen in la, amaute tung panin, beh khat ciangin ciangkhut khat, a beh tawh kizui-in a makaite khempeuh tung panin ciangkhut sawm-le-nih la in. A ciangkhut tungah amau min ciat gelh in la, Levi ciangkhut tungah Aaron’ min gelh in. Bang hang hiam cih leh beh lutang khatah ciangkhut khat hi ding hi. Tua ciangin kikhopna buk sung teci pan’na mai, nang tawh i kituahna munah tuate na koih ding hi. Keimah in ka teel mipa, ciangkhut hong sel ding hi; amaute in nang hong phunsanna, Israel mite’ phunna tua bangin kei kiang panin ka beisak ding hi,” a ci hi. Moses in Israel mite tungah gen hi; a makaite khempeuh in a beh tawh kizui-in makai khat ciangin khat pai, ciangkhut sawm leh nih ama tungah pia uh hi; Aaron’ ciangkhut pen amaute’ ciangkhut lakah om hi. Moses in teci pan’na puanbuk sung Topa ’ mai-ah ciangkhutte koih hi. A zing ciangin teci pan’na puanbuk sungah Moses pai hi, en in: Levi-te beh ading Aaron’ ciangkhut selin nguum khia a, paakin, almond min gah a gah hi. Tua ciangin Moses in Topa ’ mai panin Israel mite khempeuh kiangah ciangkhut khempeuh pai khiatpih hi; amaute in en uh a, a ciangkhut ciat uh la uh hi. Topa in Moses kiangah, “Amaute si kha ding ahih manin, amaute in kei hong phunsanna na bei sak theih nadingin a lehdo mite adingin lim ahi dingin teci pan’na mai-ah Aaron’ ciangkhut koih kik in,” a ci hi. Tua mah bangin Moses in hih hi; Topa in amah a sawl bangin, amah in zong hih hi. Israel mite in Moses kiangah, “En in, kote a si ka hi ta uh a, a mawkna ka hi ta uh hi; kote khempeuh a mawkna ka hi ta uh hi. A nai-ah a pai, Topa ’ biakbuk nai-ah a pai peuhmah si ding hi. Kote khempeuh ka bei nading uh hi ta ahi hiam?” a ci uh hi. Tua ahih ciangin Topa in Aaron kiangah, “Nang leh na tapate leh na behte biakinn tawh kisai-in mawhna nang tawh pua khawm ding uh hi; nang leh na tapate in na siampi nasepna tawh kisai-in mawhna nang tawh na pua khawm ding uh hi. Amaute in nang hong pawlin, teci pan’na puanbuk mai-ah nang leh na tapate na om lai takun note’ na hong sep theih nadingin na pate’ nam ahi Levi minam na sanggamte zong paipih in. Amaute in note hong huhin puanbuk nasep khempeuh sem ding uh hi; ahih hangin note leh amaute si kha ding na hih ciangun biakinn nazatte leh biakna tau kiangah pai lo ding uh hi. Amaute in note hong pawlin, kikhopna buk vaan-in puanbuk nasep khempeuh sem ding uh hi; note kiangah mi dang kuamah hong pai lo ding hi. Israel mite tungah hehna a a om nawn loh nadingin biakinn nasep leh biakna tau nasep note in na sem ding uh hi. En un, Israel mite kiang panin na sanggam uh Levi mite ka la khin hi; amaute pen kikhopna buk nasep a sem dingin Topa tungah a kipia, note tungah letsong ahi hi. Nang leh na tapate in biakna tau tawh kisai nate leh dalna puan sunga om nate khempeuhah na siampi nasep uh na sem ding uh hi; na siampi nasep uh letsongin kong piak hi a, a nai-ah hong pai midang peuhmah kithat ding hi,” a ci hi. Tua ciangin Topa in Aaron kiangah, “En in, kei tungah hong kipia biakna a kikoih khempeuh, Israel mite in a ap nate khempeuh nang kong pia hi; nangma tanh ding leh na suan na khakte’ kaih ahi tawntung dingin note tungah kong pia hi. Hih in mei tawh hal dingte lak panin a kisiit, a siangtho pen nangma nate ahi hi; amaute in kei tungah hong piak amau’ biaknate khempeuh, an tawh amau’ biaknate khempeuh leh khialhna hanga amau’ biaknate khempeuh leh mawhna hanga amau’ biaknate khempeuh pen nang leh na suan na khakte adingin a siangtho pen hi ding hi. A siangtho pen mun khatah na ne ding uh hi; pasal peuhmah in ne thei ding hi; note’ adingin a siangtho ahi hi. Amau’ letsong biakna, Israel mite in veii-a biaknate khempeuh uh zong nomau aa ahi hi; nang leh na tapate leh na tanute kaih tawntung dingin tuate kong pia hi; na inn sunga om a siangtho mi peuhpeuh in ne thei ding hi. Sathau a limci pen khempeuh, leh leenggahzu leh an a limci pen khempeuh, Topa tungah amau piak an palte, note tungah kong pia hi. Amaute in Topa tungah a piak uh, amau’ leitangah a min masa gah khempeuh nomau’ aa hi ding hi; na inn sunga om a siangtho mi peuhpeuh in ne thei ding hi. Israelte sungah a ki-ap na peuhmah nomau aa hi ding hi. Mihing leh ganhing khempeuh sung panin naubu a hong, amaute in Topa tungah a piakte khempeuh uh, mihing hita leh ganhing hita leh, nomau aa hi ding hi; ahi zongin mihing tacil na tankhia ding uh a, ganhing tacil zong na tankhia ding uh hi. Tuate a kitatna man (kha khat a phak ciangin tuate na tankhia ding uh hi) gerah sawmnih a pha biakinn shekel tawh kizui-in ngun shekel nga-in na seh ding uh hi. Ahih hangin bawng tacil, ahih kei leh tuu tacil, ahi kei leh keel tacilte na tan kei ding uh hi; tuate siangtho hi. Biakna tau tungah tuate’ si na theh ding uh a, Topa tungah gim namtui, mei tawh kihal biakna-in tuate’ thau na hal ding uh hi; ahih hangin a kiveii sa-iik leh a taklam phei nomau aa ahih mah bangin, tuate’ sate nomau aa hi ding hi. Israel mite in Topa tungah a piak a siangtho biaknate khempeuh, nang leh na tapate leh na tanute tungah kaih tawntung dingin kong pia hi; tua in nang leh na suan na khakte adingin Topa mai-ah a tawntung a, ci tawh thuciamna ahi hi,” a ci hi. Topa in Aaron kiangah, “Nang in amau’ gam sungah gamhluah na nei kei ding a, amaute lakah tanh zong na nei kei ding hi; keimah in Israel mite lakah nangma tanh leh nangma luah ka hi hi. “Kikhopna buk sungah amaute’ nasepna, amau’ nasep thaman dingin Israel sunga sehsawm suah sehkhat khempeuh, Levi mite tungah gamh-in ka pia hi. Amaute in khialhna thuakin si kha ding uh ahih manin tu-a kipan kikhopna buk kiangah Israel mite pai lo ding uh hi. Ahih hangin Levi mite in kikhopna buk nasep sem ding uh a, amaute in a mawhna uh pua ding uh hi; tua in amau’ khang tawntungin tawntung ngeina hi ding hi; amaute in Israel mite lakah luah nei lo ding uh hi. Bang hang hiam cih leh amaute in biakna-in Topa tungah a piak uh Israel mite’ sehsawm suah sehkhat pen Levi mite tungah luah dingin ka pia khin hi; tua ahih ciangin Israel mite lakah amaute in luah a neih loh ding uh ka gensa ahi hi,” a ci hi. Topa in Moses kiangah, “Levi mite kiangah hih bangin na gen lai ding hi: “Note luah dingin amaute’ tung panin kong piak ahi sehsawm suah sehkhat Israel mite tung panin na lak uh ciangin, tua sung panin Topa tungah biakna, sehsawm suah sehkhat sung pan sehsawm suah sehkhat na pia sawn ding uh hi. Tua na biaknate uh, ancilna pana an leh leenggah sukna pana kipia mah bangin note aa-in kiciamteh ding hi. Tua ahih ciangin Israel mite tung panin na ngah uh sehsawm suah sehkhat khempeuh tung panin Topa tungah biakna na pia ding uh hi; tua sung panin siampi Aaron’ tungah Topa a kibiakna na pia ding uh hi. Note tungah hong kipia letsong lakah a limci pen, a siangtho pen paipihin Topa adingin biakna khempeuh na pia ding uh hi,’ ci-in gen in. Tua ahih ciangin amaute kiangah, ‘Tuate sung panin a limci pen teng na piak khit uh ciangin, a om lai teng Levi mite’ adingin ancilna pana piangte leh leenggah sukna pana piangte a kipia mah bangin kiciamteh ding hi; mun khatpeuh peuh ah na ne thei ding uh hi, nang leh na innkuanpihte in na ne thei ding uh hi; bang hang hiam cih leh tua in kikhopna buk sungah note’ nasepna thaman ahi hi. Tua sung panin a limci pen na piak nak uh leh tua thu hangin mawhsakna na thuak kei ding uh hi. Israel mite’ na a siangthote na nin sak kei ding uh hi, na ninsak uh leh na si ding uh hi,’ ci-in gen in,” a ci hi. Tu-in Topa in Moses leh Aaron kiangah, “Hih in Topa ’ thupiak thukham leh ngeina ahi hi: Poina a nei lo, sit ban’na a om lo, a tungah nasepna kol a kivawh ngei nai lo, bawngla a san khat nangma kiangah hong paipih nadingun Israel mite kiangah gen un. Siampi Eleazar kiangah na pia ding uh a, giahphual pua lamah kipaipihin ama mai-ah kigo ding hi; siampi Eleazar in a khutme tawh a si tawm khat la-in, kikhopna buk mai lamah a si sagih vei theh ding hi. Ama muhna ah a bawngla kihal ding hi; a vun, a sa, leh a si, a ek tawh kihal ding hi; siampipa in taamtaak sing leh puknah leh a ausan khaute la-in bawngla a kihalna sungah tuate khul ding hi. Tua ciangin siampipa in ama puante sawpin tui sungah kipumsil ding a, tua khit ciangin giahphual ah hong pai ding hi; a nitak mateng siampipa a nin hi ding hi. Bawngla a hal mipa-in ama puante sawpin tui sungah kipumsil ding a, a nitak mateng a nin hi ding hi. Mi a siang khat in bawngla vute khawmin, giahphual pua lam a siang mun khatah tuate koih ding hi; khialhna maisak nading, nitna sian’sak nading tui-ah zat dingin Israel mi honpite adingin tuate kikem ding hi. Bawngla vute a khawm mipa in ama puante sawpin, a nitak mateng a nin hi ding hi. Hih in Israel mite leh amaute lakah a peem khualmi tungah tawntung ngeina hi ding hi. “A si mi khatpeuh’ pumpi a lawngpa ni sagih sung a nin hi ding hi; a ni thum ni leh a ni sagih ni-in amahmah tui tawh kisiangsakin, tua khit ciangin a siang hi ding hi; ahih hangin a ni thum ni leh a ni sagih ni-in amahmah a kisian’sak kei leh, amah a siang suak thei lo ding hi. A sisa mi khatpeuh’ pumpi, mi si a lawng mi in amahmah a kisian’sak tawm kei leh amah in Topa ’ biakbuk a ninsak hi a, Israel sung panin tua mi kikhen khia ding hi; nitna hangin ama tungah tui kibuak lo ahih manin amah a nin hi ding hi; ama nitna ama tungah om lai hi. “Hih in, mi khat puanbuk sungah a sih ciangin ngeina ahi hi; puanbuk sungah a pai mi peuhmah leh puanbuk sungah a om mi peuhmah ni sagih sung a nin hi ding hi. A kisin cip lo a kihong beel peuhmah a nin ahi hi. Namsau tawh gamlakah a kithat mi ahi a, misi pumpi ahi a, mi guh ahi a, han ahi zongin a lawng mi peuhmah ni sagih sung a nin hi ding hi. Amaute in a nin mipa adingin a kihal khialhna hanga biakna vute la-in beel sung khatah tui luang lai tawh hel ding uh hi; tua ciangin a siang mi khat in puknah la-in a tui sungah diah ding a, puanbuk tung leh a nazatte khempeuh tung leh tua lai-ah a om mi khempeuh tung leh guh ahi a, a kithat mi ahi a, misi ahi a, han ahi zongin a lawng mipa tungah theh ding hi; a ni thum ni leh a ni sagih ni-in a siang mipa in a nin mipa tungah theh ding hi; tua bangin a ni sagih ni-in amah in mi nin pa siangsakin, amah in a puante sawpin tui sungah kipumsil ding a, a nitak ciangin amah siang ding hi. “Ahih hangin a nin hi napi-in amah a kisiangsak lo mipa in Topa ’ biakinn ninsak ahih manin mi honpi panin tua mipa kikhen khia ding hi; nitna hangin ama tungah tui kibuak lo ahih manin amah a nin ahi hi. Tua in amaute adingin tawntung ngeina khat hi ding hi. Nitna hangin tui a theh mipa in ama puante sawp ding hi; nitna hanga a kizang tui a lawng mipa a nitak mateng nin ding hi. A nin mipa in a lawn’ peuhpeuh nin ding hi; tua a lawng peuhpeuh a nitak mateng nin ding hi,” a ci hi. Israel mite, a mihon buppi, a kha masa sungin Zin gamlak tung uh a, mite Kadesh munah om uh hi; tua lai-ah Miriam si a, tua lai mahah kivui hi. Tu-in mihonte ading tui om lo hi; tua ahih manin Moses leh Aaron’ langah amaute kihawmin kituah uh hi. Mite Moses tawh kiseelin, “ Topa mai-ah ka sanggamte uh a sih lai-in a si hi zaw ta le ung! Bang hangin hih lai-ah kote leh ka ganhingte uh a si dingin Topa ’ mihonte hih gam lakah hong paipih na hi hiam? Bang hangin hih mun sia-ah hong paipih dingin Izipt panin kote hong paito sak na hi hiam? An ahi a, thei ahi a, leenggui ahi a, mang kawlsing ahi zongin a omna mun hi lo hi; dawn ding tui zong om lo hi,” a ci uh hi. Tua ciangin mihonte omna panin kikhopna buk kongah Moses leh Aaron pai-in bok uh hi. Topa ’ minthan’na amaute tungah kilang a, Topa in Moses kiangah, “Ciangkhut la-in, nang leh na sanggampa Aaron in mihonte khawm un la, suangpi in amau’ muh-in tui a piak ding sawl un; tua bangin suangpi panin amau ading tui na pia ding hi; tua bangin mihonte tung leh amau’ ganhingte tungah tui na pia ding hi,” a ci hi. Amah in a thupiak bangin Topa mai panin ciangkhut la hi. Moses leh Aaron in suangpi mai-ah mihonte kaikhawmin, amah in amaute kiangah, “Tu-in za un, a lehdo mite aw; hih suangpi panin note ading tui hong phulkhiasak ding ka hi uh hiam?” a ci hi. Moses in a khut laam toin a ciangkhut tawh suangpi nih vei sat hi; tui tampi phulkhia-in mihonte leh amau’ ganhingte in dawn uh hi. Topa in Moses leh Aaron kiangah, “Israel mite mai-ah kei hong um lo hong siangthosak lo na hih uh ciangin amaute ka piaksa leitangah hih mihonte na tun’pih kei ding uh hi,” a ci hi. Hihte pen, Israel mite Topa tawh a kiseelna, amaute lakah amahmah a siangtho a, a kilahna mun, Meribah tui phual-a thu piang ahi hi. Moses in Kadesh panin Edom kumpipa kiangah kamtaite sawl a, “Na sanggam ahi Israelte in hih bangin ci hi: Kote’ tuah khak kamsiatna khempeuh na thei hi. Ka pu ka pate uh Izipt ah na paisukin Izipt ah sau veipi ka teeng uh hi; Izipt mite in kote leh ka pu ka pate uh hong gim bawl hi; Topa tungah ka kiko uh ciangin amah in ka aw uh hong za a, vantung mi khat hong sawlin, Izipt panin hong pai khiatpih hi; tu-in nangma gam nawl Kadesh khuapi ah ka om uh hi. Tu-in kote na gam hong kantan sak in. Lo ahi a, leenggui lo ahi zong nawk loin, tuikhuk panin zong tui ka dawn kei ding uh hi; Kumpipa’ Lamlian dungah ka pai ding uh a, na gamsung ka khen’ matengun tak lam ahi a, vei lamah ahi zongin ka pial kei ding uh hi,” a ci hi. Ahih hangin Edom mite in ama kiangah, “Nong nawk kei ding uh hi, nong nawk uh leh note lang pangin namsau tawh kong kuan ding uh hi,” a ci hi. Israel mite in, lamlian lam tawnin ka pai to ding uh hi; kote leh ka ganhingte un na tui uh ka dawn uh leh, a man kong pia ding uh hi; khe tawh pai-in hong nawk sak un, a dang kong ngen kei uh hi,” a ci hi. Ahih hangin Edom mite in, “Nong nawk kei ding uh hi,” a ci uh hi. Amaute’ lang khatah galkap tampi tawh Edom mite kuan hi. Israel, amau gam a nawk sak ding tua bangin Edom mite in nial uh hi; tua ahih ciangin amau kiang panin Israel mite paikhia uh hi. Kadesh panin amaute pai uh a, Israel mite, a mihon buppi-in Hor Mual tung uh hi. Edom gamgi Hor Mual ah Topa in Moses leh Aaron tungah, “Ama mite kiangah Aaron kigawm ding hi; bang hang hiam cih leh Meribah tui-ah note in ka thupiak lehdo na hih manun, Israel mite tungah ka piak leitangah amah tum lo ding hi. Aaron leh ama tapa Eleazar sam in la, Hor Mual ah amaute paipih in; ama tung panin Aaron puante suahkhia in la, a tapa Eleazar silh sak in; ama mite kiangah Aaron kigawm ding a, tua lai-ah si ding hi,” a ci hi. Topa thupiak bangin Moses gamta hi; mihonte khempeuh’ muhin Hor Mual tungah amaute paito uh hi. Moses in Aaron puante suahkhiatsak a, a tapa Eleazar silh sak hi; tua mual dawnah Aaron si hi. Tua ciangin mual tung panin Moses leh Eleazar paisuk uh hi. Mi honte khempeuh in Aaron si hi ci-in a muh uh ciangin, Aaron hangin Israel innkuan khempeuh ni sawmthum sung kap uh hi. Kanaan mi ahi Negeb gama teeng Arad gam kumpipa in Atharim lam tawnin Israel hong paina thu a zak ciangin, amah in Israel doin, amaute kimkhat sal-in man hi. Israelte in Topa tungah kiciamna khat bawl uh a, “Ka khut sung uhah hih mite nong piak nak leh kote in amau’ khuapite ka susia mang ding uh hi,” a ci uh hi. Topa in Israelte’ aw ngai-in Kanaan mite pia hi; amaute in amau leh a khuapite uh susia mang hi; tua ahih ciangin tua mun pen Hormah kici hi. Amaute Hor Mual panin ding khia-in, Edom gam kiim-ah pai dingin San Tuipi lamah, pai uh hi; lam kalah mite lungkia uh hi. Mite in Pasian leh Moses gensia uh a, “Bang hangin gam lakah a si dingin Izipt panin kote hong pai khiatpih to na hi hiam? Bang hang hiam cih leh an leh tui om lo hi, bangmah a man lo hih an ka kih uh hi,” a ci uh hi. Tua ciangin Topa in mite lakah gul gu-phate khah a, tuate in mite tu-in Israel mi tampi si hi. Moses kiangah mite hong pai-in, “ Topa leh nang hong gensia-in kam pau ka hih manun ka khial uh hi; kote kiang panin gulte a lak khiat nadingin Topa tungah thuum in,” a ci uh hi. Tua ahih ciangin mite’ adingin Moses in thuumsak hi. Topa in Moses kiangah, “Gul gu-pha khat bawl in la, khuam khat tungah khai in; gul in a tuk mi peuhmah in tua gul a muh ciangin hing ding hi,” a ci hi. Tua ahih ciangin Moses in sumngo gul khat bawl a, khuam khat tungah khai hi; gul in mi khatpeuh a tuk leh amah in sumngo gul enin hing pah hi. Israel mite ding khia uh a, Oboth munah giahphual sat uh hi. Amaute Oboth panin ding khia uh a, nisuahna lam, Moab gal gamlak, Iyeabarim munah giahphual sat uh hi. Tua lai panin amaute ding khia uh a, Zered Kuam ah giahphual sat uh hi. Tua lai panin amaute ding khia uh a, Amor mite’ gamgi pana hong kikhung suk gamlak a, om Arnon gun gal khatah giahphual sat uh hi; bang hang hiam cih leh Arnon gun pen Moab leh Amor mite kikalah gamgi ahi hi. Tua ahih manin Topa ’ Gal Laibu sungah, “Sufah gama Vuahep khua, leh Arnon gun kuamte, leh Ar khua ciang a ban suk a, Moab gamgi lamah a paisuk kuam,” kici hi. Tua lai panin Be-er munah pai uh hi; tua pen Topa in Moses kiangah, “Mite kaikhawmin, amaute tui ka pia ding hi,” a cihna tuikhuk ahi hi. Tua ciangin Israel mite in hih la sa uh hi: “Tuikhuk aw, Phul in!—La sak un! kumpi ciangkhut leh amau ciangkhutte tawh mite’ uliante in a tawh, kumpi tate in a tawh tuikhuk,” a ci uh hi. Gamlak panin amaute Mattanah mun-ah pai uh a, Mattanah panin Nahaliel, Nahaliel panin Bamoth, Bamoth panin sehnel gam a kimuh suk theihna Pisgah mual kiang nai, Moab gam sunga kuam khatah tung uh hi. Tua ciangin Israelte in Amor kumpipa Sihon kiangah kamtaite sawl a, “Na gam hong kantan sak in; lo ahi a, leenggui lo ahi zongin ka pial kei ding uh hi; tuikhuk tui ka dawn kei ding uh hi; na gam ka khen khit mateng uh Kumpipa’ Lamlian tawnin ka pai ding uh hi,” a ci hi. Ahih hangin Sihon in ama gam Israelte kantan sak lo hi. Amah in a mite khempeuh kaikhawmin, Israelte do dingin gam lakah pai-in Jahaz mun tung a, Israelte a do hi. Israelte in namsau tawh amah leh a mite tampi thatin, Arnon gun panin Jabbok lui, Ammon mite kiang dong a gam lak sak hi; bang hang hiam cih leh Jazer pen Ammon mite’ gamgi ahi hi. Israelte in hih khuapite khempeuh la-in, Heshbon gam sunga Amor mite’ khuapite khempeuh leh khua neute khempeuh ah teeng uh hi. Bang hang hiam cih leh Heshbon pen, ni danga Moab kumpipa simin a khut sung panin Arnon gun ciang dong a gam khempeuh a lak sak, Amor mite’ kumpipa Sihon’ khuapi ahi hi. Tua ahi ciangin la a sa pawlte in, “Heshbon ah hong pai un, lam kik un, Sihon khuapi kip sak un. Heshbon panin mei piang khia hi, Sihon khuapi panin meikuang piang khia hi. Moabte’ kumpi Ar, Arnon mual sang a ukte kang tum hi. O Moab! gimna na ngah hi, O Khemosh mite! na mangthang uh hi, Amah in a tapate gal tai-in, a tanute gal matin, Amor kumpipa Sihon adingin hong bawl hi. Tua ahih ciangin amau’ suan leh khakte Heshbon panin Dibon ciang dong si uh a, mei in Medeba ciang dong a bat mateng ka siasak uh hi,” ci-in sa uh hi. Tua ciangin Amor mite’ gam sungah Israelte teeng hi. Moses in Jazer khua thu a kansim ding a sawl hi; amaute in a khua neute la-in tua lai-a om Amor mite suan uh hi. Tua ciangin amaute kihei-in Bashan lamah paito uh hi; Bashan kumpipa Og leh a mite khempeuh Edrei-ah amaute do dingin kuan uh hi. Ahih hangin Topa in Moses kiangah, “Amah kihta kei in; bang hang hiam cih leh amah leh a mite khempeuh leh a leitang, nangma khut sungah kong pia khin hi; Heshbon ah a teeng Amor kumpipa Sihon na bawl bangin amah na bawl ding hi,” a ci hi. Tua ahih ciangin khat beek a nungta a om lo dingin amaute in amah leh a tapate leh a mite khempeuh that uh hi; amaute in ama gam tang uh hi. Tua ciangin Israel mite ding khia uh a, Jerikho gei Jordan gal khat Moab gam leizangah giahphual sat uh hi. Israelte in Amor mite tungah a bawlna khempeuh Zippor’ tapa Balak in mu hi. Amaute tam mahmah uh ahih manin Moab mite in tua mite kihta uh hi; Israel mite kihtakna tawh Moab mite a kidim hi. Moab mite in Midian upate kiangah, “Bawngtal in gamlak lopate a liah bangin hih mihonte in i kiim-a om khempeuh liak tum mang ding hi,” a ci hi. Tua ahih ciangin Zippor’ tapa Balak, tua hun lai taka Moab kumpipa in Amau mite’ gam, Gun gei Pethor ah a om Beor tapa Balaam kiangah kamtaite sawlin, “En in, Izipt panin mihon khat hong paikhia hi; amaute in lei maitang teng dim khin uh a, keima gal khatah amaute om uh hi. Tu-in hong pai in la, amaute hat lua uh ahih manin hih mite hong samsiat sak in; tua hi leh amaute zoin hih gam panin ka hawl khia zo kha ding hi; bang hang hiam cih leh thupha na piak mi in thupha ngahin na samsiat mi in siatna a ngah ka thei hi,” a ci sak hi. Tua ahih ciangin Moab upate leh Midian upate aisaan man ding tawh kuan khia uh hi; Balaam kiangah amaute pai uh a, Balak’ thu ama kiangah sung uh hi. Amah in amaute kiangah, “Tu zan hih lai-ah giak un, Topa in kei tungah hong gen bangin note tungah thu kong puak kik ding hi,” a ci hi; tua ahih ciangin Moab uliante Balaam tawh om hi. Balaam kiangah Pasian hong pai-in, “Nang tawh a om hih mite kua ahi hiam?” a ci hi. Balaam in Pasian kiangah, “Zippor’ tapa Balak, Moab kumpipa in kei kiangah hong sawlin, ‘En in, Izipt panin mihon khat hong paikhia a, lei maitang teng dim uh hi; tu-in hong pai in la amaute doin ka hawl khia zo kha ding hi,’ hong ci hi,” ci-in a gen hi. Pasian in Balaam kiangah, “Amaute na zui kei ding hi; tua mite thupha kipia ahih manin na samsia kei ding hi,” a ci hi. Tua ahih ciangin zingsangin Balaam tho-in Balak’ uliante kiangah, “Na gam uhah ciah un; bang hang hiam cih leh Topa in note kong zuih ding hong phal lo hi,” a ci hi. Tua ahih ciangin Moab uliante ding-in Balak kiangah pai uh a, “Balaam in kote hong zui nuam lo hi,” ci uh hi. Balak in amaute sangin a tamzaw leh a zahtak-huai zaw uliante khat vei sawl kik hi. Amaute Balaam kiangah pai uh a, ama kiangah, “Zippor’ tapa Balak in hih bangin ci hi: ‘Kei kiangah nong pai nading bangmah kikol-awk sak kei in; bang hang hiam cih leh min phatna lianpi nang kong pia ding a, kei tunga nong gen peuhpeuh ka hih ding hi; hong pai in la, hih mite hong samsiat sak in,’ a ci hi,” ci-in a gen uh hi. Ahih hangin Balaam in dawngin Balak’ nasemte kiangah, “Balak in kham leh ngun tawh a kidim ama inn hong pia ding hita leh zong, Topa ka Pasian’ thu piakna banah a tawmzaw hita leh a tamzaw hita leh bangmah ka hih thei kei hi. Tu-in kong thuum hi, Topa in kei tungah bang hong ci lai ding hiam cih ka theih nadingin tu zan zong hih lai-ah giak un,” a ci hi. Balaam kiangah zanin Pasian hong pai-in, “Nangmah sam dingin mite hong pai ahih leh, tho in la, amaute zui in; ahih hangin nang kong sawl teng bek na hih ding hi,” a ci hi. Tua ahih ciangin zingsangin Balaam tho-in a la tutphah vawh a, Moab uliante zui hi. Ahih hangin amah pai ahih manin Pasian’ hehna so hi; amah langpang dingin Topa ’ vantungmi in lampi ah na pang hi. Tu-in a la tungah amah tuang a, a nasemte nih in zong a zui uh hi. A la in Topa ’ vantungmi a khut sungah namsau dawhsa tawi-in lampi ah a ding mu hi; lampi panin lam pialin gam lakah pai hi; Balaam in lampi ah a paikik nadingin a la sat hi. Tua ciangin leenggui lo kikal, a pang tuakah phung a omna lam kawcik ah Topa ’ vantungmi na ding hi. La in Topa ’ vantungmi a muh ciangin phung phu a, Balaam’ khe phung tawh nengcip hi; tua ahih ciangin amah in a la sat kik hi. Tua ciangin Topa ’ vantungmi na ma pai-in, tak lam ahi a, vei lam ahi zongin kihei theih nading a om lohna mun kawcik khatah na ding leuleu hi. La in Topa ’ vantungmi a muh ciangin Balaam nuai-ah lumsuk hi; Balaam heh mahmah a, a ciangkhut tawh la sat hi. Tua ciangin Topa in la pau theisak a, la in Balaam kiangah, “Thum vei dong nong sat nadingin nang bang hong cih ka hi hiam?” a ci hi. Balaam in la kiangah, “Nang in kei nong mawlpihna hang ahi hi. Ka khutah namsau tawi leng ka ut hi; tua hi leh nang kong that khin ding hi,” a ci hi. La in Balaam kiangah, “Na khan’ tawnin tu ni ciang dong na tuan’na na la hilo ka hi hiam? Hih bangin nang hong hih ngei ka hi hiam?” a ci hi. Amah in, “Nong hih ngei kei hi,” a ci hi. Tua ciangin Topa in Balaam’ mitte hon’sak a, a khut sungah namsau dawhsa tawh Topa ’ vantungmi lampi ah a ding mu hi; a lu kunin boksuk hi. Topa ’ vantungmi in ama kiangah, “Bang hangin na la thum vei dong sat na hi hiam? En in, hih na khualzinna ah lungkim lo ka hih manin nang hong pang dingin kong kuankhia hi; la in kei hong mu-in thum vei dong hong pel hi. Kei hong pel kei leh, tu mahmahin nang hong that khinin amah ka hingsak ding hi,” a ci hi. Tua ciangin Balaam in Topa ’ vantungmi kiangah, “Kei hong pangin lampi ah na din’ lam thei lo ka hih manin ka khial hi. Tua ahih ciangin tu-in ka khualzinna hoih sa lo na hih leh ka ciahkik ding hi,” a ci hi. Topa ’ vantungmi in Balaam kiangah, “Mite zui in; ahih hangin nang kong sawl teng bek na gen ding hi,” a ci hi. Tua ahih ciangin Balaam in Balak’ uliante zui suak hi. Balaam’ hong paina thu Balak in a zak ciangin, Arnon gun gamgi-a a kizatna gei-a om Moab khuapi, gampi ciangah amah dawn dingin paikhia hi. Balak in Balaam kiangah, “Nang hong sam ding hong sawl hilo ka hi hiam? Bang hangin hong pai lo na hi hiam? Nang hong liansak lah ding ka hi hiam?” a ci hi. Balaam in Balak kiangah, “En in, na kiang hong tung ing! Na khatpeuh ka gen theih nading vangliatna khatpeuh nei ka hi hiam? Pasian in ka kam sungah hong guan’ thu bek ka gen ding hi,” a ci hi. Tua ciangin Balaam in Balak zui a, Kiriath-huzoth khua ah tung uh hi. Balak in bawngtalte leh tuute tawh biakna pia-in Balaam leh amah tawh a om uliante kiangah a puak hi. A zing ciangin Balak in Balaam samin Bamoth-baal munah paipih to hi; tua lai panin amah in Israel mi a madawk pente gal muh thei hi. Tua ciangin Balaam in Balak kiangah, “Hih lai-ah kei adingin biakna tau sagih hong bawlsak in la, kei adingin bawngtal sagih leh tuutal sagih hong pia in,” a ci hi. Balaam’ gen bangin Balak in hih hi; Balak leh Balaam in biakna tau simah bawngtal khat leh tuutal khat ciat pia uh hi. Balaam in Balak kiangah, “Na meihal biakna kiangah na ding in, kei ka va pai ding hi; kei hong dawn dingin Topa hong pai kha ding hi; amah in kei hong lah khempeuh nang kiangah kong gen ding hi,” a ci hi. Tua ciangin a sang mualpawn khatah amah pai hi.’ Pasian in Balaam na dawn hi; Balaam in ama kiangah, “Biakna tau sagih ka bawl khin a, baikna tau simah bawngtal khat leh tuutal khat ciat ka pia hi,” a ci hi. Topa in Balaam’ kamah thu guang a, “Balak kiangah ciahkik in la, hih bangin na gen ding hi,” a ci hi. Ama kiangah a ciahkik ciangin amah leh Moab uliante khempeuh a meihal biakna gei-ah na ding uh hi. Balaam in a thugen ding teng genin, “Aram panin Balak in kei hong paipih hi, nisuahna mualte panin Moab kumpipa in hong paipih hi; ‘Hong pai in, Jakob mite hong samsiat sak in, hong pai in, Israel mite mawhsak in! hong ci hi. Pasian’ samsiat loh mite bangci samsiat ding ka hi hiam? Topa ’ mawhsak loh mite bangci mawhsak ding ka hi hiam? Bang hang hiam cih leh mualte’ dawn panin amaute ka mu hi, mual neute panin amaute ka en hi; en in, a tang teen, mite minamte lakah a kihel lote! Kua in Leivui banga a tam Jakob mite a mal sim zo ding a, Israel sehli suah sehkhat a mal sim zo ding ahi hiam? Mi thumanpa’ sihna bangin hong si sak in la, ka mailam thu ama’ aa bang hi sak in!” a ci hi. Tua ciangin Balak in Balaam kiangah, “Kei bang hong cih na hi hiam? Ka galte a samsia dingin nang kong sam hi, en in, bangmah na hih kei a, amaute thupha na pia zawsop hi,” a ci hi. Amah in, “ Topa in ka gen dingin ka kam sungah hong guan thu, don lo ding ka hi hiam?” ci-in a dawng hi. Tua ciangin Balak in ama kiangah, “Amaute na muh theih nading mun dangah kei hong zui in; amaute a madawk teng bek na mu ding a, a vekpi-in na mu kei ding hi; tua ciangin tua lai panin amaute nong samsiat sak ding hi,” a ci hi. Tua ciangin amah in Zofim gamlak, Pisgah mual dawnah amah paipihin, biakna tau sagih bawl a, biakna tau simah bawngtal khat leh tuutal khat ciat a pia hi. Balaam in Balak kiangah, “Hua lamah Topa tawh ka va kituah kalun na meihal biakna gei hih lai-ah na ding in,” a ci hi. Topa in Balaam na dawn a, ama kam sungah thu guangin, “Balak kiangah ciahkik in la, hih bangin thu na gen ding hi,” a ci hi. Ama kiangah a pai ciangin a meihal biakna gei-ah amah na ding a, Moab uliante tawh na om uh hi. Balak in ama kiangah, “ Topa in bang hong gen ahi hiam?” a ci hi. Balaam in a thugen ding teng genin, “Balak aw, tho in la, za in; Zippor’ tapa aw, ka thu ngai in: A zuau dingin Pasian in mihing hi lo hi, a kisik dingin mihing’ tapa hi lo hi. Amah in ci khin hi, amah in hih lo ding ahi hiam? Amah in gen khin hi, amah in tangtungsak lo ding ahi hiam? En in, thupha piak ding thu ka ngah hi; amah in thupha pia khin hi, keimah in ka khelkik thei kei hi. Amah in Jakob mite sungah mawhna mu lo hi; amah in Israel mite sungah zong gamtat siatna mu lo hi. Topa amau’ Pasian in amaute tawh om a, kumpipa phatna awging amaute’ lakah om hi. Pasian in Izipt panin amaute paikhiatpih hi; amaute in gamsial tha bang hatna nei uh hi. Bang hang hiam cih leh Jakob mite a kibum nading om lo a, Israel mite lang khatah aisaanna ding om lo hi; tu-in Jakob suan Israel mite thu tawh kisai-in, ‘Pasian in bang hih hiam!’ kici ding hi. En un, hua mite! Humpinelkaipi bangin tho toin, humpinelkaipa bangin kaang to hi; a an a nek mateng, a matte’ si a dawn mateng, lumsuk lo hi,” a ci hi. Tua ciangin Balak in Balaam kiangah, “Amaute samsia peuhmah kei in la, thupha zong pia peuhmah kei in,” a ci hi. Ahih hangin Balaam in Balak kiangah, “‘ Topa ’ cih khempeuh keimah in ka hih ding hi,’ hong ci hilo ka hi hiam?” ci-in a dawng hi. Balak in Balaam kiangah, “Tu-in hong pai in, mun dangah kong paipih ding hi; tua lai panin amaute nong samsiat sakna ding Pasian in hong lungkimpih kha ding hi,” a ci hi. Tua ahih ciangin Balak in sehnel gam a kimuh sukna Peor mual dawnah Balaam paipih hi. Tua ciangin Balaam in Balak kiangah, “Hih lai-ah kei adingin biakna tau sagih hong bawlsak in la, bawngtal sagih leh tuutal sagih hih lai-ah hong pia in,” a ci hi. Balaam’ cih bangin Balak in hih a, biakna tau simah bawngtal khat leh tuutal khat ciat pia hi. Israel thupha piak ding in Topa lungkimsak ahihna Balaam in a muh ciangin, a hun danga bangin kihilna lim mu dingin pai lo a, a maitang gamlak lam ngat hi. Balaam khua dak a, a nam-namin Israelte giahphual sat a mu hi. Pasian’ Kha ama tungah hong tung a, amah in a thugen ding teng genin, “Beor’ tapa Balaam’ thugen, a mit in khua a mu thei mipa’ thugen, Pasian’ thute a za, Vanglianpa’ mangmuhna a mu, mang mu napi-in a mit in khua a mu thei mipa’ thugen in: Jakob mite aw, na puanbukte uh bangzahin hoih ahi hiam, Israel mite aw, na giahphual uh bangzahin hoih ahi hiah? Saupi a kiphah kuamte tawh kibang a, gun gei-a om huante tawh kibang hi, Topa in a suan aloes paknamtui kungte tawh kibang a, tui gei-a om taamtaak kungte tawh kibang hi. A phelkhaite panin tui luang ding a, a khaici in tui tampite ngahin, a kumpipa uh, Agag sangin sangzaw ding a, ama kumpigam kiliansak ding hi. Pasian in Izipt panin amaute paikhiatpih a, amaute in gamsial tha bang hatna nei uh hi. Amaute in a gal uh ahi minamte ne tum ding uh a, amaute’ guh suzan gawp ding uh a, a thaltang uh tawh amaute kap let ding uh hi. Amaute bok hi, humpinelkaipa bangin lumsuk uh hi, humpinelkaipi bangin lumsuk uh hi; kua in amaute phong ngam ding ahi hiam? Note thupha hong piate in thupha ngah hen la, note hong samsiate in samsiatna ngah ta hen,” a ci hi. Balaam’ tungah Balak heh mahmah a, amah in a khut leh a khut a tuum hi; Balak in Balaam kiangah, “Ka galte a samsia dingin nang kong sam hi, en in, nang in amaute thum vei tak thupha na pia khin zo hi. Tua ahih ciangin tu-in na omna munah tai in; ‘Nang kong min liansak taktak ding hi,’ ka hong ci hi; ahih hangin na minliat nading panin Topa in nang hong khaktan hi,” a ci hi. Balaam in Balak kiangah, “Kei kiangah nong sawl na kamtaite kiangah ‘Balak in kham leh ngun tawh a kidim ama inn hong pia ding hita leh zong, Topa ’ thu banah keima thu-in a pha bawl ding ahi a, a sia bawl ding ahi zongin, ka hih thei kei hi; Topa ’ gente bek keimah in ka gen ding hi,’ ci-in gen hilo ka hi hiam? Tu-in, en in, ka mite kiangah ka pai ding hi; hong pai in, nidang ciangin hih mite in na mite tungah a bawl dingte kong thei sak ding hi,” a ci hi. Amah in a thugen ding teng genin, “Beor’ tapa Balaam’ thugen, a mit in khua a mu thei mipa’ thugen, Pasian’ thute a za, Sang Penpa’ thutheihna a thei, Vanglianpa’ mangmuhna a mu, mang mu napi-in a mit in khua a mu thei mipa’ thugen in: Amah ka mu hi, ahih hangin tu hun hi lo hi; amah ka en hi, ahih hangin a hun nai nai lo hi: Jakob sung pan aksi khat hong suakkhia ding a, Israel sung pan kumpi ciangkhut khat hong piang ding hi; tua in Moab’ taltang sat kham ding a, Sheth’ suante khempeuh sugawp ding hi. Israel hang takin a om sungin, Edomte kisuankhia ding hi, A galte ahi Sheir zong, kisuankhia ding hi. Jakob tawh ukna na kisem ding a, khuapi sunga a suaktate kisusia ding!” a ci hi. Tua ciangin amah in Amalek enin, ama thu gen ding teng genin, “Amalek in minamte lakah a masa pen hi a, ahih hangin a tawpna ah siatna a tuak ding hi,” a ci hi. Tua ciangin amah in Ken mite enin, ama thugen ding teng genin, “Na omna mun kho a, suangpi sungah na bu kibawl hi; Ahih hangin Kain bei ding hi. Ashur in galmatin nang bang tan vei hong nei ding ahi hiam?” a ci hi. Amah in a thugen ding teng genin, “Ala, Pasian in hihte ahih ciangin kua nungta zo ding ahi hiam? Ahih hangin Kittim panin teembawte hong pai-in Ashur leh Eber gimsak ding hi; amah in zong siatna tuak ding hi,” a ci hi. Tua ciangin Balaam ding-in ama gamah ciahkik hi; Balak zong a ciah hi. Shittim ah Israel mite a om lai takin mite in Moab tanute tawh paktat ding kipan uh hi. Hih mite in amau’ pasian biak piakna ah mite sam uh a, mite in ne-in, amau’ pasiante’ mai-ah kun uh hi. Tua ahih ciangin Peor-a Baal tawh Israel mite va kizom tawm hi. Israel tungah Topa heh mahmah hi; Topa in Moses kiangah, “Israel mite tung panin Topa ’ hehna a kihtakhuai a kipelh theih nadingin mite’ ukpite khempeuh man in la, Topa mai-ah suntangin amaute khai in,” a ci hi. Moses in Israel thukhente kiangah, “Note khempeuh in Peor-a Baal tawh a va kizom tawm na mite khempeuh uh na that ciat ding uh hi,” a ci hi. En in, kikhopna buk kongah amaute kapin a om laitak, Moses’ muhna leh Israel mihon buppi’ muhna ah Israel mite khat hong pai-in Midian numei khat ama innkuanpihte kiangah hong ciahpih hi. Siampi Aaron’ tapa Eleazar, Eleazar’ tapa Finehas in a muh ciangin ding-in mihonte nusia a, a khutah teipi khat tawi-in Israel mipa inndei sungah zui a, Israel mipa leh a numei, a numei’ pumpi pailetin a nihin sun khawm hi. Tua bangin Israel mite sung panin gimna dai hi. Ahih zongin tua gimna tawh a si mite tul sawmnih leh tulli ahi hi. Topa in Moses kiangah, “Siampi Aaron’ tapa Eleazar, Eleazar’ tapa Finehas in Israel mite tungah ka hehna damsak kik hi; keima pammaihsak bangin amah in pammaih sa a, tua ahih ciangin pammaih ka sakna tawh Israel mite ka beisak kei hi. Tua ahih ciangin, ‘En in, ka thuciam ahi nopsakna amah ka pia hi; ama tung leh ama khit-a a suan leh khakte tungah tawntung siampi hihna thuciamna hi ding hi; bang hang hiam cih leh ama Pasian’ ading amah in pammaih sak sak a, Israel mite ading kilemna bawl sak hi,’ ci in,” a ci hi. Midian numei tawh a kithat khawm, Israel mi a kithatpa’ min in Simeon mite sung panin a beh lutang Salu’ tapa Zimri ahi hi. Midian numei a kithatnu’ min in Midian innkuan sungah a beh lutang ahi Zur’ tanu Kozbi ahi hi. Topa in Moses kiangah, ”Midian mite gimsak gawp in la, amaute vat gawp in; bang hang hiam cih leh amaute in a khel pilna uh tawh note hong gimsak gawp uh a, Peor tawh kisai thu leh Peor hangin gimna ni-in a kithat, amau’ sanggamnu, Midian uliante tanu Kozbi thu-ah note hong khem uh hi,” a ci hi. Tua gimna khit ciangin Topa in Moses tung leh siampi Aaron’ tapa Eleazar tungah “Israel mi honte khempeuh kum sawmnih pan a tungsiah, a beh beh-in, Israel sung panin galdo dingin a kuan khia thei ding khempeuh sim in,” a ci hi. Moses leh siampi Eleazar in Jerikho nai, Jordan kiang, Moab leizangah amaute tungah thu gen a, Topa in Moses a thupiak bangin, “Kum sawmnih pan a tungsiah peuhmah mi sim un,” a ci hi. Izipt gam panin a paikhia Israel mite in: Israel’ tacil Reuben ahi hi; Reuben’ tapate in: Honak pan Hanok behte ahi uh hi; Pallu pan Pallu behte ahi uh hi; Hezron pan Hezron behte ahi uh hi; Karmi pan Karmi behte ahi uh hi. Hihte in Reubente beh ahi uh hi; amau mi tul sawmli leh tulthum leh za sagih leh sawmthum pha hi. Pallu’ tapate in: Eliab ahi hi. Eliab’ tapate in: Nemuel, Dathan, leh Abiram ahi uh hi. Hih Dathan leh Abiramte in, mihonte lak panin pawl a kai, amaute in Topa ’ thu a seel lai-in Korah tawh kipawlin Moses leh Aaron’ thu a seelte ahi uh hi, mei in mihing zanih leh sawmnga a kat tum lai-in lei in a kam ka-in Korah tawh amaute valh tum a, amau pawl teng si uh hi; amaute pen hilhkholhna a suak uh hi. Ahi zongin Korah’ tapate si lo uh hi. Amau’ behbehin Simeon minamte in: Nemuel pan Nemuel behte ahi uh hi; Jamin pan Jamin behte ahi uh hi; Jakhin pan Jakhin behte ahi uh hi; Zerah pan Zerah behte ahi uh hi; Shawl pan Shawl behte ahi uh hi. Hihte in Simeon minam hi uh a, tul sawmnih leh tulnih leh za nih ahi hi. Amau’ behbehin Gad minamte in: Zefon pan Zefon behte ahi hi; Haggi pan Haggi behte ahi uh hi; Shuni pan Shuni behte ahi uh hi; Ozni pan Ozni behte ahi uh hi; Eri pan Eri behte ahi uh hi; Arod pan Arod behte ahi uh hi; Areli pan Areli behte ahi uh hi. Hihte in amau mi phazah tawh kizui-in Gad minamte hi a, tul sawmli leh zanga ahi hi. Judah’ tapate in Er leh Onan ahi hi; Kanaan gamah Er leh Onan si uh hi. Amau’ behbehin Judah minamte in: Shelah pan Shelah behte ahi uh hi; Perez pan Perez behte ahi uh hi; Zerah pan Zerah behte ahi uh hi. Perez mite; Hezron pan Hezron behte ahi uh hi; Hamul pan Hamul behte ahi uh hi. Hihte in amau mi phazah tawh kizui-in Judah’ minamte hi a, tul sawmsagih leh tulguk leh zanga ahi uh hi. Amau’ behbehin Issakhar minamte in: Tola pan Tola behte ahi uh hi; Puvah pan Puvah behte ahi uh hi; Jashub pan Jashub behte ahi uh hi; Shimron an Shimron behte ahi uh hi. Hihte in amau mi phazah tawh kizui-in Issakhar minamte hi a, tul sawmguk leh tulli leh zathum ahi hi. Amau’ behbehin Zebulun minamte in: Sered pan Sered behte ahi uh hi; Elon pan Elon behte ahi uh hi; Jahle-el pan Jahle-le behte ahi uh hi. Hihte in amau mi phazah tawh kizui-in Zebulun minamte hi a, tul sawmguk leh zanga ahi hi. Amau’ behbehin Josef minamte in: Manasseh leh Efraim ahi uh hi. Manasseh minamte in: Makhir pan Makhir behte ahi uh hi; Makhir in Gilead’ pa ahi hi; Gilead pan Gilead behte ahi uh hi. Hihte in Gilead’ tapate ahi uh hi: Iezer pan Iezer behte ahi uh hi; Helek pan Helek behte ahi uh hi; Asriel pan Asriel behte ahi uh hi; Shekhem pan Shekhem behte ahi uh hi; Shemida pan Shemida behte ahi uh hi; Hefer pan Hefer behte ahi uh hi. Tu-in Hefer’ tapa Zelofehad in tapa nei lo a, ahih hangin tanu nei hi: Zelofehad’ tanute’ minte in Mahlah, Noah, Hoglah, Milkah leh Tirzah ahi hi. Hihte in Manasseh minamte ahi hi; amau mi a phazah in tul sawmnga leh tulnih leh za sagih ahi hi. Hihte in amau’ behbehin Efraim minamte ahi uh hi; Shuthelah pan Shuthelah behte ahi uh hi; Bekher pan Bekher behte ahi uh hi; Tahan pan Tahan behte ahi uh hi. Hih in Shuthelah minamte ahi uh hi: Eran pan Eran behte ahi uh hi. Hihte in amau mi phazah tawh kizui-in Efraim minamte hi a, tul sawmthum leh tulnih leh za nga ahi hi. Hihte in amau’ behbehin Josef minamte ahi hi. Amau’ behbehin Benjamin minamte in: Bela pan Bela behte ahi uh hi; Ashbel pan Ashbel behte ahi uh hi; Ahiram pan Ahiram behte ahi uh hi; Shefufam pan Shefufam behte ahi uh hi; Hufam pan Hufam behte ahi uh hi. Bela’ tapate in Ard leh Na-aman ahi uh hi: Ard pan Ard behte ahi uh hi; Na-aman pan Na-aman behte ahi uh hi. Hihte in amau’ behbehin Benjamin minamte ahi hi; amah mi a phazah in tul sawmli leh tulnga leh za guk ahi hi. Hihte in amau’ behbehin Dan minamte ahi hi: Shuham pan Shuham behte ahi uh hi. Hihte in amau’ behbehin Dan minamte ahi uh hi. Amau mi a phazah tawh kizui-in Shuham minamte khempeuh in tul sawmguk leh tulli leh zali ahi hi. Amau’ beh behin Asher minamte in: Imnah pan Imnah behte ahi uh hi; Ishvi pan Ishvi behte ahi uh hi; Beriah pan Beriah behte ahi uh hi. Beriah minamte in: Heber pan Heber behte ahi uh hi; Malkhiel pan Malkhiel behte ahi uh hi. Asher’ tanu’ min in Serah ahi hi. Hihte in amau mi a phazah tawh kizui-in Asher minamte hi a, tul sawmnga leh tulthum leh zali ahi hi. Amau’ behbehin Naftali minamte in: Jahze-el pan Jahze-el behte ahi uh hi; Guni pan Guni behte ahi uh hi; Jezer pan Jezer behte ahi uh hi; Shillem pan Shillem behte ahi uh hi. Hihte in amau’ beh beh-in Naftali minamte ahi hi, amau mi a phazah in tul sawmli leh tul nga leh zali ahi hi. Hih in Israel mi a phazah hi a, tul zaguk leh tulkhat leh za sagih leh sawmthum ahi hi. Topa in Moses kiangah, “Min a phazah tawh kizui-in hih mite tungah luah dingin leitang kihawm ding hi. Minam a tamte tungah gamh a tam na pia ding a, minam tawmte tungah gamh a tawm na pia ding hi; minam khempeuh a mi phazah tawh kizui-in gamh kipia ding hi. Ahih hangin leitang pen aisaanna tawh kihawm ding hi; amau’ beh min tawh kizui-in amaute in luah ding uh hi. Aisaanna tawh kizui-in a tam a tawmte a gamh uh kihawmsak ding hi,” a ci hi. Hihte in amau’ behbeh-in a kisim Levi minamte ahi uh hi: Gershon pan Gershon behte ahi uh hi; Kohath pan Kohath behte ahi uh hi; Merari pan Merari behte ahi uh hi. Hihte in Levi minamte ahi uh hi: Libni behte, Hebron behte, Mahli behte, Mushi behte leh Korah behte ahi uh hi. Kohath in Amram’ pa ahi hi. Amram’ zi a min in Levi sung pan Izipt gamah a suak ahi Levi’ tanu Jokhebed ahi hi; tua nu in Amram tawh Aaron leh Moses leh a sanggamnu uh Miriam nei hi. Aaron in ta Nadab, Abihu, Eleazar, leh Ithamar nei hi. Ahih hangin Nabad leh Abihu pen amaute in Topa mai-ah mei siangtho lo a piak lai-un si uh hi. Pasal peuhmah kha khat pan a tungsiah, amau sung pan a kisimte in tul sawmnih leh tulthum ahi hi; bang hang hiam cih leh Israel mite lakah amaute gamh kipia lo ahih manin Israel mite lakah amaute kisim khawm lo hi. Jerikho nai Jordan kiang Moab leizangah Israel mite a sim Moses leh siampi Eleazer mah in a sim mite in hihte ahi uh hi. Ahih hangin Sinai gam lakah Israel mite a sim Moses leh siampi Aaron in a simte lakah hihte khat zong kihel lo hi. Bang hang hiam cih leh Topa in amaute thu a genna ah, “Amaute gam lakah si ding uh hi,” a ci hi. Jefunneh’ tapa Kaleb leh Nun’ tapa Joshua lo buang amaute khat beek om nawn lo hi. Tua ciangin Josef tapa sung panin Manasseh’ tapa Makhir, Makhir’ tapa Gilead, Gilead’ tapa Hefer, Hefer’ tapa Zelofehad, Zelofehad’ tanute a nai-ah hong pai uh hi. Ama tanute’ minte in: Mahlah, Noah, Hoglah, Milkah, leh Tirzah ahi hi. Amaute, Moses mai leh siampi Eleazer mai leh makaite mai leh mihonte khempeuh mai, kikhopna buk kongah ding uh a, “Ka pa uh gam lakah a si hi; Korah tawh kipawlin Topa ’ langah a kikaikhawm tawm mihonte lakah amah kihel lo hi; ahih hangin ama khialhna hangin si hi; amah in tapa nei lo hi. Amah in tapa a neih loh man bekin bang hangin a beh sung panin ka pa uh min mangthang ding ahi hiam? Ka pa uh’ sanggamte lakah kote neihsa hong pia un,” a ci uh hi. Moses in Topa mai-ah amau’ thu gen hi. Topa in Moses kiangah, “Zelofehad’ tanute’ a thugen man hi; amau pa’ sanggamte lakah gamh neihsa amaute tungah na pia ding a, amau’ pa gamh amaute tungah na tung sak ding hi. Israel mite tungah hih bangin na gen ding hi: ‘Pasal khat si-in, tapa a neih kei leh, a tanu ama gamh na luah sak ding uh hi. Amah in tanu a neih kei leh, ama gamh a sanggam pasalte tungah na tung sak ding uh hi. Amah in sanggam pasal a neih kei leh, ama gamh ama pa’ sanggam pasalte tungah na pia ding uh hi. Ama pa in sanggam pasal a neih kei leh, ama gamh ama innkuan tawh a kinai ama behpa’ tungah na pia ding a, amah in tang ding hi. Topa in Moses a thupiak bangin hih in Israel mite tungah thukham leh ngeina kip hi ding hi,’ ci in,” a ci hi. Topa in Moses kiangah, “Hih Abarim mual tungah paito in la, Israel mite tungah ka piak leitang en in. Na muh khit ciangin na sanggampa Aaron mah bangin nang zong na mite kiangah hong kigawm ding hi; bang hang hiam cih leh mi honpite a kitot lai-un tui phual-ah keimah sian’thosak ding hunin Zin gam lakah keima thu nong lehpan’ hi,” a ci hi. (Hihte in Zin gamlak, Kadesh gam Meribath tui-a thu piangte ahi hi.) Moses in Topa kiangah, - “ Topa ’ mihonte a cing nei lo tuute a bat loh nadingin amaute’ mai-ah pai khia-in amaute mai-ah a tum ding, amaute paikhiatpihin amaute a ciahpih ding, mihonte a uk dingin, Topa, mi khempeuh tungah nuntakna a pia Pasian ahi nangmah in mi khat seh in,” a ci hi. Topa in Moses kiangah, “Nun’ tapa Joshua, siamna a nei mipa la in la, ama tungah na khut nga in; siampi Eleazar leh mihon khempeuh mai-ah amah na ding sak ding a, amaute’ muhna ah amah za na pia ding hi. Israel mihon khempeuh in ama thu a man’ theih nadingin thuneihna pawl khat amah na guan ding hi. Siampi Eleazar’ mai-ah amah ding ding a, amah in Topa mai-ah Urim thukhenna tawh thu dotsak ding hi; amah leh amah tawh a om Israel mi khempeuh, mihon buppi, ama thu tawh pusuak ding uh a, ama thu mah tawh sungtum ding uh hi,” a ci hi. Topa in amah a thupiak bangin Moses gamta hi; amah in Joshua la-in siampi Eleazar leh mihon buppi mai-ah dingsak a, amah in ama tungah a khutte nga-in, Topa in Moses’ tungah a gen bangin amah za pia hi. Topa in Moses kiangah, “Israel mite thu pia in la, amaute tungah, ‘Keimah biakna, mei tawh kihal keimah hong kibiakna an, a gim namtui keima aa, a hunin kei tungah nong piak ding uh phawk un,’ ci-in gen in. Amaute tung a, hih in Topa tungah na piak ding uh mei tawh kihal biakna ahi hi; a sit bang lo kum khat a pha tuuno nih, tatsat loin biak piakna-in ni simin na pia ding uh hi. Tuuno khat zingsangin na pia ding uh a, tuuno khat pen nitakin na pia ding uh hi; an tawh biakna-in a kisatzan sathau thawl khat sehli suah sehkhat tawh a kibawl annel seu khat sehsawm suah sehkhat zong na pia ding uh hi. Tua in Topa tungah mei tawh kihal biakna, a gim namtui dingin Sinai Mual ah a kikipsak, a kitatsat lo meihal biakna ahi hi. Leenggahzu tawh a biakna pen tuuno khat ciangin thawl khat sehli suah sehkhat hi ding hi; Topa ’ tungah leenggahzucil tawh biakna pen siangtho munah na sung ding uh hi. A tuuno khat nitakin na pia ding uh hi; zingsang a, an tawh biakna leh a leenggahzu tawh biakna mah bangin, mei tawh kihal biakna, Topa tungah a gim namtui-in na pia ding uh hi. “Sabbath ni-in a sit bang lo kum khat a pha tuuno nih leh an tawh biakna-in sathau tawh a kibawl annel seu khat sehsawm suah sehnih leh a leenggahzu tawh biakna hi ding hi: hih in, tatsat loin meihal biakna leh a leenggahzu tawh biaknate banah sabbath simin meihal biakna ahi hi. “Kha simin a ni masa ni-in Topa tungah meihal biakna na pia ding uh hi: bawngtalno nih, tuutal khat; a sit bang lo kum khat a pha tuuno a pa sagih hi ding hi; bawngtal khat ciangin an tawh biakna-in sathau tawh a kibawl annel seu sehsawm suah sehthum zong hi ding hi; a tuutal khat ciangin an tawh biakna-in sathau tawh a kibawl annel sehsawm suah sehnih hi ding hi; tuuno khat adingin an tawh biakna-in sathau tawh a kibawl annel sehsawm suah sehkhat ciat hi ding hi; a gim namtui meihal biakna, Topa tungah mei tawh kihal biakna ding ahi hi. Leenggahzu tawh a biaknate in, bawngtal khat ciangin leenggahzu thawl lang, tuutal khat ciangin leenggahzu thawl khat sehthum suah sehkhat tuuno khat ciangin leenggahzu thawl khat sehli suah sehkhat hi ding hi; hih in kum khat sunga om kha simin meihal biakna ahi hi. Topa tungah khialhna hanga biakna-in keel a pa khat zong hi ding hi; tua pen a kitatsat loin meihal biakna leh a leenggahzu tawh biaknate banah kipia ding hi. “Kha masa a nisawm leh nili ni in Topa ’ Paisan Pawi ni ahi hi. Tua kha a ni sawm leh ni nga ni in pawi ni ahi hi; ni sagih sung silngo sawhloh anlum kine ding hi. A ni masa ni-in a siangtho kikhopna khat om ding hi: leitung nasep na sem kei ding uh a, mei tawh kihal biakna, meihal biakna Topa tungah na pia ding uh hi: bawngtalno nih, tuutal khat, leh kum khat a pha tuuno a pa sagih hi ding hi; tuate a sit bang lo a hih ding thei ta un; sathau tawh a kibawl annel ahi an tawh a biaknate zong hi ding hi; bawngtal khat ciangin seu khat sehsawm suah sehthum, leh tuutal khat ciangin seu khat sehsawm suah sehnih na pia ding uh hi; tuuno sagihte khat ciangin sehsawm suah sehkhat mah na pia ding uh hi; note adingin kilemna bawl nadingin khialhna hanga biakna-in keel a pa khat zong hi ding hi. Meihal biak nading ahi zingsanga meihal biakna banah tatsat lo-a biakna-in hihte na pia ding uh hi. Tua mah bangin mei tawh kihal an tawh biakna ahi, Topa tungah a gim namtui, ni sagih sung ni simin na pia ding uh hi; tua pen a kitatsat lo-a meihal biakna leh leenggahzu tawh a biaknate banah kipia ding hi. A ni sagih ni-in a siangtho kikhopna khat na nei ding uh hi; leitung nasep na sem kei ding uh hi. “Na nipi-kal pawi hunun Topa tungah an thak tawh biakna na piak hun uh anpal ni-in a siangtho kikhopna khat na nei ding uh hi; leitung nasep na sem kei ding uh a, meihal biakna, Topa tungah a gim namtui na pia ding uh hi: bawngtalno nih, tuutal khat, kum khat a pha tuuno a pa sagih hi ding hi; sathau tawh a kibawl ahi an tawh a biak nadingin zong, bawngtal khat ciangin seu khat sehsawm suah sehthum, tuutal khat ciangin sehsawm suah sehnih, tuuno sagihte khat ciangin sehsawm suah sehkhat na pia ding uh hi; note adingin kilemna bawl nadingin keel a pa khat zong na pia ding uh hi. A kitatsat lo-a meihal biakna leh an tawh a biaknate banah tuate leh leenggahzu tawh a biakna na pia ding uh hi. Tuate a sit bang lo a hih ding thei ta un. “A kha sagihna a ni masa ni-in kikhopna siangtho khat na nei ding uh hi; leitung nasep na sem kei ding uh hi. Tua pen note in peengkul na tum ni ding uh hi a, meihal biakna, Topa tungah a gim namtui na pia ding uh hi: bawngtalno khat, tuutal khat, a sit bang lo kum khat a pha tuuno a pa sagih hi ding hi; bawngtal tawh piak dingin sathau tawh a kibawl annel ahi an tawh a biaknate seu khat sehsawm suah sehthum, tuutal tawh sehsawm suah sehnih, leh tuuno sagihte khat ciangin sehsawm suah sehkhat hi ding hi; note adingin kilemna bawl nadingin khialhna hanga biakna-in keel a pa khat zong hi ding hi; a khasim meihal biakna leh an tawh a biakna, leh a kitatsat lo-a meihal biakna leh an tawh a biakna, leh tuate ading ngeina a om bangin a gim namtui, Topa tungah mei tawh kihal biakna ahi leenggahzu tawh a biaknate banah hi ding hi. “Hih kha sagihna a ni sawm ni-in a siangtho kikhopna khat na nei ding uh a, nomau na kigawt tawm ding uh hi; na na sem kei ding uh a, Topa tungah a gim namtui meihal biakna na pia ding uh hi: bawngtalno khat, tuutal khat, kum khat a pha tuuno a pa sagih hi ding hi; tuate in note’ muhna ah a sit bang lo hi ding hi; sathau tawh a kibawl annel tawh a biaknate in, bawngtal tawh piak dingin seu khat sehsawm suah sehthum, a tuutal tawh sehsawm suah sehnih, tuuno sagihte khat ciangin sehsawm suah sehkhat hi ding hi: kilem nadingin khialhna hanga biakna leh a kitatsat lo-a meihal biakna leh an tawh a biakna leh leenggahzu tawh a biaknate banah khialhna hanga biakna-in keel a pa khat zong hi ding hi. “A kha sagihna ni sawm leh ni nga ni-in a siangtho kikhopna khat na nei ding uh hi; leitung nasep na sem kei ding uh a, Topa adingin ni sagih sung pawi na kham ding uh hi; meihal biakna, Topa tungah a gim namtui, mei tawh kihal biakna, bawngtalno sawm-le-thum, tuutal nih, kum khat a pha tuuno a pa sawm-le-li na pia ding uh hi; tuate a sit bang lo hi ding hi: sathau tawh a kibawl annel ahi an tawh a biaknate in, bawngtal sawm-le-thumte khat ciangin seu khat sehsawm suah sehthum, tuutal nihte khat ciangin sehsawm suah sehnih, leh tuuno sawm-le-lite khat ciangin sehsawm suah sehkhat hi ding hi; a kitatsat lo-a meihal biakna, an tawh a biakna leh leenggahzu tawh a biaknate banah khialhna hanga biakna-in keel a pa khat zong hi ding hi. “A ni nih ni-in bawngtalno sawm-le-nih, tuutal nih, a sit bang lo kum khat a pha tuuno a pa sawm-le-li, ngeina kip om bangin a phazah tawh kizui-in bawngtalte, tuutalte, leh tuunote tawh piak dingin an tawh a biakna leh leenggahzu tawh a biaknate zong hi ding hi; a kitatsat lo-a meihal biakna leh an tawh a biakna leh leenggahzu tawh a biaknate banah khialhna hanga biakna-in keel a pa khat zong hi ding hi. “A ni thum ni-in bawngtal sawm-le-khat, tuutal nih, a sit bang lo kum khat a pha tuuno a pa sawm-le-li, ngeina kip om bangin a phazah tawh kizui-in bawngtalte, tuutalte, leh tuunote tawh piak dingin an tawh a biakna leh leenggahzu tawh a biaknate zong hi ding hi; a kitatsat lo-a meihal biakna leh an tawh a biakna leh leenggahzu tawh a biaknate banah khialhna hanga biakna-in keel a pa khat zong hi ding hi. “A ni li ni-in bawngtal sawm, tuutal nih, a sit bang lo kum khat a pha tuuno a pa sawm-le-li, ngeina om bangin a phazah tawh kizui-in bawngtalte, tuutalte, leh tuunote tawh piak dingin an tawh a biakna leh leenggahzu tawh a biaknate zong hi ding hi; a kitatsat lo-a meihal biakna, an tawh a biakna, leh leenggahzu tawh a biaknate banah khialhna hanga biakna-in keel a pa khat zong hi ding hi. “A ni nga ni-in bawngtal kua, tuutal nih, a sit bang lo kum khat a pha tuuno a pa sawm-le-li, ngeina kip om bangin a phazah tawh kizui-in bawngtalte, tuutalte, tuunote tawh piak dingin an tawh a biakna leh leenggahzu tawh a biaknate zong hi ding hi; a kitatsat lo-a meihal biakna leh an tawh a biakna leh leenggahzu tawh a biaknate banah khialhna hanga biakna-in keel a pa khat zong hi ding hi. “A ni guk ni-in bawngtal giat, tuutal nih, a sit bang lo kum khat a pha tuuno a pa sawm-le-li, ngeina kip om bangin a phazah tawh kizui-in bawngtalte, tuutalte, leh tuunote tawh piak dingin an tawh a biakna leh leenggahzu tawh a biaknate zong hi ding hi; a kitatsat lo-a meihal biakna, an tawh a biakna, leh leenggahzu tawh a biaknate banah khialhna hanga biakna-in keel a pa khat zong hi ding hi. “A ni sagih ni-in bawngtal sagih, tuutal nih, a sit bang lo kum khat a pha tuuno a pa sawm-le-li, ngeina kip om bangin a phazah tawh kizui-in bawngtalte, tuutalte, leh tuunote tawh piak dingin an tawh a biakna leh leenggahzu tawh a biaknate zong hi ding hi; a kitatsat lo-a meihal biakna, an tawh a biakna, leh leenggahzu tawh a biaknate banah khialhna hanga biakna-in keel a pa khat zong hi ding hi. “A ni giat ni-in a zahtakhuai kikhopna na nei ding uh hi; leitung nasep na sem kei ding uh hi, meihal biakna, mei tawh kihal biakna, Topa tungah a gim namtui na pia ding uh hi: bawngtal khat, tuutal khat, a sit bang lo kum khat a pha tuuno a pa sagih, leh ngeina kip om bangin bawngtal, tuutal, leh tuunote a phazah tawh kizui-in piak khawm dingin an tawh a biakna leh leenggahzu tawh a biaknate hi ding hi; a kitatsat lo-a meihal biakna leh an tawh biakna leh leenggahzu tawh a biaknate banah khialhna hanga biakna-in keel a pa khat zong hi ding hi. “Na thuciam biak piakna uh leh ut thu-a na biak piaknate uh banah na meihal biaknate, leh an tawh na biaknate, leh leenggahzu tawh na biaknate, leh thunuam-a na biak nadingun a kiseh na pawi hunte uhah hihte Topa ’ tungah na pia ding uh hi,” a ci hi. Topa in Moses a thupiaksa bangin Moses in Israel mite tungah a thu a kimin a gen hi. Moses in Israel minam lutangte tungah, “Hih in Topa ’ thupiak ahi hi. Mi khat in Topa tungah thuciamna a ciam ciang ahi a, amah in a zuih dingin kiciamna a bawl ciang ahi zongin, amah ciampel lo ding hi; ama kam sung panin a gingkhiate khempeuh tawh kizui-in gamta ding hi. Tua ahih kei leh, numei khat in Topa tungah thuciamna bawlin, a pa’ inn sungah nungakin a om sungin kamciamna tawh amah kikhih tawm a, amah in a zuih dingin thuciamna leh kamciamnate a pa in za napi-in ama tungah bangmah a cih kei leh, ama thuciamna khempeuh kip ding a, amah kikhih tawmna kamciamna khempeuh kip ding hi. Ahih hangin a pa in a zak ni-in a lungkim lohna tua nu’ tungah a gen leh, tua nu’ thuciamna, amah a kikhih tawmna kamciamnate khat zong kip lo ding hi; a pa in nial ahih manin Topa in tua nu a maisak ding hi. Tua numei, pasalkhat tawh kiteng a, amah a kikhih tawmna thuciamna ahi a, ngaihsun lopi-in a kam paunate ahi zongin a pasal in za a, a zak ni-in tua nu’ tungah bangmah a cih kei leh tua numei’ thuciamna kip ding a, amah a kikhih tawmna a kamciam kip ding hi. Ahih hangin, a pasal in tua thu a zak ni-in a lungkim lohna a gen leh, amah a kikhih tawmna ahi numei’ tunga om kamciamna leh ngaihsun lopi-in a kam paunate amah in phiatsak ding hi; Topa in tua nu maisak ding hi. Ahih hangin meigong numei’ thuciamna ahi a, a kima numei’ aa ahi zongin, amah a kikhih tawmna peuhmah ama tungah kip ding hi. Amah in pasal’ inn sungah thuciam ahi a, kiciamna khat tawh kam ciamin amah a kikhih tawmna ahi zongin, a pasal in za a, tua nu’ tungah bangmah ci loin, a nial kei leh, ama thuciamna khempeuh kip ding a, amah a kikhih tawmna kamciamna khempeuh zong kip ding hi. Ahih hangin a pasal in tua thute a zak ni-in a phiatsak leh, ama thuciamna tawh kisai-in a kam pana a gingkhia peuhmah ahi a, amahmah a kamciamna tawh kisaite ahi zongin kip lo ding hi: a pasal in tuate phiatsak ahih manin Topa in tua nu maisak ding hi. Thuciamna khatpeuh ahi a, amah a kigawt tawm nadingin a kikhihna kamciam khatpeuh ahi zongin, a pasal in kipsak thei, a pasal in phiatsak thei hi. Ahih hangin a pasal in tua ni-a kipanin tua nu’ tungah bangmah a cih kei leh, amah in tua nu’ tunga om a thuciam khempeuh hita leh a kamciam khempeuh hita leh a kipsak ahi hi; amah in tuate a zak ni-in ama tungah bangmah ci lo ahih manin tuate a kipsak ahi hi. Ahih hangin amah in tuate a zak khit ciangin a nung phiat leh, amah in tua nu’ mawhna pua ding hi,” a ci hi. Hihte in, pasal leh a zi, leh a pa inn sungah nungakin a om lai takin a pa leh a tanu kikalah a om, Topa in Moses a thupiak ngeinate ahi hi. Topa in Moses kiangah, “Israel mite’ phu Midiante tungah la in; tua khit ciangin na mite kiangah nang hong kigawm ding hi,” a ci hi. Tua ciangin Moses in mite kiangah, “Midian tungah Topa ’ phulakna a sem ding, Midiante a do dingin note lak panin mi pawl khat galhiam guan un. Israel minamte nam khat panin tul khat ciat gal sungah na kuansak ding uh hi,” a ci hi. Tua ahih ciangin Israel tul tampi sung pan minam khatah tul khat, tulsawm leh tulnih galdo dingin galhiam kiguan hi. Moses in amaute’ minam khat panin tul khat ciat leh biakinn nate leh pataukoh nadingin peengkulte siampi Eleazar’ tapa Finehas kengsakin gal sungah kuansak khawm hi. Topa in Moses a thupiak bangin Midiante do uh a, pasal khempeuh that uh hi. Amaute in midangte leh Midian kumpite a thatna uhah Midian kumpi ngate Evi, Rekem, Zur, Hur leh Reba that uh hi; amaute in Beor’ tapa Balaam zong namsau tawh that uh hi. Israel mite in Midian nupite leh a tate uh man uh hi; amaute in a bawngte, a tuuhonte khempeuh leh a na khempeuh uh laksak uh hi. Amau’ ten’na a khuapite khempeuh uh leh a giahphual khempeuhte uh mei tawh halsak uh a, a matsa khempeuh uh, mihing ganhing ciahpih khin uh hi. Tua ciangin amaute in Jerikho nai, Jordan kiang, Moab leizang a, a giahphual uh Moses leh siampi Eleazar leh Israel mihonte kiangah a galmatte uh leh a na matte uh tun’pih uh hi. Moses leh siampi Eleazar leh mihon makaite khempeuh giahphual pua-ah a dawn dingin paikhia uh hi. Galdona panin a hong ciah mi tul tampi a ukte leh mi za tampi a uk galkap uliante tungah Moses heh hi. Moses in amaute tungah, “Numei khempeuh hing khawi na hi uh hiam? En un, hihte in Balaam’ lamlahna tawh Peor ah Topa tungah Israel mite zuautat sak hi, tua ahih manin Topa ’ mihonpite lakah gimna hong tung hi. Tua ahih ciangin tu-in, naupangte lakah pasal peuhmah that un la, lupkhopna tawh pasal a theisa numei peuhmah that un. Ahih hangin lupkhopna tawh pasal a thei nai lo nungaknote khempeuh note adingin kem un. Giahphual pua-ah ni sagih sung om un; note lakah mi khatpeuh peuh a thatte leh a kithatsa a lawng peuhmahte in, ni thum ni leh ni sagih ni-in note leh na galmatte uh na kisian’ suah ding uh hi. Puan khempeuh, savun tawh a kibawl na khempeuh, keel mul tawh a kibawl na khempeuh, leh sing tawh a kibawl na khempeuh na sian’suah ding uh hi,” a ci hi. Siampi Eleazar in galdona ah a kuan galkapte tungah: “ Topa in Moses a thupiak thukham ngeina in hih ahi hi: kham, ngun, sumngo, sik, dal, leh haknaw, mei a do zo peuhmahte bek mei-ah na hal ding uh a, a siang hi ding hi. Ahi zongin nitna sian’suahna tui tawh kisian’suah lai ding hi; mei a do zo lo peuhmahte, tui-ah na sawp ding uh hi. A ni sagih ni-in na puante uh na sawp ding uh a, note na siangtho ding uh hi; tua khit ciangin giahphual ah nong ciah ding uh hi,” a ci hi. Topa in Moses kiangah, “Nang leh siampi Eleazar leh mihonte’ beh lutangte in gal sunga a kiman mihing leh ganhingte sim un; galdo dingin a kuankhia galhangte leh mihonte khempeuh tungah gal sunga a kimante khennih suahin a kikimin hawm sak in. Galdo dingin a kuankhia galkapte’ tung panin mite, bawngtalte, late, leh tuuhonte za nga ciangin Topa ’ siah dingin khat ciat la in; a lang a ngah sung panun la in la, Topa tungah biakna-in siampi Eleazar tungah pia in. A lang Israel mite in a ngah sung panin mite, bawngtalte, late, tuuhonte, ganhing khempeuh, sawmnga ciangin khat ciat la in la, Topa biakbuk a kem Levi mite tungah pia in,” a ci hi. Topa in Moses a thupiak bangin Moses leh siampi Eleazar in hih uh hi. Tu-in galkapte in a lak gal sunga a mat uh a om lai a kihawm dingte in: tuu tul zaguk leh tul sawmsagih leh tulnga, bawng tul sawmsagih leh tulnih, la tul sawmguk leh tul khat, leh lupkhopna tawh pasal a thei nailo numei a vekpi-in mi tul sawmthum leh tulnih ahi hi. A lang ahi, gal sunga a kuankhia mite’ ngah in tuu tul za thum leh tul sawmthum leh tul sagih leh za nga hi a, Topa ’ tuu-siah pen tuu za guk leh sawmsagih leh nga ahi hi. Bawngte tul sawmthum leh tulguk hi a, tua sung panin Topa ’ siah sawmsagih leh nih ahi hi. Late tul sawmthum leh za nga hi a, tua sung panin Topa ’ siah sawmguk leh khat ahi hi. Mi tul sawm leh tulguk hi a, tua sung panin Topa ’ siah mi sawmthum leh nih ahi hi. Topa in Moses a thupiak bangin, Moses in siampi Eleazar tungah Topa biak nading siah pia hi. Galdo dingin a kuankhia mite tung panin Moses in a khenkhiat, Israelte in a lang a ngah— mihonte in a lang a ngah teng tuu tul za thum leh tul sawmthum leh tul sagih leh za nga, bawng tul sawmthum leh tulguk, la tul sawmthum leh za nga, mi tul sawm leh tul guk ahi hi— Moses in Israelte in a ngah a lang sung panin mihing leh ganhing sawmnga ciangin khat ciat la-in, Topa in Moses a thupiak bangin, Topa ’ biakbuk a kem Levi mite’ tungah pia hi. Tua ciangin galkap tul tampite tunga uliante ahi, tul tampi a ukte leh za tampi a ukte, Moses kiangah hong pai uh a, Moses kiangah, “Kote’ ukna nuai-a a om galkapte, na nasem kote in ka sim khin uh a, kote kiang panin mi khat zong a peelhem om lo hi. Kote in Topa mai-ah ko adingin kilemna bawl nadingin Topa biakna kham tawh a kibawl nate, banbuhte leh taute, min gelhna zungbuhte, bilbahte, leh khite ka muh ciat uh kong tun’ pih zo uh hi,” a ci hi. Moses leh siampi Eleazar in amaute tung panin na-a a kibawl khamte sang uh hi. Tul tampi a ukte leh za tampi a ukte’ tung panin a kingah, Topa tungah biakna-in a piak uh khamte khempeuh in shekel tul sawm leh guk leh za sagih leh sawmnga pha hi. (Gal sunga a kuan mite in amau ading ciat la uh hi). Moses leh siampi Eleazar in tul tampi leh za tampite a uk mite tung panin khamte sang a, Israel mite adingin Topa mai-ah phawk tawntungna-in kikhopna buk sungah paipih hi. Tu-in Reuben minamte leh Gad minamte in ganhing hon tampi nei uh hi; amaute in Jazer gam leh Gilead gam mu uh a, en in: a gam in gan gam ahi hi. Tua ahih ciangin Gad minamte leh Reuben minamte pai-in Moses leh siampi Eleazar leh mihon makaite kiangah, “Ataroth, Dibon, Jazer, Nimrah, Heshbon, Elealeh, Sebam, Nebo, leh Beon, Topa in Israel mihonte’ mai-ah a suksiat gamte in gan gam hi a; na nasem kote in gam ka nei uh hi,” a ci uh hi. “Note muhna ah maipha ka ngah uh leh, na nasemte in a neih dingin hih gam hong pia un; Jordan kantanin kote hong paipih kei un,” amaute in a ci uh hi. Ahih hangin Moses in Gad minamte leh Reuben minamte tungah, “Note hih lai takah tu-tu in, na sanggamte uh gal sungah kuan ding ahi hiam? Topa in amaute a piakna gamah a pai nading uhah Israel mite bang hangin lungkiasak ding na hi uh hiam? Na pu na pate uh Kadesh-barnea panin gam vel dingin ka sawl lai-in zong tu-a mah a bang uh hi. Bang hang hiam cih leh amaute Eshkol Kuamah paito-in tua gam a muh uh ciangin, Topa in amaute a piakna gamah a pai nading uhah Israel mite lung kiasak uh hi. Tua ni-in Topa ’ hehna so a, amah kiciamin, ‘Amaute in kei hong zui taktak lo uh ahih manin Izipt gam pan a paikhia mite kum sawmnih panin a tungsiah peuhmah khat beek in Abraham, Isaak, leh Jakob tungah piak dinga ka ciamsa gam mu lo ding uh hi; Kenaz mi Jefunneh’ tapa Kaleb leh Nun’ tapa Joshua in Topa zui taktak uh ahih manin a mu ding uh hi,’ a ci hi. Israel mite tungah Topa ’ hehna so a, Topa’ muhna ah siatna a gamta tua khang mi khempeuh a bei mateng kum sawmli sung gam lakah amaute vak kawikawi sak hi. En un, Israel mite tungah Topa ’ heh luatna a khangsak to lai dingin, khialhna’ tate, na pu na pate uh’ tangin hong khang na hi uh hiam! Bang hang hiam cih leh amah zuihna panin note na pial uh leh amah in gam lakah amaute nusia kik ding hi; note pen hih mi khempeuh a susia na hi ding uh hi,” a ci hi. Tua ciangin amaute ama kiang nai-ah hong pai-in, “Hih lai-ah ka tuute uh adingin tuu-khawkte bawlin, ka zi ka tate uh adingin khua ka sat ding uh a, ahih hangin kote in hiam tawi-in amau’ munah Israel mite ka tun’pih mateng uh amau mai-ah a pai dingin ka kiging ding uh hi; tua kikal sungin hih gam sungah a teeng mite kiang pan kihut nadingin ka zi ka tate uh khuapi muanhuai sungah a na om ding uh kisam hi. Israel mite in amau’ luah ding ciat a luah khit matengun ka inn uhah ka ciah kei ding uh hi. Bang hang hiam cih leh Jordan gal khat leh tua ban siah-ah amaute tawh ka luah khawm kei ding uh hi; bang hang hiam cih leh Jordan hih lam gal nisuahna lam ko’ luah hong suak hi,” a ci hi. Tua ahih ciangin Moses in amaute kiangah, “Note, tu-a bangin gamta-in, galdo dingin Topa mai-ah a pai dingin hiam la-in, Topa in a mai panin a galte a hawlkhiat matengin hiam a tawi note khempeuh in ama mai-ah Jordan kantanin, Topa mai-ah leitang a kilak matengin na om uh leh; note ciahkikin Topa leh Israel nasep ding uh panin na peng ding uh hi; hih leitang in Topa mai-ah note neihsa hi ding hi. Ahih hangin note tua bangin na gamtat kei uh leh, en un, Topa ’ tungah a khial khin na hi uh hi; na khialhna un note hong sulzuih ding thei tel ta un. Na zi na tate uh adingin khuapite sat un la, na tuute uh adingin tuu-khawkte bawl un; na ciamsa bangun gamta un,” a ci hi. Gad minamte leh Reuben minamte in Moses kiangah, “Ka topa’ thupiak bangin na nasemte ka gamta ding uh hi. Ka tate uh, ka zite uh, ka tuuhonte uh leh ka ganhing khempeuhte uh Gilead gam khuapite ah na om ding uh hi; ka topa in na thupiak bangin na nasemte, galdo ding a, hiam tawi khempeuh, galdo dingin Topa mai-ah galkah ding uh hi,” a ci uh hi. Tua ahih ciangin Moses in amaute’ thu tawh kisai-in siampi Eleazar tung leh Nun’ tapa Joshua tung leh Israel minam beh lutang khempeuh tungah thu pia hi. Moses in amaute tungah, “Gad minamte leh Reuben minamte ahi, Topa mai-ah galdo dingin hiam a tawi khempeuh in note tawh Jordan kantanin note mai-ah tua gam a kizawh leh, Gilead gam a neih dingun amaute tungah na pia ding uh hi; ahih hangin hiam tawi-in note tawh hong galkah kei uh leh zong, amaute in Kanaan gam sungah note lakah ngah a nei veve ding uh hi,” a ci hi. Gad minamte leh Reuben minamte in dawng uh a, “Na nasemte tungah Topa in a gensa bangin kote ka gamta ding uh hi. Hiam tawi-in Topa mai-ah Kanaan gam sungah ka pai ding uh a, kote’ luah ahi ka neihsa uh Jordan gal khatah kote’ aa mahin na kip ding hi,” a ci uh hi. Moses in Gad minamte leh Reuben minamte leh Josef tapa Manasseh minam a langte tungah, Amor kumpi Sihon’ gam leh Bashan kumpi ahi Og’ gam, a leitang leh a khuapite a gam sung tawh, a gam sunga leitang tunga om khuapi khempeuh pia hi. Gad minamte in khuapi muanhuai Dibon, Ataroth, Aroer, Atoroth-shofan, Jazer, Jogbehah, Bethnimrah, Bethharan-te satin tuute adingin tuu-khawkte bawl uh hi. Reuben minamte in Heshbon, Elealeh, Kiriathaim, Nebo, leh Baalmeon (a minte khel ding), leh Sibmah khuapite sat uh hi; amau’ satsa khuapite a min thak phuak uh hi. Manasseh tapa ahi Makhirte beh, Gilead ah pai-in va la uh a, tua sunga om Amor mite suankhia uh hi. Moses in Manasseh tapa Makhir-te beh tungah Gilead pia-in, tua lai-ah amaute teeng uh hi. Manasseh minam sung panin Jair pai-in amau’ khua neute va la a, tuate Havvothjair phuak hi. Nobah pai-in Kenath leh a khua neute va la a, ama min tamin Nobah phuak hi. Hihte in Moses leh Aaron’ makaihna tawh Izipt gam panin a honin a paikhiat lai-un Israel mite’ giahphualte ahi hi. Moses in Topa ’ thupiakna tawh phual khat khit phual khat amau’ kipatna munte gelh hi; hihte in amau’ kipatna mun tawh kizui-in a giahphualte ahi hi. A kha masa, tua kha ni sawm leh ni nga ni-in Remeses panin amaute ding khia uh hi; Paisan ni khat a zing ciangin Izipt mite khempeuh’ muhna ah gualzawhna tawh Israel mite paikhia uh a, Topa in amaute lakah a thah lup tacil khempeuh Izipt mite in a vui laitak uh ahi hi; amau’ pasiante tungah zong Topa in thukhenna bawl hi. Tua ahih ciangin Remeses panin Israel mite ding khia uh a, Sukkoth ah giahphual sat uh hi. Sukkoth panin amaute ding khia uh a, gam monga om Etham ah giahphual sat uh hi. Etham panin amaute ding khia uh a, Baalzefon nisuahna lama om Pihahiroth lamah kihei kik uh hi; amaute in Migdol mai-ah giahphual sat uh hi. Hahiroth mai panin amaute ding khia uh a, tuipi laizang kantanin gam lakah pai-in Etham gam lakah ni thum lam pai uh a, Marah ah giahphual sat uh hi. Marah panin amaute ding khia uh a, Elim tung uh hi; Elim ah cik tuikhuk sawm-le-nih leh nisuh kung sawmsagih om a, amaute in tua lai-ah giahphual sat uh hi. Elim panin amaute ding khia uh a, San tuipi gei-ah giahphual sat uh hi. San tuipi panin amaute ding khia uh a, Sin gam lakah giahphual sat uh hi. Sin gamlak panin amaute ding khia uh a, Dofkah ah giahphual sat uh hi. Dofkah panin amaute ding khia uh a, Alush ah giahphual sat uh hi. Alush panin amaute ding khia uh a, mite’ dawn ding tui a om lohna Refidim ah giahphual sat uh hi. Refidim panin amaute ding khia uh a, Sinai gam lakah giahphual sat uh hi. Sinai gamlak panin amaute ding khia uh a, Kibrothhattaavah ah giahphual sat uh hi. Kibrothhattaavah panin amaute ding khia uh a, Hazeroth ah giahphual sat uh hi. Hazeroth panin amaute ding khia uh a, Rithmah ah giahphual sat uh hi. Rithmah panin amaute ding khia uh a, Rimmonperez ah giahphual sat uh hi. Rimmonperez panin amaute ding khia uh a, Libnah ah giahphual sat uh hi. Libnath panin amaute ding khia uh a, Rissah ah giahphual sat uh hi. Rissah panin amaute ding khia uh a, Kehelathah ah giahphual sat uh hi. Kehelathah panin amaute ding khia uh a, Shefer Mual ah giahphual sat uh hi. Shefer Mual panin amaute ding khia uh a, Haradah ah giahphual sat uh hi. Haradah panin amaute ding khia uh a, Makheloth ah giahphual sat uh hi. Makheloth panin amaute ding khia uh a, Tahath ah giahphual sat uh hi. Tahath panin amaute ding khia uh a, Terah ah giahphual sat uh hi. Terah panin amaute ding khia uh a, Mithkah ah giahphual sat uh hi. Mithkah panin amaute ding khia uh a, Heshmonah ah giahphual sat uh hi. Heshmonah panin amaute ding khia uh a, Moseroth ah giahphual sat uh hi. Moseroth panin amaute ding khia uh a, Ben-ejaakan ah giahphual sat uh hi. Ben-ejaakan panin amaute ding khia uh a, Horhaggidgad ah giahphual sat uh hi. Horhaggidgad panin amaute ding khia uh a, Jotbathah ah giahphual sat uh hi. Jotbathah panin amaute ding khia uh a, Abronah ah giahphual sat uh hi. Abronah panin amaute ding khia uh a, Ezion-geber ah giahphual sat uh hi. Ezion-geber panin amaute ding khia uh a, (Kadesh ahi) Zin gam lakah giahphual sat uh hi. Kadesh panin amaute ding khia uh a, Edom gam mong Hor Mual-ah giahphual sat uh hi. Israel mite Izipt gam panin a paikhiat zawh uh a kum sawmli-na a kha ngana a ni masa ni-in Topa ’ thupiakna tawh Hor Mual tungah siampi Aaron paito-in tua lai-ah a si hi. Hor Mual-ah Aaron a sihin kum za leh kum sawmnih leh kumthum a pha hi. Kanaan gam sung Negeb gamah a teeng Kanaan mi Arad kumpipa in Israel mite’ hong paina thu za hi. Hor Mual panin amaute ding khia uh a, Zalmonah ah giahphual sat uh hi. Zalmonah panin amaute ding khia uh a, Punon ah giahphual sat uh hi. Ponun panin amaute ding khia uh a, Oboth ah giahphual sat uh hi. Oboth panin amaute ding khia uh a, Moab gam sung ahi Iyeabarim ah giahphual sat uh hi. Iyim panin amaute ding khia uh a, Dibongad ah giahphual sat uh hi. Dibongad panin amaute ding khia uh a, Almondiblathaim ah giahphual sat uh hi. Almondiblathaim panin amaute ding khia uh a, Nebo tun’ ma Abarim mualte-ah giahphual sat uh hi. Abarim mualte panin amaute ding khia uh a, Jerikho nai Jordan kiang Moab leizangah giahphual sat uh hi; Jordan kiang Bethjeshimoth panin Moab leizang sunga a om Abelshittim dongah amaute in giahphual sat uh hi. Jerikho nai Jordan kiang Moab leizangah Topa in Moses kiangah, “Israel mite tungah hih bangin gen in; Jerikho kantanin Kanaan gam na tun’ uh ciangin note mai panin tua gama teeng mi khempeuh na hawlkhia ding uh a, amau’ suang milimte khempeuh susia-in, a kisung amau’ milimte khempeuh na susia ding uh a, mual tunga a biaknate khempeuh uh na sumang ding uh hi; na neih dingun note tungah leitang hong pia khin ka hih manin note in leitang luahin tua tungah na teeng ding uh hi. Note in na minam uh tawh kizui-in aisaanna tawh leitang na luah ding uh hi; minam tamte tungah luahna a tam na pia ding a, minam tawmte tungah luahna a tawm na pia ding hi; mi khatpeuh ading ai a phatna peuhpeuh ama’ aa hi ding hi; na pate uh nam tawh kizui-in na luah ding uh hi. Ahih hangin note’ mai panin tua gam sunga teeng mite na hawlkhiat kei uh leh, na om sak laite uh note tungah na mittang uhah hong do, na pang uhah a hong sun lingte hong hi ding uh a, na ten’na gam uhah note hong gimsak ding uh hi. Amaute tunga hih dinga ka ngaihsut bangin note tungah kong hih ding hi, ci-in gen in,” a ci hi. Topa in Moses kiangah, “Israel mite thu pia in la, amaute tungah, Kanaan gamah na lut uh ciangin (hih in note’ luah dingin note hong kipia ding, Kanaan leitang a vekpi-in), na leitaw lam pang uh in Zin gamlak panin Edom pang teng hi ding a, leitaw lam na gamgi uh nisuahna lamah Ci Tuipi mong pan kipan ding hi; na gamgi uh Akrabbin mual leitaw lamah kawi-in Zin dong banin, Kadeshbarnea leitaw lamah pai ding hi; tua ciangin Hazaraddar lamah pai suakin Azmon dongah pai ding hi; gamgi in Azmon panin Izipt Lui lamah kawi-in Tuipi ah tawp ding hi. “Nitumna gamgi dingin Tuipi Lian leh a gei dung teng na nei ding uh hi; hih in nitumna lam na gamgi uh hi ding hi. “Hih in leilu lam na gamgi uh hi ding hi: Tuipi Lian panin Hor Mual dongah lam na ciamteh ding uh hi; Hor Mual panin Hamath tumna ciang dong na ciamteh ding uh a, gamgi in Zeadad dong ban ding hi; tua ciangin Zifron dongah gamgi kikhung ding a, a mong in Hazarenan ah tawp ding hi; hih in leilu lam na gamgi uh hi ding hi. “Nisuahna lam na gamgi uh Hazarenan panin Shefam dong na ciamteh ding uh hi; gamgi in Shefam panin Ain nisuahna lam Riblah dongah paisuk ding hi; gamgi paisuk lai-in nisuahna lamah Khinnereth tuipi liangko dong ban ding hi; Jordan dongah gamgi paisuk ding a, a mong in Ci Tuipi ah tawp ding hi. Hih in a kimkot-a gamgi a nei na leitang uh hi ding hi, ci-in gen in,” a ci hi. Moses in Israel mite thu pia-in, “Hih in minam kua leh minam langte tungah piak dingin Topa in a thupiak aisaana tawh na luah ding uh leitang ahi hi; bang hang hiam cih leh Reuben minamte a behbeh leh Gad minamte a behbehin amau’ luahna ngah khin zo uh a, Manasseh minam a langte in zong ngah khin zo hi; minam nihte leh minam langte in nisuahna lam Jerikho nai Jordan gal khatah amau’ luahna ngah khin zo uh hi,” a ci hi. Topa in Moses kiangah, “Hihte in luah dingin note’ tungah gam a hawm ding mite’ min ahi hi; siampi Eleazar leh Nun’ tapa Joshua ahi uh hi. Luah dingin gam a hawm dingin minam simah makai khat na la ding hi. Hihte in tua mite’ min ahi hi; Judah minam sung panin Jefunneh’ tapa Kaleb ahi hi. Simeon minam panin Ammihud’ tapa Shemuel ahi hi. Benjamin minam panin Khislon’ tapa Elidad ahi hi. Dan minam sung panin makai khat, Jogli’ tapa Bukki ahi hi. Josef tapate sung pan: Manasseh minam sung panin makai khat, Efod’ tapa Hanniel ahi hi. Efraim minam sung panin makai khat, Shiftan’ tapa Kemuel ahi hi. Zebulun minam sung panin makai khat, Parnak’ tapa Elizafan ahi hi. Issakhar minam sung panin makai khat, Azzan’ tapa Paltiel ahi hi. Asher minam sung panin makai khat, Shelom’ tapa Ahihud ahi hi. Naftali minam sung panin makai khat, Ammihud’ tapa Pedahel ahi hi. Hihte in Kanaan gamah Israel mite adingin gamh a hawm dingin Topa in a thupiak mite ahi hi,” a ci hi. Jerikho nai Jordan kiang Moab leizangah Topa in Moses kiangah, “Amaute in amau’ neih a luah uh sung panin ten’ nadingin Levi mite tungah khuapi a piak nadingun Israel mite thu pia in: khuapi kiim-a lonona gamte Levi mite tungah na pia ding hi. Khuapite in amau’ ten’ nading hi ding a, a lonona gamte in amau bawngte leh a inn ganhingte leh a ganhing khempeuh’ ading ahi hi. Levi mite tungah na piak ding uh khuapi lonona gamte in khuapi kulh panin a kimkot tong tul ciang bang ding hi. Khuapi pualam na teh ding a, nisuahna lam pang tong tulnih, leitaw lam pang tong tulnih, nitumna lam pang tong tulnih, leilu lam pang tong tulnih hi ding a, a laizangah khuapi om ding hi; hih in amau’ khuapite’ lonona taang gam dingin a neih ding uh ahi hi. Levi mite tungah na piak uh khuapite in bukna khuapi gukte hi ding a, mi thatte tua lai-ah na taisak ding uh a, tuate banah khuapi sawmli leh nih na pia ding uh hi. Levi mite tungah na piak uh khuapi khempeuh in sawmli leh giat hi-in, a lonona gamte tawh hi ding hi. Israel mite’ neihsa sung panin na piak ding khuapite in, minam tamte tung panin tam la-in, minam tawmte tung panin tawm na la ding hi; amau’ luah gamh tawh a kizui-in Levi mite tungah a khuapite uh pia ciat ding uh hi,” a ci hi. Topa in Moses kiangah, “Israel mite tungah hih bangin gen in: Jordan kantanin Kanaan gamah na tun uh ciangin, sawm lopi-in mi khatpeuh a that kha mi thatte a va tai theih nadingin note adingin bukna khuapi dingin khuapite na teel ding uh hi. Thu kikhen dingin mi honpi mai-ah a din’ ma-in mi thatte a sih loh nadingin khuapite in phulapa’ kiang panin note’ adingin bukna hi ding hi. Na piak uh khuapite in note’ bukna khuapi gukte hi ding hi. Bukna khuapi dingin Jordan gal khatah khuapi thum, Kanaan gamah khuapi thum na pia ding uh hi. Sawm lopi-in mi khatpeuh a that khate a tai theih nadingin hih khuapi gukte in Israel mite leh khual mite leh note lakah a peemte’ adingin bukna hi ding hi. “Ahih hangin amah in na-a kizang sik khat tawh amah satin amah a sih leh, amah in mi that ahi hi; a mi thatpa kithat ding hi. Amah in, mi a sih theih nading mah ahi a khut sunga om suang khat tawh a suk a, a sih leh, amah mi that ahi hi; a mi thatpa kithat ding hi. Tua ahih kei leh, amah in, mi a sih theih nading ahi a khut sunga om sing a kibawl hiam khat tawh amah a sat a, a sih leh, amah mi that ahi hi; a mi thatpa kithat ding hi. A kinaipih pen khat in a phu la-in mi thatpa that ding hi; amah a tuah ciangin that ding hi. Amah in muhdahna tawh sunin, ahih kei leh bukin a khawh a, a sih leh, tua ahih kei leh galbawlna tawh a khut-in tumin a sih leh, tua a tumpa kithat ding hi; amah mi that ahi hi; a phulapa in a tuah ciangin tua mi thatpa that ding hi. “Ahih hangin gal bawl lopi-in thakhatin amah sunin, ahih kei leh buk lopi-in na khatpeuh tawh amah khawh-in, ahih kei leh, amah pen ama gal hilo, ama siatna ding a zong hilo napi-in, mi a sih theih nading suang khat zangin, a muh lopi-in amah in deng kha a, a sih leh, mi thatpa leh a phulapa kikalah hih ngeina kipte tawh kizui-in mihonpi in khen ding hi; a phulapa’ khut sung panin mihonpi in mi thatpa honkhia-in, mihonpi in amah a va taina, bukna khuapi ah amah puakkik ding a, sathau siangtho a kinilh siampi lianpa a sih matengin tua sungah a teeng ding hi. Ahih hangin hun khatpeuh peuhah amah a taina bukna khuapi gamgi kheng in a pai a, a phulapa in ama bukna khuapi daihual pua lamah amah mu-in, a phulapa in mi thatpa a thah leh, tua a thatpa mawh lo ding hi. Bang hang hiam cih leh siampi lianpa a sih matengin tua mipa a bukna khuapi sungah a om ding ahi hi; ahih hangin siampi lianpa a sih khit ciangin mi thatpa a neihsa leitangah ciahkik thei ding hi. “Hihte in na ten’na khempeuh uhah na khang tawntungun thukham leh ngeina hi ding hi. Khatpeuh in mi khat a thah leh, tecite’ genna siksanin mi thatpa kithat ding hi; ahih hangin teci khat bek’ teci pan’na siksanin kuamah kithat lo ding hi. Tua tham loin, sihna thuak dingin a mawh mipa’ nuntakna tatna sum na sang kei ding uh hi; amah kithat ding hi. Siampi lianpa a sih ma-in bukna khuapi ah a taisa mipa a gamah a ciahkik theih nadingin ama nuntakna tat nading sum na sang kei ding uh hi. Na ten’na leitang uh na ninsak kei ding uh hi; bang hang hiam cih leh mi thahna in leitang ninsak a, a that mipa a kithah kei buang leh, tua mi kithahna leitang sian’sak nading thu dang om thei lo hi. A laizangah keimah ka ten’na, note ten’na leitang na ninsak kei ding uh hi; bang hang hiam cih leh Topa keimah in Israel mite laizangah ka teeng hi, ci-in gen in,” a ci hi. Josef tapate beh Manasseh, Manasseh’ tapa Makhir, Makhir’ tapa Gilead ahi Gilead’ tapate beh lutangte in hong naih-in Moses leh Israel mi beh lutang ahi makaite’ mai-ah thu gen uh a, amaute in, “Israel mite tungah aisaanna tawh luah dingin leitang piak ding Topa in ka topa thu hong pia hi; ka sanggam uh Zelofehad’ luahnate a tanute tungah piak dingin Topa in ka topa thu hong pia hi. Ahih hangin Israel sungah minam dangte’ tapate khatpeuh peuh tawh amaute kiteng leh a pate uh’ luahna panin amau aa teng kilakhia-in a manawh minamte tungah tua luahna kipia beh ding hi; tua ahih ciangin ko’ ngahsa luahna panin a kikhen khia ding ahi hi. Israel mite’ jubili hong tun ciangin, amau’ aate pen a manawh minamte’ tungah kapia beh ding hi; ka pa uh namte’ luahna panin amau’ aa kikhenkhia ding hi,” a ci hi. Moses in Topa genna tawh kizui-in Israel mite thu pia a, “Josef suan minamte’ genna man hi. Hih in Zelofehad’ tanute tawh kisai-in Topa thupiak ahi hi; Amaute in hoih a sak pente uh tawh kiteng hen; ahih hangin amau’ behte bek ten’pih thei ding uh hi. Israel mite’ gamhte minam khat pan namdang khatah paikhia lo ding hi; bang hang hiam cih leh Israel mi khempeuh a minam ciat uh tawh kip ding uh hi. Israel mite khempeuh in a pate’ uh gamh a luah theih nadingun, Israel mite’ sung panin minam khat peuhpeuh ah gamh a nei tanu khempeuh in a pate’ nam sung khatpeuh peuh’ zi hi ding hi. Tua ahih ciangin minam khat pan a dangah gamh paikhia lo ding hi; bang hang hiam cih leh Israel mite sung panin minam khempeuh amau’ gamh ciat tawh kip ding uh hi,’ ci hi,” ci-in a gen hi. Topa in Moses a thupiak bangin Zelofehad’ tanute gamta uh hi; Bang hang hiam cih leh Zelofehad’ tanu Mahlah, Tirzah, Hoglah, Milkah leh Noahte, a pate uh sanggamte’ tapate tawh kiteng uh hi. Josef’ ta Manasseh’ tapate innkuan sungah amaute in pasal nei uh a, a pate nam innkuan sungah amau’ gamh luahte kip hi. Hihte in Jerikho nai Jordan kiang Moab leizangah Israel mite tungah Moses tung tawnin Topa in a piak thupiaknate leh ngeina kipte ahi hi. Hihte in, Jordan gal khat gamlak, Suf gal khat Arabah gam sung, Paran leh Tolef, Laban, Hazeroth leh Dizahab kikalah Moses in Israelte khempeuh tungah a gen thute ahi hi. Tua mun pen Horeb panin Seir Mual tawnin Kadeshbarnea lamah ni sawm leh ni khat paina ahi hi. - Heshbon gamah a teeng Amor kumpipa Sihon, leh Ashtaroth leh Edrei gamah a teeng Bashan kumpipa Og a zawh khit ciangin, a kum sawmlina kha sawm leh kha khatna a ni masa ni-in, amaute tungah thupiakna-in Topa in ama tungah a piak bang bangin Moses in Israel mite tungah gen hi. Moab gam Jordan gal khatah Moses in hih thu gentel a, ”Horeb gam sungah Topa i Pasian in eite kiangah, ‘Hih mual-ah sau vei na om khin zo uh hi; kihei-in na khualzin uh kipan un la, Amor mite’ gam mualtung gam leh Arabah kiim, mualtung gam, lei niamna gam, Negeb gam khempeuh, leh Kanaan mite’ gam tuipi gei leh Lebanon, gun golpi ahi Eufrates gun dongin pai un. En un, note mai-ah leitang ka koih zo hi; pai un la, Topa in na pate uh Abraham, Isaak leh Jakob tung leh amau nunga a suan leh a khakte uh tungah piak dingin a ciam leitang luah un,’ hong ci hi. “Tua hun lai takin note kiangah, ‘Kei guak bek in note kong en zo kei ding hi; Topa na Pasian un note tampi hong khang sak zo hi, en un, note in tu hunin vantung aksite zah-in tampi na pha uh hi. Topa, na pate uh Pasian in tu-a zah tul-in note hong khangsak hen la, note tungah hong ciamsa bangin thupha hong pia ta hen! Kei guak in note’ thu kineihnate sian’sakna ding tavuan lianpi bangci puak zawh ding ka hi hiam? Na minam uh tawh a kizui-in a pil, thu thei, thu phawksa mi teel un la, note’ lutang-in amaute ka koih ding hi,’ kong ci hi. Note in, ‘Nangma hong gen thu in kote hih dingin hoih hi,’ ci-in nong dawng uh hi. Tua ahih ciangin na minam lutang uh ahi, a pil thu phawksa mite ka la a, note tungah lutang-in a tul, a za, a sawmnga, a sawm ukte leh uliante na minam khempeuh sung uhah ka koih hi. Tua hun lai takin na thukhente uh ka thuhilh a, ‘Na sanggamte uh thu neihte za un la, mi khat leh a sanggampa ahi a, amah tawh a om mi khualpa tawh ahi zongin thu a man takin khen un. Thukhenna ah angvan na nei kei ding uh hi; a neu leh a liante a kibangin na ngai ding uh hi; mihing maitang na zahtak kei ding uh hi; bang hang hiam cih leh thukhenna in Pasian’ aa ahi hi; note adingin a haksa lua thute kei kiangah nong paipih ding uh a, keimah in tua thu ka za ding hi,’ ka ci hi. Note hih ding na khempeuh tua hunin note kiangah thu kong pia hi. “Tua ciangin Horeb panin i ding khia a, Topa i Pasian in hong thupiak bangin Amor mite’ gam mualtung gam zuatna lam kalah note’ muhsa a lian a lipkhaphuai keugawgam i nawk hi; tua ciangin Kadesh-barnea i tung hi. Tua ciangin note’ kiangah, ‘ Topa i Pasian in eite hong piak Amor mite’ gam mualtung gam na tung uh hi. En un, Topa na Pasian un note mai-ah leitang koih zo hi; Topa, na pate uh Pasian in note tungah hong gensa bangin pai un la, luah un; lau kei un la, lungkia kei un,’ kong ci hi. Tua ciangin na vekpi-un ka kiangah nong pai uh a, ‘Eite adingin gam va enin, i paitoh nading lampi leh i zuat ding khuapite hong gen kik thei ding eite’ mai-ah mi sawl ni,’ nong ci uh hi. Tua thu hoih tuak ka sa a, minam khatah khat, note mi sawm-le-nih kong teel hi; amaute kithawi-in mualtung gamah paito uh a, Eshkol kuamah pai-in va en uh hi. Amaute in tua gam singgah pawlkhat a khut-un hong tawi-in i kiangah hong tun’pih suk uh a, amaute in eite kiangah thu hong zasak kikin, ‘ Topa i Pasian in eite hong piak gam in leitang hoih ahi hi,’ hong ci uh hi. “Ahi zongin note paito nuam loin, Topa na Pasian uh hong thupiak na nial uh hi; na puanbukte uh sungah na phun uh a, ‘ Topa in eite hong mudah ahih manin eite susia ding, Amor mite’ khut sungah hong pia dingin Izipt gam panin eite hong paikhiatpih hi. Koi lai-ah paito ding i hi hiam? I sanggamte in i lungsim hong siasak khin uh a, “A mite in ei sangin lian zaw-in sangzaw uh hi; a khuapite lianin van banin ki-uum hi; tua tham loin Anak mite tua munah i mu hi,” hong ci uh hi,’ na ci uh hi. Tua ciangin note kiangah, ‘Lau kei un la, amaute kihta kei un. - Izipt gam sungah note mit muhah a hih bangin leh mi khat in a tapa a puak bangin hih mun na tun’ matengun lam tawntungah Topa na Pasian un note hong puak na muhsa uh gamlaka mah bangin, note mai-ah a pai Topa na Pasian un note’ adingin hong dosak ding hi,’ kong ci hi. - Ahi zongin hih bang thu om hi napi-in, note in na puanbuk lamna mun ding uh hong lak ding leh na pai nading lampi uh hong lak dingin zan-in mei, sun-in meii tawh note mai lampi-ah a pai Topa na Pasian uh na um kei uh hi. “ Topa in note’ gen thu hong za a, heh in, nasia takin kiciam a, - Hih a gilo khang mite khat beek in, na pate uh tungah piak dinga ka ciam gamhoih mu lo ding a, Jefunneh’ tapa Kaleb bek in mu ding hi; amah in tua gam mu ding hi, amah in a lungsim khempeuh tawh Topa zui ahih manin amah leh a tate tungah ama totsa leitang ka pia ding hi!” a ci hi. Note’ hangin kei tungah zong Topa heh a, ‘Nang zong tua gamah na lut kha kei ding hi; Nun’ tapa Joshua, nangma mai-ah a dingpa lut ding hi; amah hanthawn in, bang hang hiam cih leh amah in Israel mite mapi-in tua gam luahsak ding hi. Tua tham loin galte’ mimat suak ding hi na cih uh na taneute uh leh, tu hun lai taka asia leh apha a khen thei nai lo na tate uh, tua gamah pai ding a, amaute tungah tua gam ka pia ding a, amaute in tua gam luah ding uh hi. Ahih hangin note ahih leh, kihei un la, San Tuipi lam manawh-in gamlakah pai un,’ hong ci hi. “Tua ciangin note in kei nong dawng uh a, ‘ Topa tungah ka khial khin uh hi; Topa i Pasian in hong thupiak bang teek teekin paito-in i do ding hi,’ nong ci uh hi. Na milip-un na galhiam uh tawh na kithawi uh a, mualtung gamah paitoh ding na baih ngaihsut uh hi. Tua ciangin Topa in kei kiangah, ‘Amaute kiangah gen in: Note lakah kei om lo ka hih manin kuanto kei un la, do kei un; tua bangin kuanto le uh cin na galte uh na lel ding uh hi,’ ci in, hong ci hi. Tua ahih ciangin note kiangah kong gen a, note in na ngai nuam kei uh hi; Topa ’ thupiakna na nial uh a, mualtung gamah na kuanto hamtang uh hi. Tua ciangin tua mualtung gamah a teeng Amor mite hong kuanin, Seir gam Hormah ciang dongah khuai bangin hong delhin hong zo uh hi. Note hong ciahkikin Topa mai-ah na kap uh hi; ahih hangin Topa in na aw uh hong ngai loin, a bil zong hong ngat lo hi. Tua ahih ciangin tua thu hangin ni tampi sung Kadesh munah na om uh hi. “Tua ciangin Topa in kei tungah hong gen bangin, eite kihei-in San Tuipi lam manawh-in gamlakah i pai hi; ni tampi sung Seir Mual tungah i pai kawikawi hi. Tua ciangin Topa in kei tungah, ‘Hih mual kiimah sauvei khop na pai khin ta uh hi; leilu lamah kihei un. Mite hih bangin thupia in: Seir gamah a teeng Esau’ suan leh khak, na behte uh’ gam sung a nawk ding na hi uh hi; amaute in note hong kihta ding uh hi. Tua ahih ciangin kidawm un; amaute tawh kisel kei un; bang hang hiam cih leh amau’ leitang khat zong no kong pia peuhmah kei ding hi, Esau’ neih dingin ama tungah Seir Mual pia khin ka hih manin khe a ta khop zah zong no kong pia kei ding hi. Na nek ding uh an amaute tung panin sum tawh na lei ding uh hi; na dawn ding uh amau’ tui zong sum tawh na lei ding uh hi. Bang hang hiam cih leh khut tawh na sepna khempeuh uhah Topa na Pasian un note thupha hong pia hi; hih a zai gamlakah na paina uh amah in hong thei hi; hih kum sawmli sung Topa na Pasian uh no tawh hong om hi; bangmah na kisam kei uh hi, ci-in gen in,’ hong ci hi. Tua ahih ciangin Seir gamah a teeng Esau’ suan i behte, leh Elath leh Ezion-geber khua pan hong kipan Arabah lampi panin i paikhia suak hi. “Tua ciangin eite kihei-in Moab gamlak lamah i pai hi. Topa in kei kiangah, ‘Amau leitang na neih dingun note tungah hong pia lo ding ka hih manin Moab mite simsak kei un la, amaute tawh gal-in kido kei un, bang hang hiam cih leh a neih dingun Lot’ suan leh khakte tungah Ar khua ka pia zo hi,’ hong ci hi. (Anak mite zah-in a tun a sang, a lian, a tam Emim mite tua lai-ah teeng ngei hi; Anak mite mah bangin amaute zong Refaim mite kici a, ahih hangin Moab mite in Emim ci uh hi. Hor mite zong Seir-ah nidangin teeng ngei a, ahih hangin, Topa in amaute tungah a piak amau leitang tungah Israel mite in ahih mah bangin, Esau’ suan leh khakte in amaute suankhia-in amaute susia a, amau’ munah teeng uh hi.) Tu-in ding un la Zered lui kantan un,’ hong ci hi. Tua ahih ciangin Zered lui i kantan hi. Amaute tungah Topa a kiciam mah bangin galsim mi ahi tua khang mite khempeuh gam sungah a sih khit dong ahi, Kadesh-barnea i nusiat-a kipan Zered lui i kantan dong kikal kum sawmthum leh kum giat ahi hi. Amaute a bei khit mateng gamlakah amaute a susia dingin Topa langpang takpi hi. “Tua ahih ciangin mihingte lak panin galsim mite bei-in a sih khit ciangin, Topa in kei kiangah, ‘Tu ni-in Ar khua san takah Moab gamgi kantan ding na hi uh hi; Ammon mite leitang khat zong na neih dingun hong pia lo ding ka hih manin, Ammon mite’ gamgi na nai uh ciangin amaute gimsak kei un la, amaute tawh kido kei un, bang hang hiam cih leh a neih dingun Lot’ suan leh khakte tungah ka pia ding hi. - (Tua pen Refaim gamgi ci-in zong kithei ngei hi; Refaim mite tua lai-ah teeng ngei a, ahih hangin Ammon mite in amaute pen, Anak mite bangin lianin a tam a tun a sang mite ahi Zamzummim mite ci uh hi; ahih hangin Topa in amaute mai-ah tua mite susia hi; amaute in tua mite suankhia uh a, amau’ mun-ah teeng uh hi; amah in Seir-ah a teeng Esau suan leh khakte adingin amaute mai-ah Hor mite a suksiat mah bangin, amaute in tua mite suankhia-in tuni dongin amau’ mun-ah teeng uh hi. Gaza ciang dong khua neute-ah a teeng Avvim mite ahih leh Kaftor pana hong pai Kaftor mite in susia in amau’ munah teeng uh hi.) ‘Ding-in, na khualzin kipan in la, Arnon kuam kantan in; en in, Heshbon kumpipa, Amor mi Sihon leh ama leitang na khut sungah kong pia zo hi; amah suankhiat ding kipan in la, gal sungah amah tawh kido in. Nomau’ thu za-in note hangin liing-in a gim ding ahi, vantung nuai khempeuh a, om mite tungah note hong kikihtakna leh note hanga launa ka tun’sak ding tu ni-in ka kipan ding hi,’ hong ci hi. “Tua ahih ciangin Kedemoth gamlak panin Heshbon kumpipa Sihon kiangah kilemna thu genin kamtai ka sawl a, ‘Na gam sung hong nawksak in; lampi bekah ka pai ding a, taklam ahi a, veilam-ah ahi zongin ka pial kei ding hi. Ka nek ding an sum tawh lei dingin nong zuak ding a, ka dawn ding tui sum tawh lei dingin nong pia ding hi; khe tawh hong nawksak bek in, Jordan kantanin Topa ka Pasian un kote hong piak leitangah ka tun matengun Seir-a a teeng Esau’ suante leh Ar-a a teeng Moab mite in kei hong paisak mah bangun hong paisak in,’ ka ci hi. Ahih hangin Heshbon kumpipa Sihon in eite hong paisak lo hi; bang hang hiam cih leh tu huna mah bangin na khut sung uhah amah hong piak theih nadingin Topa a Pasian un a lungsim khauh sakin, amah paupeng sak hi. Topa in kei kiangah, ‘En in, Sihon leh a leitang nang tungah piak kong kipan khin zo hi; a leitang na luah theih nadingin suankhiat ding kipan in,’ hong ci hi. Tua ciangin Sihon leh a mite khempeuh eite do dingin Jahaz-ah hong pai uh hi. Topa i Pasian in amah hong pia hi; amah leh a tapate leh a mi khempeuh i zo hi. Tua hunin a khuapi khempeuh i la a, a khuapi khempeuh, papi, nupi leh naupangte i susia maimang hi; bangmah i siit kei hi; i laksa a khuapi sunga van kinusiate tawh a ganhingte uh eima adingin i la bek hi. Arnon kuam mong a, a om Aroer leh tua kuam sunga om khuapi Gilead ciang dongah eite adingin khuapi a hat lua khat beek om lo hi; Topa i Pasian in a vekpi-in eite khut sungah hong pia hi. Ammon mite’ leitang ahi, Jabbok gun pang khempeuh leh mualtung gam khuapite leh Topa i Pasian in hong khamna munte bek i va neh kei hi. “Tua ciangin eite kihei-in Bashan lamah i paito hi; Bashan kumpipa Og leh ama mite khempeuh Edrei-ah eite do dingin hong kuankhia hi. Ahih hangin Topa in kei kiangah, ‘Amah kihta kei in, bang hang hiam cih leh amah leh a mite khempeuh leh a leitang nangma khut sungah kong pia khin zo hi; Heshbon ah a teeng Amor kumpipa Sihon na bawl bangin ama tungah na bawl ding hi,’ hong ci hi. Tua ahih ciangin Topa i Pasian in eite khut sungah Bashan kumpipa Og leh a mite khempeuh zong hong pia hi; ama adingin mi khat beek a suakta nawn lo dingin i vatmai hi. Tua hunin a khuapite khempeuh i la hi—amau kiang pan i lak loh khuapi khat zong om lo hi—Bashan gama Og kumpi gam sung, Argob gambup, khuapi sawmgukte ahi hi. Kulhpi a, ki-uum lo khuaneu tampite sim loh, hih khuapite khempeuh kulh sangpi, kongpi leh sikzawlte tawh muanhuai tak-a a kibawl ahi hi. Heshbon kumpipa Sihon i bawl bangin amaute i susia mang a, khuapi khempeuh, papi, nupi leh naupangte i susia hi. Ahih hangin a ganhing khempeuh leh khuapi sunga van kinusiate i la hi. Tua ahih ciangin tua hun lai takin, gam, Jordan gal khat a, om Amor kumpi nihte’ khut sung pan, Arnon kuam panin Hermon Mual dong (Sidon mite in Hermon pen Sirion ci a, Amor mite in Senir ci uh hi), mualzang khuapite khempeuh leh Gilead khempeuh leh Bashon khempeuh, Salekah leh Edrei dong, Bashan a, om Og kumpi gam khuapite i la hi. (Bang hang hiam cih leh Bashan kumpipa Og bek Refaim gam sung panin a om lai ahi hi; en in, ama lupna a han in suang han ahi hi; Ammon mite’ khuapi Rabbah ah tua han om lai hilo ahi hiam? Tong gual-in, a sauna tongkua hi a, a zaina tongli ahi hi.) “Tua huna hih leitang i luah ciangin, Reuben mite leh Gad mite tungah Arnon kuam mong-a om Aroer pan leh Gilead mualtung gam kimkhat a khuapite tawh ka pia hi. Gilead gam a om lai teng leh Argob gam khempeuh ahi, Og kumpi gam, Bashan gam khempeuh, Manasseh minam kimkhatte tungah ka pia hi. (Bashan gam buppi pen Refaim leitang kici hi. Manasseh mi Jair in Bashan kici Argob gam khempeuh, Geshur mite leh Ma-akath mite’ gamgi dong la a, tua sunga khua neu minte ama min tam sakin tuni donga a kip Havvoth-jair phuak hi.) Makhir tungah Gilead ka pia a, Reuben mite leh Gad mite tungah Gilead panin Arnon kuam dong, gamgi dingin a kuam laita, Ammon mite’ gamgi ahi Jabbok gun dong tawh ka pia hi; Arabah gam zong, a gamgi dingin Jordan tawh, Khinnereth panin nisuahna lam-a om Pisgah mual pang nuai-a Ci Tuipi ahi Arabah tuipi ciang dong amaute ka pia hi. “Tua hunin note thu kong pia a, ‘ Topa na Pasian un na neih dingun hih leitang hong pia zo hi; na galhang mite khempeuh uh galhiam tawh kithawi-in Israel mi na sanggamte uh mai-ah va kuan ding hi. Ahih hangin na zite, na ta neute leh na ganhingte uh (ganhing tampi na neih uh ka thei hi) note kong piaksa khuapite ah om ding uh a, Topa in note hong piak bangin na sanggamte uh tungah lungsim tawlngakna pia-in, Topa na Pasian uh Jordan gal khatah amaute a piak leitang amaute in zong a luah matengun na om ding uh hi; tua ciangin note kong piaksa ahi na neihsa ciat uhah note khempeuh na ciah ding uh hi,’ kong ci hi. Tua hun lai takin Joshua thu ka pia a, ‘ Topa na Pasian in hih kumpi nihte tungah a bawlte khempeuh na mit in mu khin hi; na nawk kumpi gam khempeuh tungah zong Topa in tua mah bangin hih ding hi. Amaute na kihta kei ding hi; bang hang hiam cih leh nang adinga hong do sakpa in Topa na Pasian ahi hi,’ ka ci hi. “Tua hunin keimah in Topa tungah ka thuum a, ‘ Topa Pasian aw, na liatna leh na thahatnate na nasempa tungah lah ding a hong kipan pan bek na hi hi; bang hang hiam cih leh vantung hita leh leitung hita leh nangma’ aa bangin tua bang nasep leh a vanglian gamtatna a hih thei bang pasian om ahi hiam? Kei hong paisak in la, Jordan gal khat-a om gam hoih, tua mualtung gam hoih leh Labanon hong musak in, ci-in kong thuum hi,’ ka ci hi. Ahih hangin note’ hangin kei tungah Topa heh a, ka thu hong ngai lo hi: Topa in kei kiangah, ‘Pha zo hi, hih thu kei kiangah hong gen nawn kei in. Pisgah mual dawnah paito in la, nitumna lam, leilu lam, leitaw lam leh nisuahna lamah na mit sang hah to in la, na mit tawh gal-et in; bang hang hiam cih leh nangmah in hih Jordan na kantan kei ding hi. Ahih hangin Joshua thu pia in la, hanthawnin thakhauhsak in; bang hang hiam cih leh hih mite mai-ah amah pai ding a, nangmah in na muh ding leitang amaute luah sak ding hi,’ hong ci hi. Tua ahih ciangin Bethpeor gal-a kuam sungah i taam lai hi. “Tu-in, Israelte aw, note nungta-in Topa, na pate uh Pasian in note hong piak leitangah va pai-in na luah theih nadingun note kong hilh thukhamte leh ngeina kipte don un la, zui un. Topa na Pasian un hong piak ahi keima hong thugente na zuih theih nadingun no kong thupiakte behlap loin, zong na khiam kei ding uh hi. Na mit un Baalpeor ah Topa ’ hihna mu khin hi; bang hang hiam cih leh Topa na Pasian un note lak panin Peor-a Baal a zui mi khempeuh susia hi; ahih hangin Topa na Pasian uh a lenkipte khempeuh tu ni-in na hing lai uh hi. En un, note in luah dingin na lutna gam sungah na zuih dingun Topa ka Pasian in kei hong thupiak bangin thukhamte leh ngeina kipte kong hilh khin zo hi. Tuate zui un la, sem un; bang hang hiam cih leh hih thukhamte khempeuh a zak uh ciangin, ‘Hih minam liante in a pil thu thei mi taktak hi,’ a ci ding uh mite’ muhna ah hih thu nomau pilna leh nomau thu theihna hi ding hi. Bang hang hiam cih leh eite in Topa i sap hun simin eite kiangah i Pasian hong nai zahin pasian a nei minam lian koi-ah om ahi hiam? Tu ni-in note kong hilh hih thute bangin thukham leh ngeina kip man a nei minam lian koi-ah om ahi hiam? - “Na mit un a muhsa nate na nuntak sungun mangngilh kha-in, na lungsim panun paikhia kha ding ahih manin lim takin ngaihsunin hoih takin kikem un; Horeb a, Topa na Pasian uh mai-ah na din’ ni-un Topa in kei kiangah, ‘Leitungah a nuntak lai teng uh amaute in kei hong kihtak nading leh amaute in a tate uh a hilh sawn theih nadingun keimah in amaute tungah ka thute ka zaksak theih nadingin ka kiangah mite hong khawm in,’ hong cihna thu, na tate uh leh na tate’ tate uh tungah kithei sak un. Mei in mual kang-in van laizang dong banto-in, khuamial leh meii leh khuaziing in a tuamcip lai takin note a nai-ah hong pai-in mual bul-ah na ding uh hi. Tua ciangin mei sung panin Topa in note kiangah thu hong gen hi; note in awging na za uh a, ahih hangin bangmah na mu kei uh hi; awging bek om hi. Thupiakna sawmte ahi note’ hih dinga hong thupiak ama thuciamna note tungah hong gen hi; amah in suangpeek nih tungah tuate gelh hi. Note in na luah ding uh gam sungah na zuih theih nadingun, thukhamte leh ngeina kipte note kong hilh nading tua hun lai takin Topa in kei thu hong pia hi. “Tua ahih ciangin note hoih takin kidawm un. Horeb ah mei sung panin Topa in note tungah thu hong gen ni-in bangmah mu lo na hih uh manin, note adingin lim khatpeuh peuh, pasal tawh a kibang hita leh numei tawh a kibang hita leh, leitunga om ganhing khatpeuh peuh tawh a kibang hita leh, huih laka leeng kha a nei vasa khatpeuh peuh tawh a kibang hita leh, leitungah a bokvak khatpeuh peuh tawh a kibang hita leh, lei nuai-ah a om tui sunga ngasa khatpeuh peuh tawh a kibang hita leh, a kiseek milim bawlna tawh a sia-in na gamtat khak loh nadingun kidawm un. Note in na mit uh tawh vantung lam en to-in, ni leh kha leh aksite, vantung na khempeuh na muh uh ciangin, vantung nuai khempeuh a, mite tungah Topa na Pasian un a piak nate lamah kihei-in tuate bia-in a na na sep khak ding uh kidawm un. Ahih hangin Topa in tu ni-a bangin sik meikhuk, Izipt panin ama neih mi dingin note hong la-in hong paikhiatpih khin hi. Tua tham loin note hangin kei tungah Topa heh a, keimah in Jordan kantan loin Topa na Pasian un note’ gamh dingin hong piak leitang hoih ah ka lut lohna dingin kiciam hi. Hih gamah kei ka si ding a, Jordan khengin ka pai thei kei ding hi: ahih hangin note in kantanin, tua gam hoih na luah ding uh hi. Topa na Pasian un note tawh hong bawl thuciamna mangngilhin, Topa na Pasian un note’ hih dinga hong kham lim khatpeuh peuh tawh a kibang a kiseek milim na bawl khak loh nadingun kidawm un. Bang hang hiam cih leh Topa na Pasian un hong kangtum thei mei tawh kibang a, a haza Pasian ahi hi. “Note in tu leh ta nei-in gam sungah mi khangham na suah uh ciangin, na khatpeuh peuh tawh a kibang lim-in a kiseek milim bawlna leh Topa na Pasian uh muhna ah a sia bawlna tawh amah a hehsak dingin na siat gamtat uh leh, Jordan gal khat luah dingin na paina leitang uhah na siat maimang baih nadingun note langkhatah teci pang dingin tu ni-in van leh lei ka sam hi; tua leitang tungah note sauvei na hing kei ding uh a, na sia maimang ding uh hi. Topa in mite lakah note hong thehthang ding a, Topa in note hong hawlna minamte lakah mi tawmcik bek na om lai ding uh hi. Note in tua lai munah mite’ khut in a bawl, khua mu thei lo, khua za thei lo, a ne thei lo, a nam thei lo sing leh suang pasiante’ na na sem ding uh hi. Ahih hangin tua lai panin Topa na Pasian uh na zong ding uh a, na lungsim khempeuh uh leh, na nuntakna khempeuh uh tawh na zon’ uh leh amah na mu ding uh hi. Note in gimna thuakin, mai lam hunah hih nate khempeuh no tungah hong tun’ ciangin, Topa na Pasian uh lamah kihei-in ama thu na mang ding uh hi, bang hang hiam cih leh Topa na Pasian un hehpihna a nei Pasian ahi hi; amah in note hong tamasak lo ding hi, hong susia lo ding hi, na pate uh tawh a thuciamna mangngilh lo ding hi. “Pasian in leitungah mi a pian’sak ni-a kipan, no pian’ ma-a hun beisa thu tu-in kan un la, van mong khat pan mong khat kikal thu zong kan un, hih bang na lian piang ngei-in a kiza ngei peuhmah hiam? Note in Pasian’ aw za khin napi-in na hin’ lai uh bangin meikuang sung panin pasian’ pauna aw mi khatpeuh peuh in za ngei ahi hiam? Tua ahih kei leh, Topa na Pasian un Izipt gam sungah note adingin na muhna uhah a bawlte khempeuh tawh kibangin, ze-etna, lim, nalamgdang, gal, a vanglian leh a thahatna leh launa lianpi tawh pasian khat sung pan minam khat a va lak ding hanciam ngam ngei ahi hiam? Topa in Pasian hi, ci-in na theih nadingun note tungah hih thu hong kilak hi; amah sungah kuamah dang om lo hi. Amah in note hong khal theih nadingin vantung panin ama aw note hong za sak hi; a mei lianpi note leitungah hong mu sak a, mei sung panin ama kam na za uh hi. Amah in na pate uh itin, amau suan leh khakte hong tel a, amahmah in ama vanglian tawh Izipt panin note hong paikhiatpih a, note sangin a tamzaw leh a vanglian zawte’ gamah hong paipihin, note’ luah dingin amau’ leitang hong piak nadingin note mai-ah amaute hong hawlkhiat sak ahih manin tu ni-in hih bangin na om thei uh hi; tua ahih ciangin tunga om vantung hita leh nuai-a om leitung hita leh ah Topa in Pasian a hihna thu tu ni-in na thei un la, na lungsim uhah ciamteh un; kuamah dang om lo hi. Tua ahih ciangin note leh note khit-a na tate uh tungah thu hong nuamin, Topa na Pasian un a tawntung a, hong piak gam sungah na khan’ uh na sausak theih nadingun tu ni-a note kiangah kong gen ahi ama thukhamte leh a thupiaknate na zui ding uh hi,” a ci hi. - Tua ciangin, a beisa hunah amah tawh kilangneihna a om lo, tum lopi-in a vengpa a that, mi that kha-pa va tai-in hih khuapite khatpeuh peuhah tai-na tawh a suahtak theih nadingin Moses in nisuahna lam Jordan gal khatah khuapi thum tuam koih hi: Reuben mite adingin mualzang gamlakah Bezer khua, Gad mite’ adingin Gilead gam sung Ramoth khua leh Manasseh mite’ adingin Bashan gam sung Golan khua ahi hi. Hih in Israel mite tungah Moses in a piak thu ahi hi. - hihte in, Izipt gam panin a paikhiat-un Moses leh Israel mite in a zawh Heshbon-ah a teeng Amor mite’ kumpipa Sihon’ gam sung, Jordan gal, Bethpeor tawh a kigalsai kuam sungah, Izipt panin Israel mite a paikhiat lai-in Moses in amaute tungah a gen tecipan’nate, thukhamte leh ngeina kipte ahi hi. Moses in Israelte khempeuh samin amaute kiangah, “Israelte aw, tu ni-a note zak-in kong gen thukhamte leh ngeina kipte za un la, note in thei-in lim takin zuih ding na ngaihsun ding uh hi. Topa i Pasian in Horeb ah eite tawh thuciamna khat bawl hi. Topa in i pute i pate bek tawh hih thuciamna a bawl hi loin, tu ni-a ahing eite khempeuh tawh zong a bawl ahi hi. - Note tungah Topa ’ thu a gen dingin Topa leh note kikalah ka din’ hun lai takin, mei sung panin tua mual-ah Topa in kimai tuahin note hong hopih hi; mei hangin note lau na hih manun mual tungah na paito kei uh hi. Amah in: “Keimah in salsuahna, Izipt leitang panin nang a hong paikhiatpih Topa na Pasian ka hi hi. “Keimah longal pasian dang na nei kei ding hi. “A kiseek milim hita leh, tunga vantunga om hita leh, nuai-a leitunga om hita leh, lei nuai-a om tui sungah hita leh a om na khatpeuh peuh a sun khatpeuh peuh nang adingin na bawl kei ding hi; amaute mai-ah kun loin, amau’na na sem kei ding hi; bang hang hiam cih leh keimah Topa na Pasian in a aam Pasian ka hi a, kei hong mudahte tungah a pate’ mawhna a tate tungah khang thum khang lina dongin thuk-in, ahih hangin kei hong it-in ka thupiakte a zui mi a tul tampite tungah itna kip a lakpa ka hi hi. “ Topa na Pasian’ min na zangkhai zat kei ding hi: bang hang hiam cih leh Topa in ama min a zangkhai zat mi a mawh lo hi, ci lo ding hi. “ Topa na Pasian in hong thupiak bangin na siangthosak dingin sabbath ni tang in. Ni guk sung na semin na nasep ding khempeuh na hih ding hi; ahih hangin a ni sagih ni in Topa na Pasian’ sabbath ni ahi hi; tua ni-in nangmah bangin na nasem pasal leh na nasem numeite a tawlngak theih nadingin, nang, na tapate, na tanute, na nasempate, na nasem nute, na bawngtal, na la, na ganhing khatpeuh peuh leh na huang sung om zinte in na khatpeuh peuh sem lo ding uh hi. Izipt gamah nasem na hihna leh tua lai panin Topa na Pasian in a vangliatna khut leh a thahatna tawh hong paikhiatpihna na phawk ding hi; tua ahih ciangin sabbath ni na tan’ ding Topa na Pasian in thu hong pia hi. “ Topa na Pasian in hong piak leitang tungah na khan’ sau-in na nopsak theih nadingin Topa na Pasian in hong thupiak bangin na nu na pa zahtak in. “‘Mi na that kei ding hi. “‘Nu-le-pa mawhna zong na bawl kei ding hi. “‘Na na gu kei ding hi. “‘Na vengte lang khatah zong a man loin teci na pang kei ding hi. “‘Na vengte’ zi zong na deihgawh kei ding hi; na vengte’ inn, a lo, a nasempa, a nasemnu, a bawngtal, a la, ahih kei leh na vengte’ na khatpeuh peuh na deih kei ding hi,’ ci hi. “ Topa in, mei, meii leh a mial mahmah sung panin awging lianpi tawh mual tunga no a kikhawm khempeuh tungah hih thute hong gen hi; amah in bangmah genthuah lo hi. Amah in suangpeek nih tungah tuate gelhin, tua suangpeekte kei tungah hong pia hi. Mei in mual a kat lai takin khuamial sung panin awging na zak uh ciangin na minam lutang khempeuh uh leh na upate uh kei kiangah nong pai uh hi; note in, ‘En in, Topa i Pasian in eite tungah a minthan’na leh a liatna hong lak khin a, mei sung panin ama awging i za khin hi; Pasian in mi hopih napi, mi a hing lai veve-in tu ni-in i mu hi. Tua ahih ciangin bang hangin tu-in eite si ding i hi hiam? Hih mei lianpi in eite hong kangtum ding hi; Topa i Pasian’ awging za lai lehang eite i si ding hi. Bang hang hiam cih leh a si thei mihing khempeuh sung panin eite’ zak bangin mei sung panin a nungta Pasian a paukhiatna awging za-in, a nungta lai kua om ahi hiam? A nai-ah va pai in la, Topa i Pasian in a gen ding khempeuh va za in; Topa i Pasian in nang tungah hong gen ding teng ko tungah hong gen in; kote in hong mangin ka sem ding uh hi,’ nong ci uh hi. “Kei kiangah nong gen uh ciangin Topa in na thu uh a za hi; Topa in kei kiangah, “Hih mite in nang kiangah hong gen uh thute ka za khin hi; a gen khempeuh uh a manin gen uh hi. Amaute leh a suan a khakte uh a nopsak tawntung theih nadingin keimah zahtak ding leh ka thupiak khempeuh zuih ding hih bang ngaihsutna nei tawntung le-uh ka deih ahi hi. Pai in la, amaute kiangah, ‘Na puanbuk uhah ciah un,’’ ci in. Ahih hangin nang, kei kiang hih lai-ah om in, amaute’ neih dingin ka piak leitangah amaute in a zuih theih nadingun amaute na hilh ding thupiakna leh thukhamte leh ngeina kipte khempeuh nang tungah kong gen ding hi,’ hong ci hi. Tua ahih ciangin Topa na Pasian un note hong thupiak bangin na gamtat ding uh na kingaihsun ding uh hi; ama thu panin taklam hita leh vei lamah hita leh na pial kei ding uh hi. Note nungta-in, nuamsa-in, na tan’ ding uh leitangah sawtpi na nuntak nadingun Topa na Pasian un note hong thupiakna lampi khempeuh na tawn ding uh hi. Tua ahih ciangin Israelte aw, note nuamsa-in, Topa, na pate uh Pasian in note tungah hong ciamsa bangin bawngnawi leh khuaizu’ a luan’na gamah tampi pha-in na khan’ theih nadingun hih thute za un la, na zuih nadingun ngaihsun un. “Israelte aw, za un; Topa i Pasian in Topa khat bek ahi hi; Topa note’ Pasian, na lungsim khempeuh, na nuntakna khempeuh uh leh na thahatna khempeuh uh tawh na it ding uh hi. Tu ni-a no kong piak hih thute in na lungsim uhah om ding hi; na tate uh tungah lim takin na hilh ding uh a, na inn sung uhah na tut ciang, lampi-ah na pai ciang, na lup ciang leh na thawh ciangun tua thute na gengen ding uh hi. Na khut tung uhah lim dingin tuate na hen ding uh a, na mitte uh kikalah tuate in talsuante bang hi ding hi. Na inn kongkhak khuam tung uh leh na kongpi uh tungah tuate na gelh ding uh hi. “ Topa na Pasian un note piak dingin na pate uh Abraham, Isaak leh Jakob tungah a ciam, note’ phuh loh a lian a hoih khuapite, note’ khol loh na hoih khempeuh tawh a kidim innte, note’ bawl loh tuibem, note’ suan loh leengguite leh oliv kungte a omna leitangah hong paipihin, note in ne-in na kham uh ciangin, salsuahna Izipt leitang panin hong paikhiatpih Topa na mangngilh khak loh nading uh kidawm un. Topa na Pasian uh na zahtak ding uh hi; ama na bek na sem ding uh a, ama min tawh na kiciam ding uh hi. Note kiim-a om mite’ pasiante ahi pasian dangte’ nung na zui kei ding uh hi; bang hang hiam cih leh note lakah a om Topa na Pasian uh in a aam Pasian ahi hi; tua bang hi kei leh note tungah Topa na Pasian uh hong hehin lei maitang panin note hong susia ding hi. “Massah ah amah na ze-et uh bangin Topa na Pasian uh na ze-et nawn kei ding uh hi. Amah in note hong thupiaksa ahi Topa na Pasian uh thupiaknate, a tecipan’nate leh a thukhamte lim takin na kem ding uh hi. - Topa ’ hong ciamsa bangin note mai panin na langte khempeuh uh nawh khiatna tawh na pu na pate uh tungah piak dingin Topa in a ciamsa leitang hoih note in na luah theih nading uh leh note na nopsak theih nadingun Topa ’ muhna ah a man leh a hoih nate na sem ding uh hi. “Hong tung ding hunah na tapate un, ‘ Topa Pasian in note hong thupiaksa tecipan’na leh thukhamte leh ngeina kipte in bang a cih nopna ahi hiam?’ ci-in hong dot ciangin, na tapate uh kiangah, ‘Eite in Izipt gam sunga Faro’ silate i hi hi; Topa in Izipt panin a vangliatna tawh hong paikhiatpih hi; Topa in eite’ muhna ah a lian a nasia lim leh na lamdangte Izipt mite leh Faro leh a uliante khempeuh tungah lak hi; amah in i pu i pate tungah piak dinga a ciam leitangah hong paipihin eite hong piak theih nadingin tua lai panin eite hong paikhiatpih hi. Tu hun-a bangin i nuntak theih nadingin amah in eite’ hoih tawntung nading deihna ah Topa i Pasian zahtakin hih thukhamte khempeuh i zuih ding Topa in thu hong pia hi. Amah in eite hong thupiak bangin Topa i Pasian mai-ah hih thupiakna khempeuh lim takin zui lehang eite’ adingin thumanna hi ding hi,’ na ci ding uh hi. “ Topa na Pasian un luah dinga na tumna uh leitangah hong paipihin, note’ mai-ah Hit mite, Girgash mite, Amor mite, Kanaan mite, Perez mite, Hiv mite, leh Jebus mite, no sangin lianzaw-in a thahat zaw minamte note mai panin siang khia sakin, Topa na Pasian un note tungah amaute hong pia-in, note in amaute na zawh uh ciangin, note in amaute na susia mang ding uh hi; amaute tawh thuciamna na bawl kei ding uh a, amaute tungah hehpihna na lak kei ding uh hi. Amaute tawh kiteeng loin, na tanute uh amau tapate pia loin, a tanute uh na tapate’ adingun na la kei ding uh hi. Bang hang hiam cih leh pasian dangte na sem dingin keimah zuihna panin na tapate uh amaute in heikhia ding uh hi. Tua ciangin no tungah Topa ’ hehna hong so-in note hong susia pak ding hi. Note in amau tungah hih bangin na gamta ding uh hi: a biakna taute uh phelsakin, a khuampite uh deeng zanin, amau’ Asherah milimte phuk sakin, a kiseek a milimte uh mei tawh na hal ding uh hi. “Bang hang hiam cih leh note in Topa note’ Pasian tungah a siangtho mi na hi uh hi; lei maitang-a om mite khempeuh sung panin a neih manpha ama mi ahi dingin Topa na Pasian un note hong teel zo hi. Topa in note hong itin hong teelna in midangte sangin na tam zawkna hang uh hi lo hi, bang hang hiam cih leh mi khempeuh lakah a tawmpen na hi uh hi; Topa in salsuahna Izipt kumpipa Faro khut sung panin note hong tankhia-in a vangliatna tawh hong paikhiatpihna in Topa in note hong itin, na pate uh tunga a kiciam thuciam a zuihna hang ahi hi. Tua ahih ciangin Topa na Pasian uh Pasian hi a, amah itin a thupiakna a zuite tungah khang tul khat dongin thuciamna leh itna kip lenin a thuman Pasian, amah a mudah mite a maitang uhah suksiatna tawh a thukpahpa ahihna thei un; amah a mudah mi tungah zekai loin a maitang mah ah thuk ding hi. Tua ahih ciangin tu ni-a no kong thupiak ahi thupiakna, thukhamte leh ngeina kipte lim tak-a na zuih ding uh ngaihsun un. “Note in hih ngeina kipte za-in, kemin tuate na zuihna hangun, Topa na Pasian un na pu na pate uh tungah a ciam thuciamna leh itna kip note tungah hong tung sak ding hi; amah in note hong itin, thupha hong pia-in, tampi hong phasak ding hi; amah in note tungah piak dingin na pu na pate uh tungah a kiciamna gam sungah note’ suan leh khakte leh na gam sung panun a piangte, na an uh leh na leenggahtui uh leh na sathau uh, leh na ganhingte uh pungsakin, na tuu-le-keelno honte uh zong thupha pia ding hi. Midangte khempeuh sangin note thupha hong kilim piak zaw ding hi; note lak hita leh na ganhingte lak uh hita leh a nu ahi a, a pa ahi zongin a ciing om lo ding hi. Topa in note tung panin natna khempeuh lakhia ding hi; note in na theihsa uh ahi Izipt gam-a natna siate note tungah khat zong hong tung lo ding a, ahih hangin no hong mudahte khempeuh tungah tuate tung sak ding hi. Topa na Pasian un no tungah hong piak mi khempeuh na beisak ding uh a, amaute na khasiat kei ding uh hi; note’ adingin thangzak hi ding ahih manin amau’ pasiante’ na zong na sem kei ding uh hi. “Na lungsim uhah, ‘Hih minamte ei sangin tamzaw hi; amaute bangci suankhiat theih ding i hi hiam?’ na cih khak uh leh, amaute na kihta kei ding uh hi, Topa na Pasian un Faro leh Izipt mite khempeuh tungah ahih, na mitte un a muhsa a lian ze-etnate, limte, nalamdangte, a vangliatna leh Topa na Pasian un hong paikhiatpihna a thahatna phawk ding uh hi; Topa na Pasian un na kihtak uh mi khempeuh tungah tua bangin hih ding hi. Tua tham loin, a om lai mite leh no kiang panin a bu mite a siat khit dong matengin Topa na Pasian un amaute lakah khuaipi nam tunpi khah ding hi. Note in amaute na kihta kei ding uh hi; bang hang hiam cih leh a lian a kihtakhuai ahi Pasian, Topa na Pasian uh note tawh a om hi. Topa na Pasian un note mai-ah hih minamte tawm tawmin siang khiasak ding hi; note adingin gamsate hong tam khan’ lua kha ding ahih manin amaute thakhat thu-in na beisak kei ding uh hi. Ahih hangin Topa na Pasian un note tungah amaute hong pia ding a, amaute a bei matengin kibuaisak ding hi. Amah in note khut sungah amaute’ kumpite hong pia ding a, note in vantung nuai panin amaute’ min na maimang sak ding uh hi; amaute na susia khin mang ding uh a, note lang khatah mi khat beek hong pang zo lo ding hi. A kiseek amau pasian milimte mei tawh na hal ding uh hi; tua nate ah na awk khak loh nadingun amaute tunga a om kham leh ngun, deihgawh loin, note adingin na la kei ding uh hi; bang hang hiam cih leh tua in Topa na Pasian uh tungah a kihhuai ahi hi. Note’ inn sungah a kihhuai nate na tumpih kei ding uh a, tua nate tawh kibangin samsiat a thuak mi na kisuaksak kei ding uh hi; note in tua nate mudah mahmahin na kih ding uh hi; bang hang hiam cih leh tua nate in a kisamsia na ahi hi. “Note nungta-in tampi na phak theih nading uh leh na pate uh tungah piak dinga Topa a kiciamsa leitangah va pai-in na neih theih nadingun tu ni-a note kong thupiak ahi thupiakna khempeuh limtakin na zuih ding uh na ngaihsun ding uh hi. A thupiakte na zui uh hiam na zui kei uh hiam cih a theih nadingin note hong niamkhiatin na lungsim uhah bang om hiam cih a theih nadingin Topa na Pasian un gamlakah hih kum sawmli sung note hong paipihna lampi khempeuh na ciamteh ding uh hi. Mite in an bek tawh nungta loin Topa ’ kam sung panin a pusuak thu khempeuh tawh a nungta hi, ci-in note hong theihsak nadingin, amah in note hong niamkhiatin hong gilkial sak a, note hita leh na pu na pate uh hita leh in a theih ngei loh uh manna tawh hong vaak hi. Hih kum sawmli sung note tunga om na puan uh sia loin, na khe uh zong bawk lo hi. Tua ahih manin mi khatin a tapa a khal bangin Topa na Pasian un note hong khalna thu na lungsim uhah thei un. Tua ahih ciangin ama lampi zuihna leh amah zahtakna tawh Topa na Pasian’ thupiaknate na zui ding uh hi. Bang hang hiam cih leh Topa note’ Pasian in’ mual leh guamah a luang luituite a omna, ciktui leh tuikhuk a omna leitang, mangbuh leh mangbuhham, leenggui leh thei kung leh mang kawlsing a omna leitang, oliv kungte leh khuaizu a omna leitang, bangmah kisam loin, cil bawl loin an na nek nading uh leitang, a suangte sik a hihna leitang, mualte sung panin sumsan na tawh theihna uh leitang ahi gam hoih ah note hong paipih hi. Note in ne-in na gil uh vah ding a, note tungah gam hoih hong piakna hangin Topa na Pasian uh na phat ding uh hi. “Tu ni-a no tungah kong thupiak ahi ama thupiaknate leh a ngeina kipte leh a thukhamte zuih lohna tawh Topa na Pasian uh mangngilh kha ding na hih manun kidawm un: tua hi kei leh, an ne-in na kham uh ciang, inn hoihte lamin tuate sungah na teen’ uh ciang, na bawnghonte’ leh na tuuhonte uh tampi a phak ciang leh na kham leh na ngunte uh tampi pha-in, na neih khempeuh uh tampi a phak ciangin, na lungsim uh lianin, salsuahna Izipt gam panin no hong paikhiatpih, a lian a lauhuai gamlakah gul gunei leh mom-ai lak leh tui om lohna lei keu-ah hong paipihpa, meisuang tawh a kibang suangpi panin tui hong piapa, a tawpna ah a hoih-in na gamtat theih nading uh deihna-in note hong niamkhiatin hong ze-et theih nadingin na pu na pate un a theih loh manna tawh gamlakah hong vaak ahi Topa na Pasian uh na mangngilh kha ding uh hi. Na lungsim uhah, ‘Ka vangliatna uh leh ka thahatna un hih hauhna hong ngahsak hi,’ ci kha ding na hih manun kingaihsun un. Tu ni-a mah bangin na pu na pate uh tunga a kiciamna a kipsak theih nadingin, na hauh nadingun vangliatna hong piapa in amah ahih manin Topa na Pasian uh na phawk ding uh hi. Topa na Pasian uh mangngilhin pasian dangte nung zui-in tuate’ na semin na biak uh leh, na sia taktak ding uh hi, ci-in tu ni-in lim takin kong hilh khol hi. Topa note’ Pasian aw ngai lo ahih manun, Topa in note mai-ah a siatsak minamte bangin note na sia ding uh hi. Tua ahih ciangin, a kangtum thei mei bangin note mai-ah a paipa in Topa na Pasian uh ahihna tu ni-in thei un; amah in note mai-ah amaute susia-in, amaute zo ding hi; tua ahih ciangin Topa in note tungah hong ciamsa bangin amaute hawlkhia-in manlangin na siamang sak ding uh hi. “ Topa na Pasian un na mai panun amaute a nawhkhiat khit ciangin, na lungsim uhah ‘Hih leitang a luah dingin Topa in hong paipihna in komau thumanna hang ahi hi,’ ci kei un; Topa in na mai uhah amaute a hawlkhiatna in hih minamte’ gitlohna hang ahi hi. Na thumanna hang uh ahi a, na lungsim manna hang uh tawh ahi zongin amau’ leitang luah ding na hi kei uh hi; Topa na Pasian un na mai panun amaute a hawlkhiatna in hih minamte’ gitlohna hang leh Topa in na pu na pate uh Abraham, Isaak leh Jakob tungah a thuciamna kammal a kipsak theih nading ahi hi. “Tua ahih ciangin note diktatna hangin Topa na Pasian un na tan’ dingun hih leitang hoih note tungah hong pia ahih lohna thei un; bang hang hiam cih leh note in lungsim khauh mi na hi uh hi. Topa na Pasian uh gamlakah phin-in na hehsakna uh phawk un la, mangngilh kei un; Izipt gam panin na paikhiat ni uh a, kipan hih lai na tun’ dongun Topa langpan’ in, na lehdo uh hi. Horeb mual nangawn ah a heh nadingin Topa na phin uh a, note tungah Topa heh a, amah in note hong susia dektak hi. Topa in note tawh a bawl thuciamna suang ahi suangpeekte sang dingin mual tungah ka paitoh lai-in, mual tungah sun sawmli leh zan sawmli sung ka om hi; an ne lo, tui dawn loin ka om hi. Pasian khutme tawh a kigelh suangpeek nihte kei tungah Topa in hong pia hi; kikhop ni-in mei sung pana note tungah Topa in hong gensa kammal khempeuh tua suangpeekte tungah om hi. Sun sawmli leh zan sawmli a cin’ ni-in kiciamna suangpeekte ahi suangpeek nihte Topa in kei hong pia hi. Tua ciangin Topa in kei kiangah, ‘Tho in, hih lai panin paisuk mengmeng in: bang hang hiam cih leh Izipt panin na paikhiatpih mite a sia-in gamta khin uh hi; amaute ka thupiakna panin kihei khia pak uh hi; amau adingin a kisung milim khat bawl khin uh hi,’ hong ci hi. “Tua tham loin Topa in kei kiangah, ‘Hih mite ka mu khin hi, en in, a lungsim khauh mite ahi hi; amaute susia-in vantung nuai panin amaute’ min ka phiat theih nadingin kei guak hong omsak in; amaute sangin a vanglian zaw a tamzaw minam-in nang kong bawl ding hi,’ hong ci lai hi. Tua ahih ciangin kihei-in mual tung panin kong paisuk a, mei in mual kang-in kuang hi; kiciamna suangpeek nihte ka khut nihte sungah om hi. Tua ciangin ka khuadak a, en in, Topa na Pasian tung uhah na khial khin uh hi; a kisung bawngno milim note’ adingin na bawl uh hi; Topa in note hong thupiakna panin na kiheikhia pak uh hi. Tua ahih ciangin suangpeek nihte la-in ka khut nihte’ sung panin lawnin note’ mit muh ah ka sukham hi. Tua ciangin a masa-a bangin sun sawmli leh zan sawmli sung Topa mai-ah kunin ka om hi; ama heh nadingin phinin Topa muhna ah a sia gamtatna tawh note’ khialhnate khempeuh hangin an ne lo, tui dawn loin ka om hi. Bang hang hiam cih leh note tungah Topa ’ hehna leh a lungkim het lohna, note susia dingin a kithawina hangin ka lau hi. Ahih hangin tua hunin zong Topa in kei’ thu hong ngai hi. Aaron tungah Topa heh mahmah a, amah susia dingin kithawi hi; tua hun mah-in Aaron ading zong thu ka ngen hi. Tua ciangin note’ khialhna na, na bawlsa uh bawngno, mei tawh halin sukhamin, leivui bangin a neel dongin ka gawizan hi; tua ciangin mualtung pan-a hong luangsuk lui sungah a vuite ka lawn hi. “Taberah leh Massah leh Kibrothhattaavah munte ah zong Topa phin-in na heh sak uh hi. Topa in Kadesh-barnea panin note hong sawlin, ‘Paito un la, note kong piaksa leitang luah un,’ hong cih lai-in Topa na Pasian uh hong thupiakna lehdo-in, amah um loin, ama aw na ngai kei uh hi. Note kong theih ni-a kipan Topa na lehdo uh hi. “Tua ahih ciangin Topa in note ka susia ding ci ahih manin hih sun sawmli leh zan sawmli sung Topa mai-ah kunin ka om hi. Topa tungah thu ka ngen a, ‘ Topa Pasian aw, nangmah in na liatna tawh na tatkhiatsa, a vangliatna tawh Izipt panin na paikhiatpih ahi na mite leh na luahte susia kei in. Na nasemte Abraham, Isaak leh Jakob phawk in: hih mihingte’ lungsim khauhna hita leh a gitlohna uh hita leh a khialhna uh hita taleh thusim kei in, tua bang hi kei leh kote nong paikhiatpihna gam mite in, “ Topa in amaute tungah a ciamsa leitangah amaute paipih zo loin, amah in amaute mudah ahih manin, gamlakah amaute that dingin paikhiatpih hi,” ci kha ding uh hi. Bang hang hiam cih leh amaute pen na vangliatna leh na thahatna tawh na paikhiatpih na mihingte leh na luahte ahi hi,’ ka ci hi. “Tua hun lai takin Topa in kei kiangah, ‘A masa-a bangin suangpeek nih seekin, mual tungah ka kiangah hong pai in la, sing singkuang khat bawl in. A masa-a suangpeek na sukkhapte tunga thute tua suangpeekte tungah ka gelh ding a, singkuang sungah tuate na koih ding hi,’ hong ci hi. Tua ahih ciangin singkha sing tawh singkuang khat bawlin, a masa-a bangin suangpeek nih ka seek a, ka khut sungah a peek nihte tawi-in mual tungah ka pai to hi. Kikhop ni-in mei sung panin mual tungah Topa in note tungah hong gensa thute ahi thupiakna sawmte, a masa-in a kigelh bangin tua suangpeekte tungah amah in gelh hi; tua ciangin Topa in kei tungah tua suangpeekte hong pia hi. Tua ciangin kihei-in mual tung panin ka paisuk a, ka bawlsa singkuang sungah tua suangpeekte ka koih hi; Topa in kei hong thupiak bangin suangpeekte tua sungah tu-in a om hi. (Be-eroth Ben-ejaakan panin Moserah ah Israel mite zin uh hi. Tua lai-ah Aaron si a, tua lai mah ah kivui hi; ama tangin a tapa Eleazar in siampi na sem hi. Tua lai panin Gudgodah ah pai uh a, Gudgodah panin lui tuite a omna gam Jotbathah ah pai uh hi. Tua hun lai takin Topa in, tu ni dongin ama na a sem ding leh ama min tawh thupha a pia dingin Topa mai-ah ding-in Topa ’ thuciamna singkuang a pua dingin Levi minam tuam koih hi. Tua ahih ciangin a sanggamte uh bangin Levi mite in tanh ahi a, luah ahi zongin nei lo uh hi. Topa na Pasian un amau kiangah a gen bangin Topa in amau luah ahi hi.) “A masa-a bangin sun sawmli leh zan sawmli sung mual tungah ka om a, Topa in tua hunin zong ka thu hong ngai hi; Topa in note hong susia nuam lo hi. Topa in kei tungah, ‘Amaute tungah piak dingin a pate uh tungah ka kiciam leitangah pai-in a luah theih nadingun ding in la, na khualzin uh zomin mite mai-ah pai in,’ hong ci hi. “Israelte aw, tu-in, Topa na Pasian uh zahtak ding, ama lampite tot ding, amah it ding, na lungsim khempeuh uh leh na nuntakna khempeuh uh tawh Topa note’ Pasian’ na sep ding, leh nomau’ hoih nadingin tu ni-a kong thupiak ahi thupiaknate leh Topa ’ thukhamte zuih ding cih sim loh, Topa na Pasian un no tung panin bang dang hong kal ahi hiam? En un, vantung leh vantung a sangpente leh leitung leh a sunga om khempeuh in Topa note’ Pasian’ aa ahi hi; tua hi napi-in Topa in itna tawh ama lungsim na pu na pate uh tungah koihin, tu ni-a mah bangin midangte khempeuh sangin nomau’ suan leh khakte hong teel hi. Tua ahih ciangin Topa ’ thu mang un la, lung khauh nawn kei un. Bang hang hiam cih leh Topa na Pasian un a lian, a vanglian a kihtak huai Pasian, angvan nei loin, sumgolh a la lo, pasiante’ Pasian, topate’ Topa ahi hi. Amah in pa nei lote leh meigong numeite adingin thutang semin, mi peemte itin an leh puan a pia hi. Tua ahih ciangin mi peemte it un; bang hang hiam cih leh note in Izipt gamah mi peemte na hi uh hi. Topa note’ Pasian na zahtak ding uh hi; ama na semin amah beelin, ama min tawh na kiciam ding uh hi. Amah in nomau’ phat ahi hi: na mitte un a muhsa ahi hih a lian a kihtak huai a lamdang nate note adingin hong bawlsakpa in na Pasian uh ahi hi. Na pu na pate uh mihing sawmsagih Izipt ah paisuk uh hi; tu-in Topa na Pasian un vantung aksi zah-in note hong tamsak hi. “Tua ahih ciangin Topa na Pasian uh itin, ama hong thuhilhna, a thukhamte, a ngeina kipte, a thupiaknate na zui tawntung ding uh hi. Tu ni-in ngaihsun un (a thei nai lo, a mu nai lo na tate uh tungah a gen hilo ka hih ciangin) Topa note’ Pasian’ hong thuhilhna, ama liatna, a vangliatna leh a thahatna, Izipt kumpipa Faro leh a leitang tung khempeuhah a hih Izipt gam sunga ama limte leh a sepnate; Izipt galkapte, a sakolte leh a leengte tungah a hihte; note hong delh laitakin San Tuipi tui tawh amaute tuumsakin, tu ni dongin Topa in amaute a suksiatna; hih mun na tun’ ma sung tengun gamlakah amah in note tungah hong hihte; Reuben’ tapa Eliab’ tapa Dathan leh Abiramte tungah a hihte; leitang in a kam ka-in, Israelte khempeuh’ lakah a innkuanpite, a puanbukte leh amau a zuite khempeuh tawh amaute a nawmvalhna ngaihsun un; bang hang hiam cih leh a hihsa Topa ’ nasepna a liante khempeuh na mite un mu khin hi. - “Tua ahih ciangin note thahatin, note va pai-in na luah ding uh leitangah va pai-in na luah theih nading uh leh, Topa in na pu na pate uh leh a suan leh khakte uh piak dingin a kiciam, bawngnawi leh khuaizu a luan’na gamah sau vei na nuntak theih nadingun tu ni-a kong thupiak ahi thupiakna khempeuh na zui ding uh hi. Bang hang hiam cih leh luah dinga na lutna ding uh leitang in note’ hong paikhiatna, anteh ciin’na huang banga khaici vawhin na khe tawh tui na buahna uh Izipt leitang tawh kibang lo hi; note va pai-in na luah ding uh leitang in, vantung panin guahtui a ngah mual leh guam a omna leitang, Topa na Pasian un a kep leitang ahi hi; kum kipat-a kipan kum bei dongin Topa note Pasian’ mitte in tua leitang en tawntung hi. “ Topa na Pasian uh itin, na lungsim khempeuh, na nuntakna khempeuh uh tawh ama’ na na sep nadingun tu ni-a no kong thupiak ahi ama thupiaknate na zuih uh leh, na an leh na leenggahzu leh na sathau uh na kaihkhop theih dingun amah in guah masa leh guah nunung, a hunin na leitang uh adingin guah hong zusak ding hi. Amah in na ganhingte uh adingin na gam sung uhah lopa hong posak ding a, note in zong ne-in na gil uh vah ding hi. Na lungsim uh hong kikhemin, note kihei-in pasian dangte’ na semin tuate na biak khak loh nadingun kingaihsun un, tua hi kei leh no tungah Topa hong heh-in guah zu loin, leitang in gah piangsak loin, Topa in no hong piak leitang hoih ah manlangin na siat pak theih nadingun amah in vantungte khakcip kha ding hi. “Tua ahih ciangin hih ka kammalte na lungsim uhah ciamtehin na ngaihsun ding uh hi; na khut tung uhah lim dingin na khih ding uh a, tuate in na mitte kikal uhah talsuan hi ding hi. Na tate uh tungah na hilh ding uh a, na inn sung uhah na tut laitak, lampi ah na pai laitak, leh na lup ciang leh na thawh ciangun tuate genin na nei ding uh hi. - Vantungte in leitung’ tungah a om lai teng, amaute tungah piak dingin Topa in na pu na pate uh tungah a kiciam gam sungah note leh na tate uh khan’ a sau theih nadingin na inn kongkhak khuam leh na kongpite uh tungah tuate na gelh ding uh hi. Bang hang hiam cih leh Topa na Pasian uh itin, ama lampi khempeuh zui-in, amah beelin, nomau zuih dingin kong thupiak hih thupiakna khempeuh zuih ding na kingaihsut uh leh, Topa in na mai uhah a om hih minamte khempeuh hawlkhia ding a, note sangin lianzaw-in a thahat zaw minamte na suankhia ding uh hi. Na khe un a sikna mun khempeuh nomau’ aa hi ding hi; na gamgi un gamlak panin Lebanon ciang dong leh Gun, Eufrates gun, panin nitumna tuipi dong hi ding hi. Na lang uhah kuamah pang zo lo ding hi; note tungah hong ciam bangin Topa na Pasian un na tot ding uh gam khempeuh tungah note hong kizahtakna leh note hong kihtakna tungsak ding hi. “En un, tu ni-in na mai uhah thupha khat leh hamsia khat ka koih hi: tu ni-a no kong thupiak ahi Topa na Pasian uh thupiaknate na zuih uh leh thupha hi a, Topa na Pasian uh thupiaknate mang loin, na theih nai loh uh pasian dangte’ nung zui dingin tu ni-a no kong thupiak lampi panin na kihei khiat uh leh hamsia ahi hi. Luah dingin na lutna leitang uhah Topa na Pasian un hong paipih ciangin Gerizim Mual tungah thupha koihin, Ebal Mual tungah hamsia na koih ding uh hi. Tuate in Jordan gal, lampi panin nitumna lam, ni a tum sukna lam, Moreh tawsaw gei-a Gilgal gal khat, Arabah ah a teeng Kanaan mite’ gam sungah om hilo ahi hiam? Bang hang hiam cih leh Topa na Pasian un note hong piak leitang luah dingin a pai dingin Jordan a kantan ding na hi uh hi; tua leitang luahin a sungah na teen’ uh ciangin, tu ni-a note kong piak thukhamte leh ngeina kipte khempeuh na zuih ding uh lim takin na ngaihsun ding uh hi. “Hite in, leitangah na nuntak lai teng uh Topa, na pu na pate’ Pasian in neih dingin no hong piaksa gam sungah lim takin na zuih ding uh thukhamte leh ngeina kipte ahi hi. Na suankhiat ding uh minamte in amau’ pasiante’ na sepna uh mualsangte tung leh mualneute tung leh singniim nuai, mun khempeuh na susia taktak ding uh hi; amaute’ biakna taute phel khia-in, a khuampite deeng zanin, amaute’ Asherah milimte mei tawh na hal ding uh hi; a kiseek amau’ pasiante’ limte na phukpai ding uh a, tua mun panin amau’ min na maimangsak ding uh hi. Ahih hangin Topa na Pasian uh tungah tua bangin na hih kei ding uh hi. Topa na Pasian un na minam khempeuh uh sung panin ama min koih nadingin teelin, ama om nadinga a bawlna mun na zong ding uh hi; tua lai-ah na pai ding uh a, na meihal biaknate uh leh na biak piaknate uh, note in na piak uh na sehsawm suah sehkhat uh leh na piakte, thuciamna biak piakna, ut thu-a na piakna, na bawnghon tacilte uh leh na tuuhon tacilte uh tua lai-ah na paipih ding uh hi; Topa na Pasian uh a omna tua lai munah na ne ding uh a, Topa na Pasian un note thupha hong piakna hangin na hihna khempeuh uhah note leh na innkuanpihte na lungdam ding uh hi. Tu hun ciangin mi khempeuh in ama hoihsak bangin a gamtat ngei ciat bangin na gamta nawn kei ding uh hi; bang hang hiam cih leh Topa na Pasian un note hong piak tawlngakna leh luahna ah na tung nai kei uh hi. Ahih hangin Jordan gal khatah pai-in, Topa na Pasian un luah dingin note hong piak leitangah teengin, nuam taka na nuntak theih nadingun na kiim uh a, na langte khempeuh uh kiang panin tawlngakna hong piak ciangin, Topa na Pasian un ama min a teen’ nading muna a teelna munah note kong sawl khempeuh na paipih ding uh hi; na meihal biaknate uh leh na biak piaknate uh, note in na piakna sehsawm suah sehkhat uh leh na piakte uh leh Topa tungah na ciam uh na thuciam piaknate uh na paipih ding uh hi. Topa na Pasian uh mai-ah note leh na tapate leh na tanute, na nasem pasalte uh leh na nasem numeite uh, leh note neih bangin tanh ahi a, luah ahi zongin a nei lo na khua sunga om Levi mite tawh lungdam khawm un. Na tuahna mun peuh uhah na meihal biaknate uh na piak loh nadingun kingaihsun un; na minamte uh sung panin Topa in a teelna mun khatah na meihal biaknate uh pia-in, note kong thupiakte khempeuh tua lai munah na hih ding uh hi. “Ahi zongin, Topa na Pasian un note tungah hong piak thupha tawh kizui-in na khuapite khatpeuh peuh uh sungah sa na deih zahzah uh go-in na ne thei ding uh hi; sanang leh sakhitalte a kinek mah bangin mi a nin leh a siangte in na ne thei ding uh hi. A si na ne kei bek ding uh hi; tui bangin leitungah na buakhia ding uh hi. Na an uh sehsawm suah sehkhat ahi a, na leenggahzu uh ahi a, na sathau uh ahi zongin, na bawnghon leh na tuuhonte uh sung pan tacilte ahi zongin, na kiciam uh ahi na thuciamna biak piakna khatpeuh peuh uh ahi zongin, ut-thu-a na piaknate uh ahi zongin, nomau piak ahi piaknate ahi zongin na khuapite uh sungah na ne thei kei ding uh hi; Topa na Pasian un a teelna munah note leh na tapa leh na tanu, na nasem pasal leh na nasem numei, na khuapi sunga om Levi mite in Topa na Pasian uh mai-ah na ne ding uh hi; na hihna khempeuh uhah Topa na Pasian uh mai-ah na lungdam ding uh hi. Na gam sung uhah na teen’ lai teng uh Levi mite na mangngilh loh nadingun kingaihsun un. “No tungah hong ciamsa bangin Topa na Pasian un na gamgi uh hong sotsak ciangin, sa duh na hih manun, ‘Sa ka ne ding uh hi,’ na cih uh leh, na duh zahzah uh sa na ne thei ding uh hi. Topa na Pasian un ama min koih nadingin a teelna mun in note kiang panin a gamla lua ahih leh, note kong thupiaksa bangin Topa in no hong piaksa na bawnghon uh pan ahi a, na tuuhon uh pan ahi zongin khatpeuh peuh na go thei ding uh hi; na duh zahzah uh na khua sung uhah na ne thei ding uh hi. Sanang ahi a, sakhital ahi zongin a kinek mah bangin na ne thei ding uh hi; mi a nin leh mi a siangte in a kibangin na ne thei ding uh hi. A si na nek loh ding uh thei tel un; bang hang hiam cih leh sisan in nuntakna hi a, nuntakna pen sa tawh na ne khawm kei ding uh hi. Sisan na ne kei ding uh hi; tui bangin leitungah na buakhia ding uh hi. Topa muhna ah a manin na gamtat uh ciangin note leh note khit ciangin na tate uh a nopsak theih nadingin sisan na ne kei ding uh hi. Ahih hangin na bat uh a siangtho nate leh na thuciamna na piaknate uh note in la-in Topa in a teelna munah na paipih ding uh a, Topa na Pasian uh biakna tau tungah na meihal biakna, a sa leh a si na pia ding uh hi; na biak piakna uh site Topa note’ Pasian’ biakna tau tungah kibuakhia ding a, ahih hangin a sa na ne thei ding uh hi. Topa na Pasian uh muhna ah a hoih leh a manin na gamtat uh ciangin note leh note khit cianga na tate uh a nopsak theih nadingin note kong thupiak hih kammalte khempeuh na kin ding uh lim takin ngaihsun un. “ Topa na Pasian un na mai panun na suankhiat ding uh minamte beimang sakin, amaute suankhia-in amau’ leitangah na teen’ uh ciangin, na mai uhah amaute a kisuksiat khit ciangin amaute zui dingin na awk khak loh nading uh leh, ‘Kei zong amau’ hih bangin ka hih theih nadingin hih minamte in a pasiante’ na bangci sep ahi hiam?’ ci-in a pasiante’ thu na kan loh nadingun kingaihsun un. Topa na Pasian uh tungah tua bangin na hih kei ding uh hi; bang hang hiam cih leh Topa in a muhdah a kihhuai nam khempeuh amaute in a pasiante uh adingin hih uh hi; a pasiante uh adingin a tapate leh a tanute nangawn uh mei sungah hal uh hi. “Note kong thupiak khempeuh na hih ding uh na lim ngaihsut ding uh hi; na behlap kei ding uh a, zong na khiam kei ding uh hi. “Note lakah kamsang khat ahi a, mang man khat ahi zongin hong khangin, lim ahi a, nalamdang ahi zongin hong lak a, ama hong gen lim ahi a, nalamdang ahi zongin hong tungin, na theih ngei loh uh, ‘Adang pasiante nung zui-in amaute na sem ni,’ hong cih leh, tua kamsangpa ahi a, mang manpa thu ahi zongin na ngai kei ding uh hi; bang hang hiam cih leh Topa note’ Pasian na lungsim khempeuh uh leh na nuntakna khempeuh uh tawh na it uh hiam cih a kitheihna dingin, Topa na Pasian un no hong ze-etna ahi hi. Topa na Pasian uh nung zui-in, amah na zahtak ding uh a, a thupiaknate zui-in a aw na ngai ding uh a, ama na semin amah na beel ding uh hi. Ahih hangin tua kamsangpa ahi a, mang manpa ahi zongin kithat ding hi, bang hang hiam cih leh Topa na Pasian un na pai nading uh a, a hong thupiak na nusiat theih nading uh, leh Izipt leitang panin hong paikhiatpih in, salsuahna panin hong tankhia Topa na Pasian uh lang pangin na lehdo nading uh thu hong hilh ahi hi. Tua ahih ciangin note lak panin siatna na siangkhiasak ding uh hi. - “Na nu’ tapa ahih kei leh na pa’ tapa na sanggampa ahi a, na tanu ahih kei leh na tapa in ahi a, na ang sunga om na zi ahi a, nangmah banga na ngaihsut na lawm it in ahi zongin nang hong zol simin, lei mong khat pan mong khat dong kikal-ah, nang kiang pan a nai ahi a, a gamla ahi zongin, nang hita leh na pu na pate hita leh in a theih ngei loh, na kiim-a om mite’ pasiante, ‘Va pai-in pasian dangte’ na va sem ni,’ hong cih leh ama cih mang loin, a thu ngai loin, amah hehpih loin, amah khahkhong loin, amah na iim kei ding hi; nangmah in amah na that ding hi; amah that dingin nangmah a masapen na hi ding a, tua khit ciangin midangte khempeuh in hong zui ding uh hi. Salsuahna ahi Izipt gam panin a hong paikhiatpih Topa na Pasian uh kiang panin note hong paikhiatpih ding ngaihsun ahih manin suang tawh amah na deng lum ding uh hi. Tua ciangin Israelte khempeuh in za-in, lau ding uh a, hih banga gitlohna note lakah bawl kik ngei nawn lo ding uh hi. “ Topa na Pasian un teen’ nadinga hong piak na khuapite khatpeuh peuh uh sungah, mi gina lo pawlkhat note lakah hong pai-in, ‘Pai-in pasian dangte’ na va sem ni,’ ci-in na theih ngei lohte uh lamah khuapi sung a teeng mite a paikhiatpihna na zak uh leh, note in a thu na kan ding uh a, zong-in lim takin na dong ding uh hi; en un, note lakah tua banga a kihhuai-in gamtatna thu a om mah ahih takpi leh, tua khua sunga mite namsau tawh na that ding uh a, khua sunga om khempeuh leh a ganhingte, namsau tawh na susia mang ding uh hi. Note in van kinusiate khempeuh khua laizang mun awng-ah khawmin, Topa na Pasian uh tungah khuapi leh van kinusiate khempeuh meihal biakna buppi-in mei tawh na hal ding uh hi; tua khuapi in asia hi tawntung ding a, kilam kik nawn lo ding hi. - Tu ni-a note kong thupiak ahi ama thupiaknate khempeuh zui-in Topa na Pasian uh mai-ah a manin gamtatna tawh Topa na Pasian uh aw na ngaih uh leh, na pu na pate uh tungah a ciamsa bangin, a kihtak huai ama hehna panin Topa hong kihei-in note tungah migitna hong lakin, note tungah hehpihna hong nei-in, note tampi tak hong phak sak theih nadingin a ki-apsa na khat beek zong na kem kei ding uh hi. Note in Topa na Pasian uh mite na hi uh hi; mi site hangin note ki-at keh loin, na sam uh zong na mettol kei ding uh hi. Bang hang hiam cih leh note in Topa na Pasian uh tungah a siangtho mite na hi uh a, leitung maitang-a om mite khempeuh sung panin ama neih mi dingin Topa in note hong teel ahi hi. “A kihhuai na khatpeuh peuh na ne kei ding uh hi. Hihte in na nek theih ding uh ganhingte ahi hi: bawng, tuu, keel, sakhital, sanang, sim-sakhi, sathak, saza, zo-sakhi, leh gamtuu ahi hi. Ganhingte lak panin a khecin kikhenin a khecin nih-in a ka, eknel a hai ganhing peuhmah na ne thei ding uh hi. Ahi zongin eknel a hai a, khecin a ka ahi zongin hihte na ne kei ding uh hi: kalaoh, bilpi, leh sakikhte in eknel a hai hangin a khecin ka lo ahih manin note’ adingin a nin ahi hi. Vok pen a khecin a kat hangin eknel hai lo ahih manin note adingin a nin ahi hi. Tuate’ sa ne loin, a sisate zong na lawng kei ding uh hi. “Tui sunga om khempeuh lak panin hihte na ne thei ding uh hi: phe leh lip a nei peuhmah na ne thei ding uh hi. Phe leh lip a nei lo peuhmah na ne kei ding uh hi; tuate in no adingin a nin ahi hi. “Vasa a siang khempeuh na ne thei ding uh hi. Ahih hangin hihte in na nek loh dingte uh ahi hi: muvanlai, musane, lui-mu, mupi, mu-meika, amau namciat; va-ak nam khempeuh; kalaoh-vasa, pengpelep, vatawt, musi nam khempeuh; keising leh simbu, gam vatawt leh tui vatawt, samuat ne musane leh tuimu, gun vapi, gun vazonei nam khempeuh, huihtun leh bak ahi hi. Kha a nei insek ganhing khempeuh no adingin a nin ahi hi; tuate kine lo ding hi. Kha a nei insek ganhing a siangte khempeuh na ne thei ding uh hi. “Ama thu-a a sitawm ganhing peuhmah na ne kei ding uh hi; a nek dingun na khua sung uh a, om khual mite tungah na pia thei ding uh hi; tua ahih kei leh gamdang mite tungah na zuak thei ding uh hi; bang hang hiam cih leh note in Topa na Pasian uh tungah a siangtho mi na hi uh hi. “Keelno a pi’ nawizu tawh na huan kei ding uh hi. “A kum a kumin na lo uhah a piang, na khaici pan a piang khempeuh sehsawm suah sehkhat na pia ding uh hi. Topa na Pasian uh zahtak tawntung nading na theih nadingun, ama min a teen’ nadingin a teelna mun Topa note’ Pasian mai-ah na an, na leenggahzu, na sathau uh sehsawm suah sehkhat, leh na bawnghon leh tuuhon tacilte uh na ne ding uh hi. Topa na Pasian un a min koih nadingin a teelna mun pen, Topa na Pasian un no thupha hong piak ciangin note kiang panin gamla lua a, no adingin lam sau luat manin na sehsawm suah sehkhat uh na paipih zawh kei uh leh, tuate sum na suah ding uh a, na khut sung uhah a sum tunin, Topa na Pasian un teelna munah na pai ding uh a, na deih peuhpeuh uh bawng ahi a, tuu ahi a, leenggahzu ahi a, kham theih zu ahi zongin, na duh peuhpeuh uh leina-in a sum na zang ding uh hi; Topa na Pasian uh mai tua lai munah na ne ding uh a, note leh na innkuanpite na lungdam ding uh hi. Note bangin amau in tanh leh luah nei lo ahih manun no khuate sunga om Levi mite na mangngilh kei ding uh hi. “Kum thum simin tua kum-a note’ an piang sehsawm suah sehkhat khempeuh hong paikhiatpihin na khua sung uhah na khol ding uh hi; Topa na Pasian un na sepnate khempeuh uhah thupha hong piak theih nadingin, note tawh kibangin amaute in tanh ahi a, luah ahi zongin nei loh uh ahih manin Levi mite’ peemta, pa nei lo, leh meigong numei ahi note’ khua sunga omte hong pai-in ne-in a gilvah ding uh hi. “Kum sagih a cin’ simin maisakna na pia ding uh hi. Hih in maisak nading zia ahi hi: leitawi a pia mi khempeuh in a vengte tungah leitawi a, a piaksate maisak ding hi: Topa ’ maisakna kigen khin ahih manin a vengpa’ sanggampa tung pan leiba siik lo ding hi. Gam dang mite tung pan na siik thei ding uh hi; ahih hangin na sanggampate uh tung panin no’ aa ahi peuhmah na maisak ding uh hi. - Ahih hangin, tu ni-a kong thupiak ahi hih thupiakna khempeuh zui-in Topa note’ Pasian’ aw na ngaih nak uh leh note lakah a zawng om lo ding hi (bang hang hiam cih leh Topa na Pasian un na neih dingun gamluah in, hong piak leitang tungah Topa in note thupha hong pia ding hi) Bang hang hiam cih leh Topa na Pasian un hong ciamsa bangin note thupha hong pia ding a, minam tampi tungah leitawi na pia ding uh hi, ahih hangin note in lei na tawi kei ding uh hi; minam tampite na uk ding uh a, ahih hangin amaute in note hong uk lo ding uh hi. Topa na Pasian un note hong piak gam sunga na khuate uh khatpeuh peuh sungah na sanggam khat uh note lakah a zawng a om leh na lungsim uh khauhsak loin, na sanggam zawngpa uh huh loin na om kei ding uh hi, ama tungah na cingh gamtat ding uh a, bangbang hita leh ama kisap zah na leitawi ding uh hi. Na lungsim ah ngaihsutna hoih lo hong omin, ‘Kum sagihna, maisakna kum hong nai hi,’ ci-in na sanggampa gal mi etin amah bangmah na piak loh ciangin na lang khatah Topa tungah amah kiko-in, nang tungah khialhna a suah khak ding kingaihsun in. Citna tawh amah na pia ding a, amah na piak ciangin lunghianna na nei kei ding hi; Topa na Pasian in na sepna na hihna khempeuh hih thu hangin nang thupha hong pia ding hi. Bang hang hiam cih leh leitang tungah mizawng bei ngei lo ding hi; tua ahih ciangin, ‘Gam sungah na sanggampa, na a kisam mite’ leh mizawngte tungah na cingh mahmah ding hi,’ ci-in thu kong pia hi. “Na sanggampa, Hebru pasal khat ahi a, Hebru numei khat ahi zongin nang tungah hong kizuak leh, amah in nangma’ na kum guk sung hong sem ding a, a kum sagih ciangin nang kiang panin suakta-in amah na paikhia sak ding hi. Na kiang panin a suakta-in na paikhiat sak ciangin khut hawm guakin na paisak kei ding hi; na tuuhon lak, na ancilna leh na leenggah sukna panin citna tawh tampi na pia ding hi; Topa na Pasian in nang thupha hong piak zahin amah na pia ding hi. Izipt gamah sila na hihna leh Topa na Pasian in nang hong tatkhiatna na phawk ding hi; tua hih manin hih thu tu ni-in kong pia hi. Ahih hangin amah in note nuam hong sa-in, nang leh na innkuante hong it ahih manin, ‘Nang kiang panin ka paikhia kei ding hi,’ hong cih leh, phimpi khat la-in, kongkhak dapphah-in a bil na vut ding a, amah in na sila hi tawntung ding hi. Na sila numei zong tua mah bangin na hih ding hi. Na kiang panin a suakta-in amah na paisak ciangin haksa sa kei in; bang hang hiam cih leh a kicial nasem thaman lang tawh amah in nangma na kum guk sung hong sem khin zo hi. Tua ahih ciangin Topa na Pasian in na hihna khempeuh ah thupha hong pia ding hi. “Na bawnghon leh na tuuhon panun tacil a pa khempeuh Topa note’ Pasian tungah na ap ding uh hi; na bawnghon tacilte tawh na na sem kei ding uh a, na tuuhon tacilte uh zong a mul na meet kei ding uh hi. Topa in a teelna munah a kum a kumin Topa note’ Pasian uh mai-ah nang leh na innkuante in an ne ding uh hi. Ahih hangin poina khatpeuh, a khebai a mittaw, ahih kei leh poina lian khatpeuh peuh a neih leh, Topa note’ Pasian tungah biakna in na pia kei ding uh hi. Na khua sung uhah na ne ding uh hi; sanang ahi a, sakhi ahi zongin a kinek bangin mi a nin leh mi a siangte in a kibangin ne thei ding uh hi. A si bek na ne kei ding uh hi; tui bangin lei lakah na buakhia ding uh hi. “Abib kha tang un la, Topa na Pasian uh adingin Paisan pawi bawl un; bang hang hiam cih leh Abib kha sungin Topa na Pasian un Izipt gam panin note zanin hong paikhiatpih hi. Tuuhon pan ahi a, bawnghon pan ahi zongin Topa in ama min om nadingin a teelna munah Paisan biak piakna Topa na Pasian uh tungah na pia ding uh hi. Silngo sawh anlum tawh na ne kei ding uh hi; ni sagih sung silngo sawhloh anlum, gimna anlum tawh na ne ding uh hi—Izipt gam panin nawhsa-in na taikhia uh hi—Izipt gam panin na taikhiat hun uh na nuntak sung tawntung uh na phawk theih nading uh ahi hi. Na gam sung khempeuh uhah ni sagih sung note lakah silngo kimu lo ding hi; a ni masa nitak-a biak piakna a, na piak uh sa khatpeuh peuh zong a zingsang dong zan tawntung na omsak kei ding uh hi. Topa na Pasian un note hong piak khua khatpeuh peuh sungah Paisan biak piakna na pia thei kei ding uh hi; Topa na Pasian un ama min om nading mun a, a teelna munah ni a tum khit nitak, Izipt panin na paikhiat hunun Paisan biak piakna na pia ding uh hi. Topa na Pasian un a teelna munah om-in na ne ding uh hi; zingsang ciangin kihei-in na puanbukte uhah na ciah ding uh hi. Ni guk sung silngo sawhloh anlum na ne ding uh hi; a ni sagih ni-in Topa na Pasian uh adingin a thupi kikhopna khat om ding hi; tua ni-in na na sem kei ding uh hi. “Nipi kal sagih na simto ding uh hi; ankung ding laite tungah phiaukawi na tah masak uh huna kipan a nipi kal sagih sim na kipan ding uh hi. Tua ciangin Topa na Pasian un note thupha hong piakna tawh kizui-in na piak ding uh ahi note khut sung panin ut-thu-a piakna tawh Topa na Pasian uh tungah nipi kal pawi na bawl ding uh hi; Topa na Pasian uh mai, ama min om nadingin Topa na Pasian un a telna munah, nang leh na tanu leh na tapa, na nasem numei leh na nasem pasal, na khua sunga om Levi mi, peemta, pa nei lo, note lakah a om meigong numeite tawh na lungdam khawm ding uh hi. Izipt ah sila na hihna uh na phawk ding uh hi; hih thukhamte zuih ding lim takin na ngaihsun ding uh hi. “Na an cilna uh leh na leenggah sukna panun an na kaih khop uh ciangin ni sagih sung buk pawi na bawl ding uh hi; na pawi sungah nang leh na tanu leh na tapa, na nasem numei leh na nasem pasal Levi mi, peemta, pa nei lo, leh na khua sunga om meigong numeite tawh na lungdam khawm ding uh hi. Topa in a teelna munah ni sagih sung Topa na Pasian uh tungah pawi na bawl ding uh hi; bang hang hiam cih leh note na lungdam khawm theih nadingun na khawhsa leh na khut tawh na sepna khempeuh uhah Topa na Pasian un note thupha hong pia ding hi. - “Amah in a teelna mun, Topa na Pasian uh mai-ah pasal khempeuh kum khatin thum vei kilaak ding uh hi; silngo sawhloh anlum pawi, nipi kal pawi, leh buk pawi-ah kilaak ding uh hi. Amaute khut hawm guakin Topa mai-ah kilaak lo ding uh hi. Topa na Pasian un note thupha hong piaknasa tawh kizui-in mi khempeuh in ama hih theih bang ciatin pia ding uh hi. “Na minam uh tawh kizui-in Topa na Pasian un note hong piakna khuate ah thukhente leh uliante na koih ding uh hi; amaute in a man thukhenna tawh mite thukhen ding uh hi. Thutang na heikhia kei ding uh hi; angvanna na nei kei ding uh hi; sumgolh in mi pilte’ mit tawsakin thumante’ thu heikhia ahih manin sumgolh na la kei ding uh hi. Note nungta-in Topa na Pasian un note hong piak leitang na luah theih nadingun thumanna leh thumanna bekbek na zui ding uh hi. “Note in na bawlsa uh ahi Topa na Pasian uh biakna tau kiangah Asherah milim dingin khuam khatpeuh peuh na phut kei ding uh hi. Topa na Pasian un a muhdah khuampi na phut kei ding uh hi. “Bawng ahi a, tuu ahi zongin poina nei a, kisapna khatpeuh peuh a om peuhmah Topa note’ Pasian tungah biak piakna-in na pia kei ding uh hi; bang hang hiam cih leh tua in Topa note’ Pasian adingin a kihhuai ahi hi. “ Topa note’ Pasian in note hong piak khua khatpeuh peuh sungah numei ahi a, pasal ahi zongin, ama thuciamna palsatin, Topa na Pasian uh muhna ah a sia-a gamta kimu-in, pasian dangte’ na semin tuate bia ahi zongin, keimah in ka kham ahi ni ahi a, kha ahi a, vantung na khatpeuh peuhte’ na semin bia ahi zongin, no kiangah hong kigenin tua thu na zak uh leh; note in lim takin na kantel ding uh a, Israelte sungah tua bang a kihhuai na a kigamtatna thu a om mah ahih takpi leh, numei ahi a, pasal ahi zongin tua banga a sia-a gamta mi pen na kongpi uhah na paipih ding uh a, tua numei ahi a, pasal ahi zongin suang tawh na denglum ding uh hi. Teci nih ahih kei leh thum bang genna tawh a si dingpa kithat ding hi; teci khat bek thu genna tawh mi kithat lo ding hi. A that dingin tecite masa ding a, tua khit ciangin mi khempeuh in hih ding uh hi. Tua bangin note sung panin gitlohna na siangsak ding uh hi. “Mi khat leh khat kithah khakna, khat leh khat thu kituhna, mi khat leh khat kisiatna, note adingin a haksa lua thu khatpeuh peuh note’ khua sungah khen ding hong om leh, note kithawi-in Topa na Pasian un a teelna mun, Levi siampite leh tua huna thukhente kiangah na pai ding uh a, amaute kiangah thu dongin, amaute in note kiangah thukhenna hong gen ding uh hi. Tua ciangin Topa in a teelna mun panin note tungah hong gen bangun na hih ding uh hi; amaute in note tungah hong lah bangin lim takin na hih ding uh na ngaihsun ding uh hi; amaute in note tungah hong piak thuhilhna leh note tungah hong gen uh thukhennate tawh kizui-in na hih ding uh hi; amaute in hong gen thukhenna panin tak lamah ahi a, vei lamah ahi zongin na pial kei ding uh hi. Topa note’ Pasian mai-ah na sem dingin a ding siampipa’ thu ahi a, thukhenpa’ thu ahi zongin man’ lohna tawh a khengval a, gamta mipa si ding hi; tua bangin Israelte sung panin gitlohna na siangsak ding uh hi. Mi khempeuh in za-in, kihta-in, a khengvalin gamta ngam nawn lo ding uh hi. “ Topa na Pasian un note hong piak leitangah tungin, note in tua leitang nei-in a tungah na teen’ uh ciangin, ‘Eite’ kimkot a, om minamte khempeuh mah bangin eite tungah kumpi khat i koih ding hi,’ na ci nuam kha ding uh hi; Topa note’ Pasian in a teel mipa note tungah kumpi-in na koih thei takpi ding uh hi. Ahi zongin na mipihte bek uh lak panin kumpi-in mi khat na koih ding uh hi; na sanggam uh ahi lo gamdang mi khat no tungah na koih thei kei ding uh hi. Amah in ama aituam dingin sakolte tampi pha sak lo ding hi; Topa in no kiangah, ‘Hih lampi tawnin na kileh kik ngei kei ding uh hi,’ hong ci ahih manin, amah in sakolte tampi-in khangsak lo ding hi; Izipt gamah mite a paikik nading piangsak lo ding hi. A lungsim kihei khia kha ding ahih manin zi la thuah lo ding hi; ama ading ngun leh kham zong nakpi takin behlap lo ding hi. “Ama kumpigam kumpi tokhom tungah a tut ciangin Levi siampite’ kep hih thukhamte panin ama adingin laibu khat sungah gelh ding hi; - hih thukham sunga thute leh hih ngeinate kemin zuihna tawh Topa a Pasian zahtak ding a theih nading, a mipihte tungah ama lungsim a kiliatsak toh loh nading, taklam hita leh vei lam hita leh thupiaknate panin a pial loh nading, Israelte sung ahi ama kumpigam sungah amah leh a tate saupi a om theih nadingin amah in a nuntak sung tawntung tua sunga thute sim ding hi. “Levi mi siampi ahi Levi minam khempeuh in Israelte bangin tanh ahi a, luah ahi zongin nei lo ding uh hi; amaute in Topa tungah mei tawh kihal biaknate leh a kaih ngeite uh ne ding uh hi. Amaute in a sanggamte lakah gamluah nei lo ding uh hi; amah in amaute tungah a ciam mah bangin Topa in amaute’ luah ahi hi. Hih in bawng hita leh tuu hita leh biakna-in a pia mite tung panin siampite’ kaih hi ding hi; amaute in siampite tungah a liang leh a pang nihte leh a gilpi pia ding uh hi. Na anpal, na leenggahzu leh na sathau, leh na meet masak uh na tuumul na pia ding uh hi. Bang hang hiam cih leh Levi minamte Topa ’ na a sem tawntung dingin na minam khempeuh uh sung panin Topa na Pasian un a teel ahi hi. “Levi mi khat, Israelte sung na khuapi uh khatpeuh peuh ahi ama teen’na panin ama ut hun peuh ciangin Topa ’ teelna munah hong pai thei ding hi; tua ciangin Topa mai-ah nasem dingin a om a lawm Levi midangte khempeuh mah bangin Topa a Pasian’ min tawh na sem thei ding hi. Amah in a gamluah a zuakna pan a sum ngahte banah nek ding a kikimin amaute tawh tanh ngah khawm ding hi. “ Topa na Pasian un note hong piak leitang na tun’ uh ciangin, tua minamte’ gamtatna a kihhuaite zuih ding na kisin kei ding uh hi. Note lakah a tanu ahi a, a tapa ahi zongin biakna-in a zang, ai a saan, khong a khai, mai lam thu a gen, ai a tawi, bum a zang, van a kah, si khate tawh a kiho, si kha thu a dong kuamah na om kei ding uh hi. Bang hang hiam cih leh hihte a hih mi peuhmah Topa tungah kihhuai hi; hih bang a kihhuai gamtatnate hangin note mai panin Topa na Pasian un amaute hawlkhia hi. Note in Topa na Pasian uh mai-ah pau’ baang loin na om ding uh hi. Bang hang hiam cih leh note in na suankhiat ding uh hih minamte in khong khaite leh ai saante’ thu ngai uh hi; ahih hangin note ahih leh tua banga na gamtat ding uh Topa na Pasian un hong phal lo hi. “ Topa na Pasian un note lak ahi na sanggamte lak panun note adingin kei tawh a kibang kamsang khat hong khangsak ding hi—note in ama thu na ngai ding uh hi— note in, ‘Si kha ding ka hih manin Topa ka Pasian’ aw hong zasak kik kei in,’ ci-in na kikhop ni-un Horeb ah Topa na Pasian uh tung pan na deih bang uh hi ding hi. Topa in kei kiangah, ‘Amaute in a gensa uh thu in a man taktakin ci uh hi. Amau’ sanggamte lak panin nang tawh a kibang kamsang khat amaute adingin ka khangsak ding hi; ama kam sungah ka thute ka guan’ ding a, amah ka thupiak khempeuh amah in amaute tungah gen ding hi. Amah in keima min tawh a gen ka thute a don lo mi peuhmahte keimahmah in ka thuk ding hi. Ahih hangin keimah in thu gen dingin thu pia lo napi-in keima min tawh thu a gen kamsangpa hita leh pasian dangte’ min tawh thu a gen kamsangpa hita leh, tua bang kamsangte si ding hi,’ hong ci hi. Na lungsim sungah, ‘ Topa gen a hilo thu bangci theih ding i hi hiam?’ na cih uh leh- kamsang khat in Topa min tawh thu genin, tua thu pen hong tung lo ahi a, a man lo ahi zongin hong hih leh, tua thu in Topa ’ gen loh thu ahi hi; kamsangpa in ama ut thu a gen hi a, amah na kihtak ding uh kul lo hi. “ Topa na Pasian un amaute’ leitang note hong piak minamte beisakin, note in amaute suankhia-in, amaute’ khuapite leh innte ah na teen’ uh ciangin, Topa na Pasian un note’ neih dingin hong piak gam sungah note adingin khuapi thum na tuam koih ding uh hi. Mi a that khatpeuh peuh a tai theih nadingin Topa na Pasian un na neih dingun a hong piak leitang seh thumin khenin a lampite na bawl ding uh hi. - “Mi khat sing phuk dingin a vengpa tawh gamlakah pai-in, sing phuk dingin a khut tawh a hei vaanin, a heitang a ga panin kikhong-in a vengpa kha-in a sih bang danin, mi khat in sawm lohpi, a beisa hunah amah tawh kigal neihna om lopi-in a vengpa a sihsak khak leh, hih khuapite khatpeuh peuh ah amah tai-in a nuntakna hu thei ding hi; tua bang hi kei leh, amah in a beisa hunah a vengpa tawh kigal neihna nei lo ahih manin sih nading thu om lo napi-in, a hehna tawh phu la nuampa in mi that kha-pa delhin lampi a gamlatna hangin amah pha-in a si dingin liamsak kha ding hi. Tua ahih ciangin, khuapi thum tuam koih un, ci-in note thu kong pia hi. - Note in Topa na Pasian uh itin, ama lampi zuih tawntungna tawh tuni-a kong thupiak ahi hih thupiakna khempeuh lim takin na zuih uh a, amah in na pu na pate uh tungah a kiciam mah bangin Topa na Pasian un na gamgite uh hong keek sakin, na pu na pate uh piak dingin a ciam leitang note tungah hong piak leh, hih khuapi thum banah khuapi thum mah na behlap ding uh hi. Tua hi kei leh Topa na Pasian un luah dingin note hong piak leitang tungah mawh baang lo mi kithat kha ding a, tua mi thahna hanga mawhna note tungah om ding hi. “Ahih hangin mi khat in a vengpa mudahin, amah pang sim a, amah satin liam sakin a sihsak a, tua mipa hih khuapi khatpeuh peuh ah a tai leh, ama khua upate in amah hong puakin hong paipih ding uh a, a sih theih nadingin phulapa tungah ap ding hi. Note na nopsak theih nadingun amah hehpih loin, Israelte sung panin mi thatpa na beisak ding uh hi. “ Topa na Pasian un na neih dingun hong piak leitang tungah note’ kep ding na gamh luahna sung uhah khang lui mite in a phuhsa na vengte’ gi-suang na khin kei ding uh hi. “Mi khat in a hih khak mawhna lian ahi a, khialhna khatpeuh peuh a gamtatna ah ahi zongin tua mipa’ langah teci khat guak kicing lo ding hi; teci nih ahih kei leh teci thum bang thugenna tawh mawhsakna kikipsak bek ding hi. Elna lungsim a nei teci khat in mi khat gamta khial hi, ci-in a mawhsak leh, thu neite a lang nih tuakin, tua hun lai taka siampite leh thukhente mai, Topa mai-ah pai ding uh hi; thukhente in lim takin kan ding uh a, teci-pa pen zuau teci hi-in, a man lopi-in a sanggampa mawhsak ahih leh, a sanggampa tungah amah in hih dinga a sawm bang teekin ama tungah na hih ding uh hi; tua bangin note sung panin gitlohna na siangsak ding uh hi. A om lai mite in za-in, lau-in, note lakah tua bang gitlohna bawl kik ngei nawn lo ding uh hi. Amah na hehpih kei ding uh hi; nuntakna tang ding nuntakna, mit tang ding mit, ha tang ding ha, khut tang ding khut, khe tang ding khe hi ding hi. “Na langte uh a do dingin pai-in sakolte leh leengte leh galkapte nomau’ aa sangin a tam zaw-in na muh uh ciangin amaute na kihta kei ding uh hi; bang hang hiam cih leh Izipt gam panin note hong paikhiatpih Topa na Pasian uh note tawh hong om hi. Gal nai na tun’ uh ciangin siampipa a mai-ah hong pai-in mite kiangah thu genin, amaute kiangah, ‘Israelte aw, za un, tu ni-in na langte uh a do dingin na nai uh hi: na lungsim uh lausak kei un; lau kei un, liing kei un, amaute kihta kei un; bang hang hiam cih leh note tungah gualzawhna a hong pia ding, na langte uh hong dosak dingin note tawh hong paikhawmpa in Topa na Pasian uh ahi hi,’ ci ding hi. Tua ciangin uliante in mite kiangah thu genin, ‘Inn thak lam khinin a ap nai lo kua om na hi uh hiam? Gal sungah amah si-in midang khat in a inn ap kha ding ahih manin a innah ciahkik hen. Leenggui lo kho khinin, a gah a ne nai lo kua om na hi uh hiam? Gal sungah amah si-in midang khat in a gah ne kha ding ahih manin a innah ciahkik hen. A zi dingin lawm dong khinin a la nai lo kua om na hi uh hiam? Gal sungah si-in midang khat in tua numei la kha ding ahih manin a innah ciah kik hen,’ ci ding uh hi. Uliante in mite kiangah thu gen thuah lai-in, ‘A lau a lungsim meidawi kua om na hi uh hiam? A lawmte meidawi lawh kha ding ahih manin a innah ciahkik hen,’ ci ding uh hi. Uliante in mite kiangah thugen a man khit uh ciangin mite’ lutang dingin makai kiseh ding hi. “A do dingin khuapi khatpeuh na nai uh ciangin kilem nading thu gen un. Note hong dawn’na in kilem nading lam hi-in note kongpi hong hon uh leh, tua sunga om mi khempeuh in note adingin aana tawh nasemin, na na uh hong sepsak ding uh hi. Ahih hangin note tawh kilemna hong bawl loin note hong do leh, note in tua khua na umcih ding uh hi; Topa na Pasian un note khut sungah hong piak ciangin pasal khempeuh namsau tawh na that ding uh hi; ahih hangin numeite leh naupangte, ganhingte, khua sunga na dang khempeuh, a kinusiate khempeuh note adingin na la ding uh hi; Topa na Pasian un note hong piak ahi na langte uh vante na tang ding uh hi. Hih lai-a minamte’ khuapi a hilo, note kiang panin a gamla khuapi khempeuh tungah tu-a bangin na hih ding uh hi. “Khuapi khat na lak theih nadingun do-in sau veipi na umcih uh hangin, hei zatna tawh a singgah kungte na susia kei ding uh hi; a gahte na ne thei ding uh a, ahih hangin na phuk kei ding uh hi. Gam lak-a om singkungte in note’ sukgawp dingin na galte uh ahi hiam? Note hong do khuapi a tuk mateng umcihna-in na zat dingun nek dinga kizang lo singkung hi, ci-a na theih teng bek uh susia in na phuk thei ding uh hi. “ Topa na Pasian un note’ neih dingin hong piak leitangah mi khat kithatin, gamlakah lum a, a that a kitheih kei leh, na upate uh leh na thukhente uh hong paikhia-in, a kithat mipa’ omna kiim-a khuapite a gamlatna teh ding uh hi; tua ciangin a kithat mipa’ omna tawh a kinaipen khuapi upate in a kisin nai lo, kol a kai nai lo bawngla khat la ding uh hi. Tua khuapi upate in a kikho nai lo, khaici a kivawh nai lo, tui luang a omna kuam khatah a bawngla paipih suk ding uh a, tua kuam sungah bawngla ngawng attan ding uh hi. Topa na Pasian un Levi mi siampite ama’ na a sem ding leh Topa ’ min tawh thupha a pia dingin teel khin ahih manin amaute hong pai ding uh a, ki-thuneihna leh kitotna peuhmah amau’ thu tawh kiveng sak ding hi. A kithat mipa tawh a kinaipen khuapi upate khempeuh in kuam sunga ngawng a kitan bawngla tungah a khut uh sil ding uh hi; amaute in teci pangin, ‘Kote in hih mipa ka that kei uh hi, a kithah lam zong ka thei kei uh hi. Topa aw, na tatkhiatsa Israel mite’ mawhna hong maisak in, mawhna nei lo mipa a kithahna hanga mawhna na Israel mihingte hong thuaksak kei in; mi thahna hanga mawhna panin hong maisak in,’ ci ding uh hi. Topa muhna ah a manin na gamtat uh ciangin note lak panin mawhna nei lo mi thahna hanga mawhna tua bangin na siangsak ding uh hi. “Na galte uh a do dingin pai khia-in, Topa na Pasian un note’ khut sungah amaute hong pia a, amaute sal-in na mat ciangun, salte lakah numei a melhoih khat mu-in, tua nu deihin na zi dingin na lak nop leh, na innah tua numei na ciahpih ding a, amah in a lu meet-in a cinte tan ding hi. Amah in sal hihna puan suahkhia-in, na innah om ding a, a nu leh a pa hangin kha khat bit kap ding hi; tua khit ciangin amah na luppih thei ding a, nang in ama pasal hi-in, amah in na zi hi ding hi. Tua ciangin, amah na deih kei leh, ama utna peuhah na paisak ding hi; ahih hangin amah daisak khin na hih manin sum-in amah zuak loin, sila bangin na bawl kei ding hi. “Mi khat in zi nih nei a, khat itin a khat mudah a, a it leh a muhdah a zi tegel in ta nei tuakin, tapa a neih cil pen a muhdah nu tawh ahih leh, a tapate tungah gamluah dingin ama neihsa a hawm ciangin, a muhdah nu’ tapa cil sangin deih zawkna hangin a it nu’ tapa pen a tacil-in bawl thei lo ding hi, ama neihsa khempeuh tanh nih piakna tawh a muhdah nu’ tapa a tacil mahin sang ding hi; bang hang hiam cih leh tuapa in a thahatna pana a piang masa pen ahi hi; tacil hihna za in ama aa ahi hi. “Mi khat in a lungkhauh, a lehdo thei, a nu’ thu ahi a, a pa’ thu ahi zongin a mang lo, a tai hangun amau thu a ngai lo tapa khat a neih leh, a nu leh a pa in tua mipa manin ama khuapi upate kiang, a teen’na mun kongpi-ah paipihin, amaute in a khuapi upate kiangah, ‘Hih ka tapa uh lungkhauhin lehdo thei a, amah in ka thu uh hong mang lo hi; amah in anhai zuhai ahi hi,’ ci ding uh hi. Tua ciangin khuapi pasal khempeuh in suang tawh amah denglum ding uh hi; tua bangin note sung panin siatna na siangsak ding uh hi; Israelte khempeuh in za-in lau ding uh hi. “Mi khat in sihna daan thuak theih nading mawhna bawlin amah kithat a, sing tungah na khai uh leh, zan tawntung sing tungah ama luang na omsak kei ding uh a, a ni mah-in na phum ding uh hi; bang hang hiam cih leh khuam tungah a kikhai mi in Pasian’ hamsiat thuak ahi hi, Topa na Pasian un luah dingin note hong piakna na leitang uh na ninsak kei ding uh hi. “Na mipihte’ bawngtal ahi a, a tuu ahi zongin a gammang na muh leh huh loin na om kei ding hi; a neipa kiangah na ciahpih kik ding hi. Amah in na veng nai hi lo a, a nei na theih kei leh, na innah a gan na ciahpih ding a, a neipa in hong zon’ mateng na kem ding hi; hong zon’ ciangin na piakik ding hi. Tua bangin a la zong na hih ding hi; tua bangin a puan na hih ding hi; tua bangin a mangsa na muh, na mipihte’ na a mang khatpeuh peuh na hih ding hi; huh loin na om kha kei ding hi. Na mipihte’ la ahi a, a bawngtal ahi zongin lam gei-ah a kia na muh leh, tuate huh loin na om kei ding hi; tuate phottohsak kikna tawh amah na huh ding hi. “Numei in pasal’ puan khatpeuh peuh zang lo ding a, pasal in zong numei’ puan silh lo ding hi; bang hang hiam cih leh hih bang a hihte peuhmah Topa na Pasian uh tungah a kihhuai ahi hi. “Vasa bu khat, sing tung ahi a, lei lak ahi zongin, a no ahi a, a tui ahi zongin omin, a pi in a no tawh a om ahi a, a op ahi zongin na muh khak zenzen leh, a pi pen a no tawh na la khawm kei ding hi; a pi na khah ding a, nang adingin a no na la thei ding hi; hih in na nopsak nading, sau veipi na nuntak theih nading uh ahi hi. “Na inn tung panin mi kia-in mi sihna hanga mawhna na inn sungah na tun’sak khak loh nadingin inn thak na lam ciangin na innkhum zangah tangban na khung ding hi. “Na leenggui lo-ah khaici namnih na vawh kei ding hi, vawh lecin na vawhsa an leh na leenggui lo-ah a piang, a piang khempeuh biakna a, ding suak ding hi. Bawngtal khat leh la khat tawh lo na kho khawm kei ding hi. Samul leh khau, a kigan khawm puan na silh kei ding hi. “Nangmah na kituamna na puanza kiu lite tungah puanmongteep na bawl ding hi. “Mi khat in zi la-in, amah a luppih khit ciangin amah mudahin, a zumhuai gamtatna tawh tua nu mawhsakin, ‘Keimah in hih numei ka la hi, amah tawh ka lupkhop ciangin ama sungah nungakna lim ka mu kei hi,’ cihna tawh tua nu tungah minsia a tut leh, tua numei’ nu leh pa in a tanu uh’ nungakna lim a kilatna puan la khia-in upate kiang kongpi-ah paipih ding uh hi; numei’ pa in upate kiangah, ‘Hih mipa tungah zi dingin ka tanu ka pia a, amah in mudah hi; en un, “Na tanu sungah nungakna lim ka mu kei hi,’’ a cihna tawh a zumhuai-in amah mawhsak hi. Ahi zongin hihte in ka tanu’ nungakna a kilatna limte ahi hi,’ ci ding hi. Amaute in khua upate mai-ah a puan phah ding uh hi. Tua ciangin tua khua upate in tua mipa la-in sat ding uh hi; amaute in ngun shekel za khat daan pia ding uh a, numei’ pa tungah tuate pia ding uh hi; bang hang hiam cih leh amah in Israel nungak tungah minsia tun’ hi; tua ciangin a numei in ama zi mah hi ding hi; a nuntak lai teng tua nu ma thei lo ding hi. Ahih hangin a mawhsakna thu maanin, numei’ sungah nungakna lim a kimuh kei leh, amaute in a pa’ inn kongah numei nu paipih ding uh a, ama khuapi pasalte in suang tawh amah denglum ding uh hi; bang hang hiam cih leh amah in a pa’ inn sungah paktat gamtatna tawh Israel sungah haina tun’ hi; tua bangin note lak panin siatna na siangsak ding uh hi. “Mi khat, midang khat’ zi tawh a lumkhawm a kimuh leh, numei tawh a lumpa leh a numei, a nih tuakun kithat ding hi; tua bangin Israel sung panin siatna na siangsak ding uh hi. “A kidongsa nungak khat om a, mi khat in khuapi sungah tua nu tuakin amah tawh a lup leh, tua khuapi kongpi ah amau tegel na paipih ding uh a, a numei khuapi sungah om napi-in mi’ huhna ngen dingin a kiko lohna hang leh, a pasal in a vengpa’ zi a va suksakna hangin, suang tawh a nih-un na denglum ding uh hi; tua bangin note lak panin siatna na siangsak ding uh hi. “Ahih hangin mi khat in a kidongsa nungak khat gam lakah tuakin, mipa in tua nu buan-in a luppih leh, tua numei tawh a lum mipa bek si ding hi. A numei’ tungah bangmah na hih kei ding uh hi; numei’ tungah sihna tawh daantah nading mawhna om lo hi; bang hang hiam cih leh hih thu in mi khat in a vengpa do-in a thah tawh kibang hi; hih mipa in gam lakah numei hih ahih manin, a kidongsa numei in huhna ngen dingin a kiko hangin amah a hon ding kuamah om lo hi. “Mi khat in a kidong nai lo nungak khat tuakin, tua numei buan-in luppih a, amau tegel a kimuh leh, numei tawh a lumpa in nungak’ pa tungah ngun shekel sawmnga pia ding a, tua numei ama zi hi ding hi; bang hang hiam cih leh amah in a numei va su khin hi; a nuntak lai teng tua numei ma thei lo ding hi. “Mi khat in a pa’ zi ten’pih lo ding a, a pa’ aa ahi numei tawh mawh lo ding hi. “A ciltang a kitam ahih kei leh, a pasal na a cing lo mipa Topa ading kikhopna sungah lut lo ding hi. “Zawlta peuhmah, Topa ading kikhopna sungah lut lo ding hi; a suan a khak khang sawmna dong nangawnin Topa ading kikhopna sungah tua bang mi kuamah lut lo ding hi. “Ammon mite ahi a, Moab mite ahi zongin Topa ading kikhopna sungah lut lo ding uh hi; a khang sawmna dong nangawnun Topa ading kikhopna sungah lut thei ngei peuhmah lo ding uh hi; bang hang hiam cih leh Izipt panin na paikhiat lai-un lampi ah an leh tui tawh amaute in note hong dawn lo uh a, note hong samsia dingin Mesopotamia gam Pethor khua panin Boer’ tapa Balaam cial uh hi. Ahih hangin Topa na Pasian un Balaam’ thu ngai lo hi; Topa na Pasian un note hong it ahih manin, samsiatna pen note adingin thupha-in hong heisak hi. Amaute’ nopsak nading ahi a, a dau pai nading uh ahi zongin na khan’ tawnun kilemna na hanciam kei ding uh hi. “Edom mite khatpeuh na mudah kei ding uh hi; bang hang hiam cih leh amaute in na sanggam uh ahi hi; Izipt mi khatpeuh na mudah kei ding uh hi; bang hang hiam cih leh amau’ gamah peemta na hi ngei uh hi. Amaute sung pana piang a khang thumna mite Topa ’ ading kikhopna sungah lut thei ding uh hi. “Na galte langah kuanin giahphual ah na om uh ciangin, siatna nam khempeuh panin nomau na kikem ding uh hi. “Note lakah, zan sungin ama tungah thupiang hangin a siang lo mi a om leh giahphual pua lamah amah paikhia ding a, giahphual sungah hong pai lo ding hi; ahih hangin nitak ciangin amahmah tui sungah kisil ding a, ni a tum ciangin giahphual sungah hong pai thei ding hi. “Giahphual pua-ah mun khat na nei ding uh a, tua lai-ah na pai ding uh hi; na galhiamte uh banah tulzum khat na nei ding uh hi; a pua lamah na tut uh ciangin tua tawh lei to-in, kihei-in na ek uh na vuk ding uh hi. Bang hang hiam cih leh note hong hon ding leh note mai-a na galte uh hong pia dingin Topa na Pasian uh na giahphual laizang uhah hong pai hi; tua ahih ciangin note lakah a kilawm lo nate a muh loh nading leh note kiang panin amah a paikhiat loh nadingin na giahphual uh siangtho ding hi. “A topa kiang panin nang kiangah a hong tai sila a topa kiang mah ah na ap kik kei ding uh hi; na khuapite uh lak panin ama teelna mun, ama lungkim penna, note lakah note tawh amah hong teeng ding hi; amah na nengniam kei ding uh hi. “Israel ta numeite a paktat pawlin om lo ding uh a, Israel tapate zong a paktat pawlin om lo ding uh hi. A paktatnu a kiguaihna sum ahi a, a paktatpa a kiguaihna sum ahi zongin thuciamna khatpeuh peuh piakna-in Topa note’ Pasian’ inn sungah na paipih kei ding uh hi; bang hang hiam cih leh hih tegel in Topa note’ Pasian’ tungah a kihhuai ahi hi. “Na sanggampa tungah a meetin, sumgum hita leh, ankhing hita leh, a meet ngaihsutna-in na khatpeuh peuh leitawi na pia kei ding uh hi. Gamdang mi tungah a meetin leitawi na pia thei ding uh hi; ahih hangin na sanggampa tungah a meetin leitawi na pia kei ding uh hi; hih in note a luah dingin na tumna gam sungah Topa na Pasian un na sepna khempeuh uhah thupha hong piak theih nading ahi hi. “ Topa note’ Pasian tungah thuciamna na bawl ciangun na ciamna uh tungsak loin na ommawk kei ding uh hi; bang hang hiam cih leh Topa na Pasian un hong kal teekteek ding a, note tungah khialhna hong hi ding hi. Ahih hangin thuciamna bawl ding pan na kikep uh leh note sungah khialhna om lo ding hi. Na kam uh tawh na ciamsa uh thu pen Topa note Pasian tungah nomau ut-thu-a na ciam uh ahih manin na muk uh pana paikhia peuhmah na tun sak nadingun na ngaihsun ding uh hi. “Na vengpa’ leenggui lo-ah na pai uh ciangin na ut zahzah na kham dong leenggah na ne thei ding uh a, ahih hangin na van sungah na guang kei ding uh hi. Na vengpa’ ankung ding laite lakah na pai uh ciangin na khut uh tawh a vuite na zut thei ding uh a, ahih hangin phiaukawi tawh na vengpa’ ankung ding laite na at kei ding uh hi. “Mi khat in zi la-in a ten’pih ciangin, tua nu tungah kilawm lohna a muh manin numei in a pasal mit-ah maipha mu lo a, amah in makna lai gelhin numei’ tungah pia-in ama inn panin sawlkhia a, a pasal’ inn panin amah kihem khia-in, amah pai-in midang khat’ zi va suak a, a pasal nunung in amah deih lo a, makna lai gelhin numei khut sungah koih a, a inn panin tua nu sawlkhia-in, tua ahih kei leh zi ding a, a la a pasal nunung a sih leh, tua numei a hawlkhia a pasal masa in, tua nu a kinitsak khit ciangin, a zi dingin la kik thei nawn lo ding hi; bang hang hiam cih leh tua in Topa mai-ah kihhuaina hi a, Topa note Pasian un luah dinga hong piak leitang tungah mawhna na tun’pih kei ding uh hi. “Mi khat in zi a neih tungin galkapte tawh kuankhia lo ding a, nasep khatpeuh peuh zong kisawl lo ding hi; a laksa zi tawh a lungdam khawm dingin innah kum khat sung maang ding hi. “Kuamah in an gawina ahi a, an gawina suangpeek a tungnung ahi zongin khapna-in la lo ding hi; bang hang hiam cih leh khapna-in nuntakna a la hi ding hi. “Mi khat in Israel mi a sanggamte khat gu-in, amah in sila bangin bawl ahi a, a zuak ahi zongin a kimuh leh, tua gutapa si ding hi; tua bangin note lak panin siatna na siangsak ding uh hi. “Phak natna hong tun’ ciangin Levi siampite in hong gen bangin na gamtat ding uh ngaihsun un; amaute ka thupiakna bangin na gamtat nadingun na kingaihsun ding uh hi. Izipt panin na paikhiat lai-un lampi ah Topa na Pasian un Miriam tungah a hihna phawk un. “Na vengte tungah na khatpeuh peuh leitawi na piak uh ciangin ama hong khapna a la dingin a innah pai kei un. A pua lamah na ding ding uh a, leitawi na piakna mipa in nang kiangah a na khap hong paipih ding hi. Amah mizawng ahih leh ama hong khap puan nuai-ah na lum kei ding uh hi; ni a tum ciangin, a puanza nuai-ah amah lumin nang thupha hong piak theih nadingin tua hong na khap ama kiangah na piakik ding uh hi; tua in Topa note’ Pasian mai-ah note adingin thumanna hi ding hi. “A zawng a cimawh a kicial nasempa, na sanggamte khat ahi a, na gam sung na khuapite sunga om peemta khatpeuh peuh ahi zongin, na nengniam kei ding uh hi; a sep ni-in ama thaman, ni tum ma-in na pia ding uh hi (bang hang hiam cih leh amah zawng hi, tua bek ah amah kinga hi); tua hi kei leh, note langah Topa tungah amah kiko ding a, note na mawh ding uh hi. “Tate’ tangin pate kithat lo ding a, pate’ tangin zong tate kithat lo ding hi; mi khempeuh ama khialhna hang bekin kithat ding hi. “Peemta ahi a, pa nei lo mi thu ahi zongin tuate ading thutang na heisak kei ding uh a, meigong numei’ puan zong khapna na-in na lak sak kei ding uh hi; Izipt ah sila na hihna uh leh Topa note Pasian in tua lai panin hong tatkhiatna na phawk ding uh hi; tua ahih manin hih banga na gamtat nading uh thu kong pia hi. “Na lo-ah an la-in lo lai ah anlom na mangngilh uh ciangin a tawm dingin na paikik kei ding uh hi; tua in peemta, pa nei lo, leh meigong numeite’ ading ahi uh hi; hih in Topa note Pasian in na khut tawh na sepna khempeuh uhah note thupha hong piak theih nading ahi hi. No oliv kungte na sat uh ciangin a hiangte na sat kikkik kei ding uh hi; tua in peemta, pa nei lo, leh meigong numeite ading ahi hi. Na leenggui lo panun leenggah na kaihkhop uh ciangin a sang na nung khop kik kei ding uh hi; tua in peemta, pa nei lo, leh meigong numeite ading ahi hi. Izipt gamah sila na hihna uh na phawk ding uh hi; tua ahih manin hih banga na gamtat nading uh thu kong pia hi. “Mite kikalah thu kineihna om a, thukhen zumah amaute pai-in, thukhente in amau’ thu khensakin, a dikpa khahin a mawhpa lelsak a, a mawhpa satna thuak dinga kilawm ahih leh, thukhenpa in amah lumsuk sakin a khialhna zahin ama muhin sat sak ding hi. Sat sawmli kipia thei ding a, ahih hangin tua val hi lo ding hi; tua hi kei leh, hih sangin a tamvei zaw mi khat in sat lai lai leh note muhna ah na sanggampa uh a kineubawl suak ding hi. “Bawng in an a cil ciangin a muk na tuam kei ding uh hi. “Sanggam pasalte teeng khawmin, tuate khat si-in tapa a neih kei leh, a sipa’ zi pen innkuan pua lam khualmi tawh kiteeng lo ding hi; a pasal’ sanggampa in luppih-in a zi dingin amah la ding a, ama tungah pasal’ sanggampa’ nasep sem ding hi. Ama min Israel panin a kiphiat loh nadingin tua nu in a neih masak a tapa in a pasal’ sanggampa a sisa-pa’ min zom ding hi. Mipa in a sanggampa’ zi a lak nop kei leh, a sanggampa’ zi kongpi-ah upate kiangah pai ding a, ‘Ka pasal’ sanggampa in a sanggampa’ min Israel sungah a zop ding ut lo hi; pasal’ sanggampa’ nasep kei tungah hong sem lo hi,’ ci ding hi. Tua ciangin mipa’ khuapi upate in amah samin, amah thu genpih ding uh hi; amah in, ‘Tua nu ka la nuam kei hi,’ a cih teitei leh, tua ciangin upate’ omin a sanggampa’ zi ama kiangah paito-in a khe panin a khedap kaihkhiat sakin a maitang cil phih ding hi; tua ciangin tua nu in, ‘A sanggampa’ innkuan a zomto lo mipa hih bangin kibawl ta hen,’ ci khia ding hi. Israel lakah ama innkuan pen, A khedap a kikaih khiatsak mipa’ innkuan, kici ding hi. “Mi khat leh khat a kilai ciangin, a satpa’ kiang panin a pasal a honkhia dingin a khatpa’ zi hong pai a, a khut zanin a selsimte-in a mat leh, tua nu’ khut na sattansak ding uh hi; amah na hehpih kei ding uh hi. “Na ip sung uhah tawisuang nam nih, a gik leh a zang, na neikhawm kei ding uh hi. Na inn sung uhah tehna nam nih, a lian leh a neu, na neikhawm kei ding uh hi. Tawisuang a cing a man na nei ding uh a, tehna a cing a man na nei ding uh hi; tua in Topa note’ Pasian in hong piak leitangah na khan’ uh a sau theih nading ahi hi. Bang hang hiam cih leh tua bang na a hihte khempeuh, a man lo-a a gamtate khempeuh, Topa note’ Pasian tungah a kihhuai ahi hi. “Izipt panin nong paikhiat lai-un lampi ah Amalek mite in note hong bawlna, note gimin lungkhamin na om lai takun lampi ah a hong simna, leh note nungah a nunung khempeuh hong thahna uh phawk un; amaute in Pasian kihta lo uh hi. Tua ahih ciangin Topa note Pasian in note’ neih dingin luahin hong piak leitang tungah, Topa na Pasian un na kiim uh a, na galte khempeuh panun tawlngakna hong piak ciangin, vantung nuai panin Amalek mite a kiphawkna na phiatkhia ding uh na mangngilh kei ding uh hi. “ Topa na Pasian un luah dingin a hong piak leitangah va pai-in, tua leitang luahin a tungah na teen’ uh ciangin, Topa na Pasian un note hong piak leitang na lak uh, lei pana piang gah khempeuh panin a gah masa pawlkhat la-in lawh khat sungah na koih ding uh a, ama min na omsak nadingun Topa na Pasian un a teelna munah na pai ding uh hi. Tua hun lai takin na a sem siampipa kiangah pai-in ama kiangah, ‘ Topa in kote piak dingin ka pate uh tungah a ciam leitangah ka tun’ khitna uh thu tu ni-in Topa na Pasian kiangah kong ko hi,’ na ci ding uh hi. Tua ciangin siampipa in note khut panin a lawh hong sang ding a, Topa note’ Pasian biakna tau mai-ah koih ding hi. “ Topa note’ Pasian mai-ah kam pau-in, ‘A vak kawikawi kote’ pupi in Aram mi ahi hi; amah Izipt ah paisukin tua munah a peem lai-in mi tawmno ahi hi; tua lai-ah amah a lian, a thahat, tampi a pha minam khat suak hi. Iziptte in kote hong ngongbawlin hong gimsak a, ko tungah a haksa salsuahna hong guan uh hi. Tua ciangin ka pu ka pate uh Pasian ahi Topa Pasian’ tungah ka kiko uh a, Topa in kote’ aw hong za-in, ka gimnate, ka nasepnate leh hong nenniamnate uh a mu hi; Topa in a vangliatna leh a thahatna, launa lianpi, lim leh nalamdangte tawh Izipt panin kote hong paikhiatpih hi; amah in hih mun hong tun’pihin, bawngnawi leh khuaizu a luan’na gam hih leitang ko tungah hong pia hi. Tua ahih ciangin en in, Topa, nangmah in kote nong piaksa ahi leitang panin a gah sung pan a min masa kong paipih uh hi,’ na ci ding uh hi. Tua ciangin Topa note’ Pasian mai-ah na koihsuk ding uh a, Topa note’ Pasian mai-ah na bia ding uh hi; Topa note’ Pasian in note leh na innkuanpite uh tungah hong piak na a hoih khempeuhte hangin note leh Levi mite leh note lakah a om peemtate na lungdam khawm ding uh hi. “Sehsawm suah sehkhat piak kum ahi a kum thumna kumin, amaute in na khuapite uh sungah an ne-in gilvahin a om theih nadingun Levi mite, peemtate, pa nei lote, leh meigong numeite tungah na piak uh, na khawhsa uh sehsawm suah sehkhat na piak khit uh ciangin, Topa note’ Pasian mai-ah, ‘Ka inn sung panin a siangtho ding teng ka tuamkoih khin hi, tua tham loin kei nong sawlna bangin na thupiaknate khempeuh tawh kizui-in Levi mite, peemtate, pa nei lote, leh meigong numeite tungah ka pia khin hi; hih tungtangah na thupiakna khat zong ka khial kei a, ka mangngilh zong om lo hi; dah-in ka kah sungin sehsawm suah sehkhat ka ne kei hi, ka nit sungin zong ka khenkhia kei hi, misite tungah zong ka pia kei hi; Topa ka Pasian’ thu ka mang hi, kei nong thupiakna khempeuh bangin ka hih khin hi. Vantung, nangma omna a siangtho panin hong ensuk in la, kote’ pu leh pate tungah bawngnawi leh khuaizu a luan’na gam na ciam mah bangin, na mihing Israelte leh kote nong piaksa leitang thupha hong pia in,’ na ci ding uh hi. “Tu ni-in Topa na Pasian un hih thukhamte leh ngeina kipte na zuih ding uh note tungah thu hong pia hi; tua ahih ciangin na lungsim khempeuh leh na nuntakna khempeuh tawh na hih ding uh lim takin na ngaihsun ding uh hi. Tu ni-in, Topa in note’ Pasian ahihna leh note in ama lampite tawnin, ama thukhamte leh ama thupiaknate leh ama ngeina kipte zui-in, ama thu na man’ ding uh na gen khin uh hi; tu ni-in Topa in note pen amah in note tungah hong ciamsa bangin ama neih ding a manpha mi na hihna uh, leh note in ama thupiaknate khempeuh na zuih nading uh, ama bawlsa minamte khempeuh sangin phatna leh minthan’na leh pahtawina ah lianzaw-in hong koih nading, leh ama gensa mah bangin Topa note’ Pasian adingin a siangtho mi na hih nading uh hong gen khin hi,” a ci hi. Tu-in Moses leh Israel upate in mite thu pia-in, “Tu ni-a note kong piak thupiakna khempeuh na zui ding uh hi. Topa na Pasian un note hong piak leitangah pai dingin Jordan na kantan ni-un suangtumpite na phut ding uh a, buan tawh na zut ding uh hi; na pu na pate uh Pasian ahi Topa in note tungah hong ciam mah bangin bawngnawi leh khuaizu a luan’na leitang, Topa na Pasian un note hong piakna gamah lut dingin na galkah uh ciangin tua suangte tungah hih thute na gelh ding uh hi. Jordan na galkah khit uh ciangin Ebal Mual tungah tu-ni a, kong thupiakna tawh kisai-in hih suangte na phut ding uh a, buan tawh na zut ding uh hi. Tua lai-ah Topa na Pasian uh adingin biakna tau, suang kibawl biakna tau khat na bawl ding uh hi; tuate tungah sik tawh a kibawl na zatte na liik kei ding uh hi. Topa na Pasian uh adingin a kiseek lo suangtumte tawh biakna tau na bawl ding uh hi; tua biakna tau tungah Topa na Pasian uh adingin meihal biaknate na pia ding uh hi; tua ciangin thunuam-a biaknate na pia ding uh a, tua lai munah na ne ding uh hi; Topa na Pasian uh mai-ah na lungdam ding uh hi. Hih thute khempeuh tua suang kiphut tungah kitel takin na gelh ding uh hi,” a ci uh hi. Tua ciangin Moses leh Levi siampite in Israelte khempeuh tungah, “Israelte aw, gamdai un la, ngai un; tu ni-in Topa note’ Pasian mi na suak uh hi. Tua ahih ciangin Topa note’ Pasian thu mangin, tu ni-a note kong piak ama thupiaknate leh ama thukhamte na zui ding uh hi,” a ci uh hi. Moses in tua ni mah-in mite thuhilhin, “Jordan na galkah khit uh ciang mite thupha a pia dingin Gerizim Mual tungah a ding ding minamte in: Simeon, Levi, Judah, Issakhar, Josef leh Benjamin ahi hi. Ebal Mual tungah hamsia a pia dingin a ding ding minamte in: Reuben, Gad, Asher, Zebulun, Dan leh Naftali ahi hi. Levi mite in awging lianpi tawh Israel mite khempeuh tungah hih bangin ci ding uh hi: “ Topa adingin a kihhuai ahi, khutsiampa khut tawh a kibawl, a kiseek ahi a, a kisung ahi zongin milim bawlin, mun simtham ah a koih mipa in gimna ngah ta hen,’ ci ding uh hi. Tua ciangin mi khempeuh in dawngin, ‘Amen,’ ci ding uh hi. “A nu ahi a, a pa ahi zongin a zahtak lo mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘A vengpa’ gi-suang a botkhia mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Mittaw-pa lam a lak khial mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Peemta, pa nei lo, leh meigong numeite ading thutang a heikhiatsak mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Amah in pa tungah maizumna tun’ ahih manin, a pa’ zi tawh a lumkhawm mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Ganhing khatpeuh peuh tawh nu-le-pa mawhna a bawl mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘A nu’ tanu ahi a, a pa’ tanu ahi zongin a sanggamnu tawh a lumkhawm mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘A sungnu tawh a lum khawm mipa in gimna ngah ta hen’ ci ding uh hi. Tua ciangin mi khempeuh in, ‘Amen,’ ci ding uh hi. “‘A vengpa a thatsim mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Mawhna baang lopa that dingin sumgolh a la mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “‘Hih thute zuihna tawh hih thu a kipsak lo mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi. “Note in Topa na Pasian uh thu mangin, tu ni-a note kongpiak ahi ama thupiakna khempeuh lim takin na zuih uh leh, Topa na Pasian un leitung minam dang khempeuhte sangin a lianzaw-in note hong bawl ding hi. Topa na Pasian uh thu na man’ uh leh hih thuphate khempeuh no tungah hong tungin note hong ban ding hi. Khuapi sungah thupha ngah mi na hi ding uh a, gamlakah zong thupha ngah mi mah na hi ding uh hi. Note’ sung pana piangte, leh na leitang pan uh a, gahte, leh na ganhing pan uh a, piang na bawngte uh pungin, na tuuhonnote uh tungah thupha om ding hi. Na seengte uh leh na annel meekna kuangte uhah thupha om ding hi. Na sungtum uh ciangin thupha na ngah ding uh a, na pusuah uh ciangin zong thupha na ngah ding uh hi. “ Topa in, note langah hong pang na galte uh na mai uhah lelhna thuak sak ding hi; amaute lampi khat tawnin hong kuan ding uh a, note mai panin lam sagih tawnin taikeek ding uh hi. Topa in note’ ansal tung leh na hihna khempeuh uhah thupha hong puak ding hi; Topa na Pasian un note hong piakna leitangah amah in note tungah thupha hong pia ding hi. Note in Topa na Pasian uh hong thupiaknate zui-in ama lampi na tot uh leh amah in note tungah hong ciamsa bangin ama adingin a siangtho mi dingin Topa in note hong kipsak ding hi. Topa ’ min tawh note hong kisapna thu leitung mi khempeuh in thei ding uh hi; amaute in note hong kihta ding uh hi. Note piak dingin na pu na pate uh tungah Topa in a ciamna gam sungah note’ sung pana piangte, na bawng pan uh a, piangte leh na leitang pan uh a, gahte ah Topa in note nakpi takin hong hau sak ding hi. Note leitangah ama hunin guah a zusak ding leh na sepna khempeuh uh thupha a pia dingin Topa in a na hoih kholna vantung note adingin phal takin hong hon’ ding hi; note in minam tampite tungah leitawi na pia ding uh a, ahih hangin note in leitawi na la kei ding uh hi. - Note in tu ni-a kong thupiak limtakin zuihna tawh Topa na Pasian uh thupiaknate mangin, tu ni-a note kong thupiakna kammalte panin, pasian dangte, na semin a zui dingin, vei lam hita leh tak lamah hita leh na pial kei nak uh leh, Topa in a makai-in note hong bawl ding a, mi’ nungzui-in hong bawl lo ding hi; tung lam bekah na kah ding uh a, na nuai kiat ngei kei ding uh hi. “Ahih hangin note in Topa na Pasian uh thu mang loin, tu ni-a note kong piak ama thupiaknate leh ama thukhamte khempeuh lim takin na zuih kei uh leh, hih samsiatna khempeuh note tungah hong tung ding a, note hong ban ding hi. Khuapi sungah hong kisamsia ding a, gam lakah zong hong kisamsia ding hi. Na lawhte uh leh na annel meekna kuangte un zong samsiatna ngah ding hi. Note’ sung pana piangte leh na leitang pan uh a, gahte, na bawngte uh a pun’na, leh na tuuhon note uh in zong samsiatna ngah ding hi. Na sungtum ciangun hamsia na ngah ding uh a, na pusuah ciangun zong hamsia mah na ngah ding uh hi. “Note in Topa na nusiat uh a, na gamtat siat uh leh, note sia-in na sihmang khit matengun Topa in note tungah samsiatna, buaina, thuhilhna hong tung sak ding hi. A luah dingin na lutna uh leitang panin note hong beisak matengin note lakah pulnatna a tun’ nadingin Topa in bawl ding hi. Topa in pulnatna, leh cisa natna, meima nasia, leh a sa mahmah natna, leh keutumna, leh huihpi mutgawpna, leh a nom tawh note hong vatgawp ding hi; note na siat mateng uh tuate in hong delh ding hi. Na lu tung uh a, om vantungte in sumngo bangin san ding a, na nuai uh a, om leitung in sik bangin sak ding hi. Topa in na gam sung uh a, guahte tang dingin leivui leh sehnel hong zusak ding hi; note na siat matengun vantung panin note tungah tuate hong kia suk ding hi. “ Topa in na galte uh mai-ah note hong lel sak ding hi; amaute do dingin lam khatah na kuan ding uh a, amau mai-ah lam sagih ah na taikeek ding uh hi; leitung kumpi gamte khempeuh muhna ah note in a cikzet-huai na hi ding uh hi. Note’ luang hawmte in huih lak a, leeng vasate khempeuh leh leitunga ganhingte khempeuh’ an hi ding hi; amaute a bengkhia ding mihing om lo ding hi. Topa in note na damkik theih lohna uh Izipt meimatumte, leh meima daite leh meima lip neite leh cithak tawh note hong vatgawp ding hi. Topa in haina leh mittawtna leh lungsim buaina tawh note hong vatgawp ding hi; mittaw in khuamial lakah khua a zawt bangin sun-in khua na zawt ding uh a, na hihnate uhah na mavang kei ding uh hi; note hong kinengniamin na nate uh hong kisut niloh ding a, note hong huh ding kuamah om lo ding hi. Zi dingin lawm khat na dong ding uh a, midang khat in na luppih ding hi; inn na lam ding uh a, tua sungah na teeng kei ding uh hi; leenggui lo na zuan ding uh a, a gah na khawm kei ding uh hi. Na muh tangpi-un na bawngtal uh kigo ding a, a sa na ne kha kei ding uh hi; note’ mai panin na la uh hong kingawh laksak ding a, note kiangah hong kipia kik lo ding hi; na tuute uh na galte uh tungah kipia ding a, note hong huh ding kuamah om lo ding hi. Na tapate leh na tanute uh minam dangte’ tungah kipia ding a, amaute ngai-in sun nilohin na mit un enin gim ding hi; nomau’ tha tawh na dal zawh ding uh hi lo ding hi. Na theih nai loh uh minam khat in na leitang panun a gahte leh na nasepsa khempeuh uh netum ding hi; note hong kinengniamin hong kisugawp tawntung lel ding hi; tua ahih ciangin na mit un a muh ding nate in note hong hehsak mahmah ding hi. Topa in note na kidamsak kik theih loh ding uh a nasia meimatumte tawh na khukte leh na khete uh meimasak gawpin, na khenuai panun na luzang dong uhah na thuak ding uh hi. “Note leh na pu na pate un a theih ngei nai loh minam khat kiangah Topa in note leh note tungah na koih uh na kumpipa hong tun’pih ding hi; tua lai-ah sing leh suang tawh a kibawl pasian dangte’ na na sem ding uh hi. Topa in note hong paikhiatpihna mite lakah a cikzet-huai, paunak, leh ciamnuihna na suak ding uh hi. Khaici tampi lo-ah na tuh ding uh a, ahi zongin tawmno bek na khawm ding uh hi; bang hang hiam cih leh kauphe in nemang ding hi. Note in leenggah lo zuanin na puah ding uh a, ahih hangin leenggahzu dawn loin, leenggah zong na ne kha kei ding uh hi; bang hang hiam cih leh lung in tuate ne ding hi. Na gam sung khempeuh uhah oliv kung na nei ding uh a, ahih hangin a thau tawh note na kizut kei ding uh hi; bang hang hiam cih leh na oliv gahte uh pulh ding hi. Tanute leh tapate na nei ding uh a, ahih hangin amaute in nomau’ aa hi lo ding uh hi; bang hang hiam cih leh amaute galmat suak ding hi. Na singte khempeuh uh leh na lei pan uh a, a gahte khempeuh kauphete in tang ding uh hi. Note lakah a om peemta mite sang semsem ding uh a, note na niam semsem ding uh hi. Amah in note tungah leitawi hong pia ding a, note in ama tungah leitawi na pia kei ding uh hi; amah a makai hi-in, note a nungzui na hi ding uh hi. Amah in note hong piak ama thu piaknate leh thukhamte zui loin, Topa na Pasian uh thu mang lo na hih manun, note na siat matengun hih samsiatnate khempeuh note tungah hong tungin, note hong delhin hong pha ding uh hi. Note leh na suan leh khate uh tungah a tawntungin tuate in lim leh nalamdang hi ding hi. “Hih a tampi nate khempeuh om napi-in note in lungdamna leh lungsim kipahna tawh Topa note’ Pasian nasem lo na hih manun, Topa in note’ langah a hong sawl ding na galte uh’ na, gilkialna leh dangtakna, pum guak-a omna, leh na khempeuh kitangsapna tawh, na sem ding uh hi; na galte un note hong suksiat matengin note’ ngawng ah sik hakkol hong thuah ding hi. - Topa in a gamlapi leimong panin muvanlai leng banga a manlang, amau’ pau na theih loh uh minam, thukhualna a nei lo minam, khangham mite a zahtak lo, khangno mite tungah maipha zong a lak tuan lo minam khat, note’ langkhatah hong paipih ding a, note na siat matengun amaute in na ganhingnote uh leh na leitang panun a piang gahte hong neksak ding uh hi; amaute in note hong beisak matengun note adingin an, leenggahzu, ahih kei leh sathau, na ganhingte uh ahih kei leh na tuuhonnote uh zong hong nusiat lo ding uh hi. Na gam sung uh a, a om na muan’ uh a sang a muan’ huai na kulhpite uh a cip khit dong matengin na khuapite khempeuh sungah amaute in note hong umcih ding uh hi; Topa na Pasian un note hong piaksa na gam sung khempeuh uhah a om na khuapite khempeuh sung uhah note hong umcih ding uh hi. Hong umcihna leh na galte un hong lungkhamsak nading ahi na lungkhamna hun uhah Topa na Pasian un note a hong piaksa na sung panun a piang na tate, na tanute leh na tapate’ sate na ne ding uh hi. Note lakah a ngeksuak, a ci-thei pen mipa in a sanggampa, a it a zi, leh amah tawh a om a tate a nunung pen’ tungah an pia nuam lo ding hi; na khuapite khempeuh sung uhah hong umcihna leh na galte un note hong lungkhamsak nading lungkhamna hun sungah amah in bangmah nei nawn lo ahih manin ama nek a tate’ sate kuamah hawm nuam lo ding hi. - Note lakah a om a ngeksuak, a ci-thei pen numei, amah ngek-in a ci neellua ahih manin a khenuai tawh lei sik ding a ngaihsun ngei vet lo nu in, a it a pasal, a tanu leh a tapa adingin, ama sung pana a piang a tate leh ama khe kikal-a a paikhia a nau-nungzuite phal lo ding hi; bang hang hiam cih leh hong umcihna leh na galte un na khuapite uhah note hong lungkhamsak nading lungkhamna sungah bangmah neih lohna hangin amah in tuate nesim ding hi. “Hih a minthang, zahtakhuai min, Topa na Pasian uh na kihtak theih nadingun hih laibu sunga kigelh hih thute lim takin zuih ding na ngaihsut kei uh leh, Topa in note leh na suan na khakte uh tungah nasia-in sau vei a om gimna, gimna a tuandiak, leh a nasia, nat saute hong tungsak ding hi. Amah in note’ kihtak Izipt natnate note tungah hong tungsak kik ding hi; note tungah tuate hong belh ding hi. Note na siat matengun hih thukham laibu sungah a kiciamteh lo natna leh gimna khempeuh zong, Topa in no tungah hong tung sak ding hi. Note vantung aksite bangin a tam na hihna sung uhah tawmno bek na pha ding uh hi; bang hang hiam cih leh Topa na Pasian uh thu na mang kei uh hi. Topa in note tungah a hoih bawlna leh note tampi phasakna ah nuam a sak mah bangin, note tungah siatna tun’sakna leh note suksiatna ah zong Topa in nuamsa ding hi; a luah dingin na lutna uh leitang panin note hong kilakhia ding hi. Topa in leimong khat panin mong khat, minamte’ lakah note hong thehthang ding hi; tua lai-ah note leh na pu na pate un a theih nai loh sing leh suang tawh a kibawl pasian dangte’ na na sem ding uh hi. Hih minamte lakah ol tak-a nuntakna na mu kei ding uh a, kiptak a, na om nading uh gam na nei kei ding uh hi. Topa in tua lai-ah lungsim liin’na, mit gimna, leh nuntakna tha beina hong pia ding hi; na nuntakna uh lunghimawh-in na om tawntung ding uh hi; sun leh zanin launa sungah na om ding uh a, nuntak lungmuan’na na nei kei ding uh hi. Na lungsim un a kihtak launa leh na mit un a muh ding nate hangin, zingsangin, ‘Nitak hi leh! na ci ding uh a, nitakin, ‘Zingsang hi leh!’ na ci ding uh hi. Note na zinkik ngei nawn kei ding uh hi, ci-a kong ciam khualzinna, Izipt gamah teembaw tawh Topa in note hong paipih kik ding hi; tua lai-ah sila numei leh sila pasal dingin na galte uh tungah na kizuak ding uh a, ahih hangin kuamah in note hong lei lo ding hi,” a ci hi. Hihte, Horeb ah amaute tawh thuciamna a bawlsa ban-ah, Israel mite tawh Moab gamah thuciamna a bawl dingin Topa in Moses a sawl, a thuciamna kammalte ahi hi. Moses in Israelte khempeuh samin amaute kiangah, “Izipt gam sung note’ mit muh-ah, Topa in Faro tung leh ama nasemte khempeuh leh ama gam khempeuhah a bawlna, note’ mit in a muhsa ze-etna lianpite, limte, tua nalamdang liante khempeuh na thei khin uh hi; ahih hangin tu ni dongin Topa in note tungah a thu na tel nading uh lungsim hita leh, na muh nading uh mit hita leh, na zak nading uh bil hita leh hong pia nai lo hi. Kum sawmli sung gamlakah note hong makaih khin hi; note tung panin na puante uh sia nai lo a, na khe panun zong na khedapte uh sia nai lo hi; Topa pen na Pasian uh ahihna na theih nadingun nek ding anlum, leh dawn ding leenggahzu ahi a, kham theih zu ahi zongin na ne nai kei uh a, ahi zongin na kisapna teng uh hong pia hi. Hih mun na tun’ uh ciangin Heshbon kumpipa Sihon leh Bashan kumpipa Og, eite a do dingin hong kuankhia uh a, ahih hangin amaute i zo hi; amaute’ leitang i la a, Reuben mite, Gad mite, leh Manasseh minam a langte tungah luah dingin i pia hi. Tua ahih ciangin na hihna khempeuh uhah na daupai theih nadingun hih thuciamna kammalte khempeuh lim takin na zuih ding uh na ngaihsun ding uh hi. Hih kiciamna note bek tawh a bawl hi lo a, tu ni-in eite tawh Topa i Pasian’ mai-ah a ding mite tawh a bawl mah bangin tu ni-in eite tawh a om nai lo i suan i khakte tawh zong a bawl ahi hi. “Izipt gam i teen’na leh note in na nawk uh minamte lakah i paina na thei uh hi; a muhdahhuai amau’ na, sing leh suang a kibawl, ngun leh kham a kibawl, amaute lakah a om a milimte uh na mu khin uh hi. - Note lakah numei ahi a, pasal ahi a, innkuan ahi a, minam khat ahi zongin, tua minamte’ pasian na a sem dingin Topa i Pasian kiang panin tu ni-in a lungsim a heikhia a om khak ding kidawm un; tua hi kei leh note lakah gu a nei gah kha a gah singkung hong bang ding a, hih kiciamna kammalte za napi-in a lungsim ah amah thupha kipia tawmin, ‘Ka lungsim khauhna tawh ka gamta zongin ka suakta veve ding hi,’ a ci hong om kha ding hi. Hih in mihoih leh misia, a kibangin phiatkhiatna hong suak sak ding hi. Topa in amah maisak lo ding a, Topa ’ hehna tawh hazatna meikhu tua mipa’ lang khatah khu zawin, hih laibu sunga kigelh samsiatnate ama tungah tung ding a, Topa in vantung nuai panin ama min phiat ding hi. Topa in hih thukham laibu sunga a kigelh thuciam samsiatnate khempeuh tawh kizui-in gimna thuak dingin Israel minam khempeuh lak panin amah tengkhia ding hi. Hong khang lai ding mi, note nungah hong piang na tate uh leh a gamla panin hong pai gamdang mi in tua gam in a gim ngahna leh Topa in a natsakna cinatnate a muh uh ciangin— a gambup in kaat leh ci, leh nin a kangtum, khai kituh lo, bangmah po lo, lopa zong a po zawh lohna mun Sodom leh Gomorrah, Admah leh Zeboi-im bangin a kilawnthal gawp, a hehna leh a sinsona tawh Topa ’ lotgawpte tawh kibang hi, ci ding uh hi— hi hi, minamte khempeuh in bang hangin Topa in hih bangin hih gam bawl ahi hiam? Hih hehna lian in bang a cihnopna ahi hiam?’ ci ding uh hi. Tua ciangin mite in, ‘Amah in Izipt gam panin a paikhiatpih lai-in amaute tawh a bawl, a pu a pate uh Pasian ahi Topa ’ thuciamna amaute in nusia in, a theih nai loh uh pasiante leh amah in amaute tungah a piak loh pasian dangte, na va semin a biakna hang uh ahi hi; tua ahih ciangin a mite tungah Topa ’ hehna kitawh kuang a, hih laibu sunga om samsiatnate khempeuh hih leitang tungah tungsak hi; Topa in hehna, sinsona, lungham mahmahna tawh a leitang panun amaute zunglot a, tu ni-a i muh bangin amaute gamdangah lawn hi,’ ci ding uh hi. “ Topa i Pasian in hong lahkhiat loh thusim om a, ahih hangin hih thukham sunga thute khempeuh i zuih theih nadingin a hong lahkhiat thute, eite leh i suan i khakte’ zuih tawntung ding ahi hi. “Note mai-ah ka koih, na teel ding uh thupha leh samsiatna, hih nate khempeuh note tungah hong tungin, Topa in note hong hawlkhiatna minamte lakah hih thute phawk kikin, Topa note’ Pasian kiangah note leh na suan na khakte uh pai kikin, na lungsim khempeuh uh leh na nuntakna khempeuh uh tawh tu ni-a note kong thupiak ahi ama thute na man’ uh ciangin, Topa na Pasian un note na ngei uh hong bangsak kikin, note tungah hehpihna hong nei ding a, Topa na Pasian un note hong thehthangna minamte’ lak panin amah in note hong kaikhawm kik ding hi. A kihawlkhia na mite uh vanmong pekah a om leh zong, Topa na Pasian un tua lai panin note hong khawmin, tua lai panin amah in hong paipih kik ding hi; note in na neih theih nadingun, na pu na pate uh neih leitangah Topa na Pasian un hong paipih ding hi; na pu na pate uh sangin a ci-thei zaw a tam zaw-in amah in note hong bawl ding hi. Note in na lungsim khempeuh uh leh na nuntakna khempeuh uh tawh Topa na Pasian uh itin na hin’ theih nadingun, Topa na Pasian un note leh na suan leh khakte uh tungah thuman’ nopna lungsim hong guan ding hi. Topa na Pasian un hih samsiatnate khempeuh, no hong bawlsia na galte uh leh na langte uh tungah tungsak ding hi. Note in Topa ’ thu mang kikin, tu ni-a note kong piak ama thupiaknate khempeuh na zui ding uh hi. - Note in hih thukham laibu sunga kigelh ama thupiaknate leh ama thukhamte zuih ding ahi, Topa na Pasian uh thu na man’ uh a, na lungsim khempeuh uh leh na nuntakna khempeuh uh tawh Topa na Pasian uh lamah na kihei uh leh, Topa na Pasian un na sepna khempeuh uh, note’ suan leh khakte, leh na ganhingte uh panin a piangte, leh na leitang panun a piang khempeuh ah nakpi takin hong daupai sak ding hi; bang hang hiam cih leh na pu na pate uh tungah amah a lungkim mah bangin note tungah Topa hong lungkim kik ding a, note hong daupai sak kik ding hi. “Bang hang hiam cih leh tu ni-a note kong piak hih thupiakna in note adingin a haksa lua hi lo a, na zuih lah ding uh zong hi lo hi. Note in, ‘Eite in a thu za-in i sep theih nadingin kua in vantungah eite adingin hong paisakin hong laksak ding ahi hiam?’ na cih theih nadingun vantunga om hi lo hi. Note in, ‘Eite in a thu za-in i sep theih nadingin kua in tuipi gal khatah hong paisakin hong laksak ding ahi hiam?’ na cih theih nadingun tuipi gal-a om zong hi lo hi. A thu in hong nai mahmah hi; note in na zuih theih nadingun na kam sung uh leh na lungsim sung uhah om hi. “Mu un, tu ni-in na teel dingun note mai-ah nuntakna leh hauhna, sihna leh siatna ka koih khin zo hi. Topa na Pasian uh itna, ama lampite totna, ama thupiaknate leh ama thukhamte leh ama ngeina kipte zuihna tawh, tu ni-a no tungah kong piak ahi Topa na Pasian uh thupiaknate na man’ uh leh, note nungta-in tampi na pha ding uh a, a luah dingin note na lutna uh leitang tungah Topa na Pasian un note thupha hong pia ding hi. Ahih hangin na lungsim uh kihei-in, note in zui loin, pasian dangte bia ding leh a na sem dingin note hong kikaihkhiat leh, tu ni-in note tungah hih thu kong gen hi, note na sia ding uh hi; Jordan kantanin note a lut ding leh a nei dingin na paina uh leitang tungah sau vei na nungta kei ding uh hi. Tu ni-in note lang khat ah teci a pang dingin vantung leh leitung ka sam a, note mai-ah na teel dingun nuntakna leh sihna, thupha leh samsiatna ka koih hi; tua ahih ciangin note leh na suan leh khakte uh na hin’ theih nadingun nuntakna teel un la, Topa na Pasian uh itin, ama thu mangin, amah beel un; bang hang hiam cih leh Topa in na pu na pate uh Abraham, Isaak, leh Jakob tungah piak dingin a kiciamsa leitangah note na teen’ theih nadingun tua in note adingin nuntakna leh khan’ sauna ahi hi,” a ci hi. “Tua ahih ciangin Moses in Israelte khempeuh tungah hih thute a gen zom lai hi. Amah in amaute kiangah, “Tu ni-in kei kum za leh kum sawmnih ka pha hi; note kong mapi zo nawn kei hi. Topa in kei kiangah, ‘Hih Jordan gal khatah na pai kei ding hi,’ hong ci zo hi. Topa na Pasian mahmah uh note’ mai-ah hong galkah ding hi; note mai-ah hih minamte amah in susia ding a, note in amaute na suankhia ding uh hi; Topa ’ gensa bangin note’ mai-ah Joshua hong galkah ding hi. Topa in amaute a suksiat lai-a, Amor kumpi Sihon leh Og tung leh amau’ leitang tungah a bawl bangin amaute tungah bawl ding hi. Topa in note tungah amaute hong pia ding a, note kong piak thupiaknate khempeuh tawh kizui-in amaute tungah na bawl ding uh hi. Thahat un la, hang un, lau kei un la, amaute kihta kei un: bang hang hiam cih leh note tawh hong paipa in Topa na Pasian uh ahi hi; note hong cimawhsak lo ding a, hong nusia lo ding hi,” a ci hi. Tua ciangin Moses in Joshua samin, Israelte khempeuh muhin ama kiangah, “Thahat in la, hang in; bang hang hiam cih leh amaute tungah piak dingin Topa in amau pute pate’ tungah a ciamsa leitangah hih mite tawh na pai ding hi; nangmah in tua leitang amaute na ngah sak ding hi. Na mai-ah a paipa in Topa ahi hi; amah in nang tawh hong om ding a, nang hong cimawhsak loin, zong hong nusia lo ding hi; lau kei in la, lungkia kei in,” a ci hi. Moses in hih thukham gelhin, Topa ’ thuciamna singkuang a pua Levi mi siampite leh Israel upate khempeuh tungah pia hi. Moses in amaute thupia in, “Kum sagih a cin’ sim, a kisehsa suahtak sakna hun, buk pawi hunin, amah in a teelna mun Topa na Pasian uh mai-ah a kilaak dingin Israelte khempeuh a pai ciangin, amau’ zakin Israelte khempeuh mai-ah hih thukham na sim ding uh hi. - Jordan gal khatah a luah dingin na paina gam uhah na nuntak lai tengun amaute in a thu za-in Topa na Pasian uh zahtak ding a theih nading, leh hih thukham thute khempeuh lim takin a sep theih nading, leh hih thu a thei nai lo amau’ tate in Topa na Pasian uh zahtak ding a theih nadingun, numei, pasal, leh naupangte, leh na khuapite uh sunga om peemtate, mi khempeuh khawm un,” a ci hi. Tua ciangin Topa in Moses kiangah, “En in, na sih ding hun hong nai ta hi; Joshua sam in la, amah ka sawl theih nading kikhopna buk sungah hong om un,” a ci hi. Tua ciangin Moses leh Joshua pai-in kikhopna buk sungah va om uh hi. Tua ciangin meii khuam omna puanbuk sungah Topa kilang hi; meii khuam in puanbuk kong gei-ah ding hi. Tua ciangin Topa in Moses kiangah, “En in, na pu na pate kiang a zuan ding na hi ta hi; nang’ om nawn loh ciangin hih mite in a paina uh mite lakah a gam sung pasiante tawh paktat ding uh a, amaute in kei hong nusia in amaute tawh ka bawl ka thuciamna uh siasak ding uh hi. Tua hun ciangin amaute tungah ka hehna so-in, amaute nusia-in ka mai ka seel ding a, amaute beimang ding uh hi; tua ni ciangin amaute in, ‘Eite lakah i Pasian a om loh manin hih siatnate i tungah hong tung hilo ahi hiam? a cih theih nadingun amaute tungah siatna leh gimna tampi tung ding hi. Amaute pasian dangte lamah kihei uh ahih manin amau’ gamtatnasa siatnate khempeuh hangin tua hun ciangin ka mai ka seel taktak ding hi. Tua ahih ciangin hih la gelh in la, Israel mite hilh in; hih la in kei’ adingin Israel mite lang khatah teci ahih theih nadingin amaute tungah hih la hilh in. Bang hang hiam cih leh a pu a pate’ uh tungah piak dinga ka kiciamna, bawngnawi leh khuaizu a luan’na gamah amaute tunpih khinin, amaute in ne-in khamin a thau khit uh ciangin, pasian dangte lamah amaute kihei-in a na semin, kei hong simmawhin ka thuciamna siasak ding uh hi. Siatna leh haksatnate amaute tungah a tun’ ciangin hih la in teci-in amaute lang khatah pang ding hi (bang hang hiam cih leh a suan leh khakte un mangngilh lo ding uh hi); bang hang hiam cih leh piak dingin ka kiciam leitangah amaute ka paipih ma-in, amau’ vaihawm kholh a ngimnate uh ka thei hi,” a ci hi. Tua ahih ciangin tua ni mahin Moses in hih la gelh a, Israel mite hilh hi. Topa in Nun’ tapa Joshua sawlin, “Thahat in la, hang in; bang hang hiam cih leh amaute piak dingin ka kiciam leitang tungah Israel mite na paipih ding hi; nang tawh kong om ding hi,” a ci hi. Moses in a bei dongin hih thukham kammalte laibu sunga gelh a man ciangin, Moses in Topa ’ thuciamna singkuang a pua Levi mite thu pia a, “Hih thukham laibu la un la, note lang khatah teci dingin a om theih nadingin Topa na Pasian uh thuciamna singkuang gei-ah koih un. Bang hang hiam cih leh a lehdo mite leh a lungkhauh mite na hihna uh ka thei hi; en un, note tawh kei a nungta khawm laipi mahin, tu ni-in Topa na lehdo khin uh hi; ka sih khit ciangin bangzah takin lehdo zawlai ding na hi uh hiam! Hih thute amaute’ bil-ah genin, amau’ lang khatah teci a pang dingin vantung leh leitung ka sap theih nadingin na minam upate leh na uliante khempeuh uh kei kiangah hong khawm un. Bang hang hiam cih leh ka sih khit ciangin note gamtat sia-in, note kong sawlna lampi panin na pial taktak ding lam uh ka thei hi; note’ nasepna tawh amah hehsakin, Topa muhna ah a sia gamta ding na hih manun, hong pai ding hunte ah note tungah gimna hong tung ding hi,” a ci hi. Tua ciangin hih la malte a bei dongin Israel a kikhawm khempeuhte’ zakin Moses in gen hi: “Vantungte aw, ngai un, thu ka gen ding hi; ka thugente leitung in za hen. Ka thuhilhna in guahmal bangin zu-in, ka thugenna daitui bangin kia hen la, longeek tunga guah phin leh ankung tunga guahzu bang ta hen. Bang hang hiam cih leh Topa ’ min ka phat ding hi. Eite’ Pasian a liatna gen un! “Eite belh Suangpi, a nasepna kicing a, ama sepna khempeuh thumanna ahi hi. Thumanna nei-in, mawhna a nei lo Pasian hi a, amah thutangin thuman hi. Amaute in ama tungah gamtat sia uh a, amaute’ sitban’na hangin amaute in ama tate hi nawn lo uh hi; amaute in a lampial, lungsim kawi khang mite ahi uh hi. A hai, ngaihsutna nei lo mite aw, tua bangin Topa thuk ding na hi uh hiam? Amah in, note a hong piangsak, note hong bawlin a hong kipsak, na Pa uh hilo ahi hiam? A beisa hunte phawk un la, khang tampi hunte ngaihsun un; na pa dong in, hong lak ding hi; na upate dong in, hong gen ding uh hi. Sang Penpa in minam dangte tungah amau’ gamh pia a, mihingte a teen’ nading mun a seh ciangin, Pasian in a phazah tawh kizui-in mite’ gamgi a phut hi. Ahi zongin Topa ’ tanh in ama mite hi a, Jakob suante pen a kipia ama luah ahi hi. “Amah in sehnel gam, huihpi nun’na gamlakah amaute mu hi; amah in kawi-in kem a, ama mit nauta bangin amaute kem hi. A bu a vil, a note tungah a kha a zap, a khate zakin, a note a man, a kha tawh a note a pua muvanlai bangin, Topa bek mah in amaute makaih a, amaute kiangah gamdang pasian om lo hi. Amah in leitung a sangna munte tungah amaute tuang sak a, amaute in gamlak pana piangte a ne uh hi; suangpi panin amaute khuaizu hup sakin, meisuang tawh kibang suang panin sathau a ne sak hi. Bawnghon panin bawngnawi thaukhal, tuuhon panin tuunawi, tuunote leh tuutalte’ thau tawh, Bashan bawng honte leh keelte, mangbuh hoihpente tawh leenggah tuisan na dawn uh hi. “Israel mite thau mahmah uh a, a lehdo thei mi suak uh hi; note thau-in, lianpi pha-in, na zol uh hi; tua ciangin amaute a bawl Pasian amaute in nusia-in, amau’ a Honkhiapa thusim lo uh hi. Amaute in pasian dangte tawh ama hazat theih nadingin gamta uh a, a kihhuai gamtatnate tawh amaute in amah hehsak uh hi. Amaute in pasian a hilo dawite, amau’ theih ngei loh pasiante, hong suak nunung pasian thakte, na pu na pate’ theih ngei lohte’ tungah biakna pia uh hi. Note a hong Honkhiapa na phawk kei uh a, note hong suaksak Pasian na mangngilh uh hi. “ Topa in tua thu thei a, a tapate leh a tanute in hehsak ahih manin tua ama tate a nolh hi. Amah in, ‘Amaute kiang panin ka mai ka seel ding a, amaute’ tawpna bang hong hi hiam ka en ding hi; bang hang hiam cih leh amaute in a lampial khang mite hi a, cihtakna a nei lo tate ahi uh hi. Amaute in pasian a hilote tawh ka hazat nading hong bawl uh a, a milimte uh tawh kei hong hehsak uh hi. Tua ahih ciangin mi-a gentaak lote tawh amaute’ hazat theih nading ka bawl ding hi. A hai minam khat tawh amaute ka hehsak ding hi. Bang hang hiam cih leh ka hehna in mei tawh kuang a, Leinuai thukna mun dong kuang hi, leitung leh a tunga piangte kangtum a, mualte’ bulpite’ kuangsak hi. “Amaute tungah siatna ka khol ding a, amaute tungah ka thaltangte ka zang ding hi; gilkialna tawh amaute bei ding uh a, meikuang sa mahmah leh gu nei natna in amaute ne-tum ding hi; keimah in amaute a pet dingin ha hiam a nei gamsate, amaute a tu dingin gu a nei gulte ka sawl ding hi. Namsau in amaute gamlakah susia in, inn sungah launa lianpi om ding a, tangval leh nungak, naungek nawi nete sam kangsate tawh susia khawm ding hi. Keimah in, “Amaute gamlapi ah ka thehthang ding a, mite lakah amaute a kiphawkna ka beisak ding hi,” ka ci thei ding hi, amau’ langte in ngaihsun khialin, amaute in, “Eite i gualzo hi, Topa in hihte khempeuh bawl lo hi,” hong ci kha ding uh ahih manin galte’ hong phin ding ka lau hi,’ a ci hi. “Bang hang hiam cih leh amaute in ngaihsutna a nei lo minam hi a, amaute sungah thu theihtelna om lo hi. Amaute pil hi leh, hih thu theitel ding uh a, amau’ thu tawpna mu ding uh hi! Amau a Honkhiapa in amaute zuakin, Topa in amaute a piak khiat kei buang leh bangci-in mi khat in mi tulkhat delh mangin, mi nih in mi tulsawm do zo ding ahi hiam? Bang hang hiam cih leh i galte’ suangpi in eite’ Suangpi bang hi lo a, i galte thungetna a mawkna ahi hi. Bang hang hiam cih leh amau’ leenggui in Sodom leenggui pan leh Gomorrah lote panin hong pai ahi hi; amau’ leenggahte in gu a nei leenggah hi a, amau’ leenggah bawkte a kha hi; amau’ leenggahzu in gulpi gu leh a gu-pha gulgu nei’ gu ahi hi. “Hihte kei kiangah kikholin, ka van koihna sungah kisincip hilo ahi hiam? Phulakna leh thukkikna kei’ aa ahi hi, a hun ciangin amaute puk ding uh hi; bang hang hiam cih leh amau’ gim ngah hun ding hong nai a, amau’ siat nading hong tung pah hi. Bang hang hiam cih leh amaute’ vang a beina leh sila leh sila a hilote’ a beina a muh ciangin Topa in a mite’ dikna kilangsak ding a, ama nasemte tungah hehpihna nei ding hi. Tua ciangin amah in, ‘Amau’ pasiante, a bukna uh suangpi, amaute’ biak piakna thau ne-in, leenggahzu tawh a biakna uh a dawnte koi-ah om ahi hiam? amaute thosakin note kihuh sak un la, amaute na kidalna uh hi sak un! “Tu-in thei un, Keimah a kicipa in Kei ka hi hi, Kei sim loh pasian dang om lo hi; ka that a, ka nungta sak hi; ka liam sak a, ka dam sak hi; ka khut sung pan a honkhia zo kuamah om lo hi. Bang hang hiam cih leh vantung lamah ka khutte laamto-in ka kiciam a, Keimah in a nungta tawntung ka hih mah bangin, a tee ka namsau taatin, thukhen ka kipat ciangin, ka galte tungah phu ka la ding a, kei hong mudahte ka thukkik ding hi. Ka thaltangte si ka tawksak ding a, ka namsau in mi that ding hi—a kithatte leh a kimante, kei hong langpangte, si ding hi,’ a ci hi. Minamte aw Topa ’ mite tawh lungdam khawm un! bang hang hiam cih leh amah in a nasemte’ phu la a, a langte thukin, ama mite’ gam adingin kilemna bawl hi,” a ci hi. Moses hong pai-in, mite’ zakin amah leh Nun’ tapa Joshua in hih la malte khempeuh sut hi. Moses in Israelte khempeuh tungah hih thute a gen a man ciangin, amaute kiangah, “Hih thu khempeuh lim takin a hih theih nadingun na tate uh tungah na hilh theih nadingun, tu ni-a note tungah kong piak thu khempeuh na lungsim uhah koih un. Bang hang hiam cih leh hih in note adingin a thuneu hi loin, note’ nuntakna hi a, a luah dingin Jordan gal khatah na paina gam sung uhah hih thu tawh sau veipi na hing ding uh hi,” a ci hi. Tua ni mahmahin Topa in Moses kiangah, Jerikho gal lam, Moab sungah a om Nebo Mual, hih Abarim mual tungah kahto in; a neih dingun Israel mite tungah ka piak Kanaan gam en in; Hor Mual tungah na sanggampa Aaron si-in a mite kiangah a kigawm bangin, na kah tohna mual tungah si in la, na mite kiangah kigawm in; bang hang hiam cih leh Zin gamlak, Kadesh khua gei-a Meribah tui phual, Israel mite lakah keimah nong upna na siasak hi; Israel mite lakah a siangtho-in kei nong zahtak kei hi. Tua ahih manin na mai-ah a om gam a gal panin na mu ding hi; ahih hangin Israel mite ka piak gam sungah nang na lut kei ding hi,” a ci hi. Hih in, Pasian mi Moses in ama sih ma-in Israel mite thupha a piakna ahi hi. Amah in, “Sinai panin Topa hong pai a, Seir panin eite ading hong suakkhia hi; Paran Mual panin hong taangkhia a, a taklam khutah meikuang tawi-in, misiangtho tul sawmte kiang panin hong pai hi. Hi taktak hi, amah in a mite it a, ama tungah a ki-ap mite khempeuh a khut sungah om hi; tua ahih ciangin amaute in na khephung ah hong kun uh a, nang tung panin lamlahna ngah uh hi. Jakob mi honte’ neih dingin Moses in kote tungah ngeina khat hong pia hi. Mite’ makaite kikhawmin, Israel minamte khempeuh a kikaihkhop ciangin, ama mi Israelte lakah Topa in kumpi suak hi. “Reuben nungta-in, si kei hen la, ama mite zong mi tawm hi kei ta hen,” a ci hi. Tua ciangin Judah thu genin: “ Topa aw, Judah’ aw ngai in la, a mite kiangah amah paipih in. Na khutte tawh ama ading do in la, a galte dona ah a huhpa hi in,” a ci hi. Tua ciangin Levi thu genin, “Levi tungah na Thummim pia in la, na mi a dikpa tungah na Urim pia in. Massah ah na ze-et mipa, Meribah tuite ah na kitotpihpa ahi hi; a nu leh a pa sangin nang hong thupi ngaihsut zaw a, ‘Amaute ka thupisim kei hi,’ a ci pa ahi hi; amah in a sanggamte paai khia-in, a tate don lo hi. Bang hang hiam cih leh amaute in na thu mangin, na thuciamna zui uh hi. Amaute in na ngeina kipte Jakob suante hilhin, na thukhamte Israel hilh ding uh hi; amaute in na mai-ah paknamtui hong koihin, na biakna tau tungah meihal biakna bup hong koih ding uh hi. Topa aw, ama’ nate tungah thupha pia in la, a khut tawh a nasepnate saang in; a galte’ kawng su-tan in la, a din’ kik nawn loh nadingun amah a mudahte sugawp in,” a ci hi. Benjamin thu genin, “ Topa in a it mipa, ama kiangah nuam takin om hi; amah in sun tawntung kemin, a liang kikal-ah ama omna bawlsak hi,” a ci hi. Josef thu genin, “ Topa in ama leitang tunga om vantung letsong hoih pente, leh nuai-a om a thuknate tawh, ni hanga gah a hoihpente, leh kha hanga piang a hoihpente tawh, taanglai mualte tunga piang a hoihpente, leh tawntung mualte’ hauhna tawh, leitung leh a tunga om letsong hoihpente, leh sawlbawk lakah a teengpa’ maipha tawh thupha pia hen. Hihte, Josef tungah tung hen la, a sanggamte lakah ulian ahi mipa’ lutungah tung hen. A tacil bawngtal in minliatna nei a, a kite in gamsial kite ahi hi; amah in tuate tawh mite nawt ding a, lei mongdong ah amaute khempeuh phul ding hi; Efraim tul sawmte in tua bang hi a, Manasseh tul tampite in zong tua bang mah ahi hi,” a ci hi. Zebulun thu genin, “Zebulun aw, na paikhiatna ah lungdam in; Issakhar aw, na puanbukte sungah lungdam in. Amaute in a mual uhah mite sam ding uh a, amaute in tua lai-ah biak piakna mante pia ding uh hi; bang hang hiam cih leh amaute in tuipi tamna, leh sehnel sunga na manpha kiseelte ngah uh hi,” a ci hi. Gad thu genin, “Gad a lian-in a bawlpa in thupha ngah hen! Gad in humpinelkai bangin buk a, amah in a baan, leh a luzang balkham hi. Amah in lei hoihpenna mun ama adingin teel hi; bang hang hiam cih leh a ukpa’ tanh kikoihcing sak hi; mi makaite’ ngahte mah amah zong kingahsak a, amah in Israel tawh Topa ’ thupiakna leh thuman khennate a sem hi,” a ci hi. Dan thu genin, “Dan in Bashan panin a diangkhia humpinelkai no ahi hi,” a ci hi. Naftali thu genin, “O Naftali, maipha tawh nuam a sa, Topa ’ thupha tawh a kidim, bual tui leh leitaw lam a neipa,” a ci hi. Asher thu genin, “Asher in tapa dangte sangin thupha ngahzaw hen; a sanggamte’ pahtak hi hen la, a gam sungah oliv thau kidim ta hen. Na khuapite, sik leh sumngo tawh kidal ding a, na nuntak lai teng na thahatna tua bang hi ding hi, a ci hi. “Israel aw, nangmah huh dingin vantungah a tuang, a liatna tawh vanpi-ah a om, Pasian tawh a kibang kuamah dang om lo hi. Tawntung Pasian in nangma omna hi a, nangmah huh dingin tawntung baante a om hi. Amah in na mai-ah galte nawhkhia-in, Susia un, ci hi. Tua ahih ciangin lungmuanna sungah Israel bek teeng hi, Jakob’ suante bek, an leh leenggahzu gamah om hi; hi taktak hi, a vantungte in daitui hong khiatsuk hi. Israel aw, mi nuamsa na hi hi. Nang hong kihuhna lum, leh na gualzawhna namsau ahi Topa in nang banga, a hotkhiat mi kua om ahi hiam? Na galte in hong mai-etin na kiangah hong pai ding uh a, amau’ pumpi na tuancil ding hi,” a ci hi. Tua ciangin Moses zanglei panin Jerikho gal Nebo Mual, Pisgah dawnah Moses paito hi. Tua ciangin Topa in gam khempeuh, Gilead gam Dan ciang dong, Naftali gam khempeuh, Efraim leh Manasseh gam, Judah gam khempeuh Ni-tumna Tuipi dong, Negeb gam, leh Zanglei zong, tua pen nisuh kung khuapi Jerikho kuam ahi, Zoar ciang dong, amah lak hi. Tua ciangin Topa in ama kiangah, “Hih gam in, Abraham, Isaak, leh Jakob tungah kiciamin, ‘Na suan leh khakte uh tungah ka pia ding hi,’ ka cih leitang ahi hi. Na mit tawh nang kong musak khin a, ahih hangin tua lai-ah nang na pai kei ding hi,” a ci hi. Tua ahih ciangin Topa thugenna bangin Topa ’ nasem Moses pen Moab gamah si a, Bethpeor gal khat, Moab gam kuamah amah kiphum hi; ahih hangin tuhun dongin amah a kiphumna mun kuamah in thei lo hi. Moses a sih-in kum za leh kum sawmnih pha hi; a mit mang lo a, a tha ngeina zong kiam lo hi. Israel mite Moab zanglei-ah ni sawmthum sung Moses hangin kap uh hi; tua khit ciangin Moses hangin kahna leh thuumna veng hi. Tua ciangin Moses in, ama tungah a khut nga khin ahih manin Nun’ tapa Joshua in lungsim pilna tawh kidim hi; tua ahih ciangin Israel mite in ama thu mangin, Topa in Moses a thupiakna bangin gamta uh hi. Israel sungah Moses bangin Topa in maitang kimu-in a theih kamsang dang kuamah om lo hi. Izipt gam sungah Faro leh a nasemte leh a gam khempeuh ah a hih dingin Topa in ama tungah a piak limte leh na lamdangte khempeuh, leh Israelte khempeuh muhna ah Moses in a hih a lian vangliatna leh a lauhuai hihnate khempeuh a nei, amah tawh a kibang kuamah om lo hi. Topa ’ nasem Moses a sih khit ciangin Topa in Moses’ nasem ahi Nun’ tapa Joshua kiangah, “Ka nasempa Moses si ta hi; tua ahih ciangin tu-in ding in la, nang leh hih mite khempeuh, hih Jordan kantanin Israel mite tungah ka piak gam sungah pai un. Moses tungah ka ciam bangin na khe in a totna mun khempeuh nang tungah kong pia ding hi. Gamlak leh hih Lebanon panin gun lianpi ahi Eufrates gun dong, ni tumna lam-a Tuipi lian lam, Hit mite’ leitang khempeuh nangma gam hi ding hi. Na nuntak sung tawntung kuamah in na mai hong khak zo lo ding hi; Moses tawh ka om mah bangin nang tawh zong kong om ding hi; nang kong tamasak kei ding a, kong nusia kei ding hi. Thahat in la hang in; bang hang hiam cih leh amaute piak dingin a pate uh tungah ka ciam leitang hih mite na luahsak ding hi. Thahat-in hang in la, ka nasempa Moses in nang hong piak thukhamte khempeuh tawh kizui-in na gamtat ding lim takin ngaihsun in; na paina peuhah hoih takin na lamzan’ theihna dingin tak lamah ahi a, vei lamah ahi zongin pial kei in. Hih thukham laibu na mangngilh ngei kei ding hi. A sunga a kigelh thute khempeuh tawh kizui-in na gamtat theihna dingin sun leh zanin na lungngaingai ding hi; tua hi leh na lampi mavang ding a, na nasep tangtung ding hi. Thu hong pia khin hilo ka hi hiam? Thahat in la hang in; lau kei in la, lungkia kei in; bang hang hiam cih leh na paina peuhpeuhah Topa na Pasian nang tawh hong om hi,” a ci hi. Tua ciangin Joshua in mite’ uliante thu pia-in, “Giahphual-ah pai un la, mite thu pia-in, ‘Na lam-an ding uh kiging khol un; bang hang hiam cih leh Topa na Pasian un na neih dingun note hong piak leitangah pai-in a luah dingin ni thum sungin hih Jordan a galkah ding na hi uh hi,’ ci un,” a ci hi. Tua ciangin Joshua in Reuben mite, Gad mite, leh Manasseh minam a langte tungah, “ Topa ’ nasem Moses in note thu hong piakna kammal, ‘ Topa na Pasian un note tawlngakna mun hong pia-in, hih leitang note hong pia ding hi,’ a cihna thu phawk un. Moses in Jordan gal khata note hong piak leitangah na zite, na taneute, leh na ganhingte uh a na om ding uh hi; ahih hangin note lakah galhang mi khempeuh in hiam tawi-in Jordan kantanin na sanggamte uh mai-ah pai-in, note hong piak bangin Topa in na sanggamte uh tungah tawlngakna pia-in, Topa na Pasian un amaute a piak leitang amaute in zong a luah mateng na huh ding uh hi; tua ciangin note’ neih leitangah ciah kikin, Topa ’ nasem Moses in Jordan gal ni suahna lamah note hong piak leitang na luah ding uh hi,” a ci hi. Amaute in Joshua dawngin, “Kote nong thupiak khempeuh ka hih ding uh a, nong sawlna peuhpeuhah ka pai ding uh hi. Na khempeuhah Moses’ thu ka man’ uh mah bangin nangma thu zong kong mang ding uh hi. Moses a ompih mah bangin Topa na Pasian in nang hong ompih ta hen! Na thupiakna leh na thute, na thupiak peuhpeuh hong langpangin a mang lo mipa kithat ding hi. Thahat in la hang in,” a ci uh hi. Tua ciangin Nun tapa Joshua in Shittim panin thukanin mi nih sawl sim a, “Pai-in gam va en un la, a diakdiakin Jerikho khua hong en un,” a ci hi. Amaute pai uh a, Rahab min nei a paktat numei khat’ innah tungin giak uh hi. Jerikho kumpipa tungah, “En in, gamsung en dingin Israel mi pawlkhat tu nitakin hih lai-ah hong tung zo hi,” ci-in kigen hi. Tua ciangin Jerikho kumpipa in Rahab kiangah mi sawlin, “Na inn sunga hong tum, na kianga hong tung mite hong pai khiatpih in; bang hang hiam cih leh gam khempeuh a en dingin amaute hong pai uh hi,” a ci hi. Ahih hangin tua numei in mi nihte la-in na seel khin hi; tua ciangin amah in, “Hi mah hi, ka kiangah mi hong pai uh hi; ahih hangin amaute koi pan hong pai hiam cih ka thei kei hi; kulh kongpi a kikhak ding khuamial ciangin tua mite paikhia uh hi; tua mite koi-ah pai uh hiam ka thei kei hi; manlangin amaute delh un; na pha kha ding uh hi,” a ci hi. Ahih hangin amah in innkhum zangah tua mite paipih to-in innkhum zangah a koih ngei bangin a koihsa anthul kungte lakah amaute seel khin hi. Tua ahih ciangin mite in Jordan lamah ngahmun dong delh uh hi; a delhte a paikhiat phetin kulh kongpi kikhak hi. Amaute a lup ma-in innkhumzang amaute kiangah amah paito a, tua mite kiangah, “ Topa in note tungah hih leitang hong piak khitna ka thei a, note hong kikihtakna kote tungah hong tungin, hih gam sunga a teeng mi khempeuh note mai-ah lunggim uh hi. Bang hang hiam cih leh Izipt panin nong paikhiat lai-un Topa in note mai-ah San Tuipi tui a kan’sakna, leh Jordan gal khata om na suksiat mang uh Amor mite’ kumpi nihte ahi Sihon leh Og tungah na bawlna uh ka za khin uh hi. Tua thu ka zak phetun lungsim kitam zanin, ka lungsim uh bei a, note’ hangin mite’ lungsimah han’na bei hi; bang hang hiam cih leh Topa na Pasian un tunga om vantung leh nuai-a om leitungah Pasian ahi hi. Tua ahih ciangin tu-in note tungah kong dik gamtat bangin note in zong ko’ innkuan-ah nong dik gamtat nading uh Topa min tawh kei tungah hong kiciam un la, a man taktak lim khat kei hong pia-in, ka nu leh ka pa, ka sanggamnute, ka sanggampate, leh amaute tawh a kizomte khempeuh hong hon un la, sihna panin kote hong suakta sak un,” a ci hi. Mite in ama tungah, “Nang’ tangin kote ka si ngam uh hi. Hih ko thu na genkhiat kei nak leh Topa in kote tungah hih leitang hong piak ciangin nang tungah dikna leh thumanna tawh kong gamta ding uh hi,” a ci uh hi. Tua ciangin amah in kongvangneu panin khau khat tawh amaute khaisuk hi, bang hang hiam cih leh khuapi kulh sunglam pangah ama inn kilam a, khuapi kulh sungah amah teeng hi. Amah in amaute kiangah, “Mual tungah pai un, hong delhte tawh na kituak kha ding uh hi; hong delhte hong ciahkik mateng nithum sung tua lai-ah bu un; tua khit ciangin na pai nading uh ah na pai thei ding uh hi,” a ci hi. Mite in ama kiangah, “Kote nong kiciam sak thuciamna thu tawh kisai-in ka paubaang kei ding uh hi. En in, hih leitangah kong pai uh ciangin kote nong khai sukna hih kongvangneu-ah hih khauhual san na khih ding hi; na inn sungah na nu leh na pa, na sanggampate leh na pa innkuanpihte khempeuh na khawm ding hi. Mi khatpeuh na inn kong panin kongzing lampi-ah a paikhiat leh ama sihna in ama khialhna hang hi ding hi, kote ka siang ding uh hi; ahih hangin inn sungah nang tawh a om mi khatpeuh a kisukkhak leh, ama sihna in kote’ khialhna hi ding hi. Ahih hangin hih ko thute na gen khiat leh, kote nong kiciam sak thuciamna tawh kisai-in kote ka siang ding uh hi,” a ci uh hi. Tua ciangin amah in, “Na thugen bangun hi ta hen,” a ci hi. Tua ciangin amah in amaute sawl khia a, amaute paikhia uh hi; amah in a khauhual san a kongvangneu-ah khih hi. Amaute paikhia-in, mual tungah pai uh a, a delhte a ciahkik mateng nithum sung om uh hi; bang hang hiam cih leh a delhte in lam dung khempeuh zongin bangmah mu lo uh hi. Tua ciangin mualtung panin mi nihte paisuk kik uh a, galkahin Nun tapa Joshua kiangah tung uh hi; amau tunga thupiang khempeuh ama tungah gen uh hi. Amaute in Joshua kiangah, “ Topa in leitang khempeuh eite khut sungah hong pia taktak hi; tua tham loin tua gam-a teeng mite khempeuh eite hangin lungmang uh hi,” a ci uh hi. Zingsang tungin Joshua tho-in Israel mite khempeuh tawh Shittim panin ding khia uh hi; amaute Jordan gun tung uh a, a galkah ma-un tua munah giak uh hi. Nithum a cin’ni ciangin giahphualah uliante pai uh a, mite thu pia-in, “ Topa na Pasian uh thuciamna singkuang Levi mi siampite in a puak na muh uh ciangin na omna mun panun ding khia-in na zui ding uh hi, hih lamah pai ngei lo na hih manun na pai nading uh lampi tu-a bangin na thei ding uh hi. Ahi zongin note leh tua thuciamna singkuang kikalah mun awng, tong tulnih bang kihalna om ding hi; a gei-ah pai kei-un,” a ci uh hi. Tua ciangin Joshua in mite kiangah, “Nomau mah kisiangsak tawm un; bang hang hiam cih leh zing ciangin note lakah Topa in nalamdangte hong bawl ding hi,” a ci hi. Tua ciangin Joshua in siampite kiangah, “Thuciamna singkuang la un la, mite mai-ah paisuak un,” a ci hi. Amaute in thuciamna singkuang la uh a, mite mai-ah pai uh hi. Tua ciangin Topa in Joshua kiangah, “Moses tawh ka omkhawm bangin nang tawh kong omkhawm nading thu amaute in a theih nadingun Israel mite khempeuh muhna-ah tu ni-in nang liatsak ding ka kipan ding hi. Thuciamna singkuang a pua siampite thu na pia ding a, ‘Jordan tuite gei na tun’ uh ciangin Jordan sungah taang loin na ding ding uh hi,’ na ci ding hi,” a ci hi. Tua ciangin Joshua in Israel mite kiangah, “Hih lai-ah hong pai un la, Topa na Pasian uh thute za un,” a ci hi. Joshua in, “A nungta Pasian note lakah a omna hih thu tawh na thei ding uh hi, amah in pel loin note mai panin Kanaan mite, Hit mite, Hiv mite, Perez mite, Girgash mite, Amor mite, leh Jebus mite hawlkhia ding hi. En un, leitung buppi’ Topa ’ thuciamna singkuang note mai Jordan lamah pai ding hi. Tua ahih ciangin tu-in Israel minamte sung panin nam khat pan mi khat, mi sawm-le-nih la un. Leitung buppi’ Topa ahi Topa ’ thuciamna singkuang a pua siampite’ khete in Jordan tui a siik ciangin Jordan tuite luang nawn lo ding a, a tung lam panin hong luangsuk tuite lom khatin khawl ding hi,” a ci hi. Tua ahih ciangin mite mai-ah thuciamna singkuang a pua siampite tawh Jordah galkah dingin a puanbuk uh panin mite ding khia-in, thuciamna singkuang a puate Jordan tung a, thuciamna singkuang a pua siampite’ khe tui-ah a kidiah ciangin (anlak hun sung khempeuh Jordan a piau khempeuh ah let hi), a sak lam panin hong luangsuk tuite khawlin khangto a, a gamlapi, Zerethan gei-a khuapi Adam-ah a lomin kikhol a, Ci Tuipi a kici Arabah tuipi-ah a luang sukte kikhen tat siang hi; tua ciangin Jerikho galah mite galkah uh hi. Israelte khempeuh leikeu tungah a galkah sung, minam bup in Jordan a khen’ khit mateng, Topa thuciamna singkuang a pua siampite Jordan gun laizang leikeu tungah ding uh hi. Minam khempeuh Jordan a galkah khit uh ciangin Topa in Joshua kiangah, “Nam khat pan mi khat, mite lak panin mi sawm-le-nih la in la, amaute thu pia-in, ‘Siampite’ khe a din’na mun mahmah, Jordan gun laizang panin suangtum sawm-le-nih la un la, a galah pua-in tu nitak-a na giahna uh munah koih un,’ ci in,” a ci hi. Tua ciangin Joshua in nam khat panin mi khat, ama sehsa mi sawm-le-nihte Israel mite lak panin sam hi; Joshua in amaute kiangah, “ Topa na Pasian uh thuciamna singkuang mai-ah Jordan laizangah pai un la, note in Israel minam pha zah tawh kizui-in suangtum khat ciat la-in na liangko tung uh ah pua un; hong tung ding hunah na tate un, ‘Hih suangtumte bang a cih nopna ahi hiam?’ ci-in hong dot ciangin note lakah lim khat hi ding hi. Tua ciangin amaute kiangah Topa thuciamna singkuang mai-ah Jordan tuite kikhentan hi; Jordan a galkah ciangin Jordan tuite kikhentan hi, na ci ding uh hi. Tua ahih ciangin hih suangtumte in Israel mite tungah a tawntunga phawkna hi ding hi,” a ci hi. Joshua’ thupiak bangin Israel mite gamta uh a, Topa in Joshua a thupiak bangin Israel minam a phazah tawh kizui-in Jordan laizang panin suangtum sawm-le-nih la uh hi; amaute in a giahna uh munah tuate pua uh a, tua lai munah koih uh hi. Tua ciangin Joshua in thuciamna singkuang a pua siampite’ khe a din’nasa mun, Jordan laizangah tua suang sawm-le-nihte phut hi; tu ni dongin tuate tua mun mahah om lai hi. Bang hang hiam cih leh Moses in Joshua a thupiak bangin mite tungah a gen dingin Topa in Joshua a thupiakte khempeuh a vekpi-in a kiman’ khit matengin Jordan laizangah thuciamna singkuang a pua siampite ding uh hi. Mite nawhsa-in galkah uh hi; mite khempeuh a galkah khit uh ciangin Topa thuciamna singkuang leh siampite, mite mai-ah na ma pai uh hi. Moses in amaute a sawlsa bangin Israel mite mai-ah hiam tawi-in Reuben minamte leh Gad minamte leh Manasseh minam a langte na ma pai uh hi; mi tul sawmli bang gal do dingin hiam tawi-in a baihsa-in Jerikho zanglei lamah Topa mai-ah pai uh hi. Tua ni-in Israelte khempeuh muhna-ah Topa in Joshua liansak hi; amaute in Moses lamdang sa-in a om uh mah bangin, a nuntak sung tawntung amah lamdang sa-in om uh hi. Tua ciangin Topa in Joshua kiangah, “Teci pan’na singkuang a pua siampite Jordan panin hong paikhiat nading thu pia in,” a ci hi. Tua ahih ciangin Joshua in siampite thu pia a, “Jordan panin hong paikhia un,” a ci hi. Topa thuciamna singkuang a pua siampite Jordan laizang panin hong paikhia-in, siampite khe leikeu tungah hong om toh ciangin, a ngeina bangin amau mun-ah Jordan tuite hong luang kikin a piau khempeuh tuum hi. Kha masa a nisawm ni-in Jordan panin mite paikhia uh a, Jerikho nisuahna lam gamgi Gilgal-ah giahphual sat uh hi. Jordan panin a lak khiat uh tua suangtum sawm-le-nihte Joshua in Gilgal-ah phut hi. Tua ciangin amah in Israel mite kiangah, “Hong tung ding hunah na tate un a pate uh kiangah, ‘Hih suangte bang a cih nopna ahi hiam?’ ci-in a dot ciangin, “Israelte in leikeu tung tawnin hih Jordan kantan hi,’ ci-in na tate uh na theisak ding uh hi. Bang hang hiam cih leh eite in i kantan khit matengin Topa na Pasian un a keusak San Tuipi tungah a bawl bangin, note in na kantan khit matengun Topa na Pasian un Jordan tuite note adingin keusak hi; Topa ’ khut vanglian hi, ci-in leitung mi khempeuh in a theih nading ahi hi; Topa na Pasian uh na zahtak tawntung theih nading uh ahi hi,” a ci hi. Nitumna lam Jordan gal khat-a om Amor mite’ kumpite khempeuh leh tuipi gei-a om Kanaan mite’ kumpite khempeuh in, Israel mite in a kantan khit mateng amaute adingin Jordan tuite Topa in a kan’sakna thu a zak uh ciangin lungmang uh a, Israel mite hangin a lungsim uh a bei hi. Tua hun lai takin Topa in Joshua kiangah, “Meisuang tem bawl in la Israel mite a nihveina vun at kik in,” a ci hi. Tua ahih ciangin Joshua in meisuang tem bawl a, Gibeath-ha-araloth mun-ah Israel mite a vun a at hi. Joshua in amaute vun a atna a thu in: Izipt panin hong paikhia pasal galhang mite khempeuh, Izipt panin hong paikhiat khit uh ciangin lamkal gamlakah si khin uh hi. Hong paikhia mite khempeuh vun a ki-at khit hangin Izipt panin hong paikhiat khit uh gamlak lamkal-a suak mite khempeuh a vun uh ki-at nai lo hi. Bang hang hiam cih leh amaute in Topa thu a ngaih lohna hangin Izipt panin a hong paikhia minam bup, galhang mite a sih khit dong kum sawmli sung gamlakah Israel mite lam pai uh hi; Topa in eite tungah hong piak dingin i pu i pate tungah a ciamsa bawngnawi leh khuaizu a luan’na leitang amaute a muhsak loh nading thu amaute tungah Topa kiciam hi. Tua ahih ciangin Joshua in vun a at mite pen, amaute tangin amah in a pian’sak amau tate ahi hi; bang hang hiam cih leh lampi-ah amaute a vun ki-at nai lo ahih manin vun at nai loh ahi uh hi. Minam bup vun ki-atna a man khit ciangin giahphual amau mun ciat ah a dam mateng om uh hi. Tua ciangin Topa in Joshua kiangah, “Tu ni-in note tung panin Izipt gamah sal suakin na minsiatna uh ka zial khia hi,” a ci hi. Tua ahih ciangin tua mun pen tu ni dongin Gilgal kici hi. Israel mite Gilgal-a giahphual ah a om sungun tua kha a ni sawm-le-li ni nitakin Jerikho zanglei ah Paisan pawi bawl uh hi. Paisan pawi khit a zingciang ni teekteekin amaute in tua gam-a piang silngo sawhloh moh leh ankan ne uh hi. Tua gam-a piang a nek ni uh a zing ciangin manna bei ta hi; Israel mite in manna nei nawn lo uh a, ahih hangin tua kumin Kanaan leitang-a piangte a ne uh hi. Jerikho khua kiangah Joshua a tun’ ciangin a mitte sangsak in khuadak a, en in, a khut sungah namsau dawhsa tawh mi khat a mai-ah na ding hi; ama kiangah Joshua pai-in, “Ko pawl na hi hiam, ahih kei leh ka langte pawl na hi hiam?” a ci hi. Amah in, “Hi lo hi; Topa ’ galkapte a ukpa-in tu-in kong pai hi,” a ci hi. Joshua lei-ah bok sukin bia a, ama kiangah, “Ka Topa in a nasempa bang hong sawl nuam ahi hiam?” a ci hi. Tua ciangin Topa ’ galkapte a ukpa in Joshua kiangah, “Na khe panin na khedapte suah in; bang hang hiam cih leh na din’na mun in a siangtho leitang ahi hi,” a ci hi. Tua mah bangin Joshua gamta hi. Tu-in Israel mite hangin a sunglam leh a pualam panin Jerikho kikhak cip hi; kuamah pusuak lo hi, kuamah sungtum lo hi. Tua ciangin Topa in Joshua kiangah, “Thei in, na khut sungah a kumpipa leh a mi thahatte tawh Jerikho kong pia khin hi. Khuapi kimkotah galkap mi khempeuh khatvei na pai ding uh hi. Tua bangin niguk sung na pai ding uh hi. Siampi sagih in thuciamna singkuang mai-ah tuutal ki peengkul sagih tawi ding uh hi; a ni sagih ni-in khuapi kimkotah sagihvei na pai ding uh a, siampite in peengkul tum ding uh hi. Amaute in tuutal ki sauveipi a gin’sak uh ciangin, peengkul aw na zak phetun nakpi takin mi khempeuh awng ding uh hi; khuapi kulh cim mai ding a, mi khempeuh amau mai ciatah tang takin paisuak ding uh hi,” a ci hi. Tua ahih ciangin Nun tapa Joshua in siampite samin amaute kiangah, “Thuciamna singkuang la un la, tua Topa thuciamna singkuang mai-ah siampi sagihte tuutal ki peengkul sagih tawisak un,” a ci hi. Tua ciangin amah in mite kiangah, “Mai nawtin pai un; khuapi kimkotah pai un la, Topa thuciamna singkuang mai-ah hiamtawi mite paisak un,” a ci hi. Joshua in mite a thupiak bangin Topa mai-ah a pai tuutal ki peengkul a tawi siampi sagihte mai nawtin pai-in peengkul tum uh a, Topa thuciamna singkuang in amaute zui hi. Tua ciangin peengkul a tum siampite mai-ah hiamtawi mite pai uh a, peengkulte a kitum suak hun lai takin thuciamna singkuang nungah a nungdalte pai uh hi. Ahih hangin Joshua in mite thu pia-in, “Awng un, ci-a kong sawl hun matengin note awng loin, na aw uh zong na kizasak kei ding uh a, na kam panun aw khatbeek ging khia lo ding hi; awng un, kong cih ciangin na awng bek ding uh hi,” a ci hi. Tua ahih ciangin amah in Topa thuciamna singkuang khuapi kimkotah khatvei paisak hi; amaute giahphual-ah hong ciahin giahphualah a zan giak uh hi. Tua ciangin zingsangin Joshua thobaih a, siampite in Topa thuciamna singkuang la uh hi. Topa thuciamna singkuang mai-ah a pai tuutal ki peengkul sagih a tawi siampi sagihte paisuakin peengkulte tum suak uh hi; amaute mai-ah hiamtawite pai-in, peengkulte a kitum suak hun lai takin Topa thuciamna singkuang nungah a nungdalte pai uh hi. A ninih ni-in khuapi kimkotah khatvei pai uh a, giahphualah ciahkik uh hi. Tua bangin niguk sung hih uh hi. A ni sagih ni-in khuavak tungin tho baih uh a, tua mah bangin khuapi kimkotah sagihvei pai uh hi; tua ni bekin khuapi kimkotah amaute sagihvei pai uh hi. A sagihveina-ah, siampite in peengkul a tum ciangin Joshua in mite kiangah, “Awng un; bang hang hiam cih leh Topa in khuapi note hong pia zo hi. Khuapi leh a sunga omte khempeuh suksiat dingin Topa tungah kipia ding hi; amah in i sawl kamtaite na seel ahih manin numei paktat Rahab leh ama inn sungah amah tawh a om khawmte khempeuh bek hing ding hi. Ahih hangin suksiat dingin a kiseh nate panin nomau mah na kikem ding uh hi, tua hi kei leh tuate na suksiat ding uh ciangin a kisusia ding nate khat peuhpeuh iplahin la kha-in Israelte’ giahphual siat nading na khat suaksakin haksatna na tun’ kha ding uh hi. Ahih hangin ngun leh kham, sumngo leh sik tawh kibawl nazatte Topa adingin siangtho hi; Topa ’ sumkoihna-ah tuate tung ding hi,” a ci hi. Tua ahih ciangin mite awng a, peengkulte kitum hi. Mite in peengkul aw a zak phetun nakpi takin awng uh a, kulhpi cim mai-in, mi khempeuh amau mai ciatah tang takin khuapi sungah pai uh a, khuapi la uh hi. Tua ciangin amaute in khuapi sunga om khempeuh numei leh pasal, a moi a ham, bawngtalte, tuute, leh late khempeuh namsau tawh that mang khin uh a, khuapi Topa tungah ap uh hi. Tua ciangin Joshua in tua gam thu a va kansim mi nihte kiangah, “Numei paktat nu’ inn-ah va pai un la, tua lai panin a numei leh amah tawh a kizom khempeuh ama tungah na ciamsa bangun hong pai khiatpih un,” a ci hi. Tua ahih ciangin thu kansim tangvalte va tum uh a, Rahab, leh a nu leh a pa leh a sanggamte leh amah tawh a kizom khempeuh pai khiatpih uh hi; amaute in tua nu’ tanau teng khempeuh paipih uh a, Israelte’ giahphual pua lamah koih uh hi. Amaute in khuapi leh a sunga om khempeuh mei tawh hal uh hi; ngun leh kham, leh sumngo leh sik tawh a kibawl nazatte bek Topa ’ inn-a sumkoihna-ah koih uh hi. Ahih hangin numei paktat Rahab, leh a pa innkuanpite, leh tua nu tawh a kizomte khempeuh Joshua in hingkhawi hi; Jerikho thu kansim dingin Joshua in a sawl kamtaite tua nu in na seel ahih manin tu ni dongin Israel mite lakah a suan-le-khakte teeng uh hi. Tua hun lai takin Joshua in amaute tungah thuciamna khat koih a, “Mi khat kipanin hih Jerikho khuapi a lamkikpa in Topa mai-ah samsiatna thuak ta hen. A tacil luang khaamin tua khuapi bulpi phut ding a, A tapa neu pen luang khaamin a kulh kongpite phut ding hi,” a ci hi. Tua ahih ciangin Joshua tawh Topa om hi; gam khempeuhah ama min a thang hi. Ahih hangin Israel mite in a ki-ap nate tawh kisai-in zuautat uh hi; bang hang hiam cih leh Judah minam Zerah tapa Zabdi, a tapa Karmi, a tapa Akhan in a ki-ap nate pawlkhat la hi; tua ciangin Israel mite tungah Topa heh mahmah hi. Joshua in Jerikho panin Beth-el nisuahna lam, Beth-aven gei-a om Ai khua-ah mi sawl a, amaute kiangah, “Paito un la a gam va ensim un,” a ci hi. Tua mite paito-in Ai khua va ensim uh hi. Amaute Joshua kiangah hong ciah kikin ama kiangah, “Mi khempeuh kuanto sak kei in la mi tulnih ahi a, tulthum ahi zongin kuanto sak in Ai simsak in; amaute mi tawmno khat ahih manin tua lai-ah mi khempeuh gimto sak kei in,” a ci uh hi. Tua ahih ciangin mite lak panin tulthum bang tua lai-ah kuanto uh hi. Ai mite mai-ah amaute tai uh a, Ai mite in amaute mi sawmthum-le-guk khawng thatin, a kulh kongpi mai Shebarim ciang dong delh uh a, tuahsukna mun-ah amaute that uh hi. Hih thu hangin Israel mite’ han’na bei-in, lau mahmah uh hi. Tua ciangin Joshua in dahna lim-in ama puante balkeekin nitak mateng Topa thuciamna singkuang mai-ah, amah leh Israel upate boksuk uh hi; amaute in a lu tung uh ah leivui koih uh hi. Tua ciangin Joshua in, “Ala, Topa Pasian, kote hong susia ding Amor mite khut sungah hong pia dingin bang hangin hih mite Jordan gal khatah hong paipih peuhmah na hi hiam? Jordan gal khatah teen’ ding a lungkim hi hoh ta le ung! Topa aw, Israelte in a galte uh mai-ah a nungkik uh ciangin bang gen thei ding ka hi hiam! Bang hang hiam cih leh Kanaan mite leh hih gam-a teeng mi khempeuh in hih thu za ding uh a, kote hong umcihin leitung panin kote hong phiatkhia mang ding uh hi; tua ciangin a lian nangma min bang cih ding na hi hiam?” a ci hi. Topa in Joshua kiangah, “Tho in, bang hangin tua bangin lei-ah bok na hi hiam? Israel khial khin hi; amaute in ka thupiak thuciamna palsat khin uh hi; amaute in a ki-ap nate pawlkhat la uh hi; amaute in gu-in zuauthu gen uh a, amau van lakah tua nate koih uh hi. Tua thu hangin Israel mite in a galte uh nang zo lo uh hi; amaute suksiat ding mi, na suak khin uh ahih manin a galte uh mai-ah nungkikin, tai uh hi. Note lak panin a ki-ap nate na suksiat kei uh leh nang tawh kong omkhawm nawn kei ding hi. Tho in, mite sian’suah in la, ‘Zing cianga dingin note’ kisian’ suah tawm un; bang hang hiam cih leh Israel Pasian Topa in, “Israel aw, note lakah a ki-ap nate om hi; note lak panin a ki-ap nate na lak khiat matengun na galte uh na nang zo kei ding uh hi,” a ci hi. Tua ahih ciangin zingsangin na minam nam-un note hong kipaipih ding hi; Topa in a lak minam a beh behin hong pai ding hi; Topa in a lak a beh a innkuan innkuanin hong pai ding hi; Topa in a lak innkuan a mi mi-in hong pai ding hi. Tua ciangin a ki-ap nate tawh a kila khawm mipa leh a neih khempeuh, mei-in kihal ding hi; bang hang hiam cih leh amah in Topa ’ thuciamna palsat hi, Israel sungah a zumhuai na a sem ahi hi,’ ci in,” a ci hi. Tua ahih ciangin zingsangin Joshua tho baihin, a nam namin Israelte hong paipih a, Judah minam kila hi; tua ciangin amah in Judah behte hong paipih a, Zerahte beh kila hi; amah in Zerahte bek a mi mi-in hong paipih a, Zabdi kila hi; tua ciangin amah in ama innkuanpihte a mi mi-in hong paipih a, Judah minam Zerah tapa Zabdi, a tapa Karmi, a tapa Akhan kila hi. Tua ciangin Joshua in Akhan kiangah, “Ka tapa aw, Israel Topa Pasian min thangsak in la, amah phat in; tu-in na gamtatnasa kei tungah hong gen in; kei tungah hong iim kei in,” a ci hi. Tua ciangin Akhan in Joshua dawngin, “A tak takin, Israel Topa Pasian tungah ka khial khin a, hih in keima gamtatna ahi hi; Shinar panin vankila lakah puan hoih khat, leh ngun shekel zanih a gik, leh shekel sawmnga a gik kham tawn khat ka muh ciangin, tuate ka iplah a, ka la hi; en in, tuate ka puanbuk sung lei lakah a ngunte a nuai-ah omin kiseel hi,” a ci hi. Tua ahih ciangin Joshua in kamtaite sawl a, amaute a puanbuk-ah va tai uh hi; en in, a puanbuk sungah a ngun nuainung-in a na kiseel hi. Amaute in puanbuk panin tuate lakhia-in Joshua leh Israel mite khempeuh kiangah paipih uh hi; tua ciangin amaute in Topa mai-ah koih uh hi. Tua ciangin Joshua leh amah tawh a om Israelte khempeuh in Zerah tapa Akhan, leh a ngun leh a puan leh a kham tawn, leh a tanute leh a tapate, leh a bawngtalte leh a late leh a tuute, leh a puanbuk, leh a neih khempeuh la uh hi; amaute in Akhor Kuam ciangah tuate paipih uh hi. Tua ciangin Joshua in, “Bang hangin ko tungah gimna hong tun’na hi hiam? Tu ni-in Topa in nang tungah gimna hong tun’ hi,” a ci hi. Tua ciangin Israelte khempeuh in suang tawh amah deng uh hi; amaute in mei tawh amaute hal uh a, suang tawh amaute deng lum uh hi. Tua ciangin amaute in tu ni donga a om suang honpi Akhan tungah ciang uh hi; tua ciangin Topa ’ heh luatna dai hi. Tua ahih ciangin tu dongin tua mun in Akhor Kuam, kici hi. Tua ciangin Topa in Joshua kiangah, ‘Lau kei in la lungkia kei in; galkap khempeuh nang kiangah la in la, tho-in Ai-ah paito un; thei in, nangma khut sungah Ai kumpipa leh a mite, a khuapi, leh a leitang kong pia khin zo hi; Jerikho leh a kumpipa tungah na bawl bangin Ai leh a kumpipa tungah na bawl ding hi; a van kinusiate leh a ganhingte bek note adingin na la ding uh hi; a khuapi nungah a khuapi sim dingin na buksim ding uh hi,” a ci hi. Tua ahih ciangin Joshua leh galkap khempeuh Ai-ah paito dingin kipan uh hi; Joshua in a tha kicing mi thahat tul sawmthum teel a, zan-in tua mite sawlkhia hi. Amah in amaute thu pia a, “En un, tua khuapi sim dingin a nungah na buksim ding uh hi; khuapi panin gamlapi-ah na pai kei ding uh hi; ahih hangin a kigingsa-in na om ding uh hi; tua ciangin keimah leh kei tawh a om mite khempeuh in khuapi kong naih ding uh hi. A masa-a bangin kote do dingin hong kuankhiat uh ciangin amaute mai-ah kote ka na tai ding uh hi; khuapi panin amaute ka kaih khiat khit uh matengin kote nungah amaute hong pai ding uh hi; bang hang hiam cih leh amaute in, ‘A masa-a bangin eite mai-ah amaute tai uh hi,’ ci ding uh hi. Tua ahih ciangin amaute kiang panin ko ka tai ding uh hi; tua ciangin na buk simna panun note na kipan ding uh a, khuapi na la ding uh hi; bang hang hiam cih leh Topa na Pasian un note khut sungah hong pia ding hi. Khuapi na lak khit uh ciangin Topa ’ hong sawlsa bangin hihin mei tawh khuapi na hal ding uh hi; thei un, note thu kong pia khin hi,” a ci hi. Tua ahih ciangin Joshua in amaute sawlkhia hi; a buksim nading uh munah amaute pai-in, Ai nitumna lam, Beth-el leh Ai kikalah pang uh hi; ahih hangin tua zan-in mite lakah Joshua om hi. Zingsangin Joshua tho baihin mite sam a, mite mai-ah Israel upate tawh Ai-ah paito uh hi. Amah tawh a om galkap khempeuh paito uh a, khuapi mai naihin Ai leilu lam pangah phualsat uh a, Ai leh amaute kikalah luihawm khat om hi. Tua ciangin amah in mi tulnga bang paipihin, khuapi nitumna lam Beth-el leh Ai kikalah a buksim dingin koih hi. Tua ahih ciangin galkapte, khuapi leilu lamah a phualpi leh khuapi nitumna lamah a nungdalte, koih uh hi. Ahih hangin tua zanin Joshua kuam sungah om hi. Ai kumpipa in hih a muh ciangin amah leh tua khuapi mi ahi a mite khempeuh, Israelte a do dingin manlangin kithawi-in Arabah lam paisukna-ah zing tungin paikhia uh hi; ahih hangin khuapi nungah amah a buksim a om lam thei lo hi. Tua ciangin Joshua leh Israelte khempeuh in amau mai-ah kilelsak khem uh a, gamlak lamah tai uh hi. Tua ahih ciangin khuapi sunga om mi khempeuhte amau delh dingin kikaikhawm uh a, Joshua a delh uh ciangin khuapi panin amaute a kihem khia ahi hi. Ai leh Beth-el khua sungah Israelte a delh lo pasal khat beek om lo in; khuapi kong hon’sa-in nusia-in Israelte delh uh hi. Tua ciangin Topa in Joshua kiangah, “Na khut sunga om teipi Ai lamah zan in; bang hang hiam cih leh na khut sungah tua khua kong pia ding hi,” a ci hi. Tua ciangin Joshua in a khut sunga om teipi khuapi lamah zan hi. Tua ciangin a omna panun a bukte ding khia pah uh a, amah in a khut zan khit phetin amaute tai-in khuapi sungah lut uh a, a khuapi la uh hi; amaute manlangin a khuapi hal uh hi. Ai mite in a nung et kik uh ciangin, en in, khuapi meikhu van-ah a kahto hi; hih lam hita leh hua lam hita leh-ah tai thei lo uh hi, bang hang hiam cih leh gamlak lamah tai-in a kilelsak khemte in amau a delhte lamah hong kihei-in leh delh kik uh hi. A buksimte in khuapi a lak khitna leh khuapi meikhu a kah tohna Joshua leh Israelte khempeuh in a muh uh ciangin, amaute kihei kikin Ai khua mite vat gawp uh hi. Tua ciangin Ai khua mite a do dingin khuapi panin Israel dangte hong kuankhia uh hi; tua ahih ciangin Israelte kikalah amaute om uh a, pawlkhat hih lamah pawlkhat hua lamah om hi; a nungta a suakta khat zong a om lo dongin Israelte in amaute vatmai uh hi. Ahih hangin amaute in Ai kumpipa hing mat uh a, Joshua kiangah paipih uh hi. Amaute in a delhna gamlakah Ai khua mi khempeuh Israelte in thatin, amaute khempeuh namsau tawh a bei dongin a thah uh a man khit uh ciangin, Israelte khempeuh Ai-ah paikik uh a, namsau tawh vatgawp uh hi. Tua ni-in a si, Ai mi khempeuh numei leh pasal a vekpi-in tulsawm leh tulnih ahi hi. Bang hang hiam cih leh Ai khua mi khempeuh a suksiat mang khit matengin amah in teipi a zanna a khut dokkik lo hi. Amah in Joshua a thupiak, Topa ’ thugenna bangin Israelte in ganhing leh khuapi sunga van kinusiate bek la uh hi. Tua ahih ciangin Joshua in Ai hal a, tu ni donga a om mah bangin nin kholnapi khatin piangsak den hi. Tua ciangin amah in nitak mateng sing khat tungah Ai kumpipa khai hi; ni a tum ciangin Joshua in thu pia a, amaute in sing tung panin a luang la sukin, khuapi kulh kongpi lutna-ah paai uh a, a tungah suangtum lompi ciang uh a, tu ni dongin tua suangcian om lai hi. Tua lai mun, Israel mite omna-ah, Moses in a gelhsa a thukhamte tua suangte tungah amah in gelh hi. Tua ciangin amaute in Israel mite thupha a piak masak theih nadingun Topa nasem Moses in a thupiaksa bangin Israel mite khempeuh peemta hita leh tualsuak hita leh, a upate leh a uliante leh a thukhente uh tawh, Topa thuciamna singkuang a pua Levi siampite mai, thuciamna singkuang langkhat, Gerizim Mual mai lamah mi a lang, Ebal Mual mai lamah mi a lang ding uh hi. Tua khit ciangin amah in thukham laibu sunga a kigelh bang bangin thukham kammal khempeuh, thupha leh samsiatnate a sim hi. Moses in a thupiak kammalte khempeuh Israel mi honpite, leh numeite, leh naupangte, leh amau lakah a teeng peemtate mai-ah Joshua in a sim loh khat zong om lo hi. Jordan gal khat-a om mualtung gam leh lei niamna gam Lebanon lam Tuipi Lian dung khempeuhah a om kumpite, Hit mite, Amor mite, Kanaan mite, Perez mite, Hiv mite, leh Jebus mite in hih thu a zak uh ciangin, Joshua leh Israel a do dingin lungsim kikhatin kikhawm uh hi. Ahih hangin Gibeon khua-a teeng mite in Jerikho leh Ai tungah Joshua hihnasa thu a zak uh ciangin, amaute zuauthu tawh gamta uh a, lam-an bawlin, a late uh tungah a paatsa ip leh a paatsa leenggahzu um leh a kikeek leh a kiphopte guangin, a khe uh ah a paatsa, a kiphop khedapte bulhin, a paatsa puante tawh pai uh hi; a ante khempeuh uh keu-in ap hi. Amaute Gilgal-a giahphual-a Joshua kiangah pai uh a, amah leh Israel mite tungah, “A gamlapi gam panin kong pai uh hi; tua ahih ciangin kote tawh thuciamna khat hong bawl un,” a ci uh hi. Ahih hangin Israel mite in tua Hiv mite kiangah, “Kote nai-ah a teeng mite na hi kha thei ding uh hi; tua hi leh note tawh thuciamna hong bangci bawl theih ding ka hi uh hiam?’ a ci uh hi. Amaute in Joshua kiangah, “Kote in nangma nasemte ka hi uh hi,” a ci uh hi. Tua ciangin Joshua in amaute kiangah, “Kuate na hi uh hiam? Koi lai panin hong pai na hi uh hiam?”a ci hi. Amaute in ama kiangah, “ Topa na Pasian uh min hangin a gamla mahmah gam panin na nasemte kong pai uh hi; bang hang hiam cih leh ama thu, leh Izipt gam sungah a hihte khempeuh, leh Jordan gal khatah a om Amor kumpi nihte ahi, Ashtarothah a teeng Heshbon kumpi Sihon leh Bashan kumpi Og tungah a hihte khempeuh a kigenna ka za khin uh hi. Ka upate uh leh ka gamsung uh a, teeng mite khempeuh in kote kiangah, ‘Na khualzin nadingun lam-an bawl un la, amaute dawntuah dingin pai-in amaute kiangah, “Kote in na nasemte ka hi uh hi; tu-in hong pai un la, kote tawh thuciamna hong bawl un,” va ci un,’ hong ci uh hi. Hih lai-ah ka anlum uh om hi; no kiangah pai dingin kong din’ khiat ni uh’ khualzin lam-an dingin ka inn panun ka guan lai takun lum lai hi, ahih hangin tu-in, en un, keu-in ap hi; hih leenggahzu umte ka thun lai takun a thak ahi hi, tu-in en un, puak gawp hi; hih ka puante uh leh ka khedapte uh khual gamlapi zinna-in paat gawp hi,” a ci uh hi. Tua ahih ciangin Israel mite in amau’ an ciam kha uh a, Topa tung panin lamlahna dong lo uh hi. Tua ciangin Joshua in amaute tawh kilemna bawlin, amaute a hin’sak nading thuciamna bawl uh hi; tua ciangin mi honte’ makaite amau’ tungah kiciam uh hi. Amaute tawh thuciamna a bawl khit uh ni thum a cin’ ciangin, amaute a vengte ahihna leh amaute nai-ah a teengte ahihna thu za uh hi. Israel mite ding khia uh a, a ni thum ni-in amau khuapite ban uh hi. Tu-in amau’ khuapite in Gibeon, Khefirah, Be-eroth, leh Kiriath-jearim ahi hi. Ahih hangin Topa, Israelte Pasian min tawh mihonte’ makaite kiciam zo ahih manin Israel mite in amaute that lo uh hi. Tua ciangin makaite tungah mihon khempeuh phun uh hi. Ahih hangin makaite khempeuh in mihon khempeuh tungah, “ Topa, Israel Pasian min tawh amaute tungah i kiciam zo a, tu-in amaute i su thei kei ding hi. Amaute tungah i kiciam thuciamna hangin eite tungah hehna hong tung kha ding ahih manin hih bangin gamta-in amaute i hing sak ding hi,” a ci uh hi. Tua ciangin makaite in amaute kiangah, “Amaute hing sak un,” a ci uh hi. Tua ahih ciangin makaite gen mah bangin mihon khempeuh adingin amaute in singsuite leh tuitawite a suak uh hi. Joshua in amaute samin amaute kiangah, “Bang hangin kote nai hih lai-ah a teeng hi napi-in, ‘Note kiang panin gamla mahmah ung,’ cihna tawh kote hong khem na hi uh hiam? Tu-in note hong kisamsia a, note pawlkhat a tawntungin sila, ka Pasian inn adingin singsuite leh tuitawite na hi ding uh hi,” a ci hi. Amaute in Joshua dawngin, “Bang hang hiam cih leh gam khempeuh nang tungah a hong piak nading Topa na Pasian in a nasempa Moses a thupiakna leh na mai panin gam sunga teeng mi khempeuh suksiat taktak nading thu na nasemte kiangah hong kigen hi; tua ahih ciangin note hangin ka nuntakna uh nakpi takin ka lung himawh uh a, hih bangin ka gamta uh hi. Tu-in, en in, kote in nangma khut sungah ka om uh hi; hoih na sak bang leh kote tungah bawl dingin nangma muhna-ah man na sak bangin hong bawl in,” a ci uh hi. Tua ahih ciangin amah in amaute tungah tua bangin bawl a, Israel mite khut sung panin amaute honkhia hi; amaute in that lo uh hi. Ahih hangin Joshua in mihonte leh Topa biakna tau adingin ama deihna mun ahi, tu ni donga a sep dingun tua ni-in singsuite leh tuitawite a suaksak hi. Joshua in Ai a lakna zia, leh Jerikho leh a kumpipa tungah a bawl bangin Ai leh a kumpipa tungah a bawlna, leh Gibeon khua sunga teeng mite in Israel tawh kilemna a bawlna leh amaute lakah a omna thu Jerusalem kumpipa Adonizedek in a zak ciangin, nakpi takin a lau hi; bang hang hiam cih leh Gibeon in kumpi khuate khat mah bangin khua lian khat hi a, Ai khua sangin zong lian zaw-in a mite khempeuh zong mi thahat ahi hi. Tua ahih ciangin Jerusalem kumpipa Adonizedek in Hebron kumpipa Hoham kiang, Jarmuth kumpipa Piram kiang, Lakhish kumpipa Jafia kiang, leh Eglon kumpipa Debir kiangah kamtai sawlin, “Kei kiangah hong pai un, hong huh un la, Gibeon vat gawp ni; bang hang hiam cih leh Joshua leh Israel mite tawh kilemna bawl khin uh hi,” a ci hi. Tua ciangin Amor kumpi ngate, Jerusalem kumpi, Hebron kumpi, Jarmuth kumpi, Lakhish kumpi, leh Eglon kumpite in a galkapte khempeuh uh gawmin a galkapte khempeuh uh tawh paito-in Gibeon lang khatah phual satin do uh hi. Tua ciangin Gibeon mite Gilgal-a giahphual-a Joshua kiangah kamtai sawl-in, “Na nasemte hong nusia kei in; manlang takin ko kiangah hong paito-in, kote hong hon in la, hong huh in; bang hang hiam cih leh mualtung gam-a teeng Amor kumpite khempeuh kote lang pangin kikhawm uh hi,” a ci uh hi. Tua ahih ciangin Gilgal panin amah leh galhang mite khempeuh leh a thahat mi khempeuh tawh Joshua paito hi. Tua ciangin Topa in Joshua kiangah, “Amaute na khut sungah hong pia khin ka hih manin amaute kihta kei in; amaute khat beek in nang hong nang zo lo ding uh hi,” a ci hi. Tua ahih ciangin Gilgal panin zan tawntungin paito-in Joshua in thakhat thu-in amaute sim gawp hi. Topa in Israelte mai-ah amaute am gawp sakin, amaute in Gibeon-ah amaute tampi tak that uh a, Bethhoron paitohna lampi-ah amaute delhin, Azekah leh Makkedah ciang dong amaute vatgawp uh hi. Israelte mai-ah amaute a tai laitak, Bethhoron paitohna-ah a paisuk lai takun, Topa in vantung panin gialpi lianpite Azekah khua ciang dong, amaute tungah lawnsuk a, amaute si uh hi; Israel mite in namsau tawh a thah sangin tua gialpi hanga a si mi tam zaw hi. Tua ciangin, Topa in Israel mite tungah Amor mite a piak ni-in Joshua in Topa tungah thu gen hi; amah in Israelte’ muhna-ah, “Ni aw, Gibeon ah, nang kha aw, Aijalon kuam ah ding cip in,” a ci hi. Tua ciangin minamte in a galte phu a lak khit mateng ni ding cipin kha khawl hi. Hih in Ja-shar’ Laibu sungah kigelh hilo ahi hiam? Van kim lai-ah ni khawlin ni khat bup ding bang tumsuk pak lo hi. Tua hun ma hita leh tua hun khit hita leh Topa in mi khat’ thu a ngaih tua ni bang ni dang om lo hi; bang hang hiam cih leh Topa in Israel mite adingin dosak hi. Tua ciangin Joshua, amah tawh a om Israelte khempeuh tawh Gilgal-a giahphual-ah ciahkik hi. Hih kumpi ngate tai-in Makkedah leihawm sungah bu uh hi. Tua ciangin Joshua kiangah, “Kumpi ngate Mekkedah leihawm sungah a bu kimu khin hi,” ci-in kigen hi. Tua ciangin Joshua in, “Suangtum lianpite leihawm gong lik nelh un la, a cing dingin a gei-ah mi koih un; ahih hangin note tua lai-ah om kei un, na galte uh delhin a nungdalte bawh un la, a khuapi sung uh ah amaute lutsak kei un; bang hang hiam cih leh Topa na Pasian un note khut sungah amaute hong pia zo hi,” a ci hi. Joshua leh Israel mite in amaute a bei siang dongin tampi tak a thah khit ciang, leh a suakta lai mite amau’ khuapi muanhuai sungah a tum khit uh ciangin, Makkedah giahphual Joshua kiangah mi khempeuh ci damin ciahkik uh hi; Israel mite khat peuh a paupih ngam kuamah om lo hi. Tua ciangin Joshua in, “Leihawm gong hong un la, leihawm panin tua kumpi ngate kei kiangah hong pai khiatpih un,” a ci hi. Amaute in tua mah bangin hih uh a, leihawm panin tua kumpi ngate, Jerusalem kumpi, Hebron kumpi, Jarmuth kumpi, Lakhish kumpi, leh Eglon kumpite, ama kiangah paipih uh hi. Amaute in Joshua kiangah tua kumpi ngate a pai khiatpih uh ciangin, Joshua in Israel mi khempeuh samin, amah tawh a kuan khawm galkap mangte kiangah, “A nai-ah hong pai un la, hih kumpite ngawngah na khe uh nga un,” a ci hi. Tua ciangin amaute a nai-ah hong pai-in, a khe uh amaute ngawng tungah nga uh hi. Joshua in amaute kiangah, “Lau kei un la, lungkia kei un; thakhauh un la, hang un; bang hang hiam cih leh note' do na gal khempeuhte uh tungah Topa in hih bangin bawl ding hi,” a ci hi. Tua khit ciangin Joshua in amaute satin si sak a, singkung nga tungah amaute khai hi. Amaute in nitak dong sing tungah khai uh hi; ahih hangin ni a tum hun ciangin Joshua in thu pia a, amaute in sing tung panin la khia sukin, amaute a buknasa leihawm sungah lawnsuk uh a, tu ni mahmahin a om lai ahi suangtum lianpite leihawm gongah koih uh hi. Tua ni-in Joshua in Makkedah khua la a, namsau tawh tua khua leh a kumpipa vatgawp hi; a sunga om mi khempeuh susia mangin, kuamah siit lo hi; Jerikho kumpipa tungah a bawl bangin Makkedah kumpipa tungah a bawl hi. Tua ciangin Joshua, amah tawh a om Israelte khempeuh tawh Makkedah panin Libnah-ah paisuak uh a, Libnah khua sim uh hi; Topa in tua khua leh a kumpipa zong Israel mite’ khut sungah pia hi; amah in namsau tawh tua khua leh a sunga om mi khempeuh vatgawp hi; tua khua sungah kuamah siit lo hi; Jerikho kumpipa tungah a bawl bangin a kumpipa tungah bawl hi. Tua ciangin Joshua, amah tawh a om Israelte khempeuh tawh Libnah panin Lakhish-ah paisuak uh a, tua khua umcihin sim uh hi; Topa in Israel mite khut sungah Lakhish pia a, amah in a ni nih ni-in la-in, Libnah a bawl bangin tua khua leh a sunga om mi khempeuh namsau tawh vatgawp hi. Tua ciangin Lakhish a huh dingin Gezer kumpipa Horam hong kuanto hi; amaute khat zong a om nawn lo dongin Joshua in amah leh a mite vatgawp hi. Tua ciangin Lakhish panin Eglon-ah amah tawh a om Israelte khempeuh tawh Joshua paisuak uh hi; tua ni mahin tua khua la uh a, namsau tawh vatgawp uh hi; Lakhish a hih mah bangin tua khua sunga om mi khempeuh tua ni-in amah in susia mang hi. Tua ciangin Joshua, Israelte khempeuh tawh Eglon panin Hebron-ah paito hi; amaute in tua khua simin, la-in, namsau tawh tua khua leh a kumpi leh a kiima khuapite, leh a sunga om khempeuh vatgawp hi; Eglon tungah a bawl bangin amah in kuamah siit lo a, tua khua leh a sunga om khempeuh susia mang hi. Tua ciangin Joshua, Israelte khempeuh tawh Debir-ah kihei kikin tua khua sim hi; amah in a kumpipa leh a khuapite khempeuh tawh tua khua la hi; namsau tawh amaute in vatgawp uh a, a sunga om mi khempeuh amaute in susia mang uh hi; amah in kuamah siit lo hi; amah in Hebron leh Libnah leh a kumpipa tungah a bawlsa bangin Debir leh a kumpipa tungah bawl hi. Tua ahih ciangin Joshua in gam khempeuh, mualtung gam leh Negeb gam leh lei niamna mun leh mual pangsuk, leh a kumpite khempeuh zo hi; amah in kuamah siit lo a, Israelte Topa Pasian’ thu piaksa bangin husang khempeuh susia mang hi. Joshua in amaute Kadesh-barnea panin Gaza ciang dong, leh Goshen gam khempeuh Gibeon ciang dong zo gawp hi. Israelte’ Topa Pasian in Israelte adingin dosak ahih manin Joshua in hih kumpite khempeuh leh amau leitang hun khat sungin la khin hi. Tua ciangin Joshua, amah tawh a om Israel khempeuh tawh Gilgal-a giahphual-ah ciahkik hi. Hazor kumpipa Jabin in hih thu a zak ciangin, amah in Madon kumpipa Jobab, leh Shimron kumpipa, leh Akshaf kumpipa, leh saklam mualtung, leh Khinneroth leitaw lam-a om Arabah sung, leh lei niamna mun, leh nitumna lamah Nafothdor sunga om kumpite, nisuahna leh nitumna lam-a om Kanaan mite, Amor mite, Hit mite, Perez mite, leh mualtung gam-a om Jebus mite, leh Mispah gam Hermon nuai-a Hiv mite tungah thu puak hi. Tua ciangin amaute tampi a pha a galkap honpite tawh a tam mahmah sakolte leh leengte tawh, tuipi gei-a om sehnel bangin tampi tak hong kuan khia uh hi. Hih kumpite khempeuh in amau galkapte gawmin Israel mite tawh a kido dingin hong pai-in Merom tuite-ah giahphual sat khawm uh hi. Tua ciangin Topa in Joshua kiangah, “Zing ciang tu bang hunin amaute khempeuh a kithatsa-in Israel mite tungah pia ding ka hih manin amaute kihta kei in; a sakolte uh a zagui na sattat ding a, a leengte uh mei tawh na hal ding hi,” a ci hi. Tua ahih ciangin Joshua in a galkapte khempeuh tawh thakhat thu-in Merom tuite gei amaute kiangah pai-in va sim uh hi. Topa in Israelte khut sungah amaute pia a, amaute in vat gawpin a Lian Sidon leh Misrefothmaim ciang dong, leh nisuahna lamah Mizpah kuam ciang dong delh uh hi; amaute kuamah a om nawn lo dongin vatgawp uh hi. Topa ’ sawl bangin Joshua in amaute hih hi; amau’ sakolte uh a zagui sattat sakin mei tawh a leengte uh halsak hi. Tua hun lai takin Joshua kihei kikin Hazor la a, namsau tawh a kumpipa vat hi; bang hang hiam cih leh Hazor khua in tua kumpi gam khempeuh lutang hi ngei hi. Amaute in tua sunga om khempeuh namsau tawh hihin amaute susia mang hi; husang khat zong om nawn lo a, amah in mei tawh Hazor khua hal hi. Topa ’ nasem Moses in a thu piaksa bangin Joshua in tua kumpite’ khuapite, leh a kumpite khempeuh la-in namsau tawh amaute vatin amaute susia mang hi. Ahih hangin Hazor khua longal mualtunga om khuapite khat zong Israel mite in hal lo uh hi; Joshua in tua khua hal hi. Israel mite in tua khuapite sunga van kinusiate leh ganhingte amau’ galzawh van dingin la uh hi; ahih hangin amaute a suksiat khit matengun namsau tawh vatgawp uh a, husang khat beek nusia lo uh hi. Topa in ama nasem Moses a thu piak bangin Moses in zong Joshua thu pia a, Joshua zong tua mah bangin gamta hi; Topa in Moses a thu piaksate khempeuh a hih loh om lo hi. Tua ahih ciangin Joshua in gam khempeuh, mualtung gam leh Negeb gam leh Goshen gam khempeuh leh lei niamna gam leh Arabah leh Israelte mualtung gam leh a lei niamna gamte, Seir lamah a kikhung to Halak Mual panin Hermon Mual nuai Lebanon kuam a om Baalgad ciang dong la hi. Amah in amau’ kumpite khempeuh la-in amaute vatgawpin that hi. Hih kumpite khempeuh tawh sauveipi sung Joshua kido hi. Gibeon khua-a teeng Hiv mite longal Israel mite tawh kilemna a bawl khuapi khat zong om lo hi; amaute in tuate khempeuh simin a lak uh ahi hi. Bang hang hiam cih leh Topa in Moses a thupiakna bangin amaute a kisuksiat mang nading leh hehpihna ngah loin a kibeisak theih nadingin Israelte a do nadingin a lungsim uh khauhsak ding Topa ’ bawl ahi hi. Tua hun lai takin Joshua hong pai-in mualtung gam, Hebron, Debir, Anab, leh Judah mualtung gam khempeuh, leh Israel mualtung gam khempeuh panin Anak mite nawh khia siang hi; Joshua in a khuapite uh tawh amaute susia mang khawm hi. Israel mite’ leitangah Anak mite khat zong om nawn lo hi; Gaza, Gath, leh Ashdod sung bekah pawlkhat om lai hi. Topa in Moses tungah a gensa bangin Joshua in leitang khempeuh la hi; tua ciangin Joshua in amau minam tawh kizui-in a ngah ding bangin Israel mite tungah gamh-in pia hi. Tua-a kipan galdona panin tua gam tawlnga hi. Tu-in nisuahna lam Jordan galkhat, Arnon kuam panin nisuahna lam Arabah khempeuh tawh Hermon Mual ciang dong Israel mite in a leitang uh laksakin a zawh mite’ gam kumpite in: Topa ’ nasem Moses leh Israel mite in amaute zo uh hi; tua ciangin Topa ’ nasem Moses in Reuben mite leh Gad mite leh Manasseh minam a langte tungah a neih dingun amau’ leitang a pia hi. Jerikho kumpi, khat; Beth-el gei-a om Ai kumpi, khat; Jerusalem kumpi, khat; Hebron kumpi, khat; Jarmuth kumpi, khat; Lakhish kumpi, khat; Eglon kumpi, khat; Gezer kumpi, khat; Debir kumpi, khat; Geder kumpi, khat; Hormah kumpi, khat; Arad kumpi, khat; Libnah kumpi, khat; Adullam kumpi, khat; Makkedah kumpi, khat; Beth-el kumpi, khat; Tappuah kumpi, khat; Hefer kumpi, khat; Afek kumpi, khat; Lasharon kumpi, khat; Madon kumpi, khat; Hazor kumpi, khat; Shimronmeron kumpi, khat; Akshaf kumpi, khat; Taanak kumpi, khat; Megiddo kumpi, khat; Kadesh kumpi, khat; Karmel gam sunga Jokneam kumpi, khat; Nafathdor sunga Dor kumpi, khat; Galile sunga Goi-im kumpi, khat; Tirzah kumpi, khat: a vekpi-in kumpi sawmthum-le-khat ahi hi. Tu-in Joshua teekin a kum tampi pha hi; Topa in ama kiangah, “Nang teekin na kum tampi pha a, ahi zongin leitang lak ding tampi tak om lai hi. A om lai leitang in: Fillistia gam sung khempeuh, leh Geshur gam khempeuh (Kanaan mite gam ci-a a kiciamteh, leilu lam Ekron gamgi lam, Izipt nisuahna lam-a om Shihor gun pan; Fillitia gam Gaza, Ashdod, Ashkelon, Gath, leh Ekron gamte a uk mi nga om hi), leh Avvim gam, leitaw lamah, Kanaan mite leitang khempeuh, leh Sidon mite gam ahi Mearah gam Amor mite' gamgi ahi Afek ciang, leh Gebal mite’ leitang, leh Lebanon khempeuh, ni-a suahna lamah Hermon Mual nuai-a Baalgad panin Hamath tumna ciang, Lebanon leh Mishrefoth-maim kikal-a teeng Sidon mite khempeuh ahi hi. Kei mahmah in Israel mite mai panin amaute ka hawlkhia ding hi; nang kong thupiaksa bangin Israel mite tungah a luah dingin leitang hawm in. Tua ahih ciangin tu-in minam kua leh Manasseh minam a langte tungah luah dingin hih leitang hawm in,” a ci hi. Reuben mite leh Gad mite in Manasseh minam a lang dang khatte tawh Topa ’ nasem Moses in amaute a piak mah bangin, nisuahna lam Jordan gal khatah Moses in amaute a piak gamh ngah khawm uh hi; Arnon kuam mong-a om Aroer pan, leh kuam laizang-a om khuapi, leh Dibon ciang dong Medeba mualzang khempeuh; leh Ammon mite gamgi ciang dong Heshbon ah a uk Amor kumpi Sihon’ khuapi khempeuh; leh Gilead, leh Geshur mite leh Ma-akath mite gam, leh Hermon Mual khempeuh, leh Salekah dong Bashan gam khempeuh; Ashtaroth leh Edrei- ah a uk Bashan gam sunga Og kumpi gam khempeuh (Refaim-a a suaktate lakah amah bek om hi); Moses in hihte zo-in hawlkhia hi. Ahi zongin Israel mite in Geshur mite ahi a, Ma-akath mite ahi zongin hawlkhia lo uh hi; tu ni dongin Geshur mite leh Ma-akath mite Israelte lakah teeng uh hi. Levi minamte tung bekah Moses in gamh pia lo hi; ama kiangah a cih mah bangin Israelte’ Topa Pasian tungah a kipia mei tawh kihal biaknate in amau’ gamh ahi hi. Tua ciangin Moses in Reuben minam tungah amau’ beh tawh kizui-in gamh pia hi. Tua ahih ciangin amau’ gam in Arnon kuam gei-a a om Aroer pan, leh kuam laizang-a om khuapi, leh Medeba kianga mualzang khempeuh, Heshbon tawh, leh mualzang tunga om a khuapite khempeuh; Dibon, leh Bamothbaal, leh Bethba-almeon, leh Jahaz, leh Kedemoth, leh Mefa-ah, leh Kiriathaim, leh Sibmah, leh tua kuam mualtunga om Zereth-shahar, leh Bethpeor, leh Pisgah pang suk, leh Bethjeshimoth, tua in, mualzang khuapite khempeuh, leh Heshbon-ah a uk, Moses in Midian makaite Evi leh Rekem leh Zur leh Hur leh Reba, tua gam-a teeng Sihon’ uliante, tawh a zawh khop ahi Amor kumpi Sihon’ kumpi gam khempeuh ahi hi. Beor’ tapa, aisanpa Balaam zong, Israel mite in a dang a thahte lakah namsau tawh that khawm uh hi. Reuben mite gamgi in Jordan ahi hi. Hih in amau’ beh tawh kizui-in a khuapite leh a khuaneute tawh Reuben mite’ gamhluah ahi hi. Tua ciangin Moses in Gad minamte tungah zong amau’ beh tawh kizui-in gamh pia hi. Amau’ gam in Jazer, leh Gilead khuapite khempeuh, leh Rabbah nisuahna lamah a om Aroer ciang dong Ammon mite leitang kimkhat, leh Heshbon panin Ramathmizpeh leh Betonim ciang, leh Mahanaim panin Debir gam ciang dong, leh Bethharam kuam sungah Bethnimrah, Sukkoth, leh Zafon, Jordan gal khat nisuahna lam, Khinnereth Tuipi a niamna lam mong ciang, Jordan gamgi-in a nei, Heshbon kumpipa Sihon’ kumpi gam om lai teng ahi hi. Hih in amau’ beh tawh kizui-in a khuapite leh a khuaneute tawh Gad mite’ gamhluah ahi hi. Tua ciangin Moses in Manasseh minam a langte tungah gamh pia hi; amau’ beh tawh kizui-in Manasseh minam a langte tungah kipia hi. Amau’ gam in Mahanasim pan kipanin Bashan gamsung khempeuh, Bashan kumpipa Og’ kumpi gamsung khempeuh, leh Bashan gam sunga om Jair khuapi sawmgukte, leh Gilead a lang, leh Ashtaroth, leh Edrei, Bashan gam-a Og’ kumpi gam khempeuh ahi hi; hihte amau' innkuan tawh kizui-in Makhir mi a langte adingin Manasseh’ tapa Makhir mite tungah kipia hi. Hihte in Jerikho nisuahna lam Jordan gal khat; Moab zanglei-ah Moses in a hawm gamhte ahi hi. Ahih hangin Levi minamte tungah Moses in gamh pia lo hi; Israelte’ Topa Pasian in amaute kiangah a cih mah bangin amah in amau’ gamh ahi hi. Hihte in, siampi Eleazar, leh Nun tapa Joshua, leh Israel minam sung pan beh lutangte in amaute tungah a piak Kanaan gam sungah Israel mite’ ngah gamhte ahi hi. Minam kua leh alangte’ adingin Topa in Moses a thupiak bangin amau’ gamhte aisanna tawh kipia hi. Bang hang hiam cih leh Moses in Jordan gal khatah minam nih leh a langte tungah gamh pia khin zo hi; ahih hangin amaute lakah Levi mite tungah bangmah pia lo hi. Bang hang hiam cih leh Josef mite minam nih-in kikhen a, Manasseh leh Efraim minamte ahi uh hi; tua gam sungah Levi mite tungah tanh kipia lo a, ahih hangin amau teen’ nading khuapite leh a ganhingte leh a nate uh adingin a lonona gamte bek tawh kipia hi. Topa in Moses a thupiak bangin Israel mite gamta uh hi; amaute in leitang hawm uh hi. Tua ciangin Judah minamte Gilgal-a Joshua kiangah pai uh a, amaute’ sung panin Kenaz mi Jefunneh tapa Kaleb in ama kiangah, “ Topa in Kadesh-barnea-ah Pasian’ mi Moses tungah nang leh kei’ thu tawh kisai a gente na thei hi. A gamsung thu kansim dingin Topa ’ nasem Moses in Kadesh-barnea panin kei hong sawl lai-in kum sawmli ka pha hi; ka lungsim-a om bangin ama kiangah thu ka tun’ kik hi. Ahih hangin kei tawh hong paito khawm ka sanggamte in mite lungkiasak uh hi; ahi zongin keimah in lungsim tak tawh Topa ka Pasian ka zui hi. Tua ni-in Moses kiciamin, ‘Nangmah in Topa ka Pasian lungsim tak tawh zui na hih manin na khe in a totsa leitang in nang leh na tate’ adingin gamh hi tawntung ding hi,’ hong ci hi. Tu-in, en in, a cihsa bangin Topa in, Israel mite gamlakah a pai sung, Topa in hih thu Moses tungah a gen-a kipan hih kum sawmli-le-nga sung kei hong nungta sak hi; tu-in, en in, tu ni-in kei kum sawmgiat-le-nga ka pha hi. Moses in hong sawl hun lai mah bangin tu ni-in kei ka thahat lai hi; galdo nading, leh kuan khiatna leh ciahkik nadingin ka thatang in tua hun lai-a ka thatang mah bang lai hi. Tua ahih ciangin tu-in tua ni-a Topa ’ gen hih mualtung gam kei hong pia in; bang hang hiam cih leh Anak mite a muanhuai mahmah khuapite sungah a omna thu tua ni-in na za hi: Topa in kei hong ompih hi, Topa ' cih bangin amaute ka hawlkhia zo kha ding hi,” a ci hi. Tua ciangin Joshua in amah thupha pia hi; Jefunneh’ tapa Kaleb tungah gamh-in Hebron pia hi. Tua ahih ciangin amah in Topa, Israelte’ Pasian, lungsim tak tawh zui ahih manin tu ni dongin Hebron in Kenaz mi Jefunneh’ tapa Kaleb’ gamh suak hi. Hih Hebron min in a ni dangin Kiriath-arba ahi hi; Arba in Anak mite lakah mi lian pen khat ahi hi. Tua ciangin tua gam in galdona panin tawlnga hi. Amau’ beh tawh kizui-in Judah mite’ ngah in leitaw lamah Edom gamgi ciang, leitaw lam a gamla penna mun-ah Zin gamlak ciang ban hi. Leitaw lam a gamgi in Ci Tuipi mong, leitaw lam a sun tuidawk panin kipan hi; leitaw lam Akrabbim kahtohna-ah paikhia-in, Zin dong ban a, Kadesh-barnea leitaw lamah Hezron dung tawnin Addar ciang dong paito-in, Karka lamah kihei a, Azmon ciang dong pai-in Izipt lui-ah suakkhia a, tuipi-ah a mong bei hi. Hih in amau’ leitaw lam gamgi hi ding hi. Tua ciangin nisuahna lam gamgi in Jordan tun’na ciang dong Ci Tuipi ahi hi. Leilu lam pang gamgi in Jordan tun’na tuipi dawk panin kipan hi; a gamgi in Bethhoglah lamah paito a, Beth-arabah leilu lam pangah paisuak hi; tua ciangin a gamgi in Reuben’ tapa Bohan’ Suangpi dongah paito hi; tua ciangin Akhor Kuam panin Debir-ah gamgi paito a, leilu lam manawhin, tua kuam leitaw lam pangah a om, Adummim kahtohna gal khatah a om Gilgal lamah kihei hi; tua ciangin gamgi in Enshemesh tuite dungah pai-in Enrogel-ah tawp hi; tua ciangin Jebus mi (Jerusalem a cihna) liangko leitaw lam Hinnom' tapa kuam-ah gamgi paito hi; tua ciangin Refaim kuam leilu lam mong, nitumna lam Hinnom Kuam gal khatah a kikhung mual dawn-ah gamgi paito hi; tua ciangin mual dawn panin Neftoah Tuite lui-ah gamgi kikhung a, tua panin Efron Mual khuapite-ah pai hi; tua ciangin Baalah (Kiriath-jearim a cihna) lamah gamgi kawi kual hi; tua ciangin Baalah nitumna lam Seir Mual-ah gamgi kual a, tua panin paisuakin Jearim Mual (Khesalon a cihna) liangko leilu lamah pai-in, Bethshemesh-ah paisuk a, Timnah kiangah paisuak hi; Ekron leilu lam mual liangko-ah gamgi paikhia a, tua ciangin Shikkeron-ah gamgi kawi kualin, Baalah Mual-ah paisuak a, Jabne-el-ah leng khia hi; tua ciang tuipi-ah gamgi tawp hi. Tua ciangin nitumna gamgi in Tuipi Lian a dung teng ahi hi. Hih in amau’ beh tawh kizui-in Judah mite kiim-ah gamgi ahi hi. Topa in Joshua tungah a thupiak bangin Jefunneh’ tapa Kaleb tungah amah in Judah mite lakah tanh khat Kiriath-arba, Hebron a cihna, (Arba in Anak’ pa hi) pia hi. Tua lai panin Kaleb in Anak’ tapa thumte Sheshai leh Ahiman leh Talmai, Anak suan-le-khakte hawl khia hi. Tua lai panin Debir sunga teeng mite a sim dingin amah paito hi; Debir pen a ni dangin Kiriath-sefer ahi hi. Kaleb in, “Kiriath-sefer vat gawpin a la zo mi tungah ka tanu Aksah a zi dingin ka pia ding hi,” a ci hi. Tua ciangin Kaleb’ sanggampa Kenaz’ tapa Othniel in la hi; amah in a zi dingin a tanu Aksah pia hi. Tua nu ama kiangah a pai ciangin ama pa’ tung panin lo khat a nget ding hah gen hi; a la tung panin tua nu a kum ciangin, Kaleb in tua nu kiangah, “Bang ut na hi hiam?” a ci hi. Amah in, “Letsong khat hong pia in; Negeb gamah kei hong koih na hih buangin cik tuikhukte zong hong pia in,” a ci hi. Tua ciangin Kaleb in tua nu tungah cik tui tungnungte leh cik tui nuainungte a pia hi. Hih in amau’ beh tawh kizui-in Judah minamte’ gamhluah ahi hi. Leitaw lam mong ciik, Edom gamgi lamah Negeb gam Judah minamte’ neih khuapite in Kabze-el, Eler, Jagur, Kinah, Dimonah, Adadah, Kedesh, Hazor, Ithnan, Zif, Telem, Bealoth, Hazorhadattah, Kerioth-hezron (Hazor a cihna), Amam, Shema, Meladah, Hazargaddah, Heshmon, Bethpelet, Hazarshual, Be-ersheba, Biziothiah, Baalah, Iim, Ezem, Eltolad, Khesil, Hormah, Ziklag, Madmannah, Sansannah, Leboath, Shilhim, Ain, leh Rimmon; a vekpi-in khuapi sawmnih-le-kua, a khua neute tawh ahi hi. Tua ciangin lei niamna lamah Eshtaol, Zorah, Ashnah, Zanoah, Engannim, Tappuah, Enam, Jarmuth, Adullam, Sokoh, Azekah, Sha-araim, Adithaim, Gederah, Gederothaim: khuapi sawm-le-li, a khua neute tawh ahi hi. Zenan, Hada-shah, Migdalgad, Dilean, Mizpeh, Jokhe-el, Lakhish, Bozkath, Eglon, Kabbon, Lahman, Khitlish, Gederoth, Bethdagon, Na-amah, leh Makkedah; khuapi sawm-le-guk, a khua neute tawh ahi hi. Libnah, Ethar, Ashan, Iftah, Ashnah, Nezib, Keilah, Akzib, leh Mareshah: khuapi kua, a khua neute tawh ahi hi. Ekron, a khuapite leh a khua neute tawh ahi hi; Ekron panin tuipi dong, Ashdod lam pang-a omte khempeuh a khua neute tawh ahi hi. Ashdod, a khuapite leh a khua neute tawh ahi hi; Gaza, a khuapite leh a khua neute tawh ahi hi; Izipt lui leh tuipi lian a gei ciang dong tawh ahi hi. Tua ciangin mualtung gamah, Shamir, Jattir, Sokoh, Dannah, Kiriath-sannath (Debir a cihna), Anab, Eshtemoh, Anim, Goshen, Holon, leh Giloh: khuapi sawm-le-khat, a khua neute tawh ahi hi. Arab, Dumah, Eshan, Janim, Bethtappuah, Afekah, Humtah, Kiriath-arba (Hebron a cihna), leh Zior: khuapi kua, a khua neute tawh ahi hi. Maon, Karmel, Zif, Juttah, Jezre-el, Jokdeam, Zanoah, Kain, Gibeah, leh Timnah: khuapi sawm, a khua neute tawh ahi hi. Halhul, Bethzur, Gedor, Ma-arath, Beth-anoth, leh Eltekon: khuapi guk, a khua neute tawh ahi hi. Kiriathbaal (Kiriath-jearim a cihna), leh Rabbah: khuapi nih, a khua neute tawh ahi hi. Sehnel gamah, Beth-arabah, Middin, Sekakah, Nibshan, Ci Khuapi, leh En-gedi: khuapi guk, a khua neute tawh ahi hi. Ahih hangin Judah mite in Jerusalem-a teeng Jebus mite hawlkhia zo lo uh hi; tua ahih ciangin tu ni dongin Jebus mite in Judah mite tawh Jerusalem-ah teeng khawm uh hi. Josef suan-le-khakte’ tanh in Jerikho tuite’ nisuahna lam, Jerikho kiang Jordan panin sehnel gamah pai a, Jerikho panin mualtung gamte tawnin Beth-el ah paito hi; tua ciangin Beth-el panin Luz-ah pai-in, Arkhi mite gam Ataroth nawk hi; tua ciangin nitumna lam Jaflet mite gam lam Bethhoron a niam lam gam ciang dongah paisuk hi, tua ciangin Gezer-ah pai-in tuipi-ah tawp hi. Josef suan Manasseh, leh Efraim mite in amau’ gamhluah ngah uh hi. Amau' behbehin Efraim mite’ gam in anuai-a bang ahi hi: nisuahna lamah amau’ gamh gamgi in Ataroth-addar, Bethhoron tungnung ciang ahi hi; tua panin tuipi ciangah gamgi pai hi; leilu lamah Mikmethath ahi hi; tua ciangin nisuahna lam gamgi Ta-anathshiloh lamah kual pai-in, nisuahna lam a gal khatah pai-in Janoah tung hi; tua ciangin Janoah panin Ataroth leh Na-arah-ah paisuk a, Jerikho ban-in Jordan-ah tawp hi. Tappuah panin nitumna lam Kanah lui-ah gamgi pai-in, tuipi-ah tawp hi. Tua in amau’ behbehin Efraim mite’ gamhluah hi a, Manasseh mite’ gamluah sung panin Efraim mite’ adingin a kikhen khia khuapite, a khua neute tawh ahi hi. Ahi zongin amaute in Gezer sunga teeng Kanaan mite hawl khia lo uh hi: tua ahih ciangin tu ni dongin Kanaan mite in Efraim mite lakah teeng a, ahih hangin aana nasep a sem dingin sal suak uh hi. Tua ciangin Josef tacil ahih manin Manasseh minam tungah tanh kipia hi. Manasseh minam sung pan tacil, Gilead’ pa Makhir tungah Gilead gam leh Bashan gam kipia hi; bang hang hiam cih leh amah galhang mi ahi hi. Tua ciangin Manasseh minam a om laite, Abiezer, Helek, Asriel, Shekhem, Hefer, leh Shemida-te tungah a behbehin piakna kibawl hi; hihte pen Josef tapa Manasseh’ ta pasal suan-le-khakte a behbeh ahi hi. Ahih hangin Manasseh’ tapa Makhir, a tapa Gilead, a tapa Hefer, a tapa Zefehad in tapa nei loin tanu bek nei hi; a tanute’ min in: Mahlah, Noah, Hoglah, Milkah, leh Tirzah ahi hi. Amaute siampi Eleazar leh Nun tapa Joshua leh makaite mai-ah pai uh a, “Ka sanggamte uh tawh gamh hong piakna dingin Topa in Moses thu pia hi,” a ci uh hi. Tua ahih ciangin Topa ' thupiakna bangin amau’ pate’ sanggamte tawh amah in gamh pia khawm hi. Tua ahih ciangin Jordan gal khatah Gilead leh Bashante simloh Manasseh tungah tanh sawm kia hi; bang hang hiam cih leh Manasseh’ tanute in a tapate tawh gamh ngah khawm uh hi. A om lai Manasseh mite tungah Gilead leitang kipia hi. Manassehte’ gam in Asher panin Shekhem nisuahna lamah a om Mikmethath dong ban hi; tua ciangin Entappuah mite’ leitaw lamah gamgi pai hi. Tappuah leitang in Manasseh’ aa ahi hi; ahih hangin Manasseh gamgi-a om Tappuah khuapi in Efraim tapate’ aa ahi hi. Tua ciangin Kanah lui-ah gamgi paisuk hi. Manasseh khuapite lak panin lui leitaw lam-a om hih lai-a khuapite pen Efraim’ aa ahi hi. Tua ciangin lui leilu lam pangah Manasseh gamgi paisuakin tuipi-ah tawp hi; tua gam leitaw lam in Efraim’ aa hi-in, a leilu lam in Manasseh’ aa hi a, tuipi in a gamgi ahi hi; leilu lamah Asher banin nisuahna lamah Issakhar ban hi. Issakhar leh Asher gam sungah zong Manasseh in Bethshean leh a khua neute, Ibleam leh a khua neute, Dor-a teengte leh a khua neute, Endor-a teengte leh a khua neute, Ta-anak-a teengte leh a khua neute, leh Megiddo-a teengte leh a khua neute nei hi; a thumna in Nafath ahi hi. Ahi zongin Manasseh’ tapate in hih khuapite luah zo lo uh hi; Kanaan mite tua gamah teeng teitei uh hi. Ahih hangin Israel mite tampi pha-in a hat uh ciangin amaute in Kanaan mite nasemin koih uh a, hawl khia mang khin lo uh hi. Tua ciangin Josef minam in Joshua kiangah thu genin, “ Topa in kote thupha hong pia khin a, kote in mi tampi hi napi-in bang hangin ngah khat leh tanh khat bek gamh-in hong pia na hi hiam?" a ci uh hi. Tua ciangin Joshua in amaute kiangah, “Note mi tampi pha a, Efraim mualtung gam in note’ adingin neu lua ahih ciangin Perez leh Refaim gam tulakah pai un la, nomau’ ading gam vat tawm un,” a ci hi. Josef minam in, “Kote' adingin mualtung gam kicing hi; ahi zongin zang gam-a teeng Kanaan mite khempeuh, Bethshean leh a khua neute, leh Jezre-el Kuam sunga omte in sik leeng nei uh hi,” a ci uh hi. Tua ciangin Joshua in Josef suan Efraim leh Manasseh mite tungah, “Note mi tampi pha-in na vanglian uh hi; tanh khat kia na nei kei ding uh hi; mualtung gam in note’ aa hi ding a, tulak ahih hangin note in hah siangin a gamgi mong dong na luah ding uh hi; bang hang hiam cih leh amaute in sik leeng nei-in, amaute a thahat hangin Kanaan mite na hawlkhia zo ding uh hi,” a ci hi. Tua ciangin Israel mihon buppi Shiloh-ah kikhawm uh a, tua lai-ah kikhopna buk lam uh hi; amaute mai-ah gam zawhsa-in om hi. Israel mite lakah gamh a kipia nai lo minam sagih om hi. Tua ahih ciangin Joshua in Israel mite kiangah, “ Topa, na pu na pate uh Pasian in note hong piaksa leitangah pai-in na luah ding uh bang tanvei zekai ding na hi uh hiam? Minam khat panin mi thum ciat hong pia un la, amaute va kuankhia-in vaksuk vakto-in, amaute’ luah dinga ngaihsutna tawh a leitang omziate hong gelhin, tua ciangin kei kiangah hong ciah dingun amaute ka sawl ding hi. Amaute in seh sagihin khenin, leitaw lam ama gam mah-ah Judah om suakin, Josef innkuante leilu lam amau’ gamah om ding hi. Note in leitang khen sagihin hong ciamteh un la, na ciamtehna uh hih mun kei kiangah nong paipih ding uh hi; tua ciangin keimah in Topa i Pasian’ mai-ah note adingin aai ka saan ding hi. Levi mite in note lakah tanh nei lo hi; bang hang hiam cih leh Topa ’ siampi nasepna in amau’ luah ahi hi; Gad leh Reuben leh Manasseh minam a langte in Topa ’ nasem Moses in amaute tungah a piak ahi, Jordan Nisuahna lam gal khatah amau’ gamh ngah khin zo uh hi,” a ci hi. Tua ahih ciangin mite kuan uh hi; leitang a ciamtehna a gelh nadingun Joshua in a pai mite thu pia a, “Vaksuk vakto-in leitang ciamtehna hong gelh un la, kei kiangah hong pai kik un; tua ciangin Shiloh mun Topa mai-ah note adingin aai ka saan ding hi,” a ci hi. Tua ciangin mite kuanin gam sungah paisuk paito-in khen sagih suahin tua gam a khua khua-in a ciamtehna uh laibu khat sungah khum uh hi; tua ciangin Shiloh giahphual-a Joshua kiangah amaute hong pai uh hi; Joshua in amaute’ adingin Topa mai Shiloh-ah aai saan sak hi; tua ciangin Joshua in amau’ tanh ding ciat Israelte tungah leitang pia hi. A behbeh tawh kizui-in Benjamin minamte’ ading aisaan hun hong tunga amau’ tungah a kipia gam in Judah minam leh Josef minamte kikalah hong kia hi. Leilu lamah amau’ gamgi in Jordan panin kipan hi; tua ciangin Jerikho leilu lam liangko-ah paito-in, tua panin mualtung gam nawkin nitumna lamah pai hi; tua ciangin Beth-aven gam lakah tawp hi. Tua lai panin gamgi in Luz lam manawhin leitaw lam nawtin Luz (Beth-el a kici) liangko-ah pai hi, tua ciangin Bethhoron Nuainung leitaw lam-a om mualtunga Ataroth-addar khua-ah paisuk hi. Tua ciangin gamgi mun dang manawhin pai a, Bethhoron galkhat, leitaw lam-a om mual panin nitumna lam pang leitaw lamah kihei a, Judah minamte’ aa ahi Kiriathbaal (Kiriath-jearim a cihna) ah tawp hi. Hih in a nitumna lam pang piangsak hi. Tua ciangin Kiriath-jearim mong panin leitaw lam pang kipan hi; tua lai panin Efron lam, Neftoah Tuite-ah gamgi pai hi; tua ciangin Refaim kuam leilu lam monga a om, Hinnom’ tapa’ kuam a kimuhna mual a gamgi-ah pai hi; tua ciangin Jebus mite gam liangko leitaw lam, Hinnom Kuam-ah paisukin, Enrogel-ah paisuk suak hi; tua ciangin leilu lam manawhin kawi-in, Enshemesh-ah paisuak a, tua lai panin Adummim kahtohna galkhat, Geliloth-ah pai hi; tua ciangin Reuben’ tapa Bohan’ Suangpi-ah paisuk hi, tua ciangin Beth-arabah gam liangko leilu lamah paisuakin Arabah-ah paisuk hi; tua ciangin Bethhoglah gam liangko leilu lamah gamgi paisuak hi; tua ciangin Jordan mong leitaw lam, Ci Tuipi dawk leilu lamah gamgi tawp hi; hih in leitaw lam gamgi ahi hi. Jordan in nisuahna lam pang a gamgi piangsak hi. Hih in a beh zui-in a kimkotah a gamgi a gamgi-in Benjamin minam’ luah ahi hi. Tu-in amau’ beh tawh kizui-in Benjamin minamte’ khuapite in Jerikho, Bethhogal, Emekkeziz, Beth-arabah, Zemaraim, Beth-el, Avvim, Parah, Ofrah, Khefarammoni, Ofni, Geba—khuapi sawm-le-nih, a khua neute tawh ahi hi: Gibeon, Ramah, Be-eroth, Mizpeh, Khefirah, Mozah, Rekem, Irpe-el, Taralah, Zela, Haelef, Jebus (Jerusalem a cihna), Gibeah, leh Kiriath-jearim—khuapi sawm-le-li, a khua neute tawh ahi hi. Hih in a beh tawh kizui-in Benjamin minam’ luah ahi hi. Aisaan nihna Simeon ading, a beh zui-in Simeon minam ading hong tung hi; amau’ gamh in Judah minamte’ gamh sungah om hi. Ama ngah gamh dingte in Be-ersheba, Sheba, Moladah, Hazarshual, Balah, Ezem, Eltolad, Bethul, Hormah, Ziklag, Bethmarka-both, Hazarsusah, Bethlebaoth, leh Sharuhen—khuapi sawm-le-thum, a khua neute tawh ahi hi; Ain, Rimmon, Ether, leh Ashan—khuapi li, a khua neute tawh ahi hi; Negeb gam Ramah-a om Baalathbe-er ciang dong hih khuapite’ kim-a om khua neute khempeuh tawh ahi hi. Hih in a beh tawh kizui-in Simeon minam’ luah ahi hi. Simeon minam’ luah in Judah minam’ gamsung khenkhat hong suak hi; bang hang hiam cih leh Judah minam’ ngah in amau' adingin lian lua a, amau’ luah sung panin Simeon minam in gamh ngah uh hi. A beh tawh kizui-in Zebulun adingin aisaan thumna hong tung hi. Amau’ luah gam in Sarid ciang dong ban hi; tua ciangin a gamgi nitumna lamah paito-in Mareal-ah paisuak a, Dabbesheth va su a, tua ciangin Jokneam nisuahna lam-a om lui ban hi; Sarid panin nisuahna lam mundang ni a suahna lamah pai-in Khisloth-tabor gamgi-ah tung hi; tua panin Daberath-ah pai-in, tua ciangin Jafia ciang pai hi; tua lai panin nisuahna lam ni a suahna lam Gathhefer, Ethkazin lamah paisuak a, tua ciangin Rimmon-ah pai lai-in Neah lamah kawi hi; tua ciangin leilu lam pan, Hannathon lamah gamgi kihei a, Iftahel kuam-ah tawp hi; tua banah Kattath, Nahalal, Shimron, Idalah, leh Bethlehem—khuapi sawm-le-nih, a khua neute tawh ahi hi. Hih in a beh tawh kizui-in Zebulun minam’ luah ahi hi—hih khuapite a khua neute tawh ahi hi. A beh tawh kizui-in Issakhar minam adingin aisaan lina Issakhar adingin hong tung hi. A gam in Jezre-el, Khesulloth, Shunem, Hafaraim, Shion, Anaharath, Rabbith, Kishion, Ebes, Remeth, En-gannim, Enhaddah, Bethpazzez huam hi; a gamgi in zong Tabor, Shahazumah, leh Bethshemesh ban a, a gamgi in Jordan-ah tawp hi—khuapi sawm-le-guk, a khua neute tawh ahi hi. Hih in a beh tawh kizui-in Issakhar minam’ luah ahi hi—a khuapite a khua neute tawh ahi hi. A beh tawh kizui-in Asher minam’ adingin aisaan ngana hong tung hi. A gam in Helkath, Hali, Beten, Akshaf, Allammelek, Amad, leh Mishal huam hi; nitumna lamah Karmel leh Shihorlibnath ban a, tua ciangin nisuahna lamah kihei-in Bethdagon-ah pai a, leilu lam Beth-emek leh Ne-i-el lamah Zebulun leh Iftahel kuam ban hi; tua ciangin leilu lam Kabul, Ebron, Rehob, Hammon, Kanah, a Lian Sidon ciang dong paito lai hi; tua ciangin Ramah-ah gamgi kihei a, kulh a nei Tai-ar khuapi tung hi; tua ciangin Hosah-ah gamgi kihei a, tuipi-ah tawp hi; Mahalab, Akzib, Ummah, Afek, leh Rehob—khuapi sawmnih-leh-nih, a khua neute tawh ahi hi. Hih in a beh tawh kizui-in Asher minam' luah ahi hi—hih khuapite a khua neute tawh ahi hi. A beh tawh kizui-in Naftali minam’ adingin aisaan gukna Naftali minamte adingin hong tung hi. A gamgi in Helef, Za-anannim-a om tawsaw, leh Adaminekeb, leh Jabne-el panin Lakkum ciang dong pai hi; tua ciangin Jordan-ah tawp hi; tua ciangin nitumna lam Aznothtabor-ah gamgi kihei a, tua lai panin Hukkok-ah pai-in, leitaw lamah Zebulun ban a, nitumna lamah Asher banin, nisuahna lam panin Jordan ban hi. Kulh a nei khuapite in Ziddim, Zer, Hamnath, Rakkath, Khinnereth, Adamah, Ramah, Hazor, Kedesh, Edrei, Enhazor, Iron, Migdalel, Horem, Beth-anath, leh Bethshemesh—khuapi sawm-le-kua, a khua neute tawh ahi hi. Hih in a beh tawh kizui-in Naftali minam’ luah ahi hi—khuapite a khua neute tawh ahi hi. A beh tawh kizui-in Dan minam adingin aisaan sagihna hong tung hi. A luah gamte in Zorah, Eshtaol, Irshemesh, Sha-alabbin, Aiialon, Ithlah, Elon, Timnah, Ekron, Eltekeh, Gibbethon, Baalath, Jehud, Beneberak, Gathrimmon, leh Joppa galkhat-a om Mejarkon leh Rakkon a gamte tawh huam hi. Dan mite in amau’ gam a taan ciangun Dan mite kuan to-in Leshem sim uh a, amaute in manin namsau tawh a thah khit uh ciangin tua gam luahin a sungah teeng uh a, amau’ pupi’ min tamin Leshem pen Dan ci-in phuak uh hi. Hih in a beh tawh kizui-in Dan minam’ luah ahi hi—hih khuapite a khua neute tawh ahi hi. Israel mite in gamh-in tua leitangte a hawm khit uh ciangin amaute lakah Nun tapa Joshua tungah gamh pia uh hi. Topa ’ thupiakna tawh ama nget khuapi, Efraim mualtung gam-a om Timnathserah pia uh hi; amah in tua khuapi lam kikin a sungah teeng hi. Hihte in siampi Eleazar leh Nun tapa Joshua leh Israel minam beh lutangte in kikhopna buk kong, Topa mai Shiloh-ah aisaanna tawh a hawm khiat uh luahnate ahi hi. Tua bangin amaute in leitang hawmna zo uh hi. Tua ciangin Topa in Joshua kiangah, Hih khuapite khat peuhpeuhah amah tai-in khuapi kongpi tumna-ah ding ding a, tua khuapi upate kiangah a thu gentel ding hi; tua ciangin amaute in khuapi sungah amah paipihin amah mun khat pia ding a, amaute tawh amah om ding hi. Tua ciangin phulapa in amah a delh leh, tuapa tungah mi thatpa pia lo ding uh hi; bang hang hiam cih leh amah in theih lohna hangin a vengpa thatin, a beisa hun sungah ama tungah galneihna bangmah nei lo hi. Thukhenna thuak dingin mihonte mai-ah a din’ mateng, tua hun lai takin siampi lianpa a sih hun mateng, tua khuapi sungah amah om ding hi; tua khit ciangin a thatpa ama khua ama inn hong tai khiatna khua-ah paikik thei ding hi,’ ci-in gen in,” a ci hi. Tua ahih ciangin amaute in Naftali mualtung gam sunga om Galile gam sung panin Kedesh khua, Efraim mualtung gam sungah Shekhem khua, leh Judah mualtung gam sungah Kiriatharba (Hebron a cihna) khuate tuam koih uh hi. Jerikho nisuahna Jordan galkhatah Reuben minam sung panin mualtung zang gam lak-a om Bezer khua, Gad minam sung panin Gilead gam sunga om Ramoth khua, leh Manasseh minam sung panin Bashan gam sunga Golan khuate seh uh hi. Hihte in Israel mi khempeuh leh amaute lakah a peem khualmi adingin, sawm lopi-in mi khat a that kha-pa in mihonte mai-ah a din’ ma-in phulapa khutah a sih loh nadingin a tai theih nadinga a kiseh khuapite ahi hi. Tua ciangin siampi Eleazar leh Nun tapa Joshua leh Israel minam beh lutangte kiangah Levi beh lutangte hong pai uh hi; amaute in Kanaan gamsung Shiloh munah, “Teen’ nadingin khuapi leh ka ganhingte uh adingin a lononate tawh kote hong kipiak ding Moses tung tawnin Topa in thu pia zo hi,” amaute kiangah ci uh hi. Tua ahih ciangin Topa ’ thupiakna tawh Israel mite in amau’ luah nang panin Levi mite tungah anuai-a khuapite leh lonona gamte pia uh hi. Kohath behte adingin aisaan hong tung hi. Tua ahih ciangin siampi Aaron’ suan-le-khak ahi Levi mite in Judah, Simeon, leh Benjamin minamte tung panin aisaanna tawh khuapi sawm-le-thum ngah uh hi. Tua ciangin a om lai Kohath mite in Efraim minam Dan minam leh Manasseh minam a langte tung panin aisanna tawh khuapi sawm ngah uh hi. Gershon mite in Issakhar minam, Asher minamte, Naftali minamte, leh Bashan gam sunga om Manasseh minam a langte tung panin aisaanna tawh khuapi sawm-le-thum ngah uh hi. Merari mite in a beh uh tawh kizui-in Reuben minam, Gad minam, leh Zebulun minamte tung panin khuapi sawm-le-nih ngah uh hi. Topa in Moses tung tawnin a thupiak bangin hih khuapite leh a lonona gamte Israel mite in aisaanna tawh Levi mite tungah pia uh hi. Judah minam leh Simeon minam sung panin amaute in anuai-a min kigen khuapite pia uh a, Levi mite ahi Kohath beh sung panin Aaron’ suan-le-khakte tungah tung hi; amaute tungah a aii kia masa ahih man hi. Amaute in Judah mualtung gam Kiriath-arba, Arba pen Anak’ pa (Hebron a cihna), a kiim-a lonona gam tawh amau tungah pia uh hi. Ahih hangin tua khuapi’ lote leh a khua neute pen Jefunneh’ tapa Kaleb tungah a neih dingin kipia khin hi. Amaute in siampi Aaron’ suan-le-khakte tungah mithatte’ bukna khuapi Hebron a lonona gamte tawh, Libnah a lonona gamte tawh, Jattir a lonona gamte tawh, Eshtemoa a lonona gamte tawh, Holon a lonona gamte tawh, Debir a lonona gamte tawh, Ain a lonona gamte tawh, Juttah a lonona gamte tawh, Bethshemesh a lonona gamte tawh hih minam nihte sung panin khuapi kua pia uh hi; tua ciangin Benjamin minam panin Gibeon a lonona gamte tawh, Geba a lonona gamte tawh, Anathoth a lonona gamte tawh, leh Almon a lonona gamte tawh—khuapi li pia uh hi. Siampi Aaron’ suan-le-khakte’ khuapite a vekpi-in khuapi sawm-le-thum, a lonona gamte tawh ahi hi. Levi mite sung pan Kohath beh ahi a om lai Kohath mite tungah a kipia khuapite pen Efraim minamte’ aa sung pan ahi hi. Efraim mualtung gam-a om mithatte’ ading khuapi Shekhem a lonona gamte tawh, Gezer a lonona gamte tawh, Kibzaim a lonona gamte tawh, Bethhoron a lonona gamte tawh—khuapi li amaute tungah kipia hi; tua ciangin Dan minam sung panin Elteke a lonona gamte tawh, Gibbethon a lonona gamte tawh, Aijalon a lonona gamte tawh, Gathrimmon a lonona gamte tawh—khuapi li kipia hi; tua ciangin Manasseh minam a langte sung panin Ta-anak a lonona gamte tawh, Gathrimmon a lonona gamte tawh—khuapi nih kipia hi. Kohath mi a om lai behte’ khuapite a vekpi-in a lonona gamte tawh khuapi sawm ahi hi. Tua ciangin Levi beh sunga om Gershon mite tungah, Manasseh minam a langte aa sung panin Bashan gam sunga om mithatte’ adingin bukna khuapi Golan a lonona gamte tawh, leh Be-eshterah a lonona gamte tawh—khuapi nih kipia hi; tua ciangin Issakhar minam panin Kishion a lonona gamte tawh Daberath a lonona gamte tawh, Jarmuth a lonona gamte tawh, Engannim a lonona gamte tawh—khuapi li kipia hi; tua ciangin Asher minam sung panin Mishal a lonona gamte tawh, Abdon a lonona gamte tawh, Helkath a lonona gamte tawh, leh Rehob a lonona gamte tawh—khuapi li kipia hi; tua ciangin Naftali minam sung panin Galile gam sunga om mithatte’ adingin bukna khuapi Kedesh a lonona gamte tawh, Hammothdor a lonona gamte tawh, leh Kartan a lonona gamte tawh—khuapi thum kipia hi. Gershon mite beh tuamtuamte’ khuapite a vekpi-in a lonona gamte tawh khuapi sawm-le-thum ahi hi. Tua ciangin Levi mi a om lai Merari behte tungah, Zebulun minam sung panin Jokneam a lonona gamte tawh, Kartah a lonona gamte tawh, Dimnah a lonona gamte tawh, Nahalal a lonona gamte tawh—khuapi li kipia hi; tua ciangin Reuben minam sung panin Bezer a lonona gamte tawh, Jahaz a lonona gamte tawh, Kedemoth a lonona gamte tawh, leh Mefa-ath a lonona gamte tawh—khuapi li kipia hi; tua ciangin Gad minam sung panin Gilead gam sunga om mithatte’ ading bukna khuapi Ramoth a lonona gamte tawh, Mahanaim a lonona gamte tawh, Heshbon a lonona gamte tawh, Jazer a lonona gamte tawh—a vekpi-in khuapi li kipia hi. Levi beh a om lai ahi Merari beh tuamtuamte’ ading khuapi a kipiate a vekpi-in sawm-le-nih ahi hi. Israel mite’ neihsa lakah Levi mite’ khuapi a vekpi-in a lonona gamte tawh khuapi sawm-le-giat ahi hi. Hih khuapite in a kiim ciatah lonona gam nei hi; hih khuapi khempeuh tua bang ahi hi. Tua bangin Topa in amau’ pate tungah piak dingin a kiciam leitang khempeuh Israel tungah pia hi; amaute in a ngah khit uh ciangin tua lai-ah teeng uh hi. Tua ciangin a pu a pate uh tungah a ciamsa bangin Topa in amaute tungah na khempeuhah tawlngakna pia hi; Topa in a galte khempeuh uh amau khut sungah pia ahih manin a galte uh khatbeek in zong amaute nang zo lo hi. Topa in Israel mite tungah a ciamsa thuhoih khempeuh khat zong a mawkna om lo hi; a vekpi-in tung kim hi. Tua ciangin Joshua in Reuben mite, leh Gad mite, leh Manasseh minam a langte simin, amaute kiangah, “ Topa ’ nasem Moses in note hong thupiak khempeuh zui-in, keimah in note kong thupiakna khempeuhah ka thu na mang khin uh hi; tu ni dong hih hun saupi sung na sanggamte uh na nusia kei uh a, Topa na Pasian uh hong sawlna lim takin zuih ding na ngaihsun uh hi. Tu-in Topa na Pasian un amaute tungah a ciamsa bangin na sanggamte tungah tawlngakna pia hi; tua ahih ciangin Topa ’ nasem Moses in note hong piak Jordan galkhat, note’ neihsa a omna leitang na inn uh ah note kihei-in pai un. Topa ’ nasem Moses in note hong piak thupiakna leh thukham ahi, Topa na Pasian uh it ding, ama lampi khempeuh zuih ding, ama thupiakte zuih ding, amah belh ding, leh na lungsim khempeuh uh leh na nuntakna khempeuh uh tawh ama na nasep ding uh lim takin ngaihsun un,” a ci hi. Tua ahih ciangin Joshua in amaute thupha pia-in ciahsak hi; amaute a inn uh ah ciah uh hi. Tu-in Manasseh minam a langte tungah Moses in Bashan gam sungah neihsa pia khin hi; ahih hangin Joshua in a langte tungah Jordan nitumna lam a sanggamte kiang uh ah neihsa pia hi. Joshua in amaute a inn uh ah sawlin thupha a piak ciangin, amaute tungah, “Na inn uh-ah hauhna lianpi, ganhing tampi tak, ngun, kham, sumngo, sik, leh puan tampi tawh ciahkik un; na galte uh van nasuhte uh na sanggamte uh tawh hawm un,” a ci hi. Tua ahih ciangin Reuben mite leh Gad mite leh Manasseh minam a langte, Moses tung tawnin Topa ’ thupiakna tawh a neih uh amau leitang ahi Gilead gamah pai dingin Kanaan gam sunga om Shiloh mun-ah Israel mite tawh kikhenin a inn uh ah ciah uh hi. Kanaan gam sunga om Jordan gam kiim teng a tun’ uh ciangin Reuben mite leh Gad mite leh Manasseh minam a langte in tua lai Jordan gun kiangah a lian mahmah biakna tau khat lam uh hi. Tua ciangin Israel mite in, “En un, Israel mite’ aa lam pang a, om Jordan kiim gam, Kanaan gamnawl-ah Reuben mite leh Gad mite leh Manasseh minam a langte in biakna tau khat lam uh hi,” a kicihna za uh hi. Israel mite in tua thu a zak uh ciangin amaute do dingin Israel mihon buppi khempeuh Shiloh mun-ah kikhawm uh hi. Tua ciangin Israel mite in Gilead gam-a om Reuben mite leh Gad mite leh Manasseh minam a langte kiangah siampi Eleazar tapa Finehas, leh amah tawh ukpi sawm, Israel minam innkuan panin khat ciat, tua mite Israel behte lakah innkuan lutang ahi-te sawl uh hi. Tua ciangin Gilead gam sunga om Reuben mite, Gad mite leh Manasseh minam a langte kiangah amaute pai uh a, amaute kiangah, “ Topa ’ mihon buppi in, ‘ Topa lehdona-in tu ni-in note adingin biakna tau khat lamna tawh Topa zuihna panin tu ni-in kihei-in Israel Pasian tungah na gamtatnasa uh ahi hih khemna in bang ahi hiam? Ahih hangin tu-in note’ lakna leitang uh nin ahih leh Topa ’ biakbuk a din’na mun Topa ’ leitangah hong pai un la, kote lakah luah hong nei un; Topa lehdo kei un la, Topa i Pasian’ biakna tau simloh note’ ading biakna tau na lamna uh tawh kote a lehdo hong suaksak kei un. Zerah’ tapa Akhan in a ki-ap nate-ah khialin Israel mihon khempeuh tungah hehna hong tung hilo ahi hiam? Ama mawhna hangin amah bek si lo hi,’ ci uh hi,” ci-in a gen uh hi. Tua ciangin Reuben mite, Gad mite, leh Manasseh minam a langte in Israel beh lutangte dawngin, Tua bang hi het lo hi, hong tung ding hunte-ah na tate un kote’ tate tungah, ‘Israel Pasian, Topa tawh no bang kisai na hi uh hiam? Bang hang hiam cih leh no Reuben mite leh Gad mite leh ko’ kikalah gamgi-in Topa in Jordan bawl khin zo hi; Topa sungah no’ tanh bangmah om lo hi,’ a cih khak ding uh launa tawh ka bawl uh ahi hi. Tua ahih ciangin ka tate un Topa a biak ding uh na tate un khaktan kha ding uh hi. Tua ahih ciangin hong tung ding hunte-ah kote tung ahi a, kote’ suan-le-khakte tungah ahi zongin hih bangin hong kicih leh, ‘Meihal biak nading ahi a, biakpiak nading ahi zongin hi loin note leh kote kikalah teci dingin ka pu ka pate un a bawl Topa ’ biakna tau lim en un,’ i ci ding hi, ci-in ka ngaihsun uh hi. Ama biakbuk mai-a om Topa ka Pasian uh biakna tau longal, meihal biakna ahi a, an tawh biakna ahi a, biakpiak nading ahi zongin lamna tawh kote in Topa lehdo-in Topa zuihna panin a pial ka hi het kei uh hi,” a ci uh hi. Siampi Finehas leh amah tawh a om mihon ukpite, Israel beh lutangte in Reuben mite leh Gad mite leh Manasseh mite’ thugenna kammal a zak uh ciangin tua thugennate in amaute lungkim sak mahmah hi. Tua ciangin siampi Eleazar’ tapa Finehas in Reuben mite leh Gad mite leh Manasseh mite tungah, “ Topa tungah note zuautat nai lo na hih manun eite lakah Topa om hi, ci-in tu ni-in i thei hi; tu-in note in Topa ’ daantah nading panin Israel mite na honkhia uh hi,” a ci hi. Tua ciangin siampi Eleazar, tapa Finehas leh ukpite, Gilead gam-a om Reuben mite leh Gad mite kiang panin Israel mite omna Kanaan gamah ciahkik uh a, amaute tungah thu puak kik uh hi. Tua thu in Israel mite lungkim sak hi; Israel mite in Pasian phat uh a, Reuben mite leh Gad mite a teen'na leitang susia-in amaute gal-in do ding gen nawn lo uh hi. Reuben mite leh Gad mite in a biakna tau pen Teci phuak uh hi; “Bang hang hiam cih leh Topa in Pasian ahihna thu eite kikalah teci ahi hi,” amaute in ci uh hi. Topa in amau’ kim-a om gal khempeuh panin Israel mite tawlngakna a piak khit a sawtpi ciangin Joshua teekin a kum tampi pha hi. Joshua in Israel khempeuh, a upate leh a lutangte, a thukhente leh a uliante uh samin, amaute kiangah, “Tu-in kei teekin ka kum tampi pha ta hi; note’ hangin Topa na Pasian un hih minamte khempeuh tungah a bawlnate na mu khin uh hi; bang hang hiam cih leh note’ adingin hong dosakpa in Topa na Pasian uh ahi hi. En un, Jordan panin nitumna lam-a Tuipi Lian dong, a om lai minamte pen ka phiat khiatsa minamte tawh na minamte uh gamh dingin note tungah kong pia khin hi. Topa na Pasian un note mai-ah amaute lehnawt ding a, note’ muhna panin hawlkhia ding hi; Topa na Pasian un note tungah hong ciam bangin amau’ gam na luah ding uh hi. Bang hang hiam cih leh Topa in note mai-ah a lian a tha-hat minamte hawlkhia hi; note ahih leh tu ni dongin mi khat beek in hong nang zo lo hi. Note tungah hong ciamsa bangin note adingin hong dosakpa in Topa na Pasian uh ahih manin note khat in mi tulkhat na tai keek sak uh hi. Tua ahih ciangin Topa na Pasian uh na it ding uh hoih takin ngaihsun un. Bang hang hiam cih leh note nungkikin note lakah a om lai minamte tawh kipawlin amaute tawh kitengin, note in amau’ numeite ten’pihin amaute in note’ numeite a teen’pih leh; Topa na Pasian un note mai-ah hih minamte hawl khia nawn lo ding hi, ci-in tel takin thei un; Topa na Pasian un note hong piak hih leitang hoih panin na sih khit matengun amaute in note’ adingin thangzak leh tehlop, na pang uh a hong sat, na mit sung uh-a ling hi ding uh hi. “Tu-in leitung khempeuh ngeina bangin kei a pai ding ka hi ta a, note khempeuh in na lungsim uh leh na nuntakna uh ah, Topa na Pasian un note tawh kisai nahoih hong ciam khempeuh khat zong mawk mai lo ahihna na thei uh hi; a vekpi-in note’ adingin hong tung a, khat zong mawkmai lo hi. Tua ciangin Joshua in Israel minam khempeuh Shekhem-ah kaikhawmin a upate, a lutangte, a thukhente, leh Israel uliante sam hi; tua ciangin Pasian mai-ah amau ciat kilaak uh hi. Tua ciangin Joshua in mite khempeuh tungah, “Israel Pasian, Topa in hih bangin ci hi. ‘Taang lai-in Eufrates galkhatah na pu na pate uh teeng ngei a, tuate lakah Abraham leh Nahor’ pa Terah in khat ahi hi; amaute in pasian dangte’ na sem uh hi. Tua ciangin Gungal panin na pa uh Abraham la-in Kanaan gam khempeuhah ka paipih a, a suan-le-khakte tampi ka pha sak hi. Ama tungah Isaak ka pia hi; tua ciangin Isaak tungah Jakob leh Esau ka pia hi. A neih dingin Seir mualtung gam Esau ka pia a, ahih hangin Jakob leh a tate Izipt-ah paisuk uh hi. Tua ciangin Moses leh Aaron ka sawl a, a gam sunga ka sepnate tawh Izipt ka gimsak hi; tua khit ciangin note kong pai khiatpih hi. Tua ciangin Izipt panin na pu na pate uh ka pai khiatpih a, tuipi na tung uh hi; Izipt mite in leeng leh sakol tuangte tawh na pu na pate uh San Tuipi-ah delh uh hi. Topa tungah amaute a kiko uh ciangin, amah in note leh Izipt mite kikal-ah khuamial koih a, amaute tungah tuipi paisakin amaute tuumsak hi; Izipt tungah ka bawlna na mit un mu hi; gamlakah sauveipi na om uh hi. Tua ciangin Jordan galkhatah a teeng Amor mite’ leitangah note kong paipih hi; amaute in note hong doin, note khut sungah amaute kong pia a, note in amau’ leitang na luah uh a, note mai-ah amaute ka susia hi. Tua ciangin Moab kumpipa, Zippor’ tapa Balak hong khangin Israel mite hong do hi; amah in mi sawlin note hong samsia dingin Boer’ tapa Balaam samsak hi; ahih hangin Balaam’ thu ka ngai kei hi; tua ahih ciangin amah in note thupha hong pia hi; tua ahih manin Balak’ khut sung panin note kong honkhia hi. Tua ahih ciangin Jordan galkhatah pai-in Jerikho na tung uh a, Jerikho mite in note hong do uh hi. Amor mite, Perez mite, Kanaan mite, Hit mite, Girgash mite, Hiv mite, leh Jebus mite in zong hong do uh hi; note khut sungah amaute kong pia hi. Amor kumpi nihte note mai-ah a hawlkhia tunpite keimah in note mai-ah ka sawl hi; tua in note’ namsau ahi a, note’ thal tawh ahi zongin na dona hang uh hi lo hi. Note in na seploh uh leitang, na satloh uh khuapite, note tungah kong pia a, tuate sungah na teeng uh hi; na suanloh uh leenggui lo pan a gah leh oliv huan pan a gah na ne uh hi.’ “Tua ahih ciangin tu-in Topa zaktak un la, lungsim tak leh thumanna tawh ama na sem un; na pate un Gungal leh Izipt gam sungah a na a sep uh pasiante koih khia un la, Topa ’ na sem un. Topa ’ na nasep nop kei uh leh, Gungal khat-a a na a kisepsak na pu na pate uh pasian ahi a, note’ teen’na gam Amor mite’ pasiante ahi zongin, a na nasep sak ding peuhpeuh uh tu ni-in teel un; ahih hangin kei leh ka innkuanpihte in ahih leh Topa ’ na ka sem ding uh hi,” a ci hi. Tua ciangin mite in dawngin, “A dang pasiante’ na sem dingin Topa nusiat ding ka ngaihsun kei ding uh hi; bang hang hiam cih leh salsuahna Izipt gam panin eite leh i pu i pate hong pai khiatpih, eite’ muhna-ah tua lim liante a bawl, i paina lampi khempeuh leh i nawk mite khempeuh lakah hong kempa in Topa i Pasian ahi hi; Topa in eite mai-ah mi khempeuh, tua gam-a teeng Amor mite hawlkhia hi; tua ahih ciangin amah in i Pasian ahih manin kote in zong Topa ’ na ka sem ding uh hi,” a ci uh hi. Ahih hangin Joshua in mite kiangah, “ Topa ’ na nasem zo kei ding uh hi; bang hang hiam cih leh amah in a siangtho Pasian ahi hi; amah in a aam Pasian ahi hi; note’ thupalsatna ahi a, na khialhna uh ahi zongin hong maisak lo ding hi. Topa nusia-in gamdang pasiante’ na nasep uh leh, note tungah a hoih hong bawl khit ciangin amah hong kihei-in note tungah siatna hong bawlin note hong beisak ding hi,” a ci hi. Tua ciangin mite in Joshua kiangah, “Hilo hi; Topa na’ ka sem ding uh hi,” a ci uh hi. Tua ciangin Joshua in mite kiangah, “Ama na sem dingin Topa na teel khitna uh-ah note adingin note mah in teci na hi uh hi,” a ci hi. Tua ciangin amaute in, “Kote in teci ka hi uh hi,” a ci uh hi. Amah in, “Tua ahih leh note lakah a om gamdang pasiante koih khia un la, Israel Pasian, Topa ’ lamah na lungsim uh nga un,” a ci hi. Mite in Joshua kiangah, “ Topa i Pasian’ na ka sem ding uh a, ama thu ka mang ding uh hi,” a ci uh hi. Tua ahih ciangin Joshua in Shekhem-ah tua ni-in mite tawh thuciamna bawl a, amaute adingin thukhamte leh biakna ngeina kipte a bawl hi. Tua ciangin Joshua in Pasian’ thukham laibu sungah hih kammalte gelh hi; amah in suangtum lianpi khat la-in T opa ’ biakinn sung tawsaw nuai-ah phut hi. Tua ciangin Joshua in mite khempeuh kiangah, “En un, hih suangtum in eite’ langkhatah teci hi ding hi; bang hang hiam cih leh Topa in eite tungah hong thugen khempeuh za khin hi; tua ahih ciangin note in na Pasian uh tungah a man loin na gamtat loh nadingun tua suangtum in note langkhatah teci hi ding hi,” a ci hi. Tua ahih ciangin Joshua in a milip-in amau’ gam ciatah, mite ciahsak hi. Hih thute khit ciangin Topa ’ nasem, Nun’ tapa Joshua si a, a khan’ kum za leh kum sawmkhat pha hi. Tua ciangin amaute in Ga-ash mual leilu lam, Efraim mualtung gam-a om Timnathserah mun-a ama gamhluah leitangah vui uh hi. Joshua khang sung leh Joshua sangin sau a nungta zaw upate khempeuh’ khang sungin Israel mite in Topa ’ na sem uh a, Israel mite’ adingin Topa in a sepna khempeuh thei uh hi. Israel mite in Izipt panin a puak uh Josef’ guhte pen Shekhem’ pa Hamor’ tapate tung panin Jakob in dangka zakhat tawh a lei leitang Shekhem-ah kivui hi; tua leitang pen Josef’ suan-le-khakte’ luah a suak hi. Tua ciangin Aaron’ tapa Eleazar si hi; tua ciangin amaute in Efraim mualtung gam sunga ama tungah a kipia, ama tapa Finehas’ khua Gibeah-ah vui uh hi. Joshua a sih khit ciangin Israel mite in Topa tungah thu dong uh a, “Kote adingin Kanaan mite a do dingin kua paito masa ding ahi hiam?” a ci uh hi. Topa in “Judah paito ding hi; en un, ama khut sungah tua leitang ka pia zo hi,” a ci hi. Tua ciangin Judah in a sanggampa Simeon kiangah, “Kanaan mite i do theih nadingin kei tungah hong kipia gamah kei hong zui in; tua mah bangin nang hong kipia gamah keimah in zong kong zui ding hi,” a ci hi. Tua ahih ciangin Simeon in amah zui hi. Tua ciangin Judah paito a, Topa in amaute khut sungah Kanaan mite leh Perez mite pia hi; amaute in Bezek-ah tua mite tulsawm zo uh hi. Amaute in Bezek-ah Adonibezek tuakin amah tawh kido uh a, Kanaan mite leh Perez mite zo uh hi. Adonibezek tai hi; ahih hangin amaute in delhin man uh a, a khutpite leh a khepite attan uh hi. Tua ciangin Adonibezek in, “A khutpite leh a khepi a ki-attan kumpi sawmsagihte in ka sabuai nuai-ah anneng kia tawm ngei uh hi; ka gamtatnasa bangin Pasian in kei hong thuk hi,” a ci hi. Tua ciangin amaute in Jerusalem-ah amah paipih uh a, tua mun-ah amah si hi. Tua ciangin Judah mite in Jerusalem simin la uh a, namsau tawh vatin a khuapi hal uh hi. Tua khit ciangin Judah mite, mualtung gam, Negeb gam, leh lei niamna-a teeng Kanaan mite a do dingin paisuk uh hi. Tua ciangin Hebron (Hebron min pen a ni dangin Kiriath-arba) ah a teeng Kanaan mite do dingin Judah mite paisuk hi; amaute in Sheshai leh Ahiman leh Talmai zo uh hi. Tua lai panin Debir mite do dingin amaute pai uh hi. Debir min pen ni dangin Kiriath-sefer ahi hi. Tua ciangin Kaleb in, “Kiriath-sefer simin a la pa tungah a zi dingin ka tanu Aksah ka pia ding hi,” a ci hi. Tua ciangin Kaleb naupa Kenaz tapa Othniel in la hi; amah in a zi dingin a tanu Aksah pia hi. Tua nu ama kiangah a pai ciangin a pa kiang panin lo khat a nget nading tua nu in sawl hi; tua nu a la tung panin kum a, Kaleb in ama kiangah, “Bang ut na hi hiam?” a ci hi. Amah in “Letsong khat hong pia in; Negeb gamah hong koih na hih ciangin tuikhukte zong hong pia in,” a ci hi. Tua ciangin Kaleb in ama tungah tuikhuk tungnungte leh tuikhuk nuainungte a pia hi. Tua ciangin Moses’ sungpate nam ahi Ken’ suan-le-khakte, Judah mite tawh nisuh khuapi panin Negeb gam Arab gei-a om Judah gam lakah paito uh hi; amaute tua lai mun-ah tungin tua mite tawh teeng khawm uh hi. Judah in a sanggampa Simeon tawh pai khawmin Zefath-ah a teeng Kanaan mite va zo-in susia mang uh hi. Tua ahih ciangin tua khuapi min Hormah kici hi. Judah in zong Gaza leh a gam, leh Askhelon leh a gam, leh Ekron leh a gamte la hi. Topa in Judah tawh om a, amah in mualtung gam teng luah hi; ahih hangin zang gam-a teeng mite amah in hawlkhia zo lo hi; bang hang hiam cih leh amaute in sik leeng nei uh hi. Tua ciangin Moses in a gensa bangin Kaleb tungah Hebron kipia hi; tua sung panin amah in Anak tapa thumte hawlkhia hi. Ahih hangin Benjamin mite in Jerusalem-ah a teeng Jebus mite hawlkhia lo uh hi; tua ahih ciangin tu ni dongin Jerusalem-ah Jebus mite in Benjamin mite tawh teeng khawm uh hi. Josef innkuan zong Beth-el do dingin paito uh hi; Topa in amaute tawh om hi. Tua ciangin Josef innkuante in thu kansim dingin Beth-el ah mi sawl uh hi. (Tua khuapi min pen a ni dangin Luz ahi hi.) Thu kansimte in khuapi panin hong paikhia mi khat mu uh a, ama kiangah, “Khuapi lutna lampi hong hilh in, kong thuum uh hi, nang tungah kong diktat ding uh hi,” a ci uh hi. Tua ciangin amah in khuapi lutna lampi amaute lak hi; amaute in namsau tawh tua khuapi vat uh a, ahih hangin tua mipa leh a innkuante suakta sak uh hi. Tua ciangin Hit mite gamah tua mipa pai-in khuapi khat sat a, a min pen Luz ci-in phuak hi; tu dongin tua khua min in tua mah ahi hi. Manasseh in Bethshean leh a khua neute-a teeng mite, Ta-anak leh a khua neute-a teeng mite, Dor leh a khua neute-a teeng mite, Ibleam leh a khua neute-a teeng mite ahi a, Megiddo leh a khua neute-a teeng mite ahi zongin hawlkhia lo hi; ahih hangin Kanaan mite tua leitangah teeng teitei uh hi. Israelte a thahat ciangin amaute in aana tawh na a sem dingin Kanaan mite koih uh a, hawlkhia siang lo uh hi. Efraim in Gezer-ah a teeng Kanaan mite hawlkhia lo hi; tua ahih manin Kanaan mite Gezer-ah amaute lakah teeng uh hi. Zebulun in Kitron-a teeng mite ahi a, Nahalol-a teeng mite ahi zongin hawlkhia lo hi; Kanaan mite amaute lakah teengin aana tawh nasemte suak uh hi. Asher in Akko-a teeng mite, Sidon-a teeng mite, Ahlab-a teeng mite, Aksib-a teengte, Helbah-a teengte, Afik-a teengte ahi a, Rebon-a teengte ahi zongin hawlkhia lo hi; tua gam-a teeng Kanaan mite lakah Asher mite teeng uh hi; bang hang hiam cih leh amaute in hawlkhia lo uh hi. Naftali in Bethshemesh-a teengte ahi a, Beth-anath-a teengte ahi zongin hawlkhia loin, tua gam-a teeng Kanaan mite lakah teeng uh hi; ahi zongin Bethshemesh leh Beth-anath-a teeng mite in amaute adingin aana tawh na a sem mite suak uh hi. Amor mite in mual gamah Dan mite notkik uh hi, amaute in zang gamah paisuk sak lo uh hi; Amor mite, Harheres, Aijalon, leh Sha-albim-ah teeng teitei uh hi, ahih hangin Josef innkuante in amaute gawt semsem a, amaute in aana tawh nasemte suak hi. Amor mite’ gamgi in Akrabbim kahtohna, Sela leh a tung lam pan kipan hi. Tu-in Gilgal panin Bokhim-ah Topa ’ vantungmi paito hi. Amah in, “Izipt panin note kong paipih to a, na pu na pate uh tungah piak dinga ka ciam leitangah note kong paipih hi. Keimah in, ‘Note tawh ka thuciam ka siasak ngei kei ding a, hih gam-a teeng mite tawh thuciamna na bawl kei ding uh hi; amau’ biakna taute na susia ding uh hi,’ ka ci hi. Ahih hangin note in ka thupiak na mang kei uh hi. Hih banga na gamtat uh bang ahi hiam? Tua ahih ciangin tu-in keimah in, note mai-ah amaute ka hawlkhia kei ding hi; amaute in note’ ling suak ding uh a, a pasiante uh note’ adingin thang hi ding hi,” a ci hi. Topa vantungmi in hih thute Israel mite khempeuh tungah a gen ciangin, mite nakpi-in kap uh hi. Amaute in tua mun pen Bokhim ci-in phuak uh hi; tua lai mun-ah Topa tungah biakna pia uh hi. Joshua in mite a ciahsak ciangin, Israel mite leitang luah dingin amau’ gamh ciatah pai uh hi. Mite in Joshua nuntak sung leh, Israelte adingin Topa ’ sepsa na lian khempeuh a mu, Joshua sanga a khan’ sau zawte khempeuh nuntak sungin Topa ’ na sem uh hi. Tua ciangin Topa ’ nasem ahi, Nun’ tapa Joshua, a khan’ kum za leh kum sawmkhat a phak lai takin si hi. Amaute in Ga-ash Mual leilu lam, Efraim mualtung gam sung, Timnathheres-a ama luahna huan sungah vui uh hi. Tua ciangin tua khang mite khempeuh zong a pu a pate uh kiang kizuansak hi; amaute khit ciangin Topa hita leh, Israelte adingin a septe hita leh a thei lo khang thak hong piang uh hi. Tua ciangin Israel mite in Topa muhna-ah a sia gamta-in Baalte’ na sem uh hi; Izipt gam panin amaute a pai khiatpih a pu a pate uh Pasian’ ahi Topa amaute in nusia uh hi; amau’ kiim-a om mite’ pasiante lak panin pasian dangte nung zui uh a, tuate mai-ah kun uh hi; amaute in Topa phinin Topa hehsak uh hi. Amaute in Topa nusia uh a, Baalte leh Asharoth pasiante bia uh hi. Tua ahih ciangin Israelte tungah Topa ’ hehna so a, amaute’ na a sut, mi na a sut thei mite tungah amaute pia hi; a kiim-a om a galte tungah amaute pia a, amaute in a galte uh nang zo nawn lo uh hi. Amaute, galsim dingin a kuan khit peuhmah uh ciangin, Topa in a hilhkholhsa leh Topa in amaute tungah a kiciamsa bangin amaute lang khatah a sia lamin Topa pang hi; tua ahih ciangin amaute in lungkhamna tuak uh hi. Tua ciangin, amaute na a sut gawp mite’ vangliatna panin amaute a honkhia thukhente Topa in khangsak hi. Ahi zongin amaute in a thukhente uh thu ngai lo uh hi; bang hang hiam cih leh amaute in pasian dangte tawh paktatna gamta-in tuate mai-ah kun uh hi; Topa ’ thupiakna a mang amau’ pute pate’ tot lampi panin amaute pial pah uh hi, amaute in Topa ’ thu mang lo uh hi. Topa in amaute adingin thukhente a khan’sak peuhpeuh ciangin thukhente tawh Topa om a, thukhente nuntak sung tawntung a galte uh khut sung panin amaute hon hi; bang hang hiam cih leh a gimsak a nengniamte’ hangin amau’ tauna in Topa ’ hehpih nading piangsak hi. Ahih hangin thukhente a sih peuhpeuh ciangin amaute kihei kikin a pu a pate uh sangin a sia zaw-in gamta uh a, pasian dangte nung zui uh a, amaute’ na semin a mai uh-ah kun uh hi; amau gamtatnate uh ahi a, a lungkhauhnate uh ahi zongin khia lo uh hi. Tua ahih ciangin Israelte tungah Topa heh mahmah a, amah in, “Hih mite in amau pute ka thupiak ka thuciamna khialin keima thu ngai lo uh ahih manin, Joshua a sih lai-in a nusiat minamte khat zong tu-a kipanin amaute mai-ah ka hawlkhia kei ding hi, amau’ pute pate in Topa ’ lampi a zuih bangin zuih ding a don uh hiam a don kei uh hiam cih hih mite tawh Israel ka ze-et ding hi,” a ci hi. Tua ahih ciangin Topa in tua minamte thakhatin hawlkhia loin nusia a, Joshua khut sungah amaute pia lo hi. Tu-in Israelte khempeuh sung panin Kanaan gam sungah gal dona a thei kha nai lo Israelte ze-et nadingin Topa in a siit minamte in hihte ahi hi; Israel mi tua khangte in gal dona a theihtheih nading, ni dangin a kithei ngei lo gal dona tua bang mite a hilh theih nading bek ahi hi. Tua minamte in: Filistia mi ulian ngate, Kanaan mi khempeuh, Sidon mite, leh Baalhermon Mual panin Hamath lutna ciang dong Lebanon Mual tungah a teeng Hiv mite ahi hi. Moses tung tawnin a pu a pate uh a thupiak, Topa ’ thupiaknate Israelte in a mang uh hiam cih a kitheih nadingin amaute pen Israelte a kize-etna hi. Tua ahih ciangin Kanaan mite, Hit mite, Amor mite, Perez mite, Hiv mite, leh Jebus mite lakah Israel mite teeng uh hi; amaute in a zi dingun a tanute uh la a, amaute tanute a tapate uh tungah pia uh hi; amaute in a pasiante uh na sem uh hi. Topa ’ muhna-ah Israel mite a sia gamta-in, Topa amau’ Pasian mangngilh uh a, Baalte leh Asheroth-te’ na sem uh hi. Tua ahih ciangin Israelte tungah Topa ’ hehna so a, amah in Mesopotamia kumpipa Kushan-rish-athaim tungah amaute zuak hi; Israel mite in Kushan-rish-athaim’ na kum giat sem uh hi. Ahih hangin Israel mite Topa tungah kiko uh a, Topa in Kaleb’ naupa Kenaz’ tapa Othniel, amaute a honkhiapa ahi honpa khat Israel mite adingin khangsak hi. Topa ’ Kha ama tungah tung a, amah in Israel mite’ thukhen a suak hi; galdo dingin kuan khia a, Topa in ama sungah Mesopotamia kumpipa Kushan-rish-athaim pia hi; Kushan-rish-athaim tungah amah gualzo hi. Tua ahih ciangin a gam in kum sawmli sung tawlngakna hun nei hi. Tua ciangin Kenaz’ tapa Othniel si hi. Tua ciangin Topa muhna-ah Israel mite a sia gamta kik uh hi; tua ciangin Topa in Israelte lang khatah Moab kumpipa Eglon thahatsak hi; bang hang hiam cih leh Topa muhna-ah amaute a sia gamta uh hi. Eglon in Ammon mite leh Amalek mite ama kiangah khawm a, va kuan-in Israelte va zo hi; amaute in nisuh khuapi luah uh hi. Israel mite in Moab kumpi Eglon’ na kum sawm leh kum giat sung sem uh hi. Ahih hangin Topa tungah Israel mite a kiko uh ciangin, Topa in Benjamin mi, Gera tapa a veikhoi Ehud, amaute’ honpa dingin khangsak hi. Israel mite in ama tung tawnin Moab kumpipa Eglon tungah siah puak uh hi. Ehud in ama adingin lang nih a hiam, tong khat a sau namsau khat bawl hi; amah in a puan nuai a taklam phei tungah tua namsau khih hi. Tua ciangin amah in Moab kumpipa Eglon tungah a siah sung hi. Eglon pen a thau mahmah mi khat ahi hi. Ehud in a siah sun’ a man khit ciangin siah a puak mite ciahsak hi. Ahih hangin Gilgal kiang suang milimte omna panin amah kileh kikin, “Kumpipa aw, nang tungah gen ding thusim khat ka nei hi,” a ci hi. Tua ciangin amah in, “Gam dai un,” ci-in thu pia hi. Amah a cing mi khempeuh ama omna panin paikhia uh hi. Innkhum zang khuakhal inn inndei a votna sungah amah guak tu-in a om lai takin ama kiangah Ehud hong pai hi. Ehud in, “Pasian kiang panin nang tungah gen ding thu khat ka nei hi,” a ci hi. Tua ciangin a tutna panin amah ding to hi. Tua ciangin Ehud in a vei lam khut tawh a tak lam phei panin a namsau la-in, tua-pa’ gil sungah siatsuk hi; a namsau banah a bul zong tum a, a thau in a namsau khakcip hi; bang hang hiam cih leh a gil panin amah in a namsau dok lo hi; tua ciangin a ek lawt khia hi. Tua ciangin inndei pua-ah Ehud pai khia-in, innkhum zang inndei kongkhakte amah khaknelhin tuate kalh hi. Amah a paikhiat khit ciangin nasemte hong pai hi; innkhum zang inndei kongkhakte a kikalh a muh uh ciangin amaute in, “Inn vot sunga inndei ah awng hawh hi-in teh,” ci in ngaihsun uh hi. A cih nading uh a theih loh zah dong uh ngak uh hi; ahih hangin innkhum zang inndei kongkhak amah in a hon’ loh veve ciangin, amaute in a tawhtang la-in hong uh hi; sual tungah a topa uh na si hi. Amau’ zia kikalin Ehud tai-in suang milimte kheng a, Se-irah-ah tai hi. Amah a tun’ ciangin Efraim mualtung gamah peengkul gingsak hi; mualtung gam panin Israel mite amah tawh paisuk uh a, amau’ lutangin amah nei uh hi. Amah in amaute kiangah, “Ka nung hong zui un; bang hang hiam cih leh Topa in na gal uh Moab mite na khut sung uh ah hong pia zo hi,” a ci hi. Tua ahih ciangin ama nungah amaute paisuk uh a, Moab mite kiang panin Jordan ngahmunte la-in mi khat zong galkah sak lo uh hi. Tua hunin amaute in a thahat a siam Moab mite khempeuh, mi tulsawm bang that uh hi; mi khat zong suakta lo hi. Tua ahih ciangin tua ni-in Moab in Israelte’ khut nuai-a suak hi. Tua gam in kum sawmgiat sung tawlngakna nei hi. Ama khit ciangin Anath tapa Shamgar hi a, ciangkhut zum tawh Filistia mite zaguk a thatpa ahi hi; amah in zong Israelte honkhia hi. Ehud a sih khit ciangin Israel mite in Topa ’ muhna-ah a sia gamta kik uh hi. Tua ciangin Topa in Hazor-ah a uk, Kanaan kumpipa Jabin khut sungah amaute pia hi; ama galkapte a ukpa pen, Harosheth-ha-goiim-ah a teeng Sisera ahi hi. Tua ciangin Israel mite huhna ngen dingin, Topa tungah kiko uh hi; bang hang hiam cih leh amah in sik leeng zakua nei a, Israel mite kum sawmnih sung nakpi takin nengniam hi. Tua hun lai takin Lappidoth’ zi, kamsang numei Deborah in Israelte thu khen hi. Tua nu, Efraim mualtung gam sung Ramah leh Beth-el kikal nisuh kung nuai-ah thu khen hi; thu a khensak dingin ama kiangah Israel mite pai uh hi. Amah in mi sawlin Naftali gam Kedesh panin Abinoam’ tapa Barak samsak a, ama kiangah, “ Topa, Israelte’ Pasian’ in nang thu hong pia-in, ‘Pai in, Tabor Mual-ah na mite khawm in la, Naftali minam leh Zebulun minam panin mi tulsawm la in hong ci hi lo ahi hiam? Keimah in Jabin’ galkap mang Sisera, Kishon gun-ah nang hong dawntuah dingin a leengte leh a galkapte tawh ka kai khia ding hi; na khut sungah amah kong pia ding hi,’ hong ci hi,” a ci hi. Barak in ama kiangah, “Kei tawh nong kuan ding leh, ka kuan ding hi; ahih hangin kei tawh nong kuan kei ding leh ka kuan kei ding hi,” a ci hi. Tua ciangin amah in, “Nang tawh kong kuan taktak ding hi; ahi zongin, na pai nading lampi in nangma minthan’ nading hong tun’pih lo ding hi, bang hang hiam cih leh Topa in numei khat khut sungah Sisera pia ding hi,” a ci hi. Tua ciangin Deborah ding-in Barak tawh Kedesh-ah pai hi. Barak in Kedesh-ah Zebulun leh Naftali sam hi; ama kiangah mihing tulsawm kuan to uh hi; amah tawh Deborah kuanto khawm hi. Tu-in Moses’ sungpa Hohab’ suan-le-khak Ken mite sung panin Ken mi Heber paikhia a, Kedesh kiang, Zafananim-a tawsaw ciang pekah a puanbuk lam hi. Abinoam’ tapa Barak, Tabor Mual-ah paito khin ci-in Sisera kiangah a kigen ciangin, Sisera in a leeng khempeuh, sik leeng zakua, leh ama kianga om mi khempeuh, Harosheth-ha-goiim panin Kishon gun-ah sam khia hi. Tua ciangin Deborah in Barak kiangah, “Ding in! Bang hang hiam cih leh Topa in na khut sungah Sisera hong piak ni ahi hi. Na mai-ah Topa pai hilo ahi hiam?” a ci hi. Tua ahih ciangin mihing tulsawm in zui-in Tabor Mual panin Barak paisuk hi. Topa in Barak mai-ah Sisera leh a leengte khempeuh leh a galkapte khempeuh taisak hi; tua ciangin Sisera a leeng tung pan tuakin a khe-in tai hi. Barak in Harosheth-ha-goiim ciang dong a leengte leh a galkapte delh a, Sisera’ galkapte khempeuh namsau tawh kithatin bei mang uh hi; mi khat zong suakta lo hi. Ahih hangin Sisera, Ken mi Heber’ zi Jael’ puanbuk-ah a khe-in tai hi; bang hang hiam cih leh Hazor kumpipa Jabin leh Ken mi Heber’ innkuante kilem uh hi. Sisera a dawn dingin Jael pusuak a, ama kiangah, “Hong kihei in, ka Topa aw, kei lamah hong kihei in; lau kei in,” a ci hi. Tua ahih ciangin ama lam puanbuk-ah amah pai a, tua nu in sualphah puan khat tawh amah khuh hi. Amah in tua nu kiangah, “Hong thuum ing, dawn ding tui tawm hong pia in; bang hang hiam cih leh ka dang a tak hi,”a ci hi. Tua ahih ciangin amah in bawngnawi koihna savun thawl hong-in dawnsak a, amah khuh hi. Amah in tua nu kiangah, “Puanbuk kongah ding in la, mi khatpeuh hong pai-in na kiangah, ‘Hih lai-ah mi khatpeuh a om hiam?’ hong cih leh, ‘Om kei,’ na ci in,” a ci hi. Ahih hangin Heber’ zi Jael in puanbuk khetphim khat la a, a khut-ah sek khat tawi-in, ama kiangah dam takin pai a, a lung khamna hangin ihmucip-in a om lai takin a khetphim in lei a bat dongin a paang-ah khensuk hi. Tua ahih ciangin amah si hi. En in, Barak in Sisera hong delh ciangin amah dawn dingin Jael pusuak a, ama kiangah, “Hong pai in, na mi zon’ kong lak ding hi,” a ci hi. Tua ahih ciangin tua nu’ puanbuk sungah amah pai hi; tua lai-ah Sisera a paang-ah puanbuk khetphim tawh si-in na om hi. Tua ahih ciangin tua ni-in Israel mite mai-ah Pasian in Kanaan kumpi Jabin nuaisiah hi. Israel mite in Kanaan kumpipa Jabin a suksiat matengin amaute in Kanaan kumpipa Jabin tungah thuak hak semsem uh hi. Tua ciangin Deborah leh Abinoam’ tapa Barak in tua ni-in la sa uh hi: “Makaite in Israelte sungah makai uh a, mite amau mahmah utna tawh kipia uh hi, Topa phat un! ”Ngai un, Kumpite aw; na bil uh ngat un, Uliante aw; Topa tungah ka sa ding hi, Israelte Pasian, Topa tungah la ngaih ka sa ding hi. “ Topa aw, Seir panin na paikhiat ciang, Edom gam panin na paikhiat ciang, leitung liing hi. Vantung panin guahzu hi, hi hi, meiite in tui hong khia hi. Topa mai-ah mualte kiliing hi, Israelte’ Pasian, Topa ’ mai Sinai gal khatah. “Anath’ tapa Shamgar’ hun lai, Jael’ hun lai-in, a honhon a, khualzinte om nawn lo a, khualzinte lam gei-ah pial uh hi. Israel sunga lokhote khawl hi, amaute khawl hi, nang, Deborah nong khan’ mateng, Israel sungah nu banga nong khan’ mateng, A thak pasiante a kiteel ciangin, kulh kongpi sungah gal om pah hi. Lum ahi a, tei ahi zongin Israel tul sawmlite’ lakah kimu ahi hiam? Mite lak panin utna tawh amau a kipia tawm Israel a ukte lamah ka lungsim pai hi. “A thu gen un, no la puang tungah a tuangte, sualphah puan hoih tungah a tute leh lampi-ah a paite aw. Tui phual-a lasakna a tumte’ gin’na-ah, amaute in Topa ’ gualzawhna, Israel sunga a lokhote in a gualzawhna genkik uh hi. “Tua ciangin Topa ’ mite kulh kongpite-ah paisuk uh hi. “Khanglo in, khanglo in, Deborah! Khanglo in, khanglo in, la khat sa in! Tho in, Barak, na gal matte pai khiatpih in, Abinoam’ tapa aw. Tua ciangin ulianpa’ mi a om laite paisuk uh a, ama ading a dosak dingin Topa ’ mite paisuk uh hi. Amaute in Amalek ah kipan khia-in, Efraim panin ding khia uh a, tua kuam-ah pai-in amaute’ nungah Benjamin, in a behte tawh hong zui uh hi; Makhir panin a ukte hong pai sukin, Zebulun panin ulianpa’ ciangkhut a tawite hong paisuk uh hi; Issakhar uliante Deborah tawh hong pai a, Barak tungah Issakhar thuman hi; kuam sung ama khe phungah amaute kituah uh hi. Reuben behte lakah nakpi tak-a lungsim ngaihsutna om hi. Bang hangin tuu-khawkte lakah tuuhonte’ ading tamngai kitum ngai dingin zekai na hi hiam? Reuben behte lakah nakpi tak-a lungsim ngaihsutna om hi. Jordan gal khatah Gilead om hi; Dan, bang hangin teembawte tawh om ahi hiam? Asher in tuipi gei-ah tu lai a, leilak a tun’na gei-ah teeng hi. Zebulun in sihna dongin gal sungah a kipia ngam mi ahi hi; Naftali zong, gamlak a sangna mun-ah tua bangmah ahi hi. “Kumpite hong pai-in do uh hi; tua ciangin Kanaan kumpite in Megiddo tuite gei, Ta-anak-ah do uh hi; amaute in a kinusia ngunte ngah lo uh hi. Vantung panin aksite in do uh a, amau paina ciat panin Sisera do uh hi. Kishon guntui khang in amaute tai a, a leeng vanvan tuikhang, Kishon tuikhang in tai hi. Thakhauh takin mai ka nawt suak ding hi! “Tua ciangin sakolte khe, a koptaina, a sakol hangte koptaina ging hi. “ Topa ’ vantungmi in, ‘Meroz samsia in, a sunga teeng mite nasia takin samsia in, bang hang hiam cih leh Topa a huh dingin a thahatpa dona ah Topa a huh dingin hong pai lo uh hi,’ a ci hi “Numeite lakah thupha ngah pha pen Jael, Ken mi Heber’ zi, puanbuk a teeng numei lak pan thupha ngah phapen hi ta hen. Amah in tui ngen a, tua nu in bawngnawi pia hi, ulian hai sungah tua nu in bawngnawi thau-khal paipih hi. Amah in puanbuk khetphim a khutin zam a, a taklam khutin nasemte’ khetbuk zam hi; Sisera khatvei sat a, a lutang satkhamin, amah in phelkhamin a paang sun hi. Amah tuk hi, amah puk hi, tua nu khe kiangah amah taang loin om hi; ama khe phungah amah tuk hi, amah puk hi; a tukna munah, amah a si-in puk hi. “Kongvangneu panin amah khuadak a, a kikalh simsiam kawm panin Sisera’ nu khuadak hi: ‘Bang hangin a leeng hong ciah ding hih tanvei sawt hiam? A leeng khegingte bang hangin hici zekai hiam?’ a ci hi. A numeite a pilpen nu in dawng hiam, dawng lo hi, amah leh amah kidawng hi. ‘Amaute in van kinusiate mu-in hawm hilo ahi hiam?—Mi khat ciangin nungak khat ahih kei leh nih pai; a kinusia puan kinimte Sisera adingin a kinusia puan kinim a kizemte, a kinim a kizem puan nihte ka ngawng’ ading maw?” a ci hi. “Tua ahih ciangin na gal khempeuh si khin uh hi. Topa! Ahih hangin na lawmte pen a vangliatna tawh a suak ni bang ta hen,” a ci hi. Tua ciangin tua gam in kum sawmli sung tawlngakna nei hi. Israel mite Topa muhna-ah a sia gamta uh hi; Topa in Midiante’ khut sungah amaute kum sagih sung pia hi. Israelte tungah Midiante gualzo hi; Midiante hangin Israel mite in amau adingin mual tungah a om bukna munte, leh leihawmte leh mun muanhuaite bawl uh hi. Bang hang hiam cih leh Israelte in khai a tuh peuhmah uh ciangin Midian mite leh Amalek mite leh Nisuahna lam mite hong pai-in amaute do hi; amau’ lang khatah amaute in giahphual satin Gaza kiim ciangciang dong lei pan-a piangte susia uh a, Israel sungah nuntak nading bangmah nusia loin, tuu ahi a, bawngtal ahi a, la ahi zongin nusia lo hi. Bang hang hiam cih leh amaute a ganhingte leh a puanbukte uh tawh hong pai-in, kauphe bangin tamin hong pai uh hi; amaute leh a kalaohte uh kisim zo lo hi; tua ahih ciangin amaute hong tun’ ciangin gam teng bei sak uh hi. Midiante hangin Israelte kiniam koih mahmah hi; Israel mite in Topa tungah huhna ngenin kiko uh hi. Midiante hangin Israel mite Topa tungah a kiko uh ciangin, Topa in Israel mite kiangah kamsang khat sawl hi; amah in amaute kiangah, “Israelte’ Pasian, Topa in hih bangin ci hi: Izipt panin note kong pai khiatpih a, salsuahna panin note kong pai khiatpih hi; Izipt mite khut sung pan, leh note hong nengniam mite khempeuh khut sung pan note hong honkhia a, note mai-ah amaute hawl khia-in, amau’ leitang note kong pia hi; tua ciangin note kiangah, “Keimah in Topa na Pasian uh ka hi hi; na teen’na uh Amor mite pasiante zahtakna na pia kei ding uh hi,’ kong ci hi. Ahih hangin note in ka thu na ngai kei uh hi,” a ci hi. Tu-in a tapa Gideon in Midian mite muh loh dingin leenggah sukna-ah mangbuh satin a om lai takin, Ofrah-ah Abiezer mi Joash neihsa tawsaw nuai-ah Topa ’ vantungmi hong pai-in hong tu hi. Topa ’ vantungmi ama tungah kilangin ama kiangah, “ Topa in nang tawh hong om hi, nang a thahat a vanglian mipa aw,” a ci hi. Gideon in ama kiangah, “Kong thuum hi, sia aw, Topa in kote tawh hong om ahih leh, bang hangin hih nate khempeuh ko tungah hong tung ahi hiam? Ka pate un kote tungah hong genin ‘ Topa in Izipt panin eite hong paipih to hilo ahi hiam?’ a cih uh a lamdang ama sepnate khempeuh koi-ah om ahi hiam? Ahih hangin tu-in Topa in kote hong paaikhia-in, Midiante’ khut sungah hong pia khin hi,” a ci hi. Tua ciangin ama lamah Topa kihei-in, “Hih nangma vangliatna tawh pai in la, Midiante khut sung panin Israelte honkhia in; nangmah hong sawl hilo ka hi hiam?” a ci hi. Tua ciangin amah in ama kiangah, “Kong thuum hi, Topa aw, Israelte bangci hot khiat ding ka hi hiam? En in, keimah behte in Manasseh sungah a hat lopen hi a, ka innkuan sung panin kei in a neu pen ka hi hi,” a ci hi. Topa in ama kiangah, “Nang tawh kong om ding a, nangmah in mihing khat bang lelin Midian mite na vatgawp ding hi,”a ci hi. Tua ciangin amah in ama kiangah, “Tu-in nang tungah maipha ka muh leh, kei tawh a kiho mipa in nang na hihna lim khat hong lak in. Kong thuum hi, ka letsong hong puakin nang kiangah hong pai-in nangma mai-ah kong koih mateng hih lai panin paikhia kei in,” a ci hi. Amah in, “Nong pai kik mateng ka na om ding hi,”a ci hi. Tua ahih ciangin Gideon a inn-ah pai-in keelno khat, leh annel seu khat panin silngo sawhloh moh bawl hi; a sa ciang sung khatah koihin a satui beel sung khatah koih a, tawsaw nuai ama kiangah tuate paipihin pia hi. Tua ciangin Pasian' vantungmi in ama kiangah, “Sa leh silngo sawhloh moh la-in hih suang tungah koih in la, a tungah a satui sung in,” a ci hi. Tua mah bangin amah in hih hi. Tua ciangin Topa ’ vantungmi in a khut sunga om ciangkhut dawn dawksakin, sa leh silngo sawhloh mohte su hi; a suang panin mei piangkhia-in sa leh silngo sawhloh moh kangtum hi; tua ciangin ama muhna panin Topa ’ vantungmi mang hi. Tua ciangin Gideon in amah Topa ’ vantungmi ahih lam thei hi; Gideon in, “Ala, Topa Pasian! Topa ’ vantungmi mai kituahin ka mu khin kha hi,” a ci hi. Ahih hangin Topa in ama kiangah, “Nopna na tungah om ta hen; lau kei in, na si kei ding hi,” a ci hi. Tua ciangin Gideon in Topa adingin biakna tau khat tua lai-ah lam a, tua pen, Topa in nopna ahi hi, ci-in phuak hi. Tua pen, Abiezer mite’ neihsa Ofrah-ah tu ni dongin ding lai hi. Tua zan-in Topa in ama kiangah, “Na pa’ bawngtal, kum sagih a pha a bawngtal nihna la in la, na pa’ neih Baal biakna tau phelin, a gei-a om Asherah milim phuk in; tua ciangin hih lai mun muanhuai dawn-ah Topa na Pasian adingin biakna tau khat lamin, a suangte a ngeina ding bangin koih in; tua ciangin bawngtal nihna la-in, na phuk Asherah milim sing tawh meihal biakna-in pia in,” a ci hi. Tua ahih ciangin Gideon in a nasemte mi sawm la-in, Topa in ama tungah a gen bangin hih hi; ahih hangin sun-in a hih ding a innkuanpihte leh a khua mite kihta lua ahih manin zan-in a hih hi. Tua khua mite zingsang tungin a thawh uh ciangin, en in, Baal biakna tau kiphel khia-in a gei-a om Asherah milim kiphuk a, a kilam thak biakna tau tungah bawngtal nihna kipia hi. Amaute khat leh khat kiangah, “Hih na kua in hih hiam?” kici uh hi. Amaute in a thu kanin a dot khit uh ciangin, “Joash tapa Gideon in hih hi,” kici uh hi. Tua ciangin tua khua mite in Joash kiangah, “Na tapa in Baal biakna tau phel khia-in a gei-a om Asherah milim phuk ahih manin a sih theih nadingin amah hong pai khiatpih in,” a ci uh hi. Ahih hangin Joash in ama lang khatah a pang mite khempeuh tungah, “Baal pan’pih ding a, ama tupna hutpih ding na hi uh hiam? Amah a pan’pih peuhmah zingsang ciangin kithat ding hi. Amah in pasian ahih leh amah in ama ading pang tawm hen, bang hang hiam cih leh ama biakna tau kiphel khin hi,” a ci hi. Tua ahih ciangin tua ni-in Gideon, “Keima lang khatah Baal pangsak un,” a cih nopna ahi Jerubbaal min kiphuak hi, bang hang hiam cih leh Gideon in a biakna tau phel hi. Tua ciangin Midian mite leh Amalek mite leh Nisuahna lam mite khempeuh hong paikhawm uh a, amaute in Jordan kantanin Jezre-el Kuam-ah giahphual sat uh hi. Ahih hangin Gideon tungah Topa ’ Kha hong tung hi; amah in peengkul gingsak a, amah zui dingin Abiezer mite kisam khia hi. Amah in Manasseh gam khempeuhah kamtaite sawl hi; amaute zong amah zui dingin kisam hi. Amah in Asher, Zebulun, leh Naftali kiangah kamtaite sawl hi; a dawn dingin amaute paito uh hi. Tua ciangin Gideon in Pasian kiangah, “Na gensa bangin keima tha tawh Israelte na hotkhiat ding leh, en in, ancilna sual tungah tuumul lom khat ka koih hi; tuumul tung bekah daitui omin leilak dang khempeuh a keu leh, na gensa bangin keima tha tawh Israelte na honkhia ding hi, cih ka thei ding hi,” a ci hi. Tua mah bangin piang hi. A zingsang ciangin tho baihin a tuumulte a tui suk a, tuumul panin tui hai khat dim suk khia hi. Tua ciangin Gideon in Pasian kiangah, “Kei tungah hong heh kei in, tu-a khatvei bek hong pausak lai in; kong thuum hi, tuumul tawh hih khatvei bek hong sinsak lai in; kong thuum hi; tuumul tung bek keu sak in la, mun dang leitung khempeuhah daitui om sak in,” a ci hi. Tua mah bangin Pasian in tua zan-in hih hi; bang hang hiam cih leh tuumul tung bek keu a, mun dang leitung khempeuhah daitui om hi. Tua ciangin Jerubbaal (Gideon a cihna) leh amah tawh a om mi khempeuh zingsangin tho baihin Harod tuikhuk gei-ah giahphual sat uh hi; Midiante’ giahphual pen amau kiang pan leilu lam, Moreh mual kiang, kuam sungah om hi. Topa in Gideon kiangah, “Amau’ khut sungah Midian mite piak nadingin nang tawh a omkhawm mite kei adingin tam lua hi, tua hi kei leh kei tungah Israelte kisialin, ‘Komau’ hatna hangin ka gualzo uh hi,’ ci kha ding uh hi. Tua ahih ciangin tu-in mite’ zakin taangko in la, ‘Lau-in a liing mi peuhmah Gilead panin inn-ah ciah un,’ ci in,” a ci hi. Tua ciangin Gideon in amaute ze-et hi; tul sawmnih leh tulnih ciah kikin, tulsawm om lai hi. Tua ciangin Topa in Gideon kiangah, “Mite tam lua lai hi; amaute tui-ah paipih in, nang adingin tua mun-ah amaute kong sinsak ding hi; nang kiangah, ‘Hih mipa nang tawh hong pai ding hi,’ ka cihpa nang tawh hong pai ding hi; nang kiangah, ‘Hih mipa nang tawh hong pai lo ding hi,’ ka cih peuhpeuhpa pai lo ding hi,” a ci hi. Tua ahih ciangin amah in tui phual-ah mite paipih suk hi; Topa in Gideon kiangah, “Ui in a liah bangin a lei tawh tui a liak mi peuhmah na tuam koih ding hi; tua mah bangin tui dawn dingin a khukdin’ suk peuhmah zong na tuam koih ding hi,”a ci hi. Tui a liak, a khut uh a kam-ah a tuah mi zathum ahi hi; ahih hangin a dangte khempeuh tui dawn dingin khukdin’ suk uh hi. Tua ciangin Topa in Gideon kiangah, “Tui a liak mi zathumte tawh nangmah hong honkhia-in, na khut sungah Midian mite kong pia ding hi; a dangte khempeuh amau’ inn ciatah ciahsak in,” a ci hi. Tua ahih ciangin amah in amau’ tung panin mite’ beelte leh a peengkulte la hi; Israel a dangte khempeuh amau puanbuk ciatah ciahsak a, ahih hangin mihing zathumte khawl sak hi; Midiante’ giahphual pen ama khang lam kuam sungah om hi. Tua zan mahin Topa in ama kiangah, “Tho in, giahphual simin pai in; bang hang hiam cih leh na khut sungah kong pia zo hi. Ahih hangin paisuk ding na lau leh, na nasempa Purah tawh giahphual-ah paisuk in; tua ciangin amaute’ thugen na za ding a, tua khit ciangin giahphual simin a paisuk dingin na tha hong khauh ding hi,” a ci hi. Tua ciangin a nasempa Purah tawh giahphual a om galkapte in a pua lamah a gal pan’na mun-ah paisuk hi. Midian mite leh Amalek mite leh Nisuahna lam mite khempeuh kauphe bangin tamin kuam dungah om uh hi; a kalaohte uh sim zawh hilo a, a tamna pen tuipi gei-a om sehnel zah bang ahi hi. Gideon a tun’ ciangin, mi khat in a lawmpa kiangah mang khat na gen hi; amah in, “Ngai in, mang khat ka man hi; Midiante giahphual sungah mangbuhham kibawl moh khat hong tuk sukin puanbuk hong ban a, puanbuk deng kha-in puanbuk puk a, puanbuk kilumletin lei lakah kiphah hi,” a ci hi. Tua ciangin a lawmpa in dawngin, “Hih in, Israel mi Joash’ tapa Gideon’ namsau lo a dang hi lo hi; Pasian in ama khut sungah Midian leh mihon khempeuh pia khin hi,” a ci hi. Gideon in mang leh a khiatna a kigenna a zak ciangin Pasian bia-in khukdin hi; Israelte’ giahphual ah ciah kikin, “Tho in, bang hang hiam cih leh Topa in na khut sung uh ah Midian honte hong pia zo hi,” a ci hi. Amah in mihing zathumte pawl thumin khenin, amaute khempeuh’ tungah peengkul leh beel sungah meilah a om beel hawmte pia hi. Amah in amaute kiangah, “Keimah hong en un la hih bangin hih un; giahphual nawl ka tun’ ciangin kei’ hih bangin hih un, kei leh ka ompih khempeuh in peengkul ka tum ciangin, giahphual pang khempeuhah zong peengkulte tum un la, ‘ Topa ading leh Gideon ading,’ ci-in awng un,” a ci hi. Tua ahih ciangin, amaute in galvil a laih khit phet, zankim lai takin, Gideon leh amah tawh a om mi za khatte giahphual nawlah hong pai uh hi; amaute in peengkul tumin a khut sung uh a, om beelte sukham uh hi. A pawl thum-un peengkul tumin beelte sukham uh a, a veilam khut-un meilah tawi-in, a taklam khut-un a tum ding uh peengkul tawi uh hi; tua ciangin amaute kiko-in, “ Topa ading leh Gideon’ading namsau khat!” a ci uh hi. Amaute a vekpi-in giahphual kiim-ah ding uh a, galkapte khempeuh tai uh hi; amaute kiko-in tai khia uh hi. Amaute in peengkul zathumte a tum uh ciangin, Topa in giahphuala om mi khempeuh a namsau uh tawh amau leh amau kisat gawpsak hi; tua ciangin galkapte Zererah lam Bethshittah ciang, Tabbath kiang Abelmeholah gamgi dong tai uh hi. Tua ciangin Naftali leh Asher leh Manassehte khempeuh panin Israel mite kisam khia a, amaute in Midiante delh uh hi. Tua ciangin Gideon in Efraim mualtung gam khempeuhah kamtaite sawl a, “Midian mite’ lang khatah hong kuansuk un la Bethbarah ciang dong luite hong la un, Jordan zong la un,” ci sak hi. Tua ahih ciangin Efraim mite khempeuh kisam khia a, amaute in Bethbarah ciang dong luite la-in, Jordan zong la uh hi. Amaute in Midian ulian nihte Oreb leh Ze-eb man uh hi; amaute in Midiante a delh kawm-un Oreb suangpi-ah Oreb that uh a, Ze-eb leenggah sukna-ah Ze-eb that uh hi; amaute in Jordan gal khat Gideon kiangah Oreb leh Ze-eb lutangte paipih uh hi. Tua ciangin Efraim mite in ama kiangah, “Midiante do ding na pai lai-in kote nong sap loh, kote hong bangci bawl na hi hiam?”a ci uh hi. Amaute in nakpi takin amah mawhsak uh hi. Amah in amaute kiangah, “Note tawh teh dingin ke’n bang hih ka hi hiam? Efraim leenggah sang kaihkhopna in Abiezer leenggah lak sangin hoih zaw hilo ahi hiam? Pasian in note’ khut sungah Midian uliante Oreb leh Ze-eb hong pia zo hi; note tawh teh dingin ke’n bang hih zo ka hi hiam?” a ci hi. Amah in hih thu a gen khit ciang-in ama tunga amau’ hehna a bei hi. Tua ciangin Gideon, amah leh amah tawh a om mi zathumte, Jordan tungin galkah a, gimpi mahin amaute delh lai uh hi. Tua ahih ciangin amah in Sukkoth mite kiangah, “Kong thuum hi, kei hong zuite tungah anlum pia un; bang hang hiam cih leh amaute gim uh a, Midian kumpi Zebah leh Zalmunna a delh ka hi hi,” a ci hi. Tua ciangin Sukkoth uliante in, “Na galkapte tungah anlum ka piak dingun Zebah leh Zalmunna na khut sungah om khin ahi hiam?” a ci uh hi. Tua ciangin Gideon in, “Tua ahih leh pha hi, Topa in Zebah leh Zalmunna ka khut sungah hong piak khit ciangin gamlak lingte leh lingkung tawh na sa uh ka kui ding hi,” a ci hi. Tua lai panin Penuel-ah paito a, amaute tungah tua mah bangin gen hi; Penuel mite in Sukkoth mite’ dawn mah bangin amah na dawng uh hi. Tua ciangin amah Penuel mite kiangah, “Lungnuamin kong pai kik ciangin hih tausang ka su-pai ding hi,” a ci hi. Tu-in Zebah leh Zalmunnate, Nisuahna lam mi galkap khempeuh sung pan a om lai teng, mihing tulsawm leh tulnga bang a pha a galkapte uh tawh Karkor-ah om uh hi; bang hang hiam cih leh namsau a tawi mi tulza leh tul sawmnih si khin hi. Tua ciangin Nobah leh Jogbehah nisuahna lam mihonte’ tot lampi zui-in Gideon paito-in galkapte do hi; bang hang hiam cih leh galkapte a galvil om lo hi. Tua ciangin Zebah leh Zalmunna tai uh hi; amah in amaute delhin Midian kumpi nihte Zebah leh Zalmunna manin galkapte khempeuh kitheh thangsak hi. Tua ciangin Joash’ tapa Gideon a gal simna panin Heres kahtohna lam tawnin ciahkik hi. Amah in Sukkoth mi tangval khat manin thu dong hi; tua pa in ama adingin Sukkoth uliante leh upate mihing sawmsagih leh sagih a min gelhsak hi. Tua ciangin Sukkoth mite kiangah amah tungin, “Kei tungah hong kisialin, ‘A gim na mite tungah anlum ka piak dingun Zebah leh Zalmunna na khut sungah om khin ahi hiam?’ na cih uh Zebah leh Zalmunna en un,” a ci hi. Tua ciangin amah in a khuapi upate sam a, gamlak lingte leh lingkungte zong la-in, tuate tawh Sukkoth mite thuhilh hi. Tua ciangin amah in Penuel tausang su-pai-in tua khua mite that hi. Tua ciangin amah in Zebah leh Zalmunna kiangah, “Tabor-ah na thah uh mite koi-ah om ahi hiam?” a ci hi. Amaute in, “Amaute, nangmah bang uh hi; amaute in kumpipa’ tapate suun uh hi,” a ci uh hi. Tua ciangin amah in, “Amaute in ka sanggam, ka nu’ tapate ahi uh hi; Topa a nuntak mah bangin, amaute suakta sak hi le uh cin note kong that kei ding hi,”a ci hi. Tua ciangin amah in a tacil Jether kiangah, “Ding in, amaute that in,” a ci hi. Ahih hangin tangvalpa in a namsau dok lo hi; bang hang hiam cih leh amah tangval lai ahih manin lau hi. Tua ciangin Zebah leh Zalmunna in, “Nangmah mah ding in, kote hong hih in; bang hang hiam cih leh pasal in a pasal bangin a thahat hi,” a ci uh hi. Tua ciang Gideon ding-in Zebah leh Zalmunna that hi; amah in amau’ kalaohte’ ngawng-a a om khade lim tawh a kibang kizepnate la hi. Tua ciangin Israel mite in Gideon kiangah, “Nang leh na tapa leh na tupate in zong kote hong uk un; bang hang hiam cih leh Midiante khut sung panin kote nong honkhia khin hi,” a ci uh hi. Gideon in amaute kiangah, “Note kong uk kei ding a, ka tapa in zong note hong uk lo ding hi; Topa in note hong uk ding hi,” a ci hi. Tua ciangin Gideon in amaute kiangah, “Note tung panin ngetna khat hong bawlsak un; note lakah mi khempeuh in van kinusia na top uh lak panin bilbahte hong pia un,” a ci hi. (Bang hang hiam cih leh amaute in Ishmael mite ahih manin bilbah nei uh hi.) Amaute in dawngin, “Lungkim takin kong pia ding uh hi,” a ci uh hi. Tua ciangin amaute in puan phah uh a, mi khempeuh in a van kinusia top uh lak pan bilbahte tua puan tungah lawn uh hi. Ama nget kham bilbahte a gihna in kham shekel tulkhat leh zasagih ahi hi; Midian kumpite in a zat khade lim tawh a kibang kizepnate leh khainiangte leh puan dupsante, leh a kalaohte uh ngawng kimkotah a om ngawng-awhte kisim lo ahi hi. Tua ciangin Gideon in milim-in tuate bawlin ama khuapi Ofrah khua-ah koih hi; Israelte khempeuh in tua lai mun-ah tua milim bia uh a, Gideon leh a innkuanpihte’ adingin thangzak khat suak hi. Tua ahih ciangin Israel mite mai-ah Midiante guallel uh a, amaute kihisak zo nawn lo uh hi. Gideon’ hun sungin tua gam in kum sawmli sung tawlngakna nei hi. Joash’ tapa Jerubbaal pai-in ama aituam innah teeng hi. Tu-in Gideon in tapa sawmsagih, ama aa mahmah nei hi, bang hang hiam cih leh amah in zi tampi nei hi, Shekhem-ah a om a zineu in zong tapa khat nei a, amah in a min Abimelek phuak hi. Tua ciangin Joash’ tapa Gideon teek sih a, Abiezer mite neihsa Ofrah khua-a om a pa Joash’ han-ah kivui hi. Gideon a sih khit phetin Israel mite kihei kikin Baalte bia uh a, a pasian dingun Baalberith bawl uh hi. Israel mite in, mun khempeuh panin amau’ galte’ khut sung pan a honkhia Topa a Pasian uh phawk lo uh hi; Jerubbaal (Gideon a cihna) in Israelte tungah a bawl thu hoihte khempeuh hangin amaute in Jerubbaal innkuante tungah migitna bangmah lak lo uh hi. Tu-in Jerubbaal’ tapa Abimelek Shekhem-a a nu’ tanaute kiangah pai-in amaute leh a nu’ innkuante beh khempeuh kiangah, “Shekhem khuami khempeuh huau-in gen un, ‘Jerubbaal’ tapa sawmsagihte a vekpi in note hong uk ding leh khat in note hong uk ding, note adingin koi hoih zaw ahi hiam?’ a ci hi. Keimah in note’ guh note’ sa ka hihna zong phawk un,” a ci hi. Tua ciangin a nu’ tanaute in ama tangin Shekhem mite khempeuh tungah hih thute gen uh hi; tua ciangin amaute’ lungsim Abimelek zuih ding lamah hoi hi, bang hang hiam cih leh amaute in, “Amah i sanggampa ahi hi,” a ci uh hi. Tua ciangin amaute in Baalberith inn panin ngun peek sawmsagih Abimelek pia uh a, amah in ama nung a zui bangmah-a kimang lo leh thu ngaihsun thei lo mite cialna hi. Tua ciangin Ofrah-a a pa’ innah amah pai-in, Jerubbaal’ tapa a sanggam mi sawmsagihte suang khat tungah that hi; ahih hangin amah bu ahih manin Jerubbaal’ tapa neu pen Jotham suakta hi. Tua ciangin Shekhem khua mite khempeuh leh Bethmillo khua mite khempeuh hong paikhawm uh a, amaute in Shekhem khua-a tawsaw khuampi kiangah Abimelek kumpi suaksak uh hi. Jotham kiangah tua thu a kigen ciangin amah pai-in Gerizim Mual dawnah ding a, nakpi-in kiko-in amaute kiangah, “No Shekhem mite aw, Pasian in note thu hong ngaih theih nadingin ka thu hong ngai un. Khatvei, singkungte amau’ tungah kumpi-in sathau a nilh dingin paikhia uh hi; amaute in oliv kung kiangah, ‘Kote hong uk in,’ a ci uh hi. Ahih hangin oliv kung in amaute kiangah, ‘Keimah in pasiante leh mite a kipahtawina ahi ka thaunate nusia-in singkungte a uk dingin hong pai ding ka hi hiam?’ a ci hi. Tua ciangin singkungte in theikung kiangah, ‘Hong pai in la, kote hong uk in,’ a ci uh hi. Ahih hangin theikung in amaute kiangah, ‘Keimah in ka khumna leh ka gah hoihte nusia-in singkungte a uk dingin hong pai ding ka hi hiam?’ a ci hi. Tua ciangin singkungte in leenggui kiangah, ‘Hong pai in la, kote hong uk in,’ a ci uh hi. Ahih hangin leenggui in amaute kiangah, ‘Keimah in pasiante leh mite a lungnuamsak ka leenggahzu nusia-in singkungte a uk dingin hong pai ding ka hi hiam?’ a ci hi. Tua ciangin singkung khempeuh in thangling kung kiangah, ‘Hong pai in la, kote hong uk in,’ a ci uh hi. Thangling kung in singkungte kiangah, ‘Note tungah kumpi-in lungsim tak tawh sathau hong nilh na hih uh leh, hong pai un la ka liim-ah bu un; ahih hangin tua bang ahih kei leh, thangling kung lak panin meikuang hong pai khia hen la, Lebanon taamtak kungte kangtum hen,’ a ci hi. “Tua ahih ciangin tu-in Abimelek kumpi-in na bawl uh ciangin lungsim tak leh thuman tak mah tawh a gamta na hi uh hiam?—Jerubbaal leh a innkuan tungah thuman takin gamta-in ama sepna tawh a kituakin amah a bawl mah na hi uh hiam? Bang hang hiam cih leh ka pa in note ading hong do sakin a lauhuaina sungah a nuntakna pia a, Midiante khut sung panin note hong honkhia hi; ahi zongin tu ni-in ka pa’ innkuan lang khatah note tho-in a tapate mi sawmsagih suang khat tungah na that uh a, ka pa in a nasem numei tawh a neih a tapa Abimelek pen note’ tanau ahihna hangin Shekhem khua mite tungah kumpi-in na bawl uh hi— note in tu ni-in Jerubbaal leh a innkuanpihte tungah lungsim tak leh thuman tak tawh a gamta takpi mah na hih uh leh, Abimelek tungah note lungdam un la, note tungah amah zong lungdam hen; ahih hangin tua bang ahih takpi kei leh, Abimelek sung panin meikuang hong paikhia hen la, Shekhem leh Bethmillo khua mite kangtum hen; Shekhem khua mite sung pan leh Bethmillo khua mite sung panin meikuang hong pai hen la, Abimelek kangtum hen,’ a ci hi. Tua ciangin a sanggampa Abimelek a kihtakna hangin Jotham taikhia-in Be-er-ah pai-in tua lai-ah teeng hi. Abimelek in Israelte tungah kum thum sung uk hi. Pasian in Abimelek leh Shekhem mite kikalah khagilo sawlin kigalneihna omsak hi; tua ciangin Shekhem mite in Abimelek lehdo uh hi; tua in, Jerubbaal tapa sawmsagihte a kithahna thu tawh kisai-in, amaute a that a sanggampa uh Abimelek, leh a sanggamte thah nadingin a hanthawn Shekhem mite tungah thukkikna hong tun’ theih nadingin a kibawl mahmah ahi hi. Tua hi a, Shekhem mite in amah pangsim dingin mual dawn-ah mi khempeuhte’ na nasut uh hi; hih thu Abimelek kiangah kigen hi. Tua ciangin Ebed’ tapa Ga-al a tanaute tawh Shekhem-ah hong kuan hi; Shekhem mite in amah muang uh hi. Amaute lo-ah kuanin a leenggui lo uh panin leenggah khawmin cil uh a, pawi khamin amaute’ pasian’ inn-ah pai uh a, anne tuidawnin omin Abimelek zahko uh hi. Tua ciangin Ebed’ tapa Ga-al in, “Abimelek in kua hi a, ama na i sep dingin ei Shekhem mite in kua i hi hiam? Jerubbaal tapa leh ama ulian Zebul in Shekhem mite’ pu leh pa Hamor’ na sem hilo ahi uh hiam? Tua ahih ciangin bang hangin ama na sem ding i hi hiam? Hih mite keima khut nuai a, om hi tazen leh Abimelek ka khin khia ding hi. Abimelek kiangah, ‘Na galkap behlap in la hong kuan khia in,’ ka ci ding hi,” a ci hi. Tua khuapi a uk Zebul in Ebed tapa Ga-al’ kammalte a zak ciangin heh mahmah hi. Amah in Arumah khua-a om Abimelek kiangah kamtaite sawlin, “En in, Ebed tapa Ga-al leh a tanaute Shekhem-ah hong pai-in nang langpangin tua khuapi sosuah uh hi. Tua ahih ciangin tu-in nang leh nang tawh a om mite zan-in pai un la gamlakah pangsim un. Tua ciangin zingsang ciang ni a suah phetin tho baih un la khuapi bawh un; tua ciangin amah leh amah tawh a om mite nang a do dingin hong kuan khiat ciangun a hi thei bangin amaute tungah na bawl ding hi,” ci sak hi. Tua ciangin Abimelek leh amah tawh a om mite khempeuh zan-in tho-in pawl li kisuahin Shekhem sim dingin pangsim uh hi. Tua ciangin Ebed tapa Ga-al paikhia-in khuapi kulh kongpi lutna-ah ding hi; tua ciang Abimelek leh amah tawh a om mite a pan’simna panun ding to uh hi. Ga-al in tua mite a muh ciangin amah in Zebul kiangah, “En in, mual dawn panin mite hong paisuk!” a ci hi. Zebul in ama kiangah, “Mual liimte mi bangin a mu na hi hi,” a ci hi. Ga-al pau kikin, “En in, a gam laizang panin mite hong paisuk a, Aisaante’ Tawsaw lam panin pawl khat hong pai hi,” a ci hi. Tua ciangin Zebul in ama kiangah, “Tu-in na kam han’na koi-ah om hiam, ‘Ama na i sep dingin Abimelek in kua ahi hiam?’ a ci pa aw, Hih mite in na simmawhte hilo ahi hiam? Tu-in paikhia in la amaute tawh kido in,”a ci hi. Tua ciangin Shekhem mite mai-ah Ga-al kuan khia-in Abimelek tawh kido hi. Abimelek in amah delh a, a mai-ah amah tai hi; kulh kongpi lutna dongah mi tampi liamin tuk hi. Tua ciangin Arumah-ah Abimelek teeng hi; Zebul in Ga-al leh a tanaute hawlkhia a, amaute Shekhem-ah teeng thei nawn lo uh hi. A zing ciangin gamlakah Shekhem mite paikhia uh hi. Hih thu Abimelek kiangah kigen hi. Amah in a mite la-in pawlthum suahin gamlakah pangsim uh hi; tua ciangin amah khuadakin khuapi panin mite a kuankhia mu a, amaute do-in kipan a, amaute that hi. Abimelek leh amah tawh a om a pawlte in thakhatin mainawt uh a, ama pawl dang nihte in gamlak-a om mite delhin a thah sungin khuapi kulhpi lutna-ah amaute na ding uh hi. Abimelek in sun tawntung tua khuapi sim hi; amah in tua khuapi la-in a sunga om mite that hi; amah in tua khuapi phiatmai-in ci vawh hi. Shekhem Tausang mite khempeuh in tua thu a zak uh ciangin Elberith’ inn mun muanhuai-ah lut uh hi. Shekhem Tausang mite khempeuh kikaikhawm uh hi, ci-in Abimelek kiangah kigen hi. Tua ciangin amah leh amah tawh a om mi khempeuh tawh Zalmon Mual-ah Abimelek paito hi; Abimelek in a khut-in hei khat la-in selkeu lom khat sat a, tuate la to-in a liangko tungah pua hi. Tua ciangin amah tawh a om mite kiangah, “Kei hih nong muhsa bangun kei’ hih bangbangin manlangin hih un,” a ci hi. Tua ahih ciangin mi khempeuh amau’ ading selkeu lom satin Abimelek zui-in mun muanhuai sim nadingin koih uh a, amaute in mei tawh mun muanhuai halin Shekhem Tausang mite khempeuh zong, numei leh pasal mi tulkhat bang si hi. Tua ciangin Thebez-ah Abimelek pai a, Thebez langpangin giahphual sat a, tua khua la hi. Ahih hangin tua khuapi sungah tausang muanhuai khat om a, tua khua numei leh pasal, tua khuami khempeuh tua tausang-ah tai-in kikhaknelh uh hi; tua ciangin tausang khum-ah amaute pai uh hi. Tua ciangin Abimelek tausangah pai-in sim a, mei tawh a hal dingin tausang kongkhak naih hi. Numei khat in an gawina suangpeek tungnung Abimelek’lu tungah khiatsukin a lu guh deeng kham hi. Tua ciangin Abimelek in ama hiam a tawisak tangvalpa nawh sapin ama kiangah, “Na namsau dok in la kei hong that in, tua hi kei leh mite in, ‘Numei khat in, amah that hi,’ hong ci kha ding uh hi,” a ci hi. A tangvalpa in amah sun letin amah si hi. Israel mite in Abimelek a sihna a muh uh ciangin amau’ inn ciatah ciah uh hi. Ama sanggam sawmsagihte thatin a pa tungah a khialhna hangin tua bangin Pasian in Abimelek’ khialhna thuk hi; Pasian in Shekhem mite khempeuh’ gitlohna amau’ lu tungah tusak kik hi; tua bangin Jerubbaal’ tapa Jotham’ samsiatnate amau tungah a tung hi. Abimelek khit ciangin Israelte a honkhia dingin Issakhar minam Dodo’ tapa Puah’ tapa Tola hong khang hi; amah Efraim mualtung gam Shamir-ah teeng hi. Amah in Israelte kum sawmnih leh kum thum sung thu khen hi. Tua ciangin amah si a, Shamir-ah kivui hi. Ama khit ciangin Israelte kum sawmnih leh kum nih sung thu a khen Gilead mi Jair hong khang hi. Amah in la sawmthum tungah a tuang tapa sawmthum nei hi; amaute in Gilead gam sunga om tu dongin Havvothjair a kici khuapi sawmthum nei uh hi. Tua ciangin Jair si-in Kamon-ah kivui hi. Tua ciangin Israel mite in Topa ’ muhna-ah a sia gamta kik uh a, Siria mite pasiante, Sidon mite pasiante, Moab mite pasiante, Ammon mite pasiante, leh Filistia gam mite’ pasiante ahi Baalte leh Ashtaroth’ na sem uh hi; amaute in Topa nusia-in ama’ na sem lo uh hi. Tua ciangin Israelte tungah Topa ’ hehna so a, amah in Filistia mite tung leh Ammon mite tungah amaute pia a, amaute in Israel mite tua kum sugawpin nengniam uh hi. Amaute in Jordan galkhat Gilead gam sunga om Amor mite’ leitangah a om Israel mite khempeuh kum sawm leh kum giat sung nengniam uh hi. Ammon mite in Judah leh Benjamin leh Efraim minamte zong a do dingin Jordan galkah uh hi; tua ahih ciangin Israelte nakpi takin lungkham uh hi. Tua ciangin Israel mite Topa tungah kiko uh a, “Nang tungah ka khial khin uh hi; bang hang hiam cih leh kote in ka Pasian uh nusia-in Baalte’ na ka sem uh hi,” a ci uh hi. Topa in Israel mite kiangah, “Iziptte leh Amor mite, Ammon mite leh Filistia mite kiang panin hong honkhia hilo ka hi hiam? Sidon mite, Amalek mite leh Maon mite in zong note hong nengniam uh hi; kei tungah note nong kiko uh a, keimah in amaute’ khut sung panin note kong honkhia hi. Tua hi napi-in note in kei hong nusia-in pasian dangte’ na na sem uh hi; tua ahih ciangin note kong honkhia nawn kei ding hi. Pai un la note’ teel pasiante tungah ko un;’ na lungkham hun-un amaute kihonkhia sak un,” a ci hi. Israel mite in Topa tungah, “Ka khial khin uh hi; hoih na sak bangbangin ko tungah hong hih in; tu ni-in hong honkhia in, kong thuum uh hi,” a ci uh hi. Tua ahih ciangin amaute in amau’ lak panin gamdang pasiante koih khia-in Topa ’ na sem uh hi; tua ciangin Israelte’ gentheihna-ah amah dah hi. Tua ciangin Ammon mite galhiam tawi dingin kisam uh a, Gilead-ah giahphual sat uh hi; Israel mite zong kikaikhawmin Mizpah-ah giahphual sat uh hi. Tua ciangin mite, Gilead makaite khat leh khat in, “Ammon mite do dinga a kipan ngam kua om ahi hiam? Amah in Gilead gam-a teeng mite khempeuh tungah lutang hi ding hi,” a kici uh hi. Tu-in Gilead khua mi Jefthah in a vanglian galhang khat hi a, ahih hangin amah in a paktat numei’ tapa ahi hi. Gilead in Jefthah’ pa ahi hi. Gilead’ zi in zong amah tawh tapate nei hi; a tapate a khan’ ciangun amaute in Jefthah notkhia-in ama kiangah, “Ka pa uh inn sungah gamh na luah kei ding hi; bang hang hiam cih leh nang in numei dang’ tapa na hi hi,” a ci uh hi. Tua ciangin a sanggamte kiang panin Jefthah tai-in Tob gam sungah teeng hi; bangmah manlo mite in Jefthah pawmin amah tawh mite sugawpin pai uh hi. Tawlkhat khit ciangin Ammon mite in Israelte do uh hi. Ammon mite in Israelte a do ciangin, Tob gam panin Jefthah a la dingin Gilead upate va pai uh hi; amaute in Jefthah kiangah, “Ammon mite i do theih nadingin hong pai in la kote’ makai hong hi in,” va ci uh hi. Ahih hangin Jefthah in Gilead upate kiangah, “Note in kei hong mudahin ka pa’ inn pan hong hawlkhia hilo na hi uh hiam? Bang hangin thu haksa na tuah uh ciangin kei kiangah hong pai na hi uh hiam?” a na ci hi. Tua ciangin Gilead upate in Jefthah kiangah, “Kote tawh nang hong pai-in Ammon mite do-in Gilead gam sunga teeng mi khempeuh tungah lutang nong hih theih nadingin tua thu hang mahin nang lamah hong kihei ka hi uh hi,” a ci uh hi. Jefthah in Gilead upate kiangah, “Note in Ammon mite do dingin inn-ah nong ciahpih uh a, kei tungah Topa in amaute hong piak leh keimah in note’ lutang ka hi ding hi,” a ci hi. Gilead upate in Jefthah kiangah, “ Topa in eite kikalah teci hi ding hi; na cih bangin ka hi taktak ding uh hi,” a ci uh hi. Tua ahih ciangin Gilead upate tawh Jefthah pai a, mite in amau’ tunga lutang leh makai-in amah koih uh hi; Jefthah in hih thute khempeuh Mizpah khua sung Topa mai-ah gen hi. Tua ciangin Jefthah in Ammon mite kumpipa kiangah kamtaite sawlin, “Ka gam sim dingin kei kiangah nong pai nadingin kei tungah bang thu om ahi hiam?” ci sak hi. Ammon mite kumpipa in Jefthah’ kamtaite dawng a, “Izipt panin Israelte hong pai lai-in Arnon panin Jabbok leh Jordan ciang ka gam hong lak sak hang ahi hi; tua ahih ciangin tu-in thudamin hong pia kik in,” a ci hi. Jefthah in Ammon mite kumpipa kiangah kamtaite sawl kik a, ama kiangah, “Jefthah in hih bangin ci hi: Israelte in Moab leitang hita leh Ammon mite leitang hita leh la lo hi. Izipt panin Israelte hong paitoh lai-in gamlak tawnin San Tuipi-ah hong pai-in Kadesh hong tung uh hi. Israelte in Edom kumpipa kiangah kamtaite sawl a, ‘Kong thuum hi, na gam sung hong nawksak in,’ ci sak uh hi; ahih hangin Edom kumpipa in a thu ngai lo hi. Tua ciangin Moab kumpipa kiangah zong sawl uh a, ahih hangin amah thukim lo hi. Tua ahih ciangin Kadesh-ah Israelte om phot uh hi. Tua ciangin gamlak tawnin amaute khualzin uh a, Edom gam leh Moab gam kimkotin pai-in Moab gam nisuahna lam pangah tung uh a, Arnon gal khatah phual sat uh hi; ahih hangin Moab gam sungah amaute lut lo uh hi, bang hang hiam cih leh Arnon in Moab gamgi ahi hi. Tua ciangin Israelte in Heshbon kumpi ahi Amor mite kumpi Sihon kiangah kamtaite sawl uh hi; Israelte in ama kiangah, ‘Kong thuum uh hi, ka gam uh a zuan dingin na gam hong nawk sak in,’ ci uh hi. Ahih hangin Sihon in ama gam nawk dingin Israelte muang lo hi; tua ahih ciangin Sihon in a mite khempeuh kaikhawmin Jahaz-ah giahphual sat a, Israelte do hi. Topa, Israelte Pasian in Sihon leh a mite khempeuh Israelte’ khut sungah pia a, amaute in zo uh hi; tua ahih ciangin tua gam sunga teeng Amor mite’ leitang khempeuh Israelte in luah uh hi. Amaute in Arnon panin Jabbok ciang leh sehnel gam panin Jordan ciang, Amor mite gam khempeuh luah uh hi. Tua ahih ciangin Topa, Israelte’ Pasian in ama mi Israelte’ mai panin Amor mite paaikhia hi; tu-in nangmah in amaute luah kik ding sawm na hi hiam? Na Pasian Khemosh in na neih dinga hong piakte tang lo ding na hi hiam? Topa ka Pasian un kote mai-ah a suankhiatte kote in ka tang ding uh hi. Tu-in nang in Moab kumpipa Zippor’ tapa Balak sangin gina zaw na hi hiam? Amah in Israelte to ngei a, amaute do ngei ahi hiam? Heshbon leh a khua neute, leh Aroer leh a khua neute, leh Arnon gun pang-a om khuapite khempeuh sungah Israelte a teen’ kum zathum hun sung tengin bang hangin amaute la kik lo na hi hiam? Tua ahih ciangin nang tungah ka khial kei a, kei nong dona-ah kei tungah nang nong khial hi; Topa, Thukhenpa in Israel mite leh Ammon mite kikal-ah tu ni-in thu khen hi,” a ci hi. Ahih hangin Ammon kumpipa in ama kiangah a puak Jefthah’ thu don lo hi. Tua ciangin Jefthah tungah Topa ’ Kha hong tung a, amah in Gilead leh Manasseh nawkin Gilead gam Mizpah ah paisuak a, Gilead gam Mizpah panin Ammon mite kiangah paisuak lai hi. Jefthah in Topa tungah thuciamna bawlin, “Ka khut sungah Ammon mite nong piak leh, Ammon mite kiang pan gualzo-in ka ciah ciangin keimah dawn dingin ka inn sung pan hong pai peuhpeuh Topa aa hi ding a, meihal biak nadingin kong pia ding hi,” a ci hi. Tua ahih ciangin amaute do dingin Ammon mite kiangah Jefthah gal kah hi; Topa in amaute ama khut sungah pia hi. Amah in Aroer panin Minnith kiimnai ciang dong khuapi sawmnih, leh Abelkeramim ciang dong mi tampi tak thatin vatgawp hi. Tua ahih ciangin Israel mite mai-ah Ammon mite guallel hi. Tua ciangin Mizpah-a ama inn-ah Jefthah hong ciah hi; en in, amah dawn dingin a tanu khuangneute tawh lamsa-in hong paikhia hi; tua nu in ama ta khat neihsun ahi hi; amah simloh tapa ahi a, tanu ahi zongin nei lo hi. Amah in tua nu a muh ciangin a puan balkeekin, “Ala, ka tanu! kei nong niam koih mahmah hi, kei adingin lungkhamna lianpi nong suak hi; bang hang hiam cih leh Topa tungah thu ka ciam khin a, ka thuciamna ka dokkik thei kei hi,” a ci hi. Tua ciangin tua nu in ama kiangah, “Ka pa aw, Topa tungah thu ciam khin na hih leh, na kam panin a paikhia tawh kizui-in kei tungah hong bawl in, tu-in Topa in na gal Ammon mite tungah nang ading hong thuksak khin hi,” a ci hi. Tua ciangin amah in a pa kiangah, “Kei adingin hih bang hong hi sak in; kei pai-in mualte tungah vak kawikawi-in kei leh ka lawmte in nungak-a ka sih nading hangin ka thuum theih nadingun kha nih sung kei guak hong omsak in,” a ci hi. Amah in, “Pai ta in,” a ci hi. Amah in kha nih sung amah pai khiasak in; tua ciangin amah leh a lawmte pai khia-in nungak-a a sih nading hangin mualte tungah thuum uh hi. Kha nih a cin’ ciangin a pa kiangah amah ciahkik a, amah in ama bawlsa a thuciamna bangin tua nu tungah hih hi. Tua nu in pasal tawh a lum khawm nailo, nungak-in khan’sih hi. Tua ciangin Israelte sungah ngeina khat suak a, Israel tanute kum khatin ni li sung kum simin Gilead mi Jefthah’ tanu hangin a thuum dingin pai uh hi. Efraim mite galhiam tawi dingin kisam uh a, amaute Zafon-ah galkah uh a, Jefthah kiangah, “Bang hangin Ammon mite sim dingin galkahin, nang tawh a kuan khawm dingin kote hong zawn lo na hi hiam? Na inn nang tawh kong hal nelh ding uh hi,” a ci hi. Tua ciangin Jefthah in amaute kiangah, “Kei leh ka mite in Ammon mite tawh buaina lianpi khat ka nei uh hi; note kong sap ciangin amau’ khut sung panin kei nong honkhia kei uh hi. Note in kei nong hotkhiat loh ding uh ka theih ciangin keimah mah hanciam tawmin Ammon mite do dingin ka galkah a, Topa in kei khut sungah amaute hong pia hi; tua ahih ciangin bang hangin tu ni-in kei do dingin hong kuan na hi uh hiam?” a ci hi. Tua ciangin Jefthah in Gilead mite khempeuh khawmin Efraim mite tawh kido uh hi; Gilead mite in Efraim mite vatgawp hi, bang hang hiam cih leh amaute in, “No Gilead mite in Efraimte leh Manassehte lakah Efraim galtaite na hi uh hi,” a ci uh hi. Gilead mite in Efraim mite tung panin Jordan ngahmunte la uh hi. Efraim galtaite khat peuhpeuh in, “Hong galkah sak in,” a cih ciangin Gilead mite in ama kiangah, “Efraim mi na hi hiam?” ci uh hi. Amah in, “Hi kei ing,” a cih ciangin, amaute in ama kiangah, “Tua ahih leh Shibboleth ci in,” ci uh a, tua ciangin amah in, “Sibboleth” ci hi, bang hang hiam cih leh a manin ci thei lo hi; tua ciangin amaute in amah manin Jordan ngahmunte-ah that uh hi. Tua tungin Efraim mite mi tul sawmli leh tulnih si uh hi. Jefthah in Israelte kum guk sung thu khen hi. Tua ciangin Gilead mi Jefthah si a, Gilead gam ama khuapi sungah kivui hi. Ama nungah Bethlehem khuami Ibzan in Israelte thu khen hi. Amah in tapa sawmthum nei hi; ama beh pualam mite tungah tanu sawmthum mokhak a, a pualam panin a tapate adingin tanu sawmthum la hi. Amah in Israelte kum sagih sung thu khen hi. Tua ciangin Ibzan si a, Bethlehem-ah kivui hi. Ama nungah Zebulun mi Elon in Israelte thu khen hi; amah in Israelte kum sawm sung thu khen hi. Tua ciangin Zebulun mi Elon si a, Zebulun gam Aijalon-ah kivui hi. Ama sungah Pirathon mi Hillel’ tapa Abdon in Israelte thu khen hi. Amah in la sawmsagihte tungah a tuang tapa sawmli leh tupa sawmthum nei hi; amah in Israelte kum giat sung thu khen hi. Tua ciangin Pirathon mi Hillel tapa Abdon si a, Amalek mite’ mualtung gam Efraim leitang tung, Pirathon-ah kivui hi. Israel mite Topa muhna-ah a sia gamta kik uh hi; Topa in Filistia mite’ khut sungah kum sawmli sung amaute pia hi. Dan minam sung panin Zorah khuami Manoah min nei khat om hi; ama zi in tasel hi a, ta nei lo hi. Topa ’ vantungmi numei kiangah kilangin ama kiangah, “En in, na tasel a, ta na nei kei hi; ahih hangin gai-in tapa khat na nei ding hi. Tua ahih ciangin kidawm in la, leenggahzu ahi a, kham theih zu ahi zongin dawn loin, a nin bangmah ne kei in; bang hang hiam cih leh nang gai-in tapa khat na nei ding hi. Ama lu tungah mulkiatna kitah lo ding hi; bang hang hiam cih leh naupang in a suah a, kipanin Pasian tungah Nazir mi hi ding hi; amah in Filistia mite’ khut sung panin Israelte hotkhiat ding kipan ding hi,” a ci hi. Tua ciangin tua nu pai-in a pasal kiangah gen a, “Pasian’ mi khat ka kiangah hong pai a, ama meel in Pasian’ vantungmi meel tawh kibangin dipkuat-huai mahmah hi; koi pan-a hong pai cih amah ka dong kei a, amah in ama min hong gen lo hi; ahih hangin amah in kei kiangah, ‘En in, nang gai-in tapa khat na nei ding hi; tua ahih ciangin leenggahzu ahi a, kham theih zu ahi zongin dawnkei in la, a nin bangmah ne kei in; bang hang hiam cih leh naupang in a suah-a kipan a sih dong Pasian’ tungah Nazir mi hi ding hi,” a ci hi. Tua ciangin Manoah in Topa kunh a, “ Topa aw, kong thuum hi, na hong sawl Pasian’ mipa ko kiangah hong paisak kik in la, a hong suak ding naupang ka bawl nading uh hong hilhsak in,” a ci hi. Pasian in Manoah’ aw ngai-in lo lai-ah tua nu tut lai takin Pasian’ vantungmi ama kiangah hong pai hi; ahih hangin a pasal Manoah amah tawh om lo hi. Tua ciangin tua nu nawhsa-in tai-in a pasal kiangah gen a, “En in, zanhal a, kei kiangah hong pai mipa ka kiangah hong kilang hi,” a ci hi. Tua ciangin Manoah ding-in a zi zui a, a mipa kiangah pai-in ama kiangah, “Hih nu kiangah, thu genpa in nang na hi hiam?” a ci hi. Amah in, “Ka hi hi,” a ci hi. Tua ciangin Manoah in, “Na thugente a manin hong tun’ ciangin naupang’ nuntakna zia ding bang hi a, amah in bang hih ding ahi hiam?” a ci hi. Tua ciangin Topa ’ vantungmi in Manoah kiangah, “Numei kiangah ka gente khempeuh na kidawm hen. Amah in leenggui pan-a piang peuhmah dawn thei lo ding a, leenggahzu ahi a, kham theih zu ahi zongin dawn thei loin, a nin na khatpeuh peuh ne thei lo ding hi; amah ka thupiak khempeuh tang hen,” a ci hi. Manoah in Topa ’ vantungmi kiangah, “Kong thuum hi, tawlkhat khawl in la, nang adingin keelno khat hong bawl nung,” a ci hi. Topa ’ vantungmi in Manoah kiangah, “Nong khawlsak zongin na an ka ne kei ding hi; ahih hangin meihal biak nading a baihsa-in na bawl leh Topa tungah pia in,” a ci hi. (Bang hang hiam cih leh Manoah in amah Topa ’ vantungmi ahi lam thei lo hi). Manoah in Topa ’ vantungmi kiangah, “Na thugente a manin hong tun’ ciangin nang kong pahtawi theih nadingun, na min bang ahi hiam?” a ci hi. Topa vantungmi in ama kiangah, “Hih in a lamdang hi, ci-in thei napi-in bang hangin ka min hong dong na hi hiam?” a ci hi. Tua ahih ciangin Manoah in an-a biakna tawh a keelno la-in na lamdang a bawl Topa adingin suang tungah pia hi. Biakna tau panin vantung lamah meikuang a paitoh ciangin, Manoah leh a zi in a et lai takun biakna tau meikuang sungah Topa ’ vantungmi kahto hi; tua ciangin amaute lei lakah bok uh hi. Topa ’ vantungmi Manoah leh a zi tungah kilang nawn lo hi. Tua ciangin Manoah in amah Topa ’ vantungmi ahih lam thei hi. Manoah in a zi kiangah, “Pasian mu khin i hih manin i si taktak ding hi,” a ci hi. Ahih hangin a zi in ama kiangah, “ Topa in eite thah hong sawm hi leh, i khut panin meihal biakna leh an tawh biakna hong sang lo ding a, hih nate khempeuh hong lak loin, hih bang nate zong eite tungah hong pulak lo ding hi,” a ci hi. Tua numei in tapa khat nei-in a min Samson phuak hi; naupang khang a, Topa in amah thupha pia hi. Tua ciangin Topa ’ Kha in Zorah leh Eshtaol kikal Mahanehdan-ah amah hanthot ding kipan hi. Samson Timnah-ah paisuk a, Timnah-ah Filistia mi nungak khat mu hi. Tua ciangin amah paito-in a pa leh a nu kiangah gen a, “Filistia mi nungak khat Timnah-ah ka mu hi; tu in ka zi dingin amah va la un,” a ci hi. Ahih hangin a pa leh a nu in ama kiangah “Nang pai-in vun ki-at lo Filistia mite kiang panin zi na lak nadingin na tanaute’ lak ahi a, i mite khempeuh lakah ahi zongin numei khat beek om lo ahi hiam?” a ci uh hi. Ahih hangin Samson in a pa kiangah, “Tua nu hong laksak in; bang hang hiam cih leh amah in ka lung hong kimsak mahmah hi,” a ci hi. A nu leh a pa in hih thu pen Topa kiang pan ahih lam thei lo hi; bang hang hiam cih leh amah in Filistia mite tungah paulap a zong ahi hi. Tua hun lai takin Filistia mite in Israelte uk hi. Tua ciangin a nu leh a pa tawh Timnah-ah Samson paisuk a, Timnah leenggui lote-ah amah tung hi. En in, humpinelkai khanglai khat in, amah hawksan hi; tua ciangin Topa ’ Kha ama tungah khauh takin hong tung a, mi khat in keelno khat a bal gawp bangin amah in a khut guak tawh humpinelkai balzan hi. Ahih hangin tua bangin a hih thu a nu tung ahi a, a pa tungah ahi zongin gen lo hi. Tua ciangin amah paisukin a numei tawh kiho hi; tua nu in Samson lungkimsak mahmah hi. Tawlkhat khit ciangin tua nu la dingin paikik hi; humpinelkai luanghawm en dingin amah lam pial in en in, humpinelkai luanghawm sungah khuai honkhat leh khuaizu om hi. Amah in a khut tawh tuate sawkin paisuak a, a pai kawmin ne hi; amah a nu leh a pa kiangah tungin tuate pawlkhat pia a, amaute in ne uh hi. Ahih hangin humpinelkai luanghawm sung panin tua khuaizu a lakna thu gen lo hi. Tua ciangin numei kiangah a pa paisuk a, Samson in tua lai-ah pawi khat kham hi; bang hang hiam cih leh tangvalte’ hih ngei ahi hi. Mite in amah a muh uh ciangin amah a uap dingin tangval sawmthum hong paipih uh hi. Tua ciangin Samson in amaute kiangah, “Note mai-ah thu-haksa khat hong gensak un; hih pawi ni sagih sungin a thu mu khia-in bang hiam cih nong gen theih uh leh saihadial puan silh sawmthum leh pawipuan silh sawmthum note kong pia ding hi; ahih hangin bang hang hiam cih nong gen theih kei uh leh saihadial puan silh sawmthum leh pawipuan silh sawmthum kei nong pia ding uh hi,” a ci hi. Tua ciangin amaute in ama kiangah, “Ka zak theih nadingun na thu-haksa hong gen in,” a ci uh hi. Tua ciangin amah in amaute kiangah, “A ne-pa sung panin nek ding pawlkhat hong piang hi. A thahatpa sung panin a khum pawlkhat hong piang hi,” a ci hi. Ni thum sungin tua thu-haksa bang hiam cih gen thei lo uh hi. A nili ni-in amaute in Samson’ zi kiangah, “A thu—haksa bang hiam cih hong gen nadingin na pasal zol in, tua hi kei leh nang leh na pa’ inn mei tawh kong hal ding uh a, na si ding uh hi; Kote hong zawngsak dingin hih lai-ah hong sam na hi hiam?” a ci uh hi. Tua ciangin Samson zi ama mai-ah kapin, “Kei nong mudah hi, kei nong it kei hi; ka gam mite tungah thu-haksa na gen a, bang hiam cih kei kiangah nong gen kei hi,” a ci hi. Amah in numei kiangah, “En in, ka nu kiangah hita leh ka pa kiangah hita leh ka gen kei hi; nang kiangah hong gen ding ka hi hiam?” a ci hi. Tua nu a pawi ni sagih hun sung teng ama mai-ah kap hi; a ni sagih ni-in amah in tua nu kiangah gen hi; bang hang hiam cih leh amah in nakpi takin kunh hi. Tua ciangin tua nu in a gam mite kiangah tua thu-haksa gen hi. Tua khuapi mite in a ni sagih ni, ni a tum ma-in ama kiangah gen uh a, “Khuaizu sangin bang khum zaw hiam? Humpinelkai sangin bang hatzaw hiam?” a ci uh hi. Tua ciangin amah in amaute kiangah, “Ka bawngla tawh lokho khawm lo hi le uh cin, ka thu-haksa na mu khia kei ding uh hi,” a ci hi. Tua ciangin Topa ’ Kha khauh takin ama tungah hong tung a, Ashkelon-ah amah paisukin tua khua mite sawmthum that a, amaute’ nate la-in a thu-haksa a gen mite tungah a pawi puante pia hi. Hehsa-in a pa’ inn-ah ciah san hi. Tua hi a, Samson’ zi pen a moliahpa’ zi dingin kipia hi. Tawlkhat khit, mangbuh lak hunin a zi kiangah a hawh dingin keelno khat tawh Samson pai hi; amah in, “Inndei sung ka zi kiangah ka lum ding hi,” a ci hi. Ahih hangin a numei’ pa in amah lutsak lo hi. Numei’ pa in, “Amah mudah taktak hi niteh ci-in ka ngaihsun hi; tua ahih ciangin na lawmpa kiangah ka pia hi. A naunu amah sangin hoihzaw hilo ahi hiam? A u’ tangin amah la in ci-in kong thuum hi,” a ci hi. Samson in amaute kiangah, “Tu tungin amau tungah siatna ka bawlna-ah Filistia mite tawh kisai-in ka mawh kei ding hi,” a ci hi. Tua ciangin Samson pai-in ngia zathum manin meilah zong la hi; amah in a meite leh a meite kimatsakin a meite kikalah meilah khat koih hi. A meilahte a kuan’sak khit ciangin Filistia mite’ ankung ding laite lakah ngiate khah sak a, anphualte leh ankung ding laite, leh oliv lote kangtum hi. Tua ciangin Filistia mite in, “Kua in hih hiam?” a ci uh hi. Amaute in, “Timnah mite’ makpa Samson in hih hi; bang hang hiam cih leh amah in a zi lak sakin a lawmte tungah piaksak hi,” a ci uh hi. Tua ciangin Filistia mite hong paito-in tua nu leh a pa mei tawh hal lum uh hi. Samson in amaute kiangah, “Hih in note’ hih ahih leh, ka kiciam hi, note kong thuk ding a, tua khit ciangin ka khawl ding hi,” a ci hi. Amah in amaute dawm loin tampi that hi; tua ciangin amah paisukin Etam suanghawm sungah om hi. Tua ciangin Filistia mite paito-in Judah-ah giahphual sat uh a, Lehi sim uh hi. Judah mite in, “Bang hangin kote do-in hong paito na hi uh hiam?” a ci uh hi. Amaute in, “Samson a hen ding, ko tungah amah in hong hih bangin ama tungah ahih dingin kong paito uh hi,” a ci uh hi. Tua ciangin Judah mite mihing tulthum Etam suanghawm-ah paisuk uh a, Samson kiangah, “Filistia mite in eite hong ukte ahihna thei lo na hi hiam? Kote tungah nang hong bawl bang ahi hiam?” a ci uh hi. Amah in amaute kiangah, “Amaute in kei tungah hong bawl bangin amaute tungah ka bawl hi,” a ci hi. Tua ciangin amaute in ama kiangah, “Filistia mite khut sungah nang kong piak theih nadingun nangmah a hen dingin kong paisuk uh hi,” a ci uh hi. Samson in amaute kiangah, “Note mahmah in nong hih loh nading uh kei tungah hong kiciam un,” a ci hi. Amaute in ama kiangah, “Kong hih kei ding uh hi; nang hong hen bekin amaute khut sungah kong pia bek ding uh hi; nang kong that kei ding uh hi,” a ci uh hi. Tua ahih ciangin amaute in khauhual thak nih tawh amah hen uh a, tua suang panin amah pai khiatpih to uh hi. Amah Lehi a tun’ ciangin amah dawn dingin Filistia mite hong pai-in awng uh hi; tua ciangin ama tungah Topa ’ Kha khauh takin hong tung a, a baan tunga om khauhualte pen mei in a kat anthul khau tawh kibang a, amah a kikhihnate a khut panin tolhkhia hi. Tua ciangin amah in la khaguh thak khat mu a, a khut zanin tua khaguh la-in tua tawh mihing tulkhat that hi. Tua ciangin Samson in, “La khaguh khat tawh, a lom a lomin, La khaguh khat tawh mihing tulkhat ka that hi,” a ci hi. Tua ciangin a thugen a man khit ciangin a la khaguh paai khia hi; tua mun pen Ramathlehi kici hi. Tua ciangin amah dangtak mahmah a, amah in Topa samin, “Na nasempa’ tha tawh hih suahtakna lian na pia zo hi; tu-in dangtakin kei si-in vun at lote’ khut sungah puk ding ka hi hiam?” a ci hi. Tua ciangin Pasian in Lehi-a om komdep khat hong a, tua sung panin tui hong phul hi; amah in tui a dawn ciangin a lungsim hong dim kikin thakhauh kik hi. Tua ahih ciangin tua mun min Enhakkore kici hi; tu hun dongin Lehi-ah tua tuikhuk om hi. Amah in Filistia mite’ hun sung Israelte kum sawmnih sung thukhen hi. Samson Gaza-ah pai a, tua lai-ah numei paktat khat mu-in tua nu kiangah a giak dingin amah pai hi. Gaza mite kiangah “Samson hong pai,” ci-in kigen a, amaute in tua mun umcihin khuapi kulh kongpi-ah zan tawntung amah pangsim uh hi. Amaute zan tawntung dai takin om uh a, “Zingsang khuavak mateng ngak ni; tua ciangin amah i that ding hi,” ci uh hi. Ahih hangin zankim ciang dong Samson lum a, zankim ciangin tho-in khuapi kulh kongpi kongkhakte leh a khuam nihte lenin a zawlte leh a na khempeuh bot to a, a liangko tungah tuate koihin Hebron mai-ah a om mual dawnah tuate pua hi. Hih thu khit ciangin Sorekkuam-ah Delilah a kici numei khat ngai hi. Tua ciangin Filistia mi uliante tua nu kiangah hong pai-in, “Amah hong zol in la, ama hatna koi lai-ah om hiam cihna leh amah i nuaisiah nadingin amah i hen theih nading, amah i zawh theih nading zia hong thei in; tua ciangin kote in ngun peek tul leh peek zakhat ciat nang kong pia ding uh hi,” a ci uh hi. Delilah in Samson kiangah, “Na thahatna lian koi lai-ah om a, mi khatpeuh in nang hong theih nadingin bang hong kici hen ding cihna thu, nong hehpihna-in hong gen in,” a ci hi. Samson in tua nu kiangah, “Amaute in a keu nai lo thalkhau thak sagih tawh hong hen leh ka tha neem ding a, midang mah ka bang ding hi,” a ci hi. Tua ciangin Filistia mi uliante in tua nu kiangah a keu nai lo thalkhau sagih hong paipih uh a, tua nu in tua khaute tawh amah hen hi. Tu-in tua nu in inndei sungnungah mi bu sak hi. Tua ciangin tua nu in ama kiangah, “Filistia mite in nang hong hih, Samson!” a ci hi. Ahih hangin amah in, patkhaute in mei a suk khak ciangin a kitah bangin thalkhaute botsat hi. Tua ahih ciangin ama thahatna thusim kithei zo lo hi. Tua ciangin Delilah in Samson kiangah, “En in, kei nong simmawh a, zuauthu nong gen hi; nang bang hong kici hen theih ding cih nong hehpihna-in hong gen in,” a ci hi. Amah in tua nu kiangah, “Amaute in a kizang nai lo khauhual thakte tawh kei hong hen leh ka tha neem ding a, midang mah ka bang ding hi,” a ci hi. Tua ahih ciangin Delilah in khauhual thakte la-in tuate tawh amah hen a, ama kiangah “Filistia mite in nang hong hih, Samson!” a ci hi. A busim mite inndei sungnungah om uh hi. Ahih hangin amah in mimkhau bangin khauhualte botsat ziau hi. Tua ciangin Delilah in Samson kiangah, “Tu dong kei nong simmawh a, zuauthu nong gen hi; nang bang hong kici hen theih ding cih hong gen in,” a ci hi. Amah in tua nu kiangah, “Ka lu tunga ka sam lom sagihte siamkhau tawh ganin ciampek tawh khen bikbek lecin ka tha neem ding a, midang mah ka bang ding hi,” a ci hi. Tua ahih ciangin amah a ihmut lai takin a lu tunga a sam lom sagihte la-in siamin gan hi. Amah in ciampek tawh khen bikbek a, ama kiangah, “Filistia mite in nang hong hih, Samson!” a ci hi. Ahih hangin a ihmutna pan amah khanglo-in a ciampek, a siambu, leh a siam kai khia hi. Tua ciangin numei in ama kiangah, “Bang hangin na lungsim kei tawh a om lopi, ‘Nang kong it hi,’ ci thei na hi hiam? Hih thumvei dong kei nong simmawh a, na thahatna a omna mun nong gen kei hi,” a ci hi. A kam tawh ni simin nakpi takin a kut ciangin, sihna dong dingin amah lunggim hi. Amah in tua nu kiangah a lungsim khempeuh gen a, amah kiangah, “Ka lu tungah mulkiatna kitah ngei lo hi; bang hang hiam cih leh ka nu gil sunga kipan Pasian’ tungah a kipia Nazir mi ka hi hi. Ka sam kimet leh ka hatna in kei hong nusia ding a, ka tha neem ding a, midang mah ka bang ding hi,”a ci hi. Ama tungah a lungsim khempeuh gen khin hi, ci-in Delilah in a theih ciangin amah in mi sawlin Filistia mi uliante sam a, “Tu-a khatvei hong pai un; bang hang hiam cih leh amah in a lungsim khempeuh kei kiangah hong gen khin zo hi,” a ci hi. Tua ciangin Filistia uliante tua nu kiangah hong pai-in sum zong hong pua uh hi. Tua nu in a khuk tungah amah ihmu sak hi; amah in mi khat samin a lu tunga a sam lom sagihte meet sak hi. Tua ciangin tua nu in amah gimsak ding kipan a, ama thahatna in amah nusia ta hi. Tua nu in, “Filistia mite in nang hong hih, Samson!” a ci hi. A ihmutna panin amah khanglo-in, “Ni danga mah bangin pai khia-in keimah kisingin suakta ning,” a ci hi. Topa in amah a nusiat khit lam amah in thei lo hi. Tua ciangin Filistia mite in amah manin a mitte khelkhia uh a, Gaza-ah paipihin amah sumngo kol bulh uh hi, amah in thong sung angawina-ah an gawi hi. Ahih hangin a kimet khit ciangin a lu tunga a samte khang kik dingin hong kipan hi. Tu-in Filistia uliante a pasian uh Dagon tungah biakna lianpi khat a pia ding leh a gualnuam dingin kikhawm uh hi; bang hang hiam cih leh amaute in, “I pasian in i khut sungah i galpa Samson hong pia zo hi,” a ci hi. Mite in amah a muh ciangun a pasian uh phat uh hi; bang hang hiam cih leh amaute in, “I pasian in eite khut sungah i gam a susia-pa, eite tampi hong thatpa hong pia zo hi,” a ci uh hi. A lungsim uh a nop ciangin amaute in, “Eite’ adingin a kimawl theih nadingin Samson sam un,” a ci uh hi. Tua ahih ciangin amaute in, thong panin Samson sam khia-in amau’ mai-ah mawlpih uh hi. Khuampite kikalah amah ding sak uh hi; Samson in ama khut a len tangvalpa kiangah, “Ka kingak theih nadingin innpi a do khuampite hong lawngsak in,” a ci hi. Tu-in a innpi pen numei leh pasal tawh kidim hi; Samson a kimawl lai takin a en Filistia ulian khempeuh leh innkhum zangah numei leh pasal mi tulthum bang om uh hi. Tua ciangin Samson in Topa samin, “ Topa Pasian aw, kei hong phawk in, kong thuum hi, tu-a ka mittang nihte’ tang dingin Filistia mite ka thuk theih nadingin hong thahat sak in, tu-a bek kong thuum hi,” a ci hi. Samson in innpi a do khuampi nihte manin, a khut taklam-in khat a khut veilam-in khat lenin ama gihna tawh a khuamte luai hi. Samson in, “Filistia mite tawh hong si sak in,” a ci hi. Tua ciangin a tha neih khempeuh tawh sawn hi; tua ciangin uliante leh a sunga om mi khempeuh tungah innpi cimsuk hi. Tua ahih ciangin a nuntak lai-a a thah sangin a sihna-a a thah a si mi tamzaw hi. Tua ciangin a sanggam pasalte leh a innkuanpihte khempeuh hong paisukin amah la uh a, amah ciahpih to-in Zorah leh Eshtaol kikal-a om a pa Manoah’ han-ah vui uh hi. Amah in Israelte kum sawmnih sung thukhen hi. Efraim mualtung gam mi Mikah a kici min nei mi khat om hi. Amah in a nu kiangah, “Ngun peek tul leh peek zakhat nang kiang panin a kigu, tua tawh kisai-in na samsiat, keima zak-in zong na gen pen, en in, a ngun kei kiangah om hi; keimah in ka la hi,” a ci hi. Tua ciangin a nu in, “Ka tapa aw, Topa in thupha hong pia ta hen,” a ci hi. Amah in ngun peek tul leh zakhatte a nu kiangah piakik hi; a nu in, “A kiseek milim khat leh a kisung milim khat bawl nadingin ka tapa adingin Topa tungah a ngunte ka apsa ahi hi; tua ahih ciangin tu-in nang tungah kong piakik ding hi,” a ci hi. Tua ahih ciangin amah in a nu kiangah a sum a piak kik ciangin a nu in zong ngun peek zanih la-in, a kiseek milim khat leh a kisung milim khat-a a bawlsak ngun seekpa kiangah pia hi; tua pen Mikah’ inn sungah om hi. Tua mipa Mikah in biakna phual khat nei a, amah in siampi puan khat leh innsung pasiante bawlin siampi suak dingin a tapate khat koih hi. Tua hun lai-in Israelte sungah kumpi om lo hi; mi khempeuh amau’ hoihsak bang ciatun gamta uh hi. Tu-in Judah gam Bethlehem khuami, Judah innkuan, Levi tangval khat om hi; amah tua lai-ah peem hi. Tua mipa a muhna mun peuhah a teeng dingin Judah gam Bethlehem khua panin paikhia hi; tua bangin khualzinin a pai lai takin Efraim mualtung gam sunga Mikah’ inn-ah va tung hi. Mikah in ama kiangah, “Koi panin hong pai na hi hiam?” a ci hi. Amah in ama kiangah, “Judah gam sung Bethlehem khuami Levi mi ka hi a, mun ka muhna peuhah a peem ding ka hi hi,” a ci hi. Mikah in ama kiangah, “Kei tawh hong omin kei adingin pa leh siampi hong hi in, kum khat-in ngun peek sawm, leh puan silh khat, leh annek kong pia ding hi,” a ci hi. Levi mipa in amah tawh a teeng khawm dingin thukim hi; tangvalpa in ama tungah a tapate khat tawh kibang hi. Mikah in Levi mipa koihin, tangvalpa ama siampi suak in Mikah’ inn-ah om hi. Tua ciangin Mikah in, “ Topa in ka dau hong pai sak ding hi, ci-in tu-in ka thei hi; bang hang hiam cih leh siampi-in Levi mite khat ka nei hi,” a ci hi. Tua hun lai-in Israelte sungah kumpi om lo hi. Tua hun lai-in Dan minamte in a teen’ nading uh gamhluah zong uh hi; bang hang hiam cih leh tua hun dong mateng Israel minamte sung panin amau ading gamhluah bangmah kia lo hi. Tua ahih ciangin Dan mite in gam ensimin a va zong dingin amau’ minam bup khempeuh lak panin misiam nga Zorah pan leh Eshtaol panin sawl uh hi; amaute in amau kiangah, “Pai un la gam va zong un,” a ci uh hi. Amaute Efraim mualtung gam, Mikah’ inn-ah hong tung uh a, tua lai-ah taam uh hi. Amaute Mikah inn gei-ah a om uh ciangin Levi tangval’ aw khat khen thei uh hi; amaute kihei-in ama kiangah, “Kua in hih lai-ah nang hong paipih ahi hiam? Hih lai munah bang hih na hi hiam? Hih lai-ah na nasep bang ahi hiam?” a ci uh hi. Amah in amaute kiangah, “Tua bang tua bangin Mikah in kei hong bawl hi: amah in kei hong cialin kei in ama siampi ka suak hi,” a ci hi. Tua ciangin amaute in ama kiangah, “Kote’ kuankhiat khualzinna a tangtung ding hiam cih ka theih nadingun Pasian hong dotsak in, kong thuum uh hi,” a ci uh hi. Tua ciangin siampipa in amaute kiangah, “Lungnuamin pai un. Note paina na khualzinna uh Topa ’ khut sungah om hi,” a ci hi. Tua ciangin mi ngate pai khia-in Laish tung uh a, tua lai-a om mite, Sidon mite’ om bang danin dai takin omin bangmah in a upmawh lohna, leitungah bangmah kisam loin a hauhna, leh amaute Sidonte kiang panin gamla omin kuamah tawh kizopna a neih lohna, lungmuang tak-a a teen’na uh mu uh hi. Amaute Zorah leh Eshtaol-a a sanggamte uh kiang hong tun’ kik uh ciangin, a sanggamte un amaute kiangah, “Bang thu gen ding na nei uh hiam?” a ci uh hi. Amaute in, “Ding un, amaute do-in paito ni; bang hang hiam cih leh a leitang ka mu khin uh hi, en un, lei hoih mahmah hi. Bangmah hih loin om mawk ding na hi uh hiam? Pai ding zekai kei un, lut-in tua leitang va luah ni. Na pai uh ciangin bangmah a ummawh lo mite kiangah na tung ding uh hi. Leitang zai mahmah hi; hi hi, Pasian in na khut sung uh ah leitungah bangmah a kisap lohna mun hong piakhin zo hi,” a ci uh hi. Tua ciangin Dan minamte galhiam a tawi mihing zaguk Zorah leh Eshtaol panin kuankhia uh a, amaute paito-in Judah gam sung Kiriath-jearim-ah giahphual sat uh hi. Hih thu hangin tu hun dongin tua mun pen Mahanehdan kici hi; en in, tua in Kiriath-jearim nitumna lamah om hi. Amaute tua lai mun panin Efraim mualtung gamah pai suakin Mikah innah tung uh hi. Tua ciangin Laish gam a ensim dingin a pai mi ngate in a sanggamte uh kiangah, “Hih innte sungah siampi puan khat, inn sung pasiante, a kiseek milim khat, leh a kisung milim khat a omna na thei uh hiam? Tua ahih ciangin tu-in na hih ding uh ngaihsun un,” a ci uh hi. Tua ciangin amaute kihei-in Mikah’ inn-a Levi tangvalpa omna-ah tung uh a, ama omzia dong uh hi. Tu-in galhiam a tawi Dan mi zagukte kulh kongpi lutna-ah ding uh hi; tua ciangin, galhiam a tawi mi zagukte tawh kulh kongpi lutna-ah siampipa a din’ lai takin gam ensim dingin a kuankhia mi ngate tumin a kiseek milim, a siampi puan, a inn sung pasiante, leh a kisung milim la uh hi. Hih mite Mikah’ inn sungah tumin a kiseek milim, a siampi puan, a inn sung pasiante, leh a kisung milim a lak uh ciangin siampipa in amaute kiangah, “Bang hih na hi uh hiam?” a ci hi. Amaute in ama kiangah, “Pau kei in, na khut-in na kam hum in la kote tawh hong pai-in kote adingin pa leh siampi hong hi in. Nang adingin mi khat’ inn sungah siampi hih ding hoihzaw ahi hiam, tua ahih kei leh Israelte sungah minam leh beh siampi hih ding hoihzaw ahi hiam?” a ci uh hi. Tua ciangin siampipa a lungkim hi; amah in a siampi puan, leh a innsung pasiante, leh a kiseek milim la-in mite’ laizangah pai hi. Tua ahih ciangin amaute mai-ah a ta neute leh a ganhingte leh a vante uh om sakin, amaute kihei-in paikhia uh hi. Amaute Mikah’ inn panin a gamla khop khat a tun’ uh ciangin Mikah’ inn gei-a om innte sunga om mite kisam khia-in amaute in Dan mite delhin pha uh hi. Amaute in Dan mite otsan uh a, tua ciangin amaute hong kihei-in Mikah kiangah, “Hih bang mihon tawh nong pai nading bang thu om ahi hiam?” a ci uh hi. Amah in, “Note in keima bawlsa ka pasiante, leh siampipa la-in na paikhia uh hi; keimah in bang nei nawn ka hi hiam? Tua ahih ciangin, ‘Bang thu ahi hiam? bang hangin hong ci thei na hi uh hiam?” a ci hi. Dan mite in ama kiangah, “Kote lakah na aw hong kizasak kei in, tua hi kei leh ka lawmte uh hehin nang hong hih ding uh a, na innkuanpihte tawh na si kha ding uh hi,” a ci uh hi. Tua ciangin Dan mite pai uh hi; Mikah in ama adingin amaute thahat lua uh hi, ci-in a muh ciangin amah kihei-in a innah ciahkik hi. Dan mite in Mikah’ bawlsate leh a siampipa paipihin gam dai-in a om bangmah a ummawh lo mite omna Laish tung uh a, namsau tawh amaute vatin mei tawh a khuapi hal uh hi. Amaute in Sidon panin gamla uh ahih manin a honkhia ding om lo a, amaute in kuamah tawh kizopna nei lo uh hi. Tua mun pen Bethrehob-te’ neihsa kuam sungah om hi. Amaute in khuapi lam kikin a sungah teeng uh hi. Amaute in tua khuapi min pen Israelte sungah a suak amau’ pian’na Dan tamin Dan phuak uh hi; ahih hangin a masa-in tua khuapi min in Laish ahi hi. Tua ciangin Dan mite in a kiseek milim amau’ adingin phut uh hi; Moses’ tapa Gershom’ tapa Jonathan leh ama tapate in tua gam a kilak hun dongin Dan minamte adingin siampi ahi uh hi. Tua ahih ciangin amaute in Shiloh-ah Pasian’ inn a om sung teng Mikah’ bawlsa a kiseek milim phut uh hi. Tua hun, Israel sungah kumpi a om loh lai takin, Levi mite khat Efraim mualtung gammongah peemin Judah gam Bethlehem panin zineu khat la hi. A zineu ama tungah heh a, ama kiang panin pai khia-in Judah gam Bethlehem khua-a a pa inn-ah ciah a, tua lai-ah kha li sung khawng om hi. Tua ciangin a pasal ding khia-in kam neem tawh a hopih ding leh a sam kik dingin tua nu kiangah pai hi. Amah in a nasempa leh a la nih tonpih hi. Tua ciangin tua nu’ pa inn-ah tung hi; numei’ pa in amah a muh ciangin lungdamna tawh a dawn dingin hong pai hi. Tua ciangin a sungpa, numei’pa in amah taam sak a, amah tawh nithum sung om hi; tua ahih ciangin amaute in an ne, tui dawnin giak khawm uh hi. Tua ciangin a nili ni-in zingsangin amaute tho baih uh a, kithawi uh hi; ahih hangin numei’pa in a makpa, kiangah, “An tawmkhat ne-in na tha khauhsak in, tua khit ciangin na pai thei ding hi,” a ci hi. Tua ahih ciangin tua mi nihte tu-in ne-in dawn khawm uh hi; numei’ pa in mipa kiangah, “Tu zan taam ding lungkim in la, na lung nuamsak in,” a ci hi. Pai dingin mipa a din’ ciangin a sungpa in a taam kik dong mateng kho hi. Tua ciangin a ni nga ni-in a ding dingin zingsangin amah tho baih hi; numei’ pa in “An ne phot in la, ni a dialh mateng khawl lai in,” a ci hi. Tua ahih ciangin amaute in an ne uh hi. Mipa leh a zineu leh a nasempa paikhia dingin a din’ ciangin a sungpa, numei’pa in ama kiangah, “En in, tu-in nitak nai-in ni niam ta hi; tu zan taam un. En in, ni tum dektak hi; hih lai-ah giak in la na lung nuamsak in; na lam pai nading uh zing ciang zingsangin tho baihin innah na ciah ding uh hi,” a ci hi. Ahih hangin mipa tua zan taam lo hi; amah ding-in paikhia a, Jebus (Jerusalem a cihna) gal khat tung hi. Amah in tuan’na a kivawh la nih leh a zineu tawh ahi hi. Amaute Jebus kiang nai a tun’ uh ciangin ni niam khin a, nasempa in a Topa kiangah, “Tu-in hong pai-in, Jebus mite’ khuapi-ah kihei-in tua lai-ah zan taam ni,” a ci hi. A Topa in ama kiangah, “Israel mite a hilo gamdang mite’ khuapi sungah kihei-in i pai kei ding hi; Gibeah-ah i paisuak ding hi,”a ci hi. Tua ciangin amah in a nasempa kiangah, “Hong pai in, hih munte khatpeuhpeuh va naih-in, Gibeah ahih kei leh Ramah-ah zan taam ni,” a ci hi. Tua ahih ciangin amaute in khengin paisuak uh hi; tua ciangin Benjaminte’ gam ahi Gibeah khua gei-ah ni tum a, Gibeah-ah pai in a giak dingin tua lai-ah amaute kihei uh hi. Amah pai-in khuapi sung kongzing laizangah tu hi; bang hang hiam cih leh a zan taam dingin kuamah in a innah amaute sang lo hi. En in, puteek khat lo-a a nasepna panin nitak ciangin hong ciah hi; tua-pa in Efraim mualtung gam pan hi a, amah in Gibeah-ah a peem ahi hi; tua mun-a mite in Benjamin mite ahi hi. Amah khuadak a, khualzinpa khuapi kongzingah mu hi; tua ciangin puteekpa in, “Koi-ah pai ding na hi hiam? Koi panin hong pai na hi hiam?” a ci hi. Amah in ama kiangah, “Keima hong pai khiatna Judah gam Bethlehem panin Efraim mualtung gam mongah a pai dingin hong nawk ka hi uh hi. Judah gam Bethlehem-ah ka pai hi; tu-in Topa inn-a ciah ka hi hi; kuamah in a inn-ah hong tungsak lo hi. Ka late uh adingin buhtu leh gan-an, kei leh na nasemnu leh na nasemte tawh a om tangvalpa’ adingin anlum leh leenggahzu ka nei uh hi; a kisam bangmah om lo hi,” a ci hi. Tua ciangin puteekpa in, “Nopna ngah ta in; na kisapna khempeuh ka en ding hi; kongzingah giak kei hamtang in,” a ci hi. Tua ahih ciangin amah in a innah ciahpih in late gan-an pia hi; amaute in a khe uh silin, ne-in dawn uh hi. Amaute in a lung uh nuamsakin a om lai takun, en in, tua khuapi mi, mi gina lote in tua inn kimkotah pangin a kongkhak tum uh hi; amaute in inn neipa puteekpa kiangah, “Ama taw ka luktheih nadingun na innah a hong tung mipa hong paikhiatpih in,” a ci uh hi. Inn neipa, tua mipa, amaute kiangah pusuakin amaute tungah, “Hi lo hi, ka sanggamte aw, tua bangin gitloh gamtat kei un; hih mipa ka innah hong tun’ na theih napi-un hih bang a sia gamta kei un. En un, hih lai-ah ka ta nungak leh zinpa’ zineu om hi; amaute hong pai khiatpih sak un. Amaute buanin hoih na sak bangun amaute tungah hih un; ahih hangin hih mipa tungah tua bang a sia gamta kei un,” a ci hi. Ahih hangin mite in ama thu ngai lo uh hi. Tua ciangin mipa in a zineu manin amaute kiangah koih khia hi; tua ciangin amaute in tua nu buan uh a, zingsang mateng zan tawntung tua nu hih uh hi. Zingsang khuavak ding hong kipat ciangin amaute in tua nu ciahsak uh hi. Zingsang khua hong vak ciangin numei hong ciahin, ama topa a omna mipa’ kongkhak ah pukin khuavak dong om hi. Zingsang ciangin a topa tho a, a khualzin zom dingin inn kongkhak hongin a paikhiat ciangin, en in, inn khongkhakah a zineu lumin sangkil tungah a khutte kinga hi, Amah in tua nu kiangah, “Tho in, pai ta ni,” a ci hi. Ahih hangin amah in dawng nawn lo hi. Tua ciangin amah in dom to-in la tungah tua nu koih hi; mipa ding-in a innah ciah hi. A innah a tun’ ciangin amah in tem khat la a, a zineu lenin a phei a liangin seh sawm-le-seh-nih suahin sem a, Israelte gam sung khempeuhah hawm hi. A mu mite khempeuh in, “Tu ni dongin, Izipt gam panin Israel mite a pai khiat-a kipan hih bang thu piang ngei lo a, zong kimu ngei lo hi; hih thu ngaihsun un, kikum un la gen un,” a ci uh hi. Tua ciangin Israel mite khempeuh, Gilead gam zong a kihel, Dan panin Be-ersheba dong hong kuankhia uh a, Topa ' kiang Mizpah-ah mihing khat bangin mihonte hong kikhawm uh hi. Israel minam khempeuh sung pan makai khempeuh, namsau tawi khe galkap mihing tul zali, Pasian’ mite kikhopna-ah amau mahmah kipia uh hi. (Tu-in Israel mite Mizpah-ah a paina thu Benjamin mite in za uh hi.) Israel mite in, “Hih bang tatsiatna hong pian’na thu hong gen in,” a ci uh hi. Tua ciangin a kithat numei’ pasal, Levi mipa in dawngin, “Benjamin-te’ gam Gibeah-ah kei leh ka zineu, a zan taam dingin ka tung uh hi. Tua ciangin Gibeah mite kei langah hong ding uh a, zan-in kote’ omna innkiim-ah hong pang uh hi; amaute in kei hong that nuam uh a, ka zineu buan gawpin tu-in amah si hi. Tua ciangin ka zineu la-in ka semnen a, Israelte' luah gam sung khempeuhah ka hawm hi; bang hang hiam cih leh amaute in Israelte lakah kihhuaina leh ut luat khialhna gamta uh hi. En un, no Israel mihingte, note khempeuh aw, na ngaihsutna uh gen un la, hih lai-ah kikum un,” a ci hi. Tua ciangin mi khempeuh mihing khat bangin ding-in, “Eite khempeuh khat zong i puanbuk-ah pai loin, eite khat zong i inn-ah i ciah kei ding hi. Tu-in Gibeah tungah eite’ hih ding thu in: tua khua a sim dingin aisaanna tawh i pai ding a, amaute in Israelte sungah ut luatna tawh a khialhna uh hangin Benjaminte gam Gibeah a thuk theih nadingun mite’ adingin annek tuidawn a pua dingin Israel minamte khempeuh sung panin mi zakhat sung pan mihing sawm, tulkhat sung pan zakhat, tulsawm sung pan tulkhat i la ding hi,” a ci uh hi. Tua ahih ciangin khuapi do dingin Israel mite khempeuh kikhawm uh a, kipawlin mi khat bang uh hi. Tua ciangin Israel minamte in Benjamin minamte khempeuh kiangah mi sawl uh a, “Note lakah a piang thu in bangzah tatsiatna ahi hiam? Tua ahih ciangin tu-in kote in amaute thatin Israelte sung panin siatna ka paihkhiat theih nadingun Gibeah khua sunga om a mi gina lote hong piakhia un,” a ci uh hi. Ahih hangin Benjaminte in a sanggam uh Israel mite’ aw ngai lo uh hi. Tua ciangin Israel mite do dingin a kuan khia dingin Gibeah khuapite panin Benjamin mite kituah uh hi. Benjamin mite in tua ni-in amau’ khuapite panin, Gibeah-ah a teeng a kiteng khia mihing zasagih ban-ah namsau a tawi mihing tul sawmnih leh tulguk khawm uh hi. Hihte khempeuh lakah mi a kiteng khia a veikhoi zasagih om hi; amaute khempeuh in suang tawh samzang kapin a khial lote ahi uh hi. Israel mite in Benjaminte sim loh, namsau a tawi mihing tul zali khawm uh hi; hih mite khempeuh galsiam mi ahi hi. Israel mite ding-in Bethel-ah paito uh a, “Benjamin mite a do dingin kua pai masa ding ka hi uh hiam?” ci-in Pasian dong uh hi. Topa in, “Judah paito masa ding hi,” a ci hi. Tua ciangin Israel mite zingsangin tho-in Gibeah khua sim dingin giahphual sat uh hi. Tua ciangin, Israel mite Benjamin do dingin kuankhia uh hi; Israel mite amaute do dingin Gibeah-ah a gualin va naih uh hi. Benjamin mite Gibeah pan hong kuan khia-in tua ni-in Israel mite tul sawmnih leh tulnih lei-ah that uh hi. Ahih hangin Israel mite kihanthawnin a ni masa ni-a a pan'na mun mah uh ah gal pang kik uh hi. Tua ciangin Israel mite paito-in nitak dong Topa mai-ah kap uh hi; amaute in Topa kiangah thu dongin, “Ka sanggamte uh Benjamin mite do dingin gal phualah ka naih kik ding uh hiam?” a ci uh hi. Topa in, “Amaute do dingin paito un,” a ci hi. Tua ahih ciangin Israel mite a ni nih ni-in Benjamin mite do dingin hong nai uh hi. Amaute do dingin a ni nih ni-in Gibeah panin, Benjaminte hong kuankhia a, Israel mite tulsawm leh tulgiat that uh hi; hihte khempeuh namsau a tawi mite ahi hi. Tua ciangin Israel mite khempeuh, galkap vekpi paito-in Bethel-ah tungin kap uh hi; tua lai mun Topa’ mai-ah amaute tu-in nitak dong tua ni an tang uh a, Topa mai-ah meihal biakna leh thunuam-a biakna pia uh hi. Israel mite in Topa thu dong uh a, (bang hang hiam cih leh tua hunin Pasian' thuciamna singkuang tua lai-ah om a, Aaron’ tapa Eleazar’ tapa Finehas in tua mai-ah tua hunin na sem hi), “Ka sanggamte uh Benjamin mite a do dingin pai kik lai ding ka hi uh hiam, tua ahih kei leh khawl ding ka hi uh hiam?” a ci uh hi. Topa in, “Paito un; bang hang hiam cih leh zing ciangin amaute na khut sung uh ah kong pia ding hi,” a ci hi. Tua ahih ciangin Israelte in Gibeah kiim-ah a pangsim dingin mi koih uh hi. Israel mite a nithum ni-in Benjamin mite do dingin kuanto uh a, ahun dang-ate mah bangin Gibeah lang khatah pang uh hi. Tua ciangin amaute do dingin Benjamin mite kuankhia uh a, khuapi panin amaute kipaikhiasak hi; a hun dang-ate mah bangin amaute in Bethel lamah a paito pen leh Gibeah lamah a pai lam lianpi, leh gam sungah Israel mite sawmthum bang that uh hi. Tua ciangin Benjamin mite in, “A masa-a bangin i mai-ah amaute tai uh hi,” a ci uh hi. Ahih hangin Israel mite in, “Eite tai-in, khuapi panin lam lianpi-ah amaute paikhia sak ni,” kici uh hi. Israel mite khempeuh amau omna mun panin ding-in Baaltamar-ah a gualin pang uh hi; a pangsim Israel mite Geba nitumna lam amau omna panin hong diang khia uh hi. Gibeah khua a sim dingin Israelte khempeuh sung pan a kiteng khia mi tulsawm hong kuan uh a, a galdo uh haksa mahmah hi; ahih hangin Benjamin mite in amau adingin siatna a naina thu thei lo uh hi. Tua ciangin Israel mai-ah Topa in Benjaminte zo hi; Israel mite in tua ni-in Benjaminte zo hi; Israel mite in tua ni-in Benjaminte mihing tul sawmnih leh tulnga leh zakhat that uh hi; hihte khempeuh namsau a tawi mite ahi uh hi. Tua ahih ciangin Benjamin mite in a guallelhna uh kimu uh hi. Israel mite in Benjamin mite awn uh hi, bang hang hiam cih leh Gibeah khua a sim dingin a koih uh a pangsimte muang uh hi. Tua ciangin a pangsim mite manlangin hong pai-in Gibeah khua bawh uh hi; a pangsim mite hong pai khia-in namsau tawh khuapi mi khempeuh vatgawp uh hi. Tu-in Israel mite leh a pangsim mite a kiciamna lim in amaute in khuapi sung panin meikhu lianpi a suahsak toh uh ciangin Israel mite galdo dingin hong tum ding uh hi. Tu-in Benjaminte in Israel mite sawmthum bang vatgawpin thah ding kipan uh hi; amaute in, “A masa-a mah bangin eite mai-ah amaute kivat tuk gawp taktak hi,” a ci hi. Ahih hangin amau' kiciamna lim meikhu khuapi sung panin suakto dingin a kipat ciangin Benjamin mite nunghei uh hi; en in, a khuapi bup a khu in vantungah kahto hi. Tua ciangin Israel mite hong kilehhei uh a, Benjamin mite lungkia uh hi; bang hang hiam cih leh amau’ siat nading a naina thei uh hi. Tua ahih ciangin Israel mite mai panin amaute kileh kikin gamlak lam manawh uh hi; ahih hangin gal in amaute pha a, khuapi sung panin hong pai khia mite in amaute kikal-ah amaute susia uh hi. Amaute in Nohah panin nisuahna lamah Gibeah gal ciang dong Benjamin mite delhin tuancilin vatgawp uh hi. Benjamin-te sung pan galhang mihing tulsawm leh tulgiat tuk uh hi. Tua ciangin amaute kihei-in sehnel gam lam Rimmon Suangpi-ah tai uh hi; amaute mihing tulnga lam lianpite-ah si uh a, Gidom ciang dong nakpi takin amaute kidelhin tulnih kithat hi. Tua ahih ciangin tua ni-in Benjamin-te a si khempeuh, namsau a tawi galhang mihing tul sawmnih leh tulnga ahi hi. Ahih hangin mihing zaguk kihei-in gamlak lam Rimmon Suangpi-ah tai uh a, Rimmon suangpi-ah kha li sung om uh hi. Tua ciangin Israel mite in Benjamin mite do dingin kihei kik uh a, namsau tawh a mi a sa-in a muh khempeuh uh vatgawp uh hi. Amuh uh khuate khempeuh mei tawh hal uh hi. Tu-in Israel mite Mizpah-ah kiciam uh a, “Benjamin-te tungah kuamah in i tanu mo-in i kha kei ding hi,” a ci uh hi. Tua ciangin Bethel-ah mite hong pai in Pasian’ mai-ah nitak dong tu uh a, amaute nakpi takin a kap uh hi. Amaute in, “Israel’ Pasian, Topa aw, tu ni-in Israelte sungah minam khat a pelem nading, hih thu bang hangin Israelte tungah hong tung ahi hiam?” a ci uh hi. A zing ciangin mite tho baihin tua lai-ah biakna tau khat lam uh a, meihal biakna leh thu-nuam-a biakna pia uh hi. Tua ciangin Israel mite in, “ Topa ading kikhopna-ah Israel minamte khempeuh sung panin kua teng hong pai lo ahi hiam?” a ci uh hi. Bang hang hiam cih leh amaute in Topa kiangah a pai lo mite tawh kisai-in Mizpah-ah kiciamna lianpi khat bawl uh a, “Kithat ding hi,” a ci uh hi. Israel mite in a sanggam uh Benjamin mite khasiat uh a, “Tu ni-in Israelte sung panin minam khat bei hi. Eite in i tanute amaute tungah zi dingin pia lo ding hi hang, ci-in Topa tawh kiciam khin i hih ciangin a om lai amaute’ zi ding bang cih ding i hi hiam?” a ci uh hi. Tua ciangin amaute in, “ Topa kiang Mizpah-ah Israel minamte hong pai lo a om hiam?” a ci uh hi. En in, Jabeshgilead panin tua giahphual kikhopna-ah kuamah pai lo hi. Bang hang hiam cih leh mite a kikhop ciangin, en in, tua lai-ah Jabeshgilead-a teengte khat zong om lo hi. Tua ahih ciangin mihonte in a galhangte uh mihing tulsawm leh tulnih tua lai-ah sawl uh a, “Pai un la Jabeshgilead-a teengte namsau tawh va vatgawp un; nupite leh naupang neute zong hih un. Hih bangin na hih ding uh hi; pasal khempeuh leh pasal tawh a lum khawmsa numei khempeuh na sumai ding uh hi,” ci-in thu pia uh hi. Amaute in Jabeshgilead-a teeng mite lakah lup khopna tawh pasal a thei nai lo nungakno zali mu uh hi; amaute in Kanaan gam-a om Shiloh giahphual-ah tuate hong paipih uh hi. Tua ciangin mihon buppite in Rimmon Suangpi-a om Benjamin mite kiangah thu puak uh a, amaute kiangah kilemna thu gen uh hi. Tua hun ciangin Benjaminte hong ciahkik uh hi; tua ciangin amaute in Jabeshgilead numei a hing-a a koihte uh pia uh hi; ahih hangin amau' adingin kicing zo lo hi. Israel minamte sungah Topa in kitapkhapna omsak ahih manin mite in Benjaminte khasiat uh hi. Tua ciangin mihonte’ upate in, “Benjaminte sung panin numeite kithat khin ahih manin a om lai mite’ zi ding bang cih ding i hi hiam?” a ci uh hi. Amaute in, “Israelte sung panin minam khat a bei loh nadingin Benjamin a suakta laite’ adingin gamhluah a om ding kisam hi. Ahi zongin amau’ zi dingin i tanute i pia thei kei hi,” a ci uh hi. Bang hang hiam cih leh Israel mite kiciam khinin, “Benjaminte tungah zi a pia mipa in samsiatna ngah ta hen,” a ci uh hi. Tua ahih ciangin amaute in, “En un, Beth-el leilu lam, Beth-el panin Shekhem lamah a paito lam lianpi nisuahna lam, Lebonah leitaw lamah a om Shiloh-ah Topa ading kumsim pawi khamna om hi,” a ci uh hi. Tua ahih ciangin amaute in Benjamin mite thu pia-in, “Pai-in leenggui lote-ah buk un la, vil un; Shiloh tanute laamna-ah a laam dingin hong pai uh leh, leenggui lote panin note in delhin mi khempeuh in na zi ciat ding uh Shiloh tanute man un la, Benjamin gamah ciahpih un. Amau’ pate ahi a, a sanggampate uh ahi zongin kote kiangah lungkim lohna gen dingin hong pai ciangin kote in amaute kiangah, ‘Kote tungah hehpihna tawh amaute hong pia un; bang hang hiam cih leh mi khempeuh zi ding galkap-na sungah ka ngahsak zo kei uh a, note zong na mawh nadingun note in amaute tungah a pia na hi kei uh hi,’ ka ci ding uh hi,” a ci uh hi. Benjamin mite zong tua mah bangin gamta uh a, amau mi a phazah tawh kituakin a laamte lak panin a puak khiatte uh a zi dingun la uh hi; tua ciangin amaute pai-in a gamhluahna uh-ah ciahkik uh a, khuapite lam kikin a sungah teeng uh hi. Tua hun ciangin Israel mite tua lai panin paikhia uh a, mi khempeuh amau minam leh a innkuanpih ciat, tua lai panin mi khempeuh amau’ gamhluahna ciatah ciah uh hi. Tua hun lai-in Israelte sungah kumpi om lo hi; amau’ hoihsak bang ciatun mi khempeuh gamta uh hi. Thukhente in a uk hun lai-in tua gam sungah kialpi tung a, Judah gam sunga Bethlehem khuami khat, amah leh a zi leh a tapa nihte tawh Moab gamah a peem dingin pai uh hi. A mipa min in Elimelek hi a, a zi’ min in Naomi hi-in, a tapa nihte’ min in Mahlon leh Khilion ahi hi; amaute in Judah gam Bethlehem-a Efrathah mite ahi uh hi. Amaute Moab gamah pai-in tua lai-ah om uh hi. Ahih hangin Naomi’ pasal Elimelek si a, a tapa nihte bek tawh tua nu om hi. Hih tapate in Moab mite zi-in la uh hi; a khat’ min in Orpah hi a, adang khat min in Ruth ahi hi. Tua lai-ah amaute kum sawm bang teeng uh hi; tua ciangin Mahlon leh Khilion si a, tua nupi a tapa nihte leh a pasal in sihsan hi. Tua ciangin tua nu a mo tegel tawh Moab gam panin a ciahkik dingin kithawi hi; bang hang hiam cih leh Topa in a mite kemin an a piakna thu Moab gam sung panin amah in za hi. Tua ahih ciangin a omna mun panin a mo tegel tawh tua nu dingkhia a, Judah gamah ciahkik dingin lam pai uh hi. Ahih hangin Naomi in a mo nihte kiangah, “Pai un, na inn tuak uh ah ciahkik un la, na nute uh tawh om un. A sisate hita leh kei hita leh nong limbawl uh mah bangin Topa in note hong limbawl ta hen. Topa in na pasal kik uh inn tuakah hong nuamsa sak hen!” a ci hi. Tua ciangin amah in amaute namin, amaute a kap uh hi. Tua ciangin amaute in ama kiangah, “Hi lo hi, na mite kiangah nang tawh kong ciah ding uh hi,” a ci uh hi. Ahih hangin Naomi in, “Kilehkik un, ka tanute aw, bang hangin hong zui ding na hi uh hiam? Note’ pasal hong hi thei dingin ka gil sungah tapa nei lai ka hi hiam? Kilehkik un, ka tanute aw, na pai nading uh-ah pai un; bang hang hiam cih leh pasal nei dingin ka teek lua hi. Pasal nei dingin kilamen ing ci mah leng zong, tu nitak mahmahin pasal nei-in tapate nei phial ta mah leng zong, amaute a khan’ khit dong ngak zo ding na hi uh hiam? Pasal neih ding khawl ding na hi uh hiam? Hilo hi, ka tanute aw, Topa in kei hong langpan’ ahih manin note sangin nakpi takin kei ka lunggim zaw hi,” a ci hi. Tua ciangin amaute nakpi-in a kap kik uh hi; Orpah in a teeknu namin ciah a, ahih hangin Ruth in a teeknu beel hi. Tua ciangin amah in, “En in, na sanggamnu a mite leh a pasiante kiangah ciahkik khin hi; na sanggamnu’ nungah nang zong ciah in,” a ci hi. Ahih hangin Ruth in, “Nang kong nusiat nading ahi a, nang zuihna pan ka ciahkik nading ahi zongin hong cici kei in; bang hang hiam cih leh na paina-ah ka pai ding a, na giahna-ah ka giak ding hi; na mite in keima mite hi ding a, na Pasian in keima Pasian hi ding hi; na sihna-ah ka si ding a, tua munah ka kivui ding hi. Sihna cih loh buang thudang hangin kong nusiat taak leh Topa in kei hong dawm kei ta hen!” a ci hi. Tua ciangin Naomi in amah a zuih ding a lungsim a khentatna a muh ciangin bangmah ci nawn lo hi. Tua ahih ciangin Bethlehem a tun’ mateng a nih-un paisuak uh hi. Bethlehem a tun’ uh ciangin amaute’ hangin a khuazangpi-un luum lialua uh hi; “Hih nu Naomi ahi hiam?” a ci uh hi. Amah in amaute kiangah, “Naomi hong ci nawn kei un, Mara hong ci un, bang hang hiam cih leh Vanglianpa in nakpi takin kei hong gim sak hi. A dim-in ka paikhia a, Topa in a hawmin hong ciahpih kik hi. Topa in kei hong gim sakin Vanglianpa in kei tungah gimna hong tungsak ahih ciangin bang hangin Naomi hong ci lai na hi uh hiam?” a ci hi. Tua ahih ciangin tu-a bangin Moab gam panin Naomi, Moab mi a monu Ruth tawh hong ciahkik hi. Mangbuhham lak kipat lai takin Bethlehem khua hong tung uh hi. Tu-in Naomi in a pasal’ tanaute, Elimelek innkuan sung mi, Boaz min nei a hau mi gina khat nei hi. Tua ciangin Moab mi Ruth in Naomi kiangah, “Lo-ah hong kuansak in la maipha ka muhna peuhpeuhpa’ nungah anvuite lak-ah a sangh hong tawm sak in,” a ci hi. Tua ciangin amah in ama kiangah, “Pai in, ka tanu aw,” a ci hi. Tua ahih ciangin amah kuan khia-in pai a, an late’ nung lo sungah ansanghte tawm hi; Elimelekte innkuan Boaz’ lo-ah va pai kha hi. En in, Boaz in Bethlehem panin hong pai hi; amah in an late kiangah, “ Topa in note hong ompih ta hen!” a ci hi. Amaute in dawngin, “ Topa in nang thupha hong pia ta hen!” a ci uh hi. Tua ciangin Boaz in an late a uk a nasempa kiangah, “Hih numei kua ta ahi hiam?” a ci hi. Tua ciangin an late a uk nasempa in dawngin, “Moab gam panin Naomi tawh a hong ciahkik Moab numei ahi hi. Tua numei in, ‘Kong thum hi, ansangh hong tawm sakin an late nungah anlomte lakah a kiate hong khawm sak in,’ hong ci hi. Tua ahih ciangin amah hong pai-in tawlkhat zong khawl loin zingsang tunga kipan tu dong sem suak hi,” a ci hi. Tua ciangin Boaz in Ruth kiangah, “Tu-in, ngai in, ka tanu aw, midangte’ lo-ah ansang tawm dingin pai kei in la, hih lo zong nusia kei in, ka numeite’ nai-ah om cinten in. Amaute’ an lakna lo na mitsuan in la, amaute’ nungah zui in. Nang hong bawlsiat loh nading uh tangvalte thu pia khin hilo ka hi hiam? Na dang a tak ciangin pai in la tangvalte’ tui tawisa dawn in,” a ci hi. Tua ciangin amah in a mai-in lei-ah puksuk a, lei lakah kunin ama kiangah, “Kei gamdang mi khat hi napi, hih banga kei nong phawk nadingin bang hangin na mai-ah maipha ngah ka hi hiam?” a ci hi. Ahih hangin Boaz in tua nu dawngin, “Na pasal a sih khit-a kipan na teeknu’ adingin na sepnate khempeuh, leh na nu leh na pa leh na pian’na gam nusia-in nidanga na theih ngei loh mite kiangah na paina thu a kicing takin kei kiangah hong kigen zo hi. Topa in na gamtatna sate apha tawh hong thuk a, a lim nuai beel dinga na paina Israelte’ Pasian, Topa in thaman a cingin hong pia ding hi,” a ci hi. Tua ciangin numei in, “Ka topa aw, kei tungah nong dik mahmah hi; bang hang hiam cih leh keimah in na nasem numeite hilo napi-in na nasemnu tungah migitna kam nong pau hi,” a ci hi. An nek hun ciangin Boaz in tua nu kiangah, “Hih lai-ah hong pai in, anlum ne in la, leenggahzu sungah na an diah in,” a ci hi. Tua ahih ciangin an late gei-ah amah tu a, tuapa in an kante tua nu khak hi; amah in a kham mateng ne a, a khamval zong pawlkhat om lai hi. Tua nu ansang tawm dingin a din’ ciangin Boaz in a tangvalte hilh a, “Anlomte lak nangawn ah tawm sak un la, amah kosia kei un. Anlom hente lak panin zong ama adingin pawlkhat dok khia-in ama top dingin nusia un la, amah tai kei un,” a ci hi. Tua ahih ciangin amah in nitak dong lo sungah tawm hi; tua ciangin amah in a topsa teng satkhia a, mangbuhham seu khat bang pha hi. Tua ciangin amah in pua-in khuapi sungah ciah hi; a an top teng a teeknu lakin, a an khamvalte zong la-in amah pia hi. Tua ciangin a teeknu in ama kiangah, “Tu ni-in koi-ah tawm na hi hiam? Koi-ah na sem na hi hiam? Nang hong phawk mipa in thupha ngah ta hen,” a ci hi. Tua ahih ciangin amah in a teeknu kiangah a naseppihte gen a, “Tu ni-a ka nasepna mipa in Boaz ahi hi,” a ci hi. Tua ciangin Naomi in a monu kiangah, “A dikna in a hingte hita leh, a site hita leh a mangngilh lo Topa in amah thupha pia ta hen!” a ci hi. Naomi in ama kiangah, “Tua mipa in i behte, i tanau naipente khat ahi hi,” zong ci hi. Tua ciangin Moab numei Ruth in, “Tu-a ban-ah amah in kei kiangah, “Ka an khempeuh a lak khit matengun ka nasemte kiang nai-ah om in, hong ci hi,” a ci hi. Naomi in a monu Ruth kiangah, “Ka tanu aw, ama numeite tawh na kuankhop hoih mahmah hi; tua hi kei leh lo dangah nang hong kibawlsia ding hi,” a ci hi. Tua ahih ciangin Boaz numeite’ nai-ah amah omin mangbuhham lak khit dong ansangh tawm hi; a teeknu tawh amah omkhawm hi. Tua ciangin a teeknu Naomi in ama kiangah, “Ka tanu aw, nang’ adingin a nop nadingin inn na suan’ nading kong vaihawmsak ding kilawm hilo ahi hiam? A numeite tawh na na sepna Boaz in i tanau hilo ahi hiam? Thei in, amah in tu nitakin ancilna-ah mangbuhham haih hi. Tua ahih ciangin kisilin sathau kinuh in la, na puan hoihpente silhin ancilna-ah paisuk in; ahih hangin a nek a dawn a man mateng a mipa kiangah na pai lam kithei sak kei in. Ahih hangin amah a lup ciangin a lupna mun encik in; tua ciangin pai in la a khe lam puan leemin lum in; tua ciangin na gamtat nading amah in hong gen ding hi,” a ci hi. Tua ciangin amah in dawngin, “Na gen khempeuh ka hih ding hi,” a ci hi. Tua ahih ciangin ancilna-ah amah paisukin a teeknu in ama kiangah a gensa bang teekteekin gamta hi. Boaz in a nek a dawn khit ciangin a lungnuam a, anphual nawl-ah lum dingin pai hi. Tua ciangin dam takin numei hong pai-in a khe lam puan leemsakin lumsuk hi. Zankim ciangin mipa lau-in kihei a, en in, a khe-ah numei khat na lum! Amah in, “Kua na hi hiam?” a ci hi. Tua nu in dawngin, “Keimah na nasemnu Ruth ka hi hi; tanaute na hih ciangin na nasemnu na puan hong zawn in,” a ci hi. Tua ciangin amah in, “ Topa in thupha hong pia ta hen, ka tanu aw; a hau hita leh a zawng hita leh tangvalte nung na zuih lohna-ah a masa sangin a lianzaw a tawpkhak hih dikna na gamta hi. Tu-in ka tanu aw, lau kei in, na nget khempeuh nang adingin kong hih sak ding hi; bang hang hiam cih leh ka khuapih mite khempeuh in numei gina na hih lam thei uh hi. Kei pen tanau nai ka hihna man hi; ahih hangin kei sangin a naizaw tanau khat om lai hi. Tu zan om in, zingsang ciangin amah in nang tungah tanaute’ hih ding hong hih leh pha hi; amah hih sak in; ahih hangin nang tungah tanaute sep ding a sep nop kei leh, tua ciangin, Topa in a nungta ahih mah bangin nang tungah tanau nasep kong sem ding hi. Zingsang dong lum in,” a ci hi. Tua ahih ciangin zingsang dong a khe kiangah lum a, ahih hangin mi meel khat leh khat a kitheih ma-in amah tho hi; tua ciangin mipa in, “Ancilna-ah numei a paina kithei sak kei in,” a ci hi. Mipa in, “Na puansilh hong paipih in la hong dawh in,” a ci hi. Tua ahih ciangin numei in dawh a, amah in mangbuhham lawh guk teh khia-in tua nu guan’ hi; tua ciangin khuapi sungah tua nu ciah hi. A teeknu kiangah a tun’ ciangin amah in, “Ka tanu aw, bang na ci hiam?” a ci hi. Tua ciangin amah in mipa in ama adingin a hihna teng genin, “Hih mangbuhham lawh guk hong guan’ hi; bang hang hiam cih leh amah in, ‘Na teeknu kiangah khut hawm guakin na ciah kei ding hi,’ hong ci hi,” a ci hi. Amah in dawngin, “Ka tanu aw, a thu hong bangci suahkhiat cih na theih mateng ngak in; bang hang hiam cih leh mipa mawk om lo ding a, tu-in a thu siangsak ding hi,” a ci hi. Tua ciangin kulh kongpi-ah Boaz paito-in tua mun-ah tusuk hi; en in, tanaute, Boaz’ genpa hong pai hi. Tua ahih ciangin Boaz in, “Hong pai dih in, lawm aw; hih lai-ah tu dih in,” a ci hi; tua ciangin amah hong kihei-in hong tusuk hi. Tua ciangin amah in khua upate mihing sawm sam-in, “Hih lai-ah tu dih un,” a ci hi; tua ahih ciangin amaute tusuk uh hi. Tua ciangin amah in tanaupa kiangah, “Moab gam panin a hong ciahkik Naomi in i tanaute Elimelek’ neihsa leitang zuak hi. Tua ahih ciangin hih thu nang kiangah kong gen ding ngaihsun in, ‘Hih lai-a a tu mite’ muhna leh keima mi upate’ muhna-ah lei in,’ kong ci hi. Na tat ding leh tan in; ahih hangin na tat kei ding leh, a thu ka theih nadingin kei kiangah hong gen in; bang hang hiam cih leh nang sim loh a tan ding kuamah om lo hi; tua ahih manin nang kiangah kong pai hi,” a ci hi. Tua ciangin amah in “Ka tan ding hi,” a ci hi. Tua ciangin Boaz in, “Naomi tung panin a lo na lei ni-a kipanin, a site, min a gamhluah ah a tun’ kik theih nadingin a sipa’ zi Moab numei Ruth zong a lei na hi hi,” a ci hi. Tua ciangin a tanaupa in, “Keima gamhluah siasak kha ding ka hih manin keima adingin ka tan thei kei ding hi. Keimah in tan thei lo ka hih ciangin keima tat theihna thu nangmah in tang in,” a ci hi. Nidang lai-in Israelte sungah tatna leh kikhekna thu-ah ngeina in hih bang ahi hi; thu vaihawm khat peuhpeuh a kipsak nadingin mipa khat in a khedap suahkhia-in a lawmpa pia hi; hih banga hihna pen Israelte sungah kipsakna ahi hi. Tua ahih ciangin a tanaupa in Boaz kiangah, “Nang ading lei in,” a cih ciangin amah in a khedap suahkhia hi. Tua ciangin Boaz in upate leh mi khempeuh kiangah, “Tu ni-in note in Naomi’ tung panin Elimelek leh Khilion leh Mahlon’ neihsa khempeuh ka lei khitna thu teci na hi uh hi. A site’ min ama sanggamte leh a pian’na a khua sung panin a maiman’ loh nadingin ama gamhluahna-ah a site min a kizop theih nadingin a si khin Mahlon’ zi, Moab numei Ruth zong ka zi dingin ka lei khin hi; note in tu ni-in teci na hi uh hi,” a ci hi. Tua ciangin kulh kongpi-a om mite khempeuh leh upate in, “Kote in teci ka hi uh hi. Topa in, Israelte’ innkuan a lamto khawm Rachel leh Leah bangin na innkuan sunga hong pai numei bawl ta hen. Efrathah-ah na dau pai hen la, Bethlehem ah na minthang ta hen; Topa in hih a khangno lai numei tawh nang hong piak na tate hangin Judah in Tamar tawh a neih tapa Perez’ innkuan tawh kibangin na innkuan piang ta hen,” a ci uh hi. Tua ahih ciangin Boaz in Ruth la-in ama zi suak hi; amah in a zi luppih a, Topa in tua nu gai sakin amah in tapa khat nei hi. Tua ciangin nupite in Naomi kiangah, “Tanau nei loin tu ni-in hong om sak lo Topa in thupha ngah ta hen; Israelte sungah ama min thang ta hen! Amah in nang adingin na nuntakna hong pia kik, leh na khanghamna-ah hong vakpa hi ding hi; bang hang hiam cih leh, tapa sagih sangin a thupizaw, nangmah hong it na monu’ neih ahi hi,” a ci uh hi. Tua ciangin Naomi in naungeek la-in a angah tawi a, amah cingnu suak hi. A veng nupite in a min phuak uh a, “Naomi sung pan tapa khat suak,” a ci uh hi. Amaute in a min Obed phuak uh hi; amah in Jessi’ pa hi a, Jessi in David’ pa ahi hi. Tu-in Perez’ suan-le-khakte in: Perez in Hezron’ pa, Hezron in Ram’ pa Ram in Amminadab’ pa, Amminadab in Nahshon’ pa, Nahshon in Salmon’ pa, Salmon in Boaz’ pa, Boaz’ in Obed’ pa, Obed in Jessi’ pa, Jessi in David’ pa ahi hi. Efraim mi Zuf tapa Tohu, a tapa Elihu, a tapa Jeroham, a tapa Elkanah a kici min nei mi khat Efraim mual tung gam Ramathaimzofim-ah om hi. Amah in zi nih nei hi; khat’ min in Hannah hi a, a khat’ min in Peninnah ahi hi. Peninnah in ta nei a, ahih hangin Hannah in nei lo hi. Hih mipa a kum kumin a khuapi panin, Eli’ tapa nihte Hofni leh Finehas in Topa ’ siampi ahihna mun Shiloh-ah mihonte’ Topa bia ding leh ama tungah biakna pia dingin pai zel hi, Elkanah in biakna a piak ciangin a zi Peninnah leh a tanu leh a tapate khempeuh tungah tanh pia hi; amah in Hannah a it hangin Topa in amah ta neisak lo ahih manin Hannah tungah tanh nih a pia hi. Topa in amah ta neisak lo ahih manin amah a el a zipih a lawmnu in amah nakpi takin phin zel, hehsak zel hi. Tua ahih ciangin a kum kumin tua bangin hih uh hi; Topa ’ inn-ah amah a paitoh simin a lawmnu in amah phin zel hi. Tua ahih ciangin Hannah kapin an ne lo hi. Tua ciangin ama pasal Elkanah in ama kiangah, “Hannah aw, bang hangin kap na hi hiam? Bang hangin an ne lo na hi hiam? Bang hangin na lungsim dah ahi hiam? Keimah in tapa sawm sangin nang adingin hoihzaw hilo ka hi hiam? ” a ci hi. Amaute in Shiloh-ah ne-in a dawn khit uh ciangin Hannah ding hi. Tu-in Topa ’ biakinn kongkhak khuam pangah siampi Eli tu hi. Tua nu nakpi takin lungkhamin Topa ’tungah thungenin nakpi takin a kap hi. Amah in thuciamna khat bawlin, “Mihonte’ Topa aw, nangmah in na nasemnu’ gimna nong et takpi a, keimah hong phawkin na nasemnu hong mangngilh loin na nasemnu tungah tapa khat nong piak leh, Topa tungah a khan’ tawntungin amah ka pia ding a, ama lu-ah mulkiatna kitah lo ding hi,” a ci hi. Topa mai-ah thungenin a om lai takin Eli in tua nu’ kam na en hi. Hannah a lungsim-ah pau hi; a mukte bek liingin a awging kiza lo hi; tua ahih ciangin Eli in tua numei zukhamin ngaihsun hi. Tua ciangin Eli in ama kiangah, “Bang tan vei zukham ding na hi hiam? Na kiang panin na leenggahzu hemkhia in,” a ci hi. Ahih hangin Hannah in dawngin, “Hi lo hi, ka topa aw, keimah in nakpi takin a lungkham numei ka hi hi; leenggahzu ahi a, kham theih zu ahi zongin ka dawn kei hi, Topa mai-ah ka lungsim a sungkhia ka hi hi. Lungkhamna leh gimna tawh a pau ka hih manin numei ginalo bangin na nasemnu hong ngaihsun kei in,” a ci hi. Tua ciangin Eli in dawngin, “Nuam takin pai in, Israelte’ Pasian in ama tungah na ngetsa thu hong pia hi,” a ci hi. Tua ciangin numei in, “Nangma mit-ah na nasemnu maipha hong musak in,” a ci hi. Tua ciangin numei pai-in an ne a, a maisuah dahmai nawn lo hi. Amaute zingsangin tho baihin Topa mai-ah bia uh hi; tua ciangin amaute Ramah-a a inn uh ah ciahkik uh hi. Tua ciangin Elkanah in a zi Hannah luppih a, Topa in tua nu’ thungetna pia hi; a hun ciangin Hannah gai-in tapa khat nei a, a min Samuel phuak hi; bang hang hiam cih leh amah in, “ Topa tung panin amah ka nget ahi hi,” a ci hi. Tua ciangin Elkanah leh a innkuante khempeuh Topa tungah kum sim biakna leh a thuciamna pia dingin paito uh hi. Ahih hangin Hannah paito lo hi; bang hang hiam cih leh amah in a pasal kiangah, “Naungek nawi tawh a kikhen phetin Topa ’ omna mai-ah kilakin tua lai-ah a om tawntung dingin ka paipih ding hi,” a ci hi. A pasal Elkanah in ama kiangah, “Nangmah in hoih na sak pen bangin gamta in la, amah nawi tawh a kikhen dong ngak in; Topa in a kammal hong kipsak lel ta hen,” a ci hi. Tua ahih ciangin nupi omin nawi tawh a kikhen mateng a ta khoi hi. Numei in amah nawi tawh a kikhensak khit ciangin kum thum a pha bawngtal khat, annel seu khat, leh leenggahzu savun thawl khat tawh amah la hi; tua ciangin Shiloh-a Topa’ inn-ah amah paipih hi; a naupang khangmoi hi. Tua ciangin amaute in a bawngtal go-in a naupang Eli kiangah paipih uh hi. Tua nu in, “Aw, ka topa! Nangmah in a nungta na hih mah bangin ka topa aw, keimah in Topa tungah thu ngenin nangma omna hih lai mun-ah a ding nu ka hi hi. Hih naupang ka ngen hi; Topa in keima ngetna bangin amah hong pia hi. Tua ahih ciangin Topa tungah amah ka pia hi; a nuntak lai teng Topa tungah amah a kipia ahi hi,” a ci hi. Tua ciangin amaute in tua lai-ah Topa bia uh hi. Hannah in zong thungenin, “ Topa tungah ka lungdam a, Topa hangin ka kipak hi. Nong huhna hangin ka galte ka nuihsan hi. “ Topa bangin a siangtho kuamah om lo a, nang sim loh kuamah dang om lo hi; i Pasian tawh a kibang hong hu zo Suangpi dang om lo hi. Tua bangin kiphatsakna tawh pau nawn kei in la, na kam sung pan kihihsakna gingkhiasak kei in; bang hang hiam cih leh Topa in theihna Pasian hi a, amah in gamtatnate tawikhai hi. A thahatte’ thalte kitan a, ahih hangin a thanemte in thahatna ngah hi. A gilvahte in an thalawh uh a, ahih hangin a gilkialte kial nawn lo hi. Tasel mi in ta sagih nei a, ahih hangin ta tampi a nei nu lungzuang hi. Topa in thatin hingsak kik hi; amah in Leinuai-ah paipih sukin thoto sak hi. Topa in zawng sakin hausak hi; amah in niamkhiat sukin, zong sangto sak hi. Amah in leivui panin mizawngte phong to a, amah in a cimawhte a lungkhamna panun phong to hi. Uliante tawh tukhawmsak a, minphatna ngahsak hi. Bang hang hiam cih leh leitung khuampite Topa aa hi a, tuate tungah amah in leitung pumpi koih hi. “Amah in a thuman ama mite kalsuanna cing ding a, ahih hangin migilote khuamialna sungah kikhiasuk ding hi; bang hang hiam cih leh thatang hatna tawh mi gualzo lo ding hi. Topa ’ langte tamkham ding a, amah in amaute do-in vantungah van gingsak ding hi. Topa in lei mong dongah thukhen ding hi; amah in ama kumpipa tungah thahatna pia ding a, a sathau nilhpa’ vangliatna sangsak ding hi,” a ci hi. Tua ciangin Ramah-a ama inn-ah Elkanah ciah hi. Naupang in siampi Eli omna-ah Topa ’ na sem hi. Tu-in Eli’ tapate in bangmah man lo mite ahi uh hi; amaute in Topa zahtakna nei lo uh hi. Mite tungah siampite gamtatzia ding ngeinate don lo uh hi. Mi khatpeuh in biakna a piak ciangin a sa a huan lai takin siampipa’ nasempa sikkeu-ka-thum nei khat in a khut-ah tawi-in hong pai a, amah in a sikkeu tawh sikbeel dai ahi a, beel-uk ahi a, beelpi ahi a, beel sungah ahi zongin sun suk hi; sikkeuka in a kaihkhiat toh khempeuh siampipa in tang hi. Tua ahih ciangin Shiloh-ah a pai Israelte khempeuh tungah amaute in tua bangin hih uh hi. Tua tham loin a thau a kihal ma-in siampipa’ nasempa hong pai-in biakna a pia mipa kiangah, “Siampipa ading han ding sa hong pia in; bang hang hiam cih leh amah in nang tung panin sa minsa hong sang loin a sial hong sang ding hi,” a ci hi. Tua ciangin mipa in ama kiangah, “A thau hal masasak in la, tua khit ciangin na deih zahzah la in,” a cih leh, amah in, “Hi lo hi, tu mahmah in nong pia ding uh hi; tua hi kei leh thatang hat thu-in kong laksak ding hi,” a ci ding hi. Tua ahih ciangin Topa muhna-ah tangvalte’ khialhna lian mahmah hi; bang hang hiam cih leh mite in thusim lohna tawh Topa tungah biakpiaknate hih uh hi. Samuel in saihadial siampi puan silhin Topa mai-ah na a sem naupang khat ahi hi. Samuel’ nu in a pasal tawh kum sim biakna pia dingin a paitoh ciangin ama adingin puantual neu khat bawlin kum simin ama kiangah puak hi. Tua ciangin Eli in Elkanah leh a zi thupha pia-in, “Amah in Topa tungah a piak taang dingin Topa in hih numei tawh nang ta hong neisak hi,” a ci hi; tua ciangin a inn uhah amaute ciah uh hi. Tua ciangin Topa in Hannah thupha pia a, tua nu gai-in tanu nih leh tapa thum a nei hi. Naupang Samuel ahih leh Topa ’ omna-ah khang hi. Tu-in Eli teek mahmah a, Israelte khempeuh tungah a tapate’ gamtatnate, leh kikhopna buk lutna-ah na a sem numeite tawh a lupkhopna thute khempeuh za hi. Amah in amaute kiangah, “Bang hangin tua bangin gamta na hi uh hiam? Bang hang hiam cih leh mi khempeuh tung panin na gamtat siatnate uh ka za hi. Hilo hi, ka tapate aw; Topa ’ mite in a genthangna thu ka zakna in thuhoih hi lo hi. Mi khat in mi dang khat tungah a khialh leh ama adingin Pasian in pa-lai sem ding hi; ahih hangin mi khat Topa tungah khial leh ama adingin kua in va thuumsak ding ahi hiam?” a ci hi. Ahih hangin amaute in a pa’ thu ngai lo uh hi; bang hang hiam cih leh tua in amaute a thah nadingin Topa deihna ahi hi. Tu-in naupang Samuel a pumpi khangin Topa leh mite’ maipha a ngah toto hi. Tua ciangin Pasian’ mi khat Eli kiangah hong pai-in ama kiangah, “ Topa in hih bangin ci hi. ‘Izipt gam sung Faro’ innkuante khut nuai-ah na pupi Aaron leh a innkuante a om lai takin Aaron tungah keimah ka kilang hi. Israel minamte khempeuh sung panin amah ka siampi ahi ding, ka biakna tau-ah a pai ding, paknamtui a hal ding, keima mai-ah siampi puan a silh dingin ka teel hi, Israel mite tung panin mei tawh kihal keimah biaknate khempeuh na pupi’ innkuan tungah ka pia hi. Tua ahih ciangin bang hangin keimah biaknate leh ka thupiak ahi keimah hong kipiaknate thusim loin, keima mi Israelte’ piak a limci pen teng-in note kithausakna tawh kei sangin na tapate pahtawi zaw na hi hiam?’ a ci hi. Tua ahih ciangin Israelte’ Pasian, Topa in thu genin: ‘Nangma innkuan leh na behte in keima mai-ah sung tumin pusuak tawntung ding hi, ci-in thu ka ciam hi,’ a ci hi; ahih hangin tu-in Topa in thu genin: ‘Tua bang hi het lo ding hi: bang hang hiam cih leh kei hong pahtawite ka pahtawi ding a, kei hong simmawhte ka simmawhbawl ding hi. En in, nangma innkuan sung leh na beh sunga tangval hat khempeuh ka suksiat hun hong tung ding a, na innkuan sungah puteek a om loh hun hong tung ding hi. Tua ciangin Israelte tungah ka piak daupainate khempeuh na lungkham hunin en’na mit tawh na en ding hi; na innkuan sungah puteek om ngei nawn lo ding hi. Ka biakna tau panin ka suksiat loh na mipa pen mit lawt dongin a kap ding leh a lunggim dingin kikoih ding hi; tua ciangin na inn sung panin a khang khempeuh mite’ namsau tawh si ding hi. Na tapa nihte, Hofni leh Finehas tungah hong tung ding hih thu in nang adingin lim hi ding hi: amaute gel a ni kikhatin si ding uh hi. Tua ciangin ka lungsim sung leh ka ngaihsutna bangin a sem ding a citak siampi khat keima adingin ka khangsak ding hi; amah innkuan kipin ka bawl ding a, ka sathau nilhpa mai-ah amah sung tumin pusuak tawntung ding hi. Na inn sung panin a suakta mite khempeuh ngun peek khat ahi a, anlum lum khat ngen ding ahi zongin ama kiangah pai-in, “An tawm ka nek theih nadingin siampipa omna mun khat peuhpeuh ah kei hong koih in, ci-in kong thum hi,” ci ding uh hi,’ a ci hi,” ci-in a gen hi. Tu-in Eli’ khut nuai ah naupang Samuel in Topa ’ na sem hi. Tua hun lai-in Topa ’ kammal manpha mahmah hi; mangmuh muhna om lo hi. Tua hunin a mit a mang dingin a kipan khin Eli in khua mu thei lo a, ama omna tuam-ah lum hi; Pasian meivak mit nai lo a, Pasian’ thuciamna singkuang a omna mun Topa ’ biakinn sungah Samuel lum hi. Tua ciangin Topa in, “Samuel! Samuel!” ci-in sam a, tua ciangin amah in, “Hih lai-ah om ing!” ci-in, Eli kiangah tai a, “Hih lai-ah om ing, nong sam hi,” a ci hi. Ahih hangin amah in, “Kong sam kei hi; lum kik in,” a ci hi. Tua ahih ciangin amah pai-in lum hi. Tua ciangin Topa in sam kikin, “Samuel!” a ci hi. Samuel tho-in Eli kiangah pai-in, “Hih lai-ah om ing, nong sam hi,” a ci hi. Ahih hangin amah in, “Kong sam kei hi, ka tapa aw; lum kik in,” a ci hi. Tu-in Samuel in Topa thei nai lo hi; bang hang hiam cih leh Topa in amah hopih ngei nai lo hi. Topa in Samuel a thum veina samkik hi. Amah tho-in Eli kiangah pai-in, “Hih lai-ah om ing, nong sam hi,” a ci hi. Tua ciangin Topa in naupang a sapna thu Eli in thei hi. Tua ahih ciangin Eli in Samuel kiangah, “Pai in, lum in; amah in nang hong sap leh nangmah in, ‘Hong gen in, Topa aw, na sasempa in za hi,’ na ci ding hi,” a ci hi. Tua ahih ciangin Samuel pai-in ama omna-ah lumsuk hi. Topa hong pai-in ding khia-in a hun dangte-a mah bangin, “Samuel! Samuel!” ci-in a sam hi. Tua ciangin Samuel in, “Hong gen in, na nasempa in za hi,” a ci hi. Tua ciangin Topa in Samuel kiangah, “En in, a za mite khempeuh’ bil nihte a vut ding na khat Israelte sungah a bawl ding ka hi hi. Tua ni ciangin ama innkuan tawh kisai ka gensa khempeuh a patna pan a tawpna dong Eli tungah ka tungsak ding hi. A tapate in Pasian min daisak a, amah in a tate kham lo ahih manin, ama theih a mawhna hangin ama innkuan daan a pia tawntung ding ka hihna ama kiangah ka gen hi. Tua ahih ciangin Eli’ innkuante’ mawhna pen biakna ahi a, piakna in ahi zongin a maisak zawh ngei loh nading thu Eli’ innkuante tungah ka kiciam hi,” a ci hi. Samuel zingsang dong lum hi; tua ciangin amah in Topa ’ inn kongkhakte hong hi. A mangmuhna Eli kiangah a gen ding Samuel lau hi. Ahih hangin Eli in Samuel samin, “Ka tapa Samuel aw,” a ci hi. Amah in, “Hih lai-ah om ing,” a ci hi. Eli in, “Amah in nang kiangah hong gen bang ahi hiam? Kei kiangah hong iim kei in. Amah in nang tungah hong gente khempeuh kei kiangah ip nong neih leh, Pasian in nang hong dawm kei ta hen,” a ci hi. Tua ahih ciangin Samuel in ama kiangah a vekpi-in genin bangmah iim lo hi. Tua ciangin amah in, “Amah in Topa ahi hi; amah in hoih a sak bangin amah hih sak in,” a ci hi. Samuel khang a, amah tawh Topa omin, ama kammalte khat zong lei-ah kia sak lo hi. Tua ciangin Dan panin Be-ersheba kikal a, om Israelte khempeuh in Topa ’ kamsangin Samuel a kikipsakna thei uh hi. Tua ciangin Shiloh-ah Topa kilang kik zelzel hi; bang hang hiam cih leh Topa ’ thu tawh Shiloh ah Topa mahmah Samuel tungah kilang hi. Tua ciangin Israel khempeuh in Samuel thu zui uh hi. Tu-in Israel in Filistia mite a do dingin kuankhia uh hi; amaute in Ebenezer-ah phual sat uh a, Filistia mite in Afek-ah phual sat uh hi. Israel a do dingin Filistia mite kigual uh a, gal a kido uh ciangin Filistia mite in Israelte zoin galphual sungah mi tulli bang that uh hi. Mihonte giahphualah hong ciah ciangin Israel upate in, “Bang hangin Topa in tu ni-in Filistia mite mai-ah eite hong taisak ahi hiam? Amah in eite lakah hong pai-in i galte’ vangliatna panin eite hong hotkhiat theih nadingin Topa ’ thuciamna singkuang Shiloh panin paipih ni,” a ci uh hi. Tua ahih ciangin mite in Shiloh-ah mi paisak uh a, Kherubte tungah a tu Vanglianpen Topa ’ thuciamna singkuang tua lai panin hong pua uh hi; Eli’ tapa nihte, Hofni leh Finehas Pasian’ thuciamna singkuang tawh tua lai-ah om uh hi. Topa ’ thuciamna singkuang giahphual sung hong tun’ ciangin Israelte khempeuh nakpi takin awng uh a, lei thawn hi. Filistia mite in awtna gamlumna a zak uh ciangin amaute in, “Hebru mite’ giahphual-ah nakpi-a hih bang otna bang a cih nopna ahi hiam?” a ci uh hi. Topa ’ thuciamna singkuang giahphual a tun’ khitna a theih uh ciangin, Filistia mite lau uh hi; bang hang hiam cih leh amaute in, “Giahphual ah a pasiante uh tung zo hi,” a ci uh hi. Amaute in, “Gimna ngah hi ta hang!. Bang hang hiam cih leh ni dangin hih bang piang ngei lo hi. Gimna ngah hi ta hang! Kua in hih a thahat pasiante’ vangliatna panin eite hong honkhia zo ding ahi hiam? Hihte in gimna a tuamtuamte tawh Iziptte gamlakah a vat gawp pasiante ahi hi. Hang un la, pasal bangin gamta un, Filistia mite aw, tua hi kei leh amaute in note’ sila hong hih mah bangin Hebru mite’ sila na suak ding uh hi; pasal lungsim nei-in do un,” a ci uh hi. Tua ahih ciangin Filistia mite in do a, Israelte kizo in, mi khempeuh a inn ciat uhah tai uh hi; mi tampi tak kithat hi; bang hang hiam cih leh Israelte’ khe galkap mi tulsawmthum puk hi. Tua ciangin Pasian’ thuciamna singkuang zong kiman hi; Eli’ tapa nihte, Hofni leh Finehas zong kithat hi. Galphual panin Benjamin mi khat hong tai-in a puan kikeek leh a lu tungah lei khu-in Shiloh hong tung hi. Amah a tun’in, lampi gei-ah a vilin ama tutna-ah Eli na tu hi, bang hang hiam cih leh Pasian’ thuciamna singkuang hangin a lungsim liing hi. Mipa khuapi sung hong tungin a thu teng a gen ciangin khuapi mi khempeuh kiko uh hi. Eli in kikona awging a zak ciangin amah in, “Hih gamlumna bang ahi hiam?” a ci hi. Tua ciangin mipa manlangin hong pai-in Eli kiangah gen hi. Tu-in Eli kum sawmkua leh kum giat pha a, a mitte mangin khua mu thei lo hi. Mipa in Eli kiangah, “Keimah in galphual panin hong ciahpa ka hi hi; tu ni-in galphual panin kong tai hi,” a ci hi. Tua ciangin amah in, “Ka tapa aw, bangci ahi hiam?” a ci hi. A thu hong puakpa in dawngin, “Filistia mite mai-ah Israelte tai uh a, mi tampi tak zong kithat hi; na tapa nihte, Hofni leh Finehas zong si uh a, Pasian’ thuciamna singkuang kiman khin hi,” a ci hi. Amah in Pasian’ thuciamna singkuang a gen ciangin kulh kongpi gei a tutna mun panin Eli thalpuk hi; a ngawng kitanin si hi; bang hang hiam cih leh amah puteek hi-in gik hi. Amah in Israelte kum sawmli sung thukhen hi. Tu-in a monu, Finehas’ zi, nau paai-in suak dektak hi. Pasian’ thuciamna singkuang a kimatna leh a teekpa leh a pasal a sihna thu a zak ciangin amah kunin nau suak hi; bang hang hiam cih leh a nat hun tung hi. Amah si dektak a, ahi zongin amah a don numeite in ama kiangah, “Lau kei in, tapa khat na nei hi,” a ci hi. Ahih hangin amah in dawng lo a, zong don lo hi. Tua ciangin amah in, “Israelte sung panin minthan’na paikhia khin ta!” ci-in a naungek Ikhabod phuak hi; bang hang hiam cih leh Pasian’ thuciamna singkuang a kimat hang leh a teekpa leh a pasal’ hang ahi hi. Amah in, “Pasian’ thuciamna singkuang kiman khin ahih manin Israelte sung panin minthan’na paikhia khin ta hi,” a ci hi. Filistiate in Pasian’ thuciamna singkuang a mat uh ciangin Ebenezer panin Ashdod-ah pua uh hi, Tua ciangin Filistiate in Pasian’ thuciamna singkuang la-in Dagon inn sungah paipihin Dagon kiangah koih uh hi. Ashdod mite a zing ciang zing tungin a thawh uh ciangin, en in, Topa ’ thuciamna singkuang mai lei lakah Dagon mai puk hi. Tua ahih ciangin amaute in Dagon la-in a omna mun-ah koihkik uh hi. Ahih hangin a zing ciang zingtungin amaute a thawh ciangin, en in, Topa ’ thuciamna singkuang mai lei lakah Dagon na mai puk leuleu a, Dagon lutang leh a khutte gel kitan khia-in sangkil tungah om hi; Dagon a pumpi bek om hi. Tu ni dongin Dagon siampite leh Dagon inn ah a tumte khempeuh in hih thu hangin Ashdod-a Dagon sangkil tung sik lo uh hi. Topa in Ashdod khuamite nakpi takin gawt a, amah in uilut tawh Ashdod khua leh a gamsung teng lau sakin gimsak hi. Ashdod mite in hih bang thute a muh uh ciangin amaute in, “Israelte’ Pasian’ thuciamna singkuang eite kiang pan a paikhiat loh phamawh hi; bang hang hiam cih leh amah in eite leh i pasian Dagon hong gawt hi,” a ci uh hi. Tua ahih ciangin amaute in mi sawlin Filistia uliante khempeuh khawm uh a, Israelte’ Pasian’ thuciamna singkuang bang cih ding i hi hiam?” a ci uh hi. Amaute in dawngin, “Israelte’ Pasian thuciamna singkuang Gath-ah koihsak ni,” a ci uh hi. Tua ahih ciangin amaute in Israelte’ Pasian’ thuciamna singkuang tua lai-ah paipih uh hi. Ahih hangin amaute in tua Gath khua-ah a tun’pih khit uh ciangin Topa in tua khuapi langpan’in apkhapna lianpi piangsak a, amah in khuapi mite a moi a hamin gimsakin amaute tungah uilut piang hi. Tua ahih ciangin amaute in Pasian’ thuciamna singkuang Ekron-ah puak uh hi. Ahih hangin Pasian’ thuciamna singkuang Ekron a tun’ ciangin Ekron mite kiko uh a, “Kote leh ka mite uh a that dingin amaute in Israelte’ Pasian’ thuciamna singkuang ko kiangah hong paipih uh hi,” a ci uh hi. Tua ahih ciangin amaute in mi sawlin Filistia uliante khempeuh khawmin, “Kote leh ka mite uh hong thah loh nadingin Israelte’ Pasian’ thuciamna singkuang puakkhia un la, ama omna mun-ah ciahkik sak un,” a ci uh hi. Bang hang hiam cih leh a khuapi sung khempeuh ah sidek tak-a apkhapna om hi. Pasian in tua lai-ah amaute nak gawt mahmah hi; a si lo mite in uilut vei uh a, khuapi sunga kahna in vantung dongah kiza to hi. Topa ’ thuciamna singkuang Filistia gam sungah kha sagih sung om hi. Tua ciangin Filistiate in siampite leh aisante sam uh a, “ Topa ’ thuciamna singkuang bang cih ding i hi hiam? Ama omna mun-ah bang tawh kha ding i hi hiam hong gen un,” a ci uh hi. Amaute in, “Israelte’ Pasian’ thuciamna singkuang na puakkhiat uh leh, a hawm guakin puak kei un, bang bang hita leh mawhna hanga biakna pia un. Tua ciangin note na dam ding uh a, note hong gawtna thu na thei ding uh hi,” a ci hi. Tua ciangin amaute in, “Amah i piak ding mawhna hanga biakna bang ahi hiam?” a ci uh hi. Amaute in dawngin, “Filistia uliante a pha zah tawh kizui-in uilut lim kham nga leh simbeng lim kham nga hi ding hi; bang hang hiam cih leh note khempeuh leh na uliante uh tungah a kibang gimna hong tung hi. Tua ahih ciangin note in na gamsung uh hong sugawp na uilut limte uh leh na simbeng limte uh bawlin, Israelte’ Pasian’ tungah zahtakna na lak ding uh hi; note leh na pasiante uh leh na gam uh tungah amah in hong gawtna hong zangsak kha ding hi. Izipte leh Faro in a lungsim uh a khauhsak bangin bang hangin na lungsim uh khauhsak ding na hi uh hiam? Amah in amaute a mawlpih khit ciangin amaute in mite paisakin, tua ciangin mite kihemkhia uh hilo ahi hiam? Tua ahih ciangin tu-in leeng thak khat bawlin a tungah kol a kibaang ngei lo bawngpi a no nawi pia lai nih la un la, a bawngpite leeng-ah vawh un; ahih hangin amau kiang panin a note la-in innah ciahpih un. Tua ciangin Topa ’ thuciamna singkuang la-in leeng tungah koih un la, mawhna hanga biakna-in na piak uh kham milimte a gei-a singkuang sungah koih un. Tua ciangin sawlkhia un la, ama lampi-ah paisak un. Tua ciangin en un; ama gam Bethshemesh paina lampi-ah a paitoh leh hih siatna lianpi hong bawlpa in amah hi ding hi; ahih hangin a paitoh kei leh eite hong vat gawppa in amah hi lo hi; eite tungah a piang mawk hi, ci-in i thei ding hi,” a ci uh hi. Mite in tua mah bangin hih uh a, a no nawi a pia lai bawngpi nih la-in leeng-ah bulh uh a, a note inn ah khum uh hi. Amaute in Topa ’ thuciamna singkuang, kham simbeng leh uilut limte a omna singkuang leeng tungah koih uh hi. Tua ciangin bawngpite lam lian dung zui-in Bethshemesh lamah tang takin pai uh a, a pai kawmin ham uh hi; tak lam hita leh vei lam-ah hita leh kiheilo uh a, Filistia uliante in Bethshemesh gamgi ciang dong a nung zui uh hi. Tu-in Bethshemesh mite in kuam sungah a mangbuh uh a lak laitak ahi hi; amaute khuadakin thuciamna singkuang a muh uh ciangin, a muhna uh hangin amaute lungdam uh hi. Bethshemesh khuami Joshua’ lo-ah a leeng hong tungin tua mun-ah khawl hi. Tua lai-ah suangtum lianpi khat om hi; amaute in a leeng singte ek khamin a bawngpite Topa tungah meihal biakna-in pia uh hi. Levi mite in Topa ’ thuciamna singkuang leh kham milim a omna a gei-a singkuang la-in tua suangtumpi tungah koih uh hi; Bethshemesh mite in tua ni-in Topa tungah meihal biaknate pia-in biakpiaknate pia uh hi. Filistia ulian ngate in tua bang teng a muh khit uh ciangin tua ni mah-in Ekron-ah ciahkik uh hi. Filistiate in mawhna hanga biakna-in Topa tungah a piak uilut lim khamte in: Ashdod ading khat, Gaza ading khat, Ashkelon ading khat, Gath ading khat, Ekron ading khat ahi hi; ulian ngate aa Filistia khuate kulh tawh a ki-um khuapite leh a ki-um lo khua neute a pha zah tawh kizui simbeng lim khamte zong ahi hi. Topa ’ thuciamna singkuang a koihna gei uh-a suangtumpi in Bethshemesh khuami Joshua lo-ah tu ni dongin teci ahi hi. Amaute in Topa ’ thuciamna singkuang en uh ahih manin amah in Bethshemesh mite pawlkhat that hi; amah in amaute sawmsagih that a, mite lakah Topa in mi tampi that ahih manin mite thuum uh hi. Tua ciangin Bethshemesh mite in, “Hih a siangtho Pasian, Topa mai-ah kua om zo ding ahi hiam? Eite kiang panin kua kiangah amah paisak ding i hi hiam?” a ci uh hi. Tua ahih ciangin amaute in Kiriath-jearim-ah a teng mite kiangah kamtaite sawl uh a, “Filistiate in Topa ’ thuciamna singkuang hong puakkik khin uh hi. Hong paisuk un la, no kiangah puato un,” a ci uh hi. Tua ciangin Kiriath-jearim mite hong pai-in Topa ’ thuciamna singkuang puato uh a, mual tungah a om Abinadab’ inn-ah paipih uh hi; Topa ’ thuciamna singkuang a en dingin amaute in ama tapa Eleazar ap uh hi. Kiriath-jearim-ah thuciamna singkuang a om a kipan, hun saupi, kum sawmnih bang pha a, Israel mite khempeuh in Topa ngai-in thuum uh hi. Tua ciangin Samuel in Israel mite khempeuh kiangah, “Na lungsim khempeuh uh tawh Topa lamah a kihei kik na hih uh leh note lak panin gamdang pasiante leh Ashtaroth milim koih khia-in Topa lamah na lungsim uh ngat un la, ama’ na bek sem un; tua ciangin amah in Filistiate khut sung panin note hong honkhia ding hi,” a ci hi. Tua ahih ciangin Israelte in Baalte leh Ashtaroth koih khia-in Topa ’ na bek sem uh hi. Tua ciangin Samuel in, “Israelte khempeuh Mizpah-ah khawm un, note adingin Topa tungah thu ka ngen ding hi,” a ci hi. Tua ahih ciangin amaute Mizpah-ah kikhawm uh a, tui tawi-in Topa mai-ah sungkhia uh a, tua ni-in an tangin tua lai munah, “ Topa tungah i khial khin zo hi,” a ci uh hi. Samuel in Israel mite Mizpah-ah thukhen hi. Israel mite Mizpah-ah a kikhopna thu Filistiate in a zak uh ciangin Israelte a do dingin Filistia uliante paito uh hi. Israel mite in tua thu a zak uh ciangin amaute in Filistiate kihta uh hi. Tua ciangin Israel mite in Samuel kiangah, “Filistiate khut sung panin amah in eite hong hotkhiat theih nadingin Topa i Pasian tungah eite adingin thunget na khawl kei in,” a ci uh hi. Tua ahih ciangin Samuel in nawi a ne lai tuuno khat la-in Topa tungah a bup-a meihal biakna-in pia hi; Israelte’ adingin Topa tungah Samuel kiko a, Topa in amah na dawng hi. Samuel in meihal biakna a piak lai takin Filistiate in Israelte a do dingin hong naih uh hi; ahih hangin Topa in aw lianpi tawh tua ni-in Filistiate thawn gawpin amaute buaigawp sak hi; Israelte mai-ah amaute kinotkhia hi. Tua ciangin Mizpah panin Israel mite paikhia-in Filsitiate delh uh a, Bethkar nuai ciang dong amaute vatgawp uh hi. Tua ciangin Samuel in suangtum khat la-in Mizpah leh Jeshanah kikalah phut a, a min Ebenezer phuak hi; bang hang hiam cih leh amah in, “Tu ciangciang Topa in eite hong huh hi,” a ci hi. Tua ahih ciangin Filistiate kizo a, Israelte’ gam sungah tumkik nawn lo uh hi. Samuel’ hun sung khempeuh Topa in Filsitiate lang pang hi. Israelte tung panin Filistiate in a laksa khuapite, Ekron panin Gath ciang kikal sung teng, Israelte tungah kipia kik hi; Israelte in Filistiate khut sung panin a gam uh la kik uh hi. Israelte leh Amor mite kikalah zong kilemna om hi. Samuel in a nuntak sung tawntung Israelte thukhen hi. A kum kumin Bethel, Gilgal, leh Mizpah-ah kot pai hi; amah in hih munte khempeuh ah Israelte thukhen hi. Tua ciangin Ramah-ah amah ciahkik zel hi; bang hang hiam cih leh tua lai-ah ama inn om a, tua lai-ah zong Israelte tungah thukhen na sem hi. Amah in tua lai-ah Topa ading biakna tau khat lam hi. Samuel a teek ciangin amah in Israelte tungah thukhenin a tapate koih hi. A ta upa’ min Joel hi a, a nihna’ min in Abijah ahi hi; amaute in Be-ersheba ah thukhente ahi uh hi; Ahih hangin a tapate amah bangin gamta lo uh a, meetna lamah kihei uh hi; amaute in sumgolh la-in thuman heikhia uh hi. Tua ciangin Israel upate kikhawmin Ramah-a Samuel kiangah pai uh a, ama kiangah, “En in, nang na teek ta a, na tapate in nangma khekhap hong zui lo uh hi; tu-in, minam dangte khempeuh mah bangin kote hong uk dingin kote’ adingin kumpi khat seh in,” a ci uh hi. Ahih hangin amaute in, “Kote hong uk dingin kumpi khat hong pia in,” a cih uh ciangin hih thu in Samuel lungkim lo sak hi. Samuel in Topa kiangah thungen hi. Tua ciangin Topa in Samuel kiangah, “Amaute in nang kiangah hong gen thu khempeuh ngai in; bang hang hiam cih leh amaute in nang hong nial hi lo a, amaute tungah kumpi hihna panin kei hong nial ahi uh hi. Izipt panin amaute ka paikhiatpih-a kipan tu ni dongin amaute in kei hong nusia-in pasian dangte’ na semin, kei tungah hong bawlnate khempeuh mah bangin amaute in nang tungah zong hong bawl ahi uh hi. Tua ahih ciangin tu-in amaute’ thu ngai in; amaute limtakin hilh kholin, amaute tungah a uk ding kumpipa’ hih zia ding lak bek in,” a ci hi. Tua ahih ciangin Samuel in ama tung panin kumpi khat a ngen mite kiangah Topa ’ thugen khempeuh gen hi. Amah in, “Note hong uk ding kumpipa hih zia dingte in: amah in na tapate uh la-in a leengte-ah na semin a sakol nasem ding, leh a leengte mai-ah a tai dingin seh ding hi; tua ciangin amah in ama adingin a tul-a uk leh a sawmnga-a ukte, leh pawlkhatte a lo kho-in a an a la ding, leh a gal sung nazatte leh a leeng nate a bawl dingin seh ding hi. Amah in na tanute uh paknamtui bawl ding leh anhuan ding leh an em dingin la ding hi. Amah in na lote uh leh na leenggui lote uh leh na oliv lote uh sung panin a limci pen teng la-in ama nasemte tungah pia ding hi. Amah in na an uh leh na leenggui lo uh seh-sawm-suah-seh-khat la-in ama uliante leh ama nasemte tungah pia ding hi. Amah in na nasem pasalte leh nasem numeite leh na bawng leh na late uh a gina pen teng la-in ama na a sem dingin koih ding hi. Amah in na tuuhonte uh seh-sawm-suah-seh-khat la ding a, note in ama sila na hi ding uh hi. Tua ni ciangin note’ ading na teelsa uh na kumpipa uh hangin note na kiko ding uh hi; ahih hangin tua ni ciangin Topa in note hong dawng lo ding hi,” a ci hi. Ahih hangin mite in Samuel’ thu ngai nuam lo uh hi; amaute in, “Hi lo! kote tungah kumpi khat ka nei ding uh hi; kote zong minam dangte khempeuh mah bangin, ka kumpipa un kote hong ukin kote mai-ah pai-in ka galte uh hong dosak ding hi,” a ci uh hi. Samuel in mite thugen khempeuh a zak khit ciangin Topa kiangah tua thute genkik hi. Tua ciangin Topa in Samuel kiangah, “Amaute’ thu ngai in la; amaute adingin kumpi khat koih in,” a ci hi. Tua ciangin Samuel in Israel mite kiangah, “Mi khempeuh na khuapi ciat uhah ciah un,” a ci hi. Benjaminte sung panin Afiah’ tapa Bekorath, a tapa Zeror, a tapa Abiel, a tapa Kish min nei, Benjaminte mihau khat om hi; amah in tangval a mel hoih, a min Saul ahi tapa khat nei hi. Israel mite lakah amah sangin a mel hoihzaw khat zong om lo hi; mite khat peuhpeuh sangin a liangko tung siah-in amah sangzaw hi. Tu-in Saul’ pa Kish’ late mang hi. Tua ahih ciangin Kish in a tapa Saul kiangah, “Nasemte khat sam in la, ding-in pai in la, late va zong in,” a ci hi. Tua ciangin amaute in Efraim mual, mualtung gam leh Shalisha gam teng nawkin zong uh a, ahih hangin amaute in mu lo uh hi. Tua ciangin amaute in Sha-alim gam teng zong uh a, ahih hangin tua gamah na om lo hi. Tua ciangin amaute in Benjamin gam teng zong uh a, ahih hangin mu lo uh hi. Zuf gam a tun’ uh ciangin Saul in amah tawh a om a nasempa kiangah, “Hong pai in, ciahkik ni; tua hi kei leh ka pa in late ngaihsun nawn loin eite hong lunghimawh kha ding hi,” a ci hi. Ahih hangin amah in ama kiangah, “En in, hih khuapi sungah Pasian’ mi khat om a, amah in a kizahtak mi khat ahi hi; ama gen khempeuh a manin tangtung hi. Tua lai-ah pai ni; eite’ khualzin khiatna thu amah in hong gen thei kha ding hi,” a ci hi. Tua ciangin Saul in a nasempa kiangah, “Ahih hangin pai lehang, mipa bang puak ding i hi hiam? Bang hang hiam cih leh i van sunga i anlum bei ta a, Pasian’ mipa kiangah i puak ding letsong om lo hi. Bang nei i hi hiam?” a ci hi. Tua ciangin nasempa in Saul dawng kikin, “Hih lai-ah ngun shekel seh-li-suah-seh khat ka nei hi, i vai hong gen nadingin Pasian’ mipa kiangah ka pia ding hi,” a ci hi. (Tua ma lai-in Israelte sungah mi khat in Pasian kiangah thu dong dingin a pai ciangin amah in, “Hong pai in, thu-mu-pa kiangah pai ni,” a ci hi; bang hang hiam cih leh tuhun-a kamsang i cihte tua ma-in thu-mu-pa kici hi). Tua ciangin Saul in a nasempa kiangah, “Pha hi; hong pai in, pai ni,” a ci hi. Tua ahih ciangin Pasian’ mipa a omna khuapi-ah amaute pai uh hi. Amaute khuapi omna mual tungah a paitoh laitakun amaute in khuapi panin tuitawi dingin hong paikhia nungaknote tuak uh a, amaute kiangah, “Thu-mu-pa hih lai-ah a om hiam?” a ci uh hi. Amaute in dawngin, “Amah om hi; en un, note mai diakah om hi. Kinawh un; khuapi sungah tu mahmahin hong pai hi; bang hang hiam cih leh mite in tuni-in mual tunga biakna-ah biakna pia uh hi. Khuapi sung na lut phetun mual tunga biakna-ah an ne dingin a pai ma-in amah na mu ding uh hi; amah in biakpiakna thupha pia ding ahih manin ama pai mateng mite in an ne lo ding uh hi; tua khit ciangin a kisam mite in ne uh hi. Tu-in paito un; bang hang hiam cih leh amah na tuak pah ding uh hi,” a ci uh hi. Tua ahih ciangin amaute khuapi-ah paito uh hi. Amaute khuapi sungah a lut lai takin Samuel mual tunga biakna lamah a pai dingin amau’ lamah a hong paikhia mu uh hi. Tu-in Saul hong pai ni a zan ni-in Samuel tungah Topa in lak khin hi: “Zing ciang tu bang hunin Benjamin gam sung panin nang kiangah mi khat kong sawl ding a, nangmah in ka mi Israel tungah ulian dingin amah sathau na nilh ding hi. Amah in Filistiate khut sung panin ka mite honkhia ding hi; bang hang hiam cih leh amaute’ kikona kei kiang hong tung khin ahih manin ka mite’ gimna ka mu khin zo hi,” a ci hi. Samuel in Saul a muh ciangin Topa in ama kiangah, “Nang kiangah kong gen mipa hih lai-ah om! Amah in ka mite tungah a uk dingpa ahi hi,” ci-in a gen hi. Tua ciangin Saul in kulh kongpi-ah Samuel va naihin, “Hong gen in, thu-mu-pa’ inn koi lai hiam?” a ci hi. Samuel in Saul dawngin, “Keimah in thu-mu-pa ka hi hi; mual tunga biakna-ah kei mai-ah paito in; bang hang hiam cih leh nangmah in tu ni-in kei tawh an na ne ding a, zingsang ciangin nang hong ciah sakin na lungsim-a om khempeuh nang kiangah kong gen ding hi. Tu ma ni thum lai-a a mang na late ahih leh, kimu khinta ahih manin tuate na lungsim ah ngaihsun nawn kei in. Israelte sungah deih theihte khempeuh kua tungah om ahi hiam? Nang leh na pa’ innkuante khempeuh tungah om hilo ahi hiam?” a ci hi. Saul in dawngin, “Keimah in Israel minamte sung panin a tawmpen Benjaminte hilo ka hi hiam? Keima innkuan in Benjamin minam innkuan khempeuh sung panin a niampen hilo ahi hiam? Tua ahih ciangin bang hangin hih bangin kei tungah hong pau na hi hiam?” a ci hi. Tua ciangin Samuel in Saul leh a nasempa sam-in inndei sungah paipih a, mihing sawmthum bang a pha a kisam mite lak tutna bul-ah mun khat pia hi. Tua ciangin Samuel in anhuanpa kiangah, “Nang kiangah kong piak, ‘Na tuam koih in,’ kong cih pawl hong paipih in,” a ci hi. Tua ahih ciangin anhuanpa in a khe leh a kawngsa la-in Saul mai-ah lui hi; tua ciangin Samuel in, “Thei in, a kisiit pen nang mai-ah hong kilui hi. Ne in; bang hang hiam cih leh leenglate tawh na nek theih nadingin a kiseh hun a cin’ mateng nang adingin hong kisiitsak hi,” a ci hi. Tua ahih ciangin tua ni-in Saul in Samuel tawh an nekhawm hi. Amaute mual tunga biakna panin khuapi sungah a paisuk uh ciangin innkhumzang-ah Saul adingin lupna khat na kiphah a, a ihmu dingin amah lumsuk hi. Khua a vak ciangin Samuel in innkhumzang-a Saul samin, “Na pai nading ah kong sawl theih nadingin tho in,” a ci hi. Tua ahih ciangin Saul tho-in, amah leh Samuel, khuapi kongzing ah pai uh hi. Amaute khuapi nawl-ah a paisuk kawm-un Samuel in Saul kiangah, “I mai-ah nasempa a paisuak nading gen in la, amah a paisuak khit ciangin nang tungah Pasian’ thute kong theihsak theih nadingin tawlkhat hih lai-ah nang khawl in,” a ci hi. Tua ciangin Samuel in sathau thawl khat la-in ama lutungah buak a, tua ciangin amah namin, “ Topa in ama mi Israelte tungah ulian dingin nang sathau hong nilh khin hilo ahi hiam? Nangmah in Topa ’ mite ukin a kiim-a om amau’ galte’ khut sung panin amaute na honkhia ding hi. Hih in nang tungah, Topa in ama luahte tungah ulian dingin nang sathau hong nilh khitna lim hi ding hi. Tu ni-in kei kiang panin na paikhiat ciangin Benjaminte’ gam Rachel’ han kiang Zelzah-ah mihing nih na tuak ding a, amaute in nang kiangah, ‘Pai-a na zon’ late kimu khin a, tu-in na pa in late ngaihsun nawn loin nangmah hong lunghimawh a, “Ka tapa bang cih ding ka hi hiam?” ci hi,’ hong ci ding uh hi. Tua ciangin tua lai panin pai lai-in Tabor tawsaw lak na tung ding hi; tua lai panin Bethel-a Pasian kiangah a paito, keelno thum a pua mi khat, anlum thum a pua adang khat, leh leenggahzu savun thawl khat a pua, mi thum in nang hong dawn ding uh hi. Amaute in nang hong hopihin nangmah in amau tung panin na san’ ding anlum nih nang tungah hong pia ding uh hi. Tua khit ciangin Filistia khuacingte a omna Gibeath-elohim na tung ding hi: tua lai mun khuapi sung na tun’ ciangin amaute mai-ah, harp lasakna, khuangneu, tamngai, leh laiza lasakna tawh mailam thu genkholin mual tunga biakna panin hong paisuk kamsang honkhat na tuak ding hi. Tua ciangin Topa ’ Kha khauh takin nang tungah hong tung ding a, amaute tawh mailam thu genkholin mi tuamdang khatin na kikheel ding hi. Hih limte nang tungah hong tun’ ciangin na tuah peuhpeuh na hih ding hi; bang hang hiam cih leh nang tawh Pasian hong om hi. Tua ciangin keima mai Gilgal ah na paisuk ding hi; en in, meihal biaknate leh thunuam-a biaknate a pia dingin nang kiangah kong pai ding hi. Nang kiangah kei hong pai-in na hih ding teng kong lah mateng, ni sagih sung na ngak ding hi,” a ci hi. Samuel nusia dingin a nung hei ciangin Pasian in ama tungah lungsim dang khat pia hi; tua ni-in hih limte khempeuh piang hi. Amaute Gibeah ah a tun’ uh ciangin, en in, kamsang honkhat in amah na dawn hi; tua ciangin Pasian’ Kha ama tungah khauh takin hong tung a, amah in amaute lakah mailam thu genkhol hi. Amah in kamsangte tawh mailam thu a genkholhna amah a theisa mi khempeuhte in a muh uh ciangin, mite khat leh khat in “Kish’ tapa tungah bang tung ahi hiam? Saul zong kamsang suak ahi hiam?” kici uh hi. Tua ciangin tua lai-a mite khat in dongin, “Kua’ tate ahi uh hiam?” a ci hi. Tua ahih ciangin, “Saul zong kamsang suak ahi hiam?” cihna paunak khat a kipatna hong suak hi. Amah in mailam thu genkholh a man ciangin inn-ah pai hi. Saul’ pano in amah leh a nasempa kiangah, “Koi-ah pai na hi uh hiam?” a ci hi. Amah in, “Late a zong dingin ka pai uh hi; late kimu zo lo ding ci-in ka theih uh ciangin Samuel kiangah ka pai uh hi,” a ci hi. Tua ciangin Saul’ pano in, “Kong thum hi, Samuel in nang kiangah hong gen teng kei tungah hong gen in,” a ci hi. Tua ciangin Saul in a pano kiangah, “Late a kimuh khitna ko kiangah teltakin hong gen hi,” a ci hi. Ahih hangin Samuel in a gen kumpi suah nading thu tawh kisai ama tungah bangmah gen lo hi. Tu-in Samuel in Mizpah-a Topa kiangah mite khawm hi; amah in Israel mite kiangah, “Israelte’ Pasian, Topa in hih bangin ci hi, ‘Izipt panin Israelte ka paikhiatpih a, Iziptte’ khut sung leh note hong nengniam kumpi gamte khempeuh’ khut sung panin note kong honkhia hi,’ ci hi. Ahih hangin note in na tuahsiatnate uh leh na lungkhamnate uh khempeuh panin note a hong honkhia na Pasian uh tu ni-in na nial uh hi; note in, ‘Hi lo! kote tungah kumpi khat koih in,’ na ci uh hi. Tua ahih ciangin tu-in na minam nam uh leh a tul tulin Topa ’ mai-ah kilak un,” a ci hi. Tua ciangin Samuel in Israel minamte khempeuh a nai-ah hong paipih a, aisanna tawh Benjamin minam kila hi. Amah in Benjamin minamte a behbehin hong paipih a, aisanna tawh Matri innkuan kila hi; a tawpna-ah amah in Matri innkuan a mi mi-in hong paipih a, aisanna tawh Kish’ tapa Saul kila hi. Ahih hangin amaute in amah a zon’ uh ciangin amah kimu lo hi. Tua ahih ciangin amaute in Topa kiangah dong kik uh a, “Tua mipa hih lai-ah hong pai hiam?” ci uh a, Topa in, “En un, amahmah van kawmlakah bu hi,” a ci hi. Tua ciangin amaute tai-in tua lai mun panin amah hong paipih uh hi; mite lakah amah a din’ ciangin mi khat peuhpeuh sangin a liangko tung siah-in amah sangzaw hi. Tua ciangin Samuel in mi khempeuh tungah, “ Topa in a teelsa mipa na mu uh hiam? Mi khempeuh lakah amah tawh a kibang khat zong om lo hi,” a ci hi. Tua ciangin mi khempeuh awngin, “Kumpipa khan’ sau hen!” a ci uh hi. Tua ciangin Samuel in kumpipa thuneihna leh a nasepte mite kiangah gen hi; amah in tuate laibu khat sungah gelhin Topa mai-ah koih hi. Tua ciangin Samuel in mi khempeuh amau’ inn ciatah ciahsak hi. Saul zong Gibeah-a ama inn-ah ciah a, Pasian in amau’ lungsim a lawn’sak mi thahatte zong amah tawh pai hi. Ahih hangin bangmah man lo mi pawlkhat in, “Hih mipa in eite bang hong ci hotkhiat zawh ding ahi hiam?” a ci uh hi. Amaute in amah simmawhin ama kiangah letsong puak lo uh hi. Ahih hangin amah in tua mite bangmah cih lo hi. Tua ciangin Ammon mi Nahash paito-in Jabesh Gilead umcih hi; Jabesh mite in Nahash kiangah, “Ko tawh kilemna hong bawl in, nangma’ na kong sem ding uh hi,” a ci uh hi. Ahih hangin Ammon mi Nahash in amaute kiangah, “Hih thu khat tawh note tawh kilemna ka bawl ding hi, keimah in note’ taklam mittang khempeuh khel khia-in Israelte khempeuh tungah mindaina kong omsak ding hi,” a ci hi. Jabesh upate in ama kiangah, “Israelte gam sung khempeuh ah kamtaite ka sawl theih nadingun ni sagih sung a hun hong sot in, Tua ciangin kote hong honkhia ding kuamah a om kei leh nang tungah kote kong kipia ding uh hi,” a ci uh hi. Saul’ khua Gibeah-ah kamtaite a tun’ uh ciangin amaute in mite’ kiangah a thu gen uh hi; tua ciangin mi khempeuh a gingin kapkhia uh hi. Tu-in Saul a bawngtalte nung zui-in lo panin hong ciah hi; tua ciangin Saul in, “Amaute a kah nadingin bang in mite na sak ahi hiam?” a ci hi. Tua ahih ciangin amaute in Jabesh mite’ thute ama kiangah gen uh hi. Amah in hih thute a zak ciangin Saul tungah Pasian’ Kha khauh takin hong tung a, ama hehna nakpi takin so hi. Amah in bawngleeng kap khat la a, tuate sem nenin kamtaite sawlin Israel gam khempeuhah khakin, “Saul leh Samuel’ nung zui-in a kuankhia lo peuhmah a bawngtalte tungah hih bangin kihih ding hi,” ci-in gen hi. Tua ciangin mite tungah Topa kihtakna hong tung a, mihing khat bangin amaute hong kuankhia uh hi. Amah in Bezek-ah amaute a kaihkhop ciangin Israel mite tul zathum pha a, Judah mite tul sawmthum pha hi. Amaute in a hong pai kamtaite kiangah, “Jabesh Gilead-te tungah hih bangin gen un, ‘Zing ciang, ni a sat hunin, note in hotkhiatna na ngah ding uh hi,’ ci un,” a ci uh hi. Kamtaite hong tungin Jabesh mite kiangah a gen uh ciangin amaute lungdam uh hi. Tua ahih ciangin Jabesh mite in, “Zing ciangin nang tungah kote kong kipia ding uh a, nangmah in hoih na sak bang bangin kote tungah nong hih ding hi,” a ci uh hi. A zing ciangin Saul in mite pawl thumin koih hi; tua ciangin amaute giahphual laizangah zingsang tungin hong pai uh a, sun nisat dong Ammonte vat tuk uh hi; a suakta mite kithehthang uh a, amaute mi nih nangawn a om khopna om nawn lo hi. Tua ciangin mite in Samuel kiangah, “Saul in eite hong uk ding hiam?’ a cite kua ahi hiam? Amaute i thah theih nadingin a mite hong paipih in,” a ci uh hi. Ahih hangin Saul in, “Tu ni-in mi khat zong kithat lo ding hi; bang hang hiam cih leh tu ni-in Topa in Israelte sungah hotkhiatna na sem hi,” a ci hi. Tua ciangin Samuel in mite khempeuh kiangah, “Hong pai un, Gilgal-ah pai-in kumpi dingin Saul kipsak pha kik ni,” a ci hi. Tua ahih ciangin mi khempeuh Gilgal-ah pai uh a, tua lai mun Topa mai Gilgal-ah Saul kumpi-in koih uh hi. Amaute in tua lai Topa mai-ah thunuam-a biakna pia uh a, Saul leh Israel mite khempeuh tua lai-ah nakpi takin lungdam uh hi. Tua ciangin Samuel in Israelte khempeuh tungah, “En un, note in keima kiangah nong genna uh na aw khempeuh uh ka ngai a, note tungah kumpi khat ka koih khin hi. Tu-in en un, note makaipa in kumpipa ahi hi; keimah teekin ka sam kaang ta hi; en un, note tawh ka tapate om hi; ka neu lai-a kipan tu ni dong note’ makai ka hi hi. Hih lai-ah ka om hi; ka mawhna a om leh Topa mai leh a sathau nilhpa’ mai-ah kei langah teci hong pang un. Kua bawngtal ka la hiam? Ahih kei leh kua la ka la hiam? Ahih kei leh kua khem ka hi hiam? Kua nengniam ka hi hiam? Ahih kei leh keima mit a tawsak dingin kua tung panin sumgolh la ka hi hiam? Kei’ langah teci hong pang un, keimah in kong dinkik ding hi,” a ci hi. Amaute in, “Nangmah in kote nong khem kei a, zong nong nengniam kei a, mi khatpeuh tung panin zong bangmah na la kei hi,” a ci uh hi. Tua ciangin amah in amaute kiangah, “Note in kei tungah bangmah na muh lohna thu uh Topa in note’ lang khatah teci hi a, ama sathau nilhpa zong tu ni-in teci ahi hi,” a ci hi. Tua ciangin amaute in, “Amah in teci ahi hi,” a ci uh hi. Tua ciangin Samuel in mite kiangah, “Moses leh Aaron teelin Izipt gam panin na pu na pate uh a paikhiatpih Topa in teci ahi hi. Tua ahih ciangin tu-in note leh na pu na pate uh adingin Topa in hotkhiatna a sepna thu khempeuh Topa mai note tungah hong gen in kong mawhsak theih nadingin ding lai dih un. Izipt-ah Jakob pai-in Iziptte in amaute a nenniam uh ciangin Topa tungah na pate uh kiko a, na pate uh Izipt panin paikhiatpihin hih lai mun-ah amaute a teengsak ahi Moses leh Aaron’ Topa in puak hi. Ahih hangin amaute in Topa a Pasian uh mangngilh uh hi; tua ciangin amah in Hazor kumpipa Jabin’ galkap mangpa Sisera tung leh Filistiate tung leh Moab kumpipa tungah amaute zuak hi; hih mite in amaute do uh hi. Tua ciangin Topa tungah amaute kiko uh a, ‘Kote ka khial khin uh hi; bang hang hiam cih leh Topa nusia-in Baalte leh Ashtaroth’ na ka sem uh hi; ahih hangin tu-in ka galte uh khut sung panin kote hong honkhia in, nangma’ na kong sem ding uh hi,’ a ci uh hi. Tua ciangin Topa in Jerubbaal leh Barak, leh Jefthah, leh Samuel hong sawl a, na kiim khempeuh uh-a na galte uh khut sung panin note hong honkhia hi; note lungmuang takin na om uh hi. Tua ciangin note a do dingin Ammon kumpipa Nahash hong kuanna na muh uh ciangin, Topa na Pasian uh na kumpi uh hi napi-in note in kei kiangah, ‘Hi lo hi, kumpi khat in kote hong uk ding hi,’ na ci uh hi. Tu-in note’ teelsa, note’ nget kumpipa en un; en un, Topa in note tungah kumpi khat koih khin hi. Note in Topa zahtakin ama’ na sem a, ama aw ngai-in Topa ’ thupiakna na lehdo kei uh a, note a hong uk kumpipa leh Topa na Pasian uh na zuih uh leh thu hong nuam ding hi; ahih hangin note in Topa ’ aw ngai loin Topa ’ thupiakna na lehdo uh leh Topa in note leh na kumpipa uh hong langpan’ ding hi. Tua ahih ciangin tu-in taang loin ding un la, note’ mit mai-ah Topa in ahih ding hih na lian en un. Tu ni in mangbuh lak laitak hilo ahi hiam? Amah in vanging leh guah hong puak theih nadingin Topa tungah thu ka ngen ding hi; note adingin kumpi khat na ngetna uh hangin Topa muhna-ah na gamtatnasa uh na gitlohna uh a liatna thu thei-in na mu ding uh hi,” a ci hi. Tua ahih ciangin Samuel in Topa tungah thungen a, Topa in tua ni-in vanging sakin guah zusak hi; tua ciangin mi khempeuh in Topa leh Samuel nakpi takin zahtak uh hi. Tua ciangin mi khempeuh in Samuel kiangah, “Kote ka sih loh nadingun na nasemte’ adingin Topa tungah thungen in; bang hang hiam cih leh ka khialhnasate uh banah kote adingin kumpi khat ngenin hih siatna ka behlap lailai uh hi,” a ci uh hi. Tua ciangin Samuel in mite kiangah, “Lau kei un; hih siatnate khempeuh na gamta khin uh hi; ahi zongin Topa zuihna panin pial kei un la, na lungsim khempeuh uh tawh Topa ’ na sem un; meetna hong pia thei lote ahi a, hong hon thei lo a mawkna nate lamah ahi zongin pial kei un; bang hang hiam cih leh tuate in a mawkna ahi hi. Topa in ama min a khualna-in ama mite paaikhia lo ding hi; bang hang hiam cih leh ama mi-in note hong bawl nadingin Topa lungkim sak hi. Tua tham loin kei zong, note adingin Topa tungah thunget lohna tawh ka na khial het kei ding hi; keimah in a hoih a man lampite note kong hilh ding hi. Topa zahtak bek un la, na lungsim khempeuh uh tawh citakin ama na sem un; bang hang hiam cih leh note adingin amah in na lian hong bawlsaksate ngaihsun un. Ahih hangin note na gamtat siat lai uh leh, note leh na kumpipa uh, na nih un, hong kiphiat khia ding hi,” a ci hi. Amah in uk ding a kipatin Saul kum sawmthum pha hi; amah in kum sawmnih leh nih sung Israelte uk hi. Saul in Israelte mihing tulthum teel hi; tulnihte Mikmash leh Beth-el mualtung gamah Saul tawh om a, tulkhatte Benjaminte’ gamsung Gibeah-ah a tapa Jonathan tawh om uh hi; midang a om laite amau’ inn a puanbuk ciat uh-ah amah in ciahsak hi. Jonathan in Geba-ah a om Filistia khuacingte zo hi; Filistiate in tua thu za uh hi. Tua ciangin Saul in gam khempeuh ah peengkul tum a, “Hebru mi khempeuh zasak un,” a ci hi. Tua ciangin Saul in Filistia khuacingte a zawhna leh Filistiate adingin Israelte a huathuai ahihna zong Israelte khempeuh in za uh hi. Gilgal-ah Saul a pawm dingin mite kisamkhia hi. Tua ciangin Israelte tawh a kido dingin Filistiate kikhawmin, leeng tul sawmthum, sakol galkap tulguk leh galkapte tuipi gei-a sehnel zahin tampi pha uh hi; amaute hong paito-in Beth-aven nisuahna lam Mikmash-ah phual sat uh hi. Israel mite in amaute haksatna sungah a om lam uh a kimuh uh ciangin (bang hang hiam cih leh galte in amaute neh mahmah uh hi), mite suanghawm sung, leihawmte sung, suangte sung, hante sung leh tuikhukte sungah bu uh a, ahih kei leh Jordan ngahmun kantanin Gad leh Gilead gamah galkah uh hi. Saul ahih leh Gilgal-ah om lai a, amah tawh a om mi khempeuh zong lau-in liing uh hi. Amah in Samuel’ seh hun, ni sagih sung ngak hi; ahih hangin Gilgal-ah Samuel hong pai lo a, ama kiang panin mite kithehthang hi. Tua ahih ciangin Saul in, “Meihal biakna leh thunuam-a biakna hih lai kei kiangah hong paipih un,” a ci hi. Tua ciangin amah in meihal biakna pia hi. Meihal biakna a piak a man khit phetin en in, Samuel hong pai hi; amah a dawn ding leh a hopih dingin Saul paikhia hi. Samuel in, “Bang hih na hi hiam?” a ci hi. Saul in, “Kei kiang panin mite kithehthangin, a ni kiseh sungin nang lah hong tung lo a, Mikmash-ah Filsitiate a kikhopna ka muh ciangin, keimah in, ‘Tu-in Filistiate keimah hong hih dingin Gilgal-ah hong paisuk ding a, keimah in Topa ’ maipha ka ngen nai kei hi,’ ka ci hi; tua ahih ciangin keimahmah kisawl tawmin meihal biakna ka pia hi,” a ci hi. Tua ciangin Samuel in Saul kiangah, “Na hai gamtat hi; amah in nang hong thupiak ahi Topa na Pasian’ hong thupiakna na zui kei hi; bang hang hiam cih leh tu-in Topa in Israelte tungah kumpi dingin nang leh na suan na khakte a kipsak suak ding ahi hi. Ahih hangin tu-in na ukna kizom suak lo ding hi; Topa in ama lungsim bangin mi khat zong khin hi, Topa in nang hong thupiak zui lo na hih manin ama mite tungah ulian dingin Topa in amah seh khin hi,” a ci hi. Tua ciangin Samuel ding-in Gilgal panin Benjaminte gam sung Gibeah-ah paito hi. Tua ciangin Saul in mihing zaguk bang, amah tawh a om mite sim hi. Saul, leh a tapa Jonathan, leh amau tawh a om mite Benjaminte’ gam sung Geba-ah om hi; ahih hangin Filistiate in Mikmash-ah phual sat uh hi. Tua ciangin Filistiate giahphual panin galsimte pawl thumin hong kuankhia uh hi; pawlkhatte Shual gam Ofrah lamah kihei-in, pawlkhatte Bethhoron lamah kihei a, pawlkhatte gamlak lam Zeboim kuam a kimuh sukna gamgi lamah kihei uh hi. Tu-in Israelte’ gam sung khempeuhah sikseek khat zong kimu lo hi; bang hang hiam cih leh Filistiate in, “Hebru mite in amau adingin namsau ahi a, teipi ahi zongin seek kha ding hi,” a ci uh hi; ahih hangin a lo khawhna tu, a tu-zum, a hei, ahih kei leh a phiaukawi a seek hiam dingin Israelte khempeuh Filistiate kiangah paisuk uh hi; lo khawhna tu leh tu-zum seek hiamna thaman in shekel seh-thum-suah-seh-nih hi a, hei seek hiam thaman leh ciangkhut-a sik phuh thaman in shekel khat seh-thum-suah-seh-khat ahi hi. Tua ahih ciangin gal kido ni-in Saul leh Jonathan tawh a om mite khat peuhpeuh’ khut sungah namsau ahi a, teipi ahi zongin om lo hi; ahih hangin Saul leh a tapa Jonathan in nei uh hi. Tua ciangin Filistia mite in Mikmash paina Ciangka a cing dingin mi sawl uh hi. Ni khat ni-in Saul’ tapa Jonathan in ama galhiam a pua tangvalpa kiangah, “Hong pai in, gal khat-a Filistia khuacingte kiangah pai ni,” a ci hi. Ahih hangin amah in a pa kiangah gen lo hi. Saul pen Migron-a om mang-kawlsing nuai-a Gebeah nawl-ah om hi; amah tawh a om mite zaguk bang pha a, Shiloh-ah Topa ’ siampi Eli’ tapa Finehas, a tapa Ikabod, a sanggampa Ahitub’ tapa Ahijah in siampi-puan silh hi. Mite in Jonathan a paikhiat khit lam thei lo uh hi. Filistia khuacingte’ omna-ah pai dingin Jonathan in a ngimna ciangka a pang khatah suangdawk khat omin a pang lang khatah zong suangdawk khat mah om hi; a khat’ min in Bozez hi a, a lang khat min in Seneh ahi hi. Suangdawk khat in Mikmash mai leilu lamah dawkin a khat in Geba mai leitaw lamah dawk hi. Tua ciangin Jonathan in ama galhiam a pua tangvalpa kiangah, “Hong pai in, vun ki-at lo hih khuacingte kiangah pai ni; Topa in eite adingin hong hih kha ding hi; bang hang hiam cih leh hong hotkhiat nadingin a tam a tawm in Topa nawngkai sak lo ding hi,” a ci hi. Tua ciangin a galhiam puapa in ama kiangah, “Na lungsim in a sawm khempeuh hih in; en in, nang tawh ka om a, nang lungsim mah bangin kei lungsim zong ahi hi,” a ci hi. Tua ciangin Jonathan in, “En in, hua mite kiangah galkah-in amaute kiangah i va kilak ding hi. Amaute in, ‘Note kiangah kong pai mateng uh hong ngak un,’ hong cih leh i omna mun-ah taang loin i ding ding a, amaute kiangah i paito kei ding hi. Ahih hangin amaute in, ‘Ko kiangah hong paito un,’ hong cih uh leh eite i paito ding hi; bang hang hiam cih leh Topa in eite khut sungah amaute hong pia khin hi. Hih in eite adingin lim hong hi ding hi,” a ci hi. Tua ahih ciangin Filistia khuacingte kiangah amau tegel va kilak uh hi; Filistiate in, “En un, a bukna uh leivang panin Hebru mite hong pusuakkhia uh hi,” a ci uh hi. Khuacing mite in Jonathan leh a galhiam puapa na hopih uh a, “Ko kiangah hong paito un, na khat kong lak ding uh hi,” a ci uh hi. Tua ciangin Jonathan in a galhiam puapa kiangah, “Ka nung hong zuito in; bang hang hiam cih leh Topa in Israelte khut sungah amaute pia khin hi,” a ci hi. Tua ciangin Jonathan a khut leh a khe tawh kahto-in a galhiam puapa a nungah pai hi. Amaute Jonathan mai-ah puk uh a, a galhiam puapa in ama nungah amaute that hi; Jonathan leh a galhiam puapa in a hih tua mi thah masak tungin lo eka khat dung zui-in, lo kaihna kuak dung tawn lang tan sungah mihing sawmnih bang pha hi. Tua ciangin giahphual sung, gam sung, leh mite lakah apkhapna om hi; khuacingte leh galsimte nangawn liing uh hi; ziin liing hi; buaina lianpi mahmah khat hong suak hi. Benjaminte’ gam sunga Gibeah-a Saul’ galvilte in en uh hi; en in, alang alangah mihonte kikhin maimai hi. Tua ciangin Saul in amah tawh a omkhawm mite kiangah, “Mi sim un la, eite kiang panin kua paikhia hiam thei un,” a ci hi. Amaute in mi a sim khit uh ciangin, en in, Jonathan leh a galhiam puapa om lo hi. Tua ciangin Saul in Ahijah kiangah, “Pasian’ thuciamna singkuang hih lai-ah hong paipih in,” a ci hi. Bang hang hiam cih leh tua hun lai takin Pasian thuciamna singkuang Israel mite tawh pai hi. Saul in siampipa a hopih lai takin Filistiate’ giahphuala buaina hong lian semsem hi; tua ciangin Saul in siampipa kiangah, “Tua thuciamna singkuang lawng nawn kei in,” a ci hi. Tua ciangin Saul leh amah tawh a om mi khempeuh kikhawmin gal phualah pai uh hi; en in, a galte khempeuh’ namsau in amau’ lawmte mah hih ciat a, kitawhnawina lianpi khat na om hi. Tu-in tua hun ma-in Filistiate tawh omkhawm khinin giahphual-ah amaute tawh a pai khinsa Hebru mite nangawn Saul leh Jonathan tawh a om khawm Israelte tawh a kipawl dingin kihei uh hi. Tua mah bangin, Filistiate a taina thu Efraim mual tung gam-a a bu Israel mite khempeuh in a zak uh ciangin amaute in zong gal phualah nakpi takin amaute nung delh uh hi. Tua ahih ciangin Topa in Israelte tua ni-in honkhia hi; gal kidona in Beth-aven kheng hi. Israel mite tua ni-in lungkham uh hi; bang hang hiam cih leh Saul in mite tungah kiciamna khat koih a, “Tu nitak mateng leh ka galte ka thuk matengin an a nepa in samsiatna ngah ta hen,” a ci hi. Tua ahih ciangin mite khat beek in an ciam lo uh hi. Mi khempeuh tulak tung uh hi; lei lakah khuaizu om hi. Mite tulak a lut uh ciangin, en in, a khuaizu taak a, ahih hangin kuamah in a kam sungah a khut tun’ lo hi; bang hang hiam cih leh mite in tua kiciamna kihta uh hi. Ahih hangin a pa in kiciamna tawh mite a thuhilhna Jonathan in za lo hi; tua ahih ciangin amah in a khut sunga om a ciangkhut dawn dawk sakin khuaibu sungah diah a, a kam-ah a khut tun’ hi; tua ciangin a tha hatkik hi. Tua ciangin mite khat in, “Na pa in kiciamna khat tawh nakpi takin mite thuhilh a, ‘Tu ni-in an a ne mipa in samsiatna ngah ta hen,’ ci hi,” a ci hi. Mite gim mahmah uh hi. Tua ciangin Jonathan in, “Ka pa in gamsung nawngkaisak hi; hih khuaizu tawmno khat ka ciapna hangin ka tha a hatkikna mu un. Mite in tu ni-in a ut ut-un amau muhsa galte’ an kinusiate ne leh bangzah takin hoihzaw ding ahi hiam; bang hang hiam cih leh tu-in Filistiate tam kithat lo hi,” a ci hi. Amaute in tua ni-in Mikmash panin Aijalon ciang dong Filistiate sattuk uh hi. Tua ciangin mite gim mahmah uh hi; van kinusiate tungah mite va leengin, tuu leh bawngtal leh bawngnote a tuahtuah munah that uh hi; tua ciangin mite in tuate a si tawh ne uh hi. Tua ciangin amaute in Saul kiangah gen uh a, “En in, a si tawh nekna hangin Topa tungah mite khial uh hi,” a ci uh hi. Tua ciangin amah in, “Na zuau gamtat khin uh hi; suangtum lian khat kei kiang hih lai-ah hong khuk dih un,” a ci hi. Tua ciangin Saul in, “Mite lakah note pai un la, amaute kiangah, ‘Mi khempeuh in a bawngtal ahi a, a tuu ahi zongin hih lai-ah hong paipih hen la, ne un; a si tawh nekna hangin Topa tungah khial kei un,’ ci un,” a ci hi. Tua ahih ciangin mi khempeuh in tua zanin a bawngtal uh hong paipihin tua mun-ah go uh hi. Tua ciangin Saul in Topa ading biakna tau khat lam hi; tua in Topa adingin a lam masak biakna tau ahi hi. Tua ciangin Saul in, “Filistiate kiangah zanin paisukin zingsang khuavak mateng amaute va sugawp ni; amaute mi khat zong siit kei ni,” a ci hi. Tua ciangin amaute in, “Hoih na sak peuhpeuh hih in,” a ci uh hi. Ahih hangin siampipa in, “Hih lai-ah Pasian kiang nai-ni,” a ci hi. Tua ciangin Saul in Pasian kiangah thu dong a, “Filistiate’ kiangah ka paisuk ding hiam? Israelte’ khut sungah amaute na pia ding hiam?” a ci hi. Ahih hangin tua ni-in amah in dawng lo hi. Tua ciangin Saul in, “Mi a makaite khempeuh aw, hih lai-ah hong pai un; hih mawhna tu ni-in hong pian’na thei un la mu un. Bang hang hiam cih leh Israelte a honkhia Topa a nuntak mah bangin, ka tapa Jonathan tungah tua mawhna a om leh zong, amah a si taktak ding hi,” a ci hi. Ahih hangin mite lak panin amah a dawng mi khat zong om lo hi. Tua ciangin amah in Israelte khempeuh tungah, “Note lang khatah na om ding uh a, kei leh ka tapa Jonathan a lang khatah ka om ding uh hi,” a ci hi. Tua ciangin mite in Saul kiangah, “Hoih na sak bangin hih in,’ a ci uh hi. Tua ahih ciangin Saul in, “Israelte’ Pasian Topa aw, bang hangin tuni-in na nasempa hong dawng lo na hi hiam? Hih mawhna kei tungah a hi a, ka tapa Jonathan’ tungah ahi zongin a om leh, Israelte’ Pasian, Topa aw, Urim hong pia in; ahih hangin hih mawhna na mi Israelte tungah om ahih leh Thummim hong pia in,” a ci hi. Tua ciangin Jonathan leh Saul kila a, ahih hangin mite suakta hi. Tua ciangin Saul in, “Kei leh ka tapa Jonathan kikal-ah ai saan un,” a ci hi. Tua ciangin Jonathan kila hi. Tua ciangin Saul in Jonathan kiangah, “Na gamtatnasa hong gen in,” a ci hi. Jonathan in ama kiangah gen a, “Ka khut sunga om ciangkhut dawn tawh khuaizu tawm khat ka ciam hi; hih lai-ah ka om hi, kei ka si ding hi,” a ci hi. Tua ciangin Saul in, “Nang na sih taktak kei taakleh Pasian in kei hong dawm kei ta hen, Jonathan aw,” ci-in a kiciam hi. Tua ciangin mite in Saul kiangah, “Israelte sungah hih gualzawhna lian a piangsak Jonathan si ding ahi hiam? Hi dek peuhmah lo ding! Topa a nuntak mah bangin, a lu tunga sam khat zong lei lakah kia lo ding hi; bang hang hiam cih leh amah in Pasian tawh tu ni-in tua thu piangsak hi,” a ci uh hi. Tua ahih ciangin mite in Jonathan tankhia uh a, amah si lo hi. Tua ciangin Filistiate a delhna panin Saul paito hi; Filistiate amau’ mun-ah ciah uh hi. Saul in Israelte tungah kumpi nasep a lak khit ciangin mun khempeuh-a ama galte khempeuh, Moab, Ammonte, Edom, Zobah kumpite, leh Filistiate a do hi; a kiheina peuhpeuh-ah amah in amaute a sia lam vive-in koih hi. Amah in hang takin hih-in Amalekte vatgawp a, amaute a sugawp mite’ khut sung panin Israelte honkhia hi. Tu-in Saul’ tapate in Jonathan, Ishvi, leh Malkhishua ahi hi; hihte in a tanu nihte’ min ahi hi: a tacil min in Merab hi a, a nauzaw’ min in Mikhal ahi hi; tua ciangin Saul’ zi min in Ahinoam hi a, Ahima-az’ tanu ahi hi. A galkap mangpa’ min in Abner hi a, Saul’ pano Ner’ tapa ahi hi; Saul’ pa Kish leh Abner’ pa Ner in Abiel’ tapate ahi uh hi. Saul’ nuntak sung khempeuh Filistiate tawh nakpi tak-a kidona om hi; Saul in mi thahat khat peuhpeuh ahi a, mi hang khat peuhpeuh ahi zongin a muh ciangin tua mipa amah tawh kipawl sak hi. Samuel in Saul kiangah, “ Topa in ama mi Israelte tungah kumpi dingin nang sathau a nilh dingin kei hong sawl hi; tua ahih ciangin tu-in Topa ’ kammalte ngai in. Mi honte’ Topa in hih bangin ci hi, ‘Amaute Izipt panin hong paikhiat lai-in amaute in lampi-ah Israelte a nialna uh hangin Amalek mite daan ka tat ding hi. Tu-in pai-in Amalek mite vatgawp un la, amaute’ neih khempeuh susia mang khin un; amaute siit loin, numei leh pasal, naupang leh nawine laite, bawngte leh tuu, kalaoh leh la, that un,’ ci hi,” a ci hi. Tua ahih ciangin Saul in mite sam a, Telaim-ah khe galkap mi tulzanih leh Judah mi tulsawm kaikhawm hi. Tua ciangin Amalek khuapi-ah Saul hong pai-in kuam sungah pang sim hi. Tua ciangin Saul in Ken mite kiangah, “Pai un, kihemkhia un, Amalekte lak panin paikhia suk un, tua hi kei leh note amaute tawh kong susia khawm kha ding hi; bang hang hiam cih leh Izipt panin amaute hong paikhiat lai-in Israel mite khempeuh tungah migitna na lak uh hi,” a ci hi. Tua ahih ciangin Amalekte lak panin Kente kihemkhia uh hi. Tua ciangin Saul in Havilah panin Izipt nisuahna lam-a om Shur ciang dong Amalekte zo hi. Amah in Amalekte kumpipa Agag a hingin man a, mi khempeuh namsau tawh thatmang hi. Ahih hangin Saul leh mite in Agag, leh a hoih pen tuute leh bawngtalte leh gannote, leh tuunote leh a hoih khempeuh khawi uh a, tuate thatmang lo uh hi; a kisimmawh bangmah a man lo khempeuh amaute in thatmang uh hi. Topa ’ thu Samuel tungah hong tung hi; “Kumpi-in Saul ka koih ka kisik hi; bang hang hiam cih leh amah in keimah zuihna panin kihei kik a, ka thupiaknate sem lo hi,” a ci hi. Tua ciangin Samuel heh hi; zan tawntung Topa ’ tungah kiko hi; Tua ciangin Saul dawn dingin zingsangin Samuel tho baih hi; tua ciangin Samuel kiangah, “Karmel-ah Saul hong pai hi, en in, amah in ama adingin phawkna mual khat phutin, kihei-in paisuak a, Gilgal-ah paisuk hi,” kici hi. Tua ciangin Saul kiangah Samuel hong pai a, Saul in ama kiangah, “Topa’ thupha na tungah hong tung hen; Topa ’ thupiakna ka sem khin hi,” a ci hi. Tua ciangin Samuel in, “Tua ahih leh ka bil-a tuu hamna leh ka zak bawngtalte’ hamna bang ahi hiam?” a ci hi. Saul in, “Amaute in Amalekte kiang panin tuate hong paipih uh hi; bang hang hiam cih leh Topa na Pasian tungah biakna piak nadingin a limcipen tuute leh bawngtalte mite in siit uh hi; a dangte ka thatmang khin uh hi,” a ci hi. Tua ciangin Samuel in Saul kiangah, “Khawl in! Topa in tu zan-a kei kiangah hong gen thu nang kiangah kong gen ding hi,” a ci hi. Tua ciangin amah in ama kiangah, “Hong gen in,” a ci hi. Tua ciangin Samuel in, “Nang na kineu ngaihsut hun a om hangin, tu-in nang in Israel minamte’ lutang hilo na hi hiam? Topa in Israelte tungah kumpi-in nang sathau hong nilh hi. Topa in nasem dingin nang hong sawl a, ‘Pai in, mawhnei Amalekte va susia mang in la, amaute a bei mang mateng va do in,’ hong ci hi. Tua ahih ciangin bang hangin Topa ’ aw ngai lo na hi hiam? Bang hang in van kinusiate bawhin Topa muhna-ah a sia gamta na hi hiam?” a ci hi. Tua ciangin Saul in Samuel kiangah, “Keimah in Topa ’ aw ka ngai a, Topa in hong sawl nasepna-ah pai khinin, Amalek kumpipa Agag kong ciahpih khin a, Amalekte ka susiamang khin hi. Ahih hangin mite in a kinusiate, tuute leh bawngtalte, suksiat dinga a ki-ap na hoih pente Gilgal-ah Topa na Pasian piak dingin la uh hi,” a ci hi. Tua ciangin Samuel in, “ Topa in meihal biaknate leh biakpiaknate, Topa ’ thu man’ ding zahin deih ahi hiam? En in, biakpiakna sangin thuman’ ding hoihzaw a, tuutal thaute sangin thungaih ding hoihzaw hi. Bang hang hiam cih leh lehdona in aisan mawhna bangmah hi a, lungkhauhna in mawhna leh milim biakna mah bang hi. Nangmah in Topa ’ thu nial khin na hih manin, amah in zong kumpi hihna panin nang hong nolh khin hi,” a ci hi. Tua ciangin Saul in Samuel kiangah, “Ka khial khin hi; bang hang hiam cih leh keimah in mite kihta-in amau’ aw ngai ka hih manin Topa ’ thupiakna leh nangma thute ka palsat khin hi. Tua ahih ciangin, tu-in kong thum hi, ka khialhna hong maisak in la, Topa ka biak theih nadingin kei tawh hong kileh kik in,” a ci hi. Tua ciangin Samuel in Saul kiangah, “Nang tawh kong kileh kik kei ding hi; bang hang hiam cih leh nangmah in Topa ’ thu na nial khin a, Topa in nang Israelte tungah kumpi hihna panin hong nolh khin hi,” a ci hi. A paikhia dingin Samuel a kihei lai takin Saul in a puantualpi mong-in len a, a puan kikeek hi. Tua ciangin Samuel in ama kiangah, “ Topa in Israelte kumpi gam nang tung panin tu ni-in bal khia-in nang sangin a hoihzaw na vengpa tungah pia khin hi. Israelte’ minthan’na in zong zuau gen lo ding a, zong kisik lo ding hi; bang hang hiam cih leh a kisik dingin amah in mi hi lo hi,” a ci hi. Tua ciangin amah in, “Ka khial khin hi; ahi zongin tu-in keima mi upate mai leh Israelte mai-ah kei hong pahtawi in la, Topa na Pasian ka biak theih nadingin kei tawh hong kileh kik in,” a ci hi. Tua ahih ciangin Saul nung zui-in Samuel kileh kik hi; Saul in Topa bia hi. Tua ciangin Samuel in, “Amalekte’ kumpi Agag hih lai ka kiangah hong paipih in,” a ci hi. Tua ciangin Agag launa liin’na tawh ama kiangah hong pai hi. Agag in, “Sih ding lungkhamna hong tung taktak ta hi,” a ci hi. Tua ciangin Samuel in, “Na namsau in numeite ta bei-in a bawl mah bangin na nu zong numeite lakah ta bei hi ding hi,” a ci hi. Tua ciangin Samuel in Topa mai Gilgal-ah Agag semnen hi. Tua ciangin Samuel Ramah-ah pai hi; Gibeah-a a inn-ah Saul zong ciahto hi. Samuel in ama sih ni dong Saul mu kik lo hi; ahih hangin Saul hangin Samuel dah hi. Israelte tungah kumpi-in Saul a koih manin Topa kisik hi. Topa in Samuel kiangah, “Israelte tungah kumpi hihna panin amah ka nolh khitna mu napi-in Saul’ hangin bang tan vei dah ding na hi hiam? Na sathau biing-ah sathau thun in la, pai in; Bethlehem mi Jessi kiangah kong sawl ding hi; bang hang hiam cih leh ama tapate lak panin keima ading kumpi khat ka la khin hi,” a ci hi. Samuel in, “Bangci pai theih ding ka hi hiam? Saul in za leh, amah in kei hong that ding hi,” a ci hi. Tua ciangin Topa in, “Bawngla khat paipih in la, Topa tungah biakna pia dingin kong pai hi,’ ci in. Biakpiakna-ah Jessi samin na hih ding na tungah kong lak ding hi; nang tungah a min kong genpa sathau nong nilhsak ding hi,” a ci hi. Topa ’ thupiak bangin Samuel gamta-in Bethlehem ah pai hi. Tua khuapi upate a liingsa-in amah dawn dingin hong pai uh a, “Thu hoih a, hong pai na hi hiam?” a ci uh hi. Amah in, ‘Thu hoih hi; Topa tungah biakna pia dingin kong pai hi; note ki-ap un la, biakpiakna-ah kei tawh hong pai un,” a ci hi. Amah in Jessi leh a tapate ap-in, biakpiakna-ah amaute sam hi. Amaute hong tun’ ciangin amah in Jessi’ tapa Eliab enin, “ Topa ’ sathau nilhpa ama mai-ah om taktak hi,” ci-in ngaihsun hi. Ahih hangin Topa in Samuel kiangah, “A tungtham hita leh a tun’ san’na hita leh en kei in; bang hang hiam cih leh amah ka nolh hi; bang hang hiam cih leh Topa in mihingte’ muh bangin mu lo hi; mihingte in a pua lama kilangte en a, ahih hangin Topa in a lungsim en hi,” a ci hi. Tua ciangin Jessi in a tapa Abinadab samin Samuel mai-ah amah paisak hi. Amah in, “ Topa in hihpa zong teel lo hi,” a ci hi. Tua ciangin Jessi in Shammah paisak hi. Amah in, “ Topa in hihpa zong teel lo hi,” a ci hi. Tua ciangin Jessi in a tapa sagihte Samuel mai-ah paisak hi. Samuel in Jessi kiangah, “ Topa in hih mite teel lo hi,” a ci hi. Tua ciangin Samuel in Jessi kiangah, “Na tapate khempeuh hih lai-ah om kim ahi hiam?” a ci hi. Amah in, “A nautum pen om lai hi; ahih hangin en in, amah in tuute cing hi,” a ci hi. Tua ciangin Samuel in Jessi kiangah, “Amah samsak in la, hong paipih in; bang hang hiam cih leh hihlai-ah amah hong tun’ mateng eite an ne-in i tu kei ding hi,” a ci hi. Jessi in amah samsakin amah hong tumpih hi. Amah in cidam mel pua-in, a mitte hoih a, a mel hoih hi. Tua ciangin Topa in, “Ding in, amah sathau nilh in; bang hang hiam cih leh hihpa in amah ahi hi,” a ci hi. Tua ciangin Samuel in a sathau biing sunga sathau la-in a sanggamte laizangah amah sathau nilh hi. Tua ni a kipanin Topa ’ Kha khauh takin David tungah hong tung hi. Tua ciangin Samuel ding-in Ramah ah ciah hi. Tu-in Saul tung panin Topa ’ Kha paikhia a, Topa kiang panin kha gilo in amah gimsak hi. Saul’ nasemte in ama kiangah, “Tu-in en in, Pasian kiang panin kha gilo in nang hong gimsak hi. Tu-in na mai-a om nasemte in laiza lasakna a tum siam mi khat a zon’ nadingin ka topa un na nasemte thu pia in; Pasian kiang panin kha gilo na tungah hong tun’ ciangin amah in tua hong tum ding a, tua ciangin na ci hong dam ding hi,” a ci hi. Tua ahih ciangin Saul in a nasemte kiangah, “Lim takin a tum thei khat kei adingin hong zong un la, ka kiangah amah hong paipih un,” a ci hi. Tangvalte khat in dawngin, “En un, Bethlehem mi Jessi’ tapa, a tum siam, a thahat, a gal hang mi, thugen a siam, a mel hoih khat ka mu hi; Topa in amah tawh omkhawm hi,” a ci hi. Tua ahih ciangin Saul in Jessi kiangah kamtaite sawl a, “Na tapa David, tuute tawh a ompa, kei kiangah hong sawl in,” a ci hi. Tua ciangin Jessi in anlum, leh leenggahzu savun thawl khat leh keelno khat a pua la khat la-in, Saul kiangah tuate a tapa David puaksak hi. Saul kiangah David hong tung a, ama nasepna-ah lut hi. Saul in nakpi takin amah it a, amah in a galhiam pua-pa suak hi. Saul in Jessi kiangah mi sawlin, “Keima nasepna-ah David hong omsak in; bang hang hiam cih leh keima muhna-ah amah in maipha mu hi,” ci sak hi. Pasian kiang pan-a kha gilo Saul tungah a om peuhmah ciangin David in laiza la-in a khut tawh tum hi; tua ahih ciangin Saul thak suakin a cidam a, ama kiang panin khagilo kihemkhia hi. Tu-in Filistiate in galdo dingin a galkapte khawm uh hi; Judahte gam Sokoh ah amaute kikhawm uh a, Sokoh leh Azekah kikal Efesdammim ah giahphual sat uh hi. Tua ciangin Saul leh Israel mite kikhawmin Elah kuam-ah giahphual sat uh a, Filistiate do dingin kikhung uh hi. Filistiate a gal khat mual tungah ding uh a, Israelte a gal khat mual tungah ding-in, amaute’ kikalah guam khat om hi. Filistiate giahphual panin Gath khuami Goliath a kici a makai, a tun’ pi kua val a sang mi khat hong paikhia hi. Amah in a lu tungah sumngo siklukhu nei-in, sikpuan tawh amah kithawi a, a puan gihna in sumngo shekel tulnga ahi hi. Amah in a khete tungah sumngo ngaltuam nei a, a liangkote kikalah sumngo teikhawh kikhai hi. A teibul in siam lawngpi cia bang hi a, a teipak in sik shekel zaguk gik hi; ama mai-ah a lum puapa pai hi. Amah ding-in Israel uliante otsanin, “Galdo dingin bang hangin hong kuankhia na hi uh hiam? Keimah in Filistia mi hi-in, note in Saul’ nasemte hilo na hi uh hiam? Note’ adingin mi khat teel un la, tua mipa kei kiangah hong paisuk sak un. Amah in kei hong doin hong thah zawh leh kote in na nasemte ka hi ding uh hi; ahih hangin keimah in amah zoin ka thah leh note in komau’ nasem hi-in ka na uh na sem ding uh hi,” a ci hi. Tua ciangin tua Fislistia mipa in, “Tu ni-in Israel uliante kong to hi; i kido theih nadingin mi khat hong pia un,” ci thuah lai hi. Saul leh Israelte khempeuh in Filistia mipa’ kammalte a zak uh ciangin amaute lungkia-in nakpi takin lau uh hi. Tu-in David in Judah gam Bethlehem khua-a om Efrathah mi, tapa giat a nei, Jessi min neipa’ tapa ahi hi. Saul hun lai-in tua mipa teek zo-in kum tampi pha ta hi. Jessi’ tapa a upen thumte in galdona-ah Saul zui khin uh hi; gal sungah a pai a tapa thumte’ min in a ta upa Eliab, leh ama zom-ah Abinadab, leh a thumna in Shammah ahi hi. David in a nautum pen ahi hi; a upapen thumte in Saul zui uh a, ahih hangin Bethlehem-a a pa’ tuute a vak dingin Saul kiang panin David kileh kawikawi hi. Ni sawmli sung zing leh nitakin Filistiapa hong pai-in hong ding hi. Tua ciangin Jessi in a tapa David kiangah, “Hih ankan seu khat leh hih anlum lum sawm na ute puak dingin guang in la, na ute kiang giahphual ah manlangin va puak in; a tul a ukpa kiangah zong hih sathaukhal sawmte puak in. Na ute’ om dan va mu in la, amau omzia a kitheihna lim pawlkhat hong ciahpih in,” a ci hi. Tu-in Filistiate tawh kido-in Saul leh amaute, leh Israel mite khempeuh Elah kuam-ah om uh hi. Tua ciangin Jessi in amah a thupiak bangin zingsangin David tho baihin, a keem ding mi khat tawh a tuute nusia a, a ante pua-in pai hi; mihonte galphual ah pai-in galdo kikona a ot lai takun amah giahphual va tung hi. Israelte leh Filistiate, galkap leh galkap a kido dingin kinaih uh hi. David in van cingpa khut sungah a nate nusia-in galkapte kiangah va tai a, pai-in a ute va hopih hi. Amaute tawh a kiho lai takin, en in, Gath khuami Filistiate, a makaipi Goliath min nei-pa, Filistia uliante lak panin hong paikhia-in a masa-a mah bangin kam hong pau hi. David in ama kampau za hi. Israel mite khempeuh in tua mipa a muh uh ciangin ama kiang panin taikhia uh a, lau mahmah uh hi. Israel mite khat leh khat kiho-in, “Hih hong paikhia mipa na mu ngei hiam? Israelte a to dingin hong paito takpi hi; amah a that mipa tungah kumpipa in hauhna tampi pia-in, ama tanu zong pia ding a, a pa’ innkuante Israelte sungah aana nasep leh siah khempeuh maang sak ding hi,” a ci uh hi. David in ama kianga ding mite kiangah, “Hih Filistiapa that-in Israelte tung panin hih mindaina a beisakpa adingin bang kihih ding ahi hiam? Amah in a nungta Pasian’ galkapte a to dingin hih dawibia Filistiapa in kua ahi hiam?” a ci hi. Mite in a kibang mahin amah dawng uh a, “Amah a that mipa tungah tua bangin kihih ding hi,” a ci uh hi. Tu-in amah in mite kiangah thu a gen ciangin ama u a upapen Eliab in za hi; David tungah Eliab heh mahmah a, amah in, “Bang hangin hong paisuk na hi hiam? Tua tuu tawm khatte gamlakah kua tawh nusia na hi hiam? Na kihai-muan’na leh na lungsim gitlohna ka thei hi; bang hang hiam cih leh gal kidona mu dingin nong paisuk hi,” a ci hi. David in, “Bang hih ka hi hiam? Kam bek hi lo ahi hiam?” a ci hi. Tua ciangin ama kiang panin midang khat kiangah kihei-in a kibang mahin thu dong hi; mite in a masa-a mah bangin amah dawng kik uh hi. David’ kampaute a kizak ciangin amaute in Saul’ kiangah gen kik uh hi; Saul in amah sam sak hi. Tua ciangin David in Saul kiangah, “Ama hangin kuama lungkia sak kei in; na nasempa pai-in hih Filistiapa tawh ka va kido ding hi,” a ci hi. Saul in David kiangah, “Amah tawh kido dingin hih Filistiapa’ lang khatah na kuan zo kei ding hi; bang hang hiam cih leh nang in tangval na hi pan a, amah in a tangval-a kipan galkap mi ahi hi,” a ci hi. Ahih hangin David in Saul kiangah, “Na nasempa in a pa’ tuute a kem zel hi; humpinelkai ahi a, vom ahi zongin hong pai-in tuute lak panin tuuno a mat ciangin, a nungah delhin vat gawpin a kam sung panin tuuno ka honkhia hi; keimah hih dingin amah hong ding leh keimah in a khamul-in manin vat gawpin ka that hi. Na nasempa in humpinelkai leh vomte that khin ngei hi; amah in a nungta Pasian' galkapte ninsak ahih manin dawibia hih Filistiapa in tuate khat tawh kibang ding hi,” a ci hi. Tua ciangin David in, “Humpinelkai khecin leh vom khecin panin kei hong honkhia Topa in hih Filistiapa khut sung panin kei hong honkhia ding hi,” ci thuah lai hi. Tua ciangin Saul in David kiangah, “Pai in, Topa in nang hong ompih ta hen!” a ci hi. Tua ciangin Saul in a galvante David silhsak hi, amah in a lu tungah sumngo lukhu khusakin, sikpuan silhsak hi. Tua ciangin David in a galdalnate tungah a namsau khih a, amah kingeinaseh lo ahih manin lam pai dingin a kithawi leh pai thei lo hi. Tua ciangin David in Saul kiangah, “Hihte tawh ka pai thei kei hi; bang hang hiam cih leh ka kingeinaseh kei hi,” a ci hi. David in tuate suahkhia hi. Tua ciangin amah in a khut-ah a ciangkhut la-in, lui panin suangmai tang nga tengin a tuucin’ thung-ip, a ip sungah tuate koih hi; a khut sungah a suanglotna tawi a, Filistiapa nai-ah amah pai hi. Tua ciangin a mai-ah a lum puapa tawh Filistiapa hong paisukin David hong naih hi. Filistiapa khuadakin David a muh ciangin amah in simmawh hi; bang hang hiam cih leh amah a tangval pan, a cidam tuak, a mel hoih khat hi lel hi. Tua ciangin Filistiapa in David kiangah, “Ciangkang tawh kei kiangah nong pai nadingin kei in ui ka hi hiam?” a ci hi. Filistiapa in ama pasiante tawh David samsia hi. Filistiapa in David kiangah, “Ka kiangah hong pai in, huih lak vasate leh gamlak gamsate tungah na sa ka pia ding hi,” a ci hi. Tua ciangin David in Filistiapa kiangah, “Namsau leh teipi leh teikhawh tawh kei kiangah nang nong kuan hi; ahih hangin kei in Israel galkapte’ Pasian, mihonte’ Topa, nangmah in na to mipa’ min tawh nang kiangah kong kuan hi. Tu ni-in Topa in ka khut sungah nang hong pia ding a, keimah in nang hong sattukin na lu ka tankhia ding hi; tua ciangin tu ni-in huih lak vasate leh leitung ganhingte tungah Filistia mi a site’ luanghawmte ka pia ding hi; Israelte sungah Pasian khat a om lam leitung mi khempeuh in a theih nading, leh Topa in namsau leh teipi tawh a hotkhiat lohna thu hih a kikhawm khempeuh in a theih nading ahi hi; bang hang hiam cih leh galdona in Topa aa hi a, amah in kote khut sungah note hong pia ding hi,” a ci hi. David tawh kituah dingin Filistiapa ding-in hong pai a, hong naih ciangin David zong Filistiapa tawh kituah dingin manlangin gal mai-ah delh hi. Tua ciangin David in a khut-in a thung-ip sawkin suangtang khat la a, lawnin Filistiapa’ taltang kha hi; a taltang ah a suang tum a, lei lakah amah maipuk hi. Tua ahih ciangin David in suanglotna khat leh suang khat tawh Filistiapa zo a, Filistiapa kha-in that hi; David khut sungah namsau om lo hi. Tua ciangin David tai-in Filistiapa tungah ding a, a namsau la-in a paai panin dok a, amah thatin tua tawh a lu tankhia hi. Filistiate in a makaipa uh a sihna a theih uh ciangin amaute tai uh hi. Tua ciangin Israelte leh Judah mite awngin ding uh a, Gath leh Ekron kulh kongpi ciang dong Filistiate delh uh ahih manin Sha-araim panin Gath leh Ekron ciang dong Filistia mi a liamte lampi-ah puk uh hi. Tua ciangin Filistiate a delhna panun Israelte hong ciahkik uh a, amaute in amau’ giahphual luhsak uh hi. David in Filistiapa’ lutang la-in Jerusalem ah paipih hi; ahih hangin amah in a gal kidalna ama puanbuk-ah koih hi. Filistiapa do-in David a kuan khitna Saul in a muh ciangin galkap mangpa Abner kiangah, “Abner aw, hih tangvalpa kua tapa ahi hiam?” a ci hi. Abner in, “Na nuntakna a hin’ mah bangin, Kumpipa aw, ka thei kei hi,” a ci hi. Tua ciangin kumpipa in, “Tangvalpa kua tapa ahi hiam kan in,” a ci hi. Filistiapa a thahna panin David hong ciah ciangin Abner in amah samin a khut sunga Filistiapa’ lutang tawh Saul mai-ah amah paipih hi. Saul in ama kiangah, “Tangval aw, kua tapa na hi hiam?” a ci hi. David in dawng in, “Bethlehem khuami na nasempa Jessi’ tapa ka hi hi,” a ci hi. David leh Saul a kiho khit a kipanin Saul’ tapa Jonathan in David it mahmah a, Jonathan in ama pumpi zahin it hi. Saul in tua ni-a kipanin ama kiangah David omsak a, a pa’ inn-ah ciah sak lo hi. Tua ciangin Jonathan in David tawh thuciamna khat bawl hi. Jonathan in ama tunga om a puantualpi suah-in David pia a, a gal kidalna, leh a namsau nangawn leh a thal leh a kawnggak zong pia hi. David kuankhia a, Saul in a sawlna mun peuhpeuhah a maa tun’ hi; tua ahih ciangin Saul in galkapte a uk dingin amah koih hi. Hih in mite khempeuh’ muhna leh Saul’ nasemte’ muhna-ah zong hoih kisa hi. Filistiapa a thahna panin David ciahin, amaute in inn lam a zuat uh ciangin, Israel khuapite khempeuh sung panin Kumpi Saul dawn dingin khuangtum leh lungdamna lasakna leh lasaknate tawh lasa leh lam kawmin numeite hong kuankhia uh hi. Amaute in lungdamna bawlin omin numeite khat leh khat in, “Saul in a tulin that, David in a tulsawmin that,” kici uh hi. Saul heh mahmah a, hih thugenna in amah lungkim losak hi; amah in, “Amaute in David tungah a tulsawmin pia-in, kei tungah a tulin hong lo uh hi; kumpi min puak cih sim loh bang nei nawn ka hi hiam?” a ci hi. Tua ni a kipanin Saul in David encik hi. A zing ciangin Pasian kiang panin khagilo in Saul hong bawhin, ni simin David in a hih ngei bangin laiza lasakna a tum lai takin ama inn sung tengah kamsan’na nei hi. Saul in a khut sungah a teipi tawi hi; Saul in a teipi-in David nihvei khawh hi; bang hang hiam cih leh, “Kawm tawh David ka khawhcip ding hi,” ci-in ngaihsun hi. Ahih hangin David in a nihvei mahin pelh thei hi. Saul in David kihta hi; bang hang hiam cih leh Topa in amah ompih a, ahih hangin Saul kiang panin amah kihemkhia khin ta hi. Tua ahih ciangin Saul in ama omna panin amah la khia-in mihing tulkhat a uk-in koih hi; mite makai-in amah kuankhia-in hong ciah hi. David in a sepna khempeuh ah a maa tun’ hi; bang hang hiam cih leh Topa in amah ompih hi. Amah in matut zawhna lianpi a neih lam Saul in a muh ciangin amah lamdang sa-in om hi. Ahih hangin Israelte khempeuh leh Judahte khempeuh in David it uh hi; bang hang hiam cih leh amaute makaihin amah kuankhia-in hong ciah hi. Tua ciangin Saul in David kiangah, “Hih lai-ah ka tanu uzaw Merab om hi; nang tungah zi dingin kong pia ding hi; kei adingin hang peuh in la, Topa ’ gal do in,” a ci hi. Bang hang hiam cih leh Saul in, “Keima khut sungah amah si loin, Filistiate khut sungah si hen,” ci-in ngaihsun hi. David in Saul kiangah, “Keimah in kumpipa’ makpa ka hih nadingin kei in kua hi a, Israelte sungah ka tanaute, ka pa’ innkuante in kua ahi hiam?” a ci hi. Ahih hangin Saul’ tanu Merab David tungah a kipiak ding lai takin Meholah mi Adriel tungah a zi dingin kipia hi. Tu-in Saul’ tanu Mikhal in David ngai hi; amaute in Saul kiangah gen uh a, tua thu in Saul lungdam sak hi. Saul in, “Ama adingin amah in thangzak ahih theih nading leh Filistiate khut in amah a langpan’ theih nadingin ama tungah amah pia ning,” ci-in ngaihsun hi. Tua ahih ciangin Saul in David kiangah a nihveina genin, “Nang in tu-in ka makpa na hi ding hi,” a ci hi. Saul in a nasemte thupia a, “David kiangah thu tuam genpih un la, ‘En in, nang tungah kumpipa lungkim a, ama nasemte khempeuh in nang hong it hi; tua ahih ciangin tu-in kumpipa’ makpa suak in,’ ci un,” a ci hi. Saul’ nasemte in David’ kiangah hih thute gen uh hi. David in, “Keimah in mizawng hi-in a zahtakhuai lo ka hihna mu napi-in kumpipa’ makpa suah ding a thuneu sa na hi uh hiam?” a ci hi. Tua ciangin Saul’ nasemte in ama kiangah, “Tua bang tua bangin David in gen hi,” a ci uh hi. Tua ciangin Saul in, “David kiangah hih bangin na gen ding uh hi, ‘Kumpipa in a galte a thukkik theih nadingin Filistiate’ vundawn zakhat cih simloh kumpipa in moman deih lo hi,’ ci un,” a ci hi. Tu-in Saul in Filistiate’ khut tawh David sih sak ding ngaihsun hi. Ama nasemte in David kiangah hih thute a gen ciangin kumpipa’ makpa ahih ding David lungkim sak hi. A hun a bei ma-in, David ding-in ama mite tawh pai a, Filistiate mi zanih that hi; tua ciangin amah kumpipa’ makpa a suah theih nadingin kumpipa tungah a cingin a kipia amaute’ vundawnte David in hong paipih hi. Saul in a tanu Mikhal ama zi dingin pia hi. Ahih hangin Topa in David a ompihna leh a tanu Mikhal in David a itna thu Saul in a muh ciangin, Saul in David kihta semsem hi. Tua ahih ciangin Saul in David’ gal hi tawntung hi. Tua ciangin Filistia mi uliante galdo dingin hong kuankhia uh a, amaute hong kuankhiat simin Saul’ nasem dangte khempeuh sangin David in a maa tunzaw hi; tua ahih ciangin nakpi takin ama min kisang ngaihsut semsem hi. Tua ciangin Saul in David thah ding a ngaihsutna thu a tapa Jonathan leh a nasemte khempeuh kiangah gen hi. Ahih hangin Saul’ tapa Jonathan in David diksa mahmah hi. Jonathan in David kiangah, “Ka pa Saul in nang thah hong sawm hi; tua ahih ciangin zingsang ciangin kidawm in la, mun simtham khatah omin bu in, kei paikhia-in nangma omna phual nai-ah ka pa kiangah ka ding ding a, nangma thu ka pa kiangah ka gen ding hi; ama tung panin phawk ka neih leh nang kiangah kong gen ding hi,” a ci hi. Jonathan in a pa Saul kiangah David thu a hoihin genin ama kiangah, “Kumpipa a nasempa David tungah khial kei in; bang hang hiam cih leh nang tungah amah hong khial lo hi; ama nasepnate nang tungah nasep hoih ahi hi; amah in a nuntakna pia ngamin Filistiapa that a, Topa in Israelte khempeuh adingin gualzawhna lianpi piangsak hi. Nangmah in hih thu na mu a, na lung a dam hi; tua ahih ciangin bang hangin thu om lopi-in David thahna tawh a mawh baang lo mipa tungah khial ding na hi hiam?” a ci hi. Saul in Jonathan’ thu mang hi; Saul kiciam a, “ Topa in a nungta ahih mah bangin amah kithat lo ding hi,” a ci hi. Tua ciangin Jonathan in David samin, Jonathan in ama tungah hih thute khempeuh lak hi. Jonathan in Saul kiangah David paipih a, a ni dang-a bangin ama sepna ngei-ah sem hi. Tua ciangin gal hong omkik hi; David kuankhia-in Filistiate tawh kido a, amaute tampi tak that a, ama mai-ah amaute tai uh hi. Tua ciangin a khut sungah a teipi tawi-in a inn sungah a tut lai takin Topa kiang panin kha gilo Saul tungah hong tung hi; David in a laiza lasakna tum hi. Saul in a teipi-in kawm tawh David khawhcip dingin khawh hi; ahih hangin amah in Saul pelh a, amah in kawm tungah a teipi khawh hi. Tua ciangin David tai-in suakta hi. A zingsang ciangin amah a thah theih nadingin tua zanin Saul in amah a vil dingin David’ inn-ah mi sawl hi. Mikhal in ama kiangah, “Tu zanin na nuntakna na suahtak kei leh, zing ciangin nang hong kithat ding hi,” a ci hi. Tua ahih ciangin Mikhal in kongvangneu-ah David khiasuk hi; amah taikhia-in suakta hi. Mikhal in milim khat la-in lupna tungah koih a, keelmul lukham khat a lu-ah koihin puan silhsak hi. Saul in David a man dingin mi a paisak ciangin amah in, “Amah a ci na hi,” na ci hi. Tua ciangin Saul in David en dingin mi sawl a, “Amah ka thah theih nadingin a lupna tawh kei kiangah amah hong pua to un,” a ci hi. A mi sawlte hong tun’ ciangin, en in, keel mul lukham a lu san-ah omin lupna tungah a milim na om hi. Saul in Mikhal kiangah, “Bang hangin tua bangin kei hongkhem a, amah a suahtak nadingin ka galpa khah na hi hiam?” a ci hi. Mikhal in Saul dawngin, “Amah in kei kiangah, ‘Hong paisak in; bang hangin nang hong that ding ka hi hiam?’ hong ci hi,’ a ci hi. Tu-in David tai-in suakta a, Ramah ah Samuel kiangah pai-in, ama tungah Saul’ hihna teng gen hi. Tua ciangin amah leh Samuel pai-in Naioth-ah om uh hi. Tua ciangin Saul kiangah, “En in, Ramah khua sung Naioth veengah David om hi,” kici hi. Tua ciangin David a man dingin Saul in mi sawl hi; amaute in kamsang honte mailam thu genin omin amaute a makai-in Samuel a ding a muh uh ciangin, Saul’ sawltakte tungah Pasian’ kha hong tung a, amaute in zong mailam thu gen uh hi. Hih thu Saul kiangah a kigen ciangin, amah in midang sawl leuleu a, amaute in zong mailam thu mah genin om uh hi. Tua ciangin Saul in mi a thumveina sawl a, amaute in zong mailam thu genin om veve uh hi. Tua ciangin amahmah Rammah ah pai a, Seku-a om tuikhuk lianpi tung hi; amah in, “Samuel leh David koi-ah om ahi hiam?” ci-in dong hi. Mi khat in, “En in, Ramah khua sung Naioth veengah om uh hi,” a ci hi. Tua lai panin Ramah khua sung Naioth veengah amah pai hi; ama tungah zong Pasian’ Kha hong tung a, Ramah khua sung Naioth veeng a tun’ mateng a lam pai kawmin amah in mailam thu gen hi. Amah in zong a puante suahkhia-in, Samuel’ mai-ah zong mailam thu genin, tua sun tawntung leh tua zan tawntung a guaktangin om hi. Tua huna kipanin, “Saul zong kamsang suak khin ahi hiam?” kici hi. Tua ciangin Ramah khua sung Naioth veeng panin David tai-in, Jonathan kiangah hong tungin ama mai-ah, “Bang hih ka hi hiam? Ka mawhna bang ahi hiam? Amah in kei thah dingin hong zon’ nadingin na pa mai-ah ka khialhna bang ahi hiam?” a ci hi. Tua ciangin amah in ama kiangah, “Tua bang hi het lo ding! Na si kei ding hi. En in, ka pa in kei kiangah gen loin a lian hita leh a neu hita leh bangmah hih lo hi; bang hangin ka pa in kei tungah hih thu hong iim ding ahi hiam? Tua bang hilo hi,” a ci hi. Ahih hangin David in dawngin, “Nang nong pahtak lam na pa in tel takin thei hi; tua ahih manin amah in, ‘Amah dah kha ding ahih manin hih thu Jonathan theisak kei ning,’ ci-in ngaihsun hi. Ahih hangin a taktakin, Topa nungta-in nang na nuntak mah bangin kei ka sih nading themkhat bek in sam hi,” a ci hi. Tua ciangin Jonathan in David kiangah, “Na gen peuhpeuh nang adingin kong hih sak ding hi,” a ci hi. David in Jonathan kiangah, “En in, zingciang in kha det ni hi a, kumpipa tawh sabuai-ah pel loin ka tut ding ahi hi; ahih hangin a ni thum ni nitak dongin lo sungah ka buk theih nadingin kei hong paisak in. Na pa in kei hong kan leh, ‘David in ama khuapi Bethlehem-ah a va taipak dingin kei kiangah limtakin hong kingen hi; bang hang hiam cih leh amau innkuan khempeuh adingin kumsim biakpiakna tua lai-ah om hi,’ na ci ding hi. Amah in, ‘Pha hi!’ a cih leh na nasempa adingin hoih ding hi; ahih hangin amah a heh leh amah in siatna a ngaihsutna thei in. Tua ahih ciangin thuman itna tawh na nasempa hong bawl in; bang hang hiam cih leh nang tawh a siangtho thuciamna-ah na nasempa na tun’pih hi. Ahih hangin kei sungah mawhna a om leh, nangmah mah in kei hong that in, bang hangin na pa kiangah kei hong paipih ding na hi hiam?” a ci hi. Tua ciangin Jonathan in, “Nang tungah tua bang hi het kei hen! Ka pa in nang tungah siatna hong tun’sak ding a ngaihsutna thei leng nang kiangah hong gen lo ding ka hi hiam?” a ci hi. Tua ciangin David in Jonathan kiangah, “Na pa in nang hong ngawh dawn’ leh kua in kei kiangah hong gen ding ahi hiam?” a ci hi. Jonathan in David kiangah, “Hong pai in, lo sungah pai ni,” a ci hi. Tua ahih ciangin amaute gel lo sungah pai uh hi. Tua ciangin Jonathan in David kiangah, “Israelte’ Pasian, Topa in teci hi ta hen! Zingciang tu bang hun ahi a, a ni thum ni-in ahi zongin, ka pa’ ngaihsutna tawng ka kankhiat khit ciangin, en in, David tungah amah a lungsim a hoih leh, nang kiangah mi hong sawlin hong pulak lo ding ka hi hiam? Ahih hangin nang tungah siatna bawl nadingin ka pa a lungkim sak leh, a muanhuaina-ah nang na pai theih nadingin nang kiangah a thu kong pulak kei a, nang kong sawlkhiat kei taak leh, Topa in keimah Jonathan hong dawm kei ta hen. Amah in ka pa tawh a om mah bangin Topa in nang tawh hong om ta hen. Kei ka nuntak lai leh ka sih loh nadingin Topa ’ thuman itna kei tungah hong lak in; keima innkuan panin na thumanna dokkik ngei kei in. Leitung maitang panin David’ galte khempeuh Topa in a phiatkhiat ciangin, David innkuan panin Jonathan’ min phiatkhia kei in. Topa in David’ galte tungah phu la ta hen,” a ci hi. Tua ciangin Jonathan in amah a itna David tungah kiciam pha kik hi; bang hang hiam cih leh ama pumpi a it zahin amah in David it hi. Tua ciangin Jonathan in ama kiangah, “Zing ciang in kha det ni ahi hi; na tutna awng ding ahih manin nang hong kiphawk ding hi. A ni thum ni-in nakpi takin nang hong kiphawk kan zawlai ding hi; tua ciangin a thu a kikup ciangin na bukna mun-ah pai in la, suangcian hua lam pangah om in. Tua ciangin muitum bangin tua lam pangah thaltang thum ka lawn ding hi. En in, naupang khat sawlin ama kiangah, ‘Pai in, thaltangte va zong in,’ ka ci ding hi. Naupang kiangah, ‘En in, nang ma kiang hih lamah thaltangte om hi, tawm in,’ ka cih leh nang a hong pai ding na hi hi; bang hang hiam cih leh Topa a nungta ahih mah bangin nang adingin lungmuanhuai-in launa om lo hi. Ahih hangin tangvalpa kiangah, ‘En in, thaltangte nangma khen’ah om hi.’ ka cih leh, nang pai in; bang hang hiam cih leh Topa in nang hong sawlkhia hi. Nang leh kei in i gen thu tawh kisai-in ahih leh, en in, nang leh kei kikalah teci in, Topa om tawntung hi,” a ci hi. Tua ahih ciangin David lo sungah bu hi; kha det ni hong tun’ ciangin an ne dingin kumpipa tu hi. A ni danga bangin kawm gei-a tutna tung, ama tutna-ah kumpipa tu hi; a kigalsai-in Jonathan tu-in, Saul’ pangah Abner tu a, ahih hangin David’ mun awng hi. Ahi zongin Saul in tua ni-in bangmah gen lo hi; bang hang hiam cih leh amah in, “Ama tungah thu khatpeuh piang hi; amah siang lo hi, siang lo taktak hi,” a ci hi. Ahih hangin a ni nih ni, kha det ni khit a zingsang ciangin David’ mun awng lai hi. Tua ciangin Saul in a tapa Jonathan kiangah, “Bang hangin Jessi’ tapa zanni hita leh, tuni hita leh an nekna-ah hong pai lo ahi hiam?” a ci hi. Jonathan in Saul dawngin, “Bethlehem ah a pai dingin lim takin kei tungah David hong kingen hi, amah in, ‘Kei hong ciahsak in; ka innkuante un khuapi sungah biakpiakna bawl uh a, ka sanggampa in tua lai-ah ka om ding thu hong pia hi. Tua ahih ciangin tu-in nong hehpihna-in hong paisakin ka sanggamte hong musak in,’ hong ci hi. Hih thu hangin kumpipa sabuai-ah amah hong pai lo hi,” a ci hi. Tua ciangin Jonathan tungah Saul heh mahmah a, amah in ama kiangah, “A kihei khial a lehdo numei’ tapa aw, nangma maizum nading leh na nu’ mindai nadingin Jessi’ tapa na pawlpihna thu a thei lo hong sa na hi hiam? Bang hang hiam cih leh leitungah Jessi’ tapa a nuntak lai teng nang na hi a, na kumpi za ahi zongin kip lo ding hi. Tua ahih ciangin mi sawl in la, kei kiangah amah hong paipih in, amah a si taktak ding hi,” a ci hi. Tua ciangin Jonathan in a pa Saul dawngin, “Bang hangin amah kithat ding ahi hiam? Amah in bang hih ahi hiam?” a ci hi. Ahih hangin Saul in amah a vat kha dingin ama lamah a teipi lawn hi; tua ahih ciangin a pa in David that ding a ngaihsutna Jonathan in thei tel hi. Tua ciangin heh mahmahna tawh sabuai panin Jonathan ding-in tua pawi a ni nih ni-in an ne lo hi; bang hang hiam cih leh a pa in amah minsiasak ahih manin David hangin amah dah hi. A zingsang ciangin David tawh a kiciamna lo-ah Jonathan pai-in, amah tawh naupangno khat pai hi. Amah in a naupang kiangah, “Tai in la ka thaltang lotte va tawm in,” a ci hi. Naupang a tai laitakin ama khen’ah thaltang khat lawn hi. Jonathan’ thaltang lot a tukna mun-ah naupang a tun’ ciangin Jonathan in naupang samin, “Nang khen’ hua lamah thaltang om hilo ahi hiam?” a ci hi. Tua ciangin Jonathan in naupang samin, “Manlang in, hong kinawh in, tua lai-ah om kei in,” a ci hi. Tua ahih ciangin Jonathan’ naupangpa in a thaltangte khawmin a topa kiangah pai hi. Ahih hangin naupang in bangmah thei lo hi; Jonathan leh David bek in a thu thei uh hi. Tua ciangin Jonathan in a hiamte a naupangpa kiangah pia-in, ama kiangah, “Pai in la, khuapi sungah pua in,” a ci hi. Naupang a paikhiat khit phetin suangcian pang panin David ding-in lei-ah maipuk a, thumvei kun hi; Jonathan sangin David nakpi takin dahzaw a, amau khat leh khat kinamin, khitui luangin khat leh khat kikah uh hi. Tua ciangin Jonathan in David kiangah, “Ei tegel Topa ’ min tawh kiciamin, ‘Kei leh nang kikal, leh keima suan-le-khakte leh nangma suan-le-khakte kikalah a tawntungin Topa om ding hi,’ i cih mah bangin nuam takin pai in,” a ci hi. Tua ciangin amah ding-in paikhia hi; Jonathan zong khuapi sungah ciah hi. Tua ciangin David Nob khua-a siampipa Ahimelek kiangah pai hi; Ahimelek a liingsa-in David dawn dingin hong pai a, ama kiangah, “Bang hangin nang guak hong hi a, kuamah tawh hong pai lo na hi hiam?” a ci hi. David in siampi Ahimelek kiangah, “Kumpipa in na khat hong sawl a, kei kiangah, ‘Nang kong sawlna leh nang kong hilh thute khat zong kuamah theisak kei in,’ hong ci hi. Tua mun tua mun-ah tangvalte tawh kiciamna khat ka bawl zo hi. Tua ahih ciangin tu-in nang bang na nei hiam? Anlum lum nga ahih kei leh hih lai-a a om peuhpeuh hong pia in,” a ci hi. Siampipa in David dawngin, “Tu takin anlum mawkmawk ka nei kei hi; ahih hangin anlum siangtho om hi; tangvalte numei panin a kikep nak uh leh,” a ci hi. Tua ciangin David in siampipa dawngin, “A taktakin ci lehang, hih bangin ka paikhiat uh ciangin numeite kiang panin kote ka kikem tawntung uh hi; khualzin mawkmawk ciang nangawnin zong tangvalte siangtho hi; tu ni-in amaute bangzahin siangtho zawkan ding ahi hiam?” a ci hi. Tua ahih ciangin siampipa in anlum siangtho amah pia hi; bang hang hiam cih leh anlum dang om loin, a kilak khiat ni-in anlum a lum lai tawh a kilaih pah ding, Topa mai panin a kilakhia Ompihna Anlum bek om hi. Tu-in Topa mai-ah a kikhawlsak, Saul’ nasemte mi khat tua ni-in om hi; ama min in Doeg hi a, Saul’ gancing makaipipa, Edom mi ahi hi. Tua ciangin David in Ahimelek kiangah, “Teipi ahi a, namsau ahi zongin hih lai-ah nei lo na hi hiam? Bang hang hiam cih leh kumpipa’ nasep in nawhtat ding kul ahih manin ka namsau ahi a, ka hiamte ahi zongin kong la man kei hi,” a ci hi. Siampipa in, “Elah kuam-ah na thah Filistia mi Goliath’ namsau, en in, puan tawh kitunin hih lai-ah siampi puan nungah om hi; tua na deih leh la in; bang hang hiam cih leh a dang om lo a, tua bek hih lai-ah om hi,” a ci hi. David in, “Tua sanga hoihzaw a dang om lo hi; kei hong pia in,” a ci hi. David ding-in tua ni-in Saul kiang panin tai a, Gath kumpipa Akhish kiangah pai hi. Akhish nasemte in ama kiangah, “Hih David in a gam kumpipa hilo ahi hiam? Amaute khat leh khat in ama thu la-in sa-in lam uh a, ‘Saul in a tulin that, David in a tul sawmin that,’ ci hilo ahi uh hiam?” a ci uh hi. David in hih thute a lungsimah ciamteh a, Gath kumpipa Akhish kihta mahmah hi. Tua ahih ciangin amaute’ mai-ah a gamtat kheelin, amaute’ muhna-ah a hai-in kibawl a, kulh kongkhakte tung kuigawpin, a khamul tungah a cilphuan kai suk sak hi. Tua ciangin Akhish in a nasemte kiangah, “En un, hih mipa a hai lam na mu uh hi; tua ahih ciangin bang hangin kei kiangah amah hong paipih na hi uh hiam? Ka omna-ah mihai a gamta dingin hih mipa nong paipih nadingun mihai kisam thuah lai ka hi hiam? Hih mipa ka inn sungah hong pai ding ahi hiam?” a ci hi. David tua lai panin kihemkhia-in Adullam leihawm-ah tai hi; a sanggamte leh a pa’ innkuante khempeuh in a zak uh ciangin ama kiang tua lai mun-ah paisuk uh hi. Tua ciangin a lungkham mi khempeuh, leh leiba a nei mi khempeuh, leh a lungkim lo mite khempeuh ama kiangah kikhawm uh hi; amah in amaute tungah a ukpa a suak hi. Tua lai-ah amah tawh mihing zali bang om hi. David tua lai mun panin Moab gam Mizpeh-ah pai hi; amah in Moab kumpipa kiangah, “Pasian in kei adingin hong sepsak ding ka theih hun matengin ka nu leh ka pa na kiangah hong omsak in, ci-in kong thum hi,” a ci hi. Amah in Moab kumpipa kiangah amaute nusia a, munmuanhuaina sungah David a om sung teng amah tawh omkhawm uh hi. Tua ciangin kamsangpa Gad in David kiangah, “Munmuanhuaina sungah om nawn kei in; kihem in la, Judah gamah pai in.” a ci hi. Tua ahih ciangin David kihemkhia-in Hereth tulak-ah pai hi. Tu-in David leh amah tawh a om mite a kimuhna Saul in za hi. A khut sungah a teipi tawi-in, a nasemte khempeuh a kimkotah ding-in Gibeah khua a sangna mun makeng kung nuai-ah Saul tu hi. Tua ciangin Saul in a kimkot-a a ding a nasemte kiangah, “Tu-in za un, no Benjaminte aw; Jessi’ tapa in note khempeuh lote leh leenggui lote hong pia-in, note khempeuh a tul a uk, a za a uk-in hong koih dingin um a, note khempeuh in kei hong sawmsim na hi uh hiam? Tu ni-a bangin hong pangsim dingin ka tapa in Jessi’ tapa tawh thukimna a bawl ciangin kuamah in kei kiangah hong pulak loin, ka tapa in keimah a do dingin ka nasempa a hanthotna-ah note kuamah dah loin, kei kiangah zong nong pulak kei uh hi,” a ci hi. Tua ciangin Saul’ nasemte kiangah a ding, Edom mi Doeg in dawngin, “Ahitub’ tapa Ahimelek kiang Nob khua-ah Jessi’ tapa a pai ka mu a, amah in ama adingin Topa thu dot sakin, an-le-tui pia a, Filistia mi Goliath’ namsau ama tungah pia hi,” a ci hi. Tua ciangin kumpipa in Ahitub’ tapa siampi Ahimelek leh a pa’ innkuante ahi Nob-a om siampi khempeuh a sam dingin mi sawl hi; kumpipa kiangah amaute khempeuh hong pai uh hi. Tua ciangin Saul in, “Ahitub’ tapa aw, tu-in za in,” a ci hi. Amah in dawngin, “Hih lai-ah om ing, topa aw,” a ci hi. Tua ciangin Saul in ama kiangah, “Tu ni-a bangin hong pangsimin kei do dingin hong thawh theih nadingin bang hangin nang leh Jessi’ tapa in kei hong sawmsim a, ama tungah an leh namsau pia-in, ama adingin Pasian kiangah thu dotsak na hi hiam?” a ci hi. Tua ciangin Ahimelek in kumpipa dawngin, “Na nasemte khempeuh lak panin kumpipa’ makpa leh nangmah hong cingte a ukpa ahi David bangin kua thumanin, na inn sungah kua kipahtawi ahi hiam? Ama adingin Pasian thu ka dotsak a masa pen in tu ni ahi hiam? Hilo! Kumpipa in a nasempa ahi a, ka pa’ innkuante khempeuh ahi zongin ngawh kei in; bang hang hiam cih leh na nasempa in a tam hita leh a tawm hita leh hih thu khempeuh bangmah thei lo hi,” a ci hi. Tua ciangin kumpipa in, “Ahimelek aw, nang leh na pa’ innkuante na si taktak ding uh hi.” a ci hi. Kumpipa in ama kiim-ah a ding a cingte kiangah, “Kihei un la, Topa ’ siampite that un; bang hang hiam cih leh amaute zong David tawh pang khawm uh hi; amaute in ama tai lam thei napi-in kei kiangah hong pulak lo uh hi,” a ci hi. Ahih hangin kumpipa’ nasemte in Topa ’ siampite tung a tu dingin a khut uh taangkhiasak lo uh hi. Tua ciangin kumpipa in Doeg kiangah, “Kihei in la siampite hih in,” a ci hi. Edom mi Doeg kihei-in siampite hih a, tua ni-in saiha dial siampi puan a silh mihing sawmgiat leh nga that hi. Amah in siampite’ khuapi Nob khua sunga om nuntakna a nei khempeuh namsau tawh hih hi, numei leh pasal, naupang leh nawine, bawngtalte, late leh tuute, namsau tawh that khin hi. Ahih hangin Ahitub’ tapa Ahimelek’ tapate khat Abiathar a kici khat suakta-in David kiangah a tai hi. Saul in Topa siampite a thah khitna thu Abiathar in David kiangah gen hi. David in Abiathar kiangah, “Tua ni-in Doeg tua lai-ah om ahih ciangin Saul kiangah gen taktak ding hi, ci-in ka thei hi. Na pa’ innkuanpih mite khempeuh’ sihna ka piangsak hi. Kei tawh hong om in, lau kei in; bang hang hiam cih leh kei that dingin hong zongte in nang zong thah dingin hong zong hi; kei tawh nang in lungmuanna sunga om na hi ding hi,” a ci hi. Tu-in amaute in David kiangah, “En in, Filistiate in Keilah sim uh a, a ancilnate uh luh uh hi,” ci-in gen uh hi. Tua ahih ciangin David in Topa thu dongin, “Pai-in Filistiate ka sim ding hiam?” a ci hi. Topa in David kiangah, “Pai-in Filistiate sim in la, Keilah honkhia in,” a ci hi. Ahih hangin David mite in ama kiangah, “En in, Judah gam hih mun-ah eite i lau hi; Filistia galkapte do-in Keilah ah pai lehang bangzahin lauzaw ding i hi hiam?” a ci uh hi. Tua ciangin David in Topa thu dong kik hi. Topa in amah dawngin, “Ding in, Keilah-ah paisuk in; bang hang hiam cih leh na khut sungah Fislistiate kong pia ding hi,” a ci hi. Tua ciangin David leh a mite Keilah ah paisuk uh a, Filistiate tawh kido-in amau’ ganhingte ciahpihin amaute tampi tak that uh hi. Tua ahih ciangin David in Keilah-a teng mite honkhia hi. Ahimelek’ tapa Abiathar David kiang Keilah ah a tai lai-in amah in siampipuan khat kengin paisuk hi. Keilah ah David a tun’ khitna thu tu-in Saul kiangah kigen hi. Saul in, “Pasian in ka khut sungah amah hong pia khin hi; bang hang hiam cih leh kulh kongpi leh a kalhna zawl a nei khua sungah lutna tawh amahmah kikhaknelh hi,” a ci hi. Tua ciangin Saul in galdo ding, Keilah ah a paisuk ding, David leh a mite a umcih dingin mi khempeuh sam hi. Saul in ama tungah a sia a sawmna David in thei hi; amah in siampi Abiathar kiangah, “Hih lai-ah siampipuan hong paipih in,” a ci hi. Tua ciangin David in, “Israelte’ Pasian, Topa aw, keima hangin khuapi susia dingin Saul in Keilah ah pai a sawmna thu na nasempa in za khin taktak hi. Keilah mite in ama tungah kei hong ap ding hiam? Na nasempa’ zak bangin Saul hong paisuk ding hiam? Israelte’ Pasian, Topa aw, kong thum hi, na nasempa tungah hong gen in,’ a ci hi. Tua ciangin Topa in, “Amah hong paisuk ding hi,” a ci hi. Tua ciangin David in, “Keilah mite in kei leh ka mite Saul tungah hong ap ding hiam?’ a ci hi. Tua ciangin Topa in, “Amaute in note hong ap ding hi,” a ci hi. Tua ciangin mi zaguk bang a pha, David leh a mite ding-in Keilah panin kihemkhia uh a, amaute a pai theihna peuhpeuh uhah pai uh hi. Keilah panin David a suahtakna thu Saul kiangah a kigen ciangin amah in a vai a khawl phot hi. Zif gamlak mual tung gam sung, gamlak munmuanhuaina-ah David om hi. Saul in ni simin amah zong a, ahih hangin Pasian in ama tungah David pia lo hi. Amah a that dingin Saul kuankhia khin ahih manin David lau hi, Zif gamlak Horesh munah David om hi. Tua ciangin Saul’ tapa Jonathan ding-in David kiang Horesh ah pai a, Pasian in hong huh ding hi, ci-in amah hanthawn hi. Amah in ama kiangah, “Lau kei in; bang hang hiam cih leh ka pa Saul in nang hong su-kha lo ding hi; nangmah in Israelte tungah kumpi na hi ding a, keimah in nangma zom ka hi ding hi; ka pa Saul in zong hih thu thei hi,” a ci hi. Tua ciangin amaute nih in Topa mai-ah thuciamna bawl uh hi; Horesh ah David om lai-in, Jonathan a inn-ah ciah hi. Tua ciangin Saul kiang Gibeah ah Zif mite paito uh a, “Jeshimon leitaw lam, Hakhilah mual tung, Horesh-a munmuanhuai sung kote lakah David bu hilo ahi hiam? Tu-in hong paisuk in, kumpipa aw, amah na mat nopna thu thei ka hih manun hong paisuk in; kote’ hih ding ahih leh kumpipa tungah amah kong ap ding uh ahi hi,” a ci uh hi. Tua ciangin Saul in, “ Topa in note thupha hong pia ta hen; bang hang hiam cih leh note in kei tungah hehpihna nong nei uh hi. Pai un, va kician sak lai un; ama bukna mun thei-in va mu un la, tua lai-ah kua in mu hiam hong thei un; bang hang hiam cih leh amah ngiansiam mahmah hi, ci-in kei tungah hong kigen hi. Tua ahih ciangin amah a bukna mun ahi a kiselsimna mun khempeuh hong ciamteh un la, thu a kitel tak tawh kei kiangah hong paikik un. Tua ciangin note tawh kei kong pai ding hi; gam sungah amah a om lai nak leh, Judah gam sung khempeuh zon’ ding ahi zongin a tul lak panin amah ka zongkhia teitei ding hi,” a ci hi. Amaute ding-in, Zif-ah pai dingin Saul mai-ah na mapai uh hi. Tu-in David leh a mite Jeshimon leitaw lam Arabah gamsung Maon gamlakah om uh hi. Saul leh a mite amah zong dingin kuan uh hi. Hih thu David kiangah kigen hi; tua ahih ciangin Moan gamlaka om suangpi-ah amah paisuk hi. Saul in tua thu a zak ciangin amah in Maon gamlakah David delh hi. A mual pang khatah Saul pai a, David leh a mite a mual pang lang khatah pai uh hi; Saul leh a mite in David leh a mite man dingin hong um ahih manin Saul pelh dingin David a nawhtat lai takin, Saul kiangah kamtai khat hong tung a, “Hong kinawh in la hong ciah in; bang hang hiam cih leh Filistiate in gam sung hong sim hi,” a ci hi. Tua ahih ciangin David a delhna panin Saul kileh kik a, Filistiate a do-in pai hi; tua ahih ciangin tua mun pen Suahtakna Suangpi kici hi. Tua lai panin David paito-in En-gedi munmuanhuai-ah om hi. Filistiate a delhna panin Saul a ciah ciangin, ama kiangah, “En in, En-gedi gamlakah David om hi,” ci-in kigen hi. Tua ciangin Saul in Israelte khempeuh sung pan a kiteel mihing tulthum la-in Sathak Suangpi mai-ah David leh a mite zong dingin pai hi. Lam gei-a tuu-khawk a omna ah pai hi; tua gei-ah leihawm khat om a, awng hawh dingin tua sungah Saul pai hi. Tu-in David leh a mite leihawm tawngnung sungah na tu uh hi. Tua ciangin David mite in ama kiangah, “ Topa in nang kiangah, ‘En in, na khut sungah na galpa kong pia ding a, hoih na sak bangin ama tungah na hih ding hi,’ hong cih ni tu ni hita hi,” a ci uh hi. Tua ciangin David ding-in Saul’ puantualpi mong at khiat simsak hi. Tua khit ciangin amah in Saul’ puanmong at khia ahih manin David a lungsim in su hi. Amah in a mite kiangah, “Amah in Topa ’ sathau nilhpa hi ci-in thei napi-in, ama tungah ka khut ka ngak ding, Topa ’ sathau nilhpa ahi ka topa tungah hih bang ka hih ding Topa in hong kham hi,” a ci hi. Tua ahih ciangin David in hih thute tawh a mite zol a, amaute Saul hihsak lo hi. Tua ciangin Saul ding khia-in leihawm nusia a, a paina lampi ah pai hi. Tua khit ciangin David zong leihawm sung panin paikhia-in Saul nung sap a, “Ka to kumpipa!” a ci hi. Saul in a nung a et ciangin, David in lei-ah a mai kunin zahtakna bawl hi. Tua ciangin David in Saul kiangah, “Bang hangin, ‘En in, David in na siat nading zong hi,’ a ci mite’ thu um na hi hiam? En in, Topa in tu ni-in leihawm sung ka khut sungah nang hong piakna nangmah mah in tu ni-in na thei khin hi; mi pawlkhat in nang that dingin kei hong sawl a, ahih hangin nang kong hih kei hi. Keimah in, ‘Ka topa tungah ka khut ka nga kei ding hi; bang hang hiam cih leh amah in Topa ’ sathau nilhpa ahi hi,’ ka ci hi. En in, ka pa aw, ka khut sunga na puantualpi mong en in; kei tungah khialhna ahi a, kumpi dona ahi zongin a om lohna, na puantualpi mong at khia napi-in nang kong thah lohna thu tawh thei-in na mu ding hi. Kei thah dingin nong zon’ hangin nang tungah ka khial kei hi. Topa in kei leh nang kikalah thu khen hen. Kei’ tunga nong khialhnate Topa in kei taangin nang tungah hong thuk hen; ahih hangin keima khut in nang hong hih lo ding hi. Taang-ate’ paunak in, ‘A gilote’ sung panin gitlohna hong piang,’ a cih mah bang ahi hi. Ahih hangin keima khut in nang hong hih lo ding hi. Israel kumpipa kua do-a kuankhia ahi hiam? Kua delh na hi hiam? Ui si maw! Uili maw! Tua ahih ciangin Topa in thukhen hong hi-in, kei leh nang kikalah thukhenna hong pia hen la, hih thu thei-in ka thu-ah hong pang hen la, na khutsung panin kei hong honkhia hen,” a ci hi. David in hih thute Saul kiangah a gen a man khit ciangin, Saul in, “Ka tapa David, hih in nang’ aw ahi hiam?” a ci hi. Tua ciangin Saul kap hi. Amah in David kiangah, “Nang in kei sangin na thumanzaw hi; keimah in nang tungah a sia kong piak lai takin nang in kei tungah a pha nong pia hi. Topa in na khut sungah kei hong koih lai takin nang in kei nong thah lohna-ah kei nong limbawlna tu ni-in na laktel hi. Bang hang hiam cih leh mi khat in a galpa mu leh amah in a suakta-in amah paikhia sak ding ahi hiam? Tua ahih ciangin tu ni-in kei tungah nong bawlna hangin Topa in a hoih tawh nang thaman hong pia hen. Tu-in, en in, nangmah in kumpi na hih taktak ding ka thei a, Israel kumpi gam nangma khut sungah a kip ding hi. Tua ahih ciangin keima nung-a ka suan-le-khakte beisak loin, ka pa’ innkuan panin ka min na phiat loh nadingin Topa tawh kei tungah hong kiciam in,” a ci hi. Tua ciangin Saul tungah David kiciam hi. Tua ciangin Saul inn-ah ciah hi; ahih hangin David leh a mite munmuanhuai-ah paito uh hi. Tu-in Samuel si hi; Israelte kikhawmin ama hangin kap uh a, amaute in Ramah-a om ama innah amah vui uh hi. Tua ciangin David ding-in Paran gamlakah paisuk hi. Karmel mual-ah nasep a nei mi khat Maon khua-ah om hi. Tua-pa hau mahmah hi; amah in tuu tulthum leh keel tulkhat nei hi. Amah in Karmel ah a tuumul met hi. Tu-in tua mipa’ min in Nabal hi a, a zi’ min in Abigail ahi hi, Tua numei in tei leh melhoih a thuah khat hi a, ahih hangin a pasal pen a ki-uk zolo mi leh a gamtat sia khat ahi hi; amah in Kaleb mi ahi hi. Nabal in a tuumul a metna David in gamlakah za hi. Tua ahih ciangin David in tangval sawm sawl hi; David in tangvalte kiangah, “Karmel ah paito-in Nabal kiangah pai un la, keima min tawh amah hopih un. Hih bangin amah na hopih ding uh hi: ‘Nang tungah nopna om ta hen, na innkuan tungah nopna om ta hen, na neih khempeuh tungah nopna om ta hen, Ganmul mette na neihna ka za hi; tu-in na tuucingte kote tawh omin amaute tungah siatna ka bawl kei uh a, Karmel ah a om sung teng uh amaute in bangmah man’suah lo uh hi. Na tangvalte uh dong in, amaute in nang kiangah hong gen ding uh hi. Tua ahih ciangin na mai-ah ka tangvalte maipha musak in; bang hang hiam cih leh pawi ni-in kong pai uh hi. Na khut sungah na neih peuhpeuh na nasemte leh na tapa David tungah pia in,’ ci un,” a ci hi. David tangvalte hong tun’ ciangin amaute in hih thu khempeuh David minin Nabal kiangah gen uh hi; tua ciangin amaute in ngak uh hi. Tua ciangin Nabal in David’ nasemte dawngin, “David kua ahi hiam? Jessi’ tapa kua ahi hiam? Tu lai-in a tote kiang panin a taikhia nasem tampi om hi. Ka anlum leh ka tui leh ka ganmul mette’ adingin ka gawh ka sate la-in koi lai pan-a hong pai cih ka theih loh mite tungah pia ding ka hi hiam?” a ci hi. Tua ahih ciangin David’ tangvalte kihei a, ciah kikin hih thu khempeuh ama kiangah gen uh hi. Tua ciangin David in ama mite kiangah, “Mi khempeuh in na namsau uh kuah ciat un!” a ci hi. Amaute khempeuh in a namsau uh kuah uh hi; David in zong a namsau kuah hi; mihing zali bang David nungah paito uh a, mihing zanihte van tawh om uh hi. Ahih hangin Nabal nasem tangvalte khat in Nabal’ zi Abigail kiangah genin, “En in, ka topa uh a hopih dingin gamlak panin David in a kamtaite hong sawlkhia hi; amah in amaute na tai hi. Ahi zongin kote tungah tua mite hoih mahmahin kote in siatna ka thuak kei uh a, amaute tawh ka pai lai teng uh gamlakah ka om sungun bangmah ka man’suah kei uh hi; tuute kemin amaute tawh ka om sung khempeuh uh kote adingin sun leh zanin amaute in kulhpi ahi hi. Tua ahih ciangin hih thu thei in la, na hih ding ngaihsun in; bang hang hiam cih leh ka topa leh a innkuan khempeuh tungah siatna tun’sak ding kingaihsun a, amah a khan’sia ahih manin kuamah in hopih thei lo hi,” a ci hi. Tua ciangin Abigail kinawhin, anlum lum zanih, leh leenggahzu savun thawl nih, leh a semsa tuu nga, leh ankan lawh nga, leh leenggahkeu bawk zakhat, leh thei moh zanih la-in late tungah tuate guang hi. Tua nu in a tangvalte kiangah, “Keima mai-ah na paisuak un; en un, note nungah kei kong pai hi,” a ci hi. Ahih hangin amah in a pasal Nabal hilh lo hi. Amah la tungah tuangin mual liah-ah a paisuk lai takin, en in, David leh a mite ama lamah hong paisuk uh hi; amah in amaute dawn hi. Tu-in David in, “Ama neihsa khempeuh khat zong a mang lo dingin hih mipa neih khempeuh gamlakah a mawkna-in ka cing hi; amah in hih thuhoihte a sia tawh kei tungah hong thuk hi. Zingsang ciangin ama neihsa khempeuh lakah pasal khat zong ka siit tak leh Pasian in keimah David hong dawm kei ta hen,” na ci khin hi. Abigail in David a muh ciangin kinawh a, la tung panin tuakin David mai-ah maipuk a, lei lakah kun hi. Ama khe phungah pukin, “Kei tung bekah, ka topa aw, mawhna om ta hen; na kiangah na nasemnu thu hong gensak in la, na nasemnu thugente hong ngai in ci-in kong thum hi. Ka topa in hih a khan’sia mipa Nabal ngaihsun kei in; bang hang hiam cih leh amin mah bangin amah zong ahi hi; Nabal in ama min hi a, haina in amah vukcip hi; ahih hangin na nasemnu keimah in nangma hong sawl na tangvalte ka mu kha kei hi. Tua ahih ciangin tu-in, ka topa aw, Topa nungta-in, nangma nuntakna a hin’mah bangin mithah nading pan leh nangma khut tawh thuhkikna na hih loh nadingin Topa in nang hong kho ahih manin, tu-in na galte leh nangma tungah siat nading a zongte in Nabal bang ta hen. Tu-in na nasemnu keimah in nangmah ka hong puak hih letsong nangma nung hong zui tangvalte hong piasak in. Na nasemnu khialhna hong maisak in ci-in kong thum hi; bang hang hiam cih leh nangmah in Topa ’ galte do na hih manin Topa in na innkuan kipsak paisuak ding hi; na nuntak lai teng nang sungah siatna kimu lo ding hi. Nangmah delhin hong that dingin mite hong thawh leh, nangmah in Topa na Pasian kepna sung a hing mite lakah na om ding hi; amah in suang lotna kuang pan lotkhiat bangin na galte lawnkhia ding hi. Topa in nangmah tawh kisai thu a hoih a gente khempeuh tawh kizui-in hong hihin, Israelte tungah ulian-in nang hong koih khit ciangin, thu om lopi-in mi thahna ahi a, nangmah mah in phulakna hangin ahi zongin, dah nading thu ahi a, lungsim nat nading thu ahi zongin na nei kei ding hi. Topa in lim takin nang hong bawl ciangin na nasemnu hong phawk in,” a ci hi. Tua ciangin David in Abigail kiangah, “Tu ni-in keimah dawn dingin nang a hong sawl Israelte’ Pasian, Topa in thupha ngah ta hen! Tu ni-in mithahna leh keima khut tawh phulak nading panin keimah hong kem nangma ngaihsutna in thupha ngah ta hen! Bang hang hiam cih leh nang kong gimsak nading panin hong kho Israelte’ Pasian, Topa in a nungta taktak ahih mah bangin, nang hong kinawhin keimah dawn dingin hong pai lo hi lecin, zingsang ciangin Nabal sung pan pasal khat zong om nawn lo ding hi,” a ci hi. Tua ciangin David in ama tung panin amah a puakte sang hi; amah in tua nu kiangah, “Lung nuamin na inn-ah ciah to ta in; thei in, na thu ka ngai a, nong thuumna kong pia khin hi,” a ci hi. Tua ciangin Nabal kiangah Abigail hong tung hi; en in, kumpipa’ pawi tawh kibangin amah in a inn sungah pawi na kham hi. Nabal lungnuam mahmah hi; bang hang hiam cih leh amah in zu kham mahmah hi; tua ahih ciangin zingsang khuavak mateng ama kiangah bangmah gen peuhmah lo hi. Zingsang ciang, Nabal’ zukhamna a ven’ ciangin a zi in ama kiangah hih thute gen a, thakhatin a lungtang si-in amah suangtum bang hi. Tua khit ni sawm bang ciangin Topa in Nabal vat hi; tua ciangin amah si ta hi. Nabal a sihna thu David in a zak ciangin amah in, “Nabal’ khut tung panin ka ngah zahkona hong thuk sakin, siatna panin a nasempa a lenkik Topa in thupha ngah ta hen; Topa in Nabal’ gamtat siatna ama lu tung mah ah tung kiksak hi,” a ci hi. Tua ciangin David in mi sawlin ama zi dingin Abigail helsak hi. David’ nasemte Karmel-a Abigail kiang a tun’ uh ciangin amaute in tua nu kiangah, “David in amah zi dingin a la dingin kote nang kiangah hong sawl hi,” a ci uh hi. Tua ciangin amah ding-in lei-ah a mai kun a, “En un, na nasemnu in ka topa’ nasemte’ khe a silsak ding nasem ahi hi,” a ci hi. Tua ciangin Abigail kinawhin ding-in la tungah tuang a, ama nasem numei nga in amah keem hi; David kamtaite nung zui-in pai a, tua ciangin ama zi suak hi. David in Jezre-el khuami Ahinoam zong la hi; amau tegel ama zi suak uh hi. Saul in ama tanu Mikhal, David’ zi pen, Gallim khuami Laish tapa Paltiel tungah na pia khin hi. Tua ciangin Saul kiang Gibeah ah Zif mite hong pai uh a, “Jeshimon nisuahna lam Hakhilah mual tungah David bu hilo ahi hiam?” a ci uh hi. Tua ahih ciangin Saul ding-in Zif gamlakah David zong dingin Israel mi a kiteel mihing tulthum tawh Zif gamlakah paisuk hi. Tua ciangin Saul in Jeshimon nisuahna lampi gei-a om Hakhilah mual tungah giahphual sat hi. Ahih hangin David gamlakah om lai hi; amah delhin gamlakah Saul a hong paina thu a theih ciangin, David in thukan simte sawl a, Saul hong pai taktak ahihna thei hi. Tua ciangin David ding-in Saul in giahphual a satna mun-ah pai hi; David in Saul a galkap mangpa, Ner’ tapa Abner tawh a lupna mun mu hi; Saul giahphual laizangah lum a, ama kimkotah galkapte in phual sat uh hi. Tua ciangin David in Hit mi Ahimelek leh Zeru-iah’ tapa, Joab’ sanggampa Abishai kiangah, “Saul’ giahphual ah kei tawh kua hong paisuk ding na hi uh hiam?” a ci hi. Abishai in, “Kei nang tawh kong paisuk ding hi,” a ci hi. Tua ahih ciangin David leh Abishai zanin galkapte kiangah pai uh hi; giahphual sungah Saul na ihmu a, a lukhung lei lakah a teipi na kiphut hi; Abner leh galkapte ama kimkotah na lum uh hi. Tua ciangin Abishai in David kiangah, “Pasian in na galpa tu ni-in na khut sungah hong pia hi; tua ahih ciangin tu-in teipi-in lei tawh khatvei bek hong khawhcip sak in, nihvei khawh ding kisam lo hi,” a ci hi. Ahih hangin David in Abishai kiangah, “Ama tungah siatna bawl kei in; bang hang hiam cih leh Topa ’ sathau nilhpa a su peuhpeuh mawhna pan peng ding sa na hi hiam?” a ci hi. David in, “ Topa in a nungta ahih mah bangin Topa in amah vat ding hi; tua ahih kei leh zong a sih hun hong tung ding hi; tua ahih kei leh gal kikapna sungah amah paisukin si ding hi. Topa sathau nilhpa tungah ka khut ka ngak ding Topa in kei hong kham hi; ahih hangin tu-in a lukhung-a a om a teipi leh a tuithawl la-in pai ni,” a ci hi. Tua ahih ciangin David in Saul lukhung-a om teipi leh tuithawl la hi; tua ciangin amaute paikhia uh hi. Kuamah in mu lo hi, zong thei lo hi; kuamah khanglo lo hi, amaute khempeuh ihmu uh hi; bang hang hiam cih leh Topa in amaute ihmut suak mahmah sak hi. Tua ciangin David a pang khatah pai-in, amaute kikalah saupi a kihalin mual dawn-a gamla-ah ding hi; David in galkapte leh Ner’ tapa Abner samin, “Abner aw, hong dawng lo ding na hi hiam?” a ci hi. Tua ciangin Abner in dawngin, “Kumpipa a sam kua na hi hiam?” a ci hi. David in Abner kiangah, “Pasal hilo na hi hiam? Israelte sungah nang tawh a kibang kua om ahi hiam? Tua ahih leh bang hangin na to kumpipa vil lo na hi hiam? Bang hang hiam cih leh kumpipa na topa susia dingin mi khat hong pai hi. Hih banga na gamtatna hoih lo hi. Topa in a nungta ahih mah bangin a si dingin na kilawm hi; bang hang hiam cih leh Topa ’ sathau nilhpa na topa na vil kei hi. Tu-in a lukhunga a om kumpipa’ teipi leh tuithawl koi-ah om ahi hiam thei in,” a ci hi. Saul in David’ aw khen thei a, “Ka tapa David, hih in nangmah aw ahi hiam?” a ci hi. David in, “Ka topa, kumpipa aw, keima aw ahi hi,” a ci hi. Tua ciangin amah in, “Bang hangin ka topa in a nasempa delh ahi hiam? Bang gamta khial ka hi hiam? Ka tungah bang mawhna om ahi hiam? Tua ahih ciangin tu-in ka to kumpipa in a nasempa’ thu za in. Keimah do dingin nang hong toksuahpa in Topa ahih leh amah in biakna hong sang ta hen; ahih hangin mihing ahih leh amaute in Topa mai-ah samsiatna ngah ta hen. Bang hang hiam cih leh amaute in, ‘Pai in, pasian dangte’ na sem in,’ ci-in Topa ’ gamh ka ngah loh nadingin tuni-in kei hong hawlkhia uh hi. Tua ahih ciangin tu-in Topa ’ omna panin gamdang leitangah kei hong si sak kei in; bang hang hiam cih leh mual tungah vaka a bengpa bangin Israelte kumpipa keimah that dingin nong kuankhia hi,” a ci hi. Tua ciangin Saul in, “Ka gamta khial hi; hong ciahkik in; ka tapa David aw; bang hang hiam cih leh tu ni-in kei hong suaktasak na hih manin nang tungah siatna kong bawl nawn kei ding hi; en in, ka hai gamtat a, nakpi takin ka khial khin hi,” a ci hi. Tua ciangin David in dawngin, “Hih lai-ah na teipi om hi, kumpipa! Tangvalte khat hong paisak in la, hong la sak in. Topa in mi khempeuh a thumanna leh a thutakna hangin thaman pia hi; bang hang hiam cih leh Topa in tuni-in ka khut sungah nang hong pia a, keimah in Topa ’ sathau nilhpa hih dingin ka khutte ka tangkhiasak kei hi. En in, tu ni-in nangmah kong suahtaksak mah bangin Topa in zong kei hong suaktasak hen la, haksatna khempeuh panin kei hong honkhia ta hen,” a ci hi. Tua ciangin Saul in David kiangah, “Thupha ngah ta in, ka tapa David! Nangmah in na tampi na sem ding a, tuate na zo ding hi,” a ci hi. Tua ahih ciangin David ama lampi-ah pai-in, Saul ama omna mun ah ciah hi. David in a lungsim sungah, “Saul’ khut tawh ni khat ni ciangin ka si ding hi; kei adingin Filistiate gamah ka tai ding sangin a hoihzaw om lo hi; tua ciangin Saul in Israel gamgi huam sungah kei hong zon’ niloh lungkia ta ding a, keimah in ama khut sung panin ka suakta ding hi,” a ci hi. Tua ahih ciangin David ding-in, amah leh amah tawh a om mihing zagukte, Gath kumpipa, Maok’ tapa Akhish kiangah pai hi. Tua ciangin David, amah leh a mite a innkuanpih ciat tawh, David zong a zi nihte, Jezre-el khuami Ahinoam leh Nabal’ zi meigongnu, Karmel khuami Abigail tawh, Gath-a Akhish kiangah va teeng hi. Gath ah David tai hi, ci-in Saul kiangah a kigen ciangin amah in David zong nawn lo hi. Tua ciangin David in Akhish kiangah, “Nangma maipha nong muhsak zawh leh, ka ten’ theih nadingin gam sung khuate khatah kei ading mun hong pia in; bang hangin na nasempa nang tawh kumpi khuapi sungah teengkhawm ding ahi hiam?” a ci hi. Tua ahih ciangin Akhish in tua ni-in ama tungah Ziklag pia hi; tua ahih manin tu ni dongin Judah kumpite’ aa ahi hi. Filistiate gam sungah David a ten’ hun sung in kum khat leh kha li ahi hi. Tu-in David leh a mite paito-in, Geshur mite, Girzi mite, leh Amalek mite va sim uh hi; bang hang hiam cih leh hih mite in Izipt gam lam Shur ciang dongah tang lai-a kipanin a teeng mite ahi uh hi. Tua ciangin David in tua gam vat gawp a, numei ahi a, pasal ahi zongin hingkhawi loin, ahih hangin tuute, bawngtalte, late, kalaohte, leh puante la-in Akhish kiangah hong ciahkik hi. Akhish in, “Tu ni-in kua va sim na hi hiam?” ci-in a dot ciangin, David in, “Judah mite’ Negeb gam,” ahih kei leh, “Jerahme-el mite’ Negeb gam,” ahih kei leh, “Ken mite’ Negeb gam,” a ci hi. David in, “Amaute in kote’ thu genin, David in tua bangin hih hi,’ ci ding uh ahih ciangin,” ci-in ngaihsun ahih manin Gath ah thu a puak ding numei ahi a, pasal ahih zongin hingkhawi lo hi. Filistiate gam sungah a ten’ sung teng tua bang gamtatna in ama ngeina ahi hi. Akhish in David muangin, “Ama mipih Israelte in a muhdah theih nadingin a mahmah kibawl khin hi; tua ahih ciangin amah in ka nasem hi tawntung ding hi,” ci-in ngaihsun hi. Tua hunin Filistiate in Israelte do dingin a galkapte khawm uh hi. Akhish in David kiangah, “Nang leh na mite in kei tawh galkapte lakah a kuan khawm ding na hih lam thei in,” a ci hi. David in Akhish kiangah, “Hoih mahmah hi, na nasempa in bang hih thei hiam cih na thei ding hi,” a ci hi. Tua ciangin Akhish in David kiangah, “Hoih mahmah hi, khan’ tawntungin keimah hong cing dingin nang kong koih ding hi,” a ci hi. Tu-in Samuel si a, Israelte khempeuh ama hangin kapin, ama khuapi Ramah ah vui uh hi. Saul in vankahte leh aisante a gamsung panin beisak hi. Filistiate kikhawm uh a, hong pai-in Shunem ah giahphual sat uh hi; Saul in Israelte khempeuh khawm a, amaute in Gilboa-ah giahphual sat uh hi. Saul in Filistia galkapte a muh ciangin lau a, a lungsim nakpi takin liing hi. Saul in Topa thu a dot ciangin, Topa in mang tawh hita leh, Urim tawh hita leh, kamsangte tawh hita leh dawng lo hi. Tua ciangin Saul in a nasemte kiangah, “Ama kiangah pai-in ama tung pan thu ka dot theih nadingin vankah thei numei khat kei adingin hong zon’sak un,” a ci hi. A nasemte in ama kiangah, ‘En in, Edor-ah vankah thei khat om hi,” a ci uh hi. Tua ahih ciangin Saul in a mel seelin puan dang silh a, amah leh mi nih pai hi; amaute zanin numei kiangah pai uh hi. Amah in, “Kei adingin a sisate’ kha kiang pan thu hong dotsak in la, nang kiang a min kong gen peuhpeuh kei adingin hong sap tohsak in,” a ci hi. Numei in ama kiangah, “Saul’ hihsa thu, gam sung panin vankahte leh aisante a suksiatna na thei taktak hi. Tua ahih ciangin bang hangin keima sih nading a piangsak dingin kei adingin thangzak hong koih na hi hiam? ”a ci hi. Ahih hangin ama tungah Topa min tawh Saul kiciam a, “ Topa in a nungta ahih mah bangin hih thu hangin nang tungah dantahna hong tung lo ding hi,” a ci hi. Tua ciangin numei in, “Kua hong sapsak ding ka hi hiam?” a ci hi. Amah in “Samuel hong sapsak in,” a ci hi. Numei in Samuel a muh ciangin a gingin a kiko khia hi; tua ciangin numei in Saul kiangah, “Bang hangin kei hong khem na hi hiam? nang in Saul na hi hi,” a ci hi. Kumpipa in ama kiangah, “Lau kei in; bang na mu hiam?” a ci hi. Tua ciangin numei in Saul kiangah, “Lei sung panin pasian khat hong paikhia to ka mu hi,” a ci hi. Amah in tua nu kiangah, “Ama mel bang ci hiam?” a ci hi. Tua nu in, “Puteek khat hong paito hi; amah in puantualpi silh hi,” a ci hi. Tua ciangin Saul in tua pen Samuel hi ci-in thei a, lei-ah a mai kunin zahtakna bawl hi. Tua ciangin Samuel in Saul kiangah, “Bang hangin keimah sap tohna tawh hong nawngkaisak na hi hiam?” a ci hi. Saul in dawngin, “Nakpi takin ka lungkham hi; bang hang hiam cih leh Filistiate in kei hong do a, kei kiang panin Pasian kihei khia-in kamsangte tawh ahi a, mang tawh ahi zongin hong dawng nawn lo hi; tua ahih ciangin ka gamtat ding hong gen dingin nang kong sam hi,” a ci hi. Tua ciangin Samuel in, “ Topa nang kiang panin kihei khia-in na gal suak khin ahih ciangin bang hangin kei thu hong dong lai na hi hiam? Topa in kei tung tawnin hong gensa bangin nang tungah hong hih hi; bang hang hiam cih leh Topa in na khut sung panin kumpigam bal khia-in na vengpa David tungah pia khin hi. Bang hang hiam cih leh nangmah in Topa ’ thu ngai loin, Amalek tungah ama heh mahmahna tawh kizui-in hih lo na hih manin Topa in nang tungah tu ni-in hihte hong tungsak hi. Tua tham loin Topa in Israel mite zong nang tawh Filistiate khut sungah hong piakhawm ding hi; zing ciangin nang leh na tapate in zong kei kiang nong zuan ding uh hi; Topa in Israel galkapte zong Filistia-te’ khut sungah pia ding hi,” a ci hi. Tua ciangin Samuel thugente hangin lau lua-in lei lakah Saul tawn puk pah hi; tua ciangin amah in sun tawntung leh zan tawntung bangmah ne lo ahih manin ama sungah thahatna om lo hi. Tua ciangin Saul’ kiangah numei hong pai-in amah a lau mahmahna amuh ciangin tua nu in ama kiangah, “En in, na nasemnu in na thu hong ngai zo hi; ka luang khamin kei tungah nong gen bangin ka gamta zo hi. Tua ahih ciangin nang zong na nasemnu thu ngai-in na mai-ah anlum tawmkhat hong luisak in: na pai nading ah na pai ciangin na hat nadingin ne in,” a ci hi. Amah in nial a, “Ka ne kei ding hi,” a ci hi. Ahih hangin tua numei tawh kopin a nasemte in ci teitei uh hi; tua ciangin amau cih bangin mang hi. Tua ahih ciangin lei lak panin amah tho-in lupna tungah tu hi. Tu-in numei in a inn ah bawngno thau khat nei a, amah in manlang takin go-in, tua ciangin annel la a, annel meekin silngo sawhloh anlum em a, Saul leh a nasemte mai-ah lui hi; amaute in ne uh hi. Tua ciangin amaute ding-in tua zanin paikhia uh hi. Tu-in Filistiate in a galkap khempeuh uh Afek-ah khawm uh hi; Jezre-el gam sunga om tuikhuk gei-ah Israelte in giahphual sat uh hi. Filistia uliante a zaza a tultulin a pai laitakin David leh a mite zong Akhish tawh a nungah pai uh a, Filistia galkap a ukte in, “Hih Hebru mite in hih lai-ah bang hih ahi uh hiam?” a ci uh hi. Akhish in Filistia galkap a ukte kiangah, “Ni tampi, kum tampi kei tawh a om khin, Israel kumpipa Saul’ nasempa in hih David hi a, kei kiangah hong tai-a kipanin tu ni dongin ama sungah mawhna ka mu kei hi,” a ci hi. Ahih hangin Filistia galkap a ukte ama tungah heh uh hi; Filistia galkap a ukte in ama kiangah, “Amah na koihna mun ah a ciahkik theih nadingin hih mipa sawlkik in; gal kidona sungah eite lang hong suak kha ding ahih manin galdona sungah eite tawh amah hong kuansuk lo ding hi. Bang hang hiam cih leh hih mipa in a topa tawh kilemna bangci bawl ding ahi hiam? Hih lai-a om mite’ lutang tawh hi ding hi lo ahi hiam? Amaute khat leh khat in la-in sa-in lam uh a, ‘Saul in a tulin that, David in a tul sawmin that,’ a cihpa uh David hi lo ahi hiam?” a ci uh hi. Tua ciangin Akhish in David samin ama kiangah, “ Topa in a nungta ahih mah bangin, nang na thuman a, hih vai-ah nang in kei tawh kuan khia-in nong paina hangin ka lungdam hi; bang hang hiam cih leh kei kiangah nong pai-a kipan tu ni dong nang sungah khialhna bangmah ka mu kei hi. Ahih hangin uliante in nang hong thukim lo uh hi. Tua ahih ciangin tu-in ciahkik in; Filistia uliante na lungkim loh sak khak loh nadingin lungkim takin ciah in,” a ci hi. Tua ciangin David in Akhish kiangah, “Ahih hangin, keimah in bang hih ka hi hiam? Ka to kumpipa’ galte pai-in ka do theih loh nadingin nangma nasepna ah kong tum ni-a kipan tu hun dong na nasempa sungah bang mu na hi hiam?” a ci hi. Tua ciangin Akhish in David dawngin, “Nang in keima muhna ah Pasian’ vantungmi khat mah bangin paubaang lo na hihna ka thei hi; ahi zongin Filistia galkap a ukte in, “Amah in gal phual ah eite tawh hong kuanto lo ding hi,’ a ci uh hi. Tua ahih ciangin tu-in nang tawh a hong pai na topa’ nasemte tawh zingsangin tho baih un la, khua a vak phetin kihemkhia un,” a ci hi. Tua ahih ciangin Filistia gamah a ciahkik dingin David a mite tawh zingsang tungin dingkhia uh a, Filistiate ahih leh Jezre-el khua ah paito uh hi. Tu-in David leh a mite a ni thum ni-in Ziklag hong tun’ uh ciangin, Amelekte in Negeb leh Ziklag na sim khin uh hi. Amaute in Ziklag zo-in mei tawh na hal uh a, numei khempeuh leh tua khua sunga om teng a neu a lian-in man uh hi; amaute in khat zong that lo uh a, ahih hangin pua khia-in paipih uh hi. David leh a mite khuapi a tun’ uh ciangin a khuapi mei tawh kihalin, a zite leh a tanute leh a tapate uh sal-in a kimat khitna mu uh hi. Tua ciangin David leh amah tawh a om mite in a aw uh gingsakin a tha bei dongun kap uh hi. David’ zi nihte, Jezre-el khuami Ahinoam leh Karmel khuami Nabal zi meigongnu Abigailte zong sal-in kiman hi. David nakpi takin lungkham hi; bang hang hiam cih leh mi khempeuh a tanute a tapate uh hangin a lungsim uh na lua ahih manin suang tawh amah den’ ding gen uh hi. Ahih hangin David in amahmah Topa a Pasian sungah kithakhauhsak hi. Tua ciangin David in Ahimelek’ tapa siampi Abithar kiangah, “Siampi puan hong paipih in,” a ci hi. Tua ahih ciangin Abiathar in David kiangah siampi puan paipih hi. Tua ciangin David in Topa thu dong a, “Hih mihonte ka delh ding hiam? Amaute ka pha ding hiam?” a ci hi. Amah in dawngin, “Delh in; bang hang hiam cih leh na pha taktak ding a, na mite na honkhia zo taktak ding hi,” a ci hi. Tua ahih ciangin David leh amah tawh a om mihing zagukte kuankhia uh a, Besor lui-ah tungin, tua lai-ah a kinusia mi pawlkhat om uh hi. Ahih hangin David, amah leh mi zalite a delhin paisuak uh hi; Besor lui a galkah dingin a gim lua mi zanih kinusia uh hi. Amaute in Izipt mi khat gamlakah mu uh a, David kiangah amah paipih uh hi; amaute in anlum pia uh a, amah in ne hi, amaute in tui dawn ding pia uh hi, amaute in thei moh khat leh leenggahkeu bawk nih zong pia uh hi. Amah in a nek khit ciangin a tha hong dimkik hi; bang hang hiam cih leh anlum ahi a, tui ahi zongin sun thum leh zan thum ne lo dawn loin om hi. Tua ciangin David in ama kiangah, “Nang kuate na hi hiam? Koi pan na hi hiam?” a ci hi. Amah in, “Keimah in Amalekte khat’ nasem, Izipt tangval khat ka hi hi; tu ma ni thum lai-in ka ci na ahih manin ka topa in hong nusia hi. Kote in Khereth mite’ Negeb gam leh Judahte’ gamsung leh Kaleb mite’ Negeb gam ka sim uh hi; mei tawh Ziklag ka hal uh hi,” a ci hi. Tua ciangin David in ama kiangah, “Hih mite kiangah nong paipih suk ding hiam?” a ci hi. Amah in, “Nangmah in kei nong thah loh nading ahi a, ka topa’ khut sungah nong ap kik loh nading ahi zongin Pasian tawh kei tungah hong kiciam in, tua ciangin hih mihonte kiangah nang kong paipih suk ding hi,” a ci hi. Tua ciangin amah in a paipih suk ciangin, en in, Filistiate gam leh Judah gam panin a lak uh na tampite hangin amaute gam sung khempeuh ah kithehthangin an ne, tui dawn, laamin om uh hi. Tua ciangin David in a zing ciang phalvak-a kipan nitak dong amaute vatgawp hi; kalaoh tungah tuangin a tai tangval zalite sim loh amaute khat zong suakta lo hi. David in Amalekte’ laksa khempeuh ngah kik hi; David in a zi nihte honkhia hi. A neu a lian, tanute tapate, nate ahi a, a kila khat peuhpeuh ahi zongin a kisam khat zong om lo hi; David in a vekpi-in ciahpih kik hi. David in tuu honte leh bawng honte khempeuh zong man hi; mite in tua ganhingte ama mai-ah hawl uh a, “Hih in David’ na lakte ahi hi,” a ci uh hi. Tua ciangin, David zui dingin a gim lua, Besor lui-ah a kinusia mihing zanihte kiangah David pai hi; David leh amah tawh a om mite a dawn dingin amaute hong kuankhia uh hi; mite kiangah David a nai ciangin amah in amaute hopih hi. Tua ciangin David tawh a pai mite lak panin a gilo leh mi ginalote khempeuh in, “Amaute in eite tawh hong paisuak lo uh ahih manin, mite in a zi leh a tate uh la-in a paikhiatpih uh cih sim loh, eite’ ngah kik nate khat zong amaute i pia kei ding hi,” a ci uh hi. Ahih hangin David in, “Ka sanggamte aw, Topa in eite hong piaksa nate tua bangin na hih kei ding uh hi; amah in eite hong kemin eite do ding a hong pai mihonte i khut sungah hong pia khin hi. Hih thu-ah kua in no’ thu hong ngai ding ahi hiam? Bang hang hiam cih leh gal sunga a kuan mipa’ tanh zah mah, van a ngak mipa in tang ding hi; amaute in a kibangin tang ding uh hi,” a ci uh hi. Tua ni-a kipanin tu ni dongin amah in Israelte adingin thukham leh biakna ngeina kipin bawl hi. David in Ziklag a tun’ ciangin Judah upa a lawmte kiangah a na lakte pawlkhat khakin, “ Topa ’ galte’ na a kila sung panin hih lai-ah note ading letsong a om hi,” a ci hi; tua nate pen, Beth-el, Negeb sunga om Ramoth, Jattir, Aroer, Sifmoth, Eshtemoa, Karmel, Jerahmeel khuapite, Ken khuapite, Hormah, Borashan, Athak, Hebron sunga omte, David leh a mite a pai ngeina mun khempeuhte’ ading ahi hi. Tu-in Filistiate in Israelte do uh hi; Filistiate mai-ah Israel mite tai uh a, Gilboa Mual tungah thah-in tuk uh hi. Filistiate in Saul leh a tapate pha uh hi; Filistiate in Saul’ tapate Jonathan leh Abinadab leh Malkhishua that uh hi. Gal in Saul nakpi takin neh a, thal tawite in amah mu hi; thal tawite in nakpi takin amah liamsak hi. Tua ciangin Saul in a galhiam puapa kiangah, “Hih dawibia mite hong pai-in kei hong dawt letin hong mawlpih kha ding ahih manin na namsau dok in la, tua tawh hong dawt let in,” a ci hi. Ahih hangin a galhiam puapa in hih nuam lo hi; bang hang hiam cih leh amah lau mahmah hi. Tua ahih ciangin Saul in ama namsau la-in tua tungah puk hi. A galhiam puapa in Saul a sihna a muh ciangin amah zong a namsau tungah pukin, amah tawh si khawm hi. Tua bangin Saul’ leh a tapa thumte leh a galhiam puapa, leh a mi khempeuh, a ni kikhatin si khawm uh hi. Tua ciangin kuam gal khat leh Jordan gal khat-a om Israel mite in Israel mite tai-in Saul leh a tapate a sih khitna thu a zak uh ciangin amaute in a khuapite uh nusia-in tai uh hi; tua ciangin Filistiate hong pai-in tuate sungah teeng uh hi. A zing ciangin a kithat mite’ na la dingin Filistiate hong pai ciangin Saul leh a tapa thumte Gilboa Mual tungah a si mu uh hi. Amaute in a lu tan khia-in, a galhiam hawkkhia uh a, a milimte uh leh mite kiangah hih thuhoih a puak dingin Filistia gam sung khempeuh kamtaite sawl uh hi. Amaute in ama galhiam Ashtaroth biakinn sungah koih uh hi; amaute in ama luang Bethshan kulh-ah suang uh hi. Ahih hangin Jabeshgilead ah a teng mite in Saul tungah Filistiate hihna a zak uh ciangin, a hang mi khempeuh ding-in zan tawntung pai uh a, Bethshan kulh tung panin Saul’ luang leh a tapate’ luangte va la uh hi; tua ciangin amaute Jabesh ah hong tungin tua lai-ah hal uh hi. Amaute in a guhte la-in Jabesh khua sunga makeng kung nuai-ah vui uh a, ni sagih sung an tang uh hi. Saul a sih khit, Amelekte thahna panin David a ciahkik ciangin Ziklag-ah David ni nih om hi; a ni thum ni-in, en in, a puan kikeekin a lu tungah lei omin Saul’ giahphual panin mi khat hong pai hi. David kiangah amah hong tun’ ciangin lei lakah pukin zahtakna bawl hi. David in ama kiangah, “Koi panin hong pai na hi hiam?” a ci hi. Tua ciangin amah in ama kiangah, “Israel giahphual panin kong suakta hi,” a ci hi. David in ama kiangah, “Bang ci bang ahi hiam? Hong gen in,” a ci hi. Tua ciangin amah in dawngin, “Galphual panin mite tai-a, mi tampi zong pukin si uh hi; Saul leh a tapa Jonathan zong si hi,” a ci hi. Tua ciangin David in ama kiangah a gen tangvalpa kiangah, “Saul leh a tapa Jonathan a sihna bangci theih na hi hiam?” a ci hi. Tua ciangin ama kiangah a gen tangvalpa in, “Gilboa Mual ah ka om kha hi; tua lai mun-ah Saul a teipi tungah kingam hi; en in, leengte leh sakol tuangte in amah pha dek mahmah ta uh hi. Amah in a nung lam a et ciangin kei hong mu-in hong sam hi. Keimah in ka dawng a, ‘Hih lai-ah om ing,’ ka ci hi. Amah in kei kiangah, ‘Kua na hi hiam?’ hong ci hi. Keimah in amah ka dawng a, ‘Keimah in Amelek mi ka hi hi,’ ka ci hi. Amah in kei kiangah, ‘Ka pangah ding in la, kei hong that in; bang hang hiam cih leh gimna ka thuak a, ahi zongin ka naang lai hi,’ hong ci hi. Tua ahih ciangin ama pangah dingin amah ka that hi; bang hang hiam cih leh amah a tuk khit ciangin nungta lo taktak ding hi, ci-in ka thei hi; tua ciangin a lu tungah a om kumpi lukhu leh a baan tungah a om a banbulh kong la a, tuate hih lai ka topa kiangah kong paipih hi,” a ci hi. Tua ciangin David in ama puante lenin balkeek hi; amah tawh a om mite khempeuh in tua mah bangin hih uh hi. tua ahih ciangin Saul leh a tapa Jonathan, Topa ’ mite leh Israel mite hangin amaute thumin kap uh a, nitak dong an tang uh hi; bang hang hiam cih leh gal sungah amaute si uh hi. Tua ciangin David in ama kiangah a gen tangvalpa kiangah, “Koi panin hong pai na hi hiam?” a ci hi. Amah in dawngin, “Keimah in Amalek mi peemta khat’ tapa ka hi hi,” a ci hi. David in ama kiangah, “ Topa ’ sathau nilhpa susia dingin na khut na hihkhiat ding na lau loh a bangci ahi hiam?” a ci hi. Tua ciangin David in tangvalte khat samin, “Pai in, amah hihlum in,” a ci hi. Amah in amah sat a, amah si hi. Tua ciangin David in ama kiangah, “Nangma mawhna nangma lu tungah tung ta hen; bang hang hiam cih leh nangma kam in nang lang khatah teci pangin, ‘ Topa ’ sathau nilhpa ka that khin hi,’ na ci hi,” a ci hi. Tua ciangin Saul leh a tapa Jonathan’ hangin hih kahla tawh David kap a, amah in Judah mite tungah hih kahla a kihilh nading thu pia hi; en un, hih in Jashar Laibu sungah kigelh hi. Amah in: “Israel aw, na minthan’na, na mualsangte tungah kithat! A vanglianpa bangci-in tuk! Gath khua sungah gen kei in, Ashkelon kongzing ah genthang kei in; Filistia numeite lungdam kha ding, dawibia numeite nuamin diang kha ding. “No Gilboa mualte aw, Daitui ahi a, guah ahi zongin na tung uh ah omsak kei un, tui thukpi kilok zong omsak kei un! Bang hang hiam cih leh a vanglianpa’ lum nin hi, Saul’ lum, sathau kinuh lo hi. “A kithat mite’ sisan pan, A vanglianpa’ thal pan, Jonathan’ thal hong kileh kik lo a, Saul’ namsau hong guak kik lo hi. “Saul leh Jonathan, ki-it a, it huai uh! A sih a hin’-in amaute kikhen lo uh; muvanlai sangin zaptelzaw uh, humpinelkal sangin thahatzaw uh hi. “No Israel numeite aw, Saul’ hangin kap un, puansan neel takin a silhte aw, na puan tung uh ah kizepna kham a suangte aw, “A vanglianpa bangci-in tuk, galphual sungah! “Jonathan aw, na mualsangte tungah nang hong kithat hi. Nangma hangin ka lungkham hi, ka sanggam Jonathan; kei tungah nong nop mahmah hi; kei nong itna lamdang a, numei itna sangin lianzaw hi. “A vanglianpa bangci-in tuk, galhiamte bangci-in sia!” a ci hi. Hih hun khit ciangin David in Topa thu dong a, “Judah khuapi khat peuhpeuhah ka paito ding hiam?” a ci hi. Topa in ama kiangah, “Paito in,” a ci hi. David in, “Koi pen-ah paito ding ka hi hiam?” a ci hi. Amah in, “Hebron ah,” a ci hi. Tua ahih ciangin David tua lai-ah paito a, ama zi nihte, Jezre-el khuami Ahinoam leh Karmel khuami Nabal’ zi meigongnu Abigailte zong pai uh hi. David in amah tawh a om a mite khempeuh, mi khempeuh a innkuanpih ciat tawh paipih to hi; Hebron khua-ah amaute teeng uh hi. Tua ciangin Judah mite hong pai-in amaute in tua lai mun-ah Judah kumpi-in David sathau nilh uh hi. Amaute in David kiangah, “Saul a vuite in Jabeshgilead mite hi,” ci-in a gen uh ciangin Jabeshgilead mite kiangah David in kamtaite sawlin amaute kiangah, “Note in na topa uh Saul tungah hih thumanna lakin amah vui na hih manun Topa in note thupha hong pia ta hen! Tu-in Topa in itna kip leh thumanna note tungah hong lak ta hen! Note hih bangin gamta na hih manun note tungah thuhoih kong bawl ding hi. Tua ahih ciangin tu-in note kithakhauhsakin hang un; bang hang hiam cih leh na topa uh Saul si a, Judah mite in amau’ tungah kumpi-in kei sathau hong nilh khin uh hi,” a ci hi. Tu-in Ner’ tapa Abner, Saul’ galkap mangpa in Saul’ tapa Ishbosheth la-in Mahanaim ah paipih hi; amah in Gilead, Ashur mite, Jezre-el, Efraim, Benjamin leh Israelte khempeuh tungah kumpi-in amah bawl hi. Israelte tungah uk dingin a kipatin Saul’ tapa Ishbosheth kum sawmli pha a, amah in kum nih sung uk hi. Ahih hangin Judah minamte in David nung zui uh hi. Judah minamte tungah kumpi-in Hebron khua-ah David a om hun in kum sagih leh kha guk sung ahi hi. Ner’ tapa Abner leh Saul’ tapa Ishbosheth’ nasemte Mahanaim panin Gibeon ah paikhia uh hi. Zeruiah’ tapa Joab leh David’ nasemte paikhia-in Gibeon bual-ah amaute dawntuah uh hi; amaute bual lang khatah, adang khatte a bual lang khatah tu uh hi. Tua ciangin Abner in Joab kiangah, “Tangvalte ding sakin eite mai-ah kimawl sak ni,” a ci hi. Joab in, “Amaute dingsak in,” a ci hi. Tua ciangin amaute ding-in galkah uh a, Benjamin leh Saul’ tapa Ishbosheth adingin sawm-le-nih, leh David nasemte sawm-le-nih ahi hi. Tua ciangin a lang ciat uh lutang lenin, a namsau tawh a langpa’ pang dawt ciat uh hi; tua ahih ciangin amaute tukkhawm uh hi. Tua ahih ciangin Gibeon ah a om tua mun pen Helkathhazzurim kici hi. Tua ni-in gal kidona nasia mahmah hi; Abner leh Israel mite David nasemte mai-ah kizo hi. Zeruiah’ tapa thumte, Joab, Abishai, leh Asahel, tua lai-ah om uh hi. Asahel pen Siria sakhi lee bangin a khe manlang hi. Asahel in Abner delh a, amah a delh lai takin Abner a zuihna-ah tak lamah ahi a, vei lamah ahi zongin kihei lo hi. Tua ciangin Abner in a nung enin, “Asahel aw, nang na hi hiam?” a ci hi. Amah in dawngin, “Keimah ka hi hi,” a ci hi. Abner in ama kiangah, “Na tak lamah ahi a, na vei lamah ahi zongin kihei in la, tangvalte khatpeuh manin a nate sut in,” a ci hi. Ahih hangin amah a zuihna panin Asahel pial lo hi. Tua ciangin Abner in Asahel kiangah, “Keimah zuihna panin pial in; bang hangin nang lei-ah hong vatgawp ding ka hi hiam?” Tua ciangin na sanggampa Joab mai-ah ka maitang bangci lak ding ka hi hiam?” a ci kik hi. Ahih hangin amah in lam pial nuam lo hi; tua ahih ciangin Abner in a teipi tong lam-in a gil khawh a, a nungah a teipi leeng suak hi; tua ciangin amah tukin a omna-ah si hi. Asahel tuk-a a sihna mun-ah a pai mi khempeuh tang loin ding uh hi. Ahih hangin Joab leh Abishai in Abner delh ding kipan uh hi; ni a tum lai takin Gibeon gamlak paina lampi-a om Gi-ah mai-ah a kikhung Ammah mual tung uh hi. Tua ciangin Abner nungah Benjaminte kikaikhawm uh a, amaute pawl khat suakin mual dawn khatah pang uh hi. Tua ciangin Abner in Joab samin, “Mite hih bangin kithat that lai ding ahi hiam?” A tawpna-ah a haksat zawk nading thei lo na hi hiam? A sanggamte uh a delhna panin na mite a kihei nadingin na thu piak ding bang tan sawt ding ahi hiam?” a ci hi. Tua ciangin Joab in, “Pasian a nungta ahih mah bangin, hong pau lo hi lecin, a sanggamte uh delhna panin zingsang mateng mite khawl lo taktak ding uh hi,” a ci hi. Tua ahih ciangin Joab in peengkul tum hi; mi khempeuh khawl a, Israelte delh nawn loin, amaute in do nawn lo uh hi. Tua ciangin Abner leh a mite Arabah kantanin tua zan tawntung pai uh hi; amaute in Jordan kantan uh a, sun ma sung teng pai-in Mahanaim tung uh hi. Abner a delhna panin Joab ciahkik hi; amah in mi khempeuh a kaikhop khit ciangin Asahel sim lohin David’ nasemte mi sawm-le-kua in kisam hi. Ahih hangin David’ nasemte in Abner’ aa ahi Benjaminte mihing zathum leh sawmguk that uh hi. Tua ciangin amaute in Asahel la-in Bethlehem ah a om ama pa’ han-ah amah vui uh hi. Tua ciangin Joab leh a mite zan tawntung pai uh a, Hebron ah khua vak hi. Saul’ innkuan leh David’ innkuante kikalah sau veipi gal kidona om hi; David thahat semsemin, Saul’ innkuan thanem semsem hi. Hebron ah David’ tapate suak hi; a tacil in Jezre-el khuami Ahinoam tawh a neih Ammon ahi hi; a ta nihna in Karmel khuami Nabal’ zi meigongnu Abigail tawh a neih Khileab ahi hi; a thumna in Geshur kumpipa Talmai’ tanu Ma-akah’ tapa Absalom ahi hi. A lina in Haggith’ tapa Adonijah ahi hi; a ngana in Abital’ tapa Shefatiah ahi hi. A gukna in David’ zi Eglah ta Ithream ahi hi. Hihte Hebron khua-ah David’ sungpan hong suak hi. Saul’ innkuan leh David innkuante a kido sungin Saul’ innkuan sungah Abner amahmah kihatsak tawm hi. Tu-in Saul in Ai-ah’ tanu Rizpah min nei zineu khat nei hi; Ishbosheth in Abner’ kiangah, “Bang hangin ka pa’ zineu luppih na hi hiam?” a ci hi. Tua ciangin Ishbosheth’ thugennate hangin Abner heh mahmah a, “Keimah in Judah mite’ adingin ui bang lel ka hi hiam? Keimah in na pa Saul’ innkuante, a sanggam pasalte, leh a lawmte tungah tu ni dongin thumanna ka lak lai a, David’ khut sungah note kong pia nai kei hi; ahi zongin tu ni-in nang in numei khat tawh kisai-in mawhna nong pia hi. Ishbosheth in kam khatin zong Abner dawng ngam lo hi; bang hang hiam cih leh amah in Abner kihta hi. Tua ciangin Abner in Hebron-a David kiangah kamtaite sawlin, “Leitang in kua aa ahi hiam? kei tawh thuciamna hong bawl in, en in, Israelte khempeuh nang kiangah paipih dingin keimah kong pang ding hi,” a ci hi. Amah in, “Pha hi; nang tawh thuciamna khat ka bawl ding hi; ahih hangin nang tung pan na khat ka kisam hi; tua in, kei tawh kimu dingin nong pai ciangin Saul’ tanu Mikhal nong paipih masak kei leh ka mai na mu kei ding hi,” a ci hi. Tua ciangin David in Saul’ tapa Ishbosheth kiangah kamtaite sawlin, “Filistiate vun dawn zakhat tawh ka leisa ka zi Mikhal hong pia in,” a ci hi. Tua ciangin Ishbosheth in mi sawlin ama pasal, Laish tapa Paltiel kiang panin amah la hi. Ahih hangin a pasal in amah zui-in, Bahurim paina lam tawntung ama nungah kap hi. Tua ciangin Abner in ama kiangah, “Pai in, ciahkik in,” a ci hi; tua ciangin amah ciahkik hi. Tua ciangin Abner in Israel upate tawh thu kikumin, “A beisa tawlkhat sung teng note tungah kumpi dingin David na zong uh hi. Tu-in taksuak sak un; bang hang hiam cih leh Topa in David tungah kamciamin, ‘Ka nasempa David’ khut tawh Filistiate’ khut sung pan leh amau’ galte khempeuh’ khut sung panin ka mi Israelte ka honkhia ding hi,’ ci hi,” a ci hi. Abner in Benjamin mite tungah zong thu gen hi; tua ciangin Israelte leh Benjamin mi khempeuh in tua bangin hih ding hoih hi, ci-in a ngaihsutna uh Hebron-a David kiangah a gen dingin Abner pai hi. Hebron-a David kiangah mihing sawmnih tawh Abner a pai ciangin, Abner leh amah tawh a om mite’ adingin David in pawi khat kham hi. Tua ciangin Abner in David kiangah, “Amaute in nang tawh thuciamna a bawl theih nading leh na deih bangin amaute khempeuh tungah na uk theih nadingin keimah dingin ka to kumpipa kiangah Israelte khempeuh ka kaikhawm ding hi,” a ci hi. Tua ahih ciangin David in Abner sawlkhia hi; amah lung nuamin pai hi. Tua khit phetin a galsimna panun David’ nasemte Joab tawh hong tung uh a, amaute in na tampi hong ciahpih uh hi. A hih hangin Hebron khua sung David kiangah Abner na om lo hi; bang hang hiam cih leh David in amah sawlkhia khin a, amah lung nuamin pai khin zo hi. Joab leh amah tawh a om galkap khempeuh hong tun’ ciangin Joab kiangah, “Kumpipa kiangah Ner’ tapa Abner pai a, amah in amah paisak khinin, lungnuam takin amah paikhia khin hi,” ci-in gen hi. Tua ciangin kumpipa kiangah Joab pai-in, “Bang hih na hi hiam? En in, nang kiangah Abner hong pai hi; nang in amah sawlkhia-in amah a paikhiat khitna bang hang ahi hiam? Nang hong khem ding, leh na pusuahna leh na sungtumna a thei ding, leh na hih khempeuh a thei dingin Ner’ tapa Abner hong paina na thei hi,” a ci hi. David’ omna panin Joab a paikhiat ciangin, amah in Abner’ nungah kamtaite sawl a, amaute in Sirah tuibeem panin amah hong paipih kik uh hi; ahih hangin David in tua thu thei lo hi. Hebron-ah Abner hong kik ciangin, Joab in amah tawh a kituam hopih dingin kulh kongpi pam-ah paikhiatpih a, a sanggampa Asahel’ phu lakna-in amah in a gil sunin, tua ciangin si hi. Tua khit, David in tua thu a zak ciangin, amah in, “Ner’ tapa Abner’ mawhna hangin Topa mai-ah keimah leh ka kumpigam in a tawntungin mawh baang lo hi. Ama sisan Joab lutung leh ama innkuante khempeuh tungah tu ta hen; Joab’ innkuante nin paikhia a nei mi ahi a, a phak mi ahi a, ciangkhut tawi mi ahi a, namsau tawh a kithat mi ahi a, an nek ding a nei lo mi tawh ahi zongin kilawi ngei kei hen!” a ci hi. Tua ahih ciangin Joab leh a sanggampa Abishai in Abner that uh hi; bang hang hiam cih leh amah in Gibeon-a gal kidona-ah a sanggampa uh Asahel thahsak hi. Tua ciangin David in Joab leh amah tawh a om mi khempeuh kiangah, “Na puan uh balkeekin puanham silh un la, Abner’ mai-ah kap un,” a ci hi. Kumpipa David in hankuang zui hi. Amaute in Hebron ah Abner vui uh hi; tua ciangin Abner han-ah kumpipa a kap hi; tua ciangin mi khempeuh zong a kap uh hi. Tua ciangin Abner hangin kumpipa in kah la-in, “Mihaipa a sih bangin Abner si ding ahi hiam? Na khutte kihen lo hi, na khete kol kibulh lo hi; migilopa mai-ah mi khat a tuk bangin nang na tuk khin hi,” a ci hi. Tua ciangin mi khempeuh ama hangin kap kik uh hi. Tua ciangin ni a om lai-in an ne dingin David a zol dingin mi khempeuh hong pai uh hi; ahih hangin David kiciamin, “Ni a tum matengin an ahi a, na khat peuhpeuh ahi zongin ka ciap taak leh Pasian in kei hong dawm kei ta hen!” a ci hi. Tua ciangin mi khempeuh in tua thu thei uh a, tua in amaute lungdam sak hi; kumpipa sep khempeuh in mi khempeuh lungdam sak hi. Tua ahih ciangin Ner’ tapa Abner thah ding kumpipa deihna ahih loh lam tua ni-in mi khempeuh leh Israelte khempeuh in thei uh hi. Tua ciangin kumpipa in a nasemte kiangah, “Tu ni-in Israelte sungah ulian ahi milian khat a tukna theilo na hi uh hiam? Sathau kinilh kumpipa hi napi-in tu ni-in ka thaneem hi; hih Zeruiah’ tapate kei adingin haksa lua hi. Gamtat siapa a gitlohna bangin Topa in thuk ta hen!” a ci hi. Saul’ tapa Ishbosheth in Abner Hebron ah a sihna thu a zak ciangin a tha kiam a, Israelte khempeuh lungkia hi. Saul’ tapa in galsim pawlte a makai mi nih nei hi; khat pa’ min in Baanah hi-in, adang khat pa’ min in Rekhab hi a, Be-eroth khua pan Benjamin mi Rimmon’ tapate ahi uh hi (bang hang hiam cih leh Be-eroth zong Benjamin’ aa-in kisim hi; Be-eroth mite Gittaim-ah tai uh a, tu ni dongin tua lai-ah peemta-in om uh hi). Saul’ tapa Jonathan in a khete a bai tapa khat nei hi. Jezre-el panin Saul leh Jonathan’ thu hong tun’in amah kum nga pha hi; amah a cingnu in amah la-in taipih hi; tua nu a nawh taina lamin naupang kia-in a bai suak hi. Ama min in Mefibosheth ahi hi. Tu-in Be-eroth mi Rimmon’ tapate Rekhab leh Baanah dingkhia uh a, sun nisat hun pawlin Ishbosheth’ inn-ah a sun tawlngak lai takin hong tung uh hi. En in, inn kongcingnu mangbuh a su khin hi a, a lusuk suakin ihmu hi; tua ahih ciangin Rekhab leh a sanggampa Baanah sim lut uh hi. Amaute inn sungah a tun’ uh ciangin a lupna dei sung a lupna tungah amah lumin a om lai takin amaute in amah satin that uh a, a lu tan uh hi. Amaute in ama lu la-in Arabah lam tawnin zan tawntung pai uh a, Ishbosheth’ lutang Hebron-a David kiang tun’pih uh hi. Amaute in kumpipa kiangah, “Hih lai-ah, thah dingin nang a hong zong, na gal Saul tapa Ishbosheth’ lutang om hi; Topa in tu ni-in Saul leh a suan-le-khak tungah ka to kumpipa adingin hong thuksak hi,” a ci uh hi. Ahih hangin David in Be-eroth mi Rommon’ tapate Rekhab leh a sanggampa Baanah dawngin, “Haksatna khempeuh panin ka nuntakna hong tankhia Topa in a nungta ahih mah bangin, mi khat in kei kiangah, ‘En in, Saul si hi,’ ci-in hong gen ciangin, amah thuhoih puakin kingaihsun a, ama thupuak thaman ka piakna-in amah manin Ziklag-ah ka that hi. Migilote in a thuman mi khat ama inn sung a lupna tungah a thah ciangin note’ tungah ama phu hong la-in, leitung panin note hong susia zawkan ding hilo ka hi hiam?” a ci hi. Tua ciangin David in a tangvalte thu pia a, tangvalte in amaute thatin a khutte leh a khete sattan uh a, Hebron-a bual gei-ah amaute khai uh hi. Ahih hangin amaute in Ishbosheth’ lutang la-in Hebron-a Abner’ han-ah vui uh hi. Tu ciangin Israel minamte khempeuh Hebron-a David kiangah hong pai-in, “En in, kote in nangma guh leh nangma sa ka hi uh hi. A beisa hunte ah, Saul in kote tungah kumpi ahih lai takin Israelte paikhiatpih in, a tumpihpa in nangmah na hi hi; Topa in nangma kiangah, ‘Nang in keima mi Israelte a cingpa hi-in, Israelte tungah ulian na hi ding hi,’ hong ci hi.” a ci uh hi. Tua ahih ciangin Israel upate khempeuh Hebron-a kumpipa kiangah hong pai uh hi; Kumpipa David in amaute tawh Topa mai Hebron ah thuciamna khat bawl a, amaute in Israelte tungah kumpi-in David sathau nilh uh hi. Gam uk dingin a kipatin David kum sawmthum pha a, amah in kum sawmli sung uk hi. Heron panin kum sagih leh kha guk sung Judah uk hi; Jerusalem panin kum sawmthum-le-thum sung Israelte khempeuh leh Judah uk hi. Tua ciangin kumpipa leh a mite tua gam-a teeng Jebus mite do dingin Jerusalem ah pai uh a, amaute in David kiangah, “Hih lai-ah hong pai zo kei ding hi; mittawte leh khebaite nangawn in nang hong nang zo ding uh hi,” a ci uh hi- “Hih lai-ah David hong pai zo peuhmah lo ding hi,” ci-in ngaihsun uh hi. Ahi zongin David in David’ khuapi ahi Zion mun muanhuai la hi. Tua ciangin David in tua ni-in, “Jebus mite a vatgawp ding peuhmah, David in a muhdah zahin a muhdah mi peuhmah in khebaite leh mittawte a sim dingin tuizawl-ah pai ta hen,” a ci hi. Tua ahih ciangin, “Mittawte leh khebaite Topa’ inn sungah lut lo ding hi,” kici hi. Tua ciangin mun muanhuai sungah David teengin David khuapi ci-in phuak hi. Tua ciangin David in Millo panin biakinn lam-ah khuapi lam hi. David lian semsem hi; bang hang hiam cih leh Vanglian Pasian, Topa in amah ompih hi. Tua ciangin Tai-ar kumpipa Hiram in kamtaite leh taamtak singte, leh David adingin inn khat a lamsak khutsiamte leh lei-le-suang innlam siamte zong puak hi. Tua ciangin David in Israelte tungah kumpi-in Topa in amah a kipsak khitna leh Israel mite’ hangin ama kumpigam a liatsakna kiphawktel hi. Hebron panin hong tun’ khit ciangin David in Jerusalem ah zineute leh zite la thuah lai hi; David’ tanute leh tapate piang thuah lai hi. Jerusalem ah ama sung panin a suakte’ min in: Shammua, Shobab, Nathan, Solomon, Ibhar, Elishua, Nefeg, Jafia, Elishama, Eliada, leh Elifelet ahi hi. Israelte tungah kumpi-in David sathau a kinilh khitna thu Filistiate in a zak uh ciangin David a man dingin Filistiate khempeuh kuanto uh hi; ahih hangin David in tua thu za-in mun muanhuai ah paisuk hi. Tu-in Filistiate hong pai-in Refaim kuam sung dim khin uh hi. Tua ciangin David in Topa thu dongin, “Filistiate do-in ka kuanto ding hiam? Keima khut sungah amaute na hong pia ding hiam?” a ci hi. Topa in David kiangah, “Kuanto in, bang hang hiam cih leh na khut sungah Filistiate kong pia taktak ding hi,” a ci hi. Tua ciangin Baalperazim-ah David hong pai-in David in tua lai-ah amaute zo hi; tua ciangin amah in, “Tuikhang in a phulkhap bangin Topa in ka mai-ah ka galte phukham hi,” a ci hi. Tua ahih ciangin tua munin Baalperazim ci-in kiphuak hi. Filistiate in tua lai-ah a milimte uh nusia uh a, David leh a mite in tuate puakhia uh hi. Tua ciangin Filistiate hong kuanto kik lai-in Refaim kuam sung dim khin uh hi. David in Topa thu a dot ciangin, amah in, “Na kuanto kei ding hi; amaute’ nung lamah kual pai in la, lungli kungte gal panin amaute hih in. Lungli kungte’ khungah lam paina kheging na zak ciangin na tha saan in; bang hang hiam cih leh Filistia galkapte a vatgawp dingin na mai-ah Topa pai hi,” a ci hi. Tua ciangin David in Topa’ thupiak bangin hih a, Geba panin Gezer ciang dong Filistiate vatgawp hi. David in Israelte a kiteelkhia mi khempeuh, mi tul sawmthum, khawm kik hi. Tua ciangin David ding-in kherubte tungah a tu, Vanglianpen Topa ’ min tawh a kisam Pasian’ thuciamna singkuang tua mun panin a paipih to dingin amah tawh a om mi khempeuh tawh Baale-judah ah pai hi. Tua ciangin David leh Israel mite khempeuh in Topa mai-ah a tha neih zah-un la sa-in, laiza khausai lasaknate, harp khausai lasaknate, khuangneute, kuangtuahte leh daltuahte tumin lungdamin laam uh hi. Amaute in Nakon’ ancilna mun a tun’ uh ciangin Uzzah in Pasian’ thuciamna singkuang lamah a khut zanin len kha hi; bang hang hiam cih leh bawngtalte muktu hi. Tua ciangin Topa ’ hehna Uzzah tungah hong so hi; amah in thuciamna singkuang lamah a khut zan ahih manin Pasian in tua lai-ah amah vatlum hi; Pasian’ thuciamna singkuang gei-ah amah si hi. Topa in Uzzah dan pia ahih manin David heh hi; tu ni dongin tua mun Perez-uzzah kici hi. Tua ahih ciangin tua ni-in David in Topa kihta hi; amah in, “ Topa ’ thuciamna singkuang bangci-in ka kiangah hong tung thei ding hiam?” a ci hi. Tua ahih ciangin Topa ’ thuciamna singkuang David khuapi sungah a paipih ding David ut lo hi; David in Gath khuami Obededom’ inn-ah paipih hi. Tua ciangin Topa ’ thuciamna singkuang Gath khuami Obededom’ inn sungah kha thum sung om hi; Topa in Obededom leh a innkuan khempeuh thupha pia hi. Tua ciangin Kumpi David kiangah, “Pasian’ thuciamna singkuang hangin Topa in Obededom’ innkuan leh ama neih khempeuh thupha pia hi,” ci-in kigen hi. Tua ahih ciangin David pai-in Pasian’ thuciamna singkuang Obededom’ inn panin David khuapi-ah lungdamna tawh paipih to hi; Topa thuciamna singkuang a puate kal guk a suan khit ciangin amah in bawngtal khat leh bawngno thau khat biakna-in pia hi. Tua ciangin a tha neih khempeuh tawh Topa mai-ah David laam hi; David in saihadial siampi puan khat silh hi. Tua ahih ciangin David leh Israel mi khempeuh in otna leh saki tumna awging tawh Topa ’ thuciamna singkuang paipih to uh hi. Topa ’ thuciamna singkuang David khuapi sung hong tun’ lai takin kongvangneu panin Saul’ tanu Mikhal khuadak a, Topa mai-ah Kumpi David diangin a laam mu hi; tua nu in a lungsim-ah amah simmawh hi. Tua ciangin amaute in Topa ’ thuciamna singkuang hong tumpih uh a, David in ama adingin a lamsak puakbuk sung ama mun dingah koih uh hi; tua ciangin David in Topa ’ mai-ah meihal biaknate leh thunuam-a biaknate pia hi. David in meihal biaknate leh thunuam-a biaknate a piak khit ciangin amah in Vanglianpen Topa ’ min tawh mite thupha pia a, Israel mihon buppi, mi khempeuh, numeite leh pasalte tungah anlum pheng khat, sa baak khat, leh leenggahkeu pheeng khat pia ciat hi. Tua ciangin mi khempeuh a inn ciat uh ah ciah uh hi. Tua ciangin a innkuan thupha pia dingin David ciah hi. Ahih hangin David dawn dingin Saul’ tanu Mikhal hong paikhia a, “Tu ni-in Israel kumpipa, mi mawkmawkte khat maizum lo a, a guak om bangin, a nasemte, numeite’ muhna-ah a guak tangin omin, amahmah bangci kipahtawi ahi hiam?” a ci hi. Tua ciangin David in Mikhal kiangah, “ Topa’ mi Israelte tungah ulian dingin a hong koih dingin na pa leh a innkuan khempeuhte tungah kei a hong teel Topa mai ahi hi – keimah in Topa mai-ah lungdamna ka bawl ding hi. Hih sangin a simmawhhuai zaw-in ka kibawl lai ding a, nangma mit-ah a gina lo ka hi ding hi; ahih hangin nangma gen numeite in keimah hong pahtawi ding uh hi,” a ci hi, Tua ciangin Saul’ tanu Mikhal in a sih ni dongin ta nei lo hi. Tu-in kumpipa ama inn sungah teengin Topa in a kim-a ama galte khempeuh panin tawlngakna a piak khit ciangin, kumpipa in kamsang Nathan kiangah, “Tu-in thei in, keimah in taamtaak inn hoih sungah ka om a, ahih hangin Pasian’ thuciamna singkuang puanbuk sungah om lai hi,” a ci hi. Tua ciangin Nathan in kumpipa kiangah, “Pai in, na lungsim-a om khempeuh hih in; bang hang hiam cih leh Topa in nang tawh om hi,” a ci hi. Ahih hangin tua zan mahin Nathan kiangah Topa ’ thu hong tung a, “Pai in la, ka nasempa David kiangah gen in, ‘ Topa in hih bangin ci hi: Ten’ nading inn khat hong lamsak ding na hi hiam? Israel mite Izipt panin ka paikhiatpih toh ni-a kipan tu ni dongin inn sungah ka om nai kei a, puanbuk sungah omin ka pai kawikawi hi. Israel mite khempeuh tawh ka painasa mun khempeuh, ka mi Israelte a cing dingin ka thupiak thukhente khat peuhpeuh tungah, “Bang hangin taamtaak inn hoih hong lamsak lo na hi hiam?” cihna tawh kam khat beek gen ka hi hiam?’ a ci hi. Tua ahih ciangin tu-in ka nasempa David kiangah hih bangin na gen ding hi, ‘Vanglianpen Topa in hih bangin ci hi: Ka mi Israelte tungah ulian dingin lonona mun, tuute na zuihna panin nang kong la hi; na paina peuhpeuhah nang tawh kong om a, na mai panin na galte khempeuh ka khaktan hi; leitung miliante’ min khat mah bangin nang adingin min lian khat kong bawlsak ding hi. Keimah in ka mi Israelte adingin mun khat ka seh ding a, amaute in amau’ mun-ah teengin a kinawngkaisak nawn loh nadingin amaute ka phut ding hi; nidang bangin mi ngongtatte in, ka mi Israelte tungah thukhente ka koih khit zawh, amaute gimsak nawn lo ding hi; na galte khempeuh panin nang tungah tawlngakna kong pia ding hi. Tua tham loin Topa in nang adingin innkuan khat hong bawlsak ding nang tungah Topa in gen hi. Na ni cingin na pate tawh na lup ciangin, nangma sung panin hong suak khia ding na tapa nangma nungah ka khangsak ding a, keimah in ama kumpigam ka kipsak ding hi. Amah in keima min dingin inn khat lam ding a, keimah in ama kumpigam tokhom a tawntungin ka kipsak ding hi. Keimah in ama pa ka hi ding a, amah in keima tapa hi ding hi. Amah in mawhna a bawl ciangin, keimah in mite’ ciangduai tawh, mi’ tapate satna tawh amah ka thuhilh ding hi; ahih hangin nangma ma-a ka hep khiat Saul tung panin ka lak bangin ama tung panin ka itna kip ka la khia kei ding hi. Na inn leh na kumpigam keima mai-ah a kip tawntungin kibawl ding hi; na kumpi tokhom kip tawntung ding hi,’ ci hi,” a ci hi. Hih thute khempeuh tawh a kizui, leh hih mangmuhna khempeuh tawh a kizui-in Nathan in David kiangah gen hi. Tua ciangin Kumpi David tumin Topa mai-ah tu a, “ Topa Pasian aw, tu ciang dong hih bangin kei nong kep nadingin keimah in kua hi a, ka innkuan in bang hi lel ahi hiam? Hih in nangma mit-ah na neuno khat hi lai hi, Topa Pasian aw; a hong tung ding sau veipi sung na nasempa’ innsung thu ding zong na gen khin a, mai lam khangte zong kei nong lak khin hi, O Topa Pasian! David in nang tungah bang hong gen thuah nawn ding ahi hiam? Bang hang hiam cih leh nangmah in na nasempa na thei hi, O Topa Pasian! Nangma thuciamna hang leh na lungsim tawh kizui-in na nasempa na theihsak nadingin hih liatna khempeuh na piangsak hi. Tua ahih ciangin nang na lian takpi hi, Topa Pasian aw; ka bil-un ka zakna uh tawh kizui-in nang tawh a kibang kuamah om lo a, nang sim loh Pasian dang om lo hi. Ama mite’ mai-ah minam khat leh a pasiante hawlkhiatna tawh ama adingin min bawlin, amaute’ adingin alian a lauhuai nate hih sakin, ama mi dingin a tankhia dingin Pasian a paina na mi Israelte, leitung minam dang kua tawh kibang ahi hiam? Nangmah in nangma mi ahi tawntung dingin na mi Israelte nangma adingin na kipsak hi; Topa aw, nangmah in amaute’ Pasian na suak hi. Topa Pasian aw, tu-in na nasempa leh ama innkuan tawh kizomin na gensa thu a tawntung dingin kipsak in la, nangma gensa bangin hih in; tua ciangin, ‘Mi honte’ Topa in Israelte tungah Pasian hi,’ ci-in nangma min kiliansak tawntung ding a, nangma mai-ah na nasempa David’ innkuan kikipsak ding hi. Bang hang hiam cih leh Israelte’ Pasian, mi honte’ Topa nangmah in, ‘Nangma ading innkuan khat kong bawlsak ding hi,’ ci-in na nasempa tungah pulakna na bawl khin hi; tua ahih ciangin na nasempa in nang tungah hih thungetna hong ngen ngam hi. Tu-in Topa Pasian aw, nangmah in Pasian na hi a, na thute a muanhuai manin, na nasempa tungah hih nahoih na ciam khin hi; tua ahih ciangin tu-in nangma mai-ah a om tawntung suak theih nadingin na nasempa’ innkuan thupha piak ding hong lungkim in; bang hang hiam cih leh Topa Pasian aw, nangmah in na gen khin a, nangma thupha tawh na nasempa’ innkuan thupha kipia tawntung ding hi,” a ci hi. Hih thu teng khit ciangin David in Filistiate zo-in amaute nuaisiah a, David in Fislistiate’ khut sung panin Methegammah khua la hi. Tua ciangin amah in Moab mite zo a, amaute khauzang khat tawh tehin, lei lakah amaute lumsak hi; amah in thah dingin gual nih leh khah dingin gual khat dim teh hi. Tua ciangin Moab mite in David’ nasemte suakin siah puak uh hi. Zobah kumpipa Rehob’ tapa Hadadezer in Eufrates gun kiim gamte ngah kik nuamin hong kuan ahih manin David in amah do-in zo hi. David in ama tung panin sakol galkap tulkhat leh zasagih, leh khe galkap tul sawmnih la hi; David in leengkai sakol khempeuh a zagui atsat a, ahih hangin leeng zakhat ading a kicingin siit hi. Damaska gam-a Siria mite Zobah kumpipa Hadadezer a huh dingin hong kuan ciangin David in Siria mite tulsawmnih leh tulnih that hi. Tua ciangin David in Damaskas gam Aram ah khuacingte koih hi; Siria mite David’ nasem suak uh a, siah puak uh hi. Topa in David a paina peuhpeuh ah gualzawhna pia hi. Tua ciangin David in Hadadezer’ nasemte in a puak uh kham kibawl lumte la-in Jerusalem ah paipih hi. Hadadezer’ khuapite Betah leh Berothai panin Kumpi David in sumngo tampi tak la hi. Hamath kumpipa To-i in Hadadezer’ galkap buppi David in a zawhna thu a zak ciangin, Amah in Hadadezer do-in a zawhna hangin amah va hopihin a lungdampih dingin To-i in Kumpi David kiangah a tapa Joram sawl hi; bang hang hiam cih leh Hadadezer in To-i tawh gal-in kido ngei zel hi. Joram in ngun, kham, leh sumngo tawh a kibawl nate keng hi; David in minthan’na ngah hi. A ciah ciangin amah in Ci Kuam-ah Edom mite tulsawm leh tulgiat that hi. Tua ciangin amah in Edom ah khuacingte koih hi; Edom gamsung khempeuh ah amah in khuacingte koih a, Edom mi khempeuh David’ nasemte suak uh hi. Topa in David a paina peuhpeuh ah gualzawhna pia hi. Tua ahih ciangin David in Israelte khempeuh uk hi; David in a mite khempeuh tungah thutang leh thuman zang hi. Zeruiah’ tapa Joab in galkapte uk hi; Ahilud’ tapa Jehoshafat in thuciamtehpa hi; Ahitub’ tapa Zadok leh Abiathar’ tapa Ahimelek in siampi ahi uh hi; Seraiah in lai-atpa ahi hi; Jehoiada’ tapa Benaiah in Khereth mite leh Peleth mite uk hi; David tapate in gam uk uliante ahi uh hi. Tua ciangin David in, “Jonathan hangin ama tungah migitna ka lah theih nading Saul’ innkuan sungah mi khatpeuh a om lai hiam?” a ci hi. Tu-in Saul innkuan sungah Ziba min nei nasempa khat om a, amaute in David kiangah amah sam uh hi; tua ciangin kumpipa in ama kiangah, “Ziba na hi hiam?” a ci hi. Amah in, “Na nasempa keimah in Ziba ka hi hi,” a ci hi. Tua ciangin kumpipa in, “Pasian’ migitna ama tungah ka lah theih nading Saul innkuan ah mi khat beek om lai lo ahi hiam?” a ci hi. Ziba in kumpipa kiangah, “Jonathan tapa khat om lai hi; amah a khete bai hi,” a ci hi. Kumpipa in ama kiangah, “Amah koi-ah om hiam?” a ci hi. Tua ciangin Ziba in kumpipa kiangah, “Lodebar-a Ammiel’ tapa Makhir’ inn-ah amah om hi,” a ci hi. Tua ciangin Kumpi David in sawlin Lodebar-a Ammiel’ tapa Makhir’ inn panin amah la sak hi. Tua ciangin Saul’ tapa Jonathan, a ta Mefibosheth David kiangah hong pai a, mai pukin zahtakna bawl hi. Tua ciangin David in, “Mefibosheth!” a ci hi. Amah in dawngin, “En in, na nasempa,” a ci hi. Tua ciangin David in ama kiangah, “Lau kei in; bang hang hiam cih leh na pa Jonathan’ hangin nangma tungah migitna kong lak ding a, na pu Saul’ leitang khempeuh nangma tungah kong pia kik ding hi; tua ciangin nangmah in ka sabuai-ah an na ne tawntung ding hi,” a ci hi. Tua ciangin amah in zahtakna bawlin, “A sisa ui bang kei lel, nong hici bawl nadingin na nasempa in bang ka hi hiam?” a ci hi. Tua ciangin kumpipa in Saul’ nasempa Ziba samin ama kiangah, “Saul leh a innkuan tawh a kizom khempeuh na topa’ tupa’ tungah ka pia khin hi. Nang leh na tapate leh na nasemte in ama adingin lo na kho ding uh a, na topa’ tupa in an nek ding a neih theih nadingin a piangte a tun’pih ding uh hi; ahih hangin na topa’ tupa Mefibosheth in keima sabuai-ah ne tawntung ding hi,” a ci hi. Tu-in Ziba in tapa sawm-le-nga nasem sawmnih nei hi. Tua ciangin Ziba in kumpipa kiangah, “Ka to kumpipa in a thupiak khempeuh tawh kizui-in na nasempa in hih ding hi,” a ci hi. Tua ahih ciangin kumpipa’ tapate khat bangin Mefibosheth in David’ sabuai-ah an ne hi. Mefibosheth in Mika min nei tapa tangval khat nei hi. Ziba’ inn-ah a teeng khempeuh Mefibosheth’ nasemte suak hi. Tua ahih ciangin Mefibosheth Jerusalem ah teeng hi; bang hang hiam cih leh amah in kumpipa’ sabuai-ah an ne tawntung hi. Tu-in amah a khe a langnih-in a bai hi. Hih hun khit ciangin Ammon mite’ kumpipa si a, a tapa Hanun in ama tangin uk hi. Tua ciangin David in, “Keima tungah a pa thuman takin hong gamtat bangin Nahash’ tapa Hanun’ tungah thuman takin ka gamta ding hi,” a ci hi. Tua ahih ciangin David in a pa’ hangin amah a hehnem dingin a nasemte sawl hi. David nasemte Ammon mite’ gamah va tung uh hi. Ahih hangin Ammon mite’ uliante in a topa uh Hanun kiangah “David in nangma kiangah hehnemte hong sawl manin na pa a pahtawi hi, ci-in ngaihsun na hi hiam? David in a nasemte khuapi sung a en ding, thu kansim ding, leh a lawnthal dingin hong sawl hilo ahi hiam?” a ci uh hi. Tua ahih ciangin Hanun in David’ nasemte manin a khamul uh a lang ciat kiat khiatsak a, a puan uh a laizang, a kawng ciangah at khiatsakin amaute sawlkhia hi. David kiangah tua thu a kigen ciangin amaute dawn dingin amah in mi sawl hi; bang hang hiam cih leh a mite nakpi takin maizum uh hi. Kumpipa in, “Na khamul uh a khan’ mateng Jerikho ah om un la, tua ciangin hong ciah un,” a ci hi. Ammon mite in amaute David’ huat mi a suah khitna uh a muh uh ciangin Ammon mite in mi sawlin Bethrehob-a Siria mite, leh Zobah-a Siria mite, khe galkap tul sawmnih, leh Ma-akah kumpipa, mi tulkhat tawh, Tob mite mi tulsawm leh tulnih cial uh hi. David in hih thu a zak ciangin amah in Joab leh a thahat mihon khempeuh sawl hi. Tua ciangin Ammon mite hong kuankhia-in kulh kongpi lutna-ah gal sim dingin pang uh hi; Zobah leh Rehob-a Siria mite, Top mite, leh Ma-akahte, gamlakah amau pawl ciatin om uh hi. Joab in a mai leh a nungah amah do dingin gal in a pan’na a muh ciangin, amah in Israelte a kitengkhia mi pawlkhat teel a, Siria mite do dingin pang sak hi; ama mi a om lai teng a sanggampa Abishai’ ukna sungah koih a, Ammon mite’ lang khatah amaute pangsak hi. Tua ciangin amah in, “Siria mite kei adingin a hat luat leh kei nong huh ding hi; ahih hangin Ammon mite nang adingin a hat luat leh kei hong pai-in nang kong huh ding hi. Kihangsak in, i mite ading leh i Pasian’ khuapite adingin kipasalsak ni; Topa in hoih a sak bangin hong hih ta hen” a ci hi. Tua ahih ciangin Joab leh amah tawh a om mite in Siria mite a do dingin naih uh hi; tua ciangin ama mai-ah amaute tai uh hi. Ammon mite in Siria mite a tai a muh ciangin amaute zong Abishai mai-ah tai-in khuapi sungah lut uh hi. Tua ciangin Ammon mite a dona panin Joab ciah-in Jerusalem ah tung hi. Israelte in amaute a zawhna thu Siria mite in a muh uh ciangin amau mahmah kikaikhawm uh hi. Tua ciangin Hadadezer in mi sawlin Eufrates galkhat-a Siria mite paikhiatpih hi; Hadadezer’ galkap mangpa Shobak makai-in amaute Helam-ah tung uh hi. Hih thu David kiangah a kigen ciangin amah in Israelte khempeuh kaikhawm a, Jordan kantanin Helam tung hi. David do dingin Siria mite na pangin amah tawh kido uh hi. Israelte mai-ah Siria mite tai uh hi; David in leeng za sagih a hawl, Siria mite’ leh sakol tuang mi tulsawmli thatin, amau’ galkap mangpa Shobak liamsakin, tua lai-ah amah si hi. Hadadezer’ nasem ahi kumpite khempeuh in Israelte in amaute a zawhna thu a muh uh ciangin, amaute in Israelte tawh kilemna bawl uh a, amaute’ khutnuai mi suak uh hi. Tua ahih ciangin Ammon mite a huh lai ding uh Siria mite lau ta uh hi. Galdo dingin kumpite a kuankhiat hun tua kum phalbi sungin David in Joab, leh amah tawh a om a nasemte, leh Israelte khempeuh sawl hi; amaute in Ammon mite sugawpin Rabbah umcih uh hi. Ahih hangin David Jerusalem ah om hi. Khatvei nitak lamin a lupna panin David tho-in kumpi innkhumzangah a pai leh innkhumzang panin amah in numei khat a kisil galmuh kha hi a numei mel hoih mahmah hi. David in mi sawlin numei’ thu kan sak hi. Mi khat in, “Hih in Hit mi Uriah’ zi, Eliam’ tanu Bathsheba hilo ahi hiam?” a ci hi. Tua ahih ciangin David in kamtaite sawlin tua nu la hi; tua nu ama kiangah hong pai a, amah in tua nu tawh lum hi. (Tua nu in a nitna panin kisian’suah hi.) Tua ciangin ama inn-ah ciah hi. Tua ciangin numei gai hi; amah in mi sawlin David kiangah, “Nau ka paai hi,” ci-in gen hi. Tua ciangin David in Joab kiangah thu puak a, “Hit mi Uriah ka kiangah hong sawl in,” a ci hi. Tua ciangin Joab in David kiangah Uriah sawl hi. Ama kiangah Uriah a tun’ ciangin David in Joab bangci om a, mite bangci uh a, gal dona bangci mavan’ hiam cih dong hi. Tua ciangin David in Uriah kiangah, “Na inn-ah ciahsuk in la, na khete sil in,” a ci hi. Tua ciangin kumpipa’ inn panin Uriah paikhia a, kumpipa’ kiang panin letsong khat in amah zui hi. Ahih hangin Uriah a topa’ nasemte khempeuh tawh kumpipa’ inn kongkhak gei-ah lum a, ama inn-ah ciah suk lo hi. “Uriah a inn-ah ciah suk lo hi,” ci-in amaute in David kiangah a gen uh ciangin David in Uriah kiangah, “Khualzin-a hong tung hilo na hi hiam? Bang hangin na inn-ah ciahsuk lo na hi hiam?” a ci hi. Uriah in David kiangah, “Thuciamna singkuang leh Israel leh Judah buk sungah om uh hi; ka topa Joab leh ka topa’ nasemte gam lakah giak uh hi; keimah in an ne tui dawn ding leh ka zi tawh a lum dingin ka inn-ah ciahsuk ding ka hi hiam? Nangmah hingin, na nuntakna a hin’ mah bangin, hih bang ka gamta kei ding hi,” a ci hi. Tua ciangin David in Uriah kiangah, “Hih lai-ah tu ni zong om in la, zing ciangin nang kong paikhia sak ding hi,” a ci hi. Tua ahih ciangin Uriah tua ni leh a zing ciang Jerusalem ah om hi. David in amah samin, amah in ama omna-ah an leh zu ne a, tua ahih manin amah zukhamsak hi; a nitak ciangin a lupna tungah a lum dingin a topa’ nasemte tawh paikhia a, ahih hangin ama inn-ah ciahsuk tuan lo hi. Zingsang ciangin David in Joab kiangah lai khat gelh a, Uriah khut tungah a lai khak hi. A lai sungah, “Galdo a haksatna pen madawkah Uriah koih in la, amah ki-vat tukin a sih theih nadingin ama kiang panin nungkik un,” ci-in gelh hi. Joab in khuapi a umcih ciangin mi a hangte om hi ci-in a theihna munah Uriah seh hi. Khuapi mite hong kuan khia-in Joab tawh kido uh hi; mite lakah David’ nasemte pawlkhat puk hi. Hit mi Uriah zong kithat hi. Tua ciangin Joab in mi sawlin gal kidona thu khempeuh David kiangah gen hi; amah in kamtaipa thuhilhin, “Gal kidona thu khempeuh kumpipa kiangah na gen khit ciangin, kumpipa a heh suakin amah in nangma kiangah, ‘A sim dingin khuapi-ah tua zahin a nai-in pai na hi uh hiam? Kulh tung panin hong kap ding uh thei lo na hi uh hiam? Jerubbesheth’ tapa Abimelek kua in that hiam? Numei khat in angawina suangpeek tungnung kulh tung pan ama tungah khiat sukin Thebez-ah amah si hilo ahi hiam? Bang hangin tua zahin kulh nai-ah pai na hi hiam?’ hong cih leh, nangmah in, ‘Hit mi na nasempa Uriah zong si hi,’ na ci ding hi,” a ci hi. Tua ahih ciangin kamtaipa pai a, hong tungin a gen dinga Joab in a sawl thu khempeuh David kiangah gen hi. Kamtaipa in David kiangah, “Mite in kote hong zo thawhin gam lakah kote do dingin hong kuankhia uh hi; ahih hangin kote in kulh kongpi lutna dongah amaute ka not kik uh hi. Tua ciangin thal tawite in kulh tung panin na nasemte kap uh hi; kumpipa’ nasem pawlkhat si hi; Hit mi na nasempa Uriah zong si hi,” a ci hi. David in kamtaipa kiangah, “Joab kiangah hih bangin gen in, ‘Hih thu hangin nangmah kilungkhamsak kei in, bang hang hiam cih leh namsau in koi lai panin hong vat ding cih a kimatheih lo mah ahi hi; khuapi na simna khauhsak in la, lawnthal in,” na ci ding hi. Amah hanthawn in,” a ci hi. Uriah’ zi in a pasal Uriah a sihna thu a zak ciangin a pasal hangin kap hi. A kahna a ven’ ciangin David in mi sawlin ama inn-ah tua nu la sak a, tua nu in ama zi suak in, amah tawh tapa khat nei hi. Ahih hangin David gamtatna tua thu in Topa lungkim lo sak hi. Tua ciangin Topa in David kiangah kamsang Nathan sawl hi. Amah hong pai-in ama kiangah, “Khuapi khat sungah mi nih om a, khat hau-in a khat zawng hi. A haupa in tuuhon leh bawnghon tampi nei hi; ahih hangin a zawngpa in bangmah nei lo a, a leisa tuuno a nu khat nei hi. Amah in tua tuuno khoi a, amah leh a tate tawh khang khawm hi; ama an ne-in a hai panin dawn a, ama ang sungah lum hi, ama adingin tanu tawh kibang hi. Tu-in mi haupa’ inn-ah zin khat hong tung a, amah in a tuuhon ahi a, a bawnghon pan ahi zongin ama kiangah a tung khualzinpa’ adingin a gawh ding la nuam loin mi zawngpa’ tuuno laksak a, ama kianga a tung mipa adingin gawhsak hi,” a ci hi. Tua ciangin tua mipa tungah David’ hehna nakpi takin so hi; amah in Nathan kiangah, “ Topa in a nungta ahih mah bangin hih banga a gamta mipa a sih ding kilawm hi; amah hih bangin gamta a, amah in hehpihna nei lo ahih manin a tuuno a zah li-in loh ding hi,” a ci hi. Nathan in David kiangah, “Nangmah in tua mipa na hi hi! Israelte Pasian, Topa in hih bangin ci hi, ‘Israelte tungah kumpi-in nang sathau hong nilhin Saul’ khut sung panin nang kong honkhia hi; keimah in na topa’ inn leh na topa’ zite na ang sungah kong pia a, Israel leh Judah mite nang kong pia hi; hihte tawmlua ahih leh tua zah mah kong piak beh ding hi. Ama muhna-ah a sia gamta dingin bang hangin Topa ’ thu simmawh na hi hiam? Nangmah in Hit mi Uriah namsau tawh vatin, ama’ zi nangma zi dingin na la a, Ammon mite namsau tawh amah na that khin hi. Tua ahih ciangin tu-in nangmah in kei hong simmawhin Hit mi Uriah’ zi nangma zi dingin la khin na hih manin na inn sungah namsau tawh kidona veng ngei lo ding hi,’ ci hi. Topa in hih bangin ci hi, ‘En in, keimah in nangma inn sung panin nangmah langah siatna ka khangsak ding hi, na zite na muh-in la-in na vengpa tungah ka pia ding a, amah in sun nitaang sungah na zite luppih ding hi Bang hang hiam cih leh nangmah in a simthamin na hih hi; ahih hangin keimah in Israelte khempeuh muh dingin suntangpi-in ka hih ding hi,’ ci hi,” a ci hi. David in Nathan kiangah, “ Topa tungah ka khial khin hi,” a ci hi. Tua ciangin Nathan in David kiangah, “ Topa in zong na khialhna koihkhia zo hi; nang na si kei ding hi. Ahi zongin, hih bang gamtatna tawh Topa thusim peuhmah lo na hih manin nang sungpan hong piang naungek si ding hi,” a ci hi. Tua ciangin Nathan a inn-ah ciah hi. Tua ciangin Uriah’ zi in David tawh a neih naungek Topa in vat a, a ci hong na hi. Tua ahih ciangin David in naungek adingin Pasian tungah thum hi; David in an tangin pai-in zan tawntung lei lakah lum hi. Tua ciangin lei lak panin a phong dingin a inn sung upate ama kiangah ding uh hi; ahih hangin amah tho lo a, amaute tawh an zong ne lo hi. A ni sagih ni-in naungek si hi. Ama kiangah, naungek si hi, ci-in a gen ding uh David’ nasemte lau uh hi; bang hang hiam cih leh amaute in, ‘En un, naungek a hin’ lai-in amah i hopih a, amah in i thu hong ngai lo hi; tua ahih ciangin bangci-in ama kiangah naungek si, ci ngam ding i hi hiam? Amahmah kisusia kha ding hi,” a ci uh hi. Ahih hangin ama nasemte a kihuauna uh David in a muh ciangin naungek si hi, ci-in David in thei hi; tua ciangin David in a nasemte kiangah, “Naungek si ahi hiam?” a ci hi. Amaute in, “Amah si hi,” a ci uh hi. Tua ciangin David lei lak panin tho-in kisil a, sathau nilhin a puante khek hi; tua ciangin Topa ’ inn-ah pai-in bia hi; tua ciangin ama inn-ah pai hi; an a nget ciangin amaute in a mai-ah lui uh a, amah in ne hi. Tua ciangin a nasemte in ama kiangah, “Hih banga na gamtatna a bangci ahi hiam? Naungek a hin’ lai-in an tangin na kap hi; ahih hangin naungek a sih ciangin tho-in an na ne hi,” a ci uh hi. Amah in, “Naungek a hin’ lai-in an tangin ka kap hi; bang hang hiam cih leh, “Naungek a hin’ nadingin Topa in kei hong hehpih ding hiam hong hehpih lo ding hiam cih kua in thei ahi hiam?” ka ci hi. Ahih hangin tu-in amah si hi; bang hangin an tang ding ka hi hiam? Amah la kik thei ding ka hi hiam? Ama kiangah kei ka pai ding a, ahih hangin kei kiangah amah hong kik lo ding hi,” a ci hi. Tua ciangin David in a zi Bathsheba hehnem a, ama kiangah pai-in amah tawh lum khawm hi; tua nu in tapa khat nei a, amah in a min Solomon phuak hi. Topa in tua naupang it ahih manin, kamsangpa Nathan tung tawnin thu puak hi; Topa ’ itna hangin ama min Jedidiah a phuah ding gensak hi. Tu-in Joab in Ammon khuapi Rabbah simin a khuapi tuikhuk la hi. Joab in David kiangah kamtaite sawlin, “Rabbah khuapi ka sim a, a khuapi tuikhuk ka la khin hi. Tua ahih ciangin tu-in mi a om lai teng kaikhawm in la, khuapi langah phual satin khuapi la in; tua hi kei leh keimah in khuapi la-in keima min pua kha ding hi,” a ci hi. Tua ahih ciangin David in mi khempeuh kaikhawmin Rabbah-ah pai a, tua khuapi do-in la hi. Tua ciangin amah in amau’ kumpipa’ kumpilukhu a lu tung panin la hi; kumpilukhu a gihna in kham talen khat hi a, a sungah suangmanpha khat om hi; tua lukhu David’ lu tungah kikoih hi. Tua ciangin amah in khuapi sunga van kinusiate, tampi tak paikhiatpih hi. Amah in a sunga om mite paikhiatpihin sing-atnate leh tuzumte leh heite tawh na a sem dingin koih a, leisek sekna-ah amaute nasem sak hi; tua bangin Ammon mite’ khuapi khempeuh ah hih hi. Tua ciangin David leh mi khempeuh Jerusalem ah ciah uh hi. Tu-in David’ tapa Absalom in Tamar min nei sanggam numei mel hoih khat nei hi; tawlkhat khit ciangin David’ tapa Amnon in tua nu ngai hi. Amnon gim mahmah ahih manin a sanggamnu Tamar’ hangin amahmah kicinasak hi; bang hang hiam cih leh amah nungak hi a, Ammon in tuanu ahih theih nading om theih tuak lo hi. Ahih hangin Amnon in David’ sanggampa Shimeah’ tapa Jonadab min nei lawmpa khat nei hi; Jonadab in mi tei mahmah khat ahi hi: Amah in ama kiangah, “Kumpipa’ tapa aw, bang hangin zingsang khat khit zingsang khat thakiam semsem na hi hiam? Kei kiangah hong gen lo ding na hi hiam?” a ci hi. Amnon in ama kiangah, “Ka sanggampa Absalom’ sanggamnu Tamar ka ngai hi,” a ci hi. Jonadab in ama kiangah, “Na lupna tungah lum in la, a cina kineih in; nangmah en dingin na pa hong pai ciangin ama kiangah, “Keimah in mu-in ama khut panin an ka nek theih nadingin ka sanggamnu Tamar hong paisak in, an nek ding hong pia sak in la, ka muhna ah an hong bawlsak in,’ ci in,” a ci hi. Tua ahih ciangin Amnon lumin a cina kineih hi; amah en dingin kumpipa a pai ciangin Amnon in kumpipa kiangah, “Ama khut panin ka nek theih nadingin ka sanggamnu Tamar hong pai sakin mohpheng nih khawng na bawlsak nading kong thum hi,” a ci hi. Tua ciangin David in inn-a Tamar kiangah mi sawlin, “Na sanggampa Amnon’ inn-ah pai-in ama ading an bawl in,” ci sak hi. Tua ahih ciangin a sanggampa Amnon lum-a a omna mun a inn-ah Tamar pai hi. Amah in annel lom la-in meek a, ama muhna-ah mohphengte bawlin em hi. Tua ciangin amah in sikbeldai la-in ama mai-ah sungkhia a, ahih hangin amah in ne nuam lo hi. Tua ciangin Amnon in, “Kei kiang panin mi khempeuh sawlkhia in,” a ci hi. Tua ahih ciangin ama kiang panin mi khempeuh paikhia hi. Tua ciangin Amnon in Tamar kiangah, “Na khut panin ka nek theih nadingin inndei sungah an hong paipih in,” a ci hi. Tamar in a bawlsa mohphengte la-in inndei sung a sanggampa Amnon kiangah paipih hi. Ahih hangin amah in nek dingin ama kiang nai-ah a paipih ciangin, amah in tua numei lenin ama kiangah, “Hong pai in, kei tawh hong lum in, ka sanggamnu aw,” a ci hi. Amah in dawngin, “Hi lo hi, ka sanggam pa aw, kei hong thatang hih kei in; bang hang hiam cih leh Israelte sungah tua bang kihih lo hi; hih bang hai luatna gamta kei in. Keimah in ka maizumna koi-ah seelcip thei ding ka hi hiam? Nang zong, Israelte sungah mihai luate khat bang na hi ding hi. Tua ahih ciangin tu-in kong thum hi, kumpipa kiangah gen in; bang hang hiam cih leh amah in nang adingin kei hong khaktan lo ding hi,” a ci hi. Ahih hangin amah in a thugen ngai lo hi; amah sangin hatzaw ahih manin thatanghat thu tawh hihin amah luppih hi. Tua ciangin Amnon in nakpi takin amah mudah hi; amah a muhdahna in amah a itnasa sangin lianzaw hi. Tua ciangin Amnon in ama kiangah, “Ding in, paikhia in,” a ci hi. Ahih hangin numei in ama kiangah, “Hilo hi, ka sanggampa aw; bang hang hiam cih leh kei nong sawlkhiatna in kei tungah nong hihsa thu sangin lianzaw hi,” a ci hi. Ahih hangin a thu ngai lo hi. Amah in a na a sepsak tangvalpa samin, “Ka omna panin hih numei koihkhia in la, ama nungah kongkhak kalh in,” a ci hi. Tua nu in puantualpi ban nei khat silh hi; bang hang hiam cih leh kumpipa tanute in tua bangin puansilh hi. Tua ahih ciangin a nasempa in tua nu koihkhia-in ama nungah kongkhak kalh hi. Tua ciangin Tamar in a lu tungah vut koihin ama silh puantualpi bansau balkek hi; tua ciangin a lutungah a khut koihin paikhia a, a pai kawmin a gingin kap hi. Tua ciangin a sanggampa Absalom in ama kiangah, “Na sanggampa Amnon in nang hong bawlsia ahi hiam? Bangbang hita leh kilungnuamsak in, ka sanggamnu aw; amah in na sanggampa ahi hi; hih thu na lungsim ah koih kei in,” a ci hi. Tua ahih ciangin a sanggampa Absalom’ inn-ah Tamar a dah numei-in om hi. Kumpi David in hih thute khempeuh a zak ciangin heh mahmah hi. Ahih hangin Absalom in Amnon kiangah a pha ahi a, a sia ahi zongin bangmah gen lo hi; bang hang hiam cih leh amah in a sanggamnu Tamar thatanghat thu tawh hih ahih manin Absalom in Amnon mudah hi. Kum nih bit khit ciangin Absalom in Efraim nai-a om Baalhazor-ah tuumul mette khawm a, Absalom in kumpipa’ tapate khempeuh sam hi. Tua ciangin kumpipa kiangah Absalom hong pai-in, “En in, na nasempa in tuumul mette khawm hi; kumpipa leh a nasemte na nasempa tawh nong pai ding kong thum hi,” a ci hi. Ahih hangin kumpipa in Absalom kiangah, “Hilo hi, ka tapa aw, i vekpi-in pai kei ni, pai lehang kote in nang adingin vangik ka hi kha ding uh hi.” a ci hi. Amah in ci teitei a, ahih hangin amah pai nuam loin ama thupha a tungah pia hi. Tua ciangin Absalom in, “Tua bang hi lo ding ahih leh, ka sanggampa Amnon kote tawh nong paisak ding kong thum hi,” a ci hi. Tua ciangin kumpipa in ama kiangah, “Bang hangin nang tawh amah hong pai ding ahi hiam?” a ci hi. Ahih hangin Absalom in Amnon leh kumpipa’ tapate khempeuh amah tawh a paisak mateng ci teitei hi. Tua ciangin Absalom in a nasemte thu pia a, “Amnon’ lungsim leenggahzu tawh a lungnop ciangin ciamteh un la, note kiangah, ‘Amnon sat un,’ kong cih ciangin amah that un. Lau kei un; note thu hong pia khin hilo ka hi hiam? Hang un la, thahat un,” a ci hi. Tua ahih ciangin Absalom’ nasemte in Absalom’ thupiaksa bangin Amnon hih uh hi. Tua ciangin kumpipa’ tapate khempeuh ding-in a la tung ciat uh ah tuangin tai uh hi. Amaute lamkal-ah a om lai takin David kiangah thu tung a, “Absalom in kumpipa’ tapate khempeuh that a, khat beek siit lo hi,” kici hi. Tua ciangin kumpipa ding a, a puante balkeekin lei lakah lum hi; a kianga ding a nasemte khempeuh in a puan uh balkek uh hi. Ahih hangin David sanggampa Shimeah’ tapa Jonadab in, “Amaute in kumpipa’ tapa tangvalte khempeuh that hi, ci-in ka topa in ngaihsun kei in; bang hang hiam cih leh Amnon bek si hi, amah in a sanggamnu Tamar thatanghat thu tawh a hih ni-a kipanin Absalom’ thupiakna tawh hih thu a kisehkhol ahi hi. Tua ahih ciangin kumpipa’ tapate khempeuh si hi, ci-in topa in ngaihsunin lungsim-ah koih kei in; bang hang hiam cih leh Amnon bek si hi,” a ci hi. Ahih hangin Absalom tai hi. Tua ciangin galvil tangvalpa in a lu sang sakin khuadak a, en in, mual pang nai Horonaim lampi panin mi tampi hong pai hi. Jonadab in kumpipa kiangah, “En in, kumpipa’ tapate hong tung zo hi; na nasempa’ gen bangin hong piang hi,” a ci hi. Amah in a thugen a man khit phetin, en in, kumpipa’ tapate hong tungin hong kap uh hi; tua ciangin kumpipa zong a nasemte khempeuh tawh nakpi takin kap uh hi. Ahih hangin Absalom tai-in Geshur kumpipa a Ammihud tapa Talmai kiangah pai hi. Ni khat khit ni khat David a tapa’ hangin thum hi. Tua ahih ciangin Absalom tai-in Geshur kiangah pai a, tua lai-ah kum thum sung om hi. Tua ciangin kumpipa in Absalom ngai-in hong mahmah hi; bang hang hiam cih leh amah si hi, ci-in thei khin ahih manin Amnon thu-ah kihehnem hi. Tu-in Zeru-iah’ tapa Joab in kumpipa in Absalom a ngaihna thu phawk hi. Tua ciangin Joab in Tekoa-ah mi sawlin tua panin numei pil khat la-in ama kiangah, “A thuum mi bangin kineih in la, thuumna puante silh in; nangmah in sathau nilh kei in la, misi hangin ni tampi a thuum khin numei bangin gamta in; tua ciangin kumpipa kiangah pai in la, hih bangin ama kiangah thugen in,” a ci hi. Tua ahih ciangin Joab in ama gen ding thute a hilh hi. Tekoa numei kumpipa kiangah a pai ciangin lei-ah mai pukin zahtakna bawl a, “Hong huh in, Aw kumpipa,” a ci hi. Tua ciangin kumpipa in ama kiangah, “Na lungkhamna bang ahi hiam?” a ci hi. Amah in dawngin, “Kalai, meigong numei khat ka hi hi; ka pasal si hi. Na nasemnu in tapa nih nei a, lo sungah amaute khat leh khat kitawng uh hi. Amaute a khen ding kuamah om lo a, khat in a khatpa satin that hi. Tu-in ka beh buppi na nasemnu’ langah hong pang uh a, amaute in, ‘Ama thah a sanggampa’ nuntakna tangin amah ka thah theih nadingun a sanggampa a sat mipa hong pia in,’ hong ci uh hi; tua bangin amaute in innluahpa zong susia ding uh hi. Tua bangin amaute in a om lai ka lametna-pa beisakin leitungah ka pasal’ suan-le-khak a suakta omsak lo ding uh hi,” a ci hi. Tua ciangin kumpipa in numei kiangah, “Na inn-ah ciah in, nang tawh kisai-in thu ka pia ding hi,” a ci hi. Tua ciangin Tekoa numei in kumpipa kiangah, “Ka to kumpipa aw, keima tung leh ka innkuan tungah mawhna om ta hen; kumpipa leh a tokhom mawhpeng ta hen,” a ci hi. Kumpipa in, “Nang tungah mi khatpeuh in thu khatpeuh hong gen leh kei kiangah amah hong paipih in, amah in nang hong su kik ngei nawn lo ding hi,” a ci hi. Tua ciangin amah in, “Phulapa in that nawn loin, ka tapa a kisuksiat loh nadingin kumpipa in Topa na Pasian tungah na kiciam ding kong thum hi,” a ci hi. Amah in, “ Topa in a nungta ahih mah bangin, na tapa’ samzang khat zong lei-ah kia lo ding hi,” ci-in a kiciam hi. Tua ciangin numei in, “Ka to kumpipa tungah na nasemnu kam khat gensak in, ci-in kong thum hi,” a ci hi. Amah in, “Gen in,” a ci hi. Tua ciangin numei in, “Tua ahih leh bang hangin Pasian’ mite’ langah tua bang na hih sawm na hi hiam? Bang hang hiam cih leh hih bang lungsim khentatna na piakna-ah kumpipa in a hawlkhiatpa innah a paipih loh lai teng kumpipa amahmah mawh kipia ahi hi. Eite khempeuh i si ding hi, a kikhawm kik thei lo lei lakah a bua tui tawh i kibang hi; ahih hangin a hawlkhiatpa a kipuasehin a koih loh nadingin lampi a zong mipa’ nuntakna Pasian in lakhia lo ding hi. Mite in kei hong lausak ahih manin tu-in ka to kumpipa kiangah hih thu gen dingin kong pai hi; na nasemnu in, “Kumpipa kiangah thu ka gen ding hi; kumpipa in a nasemnu’ nget na sem kha ding hi. Bang hang hiam cih leh kumpipa in za-in, Pasian gamh panin kei leh ka tapa hong susia khawm ding mipa’ khut panin a nasemnu honkhia ding hi,’ ci-in ngaihsun hi. Na nasemnu in, ‘Ka to kumpipa’ kammal in nopsakna hong pia ding hi,’ ci-in ngaihsun hi; bang hang hiam cih leh ka to kumpipa in a pha leh a sia a khen thei dingin Pasian’ vantungmi tawh kibang hi. Topa na Pasian in nang tawh hong om ta hen!” a ci hi. Tua ciangin kumpipa in numei dawngin, “Nang kong dot peuhpeuh hong im kei in,” a ci hi. Numei in, “Ka to kumpipa in gen hen,” a ci hi. Kumpipa in, “Hih thu khempeuh ah Joab’ vaihawmna tawh nang hong pai na hi hiam?” a ci hi. Numei in dawngin, “Nang in a nungta taktak na hih mah bangin, ka to kumpipa aw, ka to kumpipa’ gensa khat peuhpeuh panin tak lamah ahi a, vei lamah ahi zongin mi khat pial thei lo hi. Kei hong sawlpa in na sempa Joab ahi hi; nasemnu’ kam sungah hih thute a guangpa in amah ahi hi. Na thu paizia khek nadingin na nasempa Joab in hih thu hih hi. Ahih hangin ka topa in leitunga om na khempeuh theih nadingin Pasian’ vantungmi pilna tawh a kibang pilna nei hi,” a ci hi. Tua ciangin kumpipa in Joab kiangah, “Tu-in en in, hih thu kong pia hi; pai in, tangvalpa Absalom hong ciahpih kik in,” a ci hi. Tua ciangin Joab lei-ah maipuk suk a, zahtakna bawlin kumpipa thupha pia hi; tua ciangin Joab in, “Kumpipa in a nasempa’ ngetna a piakna-ah, tu ni-in ka to kumpipa nangma muhna-ah maipha ka muhna na nasempa in thei hi,” a ci hi. Tua ahih ciangin Joab ding-in Geshur-ah pai a, Jerusalem ah Absalom ciahpih hi. Tua ciangin kumpipa in, “Ama inn-ah amah tuam ten’ sak in; amah keima omna-ah hong pai lo ding hi,” a ci hi. Tua ahih ciangin Absalom ama inn-ah tuam ten’in kumpipa’ omna-ah pai lo hi. Tu-in Israelte khempeuh sungah a mel hoihna hangin Absalom bangin tua zahin phat ding kuamah om lo hi; a khe nuai-a kipan a lu zang dongin ama tungah pauban’na om lo hi. Amah in a sam a met ciangin (bang hang hiam cih leh kum bei simin amah in met zel hi; a sam a gih ciangin amah in met hi), amah in a sam tawikhai a, kumpipa’ gik tehna-in shekel zanih gik hi. Absalom’ sung pan tapa thum, leh a min Tamar ahi, ta numei khat suak hi; tua nu in numei mel hoih mahmah khat ahi hi. Tua ahih ciangin kumpipa’ omna ah pai loin Absalom kum nih bit Jerusalem ah teeng hi. Tua ciangin kumpipa kianga sawl dingin Absalom in Joab samsak hi; ahih hangin ama kiangah Joab hong pai lo hi. Amah in a nihveina sawl a, ahih hangin Joab hong pai lo veve hi. Tua ciangin amah in a nasemte kiangah, “En un, Joab’ lo in keima aa zom hi a, tua lai-ah amah in mangbuhham nei hi; pai un la mei tawh hal un,” a ci hi. Tua ahih ciangin Absalom’ nasemte in a lo mei tawh hal uh hi. Tua ciangin Joab ding-in Absalom kiang ama inn-ah pai a, ama kiangah, “Bang hangin na nasemte in mei tawh ka lo hong halsak ahi uh hiam?” a ci hi. Absalom in Joab dawngin, “En in, nang kiangah thu kong puak a, ‘Kumpipa kiangah nang hong sawlin, “Bang hangin Geshur panin hong pai ka hi hiam? Tua lai-ah om lai leng kei adingin hoihzaw ding hi,” ci-in a va dong dingin hih lai-ah nong pai nading kong gen hi. Tua ahih ciangin tu-in kumpipa omna-ah kei hong paisak in; kei tungah mawhna a om leh amah hong that sak in,’ ka ci hi.” a ci hi. Tua ciangin kumpipa kiangah Joab pai-in ama kiangah gen hi; tua ciangin amah in Absalom sam hi. Tua ahih ciangin amah kumpipa kiangah hong pai a, a mai lei ngatin kumpipa’ mai-ah kun hi; tua ciangin kumpipa in Absalom nam hi. Hih hun khit ciangin Absalom in leeng khat leh sakolte, leh ama mai-ah a tai ding mi sawmnga la hi. Absalom tho baihin kulh kongpi lamgei-ah tu zel hi: mi khatpeuh in thu khen sak dingin kumpipa mai-ah pai nading thu a neih ciangin Absalom in amah samin “Koi lai khuapi pan na hi hiam?” a ci hi. Amah in, “Na nasempa in Israelte sungah tua minam tua khua hi,” a cih ciangin Absalom in ama kiangah, “Thei in, na thugente hoihin man hi; ahih hangin na thu a khen dingin kumpipa in a koih mi om lo hi,” a ci hi. Tham loin Absalom in, “Gam sungah kei thukhen hi leng! Thu ahi a, a hang khat peuhpeuh ahi zongin a nei mi peuhmah kei kiangah hong pai ding a, keimah in ama tungah thu a tangin ka khen ding hi,” a ci lai hi. Ama tungah zahtakna bawl dingin mi khat a nai-ah hong pai peuhmah ciangin amah in a khut zan a, amah lenin nam hi. Tua bangin Absalom in kumpipa kiangah thu khen sak dingin hong pai Israelte khempeuh tungah hih hi; tua ahih ciangin Absalom in Israel mite’ lungsim na zo hi. Kum li a cin’ ciangin Absalom in kumpipa kiangah, “Kei hong pai sak in la, Topa tungah ka ciamsa ka thuciam, Hebron-ah hong pia sak in, ci-in kong thum hi. Bang hang hiam cih leh Aram gam Geshur-ah ka om lai takin na nasempa in thuciam khat kiciam a, ‘ Topa in Jerusalem ah kei hong paipih kik taktak leh Topa tungah biakna ka pia ding hi,’ ka ci hi,” a ci hi. Kumpipa in ama kiangah, “Nuam takin pai in,” a ci hi. Tua ahih ciangin amah ding-in Hebron-ah pai hi. Ahih hangin Absalom in a simtham-a kamtaite Israel minam khempeuh kiangah sawl a, “Peengkul awging na zak phetun, ‘Absalom in Hebron-ah kumpi hi!’ ci un,” a ci hi. A kisam mi zanihte Jerusalem panin Absalom tawh pai uh a, amaute lungsim hoih tawh pai uh a, bangmah thei lo uh hi. Absalom in biaknate a piak lai takin David’ thu-lam-lakpa’ Giloh mi Ahithofel, ama khuapi Giloh panin sam sak hi. Tua ciangin sawmsimna hong hat semsem a, Absalom tawh a om mite kibehlaplap hi. Tua ciangin kamtai khat David kiangah hong pai-in “Israel mite’ lungsim Absalom’ lamah pai khin hi,” ci-in gen hi. Tua ciangin David in Jerusalem ah amah tawh a om a nasemte khempeuh kiangah, “Ding un, tai ni; tua hi kei leh Absalom’ kiang panin eite’ suahtak nading om lo ding hi; manlangin pai ni, tua hi kei leh amah in eite hong pha pak ding a, eite tungah siatna hong tung sakin namsau tawh khuapi hong vat ding uh hi,” a ci hi. Tua ciangin kumpipa’ nasemte in kumpipa kiangah, “En in, ka to kumpipa in na khensat peuhpeuh a sem dingin na nasemte kiging hi,” a ci uh hi. Tua ahih ciangin kumpipa paikhia a, ama innkuan khempeuh in ama nung zui uh hi. Kumpipa in inn kem dingin zineu sawm nusia hi. Tua ciangin kumpipa paikhia a, mi khempeuh in ama nung zui uh hi; tua ciangin inn tawpna-ah amaute khawl uh hi. Tua ciangin a nasemte khempeuh in amah nawkin pai uh hi; tua ciangin Khereth mi khempeuh, Peleth mi khempeuh, leh Gath panin amah a zui Gath mi zagukte khempeuh, kumpipa mai nawkin paisuak uh hi. Tua ciangin kumpipa in Gath mi Ittai kiangah, “Bang hangin nang zong ko tawh hong pai na hi hiam? Ciahkik in la, kumpipa tawh om in; bang hang hiam cih leh nangmah in gamdang mi na hi a, na inn panin gamdang ah a om zong na hi hi. Nangmah in zan ni-a hong pai bek na hi hi, koi lai munah kei pai ding cih theih lopi-in kote tawh a kawivak dingin nang hong bawl ding ka hi hiam? Ciahkik in, na sanggamte ciahpih in; Topa in itna kip leh thumanna nang tungah hong lak ta hen,” a ci hi. Ahih hangin Ittai in kumpipa dawngin, “ Topa nungta-in, ka to kumpipa nungta ahih mah bangin, sih nading ahi a, hin’ nading ahi zongin ka to kumpipa a omna peuhpeuh-ah na nasempa om ding hi,” a ci hi. Tua ciangin David in Ittai kiangah, “Tua ahih leh pai in, paisuak in,” a ci hi. Tua ahih ciangin Gath mi Ittai, a mi khempeuh leh amah tawh a om a naupang khempeuh tawh paisuak hi. Tua ahih ciangin mi khempeuh a pai lai takin gamsung mi khempeuh a gingin kapkhia uh a, kumpipa in Kidron lui kantanin, mi khempeuh gamlak lamah paisuak uh hi. Tua ciangin Abiathar hong paito a, biakpiakna pia hi; en in, Zadok zong Levi mite khempeuh tawh hong pai-in Pasian’ thuciamna singkuang hong pua uh hi; mi khempeuh in khuapi a khen’ khit mateng amaute in Pasian’ thuciamna singkuang nga uh hi. Tua ciangin kumpipa in Zadok kiangah, “Pasian thuciamna singkuang khuapi sungah pua kik in. Topa ’ maipha na muh nak leh, amah in kei hong paipih kikin amah leh a omna mun hong musak kik ding hi; ahih hangin amah in, ‘nang tungah lungkimna ka nei kei hi,’ hong cih leh, en in, hih lai-ah kei ka om hi, amah in hoih a sak bangin kei tungah hong hih hen,” a ci hi. Kumpipa in zong siampi Zadok kiangah, nang in thu-mu-pa hi lo na hi hiam? “En in, nuam takin nang leh Abiathar, na tapa nihte Ahima-az leh Abiathar’ tapa Jonathan tawh khuapi sungah ciahkik un. Thei in, keimah thu zasak dingin nang kiang panin thu hong tun’ mateng gamlak tui ngahmunte-ah ka ngak ding hi,” a ci hi. Tua ahih ciangin Zadok leh Abiathar in Pasian’ thuciamna singkuang Jerusalem ah puakik uh hi; amaute tua lai-ah om uh hi. Ahih hangin Oliv Mual tung kahtohna-ah David paito-in, khe guak leh lu tuamsa-in a pai kawmin kap hi; amah tawh a om mi khempeuh in a lu uh khuhin paito uh a, a pai kawmun kap uh hi. Tua ciangin David kiangah, “Ahithofel zong mi sawmsimte lakah Absalom tawh om hi,” ci-in kigen hi. Tua ciangin David in, “ Topa aw, kong thum hi, Ahithofel’ thugente haina-in na heisak in,” a ci hi. Pasian a kibiakna mun mual dawnah David a tun’ ciangin, en in, Arkhi mi Hushai amah dawn dingin a puantungsilh balkeksa leh a lu tungah lei baang tawh hong pai hi. David in ama kiangah, “Nang in kei tawh hong paisuak lecin kei adingin vangik na hi ding hi, Ahih hangin khuapi sungah nang na ciahkik leh, Absalom kiangah, ‘Aw kumpipa, keimah in nangma nasem ka hi ding hi; hun beisa sungah na pa’ nasem ka hih mah bangin tu-in nangma nasem ka hi ding hi,’ ci lecin, Ahithofel thugente kei’ adingin na khaktan zo ding hi. Siampi Zadok leh Abiathar tua lai-ah nang tawh om hi lo ahi hiam? Tua ahih ciangin kumpipa’ inn pan na zak peuhpeuh siampi Zadok leh Abiathar kiangah gen in. En in, amau’ tapate gel, Zadok’ tapa Ahima-az, leh Abiathar’ tapa Jonathan, amaute tawh omkhawm hi; na zak peuhpeuh amaute’ tung tawnin kei tungah nong puak ding hi,” a ci hi. Tua ahih ciangin Jerusalem ah Absalom a lut lai takin David’ lawmpa Hushai khuapi sungah pai hi. David in mualdawn a khen’ khit tawmvei ciangin Mefibosheth nasempa Ziba in, anlum lum zanih, leenggah-phehkeu bawk zakhat, khuakhal singgah zakhat, leh leenggahzu savun um khat a pua van a kivawh la nih tawh amah na dawn hi. Tua ciangin kumpipa in Ziba kiangah, “Bang hangin hihte hong paipih na hi hiam?” a ci hi. Ziba in dawngin, “Late in kumpipa’ innkuante a tuan’ nading, anlum leh khuakhal singgah in tangvalte’ nek ding, leh leenggahzu in gamlakah a gimte’ dawn ding ahi hi,” a ci hi. Tua ciangin kumpipa in, “Na topa Saul’ tupa koi-ah om ahi hiam?” a ci hi. Ziba in kumpipa kiangah, “En in, amah Jerusalem ah om hi; bang hang hiam cih leh amah in, ‘Tu ni-in Israel mite in ka pu Saul’ kumpigam kei hong pia kik ding hi,’ ci hi,” a ci hi. Tua ciangin kumpipa in Ziba kiangah, “En in, Mefibosheth’ neihsa khempeuh tu-in nangma aa ahi hi,” a ci hi. Tua ciangin Ziba in, “Kei in nangma nasempa ka hi hi; ka to kumpipa nangma muhna-ah maipha hong musak tawntung in,” a ci hi. Bahurim-ah Kumpi David a tun’ ciangin Saul’ innsung innkuan mi, Gera’ tapa Shimei min nei mi khat hong paikhia hi; amah hong pai kawmin samsia tawntung hi. Amah in David leh Kumpi David nasemte khempeuh suang tawh deng hi; mi khempeuh leh mi thahatte khempeuh ama taklam leh veilamah om hi. Shimei in a samsiat kawmin, “Pai mang, pai mang, nang mi thatpa, bangmah man lo mipa! Ama tangin na uk Saul’ innkuante na thahna hangin Topa in nangma tungah hong thuk hi; Topa in na tapa Absalom’ tungah kumpigam pia khin ta hi. Thei in, na siatna nangma tungah hong tu hi; bang hang hiam cih leh nang in mi thatpa na hi hi,” a ci hi. Tua ciangin Zeru-iah’ tapa Abishai in kumpipa kiangah, “Bang hangin hih ui si a bang lel mi khat in ka to kumpipa samsia ding ahi hiam? Hong paisak in la, a lu hong tankhia sak in,” a ci hi. Ahih hangin kumpipa in, “No Zeru-iah’ tapate aw, note tawh bang kisai ahi hiam? Topa in ama kiangah, ‘David samsia in,’ a cihna hangin hong samsia ahih leh, ‘Bang hangin tua ci hih na hi hiam?’ kua in ci ding ahi hiam?” a ci hi. Tua ciangin David in Abishai leh a nasemte khempeuh kiangah, “En un, keima tapa mahmah in kei thah dingin hong zong hi; hih Benjamin mi in bangzahin tu-in hong zong zaw ding hiam! Ama thu-in omsak un, amah samsia sak un; bang hang hiam cih leh Topa in amah sawl hi. Topa in ka thuakna hong en-in, tu ni-a kei hong samsiatna hangin Topa in a hoih tawh kei hong thuk kha ding hi,” a ci hi. Tua ahih ciangin ama gal-khat mual pangah Shimei pai a, a pai kawmin samsia-in suangte tawh amah dengin leivui a theh lai takin David leh a mite lampi-ah paipai uh hi. Tua ciangin kumpipa leh amah tawh a om mi khempeuhte gim mahmahin Jordan tung uh hi; tua lai-ah amah kitawldamsak hi. Tu-in Absalom leh Israel mite khempeuh Jerusalem hong tung uh a, Ahithofel amah tawh om hi. Tua ciangin David lam a lakpa, Arkhi mi Hushai in Absalom kiangah hong tun’ ciangin, amah in Absalom kiangah, “Kumpipa khan’ sawt hen! Kumpipa khan’ sawt hen! a ci hi. Absalom in Hushai kiangah, “Hih in na lawmpa’ tungah na thumanna ahi hiam? Bang hangin na lawmpa tawh pai lo na hi hiam?” a ci hi. Hushai in Absalom kiangah, “Hi lo hi; Topa leh hih mite leh Israel mite khempeuh adingin a kiteel mipa’ aa ka hi ding a, amah tawh ka om ding hi. Tua banah, kua na sem ding ka hi hiam? Ama tapa hilo ding ahi hiam? Na pa’ na ka sep bangin nangma na ka sem ding hi,” a ci hi. Tua ciangin Absalom in Ahithofel kiangah, “Na ngaihsutna hong pia in; bang hih ding i hi hiam?” a ci hi. Ahithofel in Absalom kiangah, “Inn kem dingin a nusiat na pa’ zineute luppih in; tua ciangin nangmah in na pa na muhdah bawlna thu Israelte khempeuh in za-in nangmah tawh a om mite khempeuh’ thakhauhsak ding hi,” a ci hi. Tua ahih ciangin amaute in innkhumzangah Absalom’ adingin puanbuk khat lam uh hi; tua ciangin Israelte khempeuh’ muhna-ah Absalom in a pa’ zineute luppih hi. Tua hun lai-in Ahithofel’ thugente in Pasian’ kammal mahmah bangin kingaihsun hi; tua bangin David leh Absalom in Ahithofel’ thugente thupi ngaihsut uh hi. Tua tham loin Ahithofel in Absalom kiangah, “Mi tulsawm leh tulnih hong teelsak in, keimah kuan khia-in tu zanin David ka delh ding hi. Amah gimin lungkia-in a om lai takin amah ka hih ding a, amah ka amkhamsak ding hi; tua ciangin amah tawh a om mi khempeuh tai ding uh hi. Keimah in kumpipa bek ka satpuk ding a, mothak in a pasal kiang inn-ah hong ciah bangin mi khempeuh nang kiangah kong ciahpih kik ding hi. Nangmah in mi khat bek’ nuntakna na zong hi, midang khempeuh nuam takin om ding uh hi,” a ci hi. Tua thugenna in Absalom leh Israel upate khempeuh lungkimsak hi. Tua ciangin Absalom in, “Arkhi mi Hushai zong sam un, ama thugen za ni,” a ci hi. Absalom kiangah Hushai hong pai ciangin, Absalom in ama kiangah, “Tua bangin Ahithofel in thugen hi; ama genna bangin i hih ding hiam? Tua ahih kei leh nang gen in,” a ci hi. Tua ciangin Hushai in Absalom kiangah, “Tu tungin Ahithofel’ hong thugen hoih lo hi,” a ci hi. Hushai in tua tham loin, “Na pa leh a mite mi thahat hi a, gam lakah a note a kilaksak vompi bangin amaute a hehna na thei hi. Tua ban-ah na pa in galdona-ah a siam ahi hi; amah in mite tawh zan-in omkhawm lo ding hi. En in, tu nangawnin amah dum khat sungah ahi a, mun dang khatah ahi zongin bu khin ding hi. Kisim cilna-ah mi pawlkhat a tuk ciangin tua thu a za mi peuhpeuh in, ‘Absalom a zui mite lakah sihna om khin hi,’ ci ding hi. Tua ciangin a lungtang humpinelkai lungtang a bang galhang mipa nangawn launa tawh lungkia gawp ding hi; bang hang hiam cih leh Israelte khempeuh in na pa mi thahat ahihna leh amah tawh a om mite mi hangsan ahihna thei uh hi. Ahih hangin keima ngaihsutna in, Dan panin Bersheba ciang dong, tuipi gei-a sehnel bangin a tam Israelte khempeuh nang kiangah khawmin galdo dingin nangmah mah na pai ding hi. Tua ahih ciangin amah i muhna mun khatpeuhah amah i hih ding a, lei lakah daitui kia bangin amah i tuam ding hi; amah leh amah tawh a om mi khempeuh khat zong kisiit lo ding hi. Amah khuapi khat sungah a nungkik leh, Israelte khempeuh in tua khuapi sungah khauhual paipihin tua lai mun-ah suangtang khat nangawn a kimu nawn lo dingin kuam sungah tua khua i kaikhia ding hi,” a ci hi. Tua ciangin Absalom leh Israel mite khempeuh in, “Arkhi mi Hushai’ thugen in Ahithofel’ thugen sangin hoihzaw hi,” a ci uh hi. Bang hang hiam cih leh Topa in Absalom tungah siatna a tun’sak theih nadingin Ahithofel’ thugen hoih tawh a zawh ding Topa in a sehsa ahi hi. Tua ciangin Hushai in siampi Zadok leh Abiathar kiangah, “Tua bang tua bangin Ahithofel in Absalom leh Israel upate kiangah gen hi; tua bang tua bangin keimah in thu ka gen hi. Tua ahih ciangin tu-in manlang takin sawl in la, David kiangah, ‘Tu zanin gamlak tui ngahmunte-ah giak kei in la, bangbang hita leh gal kah in; tua hi kei leh kumpipa leh amah tawh a om mite khempeuh hong kivalhtum ding hi,’ ci-in gen in,” a ci hi. Tu-in Jonathan leh Ahima-az in Enrogel-ah ngak uh hi; nasem numei khat pai-in amaute kiangah genin, amaute pai-in Kumpi David kiangah gen zel uh hi; bang hiam cih leh amaute khuapi sungah a lut uh a kimu lo ding ahi hi. Ahih hangin tangval khat in amaute mu-in Absalom kiangah gen hi; tua ahih ciangin amaute gel manlang takin paikhia uh a, a huang sungah tuikhuk a nei Bahurim-a mi khat’ inn-ah tung uh hi; amaute tuikhuk sungah paisuk uh hi. Tua ciangin a numei in khuhna khat la-in tuikhuk gong tungah phah a, tua tungah an zalh hi; bangmah kithei lo hi. Absalom’ nasemte tua nu’ inn-ah hong tun’ ciangin amaute in, “Ahima-az leh Jonathan koi lai-ah om ahi uh hiam?” a ci uh hi. A numei in amaute kiangah, “amaute lui gal khatah paikhin zo uh hi,” a ci hi. Amaute in zongin a muh zawh loh uh ciangin Jerusalem ah ciahkik uh hi. Amaute a paikhiat khit ciangin tuikhuk panin mite hong paikhia uh a, pai-in Kumpi David kiangah gen uh hi. Amaute in David kiangah, “Ding in, tui gal khatah manlang takin pai in; bang hang hiam cih leh tua bang tua bangin nangma lang khatah Ahithofel in thu gen hi,” a ci uh hi. Tua ciangin David leh amah tawh a om mi khempeuh ding uh a, amaute in Jordan kantan uh hi; khuavak ciangin Jordan a kantan nai lo khat beek om nawn lo uh hi. Ahithofel in ama thugen a kizuih loh a muh ciangin a la tutphah vawhin ama khuapi a inn-ah nuak ciah hi. Tua ciangin amah in a innkuan vai hawmsak a, tua ciangin amahmah gui-awk hi; amah si a, a pa’ han-ah kivui hi. Tua ciangin Mahanaim-ah David tung hi. Absalom in Israel mite khempeuh tawh Jordan kantan hi. Tu-in Absalom in Joab tangin galkapte a uk dingin Amasa koih khin hi. Amasa in Nahash’ tanu Abigail a ten’pih, Ishmael mi ahi Ithra min nei mi khat’ tapa hi a, ama nu Abigail leh Joab’ nu Zeru-iah unau ahi hi. Israelte leh Absalom in Gilead gamah giahphual sat uh hi. Mahanaim-ah David a tun’ ciangin, Ammon mite’ gam Rabbah panin Nahash’ tapa Shobi, leh Lodebar panin Ammiel’ tapa Makhir, leh Rogelim panin Gilead mi Barzillai, in lupnate, kuangte, leh leibeelte, mangbuh, mangbuhham, an, ankan, bepi leh basan, khuaizu leh bawngnawi-thaukhal leh tuu leh sathaukhalte, David leh amah tawh a om mite’ nek dingin hong puak uh hi; bang hang hiam cih leh amaute in, “Mite gam lakah gilkialin, gimin dangtak uh hi,” a ci uh hi. Tua ciangin David in amah tawh a om mite khawmin a tultul a ukte leh a zaza a ukte-in koih hi. David in galkapte sawlkhia-in, seh-thum suah seh-khat Joab’ ukna nuai-ah, seh-thum suah seh-khat Joab’ sanggampa Zeru-iah’ tapa Abishai’ ukna nuai-ah, leh seh-thum suah seh-khat Gath mi Ittai’ ukna nuai-ah omsak hi. Tua ciangin kumpipa in mite kiangah, “Note tawh kei zong kong kuankhia ding hi,” a ci hi. Ahih hangin mite in, “Nang nong kuan khia kei ding hi. Bang hang hiam cih leh kote tai le-ung amaute in kote phamawh hong sa lo ding hi. Kote kimkhat si le-ung amaute in kote phamawh hong sa lo ding hi. Ahih hangin nang in kote tulsawm zahin na manpha hi; tua ahih ciangin khuapi panin kote kiangah huhna hong puak lecin hoihzaw hi,” a ci uh hi. Kumpipa in amaute kiangah, “Note in hoih na sakpen bangun ka gamta ding hi,” a ci hi. Tua ahih ciangin galkap khempeuh a zaza leh a tultul-in a paikhiat lai takin kulh kongpi pangah kumpipa ding hi. Tua ciangin kumpipa in Joab leh Abishai leh Ittai thu pia-in, “Keimah nong khualna-un tangvalpa Absalom hong dawm mahmah un,” a ci hi. Kumpipa in Absalom’ thu galkapmangte tungah a vaikhakna mi khempeuh in za uh hi. Tua ahih ciangin galkapte Israelte do dingin gamlakah kuankhia uh hi; Efraim tulak-ah gal kido uh hi. David’ nasemte in tua lai-ah Israel mite zo uh a, tua ni-a mi kithat tam a, mi tulsawmnih ahi hi. Tua gam maitang tung khempeuhah gal kikapna om kim hi; tua ni-in namsau’ thah sangin thudang hangin tulak-a si mi tamzaw hi. David’ nasemte in Absalom tuak kha uh hi. Absalom in a la tungah tuang a, tawsaw lianpi hiang pha nuai khatah a la pai-in, a lutang tawsaw lakah awk a, ama nuai-a om la a paisuak lai takin van leh lei kikalah amah a kikhai-in kinusia hi. Tua ciangin mi khat in mu-in Joab kiangah gen a, “En in, tawsaw khat kawm-ah Absalom kikhai ka mu hi,” a ci hi. Joab in ama kiangah a gen mipa kiangah, “Bang, nang amah mu maw! Bang hangin lei lakah amah satkhia suk lo na hi hiam? Nang tungah ngun peek sawm leh kawnggak khat hong pia ngel ding hi ve’ng,” a ci hi. Ahih hangin mipa in Joab kiangah, “Ngun peek tulkhat ka khut sungah koih ta lecin zong kumpipa’ tapa hih dingin ka khutmeno khat zong ka zankhia kei ding hi; bang hang hiam cih leh kote’ zakin kumpipa in nang leh Abishai leh Ittai thu hong pia in, ‘Keimah nong khualna-un tangvalpa Absalom hong dawm un,’ hong ci hi. Thudang khatah, amah langpangin zuautat leng (Kumpipa tungah a ki-im bangmah om lo hi), nangmah mah kikang koihin nong hu kei ding hi,” a ci hi. Joab in, “Hih bangin nang tawh hun ka beisak kei ding hi,” a ci hi. Tua ciangin amah in thaltang thum la-in tawsaw kawm-ah Absalom a hing lai-in a lutang sungah tuate siat hi. Tua ciangin Joab’ galhiam tawite tangval sawm in Absalom umcih uh a, amah satin that uh hi. Tua ciangin Joab in peengkul tum a, Israelte a delhna panun galkapte hong ciahkik uh hi; bang hang hiam cih leh Joab in amaute kho hi. Tua ciangin amaute in Absalom la-in tulak-a dum lianpi khat sungah amah paai uh-a, ama tungah suangcianlian mahmah khat ciang uh hi; tua ciangin Israelte khempeuh amau’ inn ciatah tai uh hi. Tu-in Absalom in ama nuntak sungin khuampi khat la-in ama adingin phutin Kumpipa’ Kuam-ah om hi; bang hang hiam cih leh amah in, “Keima min hong zom ding tapa ka nei kei hi,” a ci hi; tua khuampi ama min tamin phuak a, tu ni dongin Absalom’ Mual kici hi. Tua ciangin Zadok’ tapa Ahima-az in, “Kei hong taisak in la, Topa in ama galte’ vangliatna panin amah a hotkhiatna lungdamna thu kumpipa kiangah hong puaksak in,” a ci hi. Joab in ama kiangah, “Nang in tu ni-in lungdamna thu na puak kei ding hi; a ni dang ciangin lungdamna thu na puak thei ding hi; ahih hangin tu ni-in lungdamna thu na puak kei ding hi; bang hang hiam cih leh kumpipa’ tapa si hi,” a ci hi. Tua ciangin Joab in Kush mipa kiangah, “Pai in, na muhsa teng kumpipa kiangah va gen in,” a ci hi. Kush mipa Joab’ mai-ah kunin, tua ciangin tai hi. Tua ciangin Zadok’ tapa Ahima-za in Joab kiangah, “Bangbang piang ta leh kei zong Kush mipa nungah hong tai sak in,” a ci kik hi. Joab in, “Lungdamna thu puakna hangin thaman ngah lo ding cih thei napi-in, ka tapa aw, bang hangin tai ding na hi hiam?” a ci hi. Amah in, “Bangbang piang ta leh ka tai ding hi,” a ci hi. Tua ahih ciangin amah in ama kiangah, “Tai in,” a ci hi. Tua ciangin Ahima-az zanglei lam tawnin tai a, Kush mipa makhelh hi. Tu-in David kulh kongpi nihte kikalah tu hi; galvilpa kulh kongpi khumzangah paito a, amah in a lu sangsakin a khuadak ciangin amah guakin hong tai mi khat a mu hi. Galvilpa in samin kumpipa kiangah gen hi. Kumpipa in, “Ama guak ahih leh thuhoih ahi hi,” a ci hi. Amah hong nawh tai-in hong nai hi. Tua ciangin galvilpa in midang khat hong tai mu hi; galvilpa in kulh kongpi-ah samin, “En un, midang khat amah guak hong tai!” a ci hi. Kumpipa in, “amah in zong lungdamna thu hong paipih hi,” a ci hi. Tua ciangin galvilpa in, “a masapa’ tai in Zadok’ tapa Ahima-az’ tai tawh kibang hi, ci-in ka ngaihsun hi,” a ci hi. Tua ciangin kumpipa in, “amah mihoih hi a, lungdamna thuhoih tawh hong pai hi,” a ci hi. Tua ciangin kumpipa kiangah Ahima-az kiko-in, “Na khempeuh hoih hi,” a ci hi. Tua ciangin kumpipa mai-ah lei maingatin amah kun a, “ka to kumpipa’ lang khatah a khut a liik mite nangma khut sungah a hong pia Topa na Pasian in thupha ngah ta hen,” a ci hi. Tua ciangin kumpipa in, “Tangvalpa Absalom a hoihhoih hiam?” a ci hi. Ahima-az in dawngin, “Joab in na nasempa a sawl ciangin buaina lianpi khat ka mu a, ahih hangin bang hiam cih ka thei kei hi,” a ci hi. Tua ciangin kumpipa in, “Kiheikhia in la, hih lai-ah ding in,” a ci hi. Tua ciangin amah kihei khia-in taang loin ding hi. Tua ciangin en in, Kush mipa hong tung hi; Kush mipa in, “Ka to kumpipa adingin lungdam nading thu om! Bang hang hiam cih leh nangma langah a ding mi khempeuh’ vangliatna panin tu ni-in Topa in nang hong honkhia hi,” a ci hi. Kumpipa in Kush mipa kiangah, “Tangvalpa Absalom a hoihhoih hiam?” a ci hi. Kush mipa in dawngin, “Ka to kumpipa’ galte, leh siat nadingin nangma lang khatah a ding khempeuh, tua tangvalpa bang ta hen,” a ci hi. Tua ciangin kumpipa lungsim nakpi takin sukha a, kulh kongpi tunga inndei sungah paito-in kap hi; a pai kawmin amah in, “Aw ka tapa Absalom, ka tapa, ka tapa Absalom! Nangma tangin kei sizaw taleng. Aw Absalom, ka tapa, ka tapa!” a ci hi. Joab kiangah, “En in, Absalom’ hangin kumpipa kapin thuum hi,” ci-in kigen hi. Tua ahih ciangin tua ni-a gualzawhna mi khempeuh adingin thuumna suak hi; bang hang hiam cih leh tua ni-in mite in, “Kumpipa a tapa’ hangin dah hi,” ci-in za uh hi. Tua ciangin galsung pan a tai uh ciangin a maizum mite a gelsim bangin tua ni-in khuapi sungah mite lut sim uh hi. Kumpipa in a mai khuh a, awging pha tawh kumpipa kapin, “Aw ka tapa Absalom, Aw Absalom, ka tapa, ka tapa!” a ci hi. Tua ciangin kumpipa’ inn sungah Joab hong pai-in, “Tu ni-in nangma nuntakna, leh na tanute leh na tapate’ nuntakna, leh na zite leh na zineute’ nuntakna a hong honkhia na nasemte khempeuh na maizumsak hi; bang hang hiam cih leh nangmah in nang hong mudahte itin nang hong itte na mudah hi. Bang hang hiam cih leh a ukte nasemte nang adingin bangmah ahih lohna tu ni-in na kitelsak hi; bang hang hiam cih leh Absalom hingin kote khempeuh tu ni-in si le ung na nuam ding ka thei hi, Tua ahih ciangin tu-in ding in, paikhia in la, na nasemte tungah kam neem pau in; bang hang hiam cih leh na pai kei leh tu zan ciangin mi khat zong nang kiangah hong om nawn lo ding hi, ci-in Topa min tawh ka kiciam ngam hi; hih thu in na tangval-a kipan tu ciang dong na tungah hong tungsa siatna khempeuh sangin nang adingin siazaw ding hi,” a ci hi. Tua ciangin kumpipa ding-in kulh kongpi-ah a tutna-ah tu hi. Tua ciangin mite kiangah, “En un, kulh kongpi-ah kumpipa tu hi,” ci-in kigen hi; tua ciangin kumpipa mai-ah mi khempeuh hong pai uh hi. Tu-in Israelte amau’ inn ciatah na tai khin uh hi. Israel minam khempeuh sungah mi khempeuh thu kisel uh a, “Kumpipa in i galte’ khut sung panin hong khahkhia-in Filistiate’ khut sung panin hong honkhia hi, tu-in Absalom kiang i gam sung panin amah taikhia hi. Ahih hangin eite tungah sathau i nilh Absalom, gal sungah si hi. Tua ahih ciangin tu-in bang hangin kumpipa lak kik ding bangmah gen lo na hi uh hiam?” a ci uh hi. Tua ciangin Kumpi David in hih thu, siampi Zadok leh Abiathar kiangah puakin, “Judah upate kiangah gen un, ‘Israelte khempeuh’ thu kumpipa kiangah tung khinin, bang hangin note in kumpipa a inn-ah a ciahpih nunung pen hi ding na hi uh hiam? Note in ka beh nai na hi uh a, note in keima si keima sa na hi uh hi; tua ahih ciangin bang hangin note in kumpipa a ciahpih nunung pen hi ding na hi uh hiam?” ci un. Tua ciangin Amasa kiangah, ‘Nang in keima si keima sa hilo na hi hiam? Tu-a kipan Joab’ munah nang in ka galkapte a ukpa na hih kei tak leh Pasian in kei hong dawm kei ta hen, ci hi’ ci-in gen un,” a ci hi. David’ thugen in Judah mite khempeuh’ lungsim thakhatin zo pah hi; tua ahih ciangin amaute in kumpipa kiangah thu puakin, “Nang leh na nasemte khempeuh hong ciahkik un,” a ci hi. Tua ahih ciangin kumpipa Jordan-ah hong paikik hi; tua ciangin kumpipa a dawn ding leh Jordan galah kumpipa a paipih dingin Gilgal-ah Judah mite hong pai uh hi. Tua ciangin Bahurim panin Benjamin mi Gera’ tapa Shimei, Kumpi David dawn dingin Judah mite tawh manlangin paisuk hi; Benjamin sung panin mi tulkhat amah tawh om hi. Tua ciangin Saul’ innsung nasem Ziba, a tapa sawm-le-nga leh a nasem sawmnihte tawh kumpipa’ mai-ah Jordan-ah taisuk a, kumpipa innkuante a galkahpih ding leh ama deihna bangin na a sem dingin amaute in ngahmun ngap uh hi. Jordon a galkah ding ciangin Gera’ tapa Shimei kumpipa’ mai-ah bok suk a, kumpipa kiangah, “Ka to kumpipa in Jesusalem a nusiat ni-in na nasempa’ gamtat khialhna ka topa in kei hong mawhsak kei in la, hong ciamteh kei in; kumpipa in ngaihsutin nei kei in. Bang hang hiam cih leh ka khialh khitna na nasempa in thei hi; tua ahih ciangin, en in, ka to kumpipa dawn dingin a paisuk dingin Josef minam khempeuh sung panin a masa penin tu ni-in kong tung hi,” a ci hi. Zeru-iah’ tapa Abishai in dawngin, “Amah in Topa ’ sathau nilhpa samsia ahih manin hih thu hangin Shimei thah ding hilo ahi hiam?” a ci hi. Ahih hangin David in, “Note in tu ni-in kei lang bangin na om nadingun no Zeru-iah’ tapate tawh kei bang kisai i hi hiam? Tu ni-in Israel sungah mi khatpeuh kithat ding ahi hiam? Bang hang hiam cih leh tu ni-in Israelte tungah kumpi ka hihna thei hilo ka hi hiam?” a ci hi. Tua ciangin kumpipa in Shimei kiangah, “Nang na si kei ding hi,” a ci hi. Kumpipa in a kiciamna ama tungah pia hi. Tua ciangin kumpipa dawn dingin Saul’ tupa Mefibosheth hong paisuk hi; kumpipa a paikhiat ni-a kipan lungnuamin hong tun’ kik ni dong, amah in a khete zeem lo, a khamul puah lo, a puante zong sawp lo hi. Jerusalem panin kumpipa dawn dingin hong pai ciangin kumpipa in ama kiangah, “Mefibosheth aw, bang hangin kei tawh hong pai lo na hi hiam? a ci hi. Amah in dawngin, “Ka topa, Aw Kumpipa, ka nasempa Ziba in kei hong khem hi; bang hang hiam cih leh na nasempa in ama kiangah, ‘Kei a tungah tuangin kumpipa tawh ka pai theih nadingin kei adingin la khat tutphah vawh in,’ ka ci hi. Bang hang hiam na cih leh na nasempa a khe bai hi; Amah in ka to kumpipa kiangah na nasempa hong gensia hi. Ahih hangin ka to kumpipa in Pasian’ vantungmi tawh kibang hi; tua ahih ciangin hoih na sak bangin hih in. Bang hang hiam cih leh ka to kumpipa’ mai-ah ka pa’ innkuante khempeuh a si zah dong dingin a sia ahi hi; ahih hangin nangmah in na sabuai-ah a ne mite lakah na nasempa na koih hi. Tua ahih ciangin kumpipa tungah ka koh ding thu bang nei thuah nawn ding ka hi hiam?” a ci hi. Tua ciangin kumpipa in ama kiangah, “Bang hangin nangma thu gen lailai na hi hiam? Ka lungsim ka khentat zo hi; nang leh Ziba in leitang na hawm ding uh hi,” a ci hi. Tua ciangin Mefibosheth in kumpipa kiangah, “Aw, ka to kumpipa lungnuamin inn hong tung khin ahih nungsang, a vekin amah la sak in,” a ci hi. Tu-in Rogelim panin Gilead mi Barzillai hong paisuk hi; Jordan gal khatah amah kha dingin kumpipa tawh Jordan ciang dong amah paisuak hi. Barzillai in kum sawmgiat a pha, a khangham mahmah mi khat ahi hi; Mahanaim-ah kumpipa a om lai takin amah in an pia hi; bang hang hiam cih leh amah mihau mahmah khat ahi hi. Kumpipa in Barzillai kiangah, “Kei hong zui in la, Jerusalem ah kei tawh om in, nang kong vaak ding hi,” a ci hi. Ahih hangin Barzillai in kumpipa kiangah, “Keimah in kumpipa tawh Jerusalem ah a paito dingin ka nuntak ding kum bangzah hun nei nawn ka hi hiam? Tu ni-in kei kum sawmgiat ka pha hi; a nuam leh a nuam lo khentel thei nawn ka hi hiam? Na nasempa in a nek ahi a, a dawn ahi zongin a limna phawk thei nawn ahi hiam? Lasa numeite leh lasa pasalte’ aw za thei nawn ka hi hiam? Tua ahih ciangin bang hangin ka to kumpipa tungah na nasempa in vangik kibehlap hong hi ding ahi hiam? Na nasempa in Jordan gal khatah tomkha sung kumpipa tawh hong pai ding hi. Bang hangin kumpipa in tua bang thaman tawh kei hong din’kik ding ahi hiam? Keima khuapi sung mah, ka nu leh ka pa’ han nai-ah ka sih theih nadingin na nasempa ciahkik sak in, ci-in kong thum hi. Ahih hangin hih lai-ah na nasempa Khimham om hi, ka to kumpipa tawh amah galkah sakin; hoih na sak bangbangin ama ading hih sak in,” a ci hi. Tua ciangin kumpipa in dawngin, “Khimham in kei tawh hong pai ding a, nangmah in hoih na sak bangbangin ama ading ka hihsak ding hi; kei tung panin na deih khempeuh nangma adingin kong hihsak ding hi,” a ci hi. Tua ciangin mi khempeuh Jordan gal-ah pai uh a, kumpipa zong pai hi; tua ciangin kumpipa in Barzillai namin thupha pia a, ama inn-ah amah ciah hi. Gilgal-ah kumpipa paisuak a, amah tawh Khimham paisuak hi; Judah mi khempeuh leh Israel mi a kimkhatte in zong ama pai nadingah kumpipa kha uh hi. Tua ciangin Israel mite khempeuh kumpipa kiangah hong pai-in kumpipa kiangah, “Bang hangin ka sanggam uh Judah mite in nang hong gu khia-in, kumpipa leh a innkuante, leh David’ mite amah tawh, Jordan gal-ah paipih ahi hiam?” a ci uh hi. Judah mite khempeuh in Israel mite dawngin, “Bang hang hiam cih leh kumpipa in kote tawh beh kinai ahi hi. Tua ahih ciangin bang hangin hih thu-ah heh na hi uh hiam? Kumpipa’ sum bei-in an ne peuhmah ka hi uh hiam? Tua ahih kei leh amah in letsong khat peuhpeuh kote hong pia ahi hiam?” a ci uh hi. Tua ciangin Israel mite in Judah mite dawngin, “Kumpipa sungah tanh sawm ka nei uh a, David sungah zong note sangin tam ka neizaw uh hi. Tua ahih ciangin bang hangin note in kote hong simmawh na hi uh hiam? Kote in i kumpipa ciahpih kik ding a gen masate hilo ka hi uh hiam?” a ci uh hi. Ahih hangin Israel mite’ kammal sangin Judah mite’ kammal kihtakhuai zaw hi. Tu-in tua lai-ah Benjamin mi, Bikhri’ tapa Sheba min nei, mi ginalo khat hong om kha hi; amah in peengkul tumin, “David sungah tanh i nei kei hi, Jessi’ tapa’ sungah gamh i nei kei hi; mi khempeuh na inn ciat uh-ah ciah un, Israelte aw,” a ci hi. Tua ahih ciangin Israel mi khempeuh David kiang pan nungkik uh a, Bikhri’ tapa Sheba zui uh hi; ahih hangin Judah mite in Jordan panin Jerusalem ciang dong a kumpipa uh kip takin zui uh hi. Tua ciangin Jerusalem a inn-ah David tung hi; tua ciangin kumpipa in inn kem dingin a nusiat zineu sawmte la-in a kivil inn khat sungah amaute koih a, amaute vaak hi, ahih hangin amaute luppih lo hi. Tua ahih ciangin amaute a khang laipi-in meigong numei suak uh a, a sih dong uh amaute kikhumcip hi. Tua ciangin kumpipa in Amasa kiangah, “Ni thum sungin Judah mite kei kiangah khawm in la, nangmahmah zong hih lai-ah hong om in,” a ci hi. Tua ahih ciangin Judahte sam dingin Amasa pai hi; ahih hangin ama tungah a kiciam a kisehsa hun khengin amah zekai hi. Tua ciangin David in Abishai kiangah, “Tu-in Bikhri’ tapa Sheba in Absalom sangin eite tungah siatna tamzaw hong bawl ding hi; na topa’ nasemte la in la, amah delh in, tua hi kei leh amah in ama adingin khuapi muanhuaite ngahin eite tungah buaina hong piang sak ding hi,” a ci hi. Tua ciangin Abishai’ nungah Joab leh Khereth mite, Peleth mite leh mi thahat khempeuh pai uh hi; Bikhri’ tapa Sheba a delh dingin Jerusalem panin amaute kuankhia uh hi. Gibeon gam sunga suangtumpi-ah amaute a tun’ uh ciangin amaute dawn dingin Amasa hong pai hi. Tu-in Joab in galkap puan silhin, tua tungah, a kawng tungah a kigak a paai sunga om namsau tawh a kithuah kawnggak khat om a, a mailam manawhin a pai lai takin a namsau seel hi. Tua ciangin Joab in Amasa kiangah, “Ka sanggampa aw, thuhoih ahi hiam?” a ci hi. Tua ciangin Joab in amah a nam dingin a taklam khut tawh a khamul-in Amasa man hi. Ahih hangin Amasa in Joab’ khut sunga om namsau mu lo hi; tua ahih ciangin Joab in tua tawh a pumpi sat a, nihvei sat kul loin a gilpi lei lakah bua khia hi; tua ciangin amah si hi. Tua ciangin Joab leh a sanggampa Abishai in Bikhri’ tapa Sheba delh uh hi. Tua ciangin Joab’ mite khat Amasa’ kiangah ding-in, “Joab a gum peuhmah leh David’aa ahi mi peuhmah in Joab zui un,” a ci hi. Tua ciangin lam lianpi-a ama sisan sungah Amasa kidiahin om hi. Tua lai-a a pai mi khempeuh in amah a muh ciangin khawl hi; mi khempeuh a khawlna tua mipa in amuh ciangin amah in lam lianpi panin gamlakah Amasa puakhia-in ama tungah puan khat paai hi. Lam lianpi panin amah a kilakkhiat khit ciangin Bikhri’ tapa Sheba delh dingin Joab nungah mi khempeuh paisuak uh hi. Tua ciangin Israel minamte khempeuh nawkin Abel Bethma-akah khua ah Sheba pai hi; Bikhri mi khempeuh kikhawm uh a, amah zui-in khuapi sungah tum uh hi. Tua ciangin Joab tawh a om mi khempeuh hong pai-in Bethma-akah khua-a Abel-ah amah umcih uh hi; amaute in khuapi dona-in suangcianpi khat bawl uh a, kulhpi lang khatah ding uh hi; tua ciangin kulhpi a puk theih nadingin amaute in kulhpi nuai to uh hi. Tua ciangin numei pil khat in khuapi panin samin, “Za un! Joab kiangah gen un, ‘Nang tungah thu kong gen theih nadingin hih lai-ah hong pai in,’ ci un,” a ci hi. Tua ciangin tua nu’ nai-ah amah hong pai hi; numei in, “Nang in Joab na hi hiam?” a ci hi. Amah in dawngin, “Ka hi hi,” a ci hi. Tua ciangin numei in ama kiangah, “Na nasemnu’ thugente ngai in,” a ci hi. Amah in dawngin “Ka ngai hi,” a ci hi. Tua ciangin amah in “Taang lai-in amaute in, ‘Abel-ah thu dong sak un,’ ci thei uh hi; tua bangin amaute in thu siangsak uh hi. Keimah in Israelte sungah tua banga kilemna a deih a thuman mi khat ka hi hi; nang in Israel sunga nu ahi khuapi khat suksiat ding na hanciam hi; bang hangin Topa ’ gamhluah valhtum ding na hi hiam?" a ci hi. Joab in dawngin, “Keimah in ka valh tum ding ahi a, ka suksiat ding ahi zongin keima ngaihsut hi dek lo, hi dek lo! Tua thu man lo hi. Ahih hangin Efraim mual tung gam mi, Bikhri’ tapa Sheba a kici mipa in Kumpi David lehdo hi; amah bek hong pia in, tua hi leh khuapi panin ka nungkik ding hi,” a ci hi. Tua ciangin numei in Joab kiangah, En in, kulh sung panin nang kiangah ama lutang hong kilawn suk ding hi,” a ci hi. Tua ciangin ama pilna zangin mi khempeuh kiangah tua numei pai hi. Tua ciangin amaute in Bikhri’ tapa Sheba’ lu tan khia-in Joab kiangah lawnkhia uh hi. Tua ahih ciangin amah in peengkul tum a, khuapi panin amaute kikhenin a milipin a inn ciat uh ah ciah uh hi. Tua ciangin kumpipa kiang Jerusalem ah Joab ciah hi. Tu-in Joab in Israel galkap khempeuh a uk ahi hi; Jehoiada’ tapa Benaiah in Khereth mite leh Peleth mite a uk ahi hi; Adoniram in aana tawh na a kisemsakte a uk ahi hi; Ahilud’ tapa Jehoshafat in thuciamtehpa ahi hi; Sheva in lai-atpa ahi hi; Zadok leh Abiathar in siampite ahi uh hi; Jair mi Ira in zong David’ siampi ahi hi. Tu-in kum khat khit kum khat, David’ hun sungin kum thum sung kialpi tung hi; tua ciangin David in Topa ’ kiangah thu dong hi. Tua ciangin Topa in, “Amah in Gibeon mite that ahih manin Saul leh a innkuan tungah mithah mawhna om hi,” a ci hi. Tua ahih ciangin kumpipa in Gibeon mite sam hi. Tu-in Gibeon mite in Israel mite sung hi loin Amor mi a om laite ahi uh hi; amaute a hingkhawi ding Israel mite kiciam khin napi-in, Israel leh Judah mite ading a deih luatna-in Saul in amaute thah dingin zong hi. Tua ciangin David in Gibeon mite kiangah, “Note adingin bang hong hihsak ding ka hi hiam? Note in Topa ’ mite thupha na piak theih nadingun bangci bangin kilemna hong bawl ding ka hi hiam?” a ci hi. Gibeon mite in ama kiangah, “Kote leh Saul ahi a, a innkuan tawh ahi zongin kikal ah kitotna om pen ngun leh kham in maisak zo lo ding hi; Israelte sungah mi khatpeuh ka thah hangun zong lungkim zawh nading om lo hi,” a ci uh hi. Tua ciangin amah in, “Note ading kong hihsak ding bang hi ci na hi uh hiam?” a ci hi. Amaute in kumpipa kiangah, “Israel gam sungah kote in mun ka neih loh nadingun kote hong netumin suksiat ding a vaihawmpa, Topa ’ mual tung, Topa mai Gibeon-ah amaute ka khai theih nadingun ama tapa sagihte hong pia in,” a ci uh hi. Tua ciangin kumpipa in, “Amaute kong pia ding hi,” a ci hi. Ahih hangin kumpipa in amah, David leh Saul’ tapa Jonathan’ kikal ah a om, Topa tawh kiciamna hangin Saul’ tapa Jonathan’ tapa Mefibosheth siit hi. Kumpipa in, Ai-ah’ tanu Rizpah’ tapa nih, Saul’ tawh a neih Armoni leh Mefibosheth; leh Saul’ tanu Merab in Meholah mi Barzillai’ tapa Adriel tawh a neih a tapa ngate la hi; amah in Gibeon mite tungah amaute pia a, amaute in Topa mai mual tungah amaute khai uh hi, amau sagihte si khawm uh hi. Mangbuhham lak kipat hun, an lak kipat cil lamin amaute kithat hi. Tua ciangin Ai-ah’ tanu Rizpah in puanhampi la-in an lak-a kipan van panin amau’ luanghawmte tungah guah a zuk dongin ama lup nadingin suangpi tungah phah hi; sun-in huih lak vasate ahi a, zan-in gamlak gamsate ahi zongin amau’ luanghawmte tungah amah in paisak lo hi. Saul’ zineu, Ai-ah’ tanu Rizpah’ gamtatna thu David kiangah a kigen ciangin, David pai-in Gilboa mual tungah Filistiate in Saul a thah ni-in Filistite in amaute a khaina mun Bethshan khua sung kongzing lampi laizang panin a guksak Jebeshgilead mite tung panin Saul’ guhte leh a tapa Jonathan’ guhte la hi; amah in tua lai panin Saul’ guhte leh a tapa Jonathan’ guhte paipih to hi; amaute in a kikhai mite’ guh zong kaikhawm uh hi. Tua ciangin amaute in Zela khua sung Benjamin’ leitang, a pa Kish’ han sungah Saul leh a tapa Jonathan’ guhte phum uh hi; amaute in kumpipa’ thupiak khempeuh hih uh hi. Tua khit ciangin tua gam ading thuumnate Pasian in ngai hi. Filistiate in Israelte tawh gal kido kik uh a, David a nasemte tawh paisuk khawmin Filistiate sim uh hi; Tua ciangin David gim hi. Mithagolte’ suante khat, a teipi sumngo shekel zathum a gik, namsau thak khat a kuah Ishbibenob in David that ding ngaihsun hi. Ahih hangin amah huh dingin Zeru-iah’ tapa Abishai hong pai a, Filistiapa simin amah that hi. Tua ciangin David mite in amah kunhin, “Galdo dingin ko tawh nong kuankhia nawn kei ding hi, tua hi kei leh Israel mite’ muan’ leh suan’pa kong taan kha ding uh hi,” a ci hi. Hih hun khit ciangin Filistiate tawh Gob-ah gal kidona om kik hi; tua cangin Hushah mi Sibbekai in mithagolte’ suante khat ahi Saf that hi. Tua ciangin Gob-ah Filistiate tawh gal kidona om leuleu hi; tua ciangin Bethelem mi Ja-areoregim’ tapa Elhanan in a teipi siamgante’ siam lawngpi cia a pha, Gath mi Goliath sanggampa Lahmi that hi. Tua ciangin, a khut lang tuakah khutme guk, leh a khe lang tuakah kheme guk, a vekpi-in sawm-nih-le-li a nei, mi thalian khat a omna Gath-ah gal om leuleu hi; amah zong mi thagolte sung panin apiang ahi hi. Amah in Israelte a phin ciangin, David’ sanggampa Shimei’ tapa Jonathan in amah that hi. Hih lite in Gath-a mi thagolte’ sung pan-a piang ahi uh hi, David leh a nasemte’ khut sungah amaute tuk uh hi. Tua ciangin Topa in ama galte khempeuh’ khut sung, leh Saul’ khut sung panin amah a hotkhiat ni-in David in hih la kammalte Topa tungah gen hi. Amah in, “ Topa in ka suangpi leh ka kulhpi, leh keimah honkhiapa, ka Pasian, ka suangpi, a sungah ka buknapa, ka lum leh ka kihotkhiana ki, ka munmuanhuai leh ka belh, keimah honkhiapa ahi hi; ngong hihna panin nong hon hi. A phat taak Topa ka sam a, ka galte kiang panin kei hong kihon hi. “Bang hang hiam cih leh sihna tuihualte in kei hong tuum a, siatna tuikhang in kei hong nawk hi; Leinuai khaute in kei hong kancip a, sihna thangte in kei hong dawntuah hi. “Ka lungkhamna-ah Topa ka sam a, ka Pasian ka sam hi. A biakinn panin amah in ka aw hong za a, ka kikona ama bil ah tung hi. “Tua ciangin leitung kisingin kilok a, vantung bulpite liingin taang hi; bang hang hiam cih leh amah heh hi. A nakvang panin meikhu pusuak a, a kam panin a kangtum mei pusuak hi; ama tung pan mei-am san kuangkhia hi. Amah in vantungte niamsakin hong paisuk a, ama khe nuai-ah khuamial sahpi om hi. Amah Kherub khat tungah tuangin leng a, huih khate tungah amah kimu hi. Amah in a kimkotah khuamial bawl a, a tung kikhuh nadingin meii sahpi, tui kikaikhawm hisak hi. Ama mai-a a taang sung panin mei-amte kuangkhia hi. Van panin Topa hong awng suk a, Sangpenpa in a aw hong gingsak hi. Amah in thaltangte lawn khia-in thehthang hi; khuaphialep phia sak a, amaute taisak hi. Tua ciangin tuipi tawte kimu a, lei bulpite a guakin om hi, Topa ’ mawhsakna, ama nakging tawh. “Amah in a sangna mun panin hong ban a, kei hong la hi; tui thukpi panin kei hong kaikhia hi. A hat ka galte panin kei hong honkhia a, kei hong mudahte panin hong honkhia hi; bang hang hiam cih leh kei adingin amaute hatlua uh hi. Ka kamsiat ni-in amaute in kei hong simgawp a, ahih hangin Topa in keimah hong huh hi. Amah in mun tanzau khatah kei hong paikhiatpih a, amah kei tungah lungkim ahih manin kei hong honkhia hi. “ Topa in ka thumanna tawh kizui-in thaman hong pia a, ka khutte siangthona tawh kizui-in hong dinkik hi. Bang hang hiam cih leh Topa ’ thu ka zui a, ka Pasian ka langpang kei hi. Bang hang hiam cih leh ama biakna ngeina kipte ka zui a, a thukhamte panin ka pial kei hi. Ama mai-ah kawk ka baang kei a, kisuan’na dangte panin ka kikem hi. Tua ahih ciangin Topa in ka thumanna, ama muhna-ah ka siangthona tawh kizui-in hong dinkik khin hi. “Thuman mi tungah nangmah na thuman a, a kawk baang lo mi tungah nangmah a kawk baang loin na gamta hi; “a siangtho mi tungah nangmah in a siangtho-in na gamta a, thukawi mi tungah nangmah in thupeelin na gamta hi. Nangmah in mi niamte na honkhia a, ahih hangin a kiphasakte na niamkhiat hi. Hi hi, nangmah in ka meivak na hi hi, Topa aw, ka Pasian in ka khuamial vaaksak hi. Hi hi, nangma hangin galkap honkhat ka sugawp zo a, ka Pasian khuakulh khat ka kan zo hi. Hih Pasian a thu kicing hi; Topa ’ kamciamna a manna kilang hi, amah a belte khempeuh adingin amah in kidalna lum ahi hi. “ Topa longal, Pasian kua hiam? I Pasian simloh, suangpi kua hiam? Hih Pasian in a muanhuai keima belh hi a, ka lampi lungmuanhuai sak hi. Amah in sakhipite khe bangin ka khe kipsak a, mun sangna-ah keimah hong koih hi. Amah in galsiam nadingin kei hong hilh a, ka khut in sumngo thal khauh pente keek zo hi. Nangmah in na hotkhiatna lum kei nong pia a, na huhna in kei hong liansak hi. Nangmah in ka kalsuan nading mun tanzau ka nuai-ah nong pia a, ka khe taal lo hi; ka galte delhin ka susia a, amaute a beitum mateng ka kileh kei hi. Amaute ka beisak hi; amaute ka sunlet a, amaute thokik lo uh hi; ka khe nuai-ah amaute puk uh hi. Bang hang hiam cih leh nangmah in galdo nadingin keimah tha nong guan a, keimah hong dote ka nuai-ah na nengniam hi. Nangmah in ka galte, kei hong mudahte, na nungkik sak a, keimah in amaute ka susia hi. Amaute khuadak a, ahih hangin a honkhia ding om lo hi; Topa tungah ko uh a, ahih hangin amah in dawng lo hi. Leivui bangin amaute ka satvui a, kongzing buante bangin amaute tuankhamin ka sikcipsuk hi. “Mite tawh kidona panin nangmah in kei nong honkhia hi; minamte’ lutangin kei nong bawl hi, ka theih ngei loh mite in keima na hong sem uh hi. Keimah mai-etin gamdang mite ka kiangah hong pai uh hi; amaute in ka thu a zak phetun, ka thu hong mang uh hi. Gamdang mite lungkia uh a, a phual kip panun liingin hong paikhia uh hi. “ Topa hing hi; ka Suangpi in pahtawina ngah hen la, amah in ka Pasian, ka kihotkhiatna Suangpi, ahi hi. hong thukkik sakin ka nuai-ah mite a koihsuk Pasian, ka galte panin kei hong paikhiat pihpa lian ta hen; nangmah in ka langte tungah kei nong liansak a, mi ngongtatte kiang panin kei nong honkhia hi. “ Topa aw, hih thu hangin minamte lakah nang kong phat ding a, na min phatna la ka sa ding hi. Zawhna lianpi ama kumpipa tungah pia a, a sathau nilhpa, David leh a suan-le-khakte tungah a tawntungin itna kip a lak hi,” a ci hi. Tu-in hihte in David’ kam nunungte ahi hi. Jessi’ tapa David’ thugen, a sangna-ah a kikhangto mipa, Jakob’ Pasian’ sathau nilhpa, Israel la phuak siampa’ thugen: “ Topa ’ Kha in kei tung tawnin thu hong gen a, ka kam sungah ama thugente om hi. Israel Pasian kampau khin a, Israel Suangpi in kei kiangah hong ci khin hi: Mi khat in mite tungah thutang takin ukin Pasian zahtakna tawh a uk ciangin, amah in amaute tungah zingsang khuavak bangin taang a meii kaai loh ni zingsang-a nitaang khia, lei lak panin lopate a selkhiasak guahtui bang hi. Hi hi, ka innkuan zong Pasian tawh tua bangmah hilo ahi hiam? Bang hang hiam cih leh amah in tawntung thuciamna kei tawh hong bawl a, na khempeuh a hoih a kipin hih hi. Bang hang hiam cih leh keimah hong huhin, ka deihna khempeuh tangtungsak ding hilo ahi hiam? Ahih hangin mi ginalote ahih leh a kilawnkhia lingkungte tawh kibang hi; bang hang hiam cih leh khut tawh amaute kiman thei lo hi; amaute a lawng mipa in sik leh teipi bul tawh kithawi a, amaute mei tawh kihaltum siang hi,” a ci hi. Hihte in David’ neih mi thahatte minte ahi hi: Tahkhemon mi Josheb-Basshebeth; amah in mi thumte a ukpa ahi hi; amah in a teipi tawh mihing zagiat do-in hun khat sungin thatmang khin hi. Tua ciangin mi thahat thumte lakah amah a zompa in Ahoah mi Dodo’ tapa Eleazar ahi hi. Galdo ding a kikaikhawm Filistiate to a, Israel mite a nungkik hunin David tawh amah om hi. Amah ding-in a khut a gim mateng Filistiate sattuk a, a khut a namsau-ah kimatcip hi; Topa in tua ni-in gualzawhna lianpi piangsak hi; a kithat mite’ na a tawm ding bekin ama nungah mite hong paikik uh hi. Ama zomah Harar mi Agee’ tapa Shammah ahi hi. Besan a dimna mun Lehi-ah Filistiate kikaikhawm uh hi; Filistiate kiang panin mite tai uh hi. Ahih hangin amah in tua mun laizangah pan’mun la-in hu a, Filistiate that hi; Topa in gualzawhna lianpi piangsak hi. Ukpa sawmthumte lakpanin mi thumte paisukin, Refaim kuamah Filistia mihonte in giahphual satin a om laitak Adullam leihawm-a David kiangah anlak hun pawlin tung uh hi. Tua hunin munmuanhuai sungah David om hi; Filistia khuacingte Bethelehem ah om uh hi. David in lunggulhna tawh, “Kulh kongpi gei-a om Bethlehem tuikhuk panin mi khat in tuidawn ding kei hong pia leh!” a ci hi. Tua ciangin mi thahat thumte in Filistiate’ giahphual phulin kulh kongpi gei-a om Bethlehem tuikhuk panin tui tawi khia uh a, a tui la-in David kiangah paipih uh hi. Ahih hangin amah in a tui dawn lo hi; amah in Topa adingin a tui sung a, Topa aw, hih tui ka dawn het kei ding hi. Amau’ nuntakna khamin a pai mite’ sisan a dawn tawh ka kibang ding hi,” a ci hi. Tua ahih ciangin amah in dawn lo hi. Mi thahat thumte zong hih mah bangin gamta uh hi. Tu-in Zeru-iah’ tapa, Joab sanggampa Abishai in mihing sawmthumte a ukpa ahi hi. Amah in a teipi tawh mihing zathumte do-in amaute that a, mihing thumte’ ban-ah min khat ngah beh hi. Mihing sawmthumte sung pan amah a minthang pen hi a, amaute a ukpa suak hi; ahih hangin amah in mihing thumte ban lo hi. Jehoiada’ tapa, Kabze-el khuami Benaiah in gal a hang, na lianpite a sempa ahi hi; amah in Moab galhang mi nih vat hi. Amah zong paisukin vuk a kiat ni khatin leihawm sunga om humpinelkai khat that hi. Amah in a melhoih Izipt mi khat that hi. Izipt mipa in a khut sungah teipi tawi hi; ahih hangin Benaiah ciangkhut khat tawh ama kiangah paisuk a, Iziptpa’ khut sung panin a teipi sut khia-in ama teipi mah tawh amah that hi. Jehoiada in hihte hihin a thahat mi thumte’ ban-ah min ngah hi. Mihing sawmthumte lakah amah minthang a, ahih hangin amah in mihing thumte ban lo hi. David in amah a cingte a ukin amah koih hi. Joab’ sanggampa Asahel in sawmthumte lakah khat ahi hi; Bethlehem mi Dodo’ tapa Elhanan, Harod khuami Shammah, Harod khuami Elika, Palti mi Helez, Tekoa khuami Ikkesh’ tapa Ira, Anathoth khuami Abiezer, Hushah mi Mebunnai, Ahoah mi Zalmon, Netofah khuami Maharai, Netofah khuami Baanah’ tapa Heleb, Benjamin mite’ gam sunga om Gibeah khuami Ribai’ tapa Ittai, Pirathon khua mi Benaiah, Ga-ash gei-a kuam pan Hiddai, Betharabah khuami Abi-albon, Bahurim khuami Azmaveth, Sha-albon khuami Eliahba, Jashen’ tapate, Jonathan, Harar mi Shammah, Harar mi Sharar’ tapa Ahiam, Maiakah khuami Ahasbai’ tapa Elifelet, Gilo khuami Ahithofel’ tapa Eliam, Karmel khuami Hezro, Arbi mi Pa-arai, Zobah khuami Nathan’ tapa Igal, Gad mi Bani, Ammon mi Zelek, Zeru-iah’ tapa galhiam a tawi, Be-eroth khuami Naharai, Ithri mi Ira, Ithri mi Gareb, Hit mi Uriah, a vekpi-in sawmthum-le-sagih ahi hi. Topa’ hehna Israelte tungah hong so kik a, amah in amaute’ lang khatah David hanthawnin, “Pai in, Israel leh Judah a mi phazah sim in,” a ci hi. Tua ahih ciangin kumpipa in Joab leh amah tawh a om galkap ukte kiangah, “Galdo mite a phazah ka theih nadingin Dan panin Be-ersheba ciang dong Israel minamte khempeuh lakah pai un la mi phazah sim un,” a ci hi. Ahih hangin Joab in kumpipa kiangah, “Ka to kumpipa’ mitte’ muhin Topa na Pasian in mite tu-a om zah zakhatin a tamna behlap hen; ahih hangin bang hangin ka to kumpipa in hih thu deih na hi hiam?” a ci hi. Ahih hangin kumpipa’ kamgente in Joab leh galkap ukte zo hi. Tua ahih ciangin Israel mite galdo mi a phazah a sim dingin kumpipa’ omna panin Joab leh galkap ukte paikhia uh hi. Amaute in Jordan kantanin kuam laizang-a om khuapi Aroer panin kipanin Gad lam manawh uh a, Jazer-ah paisuak uh hi. Tua ciangin amaute Gilead tung uh a, tua panin Hit mite gam Kadesh tung uh hi; tua ciangin amaute Dan tung uh a, Dan panin kual pai-in Sidon tung uh a, tua ciangin Tai-ar munmuanhuai leh Hiv mite leh Kanaan mite’ khuapite khempeuhah tung uh hi; tua panin amaute Judahte’ Negeb lam Be-ersheba-ah pai uh hi. Tua ahih ciangin gam khempeuh ah amaute a pai khit uh, kha kua leh ni sawmnih a cin’ ciangin Jerusalem ah hong tung uh hi. Tua ciangin Joab in kumpipa kiangah galdo mite a phazah a gawm pia hi: Israel sungah namsau a tawi galhang mi tulzagiat om a, Judah mi tulzanga om hi. Ahih hangin mi a sim khit ciangin David; lungsim in amahmah gimsak hi. Tua ciangin David in Topa ’ tungah, “ka gamtatnasa sungah nakpi takin ka khial hi. Ahih hangin, tu-in, Topa aw, nang tungah kong thuum hi, na nasempa, mawhna hong maisak in; bang hang hiam cih leh hai mahmahna tawh ka gamta khin hi,” a ci hi. Zingsangin David a thawh ma-in David’ thu-mu-pa ahi kamsang Gad tungah Topa ’ thu hong tung a, ”Pai in la, David kiangah hih bangin gen in, ‘ Topa in hih bangin ci hi: Nangma tungah thu thum kong pia hi; nang tungah kong hih theih nadingin tuate khat teel in,’ ci hi,” a ci hi. Tua ahih ciangin David kiangah Gad hong pai-in ama tungah genin, ama kiangah, “Na gam sung nangma tungah kum thum kialpi hong tung ding hiam? Ahih kei leh na galte in nang hong delh lai takin amaute mai-ah kha thum sung tai ding na hi hiam? Ahih kei leh na gam sungah ni thum sung natna hong om ding ahi hiam? Tu-in ngaihsun in, kei hong sawlpa kiangah bang dawn’na puakkik ding ka hi hiam khentat in,” a ci hi. Tua ciangin David in Gad kiangah, “Nakpi takin ka lungkham hi; ama hehpihna lian ahih manin Topa ’ khut sungah tung ni; ahih hangin mihing’ khut sungah hong tung sak kei in,” a ci hi. Tua ahih ciangin Topa in zingsang-a kipan a kiseh hun dingin Israelte tungah natna tungsak hi; Dan panin Be-ersheba dongin mihing tulsawm sagih si hi. Vantungmi in Jerusalem khua a susia dingin kithawi-in a khut a zan ciangin tua tatsiatna panin Topa kisik a, mite lakah suksiatna a sem vantungmi kiangah, “Pha zo hi; tu-in na khut khawlsak in,” a ci hi. Topa ’ vantungmi in Jebus mi Araunah’ ancilna gei-ah om hi. Tua ciangin mite a vat vantungmi a muh ciangin David in Topa tungah thu gen a, “En in, ka mawh hi, a khialpa in kei ka hi hi; ahih hangin hih tuute in bang hih uh hiam? Kong thum hi, kei leh ka innkuante bek daan hong pia in,” a ci hi. Tua ciangin tua ni-in David kiangah Gad pai-in ama kiangah, “Paito in, Jebus mi Araunah’ ancilna-ah Topa ading biakna tau khat phut in” a ci hi. Tua ahih ciangin Topa ’ thupiak bangin Gad’ cihna zui-in David paito hi. Araunah a khuadak suk ciangin kumpipa leh a nasemte ama lamah hong pai mu hi; Araunah paikhia-in amai lei ngatin kumpipa zahtakna bawl hi. Tua ciangin Araunah in, “Bang hangin ka to kumpipa a nasempa kiangah hong pai na hi hiam?” a ci hi. David in, “Mite’ tung panin gimna a ven’ theih nadingin Topa ading biakna tau lam nading na ancilna mun a lei ding,” a ci hi. Tua ciangin Araunah in David kiangah, “ka to kumpipa in hoih na sak bangin la in la, pia in; meihal biak nadingin bawngtalte, leh a sing dingin ancilna peekte leh bawngtal kolte hih lai-ah om hi. Kumpipa aw, Araunah in hihte khempeuh kumpipa tungah hong pia hi,” a ci hi. Tua ciangin Araunah in kumpipa kiangah, Topa, na Pasian in nang hong sang ta hen,” a ci thuah lai hi. Ahih hangin kumpipa in Araunah kiangah, Hilo hi, nangma tung panin hihte a man tawh kituakin kong lei ding hi; Topa ka Pasian’ tungah kei’ sum bei loin meihal biaknate ka pia kei ding hi,” a ci hi. Tua ahih ciangin David in ngun shekel sawmnga tawh ancilna mun leh bawngtalte lei hi. Tua ciangin David in Topa ading biakna tau khat tua lai-ah lam a, meihal biaknate leh thunuam-a biaknate pia hi. Tua ahih ciangin tua gam adingin thuumna Topa in ngai a, Israel tung panin gimna veng hi. Tu-in Kumpi David teekin kum tam ta hi; amaute in amah puan a silhsak uh hangin a khua lum thei lo hi. Tua ahih ciangin a nasemte in ama kiangah, “Ka to kumpipa’ adingin nungakno khat kizong hen la, amah in kumpipa enin amah a kemnu hi ta hen; ka to kumpipa a khua a lum theih nadingin na ang sungah tua nu lum hen,” a ci uh hi. Tua ahih ciangin amaute in Israel gamsung khempeuh ah nungak mel hoih khat zong uh a, Shunem mi Abishag mu-in, kumpipa kiangah amah paipih uh hi. Tua nungak a mel hoih mahmah hi; amah in kumpipa a kemnu suakin ama na sem hi; ahih hangin kumpipa in amah hih zo lo hi. Tu-in David leh Haggith’ tapa Adonijah amahmah kiliansakin: Keimah in kumpi ka hi ding hi,” a ci hi; amah in ama adingin leengte leh sakol tung tuangte, leh ama mai-ah a tai ding mihing sawmnga vaihawm hi. Ama pa David in, “Bang hangin tua bangin gamta na hi hiam?” ci-a dotna tawh khatvei beek amah tai ngei lo hi. Amah in a mel hoih mahmah mi khat zong ahi hi; amah in Absalom zom-a a suak ahi hi. Amah in Zeru-iah’ tapa Joab leh siampi Abiathar tawh vaihawm hi; amaute in Adonijah zui-in amah pan’pih uh hi. Ahih hangin siampi Zadok, leh Jehoiada’ tapa Benaiah, leh kamsang Nathan, leh Shimei, leh Re-i, leh David’ mi a thahatte Adonijah tawh pang lo uh hi. Adonijah in Enrogel gei-a om Gulpi’ Suangpi kiangah tuute, bawngtalte, leh ganno thaute biakna-in pia-in, amah in kumpipa’ tapate ahi, a sanggamte khempeuh leh Judah kumpi uliante khempeuh sam a, ahih hangin kamsangpa Nathan ahi a, Benaiah ahi a, mi thahatte ahi a, a sanggampa Solomon ahi zongin sam lo hi. Tua ciangin Nathan in Solomon’ nu Bathsheba kiangah, “Haggith’ tapa Adonijah kumpi suak khinin, i to David in tua thu a theih lohna thu za nai lo na hi hiam? Tua ahih ciangin tu-in hong pai-in, nangma nuntakna leh na tapa Solomon’ nuntakna na suahtaksak theih nadingin nang tungah ngaihsutna kong pia ding hi. Thakhatin Kumpi David kiangah pai-in ama tungah, ‘Ka to kumpipa in na nasemnu tungah hong kiciamin, “Na tapa Solomon in keima nungah maangin, keima kumpi tokhom tungah amah tu ding hi,” ci hilo na hi hiam? Tua ahih ciangin bang hangin Adonijah kumpi hi ahi hiam? ci in. Tua ciangin kumpipa kiangah thu na gen lai takin kei zong nangma nungah hong pai-in nangma thugen teng kong pan’pih ding hi,” a ci hi. Tua ahih ciangin Bathsheba a inndei sung kumpipa kiangah va pai hi (tu-in kumpipa teek mahmah a, Shunem mi Abishag in kumpipa’ na sem hi). Bathsheba kunin kumpipa tungah zahtakna bawl a, kumpipa in, “Bang deih na hi hiam?” a ci hi. Tua nu in ama kiangah, “Ka topa aw, na nasemnu tungah Topa na Pasian tawh kiciamin, ‘Na tapa Solomon in keima nungah maangin, keima kumpi tokhom tungah amah tu ding hi,’ na ci hi. Tu-in en in, ka to kumpipa in na theih loh hangin, Adonijah in kumpi ahi hi. Amah in biakna-in bawngtalte, ganno thaute, leh tuute, tampi tak piakhin a, kumpipa’ tapate khempeuh siampi Abiathar, leh galkapte a ukpa Joab sam hi; ahih hangin amah in na nasempa Solomon sam lo hi. Ka to kumpipa aw, tu-in nangma nungah ka to kumpipa’ tokhom tungah kua tu ding ci-a amaute kiangah na gen ding ngakin Israelte khempeuh in nang hong en uh hi. Tua bang hi kei leh ka to kumpipa a pate tawh a ihmut ciangin kei leh ka tapa Solomon a khial-in hong kiseh hun hong tung ding hi,” a ci hi. Tua nu kumpipa tawh kiho-in a om lai takin kamsangpa Nathan hong tum hi. Amaute in kumpipa kiangah, “Hih lai-ah kamsangpa Nathan om hi,” a ci uh hi. Kumpipa mai-ah amah hong pai ciangin a mai lei lam ngatin kumpipa’ mai-ah kun hi. Tua ciangin Nathan in, “Ka to kumpipa aw, “Keima nungah Adonijah maangin ka kumpi tokhom tungah amah tu ding hi,’ ci na hi hiam? Bang hang hiam cih leh tu ni-in amah paisuk khinin, bawngtalte, ganno thaute, leh tuute, tampi tak biakna-in pia a, kumpipa’ tapate khempeuh, galkapte a ukpa Joab, leh siampi Abiathar sam hi; en in, amaute in ama mai-ah ne-in dawn uh a, ‘Kumpi Adonijah a khan’ sau hen!’ ci uh hi. Ahih hangin na nasempa keimah, leh Siampi Zadok, leh Jehoiada’ tapa Benaiah, leh na nasempa Solomon, amah in hong sam lo hi. Ka to kumpipa in hih thu piangsakin, ama khit ciangin ka to kumpipa’ tokhom tungah kua tu ding cih thu na nasemte kiangah nangmah in hong gen lo na hi hiam?” a ci hi. Tua ciangin Kumpi David in dawngin, “Bathsheba ka kiangah hong sam in,” a ci hi. Tua ahih ciangin kumpipa’ omna ah tua nu hong pai-in kumpipa’ mai-ah ding hi. Kumpipa kiciamin, “Haksatna khempeuh panin kei hong honkhia Topa in a nungta ahih mah bangin, nangma tungah Topa, Israel Pasian tawh hong kiciamin, ‘Keima nungah na tapa Solomon maang ding a, keima taangin ka kumpi tokhom tungah amah tu ding hi,’ ka cih mah bangin; tu ni-in zong ka ci hi,” a ci hi. Tua ciangin Bathsheba in leilak lam mai ngatin kunin kumpipa tungah zahtakna bawl a, “Ka to Kumpi David nungta tawntung ta hen!” a ci hi. Kumpipa David in, “Siampi Zadok, kamsang Nathan, leh Jehoiada’ tapa Benaiah va sam in,” a ci hi. Tua ahih ciangin kumpipa mai-ah amaute hong pai uh hi. Kumpipa in amaute kiangah, “Na topa’ nasemte paipih un la, ka tapa Solomon keima la-sakol tungah tuang sakin Gihon ah amah paipih suk un; Israel tungah kumpi-in tua lai munah siampi Zadok leh kamsang Nathan sathau nilhsak un; tua ciangin peengkul tum un la, ‘Kumpi Solomon khan’ sau hen!’ ci un. Tua ciangin ama nungah note nong pai ding uh a, amah hong pai-in ka kumpi tokhom tungah hong tu ding hi; bang hang hiam cih leh amah in keima taangin kumpi hi ding hi: Israel leh Judah tungah a ukpa dingin amah ka seh khin zo hi,” a ci hi. Tua ciangin Jehoiada’ tapa Benaiah in dawngin, “Hi ta hen! Topa, ka to kumpipa’ Pasian in tua bangin kipsak ta hen. Topa in ka to kumpipa a ompih mah bangin amah in Solomon tawh om hen la, ka to kumpi David’ tokhom sangin ama tokhom lianzawsak hen,” a ci hi. Tua ahih ciangin siampi Zadok, kamsang Nathan, Jehoida’ tapa Benaiah, leh Khereth mite leh Peleth mite paisukin Kumpi David’ la-sakol tungah Solomon tuangsak uh a, Gihon ah amah paipih uh hi. Tua lai-ah siampi Zadok in puanbuk panin sathau biing la-in Solomon nilh hi. Tua ciangin amaute in peengkul tum uh hi; tua ciangin mi khempeuh kiko in, “Kumpi Solomon khan’ sau hen!” a ci uh hi. Tua ciangin mi khempeuh ama tungah pai-in tamngaikop tum uh a, nakpi takin lungdam uh a, amau’ gamlumna in lei thawn kham hi. Adonijah leh amah tawh a om leenglate khempeuh in a pawi bawl a man khit uh ciangin hih thu za uh hi. Jaob in peengkul aw a zak ciangin amah in, “Khuapi sunga hih gamlumna bang a cih nopna ahi hiam?” a ci hi. Amah a kam pau lai takin, en in, siampi Abiathar’ tapa Jonathan hong pai hi; tua ciangin Adonijah in, “Hong tum in, bang hang hiam cih leh nangmah in mi gina na hi a, thu hoih nong puak hi,” a ci hi. Jonathan in Adonijah dawngin, “Hilo hi, bang hang hiam cih leh i to kumpi David in kumpi-in Solomon bawl khin hi; kumpipa in amah tawh siampi Zadok, kamsang Nathan, leh Jehoida’ tapa Benaiah, leh Khereth mite leh Peleth mite sawl khin hi; amaute in kumpipa’ la-sakol tungah amah tuangsak khin uh hi; siampi Zadok leh kamsang Nathan in Gihon ah kumpi-in amah sathau nilh khin uh hi; tua lai panin amaute lungdamin ciah khin uh ahih manin khuapi sung gamlum hi. Nangma zak in hih gamlumna ahi hi. Solomon in kumpi tokhom tungah tu hi. Tua tham loin kumpipa’ nasemte i to kumpi David tungah lungdamna ko dingin pai uh a, ‘Na Pasian in nangma min sangin Solomon’ min a thangzaw-in bawl hen la, nangma tokhom sangin ama tokhom a lianzaw-in bawl hen,’ ci uh hi. A lupna tung panin kumpipa mahmah zong kun hi. Kumpipa in zong, ‘Keima mit-a ka muhin keima suan leh khakte khat ka kumpi tokhom tungah a tu dingin tu ni-in a pia Topa, Israel Pasian in thupha ngah ta hen,’ ci hi,” a ci hi. Tua ciangin Adonijah’ leenglate khempeuh liing uh a, dingin amau’ mun ciatah pai uh hi. Tua ciangin Adonijah in Solomon kihta hi; amah dingin pai a, biakna tau kite len hi. Tua ciangin Solomon kiangah, “En in, Adonijah in Kumpi Solomon kihta hi; bang hang hiam cih leh, en in, amah in biakna tau kite lenin, ‘Amah in a nasempa namsau tawh a thah loh nading kei tungah Kumpi Solomon hong kiciam masa hen,’ ci hi,” kici hi. Tua ciangin Solomon in, “Amah in kilawm mi ahihna a lahtel theih leh ama samzang khat zong lei lakah kia lo ding hi; ahih hangin ama sungah gitlohna a kimuh leh, amah si ding hi,” a ci hi. Tua ahih ciangin Kumpi Solomon in sawl a, amaute in biaknatau panin amah paikhiatpih uh hi. Amah hong pai-in Kumpi Solomon in ama kiangah, “Na innah ciah in,” a ci hi. David’ sih ding hun a nai ciangin amah in a tapa Solomon thuhilhin, ”Leitung khempeuh ngeina bangin a pai ding ka hi ta hi. Thakhauhin pasal na hihna kilangsak in la, ”Tham loin, Zeru-iah’ tapa Joab in kei hong bawlna, gal sunga si mite’ phu a lakna-in, gal kilem hun sungin a thah Israel galkap ukte ahi mi nih, Ner’ tapa Abner leh Jether’ tapa Amasa tungah a bawlna leh, amah in mawhna nei lo mite thatin, tua ama gamtatna hangin ka thuaknate zong na thei hi. Tua ahih ciangin nangma pilna bangin gamta in la, ahih hangin lungnuam takin Leinuai-ah ama lutang paisuksak kei in. Ahih hangin Gilead mi Barzillai’ tapate tungah thuman takin gamta in la, na sabuai-a nete bangin amaute omsak in; bang hang hiam cih leh na sanggampa Absalom’ kiangpanin ka tai lai-in amaute in tua bang thumanna tawh kei hong bawl uh hi. Mahanaim-ah ka pai lai-in a nasia samsiatna tawh kei hong samsia, Bahurim panin hong pai Benjamin mi Gera’ tapa Shimei zong nang tawh om hi; ahih hangin Jordan ah keimah dawn dingin hong pai ciangin ama tungah Topa tawh kiciamin, ‘Namsau tawh nang kong that kei ding hi,’ ka ci hi. Tua ahih ciangin tu-in amah a mawh baang loin ngaihsun kei in; bang hang hiam cih leh nangmah in mi pilna hi hi; ama tungah na bawl dinga kilawm na thei ding a, amah thatin a lutang hanah na paipih suk ding hi,” a ci hi. Tua ciangin ama pate tawh David ihmu-in David khuapi sungah kivui hi. Israelte tungah David in a uk hun in kum sawmli sung ahi hi; amah in Hebron ah kum sagih sung ukin, Jerusalem ah kum sawmthum leh kum thum sung uk hi. Tua ahih ciangin a pa David’ tokhom tungah Solomon tu hi; ama kumpi gam kip takin kiphut hi. Tua ciangin David leh Haggith’ tapa Adonijah Solomon’ nu Bathsheba kiangah hong pai hi. Tua nu in, “Thu-nuam-a hong pai na hi hiam?” a ci hi. Amah in, “Thu-nuam hi,” a ci hi. Tua ciangin tuapa in, “Nang tungah gen ding khat ka nei hi,” a ci hi. Amah in, “Gen in,” a ci hi. Tuapa in, “Kumpi gam in keima’ aa hi-in, Israelte khempeuh in keima uk ding a lamet mahmahna uh na thei hi; ahi zongin kumpi gam kihei-in ka sanggampa’ aa suak hi; bang hang hiam cih leh hih thu in Topa kiang pan ahi hi. Tu-in nangma tung panin kong nget ding khat om hi; kei hong nial kei in,” a ci hi. Tua nu in ama kiangah, “Gen in,” a ci hi. Amah in, “Kumpi Solomon kiangah nong ngetsak ding kong thum hi – amah in nang hong nial lo ding hi – Shunem mi Abishag ka zi dingin kei tungah hong piak ding,” a ci hi. Bathsheba in, “Hoih mahmah hi; kumpipa kiangah kong gensak ding hi,” a ci hi. Tua ahih ciangin Adonijah taangin ama tungah thu gen dingin Kumpi Solomon kiangah Bathsheba va pai hi. Tua ciangin tua nu dawn dingin kumpipa dingin tua nu mai-ah kun hi; tua ciangin ama tokhom tungah tu-in kumpipa’ nu’ adingin tutna khat lasak hi; tua nu ama tak lamah tu hi. Tua ciangin amah in, “Nangma tungah na neuno khat nget ding ka nei hi; kei hong nial kei in,” a ci hi. Kumpipa in ama kiangah, “Hong ngen in, ka nu aw; bang hang hiam cih leh kong nial kei ding hi,” a ci hi. Amah in, “Na sanggampa Adonijah’ zi dingin Shunem mi Abishag ama tungah kipia hen,” a ci hi. Kumpi Solomon in a nu dawngin, “Bang hangin Adonijah adingin Shunem mi Abishag hong ngen na hi hiam? Kumpi gam zong ama adingin ngetsak lai in; bang hang hiam cih leh amah in ka u pasal hi a, ama lamah siampi Abiathar leh Zeru-iah’ tapa Joab pang hi,” a ci hi. Tua ciangin Kumpi Solomon Topa tawh kiciamin, “Hih thu in Adonijah’ nuntakna a lei kei taak leh Pasian in kei hong dawm kei ta hen! Tua ahih ciangin tu-in, kei hong phutin ka pa David tokhom tungah hong koih a, ama ciamsa bangin kei adingin innkuan khat hong bawlsak Topa in a nungta ahih mah bangin, tu ni-in Adonijah kithat ding hi,” a ci hi. Tua ahih ciangin Kumpi Solomon in Jehoida’ tapa Benaiah sawl hi; amah in tuapa satpuk sukin, tua ciangin amah si hi. Tua ciangin siampi Abiathar kiangah kumpipa in, “Nangma mun leh gam a omna Anathoth ah ciah in; bang hang hiam cih leh na sih ding a kilawm ahi hi. Ahih hangin nangmah in ka pa David’ mai-ah Topa Pasian ’ thuciamna singkuang na puakna leh ka pa’ gimna ah na gim khopna hangin tu tungin nang kong that kei ding hi,” a ci hi. Tua ahih ciangin Solomon in Topa ’ siampi hihna panin Abiathar hawlkhia in, Topa in Shiloh a, Eli innkuan tawh kisai a genna thu tua bangin tungsak hi. Hih thu Joab kiang a tun’ ciangin – bang hang hiam cih leh Joab in Absalom a huh loh hangin Adohijah huh hi – Topa ’ puanbuk ah Joab tai-in biakna tau kite len hi. Kumpi Solomon kiangah, “ Topa ’ puanbuk ah Joab tai hi, en in, amah biakna tau gei-ah om hi,” ci-in a kigen ciangin Solomon in Jehoiada’ tapa Benaiah sawlin, “Pai in, amah satpuk suk in,” a ci hi. Tua ahih ciangin Topa puanbuk ah Benaiah pai-in ama kiangah, “Kumpipa in thu hong pia a, ‘Hong paikhia in,’ a ci hi. Ahih hangin amah in, “Hilo hi, hih lai-ah kei ka si ding hi;” a ci hi. Tua ciangin Benaiah in kumpipa kiangah thu puak kikin, “Tua bangin Joab in thu gen a, tua bangin amah in kei hong dawng hi,” a ci hi. Kumpipa in amah dawng kikin, “Ama cihsa bangin hih in, amah satpuk in la, phum in; Joab in thu om lopi-in mi a thatna hangin mawhna pen keima tung leh ka innkuan tung panin tua bangin na siangsak ding hi. Topa in ama mawhna ama lu tang mah ah tungsak kik ding hi; bang hang hiam cih leh ka pa David’ theih lohin amah in Israel galkapte a uk Jether’ tapa Amasa, amah sangin thuman zaw-in a hoihzaw ahi mihing nih do-in namsau tawh that hi. Tua ahih ciangin mi thahna hangin dantahna in Joab’ lu tung leh ama suan leh khakte’ lu tungah a tawntungin hong tungkik ding hi; ahih hangin David tung, leh ama suan leh khakte tung, leh ama innkuan tung, leh ama kumpi tokhom tungah Topa kiang panin a tawntung nopna om ding hi,” a ci hi. Tua ciangin Jehoiada’ tapa Benaiah paito-in Joab satpuk sukin that hi; gamlak ama inn sungah amah kiphum hi. Kumpipa in Joab taangin galkapte tungah Jehoiada’ tapa Benaiah koih a, kumpipa in Abiathar’ taangin siampi Zadok koih hi. Tua ciangin kumpipa in mi sawlin Shimei samsak a, ama kiangah, “Jerusalem ah inn khat lamin tua lai-ah teng in la, tua lai mun panin mun khat peuhpeuhah paikhia kei in. Bang hang hiam cih leh nang paikhia-in Kidron lui na kan ni-in na sih ding tel takin thei in; na sih leh nangma khialhna hang hi ding hi,” a ci hi. Tua ciangin Shimei in kumpipa kiangah, “Na thugen hoih hi; ka to kumpipa’ gen bangin na nasempa gamta ding hi,” a ci hi. Tua ahih ciangin Jerusalem ah sau veipi sung Shimei om hi. Ahih hangin kum thum a cin’ ciangin Gath kumpipa Ma-akah’ tapa Akhish kiangah Shimei’ silate nih va tai uh hi. Shimei kiangah, “En in, na silate Gath-ah om hi,” ci-in a kigen ciangin Shimei ding-in la khat a van vawhin a silate a zong dingin Gath-a Akhish kiangah pai hi; Shimei pai-in Gath panin a silate ciahpih hi. Jerusalem panin Gath-ah Shimei pai-in a ciahkikna thu Solomon kiangah a kigen ciangin, kumpipa in mi sawlin Shimei samsak a, ama kiangah, “ Topa tawh hong kiciamsakin, thupi takin nang hong thuhilhin, ‘Nang paikhia-in mun khat peuhpeuh ah na pai ni-in na sih ding tel takin thei in,’ hong ci hilo ka hi hiam? Tua ciangin nangmah in, ‘Na thugen hoih hi; ka mang hi,’ na ci hi. Tua ahih ciangin bang hangin Topa tungah na kiciamna leh nang hong thuhilhin kong thupiakna zui lo na hi hiam? a ci hi. Kumpipa in Shimei kiangah, “Ka pa David tungah siatna na bawlte khempeuh na lungsimah na thei hi; tua ahih ciangin Topa in nangma siatna nangma lu tung mah ah hong tun’ kik ding hi. Ahih hangin Kumpi Solomon thupha kipia-in a tawntungin Topa mai-ah a tokhom kikipsak ding hi,” zong ci hi. Tua ciangin kumpipa in Jehoiada’ tapa Benaiah thupia hi; amah paikhia-in Shimei satpuk sukin, tua ciangin amah si hi. Tua ahih ciangin Solomon’ khut sungah kumpi gam kikipsak hi. Solomon in Izipt kumpipa Faro tawh numei-a kizopna bawl hi; amah in Faro’ tanu teenpih a, ama inn, Topa ’ inn leh Jerusalem kimkota kulhpi lam a zawh mateng David khuapi sungah tua nu paipihin omsak hi. Ahi zongin Topa min adingin inn kilam nai lo ahih manin mite in mual tunga biaknate ah biakna pia uh hi. Solomon in Topa itin, a pa David’ thukhamte zui hi; ahi zongin amah in mual tunga biaknate ah biakna pia-in paknamtui hal hi. Tua ciangin biakna pia dingin Gibeon ah kumpipa pai hi; bang hang hiam cih leh tua in mual tunga biakna mun lianpen ahi hi; Solomon in tua biaknatau tungah meihal biakna tam veipi tak a piaknasa mun ahi hi. Gibeon ah zanin a mang sungah Solomon tungah Topa kilang hi; Pasian in, “Nang kong piak ding hong ngen in,” a ci hi. Solomon in, “Na nasem ka pa David tungah a lian itna kip na lak hi, bang hang hiam cih leh cihtakna, thumanna tawh nangma mai-ah gamta-in, nangma tungah lungsim thutang hi; nangmah in ama adingin hih a lian itna kip koihsakin, tu ni-in ama tokhom tungah a tu ding tapa khat na pia hi. Tu-in, Topa ka Pasian aw, keimah in naupang no khat hi napi-in ka pa David’ munah kumpi-in na nasempa nong koih hi; bangci pusuah ding cih ahi a, bangci sungtum ding cih ahi zongin bangmah ka thei kei hi. A lian, a tamna a kisim a kiseh thei lo, nangmah in na teelsa na mite lakah na nasempa om hi. Tua ahih ciangin keimah in a sia leh a pha ka theih theih nadingin na mite uk nading thu theihtelna lungsim na nasempa hong pia in; bang hang hiam cih leh hih a lian a tam na mite kua in uk zo ding ahi hiam?” a ci hi. Solomon in hih thu a ngetna in Topa lungkimsak hi. Pasian in ama kiangah, “Nangmah in hih thu hong ngenin, nangma adingin khan’ sauna ahi a, hauhna ahi a, na galte’ nuntakna ahi zongin hong ngen loin, a man thu theih nadingin nang adingin thu theihtelna hong ngen na hih manin, en in, nangma hong ngetna bangin kong pia ding hi. En in, nangma hun ma-in nang tawh a kibang a om loh nading leh nangma khitah zong nang tawh a kibang hong khan’ loh nadingin pilna leh theihna lungsim kong pia ding hi. Nangma hun sung tawntung kumpi dang nang tawh a kiteh theih loh nadingin nangma hong nget loh hauhna leh pahtawina zong nang kong pia ding hi. Na pa David in a tot bangin nangmah in ka lampite tawnin ka thukhamte leh ka thupiaknate na zuih leh na khan’ ka sausak ding hi,” a ci hi. Tua ciangin Solomon khanglo a, en in, hih in a mang ahi hi. Tua ciangin Jerusalem ah amah pai a, Topa thuciamna singkuang mai-ah amah ding-in meihal biaknate leh thunuam-a biaknate pia-in, a nasemte khempeuh adingin pawi khat kham hi. Tua ciangin numei paktat nih kumpipa kiangah hong pai uh a, ama mai-ah ding uh hi. A numei khat in, “Aw, ka topa aw, hih numei leh kei, inn khat sungah ka omkhawm uh hi; amah a om sungin keimah in ta khat ka nei hi. Ka ta neih khit ni thum ni ciangin hih numei in zong ta nei hi; ko bek a om ka hi uh hi; kote tawh inn sungah kuamah dang om lo a, kotegel bek inn sungah ka om uh hi. Amah in delhphah kha ahih manin zanin hih numei’ tapa si hi. Tua ciangin zan kim lai takin amah tho-in, na nasemnu ka ihmut lai takin ka kiang panin ka tapa la-in ama ang-ah koih a, ama tapa si keima angah hong koih hi. Zingsangin ka ta nawi pia dingin ka thawh ciangin, en in, na si hi; ahih hangin zingsangin lim takin ka et ciangin, en in, amah in keima sung pan-a suak ta na hi lo hi,” a ci hi. Ahih hangin a numei dang khat in, “Hilo hi, a hing naupang in keima’ aa hi a, a si naupangin nangma’ aa ahi hi,” a ci hi. Tua ciangin a masa nu in, “Hilo hi, a si naupang in nangma’ aa hi a, a hing naupang in keima’ aa ahi hi,” a ci hi. Tua bangin kumpipa mai-ah amaute in thugen uh hi. Tua ciangin kumpipa in “Khat in, “A nungta in keima tapa hi a, nangma tapa si hi,’ ci hi; tua ciangin a dang khat in, ‘Hi lo hi; nangma tapa si a, keima tapa in a hing pen hi,’ ci hi,” a ci hi. Tua ciangin kumpipa in, “Namsau khat hong la un,” a ci hi. Tua a hih ciangin kumpipa mai-ah namsau khat hong kipaipih hi. Tua ciangin kumpipa in, “A nungta naupang khen nih suah un la, khat tungah a lang pia-in, a dang khat tungah a lang pia un,” a ci hi. Tua ciangin a tapa a nungta numei in a lungsimah a tapa khasiat ahih manin kumpipa kiangah, “Aw, ka topa aw, a nungta naupang amah pia in; bang bang hita leh amah that kei in, a ci hi. Ahih hangin a khat in, “Hih in kei ka hi a, nang na hi zongin tang thei lo ding hi; hong hawmsak un a ci hi. Tua ciangin kumpipa in dawngin, “A masa numei tungah naupang hing pia un; bangbang hita leh that kei un; amah in a nu ahi hi,” a ci hi. Tua ciangin Israel khempeuh in kumpipa’ piak thukhenna za uh hi; thutang a sem dingin ama tungah Pasian in pilna pia hi, ci-in phawk uh ahih manin amaute in kumpipa lamdangsa-in om uh hi. Kumpi Solomon in Israel khempeuh tungah kumpi hi a, hihte in ama nuai-ah za lian a neite ahi hi: Zadok’ tapa Azariah in siampi ahi hi; Shisha’ tapa Elihoref leh Ahijah in lai-atte ahi uh hi; Ahilud’ tapa Jehoshafat in thuciamtehpa ahi hi; Jehoiada’ tapa Benaiah in galkapte a uk ahi hi; Zadok leh Abiathar in siampite ahi uh hi; Nathan’ tapa Azariah in uliante tungah a uk ahi hi; Nathan’ tapa Zabud in siampi leh kumpipa lam a lakpa ahi hi; Ahishar in kumpipa inn uk ahi hi; Abda’ tapa Adoniram in aana tawh na a semte a uk ahi hi. Solomon in Israel khempeuh tungah ulian sawm-le-nih nei-in tuate in kumpipa leh a innkuan adingin annek tuidawn pia hi; mi khat in kum khatin kha khat sung annek tuidawn pia uh hi. Hihte in amaute’ min ahi hi: Efraim mualtung gam sungah Benhur; Makaz khua, Shaalbim khua, Bethshenesh khua, leh Elonbethhanan khua sungah Bendeker; Arubboth khua sungah Benhesed (Soko leh Hefer gam khempeuh ama aa hi); Nafathdor gamsung khempeuh ah Benabinadab (amah in Solomon’ tanu Tafath zi-in nei hi); Ta-anak khua, Megiddo khua, leh Jezre-el khua nuai Zarethan khua pang-a om Bethshean gam khempeuh, leh Bethshean khua panin Jokmeam khua pang khat dongin Abelmeholah khua sungah Ahilud’ tapa Baana; Ramoth-gilead gam sungah Ben-geber (Amah in Gilead sunga om Manasseh’ tapa Jair’ khua neute leh Bashan sungah a om Argob gamsung, kulhpite leh sumngo zawlte a nei khuapi lian sawmguk nei hi); Mahanaim khua sungah Iddo’ tapa Ahinadab; Naftali gam sungah Ahima-az (amah in Solomon’ tanu Basemath zi-in la hi); Asher gam leh Bealoth khua sungah Hushai’ tapa Baana; Issakhar gam sungah Paruah’ tapa Jehoshafat; Benjamin gam sungah Ela’ tapa Shimei; Amor mite kumpi Sihon leh Bashan kumpi Og gam ahi Gilead gam sungah Uri’ tapa Geber ahi hi. Tua ciangin hih sawm-le-nihte banah Judah gam sungah ulian khat om lai hi. Judah leh Israelte tuipi gei-a sehnel bangin tam uh hi; amaute in ne-in dawnin lungdam uh hi. Solomon in Eufrates panin Filistiate’ gam leh Izipt gamgi ciang dong kumpi gam khempeuh uk hi; amaute in siah hong puak uh a, a nuntak sung tawntung Solomon’ na sem uh hi. Solomon’ ading ni khatin annek tuidawn in annel lawh sawmthum, leh an lawh sawmguk, bawngtal a thau sawm, leh lono-a kivak bawng sawmnih tuu za khat hi a, sakhitalte, leh Siria sakhite, sanangte, leh a thau vasate kisim lo lai hi. Bang hang hiam cih leh amah in Eufrates nitumna lam gamsung khempeuh Tifsah panin Gaza ciang dong, Eufrates nitumna lam pang kumpi khempeuh tungah ukna nei hi; ama kiim mun khempeuh ah kilemna om hi. Solomon’ hun sung khempeuh Judah leh Israel lungmuang takin omin, Dan panin Be-ersheba ciang dong nangawn mi khempeuh a leenggui leh a theikung nuai uhah om uh hi. Solomon in a leengte adingin buk a nei ciat sakol tul sawmli leh sakol tung tuang mi tulsawm leh tulnih zong nei hi. Tua uliante in Kumpi Solomon leh Kumpi Solomon’ sabuai-ah hong pai mite khempeuh adingin amau ciat sikh kha sung adingin annek tuidawn pia uh hi; amaute in bangmah kisamsak lo uh hi. Amau’ nasep ciat tawh kizui-in a kisapna munah sakolte leh sakol zaptelte’ adingin mangbuhham leh buhtu zong paipih uh hi. Pasian in Solomon tungah teh zawh lohin a thuk mahmah pilna leh theihna, leh tuipi gei-a sehnel bangin lungsim zaina pia a, Solomon’ pilna in nisuahna lam mi khempeuh leh Izipt pilna khempeuh khuplet hi. Bang hang hiam cih leh mi dang khempeuh sangin amah pil zaw a, Ezrah mi Ethan, leh Mahol, tapa Heman, Kalkol, leh Darda sangin pil zaw hi; ama minthan’na in a kiim-a minam khempeuh lakah kizeel hi. Amah in paunak tul thum zong genkhia hi; ama late in tul-le-nga a hi hi. Amah in Lebanon a, om taamtaak-a kipan phungmai a, a po puknahte dongin singkung thu gen hi; amah in khe li nei ganhingte, leh vasate, leh a bokvak ganhingte, leh ngasate thu gen hi. Mi khempeuh sungpan, leh leitung kumpi khempeuh sung panin Solomon’ pilna a za dingin ama pilna a zasate hong pai uh hi. Amaute in ama pa’ munah kumpi-in amah sathau a nilhna thu a zak ciangin Tai-ar kumpi Hiram in a nasemte Solomon kiangah sawl hi; bang hang hiam cih leh Hiram in David it tawntung hi. Tua ciangin Solomon in Hiram kiangah kam khak a, “ Topa in ama khe nuai-ah amaute a koihsak matengin amah a umcih a galte tawh kidona hangin ka pa David in Topa ama Pasian’ min dingin inn a lam theih lohna thu na thei hi. Ahih hangin tu-in Topa ka Pasian in na khempeuh ah tawlngakna kei tungah hong pia hi; hong langpang ahi a, thusia ahi zongin om lo hi. Tua ahih ciangin Topa in ka pa David kiangah, ‘Nangma taangin na kumpi tokhom tungah ka koih ding na tapa in ka min dingin inn lam ding hi,’ a cih mah bangin Topa ka Pasian’ min dingin inn khat lam ka sawm hi. Tua ahi ciangin Lebanon taamtaak singte kei adingin a kiphuk nading thu pia in; ka nasemte in nangma nasemte seppih ding uh a, nangma seh bangin na nasemte’ thaman ding nang tungah kong pia ding hi; bang hang hiam cih leh Sidon mite bangin sing suih zia a thei kote lakah khat zong a om lohna na thei hi,” a ci hi. Hiram in Solomon’ kam a zak ciangin nakpi takin a lungdam a, “Hih a lian a tam mite a uk dingin David tungah a pil tapa a pia Topa in tu ni-in thupha ngah ta hen,” a ci hi. Tua ciangin Hiram in Solomon kiangah mi sawlin, “Kei kiangah nong thu-khak ka za hi; taamtaak sing leh taaksan sing tawh kisai na deih khempeuh a hih dingin ka kiging hi. Ka nasemte in Lebanon panin tuipi ah tuate hong puak suk ding uh hi; nangma cihna munah a pai dingin tuipi a tawn dingin keimah in tuate phongin ka bawl dinga, tua lai munah keimah in a singte phelsakin nangmah in na ngah ding hi; nangmah in ka innkuan ading an piakna tawh ka deihnate nong kicingsak ding hi,” ci sak hi. Tua ahih ciangin Hiram in ama deih taamtaak leh taaksan singte Solomon pia a, Solomon in Hiram tungah a innkuan an dingin mangbuh beem tul sawmnih dim pia a, oliv thau bungpi tul sawmnih dim pia hi. Solomon in Hiram tungah a kum kumin hihte pia hi. Ama tungah a ciam bangin Topa in Solomon tungah pilna pia hi; Solomon leh Hiram kikalah kilemna om hi; amaute nih in thuciamna khat bawl uh hi. Kumpi Solomon in Israel khempeuh sung panin aana tawh na a sem mite la hi; a lak mite mihing tul sawmthum pha hi. Amah in Lebanon ah tua mite kha khatin tulsawm a kikhelin puak hi; amaute Lebanon ah kha khat omin innah kha nih om ding uh hi; Adorniram in hih a kila mite uk hi. Solomon in van pua mi tul sawmsagih leh mual tung gamah suangseek mi tul sawmgiat zong nei a, na a sem mite a uk, Solomon’ nuai-ah ulian tulthum leh zathum, nasep ukte a kihel lo ahi hi. Suang seeksa tawh inn bulpi a phuh theih nadingin kumpipa’ thupiakna tawh amaute in a lian, a manpha suangtumte suangkhuk panin tokhia uh hi. Tua ahih ciangin inn lam nadingin Solomon’ mi innlamte, Hiram’ mi innlamte leh Gebal mite in singphuk leh sing leh suang nasep sem uh hi. Izipt gam panin Israelmite a paikhiat zawh kum zali leh a kum sawmgiatna, Israel tungah Solomon’ uk a kum lina, a kha nihna ahi Ziv kha-in amah in Topa inn lam ding kipan hi. Kumpi Solomon in Topa adingin a lam inn in a dung tong sawmguk sau-in, tong sawmnih zai a, tong sawmthum sang hi. Biakinn mai-a innlim in inn zaina zahin tong sawmnih sau a, inn mai lamah tong sawm sang hi. Tua ciangin amah in inn adingin a pualam a kihui kongvangneute bawl hi. Amah in biakna pang tuak leh a nung lam inn kawm kimkotin inn kawm tungah zong inn lam hi; amah in a kimkot a pangah inndei bawl hi. A dawl nuainung pen tong nga zai-in, a laita tong guk zai a, a thumna tong sagih zai hi; inn kawm sungah innkam nan’na a lut loh nadingin amah in inn pualam pang kimkot adingin a nan’na singbekte bawl hi. Inn a kilam ciangin a kitawhna panin a kibawlsa suangte tawh kilam hi; tua ahih manin a kilam lai takin hei ahi a, sek ahi a, sik nazat khat peuhpeuh ahi zongin awgingte biakinn huang sungah kiza lo hi. A dawl nuainung pen lut nadingin inn’ leitaw lam pangah om hi; a dawl laita-ah kahlei zui-in kipai-in a dawl laita panin a thumna ah kipai hi. Tua ahih ciangin amah in inn lamin zo hi; amah in innkalte leh taamtaak peekte tawh inndap bawl hi. Amah in a inn buppi tungah a lambehte zomin, dawl khat ciangin tong nga sang ciat a, taamtaak singte-in a inn tawh kizom hi. Tu-in Topa thu Solomon tungah hong tung a, ”Nangmah in na lam hih inn tawh kisai-in, nangmah in ka thukhamte zui-in ka ngeina kipte mang a, ka thupiaknate khempeuh kemin tuate na zuih leh, na pa David tungah ka gen thu nang tungah kong kipsak ding hi. Tua ciangin na lam inn sung Israel mite lakah ka teeng ding a, keima mi Israel ka nusia kei ding hi,” a ci hi. Tua ahih ciangin Solomon in inn lamin zo hi. Amah in taamtaak peekte tawh innsung kawm dap hi; inn sual panin inndap innsunte dongin amah in singtawh a sunglam tuam hi; tua ciangin amah in taaksan peekte tawh inn sual tuam hi. Amah in sual panin innsun dong inn nung lam tong sawmnih taamtaak peekte tawh lam a, amah in Siangtho Pen Mun, biakinn sungnung dingin a inn sungah lam hi. Biakinn sungnung mai-a inn sung in tong sawmli sau hi. Inn sunga om taamtaak singte tungah um gah leh pak palh lim kigelh hi; a vekpi-in taamtaak hi a, suang kimu lo hi. Amah in Topa thuciamna singkuang koih nadingin inn sung tawng penah biakinn sungnung bawl hi. Biakinn sungnung in tong sawmnih sau-in, tong sawmnih zai a, tong sawmnih sang hi; amah in kham citak tawh zut hi. Amah in taamtaak sing biakna tau khat zong bawl hi. Tua ciangin Solomon in kham citak tawh inn sung zut a, biakinn sungnung mai kan tanin kham khainiang khungin kham tawh zut hi. Amah in inn khempeuh a zawh dongin inn buppi kham tawh zut hi. Biakinn sungnunga biakna tau buppi zong amah in kham tawh zut hi. Amah in biakinn sungnungah oliv sing tawh kherub nih bawl a, tong sawm tuak sang hi. Kherub kha lang khat in tong nga sau-in kherub kha lang dang khat in tong nga mah sau hi; a kha lang khat mong panin a mong lang khat dong tong sawm ahi hi. Kherub adang khat zong tong sawm mah sau hi; kherubte gel asauna leh a pian’ lim kibang hi. Kherub khat sauna in tong sawm hi a, adang kherub khat zong tua zah mah ahi hi. Amah in inn sung tawngnung penah kherubte koih hi; kherubte’ khate kizal a, khat’ kha in kawm banin, adang kherub’ kha in a kawm lang khat ban hi; amau’ kha lang khatte gel inn laizangah kituah hi. Amah in kham tawh tua kherubte zut hi. Amah in a sungnung leh a puanung inndeite, a kimkot inn kawm khempeuh tungah kherubte leh nisuh kungte leh pak palhte bawl hi. A sungnung leh a puanung inndei sunga inn sualte amah in kham tawh zut hi. Biakinn sungnung lut nadingin amah in oliv sing kongkhak peekte bawl hi; a bangtung zawl leh kongkhak khuamte in kiu nga piangsak hi. Amah in kherubte, nisuh kungte, leh pakpalh lim kibawlte tawh oliv sing kongkhak peek nihte tuam hi; amah in tuate kham tawh zut a, kherubte leh nisuh kungte tungah kham theh hi. Tua mah bangin amah in kiu li nei-in biakinn sung lutna oliv sing kongkhak khuamte, leh taaksan sing kongkhak peek nihte bawl hi; kongkhak a pek nihte kikhepin, a dang kongkhak a pek nihte zong kikhep hi. Tuate tungah amah in kherubte leh nisuh kungte leh pakpalhte bawl hi; amah in tua a bawlte tungah a tukimin kham tawh zut hi. Amah in a kiseek suang gual thum leh taamtaak sing gual khat tawh atual sungnung bawl hi. A kum lina, Ziv kha-in Topa ’ inn a bulpi kipan hi. A kum sawm-le-khatna, a kha giatna ahi Bul kha-in a na khempeuh leh a kigen khempeuh bangin a inn kizo hi. Amah in tua a lamna-in kum sagih bei hi. Solomon in ama inn ding zong kum sawm-le-thum sung lamin a inn buppi zo hi. Amah in Lebanon Tulak ah Inn lam hi; a sauna tong za hi a, a zaina tong sawmnga hi-in, a san’na tong sawmthum hi a, taamtaak khuampi gual thum tungah taamtaak innkam kikhung tungah kilam hi. Gual khatah sawm-le-nga a om khuampi sawmli-le-nga tunga kilam inndei tung san teng taamtaak sing tawh kituam hi. A gual thumte tungah kongvangneute om a, a gual thum-a kongvangneute khat leh khat kitang hi. Kongkhakte leh kongvangneu khempeuhte in a pang kikim kiu li nei a, a gual thumin kongvangneu leh kongvangneu kitang hi. Tua ciangin amah in Khuampi Innpi bawl hi; a sauna tong sawmnga hi a, a zaina tong sawmthum ahi hi; a mai lamah khuampite a nei innlim om a, tuate mai-ah a tungkhuhna khat om hi. Tua ciangin amah in thu a khen nading mun Thukhenna Innpi ahi Kumppi tokhom Innpi bawl hi; a sual panin a innsun ciang dong taamtaak sing tawh kituam hi. Innpi nung tual dang khat sunga amah a ten’ nading ama inn zong tua mah bangin a kilam ahi hi. Solomon in a zi ding a, a lak Faro’ tanu adingin hih innpi tawh a kibang inn khat zong bawl hi. Hihte khempeuh, a bulpi nangawn a, kipan a khum dong, leh Topa ’ inn tual-a kipan tual lianpi dongin, lim takin tehin, a kitan, a nung leh a mai singatna tawh a ki-at a manpha suangte tawh a kibawl ahi hi. A bulpi in a manpha suang, suang lian, pawl khat tong giat, pawl khat tong sawm a pha suangte ahi hi. Tuate’ tunga-te in tehin a kitan a manpha suang, leh taamtaak sing ahi hi. Tual lianpi in a kimkotah a kiseek suang gual thum leh taamtaak sing gual khat nei hi; tua mah bangin Topa ’ inn tual sungnung leh innlim in zong nei hi. Tua ciangin Kumpi Solomon in mi sawlin Tai-ar panin Hiram samsak hi. Amah in Naftali minam meigongpa’ tapa hi a, ama pa in Tai-ar khuami summgo seek na a sempa ahi hi; amah in sumngo tawh na khat peuhpeuh hih nadingin pilna, theihna, siamna tawh kidim hi. Kumpi Solomon kiangah amah hong pai-in ama na khempeuh sem hi. Amah in sumngo khuampi nih sung hi. Khuampi khat a sauna in tong sawm-le-giat hi a, a khuam pum kimkot tong sawm-le-nih pha hi; a sung hawm a, a sahna zung li ahi hi; a khuam nihna in tua mah tawh kibang hi. Khuampite tungah a bulh dingin amah in a kisung sumngo khuamluzepna nih zong bawl hi; khuamluzepna khat a sauna in tong nga hi a, a dang khuamluzepna a sauna in tong nga mah ahi hi. Tua ciangin amah in khuampite lu dawn-a khuamluzepna khat adingin khainiang a kihuihek tawh a kibawl ngen banga kikalh simsiam nih bawl hi; ngen khat in khuamluzepna khat ading hi a, ngen khat in a dang khuamluzepna khat ading ahi hi. Tua mah bangin amah in a mangkawlsing gahte bawl hi; khuampi lu dawn-a om khuamluzepna tuam nadingin ngen tawh kibangin a bawl tung kimkotah gual nih bawl hi; amah in a khuamluzepna dang khat zong tua mah bangin bawl hi, Tua ciangin innlim-a om khuampi dawnah a om khuamluzepnate tong li pha a, tuate tungah unok pak a kibawlte om hi. A khuamluzepnate in a khuampi nihte tung leh ngen tawh kibanga kibawl gei-a a om a bem a dawk tungah om hi; a kimkotah gual nihna mangkawlsing gah zanih om hi; a khuamluzepna dang khatah zong tua bangmah ahi hi. Amah in a khuampite biakinn innlim-ah phut hi; amah in leitaw lamah a khuam phutin a min Jakhin phuak hi; tua ciangin amah in leilu lamah a khuam phutin a min Boaz phuak hi. A khuampite dawnah unok pak a kibawl om hi. Tua bangin khuampite a bawl man khin hi. Tua ciangin amah in a kisung tuikuangpi bawl hi; tua in a bem hi a, a gei khat pan a gei khat tong sawm pha-in, tong nga thuk a, a kimkot tong sawmthum pha hi. A geivial nuai tong sawmthum sung, tuikuangpi kimkotin um gahte kibawl hi; tua um gahte gual nihin om a, a tuikuangpi a kisun’in kisung khawm pah hi. Bawngtal sawm-le-nihte tungah tua tuikuangpi kinga a, thum leilu lam nga a, thum nitumna lam nga-in, thum leitaw lam nga a, thum nisuahna lam nga hi; tuate tungah a tuikuangpi kikoih a, a nung lam uh a sung lamah om hi. A sahna in khutpeek mai cia ahi hi; a geivial pen unok pak tawh a kibang hai geivial bangin kibawl hi; tua sungah tui tambong tulli ta hi. Amah in sumngo kibawl din’na sawm zong bawl hi; tua din’nate tong li sau, tong li zai, tong thum sang hi. Tua din’nate a kibawlna zia in hih bang ahi hi: tuate in a khawkte nei-in, tua a khawkte a kungah kibulh a, tua ciangin a kungah a kibulh a khawkte tungah humpinelkai, bawngtalte, leh kherubte om hi. Tua a kungte tung, humpinelkaite leh bawngtalte’ tung leh nuai-ah a sawi-in a kikingkalh limliam om hi. Tua tham loin tua din’nate in sumngo tawh a kibawl leengpeite leh leengpeizawlte nei ciat hi; tua ciangin a kiu lite-ah tuikuangpi nan’nate om hi. Tua nan’nate a kisung hi a, a pang ciatah pakkual om hi. A vang pen, tong khat a san’tohna a dawn lamah om hi; a vang pen kingakna a kibawl bangin bem a, tong khat leh alang thuk hi. A vangah lim kigelhte om hi; a khawkte in sikli nei a, bem lo hi. A leengpei lite in a khawkte’ nuai-ah om hi; leengpei zawlte in a din’na tawh sa-khat ahi hi; leengpei a san’na in tong khat leh a lang ahi hi. A peite pen sakol leengpei bangin kibawl hi; a peizawl, a peikual, a peikalhna, leh a kalhna bulte khempeuh a kisung ahi hi. A din’nate kiu ciatah a nan’na li om ciat hi; tua a nan’nate in a din’na tawh sa-khat ahi hi. Tua ciangin a din’na dawnah tong lang a sang vial bem khat om hi; tua ciangin a din’na dawnah a kipsaknate leh a khawkte in a din’na tawh sa-khat ahi hi. Tua ciangin a kipsaknate leh a khawkte tungah a mun awng zah ciat tawh kizui-in amah in kherubte, humpinelkaite, nisuh kungte gelhin a kimkotah pakkual bawl hi. Hih bangin amah in din’na sawm bawl hi; a vekpi-in a kibangin kisungin, a liatna leh a pian’ lim kibang hi. Tua ciangin amah in sumngo tuikuang sawm bawl hi; tuikuang khatah tambong sawmgiat ta-in, tuikuang tong li ciat pha a, a din’na sawmte adingin tuikuang khat ciat om hi. Tua ciangin amah in din’nate, inn leitaw lamah nga, inn leilu lamah nga, koih hi. Tua ciangin amah in inn khang nisuahna lam kiu-ah tuikuangpi koih hi. Hiram in beelte, kawbiate, leh kuangte zong bawl hi. Tua ahih ciangin Hiram in Kumpi Solomon’ adingin Topa ’ inn a lam nasep khempeuh zo hi; khuampi nihte, khuampite dawnah a om khuamluzepna kuak nihte, leh khuampite dawnah a om khuamluzepna kuak nihte tuam nading ngen tawh kibanga kibawl nihte; leh khuampite tungah a om khuamluzepna nihte a tuam dingin ngen tawh kibanga kibawl khat adingin mangkawlsing gah gual nih ahi, ngen tawh kibanga kibawl nih adingin mangkawlsing gah zalite; din’na sawmte, leh din’nate tungah a om tuikuang sawmte; leh tuikuangpi khat, leh tuikuangpi nuai-ah a om bawngtal sawm-le-nihte ahi hi. Tu-in beelte, kawbiate, leh kuangte, Hiram in Kumpi Solomon’ adingin a bawl, Topa ’ inn sungah a om nazatte khempeuh in a tee sumngo tawh kibawl ahi hi. Jordan zanglei, Sukkoth leh Zarethan kikal beel lei-ah kumpipa in tua nate sung hi. Tam lua ahih manin Solomon in hih nate khempeuh tawi teh lo hi; sumngo gik zah kithei zo lo hi. Tua ahih ciangin Topa ’ inn sunga om nazat khempeuh Solomon in bawl hi; kham biakna tau, Ompihna Anlum adingin kham sabuai, biakinn sungnung mai, leitaw lam pangah nga omin leilu lam pangah nga a om kham citak meivak-khuamte; kham tawh kibawl pakte, meivakte, leh taitehte; paknamtui adingin haite, meitehte, kuangte, pakante, leh kham citak vutluahna; leh Siangtho Pen Mun inn sung tawngnung kongkhakte leh biakinn sung kongkhakte adingin kham bilte ahi hi. Tua ahih ciangin Kumpi Solomon in Topa ’ inn a hih nasep khempeuh kizo hi. Tua ciangin Solomon in a pa David in a apsa nate, ngun, kham, leh nazatte paipihin Topa ’ inn vankoihna ah tuate koih hi. Tua ciangin Solomon in Zion a kici David’ khuapi panin Topa ’ thuciamna singkuang a paipih dingin Jerusalem khua sung Kumpi Solomon’ mai-ah Israel upate leh minam lutang khempeuh, Israel upate leh minam lutang khempeuh, Israel beh makaite khawm hi. Tua ciangin Israel mite khempeuh a kha sagihna ahi Ethanim kha sunga pawi hunin Kumpi Solomon kiangah kikhawm uh hi. Tua ciangin Israel upate khempeuh hong pai uh a, siampite in thuciamna singkuang la uh hi. Tua ciangin amaute in Topa ’ thuciamna singkuang, kikhopna buk, leh puanbuk sunga om a siangtho nazatte khempeuh paipih uh hi; siampite leh Levi mite in tuate paipih to uh hi. Ama mai-ah a kikhawm Kumpi Solomon leh Israel mihonte khempeuh thuciamna singkuang mai-ah amah tawh omin, tuu leh bawngtalte biakna-in tampi tak pia uh ahih manin tuate kiseh thei lo, a phazah kisim zo lo hi. Tua ciangin siampite in kherubte’ kha nuai, Siangtho Pen Mun sung, biakinn sungnung lam-a ama munah Topa ’ thuciamna singkuang paipih uh hi. Kherubte in thuciamna singkuang omna mun tungah a kha uh zak ahih manin thuciamna singkuang leh a zawlte tungah kherubte in khuhna piangsak uh hi. A zawlte sau mahmah ahih manin biakinn sungnung mai Siangtho Mun panin a zawl mongte kimu hi; ahih hangin a pua lam panin kimu thei lo hi; tu ni dongin tua san takah tuate om hi. Thuciamna singkuang sungah, Izipt gam panin a paikhiat lai-un Topa in Israel mite tawh thuciamna a bawlna Horeb ah Moses in suangpeek nih a koih sim loh bangmah om lo hi. Siangtho Mun panin siampite a paikhiat ciangin meii in Topa ’ inn tuam a, meii hangin siampite in na sem dingin om thei lo uh hi; bang hang hiam cih leh Topa ’ minthan’na in Topa ’ inn tuam hi. Tua ciangin Solomon in, “ Topa in vantungah ni koih khin a, ahih hangin khuamial sahpi sungah amah a ten’ ding gen khin hi. Keimah in nangma adingin a kipahtawi inn khat, na ten’ tawntung nading mun khat ka lam khin hi,” a ci hi. Tua ciangin Israel a kikhawmte a din’ lai takin kumpipa in en kawikawi-in Israel a kikhawmte khempeuh thupha pia hi. Tu-in, Israel Pasian, Topa ’ min adingin inn khat lam ding ka pa David’ lungsim sungah om hi. Ahih hangin Topa in ka pa David kiangah, ‘Keima min dingin inn khat lam ding na lungsim sungah a omna thu-ah, tua banga na lungsimah a om hoih mahmah hi; ahi zongin nangmah in a inn na lam kei ding a, nangma sungpan hong suak ding na tapa in ka min dingin a lam ding hi,’ a ci hi. Tu-in ama bawlsa thuciamna Topa in tungsak khin hi; bang hang hiam cih leh ka pa David’ munah keimah khangin, Topa ’ ciamsa bangin Israel kumpi tokhom tungah ka tu a, Israel Pasian, Topa ’ min dingin a inn ka lam khin hi. Amah in Izipt leitang panin amaute a paikhiatpih lai-in amah in i pu i pate tawh a bawl Topa ’ thuciamna a omna thuciamna singkuang adingin tua lai-ah mun khat ka bawlsak hi,” a ci hi. Tua ciangin Israel a kikhawmte khempeuh omna Topa ’ biakna tau mai-ah Solomon ding a, vantung lamah a khutte zak hi; amah in, Israel Pasian, Topa aw, tunga om vantungah ahi a, nuai-a om leitungah ahi zongin, nangma mai-ah a lungsim khempeuh uh tawh a pai, na nasemte tungah thuciamna lenin itna kip a lak, nang tawh a kibang Pasian om lo hi; na nasem ka pa David tungah na gensa thu na kipsak hi; hi hi, nangmah in na kam tawh na gen a, tu ni-in na tangtungsak hi. Tua ahih ciangin tu-in Israel Pasian, Topa aw, ama tungah, ‘Keima mai-ah nang na gamtat mah bangin na tapate in keima mai-ah gamtat ding a kidop nak uh leh, Israel kumpi tokhom tungah a tu dingin keima mai-ah mi khat zong na tasam kei ding hi,’ ci-in na nasem ka pa David tungah na ciamsa thu len in. Tua ahih ciangin tu-in Israel Pasian aw, na nasem ka pa David tungah na gensa thu kipsak in. “Ahih hangin leitungah Pasian teeng taktak ding ahi hiam? En in, vantung leh vantung a sangpen in nang hong huam zo lo hi; keima lamsa hih inn in bangzahin nang hong huam zo lo zaw kan ding ahi hiam! Ahi zongin na nasempa’ thungetna leh a hong thuumna hong don in la, Topa ka Pasian aw, tu ni-in nangma mai-ah na nasempa in a hong ngetna ahi a kikona leh a thungetna hong ngai in; ‘Tua lai-ah ka min om ding hi,’ na cihna mun hih inn lamah sun leh zanin na mit hak in la, na nasempa in hih mun lamah a thungetna za in. Tua ciangin amaute in hih mun lamah hong nget uh ciangin na sempa leh na mi Israelte’ hong thuumna ngai in; hi hi, na ten’na mun vantungah na za hi; na zak ciangin na maisak hi. “Mi khat a vengpa tungah khialin, amah in a kiciamsak a, amah hong pai-in hih inn sung nangma biakna tau mai-ah a kiciam leh, nangmah in vantung pan za-in, gamta-in na nasemte thukhen in la, a mawhpa mawhna thuaksakin ama lu tung mah ah ama gamtatna tungsak in la, a dikpa a dikna langsakin ama dikna tawh kizui-in thaman pia in. “Nangma tungah hong khialna hangin galte mai-ah na mi Israelte a guallelh ciangin, amaute nangma lamah hong kihei kikin nangma min hong phawk a, hih inn sungah thungenin nang tungah hong thuum uh leh, vantung panin za-in na mi Israelte’ khialna maisak in la, a pu a pate uh tungah na piak leitangah amaute paipih kik in. “Nangma tungah hong khialhna hangin vantung kikhakcipin guah a zuk loh ciangin, amaute in hih mun lamah thungenin na min hong phawk a, amaute na gimsak ciangin amau khialhna panin a kihei uh leh, vantung pan za-in na mi Israel, na nasemte’ khialhna maisak in la, amaute’ zuih ding lampi hoih hilh in; tua ciangin na mite tungah gamh-in na piaksa leitang tungah guah zusak in. “Gam sungah kialpi tungin, pulnatna ahi a, ankung natna ahi a, ankung zawngkhalna ahi a, kauphe ahi a, lung ahi zongin om a, amau’ khuapi khat peuhpeuh ah a galte un umcihin, bangbang gimna, bangbang natna hita leh, mi khatpeuh ahi a, na mi Israelte khempeuh un ahi zongin amau’ lungsim natna thei-in hih inn lamah a khutte hong zanin bangbang thungetna hita leh bangbang thuumna hita leh hong bawl leh, na ten’na vantung panin za-in maisak in; tua ciangin amau’ gamtatna khempeuh tawh kizui-in a lungsim uh na theih bangin amaute tungah pia ciat in (bang hang hiam cih leh nang, nang bek in mihing khempeuh lungsim na thei hi); ka pu ka pate uh tungah na piak leitang tungah a nuntak hun sung khempeuh uh amaute in nang hong zahtak ding uh hi. “Tua mah bangin na mi Israel a hilo gamdang mi khat nangma min hangin a gamlapi gam panin hong pai-in “(bang hang hiam cih leh amaute in a lian nangma minthan’na leh nangma mite’ adingin na sepsak na liante thu za ding uh hi), hih inn lamah amah hong pai-in thu hong nget ciangin, na ten’na vantung panin za in la, tua gamdang mipa in nang tungah hong ngetna khempeuh tawh kizui-in hih in; nangma mi Israelte mah bangin leitung mi khempeuh in na min thei-in nang hong zahtak nading, leh hih ka lamsa inn in nangma min tawh a kilo a hihna a theih nading uh ahi hi. “A galte uh do dingin na mite kuan khia-in, bangbang lamah amaute sawl hita lecin nangmah in na teelsa khuapi lam Topa tung leh nangma min dingin ka lamsa inn lamah thu hong nget uh ciangin, vantung panin amau’ hong thungetna leh hong thuumna za-in amau’ vai huh in. “Amaute nang tungah hong khialin – bang hang hiam cih leh mi a khial lo kuamah om lo hi–amaute tungah nang heh a, galte tungah amaute pia-in, amaute kimanin a galte’ gam a gamla ahi a, a nai-ah ahi zongin kipuakhia a, ahi zongin amaute in a kipuak khiatna leitungah amaute in a lungsim uhah tua thu ngaihsunin kisikkik a, ‘Kote khialin lam pialin ka gitloh tat uh hi,’ ci-in amaute a mante’ leitang panin nang tungah hong thuum uh a, amaute manin a puakhia a galte uh leitangah a ngaihsutna khempeuh leh a lungsim khempeuh uh tawh amaute kisikkik in, nangmah in na teelsa khuapi, amau’ pute tungah na piaksa amau’ leitang, leh nangma min dingin ka lam inn lam nga-in nangma tungah thu hong nget uh leh vantung na ten’na mun panin amau hong thungetna leh hong thuumna za-in, amau’ vai huh in la, nang tungah hong khial na mite leh nang tunga hong gamtatna uh amau’ thupalsatnate khempeuh maisakin, amaute in amaute tungah hehpihna a neih theih nadingun amaute manin a puakhia mite’ muhna ah amaute hehpih in (bang hang hiam cih leh amaute pen Izip panin na paikhiatpih, sik meiphual sung panin na paikhiatpih, nangma mi leh nangma luah ahi uh hi). Na nasempa hong thuumna leh na mi Israelte’ hong thuumna ah maipha tawh hong en tawntung in la, nang hong sap peuhmah uh ciangin amaute na bil ngat in. Izipt panin ka pu ka pate uh na paikhiatpih lai-in na nasempa Moses tung tawnin na gen bangin nangma luah ahi dingin leitung mi khempeuh lak panin amaute na tengkhia hi, Topa Pasian aw,” a ci hi. Tu-in Solomon in hih thungetna leh thuumnate khempeuh Topa tungah a bawl khit ciangin, vantung lamah a khutte zan sa-in a khukdin’na mun Topa ’ biakna tau mai panin amah ding to hi; tua ciangin amah dingin awging pha tawh Israel a kikhawmte khempeuh thupha pia-in, “Ama hong ciamsa khempeuh tawh kizui-in ama mi Israelte tawlngakna a pia Topa in thupha ngah ta hen; a nasempa Moses tung tawnin a gensa ama thuciamna hoihte khempeuh kam khat zong maimawk lo hi. I pu i pate tawh a om mah bangin Topa i Pasian eite tawh hong om hen; eite hong nusia-in, hong taisan kei hen; amah in i pu i pate a thupiaksa ahi ama lampi khempeuh zui ding, leh ama thupiaknate, a thukhamte, leh a ngeina kipte zui dingin ama lamah i lungsim hong awnsak hen. Topa mai-ah ka thuumna ka kammalte sun leh zanin Topa i Pasian nai-ah om hen la, ni simin a kisam bangin a nasempa’ vai leh ama mi Israel’ vai hong huh hen; leitung mi khempeuh in Topa in Pasian hi, kuamah dang om lo hi, ci-in thei ding uh hi. Tua ahih ciangin Topa i Pasian tungah na lungsim khempeuh uh tawh thuman un la, tu ni-a bangin ama thukhamte zui-in a thupiaknate mang un,” a ci hi. Tua ciangin kumpipa leh amah tawh a om Israel khempeuh in Topa mai-ah biakna pia uh hi. Solomon in thunuam-a biakna-in Topa tungah bawngtal tul sawmnih leh tul nih leh tuu tul za khat leh tul sawmnih pia hi. Tua ahih ciangin kumpipa leh Israel in mi khempeuh in Topa ’ inn ap uh hi. Tua ni mahin kumpipa in Topa ’ inn mai-a om inntual laizang ap hi; bang hang hiam cih leh meihal biakna leh an tawh biakna leh thunuam-a biakna a thaute a ta zo dingin Topa mai-a sumngo biakna tauneu lua ahih manin tua lai munah meihal biakna leh an tawh biakna leh thunuam-a biakna a thaute pia hi. Tua ahih ciangin tua hunin Solomon leh amah tawh a om Israel khempeuh in Topa i Pasian mai-ah ni sagih sung, Hamath lutna panin Izipt Lui dong kikhopna lianpi khat bawlin pawi khat kham uh hi. A ni giat ni-in amah in mite ciahsak hi; amaute in kumpipa thupha pia uh a, Topa in a nasempa David leh ama mi Israel tungah hoihna a lahnate khempeuh hangin lungdamna leh lungsim kipahna tawh a inn ciat uhah ciah uh hi. Solomon in Topa ’ inn leh kumpipa’ inn leh a lam nop khempeuh a lam a man khit ciangin, Gibeon a, ama tungah a kilahsa bangin Solomon tungah Topa a nih veina kilang hi. Topa in ama kiangah, “Keima mai-ah na hihsa na thungetna leh na thuumna ka za khin hi; na lamsa hih inn ka ap khin a, a tawntungin keima min kemin ka kipsak ding hi; a tawntungin tua ka hu ding hi. Nang ahih leh, na pa David a gamtat bangin lungsim thupina leh thumanna tawh ka mai-ah gamta-in, nang kong thupiak khempeuh bangin sem a, ka thukhamte leh ka ngeina kipte na zuih leh, na pa David tungah, ‘Israel kumpi tokhom tungah mi khat zong na tasam kei ding hi,’ ci-in ka ciamsa bangin Israelte tungah na kumpi tokhom ka kipsak paisuak ding hi. Ahih hangin nang na hi a, na tate ahi zongin, keimah zuihna panin pialin, note mai-ah ka koih ka thupiaknate leh ka thukhamnate na zuih kei uh a, pasian dangte’ na a sem ding leh a bia dingin na pai uh leh, amaute ka piaksa leitang panin Israel ka lakhia ding hi; tua ciangin ka min dingin ka apsa inn pen ka muhna panin ka lawnkhia ding hi; tua ciangin Israel in mi khempeuh lakah paunak leh thugentehna suak ding hi. Tua ciangin hih inn in nin bulomtang suak ding hi; a nawk kha mi khempeuh in lamdang sa-in ee! ci ding uh hi; amaute in, ‘Bang hangin Topa in hih leitang leh hih inn hih bangin hih hiam? ci ding uh hi. Tua ciangin amaute in, “Izipt gam panin a pu a pate uh a paikhiatpih Topa a Pasian uh amaute in nusia-in, pasian dangte len uh a, tuate bia-in a na a sepna uh hang ahi hi; tua ahih ciangin Topa in hih siatna khempeuh amaute tungah tungsak hi,’ ci ding uh hi,” a ci uh hi. Solomon in inn nihte, Topa ’ inn leh kumpipa’ in a lam kum sawmnih a beina, Tai-ar kumpi Hiram in Solomon’ deih zahzah taamtaak sing leh taaksan sing leh kham a piak manin, Kumpi Solomon in Galile gam sunga om khuapi sawmnih Hiram tungah pia hi. Ahih hangin Solomon in amah a piaksa khuapite en dingin Tai-ar panin Hiram hong pai ciangin, tua khuapite tawh amah lungkim zo lo hi. Tua ahih ciangin amah in “Ka sanggampa aw, kei nong piak hih khuapite a bangci khuapi ahi hiam? a ci hi. Tua ahih ciangin tu ni dongin tuate Kabul gam kici hi. Hiram in kumpipa kiangah a piak kham talen zakhat leh sawmnih pha hi. Hih in Topa ’ inn leh ama inn, Millo leh Jerusalem kulhpi, Hazor, Meggiddon leh Gezer a lam dingin Kumpi Solomon in aana tawh nasemte a lakna thu ahi hi. (Iziptte kumpi Faro paito a, Gezer la-in mei tawh hal a, a khuapi sunga teeng Kanaan mite thatin Solomon’ zi, a tanu’ tungah moken’ in a khuapi pia hi; tua ahih ciangin Solomon in Gezer) leh Bethhoron nuainung leh Baalath leh Judah gamsung, gamlakah Tamar, leh Solomon in a neih vankoihna khuapi khempeuh, leh a leengte ading khuapite, leh a sakol tuangte’ ading khuapite, leh Jerusalem sung, Lebanon sung, leh ama ukna gamsung khempeuh ah Solomon in a lam nop khempeuh lamkik hi. Israel mite a hi lo Amor mite, Hit mite, Perez mite, Hiv mite, leh Jebus mite sung panin a om lai mi khempeuh; Israel mite in a suksiat khit siang zawh loh, tua gamah amau’ nunga a om lai a suan leh khakte uh - Solomon in hihte aana tawh na a sem sila-in bawl a, tua ahih ciangin tu ni dongin tua mah bangin om uh hi. Ahih hangin Solomon in Israel mite sila-in bawl lo hi; amaute in galkapte, ama nuai-ah a uliante, ama nuai-ah a ukte, a galkapmangte, a leeng ukte leh a sakol tuangte ahi uh hi. Hihte in Solomon’ nasep a uk ulianpite ahi hi: na a sem mite a uk mi zanga leh sawmnga ahi hi. Ahih hangin Faro tanu David khuapi panin ama adingin Solomon in a lamsak ama innah paito hi; tua ciangin amah in Millo lam hi. Solomon in Topa adingin a lam biakna tau tungah meihal biakna leh thunuam-a biakna kum khatin thum vei pia-in Topa mai-ah paknamtui hal hi. Tua ahih ciangin amah in a inn zo hi. Kumpi Solomon in Edom gamsung San Tuipi gei dunga om Eloth nai-a Ezion-geber-ah teembaw hon khat bawl hi. Tua ciangin Hiram in tua teembaw honte tawh tuipi tung nasep a thei tuipi mite ahi a nasemte, Solomon’ nasemte tawh sawlkhia hi; tua ciangin amaute Ofir-ah pai-in tua lai panin kham talen zali leh sawmnih hong paipih uh hi; amaute in Kumpi Solomon kiangah tuate tun’ uh hi. Tu-in Sheba kumpinu in Topa ’ min tawh kisai-in Solomon’ minthan’na a zak ciangin thudotna haksate tawh amah a ze-et dingin hong pai hi. Amah nungzui honpi, a namtui nate a pua kalaohte, leh kham tampi, leh suang manpha tampi tawh Jerusalem ah hong pai hi; Solomon kiangah a tun’ ciangin amah in a lungsim a, om khempeuh Solomon tungah gen hi. Tua ciangin Solomon in ama dotna khempeuh dawng hi; kumpipa in ama tungah a gentel theih loh, haksa lua a sak bangmah om lo hi. Sheba kumpinu in Solomon’ pilna, ama lamsa a inn, a sabuai-ah a an, a uliante’ omzia, leh a nasemte’ etna, a puante uh, a an piate, leh Topa ’ innah a piak a meihal biaknate khempeuh a muh khit ciangin a lungsim bei hi. Tua ciangin amah in kumpipa kiangah, “Ka gamsung panin nangma thu leh na pilna ka zak a kigen thute man hi; ahih hangin kei hong pai-in keima mit in a muh mateng a kigente ka um kei hi; tu-in, en in, a lang zong kei tungah hong kigen lo hi; na pilna leh na daupaina in ka zak thute vuknelh hi. Na zite mi hampha! Nangma mai-ah ding tawntungin na pilna a za hih na nasemte mi hampha! Nang sungah lungdamin Israel kumpi tokhom tungah nang hong koih Topa na Pasian in thupha ngah ta hen! Topa in Israel it tawntung ahih manin nangmah in thutang leh thuman na sepkhiat theih nadingin amah in kumpi-in nang hong bawl hi,” a ci hi. Tua ciangin amah in kumpipa tungah kham talen za leh sawmnih, leh a namtui nate tampi tak, leh suang manphate pia hi; Sheba kumpinu in Kumpi Solomon tungah a piak hih banga a tam a namtui nate hong pai ngei nawn lo hi. Tua tham loin Ofir panin kham hong pua Hiram’ teembaw honte in Ofir panin cingsing leh suang manpha tampi tak hong pua hi. Tua ciangin kumpipa in cingsingte Topa ’ inn leh kumpipa’ inn khuamte, la sate adingin laiza la sakna leh harp la sakna-in bawl hi; tu ni dongin tua bang cingsing hoihte hong tungkik ngei lo, kimu ngei nawn lo hi. Tua ciangin Kumpi Solomon in citna tawh ama tungah a piak banah ama deih a nget khempeuh Sheba kumpinu tungah Kumpi Solomon in pia hi. Tua ahih ciangin amah kihei-in a nasemte tawh ama gamah ciahkik hi. Kumpi Solomon in a kiseek kham tawh kibawl lum lianpi za nih bawl hi; lum khatah kham shekel zaguk bei hi. Tua ciangin amah in a kiseek kham tawh kibawl lum zathum bawl hi; lum khat ciangin kham minas thum bei hi; tua ciangin kumpipa in Lebanon Tulak Inn sungah tuate koih hi. Kumpipa in saiha kumpi tokhom a lian khat zong bawl a, kham hoihpente tawh tua tokhom zut hi. Kumpi tokhom in kahlei cial guk nei-in, kumpi tokhom nungah bawngno lutang khat om a, a tutna pang tuakah ban ngakna omin ban ngaknate pangah humpinelkai nih ding a, kahlei cial gukte’ mong ciatah khat ciat a om humpinelkai sawm-le-nih ding hi. Kumpi gamsung khat peuhpeuhah tua tawh a kibang kibawl ngei lo hi. Kumpi Solomon’ dawnna haite khempeuh kham hi a, Lebanon Tulak Inn sung haite khempeuh kham citak ahi hi; khat zong ngun hilo hi; Solomon’ hun lai-in ngun bangmahin kingaihsun lo hi. Bang hang hiam cih leh kumpipa in Hiram’ tembaw honte tawh Tarshish teembaw honkhat tuipi-ah a pai nei hi. Tarshish teembaw honte in kum thumin khat vei hong pai-in kham, ngun, saiha, zawngmaw, leh utongte hong puak zel hi. Tua bangin Kumpi Solomon in hauhna leh pilna tawh leitung kumpi khempeuh khumkhelh hi. Tua ciangin Pasian in ama lungsim sunga a koih ama pilna a ngai dingin leitung buppi in Solomon’ omna zong uh hi. Amaute khempeuh in letsong, ngun leh kham tawh kibawl nate, puante, mor paknamtuite, a kum kumin tampi tak hong puak uh hi. Tua ciangin Solomon in leengte leh sakol tuangte khawm hi; amah in leeng tul-le-za-li leh tuan’na sakol tulsawm leh tulnih nei a, amah in tuate, leeng khuapite leh Jerusalem ah zattawm dingin koih hi. Kumpipa in Jerusalem ah suang bangin ngun ol sak a, amah in Shefelah theiba sing bangin taamtaak sing tamsak hi. Solomon’ sakol lakte Izipt leh Kue pan hi a, kumpipa’ sumbawlte in Kue panin a man pia-in tuate ngah uh hi. Izipt panin leeng khat ciangin ngun shekel zaguk, sakol khat ciangin za leh sawmnga-in kingah hi; tua ahih ciangin kumpipa’ sumbawlte in Hit kumpite leh Siria kumpite khempeuh tungah zuak khia uh hi. Tu-in Kumpi Solomon in gamdang numei tampi ngai hi; Faro’ tanu, leh Moab mi, Ammon mi, Edom mi, Sidon mi, leh Hit numeite, Topa in Israel mite tungah, “Amaute tawh na kiteng kei ding uh a, amaute zong note tawh kiteng lo ding hi; bang hang hiam cih leh amaute in amau’ pasian lamah na lungsim uh hong heikhia taktak ding hi,” a cih minamte’ lak pan ahi hi; Solomon in hihte ngai-in pom hi. Amah in kumpi tanute, zi zasagih, leh zineu zathum nei hi; tua ciangin a zite in ama lungsim heikhia uh hi. Bang hang hiam cih leh Solomon a teek ciangin a zite in pasian dangte lamah ama lungsim heikhia uh hi; ama pa David’ lungsim bangin ama lungsim Topa tungah thuman bup taktak lo hi. Bang hang hiam cih leh Sidon mite’ nusian Ashtoreth, leh Ammon mite’ aa ahi a kihhuai Milkom, Solomon in bia hi. Tua ahih ciangin Topa muhna ah Solomon a sia gamta a, a pa David bangin Topa zui bup lo hi. Tua ciangin Solomon in Jerusalem nisuahna lam mual tungah Moab mite’ aa ahi, a kihhuai Khemosh leh Ammon mite’ aa ahi a kihhuai Molek adingin mual tunga biakna khat lam hi. Tua mah bangin amah in paknamtui halin a pasiante uh tungah biakna a pia a gamdang zite khempeuh adingin hihsak hi. Tua ahih ciangin Topa in Solomon kiangah, “Hih in nangma ngaihsutna hi-in, nang kong thupiaksa ka thuciamna leh ka thukhamte zui lo na hih ciangin, keimah in nangma tung panin na kumpigam balkeekin na nasempa tungah ka pia taktak ding hi. Ahi zongin na pa David’ hangin nangma hun sungin ka hih kei ding a, na tapa’ khut sung panin ka balkhia ding hi. Ahi zongin kumpigam khempeuh ka balkhia kei ding hi; ka nasempa David hang leh ka teelsa Jerusalem hangin na tapa tungah minam khat ka pia ding hi,” a ci hi. Tua ciangin Topa in Solomon’ lang khatah langpang khat, Edom mi Hadad khangsak hi; amah in Edom kumpi innkuan sung mi khat ahi hi. Bang hang hiam cih leh Edom ah David a om lai, a site a vui dingin galkap a ukpa Joab a paitoh lai-in Edom sunga pasal khempeuh amah in that hi. (Bang hang hiam cih leh amah in Edom sunga pasal khempeuh a suksiat khit matengin Joab leh Israel khempeuh tua lai-ah kha guk sung om uh hi); Ahih hangin Hadad naupangno ahih lai-in, a pa’ nasem Edom mite pawlkhat tawh Izipt ah Hadad tai hi. Amaute Midian panin ding khia-in Paran tung uh a, Paran panin mi la-in tonpih a, ama tungah inn khat pia-in, annek ding pia-in, leitang a pia Izipt kumpipa Faro kiang Izipt gam tung uh hi. Hadad in Faro’ mai-ah maipha lianpi mu a, amah in ama zi’ sanggamnu kumpinu Tahpenes’ sanggamnu tawh kitengsak hi. Tua ciangin Tahpenes’ sanggamnu in amah tawh a tapa Genubath nei a, Tahpenes in Faro innah a naupang khoi hi; Faro inn sungah Faro’ tapate tawh Genubath om hi. Ahih hangin Hadad in David a pate tawh ihmu-in galkap a ukpa Joab a sihna thu Izipt panin a zak ciangin Hadad in Faro kiangah, “Keima gamah ka ciah theih nadingin hong paikhiasak in,” a ci hi. Ahih hangin Faro in ama kiangah, “Nangma gamah na ciah nading na hanciam nadingin kei tawh na omna-ah bang kitangsapna nei na hi hiam?” a ci hi. Tua ciangin amah in ama kiangah, “Hong paisak peuh in,” a ci hi. Tua ciangin Pasian in ama topa ahi Zobah kumpi Hadadezer kiang panin a tai Eliada tapa Rezon zong Solomon a langpang dingin khangsak hi. Amah in ama kimah mi khawmin mite’ na a sut pawl a makai suak hi; amaute Damaskas ah pai-in tua lai munah teng uh a, Damaskas ah kumpi-in amah bawl uh hi. Hadad mah bangin Solomon’ hun sung khempeuh amah Israelte langpangin omin siatna bawl hi; amah in Israel mudah a, Siria gamah uk hi. Solomon’ nasem, Zeredah khua sunga om Efraim mi, Nebat’ tapa, a nu’ min Zeruah hi-in meigong ahi, Jeroboam in zong kumpipa lehdo hi. Amah in kumpipa a lehdona thu in hih ahi hi. Solomon in Millo lamin a pa David khuapi a vangte hu hi. Jeroboam in nasep siam mahmah khat hi a, Solomon in hih a khangno mipa a kizen mi hi ci-in a theih ciangin Josef minam aana tawh na a semte khempeuh tungah a uk-in bawl hi. Tua hun sungin Jerusalem panin Jeroboam a paikhiat ciangin Shiloni mi kamsang Ahijah in lampi ah amah mu hi. Tu-in Ahijah in puanthak khat na silh tawm hi; amau nihte gel bek gamlakah om uh hi. Tua ciangin Ahijah in ama tungah a silh a puanthak lenin seh sawm-le-nih suahin balkeek hi. Tua ciangin amah in Jeroboam kiangah, “Nang adingin bek sawm la in; bang hang hiam cih leh, Israel Pasian, Topa in hih bangin ci hi, ‘En in, Solomon khut panin kumpigam a balkhia ding ka hi a, nangma tungah minam sawm kong pia ding hi (ahih hangin ka nasem David hang leh Israel minam khempeuh sungpanin ka teelsa khuapi Jerusalem hangin amah in minam khat nei ding hi), bang hang hiam cih leh amah in kei hong nusia a, Sidon mite’ nusian Ashtoreth, Moab pasian Khemosh, leh Ammon mite pasian Milkom bia-in, a pa David bangin keima muhna ah a manin gamtatna leh ka thukhamte leh ka ngeina kipte zuihna tawh ka lampite tawn lo hi. Ahi zongin ama khut sung panin kumpigam bup ka la khia kei ding hi; ka thupiaknate leh ka thukhamnate a zui, ka teel ka nasem David hangin ama nuntak sung tawntung ukpa-in amah ka bawl ding hi; ahih hangin ama tapa khut sung panin kumpi gam la-in nangma tungah minam sawm kong pia ding hi. Ahi zongin ka min koih nadingin ka teelsa khuapi Jerusalem ah ka nasempa David in keima mai-ah suan leh khak a neih tawntung theih nadingin a tapa tungah minam khat ka pia ding hi. Tua ciangin keimah in nang hong la-in na deih khempeuh tungah na uk ding a, nang in Israel tungah kumpi na hi ding hi. Ka nasempa David bangin ka thukhamte leh ka thupiaknate zuihna tawh nang kong thupiak khempeuh ngai-in, ka lampite tawnin ka mit-ah a manin na gamtat leh, nang tawh hong omkhawmin, David adingin ka hih bangin nang adingin innkuan kician khat kong phuhsak ding a, nangma tungah Israel kong pia ding hi. Hih thu hangin David suan leh khakte ka gimsak ding a, ahih hangin a tawntung ding hi lo hi,’ ci hi,” a ci hi. Tua ahih ciangin Solomon in Jeroboam thah dingin zong hi; ahih hangin Jeroboam ding-in Izipt gamsung, Izipt kumpipa Shishak kiangah tai a, Solomon a sih mateng Izipt ah om hi. Tu-in Solomon’ sep a om laite, leh a hih khempeuh leh a pilna, Solomon’ nasepna laibu sungah kigelh hilo ahi hiam? Jerusalem panin Israelte khempeuh tungah Solomon in a uk hun in kum sawmli sung ahi hi. Tua ciangin Solomon a pate tawh ihmu a, a pa David khuapi sungah kivui hi; tua ciangin ama tangin a tapa Rehoboam in uk hi. Shekhem ah Rehoboam pai hi; bang hang hiam cih leh amah kumpi a suaksak dingin Israel khempeuh Shekhem ah hong pai uh hi. Nebat’ tapa Jeroboam in tua thu a zak ciangin (bang hang hiam cih leh Kumpi Solomon kiang panin a taina Izipt ah amah om lai hi), Izipt panin Jeroboam hong ciahkik hi. Tua ciangin amaute in mi sawlin amah sam uh hi; tua ciangin Jeroboam leh Israel mi a kikhawm khempeuhte hong pai-in Rehoboam kiangah, “Na pa in ka hakkol uh a gikin bawl hi. Tua ahih ciangin tu-in na pa’ nasep haksate leh kote tungah a gik hakkol zangsak in, tua ciangin kote in nangma na kong sem ding uh hi,” a ci uh hi. Amah in amaute kiangah, “Ni thum sung va kihem un la, tua ciangin kei kiangah hong pai kik un,” a ci hi. Tua ahih ciangin mite paikhia uh hi. Tua ciangin Kumpi Rehoboam in a pa Solomon a nuntak lai-in ama mai-ah a ding ngei khangham mite thu dongin, “Hih mite ka dawn’na ding ngaihsutna hong bangci piak ding na hi uh hiam?” a ci hi. Tua ciangin amaute in ama kiangah, “Nangmah in tu ni-in hih mite’ nasem ahi dingin amau’ na semin, amaute na dawn’ ciangin kam hoih pau lecin, amaute in a tawntungin nangma nasemte hi ding uh hi,” a ci uh hi. Ahih hangin khanghamte in ama tungah ngaihsutna a piakte amah in nusia-in, amah tawh khang khawmin ama mai-ah a ding khangnote thu dong hi. Amah in amaute kiangah, “‘Na pa in kote tungah hong koih hakkol zangsak in,’ kei tungah hong ci hih mite i dawn’ nading ngaihsutna hong bangci piak ding na hi uh hiam?” a ci hi. Tua ciangin amah tawh a khang khawm khangnote in ama kiangah, “Nangma kiangah, ‘Na pa in ka hakkol uh a gikin bawl hi, ahih hangin kote adingin hong zangsak in,’ hong ci hih mite kiangah hih bangin na gen ding hi; amaute kiangah, ‘Ka khutmeno in ka pa’ kawng sangin gol zaw hi. Tu-in, ka pa in hakkol gik note tungah hong koihna munah na hakkol uh kong behlap ding hi. Ka pa in ciang tawh note hong thuhilh hi; ahih hangin keimah in ciang lingnei tawh note kong thuhilh ding hi,’ na ci ding hi,” a ci uh hi. Tua ahih ciangin kumpipa in, “Ni thum ni-in ka kiangah hong paikik un,” a cih mah bangin Jeroboam leh mi khempeuh a ni thum ni-in Rehoboam kiangah hong pai uh hi. Tua ciangin kumpipa in mite ngawh dawn’ a, khangham mite in ama tungah ngaihsutna a piak thute nusia-in, khangnote’ ngaihsut piakna tawh kizui-in amaute kiangah thugen a, “Ka pa in note’ hakkol giksak hi; ahih hangin keimah in na hakkol uh ka behlap ding hi; ka pa in ciang tawh note hong thuhilh hi; ahih hangin keimah in ciang lingnei tawh note kong thuhilh ding hi,” a ci hi. Tua ahih ciangin kumpipa in mite’ thu ngai lo hi, bang hang hiam cih leh Topa in Shiloni mi Ahijah tung tawnin Nebat’ tapa Jeroboam tungah a gensa thu a tun’sak nadingin Topa in a pian’sak thu kiheina ahi hi. Kumpipa in amau’ thu a ngaih lohna Israelte khempeuh in a muh uh ciangin mite in kumpipa dawng uh a, “David sungah kote in bang ngah nei ka hi uh hiam? Jessi tapa sungah gamhluah ka nei kei uh hi. Israelte aw, na inn ciat uhah ciah un. Rehoboam in ama ading vaihawm tawm hen,” a ci uh hi. Tua ahih ciangin Israelte a inn ciat uhah kihem uh hi. Ahih hangin Rehoboam in Judah khuapite sungah a teeng Israel mite uk hi. Tua ciangin Kumpi Rehoboam in aana tawh nasemte a uk Adoram sawl a, Israelte khempeuh in suang tawh amah na deng lum uh hi. Tua ciangin Jerusalem ah a tai dingin Kumpi Rehoboam a sakol leengah a tuang dingin nawh tai hi. Tua ahih ciangin tu ni dongin saklam Israelte in David innkuan lehdo hi. Jeroboam hong ciahkik khitna thu Israelte khempeuh in a zak uh ciangin amaute in mi sawlin kikhopna ah amah samsak uh a, Israelte khempeuh tungah kumpi-in amah bawl uh hi. David innkuan a zui kuamah dang om lo a, Judah minam bek in zui hi. Jerusalem ah Rehoboam a tun’ ciangin, Solomon’ tapa Rehoboam’ kumpigam ngahkik nadingin Israel mite a sim dingin Judah minam khempeuh, leh Benjamin minam, a kiteel galhang mi tul-zakhat leh tul sawmgiat khawm hi. Ahih hangin Pasian’ mi Shemaiah tungah Pasian’ thu hong tung hi; “Judah kumpipa, Solomon’ tapa Rehoboam tung, leh Judah leh Benjamin minam khempeuh tung, leh a om lai mi dangte khempeuh tungah gen in, “ Topa in hih bangin ci hi: Note na kuanto kei ding uh a, na behte uh Israelte na do kei ding uh hi. Mi khempeuh a inn ciat uhah ciah hen; bang hang hiam cih leh hih thu in keima kiang pan ahi hi,’ ci hi,” a ci hi. Tua ahih ciangin amaute in Topa ’ thu ngai uh a, Topa ’ thugen bangin innah ciahkik uh hi. Tua ciangin Jeroboam in Efraim mualtung gam sungah Shekhem khua lamin tua lai-ah teeng hi; tua ciangin tua lai panin amah paikhia-in Penuel lam hi. Tua ciangin Jeroboam in a lungsim sungah, “Tu-in kumpigam in David innkuan ah kiheikik kha thei ding hi; Jerusalem a, Topa ’ innah biakna pia dingin hih mite paito leh, hih mite’ lungsim Judah kumpi Rehoboam, a topa uh lamah kiheikik ding a, amaute in kei hong thatin Judah kumpi Rehoboam kiangah ciahkik ding uh hi,” a ci hi. Tua ciangin kumpipa in thu kikupna khat bawl a, tua ciangin kham bawngno nih bawl hi. Tua ciangin amah in mite kiangah, “Jerusalem ah sau vei khop na paikhin ta uh hi. Israel mite aw, Izipt leitang panin note hong paikhiatpih na pasiante uh en un,” a ci hi. Amah in Beth-el ah khat koihin, Dan ah adang khat koih hi. Hih na in khialhna khat suak hi; bang hang hiam cih leh mite Beth-el a, bia ding leh Dan a, bia dingin a gamla pekah va pai uh hi. Amah in mual dawnte ah inn zong lamin mite khempeuh lak panin Levi mi ahi lo mite siampi-in seh hi. Tua ciangin Jeroboam in Judah a, om pawi tawh a kibangin a kha giatna a ni sawm-le-nga ni-in pawi khat bawl a, biakna tau tungah biaknate pia hi; tua mah bangin amah in Beth-el ah bawlin ama bawlsa bawngnote tungah biakna pia hi. Tua ciangin amah in ama bawlsa mual tunga biakna siampite Beth-el ah koih hi. A kha giatna a ni sawm-le-nga ni, ama deih kha sungin Beth-el a, ama bawlsa biakna tau ah amah paito hi; amah in Israel mite’ adingin pawi khat kipsak a, paknamtui hal dingin biakna tau ah paito hi. En in, Topa ’ thu tawh Judah panin Pasian’ mi khat Bethe-el ah hong pai hi. Paknamtui hal dingin biakna tau gei-ah Jeroboam na ding hi. Tua ciangin Topa ’ thu tawh biakna tau langpangin mipa kiko a, “Biakna tau, biakna tau aw, Topa in hih bangin ci hi; ‘En in, Josiah min nei tapa khat David innkuan sungah suak ding hi; amah in nangma tungah paknamtui a hal mual tunga biakna a pia siampite nangma tungah biakna-in pia ding a, nangma tungah mihingte’ guhte kihal ding hi,’ ci hi,” a ci hi. Tua ciangin tua ni mahin amah in lim khat pia a, “Hih in Topa in thu a gen khitna lim hi: ‘En in, biakna tau kiphelin a tunga om vutte kibuakhia ding hi,” a ci hi. Beth-el a, biakna tau langpangin Pasian’ mipa’ thugenna kumpipa in a zak ciangin biakna tau panin Jeroboam in a khut zan a, “Amah lencip un,” a ci hi. Tua ciangin amah langpangin a zankhiat a khut keu cip ahih manin ama pum lamah a khut tonsak kik thei nawn lo hi. Topa ’ thu tawh Pasian’ mipa in lim khat a piaksa tawh kizui-in biakna tau zong kiphelin biakna tau panin a vutte kibuakhia hi. Tua ciangin kumpipa in Pasian’ mipa kiangah, “Tu-in Topa na Pasian’ maipha kunh in la, ka khut a ngei a bat nadingin kei adingin thu hong ngetsak in,” a ci hi. Tua ciangin Pasian’ mipa in Topa tungah kunh hi; tua kumpipa’ khut a ngei bang kik a, a ni danga mah hong bang hi. Tua ciangin kumpipa in Pasian’ mipa kiangah, “Kei tawh innah hong ciahin nangmah kithadimsak in; keimah in nangma tungah thaman kong pia ding hi,” a ci hi. Tua ciangin Pasian’ mipa in kumpipa kiangah, “Na inn phel lang khat hong pia lecin zong na innah nang kong zui kei ding hi. Keimah in hih lai munah an ahi a, tui ahi zongin ka ne ka dawn kei ding hi. Bang hang hiam cih leh Topa ’ kammal in kei tungah thu hong pia khin zo a, ‘An ahi a, tui ahi zongin ne lo dawn loin, na paina lampi tawnin na ciahkik kei ding hi,’ hong ci hi,” a ci hi. Tua ahih ciangin amah lampi dangah pai-in Beth-el ah hong paina lampi tawnin ciahkik lo hi. Tu-in kamsang khangham khat Beth-el ah teng hi. Ama tapate hong pai-in tua ni-in Pasian’ mipa in Beth-el ah a hih thu teng ama kiangah gen uh hi; kumpipa kiangah a gen thute zong, amaute in a pa uh kiangah gen uh hi. Tua ciangin a pa un amaute kiangah “Koi lampi ah amah pai ahi hiam?” a ci hi. Tua ciangin a tapate in Judah panin hong pai Pasian’ mipa a paina lam hilh uh hi. Amah in a tapate kiangah, “Kei adingin laa van hong vawhsak un,” a ci hi. Tua ahih ciangin amaute in ama adingin laa van vawhsakin a tungah amah tuang hi. Tua ciangin Pasian’ mipa nungah amah pai a, tawsaw khat nuai-ah tu-in amah mu hi; tua ciangin amah in ama kiangah, “Nang in Judah panin hong pai Pasian’ mipa na hi hiam?” a ci hi. Amah in, “Ka hi hi,” a ci hi. Tua ciangin amah in ama kiangah, “Kei tawh innah hong ciahin an ne in,” a ci hi. Amah in, “Nang tawh kong ciahkik thei kei ding a, nang kong zui thei kei ding hi; hih munah nang tawh an ahi a, tui ahi zongin ka ne ka dawn kei ding hi; bang hang hiam cih leh Topa ’ kammal in kei tungah, “An ahi a, tui a hi zongin tua lai-ah ne lo dawn loin, na paina lampi tawnin na ciahkik kei ding hi,’ hong ci hi,” a ci hi. Tua ciangin amah in ama kiangah, “Kei zong nangmah bangin kamsang khat ka hi a, Topa ’ thu tawh vantungmi khat in kei tungah thu hong gen a, ‘Amah in an leh tui ne-in a dawn theih nadingin na innah amah paipih kik in,’ hong ci hi,” a ci hi. Ahih hangin amah in ama tungah zuau genin a phuahtawn ahi hi. Tua ahih ciangin amah in zui-in hong paikik a, ama innah an ne-in tui dawn hi. Amaute sabuai-ah a tut lai takun amah a ciahpih kik kamsangpa tungah Topa ’ thu hong tung hi; Judah panin hong pai Pasian’ mipa tungah amah kiko a, “ Topa in hih bangin ci hi, ‘Nangmah in Topa thu mang loin, Topa na Pasian in hong thu piaksa thupiakna zui loin, nang hong pai kikin, amah in, “An ne kei in la, tui dawn kei in,” hong cihna munah an ne-in tui na dawn hi; tua ahih manin na pate’ hanah na luanghawm kivui lo ding hi, ci hi,” a ci hi. Tua ciangin amah in an ne-in a dawn khit ciangin, amah in a ciahpih kik kamsangpa’ adingin laa van vawhsak hi. Amah a paikhiat ciangin humpinelkai khat in lampi ah na dawntuahin amah that hi. Ama luanghawm lampi-ah kipaai a, a gei-ah a laa ding hi; a humpinelkai zong a luanghawm gei-ah ding hi. En in, mite in va nawk uh a, lampi ah a luanghawm kipaai-in a luanghawm gei-ah humpinelkai a ding mu uh hi. Amaute hong pai-in kamsang khanghampa a ten’na khuapi sungah gen uh hi. Lampi panin amah a ciahpih kik kamsangpa in tua thu a zak ciangin amah in, “Tua in Topa ’ thu a mang lo Pasian’ mipa ahi hi; tua ahih ciangin Topa in ama tungah a gensa thu tawh kizui-in amah balnenin a that humpinelkai tungah Topa in amah pia hi,” a ci hi. Tua ciangin amah in a tapate kiangah, “Kei adingin laa van hong vawhsak un,” a ci hi. Amaute in vawhsak uh hi. Tua ciangin amah pai a, lampi ah a luanghawm kipaai-in la leh humpinelkai a luanghawm gei-ah a ding mu hi. Humpinelkai in a luanghawm ne lo a, la zong balnen lo hi. Tua ciangin kamsangpa in Pasian’ mipa luanghawm la-in la tungah koih a, kah ding leh vui dingin khuapi sungah ciahpih hi. Tua ciangin amah in ama hanah a luanghawm koih hi; tua ciangin ama hangin amaute kap uh a, “Ala, ka sanggampa!” ci uh hi. Amah a vui khit ciangin a tapate kiangah, “Kei ka sih ciangin Pasian’ mipa a kivuina hanah kei hong vui un; ama guh gei-ah kei’ guhte koih un. Bang hang hiam cih leh Beth-el a, biakna tau leh Samaria khuapite sunga om mual tunga biaknate khempeuh langpangin Topa ’ thu tawh a kiko a thugenna hong tung taktak ding hi,” a ci hi. Hih thu khit ciangin ama gamtat sia panin Jeroboam kihei tuan lo a, mite khempeuh sung panin mual tunga biaknate a, sem ding siampite bawl kik hi; amah in a ut peuhpeuh mualtunga biakna siampi dingin ap hi. Hih in leitung maitang panin khen khia-in a susia zah dingin Jeroboam innkuan tungah khialhna a suak hi. Tua hun lai takin Jeroboam’ tapa Abijah a cina hi. Jeroboam in a zi kiangah, “Ding in la, na mel kiselin Jeroboam’ zi na hih lam kitheisak kei in la, Shiloh ah va pai in; en in, hih mite tungah kumpi ka hih nading thu a gen kamsangpa Ahijah tua lai-ah om hi. Anlum sawm, moh pawlkhat, leh khuaizu thawl khat keng in la, ama kiangah pai in; naupang tungah a piang ding thu amah in nang kiangah hong gen ding hi,” a ci hi. Jeroboam’ zi tua mah bangin gamta hi; amah ding-in Shiloh ah pai a, Ahijah’ inn tung hi. A khanghamna hangin a mitte mang ahih manin Ahijah in khua mu thei lo hi. Tua ciangin Topa in Ahijah kiangah, “En in, a tapa tawh kisai nangma kiangah thu dong dingin Jeroboam’ zi hong pai hi; bang hang hiam cih leh amah a cina hi. Tua bang tua bangin tua nu tungah na gen ding hi,” a ci hi. Amah hong pai ciangin numei dang khatin kineih hi. Ahih hangin Ahijah in amah kongkhak hong tun’ a khe ging a zak ciangin, “Hong tum in, Jeroboam zi aw; bang hangin midang khat kineih na hi hiam? Bang hang hiam cih leh nang adingin thu gik khat kei tungah hong kipia hi. Pai in la, Jeroboam kiangah hih bangin gen in, ‘Israel Pasian, Topa in hih bangin ci hi: “Mite lak panin nang hong sangsakin ka mi Israelte tungah makai-in kong bawl a, David innkuan panin kumpigam balkhia-in nangma tungah kong pia hi; ahi zongin nang in ka thupiaknate zui-in, a lungsim khempeuh tawh kei hong zui-in ka mit-ah a man nate bek a sem ka nasempa David na bang kei a, nangmah in na mai-a om mite khempeuh sangin siatna bawl zaw-in, pai-in pasian dangte leh a kisung milimte nang adingin bawlin ka heh nadingin nong phin a, na nung lamah kei nong paai hi; tua ahih ciangin en in, mi khat in a bei matengin ek a haltum mah bangin Jeroboam innkuan tungah siatna tungsakin, Israel sungah sal leh a suakta mi a kibangin pasal khempeuh Jeroboam’ innkuan panin ka susia ding a, Jeroboam innkuan ka bei siangsak ding hi. Tua ahih ciangin Jeroboam’ mi ahi khuapi sunga a si mi peuhpeuh uite in ne ding hi; gamlakah a si mi peuhpeuh huihlak vasate in ne ding hi; bang hang hiam cih leh Topa in gen khin hi,” ci hi,’ ci-in gen in. Tua ahih ciangin ding in la, na innah ciah in. Na khua na tun’ ciangin na tapa si ding hi. Tua ciangin Israel khempeuh ama hangin kapin vui ding uh hi; bang hang hiam cih leh Israel Pasian, Topa tungah a lungkimhuai na khat Jeroboam innkuan sung panin ama tungah kimu ahih manin Jeroboam sung panin amah bek hanah pai ding hi. Tua tham loin tu ni-in Jeroboam innkuan a beisak ding, Israelte’ tungah kumpi khat Topa in ama adingin khangsak ding hi. Tua huna kipanin tui sunga pumpeng a kiliin’ mah bangin Topa in Israel vatin amau pute pate tungah a piak hih gam hoih panin Israel zung lot ding a, Eufrates gal khatah amaute thehthang ding hi; bang hang hiam cih leh amaute in Asherah milimte bawlin Topa a heh nadingin phin uh hi. Tua ciangin ama khialhna leh Israelte a khialhsakna ahi Jeroboam’ khialhna hangin amah in Israel nusia ding hi,” a ci hi. Tua ciangin Jeroboam’ zi ding-in kihemkhia a, Tirzah ah ciah hi. Amah in sangkil a kan lai takin naupang si hi. Tua ciangin a nasem Ahijah kamsangpa tung tawnin Topa ’ thugenna tawh kizui-in Israel khempeuh in amah vui-in ama hangin kap uh hi. Tu-in Jeroboam’ gamtatna a om laite’ a galsimna a gam uknate, en in, Israel kumpite’ Khang Tangthu Laibu sungah kigelh hi. Jeroboam’ uk hun sung in kum sawmnih-le-nih ahi hi; tua ciangin a pate tawh ihmu a, ama tangin a tapa Nadab in uk hi. Tu-in Solomon’ tapa Rehoboam in Judah ah uk hi. Gam uk dingin a kipatin Rehoboam kum sawmli-le-khat pha a, a min koih nadingin Topa in Israel minam khempeuh sung panin a teelkhiat khuapi Jerusalem ah amah in kum sawm-le-sagih sung uk hi. Ama nu a min in Na-amah hi a, Ammon mi ahi hi. Tua ciangin Judah mite in Topa ’ muhna ah a sia gamta uh a, a pu a pate khempeuh uh hih sangin a tam zaw-in amau’ hih a khialhnate uh tawh ama hazat nading piangsak uh hi. Bang hang hiam cih leh amaute in amau’ adingin mualtung a biaknate, khuampite, leh mualsang tung khempeuh leh singnim nuai khempeuh ah Asherah milimte bawl uh hi; pasal paktat pawlte zong gam sungah om uh hi. Topa in Israel mite mai-ah a hawlkhiat minamte’ gamtatna a kihhuai khempeuh bangin amaute gamta uh hi. Kumpi Rehoboam’ kum ngana kumin Jerusalem sim dingin Izipt kumpi Shishak hong kuanto hi; amah in Topa ’ inn-a van manphate leh kumpipa’ inn-a van manphate lakhia hi; amah in na khempeuh lakhia hi. Amah in Solomon’ bawlsa kham lumte khempeuh zong la hi; tua ciangin Kumpi Rehoboam in tuate’ tangin sumngo lumte bawl a, kumpipa’ inn kongkhak a cing inncing uliante’ khut sungah tuate ap hi. Topa ’ innah kumpipa a pai simin inncingte in tuate pua-in inncin’na inndei sungah tuate koihkik zel uh hi. Tu-in Rehoboam’ gamtatna a om laite, leh a sep khempeuh, Judah Kumpite’ Khang Tangthu Laibu sungah kigelh hilo ahi hiam? Tua ciangin Rehoboam leh Jeroboam kikalah galkidona om tawntung hi. Tua ciangin Rehoboam a pate tawh ihmu-in David’ khuapi sungah a pate tawh kivui hi. Ama nu a min in Na-amah hi a, Ammon mi ahi hi. Tua ciangin ama tangin a tapa Abijam in uk hi. Tu-in Nebat’ tapa Kumpi Jeroboam’ kum sawm-le-giatna kumin Abijam in Judah tungah uk ding kipan hi. Amah in Jerusalem ah kum thum sung uk hi. Ama nu’ min in Maakah hi a, Absalom’ tanu ahi hi. Ama mai-a a pa’ khialhna khempeuh amah in zui hi; a pu sawn David a thuman bangin Topa a Pasian tungah a lungsim thuman bup lo hi. Ahi zongin David’ hangin Topa a Pasian in Jerusalem ah meivak khat pia a, ama khitah a tapa koihin Jerusalem kipsak hi; bang hang hiam cih leh Hit mi Uriah thu-ah cih sim loh David in ama nuntak sung tawntung Topa ’ mit-ah a manin gamta-in a thupiakte khat peuhpeuh panin amah pial lo hi. Tu-in ama nuntak sung tawntung Rehoboam leh Jeroboam kikalah kidona om hi. Abijam’ gamtatna a om laite leh a sep khempeuh, Judah Kumpite’ Khang Tangthu Laibu sungah kigelh hilo ahi hiam? Tua ciangin Abijam leh Jeroboam kikal ah galkidona om hi. Tua ciangin Abijam a pate tawh ihmu hi; amaute in David khuapi sungah amah vui uh hi. Ama tangin a tapa Asa in uk hi. Israel kumpi Jeroboam’ kum sawmnihna kumin Asa in Judah tungah uk ding kipan a, amah in Jerusalem ah kum sawmli-le-khat sung uk hi. Ama pi’ min in Ma-akah hi a, Absalom’ tanu ahi hi. Asa in a pa David gamtat bangin Topa ’ mit-ah a manin gamta hi. Amah in gamsung panin pasal paktat pawlte koih khia-in a pate’ bawlsa milim khempeuh khinkhia hi. Amah in Asherah milim dingin a kibawl a kihhuai milim khat nei ahih manin kumpinu’ nu hihna panin a pi Ma-akah zong khinkhia hi; tua ciangin Asa in tua nu’ milim phukin Kidron lui ah hal hi. Ahih hangin mual tunga biaknate kila khia lo hi. Ahi zongin ama hun sung khempeuh Asa’ lungsim Topa tungah thuman bup hi. Tua ciangin amah in a pa’ apsa letsongte leh ama apsa letsongte, ngun, leh kham, leh nazatte Topa ’ inn sungah paipih hi. Amau’ hun sung tawntung Asa leh Israel kumpi Baasha kikalah galkidona om hi. Judah lang khatah Israel kumpi Baasha kuan to a, Judah kumpi Asa kiang pan kuamah paikhia thei lo, kuamah a tum theih loh nadingin Ramah khua lam hi. Tua ciangin Asa in Topa ’ inn vankoihna leh kumpipa’ inn vankoihna sungah a om lai ngun leh kham khempeuh la-in ama nasemte’ khut sungah tuate pia hi; tua ciangin Kumpi Asa in Damaskas ah a teng, Siria kumpi, Hezion’ tapa Tabrimmon, a tapa Benhadad kiangah tuate puak a, “Ka pa leh na pa mah bangin kei leh nang kikalah kipawlna khat omsak ni: en in, ngun leh kham letsong nangma tungah kong puak hi; keima kiang panin amah a nungkik theih nadingin Israel kumpi Baasha tawh na kipawlna va sutat in,” a ci hi. Tua ciangin Benhadad in Kumpi Asa’ thu ngai a, Israel khuapite sim dingin a galkap a ukte sawlin, Ijon, Dan, Abelbeth-ma-akah, leh Khinneroth khempeuh, Naftali gam khempeuh tawh zo hi. Baasha in tua thu a zak ciangin Ramah a lam khawlin Tirzah ah om hi. Tua ciangin Kumpi Asa in Judah khempeuh tungah thu genzakna khat bawl a, kuamah peng loin amaute in Baasha inn lamna a, zat Ramah suangte leh a singte puakhia uh hi; tua ciangin Kumpi Asa in tuate tawh Benjamin mite’ khua Geba leh Mizpah khua lam hi. Tu-in Asa’ gamtatna a om laite khempeuh, ama thahatna khempeuh, leh ama sep khempeuh, leh ama lam khuapite, Judah Kumpite’ Khang Tangthu Laibu sungah kigelh hilo ahi hiam? Ahih hangin a teek ciangin a khete-ah natna nei hi. Tua ciangin Asa a pate tawh ihmu a, a pupi David khuapi sungah a pate tawh kivui hi; tua ciangin ama tangin a tapa Jehoshafat in uk hi. Judah kumpi Asa’ kum nihna kumin Jeroboam’ tapa Nadab in Israel tungah uk ding kipan hi; amah in Israel tungah kum nih sung uk hi. Amah in Topa muhna ah a sia gamta a, a pa’ khekhap mah tawnin, Israel a khialhsakna ama khialhna mah zui hi. Issakhar minam Ahijah’ tapa Baasha in amah sawmsim hi; Baasha in Filistiate’ khua Gibbethon ah amah sattuk hi; bang hang hiam cih leh Nadab leh Israel khempeuh in Gibbethom umcihin om uh hi. Tua ahih ciangin Judah kumpi Asa’ kum thumna kumin Baasha in Nadab that a, ama tangin amah in uk hi. Amah kumpi ahih phetin Jeroboam innkuan khempeuh that hi; Topa in Shiloni mi a nasempa Ahijah tung tawnin a gensa bangin a vekpi-in a suksiat khit dongin a husang khat zong Jeroboam’ innkuan ah nusia lo hi; tua ni ama khialhna leh Israel a khialhsakna ahi Jeroboam’ khialhnate hang leh Israel Pasian, Topa a hehsakna hang ahi hi. Tu-in Nadab’ gamtatna a om laite leh a sep khempeuh, Israel Kumpite’ Khang Tangthu Laibu sungah kigelh hilo ahi hiam? Amau’ hun sung khempeuh Asa leh Israel kumpi Baasha kikalah galkidona om hi. Judah kumpi Asa’ kum thumna kumin Ahijah’ tapa Bassha in Israel khempeuh tungah Tirzah panin uk ding kipan a, kum sawmnih-le-li sung uk hi. Amah in Topa muhna ah a sia gamta a, Jeroboam’ khekhap mah tawnin, Israel a khialhsakna ama khialhna mah zui hi. Tua ciangin Baasha langpangin Hanani tapa Jehu tungah Topa ’ thu hong tung a, “Keimah in leivui lak panin nang hong sangto sakin ka mi Israelte tungah makai-in nang hong bawl napi-in, nangmah in Jeroboam’ khekhap mah tawnin ka mi Israelte na khialsak a, amaute’ khialhna tawh kei hong hehsak na hih manin, en in, keimah in Baasha leh a innkuan ka phiat khia siang ding a, Nebat’ tapa Jeroboam’ inn bangin na inn ka bawl ding hi. Baasha’ mi ahi khuapi sunga a si peuhpeuh uite in ne ding hi; ama mi gamlakah a si peuhpeuh huihlak vasate in ne ding hi,” a ci hi. Tu-in Baasha’ gamtatna a om laite, leh a septe, leh a thahatna, Israel Kumpite’ Khang Tangthu Laibu sungah kigelh hilo ahi hiam? Tua ciangin Baasha a pate tawh ihmu a, Tirzah ah kivui hi; ama tangin a tapa Elah in uk hi. Tua tham loin Jeroboam innkuan bangin ama nasepna tawh amah hehsakin Topa muhna ah a sia a gamtatna khempeuh hang leh amah in Jeroboam leh a innkuan a suksiatna hangin Hanani’ tapa kamsang Jehu tung tawnin Baasha leh a innkuan langpangin Topa ’ thu hong tung hi. Judah kumpi Asa’ kum sawmnih-le-gukna kumin Baasha’ tapa Elah in Tirzah panin Israel tungah uk ding kipan a, kum nih sung uk hi. Ahih hangin ama leengte a lang a ukpa ama nasem Zimri in amah sawmsim hi. Tirzah a, kumpi inn sung a ukpa Arza’ innah zu ne-in khamin Tirzah ah a om lai tak, Judah kumpi Asa’ kum sawmnih-le-sagihna kumin Zimri hong pai-in amah sat tukin that a, ama tangin uk hi. Amah in uk dinga a kipat, kumpi tokhom tungah a tut khit phetin amah in Baasha’ innkuan khempeuh that hi; ama behte pasal khat beek ahi a, a lawmte ahi zongin khat zong siit lo hi. Tu-in Elah’ gamtatna a om laite, leh a sep khempeuh, Israel Kumpite’ Khang Tangthu Laibu sungah kigelh hilo ahi hiam? Judah kumpi Asa’ kum sawmnih-le-sagihna kumin Zimri in Tirzah ah ni sagih sung uk hi. Tu-in Filistiate’ khua Gibbethon simin galkapte in giahphual sat uh a, giahphual sat a, om galkapte in, “Zimri in sawmsimin kumpipa that khin hi,” a kicihna za uh hi; tua ahih ciangin Israelte khempeuh in tua ni-in giahphual ah galkap a ukpa Omri kumpi-in bawl uh hi. Tua ahih ciangin Omri leh amah tawh a om Israel khempeuh Gibbethon panin paito-in amaute in Tirzah umcih uh hi. Tu-in Zimri’ gamtatna a om laite, leh ama hihsa a sawmsimna, Israel Kumpite’ Khang Tangthu Laibu sungah kigelh hilo ahi hiam? Tua ciangin Israel mite pawl nihin kikhen uh hi; mi a kimkhat in kumpi-in a bawl dingin Ginath’ tapa Tibni zui uh a, a kimkhat in Omri zui uh hi. Ahih hangin Omri a zui mite in Ginath’ tapa Tibni a zuite zo uh hi; tua ahih ciangin Tibni si a, Omri kumpi suak hi. Judah kumpi Asa’ kum sawmthum-le-khatna kumin Omri in Israelte tungah uk ding kipan a, kum sawm-le-nih sung uk hi; amah in kum guk sung Tirzah ah uk hi. Amah in Shemer’ tung panin ngun talen nih-in Samaria mual lei hi; amah in kulh tawh a mual um a, tua mual a neipa Shemer’ min tamin a lamsa khuapi min Samaria phuak hi. Omri in Topa muhna ah a sia gamta a, ama mai-a om mi khempeuh sangin a sia tamzaw gamta hi. Bang hang hiam cih leh Nebat’ tapa Jeroboam’ lampi khempeuh, leh Israel a khialhsakna khialhnate, a milimte uh tawh Israel Pasian, Topa a hehsakna uh zui hi. Tu-in Omri’ gamtatnasa a om laite, leh a thahatna a lahna, Israel Kumpite’ Khang Tangthu Laibu sungah kigelh hilo ahi hiam? Tua ciangin Omri a pate tawh ihmu a, Samaria ah kivui hi; tua ciangin ama tangin a tapa Ahab in uk hi. Judah kumpi Asa’ kum sawmthum-le-giatna kumin Omri’ tapa Ahab in Israel tungah uk ding kipan a, Omri’ tapa Ahab in Samaria panin Israelte tungah kum sawmnih-le-nih sung uk hi. Omri’ tapa Ahab in ama mai-a mite khempeuh sangin Topa muhna ah a sia tamzaw gamta hi. Nebat’ tapa Jeroboam’ khialhnate zuih ding ama adingin a thu zang tawh a kibat mah bangin, amah in Sidon mite’ kumpi Ethba-al’ tanu Jezebel zi-in la a, pai-in Baal’ na semin bia hi. Amah in Samaria a, a lam Baal inn sungah Baal adingin biakna tau khat dingsak hi. Tua ciangin Ahab in Asherah milim khat bawl hi. Ahab in ama mai-a om Israel kumpite khempeuh sangin Israel Pasian, Topa hehsak nading tam hih zaw hi. Ama hun sungin Beth-el mi Hiel in Jerikho lam hi; Topa in Nun’ tapa Joshua tung tawnin a gen bangin amah in tacil Abiram’ luang khamin a bulpi phut a, a tapa neu pen Segub’ luang khamin a kongpite phut hi. Tu-in Gileah gamsung Tishbe khua panin Tishbe mi Elijah in Ahab kiangah, “A mai-ah ka din’na Israel Pasian, Topa in a nungta ahih mah bangin keima thu tawh loin daitui ahi a, guah ahi zongin hong tung ding kumte sungah om lo ding hi,” a ci hi. Tua ciangin ama kiangah Topa ’ thu hong tung a, “Hih lai panin kihemin nisuahna lamah kihei in la, Jordan nisuahna lam ahi Kherith lui-ah bu in. Nangmah in lui panin tui na dawn ding hi; tua lai-ah nangmah hong vaak dingin va-akte thu ka pia zo hi,” a ci hi. Tua ahih ciangin amah pai-in Topa ’ thugen bangin gamta hi; amah pai-in Jordan nisuahna lam Kherith lui gei-ah om hi. Tua ciangin va-akte in ama kiangah zingsangin anlum leh sa puak a, nitakin anlum leh sa mah puak hi; amah in lui panin tuidawn hi. Tua gam sungah guahzu lo ahih manin tawl khat khit ciangin a lui kang hi. Tua ciangin ama kiangah Topa ’ thu hong tung a, “Ding in la, Sidon mite’ khua Zarefath ah pai-in tua lai-ah om in. En in, tua lai-ah nangmah hong vaak dingin meigongnu khat thu ka pia zo hi,” a ci hi. Tua ahih ciangin amah ding-in Zarefath ah pai hi; khuapi kulh kongpi a tun’ ciangin, en in, meigongnu khat in sing na tom hi; amah in tua nu samin, “Ka dawn theih nadingin beel khat sungah tui tawm hong paipih in,” a ci hi. Tua nu in paipih dingin a kisak lai takin, amah in tua nu samin, “Anlum neu khat zong hong tawi kawm in,” a ci hi. Tua ciangin amah in, “ Topa na Pasian in a nungta ahih mah bangin emsa bangmah ka nei kei a, beel sungah annel khut dim khat leh um sungah sathau tawmno khat bek om hi; tu-in keimah leh ka tapa’ adingin bawlin kote in ka nek theih nadingun singkang nih khawng a tom ka hi a, tua ciangin a si ta ding ka hi uh hi,” a ci hi. Tua ciangin Elijah in ama kiangah, “Lau kei in, pai-in la, na gensa bangin hih in; ahih hangin kei adingin moh neu khat hong bawlsak masa-in kei kiangah hong paipih in la, tua khit ciangin nang leh na tapa’ ading bawl in. Bang hang hiam cih leh Israel Pasian, Topa in hih bangin ci hi, ‘ Topa in leitungah guah a zuksak ni matengin beel sunga annel bei lo ding a, um sunga sathau in hong tamasak lo ding hi,’ ci hi,” a ci hi. Tua ciangin amah pai-in Elijah’ gensa bangin hih hi; tua nu, leh amah, leh tua nu’ innkuan ading nisimin an om hi. Elijah’ tung tawnin Topa ’ thugen bangin beel sunga annel bei lo a, um sunga sathau in zong tamasak lo hi. Hih thu khit ciangin inn sung nupi ahi numei’ tapa a cina hi; a natna nasia mahmah ahih manin gim semsemin ama sungah a hu om nawn lo hi. Tua ciangin amah in Elijah kiangah, “Pasian’ mipa aw, kei lang khatah bang thu nei na hi hiam? Ka khialhna kiphawk kiksak ding leh ka tapa’ sihna a piangsak dingin kei kiangah nong pai hi!” a ci hi. Tua ciangin amah in tua nu kiangah, “Na tapa hong pia in,” a ci hi. Amah in tua nu’ ang panin amah la-in ama giahna innkhum zangah puato-in ama lupna tungah sial hi. Tua ciangin Topa tungah kiko-in, “ Topa ka Pasian aw, ama tapa thahna tawh ka peemna meigongnu’ tung nangawnah gimna hong tungsak na hi hiam?” a ci hi. Tua ciangin naupang tungah amah thum vei kikhuangin Topa tungah kiko a, “ Topa ka Pasian aw, hih naupang’ nuntakna ama sungah hong ciahkiksak in,” a ci hi. Tua ciangin Topa in Elijah’ aw ngai hi; naupang’ nuntakna ama sungah hong ciahkikin amah hingkik hi. Tua ciangin Elijah in naupang la-in innkhumzang panin inn sungah paipih suk a, a nu kiangah amah pia hi; tua ciangin Elijah in, “En in, na tapa nungta hi,” a ci hi. Numei in Elijah kiangah, “Nang in Pasian’ mi na hihna leh na kam sunga om Topa ’ thu in thumanna ahihna tu-in ka thei hi,” a ci hi. Ni tampi khit a kum thumna kumin Elijah tungah Topa ’ thu hong tung a, “Pai in, Ahab kiangah nangmah kilak in; tua ciangin keimah in leitungah guah ka zusak ding hi,” a ci hi. Tua ahih ciangin Ahab kiangah amah kilak tawm dingin Elijah pai hi. Tu-in Samaria ah kialpi nasia hi. Tua ciangin Ahab in kumpi inn sung a ukpa Obadiah sam hi. (Obadiah in nakpi takin Topa zahtak hi; Jezebel in Topa ’ kamsangte a hon thah lai-in Obadiah in kamsang za khat la-in sawmnga sawmnga-in leihawm sungah seel a, amaute an leh tui tawh vaak hi.) Tua ciangin Ahab in Obadiah kiangah, “Gamsung ciktui omna khempeuh leh kuam omna khempeuh ah va pai in; lopa mu-in sakolte leh la-sakolte i hin’ suah zo kha ding a, ganhingte pawlkhat i sumh kei ding hi,” a ci hi. Tua ahih ciangin amaute in a et dingun leitang hawm uh hi; Ahab mahmah mun khat lamah pai-in Obadiah mahmah a mun dang khat lamah pai hi. Obadiah lam kalah a om lai takin, en in, Elijah in amah na dawntuah hi; Obadiah in amah thei-in a mai lei ngatin puk a, “Ka to Elijah, nang na hi hiam?” a ci hi. Tua ciangin amah in dawngin, “Keimah ka hi hi. Pai in, na topa kiangah, ‘En in, Elijah hih lai-ah om hi,’ ci in,” a ci hi. Amah in, “Hong thah dingin Ahab khut sungah na nasempa nong piak nadingin bang thu-ah khial ka hi hiam? Topa na Pasian in a nungta ahih mah bangin nangmah zong dingin ka topa in a sawl lohna minam ahi a, kumpi gam ahi zongin om lo hi; amaute in, ‘Hih lai-ah amah om lo hi,’ a cih uh ciangin, amaute in nang hong muh lohna thu amah in kumpi gam ahi a, minam ahi zongin kiciamsak hi. Tu-in nangmah in, ‘Pai in, na topa kiangah, “En in, hih lai-ah Elijah om hi,” ci in,’ nong ci hi. Nang kiang panin kei ka paikhiat phetin ka theih lohna munah Topa ’ Kha in nang hong pua ding hi; tua ciangin, kei pai-in Ahab kiangah genin amah in nang hong muh loh ciangin, ka khangno lai-a kipanin keimah na nasempa in Topa zahtak hi napi-in, amah in kei hong that ding hi. Jezebel in Topa ’ kamsangte a thah lai-in Topa ’ kamsangte mi zakhat, sawmnga sawmnga-in leihawm sungah seelin, amaute an leh tui tawh ka vaakna thu ka topa tungah hong kigen nai lo ahi hiam? Tu-in nangmah in, ‘Pai in, na topa kiangah, “En in, hih lai-ah Elijah om hi,” ci in,’ nong ci hi; tua ciangin amah in kei hong that ding hi,” a ci hi. Tua ciangin Elijah in, “A mai-ah ka din’na Vanglianpen Topa in a nungta ahih mah bangin, tu ni-in ama kiangah keimahmah ka kilak taktak ding hi,” a ci hi. Tua ahih ciangin Ahab tawh kimu dingin Obadiah pai-in ama kiangah gen hi; tua ciangin Elijah tawh kimu dingin Ahab pai hi. Ahab in Elijah a muh ciangin, ama kiangah, “Nang in Israel mite a lungkhamsakpa na hi hiam?” a ci hi. Amah in dawngin, “Keimah in Israel mite ka lungkhamsak kei hi; nang in Topa ’ thupiaknate nusia-in Baalte zui na hih manin nang leh na pa’ innkuan in na lungkhamsak uh hi. Tua ahih ciangin tu-in mi sawl in la, Karmel Mual kei kiangah Israelte khempeuh, leh Jezebel’ sabuai-ah an a ne Baal kamsang zali leh sawmnga leh Asherah kamsang zalite hong khawm in,” a ci hi. Tua ahih ciangin Ahab in Israel mite khempeuh kiangah mi sawlin, Karmel Mual-ah Israel mite leh kamsangte khawmsak hi. Tua ciangin mi khempeuh mai-ah Elijah hong pai-in, “Ngaihsutna kibang lo thu nih-ah bang tan vei kip loin om ding na hi uh hiam? Topa in Pasian ahih leh amah zui un; ahih hangin Baal pen Pasian ahih leh amah zui un,” a ci hi. Tua ciangin mite in kam khat beek dawng lo uh hi. Tua ciangin Elijah in mite kiangah, “kei, kei bekbek, Topa ’ kamsang sung panin ka om lai hi; ahih hangin Baal’ kamsangte mihing zali leh sawmnga om hi. Kote tungah bawngtal nih hong pia un; amau’ adingin bawngtal khat amaute teelsak un la, sem nensakin sing tungah koihsak un la, ahih hangin a tungah mei koihsak kei un; tua ciangin keimah in a bawngtal khat bawlin sing tungah koihin, a tungah mei ka koih kei ding hi. Tua ciangin note in na pasian tung uhah thu ngenin, keimah in Topa tungah thu ka ngen ding hi; tua ciangin thungetna mei tawh hong pia pasian in Pasian taktak ahi hi,” a ci hi. Tua ciangin mi khempeuh in dawngin, “Hih thugen hoih hi,” a ci uh hi. Tua ciangin Elijah in Baal kamsangte kiangah, “Note tam na hih manun note’ adingin bawngtal khat teel un la, bawl masa un; tua ciangin na pasian uh tungah thungen un la, ahih hangin a tungah mei koih kei un,” a ci hi. Tua ciangin amaute in amau tungah a kipia bawngtal la-in bawl uh a, zingsang-a kipan sun dong Baal tungah thu ngenin, “Baal aw, kote hong dawng in!” a ci uh hi. Ahih hangin awging om lo a, kuamah in dawng lo hi. Tua ciangin amau’ bawlsa biakna tau-ah amaute diang uh hi. Sun ciangin Elijah in amaute zahpihin, “Amah in pasian ahih ciangin a gingin kiko un; amah in thu a lungngaih laitak, ahih kei leh mun dangah paikhia, ahih kei leh khualzin, ahih kei leh amah ihmu-in phot ding kisam hi kha thei ding hi,” a ci hi. Tua ciangin amaute a gingin kiko-in, amau’ ngeina bangin namsaute leh sikzumte tawh, amaute tungah si a luan’ dongin ki-at kisun uh hi. Sunkim khit ciangin biakpiak hun dong mateng amaute awng suak uh a, ahih hangin awging om lo hi; kuamah in dawng lo a, kuamah in don lo hi. Tua ciangin Elijah in mi khempeuh kiangah, “Ka kiang nai-ah hong pai-un,” a ci hi; tua ciangin mi khempeuh ama kiang nai-ah hong pai uh hi. Tua ciangin amah in Topa ’ biakna tau a kisupaisa khat puah kik hi; “Israel in nangma min hi ding hi,” ci-in Topa ’ thu a tun’na Jakob tapa minam sawm-le-nihte tawh kizui-in Elijah in suangtum sawm-le-nih la hi; tua ciangin tua suangte tawh Topa ’ minin biakna tau khat lam hi. Amah in khaici lawh nih a ta dingin a lian hawklam khat biakna tau kimkotah bawl hi. Tua ciangin amah in a ngeina bangin a sing koih a, a bawngtal sem nenin a sing tungah koih hi. Tua ciangin amah in, “Beel li tui dim un la, meihal biakna tung leh sing tungah sung un,” a ci hi. Tua ciangin amah in, “A nih veina hih un,” a ci hi; tua ciangin amaute in nih veina hih uh hi. Tua ciangin amah in “A thum veina hih un,” a ci hi; tua ciangin amaute in a thum veina hih uh hi. Tua ciangin biakna tau kimkotah tui luang a, a hawklam zong tui tawh kidim hi. Biakpiak hun ciangin kamsang Elijah a nai-ah hong pai-in, “Abraham, Issak, leh Israel Pasian, Topa aw, nangmah in Israel sungah Pasian na hihna, leh keimah in nangma nasem ka hihna, leh hih nate khempeuh nangma thu tawh ka hihna thu tu ni-in kitheisak in, Topa aw, nangmah in Pasian na hihna leh amaute’ lungsim na hei kikna thu hih mite in a theih nadingin hong dawng in, Topa aw, hong dawng in,” a ci hi. Tua ciangin Topa ’ meikuang hong kia a, a meihal biakna, a sing, a suangte, leh a leivui kangtumin, hawklam sunga om tui nangawn liak tum hi. Mi khempeuh in tua thu a muh uh ciangin a mai uh lei lam ngatin puk uh hi; amaute in, “ Topa in Pasian ahi hi; Topa in Pasian ahi hi,” a ci uh hi. Tua ciangin Elijah in amaute kiangah, “Baal kamsangte man un; amaute khat zong suaktasak kei un,” a ci hi. Tua ciangin amaute in man uh hi; Elijah in Kishon lui-ah amaute paipih sukin tua lai-ah amaute that hi. Tua ciangin Elijah in Ahab kiangah, “Paito in, anne-in tuidawn in; bang hang hiam cih leh guahpi huging om hi,” a ci hi. Tua ahih ciangin a ne a dawn dingin Ahab paito hi. Karmel dawn-ah Elijah paito hi; amahmah lei lakah kun sukin a khukte kikalah a maitang phum hi. Tua ciangin a nasempa kiangah, “Tu-in paito in, tuipi lam va en in,” a ci hi. Amah paito-in khuadak a, “Bangmah om lo hi,” a ci hi. Tua ciangin amah in, “Sagih vei paikik in,” a ci hi. A sagih veina ciangin amah in “En in, khuttum cia bang meii tawmno khat tuipi panin hong paito hi,” a ci hi. Tua ciangin amah in, “Paito in, Ahab kiangah, ‘Guah in hong khak kha ding ahih manin na leeng kithawi in la, paisuk in,’ va ci in,” a ci hi. Tomno sungin meiite leh huih tawh van hong vom a, guah tampi zu hi. Ahab a leeng tungah tuangin Jezre-el ah pai hi. Tua ciangin Topa ’ vangliatna Elijah tungah om hi; amah in a kawng gakin Jezre-el lutna dongah Ahab mai-ah na tai hi. Ahab in Jezebel kiangah Elijah’ hih khempeuh, leh namsau tawh kamsangte khempeuh a thah khitna thu gen hi. Tua ciangin Jezebel in Elijah kiangah kamtai khat sawlin, “Zing ciang tu bang hunin amaute khat’ nuntakna bangin nangma nuntakna ka bawl kei taak leh pasiante in kei hong dawm kei ta hen,” cisak hi. Tua ciangin amah lau a, ding-in a suahtak nadingin pai a, Judahte’ khua Be-ersheba tungin tua lai-ah a nasempa nusia hi. Ahih hangin amahmah gamlakah ni khat lam pai-in poding kung nuai khatah tu hi; tua ciangin amah in a sih nading ngenin, “Pha zo hi; tu-in Topa aw, ka nuntakna hong la ta in; bang hang hiam cih leh keimah in ka pate sangin ka hoihzaw kei hi,” a ci hi. Tua ciangin amah lum sukin poding kung khat nuaiah ihmu hi; en in, vantungmi khat in amah lawngin ama kiangah, “Tho in la, ne in,” a ci hi. Amah khuadak a, en in, ama lutang gei-ah suangsa tungah a ki-em moh khat leh tui hai khat na om hi. Amah in ne-in dawnin lum kik hi. Tua ciangin Topa ’ vantungmi a nih veina hong pai kikin amah lawng a, “Tho in la, ne in, tua hi kei leh nang adingin khualzinna haksa lua ding hi,” a ci hi. Tua ciangin amah tho a, ne-in dawn a, tua an thahatna tawh Pasian’ mual Horeb ciang dong sun sawmli leh zan sawmli sung pai hi. Tua ciangin leihawm khatah amah tungin tua lai-ah giak hi; en in Topa ’ thu ama tungah hong tung a, amah in ama kiangah, “Elijah, hih lai-ah bang hih na hi hiam?” a ci hi. Amah in, “Vanglianpen Pasian, Topa adingin ka huaiham mahmah hi; bang hang hiam cih leh Israel mite in na thuciamna nusia-in, na biakna taute lawn khia a, namsau tawh na kamsangte that hi; kei, kei bekbek ka om lai hi; amaute in kei thah dingin hong zong uh hi,” a ci hi. Tua ciangin amah in, “Paikhia in la, mual tung, Topa mai-ah ding in, Topa hong pai ding hi,” a ci hi. En in, Topa mai-ah suangtumte sukham a, ahih hangin huih lakah Topa om lo hi; huihpi khit ciangin ziinling om a, ahih hangin ziinling sungah Topa om lo hi; ziinling khit ciangin meikuang om a, ahih hangin meikuang sungah Topa om lo hi; meikuang khit ciangin awneem neu khat om hi. Elijah in a zak ciangin a puan tawh a mai tuamin paikhia a, leihawm lutna ah ding hi. En in, ama kiangah aw khat hong ging a, “Elijah, hih lai-ah bang hih na hi hiam?” a ci hi. Amah in, “Vanglianpen Pasian, Topa adingin ka huaiham mahmah hi; bang hang hiam cih leh Israel mite in na thuciamna nusia-in, na biakna taute lawnkhia a, namsau tawh na kamsangte that hi; kei, kei bekbek ka om lai hi; amaute in kei thah dingin hong zong uh hi,” a ci hi. Tua ciangin Topa in ama kiangah, “Pai in, Damaskas gamlak na lampi-ah ciahkik in; na tun’ ciangin Siria tungah kumpi dingin Hazael sathau na nilh ding hi; tua ciangin Israel tungah kumpi dingin Nimshi’ tapa Jehu sathau na nilh ding hi; tua ciangin nangma munah kamsang dingin Abelmeholah khuami Shafat’ tapa Elisha sathau na nilh ding hi. Jehu in Hazael’ namsau panin a suakta mipa that ding hi; Elisha in Jehu’ namsau panin a suakta mipa that ding hi. Ahi zongin Baal mai-ah a kun nai lo, amah a nam nai lo mihing tulsagih Israel sungah ka siit ding hi,” a ci hi. Tua ahih ciangin tua lai panin amah paikhia a, ama mai-ah bawngtal kap sawm-le-nih tawh lo a kho Shafat’ tapa Elisha mu a, amah a sawm-le-nihna tawh na om hi. Elijah in ama gei nawkin ama tungah a puan lawn hi. Tua ciangin amah in bawngtalte nusia-in Elijah nungah tai a, “Ka nu leh ka pa kam vaikhakin hong namsak phot in, tua ciangin nang kong zui ding hi,” a ci hi. Amah in ama kiangah, “Paikik in; nang tungah bang hong hih ka hi hiam?” a ci hi. Tua ciangin amah zuihna panin ciahkik a, a bawngtal kolte la-in a bawngtalte go a, a sate bawngtal kolte tawh huanin mite tungah pia a, amaute in ne uh hi. Tua ciangin amah ding-in Elijah’ nung zui a, ama na sem hi. Siria kumpipa Benhadad in ama galkapte khempeuh khawm hi; amah tawh kumpi sawmthum-le-nih, leh sakolte leh leengte om hi; amah paito-in Samaria umcihin sim hi. Amah in Israel kumpi Ahab khuapi sungah kamtaite sawlin ama kiangah, “Benhadad in hih bangin ci hi: ‘Na ngun leh na kham keima’ aa hi; na zi hoih pente leh na tate zong keima’ aa hi,’ ci hi,” cisak hi. Tua ciangin Israel kumpipa in dawngin, “Na gen mah bangin, ka topa, kumpipa aw, kei leh ka neih khempeuh nangma’ aa ahi hi,” a ci hi. Kamtaite hong paikikin, “Benhadad in hih bangin ci hi: ‘Nang kiangah mi hong sawlin, “Kei tungah na ngun leh na kham, na zite leh na tate hong pia in,” kong cisak hi; ahi zongin zing ciang tu bang hunin nangma kiangah ka nasemte kong sawl ding a, amaute in nangma inn leh na nasemte’ inn sung thawi-in, amau’ deih peuhpeuh hong la ding uh hi,’ ci hi,” cisak hi. Tua ciangin Israel kumpipa in gamsung upa khempeuh samin, “Tu-in ciamteh un, hih mipa in buaina a zon’na thei un; bang hang hiam cih leh ka zite leh ka tate, leh ka ngun leh ka kham la dingin hong sawl a, ama thu ka nial kei hi,” a ci hi. Tua ciangin upa khempeuh leh mi khempeuh in ama kiangah, “Don kei in la, zong thukim kei in,” a ci uh hi. Tua ahih ciangin amah in Benhadad kamtaite kiangah, “Ka to kumpipa kiangah gen un, ‘Na nasempa’ tung panin nong kalh masak ka hih ding hi; ahih hangin hih thu ka hih thei kei hi,’ ci un,” a ci hi. Tua ciangin kamtaite kihemkhia-in ama tungah thu tun’ kik uh hi. Benhadad in ama kiangah sawlin, “Samaria leivui in kei hong zui khempeuh khutkuak a dim zawh taak leh, pasiante in kei hong dawm kei ta hen,” a ci hi. Tua ciangin Israel kumpipa in dawngin, “Ama kiangah gen un, ‘Galhiam a suahkhiapa bangin galhiam a kuahpa kiphasak kei hen; ci un,” a ci hi. Bukte sungah kumpite tawh zu ne-in Benhadad a om lai takin hih thu a zak ciangin, amah in a mite kiangah, “Panmun la un,” a ci hi. Tua ciangin amaute in khuapi langpangin panmun la uh hi. Tua ciangin en in, Israel kumpi Ahab kiang nai-ah kamsang khat hong pai-in, “ Topa in hih bangin ci hi; Hih mihon tampi khempeuh na mu khin hiam? En in, tu ni-in nangma khut sungah kong pia ding hi; tua ciangin keimah in Topa ka hihna na thei ding hi, ci in,” a ci hi. Tua ciangin Ahab in, “Kua tawh hi ding hiam?” a ci hi. Amah in, “ Topa in hih bangin ci hi: Gamte a ukte’ nasemte tawh, ci hi,” a ci hi. Tua ciangin amah in, “Kua in galdona pan ding hiam?” a ci hi. Amah in dawngin, “Nangmah in na pan ding hi,” a ci hi. Tua ciangin amah in gamte a ukte’ nasemte khawm a, amaute zanih leh sawmthum-le-nih ahi hi; amaute’ khit ciangin amah in Israel mi khempeuh, tulsagih khawm hi. Tua ciangin, Benhadad in bukte sungah amah a huh kumpi sawmthum-le-nihte tawh zu ne-in zu khamin a om laitak sun hunin amaute kuankhia uh hi. Gamte a ukte’ nasemte kuankhia masa uh hi. Tua ciangin Benhadad in thukante sawlkhia a, amaute in ama kiangah, “Samaria panin mite hong kuankhia uh hi,” ci-in zasak uh hi. Amah in, “Kilemna bawl dingin hong pai ahih leh a hingin amaute man un; tua ahih kei a, galdo dingin amaute hong pai ahih leh zong amaute a hing mahin man un,” a ci hi. Tua ahih ciangin gamte a ukte’ nasemte leh amaute a zui galkapte, khuapi panin kuankhia uh hi. Mi khempeuh in ama kisikpih ciat that uh hi; Siriate tai-in Israel mite in amaute delh uh a, ahih hangin Siria kumpipa Benhadad in sakol tuangin, sakol tuangte tawh taikhawm hi. Tua ciangin, Israel kumpipa paikhia-in sakolte leh leengte man a, Siriate tampi tak that hi. Tua ciangin Israel kumpipa kiang nai-ah kamsangpa hong pai-in ama kiangah, “Hong pai in, nangmah kithakhauhsak in la, na hih ding thu limtakin ngaihsun in; bang hang hiam cih leh khuakhal ciangin Siria kumpipa nangmah do-in hong kuanto kik ding hi,” a ci hi. Tua ciangin Siria kumpipa’ nasemte in ama kiangah, “Amaute’ pasiante in mual tung pasiante hi a, tua ahih ciangin eite sangin amaute hatzaw uh hi; ahih hangin zanglei ah amaute do ni; amaute sangin eite i hatzaw taktak ding hi. Hih thu hih in: kumpite ama panmun ciat panin khinkhia in la, amaute’ munah galkap mangte koih in; tua ciangin na taansa galkap tawh a kibang galkap, sakol tangin sakol, leeng tangin leeng khawm in; tua ciangin zanglei ah amaute i do ding a, amaute sangin eite i hatzaw taktak ding hi,” a ci uh hi. Tua ciangin amah in amau’ thu ngai-in hih hi. Khuakhal ciangin Benhadad in Siriate khawmin Israel do dingin Afek ah kuan to hi. Tua ciangin Israel mite kikhawmin, lam-an kiguan’ a, amaute do dingin kuan uh hi; Israel mite in amaute’ mai-ah keelhon neu nih bangin giahphual sat uh a, ahih hangin Siriate in gamsung khempeuh dim hi. Tua ciangin Pasian’ mi khat a nai-ah hong pai-in Israel kumpipa kiangah, “ Topa in hih bangin ci hi. ‘Siriate in, “ Topa in mualtung pasian hi a, amah in kuam sung pasian hi lo hi,” ci uh ahih manin hih a lian mihonpi khempeuh nangma khut sungah kong pia ding a, keimah in Topa ka hihna na thei ding hi,’ ci hi,” a ci hi. Amaute in kimaituahin ni sagih sung giahphual satin om uh hi. A ni sagih ni-in gal kido uh hi; Israel mite in Siriate ni khat sungin khe galkap tul-zakhat vat lum uh hi. Tua ciangin a om laite Afek khuapi ah tai uh hi; a om lai mi tul-sawmnih leh tulsagih tungah kulhpi cim hi. Banhadad zong tai a, khuapi sunga inndei sungnung khatah lut hi. Tua ciangin a nasemte in ama kiangah, “Tu-in en in, Israel kumpite in hehpihna a nei kumpite hi, ci-in i za hi; puanhampi i kawngah tengin i lu tungah khauhual vialin Israel kumpipa kiangah pai ni; amah in na nuntakna hong suaktasak kha ding hi,” a ci uh hi. Tua ahih ciangin amaute in a kawng uhah puanhampi tengin a lu uhah khauhual vialin Israel kumpipa kiangah pai uh a, “Na nasempa Benhadad in, ‘Kong thuum hi, kei hong nungtasak in,’ ci hi,” a ci uh hi. Amah in, “Amah nungta lai ahi hiam? Amah in ka sanggampa ahi hi,” a ci hi. Tu-in mite in a lim encikin ama tung panin a theih uh ciangin, “Hi hi, na sanggampa Benhadad nungta lai hi,” a ci uh hi. Tua ciangin amah in, “Pai un la, amah hong paipih un,” a ci hi. Tua ciangin ama kiangah Benhadad hong paikhia hi; amah in leeng tung ama kiangah amah kahtosak hi. Tua ciangin Benhadad in ama kiangah, “Ka pa in na pa’ tung panin a lak khuapite kong piakik ding hi; ka pa in Samaria ah a bawl mah bangin Damaskas ah nang adingin sumbuk na hong thei ding hi,” a ci hi. Tua ciangin Ahab in, “Hih na thugente’ hangin nang kong paisak ding hi,” a ci hi. Tua ahih ciangin amah in thuciamna khat amah tawh bawlin paisak hi. Tua ciangin Topa ’ thupiakna tawh kamsangte’ tapate mi khat in a lawmte khat kiangah, “Hong sat in, kong thuum hi,” a ci hi. Ahih hangin a mipa in amah sat nuam lo hi. Tua ciangin amah in ama kiangah, “Nangmah in Topa ’ thu mang lo na hih manin, en in, kei kiang panin na paikhiat khit phetin humpinelkai khat in nang hong that ding hi,” a ci hi. Ama kiang panin amah a kihep khiat khit phetin humpinelkai khat in amah dawntuahin that hi. Tua ciangin amah in midang khat mu a, “Hong sat in, kong thuum hi,” a ci hi. Tua ciangin mipa in amah satin, vatin amah liamsak hi. Tua ciangin kamsangpa kihem khia-in lam gei-ah kumpipa ngak a, a mit tungah puan tawh tuamin a meel seel hi. Kumpipa in a nawk lai takin amah in kumpipa tungah kiko-in, “Na nasempa gal sungah kuan hi; en in, galkap khat hong kihei-in kei kiangah mi khat hong paipih a, ‘Hih mipa kem in; amah man’na khat a neih zenzen leh ama nuntakna taangin nangma nuntakna hi ding a, ahih kei leh ngun talen khat na liau ding hi,’ hong ci hi. Na nasempa hih lai hua lai-ah manlahin a om kalin amah na mang hi,” a ci hi. Israel kumpipa in ama kiangah, “Nangma thukhenna bang hi ta hen; nangmahmah in na khen tawm hi,” a ci hi. Tua ciangin amah in a mit panin a tuamna phel dingin nawhtat hi; tua ciangin Israel kumpipa in amah pen kamsangte khat ahih lam thei hi. Tua ciangin amah in ama kiangah, “ Topa in hih bangin ci hi: ‘Suksiat dinga ka sehsa mipa paikhiasak na hih ciangin ama nuntakna taangin nangma nuntakna, ama mite’ taangin nangma mite pai ding hi,” ci hi,” a ci hi. Tua ciangin Israel kumpipa a innah lungkimlo, maikhingin pai a, Samaria tung hi. Tu-in Jezre-el khuami Naboth in Samaria kumpi Ahab’ kumpi inn gei-ah leenggui lo khat nei hi. Hih thu khit ciangin Ahab in Naboth kiangah, “Ka inn tawh kinai ahih manin anteh huan dingin ka neih theih nadingin na leenggui lo hong pia in; keimah in tua tang dingin leenggui lo hoihzaw khat kong pia ding hi; ahih kei leh zong nang adingin a hoih zawk ding leh a man ding sum kong pia ding hi,” a ci hi. Ahih hangin Naboth in Ahab kiangah, “Ka pu ka pate’ gamh nang tungah kong piak ding Topa in hong kham hi,” a ci hi. Tua ciangin Jezre-el khuami Naboth in ama tungah a thugenna hangin hehna leh maikhin’na tawh Ahab a innah ciah hi; bang hang hiam cih leh amah in, “Ka pu ka pate’ gamh nang tungah kong pia kei ding hi,” a ci hi. Amah a lupna tungah lumin a mai hei a, an ne lo hi. Ahih hangin a zi Jezebel ama kiangah hong pai-in, ama kiangah, “An a ne lo zah dingin bang hangin na lungsim tua zahin heh ahi hiam?” a ci hi. Amah in ama kiangah, “Bang hang hiam cih leh keimah in Jezre-el khuami Naboth kiangah thu genin, ‘Sum tawh lei dingin na leenggui lo hong pia in; ahih kei leh zong, na lungkim leh tua tang dingin leenggui lo dang kong pia ding hi,’ ka ci hi; amah in hong dawngin, ‘Nang tungah ka leenggui lo kong pia kei ding hi,’ hong ci hi,” a ci hi. Tua ciangin a zi Jezebel in ama kiangah, “Tu-in Israel mite a ukpa hilo na hi hiam? Tho-in an ne in la, na lungsim nuamsak in; keimah in Jezre-el khuami Naboth’ leenggui lo nangma tungah kong pia ding hi,” a ci hi. Tua ahih ciangin amah in Ahab’ minin laikhakte gelhin ama min gelhna tawh tua laite tungah gelh a, ama khuapi sungah Naboth tawh a teeng upate leh uliante tungah tua laite khak hi. Amah in a laite sungah, “An tan’ ding thu zasak un la, mite lak a sangna munah Naboth koih un; ama mai-ah mi ginalo nih koihin ama lang khatah mawhna zongsak in, ‘Nang in Pasian leh kumpipa na samsia hi,’ cisak un. Tua ciangin amah la khia un la, denglum un,” a ci hi. Tua ciangin ama khuapi mi, ama khuapi sungah a teeng upate leh uliante in amaute tungah Jezebel’ thupuak bangin hih uh hi. Amaute tungah a khak laite sungah a kigelh mah bangin, amaute in an tan’ ding thu zasak uh a, mite lak a sangna munah Naboth koih uh hi. Tua ciangin mi ginalo nihte hong pai-in ama mai-ah tu uh hi; tua ciangin mi ginalo nihte in mite’ mai-ah Naboth’ mawhna zong uh a, “Naboth in Pasian leh kumpipa samsia hi,” ci uh hi. Tua ahih ciangin amaute in khuapi pua lamah amah paipih uh a, suang tawh amah denglum uh hi. Tua ciangin amaute in Jezebel kiangah thu puakin, “Suang tawh Naboth kideng zo hi; amah si hi,” a ci uh hi. Jezebel in Naboth suang tawh kidengin a sihna a zak phetin, amah in Ahab kiangah, “Tho in, sum tawh lei dingin nangma tungah hong piak nop loh, Jezre-el khuami Naboth’ leenggui lo tang in; bang hang hiam cih leh Naboth hing nawn lo hi, si ta hi,” a ci hi. Naboth a sihna thu Ahab in a zak phetin, a luah dingin Jezre-el khuami Naboth’ leenggui lo-ah a paisuk dingin tho hi. Tua ciangin Tishbe khuami Elijah tungah Topa ’ thu hong tung a, “Tho in la, Samaria ah a om Israel kumpi Ahab dawntuah dingin paisuk in; en in, a la dingin a paina Naboth’ leenggui lo-ah amah om hi. Nangmah in ama kiangah, ‘ Topa in hih bangin ci hi; “That khinin, zong luah khin na hi hiam?” ci hi,’ na ci ding hi. Tua ciangin ama kiangah, ‘ Topa in hih bangin ci hi: “Uite in Naboth’ sisan a liahna munah uite in nangma sisan liak ding uh hi,” ci hi,’ ci-in gen in,” a ci hi. Ahab in Elijah kiangah, “Ka galpa aw, kei hong mu na hi hiam?” a ci hi. Amah in dawngin, “ Topa muhna ah a sia gamta dingin nangmah kipia tawm na hih manin nangmah kong mu hi. Topa in hih bangin ci hi: Nangma tungah siatna kong tungsak ding hi; nang kong phiatkhia siang ding a, Israel sungah nangma mi sal leh a suakta mi pasal khempeuh, ka susia ding hi; kei nong hehsakna hang leh Israel na khialhsakna hangin Nebat’ tapa Jeroboam’ innkuan leh Ahijah’ tapa Baasha’ innkuan bangin nangma innkuan ka bawl ding hi. Jezebel’ thu zong Topa in genin, ‘Uite in Jezre-el huam sungah Jezebel ne ding uh hi,’ ci hi. Khuapi sungah Ahab’ innkuan a si peuhpeuh uite in ne ding uh hi; gamlakah a si ama innkuan peuhpeuh huih lak vasate in ne ding uh hi, ci hi,” a ci hi. Ama zi Jezebel in a hanthot Ahab bangin Topa ’ muhna ah a sia gamta dingin amahmah a kipia tawm mi kuamah om lo hi. Topa in Israel mite’ mai-ah a hawlkhiat Amor mite bangin milimte zui-in a kihhuai mahmahin gamta hi. Ahab in hih thute a zak ciangin a puante balkek a, a pum tungah puanhampi silhin, an tangin puanhampi tungah lum a, maikhingin vak kawikawi hi. Tu-in Tishbe khuami Elijah tungah Topa ’ thu hong tung a, “Keima mai-ah bangzahin Ahab a kiniamkhiatna na mu hiam? Keima mai-ah amah kiniamkhiat ahih manin ama hun sungin siatna ka tungsak kei ding hi; ahih hangin a tapa’ hun sungin ama innkuan tungah siatna ka tungsak ding hi,” a ci hi. Kum thum sung Siria leh Isarel galkido loin om uh hi. Ahih hangin a kum thumna kumin Judah kumpipa Jehoshafat, Israel kumpipa Ahab kiangah paisuk hi. Tua ciangin Israel kumpipa in a nasemte kiangah, “Ramoth-gilead eima’ aa hi a, eite pau loin om-in Siria kumpipa khut sung panin i lakkhiat lohna thu na thei uh hiam?” a ci hi. Tua ciangin amah in Jehoshafat kiangah, “Ramoth-gilead ah galdo dingin kei nong zui ding hiam?” a ci hi. Jehoshafat in Israel kumpipa kiangah, “Kei-a kipan ka mite leh ka sakolte in nangma’ aa ka hi uh hi,” a ci hi. Tua ciangin Jehoshafat in Israel kumpipa kiangah, “ Topa thu dong masa in,” a ci hi. Tua ciangin Israel kumpipa kamsangte mihing zali bang khawmin amaute tungah, “Ramoth-gilead a sim dingin ka kuan ding hiam, ahih kei leh ka thuak ding hiam?” a ci hi. Amaute in, “Kuanto in; bang hang hiam cih leh Topa i kumpipa’ khut sungah hong pia ding hi,” a ci uh hi. Ahih hangin Jehoshafat in, “Thu i dot theih ding Topa ’ kamsang adang khat beek om nawn lo ahi hiam?” a ci hi. Tua ciangin Israel kumpipa in Jehoshafat kiangah, “ Topa thu i dot theih ding, Imlah’ tapa Mikaiah kici mi khat om lai hi; ahih hangin amah in kei’ thu a hoih gen ngei loin a sia gen ahih manin amah ka mudah hi,” a ci hi. Tua ciangin Jehoshafat in, “Kumpipa in tua bangin ci kei in,” a ci hi. Tua ciangin Israel kumpipa in ulian khat samin, “Manlangin Imlah’ ‘tapa Mikaiah hong paipih in,” a ci hi. Tu-in Samaria kulhpi lutna ancilna ah Israel kumpipa leh Judah kumpipa Jehoshafat a kumpi tokhom tung uhah tu-in kumpi puan tawh kizemin om uh hi; kamsang khempeuh in amau’ mai-ah thu gen uh hi. Tua ciangin Khene-anah’ tapa Zedekiah in ama adingin sik kite bawl a, “ Topa in hih bangin ci hi: ‘Amaute a kisuksiat matengin hihte tawh Siria mite na nawt ding hi,’ ci hi,” a ci hi. Kamsang khempeuh in zong tua mah bangin genin, “Ramoth-gilead ah kuanto in la, gualzo in; Topa in kumpipa’ khut sungah hong pia ding hi,” a ci uh hi. Tua ciangin Mikaiah a sam dingin a pai kamtaipa in ama kiangah, “En in, thu kikhatin kamsangte’ thugen in kumpipa’ adingin a hoih lam ahi hi; amaute’ thugen bangin nang zong gen in la, a hoih lamin gen in,” a ci hi. Ahih hangin Mikaiah in, “ Topa in a nungta ahih mah bangin, Topa in kei tungah a hong gen thu ka gen ding hi,” a ci hi. Kumpipa kiangah amah a tun’ ciangin kumpipa in ama kiangah, “Mikaiah aw, Ramoth-gilead ah galsim dingin i kuan ding hiam, ahih kei leh i thuak ding hiam?” a ci hi. Tua ciangin amah in dawngin, “Kuanto in la, va gualzo in; Topa in kumpipa’ khut sungah hong pia ding hi,” a ci hi. Ahih hangin kumpipa in ama kiangah, “ Topa ’ min tawh thudang gen loin thuman bek kei tungah nong gen nading bangzah vei hong thuhilh ding ka hi hiam?” a ci hi. Tua ciangin amah in, “Tuucing a nei lo tuute bangin mualte tungah Israel mi khempeuh a kithehthang ka mu hi; Topa in, Hihte in makai nei lo hi; amaute lungnuam takin a inn ciat uhah ciah hen,’ ci hi,” a ci hi. Tua ciangin Israel kumpipa in Jehoshafat kiangah, “Amah in kei’ thu a hoih gen loin a sia gen ding hi, nang kiangah hong ci khin hilo ka hi hiam?” a ci hi. Tua ciangin Mikaiah in, “Tua ahih ciangin Topa ’ thu ngai in: Topa a kumpi tokhom tungah tu-in, ama pang a taklam khut leh a vei lamah vantungmi honpi a ding ka mu hi; tua ciangin Topa in, ‘Amah kuanto-in Ramoth-gilead ah a tuk nadingin kua in Ahab va zol ding hiam?’ ci hi. Khat in thu khat genin adang khat in thudang khat gen hi. Tua ciangin Kha khat hong mai dawkin Topa mai-ah ding a, ‘Keimah in amah ka zol ding hi,’ a ci hi. Topa in ama kiangah, ‘Bang lam tawh zol ding na hi hiam?’ a ci hi. Amah in, ‘Keimah paikhia-in, ama kamsangte khempeuh’ kam sungah zuau thei kha ka va hi ding hi,’ a ci hi. Tua ciangin amah in, ‘Nangmah in amah a va zol ding na hi a, nangmah in na zo ding hi; paikhia in la, tua bangin hih in,’ a ci hi. Tua ahih ciangin tu-in en in, Topa in hih na kamsangte khempeuh’ kam sungah zuauthei kha khat koih khin hi; Topa in nang tawh kisai-in a sia gen khin hi,” a ci hi. Tua ciangin Khena-anah’ tapa Zedekiah a nai-ah hong pai-in Mikaiah a paang bengin, “Nang tungah thu a gen dingin keima tung panin Topa ’ Kha hong bangci pai hiam?” a ci hi. Tua ciangin Mikaiah in, “En in, nangmah a bu dingin inndei sungnung ah na pai ni ciangin na mu ding hi,” a ci hi. Tua ciangin Israel kumpipa in, “Mikaiah man un la, khuapi sung a ukpa Amon leh kumpipa’ tapa Joash kiangah paipih kik un; tua ciangin, ‘Kumpipa in hih bangin ci hi, “Hih mipa thong sungah koih un la, lungnuamin kei kong ciahkik matengin an leh tui tawmno cik bek tawh vaak un,” ci hi,” va ci un,” a ci hi. Tua ciangin Mikaiah in, “Lungnuam takin nong ciahkik leh Topa in kei tung tawnin thu hong gen lo ahi hi,” a ci hi. Tua ciangin amah in, “No mi khempeuhte aw hih ka thugen za un,” ci thuah lai hi. Tua ahih ciangin Israel kumpipa leh Judah kumpipa Jehoshafat Ramoth-gilead ah kuanto uh hi. Tua ciangin Israel kumpipa in Jehoshafat kiangah, “Kei ka meel seelin gal sungah kong kuan ding a, ahih hangin nangmah in na kumpi puante nong silh ding hi,” a ci hi. Tua ciangin Israel kumpipa in a meel seelin gal sungah kuan hi. Tu-in Siria kumpipa Aram in ama leeng a uk mi sawmthum-le-nihte thu pia-in, “A neu ahi a, a lian tawh ahi zongin kido loin, Israel kumpipa bek tawh na kido ding uh hi,” a ci hi. Leeng a ukte in Jehoshafat a muh uh ciangin amaute in, “Israel kumpipa hi taktak hi,” a ci uh hi. Tua ahih ciangin amah do dingin amaute kihei uh hi; tua ciangin Jehoshafat awng khia hi. Israel kumpipa ahih lohna leeng a ukte in a muh uh ciangin amah a delhna panin amaute nungkik uh hi. Ahih hangin mi khat in a thal mawk lot a, a galhiam awmdal thep kikalah lutin Israel kumpipa kha hi; tua ahih ciangin amah in a leeng hawlpa kiangah, “Kei liam ka hih manin kihei in la, gal sung panin hong puakhia in,” a ci hi. Tua ni-in gal kidona lian a, nitak a sih dong Siriate lam mai ngatin a leeng sungah Israel kumpipa kingamin om hi; a liamna panin a si luangte leeng taw lamah luang hi. Nitum pawlin galkapte lakah kikona khat hong om a, “Mi khempeuh ama khuapi-ah, mi khempeuh ama gamah!” kici hi. Tua ahih ciangin kumpipa si a, Samaria ah kipaipih hi; amaute in Samaria ah kumpipa vui uh hi. Tua ciangin amaute in Samaria bual gei-ah leeng sil uh a, Topa in a gensa thu tawh kizui-in uite in a sisan liak tumin numei paktatte tua sungah kisil uh hi. Tu-in Ahab’ gamtatna a om laite, leh a hih khempeuh, leh ama lamsa saiha inn, leh ama lam khuapi khempeuh, Israel Kumpite’ Khang Tangthu Laibu sungah kigelh hilo ahi hiam? Tua ahih ciangin a pate tawh Ahab ihmu hi; ama tangin a tapa Ahaziah in uk hi. Israel kumpi Ahab’ kum lina kumin Asa’ tapa Jehoshafat in Judah tungah uk ding kipan hi. Gam uk dingin a kipatin Jehoshafat kum sawmthum-le-nga pha a, Jerusalem ah kum sawmnih-le-nga sung uk hi. Ama’ nu’ min in Azubah hi a, Shilhi’ tanu ahi hi. Amah in a pa Asa’ khekhap tawn hi; amah tua lampi panin pial loin, Topa muhna ah a manin gamta hi; ahi zongin mual tunga biaknate kilakhia lo a, mite in tuate tungah biakna pia lai-in paknamtui hal uh hi. Jehoshafat in Israel kumpipa tawh zong kilemna bawl hi. Tu-in Jehoshafat’ gamtatna a om laite, leh amah in a lah a thahatna, leh amah in a galdona, Judah Kumpite’ Khang Tangthu Laibu sungah kigelh hilo ahi hiam? A pa Asa’ hun lai-in a om lai pasal paktat pawlte amah in gamsung panin beisak hi. Edom ah kumpi om lo hi; Judah kumpipa khut nuai-a a huhpa khat in uk hi. Jehoshafat in kham zongin Ofir-ah a pai dingin Tarshish teembawte bawl hi; ahih hangin Ezion-geber ah teembawte sia ahih manin amaute pai lo uh hi. Tua ciangin Ahab’ tapa Ahaziah in Jehoshafat kiangah, “Teembawte sungah nangma nasemte tawh keima nasemte paikhawmsak in,” a ci hi; ahih hangin Jehoshafat ut lo hi. Tua ciangin a pate tawh ihmu a, David’ khuapi Jerusalem ah a pate tawh kivui hi; tua ciangin ama tangin a tapa Jehoram in uk hi. Judah kumpipa Jehoshafat’ kum sawm-le-sagihna kumin Ahab’ tapa Ahaziah in Samaria panin Israel tungah kum nih sung uk hi. Amah in Topa muhna ah a sia gamta a, ama nu, leh ama pa, leh Israel a khialsak Nebat’ tapa Jeroboam’ khekhap mah tawn hi. Amah in Baal’ na semin bia a, a pa mah bangin a hihna khempeuh ah Israel Pasian, Topa hehsak hi. Ahab a sih khit ciangin Moab gam in Israel lehdo hi. Tu-in Samaria a, a inndei tungnung sung a kikalh simsiam panin Ahaziah kia-in a cina hi; tua ahih ciangin amah in kamtaite sawlin amaute kiangah, “Pai un, hih cinatna panin ka damkik zo ding hiam cih thu Ekron pasian, Baalzebub kiangah va dong un,” a ci hi. Ahih hangin Topa ’ vantungmi in Tishbe mi Elijah kiangah, “Ding in, Samaria kumpipa’ kamtaite dawn dingin paito in la, amaute kiangah, ‘Ekron pasian, Baalzebub kiangah thu dong dingin na pai nadingin Israel sungah Pasian om nawn lo ahi hiam?’ ci in. Tua ahih ciangin tu-in Topa in hih bangin ci hi: ‘Nang in tu-a na lupna panin na thokik nawn kei ding hi; nang na si taktak ding hi,’ ci hi,” a ci hi. Tua ahih ciangin Elijah pai hi. Kamtaite kumpipa kiangah hong ciahkik uh a, amah in amaute kiangah, “Bang hangin hong ciahkik na hi uh hiam?” a ci hi. Tua ciangin amaute in ama kiangah, “Kote dawn dingin mi khat hong pai a, kote kiangah, ‘Note hong sawl kumpipa kiangah paikik un la, ama kiangah, Topa in hih bangin ci hi: Ekron pasian, Baalzebub kiangah thu a dong dingin na sawl nadingin Israel sungah Pasian om nawn lo ahi hiam? Tua ahih ciangin tu-a na lupna panin na thokik nawn kei ding hi; na si taktak ding hi,’ ci hi,” a ci uh hi. Amah in amaute kiangah, “Note a dawn dingin hong pai-in hih thute a genpa in a bangci mi ahi hiam?” a ci hi. Amaute in amah dawngin, “Amah in samul puan khat silh a, a kawngah savun kawnggak gak hi,” a ci uh hi. Tua ciangin amah in, “Amah in Tishbe mi Elijah ahi hi,” a ci hi. Tua ciangin kumpipa in ama kiangah mihing sawmnga a ukpa a mihing sawmnga tawh sawl hi. Mual dawn khatah a tu Elijah kiangah amah paito-in ama kiangah, “Pasian’ mipa aw, kumpipa in, ‘Hong paisuk hen,’ ci hi,” a ci hi. Ahih hangin Elijah in mihing sawmnga a ukpa dawngin, “Keimah in Pasian’ mi khat ka hih leh, vantung panin meikuang hong paisuk hen la, kangtum hen,” a ci hi. Tua ciangin vantung panin meikuang hong paisukin amah leh a mihing sawmngate kangtum hi. Kumpipa in ama kiangah mihing sawmnga a uk adang khat a mihing sawmnga tawh sawlkik hi. Tua ciangin amah paito-in a kiangah, “Pasian’ mipa aw, hih in kumpipa’ thupiakna ahi hi, ‘Manlang takin hong paisuk in!” a ci hi. Ahih hangin Elijah in amaute dawngin, “Keimah in Pasian’ mi khat ka hih leh, vantung panin meikuang hong paisuk hen la, nang leh na mihing sawmngate hong kangtum hen,” a ci hi. Tua ciangin vantung panin Pasian’ meikuang hong paisukin amah leh a mihing sawmngate kangtum hi. Kumpipa in mihing sawmnga a uk a thumna-pa a mihing sawmnga tawh sawl leuleu hi. Tua ciangin mihing sawmnga a uk a thumna-pa paito a, Elijah’ mai-ah hong pai-in khukdin’in hong puk a, amah kun-in, “Pasian’ mipa aw, nangma tungah kong thum hi, keima nuntakna leh nangma nasem hih mihing sawmngate’ nuntakna pammaih sa-in hong hehpih in. En in, vantung panin meikuang hong paisuk a, mihing sawmnga a uk a masa nihte a mi sawmngate uh tawh kangtum hi; ahih hangin tu-in ka nuntakna pammaih sa-in hong hehpih in,” a ci hi. Tua ciangin Topa ’ vantungmi in Elijah kiangah, “Amah tawh paisuk in; amah kihta kei in,” a ci hi. Tua ahih ciangin amah ding-in kumpipa kiangah amah tawh paisuk a, tua ciangin ama kiangah, “ Topa in hih bangin ci hi, “Bang hang hiam cih leh nangmah in Ekron pasian, Baalzebub kiangah thu dong dingin kamtaite na sawl khin hi, thu dot ding Israel sungah Pasian om nawn lo ahi hiam?Tua ahih ciangin tu-a na lupna panin nang na thokik nawn kei ding hi; nang na si taktak ding hi,’ ci hi,” a ci hi. Tua ahih ciangin Elijah’ gensa Topa ’ kammal tawh kizui-in amah si hi. Ahaziah in tapa nei lo ahih manin Judah kumpipa, Jehoshafat’ tapa Jehoram’ kum nihna kumin, a sanggampa Jehoram in ama tangin kumpi suak hi. Tu-in Ahaziah’ gamtatna a sepsa a om laite, Israel Kumpite’ Khang Tangthu laibu sungah kigelh hilo ahi hiam? Tu-in Topa in pingpei-in vantungah Elijah a lak ding lai-in Elijah leh Elishate Gilgal panin inn zuanin lamkal-a om ahi uh hi. Tua ciangin Elijah in Elisha kiangah, “Hih lai-ah khawl in, kong thuum hi; bang hang hiam cih leh Topa in Beth-el ciang dong kei hong sawl hi,” a ci hi. Ahih hangin Elisha in, “ Topa a nuntak bang, leh nang mahmah na nuntak mah bangin, nang kong nusia kei ding hi,” a ci hi. Tua ahih ciangin amaute Beth-el-ah paisuk uh hi. Tua ciangin Beth-el ah a om kamsang honkhat Elisha kiangah hong paikhia uh a, ama kiangah, “ Topa in tu ni-in nangma kiang panin na topa a lakkhiat ding na thei hiam?” a ci uh hi. Tua ciangin amah in, “Hi hi, ka thei hi; bangmah gen nawn kei un,” a ci hi. Elijah in ama kiangah, “Elisha aw, hih lai-ah khawl in, kong thum hi; bang hang hiam cih leh Topa in Jerikho-ah kei hong sawl hi,” a ci hi. Ahih hangin amah in, “ Topa a nuntak bang, leh nang mahmah na nuntak mah bangin, nang kong nusia kei ding hi,” a ci hi. Tua ahih ciangin Jerikho ah amaute tung uh hi. Jerikho ah a om kamsang honkhat in Elisha kiangah hong naih uh a, ama kiangah, “ Topa in tu ni-in nangma kiang panin na topa a lakkhiat ding na thei hiam?” a ci uh hi. Tua ciangin amah in dawngin, “Hi hi, ka thei hi; bangmah gen nawn kei un,” a ci hi. Tua ciangin Elijah in ama kiangah, “Hih lai-ah khawl in, kong thum hi; bang hang hiam cih leh Topa in Jordan ah kei hong sawl hi,” a ci hi. Ahih hangin amah in, “ Topa a nuntak bang, leh nang mahmah na nuntak mah bangin, nang kong nusia kei ding hi,” a ci hi. Tua ahih ciangin amaute a nih-un pai lai uh hi. Kamsang mihing sawmnga zong pai a, amaute gel Jordan gei-ah a din’ lai tak, a kiang panun a gamla simah amaute ding uh hi. Tua ciangin Elijah in a puantualpi suahin zial a, tua tawh a tui sat hi; lei keu tungah amaute gel a pai theih matengin a pang khat leh a pang lang khatah a tui kikhen hi. Amaute a galkah khit uh ciangin Elijah in Elisha kiangah, “Nang kiang panin kei hong kilak khiat ma-in nang adingin kong hihsak ding hong gen in,” a ci hi. Tua ciangin Elisha in, “Kong thuum hi, na kha’ tanh nih hong luahsak in,” a ci hi. Tua ciangin amah in, “A haksa na khat nong ngen hi; ahi zongin, nangma kiang panin kei hong kilak lai takin kei nong muh leh nang adingin tua hong piang ding hi; ahih hangin kei nong muh kei leh tua bangin hong piang lo ding hi,” a ci hi. Tua ciangin amaute a pai kawmkawm a kiho lai takun, en in, mei leeng khat leh mei sakolte in amaute nih khen hi. Tua ciangin vantungah Elijah pingpei-in paito hi. Tua ciangin Elisha in tua mu-in amah kiko a, “Ka pa, ka pa! Israel mite’ leengte leh sakol galkapte!” a ci hi. Tua ciangin amah in Elijah mu nawn lo hi. Tua ciangin amah in ama puan lenin phel nih-in balkek hi. Tua ciangin amah in ama tung panin a kiakhia Elijah’ puan tawm a, kilehin Jordan gunpang ah ding hi. Tua ciangin amah in ama tung panin a kiakhia Elijah’ puan la-in tui sat a, “Elijah’ Pasian, Topa koi-ah om na hi hiam?” a ci hi. Amah in tui a sat khit ciangin a pang khat leh a pang lang khatah a tui kikhen hi; tua ciangin Elisha pai-in galkah hi. Tu-in Jerikho ah a om kamsangte in amah a muh uh ciangin amaute in, “Elijah’ kha Elisha tungah om hi,” a ci uh hi. Tua ciangin amah dawn dingin amaute hong pai uh a, ama mai lei lakah amaute kun uh hi. Tua ciangin amaute in ama kiangah, “Tu-in en in, na nasemte tawh a thahat mihing sawmnga om hi; kong thum uh hi, amaute paisak in la na topa zong in; Topa ’ Kha in amah manin mual tung ahih kei leh guam sungah amah khia hi kha ding hi,” a ci uh hi. Tua ciangin amah in, “Na sawl kei ding uh hi,” a ci hi. Ahih hangin amaute in amah a maizum dongin a cih teitei uh ciangin, amah in, “Sawl un,” a ci hi. Tua ahih ciangin amaute in mihing sawmnga sawl uh hi; amaute in ni thum sung amah zong uh a, ahih hangin amah mu lo uh hi. Tua ciangin amah Jerikho ah a khawl sungin ama kiangah amaute hong paikik uh a, amah in amaute kiangah, “Note kiangah, Pai kei un, hong ci hilo ka hi hiam?” a ci hi. Tu-in khuapi mite in Elisha kiangah, “En in, ka topa in a muh bangin, hih khuapi omzia nuam hi; ahih hangin a tui sia a, hih gamah kipung thei lo hi,” a ci uh hi. Amah in, “Hai thak khat hong paipih un la, a sungah ci koih un,” a ci hi. Tua ahih ciangin amaute in ama kiangah paipih uh hi. Tua ciangin tuinak ah amah pai-in a sungah ci lawnin, “ Topa in hih bangin ci hi, hih tui a hoihin ka bawl khin hi; tu-a kipanin sihna ahi a, tatolhna ahi zongin piangsak nawn lo ding hi,” a ci hi. Tua ahih ciangin Elisha’ kampauna tawh kizui-in tu ni dongin a tui hoih hi. Amah tua lai panin Beth-el-ah paito hi; lampi ah amah a paitoh lai takin khuapi panin naupang neu pawl khat hong paikhia-in amah zahko uh a, “Paito in, nang lukolhpa! Paito in, nang lukolhpa!” a ci uh hi. Tua ciangin amah a kiimah kihei a, amah in amaute a muh ciangin Topa ’ min tawh amah in amaute samsia hi. Tua ciangin gamlak panin vom a pi nih hong pai-in naupang sawmli-le-nih balgawp hi. Tua lai panin amah Karmel Mual ah paisuak a, tua ciangin Samaria ah ciahkik hi. Judah kumpipa Jehoshafat’ kum sawm-le-giatna kumin Samaria sung Israelte tungah Ahab’ tapa Jehoram kumpi suak a, amah in kum sawm-le-nih sung uk hi. Ama nu leh ama pa zahin a siat loh hangin amah in Topa muhna ah a sia gamta hi. Amah in a pa’ bawlsa Baal khuampi koihkhia tei a, ahi zongin amah in Israelte a khialsak Nebat’ tapa Jeroboam’ khialhna mah pom hi; tua panin amah kihemkhia lo hi. Tu-in Moab kumpi Mesha in tuu khawipa ahi hi; amah in Israel kumpipa tungah kum simin tuuno tul zakhat, leh tuutal tul zakhat’ mul a piak ding ahi hi. Ahih hangin Ahab a sih ciangin Moab kumpipa in Israel kumpipa lehdo hi. Tua ahih ciangin tua lai takin Samaria panin Kumpi Jehoram kuan khia-in Israel mi khempeuh khawm hi. Tua ciangin amah pai-in Judah kumpi Jehoshafat kiangah thu puak a, “Moab kumpipa in kei hong lehdo hi; Moab gam a sim dingin kei tawh nong kuan ding hiam?” a ci hi. Tua ciangin amah in, “Kong kuan ding hi; keimah akipanin ka mite leh ka sakolte in nangma’ aa ka hi uh hi,” a ci hi. Tua ciangin amah in, “Koi lam tawnin kuan ding i hi hiam?” a ci hi. Jehoram in dawngin, “Edom gamlak lam tawnin,” a ci hi. Tua ahih ciangin Judah kumpipa leh Edom kumpipa tawh Israel kumpipa pai hi. Amaute ni sagih sung a kual paikhit uh ciangin galkapte hita leh amaute a zui ganhingte’ ading hita leh tui om lo hi. Tua ciangin Israel kumpipa in, “Ala! Moab kumpipa khut sungah a piak dingin Topa in hih kumpi thumte sam hi,” a ci hi. Tua ciangin Jehoshafat in, “Ama tung tawnin Topa tungah thu i dot theih nadingin hih lai-ah Topa ’ kamsang om lo ahi hiam?” a ci hi. Tua ciangin Israel kumpipa’ nasemte khat in dawngin, “Elijah’ khut, tui a buak zel, Shafat’ tapa Elisha om hi,” a ci hi. Tua ciangin Jehoshafat in, “ Topa ’ thu in amah tawh om hi,” a ci hi. Tua ahih ciangin Israel kumpipa leh Jehoshafat leh Edom kumpipa ama kiangah paisuk uh hi. Tua ciangin Elisha in Israel kumpipa kiangah, “Nang tawh bang kisai ka hi hiam?” Na nu’ kamsangte leh na pa’ kamsangte kiangah pai in,” a ci hi. Ahih hangin Israel kumpipa in ama kiangah, “Hilo hi; Moab khut sungah a piak dingin hih kumpi thumte a sampa in Topa ahi hi,” a ci hi. Tua ciangin Elisha in, “Ama na ka sep Vanglianpen Topa in a nungta ahih mah bangin, Judah kumpipa Jehoshafat thupi ngaihsutna nei lo hi leng, nang hong en loin, zong kong mu kei ding hi. Ahih hangin tu-in lasakna a tum siam khat hong paipih in,” a ci hi. Lasakna a tum siampa in a tum ciangin Topa ’ kha ama tungah hong tung hi. Tua ciangin amah in, “ Topa in hih bangin ci hi, ‘Hih a keu luitaw, tuilite tawh a dimin ka bawl ding hi,’ ci hi. Bang hang hiam cih leh Topa in hih bangin ci hi, ‘Huih ahi a, guah ahi zongin na mu kei ding a, ahih hangin nangmah in na dawn ding, nang, na ganhon, leh na ganpite in a dawn dingin luitaw in tui tawh kidim ding hi,’ ci hi. Hih in Topa muhna ah a thuneu khat ahi hi; amah in Moab mite zong nangma khut sungah hong pia ding a, nangmah in kulhpi a nei khuapi khempeuh, leh khuapi deihhuai khempeuh zo-in, singkung hoih khempeuh phukin, tuinak khempeuh na khakcip ding a, leitang hoih khempeuh suangtum tawh na kidimsak ding hi,” a ci hi. A zingsang ciang, biakna piak hunin, en in, gam sung tui tawh a kidim matengin Edom panin tui hong luang hi. Amaute a sim dingin kumpite a kuan tohna thu Moab mite khempeuh in a zak uh ciangin, a moipen panin a hampen dongin galhiam a tawi thei khempeuh kisamkhia uh a, gamgi ah kikhawm uh hi. A zingciang zingsang tungin amaute tho-in, tui tungah ni a taan’ ciangin, Moab mite in amau’ gal khatah a om tuite pen sisan bangin a sanin mu uh hi. Tua ciangin amaute in, “Hih in sisan ahi hi; kumpite khat leh khat kidoin, khat leh khat kithat hi taktak ding hi. Tua ahih ciangin tu-in, Moabte aw, vankinusiate va la ni!” a ci uh hi. Ahih hangin Israelte’ giahphual ah amaute a tun’ uh ciangin, amaute’ mai-ah a taikhiat matengin Israel mite hong kipanin Moab mite do uh hi; tua ciangin amaute mai nawtin pai-in a pai kawmun Moab mite that uh hi. Tua ciangin amaute in khuapite lawnthal uh a, suang in a khuhcip dongin leitang tung khempeuhah mi khempeuh in suang lawn uh hi; amaute in tuinak khempeuh khakcip uh a, singkung hoih khempeuh phuk uh hi; Kirhareseth ah a suangtumte bek a om dongin suanglotna tawite in umcihin vatgawp uh hi. Moab kumpipa in galsimna pen amah a kihihna ahih lam a theih ciangin, Edom kumpipa’ santak a phukhia dingin namsau tawi mihing zasagih la hi; ahih hangin amaute in phukhia zo lo uh hi. Tua ciangin amah in ama tangin a uk ding a tapa upa pen la-in kulh tungah meihal biakna-in pia hi. Israel mite in tua bang gamtatna a muh uh ciangin a lungsim uh sukha mahmah a, amau’ kiang panin nungkikin a gamah ciahkik uh hi. Tu-in kamsang honte sung pan khat’ zi Elisha tungah kiko-in “Na nasem ka pasal si hi; na nasempa in Topa a zahtakna na thei hi, ahih hangin ka tate nih sila dingin a la dingin a leibatna-pa hong pai hi,” a ci hi. Tua ciangin Elisha in tua numei kiangah, “Nang adingin bang hong hihsak ding ka hi hiam? Hong gen in; inn sungah bang nei na hi hiam?” a ci hi. Tua ciangin amah in, “Na nasemnu in sathau bing khat cih sim loh inn sungah bangmah nei lo hi,” a ci hi. Tua ciangin amah in, “A pua-ah paikhia in, beel hawm a tawm lua lo, na veengte khempeuh’ beel va kawm in. Tua ciangin sung tumin, nang leh na tapate kong kikhaknelh un la, hih beelte khempeuh sungah sung in; beel khat a dim ciangin tuam koih in,” a ci hi. Tua ahih ciangin ama kiang panin tua numei paikhia-in amah leh a tapate kong kikhaknelh hi; amah in a sun’ lai takin amaute in ama kiangah a beelte paipih uh hi. Beelte a dim ciangin amah in a tapa kiangah, “Beel dang khat hong paipih in,” a ci hi. Tua ciangin amah in ama kiangah, “Beel adang om nawn lo hi,” a ci hi. Tua ciangin sathau a luan’ khawl hi. Tua nu hong pai-in Pasian’ mipa kiangah gen a, tua ciangin amah in, “Pai in, a sathau zuakin na leibate loh in, nang leh na tapate in a om laite tawh na nungta ding uh hi,” a ci hi. Ni khat Elisha Shunem ah paisuak a, tua lai-ah a hau numei khat tengin tua nu in anne dingin amah sam hi. Tua ahih ciangin amah in tua lam a nawk peuhpeuh ciangin anne dingin tua lai-ah baang hi. Tua ciangin tua numei in a pasal kiangah, “Tu-in en in, hih i lampi hong nawk tawntungpa in Pasian’ misiangtho hi, ci-in ka thei hi. Eite kiangah amah hong pai peuhpeuh ciangin a tun’ theih nadingin innkhum zangah kawm a nei inndei neu khat bawlin tua sungah ama adingin lupna khat, sabuai khat, tutphah khat, leh meivak khat koihsak ni,” a ci hi. Ni khat amah tua lai-ah hong pai-in inndei sungah lut a, tua lai-ah tawlnga hi. Tua ciangin amah in a nasempa Gehazi kiangah, “Hih Shunem mi sam in,” a ci hi. Amah in tua numei a sap ciangin ama mai-ah tua nu hong ding hi. Tua ciangin amah in ama kiangah, “Tu-in tua nu kiangah hih bangin gen in, Thei in, kote’ adingin hih haksatna khempeuh na thuak hi; nang adingin bang kihih ding ahi hiam? Kumpipa kiang ahih kei leh galkap a ukpa kiangah nang tangin thu khat hong kigensak ding na ut hiam?” a ci hi. Amah in dawngin, “Keimah in ka mipihte lakah teng ka hih manin bangmah ka kisam kei hi,” a ci hi. Tua ciangin amah in, “Tua bang ahih leh tua nu adingin bang kihihsak ding ahi hiam?” a ci hi. Gehazi in dawngin, “Thu khat bek om hi, tua nu in tapa nei lo a, a pasal teek hi,” a ci hi. Amah in, “Tua nu sam in,” a ci hi. Amah in tua nu a sap ciangin kongka lai-ah amah ding hi. Tua ciangin amah in, “A hun hong tun’ ciangin tapa khat na tawi ding hi,” a ci hi. Tua ciangin tua nu in, “Hilo hi, ka topa, Pasian’ mipa aw, na nasemnu tungah zuau kei in,” a ci hi. Ahih hangin tua nu in naupaai a, Elisha in ama tungah a gensa bangin a hun a tun’ kik ciangin amah in tapa khat nei hi. Naupang a gol ciangin ni khat a pa kiang anlate lakah pai hi. Tua ciangin amah in a pa kiangah, “Aw, ka lutang, ka lutang!” a ci hi. A pa in a nasempa kiangah, “A nu kiangah, va pua in,” a ci hi. Amah in domin a nu kiangah a paipih ciangin a ang sungah sun dong naupang tu a, tua ciangin si hi. Tua ciangin tua nu paito-in Pasian’ mipa’ lupna tungah amah koih a, amah kong khaknelhin paikhia hi. Tua ciangin amah in a pasal samin, “Manlang takin Pasian’ mipa kiangah pai-in kong ciahkik theih nadingin nasemte khat leh late khat hong puak in,” a ci hi. Tua ciangin amah in, “Bang hangin tu ni-in ama kiangah pai ding na hi hiam? Kha det ni ahi a, sabbath ni ahi zongin hilo hi,” a ci hi. Amah in, “Hong hoih na ding hi,” a ci hi. Tua ciangin amah in la van vawhin a nasempa kiangah, “Gan nawh in; kong gen kei nak leh kei adingin a pai khiamsak kei in,” a ci hi. Tua ahih ciangin amah dingkhia a, Karmel Mual-a Pasian’ mipa kiangah pai hi. Pasian’ mipa in amah hong pai a muh ciangin a nasempa Gehazi kiangah, “En in, gal-ah Shunem nu hong pai hi; amah dawn dingin thakhatin va tai in la, ama kiangah, “Na dam hiam? na pasal a dam hiam? Naupang a dam hiam?” va ci in, a ci hi. Tua ciangin tua nu in, “Hoih hi,” a ci hi. Tua ciangin Pasian’ mipa kiang mual tungah tua nu a tun’ ciangin tua nu in ama khe len hi. Tua ciangin amah a sawnkhia dingin Gehazi hong pai hi. Ahih hangin Pasian’ mipa in, “Amah tuaci omsak in, bang hang hiam cih leh amah nakpi takin lungkham hi; Topa in kei tungah a thu iim a, kei kiangah hong gen lo hi,” a ci hi. Tua ciangin tua nu in, “Ka topa’ tung pan tapa hong ngen ka hi hiam? Kei hong khem kei in, hong ci hilo ka hi hiam?” a ci hi. Amah in Gehazi kiangah, “Na kawnggak gak in la, na khutah ka ciangkhut tawi-in pai in. Mi khatpeuh tawh na kituah leh amah hopih kei in; mi khatpeuh in nang hong hopih leh dawng kei in; tua ciangin naupang’ mai tungah ka ciangkhut va nga in,” a ci hi. Tua ciangin naupang’ nu in, “ Topa a nuntak bang, leh nang mahmah na nuntak mah bangin, nang kong nusia kei ding hi,” a ci hi. Tua ahih ciangin amah ding-in tua nu zui hi. Gehazi na ma paisuakin naupang’ mai tungah a ciangkhut nga a, ahih hangin awging ahi a, nuntakna lim ahi zongin om lo hi. Tua ahih ciangin amah a dawn dingin hong kileh kik a, ama kiangah, “Naupang khanglo nai lo hi,” a ci hi. Inn sungah Elisha hong tun’ ciangin amah in a lupna tungah a si-in a lum naupang mu hi. Tua ahih ciangin amah lutin amaute nih kong kikhaknelhin, tua ciangin Topa tungah thungen hi. Tua ciangin amah paito-in naupang’ tungah bok a, ama kam tungah ama kam koihin, ama mitte tungah ama mitte omsak a, ama khutte tungah ama khutte omsak hi; tua ciangin ama tungah amah kikhuang a, naupang a ci hong lum hi. Tua ciangin amah dingto kikin inn sungah khatvei vak kawikawi a, tua ciangin paito-in ama tungah kikhuang hi; naupang sagih vei hetchiai-in a mit hak hi. Tua ciangin amah in Gehazi samin, “Hih Shunem numei sam in,” a ci hi. Tua ahih ciangin amah in tua nu sam hi. Tua nu ama kiangah hong pai ciangin amah in, “Na tapa la in,” a ci hi. Tua nu hong pai-in ama khe-ah pukin lei lakah kun hi; tua ciangin a tapa la-in paikhia hi. Tua ciangin tua gam sungah kialpi a tun’ lai takin Gilgal ah Elisha hong paikik hi. Kamsangte ama mai-ah a tut lai takin amah in a nasemte kiangah, “Beel lianpi suang in la, kamsangte’ ading meh huan in,” a ci hi. Amaute khat meh zong dingin gamlakah pai a, vatak-um gui khat mu-in tua tung panin a ang dimin umgah lo a, tuate bang hiam cih thei lopi-in hong pai-in meh beel sungah at nen hi. Tua ciangin amaute in mite’ nek dingin hong thukkhia uh hi. Ahih hangin amaute in meh a nek lai takun, amaute kiko-in, “Pasian’ mipa aw, an sungah gu om!” a ci uh hi. Amaute in ne thei lo uh hi. Amah in, “Tua ahih leh a an tawm hong la un,” a ci hi. Tua ciangin amah in beel sungah tua an lawn a, “Amaute in a nek theih nadingin mite’ adingin thukkhia un,” a ci hi. Tua ciangin bangmah ci nawn lo hi. Mi khat Baalshalishah panin hong pai-in Pasian’ mipa kiangah anpal anlum, mangbuhham lum sawmnih, leh anvui athak a van sungah hong pua hi. Tua ciangin Elisha in, “Amaute in a nek thei nadingun kamsangte tungah pia in,” a ci hi. Ahih hangin a nasempa in, “Mihing zakhatte’ mai-ah keimah in hih bangci lui theih ding ka hi hiam?” a ci hi. Tua ahih ciangin amah in, “Amaute in a nek theih nadingun mite tungah tuate pia in, bang hang hiam cih leh Topa in, ‘Amaute in ne-in khamval ding uh hi,’ ci hi,” a ci kik hi. Tua ahih ciangin amah in amaute mai-ah tua an lui hi. Tua ciangin amaute in ne uh a, Topa ’ kamgen bangin pawlkhat val lai hi. Siria kumpipa’ galkap a uk Na-aman in a topa tawh milian khat hi-in maipha lianpi a ngah mi ahi hi; bang hang hiam cih leh Topa in ama hangin Siria mite gualzawhna pia hi. Amah in a thahat a vanglian khat hi a, ahih hangin amah in a phak ahi hi. Tu-in Siria mite in a galsimna khat uhah Israel panin numeino khat ciahpih uh a, tua nu in Na-aman’ zi na sem hi. Amah in a tonu kiangah, “Samaria ah a om kamsangpa tawh ka topa a omkhawm hi leh! Amah in a phakna damsak ding hi,” a ci hi. Tua ahih ciangin Na-aman sungtumin a topa kiangah, “Tua bang tua bangin Israel gam numeino in thu gen hi,” ci-in gen hi. Tua ciangin Siria kumpipa in, “Tu-in pai in, Israel kumpipa kiangah lai khat ka khak ding hi,” a ci hi. Tua ahih ciangin amah pai-in ngun talen sawm, kham shekel tulguk, leh pawi puan sawm keng hi. Amah in Israel kumpipa tungah laikhak keng a, tua sungah, “Hih laikhak na ngah ciangin, ama phakna na damsak theih nadingin ka nasempa Na-aman nang kiangah kong sawlna thu thei in,” a ci hi. Israel kumpipa in a laikhak a sim ciangin amah in a puante balkekin, “Mi khat a phakna damsak dingin hih mipa in kei tungah hih thu hong puak nadingin a that ding leh a nungtasak dingin keimah in Pasian ka hi hiam? Ngaihsun dih un la, kei tawh kitot nading a zon’na thei un,” a ci hi. Ahih hangin Israel kumpipa in a puante a balkekna thu Pasian’ mipa Elisha in a zak ciangin, amah in kumpipa kiangah mi sawlin, “Bang hangin na puante balkek na hi hiam? Israel sungah kamsang khat a omna thu amah in a theih nadingin tu-in kei kiangah amah hong paisak in,” ci sak hi. Tua ahih ciangin sakolte leh a leengte tawh Na-aman hong pai-in Elisha’ kongah khawl hi. Tua ciangin Elisha in ama kiangah kamtai khat sawlin, “Pai in la, Jordan sungah sagih vei kisil in, tua ciangin nangma ci-le-sa a ngei hong bang kikin nang na siang ding hi,” ci sak hi. Ahih hangin Na-aman heh a, paikhia-in, “En in, amah kei kiangah hong paikhia-in, hong ding-in, a Pasian a Topa ’ min loin, a natna mun tungah a khut vanin, mi phakpa damsak taktak ding hi, ci-in ka ngaihsun hi. Israel tui khempeuhte sangin Damakas gunte ahi Abana leh Farpar hoihzaw hilo ahi hiam? Tuate sungah kisilin siang thei lo ding ka hi hiam?” a ci hi. Tua ahih ciangin amah kihei-in a hehsa-in paikhia hi. Ahih hangin a nasemte a nai-ah hong pai-in ama kiangah, “Ka pa aw, kamsangpa in na lian khat hih dingin hong sawl leh hih ding hilo na hi hiam? Tua ahih ciangin amah in nang kiangah, ‘Kisil in la, siang in,’ hong cih ciangin na hih zawk ding bangzah ta-in kilawm hilo ahi hiam?” a ci uh hi. Tua ahih ciangin Pasian’ mipa kamgen bangin amah paisukin Jordan sungah sagih vei kidiah hi; tua ciangin a ci-le-sa naupangno’ ci-le-sa bangin a ngei bang kikin amah siang hi. Tua ciangin Pasian’ mipa kiangah amah leh a pawlte khempeuh kileh kikin amah hong pai-in ama mai-ah ding hi; tua ciangin amah in, “En in, leitung khempeuhah Pasian om loin, Israel sungah om hi, ci-in ka thei hi; tua ahih ciangin tu-in na nasempa tung panin letsong khat hong sang in,” a ci hi. Ahih hangin amah in, “A na ka sep Topa in a nungta ahih mah bangin, bangmah kong sang kei ding hi,” a ci hi. Tua ciangin amah in a lak nading kunh teitei a, ahih hangin amah in nial hi. Tua ciangin Na-aman in, “Tua ahih kei leh, kong thuum hi, na nasempa’ tungah la-sakol nih puak khop leitang hong pia in; bang hang hiam cih leh tu-a kipanin na nasempa in meihal biakna ahi a, biak piakna ahi zongin pasian khat peuhpeuh tungah pia loin Topa tungah ka pia ding hi. Ahi zongin hih thu-ah Topa in na nasempa a mawhna hong maisak hen: ka topa Rimmon inn sungah a bia dingin pai-in ka ban tungah kingam a, Rimmon inn sungah kei ka kun ciangin, hih thu-ah Topa in na nasempa hong maisak hen,” a ci hi. Amah in ama kiangah, “Nuam takin pai in,” a ci hi. Ahih hangin ama kiang panin Na-aman tom khat a paikhit ciangin, Pasian’ mipa Elisha’ nasem Gehazi in, “En un, ama tung panin ama hong puak san’ lohna tawh ka topa in Siria mi hih Na-aman khah hi. Topa in a nungta ahih mah bangin, ama nungah kei tai-in ama tung panin na khat peuhpeuh ka ngah ding hi,” a ci hi. Tua ahih ciangin Gehazi in Na-aman nung delh hi. Tua ciangin ama nungah mi khat hong taina Na-aman in a muh ciangin amah dawn dingin a leeng panin kum a, “Thu a hoih kim hiam?” a ci hi. Tua ciangin amah in, “A vekpi-in hoih hi. Ka topa in, ‘Kamsangte nih Efraim mualtung gam panin kei kiangah tu mahmahin hong tung hi; kong thum hi, amaute tungah ngun talen khat leh pawi puan nih pia in,’ a ci dingin hong sawl hi,” a ci hi. Tua ciangin Na-aman in, “Talen nih hong sang nuam hoh in,” a ci hi. Tua ciangin amah in a san’ ding kunh a, ngun talen nih ip nihin henin pawi puan nih tawh, a nasem nihte tungah guan hi; tua ciangin amaute in Gehazi’ mai-ah tuate pua uh hi. Tua ciangin mual tungah amah a tun’ ciangin amah in amaute’ tung panin tuate la-in inn sungah koih hi; tua ciangin mite sawl khia a, amaute kihem uh hi. Amah sungtumin a topa mai-ah ding a, tua ciangin Elisha in ama kiangah, “Gehazi aw, koi-ah pai na hi hiam?” a ci hi. Tua ciangin amah in, “Na nasempa koimah pai lo hi,” a ci hi. Ahih hangin amah in ama kiangah, “Nangmah dawn dingin a leeng tung panin mipa a kihei lai takin nang tawh ka kha omkhawm hilo ahi hiam? Sum leh puante, oliv huante leh leenggui lote, tuute leh bawngtalte, nasem numeite leh nasem pasalte san’ ding hun ahi hiam? Tua ahih ciangin nangma tung leh na suan-le-khakte tungah Na-aman’ phakna hong belh tawntung ta hen,” a ci hi. Tua ahih ciangin Gehazi ama omna panin vuk bangin kaangin a phakin paikhia hi. Tu-in kamsangte khat in Elisha kiangah, “Thei in, nangma ukna nuai-a ka ten’na mun uh kote’ adingin neu lua hi. Kote Jordan ah hong paisakin kote in singluang khat ciat la-in ka ten’ nading uh mun khat ko hong bawlsak in,” a ci uh hi. Tua ciangin amah in dawngin, “Pai un,” a ci hi. Tua ciangin amaute khat in, “Na nasemte tawh kuan khawm ding hong ut in,” a ci hi. Amah in dawngin, “Kong kuan ding hi,” a ci hi. Tua ahih ciangin amaute tawh amah kuan hi. Amaute Jordan a tun’ uh ciangin amaute in sing phuk uh hi. Ahih hangin khat in singluang a tan lai takin a heitang tui sungah kia hi; tua ciangin amah kiko-in, “Ala, ka topa! A kikawm hi ve’n,” a ci hi. Tua ciangin Pasian’ mipa in, “Koi lai-ah kia ahi hiam?” a ci hi. Amah in a mun ama kiangah a lah ciangin amah in ciangkang khat khiakin tua munah lawn a, a sik laamsak hi. Tua ciangin amah in, “Lato in,” a ci hi. Tua ahih ciangin amah in a khut zanin la hi. Khat vei Siria kumpipa in Israel do a, amah in a nasemte tawh thu kikumin, “Tua mun tua mun in i pan’mun hi ding hi,” a ci hi. Ahih hangin Pasian’ mipa in Israel kumpipa tungah thu puak a, “Siriate in hong buksim uh ahih manin hih mun na nawk khak loh nadingin kingaihsun in,” a ci hi. Tua ciangin Israel kumpipa in Pasian’ mipa in a genna munah sawl hi. Tua bangin amah in amah hilhkhol zel a, tua ahih manin amahmah khatvei ahih kei leh nihvei sangin a tam veizaw kihonkhia hi. Tua ciangin hih thu hangin Siria kumpipa nakpi takin patau hi; amah in a nasemte samin amaute kiangah, “Eite sung panin Israel kumpipa lamah a pangsim mipa hong gen lo ding na hi uh hiam?” a ci hi. Tua ciangin a nasemte khat in, “Kuamah om lo hi, ka topa, kumpipa aw; ahih hangin Israel sungah kamsang ahi Elisha in na lupna inndei sunga na thugente Israel kumpipa tungah gen hi,” a ci hi. Tua ciangin amah in, “Keimah in sawlin amah ka mat theih nadingin pai in la, amah a omna mun va thei in,” a ci hi. Ama kiangah, “En in, amah Dothan ah om hi,” ci-in kigen hi. Tua ahih ciangin amah in sakolte leh leengte leh galkap hon lianpi khat tua lai-ah sawl hi; amaute zanin hong pai-in khuapi umcih uh hi. Pasian’ mipa’ nasempa zingsangin tho baihin a paikhiat ciangin en in, khuapi kimkotah sakolte leh leengte tawh galkap na om hi. Tua ciangin nasempa in, “Ala, ka topa! Bang cih ding ihi hiam?” a ci hi. Amah in, “Kihta kei in; bang hang hiam cih leh amaute tawh a omte sangin eite tawh a omte tamzaw hi,” a ci hi. Tua ciangin Elisha in thungenin, “ Topa aw, kong thum hi, amah in a muh theih nadingin a mitte hon’sak in,” a ci hi. Tua ahih ciangin Topa in tangvalpa’ mitte hon’sak a, tua ciangin amah in mu hi; en in, Elisha’ kimkot mual tung in sakolte leh mei leengte tawh kidim hi. Amah do dingin Siriate hong paisuk ciangin Elisha in Topa kiangah thungenin, “Hih mite mittawtna tawh vatgawp in, kong thum hi,” a ci hi. Tua ahih ciangin Elisha’ thungetna bangin amah in mittawtna tawh amaute vatgawp hi. Tua ciangin Elisha in amaute kiangah, “Hih in a lampi hi lo a, hih in a khuapi hi lo hi; kei hong zui un, na zon’ uh mipa kiangah note kong paipih ding hi,” a ci hi. Tua ciangin amah in Samaria ah amaute paipih hi. Amaute Samaria ah a lut phetin Elisha in, “ Topa aw, amaute in a muh theih nadingun hih mite’ mitte hon’sak in,” a ci hi. Tua ahih ciangin Topa in amau’ mitte hon’sak a, tua ciangin amaute in mu uh hi; en in, Samaria laizangah amaute om uh hi. Israel kumpipa in amaute a muh ciangin amah in Elisha kiangah, “Ka pa aw, amaute ka that ding hiam? Amaute ka that ding hiam?” a ci hi. Amah in dawngin, “Amaute na that kei ding hi. Na namsau leh na thal tawh loin galmatin na laksate that ding na hi hiam? Amaute in ne-in dawnin a topa uh kiangah a ciah theih nadingun amaute mai-ah an leh tui lui in,” a ci hi. Tua ahih ciangin amah in amaute adingin pawi lianpi khat bawl hi; amaute in ne-in a dawn khit uh ciangin amah in amaute sawlkhia a, tua ciangin a topa uh kiangah amaute ciah uh hi. Tua ciangin Israel gam a sim dingin Siriate hong pai nawn lo hi. Tua khit ciangin Siria kumpipa Benhadad in a galkap buppi khawmin paito a, Samaria umcih hi. Amaute in a um cih lai takin, la lutang khat ngun shekel sawmgiat, leh gam lo-uih bul hai khat ngun shekel nga-in a kizuak dongin Samaria ah kialpi lianpi tung hi. Tu-in Israel kumpipa kulh zangah a pai lai takin numei khat ama tungah kiko-in, “Hong huh in, ka topa, Aw kumpipa!” a ci hi. Tua ciangin amah in, “ Topa in nang hong huh kei leh koi lai pan nang hong huh ding ka hi hiam? Ancilna phual pan ahih kei leh leenggah sukna pan hi ding ahi hiam?” a ci hi. Tua ciangin kumpipa in tua nu dongin, “Na lungkhamna bang ahi hiam?” a ci hi. Amah in dawngin, “Hih numei in kei kiangah, ‘Tu ni-in amah i nek theih nadingin na tapa hong pia in, zing ciangin keima tapa i ne ding hi,’ hong ci hi. Tua ahih ciangin kote in ka tapa huanin amah ka ne uh hi. A zing ciangin keimah in ama kiangah, ‘Amah i nek theih nadingin na tapa hong pia in,’ ka ci hi; ahih hangin tua nu in a tapa na seel hi,” a ci hi. Kumpipa in numeinu’ thugente a zak ciangin ama puante balkek hi—tu-in amah kulh zangah pai hi—mite khuadak uh a, en in, amah in puanhampi a sung lamah silh hi— tua ciangin amah in, “Tu ni-in Shafat’ tapa Elisha’ lutang a liangko tungah a om lai taak leh Pasian in kei hong dawm kei ta hen,” a ci hi. Elisha a inn sungah tu a, upate amah tawh tukhawm uh hi. Tu-in kumpipa in ama omna panin mi khat sawlkhia hi; ahih hangin kamtaipa a tun’ ma-in Elisha in upate kiangah, “Hih mi thatpa in ka lutang a tankhia dingin hong sawlna na mu uh hiam? En un, kamtaipa hong tun’ ciangin kong khak un la, ama lang khatah khauh takin kongkhak lencip un. Ama nungah a topa’ kheging hong kiza hilo ahi hiam?” a ci hi. Amaute tawh amah a kiho lai takin ama kiangah kumpipa hong paisukin, “Hih lungkhamna Topa ’ kiang pan ahi hi! Bang hangin Topa ngak lai ding ka hi hiam?” a ci hi. Ahih hangin Elisha in, “ Topa ’ thu za in: Topa in hih bangin ci hi. Zing ciang tu bang hunin Samaria kulh kongpi ah annel lawh khat shekel khatin kizuak ding a, mangbuhham lawh nih ciangin shekel khatin kizuak ding hi,” a ci hi. Tua ciangin a ban tungah kumpipa a kingapna galkap ukpa in Pasian’ mipa kiangah, “ Topa mahmah in vantungah kongvangneute hong bawl leh zong, hih bang thu hi thei ding ahi hiam?” a ci hi. Ahih hangin amah in, “Nangma mit mahmah tawh hih thu na mu ding a, ahih hangin nang in na ne kha kei ding hi,” a ci hi. Tu-in kulh kongpi lutna ah a phak mi li om hi; amaute khat leh khat in, “I sih dongin bang hangin hih lai-ah tu ding i hi hiam? Eite in, ‘Khuapi sungah lut ni,’ ci lehang, khuapi sungah kialpi om a, tua lai-ah eite i si ding hi; hih lai-ah tu lehang eite i si veve ding hi. Tua ahih ciangin tu-in hong pai-un, Siriate’ phualah va pai ni; amaute in eite hong khawi leh eite i nungta ding a, ahih hangin amaute in eite hong thah leh zong a si veve ding mah i hi lel hi,” kici uh hi. Tua ahih ciangin amaute Siriate phual ah a pai dingin phalvak tungin tho uh hi; ahih hangin amaute Siriate’ phual a nawl a tun’ uh ciangin en in, tua lai-ah kuamah na om lo hi. Bang hang hiam cih leh Topa in leengte, leh sakolte, galkap hon lianpi khatte’ ging Siria galkapte zasak a, tua ahih ciangin amaute khat leh khat in, “En un, Israel kumpipa in eite hong hih dingin Hit kumpite leh Izipt kumpite cial hi,” kici uh hi. Tua ahih ciangin amaute phalvak tungin tai-in a puanbukte, a sakolte, leh a late uh nusia uh a, a phual uh a tuaci bang mahin nusia-in a suahtak nadingun tai uh hi. Giahphual nawlah hih a phakte hong tun’ uh ciangin puanbuk khat sungah amaute lutin ne-in dawn uh a, amaute in ngun leh kham leh puan puakhia-in pai-in tuate seel uh hi; tua ciangin amaute hong paikikin puanbuk dang khatah lut uh a, tua panin vante puakhia-in pai-in tuate seel leuleu uh hi. Tua ciangin amaute khat leh khat in, “A manin i gamta kei hi. Tu ni-in thuthak a hoih i theih ni ahi hi; eite pau loin zingsang khuavak dong ngak lehang daantahna i thuak ding hi; tua ahih ciangin tu-in hong pai un, eite pai-in kumpipa’ innkuante kiangah gen ni,” ki-ci uh hi. Tua ahih ciangin amaute hong pai-in kulh kongpi cingte samin amaute kiangah, “Kote in Siriate’ phualah ka va tung uh a, en in, tua lai-ah kuamah kimu lo, bangmah kiza lo, bangmah om lo, ahih hangin sakolte kikhihin, late kikhihin, puanbukte a om bang bangin om hi,” ci-in gen uh hi. Tua ciangin kulh kongpi cingte in thu zasak uh a, kumpipa’ innkuante sungah hih thu kigen hi. Tua ciangin kumpipa zanin tho-in a nasemte kiangah, “Siriate in eite’ lang khatah a vaihawmna kong gen ding hi. Eite i kialna amaute in thei uh hi; tua ahih ciangin amaute gamlakah a bu dingin a phual panun paikhia uh a, ‘Khuapi sung panin amaute a paikhiat uh ciangin amaute a hingin manin khuapi sungah i lut ding hi,’ ci-in ngaihsun uh hi,” a ci hi. Tua ciangin a nasemte khat in, “Mi pawl khat sakol a om laite sung panin nga paipih sak ni, hih lai-ah a om laite pen a sisa Israel mi honpi bup tawh a kibang lel ihihna i thei hi; amaute sawlin en dih ni,” a ci hi. Tua ahih ciangin amaute in sakol tung tuang mi nih la a, kumpipa in Siria galkapte nungah amaute sawl a, “Pai-in va thei un,” a ci hi. Tua ahih ciangin amaute Jordan ciang dong va pai uh hi; en in, lampi khempeuh Siriate in nawhsa-in a paihkhiat uh puante leh nate tawh paak zeizai hi. Tua ciangin kamtaite hong kikin kumpipa kiangah gen uh hi. Tua ciangin mite paikhia uh a, Siriate’ phual luh uh hi. Tua ahih ciangin Topa ’ gensa bangin annel lawh khat shekel khatin kizuakin, mangbuhham lawh nih ciangin shekel khatin kizuak hi. Tu-in kumpipa in a khut tungah a kingapnapa ahi a ukpa pen kulh kongpi ukin seh hi; tua ciangin mite in kulh kongpi ah ama tung sikin pai uh a, ama kiangah kumpipa a paisuk lai takin Pasian’ mipa’ gensa bangin amah si hi. Bang hang hiam cih leh Pasian’ mipa in kumpipa kiangah, “Zing ciang tu bang hunin Samaria kulh kongpi ah mangbuhham lawh nih ciangin shekel khatin kizuak ding a, annel lawh khat ciangin shekel khatin kizuak ding hi,” a cih ciangin, galkap ukpa in Pasian’ mipa dawngin, “ Topa mahmah in vantungah kongvangneute hong bawl leh zong, hih bang thu hi thei ding ahi hiam?” a ci hi. Tua ciangin amah in, “Nangma mit mahmah tawh hih thu na mu ding a, ahih hangin nang in na ne kei ding hi,” a ci hi. Mite in kulh kongpi ah ama tung sikin pai-in amah si ahih manin ama tungah tua bangin piang hi. Tu-in Elisha in a tapa a nuntakna a hin’ kiksak numei kiangah, “Ding in, na innkuan tawh kihemkhia in la, na hih theihna peuhpeuh ah peem in; bang hang hiam cih leh Topa in kialpi khat tungsak a, gam sungah tua kialpi kum sagih sung hong tung ding hi,” ci khin zo hi. Tua ahih ciangin numei ding-in Pasian’ mipa’ thugen bangin gamta hi; tua nu a innkuan tawh pai-in Filistiate gamah kum sagih sung peem hi. Kum sagih a cin’ khit, Filistiate gam panin numei hong ciahkik ciangin, kumpipa kiangah a inn leh a leitang a ngen dingin paikhia hi. Tu-in Pasian’ mipa’ nasem Gehazi tawh kumpipa kiho-in, “Elisha’ sepna na lian khempeuh hong gen in,” a ci hi. Tu-in amah in Elisha in a sisa a hin’sakna thu kumpipa kiangah a gen lai takin, en in, a tapa a hin’ kiksak numei in kumpipa kiangah a inn leh a leitang hong ngen hi. Tua ciangin Gehazi in, “Ka topa, Kumpipa aw, hih lai-ah a numei om a, Elisha in a nuntakna a hin’ kiksak a tapa hih lai-ah om hi,” a ci hi. Kumpipa in numei kiangah a dot ciangin tua nu in ama kiangah gen hi. Tua ahih ciangin kumpipa in a uliante khat sawlin, “Leitang a nusiat ni-a kipan tu hun dong lo pana a piang khempeuh tawh ama’ aa ahi khempeuh piakik in,” a ci hi. Tu-in Damaskas ah Elisha hong pai hi. Siria kumpipa Benhadad a ci na hi; ama kiangah, “Hih lai-ah Pasian’ mipa hong pai hi,” ci-in a kigen ciangin, kumpipa in ama nuai-a ulian Hazael kiangah, “Letsong khat kengin Pasian’ mipa dawn dingin pai in la, ama tung tawnin Topa thu va dong in la, ‘Hih natna panin ka damkik zo ding hiam?’ ci in,” a ci hi. Tua ahih ciangin amah dawn dingin Hazael pai a, Damaskas a, na hoih namkim kalaoh puak sawmli letsong a keng hi. Amah hong tungin ama mai-ah a din’ ciangin amah in, “Siria kumpipa na tapa Benhadad in nang kiangah kei hong sawlin, ‘Hih natna panin ka damkik zo ding hiam?’ ci hi,” a ci hi. Tua ciangin Elisha in ama kiangah, “Pai in, ama kiangah gen in, ‘Na damkik taktak ding hi,’ ci in; ahih hangin Topa in amah a sih taktak ding kei kiangah hong lakkhin hi,” a ci hi. Tua ciangin amah a maizum dongin a etna mun mah en denin Hazael sal gega hi. Tua ciangin Pasian’ mipa kap hi. Tua ciangin Hazael in, “Bang hangin ka topa kap na hi hiam?” a ci hi. Amah in dawngin, “Bang hang hiam cih leh Israel mite tungah nangmah in na bawl ding siatna ka thei hi; nangmah in amau’ mun muanhuainate mei tawh na hal ding a, namsau tawh amau’ tangvalte thatin, amau’ naupang neute lei na den’ khap nading a, naupaai amau’ numeite na phelkham ding hi,” a ci hi. Tua ciangin Hazael in, “Ui a hi lel na nasempa in hih na lian a hih nadingin bang ahi hiam?” a ci hi. Elisha in dawngin, “Nangmah in Siria tungah kumpi na hih ding thu Topa in kei tungah hong lakkhin zo hi,” a ci hi. Tua ciangin Elisha kiang panin amah kihem khia a, ama kiangah, “Elisha in nang kiangah bang hong ci ahi hiam?” a na ci a topa kiangah va tung hi. Tua ciangin amah in dawngin, “Amah in kei kiangah nang na damkik taktak nading thu hong gen hi,” a ci hi. Ahih hangin amah in a zing ciangin delhphahpuan khat la-in tui sungah tua puan diah a, tua puan kawt tawh kumpipa’ maitang tuamcipin si sak hi. Tua ciangin ama tangin Hazael kumpi suak hi. Israel kumpi, Ahab’ tapa Joram’ kum ngana kumin, Judah kumpi, Jehoshafat’ tapa Jehoram in uk ding kipan hi. Amah kumpi a suah hunin a kum sawmthum-le-nih pha a, Jerusalem ah kum giat sung uk hi. Ahab’ tanu in ama zi ahih manin Ahab’ innkuante’ gamtatnasa, Israel kumpite’ lampi mah amah in tawn hi. Amah in Topa muhna ah a sia gamta hi. Ahi zongin amah in ama tung leh a suante tungah ukna a piak suak ding thuciam khin ahih manin a nasempa David hangin Topa in Judah susia lo hi. Ama hun sungin Judah ukna panin Edom mite lengkhia-in amau’ ading kumpi khat koih uh hi. Tua ciangin Jehoram in a leengte khempeuh tawh Zair-ah kuan hi. Tua lai-ah Edom mite in amaute umcih uh a, zanin kipanin amah leh a leeng ukte in amau a umcih Edom mite vatgawp-in innah tai uh hi. Tua ahih ciangin tu ni dongin Judah ukna panin Edom mite lengkhia hi. Tua ciangin tua hun mahin Libnah lengkhia hi. Tu-in Jehoram’ gamtatna a om laite leh ama sep khempeuh, Judah Kumpite’ Khang Tangthu Laibu sungah kigelh hilo ahi hiam? Tua ahih ciangin Jehoram a pate tawh ihmu a, David khuapi sungah a pate tawh kivui hi; tua ciangin ama tangin a tapa Ahaziah in uk hi. Israel kumpi, Ahab’ tapa Joram’ kum sawm-le-nihna kumin, Judah kumpi, Jehoram’ tapa Ahaziah in uk ding kipan hi. Ahaziah in uk ding a kipatin kum sawmnih-le-nih pha a, amah in Jerusalem ah kum khat sung uk hi. Ama nu’ min in Athaliah ahi hi; amah in Israel kumpi Omri’ tunu ahi hi. Amah in zong Ahab’ innkuante’ makpa ahih manin Ahab’ innkuante’ gamtatnasa bangin Topa ’ muhna ah a sia gamta a, Ahab’ innkuante’ lampi mah tawn hi. Siria mite in Joram a na liamsakna mun Ramoth-gilead ah Siria kumpipa Hazael tawh galkido dingin Ahab’ tapa Joram tawh kipawlin amah kuan hi. Tua ciangin Siria kumpipa Hazael a sim lai takin Siria mite in Ramah ah amah a liamsakna mate Jezre-el ah a kidamsak dingin Kumpi Joram ciahkik hi. Amah a cina ahih manin, Jezre-el ah Ahab tapa Joram a veh dingin Judah kumpi Jehoram’ tapa Ahaziah va paisuk hi. Tua ciangin kamsang Elisha in kamsangte’ sung pan khat samin ama kiangah, “Kithawi in la, hih sathau um tawi-in Ramoth-gilead ah va pai in. Na tun’ ciangin, Nimshi’ tapa Jehoshafat, a tapa Jehu tua lai-ah va zong in; tua ciangin pai-in a lawmte lak panin a paikhiat ding sawl in la, inndei sungnung khat sungah amah paipih in. Tua ciangin sathau um la-in ama lu tungah sung in la, ‘ Topa in hih bangin ci hi, ‘Israel tungah kumpi-in sathau kong nilh hi, ci hi,’ va ci in. Tua ciangin kongkhak hong in la, tai in; zekai kei in,” a ci hi. Tua ahih ciangin kamsang tangvalpa Ramoth-gilead ah pai hi. Amah a tun’ ciangin, en in, galkap a ukte in thu kikupna nei uh hi; tua ciangin amah in, “Ukpa aw, nang tungah thugen ding khat ka nei hi,” a ci hi. Tua ciangin Jehu in, “Kote lakah kua tungah nei na hi hiam?” a ci hi. Tua ciangin amah in, “Nangma tung hi, ukpa aw,” a ci hi. Tua ahih ciangin amah ding-in inn sungah pai hi; tua ciangin tangvalpa in ama lu tungah a sathau sungin, ama kiangah, “Israel Pasian, Topa in hih bangin ci hi, Israel mite’ tung, Topa ’ mite tungah kumpi-in nang sathau kong nilh hi. Kamsang ka nasemte a thahna leh Topa ’ nasemte khempeuh a thahna hangin Jezebel tungah phu ka lak theih nadingin na topa Ahab innkuan na satpuk ding hi. Bang hang hiam cih leh Ahab innkuan sia ding hi; Israel sungah keimah in Ahab’ innkuan panin sal hita leh a suakta hita leh pasal khempeuh ka beisak ding hi. Tua ciangin keimah in Nebat’ tapa Jeroboam’ innkuan leh Ahijah’ tapa Baasha’ innkuan bangin Ahab’ innkuan ka bawl ding hi. Tua ciangin uite in Jezre-el gam sungah Jezebel ne-in, kuamah in amah vui lo ding hi,” a ci hi. Tua ciangin amah in kongkhak hongin tai hi. A topa’ nasemte kiangah Jehu hong pusuah ciangin amaute in ama kiangah, “Thu khempeuh a hoih hiam? Bang hangin hih mi haipa nang kiangah hong pai ahi hiam?” a ci uh hi. Tua ciangin amah in amaute kiangah, “A mipa leh a thugen na thei uh hi,” a ci hi. Tua ciangin amaute in, “Tua thu ka thei kei uh hi; tu-in ko kiangah hong gen in,” a ci uh hi. Tua ciangin amah in, “Tua bang tua bangin amah in kei kiangah thu hong genin, ‘ Topa in hih bangin ci hi, Israel tungah kumpi-in nang sathau kong nilh hi,’ hong ci hi,” a ci hi. Tua ciangin nawhsa-in mi khempeuh in a puan uh la-in ama din’ nadingin kahlei tungah koih uh a, tua ciangin amaute in peengkul tumin, “Jehu in kumpi hi,” ci-in tangko uh hi. Tua ciangin Nimshi’ tapa Jehoshafat tapa Jehu in Joram sawmsim hi. (Tu-in Siria kumpi Hazael langpangin Ramoth-gilead ah Israel khempeuh tawh khuacingin Joram om hi; ahih hangin Siria kumpi Hazael tawh a kido lai-in Siriate in amah a liamsakna mate Jezre-el ah a kidamsak dingin kumpi Joram ciahkik khin hi.) Tua ahih ciangin Jehu in, “Hih in na ngaihsutna uh tawh a kituah leh Jezre-el ah pai-in thu a va ko dingin khuapi panin kuamah paikhia sak kei un,” a ci hi. Tua ciangin Jehu a leeng tungah kahin Jezre-el ah pai hi, bang hang hiam cih leh tua lai-ah Joram lum hi. Tua ciangin Judah kumpipa Ahaziah Joram kiangah a hawh dingin na tung khin hi. Tu-in Jezre-el tausang tungah galvilpa ding a, amah hong pai lai takin Jehu’ pawlte amah in mukhia a, “Mi honkhat ka mu hi,” a ci hi. Tua ciangin Joram in, “Sakol tung tuang mi khat la-in amaute dawn dingin sawl in la, ‘Thuhoih ahi hiam?’ ci sak in,” a ci hi. Tua ahih ciangin sakol tung tuangin amah dawn dingin mi khat pai a, “Kumpipa in hih bangin ci hi, ‘Thuhoih ahi hiam?’ ci hi,” a ci hi. Tua ciangin Jehu in, “Thuhoih tawh bang hih ding na hi hiam? Kihei in la, ka nungah hong tuang in,” a ci hi. Tua ciangin galvilpa in thu zasakin, “Kamtaipa in amaute kiang ban a, ahih hangin amah hong paikik lo hi,” a ci hi. Tua ciangin amah in sakol tung tuang a nihna sawlin amaute kiangah tuapa pai a, “Kumpipa in hih bangin hong ci khin hi, ‘Thuhoih ahi hiam?’ ci hi,” a ci hi. Tua ciangin Jehu in dawngin, “Thuhoih tawh bang hih ding na hi hiam? Kihei in la, ka nungah hong tuang in,” a ci hi. Galvilpa in thu zasak kikin, “Amah in amaute va ban a, ahih hangin amah hong paikik lo hi. A hawlzia in Nimshi’ tapa Jehu’ hawl tawh kibang hi; bang hang hiam cih leh amah in nakpi takin hawl hi,” a ci hi. Joram in, “Kithawi un,” a ci hi. Tua ciangin amaute in a leeng kithawisak uh hi. Tua ciangin Israel kumpipa Joram leh Judah kumpipa Ahaziah, a sakol leeng tuak uhah tuangin dingkhia-in, Jehu dawntuah dingin pai uh a, Jezre-el mi Naboth’ leitangah amah tawh kituak uh hi. Joram in Jehu a muh ciangin amah in, “Jehu aw, thuhoih ahi hiam?” a ci hi. Amah in dawngin, “Na nu Jezebel’ paktatnate leh aisannate tua zahin a tam lai teng bang thuhoih om thei ding ahi hiam?” a ci hi. Tua ciangin Joram in a sakol kamkaih leh hei-in tai a, Ahaziah kiangah, “Ahaziah aw, gal om!” a ci hi. Tua ciangin Jehu in a thaneih khempeuh tawh a thal keekin a liangko nih kikal sanah Joram kap a, a thaltang in a lungtang pailetin a leeng sungah amah puksuk hi. Jehu in amah a huhpa Bidkar kiangah, “Amah tawmto in la, Jezre-el mi Naboth’ neihsa leitang tungah amah paai in; bang hang hiam cih nang leh kei in a pa Ahab’ nungah mai kimin i tuan’ lai takin amah langpangin Topa in hih thu a genna phawk in: ‘Zan ni-in Naboth leh a tapate a kithahna ka muh taktak mah bangin— Topa in ci hi—leitang tung hih munah nang kong thuk ding hi,’ a ci hi. Tua ahih ciangin tu-in Topa ’ thugen bangin amah tawmin tua mun leitang tungah paai in,” a ci hi. Judah kumpipa Ahaziah in hih thu a muh ciangin Bethhaggan lamah tai hi. Tua ciangin Jehu in amah delhin, “Amah zong kap un,” a ci hi; tua ciangin amaute in Ibleam gei, Gur kahtohna san a leeng sungah amah kap uh hi. Ahi zongin amah Megiddo khuapi ciang dong tai zo lai a, tua khua panin amah si hi. A nasemte in leeng khat tawh Jerusalem ah pua uh a, David khuapi sungah a pate tawh ama hanah vui uh hi. Ahab’ tapa Joram’ kum sawm-le-khatna kumin Ahaziah in Judah tungah uk ding kipan hi. Jezre-el ah Jehu hong tun’ ciangin Jezebel in a thu za hi; amah in a mitte zutin a lutang zeem a, kongvangneu ah khuadak hi. Kulh kongpi-ah Jehu hong lut lai takin amah in, “Nang Zimri, a topa a thatpa aw, bang hih-a hong pai na hiam?” a ci hi. Tua ciangin kongvangneu lamah amah khuadak to-in, “Kei lamah kua om na hi uh hiam?” a ci hi. Inn sung maangte nih khawng thum khawng in amah hong en suk hi. Jehu in, “Amah hong lawnsuk un,” a ci hi. Tua ahih ciangin amaute in Jezebel lawnsuk uh hi; a sisan pawlkhat kulh tung leh sakolte tungah kitheh a, tua ciangin amaute in amah tuancil uh hi. Tua ciangin amah sungtumin ne-in dawn hi; tua ciangin amah in, “Tu-in a kisamsia hih numei mu un la, amah phum un; bangbang ahi zongin amah in kumpipa’ tanu hi buang hi,” a ci hi. Ahih hangin amah a phum dingin amaute a pai uh ciangin a luguh leh a khete leh a khut peekte sim loh amah mu nawn lo uh hi. Amaute hong paikikin ama kiangah a gen uh ciangin, amah in, “Hih in ama nasempa, Tishbe mi Elijah’ tung tawnin Topa ’ gensa ahi hi, ‘Jezre-el gam sungah uite in Jezebel’ sa ne ding uh hi; tua ciangin Jezebel’ luanghawm in Jezre-el gam sung gamlak maitang tungah eklei tawh kibang ding a, tua ahih manin kuamah in, ‘Hih in Jezebel ahi hi,’ cih thei lo ding hi,” a ci hi. Tu-in Ahab’ suan-le-khak mihing sawmsagih Samaria ah teeng hi. Tua ahih ciangin Jehu in laikhakte gelh a, khuapi a ukte, upate, leh Ahab’ suan-le-khak a kemte tung Samaria a, Jezreel uliante’ tungah tua laite khakin, “Tu-in hih lai na ngah phetun, na topa uh suante note tawh omin, leengte leh sakolte, kulh a nei khuapite zong, leh hiamte na neihna uh thei un. Na topa uh suante a hoihpen leh a kilawmpen teelin a pa’ kumpi tokhom tungah tusak un la, na topa uh innkuan’ adingin do un,” a ci hi. Ahih hangin amaute nakpi takin lau uh a, “En un, kumpi nihte in amah nang zo lo uh hi; tua ahih ciangin eite in bangci nan’ zawh ding ihi hiam?” a ci uh hi. Tua ahih ciangin kumpi inn a ukte leh khuapi a ukte in upate leh a kemte tawh kigawmin Jehu kiangah mi sawl uh a, “Kote in nangma nasemte ka hi uh a, nong sawl khempeuh ka hih ding uh hi. Khat zong kumpi-in ka bawl kei ding uh hi; hoih na sak bang bangin hong hih in,” a ci uh hi. Tua ciangin amah in amaute kiangah a laikhak nihna gelhin, “Note in keima lamah omin, keima thu mang dingin a kiging na hih uh leh, na topa uh Ahab’ suan-le-khakte lutangte hong la un la, zing ciang tu bang hunin kei kiang Jezre-el ah hong puak un,” a ci hi. Tu-in kumpipa’ suan-le-khak mihing sawmsagihte, amaute a khoi khuapi sung makaite tawh omkhawm uh hi. Amaute kiangah a laikhak a tun’ ciangin amaute in kumpipa’ suan-le-khakte la-in amau mihing sawmsagihte that uh a, tua ciangin a lutang uh seeng sungah guangin ama kiang Jezre-el ah puak uh hi. Kamtaipa hong pai-in ama kiangah, “Amaute in kumpipa’ suan-le-khakte’ lutangte hong paipih uh hi,” ci-in a gen ciangin amah in, “Zingsang mateng kulh kongpi lutna ah khawl nihin koih un,” a ci hi. Zingsangin amah a paikhiat ciangin amah ding a, mi khempeuh kiangah, “Note na paubang kei uh hi. Ka topa Joram sawmsimin amah a thatpa in keimah ka hi hi; ahih hangin kua in hihte khempeuh sattuk ahi hiam? Ahab’ innkuan tawh kizomin Topa in a gen thu, Topa ’ kammal khat zong lei-ah kia lo ding hi, ci-in thei un; bang hang hiam cih leh a nasempa Elijah’ kiangah a gensa thu Topa in sem khin zo hi,” a ci hi. Tua ahih ciangin Jehu in kuamah a siit nawn loh dongin Jezre-el sungah Ahab innkuan a om laite, a behte, leh a lawm mel theihte, leh a siampite khempeuh that hi. Tua ciangin amah dingkhia-in Samaria ah pai hi. Lam kal, Tuucingte’ buk a tun’ lai takin, Jehu in Judah kumpi Ahaziah’ behte tawh kituak a, amah in, “Kuate na hi uh hiam?” a ci hi. Tua ciangin amaute in dawngin, “Kote in Ahaziah’ behte ka hi uh a, kumpinu’ tapate leh kumpi ta dangte kiangah a hawh dingin hong paisuk ka hi uh hi,” a ci hi. Amah in, “Hing mat un,” a ci hi. Tua ciangin amaute in tuate hing mat uh hi; tua ciangin amaute thatin tua lai-a om dum-ah amaute mihing sawmli-le-nih a sisa-in lawnsuk uh a, amah in amaute khat zong hing khawi lo hi. Tua lai panin amah a kihepkhiat ciangin amah dawn dingin hong pai Rekhab’ tapa Jehonadab tawh kituak hi; tua ciangin amah in tuapa hopihin ama kiangah, “Keima lungsim nang tungah a thuman bangin na lungsim kei tungah a thuman hiam?” a ci hi. Tua ciangin Jehonadab in dawngin, “Man hi,” a ci hi. Jehu in, “A man leh na khut hong khak in,” a ci hi. Tua ahih ciangin amah in a khut khak hi. Tua ciangin Jehu in leeng sungah amah lato hi. Tua ciangin amah in, “Kei tawh hong pai in la, Topa ading ka deih luatna hong thei in,” a ci hi. Tua ahih ciangin amah in a leeng sungah amah tuang sak hi. Tua ciangin Samaria ah a tun’ ciangin Elijah tungah a gen Topa ’ kammal bangin Jehu in amaute a siakkhiat dongin Samaria sunga Ahab mi a om laite khempeuh amah in that hi. Tua ciangin Jehu in mi khempeuh khawmin amaute kiangah, “Ahab in Baal’na tawmkhat sem hi; ahih hangin Jehu in tampi sem ding hi. Tua ahih ciangin tu-in Baal kamsangte khempeuh, leh amah a biate khempeuh, leh a siampite khempeuh kei kiangah hong sam un; Baal tungah biakpiakna lianpi nei ding ka hih manin kuamah pelem sak kei un; a pelem peuhmah nungta lo ding hi,” a ci hi. Ahih hangin Baal a biate a suksiat theih nadingin Jehu in ngian tawh hih hi. Tua ciangin Jehu in thu pia-in, “Baal adingin a thupi kikhopna khat bawl un,” a ci hi. Tua ahih ciangin amaute in tua thu zasak uh hi. Tua ciangin Jehu in Israel sung khempeuhah thu zasak hi; Baal a bia khempeuh hong pai uh a, hong pai lo mi khat zong om lo hi. Tua ciangin Baal inn sungah amaute lut uh a, Baal inn mong khat pan mong khat dong dim uh hi. Amah in puankoihna a ukpa kiangah, “Baal a biate khempeuh adingin puante hong la in,” a ci hi. Tua ahih ciangin amah in amaute’ adingin puante hong paikhiatpih hi. Tua ciangin Rekhab’ tapa Jehonadab tawh Baal inn sungah Jehu tum hi; tua ciangin amah in Baal a biate kiangah, “Hih lai-ah Baal a biate bek omin, note lakah Topa ’ nasemte a om loh nading thei un la, zong un,” a ci hi. Tua ciangin biak piaknate leh meihal biaknate a pia dingin amah tum hi. Tu-in Jehu in a pua lamah mi sawmgiat koih a, “Na khut sung uhah kong piakte khat peuhpeuh a suaktasakpa in ama nuntakna tawh loh ding hi,” a ci hi. Tua ahih ciangin meihal biakna a bawl a man khit phetin Jehu in a cingte leh uliante kiangah, “Sung tum un la, amaute that un; mi khat zong suaktasak kei un,” a ci hi. Amaute in namsau tawh a thah khit uh ciangin a cingte leh uliante in amaute lawnkhia uh a, tua ciangin Baal inn a sungnung dei-ah tumin, Baal inn sunga a om khuampi paikhiatpihin hal uh hi. Tua ciangin amaute in Baal khuampi susia-in, Baal inn susia uh a, tu ni dongin ekbuk suaksak uh hi. Tua bangin Jehu in Israel sung panin Baal siakkhia hi. Ahih hangin Beth-el leh Dan ah a omkhawm bawngnote ahi, Israelte a khialhsakna, Nebat’ tapa Jeroboam’ khialhnate panin Jehu kiheikhia lo hi. Tua ciangin Topa in Jehu kiangah, “Nangmah in keima mitah a man thu lim takin na sepna hang, leh ka lungsimah a om bangin Ahab innkuan tungah na bawlna hangin, na suante khang lina dongin Israel kumpi tokhom tungah tu ding hi,” a ci hi. Ahih hangin Jehu in a lungsim khempeuh tawh Israel Pasian, Topa ’ thukham sungah lim takin gamtat ding ngaihsun lo hi; Israelte a khialhsakna ahi Jeroboam’ khialhnate panin amah kihei lo hi. Tua hun lai-in Topa in Israel gam pawlkhat khen khiat ding kipan hi. Hazael in Israel gamsung khempeuhah amaute zo hi: Jordan panin nisuahna lam, Gilead gam khempeuh, Gad mite, leh Reuben mite, leh Manasseh mite, Arnon kuam gei-a om Aroer panin Gilead leh Bashan gam khempeuh zo gawp hi. Tu-in Jehu’ gamtatna a om laite, leh a sep khempeuh, leh ama thahatnate khempeuh, Israel Kumpite’ Khang Tangthu Laibu sungah kigelh hilo ahi hiam? Tua ahih ciangin Jehu a pate tawh ihmu a, amaute in Samaria ah amah vui uh hi. Tua ciangin ama tapa Jehoahaz in ama tangin uk hi. Jehu in Samaria panin Israel tungah a uk hun in kum sawmnih-le-giat sung ahi hi. Tu-in Ahaziah’ nu Athaliah in a tapa a sihna a theih ciangin amah kipanin kumpi innkuan khempeuh susia hi. Ahih hangin Ahaziah’ sanggamnu, Kumpi Joram’ tanu Jehosheba in Ahaziah’ tapa Joash la-in, thah dingin a kikoih kumpipa’ tapate lak panin amah gu khia a, lupna sen’na inndei sungah amah leh a cingnu koih hi. Tua bangin tua nu in Athaliah kiang panin amah seel a, tua ahih manin amah kithat lo hi; Athaliah in Israel gam sungah a uk sung teng tua nu tawh amah kum guk sung omin Topa ’ inn sungah bu hi. Ahih hangin a kum sagihna kumin siampi Jehoiada in mi sawlin Kar mite leh kumpi inncing a ukte sam sak a, Topa ’ inn sung ama kiangah samsak hi; tua ciangin amah in amaute tawh thuciamna khat bawlin Topa ’ inn sungah kiciamna nuai-ah amaute koih a, amah in amaute kiangah kumpipa’ tapa lak hi. Tua ciangin amah in amaute thupia a, “Note’ sep ding in hih ahi hi: sabbath ni-in nasep pengin kumpipa’ inn a cing no seh-thum suah-seh-khatte in (adang seh-thum suah-seh-khatte Sur kulh kongpi ah omin adang seh-thum suah-seh-khatte a cingte’ nung kulh kongpi ah om hi), kumpi inn na cing ding uh hi; tua ciangin Sabbath ni-in na semin Topa ’ inn a cing no a khen nihte in, na khut sung uhah na hiam ciat uh tawh kumpipa na umcih ding uh hi; tua ciangin no a gual a, pangte hong neh peuhpeuh kithat ding hi. A paikhiat ciang leh a sungtum ciangin kumpipa tawh om un,” a ci hi. A ukte in siampi Jehoiada’ thupiak khempeuh bangin hih uh a, Sabbath ni-in nasep a sem dingte tawh Sabbath ni-in ama mi nasep a peng dingte hong paipih ciat uh a, siampi Jehoiada’ kiangah hong tung uh hi. Tua ciangin siampipa in a ukte’ tungah Topa ’ inn sungah a om David’ aa ahi teipite leh lumte pia hi; tua ciangin inn leitaw lam pang panin inn leilu lam pang, biakna tau leh inn kimkotah mi khempeuh a khut uhah a hiam ciat uh tawh a cingte ding uh hi. Tua ciangin amah in kumpipa’ tapa paikhiatpihin, ama tungah kumpi lukhu koih a, tecipan’na amah pia hi; tua ciangin amaute in amah kumpi hi, ci-in tangko-in amah sathau nilh uh hi; tua ciangin amaute in a khut uh bengin, “Kumpipa khan’ sau hen!” a ci uh hi. Athaliah in a cingte leh mite’ gamlumna a zak ciangin mite kiang Topa ’ inn sungah amah pai hi; amah a khuadak ciangin a ngeina ding bangin khuampi gei-ah kumpi thakpa ding-in kumpipa gei-ah a ukte leh peengkul tumte om a, tua gammi khempeuh in lungdamin peengkul na tum uh hi. Tua ciangin Athaliah in a puante balkekin kiko a, “Sawmsimna! sawmsimna!” a ci hi. Tua ciangin siampi Jehoiada in galkap a ukte thu pia-in, “A pua-ah tua nu paikhiatpih un; amah a pan’pih peuhmah namsau tawh that un,” a ci hi. Bang hang hiam cih leh siampipa in, “ Topa ’ inn sungah amah that kei un,” a ci hi. Tua ahih ciangin amaute in tua nu man uh a, kumpipa’ inn lutna Sakol Kongpi a tun’ ciangin tua lai-ah amah kithat hi. Tua ciangin Jehoiada in amaute Topa ’ mi ahih nading uh Topa leh kumpipa leh mite kikalah thuciamna khat bawl hi; kumpipa leh mite kikalah zong bawl hi. Tua ciangin tua gammi khempeuh Baal innah pai uh a, phel keek uh hi; a biakna taute leh a milimte amaute in sukham uh a, amaute in biakna taute mai-ah Baal siampi Mattan that uh hi. Tua ciangin siampipa in Topa ’ innah galvilte koih hi. Tua ciangin amah in a ukte, Kar mite, a cingte, leh tua gammi khempeuh kaikhawm hi; tua ciangin amaute in Topa ’ inn panin kumpipa paipih suk uh a, a cingte’ lampi tawnin kumpipa’ innah pai uh hi. Tua ciangin amah in kumpite’ kumpi tokhom tungah a tutna hong la hi. Tua ahih ciangin tua gam mi khempeuh lungdam uh hi; kumpipa’ innah namsau tawh Athaliah a kithah khit ciangin khuapi sung gamdai hi. Joash in uk ding a kipat ciangin ama khan’ kum sagih pha pan hi. Jehu’ kum sagihna kumin Joash in uk ding kipan a, amah in Jerusalem ah kum sawmli sung uk hi. Ama nu’ min in Zibiah hi a, Be-ersheba khuami ahi hi. Siampi Jehoiada in amah thuhilh ahih manin Joash in ama hun sung tawntung Topa ’ mitah a man gamta hi. Ahi zongin mual tunga biaknate kila khia lo hi; mite in tuate tungah biakna pia-in paknamtui hal lai uh hi. Joash in siampite kiangah, “Pasian’ inn sungah a kipaipih a siangtho nate’ man sum khempeuh, a milipin piak dingin a kiseh sum, leh amau’ ut thu tawh Pasian’ innah a kipaipih sumte, amau’ nasepna mite ciat panin siampite in kaikhawm un; tua ciangin biakinn puahphat nading a, kisapna a kimuhna khempeuh puahsak un,” a ci hi. Ahih hangin kumpi Joash’ uk kum sawmnih-le-thumna kum dongin siampite in inn puah nai lo uh hi. Tua ahih ciangin Kumpi Joash in siampi Jehoiada leh siampi dangte samin amaute kiangah, “Bang hangin inn puah lo na hi uh hiam? Tua ahih ciangin tu-in na nasepna uh mite kiang panin na sum lakte uh kem nawn kei un la, a sumte inn puah nadingin hong ap un,” a ci hi. Tua ahih ciangin mite’ tung pan sum kaihkhop tavuan la nawn loin, inn puah ding zong tavuan a lak nawn loh ding uh siampite thukim uh hi. Tua ciangin siampi Jehoiada in singkuang, khat la-in a siin vutvang a, Topa ’ inn sung tum ciangin taklam pang khuampi gei-ah koih hi; tua ciangin sangkil a cing siampite in Topa ’ inn sungah a kipaipih sum khempeuh tua sungah koih uh hi. Singkuang sungah sum tam om hi ci-in a theih peuhpeuh uh ciangin kumpipa’ lai-atpa leh siampi lianpa hong paito-in Topa ’ inn sungah a om sumte amaute in simin ip tawh tun uh hi. Tua ciangin amaute in Topa ’ inn a en nasemte’ khut sungah a teh khiat uh sumte pia uh hi; tua ciangin amaute in Topa ’ inn a sem khutsiamte leh innlamte tung, leh lei-le-suang inn lam siamte leh suangsekte tung, Topa ’ inn puah nadingin sing lei nading leh suang tawh nading, leh inn puahna khat peuhpeuh a, zat dingin piakhia uh hi. Ahih hangin Topa ’ inn adingin ngun kuangte, meitehte, haite, peengkulte, ahih kei leh kham ahi a, ngun khat peuhpeuh ahi zongin, Topa ’ innah a kipaipih sumte panin kibawl lo hi, bang hang hiam cih leh Topa ’ inn a puah nasemte tungah tua sum kipia hi. Amaute in thuman takin na sem uh ahih manin nasemte tungah piak dingin a khut sung uhah sum a apnate uh tung panin amaute in sum ciamtehna lai ngen lo uh hi. Mawhna hanga piak sum leh khialhna hanga piak sumte Topa ’ inn sungah kipaipih lo hi; tuate in siampite’ aa ahi hi. Tua hun lai takin Siria kumpipa Hazael paito-in Gath simin la hi. Ahih hangin Hazael in Jerusalem do-in a paito dingin a mai a ngat ciangin, Judah kumpi Joash in Judah kumpite ahi ama hun ma-a sem Jehoshafat leh Jehoram leh Ahaziahte’ apsa thuciam piakna letsongte khempeuh, leh ama thuciam piakna letsongte, leh Topa ’ inn leh kumpipa’ sumkoihnate ah a om kham khempeuh la-in Siria kumpipa Hazael kiangah puak hi. Tua ciangin Jerusalem panin Hazael paikhia hi. Tu-in Joash’ gamtatna a om laite, leh ahih khempeuh, Judah Kumpite’ Khang Tangthu Laibu sungah kigelh hilo ahi hiam? Ama nasemte kipanin sawmsimna khat vaihawm uh a, Silla paisukna lampi Millo inn sungah Joash that uh hi. Amah a sat pukte in ama nasemte’ Shimeath’ tapa Jozakar leh Shomer’ tapa Jehozabad ahi hi; tua hi a, amah si hi. Tua ciangin amaute in David khuapi sungah ama pate tawh amah vui uh a, ama tangin a tapa Amaziah in uk hi. Judah kumpi, Ahaziah’ tapa Joash’ kum sawmnih-le-thumna kumin, Jehu’ tapa Jehoahaz in Samaria panin Israel uk ding kipan a, amah in kum sawm-le-sagih sung uk hi. Amah in Topa ’ muhna ah a sia gamta a, Israelte a khialhsakna, Nabat’ tapa Jeroboam’ khialhnate zui hi; tuate panin amah kihem khia lo hi. Tua ciangin Israelte tungah Topa heh a, amah in Siria kumpipa Hazael khut sung leh Hazael’ tapa Benhadad khut sungah amaute pia tawntung hi. Tua ciangin Jehoahaz in Topa tungah thum a, Topa in a thu ngai hi; bang hang hiam cih leh Israel a kinen’niamna, Siria kumpipa in amaute a nen’niamna mu hi. (Tua ahih ciangin Topa in Israel tungah honpa khat pia a, tua ahih manin Siriate khut sung panin amaute suakta uh hi. tua ciangin a ni danga bangin Israelte a inn uhah teeng uh hi. Ahi zongin Israel a khialhsakna, Jeroboam’ innkuante’ khialhnate panin amaute kihem khia lo uh a, amaute in tuate zui uh hi; Ahserah milim zong Samaria mah-ah om lai hi.) Bang hang hiam cih leh Jehoahaz’ adingin galkap sakol tung tuang sawmnga leh leeng sawm leh khe galkap tulsawm bang bek om lai hi; bang hang hiam cih leh Siria kumpipa in amaute susia-in ancilna a, leivui bangin amaute bawl hi. Tu-in Jehoahaz’ gamtatna a om laite leh ama hih khempeuh, leh ama vangliatna, Israel Kumpite’ Khang Tangthu Laibu sungah kigelh hilo ahi hiam? Tua ahih ciangin Jehoahaz a pate tawh ihmu a, amaute in Samaria ah amah vui uh hi; tua ciangin ama tangin a tapa Jehoash in uk hi. Judah kumpipa Joash’ kum sawmthum-le-sagihna kumin Jehoahaz’ tapa Jehoash in Samaria panin Israel tungah uk ding kipan a, amah in kum sawm-le-guk sung uk hi. Amah in zong Topa ’ muhna ah a sia gamta hi; Israelte a khialhsakna, Nebat’ tapa Jeroboam’ khialhnate, khempeuh panin amah kihem khia lo a, tua mah bangin amah gamta hi. Tu-in Jehoash’ gamtatna a om laite, leh ama hih khempeuh, leh Judah kumpipa Amaziah a dona a thahatnate, Israel Kumpite’ Khang Tangthu Laibu sungah kigelh hilo ahi hiam? Tua ahih ciangin a pate tawh Jehoash ihmu a, tua ciangin ama kumpi tokhom tungah Jeroboam a nihnapa a tu hi; tua ciangin Israel kumpite tawh Samaria ah Jehoash kivui hi. Tu-in amah a sih nading natna tawh Elisha a nat ciangin, Israel kumpipa Jehoash ama kiangah paisuk a, ama mai-ah kapin, “Ka pa, ka pa! Israel mite’ leengte leh sakol galkapte!” ci-in kiko hi. Tua ciangin Elisha in ama kiangah, “Thal khat leh thaltangte hong la in,” a ci hi; tua ahih ciangin amah in thal khat leh thaltangte la hi. Tua ciangin amah in Israel kumpipa kiangah, “Thal keek in,” a ci hi. Tua ciangin amah in keek hi. Tua ciangin Elisha in kumpipa khutte’ tungah ama khutte nga hi. Tua ciangin amah in, “Nisuahna lam kongvangneu hong in,” a ci hi; tua ciangin amah in hong hi. Tua ciangin Elisha in, “Lawn in,” a ci hi; tua ciangin amah in lawn hi. Tua ciangin amah in, “ Topa ’ gualzawhna thaltang, Siria tungah gualzawhna thaltang! Bang hang hiam cih leh amaute na beisak dongin Afek-ah Siriate na do ding hi,” a ci hi. Tua ciangin amah in, “Thaltangte la in,” a ci hi; tua ciangin amah in la hi. Tua ciangin amah in Israel kumpipa kiangah, “Tuate tawh leilak sat in,” a ci hi; tua ciangin amah in thum vei satin khawl hi. Tua ciangin Pasian’ mipa ama tungah hehin, “Nga vei ahi a, guk vei ahi zongin sat ding kilawm hi; tua hi leh na beisak dongin Siria na satpuk ding hi; ahih hangin tu-in Siria thum vei bek na satpuk ding hi,” a ci hi. Tua ahih ciangin Elisha si a, amaute in amah vui uh hi. Tu-in Moab mihonte in sikhiau sungin tua gam sim zel uh hi. Tua ciangin amaute in mi khat a vui lai takun, en in, a sim dingin a hong pai mihon khat mu uh a, amau zong a misi uh Elisha’ han sungah lawn uh hi; a misi in Elisha’ guhte a sukkhak phetin hingkik a, tua ciangin ama khe-in ding hi. Tu-in Siria kumpipa Hazael in Jehoahaz’ hun sung khempeuh Israel nengniam hi. Ahih hangin Topa in amaute hehpihin amaute khasiat a, Abraham, Isaak, leh Jakob tawh a thuciamna hangin amaute lamah amah kihei a, amaute susia lo hi; tu dongin zong ama mite mangngilh lo hi. Siria kumpipa Hazael a sih ciangin ama tangin a tapa Benhadad kumpi suak hi. Tua ciangin a pa Hehoahaz’ tung panin gal sungah Hazael in a laksak khuapite, Hazael’ tapa Benhadad tung panin Jehoahaz’ tapa Jehoash in la kik hi. Jehoash in amah thum vei zoin Israel khuapite ngah kik hi. Israel kumpi, Jehoahaz’ tapa Jehoash’ kum nihna kumin, Judah kumpi, Joash’ tapa Amaziah in uk ding kipan hi. Amah in uk ding a kipatin kum sawmnih-le-nga pha a, Jerusalem ah amah in kum sawmnih-le-kua sung uk hi. Ama nu’ min in Jehoaddin hi a, Jerusalem khuami ahi hi. Amah in Topa ’ mit-ah a man gamta a, ahi zongin a pu David bang zo lo hi; a pa Joash’ hihsa na khempeuh hih hi. Mual tunga biaknate koih khia lo hi; mite in tuate tungah biakna pia-in paknamtui hal lai uh hi. Kumpi aana kip takin ama khut sungah a om phetin ama pa ahi kumpipa a that a nasemte amah in that hi. Ahih hangin Topa in a thupiakna, Moses thukham laibu sungah, “Tate’ hangin pate kithat lo ding a, pate’ hangin tate zong kithat lo ding hi; ahih hangin mi khempeuh amau khialhna hangin si ding hi,” ci-in a kigelh bangin amah in mi thatte’ tate that lo hi. Amah in Edom mite tulsawm Ci Kuam ah thatin Sela khua do-in la a, tu ni dongin a min ahi Jokthe-el a phuak hi. Tua ciangin Amaziah in Israel kumpi, Jehu tapa Jehoahaz’ a tapa Jehoash kiangah kamtaite sawlin, “Hong pai in’ khat leh khat mai kituahin kisi ni,” a ci hi. Tua ciangin Israel kumpi Jehoash in Judah kumpi Amaziah kiangah thu puak a, “Lebanon a, om thangling khat in Lebanon a, om taamtaak khat kiangah sawlin, ‘Ka tapa’ zi dingin na tanu hong pia in,’ ci hi; tua ciangin Lebanon gamsa khat in hong nawkin thangling tuancil hi. Nangmah in Edom na vat khin a, na lungsim in nang hong liansak hi. Na minthan’na tawh lungkim in la, innah om in; bang hangin nang tukin, Judah tawh nang na tuk nadingin buaina piangsak ding na hi hiam?” a ci hi. Ahih hangin Amaziah in a thu ngai lo hi. Tua ahih ciangin Israel kumpipa Jehoash paito a, Judahte’ gam Bethshemesh ah amah leh Judah kumpipa Amaziah khat leh khat kimaituahin gal kido uh hi. Tua ciangin Israel in Judah zo a, mi khempeuh a inn uhah tai uh hi. Tua ciangin Israel kumpipa Jehoash in Bethshemesh ah Ahaziah’ tapa Joash, a tapa Amaziah ahi Judah kumpipa man hi. Tua ciangin Jerusalem ah amah hong pai a, Efraim Kongpi panin Kiu Kongpi dong Jerusalem kulhpi tong zali sung susia hi. Tua ciangin amah in kham leh ngun khempeuh, leh Topa ’ inn sung leh kumpipa’ inn vankoihna sungah a om um-le-beel khempeuh la-in, mite zong man a, tua ciangin Samaria ah ciahkik hi. Tu-in Jehoash in ahih a gamtatna a om laite, leh a vangliatna, leh Judah kumpipa Amaziah tawh a kidona, Israel Kumpite’ Khang Tangthu Laibu sungah kigelh hilo ahi hiam? Tua ciangin Jehoash a pate tawh ihmu a, Israel kumpite tawh Samaria ah kivui hi; tua ciangin ama tangin a tapa Jeroboam a nihnapa in uk hi. Israel kumpipa, Jehoahaz’ tapa Jehoash a sih khit ciangin Judah kumpipa, Joash’ tapa Amaziah kum sawm-le-nga sung nungta lai hi. Tu-in Amaziah’ nasepna a om laite, Judah Kumpite’ Khang Tangthu Laibu sungah kigelh hilo ahi hiam? Tua ciangin amaute in Jerusalem ah amah sawmsim uh a, amah zong Lakhish ah tai hi. Ahih hangin amaute in ama nung zui-in Lakhish ah mi sawl uh a, tua lai-ah amah that uh hi. Tua ciangin amaute in sakolte tungah amah hong paipih uh hi; David’ khuapi sung Jerusalem ah a pate tawh amah kivui hi. Tua ciangin Judah mite khempeuh in kum sawm-le-guk a pha Uzziah la-in a pa Amaziah’ tangin kumpi-in koih uh hi. A pa a sih khit ciangin amah in Elath khua zo kikin lam pha a, Judah mite’ adingin ngah kik hi. Judah kumpipa, Joash’ tapa Amaziah’ kum sawm-le-ngana kumin, Israel kumpipa, Jehosh’ tapa Jeroboam in Samaria ah uk ding kipan a, amah in kum sawmli-le-khat sung uk hi. Amah in Topa muhna ah a sia gamta hi; Israel a khialhsakna, Nebat’ tapa Jeroboam’ khialhnate khempeuh panin amah kihem khia lo hi. Amah in, Gathhefer pana kamsangpa, Amittai’ tapa, a nasem Jonah tung tawnin Israel Pasian, Topa ’ thugen bangin, Hamath lutna panin Arabah Tuipi dong Israel gamgi ngahkik hi. Bang hang hiam cih leh Israelte’ thuakna nasia mahmah hi, ci-in Topa in mu hi; bang hang hiam cih leh sal ahi a, a suakta mi ahi zongin a peng kuamah om lo a, Israel a huh ding kuamah om lo hi. Ahih hangin vantung nuai panin Israel min a phiatkhiat ding Topa in gen nai lo ahih manin Jehoash’ tapa Jeroboam’ khut tawh amah in amaute honkhia hi. Tu-in Jeroboam’ gamtatna a om laite, leh a hihte khempeuh, leh a vangliatna, a galsimna, leh Judah in a na neih ngei Damaskas leh Hamath khuapite Israel’ adingin a ngah kikna, Israel Kumpite’ Khang Tangthu Laibu sungah kigelh hilo ahi hiam? Tua ciangin Israel kumpi ahi, a pate tawh Jeroboam ihmu a, ama tangin a tapa Zekhariah in uk hi. Israel kumpipa Jeroboam a nihna’ kum sawmnih-le-sagihna kumin Judah kumpipa, Amaziah’ tapa Uzziah in uk ding kipan hi. Amah in uk ding a kipatin kum sawm-le-guk pha a, Jerusalem ah kum sawmnga-le-nih sung uk hi. Ama nu’ min in Jekoliah hi a, Jerusalem khuami ahi hi. A pa Amaziah’ sepsa khempeuh tawh kizui-in amah in Topa ’ mit-ah a man gamta hi. Ahi zongin mual tunga biaknate kilakhia lo hi; mite in tuate tungah biakna pia-in paknamtui hal lai uh hi. Tua ciangin Topa in phak natna tawh kumpipa vat ahih manin a sih ni dongin amah a phak hi a, inn tuam sungah amah teng hi. Tua ciangin kumpipa’ tapa Jotham in innkuan tungah a uk hi a, tua gam mite a uk hi. Tu-in Uzziah’ gamtatna a om laite, leh a hih khempeuh, Judah Kumpite’ Khang Tangthu Laibu sungah kigelh hilo ahi hiam? Tua ciangin Uzziah a pate tawh ihmu a, amaute in David khuapi sungah a pate tawh amah vui uh a, tua ciangin ama tangin a tapa Jotham in uk hi. Judah kumpipa Uzziah’ kum sawmthum-le-giatna kumin Jeroboam a nihna’ tapa Zekhariah in Samaria panin Israel tungah kha guk sung uk hi. A pate’ hihsa bangin amah in Topa ’ muhna ah a sia gamta hi. Israel a khialhsakna, Nebat’ tapa Jeroboam’ khialhnate panin amah kihem khia lo hi. Jabesh’ tapa Shallum in amah sawmsim a, Ibleam ah amah sat pukin that a, tua ciangin ama tangin uk hi. Tu-in Zekhariah’ sepna a om laite, en in, Israel Kumpite’ Khang Tangthu Laibu sungah kigelh hi. (Hih in Topa ’ thuciamna, Jehu tungah a piak, “Na suante khang lina dongin Israel kumpi tokhom tungah tu ding hi,” a cih ahi hi. Tua ahih ciangin tua bangin a piang hi.) Judah kumpipa Uzziah’ kum sawmthum-le-kuana kumin Jabesh’ tapa Shallum in uk ding kipan a, amah in Samaria ah kha khat sung uk hi. Tua ciangin Tirzah panin Gadi’ tapa Menahem hong paito-in Samaria hong tung a, tua ciangin amah in Samaria ah Jabesh’ tapa Shallum satpukin that a, ama tangin uk hi. Tu-in Shallum’ sepna a om laite, leh amah in a hihsa a sawmsimna, en in, Israel Kumpite’ Khang Tangthu Laibu sungah kigelh hi. Tua hun lai takin Menahem in Tappuah leh a sunga teng khempeuh leh Tirzah pana kipan a gam sung teng luh hi; bang hang hiam cih leh amaute in ama adingin a kongpite uh hong lo uh a, tua ahih ciangin amah in luhin, tua sunga om numei naupaai khempeuh phel kham hi. Judah kumpipa Uzziah’ kum sawmthum-le-kuana kumin Gadi’ tapa Menahem in Israel tungah uk ding kipan a, amah in Samaria panin kum sawm sung uk hi. Amah in Topa muhna ah a sia gamta hi; Israel a khialhsakna, Nebat’ tapa Jeroboam’ khialhnate khempeuh panin a nuntak sung tawntung amah kihem khia lo hi. Assiria kumpipa Pul tua gam do dingin hong kuan hi; tua ciangin kumpi aana a letna a kipsak dingin a huh theih nading a deihna-in Menahem in Pul tungah ngun talen tulkhat pia hi. Menahem in Assiria kumpipa tungah a piak dingin mihau khempeuh, a mi kim tung panin ngun shekel sawmnga, Israelte tung panin sum dok hi. Tua ahih ciangin Assiria kumpipa kihei kik a, tua gam sungah om lo hi. Tu-in Menahem’ sepna a om laite, leh a hih khempeuh, Israel Kumpite’ Khang Tangthu Laibu sungah kigelh hilo ahi hiam? Tua ciangin a pate tawh Menahem ihmu a, ama tangin a tapa Pekahiah in uk hi. Judah kumpipa Azariah’ kum sawmngana kumin Menahem’ tapa Pekahiah in Samaria panin Israel tungah uk ding kipan a, amah in kum nih sung uk hi. Amah in Topa ’ muhna ah a sia gamta hi; Israel a khialhsakna, Nebat’ tapa Jeroboam’ khialhnate panin amah kihei khia lo hi. Tua ciangin ama nuai-ah a ukpa, Remaliah’ tapa Pekah in Gilead mi sawmnga tawh amah sawmsim a, kumpipa’ inn sungtawng, Samaria ah amah that hi; amah a thah khit ciangin ama tangin uk hi. Tu-in Pekahiah’ nasepna a om laite, leh a hih khempeuh, en in, Israel Kumpite’ Khang Tangthu Laibu sungah kigelh hi. Judah kumpipa Uzziah’ kum sawmnga-le-nihna kumin Remaliah’ tapa Pekah in Samaria panin Israel tungah uk ding kipan a, kum sawmnih sung uk hi. Amah in Topa muhna ah a sia gamta hi; Israel a khialhsakna, Nebat’ tapa Jeroboam’ khialhnate panin amah kihem khia lo hi. Israel kumpipa Pekah’ hun lai takin Assiria kumpipa Tiglath-pileser hong pai-in Ijon, Abelbethma-akah, Janoah, Kedesh, Hazor, Gilead, leh Galili, Naftali gam khempeuh la hi; amah in galmatin mite Assiria ah ciahpih hi. Tua ciangin Uzziah’ tapa Jotham’ kum sawmnihna kumin, Elah’ tapa Hoshea in Remaliah tapa Pekah sawmsimin amah satpukin that a, tua ciangin ama tangin uk hi. Tu-in Pekah’ gamtatna a om laite, leh a hih khempeuh, en in, Israel Kumpite’ Khang Tangthu Laibu sungah kigelh hi. Israel kumpipa, Remaliah’ tapa Pekah’ kum nihna kumin, Judah kumpipa, Uzziah’ tapa Jotham in uk ding kipan hi. Amah in uk ding a kipatin kum sawmnih-le-nga pha a, amah in Jerusalem ah kum sawm-le-guk sung uk hi. Ama nu’ min in Jerusha hi a, Zadok’ tanu ahi hi. A pa Uzziah’ gamtatnasa khempeuh bangin amah in Topa ’ mit-ah a man gamta hi. Ahi zongin mualtunga biaknate kikoih khia lo hi; mite in tuate tungah biakna pia-in paknamtui hal lai uh hi. Amah in Topa ’ inn kulh kongpi tungnung bawl hi. Tu-in Jotham’ nasepna a om laite, leh a hih khempeuh, Judah Kumpite’ Khang Tangthu Laibu sungah kigelh hilo ahi hiam? Tua hunin Topa in Judah do dingin Siria kumpipa Rezin leh Remaliah’ tapa Pekah sawl ding kipan hi. Jotham a pate tawh ihmu a, a pu David khuapi sungah a pate tawh kivui hi; ama tangin a tapa Ahaz in uk hi. Remaliah’ tapa Pekah’ kum sawm-le-sagihna kumin, Judah kumpipa, Jotham’ tapa Ahaz in uk ding kipan hi. Ahaz in uk ding a kipatin kum sawmnih pha a, Jerusalem ah kum sawm-le-guk sung uk hi. A pu David’ gamtatnasa bangin amah in a Pasian, Topa ’ mit-ah a man gamta lo a, Israel kumpipte’ khekhap mah zui hi. Topa in Israel mite’ mai-ah a hawlkhiat minamte’ zat a kihhuai gamtate bangin biakna-in ama tapa nangawn hal hi. Amah in mual tunga biaknate tung, leh mual dawnte tung, leh singniim nuai khempeuh ah biakna pia-in paknamtui hal hi. Tua ciangin Siria kumpipa Rezin leh Israel kumpipa, Remaliah, tapa Pekah, Jerusalem gal-in a do dingin hong kuanto uh a, amaute in Ahaz umcih uh a, ahih hangin amah zo zo lo uh hi. Tua hun lai takin Edom kumpipa Rezin in Edom gam dingin Elath la kikin Elath panin Judah mite hawlkhia hi; tua ciangin tu ni dongin amaute a ten’na ahi Elath-ah Edom mite hong pai uh hi. Tua ciangin Ahaz in Assiria kumpipa Tiglath-pileser kiangah kamtaite sawlin, “Keimah in na nasempa leh na tapa ka hi hi. Hong kuanto in la, keimah a hong sim Siria kumpipa leh Israel kumpipa’ kiang panin kei hong honkhia in,” a ci hi. Ahaz in zong Topa ’ inn sung leh kumpipa’ vankoihna a, ngun leh khamte la-in Assiria kumpipa kiangah letsong khat puak hi. Tua ciangin Assiria kumpipa in ama thu ngai hi; Assiria kumpipa Damaskas a do-in hong kuan to-in tua khua la a, a mite galmatin Kir-ah pua a, amah in Rezin that hi. Assiria kumpipa Tiglath-pileser tawh kimu dingin kumpi Ahaz Damaskas ah a pai ciangin, amah in Damaskas ah a om biakna tau mu hi. Tua ciangin kumpi Ahaz in biakna tau a om dan, a neng a tawngin a lah kimna a lim khat siampi Urijah kiangah puak hi. Tua ciangin siampi Urijah in biakna tau bawl hi; Damaskas panin kumpi Ahaz hong tun’ ma-in kumpi Ahaz in Damaskas panin a khakna tawh kizui-in siampi Urijah in a bawl hi. Damaskas panin kumpipa hong tun’ ciangin kumpipa in biakna tau en hi. Tua ciangin biakna tau kiang kumpipa in hong naihin paito a, biakna pia hi. a meihal biakna leh an tawh a biakna halin, leenggahzu tawh a biakna sung a, thunuam-a a biakna sisan biakna tau tungah theh hi. Tua ciangin amah in ama biakna tau leh Topa ’ inn kikal, inn mai panin Topa mai-ah a om sumngo biakna tau la khia-in ama biakna tau leilu lam pangah koih hi. Tua ciangin kumpi Ahaz in siampi Urijah thu pia-in, “Gam sung mi khempeuh’ meihal biakna, leh an tawh a biakna leh leenggahzu tawh a biakna uh tawh biakna tau lian tungah zingsang meihal biakna, leh nitakin an tawh biakna, leh kumpipa’ meihal biakna leh an tawh a biaknate hal khawm in; tua tungah meihal biakna sisan khempeuh, leh biak piakna sisan khempeuh theh in; ahih hangin sumngo biakna tau in kei adingin thu dot nading hi ding hi,” a ci hi. Kumpi Ahaz’ thupiak bangin siampi Urijah in hih thu khempeuh hih hi. Tua ciangin kumpi Ahaz in a din’na kungte tan khia-in tuate panin a kuang la khia a, a nuai-a om sumngo bawngtalte tung panin tuikuangpi la khia sukin suang vial tungah nga hi. Tua ciangin Assiria kumpipa hangin amah in sabbath ni-in zat dingin inn sungah a kibawl tutna khuhna leh kumpipa’ lutna a puanung, Topa ’ inn panin lakhia hi. Tu-in Ahaz in a hih a gamtatna a om laite, Judah Kumpite’ Khang Tangthu Laibu sungah kigelh hilo ahi hiam? Tua ciangin Ahaz a pate tawh ihmu a, David khuapi sungah a pate tawh kivui hi; tua ciangin ama tangin a tapa Hezekiah in uk hi. Judah kumpipa Ahaz’ kum sawm-le-nihna kumin Elash’ tapa Hoshea in Israel tungah Samaria panin uk ding kipan a, amah in kum kua sung uk hi. Amah in Topa muhna ah a sia gamta a, ahi zongin ama ma-a Israel kumpite bang hi lo hi. Assiria kumpipa Shamaneser amah doin kuanto hi; tua ciangin Hoshea in ama khutnuai mi suak a, ama tungah siah puak hi. Ahih hangin Assiria kumpipa in Hoshea a zuautatna mu hi; bang hang hiam cih leh amah in Izipt kumpipa So kiangah kamtaite sawl a, a kum kumin a hih ngeisa bangin Assiria kumpipa tungah zong siah pia lo hi; tua ahih ciangin Assiria kumpipa in amah man a, thong sungah amah hencip hi. Tua ciangin Assiria kumpipa in gam sung khempeuh simin Samaria tung a, amah in kum thum sung umcih hi. Hoshea’ kum kua-na kumin Assiria kumpipa in Samaria la a, amah in Assiria ah Israel mite ciahpih a, Halah gam sung, leh Gozan gam a, gun om Habor, leh Media khuapite sungah amaute koih hi. Hih thu a pian’na in, Israel mite in Izipt kumpipa Faro’ khutnuai Izipt gam panin amaute a paikhiatpih a Pasian uh Topa ’ tungah khial a, pasian dangte kihta-in Israel mite mai-ah Topa in a hawlkhiat minamte’ ngeina, leh Israel kumpite in a pian’sak ngeinate a zuihna hang uh ahi hi. Tua ciangin Israel mite in Topa a Pasian uh langpanin a man lo na vaihawm uh hi. Amaute in amau’ adingin gal vilna bukno akipan kulh a nei khuapi dongin khuapi khempeuh ah mual tunga biakna bawl uh hi; amaute in amau’ adingin mualsang tung khempeuh leh singniim nuai khempeuh ah khuampite leh Asherah milimte phut uh hi; tua ciangin amaute’ mai-ah Topa in a puakkhiat minamte’ hih bangin amaute in mual tunga biakna mun khempeuh tungah paknamtui hal uh hi. Amaute in a hoih lo nate hihin Topa hehsak uh a, Topa in amaute tungah, “Note in na hih kei ding uh hi,” a cih milimte’ na sem uh hi. Ahi zongin Topa in kamsangte khempeuh leh thu-mu-te khempeuh tung tawnin Israel leh Judah hilhkhol a, “Na pu na pate uh ka thupiak thukhamte khempeuh, leh kamsangte ahi ka nasemte tung tawnin note kiangah thu kong puak bangin na gamtat siate panun kihei-in ka thupiaknate leh ka thukhamte zui un,” a ci hi. Ahih hangin amaute in thungai lo uh a, Topa a Pasian uh a um lo a pate uh mah bangin lungsim khauh uh hi. Amaute in ama thukhamte, leh a pu a pate uh tawh a bawl a thuciamna, leh amaute tungah a piak hilhkholhnate simmawh uh hi. Amaute in a mawkna milimte zui-in a mawkna suak uh a, amaute tawh kibangin gamta kei un ci-in Topa in a thupiak tawh kisai-in, amaute in amau’ kim-a om minamte zui uh hi. Amaute in Topa a Pasian uh thupiakte khempeuh nusia-in amau’ adingin a kisung bawngno nih lim bawl uh hi; amaute in Asherah milim khat bawl uh a, vantung a, om nate khempeuh bia-in Baal’ na sem uh hi. Amaute in biakna-in a tanute uh leh a tapate uh halin vankahna leh aisanna zang uh a, Topa muhna ah a sia gamta dingin amau kizuak tawmin amah hehsak uh hi. Tua ahih ciangin Israel mite tungah Topa heh a, ama muhna panin amaute hemkhia hi; kuamah dang om nawn loin Judah minam bek om lai hi. Judah mite in zong Topa a Pasian uh thupiaknate zui loin Israel mite in a phuah tawm ngeinate zuihpih uh hi. Tua ciangin Topa in Israel suan-le-khakte khempeuh nialin amaute gimsak a, ama muhna panin amaute a paihkhiat dongin a siasak mite khut sungah amaute pia hi. Amah in David innkuan panin Israel gam a balkhiat khit ciangin Israel mite in Nebat’ tapa Jeroboam kumpi-in koih uh hi. Tua ciangin Jeroboam in Topa zuihna panin Israel hawlkhia-in khialhna lianpi amaute bawlsak hi. Tua ciangin Assiria kumpipa in Babilon, Kuthah, Avva, Hamath, leh Sefarvaim panin mite paipih a, Israel mite’ tangin Samaria khuapite ah amaute koih hi; amaute in Samaria gam luahin a khuapite-ah teeng uh hi. Tua lai-ah a ten’ cilun amaute in Topa kihta lo uh hi; tua ahih ciangin Topa in amaute kimkhat a that humpinelkaite amaute lakah khah hi. Tua ahih ciangin Assiria kumpipa kiangah, “Nangmah in pua khia-in Samaria khuapite sungah na koih minamte in tua gam’ pasian’ thukham thei lo uh hi; tua ahih ciangin amah in amaute lakah humpinelkaite khah hi, en in, amaute in tua gam’ pasian’ thukham thei lo uh ahih manin tuate in amaute that uh hi,” ci-in kigen hi. Tua ciangin Assiria kumpipa in thu pia a, “Na puakkhiatna uh mun siampite khat tua lai-ah puak un; amah pai-in tua lai-ah teengin a gamsung pasian’ thukhamte amaute hilh sak un,” a ci hi. Tua ahih ciangin Samaria panin a puakkhiat uh siampite khat hong pai-in Beth-el ah teng a, amaute in Topa bangci kihtak ding cih thu amaute kiangah hilh hi. Ahih hangin minam khempeuh in amau’ pasiante bawl uh a, minam khempeuh in amau’ ten’na khuapite sung, Samaria mite’ bawlsa mual tunga biakna munte ah tuate koih uh hi; Babilon mite in Sukkoth-benoth pasian lim, Kuth mite in Nergal pasian lim, Hamath mite in Ashima milim, leh Avva mite in Nabhaz leh Tartak milimte bia uh hi; Sefarvaim mite in Sefarvaim pasiante ahi Adrammelek leh Anammelek biakna-in a tate uh mei tawh hal uh hi. Amaute in zong Topa kihta uh a, mual tunga biakna siampi dingin amau sung panin mi namkim seh uh a, tuate in mual tunga biaknate tungah amau’ adingin biakna piaksak uh hi. Tua ahih ciangin amaute in Topa kihta uh a, ahih hangin amaute a kipuak khiatna minamte’ ngeina bangin amau’ pasiante’ na zong sem uh hi. Tu ni dongin amaute in a ni danga ngeina bangin hih uh hi. Amaute in Topa kihta lo uh a, Israel min a phuah Jakob’ suante’ Topa in a thupiak thukhamte ahi a, ngeina kipte ahi a, zuih ding ngeina ahi a, a thupiakna ahi zongin amaute in zui lo uh hi. Topa in Israelte tawh thuciamna khat bawlin amaute thu pia a, “Note in pasian dangte kihta loin, amaute tungah note kun loin, amau’ na zong sem loin, amaute tungah biakna zong na pia kei ding uh hi; ahih hangin Izipt gam panin vangliatna leh thahatna tawh note a hong paikhiatpih Topa na kihta ding uh hi; ama mai-ah note na kun ding uh a, ama tungah biakna na pia ding uh hi. Note adingin a gelh thukhamte leh ngeina kipte leh zuih ding ngeina leh thupiaknate zuih ding na kingaihsun tawntung ding uh hi. Note in pasian dangte na kihta kei ding uh a, note tawh ka bawlsa thuciamna na mangngilh kei ding uh hi. Note in pasian dangte na kihta kei ding uh a, ahih hangin Topa na Pasian uh na kihta ding uh hi; tua ciangin amah in na galte khempeuh uh khut sung panin note hong honkhia ding hi,” a ci hi. Ahi zongin hih mite in tua thu ngai lo uh a, a ni danga ngeina bangin gamta uh hi. Tua ahih ciangin hih minamte in Topa kihta uh a, a kiseek amau’ milimte’ na zong sem kawm uh hi; a tate uh leh a tate uh tate in zong tua bangin hih uh hi—a pu a pate uh hih bangin a suan a khakte un tu ni dongin hih uh hi. Israel kumpipa, Elah’ tapa Hoshea’ kum thumna kumin, Judah kumpipa, Ahaz’ tapa Hezekiah in uk ding kipan hi. Amah in uk ding a kipatin kum sawmnih-le-nga pha a, amah in Jerusalem ah kum sawmnih-le-kua sung uk hi. Ama nu’ min in Abi hi a, Zekhariah’ tanu ahi hi. Amah in a pu David’ hihna khempeuh tawh kizui-in Topa ’ mit-ah a man gamta hi. Amah in mual tunga biaknate hemkhia-in, khuampite sutan a, Asherah milim phuk pai hi. Tua ciangin amah in Moses’ bawlsa sumngo gulpi satnen hi; bang hang hiam cih leh tua ni dongin Israel mite in tua tungah paknamtui hal uh hi; tua pen Nehushtan kici hi. Amah in Israel Pasian, Topa muang hi; tua ahih ciangin ama nung a, Judah kumpite khempeuh lak hita leh ama mai-ate lak hita leh amah tawh a kibang kuamah om lo hi. Bang hang hiam cih leh amah in Topa kip takin len hi; amah zuihna panin kihemkhia lo a, Topa in Moses a thupiak thupiaknate zui hi. Tua ciangin amah tawh Topa omkhawm hi; a kuankhiatna khempeuh ah mavang hi. Amah in Assiria kumpipa lehdo-in ama na sem lo hi. Amah in galvilna bukno akipan kulh a nei khuapi dongin, Gaza leh a gamsung ciang dong Filistiate vatgawp hi. Israel kumpipa, Elah’ tapa Hoshea’ kum sagihna kum ahi, Kumpi Hezekiah’ kum lina kumin Assiria kumpipa Shalmaneser, Samaria do-in hong kuan to-in umcih a, kum thum a beina ah tua khua la zo hi. Israel kumpi Hoshea’ kum kua-na kum ahi, Hezekiah’ kum gukna kumin Samaria kila hi. Assiria kumpipa in Israel mite Assiria ah la a, Halah gam sung, leh Gozan gama gun om Habor, leh Media khuapite sungah koih hi; bang hang hiam cih leh amaute in Topa a Pasian uh aw ngai lo a, ama thuciamna, Topa ’ nasem Moses’ thupiak khempeuh nangawn palsat uh hi; amaute in thu ngai loin, thu zong mang lo uh hi. Kumpi Hezekiah’ kum sawm-le-lina kumin Assiria kumpipa Sennakherib, Judah khuapi kulh a neite khempeuh a sim dingin hong kuan to-in tuate la hi. Tua ciangin Judah kumpipa Hezekiah in Assiria kumpipa kiang Lakhish ah mi sawlin, “Ka gamta khial hi; kei kiang panin nungkik in; kei tungah nong koih peuhpeuh ka thuak ding hi,” a ci hi. Tua ciangin Assiria kumpipa in Judah kumpipa Hezekiah tung panin ngun talen zathum leh kham talen sawmthum kal hi. Tua ciangin Hezekiah in Topa ’ innsung leh kumipa’ inn vankoihnate a, a om ngun khempeuh ama tungah pia hi. Tua hunin Hezekiah in Topa ’ biakinn kongkhakte tung pan, leh Judah kumpipa Hezekiah in a zutna kongkhak mungte panin khamte hawkkhia-in Assiria kumpipa tungah pia hi. Tua ciangin Assiria kumpipa in Lakhish panin Kumpi Hezekiah kiang Jerusalem ah galkap hon lianpi khat tawh a galkapmang lian penpa, a innsung mang lianpenpa, leh a ulian khat a sawl hi. Amaute paito-in Jerusalem tung uh hi. Amaute a tun’ uh ciangin amaute hong pai-in puansawppa’ nasepna phual zuatna lampi a, om bual tungnung tuilakna gei-ah hong ding uh hi. Amaute in kumpipa a sap uh ciangin, amaute kiangah inn sung ukpa ahi, Hilkiah’ tapa Eliakim, leh lai-at Shebnah, leh thuciamtehpa ahi, Asaf tapa Joah hong pai uh hi. Tua ciangin a ulianpa in amaute kiangah, “Hezekiah kiangah gen un, ‘Assiria kumpipa, kumpi lianpa in hih bangin ci hi: Hih na kimuan’na uh bang suang na hi uh hiam? Note in kampau lel pen galsim nadingin thu lamlahna leh thahatna-in na ngaihsun uh hi! Note in kei nong lehdo nadingun bang suang na hi uh hiam? En un, a tungah a kingam mipa’ khut a sun ding pumpeeng kitam kung a bang lel Izipt tu-in na suang uh hi. Amah a suangte khempeuh tungah Izipt kumpipa Faro in tua bang lel ahi hi. Ahih hangin note in kei kiangah, “Kote in Topa ka Pasian uh ka suang uh hi,” na cih uh leh, Hezekiah in mual tunga biaknate leh a biakna taute hepkhiat sakin Judah leh Jerusalem tung a, “Jerusalem khua sung hih biakna tau mai-ah na bia ding uh hi,” a cihpa hilo ahi hiam? Tu-in hong pai un, Assiria kumpi ka topa tawh kikhapna khat bawl un: no lam panin a tunga tuang ding na ngah nak uh leh note tungah sakol tulnih kong pia ding hi. Tua ahih ciangin note in leengte leh sakol tuangte tawh kisai-in Izipt a suang kimlai-in bangci-in ka topa’ nasemte lakah a neupen galkap ukpa khat lehnawh zo ding na hi uh hiam? Tua tham loin, Topa tawh loin hih mun do a, a susia dingin hong paito ka hi hiam? Topa in kei kiangah, Hih gam do-in paito in la, susia in,’ hong ci hi,” a ci hi. Tua ciangin Hilkiah’ tapa Eliakim, leh Shebnah, leh Joah in a ulianpa kiangah, “Kong thum uh hi, kote in thei ka hih manun Aram pau-in na nasemte tungah thu hong gen in; kulh tunga om mite’ zakin Judah pau-in kote tungah hong gen kei in,” a ci uh hi. Ahih hangin a ulianpa in amaute kiangah, “Ka topa in hih thute na topa uh leh note tungah a gen dingin hong sawlin, amau’ ek mah ne-in amau’ zun mah dawn dingin note tawh a siakhawm ding kulh tunga tu mite kiangah gen lo dingin hong sawl ahi hiam?” a ci hi. Tua ciangin a ulianpa dingin Judah pau-in a gingin kiko a: “Assiria kumpipa, kumpi lianpa’ thu za un! Kumpipa in hih bangin ci hi: ‘Hezekiah’ khemsa-in om kei un; bang hang hiam cih leh amah in keima khutsung panin note hong honkhia zo lo ding hi. Topa in eite hong honkhia taktak ding a, Asiria kumpipa khut sungah hih khuapi kipia lo ding hi, ci-a Hezekiah’ hong genna tawh Topa suang kei un,’ ci hi. Assiria kumpipa’ khut sung panin minamte’ pasian khatpeuh in a gam honkhia ngei ahi hiam? Hamath leh Arpad’ pasiante koi-ah om ahi uh hiam? Sefarvaim, Hena, leh Ivvah pasiante koi-ah om ahi uh hiam? Keima khutsung panin amaute in Samaria a honkhia uh hiam? Topa in ka khutsung panin Jerusalem a hotkhiat nadingin gam sung pasiante khempeuh lakah kua in keima khutsung panin a gam uh honkhia ngei ahi hiam?’ ci hi,” a ci hi. Ahih hangin mite dai-in kam khat beek dawngkik lo uh hi; bang hang hiam cih leh kumpipa’ thupiakna in, “Amah dawng kei un,” cihna ahi hi. Tua ciangin inn sung a ukpa, Hilkiah’ tapa Eliakim, leh lai-atpa Shebna, leh thuciamtehpa, Asaf tapa Joahte a puan uh balkeksa-in Hezekiah kiangah hong pai uh a, a ulianpa’ kammalte ama kiangah gen uh hi. Kumpi Hezekiah in a zak ciangin, a dahna hangin a puante balkekin puanhampi silh a, Topa ’ inn sungah pai hi. Tua ciangin amah in inn sung a ukpa Eliakim, leh lai-atpa Shebna, leh siampi luite puanhampi silhsakin Amoz’ tapa kamsangpa Isaiah kiangah sawl hi. Amaute in ama kiangah, “Hezekiah in hih bangin ci hi: Tu ni in lungkham ni, hong kitai ni, min dai ni ahi hi; naungekte a suah hun tung a, amaute hin’ khiatna ding thatang om lo hi. Ama topa ahi Assiria kumpipa in a nungta Pasian a zahko dingin a sawl a ulianpa’ kammalte khempeuh Topa na Pasian in za-in Topa na Pasian in a zaksa thute nial khin kha ding hi; tua ciangin a om lai mite adingin thungen in,” a ci uh hi. Kumpi Hezekiah’ nasemte Isaiah kiangah hong tun’ ciangin, Isaiah in amaute kiangah, “Na topa uh kiangah gen un, ‘ Topa in hih bangin ci hi: Assiria kumpipa’ nasemte in kei hong simmawhna, na zaksa uh thute hangin lau kei un. En un, keimah in ama sungah lungsim khat ka guang ding a, amah in kamdawn khat za-in a gamah ciahkik ding hi; ama gam mah ah namsau tawh amah a tuk nading ka piangsak ding hi,’ ci un,” a ci hi. Assiria kumpipa in Lakhish nusia khinin Libnah khua tawh a kidona thu, a ulianpa in za ahih manin, kumpipa kiangah thu a dong dingin a pai hi. Ethiopia kumpipa Tirhakah in amah do dingin a hong kuankhiat khitna thu kumpipa in a zak ciangin, amah in Hezekiah kiangah kamtaite sawl kikin, “Judah kumpipa Hezekiah kiangah hih bangin gen un: ‘Assiria kumpipa khut sungah Jerusalem kipia lo ding hi, ci-a hong ciamna tawh na suan’ na Pasian’ khemsa-in om kei in. En in, Assiria kumpite in gam khempeuh a hihnasa, a suksiat mangna thu na za khin hi. Tua ahih ciangin nang hong kihonkhia ding ahi hiam? Ka pu ka pate in a suksiat minam Gozan, Haran, Rezef, leh Telassar gam sunga om Eden mite, tua minamte’ pasiante in amaute a honkhia zo hiam? Hamath kumpipa, Arpad kumpipa, Sefarvaim khuapi kumpipa, Hena kumpipa, ahih kei leh Ivvah kumpipa koi-ah om ahi hiam?’ ci un,” a ci hi. Hezekiah in kamtaite’ tung panin a lai sangin sim hi; tua ciangin Topa ’ innah Hezekiah paito a, Topa ’ mai-ah a lai zal hi. Tua ciangin Hezekiah in Topa ’ mai-ah thu ngenin, “ Topa, Israel Pasian, kherubte tungah a tupa aw, leitung kumpi gam khempeuh lakah nangmah, nangmah bek in Pasian na hi hi; nangmah in vantung leh leitung na bawl hi. Topa aw, na bil hong ngat in la, hong za in; Topa aw, na mitte hong hak in la, hong mu in; tua ciangin a nungta Pasian a zahkona dingin a hong khak Sennakherib’ thute za in. A taktakin, Topa aw, Assiria kumpite in minam dangte leh a gam uh siasak a, a pasiante uh meikhuk sungah lotsak uh hi; bang hang hiam cih leh tuate in pasian hi lo-in, mihingte’ khut tawh a kibawl sing leh suang ahi hi; tua ahih ciangin tuate kisusia hi. Tua ahih ciangin tu-in, Topa kote’ Pasian aw, leitung kumpi gam khempeuh in nang, nang bek Pasian na hihna a theih nadingun ama khut panin kote hong honkhia in, kong thum hi, Topa aw,” a ci hi. Tua ciangin Amoz’ tapa Isaiah in Hezekiah kiangah sawlin, “Israel Pasian, Topa in hih bangin ci hi: Assiria kumpipa Sennakherib tawh kisai kei tungah nong thungetna ka za zo hi. Hih in amah tawh kisai-in Topa ’ gensa thu ahi hi: “Zion khua pi in nang hong simmawh a, nang hong nuihsan hi; Jerusalem khuapi in na nungah a lu hong peisan hi, “Kua zahko-in a simmawh na hi hiam? Kua langpangin na aw sang sakin kihihsakna tawh gamta na hi hiam? Israelte’ a Siangtho Pa, a simmawh na hi hi. Na kamtaite tawh Topa na zahko a, nangmah in, ‘Ka leeng tampite tawh mual sangpen munah ka paikhin a, Lebanon gam tawng pek dong ka tung hi; a taamtaak sangpente ka phuk a, a taaksan hoihpente ka phuk hi; a gam tawng nungpen ah ka lut a, a tulak thukpen dongah ka lut hi. Tuikhukte ka to a, gamdang tuite ka dawn a, ka khe nuai tawh Izipt luite khempeuh ka keusak hi,’ na ci hi. “Sawt pek lai-in ka ngaihsutsa ahihna za nai lo na hi hiam? Taanglai pek panin ka geel kholhsa hi, tu-a ka tun’sak ding thute, kulh a nei khuapite nin bulomtang-in na hei nading, a sunga teengte a hatna teng kilakhia-in, lungkia-in cih nading thei loin, gamlak singnote le longeekte bangin, innkhumzang a, lopate bangin a om lai tak; a khan’ khit ma-in a si ding hi. “Ahih hangin keimah in na tutsukna leh na pusuahna leh na sungtumna, kei tungah na hehna ka thei hi. Kei tungah na hehna hang leh na kiphatsakna ka bil ah hong tun’ khitna hangin, na nak ah nakpheh hong bulhin, na kam ah kamkaih kong bulh ding a, nangmah nong kuan khiatna lam mah ah nang kong lehhei kik ding hi,” a ci hi. Tua ciangin Isaiah in Hezekiah kiangah, hih in nang adingin lim hong hi ding hi: tu kumin ama thu-in a pote na ne ding a, a kum nihna ciangin tua mah bangin a selkhiate na ne ding hi; a kum thumna ciangin khai tuhin atin, leenggui suanin a gah na ne ding hi. Tua ciangin Judah innkuan a suakta a om laite in a thuk lamah zungkha kikin a tung lamah gah hong gah to ding hi; bang hang hiam cih leh Jerusalem panin a om laite hong paikhia ding a, Zion Mual panin a suakta honkhat hong paikhia ding hi. Topa ’ deihluatna in hih thu hong tungsak ding hi. “Tua ahih ciangin Topa in Assiria kumpipa tawh kisai-in hih bangin gen hi: Hih khuapi sungah amah hong pai lo ding a, thaltang khat zong lawn lo ding a, khuapi mai-ah lum khat tawh hong pai loin, khuapi dona-in phung zong ciang lo ding hi. Amah hong paina lampi mah tawnin amah kileh kik ding a, hih khuapi sungah amah hong pai lo ding hi’ Topa in ci hi. Bang hang hiam cih leh keima min ka khualna leh ka nasempa David tungah ka ciamsa thu hangin hih khuapi ka hu ding hi, ci hi,” a ci hi. Tua zanin Topa ’ vantungmi paikhia a, Assiria’ giahphual ah galkap tul zakhat leh tul sawmgiat leh tulnga that hi; zingsang tungin mite a thawh ciangin, en in, hihte khempeuh siluang hawm na hi hi. Tua ciangin Assiria kumpipa Sennakherib kihemkhia a, innah ciahin Nineveh ah teng hi. Tua ciangin amah in ama pasian Nisrok’ inn sungah bia-in a om lai takin, ama tapate Adrammelek leh Sharezer in namsau tawh amah thatin Ararat gamah tai uh hi. Tua ciangin ama tangin a tapa Esarhaddon in uk hi. Tua hun lai takin Hezekiah a cina-in si dektak hi. Tua ciangin Amoz’ tapa kamsangpa Isaiah ama kiangah hong pai a, ama kiangah, “ Topa in hih bangin ci hi: ‘Na innkuan vai ding hawm in; bang hang hiam cih leh nang na si ding hi; na damkik kei ding hi, ci hi,” a ci hi. Tua ciangin Hezekiah in a mai kawm lam ngatin Topa tungah thungen a, “Nangma mai-ah thuman tak leh lungsim khempeuh tawh ka gamtatna, leh nangma muhna ah a hoih ka sepna thu tu-in hong phawk in, kong thum hi, Topa aw,” a ci hi. Tua ciangin Hezekiah nakpi takin kap hi. Tua ciangin inntual laita panin Isaiah a paikhiat ma-in ama tungah Topa ’ thu hong tung hi: “Kileh kik in la, keima mite’ makai Hezekiah kiangah hih bangin gen in. Na pa David’ Pasian, Topa in hih bangin ci hi: Na thungetna ka za khin a, na khituite ka mu khin hi; en in, nang kong damsak ding a; ni thum ni-in Topa ’ innah na paito ding hi. Na nuntakna kum sawm-le-nga sung kong behlap ding hi. Assiria kumpipa’ khutsung panin nangmah leh hih khuapi ka honkhia ding a, keima hang leh ka nasempa David hangin hih khuapi ka hu ding hi, ci-in gen in,” a ci hi. Tua ciangin Isaiah in, “Thei moh khat hong la un. Amah a damkik theih nadingin tuate la un la, a uilut nuh un,” a ci hi. Tua ciangin Hezekiah in Isaiah kiangah, “ Topa in kei hong damsakna ding, leh a ni thum ni-in Topa ’ innah ka paitoh nading a lim in bang hi ding ahi hiam?” a ci hi. Tua ciangin Isaiah in, “ Topa in a ciamsa na hong hih nadingin hih in Topa tung panin nangma tungah lim ahi hi: a liim kalsawm mai pai ding hiam, ahih kei leh kalsawm nungkik ding ahi hiam?” a ci hi. Tua ciangin Hezekiah in dawngin, “Liim kal sawm a mainawt ding a baih khat ahi hi; liim kal sawm nungkik sak zaw in,” a ci hi. Tua ciangin kamsangpa Isaiah Topa tungah kiko hi; tua ciangin amah in Ahaz’ ni-nai tungah a ni tumsa a liim kal sawm lehkaih hi. Tua hun lai takin Babilon kumpipa, Baladan’ tapa Melodak-baladan in Hezekiah kiangah laikhakte leh letsong khat tawh kamtaite sawl hi; bang hang hiam cih leh Hezekiah cina, ci-in amah in za hi. Tua ciangin Hezekiah in amaute na zindo a, amah in amaute kiangah a vankoihna inn khempeuh, ngun, kham, a namtui nate, sathau manpha, a galvan, a vankoihna innte ah a om khempeuh lak hi; ama inn sung hita leh ama gamsung khempeuh pan hita leh Hezekiah in amaute a lah loh om lo hi. Tua ciangin Kumpi Hezekiah kiangah kamsangpa Isaiah hong pai a, ama kiangah, “Hih mite in bang gen ahi hiam? Koi lai panin nang kiangah hong pai ahi hiam?” a ci hi. Tua ciangin Hezekiah in, “Amaute Babilon gam, a gamlapi panin hong pai uh hi,” a ci hi. Amah in, “Amaute in na inn sungah bang mu ahi uh hiam?” a ci hi. Tua ciangin Hezekiah in dawngin, “Amaute in ka inn sunga om khempeuh mu uh hi; ka vankoihna inn sungte panin amaute ka lah loh bangmah om lo hi,” a ci hi. Tua ciangin Isaiah in Hezekiah kiangah, “ Topa ’ thu za in: En in, na inn sunga om khempeuh leh na pu na pate in tu ni donga a kholte Babilon ah a kipuak ni ding hong tung ding hi; bangmah kisiit lo ding hi, Topa in ci hi. Nangma sung pan a suak na tapate pawlkhat kilakhia ding hi; amaute in Babilon kumpipa’ inn sungah innsung maangte hi ding uh hi,” a ci hi. Tua ciangin Hezekiah in Isaiah kiangah, “Na gensa ahi Topa ’ thugen in hoih hi,” a ci hi. Bang hang hiam cih leh amah in, “Keima hun sungin kilemna leh lungmuan’na a om nak leh bang phamawh ding hiam?” ci-in ngaihsun hi. Hezekiah’ sepna a om laite, leh a vangliatna, leh tuili leh tuilakna bawlin khuapi sungah tui a tutna, Judah Kumpite Khang Tangthu Laibu sungah kigelh hilo ahi hiam? Tua ciangin Hezekiah a pate tawh ihmu hi; ama tangin a tapa Manasseh in uk hi. Manasseh in uk ding a kipatin kum sawm-le-nih pha a, amah in Jerusalem ah kum sawmnga-le-nga sung uk hi. Ama nu’ min in Hefzibah ahi hi. Topa in Israel mite’ mai-ah a hawlkhiat minamte’ gamtatna a kihhuaite mah bangin Topa ’ muhna ah amah in a sia gamta hi. Bang hang hiam cih leh amah in a pa Hezekiah’ suksiatsa mual tunga biaknate lamkik hi; tua ciangin amah in Baal adingin biakna taute phut a, Israel kumpipa Ahab’ bawl bangin Asherah milim khat bawl a, vantung a, om nate khempeuh bia-in tuate’ na sem hi. Tua ciangin Topa in, “Jerusalem ah ka min ka koih ding hi,” a cihna Topa ’ inn sungah amah in biakna taute lam hi. Tua ciangin amah in Topa ’ inn tual nihte tungah vantung a, om nate khempeuh adingin biakna taute lam hi. Tua ciangin amah in biakna-in a tapa hal a, aisanna leh mai lam thugen kholhnate semin, vankahtheite leh aisante tawh nasem hi. Amah in Topa ’ muhna ah a sia tampi gamta a, Amah hehsak hi. Ahih hangin amaute in thu ngai lo a, Topa in Israel mite’ mai-ah a suksiat minamte’ gamtatna sangin a siazaw a gamtat nadingun Manasseh in amaute zol hi. Tua ciangin Topa in kamsangte ahi a nasemte’ tung tawnin gen a, “Judah kumpipa Manasseh in hih a kihhuai nate gamta a, ama ma-a Amor mite’ gamtatna sangin a siazaw-in na semin a milimte tawh Judah mite zong khialsak khin hi; tua ahih ciangin Israel Pasian Topa in hih bangin ci hi: En un, a za mite khempeuh’ bilte a vut ding siatna Jerusalem leh Judah tungah ka tungsak ding hi. Keimah in Jerusalem tungah Samaria a kitehna khau leh Ahab’ innkuan khaukhai sikbawk ka khai ding hi; tua ciangin mi khat in pakan a nul bangin keimah in Jerusalem nulin ka lumlet ding hi. Tua ciangin keimah in ka gamh a om laite paai khia-in amau’ galte’ tungah ka pia ding a, amaute in a galte’ adingin a mat ding mi leh vankiate suak ding uh hi; bang hang hiam cih leh amaute in a pu a pate uh Izipt panin hong paikhiat akipan tu ni dongin keima muhna ah a sia gamta-in kei hong hehsak uh hi,” a ci hi. Tua tham loin amaute in Topa ’ muhna ah a sia a gamtat nadingun amah in Judah mite a khialhsakna banah, Jerusalem mong khat pan mong khat sisan tawh a kidimsak dongin Manasseh in mawhbaang lo mi tampi that hi. Tu-in Manasseh’ sepna a om laite, leh a hih khempeuh, leh a ma hihsa a khialhna, Judah Kumpite’ Khang Tangthu Laibu sungah kigelh hilo ahi hiam? Tua ciangin Manasseh a pate tawh ihmu a, Uzza’ huan sung, ama inn huan sungah kivui hi; tua ciangin ama tangin a tapa Amon in uk hi. Amon in uk ding a kipatin kum sawmnih-le-nih pha a, amah in Jerusalemah kum nih sung uk hi. Ama nu’ min in Meshullemeth hi a, Jotbah khuami Haruz’ tanu ahi hi. Amah in a pa Manasseh’ gamtat bangin Topa muhna ah a sia gamta hi. Amah in a pa’ khekhap khempeuh tawn a, a pa in a na a sepsak milimte’ na mah semin tuate bia hi; amah in a pu a pate’ Pasian, Topa nusia a, Topa ’ lampi tawn lo hi. Tua ciangin Amon’ nasemte in amah sawmsim uh a, ama inn sungah kumpipa that uh hi. Ahih hangin tua gam mite in kumpi Amon a sawmsimte khempeuh that uh a, tua ciangin tua gam mite in ama tangin a tapa Josiah kumpi-in koih uh hi. Tu-in Amon’ hihsa a gamtatna a om laite in Judah Kumpite’ Khang Tangthu Laibu sungah kigelh hilo ahi hiam? Tua ciangin Uzza’ huan sung ama hanah amah kivui hi; tua ciangin ama tangin a tapa Josiah in uk hi. Josiah in uk ding a kipatin kum giat pha a, amah in Jerusalem ah kum sawmthum-le-khat sung uk hi. Ama nu’ min in Jedidah hi a, Bozkath khuami Ada-iah’ tanu ahi hi. Amah in Topa ’ mit-ah a man gamta-in, a pu David’ khekhap khempeuh zui cinten a, tak lamah ahi a, vei lamah ahi zongin pial lo hi. Kumpi Josiah’ kum sawm-le-giatna kumin, kumpipa in a lai-atpa Meshullam’ tapa Azaliah, a tapa Shafan, Topa ’ innah sawl a, “Kong cingte in mite tung panin a khop uh ahi Topa ’ inn sungah hong kipaipih sum phazah a theih nadingin siampi lianpa Hilkiah kiangah paito in; tua ciangin Topa ’ inn a en nasemte tungah a sum piasak in; Topa ’ innah a om inn a puah nasemte tungah amaute tua sum pia sak in. tua sum in khutsiamte, innlamte, lei-le-suang inn lam siamte tungah piak ding leh inn puah nadingin sing lei nading leh suang tawh nading zong ahi hi. Ahih hangin thuman takin amaute gamta uh ahih manin amaute khut sungah a kipia sumte hangin amaute tung panin sazian kingen lo ding hi,” a ci hi. Tua ciangin siampi lianpa Hilkiah in lai-atpa Shafan kiangah, “ Topa ’ inn sungah thukham laibu ka mu khin hi,” a ci hi. Tua ciangin Hilkiah in Shafan kiangah a laibu pia a, amah in sim hi. Tua ciangin kumpipa kiangah lai-atpa Shafan hong pai-in, kumpipa kiangah thu zasak a, “Na nasemte in inn sungah a om sumte la khia-in Topa inn a en nasemte’ tungah pia khin zo uh hi,” a ci hi. Tua ciangin lai-atpa Shafan in kumpipa kiangah, “Siampi Hilkiah in laibu khat kei hong pia hi,” a ci hi. Tua ciangin Shafan in kumpipa mai-ah tua laibu sim hi. Kumpipa in thukham laibu sunga thute a zak ciangin dahna hangin a puante balkek hi. Tua ciangin kumpipa in siampi Hilkiah, leh Shafan’ tapa Ahikam, leh Mikaiah’ tapa Akbor, leh lai-atpa Shafan, leh kumpipa’ nasem Asa-iah thu pia a, “Pai un la, a kimu hih laibu sunga thute tawh kisai-in keima ading, mite ading, leh Judah mi khempeuh adingin Topa tungah thu va dong un; bang hang hiam cih leh hih laibu sunga thu, eite tawh kisai-in a kigelh khempeuh bangin gamtat ding i pu i pate in na mang lo uh ahih manin eite tungah Topa ’ hehna in lian hi,” a ci hi. Tua ahih ciangin siampi Hilkiah, Ahikam, Akbor, Shafan, leh Asa-iahte, puan a kem, Harhas tapa Tikvah, a tapa Shallum’ zi kamsangnu Huldah kiangah pai uh hi (tu-in tua nu in Jerusalem khua sung a Veng Nihna ah teng hi); tua ciangin tua nu tawh amaute kiho uh hi. Tua ciangin amah in amaute kiangah, “Israel Pasian, Topa in hih bangin ci hi: ‘Kei kiangah note hong sawl mipa kiangah gen un. Topa in hih bangin ci hi. En un, hih lai mun leh a tungah a teengte tungah Judah kumpipa in laibu sunga a sim thute khempeuh ahi siatna ka tungsak ding hi. Bang hang hiam cih leh amaute in kei hong nusia-in pasian dangte tungah paknamtui hal uh a, amau’ khut tawh a bawl milimte tawh kei hong hehsak uh ahih manin hih mun tungah ka hehna kitawhkuang ding a, kimitsak lo ding hi. Ahih hangin Topa tungah thu a dong dingin note a hong sawl Judah kumpipa tungah ahih leh note in hih bangin na gen ding uh hi. Israel Pasian, Topa in hih bangin ci hi: Nangmah in na zaksa thute tawh kisai-in, amaute gamkhing leh samsiatna a ngahte a suah nadingin hih mun leh a tungah a teeng mite tungah ka kam pauna na zak ciangin na lungsim kisikin Topa mai-ah nangmahmah kiniamkhiatin, na puante balkekin ka mai-ah na kahna thu, keimah in zong ka za hi, Topa in ci hi. Tua ahih ciangin, en in, na pate kiang nang kong zuansak ding a, nangmah in nuam takin na han na zuan ding a, hih mun tungah ka tun’sak ding siatna khempeuh na mit in mu lo ding hi,’ ci hi,” a ci hi. Tua ciangin amaute in kumpipa kiangah thu puakkik uh hi. Tua ciangin kumpipa in Judah leh Jerusalem upate khempeuh samsak a, ama kiangah hong kikhawm uh hi. Tua ciangin kumpipa Topa ’ innah paito a, amah tawh Judah mi khempeuh leh Jerusalem a, teengte khempeuh, siampite, kamsangte leh mi khempeuh a neu a lian tawh pai uh hi; tua ciangin amah in amaute’ zakin Topa ’ inn sungah a kimu thuciamna laibu sunga thute khempeuh simkhia hi. Tua ciangin khuampi gei-ah kumpipa dingin hih laibu sunga a kigelh hih thuciamna kammalte khempeuh a sep nading, Topa thu mangin a thupiaknate leh a tecipan’nate leh a thukhamte, a lungsim leh a ngaihsutna khempeuh tawh a zuih nading, Topa mai-ah thuciamna khat bawl hi; tua ciangin mi khempeuh tua thuciamna ah kihel uh hi. Tua ciangin kumpipa in siampi lian Hilkiah, a nihna siampi, leh kong cingte in Topa ’ biakinn sung panin Baal leh Asherah milim’ adingin a kibawl nazatte khempeuh, leh vantung a, om nate khempeuh adingin a kibawlte hong paikhiatpih nading uh thupia hi; amah in Jerusalem pualam Kidron leikang halna munah tuate halin a vute Beth-el ah pua hi. Tua ciangin amah in Judah khuapite leh Jerusalem kiim a, om mual tunga biaknate tungah paknamtui hal dingin Judah kumpite in a kipsaksa milim biate’ siampite hawlkhia hi; Baal tung, ni tung, kha tung, aksi honpite tung, leh vantung a, om nate khempeuh tungah paknamtui a halte zong hawlkhia hi. Tua ciangin amah in Topa ’ inn panin Jerusalem pualam, Kidron lui-ah Asherah milim paikhiatpih-in Kidron lui-ah hal a, tua ciangin amah in sat vui-in mi nautangte’ han tungah a vuite lawn hi. Tua ciangin amah in numeite in Asherah milim’ adingin a kikhaite a gatna mun Topa ’ inn sunga om a paktat pawlte’ innte phelkhia hi. Tua ciangin amah in Judah khuapite panin siampite khempeuh paikhiatpih a, Geba panin Be-ersheba ciang dong, siampite in paknamtui a halna mual tunga biaknate susia hi; tua ciangin amah in khuapi kulh kongpi vei lam ahi, khuapi ukpa Joshua’ kongpi lutna ah a om dawi biakna munte phelkhia hi. Ahi zongin, tua lai-a sem siampite ahih leh Jerusalem a, Topa ’ biakna tau-ah hong paito thei lo uh a, amau’ sanggamte lakah silngo sawhloh anlum ne uh hi. Tua ciangin amah in kuamah in Molek tungah a tanu ahi a, a tapa ahi zongin biakna-in a hal theih nawn loh nadingin Hinnom Kuam sunga om Tofeth susia hi. Tua ciangin amah in a kimnai-a om, innsung ulian Nathanmelek’ inn gei, Topa ’ inn sung lutna mun a, Judah kumpite in ni tungah a ap uh a sakolte koihkhia hi; tua ciangin amah in ni’ sakol leengte mei tawh hal hi. Tua ciangin Judah kumpite in a bawlsa ahi Ahaz’ inndei tungnung khumzang a, om biakna taute, leh Topa ’ inn tual nihte’ sungah Manasseh in a bawlsa biakna taute, amah in phelin satnen a, tua a vuite Kidron lui-ah paai hi. Tua ciangin Israel kumpipa Solomon in Sidon mite’ kihhuaina Ashtoreth’ ading, leh Moabte’ kihhuaina Khemosh’ ading, leh Ammon mite’ kihhuaina Milkom’ ading a lam, Jerusalem nisuahna lam Oliv Mual leitaw lam-a om mual tunga biaknate kumpipa in susia hi. Tua ciangin amah in a khuampite satkhamin, Asherah milimte phuk a, mihing guh tawh a dim tua munte a vuk hi. Tua tham loin Israelte a khialsak Nebat’ tapa Jeroboam in Beth-el ah a phuhsa mual tunga biakna, tua biakna mun a biakna tau tawh, amah in phelin a suangte sukham a, tuate satvui hi; amah in Asherah milim zong hal hi. Tua ciangin Josiah kihei-in mual tunga om hante mu hi; tua ciangin amah in mi sawlin hante sung panin a guhte la sak a, hih nate a genkhol Pasian’ mipa in a gen Topa ’ thugen tawh kizui-in biakna tau tungah tuate halin susia hi. Tua ciangin amah in, “Hua gal khat-a ka muh phawkna mual bang ahi hiam?” a ci hi. Tua ciangin khuapi sung mite in ama kiangah, “Judah panin hong pai-in Beth-el-a biakna tau tungah na bawl hih nate a genkhol Pasian’ mipa’ han ahi hi,” ci-in a gen uh hi. Tua ciangin amah in, “Amah tuaci omsak un; kuamah in ama guhte khin kei un,” a ci hi. Tua ahih ciangin amaute in Samaria panin hong paikhia kamsangpa’ guhte tawh, ama guhte tuaci omsak uh hi. Tua ciangin Israel kumpite in a bawlsa, Topa a hehsakna uh ahi Samaria khuapite sunga om mual tunga biakna munte khempeuh zong Josiah in lakhia hi; Beth-el a, a hihsa khempeuh mah bangin tuate tungah hih hi. Tua ciangin amah in tua lai-a a om, mual tunga biakna siampite khempeuh, biakna taute tungah that a, tuate tungah mihing guh hal hi. Tua ciangin amah Jerusalem ah ciahkik hi. Tua ciangin kumpipa in mi khempeuh thu pia a, “Hih thuciamna laibu sungah a kigelh mah bangin Topa na Pasian uh pahtawina-in Paisan Pawi bawl un,” a ci hi. Bang hang hiam cih leh Israelte thu a khen thukhente’ huna kipan hita leh, Israel kumpite ahih kei leh Judah kumpite’ hun sung khempeuhin tua bang Paisan Pawi kibawl ngei lo hi; ahih hangin Kumpi Josiah’ kum sawm-le-giatna kumin Jerusalem ah Topa adingin Paisan Pawi kibawl hi. Tua tham loin Topa ’ inn sungah siampi Hilkiah in a muh laibu sungah a kigelh thukham kammalte amah in a kipsak theih nadingin Judah gam sung leh Jerusalem a, a om vankahte, aisante, innsung pasiante, milimte leh a kihhuainate khempeuh Josiah in hemkhia hi. Ama hun ma-in, amah tawh a kibang, Moses’ thukham tawh kizui-in a lungsim khempeuh, a nuntakna khempeuh leh a thahatna khempeuh tawh Topa lamah a kihei kumpi om lo hi; ama nungah zong amah tawh a kibang khat zong hong khang lo hi. Manasseh in amah a phinna ahi hih phinnate khempeuh hangin Judah tungah ama hehna, a lauhuai hih hehna lian panin Topa kihei nai lo hi. Topa in, “Israel ka khinkhiat bangin ka muhna panin Judah zong ka khinkhia ding a, keimah in ka teelsa khuapi Jerusalem, leh ka min om ding hi, ka cihna inn ka paaikhia ding hi,” a ci hi. Tu-in Josiah’ gamtatna a om laite, leh a hih khempeuh, Judah Kumpite’ Khang Tangthu Laibu sungah kigelh hilo ahi hiam? Ama hun sungin Assiria kumpipa a huh dingin Eufrates gunah Izipt kumpipa Faro Neko kuanto hi. Amah khaktan dingin Kumpi Josiah kuan hi; tua ciangin Faro Neko in Josiah a muh ciangin Megiddo ah that hi. Tua ciangin ama nasemte in Megiddo panin a sisa-in leeng khat sungah amah pua-in Jerusalem ah ciahpih uh a, a hanah amah vui uh hi. Tua ciangin tua gam mite in Josiah’ tapa Jehoahaz la-in sathau nilh uh a, a pa’ tangin kumpi-in amah koih uh hi. Jehoahaz in uk ding a kipatin kum sawmnih-le-thum pha a, amah in Jerusalem ah kha thum sung uk hi. Ama nu’ min in Hamutal hi a, Libnah khuami Jeremiah’ tanu ahi hi. A pu a pate’ gamtatnasa khempeuh bangin amah in Topa muhna ah a sia gamta hi. Tua ciangin amah in Jerusalem a uk theih loh nadingin Faro Neko in Hamath gam sung Riblah khua-ah amah kol bulh a, tua gamte ama tungah ngun talen zakhat leh kham talen khat siah kipiasak hi. Tua ciangin Faro Neko in a pa Josiah’ tangin Josiah’ tapa Eliakim kumpi-in koih a, ama min Jehoiakim ci-in kheelsak hi. Ahih hangin amah in Jehoahaz paikhiatpih hi; amah Izipt tung a, tua lai-ah si hi. Tua ciangin Jehoiakim in a ngun leh a kham Faro tungah pia a, ahih hangin Faro’ thupiakna bangin tua sum a piak dingin a gam sung mite tungah amah in siah dong hi. Faro Neko tungah piak dingin amah in mi khempeuh tung panin a neihna uh tawh kizui-in a gam sung mite’ ngun leh kham dok hi. Jehoiakim in uk ding a kipatin kum sawmnih-le-nga pha a, amah in Jerusalem ah kum sawm-le-khat sung uk hi. Ama nu’ min in Zebidah hi a, Rumah khuami Padaiah’ tanu ahi hi. A pu a pate’ gamtatnasa khempeuh bangin Topa muhna ah amah a sia gamta hi. Ama hun sungin Babilon kumpipa Nebukhadnezzar hong kuanto a, Jehoiakim kum thum sung ama nasem suak hi; tua ciangin Jehoiakim in amah lehdo hi. Tua ciangin kamsangte ahi ama nasemte tung tawnin a gen Topa ’ thugenna bangin Judah a susia dingin ama lang khatah Topa in Khaldea mihonte, Siria mihonte, Moab mihonte leh Ammon mihonte sawl hi. Tu-in Jehoiakim’ sepna a om laite, leh a hih khempeuh, Judah Kumpite’ Khang Tangthu Laibu sungah kigelh hilo ahi hiam? Tua ahih ciangin a pate tawh Jehoiakim ihmu a, ama tangin a tapa Jehoiakhin in uk hi. Tua ciangin Babilon kumpipa in Izipt Lui panin Eufrates gun dong Izipt kumpipa’ neih khempeuh laksak khin ahih manin Izipt kumpipa a gam panin hong kuankhia kik nawn lo hi. Jehoiakhin kumpi a suahin kum sawm-le-giat pha a, amah in Jerusalem ah kha thum sung uk hi. Ama nu’ min in Nehusta hi a, Jerusalem khuami Elnathan’ tanu ahi hi. Amah in a pa’ gamtatnasa khempeuh bangin Topa muhna ah a sia gamta hi. Tua hun lai takin Babilon kumpipa Nebukhadnezzar Jerusalem ah hong kuanto a, tua khuapi ki-umcih hi. Ama nasemte in a umcih lai takin Babilon kumpipa Nebukhadnezzar tua khuapi ah hong tung hi: Amah in Jerusalem khempeuh, a ulian khempeuh leh a thahat a vanglian khempeuh, galmatin tulsawm, khutsiamte leh sikseekte khempeuh ciahpih hi; tua gama a zawngpente simloh kuamah om nawn lo hi. Amah in Babilon ah Jehoiakhin a ciahpih hi; kumpipa’ nu, kumpipa’ zite, ama nuai-ah a zaneite, leh tua gam sung ukpite, Jerusalem panin Babilon ah amah in galmatin la hi. Babilon kumpipa in a vekpi-in a thahat, galdo dingin a hoih ahi mi thahat khempeuh tulsagih, leh khutsiamte leh sikseekte tulkhat, galmatin Babilon ah paipih hi. Tua ciangin Babilon kumpipa in Jehoiakhin’ tangin ama pa’ sanggampa Mattaniah kumpi-in koih a, a min Zedekiah-in kheelsak hi. Zedekiah kumpi a suahin kum sawmnih-le-khat pha a, amah in Jerusalem ah kum sawm-le-khat sung uk hi. Ama nu’ min in Hamutal hi a, Libnah khuami Jeremiah’ tanu ahi hi. Jehoiakim’ gamtatnasa khempeuh bangin amah in Topa ’ muhna ah a sia gamta hi. Bang hang hiam cih leh Topa ’ hehna hangin ama kiang panin amaute a paihkhiatna zah dong dingin Jerusalem leh Judah tungah thu hong om hi. Tua ciangin Zedekiah in Babilon kumpipa lehdo hi. Tua ahih manin ama uk a kum kua-na, tua kum a kha sawmna, tua kha a ni sawm ni-in Babilon kumpipa Nebukhadnezzar a galkap khempeuh tawh Jerusalem a sim dingin hong pai-in tua khua umcih uh hi; tua ciangin amaute in a kimkotah umcih nading panmun bawl uh hi. Tua ahih ciangin Kumpi Zedekiah’ kum sawm-le-khatna kum dong tua khuapi ki-umcih hi. A kha lina a ni kua ni-in tua khuapi sungah kialpi nasia mahmah ahih manin tua gam mite’ ading an om lo hi. Tua ciangin khuapi kulh sulet uh hi; Khaldea mite khuapi kiimah a ompi mahin, kumpipa’ huan kiang lam kulhpi nih kikal kulh kongpi lampi zui-in kumpipa leh a galhang mi khempeuh zanin tai uh hi. Amaute Arabah lam manawhin pai uh hi. Ahih hangin Khaldea mite’ galkapte in kumpipa delh uh a, Jerikho zanglei-ah amah pha uh hi; tua ciangin a galkap khempeuh ama kiang panin kithehthang uh hi. Tua ciangin amaute in kumpipa man uh a, ama tungah thukhenna a pia, Riblah a, Babilon kumpipa kiangah amah paipih uh hi. Amaute in Zedekiah’ muhna ah a tapate thatin, Zedekiah’ mitte khelkhia uh a, amah kol bulhin Babilon ah paipih uh hi. A kha ngana, tua kha a ni sagih ni—Babilon kumpipa, Kumpi Nebukhadnezzar’ kum sawm-le-kuana kumin—Babilon kumpipa’ nasempa, amah a cingte a ukpa Nebuzaradan Jerusalem ah hong pai hi. Amah in Topa ’ inn, kumpipa’ inn leh Jerusalem khua sung inn khempeuh hal hi; inn lian khempeuh amah in haltum hi. Tua ciangin a cingte a ukpa tawh a om Khaldea mi galkapte khempeuh in Jerusalem kimkot a, kulhpi susia uh hi. Tua ciangin a cingte a ukpa Nebuzaradan in khuapi sungah a kinusia a om lai mite leh Babilon kumpipa a taisan mite, mi honpi a om lai teng khempeuh sal-in paipih khawm hi. Ahih hangin a cingte a ukpa in leenggui lote a en ding leh lo kho dingin tua gam mi a zawngpente pawlkhat nusia hi. Tua ciangin Topa ’ inn sungah a om sumngo khuampite, leh Topa ’ inn sungah a om a din’nate leh sumngo tuikuangpi Khaldea mite in satnen uh a, Babilon ah a sumngo pua uh hi. Tua ciangin amaute in beelte, kawbiate, taitehte leh paknamtui adingin pakante leh biakinn sung nasepna a, kizang sumngo nazatte khempeuh, vutluahnate zong, leh haite lakhia uh hi. A cingte a ukpa in kham a hite kham mahin la-in ngun a hite a ngun mahin la hi. Solomon in Topa ’ inn a, dinga a bawl khuampi nihte, tuikuangpi khat, leh a tun’nate, sumngo tawh kibawl hih nazatte khempeuh ahih leh tawi teh zawh ding hilo hi. Khuampi khat a san’na in tong sawm-le-giat hi a, tua tungah sumngo khuamluzepna khat om hi; khuamluzepna a san’na in tong thum ahi hi; sumngo tawh a kibawl ahi ngen banga kikalh simsiam leh mangkawlsingte khuamluzepna kimkotah om hi. A khuampi nihna in zong tua mah bangin, ngen banga kikalh simsiam tawh ahi hi. Tua ciangin a cingte a ukpa in siampi lianpi Seraiah, leh siampi nihna Zefaniah, leh kong a cing mi thumte la hi; tua ciangin khuapi panin galkapte a uk ngei ulian khat, leh khuapi sungah a om kumpipa’ thukuppihte mi nga la hi; tua ciangin gamsung mite a khawm galkapte a ukpa’ lai-atpa la hi; tua ciangin khuapi sungah a om tua gamsung mi sawmguk la hi. Tua ciangin a cingte a ukpa Nebuzaradan in amaute la-in Riblah a, Babilon kumpipa kiangah amaute paipih hi. Tua ciangin Babilon kumpipa in amaute vat a, Hamath gam sung Riblah ah amaute that hi. Tua ahih ciangin amau’ gam panin sal-in Judah mite kilakhia hi. Tua ciangin Judah gam sungah a om lai, Babilon kumpipa Nebukhadnezzar in a nusiatte tungah a uk dingin Shafan’ tapa Ahikam, a tapa Gedaliah amah in seh hi. Tu-in gamsunga om galkap a ukte leh a mite in Babilon kumpipa in a uk dingin Gedaliah a sehna thu a zak uh ciangin amaute a mite uh tawh Mizpah a, Gedaliah kiangah hong pai uh hi; tuate in Nethaniah’ tapa Ishmael, leh Kareah’ tapa Johanan, leh Netofah mi Tanhumeth’ tapa Seraiah, leh Ma-akath mi Ja-azaniah ahi uh hi. Tua ciangin Gedaliah in amaute leh a mite uh tungah kiciamin, “Khaldea mi uliante’ hangin lau kei un; gam sungah teengin, Babilon kumpipa’ na sem un, tua ciangin note’ adingin thu hong nuam ding hi,” a ci hi. Ahih hangin a kha sagihna sungin kumpi innkuan sung panin Elishama’ tapa Nethaniah, a tapa Ishmael mihing sawm tawh hong kuanin Gedaliah leh Mizpah ah amah tawh a om Judah mi leh Khaldea mite simin that hi. Tua ciangin a neu a lianin mi khempeuh, leh galkap a ukte dingkhia-in Izipt ah pai uh hi; bang hang hiam cih leh amaute in Khaldea mite kihta uh hi. Judah kumpipa Jehoiakhin thong sungah a om zawh kum sawmthum-le-sagihna kum, kha sawm-le-nihna, tua kha in sawmnih-le-sagih ni, Babilon kumpipa Evil-merodak in uk ding a kipat kumin, hehpihna tawh thong panin Judah kumpipa Jehoiakhin khah hi; amah in migitna kam tawh amah hopih a, Babilon sunga amah tawh a om kumpi a mat dangte khempeuh sangin a sangzaw-in amah pahtawi hi. Tua ahih ciangin Jehoiakhin in a thong puante suahkhia hi. Tua ciangin a nuntak sung ni simin kumpipa’ sabuai ah a manmanin an ne hi; tua ciangin ama ngah thuap dingin, amah a nuntak sung tawntung ni simin tanh khat, a manman a, ngahthuapna ama tungah kumpipa in pia hi. Adam’ ta Seth, Seth’ ta Enosh; Enosh’ ta Kenan, Kenan’ ta Mahalalel, Mahalalel’ ta Jared; Jared’ ta Enok, Enok’ ta Methuselah, Methuselah’ ta Lamek; Lamek’ ta Noah, Noah in tapa thum nei a, tuate in Shem, Ham leh Jafeth ahi uh hi. Jafeth’ tapate in: Gomer, Magog, Madai, Javan, Tubal, Meshek, leh Tiras ahi uh a, amau’ min pua-in minam piang ciat hi. Gomer’ suante in: Ashkenaz mite, Rifath mite, leh Togarmah mite ahi hi. Javan’ suante in: Elishah mite, Tarshish mite, Kittim mite leh Rodanim mite ahi uh hi. Ham’ tapate in: Kush, Izipt, Put, leh Kanaan ahi uh a, amau’ min pua-in minam piang ciat hi. Kush’ suante in: Seba mite, Havilah mite, Sabta mite, Raamah mite, leh Sabteka mite ahi uh hi. Raamah’ suante in: Sheba mite, leh Dedan mite ahi uh hi. Kush in Nimrod kici tapa khat nei hi; amah in leitungah a vanglian ding khatin hong kipan hi. Izipt in Lud mite, Anam mite, Lehab mite, Naftuh mite, Pathrus mite, Kasluh mite (Filistia mite’ hong pian’na), leh Kaftor mite’ pian’na pupi ahi hi. Kanaan in a tacil Sidon, leh Heth, leh Jubus mite, Amor mite, Girgash mite, Hiv mite, Arka mite, Sin mite, Arvad mite, Zemari mite, leh Hamath mite’ pian’napa ahi hi. Shem tapate in: Elam, Asshur, Arpakshad, Lud, Aram, Uz, Hul, Gether, leh Meshek ahi uh a, amau min pua-in minam piang ciat hi. Arpakshad in Shelah’ pa ahi hi; Shelah in Eber’ pa ahi hi. Eber sung pan a piang tapa nihte: khatpa’ min in Peleg ahi hi (bang hang hiam cih leh ama hunin gam kikhen hi), a sanggampa’ min in Joktan ahi hi. Joktan in Almodad mite, Shelef mite, Hazarmaveth mite, Jerah mite, Hadoram mite, Uzal mite, Diklah mite, Ebal mite, Abimael mite, Sheba mite, Ofir mite, Havilah mite, leh Jobab mite’ pian’napa ahi hi; hihte khempeuh in Joktan’ suante ahi uh hi. Shem, Arpakshad, Shelah; Eber, Peleg, Re-u, Serug, Nahor, Terah; tua ciangin Abraham a kici Abram ahi suk uh hi. Abraham’ tapate in: Isaak leh Ishmael ahi uh hi. Hihte in amau’ khangsimna ahi hi: Ishmael’ tacil in Nebaioth ahi hi; tua ciangin Kedar, Adbe-el, Mibsam, Mishma, Dumah, Massa, Hadad, Tema, Jetur, Nafish, leh Kedemah ahi uh hi. Hihte in Ishmael’ tapate ahi uh hi. Abraham’ zineu Keturah’ tapate: Zimran, Jokshan, Medan, Midian, Ishbak, leh Shuah ahi uh hi. Jokshan’ tapate in: Sheba leh Dedan ahi uh hi. Midian’ tapate in: Efah, Efer, Hanok, Abida, leh Elda-ah ahi uh hi. Hihte khempeuh in Keturah’ suan leh khakte ahi uh hi. Abraham in Isaak’ pa ahi hi. Isaak’ tapate in Esau’ leh Israel ahi uh hi. Esau’ tapate in: Elifaz, Re-u-el, Jeush, Jalam, leh Korah ahi uh hi. Elifaz’ tapate in: Teman, Omar, Zefi, Gatam, Kenaz, Timna leh Amalek ahi uh hi. Re-u-el’ tapate in: Nahath, Zerah, Shammah, leh Mizzah ahi uh hi. Seir’ tapate in: Lotan, Shobal, Zibeon, Anah, Dishon, Ezer, leh Dishan ahi uh hi. Lotan’ tapate in Hori leh Homan ahi uh hi; tua ciangin Lotan’ sanggamnu in Timna ahi hi. Shobal’ tapate in: Alian, Manahath, Ebal, Shefi, leh Onam ahi uh hi. Zebeon’ tapate in: Ai-ah leh Anah ahi uh hi. Anah’ tapa in Dishon ahi hi. Dishon’ tapate in: Hamran, Eshban, Ithran, leh Kheran ahi uh hi. Ezer’ tapate in: Bilhan, Za-avan, leh Ja-akan ahi uh hi. Dishon tapate in: Uz leh Aran ahi uh hi. Israelte tungah kumpi khatpeuh peuh in a uk ma-in Edom gam sungah a uk kumpite in hihte ahi uh hi: Beor’ tapa Bela hi a, ama khuapi min in Dinhabah ahi hi. Bela a sih ciangin ama tangin Bozrah khuami Zerah’ tapa Jobab in uk hi. Jobab a sih ciangin ama tangin Teman mite’ gam mi Husham in uk hi. Husham a sih ciangin Moab gam sungah Midian a zopa, Bedad’ tapa Hadad in ama tangin uk hi; ama khuapi min in Avith ahi hi. Hadad a sih ciangin ama tangin Masrekath khuami Samlah in uk hi. Samlah a sih ciangin ama tangin Eufrates gun gei-a om Rehoboth khuami Shawl in uk hi. Shawl a sih ciangin ama tangin Akbor’ tapa Baalhanan in uk hi. Baalhanan a sih ciangin ama tangin Hadad in uk hi; ama khuapi min in Pai hi a, ama zi’ min in Mehetabel hi a, Mezahab’ tanu ahi Matred’ tanu ahi hi. Tua ciangin Hadad si hi. Edom ukpite in: ukpi Timna, Aliah, Jetheth, Ohilibamath, Elah, Pinon, Kenaz, Teman, Mibzar, Magdiel, leh Iram ahi uh hi; hihte in Edom ukpite ahi uh hi. Israel’ tapate in: Reuben, Simeon, Levi, Judah, Issakhar, Zebulun, Dan, Josef, Benjamin, Naftali, Gad, leh Asher ahi uh hi. Judah’ tapate in: Er, Onan, leh Shelah ahi uh hi; hih thumte in Kanaan mi Bathshua tawh a neih ahi hi. Tu-in Judah’ tacil Er in Topa ’ muhna ah gilo a, tua ciangin T opa in amah that hi. A tapa’ zi Tamar in zong amah tawh Perez leh Zerah nei hi. Judah in a vekpi-in tapa nga nei hi. Perez tapate in: Hezron, leh Hamul ahi uh hi. Zeran’ tapate in: Zimri, Ethan, Heman, Kalkol, leh Dara, a vekpi-in nga pha uh hi. Karmi’ tapa in: A ki-ap nate-ah a khial, Israel a nawngkaisak Akhar ahi hi; tua ciangin Ethan’ tapa in Azariah ahi hi. Ama sung panin a suak Hezron’ tapate in: Jerahme-el, Ram, leh Khelubai ahi uh hi. Ram in Amminadab’ pa hi a, Amminadab in Judah tapate sung pan ulian Nahshon’ pa ahi hi. Nahshon in Salma’ pa, Salma in Boaz’ pa, Boaz in Obed’ pa, Obed in Jessi’ pa ahi hi. Jessi in a tacil Eliab, a nihna Abinadab, thumna Shimea, a lina Nethanel, a ngana Raddai, a gukna Ozem, a sagihna David’ pa ahi hi; amau’ sanggamnumeite in Zeru-iah leh Abigail ahi uh hi. Zeru-iah’ tapate in: Abishai, Joab leh Asahel, thum pha uh hi. Abigail in Amasa nei a, Amasa’ pa in Ishmael mi Jether ahi hi. Hezron’ tapa Kaleb in a zi Azubah leh Jerioth-te tawh ta nei hi; ama tapa in: Jesher, Shobab, leh Ardon ahi uh hi. Azubah a sih ciangin Kaleb in Efrath ten’pihin, tua nu in amah tawh Hur nei hi. Hur in Uri’ pa hi a, Uri in Bezalel’ pa ahi hi. Tua khit ciangin kum sawmguk a phak ciangin Hezron in a ten’pih Gilead’ pa Makhir’ tanu luppih hi; tua nu in amah tawh Segub nei hi; Segub in Jair’ pa hi a, Gilead gam sungah khuapi sawmnih-le-thum nei hi. Ahih hangin Geshur leh Aram in amaute tung panin Havvothjair khua Kenath leh a khuaneute, khua sawmguk la hi. Hihte khempeuh in Gilead’ pa Makhir’ suan leh khakte ahi uh hi. Hezron a sih khit ciangin Kaleb in a pa Hezron’ zi Efrath luppih a, tua nu in amah tawh Tekoa khuapi a sat Ashur nei hi. Hezron’ tacil Jerahme-el’ tapate in: A tacil Ram, Bunah, Oren, Ozem, leh Ahijah ahi uh hi. Jerahme-el in a zi dang khat zong nei a, a min in Atarah ahi hi; amah in Onam’ nu ahi hi. Jerahme-el’ tacil Ram’ tapate in: Maaz, Jamin, leh Eker ahi uh hi. Onam’ tapate in: Shammai leh Jada ahi uh hi. Shammai’ tapate in: Nadab leh Abishur ahi uh hi. Abishur’ zi min in Abihail hi a, tua nu in amah tawh Ahban leh Molid nei hi. Nadab’ tapate in: Seled leh Appaim ahi uh hi; Seled in ta nei loin si hi. Appaim’ tapa in Ishi ahi hi. Ishi’ tapa in Sheshan ahi hi. Sheshan’ tapa in Ahlai ahi hi. Tua ciangin Shammai’ sanggampa Jada’ tapate in: Jether leh Jonathan ahi uh hi; Jether in ta nei loin si hi. Jonathan’ tapate in: Peleth leh Zaza ahi uh hi. Hihte in Jerahme-el’ suan leh khakte ahi uh hi. Tu-in Sheshan in tapa nei loin tanu bek nei hi; ahih hangin Sheshan in Jarha min nei Izipt sila khat nei hi. Tua ahih ciangin Sheshan in a sila Jarha tungah a zi dingin a tanu pia hi; tuanu in Attai nei hi. Attai in Nathan’ pa hi a, Nathan in Zabab’ pa ahi hi. Zabab in Eflal’ pa hi a, Eflal in Obed’ pa hi hi. Obed in Jehu’ pa hi a, Jehu in Azariah’ pa ahi hi. Azariah in Helez’ pa hi a, Helez in Eleasah’ pa ahi hi. Eleasah in Sismai’ pa hi a, Sismai in Shallum’ pa ahi hi. Shallum in Jekamiah’ pa hi a, Jekamiah in Elishama pa ahi hi. Jerahme-el’ sanggampa Kaleb’ tapate in: Zif’ pa ahi a tacil Mareshah ahi hi. Mareshah’ tapa in Hebron ahi hi. Hebron’ tapate in: Korah, Tappuah, Rekem, leh Shema ahi uh hi. Shema in Raham’ pa hi a, Raham in Jorkean’ pa ahi hi; Rekem in Shammai’ pa ahi hi. Shammai’ tapa in Maon ahi hi; Maon in Bethzur’ pa ahi hi. Kaleb’ zineu Efah in Haran, Moza, leh Gazez nei hi; Haran in Gazez’ pa ahi hi. Jahdai’ tapate in: Regem, Jotham, Geshan, Pelet, Efah, leh Sha-af ahi uh hi. Kaleb’ zineu Ma-akah in Sheber leh Tirhanah nei hi. Tua ciangin tapa nih nei leuleu a, Madmannah khuapi a sat Sha-af, leh Makbenah khuapi leh Gibea khuapi a sat Sheva ahi uh hi. Kaleb in tanu khat zong nei a, a min Aksah ahi hi. Hihte in Kaleb’ suan leh khakte ahi uh hi. Kaleb’ zi Efrath’ tacil Hur’ tapate in: Kiriath-jearim khuapi a sat Shobal, Bethlehem khuapi a sat Salma, leh Bethgader khuapi a sat Haref ahi uh hi. Kiriath-jearim khuapi a sat Shobal in tapa nei hi: Haroeh leh Menuhoth mi a langte’ pian’na ahi hi. Tua ciang Kiriath-jearim khua sungah a teengte in: Ithri mite, Puth mite, Shumath mite, leh Mishrai mite ahi uh hi; hihte sung panin Zorah mite leh Estaol mite hong piang hi. Bethlehem khuapi a sat Salma’ suante in: Netofah mite, Atroth-bethjoab, leh Zorah mi ahi Manahath mite a lang ahi hi. Jabez-ah a teeng laithei minamte in: Tirath mite, Shimeath mite, leh Sukath mite ahi uh hi. Hihte in Rekhab minamte tawh a kiteeng Ken mite ahi uh hi. David sung panin Hebron ah a piang tapate in: Jezre-el mi Ahinoam tawh a neih a ta cil Ammon; Karmel numei Abigail tawh a neih a nihna Daniel, Geshur kumpipa Talmai’ tanu, a nu Ma-akah a hi a thumna Absalom; a nu Haggith ahi a lina Adonijah; Abital tawh a neih a ngana Shefatiah; a zi Eglah tawh a neih a gukna Ithream; amah in kum sagih leh kha guk sung a ukna Hebron ah ama sung panin guk suak hi. Tua ciangin amah in Jerusalem ah kum sawmthum-le-thum sung uk hi. Ama sung panin Jerusalem ah a suakte in: Shimea, Shibab, Nathan, leh Solomon, Ammiel’ tanu Bathsheba tawh a neih li pha uh hi; tua ciangin Ibhar, Elishama, Elifelet, Nogah, Nefeg, Jafia, Elishama, Eliada, leh Elifelet, kua pha uh hi. Hihte in, a zineute’ tapate sim lohin, David’ tapate ahi uh hi: Tamar a kici tanu khat zong nei hi. Solomon’ suan leh khakte in: Rehoboam, a tapa Abijah, a tapa Asa, a tapa Jehoshafat, a tapa Joram, a tapa Ahaziah, a tapa Joash, a tapa Amaziah, a tapa Azariah, a tapa Jotham, a tapa Ahaz, a tapa Hezekiah, a tapa Manasseh, a tapa Amon, a tapa Josiah ahi uh hi. Josiah’ tapate in: A tacil Johanan, a nihna Jehoiakim, a thumna Zedekiah, a lina Shallum ahi uh hi. Jehoiakim’ suan leh khakte in: A tapa Jekoniah leh Zedekiah ahi uh hi; Babilon ah sal a suak Jekoniah’ tapate in: A tapa Shealtiel, Malkhiram, Pedaiah, Shenazzar, Jekamiah, Hoshama, leh Nedabia ahi uh hi; Pedaiah’ tapate in: Zerubbabel leh Shimei ahi uh hi; Zerubbabel’ tapate in: Meshullam leh Hananiah hi a, Shelomith kici tanu khat zong nei hi; tua ciangin tapa dang Hashubah, Ohel, Berekiah, Hasadiah, leh Jushabhesed, nga nei lai hi. Hananiah’ tapate in: Pelatiah leh Jeshaiah, Refaiah, a tapa Arnan, a tapa Obadiah, a tapa Shekaniah ahi uh hi. Shekaniah in tapa khat leh tupa nga nei a, a tapa in Shemaiah ahi hi. Shemaiah tapate in: Hattush, Igal, Bariah, Neariah, leh Shafat, a vekin guk pha uh hi. Neariah’ tapate in: Elio-enai, Hizkiah, leh Azrikam, thum pha uh hi. Elio-enai’ tapate in: Hodaviah, Eliashib, Pelaiah, Akkub, Johanan, Delaiah, leh Anan, sagih pha uh hi. Judah’ tapate in: Perez, Hezron, Karmi, Hur, leh Shobal ahi uh hi. Shobal’ tapa Reajah in Jahath’ pa hi a, Jahath in Ahumai leh Lahad’ pa ahi hi. Hihte in Zorah khua a teeng minamte pu leh pate ahi uh hi. Tekoa khuapi a sat Ashur in zi nih, Helah leh Na-arah nei hi; Na-arah in amah tawh Ahuzzam, Hefer, Temeni, leh Ha-ahashtari nei hi. Hihte in Na-arah’ tapate ahi uh hi. Helah tawh a tapate in: Zerah, Izhar, leh Ethnan leh Koz ahi uh hi. Koz in Anub leh Zobehah pa hi a, Harum’ tapa Aharhel’ suante pupi ahi hi. Jabez a kici mi khat in a sanggamte sangin pahtawihuai zaw hi; a nu in, “Gimpi-in amah nei ka hih manin,” ci-in a min Jabez phuak hi. Jabez in Israel Pasian tungah thu ngen a, “Kei thupha hong pia-in ka gamgi hong keeksak in. Kei hong ompih in la, kei hong gimsak loh nadingin siatna panin hong kem in!” a ci hi. Tua ciangin Pasian in ama ngetna pia hi. Shuhah’ sanggampa Khelub in Mehir’ pa hi a, Mehir in Eshton’ pa ahi hi. Eshton in Bethrafa, Paseah, leh Tehinnah, tapa thum nei a, Tehinnah in Irnahash khuapi satpa ahi hi. Hih mite’ suan leh khakte, Rekah munah teeng uh hi. Kenaz’ tapate in: Othiel leh Seraiah ahi uh hi; Othniel’ tapate in: Hathath leh Meonothai ahi uh hi. Meonothai in Ofraih’ pa ahi hi; Seraiah in Joab’ pa hi a, Joab in Geharashim khuapi satpa ahi hi. Tua khua a teeng mite khutsiamte vive ahih manin tua min kiphuak hi. Jefunneh’ tapa Kaleb’ tapate in: Iru, Elah, Na-am ahi uh hi: Elah’ tapa in Kenaz ahi hi. Jehallelel’ tapate in: Zif, Zifah, Tiria, leh Asarel ahi uh hi. Hodiah in Naham’ sanggamnu ten’pih a, amau’ suante in Keilah khua-ah a teeng Garm mite leh Eshtemoa khua-ah a teeng Ma-akath minamte ahi uh hi. Shimon’ tapate in: Amnon, Rinnath, Benhanan, leh Tilon ahi uh hi. Ishi’ tapate in: Zoheth leh Benzoheth ahi uh hi. Judah’ tapa khat ahi Shelah’ tapate in: Lekah khuapi a sat Er, Mareshah khuapi a sat La-adah, leh Beth-ashbea khua-ah saihadial puan a gan minamte ahi uh hi: tua ciangin Jokim, leh Kozeba khuapi sungah a teeng mite; tua ciangin Joash leh Saraf hi uh a, amaute gel in Moab numeite ten’pihin Bethlehem khua ah teeng uh hi. (Hih pen tuanthu lui pekpek ahi hi.) Hihte in beelseekte hi a, Netaim khua leh Gederah khua ah a teengte ahi uh hi; ama na a sem dingin kumpipa tawh tua khuate ah teeng khawm uh hi. Simeon’ tapate in: Nemuel, Jamin, Jarib, Zerah, leh Shawl ahi uh hi; Shawl tapa Shallum, a tapa Mibsam, a tapa Mishma ahi uh hi. Mishma’ suante in A tapa Hammuel, a tapa Zakkur, a tapa Shimei ahi uh hi. Shimei in tapa sawm-le-guk leh tanu guk nei hi; ahih hangin a sanggamte in ta tampi nei lo uh a, Judah minamte a pun’ bangin Simeon minamte pung lo uh hi. Amaute Beersheba, Moladah, Hazarshual, Bilhah, Ezem, Tolad, Bethuel, Hormah, Ziklag, Bethmarkaboth, Hazarsusim, Bethbiri, leh Sha-ariam-ah teeng uh hi. Hihte in David’ uk hun mateng amaute’ khuapite ahi hi. Tua ciangin amau’ khuaneute in Etam, Ain, Rimmon, Tokhen, leh Ashan, khuapi nga, Baal ciang dong hih khuapite kiim-a om a khuaneute khempeuh tawh ahi hi. Hihte in amau’ ten’na hi a, amaute in khangsimna ciamtehna nei uh hi. Meshobab, Jamlek, Amaziah’ tapa Joshah, Joel, Asiel’ tapa Seraiah, a tapa Joshibiah, a tapa Jehu, Elio-enai, Ja-akobath, Jeshohaiah, Asa-iah, Adiel, Jesimiel, Benaiah, Shemaiah’ tapa Shimri, a tapa Jedaiah, a tapa Allon, a tapa Shifi’ tapa Ziza— a min-a a kilo hih mite in amau’ beh ciatah uliante hi uh a, amau’ beh ciat nakpi takin khang hi. A tuuhonte uh adingin lonona zong dingin kuam nisuahna lam pang, Gedor lutna lamah khual zin uh a, leihoih, lonona, leh gam zai-in, gamdai-in, a nopna mun mu uh hi; bang hang hiam cih leh tua lai-ah a teeng masate in Ham mite ahi uh hi. A min-in a kiciamteh hih mite, Judah kumpipa Hezekiah’ hun sungin hong pai-a, amau’ puanbukte leh tua lai-ah a om Meunim mite susia-in tu ni dongin amaute beisak uh a, amau’ tuuhonte’ adingin tua lai-ah lonona om ahih manin amau’ munah amaute teeng uh hi. Tua ciangin amaute pawl khat, Simeon mi zanga, Seir Mual-ah pai uh a, amaute in Ishi’ tapate Pelatiah, Neariah, Refaiah, leh Uzziel makai-in nei uh hi; amaute in Amalek mi a suakta a om laite susia uh a, tu ni dongin tua munah amaute teeng uh hi. Israel’ tacil Reuben’ tapate (amah in tacil ahih hangin amah in a pa’ zineute khat luppih ahih manin ama innluahza pen Israel’ tapa Josef tungah kipia a, tua ahih ciangin innluahza tawh kizui-in khangsimna ah amah kiciamteh lo hi; Judah in a sanggamte lakah a thahat suakin ama sung panin ulian khat a om hangin innluahza pen Josef’ aa ahi hi); Israel’ tacil Reuben’ tapate in: Hanok, Pallu, Hezron, leh Karmi ahi uh hi. Joel’ tapate in: A tapa Shemaiah, a tapa Gog, a tapa Shimei, a tapa Mikah, a tapa Reaiah, a tapa Baal, a tapa Be-erah hi a, Assiria kumpipa Tilgath-pilneser in amau’ minam makai Be-erah manin sal-in a puakkhiatpa ahi hi; amah in Reuben mite a ukpipa ahi hi. Tua ciangin amau’ khangsimna a kiciamteh ciangin a innkuan kuanin ama behte in: Ukpi Jeiel, Zekhariah, leh Joel mite beh sung panin Shema tapa Azaz, a tapa Bela ahi hi. Nebo leh Baalmeon ciang dong Aroer-ah a teeng uh hi. Gilead gam sungah amau’ bawngte khangin tampi pha ahih manin Eufrates gun hih lam pang sehnel gam lutna ciang dong nisuahna lamah zong amah teeng hi. Tua ciangin Saul’ hun lai-in amaute in Hagri mite do-in zo uh hi; tua ciangin Gilead nisuahna lam gam khempeuh-a amau’ puanbukte luahin a sungah teeng uh hi. Bashan gam Salekah dongah Reubente’ gal khatah a teeng Gad minamte in: Ukpi Joel, a zom Shafam, Janai leh Shafat in Bashan-ah beh makai ahi uh hi. Tua ciangin amau’ beh makai dangte in: Mikhael, Meshullam, Sheba, Jorai, Jakan, Zia, leh Eber, sagih pha uh hi. Hihte pen Buz’ tapa Jahdo, a tapa Jeshishai, a tapa Mikhael, a tapa Gilead, a tapa Joroah, a tapa Huri, tapa Abihail’ suante ahi uh hi; Guri’ tapa Abdiel’ tapa Ahi in amau’ behte sungah ukpi ahi hi; amaute Gilead gam sung, Bashan gam leh a khuapite sung, leh Sharon gam sung lonona a kiten’ theihna ciang dongah teeng uh hi. Hihte khempeuh Judah kumpi Jotham’ hun sung, leh Israel kumpi Jeroboam’ hun sungin khangsimna-ah kiciamteh hi. Reuben mite, Gad mite, leh Manasseh minam a langte in mi thahat, lum leh namsau kuahin thal a tawi, gal a siam, nasem dingin a baihsa-in a om mi tul sawmli leh tulli leh zasagih leh sawmguk nei hi. Amaute in Hagri mite, Jetur mite, Nafish mite, leh Nodab mite zo uh hi; amaute a do dingin huhna a ngah uh ciangin Hagri mite leh amau tawh a pawl khempeuhte amaute’ khut sungah kipia hi; bang hang hiam cih leh gal kidona sungah amaute in Pasian’ tungah ko uh a, amaute in amah muang ahih manin amah in amaute’ thuumna pia hi. Amaute in amau’ ganhingte mat sak uh hi: a kalaoh uh tul sawmnga, tuu tul zanih leh tul sawmnga, la tulnih, leh mi tul zakhat hing mat uh hi. Tua gal in Pasian’ gal ahih manin mi tampi tak kithatin puk hi. Tua ciangin amaute sal a suah dong uh amau’ munah teeng uh hi. Manasseh minam a langte gam sungah teeng uh hi; amaute Bashan panin Baalhermon, Senir, leh Hermon Mual tungah tam pha mahmah uh hi. Amau’ beh lutangte in: Efer, Ishi, Eliel, Azriel, Jeremiah, Hodaviah, leh Jahdiel, a thahat galhangte, mi minthangte, a beh lutangte ahi uh hi. Ahih hangin amaute in a pate uh Pasian’ thu palsat uh a, Pasian in amaute’ mai-ah a suksiat tua gam mite’ pasiante bia uh hi. Tua ahih ciangin Israel’ Pasian in Assiria kumpipa Pul’ lungsim, Tilgath-pilneser a kici Assiria kumpipa’ lungsim hansuah a, amah in amaute, Reuben mite, Gad mite, leh Manasseh minam a langte pua khia-in, amaute Halah, Habor, leh Gozan gun-ah paipihin tu ni dongin tua lai-ah om uh hi. Levi’ tapate in: Gershom, Kohath, leh Merari ahi uh hi. Kohath’ tapate in: Amram, Izhar, Hebron, leh Uzziel ahi uh hi. Amram’ tate in: Aaron, Moses, leh Miriam ahi uh hi. Aaron’ tapate in: Nadab, Abihu, Eleazar, leh Ithamar ahi uh hi, Eleazar suan leh khakte in: A tapa Finehas, a tapa Abishua, a tapa Bukki, a tapa Uzzi, a tapa Zerahiah, a tapa Meraioth, a tapa Amariah, a tapa Ahitub, a tapa Zadok, a tapa Ahima-az, a tapa Azariah, a tapa Johanan, leh a tapa Azariah, (Solomon in Jerusalem ah a lam inn sungah siampi a sempa) ahi hi. Azariah’ tapa Amariah, a tapa Ahitub, a tapa Zadok, a tapa Shallum, a tapa Hilkiah, a tapa Azariah, a tapa Seraiah, a tapa Jehozadak ahi hi; Topa in Nebukhadnezzar’ khut tawh Judah leh Jerusalem sal-in a mat ciangin Jehozadak salin pai hi. Levi’ tapate in: Gershom, Kohath, leh Merari ahi uh hi. Tua ciangin Gershom’ tapate in: Libni leh Shimei ahi uh hi. Kohath’ tapate in: Amram, Izhar, Hebron, leh Uzziel ahi uh hi. Merari tapate in: Mahli leh Mushi ahi uh hi. Hihte in amau’ beh tawh kizui-in Levi minamte ahi uh hi. Gershom sung pan: a tapa Libni, a tapa Jahath, a tapa Zimmah, a tapa Joah, a tapa Iddo, a tapa Zerah, a tapa Jeatherai ahi hi. Kohath’ suante in: a tapa Amminadab, a tapa Korah, a tapa Assir, a tapa Elkanah, a tapa Ebiasaf, a tapa Assir, a tapa Tahath, a tapa Uriel, a tapa Uzziah, leh a tapa Shawl ahi hi. Elkanah, tapate in: Amasai leh Ahimoth ahi hi. Ahimoth’ suante in: A tapa Elkanah, a tapa Zofai, a tapa Nahath, a tapa Eliab, a tapa Jeroham, a tapa Elkanah, a tapa Samuel ahi uh hi. Samuel tapa in: a tacil Joel, a nihna Abijah ahi uh hi. Merari’ suante in: Mahil, a tapa Libni, a tapa Shimei, a tapa Uzza, a tapa Shimea, a tapa Haggiah, leh a tapa Asaiah ahi uh hi. Topa ’ inn sungah thuciamna singkuang a tawlngak khit ciangin tua sungah lasak nasep a ukin David in a koih mite in hihte ahi uh hi. Solomon in Jerusalem ah Topa ’ inn a lam ciang dong amaute in kikhopna puanbuk ahi biakbuk mai-ah lasak na sem uh hi; amaute in a nasep uh a hunhun a banbanin, sem uh hi. Hih nasep a semte khangsimna in a nuai-a bang ahi hi. Kohath mite beh sung panin: Heman in la makaipi hi a, Joel’ tapa ahi hi. Heman khang simna in a pupi Israel lam manawhin kileh sim to hi. Heman a pa Joel, a pa Samuel, a pa Elkanah, a pa Jehoram, a pa Eliel, a pa Toah, a pa Zuf, a pa Elkanah, a pa Amasai a pa Elkanah, a pa Joel, a pa Azariah, a pa Zefaniah, a pa Tahath, a pa Assir, a pa Ebiasaf, a pa Korah, a pa Izhar, a pa Kohath, a pa Levi, a pa Israel, ahi hi. Asaf in lasa pawl a nihna a makaipa hi a, ama khangsimna a pupi Levi lam manawhin kileh simto hi. Tuate in: Asaf, a pa Berekhiah, a pa Shimea, a pa Mikhael, a pa Baaseiah, a pa Malkhijah, a pa Ethni, a pa Zerah, a pa Adaiah, a pa Ethan, a pa Zimmah, a pa Shimei, a pa Jahath, a pa Gershom, a pa Levi, ahi uh hi. Merari-te beh sung panin Ethan in lasa pawl a thumna a ukpa hi a, ama khang simna in a pupi Levi lam manawh in kileh simto hi. Tuate in: Ethan, a pa Kishi, a pa Abdi, a pa Malluk, a pa Hashabiah, a pa Amaziah, a pa Hilkiah, a pa Amzi, a pa Bani, a pa Shemer, a pa Mahli, a pa Mushi, a pa Merari, a pa Levi hi a, Levi mi a sanggamte uh Pasian’ inn biakbuk nasep dang khempeuh a sem dingin a kisehte ahi hi. Ahih hangin Aaron leh a tapate in Pasian’ nasem Moses’ thupiaksate khempeuh bangin siangtho pen mun nasepnate khempeuh leh Israel mite adingin kilemna a bawl dingin meihal biakna tau tung leh paknamtui biakna tau tungah piakna bawl uh hi. Aaron’ suan leh khakte in: Aaron a tapa Eleazar, a tapa Finehas, a tapa Abishua, a tapa Bukki, a tapa Uzzi, a tapa Zerahiah, a tapa Meraioth, a tapa Amariah, a tapa Ahitub, a tapa Zadok, a tapa Ahima-az ahi hi. Amau’ gamgi huam sungah amau’ ten’na tawh kizui-in amau’ omna munte in: Kohathte beh sung pan Aaron’ suante tungah a kipia, amau’ adingin a tanh uh om a, Judah gam sungah Hebron leh a kiim lononate amaute tungah pia uh a, ahih hangin khuapi lote leh a khuaneute Jefunneh’ tapa Kaleb tungah pia uh hi. Aaron’ suante tungah amaute in a piak bukna khuapite in: Hebron, Libnah a lonona gamte tawh, Jattir, Eshtemoa a lonona gamte tawh, Hilen a lonona gamte tawh, Debir a lonona gamte tawh, Ashan a lonona gamte tawh, leh Bethshemesh a lonona gamte tawh ahi hi; tua ciangin Benjamin minamte’ gam sung panin Geba a lonona gamte tawh, Alemeth a lonona gamte tawh, leh Anathoth a lonona gamte tawh ahi hi. Amau’ innkuan khempeuh’ khuapite in sawm-le-thum ahi hi. Kohath mi a om laite tungah aisaana tawh Manasseh minam a langte’ gam sung panin khuapi sawm kipia hi. Gershom-te beh tungah a innkuan-a kizui-in Issakhar-te’ gam, Asher-te’ gam, Naftali-te’ gam, leh Bashan-a om Manasseh-te’ gam sung panin khuapi sawm-le-thum kipia hi. Merari-te beh tungah a innkuan-a kizui-in Reuben-te’ gam, Gad-te’ gam, leh Zebulun-te’ gam sung panin khuapi sawm-le-nih kipia hi. Tua ahih ciangin Israel mite in hih bangin Levi mite tungah khuapite a lononate tawh pia uh hi. Amaute in Judahte’ gam, Simeonte’ gam, leh Benjaminte’ gam sung panin zong a min-a kilo hih khuapite amaute tungah pia uh hi. Tua ciangin Kohathte beh pawl khat in Efraim minamte gam sung panin amau’ gam khuapite ngah uh hi. Amaute tungah a kipia bukna khuapite in: Efraim mual tung gam sungah a om Shekhem a lonona gamte tawh, Gezer a lonona gamte tawh, Jokmean a lonona gamte tawh, Bethhoron a lonona gamte tawh, Aijalon a lonona gamte tawh, Gathrimmon a lonona gamte tawh, leh Manasseh minam a langte’ gam sung panin Aner a lonona gamte tawh, leh Bileam a lonona gamte tawh hi a, hihte in Kohathte beh a om laite’ ading ahi hi. Manasseh minam a langte gam sung panin Gershomte beh tungah a kipiate in: Bashan gam sunga Golan a lonona gamte tawh leh Astaroth a lonona gamte tawh ahi hi; tua ciangin Issakharte’ gam sung panin: Kedesh a lononte gamte tawh, Daberath a lonona gamte tawh, Ramoth a lonona gamte tawh, leh Anem a lonona gamte tawh ahi hi; Asherte’ gam sung panin: Mashal a lonona gamte tawh, Abdon a lonona gamte tawh, Hukok a lonona gamte tawh, leh Rehob a lonona gamte tawh ahi hi; tua Naftali-te’ gam sung panin: Galile gam sunga om Kedesh a lonona gamte tawh, Hammon a lonona gamte tawh, leh Kiriathaim a lonona gamte tawh ahi hi. Merari-te beh a om laite tungah Zebulunte’ gam sung panin a kipiate in: Rimmono a lonona gamte tawh, Tabor a lonona gamte tawh, Jordan nisuahna lam, Jerikho kiang Jordan gal khat sung pan: pawn-a om Bezer a lonona gamte tawh, Jahzah a lonona gamte tawh, Kedemoth a lonona gamte tawh, leh Mefa-ath a lonona gamte tawh ahi hi; tua ciangin Gad-te’ sung panin: Gilead gam-a om Ramoth a lonona gamte tawh, Mahanaim a lonona gamte tawh, Heshbon a lonona gamte tawh, leh Jazer a lonona gamte tawh ahi hi. Issakhar’ tapate in: Tola, Puah, Jashub, leh Shimron, li pha uh hi. Tola’ tapate in: Uzzi, Refaiah, Jeriel, Jahmai, Ibsam, leh Shemuel-te hi a, amau’ beh sung panin innkuan lutangte hi a, Tola-te beh in amau’ khangin a galhangte ahi uh hi. David’ hun lai takin mihing tul sawmnih leh tulnih leh zaguk pha hi. Uzzi’ tapa in Izrahiah ahi hi. Izrahiah leh a tapate in: Mikhael, Obadiah, Joel, leh Isshiah, mi nga, a vekpi-in ukpite ahi uh hi; amaute’ ban-ah a pate uh innkuan kuanin khang simna-ah a kiciamtehna tawh kizui-in galsim dingin galkap honte mi tul sawmthum leh tulguk om hi; bang hang hiam cih leh amaute in zi tampi leh tapa tampi nei uh hi; Issakhar’ minam sungah a om, khang simna ah a kiciamteh, a galhang a thahat amau beh mi a vekpi-in tul sawmgiat leh tul sagih ahi hi. Benjamin’ tapate in: Bela, Bekher, leh Jediael, thum pha uh hi. Bela’ tapate in: Ezbon, Uzzi, Uzziel, Jerimoth, leh Iri, nga pha uh a, amau beh sungah innkuan lutang, a thahat galhangte ahi uh hi; amau’ khangsimna a kiciamtehna-ah tul sawmnih leh tulnih leh sawmthum-le-li pha uh hi. Bekher’ tapate in: Zemirah, Joash, Eliezer, Elio-enai, Omri, Jeremoth, Abijah, Anathoth, leh Alemeth ahi uh hi. Hihte khempeuh in Bekher’ tapate ahi uh hi; amau’ khang tawh kizui-in a khangsimna a kiciamtehna ah, amau’ beh sungah innkuan lutang, a thahat a galhang mihing tul sawmnih leh zanih ahi hi. Jedial’ tapa in Bilhan ahi hi. Bilhan’ tapate in: Jeush, Benjamin, Ehud, Khena-anah, Zethan, Tarshish, leh Ahishar ahi uh hi. Hihte khempeuh in amau’ beh sungah innkuan lutang hi uh a, a thahat a galhang, Jediael’ suante gal dona-ah nasem dingin a baihsa-in a om mihing tulsawm leh tulsagih leh zanih pha uh hi. Tua ciangin Shuppim leh Huppim in zong hih minamte sung mah hi a, Dan in Hushim kici tapa khat nei hi. Naftali’ tapate in: Jahziel, Guni, Jezer, leh Shallum hi a, Bilhan sung pan-a piangte ahi uh hi. Manasseh’ tapate in: A zineu Aram numei tawh a neih Asriel leh Makhir ahi hi. Makhir in Gilead’ pa ahi hi. Tua ciangin Makhir in Huppim leh Shuppim ading zi la hi. Ama sanggamnu’ min in Ma-akah ahi hi. Makhir’ tapa a nihna’ min in Zelofehad ahi hi; Zelofehad in a tanu bek nei hi. Tua ciangin Makhir’ zi Ma-akah in tapa nih nei a, a min Peresh leh Sheresh ahi hi; tua ciangin Peresh’ tapate in Ulam leh Rakem ahi hi. Ulam’ tapa in Bedan ahi hi. Hihte in Manasseh’ tapa Makhir’ tapa Gilead’ suante ahi hi. Tua ciangin Gilead’ sanggamnu Hammolekheth in Ishhod, Abiezer, leh Mahlah nei hi. Shemida’ tapate in: Ahian, Shekhem, Likhi, leh Aniam ahi uh hi. Efraim’ suante in: A tapa Shethelah, a tapa Bered, a tapa Tahath, a tapa Eleadah, a tapa Tahath, a tapa Zabad, a tapa Shuthelah ahi hi. Efraim in tapa dang nih nei a, tuate in Ezer leh Elead ahi uh hi. Gath khua mite’ bawng sut dingin a kuan lai-in Gath mite in amau tegel na that uh hi. Tua ciangin a pa Efraim ni tampi sung kap a, amah hehnem dingin a sanggamte hong pai uh hi. Tua ciangin Efraim in a zi luppih a, amah gai-in tapa khat nei hi; ama inn sungah siatna tung ahih manin amah in a min Beriah a phuak hi. Ama tanu in She-erah hi a, Bethhoron nuainung leh a tungnung leh Uzzenerah khua a lamnu ahi hi. Tua ciangin Refah kici tapa khat nei a, ama suante in: Resef, a tapa Telah, a tapa Tahan, a tapa Ladan, a tapa Ammihud, a tapa Elishama, a tapa Mun, a tapa Joshua ahi hi. Amau’ neihsa gam leh a ten’nate uh in Beth-el leh a khuapite, leh nisuahna lamah Na-aran, leh nitumna lamah Gezer leh a khuapite, Shekhem leh a khuapite’ leh Azzah leh a khuapite ahi hi; Manasseh’ suante in Bethshean leh a khuapite, Ta-anak leh a khuapite, Megiddo leh a khuapite, Dor leh a khuapite uk uh hi. Hihte sungah Israel’ tapa Josef suante teeng uh hi. Asher’ tapate in: Imnah, Ishvah, Ishvi, Beriah, leh a sanggamnu uh Serah ahi hi. Beriah’ tapate in: Heber leh Malkhiel hi a, Malkhiel in Birzaith’ pa ahi hi. Heber in Jaflet, Shomer, Hotham, leh a sanggamnu uh Shua-te’ pa ahi hi. Jaflet’ tapate in: Pasak, Bimhal, leh Ashvath ahi uh hi. Hihte in Jaflet’ tapate ahi uh hi. A sanggampa Shomer’ tapate in: Rohgah, Jehubbath, leh Aram ahi uh hi. A sanggampa Hotham’ tapate in: Zofah, Imna, Shelesh, leh Amal ahi uh hi. Zofah’ suante in: Suah, Harnerfer, Shual, Beri, Imrah, Bezer, Hod, Shamma, Shilshah, Ithran, leh Be-era ahi uh hi. Jether’ suante in: Jefunneh, Pispa, leh Ara ahi uh hi. Ulla’ suante in: Arah, Hanniel, leh Rizia ahi uh hi. Hihte khempeuh in Asher’ suan, beh lutangte a kipakta, a thahat galhangte, uliante a ukte ahi uh hi. Gal sungah nasem dingin khangsimna ah a kiciamteh amau a phazah in mihing tul sawmnih leh tulguk ahi hi. Benjamin in a tacil Bela, a nihna Ashbel, a thumna Aharah, a lina Nohah, leh a ngana Rafa-te’ pa ahi hi. Bela’ tapate in: Addar, Gera, Abihud, Abishua, Na-aman, Ahoah, Gera, Shefufan, leh Huram, ahi uh hi. Ehud’ tapate in (amaute in Geba a, teeng leh lutangte hi uh a, amaute Mnanhath-ah galmatin kipua hi): Na-aman, Ahijah, leh Uzza leh Ahihub’ pa Heglam a kici Gera ahi uh hi. Shaharaim in a zite ahi Hushim leh Baara a mak khit ciangin Moab gam sungah tapate nei hi. Amah in a zikik Hodesh tawh a neih a tapate in: Jobab, Zibia, Mesha, Malkam, Jeuz, Sakhia, leh Mirmah ahi uh hi. Hihte in amau’ beh sungah innkuan lutangte ahi uh hi. Amah in Hushim tawh zong a neih a tapate in: Ahitub leh Elpa-al ahi uh hi. Elpa-al’ tapate in: Eber, Misham, leh Ono leh Lod a khuapite tawh a sat Shemed, leh Beriah leh Shema (Gath a, teengte a taisak Aijalon a, a teeng beh lutangte); leh Ahio, Shashak, leh Jeremoth ahi uh hi. Zebadiah, Arad, Eder, Makhael, Ishpah, leh Joha in Beriah’ tapate ahi uh hi. Zebadiah, Meshullum, Hizki, Heber, Ishmerai, Izliah, leh Jobab in Elpa-al’ suante ahi uh hi. Jakim, Zikri, Zabdi, Elienai, Zillethai, Eliel, Adaiah, Beraiah, leh Shimrath in Shimei’ suante ahi uh hi. Ishpan, Eber, Eliel, Abdon, Zikri, Hanan, Hananiah, Elam, Anthothijah, Ifdeiah, leh Penuel in Shashak’ suante ahi uh hi, Shamsherai, Shehariah, Athaliah, Ja-areshiah, Elijah, leh Zikri in Jehoham’ suante ahi uh hi. Hihte in amau’ khang tawh kizui-in beh lutangte, a ukpite ahi uh hi. Hihte Jerusalem ah teeng uh hi. Gibeon khuapi a satpa Jeiel in Gibeon ah teeng a, ama zi’ minin Ma-akah ahi hi. Ama tapa upa pen in: Abdon, tua ciangin Zur, Kish, Baal, Nadab, Gedor, Ahio, Zekher, leh Mikloth (amah in Shimeah’ pa) ahi hi. Tu-in amau’ suan leh khakte zong Jerusalem a, amau’ behte’ gal khatah amau’ behte mah tawh teeng uh hi. Ner in Kish’ pa, Kish in Saul’ pa ahi hi. Saul in Jonathan, Malkhishua, Abinadab leh Eshba-al’ pa ahi hi; tua ciangin Jonathan’ tapa in Meribba-al ahi hi; Meribba-al in Mikah’ pa ahi hi. Mikah’ tapate in: Pithon, Melek, Tarea, leh Ahaz ahi uh hi. Ahaz in Jehoaddah’ pa ahi hi; Jehoaddah in Alemeth, Azmaveth, leh Zimri’ pa ahi hi. Zimri in Moza’ pa ahi hi. Moza in Binea’ pa ahi hi; Binea’ tapa Rafah, a tapa Eleasah, a tapa Azel ahi hi. Azel in tapa guk nei a, hihte in amau’ min ahi hi. Azrikam, Bokheru, Ishmeal, Sheariah, Obadiah, leh Hanan ahi uh hi. Hihte khempeuh in Azel’ tapate ahi uh hi. Azel’ sanggampa Eshek’ tapate in: a tacil Ulam, a nihna Jeush, leh a thumna Elifelet ahi hi. Ulam’ tapate in a thahat galhangte, thaltawite, tapa tampi leh tupa tampi a neite hi a, mi za leh sawmnga pha uh hi. Hihte khempeuh in Benjamin minamte ahi hi. Tua ahih ciangin Israel khempeuh khangsimna ah kiciamteh hi; Israel Kumpite’ Laibu sungah hihte kigelh hi. Amau’ thuman’lohna hangin daan piakna-in Babilon ah salin Judah mite kipaipih hi. Tu-in amau’ neihsa amau’ khuapite’ sungah a teeng kik masate in Israel nautangte, siampite, Levi mite, leh biakinn nasemte ahi uh hi. Tua ciangin Judah, Benjamin, Efraim, leh Manasseh mi pawl khat Jerusalem ah teeng uh a, tuate in: Judah’ tapa Perez’ tapate sung panin Bani’ tapa Imri, a tapa Omri, a tapa Ammihud, a tapa Uthai in a makai ahi hi. Tua ciangin Judah’ tapa Shelah mite sung panin: Innkuan lutang Asaiah in a makai ahi hi. Judah’ tapa Zerah’ mite sung panin: Jeuel in a makai ahi hi. Judah minam sung panin innkuan zaguk leh sawmkua ahi hi. Benjamin mite sung panin: Hassenuah’ tapa Hovadiah, a tapa Meshullum, a tapa Sallu ahi hi. Tua ciangin Jehoram’ tapa Ibneiah, Mikri ta Uzzi, a tapa Elah, leh Ibnijah ta Reuel, a tapa Shefatiah, a tapa Meshullam ahi hi. Benjamin minamte sung panin innkuan za kua leh sawmnga-le-guk ahi hi. Hih min kilote khempeuhte in amau’ beh ciatah beh lutangte ahi uh hi. Siampite’ sung panin: Jedaiah, Jehoiarib, Jakhin, leh Pasian’ inn sung a ukpipa Ahitub’ tapa Marioth, a tapa Zadok, a tapa Meshullam, a tapa Hilkiah’ tapa Azariah: leh Malkhijah’ tapa Pashhur, a tapa Jehoram’ tapa Adaiah, leh Immer’ tapa Meshillemith, a tapa Meshullam, a tapa Jahzarah, a tapa Adiel’ tapa Ma-asai ahi hi; hihte banah amau’ behte, a beh lutangte, Pasian’ innah nasep nadingin a siam mahmah mihing tulkhat leh zasagih leh sawmguk ahi hi. Levi mite sung panin: Marari’ tapate sung pan Hashabiah, a tapa Azikam, a tapa Hasshub’ tapa Shemaiah; leh Bakbakkar, Heresh, Galal, leh Asaf tapa Zikri, a tapa Mika’ tapa Mattaniah; leh Jeduthun’ tapa Galal, a tapa Shemaiah’ tapa Obadiah, leh Netofah mite’ khuaneute sungah a teeng Elkanah’ tapa Asa’ tapa Berekhiah ahi hi. Kulhkongpi cingte in: Shallum, Akkub, Talmon, leh Ahiman hi a, Shallum in amau’ makaipa ahi hi. Tu dongin Kumpipa’ Kulhkongpi nisuahna lam pangah a omte ahi uh hi. Hihte in Levi mite omna kongcingte ahi ngei uh hi. A pu a pate un lutna mun a cing, Topa ’ phual a ukte ahih mah bangin Korah’ tapa Ebiasaf, a tapa Kore’ tapa Shallum, leh a behte ahi Korah mite in nasepna a uk, puanbuk kong a cingte ahi uh hi. Eleazar’ tapa Finehas in a beisa hun sungah amaute in ukpa ahi hi; Topa in amah ompih hi. Meshellemiah tapa Zekhariah in kikhopna puanbuk lutna ah kongcingpa ahi hi. Sangkil-ah kongcing-in a kitel hih mite khempeuh in zanih leh sawm-le-nih ahi hi. Amaute a khuaneute uh-a khangsimna ah kiciamteh uh hi. David leh thu-mupa Samuel in amau’ panmun-ah amaute phut hi. Tua ahih ciangin amaute leh a suan a khakte un Topa ’ inn kulhkongpite a uk, puanbuk inn a cingte ahi uh hi. Kongpi cingte in a pang li, nisuahna, nitumna, leilu, leh leitaw lamah om uh hi; tua ciangin amau’ khuaneute sungah a om a behte uh hih mite tawh a om dingin a hun hunin ni sagih simin hong pai ding uh a kisam ahi hi; bang hang hiam cih leh Levi mi ahi kongpi a cing ukpi lite in inn sungte leh Pasian’ inn van manpha koihnate a uk ahi uh hi. Pasian’ inn kiimah amaute giak uh hi; bang hang hiam cih leh amaute tungah vilna nasep leh zingsang simin kong a hon’ dingin nasep kiguan hi. Amaute pawlkhat in biakinn sunga kizang um-le-beelte uk uh hi; bang hang hiam cih leh tua nazatte hong kitumpih ciang hita leh a kilakkhiat ciang hita leh a mal zah a sim ding uh kisam hi. Amau adang pawl khatte tutphah sabuaite leh a kituam koih um-le-beel, an neelte, leenggahzute, sathaute, paknamtuite, leh a namtui nate zong a en dingin kiseh hi. Siampite’ ta adangte in a namtui nate hel dingin bawl uh a, tua ciangin Korah mi Shallum’ tacil, Levi mite lak pan Mattiah in biak nading moh pheengte bawl ding hi. Kohath mi amau’ behte pawlkhat in zong sabbath simin koih ding Ompihna Anlum uk uh hi. Tu-in hihte in lasate, Levi mi beh lutangte, nasep dangte panin pengin biakinn deite sungah a teengte ahi uh hi; bang hang hiam cih leh amaute in sun leh zanin na sem uh hi. Hihte in Jerusalem ah a teeng amau’ khang tawh kizui-in makaite, Levi mi beh lutangte ahi uh hi. Gibeon-ah Gibeon khuapi a satpa Jeiel teeng a, ama zi’ min in Ma-akah hi-in, a tapa upa pen in Abdon, tua ciangin Zur, Kish, Baal, Ner, Nadab, Gedor, Ahio, Zekhariah, leh Mikloth ahi hi; tua ciangin Mikloth in Shifeam’ pa ahi hi; amau’ suan leh khakte zong Jerusalem a, a behte uh gal khatah a behte uh tawh teeng uh hi. Ner in Kish’ pa, Kish in Saul’ pa ahi hi. Saul in Jonathan, Malkhishua, Abinadab, leh Eshbaal’ pa ahi hi; Jonathan’ tapa in Meribbaal ahi hi; Meribbaal in Mikah’ pa ahi hi. Mikah tapate in: Pithon, Melek, Tahrea, leh Ahaz ahi uh hi; Ahaz in Jarah’ pa hi a, Jarah in Alemeth, Azmaveth, leh Zimri’ pa ahi hi; Zimri in Moza’ pa ahi hi. Moza in Binea’ pa ahi hi; a tapa Refaiah, a tapa Eleash, a tapa Azel ahi hi. Azel in tapa guk nei a, amau’ minte in: Azrikam, Bokheru, Ishmael, Sheraiah, Obadiah, leh Hanan ahi uh hi; hihte in Azel’ tapate ahi uh hi. Tu-in Filistiate in Israel mite sim uh hi; Filistiate mai-ah Israel mite tai uh a, Gilboa Mual tungah tuk zeizai uh hi. Filistiate in Saul leh a tapate pha uh hi; tua ciangin Filistiate in Saul’ tapate Jonathan leh Abinadab leh Malkhishua that uh hi. Gal kidona in Saul neh mahmah a, thaltawite in amah pha hi; thaltawite in amah liamsak hi. Tua ciangin Saul in a galvan puapa kiangah, “Na namsau dok in la tua tawh kei hong sun let in, tua hi kei leh hih dawi bia mite hong pai-in kei hong khel bawl kha ding uh hi,” a ci hi. Ahih hangin a galvan puapa in hih ngam lo hi; bang hang hiam cih leh amah lau mahmah hi. Tua ahih ciangin Saul in ama namsau la-in tua tungah puk hi. A galvan puapa in Saul a sihna a muh ciangin amah zong ama namsau tungah pukin si hi. Tua bangin Saul si hi; amah leh a tapa thumte leh a innkuan khempeuh si khawm uh hi. Kuam sungah a om Israel mite khempeuh in galkapte tai khinin Saul leh a tapate a sihna a muh uh ciangin amaute in a khuapite uh nusia-in tai uh hi; tua ciangin Filistiate hong pai-in khuate sungah teeng uh hi. A zing ciangin, Filistiate in a kithatte’ nate a hawkkhia dingin hong pai ciangin Saul leh a tapate Gilboa Mual tungah a sihna mu uh hi. Tua ciangin amaute in ama nate hawkkhia in, a lutang leh a galhiam la uh a, a milimte uh leh mite kiangah hih thu thak a ko dingin Filistiate gam khempeuh ah kamtaite sawl uh hi. Amaute in amau’ pasian’ biakinn sungah ama galhiam koihin Dagon biakinn sungah ama lutang suang uh hi. Ahih hangin Jabeshgilead mi khempeuh in Saul tungah Filistiate’ hihsa thu khempeuh a zak uh ciangin a thahat mi khempeuh ding-in Saul’ luanghawm leh a tapate’ luanghawmte sut khia-in Jabesh ah paipih uh hi. Tua ciangin amaute in Jabesh a, tawsaw nuai-ah amaute’ guh vui uh a, ni sagih sung an tang uh hi. Tua ahih ciangin a thuman’lohna hangin Saul si hi; amah in Topa ’ thupiakna a zuih lohna, leh vankah khat thu dongin a lamlah ding a zon’na, leh Topa tung panin lamlahna a zon’ lohna ah Topa tungah a thuman lo ahi hi. Tua ahih ciangin Topa in amah that a, Jessi’ tapa David tungah kumpi gam hei hi. Tua ciangin Israel mi khempeuh David kiang Hebron ah kikhawm uh a, “En in, kote in nangma guh leh nangma sa ka hi uh hi. A hun beisa, Saul kumpi ahih sung nangawnin Israel a kuankhiatpih leh a ciahpih in nangmah na hi hi; Topa na Pasian in nangma kiangah, ‘Nangmah in ka mi Israelte a cingpa na hi ding a, ka mi Israelte tungah ulian na hi ding hi,’ hong ci hi,” a ci hi. Tua ahih ciangin Israel upate khempeuh kumpipa kiang Hebron ah hong pai uh hi; tua ciangin David in Topa mai Hebron ah amaute tawh thuciamna khat bawl a, Samuel’ tung tawnin Topa ’ thugen bangin amaute in Israel kumpi-in David sathau nilh uh hi. Tua ciangin Jebus mite a ten’na, Jebus a kici Jerusalem ah David leh Israel mi khempeuh hong pai uh hi. Jebus ah a teeng mite in David kiangah, “Hih lai-ah nang nong pai kei ding hi,” a ci uh hi. Ahi zongin David in David khuapi a kici Zion mun muanhuai la hi. David in, “Jebus mite a va sim masa peuhpeuh in ukpi leh ukpa hi ding hi,” a ci hi. Tua ciangin Zeruiah’ tapa Joab kuanto masa a, tua ahih ciangin amah in ukpi suak hi. Tua ciangin mun muanhuaina sungah David teeng hi; tua ahih ciangin tua khua in David khuapi kici hi. Tua ciangin amah in Millo panin a kualin khuapi lam hi; Joab in khuapi sung a om lai mun teng puahkik hi. Vanglianpen Topa in amah tawh om ahih manin David lian semsem hi. Tu-in hihte in Israel tawh kisai-in Topa ’ thugen bangin amah kumpi-in a bawl dingin Israel khempeuh tawh ama kumpi gam sungah amah nakpi takin a huh David’ mi a thahat a ukpite ahi hi. David’ mi a thahatte a kiciamtehna in: Hakmoni mi Jashobeam in mi thumte a ukpi ahi hi; amah in a teipi tawh mihing zathum do a, hun khat sungin that khin hi. Tua ciangin a thahat mihing thumte lak panin amah a zompa in Ahoah-te beh Dodo’ tapa Eleazar ahi hi. Filistiate galdo dingin a kikaihkhop lai takin amah in Pasdammin ah David tawh om hi. Tua lai-ah mangbuhham a dimna leitang khat om a, Filistiate kiang pan mite tai hi. Ahih hangin amah in tua leitang laizangah panmun la-in hu a, Filistiate that hi; tua ciangin Topa in zawhna lianpi tawh amaute honkhia hi. Refaim kuamah Filistia galkapte in giahphual a sat lai takun Adullam leihawm David kiang suangpi ah ukpi sawmthumte sung panin mihing thum paisuk uh hi. Tua hunin mun muanhuai sungah David om hi; Filistia khua cingte Bethlehem ah om uh hi. Tua ciangin David in, “Kulhkongpi gei-a Bethlehem tuikhuk panin mi khat in tui dawn ding kei hong pia leh!” ci-in lunggulhna tawh pau hi. Tua ciangin a thahat mihing thumte in Filistiate’ giahphual phulin kulhkongpi gei-a om Bethlehem tuikhuk panin tui tawi uh a, a tui la-in David kiangah paipih uh hi. Ahih hangin David in tua tui dawn lo hi; amah in Topa adingin sung a, “Ka Pasian’ mai-ah hih bangin ka gamta het kei ding hi. Hih mihingte’ nuntakna sisan tui dawn ding ka hi hiam? Bang hang hiam cih leh amaute in a nuntakna uh khamin kei kiangah hong paipih uh hi,” a ci hi. Tua ahih ciangin amah in dawn lo hi. A thahat mi thumte in hih nate sem uh hi. Tu-in Joab’ sanggampa Abishai in sawmthumte lakah a ukpi ahi hi. Amah in a teipi tawh mihing zathum doin amaute that a, mihing thumte’ banah min khat ngah hi. Amah in mihing sawmthumte sung panin a minthang pen hi a, amaute a ukpa suak hi; ahih hangin amah in mihing thumte ban lo hi. Jehoiada’ tapa Benaiah in Kabze-el khuami gal a hang, na lianpite a sempa ahi hi; amah in Moab galhang minih vat lum hi. Amah zong paisukin vuk a kiat ni khatin leihawm sunga om humpinelkai khat that hi. Amah in Izipt mi khat, a tha gol, pi sagih leh a lang a sang khat that hi. Iziptpa in a khut sungah siamgante’ siamlawngpi cia a pha teipi khat nei hi; ahih hangin Benaiah ciangkhut khat tawh ama kiangah paisuk a, Iziptpa’ khut sung panin a teipi sut khia-in ama teipi mah tawh amah that hi. Jehoiada’ tapa Benaiah in hih nate sem a, a thahat mi thumte banah min khat ngah hi. Mihing sawmthumte lakah amah minthang a, ahih hangin amah in mi thumte ban lo hi. Tua ciangin David in amah a cingte a ukin koih hi. Galkap lak panin a thahat mite in Joab’ sanggampa Asahel, Bethlehem khuami Dodo’ tapa Elhaan, Harod khuami Shammoth, Pelon khuami Helez, Tekoa khuami Ikkesh’ tapa Ira, Anathoth khuami Abiezer, Hushah khuami Sibbekai, Ahoah-te beh Ilai, Netofah khuami Maharai, Netofah khuami Baanah’ tapa Heled, Benjamin mite sung panin Gibeah khuami Ribai’ tapa Ithai, Pirathon khuami Benaiah, Ga-ash mualkuam mi Hurai, Betharabah khuami Abiel, Baharum khuami Azmaveth, Sha-albon khuami Eliahba, Gizon khuami Hashem, Harar khuami Shagee’ tapa Jonathan, Harar khuami Sakher’ tapa Ahiam, Ur’ tapa Elifal, Mekherah khuami Hefer, Pelon khuami Ahijah, Karmel khuami Hezro, Ezbai’ tapa Na-arai, Nathan’ sanggampa Joel, Hagri’ tapa Mibhar, Ammon mi Zelek, Zeruiah’ tapa Joab’ galhiam puapa Be-eroth khuami Naharai, Ithri mi Ira, Ithri mi Gareb, Hit mi Uriah, Ahlai’ tapa Zabad, Reuben mite’ makai khat ahi, Reuben mi Shiza’ tapa Adina, leh amah tawh mihing sawmthum, Ma-akah’ tapa Hanan, leh Mithni mi Joshafat, Ashterath khuami Uzzia, Aroer khuami Hotham’ tapate Shama leh Jeiel, Shimri’ tapa Jediael, leh Tiz khuami a sanggampa Joha, Mahavah khuami Eliel, leh Elna-am’ tapate Jeribai leh Joshaviah, leh Moab mi Ithmah, Zobah khuami Eliel, Obed, leh Jaasiel ahi uh hi. Tu-in Kish’ tapa Saul’ hangin a ut utin a tat theih loh lai takin Ziklag a, David kiangah hong paite in hih mite ahi hi; gal sungah amah a huh a thahatte lakah amaute a kihelte ahi uh hi. Amaute in thaltawite hi uh a, tak lam khut ahi a, vei lam khut tawh ahi zongin thaltang leh suangte lawn thei uh hi: amaute in Saul’ behte Benjamin mi ahi uh hi. A ukpi in Ahiezer hi a, tua ciangin Joash ahi hi, amaute gel in Gibeah khuami Shema-ah’ tapate ahi uh hi; Azamveth’ tapate Jeziel leh Pelet zong ahi hi; Anathoth khuami Berakah leh Jehu zong ahi hi. Gibeon khuami Ishmaiah in mihing sawmthumte lakah a thahatpa leh sawmthumte a makaipa ahi hi; Gederah khuami Jeremiah, Jahaziel, Johanan, leh Jozabad zong ahi uh hi; Harif mi Eluzai, Jerimoth, Bealiah, Shemariah, leh Shefatiah zong ahi uh hi; Korah mi Elkanah, Issaiah, Azarel, Joezer, leh Jashobeam zong ahi uh hi. Tua ciangin Gedor khuami Jeroham tapate Joelah leh Zebadiah ahi uh hi. Gad minam sung panin gamlak a, mun muanhuai a, David kiangah a thahat a siam galhangte, lum leh teipi zat a siam, a maitang uh humpinelkai maitang bangin, mual tunga om sakhi bangin a manlang mi hong paite in: A ukpi Ezer, a nihna Obadiah, a thumna Eliab, a lina Mishamannah, a ngana Jeremiah, a gukna Attai, a sagihna Eliel, a giatna Johanan, a kuana Elzabad, a sawmna Jeremiah, a sawm-le-khatna Makbannai ahi uh hi. Hih Gad mite in galkap uliante hi a, a neuzawte in zakhat val, a golzawte in tulkhat val uk uh hi. Hihte in Jordan a piau khempeuh a dimlet laitak kha masa sungin Jordan kantanin kuam sunga om mite nisuahna lam leh nitumna lamah a taisak mite ahi uh hi. Tua ciangin Benjamin mi leh Judah mi pawlkhat David kiang mun muanhuai ah hong pai uh hi. Amaute dawntuah dingin David pai khia-in amaute kiangah, “Kei kiangah kilawmtatna tawh keimah huh dingin hong pai na hih uh leh note tawh ka lungsim kihual khawm ding hi; ahih hangin keimah in bangmah khialhna nei lo napi-in ka langte tungah kei a lehhek dingin hong pai na hih uh leh, i pu i pate’ Pasian in thei hen la, note hong tai hen,” a ci hi. Tua ciangin mihing sawmthum a ukpipa Amasai tungah Pasian Kha Siangtho hong tung a, amah in, “Kote in nangma’ aa hi ung, David aw; nang tawh om ung, Jessi’ tapa aw! Nopna, nopna nang tungah om hen la, nang hong huhte tungah nopna om ta hen! Bang hang hiam cih leh na Pasian in nang hong huh hi,” a ci hi. Tua ciangin David in amaute sang a, ama galkap uliante-in bawl hi. Saul a do dingin Filistiate tawh David a kuan lai takin Manasseh mi pawlkhat tai-in David beel hi. (Ahi zongin David in Filistiate huh thei lo hi; bang hang hiam cih leh Filistiate a ukte in thu kikupna khat nei uh a, “Eite’ makaite’ siat nadingin a topa Saul kiangah David tai ding hi,” ci-in amah sawl khia uh hi.) David Ziklag ah a pai lai takin Manasseh sung panin tai-in amah a beelte in: Adnah, Jozabad, Jediael, Mikhael, Jozabad, Elihu, leh Zillethai, Manasseh sungah mi a tul-in a ukte ahi uh hi. Amaute in mi’ na a sut thei mite panin David huh uh hi; bang hang hiam cih leh amaute in a thahat a vanglian mi hi uh a, galkap sungah a ukte ahi uh hi. Pasian’ galkap hon bangin galkap hon tampi a phak dongin a ni ni-in David huh dingin mi hong pai pai hi. Hihte in Topa ’ thugen bangin Saul’ kumpi gam ama tungah a hei dingin Hebron a, David kiangah a pai galkap a khen phazah ahi uh hi. Judah mi lum leh tei a pua galkap tulguk leh zagiat ahi hi. Simeon mite sung panin galdo dingin a thahat a vanglian mihing tulsagih leh zakhat ahi hi. Levi mite sung panin tulli leh zaguk ahi hi. Aaron’ suante ulian Jehoiada, leh amah tawh mi tulthum leh zasagih ahi hi. A thahat a vanglian a khangto Zadok, leh ama beh sung panin galkap a ukte mi sawmnih-le-nih ahi hi. Tua hun ciang dong mi a tamzaw Saul tawh a kipawl, Saul’ behte ahi Benjamin mite sung panin mihing tulthum ahi hi. Efraim mite sung panin a thahat a vanglian, amau’ beh sungah a minthang mi tul sawmnih leh zagiat ahi hi. Manasseh minam a lang sung panin, hong pai-in David kumpi-in a bawl dingin a min a kilo mihing tulsawm leh tulgiat ahi hi. Issakhar sung panin Israel in bang a sep dingin kilawm cih a thei, hun pai zia a thei ukpi zanih leh amau’ ukna nuai-ah a om amau’ behte khempeuh ahi hi. Zebulun sung panin David huh dingin lungsim a kikhat, hun khempeuh ah gal a kap thei galdo nadingin galhiam khempeuh a nei mihing tul sawmnga ahi hi. Naftali sung galkap a ukte tulkhat leh amaute tawh a om lum leh tei a tawi mihing tul sawmthum leh tulsagih ahi hi. Dan mite sung panin gal do dingin a kitawi mihing tul sawmnih leh tulgiat leh zaguk ahi hi. Asher sung panin galdo dingin a baihsa-in a om hun khempeuhah gal a kap thei mihing tul sawmli ahi hi. Jordan gal khat a, om Reuben mite leh Gad mite leh Manasseh minam a langte sung panin galhiam khempeuh tawh a kithawi mihing tul zakhat leh tul sawmnih ahi hi. Galkap mi ahi; galsim ding a kithawi hih mite khempeuh, Israel tungah David kumpi-in koih ding ngaihsutna takpi tawh Hebron ah hong pai uh hi; tua mah bangin Israel a om laite khempeuh in zong David kumpi-in a bawl ding uh ngaihsutna kikhat uh hi. A sanggamte un amaute’ adingin na vaihawm khol uh ahih manin amaute tua lai-ah David tawh nithum sung an ne tui dawnin omkhawm uh hi. Israel sungah lungdamna om ahih manin a vengte uh Issakhar leh Zebulun leh Naftali ciang dong panin zong hong pai-in late leh kalaote leh la-sakolte leh bawngtalte tawh an hong pua-in, an tampi tak, thei mohte, leenggahkeu bawkte, leh leenggahzu leh sathau, bawngtalte leh tuute hong puak uh hi. David in a tul-a ukte leh a za-a ukte leh makai khempeuh tawh kikupna khat nei hi. Tua ciangin David in Israel a kikhawm khempeuhte kiangah, “Note in kilawm na sak uh a, Topa i Pasian’ deihna ahih leh, amaute eite kiangah hong pai khop theih nadingun Israel gam sungah a om lai i sanggamte leh lonona gam a nei khuapi sunga om siampite leh Levi mite kiangah mi sawl ni. Tua ciangin thuciamna singkuang eite kiangah la kik ni; bang hang hiam cih leh Saul’ hun lai-in i don kei hi,” a ci hi. Tua thu mi khempeuh in hoih sa ahih manin tua bangin hih ding a kikhawm khempeuh thukim uh hi. Tua ahih ciangin Kiriath-jearim panin Pasian’ thuciamna singkuang a ciahpih dingin David in Izipt gam Shihor lui panin Hamath lutna ciang dong Israel khempeuh khawm hi. Tua ciangin David leh Israel khempeuh, kherubte tungah a tu Topa ’ min tawh a kilo Pasian’ thuciamna singkuang a paipih to dingin, Kiriath-jearim a kici Baalah ah paito uh hi. Amaute in Abinadab’ inn panin leeng thak khat tungah Pasian’ thuciamna singkuang pua uh a, Uzza leh Ahio in leeng hawl uh hi. Tua ciangin David leh Israel khempeuh in Pasian’ mai-ah la leh laiza lasakna leh harp lasakna leh khuangneute leh daltuahte leh peengkulte leh a tha neih zah uh tawh gualnopna bawl uh hi. Amaute Khido’ ancilna phual a tun’ uh ciangin bawngtalte muktu ahih manin Uzza in thuciamna singkuang len dingin a khut va zan kha hi. Tua ciangin Uzza tungah Topa heh hi; amah in a khut tawh thuciamna singkuang su-kha ahih manin Topa in amah vat hi; tua ciangin Pasian’ mai tua lai-ah amah si hi. Uzza tungah Topa hehin daan pia ahih manin David zong a heh suak hi; tua mun in tu ni dongin Perez-uzza kici hi. Tua ni-in David in Pasian kihta hi; amah in, “Pasian’ thuciamna singkuang kei kiang innah bangci ciahpih theih ding ka hi hiam?” a ci hi. Tua ahih ciangin David in a inn David khuapi ah thuciamna singkuang ciahpih lo a, Gath mi Obededom’ innah va koih hi. Tua ciangin Pasian’ thuciamna singkuang Obededom’ innkuan tawh kha thum sung om hi; Topa in Obededom’ innkuan leh a neih khempeuh thupha pia hi. Tua ciangin Tai-ar kumpipa Hiram in David kiangah kamtaite leh taamtaak singte, ama adingin inn khat a lamsak dingin lei-le-suang inn lam siamte leh khutsiamte zong puak hi. Tua ciangin David in Israelte tungah kumpi-in Topa in amah a kipsak khitna leh ama mi Israelte’ hangin ama kumpigam nakpi takin a lianin a kibawlna phawktel hi. David in Jerusalem ah zi nei thuahin tapate leh tanute nei hi. Jerusalem ah a neih a tate’ min in: Shammua, Shobab, Nathan, Solomon, Ibhar, Elishua, Elpelet, Nogah, Nefeg, Jafia, Elishama, Beel-i-ada, leh Elifelet ahi uh hi. Israel khempeuh tungah kumpi-in David sathau a kinilhna thu Filistiate in a zak uh ciangin David zong dingin Filistiate khempeuh kuanto uh hi; David in tua thu za-in amaute do dingin kuankhia hi. Tu-in Filistiate hong pai-in Refaim kuam sung luh uh hi. Tua ciangin David in Pasian thu dong a, “Filistiate doin ka kuanto ding hiam? Keima khut sungah amaute nong pia ding hiam?” a ci hi. Tua ciangin Topa in ama kiangah, “Kuanto in, nangma khut sungah amaute kong pia ding hi,” a ci hi. Tua ciangin Baalperazim ah David paito a, amah in tua lai-ah amaute zo hi; tua ciangin David in, “Tuikhang in a phulkhap bangin Pasian in keima khut tawh ka galte phulkham hi,” a ci hi. Tua ahih ciangin tua mun a min in Baalperazim kici hi. Filistiate in tua lai-ah a pasiante uh nusia uh a, David’ thupiakna tawh tuate mei sungah kihal hi. Tua ciangin Filistiate in kuam sung luh kik lai uh hi. David in Pasian thu a dot kik ciangin Pasian in ama kiangah, “Amaute’ nungah na kuanto kei ding hi; kual pai in la lungli kungte gal khat lam panin amaute hih in. Lungli kungte’ dawnah kalsuan huging na zak ciangin galsim dingin pai in; bang hang hiam cih leh Filistia galkapte a vat dingin nangma mai-ah Pasian kuan khin hi,” a ci hi. Pasian in amah a thupiak bangin David gamta a, amaute in Gibeon panin Gezer ciang dong Filistia galkapte vat gawp uh hi. Tua ciangin David minthan’na in gam khempeuh zel a, Topa in minam khempeuh tungah amah kikihtakna tungsak hi. David in ama adingin David khuapi sungah innte lam hi; amah in Pasian’ thuciamna singkuang’ adingin mun khat bawlin puanbuk khat lamsak hi. Tua ciangin David in, Topa ’ thuciamna singkuang a pua ding leh ama na a sem tawntung dingin Topa in amaute teel ahih manin Levi mite sim loh kuamah in Pasian’ thuciamna singkuang pua thei lo ding hi,” a ci hi. Tua ciangin amah in a bawlsa, ama om nading munah Topa ’ thuciamna singkuang a paipih to dingin David in Jerusalem ah Israel khempeuh khawm hi. Tua ciangin David in Aaron’ suante leh Levi mi a khopte in: Kohath-te beh sung panin a ukpi Uriel, a behte za leh sawmnih tawh ahi hi; Merari-te beh sung panin a ukpi Asaiah, a behte zanih leh sawmnih tawh ahi hi; Gershom-te beh sung panin a ukpi Joel, a behte za leh sawmthum tawh ahi hi; Elizafan-te beh sung panin a ukpi Shemaiah, a behte zanih tawh ahi hi; Hebron-te beh sung panin a ukpi Eliel, a behte sawmgiat tawh ahi hi; Uzziel-te beh sung panin a ukpi Amminadab, a behte za leh sawm-le-nih tawh ahi hi. Tua ciangin David in siampite Zadok leh Abiathar, leh Levi mite Uriel, Asaiah, Joel, Shemaiah, Eliel, leh Amminadab sam a, amaute kiangah: Note in Levi mite beh lutangte na hi uh hi; ama adingin ka bawlsakna munah Israel Pasian, Topa thuciamna singkuang na paipih toh theih nadingun note leh na Levi mipihte uh nomau mah kisiansuah tawm un. A masa lai-in no Levi mite na om kei uh a, a kisehsa bang danin kem lo i hih manin eite tungah Topa i Pasian hong hehin daan hong pia hi, a ci hi. Tua ahih ciangin Israel Pasian, Topa ’ thuciamna singkuang a paipih to dingin siampite leh Levi mite amau mah kisiansuah tawm uh hi. Tua ciangin Topa ’ kamgenna tawh kizui-in Moses’ thupiak bangin Levi mite in a liangko uh tungah zawlte tawh Topa ’ thuciamna singkuang pua uh hi. Lungdamna aw gin’sak nadingin, la sakna nate, harp lasakna leh laiza lasaknate leh daltuahte nakpi takin tumin la a sa dingin Levi ukpite in a mipihte uh a seh nading David in thu pia hi. Tua ahih ciangin Levi mite in Joel’ tapa Heman seh uh hi; tua ciangin a behte sung panin Berekhiah’ tapa Asaf; Merari minam sung panin a behte uh Kushaiah’ tapa Ethan; tua ciangin amaute tawh pawl nihna-in a behte uh Zekhariah Ja-aziel, Shemiramoth, Jehiel, Unni, Eliab, Banaiah, Maaseiah, Mattithiah, Elifelehu, leh Mikneiah, leh kongcingte Obededom leh Jeiel seh uh hi. Lasate Heman, Asaf, leh Ethan-te in sumngo daltuahte a tum ding ahi uh hi; Zekhariah, Aziel, Shemiramoth, Hehiel, Unni, Eliab, Ma-asseiah, leh Benaiah-te in a paisuak-aw-in harp lasaknate a tum ding uh ahi hi; ahih hangin Mattihiah, Elifelehu, Mikneiah, Obededom, Jeiel, leh Azaziah-te in laiza lasaknate a un-aw-in makai ding ahi uh hi. Levi mite sungah la makai Khenaniah in la uk ding hi; bang hang hiam cih leh amah in thei hi. Berekhiah leh Elkanah-te in thuciamna singkuang ading kongcingte hi ding uh hi. Siampite Shebaniah, Joshafat, Nethanel, Amasai, Zekhariah, Benaiah, leh Eliezer-te in Pasian’ thuciamna singkuang mai-ah peengkulte tum ding uh hi. Obededom leh Jehiah-te zong thuciamna singkuang’ adingin kongcingte hi ding uh hi. Tua ahih ciangin David leh Israel upate, leh a tul-a a ukte, Obededom’ inn panin lungdamna tawh Topa ’ thuciamna singkuang a paipih to dingin pai uh hi. Pasian in Topa ’ thuciamna singkuang a pua Levi mite huh ahih manin amaute in bawngtal sagih leh tuutal sagih biakna-in pia uh hi. David in saihadial puan tualpi silh a, tua mah bangin thuciamna singkuang a pua Levi mite khempeuh, leh lasate, leh lasate a uk Khenaniah-te in zong silh uh hi; tua ciangin David in siampi puan khat silh hi. Tua ahih ciangin Israel khempeuh in sakite leh peengkulte, leh daltuahte’ awging tawh kizui-in otna tawh Topa ’ thuciamna singkuang paipih to uh a, harp lasaknate leh laiza lasaknate tawh nakpi takin la sa uh hi. Topa ’ thuciamna singkuang David khuapi hong tun’ lai takin Saul’ tanu Mikhal in kongvangneu panin na en a, Kumpi David laamin a gualnuam-a om a mu hi; tua ciangin amah in a lungsim sungah David neu-et hi. Tua ciangin amaute in Pasian’ thuciamna singkuang hong tumpih uh a, David in ama adingin a lamsak puanbuk sungah koih uh hi; tua ciangin meihal biakna leh thu-nuama biaknate Pasian’ mai-ah pia uh hi. David in meihal biaknate leh thu-nuama biaknate a piak a man khit ciangin amah in Topa ’ min tawh thupha pia a, Israel mi numei leh pasal khempeuhte tungah anlum lum khat, sa bak khat, leh leenggahkeu bek khat ciat hawm hi. Tua tham loin amah in Topa ’ thuciamna singkuang mai-ah na semin thu ngen ding, lungdamna ko ding, leh Israel Pasian, Topa a phat dingin Levi mite pawlkhat seh hi. Asaf in a ukpi hi a, amah zomah a nihnate in Zekhariah, Jehiel, Shemiramoth, Jehiel, Mattithiah, Eliab, Banaiah, Obededom, leh Jeiel, harp lasaknate leh laiza lasaknate a tum dingte ahi uh hi; Asaf in daltuahte a tum ding hi a, siampite Benaiah leh Jahaziel-te in Pasian’ thuciamna singkuang mai-ah peengkulte a tum paisuak ding uh ahi hi. Tua ciangin tua ni-in David in Asaf leh a Levi mipihte in Topa ’ tungah lungdamkohna la a sak ding seh masa hi. Topa ’ tungah lungdamna ko-in, ama min lo un la, ama sepnate mite lakah kitheisak un! Amah la sak un, phatna la amah sak un la, a lamdang ama septe khempeuh gen un! Ama min siangtho hangin nuamin diang un la, Topa a zong mite lungdam ta hen! Topa leh ama hatna zong un la, ama ompihna zong den un! Ama hihsa a lamdang nasepte phawk un la, ama hih a lamdangte, a genkhiat thukhennate phawk un, Ama nasem Abraham’ suante, Jakob’ suante, ama teel tuamte aw! Amah in Topa eite’ Pasian hi a, ama thukhennate leitung khempeuh ah om hi. Amah in a thuciamna phawk tawntung hi, khang tulkhat adingin a thupiakna kammal, Abraham tawh a bawl thuciamna, Isaak tungah kiciamin a khapna, Jakob tungah thukhamin amah in a kipsak, Israel tungah tawntung thuciamna-in a kipsak, “Nangma tungah Kanaan gam hong pia-in, gamhluah dingin na tanh dingin kong pia ding hi,” a cihte phawk tawntung hi. Amaute a mi-in tawmin, gen taak loin, peemta hi uh a, minam khat pan nam khatah vak kawikawi-in, kumpigam khat pan gamdang khatah a pai lai-in, amah in amaute kuamah nengniam sak lo hi; amaute’ hangin amah in kumpite tai a, “Ka sathau nilhte lawng kei un, ka kamsangte tungah siatna hih kei un!” ci hi. Leitung khempeuh aw, Topa la sak un! A ni ni-in ama hotkhiatna thu gen un. Minamte lakah ama minthan’na gen khia un la, a lamdang ama septe mi khempeuh lakah gen un! Bang hang hiam cih leh Topa lian a, nakpi takin phat ding ahi hi; pasian khempeuh sangin amah lamdang sak zawk ding ahi hi. Bang hang hiam cih leh minam dangte’ pasiante khempeuh milim hi lel a, ahih hangin Topa in vantungte a bawlpa ahi hi. Pahtawina leh minliatna in amah umcih a, thahatna leh lungdamna in amah kimkot hi. Leitung mi khempeuh aw, Topa thei tel un la, Topa ’ minthan’na leh a thahatna thei tel un! Ama’ min in ngah dingin a kilawm zah ciang dong minthan’na Topa tungah pia un; biakna paipih un la, ama mai-ah pai un! Biakna puan silhin Topa bia un; leitung mi khempeuh aw, ama mai-ah ling un; hi hi, leitung kip a, kilok ngei lo ding hi. Vantung kipak hen la, leitung lungdam hen, minamte lakah, “ Topa maang hi!” amaute in ci ta uh hen. Tuipi leh a sunga om khempeuh awng hen la, gamlak leh a sunga om khempeuh diang hen! Tua ciangin gamlak singte in lungdamin Topa mai-ah la sa ding uh hi, bang hang hiam cih leh leitung thukhen dingin amah hong pai hi. Amah hoih ahih manin Topa tungah lungdamna ko un; bang hang hiam cih leh a itna kip a tawntungin a kho hi! “Kote hong khahkhia in, ka kihotkhiatna Pasian aw, minamte lak panin hong kaikhawmin hong honkhia in, na min siangtho tungah lungdamna kong koh theih nading uh, leh nangmah phatna ah ka minthan’ nadingun, Israel Pasian, Topa in thupha ngah ta hen, a tawntung pan a tawntung dongin!” zong ci lai un, a ci hi. Tua ciangin mi khempeuh in, “Amen!” ci-in Topa phat uh hi. Tua ahih ciangin David in ni sim-a a kisam bangin thuciamna singkuang mai-ah na a sem tawntung dingin Asaf leh a Levi mipihte Topa ’ thuciamna singkuang mai-ah nusia a, Obededom leh a behte sawmguk-le-giatte zong nusia hi; Jeduthun’ tapa Obededom leh Hosah-te in kongpi cing dingte ahi uh hi. Ama itna kip kho tawntung ahih manin, amaute tawh Heman leh Jeduthun, leh Topa tungah lungdamna a ko dingin a kiteel; a minin a kilo khia a om laite om hi. Heman leh Jeduthun in la aw dingin peengkulte leh daltuahte nei uh a, biakna la sak nadingin lasakna nate nei uh hi. Jeduthun’ tapate kulhkongpi cing dingin kiseh hi. Tua ciangin mi khempeuh in a inn ciat uhah ciah uh a, David zong a innkuan thupha pia dingin a innah a ciah hi. Tu-in David a innah a teen’ ciangin amah in kamsang Nathan’ kiangah, “En in, keimah in taamtaak inn hoih sungah ka teeng a, ahih hangin Topa thuciamna singkuang in puanbuk nuai-ah om hi,’’ a ci hi. Tua ciangin Nathan in David kiangah, “Pasian in nang tawh om ahih manin na lungsim a, om khempeuh hih in,” a ci hi. Ahih hangin tua zan mahin Nathan’ kiangah Topa ’ thu hong tung a, “Pai in la, ka nasempa David kiangah gen in. ‘ Topa in hih bangin ci hi: Nangmah in teen’ nadingin kei adingin inn na lam kei ding hi. Bang hang hiam cih leh Israelte ka paipih toh a, kipan tu ni dongin inn sungah ka teeng kei a, puanbuk khat pan puanbuk khat, omna khat pan omna khatah ka pai kawikawi hi. Israel khempeuh tawh ka painasa mun khempeuh ah, keima mite tuu bangin a cing dingin ka sawl thukhente khatpeuh peuh tungah, “Bang hangin lamsak lo na hi hiam?” ci-in kam khat beek ka gen hiam?’ ci hi. Tua ahih ciangin tu-in ka nasempa David kiangah hih bangin na ci ding hi, ‘Vanglianpen’ Topa in hih bangin ci hi, ka mi Israel tungah ulian a hi dingin lonona, tuu na zuihna panin nang kong la hi; na paina peuhpeuh ah nang tawh kong om khin a, na mai panin na galte khempeuh ka susia hi; leitung miliante khat min bangin nang adingin min khat kong bawlsak ding hi. Na nuntakna bei-in na pate kiang na zuat ciangin nangma nungah na tapate khat ka khangsak ding a, ama kumpi gam ka kipsak ding hi. Amah in kei adingin inn khat hong lamsak ding a, keimah in ama kumpi tokhom ka kipsak paisuak ding hi. Keimah in ama pa ka hi ding a, amah in Keima tapa hi ding hi; nangma hun ma-a sem Saul tung panin ka lak khiat bangin ama tung panin ka itna kip ka la khia kei ding a, ka inn sung leh ka kumpi gam sungah amah kipsak paisuakin ama kumpi tokhomkip paisuak ding hi,’ci hi,” a ci hi. Hih kammalte khempeuh tawh kizui, leh hih mangmuhna khempeuh tawh kizui-in Nathan in David kiangah gen hi. Tua ciangin Kumpi David tumin Topa ’ mai-ah tu a, “ Topa Pasian aw, nangmah in hih ciang dong kei nong tun’ pih nadingin keimah in kua hi a, ka innkuanpihte in bang hi lel ahi hiam? Hih a beisa thu in nangma mit-ah na neu khat ahi hi, Pasian aw; nangmah in a hong tung ding hunpi khat sung tangding na nasempa’ suan leh khak tawh kisai thu zong na gen khin a, mai lam a, khang dingte thu kei nong lak khin hi, Topa Pasian aw! Na nasempa nong pahtawina ah David in nang tungah bang gen ding nei nawn ahi hiam? Bang hang hiam cih leh nangmah in na nasempa na thei hi. Topa aw, na nasempa’ hang, leh nangma lungsim bangin hih na liante khempeuh na kitheihsakna ah hih liatna khempeuh na hih hi. Ka bil-un ka zakna uh tawh kizui-in Topa aw, nangmah tawh a kibang kuamah om lo a, nang simloh Pasian om lo hi. Izipt panin na hotkhiatna mite mai-ah minamte hawlkhiatna tawh nang adingin a lian a lauhuai min khat na bawlna, Pasian pai-in ama mi dingin a hotkhiatna mi Israelte tawh a kibang leitungah minam dang kua om ahi hiam? Na mi Israelte a tawntungin nangma mi ahi dingin na bawl hi; tua ciangin Topa aw, nangmah in amaute’ Pasian na suak hi. Tu-in Topa aw, na nasempa leh a suan a khakte tawh kisai-in na gensa thu a tawntungin kip hen la, na gensa bangin hih in; tua ciangin, ‘Israel Pasian, Vanglianpen Topa in Israelte’ Pasian hi,’ ci-in nangma min a tawntungin kipin kiliansak ding a, na nasempa David’ ukna nangma mai-ah kip tawntung ding hi. Bang hang hiam cih leh nang ka Pasian in keima suante kumpi-in nong bawlsak nading na nasempa tungah nong lak khin zo hi; tua ahih ciangin na sempa in na mai-ah thu nget ding han’na lungsim nei hi. Tu-in Topa aw, nangmah in Pasian na hi a, na nasempa tungah hih na hoih na ciam khin hi; tua ahih ciangin tu-in nangma mai-ah a kizop tawntung theih nadingin na nasempa’ suan leh khakte thupha na piak ding nang hong lungkim ta in; bang hang hiam cih leh Topa aw, nangmah in thupha na piaksate a tawntungin thupha ngah ahi hi,” a ci hi. Hih thu khit ciangin David in Filistiate zoin nuaisiah a, Filistiate’ khut sung panin Gath leh a khuaneute la hi. Tua ciangin amah in Moab mite zo a, Moab mite David’ nasem suakin siah hong puak uh hi. Zobah leh Hamath gam kumpipa Hadadezer-in Eufrates gun kuam gamte ngah kik nuamin kuan ahih manin, David in amah doin zo hi. Tua ciangin David in ama tung panin leeng galkap tulkhat, sakol tuang galkap tulsagih, leh khe galkap tul sawmnih la hi; tua ciangin David in leengkai sakol galkap khempeuh a zagui atsat sak a, ahih hangin leeng za khat’ adingin a kicing siit hi. Zobah kumpipa Hadadezer huh dingin Damaskas-a Siria mite hong pai ciangin David in Siria mite tul sawmnih leh tulnih that hi. Tua ciangin David in Siria gam Damakas ah khuacingte koih hi; tua ciang Siria mite David’ nasem suak uh a, siah puak uh hi. David a paina peuhpeuh ah Topa in gual zawhna pia hi. Tua ciangin David in Hadadezer’ nasemte in a puak kham kibawl lumte la-in Jerusalem ah ciahpih hi. Tua ciangin Hadadezer khuapite Tibhath leh Kun panin David in sumngo tampi tak la hi; Solomon in tuate tawh sumngo tuikuangpi leh khuampite leh sumngo um-le-beelte a bawl hi. David in Zobah kumpipa Hadadezer’ galkap buppi a zawhna thu Hamath kumpipa To-u in a zak ciangin, Hadadezer simin a zawhna hangin a hopih ding leh a lungdampih dingin Kumpi David kiangah a tapa Hadoram sawl hi; bang hang hiam cih leh Hadadezer in To-u tawh kido zel hi. Amah in kham ngun, leh sumngo tawh kibawl na namkim khempeuh puak hi; Kumpi David in hihte zong, Edom, Moab, Ammon mite, Filistiate, leh Amalek, minam khempeuh kiang panin a puak khiat ngun leh kham tawh Topa ’ tungah ap khawm hi. Tua ciangin Zeru-iah’ tapa Abishai in Ci Kuamah Edom mite tulsawm leh tulgiat that hi. Tua ciangin amah in Edom ah khuacingte koih hi; tua ciangin Edom mite khempeuh David’ nasem suak uh hi. Topa in David a paina peuhpeuh ah gualzawhna pia hi. Tua ahih ciangin David in Israel khempeuh tungah uk hi; amah in a mite khempeuh tungah thuman leh thutang zang hi. Zeru-iah’ tapa Joab in galkapte a uk ahi hi; Ahilud’ tapa Jehoshafat in thuciamtehpa ahi hi; Ahitub’ tapa Zadok leh Abiathar’ tapa Ahimelek in siampite ahi uh hi; Shavsha in lai-atpa ahi hi; Jehoiada’ tapa Benaiah in Khereth mite leh Peleth mite tungah a uk ahi hi; David’ tapate in kumpipa’ nasepna-ah maang liante ahi uh hi. Hih thu khit tawl khat ciangin Ammon mite’ kumpipa Nahash si a, a tapa in ama tangin uk hi. Tua ciangin, David in, “Ama pa kei tungah thuman takin hong gamta ahih manin Nahash’ tapa Hanun tungah thuman takin ka gamta ding hi,” a ci hi. Tua ahih ciangin David in a pa huhau-in amah a hehnem dingin kamtaite sawl hi. Tua ciangin David’ nasemte amah a hehnem dingin Ammon mite’gam Hanun’ kiangah hong pai uh hi. Ahih hangin Ammon mite’ uliante in Hanun’ kiangah, “David in nang kiangah hehnemte hong sawlna hangin na pa a pahtawi hi, ci-in ngaihsun na hi hiam? A phekleh ding leh a lumlet ding leh gam sung ensim dingin ama nasemte na kiangah hong pai hilo ahi hiam? a ci uh hi. Tua ahih ciangin Hanun in David’ nasemte manin a khamul uh metsak a, a kawngciang uhah a puante at khiatsakna tawh amaute daisakin sawl khia hi; tua ciangin amaute kihem uh hi. Hih mite tawh kisai thu David kiangah a kigen ciangin amah in amaute a dawntuah dingin mi sawl hi; bang hang hiam cih leh hih mite nakpi takin maizum uh a, ciah ngam lo uh hi. Tua ciangin kumpipa in, “Na khamul uh a khan’ kik mateng Jerikho ah om un la, tua ciangin hong ciah un,” a ci hi. Ammon mite in David’ muhdahin amau mah a kibawl tawmna uh a muh uh ciangin Hanun leh Ammon mite in Mesopotamia, Aramma-akah, leh Zobah panin leeng galkapte leh sakol galkapte cial nadingin ngun talen tul khat puak uh hi. Amaute in leeng galkap tul sawmthum leh tulnih leh Ma-akah gam kumpipa a galkap tawh cial uh a, amaute hong pai-in Medeba khua kiangah phual sat uh hi. Tua ciangin a khuapite uh panin Ammon mite kikhawmin galdo dingin hong kuan uh hi. David in tua thu a zak ciangin Joab leh mi thahat galkap khempeuh sawl hi. Tua ciangin Ammon mite hong kuan khia-in khuapi lutna ah galdo dingin hong pang uh a, a hong kuan kumpite pen amau teng mah gamlakah om uh hi. Gal in a nung leh a mai panin a pan’na Joab in a theih ciangin Israel mi kitengkhia mi pawlkhat teel a, Siriate a do dingin pangsak hi; a om lai a mite amah in a sanggampa Abishai’ ukin koih a, Ammon mite a do dingin amaute kipangsak hi. Tua ciangin amah in, “Siria mite ka lelh tuak leh nangmah in kei nong huh ding hi; ahih hangin Ammon mite nang na lelh tuak leh keimah in nang kong huh ding hi. Hang in, i mite ading leh i Pasian’ khuapite’ ading pasal tat ni; Topa in ama hoihsak bangin hong hih ta hen,” a ci hi. Tua ahih ciangin Joab leh amah tawh a om mite in a do dingin Siria mite kiang nai hong naih uh hi; tua ciangin ama mai-ah amaute tai uh hi. Siria mite a taina Ammon mite in a muh uh ciangin tua mah bangin amaute zong Joab’ sanggampa Abishai’ mai-ah tai uh a, khuapi sungah lut uh hi. Tua ciangin Jerusalem ah Joab hong ciahkik hi. Ahih hangin Siria mite in amaute Israel in a zawhna a muh uh ciangin, amaute in kamtaite sawlin Eufrates galkhat a, om Siria galkapte sam uh a, Hadadezer’ galkapte a ukpa Shofak a makai-in om hi. David kiangah hih thu a kigen ciangin, amah in Israel khempeuh khawmin Jordan galkah a, amaute kiangah pai-in amaute a do dingin galkapte khawm hi. David in Siria mite do dingin gal pangsak a, Siria mite tawh kido uh hi. Tua ciangin Israelte mai-ah Siria mite tai uh hi; tua ciangin David in Siria mite leeng hawl galkap mihing tulsagih, leh khe galkap tul sawmli that a, amau’ galkap ukpa Shofak zong that hi. Tua khit ciangin Hadadezer’ nasemte in amaute Israelte in a zawh khitna a muh uh ciangin amaute in David tawh kilemna bawl uh a, ama khut nuai suak uh hi. Tua ahih ciangin Siria mite in Ammon mite huh nuam nawn lo uh hi. Kumpite in khuakhal sungin galsimin kuankhia zel uh hi. Tua hun hoih khuakhal hong tun’ ciangin Joab in galkapte pai khiatpihin Ammon mite’ gam sugawp a, hong pai-in Rabbah khua umcih hi. Ahih hangin Jerusalem ah David om hi. Tua ciangin Joab in Rabbah khua vatin lumlet hi. Tua ciangin David in amau’ kumpipa’ kumpi lukhu ama tung panin lak khiatsak hi; tua lukhu kham talen khat gikin a sungah suangmanpha khat a omna amah in thei hi; tua hi a, David in tua lukhu ama lu tungah khu hi. Tua ciangin amah in tua khuapi panin van kinusiate tampi tak pai khiatpih hi. Tua ciangin amah in tua sunga om mite pai khiatpihin sing-atnate leh tuzumte leh heite tawh na a sem dingin koih hi; tua bangin Ammon mite’ khuapite khempeuh ah David in hih hi. Tua ciangin David leh mi khempeuh Jerusalem ah ciah uh hi. Hih thu khit ciangin Gezer ah Filistiate tawh kidona hong om hi; tua ciangin Hushah khua mi Sibbekai in mithagolte’ suan leh khakte khat ahi Sippi that hi; tua ciangin Fillistiate kinuaisiah hi. Tua ciangin Filistiate tawh kidona om kik leuleu hi; tua hi a, Jair’ tapa Elhanan in a teipi kung siamlawngpi cia a pha, Gath khuami Goliath’ sanggampa Lahmi that hi. Tua ciangin a khut lang tuakah khutme guk a nei, a khe lang tuakah zong kheme guk mah a nei, a vekpi-in sawmnih-le-li a nei, mi thalian khat a omna Gath ah gal om kik hi; amah zong mi thagolte’ sung pana hong piang ahi hi. Amah in Israel a to ciangin David’ sanggampa Shimea’ tapa Jonathan in amah that hi. Hihte in Gath a, mithagolte sung pana hong piang ahi uh hi; David leh a nasemte’ khutin amaute puk uh hi. Satan in Israel langpan’ a, Israel mi phazah a sim dingin David hanthawn hi. Tua ahih ciangin David in Joab leh galkap a ukte kiangah, “Pai un, Be-ersheba panin Dan ciang dong Israel mi phazah va sim un la, amaute a phazah ka theih nadingin kei kiangah thu hong zasak un,” a ci hi. Ahih hangin Joab in, “ Topa in a mite a zah za khatin behlap ta hen! Ka to kumpipa aw, amaute khempeuh ka topa’ nasemte hilo ahi uh hiam? Tua ahih ciangin bang hangin ka topa in hih kisam sa na hi hiam? Bang hangin Israel tungah mawhna tun’ ding na hi hiam?” a ci hi. Ahih hangin kumpipa in Joab thu-zawh hi. Tua ahih ciangin Joab kihem khia-in Israel sung khempeuh ah pai a, tua ciangin Jerusalem ah hong ciahkik hi. Tua ciangin Joab in David kiangah galkap thei ding mi phazah pia hi. Israelte khempeuh sungah galkap thei ding mihing awn khat leh sang khat om a, Judah sungah galkap thei ding mi tul zali leh tul sawmsagih om hi. Ahih hangin Joab in kumpipa’ thupiakna hoih sa het lo ahih manin a simna ah Levi minam leh Benjamin minamte hel lo hi. Ahih hangin hih thu ah Pasian lungkim lo a, amah in Israel vat hi. Tua ciangin David in Pasian kiangah, “Hih na ka sepna ah nakpi takin ka khial hi. Ahih hangin tu-in nang tungah kong thuum hi, na nasempa’ mawhna hong maisak in; bang hang hiam cih leh a haihuai mahmahin ka gamta khin hi,” a ci hi. Tua ciangin Topa in David’ thu-mupa Gad tungah thu gen a, “Pai in la, David kiangah, ‘ Topa in hih bangin ci hi; ‘Nangma tungah thu thum kong pia hi; nang tungah kong hih theih nadingin tuate khat teel in,’ ci hi, ci in,” a ci hi. Tua ahih ciangin David kiangah Gad hong pai-in ama tungah, “ Topa in hih bangin ci hi, ‘Na lak ding khat teel in; kialpi kum thum sung; ahih kei leh na langte in nang hong simgawp lai takin na galte’ mai-ah kha thum sung galtaina; ahih kei leh gam sungah pulnatna leh Topa ’ vantung mi in Israel sung khempeuh ah suksiatna ni thum sung a piangsak Topa ’ namsau,’ ci hi. Tu-in kei hong sawlpa kiangah ka ciahpih ding dawn’ nading khentel in,” a ci hi. Tua ciangin David in Gad kiangah, “Keimah in lungkhamna lianpi khat ka tuak hi; ama hehpihna lian mahmah ahih manin Topa ’ khut sungah hong puksak in; ahih hangin mihing’ khut sungah hong puksak kei in,” a ci hi. Tua ahih ciangin Topa in Israel tungah pulnatna khat tung sak hi; Israel mi tul sawmsagih puk hi. Tua ciangin Pasian in a susia dingin Jerusalem ah vantungmi sawl hi; ahih hangin amah in a suksiat ding lai takin Topa in mu a, tua thusia ah amah kisik hi; tua ciangin amah in a susia vantungmi kiangah, “Pha zo hi; tu-in na khut khawlsak in,” a ci hi. Jebus mi Ornan’ ancilna gei-ah Topa ’ vantungmi a din’ laitak ahi hi. Tua ciangin David khuadak to a, leitung leh vantung kikalah Topa ’ vantungmi ding-in a khut sungah a kidoksa namsau khat omin Jerusalem tungah a zan mu hi. Tua ciangin David leh a upate puanhampi silhin mai puk uh hi. Tua ciangin David in Pasian kiangah, “Mi phazah a sim dingin thu a piapa in keimah hilo ka hi hiam? Khialin a gitloh gamtat mahmahpa in keimah ka hi hi. Ahih hangin hih mite in bang gamta khial ahi uh hiam? Topa ka Pasian aw, kong thuum hi, keimah leh ka innkuan daan hong pia in; ahih hangin na mite tungah gimna tungsak kei in,” a ci hi. Tua ciangin David paito-in Jebus mi Ornan’ ancilna phual tungah Topa adingin biakna tau khat a lam nading a gen dingin Topa ’ vantungmi in Gad sawl hi. Tua ahih ciangin Topa ’ min tawh a gen Gad’ kammal bangin David paito hi. Amah tawh a om a tapa lite bu uh a, Ornan in mangbuh a cilcil lai takin a khuadak leh Topa ’ vantungmi mu hi. Ornan kiangah David hong tun’ ciangin, Ornan khuadak a, David mu-in ancilna panin hong paikhia a, a mai lei lam ngatin David tungah zahtakna bawl hi. Tua ciangin David in Ornan kiangah, “Mite kiang panin gimna a ven’ theih nading Topa ’ ading biakna tau ka lam theih nadingin na ancilna mun hong pia in—a man a cingin piak dingin hong pia in,” a ci hi. Tua ciangin Ornan in David kiangah, “La in, ka to kumpipa in hoih na sak bangin hih in; thei in, meihal biaknate a, zat dingin bawngtalte, a sing dingin ancilna singte, leh an tawh biak nadingin a mangbuhte kong pia hi. A vekpi-in kong pia hi,” a ci hi. Ahih hangin Kumpi David in Ornan kiangah, “Hi lo hi, a man a cing tawh kong lei ding hi; Topa ’ adingin nangma’ aa ka la kei ding a, keima sum bei loin meihal biaknate zong ka pia kei ding hi,” a ci hi. Tua ahih ciangin David in Ornan tungah a mun lei nadingin kham shekel zaguk a gik a pia hi. Tua ciangin David in tua lai-ah Topa ’ adingin biakna tau khat lamin meihal biaknate leh thu-nuama biaknate bawlin Topa ’ tungah thu ngen a, tua ciangin amah in a thungetna a piakna-in a meihal biakna a hal dingin vantung panin meikuang pia suk hi. Tua ciangin Topa ’ thupiakna tawh vantungmi in a namsau a pai sungah siat kik hi. Tua hunin, Jebus mi Ornan’ ancilna phual ah Topa in ama nget a piakna David in a muh ciangin amah in tua lai-ah a biak piaknate bawl hi. Bang hang hiam cih leh Moses in gamlakah a bawl Topa ’ biakbuk leh meihal biakna tau pen tua hunin Gibeon mualdawn ah om lai hi; ahih hangin amah in Topa ’ vantungmi’ namsau kihta ahih manin Pasian’ tungah thu a dong dingin tua lai-ah David pai ngam lo hi. Tua ciangin David in, “Hih lai-ah Topa Pasian’ inn om ding a, hih lai-ah Israel’ ading meihal biakna tau om ding hi,” a ci hi. Israel gam sunga om gamdang mite a kaihkhop nadingun David in thu pia a, tua ciangin amah in Pasian’ inn lam nadingin suang seeksate a bawl dingin suang seekte koih hi. David in kongpi kongkhak a, zat dingin siktukkilh leh gak nadingin sik tampi koihin, teh zawh lohin sumngo tampi tak zong koih a, taamtaak singte sim zawh hi lo hi; bang hang hiam cih leh Sibon khuamite leh Tai-ar khuamite in David kiangah taamtaak tampi tak puak uh hi. Bang hang hiam cih leh David in, “Ka tapa Solomon khangno-in pumpi tawh sinna om nai lo a, Topa ’ adingin a kilam ding inn in gam khempeuh ah minthan’na leh pahtawina ah alian mahmah ding ahi hi; tua ahi ciangin keimah in tua inn dingin ka kiging khol ding hi,” a ci hi. Tua ahih ciangin David in a sih ma-in na tampi tak koih khol hi. Tua ciangin amah in a tapa Solomon sam a, Israel Pasian, Topa adingin inn khat a lam ding gen hi. David in Solomon kiangah, “Ka ta aw, Topa ka Pasian’ min dingin inn khat lam ding ka lungsimah om hi. Ahih hangin kei tungah Topa ’ thu hong tung a, ‘Nangmah in mi tampi thatin gal lianpipi na sim hi; nangmah in keima mai leitungah sisan tua zahta luangsak na hih manin ka min dingin inn na lam kei ding hi. En in, nangma sung panin tapa khat hong piang ding hi; amah in kilemna mi hi ding hi. Keimah in a kimkot a, a galte khempeuh panin ama tungah kilemna ka pia ding hi; Ama min in Solomon hi ding a, ama hun sungin Isreal tungah kilemna leh daihna ka pia ding hi. Amah in keima min dingin inn khat lam ding hi. Amah in ka tapa hi-in keimah in ama pa ka hi ding a, Israel sungah ama kumpi tokhom ka kipsak paisuak ding hi,’ hong ci hi. Tu-in ka ta aw, amah in nangma thu a gensa bangin Topa na Pasian’ inn na lamna ah na tangtun’ theih nadingin Topa in nang hong ompih ta hen. Amah in Israel tungah nang hong uksak ciangin Topa na Pasian’ thukham na zuih theih nadingin Topa in ngaihsut pilna leh thutelna nang tungah hong pia ta hen. Tua ciangin Israelte’ adingin Topa in Moses a piak thukhamte leh biakna ngeina kipte zuih ding na kidop nak leh na maa vang ding hi. Thakhauh in la, hang in. Lau kei in; lungkia kei in. Gimna lianpi tawh Topa ’ inn dingin kham talen tul zakhat, ngun talen awn khat, leh teh zawh lohin sumngo leh sik ka koih khin zo hi; bang hang hiam cih leh tam mahmah hi; sing leh suang zong ka koih zo hi. Nangmah in hihte na behlap ding hi. Nangmah in na a sem ding mi tampi na nei hi: suangseekte, lei-le-suang inn lam siamte, khutsiamte, leh sim zawh lohin siamna nam khempeuh a nei, kham, ngun, sumngo, leh sik sep a siamte na nei hi. Kithawi in la, sem in! Topa in nang hong ompih ta hen!” a ci hi. David in zong Israel makaite khempeuh in a tapa Solomon a huh nading thu pia a, “ Topa na Pasian uh note tawh om hilo ahi hiam? Amah in na kiim khempeuh uhah kilemna hong pia hilo ahi hiam? Bang hang hiam cih leh amah in gam sungah teeng mite keima khut sungah hong pia khin hi; Topa leh ama mite mai-ah gam sung khempeuh kinuai-siah hi. Tu-in Topa na Pasian uh a zong dingin na ngaihsutna uh leh na lungsim uh kipsak un. Topa ’ min dingin a kilam inn sungah Topa ’ thuciamna singkuang leh Pasian’ um-le-beel siangthote a kipaipih theih nadingin kithawi un la, Topa Pasian’ biakinn lam un,” a ci hi. Tu-in David teekin kum tampi pha a, amah in Israel tungah kumpi-in a tapa Solomon koih hi. David in Israel makai khempeuh leh siampi leh Levi mite khawm hi. Levi mite kum sawmthum panin a tungsiah teng kisim a, a vekpi-in pasal tul sawmthum leh tulgiat pha hi. David in, “Hihte tul sawmnih leh tulli in Topa ’ inn sungah nasep uk ding a, tulguk in mangte leh thukhente hi ding a, tulli in kongcingte, leh tulli in phatna ding a, ka bawlsa lasaknate tawh Topa ’ tungah phatna pia ding uh hi,” a ci hi. Tua ciangin David in Levi mite a beh behin pawl thum suah a, tuate in: Gershon pawl, Kohath pawl, leh Merari pawl ahi uh hi. Gershon’ tapate in Ladan leh Shimei ahi uh hi. Ladan’ tapate in: A ukpi Jehiel, leh Zetham, leh Joel, thum pha uh hi. Shimei’ tapate in: Shelomoth, Haziel, leh Haran, thum pha uh hi. Hihte in Ladan’ beh lutangte ahi uh hi. Tua ciangin Shimei’ tapate in: Jahath, Zina, Jeush, leh Beriah ahi uh hi. Hih lite in Shimei’ tapate ahi uh hi. Jahath a ukpi hi-in, Zina a nihna ahi hi; ahih hangin Jeush leh Beriah-te in tapa tampi nei lo uh ahih manin innkuan khat kisuak sakin sim khatin kisim khawm hi. Kohath’ tapate in: Amram, Izhar, Hebron, leh Uzziel, li pha uh hi. Amram’ tapate in: Aaron leh Moses ahi uh hi. Amah leh a tapate in Topa ’ mai-ah paknamtui a hal tawntung ding leh ama na semin ama min tawh thupha a piak tawntung theih nadingin a siangtho pen nate a ap dingin Aaron kituam koih hi. Ahih hangin Pasian’ mipa Moses’ tapate ahih leh Levi minamte lakah kisim hi. Moses’ tapate in: Gershom leh Eliezer ahi uh hi. Gershom’ tapate lakah Shebuel in a ukpi ahi hi. Eliezer’ tapate lakah Rehabiah in a ukpi ahi hi; Eliezer in tapa dang nei lo a, ahih hangin Rehabiah’ tapate tam mahmah hi. Kohath’ tapa nihna Izhar’ tapate lakah Shelomoth in a ukpi ahi hi. Kohath’ tapa thumna Hebron’ tapate lakah: Jeriah a ukpi, Amariah a nihna, Jahaziel a thumna leh Jekameam a lina ahi hi. Kohath’ tapa lina Uzziel’ tapate lakah: Mikah a ukpi, leh Issiah a nihna ahi hi. Merari’ tapate in: Mahli leh Mushi ahi hi. Mahli’ tapate in: Eleazar leh Kish ahi hi. Eleazar in tapa nei loin si a, tanu bek nei hi; amau’ tanau, Kish’ tapate in amaute ten’pih uh hi. Mushi’ tapate in: Mahli, Eder, leh Jeremoth, thum pha uh hi. Hihte in Topa ’ inn nasepna ah na a sem ding, kum sawmnih panin a tungsiah, a mi mi-in a minin a mi phazah zui-in a kiciamtehna bangin beh lutangte, a beh behin Levi’ suante ahi hi. Bang hang hiam cih leh David in, “Israel Pasian, Topa in a mite tungah kilemna pia zo hi; tua ciangin amah in Jerusalem ah om tawntung hi. Tua ahih ciangin Levi mite in puanbuk hita leh tua tawh kisai nasep nading nate khat peuhpeuh hita leh a puak ding uh kisam nawn lo hi,” a ci hi. Bang hang hiam cih leh David’ thupiakna a nunung pen tawh a kisim hihte in kum sawmnih panin a tungsiah Levi mi a phazah ahi hi— “ahih hangin amaute’ nasep in Topa ’ inn nasepna ah Aaron’ suante huhin, inntualte leh inndeite kemin, biakna na khempeuh a siangtho sak ding, leh Pasian’ inn nasepna ah hih ding khat peuhpeuh a sem ding ahi uh hi; Ompihna Anlum, an tawh biak nadingin annel, silngo sawh loh anlum moh, a ki-em piakna, sathau tawh a kihel piakna, leh a tam tehna, ahih kei leh a lian tehna nasep khempeuh zong a huh ding ahi uh hi. Tua ciangin amaute zingsang simin ding ding uh a, lungdamna koin Topa phatin, nitakin zong tua mah bangin hih ding uh a, a mal zah a kisam bangin sabbath nite, khadet nite, leh pawi nite-in Topa tungah meihal biakna a kipiak peuhpeuh ciangin a tawntungin Topa mai-ah om ding uh hi. Tua bangin Levi mite in kikhopna puanbuk leh biakinn kemin, Topa ’ inn nasepna ah amau’ behte ahi Aaron’ suante huh ding uh hi,” a ci hi. Aaron’ suante a kisehkhennate in hihte ahi hi. Aaron’ tapate in: Nadab, Abihu, Eleazar, leh Ithamar ahi uh hi. Ahih hangin a pa uh sih ma-in Nadab leh Abihu si-in ta nei lo uh ahih manin Eleazar leh Ithamar-te siampi suak uh hi. Eleazar’ suan Zadok, leh Ithamar’ suan Ahimelek’ huhna tawh David in amau’ nasepna ah a kiseh bangin Aaron’ suante a koih hi. Ithamar’ suante lak sangin Eleazar’ suante lakah ukpi tam om zaw ahih manin, amaute in Eleazar’ suante pawl sawm-le-guk suahin, Ithamar’ suante pawl giat suah hi. Eleazar’ suante leh Ithamar’ suante lakah biakinn uliante leh Pasian’ uliante om tuak uh ahih manin amaute in a kibangin aisaanna tawh amaute koih uh hi. Tua ciangin Levi mi Nethanel’ tapa ahi lai-atpa Shemaiah in Kumpipa, leh uliante, leh siampi Zadok, leh Abiathar’ tapa Ahimelek, leh siampite leh Levi mi beh lutangte’ omna ah amaute ciamteh hi; Eleazar’ suante’ adingin khat kiteelin, tua ciangin Ithamar’ suante adingin khat kiteel a, kilaih sak niloh uh hi. Aisaanna a masa pen Jehoiarib tung, a nihna Jedaiah tung, a thumna Harim tung, a lina Seorim tung, a ngana Malkhijah tung, a gukna Mijamin tung, a sagihna Hakkoz tung, a giatna Abijah tung, a kuana Jeshua tung, a sawmna Shekaiah tung, a sawm-le-khatna Eliashib tung, a sawm-le-nihna Jakim tung, a sawm-le-thumna Huppah tung, a sawm-le-lina Jeshebeab tung, a sawm-le-ngana Bilgah tung, a sawm-le-gukna Immer tung, a sawm-le-sagihna Hezir tung, a sawm-le-giatna Happizzez tung, a sawm-le-kuana Pethahiah tung, a sawmnihna Jehezkel tung, a sawm-nih-le-khatna Jakhin tung, a sawmnih-le-nihna Gamul tung, a sawmnih-le-thumna Delaiah tung, a sawmnih-le-lina Ma-aziah tungah tu hi. Hihte in Israel’ Topa Pasian in amah a thupiak bangin a pupi uh Aaron in amaute’ adingin a kipsakna ngeina bangin Topa ’ inn sungah pai dingin amau’ nasep uh ahi a kiseh nasep nei uh hi. Tua ciangin Levi’ suante a om laite lakah: Amram’ suante sung panin Shubael’ suante Jehdeiah ahi hi. Rehabiah’ suante sung panin Isshiah a ukpi ahi hi. Izhar’ suante sung panin Shelomoth’ suante Jahath ahi hi. Hebron’ suante lakah: Jeriah a ukpi, Amariah a nihna, Jahaziel a thumna, Jekameam a lina ahi hi. Uzziel’ suante sung panin Mikah’ suante Shamir ahi hi. Mikah’ sanggampa in Isshiah ahi hi; Isshiah’ suante sung panin Zekhariah ahi hi. Merari’ suante in: Mahli, Mushi, leh Ja-aziah ahi hi. Merari’ suante Ja-aziah’ sung panin Beno, Shoham, Zakkur, leh Ibri ahi hi. Mushi’ tapate in: Mahli, Eder, leh Jerimoth ahi uh hi. Hihte in a beh tawh kizui-in Levi’ suante ahi uh hi. Hihte in zong a behte uh ahi Aaron’ suante mah bangin kumpi David, Zadok, Ahimelek, leh siampite leh Levi mi beh lutangte’ muhna ah beh lutangte leh a nau pasalte ciat in a kibangin ai saanna tawh nasepna tavuan la uh hi. David leh nasepna ah a ukpite in zong laiza lasaknate, harp lasaknate, leh daltuahte tawh mai lam thu a genkhol dingin Asaf, Heman, leh Jeduthunte’ tapate pawlkhat nasepna-a dingin koih tuam uh hi. Na a semte leh amau’ nasepte in: Asaf’ tapate sung panin: kumpipa’ makaihna nuai-ah mai lam thu a genkhol Asaf’ makaihna nuai-ah Asaf tapate Zakhur, Josef, Nethaniah, leh Asharelah ahi hi. Jeduthun sung panin Jeduthun’ tapate in: lungdamkohna leh Topa phatna-in laiza lasakna tawh mai lam thu a gen khol a, a pa uh Jeduthun’ makaihna nuai-ah Gedaliah, Zeri, Jershaiah, Shimei, Hashabiah, leh Mattibiah, guk pha uh hi. Heman sung panin Heman’ tapate in: Bukkiah, Mattaniah, Uzziel, Shebuel, Jerimoth, Hananiah, Hanani, Eliathah, Giddalti, Romamtiezer, Joshbekashah, Mallothi, Hothir, leh Mahazioth ahi hi. Hihte khempeuh in Pasian thuciamna bangin amah a pahtawi dingin kumpipa’ thu-mupa Heman’ tapate ahi hi; bang hang hiam cih leh Pasian in Heman tungah tapa sawm-le-li leh tanu thum pia hi. Amaute khempeuh Pasian’ inn nasep nadingin Topa’ inn sungah daltuahte, harp lasaknate, leh laiza lasaknate tawh la lam sangah a pate uh ukna nuai-ah om uh hi. Asaf, Jeduthun, leh Hemante in kumpipa’ thupiakna nuai-ah om uh hi. A Levi mipihte uh tawh Topa’ ading lasakna lamah sinna a nei a siam mi a vekpi in zanih leh sawmgiat-le-giat ahi hi. Tua ciangin a neu a lian, sia leh a sinte a kibangin, amaute in amau’ nasep ding uh aisaan uh hi. Asaf behte adingin ai masa Josef tungah tu hi; a nihna Gedaliah, leh a sanggamte leh a tapate, sawm-le-nih tung tu hi; a thumna Zakkhur, leh a tapate leh a sanggamte, sawm-le-nih tung tu hi; a lina Izzri, leh a tapate leh a sanggamte, sawm-le-nih tung tu hi; a ngana Nethaniah, leh a tapate leh a sanggamte, sawm-le-nih tung tu hi; a gukna Bukkiah, leh a tapate leh a sanggamte, sawm-le-nih tung tu hi; a sagihna Jesharelah, leh a tapate leh a sanggamte, sawm-le-nih tung tu hi; a giatna Jeshaiah, leh a tapate leh a sanggamte, sawm-le-nih tung tu hi; a kuana Mattaniah, leh a tapate leh a sanggamte, sawm-le-nih tung tu hi; a sawmna Shimei, leh a tapate leh a sanggamte, sawm-le-nih tung tu hi; a sawm-le-khatna Azarel, leh a tapate leh a sanggamte, sawm-le-nih tung tu hi; a sawm-le-nihna Hashabiah, leh a tapate leh a sanggamte, sawm-le-nih tung tu hi; a sawm-le-thumna Shubael, leh a tapate leh a sanggamte, sawm-le-nih tung tu hi; a sawm-le-lina Mattithiah, leh a tapate leh a sanggamte, sawm-le-nih tung tu hi; a sawm-le-ngana Jeremoth, leh a tapate leh a sanggamte, sawm-le-nih tung tu hi; a sawm-le-gukna Hananiah, leh a tapate leh a sanggamte, sawm-le-nih tung tu hi; a sawm-le-sagihna Joshbekashah, leh a tapate leh a sanggamte, sawm-le-nih tung tu hi; a sawm-le-giatna Hanani, leh a tapate leh a sanggamte, sawm-le-nih tung tu hi; a sawm-le-kuana Mallothi, leh a tapate leh a sanggamte, sawm-le-nih tung tu hi; a sawmnihna Eliathah, leh a tapate leh a sanggamte, sawm-le-nih tung tu hi; a sawmnih-le-khatna Hothir, leh a tapate leh a sanggamte, sawm-le-nih tung tu hi; a sawmnih-le-nihna Giddalti, leh a tapate leh a sanggamte, sawm-le-nih tung tu hi; a sawmnih-le-thumna Mahazioth, leh a tapate leh a sanggamte, sawm-le-nih tung tu hi; a sawmnih-le-lina Romamtiezer, leh a tapate leh a sanggamte, sawm-le-nih tung tu hi. Kongcingte a kiseh khennate in: Korah behte sung panin, Asaf innkuan sung panin Kore’ tapa Meshelemiah ahi hi. Meshelemiah’ tapate in: Zekhariah a tacil, Jediael a nihna, Zebadiah a thumna, Jathniel a lina, Elam a ngana, Jehohanan a gukna, Elieho-enai a sagihna ahi hi. Tua ciangin Obededom’ tapate in: Shemaiah a tacil, Jehozabad a nihna, Joah a thumna, Sakar a lina, Nethanel a ngana, Ammiel a gukna, Issakhar a sagihna, Peullethai a giatna ahi hi; bang hang hiam cih leh Pasian in Obededom thupha pia hi. Ama tapa upa pen Shemaiah sung panin zong a beh sungah ukte ahi tapate suak hi; bang hang hiam cih leh amaute in siamna lian a nei mite ahi uh hi. Shemaiah’ tapate in: Othni, Refael, Obed, Elzabad leh a sanggamte siamna a nei ahi Elihu, leh Semakhiah ahi hi. Hihte khempeuh in Obededom’ tapate leh amau’ tapate leh a sanggamte uh tawh, nasepna dingin siamna a nei mikician ahi uh hi; Obededom sung panin sawmguk-le-nih pha uh hi. Tua ciangin Meshelemiah in siamna a nei tapate leh sanggamte, sawm-le-giat nei hi. Tua ciangin Merari’ innkuan sung panin Hosah’ tapate in: Shimri a ukpi (amah tacil ahih loh hangin a pa in a ukpi-in amah bawl hi), Hilkiah a nihna, Tebaliah a thumna, Zekhariah a lina ahi hi. Hosah’ tapate leh a sanggamte khempeuh sawm-le-thum pha uh hi. Innkuan pasal lutangte kongcingte ahi uh hi; amaute in a sanggamte uh tawh Topa ’ inn sungah nasep nei uh hi; amaute in a neu a lian a kibangin a pate uh innkuan kuanin amau’ kongpi ding ai saan uh hi. Nisuahna lam adingin ai, Shelemiah tungah tu hi. A tapa, a pil thulamlakpa Zekhariah’ adingin zong ai saan uh a, leilu lam-a dingin ama ai pha hi. Obededom adingin leitaw lamah hong suak a, a tapa tungah vankoihna inn kipia hi. Shuppim leh Hosah adingin lampi a pai tohna, Shallekheth kongpi san, nitumna lamah kia hi. Galvil leh galvil kimaituah hi. Vankoihna inn kongah nih nih-in a om mah bangin ni simin nisuahna lamah guk omin, ni simin leilu lamah li omin, ni sim mah-in leitaw lamah li om hi; tua ciangin nitumna lam a, om lampi inn adingin a lampi ah li omin a lampi innah nih om hi. Hihte in Korah mite leh Merari’ tapate lakah kongcingte a kiseh khenna ahi hi. Tua ciangin Levi mite sung panin Ahijah in Pasian’ inn van manpha koihleh a ki-ap letsong koihnate uk hi. Gershom-te beh sung panin Ladan in innkuan tampi a pian’ khiatna mi khat hi a, Jehiel innkuante zong ama sung panin a piang ahi hi. Jehiel’ tapate, Zetham leh a sanggampa Joelte in Topa ’ inn van manpha koihnate uk uh hi. Amram mite, Izhar mite, Hebron mite, leh Uzziel mite sung panin— Moses’ tapa Gershom-te beh sung panin Shebuel in van manpha koihna a ukte’ lakah a ukpi ahi hi. Gershom sanggam Eliezer’ suan Shelomoth tawh zong beh kinai ahi hi. Eliezer’ sung panin a tapa Rehabiah, a tapa Jeshiah, a tapa Joram, a tapa Zikri, a tapa Shelomoth ahi hi. Hih Shelomoth leh a sanggamte in, kumpi David, leh beh lutangte, leh a tul tul leh a za za-a uk uliante, leh galkap a ukte in a ap uh ahi, a ki-ap letsongte a kikoihna khempeuh uk uh hi. Gal sungah a ngah vankinusiate sung panin Topa ’ inn puah nadingin amaute in letsongte ap uh hi. Thu-mupa Samuel, leh Kish’ tapa Saul, Ner’ tapa Abner, leh Zeru-iah’ tapa Joab in a apsate khempeuh zong, a ki-ap letsong khempeuh Shelomoth leh a sanggamte’ kepna sungah om hi. Izhar mite sung panin Khenaniah leh a tapate pen Israel adingin uliante leh thukhente-in a pualam nasepna ah kiseh hi. Hebron mite sung panin Hashabiah leh a sanggamte, siamna a nei mihing tulkhat leh zasagih in Jordan nitumna lam Israel tungah Topa ’ nasepna khempeuh leh kumpipa’ nasemna ah uk uh hi. Hebron mite sung panin Jerijah in a ukpi ahi hi. (David’ uk a kum sawmlina kumin kikantelna bawl uh a, Gilead gam sung Jazer ah amaute sung panin siamna lian a nei mihing kimu hi.) Kumpi David in Jerijah leh a sanggamte, siamna a nei mihing tulnih leh zasagih, a beh sungah lutang ahite, Pasian tawh a kisai na khempeuh leh kumpipa’ vaite ah, Reuben mite, Gad mite, leh Manasseh a langte tungah a uk dingin a seh hi. Tu-in Israel mite, beh lutangte, a tul leh a za-a a ukte, leh khen khatah mi tul sawmnih leh tulli a om, kum tawntung kha khat khit kha khat hong tungin a kuankhia a khente tawh kisai-in na khempeuh ah kumpipa’ na a sem a uliante in: Zabdiel’ tapa Jashobeam in a kha masa sungin a khen masa a uk ahi hi; ama khen sungah tul sawmnih leh tulli om hi. Amah in Perez’ suan leh khak hi a, a kha masa sungin galkap a ukte khempeuh a ukpi ahi hi. Ahoah-te beh Dodai in a kha nihna sunga a khen a ukpi ahi hi; ama khen sungah tul sawmnih leh tulli om hi. A kha thumna adingin a uk a thumna-pa, siampi Jehoiada’ tapa Benaiah in a ukpi ahi hi; ama khen sungah tul sawmnih leh tulli om hi. Hihpa in mihing sawmthumte sungah a thahat, mihing sawmthumte a uk Benaiah ahi hi; ama tapa Ammizabad in ama khen a ukpa ahi hi. Joab sanggampa Ashahel in a kha lina adingin a lina hi a, ama nungah amah a liah dingin a tapa Zebadiah om hi; ama khen sungah tul sawmnih leh tulli om hi. A kha ngana adingin a uk a ngana-pa in Izrah-te beh Shamhuth ahi hi; ama khen sungah tul sawmnih leh tulli om hi. A gukna, a kha gukna adingin Tekoa khua mi Ikkesh’ tapa Ira ahi hi; ama khen sungah tul sawmnih leh tulli om hi. A sagihna, a kha sagihna adingin Efraim’ suante sung panin Pelon khua mi Helez ahi hi; ama khen sungah tul sawmnih leh tulli om hi. A giatna, a kha giatna adingin Jerah mi sung panin Hushan khua mi Sibbekai ahi hi; ama khen sungah tul sawmnih leh tulli om hi. A kuana, a kha kuana adingin Benjamin mi sung panin Anathoth khuami Abiezer ahi hi; ama khen sungah tul sawmnih leh tulli om hi. A sawmna, a kha sawmna adingin Zerah mi sung panin Netofah khua mi Maharai ahi hi; ama khen sungah tul sawmnih leh tulli om hi. A sawm-le-khatna, a kha sawm-le-khatna adingin Efraim suante’ sung panin Pirathon khuami Benaiah ahi hi; ama khen sungah tul sawmnih leh tulli om hi. A sawm-le-nihna, a kha sawm-le-nihna adingin Othniel suante’ sung panin Netofah khuami Heldai ahi hi; ama khen sungah tul sawmnih leh tulli om hi. Israel minamte tungah a ukpite in: Reuben mite’ adingin Zikri’ tapa Eliezer ahi hi; Simeon mite’ adingin Ma-akah’ tapa Shefatiah ahi hi; Levi adingin Kemuel’ tapa Hashabiah ahi hi; Aaron adingin Zadok ahi hi; Judah’ adingin David, sanggamte’ sung panin Elihu ahi hi; Issakhar’ adingin Mikhael’ tapa Omri ahi hi; Zebulun’ adingin Obadiah’ tapa Ishmaiah ahi hi; Naftali adingin Azriel’ tapa Jeremoth ahi hi; Efraim mite’ adingin Azaziah’ tapa Hoshea ahi hi; Manasseh minam a langte’ adingin Pedaiah’ tapa Joel ahi hi; Gilead gam sunga Manasseh minam a langte adingin Zekhariah’ tapa Iddo ahi hi; Benjamin adingin Abner’ tapa Ja-asiel ahi hi; Dan adingin Jeroham’ tapa Azarel ahi hi. Hihte in Israel minamte’ makaite ahi uh hi. Israel mite vantung aksi zahin a tamin a bawl nading Topa in thuciam khin ahih manin David in kum sawmnih nuaisiah a pha mite sim lo hi. Zeru-iah’ tapa Joab in sim ding kipan a, ahih hangin zo man lo hi; bang hang hiam cih leh hih thu hangin Israel tungah Pasian’ hehna hong tung a, Kumpi David’ khang tangthu sungah tua a kisimte kikhum lo hi. Kumpipa’ van manpha a ukte in: Kumpipa’ van manpha koihnate ah Adiel’ tapa Azmaveth ahi hi; tua ciangin gam sunga van manpha koihnate, khuapi sungate, khuaneute leh tausangte, sunga omte tungah Uzziah’ tapa Jonathan ahi hi; tua ciangin lo kho dingin lo nasep a sem mite tungah Khelub’ tapa Ezri ahi hi; tua ciangin leenggui lote tungah Ramah khuami Shimei ahi hi; tua ciangin leenggui lo panin a piang leenggahzu koihnate’ adingin Shifmoth khuami Zabdi ahi hi. Shefelab gam sunga om Oliv leh theiba kungte tungah Gederah khuami Baalhanan ahi hi; tua ciangin sathau koihnate tungah Joash ahi hi. Sharom gam sungah a gamta ganhonte tungah Sharon khuami Shitrai ahi hi; kuam sunga om ganhonte tungah Adlai’ tapa Shafat ahi hi; Kalaohte tungah Ishmael mi Obil ahi hi; tua ciangin la a nute tungah Meronoth khuami Jehdeiah ahi hi. Tuuhonte tungah Hagri mi Jaziz ahi hi. Hihte khempeuh in Kumpi David’ neihsa a kemte ahi uh hi. David’ pano Jonathan in thu thei mi leh lai thei mi ahih manin thu-lam-lakpa ahi hi; amah leh Hakmoni’ tapa Jehiel in kumpipa’ tapate cing uh hi. Ahithofel in kumpipa’ thu-lamlakpa hi a, Arkhi mi Hushai in kumpipa’ lawmpa ahi hi. Ahithofel a sih ciangin Benaiah’ tapa Jehoiada leh Abiathar in laih uh hi. Joab in kumpipa’ galkapte a ukpa ahi hi. David in Jerusalem-a Israelte lakah zaneite, minamte sungah zaneite, kumpipa’ na a sem a khente sungah uliante, a tul tul a, a ukte, a za za-a a ukte, neihsa khempeuh leh kumpipa’ ganhingte leh a tapate a kemte pen, kumpi inn a, zaneite, a thahat mite, leh gal a hang tawntungte khempeuh tawh khawm hi. Tua ciangin Kumpi David a khe-in ding to in, “Ka sanggam leh ka mite aw, ka thugen hong za un. Topa ’ thuciamna singkuang ading leh i Pasian’ khengak nadingin tawlngakna inn khat lam ding ka lungsim sungah a om hi; tua ciangin a lam nading ka kiging hi. Ahih hangin Pasian in kei kiangah, ‘Nangmah in galhang khat hi-in sisan tampi luangsak na hih manin keima min dingin inn na lam kei ding hi,’ hong ci hi. Ahi zongin Israel Topa ’ Pasian in Israel tungah kumpi ahi tawntung dingin ka pa’ innkuan khempeuh panin kei hong teel hi; bang hang hiam cih leh amah in makai-in Judah teel a, tua ciangin Judah innkuan panin ka pa innkuan teel a, tua ciangin ka pa’ tapate lak panin Israel khempeuh tungah kumpi-in kei hong bawl ding kei tungah amah lungkim hi. Tua ciangin ka tapate khempeuh lak panin (bang hang hiam cih leh Topa in kei tungah tapa tampi hong pia hi) Israel tungah Topa ’ kumpi tokhom tungah a tu dingin amah in ka tapa Solomon teel khin hi. Amah in kei kiangah, ‘Ka inn leh ka inntualte a bawl dingpa in na tapa Solomon ahi hi; bang hang hiam cih leh ka tapa dingin amah ka teel khin a, keimah in ama pa ka hi ding hi. Amah in ka thupiaknate leh ka biakna ngeina kipte tu ni-a mah bangin zuih ding a ngaihsut paisuak nak leh ama kumpi gam ka kipsak tawntung ding hi,’ hong ci hi. Tua ciangin tu-in note in hih leitang hoih nei-in note khit na tate uh tungah gamh-in na nusiat tawntung theih nadingun Topa ’ mai-ah kikhopna ahi Israel khempeuh’ muhna, leh i Pasian’ zakna ah Topa na Pasian uh’ thupiaknate khempeuh zui-in zong un. “Tu-in nang, ka tapa Solomon aw, na pa’ Pasian thei in la, na lungsim khempeuh leh utna lungsim tawh ama na sem in; bang hang hiam cih leh Topa in lungsim khempeuh zong a, ngimna leh ngaihsutna khempeuh thei hi. Nangmah in amah na zon’ leh nangmah in amah na mu ding hi; ahih hangin amah na nusiat leh amah in nang hong paaikhia paisuak ding hi. Biakinn dingin inn khat a lam dingin Topa in nang hong teel khin ahih manin tu-in kingaihsun in; thahat in la, sem in,” a ci hi. Tua ciangin David in a tapa Solomon tungah biakinn innlim, leh a innte, a van manpha koihnate, a dawl tungnungte, leh a dei sungnungte, leh hehpihna tokhom’ adingin inndei a geelna; leh Topa ’ inn a tualte adingin a lungsimah a ngaihsut khempeuh, a kimkot a, inndeite khempeuh, Pasian’ inn van manpha koihnate, leh a ki-ap letsongte ading van manpha koihnate; siampite leh Levi mi a khente, leh Topa ’ inn sungah nasepna khempeuh ading; Topa ’ inn sungah nasep nading um-le-beel khempeuh ading, nasepna ah zat ding kham tawh kibawl um-le-beel khempeuh a gihna, nasepna ah zat dingin ngun tawh kibawl um-le-beelte a gihna, nasepna ah meivak khuam a kizat ciatna bangin kham meivak khuamte leh a meivakte a gihna, a meivak khuam leh a meivakte a gihna zah ciat, meivakkhuam khat leh a meivakte ngun a gihna, Ompihna Anlum adingin sabuai kham a gihna ciat, ngun sabuaite adingin ngun a gihna, leh sikkeukate, kuangte, leh haite ading kham citak a gihna; kham haipite leh a gihna ciat; ngun haipite leh a gihna ciat; a kisiangsaksa kham tawh kibawl paknamtui biakna tau ding leh a gihna zah ding a geelna; a khate uh zakin Topa ’ thuciamna singkuang a khuh kherubte’ kham leeng ding a geelna zong pia hi. Nasep ding khempeuh geelsa bangin sep dingin hih thu tawh kizui-in Topa ’ genna bangin lai-in gelhna tawh amah in hihte khempeuh a siangin hih hi. Tua ciangin David in a tapa Solomon kiangah, “Thakhauhin hang in la, sem in. Lau kei in, lungkia kei in; bang hang hiam cih leh Topa Pasian, kei’ Pasian nangawn nang tawh om hi. Topa ’ inn sung nasepna khempeuh a nasepna khempeuh a kizawh matengin amah in nang hong tamasak lo, hong nusia lo ding hi. Tua ciangin Pasian’ innah nasep khempeuh a sem dingin siampite leh Levi mi a khenkhente om hi; nasepna khatpeuh peuhah siamna a nei mi, nasepna khempeuhah nang tawh hong om ding hi; uliante leh mi khempeuh zong nangma thupiakna bangbangin gamta ding uh hi,” a ci hi. Tua ciangin kumpi David in a kikhawm khempeuhte kiangah, “Pasian in amah bek a teelsa ka tapa Solomon pen khangno-in pumpi tawh sinna om nai lo a, nasep ding pen lian hi; bang hang hiam cih leh hih inn lianpi in mihing ading hilo a, Topa Pasian’ ading ahi hi. Tua ahih ciangin ka Pasian’ inn dingin ka hih theih zah ciang, phuh dingin onik suang, suangpak, mel tuamtuam a nei suang, suangkang, leh suangmanpha nam khempeuh tampi takte ban-ah kham zat nading nate ah kham, ngun zat nading nate-ah ngun, leh sumngo zat nading nate ah sumngo, sik zat nading nate ah sik, leh sing zat nading nate ah sing ka koih khin zo hi. Tua tham loin, a siangtho inn adingin ka koihte khempeuh banah, ngun leh kham keima aa mahmah zong om a, ka pa Pasian’ inn ka ngaihsutna hangin ka Pasian’ innah ka piakte in: Kawm zut nadingin Ofir gam kham ahi kham talen tulthum, leh a kisiangsaksa ngun talen tulsagih, leh siamneelte in a hih ding nasepna khempeuh adingin kham zat nading nate ah kham leh ngun zat nading nate ah ngun ahi hi. Kua in utna lungsim tawh Topa tungah tu ni-in amahmah kipia-in ki-ap ding na hi uh hiam?” a ci hi. Tua ciangin beh lutangte in ut thu-a piakna bawl uh a, minam makaite, a tul tul-a a ukte leh a za za-a a ukte, leh kumpipa’ nasepna ah a uk uliante in zong hih uh hi. Amaute in Pasian’ inn nasep nadingin kham talen tulnga leh kham darik tulsawm, ngun talen tulsawm, sumngo talen tulsawm leh tulgiat, leh sik talen tul zakhat pia uh hi. Suangmanpha a nei peuhmah in Gershon mi Jehiel’ kepna sung, Topa ’ inn van manpha koihna ah pia uh hi. Tua ciangin hih mite in utna lungsim tawh pia uh ahih manin mite lungdam uh hi; bang hang hiam cih leh amaute in lungsim khempeuh tawh Topa tungah cingtakin pia uh hi; kumpi David zong nakpi takin lungdam hi. Tua ahih ciangin a kikhawmte khempeuh’ omna ah David in Topa phat hi; tua ciangin David in: “Nang, Topa, ka pu uh Israel Pasian aw, a tawntungin thupha ngah ta in. Topa aw, liatna, leh vangliatna, leh minthan’na, leh gualzawhna, leh min liatna in nangma’ aa ahi hi; bang hang hiam cih leh vantung leh leitungah a om khempeuh in nangma’ aa ahi hi; Topa aw, kumpigam in nangma’ aa hi a, tuate khempeuh tungah nang a lutangin hong kisangsak hi. Hauhna leh minphatna nangma kiang pan hong pai a, nangmah in na khempeuh tungah na uk hi. Na khut sungah vangliatna leh thahatna om hi; liatsak nading leh thakhauhsak nading na khut sungah om hi. Tu-in nangma tungah ka nuam uh hi, kote’ Pasian aw, a minthang na min ka phat uh hi. “Ahih hangin kote in hih bangin utna tawh ka piak nadingun keimah in kua hi a, ka mite in bang hi lel ahi hiam? Bang hang hiam cih leh na khempeuh nang kiang pan hong pai hi a, nangma’ aa mah nang tungah kong pia uh hi. Bang hang hiam cih leh ka pu ka pate khempeuh uh mah bangin kote in nangma mai-ah mikhualte leh peemtate ka hi uh hi; ka hunte uh leitungah nilim bang hi a, a kip om lo hi. Topa kote’ Pasian aw, na min siangtho pahtawi nadingin nang ading inn lam nadingin ka piaksa uh hih a tampite in nangma khut sung panin hong pai hi a, a vekpi-in nangma aa mah ahi hi. Nangmah in lungsim entelin thumanna ah na lungkimna ka thei hi, ka Pasian aw; lungsim thumanna tawh hih nate khempeuh citna tawh kong pia khin a, tu-in nang tungah citna leh lungdamna tawh a hong pia, hih lai-ah a om na mite ka mu zo hi. Ka pute uh Abraham, Isaak, leh Israel Pasian, Topa aw, na mite’ lungsim sungah tua bang ngimnate leh ngaihsutnate omsak tawntung in la, amaute’ lungsim nangma lamah kai in. Amah in a lungsim khempeuh tawh na thupiaknate, na tecipannate, leh na thukhamte kemin a vekpi-in sem a, keimah in ka vaihawmsa inn lianpi amah in lam theih nading ka tapa Solomon tungah utna lungsim guan in,” a ci hi. Tua ciangin David in a kikhawmte khempeuh tungah, “ Topa na Pasian uh phat un,” a ci hi. Tua ciangin a kikhawmte khempeuh in a pute a pate uh Pasian Topa phat in, a lu uh kun uh a, Topa bia-in kumpipa tungah zahtakna bawl uh hi. Tua ciangin amaute in Topa tungah biakpiakna bawl uh a, a zing ciangin Topa tungah meihal biakna bawngtal tulkhat, tuutal tulkhat, leh tuuno tulkhat, a leenggahzu tawh a biakna teng tawh, leh Israel khempeuh adingin biak piakna tampi pia uh hi; tua ciangin amaute in tua ni-in lungdamna lianpi tawh Topa mai-ah pawi khamin om uh hi.Tua ciangin amaute in David’ tapa Solomon kumpi-in a nihveina bawl uh a, amaute in Topa adingin amah kumpi-in sathau nilhin, siampi dingin Zadok sathau nilh uh hi. Tua ciangin a pa David tangin Topa ’ kumpi tokhom tungah kumpi-in Solomon tu hi; tua ciangin amah a dau pai a, Israel khempeuh in ama thu mang uh hi. Makaite khempeuh leh a thahat mite, leh Kumpi David’ tapate khempeuhte in zong Kumpi Solomon tungah a thuman ding uh thu ciam uh hi. Tua ciangin Topa in Israel khempeuh muhna ah Solomon tungah minthan’na lianpi pia a, Israel sungah ama ma-in kumpi khatpeuh peuh tungah a kipia ngei nai lo kumpi min liatna guan hi. Tua bangin Jessi’ tapa David in Israel khempeuh tungah kumpi ahi hi. Israel tungah ama uk hun in kum sawmli sung ahi hi; amah in Hebron ah kum sagih sung, Jerusalem ah kum sawmthum-le-thum sung uk hi. Tua ciangin a khangham, a ni cing, hauhna leh minphatna tawh si hi; tua ciangin a tapa Solomon in ama tangin uk hi. Tu-in Kumpi David’ gamtatnate a patna pan a tawpna dongin, thu-mupa Samuel’ Khang Tangthu sung, leh kamsang Nathan’ Khang Tangthu sung, leh thu-mupa Gad’ Khang Tangthu sungah, ama ukna leh ama vangliatnate khempeuh leh ama tung leh Israel tung, leh gamsung kumpi gamte khempeuh tungah a tung thute a kiciamtehna tawh kigelh khawm hi. David’ tapa Solomon in ama kumpi gam kho takin lenkip hi, bang hang hiam cih leh Topa ama Pasian in ompih a, a lian mahmahin amah bawl hi. Solomon in Israel khempeuh tung, a tultul leh a zaza-a a ukte tung, thukhente tung, leh Israel khempeuh sunga makai khempeuhte tung, leh beh lutangte tungah thu gen hi. Tua ciangin Solomon, leh amah tawh a om a kikhawm khempeuh, Gibeon-ah a om mual dawn-a biak piakna munah pai uh hi; bang hang hiam cih leh Topa ’ nasem Moses in gamlak ah a bawlsa Pasian’ kikhopna buk tua lai-ah om hi. Ahih hangin David in Kiriath-jearim panin ama adingin a bawlsaknasa munah Pasian’ thuciamna singkuang paipihto khin hi; bang hang hiam cih leh amah in Jerusalem ah tua adingin puanbuk khat lamsak khin hi. Tua tham loin Hur’ tapa Uri, a tapa Bezalel in a bawl sumngo biaknatau pen Topa ’ biakbuk mai tua lai-ah om hi. Tua ciangin Solomon leh a kikhawm mite in Topa thu dong uh hi. Tua ciangin kikhopna bukah a om, Topa mai-a sumngo biaknatau ah Solomon paito-in tua tungah meihal biakna ganhing tulkhat pia hi. Tua zanin Solomon tungah Pasian kilang a, ama kiangah, “Nang kong piak ding hong ngen in,” a ci hi. Tua ciangin Solomon in Pasian kiangah, “Nangmah in ka pa David tungah a lian leh a kip itna na lak khin a, ama taangin kumpi-in keimah nong koih khin hi. Topa Pasian aw, leitung leivui zahin a tam mi tungah kumpi-in kei hong koih khin na hih manin ka pa David tungah na thuciamna tu-in hong tung sak in. Hih mite ka uk theih nadingin tu-in pilna leh theihna hong pia in; bang hang hiam cih leh hih zah-a a tam hih na mite kua in uk zo ding ahi hiam?” a ci hi. Pasian in Solomon dawngin, “Hih thu na lungsim sungah om a, nangmah in neihsate, hauhna, pahtawina, ahih kei leh nang hong mudahte’ nuntakna ngen loin, a tungah kumpi-in nang kong koihna ka mite na uk theih nadingin nang adingin pilna leh theihna hong ngen na hih manin, pilna leh theihnate nangma tungah hong kipia hi. Nang ma-a kumpite kuamah in a neih ngei loh, nang khit-ate kuamah in zong tua bang a neih loh ding, hauhnate, neihnate, leh pahtawina zong, nangma tungah kong pia ding hi,” a ci hi. Tua ahih ciangin Gibeon-a om mual dawn-a biak piakna mun, kikhopna buk mai panin Jerusalem ah Solomon hong pai hi. Tua ciangin amah in Israel tungah a uk hi. Solomon in leengte leh sakol tung tuangte kaikhawm hi; amah in leeng tulkhat leh zali leh sakol tung tuang mi tulsawm leh tulnih nei a, leeng khuapite sung leh Jerusalem ah tuate koih hi. Tua ciangin kumpipa in Jerusalem ah suang bangin ngun leh kham olsak a, taamtaak singte pen Shefelah theiba sing bangin tam sak hi. Solomon in gamdang panin sakol a laknate in Izipt leh Kue pan hi a, kumpipa’ sumbawlte in a man ding pia-in Kue panin tuate ngah uh hi. Amaute in Izipt panin leeng khat ciangin ngun, shekel za gukin la uh a, sakol khat ciangin za leh sawmnga-in la uh hi; tua mah bangin amaute in zuakkhiat kik dingin Hit kumpite leh Siria kumpite khempeuh tung panin zong sakol leh leeng la uh hi. Tu-in Solomon in Topa ’ min dingin biakinn khat leh ama adingin kumpi inn khat lam ding sawm hi. Tua ciangin Solomon in van pua ding mi tul sawmsagih leh mual tung gamah suang to ding mi tul sawmgiat, leh tuate a vaan dingin mi tulthum leh zaguk seh hi. Tua ciangin Solomon in Tai-ar kumpi Huram’ kiangah thu puak a: “Teen nading inn khat a lam nadingin ka pa David tungah taamtaak sing na puak mah bangin kei tungah zong hong puak in. En in, Israelte’ adingin a tawntung ading a kikipsaksa bangin, ama mai-ah a namtui nate ahi paknamtui hal nading leh Ompihna Anlum piak tawntung nading, leh sabbath nite leh khadet nite leh Topa i Pasian’ adingin a kisehsa pawi nite-in zing leh nitakin meihal biaknate piak nadingin Topa ka Pasian’ minin inn khat lamin ama tungah a ap ding ka hi hi. Kote’ Pasian in pasian khempeuh sangin lianzaw ahih manin ka lam ding inn in lian ding hi. Ahih hangin vantung, a sangpen vantung nangawn in amah huam zo lo ahih manin ama adingin kua in inn lam zo ding ahi hiam? Ama mai-ah paknamtui hal nading cih sim loh ama adingin inn a lamsak dingin kei in kua ka hi hiam? Tua hi a, tu-in ka pa David in a sehsa, Judah leh Jerusalem ah kei tawh a om nasep siamte tawh a semkhawm dingin kham, ngun, sumngo, leh sik, leh a ausan, a dupsan, puandumte, leh na sepna-ah zong siamna a nei mi khat hong puak in. Sing nasem sing a phukte’ adingin a kisuvui mangbuh beem tul sawmnih, mangbuhham beem tul sawmnih, leenggahzu tambong tul sawmli, leh sathau tambong tul sawmli ka pia ding hi,” a ci hi. Tua ciangin Tai-ar kumpi Huram in lai-in thuk-in Solomon kiangah khak a, “ Topa in a mite it ahih manin amaute tungah kumpi-in nang hong koih hi,” a ci hi. Tua ciangin a lai sungah gen thuah lai a, “ Topa adingin biakinn khat, leh ama adingin kumpi inn khat a lam ding, thu theihna leh thu telna tawh a kidim tapa pil, David tungah pia-in, van leh lei a bawl Israel Topa Pasian in thupha ngah ta hen. Tua ahih ciangin tu-in ka topa in a gensa mangbuh leh mangbuhham, sathau leh leenggahzute, na nasemte tungah puak in; tua ciangin na kisap sing peuhmah Lebanon panin kong phuk ding uh a, nangmah in Jerusalem ah na puaktoh theih nadingin phong-in tuipi tungah Joppa dong nang kiangah kong paipih ding uh hi,” zong ci lai hi. Tua ciangin a pa David in mi phazah a sim mah bangin, Solomon in Israel gam sunga om gamdang mi khempeuh mi phazah simna bawl hi; mi tulza khat leh tul sawmnga leh tulthum, leh zaguk pha hi. Amah in van pua dingin amaute tul sawmsagih, mual tung gamah suang to dingin tul sawmgiat, leh mite’ nasep a vaan dingin tulthum leh zaguk seh hi. Tua ciangin Solomon in Jerusalem sung Moriah Mual tung a, a pa David tungah Topa a kilahna mun, David in a seh-nasa mun ahi, Jebus mi Ornan ancilna phual-ah Topa ’ inn lam ding kipan hi. Amah in ama uk a kum lina a kha nihna ni nih ni-in lam ding kipan hi. Pasian’ inn lam nading Solomon’ geelna in: a dung nidanga kizang tong-in, tong sawmguk hi a, a vai tong sawmnih ahi hi. Inn mai-a innliim in inn vai tawh kikimin tong sawmnih sau hi; tua ciangin a san’na in tong sawmnih ahi hi. Amah in taaksan tawh a innpi kawm dapin kham hoih tawh zut a, tua tungah nisuh leh khainiang bawl hi. Amah in suang manpha phutin a inn zeem hi. A kham in Parvaim kham ahi hi. Tua ahih ciangin amah in a inn—a innsunte, a sangkilte, a kawmte, leh a kongkhakte, kham tawh zut hi; tua ciangin a kawmte tungah kherubte bawl hi. Tua ciangin amah in siangthopen mun bawl hi; a dung in inn vai tawh kizui-in tong sawmnih hi a, a vai in tong sawmnih mah ahi hi; amah in kham hoih talen zaguk tawh zut hi. A kilhnate a gihna in kham shekel sawmnga ahi hi. Tua ciangin amah in a inn dawl tungnungte kham tawh zut hi. Amah in siangtho pen mun sungah sing kherub nih bawlin kham tawh tuate zut hi. Tua kherub tegel kha a kizalin tong sawmnih ahi hi; a khat’ kha khat in tong nga hi-in inn kawm ban a, tua ciangin a kha lang khat tong nga in a kherub dang khat’ kha ban hi. Tua mah bangin a kherub dang khat’ kha lang khat in tong nga hi-in inn kawm lang khat ban a, tong nga mah a sau a kha lang khat in a kherub masa’ kha tawh kizom hi. Hih kherubte’ khate in tong sawmnih huam hi; kherubte amau’ khe-in ding-in innpi sung lam nga uh hi. Tua ciangin amah in a dum leh a ausan leh a dupsan puante leh saihadial tawh a dalna puan bawl a, tua tungah kherubte bawl hi. Amah in inn mai san-ah tong sawmthum-le-nga a sang, a dawn tuakah tong nga a pha khuamluzepna a nei khuampi nih bawl hi. Amah in ngawng-a awhte bangin khainiangte bawlin khuampite dawnah koih hi; tua ciangin amah in mangkawlsing zakhat bawlin khainiangte tungah koih hi. Amah in tua khuamte, khat leitaw lam, a khat leilu lam, biakinn mai-ah phut hi; amah in leitaw lam-a om pen Jakhin phuakin, leilu lam-a om pen Boaz phuak hi. Amah in sumngo biaknatau, a dung tong sawmnih, a vai tong sawmnih a sang tong sawm a pha khat bawl hi. Tua ciangin amah in a kisung tuikuangpi bawl hi; tua in a bem hi a, a gei khat pen a gei khat dong tong sawm pha-in, tong nga sang a, a kimkot tong sawmthum pha hi. Tuikuangpi kimkot a nuai tong sawmthum sungah um gah limte om hi; tua um gahte gual nihin om a, tuikuangpi a kisun’in kisungkhawm pah hi. Bawngtal sawm-le-nihte tungah tua tuikuangpi kinga a, thum leilu lam nga a, thum nitumna lam nga-in, thum leitaw lam nga a, thum nisuahna lam nga hi; tuate tungah a tuikuangpi kinga a, a nung lam uh a sung lamah om hi. A sahna in khutpeek mai cia ahi hi; a geivial pen unok pak tawh a kibang hai geivial bangin kibawl hi; tua sungah tui tambong tulguk val ta hi. Amah in kisil nading tuikuang dang sawm zong bawl a, leitaw lamah nga, leilu lamah nga koih hi. Amaute in meihal biakna a, a zatte uh hihte sungah silsiang ding uh a, tuikuangpi in siampite’ kisil nading ahi hi. Tua ciangin amah in a kigelhsa bangin kham meivakkhuam sawm bawl a, biakinn sung leitaw lamah nga, leilu lamah nga koih hi. Amah in sabuai sawm zong bawl a, biakinn sung leitaw lam pangah nga, leilu lamah nga koih hi. Tua ciangin amah in kham kuang zakhat bawl hi. Amah in siampite’ inntual, leh inntual lian, leh inntual kongkhakte bawl a, a kongkhakte sumngo tawh zut hi. Tua ciangin amah in inn khang nisuahna lam kiu-ah tuikuangpi koih hi. Huram in beelte, kawbiate, leh kuangte zong bawl hi. Tua ahih ciangin Huram in Kumpi Solomon’ adingin Pasian’ inn a bawl nasep a zawhte in: Khuampi nihte, kuang-ukte, leh khuampite lu dawnah a om khawmluzepna nihte; leh khuampite lu dawnah a om khuamluzepna kuang-uk nihte a tuam dingin ngen bang-a kibawl nihte, leh khuampite tungah a om khuamluzepna kuang-uk nihte a tuam dingin ngen banga kibawl khat adingin mangkawlsing gual nih ahi ngen banga kibawl nihte adingin mangkawlsing zalite ahi hi. Amah in a din’nate, leh din’nate tungah a kikoih tuikuangte, leh a tuikuangpi khat, leh tua nuai-a om bawngtal sawm-le-nihte zong bawl hi. Topa ’ inn dingin Kumpi Solomon’ adingin siapa Huram in a kihal sumngo tawh beelte, kawbiate, sikkeukate, leh hihte’ adingin nazat khempeuh a bawl hi. Jordan zanglei sung Sukkoth leh Zeredah kikal beel lei-ah kumpipa in hihte sung hi. Solomon in hih nate tampi tak bawl a, sumngo a gik zah kithei zo lo hi. Tua ahih ciangin Solomon in Pasian’ inn sunga om na khempeuh a bawlte in: kham biakna tau, Ompihna Anlum adingin sabuaite, a kigelhsa bangin biakinn sungnung mai-ah vak dingin kham citak meivakkhuamte leh a meivakte; kham siangpen tawh a kibawl a pakte, a meivakte, leh a tehte; kham siangtho tawh a kibawl a taitehte, kuangte, paknamtui adingin pakante, leh vutluahna hi a, siangthopen mun pai nading kongkhak sungnungte’ ading leh biakinnpi sung kongkhakte’ adingin biakinn kongkhak bilte in kham ahi hi. Tua bangin Topa ’ inn ding Solomon in ahih nasep khempeuh kizo hi. Tua ciangin a pa David in a apsa nate Solomon in paipihin, Pasian’ inn van manpha koihnate sungah a ngunte, a khamte, leh um-le-beelte khempeuh a seng hi. Tua ciangin Zion a kici David khuapi sung panin Topa ’ thuciamna singkuang a paipih to dingin Solomon in Israel upate, minam lutang khempeuh, leh Israel beh makaite, Jerusalem ah kaikhawm hi. Tua ciangin a kha sagihna-a pawi hun sung kumpipa’ mai-ah Israel mi khempeuh kikhawm uh hi. Tua ciangin Israel upate khempeuh hong pai uh a, Levi mite in thuciamna singkuang la uh hi. Tua ciangin amaute in thuciamna singkuang, leh kikhopna buk, leh puanbuk sunga om a siangtho um-le-beel khempeuh pua to uh hi; siampite ahi Levi mite in tuate pua to uh hi. Tua ciangin kumpi Solomon leh ama mai-ah a kikhawm Israelte khempeuh thuciamna singkuang mai-ah om uh a, biakna-in tuu leh bawngtal tampi tak pia uh ahih manin a phazah kisim zo lo hi. Tua ahih ciangin siampite in kherubte’ kha nuai, siangthopen mun sung, biakinn sungnung sung ama munah Topa ’ thuciamna singkuang paipih uh hi. Kherubte in thuciamna singkuang tungah a khate uh zak ahih manin kherubte in thuciamna singkuang leh a zawlte tungah khuhna khat suak uh hi. A zawlte sau ahih manin siangtho mun panin biakinn sungnung mai-ah a mongte kidawk hi; ahih hangin a pua lam panin kimu thei lo hi; tu ni dongin tua lai-ah tuate om hi. Amaute Izipt panin hong paikhiat lai-in Topa in Israel mite tawh thuciamna a bawlna mun Horeb-ah Moses in suangpeek nihte a koih sim loh thuciamna singkuang sungah bangmah om lo hi. Siangtho mun panin siampite hong pusuakin (bang hang hiam cih leh amau’ pawlte cih tuam om loin tua lai-a om siampite khempeuh amau mahmah kisian’suah uh hi; tua ciangin Levi mi lasate Asaf, Heman, leh Jeduthun, amau’ tapate leh a behte, saihadial puan tawh kizemin, daltuahte, harp lasaknate, leh laiza lasaknate tawi-in peengkul tum siampite za leh sawmnih tawh biakna tau nisuahna lamah ding khawm uh hi; aw kikhatin phatin Topa tungah lungdam koh ding pen peengkul tumte leh lasate’ nasep ahi hi), peengkulte leh daltuahte leh adang lasaknate tawh, “ Topa tungah lungdam koh ding hoih hi, bang hang hiam cih leh ama itna kip tawntung hi,” ci-in Topa phatna-in la a kisak ciangin, Topa ’ inn in meii tawh kidim a, meii hangin siampite in na sem zo lo uh hi; bang hang hiam cih leh Topa ’ minthan’na in Pasian’ inn sung a dim hi. Tua ciangin Solomon in, “Khuamial sahpi sungah teen ding a teel Topa aw, a tawntungin na teen nading mun, a lian inn khat, hih lai-ah kong lamsak khin hi,” a ci hi. Tua ciangin kumpipa in en kawikawi a, Israel mi a kikhawmte khempeuh a din’ laitakin amaute khempeuh thupha pia hi. Tu-in Israel Pasian, Topa ’ min dingin inn khat lam ding ka pa David’ lungsim sungah om hi. Ahih hangin Topa in ka pa David tungah, ‘Na lungsimah keima min dingin inn khat lam ding na ngaihsun a, tua na ngaihsutna hoih mahmah hi; ahi zongin keima min dingin tua inn a lam dingpa in nangmah hi loin, nangma sung pan hong piang ding na tapa hizaw ding hi,’ a ci hi. Tu-in Topa in a bawlsa thuciamna tungsak khin hi; bang hang hiam cih leh Topa ’ thuciam bangin ka pa David’ munah hong khangin Israel kumpi tokhom ah kong tu a, Israel Pasian, Topa ’ min dingin inn ka lam khin hi. Amah in Israel mite tawh a bawl Topa ’ thuciamna a kikoihna singkuang tu-in tua lai-ah ka koih khin hi,” a ci hi. Tua ciangin Israel a kikhawmte khempeuh omna Topa ’ biaknatau mai-ah Solomon ding-in a khut zan hi. Solomon in a dung tong nga, a vai tong nga, a sang tong thum a pha sumngo tau khat bawlin inntual ah koih khin hi; tua ciangin tua tungah amah ding hi. Tua ciangin Israel a kikhawmte khempeuh muhin amah khuk din’in van lamah a khut zan hi; tua ciangin, “Israel Pasian, Topa aw, vantungah ahi a, leitungah ahi zongin thuciamna lenin a lungsim khempeuh uh tawh nangma thu hong mang na nasemte tungah itna kip a lak, nang tawh a kibang Pasian om lo hi; ama tungah na gensa bangin na nasem ka pa David tungah a tungsakpa na hi hi; hi hi, na kam tawh thu na gen a, na khut tawh tu ni-in na tungsak hi. Tua ahih ciangin tu-in Israel Pasian, Topa aw, ama tungah thuciamin, ‘Keima thu nang na man’ bangin na suan na khakte in ka thukham zui-in a gamtatna uhah a kidop nak uh leh Israel kumpi tokhom tungah a tu dingin keima mai-ah mi khat beek na kitasam kei ding hi,’ na cihsa bangin na nasem ka pa David tawh na thuciamsa kipsak in. Tua ahih ciangin tu-in Israel Pasian, Topa aw, na nasempa David tungah na gensa na kammal kipsak in. “Ahih hangin Pasian in mite tawh leitungah hong teeng takpi ding ahi hiam? En in, vantung leh a sangpen vantung in nang hong huam zo lo hi; hih keima lamsa inn in hong huam zo lo zawkan ding hi! Ahi zongin na nasempa’ thungetna leh hong thuumna don in; Topa ka Pasian aw, na nasempa in na mai-ah hong kikona leh hong nget thungetna ngai in; na nasempa in hih mun lamah hong thungetna na zak theih nadingin nangmah in na min koih nadingin na ciamsa mun hih inn lam sun leh zanin na mit tawh en in. Amaute in hih mun lam nga-in thu hong nget uh ciangin na nasempa leh na mi Israelte’ hong thuumnate nangmah in ngai in; hi hi, na teen’na mun vantung panin za in; na zak ciangin maisak in. “Mi khat a vengte tungah khialin kiciamna kiciamsak a, hong pai-in hih inn sung na biakna tau mai-ah a kiciamna hong kiciam leh, vantung panin za-in gamta in la, na nasemte thukhenin, a mawh mi a gamtatna ama lu tung mah-ah tusakin thuk in la, a thuman mi a thumanna tawh kizui-in thaman piakna tawh langsak in. “Na mi Israelte nang tungah hong khialhna hangin a galte uh mai-ah guallelin, amaute hong kihei kikin na min hong phawkin hih inn sung nangma kiangah thungenin thuumna hong bawl ciangin, vantung panin nangmah in za in la, na mi Israelte’ khialhna maisakin amaute leh a pu a pate uh tungah na piak leitungah amaute paipih kik in. “Amaute nangma tungah hong khialhna hangin vantung kikhakcipin guah a zuk loh hun, amaute na gimsak hun ciangin, amaute in hih mun lam nga-in thu ngen a, na min hong phawkin amau’ khialhna panin a kihei uh leh, amaute a pai nading lampi hoih hih in la, vantung panin za-in na nasemte, na mi Israelte’ khialhna maisak in; tua ciangin na mite tungah gamh-in na piak na leitang tungah guah zusak in. “Gam sungah kialpi tungin, pulnatna ahi a, ankung natna ahi a, ankung zawngkhalna ahi a, kauphe ahi a, lung ahi zongin om a; amau’ khuapi khatpeuh peuh ah a galte un umcihin; bang bang gimna, bang bang natna hi taleh; mi khatpeuh ahi a, na mi Israelte khempeuh in ahi zongin amau’ natna leh a dahna ciat uh thei-in hih inn lamah a khut uh hong zanin bangbang thungetna hi taleh bangbang thuumna hi taleh hong bawl leh; na teenna mun vantung panin za in la, maisakin,amau’ gamtatna khempeuh tawh kizui-in a lungsim uh na theih bangin amaute tungah pia ciat in (bang hang hiam cih leh nang, nang bek in mihing’ lungsim na thei hi); tua hi leh ka pu ka pate uh tungah na piak leitang tungah a nuntak hun sung khempeuh uh amaute in nang hong zahtakin nangma thu hong zui ding uh hi. “Tua mah bangin na mi Israel a hilo gamdang mi khat a lian nangma min hang leh, nangma thahatna hangin a gamlapi gam panin hong pai-in, hih inn lam nga-in thu hong nget leh na teenna mun vantung panin za in la, gamdang mipa in na tungah hong ngetna khempeuh tawh kizui-in hih in; tua hi leh nangma mi Israelte mah bangin leitung mi khempeuh in na min thei-in nang hong zahtak ding uh a, keima lamsa hih inn in nangma min tawh a kilo ahihna thei ding uh hi. “A galte uh do dingin na mite kuan khia-in, bangbang lamah amaute sawl hita lecin, nangmah in na teelsa hih khuapi lam nangma tung leh nangma min dingin ka lamsa inn lam nga-in amaute in thu hong nget uh leh, amau’ hong thungetna leh hong thuumnate vantung panin za-in amau’ vai huh in. “Amaute nang tungah hong khialin (a khial lo kua om hiam?) amaute tungah nang heh a, galte tungah amaute pia-in, amaute a gamla gam ahi a, a nai-ah ahi zongin galmatin kipua khia a; ahi zongin galmatin a kipuakna gamah amaute in a lungsim sung uhah tua thu ngaihsunin kisik kik a, ‘Kote khialin lam pialin ka gitloh tat uh hi,’ ci-in amaute galmatin a omna gam panin nang tungah hong thuum a; amaute galmatin a kitutna, galmatin a omna leitangah a ngaihsutna khempeuh uh leh a lungsim khempeuh uh tawh amaute kisik kikin, na teelsa khuapi leh nangma min dingin ka lamsa inn, nangmah in amau’ pute pate tungah na piak amau’ leitang lam nga-in thu hong nget uh leh, na teenna vangtung panin amau’ thungetna leh thuumnate za in la, amau’ vai huhin nang tungah hong khial na mite maisak in. Ka Pasian aw, tu-in na mit hak in la, hih lai muna thungetna na bil hong ngat in. “Tu-in ding-in Topa Pasian aw, na tawlngakna ding munah, na vangliatna singkuang tawh pai in. Topa Pasian aw, na siampite, gupna tawh zem in la, na hoihna ah na mi siangthote lungdam ta hen. Topa Pasian aw, na sathau nilhpa nial kei in! Na nasempa David na itna sa hong phawk in,” a ci hi. Solomon a thunget a tawp ciangin, vantung panin meikuang hong pai sukin meihal biakna leh biak piaknate haltum a, tua ciangin Topa ’ minthan’na in biakinn hong dim hi. Topa ’ minthan’na in Topa ’ inn dim ahih manin Topa ’ inn sungah siampite lut thei lo uh hi. Israel mite khempeuh in meikuang hong pai sukin Topa ’ minthan’na biakinn tungah a om a muh uh ciangin suangphah tungah lei lam maingatin kun uh a, bia-in Topa tungah lungdamna ko-in, “ Topa tungah lungdam koh ding hoih hi; bang hang hiam cih leh ama itna kip tawntung hi,” a ci hi. Tua ciangin kumpipa leh mi khempeuh in Topa ’ mai-ah biakna pia uh hi. Kumpi Solomon in biakna-in bawngtal tul sawmnih leh tulnih leh tuutal zakhat leh tul sawmnih pia hi. Tua ahih ciangin kumpipa leh mi khempeuh in Pasian’ inn ap uh hi. Siampite amau’ panmun uhah ding uh hi; Levi mite zong, Kumpi David in Topa tungah lungdam koh nadingin a bawl Topa ’ tungah la sak nading lasaknate tawh ding uh hi—bang hang hiam cih leh ama itna kip tawntung hi—David in amau’ nasepna tawh phatnate a bawl ciangin tua bangin hih uh hi; amaute tawh a kigalsai-ah siampite in peengkulte tum uh hi; tua ciangin Israel khempeuh ding uh hi. Tua ciangin Solomon in Topa ’ inn mai-ah a om inntual laizang ap hi; bang hang hiam cih leh Solomon in a bawl sumngo biakna tau-ah meihal biakna leh an tawh biakna leh a thaute ta zo lo ahih manin tua lai munah amah in meihal biakna leh thunuam-a biakna thaute pia hi. Tua hun lai takin Solomon leh amah tawh a om Israel khempeuh mihon tampi in Hamath lutna panin Izipt lui ciang dongah ni sagih sung pawi a kham uh hi. Tua ciangin a ni giat ni-in amaute in a thukhupna kikhopna khat nei uh hi; bang hang hiam cih leh amaute in biakna tau apna ni sagih sung pawikham uh hi; pawi dang ni sagih sung kibawl beh lai hi. A kha sagihna a ni sawmnih leh ni thum ni-in, Topa in David leh Solomon leh ama mi Israel tungah a hoih a bawlna hangin amah in lungdamna leh kipahna tawh a inn uhah mite ciah khia sak hi. Tua bangin Solomon in Topa ’ inn leh kumpi inn zo hi; Solomon in Topa ’ inn leh ama inn sungah hih dinga a geel khempeuh nuam takin zo hi. Tua ciangin zanin Solomon’ tungah Topa kilangin ama kiangah: “Na thungetna ka za khin a, keima adingin biakpiakna inn dingin hih mun ka teel khin hi. Keimah in vantungte khakcipin guah a zuk loh ciang ahi a, gam sung a netum dingin kauphe thu ka piak ciang ahi a, ka mite lakah natna ka tun’sak ciang ahi zongin, keima minin a kisam ka mite amau mahmah kiniamkhiatin, thu ngenin ka mai hong zong a, amau’ gitlohnate panin a kihei uh leh, tua ciangin keimah in vantung panin ka za ding a, amaute’ khialhna maisakin a leitang uh ka hoihsak kik ding hi. Tu-in ka mitte hakin hih lai munah a kingen thungetna ka bilte in ngai ding hi. Bang hang hiam cih leh a tawntungin ka min a om theih nadingin keimah in hih inn teelin ka ap khin hi; ka mitte leh ka lungsim a tawntungin tua lai-ah om ding hi. Nang adingin ahih leh, na pa David a gamtat bangin keima mai-ah na gamtat a, nang kong sawl khempeuh bangin semin ka thukhamte leh ka biakna ngeina kipte na zuih leh, na pa David tawh kiciamin, ‘Israel a uk dingin mi khat zong na kitasam kei ding hi,’ ka cih bangin na kumpi tokhom ka kipsak ding hi. “Ahih hangin note kihei-in, na mai uhah ka koihsa ka thukhamte leh ka thupiaknate nusia a, pai-in pasian dangte’ na semin tuate na biak uh leh, note tungah kong piaksa leitang panin note kong botkhia ding hi; tua ciangin ka min dingin ka apsa hih inn ka muhna panin ka lawnkhia ding a, mi khempeuh lakah paunak leh gentehna ka suaksak ding hi. Tua ciangin a minthangsa hih inn a nawkkha khempeuh in lamdangsa-in, ‘Bang hangin hih bangin Topa in hih gam leh hih inn bawl ahi hiam?’ ci ding uh hi. Tua ciangin amaute in, ‘Bang hang hiam cih leh Izipt gam panin amaute a paikhiatpih a pu a pate uh Pasian ahi Topa amaute in nusia uh a, pasian dangte pom uh a, tuate bia-in a na sem uh hi; tua ahih ciangin amah in hih siatna khempeuh amaute tungah tungsak hi,’ ci ding uh hi,” a ci hi. Solomon in Topa ’ inn leh ama inn a lam khit kum sawmnih a cin’ ciangin, Kumpi Huram in ama tungah a piaksa khuapite Solomon in lampha-in tuate sungah Israel mite teeng sak hi. Tua ciangin Hamathzobah-ah Solomon pai-in tua gam la hi. Amah in gam sungah Tadmor khua satin Hamath gam sungah vankoihna khuapite khempeuh lam hi. Amah in khuapi kulh, kongpite, leh zawlte a nei Bethhoron Tungnung leh Bethhoron Nuainung, leh Baalath, leh Solomon’ neih vankoihna khuapite khempeuh, leh a leengte’ adingin khuapite khempeuh, leh a sakol tung tuangte’ ading khuapite, leh Solomon in Jerusalem, Lebanon sung leh ama ukna gam sung khempeuh ah a lam nop khempeuh zong lam hi. Israel a hilo Hit mite, Amor mite, Perez mite, Hiv mite, leh Jebus mite sung panin a om lai, Israel mite in a suksiat nai loh amau nungah a suan leh khak uh tua gam sungah a om laite—Solomon in aana tawh siah a pia dingin bawl a, tua bangin tu ni dongin amaute om uh hi. Ahih hangin Israel mite ahih leh Solomon in ama na a sem dingin sal-in bawl lo hi; amaute in galkapte, leh ama nuai-ah uliante, a leengte a ukte, leh a sakol tung tuangte ahi uh hi. Hihte in Kumpi Solomon’ ulian ukpite hi a, mite tungah aana a zang mihing zanih leh sawmnga ahi uh hi. Solomon in David khuapi panin Faro’ tanu ama zi paipihin ama adingin a lamsak innah tun’pih hi; bang hang hiam cih leh amah in, “ Topa ’ thuciamna singkuang a tun’nasa munte siangtho ahih manin Israel kumpi David’ inn sungah ka zi teeng lo ding hi,” a ci hi. A pa David’ biakna ngeina kip tawh kizui-in, amau’ nasepna dingin siampite a pawlpawlin a kikhennate, leh ni simin nasepna-ah a kisam bangin siampite’ mai-ah Levi mite phatna panmunte leh nasepna, leh kongpi tampite’ adingin kongcingte amau’ pawl kikhenna ciatah amah in seh hi; bang hang hiam cih leh tua bangin Pasian’ mipa David in thu pia hi. Thu khatpeuh peuh leh van manpha koihnate tawh kisai-in kumpipa in siampite leh Levi mite a thupiakna bang teekteekin amaute in sem uh hi. Tua bangin Topa ’ inn bulpi a kiphuh ni-a kipan a kizawh dongin Solomon’ nasep khempeuh kimansiang hi. Tua ahih ciangin Topa ’ inn kizo hi. Tua ciangin Edom gam sung tuipi gei-a om Ezion-geber leh Eloth khuate-ah Solomon pai hi. Tua ciangin kumpi Huram in teembawte leh tuipi a thei a nasemte tawh ama nasemte sawl a, Solomon’ nasemte tawh Ofir-ah pai khawmin tua lai panin kham talen zali leh sawmnga pua-in kumpi Solomon kiang tun’ pih uh hi. Tu-in Sheba kumpinu in Solomon’ minthan’na a zak ciangin thudotna haksate tawh amah a ze-et dingin Jerusalem ah hong pai a, nungzui honpite leh a namtui nate leh kham tampi leh suangmanphate a pua kalaohte hong keng hi. Solomon kiangah amah hong tun’ ciangin a lungsim-a om khempeuh ama tungah gen hi. Tua ciangin Solomon in ama dotna khempeuh dawng hi; Solomon in ama tungah a gentel theih loh haksa a sakluat bangmah om lo hi. Sheba kumpinu in Solomon’ pilna, a ma lamsa inn, a sabuai-ah a an, a uliante’ omzia, leh a nasemte’ etna zia leh a puansilhte, a anpiate leh a puansilhte, leh Topa ’ inn ah a piak a meihal biaknate a muh khit ciangin a lungsim bei hi. Tua ciangin amah in kumpipa kiangah, “Ka gam sung panin nangma thute leh na pilna ka zak a kigen thute man hi; ahih hangin kei hong pai-in ka mit in ka muh matengin a kigen thute ka um kei hi; a tak takin, na pilna a liatna alang zong kei kiangah hong kigen lo ahi hi; ka zaksa thute sangin na thupizaw hi. Na zite mi hampha! Na mai-ah ding tawntungin na pilna a za hih na nasemte mi hampha! Na tungah lungkimin Topa na Pasian adingin kumpi-in a kumpi tokhom tungah nang hong tusak Topa na Pasian in thupha ngah ta hen! Na Pasian in Israel itin a tawntungin amaute kipsak ding ahih manin, nangmah in thutang leh thuman na sepkhiat theih nadingin amaute tungah kumpi-in nang hong koih hi,” a ci hi. Tua ciangin amah in kumpipa tungah kham talen zakhat leh sawmnih, leh a namtui nate tampi tak, leh suangmanphate pia hi. Sheba kumpinu in Kumpi Solomon tungah a piak tua bang a namtui nate zahin a hoih om ngei lo hi. Tua tham loin Ofir panin kham hong pua kumpi Huram’ nasemte leh Solomon’ nasemte in cingsing leh suangmanphate hong pua uh hi. Tua ciangin kumpipa in Topa ’ inn leh kumpi inn-a cingsing kahlei ding leh lasate’ adingin laiza lasaknate leh harp lasaknate-in zong bawl hi; tua hun ma-in Judah gam sungah tua bang kimu ngei lo hi. Tua ciangin kumpinu in amah a puakte a thukna-in letsong a piakte banah, a deih khempeuh, a nget khempeuh, Sheba kumpinu tungah Solomon in pia hi. Tua ahih ciangin amah kihei-in a nasemte tawh ama gamah ciah kik hi. Tu-in kum khat sungin Solomon tungah a tung kham a gihna in kham talen zaguk leh sawmguk-le-guk hi a, sumbawlte leh sumbukte’ tutte a kisim lo ahi hi; Abrabia kumpite khempeuh leh gamsung a ukte in Solomon kiangah kham leh ngun puak uh hi. Kumpi Solomon in kham a kiseek lumpi zanih bawl hi; lum khat ciangin a kiseek kham shekel zaguk bei hi. Tua ciangin amah in a kiseek kham lum zathum bawl hi; lum khat ciangin kham shekel zathum bei hi; tua ciangin kumpipa in Lebanon tulak kumpi inn sungah tuate koih hi. Kumpipa in saiha kibawl kumpi tokhom a lian khat zong bawl a, kham citak tawh zut hi. Kumpi tokhom in cial guk leh kham a kibawl khengakna khat nei-in, tuate kumpi tokhom tawh kimat a, tutna pang tuakah ban ngaknate leh a ban ngaknate pangah humpinelkai nih ding a, kahlei cial guk mong ciatah khat ciat, humpinelkai sawm-le-nih ding hi. Kumpi gam khatpeuh peuh ah tua tawh a kibang kibawl ngei lo hi. Kumpi Solomon’ dawnna haite khempeuh kham hi a, Lebanon tulak inn sung um-le-beelte khempeuh kham citak ahi hi; Solomon’ hun lai-in ngun bangmahin kingaihsun lo hi. Bang hang hiam cih leh Kumpi Huram’ nasemte tawh kumpipa’ teembawte, Tarshish ah pai hi; Tarshish teembawte kum thum simin khatvei hong tungin kham, ngun, saiha, zawngmaw, leh zawngpi hong puak zel hi. Tua bangin kumpi Solomon in hauhna leh pilna tawh leitung kumpi khempeuh khupnelh hi. Tua ciangin Pasian in ama lungsim sungah a koihsak pilna a za dingin leitung kumpi khempeuh in Solomon’ omna hong zong uh hi. Amaute khempeuh in a letsong ciat uh, ngun leh kham tawh kibawl nate, puante, mirrah paknamtuite, a namtui nate, sakolte, le la-sakolte, a kum kumin tampi tak hong puak uh hi. Solomon in sakolte leh leengte adingin buk tulli, leh sakol tuang mi tulsawm leh tulnih nei a, leeng khuapite leh Jerusalem khua ah amah tawh tuate omsak hi. Amah in Eufrates panin Filistiate gam ciang, leh Izipt gamgi ciang dong kumpi khempeuh uk hi. Kumpipa in Jerusalem ah suang bangin ngun ol sak a, Shefelah theiba sing bangin taamtaak sing tamsak hi. Solomon’ adingin Izipt leh gam khempeuh panin sakolte kila hi. Tu-in Solomon’ gamtatna a om laite, a kipatna pan a tawp dong, kamsang Nathan’ tangthu sung, leh Shiloh khua mi Ahijah’ thugen kholhna sung, leh Nebat’ tapa Jeroboam’ thu tawh kisai-in thu-mupa Iddo’ mangmuhna sungah kigelh hilo ahi hiam? Solomon in Jerusalem panin Israel khempeuh tungah kum sawmli sung uk hi. Tua ciangin Solomon a pate tawh ihmu a, a pa David khuapi sungah kivui hi; tua ciangin a tapa Rehoboam in ama taangin uk hi. Amah kumpi a suaksak dingin Israel khempeuh Shekhem ah pai ahih manin Shekhem ah Rehoboam pai hi. Nebat’ tapa Jeroboam in tua thu a zak ciangin (bang hang hiam cih leh kumpi Solomon kiang panin a taina Izipt ah amah om hi), Izipt panin Jeroboam hong ciahkik hi. Amaute in mi sawlin amah sam kik uh a, tua ciangin Jeroboam leh Israel khempeuh hong pai-in Rehoboam kiangah, “Na pa in ka hakkol uh gik sak hi. Tua ahih ciangin tu-in na pa’ nasep haksa leh kote’ tungah a gik ama hakkol zang sak in la, kote in nangma na kong sem ding uh hi,” a ci uh hi. Amah in amaute kiangah, “Nithum sung a hun hong pia un la, tua ciangin hong pai kik un,” a ci hi. Tua ciangin Kumpi Rehoboam in a pa Solomon a nuntak lai-a a mai-ah a ding khangham mite thu kuppih a, “Hih mite ka dawn’ nading ngaihsutna hong bang ci piak na hi uh hiam?” a ci hi. Tua ciangin amaute in ama kiangah, “Hih mite tungah nang dik a, amaute lungkimsak in, amaute tungah kam hoih pau lecin, amaute in nangma nasemte hi tawntung ding uh hi,” a ci uh hi. Ahih hangin khanghamte in a ngaihsutna a piak nusia-in amah tawh a khang khawm, ama mai-ah a ding khangnote thu kuppih hi. Amah in amaute kiangah, “Kei kiangah, ‘Na pa in kote tungah hong suat hakkol zang sak in,’ hong ci hih mite i dawn’ nading bang ngaihsutna hong pia na hi uh hiam?” a ci hi. Tua ciangin amah tawh a khang khawm khangnote in ama kiangah, “Nangma kiangah, ‘Na pa in ka hakkol uh giksak hi; ahih hangin kote’ adingin hong zangsak in,’ hong ci mite kiangah hih bangin gen in, ‘Ka khutmeno in ka pa’ kawng sangin lianzaw hi. Tu-in ka pa in note tungah hakkol gik hong koihna ah keimah in na hakkol uh ka behlap ding hi. Ka pa in ciang tawh note hong thuhilh hi; ahih hangin keimah in ciang ling nei tawh note kong thuhilh ding hi,’ ci in,” a ci uh hi. Tua ahih ciangin kumpipa in, “Kei kiangah ni thum ni-in hong pai kik un,” a cih mah bangin Jeroboam leh mi khempeuh a ni thum ni-in Rehoboam’ kiangah hong pai uh hi. Tua ciangin kumpipa in amaute ngawh dawnin khangham mite’ ngaihsut piakna nusia a, “Ka pa in na hakkol uh giksak hi; ahih hangin keimah in ka behlap ding hi; ka pa in ciang tawh note hong thuhilh hi; ahih hangin keimah in ciang ling nei tawh note kong thuhilh ding hi,” ci-in khangnote’ ngaihsut piakna bangin kumpi Rehoboam in amaute kiangah gen hi. Tua ahih ciangin kumpipa in mite’ thu ngai lo hi; bang hang hiam cih leh Shiloh khuami Ahijah tung tawnin Nebat’ tapa Jeroboam tungah a thugente Topa in a tun’sak theih nadingin Pasian a pian’sak thu kiheina ahi hi. Kumpipa in amaute’ thu a ngaih lohna Israel khempeuh in a muh uh ciangin, mite in kumpipa dawngin, “David’ sungah kote in bang ngah nei ka hi uh hiam? Jessi’ tapa’ sungah gamluah ka nei kei uh hi. Israelte aw, na inn ciat uhah ciah un, Rehoboam in ama ading vaihawm tawm hen,” a ci uh hi. Tua ahih ciangin Israel khempeuh a inn ciat uhah kihem uh hi. Ahih hangin Judah khuapite ah a teeng Israel mite tungah Rehoboam in uk hi. Tua ciangin kumpi Rehoboam in aana tawh na kisemsakte a uk nasep ukpa Hadoram Israelte kiangah sawl a, Israel mite in suang tawh amah na denglum uh hi. Tua ciangin Jerusalem ah a tai dingin kumpi Rehoboam a leeng tungah tuang dingin nawhtat hi. Tua ahih ciangin tu ni dongin Israel in David innkuan lehdo hi. Jerusalem ah Rehoboam hong tun’ ciangin a kumpi gam a ngah kik nadingin Israelte a do dingin amah in Judah minam leh Benjamin minam a kitengkhia galhang mihing tul zakhat leh tul sawmgiat kaikhawm hi. Ahih hangin Pasian’ mi Shemaiah tungah Topa ’ thu hong tung hi: “Judah kumpi Solomon’ tapa Rehoboam leh Judah leh Benjamin sunga om Israel khempeuh tungah gen in, ‘ Topa in hih bangin ci hi: ‘Note na kuanto kei ding uh a, na mipihte uh na do kei ding uh hi. Mi khempeuh na inn uhah ciahkik un; bang hang hiam cih leh hih thu in keima kiang pan ahi hi,’ ci-in gen in,” a ci hi. Tua ahih ciangin amaute in Topa ’ thu ngai-in ciahkik uh a, Jeroboam a do dingin kuan lo uh hi. Jerusalem ah Rehoboam teeng a, kihut nadingin Judah gam sungah khuapite lam hi. Amah in Bethlehem, Etam, Tekoa, Bethzur, Soko, Adullam, Gath, Mareshah, Zif, Adoriam, Lakhish, Azekah, Zorah, Aijalon, leh Hebron, Judah leh Benjamin gam sunga om kulh a nei khuapite lam hi. Amah in mun muanhuaite a muanhuai-in bawlin, tuate sungah a ukte, leh an, sathau, leh leenggahzu koih hi. Tua ciangin amah in khuapi khempeuh ah lum leh tei koih a, a muanhuai mahmahin bawl hi. Tua ahih ciangin Judah gam leh Benjamin ama aa suak hi. Tua ciangin Israel tungah a om siampite leh Levi mite khempeuh in amau’ teenna mun khempeuh panin amah beel uh hi. Tua ciangin Israel’ Topa Pasian zon’ ding a lungsim uhah a khentat khin mite in amau’ pute pate Pasian, Topa tungah biakna pia dingin Israel minam khempeuh sung panin amau’ nung zui-in Jerusalem ah hong pai uh hi. Amaute in Judah kumpi gam thakhauh sak uh a, amaute in Solomon’ tapa Rehoboam lungmuangin kum thum sung koih uh hi; bang hang hiam cih leh kum thum sung David leh Solomon’ thu zui-in amaute gamta uh hi. Rehoboam in Mahalath teenpih hi, Mahalath’ pa in David’ tapa Jerimoth hi a, a nu-in Jessi’ tapa Eliab’ tanu Abihail ahi hi. Tua nu in amah tawh tapate, Jeush, Shemariah, leh Zaham nei hi. Tua nu’ khit ciangin amah in Absalom’ tanu Ma-akah la a, amah tawh Abijah, Attai, Ziza, leh Shelomith nei hi. Rehoboam in a zi dangte leh a zineute khempeuh sang Absalom’ tanu Ma-akah itzaw hi (amah in zi sawm-le-giat leh zineu sawmguk la a, tapa sawmnih-le-giat leh tanu sawmguk nei hi); tua ciangin Rehoboam in Ma-akah’ tapa Abijah, a sanggamte lakah ulian penin seh hi; bang hang hiam cih leh kumpi-in amah koih sawm hi. Amah pil gamtat a, Judah leh Benjamin gam sung, kulh nei khuapite khempeuh ah a tapa pawlkhat khen hi; amah in amaute tungah na tampi pia a, amaute’ adingin zi zon’sak hi. Rehoboam’ ukna kipin a thahat ciangin, amah leh amah tawh a om Israel khempeuh in Topa ’ thukham nusia uh hi. Amah in kulhnei khuapite la-in Jerusalem ciang dong hong tung hi. Tua ciangin Shishak’ huhau-in Jerusalem ah a kikhawm Rehoboam leh Judah uliante kiangah kamsang Shemaiah hong pai-in amaute kiangah, “ Topa in hih bangin ci hi: ‘Note in kei nong nusia uh hi; tua ahih ciangin Shishak’ khut sungah note kong pia khin hi,’ ci hi,” a ci hi. Tua ciangin Israel uliante leh kumpipa kiniamkhiatin “ Topa thuman hi,” a ci uh hi. Amaute a kiniamkhiatna thu Topa in a muh ciangin Shemaiah tungah Topa ’ thu hong tung hi: “Amaute kiniamkhiat ahih manin ka susia kei ding hi; amaute ka suaktasak liai-liai tei ding a, Shishak’ khut tawh Jerusalem tungah ka hehna ka tungsak kei ding hi. Ahi zongin amaute in keima nasepna leh gam sung kumpite’ nasepna a theih nadingun amaute in ama nasemte suak ding uh hi,” a ci hi. Tua ahih ciangin Jerusalem a simin Izipt kumpipa Shishak hong kuanto hi; amah in Topa ’ inn-a vanmanphate leh kumpipa’ inn-a vanmanphate lakhia hi; amah in na khempeuh la khia hi. Amah in Solomon’ bawlsa kham lumte zong lakhia hi; tua ciangin kumpi Rehoboam in tuate’ taangin sumngo lum bawl a, kumpipa’ kongcing ahi inncing a ukte’ khut sungah tuate ap hi. Topa ’ innah kumpipa a pai simin a cingte hong pai-in tuate keng uh a, tua ciangin cin’na inndei sungah tuate koih kik uh hi. Amah in a kiniamkhiat ciangin siat cimitna a pian’ loh nadingin ama tung panin Topa ’ hehna kiheikhia hi; tua tham loin Judah gam sungah thu-paizia zong hoihsak hi. Tua ahih ciangin kumpi Rehoboam amahmah Jerusalem ah kikipsakin uk hi. Rehoboam in uk ding a kipatin kum sawmli-le-khat pha a, Israel minam khempeuh sung panin a min koih nadingin Topa in a teelkhiat khuapi Jerusalem ah amah in kum sawm-le-sagih sung uk hi. Ama nu’ min in Naamah hi a, Ammon mi ahi hi. Amah in Topa zon’ ding a lungsim ah koih lo ahih manin a sia gamta hi. Tu-in Rehoboam gamtatnate, a kipatna pan a tawpna dong, kamsang Shemaiah leh thu-mupa Iddo’ khang tangthu sungah kigelh hilo ahi hiam? Rehoboam leh Jeroboam kikalah gal kidona om tawntung hi. Tua ciangin Rehoboam a pate tawh ihmu a, David khuapi sungah kivui hi; tua ciangin a tapa Abijah in ama taangin uk hi. Kumpi Jeroboam’ uk kum sawm-le-giatna kumin Abijah in Judah tungah uk ding kipan hi. Amah in Jerusalem ah kumthum sung uk hi. Ama nu’ min in Mikaiah hi a, Gibeah khuami Uriel’ tanu ahi hi. Tu-in Abijah leh Jeroboam kikalah gal kidona om hi. Gal sim dingin Abijah kuankhia a, a kitengkhia mi tul zali a pha, a thahat galhang galkap hon nei hi; tua ciangin Jeroboam in amah do dingin a kitengkhia galhang tul zagiat tawh pang hi. Tua ciangin Efraim mualtung gamah a om Zemaraim Mual tungah Abijah ding to-in, “Jeroboam leh Israel khempeuh aw, ka thu ngai un! Israel Topa Pasian in David leh a suante tungah Israel kumpi hih nading thu thuciamna kip tawh a piakna na theih ding uh kilawm hilo ahi hiam? Ahi zongin David’ tapa Solomon’ nasempa, Nebat’ tapa Jeroboam kipanin a topa lehdo hi. Rehoboam khangno lai a, thu khentat thei nai loin, amaute a nial zawh nai loh hun lai takin mi gina lo honkhat Solomon’ tapa Rehoboam’ kiimah kikhawmin amah dem uh hi. “Note mi tampi na hihna uh leh note’ pasian dingin Jeroboam in hong bawlsak kham bawngnote note tawh a om manin, David’ suante’ khut sung panin Topa ’ kumpi gam do ding tu-in na ngaihsun uh hi. Note in Aaron’ suan, Topa ’ siampite, leh Levi mite hawlkhia-in, gamdang mite bangin note’ adingin siampite bawl khin hilo na hi uh hiam? Bawngtalno khat tawh ahi a, tuutal sagih tawh ahi zongin a ki-ap dingin a hong pai peuhpeuh, pasian a hilote’ siampi suak pahpah hi. Ahih hangin kote ahih leh, Topa ka Pasian uh hi a, amah ka nusia kei uh hi. Topa ’ na a sem, Aaron’ suan ahi siampite leh amau’ nasepna ah a huh dingin Levi mite ka nei uh hi. Amaute in Topa ’ tungah zing leh nitak simin meihal biaknate leh a namtui nate ahi paknamtui pia a, kham citak sabuai tungah Ompihna Anlum koihin, nitak simin a meivakte a kuan’ nadingin kham meivakkhuamte don uh hi; bang hang hiam cih leh kote in Topa ka Pasian uh hong sawlnate ka zui uh a, ahih hangin note in amah na nusia uh hi. En un, kote’ lutang-in kote tawh Pasian hong omkhawm a, note a do ding sapna peengkul a tum dingin a siampite a galkap peengkulte tawh hong om uh hi. Israel’ mite aw, na pu na pate uh Pasian, Topa do kei un; bang hang hiam na cih uh leh na tangtung kei ding uh hi,” a ci hi. A nunglam panin amaute ahih dingin a pangsim ding pawlkhat Jeroboam in kualpai sak hi; tua ahih ciangin Judah mite’ mai-ah ama galkapte om a, a pangsimte amau’ nungah om hi. Judah mite a khuadak ciangin, en in, amau’ mai leh a nung uhah gal om hi; tua ciangin Topa ’ tungah amaute kiko uh a, siampite in a peengkulte uh tum uh hi. Tua ciangin Judah mite in a galdona aw kiko uh hi. Judah mite a kiko uh ciangin Abijah leh Judah mite’ mai-ah Pasian in Jeroboam leh Israel khempeuh zo hi. Judah mite’ mai-ah Israel mite tai uh a, Pasian in amau’ khut sungah amaute pia hi. Abijah leh a mite in amaute tampi tak that uh hi; tua ahih ciangin Israel mi a kitengkhia mihing tul zanga a kithatin tuk hi. Judah mite in a pu a pate uh Pasian, Topa suang uh ahih manin gualzo uh a, tua hunin Israel mite kizo hi. Tua ciangin Abijah in Jeroboam delh a, ama tung panin khuapite, Beth-el a khuaneute tawh, Jeshanah a khuaneute tawh, leh Efron a khuaneute tawh la hi. Jeroboam in Abijah hun sungin ama vangliatna ngahkik lo hi; tua ciangin Topa in amah vat a, amah si hi. Ahih hangin Abijah a thahatna khang hi. Amah in zi sawm-le-li la a, tapa sawnih-le-nih leh tanu sawm-le-guk nei hi. Abijah’ gamtatna a om laite, ama ziate leh ama thugente, kamsang Iddo’ tangthu sungah kigelh hi. Tua ciangin Abijah a pate tawh ihmu a, amaute in David khuapi sungah amah vui uh hi; tua ciangin ama tangin a tapa Asa in uk hi. Ama hun sungin tua gamah kum sawm sung gal dai hi. Tua ciangin Asa in ama Pasian, Topa ’ mit-ah a hoih leh a man na sem hi. Amah in gamdang biaknataute leh mual dawn-a biakpiakna munte la khia-in, khuampite supai-in Asherah milimte phuk a, amau’ pute pate’ Pasian, Topa zongin thukham leh thupiaknate a zuih nadingun Judah mite thu pia hi. Amah in Judah khuapi khempeuh panin mual dawn a, biakpiakna munte leh paknamtui biaknataute zong la khia hi. Tua ciangin ama nuai-ah kumpi gam sung gal dai hi. Tua gamah gal dai ahih manin Judah sungah kulh a nei khuapite lam hi. Topa in ama tungah kilemna pia ahih manin tua kum sungin amah in galdona nei lo hi. Tua ciangin amah in Judah mite kiangah, “Hih khuapite lamin kulhpite leh tausangte, kulhkongpite leh zawlte tawh um ni; eite in Topa i Pasian zong i hih manin leitang in eima’ aa hi lai hi; eite in amah i zong a, amah in i kiim khempeuh panin kilemna hong pia hi,” a ci hi. Tua ahih ciangin amaute in khuapi lam uh a, mavang uh hi. Asa in Judah mite sung panin lumgol leh teipi a tawi galkap tul zathum, leh Benjamin mite lumneu pua-in thal a keek tul zanih leh tul sawmgiat nei hi; hih mite khempeuh in a thahat galhang mite ahi uh hi. Amaute a sim dingin Ethiopia mi Zerah, galkap awn khat leh leeng galkap zathum tawh hong kuan khia a, Mareshah ciang dong hong tung hi. Tua ciangin amah a dawntuah dingin Asa kuankhia a, Zefathah leh Mareshah kuamah galdo nading pan’na bawl uh hi. Tua ciangin Topa ’ Pasian tungah Asa kiko a, “ Topa aw, a thahat leh a zawngkhal kikalah a huh dingin nang tawh a kibang kuamah om lo hi. Kote hong huh in, Topa kote’ Pasian aw, bang hang hiam cih leh nang kong suang uh a, nangma minin hih mihonpi do dingin kong pai uh hi. Topa aw, nangmah in kote’ Pasian na hi hi; mite kizosak kei in,” a ci hi. Tua ahih ciangin Topa in Asa leh Judah mite mai-ah Ethiopia mite zo a, tua ciangin Ethiopia mite tai uh hi. Asa, leh amah tawh a om mite in Gerar ciang dong amaute delh uh a, a hing kuamah a om nawn loh dongin Ethiopia mite puk uh hi; bang hang hiam cih leh Topa leh ama galkapte mai-ah amaute kisusia hi. Judah mite in van kinusia tampi tak puakhia uh hi. Topa kikihtakna amaute tungah om ahih manin amaute in Gerar kiim a, khuapi khempeuh vat uh hi. Amaute in khuapi khempeuh luh uh a, tuate sungah van kisutte tam mahmah hi. Tua ciangin amaute in gan omna puanbukte vat uh a, tuu leh keel tampi leh kalaohte puakhia uh hi. Tua ciangin Jerusalem ah ciahkik uh hi. Oded’ tapa Azariah tungah Pasian’ Kha hong tung a, tua ciangin Asa dawntuah dingin amah pai-in ama kiangah, “Ka thu ngai un, Asa leh Judah mite leh Benjaminte aw: Note in amah tawh na om lai teng uh Topa in note tawh om hi. Amah na zon’ uh leh amah na mu ding uh a, ahih hangin amah na nusiat uh leh amah in note hong nusia ding hi. Hun saupi sung Israel in Pasian man tawh om lo, thu a hilh siampi tawh om lo, thukham tawh om lo hi; ahih hangin a lungkham uh ciangin Israel Pasian, Topa ’ lamah kihei uh a, amah zongin amaute in amah mu uh hi. Tua hun lai-in mite’ nasemin a zinsuk a zintohna uhah lungmuanna om lo hi; gam khempeuh ah buaina om hi. Pasian in lungkhamna nam khempeuh tawh buaisak ahih manin minam khat leh minam khat, khuapi khat leh khuapi khat kido-in amaute kitamkham uh hi. Ahih hangin nang, hang in! Na sepna thaman hong kipia ding ahih manin na khut zawsak kei in,” a ci hi. Asa in Oded’ tapa Azariah’ thugenkholh, hih thute a zak ciangin amah hong hangin, Judah gam khempeuh leh Benjamin leh Efraim mualtung gam panin a laksa khuapite panin a kihhuai milimte lakhia a, Topa ’ innlim mai-a om Topa ’ biaknatau puah hi. Tua ciangin amah in ‘Judah leh Benjamin mi khempeuh, leh Efraim, Manasseh, leh Simeon sung panin amaute kiangah a peemte khawm hi; bang hang hiam cih leh Topa a Pasian amah tawh a omna thu amaute in a muh uh ciangin Israelte kiang panin mi tampi tak ama kiangah tai uh hi. Asa’ uk kum sawm-le-ngana a kha thumna sungin Jerusalem ah amaute kikhawm uh hi. Tua ni-in amaute in gal sung panin a ciahpih uh nate sung panin bawngtal za sagih leh tuu tul sagih tawh Topa tungah biakna pia uh hi. Tua ciangin a lungsim khempeuh uh leh a nuntakna khempeuh uh tawh a pu a pate uh’ Pasian, Topa a zon’ nading uh, leh Pasian, Topa a zong lo peuhmah, a moi ahi a, a ham ahi a, numei ahi a, pasal ahi zongin a kithah nading uh thuciamna khat bawl uh hi. Amaute in awging pha, leh otna, leh peengkulte, leh sakite tawh Topa ’ tungah kiciamna bawl uh hi. Tua ciangin Judah mi khempeuh tua kiciamna ah lungdam uh hi; bang hang hiam cih leh amaute in a lungsim khempeuh uh tawh kiciamin deihna taktak tawh amah zong a, tua ciangin amaute in amah mu uh a, Topa in a kiim uhah amaute gal daihna pia hi. Ama nu Ma-akah in Asherah milim dingin a kihhuai milim khat a bawlna hangin kumpipa’ nu hihna za panin kumpi Asa in a nu lakhia hi. Asa in a nu’ milim phuksakin satnen a, Kidron lui-ah hal hi. Ahih hangin Israel gam sung panin mualdawn a, biak piaknate kila khia lo hi. Ahi zongin ama hun sung tawntung Asa’ lungsim paubaang lo hi. Tua ciangin amah in a pa’ apsa letsongte leh ama apsa letsongte, ngun, leh kham, leh nazatte, Topa ’ innah paipih hi. Asa’ uk kum sawmthum-le-nga ciang dong gal kidona om nawn lo hi. Asa’ uk kum sawmthum-le-gukna kumin Judah do-in Israel kumpipa Baasha paito a, Judah kumpipa Asa kiang pan kuamah a paikhiat theih loh nading leh ama kiangah kuamah a pai theih loh nadingin Ramah khua phut hi. Tua ciangin Asa in Topa ’ inn leh kumpipa’ inn-a van manpha koihnate panin ngun leh kham la-in, Damaskas-ah a teeng Siria kumpipa Benhadad kiangah tuate puakin, “Ka pa leh na pa a kipawl mah bangin kei leh nang i kipawl hi; en in, ngun, leh kham kong puak hi; kei kiang panin amah a nungkik theih nadingin pai in la, Israel kumpipa Baasha tawh na kipawlna va sutat in,” a ci hi. Tua ciangin Benhadad in kumpi Asa’ thu ngai-in Israel khuapite a do dingin a galkap ukte sawl a, amaute in Ijon, Dan, Abelmaim, leh Naftali vankoihna khuapite zo uh hi. Baasha in tua thu a zak ciangin Ramah khua a lam khawl a, a nasep tawpsak hi. Tua ciangin kumpi Asa in Judah mi khempeuh khawmin thu pia a, Baasha in inn lamna a, a zat Ramah suang leh a singte amaute in puakhia a, tuate tawh Geba leh Mizpah lam uh hi. Tua hun lai takin Judah kumpi Asa kiangah thu-mupa Hanani hong pai-in ama kiangah, “Nangmah in Siria kumpipa suangin, Topa na Pasian suang lo na hih manin, Siria kumpipa’ galkapte in nang hong suaktasak hi. Ethiopia mite leh Libia mite in leeng tampi tak leh sakol tung tuang tampi tak tawh a om galkap tampi hilo ahi hiam? Ahi zongin Topa suang na hih manin, amah in na khut sungah amaute hong pia hi. Bang hang hiam cih leh ama lamah a lungsim a paubang lo mite’ tangin ama vangliatna a lak dingin Topa ’ mit in leitung khempeuh en kawikawi hi. Hih thu-ah na hai gamtat khin hi; bang hang hiam cih leh tu-a kipanin galdonate na nei ding hi,” a ci hi. Tua ciangin thu-mupa tungah Asa heh a, amah kol bulhin thong sungah koih hi; bang hang hiam cih leh hih thu hangin ama tungah nakpi takin heh hi. Tua hun mahin Asa in mi pawl khat zong gitlohna tawh gimsak hi. Asa’ gamtatnate, a patna pan a tawpna dong, Judah leh Israel Kumpite’ Laibu sungah kigelh hi. Ama uk a kum sawmthum-le-kuana kumin Asa in a khe-ah natna nei-a, a natna nasia mahmah hi; ahi zongin ama nat hun nangawn ah amah in Topa zong lo a, zato siamte’ huhna zong hi. Tua ciangin Asa a pate tawh ihmu a, ama uk a kum sawmli-le-khatna kumin si hi. David khuapi sungah amahmah in a khuak han sungah amaute in vui uh hi. Paknamtui bawl siamte in a bawl a namtui a nam tuamtuamte tawh a kidim hankuang sungah amah sial uh hi; tua ciangin amah zahtakna-in amaute in meiphual lian mahmah khat cih uh hi. Tua ciangin a tapa Jehoshafat in ama taangin uk a, Israel lang pangin amahmah kithakhauhsak hi. Amah in Judah khuapi kulhneite khempeuh ah galkapte koih a, Judah gam sung, leh a pa Asa in a laksa Efraim khuapite sungah khuacingte koih hi. Amah in a pa’ gamtat nasate zui ahih manin Jehoshafat tawh Topa om hi; amah in Baalte bia lo hi; Israelte’ gamtat bang hi loin, ama pa’ Pasian zongin ama thupiakna zui hi. Tua ahih ciangin Topa in ama khut sungah kumpi gam kipsak hi; tua ciangin Judah mi khempeuh in Jehoshafat tungah siah puak uh hi; amah in a lian hauhna leh minthan’na nei hi. Topa ’ lampite ah ama lungsim hang hi; tua ciangin amah in Judah gam sung panin mual dawn-a biak piaknate leh Asherah milimte lakhia lai hi. Ama uk kum thumna kumin ama uliante, Benhail, Obadiah, Zekhariah, Nethanel, leh Mikaiah, Judah khuapite ah thuhilh dingin sawl hi; amaute tawh Levi mi, Shemaiah, Nethaniah, Zebadiah, Ashel, Shemirahmoth, Jehonathan, Adonijah, Tobijah, leh Tabodonijah sawl hi; tua ciangin hih Levi mite tawh, siampi Elishama, leh Jehoram sawl hi. Amaute in Topa ’ thukham laibu kengin Judah sungah hilh uh hi; Judah khuapi khempeuh ah amaute pai kawikawi-in mite lakah hilh uh hi. Tua ciangin Judah gam kimkotah a om khuapi gam khempeuh tungah Topa kihtakna om a, amaute in Jehoshafat do ngam nawn lo uh hi. Filistiate pawlkhat in Jehoshafat tungah letsongte leh siah dingin ngun puak uh hi; tua ciangin Arabte in zong ama tungah ganhon tuutal tul sagih leh za sagih, leh keeltal tul sagih leh za sagih puak uh hi. Tua ciangin Jehoshafat hong lianzaw semsem hi. Amah in Judah gam sungah mun muanhuaite leh vankoihna khuapite lam a, amah in Judah khuapite sungah van tampi nei hi. Amah in a thahat galhang galkapte Jerusalem ah nei hi. A beh ciat uh tawh kizui-in amaute a phazah in: Judah sung pan a tul-a a ukte: Adnah in a ukpa hi a, a thahat galhang mi tul zathum tawh ahi hi. Ama zomah a ukpa in Jehohanan hi a, mi tul zanih leh tul sawmgiat tawh ahi hi. Ama zom-ah Topa ’ nasep nadingin a kipia Zikri’ tapa Amasiah hi a, a thahat galhang mi tul zanih tawh ahi hi. Benjamin sung panin: A thahat a galhang Eliada, thal leh lum a tawi mi tul zanih tawh ahi hi. Tua ciangin ama zomah Jehozabad hi a, galdo dingin hiam a tawi mi tul zakhat leh tul sawmgiat tawh ahi hi. Hihte in, kumpipa in Judah gam sung khempeuh a, kulhnei khuapite ah a koihte banah kumpipa’ na a semte ahi hi. Tu-in Jehoshafat in hauhna leh minthan’na lianpi nei hi; amah in Ahab tawh numei-a kizopna bawl hi. Kum tawmkhat khit ciangin Samaria-a Ahab kiangah amah paisuk hi. Tua ciangin Ahab in amah leh amah tawh a hong pai mite’ adingin tuu tampi leh bawngtal tampi go a, Ramothgilead sim dingin amah zol hi. Israel kumpipa Ahab in Judah kumpipa Jehoshafat kiangah, “Ramothgilead-ah kei tawh nong kuan ding hiam?” a ci hi. Amah in dawngin, “Keimah in nangmah bang ka hi a, ka mite in nangma mite mah bang ahi hi. Kote in galdona ah nang tawh kong kuan ding uh hi,” a ci hi. Tua ciangin Jehoshafat in Israel kumpipa kiangah, “ Topa thu dong masa in,” a ci hi. Tua ciangin Israel kumpipa in kamsangte mihing zali khawmin amaute kiangah, “Ramothgilead sim dingin kuanto ding i hi hiam, tua ahih kei leh thuak ding ka hi hiam?” a ci hi. Tua ciangin amaute in, “Kuanto in; bang hang hiam cih leh Pasian in kumpipa’ khut sungah hong pia ding hi,” a ci uh hi. Ahih hangin Jehoshafat in, “Eite in i dot theih ding Topa ’ kamsang a dang hih lai-ah om lo ahi hiam?” a ci hi. Tua ciangin Israel kumpipa in Jehoshafat kiangah, “Eite in Topa ’ thu i dot theih nading Imlah’ tapa Mikaiah kici mi khat om lai hi; ahih hangin amah in kei tawh kisai a hoih thu genkhol ngei loin a sia bekbek gen tawntung ahih manin amah ka mudah hi,” a ci hi. Tua ciangin Jehoshafat in, “Tua bangin kumpipa in ci kei in,” a ci hi. Tua ciangin Israel kumpipa in ulian khat samin, “Imlah’ tapa Mikaiah manlang takin hong paipih in,” a ci hi. Tu-in Israel kumpipa leh Judah kumpipa Jehoshafat a kumpi tokhom tung uhah tu-in a puantualpi uh tawh kizem uh hi; Samaria kulh kongpi lutna munah amaute tu uh hi; amaute’ mai-ah kamsangte khempeuh in thu genkhol uh hi. Tua ciangin Khena-anah’ tapa Zedekiah in sik kite bawl tawmin, “ Topa in hih bangin ci hi, ‘Amaute a siat matengin hihte tawh Siria mite na nawt ding hi,’ ci hi,” a ci hi. Tua ciangin kamsang khempeuh in zong tua mah bangin genkhol uh a, “Ramothgilead-ah kuanto in la, gual zo in; Topa in kumpipa’ khut sungah hong pia ding hi,” a ci hi. Tua ciangin Mikaiah a sam dingin a pai kamtaipa in ama kiangah, “En in, thu kikhatin kamsangte’ thu gen pen kumpipa’ adingin a hoihlam ding ahi hi; amaute’ gen bangin gen in la, a hoih lamin gen in,” a ci hi. Ahih hangin Mikaiah in, “ Topa in a nungta ahih mah bangin, ka Pasian’ gen thu ka gen ding hi,” a ci hi. Kumpipa kiangah amah hong tun’ ciangin kumpipa in ama kiangah, “Mikaiah aw, Ramothgilead-ah galdo dingin kuan ding i hi hiam, tua ahih kei leh thuak ding ka hi hiam?” a ci hi. Tua ciangin amah in dawngin, “Kuanto in la, gual zo in; na khut sungah amaute hong kipia ding hi,” a ci hi. Ahih hangin kumpipa in ama kiangah, “ Topa ’ min tawh thudang gen loin thuman bek kei tungah nong gen nading bang zah vei hong thuhilh ding ka hi hiam?” a ci hi. Tua ciangin amah in, “A cing nei lo tuu bangin mualte tungah Israel mi khempeuh a kithehthang ka mu hi; tua ciangin Topa in, ‘Hihte in to nei lo hi; nuam takin a inn ciat uhah ciahsak un,’ ci hi,” a ci hi. Tua ciangin Israel kumpipa in Jehoshafat kiangah, “Amah in kei tawh kisai a hoih genkhol loin a sia bek gen ding hi, ci-in nang kiangah hong gen hilo ka hi hiam?” a ci hi. Tua ciangin Mikaiah in, “Tua ahih ciangin Topa ’ thugen za in: Topa a kumpi tokhom tungah tu a, a taklam leh a veilam ah vantung mihon khempeuh a ding ka mu hi; tua ciangin Topa in, ‘Israel kumpipa Ahab kuanto-in Ramothgilead-ah a puk nadingin kua in amah zol ding ahi hiam?’ a ci hi. Tua ciangin khat in thu khat gen a, adang khat in thudang khat gen hi. Tua ciangin Kha khat hong madawkin, Topa mai-ah ding a, ‘Keimah in amah ka va zol ding hi,’ ci hi. Tua ciangin Topa in ama kiangah, ‘Bang lam tawh zol ding na hi hiam?’ a ci hi. Tua ciangin amah in, ‘Keimah pai khia-in ama kamsangte khempeuh’ kam sungah zuau thei Kha khat ka va hi ding hi,’ a ci hi. Tua ciangin amah in, ‘Nangmah in amah na va zol ding a, na zo ding hi; pai khia in la, tua bangin hih in,’ a ci hi. Tua ahih ciangin en in, Topa in hih na kamsangte’ kam sungah zuau thu thei Kha khat koih khin hi; Topa in nang tawh kisai-in siatna gen khin zo hi,” a ci hi. Tua ciangin Khen-anah’ tapa Zedekiah a nai-ah hong pai-in Mikaiah a paang bengin, “Cik hun akipanin Topa ’ Kha in kei hong nusia-in, nang tungah thu hong gen ahi hiam?” a ci hi. Tua ciangin Mikaiah in, “En in, nangmah a bu dingin inndei sungnung ah na pai ni ciangin na thei ding hi,” a ci hi. Tua ciangin Israel kumpipa in, “Mikaiah man un la, khuapi ukpa Amon leh kumpipa’ tapa Joash kiangah paipih kik un; tua ciangin, ‘Hih bangin kumpipa in ci hi; Hih mipa thong sungah koih un la, lungnuam takin kong ciahkik mateng an leh tui tawmno bek tawh vaak un, ci hi,’ ci un,” a ci hi. Tua ciangin Mikaiah in, “Lungnuam takin nong ciahkik leh, kei tung tawnin Topa in thu a gen lo ahi hi,” a ci hi. Tua ciangin amah in, “Mi khempeuh aw, tu-a ka thugen za un!” a ci hi. Tua ahih ciangin Isreal kumpipa leh Judah kumpipa Jehoshafat Ramothgilead-ah kuan to uh hi. Tua ciangin Israel kumpipa in Jehoshafat kiangah, “Keimah meel kiseelin gal sungah kong kuan ding a, ahih hangin nangmah in na puantualpite nong silh ding hi,” a ci hi. Tua ciangin Israel kumpipa a meel kiseel hi; amaute gal sungah kuan uh hi. Tu-in Siria kumpipa in a leeng a ukte thu pia khin a, “A neu tawh ahi a, a lian tawh ahi zongin kido loin, Israel kumpipa bek tawh na kido ding uh hi,” ci hi. Leeng galkap a ukte in Jehoshafat a muh uh ciangin, “Israel kumpipa hi,” a ci uh hi. Tua ahih ciangin amah do dingin amaute kihei uh hi; tua ciangin Jehoshafat kikokhia a, Topa in amah huh hi. Pasian in ama kiang panin amaute kaikhia hi; bang hang hiam cih leh Israel kumpipa ahih lohna leeng galkap a ukte in a theih uh ciangin amah a delhna panin kilehhei kik uh hi. Ahih hangin mi khat in a thal mawk lot a, Israel kumpipa a galdal thep leh a awmdal kikal kha hi; tua ahih ciangin amah in a leeng hawlpa kiangah, “Kei liam ka hih manin kileh in la, galphual panin hong puakhia in,” a ci hi. Tua ni-in galkidona nasia mahmah a, nitak dong Siria mite mai ngatin a leeng sungah Israel kumpipa kingam hi; tua hi a, nitum laitakin amah si hi. Judah kumpipa Jehoshafat lungmuang takin Jerusalem a, ama innah ciahkik hi. Ahih hangin amah dawn dingin thu-mupa Hanani’ tapa Jehu hong paikhia a, Kumpi Jehoshafat kiangah, “Migilote huhin Topa a mudahte it ding na hi hiam? Hih thu hangin Topa ’ hehna nang tungah hong tung zo hi. Ahi zongin nang na hoihna khat om hi; bang hang hiam cih leh nangmah in gam sung panin Asherah milimte susia-in Pasian zon’ ding na lungsimah na ngaihsun hi,” a ci hi. Jerusalem ah Jehoshafat teeng hi; tua ciangin Be-ersheba panin Efraim mual tung gam ciang dong mite lakah zin kawikawi a, amau’ pute pate’ Pasian, Topa kiangah amaute tun’pih kik hi. Amah in gam sunga Judah khuapi kulhnei khempeuh a khuapi a khuapi-ah thukhen dingte seh a, thukhente tungah, “Note in mi ading hi loin Topa ’ adingin a khen na hih manun na hih dingte uh ngaihsun un; thukhenna na piaknate uhah amah in note tawh hong om hi. Tu-in note in Topa zahtak un la, na hihnate uhah kingaihsun un. Bang hang hiam cih leh Topa i Pasian in thuman hei khiatna, mi deidanna, leh sumgolh laknate deih lo hi,” a ci hi. Tua tham loin, Topa adingin thukhenna a pia ding leh thu neite a khensak dingin Levi mite leh siampite leh Israel mi beh lutangte pawlkhat, Jehoshafat in Jerusalem ah seh hi. Amaute in Jerusalem ah a phual ding uh nei uh hi. Tua ciangin amah in amaute thuhilh a: “Hih bangin Topa zahtakna, cihtakna, leh na lungsim khempeuh uh tawh na hih ding uh hi: a khuapi uhah a teeng na sanggamte uh tung panin mi kithahna thu, thukham ahih kei leh thupiakna, upadi ahih kei leh biakna ngeina kipte tawh kisai-in thu khatpeuh peuh no tungah hong tun’ ciangin, amaute in Topa ’ mai-ah mawhna a pian’sak loh nading leh note leh na sanggamte uh tungah hehna hong tun’ loh nadingin amaute na hilh ding uh hi. Tua bangin na gamta ding uh a, mawhna na piangsak kei ding uh hi. En un, Topa ’ thu tawh kisai thute khempeuh ah siampi lian Amariah in no tungah om hi, tua ciangin kumpipa tawh kisai thute khempeuh ah Judah mite a ukpa Ishmael’ tapa Zebadiah om hi; tua ciang Levi mite in note tungah ulian na hong sem ding uh hi. Hang takin gamta un, thumante tawh Topa hong om ta hen!” a ci hi. Hih thu khit ciangin Moab mite leh Amon mite, leh Meunim mite pawlkhat in Jehoshafat a sim dingin hong kuan uh hi. Mi pawlkhat hong pai-in Jehoshafat kiangah, “Tuipi gal khat Edom, panin mihon tampi khat nangmah sim dingin hong kuan hi; en in, amaute Hazazontamar (En-gedi a kici) ah om uh hi,” ci-in gen uh hi. Tua ciangin Jehoshafat lau a, amahmah in Topa ’ lamlah nading zong a, Judah gam khempeuh ah antan’ ding thu zasak hi. Tua ciangin Topa ’ tung pan huhna zong dingin Judah mite hong kikhawm hi; Judah khuapi khempeuh panin Topa thu dong dingin amaute hong pai uh hi. Tua ciangin Topa ’ inn sung, inntual thak mai, Judah leh Jerusalemte’ kikhopna sungah Jehoshafat ding a, “ Topa, ka pu ka pate uh Pasian aw, nang vantungah Pasian hilo na hi hiam? Minamte’ kumpigam khempeuh tungah nang in uk hilo na hi hiam? Na khut sungah vangliatna leh thahatna om a, kuamah in nang hong nang zo lo hi. Kote’ Pasian aw, hih gamah a teeng mite na mi Israelte’ mai-ah hawlkhia-in, na lawmpa Abraham’ suan leh khakte tungah a tawntung dingin pia hilo na hi hiam? Amaute hih gamah teengin nangma min dingin hih lai-ah biakinn khat lam uh a, Eite tungah siatna, namsau, thukhenna, ahih kei leh natna, ahih kei leh, kialpi hong tun’ leh, hih inn sungah ama min om ahih manin hih inn mai-ah ding-in i gimna hunah ama tungah i kiko ding a, amah in hong za-in hong hon ding hi,’ ci uh hi. Tu-in en in, Izipt gam panin Israelte hong paikhiat lai-in na simsak loh, amaute in pelhin a suksiat loh uh Ammon mite leh Moab mite leh Seir Mual gam mite— en in, ka luah dingun kote tungah nong piaksa nangma neihsa panin kote hawlkhia dingin hong paina tawh amaute in kote hong lehthuk zawsop uh hi. Kote’ Pasian aw, amaute’ tungah thu khen lo ding na hi hiam? Bang hang hiam cih leh kote do dingin a hong pai hih mihon tampite a do dingin thahatna ka nei kei uh hi. Ka cih nading uh ka thei kei uh a, nangmah bek kong mitsuan uh hi,” a ci hi. Tua lai takin Topa mai-ah Judah mi khempeuh a taneute, a zite, leh a naupangte uh tawh ding uh hi. Tua ciangin a kikhawmte lak, Levi mite Asaf suante sung pan Mattaniah, a tapa Jeiel, a tapa Benaiah, a tapa Zekhariah, a tapa Jahaziel tungah Topa ’ Kha hong tung hi. Tua ciangin amah in, “Judah gam khempeuh leh Jerusalem a, teeng khempeuh leh kumpi Jehoshafat aw, ngai un: Topa in hih bangin note tungah hong gen hi, ‘Kihta kei un la, hih a tam mi honpi hangin lungkia kei un; bang hang hiam cih leh galdona in note’ aa hi loin Pasian aa ahi hi. Zing ciangin amaute do-in paisuk un; en un, Ziz kahtohna lampi tawnin amaute hong kuanto ding uh hi; Jeruel gamlak nisuahna lam kuam mongah amaute na mu ding uh hi. Note in hih kidona-ah na do ding uh kisam lo hi; Judah gam mite leh Jerusalem khua mite aw, na panmun uh la-in taang loin ding un la, note taangin Topa ’ gualzawhna mu un,’ ci hi. Kihta kei un la, lungkia kei un; zing ciangin amaute do-in pai un, Topa in note tawh hong om ding hi,” a ci hi. Tua ciangin Jehoshafat in a maitang lei lam ngatin kun a, tua ciangin Judah gam leh Jerusalem-a teeng mite khempeuh in zong Topa ’ mai-ah pukin Topa bia uh hi. Tua ciangin Kohath mite, Korah mite sung pan Levi mite awging pha mahmah tawh Israel Pasian, Topa a phat dingin dingto uh hi. Tua ciangin zingsangin amaute tho baihin Tekoa gamlakah paikhia uh hi; amaute a paikhiat lai takin Jehoshafat ding-in, “Judah leh Jerusalem a, teengte aw, ka thugen za un! Topa na Pasian uh um un, tua hi leh note na kip ding uh hi; ama kamsangte um un, tua hi leh na mavang ding uh hi,” a ci hi. Amah in mite tawh thu a kikup khit ciangin, galkapte mai-ah amaute a pai kawmin, “ Topa tungah lungdamna ko un, bang hang hiam cih leh ama itna kip tawntung hi,” ci-in biakna puan silhin Topa tungah la sa-in amah a phat dingte seh hi. Amaute in la sa-in phat ding a kipat uh ciangin, Judah mite do dingin a hong pai Ammon mite, Moab mite, leh Seir Mual gam mite a pangsim ding Topa in koih a, amaute kizo hi. Bang hang hiam cih leh Ammon mite leh Moab mite in Seir Mual-a teengte do dingin kipanin amaute susia mang uh a, Seir-a teengte a beisak khit uh ciangin amaute khat leh khat kisusia uh hi. Gamlak-a galvilna tausang ah Judahte hong tun’ ciangin mihonpite’ omna lam en uh hi; en in, amaute in lei lakah a puk mi si luanghawm vive na hi hi; a suakta kuamah om lo hi. Van kinusiate a tawm dingin Jehoshafat leh a mite hong pai ciangin bawngte, vante, puante, leh na manphate tampi tak mu uh a, a puak zawh loh ciang dong uh amau’ adingin la uh hi. Van kinusiate tam mahmah ahih manin ni thum sung tawm uh hi. A ni li ni-in Berakah kuamah amaute kikhawm uh hi; bang hang hiam cih leh amaute in tua lai-ah Topa phat uh hi; tua ahih ciangin tuni dongin tua mun in Berakah Kuam kici hi. Tua ciangin Judah mi leh Jerusalem mi khempeuh, Jehoshafat makai-in lungdamna tawh Jerusalem ah ciah uh hi; bang hang hiam cih leh Topa in amaute a galte uh hangin lungdam sak hi. Amaute, harp lasaknate leh laiza lasaknate leh peengkulte tawh Jerusalem Topa ’ innah tung uh hi. Topa in Israelte’ galte a dona thu a zak uh ciangin kumpi gamte khempeuh tungah Topa a kizahtakna hong om hi. Tua ahih ciangin Jehoshafat’ ukna gam sung gamdai hi; bang hang hiam cih leh a Pasian in ama kiimah galdaihna pia hi. Tua bangin Jehoshafat in Judah tungah uk hi. Amah in uk ding a kipatin kum sawmthum-le-nga pha a, Jerusalem ah kum sawmnih-le-nga sung uk hi. Ama nu’ min in Azubah hi a, Shilhi’ tanu ahi hi. Amah in a pa Asa’ lampi mah zui a, tua lampi panin pialkhia lo hi; Topa ’ muhna-ah a man na sem hi. Ahi zongin mual dawn a, biakpiaknate kilakhia lo hi; mite in a lungsim uhah a pu a pate uh’ Pasian ngaihsun nai lo uh hi. Tu-in Jehoshafat’ gamtatna a om laite, a patna pan a tawp dongin, Israel Kumpite’ Laibu sunga a kiciamteh, Hanani’ tapa Jehu’ khang tangthu sungah kigelh hi. Hih thu khit ciangin Judah kumpipa Jehoshafat in a gilo-a gamta, Israel kumpipa Ahaziah tawh kipawl hi. Tarshish a, a pai ding teembawte bawlna ah amah pawl a, amaute in Eziongerber ah teembawte bawl uh hi. Tua ciangin Mareshah khuami Dodavahu’ tapa Eliezer in Jehoshafat langpangin thu genkholin, “Nangmah in Ahaziah tawh kipawl na hih manin Topa in na bawlsate uh susia ding hi,” a ci hi. Tua ciangin teembawte kisia a, Tarshish ah pai thei lo hi. Jehoshafat a pate tawh ihmu a, David khuapi sungah a pate tawh kivui hi; tua ciangin a tapa Jehoram in ama taangin uk hi. Jehoshafat’ tapa ama sanggam pasalte in: Azariah, Jehiel, Zekhariah, Azariah, Mikhael, leh Shefatiah ahi uh hi; hihte khempeuh in Judah kumpipa Jehoshafat’ tapate ahi hi. A pa un amaute tungah letsong lianpite, ngun, kham, leh a manpha neihsate, Judah gam sunga kulh nei khuapite tawh pia hi; ahih hangin amah ta upa ahih manin Jehoram tungah kumpigam pia hi. A pa’ kumpi tokhom ah Jehoram kahin a kip ciangin namsau tawh a sanggam pasal khempeuh that a, Judah ulian pawlkhat zong that hi. Jehoram kumpi a suahin a kum sawmthum-le-nih pha a, Jerusalem ah kumgiat sung uk hi. Amah in Ahab innkuan mah bangin Israel kumpite’ lampi zui hi; bang hang hiam cih leh Ahab’ tanu in ama zi ahi hi. Topa ’ muhna ah amah a sia gamta hi. Ahi zongin, David tawh a bawlsa a thuciamna hang, leh ama tung leh a suante tungah ukna za a piak suak nading a ciam khitna hangin Topa in David suante susia lo hi. Ama hun sungin Judah ukna panin Edom leengkhia-in amau’ kumpi tuam phuan uh hi. Tua ciangin ama nuai-a a ukte leh a leengte khempeuh tawh Jehoram galkah a, zanin amah tho-in amah leh a leeng ukte a umcih Edom mite vat hi. Tua ahih ciangin tuni dongin Judah ukna panin Edom lengkhia hi. Jehoram in a pu a pate’ Pasian, Topa nusia ahih manin, tua hun lai takin Libnah zong ama ukna panin lengkhia hi. Tua tham loin amah in Judah mual tung gamah mual dawn a, biak piaknate bawl a, Jerusalem a, teeng mite citak loin om sak a, Judah mite lam pial sak hi. Tua ciangin kamsang Elijah tung panin ama kiangah laikhak khat hong tung a, “Na pu David’ Pasian, Topa in hih bangin ci hi, ‘Na pa Jehoshafat’ lampi ahih kei leh Judah kumpi Asa’ lampi tawn loin, Israel kumpite’ lampi tawnin, Ahab innkuan in cihtak lohna ah Israel a paipih bangin Judah leh Jerusalem a, teeng mite cihtaklohna ah na paipih a, nang sangin a hoihzaw, na pa’ innkuan sung panin na sanggam pasalte zong na that hi; en in, na mite, na tate, na zite, leh na neih khempeuh tungah Topa in gimna lianpi khat hong tungsak ding a, na natna hangin a ni ni-in na gil a tolhkhiat dongin, nangmahmah in gilnatna lianpi khat na nei ding hi,’ ci hi,” a ci hi. Tua ciangin Topa in Ethiopia mite kiangah a om Filistiate leh Arab mite, Jehoram tungah a heh nadingin toklo hi; tua ciangin Judah simin amaute hong kuanto-in luh uh a, kumpipa’ innah a om a muh uh na khempeuh, leh a tapate leh a zite zong puakhia uh a, a tapa neupen Jehoahaz simloh a tapa a kinusia om lo hi. Hih thute khempeuh khit ciangin Topa in a dam thei lo natna tawh a gil nasak hi. A hun a cin, kum nih beina ciangin a natna hangin a gil tolh khia a, nakpi takin na sa-in si hi. A pate adingin mei a cih uh bangin, a mite in amah zahtakna-in mei cih lo uh hi. Amah in uk ding a kipatin kum sawmthum-le-nih pha a, Jerusalem ah kumgiat sung uk hi; kuama dahpih lohin amah kihemkhia hi. Amaute in David khuapi sungah amah phum uh a, ahih hangin kumpite’ han sungah kiphum lo hi. Tua ciangin Jerusalem a, teengte in ama taangin a tapa neupen Ahaziah kumpi-in koih uh hi; bang hang hiam cih leh Arab mite tawh giahphual ah hong pai mite in a tapa golzawte khempeuh that khin uh hi. Tua ahih ciangin Judah kumpi Jehoram’ tapa Ahaziah in uk hi. Ahaziah in uk ding a kipatin kum sawmli-le-nih pha a, Jerusalem ah kum khat sung uk hi. Ama nu’ min in Athaliah hi a, Omri’ tanu ahi hi. Ama nu in a sia-a a gamtatna ah lamlak ahih manin amah in zong Ahab innkuan lampite mah tawn hi. Ahab innkuan mah bangin Topa ’ muhna ah a sia gamta hi; bang hang hiam cih leh a pa’ sih khit ciangin ama siatna dingah thulamlakte in amaute ahi uh hi. Amah in amaute’ thugen nangawn zui a, Ramothgilead ah Siria kumpi Hazael tawh a kido dingin Israel kumpi Ahab’ tapa Jehoram tawh kuan hi. Tua ciangin Siria mite in Jehoram liamsak uh a, Siria kumpi Hazael a do lai takin Ramah ah a ngah a liamnate Jezre-el-ah a kidamsak dingin kilehkik hi. Tua ciangin Jezre-el ah Ahab’ tapa Jehoram a cina ahih manin amah a en dingin Judah kumpipa Jehoram’ tapa Ahaziah hawhsuk hi. Ahih hangin Jehoram kiangah hawh dingin a paina tawh Ahaziah’ puk nading a tun’ nading Pasian’ sehsa a hi hi. Bang hang hiam cih leh tua lai-ah amah hong pai ciangin, Ahab innkuan a susia dingin Topa in sathau a nilhsa Nimshi’ tapa Jehu tawh a kimu dingin Jehoram tawh paikhia hi. Jehu in Ahab innkuan tungah thukhenna a piak lai takin Judah uliante leh Ahaziah’ na a sem, Ahaziah’ sanggam pasalte’ tapate tuak a, amah in amaute that hi. Amah in Ahaziah zong a, Samaria ah a buk lai takin amah kiman a, tua ciangin Jehu kiangah amah kipai pihin kithat hi. Amaute in amah vui uh hi; bang hang hiam cih leh amaute in, “Amah in, a lungsim khempeuh tawh Topa a zong Jehoshafat’ tupa ahi hi,” a ci uh hi. Tua ciangin Ahaziah innkuante in kumpigam a uk zo ding mi khat zong nei nawn lo uh hi. Tu-in Ahaziah’ nu Athaliah in a tapa a sihna a muh ciangin amah kipanin Judah sung pan kumpi innkuan khempeuh susia hi. Ahih hangin kumpipa’ tanu Jehoshabeath in Ahaziah’ tapa Joash la a, a kithat ding kumpipa’ tapate’ lak panin amah gukhia-in lupna inndei sungah amah leh a cingnu koih hi. Amah in Ahaziah’ sanggamnu ahih manin, Kumpi Jehoram’ tanu ahi, siampi Jehoiada’ zi Jehoshabeath in tua bangin Athaliah kiang panin amah seel a, tua nu in amah that kha lo hi; tua ciangin Athaliah in gam sung a uk lai takin Pasian’ inn sungah bu-in kum guk sung amaute tawh amah om hi. Ahih hangin a kum sagihna kumin Jehoiada amah kihanthawnin a za-a a ukte, Jeroham’ tapa Azariah, leh Jeroham’ tapa Ishmael, leh Obed’ tapa Azariah, leh Ada-iah’ tapa Ma-aseiah, leh Zikri’ tapa Elishafatte tawh thukimna khat bawl hi. Tua ciangin amaute Judah gam sungah pai kawikawi-in Judah khuapite khempeuh panin Levi mite, leh Israel mi beh lutangte khawmin Jerusalem ah hong pai uh hi. Tua ciangin a kikhawm khempeuh in Pasian’ inn sungah kumpipa tawh thuciamna khat bawl uh hi. Tua ciangin Jehoiada in amau kiangah, “En un, kumpipa’ tapa! Topa in David’ suante tawh kisai-in a gen bangin amah uk sak un. Hih in note’ hih ding ahi hi; sabbath ni-in nasep a peng no siampite leh Levi mite sung panin seh-thum-suah-seh-khat kulhkongpi cingte na hi ding uh a, tua ciangin seh-thum-suah-seh-khat kumpipa’ innah omin seh-thum-suah-seh-khat Khuabul Kulh kongpi-ah na om ding uh hi; tua ciangin mi khempeuh Topa ’ inn tualte’ sungah na om ding uh hi. Siampite leh na a sem Levi mite sim loh, Topa ’ inn sungah kuamah lut sak kei un; amaute siangtho ahih manin amaute lut thei ding uh a, ahih hangin mi khempeuh in Topa ’ sawlna na mang ding uh hi. Levi mite in a khut sungah a galhiam ciat uh tawh kumpipa cing ding uh a, tua ciangin biakinn sungah a lut peuhpeuh kithat ding hi. Hong tum ciang hita leh a pusuah ciang hita leh a paina peuhpeuh ah kumpipa tawh om un,” a ci hi. Siampi Jehoiada’ thupiak khempeuh bangin Levi mite leh Judah mi khempeuh gamta uh hi. Amaute in amau’ mi ciat sabbath ni-in na a sem ding mite tawh sabbath ni-in nasep a peng ding mite hong paipih uh hi; bang hang hiam cih leh siampite Jehoiada in nasep a peng ding a khen pawlte ciahsak lo hi. Tua ciangin siampi Jehoiada in a ukte tungah Topa ’ inn sungah a om, Kumpi David’ aa ahi ngei teipite leh lum lian leh lumneute pia hi; tua ciangin amah in mi khempeuh a galhiam ciat uh tawh kumpipa a cingin, inn leitaw lam pang pan inn leilu lam pang, biakna tau leh innkim ah koih hi. Tua ciangin amah in kumpipa’ tapa paikhiat pihin ama tungah kumpi lukhu koih a, ama tungah teci pan’na pia hi; tua ciangin amaute in kumpi-in amah taangko uh a, Jehoiada leh a tapate in amah sathau nilhin, “Kumpipa khan’ sau hen!” ci uh hi. Mite tai-in kumpipa a phatna uh gamlumna Athaliah in a zak ciangin mite’ omna Topa ’ innah pai hi. Amah a khuadak ciangin, inn lutna a, om a khuampi gei-ah kumpipa ding-in, a ukte leh peengkul tumte kumpipa’ gei-ah om-in, gam sung mi khempeuh lungdamin peengkulte tum uh a, lasate a lasakna nate uh tawh tua pawi makai-in a na om uh mu hi. Tua ciangin Athaliah in a puante balkekin kiko a, “Sawmsimna, Sawmsimna!” ci hi. Tua ciangin siampi Jehoiada in galkapte tungah a kikoih a ukte paikhiat pihin amaute tungah, “A gual-a a pangte lak panin a pua-ah amah paikhiatpih un; amah a pan’pih mi khatpeuh peuh namsau tawh kithat ding hi,” a ci hi. Bang hang hiam cih leh siampipa in, “ Topa ’ inn sungah tuanu that kei un,” ci hi. Tua ahih ciangin amaute in tuanu man uh a, tua ciangin kumpipa’ inn Sakol Kongpi vang-ah paikhiat pihin tua lai-ah amah that uh hi. Tua ciangin Topa ’ mi ahih nading uh Jehoiada in amah leh mi khempeuh leh kumpipa kikal ah thuciamna khat bawl hi. Tua ciangin mi khempeuh Baal innah pai-in a inn lai khia uh hi; amaute in a biakna taute leh a milimte sukham uh a, amaute in biakna taute mai-ah Baal siampi Mattan that uh hi. Tua ciangin Jehoiada in David hih ngei bangin, Moses’ thukham sungah a kigelh bangin lungdamna leh lasakna tawh, Topa ’ tungah meihal biakna a pia dingin, Topa ’ biakinn a en dingin David in a vaihawmsa Levi siampite leh Levi mite’ ukna nuai-ah Topa ’ biakinn adingin galvilte koih hi. Lam khat peuhpeuh ah a nin mi khat peuhpeuh hong lut loh nadingin Topa ’ biakinn kulhkongpite ah amah in kulh kongpi cingte koih hi. Tua ciangin amah in galkap ukte, miliante, mi a ukte, leh gam sung mi khempeuh paipih hi; tua ciangin amaute in Topa ’ biakinn panin kumpipa’ inn kulhkongpi tungnung tawnin kumpipa paipih suk uh hi. Tua ciangin amaute in kumpi tokhom tungah kumpipa tusak uh hi. Tua ciangin gam sung mi khempeuh lungdam uh hi; namsau tawh Athaliah a kithah khit ciangin khuapi sung nuam pah hi. Joash in uk ding a kipatin kum sagih pha a, Jerusalem ah kum sawmli sung uk hi; ama nu’ min in Zibiah hi a, Be-ersheba khuami ahi hi. Joash in siampi Jehoiada’ hun sung khempeuh Topa ’ mit-ah a man gamta hi. Jehoiada in ama adingin zi nih laksak a, amah in tapate leh tanute nei hi. Hih thu khit ciangin Joash in Topa ’ biakinn a ngei batsak kik ding ngaihsun hi. Amah in siampite leh Levi mite khawmin amaute kiangah, “Judah khuapite ah pai un la, na Pasian uh inn a kum kumin puah nadingin Israel khempeuh tung panin sum khawm un; hih thu na nawh hih ding uh thei un,” a ci hi. Ahih hangin Levi mite kinawh lo uh hi. Tua ahih ciangin kumpipa in amau’ ukpi Jehoiada samin ama kiangah, “ Topa ’ nasem Moses in tecipan’na puanbuk’ adingin Israel mihonte tung panin a khon mangmu bang hangin Judah leh Jerusalem panin Levi mite khawm sak lo na hi hiam?” a ci hi. Bang hang hiam cih leh tua a gilo numei Athaliah leh a pawlte in Pasian’ inn luh uh hi; Topa ’ inn-a om a ki-ap nate khempeuh zong Baalte’ adingin zang uh hi. Tua ahih ciangin kumpipa in thu pia a, amaute in singkuang khat bawlin Topa ’ inn kulh kongpi pua lamah koih uh hi. Gamlakah a om lai-un Pasian’ nasem Moses in Israel mite a piaksak mangmu Topa adingin hong puak nadingun Judah leh Jerusalem sung khempeuh ah thuzaksakna kibawl hi. Tua ciangin ulian khempeuh leh mi khempeuh lungdamin a mangmu uh hong sung uh a, a man khit mateng uh singkuang sungah khia uh hi. Levi mite in kumpipa’ uliante kiangah a singkuang paipih a, a sungah sum tampi a om lam a muh peuhpeuh uh ciangin, kumpipa’ lai-atpa leh siampi liante a ukpa hong pai-in singkuang sunga sum teng bung khia-in la uh a, tua ciangin a omna ngei-ah a singkuang koih kik uh hi. Tua bangin a ni ni-in amaute in hih uh a, sum tampi khawm uh hi. Tua ciangin kumpipa leh Jehoiada in Topa ’ biakinn nasep a ukte tungah tua sumte pia uh a, amaute in Topa ’ biakinn a ngei a bangsakkik dingin lei-le-suang nasep a siamte leh khutsiamte, leh Topa ’ biakinn a puahkik dingin sik leh sumngo nasep siamte zong cial uh hi. Tua ahih ciangin tua nasepna ah a kisehte in na semin amau khut sungah puahkikna nasepna in mainawt a, amaute in a ngei bangin Topa ’ biakinn bawl kikin kipsak uh hi. Amaute in a zawh khit uh ciangin, kumpipa leh Jehoiada kiangah sum a om laite hong paipih uh a, amaute in tuate tawh Topa ’ biakinn ah nasep nading leh meihal biakna dingin nazatte, leh paknamtui adingin pakante, leh kham leh ngun beelte bawl uh hi. Tua ciangin amaute in Jehoiada’ nuntak sung khempeuh a tawntungin Topa ’ biakinn sungah meihal biaknate pia uh hi. Ahih hangin Jehoiada teekin a hun kicing a, tua ciangin si hi; a sihin kum za khat leh kum sawmthum pha hi. Amah in Israel sung, leh Pasian’ na leh Pasian’ innah nasep hoih sem ahih manin amaute in David khuapi sung kumpite lakah amah vui uh hi. Jehoiada a sih khit ciangin Judah uliante hong pai-in amau’ thu a zuih nadingin kumpipa tungah thu va gen uh a, kumpipa in zong amaute’ thu ngai hi. Tua ciangin amaute in a pu a pate uh’ Pasian, Topa ’ biakinn nusia uh a, Asherahte leh milimte’ na sem uh hi. Hih amau’ mawhna hangin Judah leh Jerusalem tungah Pasian’ hehna hong tung hi. Ahi zongin Topa ’ lamah amaute a paipih kik dingin amah in amaute lakah kamsangte puak hi; hihte in amau lang khatah teci pang a, ahih hangin amaute in don lo uh hi. Tua ciangin siampi Jehoiada’ tapa Zekhariah’ sungah Pasian’ Kha hong lut hi; tua ciangin amah ding-in mite en sukin mite kiangah, “Pasian in hih bangin ci hi, ‘Bang hangin na mavan’ theih loh nadingun Topa ’ thupiaknate palsat na hi uh hiam? Note in Topa nusia na hih manun amah in note hong nusia hi,’ ci hi,” a ci hi. Ahih hangin amaute in amah sawmsim uh a, kumpipa’ thupiakna tawh amaute in Topa ’ inn tual-ah suang tawh amah denglum uh hi. Tua ciangin kumpi Joash in Zekhariah’ pa Jehoiada in ama tungah a lah dikna phawk nawn loin ama tapa thah sak mawk hi. Amah a sih ding ciangin, “ Topa in mu hen la, thuk ta hen!” a ci hi. Kum bei ciangin Joash simin Siria galkapte hong kuanto hi. Judah leh Jerusalem ah amaute hong pai-in mite lak panin mite’ ulian khempeuh that uh a, a van ngahte khempeuh uh Damasakas kumpipa kiangah puak uh hi. Siria galkapte mi tawmno hong pai hi napi-in amaute in a pu a pate uh’ Pasian, Topa nusia ahih manin Topa in amaute khut sungah galkap tampi ahi mite pia hi. Tua bangin amaute in Joash tungah thukhenna pia uh hi. Amah nakpi tak a liam sa-in nusia-in, ama kiang panin Siriate a kihepkhiat khit uh ciangin, siampi Jehoiada’ tapa a thahna hangin a nasemte in amah sawmsim uh a, a lupna tungah amah that uh hi. Tua ahih ciangin amah si hi; David’ khuapi sungah amah vui uh a, ahih hangin amaute in kumpite’ han-ah amah vui lo uh hi. Amah a sawmsim mite in Ammon numei Shimeah’ tapa Zabad, leh Moab numei Shimrith’ tapa Jehozabad ahi uh hi. Ama tapate’ thute, leh amah a kigensiatna thute, leh Pasian’ inn a kilamkikna thute, Kumpite’ Khang Tangthu Laibu sungah kigelh hi. Tua ciangin a tapa Amaziah in ama taangin uk hi. Amaziah in uk ding a kipatin kum sawmnih-le-nga pha a, amah in Jerusalem ah kum sawmnih-le-kua sung uk hi. Ama nu’ min in Jehoaddan hi a, Jerusalem khuami ahi hi. Amah in Topa ’ mit-ah a man gamta a, ahi zongin lungsim paubaang lo hi zo nai sam lo hi. Ama khut sungah kumpi vangliatna kip takin a om khit phetin a pa ahi kumpipa a that a nasemte that hi. Ahih hangin Moses laibu sungah, “Tate’ hangin pate kithat lo ding a, pate’ hangin tate kithat lo ding hi; mi khempeuh ama khialhna hangin si ding hi,” ci-in Topa in a thupiakna thukham sungah a kigelh mah bangin amah in amau’ tate that lo hi. Tua ciangin Amaziah in Judah mite khawm a, a tul-a ukte leh a za-a ukte khut nuai-ah Judah mi leh Benjamin mite a beh behin a pawl pawlin koih hi. Amah in kum sawmnih leh a tungsiah a pha mite khawm a, galsim dingin a hoih, teipi leh lum a zang thei a, a kitengkhia mihing tul zathum pha hi. Amah in Israel sung panin ngun talen zakhat tawh a thahat galhang mi tul zakhat zong cial hi. Ahih hangin Pasian’ mi khat ama kiangah hong pai-in, “Kumpipa aw, Israel mi ahi hih Efraim mite khempeuh, Topa in ompih lo ahih manin Israel galkapte nang tawh kuankhawm sak kei in. Ahih hangin hih bang lam-a hihna tawh galdona ah thahat dingin kingaihsun kha na hih leh, Pasian in galte mai-ah nang hong paai ding hi; bang hang hiam cih leh Pasian in huh nading ahi a, paihna ding ahi zongin vangliatna nei hi,” a ci hi. Tua ciangin Amaziah in Pasian’ mipa kiangah, “Ahi ta zongin Israel galkapte tungah ka piaksa talen zakhat thu bang cih ding i hi hiam?” a ci hi. Pasian’ mipa in dawngin, “ Topa in hih sangin nakpi takin a tamzaw hong pia thei hi,” a ci hi. Tua ciangin Amaziah in Efraim panin hong pai galkapte innah a ciahkik dingin paikhia sak hi. Tua ciangin Judah mite tungah amaute heh mahmah uh a, heh mahmahna tawh innah ciahkik uh hi. Ahih hangin Amaziah kihanthawnin a mite paikhiatpih a, Ci Kuam ah pai-in Seir gam mite mihing tulsawm that hi. Judah mite in a dang tulsawm hing mat uh a, suangpi dawn khatah amaute paipihin suangpi dawn panin amaute lawnsuk uh hi; amaute khempeuh them len’ hi. Ahih hangin Amaziah in gal sungah amah tawh pai sak loin, innah a sawl kik galkap mite in Samaria panin Bethhoron dong Judah khuapite na sim uh a, tuate sungah mi tulthum thatin van tampi la uh hi. Seir gam-a Edom mite a thahna panin Amaziah hong ciah ciangin amah in Seir gam mite’ pasiante hong ciahpih a, ama pasian dingin tuate koih a, tuate bia-in tuate tungah biakna pia hi. Tua ciangin Amaziah tungah Topa hehin ama kiangah kamsang khat sawl a, tuapa in, “Bang hangin nangma khut panin amau’ mite a honkhia lo, mi pawlkhatte’ pasiante beel na hi hiam?” a ci hi. Ahih hangin amah in thu a gen lai takin kumpipa in ama kiangah, “Kumpi tungah ngaihsutna a pia dingin nang hong koih ka hi uh hiam? Khawl in! Bang hangin nang hong kithat ding ahi hiam?” a ci hi. Tua ahih ciangin kamsangpa khawl a, ahih hangin, “Nangmah in hih bang gamta-in ka thugenna ngai lo na hih manin Pasian in nang hong suksiat ding a lungsim a khentatna ka thei hi,” a ci hi. Tua ciangin Judah kumpipa Amaziah in ngaihsutna a lak khit ciangin Israel kumpi, Jehu’ tapa Jehoahaz’ tapa Joash kiangah mi sawlin, “Hong pai in, khat leh khat kimai tuah ni,” ci sak hi. Tua ciangin Israel kumpipa Joash in Judah kumpipa Amaziah kiangah thu puak a, “Lebanon a, thangling kung in Lebanon a, taamtaak tungah thu puak a, ‘A zi dingin ka tapa tungah na tanu pia in,’ ci hi; tua ciangin Lebanon gamsa khat hong pai-in thangling tuancil hi. Nangmah in, ‘Mu in, Edom mite ka vat khin hi,’ na ci a, na lungsim in nang hong kisathei sak hi. Tu-a na minthan’na zah tawh innah om in; bang hangin nangmah leh Judah mite na pukkhawm nadingun buaina piangsak ding na hi hiam?” a ci hi. Ahih hangin Amaziah in mang lo hi; bang hang hiam cih leh amaute in Edom pasiante bia ahih manin, Pasian in amau’ galte khut sungah amaute a piak theih nadingin tua in Pasian’ vaihawmna ahi hi. Tua ahih ciangin Israel kumpipa Joash kuanto hi; tua ahih ciangin Judahte’ gam Bethshemesh ah amah leh Judah kumpipa Amaziah khat leh khat gal sungah kimaituah uh hi. Tua ciangin Israel mite in Judah mite zo-a, mi khempeuh a inn uhah tai uh hi. Tua ciangin Israel kumpipa Joash in Bethshemesh ah Ahaziah’ tapa Joash tapa Amaziah ahi Judah kumpipa manin Jerusalem ah paipih a, Efraim Kongpi panin a Kiu Kulhpi ciang dong tong zali sung Jerusalem kulh phelkhia hi. Tua ciangin amah in kham leh ngun khempeuh, leh Pasian inn sungah a kimu um-le-beelte khempeuh tawh Obededom man khawm hi; amah in kumpipa’ inn-a van manphate la-in luang khapna ding mite zong man a, tua ciangin Samaria ah ciahkik hi. Israel kumpi, Jehoahaz’ tapa Joash’ sih zawh Judah kumpi Joash’ tapa Amaziah kum sawm-le-nga sung hing lai hi. Tu-in Amaziah’ nasep a om laite, a patna panin a tawpna dong, Judah leh Israel kumpite’ Laibu sungah kigelh hilo ahi hiam? Topa kiang panin amah a kiheikhiat a, kipanin amaute in amah sawmsimna khat Jerusalem ah bawl uh a, tua ciangin Lakhish ah amah nungdelh sak uh a, tua lai-ah amah that uh hi. Tua ciangin sakolte tungah amah pua-in kiciahpih hi; tua ciangin David khuapi sungah a pate tawh kivui hi. Tua ciangin Judah mi khempeuh in kum sawm-le-guk a pha Uzziah la-in a pa Amaziah tangin kumpi-in koih uh hi. Kumpi ahi ama pa a sih khit ciangin amah in Eloth khua la kikin Judah gam dingin ngah kik hi. Uzziah in uk ding a kipatin kum sawm-le-guk pha a, amah in Jerusalem ah kum sawmnga-le-nih sung uk hi. Ama nu’ min Jekoliah hi a, Jerusalem khuami ahi hi. A pa Amaziah’ hihsa khempeuh bangin amah in Topa ’ mitah a maan sem hi. Pasian zahtak ding ama tungah a hilh Zekhariah’ hun sung teng amah in Pasian zong hi; amah in Topa a zon’ lai teng, Pasian in amah daupai sak hi. Amah kuankhia-in Filistiate va sim a, Gath khuapi kulh, Jabneh khuapi kulh leh Ashdod khuapi kulh sucim hi; tua ciangin amah in Ashdod gam sung leh Filistiate gam sung mun dangte ah khuapite lam hi. Filistiate leh Gurba-al ah a teeng Arab mite, leh Meunim mite a dona ah Pasian in amah huh hi. Ammon mite in Uzziah tungah siah puak uh a, amah a thahat mahmah suak ahih manin a minthan’na in Izipt gamgi ciang dong nangawn zel hi. Tua tham loin Uzziah in Jerusalem a Kiu Kongpi leh a Kuam Kongpi leh a Keen Kulh san-ah tausangte lam a, tuate kulh tawh um hi. Tua ciangin amah in gamlakah tausangte lam a, Shefelah leh zanglei ah ganhon tampi nei ahih manin tuikhuk tampi to a, amah in lei nasep uk ahih manin mual tung leh lei hoihna gamte ah lokhote leh leenggui puahte nei hi. Tua tham loin Uzziah in kumpipa’ khut nuai-ah galkap ukte khat ahi Hananiah’ ukna nuai-ah, lai-at Jeiel leh ulian Ma-aseiah in a khop lai-in a khen khenin a koih a mi phazah mah bangin, galsim dingin a hoih galkap tampi nei hi. A thahat galkap mang a vekpi in tulnih leh zaguk ahi hi. Amaute’ ukna nuai-ah galdona ah kumpipa a huh dingin thahatna tawh gal a do thei ding galkap tul zathum leh tul sagih leh zanga om hi. Uzziah in galkap khempeuh adingin lumte, teipite, siklukhute, sikpuante, thalte, lot ding suangtangte bawl hi. Amah in thaltangte leh suang liante lot nadingin tausang omna munte leh a kiute ah koih ding, mi a siamte in a bawltawm sette, Jerusalem ah bawl hi. Amah a thahat dong a lamdangpi khatin kihuh ahih manin ama minthan’na in gamlapi zel hi. Ahih hangin amah a thahat ciangin a siat nadingin a kiphatsakna hong khang hi. Bang hang hiam cih leh Topa a Pasian tungah amah khial a, paknamtui biakna tau tungah paknamtui hal dingin Topa ’ biakinn sungah lut hi. Ahih hangin Topa ’ siampi Azariah, a thahat mihing sawmgiat tawh ama nungah pai hi; tua ciangin amaute in kumpi Uzziah nialin ama kiangah, “Uzziah aw, Topa tungah paknamtui hal ding pen nangma hih ding hi lo hi; paknamtui hal dingin a ki-ap, Aaron’ suan siampite hih ding ahi hi. Biakinn sung panin paikhia in; bang hang hiam cih leh na gamta khial a, hih bang hihna in Topa Pasian tung panin nang tungah pahtawina hong tun’ lo ding hi,” a ci uh hi. Tua ciangin Uzziah heh hi. Tu-in amah in paknamtui hal dingin a khut sungah paknamtui beel tawi a, siampite tungah a hehna hangin, paknamtui biakna tau gei, Topa ’ biakinn sung siampite’ muhin ama taltang ah phaknatna hong suakkhia hi. Tua ciangin siampi lian Azariah leh siampi khempeuh in amah a et uh ciangin a taltangah phak natna na nei hi. Tua ciangin amaute in manlang takin amah sawnkhia uh a, Topa in amah vat khin ahih manin amahmah zong a paikhia dingin nawhtat hi. Tua ciangin a sih ni dong Kumpi Uzziah a phak hi a, amah mi phak ahih manin inn tuam khatah teeng hi; bang hang hiam cih leh Topa ’ biakinn panin amah kipuaseh hi. Tua ciangin a tapa Jotham in kumpipa’ innkuan tungah uk a, amah in tua gam mite uk hi. Tu-in Uzziah gamtatna a om laite, a patna panin a tawpna dong, Amoz’ tapa, kamsang Isaiah in gelh hi. Tua ciangin Uzziah a pate tawh ihmu a, amaute in kumpite’ neihsa kivuina munah a pate tawh vui uh hi; bang hang hiam cih leh amaute in, “Amah in a phak ahi hi,” a ci uh hi. Tua ciangin a tapa Jotham in ama tangin uk hi. Jotham in uk ding a kipatin kum-sawmnih-le-nga pha a, amah in Jerusalem ah kum sawm-le-guk sung uk hi. Ama nu’ min in Jerushah hi a, Zadok’ tanu ahi hi. A pa Uzziah hihsa khempeuh bangin amah in Topa ’ mit-ah a man gamta hi—ahih hangin a pa bangin Topa ’ biakinn sungah amah va mawk lut lo hi. Ahih hangin mite in a sia gamtatnate zui lai uh hi. Amah in Topa ’ biakinn kulh kongpi tungnung lam a, Ofel kulh tungah zong inn tampi lam hi. Tua tham loin amah in Judah mual tung gamah khuapite, leh sing tamna mualte tungah mun muanhuaite leh tausangte lam hi. Amah in Ammon kumpipa tawh kido a, amaute zo hi. Tua ciangin Ammon mite in tua kumin ama tungah ngun talen zakhat, leh mangbuh lawh tulsawm leh mangbuhham lawh tulsawm mah puak uh hi. Ammon mite in ama tungah a kum nihna leh a kum thumna kumin tua zah mah puak uh hi. Tua ahih ciangin Topa a Pasian’ mai-ah Jotham a va hoih tatna hangin a vang lian hi. Tu-in Jotham’ gamtatna a om laite, leh a galsimnate, leh a omziate, en in, Israel leh Judah Kumpite’ Laibu sungah kigelh hi. Amah in uk ding a kipatin kum sawmnih-le-nga pha a, Jerusalem ah kum sawm-le-guk sung uk hi. Tua ciangin a pate tawh Jotham ihmu a, David khuapi sungah amaute in amah vui uh hi; tua ciangin a tapa Ahaz in ama taangin uk hi. Ahaz in uk ding a kipatin kum sawmnih pha a, amah in Jerusalem ah kum sawm-le-guk sung uk hi. Amah in a pu David bangin Topa ’ mit-ah a man gamta lo a, Israel kumpite’ khekhap zui hi. Amah in a kisung milimte nangawn Baalte’ adingin bawl hi; tua ciangin amah in Hinnom’ tapa’ kuamah paknamtui hal a, Topa in Israel mite mai-ah a hawlkhiat minamte in a zat uh a kihhuai gamtatnate mah bangin biakna ah a tapate hal hi. Tua ciangin amah in mual dawn a, biak piaknate, leh mual neute, leh singniim nuai khempeuh ah biakna pia-in paknamtui hal hi. Tua ahih ciangin Topa in Siria kumpipa khut sungah amah pia a, amah in zo-in a mi tampi salin Damaskas ah ciahpih hi. Israel kumpipa khut sungah zong amah kipia a, amah zo-in tampi tak that hi. Bang hang hiam cih leh amaute in a pu pate uh’ Pasian, Topa nusia uh ahih manin Remaliah’ tapa Pekah in ni khat thu-in amaute galhang mihing tul zakhat leh tul sawmnih, Judah gam sungah that hi. Tua ciangin Efraim mi a thahat Zikri in kumpipa’ tapa Ma-aseiah leh kumpi inn a uk Azrikam leh kumpipa zom-ah aana a nei Elkanah that hi. Israel mite in amau’ beh Judah mite lak panin numeite, tapate, leh tanute, mihing tul zanih sal-in man uh hi; amaute in amau’ kiang panin van tampi zong la-in tua vante Samaria ah ciahpih uh hi. Ahih hangin Oded min nei Topa ’ kamsang khat tua lai-ah om hi; tua ciangin Samaria ah hong tung galkapte a dawn dingin amah pai khia a, amaute kiangah, “En un, na pu na pate uh’ Pasian Topa in Judah tungah heh ahih manin note khut sungah amaute hong pia a, ahih hangin note in heh mahmahna tawh amaute na that uh a, tua in vantung dong ban hi. Tu-in note in Judah mi leh Jerusalem mi, numei leh pasalte, na sal dingun nuaisiah na sawm uh hi. Topa na Pasian uh tungah nomau mahmah in khialhna nei hilo na hi uh hiam? Tu-in ka thugen hong za un la, na behte uh kiang panin na lak uh na galmatte uh puak kik un; bang hang hiam cih leh Topa ’ hehna a lauhuai in note tungah om hi,” a ci hi. Efraim mi ukpite pawl khat, Johanan’ tapa Azariah, Meshillemoth’ tapa Berekhiah, Shalum’ tapa Jehizkiah, leh Hadlai’ tapa Amasa, gal sung panin hong tungte’ lang khatah pang a, amaute kiangah, “Tu huna i khialhnate leh i mawhna behlapin Topa ’ tungah mawhna eite tungah tun’pih hong sawm na hih manun hih lai-ah galmatte nong tun’pih kei ding uh hi. Bang hang hiam cih leh i mawhna lian khin zo a, Israel tungah a lauhuai hehna om hi,” a ci hi. Tua ahih ciangin galhiam tawi mite in uliante leh a kikhawm khempeuh’ mai-ah galmatte leh a lak uh nate nusia uh hi. Tua ciangin tua na sem dingin a kiseh mite dingin galmatte la uh a, amaute lakah guaktang a, a omte, a vanlakte uh sung panin puante silh sak uh hi; amaute puan silhsak uh a, khedapkaihte pia-in an leh tui vaak uh a, sathau nilh uh hi; tua ciangin amaute lakah a thaginalote late tungah pua uh a, nisuh khuapi ahi Jerikho khua amau’ behte kiangah paipih uh hi. Tua ciangin Samaria ah amaute ciahkik uh hi. Tua hun lai takin Kumpi Ahaz in Assiria kumpipa kiangah huhna ngen dingin sawl hi. Bang hang hiam cih leh Edom mite in Judah sim kikin zo uh a, galmatin puakhia uh hi. Tua ciangin Filistiate in Shefelah leh Judahte’ Negeb gam sung khuapite luh uh a, Bethshemesh, Aijalon, Gederoh, Soko a khuaneute tawh, Timnah a khuaneute tawh, leh Gimzo a khuaneute tawh la hi; tua ciangin amaute tua lai munah teeng uh hi. Judah kumpipa Ahaz in Judah mite tungah kihihsakna tawh gamta-in Topa ’ tungah citak lo ahih manin ama hangin Topa in Judah mite niam koih hi. Tua ahih ciangin Kumpi Ahaz ngetna zui-in Assiria kumpipa Tilgath-pilneser hong kuan hi. Ahi zongin amah tha khuahsak zaw loin gimsak zaw hi. Bang hang hiam cih leh Ahaz in Topa ’ biakinn, kumpipa’ inn leh uliante’ inn panin la-in Assiria kumpipa tungah siah pia hi; ahih hangin hihte khempeuh a kiman’na om lo hi. Hih Kumpi Ahaz mah pen—a lungkham hunin Topa tungah citak lo zawlai hi. Bang hang hiam cih leh amah a zo Damaskas’ pasiante tungah biakna pia-in, “Siria kumpite’ pasiante in amaute huh ahih manin amaute in kei hong huh theih nadingin amau’ tungah biakna ka pia ding hi,” ci hi. Ahih hangin tua pasiante in amah leh Israel khempeuh’ siatna ahi hi. Tua ciangin Ahaz in Pasian’ inn-a um-le-beelte khawmin satnen a, tua ciangin Topa ’ biakinn kongkhakte kalhcip hi; tua ciangin ama ading Jerusalem kiu khempeuh ah biakna tau bawl hi. Amah in pasian dangte tungah paknamtui hal nadingin Judah khuapi khempeuh ah mual dawn a, biak piaknate bawl a, a pu a pate’ Pasian, Topa a heh nadingin phin hi. Tu-in ama gamtatna a om laite leh a omzia khempeuh, a patna panin a tawpna dong, en in, Judah leh Israel Kumpite’ Laibu sungah kigelh hi. Tua ciangin Ahaz si a, amaute in Jerusalem khuapi sungah vui uh hi; ahi zongin Judah kumpite tawh vui khawm lo uh hi. Tua ciangin a tapa Hezekiah in ama tangin uk hi. Hezekiah in uk ding a kipatin kum sawmnih-le-nga pha a, amah in Jerusalem ah kum sawmnih-le-kua sung uk hi. Ama nu’ min in Abijah hi a, Zakhariah’ tanu ahi hi. A pu David’ hihnasa khempeuh bangin Topa ’ mit-ah a man gamta hi. A uk a kum khatna, a kha masa sungin, amah in Topa ’ biakinn kongkhakte hongin tuate puah hi. Amah in siampite leh Levi mite paipihin nisuahna lam mun-awngah amaute khawm a, tua ciangin amaute kiangah, “Levi mite aw, ka thugen hong za un! Tu-in nomau kisian’suah un la, na pu na pate uh Pasian, Topa ’ biakinn siangtho sakin siangtho mun panin ninte nawn khia un. Bang hang hiam cih leh i pu i pate citak lo a, Topa i Pasian’ muhna ah a sia gamta uh hi; amaute in amah nusia-in, Topa ’ teen’na panin a mai uh heikhia uh a, a nung uh ngat uh hi. Amaute in innlim kongkhakte zong khakin meivakte sumit uh a, siangtho munah paknamtui halna leh meihal biaknate Israel Pasian tungah bawl lo uh hi. Tua ahih ciangin Judah leh Jerusalem tungah Topa ’ hehna hong tung a, note’ mit mahmah tawh na muh uh mah bangin amah in amaute a cikzethuai, lamdangsakna, leh a dipkuathuai-in bawl hi. Bang hang hiam cih leh en un, hih thu hangin namsau-in i pate puk uh a, i tapate leh i tanute leh i zite galmatin om uh hi. Tu-in a lauhuai a hehna eite tung pan a kiheikhiat theih nadingin Israel Pasian, Topa tawh thuciamna khat bawl ding ka lungsim ah om hi. Ka tapate aw, Topa in ama na sem ding, leh ama nasemte hi-in ama tungah paknamtui a hal dingin note hong teel khin ahih manin tu-in mawk om kei un,” a ci hi. Tua ciangin Levi mite, Kohath’ beh sung panin Amasai’ tapa Mahath, leh Azariah’ tapa Joel; Merari’ beh sung panin Abdi’ tapa Kish, leh Jehallelel’ tapa Azariah; Gershon beh sung panin Zimmah’ tapa Joah, leh Joah’ tapa Eden; Elizafen’ beh sung panin Shimri leh Jeuel; Asaf beh sung panin Zekhariah leh Mattaniah; Heman’ beh sung panin Jehuel leh Shimei; Jeduthun’ beh sung panin Shemaiah leh Uzziel kipan uh hi. Amaute in a sanggamte uh khawmin amau kisian’suah uh a, Topa ’ genna tawh kumpipa’ thupiak bangin Topa ’ biakinn a puahsiang dingin tum uh hi. A puahsiang dingin Topa ’ biakinn sung tawngnung ah a siampite lut uh a, Topa ’ biakinn sunga a muh uh nin khempeuh Topa ’ biakinn tual-ah hong paikhiatpih uh hi; tua ciangin Levi mite in la-in Kidron lui-ah puakhia uh hi. Kha masa a ni masa ni-in amaute in sian’suah ding kipan uh a, tua kha a ni giat ni-in Topa ’ biakinn lim-ah amaute hong pai uh hi; tua ciangin amaute in ni giat sung Topa ’ biakinn sian’suah uh a, a kha masa a ni sawm-le-guk ni-in zo uh hi. Tua ciangin kumpipa Hezekiah’ kiangah amaute tumin, “ Topa ’ inn khempeuh, meihal biakna tau leh a nazatte khempeuh, leh Ompihna Anlum sabuai leh a nazatte khempeuh ka puahsiang khin uh hi. Kumpi Ahaz a cihtak loh lai takin ama uk sungin a paihkhiat nazat khempeuh a baihsa-in bawlin ka sian’suah uh hi; en in, Topa ’ biakna tau mai-ah tuate om hi,” a ci hi. Tua ciangin kumpipa Hezekiah tho baihin khuapi sung ukna-za neite khawm a, tua ciangin Topa ’ biakinn ah paito hi. Tua ciangin amaute in kumpigam leh biakinn leh Judah’ adingin khialhna hanga biakna-in bawngtal sagih, tuutal sagih, tuuno sagih, leh keeltal sagih hong paipih uh hi. Tua ciangin amah in Topa ’ biakna tau tungah tuate a pia dingin Aaron’ suan siampite sawl hi. Tua ahih ciangin amaute in a bawngtalte go uh a, siampite in a sisan la-in biakna tau theh uh hi; tua ciangin amaute in tuutalte goin a sisan biakna tau theh uh hi; tua ciangin amaute in tuunote goin a sisan biakna tau theh uh hi. Tua ciangin khialhna hanga biak nading keeltal sagihte kumpipa leh a kikhawmte kiangah hong kipaipih a, tua ciangin amaute in tuate tungah a khut uh nga a, tua ciangin Israel khempeuh adingin pumkhat suahna bawl nadingin siampite in goin tuate’ sisan tawh biakna tau tungah khialhna hanga biakna bawlna bawl uh hi. Bang hang hiam cih leh Israel khempeuh adingin meihal biakna leh khialhna hanga biakna a bawl ding uh kumpipa in thu pia hi. Tua ciangin amah in David leh kumpipa’ thu-mupa Gad leh kamsang Nathan’ thupiakna bangin Topa ’ biakinn sungah daltuahte, harp lasaknate, leh laiza lasaknate tawh Levi mite koih hi; bang hang hiam cih leh tua thupiakna in a kamsangte’ tung tawnin Topa kiang pan hong pai ahi hi. David’ lasaknate tawh Levi mite ding uh a, peengkulte tawh siampite ding uh hi. Tua ciangin biakna tau tungah meihal biakna a kipiak nading Hezekiah in thu pia hi. Meihal biakna a kipat ciangin Topa ’ tungah lasakna zong kipan a, Israel kumpi David’ lasaknate in peengkulte pawm hi. A kikhawm khempeuh in bia-in, lasate in sa uh a, peengkul tumte in tum uh hi; meihal biakna a kiman mateng hihte khempeuh hih paisuak uh hi. Biak piakna a kiman ciangin kumpipa leh amah tawh a om khempeuhte in kunin bia uh hi. Tua ciangin David’ kammalte leh thu-mupa Asaf’ kammalte zangin Topa ’ tungah phatna la a sak nadingun kumpipa Hezekiah leh uliante in Levi mite thu pia uh hi. Tua ciangin amaute in lungdamna tawh phatna late sa uh a, kunin bia uh hi. Tua ciangin Hezekiah in, “Tu-in Topa tungah nomau mah na ki-ap khin uh hi; a nai-ah hong pai un la, Topa ’ biakinn ah biak piaknate leh lungdam piaknate hong paipih un,” a ci hi. Tua ciangin a kikhawmte in biak piaknate leh lungdam piaknate hong paipih uh hi; tua ciangin a lungsim ah piak nopna lungsim a nei khempeuh in meihal biaknate hong paipih uh hi. A kikhawmte in a hong paipih meihal biakna a phazah in bawngtal sawmsagih, tuutal zakhat, leh tuuno zanih ahi hi; hihte khempeuh in Topa tungah meihal biakna khat ahi hi. A ki-ap biaknate in bawngtal zaguk leh tuu tulthum ahi hi. Ahih hangin siampite a mi tawm lua uh ahih manin meihal biaknate khempeuh a vun hawk khin zo lo uh a, siampi dangte a kisian’suah ma sung teng, a sanggam uh Levi mite in nasep a kizawh mateng amaute huh uh hi—bang hang hiam cih leh kisian’suahna thu-ah siampite sangin Levi mite ngentel zaw uh hi. Meihal biakna a tampite banah thu-nuama biakna thaute, leh meihal biakna adingin leenggahzu tawh biaknate om hi. Tua bangin Topa ’ biakinn sungah nasepna kiomsak kik hi. Pasian in mite’ adingin a bawlsak thute bangin Hezekiah leh mi khempeuh lungdam uh hi; bang hang hiam cih leh tua thu thakhatin hong piang vat hi. Israel Pasian, Topa ’ Paisan Pawi a bawl dingin Jerusalem a, Topa ’ innah amaute hong paina dingun Hezekiah in Israel khempeuh leh Judahte kiangah mi sawl a, Efraim mite leh Manasseh mite tungah zong laikhakte gelh hi. Bang hang hiam cih leh kumpipa leh a uliante leh Jerusalem a, a kikhawm khempeuh in Paisan Pawi a kha nihna sungin bawl ding kikum khin uh hi— siampite mi a kicingzah ding amau kisian’suah nai lo uh a, mite zong Jerusalem ah kikhawm nai lo uh ahih manin a hunin bawl thei lo uh hi— hih geelna pen kumpipa leh a kikhawm khempeuh adingin hoih leh kilawm hi. Tua ahih ciangin mite hong pai-in Israel Pasian, Topa adingin Jerusalem ah Paisan Pawi a bawl nadingun Be-ersheba panin Dan ciang dong Israel sung khempeuh ah taangkona khat a bawlna ding uh thukhentatna khat bawl uh hi; bang hang hiam cih leh bawl dinga a kigen bangin amaute in a lianpi-in bawl ngei lo uh hi. Tua ahih ciangin kumpipa leh a uliante kiang pana laikhakte tawh Israel khempeuh leh Judah sungah laitaite pai uh a, kumpipa’ thupiakna, “Israel mite aw, Assiria kumpite’ khut sung panin a suakta, a om lai note lamah amah hong kihei kik theih nadingin Abraham, Isaak, leh Israel Pasian, Topa ’ lamah kihei kik un. Note in na theih uh bangin, amau’ pute pate’ Topa Pasian tungah a cihtaklohna hangun amaute gamkhingin amah in a bawl na pute na pate uh leh na sanggamte uh bang kei un. Tu-in na pute na pate uh bangin lungkhauh kei un la, note kiang panin a lauhuai ama hehna a kiheikhiat theih nadingin Topa ’ lamah kipia un la, amah in a tawntung dingin a sian’thosaksa a biakinn ah pai-in Topa na Pasian uh, bia un. Bang hang hiam na cih leh Topa ’ lamah note na kilehkik uh leh, na sanggamte uh leh na tate un amau a mante’ tung panin hehpihna ngahin hih gamah hong ciahkik ding uh hi. Bang hang hiam cih leh Topa na Pasian uh dikna leh hehpihna a nei hi a, ama lamah na kiheikik nak uh leh note kiang panin a maitang heikhia lo ding hi,” a ci hi. Tua ahih ciangin laitaite Efraim leh Manasseh gam sung khuapi khat pan khuapi khat, leh Zebulun ciang dong pai uh hi; ahih hangin amaute in amaute nuihsanin zahpih uh a, na simmawh bawl uh hi. Asher mi, Manasseh, leh Zebulun mi tawmkhat bek kiniamkhiatin Jerusalem ah hong pai uh hi. Topa ’ thupiakna tawh kumpipa leh uliante’ sawlna a sem dingin Judah mite tungah Pasian in lungsim kikhatna guan hi. Tua ciangin a kha nihna sungin silngo sawh loh anlum pawi a bawl dingin Jerusalem ah mi tampi, mihon tampi tak hong pai uh hi. Amaute nasem dingin kipanin Jerusalem a, om biakna taute hemkhia uh a, paknamtui halna ding biakna taute khempeuh amaute in la khia-in Kidron kuamah paai uh hi. Tua ciangin amaute in a kha nihna ni sawm-le-li ni-in Paisan Pawi tuuno go uh hi. Tua ciangin siampite leh Levi mite nakpi takin maizum uh a, tua ahih ciangin amau mah kisian’suahin Topa ’ inn sungah meihal biaknate hong paipih uh hi. Pasian’ mipa Moses’ thukham hangin amaute in amau’ panmun ngei hong la uh hi; siampite in Levi mite khut tung panin a ngah uh sisan theh uh hi. Bang hang hiam cih leh a kikhawm lakah amau mah a kisian’suah nai lo tampi om uh hi; tua ahih ciangin Topa tungah a siangtho-in a kibawl nadingin a nin khempeuh adingin Levi mite in Paisan Pawi tuuno a gawh ding uh kisam hi. Bang hang hiam cih leh mi tampi tak, Efraim, Manasseh, Issakhar, leh Zebulun sung pan tampi tak, amau mah kisiangthosak nai lo uh a, ahi zongin ngeina lopi-in amaute in Paisan Pawi ne uh hi. Bang hang hiam cih leh Hezekiah in amaute adingin thungenin, “Ka pute ka pate uh’ Pasian a dik Topa aw, biakinn siangthona ngeina om bangin a sian’ loh uh hangin lungsim tak tawh nang hong biate khempeuh’ mawhna maisak in,” a ci hi. Tua ciangin Topa in Hezekiah’ thungetna pia-in mite mawhna maisak a, gimna ngahsak lo hi. Tua ciangin Jerusalem ah a om Israel mite in lungdamna lianpi tawh ni sagih sung silngo sawhloh anlum pawi bawl uh hi; tua ciangin Levi mite leh siampite in a hatna khempeuh uh tawh Topa la sak uh a, a ni ni-in Topa phat uh hi. Tua ciangin Hezekiah in Topa ’ nasepna ah a siamna hoih uh a lak Levi mite khempeuh tungah hanthotna thugen hi. Tua ahih ciangin mite in pawi an ni sagih sung ne uh a, thu-nuama biakna pia-in a pu a pate uh Pasian, Topa tungah lungdamna ko uh hi. Tua ciangin a dang ni sagih sung mah tua pawi a bawl thuah lai ding uh a kikhawm khempeuh thukim uh hi; tua ahih ciangin amaute in lungdamna tawh adang ni sagih sung mah bawl thuah uh hi. Bang hang hiam cih leh Judah kumpipa Hezekiah in biakpiak nadingin a kikhawmte tungah bawngtal tulkhat leh tuu tulsagih pia a, uliante in a kikhawmte tungah bawngtal tulkhat leh tuu tulsawm pia uh hi. Siampite in tampi tak amau mah kisian’suah uh hi. Judah mi a kikhawm khempeuh, leh siampite leh Levi mite, leh Israel panin hong paikhia a kikhawm khempeuh, leh Israel gam panin hong paikhia leh peemtate, leh Judah gam sungah a teng peemtate, lungdam uh hi. Israel kumpi David’ tapa Solomon’ huna kipanin Jerusalem ah hih bang om ngeilo ahih manin Jerusalem ah lungdamna lianpi om hi. Tua ciangin siampite leh Levi mite ding-in mite thupha pia uh a, amau’ awging kiza-in, amau’ thungetna in vantung a, a siangtho ama teen’na banto hi. Tu-in hihte khempeuh a man ciangin, tua lai-a a om Israel khempeuh Judah khuapite ah pai-in khuampite sat khamin Asherah milimte phukin, Judah leh Benjamin sung, leh Efraim leh Manasseh sunga mual dawn-a biak piaknate leh biakna taute a suksiat khit mateng uh phelkek uh hi. Tua ciangin Israel mi khempeuh, a mi kimin amau’ inn omna a khuapi ciat uhah ciah uh hi. Tua ciangin Hezekiah in siampite leh Levi mite amau’ nasep ciat tawh kizui-in a khen a khenin seh a, siampite leh Levi mite in meihal biaknate leh thu-nuama biaknate pia-in, Topa ’ inn sung phual tuamtuamte huang sungah nasemin lungdam kohna leh phatna a bawl ding ahi uh hi. Kumpipa in ama neihsa sung panin a piakte in meihal biak nading ahi hi; Topa ’ thukham sungah a kigelh mah bangin zing leh nitak-a meihal biaknate, sabbath nite, khadet nite, leh a kiseh pawite’ adingin meihal biaknate ahi hi. Tua ciangin Topa ’ thukham sepna ah siampite leh Levi mite a kibup piak theih nadingun amau’ ngah ding a kilawm nate, Jerusalem a, teeng mite in amaute tungah a piak nadingun amah in sawl hi. Tua thupiakna a kitheihthang phetin Israel mite in anpalte, leeggahzu, sathau, khuaizu, leh lo-a piang khempeuh tampi tak hong pia uh hi; tua ciangin amaute in na khempeuh sung pan seh-sawm suah seh-khat ahi tampi tak hong paipih uh hi. Tua ciangin Judah khuapite sungah a teeng Israel mite leh Judah mite in zong bawng leh tuu seh-sawm suah seh-khat, leh Topa a Pasian uh tungah a kipiasa a ki-ap nate hong paipih uh a, a lom lomin koih uh hi. A kha thumna sungin amaute in tua a lomte cian ding kipan uh a, a kha sagihna sungin man siang uh hi. Hezekiah leh uliante hong pai-in a lomte a muh uh ciangin amaute in Topa leh ama mi Israelte thupha pia uh hi. Tua ciangin Hezekiah in a lomte thu, siampite leh Levi mite dong hi. Zadok’ suan ahi, siampi lian Azariah in amah dawngin, “Amaute in amau’ piakte uh Topa ’ inn sungah paipih ding hong kipat uh a, kipan kote in an ka ne uh a, a kicing nei-in tampi val lai hi; Topa in ama mite thupha pia ahih manin hih na tampi a om lai i nei hi,” a ci hi. Tua ciangin amaute in Topa ’ inn sungah inndeite a bawl nading uh Hezekiah in thupia hi; tua ciangin amaute in a deite bawl uh hi. Tua ciangin amaute in a piaknate, seh-sawm suah seh-khat leh a ki-ap nate cihtakna tawh hong paipih uh hi. Tuate a en ulian penpa in Levi mi Konaniah hi a, a sanggampa Shimei in amah a huhpa ahi hi; Kumpipa Hezekiah leh Pasian’ inn ukpipa Azariah’ sehna tawh Jehiel, Azariah, Nathan, Asahel, Jerimoth, Jozabad, Eliel, Ismakhiah, Mahath, leh Benaiahte in Konaniah leh a sanggampa Shimei huhin a ukte ahi uh hi. Tua ciangin nisuahna lam kulhkongpi cingpa, Levi mi Innah tapa Kore in Topa ’ ading leh siangthopen biakna adingin koihcing dingin, a kipiate a sehkhen dingin, Topa ’ tungah ut thu-a piaknate a ukpa ahi hi. Eden, Miniamin, Jeshua, Shemaiah, Amariah, leh Shekaniahte in siampite’ khuapite sungah a moi a ham a kibangin a khen khenin, a ngah ding ciat a sanggamte uh tungah a hawm dingin cihtakna tawh amah huh uh hi. Khang-simna a, amau’ kiciamtehna tawh kisai-in a kipia hi tuan loin, a khen khenin amau’ panmun tawh kizui-in ni simin nasepna ah a kisam bangin Topa ’ inn sungah a lut, kum thum leh a tungsiah a pha pasal khempeuh tungah tanh kipia kim hi. Siampite a beh zui-in nasepna kipia hi. Levi mi kum sawmnih leh a tungsiahte a khen khenin amau’ panmun tawh kizui-in nasep kipia hi. Siampite a naupangte khempeuh, a zite, a tapate leh a tanute uh tawh a mihon buppi-in kiciamteh hi; bang hang hiam cih leh a siangtho-in a kikepna uhah amaute citak uh hi. Amau’ khuapite aa ahi taang gam lote ah a Aaron’ suan siampite’ adingin ahih leh, a kiciamteh siampite lak leh Levi mite lakah pasal khempeuh tungah amau ngah dingte a hawm dingin a minin a kiseh mite, khuapi tampite sungah om hi. Tua bangin Hezekiah in Judah gam sung khempeuh ah hih hi; amah in Topa a Pasian mai-ah a hoih leh a man gamta-in cihtakna tawh sem hi. Amah in Pasian’ inn sung nasepna leh thukham leh thupiaknate tawh kizui-in a hihna ah ama Pasian zongin, a lungsim khempeuh tawh sem a, a ma vang hi. Hih thute khempeuh leh citak-a hih banga na a kisep khit ciangin Assiria kumpipa Sennakherib hong pai-in Judah simin kulhnei khuapite lang khatah phual sat a, amah adingin lak sawm hi. Sennakherib hong pai-in Jerusalem sim ding a sawmna thu Hezekiah in a theih ciangin, amah in a uliante leh a mi thahatte tawh khuapi pua lam-a luangkhia tuinakte khakcip ding vaihawm hi; amaute in amah huh uh hi. Mi tampi tak kikhawm uh a, gam sungah a luang tuinak leh lui khempeuh khakcipin “Bang hangin Assiria kumpite hong pai-in tui tampi mu ding ahi hiam?” ci uh hi. Amah in lungsim kho takin sep ding kipan a, a cimsa kulh khempeuh ciang pha-in tua tungah tausangte koihto a, tua pua lamah kulh dang khat ciang hi; amah in David khuapi sungah Millo a muanhuai-in bawlpha hi. Amah in galhiam leh lumte zong tampi bawl hi. Amah in mite a uk dingin galdona ah a ukte koih a, khuapi kulh kongpi mun-awngna ama kiangah amaute khawmin amaute tungah hanthotna tawh thu genin, “Thakhauh un la, hang un. Assiria kumpipa leh amah tawh a om mihon khempeuh mai-ah lau kei un la, zong lungkia kei un; bang hang hiam cih leh amah tawh a omte sangin eite tawh a ompa lianzaw hi. Amah tawh mihing thatang om hi; ahih hangin eite hong huhin i gal hong dosak dingin Topa i Pasian in eite tawh hong om hi,” a ci hi. Tua ciangin mite in Judah kumpipa Hezekiah’ kammalte muang uh hi. Hih thu khit ciangin a galkap khempeuh tawh Lakhish a umcih, Assiria kumpipa Sennakherib in Judah kumpipa Hezekiah leh Jerusalem ah a om Judah mi khempeuh kiangah Jerusalem ah a nasemte sawlin, “Assiria kumpipa Sennakherib in hih bangin ci hi, ‘Note in Jerusalem umcihna na nan’ nading uh bang suang na hi uh hiam? Hezekiah in note kiangah, “Assiria kumpipa khut panin Topa i Pasian in eite hong honkhia ding hi,” hong cih ciangin, note gilkial dangtakin a hong si sak dingin amah in note hong makai khial hilo ahi hiam? Hih Hezekiah mah in mual dawn a, a biak piaknate leh ama biakna taute la khia-in Judah leh Jerusalem thu pia a, “Biakna tau khat mai-ah note in bia-in tua tungah na biak piaknate uh na hal ding uh hi,” ci hilo ahi hiam? Keimah leh ka pu ka pate in gamdang mi khempeuh tungah ka hihnasate uh thei lo na hi uh hiam? Tua gam minamte’ pasiante in keima khut sung panin a gam uh honkhia zo ahi uh hiam? Na Pasian un keima khut sung panin note hong honkhiat theih nadingin ka pu ka pate in a suksiat mang tua minamte’ pasian khempeuh lakah kua in a mite honkhia zo ngei ahi hiam? Tua ahih ciangin tu-in note, Hezekiah’ khemsa-in ta kei un la, hih bangin kimakai khial sak kei un, amah um kei un; bang hang hiam cih leh minam khatpeuh, kumpigam khatpeuh’ pasian in keima khut ahi a, ka pu ka pate’ khut pan ahi zongin a mite honkhia zo ngei nai lo hi. Keima khut sung pan na Pasian un note hong honkhia zo lo zawkan ding hi,’ ci un,” ci sak hi. Tua ciangin ama nasemte in Topa Pasian leh a nasempa Hezekiah langpangin thu tam gen zawlai uh hi. Tua ciangin amah in Israel Pasian, Topa ’ heh nading leh amah a langpan’na in laikhakte gelh a, “Ka khut sung panin a mite a honkhia lo gam sung minamte’ pasiante mah bangin ka khut sung panin Hezekiah’ Pasian in a mite honkhia lo ding hi,” ci hi. Amaute in khuapi a lak theih nadingin khuapi mite lau-in a linglawn’sak nadingun kulh tungah a om Jerusalem mite tungah Judah pau tawh nakpi takin kiko uh hi. Amaute in, mite’ khut tawh kibawl, leitung mite’ pasiante a gen bang lel-un Jerusalem Pasian gen uh hi. Tua ciangin kumpipa Hezekiah leh Amoz’ tapa, kamsangpa Isaiah in hih thu hangin thu ngenin vantung lamah kiko uh hi. Tua ciangin Topa in Assiria kumpipa’ giahphual ah a thahat galhang khempeuh leh galkap ukte leh uliante a susia vantung mi khat sawl hi. Tua ahih ciangin ama gamah maizumna tawh ciahkik hi. Ama pasian’ inn sungah amah a tun’ ciangin ama tapate pawlkhat in namsau tawh amah satlum uh hi. Tua ahih ciangin Topa in Assiria kumpipa Sennakherib’ khut leh ama galte khempeuh panin Hezekiah leh Jerusalem a, teengte honkhia hi; tua ciangin amah in mun khempeuh panin galdaihna amaute tungah pia hi. Tua ciangin mi tampi in Jerusalem khua Topa kiangah letsongte hong puakin, Judah kumpipa Hezekiah kiangah na manphate hong puak uh a, tua huna kipanin minam khempeuh muhna ah amah kisangtawi hi. Tua hun lai-in Hezekiah cina-in si dektak a, amah in Topa tungah thu ngen hi; tua ciangin amah in a ngetna pia-in ama tungah lim khat pia hi. Ahih hangin a lungsim kiphasak ahih manin ama tungah phattuamna a kibawl bangin Topa tungah Hezekiah lungdam lo hi. Tua ahih manin amah leh Judah leh Jerusalem tungah Topa ’ hehna hong tung hi. Ahih hangin Hezekiah a lungsim kiphatsakna thu-ah amah leh Jerusalem a, teeng mite kiniamkhiat uh ahih manin amaute tungah Topa ’ hehna hong tung lo hi. Hezekiah hau mahmahin minthan’na ngah hi; amah in ngun, kham, suangmanphate ading, a namtui nate, lumte, a manpha um-le-beel nam khempeuh adingin van manpha koihnate bawl hi; an, leenggahzu, leh sathau koih nading van koihnate zong bawl hi; ganhing nam khempeuh adingin ganbukte, leh tuubukte bawl hi. Amah in tua mah bangin amahmah adingin khuapite leh tuuhonte leh ganhonte tampi koih hi; bang hang hiam cih leh Pasian in ama tungah neihsa tampi tak pia hi. Hih Hezekiah mah in Gihon tui tungnungte khaktanin David khuapi nitumna lam pangah luang sak hi. Hezekiah a nasepna khempeuh ah a ma vang hi. Tua ahih ciangin gam sung omzia lim a kan dingin ama kiangah kisawl Babilon uliante’ kamtaite tawh kisai-in, amah a ze-et nading leh ama lungsim sungah bang om hiam cih a vekpi-in a theih nadingin Pasian in ama thu-in amah om sak hi. Tu-in Hezekiah’ gamtatna a om laite, leh ama nasep hoihte, en in, Judah leh Israel Kumpite’ Laibu sung, Amoz’ tapa, kamsang Isaiah’ mangmuhna sungah kigelh hi. Tua ciangin Hezekiah a pate tawh ihmu a, amaute in David’ suante’ han paina mual pangah amah vui uh hi; Judah khempeuh leh Jerusalem a, teengte in a sihin amah zahtakna bawl uh hi. Tua ciangin ama tapa Manasseh in ama tangin uk hi. Manasseh in uk ding a kipatin kum sawm-le-nih pha a, amah in Jerusalem ah kum sawmnga-le-nga sung uk hi. Topa in Israel mite mai-ah a hawlkhiat minamte’ zat a kihhuai gamtatnate mah bangin, amah in Topa ’ muhna ah a sia gamta hi. Bang hang hiam cih leh a pa Hezekiah in a suksiatsa mual dawn-a biak piaknate amah in lamkikin, Baalte adingin biakna taute phut a, Asherah milimte bawlin vantung nate khempeuh bia a, tuate’ na sem hi. Topa in, “Jerusalem ah ka min om tawntung ding hi,” a cihna Topa ’ inn sungah amah in biakna taute lam hi. Tua ciangin amah in Topa ’ inn tual nihte’ sungah vantung nate khempeuh adingin biakna taute lam hi. Tua ciangin amah in Hinnom’ tapa kuamah biakna-in a tapate hal a, aisanna, leh mai lam thugen kholhna leh khongkhaina zang a, vankah theite leh aisante tawh na sem hi. Amah in Topa ’ muhna ah siatna tampi bawl a, amah hehsak hi. Manasseh in Judah leh Jerusalem a, tengte zol ahih manin, Israel mite’ mai-ah Topa in a suksiat minamte sangin amaute in a sia tamzaw gamta uh hi. Topa in Manasseh tung leh ama mite tungah thu gen a, ahih hangin amaute in don lo uh hi. Tua ciangin Topa in Assiria kumpipa’ galkap ukte amau kiangah paipih a, amaute in sikkawite tawh Manasseh manin sumngo khau tawh khihin Babilon ah paipih uh hi. Amah a lungkham ciangin Topa a Pasian’ maipha kunh-in a pu a pate’ Pasian mai-ah nakpi takin amah kiniamkhiat hi. Amah in ama kiangah thungen a, tua ciangin Pasian in ama kutna saangin, a thuumna ngai hi. Amah in Jerusalem ah amah paipih kikin a kumpigam pia kik hi. Tua ciangin Topa in Pasian ahihna Manasseh in thei hi. Tua khit ciangin amah in kuam sung, Gihon nitumna lam, David khuapi ah, Ngasa Kongpi lutna lamah kulh puanung khat ciang a, Ofel kiimah ciang suakin a sang mahmahin ciangto hi; amah in Judah gam sunga kulh nei khuapi khempeuh ah zong galkap a ukte koih hi. Tua ciangin amah in Topa ’ inn panin gamdang pasiante leh milim lakhia a, Topa ’ inn mual tung leh Jerusalem a, ama lamsa biakna tau khempeuh lakhia-in, khuapi pua lamah tuate paai hi. Amah in Topa ’ biakna tau zong koih kikin tua tungah thunuam-a biakna leh lungdam kohna pia hi; tua ciangin amah in Israel Pasian, Topa ’ na a sep nadingun Judahte thu pia hi. Ahi zongin mite in mual dawn-a biak piaknate ah biakna pia lai uh a, ahih hangin Topa amaute’ Pasian tung bekah biakna pia uh hi. Tu-in Manasseh’ gamtatna a om laite, leh a Pasian’ tungah a thungetna, leh Israel Pasian, Topa ’ min tawh ama tungah thu a gen thu-mu-te’ thungennate, en in, Israel Kumpite’ Khang Tangthu sungah om hi. Tua ciangin ama thungetna, leh ama kutna Pasian in a san’na, leh ama khialhna leh a cihtaklohna khempeuh, leh amah a kiniamkhiat ma-in mual dawn a, biak piaknate bawlin Asherahte leh milimte a koihna munte, en in, Thu-mu-te’ Khang Tangthu sungah kigelh hi. Tua ahih ciangin Manasseh a pate tawh ihmu a, amaute in a inn sungah amah vui uh hi; tua ciangin a tapa Amon in ama tangin uk hi. Amon in uk ding a kipatin kum sawmnih-le-nih pha a, amah in Jerusalem ah kumnih sung uk hi. A pa Manasseh’ gamtatnasa khempeuh bangin amah in Topa ’ muhna ah a sia gamta hi. Amon in a pa Manasseh’ bawlsa milim khempeuh tungah biakna pia a, tuate’ na sem hi. A pa Manasseh a kiniamkhiat bangin Topa mai-ah amah kiniamkhiat lo a, hih Amon in mawhna tam piangsak semsem hi. Tua ciangin ama nasemte in amah sawmsimin ama inn sungah amah that uh hi. Ahih hangin tua gam mite in Kumpi Amon a sawmsim khempeuh that uh hi; tua ciangin tua gam mite in ama tangin a tapa Josiah kumpi-in koih uh hi. Josiah in uk ding a kipatin kum giat pha a, amah in Jerusalem ah kum sawmthum-le-khat sung uk hi; Amah in Topa mit-ah a man gamta a, a pu David’ khekhap zui hi; tak lamah ahi a, vei lamah ahi zongin amah lam pial lo hi. Bang hang hiam cih leh ama uk a kum giatna sung, amah naupang ahih laipi mahin, amah in a pu David’ Pasian zon’ ding kipan hi; a kum sawm-le-nihna ciangin amah in Judah leh Jerusalem panin mual dawn a, biak piaknate, Asherah milimte, leh a kiseek leh a kisung milimte beisiang sak ding kipan hi. Tua ciangin amah in Baalte’ biakna taute ama muhna ah supai sak hi; tua ciangin amah in tuate tungah a om paknamtui biakna taute phuk hi; tua ciangin amah in Asherah milimte, leh a kiseek leh a kisung milimte sukhamin gawivui a, tuate tungah biakna a pia mite’ han tungah theh hi. Amah in amau’ biakna taute tungah siampite’ guhte zong hal a, Judah leh Jerusalem siang sak hi. Tua ciangin Manasseh, Efraim, leh Simeon, leh Naftali khuapi ciang dong, mun awngte leh a kim a pamah, amah in biakna taute sukhamin Ashera milimte leh milim dangte satvui a, Israel gam sung khempeuh ah paknamtui biakna taute satvui hi. Tua ciangin Jerusalem ah amah ciahkik hi. Tu-in ama uk a kum sawm-le-giatna, gam leh inn a sian’sak khit ciangin, Topa a Pasian’ inn a puah dingin amah in Azaliah’ tapa Shafan leh khuapi sung ukpa Ma-aseiah, leh thuciamtehpa ahi, Joahaz’ tapa Joah sawl hi. Siampi lianpa Hilkiah kiangah amaute hong pai uh a, kongcingte ahi Levi mite in Manasseh leh Efraim leh Israel a om laite khempeuh leh Judah leh Benjamin khempeuh leh Jerusalem a, teeng mite tung panin a khop ahi, Pasian’ innah hong kipaipih sumte pia uh hi. Amaute in Topa ’ inn a vaan nasemte tungah tua sum pia uh hi; tua ciangin Topa ’ innah a sem nasemte in a inn puah nading leh a ngei batsakkik nadingin pia uh hi. Amaute in a kito suangte lei nading, leh Judah kumpite in a siatsak, tep nadingin singte leh inn lam nadingin innkamte lei nadingin khutsiamte leh innlamte tungah pia uh hi. Tua ciangin mite in cihtakna tawh na sem uh hi. Amaute tungah a en dingin Levi mi Merari beh sung pan Jahath leh Obadiah, leh Kohathte beh sung pan Zekhariah leh Meshullam kikoih hi. Levi mi, lasakna nazatte ah siamna a nei khempeuh, vangik puate a uk hi a, nasepna namkim a sem khempeuh makaih uh hi; tua ciangin Levi mi pawlkhatte in laigelhte, leh za neite, leh kulhkongpi cingte ahi uh hi. Amaute in Topa ’ innah a kipaipih sumte a lakkhiat lai takun siampi Hilkiah in Moses tung tawnin a kipia Topa ’ thukham laibu mu hi. Tua ciangin Hilkiah in lai-atpa Shafan kiangah, “ Topa ’ inn sungah thukham laibu ka mu hi,” ci hi; tua ciangin Hilkiah in Shafan tungah a laibu pia hi. Shafan in kumpipa kiangah a laibu paipih a, kumpipa kiangah, “Na semte tungah a kipia khempeuh amaute in a sepsan laitak uh ahi hi. Topa inn sungah a kimu sumte amaute in lakhia a, nasep vaante leh nasemte tungah pia uh hi,” ci-in gen thuah lai hi. Tua lai-atpa Shafan in kumpipa kiangah, “Siampi Hilkiah in kei tungah laibu khat hong pia hi,” a ci hi. Tua ciangin Shafan in kumpipa mai-ah tua laibu sim hi. Kumpipa in thukham kammalte a zak ciangin a puante balkek hi. Tua ciangin kumpipa in Hilkiah, Shafan’ tapa Ahikam, Mikah’ tapa Abdon, lai-atpa Shafan, leh kumpipa’ nasempa Asaiah thu pia-in, “Pai un la, a kimu laibu sunga kammalte tawh kisai-in keima ading leh Israel leh Judah ah a om lai mite adingin Topa thu na dong un; bang hang hiam cih leh i pu i pate in hih laibu sungah a kigelh khempeuh bangin sep ding Topa ’ kammal na zui lo uh ahih manin eite tungah Topa ’ hehna lian hi,” a ci hi. Tua ahih ciangin Hilkiah leh kumpipa in a sawl mite, puan a kem Hasrah, a tapa Tokhath, a tapa Shallum’ zi ahi kamsangnu Huldah kiangah pai-in (tu-in tua nu Jerusalem sung a Veng Nihna ah teeng hi) tua thu tawh kisai ama kiangah va gen uh hi. Tua ciangin tua nu in amaute kiangah, “Israel Pasian, Topa in hih bangin ci hi: ‘Kei kiangah note a hong sawlpa kiangah gen un, Topa in hih bangin ci hi: En un, Judah kumpipa mai-ah a kisim laibu sunga kigelh samsiatnate khempeuh ahi siatna hih mun leh a tungah a teeng mite khempeuh tungah ka tung sak ding hi. Amaute in amau’ gamtatna tawh kei hong hehsak theih nadingun amaute in kei hong nusia in, pasian dangte tungah paknamtui hal uh ahih manin hih mun tungah ka hehna kisungin dai lo ding hi. Ahih hangin Topa thu a dong dingin note a hong sawl Judah kumpipa tungah hih bangin na gen ding uh hi. Israel Pasian, Topa in hih bangin ci hi: Na zaksa thute tawh kisai-in, hih mun leh a tunga teengte langpan’na ama kammal na zak ciangin na lungsim kisikin Pasian mai-ah na kiniamkhiat a, keima mai-ah nang kiniamkhiatin na puante balkekin ka mai-ah kap na hih manin, kei zong nang kong za hi, Topa in ci hi. En in, na pate kiang kong zuan sak ding a, nuam takin na han na zuan ding a, hih mun leh a tunga teengte tungah ka tun’sak ding siatna khempeuh na mit in mu lo ding hi,’ ci hi,” a ci hi. Tua ciangin amaute in kumpipa kiangah thu puak kik uh hi. Tua ciangin kumpipa in mi sawlin Judah leh Jerusalem upa khempeuh kaikhawm hi. Tua ciangin kumpipa, Judah mite leh Jerusalem-a teeng mite leh siampite leh Levi mite khempeuh, mi khempeuh a lian a neu tawh, Topa ’ innah paito hi; tua ciangin amah in Topa ’ inn sungah a kimu thuciamna laibu sunga thute khempeuh amau’ zakin sim hi. Tua ciangin kumpipa ama munah ding-in, hih laibu sungah a kigelh thuciamna kammalte a sem dingin a lungsim khempeuh leh a nuntakna khempeuh tawh Topa ’ nung a zuihna ding leh ama thupiaknate leh ama tecipan’nate leh a thukhamte a zuihna ding, Topa ’ mai-ah thuciamna khat bawl hi. Tua ciangin amah in Jerusalem leh Benjamin sunga om mi khempeuh hih thu zui sak hi. Tua ciangin Jerusalem a, teeng mite in amau’ pute pate’ Pasian ahi Pasian’ thuciamna bangin gamta uh hi. Tua ciangin Josiah in Israel mite’neihsa gam sung khempeuh panin kihhuainate khempeuh lakhia a, Israel sunga om mi khempeuh Topa amaute’ Pasian na a sem sak hi. Ama nuntak sung khempeuh amau’ pute pate’ Pasian ahi Topa zuihna panin amaute kiheikhia lo uh hi. Josiah in Topa ’ adingin Jerusalem ah Paisan Pawi bawl hi; amaute in a kha masa a ni sawm-le-li ni-in Paisan Pawi tuuno go uh hi. Amah in siampite amau’ panmunte ah seh a, Topa ’ inn sunga nasepna ah amaute hanthawn hi. Tua ciangin amah in Israel khempeuh hilhin Topa tungah a siangtho Levi mite tungah, “Israel kumpipa, David’ tapa Solomon in a lam inn sungah thuciamna singkuang siangtho koih un; na liangko tung uhah na puak ding uh kisam nawn lo hi. Tu-in Topa na Pasian uh leh ama mi Israelte’ na sem un. Note a khen khenin na beh uh tawh kizui-in kithawi un la, Israel kumpipa David’ lam lahna leh a tapa Solomon’ lam lahna zui un. Tua ciangin mi nautang na sanggamte uh beh kikhenna tawh kizui-in siangtho munah ding un la, Levi minam beh tuamtuamte sung pan kihel kim un. Tua ciangin Paisan Pawi bawlna ganhing goin nomau mah kisian’suah un la, Moses tung tawnin Topa ’ thugen bangin na sanggamte uh adingin kithawi un,” a ci hi. Tua ciangin Josiah in tua lai-a a om mi khempeuhte’ adingin Paisan Pawi piakna-in mi nautangte tungah ganhon panin tuunote leh keelnote tul sawmthum ciang dong, leh bawngtal tulthum pia hi; hihte in kumpipa’ neihsa pan ahi hi. Tua ciangin ama uliante in utna lungsim tawh mite tung, siampite tung leh Levi mite tungah pia hi. Pasian’ innah ulianpite ahi Hilkiah, Zekhariah, leh Jehiel-te in siampite tungah Paisan Pawi bawl nadingin tuuno leh keelno tulnih leh zaguk leh bawngtal zathum pia uh hi. Levi mi ukpite Konaniah, Shemaiah, leh a sanggam Nethanel, Hashabiah, Jeiel leh Jozabab-te in Paisan Pawi piak nadingin Levi mite tungah tuuno leh keelno tulnga leh bawngtal zanga pia uh hi. Nasep nading a kithawi khit uh ciangin, siampite amau’ munah ding a, kumpipa’ thupiakna bangin Levi mite amau’ khen sungah om uh hi. Tua ciangin amaute in Paisan tuuno go uh a, Levi mite in savun a hawk lai takun siampite in amau’ tung panin a ngah uh sisan theh uh hi. Tua ciangin amaute in, Moses laibu sungah a kigelh bangin Topa tungah piak dingin mi nautang sungah a innkuan a pawl tawh kizui-in a hawm theih nadingun meihal biaknate tuam koih uh hi. Tua bangin amaute in bawngtalte hih uh hi. Tua ciangin amaute in biakna ngeina kip tawh kizui-in Paisan tuuno mei-ah hang uh hi; tua ciangin amaute in beel sung, beelpi sung, leh sikbeel daite sungah siangtho piaknate huan uh a, mi nautang khempeuh kiangah tuate manlang takin puak uh hi. Tua khit ciangin amau’ ading leh siampite adingin amau mah kithawi uh hi; bang hang hiam cih leh Aaron’ suan siampite zankim ciang dong meihal biaknate pia-in manlah uh hi; tua ahih ciangin Levi mite, amau’ ading leh Aaron’ suan siampite’ adingin kithawi uh hi. David’ thupiak bangin Asaf behte ahi lasate, leh Asaf, leh Heman, leh kumpipa’ thu-mupa Jeduthunte amau’ munah om uh hi; kulhkongpi cingte kulhkongpi ciatah om uh hi; amau’ sanggam Levi mite in amau’ adingin kithawi sak uh ahih manin amau’ nasepna pan amau a paikhiat ding uh kisam lo hi. Tua ahih ciangin Kumpi Josiah’ thupiakna bangin Paisan Pawi bawl nading leh Topa ’ biakna tau tungah meihal biaknate piak nadingin tua ni-in Topa ’ nasep nading khempeuh kithawi hi. Tua lai-ah a om Israel mite in tua hunin Paisan Pawi, leh Silngo Sawh loh Anlum Pawi ni sagih sung bawl uh hi. Kamsang Samuel’ huna kipan tua bang Paisan Pawi Israel tungah kibawl ngei lo hi; Josiah, leh siampite leh Levi mite, leh tua lai-ah a om Judah leh Israel khempeuh, leh Jerusalem a, teeng mite in a bawl Paisan Pawi tawh a kibang, Israel kumpite kuamah in bawl lo hi. Josiah’ uk a kum sawm-le-giatna kumin hih Paisan Pawi kibawl hi. Hih thute khempeuh khit, Josiah in biakinn a bawl khit ciangin, Eufrates gun gei Karkhemish ah galdo dingin Izipt kumpipa Neko hong kuanto a, amah do dingin Josiah kuankhia hi. Ahih hangin amah in ama kiangah kamtaite sawlin, “Judah kumpipa aw, eite gel khat leh khat i kihih nading bang om ahi hiam? Tu ni-in nang a do dingin hong kuan ka hi kei hi; ka galte a do dingin hong kuan ka hi hi; ka kinawh nading Pasian in kei tungah thu hong pia khin hi. Kei tawh a omkhawm Pasian na nialna khawl in, tua hi kei leh nang hong susia ding hi,” ci sak hi. Ahi zongin ama kiang panin Josiah kihei khia nuam lo a, amah tawh a kido theih nadingin a meel kiseel hi. Amah in Pasian’ kam pana Neko’ thugente ngai lo a, Megiddo zanglei a, galkidona ah va pawm hi. Tua ciangin thaltawite in Kumpi Josiah kap hi; tua ciangin kumpipa in a nasemte kiangah, “Nakpi takin liam ka hih manin kei hong pai khiatpih un,” a ci hi. Tua ahih ciangin a nasemte in leeng sung panin amah la khia-in ama leeng nihna sungah amah pua-in Jerusalem ah paipih uh hi. Tua ciangin amah si a, a pate’ han sungah kivui hi. Judah gam leh Jerusalem khuami khempeuh Josiah’ hangin kap uh hi. Jeremiah in zong Josiah hangin kah la phuak hi; pasal lasate leh numei lasate khempeuh in tu ni dongin amau’ kahna ah Josiah tamlawh uh hi. Amaute in Israel sungah hih thu biakna ngeina kipin bawl uh hi; en in, Kah La sungah tuate kikhum hi. Tu-in Josiah’ gamtatna a om laite, leh Topa ’ thukham sungah a kigelh bangin a nasep hoihte, leh ama gamtatna, a masa leh a nunung, en in, Israel leh Judah Kumpite’ Laibu sungah kigelh hi. Tua gam mite in Josiah’ tapa Jehoahaz la-in Jerusalem ah a pa’ tangin kumpi-in koih uh hi. Jehoahaz in uk ding a kipatin kum sawmnih-le-thum pha hi; amah in Jerusalem ah khathum sung uk hi. Tua ciangin Izipt kumpipa in Jerusalem ah amah zakiasak a, siah ngun talen zakhat leh kham talen khat, tua gam kipiasak hi. Tua ciangin Izipt kumpipa in Judah leh Jerusalem tungah a ukin Jehoahaz’ sanggampa Eliakim koih a, ama min Jehoiakim-in khelsak hi; ahih hangin Neko in a sanggampa Jehoahaz la-in Izipt-ah paipih hi. Jehoiakim in uk ding a kipatin kum sawmnih-le-nga pha a, amah in Jerusalem ah kum sawm-le-khat sung uk hi. Amah in Topa a Pasian’ mai-ah a sia gamta hi. Babilon kumpipa Nebukhadnezzar amah do-in hong paito a, Babilon ah a paipih dingin amah kol bulh hi. Nebukhadnezzar in Topa ’ inn-a um-le-beel pawlkhatte zong Babilon ah pua-in Babilon a, a kumpi innah tuate koih hi. Tu-in Jehoiakim’ gamtatna a om laite, leh ama hih kihhuainate, leh amah a hoih lohna a kimute, en in, Israel leh Judah Kumpite’ Laibu sungah kigelh hi; tua ciangin a tapa Jehoiakhin in ama tangin uk hi. Jehoiakhin in uk ding a kipatin kum sawm-le-giat pha a, amah in Jerusalem ah khathum leh nisawm sung uk hi. Amah in Topa ’ muhna ah a sia gamta hi. Tua kum khuakhal sungin Kumpi Nebukhadnezzar in mi sawl in Topa ’ inn a, um-le-beel manphate tawh amah Babilon la sak a, Judah leh Jerusalem tungah Jehoiakhin’ sanggampa Zedekiah kumpi-in koih hi. Zedekiah in uk ding a kipatin kum sawmnih-le-khat pha a, amah in Jerusalem ah kum sawm-le-khat sung uk hi. Amah in Topa a Pasian’ muhna ah a sia gamta hi. Topa ’ kam panin thu a gen kamsang Jeremiah’ mai-ah amah kiniamkhiat lo hi. Pasian tawh a kiciamsak Kumpi Nebukhadnezzar zong amah in lehdo hi; Israel Pasian, Topa ’ kiang zuan kik nuam lo a, zong kisik nuam loin a lung khauhsak hi. A makai siampite leh mi khempeuh zong tua mah bangin citak lo mahmah uh a, minamte’ kihhuainate zui uh hi; amah in Jerusalem ah a siangtho-in a koih Topa ’ inn amaute in ninsak uh hi. A mite leh ama teen’na mun khasiat ahih manin amau’ pute pate’ Pasian, Topa in a kamtaite amaute kiangah sawl teitei hi; ahih hangin a mite tungah Topa ’ hehna a suah ciang dong, a hehna a kidamsak zawh nawn loh ciang dongin amaute in Pasian’ kamtaite zahpihin, a thute simmawhin, a kamsangte thusim lo niloh uh hi. Tua ahih ciangin amah in Khaldea mite’ kumpipa amaute’ lang khatah paipih a, amah in amau’ biakna inn sungah namsau tawh a tangvalte uh that a, tangval ahi a, nungak ahi a, a teek ahi a, a ham ahi zongin khasiat lo hi; amah in a vekpi-in ama khut sungah pia hi. Tua ciangin Topa ’ inn a, um-le-beel khempeuh a lian a neu, leh Topa ’ inn a, vanmanphate leh kumpipa leh a uliante’ vanmanphate khempeuh amah in Babilon ah paipih hi. Tua ciangin amaute in Pasian’ inn halin Jerusalem kulh nusia uh a, a kumpi inn khempeuh mei tawh halin a um-le-beel manpha khempeuh susia uh hi. Amah in namsau panin a suakta mite Babilon ah salin la a, Persia kumpi in a uk hun mateng amah leh a suan leh khakte’ nasem a suak uh hi. Tua sungin Israel leitang in a sabbathte a kicingin na tang hi. Kamsang Jeremiah tung tawnin Topa ’ thugen a tun’ nadingin kum sawmsagih a cin’ nadingin leitang a kinusiat sung khempeuh leitang in sabbath tawlngakna a tang ahi hi. Tu-in Persia kumpipa Sairas’ kum khatna kumin, Jeremiah’ kam pana Topa ’ thugen a tangtun’ theih nadingin, Topa in Persia kumpipa Sairas’ lungsim hanthawn a, amah in a kumpigam sung khempeuh ah taangkona khat bawl a, lai-in zong gelh hi. “Persia kumpipa Sairas in hih bangin ci hi, ‘Vantung Pasian, Topa in leitung kumpi gam khempeuh kei hong pia khin a, Judah gam sung Jerusalem khua ah ama adingin inn khat ka lamsak ding hong sawl hi. Note lakah ama mi ahi khempeuh, Topa a Pasian uh in ompih ta hen. Inn lam dingin Jerusalem ah amaute paito sak un,’ ci hi,” a ci hi. Persia kumpipa Sairas’ kum khatna kumin, Jeremiah’ tung tawnin Topa ’ thugen a tun’ theih nadingin, ama gam sung khempeuh ah tangkona khat bawlin lai-in zong a gelh nadingin Persia kumpipa Sairas’ lungsim ah Topa in suak sak hi. Amah in hih bangin hih hi: “Persia kumpipa Sairas in hih bangin ci hi: Vantung Pasian, Topa in leitung kumpi gam khempeuh keima tungah hong piakhin a, Judah gam sung Jerusalem khua ah ama adingin inn khat ka lamsak ding hong sawl hi. Note’ lakah ama mi peuhmah a Pasian in ompih hen la, Judah gam sung Jerusalem khua-ah paito hen la, Israel Pasian, Topa ’ inn lam kik hen— amah in Jerusalem ah a om Pasian ahi hi; tua ciangin koi lai koi lai muna om hi taleh Judah mi a om lai khempeuh, a omna mun mite in Jerusalem-a om Pasian’ inn adingin ut thu-a piakna a piakte uh banah, ngun leh kham, nate leh ganhingte tawh zong huh uh hen,” a ci hi. Tua ciangin Judah leh Benjamin sunga innkuan lutangte, leh siampite leh Levi mite, Jerusalem khua-a a om Topa ’ inn lamkik dingin a lungsim sung uhah Pasian in a suahsak mite khempeuh kithawi uh hi; tua ciangin a veng a pamte un thatang tawh a huh uh banah ngun tawh kibawl um-le-beel, kham, van tuamtuamte, ganhingte leh letsong manphate tawh huh thuah uh hi. Tua tham loin, Nebukhadnezzar in Jerusalem panin puakhia-in ama pasiante’ inn sungah a koihsa ahi Topa ’ inn-a om ngei um-le-beelte zong kumpipa Sairas in pusuah hi. Persia kumpipa Sairas in hihte pusuahin sumkempa Mithredath’ khut sungah ap hi; tuapa in Judah ukpa Sheshbazzar’ adingin a mal zah simin sazian bawlsak hi. Tua nate a phazah in: kham kuang-uk sawmthum, ngun kuang tulkhat, tem nam tuamtuam sawmnih-le-kua, kham kuang sawmthum, ngun kuang-uk anam tuamtuam zali sawmkhat leh um-le-beel adang tulkhat ahi hi. Kham leh ngun kibawl um-le-beelte khempeuh a vekpi-in tulnga leh zali pha hi; tua hi a, Babilon panin salte a kiciahpih kik ciangin Sheshbazzar in tua nate khempeuh Jerusalem ah ciahpih hi. Babilon kumpipa Nebukhadnezzar in a zawhna gam panin Babilon ah sal-in a lakte sung panin hih mite Jerusalem leh Judah ah a ciahkikte hi a, amau’ khua ciatah a ciah uh hi. Zerubbabel, Jeshua, Nehemiah, Seraiah, Re-elaiah, Mordekai, Bilshan, Mispar, Bigvai, Rehum leh Baanahte makai-in tua mite ciahpih uh hi. Israel mi phazahte in: Parosh suante tulnih zakhat leh sawmsagih-le-nih ahi hi. Shefatiah suante zathum leh sawmsagih-le-nih ahi hi. Arah suante zasagih leh sawmsagih-le-nga ahi hi. Pahathmoabte beh sung panin Jeshua leh Joab suante tulnih zagiat leh sawm-le-nih ahi hi. Elam suante tulkhat zanih leh sawmnga-le-li ahi hi. Zattu suante zakua leh sawmnga-le-nga ahi hi. Zakkai suante zasagih leh sawmguk ahi hi. Bani suante zaguk leh sawmli-le-nih ahi hi. Bebai suante zaguk leh sawmnih-le-thum ahi hi. Azgad suante tulkhat zanih leh sawmnih-le-nih ahi hi. Adonikam suante zaguk leh sawmguk-le-guk ahi hi. Bigvai suante tulnih leh sawmnga-le-guk ahi hi. Adin suante zali leh sawmnga-le-li ahi hi. Ater a kici Hezekiah suante sawmkua-le-giat ahi hi. Bezai suante zathum leh sawmnih-le-thum ahi hi. Jorah suante zakhat leh sawm-le-nih ahi hi. Hashum suante zanih leh sawmnih-le-thum ahi hi. Gibbar suante sawmkua-le-nga ahi hi. Bethlehem khuami zakhat leh sawmnih-le-thum ahi hi. Netofah khuami sawmnga-le-guk ahi hi. Anathoth khuami zakhat leh sawmnih-le-giat ahi hi. Beth-azmaveth khuami sawmli-le-nih ahi hi. Kiriath-Jearim khua, Khefirah khua, leh Be-eroth khuami zasagih leh sawmli-le-thum ahi hi. Ramah khua leh Geba khuami zaguk leh sawmnih-le-khat ahi hi. Mikmas khuami zakhat leh sawmnih-le-nih ahi hi. Beth-el khua leh Ai khuami zanih leh sawmnih-le-thum ahi hi. Nebo khuami sawmnga-le-nih ahi hi. Magbish khuami zakhat leh sawmnga-le-guk ahi hi. Elam adang khat suante tulkhat zanih leh sawmnga-le-li ahi hi. Harim suante zathum leh sawmnih ahi hi. Lod khua, Hadid khua leh Ono khuami zasagih leh sawmnih-le-nga ahi hi. Jerikho khuami zathum leh sawmli-le-nga ahi hi. Sena-ah gam mi tulthum zaguk leh sawmthum ahi uh hi. Siampite sung panin: Jeshua-te beh panin Jedaiah suante zakua leh sawmsagih-le-thum ahi hi. Immer suante tulkhat leh sawmnga-le-nih ahi hi. Pashhur suante tulkhat zanih leh sawmli-le-sagih ahi hi. Harim suante tulkhat leh sawm-le-sagih ahi uh hi. Levi mite sung panin: Hodaviahte beh panin Jeshua suante leh Kadmiel suante sawmsagih-le-li ahi uh hi. Lasate sung panin: Asaf suante zakhat leh sawmnih-le-giat ahi uh hi. Kongcingte nam sung panin: Shallum suante, After suante, Talmon suante, Akkub suante, Hatita suante, leh Shobai suante, a vekpi-in za khat leh sawmthum-le-kua ahi uh hi. Biakinn nasemte sung panin: Ziha suante, Hasufa suante, Tabbaoth suante, Keros suante, Siaha suante, Padon suante, Lebanah suante, Hagabah suante, Akkub suante, Hagab suante, Shamlai suante, Hanan suante, Giddel suante, Gahar suante, Reaiah suante, Rezin suante, Nekoda suante, Gazzan suante, Uzza suante, Paseah suante, Besai suante, Asnah suante, Meunim suante, Nefisim suante, Bakbuk suante, Hakufa suante, Harhur suante, Bazluth suante, Mehida suante, Harsha suante, Barkos suante, Sisera suante, Temah suante, Neziah suante, leh Hatifa suante ahi uh hi. Solomon’ nasemte nam sung panin: Sotai suante, Hassofereth suante, Peruda suante, Ja-alah suante, Darkon suante, Giddel suante, Shefatiah suante, Hattil suante, Pokereth-hazzebaim suante, leh Ami suante ahi uh hi. Biakinn nasemte khempeuh leh Solomon’ nasemte’ suan-le-khakte khempeuh a vekpi-in zathum leh sawmkua-le-nih pha uh hi. Telmelah, Telharsha, Kherub, Addan, leh Immer khuate panin a hong ciahkik, Israel mi hi napi-in amau’ beh leh phung a kan thei lo mite in: Delaiah suante, Tobiah suante, leh Nekoda suante, mi zaguk leh sawmnga-le-nih ahi uh hi. Siampite sung panin zong: Habaiah suante, Hakkoz suante, leh Barzillai suante (amah in Gilead mi Barzillai’ tanute khat ten’pihin tua min tawh a kilo pah) ahi uh hi. Hih mite in khang kiciamtehna ah amau’ min a zon’ uh hangin amau’ min na om lo ahih manin amaute a siang loin seh uh a, siampi nasep sem sak thei lo uh hi; Urim leh Thummin aisanna tawh ai a san ding siampi khat a om mateng amaute in biakna an siangpente a nek loh nading uh gam ukpa in gen hi. Mi a vekpi-in tulsawmli leh tulnih leh zathum leh sawmguk pha uh a, amaute’ nasem numei leh pasal mihing tulsagih zathum leh sawmthum-le-sagihte kisim lo hi; amaute in lasa numei leh pasal mihing zanih nei uh hi. Amau’ sakolte zasagih leh sawmthum-le-guk, amau’ la-sakol zanih leh sawmli-le-nga, amau’ kalaoh zali leh sawmthum-le-nga, leh a la uh tulguk zasagih leh sawmnih pha hi. Amaute Jerusalem-a Topa ’ inn a tun’ uh ciangin Pasian’ inn ama mun ngei-ah lamkik nadingin innkuan lutangte pawlkhat in Pasian’ inn adingin piakna bawl uh hi; amaute in ahih zawhna zah uh tawh kizui-in tua nasep nadingin vanmanpha koihna ah kham darik tulsawmguk leh tulkhat, ngun mina tulnga, leh siampi puan zakhat pia uh hi. Siampite, Levi mite, leh mi pawlkhatte Jerusalem leh a kim nai-ah teeng uh hi; lasate, kongcingte, biakinn nasemte, leh Israel khempeuh amau’ khuapi ciatah teeng uh hi. A kha sagihna hong cin’ ciangin Israel mite amau’ khuapi ciatah teeng khin uh ahih manin, khe khat khai bangin Jerusalem ah amaute hong kituah diam uh hi. Tua ciangin Jozadak’ tapa Jeshua leh a siampi pihte, leh Shealtiel’ tapa Zerubbabel leh a behte hong kipan uh a, Pasian’ mi Moses’ thukham sungah a kigelh bangin meihal biaknate piak nadingin Israel Pasian’ biakna tau bawl uh hi. Amaute in tua gama midang teengte kihta uh ahih manin a mun lui mah-ah biakna tau phut pahin zing leh nitak simin Topa tungah meihal biakna pia uh hi. Tua ciangin amaute in a kikipsaksa bangin buk pawi bawl uh a, ni simin zat dingin a kisehsa zah bangin meihal biakna ni simin pia uh hi; tua ciangin hihte banah a tawntunga meihal biakna, khadet sim-a biakna leh Topa ’ pawi a kisehsa hun khempeuh leh Topa ’ tungah amau’ ut thu tawh a pia mite khempeuh’ piaknate zong pia uh hi. Topa’ biakinn a bulpi a kiphuh nai loh hangin a kha sagihna a ni masa ni-a kipanin amaute in Topa tungah meihal biaknate piak ding kipan uh hi. Tua hi a, amaute in suangseekte leh khutsiamte tungah sum pia uh a, Persia kumpipa Sairas’ tung panin a thu ngahna bangun Lebanon mualtung gam panin tuipi gei Joppa khua ah taamtaak singte a hong puaksuk ding Sidon khuamite leh Tai-ar khuamite tungah zong annek tuidawn leh sathau a pia uh hi. Amaute, Jerusalem a, Pasian’ innah hong ciahkik uh a kum nihna, tua kum a kha nihna sungin Shealtiel’ tapa Zerubbabel leh Jozadak’ tapa Jeshua in nasep kipan uh a, ama Israel mipihte, siampite leh Levi mite leh salsuahna panin Jerusalem ah a hong ciahkik mite khempeuh in huh uh hi. Amaute in Levi mite kum sawmnih panin a tungsiah peuhmah Topa ’ inn sungah biakna nasepte a vaan dingin seh uh hi. Jeshua a tapate leh a behte tawh, Kadmiel, Binnui, leh Hodaviahte in Henadad’ tapate leh Levi mi a tapate uh leh a behte uh tawh Pasian’ innah nasemte tungah ukna tavuan la khawm uh hi. Innlamte in Topa ’ biakinn a bul a phuh uh ciangin, Israel kumpipa David in a geel kholhsa bangin Topa a phat dingin siampite in a puan uh silhin peengkul tawh, Asaf tapa Levi mite in daltuah tawh a panmun ding uhah hong pang uh hi; tua ciangin amaute in Topa phatna leh lungdam kohna a kidawngin sa uh a, “ Topa tungah lungdam koh ding hoih hi, bang hang hiam cih leh Israelte hong itna kip tawntung hi,” a ci uh hi. Topa ’ inn bulpi kiphut khin ahih manin mi khempeuh in nakpi takin Topa phat uh hi. Mi dang tampi in a aw neih zah-un lungdamin a kiko uh hangin a inn masa a mu ngeisa siampite leh Levi mite leh innkuan lutang, midang tampite in hih inn bulpi a kiphuh a muh uh ciangin kap-in thuum uh hi. Mite nakpi takin kiko ahih manin lungdamna awging leh kahna leh thuumna awgingte mite in khen thei lo uh hi; gamlapi pek panin tua awging kiza hi. Salsuahna panin a hong ciahkik mite in Israel Pasian Topa adingin biakinn khat a lamna thu Judah leh Benjamin mite’ galte in a zak uh ciangin, Zerubbabel leh Jeshua leh innkuan lutangte kiangah va pai uh a, amaute kiangah, “Inn lamna ah ko zong hong kihel sak un; bang hang hiam cih leh note mah bangin ko zong na Pasian uh ka bia uh a, hih lai-ah kote hong koih Assiria kumpipa Esarhaddon’ hun lai-a kipanin note’ Pasian tungah biakna ka pia uh hi,” a ci uh hi. Ahih hangin Zerubbabel, Jeshua leh Israel sunga innkuan lutang a om laite in amaute kiangah, “Kote’ Pasian’ adingin ka lam uh inn in note hong lunghihmawhpih ding hi lo hi. Persia kumpipa Sairas in kote hong thupiaksa bangin Israel Pasian, Topa adingin ko teng bek mah in ka lam ding uh hi,” a ci uh hi. Tua ciangin tua gam a, midang teengte in Judah mite lungkia sakin inn a lam lai ding uh lausak uh hi; amau’ ngimna a tangtun’ theih loh nadingin amaute a langpang dingin zum nasemte golhguk pia uh hi. Persia kumpipa Sairas’ uk huna kipan kumpi Darias hun dong hih bangin hih ngitnget uh hi. Ahasu-eras in uk ding hong kipat ciangin Judah gam leh Jerusalem a, teengte’ khiatna thu tua gam a, a na teengsate in lai-in gelh uh hi. Tua ciangin Persia kumpi Artakzaksis hun ciangin Mithredath, Tabeel leh a lawmte uh thukimna tawh kumpipa tungah laigelh uh a, a lai pen Aram lai-in kigelh a, Aram pau mahin kisim khia hi. Menzipipa Rehum leh lai-atpa Shimshai in Kumpi Artakzaksis tungah Jerusalem tawh kisai thu anuai-a bangin gelh uh hi: Menzipipa Rehum, lai-at Shimshai, leh a lawmte khempeuh, thukhente, mangpite, thuvante, uliante, Erek khuami leh Babilon khuami, Susa khua-a om Elam mite, leh a lian a minthang Ashurbanipal in hong puakkhia-in Samaria khuapi ah hong ten’sak mite leh Eufrates gun lang khat a kizawhna gam sunga om mite tung panin lai puak, ci uh hi. A lai sung thu hih anuai-a bang ahi hi: “Artakzaksis kumpipa tungah, Eufrates Gungal gam-a om na nasemte in hopihna kam kong puak uh hi: Nangma kiang panin ko kiangah a hong pai Judah mite, Jerusalem ah tu-in tung khin uh a, a gilo, mi lehdo thei ahi khuapi pen amaute in lamkikin, amaute in a khua bulpi vel khinin kulhpi cian’ a kipat khitna thu thei in. Amau’ khuapi kilam kikin kulhte kizo leh amaute in siah ahi a, mangmu ahi a, lo sapna ahi zongin hong pia nawn lo ding uh a, a tawpna-ah kumpipa hong sukkhak ding thu thei in. Hih khuapi kilam kikna a kulhte kizo khin leh Eufrates gungal gam na uk nawn loh nading thu, nangma tungah kong theikhol sak uh hi,” a ci uh hi. Tua ciangin kumpipa in hih bangin a lai uh thuk hi: “Menzipipa Rehum, lai-atpa Shimshai, leh Samaria leh Eufrates gungal gam sunga om na lawmte khempeuh uh tungah hopihna lai kong khak hi. Keima tungah nong khak uh lai pen a kitel takin keima zakna-ah hong kisim khin hi. Keimah in hih thu a kikan nading thu ka pia a, tu-in kikan khin ta hi. Tang lai-a kipanin hih khuapi in kumpite langah pangin, hih khua sungah lehdona leh kumpi dona a om ngitngetna thu kimukhia hi. A vanglian kumpite in Jerusalem ah uk ngei-in, Eufrates Gungal gam bup tungah aana zang uh a, siah leh mangmu leh losapte tua kumpite tungah kipia hi. Tua ahih ciangin hih mite in nasep a khawl nading uh thupia in. Keimah in thu kong piakkik mateng hih khuapi kilamkik lo ding hi. Hih thu tawh kisai-ah na sep ding don loin ommawk kei in; tua hi kei leh kumpi tungah siatna leh gimna hong khang ding hi,” a ci hi. Menzipipa Rehum, lai-at Shimshai, leh amau’ lawmte’ zakna ah kumpi Artakzaksis tung panin a kingah lai a kisim ciangin, Jerusalem ah amaute pai pahin Judah mite a nasep uh zawhthawh thu tawh khawlsak uh hi. Tua huna kipanin Jerusalem a, om Pasian’ inn a kisepna khawl hi; Persia kumpi Darias’ uk a kum nihna dong tua bangin khawlcip phot hi. Tu-in kamsangte Haggai leh Iddo’ suan Zekhariah in Judah gam leh Jerusalem a, om Judah mite hanthawnin, Israel Pasian’ min tawh thu genkhol uh hi. Tua ciangin Shealtiel’ tapa Zerubbabel leh Jozadak’ tapa Jeshua in Jerusalem a, Pasian’ inn lamkik ding kipan pah uh a, Pasian’ kamsangte in amaute ompihin huh uh hi. Tua lai takin Eufrates Gungal gam sung teng a uk sawn Tattenai, Shetharbozenai, leh amau’ lawmte hong pai pahin amaute kiangah, “Note in hih inn lamkikin a nate na bawl nading uh kua in thu hong pia ahi hiam?” a ci uh hi. Hih inn lam nasepna-ah a sem mite’ min zong amaute in dong uh hi. Ahi zongin Judah upate in Pasian’ vilna sungah nasem hi uh a, Darias’ kiangah a thu va tungin ama tung panin thu a kingah kik hun dong a nasep zomna uh kikhaktan lo hi. Eufrates gungal gam a uk sawn Tattenai, Shetharbozenai, leh Eufrates gungal gam sung thu a vaan ama lawmte in kumpi Darias’ tungah laikhak uh hi. Amaute in thuzaksakna lai hih bangin a gelh uh hi: “Kumpi Darias tungah thupha namcin hong tung ta hen. Judah gam, alian Pasian’ innah ka va paina uh kong theisak uh hi. Tua inn pen suang lianpite tawh kilamin a kawmte sing tawh kibawl hi; hih inn lim takin kisemin amau’ makaihna tawh a nasep uh telh mahmah uh hi. Hih inn a lamkik nading leh a nate a zawh nadingin kua in thupia hiam? cih thu hih upate tungah ka dong uh hi. Nangmah in a makai teng na theih nadingin amaute’ min zong ka dong uh hi. Amaute in hih bangin hong dawng uh hi: ‘Kote in vantung leh leitung Pasian’ nasemte ka hi uh a, kum tampi lai-a a kilamsa inn a lamkik ka hi uh hi; a lian Israel kumpi khat in lamin a zawhsa ahi hi. Ahi zongin ka pu ka pate un vantung Pasian hehsak kha uh ahih manin Babilon kumpipa, Khaldea mi Nebukhadnezzar’ khut sungah amaute pia hi; tua kumpipa in hih inn susia a, a mite Babilon ah ciahpih hi. Ahi zongin Babilon kumpipa Sairas’ uk a kum khatna kumin hih Pasian’ inn a kilamkikna ding amah in thupia hi. Tua tham loin Jerusalem a, biakinn sung panin Nebukhadnezzar in la-in Babilon biakinn sunga a koih ahi Pasian’ inn sunga kham leh ngun tawh kibawl um-le-beelte zong kumpipa Sairas in Babilon biakinn panin la khia-in gam uk a, a hong koih Sheshbazzar min neipa tungah ap hi; kumpipa in ama tungah, “Hih um-le-beelte paipih in la, Jerusalem a, biakinn ah va koihkik in; tua lai-a Pasian’ inn pen a mun ngei mah ah lamkik sak in,” ci hi. Tua ciangin Sheshbazzar hong pai-in Jerusalem a, Pasian’ inn a bulpi hong phut hi; tua huna kipanin tu dong inn lamkik kisem suak a, ahi zongin kizo nai lo hi,’ a ci uh hi. Tua ahih ciangin hoih na sak leh, Jerusalem a, hih Pasian’ inn a kilamkik nading thu kumpipa Sairas in thupia taktak hiam, pia taktak lo hiam cih a kitheih nadingin Babilon khua sunga om laibu koihna inn sung zong sak in. Tua khit ciangin kumpipa in na deihna hong zasak in,” a ci uh hi. Tua ciangin Kumpipa Darias in thupia a, Babilon khua sunga lai manphate a kisen’na innte sung kizong hi. Ahi zongin Babilon khua sungah na om lo a, Media gam sung kumpi khuapi Ekbatana-ah laizial khat kimu a, tua sungah hih anuai-a bangin a kiciamteh kimu hi: “Kumpi Sairas’ kum khatna kumin Jerusalem khua a, Pasian’ inn tawh kisai-in kumpipa in hih thu pia hi: Biakna kipia-in meihal biakna a kipaipihna munah inn lamsak kik un; a mai panin a san’na tong sawmguk, a vai tong sawmguk mah hi ding a, a kawm pen suang thuap thum leh sing thuap khat tawh a kibawl thuap li hi ding hi; hih sum beinate ahih leh kumpi sum panin kipia ding hi. Nebukhadnezzar in Jerusalem biakinn panin la khia-in Babilon ah a hong tun’pih Pasian’ inn sunga om kham leh ngun tawh kibawl um-le-beelte zong kipia kik ding hi; tuate khempeuh Jerusalem biakinn ah kipuak kik ding a, Pasian’ inn sunga a omna mun mun ciatah kikoih kik ding hi,” ci-in kigelh hi. Tua ciangin kumpi Darias in hih bangin thupia hi: “Tu-in, Eufrates Gungal gam a uk Tattenai, Shetharbozenai, leh Eufrates Gungal gam sung a vaan na lawmte, tua mun panin na kihemkhia ding uh hi; Judah mi a ukpa leh a upate in hih Pasian’ inn a lamkik theih nadingun na tua ci omsak ding uh hi; ama mun ngei mah ah a inn lamsak kik un. Hih a kigen Pasian’ inn a kilam kik theih nadingin hih Judah upate’ adingin na hih dingte uh zong thu kong pia hi. Hih nasepna a mawk khawl loh nadingin, Eufrates gungal gam sung panin a kingah siahte ahi kumpi sum sung panin beina khempeuh a cingin kipia ding hi. Vantung Pasian’ tungah meihal biakna-in piak dingin a kisam khempeuh— bawngtalnote, tuutalte, ahih kei leh tuunote na pia ding uh a, Jerusalem-a siampite’ hong ngetna bangin mangbuh, ci, leenggahzu, ahih kei leh sathaute, kitasam loin ni simin amaute tungah pia sak un. Tua hi leh amaute in vantung Pasian’ tungah a namtui biaknate pia-in kumpipa leh a tapate’ nuntak nading thu hong ngetsak thei ding uh hi. Tua tham loin, mi khatpeuh in hih thupiakna a siatsak leh ama inn panin a innkam khat kidawh khiatsakin tua tungah amah kihen cipin kisat gawp ding a, tua banah a inn zong a kisuksiat nading thu kong pia thuah lai hi. Hih ka thupiakna a siasak nuam, Jerusalem a, Pasian’ inn a susia nuam kumpi khatpeuh ahi a, mi khatpeuh ahi zongin a om leh, ama min om nading a, tua mun a bawl Pasian in tua mipa lawnthal ta hen. Keimah Darias in thu kong pia hi; ka thupiak bang tektekin sep ding ahi hi,” a ci hi. Tua ciangin kumpi Darias in amaute tungah a thupiak bang tektekin Eufrates gungal gam sung a uk sawn Tattenai, Shetharbozenai, leh a lawmte in sem uh hi. Tua hi a, kamsang Haggai leh Iddo’ suan Zekhariah’ thugenkholhna hangin Judah upate in a inn lam uh zom suakin mavang uh hi. Israel Pasian’ sawlna leh Persia kumpi Sairas leh Darias leh Artakzaksis-te’ thupiakna tawh amaute in a inn lam uh a zo uh hi; tua hi a, kumpi Darias’ kum gukna, Adar kha a ni sawmnih-le-thum ni-in a inn kizo hi. Tua ciangin Israel mite, siampite leh Levi mite leh sal a suaksa hong ciahkik mi khempeuh in lungdamna lianpi tawh Pasian’ inn apna bawl uh hi. Amaute in Pasian’ inn apna-in bawngtal zakhat, tuutal zanih, leh tuuno zali go uh a, mawhna hanga biak nadingin Israelte khempeuh adingin a minam phazah tawh kizui-in keeltal sawm-le-nih pia uh hi. Tua ciangin Moses laibu sungah a kigelh bangin Jerusalem a, Pasian’ nasep nadingin siampite amau’ panmun ngei-ah pangsak uh a, Levi mite amau nasepna ngei-ah sem sak kik uh hi. A kha masa a ni sawm-le-li ni-in sal a suaksa hong ciahkik mite in Paisan Pawi bawl uh hi. Siampite leh Levi mite a vekpi-un kisian’suah khin uh a, a vekpi-un zehsiang khin uh hi; tua hi a, amaute in sal suaksa a hong ciahkik khempeuh ading, a siampi pihte uh leh amau mahmah adingin Paisan tuuno go uh hi. Salsuahna panin a hong ciahkik Israelte leh Israel Pasian, Topa bia dingin tua gam-a midang teengte leh a nitna uh pan amau leh amau a kihemkhia tawm mite khempeuh in tua Paisan Pawi an ne uh hi. Tua hi a, amaute in lungdamna tawh ni sagih sung silngo sawhloh anlum pawi bawl uh hi; bang hang hiam cih leh amau’ lungdam nading a om theih nadingin Topa in Assiria kumpipa’ lungsim amau tungah a nuam dingin bawlsak a, tua ahih manin Israel Pasian ahi Pasian’ inn a sepna uhah kumpipa in amaute huh hi. Hih thu teng khit ciangin Persia kumpipa Artakzaksis uk hun sungin Ezra, a pa Seraiah, a pa Azariah, a pa Hilkiah, a pa Shallum, a pa Zadok, a pa Ahitub, a pa Amariah, a pa Azariah, a pa Meraioth, a pa Zerahiah, a pa Uzzi, a pa Bukki, a pa Abishua, a pa Finehas, a pa Elazar, a pa, siampi lian Aaron— hih Ezra pen Babilon panin hong paito hi. Amah pen Israel Pasian, Topa in a piak Moses thukham a siam lai thei mi khat ahi hi; Topa ahi ama Pasian in ompih ahih manin ama nget khempeuh kumpipa in pia hi. Kumpi Artakzaksis in a uk a kum sagihna kumin Israel mite, siampite, Levi mite, lasate, kongcingte, leh biakinn nasemte pawlkhat zong, Jerusalem ah Ezra tawh paito uh hi. Kumpipa’ uk kum sagih a cin’ kum, a kha ngana sungin Jerusalem tung uh hi; a kha masa a ni khat ni-in Babilon panin dingkhia dingin Ezra in a ni sehkhol a, a kha ngana a ni khat ni-in Jerusalem tung uh hi; bang hang hiam cih leh Pasian in amah ompih hi. Bang hang hiam cih leh Ezra in Topa ’ thukham a sin ding, a zui ding, leh Israel mite a hilh dingin amah kipia hi. Kumpi Artakzaksis in siampi ahi, lai theipa lah ahi, Israelte’ adingin Topa ’ thupiaknate leh thukhamte a siam Ezra tungah a piak lai in hih bang ahi hi: “Kumpite’ kumpi ahi Artakzaksis kiang panin vantung Pasian’ thukham a siam, siampi hi-in lai theipa lah ahi Ezra tungah: Ka lungsim khentatna in hih bang ahi hi. Ka gam sunga om Israel mi khatpeuh ahi a, a siampite ahi uh a, Levi mite ahi zongin, Jerusalem ah a painuam khempeuh in nang hong zuih theih nadingun thu ka pia hi. Nang tungah hong kipia ahi na Pasian’ thukham tawh kisai-in Judah leh Jerusalem ah thu bangci om hiam cih a va thei dingin kumpipa keimah leh thu hong lamlak mihing sagihte in kong sawl uh hi. Kumpipa leh a thu lamlakte in lungkim takin Jerusalem ah a teeng Israel Pasian tungah a piak ngun leh khamte zong, Babilon gam sunga na muh uh ngun leh khamte, leh Jerusalem a, note’ Pasian’ inn dingin mite leh siampite in lungkim takin a piakkhiat zuahzuahte uh tawh a va puakkhawm ding na hi hi. Hih ka thupiakna tawh kizui-in hih sumte pen Jerusalem a, note’ Pasian inn-a biakna tau tungah piak dingin bawngtalte, tuutalte, tuunote, leh a an tawh biaknate leh a leenggahzu tawh biak nadingte lei nading bekin na zang ding uh hi. Tua banah ngun leh kham a val a om lai leh, note’ Pasian’ deihna tawh kituakin hoih na sak bangun na lawmte tawh na zang thei ding uh hi. Na Pasian’ inn ah zat dingin hong kipia um-le-beelte pen Jerusalem Pasian tungah na va pia ding hi. Na Pasian’ inn adingin a kisam, na piak ding a phamawh a om khak zenzen leh kumpipa’ sum sung panin na zang thei ding hi. “Tua hi a, kumpipa keimah Artakzaksis in Eufrates gungal gam sunga kumpi vankemte khempeuh tungah hih bangin thu ka pia hi: Vantung Pasian’ thukham a siam lai a thei, siampi Ezra in note tung panin a kisapna hong nget ciangin, ngun talen zakhat, mangbuh seu zakhat, leenggahzu tambong zanih, sathau tambong zanih ciang, leh ci a deih zahzah na pia ding uh hi. Vantung Pasian in a deih peuhpeuh, vantung Pasian’ inn adingin lim takin hih un; tua hi kei leh kumpipa’ tapate leh kumpigam tungah amah hong heh kha ding hi. Siampite, Levi mite, lasate, kongcingte, biakinn nasemte, ahih kei leh hih Pasian’ inn-a nasemte khat peuhpeuh tung panin siah ahi a, mangmu ahi a, lo sap ahi zongin lak nading thu na neih lohna uh zong kong zasak uh hi, ka ci hi. “Tua hi a, nang Ezra in nang tungah hong kipia na Pasian’ pilna tawh kizui-in Eufrates Gungal gam sunga mite thu a khen dingin na Pasian’ thukham a thei mite seh in; nang leh amaute in na Pasian’ thukham a thei lote na hilh ding uh hi. Na Pasian’ thukham leh kumpipa’ thukham a mang lo peuhmah, sihna ahi a, hawlkhiatna ahi a, neihsa matna ahi a, thongkiatna ahi zongin, a ngah ding a kilawm thukhenna tawh khauh takin dan kitat ding hi,” a ci hi. Kumpi Artakzaksis’ uk hun sungin Babilon panin kei tawh hong ciahto khawm a behbeh-in a kiciamteh beh lutangte in: Finehas-te panin Gershom ahi hi. Ithamar-te beh panin Daniel ahi hi. David-te beh panin Shekaniah’ tapa Hattush ahi hi. Parosh-te beh sung panin Zekhariah hi a, amah tawh pasal zakhat leh sawmnga kiciamteh hi. Pahathmoab-te beh panin Zerahiah’ tapa Elieho-enai hi a, pasal zanih tawh ahi hi. Zattu-te beh panin Zahaziel’ tapa Shekaniah hi a, pasal zathum tawh ahi hi. Adin-te beh panin Jonathan’ tapa Ebed hi a, pasal sawmnga tawh ahi hi. Elam-te beh panin Athaliah’ tapa Isaiah hi a, pasal sawmsagih tawh ahi hi. Shefatiah-te beh panin Mikhael’ tapa Zebadiah hi a, pasal sawmgiat tawh ahi hi. Joab-te beh panin Jehiel’ tapa Obadiah hi a, pasal zanih leh sawm-le-giat tawh ahi hi. Bani-te beh panin Josifiah’ tapa Shelomith hi a, pasal zakhat leh sawmguk tawh ahi hi. Bebai-te beh panin Bebai’ tapa Zekhariah hi a, pasal sawmnih-le-giat tawh ahi hi. Azgad-te beh panin Hakkatan’ tapa Johanan hi a, pasal zakhat leh sawmkhat tawh ahi hi. A nunung penin Adonikam-te beh pan hi a, amaute’ min in: Elifelet, Jeiel, leh Shemaiah hi uh a, pasal sawmguk tawh ahi uh hi. Bigvai-te beh panin Uthai leh Zabbud hi uh a, pasal sawmsagih tawh ahi uh hi. Ahava gam lamah lui gei khatah amaute ka khawm a, tua lai-ah ni thum ka taam uh hi. Mite leh siampite ka etphat ciangin Levi mite khat zong na om lo hi. Tua ahih ciangin a lawmte lakah a makai Eliezer, Ariel, Shemaiah, Elnathan, Jarib, Elnathan, Nathan, Zekhariah, leh Meshullamte, leh thu ngaihsut a siam Jo-i-arib leh Elnathante ka sam a, Kasifia mun a, a makaipipa Iddo kiangah va pai-in, tua lai-a biakinn nasem amah leh a behte in, eite’ Pasian’ inn-a na a sem ding mihing hong puak ding uh a ngen dingin ka sawl hi. Tua hi a, hehpihna a nei eite’ Pasian in hong ompih ahih manin Levi mi Mahli-te beh sung panin thu ngaihsut siam mi ahi Sherebiah, a tapate leh a behte tawh pasal sawm-le-giat, leh Merari-te beh panin Isaiah, a behte leh amau’ tapate mi sawmnih leh Hashabiah tawh, leh Levi mite’ na a sem dingin David leh a uliante in a tuamkoih ahi biakinn nasem zanih leh sawmnih hong pia hi. Hih mite khempeuh amau’ min ciat tawh a kisam ahi hi. Tua ciangin eite’ Pasian’ mai-ah kote kiniamkhiat thei-in kote leh ka naupangte uh leh ka neihsa khempeuh uh nuam takin ka khualzinna uhah ka pai theih nading uh Pasian’ tung pan ka nget theih nadingun Ahava lui-ah antan’ nading thu ka taangko hi. Bang hang hiam cih leh kumpipa kiangah, “Ka Pasian un amah a zong mite khempeuh ompihin amau’ adingin a hoih na sem a, amah a nusiate khempeuh tungah amah heh hi,” ci-in gen khin ka hih manun lampi-ah kote hong kha dingin galkapte leh sakol tung tuangte kumpipa kiangah ka nget ding ka maizum hi. Tua hi a, kote in an ka tang uh hi; nuamtak-a ka khualzin theih nading uh i Pasian tungah ka ngen uh a, amah in ka thungetna uh hong pia hi. Tua ciangin siampi liante sung panin, mi sawm-le-nih, leh Sherebiah, Hashabiah, leh amau’ behte mi sawm, ka tuam koih hi. Tua ciangin, i Pasian’ inn nasep nadingin kumpipa leh a thulamlakte leh a uliante leh tua lai-a om Israel mi khempeuh in a tuam khenkhiat uh ngun leh kham leh um-le-beelte, amaute tungah ka ap hi. Amaute tungah ngun talen zaguk leh sawmnga, talen nih a gik ngun tawh kibawl um-le-beel zakhat, kham talen zakhat, kham darik tulkhat a man tawh kibawl kuang-uk sawmnih, leh kham zah-a a manpha sumsan hoih tawh a kibawl beel nih ka pia hi. Tua ciangin amaute kiangah, “ Topa tungah note hong ki-ap hi; um-le-beelte zong biakna vante ahi hi; ngun leh khamte ahih leh na pu na pate uh Pasian ahi Topa tungah citna tawh a kipia na ahi hi. Siampi liante leh Levi mite leh Israel mi leh lutangte’ muh-in Jerusalem khua a, Topa ’ inndei sungah na piak dong mateng uh vilin kem un,” ka ci hi. Tua ahih manin siampite leh Levi mite in Jerusalem a, i Pasian’ inn ah puak dingin ngun leh kham leh um-le-beelte hong sang uh hi. Tua ciangin Jerusalem zuan dingin kha masa a ni sawm-le-nih ni-in Ahava lui panin ka dingkhia uh hi; i Pasian in eite hong ompih ahih manin lam kal-ah galte leh pan’simna a tuamtuamte tawh hong kipelhsak hi. Jerusalem khua ka tun’ uh ciangin ni thum sung ka tawlnga uh hi. A ni li ni-in Uriah’ tapa siampi Meremoth’ tavuan lakna tawh i Pasian’ inn sungah ngun leh kham leh um-le-beelte kiseng hi; Finehas’ tapa Eleazar in amah huh a, Levi mi Jeshua’ tapa Jozabad leh Binnui’ tapa Noadiah in amau tegel huh uh hi. Vante a ki-ap ciangin lim takin kivel a, a ki-ap na khempeuh ciamtehna lai khat kibawl hi. Tua ciangin salsuahna panin inn hong zuankik mite in Israelte khempeuh’ adingin Israel Pasian’ tungah meihal biakna-in bawngtal sawm-le-nih, tuutal sawmkua-le-guk, tuuno sawmsagih-le-sagih, leh mawhna hanga biakna-in keeltal sawm-le-nih pia uh hi; hihte khempeuh pen Topa tungah meihal biakna ahi hi. Amaute in, Eufrates Gungal gam sung tenga kumpipa’ nuai-ah a uk sawn a lianpente leh uliante tungah kumpipa’ thupiaknate zong va gen uh hi; tua hi a, amaute in mite leh Pasian’ innlam nasep huh uh hi. Hih thute khempeuh a kisep khit ciangin keima kiangah makaite pawlkhat hong pai-in, “Hih gam-a teeng gamdang mite’ nitna leh Kanaan mite, Hit mite, Perez mite, Jebus mite, Ammon mite, Moab mite, Izipt mite, leh Amor mite’ gamtat a kihhuaite panin Israel mi, siampite leh Levi mite nangawn zong, a siangtho-in tuam om lo uh hi. Amaute leh a tapate un hih gam-a teeng mi namdangte’numeite ten’pih uh a, tua thu hangin a siangtho minam pen tu-in gamdang mite tawh a kihel suak ta hi. Tua hi a, hih thu-ah makaite leh thukhen uliante pen a khial masa ahi uh hi,” hong ci uh hi. Hih thu ka zak ciangin dah mahmahin ka puante balkekin, ka sam leh ka khamul botin, cih nading thei loin ka om hi. Tua ciangin sal a suak hih mite’ cihtaklohna hangin Israel Pasian’ dantah ding lau-in a liing mite khempeuh keima kiangah hong kikhawm uh a, nitak biakpiak hun dong cih nading thei loin ka om hi. Tua hi a, nitak biakpiak hun ciangin khua phawk kikin ka puan keekpi mah silh kawmin khukdin’in Topa ka Pasian’ lamah ka khut zaakin, “Ka Pasian aw, ka mawhnate un ka lu dawn uh hong vuknelhin vantung dong banto ahih manin nangma lam kong et ding maizumin ka mai san hi, ka Pasian aw. Ka pu ka pate uh huna kipanin tu hun dong mawhna lianpi ka nei uh hi. Tua thu hangin ka kumpite uh leh ka siampite un gamdang kumpite khut sungah sihna, salsuahna, neihsa kisuhna, leh maizumna thuak uh a, tu hunin zong tua bangmah ka thuak uh hi. Ahi zongin tu-in Topa ka Pasian un tomkha sung kote hong hehpih a, a suakta pawlkhat hong omsakin ama mun siangtho ah siksan ding mun hong pia hi. Amah in ka mit uh hong vaak sak kikin ka salsuahna uhah ka nuntakna uh ka thak pat theih nading uh kalsuan cilna hong pia hi. Kote in sal ka hi takpi uh hi; ahi zongin ka salsuahna uhah ka Pasian un hong nusia lo a, kote’ Pasian’ inn puahkikin ka din’sakkik theih nading uh leh Judah leh Jerusalem ah kidalna kulh ka neih theih nadingun kipat thakna a hong piak theih nadingin Persia kumpite ko tungah a thunuam dingin hong bawlsak hi. Tu-in, kote’gamtatsiate leh a lian ka mawhnate uh hangin hih bang gimna lian ka thuak uh hi; ahi zongin nangmah in kote’ tuah dinga kilawm zah dan hong tuaksak loin, tu-a banga a nungta lai-in nong omsak zaw hi; hih banga ka thuak khit uh ciangin kote in na thupiaknate mang lo kikin, a kihhuai-in a gamta mite tawh kitengin kizom kik ding ka hi uh hiam? Tua bang hi kik le ung, a suakta, a nungta ka om nawn loh dongun kote tungah na hehna hong tung sak ding hilo na hi hiam? Israel Pasian, Topa aw, nang na thutang a, ahi zongin tu ni-a a om lai ko teng nong suakta sak veve hi. Na muhna ah kote a mawhpi mah hita le ung hong hehpih in; bang hang hiam cih leh mawhna hangin nangma mai-ah kuamah om thei lo hi,” ci-in thu ka ngen hi. Ezra in tu-a bangin thu ngenin mawhna pulakin khitui naptui tawh Pasian’ inn mai-ah kunin a om lai takin Israel mi numei, pasal, naupang, mi tampi tak ama kiim-ah hong kikhawmin amaute khempeuh zong nakpi takin a kap uh hi. Tua ciangin Elam-te beh sung panin Jehiel’ tapa Shekaniah hong pau-in Ezra kiangah, “Hih gam-a teng gamdang numeite ten’pihna tawh i Pasian’ tungah i khial hi. Ahi ta zongin Israel mite’ adingin lametna om lai hi. Tua ahih ciangin tu-in, ka Topa uh nangma ngaihsutna leh i Pasian’ thupiakna a kihta mite’ ngaihsutna bangin hih i zite leh a tate uh i mak nading thu i Pasian’ tungah kiciam ni; tua ciangin thukham sunga om bangin gamta ni. Ding in, nangma nasep ding ahi hi; kote in kong huh ding uh hi. Hang in la, sem in,” a ci hi. Tua ciangin Ezra ding-in a kigensa bangin amaute a gamtat nadingun a kiciam dingin siampi liante, Levi mite leh Israel khempeuh sawl a, amau zong kiciam pah uh hi. Tua ciangin Pasian’ inn panin Ezra paikhia-in Eliashib’ tupa Jehohanan’omna inndei ah pai-in tua lai-ah giak hi; salsuahna pan hong ciahkik mite’ khialhna hangin dah ahih manin amah in an leh tui ne zo lo hi. Tua ciangin Judah leh Jerusalem sunga a om a hong ciahkik salte khempeuh Jerusalem ah a hong kikhop nading uh, leh ni thum sungin a hong tung lo a om leh uliante leh upate’ hoihsakna bangin a neihsa khempeuh kimanin, sal suaksa mihonte panin a kihawlkhiat theih nading thu taangkona khat kibawl hi. Tua ahih ciangin Judah leh Benjamin mi khempeuh ni thum sungin Jerusalem ah hong kikhawm uh hi; tua in a kha kuana a ni sawmnih ni ahi hi. Tua hi a, Pasian’ inn mai inntual ah hih thu hangin mi khempeuh patau-in guah lakah liingin tu uh hi. Tua ciangin siampi Ezra ding to-in amaute kiangah, “Note in gamdang numeite zi-in la-in Israel mite’ mawhna na behlap uh hi. Tua ahih ciangin tu-in na pu na pate uh Pasian ahi Topa tungah na mawhna uh pulak un la, ama deihna bangin gamta-in hih gam-a teeng gamdang mite leh gamdang mi ahi na zite uh tawh kikhenin tuam om un,” a ci hi. Tua ciangin a kikhawm mi khempeuh in dawngin kiko uh a, “Hi ta hen; na gen bangin ka hih ding uh hi. Ahi zongin mi tampi hi hang a, guahzuk laitak zong ahi hi; hih guah lakah ka omsuak zo kei ding uh hi. Tua tham loin hih thu ah eite in mawhna lianpi hih kha ihih manin ni khat ni nih sungin hih nasep a kizo thei ding hi lo hi. A kikhawm mihonpite’ tangin i makaite semsak in la, hih thu hangin eite tungah Pasian’ hehna a dam matengin, i khuapite sung khempeuh a, gamdang numei a ten’pih mi khempeuh amau khua sung upate leh thukhente ciat tawh a kiseh hunin i makaite kiangah va kilak uh hen,” a ci uh hi. Asahel’ tapa Jonathan leh Tikvah’ tapa Jahzeiah tegel bek in nial uh a, Levi mi Meshullam leh Shabbethai in pan’pih uh hi. Tua hi a, thukham omsa bangin hong ciahkik salsuakte gamta uh hi. Siampi Ezra in amau’ beh ciat tangin beh lutang pawlkhat tengkhia a, tuate khempeh a minin a kilo khia ahi hi. A kha sawmna a ni khat ni-in hih mite a thukan ding uh kipan uh a, a kha masa a ni khat ni-in gamdang numei a ten’pih mite thu a kanna uh zo uh hi. Siampite beh lak panin Jozadak’ tapa Jeshua leh a sanggamte beh sung panin Ma-aseiah, Eliezer, Jarib, leh Gadaliahte in gamdang numei a ten’pihna kimu hi. Amaute in a zite uh a mak ding uh kiciam uh a, amau’ mawhna hangin biakna-in tuuhon panin tuutal khat hong paipih uh hi. Immer-te beh sung panin Hanani leh Zebadiah ahi uh hi. Harim-te beh sung panin Ma-aseiah, Elijah, Shemaiah, Jehiel, leh Uzziah ahi uh hi. Pashhur-te beh sung panin Elio-enai, Ma-aseiah, Ishmael, Nethanel, Jozabad leh Elasah ahi uh hi. Levi mite sung panin Jozabad, Shimei, Kelaiah (Kelite a kici), Pethahiah, Judah leh Eliezer ahi uh hi. Lasate sung panin Eliashib ahi hi. Kongcingte sung panin Shallum, Telem leh Uri ahi uh hi. Israel midang sung pan: Parosh-te beh panin, Ramiah, Izziah, Malkhijah, Mijamin, Eleazar, Malkhijah, leh Benaiah ahi uh hi. Elam-te beh panin Mattaniah, Zekhariah, Jehiel, Abdi, Jeremoth, leh Elijah ahi uh hi. Zattu-te beh panin Elio-enai, Eliashib, Mattaniah, Jeremoth, Zabad, leh Aziza ahi uh hi. Bebai-te beh panin Jehohanan, Hananiah, Zabbai, leh Athlai ahi uh hi. Bani-te beh panin Meshullam, Malluk, Adaiah, Jashub, Sheal leh Jeremoth ahi uh hi. Pahathmoab-te beh panin Adna, Khelal, Benaiah, Ma-aseiah, Mattaniah, Bezalel, Binnui leh Manasseh ahi uh hi. Harim-te beh panin Eliezer, Isshijah, Malkhijah, Shemaiah, Shimeon, Benjamin, Malluk, leh Shemariah ahi uh hi. Hashum-te beh panin Mattenai, Mattattah, Zabad, Elifelet, Jeremai, Manasseh leh Shimei ahi uh hi. Bani-te beh panin Ma-adai, Amram, Uel Benaiah, Bedciah, Kheluhi, Vaniah, Meremoth, Eliashib, Mattaniah, Mattenai, leh Ja-asu ahi uh hi. Binnui-te beh panin Shimei, Shelemiah, Nathan, Adaiah, Maknadebai, Shashai, Sharai, Azarel, Shelemiah, Shemariah, Shallum, Amariah, leh Josef ahi uh hi. Nebo-te beh panin Jeiel, Mattithiah, Zabad, Zebina, Jaddai, Joel leh Benaiah ahi uh hi. Hih mite khempeuh in gamdang numei ten’pih uh a, amaute in a zite uh a tate uh tawh ma khawm uh hi. Hakaliah’ tapa Nehemiah’ thugen in hih bang ahi hi. A kum sawmnihna Khislev kha sungin kumpi khuapi Susa-ah ka om lai takin, ka sanggampa Hanani leh midang pawlkhat Judah gam panin hong tung uh hi; tua ciangin keimah in Jerusalem khua thu leh sal-a matna panin a suakta ahi a om suak Judah mite’ thu tawh kisai amaute kiangah ka dong hi. Salsuahna panin a suakta, tua gam-a a om suakte in haksatna lianpi leh maizumna a ngahna uh, leh Jerusalem kulh kicimin kulhkongpite mei in a kattumna thu hong gen uh hi. Hih thu ka zak ciangin tusukin ka kap niloh a, ni tampi sung an tangin, vantung Pasian kiangah thu ka ngen hi. Ka thungetna-ah, “Aw vantung Pasian, Topa, nang hong itin na thupiakna a zuite tungah na thuciamna lim takin a zui, a lian a kihtak-huai Pasian aw, Israel mi ahi, na nasemte’ taangin sun leh zanin kong thunget nilohna a ngai dingin na bil hong ngat in la, na mit hong hak in. Nangma tungah ko Israel mite ka khialhna uh, keimah leh ka pu ka pate zong ka khialhna uh ahi ka mawhnate uh kong pulak uh hi. Nangma tungah kong khial khin uh a, na nasempa Moses tungah na piak ahi thupiaknate, thukhamte, leh ngeinate ka zui kei uh hi. Na nasem Moses tungah, ‘Na cihtak kei uh leh mi namdangte lakah kong thehthang ding hi; ahi zongin kei kiangah hong ciahkikin ka thupiaknate zui-in na sep uh leh leimong dongah a kithehthangsa na mite uh kaikhawmin keima min om nadingin ka telnasa munah amaute ka ciahpih ding hi,’ ci-a na thugen hong phawkkik in. Topa aw, amaute pen na vangliatna leh a thahat na khut tawh hotkhiatsa na nasemte leh nangma mite ahi uh hi. Keima hong thungetna leh nangma min a zahtak nuam na nasemte’ thungetna na bil hong ngat in. Tu ni-in kei tungah mavan’na hong pia in la, kei tungah hih kumpipa hong migit nading lungsim guan in,” ka ci hi. Kei pen kumpipa’ anpiapa ka hi hi. Kumpi Artakzaksis’ kum sawmnihna Nisan kha sungin khatvei, a leenggahzu a baihsa-in a om khit ciangin la-in kumpipa ka pia a, ama mai-ah ka om lai takin ka mai a khing hi. Amah in, “Ci na lopi-in bang hangin na mai khing ahi hiam? Na dahna khat om hi ding hi,” hong ci hi. Tua ciangin lau mahmahna tawh kumpipa ka dawng a, “Kumpipa nungta tawntung in. Ka pute ka pate a kivuina khuapi sia gawp a, a kongpite kangtum ahih ciangin maikhing loin bangci om theih ding ka hi hiam?” ka ci hi. Tua ciangin kumpipa in, “Kei tungah bang hong ngen nuam na hi hiam?” hong ci hi. Kei zong ka lungsim tawngah vantung Pasian kiangah thu ka ngen a, tua khit ciangin kumpipa dawngin, “Kumpipa na lungkim a, dik nong sak leh, ka puah phatkik theih nadingin Judah gamsung ka pute ka pate a kivuina khuapi-ah nong paisak nading kong thuum hi, topa,” ka ci hi. Tua ciangin kumpipa in (kumpinu gei-ah tu kawmin), “Bang tan vei sawt ding a, cik ciangin hong ciahkik ding na hi hiam?” ci-in hong dong hi. Tua ahih ciangin kumpipa in ka ngetna hong thukimpih a, kei zong ka ciahkik ding hun ka gen hi. Tua ciangin kumpipa kiangah, “Kumpipa na thukim leh, Judah gam ka tun’ dong amaute in kei hong paisuak sak theih nadingun Eufrates Gungal gamsung a uksawn mite ka piak ding laikhakte, leh biakinn hut nading mun muanhuai kongpi ding, leh khuapi kulh ding, leh ka om nading inn lam nadingin sing hong piak theih nadingin kumpipa’ tulak a kem Asaf tungah piak ding laikhak zong, kei tungah hong pia in,” ka ci hi. A dik ka Pasian in kei hong ompih ahih manin kumpipa in ka ngette hong pia hi. Tua ciangin Eufrates Gungal gam a uksawn mite kiang ka tung a, kumpipa’ laikhakte amaute tungah ka pia hi. Kumpipa in galkap mangte leh sakol galkapte kei hong kha sak hi. Ahih zongin Israel mite’ phattuam nading a sem dingin mi khat hong paina thu Horonaim khuami Sanballat leh Ammon mi sal ahi Tobiah in a zak uh ciangin nakpi takin lungkim lo uh hi. Jerusalem ka tun’ ciangin ni thum sung ka tawlnga hi. Tua ciangin zan-in vak khia-in mi tawmkhat ka tonpih hi; ahi zongin Jerusalem’ adingin ka bawlsak ding ka Pasian in ka lungsim ah hong suahsak thu kuama kiangah ka gen kei hi. Keima tuan’na sim loh ganhing dang ka kizuisak kei hi. Kuam Kongpi tawnin Gulpi Tuikhuk leh Nin Kongpi lamah ka pai a, a kicimsa Jerusalem kulhpi leh mei in a kattumsa a kongpite ka en hi. Tua ciangin Tuinak Kongpi leh Kumpipa’ Bual-ah ka paisuak hi; ahi zongin ka tuan’na ganhing a paisuak theih nading mun om lo hi. Tua hi a, a zanpi mahin kuam lamah pai-in khuapi kulh ka vel hi; tua ciangin Kuam Kongpi mah tawnin khuapi sungah ka lut kik hi. Tua hi a, khua sung upate in ka paina mun ahi a, ka sep ahi zongin thei lo uh hi; bang hang hiam cih leh hih nasep tavuan a la ding Judah mite, siampite, uliante, khua sung upate, leh adangte tungah ka gen nai kei hi. Tua ciangin amaute kiangah, “I lungkhamna thu na thei uh hi. Jerusalem a siasa-in omin, a kongpite mei in kangtum hi. Hong pai un, zahkona i ngah nawn loh nadingin Jerusalem kulh ciang pha ni,” ka ci hi. Tua ciangin a dik ka Pasian in kei hong ompihna leh kumpipa in kei tungah hong gen thute zong amaute tungah ka gen hi. Tua ciangin amaute in, “Tu-in nasep kipan ni,” hong ci uh hi. Tua ahih ciangin lawp mahmah leh ngimna hoih tawh nasep kipan uh hi. Ahi zongin Horonaim khuami Sanballat leh Ammon mi sal ahi Tobiah leh Arab gam-a a sem Geshem in tua thu a zak uh ciangin, kote zahpihna leh simmawhna tawh, “Hih na sep uh bang ahi hiam? Kumpipa lehpan’ na hi uh hiam?” hong ci uh hi. Tua ciangin amaute dawngin, “Vantung Pasian in ka ma uh hong telhsak ding a, ko ama nasemte in nasep a kipan ta ka hi uh hi; note in ahih leh Jerusalem tawh kisai-in na siksan ding uh ahi a, thu ahi zongin, bangmah kimematna na nei kei uh hi,” ka ci hi. Tua ciangin siampi lian Eliashib leh a siampi pihte in nasep kipanin Tuu Kongpi bawl uh hi. Amaute in a khuamte leh a zawlte bawlin a kongkhakte bulh uh hi; amaute in Mi Za Khat Tausang ciang banah Hananel Tausang dong sem uh a, tua ciangin Pasian tungah ap uh hi. Ama zomah Jerikho khuamite in sem uh hi. Amaute’ zomah Imri’ tapa Zakkur in sem hi. Tua ciangin Hassena-ah’ tapate in Ngasa Kongpi bawl uh hi; amaute in a zawlte khungin a kongkhakte a kalhna tawh bulh uh hi. Amaute’ zomah Hakkoz’ tapa Uriah, a tapa Meremoth in ama khawk sung puah hi; tua zomah Meshezabel’ tapa Berekhiah, a tapa Meshullam; tua zomah Baana’ tapa Zadok in puah hi; a zom kikah Tekoa khuamite in puah uh a, ahi zongin amau’ uliante in nasem makaite nuai-ah na sem nuam lo uh hi. Tua ciangin Paseah’ tapa Joiada leh Besodeiah’ tapa Meshullam in Jeshanah Kongpi puah uh hi; amaute in a zawlte khungin a kongkhakte a kalhnate tawh bulh uh hi. Amaute’ zomah Gibeon leh Mizpah khuami ahi, Gibeon mi Melatiah leh Meronoth khuami Jadon in Eufrates Gungal gam a uk sawnpa’ zum dong puah uh hi. Tua zomah khamseekpa Harhaiah’ tapa Uzziel in puah hi; a zomah paknamtui bawlpa Hananiah in puah hi; amaute in Kulh Zai ciang dong a ngeina bangin Jerusalem bawlkik uh hi. Amaute’ zomah Jerusalem gam phel khat a uk, Hur tapa Refaiah in puah hi. A zomah Harumaf tapa Jedaiah in ama inn mai san teng puah hi; tua ciangin a zomah Hashabneiah’ tapa Hattush in puah hi. Harim’ tapa Malkhijah leh Pahathmoab’ tapa Hasshub in Meikhuk Tausang a huam khawk dang khat sung puah uh hi. Amaute’ zomah Jerusalem gam a phel khat a uk Hallohesh’ tapa Shallum in a tanute tawh puah uh hi. Hanun leh Zanoah khua-a teeng mite in Kuam Kongpi puah uh hi; amaute in tua kongpi bawl pha-in a kongkhakte a kalhnate tawh bulh uh a, Nin Kongpi ciang dong tong tul khat sung kulh puah uh hi. Bethhakkherem gam a uk, Rekhab’ tapa Malkhijah in Nin Kongpi puah hi; amah in tua kongpi bawl pha-in a kongkhakte a kalhnate tawh bulh hi. Mizpah gam a uk, Kolhozeh’ tapa Shallum in Tuinak Kongpi puah hi; amah in tua kongpi bawl pha-in a kongkhakte a kalhnate tawh bulh hi; tua ciangin amah in kumpipa’ huan gei-a Shelah Bual a kulh ciang a, David Khuapi pan-a hong paisuk kahlei ciang dong sem hi. Ama zomah Bethzur gam phel khat a uk, Azbuk’ tapa Nehemiah in David’ han san ciang, a kibawltawm bual leh Galkap Inn ciang dong puah hi. Ama zomah a puah Levi mite in: Bani’ tapa Rehum; ama zomah Keilah gam phel khat a uk Hashabiah in ama gam taangin puah hi. Ama zomah a puah a behte in: Keilah gam a phel khat a uk, Henadad’ tapa Bavvai in puah hi; a zomah Mizpah gam a uk Jeshua’ tapa Ezer in a Kiu-a galvan koihna kahtohna san khawk khat puah hi. Ama zomah Zabbai’ tapa Baruk in a Kiu panin siampi lian Eliashib’ inn kongkhak ciang dong khawk khat sung puah hi. Ama zomah Hakkoz’ tapa Uriah, a tapa Meremoth in Eliashib’ inn kongkhak panin Eliashib’ inn mong ciang dong khawk khat sung puah hi. Ama zomah Jerusalem kiim nai-a om siampite in puah uh hi. A zomah Benjamin leh Hasshub in amau’ inn mai san puah uh hi. A zomah Ananiah’ tapa Ma-aseiah, a tapa Azariah in ama inn gei san teng puah hi. Ama zomah Henadad’ tapa Binnui in Azariah’ inn panin a Kiu, leh kulh kiu ciang khawk khat sung puah hi. Uzai’ tapa Palal in a Kiu gal san teng leh kumpipa’ inn panin hong dawk khia, zum cingte’ omna ahi tausang tungnung teng puah hi. Amah zomah Parosh’ tapa Pedaiah leh Ofel mualtung a teeng biakinn nasemte in nisuahna lam manawhin Tui Kongpi gal san ciang leh tausang dawk puah hi. Ama zomah Tekoa khuamite in a lian tausang dawk panin Ofel mualbo kulh ciang, khawk dang khat sung puah uh hi. Sakol Kongpi tung san teng ahih leh siampite in amau’ inn mai san ciat puah uh hi. Amaute’ zomah Immer’ tapa Zadok in ama inn mai san puah hi. Ama zomah Nisuahna Kongpi a cing, Shekaniah’ tapa Shemaiah in puah hi. Ama zomah Shelemiah’ tapa Hananiah leh Zalaf tapa gukna Hanun in khawk dang khat sung puah uh hi. Amau zomah Berekhiah’ tapa Meshullam in ama inndei mai san teng puah hi. Ama zomah khamseekpa Malkhijah in Kikaihkhopna Kongpi mai san-a om biakinn nasemte’ inn leh sumbukte’ inn ciang, leh a kiu-a inndei tungnung ciang dong puah hi. Tua ciangin khamseekte leh sumbukte in a kiu-a inndei tungnung leh Tuu Kongpi kikal puah uh hi. Sanballat in kote’ kulh cian’na thu a zak ciangin lungkim loin heh mahmah a, Judah mite hong zahko hi. Amah in a kikholhpihte leh Samaria galkapte’ kiangah, “Hih Judah mi niangnuangte in bang hih dinga kipan ahi uh hiam? Hih mun bawlpha ding a, kingaihsun ahi uh hiam? Biakna pia-in, a nasep uh ni khat sungin zo dingin kilamen ahi uh hiam? Amaute in a kangtumsa nin bulomtang panin suangtum bawl kik thei ding ahi uh hiam?” ci hi. Ama kiangah a om Ammon mi Tobiah in, “Amaute in bangbang ciang ta leh amau’ kulh cian’ tungah ngia khat kah leh kicim lel ding hi,” ci hi. Tua ciangin keimah Nehemiah in thu ka ngen a, “Hong za in, kote’ Pasian aw, kote hong kisimmawh hi; kote hong zahkona amau lu tungah lehtuk sak in la, gamdang khatah sal suakin mi’ bawlsiatin amaute omsak in. Amaute in a lang tangin kulh ciangte mai-ah nang hong kosia uh ahih manin amau’ mawhna maisak kei in la, na muhna panin zong a mawhna uh sumit kei in,” ka ci hi. Tua ahih ciangin kulh ka ciang uh a, nasep a kim ciang bang kizo hi; mite in utna lungsim tawh sem uh hi. Ahi zongin Sanballat, Tobiah, Arab mite, Ammon mite, leh Ashod mite in Jerusalem kulh cian’ nasep kizom suakin, kulh vang teng huk ding a kipat khitna thu a zak uh ciangin heh mahmah uh hi. Tua hi a, Jerusalem hong simin buaina a piangsak dingin amaute kipawlin vaihawmna khat nei uh hi. Tua ahih ciangin ka Pasian uh tungah thu ka ngen uh a, amaute a en dingin sun leh zanin galvil ka koih uh hi. Tua ciangin Judah mite in, “Nasemte a tha uh zaw ta a, ahi zongin nin tampi om lai hi; eima tha tawh kulh cian’ i zo ngei kei ding hi,” hong ci uh hi. Tua ciangin ka galte un, “Amau’ phawk loh kalun amaute lakah pai-in i that ding a, a nasep uh i beisak ding hi,” hong ci uh hi. Amaute lakah a teeng Judah mite khuapi sungah hong pai ciangin, ka galte uh a omna khempeuh ciat panun hong pai-in kote hong sim nading thu, sawm vei tak hong hilhkhol uh hi. Tua ahih ciangin kulh nung lam mun niampenna mun awng tengah a namsau uh, a teipi uh, leh a thal uh tawh, a innkuankuan-un ka mite ka pangsak hi. Mite’ launa ka muh ciangin, uliante leh mi ukte leh mikhempeuh tungah, “Amaute kihta kei un. Na sanggamte, na tapate, na tanute, na zite uh leh na inn na lote uh adingin hong dosak, a lian a kihtak-huai Topa phawk un,” ka ci hi. Amau’ hong sawmna thu kote in ka phawkna uh leh Pasian in amau’ geelna a suksiatna thu ka galte un thei hi; tua ahih ciangin ka nasepna ciat uh kulh tungah ka vekpi-un ka kuankik uh hi. Tua hun-a kipanin ka khut nuai-a om mite kimkhat in na sem a, a kimkhat in a teipite, a lumte, leh a thalte uh tawi-in sikpuan silhin ding uh hi; uliante in kulh a ciang Judah mite khempeuh uk uh hi. Kulh-a cian’ ding na a nawn mite in khut lang khat in a van puak uh lenin a khut lang khat uhah galhiam tawi uh hi. Kulh ciangte in na a sep kawmun a kawng ciat uhah a namsau uh kuah uh hi. Peengkul tumpa ahih leh keima kiangah om hi. Tua ciangin uliante leh mi ukte leh mi khempeuh tungah, “I nasepna lian a, zaipi tak huam hi; eite kulh tungah kikhenin khat leh khat i kigamla hi. Peengkul kitum na zakna peuhpeuh panun ko kiangah hong kikhawm un. I Pasian in eite adingin hong dosak ding hi,” ka ci hi. Tua hi a, ni simin khuavak-a kipan nitak aksi suah dong, mi kimkhat in teipi tawi-in, mi kimkhat in na ka sem uh hi. Tua hun mahin mite kiangah, “Zanin galvil, sunin nasemin nong om theih nadingun mi khempeuh na nasemte ciat uh tawh Jerusalem khua sungah hong giak un,” ka ci hi. Tua ahih ciangin keimah-a kipan ka behte, ka nasemte, leh kei hong cingte, a kuamah peuh puan suah man om loin, mi khempeuh in ka khut uhah galhiam ka tawi den uh hi. Tu-in mi nautang numei leh pasalte in a Judah mipihte uh tungah lungkim lohna kam hong gingsak uh hi. Mi pawlkhatte in an lei nadingin a tanute uh leh a tapate uh a piakna thu gen uh hi. Pawlkhatte in kial tun’ huhau-in an lei nadingin a lote, a leenggah lote, leh a innte uh a piakna hong gen uh hi. Pawlkhatte in kumpipa tungah siah piak dingin a lote uh leh a leenggui lote uh khamin a piakna uh hong gen uh hi. Amaute in, “Kote in ka behte uh mah bangin si-le-sa kibang hi-in, ka naupangte uh zong amau’ naupangte mah bangin a hoih hi napi-in, ka tanute uh leh ka tapate uh sal suak dingin ka phum uh hi. Ka tanute uh pawlkhat zong sal suak khin a, ka lote uh leh ka leenggui lote uh midangte’ aa suak khin ahih manin amaute tat nadingin ka hih zawh uh bangmah om lo hi,” hong ci uh hi. Amaute’ kikona leh hih thute ka zak ciangin ka heh mahmah hi. Kei zong hih thu lim takin ka ngaihsun a, tua ciangin uliante leh thukhente tai-in amaute kiangah, “No leh no lei kibat manin ameet na kila uh hi,” ka ci hi. Amaute nakpi takin tai-in, ”Mi namdangte tungah sal-a kizuaksa i Judah mipihte ahi zo zahzahin i tanh kik hi; tua hi napi-in note in na mipihte uh na zuak uh a, tu-in amaute i tat kik ding hi zel hi!” ka ci hi. Amaute pau loin om uh a, a gen ding mel uh thei lo uh hi. Tua ciangin keimah in, “Note’ gamtatna hoih lo hi. I gal ahi mi namdangte’ zahkohna i ngah loh nadingin i Pasian zahtakna tawh na gamtat ding uh kilawm hi. Kei leh ka behte leh ka nasemte in zong an leh sum leitawi-in ka pia khia uh hi. Leiba ameet kilakna phiat ni. Tu ni mahmah-in a lote, a leenggui lote, a oliv lote, a innte uh leh a meet-a na lak uh sum, an, leenggahzu, leh sathaute, amaute tungah pia kik un,” ka ci hi. Tua ciangin amaute in, “Hihte khempeuh ka pia kik ding uh a, amaute tung panin bangmah ka kal nawn kei ding uh hi; na gen bangin ka gamta ding uh hi,” hong ci uh hi. Tua ciangin siampite ka sam a, a ciamsa bangun a gamtat nadingun kiciamna ka bawlsak hi. Tua ciangin kei zong ka puan singin, “Hih thuciamna a tungsak lo peuhmah a inn leh a neihsa panin Pasian in singkhia ta hen. Hih bangin kisingkhia hen la, hawmsuak hen!” ka ci hi. Tua ciangin a kikhawmte khempeuh in, “Amen,” ci uh a, Topa phat uh hi. Tua hi a, a ciamsa bangun mite gamta uh hi. Tua tham loin, Judah gam a uk dingin hong kiseh hun-a kipan, Kumpi Artakzaksis’ kum sawmnihna pan a kum sawmthum-le-nihna dong, kum sawm leh kum nih sung, kei leh ka behte in gam ukte’ ngah ngei ante ka ne kei uh hi. Keima hun ma-in a ukte in mite tungah vangikpi suan uh a, amaute tung panin ni simin an leh lenggahzu ngun shekel sawmli man la uh hi. Amau’ nasemte nangawn mite tungah kiliansak lai uh hi. Ahi zongin Pasian ka zahtakna hangin tua bangin kei ka gamta kei hi. Hih kulh cian’na ah tua tangin keimahmah in zong ka sem a, kei adingin leitang bangmah ka la kei hi; keima mite khempeuh nasem ding bekin tua lai-ah kisutuah uh hi. I kiim i paam-a mi namdangte’ kiang pan hong paite banah, ni simin ka sabuai ah an a ne, thukhente leh Judah mi a kihelin leengla za leh sawmnga bang ka nei den hi. Nisim in innsung annek tawm dinga kibawl bawngtal khat leh tuu limci guk ahi hi; tua mah bangin ak zong kibawl a, ni sawm simin leenggahzu a um tampipi-in kihih hi; tua zahin bei ta se leh gam ukte’ ngah theih ahi, an leh tui ka kal kei hi; bang hang hiam cih leh mite genthei lua hi. Pasian aw, hih mite’ adingin ka bawlna khempeuh kei’ adingin a hoih lamin hong phawk in. Kongpite ah kongkhak ka bulh nai loh hangin, kulh ka cian’ khitna leh a vang khat zong a om nawn lohna thu, Sanballat, Tobiah, Arab mi Geshem, leh ka gal dangte khempeuh un a zak uh ciangin, Sanballat leh Geshem in Ono zanglei sunga om Hakkefirim khua-ah pai-in amaute tawh thu kikum dingin hong sam uh hi; hih pen kei hong suksiat nopna uh ahi hi. Tua ahih ciangin kei zong amaute kiangah kamtaite ka sawl a, “Tu lai takin nasep thupi ka nei hi, kong pai thei kei ding hi. Kei hong pai leng, kong pai sung ka om loh kal teng nasep kitawlnga ding hi,” ka ci hi. Amaute in tu-a mah bangin li vei tak hong sam uh a, kei zong a li vei mahin tu-a bangin ka dawng kik hi. Tua mah bangin Sanballat in a nga veina hong sam a, tua tung tangin a kamtaipa in laikhak khat hong pia hi. A laikhak sungah, “Mi namdangte lakah a kigen, Geshem in zong tua a kigen thu man hi, ci-a a gen thu in, nang leh Judah mite in kumpi lehdo ding na sawm uh a, tua thu hangin kulh na ciang uh hi; tua banah nangmahmah zong kumpi na utna kigen lai hi. Judah in kumpi khat nei ta hi, ci-in, nang kumpi na hihna thu Jerusalem ah a taangko dingin kamsangte pawlkhat a koih-in zong hong kigen hi. Kumpipa in hih thu za pelmawh ding hi.Tua ahih ciangin thakhatin hong pai in la, hih thu kikum ni,” ci-in kigelh hi. Tua ciangin keimah in, “Tua na gen bangin bangmah om lo hi; tua thu in nangma phuahtawm ahi hi,” ci-in ka thuk hi. Kote in ka hanciamna uh khiamin nasep a kizawh loh nading deihna tawh amaute in kote hong lausak theih nading uh a hanciam uh ahi hi. Tua ahih ciangin ka hahkat semsem zaw hi. Mehetabel’ tapa Delaiah, a tapa Shemaiah a innah omcip ahih manin ni khat ama kiangah ka pai leh amah in, “Pasian’ inn sung, siangtho munah kituahin biakinn kong kikhak nelh ni; bang hang hiam cih leh nang hong that dingin amaute hong pai uh a, zanin amaute in nang hong that ding uh hi,” hong ci hi. Ahih hangin keimah in, “Kei bang mite tai ding ahi hiam? Kei tawh kibang mite a suahtak nadingin biakinn sungah lut ding ahi hiam? Ka pai peuhmah kei ding hi,” ka ci hi. Tua ciangin a thusim ka phawk khia hi. Pasian in tua bang thu gen dingin amah a sawl hi lo a, Tobiah leh Sanballat in tua bangin thugen dingin golhguk a na pia na hi a, ama thugenna in keimah suksiat nopna ahi hi. Ama thugen bangin gamta-in mawhna ka bawl theih nadingin keimah hong lausak dingin a kicial ahi hi; tua bangin zui kha leng kei hong minsia sakin hong simmawh ding uh hi. Ka Pasian aw, amau’ sepnate’ hangin Tobiah leh Sanballat thei in la, keimah lausak dingin a hanciam kamsangnu Noadiah leh kamsang dang khempeuh zong thei in. Elul kha ni sawmnih leh ni nga ni-in kulh kizo a, ni sawmnga leh ni nih sung hun bei hi. Ka galte un hih thu za-in, ka kiim uh-a om mi namdangte in a theih uh ciangin lamdang sa uh a, kote’ Pasian’ huhna tawh hih nasep kizo ahihna phawk uh hi. Hih hun sung teng khempeuh Judah uliante in Tobiah kiangah lai tampi khak uh a, Tobiah’ laikhakte zong amaute tungah tung hi. Tobiah pen Arah’ tapa Shekaniah’ makpa hi a, ama tapa Jehohanan in Berekhiah’ tapa Meshullam’ tanute khat ten’pih ahih manin Judah gamsunga mi tampi amah tawh kipawl hi. Amaute in ama hoihnate zong keima zakna ah hong gen uh a, keima sepna teng zong ama kiangah na puak uh hi. Tua hi a, Tobiah in zong ka lau theih nadingin kei tungah lai tampi hong khak hi. Kulh kiciang khinin, kongkhakte ka bulh khin a, kongcingte, lasate, leh Levi mite a kiseh khit ciangin, ka sanggampa Hanani leh galdalna inn a uk Hananiah in a et dingin Jerusalem ka pia hi; bang hang hiam cih leh Hananiah in midang tampi sangin a citakzaw, Pasian a zahtakzaw mi khat ahi hi. Tua hi a, amaute tungah, “Sun mateng Jerusalem kongpite hong sak kei un; tua ciangin ni om lai mahin kongte khak sakin kalh sak un. Jerusalem khua sunga teengte lak panin khuacing dingte seh un la, pawlkhatte galvilna munah, pawlkhatte amau’ inn mai ciatah omsak un,” ka ci hi. Khuapi lianin zai a, ahi zongin a sungah mi tawm bek om a, innte a kilam om nai lo hi. Tua ciangin uliante, thukhente, leh mite a innkuan kuanun ciamteh nading ka lungsimah Pasian in hong suaksak hi. Tua hi a, hong ciahkik masate’ khang ciamtehna laibu ka mu hi. Tua sungah ka muh a kigelhte in: Parosh suante mi tul nih za khat leh sawmsagih-le-nih ahi hi. Shefatiah’ suante mi za thum leh sawmsagih-le-nih ahi hi. Arah’ suante mi za guk leh sawmnga-le-nih ahi hi. Pahathmoabte’ beh sung panin Jeshua leh Joab suante mi tul nih za giat leh sawm-le-giat ahi hi. Elam’ suante mi tul khat za nih leh sawmnga-le-li ahi hi. Zattu’ suante mi za giat leh sawmli-le-nga ahi hi. Zakkai’ suante mi za sagih leh sawmguk ahi hi. Binnui’ suante mi za guk leh sawmli-le-giat ahi hi. Bebai’ suante mi za guk leh sawmnih-le-giat ahi hi. Azgad’ suante mi tul nih za thum leh sawmnih-le-nih ahi hi. Adonikam’ suante mi za guk leh sawmguk-le-sagih ahi hi. Bigvai’ suante mi tul nih leh sawmguk-le-sagih ahi hi. Adin’ suante mi za guk leh sawmnga-le-nga ahi hi. Ater a kici Hezekiah’ suante mi sawmkua-le-giat ahi hi. Hashum’ suante mi za thum leh sawmnih-le-giat ahi hi. Bezai’ suante mi za thum leh sawmnih-le-li ahi hi. Harif’ suante mi za khat leh sawm-le-nih ahi hi. Gibeon’ suante mi sawmkua-le-nga ahi hi. Bethlehem leh Netofah khuami za khat leh sawmgiat-le-giat ahi hi. Anathoth khuami za khat leh sawmnih-le-giat ahi hi. Bethazmaveth khuami sawmli-le-nih ahi hi. Kiriath-jearim, Khefirah, leh Be-eroth khuami za sagih leh sawmli-le-thum ahi hi. Ramah leh Geba khuami za guk leh sawmnih-le-khat ahi hi. Mikmas khuami za khat leh sawmnih-le-nih ahi hi. Beth-el leh Ai khuami za khat leh sawmnih-le-thum ahi hi. Nebo khuami sawmnga-le-nih ahi hi. Elam adang khat suante tul khat za nih leh sawmnga-le-li ahi hi. Harim khuami za thum leh sawmnih ahi hi. Jerikho khuami za thum leh sawmli-le-nga ahi hi. Lod, Hadik, leh Ono khuami za sagih leh sawmnih-le-khat ahi hi. Sena-ah khuami tul thum za kua leh sawmthum ahi hi. Siampite sung panin: Jeshua-te beh panin Jadaiah suante mi za kua leh sawmsagih-le-thum ahi hi. Immer’ suante mi tul khat leh sawmnga-le-nih ahi hi. Pashhur’ suante mi tul khat za nih leh sawmli-le-sagih ahi hi. Harim’ suante mi tul khat leh sawm-le-sagih ahi uh hi. Levi mite sung panin: Hodevah-te beh panin Jeshua’ suante leh Kadmiel’ suante mi sawmsagih-le-li ahi hi. Lasate sung panin: Asaf’ suante mi za khat leh sawmli-le-giat ahi hi. Kongcingte nam sung panin: Shallum’ suante, Ater’ suante, Talmon’ suante, Akkub’ suante, Hatita’ suante leh Shobai’ suante mi za khat leh sawmthum-le-giat ahi uh hi. Biakinn nasemte sung panin: Ziha’ suante, Hasufa’ suante, Tabbaoth’ suante, Keros’ suante, Sia’ suante, Padon’ suante, Lebana’ suante, Hagaba’ suante, Shalmai’ suante, Hanan’ suante, Giddel’ suante, Gahar’ suante, Reaiah’ suante, Rezin’ suante, Nikoda’ suante, Gazzam’ suante, Uzza’ suante, Paseah’ suante, Besai’ suante, Meunim’ suante, Nefushesim’ suante, Bakbuk’ suante, Hakufa’ suante, Harhur’ suante, Bazlith’ suante, Mehida’ suante, Harsha’suante, Barkos’ suante, Sisera’ suante, Temah’ suante, Neziah’ suante leh Harifa’ suante ahi uh hi. Solomon’ nasemte’ suan leh khakte sung panin: Sotai’ suante, Sofereth’ suante, Perida’ suante, Ja-ala’ suante, Darkon’ suante, Giddel’ suante, Shefatiah’ suante, Hattil’ suante, Pokhereth-hazzebaim’ suante, leh Amon’ suante ahi uh hi. Biakinn nasemte leh Solomon’ nasemte’ suan leh khakte mi a vekpi-in za thum leh sawmkua-le-nih pha uh hi. Telmelah, Telharsha, Kherub, Addon, leh Immer khuate panin a hong ciahkik, Israel mi hi napi-in amau’ beh leh phung a kan thei lo mite in: Delaiah’ suante, Tobiah’ suante, Nekoda’ suante, mi za guk leh sawmli-le-nih ahi uh hi. Siampite’ sung panin zong: Hobaiah’ suante, Hakkoz’ suante, Barzillai’ suante (amah in Gilead mi Barzillai’ tanute khat ten’pihin tua min tawh a kilo pah) ahi uh hi. Hih mite in khang ciamtehna sungah a kiciamteh mite lakah amau min a zon’ uh hangin mu lo uh ahih manin amaute a siang loin seh uh a, siampi nasep semsak thei lo uh hi; tua hi a, Urim leh Thummim aisanna tawh aisan ding siampi khat a om matengin amaute in biakna an siangthopente a nek loh nading uh gam ukpa in gen hi. Mi a vekpi-in tul sawmli leh tul nih leh za thum leh sawmguk pha a, amaute’ nasem numei leh pasal tul sagih leh za thum leh sawmthum-le-sagihte kisim lo lai hi; tua banah amaute in lasa numei leh pasal za nih leh sawmli-le-nga nei uh hi. Amau’ sakol uh za sagih leh sawmthum-le-guk, a la-sakol uh za nih leh sawmli-le-nga, a kalaoh uh za li leh sawmthum-le-nga, leh a late uh tul guk za sagih leh sawmnih pha hi. Beh lutang mi pawl khat in nasep nadingin nate pia uh hi. Gam ukpa in vanmanpha koihna ah kham darik tul khat, kuang-uk sawmnga, leh siampipuan za nga leh sawmthum pia hi. Tua ciangin beh lutang pawl khatte in vanmanpha koihna ah kham darik tul sawmnih leh ngun mina tul nih za nih pia uh hi. Tua ciangin mi dangte’ piakte in kham darik tul sawmnih, ngun mina tul nih, leh siampipuan sawmguk-le-sagih ahi hi. Tua ciangin siampite, Levi mite, leh mi pawl khatte Jerusalem khua leh a kiim-ah teeng uh a, kongcingte, lasate, biakinn nasemte, leh Israel mi dangte amau’ khuapi ciatah teeng uh hi. Kha sagihna hong cin’ ciangin Israel mite amau’ khuapi ciatah teeng khin uh hi. Tua ciangin Tui kongpimai tualpi ah mi khempeuh khe khat khai bangin hong kikhawmtuah diam hi; tua ciangin Topa in Israel mite tungah a piak ahi, Moses’ thukham laibu pen lai theipa Ezra in hong paipih nadingin gen uh hi. Tua hi a, a kha sagihna a ni khat ni-in numei pasal, leh thu telthei ding a kikhawm khempeuh’ mai-ah siampi Ezra in thukham laibu hong paipih hi. Tua ciangin amah in Tui Kongpi mai-a om tualpi lam mai ngatin zingsang tung-a kipan sun ciang dong, numei pasal leh thu a telthei ding mite’ zakin tua laibu sunga thute sim a, mi khempeuh in tua thukham laibu sunga thu kisimte lim takin ngai uh hi. Tua ciangin thugen nadinga sing tawh kibawl tau tungah lai theipa Ezra dingto a, ama taklam pangah Mattithiah, Shema, Anaiah, Uriah, Hilkiah, leh Ma-aseiah ding uh a, a veilam pangah Pedaiah, Mishael, Malkhijah, Hashum, Hashbaddanah, Zekhariah leh Meshullam ding uh hi. Mi khempeuh sangin a sangzaw munah amah ding ahih manin mi khempeuh’ muh theih dingin Ezra in a laibu hong hi; a laibu a hon’ ciangin mi khempeuh ding uh hi. Tua ciangin Ezra in a lian Pasian, Topa thupha pia a, mi khempeuh in a khut uh laamto-in, “Amen, Amen,” ci-in dawng uh hi; tua ciangin a lu uh kunin lei lam mai ngatin Topa bia uh hi. Mite amau’ omna san ciatah a om sungun mite in thukham a teltheih nadingun Levi mi Jeshua, Bani, Sherebiah, Jamin, Akkub, Shabbethai, Hodiah, Ma-aseiah, Kelita, Azariah, Jozabad, Hanan, Pelaiah-te in a khiatna hilh uh hi. Amaute in Pasian’ thukham laibu sung panin a kitel takin sim uh a, a cihnopna a kitelin gen uh a, tua a kisim thute a tel nadingun hilh uh hi. Tua ciangin gam ukpa Nehemiah, leh lai theipa lah hi-in siampi lah ahi Ezra, leh mite a hilh Levi mite in amaute khempeuh kiangah, “Tu ni in Topa note’ Pasian adingin biakna ni siangtho ahi hi; a kap a mau om kei un,” a ci uh hi. Bang hang hiam cih leh thukham kammalte a zak uh ciangin mi khempeuh kap uh hi. Tua ciangin amah in amaute kiangah, “Tu-in ciah un; an lim tui lim ne-in thadim un la, a nei zo lote zong va kholh un; bang hang hiam cih leh i Topa ’ adingin tu ni in biakna ni siangtho ni ahi hi; dah kei un, bang hang hiam cih leh Topa sungah lungdamna in note’ thahatna ahi hi,” a ci hi. Tua ahih ciangin Levi mite in mite gamdai sak a, “Dai takin om un; bang hang hiam cih leh tu ni in biakna ni siangtho ni ahi hi; dah kei un,” a ci uh hi. Tua ahih ciangin mi khempeuh an ne tui dawnin midangte a kholh ding leh lungdam-a om dingin ciah uh hi; bang hang hiam cih leh amaute tungah a kigen thute amaute in theitel uh hi. A ni nih ni-in thukham sin dingin siampite leh Levi mite tawh beh lutang khempeuh lai theipa Ezra kiangah hong kikhawm uh hi. Tua ahih ciangin mite kuan khia-in tua singhiangte hong pua-in amau’ innkhumzang ciat, a inntual uh, Pasian’ inntual, Tui Kongpi tual leh Efraim Kongpi tual-ah sawlbuk lam uh hi. Tua hi a, salsuahna panin a hong ciahkik a kikhawm mite khempeuh in sawlbuk lamin tuate sungah om uh hi; bang hang hiam cih leh Nun’ tapa Joshua’ hun-a kipanin tua ni dongin Israel mite in tua bangin pawikham ngei lo uh hi. Tua hi a, amaute lungdam mahmah uh hi. Tua hi a, akipat ni-a kipan abei ni dong Ezra in ni simin Pasian’ thukham laibu simkhia hi. Amaute in ni sagih sung tua pawikham uh a, a ngeina om bangin a ni giat ni-in pawi khupna a thupi kikhopna khat om hi. Tua kha mah a ni sawmnih-le-li ni-in an tang dingin Israel mite kikhawm uh a, puanhampi silhin a lu tung uhah lei kibuak uh hi. Tua hi a, gamdang mi khempeuh panin Israel mite tuam om uh a, amaute in din’sa-in amau’ khialhnate leh a pu a pate uh mawhnate pulak uh hi. Tua ciangin amau’ omna mun ciat uhah ding-in Topa amau’ Pasian’ thukham laibu nai thum sung sim uh a, a dang nai thum sung amaute in mawhna pulakin Topa a Pasian uh zahtakna bawl uh hi. Levi mite’ kahlei tungah Jeshua, Bani, Kadmiel, Shebaniah, Bunni, Sherebiah, Bani, leh Khenani ding uh a, Topa amaute’ Pasian tungah nakpi-in kiko uh hi. Tua ciangin Levi mi Jeshua, Kadmiel, Bani, Hashabneiah, Sherebiah, Hodiah, Shebaniah, leh Pathahiah-te in, “Ding un, Topa na Pasian uh phat un la, ‘A tawntung pan a tawntung dongin a minthang na min in thupha ngah a, thupha khempeuh leh phatna dang khempeuh sangin sangzaw hi. Nang bek in Topa na hi hi; nangmah in van sangpen vantung a, aksihonpite tawh, leitung leh a tunga om khempeuh, tuipi leh a sunga om khempeuh na bawl hi. Nangmah in tuate khempeuh na piangsak a, vantungmi honpi in Nang hong bia uh hi. Nangmah in Abram teelin Khaldea gam Ur khuapi panin paikhiatpihin Abraham min a phuak Pasian, Topa na hi hi. Nangma tungah amah a cihtakna na mu a, Kanaan mite gam, Hit mite gam Amor mite gam, Perez mite gam, Jebus mite gam, leh Girgash mite gam, amah leh a suan leh khakte tungah piak dingin ama tungah thuciamna khat na bawl hi. Nangmah thuman na hih manin na thuciamna na tungsak hi. “ ‘Nangmah in Izipt gamsunga ka pute ka pate uh gimna mu-in huhna ngenin San Tuipi-ah hong kikona uh na za a, amaute in ka pute ka pate uh kihihsakna tawh a hih gawpna thei na hih manin Faro leh a nasemte leh a gam mi khempeuh langpanin lim leh nalamdang na bawl hi; tua hi a, tu ni dongin a kip min khat nangma adingin na ngah hi. Amaute’ mai-ah tuipi phelkham na hih manin tuipi laizang leikeu tungah amaute paisuak uh a, ahi zongin tuilianpi sunga suang lot bangin tui thukna sungah amau a delhte na lawn hi. Sunin meii khuam khat tawh amaute lam na lak a, amau’ lam paina khua a vaksak dingin zanin mei khuam khat tawh lam na lak hi. Sinai Mual tungah kumsukin, vantung panin amaute hopihin, amaute tungah a man thukhenna, thukham taktak, a hoih ngeinate leh thupiaknate na pia a, na nasempa Moses tung tawnin amaute tungah na sabbath siangtho na theisak a, thupiaknate, ngeinate, leh thukhamte na pia hi. A gilkialna uh a vahsak dingin vantung panin an na pia a, a dangtakna uh a phasak dingin suangpi panin tui na phulsak a, amaute tungah piak dingin na kiciamsa gamah lutin a luah nadingun amaute na sawl hi. “‘Ahi zongin kote’ pute pate kihisakin lung khauh uh a, na thupiaknate mang lo uh hi. Amaute in thu mang nuam lo uh a, amaute lakah na bawl nalamdangte ngaihsun kha lo uh hi; amaute lung khauh niloh uh a, a salsuahna uh Izipt-ah a paipih kik dingin makai khat seh uh hi. Ahi zongin nang in mawhna a maisak nuam, dikin hehpihna a nei, lungduai-in itna kip a nei Pasian na hi a, amaute na nusia tuan kei hi. Amaute in a kisung bawngno khat amau mah adingin bawlin, “Hih in Izipt panin note hong pai khiatpih na Pasian uh ahi hi,” ci-in gendai-mawhna lianpi a bawl uh ciangin zong, nang in na hehpih mahmah manin amaute gamlakah na nusia kei hi. Sunin lam a lak meii khuam in amaute nusia lo a, zanin a pai nading uh lampi a vaksak mei khuam in zong amaute nusia lo hi. Amaute a thuhilh dingin a hoih na Kha Siangtho na pia a, na manna an zong amaute kiang panin na la kik kei a, a dangtakna uh a phasak dingin tui na pia hi. Kum sawmli tawntung gamlakah amaute na vak a, amaute in bangmah tangsapna nei lo uh hi; a puante uh zong sia lo a, a khe uh zong bawk beek lo hi. Nangmah in amaute tungah kumpi gamte leh mite na pia a, tuate in gal sung van ngah dingin na piak ahi hi. Tua ahih ciangin amaute in Heshbon kumpipa Sihon’ gam leh Bashan kumpipa Og’ gam luah uh hi. Nangmah in amau’ suan leh khakte van-a aksi zahin sim zawh lohin na tamsak a, a pu a pate un a luah dingin piak dingin na ciamsa gamah amaute na paipih hi. A suan a khakte uh tua gamah lutin a lak uh ciangin, amau’ mai-ah tua gam-a teeng Kanaan mite na nuaisiah a, a ut bang bangun a bawl dingun a kumpite leh a mite amau’ khut sungah na pia hi. Tua hi a, amaute in kulh nei khuapite leh gam hoihte la uh a, na hoih tampi tawh a kidim innte, suang kikhuak tuibeemte, leenggui lote, oliv lote, leh nek theih singgah kung tampi luah uh hi; amaute in tuate ne-in gilvahin thau uh a, nangma hoihna hangin nuamsa mahmah uh hi. “‘Ahi zongin amaute in dem nopna lungsim nei-in nang hong lehdo uh hi; amaute in na thukham nungngat uh a, nangma lamah hong ciahkik nadingun amaute a hilhkhol na kamsangte that uh a, amaute in gendai-mawhna lianpi bawl uh hi. Hih thu hangin a galte uh khut sungah amaute na ap a, a galte un amaute hih gawpgawp uh hi. Ahi zongin amau a kihih gawpgawp hun ciangin nang tungah hong ko uh a, nangmah in vantung panin na za a, na hehpihna lianpi tawh amau’ galte kiang panin a honkhia ding honkhiate na puak hi. Ahi zongin a tawldam khit uh ciangin nangma muhna ah a sia gamta zel uh a, nangmah in amau’ galte khut sungah na nusia a, a galte un amaute ukgawp uh hi. Ahi zongin amaute in nang tungah huhna hong nget uh ciangin vantung panin amau’ ngetna za-in na hehpihna tawh amaute tam veipi na honkhia hi. Tua hi a, na thukham lamah amaute hong kihei kik nading lim takin amaute na hilhkhol a, ahi zongin amaute kihisakin na thupiaknate don lo uh hi; a zuite tungah nuntakna a pia thei ahi na ngeina kip tungah amaute khial uh hi. Lung khauhin phengphi-in amaute kiheikhia uh a, thu mang nuam lo uh hi. Kum tampi sung lungduaina tawh amaute na thuak a, na kamsangte tung tawnin na Kha Siangtho tawh amaute na hilhkhol hi; ahi zongin amaute in ngai nuam lo uh hi. Tua ahih ciangin gamdang mite khut sungah amaute na pia hi. Ahi ta zongin na hehpihna lian hangin amaute beisak loin, zong na nusia kei hi; bang hang hiam cih leh nangmah in dikna leh hehpihna a nei na hi hi. “‘Tua ahih ciangin tu-in a lian, a vanglian, a kihtakhuai, itna tawh kipawl thuciamna kip takin a len kote’ Pasian aw, Assiria kumpite’ hun-a kipan tu ni dongin ka kumpite uh, ka uliante uh, ka siampite uh, ka kamsangte uh, ka pu ka pate uh leh ko mi khempeuh tungah hong tung gimnate hong neu ngaihsut sak kei in. Kote tungah hong tungsa thu khempeuh ah nangmah a thutang na hi a, nang citakin a om na hi a, ko a khial gamtat kha ka hi uh hi. Ka kumpite uh, ka uliante uh, ka siampite uh leh ka pu ka pate un nangma thukham zui lo uh a, amaute tungah na piak ahi na thupiaknate leh na hilhkholhnate zong don lo uh hi. Amaute tungah na piak gamzai leihoih ah omin, amaute tungah na piak hauhna lianpi tawh nuamsa-in amau’ kumpite’ khut nuai-ah a om laitak nangawn-un amaute in nangma’ na hong sem lo uh a, gamtat hoih lote uh nusia lo uh hi. Tu-in kote sal ka hi uh hi; ka pu ka pate un a leitang pan-a piangte ne-in a na hoih khempeuhte nuam tak-a a ngah nadingun na piak gam hih lai munah kote sal ka hi ta uh hi. Tu-in leitang tunga piang khempeuh pen kote’ mawhna hangin kote tungah nong koih kumpite tungah tung ta hi. Tua kumpite in kote pumpi tungah thu hong nei-in, ka ganhingte uh a ut ut-un hong hihsak uh a, kote lungkham mahmahin ka om uh hi,’ ci un,” a ci uh hi. Hih thute khempeuh hangin a kip thuciamna khat bawlin lai-in ka gelh uh a, ka uliante uh, ka Levi mite uh leh ka siampite un zong tua lai tungah a min uh gelh uh hi. Tua lai tungah a min a gelh mite in Hakaliah’ tapa, gam ukpa Nehemiah, Zedekiah, Seraiah, Azariah, Jeremiah, Pashhur, Amariah, Malkhijah, Hattush, Shebaniah, Malluk, Harim, Meremoth, Obadiah, Daniel, Ginnethon, Baruk, Meshullam, Abiah, Mijamin, Ma-aziah, Bilgai, Shemaiah; hih teng pen siampite ahi uh hi. Tua ciangin Levi mite sung pan: Azaniah’ tapa Jeshua, Henadad’ suante sung pan Binnui, Kadmiel, Shebaniah, Hodiah, Kelita, Pelaiah, Hanan, Mika, Rehob, Hashabiah, Zakkur, Sherebiah, Shebaniah, Hodiah, Bani, Beninu ahi uh hi. Ukpite’ sung panin: Parosh, Pahathmoab, Elam, Zattu, Bani, Bunni, Azgad, Bebai, Adonijah, Bigvai, Adin, Ater, Hezekiah, Azzur, Hodiah, Hashum, Bezai, Harif, Anathoth, Nebai, Magpiash, Meshullam, Hezir, Meshezabel, Zadok, Jaddua, Pelatiah, Hanan, Anaiah, Hoshea, Hananiah, Hasshub, Hallohesh, Piha, Shobek, Rehum, Hashabnah, Ma-aseiah, Ahiah, Hanan, Anan, Malluk, Harim, Baanah-te ahi uh hi. A om lai mite siampite, Levi mite, kongcingte, lasate, biakinn nasemte, a zite a tapate leh a tanute, thu teltheihna a nei, Pasian thukham hangin gamdang mite panin a tuam om mi khempeuh in a sanggam uh ahi, amau’ makaite pawmin, Pasian’ nasem Moses in a piak Pasian’ thukham zui-in, eite’ Topa ahi Topa ’ thupiakna khempeuh, ama ngeinate leh ama thukhamte a zuih nading uh kiciamna bawl uh hi. Gamdang mite tungah i tanute i kha kei ding a, i tapate’ zi dingin zong i la kei ding hi. Hih mite in sabbath ni-in van ahi a, an ahi zongin hong zuak leh sabbath ni leh ni siangtho khat peuhpeuh ni-in i lei kei ding hi. Kum sagihna-a an piangte lo-ah nusia-in tua kumin leiba khempeuh i maisak ding hi. Tua ciangin thukham sunga a kigelh bangin a kiseh hunin a kum kumin Topa eite’ Pasian’ biakna tau tungah beh a ban banin i Pasian’ inn sungah cih dingin sing a kitut nadingin siampite, Levi mite, leh ko mi vekpite in sing pua ding sehna ai ka saan uh hi. I leitang panin a piang anpalte leh singgah kungte panin a gah masa khempeuh a kum kumin Topa ’ innah i puak ding ka kiciam uh hi; thukham sunga a kigelh mah bangin, i Pasian’ innah a om, i Pasian’ inn sungah na a sem siampite kiangah zong i tapa upapente leh i bawngte’ tacilte, leh i ganhonte’ tacilte leh i tuuhonte’ tacilte i paipih nading, leh annel lom i meek masakpen siampite tungah i puak ding, leh gah nei sing khempeuh panin a gah masa, sathau leh leenggahzu thakte khempeuh i Pasian’ inn vankoihna-ah i puak ding, leh lo khawhna i khuaneute khempeuh ah sehsawm suah sehkhat a kaikhawmte in Levi mite ahih manin i leitang panin i sehsawm suah sehkhat khempeuh Levi mite kiangah i puak ding ka kiciam uh hi. Levi mite in sehsawm suah sehkhat a khop uh ciangin Aaron’ suan siampite tawh hih khawm ding uh hi; tua ciangin Levi mite in i Pasian’ inn sunga vankoihna a kilawm mun inndeite ah sehsawm suah sehkhat sungpan sawm-ah khat puak ding uh hi. Bang hang hiam cih leh biakinn um-le-beelte a kikoihna inndeite leh na a sem siampite, kongcingte leh lasate a giahna inndeite ah Israel mite leh Levi mite in a kipia ante, leenggahzute leh sathaute a paipih ding uh ahi hi. Eite’ Pasian’ inn kin loin i om kei ding hi. Tua ciangin Jerusalem ah mi makaite teeng uh hi; tua lo midang teng, amau’ lak pan mi sawm-ah khat, khuapi siangtho Jerusalem ah a teeng dingin aisaanna tawh kiteel uh a, a om lai mi sawm-ah kuate ahih leh khuapi dangte ah om uh hi. Tua hi a, sawl lohin, Jerusalem ah amau thu-in a teeng tawm nuam khempeuhte tungah mite lungdam uh hi. Hih anuai-ate in Jerusalem-a a teeng a uksawn ukpite ahi hi; ahi zongin Judah khuapi dangte ah Israel midangte, siampite, Levi mite, biakinn nasemte, leh Solomon’ nasemte’ suan leh khakte teeng uh a, amau’ neihsa, a khuapi ciat uhah teeng uh hi. Judah minam leh Benjamin minam sung panin mi pawlkhat zong Jerusalem ah teeng uh hi. Judah minam sung panin: Perez’ suan Mahalalel, a tapa Shefatiah, a tapa Amariah, a tapa Zekhariah, a tapa Uzziah, a tapa Athaiah’ suante, leh Shelah’ suan Zekhariah, a tapa Jo-i-arib, a tapa Ada-iah, a tapa Hazaiah, a tapa Kolhozeh, a tapa Baruk, a tapa Ma-aseiah’ suante ahi uh hi. Jerusalem ah a teeng Perez’ suante khempeuh in galhang mi za li leh sawmgiat-le-giat pha uh hi. Benjamin minam sung panin: Jeshaiah’ tapa Ithiel, a tapa Ma-aseiah, a tapa Kolaiah, a tapa Pedaiah, a tapa Joed, a tapa Meshullam, a tapa Sallu’ suante, leh a beh Gabbai leh Sallai hi uh a, mi za kua leh sawmnih-le-giat pha uh hi. Zikri’ tapa Joel in amau’ mapi hi a, Hassenuah’ tapa Judah in khuapi uk a nihnapa ahi hi. leh inn nasep a sem a behte hi uh a, mi za giat leh sawmnih-le-nih pha uh hi; tua ciangin Malkhijah’ tapa Pashhur, a tapa Zekhariah, a tapa Amzi, a tapa Pelaih, a tapa Jeroham, a tapa Ada-iah, leh beh lutang ahi a beh dangte hi a, za nih leh sawmli-le-nih pha uh hi; tua ciangin Immer’ tapa Meshillemoth, a tapa Ahzai, a tapa Azaral, a tapa Amashai, leh a thahat a vanglian a behte hi a, mi za khat leh sawmnih-le-giat pha uh hi; Haggedolim’ tapa Zabdiel in amau’ mapi ahi hi. Levi mite sung panin: Bunni’ tapa Hashabiah, a tapa Azrikam’ tapa Hashub’ tapa Shemaiah, leh Pasian’ inn pualam nasep a uk, Levi mi ukpite ahi Shabbethai leh Jozabad, leh lungdam koh thungetna patkhiat ding a makai Asaf, a tapa Zabdi, a tapa Mika, a tapa Mattaniah, leh a sanggamte lakah a nihna ahi Bakbukiah, leh Jeduthun’ tapa Galal, a tapa Shammua, a tapa Abda’ suante beh ahi uh hi. Khuapi siangtho sunga Levi mi a om khempeuh mi za nih leh sawmgiat-le-li pha uh hi. Kongpite a vil kongcingte in Akkub, Talmon leh a behte hi uh a, mi za khat leh sawmsagih-le-nih pha uh hi. A om lai Israelte, siampite leh Levi mite ahih leh Judah khuapi dangte ah om uh a, amau’ luah leitang ciatah teeng uh hi. Ahi zongin biakinn nasemte ahih leh Ofel mualbo-ah teeng uh a, Ziha leh Gishpa in amaute uk uh hi. Jerusalem a, Levi mite ukin Pasian’ inn nasepna a vaanpa in Mika’ tapa Mattaniah, a tapa Hashabiah, a tapa Bani, a tapa Uzzi hi a, amah in lasa Asaf’ suante sung pan ahi hi. Tuate beh in kumpipa’ thupiakna tawh nasem uh a, tua lasate in ni simin na a sep ding uh kisam hi. Tua ciangin Judah’ tapa Zerah, a tapa Meshezabel, a tapa Pethahiah in mite tawh kisai thu khempeuh ah kumpipa zatpen ahi hi. Khuaneute leh a kiim-a lote tawh kisai-in: Judah mi pawlkhatte’ teenna in, Kiriath-arba leh a khuaneute, Dibon leh a khuaneute, Jekabze-el leh a khuaneute, Jeshua, Moladah, Bethpelet, Hazarshual, Be-ersheba leh a khuaneute, Ziklag, Mikonah leh a khuaneute, Enrimmon, Zorah, Jarmuth, Zanoah, Adullam, a khuaneute uh, Lakhish leh a lote, Azekah leh a khuaneute ahi hi. Tua hi a, amaute in Be-ersheba panin Hinnom Kuam dongah teeng uh hi. Tua ciangin Geba, Mikmash, Aija, Beth-el leh a khuaneute, Anathoth, Nob, Ananiah, Hazor, Ramah, Gittaim, Hadid, Zeboim, Neballat, Lod, Ono, leh Geharashim khuate-ah Benjamin mite teeng uh hi. Tua ciangin Judah gam a, Levi mite pawlkhat Benjamin gamah kigawm hi. Shealtiel’ tapa Zerubbabel leh Jeshua tawh hong ciahkik siampite leh Levi mite in: Seraiah, Jeremiah, Ezra, Amariah, Malluk, Hattush, Shekaniah, Rehum, Meremoth, Iddo, Ginnethoi, Abijah, Mijamin, Ma-adiah, Bilgah, Shemaiah, Jo-i-arib, Jedaiah, Sallu, Amok, Hilkiah, leh Jedaiah-te ahi uh hi. Hihte in Jeshua’ hun lai-in siampite leh a sanggamte uh lakah a ukpite ahi uh hi. Levi mite sung panin: Jeshua, Binnui, Kadmiel, Sherebiah, Judah leh Mattaniah hi a, amah in a sanggamte tawh lungdam kohna late a uk hi. Tua ciangin a sanggamte uh Bakbukiah leh Unni in amaute tawh kigal sai-in nasem uh hi. Tua hi a, Jeshua in Joiakim’ pa, Joiakim in Eliashib’ pa, Eliashib in Joiada’ pa, Joiada in Jonathan’ pa, Jonathan in Jaddua’ pa ahi hi. Tua ciangin Joiakim’ hun lai-in beh lutang ahi siampite in: Seraiah’ suante sung panin Meraiah; Jeremaiah suante sung panin Hananiah; Ezra’ suante sung panin Meshullam; Amariah’ suante sung panin Jonathan; Mallukhi’ suante sung panin Johohanan; Shebaniah’ suante sung panin Josef; Harim’ suante sung panin Adna; Meraioth’ suante sung panin Helkai; Iddo’ suante sung panin Zekhariah; Ginnethon’ suante sung panin Meshullam; Abijah’ suante sung panin Zikri; Miniamin’ suante sung panin mi khat; Moadiah’ suante sung panin Piltai; Bilgah’ suante sung panin Shammua; Shemaiah’ suante sung panin Jehonathan; Jo-i-arib’ suante sung panin Mattenai; Jedaiah’ suante sung panin Uzzi; Sallai’ suante sung panin Kallai; Amok’ suante sung panin Eber; Hilkiah’ suante sung panin Hashabiah; Jedaiah’ suante sung panin Nethanel ahi uh hi. Eliashib, Joiada, Johanan, leh Jaddua-te’ hun lai-a beh lutangte leh siampite ahih leh Persia kumpipa Darias hun ciang dong Khang Tangthu Laibu sungah kiciamteh hi. Levi mite beh sung panin beh lutangte pen Eliashib’ tupa Johanan’ hun ciang dong Khang Tangthu Laibu sungah kigelh hi. Tua ciangin Levi mi ukpite in: Hashabiah; Sherebiah, Jeshua, Binnui, leh Kadmiel hi uh a, Pasian’ mi David’ thupiakna bangin a ban banin phatna lasa ding leh lungdam ko dingin a sanggamte uh tawh na a sem ding uh ahi hi. Mattaniah, Bakbukiah, Obadiah, Meshullam, Talmon, leh Akkubte in vankoihna kongpite a cing kongcingte ahi uh hi. Hih in Jozadak’ tapa Jeshua, a tapa Joiakim’ hun leh gam ukpa Nehemiah leh siampi hi-in lai theipa zong ahi Ezra-te’ hun lai-a vaihawmna ahi hi. Tua ciangin amaute in daltuahte, harp lasaknate, laiza lasaknate tawh lungdam ko-in lasa-in lungdamna tawh kulhpi apna a bawl dingin Jerusalem ah hong pai theih nadingun Levi mite a omna khempeuh uhah zong uh hi. Tua hi a, Jerusalem kiim leh Netofah mite’ khuaneute panin Levi mi lasate hong kikaikhawm uh hi. Bethgilgal khua leh Geba kiimnai leh Beth-azmaveth khua panin zong hong pai uh hi; bang hang hiam cih leh lasate pawl in Jerusalem kiimah amau’ adingin khuaneute sat uh hi. Tua ciangin siampite leh Levi mite amau mah kisian’suah tawm uh a, tua khit ciangin mite leh kongpite leh kulhpi sian’suah uh hi. Tua ciangin khuapi kulhzang ah Judah mi uliante ka paipih a, lam pai kawmin lungdamna ko dingin pawl lian nih ka seh hi. Kulhzang panin pawlkhatte taklam manawhin Nin Kongpi lamah pai uh hi. Tuate’ nungah Hoshaiah leh Judah uliante kimkhat, leh Azariah, Ezra, Meshullam, Judah, Benjamin, Shemaiah, leh Jeremiah, leh siampi pawlkhat peengkul tawh: Asaf tapa Zakkur, a tapa Mikaiah, a tapa Mattaniah, a tapa Shemaiah, a tapa Jonathan, a tapa Zekhariah, leh ama behte Shemaiah, Azarel, Milalai, Gilalai, Ma-ai, Nethanel, Judah, Hanani-te, Pasian’ mi David’ lasakna nate tawh pai uh a, tuate lakah lai theipa Ezra masa hi. Tuinak Kongpi panin kulh kahtohna David khuapi kahlei ah paito-in, David’ inn khengin nisuahna lam manawhin Tui Kongpi dongah pai uh hi. Lungdamna a ko a pawl dang khat pen veilam manawhin pai uh a, mi a kimkhat tawh amaute ka zui hi. Kulh tungah pai-in Meikhuk Tausang pan Kulh Zai-ah, tua panin Efraim Kongpi, tua ciangin Jeshanah Kongpi, tua ciangin Ngasa Kongpi, tua ciangin Hananel’ Tausang, tua ciangin Mi Za Khat Tausang, tua ciangin Tuu Kongpi-ah pai uh a, tua ciangin Thong Kongpi-ah khawl uh hi. Tua hi a, lungdamna a ko hih pawl nihte, Pasian’ innah ding uh a, uliante kimkhat leh kei ka omkhawm uh hi. Tua ciangin siampi Eliakim, Ma-aseiah, Miniamin, Mikaiah, Elio-enai, Zekhariah, leh Hananiahte a peengkulte uh tawh om uh a, Maaseiah, Shemaiah, Eleazar, Uzzi, Jehohanan, Malkhijah, Elam, leh Ezer zong om uh hi. Tua hi a, Jezrahiah makai-in lasate in lasa uh hi. Pasian in nakpi takin amaute lungdamsak ahih manin amaute in tua ni-in biak piakna lian tampi pia-in lungdam uh hi; numei naupangte zong lungdam uh hi. Tua hi a, Jerusalem khua sungah lungdamna awging gamlapi pek pan nangawnin kiza hi. Tua ciangin khuapite kiimah lo omte a golna leh a neuna tawh kizui-in siampite leh Levi mite’ adingin thukham sunga om bangin a kaihkhop ding uh a kipia nate, anpalte, leh sehsawm suah sehkhatte a koih nading uh vankoihna innte a uk dingin mi kiseh hi; bang hang hiam cih leh siampite leh Levi mite’ nasepna hangin Judah mi khempeuh lungdam mahmah uh hi. Tua hi a, David leh a tapa Solomon’ thupiakna tawh kizui-in lasate leh kongcingte mah bangin amaute in amau’ Pasian’ nasepte leh sian’suah nasep sem uh hi. Bang hang hiam cih leh David’ hun lai-in lasate a ukpi leh phatna leh Pasian tungah lungdam kohna a makai-in Asaf om hi. Zerubbabel leh Nehemiah’ hun lai-in Israel mite khempeuh in lasate leh kongcingte’ adingin a nisim tanh uh pia uh hi; tua ciangin amaute in Levi mite’ ading tuam koih uh hi; tua ciangin Levi mite in Aaron’ suante ading tuam koih sawn leuleu uh hi. Tua ciangin amaute in mipi’ zakin Moses’ laibute sim uh a, Pasian’ mite’ kikhopna ah Ammon mi leh Moab mite a kihel ngei loh nading thu kiphawk khia hi; bang hang hiam cih leh amaute in an leh tui tawh Israel mite na dawn lo uh a, amaute a samsia dingin Balaam cial zawsop uh hi. Ahi zongin i Pasian in tua samsiatna thupha-in hong heisak hi. Mite in hih thukham a zak uh ciangin Israel mite lak panin gamdang suan peuhmah khenkhia uh hi. Ahi zongin tua hun ma-in, i Pasian’ inn sung vankoihna inndeite a uk dingin a kiseh, Tobiah tawh a kimeltheih siampi Eliashib in, Levi mite, lasate, leh kongcingte’ adingin piak dingin a kisawl an tawh biakna, paknamtui, um-le-beelte, an sehsawm suah sehkhat, leenggahzu, leh sathau, leh siampite’ adingin a kipia nate a koihna ngei uh inndei lianpi khat, Tobiah’ adingin bawlsak hi. Babilon kumpi Artakzaksis in a uk kum sawmthum-le-nihna kumin ama kiangah pai ka hih manin hih thu a pian’ lai takin Jerusalem ah ka om kei hi. Tawl khat khit ciangin kumpipa kiangah a khuan ka ngen a, Jerusalem ah ka ciahkik hi. Tua ciangin Tobiah’ adingin Pasian’ inn huang sungah inndei khat a vaihawmsakna thu, Eliashib’ gamtat hoih lohna ka phawk khia hi. Hih thu ah lungkim hetlo ka hih manin inndei sung panin Tobiah’ van teng ka lawnkhia hi. Tua ciangin tua inndei a sian’sak nading uh, leh Pasian inn a, um-le-beelte an tawh biakna leh paknamtui tawh a koih kik nadingun thu ka pia hi. Levi mite’ ngah dingte amau’ tungah kipia lo ahih manin Levi mite leh lasate in a nasep ngeite uh nusia-in a lote uhah na a sepna uh zong ka phawk khia hi. Tua ahih ciangin uliante tungah ka lungkim kei a, “Bang hangin Pasian’ inn kinusiacip ahi hiam?” ka ci hi. Tua hi a, amaute kaikhawm kikin amau sepna ngei mun ciatah ka pangsak kik hi. Tua ciangin Judah mite khempeuh in an, leenggahzu, leh sathau sung pan sehsawm suah sehkhat hong paipihin vankoihna innte ah hong tun’ uh hi. Tua ciangin tua vankoihna innte a kem dingin siampi Shelemiah, lai thei Zado, leh Levi mi Pedaiah, leh amaute a huh dingin Mattaniah’ tapa Zakkur, a tapa Hanan ka seh hi; bang hang hiam cih leh amaute in mi muanhuai ahi uh hi. Amau’ nasep in a sanggamte uh tungah amau’ tanh ciat uh a hawmkhia ding ahi uh hi. Ka Pasian aw, hih thu tawh kisai-in kei hong phawk in la, ka Pasian’ inn leh a nasep nadingin ka sepsa gamtat hoihte maimangsak kei in. Tua hun lai-in Judah gam sungah mite in sabbath ni-in leenggah sukin, a khawhsate uh khawmin laate tungah suanin, leenggahzu, leenggah, theigah, leh van namkim, sabbath ni-in Jerusalem ah hong puakna ka mu hi; tua ni-in a an zuakna uh hangin ka lungkim lohna amaute tungah ka gen hi. Jerusalem khua sunga teeng Tai-ar khuamite in zong ngasa leh van namkim hong paipihin Judah mite tung leh Jerusalem khua sungah sabbath ni-in zuak uh hi. Tua ciangin Judah uliante tungah ka lungkim kei a, amaute kiangah, “Bang hangin hih bangin hoih lohna gamta-in, sabbath ni ninsak ngam na hi uh hiam? Na pu na pate uh tu-a bang teekin a gamtat manin eite tung leh hih khuapi tungah hih bang siatna khempeuh hong tung hilo ahi hiam? Tua hi napi-in note in sabbath nitsakna tawh Israel tungah hehna tamzaw na tungsak uh hi,” ka ci hi. Tua hi a, sabbath ni ding khuamial ciangin kongpite a kikhak nading ka sawl a, sabbath bei khit mateng a kihon’ loh nadingin thu ka pia hi. Tua ciangin, sabbath ni-in khua sungah van hong kilutpih loh nadingin kongpite a cing dingin ka nasemte pawlkhat ka koih hi. Tua ciangin sumbukte leh na nam tuamtuam a zuakte, khatvei nihvei khawng Jerusalem pua lamah giak uh hi. Ahi zongin amaute hilhkholin amaute kiangah, “Bang hangin kulh gei-ah giak na hi uh hiam? Nong giah kik uh leh note tungah thu kong bawl ding hi,” ka ci hi. Tua huna kipanin sabbath ni-in amaute hong pai nawn lo uh hi. Tua ciangin sabbath ni a siangtho-in a omsak theih nadingun amaute kisian’suah tawmin kongpite hong cin’ nadingun Levi mite ka sawl hi. Ka Pasian aw, hih thu ah zong hong phawk in la, na itna tawh kizui-in siatna panin kei hong pengsak in. Tua hun lai mah-in zong Judah mite in Ashdod numei, Ammon numei, leh Moab numeite a ten’pihna, leh a tate uh kimkhat in Ashdod kampau a zatna, leh Judah kampau zang thei loin, amau’ pau ciat bek a zat theihna thu ka mukhia hi. Amaute tai gawpin ka samsia a, pawlkhat satin a sam uh ka bawhsak gawp hi. Tua ciangin Pasian’ min tawh amaute ka kiciamsak a, “Note in amau’ tapate’ zi dingin na tanute na pia kei ding uh a, na tapate uh zi dingin ahi a, nomau’ zi dingin ahi zongin amaute’ tanu na la kei ding uh hi. Israel kumpipa Solomon zong tua bang numeite’ hangin khial hilo ahi hiam? Minam tampite lakah amah tawh a kibang kumpi khat zong om lo a, ama Pasian in amah itin, Israel khempeuh tungah kumpi-in amah koih hi; ahita zongin gamdang numeite in amah nangawn khialsak hi. Tua ahih ciangin note’ gamtatnate hong zui-in, gamdang numeite teen’pihna tawh hih siatna lian khempeuh gamta-in i Pasian tungah hong zuautat ding ka hi uh hiam?”ka ci hi. Siampi lian Eliashib’ tapa Jehoiada’ tapate khat in Horonaim khuami Sanballat’ makpa na hi hi; tua ahih manin keima kiang panin amah ka hawlkhia hi. Ka Pasian aw, amaute in siampi nasepna leh siampite leh Levi mite’ thuciamna siasak ahih manun amaute thei in. Tua bangin gamdang tawh a kizom nate khempeuh panin amaute ka siangsak a, siampite leh Levi mite a nasep ngei mah uh ka semsak kik hi. Tua ciangin a kiseh hunin zat dingin cih ding sing tawh biakna leh anpal tawh biak nading ka vaihawmsak hi. Ka Pasian aw, a hoih lamin kei hong phawk in. Hih lai-a kigen thu piangte pen India gam panin Ethiopia gam dong, gamneu za khat sawmnih-le-sagih a uk Ahasu-eras’ hun lai-a piang thu ahi hi. Hih hun lai takin kumpi khua ahi Susa khuapi sunga a kumpi tokhom tungah amah tu hi. Ama uk a kum thumna kumin ama nuai-a a uliante khempeuh leh a nasemte’ adingin pawi khat bawksak hi. Ama khut nuai-a om Persia leh Media galkapmangte leh ama nuai-a uliante leh a ma nuai-ah gam a uk sawnte a om lai takin, a kumpi gam hauhna leh ama thupi ziazuana ni tampi sung, ni za leh ni sawmgiat sung tak lak hi. Hih pawi hun a bei khit ciangin kumpi khua Susa khuapi sunga om mi lian mi neu mi khempeuh adingin kumpipa in pawi khat bawl hi; tua pawi pen kumpi inn huang sungah kibawl a, ni sagih kibawl hi. Tua huang sungah suangkang khuamte kiphut a, khau malneu leh khau dupsan tawh ngun kualte ah kikhihin a kikhai dalna puan pakte kikhungin, suangmanpha a san, a dum, a kang, leh a vom, a nam tuamtuamte kizangin a kizeem suangphah kiphah tungah kham leh ngun kibawl lupnate kikoih hi. Khamhai nam tuamtuamte tawh zu kihawm a, kumpipa’ hauhna tawh kituakin deih deihin zu kizang hi. Tua lai-ah zu nekna zia pen kihah piak cih om lo hi; bang hang hiam cih leh mi khempeuh in amau’ duh zahzah bek a neksak nading uh kumpipa in ama nuai-a uliante thupia hi. Tua banah Kumpinu Vashti in zong numeite’ adingin Kumpipa Ahasu-eras’ inn sung mah-ah pawi khat bawl hi. Ahih hangin Kumpinu Vashti in innsung mangte’ thu puak kumpipa’ sapna nial hi. Hih a nialna thu ah kumpipa heh mahmah a, a hehna hangin a sin sung so hi. Tua ciangin kumpipa in upadi siam a mi pilte thu dong hi; bang hang hiam cih leh upadi leh biakna lam thu theite khempeuh thu dotpen kumpipa’ zat ngei khat ahi hi; ama gei nai pen ah a tu, hun omzia a thei, Persia leh Media gam ulian sagihte ahi Karshena, Shethar, Admatha, Tarshish, Meres, Marsena, leh Memukante hi uh a, kumpipa kiangah a hawh thei, kumpi gam sungah ulian pente ahi uh hi. “Innsung mangte’ tung tawnin keimah Kumpi Ahasu-eras’ thupiakna bangin gamta lo ahih manin Kumpinu Vashti tungah upadi tawh kizui-in bangci kihih ding ahi hiam?” a ci hi. Tua ciangin kumpipa leh uliante’ zakin Memukan in dawng a, “Kumpinu Vashti khial hi; kumpipa tung bek hi loin Kumpipa Ahasu-eras’ ukna gam sung khempeuh a, om uliante leh mi khempeuh tungah zong a khial ahi hi. Kumpinu’ gamtatna thu numei khempeuh in thei ding uh a, hih thu hangin numeite in a pasalte uh simmawh ding uh hi; amaute in, ‘Kumpipa Ahasu-eras in ama kiangah a pai dingin Kumpinu Vashti thu pia napi-in pai lo hi,’ ci ding uh hi. Hih banga kumpinu’ gamtatna thu a za Persia leh Media gam numei liante in kumpipa nuai-a uliante tungah tu ni mahmah-in hih thu gen ding uh a, kisimmawhna leh kizahtak lohna tampi piangsak ding hi. Kumpipa in hoih nasak leh, kumpi thupiakna khat paisak in la, Kumpipa Ahasu-eras’ mai-ah Vashti a kilaak kik nawn loh nadingin a kikhel kik ngei nawn lo ding Persia mite leh Media mite’ upadi sungah gelhsak in; tua ciangin amah sangin a kilawm zaw numei khat ama za luahsak in. Tua banga kumpipa’ thupiakna thu kumpigam sung khempeuh ah a kizak ciangin numei khempeuh in a neu a lian amau’ pasal ciat zahtak ding uh hi,” a ci hi. Kumpipa leh uliante in hih ngaihsutna hoih sa uh a, Memukan’ gen bangin kumpipa gamta hi. Pasal khempeuh in ama innsung ukpa ahih nading leh ama kam a kizuih kim nadingin kumpipa’ ukna gam khempeuh ah amau’ lai ciat, leh mi khempeuh tungah amau’ pau ciatin laikhakte kigelh hi. Hih thu teng a pian’ khit, Kumpipa Ahasu-eras’ hehna a dam ciangin, amah in Vashti phawkin, Vashti’ gamtatna leh amah tawh kisai-in a thupiakna zong thei hi. Tua ahih ciangin kumpipa’ nasemte in ama kiangah, “Kumpipa’ adingin a meel hoih nungak khangnote zongsak in. Kumpi khua ahi Susa khuapi-a numeite’ omna-ah a meel hoih nungak khangno khempeuh hong paipih nadingun na ukna gam tuamtuam khempeuh ah uliante sawl in. Tua numeite pen numeite a uk, kumpipa’ innsung mang Hegai’ kep dingin ki-ap hen. Tua ciangin tua numeite tungah paknamtui tuamtuamte kiguan hen. Tua sung panin kumpipa’deih pen nungak in Vashti’ tangin kumpinu suak hen,” a ci uh hi. Kumpipa in hih ngaihsutna hoih sa a, tua bangin gamta hi. Tu-in kumpi khua Susa khuapi sungah Benjamin minam Kish, a tapa Shimei, a tapa Jair, a tapa Mordekai a kici Judah mi khat om hi. Amah pen, Babilon kumpipa Nebukhadnezzar in Jerusalem panin Judah kumpipa Jekoniah tawh a lak galmatte lak-a kihelte khat ahi hi. Amah in a innlak pate khat tanu’ a min masa Hadassah, a nung ciangin Esther a kici, khoi hi; bang hang hiam cih leh a nu leh a pa om nawn lo hi; tua numei a meel hoih-in a ngaih bang mahmah khat hi a, a nu leh a pa a sih ciangin Mordekai in ama tanu dingin la hi. Kumpipa’ thupiakna kithei kimin, Hegai’ kep dingin ap dingin kumpi khua Susa khuapi-ah numei tampi hong kipaipih ciangin, numeite a uk Hegai’ tungah ap dingin kumpipa’ innah Esther zong kipaipih hi. Amah in tua nungak hoihsa-in pakta mahmah ahih manin paknamtuite leh a annek ding pia pah a, kumpipa inn sung panin a kiteel nasem numei sagih zong guan a, amah leh a nasem numeite tungah numeite’ omna a hoih pen mun pia pah hi. Mordekai in khaam ahih manin Esther in ama nam leh phung gen khia lo hi. Esther bangci om a, ama tungah bang piang hiam cih a theih nadingin numeite’ omna inntual mai-ah ni simin Mordekai va pai zel hi. Numeite a kigin’ kholh hun a vekpi-in kha sawm-le-nih sung hi a, sathau leh mirrah paknamtui tawh kha guk sung kipuahin, paknamtui tuamtuamte leh kipuahna dangte tawh kha guk sung mah kipuah uh hi. Kigin’ kholhna hun cing a, Kumpipa Ahasu-eras kiangah numeite a pai ciangin numeite’ omna panin kumpipa’ innah a deih peuhpeuh uh kikengsak hi. Nitak-in kumpipa kiangah va pai a, a zingsang ciangin numeite’ omna a mun dang khatah kiciahsak a, kumpipa’ zineute a uk, kumpipa’ innsung mang Sha-ashgaz in kem hi. Kumpipa in a deihkik kei leh kumpipa kiangah pai kik nawn lo hi; kumpipa in a deih leh a min-in kisam kik hi. Mordekai in ama tanu dingin a lak a innlak pa Abihail’ tanu Esther pen kumpipa kiangah a pai ding hun a tun ciangin, numeite a uk kumpipa’ innsung mangpa Hegai’ gen teng lo buang bangmah dang gen lo hi. Tu-in Esther a mu mi peuhmah in hoih sa kim hi. Ama uk a kum sagihna, kha sawmna a hi Tebeth kha sungin kumpi inn sung Kumpi Ahasu-eras’ kiangah Esther a kipaipih ciangin, kumpipa in ama numei dangte khempeuh sangin it zaw a, a nungak dangte khempeuh sangin lim bawl zaw hi. Tua hi a, kumpi lukhu amah khusakin Vashti’ taangin kumpinu suaksak hi. Tua ciangin kumpipa in Esther pahtawina-in ama uliante leh a nasemte khempeuh’ adingin pawi lianpi khat bawl hi. Amah in ama ukna gam khempeuh ah tua ni nasep khawlin zum a khak nading uh zong thu zasak kim a, kumpipa’ min tawh a kilawm a kituak letsongte zong hawmkhia hi. Kumpipa’ kongtual-ah Mordekai om hi; ama hilhna tawh kizui-in Esther in ama minam ahi a, a innkuan ahi zongin pulak lo hi; Mordekai’ kep sungin ama thu a man’ mah bangin tu-in zong Mordekai’ gen bangin gamta hi. Ni khat, kongtualah Mordekai a om lai takin, kongcing ahi kumpipa’ innsung mangte Bigthana leh Teresh heh uh a, Kumpipa Ahasu-eras thah ding sawm uh hi. Hih thu Mordekai in phawkin Kumpinu Esther kiangah ko a, Esther in Mordekai’ hong thupuak ci-in kumpipa kiangah gen sawn hi. A thu kikanin a manna a kitheih ciangin khuampite tungah tua mi nihte gel kikhai lum hi. Hih thu piangte khempeuh kumpipa’ theihin kumpi Khang Tangthu Laibu sungah kiciamteh hi. Hih thute khit ciangin Kumpipa Ahasu-eras in Agag-te beh Hammeda-tha’ tapa Haman a za khangsak a, amah tawh a semkhawm ulian dangte khempeuh sangin a lianzaw-in bawl hi. Tua ahih ciangin kumpi huang sunga om kumpipa’ nasem khempeuh in Haman zahtak bawlin ama mai-ah kun uh hi; bang hang hiam cih leh tua banga a hih ding uh kumpipa in thupia hi. Ahih hangin Mordekai in amah zahtakna limin a mai-ah kun lo hi. Tua ciangin kumpipa huang sunga om kumpipa’ nasemte in Mordekai kiangah, “Bang hangin kumpipa’ thupiak mang lo na hi hiam?” a ci uh hi. Ni simin amaute in Mordekai kiangah gengen uh a, ahih hangin amah in mang nuam lo hi; Judah mi ahihna thu amaute kiangah gen khin ahih manin tua banga ama nialna a kimang ding mah ahi hiam cih a theih nadingun Haman’ kiangah a thu ko uh hi. Ama mai-ah Mordekai a kun lohna, amah a zaktak bawl lohna a theih ciangin Haman nak heh mahmah hi. Amah in Mordekai’ mipihte a theih ciangin amah bek suk taak sa lo a, Ahasu-eras’ kumpi gamsung khempeuh a, a om Judah mi khempeuh, Mordekai leh a minam buppi-in a suksiat theih nading lampi zong hi. Kumpi Ahasu-eras’ uk a kum sawm-le-nihna, kha masa pen ahi Nisan kha-a kipanin a ni ni a kha kha-in Pur a kici aisanna tawh Haman’ muhin ai kisaan a, a kha sawm-le-nihna Adar kha a ni sawm-le-thum ni-in ai pha hi. Tua ciangin Haman in Kumpipa Ahasu-eras’ kiangah, “Na ukna gam tuamtuam sunga mite lakah a om kawikawi, amau a tuam om mi pawl khat om hi. Amau’ ngeinate pen midangte’ aa tawh kibang lo hi; amaute in nangma thukhamte zui lo uh hi. Tua ahih manin hih mite na hici khahkhong ding kilawm lo hi. Kumpipa in hoih nasak leh amaute a kisuksiat nading thu pia-in lai-in gelh in; tua hi leh nangma sumkholna sungah koih dingin na khut nuai-a na uliante tungah ngun talen tul sawm ka pia ding hi,” a ci hi. Tua ahih ciangin kumpipa in ama khut tung panin a min thuhna zungbuh suahin Judah mite’ gal, Agag-te beh Hammedatha’ tapa Haman tungah pia hi. Tua ciangin kumpipa in Haman kiangah, “Na sum cihte leh na mi cihte nangmah kong pia hi; na ut bangbangin bawl in,” a ci hi. A kha masa a ni sawm-le-thum ni-in kumpipa’ lai-atte khempeuh kisam a, Haman’ genna tawh kizui-in kumpipa’ nuai-ah gam tampi a uk sawnte, gam khat a uk sawnte leh gam uk sawnte’ khut nuai-ah a mi tuamtuamte lakah uliante tungah lai kipaisak hi. Gam khempeuh ah amau’ lai ciat, mi khempeuh tungah amau’ pau ciatin kigelh hi. Hih lai pen Kumpipa Ahasu-eras’ min tawh kigelhin kumpipa’ min thuhna zungbuh tawh min kithuh hi. Tua bangin kumpipa’ ukna gam khempeuh ah laitaite lai kipiasak a, Adar kha ahi a kha sawm-le-nihna a ni sawm-le-thum ni, ni khat sungin Judah mi a moi a ham, numei naupang, a vekpi-in susia-in, thatin, a beisak mang nading uh, leh a neihsate uh a laksak nadingun thu kipia hi. Tua a ni seh ni-in amaute a baihsa-in a om theih nadingun hih thupiakna lai pen gam khempeuh ah dal khat ciat kipuakin tua thu pen a gamsung mi khempeuh tungah a kizasak kim ding ahi hi. Kumpipa’ thupiakna tawh laitaite kinawh sawl a, hih thupiakna pen kumpi khua Susa khuapi panin a kihawmkhia ahi hi. Kumpipa leh Haman zu ne-in om uh a, ahi zongin Susa khuapi sung buai mahmah hi. Mordekai in hih thu piang teng a theih ciangin a puan balkekin puanhampi silhin vut kibuak a, nakpi takin kap kawmin khua sungah vak kawikawi hi. Puanhampi silh kawmin kongpi-ah kuamah kilutsak lo ahih manin kumpi inn kongpi panin a kimuhna mun ciangah pai hi. Kumpipa’ thupiakna a tun’na gam Judah mite’ omna khempeuh ah nakpi tak-a thuumna leh tauna, an tan’na, kahna, leh dip humna om hi. Mi a tamzaw in puanhampi silhin vut lakah lum uh hi. Esther’ nasem numeite leh a innsung mangte hong pai-in ama kiangah tua thu a gen ciangin kumpinu in lamdangsa mahmah hi. A puanhampi a laih nadingin amah in Mordekai ading puante khak a, ahih hangin Mordekai in tuate na sang lo hi. Tua ciangin Esther in ama na a sem dingin a kiseh, kumpipa’ innsung mangte lak panin Hathak a kici mipa samin hih thu in bang hi a, bang a cih nopna hiam ci-in Mordekai tung panin thu a va kan dingin sawl hi. Kumpi inn kongpi mai-a om khuapi kongzing tualpi-a om Mordekai kiangah Hathak va pai a, Mordekai in ama tunga thu piangte khempeuh leh Judah mite sukmang nadingin kumpipa’ sumkholna-ah Haman in piak ding a sum ciam zah thute khempeuh ama kiangah na gen hi. Amaute a kisukmang nadingin Susa khua panin a kihawmkhia lai dal khat zong Mordekai in ama tungah pia a, amah in Esther tungah tua lai na pia-in a thu a na gentel nading leh, kumpipa kiangah Esther na pai-in ama mipihte adingin a na thuumsak ding zong sawl hi. Hathak zong ciahin Mordekai’ thugen teng Esther kiangah va gen hi. Tua ciangin Esther in Hathak mah sawl kikin Mordekai tungah thu zasak a, “Numei ahi a, pasal ahi zongin sap lohpi-in mi khat peuhpeuh kumpipa’ omna inn sungah a va lut leh upadi khat bek om a, tua in: thah ding ahi hi; kumpipa in ama lamah a kham kumpi ciangkhut a na zan leh tua mipa suakta bek ding ahihna thu kumpipa’ nasemte leh ama ukna gam mi khempeuh in a theih ciat uh ahi hi. Tu-in kumpipa kiangah a pai dingin hong kisap loh zawh ni sawmthum bang pha ta hi,” a ci hi. Tua hi a, Esther’ thugen teng Mordekai tungah gen uh hi. Tua ciangin Mordekai in Esther a dawn’ kikna thu amaute mah puasak a, “Kumpi inn sungah na omna hangin Judah mi khempeuh lak panin nang a suakta tuan dingin kingaihsun kei in. Hih bang hunin bangmah hih lo-in na om cip leh, Judah mite’ suahtak nading leh noptuam nading thu mun dang khat pan hong piang veve ding a, ahi zongin nangmah leh na innkuanpihte i si mang ding uh hi. Hih kumpi inn na tun’na pen hih bang hun-a mah dinga tung na hih mel zong kua’n thei ahi hiam?” a ci hi. Tua ciangin Esther in Mordekai a dawn’na amaute puasak a, “Pai-in Susa khua sunga om Judah mi khempeuh khawm in la, keimah ngaihsutna-in an na tang un; a sun a zan ci loin ni thum sung an ne lo, tui dawn loin na om un. No tan’ mah bangin kei leh ka nasem numeite in zong ka na tang ding uh hi. Tua khit ciangin ngeina ahih loh hangin kumpipa kiangah ka va pai ding hi; ka sih leh zong a si ka hi ding hi,” a ci hi. Tua ahih ciangin Mordekai pai-in Esther’ sawl bang teekteekin gamta hi. A ni thum ni-in Esther in a kumpi puan silhin kumpipa’ inntual sung nungah ding-in kumpi inn lam nga hi; kumpi inn sung a kumpi tokhom tungah kumpipa tu-in kongpi lam nga hi. Inntual ah Kumpinu Esther ding-a om kumpipa in a muh ciangin Esther in kumpipa’ maipha ngah a, kumpipa in a khut-a a tawi kham ciangkhut pen Esther’ lamah zan hi. Tua ciangin Esther in hong naihin tua ciangkhut dawn va lawng hi. Tua ciangin kumpipa in ama kiangah, “Kumpinu Esther aw, bang thu ahi hiam? Kei tungah nong nget peuhpeuh, ka kumpi gam phel khat ciang dong, nang tungah hong kipia ding hi,” a ci hi. Tua ciangin Esther in, “Nong hehpih zawh leh, kumpipa’ adinga kong bawlsak nitak an ne dingin tu ni-in Haman tawh hong pai un,” a ci hi. Tua ciangin kumpipa in, “Esther’ deih bangin i gamtat theih nadingin manlangin Haman va sam un,” a ci hi. Tua ahih manin Esther’ bawlsa nitak an ne dingin kumpipa leh Haman hong pai uh hi. Amaute in zu a nek lai takun kumpipa in Esther kiangah, “Nong nget peuhpeuh hong kipia ding hi. Nong nget peuhpeuh ka kumpi gam phel khat ciang dong hong kipia ding hi,” a ci hi. Esther in dawngin, “Nang tung panin kong nget nop kong thum nop thu in: “Topa aw, nong hehpih zawh a, na lung a kim a, kong nget thu nong piak zawh ding leh, note gel’ adingin ka na bawl an ne dingin zing ciangin kumpipa leh Haman hong pai un. Zing ciangin nong cih bangin ka deihna kong gen ding hi,” a ci hi. Tua ahih ciangin lungdam kipakin tua ni-in Haman ciah hi. Ahih hangin kongpi-a om Mordekai in amah zahtakna limin ama mai-ah ding lo, kun lo-a om a muh ciangin Mordekai tungah nakpi takin heh hi. Ahi zongin Haman ki-iip tentanin innah ciah hi. Tua ciangin a lawmte leh a zi Zeresh sam a, ama hauhna teng, a tapa neih teng, kumpipa in amah a pahtak manin a za khan’ sakna teng, leh kumpipa’ nasemte leh ulian dangte khempeuh sangin a lianzawin amah a koihna thute khempeuh amaute tungah gen in lak hi. Tua ciangin Haman in, “Hih teng bek hi nai lo lai hi; Kumpinu Esther nangawn in ama bawlsa an kumpipa tawh a ne khawm dingin kei sim loh mi dang kuamah paisak lo hi. Zing ciangin zong kumpipa tawh kei hong sam khawm hi. Ahi zongin kumpipa’ kongpi-a tu Judah mi Mordekai ka muh lai teng hih thute khempeuh a mawkna suak zel hi,” ci lai hi. Tua ciangin a zi Zeresh leh a lawmte khempeuh in ama kiangah, “Pi sawmsagih-le-nga a sang khuam phutsak in la, tua tungah Mordekai a kikhai lup nadingin zing ciangin kumpipa kiangah gen in; tua ciangin nitak an ne dingin lungnuam takin kumpipa tawh pai in,” a ci uh hi. Haman in hih ngaihsutna hoih sa a, a khuam phutsak hi. Tua zan-in kumpipa ihmu thei lo a, nisim thupiang ciamtehna Khang Tangthu Laibu lasak a, ama zakin tua laibu kisim hi. Tua banga kisim ciangin, kongcingte’ sung panin innsung mang Bigthana leh Teresh in Kumpipa Ahasu-eras thah a sawmna thu pen Mordekai in a genna thu a kiciamtehna sim kha uh hi. Tua thu a zak ciangin kumpipa in, “Hih thu hangin Mordekai’ tungah pahtawina ahi a, minliatna ahi zongin bang kipia ahi hiam?” a ci hi. Tua lai-a a om kumpipa’ nasemte in Mordekai tungah bangmah a kipiak lohna thu gen uh hi. Tua ciangin kumpipa in, “Hih kiim nai-ah kua om hiam?” a ci hi. Tua lai takin Mordekai thah nadingin a phuhsa khuam tungah Mordekai khai lup nading thu kumpipa kiangah a gen dingin kumpi huang sungah Haman hong tum hi. Tua ahih ciangin kumpipa’ nasemte in ama kiangah, “Hih lai-ah Haman om hi, inntual ah ding hi,” a ci uh hi. Tua ciangin kumpipa in, “Amah hong tumsak un,” a ci hi. Tua ahih ciangin Haman hong tum a, kumpipa in ama kiangah, “Kumpipa in a pahtawi nop mipa tungah bang kihih leh hoih na sa hiam?” a ci hi. Tua ciangin Haman in a lungsimah ngaihsun a, “Kumpipa in kei sangin a pahtawi nop zawk ding kua om zenzen ding hiam?” ci-in ngaihsun hi. Tua ahih manin Haman in kumpipa kiangah, “Kumpipa in a pahtawi nop mipa adingin kumpipa mahmah in a silh kumpi puante, leh kumpipa a tuan’na sakol a lukhu tawh lasak in. Tua ciangin kumpipa’ ulian pen khat tungah tua kumpi puante leh sakol apsak in. Kumpipa in a pahtawi nop mipa pen amah zeemsak in la, tua ciangin khua sung kongzing lampi-ah sakol tungah a tuangsa-in na ulian penpa kaisak in la, ama mai-ah kiko sakin, ‘Kumpipa in a pahtawi nop mipa tungah hih bangin kibawl ding hi,’ cisak in,” a ci hi. Tua ciangin kumpipa in Haman kiangah, “Na cihsa bangin manlangin kumpi puante leh sakol la pah in la, kongpi-a om Judah mi Mordekai tungah hih thute khempeuh hih in. Na gensate khat beek siit kei in,” a ci hi. Tua ahih ciangin Haman in kumpi puante leh sakol la-in Mordekai zeem a, khuapi sung kongzing lampi-ah amah tuangsakin, “Kumpipa in a pahtawi nop mipa tungah hih bangin kibawl ding hi,” ci-in taangko hi. Tua ciangin kumpipa’ kongpi-ah Mordekai ciahkik hi. Haman ahih leh kilukhuhsa-in a thuum kawmin a innah ciah pah vingveng hi. Tua ciangin Haman in a zi Zeresh leh a lawmte khempeuh tungah ama tunga thu piang teng gen hi. Tua ciangin a zi Zeresh leh a lawmte in ama kiangah, “Tu-a na lelhtaak Mordekai in Judah mi ahih leh amah na zo kei ding a, amah in nang hong zo zaw ding hi,” a ci uh hi. Tua bangin Haman tawh amaute a kiho lai takin kumpipa’ innsung mangte hong pai a, Esther’ bawlsa nitak an ne dingin amah pai khiatpih pah uh hi. Tua ahih ciangin Kumpinu Esther tawh an ne dingin kumpipa leh Haman va pai uh hi. A ni nih ni, amaute in zu a nek lai takun kumpipa in Esther’ kiangah, “Kumpinu Esther aw, nong nget nop bang ahi hiam? Nong nget peuhpeuh ka kumpi gam phel lang khat dongin hong kipia ding hi,” ci kik leuleu hi. Tua ciangin Kumpinu Esther in dawngin, “Kumpipa in nong hehpih zawh a, kumpipa in hoih nasak leh, kong nget kong thum nopna thu in keimah leh ka mite sihna tawh nong kipelhsak nading ahi hi. Bang hang hiam cih leh kei leh ka mite suksiat ding, thah ding, beisak mang dingin hong kizuak hi. Kote, numei pasal a kibangin sal dingin hong kizuak hi leh bangmah ka pau kei ding hi; tua bang lel tawh kumpipa nawngkaisak taak lo hi,” a ci hi. Tua ciangin Kumpipa Ahasu-eras in Kumpinu Esther’ kiangah, “Hih banga gamtat ding a ngaihsun kua hi a, koi-ah om ahi hiam? a ci hi. Tua ciangin Esther in, “Hong langpang ka galpa! Hih mi gilo Haman!” a ci hi. Tua lai takin kumpipa leh kumpinu’ mai-ah cih nading thei loin Haman om hi. Tua ciangin kumpipa hehsa-in an nekna pan ding khia-in kumpi huan sungah pai hi. Ahi zongin Haman ahih leh tua lai mah-ah omin Kumpinu Esther in a nuntakna a suahtaksak nading thuum hi; bang hang hiam cih leh kumpipa in amah thah dingin a ngaihsutna lungsim thei hi. Kumpi huan panin a annekna mun uhah kumpipa hong paikik ciangin Esther’ tutna lamah Haman na awn phei-a om mu a, kumpipa in, “Ka inn sung ka muhna nangawn-ah hih mipa in kumpinu hih ding ahi hiam?” ci hi. Kumpipa in tua thu a cih phetin amaute in Haman’ mai puan khuh uh hi. Tua ciangin kumpipa’ na a sem innsung mangte lakah Harbona in, “Ni dangin kumpipa’ na hoih takin a sem ngei Mordekai thah nadingin Haman mahmah in a phuhsak, pi sawmsagih-le-nga a sang khuam pen Haman’ innah tu mah-in om hi,” a ci hi. Tua ciangin kumpipa in, “Tua tungah amah khailum un,” a ci hi. Tua ahih ciangin Mordekai khailup nadingin a phuh khuam tungah Haman khai lum uh hi. Tua ciangin kumpipa’ hehna dam hi. Tua ni mahin Kumpipa Ahasu-eras in Judah mite’ gal ahi Haman’ neihsa khempeuh Kumpinu Esther tungah pia hi. Tua ciangin kumpipa’ omna-ah Mordekai hong tung hi; bang hang hiam cih leh amah tawh a kinaina zia, kumpipa kiangah Esther in gen hi. Tua ciangin kumpipa in Haman’ tung panin a lakkiksa minthuhna zungbuh pen suahkhia-in Mordekai pia hi. Tua hi a, Haman’ neihsa khempeuh a uk dingin Esther in Mordekai koih hi. Kumpipa’ mai-ah Esther khatvei va pai kikin khitui naptui tawh a khe mai-ah va puk a, Agag mi Haman’ vaihawm siatna liante leh Judah mite a sawmna thu a kipelh kik theih nadingin va thuum hi. Kumpipa in Esther lamah a kham ciangkhut na zan a, tua ciangin Esther tho to-in kumpipa mai-ah ding-in, “Kei nong hehpih zawh a, hih ka ngaihsutna man nasak a, hoih nasak leh, na ukna gamsung khempeuh ah a om Judah mite thah nading a sawmna-in Agag-te beh Hammedatha’ tapa Haman in a laigelhte dawhkik nadingin lai khat gelhsak in. Ka mipihte tungah hih siatna liante a tung ka muh ding bangci thuak zawh ding ka hi hiam? Ahih kei leh ka innkuanpih tungah a tung hih siatna ka muh ding bangci thuak zawh ding ka hi hiam?” a ci hi. Tua ciangin Kumpipa Ahasu-eras in Kumpinu Esther leh Judah mi Mordekai tungah, “Haman in Judah mite thah hong sawm ahih manin sing tungah amah kikhai lum khin a, Haman’ neihsa khempeuh Esther tungah kong pia khin hi. Kumpipa’ min tawh kigelhin, kumpipa’ minthuhna tawh a kithuh khinsa lai pen kidok kik thei nawn lo ahih manin, tu-in Judah mite tawh kisai-in hoih dinga na up bangin kumpipa’ min tawh a dang thupiakna khat gelh in la, tua khit ciangin kumpipa’ minthuhna zungbuh tawh thuh in,” a ci hi. Tua ahih ciangin a kha thumna ahi Sivan kha a ni sawmnih-le-thum ni-in kumpipa’ lai-atte kisam a, Mordekai’ gen bang teekteekin Judah mite tung, leh India panin Ethiopia dong, gam za khat leh sawmnih-le-sagih a uk ahi gam tampi a ukte, gam khat a ukte leh tua gamsunga uliante tungah lai kihawm kik a, amau’ lai ciat leh amau’ pau ciatin kigelh hi; Judah mite’ ading zong amau’ lai leh amau pau mah-in kigelh hi. Tua lai pen Kumpipa Ahasu-eras’ minin kigelhin kumpipa’ minthuhna zungbuh mah tawh kithuh a, kumpi sakol bukah a kikhawi kumpipa’ sakolte tungah laitaite kituangsakin lai kihawmsak hi. Tua thupiakna lai pen gam khempeuh ah kihawmin mi khempeuh kitheisakin, amau’ galte a thukkik nading ahi tua ni tawh kisai-in Judah mite a kigin’ kholh ding uh ahi hi. Tua ahih ciangin kumpipa’ sakolte’ tungah laitaite tuangin kumpipa’ thu-kin sawl mah bangin nawh tai uh hi; tua ciangin Susa khuapi sungah zong tua thupiakna lai kihawm hi. Tua ciangin kumpi puansan leh a kang silhin, kham tawh kibawl kumpi lukhu lianpi khu-in, saihadial puan neel leh puansan silhsa-in kumpipa’ omna panin Mordekai paikhia hi; tua ciangin Susa khuapi sunga mi khempeuh lungdamin awng uh hi. Tua hi a, Judah mite in suahtakna, lungdamna, leh pahtawina ngah uh hi. Kumpipa’ thupiakna a tun’na gam leh khua khempeuh ah Judah mite adingin lungdamna leh kipahna, pawi bawlna leh nasep khawlin zumkhakna om hi. Tua hi a, mite in Judah mite kihta uh ahih manin tua gam-a om mi tampi tak in Judah mi ka hi uh hi, ci uh hi. A kha sawm-le-nihna ahi Adar kha a ni sawm-le-thum ni-in kumpipa’ thupiakna bangin sepkhiat nading hun hong tung hi. Judah mite’ galte in gualzo ding a, a ki-up ni teek pen amau a mudah mite’ tungah Judah mite a gualzawh ni ding hong hi hi. Tua ni-in amaute’ siat nading a geelte a su dingin Kumpipa Ahasu-eras’ ukna gam khempeuh-a amau’ khuapite sungah Judah mite kikhawm uh hi. Mi khempeuh in Judah mite kihta uh ahih manin kuamah in Judah mite nang ngam lo uh hi. Mordekai kihta uh ahih manin gam tampi a ukte leh gam khat a ukte leh gamsunga ulian tuamtuamte leh kumpi ulian khempeuh in Judah mite pan’pih uh hi. Bang hang hiam cih leh kumpi inn sungah Mordekai ulianpi khat suak a, a vangliatna a khan’ semsem mah bangin gam khempeuh ah ama minthan’na kizel hi. Tua ahih ciangin Judah mite in namsau tawh a galte uh tampi tak that lum uh a, amaute a mudahte a ut ut-un hih gawp uh hi. Kumpi khua Susa khuapi sung mahmah-ah Judah mite in mi za nga thatin susia uh hi. Kumpi khua Susa khuapi sunga a kithat zah tua ni mahmahin kumpipa kiangah kizasak hi. Tua ciangin kumpipa in Kumpinu Esther kiangah, “Kumpi khua Susa khuapi sungah Judah mite in mi za nga that uh a, Haman’ tapa sawmte zong that uh hi. Ka ukna gam dangte sungah zong bangzah that ding kithei lo hi. Tu-in bang deih lai na hi hiam? Nong nget peuhpeuh hong kipia lai ding hi,” a ci hi. Tua ciangin Esther in, “Kumpipa in hoih nasak leh, tu ni-a mah bangin zing ciang zong Susa khuapi sunga om Judah mite tungah hih theihna thupia in la, Haman’ tapa sawmte’ luanghawm khuam tungah khaisak in,” a ci hi. Tua ahih manin tua banga a hih nadingin kumpipa in sawl hi; Susa khuapi sungah hih thu suakkhiasak a, khuam tungah Haman’ tapa sawmte kikhai hi. Susa khuapi sunga om Judah mite Adar kha a ni sawm-le-li ni-in kikhawm kikin Susa khua sungah mi za thum that uh hi. Ahi zongin amaute’ neihsate suksak lo uh hi. Tua mah bangin kumpipa’ ukna gam tuam tuam-a om Judah mite in zong amaute’ galte panin a kihut nadingun kikhawm uh hi. Amau a mudah mihing tul sawmsagih leh tul nga thatin a galte uh tungah phu la uh hi. Ahih hangin a neihsate uh suksak lo uh hi. Hih banga a hih pen Adar kha a ni sawm-le-thum ni hi a, a ni sawm-le-li ni-in tawlnga uh a, pawi bawlin lungdamin om uh hi. Ahih hangin Susa khua sunga om Judah mite in ahih leh a ni sawm-le-thum leh sawm-le-li ni-in kikaikhawm uh a, a ni sawm-le-nga ni tawlnga uh a, pawi bawlin lungdamin om uh hi. Hih thu hangin gam sung khuaneute-a teeng Judah mite in Adar kha a ni sawm-le-li ni pawibawlna leh lungdam ni dingin tawlngak ni-in nei uh a, anlimnono kikholhna ni-in zang uh hi. Tua ciangin Mordekai in hih thupiangte khempeuh lai-in ciamteh a, a nai a gamla-a om Kumpipa Ahasu-eras’ ukna gamsung khempeuh a, om Judah mite tungah lai paisak hi. A kum kumin Adar kha ni sawm-le-li ni leh sawm-le-nga ni a tan’ nadingun thupia hi. Tua nite pen Judah mite a galte uh tung panin a suahtak ni, dahna leh thuumnate lungdamna leh lungnopna a suah kha ahi hi. Tua ahih manin amaute in pawi bawl ni leh lungdam ni-in nei-in, anlimnono khat leh khat kikholh ni leh mi zawngte tungah letsong piak ni-in a zat dingun thupia hi. Tua ahih ciangin Mordekai’ laigelhna tawh kizui-in Judah mite in a patsa uh hih banga a hihnate uh zom uh hi. Bang hang hiam cih leh Judah mi khempeuh’ gal ahi, Hammedatha’ tapa’ Agag-te beh Haman in Judah mite sugawpin a suksiat nadingin Pur kici ai saan-in Judah mite suksiat ding sawm hi. Ahih hangin kumpipa in hih thu a theih ciangin, Judah mite suk nadingin Haman in a geelsa thuhoih lopen Haman’ lutung mah a lehtuk nading, leh amah leh a tapate khuam tungah a kikhai nading lai-in gelhin thupia hi. Tua ahih ciangin Pur min tam-in hih hun sung teng Purim ci-in phuak uh hi. Tua ahih ciangin hih lai sunga a kigelh thute khempeuh, leh hih thute amau’ mit tawh mu-in a pumpi uh tawh a tuahna uh hangin, Judah mite amau mahmah, leh a suan a khakte uh, leh amau a pawlpih khempeuh in lai sunga kigelh bangin a kiseh hunin kum simin hih ni nihte peel loin a tan’ nading uh kipsak uh a, a khang khangin innkuan sim, gam sim, khuapi simah hih nite kiphawkin a kitan’ nading leh Judah mite lakah hih Purim nite a kitan’ ngitnget nading ahi a, a suan-le-khakte un zong hih thu a mangngilh ngei het loh nading uh ahi zongin kho takin len uh hi. Tua ciangin Abihail’ tanu Kumpinu Esther in Purim thu tawh kisai hih laikhak nihna a kipsak nadingin Judah mi Mordekai tungah aana a kicingin a piakna, lai-in gelh hi. Kumpi Ahasu-eras’ ukna gam za leh sawmnih sagih sungah a om Judah mite khempeuh tungah kilemna leh nopna a om nading deihsakna laite kikhak a, Judah mi Mordekai in a gelhsa bang, a kisehsa bangin hih Purim nite a tan’ nadingun thu kipia hi. Tua mah bangin amaute leh a suan-le-khakte uh adingin an tan’ nading leh thuumna bawl nading ngeinate gelh uh hi. Kumpinu Esther’ thupiakna in hih Purim bawl nading ngeinate kipsak a, lai thupite sungah hih thu kiciamteh hi. Kumpipa Ahasu-eras in a ukna gam leitung leh tuikulh tunga teengte tung panin siah kai hi. Ama vangliatna leh a thahatna tawh a sepnate khempeuh, leh Mordekai tungah a piak minphatnate, Media leh Persia Kumpite’ Khang Tangthu Laibu sungah kigelh hi. Bang hang hiam cih leh Kumpipa Ahasu-eras’ zomah Mordekai in a za lianpen nihna ahi hi; Mordekai in ama mite’ phattuam nading leh a suan-le-khakte uh a khan’toh nading hanciam ahih manin Judah mite lakah milian khat hi a, a gam mihonpite in it kim uh hi. Uz gamah Job kici min nei mi khat om hi; tua mipa a paubaang lo, a thutang, Pasian a zahtak mi khat hi a, amah in gamtat hoih lo peuhmah pel hi. Amah in tapa sagih leh tanu thum nei hi. Amah in tuu tulsagih, kalaoh tulthum, bawngtal kap zanga, leh la a pi zanga, leh nasem tampi tak nei hi; tua ahih manin nisuahna gam sungah Job in a haupen khat ahi hi. Ama tapate in inn khat panin inn khatah a ban banin pawi bawlin pai kawikawi uh a, tua pawi siim dingin a sanggam numei thumte uh zong sam uh hi. Tua banga a pawi bawl uh vial khat a kikhit ciangin Job in a tapate samin amaute sian’suah a, zingsangin tho baihin a ta phazah tawh kizui-in meihal biakna pia hi; bang hang hiam cih leh Job in, “Ka tate khialin, a lungsim sung uh ah Pasian samsia kha thei ding uh hi,” a ci hi. Hih bangin Job in hih tawntung hi. Nikhat ni-in Topa ’ omna-ah vantungmite hong pai uh a, tuate lakah Satan zong hong pai hi. Topa in Satan kiangah, “Koi pan-a hong pai na hi uh hiam?” a ci hi. Satan in Topa dawngin, “Leitung khempeuh a lu pan a taw dong vak kawikawi-in ka va pheklekna mun panin kong pai hi,” a ci hi. Tua ciangin Topa in Satan kiangah, “Ka nasem Job na phawk kha hiam? A paubaang lo a thutang, Pasian zahtakin gamtat hoih lo a pel, amah tawh a kibang midang leitungah na mu kei ding hi,” a ci hi. Tua ciangin Satan in Topa dawngin, “Job in Pasian hong mawk zahtak ahi hiam? Amah leh a innkuan leh a neihsate khempeuh na hutna-in a kimkotah dai khan hilo na hi hiam? Ama hihna khempeuh ah thupha na pia a, gen zawh lohin ama neihsa pung hi. Ahi zongin na khut zanin ama neihsa khempeuh suksak lecin na maitang mahmah-ah nang hong samsia pah ding hi,” a ci hi. Tua ciangin Topa in Satan kiangah, “En in, ama neihsa khempeuh na khut sungah kong ap hi; ahi zongin ama pumpi ahih leh na sukha kei ding hi,” a ci hi. Tua ciangin Topa ’ omna panin Satan paikhia hi. Nikhat ni-in a tapate leh a tanute in a u pen uh inn-ah an ne zu ne-in om uh hi; kamtai khat Job kiangah hong tungin, “Bawngtalte in lo kho-in, tuate gei-ah late gamta uh hi; tua lai takin Seba mite hong pai-in ganhingte hong sut a, namsau tawh gancingte that khin uh hi; hih thu hong zahsak thei dingin kei bek kong suakta hi,” a ci hi. Amah in thugen a khit ma-in kamtai dang khat hong tungin, “Vantung panin keek hong kia a, tuute leh tuucingte kha-in kangtum uh hi; hih thu nang kiangah hong ko thei dingin kei bek kong suakta hi,” a ci hi. Tuapa in thugen a khit ma-in kamtai dang khat hong tung leuleu-in, “Khaldea mite honthum in kalaohte hong sut a, namsau tawh kalaoh tung tuangte khempeuh that hi; hih thu nang kiangah a ko thei dingin kei bek kong suakta hi,” a ci hi. Amah in a thugen a khit ma-in kamtai dang khat hong tung leuleu a, “Na tapate leh na tanute a u pen uh inn-ah an ne zu ne-in om uh hi; tua lai takin sehnel gam panin huihpi pingpei hong nungin a inn mut paai-in na tate denglum hi; nang kiangah hih thu a ko thei dingin kei bek kong suakta hi,” a ci hi. Hih thu a zak ciangin Job dah lua-in a puan balkek a, tua ciangin a sam met khia-in lei lakah bok sukin Pasian bia hi. Tua ciangin amah in, “Ka nu sung panin guaktangin ka suak a, Guaktang mahin ka ciahkik ding hi. Topa in hong pia a, Topa mah in hong lakik hi; Topa ’ min kiphat ta hen,” a ci hi. Hih thu khempeuh ah Job khial lo a, Pasian zong mawhsak lo hi. Nikhat ni-in Topa ’ omna-ah vantungmite hong paikik uh a, Satan zong amaute lakah hong kihelin Topa ’ omna mah-ah hong pai hi. Tua ciangin Topa in Satan kiangah, “Koi lai panin hong pai na hi hiam?” a ci hi. Satan in Topa dawngin, Leitung khempeuh a lu pan a taw dong vak kawikawi-in ka va pheklekna mun panin kong pai hi,” a ci hi. Tua ciangin Topa in Satan kiangah, “Ka nasem Job na phawk hiam? A paubaang lo, a thutang, Pasian zahtakin gamtat hoih lo a pel, amah tawh a kibang midang leitungah om lo hi. Thu om lopi-in amah susia dingin kei nong kampau sak a, ahi zongin, ama hoihna bangmah hem tuan lo hi,” a ci hi. Tua ciangin Satan in Topa dawngin, “Vun bek in vun mah lei zo bek, ci-in paunak a om mah bangin mi khat in ama nuntakna a hutna-in a neih khempeuh pia ngam ding hi. Tu-in na khut zan in la, ama sa leh a guh suksak lecin nangma maitang mahah pel loin nang hong samsia ding hi,” a ci hi. Tua ciangin Topa in Satan kiangah, “En in, na khut sungah amah kong ap hi; ahi zongin amah sisak kei in,” a ci hi. Tua ahih ciangin Topa ’ omna panin Satan paikhia a, Job a khetul pan a luzang dongin a kihhuai meima veisak hi. Tua ciangin Job in beel kitam them khat la-in tua tawh kikhuatin vut lakah tu hi. Tua ciangin a zi-in, “Na upna khiam tuan lo ding na hi hiam? Pasian samsia in la, si suk in,” a ci hi. Ahih hangin amah in a zi kiangah, “Numei haite’ kampau bangin na pau hi. Pasian’ tung panin a hoih sang i hih ciangin siatna zong sang lo ding i hi hiam?” a ci hi. Hih thu khempeuh ah Job in a kampau nangawnin khial lo hi. Job’ lawmte thum, Teman khuami Elifaz, Shuah gammi Bildad, leh Na-amah gammi Zofar-te in Job’ thuak gimna thu teng a zak uh ciangin a inn ciat panun amah hehnem ding leh a hanthawn dingin kituahin hong paikhawm uh hi. Amaute in a gamla sim mun panin Job a muh tungun amah thei pah lo uh hi; tua ciangin amaute a gingin kap khia uh a, a puan uh balkeekin a lu tung uh a tu dingin leivui lawn to uh hi. Tua ciangin lei lakah sun sagih leh zan sagih sung amah tawh tukhawm uh a, ama thuakna a nasiat mahmah lam tak mu uh ahih manin kuamah in kam khat beek a paupih ngam kei uh hi. Hih bang teng khit ciangin Job in thugen hong kipan a, mihing-a a pian’ni samsia hi. Tua ciangin Job in, “Ka suah ni, leh ‘pasal naungeek khat suak hi,’ a kicih zan beimang hen! Tua ni khimzin’ ni suak hen! Van-a Pasian in phawkin nei kei hen la, tua ni-in khuavak taang kei hen. Khua niim leh khuamial in khuhcip hen. Tua ni-in meiipi zing hen la, tua ni awk in valh tum hen. Tua zan—khuamial sahpi in mancip hen! Kum khat sunga ni om dangte tawh kisim khawm kei hen la, kha khat sunga ni om dangte lakah kiseh khawm kei hen. Tua zan-in ta piang thei kei hen la, lungdam otna awging tua zanin ging nawn kei hen. Phuisamna tawh gulpi a khiim thei, a mitphiat uh tawh tuipi ganhing a hencip thei mite in tua zan samsia ta hen. Tua ni zingsang, aksite mial hen. A vak ngei lo ding khuavak ngak niloh hen la, zingsang phalvak mu ngei kei hen: bang hang hiam cih leh kei hong kipaaina naugil na khakcip lo a, kei’ muhna panin lungkhamna hong hepkhiat sak lo hi. Bang hangin a sisa-in suak lo a, bang hangin ka suah phetin si hoh lo ka hi hiam? Bang hangin ka nu’ khuk tungah hong kitawi a, a nawi hong kiteepsak se ahi hiam? Tua hi zenzen kei leh nuam takin han-ah ka lum hithiat khin ding hi; sihna sungah ihmu-in ka tawlnga khin ding a, amau’ adingin inn hoih nono a lam leitung kumpite leh a uliante, a inn uh ngun leh kham tawh a kidim a hau uliante tawh han-ah ka tawlnga khin ta ding hi. Bang hangin a hun cing nai lo-a suak naungeek bang, khuavak mu man lo-a si naungeekte bangin hong kiselcip hoh lo ahi hiam? Tua lai-ah a migilote in siatna sukha nawn lo ding a, a gimte tawlnga hithiat ding hi. Tua lai-ah galmat salte in nopna ngah ding a, nasem ukpa’ aw za nawn lo ding uh hi. Tua lai-ah milian mineu omkhawm a, silate nangawn a topa’ kiangpan suakta hi. Bang hangin lungkhamna a thuak mipa tungah khuavak kipia a, nuntakna haksa a sa mahmah mipa tungah nuntakna kipia hiam? sih ding lunggulh ngeungau napi a si thei lo, sum phum zon’ sangin sih ding a lim zon’ zaw, han sung a tun’ ciangin a nuam mahmah, hankhuk a tun’ ciangin nuam lua-in a diang gawp mite’ khuavak mu dingin mi-in piang laizang ahi hiam? Bang hangin mai lam thu ding thei lopi-in a mot om ding, a kimkotah Pasian in dai a khaknelh mipa, mi-in piang zenzen ahi hiam? Bang hang hiam cih leh khuisatna in ka annek suak a, ka tauna in luipi ging bang ahi hi. Ka kihtaktak ka tungah hong tung a, ka laulau ka tuak ta hi. Lungnopna ahi a, daitak-a om hithiat theihna ahi zongin ka nei kei hi; lungkhamna in hong nawk niloh a, tawldam hun ka nei kei hi,” a ci hi. Tua ciangin Teman khuami Elifaz in thu gen a, “Mi khatpeuh in thu hong genpih leh na heh ding hiam? Kua in a kam ip zo nawn ding ahi hiam? Lunghiang mite na hanthotna, khut kha, ban khate na khauhsakna, a puk mite na thugenna tawh na kipsakna, khuk zaw mite na hatsak ngeite ngaihsun in. Ahi zongin nang tungah tuate hong tung a, na thuak zo kei hi; tuate in nang hong su a, na lung niam hi. Na biakna in hong hehnem zo lo ahi hiam? A paubaang lo, na nuntakna in lametna hong pia zo lo ahi hiam? Tu-in ngaihsun in, midik kimlai kua sia ngei ahi hiam? A thutang mi a kisuksiatna koi-ah na mu ngei hiam? Mawhna bawlin buaina ahih mi in a gamtatna bangin a gah a atna ka thei hi. Pasian’ husan’na tawh tua bang mite sia a, ama hehna in tua bang mite kangtum hi. Humpinelkai bangin migilote hawkna dai ta a, Pasian in amau hate suktan sakin gamdai ta uh hi. An nek ding mu loin a thahat humpinelkai bangin si uh a, a tate uh kithehthang hi. Tu-in kei kiangah thu khat hong tung khian a, ka bil in tua thu ginghiau a za hi. Mi a ihsip hun zankim laitak, zan mangmat hun lai takin, launa leh liin’na kei tungah hong tung a, ka pumpi liin’na in kei hong lausak hi. Huih in ka mai hong mut a, ka khuasikmul hong suaksak hi. A meel ka khen theih loh lim khat hong ding a, ka mai-ah mihing lim khat hong om a, tua ciangin aw-uun duadua khat ka za a, ‘Pasian mai-ah mi khatpeuh paubaang loin om zo ngei ding ahi hiam? Amah a Bawlpa’ mai-ah sitbaang loin om zo ngei ding ahi hiam? Pasian in ama nasemte mahmah muang zo loin, a sawltakte a mawhna mu ahih leh, inn umna kawm dingin buan-a kizatna inn sunga teeng mite, a inn bulpi leivui ahi, vasa bu bangin a kimeekcip thei, zing kal nitak kal-a a kisusia thei sungah a omte, bangzah ta-in kuama don lohin sia cipin, amau’ liatna in taisan pak ding a, pilna ngah ngei loin si pak kan zawn ding ahi hiam?’ hong ci hi. Tu-in na thu ko in; nang hong huh ding om ahi hiam? A siangthote kua pen’ lam zuan ding na hi hiam? Mihaipa in ama hehna sih lawh a, muhdahna in sihna piangsak hi. Mihaipa in lim takin zung kha ngei napi, ama inn thakhatin kizunglot ka mu ngei hi. A tapate kuama suahtaksak zawh ding hi nawn lo hi; kulh kongpi gei-ah amaute kisugawp a, amaute a honkhia ding kuamah om lo hi. Midangte in a neihsate liah tumsak a, amah sangin a hatzawpa in a um a beel sunga omte nangawn laksak a, a neih a lam duhgawh deihgawh hi. Lei lak panin gimna hong piang tawm lo a, lei sung panin lungkhamna hong pokhia tawm hi lo hi; mei-ek a tolen’ ngei mah bangin mihing in ama lungkham nading mah piangsak hi. Nang hi leng, ka Pasian tungah ka thuum ding a, ama tungah ka thu ka ap ding hi. Amah in na liante leh kuama phawk zawh loh thute sem a, genzawh lohin a lamdang na tampi bawl hi. Amah in leitungah guah zusak a, lo khempeuh tui a buak hi. Amah in miniamte sang koih a, a dahte lungnuam sak hi. Amah in migilote’ geelna suksiatsak ahih manin amaute in a ngimna uh tangtun thei lo uh hi. Amah in migilote amau’ gitlohna mah-ah awk sak a, ngian a zangte’ geelna lumlet sak hi. Suntangpi-in amaute khuamial sung kiden’na a, suntangpi-in zan bangin mialzawt uh hi. Ahi zongin amah in amau’ kiang panin pa nei lote honkhia a, mi thahatte kiang panin mi cimawhte honkhia hi. Tua ahih manin mizawngte in lametna nei kik uh a, thuman lote ahih leh kihencip hi. Pasian in a taii mite minuamsa hizaw ahih manin, Vanglianpa’ taiina thupisan’ in. Bang hang hiam cih leh amah in a liamsak hangin a liamma tun ding a, ama satna liamma a damsak ding hi. Lungkhamna guk vei dong na tuahna-ah amah in hong hon ding a, a sagih veina dingah siatna in nang hong su nawn lo ding hi. Kialpi sungin na sih nading pan hong honkhia ding a, gal sungah namsau panin hong suakta sak ding hi. Gensiatna pan nang hong kihu ding a, siatna hong tun’ ciangin na lau kei ding hi. Suksiat ding leh puksih dingte na nuihsan lel ding a, leitung gamsate na kihta kei ding hi. Bang hang hiam cih leh na lo sungah suang om lo ding a, gamlak gamsate in hong su lo ding hi. Na inn sung lunghimawh nading om lo hi ci-in na thei ding a, na inn kiim na et ciangin a kitasam bangmah om lo ding hi. Na suan na khakte tampi pha ding hi, ci-in na thei ding a, na sunga piangte leitung lopa zah pha ding hi, ci-in na thei ding hi. A hun ciangin ancilna phual-ah buhlom a tun’ mah bangin teek sihin han na zuan ding hi. Hih thu khempeuh ka kantel uh a, a thuman a na hi hi, za in la, nang adingin zang in. Tua ciangin Job in dawng a, “Ka lunggimna kitawikhai hen la, ka haksatna khempeuh kitawi teh leh! Tuipi sehnel khempeuh sangin gikzaw ding ahih manin ka kampaute thakhauh mahmah hi. Vanglianpa’ thaltangte in kei hong kha a, ka sungah a thal gu kidiah hi. Pasian in a kihtakhuai-in kei hong su hi. Gam late in lopa a nek lai takin ham a, bawngtal in an a nek lai takin ham ahi hiam? An lim lote, ci sawh loin kine thei a, aktui da kang in limna nei ahi hiam? Ka kam in tuate ciam nuam lo a, tuate in a luaksuahhuai an tawh kibang hi. Ka ngetna ngah thei hi leng a, Pasian in ka deihna hong pia ding hi leh, Pasian in kei hong sucip hen la, a khut zanin kei hong that vet leh! Tua hi leh keima kihehnepna hi ding a, hih zahta ka thuakna-ah nuamin ka diang ding hi. Bang hang hiam cih leh Siangtho Pa’ thu ka nial khat zong om lo hi. Ka thuak lai nadingin bang hatna nei nawn a, lungduai a ka omna dingin lamet ding bang om nawn ahi hiam? Ka thahatna in suang bang hi a, ka pumpi in sumngo tha paai ahi hiam? Kei leh kei’ sungah huhna bangci ngah tawm ding ka hi hiam? Kei hong kihuh nading ka nget nading kuamah om lo hi. “Pasian ka nusia a, ka nusia kei zongin, hih bang lungkham hunin lawm citak ka kisam hi. No ka lawmte pen, lui tuikhang bang, a mangthang pak luitui let bang, nin a khaknelh vuk leh tuikhal bangin na zuautat uh hi. Khua a lum ciangin tua tui mangthang a, ni a sat ciangin a kang hi. Tua tui zong dingin khualzin mite pai kawikawi a, gamsung tengah kawi pai-in a mangthang uh hi. Tema khua mi khualzinte in zong tua tui zong uh a, Sheba mite in zong tua tui muan’in a nei uh hi. Ahi zongin tua a lametna uh ah cimawh uh hi; tua tui zuan uh a, a om loh ciangin cih nading thei loin kam ka uh hi. Tu-in zong kei adingin note tua mah bang na hi uh hi; ka gimna teng nong mu uh a, na lau uh hi. No kiangah, ‘Na khat peuhpeuh hong pia un, ka suahtak nadingin sum tawh hong huh un, ka galte’ kiang panin hong honkhia un, kei hong nengniamte’ khut sung panin hong tan khia un,’ hong ci ngei zenzen ka hi hiam? “Hong hilh thei le uh cin, pau loin ka om pah ding hi: Ka khialhna hong theih telsak dih un. Lungsim takpi tawh thugennate heh loin kisang thei a, ahi zongin no hong taiina un bang phatuam sak ahi hiam? Kamging mawkmawk hehtaak sa a, huih letmang cihmawh kamte thupi ngaihsut na hi uh hiam? Mi cimawh khat suksiat sawm a, na lawm khat uh hih gawp sawm na hi uh hiam? “Tu-in kong thuum hi; kihei un la kei hong en un, Na maitang uh ah zuau gen dingin kilawm ka hi hiam? Ngaihsun pha un, a kilawmlopi-in hong hih kei un. Ngaihsun pha un, ka hoihna hong kize-et hi lel hi. Ahi zongin zuau gen mahin nong ngaihsun lai veve uh a, a sia leh a pha khen thei loin nong seh lai veve uh hi. “Leitungah mihing in nasep haksa nei a, ama hun in thacial nasempa’ aa bang hilo ahi hiam? Sila nasemte in niliim lunggulhin, a kicial nasempa in a thaman a ngak tawh kibang hilo ahi hiam? A mawkna-ah kha tampi sung ka om a, zan thapai lungkhamna in keima tanh ahi hi. Nitak ka lup ciangin, ‘Cik ciangin khuavak in ka tho tam,’ ka ci hi. Ahi zongin zan sau a, zingsang khuavak mateng ka kigawigawi hi. Ka pumpi khempeuh than dim a, ka vun tung khempeuh meima in tuamcip hi. Ka hunte in siamgante’ siam ciangtang sangin manlang zaw a, lametna om loin a mong tung pak hi. “Pasian aw, ka nuntakna in husan’ bang bek ahihna hong phawk in; ka mit in hun nuam mu kik ngei nawn lo ding hi. Kei hong mu ngeipa in kei hong mu nawn lo ding a, na hong et laitak mahin ka mangthang ding hi. Meiilum kaite bei-in a man’than’ bangin Leinuai-a paisukpa hong ciahkik ngei nawn lo ding hi. A inn-ah amah hong ciahkik nawn lo ding a, ama omna ngei mun in amah thei nawn lo ding hi. “Tua ahih manin pau loin ka om kei ding hi; ka lungkham manin kam ka pau ding a, ka gim luat manin ka phun ding hi. Kei hong cing ding na koih nadingin, kei tuipi ganhing hong sa na hi hiam? Lum leng nuam ding a, ihmu leng ka phunna phatuam ding hi, ci leng lah, a lauhuai mang nong man’sak a, a lauhuai mangmuhna tawh nong lau sak hi. Tua ahih manin gui-awk ding ka ut zaw a, hih bang ka thuak sangin ka si nuam zaw hi. Ka lungkham a, ka nungta nuam nawn kei hi. Ka nuntakna in husan’ bang hi lel ahih manin kei guak hong hici om sak hoh in, kimanna om lo hi. Nang in hih zahin na thupi ngaihsut dingin na lungsimah na ngaihsut dingin, zingsang simin daantat dingin ama kiangah pai-in amah na ze-et themthum nadingin mihing in bang hi lel ahi hiam? Tom kha sung beek hong pelh lo ding a, ka hu beek hong sang sak man lo ding na hi hiam? Mihingte a encikpa aw, a khial ka hih leh zong, nang tungah bang hong gamta ka hi hiam? Bang hangin kei hong ngim a, bang hangin na muitum suak ka hi hiam? Bang hangin ka khialhna hong maisak lo a, ka mawhna hong paihkhiat sak lo na hi hiam? Tu-in han sungah ka lum ding a, nong zon’ hangin ka na om kei ding hi,” a ci hi. Tua ciangin Shuah gammi Bildad in dawng a, “Tua bang thu bangtan vei gengen ding a, bangtan vei paupau ding na hi hiam? Pasian in thutang zang lo ahi hiam? Vanglianpa in thuman zang lo ahi hiam? Na tate ama tungah khial a, amau’ mawhna amaute a tuaksak hi. A hun lai-in Pasian zong in la, Vanglianpa’ hehpih ding thuum lecin, nang dikin thutang kisa na hih leh pel loin amah in nang hong en ding a, na thumanna tawh kizui-in thaman hong pia na ding hi. Tua hi leh, na zawn’ mahmah khit hangin a tawpna-ah na hau kik ding hi. “Khangluite thu kantel in la, pute pate’ tuahsa thute ngaihsun in. Eite in zan mah mi i hi a, bangmah i thei kei hi; leitunga i nuntaknate in niliim bang hi lel hi. Amaute in nang hong hilhin, a thu hong genin, amau’ phawksa thute hong gen ding hilo ahi hiam? “Ciknawng om lohna-ah laiphai kungte po thei ahi hiam? Tui om lohna-ah pumpeng kungte pung thei ahi hiam? Ahi zongin tuate a pak kimlai a phuk hun nai lopi-in lopa dang khempeuhte sangin keu masa zaw hi. Pasian a mangngilh mi khempeuh tua mah bang ahi hi; Pasian a don lo mite’ lametna a bei hi. Ama kimuan’na maimom khau bang hi lel a, ama ki-upna maimom bu bang hi lel hi. A inn tungah kingam a, a inn hoi hi, a inn lencip a, ahi zongin kip zo lo hi. Amah in nitaang sungah a khang kungno, a huan sungah a dawn hilhhelh kungno ahi hi. Ahi zongin suangtum lakah a zung a kivial, suangtawphah a phukha zung suak hi. Tua ciangin mi khatpeuh in a phung pan zung bawh a, ‘Nang hong thei ngei zenzen kei ing,’ ci-in lawnkhia hi. Hih bang danin ama nuntakna bei a, lei sung panin kung dangte hong po khia hi. “Thei tel in Pasian in mawhbaang lo mi nil khia lo ding a, gamtatsia mite huh lo ding hi. Na muk-ah nuihna hong omsak ding a, na kam-ah lungdam-a kikona hong omsak ding hi. Nang hong mudahte in maizumna ngah ding uh a, migilote’ puanbuk maimang ding hi,” a ci hi. Tua ciangin Job in dawng a, “Kuamah in Pasian a zawhzawh lohna a tel takin ka thei ta hi. Mi khat in Pasian tawh thu kinial ding hi leh tulkhat sungah khatvei nangawn dawng thei lo ding hi. Ama pilna thukin, ama vangliatna zai hi; kua in khauh takin nial a, nial pai suak zo ahi hiam? Pasian in mualte liingsak a, tawlnga sak lo hi; a hehna tawh mualte lumlet hi. Amah in leitung lokgawp a, a khuampite kiliing hi. Amah in ni a suah loh nadingin thu pia a, aksite sin cip hi. Amah bek in vanpi zal a, tuipi tuihualte tuancil hi. Amah in van-a om Khawlei-uikai, Zawlzawng, Seguk, leh Khanglam aksite a bawlpa ahi hi. Amah in kuama theihkhiat zawh loh na lian tampi bawl a, kuama sim zawh loh na lamdang tampi sem hi. Ka kiangah amah hong pai a, ke’n amah ka mu thei kei hi; amah gamtangtang a, ahih hangin amah ka thei kei hi. Amah in la khia nuam leh kua in khaktan zo ding hiam? Bang hih na hi hiam, kua in ci thei ding ahi hiam? “Pasian in ama hehna dokkik het lo mah ding hi; Rahab’ pawlte a khe nuai-ah kun uh hi. Tua ahih ciangin ke’n amah bangci dawn thei loh zaw kan ding a, amah ka nial nading kammal bangci muh ding ka hi hiam? Kei ka dik hangin amah ka dawng thei kei hi; kei hong mawhsakpa tungah hong hehpih ding ka nget kul hi. Thukhen zumah amah samin hong pai leh zong ka thuumna hong ngai dingin ka um tuan kei hi. Bang hang hiam cih leh thu themno khat hangin nakpi takin kei hong hih a, thu om lopi-in gimna tampi hong thuaksak hi. Ka hu nangawn hong sang sak man lo a, lungkhamna tawh hong kidimsak hi. Thatang hat thu ding hi leh, amah hat mahmah a, thutang kituh hi leeng, kua in thukhen zumah amah sam zo ding ahi hiam? Kei ka dik hangin keima kam mah in hong man ding a, mawhbaang lo ka hih hangin ka kampau hong lehhei sak ding hi. Paubaan’ na ka neih loh hangin kei ka kithupi ngaihsut tuan het kei a, ka nuntakna ka kih hi. Thu khat bek om hi; tua ahih ciangin, amah in a paubaang lote leh a gilote susia khawm hi, ka ci hi. Lauhuai lianpi hong tung pakin sihna a om ciangin mawhbaanglote’ thuumna nuihsan lel hi. Migilote khut sungah leitung kipia a, amah in thukhen-mangte’ mit tunsak hi—amah hi kei leh kua ahi ding ahi hiam? “Laitaite sangin ka hun nawh tai zaw a, bei pak ahih manin nopna ngah kha lo hi. Pumpeng gunkuang bangin nawh pai a, muvanlai sa bawh bangin nawh len’ hi. Ka dahnate kimangngilh bawlin, kimaitaisak ning ci ta leng zong, a dikin nong seh loh ding lam tak thei khin ka hih manin ka thuak dingte’ hangin ka lau hi. Kei a mawh-a hong kiseh ding ahih leh bang hangin a mawkna-in na sem ding ka hi hiam? Satpiang tawh kei kisilin, vuttui tawh ka khutte sawp ta leng zong, buan sungah kei nong hencip ding a, ka puante in kei a kihhuai hong suaksak ding hi. Amah ka dawn’ theih nadingin amah in kei bangin mi hi lo a, thukhen zum-a thu kineihpih theih ding hi lo hi. Ko tegel kikalah thu hong khen ding khat om thei hen la, ko tegel tungah a aana hong zang ding khat om hi leh, kei hong kisatna ciang hong paih khiatsak ding a, kei tungah lauhuaina lianpite hong om nawn lo ding hi. Bang bang ahi zongin amah kihta loin ka pau ding hi; bang hang hiam cih leh kei omzia ding banga ka om loh lamtak ka kithei hi. “Ka nuntakna ka cimtak ta hi; ka dahna thu ka ut utin ka gen ding a, ka lungkham manin ka paupau ding hi. Pasian kiangah hih bangin ka ci ding hi: Kei hong mawhsak kei in; kei nong langpan’na thu hong gen in. Na khut tawh na sepsate simmawh bawlin, migilote’ vaihawmna pan’pihin, hih bangin nong netniamna-ah bang phattuam ngah na hi hiam? Mihingte bang lelin gamta na hi hiam? Na nuntakna kote’ aa tan bang lelin ngaihsun na hi hiam? Bang hangin ka mawhna khempeuh sulzuih-in, ka khialhna khempeuh kantel na hi hiam? Ka mawh lohna na thei a, nang kiang panin kei hong hon ding a om lohna na theihsa mah ahi hi. Nangma khut in kei hong lomin nong piangsak a, tu-in nangma khut mah in kei hong leh suksiat kik hi. Leivui panin kei nong bawlna phawkkik in; leivui mah-in hong dengvui kik ding na hi hiam? Kei ka pian’ nadingin ka pa tungah thatang na guan’ a, ka nu’ sungah kei nong khangsak hi. Guh leh thaguite tawh ka pumpi ding nong bawl a, sazang leh vun tawh tua guhte nong tuamsak hi. Kei tungah nuntakna hong pia-in nong it tawntung a, nangma hong kepna hangin ka nungta hi. Ahi zongin a beisa hun sung khempeuh-ah kei adingin thusim khat na na neihna tu-in ka thei hi. Ka khialh khakna hong ensim niloh na hih manin ka mawhna nong maisak nuam kei hi. Ka khialh phetin gimna nong pia a, ka gamtat hoih ciangin nong pakta tuan kei hi. Keimah in mindaina leh maizumna tawh ka kidim hi. Mavan’na khatpeuh neisun leng zong, humpinelkai bangin ka siat nading nong zong a, kei’ gim theih nadingin nalamdang nangawn na bawl hi. Kei a hong langpang dingin teci na nei tawntung a, kei tungah na hehna khang semsemin, kei nong suk nading thu thak na mu tawntung hi. “Pasian aw, bang hangin ka nu’ sung pan hong piangsak peuhmah na hi hiam? Kuama’ hong muh ma-in a si hi zaw leng! Ka nu’ sung pan hankhuk zuat pah ding pen, mihing-a pian’ loh zah mahin a hoih ahi hi. Ka nuntakna bei dektak ta hilo ahi hiam? Hong hici om sak hoh in! Ka hun neih lai sun teng nuamtak hong zangsak in. Kei a pai baih ta ding ka hi a, kong ciahkik ngei kei ding hi, khuamial, lungzin’na gam, khuavak nangawn khuamial ahihna, khuamial gam, lungzin’na gam, lungkhamna gam a zuan ta ding ka hi hi,” a ci hi. Tua ciangin Na-amah gammi Zofar in dawng a, “Kampau hihzahta hong kidawng lo ding sa a, kam tam pauna hangin thumanin hong kiseh ding sa na hi hiam? Job aw, na thugente hong dawng thei lo ding hong sa na hi hiam? Na simmawh kampaute hong kidawng mawh ding sa na hi hiam? Na thugente a man na sa kha a, Pasian’ muhna-ah a siangtho-in na kingaihsun kha hi. Pasian in na thugente hong dawngkik leh ut mahmah ing! Pilna nam tampi a omna thu, mihingte’ theih zawh loh thuthuk a omna thu hong gen ding hi. Na mawhna zahin Pasian in hong daantah lohna thu thei in. “Pasian’ thuthuk thei khin zo ding na hi hiam? Vanglianpa’ hih theihna thei khin zo ding na hi hiam? Pasian in vantung sangin sang zaw a, ahi zongin tua vantung nangawn na ban zo kei hi. Pasian in Leinuai thu thei a, ahi zongin nangmah in tua thu na thei kei hi. Pasian’ liatna in leitung sangin golzaw a, tuipi sangin zaizaw hi. Pasian in nang manin thu hong sit leh amah a khaktan ding kua om ahi hiam? Pasian in mi hoihlote thei takpi hi; mawhna a muh ciangin thu don lo ding ahi hiam? Gam sung late mihing suak ngei ding a mihaite pil ngei ding ahi hiam? “Job aw, na lungsim a hoihin bawl in la, Pasian’ lam kihei in. Khialhna na bawl khak leh paaikhia in la, na inn-ah gitlohna omsak kei in. Tua hi leh kisuan’na om loin na khuadak ngam ding a, na lungnuamin launa na nei kei ding hi. Na lungkhamnate veng ding a, tuikhang pak bangin na phawk kha nawn kei ding hi. Tua ciangin na nuntakna in sun sangin taangzaw ding a, nuntak lungzin pen hun in phalvak sangin taangzaw ding hi. Lungnuam tak leh lametna nei-in na om ding a, Pasian in nang hong hu-in tawldamna hong pia ding hi. Kuamah kihtak nei loin nuam takin na om ding a, mi tampi in nangma maipha hong zong ding uh hi. Ahih hangin migilote ahih leh cimawhin khuadak ding uh a, suahtak nading lampi mu lo ding uh hi. Amau’ ngah ding ahih leh sihna bek ahi hi,” a ci hi. Tua ciangin Job in dawng a, “Note pen theihna kicing na kisa mah uh a, pilna a nei na kisa mah uh hi. Ahi zongin note zah mahin kei zong thu ka thei a, note sangin themkhat zong ka niamzaw tuan kei hi. Midangte sangin na theih zawk uh bang om tuan ahi hiam? Ka lawmte nangawn in tu-in kei hong nuihsan uh a, kei dikin paubaang lo napi hong nuihsan uh hi; ahi zongin Pasian in ka thungetna hong piak hun om hi. Note in lungkhamna na nei kei uh a, ahi zongin kei nong ciamnuih bawl uh hi; a puk dektak mipa na satgawp uh hi. Guta mite nuam takin om hit-hiat a, Pasian simmawhte nuam takin nungta hi. “Ahi zongin, gamsate va dong un, hong hilh ding uh hi; vasate va dong un, hong hilh ding uh hi; lei tunga bokvak ganhingte va dong un, hong hilh ding uh hi; tui sung ngasate zong va dong un, hong hilh ding uh hi. Pasian’ khut in amaute a bawlna thu, a vekpi-in thei kim uh hilo ahi hiam? Ama pian’saksate’ nuntakna a ukpa in Pasian ahi hi; mihing khempeuhte’ nuntakna ama khut sungah om hi. Leii in an a ciap mah bangin, bil in thu ngai tel hilo ahi hiam? Khanghamte in pilna nei a, nuntak saute in thu thei tel uh hi. “Pasian in pilna leh vangliatna nei a, amah thukip-in thu theitel hi. Pasian in phelkeek leh kuamah in lamkik zo lo a, Pasian in thong-ah mi koih leh kuamah in suaktasak zo lo hi. Pasian in guah a khaktan ciangin leitung keugaw a, tui a khah ciangin tui hong khang hi. Pasian thahatin gualzo tawntung a, mi khemte leh khemna a thuakte Pasian’ ukna nuai-ah om hi. Amah in mipilte’ pilna susia-in, makaite pen mihai bangin gamta sak hi. Amah in kumpite za kia sak a, thong-ah a khia hi. Amah in siampite mihai suaksak a, mi vangliante lawnthal hi. Amah in mi’ muante a pau thei loin bawl a, khanghamte’ pilna paihkhiatsak hi. Amah in mi vangliante mindaisak a, mi thupite’ kihihsakna beisak hi. Amah in khuamial sung panin thuthukte kalkhia a, a kithei zolo thute kitelsak hi. Amah in minamte thahatsakin liansak a, ahi zongin amah in tuate zo gawpin susia hi. Amah in minam makaite’ pilna paihkhiatsak a, lampi om lohna gamlakah a vakvai sak hi. Khuavak om loin khuamial lakah amaute in mialzawt uh a, zukham bangin amaute hoi-hoi uh hi. “Na gen thu khempeuh uh ka muhsa hi a, ka bil-in ka zaksa, ka theihsa thu ahi hi. Note’ theih khempeuh, kei zong ka thei hi. Note sangin ka neuzaw tuan kei hi. Ahi zongin note tawh kam kinial hi loin Pasian tawh kinial ka hi hi. Pasian tawh hih thu ka kinial nuam hi. Note in na haina uh zuauthu tawh na melh uh a, kuamah a damsak zolo zato siam-a kineite tawh na kibang uh hi. Pau het loin om hi le-uhcin, mipilpi mah hong kisa zaw ding hi ve’n. Tu-in ka thugen hong ngai un la, ka gen laitak limtak ngai un. Pasian’ min dingin a man lo genin, ama adingin zuauthu gensak ding na hi uh hiam? Pasian angvan ding a, ama ading gensak ding na hi uh hiam? Pasian in lim takin note hong entel leh note sungah hoihna mu ding ahi hiam? Mihingte na khem bangun Pasian khem thei dingin kingaihsun na hi uh hiam? A simthamin angvanna na zat uh leh amah in note hong taai taktak ding hi. Ama vangliatna in note hong lausak ding a, note tungah amah kihtakna hong tung ding hilo ahi hiam? Na thugennate uh vut khu bang hi lel a, na siksante uh leikhal bang hi lel hi. Pau kei un la, kei thu hong gensak dih un, a piang peuhpeuh a piang hi mai hen. Keimah in ka nuntakna pia ngamin, ka nuntakna ka ap ngam hi. Pasian in kei hong that mah taleh zong, ke’n phamawh ka sa kei hi. Ahi zongin ama mai-ah ka thu ka gen veve ding hi. Pasian’ mai-ah migilote’ pai ngam lo ahih manin, ka han’na in ka gualzawhna hi ding hi. Ka thugente limtak ngai un la, ka lahtelnate na za un. Ka thu a gen dingin a baihsa-in ka om a, thu ka zawh ding ka tel theih hi. Pasian aw, kei hong mawhsak ding na hi hiam? Nong mawhsak leh, pau loin a si dingin ka kiging hi. Thu nih kong ngen hi, hong pia in; tua ciangin nang tungah bangmah kong im kei ding hi. Kei hong daantat nawn kei in la, launa hong thuaksak nawn kei in. Pasian aw, hong hopih masa in, kong dawng ding hi. Kei, thu hong gensak in la, nang’ hong dawng in. Ka mawhna ka khialhna bangzah pha hiam? Ka mawhna leh ka khialhna teng hong thei sak in. Bang hangin kei hong peel a, gal bangin hong ngaihsun na hi hiam? Keimah, lausak ding hanciam na hi hiam? Kei, singteh bang lel hilo ka hi hiam? Anvai themkhat gal-in do ding na hi hiam? Nangmah in kei tungah thusiapi nong zong a, ka neu lai-a ka gamtatna nangawn tawh nong mawhsak hi. Nangmah in ka khe sikkol nong bulh a, ka kalsuanna khempeuh leh ka khekhap nangawn na entel hi. Tua huhau-in singmuat bangin ka puk a, nget in a nek puan bangin ka zangawp hi. “Mihingte a nuntak hun tom a, lungkhamna tawh kidim hi. Amaute pakpalh bangin khangin keu pak uh a, niliim bangin pai hanhanin mangthang uh hi. Pasian aw, tua bang lel mi kei hong en a, thukhenna thuak dingin na mai-ah hong sam na hi hiam? Mihing banga a ninte sung panin a siang bangmah hong piang lo ding hi. Ama nuntak tan ding kisehkhol a—a nuntak ding kha phazah kiciangtan khin hi. Nangmah in na ciangtan khin a, kikheel thei lo hi. Amah en loin tuaci omsak mai in la, a nuntakna haksa mah zomsak hoh in. “A kiphuksa singkung nangawn in lametna nei a, a bul sel-in nungta kik thei hi. Lei sungah a zungte a teek zongin, lei sungah a bulsum a si zongin, guahtui ngahin, singkungno bangin hong sel kik hi. Ahi zongin, mi si a, amah maimang pah hi; amah a beina tungta a, koi-ah om nawn ahi hiam? Gun tuite leh tuipi tuite a kan hun om thei ding hi. Ahi zongin vanpi a om lai tengin, misite tho kik ngei lo ding a, a ihmutna panun khanglo ngei lo, tang ngei lo ding uh hi. Tua ciangin kei na hong sam ding a, kong dawng ding hi; nangma bawlsa ahi keimah na hong lunggulh ding hi. Tua ciangin ka kalsuanna khempeuh nong en ding a, ahi zongin ka khialhnate nong sulzuih nawn kei ding hi. Ka khialhnate hong maisakin, nong paihkhiatsak ding hi; ka mawhna khempeuh nong phiat khiatsak ding hi. Tu-a bangin a piang thei hi leh ka ut mahmah hi. “Ahi zongin a tak takin ci lehang, mualte a puk ding hun, suangkeente nangawn a cip ding hun hong tung ding hi. Tui in suangte nawt khia-in, guahtui in lei a nawt khiat bangin, nangmah in mihingte’ lametna na beisak hi. Nangmah in mi khat zo gawpin amah bei hi; A meel kheksak gawpin na hawl mang hi. A tapate in amah pahtawi dingin hong pai ta leh zong bangmah phawk zo nawn lo a, a tapate mindai ta leh zong bangmah phawk zo nawn lo hi. A pumpi sunga a natnate leh a lungsim gimna bek phawk in,” a ci hi. Tua ciangin Teman khua mi Elifaz in dawng a, “Job aw, mawk paupau kei in! Nang’ pau bangin mipilte pau ngei lo a, bangmah-a kimang lo kam pau lo a, phattuamna om lo dingpi-in thu seel lo uh hi. Ahi zongin nangmah in Pasian zahtak nading na beisak a, ama mai-ah thu gen nading na khaktan hi. Tu-in na mawhna thu na kam panin hong gingkhia a, ngian zangin na kampau tawh na mawhna na seel hi. Na mawhna thu kei’ hong gen kisam lo a, na pauna khempeuh in na mawhna hong langsak ta hi. “Mihing a piang lakah nang a masa pen kisa na hi hiam? Pasian in mualte a bawl lai-in nang a piang khin kisa na hi hiam? Pasian’ vaihawmnate a zasimin kingaihsun na hi hiam? Nang bek in pilna khempeuh a nei-in kingaihsun na hi hiam? Ko’ theih loh thu bang thei tuan na hi hiam? Ko’ muh loh nang bang mu tuan na hi hiam? Na pa’ pian’ ma-a piang puteek samkangte tung panin kote in ka pilnate uh ka ngah uh hi. Pasian in nang hong hehnem hi; bang hangin nialnial na hi hiam? Kam khum kam nem tawh Pasian’ taangin nang tungah thu kong gen uh hi. Ahih hangin nang na lung khauhin, kote nong heh et hi. Pasian’ tungah a heh na hi a, amah a simmawh na hi hi, tua bang thu gen kei in. Mihing-a piang peuhmah paubaang loin siangtho taktak zo ding ahi hiam? Pasian’ tungah a thuman zo kua om ding ahi hiam? Pasian in a siangtho vantungmite nangawn muang lo ahih leh, ei mawhnei mite bang hong ci muan’ mah ding ahi hiam? Mihing in tui i dawn bangin siatna i dawndawn a, mihing pen siahuai-in bangmah i man kei hi. “Job aw, tu-in ka thutheihte na ngai in. Mi dang a nengniam migilopa in a khan’ tawntungin lungkhamna thuak ding hi. Lau nading awging a bil-ah za ngitnget ding a, lungmuangin a om lai takin gutate in buluh ding hi. Lungzin’na pan suahtak nading lametna om lo a, amah that dingin mun khatah namsau in ngak khinkhian a, amah ne dingin musanete in ngak uh hi. A mai lam thu lungzin’huai ahihna thei hi. A thahat kumpi khat bangin lungkhamna leh lungzin’na in amah hih gawp dingin a ngak hi. Pasian langpangin a khuttum a lahsan, Vanglianpa a dem mipa in hih bang thute thuak hi. Bang hang hiam cih leh amah in khauhtakin Pasian langpangin, a lum sahpi tawh lehdo hi. A thatang muan’huai-in a pumpi a liat hangin, ama teen’na khuapi sia-in, ama inn kisusia ding a, a sawt loin nin bulomtang suak ding hi. Amah sauvei hau lo ding a, a neihsate kip lo ding hi. Ama liim nangawn maimang ding a, khuamial panin suakta lo ding hi. Amah pen, a hiangte mei in a kattumsak, a pakte huih in a letkhiatsak singkung tawh kibang ding hi. Amah in gitlohna suan’in nei ahih manin, gitlohna bek mah ngah kik ding hi. A hun a tun’ ma-in amah bei ding a, singhiang bangin keu-in hing kik nawn lo ding hi. A min ma-in a gahte a pulh leenggui bang ding a, a pakte a pulh mangkhin oliv kung bang ding hi. Bang hang hiam cih leh Pasian ngaihsun lote mi cimang suak a, sumgolh tawh kilam innte mei in kangtum hi. Hih bang mite in siat nading bek ngaihsunin sem uh a, a lungsim uh ah khem ding bekbek ngaihsun uh hi,” a ci hi. Tua ciangin Job in dawng a, “Tua bang thute ka za ngei khin hi; hehnepna in gim nading bek ahi hi. Khawl hun nei loin gengen lai ding na hi uh hiam? Na gen ding uh omom lai ahi hiam? Note leh kei kikheek thei hi lehang, note’ gen khempeuh kei zong ka gen thei ding hi. Note ka lu hong pei sanin, thu tampi tak mah kong gen thei ding hi. Ahi zongin, keimah in note hong tua cih loin, thu hoih tawh note hong hehnemin, note hehnep nading thu ka gen ding hi. “Thu gen leng ka natna nuamtuam lo a, pau kei ta leng zong, phatuam tuan lo hi. Pasian aw, kei nong paatsak ngiingei a, ka innkuan teng na si sak khin hi. Kei nong mancip a, ka gal na suak hi. Ka vun guak leh ka guh guak bek-in ka om a, keima mawhna a kilatna-in mite in ngaihsun uh hi. Pasian in a hehna tawh hong balnen ngiingei a, a ha hong gawi sanin hong heh et hi. Mite in kei hong zahko uh a, ka paang a beng dingin hong kikhawmtuah uh hi. Pasian in migilote khut sungah kei hong pia hi. Kei nuamtakin a om kim lai, Pasian in ka gawl-in hong manin, hong balgawpin hong sugawp hi. Pasian in a muitum dingin kei hong suang a, ka kimkot panin a thaltangte tawh hong kap hi. Tua thaltangte in kei hong kha-in hong liamsak a, tua bang nangawn ah hong hehpih lo hi. Amah in kei hong liamsak thuahthuah a, galkap a hehpa bangin hong hih gawp hi. Kei thuum-in puanhampi ka silh a, guallel-in leivui lakah ka om hi. Ka kah kahna-in ka mai khempeuh sangawp a, ka mitkhute bawkin hong liahcip hi. Ahi zongin ngongtatna themkhat zong ka zang kei a, Pasian’ tungah ka thungetna in lungsim takpi tawh ahi hi. “Leitung aw, a man lo-a kei hong kibawlna seelcip kei in! Thuman deih-a ka kikona aw daicip sak kei in. Kei’ adingin a ding ding, kei hong pan’pih ding mi khat a sanglam vantungah om hi. Keima tang-a sempa in ka lawmpa ahi hi, Pasian in ka khitui luan’na bangin ka thungetna hong za leh ka ut hi. Mi khat in a lawmpa’ ading a thuumsak bangin, mi khatpeuh in Pasian kiangah kei ading hong thuumsak leh ka ut hi. Bang hang hiam cih leh ka hun nai mahmah ta a, ka lehzuih nawn loh ding lampi zui-in a pai ka hi ta hi. Ka bei ding naikuan ta hi. Ka hu ka sang zo nawn kei a, kei adingin hankhuk cih loh bangmah dang om nawn lo hi. Ka heina khempeuh ah mite in hong zahko a, amau’ hong phinna in hong lungzingsak hi. “Pasian aw, kei hong hu in. Ka thugente hong pan’pih ding kuamah dang om lo hi. Nangmah in amaute thuman a mu lo dingin bawl na hih manin amaute na gualzosak kei ding hi. Paunak in, sum ngah nop manin mi khat in a lawmte a lehhek leh, a tate in tua gitlohna thaman thuak hi, kici hi. “Tu-in amaute in kei tungah hih paunak hong bulh uh a, mite in hih thu za-in kei hong cilpih uh hi. Ka dahna hangin ka mit mial a, ka khut ka khete ciangkang bang hi. Mi hoih-a kineite in lamdang hong sa uh a, migilo-in kei hong seh uh hi. Mite’ zahtak-a kinei mite in, amau’ ngaihsutna man sa semsem uh hi. Thuman sem mite in thahat semsem ding hi. Ahi zongin amaute khempeuh hong pai-in ka mai-ah hong ding le uh, amaute lakah mipil khat zong ka mu kei ding hi. Ka hun bei ta hi; ka geelna teng maimang a, ka lametna teng bei ta hi. Ka lawmte in, zan khuamial pen sun khuavak, ci uh hi; khuavak hong nai ta hi, ci uh a, ahi zongin khuamial sung mah ah kei ka om lai veve hi. Kei’ lamet nading misite’ gam bek om lai a, tua khuamial sungah lumin ka ihmu ding hi. Hankhuk pen ka pa hi, ka ci ding a, kei hong ne thante pen ka nu leh sanggam numeite, ka ci ding hi. Kei’ lamet ding tua lai-ah bang om ahi hiam? Ka lamet ding tua lai-ah kua in nong muhsak uh hiam? Misite’ gam Leinuai-ah ka pai ciangin nopsakna in kei hong zui lo ding hi,” a ci hi. Tua ciangin Shuah gammi Bildad in dawng a, “Job aw, khawl hun nei thei lo ding na hi hiam? Hong khawl phot lecin, ko zong thu kong gen thei ding uh hi. Bang hangin bawng bang lelin kote hong ngaihsun a, mihaipi-in kote hong seh na hi hiam? Na hehna tawh nangmah a kigimsak bek na hi hi. Nangma hangin leitung kinusia ding a, mualte kikhin khia ding sa na hi hiam? “Migilopa’ meivak kisumit ding a, cikmah hunin a kuangkik ngei nawn kei ding hi. Ama buk sungah khuamial ding a, a meivak mit ding hi. A khe kip ngei a, ahi zongin tu-in a khe bai ta hi. Amah in a ngaihsut khialhna puklawh hi. Thangsiahna ngen sungah bungbu tuk a, gum sungah amah kia hi. Thang-ah a khetul-in awk a, thangkhau in amah gakcip hi. Amah siahna-in lei lakah khauzak kitung a, a pai nading lampi-ah thang kisiah hi. A ciangciang-ah lauhuaina in amah pang a, a kalsuanna khempeuh ah sulzuih hi. Siatna in amah ngak a, siatna in su dingin amah ngak gige hi. A kihtakhuai natna in a pum khempeuh tuam a, a khut leh a khete muatsak ta hi. Lungmuang tak-a a omna inn panin kikaikhia a, Sihna Kumpipa kiangah kitunpih hi. Ama sihna hangin a inn zatui tawh a kisian’suah khit ciangin a ut peuhpeuh tua inn-ah teeng thei pah ding hi. Lei sunga ama zungte keu in, a tunga ama hiangte a si ta hi. Inn leh gam-ah a minthan’na bei ta a, kuamah in amah phawk kha nawn lo hi. A nungtate’ gam panin amah kihawl khia ding a, khuavakna mun panin khuamialna-ah kihawl khia ding hi. Amah in suan-le-khak nei lo a, a teen’nasa mun-ah ama gui zom ding om lo hi. Nisuahna pan nitumna dong ama thuakna a za peuhmah kigaih-in launa tawh liing uh hi. Migilote, Pasian a ngaihsun lote’ thu tawpna in hih bang mah ahi hi,” a ci hi. Tua ciangin Job in dawng a, Bangtanvei thu gengenin, kei hong gimsak ding na hi hiam? Kei nong simmawh niloh a, tua banga na gamtatna ah maizumna mel na nei thei kei hi. A khial takpi mah hita leng zong, nang’ lainat nading bang om ahi hiam? Keimah sangin a hoih zaw-in nang na kingaihsun a, ka thuaknate pen ka mawhna hang hi, ci-in na ngaihsun hi. Hih thu hong piangsakpa in Pasian ahih lam mu thei lo na hi hiam? Kei hong mat nadingin amah in thang hong siah hi. Hong ngong bawlna ka nial hangin kuamah in hong don kei hi. Thuman ka deih hangin hong kipia kei hi. Pasian in ka lampi khaktan a, ka paisuak zo kei hi. Amah in ka pai nading lampi khua mialcipsak hi. Amah in ka hauhna khempeuh hong lakkhiatsak a, ka min hoih kimlai hong siasak hi. Amah in ka pumpi khempeuh hong satgawp hi. Ka nopsakna teng hong zunglot sakin, vul gawpin a si dingin hong nusia hi. Kei’ tungah Pasian’ hehna sogawp a, ama gal lian penin kei hong ngaihsun hi. Amah in keimah sim dingin a galkapte hong sawl a, galkapte in dum to-in ka buk hong umcih uh hi. “Pasian in ka sanggamte hong taisan sak a, kei hong theisate kiangah mikhualpi ka suak hi. Ka behte leh ka lawmte bei ta hi. Ka inn-ah hong tung ngei ka zinte in hong mangngilh ta a, ka na a sem numeite in mikhual bangin hong bawl a, amau’ mai-ah midangpi ka suak hi. Ka nasemte khatpeuh ka sap ciangin hong dawng nuam lo uh a, hong huh nading ka thuum ciang nangawnin hong thudon lo uh hi. Ka zi in ka gimnam nam zo lo a, ka sanggamte mahmah in zong hong naih nuam lo uh hi. Naupang melmawl nangawn in kei hong simmawh uh a, kei hong muh uh ciangin hong nuihsan uh hi. Ka lawm it pente nangawn in kei hong muhdah et uh a, ka it pente nangawn in kei hong lang bawl uh hi. Ka guh tungah ka vun kol dihdiah-in om a, a nungta liai-liai bekin ka om hi. Hong hehpih un! Hong hehpih un! Ka lawmte hilo na hi uh hiam? Pasian in kei hong satpaai hi. Pasian’ hong bawlsiat bangin bang hangin no zong hong bawlsia ding na hi uh hiam? Nong gimsakna uh kicing ta hoh hilo ahi hiam? “Ka thugente mi khatpeuh in ciamteh hen la, laibu khat sungah khum leh ut mahmah ing! Tua ahih kei leh zong, ka thugente, sikkhu khat tawh suang tungah khen hen la, a mang ngei nawn lo dingin gelh leh ut ing! Ahi zongin a tawpna-ah kei hong pan’pih ding a nungta tawntung mi khat, vantungah a omna thu ka thei hi. Natna in ka vun a nektum khit hangin, hih ka pumpi mahmah tawh Pasian ka mu ding hi. Keima mit tektek tawh amah ka mu ding a, amah in kei hong mikhual et lo ding hi. Ka lungsim han’na bei hi. Bang hang hiam cih leh, “Amah bang i ci gimsak thei ding hiam?” na ci uh hi. Kei nong suk theih nadingun paulap khatpeuh na zong uh hi. Ahi zongin tu-in namsau kihta un—tua namsau in a mawhte tungah Pasian’ hehna hong sem ding hi; tua ciangin thu a khen ding khat a om lam na thei ding uh hi,” a ci hi. Tua ciangin Na-amah gammi Zofar in dawng a, “Job aw, ka heh nong suaksak a, kei ka ki-iip zo nawn kei hi. Na thugente khempeuh kei nong simmawhna kam hi a, ahi zongin kong dawn’ nading ka thei hi. Tanglai pek-a kipan, leitungah mihing a om cil-a kipanin, migilote’ nopsak hun a tomna thu, Pasian a thudon lote’ lungdam hun a tomna thu thei lo na hi hiam? Migilopa lianin vantung a banto zongin, lian mahmah in a lutang in meii lak a banto zongin, leivui them bangin maimang lel ding hi. Amah a thei ngei mite in, ‘Amah koi-ah om ta hiam?’ ci-in lamdangsa ding uh hi. Amah pen zan-a mangmat bang leh mumaang bangin maimang ding a, cik mah hunin kimu kik ngei nawn lo ding hi. Ama teen’na ngei mun panin amah mangthang ding a, mizawngte’ na a suhsakte, a tate in a lohsak kik ding uh hi. A pumpi moisuahin a thahat hangin, a sawt loin leivui suak pak ding hi. “Ama kam sungah gitlohna lim sa mahmahin, namtui sa-in a leii tawh lop melmel a, amah in muam muam nuamin siakhia nuam lo a, lim sa-in a dangtawng den’na-in a neih hangin, a gil sungah a kha mahmah an suakin, gulgu a khapen zahin kha deidai hi. Migilopa in a guksa hauhnate luakhia kik a, a gil sung nangawn panin Pasian in a lakkhiatsak hi. Migilote’ nekte in gu tawh kibang a, gulgu neite’ tuk bangin amah si sak hi. Amah in bawngnawi leh khuaizu guntui bangin a luang mu kha lo ding hi. Amah in a nasepna thaman khempeuh nusia ding a, a hauhna zang kha man lo ding hi. Bang hang hiam cih leh amah in mizawngte bawlsia-in don lo a, midangte’ inn lamsate sutin a tang hi. “A huaihamna bei ngei lo a, a duh khempeuh siit nei lo hi. Amah in a nek ciangin a khamval om nawn lo a, tu-in a hauhna teng bei ta hi. A cihtheih pen hun lai takin, ama tungah lungkhamna lianpen tung ding hi. Amah in a duh duh ne mai hen! Pasian in hehna tawh daantat ngawn ding hi. Amah in namsau pelhin a taina-ah sumngo thal in kaptuk ding hi. Thaltang khat in a pumpi pailet a, a te-dildel thaltang muk-ah si taak keuhkeuh a, ama tungah a kihtak huaipi hong tung hi. Ama kholsa khempeuh kisusia a, mihing’ tawh loh meikuang in amah leh a innkuan khempeuh kangtum hi. Vantungte in hih mipa’ mawhna pholak a, leitung in ama langah teci pang hi. Pasian’ hehna hangin, ama hauhna khempeuh kisusia ding hi. Migilote’ ngah ding a Pasian’ piak, migilote’ ngah in tu-a bang ahi hi,” a ci hi. Tua ciangin Job in dawng a, “Ka thugennate lim takin hong ngai un la, Ka thu nong ngaihna uh nong hehnepna uh hi sak ni. Thu ka gen theih nading hun hong pia un la, ka gen khit ciangin na ut uh leh hong zahpih un. Kei’ kitotpihpa in mihing hi lo hi. Bang hangin lungtom lo ding ka hi hiam? Kei hong en dih un. Lamdang na saktaak ding khat uh hilo ka hi hiam? Keima tunga thu piang ka ngaihsut ciangin, lamdang sa-in lau-in ka liing hi. Bang hangin Pasian in migilote khan’to sak a, hau sakin liansak ahi hiam? A tate uh nuam takin a khan’tohna, leh a u a nau, a suan a khakte uh a pun’na a mu ding dongin nungta uh hi. Pasian in amaute’ inn sungah lungkhamna tungsak lo a, amaute in lauhuaina thuak kha ngei lo uh hi. A bawngte uh pung a, ta tolh cih zong om lo hi. Tuuno bangin a naupangte uh tai khia-in kimawl uh a, tamngai leh harp lasakna aw tawh kituakin lam uh hi. Amaute a nuntak sungun ci-thei mahmah uh a, gentheihna thuak se loin si hiat uh hi. Migilote in Pasian nawlkhin uh a, Pasian in amau’ nuntak nadingin a deihsaknate thei nuam lo uh hi. Pasian’ nasep ding kisam sa lo uh a, Pasian’ kianga thunget a phattuamna om kei, ci uh hi. Amau’ thahatna hang bek tawh a gina kisa uh a, amau’ ngaihsutna leh kei aa kigamla hi. “Migilopa’ meivak kisukmit sak ngei ahi hiam? Amaute khatbeek in lungkhamna tuak ngei ahi uh hiam? Pasian in migilote hehna tawh daantat ngei ahi hiam? Huih in a letkhiat buhkungte bang, huihpi in a mutkhiat buhsi bangin bawl ngei ahi hiam? Pasian in a pa’ khialhna hangin a ta daantat hi, na ci uh hi. Tua bang hilo! Pasian in a mawhte mahmah daantat hen la, amau’ mawhna hangin daantat ahihna thei sak hen. Mawhneite amau’ mawhna daan thuaksak hen la, Vanglian Pasian’ hehna theisak hen. Mi khat a nuntakna a bei ciangin, a tate’ nopsakna phawk thei ahi hiam? Mi khat in Pasian tungah thu hilh thei ding ahi hiam? Mi khat in Vanglian Pasian tungah thu khen thei ding ahi hiam? Mi pawlkhatte a ci-thei mahmah-in si a, lungmuang lungnuamin om uh a, annek tuidawn kicingin cidam hi. Pawlkhatte ahih leh nopsak cih thei kha ngei loin, lunggim lungkhamin si uh hi. Ahi zongin a kibangin a vekpi-in si-in kivui a, than in amaute tuamcip hi. “Na lungsim sung uh ah na ngaihsutna, kei nong siatsak nopnate uh ka tel mahmah hi. Siatna a gamta, mi lianpa’ inn, koi-ah om ta ahi hiam; na ci uh hi. Khualzinin mite tawh kiho ngei lo na hi uh hiam? Amaute’ thugente thei lo na hi uh hiam? Pasian hehin daan a piak ciangin, migilote peng tawntung zawsop hi. Migilopa a gamtatna bangin a thukkik ding, migilopa mawhsakin a langpang ding kuamah om lo hi. Migilopa han-ah a kivui ciangin, a hankhuk kicing a, mi tul tampite in amah kha-in, damtak leh kangtakin lei tawh kivuk hi. Tu-in note in amawknapi tawh hehnep nong sawm uh hi. Na gen thu khempeuh uh zuauthu bek hi lel hi,” a ci hi. Tua ciangin Teman khua mi Elifaz in dawng a, “Mihing a pil pente i cih nangawn, ama pumpi’ ading cih loh buang, Pasian’ ading a kiman’na om lo hi. Na gamtat hoihna in Pasian’ phattuam nading piangsak lo a, na hoihna in Pasian hoihsak tuan lo hi. Nangmah in Pasian na zahtakna hangin, amah in nang hong tai-in hong ze-et hilo hi. Na mawhna a tamna hang, na gitlohna a liatna hang hizaw hi. Na sanggampa’ hong sum bat taang dingin, a silh ding siitsak loin a puan teng na laksak hi. A dangtakte tui na pia nuam kei a, a gilkialte an na pia nuam kei hi. Na vangliatna leh na za liatna zangin, gam khempeuh na la khin hi. Meigong numeite a huh nuam lo bek hi loin, mi tagahte bawlsia-in a neihsa uh na sut hi. Tua ahih manin na kimkotah thang hong siah a, thakhat thu-in launa in hong buaisak hi. Khuavak kimlai khuamial hong suak vatin khua na mu thei kei a, tuikhang in nang hong tuumcip hi. “Van a sang pen dawn-ah Pasian om a, a sang mahmah a om aksite hong suk et lai hi. Ahi zongin nangmah in, Pasian in bang thei ding ahi hiam? Meii in Pasian tuamcip hi—eite’ thu bang hong ci khen theih ding ahi hiam?’ na ci hi. Van khumzangah Pasian a pai kawmin, meii pailetin Pasian in hong musuk thei lo ding hi, ci-in na ngaihsun hi. Migilote’ gamtat ngeite mah gamtat ding ngaihsun na hi hiam? Amau’ hun tung lopi-in tuikhang in amaute taai hi. Hih mite pen Pasian a nial, Pasian in amaute bangmah a cih thei lo dinga a ki-umte ahi uh hi. Tua hita se leh amaute a daupaisakpa in Pasian hi a, migilote’ ngaihsutna kei aa tawh kigamla hi. Migilote a kidaantatna a muh uh ciangin mi hoihte nuamin, pauban’na nei lo mite in nuihsan uh hi. Bang hang hiam cih leh migilote’ neih khempeuh kisusia a, a om lai sunte nangawn mei in kangtum hi. “Job aw, tu-in Pasian tawh kilem in la, amah galbawl nawn kei in; tua hi leh amah in nang thupha hong pia ding hi. Ama hong hilhnate zui in la, ama thute na lungsimah ciamteh in. Lungsim tak tawh Vanglianpa lamah kihei in la, na innsung pan gamtatsia khempeuh bei sak in la, na kham neihte leivui bang lelin ngaihsunin, na Ofir khamte gunsuang bang lelin ngaihsunin, Vanglian Pasian pen nangma kham, leh nangma ngun hi sak lecin, Pasian na muang tawntung ding a, na lungdamna bulpi in amah ahih lam na thei ding hi. Thu na nget ciangin amah in na ngetna hong pia ding a, na thuciamnate na tungsak ding hi. Na hih khempeuh na taangtun’ dinga na maa vang ding hi. Pasian in mi kiphasakte niamkhiat a, mi niamte gum hi. Nang a mawhbaang lo a, na gamtatna a man ahih nak leh amah in nang hong hon ding hi,” a ci hi. Tua ciangin Job in dawng a, “Tu lai takin Pasian tungah phun lo, heh lo in ka om thei kei a, thuum loin ka om thei kei hi. Amah ka zon’na ding dan thei-in, ama kiang ka tun’na ding zia thei hi leng, ama mai-ah ka thu ka gen ding a, kei ka dikna thu a kicingin ka gen ding hi. Ama hong gen ding thute leh kei hong dawn’ nading thute ka thei nuam hi. Pasian in a thaneih khempeuh tawh kei hong langpan’ ding ahi hiam? Langpan’ lo ding hi, ka thugenna ngai ding hi. Kei a thuman ka hi a, Pasian kiangah ka gen thei ding hi; kuama phel zawh nawn loh dingin kei’ dikna genkhia ding hi. “Ahi zongin Nisuahna lam ka zong a, Pasian ka mu thei kei hi; Nitumna lam ka zong a, amah ka mu thei tuan kei hi. Leilu lam ka zon’ hangin amah ka mu thei kei a, Leitaw lam ka zon’ hangin zong amah ka mu thei tuan kei hi. Ahi zongin Pasian in ka kalsuanna khempeuh thei a, kei hong ze-et khit ciangin kham bangin ka sian’thona a mu ding hi. Ama hong lamlahna citakin ka zui a, lam ka pial ngei kei hi. Pasian’ thupiakna bangin ka gamta ngitnget a, keima utna zui loin, ama deihna ka zui hi. Amah in a lungsim kheel mi hi lo a, kuamah in amah nial zo lo hi. Ama hihnopte kuamah in khaktan zo lo hi. Tua ahih manin kei’ adingin a geelsate amah in tungsak ding hi. Amah in hih banga geelna tampi nei hi. Tua hi a, ama omna-ah kei ka lau mahmah a, ka ngaihsut khak ciangin amah ka kihta hi. Vanglian Pasian in ka lungsim hanna hong maimangsak hi. Khuamial in ka mit hong mialsak hangin keima kihtak in khuamial hilo a, Pasian ahi hi. “Pasian in bang hangin thu a khen ni ding hun seh lo a, ama na a semte thutang ahihna a lah ni ding seh lo ahi hiam? Mite in leitang gol a ngah theih nadingun gisuangte khinsim uh a, tuute gu-in amau’ tuuhon tawh khawl khawm uh hi. Mi tagahte’ la neihsunte guksak uh a, meigong numei in a leiba a loh khit dong a bawngtal matsak uh hi. Mizawngte’ ngah theih dingte khaktan uh a, mizawngte notkhia uh ahih manin amaute bucip uh hi. Tua ahih manin gamlak la bangin gam keuna sungah a an ding zong tawm uh a, a tate uh an ding koi mah-ah mu zo lo uh hi. Midangte’ lo sungah anlak na sem uh a, migilote’ leenggui lo-ah leenggah loin om uh hi. Zan-in puan silh loin lum uh a, khuadampi lakah silh ding nei loin om uh hi. Mualtung pan-a hong zu guahtui in amaute kawt ciimsak a, suangpi pang peuh belin toncip uh hi. Migilote in pa nei nawn lo naupangte sila-in nei uh a, mizawngte’ tate leiba taangin la uh hi. Tua mizawngte in puan silh loin na sem uh a, gil kialpi-in anlak na sem uh hi. A thau ngah nadingin oliv gahte gawi-in, leenggahzu ngah nadingin leenggahte cil napi-in, gilkial dangtakpi-in ki-omsak hi. Khuapi sungah a liam a site’ kikona kiza napi-in Pasian in amau’ thungetnate don lo hi. “Sun khuavak a nial, tua khuavak thuzia a thei lo, khuavak lampi a pelh mi pawlkhat om hi. A zawng a cimawhte a that dingin khuavak ma-in mithatpa kuankhia a, zan sungin mi’ na guksak hi. Numei tunga mawh mipa in khuamial ding ngakin om a, mite’ theih loh dingin ama meel seel hi. Gutate in sun a ciamtehsa teng zan-in inn luh uh a, sunin amaute bu- in khuavak peel uh hi. Bang hang hiam cih leh zan khuamial pen amaute khempeuh’ adingin zing khuavak bang hi a, zan khuamial lauhuai sung nuamsa uh hi. “Tua bang migilote tuikhang in taai a, ama neih leitangte Pasian in samsia a, tua leenggui lote-ah nasemin kikuan nawn lo hi. Nisat hun leh khuakhal hunin vukkhalte a manthan’ bangin mihingte’ gamsung panin mawhnei mi mangthang hi. Amah kiphawk kha nawn lo a, a nu nangawn in zong mangngilh ta hi; thante in amah ne tum a, amah maimang ta hi. Bang hang hiam cih leh tua bang mi in numei tacingte’ neihsa tawh kivak a, meigong numeite’ phattuam nading bangmah bawl lo hi. Pasian in a thahatna tawh mi vangliante susia a, amah a gamtat ciangin migilopa si pah hi. Pasian in amah a lungnuamin nungta sak a, ahi zongin amaute langpanin, encik tawntung hi. Migilopa tomkha sung a liat hangin, kiak bangin vulkik pahin, a kisattan ankung bangin keu pah hi. Hih thu kua-in nial zo ding na hi uh hiam? Ka thugennate man lo hi, ci-in kua in hong sel zo ding na hi uh hiam?” a ci hi. Tua ciangin Shuah gammi Bildad in dawng a, “Pasian vanglian a, mi khempeuh in a zahtak ding ahi hi. Ama vantung kumpi gam, nuam takin a omsak zo hi. Ama na a sem a vantungmite a phazah kua in sim zo ding ahi hiam? Pasian’ khuavak in a bat lohna koi lai mun om ahi hiam? Pasian’ muhna-ah kua dik zo ding a, kua siangtho zo ding ahi hiam? Ama mit-ah khapi nangawn taang sa zo lo a, aksite nangawn siang sa zo lo hi. Tua ahih leh, lungno, ganhing no ahi lel mihing pen bangci ding hiam? Mihing in Pasian’ muhna-ah bang man lel ahi hiam?” a ci hi. Tua ciangin Job in dawng a, “A hehpihhuai kei nong huhna, a tha zawngkhal kei nong hotna, hih bang ahi hiam? Kei bang mihai tungah thumanpha nong gen a, pilna thu tampi nong pulak hi. Tua bang thu gen dingin kua in hong sawl a, kua’ lungsim hong pulak khia na hi hiam? Misite’ gam kiling a, a sunga teengte launa tawh ling uh hi. Pasian’ muhna-ah misite’ gam kilang sinsen a, a muh theih lohna dingin a liah bangmah om lo hi. Pasian in mun awng tungah vanpi zal a, bangmah in len lopi-in leitung khai lingleng hi. Amah in meiilom lakah tuite khol a, tua tui gihna meii a pua zo sak hi. Amah in kha a liah ding bawl a, meii tawh kha a khuh hi. Amah in muh tawpna-ah git dinden-in, khuavak leh khuamial khen hi. Amah in vanpi a pua khuampite a tai ciangin, tua khuampite lau-in ling uh hi. Ama thahatna tawh tuipi zo a, ama siamna tawh tuipi ganhing golpi Rahab thatlum hi. A hu a san’ ciangin vantung teng siang pah a, ama khut in a taikhia gulpi thatlum hi. Hihte in ama vangliatna themkhat bek hi pan a, i zak thute a heem lam bek hi pan hi. Pasian a liatna taktak kua in thei khin zo ding ahi hiam?” a ci hi. Tua ciangin Job in thu gen kik a, “Keima dikna hong seelcipsak Pasian, ka lungsim hong gimsak Vanglianpa a nungta ahih mah bangin, ka sungah nuntakna a om lai teng, Pasian’ hu, ka nak-ah ka diik lai teng, ka muk tawh thusia peuhmah ka gen kei ding a, ka kam tawh zuauthu peuhmah ka gen ngei kei ding hi, ci-in ka kiciam hi. Note a thuman hi, kong ci ngei peuhmah kei ding a, ka nuntak lai teng, kei a thuman hi’ing, ka cihna ka khia ngei kei ding hi. Kei’ thuman ka kisakna ka khia ngei kei ding hi; ka lungsim-ah kisuanna om loin siang mahmah hi. “Kei hong langpan’ kei hong dote in, migilote leh thumanlote bangin daan thuak ta hen. Pasian in amaute’ nuntakna a laksak hun ciangin, migilote’ ading bang lametna om ahi hiam? Lungkhamna a thuak uh ciangin, Pasian in amau’ kikona aw ngai ding ahi hiam? Pasian in a piak ding lungdamna a deih ding uh kilawm ahih manin, ama tungah thu a nget tawntung ding uh a kilawm ahi hi. Pasian’ vangliatna bangzahin lian cih hong gensak un la, Vanglian Pasian’ geelsa teng hong laktel sak dih un. Ahi zongin tuate khempeuh na theih khitsa uh ahi hi; tua ahih ciangin bang hangin mawk pau na hi uh hiam? “Vanglian Pasian in mi gilote’ mi ngongtatte, daan a piakna hih bang ahi hi. Tapa tampi a neih hangun, a vekin gal sungah si mang khin ding uh hi; a tate uh gilkial tawntung ding uh hi. A nungta lai sunte zong pulnatna tawh si ding uh a, meigong numeite in misite kah zo lo ding uh hi. Migilote in kuama sim zawh loh ngun tampi tak nei ding uh a, gen zawh lohin nikten puansilh ciang venvan ding uh hi. Ahi zongin mihoih pawlkhat in tua puante silhin, thuman mi pawlkhat in tua ngunte tang lel ding uh hi. Migilote’ lam innte kho lo a, maimom bu, ahih kei leh lo hon’na buk tawh kibang lel hi. Amaute a hau sa-in lum uh a, ahih hangin a hausa-in a lumkik nawn kei ding uh hi. Zingsang a khan’lawh ciangun a neihsa teng uh na bei ta hi. Lauhuaina in tuikhang pak bangin nawk gawp ding a, zan ciangin huihpi in amaute mut khia mang ding hi. Nisuahna huihpi in amaute len khia-in, a inn panun gamlapi-ah len khia ding hi. Amaute in a suahtak theih nading a hanciam tantan kim lai mah, hehpih ngaihsut loin len khia mang ding hi. Amaute a tai lai takun huih in nawk gawpin, a susia dingin mutgawp hi. “Ngun a kitawh khiatna ngunkhuk om a, kham a kisian’ sakna mun mah a om hi. Mihingte in lei sung panin sik tokhia a, suang sung panin sumsan huantui uh hi. Mihingte in khuamial thuk pen sung zongin, lei sung a thukpi dong zong uh a, khuamial thuk tawng sung pan suang tokhia uh hi. Mihingte’ teen’na panin a gamlapi mun, kuamah a pai ngei lohna sungah, lei sung sumte tokhia uh hi. Tua lai-ah amau guak in na sem uh a, leithuk sungah khauhual tawh kivei suk kivei to uh hi. Lei tungah an nek ding hong pokhia a, ahi zongin lei nuai thuk sung mei bangin sa hi. Lei sunga om suangte sungah sapfeiros suangmanpha om a, a leivuite sungah kham om hi. “Simbung in zong tua lampi thei ngei lo a, luimu zong tua lai-ah va leng ngei lo hi. Humpinelkai ahi a, a kihtakhuai ganhing dangte ahi zongin, cik mahin tua lai-ah va pai ngei lo uh hi. “Mihingte in suang sak pente to uh a, mualte’ bul lei sung panin tokhia uh hi. Suangte a tawhvang uh ciangin, suangmanphate mu uh hi. Amaute in tuinak kipatna dong lei sung to uh a, a kiphumcip nate hong suahkhia uh hi. “Ahi zongin koi lai-ah pilna kimu ding ahi hiam? Koi lai-ah thutheihna nak om ahi hiam? A kimuh nading lampi mihingte in thei lo a, mihingte’ gam sungah lah om lo hi. A thuk mahmah tuipi liante in, ‘Ko sungah om lo hi,’ ci uh a, tuipite in, ‘Ko kiangah om lo hi,’ ci uh hi. Pilna pen kham tawh a kilei zo hi lo a, a man zong ngun tawh a kiseh thei hi lo hi. Ofir kham tawh a kilei zo hi lo a, suangmanpha pen tawh zong a kilei zo hi tuan lo hi. Pilna a manphatna kham leh limlang tawh teh theih hi lo a, kham hoihpen kibawl nate tawh zong lei zawh hi lo hi. Pilna manphatna pen suangkhi leh limlangte tawh genteh theih hi lo a, pilna themkhat in kep sangin manpha zaw lai hi. Ethiopia gam-a piang Topaz suangmanphate tawh teh theih ding hi lo a, kham citak pente tawh zong kiteh thei tuan lo hi. “Tua ahih leh pilna koi lai pan hong piang ahi hiam? Thutheihna koi lai-ah om ahi hiam? Nuntakna nei sungpan a mu thei kuamah om lo a, a leeng thei vasate nangawn in mu thei lo hi. Sihna leh siatna nangawn in, a thu hem zak bek ung, ci uh hi. “Pasian bek in pilna lampi thei a, amah in pilna a omna mun thei hi. Bang hang hiam cih leh amah in leimong khempeuh dong mu a, vantung nuai-ah a om na khempeuh mu thei hi. Pasian in huih a gik nading zah bawlin, tuipi liat nading zah a seh laitak, guah a zuk nading mun thu pia-in, vangingte’ zuih ding lampi a bawlsak laitak nangawnin, amah in pilna mu-in a manphatna entel a, amah in hoih sa-in kipsak hi. Tua ciangin amah in mihingte tungah, ‘ Topa zahtakna in pilna ahi hi, siatna pelhna in thu theihna ahi hi,’ ci hi,” a ci hi. Tua ciangin Job in a thu gen kik a, “Ka nuntakna nidanga bang hi kik hen la, Pasian in kei hong et hun lai bang hi kik leh ka ut hi. Tua hun lai-in Pasian in kei hong ompih tawntung a, khuamial sungah ka pai laitakin Pasian in khuavak hong pia hi. Tua hun in ka cih theih pen hun laitak hi a, Pasian in ka innkuan hong hut laitak ahi hi. Tua hun lai-in Vanglian Pasian in kei hong ompih a, ka kimkotah ka tate om uh hi. Ka bawngte leh ka keelte in nawi deih zahzah hong pia uh a, suang tam penna leilak nangawn-ah ka oliv kungte hoih mahmah hi. Khua sung upate a kikhop ciangin, amaute lakah kikhawm dingin ka pai ciangin, kei hong muh phetin khangnote in tutna hong awn uh a, kei hong zahtakna limin papite na ding uh hi. Khua sung uliante a kiho na khawl pah uh a, a khut uh tawh a kam uh na hum uh hi. Mi thupi pente nangawn na gamdai pah uh a, kuamah pau loin na om uh hi. Ka thugen a za mi peuhmah in a hoih lamin na za uh a, hong mu mi peuhmah in dik hong sa uh hi. Mizawng ka theih peuhmah ka huh a, cih nading thei lo tagahte ka huh hi. A lungkham a cimawhte in kei hong phat uh a, meigong numeite lungnuamin ka omsak hi. Thumanna puan bangin ka silh a, thuman in hong tuam hi. Thutang pen puanpi bangin ka silh a, thutang in hong tuam hi. Mittawte’ adingin mit ka hi a, khebaite’ adingin khe ka hi hi. Mizawngte’ adingin a pa uh ka hi a, lungkhamna a thuak ka theih loh mite ka pan’pih hi. Migilote’ gitlohna ka sugawp a, amau’ sukgawp mite ka honkhia hi. Ka kum sehnel zah-a tam dingin ka ngaihsun a, nuamtakin inn-ah a si dingin ka kilamen hi. A zung in tui a ngah tawntung singkung tawh ka kibang a, a hiangte daitui in a nomsak tawntung singkung tawh ka kibang hi. Mi khempeuh in kei hong phat tawntung uh a, ka tha a hat tawntung hi. “Mite in ka thugen ngai-in hong ngak uh a, ka thugente pau loin lim takin hong ngai uh hi. Thu ka gen khit ciangin a genthuah ding uh bangmah thei nawn lo uh a, ka thugennate hoih takin na sang pah uh hi. Lokhote in khuapi-guah deihin a ngak bangin, ka thugente hoih takin na sang uh hi. Amaute, itna tawh ka nuihsat ciangin lungnuam uh a, ka mai a tai ciangin a mai gumna uh a bei hi. Amaute ukin a vai ding uh ka hawmsak, a kumpipa in a galkapte a makaih bangin ka makai a, a lungkham uh ciangin amaute ka hehnem hi. “Ahi zongin tu in, a pate uh mah bangin a kimang ngei lo, tuute a cing dingin ka uite tawh a kuan khawm dinga zong ka deih loh, kei sanga khangno zawte in kei hong ciamnuih bawl ta uh hi. Amaute’ hatna bei khinta ahih manin, amau’ hatna kei adingin banga kimang nawn ding ahi hiam? Amaute zawng mahmahin gilkial uh ahih manin gamlak singzung keu peuh teep lel ding uh hi. Amaute in singkungnote botin ne uh a, limna alna a nei lo poding zung nangawn ne uh hi. Gutate otkhai-in a kidelh bangin, mite lak panin amaute kihawlkhia hi. Amaute hawkguam sung leh luihawm sung, leihawm leh keenhawm sung peuhah a teen’ uh kul hi. Amaute ganhing bangin gamlakah ham uh a, sawlkawm nuai-ah kilomin omkhawm uh hi. Bangmah-a kimang lo misia honte, mite omna gam sung panin kihawlkhia hi. “Tu-in amaute in kei simmawhin hong nuihsan uh a, amau’ ciamnuihna bek ka suak ta hi. Amaute in kei hong kih uh a, kei tawh tehna-in amaute hoih lua kisa uh a, amaute in ka maitang nangawn cil hong phih uh hi. Pasian in kei hong zawngkhalsak hong cimawhsak ahih manin amaute in a ut utin kei hong bawlsia uh hi. Hih mihonte in kei hong simgawpin, kei hong taikhia sak uh a, ka sih nadingin ka mai-ah na pang uh hi. Ka suahtak theih nading lampi khaktan uh a, keimah suksiat ding hanciam uh hi; amaute a kho ding kuamah om lo hi. Kei ka bukna leihawm-ah hong tuaksuk uh a, kei hong sucip suk uh hi. Launa tawh ka kidim a, ka thupina teng huih letkhiat bangin beimang a, ka cihtheihna teng meii bangin theng ta hi. “Tu-in a si ding ka hi ta a, ka gimna pan noptuam ngah nading om nawn lo hi. Zan thapai-in ka guh sung ka taang sung khempeuh na a, hong pet tawntung natna pen dai ngei lo hi. Pasian in ka puan ngawng pan hong manin, ka puan tawh hong heekcip hi. Buannawng sungah kei hong lawn a, nin bulom bang lel ka hi ta hi. Pasian aw, nang kong sam a, nong dawng ngei kei hi; nang tungah thu kong ngen a, nong don het kei hi. Kei tungah nong gilo mahmah a, nong hih theih zahin kei nong bawlsia hi. Kei huih lakah hong lawnin huih nong lensak a, huihpi in kei hong lawnsuk hong lawnto hi. Mi khempeuh adingin a kisehkholsa ahi, sihna-ah hong paipih na hihna ka thei hi. “Na hehpih ding a hong thuum cih loh buang, bangmah dang ahih thei nawn lo misiapa, bang hangin sugawp na hi hiam? A lungkham mite tawh kei kap khawmin, a cimawhte dahpih hilo ka hi hiam? Lungdamna leh khuavakna ka lamet lai takin, lungkhamna leh khuamialna hong tung zawsop hi. Lunggimna leh natna in kei hong sugawp a, gimna ka thuk ding cih loh bangmah dang om nawn lo hi. Lungkham sinkhamin ka om a, mihon lakah ding-in huhna ka ngen hi. Kei in gamkhing sunga om ngiate leh kalaoh vasate tawh a kipawl, a kikhawl ta ka hi hi. Ka vun vomin dulh khia a, ka pumtangin ka ci sa gawp hi. Nidangin lungdamna la kisa ka zakna mun-ah, thuumna leh kahna aw bek ka za ta hi. “Lunggulhna tawh nungak khatpeuh ka et ngei loh nading, lim takin kiciamna ka bawl khin hi. Vanglianpen Pasian in eite bang hong cih a, mihing gamtatna bangci thukkik ahi hiam? A man loin a gamtate tungah siatna leh gimna tungsak hi. Pasian in ka gamtatna khempeuh thei a, ka kalsuanna khempeuh hong mu hi. “A giloin ka gamtat ngei het lohna, kuamah ka khem ngei het lohna thute-ah ka kiciam ngam hi. Pasian in a man tawikhaina-ah hong tawikhai hen, ka pauban’ het lohna hong mu ding hi. Lampi man panin ka pial a, siatna lam ka zuih a, ka khut tungah mawhna a baan’ taak leh, Ka khawhsa ante midangte’ nek suak hen la, ka an khempeuh maimang ta hen. “Ka vengte’ zi zawlmit-in, a kong gei-ah ngakin ka buk taak leh, Ka it ka zi in midang’ an suksak hen la, midang’ ang-ah lum ta hen. (Tua bang mawhna in a siahuai hi a, sihna daan a thuak ding ahi hi. Ka neih khempeuh a kangtum mei husia tawh a kibang ahi hi.) “Ka nasemte khatpeuh peuh kei tungah a phun ciangin, a thu ngai-in lim takin ka bawl hi. Tua ci kei leng, Pasian’ mai bangci muh ngam ding ka hi hiam? Pasian in keima thu a khen dingin hong pai ciangin bang gen ding ka hi hiam? Kei hong piangsak Pasian mah in ka nasemte zong a piangsak ahi hi. “Mizawngte ka huhkhial ngei kei a, meigong numeite ka guaksuaksak ngei kei hi. Keimah in an ne ne-in, tagahte gilkialin ka koihkhong ngei kei hi. Ka khang tawnin tua bangte ka en tawntung hi. Mi a cimawh, puansilh ding a lei zo lo, a zawng lua ka muh ciangin, Ka tuuhon panin ka ngah tuumul puan kibawl ka pia hi. Amah in a lungsim neih khempeuh tawh kei hong phat hi. Zum thukhenna-ah zo na ning cih ngaihsutna tawh tagah khatpeuh ka kheem taak leh, ka khutte buisum hen la, ka liang bul panin kilong khia ta hen. Pasian’ daan piak ding kihta ka hih manin, tua bang peuhmah ka gamta ngei kei ding hi. “Leitung hauhna muan’ leh suan’in ka nei ngei kei a, ka hauhna zong ka kisaktheihpih ngei kei hi. A taang mahmah ni ahi a, a hoih mahmah kha ahi zongin, cik mahin ka bia ngei kei hi. Tua bang hih ding ngaihsutin zong ka nei ngei kei hi. Tua bang mawhna in sihna daan a thuak ding hi a, tua bang mawhna in Vanglian Pasian nialna ahi hi. Ka galte in gimna a thuak ciangin ka kipak ngei kei a, haksatna a tuah ciangun ka lungdam ngei kei hi. A sih nading uh deihna tawh cik mahin ka samsia ngei kei hi. Zin leh leeng lim takin ka do tawntungna thu, ka na hong sepsak mi khempeuh in thei uh hi. Ka inn-ah khualzinte ka tungsak a, kongzing lakah ka lumsak ngei kei hi. Midangte in a mawhna uh iim a, ahih hangin kei aa ka iim ngei kei hi. Midangte, hong kampau ding kihtakin ka nei ngei kei hi; amau’ simmawh ding kihtakna hangin pau loin ka om ngei kei a, ka bucip ngei kei hi. Ka thugente kuamah in na ngai lo ding ahi hiam? Ka gen khempeuh man hi, ci-in ka kiciam hi. Vanglian Pasian in hong dawng ta hen. Ka langte in kei hong mawhsakna thute ka tawi theih dingin lai sungah kigelh hi leh, tua mawhsaknate kisialhna tawh ka ngawng-ah ka ok ding a, mi khempeuh in a muh dingin ka sangsak ding hi. Ka gamtatna khempeuh Pasian kiangah ka gen ding a, ama muhna-ah lungnuamin kihihsakna tawh ka om ding hi. “Ka khawh leitang ka guk ahih a, a nei taktakpa tung pan ka suh ahih a, tua leitang-a piang ante ka nek a, tua lo a khote puksi-in ka omsak taak leh, tua lo-ah mangbuh leh mangbuhham tangin, kiak leh ling po ta hen,” a ci hi. Job’ thugente bei ta hi. Job amahmah dik kisa tawntung ahih manin hih mihing thumte in Job’ thugente dawn’ ding ngaihsun nawn lo uh hi. Tua ciangin Ram minam, Buz-te beh, Barakhel’ tapa Elihu a heh hong suak hi. Bang hang hiam cih leh Job amah kidiksakin Pasian mawhsak zawsop hi. Job’ lawm thumte tungah zong a heh suak hi. Bang hang hiam cih leh Job a dawn’na ding uh thei lo uh ahih manin Pasian a khial tawh hong kibang hi. Elihu in amaute lak panin a khangno pen ahih manin a dangte a pau kim khit mateng bangmah pau loin om hi. Ahi zongin hih mihing thumte in Job a dawn’ theih loh a muh ciangin a hehna thuak zo nawn lo hi. Tua ahih ciangin Buz-te beh Barekhel’ tapa Elihu in thu gen ding hong kipan a, “Kei a khangno hi-in, note a khangham na hih manun, ka ngaihsutna note lakah kong gen ngam kei hi. No a khanghamzawte in thu a gen ding kilawm hi, ci-in keimah in ka ngaihsun hi. Ahi zongin mihingte tunga hong tung pilna pen Vanglian Pasian’ Kha pan ahi hi. Khanghamna in mi pilsak lo a, thuman zong theisak tuan lo hi. Tua ahih ciangin tu-in ka thugen nong ngaih ding uh ka deih hi; keima ngaihsutna hong gensak dih un. “Na thugen lai takun lungduai takin kong ngaingai a, thugen ding na zon’zon’ lai takun kong ngak hithiat hi. Lim takin kong ngai a, na cihmawhna uh ka thei hi; Job’ thugente a man lohna na gentel thei kei uh hi. Bangci-in pilna nei-in kigen thei ding na hi uh hiam? Note in lel na hih manun Pasian in Job dawng ding hi. Job in note tungah thu hong gen a, kei tungah hong gen lo hi; ahi zongin note’ dawn’ bangin ka dawng ngei kei ding hi. “Job aw, hih mite in nang hong lel uh a, nang hong dawn’ nading thei lo uh hi. Amaute pau loin a om ciangun kei zong ngak lai ding ka hi hiam? Amaute in gen ding thei nawn loin ommawk uh hi. Tu-in kei zong kong dawng ding a, ka ngaihsutna kong pulak ding hi. Ka thugen ding ka ngak lah a, ka kam ka ki-iip zo kei hi. Thu gen theih nading hun nei lo hi leng, leenggahtui thak a kithun leenggahtui um bangin ka puakkham ding hi. Ka thuak zo nawn kei a, ka dawng ta hi. Hih ka thugenna-ah kuamah ka pawlpih kei ding a, kuamah ka phattuam kei ding hi. Kuamah ka mawk phat thei kei hi; tua ci mawk phat leng Pasian in kei hong sumang pak ding hi. “Job aw, tu-in ka thugen khempeuh lim takin ngai in. Ka lungsim sunga om thute, a hong gen ding ka hi hi. Ka gen khempeuh lungsim takpi tawh ka gen hi a, aman thu a gen ka hi hi. Bang hang hiam cih leh Pasian’ Kha in kei hong bawl a, Vanglianpa in kei tungah nuntakna hu hong pia hi. Nong dawn’ theih leh hong dawng in. Nong sel nading kiging in. Job aw, nang leh kei, Pasian’ muhna-ah a kibang i hi a, ei tegel in leivui pan-a piang tuak i hi hi. Tua ahih manin kei nong kihtak nading om lo a, nang kong zawhthawh nading om lo hi. Keima zakin thu na gen khin a, na genna kamgingte ka za khin hi. Nangmah in, ‘Kei ka mawh kei hi; khialhna bangmah ka gamta kei hi. Ka paubaang kei a, mawhna ka sukha kei hi. Pasian in kei hong suk theih nading thu zong a, gal bangin kei hong bawl hi. Amah in ka khe kol hong bulh a, ka gamtatna khempeuh hong encik hi,’ na cihna ka za hi. “Ahih hangin, Job aw, nangmah na khial hi. Pasian pen mihing sangin lianzaw hi. Mihingte’ phunna don ngei lo hi, ci-in bang hangin Pasian mawhsak na hi hiam? Pasian in a lam tuamtuamin thu hong gen napi-in, ama thugen kuamah in don lo hi. Zan-in mite a ihmut hun ciangin, mang leh mangmuhna sungah Pasian in thugen hi. Pasian in mite kiangah thu gen a, ama hilhkholhna hangin mite lau mahmah uh hi. Mite in khialhna a bawl nawn loh nading, mi kiphasakte a suah khak loh nading, a deihna-in Pasian in mite kiangah thu gen hi. Pasian in mihingte siatna thuaksak lo a, sih nading panin amaute honkhia hi. “Pasian in ci natsakna tawh mihing thuhilh a, a pum khempeuh natna tawh kidimsak hi. Cinapa in an ne zo lo a, an a lim pen nangawn a kihtha suak hi. A ci a sa khempeuh kiam a, a guh guak bekin om hi. Amah a bei nading a nai hi ta a, misite' gam a zuan ding ahi ta hi. Mihingte a tavuan uh a phawksak, Pasian’ vantungmi tul tampite lak panin vantungmi khat amah huh dingin hong pai kha ding hi. Vantungmi in amah a hehpihna hangin, ‘Amah suaktasak in! Misite' gamah amah pai sak kei in. Amah tatkhiat nading hih lai-ah om hi,’ a ci ding hi. Tua ciangin ama pumpi khangno suak kikin, a thahat pen hun laitak bang kik ding hi. Tua ciangin Pasian in ama thungetna pia ding a, amah in lungdamna tawh Pasian bia ding a, Pasian in ama adingin thu a hoih lamin heisak kik ding hi. Tua ciangin amah in mihonpite’ zakin, ‘Kei ka khial khin hi. A manin ka gamta kei a, ahi zongin Pasian in hong suaktasak hi. Misite’ gam ka tun’ nading panin amah in kei hong kem a, tu-in kei ka nungta lai hi,’ ci ding hi. “Pasian in hih thute khempeuh mihing tungah, hih kik zelzel a, sih nading panin honkhia kikin, nuntakna nuam pia kik hi. Job aw, tu-in ka thugen hong ngai in la, gamdai-in om in la, kei thu hong gensak in. Ahi zongin gen nop mahmah na neih leh hong gen in; bang hang hiam cih leh midik na hih ding kong deihsak hi. Ahi zongin gen nop na neih kei leh, keima thugen hong ngai in, mipil na hih theih nading thu kong hilh ding hi,” a ci hi. Tua ciangin Elihu in, “No mipilte aw, ka thugente ciamteh un, no thuthei mite aw, ka thugente ngai un. An na ciap uh ciangin a lim leh a lim lo na thei uh hi; thu kigen na zak uh ciangin pil kampau leh hai kampau na thei ding uh hi. Thuman bang hiam cih teng khia ni; thuhoih bang hiam cih mu khia ni. Job in lah, ‘Kei ka dik hi, Pasian in kei a thumanin hong seh nuam lo hi, kei thuman napi thuzuau genin hong seh hi, kei khial lo napi-in gimna thuakin ka cimawh hi,’ a ci hi. Hih Job tawh a kibang mi na mu ngei uh hiam? Amah in Pasian zahtakna lim nei thei lo hi. Amah in migilote tawh kikholh nuam sa a, mawhneite tawh vak kawikawi hi. Bang hang hiam cih leh amah in, ‘Pasian’ deihna i zuih hangin, bangmah phattuamna om lo hi,’ a ci hi. “Ahi zongin no thu ngaihsun theite in ka thugenna hong ngai un. Pasian in gitlohna gamta ngei ding a, Vanglianpa in a man lo sem ngei peuhmah ding ahi hiam? Pasian in mite a gamtatna tawh kizui-in thaman pia a, a thuak ding uh a kilawm bangin daantat hi. A taktakin ci lehang, Pasian a man loin gamta ngei lo a, thutang kimlai a khialin heisak lo hi. Pasian in a vangliatna mi khatpeuh tung pan ngah ahi hiam? Leitung khempeuh a uk dingin mi khatpeuh in a koih ahi hiam? Pasian in a ngaihsutna kheel hen la, nuntakna hu dok kik hi leh nuntakna nei khempeuh si pah ding a, mihingte, leivui suakkik ding hi. “Job aw, mipil-a kinei na hih leh ka thugennate hong ngai in. Vanglianpa in thutang deih lo dingin ngaihsun na hi hiam? Nang in a thuman Pasian mawhsak na hi hiam? Kumpite leh uliante bang mahin kimang loin a gitloh uh ciangin, amaute a mawhsak ngampa in Pasian ahi hi. Pasian pen mi khempeuh a piangsakpa hi a, amah in uliante panpih tuan lo a, mizawngte sangin mihaute thupi ngaihsut zaw tuan lo hi. Mihingte zan khat thu-in si pak thei hi. Pasian in mite sat pukin si sak thei a, nakpi-in hih kul loin mi thahatte zong that thei hi. “Pasian in mihingte gamtatna khempeuh hong encik a, i kalsuanna themno dongin hong mu khin hi. Gamtatsia mite a buk theih nadingun a seel zo ding, khuamial khuazing koi mah-ah om lo hi. Pasian mai-ah mihingte in thukhenna a thuak ni ding, a kisehkhol hun om tuan lo hi. Amah in thu kan kul loin mi vangliante sugawp a, amau’ tangin mi dangte koih hi. Amah in amaute’gamtatnate thei ahih manin, zan khat thu-in amaute lumletin susia gawp hi. Pasian in mi khempeuh’ muhna-ah mawhneite daan pia hi. Bang hang hiam cih leh amaute in a thu mang nawn lo uh a, a thupiaknate khempeuh don nawn lo uh hi. Amaute in mizawngte kapsak gawp uh a, mizawngte’ huhngetna awging Pasian in za hi. Pasian in bangmah hih het kei taleh zong, kuamah in Pasian mawhsak zo lo ding hi. Amah in hong maingat het kei leh zong, kuamah in bangmah cih zo tuan lo ding hi. Migilote hong uksak ta leh zong, tua panin suahtak nading kuamah in vaihawm zo lo ding hi. “Job aw, Pasian tungah na khialhnate pulakin, na khialh nawn loh nading thu ciam nai na hi hiam? Pasian in na khialhnate hong lah nading ngenin, na gamtat siat nawn loh nading ut nai na hi hiam? Nangmah in Pasian nial na hih manin, nangma utna bang hong hihsak ding ahi hiam? Hih thu in kei’ ngaihsut ding hi loin, nangma lungsim khentat ding ahi hi. Tu-in na ngaihsutna hong gen in. Thu ngaihsun theih peuhmahte in man hi, hong cihpih ding uh a, ka thugenna a za mipil peuhmahte in, “Thu thei lopi-in Job in thugen a, a gen peuhmah a khiatna nei mel om lo hi. Job’ thugente ngaihsun le uh cin, migilo banga kampau ahihna na thei ding uh hi. Amah in a khialhna khawl nuam lo a, eite khempeuh mai-ah Pasian simmawhin zahpih hi,’ ci ding uh hi,” a ci hi. Tua ciangin Elihu mah in, “Job aw, Pasian’ muhna-ah ka paubaang kei hi, na cih ding kilawm lo hi. Pasian kiangah, ka khialh hangin nang bang phamawh sa na hi hiam? Khialhna ka bawl loh manin bangmah phattuamna ka ngah kei hi, na cih ding kilawm lo hi. Nang leh na lawmte tungah, thu kong gen ding hi. Vantung en to dih in, Meiite bangzah takin sang ahi hiam? Mawhna na bawl manin, Pasian bangmah sukha lo hi. Tampi tak khial ta lecin amah sukha tuan ahi hiam? Na thumanna hangin Pasian in phattuamna ngah ahi hiam? Pasian in nang kiang panin bangmah deih lo hi. Na khialhna hangin na mipihte bek in thuak a, na gamtat hoihna hangin na mipihte bek in phattuamna ngah hi. “Mite in gimna a thuak uh ciang tau uh a, amaute a hon dingin midang khatpeuh sam uh hi. Lungziin’ pen hun lai takin thahatna a pia, amau a Piangsakpa Pasian’ lam nga lo uh hi. Eite mipil-in a hong bawl, ganhingte leh vasate sangin a pil zaw-in a hong bawl Pasian’ lam nga lo uh hi. Amaute migilo mi kihisakte ahih manin, huh ding a nget hangun Pasian in pia lo hi. Ngetnget, gengen a phattuamna bangmah om lo hi. Vanglian Pasian in na mu lo, na ngai lo hi. Job aw, nang in, Pasian ka mu thei kei a, ahi zongin ka thu ama khut sungah om a, lungduai takin ka ngak niloh hi, na ci hi. Pasian in kuamah daan pia lo a, khialhna zong thupi ngaihsut lo hi, ci- in na ngaihsun hi. Tua banga kam na paupau a mawknapi hi a, na gen mel zong a thei lo na hihna kilang hi,” a ci hi. Elihu in a thugen zom lai a, “Lungduai-in tawmkhat hong ngai lai in: Pasian’ tangin ka gen ding pawlkhat om lai hi. Kei hong Piangsakpa Pasian thuman hi, ci-in kong lah nadingin thu tampi kaikhawmin kong gen ding hi. Ka thugennate a khial om het lo a, na mai-ah thugenpa in mipil khat ahi hi. “Pasian thahat mahmah napi-in kuamah simmawh lo hi. Ama theih loh bangmah om lo hi. Amah in mimawhte daupaisak lo a, a zawng gimna thuakte tungah a manin gamta hi. Amah in thuman mite hu a, kumpi ukna za pia a, pahtawina ngahsak tawntung hi. Ahi zongin mite sikkol kibulh a, a gamtatnasate hangin gimna a thuak uh leh, Pasian in amau’ mawhna leh a kiphatsaknate uh a lakkhia ahi hi. A gamtat siatna panun a khawl nadingun amau’ bil-ah thu a gengen ahi hi. Amaute in Pasian' thu mangin ama na sem leh amaute nuam sa-in a khan’ uh sau hi. Ahi zongin ama thu mang kei le uh, namsau tawh si ding uh a, misite' gam zuan ding uh hi. “Migilote a heh-in ni tum uh a, gimna a thuak ciang nangawn-un ama huh ding ngen lo uh hi. Amaute khan’sih uh a, zumhuaipi-in bei uh hi. Ahi zongin Pasian in gimna tawh mite thuhilh a, mite in khua a phawk theih nadingin gimna zang hi. Pasian in lungkhamna panin nang hong pai khiatpihin, lungnuam takin nang hong om sak a, na sabuai tungah anlim nono kilui venvan hi. Ahi zongin tu-in na ngah dinga kilawm daan a thuak ta na hi hi. Sumgolh’ khemsa-in ta kei in la, leitung nate’ bawlin lam kipialsak kei in. Huh ding na nget hangin bangmah phattuamna om nawn lo a, na hauhna na liatna in hong huh thei nawn lo hi. Mihingte a beimang hun ding, zan khuamial hong tun’ ding lunggulh kei in. Siatna lamah na kihei khak loh nadingin kidawm in; na siat khak loh nadingin gimna hong kithuaksak ahi hi. Pasian’vang bangzah takin lian hiam cih phawk in; Pasian in sia khempeuh lakah a lianpen ahi hi. Kuamah in Pasian a gamtat nading sawl thei lo a, Pasian gamtat sia hi, ci-in zong kuamah in mawhsak zo lo hi. “Pasian a nasepna hangin mi khempeuh in a phat tawntung mah bangin, nang zong amah phat zaw in. Mi khempeuh in Pasian’ sepsate mu uh a, thei kim zo loin lamdangsa uh hi. Pasian’ liatna a kicingin i thei zo kei a, ama kum phazah zong i sim zo kei hi. Amah in tuipi panin tuite la to a, tua tuite guahtui-in a bawl hi. Amah in meii sung panin guah piangsak a, mihing khempeuh adingin guahzusak hi. Meiite a pai henhanna thu hita leh, van-ah van a gin’na thu hita leh kuamah in thei zo lo hi. Amah in van-ah khua phiasak a, ahi zongin tuipi thuk sung mialsak hi. Amah in hih bang lam tawh mihingte hong vak a, annek ding tampi hong pia hi. Amah in keek thu pia a, a kap nop pen a kha dingin sawl hi. Amah a heh ciangin huihpi sam a, vanging pen ama hong pai nading a kitheihna ahi hi. “Hih huihpi in ka dip hong kuasak a, ka dip van-a khai hong bangsak hi. Ama kam panin hong gingkhia hih vanging, Pasian’ pauna awging ngai un. Amah in van-ah khua phiasak a, leimong khat pan mongkhat dong taan’ hi. Tua ciangin a vanglian vanging ahi, ama awging hong kiza a, tua sung mahin khua phiaphia hi. Pasian’ sawlna tawh na lamdang pipi piang a, eite’ theih zawh loh thute hong piang hi. Amah in leitungah vuk a khia dingin sawl a, guah tampi tak a zu sak hi. Amah in mihingte’ nasep khawlsak a, amah a gamtaang ahihna lak hi. Gamsate in a lupna ngei delh uh a, a kua sungah bucip uh hi. Leitaw lam pan guahpi hong zu a, leilu lam pan huihpi hong nung hi. Pasian’ husan’na in tui khalsak a, tui lianpite khalin sik bangin sak sak hi. Amah in meiipi nomsak a, meiipi-in khua a phiasak hi. Pasian’ deihna zui-in kikhin kawikawi hi. Leitung mun khempeuhah pai- in, Pasian’ sawl teng sem uh hi. Pasian in mihingte daantah nading ahi a, a pahtakna a lah nading ahi zongin, leitungah tu-a bangin a piangsak hi. “Job aw, tawlkhat khawlin ngai in la, Pasian’ bawl na lamdangte ngaihsun in. Pasian in thu pia a, meii lak panin khua a phiatsakna na thei hiam? Bangmah in len lopi-in vantungah meii a om sak theihna, a lamdang hih ama siamna na thei hiam? Leitaw lam huihvot a nun’ lai takin, na puan sungah khua-ul kai-in na om hi. Limlang bangin a sak van peekpi, ama hih bangin zal zo na hi hiam? Pasian kiangah ka gen ding uh hong hilh in; a hawmpi-in ka om uh a, ka gen ding uh bangmah om lo hi. Pasian kiangah, thu hong gensak in, ka ci kei ding hi. Kei hong suksiat nadingin bang hangin kipia ding ka hi hiam? “Tawlkhatkhat khuavak kimu lo a, guahpi meiipi in a liah hi. Tua ciangin huih hong nungin a mut siang hi. Kham meel khuavak leilu lam pan hong taang a, Pasian’ minthan’na in zahtakna tawh hong kidimsak hi. Pasian’ vangliatna lian mahmah a, eite’ theih zawh hi lo hi. Amah thuman a, mite tungah thutangin na sem hi. Tua ahih manin mi khempeuh in amah a zahtakna, mipil a kisate amah in a don lohna, lamdang sak ding hilo hi,” a ci hi. Tua ciangin huihpi lak panin Topa in Job tungah thu gen a, “Kei’ pilna a nial dingin nang kua na hi hiam? Thu na theih loh lam a kilangsak na hi bek hi. Kipasal sakin dingto in la, kong thudot dingte hong dawng in. “Leitung ka bawl lai takin nang om na hi hiam? Thei kisa na hih leh tua thu hong gen in. Bang cia-in golsak ding cih kua in seh ahi hiam? Kua in a gol nading zah khau kai ahi hiam? Hihte khempeuh thei kisa na hi hiam? Leitung a pua khuampite, bang tungah kiphut ahi hiam? Kua in leitung bulpi phut ahi hiam? Tua ni-in zingsang aksite in la sakhawm uh a, Pasian’ tapate lungdamin kiko uh hi. “Leisung panin tuipi hong suah khiat lai takin, tua tuipi a khaktan ding kongpi kua in na khak ahi hiam? Meii tawh tuipi a tuamcippa, khuamial tawh a vialcippa in keimah ka hi hi. Tuipi gamgi ding ciamteh sakin, ama huang sung ding bek-ah ka omsak hi. Tuipi kiangah, ‘Hih ciang bek na pai ding a, a ban na kin nawn kei ding hi; na tuihualte, hih ciang bek pai ding hi,’ ka ci hi. Job aw, na nuntak sung tawntung, tu ni khuavak in, ci-in thu pia thei ngei na hi hiam? Zing khuavak in leitung a mong-in manin, a kawm-a bu migilote a sin’ khiat ding, thu pia thei ngei na hi hiam? Khuavak in mual leh guamte kilang khia sak a, puan a ton-a kikoih tawh a kibatna kilangsak hi. Migilote’ adingin sun khuavak taang lua a, siatna a gamtat nading uh a kham hi. “Tuipi sung tawng tuinak-ah pai ngei na hi hiam? Tuipi nuai leitam tungah lampai ngei na hi hiam? Misite gam khuamial kongkhakpi, mi khatpeuh in nang hong lak ngei ahi hiam? Leitung bang cia-in lian ding cih na thei hiam? Hih thute khempeuh thei na hih leh hong dawng in. “Khuavak hong kipat khiatna mun ahi a, khuamial hong paikhiatna mun ahi zongin, thei na hi hiam? Nangmah in amau’ omna mun ciang dong thei a, tua ciang dongah va kha kik thei na hi hiam? Na nuntakna sawt ta a, leitung a pian’ in nang suak khin na hih manin, tua thute khempeuh thei mah ni teh. “Vuk a kikoihna mun-ah va lut ngei a, gial a kikholna mun va mu ngei na hi hiam? Tuate, lungkham hun ciang ading, gal om hun ciang adingin ka koihcing ahi hi. Ni hong suah khiatna mun-ah ahi a, nisuahna huihpi hong kipat khiatna munah ahi zongin, nang va tung ngei na hi hiam? “Kua in guahzuk nading tuilam bawlsak a, kek’ lampi ding sialsak ahi hiam? Mihing a om lohna mun lei lakah, kua in guah zusak ahi hiam? Lopate a po theih nadingin, kua in lei keute tui buak ahi hiam? “Guah in pa nei ahi hiam? Daitui in pa nei ahi hiam? Kua sung panin tuikhal hong piang a, kua’ sung panin van-a vukte hong suak ahi hiam? Tua tuite suang bangin sak a, tuipi tui teng khalcip hi. “Van-a om Seguk henkop thei a, Zawlzawng, a kikhihna phel thei na hi hiam? Ama hun hunin aksite lam lak thei a, Khawlei uikai a pai nading lampi lak thei na hi hiam? Vompi leh anote, vantung-a om nate’ zuih ding ngeina bawl thei a, leitunga om nate’ zuih ding ngeina bawl thei na hi hiam? Van-a om meiite in guah hong zuksak theih nading, nangmah in sawl thei na hi hiam? Khua phia in, ci-in thu pia lecin, ‘Nong sawl bangin ta ning,’ hong ci ding ahi hiam? Nail gun a khan’ ding a thei gun vapite kua in hilh a, guahzuk a thei akluite kua in hilh ahi hiam? Va-akte gilkialin leeng kawikawi-in, a note in an duhin kei tungah hong nget ciangin, tua va-akte an a piapa in kua ahi hiam? “Sathakte a suah hun ding thei ngei na hi hiam? Sakhite a suah laitakin nau va dom ngei na hi hiam? Nangmah in tuate a ni ciamtehin, a suah hun ding uh thei na hi hiam? A no suak dingin, lei-ah a bawhsuk hun thei na hi hiam? A note gamlakah khangin, a nute kiangpan paikhia-in ciahkik nawn lo uh hi. “Kua in gam-late tungah suahtakna pia ahi hiam? Kua in khahin a ut utin vaksak ahi hiam? Amau’ om nadingin gamlak ka pia a, bangmah po zawh lohna zanglei- ah ka teengsak hi. Gamlumna mun khuapite tawh kigamla-ah om uh a, kuamah in zualsak zo lo, na semsak zo lo uh hi. Mualte tungah an zongin vak kawikawi uh a, nek theih ding singkung lopa a hing peuhpeuh zuan kawikawi uh hi. “Gam-bawngtal in nangma na hong sem ding ahi hiam? Na ganbuk-ah hong giak nuam ding ahi hiam? Nangmah in khauhual tawh khih zo ding a, na lo-ah na lokhawhna leng kaisak zo ding na hi hiam? Nasem dingin a hat mahmah hangin, nangma’ na hong sepsak dingin lamen ngam na hi hiam? Lo-a na an piangte hong kaihkhopsakin, na ancilna-ah an khawm dingin um na hi hiam? “Kalaoh vasate in a kha uh bangzah takin nawhzap thei hiam! Ahi zongin gun vapi bangin kalaoh vasa leng thei lo hi. Kalaoh vasa in lei lakah a tui nusia a, a tuite luumsak dingin leilak ap hi. Mi khatpeuh in a khe tawh a tuite a sikkhap khak ding, gamsa khatpeuh in a sikkhap khak ding, phawk khol lo hi. A tuite ama aa bangin ngaihsun khol lo a, ka gimna a mawkna suak kha in teh, ci-in lunghimawh lo hi. Amah a hai-a a bawlpa, ama tungah pilna a guan lopa in keimah ka hi hi. Ahi zongin amah a tai ciangin, sakol sangin hatzaw hi. “Job aw, sakolte a hatsakpa in nang na hi hiam? Sakol zangmul a posakpa in nang na hi hiam? Sakolte, kauphe bangin diangsak thei-in, mite’ kihtak dingin phitsak thei na hi hiam? Amaute in lawpna tawh a khe-un lei khuat uh a, gal sungah a tha neih khempeuh uh tawh diang uh hi. Amaute in launa meel thei lo uh a, namsau kihta-in nungkik lo uh hi. Amau’ tungah a tuang mite’ galhiam, luum leh teite tee zalzal hi. Lawp mahmahna tawh sakolte in mainawt uh a, peengkul a kitum ciangin omkhong thei lo uh hi. Peengkul a kitum ciangin ham uh a, gal nai a tun’ ma-un galgim za uh a, galkapmangte’ thupiakna awging za uh hi. “Simbung in a kha zalin leitaw lamah a len’ theih nading, nangma kiang panin hong sin ahi hiam? Muvanlai sang len’in mual tungah bu a tom nading, nang’ thupiakna hong ngak ahi hiam? Suang sangpi dawn-ah bu bawl uh a, suangheng kawmte phualpi-in nei uh hi. Tua lai mun panin khuadak kawikawi a, manin a nek theih ding an gal-et hi. Gan sihna kimkotah musanete kikhawm uh a, a note in sasi dawn uh hi,” a ci hi. Tua ciangin Topa in Job kiangah, “Job aw, nang in Vanglian Pasian na dem hi; tu-in khawl ding na hi hiam, tua ahih kei leh ama thugen dawng ding na hi hiam?” a ci hi. Tua ciangin Job in Topa dawng a, “ Topa aw, ka haipau kha hi. Hong bangci dawn’ theih ding ka hi hiam? Bangmah ka pau nawn kei ding hi. Ka gen dinga kilawm zah val gen kha ka hih manin, tu-in ka pau nawn het kei ding hi,” a ci hi. Tua ciangin huihpi sung panin Topa in Job tungah thu gen kik a, “Kipasal sakin dingto in la, ka thudotnate hong dawng in. Kei a thutang loin hong seh a, nang thutang kisa-in kei hong mawhsak na hi hiam? Kei zahin nang hat na hi hiam? Kei’ awging zahin nang aa ging zo ding ahi hiam? Na ngap nak leh na minthan’ nading leh na kihihsak nadingin kipan in la, minthan’na leh minliatna nei in. A kiphasak mite en in la, na hehna tawh amaute niamkhiat gawp in. Mi kiphasakte enin niamkhiat in la, migilote amau omna mun mun-ah tuancil in. Lei sungah amaute phumcip in la, misite' gam sungah amaute khihcip in. Tua bang na hih zawh nak leh, keimah in nang a hong phat masa penpa, nang a gualzo na hihna hong phawk masa penpa ka hi ding hi. “Tui-sakol ganhing golpi ngaihsun dih in; amah leh nang a piangsakpa in keimah ka hi hi. Amah in bawngtal bangin lopa ne a, ahi zongin ama pum sungah bangzah thahatna om a, bangzahin a sazang khauh ahi hiam? Ama mei in taamtaak sing bangin khauhin tal po a, a khe-a a sazangte hat mahmah hi. Ama guhte sumngo bangin khauh a, a khete sikzawl bangin khauh hi. “Ganhing khempeuh lak pan a lamdang pen hi a, Amah a Piangsakpa bekin zo zo hi. Gamsate a omna mualtung panin, ama an ding lopa kipuak hi. Amah lingkungte nuai-ah lum a, nawng sunga pumpeng lakah bu hi. Lingkungte leh lui gei-a gialheek kungte in ama ading nilim piangsak uh hi. Amah in guntui khangte kihta lo a, tui in a maitang a nawk gawp hangin nuam takin om thei hi. Kua in ama mit tawsakin man zo ding ahi hiam? Kua in a nakpheh-ah khau vawh zo ding ahi hiam? “Nang in ngasa siahna sikkawi tawh Awle man zo ding a, khauhual khat tawh a lei hen zo ding na hi hiam? A nakpheh-ah khau vawh zo ding a, sikkawi tawh a khaguh sunlet zo ding na hi hiam? Amah in na khah ding hong thuum ding a, na hehpih ding hong ngen ding ahi hiam? Nangmah sila ahi tawntung dingin, nang tungah thu hong ciam ding ahi hiam? Na nasem numeite na mawlpih bangin mawlpih zo ding a, vasa khawi bangin bawl zong ding na hi hiam? Ngasa bengte in lei dingin hong deek ding a, sazuakte in zuak dingin a sa sem ding ahi hiam? Ngasa khawhna teipi tawh a vun khawhlet zo ding a, teipi lingnei tawh a lutang khawhlet zo ding na hi hiam? Khatvei sukhin lecin na hih kik nawn het kei ding a, tua na sutna thu na mangngilh nawn kei ding hi. Awle a mu mi peuhmah lau-in, lei-ah puk uh hi. A heh ciangin kihtakhuai mahmah a, a mai-ah kuamah om ngam lo hi. Leitunga om mihingte lakah, awle su-a a sihlawh lo kua om ahi hiam? “Keimah in Awle khete, a guh a taang, a thahatna gen loin ka om thei kei hi. Kua in a puan tungnung hawk khiatsak zo a, a sik puanpi sunlet zo ahi hiam? A kam sungah a kihtakhuai a hate om ahih manin, kua in phensak ngam ahi hiam? A nungzang suk-ah a lipte lum bangin kithuap suk cinten a, suang bangin sakin kimatcip bikbek ciat hi. Tua alipte khat leh khat kithuapcip bikbek ahih manin, a kikal-ah huih nangawn thawl zo lo hi. Tuate kinak mat lua ahih manin, bangmah in phelkhia zo lo hi. A hetthiai ciangin taang zaizai a, a mittangte nisuak tung bangin taang hi. Ama kam panin mei kuangkhia a, mei-ek leengkhia zaizai hi. A nak panin meikhu suak a, selkeu kikhul khu tawh kibang hi. A husan’ in mei tawhkuang a, a kam panin meikuang suakkhia hi. A ngawng thakhauh mahmah ahih manin, a gim thei lo thatang nei hi. A vun tung khempeuh a nipna mun mahmah om lo a, sikpeek bangin sak kim hi. A lungsim suangtum bangin kihtak nei lo a, angawina suang bangin sakin dolah nei lo hi. Amah hong kithawi ciangin mi thahat pente nangawn lau a, kihta in cih nading thei loin om uh hi. Namsau tawh a kisut hangin bun zo lo a, teipi leh thaltangte in zong bun zo lo hi. Ama adingin sikte, buhkung bangin nip a, sumngote zong singmuatsa bang lel hi. Amah khua a phawksak zo ding thaltang om lo a, suang tawh a kiden’ ciangin a tunga anvai them tu bang lel hi. Ama adingin molhtum pen buhkung bang hi lel a, mite in teipi tawh a khawh ciangin nuihsan lel hi. A khecinte, belpei kitam a hiamte tawh kibang a, lam a pai ciangin leilak kuikeek gawp hi. Amah in tuipi tokin beel sunga tuiso bangsak zo a, sathau sa sunga tui tu bangin tuipi phuansak zaizai zo hi. A painasa-ah tuihual om dandan a, tuipi phuansak pheuphau hi. Amah tehpih theih ding leitungah bangmah om lo a, bangmah kihtak a nei het lo ganhing ahi hi. Amah in ganhing kihisak pente nangawn nuai et a, gamsa khempeuhte’ kumpi ahi hi,” a ci hi. Tua ciangin Job in Topa dawng a, “ Topa aw, vangliatna khempeuh na neihna, na hih nop khempeuh na hih theihna thu ka thei hi. Kei bangmah thei loin a om kim lai, bang hangin ka pilna hong dem ngam na hi hiam, nong ci hi. Keimah in ka tel zawh loh thu, kei’ theih dingin a lamdang lua thu a gengen ka hi hi. Thu na gen lai takin ka na ngaih nading, leh na thugente kong dawn’ ding, nong gen hi. Ni dangin mi’ gensawn bekin nang kong thei a, tu-in keima mit mahmah tawh nang kong mu ta hi. Tua ahih ciangin ka paunasate khempeuh hangin ka maizum a, tu-in vut leh vai khu-in nakpi takin ka kisik hi,” a ci hi. Topa in hih thute khempeuh Job tungah a gen khit ciangin, Teman khuami Elifaz kiangah, “Ka nasempa Job bangin, keima thu na gen ding uh a, kilawm bangin gen lo na hih manun, nang leh na lawm tegel tungah ka heh hi. Tu-in bawngtal sagih leh tuutal sagih la-in Job kiangah paipih un la, note’ adingin biakpiakna-in nei un. Job in note’ adingin thu hong ngetsak ding a, keimah in ama thungetna ka pia ding hi. Note’ haina zahin kong minsiasak kei ding hi. Note in Job’ gen bangin keima thu a manin na gen kei uh hi,” a ci hi. Tua ahih ciangin Topa ’ sawl bangin Elifaz, Bildad, leh Zofar gamta uh a, Topa in Job’ thungetna a pia hi. Job in a lawm thumte’ ading thu a ngetsak khit ciangin, Topa in Job citheisak kik a, ni danga a neih ngei zah nihin neihsa lamsa guan hi. Tua ciangin Job’ sanggam pasalte, a sanggam numeite, leh a lawm ngeite a innah hong hawh uh a, a innah pawi bawlin lungdamin omkhawm uh hi. Topa in ama tungah a tun’sak gimnate hangin a khasiatpihnate uh genin hanthawn uh hi. Amaute in sum leh kham zungbuh khatciat tawh va pha uh hi. Tua tham loin Topa in Job’ nuntakna a masa lam sangin a nunung lamah thupha lim piakzaw hi. Job in tuu tulsawm leh tulli, kalaoh tulguk, bawngtal kap tulkhat, leh la a pi tulkhat nei hi. Amah in tapa sagih leh tanu thum nei kik a, a tanu upa pen Jemimah phuak a, a nihna Keziah phuak a, a tum pen Kerenhappuk phuak hi. Job’ tanute zahin a meelhoih leitungah numei dang khat zong om lo a, a pa un a sanggam pasalte uh tawh a kibangin gamh luah khawmsak hi. Hih hun khit ciangin Job kum za leh kum sawmli sung nungta lai a, a tute ciang bek hi loin a tusawnte dong a mu hi. Tua khit ciangin khan’ khinin teek sih ta hi. Mi nuamsa i cih in, migilote’ thu a zui lo mi, mimawhte’ lampi-a ding lo mi, mi a thusim lote’ phual-a tu lo mi; ama nopsakna in Topa’ thu sung bek mah hi a, sun leh zanin ama thu a ngaihsunsun mi ahi hi. Amah in luitui luang gei-a kisuan, ama gah hunin gah a, a teh a vul lo singkung tawh kibang hi. Ahihna khempeuh ah a ma pai hi. Migilote ahih leh tua bang hi lo a, huih letkhiat ansi tawh kibang uh hi. Tua ahih ciangin migilote in thukhenna nang zo lo ding a, mimawhte in midikte’ pawl sungah kihel thei lo ding hi; bang hang hiam cih leh Topa in midikte’ lampi kem a, migilote’ lampi ahi leh siamang ding hi. Bang thu hangin minamte in siat nading ah kithukhat sim a, mite in a mawk nading sawmsim uh hiam? Leitung kumpite leh gam ukte in, Topa leh ama sathau nilhpa langpangin vaihawm uh a, “Amau’ hong hennate su-tat khia-in, amau khaute ei kiang panin paikhia ni,” ci uh hi. Vantunga tu-pa in nuihsan a, tua Topa in amaute zahko hi. Tua ciangin hehna tawh amau kiangah thu gen ding a, heh luatna tawh amaute linglawng sakin, “Ka mual siangtho Zion tungah ka Kumpi ka tusak khin hi,” ci hi. Topa’ thukhenna kong gen ding hi; Amah in kei’ tungah, “Nang in ka tapa na hi a, tuni in nang kong piang sak khin zo hi. Keima tungah hong ngen in; nangma luah dingin minamte ka bawl ding a, leimong dongin nangma neihsa ka hisak ding hi. Siktawn khat tawh amaute na satkham ding a, beelseekpa’ beel den’khap bangin amaute lei-ah na dengzan ding hi,” hong ci hi. Tua ahih ciangin kumpite aw, tu-in pil un; leitung gam ukte aw, thu phawk un. Topa aw, ka galte tam mahmah! Mi tampi in kei hong langpan’ nainai hi. “Pasian in amah huh lo ding,” mi tampi in hong ci uh hi. Ahih hangin, Topa aw, nangmah in ka kidalna lum, ka minthan’na leh ka lu hong phongpa na hi hi. Nakpi in Topa ka gal sap a, amah in a mual siangtho panin hong dawng hi. Lum-in ka ihmu a, Topa in hong kem ahih manin ka thokik hi. Keimah hong galbawl, hong umcih mi tulsawm tampite ka kihta kei hi. Tho in, Topa! Kei hong hon in, ka Pasian! Bang hang hiam cih leh nangmah in ka galte khempeuh’ paang na satgawp a, migilote’ ha na su-tan hi. Hotkhiatna in Topa, Nangma hang ahi hi; na mite tungah na thupha hong tung ta hen! Kong sap ciangin hong dawng in, a thuman ka Pasian! Gimna ka thuak ciangin nopsakna nong pia hi. Kei hong hehpih in la ka thungetna hong za in. Mite aw, ka minphatna in bang tanvei daina thuak ding ahi hiam? Bang tanvei thu mawkna deih-in, zuauthu zong ding na hi uh hiam? Ahih hangin Topa in miphate ama adingin a koihtuam lam thei ta un; ke’n ka sap ciangin Topa in hong za hi. Lau-in liing un la, mawhna pel un; na lupna tung uh-ah lungngai phapha un la, om khikhe lel un. A maan biakna piaknate lui un la, Topa muang un. Mi tampi in, "Thupha ngah thei leeng ut si hang. Ko tungah na maitang vang hong taangsak in, Topa!" ci uh hi. Amaute in an leh leenggahtui a hauh cianga a nuam uh sangin nuamna lianzaw ka lung sungah nong guan hi. Nuam takin lumin ka ihmu ding hi; bang hang hiam cih leh Topa aw, nangmah bek in lungmuan’na munah nong om sak hi. Topa aw, kong paunate hong ngai in la, kong thumnate hong thudon in. Ka Kumpi leh ka Pasian aw, nangma tungah hong thum ka hih manin ka kikona aw hong ngai in. Topa aw, zingsangin ka aw nong za hi; zingsangin nangma adingin biakna bawlin kong ngak hi. Bang hang hiam cih leh gitlohna a deih Pasian na hi kei a, siatna in tawlkhat sung zong nang tawh a omkhawm thei kei hi. A kisatheite na mit tawh kituak lo hi; siatna bawlte khempeuh na mudah hi. Zuauthu a gen mite na susia hi; Topa in, mi thah nopna lungsim leh mi kheem nopna lungsim neite mudah hi. Kei ahih leh, a kicing na itna kip suangin na inn sungah ka tum ding a, nangmah zahtakna tawh a siangtho na biakinn lam nga-in ka bia ding hi. Topa aw, ka galte’ hangin na thumanna tawh hong makaih in la, ka mai-ah na lampi tangsak in. Bang hang hiam cih leh amau sungah thuman om lo hi; amau lungsim ah siatna bek ngaihsun uh a, amau gawlgui in a kihongsa hankhuk tawh kibang hi. A leii uh tawh mawk phat uh hi. Pasian aw, a mawhna uh amau thuak sak in la, amau thu mah tawh amau puksak in; amaute in nangmah hong lehdo uh ahih manin amau mawhna tampite hangin amau paaikhia in. Ahih hangin nang hong belte khempeuh lungdam sak in la, nuamna la sasak tawntung in; na min a deihte, nangma sungah gualzo-a a lungdam theih nadingin amaute na hu hi. Topa aw, thuman mi thupha na pia hi; lum tawh dal bangin deihsakna tawh na dal hi. Topa aw, na heh laitak hong tai kei in la, lungso sa-in hong thuhilh kei in. Topa aw, thanem ka hih manin kei tungah dikna hong zang in; Topa aw, ka guh ka tang na ahih manin hong dam sak in. Ka hin’ gim mahmah hi. Topa — bang tanvei hong sawt lai ding na hi hiam? Topa aw, hong kihei in la kei hong gum in; itna kip neipa na hih manin keimah hong hon in. Bang hang hiam cih leh sihna-ah nangmah phawk theihna om lo ahih manin, Leinuai panin kua in nang hong phat thei ding ahi hiam? Ka tautauna-in ka gim hi; zan sialin ka khitui in ka lupphah tum a, ka kahkahna-in ka lupna kawt dikdek hi. Dahna hangin ka mit mial a, ka galte’ hangin ka mitzung zaw semsem hi. Siatna bawlte khempeuh aw, ka kiang panin kihemkhia un; bang hang hiam cih leh Topa in ka kahna aw a za zo hi. Topa in ka thumna za zo a, Topa in ka thungetna hong sang hi. Ka galte khempeuh zahhuai in genthei mahmah ding uh hi; amaute in nungkik-in, maizumna thuak pah ding uh hi. Topa ka Pasian aw, nang kong bel hi; kei hong delhte khempeuh kiang panin hong gum in la hong hon in. Hong hon kei lecin, hong hon ding dang om lo ahih manin amaute in humpinelkai bangin hong kaikhia-in hong balgawp ding uh hi. Topa ka Pasian aw, hih bangin ka gamtat a siat a, ka khut a khialh leh, thu om lopi-in ka lawmte kheemin, ka galte ka huh tak leh, galte in delhin hong pha hen la, lei lakah kei hong tuancilsak in la, leilak ah hong sialpai ta hen. Tho in, Topa, hehsa-in thasaan in la, ka galte’ hehna hong dal in; khanglo in, ka Pasian aw, thukhen nading khat na seh khin zo hi. Mite nangma kim-ah kikhawmsak in la, amau tung a san’na munah tu in. Topa in mite thukhen hi; Topa aw, ka thumanna leh ka sunga om keima dikna tawh kizui-in thu hong khen in. Lungsim leh ngaihsutna a en a thuman Pasian aw, migilote’ siatna beisak in la, mi thumante kipsak in. Pasian in kei hong hupa hi a, lungsim thutang mite a hon hi. Pasian in a tang-a thu khenpa hi a, ni sim-a heh den Pasian ahi hi. Mi in a kibawl phat kik kei leh, Pasian in a thalkhau suui zo a, a namsau taat ding hi. Amah in mei thaltang bawl a, sih theihna ama galhiamte a baihsa-in koih zo hi. Migilo in thusia gai-in suak nuamin na a, zuauthu hing khia hi. Amah in gum to-in, ama tawhsa gum sung mah ah amah kia hi. Ama lungngaih hoih lo pen ama lu tungah tungkik a, ama gamtatsia pen ama luzang mah ah tu hi. Ke’n ahih leh, ama dikna om bangin Topa tungah lungdamna ka lak ding a, a Sangpen Topa min, phatna la ka sak ding hi. Topa, kote’ Topa aw, leitung khempeuhah na min bangzahin lian! Vantungah na min a than’na naungekte leh naupangte’ kam tawh kisa hi; gal na neih manin galte leh langpangte na daihsak nadingin panmun kip na bawl khin hi. Na khutmete’ nasepna, na bawlsa kha leh aksite, na vantungte ka et ciangin, nangma ngaihsut tham dingin mi in bang hi a, na phawk tham dingin mihing’ ta bang hi lel ahi hiam? Ahi zongin, Pasian sangin a neuzaw deuhin amah na bawl a, minthan’na leh pahtawina na guan hi. Na khut tawh na bawlsate khempeuh tungah ukna amah na pia hi. tuu leh bawng khempeuh, gamsa khempeuh zong, huih lak-a leeng vasate, tui sunga om ngasate, tui’ lampi-a tawn khempeuhte, na khempeuh ama khe nuai-ah na koih hi. T opa, kote’ Topa aw, leitung khempeuhah na min bangzahin lian! Ka lungsim khempeuh tawh Topa tungah lungdamna kong pia ding hi; na bawlna a lamdangte khempeuh ka gen ding hi. Lungdamin nangma sungah nuamin ka diang ding a, min phatna la ka sa ding hi, Sangpen Pa aw. Ka galte a nungkik ciangin, nangma mai-ah amaute pukin kisia uh hi. Bang hang hiam cih leh, keima thutan’na nong kipsak a, tokhom tungah tu-in thuman na khen hi. Minamte na tai a, migilote na susia hi; a tawntunga mangthang dingin amau min na phiat hi. Siat denna sungah galte beimang hi; a khuate uh na zunglot hi; amau kiphawk kha nawn lo hi. Topa ahih leh kumpi za-in tu ngitnget a, thukhen nadingin a tokhom a bawl hi. leitung mite’ thu a manin khen a, a kilawm bangin mite’ thu khen hi. Topa in, nen’niamna a thuakte’ adingin munkip hi a, haksat hun ciangin mun muan’huai ahi hi. Topa aw, nangmah hong zongte nusia lo na hih manin, na min a theite in nang hong muang hi. Zion-a om Topa phatna la sa un! Ama nasepnate mite lakah gen un! Bang hang hiam cih leh mi thahna a hua-pa in amaute phawk a, a thuak mite’ aw mangngilh lo hi. Ka tungah hong dik in, Topa! Sihna panin hong honkhiapa aw, kei hong mudahte tung pan ka thuakna hong en in la, nangmah phatnate phawk kikkik-in, Zion tanute huang sungah nong hotna hangin ka nuam ding hi. Amau bawlsa gum sungah minamte kiasuk uh a, a ngenthang siahna sung uh-ah amau khe mah a awk hi. Topa in thu hong khen-in, migilote amau khut nasepna mah-ah awksakna tawh amah hong kilang hi. Pasian a mangngilh minam khempeuh ahi migilote in Leinuai ah pai ding uh hi. Bang hang hiam cih leh mi cimawhte kimangngilh den lo ding a, mizawngte’ lametna bei paisuak lo ding hi. Tho in, Topa! Mi, kizosak ke’n; na mai-ah minamte thu khen in! Amaute lau sak in, Topa! Mi ahih lelna uh minamte theisak in! Topa aw, bang hanga gamla din’ na hi hiam? Haksat hunin bang hanga nang bu khong na hi hiam? Migilote in kiphatsakna tawh mizawngte uuk delh uh hi; amau ngaihsut vaihawmna mah-ah amaute awk sak in. Bang hang hiam cih leh migilo in a lungsim deihna kiphatsak pih a, ngah nading a huaihampa in, Topa phuisam-in taisan hi. Migilo in kiphatsakna maisuah tawh amah zong lo a, ama ngaihsutna khempeuh ah, “Pasian om kei,” ci hi. Ahih nate a ma pai ngitnget hi; amah kiphasak a, na thukhennate ama muhna’ bat zawh lohin sang hi; a galte khempeuh ahih leh amah in nehpiksan lel hi. A lungsim sungah, “Kiling ngei kei ning; khang tawntungin kamsiatna tuak kei ning,” ci-in amah in ngaihsun hi. Ama kampau in hamsia leh khemna leh netniamna tawh kidim a, siatna leh manlohna thugenin nei hi. Khua neute sungah mi bukin tu a, munbute-ah mawh nei lote that hi. Ama mit in mi tuahsiate encik sim a, humpinelkai in a kua pan a buk bangin amah in buk sim-in, mizawngte man dingin buk a, mizawngte a ngenthang sungah kai-in man hi. A thatang hat thu tawh mi tuahsia mi, sucip-in, hoi-in puk suksak hi. Ama lungsim sungah, “Hih pen, Pasian in mangngilh hi, a mai seel hi, en lo ding hi,” ci-in ngaihsun hi. Tho in, Topa! Pasian aw, na khut lamto in la, a thuakte mangngilh kei in. Bang hangin migilo in Pasian simmawh a, a lungsim sungah “Nangmah in thu dongtel lo ding,” ci ahi hiam? Nangmah in na mu hi; hi takpi hi, na khut sungah na koih theih nadingin haksatna leh gimna na ciamteh hi; tuahsia mi in nangma tungah ama pumpi hong ap hi; pa nei lote a huhpa na hi hi. Migilo leh siatna bawlte’ ban kuaitan in la, a gitlohnate a bei matengin zong in. Topa in a tawntungin Kumpi hi a, ama leitang panin minamte beimang ding hi. Topa aw, lungnemte deihna na ngai ding hi; a lungsim uh na hatsak ding a, na bil na ngat ding hi. Pa nei lo leh nen’niamna a thuakte tungah na thutang a, leitung mite in launa tuak kha nawn lo ding hi. Topa ka bel hi; bangci-in ka tungah, “Vasa leeng bangin mual tungah tai-in, bang hang hiam cih leh, en in, migilote in, khuamial sung pan lungsim thutangte kap dingin a thalkhau uh-ah thaltang bulhin a thal uh keek hi; bulpite kisusia leh, midikte in bang cih thei nawn ding hiam?” nong ci thei diam? Topa in ama biakinn siangtho sungah om a, Topa ’ tokhom in vantungah om hi; a mit-in en a, a mit tawh mihing’ tate entel hi. Topa in midikte leh migilote en tel a, a ngongtat nuam mi a lungsim in mudah hi. Migilote tungah amah in mei-am leh kat zusak ding a, amau ngah ding hai in huih sa mahmah hi ding hi. Bang hang hiam cih leh Topa dik a, dik gamtatna deih hi; thutang mi in ama mai mu ding hi. Topa aw, hong huh in, bang hang hiam cih leh mihing’ tate lak panin mi thumante mangthang a, mipha khat beek om nawn lo hi. Mi kim in a vengte kiangah zuau thu gen ciat a, phat khemna kamzol leh lungsim nam nih tawh pau uh hi. Topa in, “Mizawng mi a neihsa kihawkkhia a, mi cimawh mi thuum ahih ciangin, tu’n ding-in, ama lunggulh lungmuan’na munah amah ka koih ding hi,” ci hi. Topa ’ thuciamnate in a siangtho thuciamna hi a, meikhuk sunga sagih vei a kisiangsak ngun tawh kibang hi. Topa aw, kote hong dal in la, tu khang mite kiang panin hong kem in. Mihing’ tate lakah siatna a kipahtawi ciangin mun khempeuhah migilote vak kawikawi hi. Topa aw, bang tanvei hi ding ahi hiam? Kei hong mangngilh paisuak ding na hi hiam? Bang tanvei kei kiang pan na maitang seel ding na hi hiam? Bang tanvei gimna thuakin, sunthapai-in ka lungsim dah ding ahi hiam? Bang tanvei kei’ tungah ka galte gualzo ding a hi hiam? Topa ka Pasian aw, ngaihsun in la hong dawng in, ihmu-in si kha ding ka hih manin ka mitte hong vak sak in; ka galte in “Ama tungah gualzo khin ing” ci kha ding hi. Kei ka lin’ manin ka galte nuam kha ding hi. Ahih hangin na itna kip ka muang a, nangma hotkhiatna sungah ka lungdam ding hi. Kicing takin nong hehpih manin, Topa, la kong sak ding hi. Mihai mi in a lungsim sungah, “Pasian om lo hi,” ci-in ngaihsun hi. Amaute sia uh a, kihhuai gamtatin, ahoih-a gamta kuamah om lo hi. A pil gamtat, Pasian a zong a om uh hiam cih a theih nadingin Topa in vantung panin mihing’ tate ensuk hi. Amaute a vekpi-in puk khin uh a, a kibangin kisia kim uh hi; a hoih gamtat khat beek om lo hi. Topa ’ tunga a ngen lo, an nek bang a ka mite a netum, siatna a bawlte in theihna nei lo ahi hiam? Amaute pen launa lianpi sungah om ding uh hi, bang hang hiam cih leh midikte tawh Pasian omkhawm hi. Mizawng mi’ geelna na siasak nuam a, ahih hangin Topa in ama belh ahi hi. Zion panin Israelte’ ading hotkhiatna hong tung taleh maw! Topa in ama mite’ nopsakna a piak kik ciangin, Jakob nuamin Israel kipak ding hi. Topa aw, na buk sungah kua om ding hiam? Na mual siangtho tungah kua teng ding hiam? Paubang loin gamta-in, a manin na sem a, lungsim tak a gen mi, a leii tawh gensia loin, a lawmte tungah siatna bawl lo a, a vengte a mawhsak lo mi, a mit in ginalote thusim lo a, ahi zongin Topa a zahtakte a pahtawi mi; ama nat nading nangawn-ah a ciampel lo mi, a meet-in ama sum kha lo a, thutangte’ lang ah golhguk a la lo mi ahi hi. Hihte khempeuh a hih mi pen liing ngei lo ding hi. Pasian aw, nangmah hong bel ka hih ciangin keimah hong kem in. Topa tungah, “Nang in ka Topa na hi hi; nang tawh loin hoihna ka nei kei hi,” ka ci hi. Leitung a, om mi siangthote ahih leh, amaute nampi hi a, amau sungah ka lungkimna teng om hi. Pasian dang a teelte in amau dahna khangsak hi; amau’ si theh biaknate ke’n bawlpih loin, amau’ pasiante ka biakpih kei ding hi. Topa pen keima luah dinga ka teelsa leh keima hai, na hi hi; keima ngah ding nangmah in na kem hi. Kei-a’ pen mun nuam sung hong tu ahih manin gamluah hoih nei ka hi hi. Ngaihsutna hong lak Topa ka phat hi; zan-in zong ka lungsim-ah hong suak hi. Topa ka mai-ngat tawntung a, amah in ka taklam-ah om ahih manin ka kiling kei ding hi. Tua ahih ciangin lungdamin, ka kipak a, lung muangin ka om hi. Bang hang hiam cih leh keimah Leinuai nong zuan sak kei a, na mi hoihpa Leihawmpi na mu sak kei hi. Nangmah in nuntakna lampi keimah nong lak hi; nangma omna-ah lungdamna lian om a, na tak lam ah nop tawntungnate om hi. Topa aw, thuman kong ngetna hong za in la, ka otna aw hong ngai in! Zuau baang lo muk pana ka thugetna hong ngai in! Ka tan’na nangma kiang panin hong kilangsak ta in! Na mitte thuman musak ta in! Keima lungsim hong sin in la, zan-in nangmah ka kiangah hong hawh in la, keimah hong ze-et lecin, ka sungah gitlohna na mu kei ding hi; ka kam in khial lo hi. Mite’ gamtatna tawh kisai-in ci leng, nangma muk pan-a hong pai thu tawh mi ngongtatte’ lampi ka pelh kim hi. Ka kalsuannate in nangma lampi-ah kip khin a, ka khe taal lo hi. Pasian aw, hong dawng ding na hih manin nang kong sam hi; na bil hong ngat in la ka thu hong za in. Amau’ langpangte’ kiang panin na taklam khut hong belte’ Honpa aw, na itna kip lamdang takin hong lak in. Amaute in hehpihna lungsim nei lo uh a, a kam uh tawh amaute kiphatsak pau uh hi. Amaute in kei hong sulzuih uh a, tu-in amaute in kei hong umcihin, keimah leilak den’ nadingin hong en uh hi. Amaute in a balnen nuam humpinelkai tawh kibang uh a, humpinelkai khanglai sa-pang tawh kibang uh hi. Kei ka hih leh, thumanna tawh na maitang ka en ding a, ka khanlawh ciangin, nangma mel muhna tawh ka lungkim ding hi. Ka thahatna ahi Topa aw, nang kong it hi. Topa in ka suangpi, ka munkip muanhuai, hong honkhia-pa, ka Pasian, ka suangpi, ka belhpa, ka lum, ka kihotkhiatna ki, ka munkip ahi hi. A phat taak Topa ka sam a, ka galte kiang panin ka suakta hi. Sihna khaute in hong gakcip a, siatna tuihualte in hong nawk hi. Leinuai sihna khaute in hong kancip a, sihna thangte in kei hong dawntuah hi. Ka gimna-ah Topa ka sam a, ka Pasian’ tungah huhna ngenin ka kiko hi. Amah in a biakinn panin ka aw hong za a, amah ka kohna aw in a bilte va ban hi. Ama hehna hangin leitung kipumpei in, kiveei a, mual bulpite zong lingin kising damdam hi. Ama nakvangte panin meikhu pusuak a, a kam panin mei husia pusuak hi; ama tung panin mei-am san kuangkhia hi. Amah in vanpi niamsak-in hong kumsuk a, ama khe nuai-ah meivom sahpi om hi. Amah in Kherub khat tungah tuangin hong leeng a, huih khate tungah manlang takin hong leeng hi. A kimkot-a ama ki-um nadingin khuamial bawl a, a tung kikhuh nadingin meii sahpi leh tui tawh ziingsak hi. Ama mai-a khuavak panin gialpi leh mei-amte in ama meii sahpite phulet hi. Topa zong vantungah awng a, Sangpen Pa in gialpi leh mei-amte ahi ama aw hong gingsak hi. Amah in a thaltangte lawn a, amaute kithehthang sak hi; khuaphialep phiasak a, amaute susia hi. Topa aw, nangma mawhsakna, na nakging tawh tuipi taw kimu a, leibulpite a guakin om hi. Amah in a sang panin a khut tawh zam-in hong la a, tui thukpi panin keimah hong kaikhia hi. Ka gal hatpa kiang pan leh hong mudahte kiang panin amah in keimah hong honkhia hi; bang hang hiam cih leh amaute kei’ adingin hat lua hi. Amaute in ka kamsiat ni-in kei hong neh uh hangin Topa in kei hong huhpa ahi hi. Amah in mun tanzau khatah kei hong paikhiatpih a, kei tungah lungkim ahih manin hong honkhia hi. Topa in ka thumanna tawh kizui-in keimah noptuamna hong pia a, ka khut siangthona tawh kizui-in hong dinkik hi. Bang hang hiam cih leh Topa ’ lampite ka tawn khin a, ka Pasian kiang panin gitlohna tawh ka paikhia kei hi. Bang hang hiam cih leh ama biakna ngeina kipte khempeuh ka mai-ah om a, a thukhamte ka paikhia kei hi. Ama mai-ah kawkbang loin, kisuan’ nadingte panin ka kikem hi. Tua ahih ciangin Topa in ka thumanna leh ama muhna-ah ka siangthona tawh kizui-in hong dinkik khin hi. Thuman mi tungah nangmah na thuman a, kawkbang lo mi tungah na diktat hi. A siangtho mi tungah na siangtho gamtat a, thukawi mite na galbawl hi. Bang hang hiam cih leh nangmah in miniamte na honkhia a, ahih hangin mi kiphasakte na niamsak hi. Hi hi, nangmah in keima mei na vaak a, Topa ka Pasian in ka khuamial na vaaksak hi. Hi hi, nangma hangin galkap honkhat ka sugawp thei a, ka Pasian hangin khuakulh khat ka kan thei hi. Hih Pasian a thu kicing a, Topa ’ kamciamna a manna kilang hi; amah a belte khempeuh adingin amah in kidalna lum ahi hi. Topa longal, Pasian kua hiam? Pasian longal, suangpi kua hiam? keimah thahatna hong guan, Pasian, ka lampi lungmuan’ nadinga a bawlpa ahi hi. Amah in sangaipi’ khe bangin keima khe bawl a, mun sangna-ah keimah hong koih hi. Galsim siam nadingin ka khutte hong hilh a, ka khut in sumngo thal nangawn a keek zo hi. Na hotkhiatna lum hong pia khinin, na taklam khut in hong phong a, na huhna in kei hong liansak hi. Ka kalsuan nading mun tanzau nong pia a, ka khe taal lo hi. Ka galte delhin ka pha a, a vekpi-un a kisiat khit matengin ka ciahkik kei hi. Amaute a thawhkik zawh loh nadingun ka sunlet a, ka khe nuai-ah puk uh hi. Bang hang hiam cih leh galdo nadingin keimah tha nong guan a, keimah hong dote ka nuai-ah na nenniam hi. Ka galte nangmah in na nungkik sak a, kei hong mudahte ka susia hi. Huh ding ngenin amaute kiko uh a, ahih hangin a hon ding kuamah om lo hi; amaute in Topa tungah ko uh a, ahih hangin amah in dawng lo hi. Huihpi mai-ah leivui bangin amaute ka satvui a, kongzing buante bangin amaute ka lawnkhia hi. Mite tawh kidona panin nangmah in kei nong honkhia a, minamte’ lutang-in kei nong bawl a, ka theih ngei loh mite in keima na hong sem uh hi. Ka thu a zak phetun amaute in hong mang uh a, gamdang mite in kei hong mai-et uh hi. Gamdang mite lungkia a, a phualkip panun a liing sa-in hong paikhia uh hi. Topa hing hi; ka suangpi in thupha ngah hen la, ka kihotkhiatna Pasian, hong thuhkik sakin ka nuai-ah mite hong zawhsak Pasian, ka galte kiang panin keimah hong honkhiapa lian ta hen. Hi hi, ka langte tungah kei hong liansak a, mi ngongtatte kiang panin nong honkhia hi. Topa aw, hih thu hangin minam dangte lakah nang kong phat ding a, na min phatna la ka sa ding hi. Zawhna lianpi ama kumpipa tungah pia a, a sathau nilhpa David leh a suan a khakte tungah tawntungin itna kip a lak hi. Vantung in Pasian’ minthan’na gen a, vanpi in ama nasepna taangko hi. Ni simin thu gengen a, zan simin theihtelna pulaklak hi. Pauna leh kammal om lo a, amau aw kiza lo hi; ahih hangin a aw uh leitung khempeuh ah kizel a, a kammal uh leimong dongah tung hi. Ama sungah ni’ adingin omna khat bawl khin a, ama inn sung pan-a hong pusuak zi pi tangval tawh ahi zongin, lungtaii tak-a tai dinga kipan mi thahat khat tawh ahi zongin kibang hi. Ama suahna vanmong khat pan hi a, mong khat dongin pai a, nisa bangin ama satna a liah bangmah om lo hi. Topa ’ thu kicing a, nuntakna thaksuak sak hi; Topa ’ teci pan’na pen hi takpi a, mipil lote pil sak hi; Topa ’ thuhilhte man a, lungsim nuam sak hi; Topa ’ thupiakna siang a, mitte vaaksak hi. Topa a kizahtakna in siang a, kip tawntung hi; Topa ’ ngeina kipte thuman a, a vekpi-in kituak takin man kim hi. Kham sangin ahi zongin, kham siangte nangawn sangin ahi zongin tuate deihhuai zaw a, khuaizu leh khuailuzu tak sangin zong khumzaw hi. Tham loin tuate hangin na nasempa in thu phawkna ngah a, tuate zuihna-ah noptuam lian om hi. Ahih hangin kua in ama khialhnate kimukhia thei hiam? Theih loh man-a khialnate panin hong siangsak in. Mawh kaltangnate panin zong na nasempa hong kem in la, tuate keima tungah hong uk sak kei in! Tua ciangin kawk ka baang kei ding a, mawhna lian panin ka siang ding hi. Topa, ka suangpi leh keimah hong tankhiapa aw, ka kammal leh ka lungsim ngaihsutnate nangma muhna-ah san’huai suak sak ta in! Gimna hunah Topa in nangmah hong en! Jakob Pasian min in nangmah hong dal! Siangtho mun panin amah in huhna nang hong puak hen la, Zion panin nangmah pan’pihna hong pia ta hen! Na biakpiaknate khempeuh amah in hong phawk hen la, na meihal biakpiakna hong sang ta hen. Na lungsim’ deihna amah in hong pia hen la, na geelna khempeuh hong tangtungsak ta hen! Na zawhna-ah eite lungdamin awng-in, i Pasian’ min tawh i lante khai ni! Na ngetna khempeuh Topa in hong tangtung sak ta hen! Topa in a sathau nilhpa a huh ding tu in ka thei ta a, ama vantung siangtho panin ama taklam khut-a gualzawhna lianpite tawh amah a dawng ding hi. Pawlkhat in leengte kihihsak pih-a, pawlkhat in sakolte kihihsak pih hi; ahih hangin eite in Topa i Pasian’ min i kihihsak pih hi. Amaute kinawmsawm-in puk ding uh a, ahih hangin eite tho-in i dingtang ding hi. Topa aw, kumpipa tungah gualzawhna pia in la, kong sap ciangun hong dawng in. Topa aw, nangma thahatna sungah kumpipa lungdam a, gawlzawhna na piakna sungah amah naknuam mahmah hi. Ama lungsim’ deihna nang in na piakhin a, ama hong ngetna na khaktan kei hi. Bang hang hiam cih leh thupha hoihte tawh amah na dawntuah a, ama lu tungah kham siang lukhu na khusak hi. Nangma tung panin amah in nuntakna hong ngen a, ama tungah sau veipi nuntakna na pia hi. Nangma huhna hangin ama minthan’na lian a, hoihna leh minliatna ama tungah na pia hi. Hi hi, nangmah in a tawntungin thupha ngah pen dingin amah na bawl a, nangma ompihna lungdamna tawh amah na kipaksak hi. Bang hang hiam cih leh kumpipa in Topa muang a, Sangpen Pa’ itna kip hangin amah a kiling kei ding hi. Na khut in na galte khempeuh su ding a, na khut taklam in nang hong mudahte sugawp ding hi. Na kilat ciangin meiphual kuang bangin amaute na bawl ding hi. Topa in hehna tawh amaute nawmvalh ding a, mei in amaute kangtum ding hi. Leitung panin a suan a khakte, mi’ tate lak panin amau’ tate na susia ding hi. Na langah siat nading vaihawm a, gitlohna a bawl uh leh, tangtung lo ding uh hi. Bang hang hiam cih leh amaute na taisak ding hi; na thalte tawh a maitang uh na ngim ding hi. Topa aw, na hatna hangin nang hong kipahtawi ta hen! Nangma vangliatna la sa-in kong phat ding uh hi. Ka Pasian, ka Pasian aw, bang hangin kei hong nusia na hi hiam? Keimah nong huh nading kong thumna panin bang hangin gamla om na hi hiam? Ka Pasian aw, sun-in ka kiko a, ahih hangin nong dawng kei hi; zan-in ka kiko a, ahih hangin lungsim nopna ka mu kei hi. Ahih hangin nang Siangtho Pa na hi a, Israelte’ pahtawinate tungah na tu hi. Ka pate un nangmah hong muang hi; amaute in hong muang uh a, nangmah in amaute na honkhia hi. Nang tungah amaute in hong ko uh a, amaute kihonkhia hi; nangmah hong muang uh a, guaksuak lo uh hi. Ahih hangin keimah in lungno khat bang ka hi lel a, mi ka hi kei hi; mite’ ko, mite’ simmawh ka hi hi. Hong mu khempeuh in kei hong zahko-in, hong mukpik san uh a, a lu hong peisan uh hi. “ Topa tungah amah in ama thu ap hi; amah honkhia sak un, amah deih ahih manin hon ta hen!” hong cihsan uh hi. Ahih hangin nang in gilsung panin kei hong suaksakpa na hi hi; ka nu’ ang sungah muanhuai-in keimah nong kem hi. Ka suah-a kipan nangma tungah kong tung a, ka nu in hong paai lai-a kipan keima Pasian na hi hi. Haksatna nai ahih manin kei tawh kigamla om kei in, hong huh ding kuamah dang om lo hi. Bawngtal tampi in kei hong umcih a, Bashan gam bawngtal hatte in kei hong umcih uh hi; humpinelkai hawk leh sabawh nuam bangin amaute in kei hong kamkat beba uh hi. Tui bangin kei hong kibua khia a, ka guh ka tang khempeuh kilawi khin hi; ka lungtang khuainun bang a, ka awm sungah tui suak hi; ka thahatna in leibeel phel bangin keu a, ka leii zong toncip hi; nangmah in sihna leivui sungah kei nong koih hi. Hi hi, ka kim-ah uite om a, siatna bawl mihon khat in hong umcih hi; ka khut ka khete sunlet zo uh hi— Ka guh khempeuh ka sim thei hi—amaute in sal gega-in kei hong en uh hi; amaute in amau lakah ka puante hawm uh a, ka puan hawm nadingin lai-ai saan uh hi. Ahih hangin, Topa aw, gamla om ke’n! Keimah hong huhpa aw, huh dingin hong manlang ta’n! Namsau panin keimah hong hon in la, ui’ thahatna panin ka nuntakna hong hon in. Humpinelkai kam panin keimah hong hon in la, gamsialte’ ki panin a cimawh keimah hong hon in. Ka u ka naute tungah nangma min ka gen ding a, mihon kikhopna laizangah nangmah kong phat ding hi: Topa a zahtak note in amah phat un! Jakob tapate khempeuh aw, amah minthangsak un, Israel tapate khempeuh aw, amah lamdangsakna tawh om un! Bang hang hiam cih leh amah in a thuak mi’ gimna simmawh lo, kih bawl lo hi; ama kiang panin a mai seel lo a, ama tungah a koh ciangin, amah in za hi. Mi honpite lakah nang kong phat nading na piangsak a, nang a hong zahtakte mai-ah ka thuciamna ka hong pia ding hi. Gimna thuakte in kham takin ne ding uh a, amah a zongte in Topa phat ding uh hi. A lungsim uh nuam tawntung ta hen! Leimong khempeuh in phawkin Topa ’ lamah kihei ding uh a, minamte’ innkuan khempeuh in ama mai-ah bia ding uh hi. Bang hang hiam cih leh ukna in Topa aa hi a, minamte tungah amah in uk hi. Hi hi, leitung kiphatsakna khempeuh ama mai-ah kunsuk ding hi; leivui-a paisuk khempeuh leh a kikem tawm thei lote ama mai-ah kun ding uh hi. Suan-le-khakte in ama na sem ding uh hi; mite in hong piang ding mihonte tungah Topa ’ thu gen ding uh a, a suak nai lo mite tungah ama sepsa, hotkhiatna gen ding uh hi. Topa in tuu cin’ bang-a kei hong cingpa hi a, bangmah ka kisam kei ding hi. Lo nona-ah keimah hong lumsak a, tui kiangah kei hong paipih hi. Ka nuntakna tha hong dimsak a, ama min’ adingin thuman lampi-ah kei hong kha hi. Sihna lim guam sung nangawn ka nawk hangin, siatna ka kihta kei hi. Bang hang hiam cih leh kei tawh nang nong omkhawm hi. Na molhtum leh na ciangkhut in kei hong lungmuang sak hi. Ka galte omna mai-ah kei’ ading an nong lui hi; ka lu sathau nong nilh a, ka hai a dimlet hi. Hoihna leh hehpihna in ka khan’ tawntungin hong zui taktak ding a, Topa ’ inn sungah ka om tawntung ding hi. Leitang leh a tunga omte, leitung leh a tunga teengte in Topa aa hi; bang hang hiam cih leh amah in tuipite tungah a bul phut a, gunte tungah kipsak hi. Topa ’ mual tungah kuate kah ding ahi hiam? Ama mun siangtho-ah kuate ding ding ahi hiam? Khut siangtho leh lung siangtho a nei, a man lo-ah a nuntakna pia loin, khemna tawh a kiciam lo mite ahi hi. Amah in Topa tung panin thupha ngah ding a, amah a honkhia Pasian kiang panin diksakna ngah ding hi. Tua bang mite pen, amah a zong, Jakob’ Pasian’ mai a zong minam ahi hi. Minthang Kumpipa hong tum theih nadingin, khua kongpite aw, na lute uh sangsak un! Taanglai kong khakte aw, kilaamto un! Minthang Kumpipa kua ahi hiam? Hat-a a vanglian Topa, galhat Topa ahi hi. Mihing Kumpipa hong tum theih nadingin, khua kongpite aw, na lute uh sangsak un! Taanglai kong khakte aw, kilaamto un! Hih minthang Kumpipa kua ahi hiam? Vanglianpen Topa, minthang Kumpipa ahi hi. Topa aw, nangma tungah ka lungsim kong laamto hi. Ka Pasian aw, nang kong muang hi, hong zahhuaisak kei in; ka galte ka tungah gualzo-in lungdam sak kei in. Hi hi, nang hong ngakte kuamah zahhuaisak kei in; thu khual lo-a zuau theite zahhuaisak in. Topa aw, na zia na tong thei-in hong bawl in la, na lampite hong hilh in. Na thuman sungah kei hong paipih in la hong hilh in, bang hang hiam cih leh nangmah in ka kihotkhiatna Pasian na hi hi; sunthapai-in nang kong ngak hi. Topa aw, taang pek-a kipan a omsa ahih manin, na hehpihna leh na itna kip phawkkik in. Topa aw, ka khangno lai-a ka mawhna leh ka khialhnate ciamteh kei in la, na hoihna na ngaihsutna leh na itna kip tawh kizui-in kei hong phawk in! Topa hoihin thutang hi; tua ahih manin mimawhte lam hilh hi. Amah in lungsim kiniamkhiat mite a man-ah paipih-in a zia a tong hilh hi. Ama thuciamna leh a thu a kipsakna a zuite’ adingin Topa ’ lampite in itna kip leh cihtakna hi. Topa aw, ka mawhna lian ahih manin, nangma min hangin keima mawhna hong maisak in. Topa a zahtak mi kua ahi hiam? A lampi zuih ding Pasian’ hilhna a ngah mipa ahi hi. Amah nuamsa tawntung ding a, a tate in leitang nei ding uh hi. Topa tawh kilawmtatna in amah a zahtakte’ ading hi a, a thuciamna amau tungah kitheithang sak hi. Ka mitte in Topa ’ lamen tawntung hi, bang hang hiam cih leh amah in ngenthang panin ka khete sutkhia ding hi. Keima lamah nang hong kihei in la hong hehpih in; bang hang hiam cih leh kei guak hi-in gimna ka thuak hi. Ka lungsim natnate hong damsak in la, ka gimnate panin hong paikhiatpih in. Ka gimna leh ka thuaknate ngaihsun in la, ka mawhna khempeuh hong maisak in. Ka galte bangzah takin a tamna, leh keimah hong mudah luatnate ngaihsun in. Kei hong cing in la, hong honkhia in; nangmah hong bel ka hih manin kei hong maizumsak kei in. Nang hong ngak ka hih manin, kicin’na leh thutan’na in kei hong kem ta hen. Pasian aw, ama haksatna khempeuh panin Israelte honkhia ta in. Topa aw, a hoih-in gamta-in, lungka loin Topa muang ka hih manin, ka thutan’na hong lak in. Topa aw, keimah hong ze-et in la hong sin in; ka lungsim leh ka ngaihsutna hong entel in. Bang hang hiam cih leh na itna kip ka mai-ah om a, na tungah citakin ka gamta hi. Mikhialte tawh tukhawm loin, thusim neite tawh ka kipawl kei hi; siatna bawl mihonte ka mudah a, migilote tawh ka tukhawm kei ding hi. Topa aw, mawh baan’lohna ka lahna-in ka khutte ka sil a, biakna pia-in na biakna tau kim-ah ka pai hi; lungdam kohna la a gingin sa-in, nangma nasepna lamdangte ka gen kawm hi. Topa aw, nangma inn-a teen’ ding leh na minthang a omna mun-ah om ding ka ut hi. Ahih hangin kei ahih leh, ka hoih gamtat hi; hong tankhia in la kei hong hehpih in. Leizang mun-ah ka ding hi; mihon tampi sungah Topa ka phat ding hi. Topa in ka khuavak leh ka kihotkhiatna hi; kua zahtak ding ka hi hiam? Topa in ka nuntakna’ adingin mun muanhuai hi; bang laupih ding ka hi hiam? Ka langpangte leh ka galte ahi, siatna bawlte in hong do a, kei hong gensiat ciangun, amaute kisuikha-in puk ding uh hi. Mi honkhat in kei langpangin phual a sat hangin, ka lungsim lau lo ding hi; kei langpangin gal hong kuan hangin, tua nangawn-ah ka lungmuang ding hi. Topa ’ tungah na khat ka ngen khin a, tua ngen-a ka zon’ ding pen: Topa ’ inn sungah ka khan’ tawntungin om nading, Topa ’ hoihna et ding leh ama biakinn sungah thu dot dingte ahi hi. Bang hang hiam cih leh haksat hun ciangin a buk sungah kei hong seel ding hi; a puanbuk khuhna nuai-ah kei hong seel ding-a, a san’na suang tungah hong koih ding hi. Tu-in ka kimkot-a om ka galte tungah ka lu kilaamto-in, lungdam-a kikona tawh biak piaknate ama buk sungah ka pia ding a, la ka sa ding hi, Topa ’ tungah la ngaih ka sa ding hi. Topa aw, kong ot’ ciangin hong za in la, kei hong hehpih-in hong dawng in! “Ka mai hong zong in,” na ci khin zo hi. Ka lungsim in nang tungah, “ Topa aw, nangma mai kong zong hi,” ci hi. Kei kiang panin na maitang seel kei in. Hehna tawh na nasempa hawlkhia kei in, kei hong huh ngeipa na hi hi. Hong paaikhia kei in la, hong nusia kei in, ka kihotkhiatna Pasian aw! Bang hang hiam cih leh ka nu leh ka pa in hong nusiat hangin Topa in kei hong kem ding hi. Topa aw, na lampi hong hilh in la, ka galte hangin lamphei-ah hong kha in. Ka langte’ deihna bangin kei hong nusia kei in; bang hang hiam cih leh teci man lote ka langah pang khin a, amaute in ngongtatna hu sangkhia uh hi. A hingte gam sungah Topa ’ hoihna mu dingin ka ki-um hi. Topa ngak in; tha khauh in la, na lungsim hangsak in; hi hi, Topa ngak in! Topa aw, awng-in nang kong sam hi; ka suangpi aw, ka tungah bengngong kei in, tua ci-in kei tungah hong dai dide lecin, Leihawm sunga paisukte tawh a kibang ka suak hi. Siangthopen mun lamah ka khutte laamto a, nang kiangah huhna kong nget mah bangin, kong thumna aw hong za in. Amau lungsim sungah siatna om hi napi a vengte tawh kilemna thu a gen khem, siatna bawlte, migilote tawh kei hong lakhia khawm kei in. Amau sepna leh amau gamtat siatnate bangin amaute thukkik in; amau khut sepna tawh kizui-in thuk in la, amau ngah dinga kilawm thaman pia in. Amaute in Topa ’ nasepna, a khutte’ nasepna thupi ngaihsut lo ahih manin, amah in amaute susia-in a bawlkik nawn kei ding hi. Ka thuumna aw hong za ahih manin Topa in thupha ngah ta hen! Topa in ka hatna leh ka lum hi a, ka lungsim in amah muang hi; tua ahih manin kei hong kihuh a, ka lungsim nuamin diang a, ka lasakna tawh ama tungah lungdamna ka pia hi. Topa in ama mite’ thahatna hi a, amah in a sathau nilhpa’ kihotkhiatna buk ahi hi. Na mite hon in la, na luahte thupha pia in; amau cingpa hi in la, a tawntungin amaute huh in. Topa aa ci un, van mite aw, minthan’na leh hatna Topa aa ci un. Ama minthan’na Topa ’ tungah pia un la, a siangtho kizepna tawh Topa bia un. Topa ’ aw in tuite tungah om hi; a minthang Pasian ging damdam a, tui tampite tungah Topa om hi. Topa ’ aw vanglian a, Topa ’ aw in liatna tawh kidim hi. Topa ’ aw in taamtaak singte kitansak a, Topa in Lebanon mual taamtaak singte kuaitan hi. Lebanon mual leh Sirion mualte bawngno leh gamsialno bangin amah in diangsak hi. Topa ’ aw in meikuang taangkhia sak hi. Topa ’ aw in gamlak lok a, Topa in Kadesh gamlak lok hi. Topa ’ aw in singkungte kiheekgawp sak a, gammang tulak hawkkhia-in kolhsak hi; a biakinn sungah a vekpi un awng-in “Minthan’na” ci uh hi. Tuicin tungah Topa tu hi; a tawntung kumpi hihna tawh Topa tu hi. Topa in a mite hatna pia ta hen! Topa in a mite nopna thupha pia ta hen! Topa aw, nangmah phatin ka diang ding hi, bang hang hiam cih leh kei nong kaito khin a, ka tungah ka galte na lungdamsak kei hi. Topa ka Pasian aw, huhna ngenin na tung kong awng a, kei nong damsak khin hi. Topa aw, Leinuai panin kei nong paikhiatpih to khin a, Leihawm sunga pai khinsate lak panin kei nong nungtakik sak hi. Ama misiangthote aw, Topa tungah phatna la sa un la, ama tungah lungdamna ko un. Ama hehna tomno sung bek hi a, ama deihsakna in khang tawntung ading ahi hi. Zan sung teng kahna om kha mah ding a, ahih hangin zing khuavak tawh nuamna hong pai hi. Keimah in ahih leh, ka daupai lai takin, “Ka kiling ngei kei ding hi,” ka ci kha hi. Topa aw, nong deihsakna tawh mual kip bangin kei nong phut khin hi; na maitang na seel a, kei ka khasia hi. Topa aw, nang tungah kong kiko hi; Topa tungah ka thum hi: “Leihawm sungah paisukin ka sihna-ah bang metna om ahi hiam? Leivui in nang hong phat ding ahi hiam? Na thumanna gen ding ahi hiam? Topa aw, hong za in la, kei hong hehpih in! Topa aw, nangmah in keimah huhpa hong hi in!” Topa aw, nang kong bel hi; hong maizumsak ngei kei in la, na thumanna tawh kei hong honkhia in! Na bil hong ngat in la, hong hon pak in! Ka belh ding suangpi hong hi in la, kei hong dal ding munkip muan’huai hong hi in! Hi hi, nang in ka suangpi leh ka munkip muan’huai na hi hi; nangma min ngaihsutna tawh kei hong kha-in lam hong lak in la, keima belhpa na hih manin kei hong kisiahna ngenthang kisel panin hong la khia in. Nangma khut sungah keimah kong ki-ap hi; Topa, a thuman Pasian aw, keimah nong tan zo hi. Mawkna milim a thupi ngaihsutte na mudah hi; ahih hangin ke’n Topa ka muang hi. Na itna kip hangin lungdamin ka kipak ding hi. Bang hang hiam cih leh ka thuakna mu khin-in, ka kamsiatnate nong don khin a, galte khut sungah kei nong pia kei hi; mun tanzau-ah ka khe na dingsak hi. Topa aw, genthei ka hih manin kei hong hehpih in; dahna tawh ka mit thuk a, ka lungsim leh ka pumpi zong gim ta hi. Bang hang hiam cih leh ka nuntakna dahna vive hi a, ka hunte khuisatna vive ahi hi; ka gentheihna hangin ka tha kiam a, ka guhte ngaam hi. Ka langte khempeuh’ nuihsat hi-in, ka vengte tungah cikzet-huai ka hi a, ka meltheihte’ gimneih ka hi hi; konglak-a hong mute in kei hong pelin hong taisan uh hi. Misi bangin kei hong kiphawk nawn lo hi; beel kitam khat tawh ka kibang hi. Hi hi, mi tampi’ kihuauna ka za hi—mun citeng-ah launa om! kei langpangin amaute vaihawm khawmin, thah dingin kei hong sawm uh hi. Ahih hangin keimah in nang kong muang hi, Topa aw, “Nangmah in keima Pasian na hi hi,” kong ci hi. Ka hunte na khut sungah om hi; ka galte leh hong bawlsiate khut sung panin kei hong honkhia in! Na nasempa tungah na mai taangsak in; na itna kip tawh kei hong gum in! Topa aw, nang tung hong ngen ka hih manin kei hong maizumsak kei in, migilote maizumsak in la, amaute pau ding thei loin Leinuai-ah pai sak in. Thumante lang pang a, kihihsak pau in, kiphatsakna leh simmawhna tawh kam a pau, zuauthu gen mukte pau thei lo sak in. Nang hong zahtakte’ adinga na koihsa, nang hong belte’ adinga mite’ muhna-ah na bawl, na hoihna bangzah takin kicing! Mite’ sawmsimna panin na omna huam sungah amaute na seel a, kitotna panin amaute na buk sungah muanhuai-in na kem hi. Khuapi khat gal in a umcih bangin kei hong ki-umcih lai-in a itna kip a lamdangin kei tungah hong lak ahih manin Topa in thupha ngah ta hen. Lauthawngna tawh, “Nangma muhna panin gamlapi-ah kei hong kinot khia hi,” ka ci khin hi. Ahih hangin nang tungah huhna kong nget ciangin ka thuumnate nang nong za hi. Topa it un, ama misiangtho khempeuh aw! Thumante Pasian in kem a, ahih hangin a kiphatsak gamtatte nakpi takin thuk hi. Topa a ngak mi khempeuh aw, na tha uh khauhsak-in, na lungsim uh hangsak ta un! Ama khialhna kimaisak a, ama mawhna a kituamcipsak pa in thupha ngah mi ahi hi. Topa in mawhna a khuksak loh mi, a lungsim-ah khemna a om lo mi in thupha ngah ahi hi. Ka mawhna ka pulak loh ciangin, sunthapai-a ka tautauna hangin ka pumpi a tha neem hi. Sun leh zan tawntung ka tungah na khut gik hi; khuakhal nisa bangin ka thahatna a keu hi. Ka khialhna na tungah kong pulak a, ka mawhna ka im kei hi; “Ka khialhnate Topa tungah ka pulak ding hi,” ka ci hi; tua ciangin ka mawhna nin nong maisak hi. Tua ahih ciangin nangmah hong kimuh theih lai-in mi hoih khempeuh, nangma tungah thu kingensak in; tua hi leh tuikhang in amaute ban lo ding hi. Nangmah in keima adingin bukna mun na hi a, haksatna panin kei hong kemin, hotkhiatna tawh nong tuam hi. Na paina ding lampi lakin kong hilh ding a, ka mit tawh hong enin thu kong hilh ding hi. Kamkaih tawh uk loh-a phamawh, thu theihna nei lo, sakol leh laa bang kei in. Migilote in gimna tampi thuak uh a, Topa a muangte ahih leh itna kip in tuamcip hi. Thumante aw, Topa sungah lungdamin kipak un, lungsim man mi khempeuh aw, lungdamin awng un! No thuman mite aw, Topa tungah lungdam un! Pahtawina in thutangte tawh kilawm kituak hi. Laiza khausai lasakna tawh Topa phat un la, harp zang sawm khausai lasakna tawh ama tungah la ngaih sa un! Ama tungah la thak sa un la, a gingin hoih takin khausai tum un. Bang hang hiam cih leh Topa ’ thu tang a, ama hihna khempeuh thuman tawh sem hi. Amah in thumanna leh thutan’na deih a, leitung in Topa ’ itna kip tawh kidim hi. Topa ’ kampauna tawh vantung piang a, ama kam pan-a husan’na tawh vantung nate a piang hi. Amah in tuipi tuite thawlkhat sunga thun bangin khawm a, tui thukpite tuibem-ah koih hi. Topa pen leitung khempeuh in zahtak uh hen la, leitung a teengte khempeuh in amah lamdang sakna tawh ding hen! Bang hang hiam cih leh amah pau a, hong piang hi; thu pia a, hong om hi. Topa in minamte’ thu ngaihsutna a mawkna suah a, mite’ geelna khaktan hi. Topa ’ thu ngaihsutna kip ngitnget a, a lungsim ngaihsutna khang tawntungin kip hi. Topa pen Pasian-a a nei minam, ama luah dingin teelna a ngah minam in thupha ngah ahi hi. Topa in vantung panin hong ensuk a, mi’tapate khempeuh a mu hi; a tutna mun panin amah hong dakkhia-in, leitung mi khempeuh a en hi; amau lungsim khempeuh a bawlpa in, amau gamtatna khempeuh en gige hi. A galkap tampi in kumpi khat suakta sak zo lo a, galkap hangpa ama hatna tawh kihonkhia zo lo hi. Sakol galkap in gualzawh nadingin a mawkna lametna hi a, ama hatna tawh hon zo lo hi. Topa i ngak hi; amah in eimah huhpa leh i lum ahi hi. Hi hi, ama min siangtho muang i hih manin ama sungah i lungdam hi. Topa aw, nang kong lamet uh mah bangin na itna kip ko tungah hong omsak in. Topa ka phat tawntung ding hi; amah phatna ka gengen ding hi. Topa ka phat ding hi; gimna thuakte zasak un la lungdam uh hen. Kei tawh Topa nak phat un, ama min pahtawi khawm ni! Keimah in Topa ka zong a, amah in kei hong dawngin, ka launa khempeuh panin hong honkhia hi. Amah en un la, maitai un; tua hi leh na mai uh zum ngei lo ding hi. Hih mi hehpihhuaipa kiko-in, Topa in amah za a, ama haksatna khempeuh panin honkhia hi. Amah a zahtakte’ kim-ah Topa ’ vantungmi in giahphual sat a, amaute honkhia hi. Topa ’ hoihna sin un la, hoih hi, ci-in thei un! Amah a bel mi in lungdam hi. Ama mi siangthote aw, Topa zahtak un, bang hang hiam cih leh amah a zahtakte in kisapna nei lo hi. Humpinelkai khang laite in kisapna leh gilkialna thuak hi; ahih hangin Topa a zongte in na hoih a kisap uh om lo hi. Tate aw, hong pai un la, hong ngai un. Topa zahtakna kong hilh ding hi. Hoihna a neih theih nadingin nuntakna leh khan’sau a deih kua ahi hiam? Siatna panin na leii kem in la, zuau genna panin na muk kem in. Siatna panin kihemkhia in la, a hoih bawl in; nopna zong in la, delh in. Topa ' mit in thumante’ lam en a, a bil in amau kikona lam nga hi. Siatna bawl mite leitung panin a kiphawkna a kisuktat nadingin Topa in amaute langpang hi. Huh ngen dingin thumante a kiko ciangin Topa in za a, a haksakna khempeuh panun amaute honkhia hi. Lungsim kitamzante kiangah Topa om a, lungsim zan-gawpte hon hi. Thuman mi’ thuakna a tam hangin tuate khempeuh panin Topa in amah hon hi. Amah in a guh khempeuh kem hi; khat zong kitan lo hi. Siatna in migilote that ding a, thuman mudahte kidantat ding hi. Topa in ama nasemte honkhia hi; amah a bel mi khat beek kidantat lo ding hi. Topa aw, kei hong pangte langpang in la, kei hong dote do in! Lum lian leh lum neu la in la, keimah hong huh in! Teipi leh teitangzang dok in la kei hong delhte’ lam ngat in! Keima tungah, “Kei in nangma kihotkhiatna ka hi hi!” hong ci in. Kei hong sawmte mai zumin mindaisak ta in! Keima siat nading a bawlte nungkiksak in la siasak ta in! Topa ’ vantungmi’ hawlna tawh amaute huih letkhiat ansite tawh kibangsak in. Topa ’ vantungmi’ delhna-ah a taina lampi uh mial-in nal sak in. Bang hang hiam cih leh amaute in thu om lopi-in a ngenthang uh tawh kei hong siah uh a, thu om lopi-in gum to-in kei hong siah uh hi. A phawk loh kalun amau tungah siatna tung sak in! Amau ngenthang siahsimna uh ah amaute mah awksak in la, a kisia dingin amaute kiasak in. Tua ciangin Topa tungah ka lungdam ding a, ama hotkhiatna-ah nuamin ka diang ding hi. Ka lungsim khempeuh tawh “ Topa aw, ama adinga a hat luate kiang panin a thahat lo mi a gumkhia, a neihsa a sutkhia mi kiang panin mi thahat lo a zawng a gumkhiapa ahi, nang tawh a kibang kua ahi hiam?” ka ci ding hi. Mi a el tecite hong kipan uh a, ka theih loh thute kei hong dong uh hi. Amaute in hoihnate siatna tawh kei tungah hong thuk uh a, ka khawngai mahmah hi. Ahih hangin kei ahih leh, amaute a cinat uh ciangin—puanhampi silhin an tangin kei ka kigim tawmsak hi. Ka ang ah ka lu phumin thu ka ngen a, ka lawm, ka sanggampa’ hanga dah bangin ka dah hi; a nu’ hanga kap mi bangin kapin ka vak kawikawi a, kunin ka kidikdik hi. Ahih hangin kei ka tukna-ah amaute nuamin kikhawm uh a, keimah langpangin kikaikhawm uh hi; ka theih ngei loh khebaite nangawn in tawlnga loin kei hong gensia hi; zahtakna mel nei loin hong zahko uh a, a ha uh kei hong gawisan uh hi. Topa aw, bang tanvei hong en khong ding na hi hiam? Amau hong sukgawpna panin keimah hong honkhia in la, humpinelkaite kiang panin ka nuntakna hong hon in. Tua ciangin mihon kikhopna lian sungah na tungah lungdamna kong ko ding a, mi honpite lak panin nang kong phat ding hi. A man lopi-a ka gal a hite kei tungah lungdamsak kei in la, thu om lopi-a kei hong mudahte, mit-heek kipiasak kei in. Bang hang hiam cih leh amaute in kilemna thu gen lo uh a, gam sunga dai taka mi omte lang pangin, khemna thu ngaihsun uh hi. Amaute in kei hong kamkat beba uh a, amaute in, “Ha, Ha! mu khin hang ei!” ci uh hi. Topa aw, na mu khin hi, dai om kei in! Topa aw, kei kiang panin gamla om kei in! Ka Topa ka Pasian aw, ka thu hong thei in la, kei’ adingin nangmah hong kisosuah tawm in! Topa ka Pasian aw, nangma thumanna tawh kituakin keima thutan’na hong langsak in la, amaute kei tungah lungdamsak kei in! Amau leh amau tungah, “Ha, i tuptup tung ei!” kici sak kei in. “Amah nawmvalh tum khin hang,” amaute cisak kei in. Kei’ kamsiatna-ah a lungdamte maizumsak in la zahhuai gawp sak in! Kei tunga hong kiliansakte maizumna leh mindaina silh sak in! Kei’ thutan’na lah khiat ding a deihte lungdamin, awng-in, kipaksak in la, a tawntungin, “A nasempa’ hoihna-ah a lungkim Topa lian hi,” cici sak in. Tua ciangin na thumanna leh nangmah phatna sunthapai-in ka gengen ding hi. Thu palsatna in migilopa’ lungsim tawngah thu gen a, ama mai-ah Pasian zahtakna om lo hi. Bang hang hiam cih leh ama mawhna kidawk khia lo, muhdahna thuak lo ahih manin amah kimawk phat tawm hi. Ama kammalte in siatna leh khemna vive hi a, pil gamtatna leh hoih gamtatna bei khin ta hi. A lupna tungah siat gamtat ding sawm a, hoih lohna-ah amah kibulhtawm hi; amah in siatna nolh lo hi. Topa aw, na itna kip in van ban a, na cihtakna in meii ban hi. Na thumanna in Pasian’ mualte tawh kibang a, na thukhennate in tuipi thuk tawh kibang hi; mihing leh ganhing na hon hi, Topa aw. Pasian aw, na itna kip bangzahta in manpha! Mihing tate na kha lim-ah bu uh hi. Na inn sunga na tampite tawh amaute nuamsa uh a, na lungkimna gun panin amaute dawn ding na pia hi. Bang hang hiam cih leh nuntakna tuinak nang tawh om a, na khuavak sungah kote in khuavak ka mu uh hi. Nang hong theite tungah na itna kip hong zom in la, lungsim thutangte tungah na hotkhiatna hong zom in! Kihihsakna khe kei hong sik khasak kei in la, kei pen migilote, hong hawlkhiasak kei in. Hia lai-ah siatna bawlte cimawh-in kun uh a, amaute kisuncip sukin, tho zo lo uh hi. Migilote hangin nangmah kilungsosak kei in la, a man lo-a gamta mite eng kei in! Bang hang hiam cih leh amaute lopa bangin vul pak ding uh a, lokung hingte bangin keutum ding uh hi. Topa muang in la gamtat hoih in; gam nuamah teeng in la thumanin om in. Topa sungah lungkim in, amah in na lungsim deihna nang hong pia ding hi. Topa tungah na vai teng ap in; amah muang in, amah in hong sem ding hi. Amah in na dikna khuavak bangin, na thumanna sun ni taang bangin hong lang sak ding hi. Topa mai-ah khawl dide in la, lungduai-in ngak in; a hihna a daupai-pa tung leh siatna a bawlpa tungah nangmah kilungso tawmsak kei in! Hehna panin kikham in la, sinsona nusia in! Nangmah kilungsosak kei in; tua in siatna bek-ah hong paipih hi. Bang hang hiam cih leh migilote kipuaseh ding a, ahih hangin Topa a ngakte in leitung luah ding uh hi. Ahih hangin tawlkhat sungin migilopa om nawn lo ding a, ama omna mun na limzon’ hangin, tua lai-ah amah na om lo ding hi. Ahih hangin lungnemte in leitang luahin, gen zawh lohin amaute in nuamsa ding uh hi. Migilo in thumanpa sawm a, a ha gawisan hi; ahih hangin Topa in migilopa’ hun tung ta mu ahih manin amah nuihsan lel hi. Mizawngte leh mi cimawhte suniam ding, thutang-a gamtate that dingin migilote in namsau dokin a thal uh a keek hi; a namsau uh amau lungtang mah-ah tum ding a, a thalte uh kitan ding hi. Migilote’ hauhna sangin thuman mite’ tawmno khat neih hoihzaw hi. Bang hang hiam cih leh migilote’ baan kitan ding a, ahih hangin Topa in thuman mi huh hi. Topa in paubaang lote’ ni thei a, amau’ gamh in kip den ding hi; siatna hun ciangin amaute kimaizumsak lo a, kial hun ciangin tampi nei uh hi. Ahih hangin migilote kisia hi; Topa ’ galte pen lono etlawm tawh kibang hi, amaute mangthang uh hi—meikhu bangin mangthang uh hi. Migilo in leitawi a, lohkik zo lo hi, thuman mi ahih leh cingh-a mi pia hi; Bang hang hiam cih leh Topa ’ thupha piakte in leitang luah dinga, ahih hangin ama samsiatte kipuaseh ding hi. Mi khat’ kalsuannate Topa ’ kiang pan hi a, ama lungkim banga a gamtapa amah in kipsak hi; amah a puk hangin lu-tuk lo ding hi, bang hang hiam cih leh Topa in ama khut len hi. Thuman mi a kinusiacip hita leh, a tate an ngen tawm-a kivaak hita leh, ka neu lai-a kipan tu-a ka teek dong ka mu ngei nai kei hi. Amah in mi citpiak ngitnget-in, mi tungah leitawi pia khia a, a tate zong thupha ngah mi a suak hi. Siatna panin kihem in la, gamtat hoih in; tua hi leh na kipsuak ding hi. Bang hang hiam cih leh Topa in thutang deih a, a mi siangthote nusia lo ding hi. Thuman mi kikemcing den ding a, ahi zongin migilo’ tate kipuaseh ding hi. Thuman mi in leitang luah ding a, tua tungah teeng suak ding hi. Thuman mi’ kam in pilna gen a, a leii in thutang gen hi. A lungsim sungah ama Pasian’ thukham om hi; a kalsuante taal lo hi. Migilo in thuman mi encik a, thah dingin zong hi. Topa in migilopa’ khut sungah amah nusia lo ding a, thusit dingin amah a kipaipih ciangin mawhna thuaksak lo ding hi. Topa ngak in la ama lampi zui in, leitang luah dingin nang hong liansak ding hi; migilote’ siatna na en ding hi. Lebanon gam taamtaak sing banga a sang, migilo kiphasak khat ka mu hi. Ama kiangah ka paikik a, ah! amah na om nawn lo; ka zon’ hangin amah kimu lo hi. Paubaang lo mi ciamteh in la, thutang mi en in, bang hang hiam cih leh gal phuang lo mi’ adingin nopna om hi. Ahih hangin thu palsatte kisusia mang khin ding a, migilote’ suan-le-khakte kipuaseh ding hi. Thumante’ kihotkhiatna in Topa ’ kiang pan hi a, amah in haksat hun ciangin amau bukna ahi hi. Amaute in Topa bel ahih manin amah in amaute huhin honkhia hi; migilote kiang panin amaute honin suaktasak hi. Topa aw, na hehna tawh hong tai kei in la, lungso sa-in hong thuhilh kei in! Bang hang hiam cih leh na thaltangte ka sungah hong tum khin a, ka tungah na khut hong tu khin hi. Nangma hehna hangin ka ci na a, ka mawhna hangin ka pumtangin ka na hi. Bang hang hiam cih leh ka mawhnate in ka lu tuum zo a, keima puak ding a giklua van-gik tawh kibang hi. Ka haina hangin ka liamnate nai-in uih a, hong kikunsak, hong kibokcip sak hi; sunthapai-in kapin ka vak kawikawi hi. Bang hang hiam cih leh ka ci sa mahmah a, nakpi takin ka ci na hi. Ka tha bei khinin hong kinengcip hi; ka lungsim buaina hangin ka tau hi. Topa aw, ka deihna khempeuh nang na thei a, ka khuisatna nang kiang pan kiseel lo hi. Ka lungtang kisat a, ka tha in lel hi; ka mit in zong khua mu thei nawn lo hi. Ka gim thuakna-ah ka lawmte leh ka kithuahpihte kidaang koih uh a, ka behte kei kiang pan gamla om uh hi. Kei hong that nuamte in a thang uh zakin, kei’ nat nading a zongte in siatna thu gen uh a, sunthapai-in khemna bek ngaihsun uh hi. Ahih hangin kei pen bilngong ka bang a, khua ka za kei hi, a kam ka lo, a pau theilo mi ka bang hi. Hi hi, bil khua za lo, taina kam a zang lo mi khat tawh kei ka kibang hi. Ahih hangin, Topa aw, nangmah kong ngak hi; Topa ka Pasian aw, hong dawng dingpa nangmah na hi hi. Bang hang hiam cih leh, “Ka khe a taal ciangin kei tungah hong kihisakte, kei’ tungah lungdamsak kei un,” cih bek kong thum hi. Bang hang hiam cih leh puk dingin ka kithawi a, ka gimna kam tuan lo hi. Ka thuman lohna ka pulak a, ka mawhna hangin ka dah hi. Thuman lopi-a ka gal a hite thahat a, kei hong mudah khialte tam mahmah hi. A hoih zui ka hih manin hoihna pen siatna tawh hong thukte ka langpangte ahi hi. Topa aw, kei hong nusia kei in! Ka Pasian aw, ka kiang panin gamla om kei in! Topa, ka kihotkhiatna aw, keimah huh dingin hong manlang in! “Ka leii tawh ka khialh loh nadingin ka gamtatna ka kikem ding a, ka omna-ah migilote a om lai teng ka kam ka kham ding hi,” ka ci hi. Pau loin ka dai om a, ka dai omna a mawkna hi; ka thuakna khang semsem a, ka sungah ka lung so hi. Ka lungngaih ciangin ka lung so semsem hi; tua ciangin ka pau khia a: “ Topa aw, ka mong leh ka hun ciangtan zah hong theisak in la, ka nuntakna a bei pak hun ding kei hong theisak in! En in, ka nuntakna hun tuk khat tan bang bekin na bawl a, ka nuntakna hun nang’ muhna-ah bangmah gen tham lo hi. Mihing khempeuh in husan bang bek hi takpi hi. Ni liim bangin mihing pai kawikawi takpi hi. A mawkna-in amau lungkham takpi uh a, kua in ngah ding cih thei lopi-in mite in nate khol hi. “Tu-in Topa aw, ke’n bang ngak lai ka hi hiam? Ka lametna nang sungah om hi. Ka thu palsatna khempeuh panin kei hong honkhia in. Mihaite’ nuihsatin kei hong bawl kei in! Hih banga bawl nangmah na hih manin pau loin ka om a, ka kam ka ka kei hi. Nong vuakna ma ka tung panin lakhia in; na khut tawh nong vuakna-in ka tha bei ta hi. Mawhna hangin mi satin na tai ciangin, nget in a nektum bangin ama na manpha na beisak hi; mi khempeuh in husan’ khat bang bek hi takpi hi. “ Topa aw, ka thungetna hong ngai in la, ka kikona hong za in; ka khitui luan’na hong don loin om mawk kei in; Bang hang hiam cih leh ka pu ka pate khempeuh bangin keimah in na zin, na peemta ka hi hi. Ka man’than’ hun matengin ka lungnop theih nadingin kei hong en kei in!” Topa lamenin ka ngak ngiungeu a, amah keima lam hong nga-in ka kikona aw hong za hi. Dahna dum sung, buannawng panin amah in kei hong kaikhia-in, ka khete suangpi tungah nga a, ka khe sikna muan’huaisak hi. Eima Pasian phatna la thak keima sungah hong koih hi. Mi tampi in mu-in zahtak ding a, amaute in Topa muang ding uh hi. Topa muang a, mi kiphasakte lam-a kihei lo, pasian manlote lamah a paikhial lo mi in thupha ngah ahi hi. Topa ka Pasian aw, na sepna lamdangte leh ko’ adinga na ngaihsutnate tampi na phasak a, kuamah tawh teh theih na hi kei hi! Tuate pulakin gen ding hi leng, sim zawh ding hi lo hi. Gan gawh biakna leh khawhsa tawh biakna na deih kei hi; ka bil nong hon’sak hi. Meihal biakna leh mawhmai biakna zong na kulsak kei hi. Tua ciangin keimah in, “En in, laibu sunga keima thu a kigelh khinsa bangin kong pai hi; nangma deih bang hihna-ah nuam ka sa hi, ka Pasian aw; na thukham ka lung sungah om hi,” ka ci hi. Hotkhiatna lungdamna thu thak mi honpi lakah ka gen khin hi; en in, Topa aw, na theihsa bangin ka muk ka kham kei hi. Nangma gupkhiatna huhna ka lung sungah ka im kei a, na thumanna leh na gupkhiatna thu ka gen khin hi; na itna kip leh na thumanna mi honpi tungah ka im kei hi. Topa aw, na hehpihna kei kiang panin humcip kei in la, na itna kip leh na thumanna keimah hong kem den ding hisak in! Bang hang hiam cih leh a mal-a sim zawh loh ding siatna tampi in kei hong umcih hi; khua hong mu thei losak zah dongin ka mawhnate in kei hong pha khin hi, amaute ka lu tunga ka sammal sangin tamzaw uh hi; ka lung in a lel hi. Topa aw, keimah hong honkhia nuam in! Topa, keimah huh ding hong manlang in! Kei, thah dingin a hong zongte zahhuaisak in la maisia sak in; keima siat nading a deihte nungkiksak in la minsia sak in! Keima tungah, “Ha, ha!” hong cite zahhuaina tawh maikhing sak in. Ahih hangin nang hong zongte khempeuh nang sungah nuamin kipak hen la, na gupkhiatna a deihte in, “ Topa in lian hi!” ci ngitnget uh hen. Kei ahih leh zawng-in ka cimawh hi; ahih hangin Topa in kei’ ading ngaihsun hi. Nangmah in keimah hong huhpa leh keimah honkhiapa na hi hi; zekai kei in, ka Pasian aw! Mi gentheite a khual mi in thupha ngah ahi hi. Topa in haksatna hunah amah honkhia hi. Topa in amah hu-in hingsak hi; leitungah amah thupha ngah mipa kici hi; ama galte’ deihna-ah amah na piakhia kei hi. ci na-a a lupna tungah Topa in amah na kem a, a ci nat ciangin ama gitlohna khempeuh na damsak hi. Ke’n ahih leh, “ Topa aw, kei hong hehpih in; keimah hong damsak in, bang hang hiam cih leh nang tungah kong khial zo hi!” ka ci hi. Ka galte in elna tawh keima thu gen uh a: “Cik ciangin amah a si tam, cik ciangin ama min a mang tam?” ci uh hi. Keimah en dingin mi hong pai ciangin, kam mawkna pau uh hi, a lung sungah siatna kaikhawm uh a, a paikhiat uh ciangin genthang uh hi. Kei hong mudah khempeuh in keima thu kihuauhuau uh a, kei’ adingin a sia thei pen gelgel uh hi. Amaute in, “Thusia khat ama tungah baang zo hi; a lupna panin thokik nawn lo ding hi,” ci uh hi. Ka muan’, ka lawm itpa, keima an a nepa nangawn in, a khetul tawh keimah hong peek hi. Ahih hangin, Topa aw, amaute ka thukkik theih nadingin kei hong hehpih in la, hong phong to in! Ka galte in keimah hong zawh lohna thu-ah, keima tungah nong lungkimna ka thei hi. Ahih hangin keima kicin’na hangin nong huh a, nangma omna-ah kei nong koih den hi. Israel Pasian, Topa in khang tawntungin thupha ngah ta hen! Amen, Amen. Sakhi in luitui luang sialsial a lunggulh bangin, nang kong lunggulh hi, Pasian aw. A nungta Pasian kong deih hi. Cik ciangin keimah hong pai-in Pasian’ maitang en ding ka hi hiam? Mite in keima tungah, “Na Pasian koi-ah om hiam?” hong cihcih sung teng, sun leh zanin ka khitui an-in ka nei hi. Ka lungsim sung ka suahkhia a, pawi bawl mi honkhat, kipak a otna leh nuamna la tawh Pasian’ innah ka makaihna, mihon tawh ka paina ka phawk hi. Bang hangin khakunkun ka hi hiam, bang hangin lunghimawh ka hi hiam? Pasian’ sungah lametna nei ning; bang hang hiam cih leh kei hong huhpa ka Pasian ka phat kik na ding hi. Ka lungsim tamkham hi; tua ahih manin Jordan leh Hermon gam, Mizar mual tung panin nang kong phawk hi. Nangma tuizeu ging tawh tui thukte khat leh khat kidawng a, na tuihual neu leh na tuihual liante in kei hong tuum hi. Topa in sunin a itna kip hong sawl hi; zan ciangin nuntakna hong pia Pasian tungah thungetna la ka sa hi. “Bang hangin kei hong mangngilh khin na hi hiam? Galte’ sukcip manin bang hangin kapin ka kidik hiam?” ci-in ka Pasian, ka suangpi tungah ka gen hi. Ka langte in kei tungah, “Na Pasian koi-ah om ahi hiam?” hong cihcih sung teng, ka sungah meima nai tawm bangin hong tum ngangngang hi. Bang hangin khakunkun ka hi hiam, bang hangin lunghimawh ka hi hiam? Pasian’ sungah lametna nei ning; bang hang hiam cih leh kei hong huhpa ka Pasian ka phatkik na ding hi. Pasian aw, ka dikna hong langsak in la, migilote tawh ka thu-ah hong panpih in; mi kheemte leh thutang lote kiang panin kei hong honkhia in! Bang hang hiam cih leh nangmah in kong belh Pasian na hi hi; bang hangin kei hong nilkhia na hi hiam? Galte’ sukcip manin bang hangin kapkap-in ka kidik hiam? Na khuavak leh na thuman hong sawl khia in la, na mual siangtho leh na omna-ah kei hong paipih sakin, hong khasak in! Tua ciangin Pasian biakna tau ahi zongin, ka lungdamna Pasian kiangah ahi zongin ka pia dinga, laiza khausai lasakna tawh nang kong phat ding hi, aw Pasian, ka Pasian aw. Bang hangin khakunkun ka hi hiam, bang hangin lunghimawh ka hi hiam? Pasian sungah lametna nei ning; bang hang hiam cih leh kei hong huhpa ka Pasian ka phatkik na ding hi. Pasian aw, ka pu ka pate uh hun lai-a na hihna sate, amaute in kote tungah hong gen uh a, kote in ka bil uh tawh ka za khin uh hi. Na khut tawh minam dangte na hawlkhia a, ahih hangin amaute na phut hi; midangte na sugawp a, ahih hangin amaute na suakta sak hi; bang hang hiam cih leh amaute in amau namsau tawh leitang ngah lo uh a, amau khut in amaute gualzawhna pia lo hi; na khut taklam leh na baan, na hehpihna maipha hizaw hi; bang hang hiam cih leh amau sungah nang na lungkim hi. Nangmah in Jakob’ adingin gualzawhna a sehkhol, ka Kumpi leh ka Pasian na hi hi. Nangma hangin ka galte uh ka sawnpai uh a, ko hong dote, na min suangin ka tuancil uh hi. Bang hang hiam cih leh keimah in ka thalpi ka suang kei a, ka namsau in zong kei hong hon zo lo hi. Ahih hangin nang in ka galte kiang panun kote nong hon khin a, ko hong mudahte na zahhuai gawp sak khin hi. Pasian sungah kote ka angtang ngitnget uh a, nangma tungah ka lungdam tawntung ding uh hi. Ahih hangin nangmah in kote hong nusia-in, nong min siasak khin a, ka galkap hon uh tawh nang na kuankhawm kei hi. Galte kiang panin kote nong nungkiksak a, ka galte un ka neihsa teng uh bu-luah khin uh hi. Tuu gawh ding bangin kote nang nong bawl a, minamdangte lakah nong thehthang khin hi. Na mite a man tawmno khatin na zuak a, a man ding na sang nget kei hi. Ka vengte uh’ zahko, ka kim uh-a omte’ nuihsat leh thusim lohin kote nong bawl khin hi. Minamdangte lakah a sia lam-a gentehna, mite lakah ciamnuih-a neih-in kote nong bawl khin hi. Na thuciamna-ah khial lo napi, nangmah hong mangngilh lo napi in, hihte khempeuh ko tungah hong tung khin hi. Ka Pasian uh’ min mangngilh khinin, pasian dang tungah ka khut uh khak khin hi le ung, Pasian in hih thu mukhia lo ding ahi hiam? Bang hang hiam cih leh amah in lungsim thusim a thei hi. Nangma hangin sunthapai-in kote hong kithat a, gan gote tuu gawh ding bangin hong kikoih hi. Topa aw, bang hangin ihmu na hi hiam? Nangmah hong thotawm in! Khanglo in! Kote hong nilkhia suak kei in! Bang hangin na maitang seel na hi hiam? Bang hangin ka thuakna uh leh hong kisukcipna mangngilh na hi hiam? Bang hang hiam cih leh lei lakah ka puk uh a, leivui lakah gual lelin ka lum uh hi. Tho to in, ko huh dingin hong pai in! Na itna kip hangin kote hong honkhia in! Thubul hoih khat tawh keima lungsim hong dimlet-in, ka late kumpipa tungah ka sak a, ka leii in lai theipa’ laikung tawh kibang hi. Mihing’ tate lakah nangmah na hoihpen a, thugen siamin na kam khum zungzung hi; tua ahih ciangin Pasian in nang thupha hong pia tawntung hi. Vanglianpa aw, na minthan’na leh na liatna tawh, na namsau kuah in. Thumanna a om nading leh thuman hu’ dingin na minliatna tawh gualzo-in hong pusuak in la, dipkuat-huai hih nate na taklam khut nangmah kihilhsak in! Kumpipa’ galte’ lungtang sungah na thaltang hiamte lut a, mite na nuai-ah puk uh hi. Na kumpi tokhom siangtho kip tawntung hi. Na kumpi ciangkhut in thumanna ciangkhut hi a, thumanna deihin gitlohna na mudah hi. Tua ahih ciangin Pasian ahi, nangma Pasian in, na gualpihte tungah kikhaito-in lungdamna sathau tawh nang hong nilh zo a, na puantualpi mirrah paknamtui, alo paknamtui leh thalsing namtuite a nam hi. Saiha tawh kibawl innpite panin khausai lasaknate in nang hong lungdamsak-in, kumpite tanute, numei uliante lakah om a, na taklam ah Ofir gam khamte tawh kizemin kumpinu a ding hi. Tanu aw, ngai in, ngaihsun in la, na bil hong ngat in; nangma mite leh na behte mangngilh in; kumpipa in na mel hoihna deih ding hi. Na topa ahih ciangin ama mai-ah kun in; mel tuamtuam a nei puantualpite silhin mihon kigual deudaute lakah a kithuahpih nungakte leh amah a khate tawh kumpipa kiangah kipaipih hi. Kumpipa innah a tun’ ciangun lungdamna leh nuamna tawh amaute kitumpih hi. Na pate’ tang dingin na tapate hi ding a, nangmah in leitung khempeuh ah amaute, ulian na suaksak ding hi. Keimah in khang tawntungin nangma min ka kiphawksak ding hi; tua ahih ciangin mite in nang hong phat ngitnget ding uh hi. Pasian in eima belh leh i thahatna hi a, haksat hunin hong huh pahpahpa ahi hi. Sang Penpa’ ten’na khua siangtho ahi, Pasian’ khuapi, a lungdamsak gun khat a om hi. Ama laizangah Pasian om a, amah a kiliing kei ding hi; Pasian in phalvak tungin amah huh ding hi. Minamte heh mahmah uh a, kumpi gam kiliing hi; ama aw ging khiasak a, leitung kicimgawp hi. Mi honte’ Topa ei tawh hong omkhawm a, Jakob’ Pasian in eima belh ahi hi. Hong pai un la, Topa ’ sepna, leitung, gamkhing a suahsak khitna hong en un. Amah in leimong dong ah gal beisak hi; amah in thalpi kuaitanin, teipi susia a, leengte mei tawh haltum hi. “Om hit-hiat un la, Pasian ka hihna thei un. Minamte lakah keimah hong kisangsak a, leitungah ka min hong kithangsak hi!” Mi honte’ Topa in ei tawh omkhawm a, Jakob' Pasian in eima belh ahi hi. Mi khempeuh aw, na khut uh beeng un! Lungdamna la nakpi-in sa-in Pasian phat un. Bang hang hiam cih leh Topa, a Sang Penpa, dipkuat-huai-a, leitung khempeuhah kumpi lian khat ahi hi. Mi khempeuh eima nuai-ah, minamte i khe nuai-ah amah in hong zawhsak hi. Ama itpa Jakob’ angtan’pih ahi, eima luah ding amah in hong teelsak hi. Aw ging tawh Pasian paito a, pengkul aw tawh Topa paito hi. Pasian tungah phatna la sa un, phatna la sa un! I Kumpipa tungah phatna la sa un, phatna la sa un! Bang hang hiam cih leh Pasian in leitung khempeuhte’ Kumpi ahi hi; lasakna tawh amah phat un! Minamte tungah Pasian maang hi; a tokhom siangtho tungah Pasian tu hi. Uliante in Abraham’ Pasian’ mite tawh kikhawm uh hi. Bang hang hiam cih leh leitung’ lumte in Pasian aa ahi hi; amah sangpi-in kithangsak hi! Topa lian hi, i Pasian khuapi sungah a mual siangtho sungah nakpi taka phat ding ahi hi! Kumpi lianpa’ khuapi, lei lulam-a om ama mual siangtho hoih-a a sang mahmah Zaphon in Zion Mual hi a, leitung khempeuh’ lungdamna ahi hi. A muan’huaina tua mual-ah Pasian in amah a hu’ taktakpa ahihna a lak khin hi. Ahi zongin, en un, kumpite kikaikhawm in, hong paikhawm uh hi. Amaute in tua a muh phetun lamdang sa a, amaute dipkua vatin tai uh hi; numei nausuak na a sa bangin amaute liinggawp uh hi. Nisuahna huihpi tawh Tarshis kici teembaw liante nang na susia hi. Ka zaksa bangun, mi honte’ Topa ’ khuapi sung, i Pasian’ khuapi sungah, Pasian in a phuh kip ngitngetsa ka mu uh hi. Pasian aw, na biakinn sungah nangma itna kip ka ngaihsun uh hi. Pasian aw, na min in leimong dong a zelh bangin, nangmah hong kiphatna in zong a zel hi. Na taklam khut in gualzawhna tawh a kidim hi; Zion Mual lungdam sak in! Na thukhenna hangin Judah’ mite lungdam sak in! Hih thu za un, mi khempeuh aw! Ngai un, leitung a teeng khempeuh, milian mineu, mihau mizawngte aw! Ka kam in pilna thu gen ding hi; ka lungsim’ ngaihsutna in thutelna hi ding hi. Paunak thu theih hak khat ka ngai ding a, laiza lasakna tawh a khiatna ka gentel ding hi. Haksatna hun, kei hong bawlsiate’ gitlohna in kei hong nehcip ciangin bang hangin lau ding ka hi hiam? Mite in a hauhna uh muangin, tampi a neihna uh a kisaktheihpih hangun, amah a kitankhia tawm taktak thei, a nuntakna’ man ding Pasian’ tungah a pia thei mi kuamah om lo hi. Hi hi, amah in a pilte nangawn a si mu ding a, a haite leh a teilote a kibangin sia-in, amau neihsate midangte’ tungah nusiat uh hi. Amaute in leitangte amau min a puaksak hangun, hante pen khang tawntunga amau omna, amau inn hi ngitnget hi. Ama hauhna-ah mi kip suak thei lo a, amah in a bei thei ganhingte tawh kibang hi. Hih in a kihai muan’te’ ngah hi a, amau ngahsa tawh a lungkimte’ thumong ahi hi. Tua bangin amaute Leinuai-a dingin kiseh hi; Sihna in amau cingpa hi ding hi; Midikte in zingsang ciangin uk ding uh hi, hankhuk-ah amaute tuaksuk suak uh a, a meel uh sia ding hi; Leinuai in amau’ inn hi ding hi. Ahih hangin Pasian in Leinuai’ vangliatna panin kei hong tankhia ding hi, bang hang hiam cih leh amah in kei hong sang ding hi. Mi khatpeuh a hauh ciang ahi zongin, a innkuan minthan’na a khan’ ciang ahi zongin lau kei in. Bang hang hiam cih leh a sih ciangin bangmah keng lo ding a, a minthan’na in amah zuisuk lo ding hi. A hin’ lai-in amah a lungdamin kingaihsunin, mi khat in ama ading na a limsep ciangin phatna a ngah hangin, khuavak mu ngei nawn lo dingin a sisa a pu a pate kiang mah-ah amah pai veve ding hi. Ama hauhna in mihing suaksak thei lo a, amah in a si thei ganhingte tawh a kibang hi. Vanglianpa, Topa ahi Pasian, hong pau a, nisuahna leh nitumna kikal leitung khempeuh a khawm hi. Hoih kicin’na, Zion panin, Pasian hong taangkhia hi. Pasian hong pai hi, amah dai om lo hi, ama mai-ah mei husia om a, a kimkotah huihpi om hi. A mite thu a khen theih nadingin tunglam vantung leh leitung a sam hi. “Kei tawh biak piakna-in thuciamna a bawlte, ka micitakte ka kiangah hong khawm un!” Vantung in ama thumanna gen hi, bang hang hiam cih leh Pasian mahmah thukhenpa ahi hi. “Ka mite aw, ngai un, thu kong gen ding hi, Israelte aw, note’ lang khatah teci ka pang ding hi. Kei in Pasian ka hi a, nomau’ Pasian ka hi hi. Na biak piakna uh ah note kong mawhsak kei hi; na meihal biaknate uh ka mai-ah om ngitnget hi. Na inn pan uh-a bawngtal hita leh, na ganbuk pan uh-a keeltal hita leh kong sang kei ding hi. Bang hang hiam cih leh gamlak ganhingte khempeuh, mual tul tampite’ tunga ganhingte keima-a’ ahi hi. Huih lak vasate khempeuh ka thei a, gam lak-a gamta khempeuh keima aa ahi hi. Ka gil kial taleh zong, no kiangah kong gen kei ding hi; bang hang hiam cih leh leitung leh a sunga om khempeuh keima aa ahi hi. Bawngtalte’ sa keimah in ne ding ka hi hiam, keelte’ si dawn ding ka hi hiam? Lungdam biakpiakna Pasian’ tungah pia un la, Sang Penpa tungah na thuciamnate uh bawl un; haksat hun ciangin kei tungah hong ko un; note kong honkhia ding a, note in kei nong thangsak ding uh hi.” Ahih hangin migilote tungah Pasian in hih bangin ci hi: “Ka thukhamte lawh nading, ka thuciamna na muk uh tawh gen nading note in bang thu nei na hi uh hiam? Bang hang hiam cih leh note in hilhna na mudah uh a, ka thute na nunglam uhah na pai uh hi. Guta khat mu le uhcin ama lawm, na hi pah uh a, numei-pasal mawhna a bawlte tawh na kikhawl uh hi. Na kam uh, siatna na uksak uh a, na leii un kheemna khang sak hi. Na tu uh a, na sanggamte langpangin thu na gen uh hi; amaute’ mawhna na zong uh hi. Hihte khempeuh na gamta khin uh a, bangmah ka pau kei hi; kei pen no tawh a kibangin nong ngaihsun uh hi. Ahih hangin tu in note kong tai a, na mawhna uh na mai uh-ah ka koih hi. Tua ahih ciangin, Pasian a mangngilh mite aw, hih thu ciamteh un, tua hi kei leh note kong balgawp ding hi, hong honkhia ding kuamah om lo hi. Biakpiak nadingin lungdam piakna hong paipih mi in kei hong pahtawi ahi hi; Ka thu a mang mite khempeuh ka honkhia ding hi,” Pasian aw, nangma itna kip om bangin kei hong hehpih in la, na hehpihna lian om bangin ka thu palsatnate hong phiatkhiat sak in. Ka khialhna panin kei hong silsiang kiuhkeuh in la, ka mawhna panin hong siangsak in! Bang hang hiam cih leh ka thu palsatnate ka thei a, ka mawhna ka mai-ah om ngitnget hi. Nangma tung mahmah-ah khialin, na muhna-ah a sia ka gamta khin hi, tua ahih ciangin na thugenna-ah nang na tang a, na thukhenna ah paubaan’na om lo hi. En in, a khialsa mahin kei ka suakkhia a, ka nu in hong paai cil-a kipan a mawhsa ka hi hi. En in, nang in nuntakna sungah thumanna na deih hi; tua ahih ciangin ka lungsim tawngah ciimna hong hilh in. Puknah tawh hong nul in, kei ka siang ding hi; hong sil in, vuk sangin ka ngozaw ding hi. Lungdamna leh kipahna hong pia in la, na sukgawpsa mipa lungdamsak in. Ka mawhna na mai panin seel in la, ka khialhna khempeuh hong phiatkhiat sak in. Pasian aw, ka sungah lungsim siangtho hong piangsak in la, a thak, a man, ngaihsutna ka sungah hong guan in. Na omna panin kei hong paikhia kei in la, kei kiang panin na Kha Siangtho la kei in. Na hotkhiatna hangin lungdamna kei hong ngahsak kik in la, utna lungsim tawh kei hong huh in. Tua ciangin thu palsatte na zia ka hilh ding a, mimawhte nangma lamah hong kihei kik ding uh hi. Pasian, kei hong hon Pasian aw, sih nading daan panin kei hong honkhia in; nong hotkhiatna thu lungdam takin ka sa ding hi. Topa aw, ka pau theih nadingin hong huh in; nangmah ka hong phat ding hi. Bang hang hiam cih leh ganhing tawh biakna na deih kei hi, meihal biakna nang hong pia hi ta-leng zong, nang na lungdam kei ding hi. Pasian’ san’ theih biakna in lungsim kitamzan hi; Pasian aw, a kitamzan, a kisik lungsim na simmawh kei ding hi. Na lungkimna pha tawh Zion tungah a pha bawl in; Jerusalem kulhpite ciang kik in, tua ciangin, biakpiakna man, meihal biakna leh meihal biakpiakna bup-ah na lungkim ding hi; tua ciangin na biakna tau tungah bawngtalte hong kipia ding hi. Mi thahatpa aw, bang hangin miphate suksiatna-ah kiphasak na hi hiam? Sunthapai-in nang in suksiatna na ngaihsun hi. Zuau nasempa aw, na leii in mulkiatna temhiam khat tawh kibang hi. Nang in hoihna sangin siatna na deihzaw a, thuman genna sangin zuauna na deihzaw hi. Mi khem theipa aw, a siasak thei kammal khempeuh na deih hi. Ahih hangin Pasian in nang hong susia paisuak ding hi; amah in nang hong bawhin na buk panin hong kaikhia ding hi; a hingte’ leitang panin nang hong zunglot ding hi. Thuman mite in mu-in, lau ding uh a, amah nuihsan-in, “Pasian a beel lo, ama hauhnate a muang, ama hauhna a beelpa en un!” ci ding hi. Ahih hangin kei ka hih leh Pasian’ inn sunga oliv kung hing tawh ka kibang hi. Pasian’ itna kip ka muang ngitnget hi. Hih bang bawl khin na hih manin, na tungah ka lungdam ngitnget ding hi. Thuhoih ahih manin, miphate’ omna-ah na min ka taangko ding hi. “Mihai mi in a lungsim sungah, Pasian om lo hi,” ci-in ngaihsun hi. Amaute sia uh a, a kihhuai gamta uh hi; a hoih-a gamta kuamah om lo hi. A pil, Pasian a zong mi a om uh hiam cih a theih nadingin Pasian in vantung panin mihing’ tate en suk hi. Amaute a vekpi-un puk khin uh a, a kibangin kisia kim uh hi; a hoih gamtat khat beek om lo hi. Pasian’ tungah thu a ngen lo, an nek bang-a ka mite a netum, siatna a bawlte in thu teltheihna nei lo ahi hiam? Cik mah-a tua bang launa om ngei lo, launa lianpi sungah amaute om uh hi. Bang hang hiam cih leh Pasian in migilote’ guhte thehthang ding hi; Pasian in amaute nial ahih manin, amaute maizumin kikoih ding hi. Zion panin Israelte’ adingin hotkhiatna hong tung ta leh maw! Pasian in ama mite’ nopsakna a piak kik ciangin, Jakob nuamin Israel kipak ding hi. Pasian aw, nangma min tawh kei hong hon in la, na vaang tawh ka dikna kilangsak in. Pasian aw, ka thungetna hong za in la, ka kampaute hong ngai in. Bang hang hiam cih leh mi kiphasakte in kei hong lang pang a, mi helhhawtte in thah dingin hong zong uh hi; amaute in Pasian thudon lo uh hi. En in, Pasian in kei hong huhpa hi a, Topa in kei hong huhpa ahi hi. Amah in ka galte siatna tawh thuk ding hi; na thumanna tawh amaute sumai in. Utna lungsim tawh na tungah biakpiakna kong pia ding a, nang hoih na hih manin, na tungah lungdamna kong ko ding hi, Topa aw. Bang hang hiam cih leh haksatna khempeuh panin kei nong honkhia khin a, ka galte a guallelhna ka mu khin hi. Pasian aw, ka thungetna hong ngai in la, kong thumna panin nangmah bu kei in! Kei lam hong nga in la, hong dawng in; ka gimna in kei hong zo hi. Migilote’ sukcipna, galte’ huging in kei hong gimsak hi. Bang hang hiam cih leh amaute in kei tungah haksatna hong tun’ uh a, amaute in hehna tawh keimah hong galbawl ding uh nuamsa uh hi. Ka sungah ka lungsim na mahmah a, sih ding launate kei tung hong tung zo hi. Launa leh liin’na ka tung hong tung a, launa in kei hong vukcip hi. Hih bangin ka ci hi, “Vakhu bangin kha nei hi leng pawh! Ka leengkhia ding a, nuam takin ka om hithiat ding hi; hi taktak hi, gamla pek-ah ka vakthap ding a, gam sungah ka giak ding hi. Gensiatna huihpi leh huih husiate panin bukna ka zongpak ding hi," Topa aw, amau’ ngaihsutnate suksiatsak in la, a pau uh kilamdangsak in; bang hang hiam cih leh khua sungah ngongtatna leh kam kiselna ka mu hi. Sun leh zanin amaute kulhpi tungah kot paipai uh a, a sungah siatna leh haksatnate om-in, a lakah siatna om hi; sumzuak sumleina mun panin kisukcipna leh khemna veng lo hi. Kei hong phin, galte hi lo hi—hi leh ka thuak zo ding hi; kei hong galbawl mi in kei hong mudah mi hi lo hi;—hi leh amah ka pel thei hi. Ahih hangin, ka kikimpih, ka kikholhpih, ka lawm theih mahmah, nangmah na hi hi. Kamkhum tawh i kihoho ngei hi; Pasian’ inn sungah i kikhawl khawm ngei hi. Sihna amau tungah tungsak in; Leinuai-ah a hingtangin amaute paisuksak in la, amaute launa lianpi tawh a han uh ah paisak in. Ahih hangin keimah in Pasian tungah ka ko a, Topa in kei hong hon ding hi. Nitak, zingsang leh sunin, ka gimna leh ka thumna ka gen hi, amah in ka aw hong za ding hi. Amah in ka galsimna-ah kei hong honin, a muan’huai munah hong koih ding hi, bang hang hiam cih leh keimah do dingin mi tampi kigual deudau uh hi. Taanglai pan-a kumpi-a a kikoih Pasian in za ding a, amaute niamkhiat ding hi; bang hang hiam cih leh amaute in thukham zui lo uh a, Pasian zahtak lo uh hi. Ka kikholhpih mi in ama lawmte langpangin a khut zan a, a thuciamna palsat hi. Ama kampau in thawhbat sangin nelzaw a, ahi zongin a lung sungah muhdahna om hi; a kammalte sathau sangin nipzaw a, ahi zongin tuate pen namsau hiam mahmah tawh kibang hi. Topa tungah na vangik nga in, amah in nang hong huh ding hi; amah in thumante cik mahin a kilingsak ngei kei ding hi. Ahih hangin Pasian aw, dum thukpenna munah nangmah in amaute na lawnsuk ding a, mi a thatte leh mikhemte pen amau nuntak ding zah lang hing lo ding hi. Ahih hangin keimah in nang kong muang ding hi. Pasian aw, mite in kei hong tuancil ahih manin kei hong hehpih in; sunthapai in galte in kei hong sucip hi; sunthapai-in ka galte in kei hong tuancil a, kiphatsakna tawh mi tampi in kei hong do hi. Kei ka lau ciangin nangmah ka hong muang hi. A thu ka phat Pasian’ sungah, lunghihmawhna khat zong nei loin Pasian ka muang hi. Mihing ahi lelte in kei bang hong cih zo ding ahi hiam? Amaute in ka vai siatsak ding sunthapai-in hanciam uh a, amau’ ngaihsutnate khempeuh uh keima siat nading ahi hi. Amaute kikai khawmin hong buk uh hi, ka kalsuanna hong encik uh hi. Amaute in keimah hong thah ding a hanciam uh bangin, amau khialhna hangin amaute thuk in; Pasian aw, hehna tawh tua mite lawnkhia suk in! Ka sin liin’nate nangmah in na ciamteh khin hi; ka khituite na thawl sungah thun in! Tuate na laibu sungah om lo ahi hiam? Tua ciangin, keimah in ka koh ni peuh ciangin ka galte nungkik ding hi. Pasian pen keima aa ahihna thu ka thei hi. A thu ka phat Pasian’ sungah, a thu ka phat Topa ’ sungah, lunghihmawhna khat zong nei loin Pasian ka muang hi. Mi in kei bang hong cih thei ding ahi hiam? Pasian aw, nang tunga ka kiciamna ka zuih kul hi; nang’ tungah lungdamna kong thuk ding hi. Bang hang hiam cih leh sihna panin nong honkhia khin hi, hi taktak hi, Pasian’ mai, nuntakna khuavak sungah ka pai theih nadingin ka khe a taal nading panin nong honkhia hi. Pasian aw, nangmah hong bel ka hih manin kei hong hehpih in, kei hong hehpih in; siatna huihpi a ven’ mateng na kha limah kong bu ding hi. A Sang Penpa Pasian’ tung, kei’ Pasian’ tung, kei’ adingin ama deihna a tungsak Pasian’ tungah ka ko hi. Amah in vantung panin hong dawngin keimah hong hon ding a, amah in kei hong tuancilte maizumin koih ding hi. Pasian in a itna kip leh a thumanna hong lak ding hi. Mihing tate, huaihamna tawh a netum humpinelkaite laizang ah ka om hithiat hi; amau hate in teipi leh thaltangte hi a, amau leite in namsau hiamte ahi hi. Pasian aw, vantung’ tungah sangto lai in! Leitung khempeuhah na minthan’na omsak in! Amaute in ka khe, thang hong siah uh hi; lungkhamin hong koih uh hi. Ka pai nading ah gum khat to uh a, ahih hangin tua sungah amaute mah kia uh hi. Ka lung muang hi, Pasian aw, ka lung muang hi! La ka sa ding a, nakpi takin ka sa ding hi. Ka tho ding hi! Harp lasakna leh laiza lasakna aw, tho un! Zingsang khuavak hong phong ning! Topa aw, mite lakah nang tung lungdamna kong ko ding a, minamte lakah nangmah phatna ka sa ding hi. Bang hang hiam cih leh na itna kip in vantung ban a, na thumanna in meiipi banto hi. Pasian aw, vantungte’ tungah sangto lai in! Leitung khempeuhah na minthan’na om sak in! No gam ukte aw, a manin thu na khen uh hiam? Note in mi khempeuh thu a tangin na khen uh hiam? Hi peuhmah lo hi, na lungsim uh ah aman lo na ngaihsun uh a, gam sungah ngongtatna na gamta uh hi. Migilote, a khan’ tawntungin khial uh hi, a suah tung mah-un lam khial pah uh a, zuauthu gen uh hi. Pasian aw, amau kam sunga hate sutan in la, humpinelkai khanglai hatute botkhia in, Topa aw. Tui luangkhiate bangin amaute mangthangsak in la, lopa bangin amaute kituancil-in keutumsak in. Amaute, a naai a bei toktol, a hun cing loin a nausuak, ni a mu ngei lote bangsak in. Na beelte in lingkung kuang pen sa a sak ma-in, a hing a keu-in amah in tuate phiatkhia mang hen! Heh thukna a muh ciangin thuman mipa lungdam ding a, migilote’ si sungah amah in a khete sil ding hi. Mite in, “Thuman mi’ ading noptuamna om taktak a, leitunga thukhen Pasian khat om taktak hi,” ci ding uh hi. Ka Pasian aw, ka galte kiang panin keimah hong honkhia in, keimah langpanga hong dingte kiang panin kei hong dal in, siatna a bawlte’ kiang panin hong khahkhia in la, mi that nuamte’ kiang panin keimah hong hon in. Bang hang hiam cih leh, en in, amaute in kei hong pangsim uh hi; mi kihtak-huaite in keimah hong langpangin kikaikhawm uh hi. Topa aw, kei’ thu palsatna, kei’ mawhna hang hi lo, kei’ khialhna hang hi lopi-in, amaute tai-in va kithawi uh hi. Nangmah in hong phawk tawm in, keimah huh dingin hong pai in la, en in! Nang, Vanglianpen Topa Pasian in, Israel’ Pasian na hi hi. Minam khempeuh daantat dingin tho in la, khemna tawh siat gamtat ding a sawmte kuamah siit kei in. Nitak simin amaute hong pai kikin, ui bangin ku uh a, khua sungah vak khuankhuan uh hi. Amaute tua lai-ah a kam uh tawh hawk a, a muk uh tawh zuau gen uh hi—bang hang hiam cih leh, “Kua’n hong za laizang ding ahi hiam?” ci-in amaute in ngaihsun uh hi. Topa aw, ahih hangin nangmah in amaute na nuihsan lel a, minam khempeuh na zahpih hi. Ka Thahatna aw, nangmah phatnate ka sa ding hi; bang hang hiam cih leh, Pasian aw, nangmah in ka munkip muan’huai na hi hi. Ka Pasian in ama itna kip tawh kei hong dawn ding a, ka Pasian in gualzawhna tawh ka galte hong ensak ding hi. Amaute that kei in, that lecin ka mite in mangngilh ding hi; na vangliatna tawh amaute kilok gawp sak in la, amaute niamkhiat in, Topa, komau’ lum aw! Amau kam-a mawhna, amau muk tawh a pauna thu hangin, amau’ kiphatsakna-ah amau mah awksak in. Hamsiatna zangin zuauthu a genna hangun, lei mong dongin Jakob’ tungah Pasian maang hi, ci-in mite in a theih nadingin hehna tawh amaute beisak in la, amaute a bei khit mateng sisak in. Nitak simin amaute hong pai kikin, ui bangin ku uh a, khua sungah vak khuankhuan uh hi. Amaute an zongin vak kawikawi uh a, an a kham uh ngah kei leh humham uh hi. Ahih hangin keimah in nangma vangliatna la ka sa ding a, zingsangin na itna kip phatna la nakpi-in ka sa ding hi. Bang hang hiam cih leh nangmah in keima munkip muan’huai na hi a, ka gentheih hunin keima belh na hi hi. Ka Thahatna aw, nangmah phatnate ka sa ding hi, bang hang hiam cih leh Pasian aw, nangmah in ka munkip muan’huai, kei tungah itna kip hong lak Pasian na hi hi. Pasian aw, kote nong paai khin a, ka panmunte uh na sukham khin hi; kote tungah nangmah na heh khin hi; kote ka ngei uh hong bangsak kik in. Nangmah in lei na liingsak khin a, lei na khaangkham sak khin hi; kip lo ahih ciangin a kitam mate mat kik in. Nangmah in na mite haksatna na thuaksak khin hi; ka dawn dingun nangmah in ko hong hoisak leenggahzu nong piakhin hi. Thalte panin kihem-in a kikaihkhop dingun nangmah hong zahtakte’ adingin dial khat na koih khin hi. Nangma it mite a suahtak theih nadingin nangma khut taklam tawh gualzawhna pia in la, kote’ ngetna hong pia in! Ama biakinn sungah Pasian in thu gen khin hi: “Gualzo-a lungdamna tawh Sekhem gam khenkhia-in Sukkot gamkuam ka sehkhia ding hi. Gilead gam in keima’ aa hi; Manasseh gam in keima’ aa hi; Efraim gam in ka siklukhu hi; Judah gam in ka ciangkhut hi. Moab gam in ka kisilna kuang hi; Edom gam tungah ka khedap ka lawn hi; Filistia gam tungah gualzawhna tawh ka awng hi,” Kua in khuapi muanhuai-ah kei hong paipih ding hiam? Kua in Edom gamah kei hong paipih ding hiam? Pasian aw, nangmah in kote hong don lo khin hi lo na hi hiam? Pasian aw, komau’ galkapte tawh na kuankhia kei hi. Ka gal dona uh-ah huhna kote hong pia in, bang hang hiam cih leh mihing’ huhna a mawkna hi! Pasian tawh khauh takin i hih ding hi; amah in i galte hong sikcipsak dingpa ahi hi. Pasian aw, ka kikona aw hong za in la, ka thungetna hong ngai in, ka lungsim a neu ciangin, leimong panin nang kong sam hi. Kei sanga a sangzaw suangpi tungah nangmah in hong paipih in; bang hang hiam cih leh nangmah in keima bukna na hi a, galte’ langah tausang muan’huai na hi hi. Na buk sungah hong omsak tawntung ta in! Nangma khate’ hutna sungah lungmuanga om dingin! Bang hang hiam cih leh Pasian aw, ka thuciamnate nangmah in na za khin a, nangmah hong zahtakte’ luahna keimah nong pia khin ta hi. Kumpipa’ khan’ to sak in; khang tawntungin amah nungta sak in. Pasian’ mai-ah amah om ngitnget hen la, ama itna kip leh a thumanna in amah kem ta hen. Tua ciangin ni simin ka thuciamnate bangin ta-in, na min phatna ka sasa ding hi. Dai dide-in Pasian bek ka ngak hi; keima kihotkhiatna ama tung pan hong pai hi. Ka suangpi, ka kihotkhiatna, ka munkip muan’huai in amah bek hi a, kei ka kinak lin' kei ding hi. Note khempeuh in, a hoi kawm, a kiliing gawl tawh a kibang mi khat, susia dingin bang tanvei hih huan ding na hi uh hiam? Ama za-liatna panin sukniam ding bek amaute in sawm uh hi. Amaute in thuman lo-ah nuam sa uh hi. Amaute in a kam uh tawh phat uh a, ahih hangin a sungtawng uh-ah samsiat uh hi. Ka lametna ama tung pan ahih manin, dai takin Pasian bek ka ngak hi. Ka suangpi, ka kihotkhiatna, ka munkip muan’huai in amah bek hi a, kei ka kiling kei ding hi. Keima suahtakna leh ka minphatna Pasian’ hang ahi hi; a muan’huai ka suangpi, ka bukna in Pasian ahi hi. Mite aw, amah muang tawntung un; na lungkhamna teng uh ama tungah gen un; Pasian in eite’ bukna ahi hi. Mineute ahih leh husan’ bang bek hi a, miliante pen a hawmpi ahi hi; tawikhaina-ah amaute in lek lo uh hi; amaute a kigawmin husan’ khat sangin zangzaw uh hi. Zawhthawh thu tawh lakna muan’in, nei kei in la, suhgawpnate lamet-in nei kei in; na hauhna a khan’ leh, tuate muan’ in nei kei in. Pasian in khatvei thu gen khin hi, ke’n hih thu nihvei za khin ing; vangliatna in Pasian’ neihsa ahi hi; Topa aw, itna kip in nangma aa hi. Bang hang hiam cih leh mite ama sepna bangin na thukkik hi. Pasian aw, nangmah in keima Pasian na hi hi, nangmah kong zong hi, ka lungsim khempeuh tawh nang kong deih hi; tui om lohna gamkeu bangin ka pumpi in nang hong deih hi. Tua ahih ciangin na vangliatna leh na minthan’nate mu dingin biakinn sungah nangmah kong en hi. Na itna kip in nuntakna sangin hoihzaw ahih manin, nangmah ka hong phat ding hi. Tua ahih ciangin ka nuntak lai teng nangmah kong phat ding a, ka khutte nang lamah lamto-in thu kong ngen ding hi. Bang hang hiam cih leh nangmah in kei hong huhpa na hi a, nangma hutna sungah lungdamin la ka sa hi. Nangmah ka hong bel hi; nangma taklam khut in kei hong len hi. Ahi zongin kei thah dingin a hong zongte pen lei thukpi sungah paisuk ding hi; Amaute pen gal sungah si ding uh a, ngiate’ an suak ding uh hi. Ahih hangin Pasian sungah kumpipa lungdam ding hi; amah tawh thuciam khempeuhte zong minthang ding hi; bang hang hiam cih leh zuauthu gente kamte kihubing ding hi. Pasian aw, ka thumna aw hong za in; gal launa panin kei hong kem in, migilote’ sawm simna, thusia bawlte’ vaihawmna, namsau banga a leii uh a tatte, thaltang banga thu hoih lo a ngimte, a buk simna panun mawh baang lo mi a kapte, lau het loin thakhatin amah a kapte’ kiang panin kei hong liah in. Amaute in a thusia ngaihsutna uh len kip uh hi; amaute in thang siahsim ding gen uh a, “Eite kua in hong mu ding ahi hiam? Eite’ mawhna kua in hong kankhia zo ding ahi hiam? Siam mahmahna tawh i sawm simna i ngaihsun khia hi,” ci-in ngaihsun uh hi. Bang hang hiam cih leh mihingte’ sung thu leh lungsim thuk mahmah hi. Ahih hangin Pasian in a thaltang tawh amaute kap ding hi; amaute thakhatin liam ding uh hi. Amau’ kampauna hangin amah in amaute siatna ngah sak ding a, amau a mu khempeuh in a lu uh peisan ding uh hi. Tua ciangin mi khempeuh lau ding uh hi; amaute in Pasian hihsa thute gen ding uh a, ama hihsate ngaihsunsun ding uh hi. Topa ’ sungah midikte lungdam ding uh a, ama sungah bu ding uh hi. Lungsim thutangte khempeuh in amah phat ding uh hi. Pasian aw, Zion-ah nangmah phat dingin kilawm hi; nangma tunga thuciamna sate hong kibawl ding hi. Nangmah in thungetna a za-pa na hi hi! Mawhna thu hangin nangma kiangah mi khempeuh hong pai ding uh hi. Ka mawhnate un kote hong zawh ciangin, nangmah in tuate nong maisak hi. Na inn-a om dinga na tel na lakte in mi nuamsa ahi hi! Nangma biakinn siangtho ahi na inn sunga hoihna tawh lungkim nung! Tuipi gamla pente leh leimong dong khempeuhte’ lametna, komau’ kihotkhiatna Pasian, nangma thahatna tawh mualte a bawl, vangliatna tawh a kidim, tuipi gingte, tuihual gingte, mi gamlumte a daisakpa aw, lei mong pek-a omte in na hihsa limte a kihtak nadingun kihtakhuai gamtatna zangin, hotkhiatna tawh kote’ ngetna nong pia hi; nisuahna leh nitumna kikal-a om mite khempeuh lungdam-a awng dingin na bawl hi. Nangmah in leitung en-in guah na zusak a, a hoihna lianpi-in na behlap hi; Pasian’ gunpi in tui tawh kidim hi; nangmah in amaute khaici na guan hi, tua ahih ciangin nangmah in na bawl khol hi. Tu ma-kuakte tui tampi na buak a, leivumte zalh mai-in, guahtui tawh na nipsak a, a po kungte thupha na pia hi. Nangma hauhna tawh kum na phasak a, na leng paina tengah sathau taak hi. Ganhing tatna, a noptuak munte-ah ganhing hon omin mualte lungdamna tawh kidim a, lo no-na munte tuuhon tawh kizem-in, kuampite an tawh kidim a, lungdamin awngin amaute in la sakhawm uh hi. Leitung mi khempeuh aw, Pasian tungah lungdamna aw gingpha sak un; ama minthan’na sa un la, ama tungah minthang phatna pia un! Pasian’ tungah hih bang ci un, “Nangma bawlnate bangzah takin dipkuat huai! Na vanglian mahmah ahih manin na mai-ah na galte in nang hong mai-et uh hi. Leitungmi khempeuh in nangmah hong bia uh hi; amaute in nangmah phatna hong sak uh a, nangma phatna hong sak uh hi.” Hong pai un la Pasian’ sepsate mu un; mite’ lak-a a bawlnate ah amah dipkuat-huai hi. Amah in tuipi pen leikeu suaksak a, i pu i pate in khe tawh tuipi kantan uh hi. Tua ama sepna hangin i lung a dam hi. Ama hatna tawh a uk ngitngetpa, a mit tawh minamte a encik ngitngetpa, mi lehdote in langpan’ kei uh hen. Bang hang hiam cih leh Pasian aw, nangmah in kote nong sin zo hi; mei tawh ngun a kisin bangin kote nong sin khin hi. Nangmah in thong sungah kote nong tung sak a, nangmah in ka nungzang uh-ah vangikpi nong suan hi. Nangmah in ka galte uh nong tuancilsak a, tui leh mei lauhuainate ka thuak uh hi; ahih hangin nangmah in a tanzauna munah nong paipih hi. Ganhing thaute tawh meihal biaknate, tuutal-a biakna khute tawh biakna kong pia ding hi; bawngtalte leh keelte tawh nangmah biak piaknate ka bawl ding hi. Pasian zahtak note khempeuh aw, hong pai un la, za un, kei’ adinga ama bawlsate kong gen ding hi. Ama tungah nakpi-in ka kiko a, ka leii tawh amah kiphat hi. Ka lung sungah mawhna kem leng, Topa in ka thu hong ngai lo ding hi. Ahih hangin Pasian in ka thu hong ngai khin taktak hi; amah in ka thungetna aw hong don zo hi. Amah in keima thungetna hong nolh loin, kei kiang panin a itna kip lakhia lo ahih manin Pasian in thupha ngah ta hen! Pasian in eite hong hehpihin thupha hong pia hen la, eite tungah ama mai hong taangsak hen, leitungah nangma lampi, minam khempeuhte lakah nangma hotkhiatna vang kithei ta hen. Pasian aw, mite nangmah phatsak in; mi khempeuh nangmah phatsak ta in! Mite thu a manin khenin, minamte leitungah lamlak na hih manin, minamte nuam-in lungdamna sa sak in. Pasian aw, mite nangmah phat sak in; mi khempeuh nangmah phatsak ta in! Leitung in ama hauhna gahkhia khin hi; Pasian, eima Pasian in eite thupha hong pia khin hi. Pasian in eite thupha hong pia khin hi; leimong dong khempeuhte in amah zahtak uh hen. Pasian tho hen la, ama galte kithehthangsak hen; amah a mudahte ama mai-ah tai uh hen. Meikhu a kilenkhiatsak bangin amaute hawlkhia ding hi; mei mai-ah khuainun a tui bangin Pasian’ mai-ah migilote siamang ding hi. Ahih hangin midikte lungdam ding hi; Pasian’ mai-ah amaute nuamin diang ding hi; amaute lungdamin awng ding uh hi. Pasian’ tungah la sa un la, ama min phatna la sa un; meiite tunga tuangpa lasak un; ama min in Topa ahi hi, a mai-ah lungdamin diang un! Pa nei lote’ pa leh meigong numeite a hupa in, ama omna siangtho sunga om Pasian ahi hi. Pasian in a cimawhte a ten’ nading inn pia hi; amah in thongkiate nopsakna munah tun hi; ahih hangin mi lehdote ahih leh keugaw gamah teeng uh hi. Pasian aw, nangma mite’ mai-ah na kuankhiat ciang, gamlak nawkin na pai ciangin, nangmah Pasian na om manin lei lingin, vantungte in guah zusak hi; Pasian ahi, Israelte’ Pasian’ omna-ah Sinai mual nangawn ling hi. Pasian aw, na luah mite vulgawp ahih manin guah tampi zusakin na nosuak sak kik hi; na mihonte in tua sungah om nading mu uh hi; Pasian aw, nangma hoihna tawh a cimawhte’ kisapna na guan hi. Topa in thu pia hi; hih thu a pua mihonte tam mahmah hi: “Kumpite’ galkapte, tai uh!” ci uh hi. Inn-a om nupite in galte’ van kisutte hawm uh a, Meiphual gei-ah na ihmut laitak nangawn un, ngun leh kham mel tawh a kizem keima vakhu khate tawh na kibang ding uh hi. Vanglianpa in tua gam pan kumpite a nawhkek ciangin Zalmon mual tunga vuk kia tawh kibang hi. Aw mual lianpi, Bashan mual; aw, mualdawn zum tampi a nei, Bashan mual! Mualdawn zum tampi a nei mual aw, Pasian in ama om nadinga a deih mual, Pasian a om tawntung nading mun, bang hangin en’na tawh en na hi hiam? Leng muan’huai tulsawm kop nih, a tul a tul tawh, Sinai mual panin siangtho munah Topa hong pai hi. Topa nangmah Pasian tua munah na om theih nadingin a sangna-ah kahto-in salte na paipih a, mite leh mi lehdote’ tung nangawn panin piakkhong nate na ngah hi. Ni simin eite’ adinga hong thuaksak Topa in thupha ngah ta hen; Pasian in eite’ kihotkhiatna ahi hi. Eite’ Pasian in hotkhiatna Pasian ahi hi; sihna panin suahtakna in Topa Pasian aa ahi hi. Ahih hangin Pasian in, mawhna tawh a gamtapa leh a galte’ lutangte sukham ding hi. Pasian aw, ka Kumpipa ahi, keima Pasian, biakinn sungah zahtakhuai taka na paina kimu a— a mai-ah la sate, a nungah tamngai tumte, a laizang-ah nungak khuangtumte in: “Israel’ suan-le-khakte aw, mipi kikhopna sungah Topa Pasian phat un!” Amaute lakah a neupen Benjamin in a mapi-in om a, amau’ hon lakah Judah kumpite, Zebulun kumpite, Naftali kumpite om uh hi. Pasian aw, na vangliatna thu pia in; kote’ adinga hong bawlsak Pasian aw, na thahatna lak in. Jerusalem-a na biakinn hangin kumpite in nang tungah letsong hong puak uh hi. Pumpeng lak-a teeng ganhingte, minamte’ bawngno lak a, bawngtal honte taigawp in. Siah a lunggulhte tuancil in la, gal a uuk mite, thehthang gawp in. Izipt gam panin sumngo lakhiasak in la, Pasian tungah thungetna-in Ethiopia gam a khut zansak mengmeng in. Israelte tunga a lian, Pasian’ hatna pahtawi un; ama vangliatna vantung ah om hi. Israelte’ Pasian in ama biakinn sungah zahtak-huai a, ama mite tungah vangliatna leh thahatna pia hi. Pasian in thupha ngah ta hen! Pasian aw, hong hon in! Bang hang hiam cih leh tui in ka ngawng ciang hong tum ta hi. Khe tawh din’ kip nading mun a om lohna buannawng thuk sungah ka tum a, tuithuk sung ka tung khin a, ka tungah tuikhang luang hi. Ka kiko-kona-in ka gim a, ka gawlgui keu ta hi. Ka Pasian ka ngakna-in ka mitte maang ta hi. Thu omlopi-a kei hong mudah mi, ka lu tunga samzangte sangin tamzaw uh hi; kei hong susia ding, zuauthu tawh hong dote hat mahmah uh hi. Kei’ guk lohpi, ke’n loh ding ka hi hiam? Pasian aw, ka pillohna na thei a, ka tatkhialhnate nangma kiang pan kiliah lo hi. Vanglianpen Topa Pasian aw, nangmah hong muangte keima hangin zahhuaisak kei in; Israel Pasian aw, nang hong zongte keima hangin mindaisak kei in. Bang hang hiam cih leh nangma hangin kona ka thuak a, maizumna in ka maitang hong tuam khin hi. Ka sanggamte lakah midang ka suak khin a, ka innkuanpihte lakah khualmi ka suak hi. Nangma inn ka deih luatna mei bangin ka sungah sa a, nangmah hong kote’ konate keima tung hong tu hi. An ngolhna tawh ka lungsim ka kiniamkhiat ciangin, keimah hong kikona suak zawsop hi. Ka puan dingin puanhampi bawl taleng zong amau adingin gentehna ka suak veve hi. Khua kongpi sung a tu mite’ gengen ka hi a, zukhamte in keimah la-in hong sa uh hi. Topa aw, kei ka hih leh nangma tungah thu kong ngetna in, a kicing na itna kip tawh a hun hoih ciangin hong dawng in, Pasian aw. Buannawng sunga tum nading panin nangma thuman huhna tawh kei hong hon in la, tui thukte leh ka galte kiang panin hong suakta sak in. Ka tungah tuikhang hong luangsak kei in la, khuamial thukpi hong nawmvalh sak kei in la, guum in a kuavang ka tungah hong khak nelhsak kei in. Topa aw, na itna kip hoih manin kei hong dawng in la, na hehpihna lian a om tawh kizui-in kei lam hong nga in. Na nasempa kiang pan na maitang seel kei in la, kei cimawh ka hih ciangin hong dawng meng in. Kei kiangah hong nai in la hong tan in, ka galte’ hangin kei hong khah in! Keimah hong kisimmawhna, ka maizumna leh ka mindaina nang na thei a, ka galte khempeuh nang na thei hi. Simmawhna in ka lungsim sukham zo ahih manin kei ka cimawh hi. Hong hehpih ding ka zon’ hangin kuamah om lo hi; hong huh ding ka zon’ hangin kuamah ka mu kei hi. Amaute in an dingin gu hong pia uh a, ka dangtakna-ah dawn dingin tuithuk hong pia uh hi. Amau mai-a a sabuai uh thangzak suaksak in la, amau biakna pawite tehlop suaksak in. Khua a muh theih loh nadingun amau mit mialsak in la, amau kawngte uh linglingsak in. Amau tungah nangma thangpaihna sungsuk in la, na hehna so amaute bansak in. Amau phualpi a kilawi mun suak hen la, amau buk-ah khat zong teengsak kei in. Bang hang hiam cih leh nangmah in na satgawp mi amaute in bawlsia uh a, nangmah in na liamsaksa mi amaute in gimsak sawnsawn uh hi. Amau dan thuakna ban-ah dan thuaksak thuahthuah in la, nangma tung panin suahtakna ngah kei ta uh hen. A nungtate’ laibu sung panin amaute kiphiatsak in la, miphate lakah a min uh kikhumsak kei in. Ahih hangin kei in gimna thuakin na ka sa hi; Pasian aw, na hotkhiatna in keimah a sangna munah hong koih ta hen! La tawh Pasian min ka phat ding a, lungdamna tawh amah ka pahtawi ding hi. Hih banga hihna in bawngtal khat ahi a, a ki leh a khecinte tawh a kim bawngtalno khat tawh sangin ahi zongin Topa lungdam sakzaw ding hi. Nen’niamna a thuakte hih musak un la lungdam hen; Pasian a zong note aw, na lungsim uh nosuak sak kik un. Bang hang hiam cih leh Topa in a cimawhte’ aw za a, henna sunga om ama mite simmawh lo hi. Vantung leh leitung, tuipi leh a sunga gamtang khempeuhte in amah phat ta uh hen. Bang hang hiam cih leh Pasian in Zion hon-in Judah khuapite lamkik ding a, ama nasemte tua lai-ah teengin tang pah ding uh hi; ama nasemte’ tate in tua leitang luah-in, amah a itte tua sungah teeng ding uh hi. Pasian aw, keimah hong honkhia nuam in! Topa aw, keimah huh dingin hong manlang in! Kei, thah hong sawmte maizumin kibuaigawpsak in! Keima siat nading a deihte nungkiksak in la, mindaisak in! “Ha, ha!” a cite, a maizumna uh tawh maikhingsak in! Nangmah hong zongte khempeuh lungdamin nangma sungah kipak ta hen! Na hotkhiatna a deihte in, “Pasian in lian hi!” ci ci ta hen. Ahih hangin keimah zawng-in ka cimawh hi, Pasian aw, hong manlang in! Nangmah in keimah huhpa leh hong honkhiatpa na hi hi; Topa aw, hong zekai kei in! Topa aw, nangmah kong bel hi; keimah hong zahhuaisak ngei kei in! Na thumanna tawh keimah hong gum in la hong honkhia in; kei lamah na bil hong ngat in la hong hon in! Nangmah in hong hon dingin ka belh suangpi, ka kulh muan’huai hong hi ta in, bang hang hiam cih leh nangmah in keima suangpi leh ka kulhpi na hi hi. Ka Pasian aw, migilote khutsung pan leh, thuman lote leh migilote’ matna panin keimah hong hon in. Topa aw, bang hang hiam cih leh ka neu lai-a kipanin nangmah in keima lametna, ka muan’na na hi hi, Topa aw. Ka suah tunga kipanin nangmah kong bel hi, ka nu’ gil sung panin hong lakhia-pa na hi hi. Nangmah kong phat ngitnget hi. Mi tampi’ adingin sia-hil bang ka hih hangin nangmah in a muan’huai keima belh na hi hi. Sunthapai-in nangmah kong phat a, na minthan’na ka gen tawntung hi. Teek hun ciangin keimah hong lawnkhia kei in la, ka thakiat ciangin kei hong nusia kei in. Bang hang hiam cih leh ka galte kiho-in, kei hong thah nopna thu kikum uh hi. “Pasian in amah nusia zo hi; amah a hon ding om lo ahih ciangin delh-in man ni,” kici uh hi. Pasian aw, kei kiang panin gamla om kei in; ka Pasian aw, keimah huh dingin hong manlang in! Kei hong mawhsakte zahhuai-in beimang uh hen la, keima siat nading a zongte, simmawhna leh minsiatna in tuamcip ta hen. Ahih hangin ke’n nang kong lamen-en dinga, nangmah kong phat semsem lai ding hi. Thuman tawh na hotkhiatna nasepnate sim zawh lohin tam ahih manin sunthapai-in ka gengen ding hi. T opa Pasian aw, na nasepna liante ka phat ding a, na thumanna bek genin ka nei ding hi. Pasian aw, ka khangno lai-a kipanin nong thuhilh a, a lamdang na nasepnate ka gengen lai hi. Tua ahih ciangin Pasian aw, hong piang lai ding mite khempeuh tungah nangma hatna ka gen khit matengin, teek-a ka sam a kaan’ hun ciang dong nangawn-in kei hong nusia kei in. Pasian aw, na vangliatna leh na thumanna in van sangpite ban hi. Pasian aw, na lianpipi na sem khin zo hi, nang tawh a kibang kua om ahi hiam? Gimna lianpipite hong tuaksak nangmah in keimah nong hing kiksak ding a, lei thukpi sung panin nong lakhiato kik ding hi. Nangmah in ka min hoihna nong khang sak ding a, nong nuamtuamsak kik ding hi. Ka Pasian aw, na thumannate hangin kei zong harp lasakna tawh nangmah kong phat ding hi; Israelte’ Siangtho Pa aw, laiza lasakna tawh nangmah phatna ka sa ding hi. Nangmah phatna ka sak ciangin nuam-in ka awng ding hi; nangma hotkhiatsa ka nuntakna zong nuam-in awng ding hi. Keima siat nading a zongte zahhuai-in kiminsia-sak khin ahih ciangin sunthapai-in thuman tawh nong huhna ka gengen ding hi. Pasian aw, nangma thutang kumpipa hilh in la, nangma thuman kumpi tapa hilh in! Amah in thumanna tawh na mite tungah thu khen hen la, na mizawngte’ tungah thutan’na tawh thu khen ta hen. Mualliante leh mualneute in thumanna tawh na mite’ adingin nopna puak ta hen! Amah in mizawngte’ ading thu khen hen la, mi cimawhte suahtakna pia-in, mi nengniamte sucip ta hen! Ni leh kha a om lai teng, khang tawntungin amah hing ta hen! Amah, pawn lak lopa tunga guah kia leh lei a kawtsak guahzu tawh kibang ta hen! Ama hun sungin thumanna pung hen la, khapi a bei mateng nopna om ta hen! Ama ukna in tuipi khat pan tuipi khat, Gunpi panin leimong dongin om ta hen! Ama galte a mai-ah kunsuk uh hen la, amah langpangte in leivui liak ta uh hen! Tarshis kumpite leh tuikulh neu-a kumpite in ama tungah siah pia uh hen la, Sheba leh Seba kumpite in letsong puak ta uh hen! Kumpi khempeuh ama mai-ah boksuk uh hen la, minam khempeuh in ama na sem ta uh hen! Bang hang hiam cih leh mi cimawh mi in a koh ciangin honkhia a, a zawng mi leh huh ding nei lo mi honkhia hi. Amah in a thakiam mi leh a cimawh mite hehpih a, mi cimawhte’ nuntakna hon hi. Amah in amaute pammaih sa ahih manin nen’niamna leh ngong hihna panin amaute tankhia hi. Amah khan’sau hen la, Sheba gam-a khamte ama tungah kipia ta hen! Ama adingin thu kingetsak tawntung hen la, sun thapai-in ama adingin thupha kingetsak ta hen! Gam sungah an tampi piang hen la, mualliante dawn-ah dim mema-in Lebanon gam sung bang hen la, gam lak-a lopate bangin khuapite sung panin mite pung ta uh hen! Ama min kip tawntung hen la, ni a om lai teng a minthan’na kip suak hen! Ama hangin mite in thupha ngah hen la, minam khempeuh in amah pen thupha ngahpa, ci ta uh hen! Nalamdangte a bawl amah bek ahi, Israel Pasian, Topa in thupha ngah ta hen. A minthang ama min in thupha ngah tawntung hen la, ama minthan’na in leitung khempeuh dim ta hen! Amen, Amen. Jessi’ tapa David’ thungetnate bei ta hi. A lungsim sung a siangtho, thutangte tungah Pasian hoih takpi hi. Ahih hangin kei ka hih leh ka khete kisuipuk dektak a, ka khe taal dektak hi. Bang hang hiam cih leh migilote’ daupaina ka muh ciangin mi kihisakte ka eng hi. Bang hang hiam cih leh amaute in nat velvalna thuak lo uh a, a pumpi uh cidamin zol hilhial hi. Amaute in midangte bangin haksatna thuak lo uh a, amaute in midangte bangin gimna ngah lo uh hi. Tua ahih ciangin amaute in kiphatsakna khainiang bangin ok uh a, ngongtatna puan bangin silh uh hi. A lungsim panun gitlohna pusuak sak uh a, a ngaihsutna uh gitlohna tawh dimlet hi. Amaute in mi thusim loin elpau uh a, kiliatsakna tawh sucip dingin mi tawng uh hi. Amaute’ gensiatna in vantung ban a, kiliatsakna tawh leitungah thu gen kawikawi uh hi. Tua ahih ciangin mite kihei-in amaute phat uh a, amau’ mawhna zong lo uh hi. Amaute in, “Pasian in bangci theih ding ahi hiam? Sang Penpa in phawk ding ahi hiam?” ci uh hi. En un, hihte migilo ahi hi; a tawntungin nuam takin om hithiat uh a, amaute a hauhna uh khang semsem hi. Ka lungsim siang sak a, dikna tawh ka khutte ka sil siang hangin phattuamna om lo hi. Bang hang hiam cih leh sunthapai-in gimna ka thuak a, zingsang simin hong kithuhilh hi. “Hih bangin thu gen ning,” a ci hi leng, nangma mite tunga thutak lo ka suak ding hi. Ahih hangin, hih thu a bangci hiam ci-a ka ngaihsut ciangin kei adingin a lunggim-huai mahmah nasep khat hong suak a, Pasian’ biakinn sungah ka pai ciangin a thu tawpna dongte ka tel hi. Nangmah in amaute mun nalna-ah na koih takpi a, a sia dingin amaute na tuksak hi. Tomno sungin amaute kisusia-in, launa in nilkhia mang! Amaute pen mi khat in mang a mat tawh kibang a, na khan’lawh ciangin amaute a bangci hiam cih na phawk nawn kei hi. Ka lung khamin ka lungsim hong nat ciangin, keimah hai-in bangmah ka thei kei a, nangma mai-ah ganhing tawh ka kibang hi. Ahih hangin nangmah tawh ka omkhawm ngitnget a, ka khut taklam-in nong len hi. Nangma thugenna tawh keimah lam nong lak a, a nung ciangin minthan’na tawh keimah nong sang ding hi. Nang sim loh vantungah kua nei ka hi hiam? Nang sim loh ka deih ding leitungah kuamah om lo hi. Ka lungsim leh ka pumpi zawngkhal kha ding a, ahih hangin Pasian in ka lungsim hatna leh keima aa hi tawntung ding hi. Bang hang hiam cih leh, en in, nangmah tawh a kigamlate kisia ding a, nangma tunga hong khialte na beisak hi. Ahih hangin kei adingin Pasian kianga om ding hoih hi; na nasepnate khempeuh ka gen theih nadingin Topa ka Pasian kong bel hi. Pasian aw, bang hangin kote hong paikhia paisuak na hi hiam? Bang hangin nangma gam sunga na tuute tungah heh na hi hiam? Tanglai-a na ngahsa nangma mihonte, nangma luah minam dinga, na tatkhiatsate phawk in! Na ten’nasa Zion Mual phawk in. A sia densa munah hong kalsuan in; biakinn sunga om nate khempeuh gal in susia khin ta! Na galte, nangma mun siangtho laizangah awng uh a, amau lumte lim dingin suang uh hi. Amaute pen, tuu-lak sing phatna sungah pai-in heipi tawh sing a phuk bang uh hi. Tua ciangin biakinn na kizeemte khempeuh sek-hei leh sekpite tawh sat kham uh hi. Amaute in nangma biakinn mei tawh hal uh a, nangmah hong kibiakna mun susia uh hi. Amaute in, “A vekpi-in zomang khin ni,” kici uh a, gam sung teng-a om Pasian biakna inn khempeuh mei tawh hal uh hi. Kote in ka mailam thu ding uh ka thei kei uh hi; kamsang khat zong om nawn lo a, bang tanvei hi ding ci-a a thei kuamah ka om kei uh hi. Pasian aw, galte in bang tanvei hong thusim loin om ding ahi hiam? Langpangte in nangma min hong simmawh den ding ahi uh hiam? Bang hangin na khut dok kik a, na khut taklam na ang sungah koih na hi hiam? Ahi zongin Pasian in tanglai pek-a kipan kumpi hi a, leitungah hotkhiatna a sem ka Kumpi ahi hi. Nangma vangliatna tawh tuipi na khenkham a, tuite tunga gulpite’ lutangte na sukham hi. Nangmah in Awle’ lutangte na sukham a, amah pen, gamlak ganhingte’ nek dingin na pia hi. Nangmah in ciktuite leh luite na phulsak a, guntui luangte na kangsak hi. Sun in nangma aa hi a, zan zong nangma aa ahi hi; nangmah in ni leh kha na bawl hi. Nangmah in leitung gamgi khempeuhte, phalbi hun leh khuakhal hunte na bawl khin hi. Topa aw, galte in hong thusimlohna leh, dawi bia mite in nangma min a simmawhna thu uh phawk in. A cimawh na mite, a gal gilote uh khut sungah nusia kei in la, bawlsiatna a thuak na mite mangngilh kei in. Na thuciamna hong pingaihsut in; bang hang hiam cih leh leitung mun mialna khempeuh mi ngongtatte’ omna tawh kidim hi. A kisikcip mite zahhuaisak kei in la, mizawngte leh mi cimawhte nangma min kiphatsak in. Pasian aw, tho in la, nangma thu-ah hong pang in; dawi bia mite in sun tawntungin nangmah hong thusim lohna phawk ta in! Nangma galte’ kikona aw, nang hong langpangte’ gamlum semsemna mangngilh kei ta in! Pasian aw, nangma tungah ka lungdam uh hi; nangma tungah ka lungdam uh hi; nangma liatna thu ka gen uh a, a lamdang na bawlnate ka sut kikkik uh hi. A hun ka sehsa ni ciangin thu a maanin ka khen ding hi. Leitung leh a tunga teengte khempeuh a kilin’ ciangin, a khuampite a kipsakpa in keimah ka hi hi. A kiphasakte tungah, “Kiphasak kei un,” a gilote tungah, kihisak kei un; kihisak kei un la, kiphatsakna tawh kam pau kei un,” ka ci hi. Bang hang hiam cih leh san’tohna in nisuahna lam ahi a, nitumna lam ahi a, gamlak panin ahi zongin hong pai hi lo hi; ahih hangin mihing khat a sangsak, mihing khat a niamsak, thu a khenpa in Pasian ahi hi. Bang hang hiam cih leh Topa khut sungah leenggahzu a phuan, a kihelkim ngiingei hai khat om a, amah in tua sung panin hong bungkhia dinga, leitung migilote khempeuh in a tawdat dong takin liaktum ding uh hi. Ahih hangin kei ahih leh ka lungdam ngitnget ding a, Jakob Pasian’ tungah phatna late ka sa ding hi. Migilote’ vangliatna khempeuh amah in susia ding a, ahih hangin thuman mite’ vangliatna khang semsem ding hi. Judah gam sungah Pasian kithei a, Israel gam sungah ama min lian hi. Salem khua sungah ama omna kibawlin, Zion khua sungah ama teen’na mun kibawl hi. Amah in tua lai-ah thaltangte, lum, namsau leh galhiamte kuaitan hi. A om ngitnget mualliante sangin nang na min thangzaw-in na lianzaw hi. Lungsim khauhte’ neihsa nate kisutkhia a, amaute ihmucip suak uh hi; gal hat mi khempeuhte in amau khut uh zang thei nawn lo uh hi. Jakob’ Pasian aw, nangma thuhilhna hangin sakol leh a tung tuangpa khawlcip uh hi. Ahih hangin nang zahtak-huai mahmah teh! Na heh khit phot ciangin nangma mai-ah kua ding zo ding ahi hiam? Mite’ hehna in nangmah hong kiphatna piangsak ding a, na hehna pan a suakta sun mite in nangmah pahtawina pawi bawl ding uh hi. Pasian tungah a gingin ka kiko hi, amah in kei hong zak theih nadingin Pasian tungah a gingin ka kiko hi. Ka lungkham hunin keimah in Topa zongin; zanin thungenin gim het loin ka khut ka zan a, ahi zongin hehnepna ka ngah kei hi. Keimah in Pasian ka ngaihsun a, ka tau hi; lung ka geelgeel a, ka gim mahmah hi. Nangmah in ihmu lo dingin nong bawl a, lungkham-in ka pau thei kei hi. Hunluite ka ngaihsun a, sawt pek lai-a kumte ka phawk hi. Zan-in ka lungsim tawh ka kiho a, lung geelgeelin thu ka kan ciangin: “ Topa in hong nial paisuakin, maipha hong pia kik ngei lo ding ahi hiam? Ama itna kip bei paisuak ding ahi hiam? Ama thuciamte a bei paisuak ding ahi hiam? Pasian in hehpihna a neih ding mangngilh khin ta ahi hiam? Amah in hehna tawh ama hehpihnate humcip khin ahi hiam?” ka ci hi. Tua ciangin ahih leh, “Sang Penpa khut taklam a kikhelna in keima kha-kham veina ahi hi,” ka ci hi. Topa ’ sepnate ka lungsimah ka phawk ding hi; hi hi, hunlui lai-a nangma nalamdangte ka ciamteh ding hi. Nangma nasepna khempeuh ka lungngaingai ding a, nangma sepna a liante ka ngaihsunsun ding hi. Pasian aw, nangma lampi, siangtho hi. Eima Pasian tawh kibangin bang pasian lian ahi hiam? Nangmah in nalamdangte a bawl, mite lakah nangma vangliatna a langkhiasak khin Pasian na hi hi. Nangmah in na khut tawh Jakob leh Josef’ tate, na mite na tankhia hi. Tuite in nang hong muh ciang, Pasian aw, tuite in nang hong muh ciangin, amaute lau uh hi, hi taktak hi, tuithukpi zong a liing hi. Meiipite in tui sungkhia-in, vante ging damdam a, nangma thaltangte mun citeng-ah leeng uh hi. Na vanging lianpi pingpei sungah om-in, khuaphialepte in leitung taan’ a, leitang liingin kising hi. Nangma lamlian in tuipi tung hi a, nangma lamneu in tui liante tung ahi hi; ahi zongin na khekhapte kimu lo hi. Nangmah in, Moses leh Aaron’ khut tawh, na mite, tuuhon bangin na makaih hi. Ka mite aw, keima hilhna ngai un la, ka kam tawh ka thugente na bil uh hong ngat un! Hih thute, i tate tungah eite in im loin, hong piang ding khangthakte tungah, Topa ’ minthang nasepna, ama vangliatna leh ama sepsa nalamdangte i gen ding hi. Thal a tawi Efraim mite in gal kido ni-in nungkik uh hi. Amaute in Pasian’ thuciamna zui lo uh a, ama thukham bangin gamta nuam lo uh hi. Ama bawlsa leh amau tunga nalamdang a lahsate amaute in mangngilh uh hi. Izipt gamsung, Zoan mun-ah, a pu a pate uh’ muhna-ah amah in nalamdang a bawl hi. Amah in tuipi khenkhia-in amaute kantansak a, tuite a lompi-in omsak hi. Sun hunin amah in amaute meiipi khat tawh kha a, zan tawntung, meikuang taang khat tawh a kha hi. Amah in gamsung ah suangpite kitamsak a, tui thukpi sung pan-a piangkhia bangin amaute tungah tuidawn ding tampi pia hi. Amah in suangpi sung panin luitui luangkhia sak a, gunte bangin tuite luangsak hi. Ahi zongin ama tungah amaute khial lailai uh a, sehnel gam sungah Sang Penpa lehpan’ uh hi. Amau’ duh mahmah an kalhna tawh amaute in a lungsim sung uh-ah Pasian ze-et uh hi. Amaute in Pasian gensia uh a, “Pasian in gamlakah sabuai phah thei ding ahi hiam? Amah in suangpi sat a, tui lengkhia-in luite dimlet takpi ahi hiam? Amah in ama mite, an ahi a, sa-meh ahi zongin a pia thei takpi ahi hiam?” ci uh hi. Tua ahih ciangin Topa in a zak ciangin hehna tawh kidim-in, meikuang tawh Jakob sugawp a, Israel tungah ama hehna khang hi; Bang hang hiam cih leh amaute in Pasian um lo uh a, ama hotkhiat vangliatna muang lo uh hi. Ahi zongin amah in, tung-a om vantungte thu pia-in, vantung kongte hong a, nek dingin amau tungah manna kici an zusak-in, amaute vantung an na pia hi. Mihingte in vantungmite’ an ne a, amah in amaute tungah an tampi puak hi. Amah in vantungah nisuahna huih nungsak-in, ama vangliatna tawh leitaw lam huih paikhiatpih a, amah in amaute tungah leivui zah bangin sa zusak a, tuipi sehnel zah bangin vasa kha neite zusak hi; amah in amau giahphual laizang, amau omna kiim khempeuhah tuate kiasak hi. Amah in amau’ duhpen pia ahih manin, amaute in ne-in gilvah uh hi. Ahih hangin amaute in a duhpen uh a kham ma, amau kam sungah an om laipi mahin, amau tungah Pasian’ hehna tung kikin amah in amau lak pan-a a hatpente that-in, Israel sung pan-a a kitengkhia mite niamkoihsuk hi. Hih nalamdangte khempeuh om napi-in amaute khial lai veve uh a, ama nalamdangte hangin amaute in um tuan lo uh hi. Tua ahih ciangin amah in amau nite, husan’ bangin maimangsak a, amau nuntakna, launa lianpi tawh beisak hi. Amah in amaute a thah ciangin amaute in amah zong a, amaute kisikin, lungsim taktak tawh Pasian zong uh hi. Amaute in Pasian pen, amau tankhiapa Sangpen Pasian, a suangpi uh ahihna phawk uh hi. Ahih hangin amaute in a kam uh tawh amah phat khem uh a, a lei uh tawh ama tungah zuau gen uh hi. Amau lungsim uh ama lamah kip lo a, ama thuciamna-ah amaute thuman lo hi. Ahi zongin, amah in hehpihna lungsim nei ahih manin amau khialhnate maisak a, amaute susia lo hi; amah in a hehna iip zelzel a, a hehna khempeuh phongkhia lo hi. Amah in, amaute pen mihing hi lel a, hong paikik nawn lo huih nung bang ahihna uh phawk hi. Amaute in gam lakah amah lehdo zelzelin, sehnel gam sungah amah dahsak uh hi! Amaute in amah ze-et kikkik uh a, Israelte’ Siangtho Pa phin uh hi. Amaute in a luituite uh a dawn theih loh nadingin amau gunte amah in sisan a suaksak hi. Amah in, amaute a pet thei cippi honte leh amau’ lote a susia uiphukte amau lakah a sawl hi. Amah in, amau’ lo ante tangngol pia a, amau sepna gahte kauphe pia hi. Amah in, a leengguite uh gial tawh denggawp a, a theithekte uh vukkhal tawh susia hi. Amah in, a ganhingte uh gial tawh denglum a, a gankhawite uh keek tawh denglum hi. Amah in, amaute tungah a lauhuai ama sinsona, hehna, thangpaihna, gimna, a susia thei vantungmi honkhat khah hi. Amah in, a sin sona ip lo a, kuamah hin’ khawilo a, pulnatna tawh amaute sisak hi. Ham’ suante inn sunga ta upa teng ahi, Izipt gam sunga naucil khempeuh amah in vatmai hi. Tua ciangin amah in tuu bangin ama mite paikhiatpih a, gam lakah ganhon bangin amaute lam lak hi. Amah in muan’huaina mun-ah amaute paipih ahih manin amaute lau lo uh hi; ahih hangin tuipi in amau’ galte tumcip hi. Amah in, a khut taklam tawh a ngahsa mual, a gam siangtho-ah amaute paipih hi. Amah in, minamte, amau’ mai panin hawlkhia-in; amau’ luah ding neihsa hawmsak a, Israel minamte amau buk sungah teeng sak hi. Ahi zongin amaute in Sangpen Pasian ze-etin lehdo uh a, ama teci pan’nate zui loin, a pate uh mah bangin kiheikhia-in zuau gamtat uh hi; thal ginalo bangin amaute kihuiheek uh hi. Bang hang hiam cih leh amaute in amau’ munsangte tawh amah a sinso nadingin phin uh a, amau’ milim bawlte tawh ama hazat nading piangsak uh hi. Pasian in a zak ciangin hehna tawh kidim a, amah in Israel nial siangtho hi. Amah in, mihingte’ lak-a omna puanbuk, Shiloh khua-a a omna nusia a, ama vangliatna, galte’ tungah ap a, ama minthan’na galte’ khutah pia hi. Amah in, a mite, namsau tawh sisak a, ama luahte tungah a hehna nga hi. Mei in amau tangvalte kangtum a, amau nungakte a ten’pih ding kuamah om nawn lo hi. Amau siampite, namsau in puksak a, amau zite in kah zo lo uh hi. Tua ciangin, Topa pen, zu kham-a awng mi thahatpa, a ihmu tho bangin khanglo hi. Amah in, a langpangte zo a, a maizum tawntung dingin amaute koih hi. Amah in, Josef’ puanbuk nial a, Efraim minamte teel lo hi; ahih hangin, ama it, Zion Mual, Judah minam a teel hi. Amah in, kip den dinga a phuhsa leitang, van sangpi bangin, ama biakinn a lam hi. Amah in, lungsim thutang tawh amaute cingin, a siam mahmah a khut tawh amaute lam lak hi. Pasian aw, nangma luahna gam sungah dawi biate hong pai uh hi; amaute in nangma biakinn siangtho nin sak uh hi; amaute in Jerusalem siasak khin uh hi. Amaute in, nangma nasemte’ pumpite, a an dingun huih lak vasate pia uh a, na misiangthote’ sate, lei lak ganhingte pia uh hi. Amaute in, Jerusalem kimkot-ah tui bangin amaute’ sisan buakhia uh a, amaute a vui ding kuamah om lo hi. Kote in ka vengte uh’ zahko, ka kim uh-a omte’ ko leh nuihsat ka suak khin uh hi. Topa aw, bang tanvei hi ding hiam? Heh paisuak ding na hi hiam? Nangma hazat hehna, mei bangin kuang paisuak ding ahi hiam? Nangmah hong thei lo minamte tung leh, nangma tunga thu hong ngen lo kumpi gamte tungah heh gawp in. Bang hang hiam cih leh amaute in ka mite uh thatmang khin a, ka gam sung uh susia gawp hi. Ka pu ka pate uh mawhna hangin kote hong lang ngaihsut kei in la, kote hong kiniam koih mahmah ahih manin, kote hong dawntuah dingin na hehpihna hong paisak mengmeng in. Kote’ kihotkhiatna Pasian aw, nangma min a than’ nadingin kote hong huh in la, nangma min hangin kote hong khahkhia-in ka mawhna uh hong maisak in! “Amau’ Pasian koi-ah om hiam?” minamte in a cih ding bang hangin kilawm ding ahi hiam? Na nasemte’ sisan luangkhia phulakna pen, minamte’ lak, komau’ muhna-ah kitheisak in! Thongkiate’ taunate ngai in la, thah dinga a kisehte nangma vangliatna tawh kizui-in suakta sak in! Amaute in nang hong zahkona mah tawh ka vengte uh’ ang sungah a zah sagih-in thuk in, Topa! Tua ciangin, nangma mi, nangma gamsung tuu ahi kote in, na tungah lungdamna kong lak ngitnget ding uh a, a khang a khangin nangmah phatnate ka gengen ding uh hi. Tuuhon bangin Josef a paipih, Israel Tuucingpa aw, ngai in! Nang, Kherubte tunga tu-pa aw, Efraim leh Benjamin leh Manasseh mai-ah taangkhia in! Na tha saan in la, kote honkhia dingin hong pai in! Ka ngei uh hong bangsak kik in, Pasian aw, kote hong kihotkhiat theih nadingin na maitang hong taang sak in! Vanglianpen Topa Pasian aw, na mite’ thungetna-ah nang bang tanvei sin so ding na hi hiam? Nangmah in an dingin khitui amaute na pia a, amaute’ dawn dingin khitui tampi na pia hi. Nangmah in, ka vengte uh’ thusim lohin kote nong bawl a, ka galte un hong thusimlohna tawh amau kinuihsan uh hi. Ka ngei uh hong bangsak kik in, mihonpite’ Pasian aw; kote a hong kihotkhiat theih nadingin na maitang hong taang sak in! Nangmah in, Izipt panin leenggui khat na la a, minamte hawlkhia-in, tua leenggui na suan hi. Nangmah in tua leenggui’ adingin lei na hahsiang a, amah in zung thuk kha-in leitang dim hi. Ama liim in mualliante lim sun a, a hiang in taamtaak singliante khuh a, tuipi lamah a hiangte zam-in, a dawnngekte in Gunpi lam zuan hi. Tua ahih ciangin, lampi-a pai khempeuh in ama gah a lawh theih nadingin, bang hangin nangmah in a daigawl suvang na hi hiam? Gamlak-a om Ngal in susia gawpin, zang sunga om ganhing khempeuh in kivakna-in nei uh hi. Amaute in mei tawh hal-in sattan uh hi; amaute heh-et in la, susia in. Ahih hangin nangma adinga na hatsak mi’ tapa, na taklam khut-a mipa tungah thahatna guan in. Tua ciangin nang kiang panin kote ka kihei kik nawn kei ding uh hi; kote, hong nungtasak in, nangmah kong phat ding uh hi. Ka ngei uh hong bangsak kik in, mihonpite’ Topa Pasian! Kote hong kihotkhiat theih nadingin na maitang hong taang sak in! Eite’ thahatna ahi Pasian’ tungah nakpi-in la sa un la, Jakob Pasian’ tungah lungdamin awng un! La khat phuang-in, khuangno tum-in, a ngaih laiza khausai lasakna leh harp khausai lasakna tum un. Kha-det, kha-liik, i pawi ni-in pengkul tum un. Bang hang hiam cih leh, tua in, Israelte’ adingin thukham hi a, Jakob Pasian’ biakna ngeina kip khat ahi hi. Amah in, Izipt gamah a pai lai-in Israel mite tungah thu piakna-in nei hi. Keimah in ka theih ngei loh kampau khat hih bangin ka za hi. “Na liangko uh a, vangik kong lakkhiat sak a, na khut uh-a na ciangkhaite uh kong khahsak hi. Na cihmawh uh ciangin kei nong sam uh a, keimah in note kong honkhia hi; keimah in, a kilang lo vanging sung panin note kong dawng a, Meribah tui phualte-ah note kong ze-et hi. Ka mite aw, note kong thuhilh laitakin hong ngai un! Israelte aw, ka thu hong ngai hi hoh le uh cin! Note lakah pasian dang om lo ding a, Pasian dang khat’ mai-ah na kun kei ding uh hi. Keimah in, Izipt gam panin note a hong lakhia, Topa na Pasian uh ka hi hi. Na kam uh a gol-in ka un, keimah in kong dimsak ding hi. “Ahih hangin ka mite in keima aw ngai lo uh hi; Israelte in kei’ thu themkha zong zui lo uh hi. Tua ahih ciangin amau ut banga gamta dingin amau lungsim khauhna bangin ka tasak hi. Ka mite in ka thu hong ngai-in, ka deih bangin Israel gamta leh pawh! Amau’ galte ka zawhsak pak ding a, amau galte lang pangin ka khut ka liik ding hi. Topa a mudahte in amah mai-et ding a, amaute’ dantuahna, kip paisuak ding hi. Mangbuh hoihpen tawh note kong vaak dinga, suangpi pan-a khuaizu tawh note kong gil vah sak ding hi.” Pasian in thu vaihawm kikhopna sungah ama panmun hong len a, amah in pasiante lakah thu a khen hi. “Note in bang tanvei amaan loin thu khenin, migilote tungah angvanna zang ding na hi uh hiam? A ginalote leh pa nei lote tungah thuman un la, a thuakte leh a cimawhte’ thumanna kipsak un. A ginalote leh a cimawhte hon un la, migilote’ khut sung panin amaute honkhia un.” Amaute in thu-theihna ahi a, thutelna ahi zongin nei lo uh a, amaute khuamial sungah gamta uh hi; leitung bulpite khempeuh kiling hi. Ke’n kong cih-inah, “Note khempeuh in, Sang Penpa’ tate, pasiante, na hi uh hi; Ahi zongin, mite bangin si-in, kumpi khat peuhpeuh bangin na kia ding uh hi.” Pasian aw, tho in, leitung thu khen in; bang hang hiam cih leh minam khempeuh nangma’ aa ahi hi. Pasian aw, dai dide-in om kei in; lung nuamin, taang loin om kei in, Pasian aw! Bang hang hiam cih leh na galte in gamlumna piang sak uh a, nang hong mudahte kiphasak uh hi. Amaute in khem siamna tawh na mite thang siah uh a, amaute in, na itte lang pangin thu kikum uh hi. Amaute in, “Hong pai un, amaute minam khat hihna panin beisak ni; Israel min kiphawksak nawn kei ni!” ci uh hi. Hi hi, amaute in siat nading geelin kithukhat uh hi; amaute in nangmah lang pangin thuciam bawl uh hi— Edom mite leh Ishmael mite, Moab leh Hagri mite, Gabal, Ammon leh Amalek mite, Filistia leh Tai-ar khua-a teeng mite tawh thuciam bawl uh hi. Assiria mite in zong amaute pawlpih hi; amaute in Lot suan-le-khakte’ pawl muanhuaite ahi uh hi. Ka Pasian aw, amaute pen, pingpei sunga ninnen, huih mai-a ansi leng bangsak in. Mei in gamlak a haltum bang, meikuang in mualliante a kuan’sak mah bangin nangmah in na khuapihuih tawh amaute delh in la, na huihpi tawh amaute lausak in! Topa aw, amaute in nangma min hong zon’ theih nadingin amaute, maizumna tawh kidimsak in. Amaute maizumin lungkia densak in la, amaute mindai-in siasak in. Topa a kici min nei nangmah bek in leitung khempeuhah a Sang Penpa na hihna amaute thei sak in. Vanglianpen Topa aw, na teen’na mun bangzah takin etlawm ahi hiam? Ke’n ka lunggulh mahmah hi, hi taktak hi, Topa ’ huang sung ka lunggulh mahmah a, ka lungsim leh ka pumpi in a nungta Pasian tungah lungdamin la a sa hi. Mi honpite Topa, ka kumpi leh ka Pasian aw, na biakna tau-ah, kawlgit nangawn in a inn ding mu a, phialphiah in ama om nading, a note a koihna bu a mu hi. Nangma inn sungah teeng a, nangmah phatna a sa ngitnget mite in thupha ngah mi ahi hi. Nangma sungah amau thahatna om a, amau lungsim sungah Zion zuatna lampi a om mite in thupha ngah mi ahi uh hi. Amaute in Kuam keuna mun kantanin a pai laitakin, tua kuam pen ciktui tampi tawh kidim a, guahzu masate in zong tua mun pen bualtuite tawh kidim sak hi. Amaute a tha uh hat semsem hi; Zion-ah pasiante’ Pasian kimu ding hi. Mi honte Topa Pasian aw, ka thungetna hong za in; hong ngai in, Jakob Pasian aw! Pasian aw, ka lum uh en in; na sathau nilhpa’ maitang en in! Bang hang hiam cih leh mun dangah ni tulkhat om sangin nangma huang sungah ni khat om hoih zaw hi. Gitlohna inn sungah ka teen’ sangin ka Pasian’ inn kongcingpa ka hi nuamzaw hi. Bang hang hiam cih leh Topa Pasian in eite hong hupa leh a minthang i Kumpi hi a, maipha leh pahtawina hong pia hi. Thuman-a gamtate tungah Topa in na hoih bangmah siit lo hi. Mi honte Topa aw, nangmah hong muang mi in thupha ngah mi ahi hi! Topa aw, nangma gam, na lungsim tawh kituak hi; Jakob’ nopsaknate a ngeina na bangsak kik hi. Na mite’ mawhna na maisak a, amau khialhna khempeuh na maisak hi. Na hehna khempeuh na damsak a, na sin so-na na daisak hi. Kote’ kihotkhiatna Pasian aw, kote ka ngei uh hong bangsak kik in la, kote tunga na lungkim lohna beisak ta in! Kote tungah hong heh paisuak ding na hi hiam? Khang tawntungin heh paisuak ding na hi hiam? Nangmah kong phat theih nadingun ko na mite hong nungtasak kik lo ding na hi hiam? Topa aw, kote tungah na itna kip hong lak in la, na hotkhiatna kote hong pia in. Topa Pasian’ thu gen ding hong zasak dih un, bang hang hiam cih leh amah in ama lamah a lungsim uh tawh a kiheite, ama mi siangthote, a mite tungah kilemna thu gen ding hi. I gam sungah minthan’na a om theih nadingin amah a zahtakte’ adingin ama hotkhiatna hong om takpi hi. Itna kip leh thutakna kigawm ding a, thumanna leh kilemna kihual ding uh hi. Leilak panin thutakna hong po khiato ding a, thumanna in vantung panin ensuk ding hi. Hi hi, Topa in a hoih nate hong pia ding a, i leitang in hauhna piangsak ding hi. Thumanna in Topa ’ mai-ah mapai ding a, ama lampi bawlkhol ding hi. Topa aw, kei, hehpihhuai-in cimawh ka hih manin na bil hong ngat in la, hong dawng in. Mihoih ka hih manin kei hong kem in; nangmah hong muang na nasempa hong hon in. Nangmah in ka Pasian na hi hi, Topa aw, sun tawntung nang tungah hong kiko ka hih ciangin kei hong hehpih in. Topa aw, nangma tungah thu hong ngen ka hih manin, na nasempa hong kipaaksak in. Bang hang hiam cih leh Topa aw, nangmah hoih-in mawhna na maisak a, nangma tunga hong ngente khempeuh tungah itna kip tampi na nei hi. Topa aw, ka thungetna hong za in la, thuum-a kikona hong ngai in. Nangmah in kei hong dawng na hih manin ka haksat hun ciangin nangma tungah kong ngen hi. Topa aw, pasiante lakah nang tawh a kibang kuamah om lo a, nangma’ sep bang, kuamah in sem thei lo hi. Topa aw, na bawlsa minam khempeuh hong pai-in na mai-ah hong kun ding a, nangma min hong phat ding uh hi. Bang hang hiam cih leh nangmah in nalamdangte bawlin a lian na hi a, nang bek in Pasian na hi hi. Topa aw, nang tungah hong thumanin na lampi ka zuih theih nadingin kei hong hilh in; nangma min a zahtakte tawh ka lungsim pumkhat hong hi sak in. Topa ka Pasian aw, ka lungsim khempeuh tawh nangma tungah ka lungdam a, nangma min ka thangsak ngitnget ding hi. Bang hang hiam cih leh keimah nong itna kip lian mahmah a, Leinuai thuk sung sihna panin kei nong honkhia khin hi. Pasian aw, mi kihisakte, kei lang pangin hong tho hi; thuhelhhawt mi pawlkhat in kei, thah hong sawm uh a, amaute in nang hong thudon lo uh hi. Ahih hangin Topa aw, nangmah in a hehpih thei, a dik Pasian na hi a, heh hak-in, itna kip leh thumanna tawh a kidim na hi hi. Kei lamah hong kihei in la kei hong hehpih in; na nasempa tungah na thahatna pia in la, na nasem numei’ tapa hong hon in. Topa nangmah in kei hong huh-in, nong thakhauh sakna hangin, kei hong mudahte in mu-in a zahhuai nadingin keima tungah na maipha hong lak in. Mual siangtho tungah ama phuhsa khuapi om hi. Topa in Jakob’ teen’na mun khempeuhte sangin Zion kulh kongpi itzaw hi. Pasian’ khuapi aw, nangma minthan’na teng hong kigen hi. Kei hong theite lakah Izipt leh Babilon ka hel hi; Filistia, Tai-ar leh Ethiopia-te zong—“Hihte pen hua lai mah pan-a piang ahi hi,” amaute in ci ding uh hi. Zion thu tawh kisai-in ahih leh, “Minam khempeuh ama sung pan-a suak ahi hi,” kici ding hi; Bang hang hiam cih leh Sang Penpa mahmah in amah kipsak ding hi. Topa in, “Hihte pen hua lai-a suak” ci-in minam khempeuh ciamtehin gelh ding hi. Tua sung a teeng mi khempeuh in a kibangin, “Ka lungdamna bulpite khempeuh uh nangma sungah om hi,” ci ding uh hi. Topa, ka Pasian aw, sun-in huhna kong ngen a, zan-in nangma mai-ah kong kiko hi. Ka thungetna hong za in la, huh ding kong ngetna hong ngai in. Bang hang hiam cih leh lungkhamna tampi ka tungah hong tung a, ka si dektak hi. Kei pen, a si dektak mi tawh ka kibang a, ka thahatna khempeuh bei khinta hi. Misite lakah a kinusia, a kithatlum, han sunga a lum, nangma huh zawh ahi nawn lo, na phawk nawn lohte tawh ka kibang hi. Kei pen, mial-a a thukna mun, Leihawm thukna sungah nong koih khin hi. Nangma hehna keima tungah gik mahmah a, na tuihualte khempeuh tawh kei nong vukcip hi. Ka kikholhpihte in kei hong pelh dingin nong bawl khin a, amaute tungah a cikziat huai khatin kei nong bawl hi. Ka suahtak khiat theih loh nadingin kei hong kikhumcip hi; thuakna hangin ka mit mial hi. Topa aw, ni simin nangma tungah kong ngen hi; thu ngenin ka khutte nangma lamah kong zan hi. A sisate’ adingin nangmah in nalamdang bawl na hi hiam? Nangmah phat dingin mi site hong tho ding ahi hiam? Han sungah na itna kip kigen a, siatna mun-ah na thumanna kigen ding ahi hiam? Khuamialna sungah nangma nalamdangte kithei a, mangngilhna gam sungah na hotkhiat huhna kithei ahi hiam? Ahih hangin Topa aw, nangma tungah huhna kong ngen a, zingsang simin nangma mai-ah thu kong ngen hi. Topa aw, bang hanga kei hong paikhia na hi hiam? Bang hangin kei kiang panin na maitang seel na hi hiam? Ka neu-a kipan gimna thuakin ka si dektak a, nangma dante ka thuak hi; ka cih nading mel ka thei kei hi. Nangma hehna in kei hong nawk khin a, a lauhuai nangma hong dona in kei hong susia hi. Amaute in tuikhang bangin sun tawntung kei hong umcih uh a, kei hong tuamcip uh hi. Hong itte leh ka lawmte keimah nong pelhsak khin a, khuamial bek, keima kikholhpih ahi hi. Topa aw, na itna kip, la-in ka sa tawntung ding a, na thutakna, a tawntungin ka gengen ding hi. Bang hang hiam cih leh na itna kip kho tawntung a, na thutakna, vantung bangin kip tawntung hi. Nangmah in, “Ka teelpa tawh thuciamna khat ka bawl zo a, ka nasem David tungah thu ka ciam zo hi: Na suan na khakte kumpi-in ka kipsak suak ding a, na kumpi gam, khang tawntungin ka kipsak ding hi,” na ci khin hi. Topa aw, na nasepna lamdangte pen vantungte phatsak in la, mi siangthote kikhopna sungah na thumanna phatsak in. Mi honte Topa Pasian aw, na khempeuh ah na thutak a, nangmah banga vanglian kua om ahi hiam? Topa aw. Nangmah in tuipi khang na uk a, a tuihualte a saan’ ciangin na daisak hi. Nangmah in a kithatsa luanghawm khat bangin ganhing golpi Rahab na sugawp a, na thahatna tawh na galte na zogawp hi. Vantungte nangma’ aa hi a, leitung zong nangma’ aa ahi hi; leitung leh a sunga omte khempeuh nangma phuhsa ahi hi. Saklam leh khanglamte nangma bawlsa hi a, Tabor mual leh Hermon mual in lungdamna tawh na min hong phat uh hi. Nangma vang lian mahmah a, na thahatna kigen thei lo hi. Thumanna leh thutan’na tawh na kumpi gam na phut a, itna kip leh thumanna tawh na khempeuh na sem hi. Bang hang hiam cih leh nangmah in gualzawhna lianpi kote nong ngah sak a, nangma angvanna tawh kote nong gualzo sak hi. Kote kihutna in Topa kiang pan hi a, Israelte’ Siangtho Pa, nangmah in ka kumpipa uh nong pia hi. Hunlui lai-in na thuman mipa tungah mang sungah thu genin hih bangin na ci hi: A vanglian khatpa tungah lukhu ka koih zo a, mite lak panin a kitengkhia mi khat ka liansak zo hi. Galte in amah khem zo ngei lo ding a, migilote in amah zo ngei lo ding uh hi. Ama mai-ah a galte ka sugawp ding a, amah a mudahte ka satpuk ding hi. Amah it tawntungin, ama tungah ka thutak ding a, amah, ka gualzosak tawntung ding hi. Mediterranean Tuipi-a kipan Eufrates Gunpi dong amah ka uksak ding hi. Amah in kei kiangah, ‘Nangmah in keima Pa, ka Pasian leh ka kihotkhiatna Suangpi na hi hi,’ hong ci ding hi. Keimah in amah pen tacil leh leitung kumpite lakah a sang penin ka bawl ding hi. Amah ka itna, ka kipsak tawntung ding a, ama tungah ka thuciamna kip tawntung ding hi. Ama suan-le-khakte, kumpi ka hisak ngitnget ding a, a kumpigam, vantung bangin ka kipsak ding hi. ahih hangin amah ka itna ka khiam kei ding a, ka thuciamna ka kipelhsak kei ding hi. Ka thuciamna siasak loin, ka muk pan-a paikhia thute ka khel kei ding hi. A tawntung-a dingin ka siangthona tawh khatvei ka kiciam khin hi; David tungah ka zuau kei ding hi. Ama suan-le-khakte kizom paisuak ding a, van-a ni a taan’lai teng, a kumpigam ka kip sak ding hi. Khapi bangin tua pen kip paisuak ding a, vantung a om lai teng kip ding hi." Ahih hangin tu-in nangmah in amah lawnkhia-in na nial a, na sathau nilhpa tungah hehna tawh na kidim hi. Na nasempa tawh na thuciamna na pelh khin a, leivui lakah ama kumpi lukhu na paihsak hi. Nangmah in ama kulhte khempeuh na sukham khin a, ama gal panmunkipte a sia na suah khin hi. A pai khempeuh in ama nate sutgawp uh a, amah pen a vengte’ nuihsat a suak hi. Nangmah in ama galte na gualzosak a, ama galte khempeuh na lungdam sak khin hi. Hi hi, ama galhiamte a mawkna na suak sak a, gal kidona-ah amah na guallel sak hi. Nangmah in ama khut panin a kumpi ciangkhut na lakhia a, a kumpi tokhom, leilak na den’na hi. Nangmah in ama tangval a thahat hun na tomsak a, maizumna tawh amah na kidimsak hi. Topa aw, nang bang tanvei bucip den ding na hi hiam? Na hehna bang tanvei mei bangin kuang ding ahi hiam? Topa aw, nuntak hun bang zahin tom cih hong phawk in; mihingte a mawkna dingin bawl na hi hiam? A si thei lo mi kua om ahi hiam? Sihna hankhuk panin kua suakta zo ahi hiam? Topa aw, na thumanna tawh David na thuciamna, hunlui lai-a na itna kip koi-ah om ta ahi hiam? Topa in thupha ngah tawntung ta hen; Amen, Amen. Topa aw, nangmah in khang tawntunga kote omna mun na hi hi. Mual liante leitang leh leitung na bawl mapek, a tawntunga kipan a tawntung dongin nangmah in Pasian na hi hi. Nangmah in, mi, leivui na suak kiksak a, “Mihing’ tate aw, ciahkik un!” na ci hi. Bang hang hiam cih leh nangma muhna-ah kum tulkhat sung pen a bei ciangin zanni ahi a, zan-a khan’lawh khat sung tawh ahi zongin, kibang bek hi. Nangmah in mite na phiatkhia hi; amaute in a ihmu tawh kibang uh a, zingsang-a a no kik lopa tawh kibang uh hi; zingsangin palhin thaksuak kik a, nitak ciangin vulin keu uh hi. Bang hang hiam cih leh na sinso-na in kote hong susia a, na hehluatna in kote hong laugawp sak hi. Nangmah in kote’ mawhnate na mai-ah na koih a, ka khialh simnate uh na maitang ah na koih hi. Bang hang hiam cih leh ka hun khempeuh uh na hehna-in bei a, ka kumte uh husan’ khat bangin a bei hi. Kote nuntak in kum sawmsagih sung hi a, cidam le-ung sawmgiat bang hi thei hi; ahih hangin tua hun sung in gimna leh haksatna hi a, tuate bei pakin, kote ka maimang uh hi. Nang hong kizahtakna zah dingin kua in na sinso-na’ vangliatna thei a, na hehna’ husiatna thei ahi hiam? Tua ahih ciangin pilna lungsim ka ngah theih nadingun ka nuntak uh a tom lam ka theih nadingun hong hilh in. Topa aw, hong kihei kik in! Bang tan sauvei ding ahi hiam? Na nasemte hong hehpih in! Ka nuntak tawntung uh lungdamin ka kipak theih nadingun zingsangin na itna kip tawh kote hong lungkimsak in. Kote nong gimsak ni zah leh siatna ka thuak uh kum zah mah, kote hong kipaaksak in. Na nasemte tungah na nasepna leh, amau tate tungah na minthan’na vang hong kilangsak in. Kote’ Topa Pasian’ maipha, komau tungah hong om sak in la, kote’ nasepna khempeuh hong tangtung sak in, hi hi, ka nasepna khempeuh uh-ah hong mavang sak in. Sang Penpa’ liahna sungah a om mi, Vanglianpa’ liim sungah a om mi in, Topa tungah, “Ka bukna leh ka munkip muanhuai, ka muan’ ka Pasian na hi hi,” a ci ding hi. Bang hang hiam cih leh amah in thangsiahpa’ thangzak leh a lauhuai pulnatna panin nangmah hong honkhia ding hi; amah in a khate tawh nang hong tuam ding a, ama khate nuai-ah buk nading na mu ding hi; ama thumanna in nang hong dalin hong hu ding hi. Na kiangah mi tulkhat, na kimkotah mi tulsawm, hong tuk kha ding uh hi; ahih hangin tuate in na kiang nai hong neh lo ding hi. Na mit tawh na en bek ding a, migilote a kithukkikna na mu ding hi. Nangmah in Topa pen na buk nadingin bawlin, Sang Penpa, nang a hu dingin bawl khin na hih manin, na tungah siatna hong tung lo ding a, na innah gimna hong tung lo ding hi. Bang hang hiam cih leh na lampi khempeuhah nangmah hong cing dingin amah in ama vantungmi nang hong kemsak ding hi. Na khete in suang a suihkhak loh nadingin, amaute in a khut uh tawh nang hong dom ding uh hi. Nangmah in humpinelkai leh gul gu nei tung na tawn ding a, na khe nuai-ah humpinelkai khang lai leh gulpi na tuancil ding hi. Amah in itna tawh kei hong bel ahih manin amah ka honkhia ding a, amah in ka min thei ahih manin mun sangna-ah amah ka koih ding hi. Amah in kei hong sap ciangin keimah in amah ka dawng ding hi; haksatna sungah amah ka ompih ding a, amah honkhia-in ka pahtawi ding hi. Nuntak sau tawh amah ka lungkim sak ding a, amah ka honkhia ding hi. Bang hang hiam cih leh Topa aw, nangma nasepna tawh kei hong lungdamsak a, nangma nasepnate hangin lungdamin la ka sa hi. Topa, na sepnate bangzah takin lian! Na ngaihsutnate thuk mahmah! Bang hang hiam cih leh, Topa aw, na galte en in, bang hang hiam cih leh, en in, na galte beimang ding hi; siatna bawl khempeuhte kithehthang ding uh hi. Ahih hangin nangmah in zangsial bangin kei nong hatsak a, kei tungah thupha hong pia-in nong lungdam sak hi. Ka galte’ pukna ka mitte in mu khin a, keimah hong do a gilote’ siatna ka bilte in za khin ta hi. Thuman mi in nisuh kung bangin palh a, Lebanon mual tunga taamtaak kung bangin a khang hi. Topa ’ inn sungah amaute kisuan a, i Pasian’ huang sungah amaute palh uh hi. Topa maang hi; liatna tawh kumpipuan kisilhsak hi; Topa, kumpipuan kisilhsak a, thahatna tawh kidim hi. Hi hi, leitung kikip sak a, kiling ngei lo ding hi; taanglai pek panin na tokhom a kipsa hi a, nang in a tawntung-a om na hi hi. Topa aw, gunte hong khangto-in, gunte in a aw uh hong sangsak a, gunte, nakpi takin hong ging hi. A sangna-a om Topa vanglian hi, tui tampi gingte sangin vanglian zaw hi, tuipi hualte sangin vanglian zaw hi. Na thupiaknate in a hi taktak ahi hi; Topa aw, siangthona in a tawntungin na inn tawh a kilawm hi. A thukkik Pasian, a thukkik Pasian, Topa aw, na hehna hong lakkhia in. Tho in leitung thukhenpa aw, a kiphasak mite tungah amau ngah dinga kilawm pia ta in! Topa aw, migilote bang tanvei, migilote bang tanvei lungdamin omom lai ding ahi uh hiam? Gamtatsiate, bang tanvei kihisak lai ding uh a, a siat gamtatna uh bang tanvei kisialhpih lai ding ahi uh hiam? T opa aw, amaute in nangma mite sugawp uh a, nangma luahte gimsak uh hi. Amaute in meigong numei leh khualmi thatlum uh a, pa nei lote suamlum uh hi; amaute in, “ Topa in mu lo hi; Jakob Pasian in thei lo hi,” hong ci uh hi. Thei tel un, mi lungsim mawl pente aw! Lung pillote aw, cik ciangin pil ding na hi uh hiam? I bil a bawlpa in khua za lo ding ahi hiam? I mit a piang sakpa in, khua mu lo ding ahi hiam? Bang hang hiam cih leh Topa in ama mite nusia lo ding a, ama luahte paidak lo ding hi; bang hang hiam cih leh thutang pen thumante tungah hong tungkik ding a, lungsim thutang khempeuh in amah zui ding uh hi. Kei adingin migilote do dingin kua kipan ahi hiam? Kei adingin siatna bawlte’ lang khatah kua ding ahi hiam? Topa in kei hong huh lo hi leh, gamkhing sungah ka tung khin ta ding hi. Topa aw, “Ka khe taal,” ci-a ka ngaihsut ciangin na itna kip in kei hong kaito hi. Ka lungsim ngaihsutna a tam ciangin kei nong hehnem a, nong lungdam sak hi. Sih nadinga ngeina a bawl, a gilo gam ukte, nang tawh kipawl thei ding ahi hiam? Amaute in thuman mihoihte thah sawm uh a, a mawh baang lo mite, sihna daan thuak sak uh hi. Ahih hangin Topa in keima munkip, keima Pasian, ka belh suangpi suak khin ta hi. Amah in amau mawhnate amau tung mah-ah tungsak kikin, a git lohna hangun amaute maimang sak ding hi; Topa, i Pasian in amaute maimang sak ding hi. Hong pai un, Topa phat ni; eite a hong hu, a hong honkhia pa tungah lungdamna la sa ni. Ama omna-ah lungdamna ko-in pai ni; phatna late, ama tungah lungdam takin sa ni! Bang hang hiam cih leh Topa in a lian Pasian khat hi a, pasian khempeuh tungah Kumpi lian khat ahi hi. Amah in leitung khempeuh uk a, guam thukpen panin mual sangpen dawn dongin amah in uk hi. Amah in a bawlsa tuipite uk a, ama bawlsa leitung zong uk hi. Hong pai un, bia-in kun ni, eite hong Bawl Topa mai-ah khukdin’ ni! Bang hang hiam cih leh amah in eite’ Pasian hi a, eite in ama hong kep mite leh ama khut sunga om tuute i hi hi. Tu ni-in hih bangin ama hong thugen za un: Kum sawmli sung tua minam ka kih a, “Amaute in a lungsim sungah a khial mi hi a, amaute in ka thupiakte mang lo uh hi,” ka ci hi. Tua ahih ciangin ka nopsakna mun-ah amaute a lut lo dingin sinso kawmin ka kiciam hi. Leitung mi khempeuh aw, Topa tungah la thak khat sa un; Topa tungah la sa un! Topa tungah la sa un la, ama min phat un; ni khat khit ni khat ama hong hotkhiatna thu gen tawntung un. Ama minthan’na, minamte lakah gen un la, ama nalamdang septe, mi khempeuh lakah pulak un! Bang hang hiam cih leh Topa lian a, nakpi tak-a phat ding ahi hi; pasian dangte khempeuh sangin amah zahtak zawk ding ahi hi. Bang hang hiam cih leh minam dangte’ pasiante khempeuh in milim hi lel a, ahih hangin Topa ahih leh vantungte a bawlpa ahi hi. Pahtawina leh liatnate ama mai-ah om a, hatna leh hoihnate ama omna mun siangtho-ah a om hi. Minam kimte aw, Topa in minthan’na leh hatna nei hi, ci-in mang un, Topa in nei hi, ci-in mang un. Ama min in a ngah dinga kilawm minthan’na, Topa tungah pia un la, biak piakna hong keng-in ama huang sungah hong pai un! Puan siangtho silhin Topa bia un. Leitung mi khempeuh aw, ama mai-ah ling un! Minamte lakah, “ Topa in uk hi! Hi hi, leitung kikipsak a, liing ngei lo ding hi; amah in mihingte’ thu a manin khen ding hi,” ci un. Vantungmite kipak hen la, leitung lungdam hen; tuipi leh a sunga omte khempeuh awng ta uh hen; Topa in uk hi; leitung lungdam hen la, tuikulh neu tampite zong lungdam ta uh hen! Meiipite leh khuamial sahpite ama kiim-ah om a, thumanna leh thutan’nate in ama tokhom’ bulpi ahi hi. Ama mai-ah mei pai a, a kimkot-a om ama langpangte kangtum hi. Ama khuaphialepte in leitung taang sak a, leitung in mu-in a liing hi. Topa ’ mai, leitung mi khempeuh Topa ’ mai-ah mualliante in khuainun bangin tui suak uh hi. Vantungte in ama thumanna genkhia a, mi khempeuhte in ama minthan’na en uh hi. Bangmah man lo milimte a kisak theihpih, milim a bia mi khempeuhte maizumin kikoih a, ama mai-ah pasian khempeuh kun uh hi. Pasian aw, Zion in za-in nuam a, nangma thukhennate hangin Judah khuapite lungdam uh hi. Bang hang hiam cih leh Topa aw, leitung khempeuh a ukpa na hi a, pasian dang khempeuh sangin nakpi takin na lianzaw hi. Topa in gitlohna a mudahte it a, amah in a mi siangthote’ nuntakna kem hi; amah in migilote khut sung panin amaute honkhia hi. Thuman mite’ tungah khuavak hong taang a, lungsim thutang mite’ tungah lungdamna hong tung hi. Thuman mite aw, Topa sungah lungdam un la, ama min siangtho phat un! Amah in nalamdangte bawl khin ahih manin Topa tungah la thak khat sa un! Ama khut taklam leh ama khut siangthote in amah gualzosak hi. Topa in ama gupkhiatna kitheisak khin zo a, amah in minamte muhna-ah ama thumanna lang sak khin hi. Amah thutakin, it tawntungna nei ahih manin Israelte' tunga a thuciamna tung sak hi. Leitung mi khempeuh in i Pasian’ gupkhiatna mu khin uh hi. Leitung mi khempeuh aw, Topa tungah lungdamin la sa un la, lungdamin awng khia un la phatna la sa un! Laiza lasakna tawh Topa tungah phatna late sa un la, laiza lasakna leh langaih tawh phat un! Pengkulte leh sa-ki aw tawh Topa, Kumpipa mai-ah lungdamna ging sak un! Tuipi leh a sunga omte khempeuh aw, awng un la, leitung leh a tunga teeng khempeuh aw, la sa un. Topa in uk hi; mihonte ling hen! Amah, Kherubte tungah tu hi; leitung liing ta hen! Zion khuapi-ah Topa lian hi; amah in leitung mi khempeuh uk hi. A lian a kihtak-huai ama min, mi khempeuh in phat ta hen. Amah siangtho hi. Thutang a deih, Vanglian Kumpipa aw, nangmah in thuman na phut khin a, Jakob’ sungah thutang leh thuman na semkhia hi. I Topa Pasian phat un; ama khe ngakna munah bia un! Amah siangtho hi! Moses leh Aaronte in ama siampi hi uh a, amah a biate lakah Samuel zong kihel hi. Topa tungah amaute kiko uh a, amah in amaute a dawng hi. Amah in meii khuampi sung pan amaute tungah thu gen a, ama teci pan’nate leh amah in amau tunga a thukham piakte amaute in zui uh hi. Kote’ Topa Pasian aw, nangmah in amaute na dawng hi; nangmah in amaute tungah mawhna a maisak Pasian na hi a, ahih hangin amau gamtat khialhnate a thukkik khat na hi hi. Topa Pasian phat un la, ama mual siangtho-ah bia un; bang hang hiam cih leh i Topa Pasian siangtho hi! Gam khempeuh aw, Topa tungah lungdamna aw ging sak un! Lungdamna tawh Topa ’ na sem un! Ama omna-ah la sa kawmin hong pai un! Topa pen Pasian a hihna thei un! Eite hong bawlpa in amah hi a, eite in ama aa i hi hi; eite in ama mi i hi a, ama gan khahna sunga a tuute i hi hi. Lungdam kohna tawh ama kongpi-ah lut un la, phatna tawh ama huang sungah tum un; Ama tungah lungdam ko un la, ama min phat un! Bang hang hiam cih leh Topa hoih hi; ama itna kip-in kho tawntung a, ama thumanna a khang a khangin a kip hi. Keima la in nangma itna leh thutan’na hi a, nang kong sak ding hi. Topa aw, kong sak ding hi. Paubaan’na a om lo thu bek ka kin ding hi. Cik ciangin kei kiangah nang hong pai ding na hi hiam? Lungsim hoihna tawh ka inn sungah ka gamta ding hi; a sia na peuhmah ka deih kei ding hi. Lam khial mite’ nasepna ka mudah hi; tuate tawh ka kisukha kei ding hi. Lungsim kawina ka deih het kei a, siatna, ngaihsut-in zong ka nei kha kei ding hi. A vengte a gensia sim mite ka susia ding a, kiphatsakna leh kihihsakna lungsim a nei mi ka thuak kei ding hi. Leitungah a thuman mite kei tawh a omkhop theih nadingun maipha ka pia ding a, paubaan’na om lo a, a gamta mi in keima na hong sem ding hi. Khemna a zang mi peuhmah keima inn ah teeng lo ding a, zuauthu a gen mi peuhmah keima omna-ah om thei nawn lo ding hi. Zingsang simin, leitunga migilote khempeuh ka susia ding a, Topa ’ khuapi panin, siatna bawlte khempeuh ka khenkhia ding hi. Topa aw, ka thungetna hong za in la, ka hong thuumna hong ngai in. Ka cihmawh hunin kei kiang panin bu kei in! Keima lam hong nga in la, kong sap ciangin hong dawng pah in! Bang hang hiam cih leh keima nuntakna, meikhu bangin beimang a, ka pumpi, meikuang bangin a sa hi. Lungkham lua-in lopa bangin ka keutum a, an nangawn ka ne zo kei hi. A ging-in ka tautauna hangin ka guh guakin ka om hi. Gamlak-a om musane leh mun kolhna-a om simbu tawh ka kibang hi; ihmu thei loin ka om a, innkhum dawn-a vasa khatguak om tawh ka kibang hi. Sun nilohin ka galte in kei hong zahko a, kei hong simmawhte in ciamsiatna-in ka min zang uh hi. Keima nuntakna in nitak lam-a liim om tawh kibang a, lopa bangin kei ka vulgawp hi. Ahih hangin Topa aw, nang na kip ngitnget a, khang tawntungin nangmah hong kiphawkna a kip hi. Nangmah tho-in Zion khua na hehpih ding hi; amah na angvan hun ding hi ta hi; a kiciangtansa hun hong tung khin hi. Bang hang hiam cih leh na nasemte in tua khua suangtumte itin a leivuite nangawn pammaih sa uh hi. Minamte in Topa hong zahtak-in, leitung kumpi khempeuh in nangma minthan’na hong zahtak ding uh hi. Bang hang hiam cih leh Topa in Zion khua lam ding a, ama minthan’na hong kilang ding hi; amah in, mi cimawhte’ thungetna kin-in, amau’ thuumna simmawh lo ding hi. A suak nai lo mite in Topa a phat theih nadingun, hong tung ding khang mite’ adingin hih thu kiciamteh hen: Amah in, kei a khangtung kimlai ka thahatna hong suktat sak a, ka hunte hong khiapsak khin hi. Keimah in, “Khang tawntungin a kip ka Pasian aw, kei hong khan’sih sak kei in!” ka ci hi. Tanglai hunin nangmah in leitung bulpi na koih a, vantungte zong nangma khut tawh na bawlsa ahi hi. Amaute sia ding a, ahih hangin nang na kip hi; amaute pen puan bangin paatkhia ding hi. Nangmah in amaute pen puan bangin na kheek a, amaute maimang uh hi; ahih hangin nang na kibang ngitnget a, na nuntak kumte in mong nei lo hi. Na nasemte’ tate, lungmuangin om ding uh a, amau suan-le-khakte nangma mai-ah kip ding uh hi. Topa ka phat ding a, ka lungsim khempeuh tawh ama min siangtho ka phat ding hi. T opa ka phat ding a, ama migitna ka mangngilh kei ding hi. Amah in ka mawhna khempeuh hong maisak a, ka natna khempeuh hong dam sak hi. Hankhuk tung ding hong suakta sak a, itna leh hehpihna tampi hong pia hi. Muvanlai bangin ka thahat theih nadingin thupha namkim hong pia hi. Topa in, a kinengniam mi khempeuh adingin thuman, thutangin thu a khen hi. Amah in ama geelna, Moses tungah gen a, ama nasepnate, Israel mite a musak hi. Topa dik-in hehpihna tawh kidim a, heh hak-in, a lian mahmah itna kip tawh kidim hi. Amah in hong taai ngitnget lo ding a, amah heh paisuak lo ding hi. Amah in, eite’ khialhna tawh kituakin hong bawl loin, eite’ mawhna tawh kituakin hong thukkik lo hi. Vantung in leitung panin a san’ mah bangin, amah a zahtakte tungah ama itna kip lianin sang mahmah hi, nisuahna pen nitumna panin a gamlat mah bangin, eite tung panin i mawhna daante gamlapi-ah amah in a nilkhia hi. Pa in a tate a hehpih bangin, Topa in amah a zahtakte hong hehpih hi. Bang hang hiam cih leh amah in eite’ pian’na hong thei hi; eite leivui i hihna a phawk hi. Mihing ahih leh ama nuntak hunin lopa tawh kibang hi; lo lai a paakte bangin amah palh hi; bang hang hiam cih leh huih in amah seem-in beimang a, tua mun in amah thei kha nawn lo hi. Topa in ama tokhom vantungah phut khin a, amah in mun khempeuh a uk hi. Ama thugen a ngai, ama thu bang-a a sem no a thahat, no ama vantung mite aw, Topa phat un! Ama deih banga gamta ama nasem, ama vantungmi hon khempeuhte aw, Topa phat un! Ama ukna mun khempeuh ah a om, ama bawlsate aw, Topa phat un. Ke’n, Topa ka phat ding hi. Topa ka phat ding hi. Topa ka Pasian aw, nang na lian mahmah hi. Nangmah in minthan’na leh liatna na silh hi. Puanza bangin, khuavak tawh nang na kituam a, vantungte pen puanbuk bangin na zal hi. Van-a om tui tungah na inn na lam a, meiipite, na leeng dingin na bawl a, huih khate' tungah na tuang hi. Huihte nangma kamtai dingin na bawl a, mei leh meikuangte nangma nasemte na hisak hi. A ling ngei lo dingin leitung pen ama bulpi tungah na phut hi. Nangmah in, puan tawh tuam bangin leitung pen tui thukna tawh na tuam a; tuite in mualte tuumcip hi. Na thuhilhna hangin tua tuite taikhia uh a, na thupiakna awging a zak uh ciangin kikhawhkhia uh hi. Nangmah in amau adinga na sehnasa munah mualte kahto-in, guamte kiasuk hi. Amaute in leitung a tuamkik loh nadingin nangmah in amaute’ kantan loh ding gamgi khat na phut hi. Nangmah in kuamte sung panin ciktui na phulkhiasak hi; mualte kikal-ah amaute luang uh a, gamlak ganhing khempeuhte’ dawn ding tui na pia hi; gam sakolte in amau dangtakna tua-ah phasak uh hi. Tua tui kiangah huih lak vasate om uh a, singhiangte lakah amaute ham zaizai uh hi. A sangna mun na omna panin nangmah in mualte tungah guah na zusak a, nangma thupha tawh leitung kidim hi. Nangmah in ganhingte’ ading lopa, leilak panin an a ngah theih nadingin mihing in a khawh dingin ankungte, mihing lungsim a nuamsak ding leenggahzu, a maitang a zolsak ding sathau, mihing lungsim a hatsak ding an na piangsak hi. Topa in a suan, Lebanon mual-a taamtaak singte, tua ama singkungte in guahtui tampi a ngah hi. Tua singte tungah vasate in bu bawl uh a, taaksing kungte lakah vasa golpite in bu tom uh hi. Mualsangte in sathak’ ading hi a, suangtumte in bilpi ganhingte’ belh ding ahi hi. Nangmah in, hun ciamteh nadingin khapi na bawl a, ni in ama tum hun ding a thei hi. Nangmah in khuamial na bawl a, gamlak ganhing khempeuh a vakkhiat hun in zan sung ahi hi. Humpinelkai khanglaite in amau sa ngah nadingin hawk uh a, amau an ding Pasian’ tung pan ngah uh hi. Ni a suah ciangin amaute kihemkhia uh a, a kua sung uh-ah lum uh hi. Mi pen, nasem dingin kuankhia uh a, nitak mateng na sem uh hi. Topa aw, nangma sepsa bangzah takin tam! Nangmah in ciimna tawh tuate khempeuh na bawl khin hi; leitung in nangma pian’sak ganhingte tawh kidim hi. Hua lai-ah, ganhing alian aneu, sim zawh loh-a a tam, a vak mua-mua-na, lianin a zai mahmah tuipi om hi. Hua lai-ah teembawte leh gualnop nadinga na bawl Awle pai hi. A hun ciangin an piak ding ngak-in hihte khempeuh in nang hong en uh hi. Na piak ciangin amaute in ne uh a, an na pia a, amaute lungkim uh hi. Na maitang na seel ciangin amaute khasia uh hi; amau’ husan’na na lakkhiat ciangin, amaute si-in amau’ pian’na leivui-ah ciahkik uh hi. Nangmah in na hu na san’khiat ciangin amaute a kipiangsak hi a, nangmah in leitung na bawl thak hi. Ka nuntak lai teng Topa tungah la ka sa ding a, ka hin’ lai teng ka Pasian phatna la ka sa ding hi. Topa in kei hong lungdamsak ahih manin, ka lasaknate in amah lungdamsak ta hen. Mawhneite leitung panin beimang hen la, migilote om nawn kei hen! Ke’n, Topa ka phat ding hi. Topa ka phat ding hi. Topa tungah lungdamna ko-in, ama minphat un la, ama nasepnate, mite lakah kitheisak un! Ama tungah la sa un la, ama tungah phatna la sa un, a lamdang ama nasepte khempeuh gen un! Ama min siangtho sungah lungdam un la, Topa a zong mite lungdam ta hen! Topa leh ama hatna zong un la, ama mai a tawntungin zong un! Amah in Topa i Pasian ahi hi; ama thupiaknate leitung khempeuh ading ahi hi. Amaute tawm mahmah-in, bangmah gentham lo uh a, khualmi hi-in, minam khat panin minam khatah gam khat panin gam khatah a vak kawikawi lai takun, amah in amaute kuamah nen’niamsak lo hi; amaute hangin amah in kumpite thuhilhin, “Ka sathau nilhte sukha kei un, ka kamsangte tungah siatna bawl kei un!” ci hi. Amah in leitungah kialpi tungsakin, an khempeuh a siatsak ciangin, amah in, Josef a kici, sila-a kizuak mi khat, amaute mai-ah a sawl hi. Ama khete pen kolte in nasak a, ama ngawng pen sikkol sungah kikoih hi; ama thugente a tun’ matengin Topa in amah ze-et hi. Kumpipa in amah khahkhia dingin mi paisak a, mihingte a ukpa in amah khah hi; Tua ciangin Izipt gamah Israel a pai hi; Ham’ gam sungah Jakob peemta-in va om hi. Topa in ama mite pungsak mahmah a, a galte sangin amaute hatzaw sak hi. Ama mite mudahin, ama nasemte, khemsiamna tawh a bawl dingin, amau lungsim uh amah in kiheisak hi. Amah in, ama nasem Moses leh ama teelsa Aaron sawl hi. Amaute in, ama limte amaute lakah, nalamdangte, Ham’ gam sungah bawl uh hi. Amah in khuamial sawlin, leitung khimzing sak hi; ahih hangin Izipt mite in ama thu langpang uh hi. Amah in amau’ tuite sisan suak sak a, a ngasate uh sisak hi. Amau’ leitang tung leh amau kumpipa inn sung nangawn, uiphukte tawh kidim hi. Amah kam pau a, tho honpite leh thokangte, gam sung khempeuh ah hong om hi. Amah in amau’ guah dingin gialpi leh amau gam sung khempeuh a taangsak khuaphialep, amaute pia hi. Amah in amau’ leengguite leh theikungte vattansak a, amau gamsung singte kuaihtansak hi. Amah kam pau a, kauphete leh tangngolte, sim zawh lohin hong pai uh a, gam sunga kung khempeuh leh amau leitang pan-a a gah khempeuh nektum sak mang hi. Amah in, amau thahatna pan-a a piang masa, Izipt mi tacil khempeuh satlum hi. Tua ciangin amah in, ngun leh kham tawh Israelte paikhiatpih a, amaute a vekpi-in cidamin thahat kim uh hi. Amaute a paikhiat ciangun Izipt mite lungdam mahmah uh hi, bang hang hiam cih leh amaute kihta uh hi. Amah in, a liah dingin meiipi kaaisak a, zan ciangin khuamuh nadingin mei om sak hi. Amaute in ngen a, amah in, vamimte leh vantung panin anlum tampi a pia hi. Amah in suangpi hong a, tui phulkhia hi; guntui bangin sehnel gamah a luang hi. Bang hang hiam cih leh a siangtho ama thuciamna leh ama nasem Abraham a phawk hi. Tua ahih ciangin, ama mite lungdamna tawh, ama teel mite lasakna tawh a paikhiatpih hi. Topa phat un! Topa tungah lungdamna ko un, bang hang hiam cih leh amah hoih a, ama itna kip kho tawntung hi! Topa ’ nasepna lianpite kua in genkhia thei-in, amah phatna khempeuh lakkhia thei ding ahi hiam? Thutang a zui, a tawntunga thuman-a gamta mite in mi nuamsa ahi hi! Ka pate uh leh kote ka khial khin uh hi; mawhna ka bawl khin uh a, ka gitloh gamtat khin uh hi. Ka pate un Izipt gamah a om lai-un nangma nasepna lamdangte ngaihsun lo uh hi; nangma itna kip a tampite phawk lo uh a, San Tuipi-ah Sang Penpa hong lehdo uh hi. Ahi zongin amah in, a lian mahmah ama vangliatna a kitheihsak nadingin, ama min a ngaihsutna-in amaute honkhia hi. Amah in San Tuipi thuhilh a, tua tuipi kang hi; amah in gamlak kantan bangin tuithuk kantanin amaute paipih hi. Tua ahih ciangin amah in, galte khut sung panin amaute hon a, a langpangte’ vangliatna panin amaute khahkhia hi. Tui in amau’ langte tummang a, amaute a suakta khat zong om lo uh hi. Tua ciangin amaute in ama thu um uh a, amah phatna sa uh hi. Ahih hangin amaute in ama nasepte mangngilh pah uh a, ama thugen ding ngak loin gamta pah uh hi. Ahih hangin amaute in gamlak ah deihluat mahmah na nei uh a, sehnel gam sungah Pasian ze-et uh hi; amah in amaute’ nget pen pia a, ahih hangin amaute sungah siatna tung sak hi. Giahphual-ah, mite in Moses leh Topa ’ mi siangtho Aaron a hazat uh ciangin, lei kihongin Dathan valhtum a, Abiram’ pawlte vukcip hi. Amaute sungah mei hong piangkhia a, meikuang in migilote kangtum hi. Amaute in Horeb gam sungah bawngno khat bawl uh a, a kisung tua milim bia uh hi. Amaute in Pasian’ minthan’na pen, lopa a ne bawngtal lim tawh kheekna uh hi. Tua ahih ciangin amaute a suksiat nading a hehna panin a heikhia dingin ama mai-ah a teelpa Moses ding hi kei leh—amaute ka susia ding hi, amah in ci hi. Amaute in gamnuam simmawh uh a, ama thuciamna um lo uh hi. Amaute a puanbuk sung uh-ah phun uh a, Topa ’ thu ngai lo uh hi. Tua ciangin amaute in Peor mun-a Baal pasian beel uh a, nuntakna a nei lote tunga biakna kipiate a ne uh hi; amau’ gamtatna tawh Topa ’ heh nading piangsak uh a, amaute lakah pulnatna hong tung hi. Tua ciangin Finehas ding-in hong palai-a, pulnatna hong dai hi. Tua thu pen, a khang a khangin ama thumanna-in kiciamteh tawntung hi. Topa in amaute a thupiak bangin, amaute in tua mite that lo uh hi. Minam dangte tawh kihelin amau gamtat bangbang a gamta dingin kisin uh hi. Amau adingin thangzak ahi, amau milimte’ na seppih uh hi. Amaute in, a tapate uh leh a tanute uh dawi biakna-in nei uh hi; amaute in, Kanaan gam milimte a biakna-un, mawhna nei lo a tanute uh leh a tapate uh that uh a, hih mi thahna hangin gamsung a nin a suak hi. Tua ahih ciangin amau sepna tawh amaute a nin suak uh a, amau gamtatnate tawh palhngulhna a bawl uh hi. Tua ciangin ama mite tungah Topa ’ hehna hong kikuantawh a, amah in ama luah minamte a kih hi; amau a mudah minamte in a uk theih nadingin tua minamte’ khut sungah amaute a pia hi. A galte un amaute nengniam uh a, amau’ khut nuai-ah koih uh hi. Amah in amaute tam veipi honkhia hi; ahih hangin amaute in lehdona lungsim vom uh a, amau mawhna hangin amaute kiniam koih hi. Tua bang ahi ta zongin, amah in amaute’ kikona a zak ciangin, amaute’ cihmawhna a don hi. Amaute ading a ngaihsutna-in ama thuciamna a phawk a, ama itna kip lianpi tawh kizui-in a kolsak hi. Amaute a man mi khempeuhte in a khasiatpih zah dong dingin amah in amau tungah a piangsak hi. Topa, kote’ Pasian aw, kote hong hon in la, nangma min siangtho kong phat theih nading uh leh nangma tungah lungdamna kong koh theih nadingun, minamte lak panin kote hong kaikhawm kik in. Topa, Israel Pasian in, a tawntung a kipan a tawntung dongin thupha ngah ta hen! Mi khempeuh in, “Amen” ci ta uh hen! Topa phat un! Topa tungah lungdamna ko un, bang hang hiam cih leh amah hoih a, ama itna kip kho tawntung hi! Pawlkhatte gamlakah gammang uh a, a teen’ nading uh khuapi tun’na lampi mu lo uh hi; gilkial dangtakin amaute sibup uh hi. Tua ciangin amaute in a lungkhamna uh-ah Topa ko uh a, amau cihmawhna panin amah in honkhia hi; amau’ teen’ nading khuapi a tun’ matengun amah in lampi man-ah amaute paipih hi. Ama itna kip leh mihing tate tungah a lamdang ama nasepnate hangin amaute in Topa ’ tungah lungdamna ko ta uh hen! Bang hang hiam cih leh amah in a dangtakte phasak a, a gilkialte nahoih tawh vah sak hi. Pawlkhatte, khuamial sung leh a ziing sungah tu uh a, sikkol kibulhin gimna thuakin thongkia uh hi, bang hang hiam cih leh amaute in Pasian’ thute lehdo uh a, Sang Penpa’ thugente nial uh hi. Nasep haksatna tawh amaute’ lungsim niamsak hi; amaute puk uh a, a huh ding kuamah om lo hi. Tua ciangin amaute in a lungkhamna uh-ah Topa ko uh a, amau cihmawhna panin amah in honkhia hi; amah in, khuamial sung leh a ziing sung panin amaute lakhia a, amau a kihennate botsatkhia hi. Ama itna kip leh mihing tate tungah a lamdang ama nasepnate hangin amaute in Topa ’ tungah lungdamna ko ta uh hen! Bang hang hiam cih leh amah in sumngo kongkhakte sukhamin, sikzawlte tum nih suah hi. Pawlkhatte, amaute’ khialhna hangin, gimna thuak uh a, amau lehdona hangin hailawh uh hi. amaute in an peuhmah kih uh hi, amaute, sihna kongpi nai ta uh hi. Tua ciangin amaute in a lungkhamna uh-ah Topa ko uh a, amau cihmawhna panin amah in honkhia hi; amah in ama’ thu vaikhakin, amaute dam sak a, siat nading panin amaute honkhia hi. Ama itna kip leh mihing tate tungah a lamdang ama nasepnate hangin amaute in Topa ’ tungah lungdamna ko ta uh hen! Lungdamkoh piaknate pia-in, ama nasepnate lungdam late tawh amaute gen sak un! Pawlkhatte, teembaw tawh tuipi-ah pai uh a, tuiliante tungah sumbawl na sem uh hi; amaute in, tuithuk tungah Topa ’ gamtatna, a lamdang ama septe mu uh hi. Bang hang hiam cih leh amah in thupia a, tuipi hualte piangsaka, huihpi nungsak hi. Amaute, van-ah kilawnto-in, a thukna-ah kiasuk uh hi; a lauhuai siatna sungah amau lungsim han’na bei hi; amaute zukham bangin hoisuk hoito uh a, a cih nading mel uh thei nawn lo uh hi. Tua ciangin amaute in a lungkhamna uh-ah Topa ko uh a, amau cihmawhna panin amah in honkhia hi. Amah in huihpi dai sak a tuipi hualte a bei hi. Tua ciangin, tua tuihualte a khawl manin amaute lungdam uh hi, amah in amaute’ utna khua-ah paipih hi. Ama itna kip leh mihing tate tungah a lamdang ama nasepnate hangin amaute in Topa ’ tungah lungdamna ko ta uh hen! Amaute in mihonte kikhopna sungah amah pahtawi-in, upate kikhopna sungah amah phat ta uh hen. Amah in sehnel gam pen bualtuite suaksak a, leitang keu pen ciktui suak sak hi. Amah in, tua munah gilkialte teeng sak a, amaute in a teen’ nading uh khuapi khat sat uh hi; amaute in lo-ah an tuhin, leenggui suan uh a, a gah tampi tak ngah uh hi. Ama thupha tawh ante nakpi takin pung hi; amah in, amau bawngte zong kiam sak lo hi. Amaute pen, nen’niamna, haksatna leh dahna tawh kikhiamin a kiniamkoih ciangin, amah in, uliante tungah simmawhna buaksukin, lampi om lohna gam sungah vakvai sak hi; ahih hangin amah in thuakna sung panin a cimawhte laamto a, tuu honpite bangin amau innkuante pung sak hi. Lungsim thutangte in hih thu mu in kipak uh hi; a gilo khempeuhte in ahih leh amau kam a cih ciat uh hi. A pil peuhmah in hih thute don hen la; Topa ’ itna kip lungngaingai ta hen. Pasian aw, ka lungsim a kigingsa-in om hi! Ka sa ding hi, phatna late ka sa ding hi! Kei ka tho ding hi. Harp lasakna leh laiza lasakna aw, tho un! Zingsang khuavak hong phong ning! Topa aw, mite lakah nang tung lungdamna kong pia ding a, minam dang lakah nangma tungah phatna ka sa ding hi. Bang hang hiam cih leh na itna kip in vantung ban a, na thumanna in meiipite banto hi. Pasian aw, vantungte’ tungah sangto lai in! Leitung khempeuhah na minthan’na om sak in! Nangma it mite, nangma hatna tawh kote hong hon in la, kong ngetna hong pia in! Ama biakinn sungah Pasian in thuciam khin hi: “Gualzo-a lungdamna tawh Shekhem gam khenkhia-in Sukkot gamkuam ka sehkhia ding hi. Gilead gam in keima aa hi a, Manasseh gam in keima aa hi; Efraim gam in ka sik lukhu hi a, Judah gam in ka ciangkhut hi. Moab gam in ka kisilna kuang hi a, Edom gam tungah ka khedap ka lawn hi; Filistia gam tungah gualzawhna tawh ka awng hi. Kua in khuapi muanhuai-ah kei hong paipih ding hiam? Kua in Edom gamah kei hong paipih ding hiam? Pasian aw, nangmah in kote hong don lo khin hi lo na hi hiam? Pasian aw, komau’ galkapte tawh na kuankhia kei hi. Ka galdona uh-ah huhna kote hong pia in, bang hang hiam cih leh mihing’ huhna a mawkna hi! Pasian tawh khauh takin i hih ding hi; amah in i galte hong sikcipsak dingpa ahi hi. Keima hong phat Pasian aw, dai dide in om kei in! Bang hang hiam cih leh migilote leh zuauthu gente keima langah hong pang uh a, keimah hong gensia-in, zuauthu bekbek genin nei uh hi. Amaute in muhdahna kamte pau-in kei hong gensia uh a, thu om lopi-in kei hong langpan’ uh hi. Amaute ka itna, amau adinga thu ka ngetsakna nangawn, amaute in hong thukna-in kei hong mawhsak uh hi. Tua ahih ciangin amaute in hoihna’ adingin siatna, itna’ adingin muhdahna tawh kei hong thuk uh hi. Ama langah migilo khat pangsak in la, thusitna thuak dingin mawhna zong mipa khat paipihsak in. Amah thu a kisit ciangin, thu lelin pusuak sak in la, ama thungetnate zong mawhna suak sak in. Amah a khan’ tom hen la, midang khat in ama nasep za ngah ta hen! Ama tate, pa nei lo hi ta hen la, a zi pen meigong numei hi ta hen! Ama tate vak kawikawi-in khut dawhin ngen hen la, a kisiasa amau’ teen’na mun panin kihawlkhia ta hen! Ama leibatna-pa in a neih khempeuh man hen la, khualmite in a om lai sunsunte sut ta hen. Ama tungah migitna kuamah in lak kei hen la, pa nei lo ama tate, kuamah in hehpih kei ta hen! Ama suan-le-khakte bei hen la, khang khat sungin ama min maimang ta hen! Topa ’ mai-ah a pu a pate’ mawhna kiciamteh hen la, a nu’ mawhna kimaisak kei ta hen! Topa ’ mai-ah tua mawhnate om-omsak in la, leitung panin amah a kiphawkna bei ta hen! Bang hang hiam cih leh amah in migitna lah ding ngaihsun lo a, a zawng a cimawhte leh lungsim kitamzan mite a sih dongun bawlsia hi. Amah in mi samsiat nuamsa hi; ama tungah samsiatnate tungsak in! Amah in thupha pia nuam lo hi; kuamah in amah thupha pia kei ta hen! amah in puan bangin samsiatna silh hi; tua pen ama pumpi sungah tui bangin, a guhte sungah sathau bangin lutin kizel ta hen! Tua pen, amah a kituamna puan tawh kibang hen la, ni sim-a amah a kigakna kawnggak tawh kibang ta hen! Hih pen, keimah hong mawhsakte’ tung, kei hong gensiate’ tungah, Topa ’ kiang pan-a thaman hi ta hen! Ahih hangin Pasian ka Topa aw, na min na ngaihsutna tawh keima taangin hong pang in la, na itna kip hoih ahih manin kei hong honkhia in! Bang hang hiam cih leh kei genthei-in ka cimawh a, ka lungsim tawng dongin hong nasak hi. Nitak lam-a niliim bangin kei ka bei a, kauphe bangin kei hong kisingkhia hi. An ngolhna hangin ka khukte zaw a, ka pumpi sa zong kiam khin ta hi. Kei, amaute’ nuihsatin ka om a, amaute in kei hong muh ciangun hong lupeisan uh hi. Topa ka Pasian aw, kei hong huh in! Nangma itna kip tawh kituakin kei hong hon in! Topa aw, hih pen nangma bawl, nangma khut in a sep ahihna amaute thei sak in! Amaute in kei hong samsiatsiat hen, ahih hangin nangmah in kei thupha nong pia ding hi. Ka langte zahhuaisak in la, na nasempa keimah hong kipaksak ta in! Kei hong mawhsakte in mindaina silh uh hen la, puanza silh bangin amau’ maizumna tawh kituamcip ta uh hen! Topa tungah ka kam tawh lungdamna nakpi takin ka ko ding a, mihonte lakah amah ka phat ding hi. Bang hang hiam cih leh sihna daan a piapa’ khutsung panin a hon dingin mi cimawhpa’ taklam-ah amah hong ding hi. Topa in ka to kumpipa tungah, “Na galte nangma khe ngakna-in ka bawl matengin ka taklam khutah tu in,” a ci hi. Topa in Zion panin na kumpi ciangkhut hong puak hi. Na galte’ lakah uk in! Na mihonte mual siangtho tungah na makaih ciangin, utna lungsim tawh na mite hong kipia ding uh hi. Daitui bangin zingsang ciangin na khangnona nangma tungah hong tung ding hi. Topa in thuciam zo a, ama ngaihsutna kheel lo ding hi. “Melkhizedek bangin nang in a tawntungin siampi na hi hi,” a ci hi. Topa in nangma taklam-ah om hi; ama heh ni-in amah in kumpite zogawp ding hi. Kumpipa in minamte lakah thukhen ding a, tua munte misi luang tawh dimsak ding hi; amah in a zai mahmah leitungah ukpite susia ding hi. Amah in lampi gei-a luitui dawnin thahat ding a, amah a gualzo-in om ding hi. Topa phat un, lungsim thutangte a omna, mihon kikhopna sungah ka lungsim khempeuh tawh Topa tungah lungdamna ka ko ding hi. Topa ’ nasepnate lian a, hoih a sa mi khempeuh in tuate kankan uh hi. Ama nasepna in pahtawina leh minliatna tawh kidim a, ama thumanna in kip tawntung hi. Amah in phawk tawntung dingin a lamdang ama sepnate hong bawl a, Topa dikin hehpihna a nei hi. Amah in amah zahtakte an pia a, ama thuciamna hong phawk tawntung hi. Amah in ama mite tungah minamte’ gamh a piakna tawh ama vangliatna hong lak khin hi. Ama nasepnate khempeuh ah amah thumanin citak a, ama thupiaknate muan’taak mahmah hi. A tawntungin tuate kip ngitnget a, thuman leh thutang tawh zuih ding ahi hi. Amah in a mite hong honkhia a, amah in a tawntunga dingin thupiakna a bawl khin hi. Ama min, siangtho-in kihtak-huai mahmah hi! Topa zahtakna in pilna kipatna ahi hi; ama thupiak a zuite khempeuh tungah thukhen siamna a pia hi. Amah phat tawntung ding ahi hi. Topa phat un. Topa zahtak-in ama thupiaknate nuam a sa mahmah mi in thupha ngahpa ahi hi! Ama suan-le-khakte in leitungah vanglian ding a, lungsim thutang a nei mipa’ suan-le-khakte’ thupha kipia ding hi. Hauhna leh nopsaknate ama inn sungah dim ding a, ama thumanna kip tawntung ding hi. Lungsim thutangte’ adingin khuamial sung panin khuavak hong taangkhia hi; Topa dik a, hehpihna nei-in, thuman hi. Cingh gamtatin mi tungah leitawi pia a, thutangin a gamta mipa tungah thu hoih hi. Amah kiliing lo taktak ding a, amah kiphawk tawntung ding hi. Amah in thusia zak ding lau lo hi; Topa muang a, ama lungsim a kip hi. Amah lau lo, lunghimawh loin om hithiat a, amah a langpangte a guallelh ding lamtak theitel hi. Amah in hawmkhia zuahzuah a, mizawngte tungah pia khin hi; ama migitna kip tawntung a, amah vanglianin, kipahtawi ding hi. Migilo in hih thu mu-in a hehsuak a, a ha gawigawi-a tuimang hi; migilopa’ lametna in a mawkna suak ta hi. Topa phat un! Topa ’ nasemte aw, phat un, Topa ’ min phat un! Topa ’ min in tu-a kipanin a tawntungin thupha ngah ta hen! Nisuahna pan nitumna dongin Topa ’ min phat ding ahi hi! Topa in minam khempeuhte tungah uk a, ama minthan’na in vantung sangin sang zaw hi. Amah in leivui panin mizawngte lamto-in, ninphual panin mi cimawhte leh a lungkhamte domto a, uliante tawh kikhawlsak a, ama mite ulian-in a bawl hi. Amah in tasel numei inn guan a, ta a nei nu lungdamin a bawl hi. Topa phat un! Israelte Izipt gam pan pusuakin, Jakob innkuanpihte paudang a zang mite kiang pan a paikhiat uh ciangin, Judah gam in ama biakinn suak a, Israel gam in ama ukna gam a suak hi. Tuipi in mu-in taikhia a, Jordan gun a nung kik hi. Mualliante tuutal bangin diang uh a, mualneute tuuno bangin a diang uh hi. Tuipi aw, na taikhiat nading, Jordan gun aw, na nungkik nading, Mualliante aw, tuutal bangin, mualneute aw, tuuno bangin na dian’ nading uh bang in hong nasak ahi hiam? Kote tungah hi loin, Topa aw, kote tungah hi loin, na itna kip leh na thumanna hangin nangma tungah minthan’na om ta hen! Bang hangin minamte in, “Amaute’ Pasian koi-ah om ahi hiam?” ci laizang ding ahi uh hiam? Vantungah eite’ Pasian om a, ama ut peuhpeuh a hih hi. Amaute’ milimte pen ngun leh kham hi a, mihingte’ khut tawh kibawl ahi hi. Amaute in kam nei napi-in pau thei lo uh a, mit nei napi-in khua mu thei lo uh hi. Amaute in bil nei napi-in khua za lo uh a, nak nei napi-in nam thei lo uh hi. Amaute in khut nei napi-in lawng thei lo uh a, khe nei napi-in lam pai thei lo uh hi; amaute in aw gingsak thei lo uh hi. Amaute a bawlte leh amaute a muangte khempeuh pen amaute mah tawh kibang uh hi. Israelte aw, Topa muang un! Amah in note hong huhpa leh hong hupa ahi hi. Aaron innkuante aw, Topa muang un! amah in note hong huhpa leh hong hupa ahi hi. Topa a zahtakte aw, Topa muang un! Amah in note hong huhpa leh hong hupa ahi hi. Topa in eite hong phawk a, amah in thupha hong pia ding hi; amah in Israel mite, thupha hong pia ding a, amah in Aaron’ innkuante thupha hong pia ding hi; amah in Topa a zahtakte alian aneu-in thupha hong pia ding hi. Topa in note leh na tate uh hong pung sak ta hen! Van leh lei a bawl Topa in note thupha hong pia ta hen! Vantung pen Topa ’ aa hi a, ahih hangin leitung pen mihingte’ tungah amah in hong pia khin hi. Misite ahi a, gamdaihna sunga a pai peuhpeuhte in ahi zongin Topa phat lo uh hi. Ahih hangin eite in tu-a kipanin a tawntungin Topa i phat ngitnget ding hi. Topa phat un! Topa ka it hi, bang hang hiam cih leh amah in ka aw hong za a, ka thuumnate hong ngai hi. Amah ka sap sialin, ka sapna aw hong ngai hi. Sihna khau in kei hong gakcip hi; Leinuai sihna in kei hong mancip a, natna leh lungkhamna ka thuak hi. Tua ciangin Topa ’ tungah thungen in: “ Topa aw, nang tungah kong thuum hi, kei hong hon in,” ka ci hi. Topa dikin thuman a, i Pasian in hehpihna nei hi. Topa in thu thei lo mi hong kem a, kei hong kiniam koih ciangin amah in hong huh hi. Lungmuang takin ka om ding hi; bang hang hiam cih leh kei tungah Topa hong thunuam hi. Topa in sihna panin kei hong honkhia hi; ka khituite hong kangsak a, kei hong guallelsak lo hi. Tua ahih ciangin, mihingte’ omna leitung, Topa ’ mai-ah gamta-in ka om hi. “Keimah in nakpi takin gimna ka thuak hi,” ka cih ciang nangawnin ka upna mah ka len cinten hi; lunghihmawhna tawh, “Mi khempeuh zuau gen vive hi,” ka cih hun nangawnin ka um lailai hi. Kei tunga ama thupha tampite Topa ’ tungah bangci thuk ding ka hi hiam? Topa in kei hong hotkhiat ka lungdamna hangin, ama kiangah tuiphih biakna ka paipih ding hi. Ama mi khempeuhte a omna mun, Topa ’ tungah ka thuciamnasa ka pia ding hi. Ama misiangthote’ sihna pen Topa ’ muhna-ah manpha mahmah hi. Topa aw, keimah in nangma nasem ka hi hi; nangma nasem ka hi a, na nasem nu’ ta ka hi hi. Keimah hong kikhihnate nong sutkhiatsak zo hi. Lungdamkoh biakpiakna nang tungah kong pia ding a, Topa tungah thu kong ngen ding hi. Minam khempeuh aw, Topa phat un! Mi khempeuh aw, amah phat un! Bang hang hiam cih leh eite tungah ama itna kip lian mahmah a, Topa ’ thutakna a tawntungin kip ngitnget hi. Topa phat un! Topa tungah lungdamna ko un, bang hang hiam cih leh amah hoih a, ama itna kip kho tawntung hi! “Ama itna kip kho tawntung hi,” Israelte in ci ta uh hen. “Ama itna kip kho tawntung hi,” Aaron innkuante in ci ta uh hen. “Ama itna kip kho tawntung hi,” Topa a zahtakte in ci ta uh hen. Ka cihmawhna-ah Topa ka sam a, Topa in hong dawng-in mun tanzau-ah hong koih hi. Topa in kei hong ompih hi; bangmah ka kihta kei ding hi. Mi in kei bang hong cih zo ding ahi hiam? Kei hong huh dingin kei lamah Topa om hi; kei hong mudahte pen gualzawhna tawh ka en ding hi. Mi i muan’ sangin Topa belh ding hoihzaw hi. Uliante i muan’ sangin Topa belh ding hoihzaw hi. Minam khempeuh in kei hong umcih uh hi; ahih hangin Topa ’ vang tawh amaute ka sugawp hi. Amaute in kei hong umcih hi, ka kimkot ah hong umcih uh hi; ahih hangin Topa ’ vang tawh amaute ka sugawp hi. Amaute in khuaipi bangin kei hong umcih uh a, lingkung meikang bangin amaute kuang uh hi; Topa ’ vang tawh amaute ka sugawp hi. Kei ka puk nadingin nakpi takin hong kisawn a, ahih hangin Topa in kei hong huh hi. Topa in a vanglian, a thahatin kei hong bawl a, amah in keimah hong honpa ahi hi. Ngai un! thuman mite’ puanbuk sungah gualzawh lungdamna la kisa a, “ Topa ’ taklam khut in a lian nate hih khin hi! Topa ’ taklam khut kipahtawi a, Topa ’ taklam khut in a lian nate hih khin hi!” kici hi. Kei ka si kei ding a, ka hing ding hi; Topa ’ sepnate ka gengen ding hi. Topa in nasia takin kei hong thuhilh a, ahih hangin kei hong sisak lo hi. Topa tungah lungdamna ko-in ka lut theih nadingin thumanna kongpite kei hong hon in. Hih in Topa ’ kongpi ahi hi; thuman mi bek hih kongpi-ah lut ding hi. Nangmah in kei hong dawngin, ka kihotkhiatna suak khin na hih ciangin nangma tungah ka lungdam hi. Inn lamte in a nilkhiat suang pen innkiu suang bulpi suak khin ta hi. Hih in Topa ’ nasepna hi a, eite’ mit-ah lamdang hi. Hih ni pen Topa hong piak ni hi a, eite lungdamin i kipak ding hi. Topa aw, kote hong hon in, hong thuum ung! Topa aw, kong thuum uh hi, daupaina hong pia in! Topa ’ min tawh hong paipa in thupha ngah ta hen! Topa ’ inn panin nang kong phat uh hi. Topa in Pasian ahi hi; amah in eite tungah nopsakna hong pia zo hi. Na khut uh-ah singhiang tawi-in, biaknatau kimkotin pai un. Nangmah in keima Pasian na hi a, nangma tungah lungdamna kong ko ding hi; nangmah in keima Pasian na hi a, nangmah kong phat ding hi. Topa ’ tungah lungdamna ko un, bang hang hiam cih leh amah hoih a, ama itna kip kho tawntung hi. Amau gamtatna-ah paubaan’na om lo a, Topa ’ ngeina sunga gamtate in thupha ngah ahi hi! Nangma thuhilhte limtak-a zuih dingin thu nong pia hi. Nangmah ngeina kipte zuihna-ah ka gamtatna kip ta hen! Tua ciangin, nangma thupiakte khempeuh mitsuanin nei khin ka hih manin, kei ka maizum kei ding hi. Nangma biakna ngeina kipte ka sin khit ciangin lungsim thutang tawh nangmah kong phat ding hi. Nangma ngeina kipte ka zui ding hi; kei hong nusia suak kei in. Tangval khat in ama gamtatna bangci siangtho kep theih ding ahi hiam? Nangma thu mah bangin kepna tawh a gamtatna siangthosak thei ding hi. Ka lungsim khempeuh tawh nang kong zong hi; na thupiaknate panin kei hong pialsak kei in! Nang tungah kong khialh loh nadingin ka lungsim sungah nangma thu ka khol hi. Topa aw, thupha ngah ta in; na ngeina kipte kei hong hilh in! Nangma hong piak na biakna ngeina kipte khempeuh ka gengen ding hi. Hauhnate khempeuh sangin nangma thuhilhnate nuam ka sa zaw hi. Nangma thuhilhnate lungngaingai-in, nangma lampite ka mitsuan ding hi. Nangma ngeina kipte-ah nuam ka sa ding a, nangma thu ka mangngilh kei ding hi. Nungta-in nangma thu ka zuih theih nadingin na nasempa tungah hong cingh in. Nangma thukham sung panin a lamdang nate ka muh theih nadingin keima mitte hong hon’sak in. Keimah in leitungah peemta ka hi hi; kei kiang panin na thupiaknate seel kei in! Nangma biakna ngeina kipte a tawntungin ka lunggulh venvan hi. Nangmah in, na thupiaknate panin a pialkhia, a kisamsiat, a kiphasakte na thuhilh hi; nangma thuhilhnate zui khin ka hih manin amau’ hong nuihsatna leh hong simmawhnate panin kei hong suakta sak in. Uliante tu sukin keimah lang pangin thu a vaihawm uh hangin na nasempa in na ngeina kipte ngaihsunsun ding hi. Na thuhilhnate ka deih hi; tuate in keimah thu hong lakte ahi hi. Guallel-in leivui lakah ka lum hi; na thu omsa bangin kei hong hingsak in! Ka gamtatnate kong gen ciangin, nangmah in kei nong dawng hi, na ngeina kipte kei hong hilh in! Nangma ngeina kipte kei hong theitelsak in nangma nasepna lamdangte ka ngaihsunsun ding hi. Dahna in kei hong vukcip hi; nangma thu omsa bangin kei hong thakhauhsak in! A man lo lampite ka zuih khak loh nadingin hong kem in; hong hehpih in la, na ngeinate kei hong hilh in. Thumanna lampi ka teel khin a, nangma biakna ngeina kipte ka deih hi. Topa aw, nangma thuhilhnate ka pom hi; kei hong zahhuaisak kei in! Keima theihna nong zaisak ciangin nangma thupiaknate lawpna tawh ka zui ding hi. Topa aw, na ngeina kip lampi kei hong hilh in; among dongin ka zui ding hi. Nangma thute kemin ka lungsim khempeuh tawh ka zuih theih nadingin thu theihtelna kei hong pia in. Nangma thupiakna lampi-ah kei hong paipih in, bang hang hiam cih leh tua-ah nuam ka sa hi. Nangma thuhilhnate’ lamah ka lungsim awnsak in la, ngah nading lamah awn sak kei in! Bangmah-a kimang lo nate, kei hong kinsak kei in la, nangma thu omsa bangin hong nungta sak in. Nangmah hong zahtakte’ adinga na thuciamna pen na nasempa tungah hong kip sak in. Ka kihtak hong kikonate heikhia in; bang hang hiam cih leh nangma biakna ngeina kipte hoih mahmah hi. En in, nangma thuhilhte ka lunggulh hi; na thumanna tawh kei hong hing sak in! Topa aw, na ciamna bangin na itna kip, na hotkhiatna keima tungah hong tung sak in; tua ciangin, na thu muang ka hih manin kei hong zahkote tungah ka dawn’ nading om ding hi. Nangma biakna ngeina kipte lamenin om ka hih manin a man thu hong gen thei sak tawntung in. Nangma thu tatsat lo-in ka zui ngitnget ding hi; nangma thuhilhnate zuih ding hanciam ka hih manin, nuam takin ka nungta ding hi. Kumpite’ mai-ah nangma thute ka gen ding a, maizumna ka thuak kei ding hi; bang hang hiam cih leh ka deih nangma thupiakna zuih ding nuam ka sa hi. Keima deih ahi nangma thupiaknate ka zahtak a, na ngeina kipte ka lungngaingai ding hi. Keimah nong lametsakna ahi na nasempa’ tunga na thuciamna hong phawk in. Hih in ka thuakna-ah keima kihehnepna hi a, na thuciamna in kei, nuntakna hong pia hi. Mi kiphasakte in kei hong zahko gawp a, ahih hangin nangma thukham panin kei ka pial kei hi. Topa aw, hunlui lai-a nangma biakna ngeina kipte ka ngaihsut ciangin ka lung hong nuam hi. Nangma thu a nusia migilote hangin ka heh a suak hi. Hih leitung ka omna peuh ah, nangma ngeina kipte, la phuak-in ka sa sa hi. Topa aw, zan-in nangma min ka phawk a, nangma thu ka zui hi. Nangma thuhilhte zui ka hih manin hih thupha in keima tungah hong tung hi. Topa pen keima tanh ahi hi; na thute zuih ding ka kiciam hi. Ka lungsim khempeuh tawh na maipha kong ngen hi; na thuciamna bangin kei hong hehpih in. Ka gamtatnate ka ngaihsun a, nangma ngeinate zuih ding ka kiciam hi; kei kinawhin, nangma thupiaknate zuih ding ka zekai kei hi. Migilote’ khau in kei hong vialh hangin, nangma thu ka mangngilh kei hi. A man nangma biakna ngeina kipte hangin nangmah phat dingin zankim lai takin ka tho hi. Kei pen, nangma thuhilhte a zui a, nangmah a hong zahtak khempeuhte’ kikholhpih ka hi hi. Topa aw, leitung in nangma itna kip tawh kidim hi; na ngeina kipte kei hong hilh hi! Topa aw, na thuciamna bangin na nasempa na limbawl hi. Nangma thupiakte um ka hih manin thu khentel theihna leh theihna hong hilh in. Dan nong piak ma-in lam ka pial thei zel-a, ahih hangin tu-in na thu ka zui hi. Nangmah na hoih a, a hoih nate na sem hi; na ngeina kipte kei hong hilh in. Mi kiphasakte in kei’ langah zuauthu vive gengen uh a, ahih hangin ka lungsim khempeuh tawh na thuhilhte ka zui hi; amaute’ lungsim in thu theithei loin kheengcip a, ahih hangin ke’n nangma thu sung nuam ka sa hi. Nangma ngeina kipte ka sin theih nadingin gimna ka thuak pen kei’ adingin hoih mahmah hi. Nangma kam sung pan-a thu in kham leh ngun tul tampite sangin kei adingin hoihzaw hi. Nangma khutte in kei hong piangsakin a hong bawl hi; na thupiaknate ka sin theih nadingin kei tungah thu theihtelna hong pia in. Nangma thuciam muang ka hih manin nang hong zahtakte in kei hong mu-in lungdam ding uh hi. Topa aw, na biakna ngeina kipte man hi ci-in ka thei a, na thumanna hangin kei dan nong pia hi. Na nasempa tunga na thuciamna bangin keimah hehnem dingin na itna kip a baihsa-in hong om sak in. Kei ka nuntak theih nadingin na hehpihna kei tungah hong tung sak in; bang hang hiam cih leh nangma thu in nuam ka sakna ahi hi. Mi kiphasakte zahhuaisak in, bang hang hiam cih leh amaute in khemna tawh kei hong lumlet uh hi; ke’n ahih leh, na thuhilhte ka lungngaingai ding hi. Nangma teci pan’nate a theih nadingun nang hong zahtakte kei lamah hong kiheisak in. Guallelh maizumna ka thuak loh nadingin nangma ngeina kipte a kicing takin a zui zo mi hong hisak ta in! Nong hotkhiat ding ka ngakngakna-in ka tha bei ta hi; nangma thu muangin ka lamen hi. Na thuciamnate ka etetna-in ka mitte thazaw ta hi; “Cik ciangin kei hong hehnem ding na hi hiam?” kong ci hi. Bang hang hiam cih leh kei pen meikhu lak-a a kikoihdak savun-um tawh ka kibang a, ahih zongin nangma ngeina kipte ka mangngilh tuan kei hi. Na nasempa in bang tanvei ngak lai ding ka hi hiam? Kei hong bawlsiate cik ciangin thu khen ding na hi hiam? Nangma thu a zui lo, mi kiphasakte in keimah siahna in gum to uh hi. Nangma thupiaknate khempeuh man taktak hi; amaute in thuman lopi-in kei hong bawlsia uh hi; kei hong huh in! Amaute in kei hong that zo dektak uh hi; ahih hangin keimah in na thuhilhnate ka mangngilh tuan’ kei hi. Nangma kam pan-a na teci pan’nate ka zuih theih nadingin na itna kip tawh kei hong hing sak in. Topa aw, vantungah nangma thu kip tawntung hi. Nangma thumanna in khang tawntungin kip hi; nangmah in leitung na kipsak a, om tawntung hi. Nangma sehna tawh tuni dongin amaute kip uh hi; bang hang hiam cih leh na khempeuh in nangma nasem ahi hi. Nangma thu pen nuam a sa hi lo hi leng, ka thuakna-ah kei ka kisia khin zo ta ding hi. Nangma thuhilhte ka mangngilh ngei kei ding hi; bang hang hiam cih leh tuate tawh nong nungta sak hi. Kei in nangma aa ka hi hi, kei hong hon in; bang hang hiam cih leh nangma thuhilhte zuih ding ka hanciam hi. Migilote in keimah that dingin hong buk uh hi; ahih hangin na teci pan’na ke’n ka lungngaingai ding hi. A kicing-a a kingaihsun nate khempeuh in mong a neihna ka mu khin a, ahih hangin nangma thupiakna in mong nei loin zai mahmah hi. Na thu deih mahmah ing! Sun tawntung-a ka lungngaih-ngaih ahi hi. Na thupiakna in ka langte khempeuh sangin a pilzaw-in kei hong bawl hi; bang hang hiam cih leh tua in kei tawh omkhawm tawntung hi. Ka siate khempeuh sangin thu ka telzaw hi, bang hang hiam cih leh na teci pan’nate ka ngaihsunsun hi. Khanghamte sangin thu ka tel zaw hi, bang hang hiam cih leh na thuhilhte ka zui hi. Nangma thu ka zuih theih nadingin gamtat sia khempeuh ka pelh hi. Nangmah in kei hong hilh khin na hih manin na biakna ngeina kipte panin ka pial kei hi. Nangma thute khum mahmah a, khuaizu sangin ka kam-ah khumzaw hi. Na thuhilhnate hangin thu theihtelna ka ngah hi; tua ahih ciangin a man lo lampi khempeuh ka mudah hi. Na thu in kei, lam hong lak ding meivak hi a, ka paina lampi-ah khuavak ahi hi. A thuman nangma biakna ngeina kipte zui dingin thu ka kiciam khin a, ka kipsak hi. Nakpi takin gimna ka thuak hi; Topa aw, nangma thu omsa bangin kei hong nungta sak in! Topa aw, phat-a kong biaknate hong sang in la, nangma biakna ngeina kipte kei hong hilh in. Ni simin ka nuntakna lauhuai ngitnget a, ahih hangin nangma thu ka mangngilh tuan kei hi. Migilote in, kei thang hong siah uh a, ahih hangin na thuhilhte panin kei ka pial kei hi. Nangma biakna ngeina kipte in tawntung keima luah ahi hi; hi hi, tuate in keima lungdamna ahi hi. Nangma ngeina kipte ka sih mateng a zui tawntung dingin ka lungsim ka khensat hi. Nangma sungah hong thuman lote ka mudah a, ahih hangin keimah in nangma thu ka deih hi. Nangmah in keima bukna mun leh ka lum na hi hi; nangma thuciamna ka muang hi. No, siatna bawlte aw, Pasian’ thupiaknate ka zuih theih nadingin kei kiang panin paikhia un. Kei ka nuntak theih nadingin na thuciamna tawh kizui-in kei hong huh in la, ka lametna-ah kei hong zahhuaisak kei in. Kei ka suahtak theih nading leh na ngeina kipte sungah nuam ka sak ngitnget theih nadingin kei hong huh in. Nangma ngeina kipte panin a pial khiate khempeuh na nilkhia hi; hi hi, amau’ khemsiamna in a mawkna ahi hi. Nangmah in leitung migilote khempeuh sik-ek bangin na ngaihsun hi; tua ahih ciangin na teci pan’nate ke’n ka deih hi. Nang kong zahtakna-in ka khuasikmul suak a, na thukhennate ke’n ka zahtak hi. Keimah in, thutang leh thumanin ka gamta hi; kei hong nengniamte’ khut sungah hong nusia kei in. Na nasempa’ adingin hong kikham in la, mi kiphasakte kei hong nengniamsak kei in. Nangma hotkhiatna leh a man na thuciamna hong tun’ ding ka etna-in ka mitte a thazaw hi. Na itna kip tawh kituakin na nasempa tungah hong bawl in la, na ngeina kipte kei hong hilh in. Keimah in na nasempa ka hi hi; na thuhilhnate ka theih nadingin thu theihtelna hong guan in! Topa aw, na thu kipalsat khin ahih ciangin na thukhen hun ding hi ta hi. Tua ahih ciangin khamte, kham hoihte sangin nangma thupiakna ke’n ka deihzaw hi. Tua ahih ciangin na thuhilhte khempeuh tawh kituakin kei ka gamta hi; a man lo lampi khempeuh ka mudah hi. Na thuhilhnate lamdang mahmah a, ka lungsim khempeuh tawh tuate ka zui hi. Nangma thute hon’khiatna in khuavaksak a, thu thei lote, thu theihtelna a guan hi. Na thupiaknate ka lunggulhna-in, ka kam ka-in ka leii ka kha hi. Nangmah hong itte tungah na hih ngei bangin kei lamah hong kihei in la, hong hehpih in. Nong ciamsa bangin ka puk nading panin hong kem in la, kei’ tungah siatna gualzosak kei in. Nangma thuhilhte ka zuih theih nadingin, kei hong nengniamte’ kiang panin kei hong honkhia in. Na nasempa tungah na maitang hong taangsak in la, na ngeina kipte kei hong hilh in. Mite in nangma thu zui lo ahih manin ka khitui hawk luan’in a luang hi. Topa aw, nang na thuman a, na thukhennate zong thuman mahmah hi. Nangma koihsa ngeina kipte in thuman in thutak hi. Ka galte in nangma thu kin lo uh ahih manin, ka hehna mei bangin a kuang hi. Na thuciamnate lim takin ki-entel zo a, nangma nasempa in deih mahmah hi. Kei ka neu a, hong kisimmawh hi, ahih hangin na thuhilhnate ka mangngilh kei hi. Nangma thumanna kip tawntung a, na thukham zong man tawntung hi. Dahna leh lungkhamna ka tungah hong tung a, ahih hangin na thupiaknate pen nuam ka sakna ahi hi. Na teci pan’nate in a tawntungin thuman hi; thu theihtelna hong guan in; ka nungta ding hi. Ka lungsim khempeuh tawh kong kiko hi; hong dawng in, Topa! Na ngeina kipte ka zui ding hi. Nang tungah kong kiko hi; na thuhilhte ka zuih theih nadingin kei hong hon in. Khuavak ma-in tho-in huhna ngenin, ka kiko a, nangma thuciamna hong tun’ ding lamenin ka om hi. Nangma thuciamna a lungngaingai dingin, zan khuavak-in ka zanhak hi. Topa aw, na itna kip tawh kizui-in ka aw hong za in la, nangma thutan’na tawh kizui-in ka nuntakna hong kem in. Gitloh ngimna tawh kei hong bawlsia amaute in kei hong neh ta uh hi; amaute in nangma thu ngaihsutin nei lo uh hi. Ahih hangin Topa aw, kei kiangah nang nong nai a, nangma thupiaknate khempeuh ahi taktak ahi hi. Tuate a tawntunga kip dinga na bawl ahihna thu, nangma thuhilhnate panin sawtpi-in ka thei hi. Ka thuakna hong en in la, kei hong honkhia in, bang hang hiam cih leh nangma thu ka mangngilh kei hi. Ka thu-ah hong pang in la, kei hong suaktasak in; na ciamsa bangin kei hong honkhia in! Migilote, kihonkhia lo ding hi; bang hang hiam cih leh amaute in nangmah thukhamte zui lo uh hi. Topa aw, na hehpihna lian hi; nangma biakna ngeina kip tawh kituakin kei hong honkhia in. Kei hong bawlsiate leh ka langte tam mahmah a, ahih hangin nangma thu panin kei ka pial tuan kei hi. Thuman lo mite enin ka kih hi, bang hang hiam cih leh amaute in nangma thupiaknate zui lo uh hi. Nangma thuhilhnate bangzah tak-a ka deihna hong ngaihsun in! Topa aw, na itna kip tawh kizui-in kei hong hon in. Nangma thubulpi in thumanna hi a, a man, nangma biakna ngeina kipte khempeuh a tawntungin kho ngitnget hi. Uliante in thu om lopi-in kei hong bawlsia uh a, ahih hangin na thute, lamdang sa-in ka thupi ngaihsut hi. Van-kinusia tampi a ngahpa bangin, na thuciamna-ah ka lung a dam hi. Zuaunate zadahin ka kih a, ahih hangin nangma thu ka deih hi. A man, nangma biakna ngeina kipte hangin ni khatin sagih vei nang kong phat hi. Nangma thu a deihte in lungnopna lianpi ngah uh a, bangmah in amaute tuksak zo lo hi. Topa aw, nangma hong hotkhiat ding ka ngak a, nangma thupiaknate ka sem hi. Nangma thuhilhnate ka zui a, tuate ka nakdeih mahmah hi. Na thuhilhnate leh na biakna ngeina kipte khempeuh ka zui a, ka gamtatna khempeuh nang nong mu hi. Topa aw, kong kikona aw in nangma kiang hong ban ta hen la, nangma thu omsa tawh kizui-in thu theihtelna kei hong guan in. Keima thuumna in nangma kiang hong ban hen la, nangma thu omsa tawh kizui-in kei hong honkhia in. Na ngeina kipte kei hong hilh na hih manin, nang ka hong phat tawntung ding hi. Na thupiaknate khempeuh man ahih manin, nangma thu phatna ka sa ding hi. Nangma thuhilhte hong zui ka hih manin, keimah huh dingin a kigingsa-in om tawntung in. Topa aw, nong hotkhiat ding ka lamen a, nangma thu sungah nuam ka sa mahmah hi. Nang kong phat theih nadingin kei hong nungta sak in la, na biakna ngeina kipte kei hong huhsak in. A gammang tuu bangin lam ka pial khin hi; tua ahih manin na nasempa hong zong in. Bang hang hiam cih leh nangma thupiaknate ka pelh kei hi. Ka cihmawh ciangin Topa tungah ka kiko a, amah in hong dawng hi. Topa aw, mizuaute leh mikhemte kiang panin kei hong honkhia in.” Mikhem theite aw, note’ tungah bang hong kipia ding a, note’ tungah bang hong kihih lai ding ahi hiam? Galhangpa’ thaltang hiamte leh sesing hol am! Note lakah ka om khak pen, Meshek gam sunga teen’ khak sangin haksa zaw a, Kedar mite’ lak-a teen’ khak sangin siahuai zaw hi. Gal kilemna a deih lo mite lakah sauvei ka teeng lua khin ta hi. Kei in gal kilemna a ngaihsun mi ka hi hi; ahih hangin kilem nading thu ka gen ciangin amaute in hong do nuam semsem uh hi. Keimah in mual tung lam ka ento hi. Keimah huhna koi lai pan hong pai ding ahi hiam? Van leh lei a bawl Topa kiang panin keima huhna hong pai hi. Amah in ka khe taalsak lo ding a, kei hong kempa lusu lo ding hi. En un, Israel a kempa pen lusu lo a, zong ihmu lo hi. Topa in nangmah hong cing ding a, nangmah hong hu dingin na kiangah hong om hi. Sun-in ni in nang hong gimsak lo ding a, zan-in kha in nang hong sukha lo ding hi. Topa in, siatna khempeuh panin nang hong hu ding a, amah in a muanhuai-in nang hong kem ding hi. Topa in, tu-a kipan a tawntungin na pusuahna na sungtumna-ah nang hong kem ding hi. Amaute in kei tungah, “ Topa ’ innah pai ni,” hong cih uh ciangin ka kipak hi. Jerusalem aw, na kulh kongpi sungah kote hong tungin ka ding khin ta uh hi. David innkuante’ kumpi tokhom ahi, thukhen nading kumpi tokhom tua lai-ah kikoih hi. Jerusalem khuapi’ nopsak nading thu ngen un la, “Nang hong itte a dau uh pai ta hen! Na kulhte sungah lungnopna om hen la, na galvilna tausangte’ huam sungah lungmuan’na om ta hen” ci un. Sanggamte leh kikholhpihte ka khualna-in, “Nang sungah nopna om ta hen!” ka ci ding hi. Topa i Pasian’ inn ka khualna-in nangma nopsakna ka zong ding hi. Vantung-a a ompa aw, nangmah kong ento hi! En in, nasem pasalte in a topa uh muang a, nasem numei in a tonu-uh a muan’ mah bangin, ko tungah hehpihna nong neih matengin Topa kote’ Pasian kong mitsuan uh hi. Kote hong hehpih in, Topa aw, kote hong hehpih in, bang hang hiam cih leh kote in ka thuak zawh loh uh simmawhna ka thuak uh hi. A ut ut-a gamta mite’ hong zahkona, mi kiphasakte’ hong simmawhna tawh sau vei ka gim lua khin ta uh hi. Ei lam-ah Topa, hong pang lo hi leh, Israelte in tu-in ci ta uh hen— Mihingte ei lang pangin hong thawh ciangin ei lamah Topa hong pang lo hi leh, ei tunga amau hehna a kisosuah ciangin amaute in eite a hingin hong nawmvalh khin ding uh hi; tuikhang in eite hong taikhia in, tuihualte in hong tummang khin ding a, tuipi husiate in hong tummang khin ding hi. Amau’ suksiat dingin eite a hong piakhia lo Topa in thupha ngah ta hen! Thangsiahte thangzak panin vasa a suahtak bangin eite i suakta hi; thangkhau kibottat a, eite i suakta khin ta hi. Van leh lei a bawl Topa ’ tung panin eite hong kihuhna hong pai hi. Topa a muang mite pen, ling loin a om tawntung Zion Mual tawh kibang hi. Mualte in Jerusalem kimkotah a om mah bangin, Topa in ama mite’ kimkotah tu-a kipanin a tawntungin om ding hi. Thuman mite in khialhna a bawl khak loh nadingun, amaute tunga kipia leitang tungah migilote in amaute uk paisuak lo ding hi. Topa aw, a hoih mite tung leh na thupiakna a zui mite tungah hehpihna hong nei in! Ahih hangin amau’ gitlohna a zui mite pen siatna bawlte daan na piak ciangin, amaute tawh pia khawm in. Israelte tungah nopna om ta hen! Topa in Zion-ah eite hong ciahpih kik ciangin, i mang tawh kibang liang hi. Lungdamin i nui a, lungdam lua-in la i sa hi. Tua ciangin minam dangte kiho-in, “ Topa in amau adingin na lianpite bawl khin ta hi,” kici uh hi. Topa in eite’ adingin na lianpite bawl khin ta a, eite i kipak hi. Topa aw, lei keuna mun-ah guah in tui a puak bangin kote’ nopsaknate a ngei hong bangsak kik ta in! Khitui tawh khai a tuhte, lungdam-a kikona tawh an lasak ta in! Kap kawm-in kuankhia-in a tuh ding khaici a pua mi in lungdam-a kikona tawh buhlomte pua-in innah hong ciah ding hi. Topa in inn lam kei leh, a lam mite’ nasepna in a mawkna ahi hi. Topa in khuapi hu kei leh, khuapi cingte’ cin’na in a mawkna ahi hi. Zingsangin tho baih-in, gimpi-a nangma’ sepsa an na nek hakna in a mawkna ahi hi; bang hang hiam cih leh amah in ama itte tungah a ihmut sung nangawnun a pia hi. En un, tapate pen Topa ’ tung pan-a letsong hi a, tate pen ama hong piak thupha ahi hi. Mi khat in a khangno lai-in a neih tapate pen galhangpa’ khut sunga om thaltangte tawh kibang hi. A thallawng dimin tua bang thaltang a neipa in mi lungdam ahi hi. Amah guallel-in zahhuai ngeilo ding hi. Topa zahtak-in ama thu a zui mi khempeuh thupha ngah mi ahi hi! Na khut tawh na sepsa thaman na ne ding a, na lungdamin na ma vang ding hi. Nangma inn sungah na zi in a gah pha mahmah leenggui tawh kibang ding a, na sabuai kim-ah na tate in oliv-no dawng hilhhelh tawh kibang ding uh hi. En un, Topa a zahtak mi tua bangin thupha kipia ding hi. Topa in Zion panin nang thupha hong pia hen la, na nuntak tawntung Jerusalem’ nopsakna mu ta in! Na tute a mu dingin hong siam hen la, Israelte tungah nopna om ta hen! “Amaute in ka neu lai-a kipanin nakpi takin kei hong gim sak uh hi,”Israel in tu in ci ta hen— “Amaute in ka neu lai-a kipanin nakpi takin kei hong gimsak uh hi; ahih hangin amaute in kei hong zo nai lo uh hi. Lo khote in lei a kuih bangin ka nungzang kuikeek uh a, tu-ma-kuakte tawh kibangsak uh hi. Topa thuman a, amah in migilote’ henna khaute su-tat khin hi. Zion a mudahte khempeuh maizumin kinungkiksak ta hen! Topa aw, a thukpi sung panin nang tungah kong kiko hi! Topa aw, ka aw hong za in! Ka thumna aw-gingte hong ngai in! Topa aw, nangmah in mawhnate ciamteh lecin, Topa aw, kua in thuak zo ding ahi hiam? Ahih hangin nang hong kizahtak theih nadingin nangmah in mawhna na maisak hi. Topa ’ hong huh ding lawpna tawh ka ngak a, ama thugen ka muang hi. Galvilte in zingsang a ngaklah sangin, Topa ka ngaklah zaw hi. Israel aw, Topa muang in! Bang hang hiam cih leh Topa itna kip tawntung a, amah in hong honkhia nuam tawntung hi. Amah in, Israelte a mawhna khempeuh panin tankhia ding hi. Topa aw, ka lungsim kiliansak nawn lo a, kei ka kihisak nawn kei hi; kei adingin a lian lua leh a lamdang luate ngaihsutin ka nei kei hi. A nu’ nawi tawh a kikhenta naupang bangin daii takin ka om dide zo ta hi; a daii hit-hiat-a a om naupang tawh ka kibang hi. Israel aw, tu-a kipanin a tawntungin Topa muang in. En un, Jaar gam sungah ka mu uh hi; cihna thuthak Ephrathah-ah kiza hi. “Ama omna mun-ah va pai ni; ama khe-ngakna-ah va bia ni!” Topa aw, tho in la a vanglian na thuciamna singkuang tawh na omna munah hong pai in. Nangma siampite in diktatna puan silh uh hen la, na misiangthote lungdamin awng ta uh hen. Na nasempa David tungah thu na ciam zo hi; na sathau nilhpa nial kei in. Topa in a pelh loh ding kiciamna taktak khat David tungah a ciam a, “Nang sung pan-a na tate khat na kumpi tokhom tungah ka koih ding hi. Na tate in, amau tunga ka hilh ding ka thuciamna leh ka teci pan’nate a zuih uh leh, amau’ tate zong na kumpi tokhom tungah tu paisuak ding uh hi,” na ci hi. Bang hang hiam cih leh Topa in Zion teel khin zo a, amah in tua mun pen ama teen’ nadingin a deih hi. “Hih in ka om tawntung nading mun ahi hi; deih ka hih manin hih lai munah ka teeng ding hi. Ama beem-le-pang thupha tampi ka pia ding a, a mizawngte, an ka vak kham ding hi. Ka hotkhiatna thu, a siampite ka taangko sak ding a, a mi siangthote lungdamin la sa-in awng ding uh hi. Keimah in tua lai-ah David’ suan-le-khakte kumpi lian-in ka koih ding a, ka sathau nilhpa’ ukna ka kipsak ding hi. Ama galte maizumna tawh ka kidimsak ding a, ahih hangin ama kumpigam khangin zai semsem ding hi,” na ci hi. En un, sanggam bangin mite pumkhat suakin a tutkhawm ciangin bangzahin hoihin nuam ahi hiam! Tua in, a puanpi ngawng tunga Aaron’ khamul kaisuk zui-a a taaksuk, a lu tunga sathau manpha tawh kibang hi. Tua in, Zion mualte tunga a kia Hermon mual pan-a daitui tawh kibang hi. Bang hang hiam cih leh Topa in nuntak tawntungna thupha tua mun-ah a pia hi. Zan khuavak Topa ’ inn sunga a ding, no, Topa ’ nasem khempeuhte aw, hong pai un la Topa phat un! Siangtho mun lamah na khutte uh laamto un la, Topa phat un! Van leh lei a bawl Topa in Zion panin note thupha hong pia ta hen! Topa phat un, bang hang hiam cih leh Topa hoih hi; ama min phatna lasak un, bang hang hiam cih leh phat nop huai hi. Bang hang hiam cih leh Topa in ama adingin Jakob teel a, ama neihsa dingin Israel teel khin ta hi. Bang hang hiam cih leh Topa lian hi, ci-in ka thei a, eite’ Topa pen pasian khempeuh sangin lianzaw hi. Vantung leh leitung, tuipi leh a thukna sung khempeuhah Topa in ama ut peuhpeuh a bawl hi. Amah in leimong panin meiipi kai sakin, guahzuk nadingin khuaphialepte bawl a, ama saalte panin huih pusuak sak hi. Amah in, Izipt gam sungah mihing leh ganhing tacil khempeuh vatmai hi; Izipt aw, nangma sungah, lim leh nalamdangte, Faro leh a nasem khempeuhte daan piakna-in a lak hi; minam tampite vatmai-in kumpi vangliante that a, Amor kumpipa Sihon, Bashan kumpipa Og leh Kanaan kumpipa that hi. Amau leitang khempeuh, ama mi Israelte’ luah dingin a piakhia hi. Topa aw, nangma min kip tawntung hi, Topa aw, nangma minthan’na khang tawntungin a kip hi. Bang hang hiam cih leh Topa in ama mite’ thu khenin, ama nasemte tungah hehpihna nei ding hi. Minamte’ milimte pen mihingte’ khut tawh a kibawl, ngun leh kham ahi hi. Amaute in kam nei uh a, ahih hangin amaute pau thei lo uh hi, amaute in mit nei uh a, ahih hangin amaute in khua mu thei lo uh hi, amaute in bil nei uh a, ahih hangin amaute in khua za thei lo uh hi, amaute’ kam sungah naksuk naktohna theihna nei lo uh hi. Milim a bawl mite pen milimte mah bangsak in!—milim a muang khempeuhte zong tua milimte mah bangsak in! Israel mite aw, Topa phat un! Aaron’ innkuante aw, Topa phat un! Levi mite aw, Topa phat un! Topa a zahtakte aw, Topa phat un! Jerusalem inn-a a nei, Zion-a om Topa in thupha ngah ta hen! Topa phat un! Amah hoih ahih manin Topa tungah lungdamna ko un, bang hang hiam cih leh ama itna kip kho tawntung hi. Lungdamna pen pasiante’ Pasian’ tungah ko un, bang hang hiam cih leh ama itna kip kho tawntung hi. Lungdamna pen topate’ Topa tungah ko un, bang hang hiam cih leh ama itna kip kho tawntung hi; nalamdang lian a bawl amah bek a hipa' tungah, bang hang hiam cih leh ama itna kip kho tawntung hi; theihna tawh vantungte a bawlpa’ tungah, bang hang hiam cih leh ama itna kip kho tawntung hi; tuite tungah leitung a zalpa tungah, bang hang hiam cih leh ama itna kip kho tawntung hi; khuavak lianpite a bawlpa tungah, bang hang hiam cih leh ama itna kip kho tawntung hi; sun pen ni a uksakpa tungah, bang hang hiam cih leh ama itna kip kho tawntung hi; zan pen kha leh aksite a uksakpa tungah, bang hang hiam cih leh ama itna kip kho tawntung hi; Izipt gam tacil khempeuh a vatmai-pa tungah, bang hang hiam cih leh ama itna kip kho tawntung hi; amau sung pan Israelte a paikhiatpihpa tungah, bang hang hiam cih leh ama itna kip kho tawntung hi; a baan zanin a khut thahat tawh a paikhiatpihpa tungah, bang hang hiam cih leh ama itna kip kho tawntung hi; San Tuipi a phelkhappa tungah, bang hang hiam cih leh ama itna kip kho tawntung hi; Israelte tua tui laizang a kantan sakpa tungah, bang hang hiam cih leh ama itna kip kho tawntung hi; ahih hangin Faro leh a mihonte San Tuipi sungah a thalpaihpa tungah, bang hang hiam cih leh ama itna kip kho tawntung hi; gamlak nawkin ama mite a paipihpa tungah, bang hang hiam cih leh ama itna kip kho tawntung hi; kumpi liante a vatmaipa tungah, bang hang hiam cih leh ama itna kip kho tawntung hi; kumpi minthangte a thatpa tungah, bang hang hiam cih leh ama itna kip kho tawntung hi. Amor’ mite kumpipa Sihon leh, bang hang hiam cih leh ama itna kip kho tawntung hi; Bashan kumpipa Og, bang hang hiam cih leh ama itna kip kho tawntung hi; amaute’ leitang pen gamhluah dingin a pia khiapa tungah, bang hang hiam cih leh ama itna kip kho tawntung hi; ama nasem Israel tungah gamh-a a piapa tungah, bang hang hiam cih leh ama itna kip kho tawntung hi; miniam i hih laitak-a hong phawkpa tungah, bang hang hiam cih leh ama itna kip kho tawntung hi; i galte kiang pan hong honkhiapa tungah, bang hang hiam cih leh ama itna kip kho tawntung hi; nuntakna a nei khempeuh a vaakpa tungah, bang hang hiam cih leh ama itna kip kho tawntung hi. Vantung’ Pasian’ tungah lungdamna ko un, bang hang hiam cih leh ama itna kip kho tawntung hi. Zion khuapi i ngaihsut khak ciangin Babilon luite gei-ah eite tusukin i kapkap hi. Tua lai-a gialhek kungte tungah i laiza lasaknate i khai hi. Bang hang hiam cih leh ei hong man mite in la i sak ding hong deih a, ei hong bawlsiate in i gualnop ding hong deihin, “Zion late khat hong sak un!” hong ci uh hi. Topa ’ la, gamdang ah bangci sak thei ding i hi hiam? Jerusalem khuapi aw, nang kong mangngilh taak leh ka taklam khut bui ta hen! Nang kong phawk kei a, kei’ lungdamna a lianpen sangin Jerusalem a sangzaw in kong koih kei taak leh ka dang tawngah ka leii toncip ta hen! Topa aw, Jerusalem a siat ni-a Edom mite in, “Sumai un, sumai un! A bulpi dongin sumai un!” a cih vialna uh phawk in. Mi a susia, Babilon aw, kote tunga nong bawl bangin nang tungah hong thukpa in lungdamna ngah ta hen! Na taneute hong laksakin suangtumpi den’na-a hong neihsakpa in lungdamna ngah ta hen! Topa aw, ka lungsim khempeuh tawh nang tungah lungdamna kong ko a, pasiante’ mai-ah nangmah phatna ka sa hi; nangma biakinn siangtho lamah ka kun a, na itna kip leh na thumanna hangin na min kong phat hi; bang hang hiam cih leh na khempeuh sangin na min leh na thu a liat zawkna na lak hi. Nang kong sap ciangin kei nong dawng a, na thahatna tawh kei nong thakhauhsak hi. Topa aw, leitung kumpi khempeuh in na thuciamnate za khin uh ahih manin nang hong phat ding uh hi. Topa ’ minthan’na lian ahih manin amaute in Topa ’ nasepna ziate la-in sa ding uh hi. Bang hang hiam cih leh Topa lian napi-in amah in a neute don hi; ahih hangin a kiphasakte ahih leh amah in gamlapi panin mu thei hi. Haksatna tuamtuamte ka thuak ciangin kei nong kem hi; a heh ka galte, kei’ tangin nong dosak a, na thahatna tawh kei nong honkhia hi. Topa in kei adinga a ngaihsutna tung sak ding hi; Topa aw, na itna kip kho tawntung hi. Na sepsa na maban hong tun in. Topa aw, nangmah in kei nong entel-a nong thei khin hi. Nangmah in ka heksukna, ka hektohna khempeuh na thei hi; nangmah in ka ngaihsutnate gamlapi pek panin na thei hi. Nangmah in ka sep laitak ahi a, ka khawl laitak ahi zongin nong mu a, ka gamtatnate khempeuh na thei hi. Topa aw, kam khat bek nangawn ka paukhiat ma-in, nangmah in ka gen ding teng a vekpi in na thei khin hi. Nangmah in ka nung leh ka mai-ah nong dal a, na thahatna tawh kei nong hu hi. Tua bangin kei nong theihna pen kei adingin lamdang lua mahmah a, thuthuk lua ahih manin kei’ theihtel zawh ding hi lo hi. Nangma Kha a pelh dingin koi-ah pai ding a, nangma omna panin koi-ah taikhia ding ka hi hiam? Vantungah kahto leng tua lai-ah nang na om a, Leinuai misite gamah lupna bawl ta leng zong tua lai-ah nang na om veve ding hi. Leimong pek-ah leengin, tuipimong pek-ah om taleng zong, tua lai nangawn-ah nangma khut in kei hong paipihin, na khut taklam in kei hong len ding hi. “Khuamial in kei hong tuamcip hen la, ka kim-a khuavak omte zan khuamial suak hen,” ci taleng zong, tua nangawn-ah, nangma adingin khuamial pen mial lo a, zan khuamial pen sun nitaang tawh kibang hi; bang hang hiam cih leh nang adingin khuamial pen khuavak mah bang lel hi. Bang hang hiam cih leh nangmah in ka pumpi na khempeuh na piangsak a, ka nu’ gil sungah keimah nong khuituah hi. Kihtak dingin a kilawm na hih manin, nang ka hong phat hi. Na nasepnate lamdang mahmah hi; Nang in kei nong limtheih mahmah hi; a thukna sung mun simtham-ah kei hong kikhuituahin hong kibawl lai takin, ka guh ka taang, na mai-ah kiliah lo hi. A kipiangsak nai lo keima pumpi nate na mit in a mu hi; ka pumpi nate khat beek a om ma, ka ni zah ding a kiciangtan laitakin tuate khempeuh na laibu sungah kigelh khin hi. Pasian aw, na ngaihsutnate kei adingin bangzah takin manpha! Tuate khempeuh a vekpi in bangzahin zai! Tuate sim leng sehnel sangin tamzaw hi. Ka khan’lawh ciangin nang tawh ka omkhawm lai hi. Pasian aw, nangmah in migilote that in la, mithat theite, kei kiang panin paikhia sak in. Bang hang hiam cih leh amaute in nang hong dem uh a, siatna ngimna tawh nang hong pang uh hi. Topa aw, nang hong mudah mite ke’n mudah hi lo ka hi hiam? Nang’ langah hong pangte ke’n kih hi lo ka hi hiam? Amaute muhdah cihtakin ka mudah a, amaute ka gal-in ka seh hi. Pasian aw, kei hong entel in la ka lungsim hong thei in! Kei hong sit in la ka ngaihsutnate hong thei in! Kei sungah siat theihna a om kha hiam hong en in la, tawntung lampi ah kei hong kha in! Topa aw, migilote kiang panin kei hong honkhia in la, mi ngongtatte kiang panin kei hong kem in. Amaute in a lung sung uh ah thusia geelgeel uh a, gal vive phuang ngitnget uh hi. Amaute’ leii in gulpi leii bang a, a thugente uh gulgu bang hi. Topa aw, migilote khut sung panin kei hong cing in la, kei, sukpuk ding a hong sawm mi ngongtatte’ kiang panin kei hong kem in. Mi kiphasakte in kei hong siahna-in tehlop koihsim uh a, amaute in khau tawh ngenthang zak uh a, lam gei-ah thangzak tawh kei hong siah uh hi. Topa ’ tungah hih bangin ka ci hi: Nang in keima Pasian na hi hi; keima thuumna awte hong ngai in, Topa! Topa, keima Topa, a thahat kei hong honkhiapa aw, gal kidona sungah keimah nong hu hi. Topa aw, migilopa’ deihnate tangtungsak kei in la, ama thusia sawmna a maban sot sak kei in! Kei hong umcih mite, gualzosak kei in la, kei hong sawmnate uh amau’ lu tung mah tusak in! Amaute tungah mei-am kuang zusak in! A thokik zo nawn lo dingin dum sungah amaute kia suk sak in! Mi gensiapa leitungah kip sak kei in la, mi ngongtatpa pen thusia in sulzuih mengmeng ta hen! Topa in a thuak mite’ thu a panpihna, mi cimawhte’ adingin thu a manin a khenna ka thei hi. Thuman mite in nangma min hong phat pelmawh ding uh a, lungsim thutangte pen nangma omna-ah teeng ding uh hi. Topa aw, nang kong sam hi; hong kinawh in! Nang kong sap ciangin ka aw hong ngai in! Ka thungetna pen nangma mai-ah paknamtui, ka khutte ka laptohna pen nitak biak piakna bangsak in! Topa aw, keima kam a cing ding khat koih in la, ka mukte’ kongkhak a vil ding khat koih in! Mawhna bawl nopna lungsim hong nei sak kei in la, a gilo mite tawh hong kikhawlsak kei in. Amau anlimte hong duhgawh sak kei ta in. Mi phapa kei hong vuasak in la, ahih hangin migilopa ka lu sathau nilh sak ngei kei in; bang hang hiam cih leh amau’ gitloh gamtatnate lang pangin thu ka ngenngen hi. Amaute, thu kisitin mawhsakna a thuak uh ciangin, Topa ’ thute man hi, ci-in a thei ding uh hi. Mi khat in suangpi khat sukhamin leitungah a thehthang gawp bangin Leinuai’ kongvang ah amau guhte kithehthang ding hi. Ahih hangin Topa Pasian aw, nang ka hong muang tawntung a, nangmah ka hong beel hi; kei hong nusia kei in! Amaute in keimah hong siahna uh tehlop leh siatna bawlte’ thangzak panin kei hong kem in! Kei ka suahtak ciangin amau’ ngenthang sung mah-ah migilote awk sak in. Topa ’ hong huh ding ngenin ka kiko a, Topa tungah ka thuum hi. Ama mai-ah ka lungkim lohna ka sung a, ama mai-ah ka haksatna ka gen hi. Ka cih nading ka theih nawn loh ciangin, amah in ka mailam ding hong theihsak hi. Ka paina lampi-ah ka galte in tehlop khat tawh kei hong siahsim uh hi. Ka kiim ka pam enin ka khuadak a, ahih hangin kei hong huh ding kuamah om lo hi; ka belh ding kuamah om lo a, kuamah in kei hong don lo hi. Topa aw, nang tungah kong kiko hi; nang in keima belh na hi a, a hingte’ leitangah keima tanh na hi hi, kong ci hi. Ka kikona hong ngai in; bang hang hiam cih leh kei hong kiniamkoih mahmah hi! Kei hong bawlsiate’ kiang panin hong honkhia in; bang hang hiam cih leh kei’ adingin amaute hatlua uh hi! Thong sung panin kei hong lakhia in! Tua ciangin nangma mite tawh na min kong phat khawm ding uh hi; bang hang hiam cih leh nang in itna lianpi tawh kei tungah nong gamta hi. Topa aw, ka thungetna hong za in la, ka thuumnate hong ngai in! Na thumanna leh na thutakna tawh kizui-in kei hong dawng in! Na nasempa, thu hong sit kei in; bang hang hiam cih leh nangma mai-ah mihing a dik kuamah om lo hi. Bang hang hiam cih leh gal in kei hong bawlsia a, hong zogawp hi; sau veipi-a a site bangin a mial sungah hong tusak hi. Tua ahih ciangin ka cih nading ka thei nawn kei a, ka lungtang-ah si teeng lo hi. Hunluite ka phawk a, nangma sepsate khempeuh ka ngaihsunsun hi; na khut in a sepsa nate ka lungngaingai hi. Thu ngenin nang lamah ka khut kong zan a, leikeu in tui a duh bangin nang kong duh hi. Topa aw, kei hong dawng mengmeng in! Kei ka cimawh ta hi! Leihawm sung misite kiang-a paisukte tawh ka kibat loh nadingin kei kiang panin na maitang seel kei in. Nangmah hong muang ka hih manin na itna kip zingsangin kei hong zasak in. Nangma tungah thu hong ngen ka hih manin, ka pai nading lampi hong hilh in. Topa aw, ka langte’ kiang panin kei hong honkhia in! Nangmah beel dingin kong tai hi! Nang in keima Pasian na hih manin nangma deih banga gamta dingin kei hong hilh in! Kei hong hehpih in la, lamphei-ah hong kha in. Topa aw, nangma min na ngaihsutna-in keima nuntakna hong kem in! Nangma thumanna tawh kituakin haksatna panin kei hong paikhiatpih in! Kei pen nangma nasem ka hih manin na itna kip tawh kituakin ka galte khenkhia in la, ka langte khempeuh susia in. Ka khutte galdo nading, ka khutmete galkap nadinga a hilh, kei hong hu, Topa in thupha ngah ta hen; amah in ka suangpi leh ka munkip muan’huai, ka kulhpi leh hong honkhiapa, ka lum leh ka belhpa, ka nuai-ah mite a zopa ahi hi. Topa aw, nangmah in na phawktham dingin, mi in bang hi a, nangmah in na ngaihsut tham dingin mihing’ tapa in bang ahi hiam? Mi pen husan’ khat tawh kibang a, ama nite in a tai dandan nilim tawh kibang hi. Topa aw, na vanpite niamsak in la hong paisuk in! Mualte lawng in la meikhu suak sak in! Khuaphialep phiasak in la, amaute kithehthang sak in, na thaltangte lawn in la amaute susia in! A sangna mun panin na khut hong zan in la, tuilian lauhuaite, leh gamdang mite’ vangliatna panin hong honkhia in. A kam uh tawh zuauthu a gente leh kiciamna a bawl khit ciang nangawnin a zuau vevete’ kiang panin kei hong phelin hong honkhia in. Pasian aw, la thak khat kong sak ding hi; harp zang sawm khausai lasakna nang kong tum ding hi. Kumpite tungah gualzawhna a piapa, na nasempa David a honkhiapa na hi hi. A gilo galte kiang panin kei hong hon in la, a kam uh tawh zuauthu a gen, kiciamna a bawl khit ciang nangawn-in a zuau veve gamdang mite’ khut sung panin kei hong honkhia in. Ka tapate uh a tangval lai-in a khangcing kungte bang ta hen la, ka tanute uh kumpi inn lam nadinga kisui innkiu khuampite bang ta hen; ka saalte uh dimin an nam khempeuh om ta hen la, ka tuute uh a tultul a thenthenin gamlakah suak ta hen; ka bawngte uh pung hen la a tolh om kei ta hen; ka kongzingte uh ah cimawh-a kikona om kei ta hen! Tua bang thupha ngah mi in mi lungdam ahi hi! Topa pen amau’ Pasian ahi mite pen mi lungdam ahi hi. Ka Pasian leh ka Kumpi aw, nangmah hong pahtawi-in a tawntungin nangma min ka phatphat ding hi. Ni simin nangmah hong pahtawi-in, a tawntungin nangma min ka phatphat ding hi. Topa lian hi, nakpi tak-a phat ding hi a, ama liatna ngaihsut zawh ding hi lo hi. A khang a khangin nangma nasepnate kiphatphat ding a, a vanglian na bawl nate kigengen ding hi. Nangma liatna leh na minthan’na a lamdang nangma sepnate ka lungngaingai ding hi. Mite in a vanglian nangma bawlnate taangko ding a, keimah in nangma liatna ka pulak ding hi. Amaute in nangma liatna na minthan’na genkhia-in, nangma thumanna nakpi-in sa ding uh hi. Topa dikin hehpihna nei a, hehhakin itna kip lianpi nei hi. Topa pen mi khempeuh tungah hoih a, ama bawlsate khempeuh tungah ama hehpihna om hi. Topa aw, nangma sepsate khempeuh in nang tungah lungdamna hong ko ding uh a, nangma misiangthote khempeuh in nangmah hong phat ding uh hi! Amaute in na kumpi a minthan’na genin, na vangliatna thu sut ding uh a, a vanglian nangma sepnate leh na Kumpi gam hoihna a minthan’nate mihing tate’ tungah kitheisak ding uh hi. Na Kumpigam pen a tawntunga om kumpigam hi a, na ukna in khang tawntungin a kip hi. Topa pen ama thute khempeuh ah thutak a, a gamtatna khempeuhah hehpihna nei hi. Topa in a puk mite khempeuh huh a, niamsakna a ngah mite khempeuh sangto sak hi. Nuntakna a nei khempeuhte’ mit in nang hong en uh a, nangmah in a hun a tun’ ciangin amaute an na vaak hi. Nangmah in na khut na hong a, nuntakna a nei khempeuhte’ deihna na lungkim sak hi. Topa pen ama sepna khempeuh ah thutang a, a gamtatna khempeuh ah hehpihna nei hi. Amah a sam mi khempeuh, lungsim tak tawh a sam mi khempeuhte kiangah, Topa nai hi. Amah in, amah a zahtakte khempeuh’ deihna tung sak a, amaute’ kikona zong za-in amaute honkhia hi. Topa in amah a itte khempeuh kem a, ahih hangin migilote khempeuh amah in susia ding hi. Topa ka phat tawntung ding hi; mi khempeuh in a tawntungin ama min siangtho phat ta uh hen. Topa phat un! Ke’n, Topa ka phat ding hi. Ka hin’ lai teng Topa ka phat ding hi; ka nuntak lai teng ka Pasian tungah phatnate ka sa ding hi. Huhna hong pia thei lo uliante ahi a, mihing’ tapa ahi zongin muang kei un. A husan’na a bei ciangin amah lei-ah ciahkik a, tua ni mahin ama ngaihsutnate bei ta hi. Jakob’ Pasian pen ama huhpa hi-in, ama Topa Pasian, a muangpa in mi lungdam ahi hi. Amah in van leh lei, tuipi leh tuate sunga omte khempeuh bawl a, a tawntungin thuman hi; a kinengniam mite’ adingin thumanna semkhia a, gilkialte an a vaak hi. Topa in thongkiate khahkhia hi; Topa in mittawte, khua musak hi. Topa in, niamsakna a thuak mite sangto sak a, Topa in thuman mite a it hi. Topa in peemtate kem a, meigong numei leh pa nei lote a huh hi; ahih hangin amah in migilote’ vaihawmna suksiatsak hi. Zion aw, nangma Pasian Topa in khang tawntungin uk ding hi. Topa phat un! Topa phat un! Bang hang hiam cih leh i Pasian tungah phatnate i sak ding hoih hi; phatna sak ding nuam a, zong kilawm hi. Topa in Jerusalem khuapi lam a, amah in a kinilkhia Israelte kaikhawm hi. Amah in lungsim kitamte damsak a, amau’ meimate tuamsak hi. Amah in aksite a phazah ding seh a, tuate amau min ciatin a sam hi. I Topa lian hi, ama vangliatna lian mahmah a, amah in thu a theihtelna pen ngaihsut zawh ding hi lo hi. Topa in a kisikcip mite laamto-in, migilote leilak den’na hi. Topa tungah lungdam kohna la sa un la, laiza lasakna tawh i Pasian tungah la ngaih sa un! Amah in vanpite pen meiipite tawh tuamin, leitung adingin guah bawl a, mualte tungah lopa posak hi. Amah in ganhingte leh a ham va-ak note an vak hi. Ama lungkimna leh amah in nuam a sak nate pen sakol thahatna leh galhangte’ hang hi lo hi. Topa in amah a zahtak mite leh ama itna kip a muangte tungah lungkim hi. Jerusalem khuapi aw, Topa phat in. Zion aw, nangma Pasian phat in! Bang hang hiam cih leh amah in na kulh kongpi zawlte tosak a, na mite, thupha hong piaksak hi. Amah in na gam sungah kilemna bawl a, mangbuh hoihpente tawh nang hong dimsak hi. Amah in thu hong pia a, ama thu manlangin leitung hong tungsuk hi. Amah in tuumul bangin vukkhal hong pia a, vut bangin vuukpaak hong thehthang hi. Amah in suangtum bangin a tuikhalte hong lawnkhia hi; tua a votna kua in thuak zo ding ahi hiam? Amah in thupia-in tuate tuisak hi; amah in a huih nungsak a, tuite a luang hi. Amah in Jakob tungah ama thu gen a, Israel tungah ama ngeina kipte leh ama biakna ngeina kipte a gen hi. Amah in tua bangin minam dang khatpeuh peuh tungah bawl lo hi; amaute in amau biakna ngeina kipte thei lo uh hi. Topa phat un! Topa phat un! Vantung panin Topa phat un la, a sangna panin amah phat un! Ama vantungmi khempeuh aw, amah phat un, ama mihonpite khempeuh aw, amah phat un! Ni leh kha aw, amah phat un, a taang aksi khempeuh aw, amah phat un! Van sangpente leh vante tunga om tuite aw, amah phat un! Topa ’ min amaute phatsak un! Bang hang hiam cih leh amah in thu pia a, amaute a piang hi. Amaute a tawntung a om dingin amah in kipsak hi; a palsat loh ding uh thupiakna amah in a bawl hi. Leitung panin, Topa phat un, no gunpi liante leh tuipi thuk khempeuh, mei leh gial, tuikhal leh vuuk, ama thupiakna a mang huihpi! Mualliante leh mualneute khempeuh, gah a nei singkungte leh taamtaak singkung khempeuh! Gamsate leh innsate khempeuh, a bokvak ganhingte leh a leeng vasate! Leitung kumpite leh mihing khempeuhte, leitung uliante leh thukhente khempeuh! Nungak leh tangvalte, teeksiate leh naupangte! Topa ’ min phatsak un, bang hang hiam cih leh ama min bek lian a, ama minthan’na in leitung leh vantung sangin sangzaw lai hi. Amah in ama mite thahat sak a, ama misiangthote khempeuh, ama mai-a om Israelte khempeuh in amah phat uh hi. Topa phat un! Topa phat un! Topa ’ tungah la thak sa un, a thuman mite’ kikhopna sungah amah phatna sa un! Amah a Bawlpa’ tungah Israel lungdam hen la, amau Kumpipa’ sungah Zion mite kipak ta hen! Laamna tawh ama min phat un la, khuang leh laiza lasakna tawh ama tungah langaih sa un! Bang hang hiam cih leh ama mite tungah Topa lungdam a, miniamte gualzo sakin a pahtawi hi. A gualzawhna uh-ah thuman mite lungdamin diang uh hen la, ama mai-ah khukdin-in, nuamna la sa uh hen. Topa phat un! Ama biakinn sungah Pasian phat un la, ama vangliatna mun vantungah amah phat un! A vanglian ama sepnate hangin amah phat un la, ama liat mahmahna tawh kituakin amah phat un! Peengkul aw tawh amah phat un la, githa lasakna leh harp lasakna tawh amah phat un! Khuang leh laamna tawh amah phat un la, khausai lasaknate leh tamngai tawh amah phat un! Daltuahte tawh amah phat un la, nakpi-a ging daltuahte tawh amah phat un! Husang theite khempeuh in Topa phat ta un! Topa phat ta un! David’ tapa, Israel kumpi Solomon’ paunakte: Mite in pilna leh thuhoihte a phawk theih nading, khiatna thuk a nei kammalte a theih theih nading. A hoih-in a pil gamtat theih nading, thuman, thutang, a kilawmin a gamtat theih nading. Thu thei nai lote in a theih nading, khangnote in pilna leh thu ngaihsut theihna a ngah nading. Mi ciimsate ciimsak semsemin, mipilsate pilsak semsem-in, paunakte leh thugentehnate thei-in, mipilte’ kampau leh a thugente a theih nading. Topa zahtakna in pilna kipatna hi a, mihaite in pilna leh thuhilhna don lo uh hi. Ka ta aw, na pa’ hong thuhilhna zui in la, na nu’ hong thugente ngai in. Tua hilhnate in na gamtatna hong hoihsak ding a, kizepna lukhu leh kizepna khi bangin hong etlawm sak ding hi. Ka ta aw, mihoih lote in hong zol ciangin, amau’ zolna zui kei in. Amaute in, “Hong pai in, mi khatpeuh va that ni, Mi ommuang khat va muan suam ni, I muh tungin a cidam, a hing kimlai hi napi, i suk khit ciangin a sisa hi ding! Na a manpha a namkimin i sut ding a, tua bang nate i inn dimin i nei ding hi. Kote tawh hong kipawl lecin, i ngah khempeuh i hawm ding hi,” hong cih uh hangin ut kei in. Ka ta aw, tua bang mite tawh kikhawl kei in la, amaute kiang panin kihemkhia in. Amaute a sia-in gamta nuam vanvan uh a, mi thah ding haksa sa lo uh hi. I mat nop vasate’ muhtang pi-in, i siahna ngenthang zaak pen a mawkna hi. Ahi zongin hih mite in amau’ awk nading mah thang siah uh a, kuamahdang awk loin, amau mah hai awk uh hi! Zawhthawh thu tawh mi’ na a sutte in sihlawh tawntung zaw a, hih bang a gamtate in tu-a bangmah tuak ngitnget hi. Ngai in! Kongzing lampi leh van kizuakna phualpi-ah pilna hong kiko hi. Khuapi kulh kongpi tual leh mi a kikhopna mun khempeuh ah nakpi takin hong awngkhia a, ”Mihaite aw, bangtanvei hai omom nuam lai na hi uh hiam? Bangtanvei pilna thudon loin om ding na hi uh hiam? Pilna ngaihsutin nei ngei lo ding na hi uh hiam? Kong thuhilhna hong ngai un, ka ngaihsutna kong gen ding a, ka theihna kong zasak ding hi. Keimah in note hong sam napi-in nong ngai nuam kei uh a, ka khut hong vaan napi-in kuamah in nong thudon kei uh a, ka thugente khempeuh hong thudon loin, kong tainate hong mang nuam lo na hih manun, lungkhamna na tuah uh ciangin kei zong kong nuihsan lel ding a, launa na tuah uh ciangin kong thusim kei ding hi. Lungkhamna in huihpi’ nawk bangin note hong nawk gawpin, pingpei bangin note hong pei gawpin, lungkhamna leh sinkhamna na tuah uh ciangin kong don kei ding hi. Tua bang hun ciangin kei nong sam ding uh a, ahi zongin kong dawng kei ding hi. Lim takin kei nong zong ding uh a, ahi zongin koi mah-ah nong mu kei ding uh hi. Note in pilna deih loin, Topa na zahtak nuam kei uh a, ka thugente deih loin, kong thuhilhna ngai nuam lo na hih manun, na gamtatna bangun na thuak ding uh a, nomau’ gamtatna mah in note hong gimsak ding hi. Bang hang hiam cih leh thu thei lote in, pilna a don loh manun sihlawh uh a, ahi zongin, ka thugenna a ngaite in lungmuanna ngah ding a, launa nei loin nuam takin om ding uh hi,” a ci hi. Ka ta aw, kong hilhte thei in la, kong gente mangngilh ngei kei in. Pilna thute limtakin ngai in la, na theihtel zawh nadingin hanciam in. Hi hi, thu theih nading hanciam takpi in la, thumuh nading hahkat takpi in. Ngun, ahih kei leh a kiseel sum manpha zon’ bangin, hahkatin pilna zong in. Tua hi leh, Topa zahtakna thu na thei ding a, Pasian na theitel ding hi. Bang hang hiam cih leh pilna a piapa in Topa hi a, amah in pilna leh siamna a hilhpa ahi hi. Pasian in thuman mite pilna guan a, midiktatte a hu hi. Amah in thutang mite cing a, amah a itte kem hi. Tua hi leh thuman leh thutang, ahoih leh a kilawm na thei ding hi. Tua ciangin mipil na suak ding a, na pilna hangin nuam na sa ding hi. Na thu ngaihsut theihna leh na thutelna in, nangmah hong hu-in, a sia-in na gamtat khak ding hong kem ding a, kampauna tawh buaina a piangsak thei mi, nuntakna manin a nungta lo, mawhna khuamial sungah a gamta, a sia-in gamtat ding nuam a sa, asia-a gamtatna-ah a lungkim mahmah, mi lungsim kawi, muan’ theih loh ding mite panin nang hong kem ding hi. Tua nu’ inn-ah pai lecin sihna lampi zui na hi a, misite’ gam a zuan na hi hi. Tua bang numei tawh mawhna a bawl mite, nuntakna nuam nei kik cih om ngei lo hi. Tua ahih ciangin mihoihte’ gamtat bangin na gamta ding a, thuman mite’ gamtatna na zui ding hi. Bang hang hiam cih leh mi thuman, mi ginate, hih i leitungah teengin om ding uh a, ahi zongin leitung panin migilote kilawn khia-in, singkung zung bawh bangin mawhneite kibotkhia ding hi. Ka ta aw, kong thuhilhte mangngilh kei in la, kong thugente phawk tawntung in. Kong thuhilhte in na khan’ hong sausak ding a, nang hong daupai sak ding hi. Thumanna leh cihtakna khahsuah ngei kei in la, na ngawng-ah tuate ok in, na lungtang tungah gelh in. Tua hi leh, Pasian leh mite mai-ah maipha ngahin na ma vang ding hi. Na lungsim khempeuh tawh Topa muang in la, nang’ theihna suang kei in. Na hihna khempeuh ah amah phawk in; tua hi leh lampi maan hong lak ding hi. Nangmah mah a pilin kingaihsun tawm kei in la, Topa zahtakin, a sia pel in. Tua hi leh, nang adingin damna zatui tawh kibang ding a, na meimate damsakin, na natnate daisak ding hi. Na neihsate leh na anpalte tawh Topa zahtak in. Tua hi leh, na ansaalte an tawh kidim ding a, a beel dimleetin leenggahzu na nei ding hi. Ka ta aw, Topa ’ hong thuhilhna lim takin ngai in la, hong tainate thudon in. Bang hang hiam cih leh, pa in a pahtak a tapa a thuhilh bangin, Topa in a it mite a thuhilh hi. Pilna nei-in, thu a thei mipa in, a lungdam mi ahi hi. Pilna nei leng, ngun sangin hoihzaw a, kham sangin manphazaw hi. Pilna in a manphapen suangmanpha nangawn sangin manphazaw a, mihingte’ deih theih na lakah tehpih theih ding om lo hi. Pilna in hong khan’ sausak a, hauhna leh pahtawina zong hong pia hi. Pilna in nuntakna hong nuamsak a, lungmuang takin hong omsak den hi. Pilna a nei mite a lungdam mi hi a, pilna a neite in nuntakna singkung tawh kibang hi. Topa in a pilna tawh leitung bawl a, a theihtelna tawh vantung bawl hi. Ama pilna in guntuite luangsak a, meiite in leitungah guahzu sak hi. Ka ta aw, pilna leh thu ngaihsut theihna len tawntung in la, cik mah ciangin khahsuah ngei kei in. Tuate in nang adingin nuntakna hi ding a, na hoih nadingin kizepna hi ding hi. Tua hi leh, lungmuang takin na nungta ding a, puk nading thu bangmah om lo ding hi. Launa om loin nuam takin na lum ding a, zan tawntung lungmuang takin na ihmu thei ding hi. Migilote tungah huihpi bangin siatna a tun’ ciangin, nang na lunghihmawh nading om lo ding hi. Bang hang hiam cih leh Topa in a muanhuai-in nang hong kem ding a, siatna hong tuak sak lo ding hi. Nangma hih zawh ding thu ahih nak leh, midangte’ kitaangsapna huh tawntung in, Na vaihawmsak theih pah ding ahih nak leh, zing ciangin hong pai kik in, ci-in a hun sotto kei in. Nang hong muangin na nai-ah hong teeng na vengpa, gim a ngah nading bangmah vaihawm kei in. Nang tungah bangmah siatna a hong bawl lo, mi khatpeuh tawh thu om lopi-in kimawktot kei in. A ngongtat thei mite eng kha kei in la, amau’ gamtat bangin gamta kha kei in. Bang hang hiam cih leh Topa in a sia-a gamtate mudah a, thuman mite bek a pawlpih dingin la hi. Topa in migilote’ inn sung samsia a, thuman mite’ inn sung thupha pia hi. Amah in mi kihisakte bang mahin sim lo a, a kiniamkhiatte tungah maipha pia hi. Mipilte in minphatna leh pahtawina ngah ding a, mihaite in maizumna leh mindaina ngah ding uh hi. Tate aw, na pa uh’ hong hilhnate ngai un la, thu na teltheih nadingun lim takin ngaihsun un. Bang hang hiam cih leh kong hilh thute thuhoih ahi hi; kong hilhte khempeuh lim takin, ciamteh un. Kei zong ka nu leh ka pa’ tapa neihsun, naupangno khat ka hih lai-in, ka pa in thu hong hilh a, “Ka thugente ciamteh in la mangngilh ngei kei in. Kong gen bangin gamta in, tua hi leh na nungta ding hi. Pilna leh thu ngaihsut theihna na neih nading hahkat in la, kong gen thute mangngilh kei in la, hoih takin, ngaihsun in. Pilna nusia kei in, tua hi leh siatna panin nang hong hu ding hi, pilna deih in, tua hi leh lungmuang takin na om nadingin hong kem ding hi. Pilna na ngah nading a thupi masapen hi a, na neih khempeuh na bei lawh zongin na zon’ ding ahi hi. Pilna deih in, mi lianin nang hong bawl ding hi; limtak pom in, pahtawina hong ngah sak ding hi. Pilna in pahtawina leh minthan’na, nang tungah hong tung sak ding hi,” hong ci hi. Ka ta aw, ka thugente lim takin zui in, tua hi leh na khan a sau ding hi. Na pil nading lampi kong hilh zo a, na gamtat nading zia kong gen zo hi. Hoih takin gamta lecin bangmah in hong nawngkaisak lo ding a, na tai hangin zong na puk kha kei ding hi. Hong kihilhnate lencip in la khahsuah kha kei in; na nuntak nading ahih manin lim takin zui in. Migilote tawh kikhawl kei in la, amau’ gamtatnate zui kei in. Amau’ gamtat bangin gamta peuhmah ke’n! Gitlohna peel in! Pai san in la, na maban sem in. Migilote in asia khatpeuh a sep mateng lum thei lo uh a, mi khatpeuh a suk zawh mateng ihmu lo uh hi. Gitlohna, annek bangin nuamsa uh a, ngongtatna, tuidawn bangin ngaihsun uh hi. Ahi zongin thuman mite’ zuih lampi ahih leh, sun dong a taang pha semsem zing khuavak tung tawh kibang hi. Migilote’ lampi ahih leh zan khuamial bangin mial a, amaute a tuksak, a suihkhak nate nangawn mu thei lo uh hi. Ka ta aw, ka thugente don in la ka kammalte ngai in. Na kiang panin paikhia sak kei in la, na lungsim ah ciamteh in. Bang hang hiam cih leh tua thu a zuite in, nuntakna leh cidamna-in nei uh hi. Na lungsim ngaihsutnate in nuntakna nak hi a, na neihsa a manphapen bangin na kep ding ahi hi. A man lo thu gen ngei kei in la, zuauthu leh a kiza khial thei ding kammalte zang het kei in. Kisuan’na nei loin om liuliau in la, maizumin kuncip kei in. Na khatpeuh na sepna thu theitel in, tua hi leh na sep peuhpeuh mavang ding hi. Siatna peelin a maanin gamta in la, thuman lampi panin themcik zong pial kha kei in. Ka ta aw, ka pilna leh ka thumuhnate, lim takin ngai-in hong za in. Tua hi leh, a kilawmin na gamtat nading zia na thei ding a, na kampaunate in na pil lam tak hong kilangsak ding hi. Numei paktatte’ kampau, khuaizu bangin khum mahmahin, a thugente uh a neel dakdak hangin, a tawpna-ah lungkhamna leh natna sim loh, nangma tungah bangmah dang hong guan lo hi. Amah in sihna gamah hong paipih ding a, ama tot lampi in sihna mun tun’na lampi ahi hi. Nuntakna lampi-ah amah om lo a, nang na phawk loh hangin amah lam pialin a vakvai ahi hi. Tate aw, tu-in ka thugente hong ngai un la, ka thugente mangngilh kei un. Tua bang numei tawh kineh kha kei un la, a inn gei nangnawn-ah pai kha kei un. Tua bang na hih kei uh leh, na min hoihna teng uh midang tungah tung ding a, hehpihna a nei lo mite’ khutlum tawh na khan’sih ding uh hi. Khualmite in na neih khempeuh uh la ding a, na sepsa khempeuh uh midangte in ngah ding hi. Na sih kuan uh ciangin thuumin na tau ding uh a, gawng-in na guh guak bekun na om ding uh hi. Tua ciangin, “Bang hangin thu thei thei hoh lo a, hong kihilhna mang hoh lo ka hi hiam? Kei hong hilh siate’ thu ka mang nuam kei a, amau’ hong hilhnate ka don kei kha hi. Tua ahih manin tu-in ka cimawh vat a, mi mai-ah ka min a sia hi,” na ci ciat ding uh hi. Na zi’ tungah citak in la, amah bek itin nei in. Pasal dang tawh va vak zau-in kongzing lakah va mawh kha ding hi. Na zi in nangma ading bek hi a, midang tawh na neihkhawm ding hi lo hi. Tua ahih ciangin na zi tawh lungkim in la, na teen’pih numei tawh lungdam in. A it huai a ngaihbangin ngaihsun tawntung in la, ama ngaihbaan’na tawh lungdamin, ama hong itna tawh lungkim in. Ka ta aw, bang hangin numei dang lunggulh ding a, numei dangte’ ngaihban’na iplah ding na hi hiam? Bang hang hiam cih leh Pasian in na gamtatna khempeuh hong mu a, na paina khempeuh hong en kawikawi hi. Migilopa’ mawhna in thangzak bang hi a, ama mawhna thang sung mahah amah awk hi. Ama pumpi ki-uk zo lo ahih manin sihlawh a, ama hailuatna in hankhuk sung tun’ hi. Ka ta aw, na lawmte khatpeuh in sum leitawi a lak ciangin, a loh zawh kei leh ama taangin a lohsak dingin kam na ciam kha hiam? Na kampauna hangin nang hong kimanin, na thuciamna hangin na awk kha hiam? Ka ta aw, tua bang na hih khak leh, tua mipa khut sungah a om na hi hi; na suahtak theih nadingin manlangin ama kiangah pai in la, hong khah nadingin ama kiangah thuum in. Ihmu mu kei in la, om mawkmawk kei in. Sabengpa’ kiang panin a suahtak nadingin sakhi a tai bangin, thang ah a awk vasa a kitom bangin na suahtak nadingin hamciam in. Thadahpa aw, miksite kiangah pai in la, amau’ nuntakna zia va en in. Amaute in a uk ding leh a makai ding kuamah nei lo napi-in, khuakhal sungin a nek ding uh, tuk sungin kaikhawm khol uh hi. Thadahpa aw, bang tanvei lumlum ding a, cik ciangin thokhia ding na hi hiam? Tawmkhat sung mengme lai ning, tawmkhat sung ihmu lai ning, na cih kikalin, zawn’na leh cihmawhna in migilo gutate bangin nang hong sugawp pak ding hi. Mi gina lo, a gilopa, zuauthu genin vak kawikawi a, nang hong khem nop manin, a mit-heek hong pia-in, a khe tawh hong su-in, a khut tawh hong khoih hi. A lungsim-ah thusia bekbek ngaihsun niloh a, a omna peuh-ah buaina piangsak hi. Tua ahih manin theihkholh lohin ama tungah lungkhamna tung ding a, bawlkik zawh nawn loh dongin siatna ngah ding hi. Topa in a muhdah, a khahkhong ngei loh ding, thu guk, bek hilo, thu sagih tak om a tuate in, kihihsakna, zuauthu genna, mawhnei lo mi thahna, thusia bawl ding ngaihsutna, gamtat siat ding a manlangte, zuauthu a ban gengen teci man lote, a lawmte lakah kitotna a piangsakte ahi hi. Ka ta aw, na pa’ hong gen bangin gamta in la, na nu’ hong thuhilhte mangngilh ngei kei in. Amau’ hong thugente phawk tawntung in la, na lungsimah ciamteh niloh in. Tua thute in na paina peuhah lam hong lak ding a, zan-in na ihmut kalin nang hong cing ding a, sun-in na hah sungin na gamtat nading hong hilh ding hi. Bang hang hiam cih leh thupiaknate in meivak hi a, hilhnate in a taang mahmah khuavak bang hi-in, khalna leh hilhnate in nuntak nading lampi hi a, Mi’ zi tawh na mawh loh nading nang hong kemin, kamkhum zanga hong zol numei ginalote kiang panin hong hu ding hi. Amau’ meel hoihna iplah kha kei in la, amau’ hong zawlmitna khenglah kei in. Bang hang hiam cih leh anlum khat tawh numei paktat khat kingah zo a, ahi zongin numei tawh mawhna in nuntakna bup siasak hi. Na ang sungah meikuang pom lecin, na puan kang loin om ding ahi hiam? Mei-am tung tawnin pai lecin, na khe kang loin om ding ahi hiam? Tua mah bangin, mi zi tawh a mawhte in thuak ding a, tua banga gamta peuhmah in thuak ding uh hi. A gilkial mi khat in an a guk ciangin, midangte in mawhsak lua lo napi, amah kiman leh, azah sagih-in kiloh sak a, a neih khempeuh a piak kul hi. Ahi zongin numei tawh mawhte in thu ngaihsun thei lo mi hi a, amah leh amah a kisusia tawm ahi hi. Amah in satgawpna thuakin a min sia ding a, a mindai paisuak ding hi. A pasal a heh zawk nading thudang om nawn lo a, a heh thukna-ah khawl hun cih nei thei lo ding hi. Amah in sum-le-pai sang nuam lo a, letsong tampi piakna in a hehna damsak zo lo hi. Ka ta aw, ka thugente ciamteh in la, kong sawl thute mangngilh ngei kei in. Kong gen bangin gamta in; na nungta ding hi. Kong thuhilhte, na mitnauta bangin hoih takin kem in. Kong hilhnate kem tawntung in la, na lungtang tungah gelh in. Pilna, na sanggamnu dingin nei in la, thumuhna, na lawm itpen dingin nei in. Tua hi leh, midangte’ zi tungah na khialh khak loh nading, kamkhum tawh hong zol numeite tawh na khialh khak loh nadingin hong hu ding hi. Khatvei, ka omna inn-ah, ka kongvangneu panin ka khuadak a, bangmah a phawk nai lo tangval honkhat lakah, tangval thu thei nai lo khat ka limmuh kha hi. Lamdungah amah a vak lai takin, tua bang numei paktat a omna inn gei khatah va pai kha a, tua hun in, nitak nitum khit zawh, khuamui hun laitak ahi hi. Tua numei in numei paktatte’ puansilh ngeite silh kawmin, ngimna khat tawh tua tangval na dawntuah hi. Tua numei in maizumna mel thei loin a hang mahmah hi a, lamdung tengah vak tawntung hi. Mihon omna vanzuakna phual, lamdung citeng, leh kongkiu khatpeuhah mi ngakin om niloh hi. Tua numei in tangvalpa thakhatin kawi-in tawp a, na maitai bawlin ama kiangah, ”Tu ni-in biakpiakna ka bawl a, nek ding sa tampi ka nei hi. Ka nekpih dingin nang kong zong a, tu-in nang kong mu petmah hi. Ka lupna tung a nop mahmah nadingin, Izipt gam puan hoihpente ka phah zo hi. Mirrah paknamtui, oloes paknamtui leh kinnamon paknamtui tawh, ka lupna tung a namtui dingin ka bawl khin ta hi. Hong pai in, zan thapai-in ki-itna bawlin, ang kikawmin lungnuam ni, Bang hang hiam cih leh ka pasal khual gamlapi-ah zin a, tu lai takin inn-ah om lo hi. Amah in sum tampi keng a, nipi kal nih bang mateng hong tung lo ding hi,” a ci hi. Tua ahih manin kamkhum kamneel tawh amah zol a, tangvalpa in tua zolna mang kha hi. Tua ahih manin a kigo ding bawngtal in a sih nading mun a zuat bangin, sakhi in a awk nading thang zuanin a dian’laklak bangin, thaltang in a lungtang a khak nading munah amah va pai hi. Vasa in a sih nading thang-antah a bawh bangin va bawh a, a lauhuai sung a tung ahih lamtak thei lo hi. Ka tate aw, kei lam hong nga un la, ka thugente hong ngai un. Tua bang numeite’ zolna mang kei un la tua bangte tawh khial kha kei un. Tua bang numei in mi tampi tak siasakin, sim zawh loh ding mi tampi’ sihna piangsak hi. Tua bang numei zuihna in sihna gam zuatna hi a, sih baih nading lam zuatna ahi hi. Ngai un! Pilna in hong sam a, thu ngaihsut theihna hong kiko hilo ahi hiam? Lamdung mualtung tengah, lamka citeng mun khempeuh ah ding a, khuapi lutna lampi gei-ah, mi omna kongpi tual-ah hong kiko a, “Mi khempeuh tungah kong thuum a, leitunga om mi khempeuh kong sam hi. Ngaihsut kicing nai lote aw, na lungsim uh picing sak un. Mihaite aw, thu ngaihsun un. Ngai un, thumanpha kong gen ding a, ka gen khempeuh thumaan vive ahi hi. Ka thugente a maan bekbek hi a, zuauthu ka deih kei hi. Ka gen khempeuh ahi vive hi a, zuauthu, thukawi om het lo hi. Thungaihsun theite’ adingin telnop a, thu mutheite’ adingin siang mahmah hi. Ngun sangin kong thuhilhnate deihzaw un la, kham hoihpen sangin thutheihna deihzaw un. Suangmanpha sangin pilna ahi keimah ka manphazaw a, kei tawh nong tehpih theih ding uh a manpha dang om lo hi. Pilna ahi keimah in thuthuk muh theihna ka nei a, thu a tel-a theihna leh a kilawm-a ngaihsut theihna ka nei hi. Topa zahtakna in thusia muhdahna hi a, kiphatsakna leh kihihsakna, gamtatsia leh thuzuau ka mudah hi. Thu geelin ka semkhia a, thutelna nei-in, kei ka thahat hi. Kumpite in a gam mite a uk nading, mi ukte in ngeina maan a zat theih nadingin ka huh hi. Leitunga om mi ukte khempeuh in keima huhna bek tawh uk zo uh a, milian mithupite in keima huhna bek tawh vaihawm zo uh hi. Kei hong itte ka it a, kei hong zong peuhmahte in hong mu uh hi. Keimah in piakkhiat theih ding hauhna leh minphatna, daupaina leh matutsak zawhna ka nei hi. Keima kiang panin na ngahte uh, ngun hoihpen sangin hoihzaw a, kham hoihpen sangin zong hoihzaw lai hi. Keimah in thuman lampi ka zui a, thutang lampi ka tawn hi. Kei hong itte ka hausak a, a inn dimin neih-le-lam ka pia hi. “ Topa in kei hong piangsak masapen a, tangtawng-a ama sep lak pan a masapen ka hi hi. Tangtawng pek lai-in kei hong bawl a, leitung a om ma-in hong bawl masakpen ka hi hi. Tuipite a om ma-in kei ka suak a, kei’ suah hunin luituite om nai lo hi. Mual liante a kibawl ma-in kei ka suak khin a, mualneute a kibawl ma pekin ka om khin hi. Leitung gam khempeuh a bawl ma, lei themkhat beek nangawn a bawlma pekin kei ka om khin hi. Amah in vantung bawlin, tuipi kimkotah vanpi mong ding a bawl laitak, amah in vantungah meiite kipsakin, tuipi tuinakte a bawl laitak, tuipi tuite in ama cihna bangin khengin, a luan’ loh nading thu a piak lai takin ka om a, leitung bulpite a ciamteh lai takin, Na geel siampa bangin amah tawh kikhawlin, keimah in ni simin ama lungdamna ka hi a, ama kiangah om nuam sa-in, leitungah ka lungdam a, mihingte lakah nuam ka sa hi. “Tate aw, tu-in ka thugen hong ngai un la, kong gente zui le-uh cin thupha na ngah ding uh hi. Hong kihilhnate zui-in pilna ngah un la, thudon loin mawk om kei un. Ka thugenna ngai mipa, ni simin ka kong gei-ah omin, ka inn-ah a ngak mipa in thupha ngah ding hi. Kei hong mu mipa in nuntakna a mu hi a, Topa ’ mai-ah maipha ngah hi. Ahi zongin kei hong mu lopa in amahmah a kisusia hi a, kei hong mudah peuhmah, a si nuam ahi hi,” hong ci hi. Pilna in a inn lam a, a inn ding khuampi sagih phut hi. Amah in pawi bawl dingin sa go-in leenggahzu khaihin, an nek nading sabuai bawl hi. Khua sung mun sang khempeuh panin mi sam dingin, amah in a nasem numeite sawl a, “Thu thei lote aw, hong pai un,” ci-in samsak a, mihaite kiangah, “Hong pai un la, ka huansa ka an ne-in, ka bawlsa leenggahzu hong dawn un. Thu thei lote taisanin khan’sau un la, pilna lampi zui un,” ci sak hi. Mihaite thuhilh lecin hong maizumsak ding a, migilote thuhilh lecin hong sugawp ding hi. Mihaite thuhilh kei in, hong mudah ding hi. Mipilte thuhilh in, hong it ding hi. Mipilte thuhilh lecin pil semsemna-in nei ding a, thuman mite thuhilh lecin a thu theihna khang semsem ding hi. Topa zahtakna in pilna kipatna hi a, Siangtho Pa theihna in thumuhna ahi hi. Pilna in na khang hong khan ding a, na nuntakna hong sausak ding hi. Pil lecin nangma phattuam nading hi a, pilna don kei lecin nangma sup nading ahi hi. Haina in a kamtam, zumna meel thei lo numei tawh kibang a, ama kong gei-ah ahi a, khuasung mun sangpen ah ahi zongin tu a, ama kiang a nawkkha, amau’ nasep bek a phawk kimlai mite kiangah, “Thu thei lote aw, hong pai un,” ci-in samin, mihaite kiangah, Tui dawnsim, khum diak a, annek sim, lim diak hi,” ci hi. Tua lai-a a paite a sihna thu, tua lai-a lutsate sihna gamthuk sungah a om khitna thu, a khem zawh mite in phawk kha lo uh hi. Solomon’ paunakte in: Tapil in a pa lungdamsak a, tahai in a nu dahsak hi. Thuman lo-a ngahna-ah phattuamna om lo a, thumaanna in sih nading pan hong hon hi. Topa in mihoihte a gil kialin koih lo a, migilote a duh uh ne sak lo hi. Thadahna in zawn’na hi a, thanuamna in hauhna hi. A hun-a an lapa in mipil hi a, an lak hun-a a ihmu-pa in maizumna ngah hi. Mihoihte in thupha ngah a, migilote in thusia bekbek gen hi. Mihoihte kiphawkphawk a, migilote kimangngilh pah hi. Mipilte in thuhilhna mang a, a haipaute in lungkhamna tuak hi. Thuman mite lungnuamin om hithiat a, thuman lote kiman hi. Khialhna kimuhmawh bawlna in buaina piangsak a, hang tak-a hilh ngamna in nopna piangsak hi. Mihoihte’ kampaute in nuntakna tuinak bang a, migilote in thusia bekbek gen hi. Muhdahna in kitotna piang sak a, itna in mawhna khempeuh maisak hi. Thu ngaihsun theite’ kam sungah pilna om a, mihaite’ nungzang ah ciangduai kinga hi. Mipilte in a pilna uh behlapin, mihaite a pau ciangin thusia tawh kizom pah hi. Hauhna in mihaute hu a, zawn’na in mizawngte siasak hi. Mihoihte’ thaman in nuntakna hi a, migilote’ thaman in daantatna ahi hi. Kihilhna man’na in nuntakna lampi zuihna hi a, hilhna man’nop lohna in lauhuai lampi zuihna ahi hi. Mi a mudahte bekin zuauthu gen a, mi a gensiate in mihai ahi hi. Kam tam paute, tampi khial a, pau ip theite mipil hi. Mihoihte’ thugente in nguntang bang a, migilote’ ngaihsutna in bangmah man lo hi. Mihoihte’ thugente in mi tampi nuamtuam sak a, mihaite in a hai sihpih uh hi. Topa ’ thupha in mite hausak a, dahna, gimna tawh piakhawm lo hi. Mihaite in gamtat siat ding nuam sa uh a, thu ngaihsun theite in pilna gamtatna nuam sa uh hi. Migilote tungah a kihtaktak uh tung a, mihoihte in a deihdeih uh ngah uh hi. Huihpi a nun’ ciangin migilote len’mang a, thuman mite lungmuangin om tawntung uh hi. Leenggah tuithuk in ha kimsak a, meikhu in mit a sipsak bangin, mi thadah in a cialpa a nasak hi. Topa zahtakna in khan’sausak a, migilote khan’ sih hi. Mihoihte’ lametna in lungdamna hi a, migilote’ lametna in a hawmpi hi. Topa in midikte hu a, migilote susia hi. Midikte lungmuangin mun khatah teeng tawntung ding uh a, migilote in teen’ nading mun ngah zo lo ding uh hi. Midikte in pilna thu gen uh a, thuhoih lo a gente’ leei ki-attan ding hi. Midikte in a gen ding thuhoih thei a, migilote in thusia bekbek gengen uh hi. Topa in tawikhaina man lo a zangte mudah a, tawikhaina man a zangte tungah lungkim hi. Mi kiphasakte in minsiatna ngah pak ding a, lungsim niamkhiatna tawh pilna kingah hi. Midikte thuman in gamta uh a, amau’ hoihlohna tawh migilote kisusia hi. Hauhna in na sih nading panin hong hu thei lo a, thumanna in na sih ding hong hu thei hi. Thumanna in midikte’ nuntakna a nuam zaw-in piangsak a, migilote in amau’ gitloh mah puklawh uh hi. Thumanna in midikte honkhia a, thuman lo mite in amau’ huaihamna mah awkpih uh hi. Migilote a sih ciangin a lametna teng tawh beikhawm a, hauhna suan’na in a mawkna suak hi. Lungkhamna a tuah loh nadingun midikte kihu a, migilote tungah lungkhamna tungzaw hi. Pasian a ngaihsun lo mite’ thugenna hangin mite in siatna thuak a, midikte’ pilna hangin mite in gupna ngah uh hi. Midikte a tuahphat ciangin khua sungah lungdamna om a, migilote a sih ciangin zong khua sungah lungdamin kikona om hi. Thuman mite’ omna hangin khuapi a lian suak a, migilote’ kampauna hangin khuapi kisia hi. Simmawhna tawh midang hopihna in haina hi a, mipilte pau loin om dide hi. Mi a gensia-siate’ tungah thusim kigen ngam lo a, a muanhuai mite tung bekah thusim kigen ngam hi. Thu lamlak ding a nei lo mihingte kipuk uh a, thu lamlak tampi neihna in lungmuan’ na hi. Midang khat’ leiba lohsak ding na kiciam leh na kisik ding hi; tua bang thu-ah kihel kei lecin nang adingin hoihzaw hi. A dik numei kizahtak a, dikna nei lo numei in mindaina hi. A thadah mi in sum nei ngei lo a, a hahkat mi in sum hau hi. Migi lecin nang adingin ahoih bawl na hi a, gilo lecin nangmahmah a kigimsak na hi bek hi. Migilote in a man nei taktak bangmah ngah lo a, thuman-a gamtate in pel loin thaman hoih ngah hi. Thu man-a gamtat ding a hanciamte nungta ding a, asia-a gamta teiteite si ding hi. Topa in lungsim gilo mite mudah a, a man-a gamtate tungah lungkim hi. Migilote in daan a thuak hamtang nading, midikte daan tawh a kipelh nading thei in. Thu a ngaihsun thei lo numei meelhoihna in, vokpi muk-a om kham nakbah tawh kibang lel hi. Mihoihte’ deihna thuhoih tawh kizom tawntung a, migilote’ deihna a tun’ ciangin mi khempeuh heh hi. Mi pawlkhat in sum zang ziahziah napi-in hau semsem a, mi pawlkhat in cil mahmah napi, zawng semsem hi. A cingh mite hau semsem ding a, midang a huhte in huhna mah ngah kik ding hi. An man khan’ ding ngakna-in a zuak nuam lote kisamsia a, lei nop hun-a a zuak pahte kiphat hi. Thuhoih a hanciamte in pahtakna ngah a, siatna a hanciamte in siatna mah ngah hi. Tuk lai-a singteh tam bangin midikte’ hauhna khang ding a, phabi lai-a singteh pulh bangin hauhna suangte kiam ding hi. A innkuan sung a uk khial mite hawmsuak ding a, a haite mipilte’ sila suak tawntung ding hi. Midikte’ gah in nuntakna singkung hi a, nuntakna Khate a man mi in mipil ahi hi. Mihoihte, hih leitungah thaman kipia ahih leh, migilo leh mawhneite, gimna kipiazaw kan ding hi. Pilna a deihte in kithuhilh ding ut a, kitai ding ut lohna in haina hi. Mihoihte in Topa ’ maipha ngah a, siatna a gamtate Topa in mawhsak hi. Gitlohna in lungmuan’na piangsak lo a, thuman mite lungmuang takin om uh hi. Zi hoih in a pasal’ minthan’na leh lungdamna hi a, a pasal a maizumsak zi in a pasal adingin a dam thei lo guhnatna tawh kibang hi. Thuman mite in a kilawm a kituakin hong bawl a, migilote bek in hong khem nuam hi. Migilote’ thugente in mi thahnopna bekbek hi a, midikte’ thugente in a lauhuai sunga om mite honkhia hi. Migilote in sihna tuakin ci-mang a, thuman mite nungta-in khang kizom hi. Mipilte kiphatin kipahtawi a, mihaite kineu-et hi. Nektawm ding nei lopi-in milianpi bang-a omna sangin, nuntak nading nasem-a mi mawkmawk hihna hoihzaw hi. Midikte in a gannote hoihtak don a, migilote in a gannote bawlsia hi. Nakpi tak-a lokhote in an hau a, man nei lopi-a hun beisakna in haina hi. Migilote’ belh mun muanhuai in leikhal bangin kitamzan a, mihoihte’ zung kip tawntung hi. Migilote’ in a zuaugenna uh awkpih a, thuman mite, buaina tawh kipelh hi. Mite in kamhoih pauna hangin thaman ngah a, a sepna bangun zong thaman ngah hi. Mihaite in amau mah thuman kisa tawntung a, mipilte in mi’ thugenna ngai nuam uh hi. Mihaite in a hehna uh langsak pah a, mipilte in a hehna uh iip zo hi. Thuman mite in thu taktak mah gen uh a, zuau tecite in khemna thu bek gen uh hi. Ngaihsun lo-a kampauna in temhiam bangin mi liamsak thei a, mipilte’ kampauna in tua bang liamna damsak thei hi. Thuman genna kip tawntung a, thuzuau genna tomno sung bek kimang hi. Thusia ngaihsunte lungkham a, thuhoih vaihawmte lungdam hi. Thumante tungah thusia tung lo a, migilote, lungkhamna tawh kidim hi. Topa in zuau gen mite mudah a, mi citakte tungah lungdam hi. Mipilte in a theihna uh im khinkhian a, mihaite in a haina uh pholaklak hi. Mi thunuamte a vang lian a, a thadahte sila suak hi. Lunghihmawhna in lungkhamna piangsak a, kampau hoih in mi lungdamsak hi. Midikte in a gamtatna uh tel-et a, migilote, a gamtatna un lam pialsak hi. Thadahte, a tup tung ngei lo a, thanuamte in a deih ngah hi. Mi thumante’ gamtatna in nuntakna piangsak a, mihaite’ gamtatna in sihna piangsak hi. Ta pil in a pa’ hilhna mang a, a kihisak mi in akhial min pua nuam lo hi. Mihoihte in a kamsiamna bangun thaman sang a, mizuaute in siattat ding bek ut uh hi. Pau a ki-ip zo mi in a nuntakna a hu hi a, a mawk paupau mi in amah a kisiasak tawm ahi hi. Thadah mi in a deih ngah zo lo a, nasep hahkat mi in a deih khempeuh ngah zo hi. Thuman mi in zuauthu deih lo a, a gilo mi in gensiatna leh mindai nading bek pau hi. Diktatna in midikte hu a, gitlohna in mawhneite’ pukna hi. Mi pawlkhatte, zawng napi-in kihau sak uh a, mi pawlkhatte, hau napi-in kizawngsak uh hi. Mihaupa’ sum hauhna in a nuntakna tankhia zo a, mizawngpa in kitat nading bangmah nei lo hi. Thuman mite, khuavak bangin taang lela a, migilote meivak bangin mit pak hi. Hilh ding ut lo a, kihihsakna in kitotna bek piangsak thei a, hong kithuhilh ding utna in a hoihzaw ahi hi. Ol tak-a hauh pakna in kiam kik pah a, haksapi-a hauh tohna in khang semsem hi. Lamet tun’lohna in lungsim cinasak a, deihna tangtun’na in lungdamna hi. Thu kihilh ding ut lohna in siat ding utna hi a, thu kihilhna zuihna in lungnopna hi. Mipilte’ thuhilhna in nuntakna tuinak bang hi a, sihna thang tawh kipelhna ahi hi. Thu ngaihsut theihna in maipha ngahna hi a, zuautatna in lungkhamna bek piangsak hi. Thu ngaihsun theite, pilna tawh gamta a, mihaite in a haina tangkoko hi. Kamtai ginalo in mi lungkhamsak a, a citak thu puapa in mi lungdam kik sak hi. Thu kihilhna zui lo mi in zawn’na leh mindaina ngah a, thu kihilhna a zui mi in minphatna leh pahtawina ngah hi. Deihna ngahna in lungsim nuam sak a, siat gamtatna panin mihaite pialkhia nuam lo hi. Mipil tawh kikhawl lecin na pil ding a, mihai tawh kikhawl lecin gimna na thuak ding hi. Tuahsiatna in mawhneite sulzuih kawikawi a, midikte tuahpha kawikawi hi. Midikte in a tu a tate’ luah ding gamh nei a, mawhneite neihsate ahih leh midikte’ ading hi lel hi. Lo thak panin mizawngte’ khamkhop ding an piang kha ding a, ahi zongin thuman lohna hangin tua nangawn maimang thei ding hi. A ta a tai nuam lote in a mudah hi a, a ta a itte in lim takin thuhilhin tai hi. Thuman mi in a kham ding nei-in a gil vah a, a gilo mi in nektawm ding nei loin a gil kial hi. Numei pilte in innsung nuntakna khangsak a, numei haite in innsung susia hi. Thuman-a gamta mite in Topa zahtak a, a sia-a gamta mite in simmawh hi. Mihaite a pau ciangin satna thuaklawh uh a, mipilte’ pauna in sat nading pan pengsak hi. Bawngtal om kei leh lo panin an tawm bek kila a, bawngtal’ tha tawh an kihau hi. A citak teci in thuman bekbek gen tawntung a, a gina lo teci in zuauthu bekbek gen tawntung hi. Mi a simmawh theite in pilna a zon’zon hangin ngah zo lo a, thu ngaihsun theite in olno takin ngah thei uh hi. Mihaite tawh kikhawl kei in, amau’ kiang pan pilna na ngah kei ding hi. Thu ngaihsun theite a pilna in lampi man musak a, mihaite a haina in lam khialsak hi. Mihaite in a khialh hangun phamawh sa lo uh a, mipilte a khialh ciangun mawh maisak ding deih uh hi. Lungdamna leh lungkhamna eimah bek in i theih hi a, midang kuamah in hong phawkpih kha lo hi. Migilote’ inn kisusia ding a, thuman mite’ inn kipin gina semsem ding hi. Mihingte in thuman lampi hi a cih khakte pen, sihna lampi na hi kha thei hi. Nuihna in cihmawh seelna zong hi thei a, kigualnop sakna a ven’ciangin dahna hong kilang kik hi. Misia in siatna thaman ngah a, mipha in phatna thaman ngah hi. Mihaite in a thu zak peuh um pahpah a, mipilte in a gamtat nading ngaihsun cian hi. Mipilte in Topa zahtakin siatna panin kihem a, mihaite in thu ngaihsun masa loin gamta pahpah hi. A lungtom mite hai gamtat a, ngaihsutna hoih lo a neite kimudah hi. Mihaite in haina bek mah ngah a, mipilte in pilna mah ngah thuah hi. Migilote in mihoihte mai-et uh a, maipha a piak nading uh thuum uh hi. Kuamah in mizawngte ngai lo a, mihaute in lawm tampi nei hi. Mizawngte a simmawhte a khial hi a, mizawngte’ tungah a cinghte thupha ngah ahi hi. Na a hoih a semte, mite in muangin zahtak a, asia gamtatna in khialhna lianpi ahi hi. Gimpi-a nasepna in hauhna hi a, kam bek pau-in tut mawkna in zawn’na ahi hi. Pilna in mipilte’ minthan’na lukhu hi a, haina in mihaite’ kizepna bulpi pen ahi hi. Thutak a gen teci in nuntakna hu zo a, thuzuau a gen teci in mi lehhek hi. Topa a zahtak mi in lungmuanna nei a, a tate’ belh theih ding ahi hi. Topa zahtakna in nuntakna tuinak tawh kibang a, sihna thang tawh kipelhsak hi. Mi tampi a uk kumpipa a minthang a, a uk ding mi om kei leh a mawkna hi. A lungduaite mipil hi a, lungtomna in haina kilatna hi. Lungnopna in pumpi cidamsak a, hazatna in guh muatsak natna ahi hi. Mizawngte bawlsiatna in a piangsak Pasian simmawhna hi a, mizawngte tungah citna in Pasian zahtakna ahi hi. Migilopa, ama tatsiatna in puksak a, mihoihpa, ama hoihtatna in hu hi. Thungaihsun theite’ lungsim sungah pilna teeng a, mihaite in pilna thei kha lo uh hi. Thumanna in minam minthangsak a, mawhna in minam mindaisak hi. A hoih-a gamta mite tungah kumpipa lungdam a, a gina-a gamta lote daan pia hi. Kam neem-a dawn’na in hehna damsak a, kamkhauh in hehna piangsak hi. Mipilte in pilna thu gen a, mihaite in haina thu gen hi. Topa ’ mit in mun khempeuh mu a, misia, mipha, hong encik kim hi. Kamkhum in nuntakna piangsak a, kamsia in lung gimsak hi. A pa’ hilhna a ngai nuam lote mihai hi a, hilhna a mang nuamte mipil ahi hi. Thuman mite’ neihsa kip a, migilote’ hauhna in lungkham guan hi. Mipilte’ kampauna in pilna khang sak a, mihaite lungsimah thuman lohna bek om hi. Topa in migilote’ biakpiakna kihhuai sa a, thuman mite’ thungetna-ah lungdam hi. Topa in migilote’ gamtatna kihhuai sa a, thuman a deih mite a it hi. A gamta khial mite, nakpi takin kithuhilh a, kithuhilhna a mang nuam lote in sihna thuak ding hi. Topa in sihna gam sunga omte nangawn mu thei ahih leh, mihingte ngaihsutna telmuh zawkan ding hilo ahi hiam? A kihisak mite in kithuhilhna ngai nuam lo uh a, mipilte kiangah thu dong ngei lo uh hi. Lungdamna in mai taiisak a, lungkhamna in mai gumsak hi. Thungaihsun theite in pilna zong a, mihaite ahih leh theihlohna tawh lungkim hi. Mizawngte, a lungkham hi tawntung a, a lungdam mite in nuntakna nuamsa mahmah uh hi. Hau napi-a lungkham sangin, zawng napi-a Topa zahtakna hoihzaw hi. Kitawngtawng kawm-a sa meh limpen nekna sangin, ki-it diamdiam-a anteh meh nek hoihzaw hi. Lungtomna in kitotna piangsak a, lungduaina in kilemna piang sak hi. Mi thadahte in mun khempeuh ah haksatna tuak a, mi thumante in haksatna tuak kha lo hi. Ta pilte in a pa lungdam sak a, mihaite in a nu simmawh hi. Mihaite in a hai mah uh lungdampih a, mipilte ahih leh a manin gamta uh hi. Lim ngaihsut lo-a sepna tawh bangmah piang zo lo a, ngaihsut piaknate tawh ma kitun’ zo hi. A hun mah-a dawn’ pah theihna lungkim huai a, a kilawm kammal tawh dawn’ pah theihna hoihzaw kan hi. Mipilte in nuntakna lampi zuito uh a, sihna lampi zuisuk lo uh hi. Topa in mi kiphasakte’ inn phelkhiatsak a, meigongte’ neihsa hutpih hi. Topa in migilote’ ngaihsutna kihhuai sa a, midikte’ kampaunate hoih sa hi. A man lo-a sum ngahna in innsung lungkham sak a, sumgolh a deih lote a nuntak sauvei nuam hi. Mihoihte in a kampau ding ngaihsun phot a, migilote’ paupakna in thusia tawh kizom hi. Topa in midikte’ thungetna ngai a, migilote’ thungetna don lo hi. Maitaina in lung nuamsak a, thuhoih zakna in lung damsak hi. Kithuhilhna zuih theihna in, mipilte’ lak-a kihel theihna ahi hi. Kithuhilh ding a ut lote amahmah a kisusia hi a, kithuhilh ding a utte pil semsem hi. Topa zahtakna in pilna mah hi pah a, kiniamkhiatna in pahtawina hong ngah sak hi. Mite in bangbang a geel zongin, Topa ’ deihna bang bekin a piang ding hi zaw hi. Mihingte in a gamtatna uh-ah man kisa a, ahi zongin Topa in a khenna khat na om hi. Na nasepnate khempeuh ah Topa ap in, tua hi leh na geelna bangin tangtung ding hi. Topa in na khempeuh ngimna nei-in bawl a, migilote nangawn siatna thuak dingin a bawl ahi hi. Topa in akihisak mite mudah a, daan a thuak hamtang nading uh, thei in. Thumanna leh cihtakna in mawhmai ngahna hi a, Topa zahtakna in siatna tawh kipelhna hi. Topa ’ deih bang-a gamtatna in, galte nangawn lawm-a kaih zawhna hi. Thuman lo-a hauhna sangin, thuman-a tawmno neihna hoihzaw hi. Mihing in thu geel a, ahi zongin Topa ’ deihna bangin kisemkhia hi. Kumpipa in thuman gen a, thu a khen ciangin khial ngei lo ding hi. A maan tawikhaina leh tawitehnate Topa ’ aa hi a, tawisuang khempeuh ama bawlsa ahi hi. Thuman-a gamtatna bek in kumpi kipsak ahih manin, asia-a gamtat ding kumpite ut lo uh hi. Kumpite in thuman genna deih uh a, thuman a gen mite it uh hi. Kumpipa heh leh mi khatpeuh in sihlawh thei a, mipil khat in kumpipa lungdamsak thei hi. Kumpipa maitaii leh nuntakna hi a, ama pahtakna in tuk-guah a zusak meiipi tawh kibang hi. Kham sangin pilna hoihzaw a, ngun sangin thu theihna deihhuai zaw hi. Mihoihte in siatna tawh a kipelh ding lampi tawn a, a lampi tot limtak-a a ngaihsun mi in a nuntakna a hu ahi hi. Kisaktheihna in siatna hong tuak sak a, kiphatsakna in pukna hong piang sak hi. Mi kihisak tawh kipawlin van kisutte ngahna sangin, mizawngte tawh kikhawlin mi neu-a om hoihzaw hi. Thuhilhna a mang mite, a maa vang ding a, Topa a muang mite, thupha ngah ahi hi. Lungsim pilte in thu muhna tawh kam pau uh a, amau’ kam khumna, zaknophuai kisa semsem hi. Pilna in mipilte’ adingin hin’na tuinak bang hi a, mihaite ahih leh amau’ haina mah in daan thuak sak hi. Mipilte in thu ngaihsun kawmin kam pau uh a, amau’ pauna zaknophuai semsem hi. Kam khum in khuaipizu bang hi a, a kam-ah khum a, guh leh tangte adingin cidamna ahi hi. Hoih hi, ci-a i ngaihsut khak thu khat pen, sih theih nading thu na hi thei zawsop hi. An duhna in mi na semsak a, gilkialna in nak sepsak semsem zaw hi. Migilote in siat nading bek zongzong a, a kampaunate uh na a kangtum thei meikuang tawh kibang hi. Mihoih lote in kitotna piang sak a, mi gensiate in lawmta ki-it kimlai kimuhdah sak hi. A ngongtat mite in a lawmte zol a, lungkhamna sung tun’pih hi. A mit hong sitsante in thusia a ngaihsun hi a, a neh hong piksante in thusia geel ahi hi. A teekte’ samkaang in minthan’na lukhu hi a, thuman-a nuntakna tawh a ngah ahi hi. Vangliatna sangin lungduaina hoihzaw a, khuapi khat ukna sangin eima pumpi ki-uk zawhna hoihzaw hi. Mite in bangbangin ai a san zongin, a piang ding thu in, Topa ’ deihna bang bek hizaw hi. Kitawng kawmin pawipi sungah an nekna sangin, lungnuam takin moh keu themkhat nekna hoihzaw hi. A pil silapa in a topa’ ta hai tungah aana nei-in, a topa’ gamh pawlkhat a luah hi. Kham leh ngunte, mei sungah kize-et a, mihingte’ lungsim, Topa in ze-et hi. Migilote in gitlohna thu mah ngaih-in nei a, zuautheite in zuauthu mah ngaih-in nei hi. A zawngte a simmawhpa in amah a Piangsakpa a simmawh hi a, midangte tuahsiatna-ah a lungdam mipa in daan tuak hamtang ding hi. Tute in puteekte’ minthan’na lukhu hi a, pate in tate’ minthan’na ahi hi. Miliante in zuauthu gen ngei lo a, mihaite in na-a kimang kampau ngei lo hi. Sumgolh a zangte in ai bangin ngaihsun uh a, a deih khempeuh uh a ngah sak dingin ngaihsun uh hi. Mi’ khialhna a maisakte, midangte in it-in lawm hau uh a, mi’ khialhna ciamtehna in lawm taanna hi. Mihai khat, zavei a kisatna sangin, mipil khat, khatvei taina in bunzaw hi. Thusia bekbek a deih tawntung migilote kiangah, a gilo kamtaipa bangin sihna tung ding hi. Mihaite a hai gamtatna uh i tuah khak sangin, a no a kilaksak vompi hang khat tuak leeng hoihzaw lai hi. Thuhoih kimlai thusia tawh a thukte’ inn sungah, cik mahin thusia veng cih om ngei lo hi. Kitot i kipat ciangin tui lipi cin’na phung kehsak khak tawh kibang hi; tua ahih manin a nasiat ma-in kitot khawl pak in. Migilote khahkhongna, leh thuman mite mawhsakna, a nih tuakin Topa in deih lo hi. Mihaipa in thu ngaihsut theihna nei lo ahih manin, pilna zon’ nading sum tampi a zat hangin a phattuamna om lo hi. Lawm citak in a tawntungin hong it a, i sanggamte in i lungkhamna hong thuakpih dinga piang ahi hi. Thu a ngaihsun thei lo mihaite bek, midangte’ leiba lohsak dingin kipia ngam hi. Khialh ding a utte, lungkham ding a ut hi a, kihisak-a paupaute, buaina zongzong ahi hi. Lungsim hoih lote in lungdamna mu lo a, mi a khem theite in lungkhamna tuak hi. Tapa hai in a pa’ lungkhamna hi a, tahai a neipa a lungdam lo hi. Mai taii-na in ci damsak a, mai gum tawntungna in guhtui teep kang hi. A ginalo thukhente in sumgolh sang sim uh a, a thukhenna uh ah thuman om nawn lo hi. Mipilte in ahoih pen-a gamtat nading thei a, mihaite in a cih nading meel uh thei lo hi. Ta hai in a pa dahsak a, a pian’na a nu zong lungkhamsak hi. A thuman mi daan piak ding hoih lo a, mihoihte satna in thu-khialhna ahi hi. Thu a thei taktakte in gengen khol lo a, a paupau khollote thu mu taktak hizaw hi. Mihaite nangawn pau loin om leh a pil mah-in kingaihsun hi; thu ngaihsun thei na hihna a kilat nadingin pau loin om in. Midang tawh a kipawl thei phalote pen amah bek thupi a kisate hi a, midangte’ cih khempeuh maan a sak khatbeek om lo hi. Mihaite in thu a tel theih zawh nading uh kin lo uh a, pil si, a kicih theih nading bek deihna tawh thu gen uh hi. Mawhna bawl leeng maizumna tawh kizom pah a, minsiatna ngah leeng mindaina tawh kizom pah hi. Mihingte’ kampau in pilna kipatna suak thei a, tuipi bangin thukin, luitui bangin siang hi. Mi mawhte angvanin diksak ding hoih lo a, midikte mawhsak ding thuman lo hi. Mihaite in kitot nading a pat ciangin, hong sat un, ci-a a ngenngen ahi hi. Mihaite a pau ciangin amau’ siat nading mah kampau hi a, amau kampau mah awkpih uh hi. Gensiatna in an a lim mahmah tawh kibang a, thakhatin i sungah kihupsuk hi. Na a susia mite a hoih loh zah mahin, a thadahte zong mihoih lo ahi hi. Topa ’ min in tausang muanhuai tawh kibang a, thuman mite in beelin lungmuangin om thei uh hi. Khuapi kim-a kulhpi in amah a hut bangin, a hauhna in amah a hu dingin mihaupa in ngaihsun kha hi. A kiniamkhiatte in zahtakna ngah uh a, a kihisakte in siat ding a manawh hi ta hi. A thu zakhin nai lopi-a dawn’kikna in, haina leh maizumhuaina ahi hi. Mihingte’ lungsim in cinatna thuak zo sak a, mihing lungsim kisia leh cih nading dang om nawn lo hi. Thungaihsun theite in a pilna uh behlap a, pilna a ngah nadingun mipilte in a bil uh tawh ngai uh hi. Letsong in a piapa’ adingin lampi hon’sak a, miliante tawh kimusak thei hi. Thukhenna zumah, a langpa in a thuk mateng, a gen masapa a thuman tawh kibang hi. Thu a gen siam tuaktuak mi nih, zum sungah a kisel ciangin, kiciamna bek in thu khen zo hi. Sanggamte huhna in khuapi muanhuai bangin hong hu a, sanggam tawh kitotna in kidon lohna piangsak hi. Mi khat in a kampauna hangin gilvahna ngah ding a, a thugenna hangin nuntakna ngah ding hi. Kampauna in sihna ahi a, hin’na ahi zongin piangsak thei a, i kampauna banga piangte san’loh phamawh hi. Zi a mu zote na hoih a mu hi a, Topa ’ maipha a ngah ahi hi. Mizawngte a pau ciangin thuumna kam zang a, mihaute in a dawn’ ciangin kihihsakna kam zang hi. Lawm pawlkhatte, sauvei kimang lo a, lawm pawlkhatte, sanggam sangin kipzaw hi. Zuau gen-a mihai hihna sangin, citak-a zawn’ khiukheuna hoihzaw hi. Thu theilopi-a lawpluatna hoih-lo a, mawk nawhtatna in lungkhamna piangsak thei hi. Mi pawlkhat in amau’ haitatna hangin gimna ngah hi napi-in, Topa ngawhin mawk heh uh hi. Mihaute in lawm mu thuahthuah a, mizawngte in a neihsun teng nangawn khahsuah suah hi. Thuman genlo teci in daan tuak pelmawh ding a, zuau gen mi suakta lo ding hi. A cingh mihaupa’ maipha ngah ding ki-ut ciat a, na a piak mi khempeuh ama lawm ahi hi. Mi khempeuh in a sanggam zawngpa uh mudah ciat a, a lawmte in a taisatna thu lamdang hi lo hi. A nungah zui-in a sap uh hangin amaute kimu zo nawn lo uh hi. Pilna a zongpa in ama phattuam nading a zong hi a, thu a thei mipa’ sepna mavang ding hi. Thuman lo teci in daan tuak pelmawh ding a, zuau gen mi in sihna thuak ding hi. Mihaite, a nop lua-a nuntak ding kilawm lo a, silate in, miliante a uk ding kilawm lozaw lai hi. Pilna in mi lungduaisak a, mi’ hong hehsaknate kiphawkmawh bawlna in minthan’na hi. Kumpipa’ hehna in humpinelkai hawk bangin lauhuai a, ama pahtakna in lopa tunga daitui taak bangin deihhuai hi. Tapa hai in a pa’ lungkhamna hi a, zi phunphun in a theu thei lo guahciin tawh kibang hi. Inn leh neihsate in pate tung panin a kiluah hi a, zipil ahih leh Topa bek in hong pia thei hi. A thadahte lumlum a, a mawk omte a gil kial hi. Thukham a zuite a khan’ sau ding a, thukham a zui lote si ding hi. Mizawngte tungah a piate in Topa ’ tungah a pia hi a, Topa in a cingin amaute tungah lohkik ding hi. Thu hong man’ theih lai-in na ta thuhilh in; na hilh kei leh a siat nading a deih na hi hi. Migilopa, ama thuak ding daan mah thuaksak zaw in; honkhia lecin, na hotkhiat kik zelzel kul ding hi. Thu kigente ngai-in, hong kihilhte mang lecin, mailam ah mipil na hi ding hi. Mihing’ ngaihsutna ah thu tampi om a, ahi zongin Topa ’ deihna tawh a kituakte bek kimang ding hi. Duhhopna in mindaina hi a, zuau genpa hihna sangin mizawng hihna hoihzaw lai hi. Topa a zahtakte in nuntakna nei-in, lungkim takin nuamsa-in om uh a, siatna bangmah tuak kha lo uh hi. A thadah mi in a khut tawh ankuang sawk sukin, a kam ah an a bah tohkik ding nangawn ut lo liang hi. Thu theilote in satna tawh pilna ngah zo bek a, thu ngaihsunte in taina lel tawh pilna ngah zo uh hi. A pa nawt gawpin, a nu a notkhia tapa in, zumna leh mindaina a piang sak tapa ahi hi. Thuhilhna a mang nuam lo tapa in, pilna a thei kha lo ding tapa ahi hi. Mi a susia nuam teci in thuman gen nuam lo a, migilote in gitloh tatna nuam sa uh hi. Mi a thusim lote in ciangduai thuak a, mihaite in satna thuak hi. Leenggahzu in kam tam sakin, khamtheih zu in kitawngsak a, zu khamna in haina ahi hi. Kumpipa’ hehna in a lauhuai humpinelkai hawk bang hi a, kumpipa a hehsak khate in sih lawh uh hi. Kitot khak ding pelhna in pahtak ngahna hi a, mihaite bek kitot ding ut uh hi. Lo khawh hun-a a kho nuam lo thadahpa in, tuk anlak hun ciangin bangmah nei lo ding hi. Mihingte’ ngaihsutna in a thuk sunga om tui tawh kibang a, thuthuk mu theite bekin suak khia thei hi. Mi khempeuh in mi citakin kigen kim uh hi; ahi zongin a citak takpi ding mi kimu zo ding ahi hiam? Mi khat thumanin a hoihin a nuntak leh, ama suan-le-khakte mi hampha ahi uh hi. Thukhenna tokhom tungah a tu kumpipa in, a mit-in a etna tawh a hoih lote khenkhia thei hi. “Ka lungsim siangtho hi; mawhna ka nei het kei hi,” a ci thei ding kua om hiam? Tawisuang nam nih leh piciang nam nih zanga khemna, Topa in a deih lohna kibang hi. Naupangte nangawn mi citak mihoih ahihna, a gamtatna panun kimukhia thei hi. Topa in khuamuh nading mit, leh khuazak nading bil hong guan hi. Lumlum lecin na zawng ding a, semsem lecin na hau ding hi. Vanleipa in vanzuakpa kiangah, “Kiman kei, kiman kei,” ci ci a, a paikhiat khit ciangin sum dek siam ing, ci-in mi kiangah kisial hi. Pilna tawh kam na pau theih leh, kham leh suangmanpha sangin a manphazaw a nei na hi hi. Mi khat in gamdang mi khat’ leiba lohsak dingin kam a haiciam leh, a ciam bangin a neihsa kilaksak takpi ding hi. A man lo-a kingah an in lim zungzung a, ahi zongin a nung ciangin suangtang hai khak tawh kibang hi. Hoih tak-a geelna, midangte ngaihsutna dotna tawh nasepna taangtung hi; geelna kician om lopi-in galsim dingin kipan kei in. Mi a gensia kawikawite muanhuai thei lo hi; tua banga mihai paute tawh kikhawl kei in. Na nu leh na pa na samsiat leh, khuamial sunga meivak kisumit na bang ding hi. A baihlam-a hauh pakna in, a tawpna ah phattuamna om lo hi. Mite’ hong bawlsiatna thukkik ding ngaihsun kei in, Topa ’ hong huh ding ngak in. Tawisuang nam nih a zangte, Topa in mudah a, amah in tawikhaina man lote hoihsa lo hi. Topa in mihingte’ gamtat nading uk hi; koici gamtat ding cih mihing in bangci theih ding ahi hiam? Pasian tungah piak ding na ciam ma-in hoih takin ngaihsun masa in; tua hi kei leh na kinungsik kha ding hi. A pil kumpipa in migilote tengkhia a, khasiat loin daantat gawp hi. Topa in mihing lungsim meivak bangin zang a, i sung tawng dong hong entel hi. Kumpipa in itna tawh thuman, thutang, citakin a uk lai teng, a kumpi za-ah kip bek hi. Khangnote’ thahatna in amau’ minthan’na hi a, khanghamte’ sam kan’na in amau’ thupina lim ahi hi. Nakpi tak-a satna in misia kimlai a pha hong suah a, nakpi tak-a vuakna in i sung tawng hoih lohna teng siangsak hi. Topa ’ khut sungah kumpipa om a, lo sunga tui lak bangin a deihna peuhah hei kawikawi thei hi. Na gamtatna khempeuh nangmah in man na sak hangin, Topa in na lungsim tawng a et telna phawk in. Topa in biakpiakna sangin, thuman thutang deihzaw hi. Kihisak-a gamtatna leh kiphatsakna lungsimte in, mawhna hi a, migilo hihna lim ahi hi. Lim takin ngaihsunin geelna in hauhna lampi hi a, nawhsa-in lopthop hihna in zawn’na lampi ahi hi. Zuau genna tawh hauhna in beimang pak a, sihna khuk sung hong tun’pih hi. Migilote, a manin gamta nuam lo uh ahih manin, amau’ gamtat siatna mah awkpih uh hi. Mimawhte thukawi-in gamta uh a, midikte a man-in gamta uh hi. Phun bek a thei zi tawh inn sungah teen’ khop sangin, innkhumzang kiu khat-a tang teen’ hoihzaw tham hi. Migilote in thusia bekbek deih uh a, a lawmte nangawn zah tuan lo uh hi. Mi kiphasakte daan a kipiak ciangin mi mawkmawkte in pil lawh a, mipilte a kihilh ciangin thutheihna-in nei uh hi. Midik in migilopa’ inn sung encik a, migilote lawnthalin siasak hi. Mizawngte’ huh ngetna a pia nuam lote pen, amau zong cimawhin huhna a nget ciangun kipia lo ding hi. A simtham-a letsong piakna in hehna dam sak a, puan nuai-a tawi in sinsona dai sak hi. Thutangin na a kisep ciangin midik khempeuh lungdam a, ahi zongin migilote lungkham hi. A kilawm gamtatna panin a pialkhiate, misi honte’ lakah tung hi. A noptat nuamte zawng a, zu ne a, sathau namtui nilhte hau lo hi. Midikte’ thuak dingin a bawlsak uh gimnate pen, migilote mah in lehthuak zawsop uh hi. A phun hat zi gilo tawh teen’ khop sangin, gam simtham-a khat guak teen’ hoihzaw hi. Mipilpa’ inn sungah neih leh lam a dim a ha-in om a, ahi zongin mihaipa in a ngah zahzah zangkhia pah hi. Thuman thutakin gamta tawntung lecin, na khan’ sau-in, pahtawina na ngah ding hi. Mipil khat in mi thahatte’ hut khuapi la zo a, amau’ muanmuan kulhpi nangawn susia zo hi. Kampau a ki-ip zote, lungkhamna tawh kipelh hi. Mi kihisak i cihte pen, kiliansakin a kiphasak mite ahi hi. Mi thadahpa in na sem nuam lo ahih manin, amahmah a kithat tawm ahi hi. Mihoih lote in lungkim hun nei loin deih thuah tawntung a, mihoihte cingh-in, piakhia tawntung uh hi. Topa in migilote’ biakpiakna deih lo hi; ngimna hoih lo tawh a piakte uh deih lo kanlai hi. A manlo tecite mangthang ding a, thuman tecite’ kam kiza za ding hi. Migilote in mi’ muan theih nadingin khauh pau uh a, midikte ahih leh lungmuangin kampau hiathiat uh hi. Pilna, theihna, thugennate in, Topa ’ mai-ah bangmah man lo hi. Galdo nadingin sakolte a baihsa-in kikoih a, ahi zongin galzawhna pen Topa ’ hang hizaw hi. Hauhna sangin min hoihna deihhuai zaw a, kham leh ngun sangin mi’ hong thusimna deihhuai zaw hi. A hau a zawng a kilamdan’na om lo hi; a nih tuak-in Topa ’ bawlsa ahi uh hi. Mipilte in a lauhuai thu mu thei-in pelh uh a, mi mawkmawkte in phu suakin thuak uh hi. Kiniamkhiat-a, Topa zahtakna thaman in, hauhna, minthan’na, leh khan’sauna ahi hi. Migilote’ lampi-ah thang kisiahin so kidawh a, mipilte in tua lampi pelh uh hi. Naupang khat a neu lai-in lampi man tawnsak lecin, a teek dongin lam pial nawn lo ding hi. Mihaute in mizawngte uk a, leitawi a late in a piate’ sila suak hi. Thuman lo khaici a vawhte in lungkhamna tuak a, amau’ hehna ciangduai amau’ tung mah tu kik hi. A cingh mite in mizawngte an pia a, amah in thupha ngah kik hi. Mi kiphasakte hawlkhia lecin, kitotna leh kisimmawhna bei ding hi. Lungsim siangtho tawh kamsiamna in kumpipa’ lawm hong suaksak hi. Topa in thuman mite kem a, ahi zongin thuzuau gente lawnkhia hi. Mi thadahte inn-ah lumlum a, “pua pial leeng humpi’n hong hih kha’n teh,” ci uh hi. Numei tunga mawhna in thangzak bang hi a, tua thang ah a awkte tungah Topa heh hi. Naupangte a hai gamtat a ngeina hi a, deihsak-a satna in mihoih suaksak thei hi. Hauh nop manin mihaute letsong pia leeng kizawn’lawh a, hauh nop manin mizawngte’ neihsa laksak leeng zong kihauhlawh tuan lo hi. Na bil uh hong ngatin, mipilte’ thugen ngai un la, ka hong hilh pilna thute na lungsim uh ah lut sak un. Na lungsim uh ah cing-in zang thei le uh cin, na lung uh dam tawntung ding hi. Tua hi leh Topa muan’in na nei ding uh a, tu ni-in note’ phattuam nading kam pau ka suak ding hi. Thuhilhna leh pilna thu nam sawmthum, hih lai munah note’ adingin ka gel a, note hong sawlte tungah thuman na gen kik theih nadingun, thuman na theih nading uh ka deihna ahi hi. Bangmah hong hih zo lo ding cihna tawh nuamtak sa-in, mizawngte’ neihsa mawksut kei in la, zum-ah khia-in mawk bawlsiat kei in. Bang hang hiam cih leh Topa in amaute pan’pih ding a, amau a bawlsiate tungah phu laksak ding hi. A hehbaih mite tawh kipawl kei in la, a lungtom mite tawh kikhawl kei in. Amau’ hoih lohnate na zuih khak loh nading na kidop kei leh, nangmah in zong na awk-lawh kha ding hi. Midangte’ leiba lohsak dingin kamciamin, leiba tavuan la kha kei in. A leiba lohsak zo kei lecin, na lupna nangawn hong kidawh khiatsak ding hi. Na pu na pate’ phuhsa gi-suang, cik mah hunin khin kei in. Ama nasepna-ah a siam mahmah mi na thei kha hiam? amah in mi mawkmawkte’ na sem lo ding a, kumpite’ na sem ding hi. Mi liante tawh an nekhawm dingin na tut ciangin, na tutpihpa lim takin en in. An ngaklah thei mi na hih leh zong lim takin kidawm in. Hong thangsiahna hikha thei ding ahih manin, tua an limte lunggulh lua pah kei in. Hauh nop man bekin sum’ sila suak kei in la, a man loin gamta kha kei in. Na ngahsa, sumte, mitphiat kalin bei mang thei a, muvanlai bangin thakhatin lengmang thei hi. A cil tentan mite’ an neksak kei in la, a an limte uh duhgawh kha kei in. “Ne ne in hong cih hangin,” a cih takpi hi lo hi. Na dangtawng hong sun samzang nek khak tawh kibang ding hi. Na neksa teng na luakhia kik ding a, na kamsiam ngah teng maimang ta ding hi. Mihaite, pil hopih kei in, a manphatna phawk thei lo uh hi. Taanglai gi-suang khin kei in la, tagahte’ leitang va keek kei in. Amaute a Hupa in a tha hat a, nang’ lang khatah amaute pan’pih ding hi. Hong kihilhnate zui-in la, pilna thu hong kigente ngai in. Naupangte sat ding lunghiang kei in; satna hangin si lo ding hi. Ciangduai tawh sat lecin, nuntak lawhzaw ding hi. Ka ta aw, mipil suak lecin, ka lungdam mahmah ding hi. Thuman na gen ciangin, ka nuam mahmah ding hi. Mawhnei mite eng kha kei in la, Topa na zahtakna zom paisuak in. Tua bang hi lecin lametna om a, ci-thei-in na khan’ a sau ding hi. Ka ta aw, ka thu ngai in la mipil suak in; lampi man zuih ding ngaihsutpi-in nei in. Zu ne nete tawh kikhawl kei in la, a uisante tawh kithuah kha kei in. Zu nete leh a uisante zawng ding uh a, a ne bek-a nitumte in puansia bek silh zo ding uh hi. Na pian’na na pa’ thu ngai in la, na nu a teek ciangin simmawh bawl kei in. Thuman, pilna, siamna, thu ngaihsut theihna lei in; tuate zuakkhiat dingin pammaih lua hi. Ta hoih a neipa in a lungdam ding a, ta pil a neipa in a ta tungah lungkim ding hi. Na nu leh na pa a kipah nadingin gamta in la, na pian’na na nu lungdamsak in. Ka ta aw, na lungtang kei hong pia in la, ka gamtatnate na mit-in en gige in. Numei paktatte in kiat theihna gum tawh kibang a, numei ginalote in tangciak theihna hawkguam tawh kibang hi. Gutate bangin nang hong buksim a, mi tampi tak siasak uh hi. Kuate in gal nei a, kuate in dahna thuak hiam? Thu om lopi-in kuate liam a, thu om lopi-in kuate a mit san gega hiam? Zu ne-a a tut khote, zu a ne nete ahi hi. Hai sungah a phuan seuhseuh, gawl sungah a tum suk hit-hit thei, leenggahzu san etin nei kei in. A tawpna-ah gulpi bangin hong tu ding a, gul gu nei bangin hong tu ding hi. Na mit-ah na lamdang dang hong suak ding a, hoih takin na pau thei nawn kei ding hi. Tuipi tunga lum tawh na kibang ding a, a suk-awn a to-awn teembaw dawn-a tuang tawh na kibang ding hi. “Hong vuak hangun ka liam kei a, hong sat hangun ka phawk kei hi. Ka pilvan' ciangin zu ka ne kik ding hi,” na ci ding hi. Migilote eng kei in la, amaute tawh kikhawl kei in. Amaute in tatsiat ding bek ngaihsun uh a, thusia bekbek genin nei uh hi. Pilna tawh inn kilam a, ngaihsut siamna tawh inn kip hi. Thu ngaihsut theihna a omna inn sungah, ahoih amanpha nate a dimin om hi. Thahatna sangin pilna hoihzaw a, thakhauhna sangin thutheihna hoihzaw hi. Geel siamna tawh galte kizo a, ngaihsut siamnate tawh gualzawhna kingah hi. Pil kampauna in mihaite’ theih zawh dingin thuk lua a, mihon lakah mihaite in thu gen ngam lo uh hi. Thusia lamsang a deih mite, thusia bawl mi kici hi. Mihaite’ vaihawmna in khialhna bek piangsak lel a, mi a simmawh theite, midangte in mudah uh hi. Haksakna na tuah ciangin na lung a kiat leh, a gina lo mi na hi hi. Thah dinga a kikai khia mipa honkhia in la, sih nading mun a zuan mipa leh kaih in. Ke’n thei kha kei ing, na cih nop hangin, lungsim a thei Pasian in tel veve a, nang hong encik Pasian in hong tel theihna phawk in; mi khempeuh a gamtatna bangin thukkik ding hi. Ka ta aw, khuaizu khum ahih manin ne in; khuailuzu in i kam-ah khum mahmah hi. Pilna in i nuntakna ah khuaizu tawh kibang a, pilna nei lecin mai lamah lametna om a, na khan’ hong sausak ding hi. Migilote’ gamtat bangin, thuman mite’ omna sugawp kei in la, amau’ teen’na inn luhgawp kei in. Mihoihte, sagih vei dong a puk hangin thokik kik thei a, migilote ahih leh tuahsiatna tuakin kithallot hi. Na galte in gimna a ngah ciangin lungdam kei in la, a puk uh ciangin kipak kei in. Bang hang hiam cih leh, Topa in hong thei-in nang tungah lungkim lo ding a, na galte tungah heh tat nawn lo kha ding hi. Migilote hangin na lung nuammawh sak kei in la, amaute eng kha kei in. Amaute in mai lamah lamet ding bangmah nei lo hi; amaute’ meivak kisukmitsak ding hi. Ka ta aw, Topa leh kumpipa zahtak khawm in la, amau a langpangte tawh kipawl kha kei in. Tua bang mite thakhat thu-in kisugawp thei ding hi. Pasian leh kumpipa’ pian’sak theih ding gimna, kuamah in genkhol thei lo hi. Mipilte’ thugen dangte in: Mi langmuh-a thukhenna hoih lo hi. Mimawh kim lai a diksak thukhenpa, leitunga mi khempeuh in mudahin phuisam ding hi. A mawh mi daan a pia thukhenpa ahih leh, thupha kipia-in a dau pai ding hi. A man tak-a dawn’kikna in, lawm taktak hihna lim ahi hi. Na nuntak nading zong masa in la, na an nek ding a kicin’ ciang bekin, na inn ding lamin zi leh ta nei pan in. Thu kician om lopi-in na vengpa langkhatah teci pang kei in la, ama siat nadingin zuauthu gen kei in. Kei tunga hong bawl bangin kei zong ka bawl ding a, ama hong hihna bangin ka thuk ding hi, ci kha kei in. Mi thadahpa’ lo gei-ah ka va pai a, mihaipa’ leenggui lo ka nawk kha hi; ka et ciangin a locing bup-ah kiak dim a, a leitang khempeuh lopa in khuh a, a umna a phungcian’ suangte kicim khin hi. Tua bang ka muh ciangin thu ka lungngai a, thu manpha khat ka mukhia hi. Tawmkhat ihmutna, tawmkhat lusukna, tawmkhat sung na sem loin khut zepna hangin, i tungah zawn’na hong tung a, cihmawhna in hong khuhcip hi. Judah kumpi Hezekiah’ lai-atte in a tei Solomon’ paunak dangte: Pasian in thu a ip manin minthang a, kumpite in thu a gen khiat manin minthang hi. Vantung sang lua a, lei sung a thuk luat mah bangin, kumpipa’ ngaihsutna thuk lua-in kithei zo lo hi. Ngun a ek teng paaikhia lehang, siksekpa in na hoihpi piangsak thei hi. Kumpipa kiang pan migilote nilkhia lehang, thuman-a ama ukna kip thei bek hi. Kumpipa mai-ah na om ciangin milian kineih kei in la, miliante’ tutna ding munah tu kha kei in. Uliante a awn dingin hia lai-ah va tusuk in hong kicih sangin, hih lai-ah hong tuto in, hong kicih ding hoihzaw hi. Thu khatpeuh na theih ciangin, thukhen zum tun’ pah kei in. Na vengpa in nang’ khialhna hong laktel kik leh, nang’ bang lawh nawn ding na hi hiam? Na thuneihpih na vengpa bek mah tawh thu kisel in la, mi khat’ thusim midang tungah genthaang kei in, Tua hi kei leh amah hehin nang hong maizumsak ding a, na minsiatna bei ngei lo ding hi. A kilawm hun-a kammal khat paukhiatna in, ngunpeek tunga kham tang khat a kisuang tawh kibang hi. Hilhna a sangthei mipa’ adingin a pil thuhilhpa in, kizepna kham bilbah tawh kibang hi. Amah a sawlte tungah a citak kamtaipa in, an lak hun-a tuikhal vot tawh kibang a, a tote’ lungsim thak suaksak hi. Bangmah a piak lohpi a kisialhpihpa in, guah a zusak tuan lo meiipi leh huihpi nung tawh kibang lel hi. Lung duai-a zolzolna tawh gam ukte kizo thei a, kamnem-a pauna tawh aana neite kizo thei hi. Khuaizu na nek ciangin a hoih khop zah bek ne in; tua hi kei leh kham lua-in na lua ding hi. Na vengte inn-ah hawh mun lua kei in; hong cimtakin hong mudah kha ding hi. A lawmte’ lang khatah teci man lo a pang mi in, molhtum, namsau, ahih kei leh thaltang hiam tawh kibang hi. Haksat hunin a zuautat mi muan-a neih khakna in, ha na, ahih kei leh khebai tawh kibang hi. A dah a lungkham mipa kianga lasakna in, khuadam lai taka puan suahkhiat tawh kibang a, meima ci-al nuh tawh kibang hi. Na galte a gil a kial leh an pia in la, a dang a taak leh tui pia in. Tua hi leh amau’ maizum nadingin a bawl na hi a, Topa in nang tungah thaman hong pia ding hi. Leilu lam huih in guah a zuksak bangin gensiatna in hehna piangsak hi. Phun bek a thei zi tawh inn sungah teen’ khop sangin, innkhumzang kiu khat-a tang teen’ hoihzaw tham hi. A dangtak mipa in tuivot lim a sak bangin, gamlapi-a om lawmte kiang pan-a thupha zak nuam kisa hi. Mihoih khat in mihoih lote’ gamtatna a zuih khak ciangin, hawktui nin, ahih kei leh tui uih tawh kibang hi. Khuaizu tamlua nek ding a hoih loh bangin, phat ding deih luatna in hoih lo hi. Ama lungsim a ki-uk zolopa in, dalna kulhpi a nei lo khuapi tawh kibang hi. Tuk lai tak-a vukkia, leh an lak hun-a guahzu bangin, pahtawina in mihaite’ adingin a kilawmna om lo hi. Thu om lopi-in hong kisamsiatna in bangmah hong cih thei lo a, khawlna mun mel a nei lo a lengsuk a lengto Phialphiah tawh kibang lel hi. Sakolte sat ding kisam a, Late kamkaih bulh ding kisam a, mihaite zong satloh phamawh hi. Mite’ hai thudotna dawngdawng lecin, nang zong amau mah banga a hai na hi hi. Mihaite a pil kisa kha ding uh ahih manin, amau’ haina tawh kizui-in dawng in. Mihai khat kamtai-a a zangpa in, ama khe mah a sattan tawm, siatna a zongpa ahi hi. Khebaipa’ khe, kiman’na om loin a kikhai mawk bangin, mihaite’ adingin paunak in bangmah man nei lo hi. Saili kuangah sailungtang khihcip lehang a phattuamna a om loh mah bangin, mihaite pahtawina in a mawkna ahi hi. Mihaite in paunak thuhilhnate a paukhiat ciangin, zu khampa in a khut-a ling om a khei dinga kipan tawh kibang lel hi. Mihai a tuahkhak peuh tha cial-a a neipa in, a tuahkhak peuh a bankap thaltawipa tawh kibang hi. Ui in a luak a zuat kik bangin, mihaite a haitat ngei bangin ta kik zel hi. A pil lo kimlai pil a kisapa sangin, mihaite’ adingin lametna om zaw lai hi. Thadahpa in, “Lampi-ah humpinelkai om! Kongzingah humpinelkai om!” ci-in lumlum hi. Kongkhak in kawmheek tungah a kiheihei lel bangin, mi thadahpa a lupna tungah kiheihei hi. Thadahpa in a khut-in ankuang sung sawk suk a, a kam-ah a bahtoh ding nangawn gim zungzung kisa hi. A kilawm-a thu a dawng thei mihing sagih sangin, mi thadahpa ama ngaihsutna-ah pil kisa zaw hi. Eite tawh a kisai lo kitotna sunga va kiphumna in, ui ommuang khat a bil-a kaihsak tawh kibang hi. A vengte a khem khit ciangin, ka ciamnuihna hi, a cipa pen, sih theihna gu a baang thaltang tawh a kappa tawh kibang hi. Sing om kei leh mei mit a, gensiatna om kei leh kitotna bei hi. Meihol in mei am ding piangsak a, sing in mei kuangsak a, migilo in kitotna piangsak hi. Gensiatna in a lim mahmah an tawh kibang a, mihingte’ sungtawng pekah tumsuk pahpah hi. Tungtham bek-a kamkhum pauna in, cimbeng kizut leibel tawh kibang hi. Mi simtatte in a kampi bek tawh thuhoih gen a, a lungsim ah zuauthu bek om hi. A lungsim-ah a deihhuai lo thu sagih tak om ahih manin, kam khum tak-a a pau manin um kha kei in. Ama hoih lohna a ip nop hangin, mi khempeuh in ama gitlohna thei veve hi. Mi siahna-in gum a tote, ama gum tawhna sung mah-ah amah leh kiat zawsop a, mi a deng kha dinga suang a khukte, ama suang khuk mah in amah leh khak zaw hi. Zuau genna in midik kim lai a mawh bangsak a, tungtham bek-a thugenna in siatna bek piangsak hi. Zing ciang hun-a ding kima-sialh kei in, tu leh tua hun kikal-a piang ding na thei kei hi. Midangte’ hong phat loh buang, nang kiphat tawm kei in. Khualmite’ hong phat loh buang, nangma kam-in kiphat tawm kei in. Suangtum leh sehnel gik mahmah a, ahi zongin mihaite’ pian’sak lungkhamna gikzaw lai hi. Hehna leh sinsona siahuai a, ahi zongin hazatna siahuai zaw lai hi. Itna i seelbawl sangin, a langtang-a taina hoihzaw hi. I lawmte in hong liamsak khak hangin, i hoih nading hong deihsakna hi a, i galte’ hong ngawng kawina in, hong lehbawlna ahi hi. A gilvah mipa in khuaizu nangawn duh nawn lo a, a gilkial mipa in a kha an nangawn lim sa hi. Inn panin gamlapi-ah a zinkhia mipa in, a bu panin a leengkhia vasa tawh kibang hi. Sathau namtui leh paknamtui in lungnuam sak a, lawmte’ limbawlna in tha hatsak hi. Na lawmte daang koih kei in la, na pa’ lawmte dong nangawn lawm bawl in. Na lungkham ciangin na sanggampa va ko kei in, a gamla-a om i sanggampa sangin, i nai-a om i vengpa kimang zaw hi. Ka ta aw, pil in, tua hi leh ka lungdam ding a, kei hong mawhsak nuamte in bangmah hong cih thei lo ding hi. Mipilte in a lauhuai thu mu thei-in pelh uh a, mi mawkmawkte in phu suakin thuak uh hi. Mi khat in gamdang mi khat’ leiba lohsak dingin kam a hai ciam leh, a ciam bangin a neihsa kilaksak takpi ding hi. Mi khat in a kituak lopi-in midang khat limbawl lua liang leh, amah in a sia lam-in na ngaihsun zaw hi. Phun bekbek a thei zi in, theu hun mel a nei lo guah ciin tawh kibang hi. Tua bang numei kikho thei lo a, a kikham thei lo huihnung, leh i khut-a sathau tawi nop tawh kibang hi. Sik in sik mah hiamsak thei a, mi in midang pilsak thei hi. Theikung a cingpa in a gah ne a, a topa a kempa in pahtakna ngah hi. Tui sung en leeng eima maitang i muh bangin, i lungsim en leeng eima pian’zia kilang hi. Mihingte’ lungsim in mi site’ gam tawh kibang a, tamlua cih hun nei thei lo hi. Ngun leh khamte, meikhuk-ah kize-et a, mihing ahih leh phatna tawh kize-et hi. Mihai khat a sih dek dongin na satsat hangin, a hai ngei mah-in hai veve lai ding hi. Na tuuhonte hoih takin thei in la, na bawnghonte hoih takin kem in. Bang hang hiam cih leh neihsa kip tawngtung lo a, hauhna pen, a khang khangin kizom suak lo hi. Lopate ki-at mang khin a, ahi zongin a no hong sel kik hi; mualtung a, po lopa hing khempeuh ki-atin inn-ah kipua a, tuute in na puan ding hong guan a, na keeltal mante in lo cing khat man tawh kikim hi. Na keelnawite ahih leh, na innkuan an nek ding, leh na nasem numeite nuntak nadingin kicing ding hi. Kuama delh lopi-in migilote taimang a, mi thumante ahih leh humpinelkai bangin hang uh hi. Gamsung mite a hoih loh ciangin, a ban banin gam uk tampi nei uh a, ahi zongin mipil thu ngaihsun theite in, gamsung thahatsakin kipsak uh hi. Mizawngte a bawlsia aana nei mipa in, lo-a ante a susia gawp guahzu tawh kibang hi. Thukham zui lo mite in migilote pakta uh a, thukham zui mite ahih leh migilote tawh kilemlo uh hi. Mi sia-huaite in thutang cih mel thei lo uh a, Topa a biate in ahih leh a kicingin thei uh hi. Hau napi-a mi lungsim kawi hihna sangin, zawng napi-a pauban’ neih lohna hoihzaw hi. Thuhilhna a mang mi in ta pil hi a, lawm gina lo tawh a kikhawl mi in a pa mindaisak hi. A meet a pung lakna tawh a hau mipa in, mizawngte a hehpih thei mipa’ adingin sum zong hi lel hi. Mi khat in thukham a zuih nop kei leh, ama thungetna nangawn Pasian in zak thadahhuai sa hi. A dik mi khat, siatsak ding a hanciampa pen, ama tawhsa gum sung mah-ah kia ding a, a dik mipa in gamh hoih luah ding hi. Mihaupa pen amah pil kisa a, ahi zongin a zawng mipilpa in, a haupa’ haina phawkkhia veve hi. Mihoihte in vangliatna a ngah ciangin, mi khempeuh lungdam uh a, migilote a liat ciangin, adangte in gimna thuak uh hi. A khialhna a im mipa a dau pai lo ding a, a mawhna pulakin a kikheel mipa in hehpihna ngah ding hi. Topa a zahtak tawntung mipa in mi nuamsa hi a, a lung khauh mipa in lungkhamna tuak ding hi. Mizawngte a uk migilopa in humpinelkai gilkial, leh vompi halungvei tawh kibang hi. Ngaihsut siamna a nei lo gam ukpa in a gilo kumpi hi ding a, thuman lo-a ngahna a deih lo mipa in sau veipi uk ding hi. Mi that-a a khialpa in, ama hankhuk ding a to hi a, a hankhuk tawh ding kho kei in. Thuman-a gamta mite lung muangin om ding uh a, a zuautat mite ahih leh puk ding uh hi. Nakpi tak-a lo khopa hau mahmah a, bangmah-a kimang tum lo a sempa zawng mahmah hi. A citak mipa in thupha tampi ngah ding a, a hau baih nuam mipa in daan tuak pelmawh ding hi. Mi langbawlna hoih lo a, ahi zongin letsong neucik khat hangin thukhente gamta khial thei zel hi. A huaiham mi in a hauh nadingin huai mengmeng a, a tawpna-ah a zawn’ ding lam tak phawk kha lo hi. Mi khat tai-in thuhilh lecin, tungtham-a phatna sangin, a tawpna-ah lungdam zaw ding hi. A nu leh a pa’ neihsa lak sak a, “Khialhna hi kei” a cipa in, guta mah hi veve hi. A huaiham mi in kitotna piang sak a, Topa a muang mi in mihau hi ding hi. Ei leh ei kimuan’na in haina hi a, mipilte’ hilhna zuihna in lungmuan’na hi. Mizawng a huhte cimawh ngei lo ding a, huhna a pia nuam lote in samsiatna ngah ding hi. Migilote a liat ciangin midangte bucip uh a, amaute a za kiat ciangin midikte in uk kik ding hi. Kihilhhilh napi-a a mang nuam lote, bawl phatkik zawh nawn loh dongin kisia ding hi. Midikte in gam a uk ciangin gam mite lungdam a, migilote in a uk ciangin a gam mite thuum uh hi. Pilna a deih mi in a pa lungdamsak a, numei paktat tawh a kikhawl mi in a neihsa teng lawnmang hi. Thuman-a a gamta kumpi in a gam kipsak a, sum bek a ngaihsun kumpipa in a gam siasak hi. A man lopi-a mi khat mawk phatna in, a awk nadingin thangsiahna ahi hi. Migilote, amau’ mawhna sungah awkcip a, midikte ahih leh suakta-in lungdam uh hi. Midikte in mi cimawhte’ ading thu khual a, migilote in tua bang khualna thei lo uh hi. Thu a khual lote in khua sungah buaina lianpi piangsak a, mipilte in tua buaina dai sak thei hi. Mipil khat in mihai khat tawh zum-ah thu nei leh, mipilpa tungah hehin zahko a, phattuamna piang tuan lo hi. Mi a that nuamte in a thuman mi mudah a, midikte in a thuman mi hu uh hi. Mihaipa a hehna bangin kampau-in gamta gawp a, mipilpa ahih leh ki-ip-in a hehna dam sak hi. Kumpipa in zuauthu saang-in na sem leh, a nuai-a ulian khempeuh zong zuau genin nitum ding hi. Mizawngpa leh mi bawlsiapa a kibatna uh khat om hi— Topa in a nih tuak-un mittang guan hi. Kumpipa in mizawngte’ thu a manin khensak leh, a ukna kip tawntung ding hi. Ciangduai leh taina in pilna guan’ a, a kikhahkhong ta in a nu maizum sak hi. Migilote ulian suak leh siatna khang semsem a, ahi zongin midikte in amau’ mit mahmah tawh, a gilo uliante’ za kiatna mu ding uh hi. Na ta thuhilhin tai lecin, ama hangin na kipak ding a, na lung hong kimsak ding hi. Pasian’ lamlahna a kizuih lohna gam-ah, gamsung mite phengtat uh a, Pasian’ thukham a zui mite a lungdam hi. Kam-a hilh lel tawh silate pil zo lo a, a theih hangin hong mang tuan lo hi. Thu ngaihsun lo-a pheng paupau mipa sangin, mihaipa adingin lametna om zawlai hi. Sila khat a neu tunga-a kipan lim takin na khoi hangin, a tawpna-ah nang hong hehsak veve ding hi. A heh pahpahte in kitotna piangsak a, a heh baihte khial thei tawntung hi. A kiphasakte in niamkhiatna thuak ding a, a kiniamkhiatte in pahtawina ngah ding hi. Guktakna sunga kipawl mipa, ama adingin thusia zongpa ahi hi. A guktakna pulak leh daan kitat ding a, genkhia kei leh lah kisamsia veve ding hi. Midangte kihtakna in hong lunghimawhsak a, Topa muan’na in hong lungmuangsak hi. Mi khempeuh in gam ukte’ maipha ngah ding hanciam uh a, ahi zongin Topa kiang pan bekin thutang kingah hi. Midikte in migilote mudah a, migilote in midikte mudah hi. Jakeh’ tapa Agur’ thugente. Hih mi lianpa in, “Pasian aw, ka lunggim a, ka cih nading ka thei kei hi. Ka hai lua a, mihing ka sun kei hi. Mihing bangin ngaihsut siamna ka nei kei hi. Pilna thu ka thei kei a, Pasian’ thu ka theih om lo hi. Vantungah kua kah to a, leitungah hong kumsuk kik ahi hiam? Kua in a khut sungah huihte lomcip a, puanin tuite tuncip ahi hiam? Kua in leitung bulpite phut kip ahi hiam? Tua bang mi na theih ngei leh, a tapa’ min bang ahi hiam? Pasian in a thugen khempeuh a manna laktel a, amah a belte khempeuh tungah kidalna lum ahi hi. Ama gen lohpi behlap sak kei in; na tua cih leh amah in nang hong tai-in, thuzuau gen na hihna hong kilang ding hi,” a ci hi. Pasian aw, thu nam nih kong ngen hi. Ka sih ma-in tuate hong pia in. Zuauna leh khemna ka zat loh nadingin hong huh in la, a hau lua lo, a zawng lua loin hong bawl in la, ka khamkhop zah lian bek an hong pia in. Hau lua leng, nang hong nialin, “ Topa i cih kua hiam?” kong ci kha ding a, zawng lua leuleu leng, mi’ na guk sakin, ka Pasian’ min kong daisak kha zel ding hi. A topa kiangah sila khat gensia kei in; amah in nang hong gensia-in, gimna na thuak kha ding hi. A pate samsia-in a min a dai sak a, nute a phat lo mi pawlkhat om hi. Amaute a nin mahmah kim lai hi napi-in, amau’ muhna-ah siang a kisa mahmah mi pawlkhat om hi. Mihoih pha mahmah-a a kingaihsun, a kiliansak mi pawlkhat om hi. A ha uh namsau tawh a kibang, a ha uh temta tawh a kibang, gam sunga mizawngte a netum, mi cimawhte a liaktum mi pawlkhat om hi. Vot in tanu nih nei a, khat in, “Hong pia in,” ci a, a khat in zong, “Hong pia in,” mah ci veve hi. “Pha zo ta,” a ci ngei lo thum om a, eh! li hizaw: Han khuk, taciing numei, tui a deih tawntung leikeu, leh a kisumit zo lo meikuang ahi uh hi. A pa a simmawh mipa, a nu’ thu a mang nuam lo mipa, va-ak in a mittang khel khiatsakin, musanete in a sa ne ding uh hi. Ka theih zawh het loh a lamdang mahmah thu thum om a, eh! li hizaw: van-ah musane a leen’ theihna zia, suangpi tungah gul a pai theihna zia, tuipi tungah teembaw a pai theihna zia leh nungak leh tangval a kingaihna zia ahi hi. A citak lo zi in hih bangin gamta hi: Midang tawh khialin, tua ciangin kisilsiang a, “Bangmah khialhna gamta ke’ng,” ci khem hi. Leitungmi khempeuh in a thuak zawh loh thu thum, eh! thu li om a, sila khat kumpi a suah ciang, a hai khat in a duh bangbang a nek zawh ciang, a muhthadahhuai numei khat in pasal a neih ciang, nasem numeino in a tonu’ za a suan ciang ahi hi. A neu mahmah ganhing nam li leitungah om a, ahi zongin a pilpen pente ahi uh hi. Miksite: a hat het lo ganhing hi napi-in, khuakhal sunga a nek ding khol zo uh hi. Ngalvangte: a thahat lo ganhing hi napi-in, suang lakah a kua ding uh bawl zo uh hi. Kauphete: kumpi nei lo napi-in, a kituak diamdiamin hon tat thei uh hi. Innhikte: khut sunga tawi zawh ganhing hi lel napi-in, kumpi inn sungah teeng zo uh hi. A gamtatna i et ciangin a thupi suak mahmah thum, eh! li om a, Ganhing lak pan a hatpen, kuamah a kihta lo humpinelkai, a kihihsak pai kuahkuah aklui, a kihihsak pai gangan keetal, a mite mai-ah a pai lanlan kumpipa ahi hi. Kiphasakin na haipau ngei a, thusia bawl ding na ngaihsut ngei khak leh, lim takin thu ngaihsun pha in! Bawngnawi, meekmeek lehang thawhbat hong suak a, mi khat a nak tupsak lehang si hong luang a, mi phin lehang kitotna hong piang hi. Kumpipa Lemuel, a nu in a thuhilhna: Ka it mahmah ka ta aw, thu ngenngen-a kong neih tapa na hi hi. Bang hong gen ding ka hi hiam? Na thatang teng numei tungah beisak kei in la, na sum khempeuh numei tungah zang kei in, numei in kumpipa siasak thei hi. Lemuel aw, ka thugen hong ngai in. Kumpite in zu nek huai lo a, mi ukte in khamtheihzu a duh ding hi lo hi. Zu ne le uh, thukham mangngilh uh a, thukham hei-in mizawngte gim pia kha thei uh hi. A si dekdekte, khamtheihzu pia in la, a lungkham mahmahte, leenggahzu pia in. Amaute ne sak lecin a zawn’na uh mangngilhin, a lungkhamna uh phawk nawn lo ding hi. Thu a gen thei lo mite’ adingin gensak in la, a huh ding om lo mite pan’pih in. Amau’ ading thu genin a tangin thu khen in la, a zawng-a cimawh mite, amau’ adinga kilawm hamphatna ngah sak in. Zi hoih in suangmanpha sangin manpha zawpek a, ahi zongin zi hoih ngah ding haksa mahmah hi. A pasal in muang mahmah a, a innsung uh ah annek kitasam ngei lo uh hi, Amah in a khan’ tawntungin a pasal tungah thupha bawl a, a pasal tungah thusia tun’ngei lo hi. Amah in samul leh khau zongin, thanuam takin nasem hi. Amah in, sumbukte’ van pua teembaw bangin, gamlapi panin an hong ciahpih hi. Phalvak tungin ziingtho a, an nek ding teng lim takin bawlin, a nasem numeite’ sep ding teng vaihawmsak hi. Amah in leitang hoih penpen zong a, a thalawhsa sum tawh a leenggui lo ding lei hi. A nik sing ten’in a puanban zial a, thalawp takin a na sem hi. Amah in a nasepte a manphatna thei a, zankim zankhang dongin a meivak mit lo hi. Amah in khau kheek-in, a puan ding gan tawm hi. A zawng mite tungah amah cingh a, a cimawh mite tungah huhna pia hi. A innkuan bup-un puanlum guan’ zo ahih manin, phalbi tun’ ding lunghimawh lo hi. Amah in a puan ding khui tawm a, saihadial puansan vive silh zo hi. A pasal, thukhen upate lakah a tut ciangin, mite’ lakah kizahtak hi. Amah in puan khui-in, kawnggakte zong bawl a, sumbukte tungah tuate zuak hi. Amah a tha hatin, zong kizahtak a, mailam hun-a ding a lung patau lo hi. Amah in pilna tawh thu gen a, kam khum takin pau hiat-hiat hi. Amah in a innkuan sung kisapna teng sem a, a tawntungin manlah den hi. A tate in amah it uh a, a pasal in zong pakta mahmah a, “Zi hoih tampi a om tei hangin, nang kan-a hoih kuamah om kei,” ci-in phat hi. Ngaihban’na in zuaupi hi thei a, mel hoihna zong maimang thei hi; ahi zongin Topa a zahtak numei in a phat taak khat ahi hi. A sepna khempeuh hangin amah phat un, mi khempeuh in a zahtak dingin a kilawm ahi hi. Jerusalem khua sungah kumpi a sem, David’ tapa Thugen Siampa’ thugente; Thugen Siampa in hih bangin ci hi: A mawknapi, a mawknapi, na khempeuh a mawknapi, Gimpi-a nisa thuak-a nasepna-ah mihing in bang noptuamna ngah ahi hiam? Khang khat bei-in khang khat hong khang a, ahi zongin leitung kibang bang niloh hi. Ni hong suakin ni tum a, a suakkik dingin tumzel hi. Leitaw lam-ah huih nungin, leilu lam-ah nung leuleu a, a zuihna ngei teng mah zui-in, nungnung niloh hi. Lui khempeuh tuipi-in luangsuk a, ahi zongin tuipi dim nai lo hi; tuinak-ah tuite tung kik zelin, a nak panin hong luangsuk kik zel hi. Na khempeuh lunggim huai a, kuama gen zawh ding hi lo hi; Mit in a muh cim thei lo a, bil in a zak cim thei lo hi. A omsa mah bangin hong piang kik ding a, a kisemsa bangin hong kisem kik ding hi. Leitungah a thak na khat beek om lo hi. Hih in a thak ahi hi, a kici thei ding khat beek om lo hi. Eite’ khan’ ma-in, a omsa vive ahi hi. A beisa nate kiphawk kha nawn lo a, hong tung lai ding thute zong a khang kikte in phawk nawn lo ding hi. Thugen siampa keimah in Jerusalem khua-ah Israel kumpi ka hi ngei hi. Hih leitungah a kisem na khempeuh en telin a thu kan ding ka ngaihsun hi. Pasian in tua bang nasep ei tungah hong guat pen a nuam het lo nasep khat ahi hi. Leitungah a kisem khempeuh ka mu khin a, tuate khempeuh a mawknapi na hi a, huihpi nungdelh tawh kibang hi. A kawisate kimamsak thei lo a, a om lopi a omin kiseh thei lo hi. “Pilna sangpi ka nei a, keima mai-ah Jerusalem a uk midangte khempeuh sangin ka pilzaw hi; pilna leh theihna a kici khempeuh ka theih loh om lo hi,” ka kici hi. Pilna leh haina, theihna leh mawkna, a kilamdan’na ka zong hi. Ahi zongin tua bang ka hahkatna zong a mawknapi ahih lam ka phawk hi. Pil semsem lehang kilunghimawh semsem a, tam thei semsem lehang hong gim sak semsem zawsop hi. Lungdamna zongin, nuam ka sak bang bangin om ning, ci-in ka ngaihsun leuleu hi. Tua zong a mawknapi ahihna ka phawk zel hi. Nuihna in haina ahihna, leh nopna in bangmah-a a kiman’ lohna ka mukhia hi. Mihingte in leitungah tomno a nuntak sungin bangci om leh hoih ding hiam, cih ka muh theih nadingin, pilna ka deihna mah tawh, zu nekna tawh ka lung nuamsakin, ka utut ka sep ding ka hamciam hi. Na a lianpi tampi tak mah ka sem zo hi. Keima adingin inn tampi tak ka lam a, leenggui lo tampi tak mah ka nei hi. Huan bawlin singno cin’na lo zong ka nei a, ka huan sungah nek theih namkim kidim hi. Tua singnote tui piak nadingin tuikhukpi zong ka bawl hi. Ka inn-ah a suak silate’ ban-ah, sila a nu a pa-in tampi tak ka nei thuah hi; tuuhonte leh bawnghonte zong tampi tak ka nei a, Jerusalem a om ngei dangte khempeuh sangin ka hauzaw hi. Ka zawhsa kumpite’ sumkholna panin keima adingin ngun leh kham zong ka la hi. Ka lungnop nadingin la a sa ding lasiam numei leh pasal tampi ka nei a, zi zong ka deih zahzah ka nei zo hi. Tua ahih ciangin keima hun ma-in Jerusalem-ah a om ngei mite khempeuh sangin ka lianzaw a, ka pilna zong bei tuan lo hi. Ka deih khempeuh ka nei a, ka ut bang bangin omin ka gamta hi. Ka sepna khempeuh ah nuam ka sa hi; tua nopsakna in ka nasepna hangin ka phattuamna ahi hi. Tua ciangin ka sepsa na khempeuh, leh tua banga haksapi-a ka sepnate ka ngaihsut kik ciangin, na khempeuh a mawknapi ahihna leh leitungah bangmah phattuamna a omlohna ka phawk hi. A hi-in ci lehang, kumpi khat in ama ma-a kumpipa’ hihsa teng mah a hih thei bek ahi hi. Tua ahih ciangin pilna, haina, mawkna i cih in bang hiam, ci-in ka ngaihsun hi. Tua banga ka ngaihsut ciangin, khuavak in khuamial a zawh bangin, pilna in haina zawhna ahih lam ka mu hi. Mipilte in a pai nading mun mu thei a, mihaite in a pai nading mun mu thei lo hi. Ahi zongin a pil leh a hai in a kibang khat a tuah tuak ding ka thei hi. Tua ciangin, “Mihaite tungah a piang thu in kei tungah zong hong piang ding ahih manin, ka pil mahmah manin bang phattuamna ngah ka hi hiam?” ka ci a, “Bangmah ngah kei ing, themkhat zong ngah kei ing,” ci-in ka kidawng hi. Mihaite a kiphawkphawk loh mah bangin, mipilte zong kiphawkphawk tuan lo hi; mai lam hun-ah i vekpi-in hong kimangngilh lel ding hi. A pil a hai-in, i vekin i si ding hi. Tua ahih ciangin hih leitunga sepna khempeuh in lungkhamna cih loh hong piak theih ding bangmah om lo ahih manin, hih leitunga hin’na in kei adingin bangmah akiman’na om lo hi. A mawknapi, huih hawm guak bek hi lel hi. Keimah hong laih dingpa tungah ka neih ka lam khempeuh ka nusiat ding thei ka hih manin, nakpi tak-a sem-a ka gimpih nate in kei’ adingin a phattuamna om lo hi. Amah pil ta leh hai ta leh, ka pilna ka siamna khempeuh zang-a ka sepsa nate luahin a ukpa hi ding hi. Hih in a mawknapi taktak ahi hi. Tua ahih ciangin hih leitungah nakpi takin ka na sepna ka kisik hi. Pilna, siamna, theihna siit loin na kisem a, themkhat zong a gimpih het lo mi khat’ adingin nusiat ding hi zenzen hi. Hih thu in a man het lo, a mawknapi taktak ahi hi. Mi khat in hih leitungah lunghimawhna thatang sanin na a sepna-ah bang phattuamna ngah ahi hiam? Sepna bawlna khempeuh ah lungkhamna leh sinkhamna bekbek hi a, zan nangawnin ihmut mawhpih hi. Hih in a mawknapi taktak ahi hi. Mihing khat in a nasepna thamanin an ne tui dawnin nuam sa-in a om sangin a hoihzaw bangmah dang om lo hi. Ahi zongin tua nangawn zong, Pasian’ hang ahihna ka phawk hi. Pasian kihel loin kua in an ne-in nuamsa thei ding ahi hiam? Pasian in amah a lungdamsakte tungah pilna, theihna, leh lungdamna pia a, ahi zongin a hehpihhuai mi mawhte ahih leh a sep bek sisakin, amau’ thalawhsa khempeuh, amah a lungdamsakte tungah piaksak hi. Hih in a mawknapi taktak, huihpi nung delh bang bek ahi hi. Hih leitungah a piang thu khempeuh Pasian in ama pian’ hun dinga a sehsa hunin a pian’sak ahi hi. Suah hun om a, sih hun om hi. Suan hun om a, bawhkhiat hun om hi. Gawh hun om a, khawi hun om hi. Phel hun om a, lam hun om hi. Kah hun om a, nuih hun om hi. Dah hun om a, lam hun om hi. Lupkhop hun om a, tuam lup hun om hi. Kikawi hun om a, kikhahkhiat hun om hi. Zon’ hun om a, mansuah hun om hi. Kep hun om a, paihkhiat hun om hi. Balkeek hun om a, phop hun om hi. Daih hun om a, pau hun om hi. It hun om a, muhdah hun om hi. Kido hun om a, kilem hun om hi. Na a sem mipa in a sepna khempeuh thamanin bang ngah ahi hiam? Pasian in eite’ manlahpih dinga hong piak nasep ka thei hi. Amah in na khempeuh ama hun tawh a kituak dingin bawl hi. Amah in mai lam thu theih nopna lungsim eite sungah hong guan’ a, ahi zongin ama sepnate a cing-a theih zawh nading hong guan lo hi. Tua ahih ciangin mihingte in a nuntak lai teng a siam tawp-un gamta-in lungdam-a a om ding a thupi pen ahihna ka phawk hi. Eite khempeuh in an ne tui dawnin, i sepna thaman tawh lungdamin i om ding kilawm a, tua in Pasian’ hong piak letsong ahi hi. Pasian’ sep khempeuh a kip tawntung ding ahihna ka thei hi; i behlap theih ding om lo a, i paihkhiat theih ding zong om lo hi. Amah i zahtak theih nadingin Pasian in tua bang ding mahin a bawl ahi hi. A piang khat peuhpeuh pen a piang ngeisa mah na hi a, a piang lai ding khat peuhpeuh zong a piang ngeisa mah na hi lel hi. Pasian in ama hun hunin a piang ngeisa mah piang sak kik zelzel hi. Leitungah Thumanlohna Tua tham loin, hih leitungah gitlohna in thuman thutang a suankhiatna zong ka mu hi. Pasian in sepna bawlna leh na khempeuh ama hun ding sehkhol khin ahih manin, midikte leh migilote thu khen ding hi. Mihingte pen ganhing bang lel ahihna uh a lahtel nadingin Pasian in mihingte ze-et hi, ci-in ka lungsimah ka ngaihsun hi. A tawpna-ah ci lehang, mihingte leh ganhingte in a tuah ding uh kibang a, ganhing mah bangin mihing zong si hi. Mihing leh ganhing in a kibangin nuntakna hu nei a, mihing leh ganhing nuntakna a kiman’na bangmah om lo ahih manin, mihing in ganhing sangin a hoih zawkna bangmah om tuan lo hi. A nih tuakin mun khatah tungkhawm ding uh a, leivui pan-a piang uh ahih mah bangin leivui mah suakkik ding uh hi. Mihingte’ kha van-ah kahtoin, ganhingte’ kha lei-ah lutsuk hi, cih a thei zong kuamah om lo hi. Tua ahih ciangin mihing in a sep thaman uh ne-in nuamsa-in a om ding uh a hoih pen ahihna ka phawk hi. Tua lo ahih theih ding uh bangmah dang om lo hi. I sih khit ciangin bang piang ding cih theih theihna om lo hi. Leitungah thuman lo-a a kigamtatnate khempeuh ka ngaihsun kik leuleu hi. Nenniamna a thuak mite kap uh a, ahi zongin kuamah in amaute hehnem lo hi. A nengniam mite thahat lua uh ahih manin kuamah in thuk ngam lo hi. A hing lai mite sangin a si khinsa mite hampha ka sa zaw hi. Mihing-a hong piang nai lo, hih leitung gitlohna teng a mu nai lote hampha zawlai sawnsawn hi. Mi khat leh khat, hauh nop man-a kidemna hangin nakpi-a na kisem ahihna ka mu hi. Hih zong a mawknapi hi a, huihpi nung delh mah tawh kibang bek hi. Mihaite in na sem loin a khut zepin om uh a, a tawpna-ah gil kialin sih lawh uh hi. Nakpi-in na sem a, a mawknapi ahi ding khut nih dim sangin, lungsim nuam-a khut khat dim neihna hoihzaw hi. Nuntakna sungah a mawknapi ahi thudang khat ka mu leuleu hi. Mi khat in a tapa ahi a, sanggam ahi zongin nei lo napi-in, a tawntungin nasemin a neihsa tawh lungkim hun nei thei lo hi. Kua adingin gimpi-in na sem a, a ut utin ta hoh lo ahi hiam? Hih in zong a mawknapi mah, a dahhuai nuntakna khat ahi hi. Mi khat sangin mi nih hoihzaw hi; amau’ sepna thaman ngah uh hi. Bang hang hiam cih leh khat cimawh leh a khat in huh a, mi khat guak pen cimawh zenzen leh a huh ding om lo ahih manin a dahhuai pha mahmah ahi hi. Khua a dam ciangin mi nih lumkhawm leh khua lum hi; khat guak bangci khua lum thei ding ahi hiam? Mi khat bek hi leh zawh nop kisa a, nih pha leh kizo zo lo hi. Zang thum-a kiheek khauhual bawhsat hak hi. Mi’ thugen a sang thei nawn lo, teek leh hai a thuah kumpipa sangin, zawng napi-in a pil tangval khat hoihzaw hi. Mi khat pen thong panin suakta-in kumpi suak thei a, zawng napi-in ama gam sungah kumpi suak thei hi. Hih leitungah a teeng mi khempeuh’ thu ka ngaihsun a, tua mite lak panin kumpipa’ za a luah ding khangno pawlkhat a omna ka phawk hi. Kumpipa’ uk mite sim zawh lohin tam a, ahi zongin amah a sih ciangin a nasepna hangin a lungdam khat beek om lo hi. Hih in a mawkna taktak, huihpi nung delh bang bek ahi hi. Biakinn-ah na pai ciangin lim takin kingaihsun in. Aman leh aman lo a khen thei lo mihaite’ biakpiaknate tawh a kibang piakna sangin thungai dingin biakinn-a paina hoihzaw hi. Thu ngaihsun masa-in pau in la, Pasian’ tungah thu mawkciam pak kei in. Vantungah Pasian om a, leitungah nang om na hih manin na pau dinga kilawm zah val pau kei in. Na lunghimawh semsem leh na mang sia semsem ding a, tam pau semsem lecin na haina kilang semsem ding hi. Pasian tungah thu na ciam ciangin manlangin tung sak pah in. Amah in mihaite dik sa lo hi. Na thuciamna bangin tung sak in. Na thuciamna bangin na tunsak loh ding sangin thuciamna neih vet loh ding hoihzaw hi. Pasian’ siampipa’ mai-ah ka khial kha hi ci-in na gen ding kisam kha ding ahih manin na kampauna hangin khial kha kei in. Tua bangin gamta kha lecin nangma tungah Pasian heh ding a, na sepsa khempeuh hong suksiatsak ding hi. Mang tam man leeng a mawkna mah tam a, kam tam pau leeng zong a kituak mahin a mawkna thu mah kibeh laplap hi; bangbang ahi zongin Pasian zahtak lai veve in. Kumpite in mizawngte gim ngah sakin, thuman thutangin na a kisep kei leh, lamdang sa kei in. Uliante pen amau’ tunga uliante in en uh a, tuate tungah a en sawn a lianzaw khat om lai hi. Gam khat peuhpeuh in a kumpipa in lokhawhna lamsang a lunghimawh kumpi kisam hi. Sumdeihna lungsim na neih leh lungkim hun cih na nei ngei kei ding hi; na hauh nop hangin na deih khempeuh na ngah ngei kei ding hi; hih in a mawknapi ahi hi. Hau semsem lecin na vak ding mi tam semsem a, hauzaw ing, ci-a na theih cih bek simloh bangmah phattuamna na ngah kei hi. Na a sem mipa in a nek ding nei taleh nei takei leh lungnuam takin ihmu thei a, a haute ahih leh lungnuam takin ihmu thei lo uh hi. A hoih het lo na khat hih leitungah ka mu hi: mite, amau’ lunggim nadingin hau uh hi. Na a sep khialh manin a neihsa teng uh suplawh uh a, a tu a tate’ luah ding bangmah om nawn lo hi. I nute’ sung panin bangmah nei loin tangguakin i suah mah bangin tangguak mahin i ciahkik hi. I sepnate, i ciahpih kik theih bangmah om lo hi. A dahhuai mahmah thu in: i suah hun lai-a mah bang tektekin i ciahkik ding hi; a mawknapi dinga i sepna-ah bang phattuamna ngah i hi hiam? I nuntak sung teng lungzin’na, dahna, lunghimawhna, natna satna leh hehna bek tawh hun bei lel hi. Keimah in ka phawk khiat thu in: Pasian in tomkha nuntak hih leitungah hong piak sungin, i sep thaman ne-in dawnin, nuamsa-in i om ding a hoihpen ahi hi. Hih in mihingte’ thumong ahi hi. Pasian in mi khat neih leh lam guan’in, a hauhna nuam takin a nek sak leh, amah lungdamin a sepna thaman ne-in a om ding ahi hi. Tua nopsakna in Pasian’ kiang pan ahi hi. Pasian in lungdamin om sak ahih manin a nuntak tom lam phawkin nei kha lo ding hi. Hih leitunga mihingte tungah a man het lo-a hong kibawlna ka phawk hi. Pasian in mi khatpeuh tungah neih leh lam, leh hauhna leh pahtawina pia-in, a deih khempeuh neisak napi-in, tua nate nuam takin zang sak loin, midang khat in nopsak lawh laizang hi. Hih in a mawknapi, a thuman het lo khat ahi hi. Mi khat in ta zakhat nei-in, kum saupi zong nungta thei kha ding hi; bangzahin sauveipi a nungta ahi zongin leitungah nopsakna ngah loin, lim tak-a vuina a ngah kei leh, a sisa-a suak naungek hoihzaw lai hi. A sisa-a suak naungek a kiman’na om lo hi; khuamial sungah suakin, khuamial sung mah-ah mangthangin kiphawk nawn lo hi. Sun khuavak mu kha loin, nuntakna bangci hiam, cih a theih khak loh hangin tawlngakna a ngah hi buang hi. Nuntakna-ah nopsakna a ngah lo mipa kum tulnih a hing zongin, a tawpna-ah a sisa-a suak naungek mah tawh a tun’na mun kibang lel hi. Mihingte’ nasepna in a nek tawm ding bek a ngaihsutna hi napi-in, a kham khop ngah zo tuan lo hi. Tua ahih manin mihaipa sangin mipilpa a hamphat zawkna bang om tuan ahi hiam? Mihaipa in nuntak nading zia a theih hangin bang phatuam tuan ahi hiam? Na dang dang deih thuah ngitngetna sangin i neihsa teng tawh lungkimna hoihzaw hi. Hih zong a mawknapi, huihpi nung delh mah tawh a kibang bek ahi hi. A piang thu khempeuh, a tuaci ding mahin tangtawng-a kisehsa hi a, mi khat in amah sangin a thahatzaw khat a nial zawh lohna thu i vekpi-in i thei hi. Sauvei kinial lehang a mawkna hi semsem a, a phattuamna bang om hiam? Nilim bangin a pai hanhan, a mawknapi hih nuntak tom sungah mihing’ ading a hoihpen kua in thei ding ahi hiam? Ama sih khit ciangin leitungah bang piang ding cih kua in gen thei ahi hiam? A manpha paknamtui sangin minpha hoihzaw a, i suah ni sangin i sih ni hoihzaw hi. Pawi simna sangin si galna hoihzaw hi; sih ding bek a ngak ahihna mihing khempeuh in a phawk ding kilawm hi. Nuihna sangin dahna hoihzaw hi; na mai hong gumsak zah in na thu theihna hong khangsak hi. Mipilte, dahna lakah om tual a, mihaite, nopna lakah om tual hi. Mihaite in pahtawina la hong sak sangin, mipilte’ hong taina hoihzaw hi. Mihaite’ nuihna in meikuang sunga selkeu kikhul a puak zaizai tawh kibang a, khiatna nei lo, a mawknapi ahi hi. Mipil khat in midangte a khem ciangin, mihai bangin a gamta ahi hi. Sumgolh lakna in a lapa’ gamtat hoihna siasak hi. Na khatpeuh a kipatna sangin a tawpna hoihzaw a, kiphatsakna sangin lungduaina hoihzaw hi. Heh pahpah kei in, hehna in haihuai hi. “Bang hangin nidang lai-in hih sangin hoihzaw tham pek hiam?” ci-in dong kei in. Tua in pil thudotna hi lo hi. Pilna in hauhna zahin hoih a, mihingte’ adingin phattuamna ahi hi. Sum in hong lungmuan’sak bangin pilna in zong hong lungmuang sak hi. Pilna a manphatna in a pilte a nuntaksak theihna ahi hi. Pasian’ sepsate ngaihsun dih in. Pasian in a kawi-a a bawlsate, kua in mamsak kik thei ahi hiam? Nopna na ngah lai takin lungdam in; haksakna na tuah ciangin hih thu ngaihsun in: Lungdamna leh lungkhamna hong piapa in Pasian hi a, mai lam-ah bang piang ding cih kuamah in thei lo hi. Ka nuntakna a mawknapi hi a, ahi zongin ka nuntak sungin thu khempeuh ka thei hi. Mi khat hoih napi-in si a, mi khat siahuai napi-in a khan’sau hi. Tua ahih ciangin hoih lua kei in la, lah sia lua kei in. Bang hangin nang kisiasak tawm ding na hi hiam? Gilo lua, hai lua kei in. Bang hangin khan’sih laizang ding na hi hiam? A nih tuakin lenkip in. Pasian na zahtak nak leh, khatpeuhpeuh na zuihna-ah na ma vang ding hi. Khuapi a uk mihing sawm sangin pilna in mi khat hatsak zaw hi. A manin a gamta, a khial ngei het lo, leitungah mi khat zong om het lo hi. Mi’ gen khempeuh thudonin nei kei in; na nasempa’ hong samsiatna na za kha ding hi. Nang zong midang na samsiat zelzelna, tel takin na kithei hi. Hihte khempeuh ka pilna tawh ka ze-et a, pil ding ka hahkat hangin kei’ bat zawh ding hi lo hi. Mihing nuntakna, kua in thei khia zo ding ahi hiam? Eite adingin thuk lua a, tel hak lua hi. Keimah in, pilna siamna ka theih nading pilna mu-in, thupiangte a hang ka theih nadingin, nakpi takin hanciamin ka lungsim ka pia a, haina a hoihlohna leh a haihuaina ka thei khia hi. Sihna sangin numei a siahuai zawkna ka theikhia hi. Ama hong piak itna in thang bangin hong tepcip a, ama hong kawina khut in sikkhau bangin hong hencip hi. Pasian’ deihna banga gamtate in tua bang numei pel thei a, ahi zongin a mawh nuamte a thang ah awk uh hi. Thugen siampa in hih bangin ci hi: Thu ka kankan ciangin, aban banin thu ka phawk khia hi. A thudang ka zon’zon’ hangin, bangmah ka mu zo tuan nawn kei hi. Pasal tulkhat sung panin khat bang a pil a om khak theihna, ahi zongin numei lakah a pil cih bang a om lohna, keimah in ka phawkkhia hi. Keima theihkhiat thu in: Pasian in eite a thuman dingin hong bawl napi-in, eite in paulap tuamtuam zongin, i kikai-awk sak hi. Mipilte bek in na akhiatna taktak theithei uh hi. Pilna in mipilte maitaisak a, a hehmai bei sak hi. Kumpipa hong sawl bangin gamta in la, Pasian’ tungah thu mawkciam pak kei in. Kumpipa in a ut peuhpeuh hih thei ahih manin, ama kiang panin paikhia in la, ama lungkim lohna hih teitei kei in. Kumpipa in aana neihna tawh gamta hi; ama gen bangin gamta in; kuamah in amah nial zo lo hi. Ama thu a mangte in haksakna tuak kha lo ding hi; mipilte in a gamtat nading zia leh a hun hoih thei uh hi. Na khatpeuh i hih ding ciangin a kilawm hun, leh a ngeina man om a, ahi zongin eite in bangmah i thei kei hi. A hong piang ding thu i thei kei a, a hong gen thei zong kuamah om lo hi. A sih ding a pelh thei, a sih ding hun a phiat thei kuamah om lo hi. Gal a om ciangin gal launa a pelh thei, siatna sungah a lut ciangin a peng thei kuamah om lo hi. Leitunga gamtatnate ka ngaihsut ciangin, hih thute ka mukhia hi. Mi khat in midang tungah vangliatna nei-in, a uk sung mite a gimsak gawp hun om hi. Migilote si-in kivui a, a siat gamtatna khua sunga mite mah in han panin a ciah ciangun amah a phat vevena uh ka mu hi. A mawhte kidaantat pahpah lo ahih manin, mihingte in khialh ding haksa sa lo uh hi. Mawhnei khat in zavei dong siatna bawl napi-in, a khan’ sau veve hi. Ahi zongin, “Pasian a zahtakte adingin, thu khempeuh nuam ding hi. Migilote’ adingin, thu nuam lo ding a, amaute in Pasian zahtak lo uh ahih manin, a nuntak hun uh nilim bangin bei pak ding a, khan’sih ding uh hi,” kici hi. Ahi zongin hih thugenna a mawknapi ahi hi. Leitunga thupiangte ngaihsun dih in: khatveivei midikte’ in migilote’ daantuah ding teng tuak zawsop a, migilote in midikte’ thaman ngah ding teng ngah zawsop uh hi. Hih thu in a hai vai, a mawkna taktak ahi hi. Tua ahih ciangin mihing in hih leitungah nuam a sak theih ding adang om lo ahih manin, an ne tui dawnin nuamsa-in a om ding bek ahi hi. Pasian in hih leitungah nuntak a piak sung teng, a sep thaman a ngah theih ding hih bek om hi. Pil ding hahkatin, leitunga thupiangte ka theih ciangin, sun leh zanin ihmu lo liangin i om hangin, Pasian’ nasepna i theih zawh lohna ka phawk hi. Mihingte in bangzahin i hahkat hangin kithei khia zo lo hi. Mipilte in thei a kisak hangun, bangmah thei lo uh hi. Nakpi takin sauveipi ngaihsun a, ka phawk thu in: mipilte leh midikte’ gamtatna khempeuh Pasian in uk a, Pasian’ itna hang hizaw hiam, a muhdahna hang hizaw hiam, kuamah in thei lo hi. Amau’ mai lam thu khempeuh a mawkna hi. Bang hang hiam cih leh mi khempeuh thumong kibang a, midikte leh migilote, mihoihte leh misiate, misiangte leh mininte, biakna piate leh a pia lote, a thu tawpna a vekpi-in kibang lel hi. Mawhneipa sangin mihoihpa hampha zaw tuan lo a, thuciamna a bawl lopa sangin a bawlpa hampha zaw tuan lo hi. Mi khempeuh’ thumong kibang kim a, hih thu in leitunga thupiang lakah a man het lo khat ahi hi. Mihingte a nuntak lai teng, gitlohna leh a mawkna thu tawh a lungsim uh kidim a, theih kholh lohin mihingte si pak uh hi. Ahi zongin a hing laite’ ading lametna om thei hi; a sisa humpinelkai sangin a hing lai ui hoihzaw hi. A hing laite in a si ding ahih lam thei thei uh a, a sisate in bangmah thei nawn lo hi. A sisate in thaman bangmah nei nawn lo uh a, amaute kiphawk kha nawn lo hi. Amau ading itna, muhdahna, hanciamna cihte om nawn lo a, leitunga om nate, khat beek thei kha kik nawn lo ding uh hi. An ne-in lungdam in la, zu ne-in lungnuam in: na gamtatna peuhpeuh, Pasian in hoih a sa hi. Na puante siangin paaksak tawntung in la, na sam gumsak ngei kei in. Pasian in hih leitungah nang a hong piak, tomkha sung na nuntak lai teng, na it na zi tawh a nuam thei thei-in om in. Leitung lungkhamna sungah na lawhtak tua bek mah hi ding hi. Na mai-ah sep ding a om khempeuh, na tha neihzah tawh sem in. Bang hang hiam cih leh, nangmah in na zuat ding sihna gam sungah, nasepna leh thungaihsutna, pilna leh theihna cihte om lo hi. Hih leitungah ka phawk thudang khat in: a tai hat mite in tai kidemna-ah zo tawntung lo a, galhang thahatte in gal zo tawntung lo hi. A pilte in an a kham ngah tawntung lo a, a pilte hau tawntung lo hi. Hih theih siamna a neite milian suak tawntung lo hi. Mi khempeuh tungah kamsiatna vive tung hi. Mihing in ama hun ding thei ngei lo hi. Thang-ah a awk vasate, ngen-ah a awk ngasate tawh i kibang hi. Lam-et loh hun laitak keekin, hun sia sungah mihingte i tung hi. Thudang khat zong ka mukhia hi: Hih leitungah pilna a hoihna gentehna a hoih khat om hi. Mi tawmno bek a omna khua khat om a, a vanglian kumpi khat in tua khua sim hi. Amah in tua khua umcihin, a khuasung luhgawp dingin ngaihsun hi. Tua khua sungah azawng mipil khat om a, ama pilna tawh tua khua hu zo hi. Ahi zongin kuamah in tua mizawngpa phawk kha lo hi. Thahatna sangin pilna hoihzaw ka ci a, ahi zongin kuamah in mizawngte a pil dingin ngaihsun lo a, mizawngte’ thugen kuamah in thudonin nei lo hi. Mihai hon lakah gam-ukpa in, thu a gen lualua sangin, mipilpa in dam taka a gen hiathiat ngaih huaizaw hi. Galhiamte sangin pilna hoihzaw a, ahi zongin khialhna khat in a hoih tampi susia thei hi. A sisa thote in paknamtui bung sunga om paknamtui uih sak thei a, haitatna themno khat in pilna lianpen susia thei hi. Mipilte a man-a a gamtat ding a ngeina hi a, mihaite a sia-a gamtat ding a ngeina ahi hi. Mihaite, lampi-ah a pai kawm nangawnin haitat uh a, a haina uh mi khempeuh theisak uh hi. Nang tungah gam-ukpa a heh leh, na nasepna za taisan pah kei in. Dai tak-a om hithiatna in khialhna lianpi maisak thei hi. Hih leitungah a thuman lo, gam-ukte’ pian’sak ka muhte in: Mihaite, za lianpi kipia a, mihaute kiniam koih suk hi. Sakol tungah silate tuang a, miliante sila bangin a khe-un pai uh hi. Gum a tote, gum sung mah-ah kia ding a, mi’ phung a phelsakte, gul in tu ding hi. Suang tokhiate, suang mah in liam sak ding a, sing-ekte, sing ehna mah-ah liam ding hi. I hei mawl napi-in i tat kei leh, nakpi takin sat kul a, ngaihsut masak ding pil huaizaw hi. Gul khiim thei napi-in i khiim kei leh, a kiman’na om tuan lo hi; gul in hong tu veve ding hi. Mipilte’ kampauna in pahtawina ngahsak a, mihaite’ kampauna in amau mah siasak hi. Thugen a kipatun bang tum lo tawh kipan pah malam uh a, gitloh hai vai teng tawh thugen khup lel uh hi. Mihaite in thu gengenin ciakciak uh hi. Mai lam-a thupiang ding kuamah in thei lo a, i sih khit-a thupiang ding hong gen thei om lo hi. A inn zuat nading lampi a thei lo mihai luate bek, a innlam zon’na in gim ding uh hi. A kumpipa mite’ cih bang bangin gamta lel a, zan khuavakin zu ne makai a nei, gam khatpeuh in lungkhamna thuak hi. A kumpipa in lungsim khentatna nei thei a, a makaite in annek tuidawn a hun thei a, amau ki-uk thei-in zu a kham lo makai a nei, gam khat peuhpeuh, a hampha gam ahi hi. Thadah lua-a a inn vang nangawn a hu nuam lopa, a inn keh ding a, a innpi nangawn in puklawh ding hi. An in lung damsak a, zu in lung nuamsak a, sum in ahih leh na khempeuh a kicingsak hi. Na lungsim nangawn-ah, kumpipa gensia kei in la, kuama zak lohna mun na lupna tung nangawn-ah, mihaute samsia kei in. Thopi in na thugen teng na puak kha ding hi. Tui tungah na anlum khia in, ni tampi khit ciangin na mu kik ding hi. Na neihsate, mun sagih ahi a, mun giat-ah ahi zongin khen kawikawi in. Hih leitungah bang thusia hong piang ding cih na thei khol kei hi. Meii sungah tui a tamluat ciangin, leitungah guah-in hong zusuk a, singkung khatpeuh a puk ciangin, a pukna san san-ah om paisuak hi. Huih leh guah ngakin, khuahun hoih dong a ngak mi in, khaici tuh ngei lo ding a, an zong la ngei lo ding hi. Nupi gai khat sungah nuntakna thak bangci kipat hiam, ci-in na theih zawh loh mah bangin, na khempeuh a bawl Pasian’ nasepna, na thei zo ngei kei ding hi. Zingsang-a kipan khaici tuh in la, nitak dong mateng khawl kei in. A vek-a a po kim ding ahi a, khat sia-in, khat a po ding ahi zongin, bangmah na theih kholh om lo hi. Khuavak hoih mahmah a, i mit in nitaang a muh ciangin nuam mahmah hi. Mi khat sau veipi a nuntak leh a nuntak sung nuam takin om ta hen. Sau veipi tak a hing zongin, a sih khit hun a sau vei zawkna phawk ta hen. Mai lam-ah a lam-ethuai bangmah a om kei hi. Khangnote aw, na khangno uh nuam sa un la, na khangno lai-un lungdam un. Na hih nop peuhpeuh uh hih un la, na ut bang bangun gamta un. Ahi zongin na gamtatna uh tawh kizui-in, Pasian in thu hong khen ding lamtak phawk gige un. Note kilunggimsak kei un la, na pumpi uh gentheisak kei un. Bang hang hiam cih leh na khangno hun sung uh sau vei lo ding hi. Na lungkham hun ding hong tun’ ma, “Nuntakna nuamsa kei ing,” na cih ma hun, na khangno lai takin nang hong Piangsakpa phawk in. Lungkham hun i cih in: Nang adingin nitaang, khataang, aksi taangte a dialh hun, meiipi kai a then’ nawn loh hun, na muan’ na suan’ a thahat na khut, na baan, na khete, a thanem hun, an hai nadingin na hatang tawm lua ta-in, na mitmangin khua na lim muh theih nawn loh hun, khuasung gamlumnate na bil in za thei nawn loin, ansukna gingte na zak theih phat nawn loh hun, la kisate za thei nawn loin, vasa ham nangawn in hong phawn’ zawh nawn loh hun, keen sangte-ah pai ngam nawn loin, lam pai ding a haksat hun, na samte hong kang-in, na khangno thahatna teng bei ta-in, na tha a kiam hun ding ahi hi. Eite in i tawntung inn ding a zuan ding i hi a, khuasung lampi-ah kahna awging kiza ding hi. I ngun meivak khaina khau kitatin, i kham meivak kia-in kitam ding a, i tuikhaina khau kitatin, i tuikhaina beel kitam ding hi. I pumpi, lei suak kik ding a, i nuntakna a hong pia Pasian’ kiangah, i kha ciahkik ta ding hi. Thugen Siampa in, “A kiman’na a om lo, a mawknapi, na khempeuh a mawknapi ahi hi,” a ci hi. Thugen Siampa, mipil ahih ban-ah ama theih teng, mite tungah hilh hi. Amah in paunakte, lim takin sin a, aman ahihna thu hoih takin entel hi. Thugen Siampa in a zaknophuai kammal khawm a, ama gelh kammalte, aman taktak ahi hi. Mipilte’ thugente in, tuucingte in tuu hawlna-in a zat ciangkhut hiam tawh kibang hi. Tua thute pen, eite khempeuh tuucin’ banga hong Cingpa Pasian’ piak ahi hi. Ka ta aw, na phawk ding thudang khat om hi. Lai gelh-a a bu-a bawlna in bei hun nei thei lo a, lai tam sin luatna in pumpi gim-sak hi. Hih thute khempeuh banah, gen ding thu khat bek om hi. Mihing hong kipian’sakna, a thu bulpipen in: Pasian zahtakna, leh a thupiaknate man’na ahi hi. Apha hita leh asia hita leh, a simtham-a i hih simte nangawn, i hihna khempeuh ah, Pasian in thu hong khen ding hi. Solomon’ la ngaihpente: Nungak: Na muk tawh nong tawptawp a, nong itna in leenggahzu sangin khumzaw hi. Na omna khempeuh nam vuauvuau a, na min kizaza a, nang hong ngai lo om lo hi. Hong kai in la, paikhawm ni. Ka kumpi hong hi in la, na innah hong ciahpih in. Nang tawh om leeng i lung dam a, leenggahzu ne-in nuam sa ni. Nang kong ngaih khak tuahpha ing. Jerusalem nungakte aw, ka vom hangin ngaih baang ing. Savun puanbuk bangin ka ang hiuhiau a, Solomon’ puankhaite ka bang hi. Ka vom manin hong enneu kei un. Nisa ka thuakna hang ahi hi. Ka ute in kei hong gawtbawl uh a, lo hong kuan saksak uh a, keima pumpi ka don man kei hi. Ngaihno aw, hong gen dih in. Koi lai-ah na tuu cing ding a, sun-in koi lai-ah khawl ding na hi hiam? Bang hangin tuucing dangte lakah nang hong zong kawikawi phot ding ka hi hiam? Tangval: Nungak khempeuh lak-a a ngaih baang pen nungak aw, a mun thei lo na hi hiam? Tuuhonte zui-in na keelte hong khah in la, tuucingpa’ puanbuk gei-ah hong cing in. Ngaihno aw, Faro’ sakoltal in sakolpite a delh bangin, nang hong kidelh hi. Na biang tuak-a na samphek kaisukte ngaih baang a, suangmanpha bangin na liangko tungah kinga hi. Nangma adingin kham khainiang bawlin, na kizep nading zong ngun tawh bawl ni. Nungak: Ka kumpipa a lupna tungah a om lai takin ka paknamtui hong kizeel hi. Ka ang-ah ka ngaihno hong lup lai takin, mirrah paknamtui bangin namtui viauviau hi. Ka ngaihno in, En-gedi gam leenggui lo-a, a palh lihleh paak hoihte tawh kibang hi. Tangval: Ngaihno aw, na meel hoih a, na mit zong ngaih baang hi. Nungak: Ngaihno ngiingeei aw, na etlawm a, na ngaihhuai hi. I lupna in lopa tung hi ding a, taamtaak kungte, i innkhuam hi-in, taaksan hiangte, i inn tungdap hi ding hi. Keimah in, Sharon gam sunga om gamlak paak, mual kuam sunga unok paak ka hi lel hi. Tangval: Tua bang hilo a, ka ngaihno in numei khempeuh lak panin, ling lak-a om unok paak tawh kibang hi. Nungak: Ka ngaihno, tangval dang tawh teh lehang, gamlak singkung lak-a apple kung tawh kibang hi. Ama liim-ah ka tu nuam a, a gahte lim ka sa hi. An nekna phual-ah hong paipih in la, itna mai tawh hong en in. Lungzuang, duangvul ka hih manin, leenggahkeu tawh hong vaak in la, apple gah tawh hong thadim sak in. A vei lam baan hong kham sak a, a taklam khut-in kei hong kawi hi. Jerusalem nungakte aw, ko’ kingaihna nong suknawi loh nadingun, sakhi leh sanang tawh kei tungah hong kiciam un. Ka ngaihno’ awging ka za hi. Mualtung tawnin hong tai a, mualte kantanin kei hong zuan hi. Ka ngaihno in sanang tawh kibang a, sakhitalno tawh zong kibang hi. Ka inn pualam uhah ding a, kongvangneu-ah hong dak zial-in, kawmvang panin hong engiau hi. Ka ngaihno in ka kiangah thu hong gen a, “Hong pai in, ngaihno aw, hong zui in, it luat aw, Phalbi veng ta a, guahzu nawn lo hi. Gam sung tengah paakte palh a, lasak hun hong tung ta a, gam sung tengah vakhu hamte kiza ta hi. Theite zong minmin ta a, leenggah paak gim namtui zong kiza ta hi. Hong pai in, ngaihno aw, Hong zui in, it luat aw. Tangval: Suangheng kawm-a vasa bangin nang na bubu niloh hi. A ngaih baang na mai hong musak in la, a lungzuan’ huai na awging hong zasak in. I leengguite paak ta ahih manin, ngiano hon in a suksiat ma-in man ni,” hong ci hi. Ka ngaihno in keima aa hi; kei in ama aa hi’ng. Amah in unok paakte lakah a tuu cing a, nitak huih vot mateng, nitak nitum mateng a cing hi. Sanang bangin, mual tunga sakhitalno bangin, it luat aw, hong paikik in. Zan sialin, ka lup kawmin, ka ngaihno ka lungngaingai a, amah ka zon’zon’ hangin ka mu zo kei hi. Tho-in khua sung tengah ka vak a, kongzing kong kawm tengah ka pai a, ka ngaihno ka zong a, ka zon’zon’ hangin ka mu zo kei hi. Khuasung cing a, pai kawikawite ka tuak a, “Ka ngaihno na mu uh hiam?” ci- in ka dong hi. Khua sung cingte tawh ka kikhen khit phetin, ka ngaihno tawh ka kimu hi. Amah kawi-in ka lencip a, ka pian’na ka nu’ inndei sung, ka nu’ inn dong ka tun’pih mateng ka khah kei hi. Jerusalem nungakte aw, ko’ kingaihna nong suknawi loh nadingun, sakhi leh sanang tawh kei tungah hong kiciam un. Mirrah paknamtui leh saledi paknamtui kihel tawh a kibang, sumbuk-a paknamtui om khempeuh, a kihal khin a khu tawh a kibang, gamlak a, hong khu to henhan bang ahi hiam? En un, Solomon, kumpi luai-in hong kizawng hi! Israel gam sunga om galkap hoihpen, galkap sawmguk in amah cing hi. A vekpi-in namsau zat a siam vive hi a, galdo a siam vive hi khin uh hi. A vekpi-in namsau kuah kim uh a, mi’ hih khak ding cing uh hi. Sing hoihpen tawh a kibawl luai-in, Kumpi Solomon hong kizawng hi. A luai khuamte, ngun tawh kizut a, a tungah, kham tawh kizem puan kilam hi. A tut nading puansan kibawl a, a sungah savun kidap hi. Jerusalem nungakte aw, hong pai un la, Kumpi Solomon en dih ve un. A zi neih ni, a lungdam ni, a nu in amah a khuksak Kumpi lukhu hong khu hi. It luat aw, na ngaih baang a, na lu khuhna puan vang panin, a ngaih baang na mit hong tee kelkel hi. Gilead mual tunga keelhon diang leklek bangin, na samphekte phe velvel hi. Na hapaak singsengte zong, a mul a kimet khin phet, a kisawpsiang tuute tawh kibang hi. Na ha khat zong tok lo a, a vekpi-in kituak dimdiam hi. Na mukte in puansan tawh kibang a, na kampau, ngaihngaih nop huai hi. Na lu khuhna puan sung panin, na kho, hong san lehleh hi. Na ngawng in a tungah galhangte’ zat lum tangzang tulkhat a kikhai zeizaina, David’ tausang tawh kibang hi. Na nawite in, unok pak lakah a takhawm helhel sanang nih tawh ahi a, a takhawm hialhial sakhi peeng tawh ahi zongin kibang hi. Zingsang huih vot a nun’ mateng zingsang khuavak hong tun’ mateng, mirrah paknamtui mual tungah om suakin, saledi paknamtui lakah ka bual ding hi. Ngaihno aw, na ngaih baang mahmah a, kawk baan’ nading na nei kei hi. Ka lawm ngaih aw, Lebanon Mual panin hong pai in la, Lebanon Mual panin kei hong zui in. Humpinelkaite leh kamkeite a ten’na, Amana Mual dawn panin hong taisuk in la, Senir Mual leh Hermon Mual panin hong paisuk in. It luat, ka lawm ngaih aw, na mit hah in ka lung kuai a, na khi-awh in ka lungsim hong zo hi. It luat, ka lawm ngaih aw, nang tawh kingaih, nuam mahmah hi. Na itna in leenggahzu sangin khumzaw a, na paknamtui in paknamtui dang khempeuh sangin namtuizaw hi. Lawm aw, na muk, khuaizu bangin khum a, na leii in bawngnawi leh khuaizu ahi hi. Na puante in, Lebanon Mual tunga paknamtui namkim a nam hi. Ka lawmnu, ka naunu, a ki-umcip huan hi a, a kinei tuam tuinak ahi hi. Tua huan sungah singkungte hoih takin khang a, mangkawlsing cin’na huan tawh kibang hi. Singgah limcipente tua lai-ah gah a, henna leh nard sing namtuite a po hi. Nard sing leh saffron sing, thalsing leh kinnamon kung, a namtui a gah namkim kung po a, mirrah leh aloses, a namkim om hi. Lebanon Mual tung panin lui hong luangsuk a, ciktui luangte, luitui luangte, tua huan sungah tungsuk hi. Nungak: Saklam huih aw, hong nungsuk in la, khanglam huih aw, hong nungto in. Ka huan sung teng hong namtui sak un. Ka ngaihno, ka huan ah hong paisak un la, a gah limcipente hong ne sak un. It luat, ka lawmnu aw, ka huan sung hong tung zo ing, Ka paknamtuite ka kaikhawm hi. Ka khuaizu leh ka khuailuzu ka ne a, ka leenggahzu leh ka bawngnawite ka dawn hi. Nungak dangte: Nungak leh tangval aw, na lungkim piikpeek dongun, ne-in dawnin nuam sa un. Kikhen Man-a Lunggimna Nungak: Ka lup hangin ka lungsim ihmu lo a, ka ngaihno in ka kong hong kiuh ka za hi. Tangval: It luat, ngaihno, ka lungtup aw, kei hong tumsak in. Ka lu tungah daingo kia a, meiilum in ka sam kawtsak hi. Nungak: Ka puan teng suah khin zo ing, ka puante silh kik ding ka hi hiam? ninsak ding ka hi hiam? Ka ngaihno in kongkhak hong len khin napi, hong taisan kik hi. Ka ngaihno, tumsak dingin ka kithawi a, ka khutte mirrah paknamtui tawh ka zut a, ka khutmete, mirrah paknamtui tui ka nuh a, kong hong dingin a hon’na ka len hi. Ka ngaihno, lutsak dingin kong ka hon’ a, amah na taikhia khin ta hi. Amah a taikhiat manin ka dah lua a, amah ka zon’ hangin ka mu kei a, amah ka sap hangin hong dawng lo hi. Khuasung a cing mite tawh ka kituak a, kei hong satin hong liamsak a, kulhzang-a a kileh den khuacingte in ka puantungsilh hawkkhia uh hi. Kong thuum hi, Jerusalem nungakte aw, ka ngaihno na muh uh leh, lungzuangin ka sih dekna, na gensak un. Nungak in a Lawmpa Phat Nungak dangte: Nungak lak-a a hoihpen aw, na ngaihno a bangci hiam, hong gen dih in. Tua banga kong gen liang ding uh, bangzahta-in lamdang ahi hiam? Nungak: Ka ngaihno, a mel hoih a, a tha hat hi; mi tulsawm lakah tehpih ding dang om lo hi. A sam sau-in kil thiuhtheuh a, a sam hoih-in vom dikdek a, kham sangin zong manphazaw hi. A mittangte ahih leh, tuisiang phuan lakah a kisilsiang, luitui luang gei-a a om, vahuite tawh kibang hi. A biangte pen paknamtui a dim-a kithun, thawlsan kiuhkeuh tawh kibang hi, A mukte pen, mirrah paknamtui tawh a kidim, unok paak tawh kibang hi. A khutte etlawmin hi linlian a, suangmanpha a kiphut zungbuhte a bulh hi. A pumpi in, suangmanpha a kiphut dimdiam, saiha pak tawh kibang hi. A khete in, kham citak a kiphuh dimdiamna, suangngo khuamte tawh kibang a, ama duang in Lebanon mual sang, taamtaak kung hoih bangin thupi suah hi. A kampaute, khum zungzung a, a vekpi-in, deih loh ding, khat zong om lo hi. Ka ngaihno, hih bang teng hi. Jerusalem nungakte aw. Nungak lak-a hoihpen nu aw, na ngaihno, koi-ah pai hiam? Na ngaihno, koi lam pai hiam? Amah hong zon’ pih nu’ng. Nungak: Ka ngaihno, paaknamtui kung a pona, a huan sungah pai hi. A huan sungah a tuu cing a, unok paakte a lo hi. Ka ngaihno, kei aa hi a, kei in ama aa hi’ng. Amah in unok pak lakah a tuute gamtasak hi. Tangval in A Lawmnu Phat Tangval: Ngaihno aw, Jerusalem khuapi bangin na etlawm a, Tirzah khuapi bangin na hoih a, vantung aksi bangin na deihhuai hi. Keima lam hong nga kei in. Na mai in hong lenglua hi. Gilead mual tunga keelhon diang leklek bangin na samphekte phe velvel hi. Na hate zong, a kisil khin phet tuuhon bangin, pak singseng hi. A tok khat zong om lo a, a vekpi-in kituak dimdiam hi. Na lu khuhna puan sung panin, na kho hong san lihleh hi. Kumpi-zi sawmguk, kumpi zineu sawmgiat, sim zawh lohin nungak om kha mah ding a, ahi zongin khat bek ka ngai a, amah in vahui bangin it-huai hi. Amah in a nu’ tanu neihsun hi a, a nu’ ta itpen khat ahi hi. Minam numeite in amah mu-in thupha pia-in, kumpi’ zineute in amah phat uh hi. Zingsang khuavak tawh a kibang, hih nungak, kua ahi hiam? Amah a mel hoih mahmah a, nitaang khataang, a bang hi. Kuam sunga singkungnote a en ding, leenggui a pak nai hiam cih a en ding, mangkawlsing a pak nai hiam, cih a en dingin, singno huan ah ka paisuk hi. Galdo ding a, kithawi sakol hawlpa a liin’ bangin, nang kong ngaihna hangin ka liingliing hi. Nungak dangte: Hong ciahkik in, hong ciahkik in, Shulam numei aw, nang kong muh theih nadingun, hong ciahkik in, hong ciahkik in. Tangval: Shulam nungak, khanglui lai lam-a a laamte bangin, bang hangin mu nuam na hi uh hiam? Kumpi meel pua, a ngaih baang nungak aw, na khete leh na khedap kilawm mahmah! Na phei leh na tanzumte, sing suih siamte’ suih bang hiuhiau hi. Na kalkawm in, leenggahzu lim tawh a kilawi lo, hai bangin uk kiukeu hi. Na kawng in, unok paak tawh a ki-um, buhlom hen tawh kibang hi. Na nawite in, a takhawm helhel sakhi peeng, a omkhawm hialhial sanang nih tawh kibang hi. Na ngawng in, saiha tausang tawh kibang hi. Na mitte in, Heshbon khuapi kulh gei-a om, tuilite tawh kibang hi. Na nak in Damaskas khuapi lam a nga, Lebanon tausang bangin hoih hiuhiau hi. Na lutang in, Karmel Mual bangin kitawito a, na samphekte san hiuhiau a, a etlawmna in kumpipa’ mit la vangvang hi. Nungak leh Tangval A Kideih Tuakna It luat aw, na ngaih baang a, na meel muh, nuam zungzung hi. Tumkung bangin na etlawm a, na nawite in, nisuh gah bawk pha tawh kibang hi. Tumkung tungah kahto-in, a gah ka lo ding hi. Na nawite in, kei adingin leenggah bawk tawh kibang a, na gimnam in apple min bangin namtui hi. Na kam in, leenggahzu bangin khum zungzung hi. Nungak: Ka ngaihno tungah leenggahzu khum luang hen la, a muk a ha tawk kim hen. Ka ngaihno’ aa ka hi a, amah in kei hong deih hi. Ngaihno aw, gam lakah paikhia-in, leenggui lo-ah va giak ni. Zingsangin tho baihin, leengguite a sel nai hiam, leengguite a pak nai hiam, mangkawlsing kungte a pak nai hiam, i en ding hi. Tua lai munah kong itna letsong ka hong pia ding hi. Tua lai-ah zawl-ai kung namtui gim na za ding a, singgah lim namcin i kong gei-ah om hi, Ngaihno aw, a gah alui leh athak, nang adingin na duhduh kong koihsak hi. Ka nu sung pana piang ka sanggampa hi lecin, kei ka ut hi. Tua hi leh, lam kal-ah hong tuak taleng zong, kong tawptawp ding a, kuamah in phamawh sa lo ding hi. Keimah pian’na, ka nu inndei sungah, nang kong paipih ding a, tua lai-ah kei nong kawi ding hi. Tua lai-ah leenggahzu lim, mangkawlsing tui, kong tulh ding hi. A veilam khut hong khamsak a, a taklam khut-in kei hong kawi hi. Jerusalem nungakte aw, ko’ kingaihna nong suknawi loh nadingun, kei tungah hong kiciam un. Itna in Sihna Zahin Khauh Nungak dangte: Gamlak panin a lawmpa tawh khut kilensa-in, a hong paikhia kua ahi hiam? Nungak: Nangmah na pian’na mun, na nu in nang hong neihna mun, apple kung nuai panin nang kong phong hi. Kei sim loh, kuamah ngai kei in la, kei sim loh, kuamah na ang-ah kawi kei in. Itna in sihna zahin thahat a, ngaihna in sihna zahin khauh hi. Itna in mei bangin kuangkhia a, meikuang lianpen a suak hi. Tui tampi tawh kisumit zo lo a, tui sungah i phumcip hangin mit zo lo hi. Mi khat in a neihsa sum khempeuh tawh, itna lei dingin hong kithawi leh, kinuihsan lel ding hi. Nungak dangte: Sanggam numeino khat ka nei uh a, ama nawite neu mahmah hi. Tangval khat in hong hel zenzen leh, ka sanggamnu uh bangci huh ding ka hi uh hiam? Amah khua umna kulh hi leh, ngun kibawl tausang tawh ka hu ding uh a, amah kulh kongpi hi leh, taamtaak sing peekte tawh ka dal ding uh hi. Nungak: Keimah in khua kulh ka hi a, ka nawite in a tausang ahi hi. Lim takin kei hong kihutna, ka ngaihno in thei ding hi. Tangval: Baalhamon a kici munah Solomon in leenggui lo khat a nei hi. Amah in tua lo a en dingin lo khote sawl a, lo-a piangte’ man dingin lo khote khat in ngun dangka tulkhat ciat a piak ding uh ahi hi. Keimah in keima aituam leenggui lo khat ka nei hi. Solomon aw, na ngun dangka tulkhat la in la, lo khote tungah amau’ tanh ding za nih pia in. Huan sunga om ka ngaihno aw, ka lawmte in hong ngai dide ahih manin, nangma aw zong, hong zasak dih in. Nungak: Ka ngaihno aw, sanang bangin, paknamtui kung a pona mun, mual tunga om sakhitalno bangin, kei kiangah hong pai in. Judah gam kumpite ahi Uzziah, Jotham, Ahaz leh Hezekiahte’ hun lai in, Amoz’ tapa Isaiah in Judah gam leh Jerusalem khua tawh kisai a muh mangmuhnate in: Vantungte aw, za un, leitung aw, ngai un; bang hang hiam cih leh Topa in thu hong gen khin zo hi: “Ka pattahsa tapate in kei hong lehdo uh hi. Bawng in amah a neipa thei a, la in ama topa’ an piakna mun thei buang hi; ahih hangin Israel in thei lo hi, keima mite in thei-thei lo hi,” Ah, a khial minam, mawhna tawh a gik mite, siatna a bawlte’ suan leh khakte, a gamtatsia tapate! Amaute in Topa nusia khin uh a, amaute in Israelte’ Siangtho Pa simmawh khin uh hi; amaute in amah nungngat uh hi. Bang hangin note hong kisat beh lailai nadingin lehdo teitei na hi uh hiam? Israel aw, na lutang khempeuh liamma dim a, na lungsim leh na ngaihsutna gim mahmah hi. Khe nuai-a kipan lutang dong nangawnin a cidamna om lo a, satnim gawpnate leh meimapite leh si luang liammate om hi; tuate pen a nai kisaal lo, kitun lo, sathau tawh kinomsak lo hi. Na gam uh khing a, na khuapite uh mei tawh kihal hi; na muh tangpi mahun gamdang mite in na gam uh hong laksak a, theih ngei lohte’ lotthal bangin na khempeuh susia gawp uh hi. Jerusalem khuapi bek om lai a, leenggui lo-a buk, tangmai lo sunga hampheng bangin kuama’ hut lohin kinusia a, a ki-umcih khuapi tawh kibangin kinusia hi. Vanglianpen Topa in eite tawmno khat a nungta-in hong siit hi kei leh, eite pen Sodom khua bang khinin, Gomorrah khua bang i suak khin ta ding hi. Sodom a uk mangte aw, Topa ’ thu za un! No Gomorrah mite aw, i Pasian’ hilhna ngai un! Topa in hih bangin ci hi: “Note’ biak piakna a tampite pen kei’ tungah bang hi leltak ahi hiam? Tuutalte leh ganhing thaute’ sathau tawh meihal biaknate ka kham ta hi; bawng talte, tuunote, keltalte’ sisan-ah kei ka lungkim kei hi. “Kei’ mai-ah kilaak ding a, nong pai uh ciangin hih banga ka huang sung na tuatcil gawpna uh kua in hong deih ahi hiam? Bangmah-a kimang lo piaknate hong paipih nawn kei un; paknamtui halna ka kih hi. Khadet ni, sabbath ni leh thupi tak-a na kikhopnate uh mawhna tawh kidim ahih manin ke’n ka thuak zo kei hi. Note’ khadet nite leh na pawite uh ka mudah hi; tuate pen kei’ adingin van gikpi khat suak khin a, tuate ka puakna-in ka gim hi. Thu ngenin na khutte uh nong zaak uh ciangin note kiang pan ka mai ka seel ding a, thu tampi na nget uh hangin, ke’n ka ngai tuan kei ding hi; bang hang hiam cih leh note’ khut in sisan tawh kidim hi. Note kisil tawm un la, a siangtho-in kibawl un; keima muhna-ah na gamtat siatnate uh paikhia un; siatna na bawlte uh khawl un la, gamtat hoih ding kisin un; thumanin gamta un la, nenniamna kheel un; pa nei lote huu un la, meigong numei pan’pih un. Topa in hih bangin ci hi: “Tu-in hong pai un la, thu kikum khawm ni; na mawhnate uh puansan a bat hangin vuuk bangin hong ngo ding hi; na mawhnate uh si bangin a san hangin tuumul bangin hong kaang ding hi. Note in utna lungsim nei-in thu na man’ nak uh leh lei pan-a piang a gah hoihte na ne ding uh hi; Ahih hangin note in kei hong nialin nong lehdo uh leh namsau in note hong vatmai ding hi; bang hang hiam cih leh Topa in hih thu gen khin zo hi.” A thutak khuapi, thutang tawh a kidim ngeisa, bang ci-a a paktat numei tawh kibang ta ahi hiam! Ama sungah thumanna om ngei a, ahih hangin tu-in mi thatte bek a om hi. Jerusalem khuapi aw, nguntang na bang ngei a, tu-in ngun-ek na suak hi. Leenggahzu limci na bang ngei a, tu-in tui mawkmawk na bang ta hi. Na uliante, mi lehdote hi a, gutate tawh a kikhawlte ahi hi. Mi khempeuh in sumgolh leh letsong deih uh hi. Amaute in pa nei lote pan’pih lo uh a, meigongnu’ thu amaute in sang lo uh hi. Tua ahih ciangin, Topa, Vanglianpen Topa, Israelte’ Vanglian Pa in hih bangin ci hi: “Ah, ka lang ahi note tungah ka hehna kong khahkhia ding a, ka gal ahi note tungah keimah in kong thuk ding hi. Note kong langpan ding a, meikhuk-a haltui bangin na saam-ek teng uh tuikhia sakin, na kihelpih na nin khempeuh uh ka lakhia ding hi. A masa-a bangin na thukhente, a kipat cil-a bangin na upate ka koih kik ding hi. Tua khit ciangin nang pen, thuman khuapi, thutak khuapi, hong kici ding hi.” Topa thutang ahih manin Jerusalem khuapi honkhia ding a, a sunga teeng a kisik mi khempeuh zong dikna tawh honkhia ding hi. Ahih hangin a lehdo mite leh a khial mite pen kisusia khawmin Topa a nusiate pen kibeimangsak ding hi. Bang hang hiam cih leh tawsaw kungte na biakna hangun note na maizum ding uh a, biakna huan na bawlna hangun zahhuai-in na mai uh san ding hi. Bang hang hiam cih leh note pen, a teh a vul tawsaw kung leh tui a ngah lo huan tawh na kibang ding uh hi. A thahat mipa pen patlom tawh kibang ding a, ama nasepna pen mei-ek suak ding hi; kuamah in phelh zo loin amaute gel kangtum khawm ding uh hi. Judah gam leh Jerusalem khua tawh kisai Amoz’ tapa Isaiah muhna thu in: Nidang ciangin Topa ’ inn omna mual pen, mual liante lakah a sang penin kikipsak ding a, mual neute tungah kisangsak ding hi; tua-ah minamte khempeuh pai muamua ding uh a, mi tampite hong pai-in: “Hong pai un, amah in ama zia-le-tongte eite hong hilh theih nading leh ama lampite i zuih theih nadingin Jakob’ Pasian’ inn, Topa ’ mual-ah paito ni,” a ci ding uh hi. Bang hang hiam cih leh Topa in Zion panin thu hong gen ding a, Jerusalem khua panin Topa ’ thuhilhna hong paikhia ding hi. Amah in minamte khat leh khat kikal ah thukhenin, mi tampite’ thu khentat sak ding hi; amaute in a namsaute uh lo khawh na tu, a teipite uh singhiang heuhna temkawi-in seek ding uh hi; Minam khat leh minam khat kido nawn lo ding a, galdo dingin kithawi nawn lo ding uh hi. Jakob’ suan leh khakte aw, hong pai un, Topa ’ khuavak sungah gamta ni. Amaute pen nisuahna lam gam khongkhaite leh Filistia mite bangin aisante tawh kidim uh a, gamdang mite’ ngeina zui uh ahih manin, Jakob suan leh khakte, na mite nang na nial hi. Amau gam in ngun leh kham tawh kidim a, amau sumte in bei hun cih nei lo hi; amau gam in sakolte tawh kidim a, amau leengte in bei hun cih nei lo hi. Amau gam in milimte tawh kidim hi; amau’ khut tawh a bawlsate, a khutmete tawh a bawlsate amaute in bia uh hi. Tua ahih ciangin mite kiniamkhiat sukin, mite a niamin kikoih suk hi. Amaute’ mawhna maisak kei in: Topa kihtakna leh a lian ama minthan’na panin suanghawm sungah lut in la, leivui sungah bu in. Mite’ kiliatsakna pen kiniam koih ding a, mihingte’ kiphatsakna pen kiniam khiat ding hi; tua ni ciangin Topa bek a lianin kikoih ding hi. Bang hang hiam cih leh Vanglianpen Topa in a sehsa ni nei hi, a kiphasak leh a kiliansak khempeuh, a kisangsak leh a sangte khempeuh niamkhiat suk ding hi; a sang, a kilamto, Lebanon mual taamtaak singkungte khempeuh; Bashan mual tawsaw kungte khempeuh; alian mual sangte khempeuh leh a sang mual neute khempeuh; tausang khempeuh leh a muanhuai kulhte khempeuh; Tarshish teembaw khempeuh leh teembaw hoih khempeuh, a niam koih ding ni khat a nei hi. Mite’ kiliatsakna kiniamkhiat ding a, mite’ kiphatsakna a niamin kikoih suk ding hi; tua ni ciangin Topa bek a lianin kikoih ding hi. Milimte mangthang khin ding hi. Leitung liingsak gawp dingin Topa a thawh ciangin, amah kihtakna leh alian ama minthan’na panin, suanghawm sung leh leihawm sungah mite bu ding uh hi. Ama’ nakvang sungah husan’na a om mipa muang kei in; Ama’ husanna pen banga sim tham ding ahi hiam? Bang hang hiam cih leh, en un, Topa, Vanglianpen Topa in Jerusalem khua leh Judah gam panin nuntakna leh lu hin’na, nuntakna an khempeuh leh nuntakna tui khempeuh; mivanglianpa leh galkappa, thukhenpa leh kamsangpa, aisanpa leh upa-pa, mi sawmnga a uk bupa leh zalian a neipa, thu lamlakpa leh khut siampa leh bum siamte lakhia hi. Amaute’ ulian dingin naupangte ka bawl ding a, naungeekte in amau uk ding uh hi. Mite khat leh khat, mi khempeuh in a lawmte ciat, mi khempeuh in a veengte ciat, kinencip gawp ding uh hi; khangnote pen uhamte tungah, migina lote pen miliante tungah kiphasak ding uh hi. Mi khat in ama pa’ inn sungah a sanggampa lenin, “Nang in puan na nei hi; nang in kote’ makaipa nong hi ding a, hih a sia lomtangte pen nangma khut sung hi ding hi,” a cih ni ciangin, amah in: “Kei in a damsakpa ka hi kei ding hi; ka inn sungah an leh puan om lo hi; mite a makai-in nong bawl kei ding hi,” ci-in genkhia ding hi. Bang hang hiam cih leh, amau kampaute leh amau gamtatnate in Topa langpangin, a minthang ama omna dem uh ahih manin, Jerusalem khua kipukin, Judah gam kia hi. Amau’ maiput in amau langah teci pang hi; Sodom bangin amaute in a mawhna uh genkhia uh hi, amaute in iim lo uh hi. Amaute in gimna ngah ta hen! Bang hang hiam cih leh amaute in amau tung mah ah siatna kitun’ uh hi. Amaute tungah thu hoih ding hi, ci-in thuman mite kiangah gen un, bang hang hiam cih leh amaute in amau gamtatna hoih a gah ne ding uh hi. Mi gilo in gimna ngah ta hen! Ama khut in a hihsate ama tung mah ah kithukkik ding ahih manin ama tungah thu sia ding hi. Keima mite ahih leh—khangnote in bawlsia uh a, numeite in zong uk uh hi. Ka mite aw, na makaite un note lam hong lak khial a, note’ lampi zuih pen hong siasak hi. Topa in, thu pang dingin thukhenna munah ama panmun hong la a, ama mite thukhen dingin a ding hi. Topa in, upate leh ama mite’ uliante tawh thukhen dingin kipan a; “Leenggui lo a ne tumte pen note na hi uh a, mizawngte’ na a kisutte note’ inn sungah om hi. Ka mite sucip-in, mi zawngte na gawina uh, bang na cih nopna uh ahi hiam? Vanglianpen Topa Pasian in ci hi. Topa in hih bangin ci hi: Jerusalem numeite kiphasakin ngawng doksa-in lam pai a, kiphatsakna tawh a mit uh hei pampam-in hi tuihtuihsa-in pai uh a, a khe uh tawh gingsak sualsual ahih uh ciangin; Topa in Jerusalem numeite lutang meima sakin, Topa in amau’ lutang kolhsak ding hi. Tua ni ciangin Topa in, khebuh hoihte, lutuam leh khade lim tawh a kibang kizepnate; bilbah tualte, taaute leh mai-sitnate; lukhute, banbulhte, kawngtente, paknamtui bungte leh a kivom aite; min gelhna zungbuhte leh nakbuhte; pawi puante, puanza neute, puanpite leh khutkhai ipte; puanza neu vang siseihte, saihadial puan sungsilhte, dialkhipte leh kikhuhna puante lakhia ding hi. Paknamtui tangin uihna; kawnggak tangin khauhualpi; lim tak-a kizem sam tangin lu kolhna; puan hoih tangin puanhampi; mel hoihna tangin maizumna hun hong tung ding hi. Na mite pen namsau tawh si ding uh a, a vanglian na mitepen gal sungah kisia ding uh hi. Khuapi kongpi pen tau-in thuum ding hi; khuapi pen gamkhing suakin, a tangguak-a om nupi bangin lei lakah tucip ding hi. Tua ni ciangin, nupi sagih in papi khat nei khawm ding uh a, “Kote in komau’ an ciat mah ne-in, komau’ puanciat mah ka silh ding uh hi, kote pen, nangma zi cih min bek hong pua sak in; ka minsiatna teng uh hong hum in,” ci ding uh hi. Tua ni ciangin Topa ’ bulsel pen mel hoihin minthang ding a, leitung pan-a a piang gahte pen, a suakta Israel mite’ kiphatsakna leh minthan’na hi ding hi. Tua ciangin Zion Mual tung khempeuh leh ama kikhopnate tungah, sun-in meii sungah, zan-in meikuang khu tawh Topa in hong bawl ding a, Topa ’ minthan’na tung khempeuh ah a kizal khat om ding hi. Tua pen, sun ciangin nisa liah ding leh huihpi guahpi panin bukna leh belhna hi ding hi. Ka lawm itpa’ tangin, a leenggui lo a itna la hong sa ning: Ka lawm itpa in, lei hoih mahmahna mual tung khatah leenggui lo khat a nei hi. Amah in lei to-in suangte paikhia a, leenggui hoihte a suan hi; amah in a laizangah tausang khat lam a, tua sungah leenggah sukna khuk khat a to hi; amah in leenggah hoih hong gah ding lamen a, ahih hangin gam leenggah hong gah mawk hi. Tu-in, Jerusalem khua-a teengte leh Judah mite aw, kei leh ka leenggui lo kikal-ah thu nong khen nading uh kong thuum hi. Ka leenggui lo’ adingin ka hih nai loh ka hih ding a kilawm bang om lai ahi hiam? Leenggah hoih gah ding ka lamet lai takin bang hangin gam leenggah hong gah mawk ahi hiam? Tu-in, ka leenggui lo tungah ka hih ding note tungah kong gen ding hi. A daai ka lakhia ding a, kinemang ding hi; a gawl ka susia ding a, kituancil ding hi. Lo khul-in ka bawl ding hi; kipuah loin, kikho lo ding a, lingkung leh lingte khang ding hi; ama tungah meiite in zong guah a zuksak loh nadingin thu ka pia ding hi. Bang hang hiam cih leh Vanglianpen Topa ’ leenggui lo pen Israel mite hi a, Judah mite pen lungdamna tawh a suan kungte ahi hi; amah in thutan’na lamen a, ahih hangin sisan luan’na om hi; thumanna lamen a, ahih hangin kahna om hi: Leitang tungah amau guak a teeng zah dongin midang’ adingin mun khempeuh a bei matengin inn khat leh khat, lo khat leh khat, gawmin a la thuah tawntung mite in gimna ngah ta hen. Vanglianpen Topa in ka zakna-ah hih bangin kiciam hi: “Aman takin, inn tampi tak hawmsuak ding a, a lian a hoih innte ah a teeng om lo ding hi. Bang hang hiam cih leh leenggah lo eeka sawm in phelpi khat dim bek gah ding a, khaici beem khat in an seu khat bek piangsak ding hi.” Zingsang tungin tho-in, kham theih zu delhin, leenggah zu in amaute a satsak pialpual matengin nitakin a tut kho mite in gimna ngah ta hen! Amaute in a pawi sung uhah laiza la sakna leh harp la sakna, khuang, tamngai leh leenggahzu tampi nei uh hi; ahih hangin amaute in Topa ’ sepnate don lo uh a, a khut tawh a bawlte zong mu lo uh hi. Tua ahih ciangin thu theihlohna hangin ka mite sal suak uh hi; amau’ mi liante gilkialin si dek uh a, a mihonte uh dangtakin keu uh hi. Tua ahih ciangin Leinuai in a duhna khangsakin, bangmah tawh kiteh theih lo zahin a kam ka beba a, Jerusalem’ hoihna leh a mipite, a mihonte leh ama sunga lungdam mite a nawmvalh hi. Mite a niamin kikoih suak a, mite kiniamkhiat suk hi, a kiphasakte kiniamkhiat suk hi. Ahih hangin thutang sepna tawh Vanglianpen Topa in a liatna hong kilangsak a, a Siangtho Pasian in a mite a thukhenna tawh ama siangthona hong kilangsak hi. Tua ciangin tuunote in amau’ tatna gamlak mun bangin lopa ne ding uh a, a thau ganhingte leh keelnote in a siasa khuapi sungah gamta ding uh hi. A phate sia ci-in, a siate pha ci a, khuavak dingin khuamial koihin, khuamial dingin khuavak koih a, a khum dingin a kha koihin, a kha dingin a khum a koihte in gimna ngah ta hen! Amau’ mit-ah pil kisa a, amau’ muhna-ah siam a kisate in gimna ngah ta hen! Leenggahzu tampi a dawnte, kham theih zu nek a hatte, mimawhte sumgolh tawh khah a, midikte a mawhsakte in gimna ngah ta hen! Tua ahih ciangin, mei in buhkung keute kangtum a, meikuang sungah lopa keute a kattum bangin, amaute’ zung pen muatna hi ding a, amaute’ pak palhte pen leivui bangin van-ah leengto ding hi; bang hang hiam cih leh Vanglianpen Topa ’ thu nialin, Israelte’ Siangtho Pa’ thu simmawh uh hi. Tua ahih ciangin, Topa ’ hehna ama mite’ tungah hong khangin, a khut zanin amaute vat gawp a, mualte liing hi; amaute’ luang hawmte pen kongzing lampite ah nin bangin om hi. Hih bang teng hangin zong a hehna dam nai lo a, ama khut kizan lai hi. Amah in, gamlapi-a om minam khat a sapna-in lim khat lak a, lei mong panin hong pai nadingin a sam hi; manlang takin hong paipah hi. Tua a hong pai mite kuamah gim lo uh hi, kuamah tuk lo uh hi, kuamah lusu lo, ihmu lo uh hi, dialkaih khat zong kol lo hi, khedap khau khat zong tat lo hi; amau’ thaltangte hiam a, a thal khempeuh uh a kikeeksa ahi hi, amau sakolte’ khecinte pen meisuang bangin sak a, a leengpeite uh pingpei bangin manlang hi. Amaute’ kikona pen humpinelkai hawk tawh kibang a, humpinelkai khanglaite bangin amaute hawk uh hi; amaute humhamin a sa nek ding uh man uh a, amaute in puakhia-in kuamah in honkhia zo lo hi. Tua ni ciangin amaute in tuipi ging bangin Israel tungah ngik ding uh hi. Mi khatpeuh in leitang en leh, khuamialna leh lungzin’na bek om hi; meiite in khua mialsak hi. Uzziah Kumpipa a sih kumin, a sang mahmah, a lian kumpi tokhom tungah Topa a tu ka mu hi; ama kumpi puanpi pen biakinn sung teng dim hi. Ama tungah serafim vanmite ding uh hi; tuate in kha guk ciat nei uh hi; nih tawh ama mai liah-in nih tawh ama khe tuamin, nih tawh leeng uh hi. Amaute khat leh khat kisamin: “Vanglianpen Topa, siangtho, siangtho, siangtho hi; leitung khempeuh ama minthan’na tawh kidim hi,” ci-in awng uh hi. Tua kikona aw tawh biakinn kongkhak khuam bulpite kiling a, inn sung teng meikhu tawh kidim hi. Tua ciangin keimah in, “Gim ngahpa hi ta ing! Bang hang hiam cih leh a mawknapi ka hi hi; ka kam-a ka thugen khempeuh mawhna vive hi a, a thugen khempeuh uh mawhna leh nitna ahi mite’ lakah ka teeng kha hi. Vanglianpen Topa, Kumpipa ka mu kha khin ta hi,” ka ci hi. Tua ciangin serafim vanmite khat, biakna tau panin taiteh tawh a teh mei-am khat a khutah tawi-in, keima kiangah hong leeng hi. Amah in ka kam hong bi a, “En in, hih in na muk su-kha zo hi; na mawhna beita a, na khialhna kimaisak zo hi,” hong ci hi. Tua ciangin, “Kua sawl ding a, eite’ adingin kua va pai ding ahi hiam?” Topa’ cihna aw ka za hi. Tua ciangin ke’n, “Hi lai-ah kei om ing! Kei hong sawl in,” ka ci hi. Tua ciangin amah in, “Pai in la, hih mite tungah hih bangin ci in: ‘Za za napi, tel lo; mu mu napi, thei lo, amaute in a mit uh tawh a muh loh nading, a bil uh tawh a zak loh nading, a lungsim uh tawh thu a theihtel loh nading, amaute kihei-in damna a ngah lohna dingun hih mite lungsim mawl sak in la, amau bil uh ngong sak in la, a mit uh va si sak in,” hong ci hi. Tua ciangin keimah in “Topa aw, bang tanvei sawt ding ahi hiam?” ka ci hi. Amah in, khuapite-ah a teeng kuamah om loin hawm suakin, innte ah kuamah om loin kinusia a, leitang pen gamkhing suak kiuhkeuhin, Topa in gamlapi-ah mite khinkhia-in, leitungah a kinusia mun tampi a om dong, tua tan hong sawt ding hi, hong ci hi. Mi, seh sawmsuah seh khat bang a om lai hangin, taak kung leh tawsaw kungte a kiphuk khit ciangin a bulsum om laite mei tawh a kihal kik bangin amaute zong kisusia ding hi. A siangtho khaici pen, tua a bulsum ahi hi, ci hi. Uzziah’ tapa Jotham, Jotham’ tapa Ahaz ahi Judah kumpipa’ hun lai takin, Siria kumpipa Rezin leh Remaliah’ tapa Pekah ahi Israel kumpipa in Jerusalem khuapi sim dingin kuanto uh a, ahih hangin amaute in zo zo lo uh hi. “Siriate pen Efraim mite tawh kikop,” ci-a David’ innkuante’ tungah a kigen ciangin, huih in gamlak-a singte a mut bangin amah leh a mihingte’ lungsim kiliing hi. Topa in Isaiah’ tungah, “Ahaz tawh kimu dingin Puansawppa’ nasepna phual zuatna-a lampi kianga a om, bual tungnung tui lakna mongah nang leh na tapa Shearjashub pai un la, ama tungah, ‘Kidawm in la, om khinkhian in; lau kei in, Siria gam kumpipa Rezin leh Remaliah’ tapa’ hehna pen, sing tumbang nih a khute tawh kibang lel ahih manin kilunggim sak kei in. Bang hang hiam cih leh Siria kumpi-a kipan Remaliah’ tapa leh Efraim mite in nang hong sawm uh a, “Judah gam do dingin pai-in va sugawp ni, eima adingin va zo ni, tua gamah kumpi dingin Tabe-el’ tapa va koih ni,” ci uh hi, Topa Pasian in hih bangin ci hi: Tua thu pen kip lo ding a, hong tangtung lo ding hi. Bang hang hiam cih leh Siria’ lutang pen Damaskas khuapi hi a, Damaskas’ lutang in Rezin ahi hi. (Kum sawmguk leh kumnga sungin minam a hi zo nawn lo zah dongin Efraim kitamzan gawp ding hi.) Efraim’ lutang in Samaria hi a, Samaria’ lutang in Remaliat’ tapa ahi hi. Hih thu upna kho na neih kei leh, nang na kip kei ding hi,’ va ci in,” ci-in a gen hi. Topa in Ahaz kiangah thu genkik a, “ Topa, na Pasian’ kiang panin lim khat ngen in la, a thuk Leinuai panin ahi zongin, a sang vantung panin ahi zongin ngen in,” ci hi. Ahih hangin Ahaz in, “Ka ngen kei ding hi, Topa ka ze-et kei ding hi,” ci hi. Tua ciangin Isaiah in, “David innkuan aw, ngai un! Mite na lunggim sakna uh thu neu sa a, ka Pasian zong lunggim sak na hi uh hiam? Tua ahih ciangin Topa mahmah in note’ tungah lim khat hong pia ding hi. En un, nungak khat gai-in tapa khat nei ding a, ama min Immanuel kici ding hi. Amah in a hoih lote nial-in a hoihte a teel theih hun ciangin bawngnawi thau khal leh khuaizu ne ding hi. Bang hang hiam cih leh naupang in a hoih lote nial-in a hoihte a teel theih hun ma-in na kihtak uh kumpi nihte’ gam kinusiacip ding hi. Efraim mite pen Judah mite kiang pan a, a paikhiat-a kipan nidanga piang ngei lo thu ahi, Assiria kumpipa nang leh na mite leh na pate’ innah Topa in hong tungsak ding hi,” ci hi. Tua ni ciangin Izipt luite’ nak-a a om Izipt mite, thopi hon bangin hong pai nading leh Assiria mite, a gam panun khuaipi hon bangin hong pai nadingun Topa in sam ding hi. Tuate khempeuh hong pai-in, keenhawmte sung leh suangpi heengte sung leh lingkung kawmte leh ganhing tatna mun khempeuh ah dim ding uh hi. Tua ni ciangin Topa in Gun gal khat pan a, a kikawm temta ahi Assiria kumpipa zangin a sam leh a khemul mettol ding a, a khamul zong metkhia ding hi. Tua ni ciangin mi khat in bawngla khat leh keel nih bang bek suahtak zo ding a, ahi zongin tuate in nawi tampi a piakna hangin amah in bawngnawi thaukhal ne zo ding hi; bang hang hiam cih leh gam sunga a om lai mi khempeuh in bawngnawi thaukhal leh khuaizu ne ding hi. Tua ciangin ngun shekel tul khat a man leenggui tul khat a omna mun khempeuh pen lingkungte leh lingte suak ding hi. Gam khempeuh lingkungte leh lingte tawh kidim ding ahih manin, thal leh thaltangte tawh tua munah mihingte gamvak ding uh hi; lingkungte leh lingte na kihtakna hangin tu-peek tawh a kikho ngei mual neute-ah na pai ngam kei ding hi; tua munte pen bawng khahna leh tuute’ gamtatna mun suak ding hi. Tua ciangin Topa in, “Suangpeek lianpi khat la in la, tua tungah mihingte’ theihkim lai tawh, ‘Mahershalalhasbaz’ ci in gelh in,” hong ci hi. Hih thu a thei dingin a muanhuai teci, siampi ahi Uriah leh Jeberekhiah’ tapa Zekhariah ka nei hi, hong ci hi. Tua ciangin kamsangnu tawh ka lumkhawm a, amah gai-in tapa khat hong nei hi. Tua ciangin Topa in ka tungah, “Ama min pen Mahershalalhasbaz, ci-in phuak in: bang hang hiam cih leh naungek in, Nu aw, pa aw, a cih a theih ma-in Damaskas khua’ hauhna leh Samaria khua sunga a kisut vante, Assiria kumpipa in la-in masuan ding hi,” hong ci hi. Topa in kei tungah thu hong genkik a, “Hih mite in, dam tak-a a luang didi Shiloah tuite nial uh a, Rezin leh Remaliah’ tapa’ mai-ah launa tawh liing liang uh ahih ciangin; en in, Topa in Assiria kumpipa leh ama minthan’na khempeuh ahi, hat a, a tam mahmah Gun tuite, amaute’ lang khatah piangsak ding hi; tui in a batna ngei teng tum-in, a piau khempeuh dimlet hi; Judah gam dong hong nawtsuk ding a, dimlet-in pai suaksuak-in, ngawng ciang dong tum ding hi,” hong ci hi. Ahih hangin Pasian in eite hong ompih a, a kizal ama khate in i gam hong hu ding hi. No minam dangte aw, galsim dingin awng un, thei un la, kitamzan un; gamlapi-a om gamte khempeuh aw, ngai un; kigalging un, ahih hangin lungkiatna na thuak veve ding uh hi; kigalging un, ahih hangin lungkiatna na thuak veve ding uh hi. Thu na vaihawm khawm uh hangin a mawkna suak ding hi; thu khat peuhpeuh na gen uh hangin kip lo ding hi; bang hang hiam cih leh kote tawh Pasian omkhawm hi. Bang hang hiam cih leh Topa in ama vangliatna tawh nakpi takin kei tungah thu hong gen a, hih mite’ lampi ka zuih loh nadingin hong hilhkhol a, “Hih mite’ sawmsimna pawlpih kei un. Amaute’ kihtakte kihta kei un la, lau kei un. Ahih hangin Vanglianpen Topa pen a siangtho-in na ngaihsun ding uh hi; amah note’ zahtak leh note’ launa na hi sak ding uh hi. Amah pen, bukna hi ding a, a siangtho’ luatna hangin mite’ kitukna leh puk theihna suangtum tawh kibang hi. Judah leh Israel kumpigam mite leh Jerusalem khua-a teeng mite a awk nading thangzak tawh kibang ding hi. Mi tampi tak tuk ding uh hi; amaute tukin kitamzan gawp ding uh hi; amaute awk-in kiman ding hi,” hong ci hi. Ka nungzuite aw, Pasian in kei tungah hong piak hih teci thute, lim takin kemin koih cing un. Jakob innkuante’ kiang panin a maitang a seel Topa ngakin amah ka muang ding hi. En un, Topa in kei hong piak ka tate leh keima pumpi pen, Zion Mual tunga a teeng Vanglianpen Topa ’ tung panin Israel mite sungah lim leh kihilna ka hi uh hi. Amaute in note kiangah, “Phun suau-suau-in a pau mualmual vankah theite leh aisan theite kiangah thu dong un. Mite in amaute’ pasian thu dongin, mihingte’ thu pen misite dot ding mah hilo ahi hiam?” hong ci ding uh hi. Tua ciangin note in, “ Topa hong hilh thute leh teci panna thute ngai un. Aisante’ thu ngai kei un. Amaute in zing khuavak nei lo ahih manin hong gen thute a kiman’na om lo hi,” ci-in dawng un. Mite pen gam sungah vak kawikawi-in, nakpi takin lungkhamin gilkial ding uh hi; amaute a gil uh a kial ciangin lungham gawp ding uh a, a kumpipa uh leh a Pasian uh hamsiat-in van dak ding uh hi; amaute in lei lak a et suk hangun, lungkhamna leh khumialna, lungzing-a gimna bek om hi; khuamial ngeungau sungah amaute kihawlkhia ding hi. Zebulun minamte leh Naftali minamte’ teen’na gamte in lungkham thuak ding uh a, mai lamah pahtawina ngah kik ding uh hi. Mediterranean tuipi akipanin nisuahna lam Jordan gun gal, minam dangte’ teenna Galile gamsung pen minthang kik ding hi. Khuamial sunga a pai mite in khuavak lianpi mu khin ta hi; sihna lim thukna gam sunga a teeng mite tungah khuavak taang khin zo hi. Nangmah in amaute na pung sak a, a lungdamna uh na khang sak hi; anlak hun ciang-a lungdamna leh mite in vankisutte a hawm ciangun a lungdam bangun, nangma mai-ah amaute lungdam uh hi. Bang hang hiam cih leh Midian mite a kizawh ni-a bangin nangmah in gik a sak uh a hakkol uh, amau liangko tunga singzawl leh amaute a nengniamte in a satna ciangkhut na kuaihtan sak a, nangma mi a bawlsia minamte na zo gawp hi. Gal kikapna sunga gal hangte’ khedap khempeuh leh si a baang puan khempeuh mei-in kicih ding hi. Bang hang hiam cih leh eite adingin naungek khat hong suak a, eite tungah tapa khat hong kipia hi; ama liangko tungah ukna om ding a, ama min pen, “Lamdang, Thulakpa, Vanglian Pasian, Tawntung Pa, Nopsakna Kumpi,” kici ding hi. Tua huna kipanin a tawntungin David kumpi tokhom tungah maangin ama gam sungah thutan’na leh thumanna phutin a kipsak nadingin, alian semsem ama ukna leh nopsakna in mong nei lo ding hi. Vanglianpen Topa ’ deih luatna in hih thu hong tungsak ding hi. Topa in Jakob tungah thu khat khah a, Israel tungah hong tung ding hi; Tua ahih ciangin Topa in, Rezen do dingin a langpang ding bawl a, amau’ galte hanthawn hi. A mai-a om Siria mite leh a nunga om Filistia mite in kamka-in Israel netum uh hi. Hih thute khempeuh hangin ama hehna dam zo nai lo a, ama khut kilamto lai hi. Amaute a satpa’ lamah mite kihei lo a, Vanglianpen Topa zong lo uh hi. Tua ahih ciangin Topa in Israel sung panin a makaite leh a mihonte, a lu panin a mei dongin, nisuh hiang leh pumpengte anihin ni khat thu-in vat mai hi. Upate leh a zahtak huai mite pen a lutang hi a, zuauthu a hilh kamsangte pen a mei ahi hi; bang hang hiam cih leh hih minam a makaihte in lam khialsak a, amaute’ makaite in lampialsak uh hi. Tua ahih ciangin amau’ tangvalte tungah Topa lungdam lo a, pa nei lote leh a meigong numeite uh tungah hehpihna nei lo hi; bang hang hiam cih leh mi khempeuh in Pasian’ thu khual loin siatna a bawl vive hi a, kam khempeuh in haina thu gen uh hi. Hih thute khempeuh hangin ama hehna dam zo nai lo a, ama khut kilamto lai hi. Bang hang hiam cih leh gitlohna pen mei bangin kuang a, lingkungte leh lingte kangtum sak hi; gamlak lopa phate kuang sak a, meikhu lomtangin van lamah kizialto uh hi. Vanglianpen Topa ’ hehna hangin meikuang bangin gamsung kang a, mite pen mei-a kicih sing tawh kibang uh hi; kuamah in a sanggampa zahtuan lo hi. Amaute in taklam-a omte ne uh a, ahih hangin gilkial lai uh hi, amaute in veilam-a omte ne uh a, ahih hangin kham nai lo uh hi; mite in amau’ vengte’ sa ne ciat uh hi, Manasseh in Efraim, Efraim in Manasseh ne-in tua tegel in Judah langpang khawm uh hi. Hih thute khempeuh hangin ama hehna dam zo nai lo a, ama khut kilamto lai hi. Dan piak ni hun, gamlapi panin siatna hong pai ciangin note in bang cih ding na hi uh hiam! Huhna ngenin kua kiangah tai ding a, na neihsa uh koi-ah koih ding na hi uh hiam? Thongkiate’ lakah tonbucip-a om ding leh a kithat mite’ lakah tuk ding bek a om hi. Hih thute khempeuh hangin ama hehna dam zo nai lo a, ama khut kizan lai hi. Assiria-te in gimna ngah hen, keima hehna molhtum leh ka lungdamna ciangkhut ahi uh hi. Pasian thu a ngaihsun lo minam leh keimah hong hehsak mite’ neihsa sutin lak sakin, amaute pen konglak buannawng bangin a tuancil dingin amaute sawlin thu ka pia hi. Ahih hangin amah in tua bang bek sawm lo a, a lungsim in zong tua bang bek ngaihsun lo hi; ama lungsim sungah minam tampi suksiat nopna thu om hi; bang hang hiam cih leh amah in, “Ka galkap mangte pen kumpi vive hi khin hilo ahi hiam? Kalno khuapi pen Karkhemish khuapi tawh kibang hilo ahi hiam? Hamath khuapi pen Arpad khuapi tawh kibang hilo ahi hiam? Samaria khuapi pen Damaskas khuapi tawh kibang hilo ahi hiam? Jerusalem leh Samaria milimte sangin milim lianzaw a nei milim kumpi gamte ka khut in ban khin ahih ciangin, Samaria leh a milimte tunga ka bawl bangin Jerusalem leh a milimte’ tungah bawl lo ding ka hi hiam?” ci hi. Topa in Zion Mual leh Jerusalem khua-ah ama nasep ding teng a zawh khit ciangin, amah in Assiria kumpipa kihisakin a kisialhna leh a kiphatsakna daantat ding hi. Bang hang hiam cih leh amah in: “Keimah in thu theihtelna nei ka hih manin keima thahatna leh keima pilna tawh ka hih khin hi; mihingte’ gamgite lakhia-in amau’ sumte ka sut khin hi; keimah in a vanglianpa bangin amau kumpite ka sugawp hi. Vasa bu-mek bangin mihingte’ hauhna ka la ziau hi; a kinusia vasa tuite mite in a lak bangin leitung khempeuh ka la khin hi; a kha a zap, a kam a ka, a ham khat beek om lo hi,” ci hi. Amah a liikto-pa pen molhtum-in a zang ding bang keek, sing a hilo mipa pen ciangkhut-in a liikto ding bang keek-in, hei in phuk nading a, amah a zangpa’ tungah kisial thei ding ahi hiam, sing-attem in amah a zangpa’ tungah kiliansak thei ding ahi hiam! Tua ahih ciangin Topa, Vanglianpen Topa in ama mi thahat galkapte lakah natna lianpi tungsak ding a, tua natna in amaute sungah meikuang bangin kuang niloh ding hi. Israel’ khuavak pen mei suakin, ama Siangtho Pa pen meikuang suak ding hi; ni khat sungin ama lingkungte leh lingte kang-in beitum ding hi. Gah tampi a piangsak ama leitang leh ama gamlak a minthan’na pen nuntakna leh pumpi dong takin Topa in susia khawm ding a, mi cina khat a bei tawh kibang ding hi. A om lai ama gamlak singkungte pen tawm mahmah a, naupang khat nangawn in khat khatin sim khin thei hi. Tua ni-a kipan, Israel a om laite leh Jakob innkuan a suakta laite in amau a sugawppa suang nawn loin, Topa ahi, Israelte’ Siangtho Pa pen thuman tawh suan’ in, nei ding uh hi. Jakob’ innkuan a om laite, a vanglian Pasian kiangah ciahkik ding hi. Na mi Israelte pen tuipi sehnel zah bang ahih hangin, amaute a om lai tawm khat bek hong ciahkik ding hi. Thuman mahmahna tawh siatna thu kikhen ahi hi. Bang hang hiam cih leh Topa, Vanglianpen Topa in a thukhennasa bangin leitung khempeuh ah bei siangna bawl ding hi. Tua ahih ciangin Topa, Vanglianpen Topa in hih bangin ci hi: “Zion-ah a teeng ka mihingte aw, Izipt mite’ hih bangin amaute in molhtum tawh hong satin a ciangkhut uh hong liik ciangin Assiria mite kihta kei un. Bang hang hiam cih leh a sawt loin note tungah ka thangpaihna bei ding a, ka hehna amaute’ tung tuin, amaute sia ding uh hi. Vanglianpen Topa in Oreb suangpi-ah Midian mite a sukgawp bangin, amah in amaute khau tawh sat ding a, Izipt ah a hih bangin amah in a ciangkhut tuite tungah vaan ding hi. Tua ni ciangin na liangko panun ama vangikpi kinkhia ding a, ama hakkol pen na ngawng panun kilakhia ding hi; bang hang hiam cih leh na thau luatna hangin, hakkol ki sukham ding hi.” Galte pen Rimmon gampan hong kipanin Ai-ath khua hong tung uh a, amaute in Migron khua kantanin hong pai uh a, Mikmas khua-ah a van uh hong seng uh hi. Amaute in mualciang kantanin Geba khua-ah zan khat giak uh hi; Ramah khua mite lau-in liing uh a, Saul’ teen’na Gibeah khua mite tai uh hi. Gallim khuamite aw, nakpitakin kiko un; Laisah khuamite aw, ngai un! Anathoth khuamite aw, amah dawng un: Madmenah khuamite taikhia a, Gebim khua-a teeng mite suakta dingin tai uh hi. Tu ni mahmah-in Nob khua-ah galte tungin khawl uh a, Zion Mual ahi, Jerulasem khuapi, a khuttum uh sin’san uh hi. En un, Topa, Vanglianpen Topa in a kihtak huai vangliatna tawh sing hiangte heuh ding hi; a kung sangte kiphuk ding a, a kisangsakte a niam-in kikoih ding hi. Amah in tulak singte hei tawh phuk ding a, Lebanon mual pen Vanglian Pa’ mai-ah puk ding hi. Jessi’ phungsung panin a sel khat hong khangkhia ding a, a zungte panin a hiang khat hong gah ding hi. Ama tungah, Topa ’ Kha ahi, lungpilna leh thu theihtelna Kha, thu lamlah siamna leh vangliatna Kha, theihna leh Topa kihtakna Kha om ding hi. Amah in Topa ’ kihtakna ah lungdam ding hi. Amah in a mit-a a muhna tawh thukhen loin, a bil-a a zakna tawh thu khentat lo ding hi; a kitangsam mite thumanna tawh thukhensak ding a,, mizawngte’ thu a tangin khensak ding hi; ama kam pan a, molhtum tawh leitung mite daan kitat ding a, a muk pan a, a husan’na tawh mi gilote si ding uh hi. Amah in dikna tawh a kawnggakin thumanna dial a kawng ah thuah ding hi. Keivom pen tuuno tawh omkhawm ding a, kamkei gialbem pen keelno tawh lum khawm ding hi, bawngno leh humpinelkai leh ganhing thaute omkhawm ding uh a, naupangno khat nangawn in tuate hawl ding hi. Bawngpi leh vompi in an nekhawm ding uh a, amau’ note lum khawm ding uh hi; humpinelkai in bawngtal mah bangin buhkung ne ding hi. Nawine naungeek in gulgilo’ kuavangah kimawl ding a, nawine nawn lo naupang in gul gunei’ bu a sawk hangin tu lo ding hi. Ka mual siangtho buppi tungah amaute khat leh khat kiliamsak lo ding uh a, kisusia lo ding uh hi; bang hang hiam cih leh tuite in tuipi omna a tuamcip mah bangin leitungah Topa ’ thu theihna kidim ding hi. Tua ni ciangin Jessi’ zung pen mihingte’ tungah lim khat hi ding hi; minamte in ama kiangah kikhawm ding uh a, ama tawlngakna mun pen minthang mahmah ding hi. Tua ni ciangin Topa in, Assiria gam, Izipt gam, Pathros gam, Ethiopia gam, Elam gam, Shinar gam, Hamath gam leh tuipi gei-a gamte panin ama mi a om laite a ngahkik nadingin a vangliatna zang kik ding hi. Amah in minamte’ adingin lan khat khai ding a, Israel mi a kihawlkhiate kaikhawmin, leitung kiuli panin Judah mi a kikhenthangte kaikhawm ding hi. Efraim in hazatna a neihnate bei ding a, Judah mi a galbawlte kisusia ding hi; Efraim in Judah haza nawn lo ding a, Judah in Efraim galbawl nawn lo ding hi. Ahih hangin amaute in, nitumna lam-a om Filistia mite sim khawm ding uh a, nisuahna lam-a om mite luh khawm ding uh hi. Amaute in Edom mite leh Moab mite zogawp ding uh a, Ammon mite in amau’ thu mang ding uh hi. Topa in ama huihsa nungsakin Nail gunpi leh Eufrates gunpi tuite tungah a khut zanin kangsak ding a, mi khempeuh in nuam takin khedap tawh a kantan zawh ding luineu sagih bek siit lai ding hi. Izipt gam panin Israel mite hong paitoh ciangin amau’ ading lam lianpi khat a om mah bangin, ama mi a om laite’ adingin zong Assiria gam panin lam lianpi khat om ding hi. Ni khat ni ciangin mite in, “ Topa aw, kei’ tungah na heh hangin na hehna dam a, nangmah in kei hong hehnem na hih manin nang kong phat ding hi. “En in, Pasian in keima kihotkhiatna ahi hi; amah ka muang ding a, ka lau kei ding hi; bang hang hiam cih leh Topa Pasian in thahatna leh vangliatna hong pia a, amah in keimah hong honkhiapa ahi hi,” a cih hun uh hong tung ding hi. Tui siangtho in a dangtakte a lungdamsak mah bangin, Pasian’ hotkhiatna tuikhuk in a mite lungdamsak ding hi. Ni khat ni ciangin mite in, “ Topa ’ tungah lungdamna ko un la, a min lo-in, ama hong huh ding ngen un; minamte khempeuh lakah ama septe kitheisak un la, ama min kiliansak hi, ci-in gen un. “Amah in minthang takin sem khin ahih manin Topa ’ tungah phatna la sa un; leitung khempeuh ah hih thu kitheisak un. Zion-a teeng mite aw, nomau’ lakah Israelte’ Siangtho Pa lianin om ahih manin awng un la, lungdamin la sa un,” a cih hun uh hong tung ding hi. Amoz’ tapa Isaiah in Babilon siatna ding tawh kisai a muhnate a genna: Mual kolh tungah lan khat khai to un la, galkapte tungah nakpi takin kiko un; mi liante’ kongpi-ah a lut nadingun amaute khut vaan un. Keimah mah in ka tuamkoihsa mite thu pia khinin, ka hehna thu a sem khia dingin, ka gualzawhna ah a lungdam ka mi thahatte ka sam khin hi. Ngai un, mihonpi gamlum bangin mual tungte ah gamlumna! Ngai un, minamte’ kumpi gamte kikhawmin a gamlumna! Vanglianpen Topa in galdo dingin mihon khat kaikhawm hi. Leitung buppi susia dingin Topa leh ama hehna galhiamte gamlapi van mong panin hong pai hi. Topa ’ ni hong nai ahih manin nakpi-in kap un; Vanglian Pa’ kiang panin suksiatna hong tung ta ding hi. Tua ahih ciangin khut khempeuh zaw-in, mi khempeuh’ lungsim tui suak ding a, amaute lau ding uh hi. Amaute in gim mahmahna leh nat velvalna thuak ding uh a, numei nausuak ding bangin na sa ding uh hi. Amaute khat leh khat lamdang sakna tawh ki-en ding uh a, a maitangte uh meikuang bang ding hi. En un, leitung gamkhing suaksakin, leitung mawh neite a susia dingin gitlohna, hehna leh sinso-na tawh Topa ’ ni nasia takin hong tung hi. Bang hang hiam cih leh vantung aksite leh amau’ aksi honpite in khuavakna piakhia lo ding hi; ni a suah tung akipan mial ding a, kha in khuavak taangkhia sak lo ding hi. Leitung mite a tatsiatna hangin, migilote a mawhna hangin daan ka pia ding hi; mi kihisakte’ kiphatsakna bei sakin, a kisatheite’ kiliatsakna ka niamkhiat ding hi. Mihingte pen kham hoihte sangin a tawmzaw, minam pen Ofir gam khamte sangin a tawmzaw-in ka bawl ding hi. Tua ahih ciangin ama sinso ni-in Vanglianpen Topa ’ hehna hangin vantung lau-in ka liingsak ding a, ama omna panin leitung kisingkhia ding hi. A kidelh sanang leh a cing om lo tuu bangin mi khempeuh pen amau mite lam ciatah kihei-in, mi khempeuh amau gam ciatah tai ding hi. A kimu mi peuhmah kithat ding a, a kiman mi peuhmah namsau tawh si ding hi. Amau’ muhna mah ah a naungeekte uh leilak kiden’ gawp nading hi; amaute’ inn kiluhin, a zite uh kibuansak ding hi. En un, ngun leh kham tawh a lungkim lo Media mite pen amaute do dingin ka hanthawn hi. Amau’ thalte in tangvalte that ding hi; amaute in gil sung pan a, piang naungeekte hehpih lo ding uh hi; amaute’ mit in naupangte khasiat lo ding hi. Khaldel mite’ vangliatna leh kiphatsakpih, kumpigam a minthang bel Babilon khua pen Pasian in Sodom leh Gomorrah a siatsak lai hun bang ding hi. Khang tawntungin tua lai-ah kuamah teeng lo, om ngei nawn lo ding hi; Arabia mite kuamah in tua lai-ah a puanbuk lam lo ding a, tuucingte kuamah in tua lai-ah a tuute lum sak lo ding hi. Ahih hangin tua munah gamsate lum ding uh a, tua mun a, innte pen se-alte tawh kidim ding hi; tua munah kalaoh-vasa golpite teengin, tua munah gamkeelte laam ding uh hi. Munmuanhuai sungah ngiate, kumpi inn nuam sungah se-alte ham ding uh hi; Babilon khuapi siat ding hun hong nai ta a, a ni sawt nawn lo ding hi. Topa in Jakob hehpihin Israel teel kik ding a, amaute pen a gam uhah koih kik ding hi, khual mite in amaute pawlin Jakob innkuan beel ding uh hi. Minamte in amaute la-in amau omna munah paipih ding uh hi. Israel mite in minamte nei ding uh a, Topa ’ gam sungah amaute pen sila numei sila pasal dingin nei ding uh hi; amaute a man ngei mite pen tu-in amaute in leh mat ding a, amaute a nengniam ngei mite tungah tu-in ukna nei ding uh hi. A haksa nasep hong kisep sakna, gimna, salsuahna leh lungkhamna panin Topa in note tungah tawldamna hong piak ciangin, Babilon kumpipa’ tungah hih zahkona kam na zang ding uh hi; “A nengniampa koi ci bei! a hehna koi ci khawl! Leitung khempeuh tawlnga-in gamdai takin om ta uh a, amaute la sa-in kiko uh hi. Taksing kungte nang tungah lungdamin, Lebanon mual taamtaak singkungte in, “Nang hong kiniam koih khit nungsang kote phuk dingin kuamah hong pai nawn kei,’ ci uh hi. Nang na paisuk ciangin hong dawntuah dingin Hansunga misite’ khate kihanthawn a, nangmah hopih dingin leitungah a lian ngei misi uliante kipusuaksak hi; a minamte’ kumpite khempeuh amau kumpi tokhom panin hong tho uh hi. Amaute in nang hong hopih-in, ‘Nang zong kote mah bangin na thahat kei hi! Kote mah na bang ta hi!’ hong ci ding uh hi. Nangma harp lasakna awte, nangma liatna hanah kipaipih suk hi; thante pen nangma delhphah hi a, thante pen nangma silh ahi hi. Nang Khuavak’ ta, Zingsol, Babilon kumpipa aw, vantung panin nang bangci kiat na hi hiam! Minamte a niam koihpa ahi nangmah lei lak dongah hong bangci kiphukpai ahi hiam! Nang in na lungsim sungah, ‘Van tungah ka kahto ding hi; a sangna mun, Pasian’ aksite’ tung pekah ka kumpi tokhom ka koih ding a, leilu lam pek a, kikhopna mual tungah a sang pen mual siangtho tungah ka tu ding hi; meiite’ tung pekah ka kahto ding a, Sang Penpa bangin ka kibawl ding hi,’ na ci hi. Ahih hangin nang pen, han sung, leihawm thuk penna Leihawm sungah hong kikoih suk ding hi. Nangmah hong mu mite in nang hong en gega-in, nangma thu lungngai dedu ding uh a, ‘Hih mipa pen, leitung a liingsakpa, kumpi gamte a lok gawppa, Leitung pen sehnel gam suaksakin, khuapite a susia-pa, thong sungah a khum mite pen innah a ciahsak lopa pen hihpa hilo ahi hiam? hong ci ding uh hi. Minamte’ kumpite khempeuh pen amau’ hankhuk sung ciat uhah minthangin lum uh hi; ahih hangin nang pen, namsau tawh a kithat misite tawh na kituam a, Suanghawmpi sunga a paisukte, khe tawh a kisikcip si luang hawmte bangin, na hankhuk pua lamah hong kilawnkhia hi. Nangmah in na gam susia-in, na mihingte that khin na hih manin, amaute tawh nangmah hong kivui khawm lo ding hi. “Siatna a bawlpa’ suan leh khakte’ min kilo ngei nawn kei ta hen! Amaute khangto-in leitung a neih loh nading leh leitung maitang teng khuapi tawh a kidimsak loh nadingin amau’ pate’ mawhna hangin ama tate’ kithah nading vaihawm in.” Vanglianpen Topa in, “Amaute’ lang khatah ka pang ding a, “Babilon min leh a om lai mite, tate leh suan leh khakte ka susia ding hi, Topa in ci hi. Simbute’ om nadingin tua khuapi bawlin, bualtui ka suaksak ding a, siatna munphiah tawh ka phiat khia siang ding hi,” Vanglianpen Topa in ci hi. Vanglianpen Topa kiciam khin a: “Ka geelsa bangin piang ding a, ka ngimsa bangin kip ding hi, Keimah in ka gam sungah Assiria mi ka susia ding a, ka mual tungah ka sikcip ding hi; ka mite’ tung panin Assiriate hakkol, amaute’ liangko panin Assiriate’ vangik kia khia ding hi,” a ci hi. Hih ngimna pen leitung buppi’ adinga a kingim ahi hi, hih ka khut pen minam khempeuh daanpiak nadingin a kizan ahi hi. Vanglianpen Topa in ngim khin ahih manin kua in phiat zo ding ahi hiam? Ama khut kizan khin hi, kua in kaiton kik zo ding ahi hiam? Ahaz Kumpipa a sih kumin hih thu hong tung hi: “Filistia mite khempeuh aw, note hong kisatna ciangkhut a kitan manin lungdam kei un, bang hang hiam cih leh singbul panin a sel a om mah bangin gulpi a sih khit ciangin, a siahuai-zaw gul gunei hong om ding a, tuate pen a leng thei gulpi hong hi ding uh hi. Mizawngte in keima gan khahna sungah an ne ding a, a cimawhte lungmuang takin lum hit-hiat ding hi; ahih hangin no Filistia mite, kialpi tawh kong that ding a, a suakta kha a omte laite keimah in ka that ding hi. Filistia khuapi kongpite aw, nakpi-in kap un; khuapite aw, kiko un; Filistia mi khempeuh aw, lau-in liing un! Bang hang hiam cih leh leilu lam panin galkap honte’ hong paina leivui khu hong kitung a, tua galkapte lakah a meidawi khat beek om lo hi.” Filistia mite’ hong sawl kamtaite, mi khatpeuh in bangci dawn’ ding hiam? “ Topa in Zion kipsak khin a, gimna a thuak ama mite in tua sungah buk nading mu uh hi,” ci in dawng ding hi. Moab gam tawh kisai thu: Zan khat thu-in Ar khua kisiasak ahih manin Moab gam bei hi; zan khat thu-in Kir khua kisiasak ahih manin Moab gam bei hi. A sangna munte ah a kap dingin Dibon khuamite pai to uh hi; Nebo leh Medeba khuate’ hangin Moab mite nakpi takin kap uh hi. Dahna limin lu khempeuh kimettol a, khamul khempeuh kimetmai hi; kongzing lakah amaute in puanhampi teng uh hi; innkhumzang leh kongzing lampi kituahnate ah mi khempeuh nakpi-in kapin khitui tawh kawt uh hi. Heshbon khua leh Elealeh khua kiko a, amau’ kahna awging Jahaz khua ciang dongah kiza hi; tua ahih ciangin Moab gammi galhiam tawite lau-in nakpi takin kiko uh hi; amaute liing uh hi. Moab gam adingin ka lungsim kiko hi; a galtai ama mite Zoar khua, Eglath-shelishiah khuate ah tai uh hi. Bang hang hiam cih leh Luhith lampi-ah amaute kapsa-in paito uh hi; Horonaim khua zuatna lampi ah amaute in siatna a thuakna uh hangin nakpi-in kiko uh hi; Nimrim lui tuite kang hi; lopa keu-in, ankungte beita a, lopa hing om nawn lo hi. Tua ahih ciangin amaute in a ngahsa uh leh a kholsa uh na tampite pua-in Gialheek Lui-ah paipih uh hi. Bang hang hiam cih leh Moab gam kim khempeuh ah kahna aw ging hi; kahna in Eglaim khua ban a, kahna in Be-er-elim khua ban hi. Bang hang hiam cih leh Dimon lui tuite pen sisan tawh kidim hi; ahi zongin Dimon khua in a thuak ding a nasia zaw om lai a, Moab gam panin a suakta mi leh gam sunga a om lai mite khempeuh humpi khat in negawp ding hi. Moab mite in Zion Tanu’ mual, gam ukpa tungah Sehnel gam Sela khua panin siah dingin tuunote puak uh hi. A bu a kipaih khiatsak ciangin cih nading thei loin a leeng kawikawi vasate bangin, Arnon guntui ngahmun ah Moab mite om uh hi. “Amaute tungah thu hoih lak in la, thutangin gamta in; sunkim lai tak-a nangma liahna liim pen zan khuamial bangsak in; a kihawlkhia mite seel un la, galtai mite hek kei in; a kihawlkhia Moab mite note lakah teengsak un; amau a susiate’ kiang panin amaute’ belh hi un. A nengniampa om nawn loin, suksiatna hun bei a, gam sung panin a khe tawh a sik mipa a man’than’ ciangin, itna kip tawh kumpi tokhom khat kiphut ding a, thuman sep ding a manlang, thutang zongin, thu a khen mipa pen David’ buk sunga tua tokhom tungah thuman tawh tu ding hi.” Moab’ kiphatsakna thu i za khin hi, amah kiphasak mahmah hi; a kiliatsakna, a kiphatsakna, a kihihsaknate— ama kisialhnate a mawkna ahi hi. Tua ahih ciangin a thuakna uh hangin Moab mite kap hen la, mi khempeuh zong Moab— mite’ hangin kap ta hen. Nakpi takin gimna a thuak lai takun Kirhareseth khua a, a an lim nekte uh a phawk khak uh ciangin khasia-in kap uh hi. Bang hang hiam cih leh a hiang zai-in tuipi kantan a, Jazer khua banin sehnel gam dongah a zaam ama hiangte, minamte’ tote in sattan ahih manin Heshbon lo laite leh Sibmah leengguite vul ta hi. Tua ahih ciangin Jazer khuamite a kah bangin Sibmah leengguite’ hangin kei ka kap hi; Heshbon leh Elealeh khuate aw, ka khitui tawh note kong kawtsak hi; na singgahte uh minta a, na anlakna uh hangin lungdamna tawh kikonate dai ta hi. An tampi a pian’ ngeina lo lai-ah lungdamna leh nuamna om nawn lo hi; leenggui lote sungah lasakna om lo a, lungdam-a kikona om nawn lo hi; leenggah cilna ah kuamah in leengtui suk lo hi; leenggah lawh cianga kikona aw kidaisak ta hi. Tua ahih ciangin Moab gam hangin laiza la sakna bangin ka lungsim kisat gaihgaih a, Kirhareseth khuapi hangin keimahmah zong ka kisat gaihgaih hi. Moab amahmah hong kilaakin, a sangna munah lungkhamin hong pai a, ama siangtho munah thu a nget ciangin bangmah ngah lo ding hi. Hih bang thu pen, Topa in a beisa hun lai-in Moab tawh kisai-in thu a gensa ahi hi. Ahih hangin tu-in Topa in, “Nasem ding a, a kicial kum hunte sung bangin, kumthum sungin, ama mihon tampite om tase leh Moab’ minthan’na in simmawhna thuak ding a, a suakta lai mite pen tawm mahmahin, thanem ding hi,” a ci hi. Damaskas tawh kisai thu:— En in, Damaskas in khuapi hi nawn loin, ninbulomtang suak ding hi. Ama khuapite ahi Aroer kinusiacip paisuak ding hi; tuuhonte’ omna ding suak ding a, amaute lum hithiatin bangmah in lausak lo ding hi. Efraim gam panin kulhpi bei-in, Damaskas khua panin kumpi gam mangthang ding hi; Siria mi a suakta laite pen Israel mite vangliatna mah bang ding uh hi, Vanglianpen Topa in ci hi. Tua ni ciangin Jakob’ liatna bei ding a, ama hauhna mangthang ding hi. An a la mi in ankung a ding laite kaikhawmin a khut in ante a lak khit ciangin leitang hawm guak ahi a, mi khat in Refaim Kuam sunga ansang a kaihkhop khit ciangin lo lai hawm guak tawh ahi zongin kibang ding hi. Oliv kung a kisin’ ciangin a hiang sang pen dawnah pumnih pumthum, singkung hiang dawnah pumli pumnga a om lai tawh kibang ding hi, Israelte’ Topa Pasian in ci hi. Tua ni ciangin mite in amaute a Bawlpa pi ngaihsut ding uh a, amaute’ mit in Israelte’ Siangtho Pa en ding uh hi; amaute in ama’ khut tawh a bawlsa uh biakna taute don lo ding uh a, amau’ khutme tawh a bawlsa uh Asherah milimte hita leh paknamtui halna biakna taute hita leh suang ding uh hi. Tua ni ciangin amau’ khuapi muanhuaite pen, Hiv mite leh Amor mite in Israel mite’ hanga a nusiat uh lingkung pona mun tawh kibang ding a, gamkhing suak ding hi. Note in, nomau’ kihotkhiatna Pasian mangngilhin,nomau’ belh Suangpi phawk lo na hih manun note in biakna huan bawlin kung hoihte suan a, leenggui kung namdangte tawh peh-in, tuate na suan ni mah-un khang a, na tuh ni uh a zingsang mahin a pak hangin a gah om lo ding, cinatna leh a dam theilo natna hong tun’ ni hi ding hi. Ah, mi tampite’ kikona, tuipi ging bang! Ah, minamte’ otna, tui lianpi ging bang! Tui lianpi a ging bangin minamte awng uh hi, ahih hangin amah in amaute tai ding a, gamlapi-ah amaute taikhia ding uh hi; mual tunga huih mai-ah ansi leeng bang leh huihpi mai-a pingpei bangin amaute lengkhia mang ding uh hi. En un, nitakin hong lausak vat a, zingsang ma-in amaute bei ta! Hih bang thute pen, eite hong susia-in eite hong luh gawpte’ thuak ding ahi hi. Leitunga teeng mi khempeuh, leitang tunga om mi khempeuhte aw, mualte tungah lan khat hong kilah ciangin, en un! Peengkul hong kimut ciangin, ngai un! Bang hang hiam cih leh Topa in kei tungah, “Nitaang sunga nisa silsel, anlak nisa sunga meiizun bangin, ka omna panin daitakin ka en ding hi” hong ci hi. Bang hang hiam cih leh leenggah lawh hun ma deuh, leenggui a pak khit, leenggah a puamcin’ lai takin, amah in singhiang heuhna temkawi tawh a selte atkhia ding a, a zam zeizai a hiangte heuhkhia ding hi. Tuate khempeuh pen mual tunga vasate’ nek ding leh leitunga ganhingte’ nek dingin kinusia ding hi. Khuakhal hun ciangin vasate in ne ding a, phalbi hun ciangin leitunga ganhingte in ne ding uh hi. Tua hun ciangin, amau’ gam gunpi in a phelkhap, a vanglian a gualzo minam, a nai a gamla ah a kikihta mite, a tun sang mi, a ci nel mite kiang panin, Vanglianpen Topa ’ min omna mun Zion Mual, Vanglianpen Topa ’ tungah letsong hong kipuak ding hi. Izipt gam tawh kisai thu: A manlang mahmah meii tungah Topa tuangin Izipt gamah pai hi; ama mai-ah Izipt gam milimte liing ding a, Izipt mite’ han’na bei ding hi. Izipt mite amau leh amau ka kitawngsak ding hi, mi kim in sanggam khat leh khat ama vengte ciat do ding a, khua khat leh khua khat kido-in, mi khat leh khat, kumpigam khat leh khat kumpi-za kituh ding hi; Izipt mite’ lungsim hawmsuak ding a, amau’ geelnate ka siasak ding hi; amaute in milimte leh khongkhai theite, vankah theite leh aisan theite thu dong ding uh hi; Izipt mite pen a haksa kumpi khut sunga ka pia ding a, a kihtak huai a gilo kumpipa in amaute uk ding hi, Topa ahi Vanglianpen Topa in ci hi. Nail gun tuite keu ding a, gun pen kangcip-in keu ding hi; lei zui a, tui kilate uih-in, Izipt gam Nail gun hiangte kiamin keucip ding a, pumpeng kung leh phai kungte muat ding hi. Nail gun gei, Nail gun kiang ankungte kolh ding a, Nail gun kianga kituh khempeuh keucip-in huih in leenkhia-in om nawn lo ding hi. Nail gun sunga nga-siahna sikkawi a khia, ngabengte thuumin tau ding uh a, tui tungah ngeen a paii mite thanem ding hi. Anthul khau ciing a, na a semte leh patpuan a gante lungkham ding uh hi. Gamsung makai mite kisusia cip ding a, a kicial nasemte dah ding hi. Zoan uliante hai cihtakin hai uh a, Faro’ mipil thu lamlakte in thu haihuai gen uh hi Nang in Faro’ tungah, “Mi pilte khat ka hi a, tanglai kumpipite’ nungzui ka hi hi,” bang ci a, ci thei ding na hi hiam? Tua ahih leh Izipt kumpipa Faro aw, na mi pilte koi-ah om ahi hiam? Vanglianpen Topa in Izipt gam daantah ding a ngimna thu, na mipilte in nangma tungah hong gen thei kha ding hi. Zoan uliante mihai suak khin a, Memfis uliante zong hai khin uh hi: minamte a makaih ding a, kineite mah in Izipt mite lam khialhpih khin hi. Topa in amaute lungsim kitukalhsak khin zo hi; zukhampa pen ama luak sung mahah a puk bangin Izipt gam mite’ hihna khempeuh khialin hoi mang khin hi. A hau a zawng, alian aneu, mi khat beek in Izipt’ adingin a hih sak theih ding bangmah om lo ding hi. Tua ni ciangin Izipt mite pen numei bang ding uh a, Vanglianpen Topa in amaute tungah a khut a sin’sanna hangin lau-in liing ding uh hi. Judah gam pen Izipt mite’ kihtak hong suak ding hi; Vanglianpen Topa in amaute daantah ding a ngimna hangin, hih thu a kigenna mi peuhpeuh lau ding uh hi. Tua ni ciangin, Izipt gam sungah khuapi nga in, Kanaan mite’ kampau zangin Vanglianpen Topa tungah thuman ding thuciam ding hi. Hih khuapi khat pen Ni khuapi kici ding hi. Tua ni ciangin Izipt gamah Topa ’ adingin biakna tau khat, a gamgi-ah Topa ’ ading khuampi khat om ding hi. Tua pen, Vanglianpen Topa ’ adingin Izipt gam sungah lim leh teci hi ding hi; a nengniam mite’ bawlsiatna hangin Topa ’ tungah amaute a kiko ciangin, amah in amaute’ tungah honpa khat sawl ding a, amaute hu’ in khahkhia ding hi. Topa in Izipt mite tungah amahmah kitheisak ding hi; tua ni ciangin Izipt mite in Topa thei-in biak piakna leh meihal tawh bia ding uh a, amaute in Topa ’ tungah thuciamna bawl-in, tua thuciamnate sem ding uh hi. Topa in Izipt mite pulnatna tawh vat ding a, ahi zongin damsak ding hi; Topa ’ lamah amaute kihei kik ding uh a, amah in amaute’ thuumna donin amaute damsak ding hi. Tua ni ciangin Izipt gam panin Assiria gamah lam lianpi khat pai-in, Assiria mite Izipt gamah hong pai ding a, Izipt mi Assiria gam sungah pai-in, Izipt mite in Assiria mite tawh bia khawm ding uh hi. Tua ni ciangin Israel, Izipt leh Assiria hih thumte pen leitung khempeuh adingin thupha hi ding uh a, Vanglianpen Topa in amaute thupha pia in, “Ka mihingte ahi Izipt leh ka khut tawh ka sepsa ahi Assiria leh keima luah ahi Israel in thupha ngah ta hen,” ci-a thupha a piakte hi ding uh hi. Assiria kumpipa Sargon in a sawl galkap mang lian penpa in Filistia khuapi Ashdod-ah pai-in, tua khua va do hi. Tua hun ma kum thum lai takin Topa in Amoz’ tapa Isaiah tung tawnin thu genin, “Na puanhampi suah in la, na khe panin na khedapte suah in,” a ci hi. Amah zong tua mah bangin gamta-in, tangguak leh kheguak tawh lam pai hi. Ashdod khua a kilak khit ciangin Topa in, “Izipt leh Ethiopia’ lang khatah lim leh siahil dingin ka nasempa Isaiah tangguak leh kheguak tawh kum thum sung lam a pai mah bangin, Assiria kumpipa in, Izipt gam mite’ maizumna ahi, a moi a hamin, tangguak kheguakin, tawbo dawksa-in, Izipt mite gal-in manin, Ethiopia mite sal-in manin paikhiatpih ding hi. Tua ciangin amau’ muan Ethiopia leh amau’ kisialhpih Izipt’ hangin amaute lungkia-in a maizum ding uh thei lo ding uh hi. Tua ni ciangin hih tuipi gei-a teeng mite in, “En un, eite’ muan Assiria kumpipa’ kiang pan a, eite huhin honkhia dingin i belh mite’ tungah hih bang piang khin ta hi. Eite bangci suahtak ding i hi hiam?’ ci ding uh hi,” a ci hi. Babilon gam tawh kisai thu: Pingpeite leitaw lam panin hong kipat mah bangin, a lauhuai gam panin siatna hong pai hi. A kihtak huai mangmuhna khat kei tungah hong kigen hi; A lehheekpa in lehheekin a sut thei mipa in sut hi, a susia thei mipa in susia hi. Elam galkapte aw, kuan to un, Media galkapte aw, umcih un; Babilon’ pian’sak ahi, khuisatnate khempeuh Pasian in beisak ta hi. Tua ahih ciangin ka pumpi na hi; nausuak numei in na a sak bangin na ka sa hi; khuaza thei lo zah dongin a kuncip-in ka om a, ka muh nate hangin lamdang sa in ka om hi. khua mu thei lo zah dongin lungkia-in ka om hi. Ka lung vai a, kihtakna in hong si daang sak hi; keima lunggulh zan khuamial pen keima liin’na a suak hi. Amaute in sabuai phahin, sual puante phah uh a, ne-in, dawn uh hi. Uliante aw, tho un, lumte sathau nuh un! Bang hang hiam cih leh Topa in kei tungah: “Pai in, galvil khat koih in la, ama muh bangbang gensak in. Amah in sakol tung tuang mite a kopkopin, la tungah a tuangte, kalaoh tungah a tuangte a muh ciangin limtak, pha takin ngai hen,” hong ci hi. Tua ciangin a mu-pa kiko a: “Topa aw, tausang tungah sun tawntung ka ding a, ka vilna munnah zankhuavak ka om hi. En in, sakol leeng tuangte a kopkopin hong pai!” ci hi. A dang khat in, “Babilon cim hi, cim hi; ama milim pasiante khempeuh leilak dongah amah in suksiat sak hi,” ci-in dawng hi. A kicilsa, a kiseepsa keima’ aa-te aw, Israelte’ Pasian, Vanglianpen Topa ’ tung pana ka zaksa teng note tungah ka hong gen hi. Edom gam tawh kisai thu: Seir mual tung panin khat in kei hong sam a, “Gal vilpa aw, tu zan bangci hiam? Gal vilpa aw, tu zan bangci hiam?” hong ci hi. Gal vilpa in, “Zing ni hong suak a, zan khua zong hong mial hi. Thukan nuam na hih leh, hong paikik in la, hong kan in,” a ci hi. Arabia gam tawh kisai thu: Dedan mi khualzin honte aw, Arabia gamsung gamlakah na giak ding uh hi. Tema gam a, teeng mite aw, a dangtakte, tui puak un la, galtaite, an tawh dawn un. Bang hang hiam cih leh amaute pen namsau, a kidoksa namsau, a kikeek thal leh gal in a phutna panin hong tai uh ahi hi. Bang hang hiam cih leh Topa in keima tungah, “Thacial kum hunte sung mah bangin kum khat sungin Kedar mite’ minthan’na khempeuh bei ding hi; Kedar mi thaltawi siam a om laite tawm ding hi; bang hang hiam cih leh, Topa, Israelte’ Pasian in hih thu gen khin zo hi,” hong ci hi. Note hong uk mite tai uh a, thal zat kul loin amaute kiman hi. Amaute gamlapi ah a tai uh hangin, hong kimu note khempeuh hong kiman hi. Tua ahih ciangin keimah in, “Kei hong en kei un la, khitui tampi luangin nakpi-in hong kapsak un; ka mite tampi a sihna hangin keimah hehnem ding hong hanciam kei un,” ka ci hi. Bang hang hiam cih leh Vanglianpen Topa Pasian in mangmuhna kuam sungah buaina leh tuatcil gawpna leh kitawhzauna, kulhte suksiat gawpna leh launa mualte tungah kikona ni hong tungsak hi. Sakol leengte leh sakol tung tuangte tawh Elam galkapte in thallawng pua a, Kir galkapte in a lumte uh a baihsa-in nei uh hi. Nomau’ teel Judah kuamte pen sakol leeng tawh kidim a, sakol tuangte in Jerusalem kulh kongpite ah pang uh hi. Judah a kihutna teng khempeuh kihong khia khin ta hi. Tua ni ciangin Tulak Inn sunga kikoih galhiamte na suang ding a, David khuapi mun tampi tak a siatna mu-in, bual nuainung tuite na khawm a, nangmah in Jerusalem innte a phazah simin, kulhpi siate puah nadingin innte na phel hi. Nangmah in, bual lui pan a, tuite khol nadingin kulhpi nih kikal ah tui beempi khat na bawl hi. Ahih hangin nangmah in, tua na a na bawlpa phawk loin, sawt pek a, a na geelpa na don kei hi. Tua ni ciangin Vanglianpen Topa Pasian in kahna leh thuumna, sam mettolna leh puanhampi silh ding thu hong pia hi; ahih hangin note in lungdamna leh kipahna, bawngtalte leh tuute gawhna, sa nekna leh leenggahzu nekna na nei zawsop uh a, “Zing ciangin si ding i hih ciangin ne-in dawn ni” na ci uh hi. Vanglianpen Topa in kazakna ah thu hong gen a, “Na sih matengun hih mawhna hong kimaisak lo taktak ding hi,” Vanglianpen Topa Pasian in hong ci hi. Tua ahih ciangin Vanglianpen Topa Pasian in, “Hong pai in, innsung na teng a uk, neihsa kempa Shebna kiangah pai in la, ama tungah hih bangin gen in: Hih lai-ah nangma ading hankhuk a to, a sangna munah hankhuk a bawl, na om nading suang a khuak mipa aw, nang in hih lai-ah bang hih a, vui ding kua nei na hi hiam? En in, nang mi thahatpa aw, Topa in nang hong lawnkhia gawp ding hi. Amah in nakpi takin nang hong lenin, hong pingpeipei ding a, lei tanzau munah bawlung bangin hong lawn ding hi; na topa’ inn sung’ adingin maizumna ahi nang pen tua munah si-in, na kisaktheihpih na sakol leengte lakah na tuk ding hi. Na nasepna phual panin nang kong nawtkhia ding a, na omna panin nang hong kilawn khiasuk ding hi. Tua ni ciangin Hilkiah’ tapa ahi ka nasempa Eliakim ka sam ding a, nangma puantualpi amah silh sakin, nangma kawnggak tawh amah ka gak ding a, nangma ukna ama tungah ka pia ding hi; amah pen Jerusalem khua a, teengmite leh Judah mite tungah pa hi ding hi. David suan leh khakte’ khut nuai-ah aana neihna tawhtang pen ama liangko tungah ka pia ding hi; amah in hong-in, kuamah in khak lo ding hi; amah in khak-in, kuamah in hong lo ding hi. Amah pen a kician mun khatah vankhaina bangin ka khenkip ding a, ama phung sungah pahtawi ngahna phungpi suak ding hi. Ahi zongin a beh a phung, a suan a khakte khempeuh ama adingin vangikpi hi ding a, um-le-beel, kuang leh keute, hai akipan thawl dongin vankhai ah a kikhai bangin ama tungah kibom ding uh hi. Vanglianpen Topa in, tua ni ciangin mun hoihna a, a kikheen vankhai in lel ding hi; Topa in gen khin ahih ciangin, amah pen kitanin kia ding a, ama tunga vangik teng kisia ding hi,” hong ci hi. Tai-ar khua tawh kisai thu: Tarshish teembaw hawlte aw, Tai-ar khua kisia a, inn leh khawlmunte om nawn lo ahih manin, kap un! Saipras gam panin hih thu amaute in za uh hi. Tuikulh-a teeng mite aw, thuumin tau un, Sidon sumbukte aw, na sawltakte un tuipi kantanin tui lianpite tungah om uh hi; Izipt gam a, piang ante lei-in na zuak uh a, minam khempeuh tawh sumbawlin na kizom uh hi. Sidon aw, maizum in bang hang hiam cih leh tuipi in thu gen khin hi, tua tuipi munmuan huai in: “Keimah in nau paii-in na ka sa ngei kei a, nau ka nei ngei kei hi; ta numei ka khoi ngei kei a, ta pasal zong ka khan’suah ngei kei hi,” ci hi. Izipt gamah hih thu a kizak ciangin, Tai-ar tawh kisai thu hangin amaute in na sa ding uh hi. Tuipi gei-a teeng mite aw, Tarshish khua-ah tai un la, kap un! Taang lai pek pan a, a piang, gamlapi pek panin a kiphut hih khuapi pen nomau’ lungdampih pen mah ahi hiam? Kumpi khuapi ahi, ama sumbukte ulian ahi; ama sum bawlte leitungah a kipahtawite ahi, Tai-ar khuapi hih bang a pian’ nading kua’ vaihawm ahi hiam? Topa ’ vaihawm ahi hi. Mi liante’ kiphasaknate a beisak nading, leh a kipahtawi uliante a niamkhiat nadingin a bawl ahi hi. Tarshish mite aw, tu-in kuankhia un la, lo kho un. Na sum bawlna teng uh maimang khin ta hi. Topa in tuipi tungah a khut zan a, kumpi gamte kiliingsak gawp hi; Sum bawlna phualpite a kisuksiat nading Topa in thupia zo hi. Amah in, “Sidon Tanu Siangtho aw, na lungdamna teng bei khin ta hi. Na mite in nenniamna thuak uh a, Saipras tuikulh ah a va tai uh hangin, tua lai nangawnah lungnopna hun nei lo ding uh hi,” ci hi. Tai-ar khuapi, gamsate’ phualpi a suaksate in; Assiria mite hi lo a, Babilon mite ahi hi. Babilon mite in khuapi luh nading panmun bawl uh a, Tai-ar khuapi kulhte susia-in, khuapi sung khempeuh a sia suah uh hi. Tarshish teembaw hawlte aw, na muan uh khuapi kisia ahih manin thuumin kap un. Tua a siat huna kipanin kumpi khat nuntak hun sung tan ahi, kum sawmsagih sung Tai-ar khuapi kimangngilh ding hi. Kum sawmsagih a cin’ ciangin, paktat numei’ la sunga mah bangin Tai-ar khuapi tungah’ piang ding hi: “Kuama’ phawk loh numei paktat aw, harp la sakna khat la in la, khuapi kimkotah pai in! Nang hong kiphawk theih nadingin la ngaih phuak in la, la tampi sa in.” Kum sawmsagih a cin’ ciangin Tai-ar khuapi ah Topa hawh ding a, Tai-ar khuapi in ama sep ngei paktatna sem kikin, leitung kumpigam khempeuh tawh kizomin sumbawlna sem ding hi. Ama sumbuk vante leh ama sepna panin a ngah nate pen Topa tungah kipia ding hi; ahih hangin tuate kikholcip mawk loin, Topa a bia mite’ an ding leh puan hoih nono leina-in kizang ding hi. En un, Topa in leitung hawmsuak sakin gamkhing suaksak ding a, amah in lei maitang huiheek gawpin, a tunga teeng mite thehthang ding hi. Mi khempeuhte’ thuakna kibang kim ding hi. Siampite leh mi mawkmawkte, silate leh a tote, vanleite leh van zuakte, sum neite leh leibate, ahau azawng, a thuakna uh kibang ding hi. Leitung kihawmsuak sakin kisiacip ding hi; bang hang hiam cih leh Topa in hih thu genkhin zo hi. Leitung vulin keugaw a, leitung buppi thanemin vul gawp hi; leitung a, a kipahtawite vulgawp hi. Ama tunga teengte in leitung ninsak uh hi; bang hang hiam cih leh amaute in thukhamte mang loin, ngeina kipte palsat uh a, tawntung thuciamna peel uh hi. Tua ahih ciangin Topa in leitung samsiatin susia a, a tunga teeng mite in amau’ mawhna hangun kangtum uh hi; tua ahih ciangin leitunga teeng mite tawm semsem hi. Leengguite vulin, leenggahzu kang a, a lungdam mi khempeuh khuisa ta uh hi. Lungdamna khuang gingte daii-in, lungdam a, gamlumnate om nawn lo a, lungdam a, laiza tawh la saknate daii ta hi. Zu phungah lungdam a, la sakna om nawn lo a, zu khempeuh sia-in kha gawp hi. Khuapi hawm suak pen kisiacip suk a, kuamah a tum theih loh nadingin inn khempeuh kikhakcip hi. Leenggahzu a duh manun kongzing ah mite kiko uh hi; lungdamna khempeuh lungkhamna suak a, leitung kipahna kibeisak ta hi. Khuapi sungah gamkhin’na bek om a, kongpite kisat khamin kisia hi. Hih in leitung a, om minam khempeuh tungah a tung ding thu ahi hi. Oliv kung a kisin’ khit ciang, leenggah kilo khinin a sangh a kikaih khop khit ciangin a kinusia lo hawmte tawh kibang ding hi. A suakta sun mite in lungdamin la sa ding uh hi. Nitumna lam a, om mite in Topa a liat mahmahna thu gen ding uh a, Nisuahna lama, om mite in Topa phat ding uh hi. Tuipi dunga a teeng mite in Topa, Israelte’ Pasian’ min phat ding uh hi. Lei mong a gamla pen pek pan nangawnin “a thuman Pa in vanglian ta hen’ cih la i za ding hi. Ahih hangin keimah in, “Ka lungkham hi, ka lungkham hi. Gimna ngah hi ta ing! Bang hang hiam cih leh mi khemte in khemkhem lai-in sia semsem uh a, khem zawh thu ciam lailai uh hi,” ka ci hi. Leitung a, teeng mihingte aw, note’ adingin launa, gum, leh thangzakte om hi. Lauhuaina panin a tai mipa gum sungah kia ding a, gum sung panin a taikhiat ciangin thangzak sungah awk ding hi. Bang hang hiam cih leh van panin guahpi hong bua ding a, leitung bulpite kiling ding hi. Leitung khang kham-in, kilok gawp ding a, kiphelkham ding hi. Leitung pumpi zukham bangin hoi ding a, huihpi in a mut buk bangin awn ding hi. Ama mawhnate in nengcip gawp ding a, amah pukin thokik zo nawn ngei lo ding hi. Tua ni ciangin Topa in vantung a, om vangliatnate, leh leitung kumpite daantat ding hi. Gum sunga om thongkiate bangin amaute kikaikhawm ding hi; thong sungah amaute kikhaknelh ding a, ni tampi khit ciangin amaute kidaantat ding hi. Tua ciangin khapi mial ding a, ni taang nawn lo ding hi; bang hang hiam cih leh Vanglianpen Topa in Zion Mual tung leh Jerusalem khua sungah uk ding a, ama upate’ mai-ah ama minthan’na kilangsak ding hi. Topa aw, nang in keima Pasian na hi hi; nangmah kong liansak ding a, nangma min ka phat ding hi; bang hang hiam cih leh nang in a lamdang nate na semkhin a, tanglai pek a, na geelnate a kip a thumaan takpi ahi hi. Bang hang hiam cih leh nang in khuapi pen ninbulomtang na suah a, a muanhuai khuapi a sia na suaksak hi; mi kiphasakte’ mun muanhuai pen khua hi nawn lo a, cik mah hunin kilam nawn lo ding hi. Tua ahih ciangin mi thahatte in nang hong minthang sak ding a, thukhual lo minamte’ khuapite in nang hong zahtak ding uh hi. Bang hang hiam cih leh nang pen mizawngte’ adingin mun muanhuai, a cimawh mi’ adingin a lungkhamna ah mun muanhuai, huihpi panin bukna leh nisa panin nilim na hi hi; bang hang hiam cih leh thukhual lo mite’ hihna pen huihpi in kulh a nawk tawh kibang a, mun keuna a, nisa tawh kibang hi. Nang in khualmite’ gamlumna na daisak hi; meii liim in nisa a votsak bangin thukhual lo mite’ la sakna kitawpsak hi. Vanglianpen Topa in hih mual tungah mi khempeuh adingin anlim nekna pawi, a ciil mahmah leenggahzu nekna pawi, guhngek tawh a kidim an nekna, a siangtho leenggahzuciil nekna pawi bawl ding hi. Amah in, mi khempeuh in a khuk uh dahna puan leh minam khempeuh’ silh dahna puante, hih mual tungah susia ding hi. Amah in sihna beimang sak ding a, maitang khempeuh panin khitui nul ding hi; leitung khempeuh panin ama mite a kizahkona lakhia ding hi; bang hang hiam cih leh Topa in hih thu gen zo hi. Tua ni ciangin, “En un, amah in eima Pasian hi; eite hong hon dingin amah i muang hi. Amah in eima Topa hi; amah i ngak hi; amah in eite hong gumkhia ahih manin lungdamin kipak ni,” kici ding hi. Bang hang hiam cih leh Topa in hih Zion Mual hu ding a, ahi zongin Moab mite ahih leh ninkholna dum sungah buhkungte a kisikcip bangin kisikcip gawp ding hi. Tuipeekpa in tuipeek dingin a khutte a van bangin amaute in a khut uh vanvan ding uh a, ahih hangin a khut uh a van simin a kiphatsaknate uh Pasian in niamsuk sak ding hi. Amah in, Moab mite’ kulh muanhuaite suksiat sakin leilak den’ nading a, leivui suak mang khin ding hi. Tua ni ciangin Judah gam sungah hih la kisa ding hi: “Khuapi muanhuai khat i nei hi; Topa mahmah in i kulhte leh i panmun kipte hong hut sak hi. Upna ah a kip thuman minamte a lut theih nadingin kulh kongpite hong ta un. Topa aw, nang hong muang a, nangma tungah a lungsim kip mipa, lungnopna kicing na pia ding hi. Topa Pasian in tawntung Suangpi ahih manin, Topa muang tawntung un. Bang hang hiam cih leh amah in a kiphasak mite niamkhiat hi. Amau’ teen’na khuapi muanhuai suksiat sak a, a kulhpite den’ khapsakin leivui suah hi. A zawng, a cimawh, a kinengniam mite in tu-in tua khua tuancil uh hi.” Midikpa’ lampi tamkim a, nangmah in midikpa’ lampi na neel sak hi. Topa aw, nangma thukham deihna kong zui uh a, nang kong ngak uh hi; nangmah in kote’ deih kicin’na na hi hi. Ka lungsim khempeuh tawh zanin nang kong deih a, zingsang khuavak ciangin lungsim tak tawh nang kong zong hi. Bang hang hiam cih leh leitung leh a mite tungah thu na khen ciangin leitung a, teeng mite in thuman i cih bang hiam, cih phawk ding uh hi. Mi gilote tungah na migit hangin a maanin gamtat ding thei thei tuan lo uh a, lungsim thutang mite’ gam sungah khialhna bawl lai veve uh hi. Amaute in Topa ’ min liatna hong phawk nuam lo uh hi. Topa aw, na khut kisang lap a, na galte in mu lo uh hi. Amaute, maizumna thuak sak in la, amaute’ adingin na geelsa meite, amaute haltum sak in. Na mite ading na hanciamna thu, na galte tungah kilangsak in. Topa aw, kote’ tungah daihna hong pia in. Kote’ matut zawhna khempeuh, nangma hong sepsakna hang ahi hi. Topa kote’ Pasian aw, nang ahi lo to dangte in ko tungah hong uk hangin, nangmah min bek mah kote in ka zahtak uh hi. Amaute si a, hingkik lo ding uh hi; amaute mangthang ta uh a, omkik nawn lo ding uh hi; tua bang a pian’ theih nadingin nangmah in amaute tungah siatna na tung sak a, amaute a kiphawkna khempeuh na beisak hi. Ahih hangin nangmah in ko minam nong khangsak hi, Topa aw, nangmah in minam na khangsak a, gamgi khempeuh na keeksak khin hi. Hih thu hangin nangma min a thang hi. Topa aw, amaute a cihmawhna uhah nang hong zuan uh a, nangmah in amaute thu na hilh a, a thungetna uh ging zo lo hi. Topa aw, nangma hangin kote pen naupaii numei a hun a nai ciangin na sa-in kiheek a, a kap tawh ka kibang uh hi; kote in numei naupaii-in nausuak ding a, kithawi bang ka hi uh a, huih bek a hingkhia tawh ka kibang uh hi. Kote in leitung mite ading bangmah ka suakkhia sak kei uh a, leitunga teeng ding kuamah ka hingkhia kei uh hi. Nangma mi a site hingkik ding a, amaute’ pumpi tho ding hi. Han sunga a lum mite aw, tho un la, lungdamin la sa un! Bang hang hiam cih leh zing daitui in leitung a nosak kik bangin, sawtpi a, a si mite, Topa in hingkik sak ding hi. Ka mite aw, hong pai-in na inn sung uhah tum un la, na kongte uh khak un; hehna a dam matengin tawlkhat sung bu un. Bang hang hiam cih leh en un, amau’ mawhna hangin leitung a, teeng mite daan pia dingin ama omna panin Topa hong paikhia a, leitung in ama tunga a luang sisante laakkhia ding a, a kithat ama mite sincip nawn lo ding hi. Tua ni ciangin Topa in, a sak, a lian, a to namsau tawh a taikhia gulpi ahi tuipi ganhing, a kikual vial gulpi ahi tuipi ganhing daantat ding a, amah in tuipi sunga om tua gulpi that ding hi. Tua ni ciangin: “A gahpha leenggah lo thu la-in sa un! Keimah, Topa in tua lo hongpa ka hi a, a hun hunin tui ka buak hi. Khatpeuh in a suksiat loh nadingin sun leh zan-in ka hong a, Leenggui lo tungah ka heh nawn kei hi. Lingte leh lingkungte om hi leh keimah kuan khia-in tuate ka haltum ding hi. Tua ahih kei leh keima hutna sungah amaute om hen la, amaute in kei tawh kilemna bawl-in, amaute kei tawh kilem ta uh hen.” Hong pai ding hunte sungah Jakob in zung kha ding a, Israel palhin dawnkhia ding a, leitung khempeuh gah tawh dimsak ding hi. Amau’ galte a vat gawp bangin Pasian in Israelte vat gawp ahi hiam? Tua ahih kei leh amau a thatte a kithah bangin amaute kithat ahi hiam? A kithukkim dingin amah in amaute sal suahsakna tawh daan pia hi; nisuahna huihpi a nun’ ni-in amah in a kihtak huai a ging pha tawh amaute khinkhia hi. Amah in suang tawh kibawl biakna tau khempeuh suangkang satvui a bat sak ciangin Asherah milimte leh paknamtui taute a ding lai om nawn lo hi; hih thu hangin Jakob’ mawhna kimaisakin, a mawhna kilakkhiat sak hi. Bang hang hiam cih leh a muanhuai khuapi pen gamlak bangin amah guakin omin, mite’ teen’na mun pen kitaisan-in kinusia hi; tua lai-ah bawngno gamta-in, lum a, a hiangte kheuh hi. A hiangte a keu ciangin kitan hi: nupite hong pai-in mei-in cih uh hi. Hih mite in khentel theihna nei lo ahih ciangin amaute a bawlpa in amaute hehpih lo ding a, amaute a piangsakpa in amaute tungah maipha lak lo ding hi. Israel mite aw, tua ni ciangin Eufrates gunpi panin Izipt Luipi dongin Topa in tuancil ding a, note khat khatin hong kikaikhawm ding hi. Tua ni ciangin peengkul lianpi khat kitum ding a, Assiria gam sunga a mangthang mite leh Izipt gam sunga a kihawlkhia mite hong pai-in Jerusalem mual siangtho tungah Topa bia ding uh hi. Efraim minam zukhamte’ kisaktheihna leihoih zangkuam i lutunga kisuang, a vulgawp paak ahi, a vanglian ama hoihna tawh zukham a, a pukte’ kisak theihna tua kumpi lukhu in gim ngah ta hen! En un, Topa in vanglian-in a hat mahmah mi khat nei hi; a susia huihpi gialpi, tuikhanglet leh a thahat huihpi bangin amah in leilak den’ gawp nading hi. Tua ni ciangin Vanglianpen Topa pen ama mi a om laite’ adingin minthan’na kumpi lukhu leh hoihna lukhu hi ding hi; thukhen a, a tupa tungah thutang lungsim guan ding a, khuapi kulh hong luh galte a notkhia mite tungah han’na lungsim guan ding hi. Hih mite zong leenggahzu tawh hoi-in kham theih zu tawh awn uh hi: siampite leh kamsangte nangawn zu khamin hoi uh hi. Kamsangte in zu kham lua ahih manin Pasian’ muhsak mangmuhnate thei thei lo uh a, siampite in zong zu kham lua uh ahih manin a thukhen dingte uh khen thei lo uh hi. Bang hang hiam cih leh sabuai khempeuh a luak uh tawh kidim a, a nit lohna mun om lo hi. Amaute in kei hong phunsan uh a, “Amah in kua tungah hilh a, kua tungah thugen-a kinei ahi hiam? Ang sung panin a kilakhia nawi tawh a kikhentung naungeekte hilh-a kinei ahi hiam? Bang hang hiam cih leh malkhat khit malkhat, gualkhat khit gualkhat, thukhat khit thukhat, cih bang hi lel hi,” hong ci uh hi. A mantakin, note in ka thugen na ngaih kei uh leh Topa in hih mite kiangah a pau na theih loh uh gamdang mite, note tungah thu hong hilhsak ding hi. Topa in note tungah tawlngakna leh lungnopna hong pia napi-in! note in ama thu na ngai kei uh hi. Tua ahih ciangin Topa in note tungah, malkhat khit malkhat, gualkhat khit gualkhat, thukhat khit thukhat, cih bangin hong hilh ding ahi hi. Tua ciangin na kalsuanna khempeuh uhah na puk ding uh a, note liamin, thang-ah awk-in, sal-in hong kipaipih ding hi. Tua ahih ciangin Jerusalem khua sungah hih mite a uk, midangte a kote aw, Topa ’ thu za un! “Eite in sihna tawh thuciamna khat i bawl khin a, Leinuai tawh thukimna khat i nei zo hi; a tuumcip ding tuiciin in hong nawk ciangin ei hong ban lo ding hi; bang hang hiam cih leh zuau thu i beel a, zuauna ah i bu hi,” na ci uh hi. Tua ahih ciangin Topa Pasian in, “En un, keimah in Zion sungah bulpi ding khat, suang, a kize-etsa suang, a manpha innkiu suang, bulpi muanhuai khat ka koih hi: Tua suang tungah, ‘Hih a um mi in lungkhamna tuak lo ding hi,” ci-in kigelh hi. Keimah in thutan’na pen khau khai bangin ka bawl ding a, thuman’na pen khaukhai sikbawk bangin ka bawl ding hi; gial in na zuau buk uh dengkhia ding a, tui in na bukna mun uh susia ding hi,” ci hi. Tua ciangin sihna tawh na thuciamna uh kiphiat ding a, Leinuai tawh na thukimna uh kip lo ding hi; a tuumcip ding tuiciin in hong nawk ciangin note hong sugawp ding hi. Hong nawk sial-in note hong tai ding hi; bang hang hiam cih leh zingsang khat khit zingsang khat, sun leh zan-in hong nawk tawntung ding hi; Topa tung panin na zak uh thute a ban banin launa lianpi vive hi ding hi. Bang hang hiam cih leh paunak sungah, khe khuan’ nadingin lupna tom lua a, silh dingin puanza neu lua in nang hong tuam zo lo hi. Bang hang hiam cih leh a lamdang ama bawlna bawl ding leh a tumdang ama nasep sem dingin Perazim Mual tung a, a sep bangin Topa in hong sem ding a, Gibeon kuama a heh bangin amah hong heh ding hi. Tua ahih ciangin tu-in, note hong kikhihna, a to-in kibawl kha ding ahih manin thusim loin om kei un; bang hang hiam cih leh Vanglianpen Topa Pasian tung panin gam buppi-ah siat nading thukhenna ka za khin hi. Na bil uh hong ngat un la, ka aw za un; ngai un la, ka thugenna za un. Lo khopa in khaici dingin lo kho niloh ahi hiam? amah in lei kalkhamin git niloh ahi hiam? Amah in lei a zalhtam khit ciangin masala tang vawh-in, kummin tang tuh a, mangbuhte a gualgual-in tuhin, mangbuhham ama omna ding san-ah tuh a, mangbuhmante a nawl hui-ah tuh hilo ahi hiam? Bang hang hiam cih leh amah a manin kihilh hi; ama Pasian in amah hilh hi. Masala-te pen buhcilna tawh kicil lo a, kumminte tungah buhcilna pei kihual lo hi; ahih hangin masala-te ciangkang tawh kisatkhia a, kumminte molhtum tawh kisat hi. Mi khatpeuh in antang cilvui ahi hiam? Hi lo hi, amah in cil paisuak ngitnget lo hi; a sakol tawh buhcilnapei a kihualsak ciangin amah in kitamvui-sak lo hi. Hih zong Vanglianpen Topa ’ kiang pan a, hong pai thu ahi hi; amah pen thu lamlahna-ah lamdang a, pilna-ah lian mahmah hi. Pasian’ biakna tau ahi Jerusalem khuapi, David in a sat khuapi in gim ngah ta hen. Kumte, a ban banin paipai sak un la, pawite a ngeina bangin kot paipai sak un. Ahih hangin keimah in ‘Pasian’ biakna tau, a kici tungah gimna ka tungsak ding hi. Thuumna leh tauna om ding a, tua khuapi pen, biakna halna biakna tau suak ding hi. Na kimkotah hong umcih-in, tausangpite tawh kong um ding a, nangmah umcih nading dum ka bawl ding hi. Tua ciangin leithuk sung panin nang na pau ding a, a niamna mun leivui sung panin nangma kammal hong ging ding hi; nangma aw pen lei sung panin sikha’ aw bangin hong ging ding a, na thugenna pen lei sung panin hong phun suausuau ding hi. Ahih hangin nangma gal honpite leivui neel leeng bang ding uh a, thukhual lo mi honpite ansi leeng bang ding uh hi. Tua ciangin tomkha sungin thakhat thu-in, Vanglianpen Topa in vanging, zinliing, a ging lianpi, pingpei leh huihpi, leh a kangtum thei meikuang tawh hong pai ding hi. Tua ciangin Pasian’ biakna tau a do minam honpite khempeuh, tua khuapi leh a kulhpi simin a lungkham sakte khempeuh, zan-a mangmat tawh kibangin maimang ding uh hi. A gilkial mipa in a mangin an ne a, a khan’ lawh ciangin a gil a vah tuan lo, a dangtak mipa in a mangin tui dawn a, a dangtak pha tuan loin a gim mahin a khan’ lawh mah bangin, Jerusalem a do minam honpite khempeuh zong tua ci ding uh hi. Lamdang kisa sak un la, lamdang a sa hi un, ki-mittawsak un la, a mittaw hi un! Leenggahzu dawn lopi-in a kham hi un; kham theih zu ne lopi-in hoi un! Bang hang hiam cih leh Topa in note tungah nakpi ihmut nopna lungsim hong guang a, nomau’ mit ahi kamsangte mitsi sak-in, nomau’ lutang ahi thu mutheite khuhcip hi. Hih mangmuhnate khempeuh pen note’ adingin ahih leh a kimatcip laibu sunga thu om tawh a kibang suak hi. Mite in lai a sim theipa khat tungah, “Hih lai sim dih in,” a cih ciangin amah in, “Kimatcip ahih manin ka sim thei kei hi,” ci hi. Tua ciangin amaute in lai a sim thei lopa kiangah, “Hih lai sim dih in,” a cih uh ciangin amah in, “Ka sim thei kei hi,” a ci hi. Tua ciangin Topa in: “Amaute’ lungsim kei tawh kigamla napi-in hih mite in a kam uh tawh kei kiangah hong nai uh a, a muk uh tawh kei hong pahtawi-in, amaute in kei hong kihtakna pen mihingte’ thupiak a zuihna uh ahi lel hi; tua ahih ciangin en un, hih mite tungah a tumdang leh a lamdang ahi a lamdang nate ka bawlkik ding hi; amau’ mipilte’ pilna kisia ding a, amau’ thu mutel theite’ thu muhtel theihna kiseel ding hi,” a ci hi. Topa ’ kiang panin ama’ thu vaihawmna a seel cip, khuamial sungah a gamta, “Kua in hong mu ding hiam? Kua in hong thei ding hiam?’ a cite in gimna ngah ta hen. Note in na khempeuh a leh lamin na koih uh hi. Beel seekpa pen tungman bangin kingaihsun ding a, a kibawlsa na in a bawlpa tawh kisai-in, “Amah in kei hong bawl lo hi,” cihna ahi zongin, a beel in a sekpa tungah, “Amah in theihna nei kei,” ci ding ahi hiam? Lebanon mual pen singno lo hoih suakin, singno lo hoihpen tulak a suahna ding hun tomno sung bek hilo ahi hiam? Tua ni ciangin bilngongte in laibu sunga thute za ding a, lungzin’na leh khuamialna sung panin mittawte’ mit in mu ding uh hi. Lungniamkhiat mite in Topa sungah lungdamna thak ngah ding uh a, Israelte’ Siangtho Pa’ sungah mizawngte lungdam ding uh hi. Tua ahih ciangin Abraham a honkhia Topa in Jakob innkuan tawh kisai thu a gen-inah: “Jakob maizum nawn lo ding a, a mai khing nawn lo ding hi. Bang hang hiam cih leh keima khut tawh ka bawlsa ahi amau’ tate a muh ciangin, amaute in keima min siangthosak ding uh hi; amaute in Jakob’ Siangtho Pa, a siangtho ahihna phawk ding uh a, Israel’ Pasian zaktakin kihta ding uh hi. Kha lamah a pialkhia mite in thu theitel ta ding uh a, a phunphun mite in thuhilhna ngai ta ding uh hi.” Tua ahih ciangin Faro’ hutna pen na maizumna uh hi ding a, Izipt’ liahna sunga na bukna uh nomau’ zahhuaina hi ding hi. Bang hang hiam cih leh amau’ uliante in Zoans khua-ah va tung a, amau’ tangmite in Hane khua a va phak uh hangin, amaute tungah phattuamna a pia thei lo, maizumna leh mindaina cih loh buang huhna leh phattuamna a pia thei lo mite hangin Judah mi khempeuh in maizumna ngah ding uh hi. Negeb gam-a ganhingte tawh kisai thu: Amaute in, humpinelkai nu leh humpinelkai pa, gul gu nei leh a leengthei gulpi a omna, lungkhamna leh gimna gam nawk-in, amau’ hauhnate la nungzang leh amau sumte kalaoh thuvum tungah suanin amaute bangmah phattuamna a pia thei lo mite tungah puak uh hi. Bang hang hiam cih leh Izipt’ huhna bangmah man loin a hawmpi hi a, tua ahih manin, “Tang lo a, a tu hithiat Rahab” ci-in min ka phuah hi. Tu-in pai in la, hong tung lai ding hunte ah teci ahi ngitnget dingin amaute’ mai-ah suangpeek tungah gelh in la, laizial khat sungah at in. Bang hang hiam cih leh amaute pen, a lehdo mite, a zuau thei tapate, Topa ’ hilhna thu a ngai nuam lo mite ahi uh hi; amaute in thu mutheite tungah, “Mu nawn kei un,” ci-in, kamsangte tungah “Kote’ tungah thuman hong gen kei un; kote’ tungah thuzol bek hong gen un la, thutak ahi lote genkhol un, lampi nusia-in, lamzin panin pial un la, Israelte’ Siangtho Pa’ thu hong zasak nawn kei un,” a ci uh hi. Tua ahih ciangin Israelte’ Siangtho Pa in, “Note in hih thu simmawh-in, zawhthawhna leh khemna suangin, tuate muang na hih manun; hih mawhna pen note’ adingin kulh sangpi khat khangkham-a lawtkhia-in a cim dektak, theih kholh lohin thakhat a, a cim vat tawh kibang ding hi; tua cipna pen iplah loin a kidengkham beel seekpa’ beel themte lak pan meikhuk a, mei lak nading ahi zongin, tuikhuk a, tui dip nading ahi zongin a om het lo tawh kibang ding hi,” a ci hi. Bang hang hiam cih leh Israelte’ Siangtho Pa, alian Pasian in, “Kihei kikna leh khawlna bek tawh note in suahtakna na ngah ding uh hi; daii tak-a omna leh muanna in nomau’ thahatna hi ding hi,” a ci hi. Ahih hangin note na tuaci kei uh a, “Hi lo! Sakol tungah manlang takin i tai ding hi,” ci na hih uh ciangin note na taikhia ding uh a; “Sakol zaptel tungah i tuang ding hi,” ci na hih uh ciangin note hong delh mite zong zaptel ding hi. Mual sang dawn a, dial khuam bang ahi a, mualtunga dial tawh kibangin ahi zongin, note hong kinusiat dong matengin, mi khat’ tawn’na tawh tulkhat tai-in, mihing nga’ tawn’na tawh note na taimang ding uh hi. Tua ahih ciangin note hehpih nuamin Topa in hong ngak hi; note tungah hehpihna hong lah ding amah kipakta hi. Bang hang hiam cih leh Topa pen a thutang Pasian ahi hi; amah a muangte khempeuh thupha ngah ahi hi. Hi hi, Jerusalem khua sunga a teeng Zion sunga a om mite aw, note na kap nawn kei ding uh hi. Note’ huh ngen a, kahna aw hangin amah in hong hehpih taktak ding a, amah in a zak ciangin note hong dawng ding hi. Topa in note tungah cihmawhna leh gimna an hong piak hangin, na Siate uh kiseel nawn lo ding uh a, amaute na mit mahmah uh tawh na mu ding uh hi. Taklam na kihei ciang uh hita leh veilam na kihei ciang uh hita leh, “Hih pen lampi hi, hih tawn un,” cihna aw, na nung lam panun na bil un a za ding hi. Tua ciangin note in ngun tawh a kizut na milimte uh leh kham a kiluan’ a kisung na milimte uh numei nindalna puan bang hi. Nin bangin tuate na thehthang ding uh a, tuate tungah, “Bei mang un!” na ci ding uh hi. Amah in, khaici na tuh nadingun guah hong zusak ding a, lei pan-a piang an hoih tampi tak hong pia ding hi. Tua ni ciangin gankhahna mun zaina-ah na ganhingte un lopa ne ding uh hi; lo a kho bawngtalte leh late in kawbia leh tu-ka tawh a kitoksa an al ne ding uh hi. Na galte uh’ tausangte pukin mi tampi a sih ni-in, mualsang leh mual neute tung khempeuh ah lui tui luang ding hi. Tua tham loin, Topa in ama mite’ liamna tuamin ama satna meimate a damsak ni ciangin kha taang pen ni taang bang ding a, ni taang pen ni sagih sunga taang zah bangin a zah sagih-in taang ding hi. En un, Topa ’ Min gamlapi panin kimu thei hi. Ama hehna meikuangpi leh meikhu in hong kilangsak a, ama kampaunate, mei bangin a kuang hi. Ama husan in, ngawng dong a banto, a taii tuikhang bang ahi hi. Amah in minamte’ thuak siatnate haihna sungah a haih hi; amah in lamkhialsak kamkaihna pen mite’ khaguh ah a thuah hi. Ahi zongin no Pasian’ mite in ahih leh, biakna pawi a kikham ni zan a, bangin la na sa ding uh hi; Israelte’ Suangpi, Topa ’ mual-ah a pai dingin tamngai aw gin’na zui-in a kuankhiate bangin na lungdam ding uh hi. Topa in heh mahmahna leh a kangtum thei meikuang sung panin vanging leh huihpi leh gialpi tawh, ama liatna minthan’na aw kizasakin, ama khut a viik sukna kimusak ding hi. Amah in a ciangkhut tawh a sat ciangin, Assiria mite in Topa ’ aw kihta mahmah ding uh hi. Topa in amaute daan pia-in ciang tawh a satna a gingte tawh kituakin khuang leh laiza lasaknate tumin na gingsak ding uh hi. Amah in a khut viik-in amaute do ding hi. Tofeth a kihal nading mei phualpi mun, sawt pekin kibawl khin zo hi; hi hi, kumpipa’ adingin a baihsa-in kikoih a, a mi-halna pen lianin kisangsak a, sing a sangpi-in vum venvan hi. Topa in kaat kuang hu sang khia ding a, tua meiphualpi tawh kuang ding hi. Izipt gamah huhna ngen dingin paisuk a, sakolte suan’ in a nei, leengte a tam manin muang a, sakol tuangte a hat mahmah manin a suang, ahih hangin Israelte’ Siangtho Pa a suang lo, Topa thu a dong lote in gimna ngah ta hen! Ahih hangin amah pil-in gimna tungsak a, a thu gensate dokkik loin, siatna bawl mite leh mawhna nasep a seppihte daan a pia hi. Izipt mite mihing hi a, Pasian hilo hi; amau’ sakolte in sa hi a, kha hilo hi. Topa in a khut a zan ciangin a huhpa puk-in, huhna a ngahpa tuk ding a, amaute khempeuh siakhawm ding uh hi. Bang hang hiam cih leh Topa in keima tungah hih bangin hong ci a, humpinelkai ahi a, humpinelkai khanglai in ahi zongin a sa nek ding a ngik ciangin, amah do dingin tuucingte honpi khat kisamkhia-in, amaute’ otna hangin lau tuan loin, amaute’ gamlumna hangin a sin a dawilok tuan loh mah bangin, Vanglianpen Topa zong Zion Mual tungah galdo dingin hong kuansuk ding hi. A kot lamlam vasate bangin Vanglianpen Topa in Jerusalem dal ding hi; amah in dalin khahkhia ding a, amah in khengsuakin, suakta sak ding hi. Israel mite aw, nakpi tak-a na dopa uh’ lamah kihei kik un. Bang hang hiam cih leh a kuamah peuh in no adingin na bawlsa uh, mawhna ahi na ngun milimte uh leh na kham milimte uh na paihkhiat hun uh hong tung ding hi. “Assiria pen mihing’ namsau ahi lo, namsau khat tawh puk ding a, mihing namsau ahi lo, namsau khat in susia ding hi; namsau panin tai ding uh a, a tangvalte uh zawhthawh thu tawh nasem dingin kikoih ding hi. Amau’ belh a mun muanhuai uh, launa hangin tai ding a, buaina hangin a uliante in a lim uh taisan ding hi,” ama meikuang Zion ah a om, ama meikhuk Jerusalem khua ah a om Topa in ci hi. En un, ni khat ni ciangin thumanna tawh kumpi khat hong maang ding a, thutan’na tawh uliante in hong uk ding uh hi. Amaute pen, huihpi panin belhna, guahpi panin bukna bang ding uh a, sehnel gam sunga tui luang bangin, nisa gam sunga om suangpi liim bang ding uh hi. Tua ciangin amau’ mit si loin, mi cimawhte’ kisapna mu ding a, amau’ bil in mi cimawhte’ thugen ngai ding uh hi. Amaute lungtomin hi phangphang nawn lo ding uh a, deihsakna lungsim tawh tel takin thugen hiathiat ding uh hi. Mi haite pen mi thupi kici nawn lo ding a, mi ginalote pen mi zahtakhuai kici nawn lo ding hi. Bang hang hiam cih leh mi hai in haina thu gen a, a lungsim ah gitlohna om a, a hoihin gamtat loh ding, Topa ’ thu a hilopi-in gen ding, a gilkialte’ an duhna a phat lohna ding leh dangtakte in tui dawn ding a neih theih loh nadingin, ama lungsim in mawhna bawl ding sawm hi. Mi gina lote’ ginat lohna in sia hi; zuauna kam tawh mizawngte siasak leh mi cimawhte’ thu a thuman ciang nangawnin a siasak dingin amah in gitloh nasepna bawl hi. Ahih hangin mipi lungsim a nei mi in na hoihte geel a, thu hoih nate ah a pang hi. Nuam tak-a a om hithiat numeite aw, tho un la, ka aw za un; nomau tum tak-a a lungmuang tanute aw, ka thugenna na ngai un. Nomau thu tum tak-a a lungkim numeite aw, kumkhat val zek khit ciangin na liinglawng ding uh hi; bang hang hiam cih leh leenggah kum hong sia ding a, singgah lawhna hun hong tung lo ding hi. Nuam tak-a om hithiat numeite aw, liing un, nomau tum tak-a a lungmuangte aw, liinglawng un; na puan uh hawkkhia-in na tangguakun om un la, na kawng uhah puanhampi teeng un. Munmuanhuaite kinusia-in, mi tampi a omna kumpi khuapi kilawi ding hi. Mual leh tausangte zong kisia gawp ding a, late leh tuuhonte in gamtatna munin nei ding uh hi. Ahi zongin Pasian in a Kha Siangtho hong puakkik ding hi. Leitang siate lo hoih hong suakkik ding a, lo-a ante hoih mahmah-in tulak bang ding hi. Tua ciangin gamsung mun khempeuh ah thutang om ding a, thu a manin kisem ding hi. Tua ciangin thumanna hangin nopna om ding a, thumanna hangin daihna leh lungmuan’ tawntungna om ding hi. Ka mihingte pen kilem tak-a teen’na lungmuang tak-a omna inn, daii tak-a tawlngakna munah om ding uh hi. (Tua ciangin gial in tulak kolh siangsak ding a, a khuapi pen cimzan ding hi.) Tui tampi a omna-ah khai tuh a, bawngtal leh late a ut utna-ah a ta sak note in mi lungdam na hi uh hi. Hong kisusia nai lo, mi a susiapa aw, gimna a ngah ding na hi ta hi. Kuamah in hong khem nai loh mi khempa aw, gimna a ngah ding na hi ta hi. Na suksiat nawn loh ciangin nang hong kisusia ding a, na khem nawn loh ciangin nang hong kikhem ding hi. Topa aw, kote hong hehpih in; nang kong muang uh hi. Zing simin kote hatna hong hi in la, lungkham hunin hong honkhia in. Vanging a bang nangma’ aw hangin mite tai a, nangma thawhtohna hangin minamte kithehthang hi; tangngol in na a khop bangin amau’ van nusiatte kikaikhawm a, kauphe honpi bangin van tawmin mite phe zaizai hi. A sangna munah teeng ahih manin Topa kipahtawi hi; amah in thutang leh dikna tawh Jerusalem dimsak ding hi; amah pen nangma hunte a kipna, hohkhiatna a kicin’na, pilna leh theihna hi ding hi; Topa kihtakna pen ama sumgum hi ding hi. En un, galhangte huhna ngenin kiko uh a, kilem nading palai semte nakpi takin kap uh hi. Lam lianpite gambulak suak a, lampi ah kuamah khualzin ngam nawn lo hi. Thuciamnate kipeksat-in, thukimnasate kipalsat a, khat leh khat kizahtakna om nawn lo hi. Leitang kinusia cipin ommawk hi. Lebanon mual-a tulak singte vulgawp a, Sharon gam leihoih pen sehnel gam bang ta hi; Bashan mual leh Karmel mual-a singtehte pulh mang khin ta uh hi. Topa in, minam dangte kiangah, “Tu-in ka tho to ding a, ka vangliatna ka lak ding hi; tu-in kei hong kipahtawi ta ding hi. Lopa keu na paii-a buhkung na suaksak hi. Na husan in nang hong kangtum mei ahi hi. Leikang ngah nadingin suangkang kihal bangin na vui suak ding uh a, meikhuk sunga a kihaltum lingkungte na bang ding uh hi,” a ci hi. Gamlapi-a om mite aw, ka sepna thu za un; a nai-a om mite aw, ka vangliatna thei un. Zion-a om mawhnei mite lau uh a, Pasian thu a ngaihsun lo mite lau-in lingcip uh hi. Amaute in, “Pasian’ thukhenna in a kuang tawntung mei tawh kibang hi. Tua bang meikuang kua in thuak zo ding i hi hiam?” ci uh hi. Thuman in gamta-in thutang na gen uh leh na suakta ding uh hi. Na vangliatna uh mizawngte khemna-in zang kei un la, sumgolh deih kei un. Mi that ding a vaihawmte’ thu ngai loin siatna lang khatah mit si un. Hih in a san’na munte ah teengin, kulh mualpi bukna-a a zang ding mipa ahi hi. Amah an kipia in, a dawn ding tui kitasam lo ding hi. Tua ciangin a hoih kumpipa na mu ding uh a, a zai mahmah a gam zong na en ding uh hi. Ni dangin na kihtak uh gamdang mi siahdongte leh siahkhawmte, tausang a cingte na phawk kha nawn kei ding uh hi. Na theihtheih loh, a kitello kampau a zang, na tel theih loh-un a pau bualbual, mi kihisakte na mu nawn kei ding uh hi. Pawite i bawlna khuapi Zion en un! Daii tak-a a kiteen’na mun, a khetphimte a tat ngei lo, a kikhin thei lo puanbuk a bang, Jerusalem khuapi, na mu ding uh hi. Tua khua sungah Topa in a thahat Pa hi in, a minthan’na hong langsak ding a, a zai gunte leh a zai lui geite-ah i teeng ding hi. Tua tuite tungah ei hong do ding gal gunkuang hong kihot nawn lo ding a, gal teembaw hong pai nawn lo ding hi. Bang hang hiam cih leh Topa pen eite’ thukhen, Topa pen eite thukham hong piapa, Topa pen eite’ kumpi ahi hi; amah in eite hong honkhia ding hi. Gal teembaw khaute kol a, ama om nading mun sanah gunkuang puan khuam lenkip zo lo a, gunkuang puan zal thei lo hi. Tua ciangin galte’ neihsate kihawm keek ding a, khebaite nangawnin van ngah ding uh hi. I gam-a teeng mite kuamah in, “Ka ci na,” ci nawn lo ding uh a, mawhna khempeuh kimaisak ding hi. Minamte aw, thu za dingin hong nai un, mihingte aw, ngai un. Leitang leh a tunga om khempeuh aw, ngai un; leitung leh a tung pan a, hong paite khempeuh in ngai un. Bang hang hiam cih leh minamte khempeuh tungah Topa lungham-in, amaute khempeuh tungah heh mahmah a, a siamang dingin amaute koih-in, thah dingin pia khin ta hi. A kithat amau’ mite kilawnkhia ding a, a si-luanghawmte uih semsem ding hi; amau’ sisan in mual khempeuh sansak ding hi. Vantung-a om khempeuh maimang ding a, laidal bangin vantungte kizial ding hi. Leenggui panin a tehte pulh-in, theikung panin a tehte a pulh bangin aksi hon khempeuh pulh ding hi. Bang hang hiam cih leh ka namsau in vantungah a sep ding khempeuh a zawh khit ciangin, en un, a siamang ding a, ka sehsa Edom mite tungah thukhen dingin hong kum suk ding hi. Topa in namsau khat nei hi; sisan tawh kidim ding a, biakna piakna tuuno si leh keel si, tuutalte’ kalthau tawh a zol bang ding hi. Bang hang hiam cih leh Topa in Bozrah khua ah hih biakna piakna nei ding a, Edom gamah hih bang tampi thahna omsak ding hi. Gamsial talte amaute tawh tukkhawm ding a, bawngtalno gehsate leh bawngtal hatte tukkhawm ding hi. Amau gam pen sisan tawh kidiah ding a, amau’ leitang pen sathau in nipsak ding hi. Topa in Zion a hotkhiat ding, phulak ni khat nei hi. A galte a thuksak ding hun khat nei hi. Lui tui khempeuh kultal tui suak ding a, leitang pen kaat suak ding hi; gamsung pen a kuang kultal tui suak ding hi. Sun leh zanin mit lo ding a, vanah a khu kahto ngitnget ding hi. Khang khat pan khang khat, a hawm guakin om ding hi; kuamah in nawk ngei nawn het lo ding hi. Ahih hangin gamlak simbu leh leh a ham zalzal simbu in, gamsung teng luah ding uh a, simbupi leh muu om ding uh hi. Pasian in Edom gam tungah buaina a khaukhai khai sukin kisiatna khaukhai sikbawk khia ding hi. Kumpi Gam Om Lo, ci-in amaute in min phuak ding uh a, a ulian khempeuhte a mawkna hi ding uh hi. Kumpi inn liante sungah lingkung po ding a, kulh a nei khua sungah laho kung leh thangling kung po ding hi. Ngiate’ an zon’na mun suakin, kalaoh-vasate’ omna hi ding hi. Gamlak ganhingte leh ngiate kikhawl ding a, gamkeel in a lawmte sam ding hi; zan a, gamta ganhingte zong hong tuak sukin ama om nading mun zong ding hi. Tua munah keising in bu tomin, tui-in, keuhin, ama kha liimah a note huai ding hi; musite zong kikhawm tuahin a nupa ciat-un om ding uh hi. Topa ’ laizial sung panin zong un la sim un: Hih ganhingte khempeuh khat beek zong mangthang lo ding a, lawmsam khat zong om lo ding hi. Bang hang hiam cih leh Topa ’ kam in thu pia khin zo a, amahmah in amaute kaikhawm ding hi. Amah in amaute’ tan dingin leitang hawmsak ding a, amau’ tanh ding ciat pia ding hi. Amaute in tua gam nei tawntung ding a, khang khat pan khang khat dongin teeng paisuak ding uh hi. Gamlak leh lei keuna gam lungdam ding a, sehnel gam lungdamin palhkhia ding hi; unok pak bangin tampi takin palhkhia ding a, lung nopna leh lasakna tawh lungdam ding hi. Lebanon mual a minthan’na, Karmel mual leh Sharon mual, a min liatna ama tungah kipia ding hi. Amaute in Topa ’ minthan’na, i Pasian’ liatna mu ding uh hi. A zaw khutte khauhsak un la, a no khukte kipsak un. Lungsim lauthawng mite kiangah, “Thakhauh un, lau kei un! En un, na galte uh tungah phu hong laksak dingin Pasian hong pai ding a, amah in note hong honkhia ding hi,” ci un. Tua ciangin mittawte’ mit kihong ding a, bilngongte’ bil kihong ding hi; tua ciangin khebai mipa pen sakhi bangin diangin lam ding a, a pau thei lo mipa in lungdamin la sa ding hi. Bang hang hiam cih leh gamlakah tui hong phulkhia ding a, sehnel gam sungah lui tui hong luang ding hi; a sa mahmah sehnelte bualtui hong suak ding a, a keugaw leitang pen ciktui tawh hong kidim ding hi; ngiate’ omna ngei leitang pen nawngpi suakin, lopa, pumpeng leh mau po ding hi. Tua lai-ah lam lianpi khat om ding a, Lampi Siangtho kici ding hi; a siang lo mite in tua tung tawn ngei lo ding a, mi haite in tua lam a zui mite khialsak nawn lo ding hi. Tua lai-ah humpinelkai om lo ding a, sasialne ganhing khat peuhpeuh hong pai lo ding hi; tua lai-ah ganhing lauhuaite kimu lo ding hi. Topa ’ tatkhiatsa mite in tua lampi tawnin hong ciah ding uh hi. Topa ’ tatkhiatsa mite hong ciah kikin, lungdam tawntungna mai pua-in lasa kawmin Jerusalem hong tung ding uh hi; amaute in lungdamna leh kipahna ngah ding uh a, dahna leh khuisatna om nawn lo ding hi. Hezekiah Kumpipa in a uk zawh kum sawm leh lina kumin Assiria kumpipa Sennakherib in Judah gam sunga khuapi muanhuai khempeuh do-in a la hi. Lakhish khua panin Assiria kumpipa in Jerusalem khua a, Hezekiah Kumpipa a lut ding a gen dingin anuai-a ulian khat leh galkap honpi a sawl hi. Puansawppa’ nasepna phual zuatna lampi-a bual tungnung tui lampi gei-ah a ulianpa khawl hi. Tua ciangin amah tawh kimu dingin Hilkiah’ tapa ahi kumpi inn sung saipa Eliakim leh lai-atpa Shebna leh Asaf tapa ahi thuciamtehpa Joah hong paikhia uh hi. Tua ciangin a galkap manglian in amaute kiangah a genna panin, “Hazekiah’ kiangah, ‘Kumpi lian ahi, Assiria kumpipa in hih bangin ci hi. Hih na lungmuanna uhah bang siksan na hi uh hiam? Kampau lel pen galdo nadingin vaihawmna leh vaang-in ngaihsun na hi uh hiam? Kei nong lehdo nadingun kua suang na hi uh hiam? En un, ama tunga a kingam mipa’ khut a sun ding, a kikuaitansa pumpeng ciangkhut tawh a kibang, Izipt na suang uh hi. Amah a muang khempeuhte tungah Izipt kumpipa Faro, tua pumpeng bang hi lel hi. Ahih hangin note in, “ Topa ka Pasian uh ka suang uh hi,” a ci-a kinei na hih uh leh ama mun sangte leh biakna taute Hezekiah in lakhia-in, Judah leh Jerusalem tungah, “Hih biakna tau mai-ah na bia ding uh hi,” ci hilo ahi hiam? Tu-in hong pai un la, ka topa Assiria kumpipa tawh kiciamna khat bawl un: A tunga tuang ding mi na ngah zawh nak uh leh sakol tulnih kong pia ding hi. Izipt mite’ leengte leh sakol muanna tawh ka topa’ leengte lak panin a neu pen khat ahi galkap mang khat bek nangawn bangci-in not zo ding na hi uh hiam? Tua tham loin, hih gam a susia Topa ’ thu loin hong pai ka hi hiam? Topa in kei kiangah, “Pai to-in hih gam do in la, susia in,” hong ci hi,’ ci-in gen un,” ci hi. Tua ciangin Eliakim, Shebna leh Joah in a ulianpa kiangah, “Kote in thei ngawn ka hih manun na nasemte tungah Aram pau tawh hong gen hoh in; kulh tunga om mite’ zakna-ah Judah pau tawh thu nong gen loh nadingin kong thuum uh hi,” ci uh hi. Ahih hangin a ulianpa in, “Hih thute na topa uh leh note tung bekah gen ding a, amau’ ek mah ne-in amau’ zun mah dawnin note tawh a siakhawm ding kulh tunga tu mite tungah a gen lo dingin ka topa in hong sawl sa na hi hiam?” a ci hi. Tua ciangin a ulianpa dingto-in, Hebru pau-in nakpi takin kiko a: “Assiria kumpi, kumpi lianpa’ thu za un! Kumpipa in, ‘Amah in note hong honkhia thei lo ding ahih manin Hezekiah’ khemsa-in om kei un. “ Topa in eite hong honkhia taktak ding hi; hih khuapi pen Assiria kumpipa’ khut sungah kipia lo ding hi,” ci-a Hezekiah in hong genna tawh na Topa uh muang kha kei un. Hezekiah in, ‘ Topa in eite hong honkhia ding hi,” ci-in lam hong khialsak kha ding ahih ciangin kidawm un. Assiria kumpipa’ khut sung panin minamte’ pasian khatpeuh in ama gam honkhia zo ngei ahi hiam? Hamath gam leh Arpad gam pasiante koi-ah om ahi hiam? Sefarvaim gam pasiante koi-ah om ahi hiam? Amaute in ka khut sung panin Samaria honkhia zo ahi hiam? Topa in ka khut sung panin Jerusalem khua a hotkhiat nadingin, hih gamte khempeuh’ pasiante’ lakah kua in ka khut sung panin a gam uh honkhia zo ahi hiam?’ ci hi,” ci-in a gen hi. Ahih hangin kumpipa in, “Dawng kei un,” ci-in thu pia khol khin ahih manin amaute daii takin om uh a, kam khat beek dawng lo uh hi. Tua ciangin Hilkiah’ tapa ahi kumpi-inn sung a sai Eliakim leh a lai-at Shebna leh Asaf tapa ahi thuciamtehpa Joah in a puan uh balkeekin Hezekiah’ kiangah pai uh a, a ulianpa’ thugen teng va gen uh hi. Hezekiah Kumpipa in a zak ciangin dahin ama puante balkeek a, puanhampi silhin Topa ’ inn sungah pai hi. Tua ciangin amah in, inn sung saipa Eliakim, lai-atpa Shebna leh siampi khangham teng dahna limin puanhampi silh kawmin Amoz’ tapa kamsangpa Isaiah kiangah sawl hi. Amaute in ama kiangah, “Hezekiah in, ‘Tu ni pen lungkham ni, tai ngah ni, mindai ni ahi hi; naungeek a suah hun tung napi-in a hingkhia zo lo nupi tawh i kibang hi. A nungta Pasian zahko dingin ama topa, Assiria kumpipa in a sawl a galkap mangpa’ thugennate, Topa na Pasian in za hen la, tua bang thu a gente daantat ta hen. Tua ahih ciangin a om lai i mite’ adingin thungen in,’ a ci hi,” ci-in a gen uh hi. Kumpipa Hezekiah’ nasemte Isaiah kiangah a tun ciangin, Isaiah in amaute tungah, “Na Topa uh kiangah, ‘ Topa in hih bangin ci hi: Assiria kumpipa’ nasemte in keimah a hong simmawhna na zaksa uh thute hangin lau kei un. En un, ama sungah kha khat ka guan ding a, amah in kamlengsawn khat za-in, ama gamah a ciahkik nading lungsim ka guan’ ding hi; ama gam sungah namsau tawh amah ka tuksak ding hi,’ ci-in gen un,” a ci hi. Tua ciangin a galkap mangpa ciahkik a, Assiria kumpipa in Libnah khua a dona-ah va pai hi. Bang hang hiam cih leh kumpipa in Lakhish khua a nusiat khitna thu za zo ahih manin tua lai va zuan pah hi. Tu-in, Ethiopia kumpipa Tirhakah in Assiria gam sim dingin Izipt galkap honpi tawh hong kuanna thu kumpipa in a za hi. Hih thu a zak ciangin Assiria kumpipa in Hezekiah kiangah kamtaite sawl a, “Judah kumpipa Hezekiah kiangah hih bangin gen un: ‘Assiria kumpipa’ khut sungah Jerusalem kipia lo ding hi, ci-a thu hong ciam na suan’ Pasian’ khemsa-in om kei in. En in, Assiria kumpite in gam khempeuhah a bawlna, a suksiat mang khitna na za zo hi. Nang hong kisuaktasak tuan ding ahi hiam? Ka pu ka pate un a suksiat minamte, Gozan minam, Haran minam, Rezef minamte leh Telassar khua-a om Eden mite pen amau’ pasiante in honkhia zo ahi hiam? Hamath kumpipa, Arpad kumpipa, Sefarvaim khuapi kumpipa, Hena kumpipa ahih kei leh Ivvah kumpipate koi-ah om ahi hiam?’ va ci un,” ci-in a gen hi. Hezekiah in kamtaite tung panin a lai puak uh saangin, a lai sim hi; Topa ’ innah Hezekiah pai to-in, Topa ’ mai-ah a lai zal hi. Hezekiah in Topa ’ tungah thungenin: “Vanglianpen Topa, Israelte’ Pasian, Kherubte tunga a tupa aw, leitung kumpi gam khempeuhte’ tungah nang bek Pasian na hi hi; nangmah in vantung leh leitung na bawl khin hi. Topa aw, na bil hong ngat in la, hong za in; Topa aw, na mit hak in la, hong mu in; Sennakherib in a nungta Pasian a zahkona, hong khak thute khempeuh za in. Topa aw, Assiria kumpite in minamte leh a gam khempeuh susia mang khin taktak a, amaute’ pasiante pen meikhuk sungah paihsakin susia khin hi; bang hang hiam cih leh tuate pen pasian hi loin, mite’ khut tawh a kibawl sing leh suangte ahi hi; tua ahih ciangin tuate kisusia hi. Tua ahih ciangin Topa aw, nang bek Pasian na hihna leitung kumpi gam khempeuh in a theih nadingin, tu-in ama khut sung panin kote hong honkhia in,” a ci hi. Tua ciangin Amoz’ tapa Isaiah in Hezekiah tungah thu puak a, “Israelte’ Pasian, Topa in hih bangin ci hi: Nang in Assiria kumpipa Sennakherib tawh kisai thu, kei kiangah thu hong ngen khin na hih ciangin, amah tawh kisai-in Topa ’ thugen in hih ahi hi: ‘Sennakherib aw, Zion tanungak siangtho in nang hong simmawh in hong zahko uh hi; Jerusalem mite in na nungah a lu hong peisan lel uh hi. ‘Nang in kua zahko-in kua gensia na hi hiam? Nang in kua tungah na aw sangsakin, kiphasak na hi hiam? Israelte’ Siangtho Pa, kei tungah hong tuaci na hi hi. Nangmah in na nasempa zangin, Topa na zahko a, Lebanon mual dong pek, mual sangte tungah ka leeng tampite tawh ka pai khin hi; taamtak sing a sang pente, taksing hoih pente ka phuk khin hi; a sang pen mun, tulak a thuk penna munah ka paikhin hi. Tuikhuk to-in, tui ka dawn a, Izipt lui tuite khempeuh ka galkapte’ khe nuai tawh ka keusak hi, na ci hi. ‘Na omna mun, na pusuahna, na sungtumna leh keima tungah na hehna ka thei hi. Keima tungah nang hehin, na kiphatsakna thu kei tungah hong tung ahih manin, na nak-ah sikkawi bulhin, na kamah kamkaih hong bulhin, nong paina lampi lam mahah nang kong ciahkik sak ding hi,’ ci hi. “Nang Hezekiah’ adingin hih in lim hong hi ding hi: tu kumin anli pote na ne ding uh a, a kum nihna ciangin tua bangmah-a pote na ne ding uh hi; a kum thumna ciangin khaituhin an na la ding uh a, leenggui suanin a gah na ne ding uh hi. Tua ciangin, Judah minam sung panin a suakta lai mite in singkung bangin zung khasuk kikin, gah na gahto kik ding uh hi; bang hang hiam cih leh a om laite Jerusalem pan ahi zongin, a suakta teng Zion Mual panin ahi zongin paikhia ding uh hi. Vanglianpen Topa’ deihluatna in hih thu hong tungsak ding hi. “Tua ahih ciangin Assiria kumpipa tawh kisai-in Topa in hih bangin ci hi: Hih khuapi sungah amah hong pai loin, thaltang lawn lo ding a, lum tawh hong pai loin, galdo nading panmun hong bawl lo ding hi. Hong paina lampi mahmah ah amah ciahkik ding a, hih khuapi sungah hong pai lo ding hi, Topa in ci hi. Bang hang hiam cih leh keimah leh ka nasempa David ka khualna-in hih khuapi a suahtak nadingin ka hu ding hi,” a ci hi. Tua ciangin Topa ’ vantungmi kuankhia-in Assiria mite’ giahphual ah mihing tulza leh tulsawmgiat leh tulnga that hi; zingsang ciangin mite a thawh ciangin hihte khempeuh mi si luang bekbek a na hi hi. Tua ciangin Assiria kumpipa Sennakherib taikhia a, innah ciahin Nineveh khua-ah teeng hi. Amah in ama pasian Nisrok innah bia-in a om lai takin, ama tate Adrammelek leh Sharezer in namsau tawh amah that uh a, Ararat gamah tai uh hi. Ama tapa Esarhaddon in ama tangin kumpi suak hi. Tua hun lai takin Hezekiah a ci na-in si dektak hi. Amoz’ tapa, kamsangpa Isaiah ama kiangah hong pai-in, “ Topa in hih bangin ci hi: Na innsung thu ding vaihawm in; bang hang hiam cih leh nang na si ding hi, na damkik zo kei ding hi, hong ci hi,” ci-in gen hi. Tua ciangin Hezekiah kawm lam nga-in Topa ’ tungah thungen a, “ Topa aw, lungsim khempeuh leh thuman tak tawh nangma mai-ah gamta-in, nangma muhna ah a hoih nate ka sepna thu, tu-in nong phawk nadingin kong thuum hi,” a ci hi. Hezekiah nakpi takin kap hi. Tua ciangin Isaiah tungah Topa ’ thu hong tung a: “Pai in la, Hezekiah kiangah gen in, Topa, na pa David’ pasian in hih bangin ci hi: Na thungetna ka za khin a, na khitui ka mu khin hi; en in, na nuntakna kumsawm leh kumnga kong piak beh ding hi. Assiria kumpipa’ khut sung panin nang leh hih khuapi kong honkhia ding a, hih khuapi ka hu ding hi, ci hi,” a ci hi. Isaiah in, “Amah in hong ciamsa thu Topa in hong bawl nadingin, hih pen Topa ’ tung panin nangma adingin lim ahi hi: En in, Ahaz kumpipa’ ni-nai tungah nitum kuan-a liim pen kalsawm ka nungkiksak ding hi, ci hi,” a ci hi. Tua ahih ciangin a tum khinsa ni pen ni-nai tungah kalsawm nungkik hi. Judah kumpipa Hezekiah a ci na-in, a natna panin a dam khit ciangin a gelh lai in: Ka hat saan lai takin a si ding ka hi ta a, ka kum om lai teng khempeuh sihna kong ah a om dingin hong kiseh hi ta hi, ka ci hi. A hingte gam sungah Topa ka mu nawn kei ding a, leitunga a teeng mite lakah mihing ka en nawn kei ding hi, ka ci hi. Tuucingpa’ puanbuk bangin ka omna inn kibotkhia-in kei kiang panin kilakhia hi; siamgante in a hial bangin ka nuntakna kihial khin a, amah in siambu panin kei hong at khia hi; sun leh zan tawntung gimna hong kithuaksak a, zingsang dong lungduai takin, huhna ngenin ka kiko hi; humpinelkai bangin amah in ka guh khempeuh kuaitan a, sun leh zan tawntung gimna hong kithuaksak hi. Phialphiah ahi a, gun vapi bangin ahi zongin ka haam a, vakhu bangin ka tau hi. Vantung lam kong et etna-in ka mitte gim hi. Topa aw, kei hong kinengniam hi; keimah huh dingin hong paita in! Ahih hangin ke’n bang gen thei ding ka hi hiam? Bang hang hiam cih leh amah in kei tungah hong gen khin a, amahmah in hih thu hong bawl hi. Ka lunggim lua a, ka nuntak sung ka kiniamkhiat ding hi. Topa aw, nang adingin kong nungta ding a, nang ading bek bekin nong nungta sak ding hi. Ka ci hong damsak kik in la, hong nungtasak in! Gimna lianpi ka thuakna in keima metna hong suak ding hi. Lauhuaina khempeuh panin kei nong honkhia a, ka mawhna khempeuh na nungzang ah na koih hi. Bang hang hiam cih leh han-a om mite in nang tungah lungdamna hong ko thei lo a, a site in nang hong phat thei lo uh hi; gum sunga a pai sukte in nangma thumanna hong muang thei lo uh hi. Tu ni-a keima bawl bangin, a hing mi, a hing mi bekin nang tungah lungdamna hong ko thei hi; pate in tate tungah nangma thumanna gen sawn uh hi. Topa in kei hong hon ding a, Topa ’ inn sungah i nuntak sung tawntung khausai lasakna i tum ding hi. Tua ciangin Isaiah in Hezekiah kiangah, “Theigah la sak in la, na damkik nadingin na meimate nuh sak in,” ci hi. Hezekiah in, “ Topa ’ innah ka paitoh zawh nadingin bang lim om ahi hiam?” ci-in a dong hi. Tua hun lai takin Baladan’ tapa, Babilon kumpi ahi Merodakbaladan in Hezekiah a ci na-in a dam kikna thu za ahih manin ama kiangah laikhak leh letsong tawh mite a sawl hi. Hezekiah in amaute lim takin zin na do hi; amah in ama dangka inn, ngun, kham, paknamtuite, sathau manpha, a galvan koihna inn khempeuh, a van koihna sunga a kimu theite khempeuh amaute na lak hi. Ama inn sung hita leh, ama gamsung khempeuh a, omte hita leh Hezekiah in amaute a lah loh om lo hi. Tua ciangin Kumpipa Hezekiah kiangah kamsangpa Isaiah hong pai-in, “Hih mite in bang gen ahi hiam? Koi lai panin nang kiangah hong pai ahi hiam?” a ci hi. Hezekiah in, “Amaute, a gamlapi, Babilon gam panin kei kiangah hong pai uh ahi hi,” a ci hi. Amah in, “Amaute in na inn sungah bang mu uh hiam?” a ci hi. Hezekiah in, “Amaute in ka inn sunga om khempeuh mu khin uh hi; ka van koihna innte sunga nate amau ka lah loh om lo hi,” ci-in a dawng hi. Tua ciangin Isaiah in Hezekiah kiangah, “Vanglianpen Topa ’ thu ngai in: En in, na inn sunga omte khempeuh leh na pu na pate in tu ni dong a, a kholsate, Babilon-ah a kipuak ding ni hong tung ding hi; bangmah kinusia lo ding hi, Topa in ci hi. Nang sung pan-a a suak, nangma tapate kimkhat kipaikhiatpih ding a, Babilon kumpipa’ inn sungah innsung mang nasep kisemsak ding hi,” a ci hi. Tua ciangin Hezekiah in Isaiah kiangah, “Nong gensa Topa ’ thu hoih hi,” a ci hi. Bang hang hiam cih leh amah in, “Kei’ hun sungin nopna leh lungmuanna om ding hi,” ci-in ngaihsun hi. Ka mite hehnem un, hehnem un, na Pasian un ci hi. Dam takin Jerusalem hopih un. Ama gimna hun bei ta a, ama mawhna kimaisakin, ama khialhnate khempeuh hangin Topa in a zah nih in daantat khin zo hi, ci-in ama tungah gen un. Awging khat in: “Gam lakah Topa ’ lampi sial un la, sehnel gam sungah i Pasian’ ading lam lianpi khat a tangin bawl un. Kuamthuk khempeuh kisangtosak ding a, mual liante leh mual neute kiniamsak ding hi; a tamkimlo munte kitamkim sak ding a, suanghum omna munte kizalhtam ding hi. Topa ’ kam in gen khin ahih manin, Topa ’ minthan’na hong kilang ding a, mi khempeuh in mu khawm ding uh hi,” a ci hi. Awging khat in, “Kiko in!” hong ci hi. Tua ciangin keimah in, “Bang thu kiko ding ka hi hiam?” ka ci hi. Mi khempeuh in lopa bang hi a, ama hoihnate khempeuh pen gamlak-a paak tawh kibang hi. Topa ’ hu in a mut ciangin lopa vul-in, paak pulh hi; mihingte pen lopa bang lel hi taktak hi. Lopa vul a, paak pulh hi; ahih hangin i Pasian’ thu kho tawntung ding hi. Zion ah lungdamna thu hong puakpa aw, mualsang dawnah kahto in. Jerusalem ah lungdamna thu hong puak pa aw, nakpi takin awng in la, lungdamna thu taangko in. Nakpi takin kiko in la, lau kei in. Judah gam khuapite tungah, “Na Pasian uh hong pai ta hi,” ci-in gen in. En un, Topa Pasian hong pai a, vangliatna tawh hong pai a, a banin ama adingin uk ding hi. En un, ama sep thamante hong pua a, a gualzawhna thamante hong masuan hi. Amah in tuucingpa bangin a tuuhonte an vak ding a, amah in a tuunote a khut sungah kaikhawmin, amah in tuate a ang sungah pua ding a, no ngeek a neite pen dam takin paipih ding hi. Kua in ama khut kuak sungah tuite tehin, ama khaap tawh vantungte teh a,lawh sung khatah leitung leivui khempeuh guang-in, pongkhaina tawh mual liante khai a, tawi tehna tawh mual neute teh ahi hiam? Kua in Topa ’ lungsim tel a, thu lamlakpa bangin kua in amah hilh ahi hiam? Thu a kicing a, a muh nadingin amah in kua dong a, kua in amah lampi man hilhin, ama tungah thu theihna hilh a, thu theihtelna lampi lak ahi hiam? En un, minamte pen tui phelkhai khat pan-a tuimal taak khat tawh kibang a, tawi tehna tunga leivui neng baang bangin kingaihsun hi; en un, amah in tuikulhte pen leivui neel bangin tawmto lel hi. I Topa biak nadingin Lebanon sing kicing lo ding a, a ganhingte zong meihal biak nadingin kicing lo ding hi. Minam khempeuhte ama mai-ah bangmah tham hi lo a, amaute pen bangmah a om lo leh, a hawm guak sangin a tawmzaw-in amah in ngaihsun hi. Tua ahih ciangin Pasian pen kua tawh tehkak ding a, amah pen bang lim tawh kibang ci ding na hi uh hiam? Milim tawh teh theih ding hi lo hi. Milim a bawlpa in sung-in, khamsekpa khat in tua pen kham tawh zut-a, tua milim’ adingin ngun khainiangte sun’sak hi. A gina lo khinta mipa in biakna a piak ding a muat lo ding sing teel hi; a taang thei lo milim khat a kituk lo dingin khutsiam mipa khat amah in zong hi. Note in thei nai lo na hi uh hiam? Note in za nai lo na hi uh hiam? A kipat cilin note tungah hong kigen khin hilo ahi hiam? Leitung a pian’ akipan thei khinta hilo na hi uh hiam? Leitung-a teeng mite kauphe tawh kibang, tua leitung kimkot tunga kumpi tokhom tungah a tu-pa; vantungte pen puan bangin zal-in, a sungah teen theih nadingin puanbuk bangin a zalpa; uliante a mawkna suaksakin, leitung ukte pen bangmah lo a suaksakpa in amah ahi hi. Amaute pen a gina-in kisuan lo, a gina-in kivawh lo, amau’ kungte in a gina-in lei sungah zung kha lo uh a, amah in amaute a mut ciangin amaute vul a, huihpi in nahpa keu bangin amaute a len’ khiatpih hi. Tua ahih ciangin kei kua tawh hong tehkak ding na hi uh hiam? Siangtho Pa in ci hi. A sangna vantung lam ento un la, mu un: kua in hihte piangsak ahi hiam? Amau’ aksi honpite khat khatin piangsakin, a lian ama thahatna tawh amaute khempeuh a min un a sampa ahi hi; vangliatna-ah thahat ahih manin khat beek pelem lo hi. “ Topa ’ kiang panin keima lampi kiliah a, keima Pasian in ka thuneihna don lo hi,” Jakob aw, bang hang-a ci a, Israel aw, bang hang-a tuaci pau na hi hiam? Thei nai lo na hi hiam? Za nai lo na hi hiam? Topa pen tawntung Pasian hi a, leitung mong khempeuh a Piangsakpa ahi hi. Amah gim lo a, zong tawl lo hi; ama thu theihtelna kigen zo lo hi. Amah in a gim mi tungah thahatna pia a, thahatna a nei lo mi a thahatna khangsak hi. Khangnote nangawn gim-in kituk ding a, khanglai mite a tha uh bei ding hi; Ahih hangin Topa a ngak mite a tha uh dimkik ding a, muvanlai bangin kha tawh leengto-in, amaute tai napi-un tawl lo ding uh a, amaute lam pai napi-un gim lo ding uh hi. Tuikulh gamte aw, gamdai takin ka thu ngai un; na mite a tha uh dimsak un la, amaute a mai-ah hong paisak un. Amaute thugen theihna ding hun ngah ding uh hi. Thukhen zumah kei tawh kisi nung. A nasem dingin dikna tawh samin, nisuahna pan-a mipa kua in hanthawn ahi hiam? Amah in ama khut sungah minamte piakhia ahih manin, amah in kumpite tuancil hi; amah in a namsau tawh amaute leivui bangin bawl a, ama thal tawh nahpa leeng bang sak hi. Ama khe in a tot ngei loh lampite zui-in amah in amaute delh a, nuam takin pai suak hi. A kipat cil-a kipan a khang khang-a mite a sam, hih nasep semin a bawl kua ahi hiam? A masa leh a nunung, Topa ahi keimah ka hi hi; kei in Amah ka hi hi. Tuikulh gamte in mu khinin lau uh a, leimongte liing uh hi; amaute in hong nai-in hong pai uh hi. Mi khempeuh in a vengte ciat huh a, a sanggamte ciat kiangah, “Tha hat un,” ci hi. Khutsiampa in kham sekpa hanthawnin, sek tawh milim a nel puahpa in sekpi tawh a satpa hanthawn a, sumtui a luan’na uh “Hoih hi,” ci uh hi; a tuk thei lo dingin amaute in tua milim siktukkilh tawh khen kip uh hi. Ahih hangin, nang, ka nasempa Israel, ka lawmpa Abraham’ suan leh khak, kong teelsa Jakob aw, lei mong panin kong lakkhiat, leimong kiu gamla pen pan-a kong sap khiat, “Nang in ka nasempa na hi a, nangmah kong teel khin zo a, nangmah kong nilkhia kei hi,” kong cihpa aw, nang tawh hong om ka hih manin lau kei in, na Pasian ka hih manin lungkia kei in; nang hong thakhauh sakin kong huh ding a, nang hong hu-in ka dikna khut taklam tawh kong honkhia ding hi. En in, nangma tunga a heh mite khempeuh maizumna kithuaksakin kikoih khong ding hi; nangmah hong dem mite pen a mawkna suakin siatna thuak ding uh hi. Nangmah hong langpangte na zon’ hangin amaute na mu nawn kei ding hi; nangmah hong dote pen bangmah hi het lo ding uh hi. Bang hang hiam cih leh keimah Topa na Pasian in na khut taklam ka len hi; Lau kei in, nangmah kong huh ding hi,” nang tunga hong cipa in keimah ka hi hi. Lungno bang ahi lel Jakob, Israel mite aw, lau kei un! Note kong huh ding hi, Topa in ci hi; note hong Tanpa in Israelte’ Siangtho Pa ahi hi. En un, note pen, a thak, a hiam, ha a nei buhcilna-in kong bawl ding hi; note in mual liante cilin na suvui ding uh a, mual neute pen ansi bangin na gawi zan ding uh hi; amaute na haih ding uh a, huih in amaute mutkhia ding a, huihpi in amaute thehthang ding hi. Tua ciangin Topa ’ hangin na lungdam ding uh a, Israelte’ Siangtho Pa’ hangin na minthang ding uh hi. Keima mite in tui duhin tui zong uh a, a dang uh a taak ciangin, amau’ hong thungetna ka pia ding a, Israelte’ Pasian ahi keimah in amaute ka nusia kei ding hi. Bangmah om lohna a sangna munte panin gunte ka luangsak ding a, kuamte’ laizangah tuikhukte ka omsak ding hi; gamlak pen bualtui ka suaksak ding a, lei keuna mun pen ciktui ka suaksak ding hi. Gam lakah taamtaak sing, singkha sing, mui sing leh oliv kungte ka posak ding hi; sehnel gam sungah taaksan sing, hiangpa sing leh taak sing ka suankhawm ding hi; Topa ’ khut in hih nate bawl hi, Israelte’ Siangtho Pa in hih nate piangsak hi, ci-in mite in mu-in a theih nading, ngaihsunin a thu a teltheih nading uh ahi hi. Na thu uh sung un, Topa in ci hi; na lahtel nopna teng uh gen un, Jakob’ Kumpipa in ci hi. Amaute in a thu uh hong paipih hen la, a piang ding thu hong gen uh hen. Eite in i ngaihsut theih nading a, a hong piang ding thu i theih nadingin a beisa hun-a om nate bang teng hiam cih hong gen uh hen; tua ahih kei leh zong, a hong piang ding thu eite tungah hong gen ta uh hen. Note pen pasiante na hihna uh ka theih nadingun tu khit ciang-a hong piang ding thute kote tungah hong gen un; kote lungkia-in ka lau nadingun phatna ahi a, siatna ahi zongin khat peuhpeuh hong bawl dih un. En un, note, bangmah na hi kei uh a, na nasepnate uh a mawkna ahi hi; note hong teelpa in a etsathuai ahi hi. Leilu lam gam panin mi khat ka hanthawn a, amah hong kuan khin hi, nisuahna lam panin amah in ka min hong lo ding hi; beel sekpa in buan a cil bang, sum sunga a kisu gawp bangin, amah in gam ukte tuancil gawp ding hi. Eite in i theih nadingin a kipat cil-a kipan kua in hong genkhia a, “Amah man hi,” i cih theih nadingin a hun ma-in kua in gen ahi hiam? Kuamah in gen khia lo, kuamah in pulak lo a, kuamah in no’ thu za lo hi. Topa ahi keimah in Zion tungah hih thu ka pulak masa a, Jerusalem tungah lungdamna thutak ka gen hi. Ahih hangin tua mun ka et ciangin kuamah om lo hi; thu ka dot ciangin hong dawng ding om lo a, thu lamlak amaute lakah om lo hi. En un, amaute khempeuh zuaupi vive ahi hi; amau’ nasepnate a mawkna ahi hi; a kisung amau’ milimte pen huih hawmpi ahi uh hi. Keimah in ka huh, keima teel, ama sungah ka lungkimna ka nasempa en un; ka Kha tawh amah ka kidimsak a, amah in minam khempeuh tungah thuman tungsak ding hi. Amah kiko loin, awng khia lo a, kongzing lakah zong thu gen zakzak lo ding hi; amah in a kisunimsa pumpeng sukham lo ding a, a khu suak mei khau sumit lo ding hi. Amah in thumanna tawh mi khempeuh tungah thutang thu sem khia ding hi. Amah in leitungah thutang thu a phuh khit matengin lungsi lo, lungkia lo ding hi; tuikulh gamte in ama thukham sungah lametna nei ding uh hi. Vantungte piangsakin a zal, leitung phah-in a tung pan-a hong paikhia nate a piangsak, leitung a, om mite tungah husan’na pia-in, leitung a, a paite khempeuh husan’na a guan Topa Pasian in hih bangin ci hi; Keimah in Topa ka hi a, Topa pen keima min ahi hi; Pasian dang’ tungah keima minthan’na ka ngahsak kei a, a kisui milimte tungah zong keimah hong kiphatnate bang ka ngah sak kei hi. En un, hun beisa-a nate in hong kheng a, tu-in a thak nate kong gen hi; tuate a hong pian’ khiat ma-in note tungah a thute kong gen khol hi.” Topa ’ tungah la thak sa un la, leimong panin amah phatna sa un! Tuipi leh a sunga omte, tuikulh gamte leh a tunga teeng mite aw, lasa un. Sehnel gam leh a khuapite, Kedar mite’ teen’na khua neute a aw uh sangkhai sak un; Sela gam-a teeng mite lungdamna tawh lasa sak un la, mual dawn panin amaute awng sak un. Topa a minthan’na ama tungah gen un la, tuikulh gamte ah amah phatna gen sak un. Mi thahatpa bangin Topa kuankhia a, gal a do mipa bangin ama hanciamna so sak hi; amah kiko-in nakpi takin awng khia a, ama hatna a galte tungah a lak hi. Pasian in hih bangin ci hi: Sau veipi sung ka dai om a, keimah leh keimah kikhamcip-in ka hi hit-hiat hi; tu-in numei nau suak ding bangin ka kiko khia ding a, ka kam ka-in ka tung-nak ding hi. Mual liante leh mual neute ka susia ding a, a po kungte khempeuh ka keusak ding hi; gunte pen tuikulh ka suaksak ding a, bualtuite ka kangsak ding hi. Amau’ theih loh lampi ah mittawte ka paipih ding a, amau’ theih ngei loh sul zuihpih-in ka kha ding hi. Amau’ mai-ah khuamial pen khuavak suaksakin, a phokna munte a tam-in ka bawl ding hi. Hihte pen keima hih ding nate hi a, tuate sem loin ka nusia kei ding hi. A kisui milimte muangin, a kisung milimte kiangah, “Note in komau’ pasiante na hi uh hi,” a ci mite kinolh ding a, maizum mahmahin ki-om sak ding hi. Bilngongte aw, za un; mittawte aw, na muh theih nadingun en un! Ka nasempa bangin kua a mit taw a, keima sawl ka kamtaipa bangin kua a bil ngong ahi hiam? Keima thuciampihpa bangin kua a mit taw a, Topa ’ nasempa bangin kua a mit taw ahi hiam? Israel in na tampi mu a, ahih hangin tuate encian lo hi; ama bilte kihong a, ahih hangin amah in khua za lo hi. Ama dikna a khual manin Topa in a thukham liansakin vanglian sak nuam hi. Ahih hangin ama mite pen a kiluh, a kisut mite hi a, leihawm sungah amaute khempeuh kikiasak a, thonginn sungah kiseel hi; amaute pen, a hon ding om lo, nek ding-a kiman ganhing suak khin uh a, kuamah in “Hong pia kik in,” a cih loh vankisutte suak khin ta uh hi. Note’ lakah khat peuhpeuh in hih thu na ngai ding uh hiam? Tu-a kipanin lim takin na ngai ding uh hiam? Kua in a sut gawppa tungah Jakob pia a, a luh gawpte’ tungah Israel pia ahi hiam? Topa mahmah in a piak hilo ahi hiam? Ama tungah eite i khial hi. Ama’ hong deih bangin i zui kei a, ama hong thuhilhnate i mang kei hi. Tua ahih ciangin amah in, ama hehna-so leh gal kidonate eite tungah hong tungsak hi. Israel mi khempeuh lakah mei bangin ama hehna hong kuang a, ahih hangin eite in bangmah i thei kei hi. Tua i thuakna hangin bangmah i phawk khia thei tuan kei hi. Ahih hangin, Jakob aw, nangmah hong piangsakpa, Israel aw, nangmah hong bawlpa, Topa in tu in hih bang ci hi: “Nangmah hong honkhia khin ka hih manin lau kei in; na min tawh nang kong sam khin zo a, nang in kei’ aa na hi hi. Nangmah in tuite na kantan ciangin nang tawh kong omkhawm ding a, gunte na kantan ciangin tui in hong tuum lo ding hi; mei kantanin na pai ciangin na kang kei ding a, a meikuangte in nang hong kangtum lo ding hi. Bang hang hiam cih leh keimah in Topa na Pasian, Israelte’ Siangtho Pa, nangmah hong Honpa ka hi hi. Nangmah tat nadingin Izipt ka pia a, nangmah khek nadingin Ethiopia leh Seba ka pia hi. Nang pen keima mit-ah manpha-in, pahtakhuai in, nangmah hong it ka hih ciangin nangma tangin mite ka pia a, nangma nuntakna khek nadingin mihingte ka pia hi. Nang tawh hong omkhawm ka hih manin lau kei in; nisuahna lam panin na suan leh khakte kong paipih ding a, nitumna lam panin na mite kong kaikhawm ding hi. Mit nei napi-a mit a taw mite, bil nei napi-a bil a ngong mite hong paikhiatpih un! Minamte kikaikhawm sak un la, mihingte kikhawm sak un. Amaute’ lak panin kua in hih thu hong genkhol thei-in, a beisa hun-a nate kua in hong lak thei ahi hiam? Amau’ dikna a langsak dingin a tecite uh hong paipih sak un la, amaute a thu za sakin, man mah hi, ci sak un. “Note in keima tecite na hi uh hi,” Topa in ci a, “Kei pen Amah ka hihna thu, nangmah in thei-in keimah nong up nading leh na theihtel theih nadingin kong teelsa ka nasempa na hi hi. Kei’ ma-in pasian om lo a, kei’ khit ah zong kuamah om lo ding hi. Kei, keimah in Topa ka hi a, kei sim loh honpa dang om lo hi. Note lakah pasian dang a om ma-in honkhia-in, pulak-in, ka gen khol hi; tua ahih ciangin note in keima tecite na hi uh hi,” Topa in ci hi. “Kei in Amah ka hi a, a kipat cil-a kipanin zong kei in Amah ka hi hi; keima khut sung panin a lakhia zo kuamah om lo hi; keimah in na ka sem a, kua in hong nokkhak zo ding ahi hiam? Israelte’ Siangtho Pa, note hong Honpa, Topa in hih bangin ci hi: “Note’ hangin Babilon ah puakin, Babilon mite galtaite bangin a kisak theihpih a teembawte sungah Khaldea mite’ kikona ka guangsuk ding hi. Keimah in Topa, note’ Siangtho Pa, Israel a Piangsakpa, note’ Kumpi ka hi hi.” “Masa lam-a nate ciamteh kei un la, a beisa nate ngaihsun kei un. En un, a thak na khat ka bawl hi; tu-in hong piang khia hi, note in thei lo na hi uh hiam? Gam lakah lam lianpi khat ka bawl ding a, sehnel gam sungah gunte ka bawl ding hi. “Ahih hangin Jakob aw, ka min nong lo kei hi; Israel aw, kei nong cimtaak hi! Meihal biakpiak nadingin kei kiangah na tuu nong paipih kei a, biak piakna tawh kei nong pahtawi kei hi. Piakna tawh nang kong vangik sak nai kei a, paknamtui piak nading kalhna tawh kong gim sak nai kei hi. Kei’ adingin sum tawh paknamtui nong lei sak nai kei a, nangmah in biakna sa a thaute tawh nong taii sak nai kei hi. Ahih hangin nang in na khialhna tawh kei tungah vangik nong suan khin a, na mawhna tawh kei nong gimsak khin hi. “Na thupalsatnate hong phiatkhiatsakpa in keimah Pasian ka hi a, kei ka hih manin na khialhnate ka ciamteh kei ding hi. Kei hong phawksak in la, thu kikum khawm ni; na dikna a kilat nadingin na thu hong sung khia in. Na pu na pa masate khial a, na makaite uh zong kei tungah hong khial hi. Na uliante un ka biakinn mindaisak uh ahih manin, Israel tungah zahhuaina ka tungsak a, Jakob ka siasak hi. “Ahih hangin, ka nasempa Jakob aw, ka teelsa Israel aw, tu-in za in! Nangmah a hong bawl, gil sung panin nang a hong piangsak, nang a hong huh ding Topa in hih bangin ci hi: Ka nasempa Jakob aw, ka teelsa Israel aw, lau kei in. Bang hang hiam cih leh a dangtak leitang tungah tui ka sung ding a, leikeu tungah lui tui ka luangsak ding hi; na suan leh khakte tungah ka Kha ka pia ding a, na tu na tate tungah ka thupha ka pia ding hi. Amaute pen lopa dumna-a a po lopa bangin, tui sung pan-a pokhia, lui tui luang gei-a a om gialheek kungte bangin po khia ding uh hi. Khat in, ‘Keimah in Topa aa ka hi hi,’ ci-in, a dang khat in Jakob’ min tawh ama min lo ding a, a dang khat leuleu in, ‘ Topa aa,’ ci-in ama khut tungah gelhin, Israel min tawh amahmah kinophuah ding hi.” Topa, Israel Kumpipa leh amah Honpa, Vanglianpen Topa in hih bangin gen a: “Keimah in a masa pen leh a nunung pen ka hi hi; kei sim loh Pasian dang om lo hi. Kua in kei tawh kibang ahi hiam? Amah gensak-in pulak sak un la, keima mai-ah gen sak un. A tung ding nate thu tanglai pek panin kua in tangko ahi hiam? Hong tung ding nate thu amaute genkhol sak dih un. Lau kei un la, kihta kei un; tanglai pek panin note kiangah hong genin pulak khin hilo ka hi hiam? Note in keima tecite na hi uh hi! Kei sim loh Pasian dang om ahi hiam? Suangpi dang om lo hi; khat beek ka thei kei hi,” ci hi. Milim a bawl mite khempeuh a mawkna hi a, amau’ deih milimte in phattuamna piangsak lo hi; milim a biate in khuamu thei lo, thu theithei lo a, amaute in maizumna thuak uh hi. Bangmah-a kimang lo pasian kua in bawl a, milim kua in sung ahi hiam? En un, ama kikholpih mite khempeuh in maizumna ngah ding hi, khutsiamte pen mi hi lel uh hi; amaute khempeuh kikhawm sakin ding sak un, amaute nakpi takin kilausak ding a, a vekpiun maizumin kikoih khawm ding hi. Sikseekpa in seekin hol tawh na sem hi; amah in sek tawh seek-in a thahat a khut tawh a sat hi; amah a gil kialin a tha zaw a, amah in tui dawn loin a gim hi. Sing nasep khut siampa in khau khungin laikung tawh ciamteh hi; amah in singnawtna tawh nawt a, tehna kual khat tawh ciamteh hi; amah in, inn sunga a teeng ding mihing mel hoih lim khat bangin mihing lim-in bawl hi. Amah in taamtaak sing kungte phuk hi; tua ahih kei leh sesing kung khat ahi a, tawsaw kung khat ahi zongin teng khia a, gamlak singte lakah khang sakin gol sak hi; amah in taamtaak kung khat suanin guah in khang sak hi. Tua ciangin tua kung pen mi khat adingin mei sing suak hi; amah in tua sing kimkhat la-in a khua lum nadingin mei-in cih a, amah in mei tawh-in moh em hi; amah in pasian khat zong bawlin bia a, amah in milim khat bawlin tua milim mai-ah kun hi. Amah in a sing kimkhat mei khuk-ah cih hi; a dang kimkhat tawh an ne a, amah in sa hang-in a gil vah hi; amah in mei awi-in, “Ah, ka khua lumta, mei mu khin ing!” ci hi. Amah in a val lai teng, ama milim pasian khatin bawl hi; tua milim mai-ah kunin bia hi; amah in tua milim tungah thungen a, “Nang in keima pasian na hih ciangin kei hong honkhia in!” ci hi. Amaute in bangmah thei lo, amaute in bangmah khentel thei lo uh hi; bang hang hiam cih leh amaute in bangmah a muh loh nadingun amah in a mit uh humsakin, bangmah a theih loh nadingun a lungsim uh khaksak hi. A kimkhat meikhuk-ah cihin, a aam tungah moh zong ka em a, sa hang-in ka ne khin zo hi; a om lai teng a kihhuai-in bawl buang ding ka hi hiam? Sing bek khat’ mai-ah kun buang ding ka hi hiam? a ci ding, thu a ngaihsun, theihna leh thu muhna a nei khat beek om lo hi. Amah pen vut a nete tawh kibang lel hi; khemna lungsim haina in amah lam pialpih khin a, amah leh amah kihonkhia thei loin, “Ka khut sungah ka tawi milim pen a haihuai hilo ahi hiam?” cih zong phawk thei lo hi. Jakob aw, hih thu phawk in. Israel aw, ka nasempa na hi hi. Nang kong bawl a, nang in keima nasem na hi hi; Israel aw, keimah in nang kong mangngilh kei ding hi. Na thupalsatnate meiipi bangin, na khialhnate meiilum bangin ka phiatkhia khin zo hi; nang hong tan khin ka hih ciangin kei kiangah hong ciahkik in. Vantungte aw, Topa in tua thu sem khin ahih manin lungdam in la sa un; Anuai-a om leitung aw, awng un; mualte aw, la sa-in awng khia un, tulak leh a sunga sing om khempeuh aw, awng un! Bang hang hiam cih leh Topa in Jakob tankhia khin a, Israel sungah amah kiminthangsak ding hi. Gil sung panin nangmah a hong piangsak, nangmah hong Tanpa, Topa in hih bangin ci hi: “Keimah in na khempeuh bawlin, keimah guakin vantungte zal-in, kuama seppih lohin leitung ka zal hi; zuau thu gente’ hilhkholhna limte a siasakpa, aisante pen mihai a suaksakpa, mi pilte lehhei kikin, amau’ thu theite haina a suaksakpa; a nasempa’ thu kip sakin, a kamtaite’ thugente a tangtungsak; ‘Jerusalem khua-ah mi teengin, Judah khuapite kilamkik ding a,, a kisia khuate ka lamkik ding hi’; tui thukpi kiangah, ‘Keu in, na gunte ka keusak ding hi’; Sairas kumpipa in ka tuucingpa hi a, ka deihna teng tung sak ding hi’; ‘Jerusalem kilam ding a,’ biakinn pen, ‘Na bulpi kiphut ding hi,’ a ci Topa ka hi hi.” Kulh kongpite a kikhak loh nadingin ama mai-ah kongkhakte a honsak ding, kumpite’ vangliatnate a lakkhiat sak ding, ama mai-ah minamte a zawh sak dingin, a taklam khut a len, a sathau nilhpa Sairas tungah Topa in hih bangin ci hi: “Nangma mai-ah kei pai-in mualte zalhmai-in, sumngo kongkhakte satzan-in a sikzawlte ka sattan ding hi. A mialna mun sunga sum kikoihte leh mun simtham-a sum kiseelte, nangma tungah kong pia ding a, tua thu hangin kei-in Topa, na min tawh hong sam Israelte’ Pasian ka hihna nong thei ding hi. Ka nasempa Jakob leh ka teelsa Israel ka ngaihsutna-in, nang pen na minin kong sam a, nong theih loh hangin min thak kong phuah hi. Keimah in khuavak leh khuamial piangsakin, a pha nate leh a sia nate ka piangsak a, hih nate khempeuh a bawlpa in keimah Topa ka hi hi. “Vantungte aw, tung lam panin thumanna zusak un la, vantungte in thumanna buasuk ta un. Hotkhiatna a po khiat theih nadingin leitang kihong sak un la, thumanna zong po khiato sak un; keimah Topa in hih thu ka bawl khin zo hi. “Amah a Bawlpa tawh a kido mipa, beel seekpa tawh a kido lei beel in gimna ngah ta hen! Tungman in amah a seekpa kiangah, ‘Nang in bang bawl na hi hiam, na nasep in khut nei lo hi,’ ci-in a thu sel ngam ahi hiam? A pa kiangah, ‘Nang in kua piangsak na hi hiam?’ a cipa hita leh, a nu kiangah, ‘Nang in nausuak dingin kua gimpih na hi hiam?’ a cipa in gimna ngah ta hen.” Amah a Bawlpa, Israelte’ Siangtho Pa, Topa in hih bangin ci hi: “Nang in keima tate’ thu hong dongin, ka khut tawh ka bawlsate tawh kisaite-ah thu hong pia ding na hi hiam? Keimah in leitung ka bawl a, tua tungah mi ka piangsak hi; keima khut in vantungte zal a, keimah in vantung na honpite khempeuh thu ka pia hi. Thumanna sungah amah khua ka phawksak a, keimah in ama lampi khempeuh ka mamsak ding hi; amah in nasep thaman ahi a, letsong ahi zongin ngaihsun loin keima khuapi lamin sal-a om ka mite khahkhia ding hi,” Vanglianpen Topa in ci hi. Topa in hih bangin ci hi: “Izipt pan a piangte leh Ethiopia sumbuk vante leh a tun a sang Seba mite nangma kiangah hong pai-in nangma aa hi ding uh a, amaute in nang hong zui ding uh hi; amaute sikkhau kibulh-in hong pai-in nangma kiangah hong kun ding uh hi. Amaute in nangma kiangah thuum ding uh a, ‘Nangmah bek tawh Pasian omkhawm a, kuamah dang om loin, amah sim loh pasian dang om lo hi,’ hong ci ding uh hi.” A taktakin, Israelte’ Pasian, Honpa aw, nangmahmah a bucip Pasian na hi hi. Milim a bawl amaute khempeuh in maizumna thuakin cih nading thei loin om ding uh hi. Ahih hangin Israel pen Topa in tawntung hotkhiatna tawh honkhia hi; nang in cikmah hunin maizumna na thuak kei ding hi. Vantungte a piangsakpa (amah Pasian!) leitung piangsakin a bawlpa (a kipsakpa; a awngthawl dingin bawl loin, teen’ nading a, leitung a piangsakpa!) Topa in hih bangin ci hi: “Keimah in Topa ka hi a, kuamah dang om lo hi. Keimah in mun simtham, khuamialna gam sungah thu ka gen kei hi; Jakob’ suan leh khakte kiangah, ‘A awngthawl mun sungah kei hong zong un,’ ka ci kei hi. Keimah Topa in thuman ka gen a, a man nate ka pulak hi. “Minam sung panin a suakta lai note aw, nomau kikaikhawmin hong pai un la, hong nai un! Amau’ sing milim a pua kawikawi mite in theihna nei lo uh a, a honkhia thei lo pasian tungah thu ngenngen uh hi. Na thu uh sung un la, gen un; amaute kikum khawmsak un! Hih thu sawt pekin kua in genkhol ahi hiam? Tang lai-in kua in pulak ahi hiam? Keimah Topa hilo ka hi hiam? Thuman Pasian leh Honpa ahi, kei sim loh Pasian dang om lo hi; kei sim loh kuamah dang om lo hi. “Leitung mong khempeuhte aw, kei lamah hong kihei un la, hotkhiatna ngah un! Bang hang hiam cih leh keimah in Pasian ka hi a, kuamah dang om lo hi. Keimahmah ka kiciam khin a, a kikhel kik nawn lo ding thu in, ‘Keima mai-ah mi khempeuh hong khukdin ding a, keima tungah thuman dingin hong kiciam ding uh hi,’ cihna, kei’ kam sung panin thumanna tawh pusuak khia khin zo hi. “ Topa ’ hang bekin dikna leh thahatna kingah hi, hong kici ding hi; kei hong mudahte khempeuh mindai-in maizum ding uh hi. Israel suan leh khakte khempeuh in Topa ’ hangin midik tangin a kisial ding uh hi.” Bel pasian puksukin, Nebo pasian kunsuk a, tua milimte pen ganhing leh bawngte tungah kipua hi; note’ puak hih nate pen, a gim mahmah ganhingte tungah vangik om bangin note’ tungah hong gik hi. Amaute kunin, amaute puksuk khawm uh a, amaute in vangik pengsak thei lo uh a, amaute mahmah zong galte’ matna sungah tung uh hi. “Na suah-a kipan kong tawi, gilsung pan-a kong puak, Jakob innkuan, Israel innkuan a suakta laite khempeuh aw, keima thu hong ngai un; na tek dongun keimah in Amah ka hi a, na sam uh a kan hun dongin note kong kem ding hi. Ka bawl khin a, ka don ding hi; keimah in hong tawi-in kong honkhia ding hi. “Note in kei, kua tawh hong kibang sakin hong kikim sak ding a, ka kibatpih dingin kua tawh hong enteh ding na hi uh hiam? Sumbawm panin khamte uang zatin tawi-tehna tawh ngunte a tehkhiate in kham seekpa cial a, amah in tua nate pen pasian-in seeksak hi; tua ciangin amaute kunin tua milim bia uh hi. Amaute in tua pasian pen a liangko tung uhah ngato-in pua uh a, ama om nading munah amaute in koih a, tua lai-ah om niloh hi; ama omna panin amah kinkhia thei lo hi. Mi khatpeuh in amah sam leh amah in dawng thei lo a, ama lungkhamna panin zong honkhia thei lo hi. “Thu a palsat mite aw, hih thu phawkin ngaihsun un la, lungngai pha un. Hun lui nate phawk un; bang hang hiam cih leh keimah in Pasian ka hi a, a dang om lo hi; keimah in Pasian ka hi a, kei tawh a kibang a dang om lo hi. A kipat cilin a tawp nading thu ka pulak a, tanglai pek panin a piang nai lo nate genin, ‘Ka ngimna kip ding a, ka sepnop khempeuh ka sem ding hi,’ ka ci hi. Nisuahna gam panin sasialne vasa khat samin, keima thu a sem khia dingin gamlapi panin mi khat ka sam hi. Thu ka gen khin a, ka tungsak ding hi; ka geel khin a, ka sem ding hi. “Dikna tawh a kigamlate, a lungsim khauh mite aw, ka thu hong ngai un: Ka dikna kong tungsak ta a, gamla nawn lo hi; ka hotkhiatna zekai lo ding hi; keima minthan’na ahi Israel adingin, Jerusalem ka honkhia ding hi.” Nungak a bang Babilon aw, hong paisuk in la, leivui lakah tu in; nungak a bang Khaldea aw, tokhom om lohna lei lakah hong tusuk in! Bang hang hiam cih leh nang pen, a moi milmel, a ngeek dikdek, hong kici nawn lo ding hi. An gawina suangte la in la, an gawi in; na kikhuhna puan lakhia in la, na nik na puan suah-in gunte kantan in. Na selsim teng kilang ding a, na maizumna teng kimu ding hi. Keimah in kong thukkik ding a, kuamah ka zah kei ding hi. Eite hong Tanpa— Vanglianpen Topa cihna min a neipa— in Israelte’ Siangtho Pa ahi hi. Babilon aw, gamdai takin tu in la, khuamialna sungah pai in; bang hang hiam cih leh nang pen, kumpi gamte’ kumpinu hong kici nawn lo ding hi. Ka mite’ tungah ka heh a, keima luah gamh ka ninsak hi; nangma khut sungah amaute kong pia a, nang in amaute na hehpih kei hi; a khangham mite tungah na hakkol na giksak mahmah hi. Nangmah in, “Kei pen, tonu ka hi tawntung ding hi,” ci na hih manin hih thute na lungsim ah koih loin, bang thu piang thei cih zong na ngaihsun kha kei hi. Tua ahih ciangin tu-in, a nuam bek a ut, lungmuang tak-a a tu hit-hiat, na lungsim sungah, “Keimah hi’ng, kei sim loh midang om kei’ meigongin om kei ning, ta-khuai cih zong sin kei ning,” a ci khuapi aw, hih thu za in: Aisan siamnate leh mibum siamna vang lianpi na neih hangin ta khuaisuahna leh meigon’na, hih thu nihte thakhat thu-in ni khat sungin a kicing takin nang tungah hong tung veve ding hi. Na gitlohna ah nang na lung muang a, “Kuamah in kei hong mu lo hi,” na ci hi; na pilna lehna theihnate in lam hong pialsak a, na lungsim sungah, “Keimah hi’ng, kei sim loh midang om kei,” na ci hi. Ahih hangin nangmah in na beisak theih loh tuahsiatna na tungah hong tung ding hi; nangmah in maisakna na ngah theih loh gimna nang tungah hong tung ding hi; nang in a thu na theih hetloh siatna na tungah thakhatin hong tung ding hi. Na neu lai-a kipan na sep ahi na mibumna leh na aisannate ah kip takin om in; phattuamna na ngah kha ding a, mite na lausak zo kha ding hi. Nang tungah hong kilak thu tampite in nang hong gimsak hi; vantungte a seh-in khenin, aksite en a, khadet simin nang tunga thu piang ding hong genkhol mite ding sak in la, nangmah kihonsak in. En in, amaute pen buhkung tawh kibang uh a, mei in amaute kangtum hi; meikuang’ vangliatna panin amau leh amau kihontawm thei lo uh hi. Hih pen khua lum nading mei-am hi lo a, awi ding mei zong hi lo hi. Nang tawh na a semkhawm, na neu lai-a kipan nang tawh na a semkhawmte tungah hih thute hong tung ding hi; amaute pen amau’ tum ciatah zauvak uh hi; nang hong hon ding kuamah om lo hi. Israel min tawh a kilo, Judah sung pan-a a piangkhia; Topa ’ min tawh thuciam in Israel min lo napi-in, thuman thutak tawh Israel Pasian a pulak lo, Jakob innkuan aw, hih thu ngai un. Note tua bang hi napi-in, khuapi siangtho sunga a teeng mite hi a, Israel Pasian i muang hi. Ama min in vanglian Topa ahi hi, ci-in na kisathei zaw lai uh hi. “A masa lam-a nate thu tanglai-in ka gen a, keima kam panin tuate gingkhia-in ka kithehthang sak hi; tua ciangin thakhat thu-in keimah in ka sem a, hong piang hi. Note pen paupeng-in, na ngawng uh sik thagui bang hi-in, na taltang uh sumngo banga sak a hihna thei ka hih manin, note in, ‘Ka milim un hihte bawl a, a kisui ka milim leh a kisung ka milim un thu pia hi,’ na cih theih loh nadingun tanglai-a kipanin hih thute note tungah kong gen a, tuate hong pian’ ma-in note tungah kong zasak khol hi. “Ka gensa thu khempeuh hong tung ta a, Ka gennate man hi, na cih ding uh hi ta hi. Tu-a kipanin, na a thakte, na theih ngei loh uh hong tung ding a ki-im nate, kong gen ding hi. Hihte pen, tu hunin a piangsak ka hi a, a beisa hun ah hih bang piang nai lo hi. A piang khinsa thu hi leh, ka theih uh thu hi, na ci kha ding uh hi. Note pen a lehheek thei na hih lam uh ka thei a, na suah tung uh akipan mi lehdo thei na hihna uh ka thei hi. Tua ahih manin tanglai akipan na bil uh kihong ngei lo a, zong na thei ngei kei uh hi. “Note kong suksiat khak loh nadingin ka min ka ngaihsutna tawh ka hehna diah-in, keimah hong kiphatna ka ngaihsutna-in note tungah ka ki-ip hi. En un, meikhuk sungah ngun a kisian’sak bangin, gimna meikhuk sungah note kong ze-et hi. Ahi zongin note pen bangmah-a kimang lo na hihna uh hong kimu khia hi. Keimah ka kikhualna, keimah ka kingaihsutna-in hih bangin kong hih hi; bang hang hiam cih leh ka min a siat ding kilawm ahi hiam? Midang khat tungah keima minthan’na ka pia kei ding hi. “Jakob leh keima hong sap Israelte aw, ka thu ngai un! Kei in amah ka hi a, keimah in a masa hi-in, keimah in a nunung zong ka hi hi. Ka khut in leitung bulpi koih a, ka khut taklam in vantungte zal hi; amaute ka sap ciangin amaute omkhawm pah uh hi. “Note khempeuh kikhawm un la, hong za un! Amaute’ lakah kua in hih ka sep ding nate genkhol thei ahi hiam? Ka teel kipawl pihpa in Babilon tungah keima ngimna sem ding a, Khaldea mite’ lang khatah kei ka pang ding hi. Kei, keimah in thu genin amah ka sam a, kei in amah ka paipih a, amah a daupai ding hi. Kei kiangah hong nai un la, hih thu za un: a kipat cil-a kipanin a simthamin thu ka gen kei a, tua thu hong pian’ akipanin kei ka om hi. (Tu-in Topa Pasian in a Kha tawh kei hong sawl hi.) Israelte’ Siangtho Pa, nangmah hong Tan, Topa in: Keimah in, phattuamna na ngah nading a, a hong hilh, na zuih ding a, kilawm lampi-ah a hong paipih Topa na Pasian ka hi hi. Ka thupiakna a ngai hi hoh leteh! Nangma nopsakna pen gunpi bang ding a, na thumanna pen tuipi tuihualte tawh kibang ding hi; na suan leh khakte sehnel zah pha-in, na tu leh tate sehnel vui zah pha ding hi; keima mai-ah amaute’ min kiphiat khia lo, kisusia ngei lo ding hi,” a ci hi. Babilon panin paikhia-in, Khaldea gam panin tai in la, lungdamna tawh hih thu gen in la, tangko-in leimong dongin puak in; “ Topa in ama nasem Jakob tankhia khin zo!” ci-in gen in. Amah in sehnel gam kantanin amaute a paipih ciangin a dang uh taak lo hi; suangpi panin amau adingin amah in tui luangsak hi; amah in suangpi khangkham sak a, tui phulkhia hi. “Tua ahih ciangin mi gilote’ adingin nopna om lo hi,” Topa in ci hi. Tuipi kulh gamte aw, ka thu ngai un la, gamlapi-a om mihingte aw, ngai un. Ka suah ma-in Topa in kei hong sam a, ka nu’ sungah ka om lai-in amah in ka min hong phuak hi. Amah in ka kam, namsau hiam bangsak a, ama khut liim tawh kei hong hu hi; amah in a kinawtngil thaltang bangin kei hong bawl a, a hiamsa-in zat pah dingin a thallawng sungah kei hong koih hi. Amah in kei kiangah, “Nang in, keima liatna a kilangsak ding ka nasempa Israel na hi hi,” hong ci hi. Ahih hangin keimah in, “Na ka sem a, ahi zongin a kiman’na om lo hi; Ka thatang khempeuh ka beisak a, ahi zongin bangmah ka tangtun kei hi. Ahi zongin ka ngah ding na, Topa ’ khut sungah om a, ka sepna thaman Pasian kiangah om hi. Ama kiangah Jakob paipih kik a, ama kiangah Israelte a kikaihkhop theih nadingin, Topa ’ mai-ah kei hong kipahtawi a, Pasian pen keima thahatna suak-in, ama nasem dingin ka nu gilsung panin keimah hong piangsak Topa in tu-in thu hong gen a— amah in, “Jakob minamte a laamto ding leh ka kepsa Israel mite a ngei uh a bangsak kik ding in keima nasem na hihna pen a baih lua mahmah nasep ahi hi; keima hotkhiatna in lei mong dong a tun’ theih nadingin Gentailte tungah khuavak dingin nang kong pia ding hi,” hong ci hi. Israel a Tankhia-pa leh ama Siangtho Pa ahi Topa in, nakpi takin simmawhna a thuak, minamte in a muhdah, gam ukte’ nasempa tungah: “Nangmah hong teel, Israelte’ Siangtho Pa, a thuman Topa ’ hangin, mite na hotkhiatna thu kumpite in a muh ciangun zahtakna tawh na mai-ah hong ding ding uh a, na mai-ah uliante, hong kun ding uh hi,” hong ci hi. Topa in ama mite kiangah, “Note hotkhiat ding hun a tun ciangin maipha kong pia ding a, huhna nong ngetna uh kong pia ding hi. Note hong kemin kong hu ding a, note tung tawnin mi khempeuh tawh thuciamna ka bawl ding hi. A kinusia na gam puahpha in a sung uhah, note a luah dingin kong teengsak kik ding hi. Thongkia mite tungah, ‘Hong paikhia un,’ ci-in, khuamial sunga om mite tungah, ‘Hong pusuak un,’ ka ci ding hi. Amaute pen lam tawntung ah an a ne, mualpawn a sang munte khempeuh ah, nuam takin a gamta tuute tawh kibang ding uh hi. Amaute gil kial lo, dangtak lo ding uh a, huihsa in hita leh nisa in hita leh amaute sukha lo ding hi, bang hang hiam cih leh amaute a hehpihpa in amaute lamkaih ding a, lui tui kiangah amaute paipih ding hi. Keimah in ka mite’ adingin mual liante kantanin lampi ka ziik sak ding a, ka lam lianpite ka phongto ding hi. Ka mite a gamlapi panin hong pai ding uh a, leilu lam gam leh nitumna lam gamte panin hong pai-in, pawl khatte, leitaw lam Sinim gam panin hong ciah ding uh hi,” a ci hi. Vantung aw, lungdamin la sa un, leitung aw, lungdamin diang in; mual liante aw, lungdamin la sa-in awng khia un! Bang hang hiam cih leh Topa in ama mite hehnem ta a, gimna a thuak ama mite hehpih ding hi. Ahih hangin Jerusalem mite in, Topa in eite hong nusia khin a, i Topa in eite hong mangngilh khin hi,” a ci uh hi. Ahih hangin Topa in, “Ama gilsung pan-a a suak nau hehpih lo ding zahin nupi khat in ama nawi a teep naungek mangngilh thei ding ahi hiam? Hihte nangawn in mangngilh kha thei ding hi, ahi zongin ke’n kong mangngilh kei ding hi. Jerusalem aw, ka khut peekte sungah nang kong gelh khin zo a, na kulhpite ka mai-ah om den hi. Nang hong bawlte in nang hong susiate nuai-siah ta uh a, nang hong siasakte nang kiang panin taikhia ta uh hi. Na kimkotah khuadak to in la, mu in; na mi khempeuh hong kikhawm uh a, nang kiangah amaute hong ciah uh hi. Keimah in a nungta Topa ka hih mah bangin, na mite khempeuh hangin na kisial ding a, mothak nu in a zat bangin amaute khempeuh kizepna-in na ok ding hi. “A kisia, a kinusia nangma munte leh a kisusia nangma gamte in, nangma tunga a teeng mite’ adingin kawcik lua taktak ding a, nang hong valhtum mite pen gamlapi-ah om ding uh hi. Na kikhen uh hun, na dah hun sungun a suak mite in nangma kiangah, ‘Kote’ adingin mun kawcik lua hi; ka om nading uh mun hong bawlsak in,’ hong ci ding uh hi. Tua ciangin nang in na lungsim sungah: ‘Kua in kei adingin hihte hong hin’ khiatsak ahi hiam? Kei dah in tang-awl-in ka om a, sal-in hong kikoihin, hong kinial hi, hihte kua in hong khoisak ahi hiam? En un, keimah guakin hong kinusia hi; tua ahih ciangin koi lai panin hihte hong piang ahi hiam? na ci ding hi,” a ci hi. Topa Pasian in: “En un, Gentailte tungah ka khut ka laamto ding a, mite tungah ka lim ka lakto ding hi; amaute in a ang sung uhah na tapate tawi-in hong paipih ding uh a, a liangko tung uhah na tanute hong pua ding uh hi. Kumpite pen nang hong kem pate hi ding a, kumpinute pen nang hong khoi na nute hi ding hi. Amaute in a maitang uh lei lak ngatin nang kiangah hong kun ding uh a, na khe-a leivuite liak ding uh hi. Tua ciangin keimah in Topa ka hihna na thei ding hi; kei sungah a lamente maizum lo ding hi,” a ci hi. Galhangpa kiang panin nate kilakhia zo ding a, thu khauhpa’ mat mite kihonkhia zo ding ahi hiam? Topa in: “A galhangpa’ mat salte kilakhia ding a, thu khauhpa’ na kilakhia ding hi; nang hong dem mite ke’n ka dem ding a, na tate ka honkhia ding hi. Nang hong nengniam mite pen amau’ satak mah ka ne sak ding a, zukham bangin amau’ si mah kham ding uh hi. Tua ciangin, kei pen, Jakob’ Vanglian Pa, nang hong Tankhiapa, nang hong Honpa Topa ka hihna mi khempeuh in thei ding hi,” a ci hi. Topa in: “Amah ka ciahsakna, na nu a kimakna lai koi-ah om ahi hiam? Tua ahih kei leh, nang kong zuakna ka lei batnate koi pen ahi hiam? En un, nomau’ mawhna hangin note hong kizuak a, nomau’ khialhna hangin na nu uh kipaikhiasak hi. Bang hangin, kong pai ciangin mi khat zong om lo ahi hiam? Kong sap ciangin hong dawng ding khat zong om lo ahi hiam? Hong hon zo lo zah dingin ka khut tom lua ahi hiam? Tua ahih kei leh note khahkhiatna ding thahatna nei lo ka hi hiam? En un, keima taiina tawh tuipi ka keusak a, gunte pen sehnel gam ka suaksak hi; tui om loh manin a ngasate uih a, dangtakin si uh hi. Vantungte khuamial ka silhsak a, amau’ kituam nadingin puanhampi ka bawl hi,” a ci hi. Thugenna tawh a lunggim mite tha a pia thei kammal ka theih nadingin, Topa Pasian in ka gen ding thu hong hilh khin hi. Ama hong hilhnate a ngai dingin zingsang simin hong phong hi. Topa Pasian in ka bil hong honsak a, amah ka lehdo kei a, ka nungngat kei hi. Hong satte tungah ka nung ka dawh a, ka khamul hong kai mite tungah ka paang ka dawh hi; maizumna leh cilphihna panin ka maitang ka hei kei hi. Bang hang hiam cih leh Topa Pasian in kei hong huh hi; tua ahih ciangin cih nading thei loin ka om kei hi; tua ahih ciangin ka mai pen a sak suang ka bangsak a, kei hong maizum sak lo ding hi, ci-in ka thei hi; ka thumanna a langsakpa Pasian a nai-ah hong om hi; kei langah kua’n hong mawhsak ding ahi hiam? Thukhen zumah kimaisak nung, Thukhen zumah kua’n hong khia nuam ahi hiam? Hong langpang dingin hong kuan ta hen. En un, Topa Pasian in kei hong huh hi; kua in kei mawh hi ci-in gen thei ding ahi hiam? En un, amaute khempeuh puan bangin paatkhia ding uh hi; nget in amaute netum ding hi. Topa kihta a, a nasempa’ thu a mangte khempeuh in, khuamial sungah khuavak nei loin na pai hangun, Topa muang un la, Pasian suan’ in nei un. Ahih hangin mei vaksak a, meilah kuang a kiguan note khempeuh aw, tu-in na meivakna leh na meilah kuang pana khuavak sungah pai-in, kalsuan un; hih in ka khut pana na ngah ding uh ahi hi. Lungkhamin na lumsuk ding uh hi. Dikna a zui, Topa a zongte aw, ngai un; note hong ki-eu khiatna suangpi leh note hong kitawh khiatna khuk en un. Na pa uh Abraham leh note’ pian’na Sarah ngaihsun dih un; bang hang hiam cih leh khat bek ahih lai takin amah ka sam a, amah thupha pia-in tampi ka phasak hi. Bang hang hiam cih leh Topa in Zion hehnem ding hi; a kisia ama munte khempeuh puah pha-in, ama gamlakte Eden huan ka bang sak ding a, a kizang thei lo ama gamte Topa ’ huan ka bang sak ding hi; ama sungah lungdamna leh kipakna, lungdam kohna leh la sakna aw om ding hi. “Ka mite aw, ka thugen hong ngai un. Minamte tungah thukham ka hilh a, keima thutan’na in amaute tungah khuavak tun ding hi. Manlangin hong pai-in amaute ka honkhia ding hi. Ka gualzawh ding hun hong naita hi. Keimah in minamte ka uk ding hi. Tuipi gei-a gamte in kei hong muang uh a, amaute in keima hotkhiat ding hong ngak uh hi. Dakto-in vantungte en un la, leitung zong ensuk un; bang hang hiam cih leh vantungte in meikhu bangin mangthang-in, leitung in puan bangin paatkhia ding a, ama tunga teengte pen thokang bangin si ding uh hi; ahih hangin keima hotkhiatna kip tawntung ding a, keima dikna bei ngei lo ding hi. “Thumanna a thei, na lungsim sung uhah keima thu a vom mite aw, ka thu ngai un; mihingte’ kosiatna kihta kei un la, amaute’ simmawhna hangin lungkia kei un. Bang hang hiam cih leh nget in puan a nektum bangin amaute beimang ding a, lungno in samul puan a pehtum bangin amaute maimang ding hi; ahih hangin keima dikna om tawntung ding a, khang tawntungin ka hotkhiatna kip ding hi.” Khanglo in, Khanglo in, thakhauh in, Topa ’ khut aw; khang sawtpi, hun lui lai-a bangin na vangliatna zangin hong huh in. Rahab a satzan gawppa, gulpi a sunpa nangmah hilo na hi hiam? Tuipi, tui thukpite a keusak; a kitankhia mite’ kantan dingin tuipi thukte lampi-in a bawlpa nangmah hilo na hi hiam? Topa tatsa mi a kithehthangte hong ciahkik ding a, lasakna tawh Zion ah hong pai ding uh hi; amaute, lungdam tawntung ding uh a, amaute in lungdamna leh kipakna ngahin dahna leh khuisatna nei nawn lo ding uh hi. “Kei, keimah in note hong hehnempa ka hi hi; lopa bang ahi, a si thei mi, mihing tate lellelte bang hangin kihta na hi uh hiam? Vantungte zal-in, lei bulpite a koih note a hong bawl Topa hong mangngilh khin ta na hi uh hiam? Note hong susia dingin a kithawi, no a hong nengniamte’ hehna, bang hangin kihta-in om tawntung na hi uh hiam? Amaute’ hehna in note hong sukha zo het lo ding hi. Thong sunga kikhum mite kikhah baih ding hi; amaute sau veipi nungta ding uh a, annek tuidawn kitasam lo ding uh hi. Bang hang hiam cih leh keimah in tuipi tok gawpin tuihualte a hawksak Topa, note’ Pasian ka hi hi—Vanglianpen Topa in ama min ahi hi. Vantungte zalin, lei bulpi ka phut a, Zion kiangah, ‘Nang in keima mi na hi hi. Na kam ah ka thu kong koih khin a, ka khut lim tawh nang kong hu hi,’ ka ci hi, Topa ’ khut sung panin ama hehna hai a dawn khin, hoina haipi a tawdat dongin a dawn khin Jerusalem aw, nangmah khanglo in nangmah khanglo in la, dingto in. Na tate khempeuh sung panin nang a hong makaih ding om lo a, na khoisa tapate khempeuh lak panin na khut a hong len ding om lo hi. Nang tungah siatna leh maiman’na, kialpi leh namsau hih gentheihna thu nih hong tung zo hi—kua in nang hong dahpih ding ahi hiam? kua in nang hong hehnem ding ahi hiam? Na mite gim khin a, ngenthang sunga sanang a awk bangin lamlian kiu khempeuh ah amaute lum uh hi; Topa ’ hehna, na Pasian’ taiina amaute in thuak uh hi. Tua ahih ciangin gimna a thuak, zu ne lopi-a zukham a bang note in hih thu za un: Ama mite’ a hu Topa, Topa ahi, na Pasian in hih bangin ci hi: “En un, note’ khut sung panin hoina hai ka lakhia khin hi; ka hehna haipi na dawn nawn kei ding uh hi; note kiangah, ‘Na tung uhah kong pai theih nadingun kunsuk un,’ hong ci no hong bawlsiate’ khut sungah tua haipi ka koih ding hi; note in na nungzang uh lei lak bangin bawlin, amaute’ pai nadingin kongzing bangin na bawl khin uh hi,” a ci hi. Zion aw, khanglo in, khanglo in la, na tha khauhsak in; khuapi siangtho Jerusalem aw, na puan hoihte silh in; bang hang hiam cih leh vun ki-at lo mite leh a nin mite nang sungah hong pai nawn lo ding hi. A kimancip Jerusalem mite aw, leivui panin kising un la, ding to un; a kiman Zion mite aw, na ngawng panun hong kihenna khaute sut un. Bang hang hiam cih leh Topa in: “Man nei loin note hong kizuak a, sum pia loin note hong kitankhia ding hi. Bang hang hiam cih leh Topa Pasian in hih bangin ci hi: Izipt gamah peemta dingin ka mite a masa in pai a, thu om lopi-in Assiria mite in amaute nengniam uh hi. Tu-in Babilon ah tua mah bangin amaute tungah piang leuleu hi. Thu om lopi-in sal-in om uh hi. Amau a ukte, kihihsakna tawh awng uh a, sunthapai-in keima min kisimmawh hi. Tua ahih ciangin ka mite in keima min hong thei ding uh a, thu a genkholpa pen keimah ka hihna tua ni ciangin amaute in hong thei ding uh hi; keimah in hih lai-ah ka om hi,” a ci hi. Thu hoih hong puak, kilemna thu a genzaak, thu hoih thupha hong puak, hotkhiatna thu a genzaak, Zion tungah, ‘Na Pasian in uk hi,’ ci-in mualte kantanin thu hong gente’ khe bangzahin hoih ahi hiam? Ngai un, na galvilte un a aw uh sangsak a, amaute lungdamin lasa khawm uh hi; bang hang hiam cih leh Zion ah Topa hong pai kikna amaute in maitang kituahin mu uh hi. A kisia Jerusalem munte aw, lasa-in kiko khawm un; bang hang hiam cih leh Topa in ama mite hehnem ta a, Jerusalem tankhia khin ta hi. Topa in minam khempeuh mai-ah ama khut siangtho lakkhia khin a, ama mite honkhia hi. Lei mong khempeuh in i Pasian’ hotkhiatna mu ding uh hi. Kihem un, kihem un, Babilon panin paikhia un la, a nin nate lawng kei un; Topa ’ beel leh kuang a puate aw, ama sung panin paikhia un la, nomau kisian’suah tawm un. Note’ mai-ah Topa pai ding a, Israel Pasian pen note’ nungah hong cingpa hi ding ahih manin, note pen galtai-in paikhia loin, kinawhsa-in na paikhia kei ding uh hi. Topa in, “En un, ka nasempa pilna tawh gamta-in, amah a lianin kikoihin kilaam to ding a, sang mahmah ding hi. Mi tampite in amah lamdang sa uh hi— mihing a bang nawn lo zah dongin nakpi takin a mai sia a, mihing a sun nawn lo zah dongin a meel sia hi— tua ahih ciangin amah in minam tampite dipkua sak ding a, ama hangin kumpite in a kam uh cih ding uh hi; bang hang hiam cih leh amaute tunga a kigen ngei lo nate mu ding uh a, amaute in a zak ngei loh uh nate theitel ding uh hi,” ci hi. Tua ciangin mite in, “I zaksa thu kua in um thei ding ahi hiam? Hih bang thu-ah Topa ’ vangliatna khut kua in bang ci muh theih ding ahi hiam? Bang hang hiam cih leh amah pen kungno khat leh leikeu sunga zung khat bangin ama mai-ah khangto hi; eite’ et dingin ama’ limin deihhuaina mel nei lo a, eite’ deih dingin hoihna nei lo hi. Amah pen mite in simmawhin nusia hi; gimna leh natna a thuak mi ahi hi; mite in en nuam loin a mai uh a humsan mipa bangin amah kisimmawh a, eite in amah i thusim kei hi. Amah in eite’ natna teng thuakin, eite’ gimna teng pua khin taktak hi; ahi zongin eite in amah pen, Pasian in a gimsak, a vuak, gimna a thuakpa-in i ngaihsun hi. Ahih hangin eite’ khialhna hangin amah kiliamsak a, eite’ mawhna hangin amah kisatnim hi; Ama gimthuakna hangin nopna i ngah a, ama liamna hangin damna i ngah hi. Eite khempeuh in tuu bangin lam i khial khin a, eite khempeuh eimau san ciatah i pai khin hi; Topa in eite khempeuh’ mawhnate ama tungah suan hi. Amah kinengniam-in, amah gimna a kithuaksak hangin amah kam khat beek pau lo hi; sa gote kiangah a kipaipih tuuno leh a mul mette mai-ah a kipaipih tuu a ham loh mah bangin, ama kam khat beek pau lo hi. Nenniamna leh thukhenna tawh amah kipaikhiatpih hi; a hingte’ gam panin amah kikhenkhia-in, ama mite’ khialhna hangin amah in gimna thuak hi, ci-in ama khang mite kua in thei ahi hiam? Amah in mawhna bawl lo, amah in zuau gen ngei lo napi-in, amaute in, mi gilote tawh hankhuk kibang, siatna bawlte tawh hanphual kibang bawl sak uh hi,” ci uh hi. Ahih hangin amah a kisatnim ding pen Topa ’ deihna ahi hi; amah in natna thuak sak hi; mawhna hangin ama pumpi a kipiak ciangin amah in a suan leh khakte mu ding a, ama khan’ sau ding hi; Topa ’ deihna ama khut sungah pung ding hi; Amah in a thuak khit ciangin nuntakna khuavak mu-in, a lungkim ding hi; ama theihna tawh a dik ka nasempa in mi tampi diktangsak ding a,, amah in amaute’ mawhnate pua ding hi. Tua ahih ciangin amah pen mi liante tawh nate ka hawmsak ding a, amah in mi hatte tawh nate hawm ding hi; bang hang hiam cih leh amah in sihna dongin a nuntakna piakhia a, khialhna a nei mite tawh kisim khawm hi; ahih hangin amah in mi tampi’ mawhna pua a, khialhna neite’ adingin thuumna bawlsak hi. Ta a suak lo a ciing numei aw, lasa in; nausuak natna a thuak ngei lo mi aw, lasa khia in la, lungdamna tawh kiko in! Bang hang hiam cih leh a kinusia nu’ tate pen a kiten’pih nu’ tate sangin tamzaw ding hi, Topa in ci hi. Na buk mun khan in la, na teen’na puanbukte kizalsak in; cil bawl kei in, na khaute sau sak in la, na khetphimte kip sak in. Bang hang hiam cih leh taklam leh veilamah nangmah kizeelin, na suan leh khakte in minamte luah ding uh a, a kinusia khuapite mi tawh dim sak ding uh hi. “Lau kei in, maizumna na thuak kei ding hi; cih nading thei loin om kei in, maizumin nang hong kikoih lo ding hi; bang hang hiam cih leh na khangno lai-a na zumhuaina leh meigon’na hanga hong kikonate na phawk kha nawn kei ding hi. Bang hang hiam cih leh nangmah hong Bawlpa in na pasal hi a, ama min in Vanglianpen Topa ahi hi; Israelte’ Siangtho Pa in nangmah hong Tankhia-pa hi a, amah pen leitung buppi’ Pasian kici hi. Khangno lai-a zi neih a kima, kinusia-a a dah zi bangin Topa in nang hong samkik hi, na Pasian in ci hi. Tomno sung nang kong nusia pak a, ahih hangin hehpihna lianpi tawh nang kong lakik ding hi. Heh luatna hangin tomno sung nang kiang panin ka maitang ka seel a, ahih hangin tawntung itna tawh nang tungah hehpihna kong nei kik ding hi, nangmah hong Tankhia Topa in ci hi. “Bang hang hiam cih leh hih pen kei adingin Noah’ hun mah tawh kibang hi: Noah’ tuite leitungah hong pai nawn lo ding ci-a ka kiciam mah bangin nang tungah heh nawn loin nang hong tai nawn lo dingin ka kiciam hi. Bang hang hiam cih leh mual liante kihemin, mual neute a kikhin zongin nang kiang panin ka itna kip paikhia ngei lo ding a, na nopsakna ding keima thuciamna kiin lo ding hi, nang hong hehpih Topa in ci hi. “Gimna a thuak, huihpi’ nawk gawp, hehnepna a ngah lo khuapi aw, en in, na suangte, suangvui hoih tawh ka ciang ding a, na bulpite pen suangmanpha tawh ka hih ding hi. Na khum dawnte suangmanpha tawh, na kulh kongpite suangsan tawh, na kulh khempeuh a manpha suang tawh ka bawl ding hi. Topa in na tapate khempeuh hilh ding a, na tapate daupai mahmah ding hi. Thumanna tawh nang hong kikipsak ding hi; nenniamna tawh na kigamla ding a, nang na lau kei ding hi; kihtakna tawh na kigamla ding a, nang nai-ah hong pai lo ding hi. Mi khatpeuh in kidona a pian’sak leh, tua pen keima kiang pan hilo hi; note tawh kidona a piangsak peuhmah note’ hangin puk ding hi. En un, pum zaap-in ama kizat nading ciat a sem dingin hiam a bawl siksekpa ka piangsak khin hi. A susia dingin a susia gawp theipa zong ka piangsak khin hi; nangmah do nading a, a kibawl hiam peuhmah mavang lo ding a, thukhenna sungah nangma langa a pang mi khempeuh na nial gawp zo ding hi. Hih in, Topa ’ nasemte’ gamluah leh keima kiang pan-in amaute’ dikna a kilahna ahi hi, Topa in ci hi.” A dangtak mi peuhmah tui phualah hong pai un; an nei lote aw, hong pai-in lei un la, ne un! Hong pai un, sum leh a man ding pia loin leenggahzu leh bawngnawi lei un. An ahi lo nate’ adingin bang hangin na sum uh zang a, hong gilvah sak thei lo nate adingin bang hangin na sem na hi uh hiam? Keima thu lim takin ngai-in, a hoih nate ne un la, an limte ah nuamsa-in om un. Ka mite aw, ka thu ngai un la, kei kiangah hong pai un; nuntakna na ngah theih nadingun hong za un; David tungah ka kamciam mah bangin, keima itna kip ahi tawntung thuciamna note tawh ka bawl ding hi. En un, amah pen mite tungah teci ding, mite a makai ding leh a ukpa dingin ka koih hi. En un, note in na theih loh uh minamte na sam ding uh a, amah in note hong minthang sak zo ahih manin, Topa na Pasian leh Israelte’ Siangtho Pa’ hangin note hong thei lo minamte note kiangah hong tai ding uh hi. “A kimuh theih hun lai-in Topa zong un la, a nai om lai-in amah sam un; mi gilopa ama gitlohna nusia sak un la, thuman lopa ama ngaihsutna nusia sak un; amah in a hehpih theih nadingin Topa tung leh i Pasian tungah amah paikik sak un, bang hang hiam cih leh a mawhna maisiangsak ding hi. Bang hang hiam cih leh keima ngaihsutnate nomau’ ngaihsutna bang hi lo a, ka paiziate nomau’ paizia bang hi lo hi, Topa in ci hi. Vantungte pen leitung sangin a san’ zawk mah bangin, keima paiziate, nomau paizia sangin sangzaw a, ka ngaihsutnate, nomau’ ngaihsutna sangin sangzaw hi. “Bang hang hiam cih leh vantung panin guahtui leh vuuk hong pai-in, amaute ciahkik loin leitung kawtsakin, kungnote meengin selkhia sak a, khaivawhpa khaici pia-in a nepa tungah an a piak mah bangin, keima kam panin a paikhia ka thu zong tua mah bang ding hi; a hawmpi-in kei kiangah hong tungkik lo ding a, keima ngimna-sa bangin tangtung sakin, amah ka sawlna thu tangtun’ ding hi. “Bang hang hiam cih leh lungdamna tawh Babilon panin na paikhia ding uh a, nopsakna tawh hong kipaikhiatpih ding hi; note mai-a mual liante leh mual neute in lasa-in awng ding uh a, gamsunga sing khempeuh in a khut uh beeng ding uh hi. Ling tangin taksing hong po ding a, lingkung tangin mui kung hong po ding hi; tua pen Topa ’ adingin phawk tawntungna, a kilakhia lo ding a tawntunga om lim khat hi ding hi,” a ci hi. Topa in hih bangin ci hi: “Sawt loin note hong honkhia ding a, ka dikna hong lakkhia ding ka hih manin thutang un la, thumanin gamta un. Hih banga a gamta mite, hih thu a lenkip mihingte, sabbath tangin a siasak lote, siatna bawl nading panin a kikemte in thupha ngah mi ahi hi,” a ci hi. Topa pawlin a beel gamdang mipa in, “ Topa in ama mite kiang panin kei hong khenkhia taktak ding hi,” ci kei hen la; a kiget mipa in, “En un, keimah in Pasian mite lakah a kihel thei ding ka hi kei hi,” ci kei hen. Bang hang hiam cih leh Topa in hih bangin ci hi: “Keima sabbath nite tangin, kei hong lungdamsak thei nate teel a, ka thuciamna a lenkip a kiget mite tungah, ka innsung leh ka huang sungah tapa leh tanute sangin a hoihzaw phawkna leh min ka pia ding a, a mang ngei nawn lo ding tawntung min, amaute tungah ka pia ding hi. “Ama na a sem ding, Topa ’ min a it ding, ama nasem hi dingin Topa pawlin a beel gamdang mite, sabbath ni tangin a siasak lo mi, ka thuciamna a lenkip mi peuhmah— hih mite ka mual siangtho ah paipihin keima thungetna inn sungah ka lungdam sak ding a, amaute’ meihal biakna leh biak piaknate ka biakna tau tungah kisang ding hi; bang hang hiam cih leh ka inn pen mi khempeuh’ adingin thungetna inn kici ding hi. Israel a kikhenthangte a kaikhawm Topa Pasian in, a kikaikhawmsa mite banah midangte ama kiangah ka kaikhawm lai ding hi, ci hi,” a ci hi. Lo sunga om ganhing khempeuhte— gamlak-a om ganhing khempeuhte aw, a netum dingin hong pai un. Ama galvilte mit taw uh a, amaute khempeuh in bangmah thei lo uh hi, amaute khempeuh ui a ham thei lote hi uh a, amaute in tawng thei lo uh hi, mot paupau, lum lum, lu su-su-in om nuam sa uh hi. Uite in nakpi takin duhna lian nei uh a, amaute in kham hun cih nei ngei lo uh hi. Tuucingte in zong thu theihna nei lo uh hi; amaute khempeuh amau tum ciatin gamta uh a, a vekpi-un amaute’ ngah nading lam lam ciatah kihei uh hi. Amaute in, “Hong pai un leenggahzu la ni, kham theih zu ne-in gilvah ni; zing ciangin zong tu ni mah bangin gen zawh lohin nuam ding hi,” ci uh hi. Thuman mipa si a, kuamah in a lungsim sungah tua thu ngaihsutin nei lo hi, kuamah in a theih loh kalin thuman mite si uh hi. Bang hang hiam cih leh tuahsiatna panin thuman mipa kilakhia a; nopsakna sungah amah tum hi, thutang-a gamta mite in a sihna uhah nopna ngahin tawlnga uh hi. No, aisan numeite’ tapate, numei tawh a mawh mite leh numei pangtatte’ tu-le-tate aw, hih lai-ah hong nai un. Kuam sunga suangmaite lakah milimte na la uh a, tua suangmaite na bia uh hi. Tuate tungah tui tawh biak piakna sungin, an tawh biak piakna na paipih uh hi. Hih thute’ hangin kei lungdam ding ka hi hiam? A lian a sang mual tungah nu-le-pa mawhna na bawl uh a, tua munah biakna pia dingin na paito uh hi. Kongkhak leh kongkhakmung nungah nangmah in na milimte na suang hi; nang in keimah hong nusia-in, na puante na suah a, nang hong luppih dingin na cialte tawh na lupna zai deda tungah na kahto uh a, tua lai-ah na hukna teng na kamsak hi. Molek kiangah pai dingin sathau tawh khual na zin a, na paknamtuite tawh na siam tawpin na kipuah hi; nang in gamlapi-ah na kamtaite na sawl a, Leinuai dong nangawn ah na sawl hi. A gamla na khualzinna tawh nang na gim a, ahih hangin nangmah in, “Lametna om kei,” na ci kei hi; nangmah in thahatna thak na ngah a, tua ahih manin na gim kei hi. Nang zuau-in, kei hong phawk loin, kei nong ngaihsut loh nadingin na kihtak hih pasiante bang ahi hiam? Sau veipi sung pau loin ka om hit-hiat manin kei hong zahtak lo na hi hiam? Na gamtatna a manin na ngaihsun hi. Ahih hangin na gamtatnate ka pholak ding a, na milimte in nang hong huh zo lo ding hi. Nang cimawh-in na kiko ciangin na milim kaihkhopte kihonsak in! Huih in amaute mutkhia-in, husan’na in amaute seem khia ding hi. Ahih hangin kei hong beel mi in leitang ngah ding a, ka mual siangtho luah ding hi. “Zik un, zik un, lampi bawl khol un, ka mite’ lampi a dongkhak thei ding na khempeuh lakhia un,” kici ding hi. Bang hang hiam cih leh a sang, a lian, tawntung sunga a teeng Pa, ama min Siangtho ahi pa in hih bangin ci hi: “Keimah in a sangna mun leh a siangtho munah ka om a, a kiniamkhiat mite’ lungsim leh a kisik mite’ lungsim a thakhauhsak kik dingin kisikna leh kiniamkhiatna lungsim a neite tawh zong ka omkhawm hi. Ka mite tungah nuntakna hu ka pia hi. Amaute ka mawhsak paisuak kei ding a, amaute tungah ka heh tawntung kei ding hi. Amau’ huaiham-mawhna hangin ka heh a, ka heh lungsim tawh amaute daan pia-in ka mai ka sel hi. Ahih hangin amaute a lungsim khauhin, a gamtat ngei bangun gamta veve uh hi. Amau’ mawh gamtatnate ka mu khin a, ahih hangin amaute ka damsak ding hi; amaute makaih-in hehnepna ka pia ding a, a dah a kapte muk panin phatna ka piangsak ding hi. Nopsakna, nopsakna, a gamla leh a nai mi khempeuh tungah om ta hen; keimah in amaute ka damsak ding hi, Topa in ci hi. Ahih hangin mi gilote pen a kilok tuipi tawh kibang uh hi; bang hang hiam cih leh tuipi khawlcip thei lo a, a tuite in buan leh ninte laamto uh hi. Mi gilote’ adingin nopsakna om lo hi, ka Pasian in ci hi. “Na aw sit loin nakpi takin kiko in la, peengkul aw bangin gingsak in; ka mihingte tungah amau khialhnate gen in la, Jakob innkuan tungah amau mawhnate gen in. Amaute pen, thuman-a a gamta, amaute’ Pasian’ biakna ngeina kipte a nusia lo minam bang keekin, ni simin amaute in kei hong zong uh a, keima lampite thei nuam uh hi; amaute in keima kiang panin a maan thukhenna hong ngen uh a, Pasian kiangah nai nuam uh hi. “Kote in an tang napi-in bang hangin hong mu lo na hi hiam? Kote kiniamkhiatin om napi-in bang hangin hong thei kha lo na hi hiam? ci uh hi. En un, note in an na tan’ ni-un nomau’ deihna na zong uh a, na nasemte uh na nengniam uh hi. En un, note in a kitawng ding leh a kilai ding leh giloin khuttum tawh a kitum ding bekin an na tang uh hi. Tu ni-a hih bang lel-a antangin na thungetna uh hong kingai ding ahi hiam? Maugua kun bangin na lu uh kunsakin, puanhampi leh vut tungah lumin, nomau na kiniamsak tawmnate uh kei’ deih antan’na sa na hi uh hiam? Hih bang hihna pen antan’na leh Topa ’ san’ theih hi ci ding na hi uh hiam? “Kei’ deih antan’na pen hih bang ahi hi! Gitlohna khaute phelin, hakkol savun khaute phel a, a kinengniam mite khahkhia-in, hakkol khempeuh suktan ding ahi hi. Na an uh a gilkialte tawh ne khawmin, inn nei lo mi zawngte a buk nading vaihawm sakin; tangguak-a om mi na muh uh ciangin puansilhsak a, na mi pihte uh kiang panin bu lo ding hilo na hi uh hiam? Tua ciangin ka maipha pen phalvak tung bangin note tungah hong taang khia ding a, manlang takin na liamnate uh hong dam ding hi. Note dikna na mai uh ah om ding a, note hong honin, na nung uh kong dal ding hi. Tua ciangin thu nong nget uh ciangin kong pia ding a, nong sap uh ciangin kong dawng ding hi. Mi bawlsiatnate khawlin, mi simmawhna khutme tawh kawk in kam gilo na paunate uh na khawl uh a, gilkial mite an pia-in, a kinengniam mite tungah amau’ kisapnate na piak uh leh, na kimkot uh a, khuamial pen khuavak hong suak ding a, na lung ziin’na uh sun nitaang hong bang ding hi. Tua ciangin note lam kong lak tawntung ding a, ni tangin a kap leitangah na kisapnate uh kong lungkim sak ding hi. A cidam a thahatin kong om sak ding hi. Tui tampi a ngah tawntung huan, a kang ngei lo ciktui tawh na kibang ding uh hi. Tang lai-a a kisia na munte uh na lamkik ding uh a, khang tampi sung a kisia bulpite na dingtosak kik ding uh hi; note pen, kulhsia a puahkik, teen’ nadingin mun siate a ngei a bangsak kikte hong kici ding hi. “Note in sabbath siangthosakin, keima ni siangtho ni-in na nasepna panun khawlin, sabbath ni pen deihhuai sa-in, Topa ’ ni siangtho pen pahtawi-huai na cih uh a, note in pahtawi-in, note’ deihna bang zui loin, note’ ut bang hih loin mot pau loin na om uh leh, Keimah biakna hangin lungdamna na ngah ding uh a, leitang a sanna munte ah kong tungsak ding hi. Na pu uh Jakob tungah ka piak leitang luahin nuam na sa ding uh hi. Topa ahi keimah in hih thu ka gen khin hi,” a ci hi. En un, a honkhia zo lo dingin Topa a ban tom lo a, khua a za thei lo dingin a bil ngong lo hi; ahih hangin note’ mawhnate in note leh na Pasian uh kikhenna piangsak a, amah in hong zak theih loh nadingin na khialhnate un ama maitang liah hi. Bang hang hiam cih leh na khutte uh mi thahna sisan tawh nin a, na khutmete uh mawhna tawh nin hi; na mukte un zuau thu gen a, na leii un gitlohna thu gen hi. Kuamah in thutang tawh thu na nei kei uh a, thuman tak tawh kuamah thukhen zumah na pai kei uh hi; note in bangmah lopi suan’in nei-in zuau thu na gen uh a, siat nading thu ngaihsunin, gitlohna na piangsak uh hi. Na ngaihsutnate uh gul gunei tuii bangin gu nei hi a, na vaihawmnate uh maimom khau puan tawh kibang lel hi. Gul gunei tuii khat sukham lehang a dang khat hong tui zel hi. Na maimom khau puante uh kizang thei lo ding a, kuamah in silh lo ding uh hi. Gitlohna gamta uh a, ngongtatna a khut sung uhah om hi. Siatna bekbek na gelgel uh a, na hih ding uh na ngaklah mahmah uh hi. Mawh nei lo mite sisan luan ding haksa na sa kei uh hi. Na paina khempeuh uhah siatna vive om kawikawi hi. Note’ Omna peuhah Kuamah lungmuang thei lo a, note’ sepna khempeuh ah thuman khat beek om lo hi. Na lungsim uh lampi kawite bang a, hong zui khate in thunuam mu ngei lo uh hi. Tua ahih ciangin, thutang eite tawh kigamla-a, eite hong gimsakte kiang panin Pasian in hong hotkhiat lohna thu i thei hi. Eite in khuavak i lamen a, ahi zongin khuamial bekbek i tuak hi. Mittaw bangin kawm i zawt a, mit nei lote bangin i mai hi; suntang laipi-in khuamial sung bangin i tuk a, a hat mite lakah mi si tawh i kibang hi. Eite khempeuh vom bangin i humham a, vakhu bangin i thuumthuum hi; eite in thutang i zong a, ahih hangin khat zong i mu kei hi; hong hotkhiat ding i ngen a, ahih hangin bangmah hong piang lo hi. Bang hang hiam cih leh nangma tungah kote’ thu-palsatnate tampi pha a, ka mawhnate uh in kote’ langah teci hong pang hi; kote’ thu-palsatnate, ka mawhnate uh ka thei uh hi. Nangmah hong lehdo-in, nang kong nungngat uh a, nangma thu kong zui kei uh hi. Midangte nengniamin nang kong lehdo uh hi. Ka ngaihsutnate uh khial a, ka thugente uh zuau thu vive ahi hi. Thutang kihawlkhia a, thuman in hong naih thei lo hi. Mi honpite kikhopna munah thuman kizang lo a, thutang tum thei lo hi. Thuman om lo lua ahih manin siatna a pelh mipa pen mi hai-in kingaihsun zawsop hi. Topa in hih thu mu a, thutang om lo ahih manin amah a lungkim lo hi. Amah in kuamah mu lo-a, nenniamna a thuak mite a huh ding mi khat beek a om lohna mu hi. Tua ahih ciangin amaute a honkhia ding, leh a dikna a kip nadingin ama khut a zang ding hi. Amah in thumanna pen awm dalna lum bangin silh ding a, gualzawhna pen sik lukhu bangin khu ding hi. Na khempeuh a manin bawlkik nopna, gimna a piangsakte daan pia-in thukkikna puansilhin, kinna puan tawh kitun ding hi. Amau’ gamtatna bangin amah in thukkik ding a, amah a lang pangte daan pia ding a, ama galte tungah a hehna thukkik ding hi. A gamla pek-a om tuikulh gamte tungah zong thukkikna pia ding hi. Tua ahih ciangin nisuahna pan nitumna kikal-a om mi khempeuh in amah zahtakin, a vangliatna kihta ding uh hi. Bang hang hiam cih leh Topa ’ huih nung bang, tuipi khang bangin amah hong pai ding hi. Topa in ama mite tungah, “Note a hupa Jerusalem ah kong pia ding a, mawhna panin a kihei khia mi peuhmah kong honkhia ding hi. Note tawh hih bangin thuciamna ka bawl hi: Nang tunga a om ka kha leh na kamsung a, ka koih keima thukhamte leh ka thuhilhnate note tungah kong pia khin a, tu-a kipanin a tawntungin note in tua thute zui-in na suan na khakte uh kam pan paikhia lo ding a, a khang khangin na maimangsak kei ding uh hi,” a ci hi. Jerusalem khuapi aw, tho in la, sun nitaang bang in! Topa minthan’na in nangma tung hong taan’ zo hi. Khuamial in leitung tuam a, minam dangte khuamial in tuamcip ding a, ahi zongin nangma tungah Topa ’ khuavak hong taang ding hi. Ama minthan’na in nang hong ompih ding hi. Nangma khuavak sungah minam dangte hong pai ding uh a, nangma taan’khiatna sungah kumpite hong pai ding uh hi. Na kimkotah khuadak in la, mu in; na mite kikaikhawmin a ciah dingin nang kiangah hong pai uh hi; na tapate gamlapi panin hong ciah ding a, naungek bangin na tanute’ ang sungah hong kipua ding hi. Tua ciangin nangmah in mu-in na maitai ding a, na lungsim liingin lungdam ding hi; bang hang hiam cih leh tuipi tung tawnin nangma tungah van hong kipuak ding a, minamte’ hauhna khempeuh nangma tungah hong tung ding hi. Midian mite leh Ephah mite’ kalaohnote, kalaoh honpite in nang hong tuam ding uh a, Sheba gam sunga om khempeuh hong pai ding uh hi. Amaute in kham leh paknamtui hong paipih ding uh a, Topa phatna taangko ding uh hi. Kedar gam tuu honte khempeuh nangma kiangah hong kipuak ding a, Nebaioth mite’ tuutalte nangma deihna ah kizang ding hi; keima biakna tau tungah piak dingin tuate hong kipaipih ding a, keimah in a minthang ka inn ka minthangsak semsem ding hi. Meiipi leeng bangin hong pai henhan hih teembawte, vakhute a buk-ah a leeng bangin hong leeng henhante kua ahi hiam? Hih teembawte pen, tuipi gei leh tuikulh-a om teembawte hi a, Tarshish teembaw lianpite in hong makaih hi. Topa in nang hong minthangsak khin ahih manin, gamlapi panin tua teembawte in nangma mite hong puak uh a, a ngun a khamte uh tawh hong puak khawm hi. Topa na Pasian, Israelte’ Siangtho Pa Pahtawina-a hong puak uh ahi hi. Gamdang mite in na kulhte ciangkik ding a, amau kumpite in nangma na hong sem ding uh hi; bang hang hiam cih leh ka hehna tawh nang kong vat gawp khin a, ahih hangin tu-in keima maipha tawh nang tungah hehpihna kong nei khin hi. Kigual diudeu-a paina ah a kumpite un hong makai-in, mite in minamte’ hauhna nang kiangah hong paipih theih nadingin na kulh kongpite kihong tawntung ding hi; a sun a zanin kikhak lo ding hi. Bang hang hiam cih leh nangma na hong sem lo minam leh kumpi gam beimang ding hi; tua minamte kisia maimang ding hi. Keima biakinn mun a meel hoihsak dingin, Lebanon mual minthan’na ahi, taaksan sing, hiangpa sing leh taaksingte nangma kiangah hong tung ding hi; keima khe ngakna mun ka minthang sak ding hi. Nangmah hong nengniamte’ tate nangma mai-ah kunsa-in hong pai ding uh a, nangmah hong simmawh mi khempeuh na khe mai-ah hong bok ding uh hi; amaute in nang pen Topa ’ Khuapi, Israelte’ Siangtho Pa’ Zion, hong ci ding uh hi. Hong kinusia, hong kimudah, kuama hong nawk loh nang pen, a tawntungin kisak theihna leh khang khat pan khang khat lungdamna ahi dingin kong bawl ding hi. Nupi khat in a ta nawi pia-in limtakin a kep bangin, ninamte leh kumpite in nang hong vakin hong kem ding uh hi. Tua ciangin kei pen Topa, nangmah Honpa, nangmah Tankhiapa, Jakob’ Vanglian Pa ka hihna na thei ding hi. Sumngo tangin kham kong paipih ding a, sik tangin ngun kong paipih ding hi; sing tangin sumngo, suang tangin sik kong paipih ding hi. Nuam na sak nadingun na mangliante uh bawlin, na nasem ukte thuman thutang tawh na ka semsak ding hi. Na gam sungah ngongtatna kiza nawn lo ding a, na gam sungah siatmai-na leh suksiatna om nawn lo ding hi; nangmah in na kulhte pen Hotkhiatna, na kulh kongpite pen Phatna, na ci ding hi. Sun hunin ni pen nangma khuavak hi loin, zan hunin kha pen nangma khuavakna hi nawn lo ding hi; Topa pen a tawntung nangma khuavak hi ding a, na Pasian pen nangma minthan’na hi ding hi. Na ni tum nawn loin na kha zong tumkik nawn lo ding hi; bang hang hiam cih leh Topa pen tawntung nangma khuavak hi ding a, nangma thuumna hunte bei ding hi. Na mihingte khempeuh thuman ding hi; keima min a than’ nadingin keima suansa kung, ka khut tawh ka sepsa ahi gam pen amaute in nei pai suak ding uh hi. A ngek pen mipa in minam khat suak ding a, a neu pente in minam lianpi suak ding hi; keimah in Topa ka hi hi; a hun ciangin keimah in thakhatin hih thu ka tungsak ding hi. A zawng mite tungah lungdamna thu puak dingin Topa in kei sathau hong nilhin hong sawl ahih manin kei tungah Topa Pasian’ kha hong om hi; lungsim kitamzante a damsak ding, sal-a a kimante tungah suahtakna thu a gen ding, a kihen mite’ adingin thong kong a hong ding; Topa maipha ngah kum, a galte tungah Pasian phulak ding hun a tun’na thu a gen ding, a thuum mi khempeuh a hehnem ding; amaute pen a thuman mite kici-in, amah a kiminthan’sak theih nadingin Topa ’ suan kungte a kicih theih nadingin, Zion ah a om a dah mite tungah vut tawh kibuak a, lukhu khuk tangin a hoih kumpi lukhu khuksak nading, tauna tangin lungdamna sathau nilhsak theih nading, a lunggimna tangin Pasian phatna puan a silh theih nadingun amah in kei hong sawl zo hi. Amaute in tang lai-a a siasate lampha ding uh a, a kisiamai-sate ding kiksak ding uh hi; amaute in khang tampi sung a kisia maisa khuapi siate puahkik ding uh hi. Gamdang mite in na tuu honte uh vak ding a, khual mite pen note’ lo kho leh leenggui puahte hi ding uh hi; ahih hangin note pen Topa ’ siampite hong kici ding a, mihingte in note pen i Pasian’ nasemte ci-in hong gen ding uh hi; minamte’ hauhna note in na ne ding uh a, amau’ hauhna note in na kisaktheihpih ding uh hi. Note’ maizumna tangin nopna a zah nih na ngah ding uh a, note’ mindaina tangin nomau’ ngahna sungah na lungdam ding uh hi; tua ahih ciangin na gam sung uhah a zah nih na luah ding uh hi; note’ aa pen tawntung lungdamna hi ding hi, Bang hang hiam cih leh keimah Topa in thutang deihin, mi’ nate suhna leh khialhna ka mudah hi; amaute tungah amau thaman thuman takin ka pia ding a,, tawntung thuciamna amaute tawh ka bawl ding hi. Amau suan leh khakte pen minamte lakah kithei ding a, amau tu-le-tate pen mite laizang ah kithei ding hi; amaute pen Topa in thupha a piak mite hi, ci-in a mu mi khempeuhte in thei-in sang ding uh hi. Topa hangin nakpi takin ka lungdam ding a, ka Pasian hangin kipakin ka diang ding hi; bang hang hiam cih leh zipipa in a lu kizemin, mo thaknu a suangmanphate tawh a kizep mah bangin amah in hotkhiatna puan kei hong silhsakin, thumanna puanpi tawk kei hong tuam khin hi. Bang hang hiam cih leh leitung in a dawn meeng sakin, huan in a kituhte a posak mah bangin, Topa PASIAN in minam khempeuh mai-ah thumanna leh phatna po khiasak ding hi. Zion a kihotkhiatna thu meilah kuang bangin a taan’ khiat mateng, ama dikna thu zing khuavak bangin a taan’ khiat matengin, Zion ka ngaihsutna-in gamdai-in ka om mawk kei ding a, Jerusalem ka ngaihsutna-in ka khawl mawk kei ding hi. Minamte in nangma gualzawhna mu ding uh a, kumpi khempeuh in nangma minthan’na mu ding uh hi; Topa in nang hong phuah min thak tawh nang hong kisam ding hi. Nang pen, Topa khut sunga hoihna lukhu, na Pasian khut sunga kumpi lukhu tawh na kibang ding hi. Nang pen a kinusia, hong kici nawn lo ding a, na leitang pen Gamkhing, kici nawn lo ding hi. Nang pen ama tungah ka lungkimna om, hong kici a, na leitang pen Kiten’pih, kici ding hi; bang hang hiam cih leh nangma tungah Topa lungkim a, na leitang pen a kiten’pih zi bang ding hi. Bang hang hiam cih leh tangval khat in nungak khat a ten’pih mah bangin nang hong lamkippa in nang hong tenpih ding a, zipipa mothak nu tungah a lungdam mah bangin na Pasian nang tungah lungdam ding hi. Topa in lim takin thuciamna bawl khin zo a, a vangliatna tawh tungsak ding hi: “Na galte’ an dingin na ante ka piakik nawn kei ding a, nangma sepsa leenggahzu gamdang mite in dawn nawn lo ding hi; ahih hangin a kholte in ne-in Topa phat ding a, a kaikhawmte in keima biakinn huang sungah dawn ding uh hi,” ci hi. Jerusalem mite aw, kulh kongpite panin paikhia un la, hong ciahkik na mipihte’ adingin lampi bawlkhol un; zik un, lam lianpi zik-in, suangtumte paikhia un la, mite’ muh dingin lim khat khaito un. En un, lei mong dongah Topa tangko khin hi: Jerusalem mite tungah, “En un, no hong honkhiapa hong pai hi; en un, ama sep thamante hong pua a, a gualzawhna thamante hong masuan hi,” ci un. Amaute pen A siangtho mi, Topa ’ tatkhiat mite kici ding a, nang pen a Kizongkhia, a kinusia lo khuapi hong kici ding hi. Edom gam, Bozrah khua panin puan ausan silhin a hong pai, a puan silhna-ah minthan’na nei-in, ama thahatna tawh hong paipa kua ahi hiam? A honkhia zo dingin hatna a nei, gualzawhna thu a zasak dingin a hong paipa in Topa ahi keimah ka hi hi. Bang hangin na puan san a, na puan silhte, leenggah cilna-a leenggah a cilpa’ puan tawh kibang ahi hiam? Mite’ lak panin kuamah in hong huh loin keimah guak in leenggah cil bangin minamte ka cil hi; sin sona tawh amaute ka cil a, hehna tawh amaute ka tuancil hi; ka puan tungah amaute’ sisan hong kitheh gawp a, ka puan khempeuh tungah sisan hong baang hi. Ka mite ka hotkhiat nading hun ta ka sa a, a galte uh phulak ding hun hi ta hi, ci-in ka ngaihsun hi. Hong huh ding mi ka zong a, ahi zongin kuamah om lo hi. Kei hong huh ding a om loh ciangin lamdang ka sa hi. Ahih zongin ka hehna in hong thahatsak a, keimahmah khut tawh ka kigumkhia hi. Ka sin sona tawh mihingte cil-in, ka hehna hangin amaute zu kham ka bang sak a, amaute’ sisan leitungah ka thehthang hi. Topa ’ itna kip, Topa phatnate, Topa in eite tunga hong piak na hoihte khempeuh tawh kizui leh, ama hehpihna tawh kizui, a lianpi ama itna kip tawh kizui-in amaute tunga a piak, Israel innkuan tunga ama hoihna lianpite ka gengen ding hi. Bang hang hiam cih leh Topa in, “Amaute pen keima mi taktak hi a, amaute in kei hong khem lo ding hi,” ci hi. Tua ahih manin a lungkhamna panun amaute a honkhia suak hi. Ama ompihna vantungmi in amaute honkhia hi. Ama itna leh ama hehpihna tawh amaute tankhia a, amah in a beisa hun lui khempeuh ah amaute domto-in a pua hi. Ahih hangin amaute in amah lehdo uh a, a Kha Siangtho dahsak uh hi; tua ahih ciangin amah pen amaute’ gal suak a, amahmah in amaute a do hi. Tua ciangin amaute in hun lui lai, ama nasem Moses’ hun phawk uh hi. Ama tuuhonte a cing tuucingpa, tuipi sung pan a, a paikhiatpih Topa koi-ah om ta ahi hiam? Amaute’ tungah a Kha Siangtho a piapa, Moses, tung tawnin a vangliatna khut zangin na lianpipi a sempa, ama mite’ mai-ah tuite khenkhamin, amah a minthan’ tawntung nadingin hih bang nate a sempa, tu-in koi-ah om ta ahi hiam, ci uh hi. Topa in tui thuk kantanin amaute a paipih ciangin leilak a, sakol pai bangin kip mahmah uh a, amaute puk lo uh hi. Lonona kuamsung a zuansuk bawngte bangin, Topa ’ Kha in amaute tawldamna a pia hi. Tua bangin Topa in a mite lamlak ahih manin ama minthang tawntung hi. A siangtho, a minthang nangma omna vantung pan a sangna kumpi tokhom panin, hong ensuk in la, hong mu in. Nangma deihna leh nangma vangliatna koi-ah om ta ahi hiam? Na lungduaina leh nong lainatna kote’ adingin kikhaktan ta hi. Bang hang hiam cih leh, Abraham in kote hong huh loin, Israel in kote hong phawk loh hangin, nangmah in kote’ Pa na hi hi; Topa aw, nangmah in kote’ Pa na hi a, nangmah in tanglai pek pan kote hong Tankhia-pa na hi hi. Topa aw, kote in nang kong kihtak loh nadingun bang hangin na lampite panin hong khialsakin ka lungsim uh khauhsak na hi hiam? Nangma nasemte, nangma luah minamte na ngaihsutna-in hong kihei kik in. Nangma misiangthote in na biakinn tawl khat sung bek nei uh hi; ko hong langpangte in tua pen tuancil gawp khin hi. Kote pen, nangmah in cik mah a, na uk ngei loh mite, nangma mi ahi ngei lo mite tawh a kibang ka suakkhin uh hi. Kote’ lamet lohpi-in nang hong pai-in a lauhuai nate na bawl ngei a, na mai-ah mualte a liing hi. Amah in a ngakte’ ading na a sempa’ thu tanglai pek panin kuamah in thei ngei lo, kuama bil in za ngei lo, kuama mit in nang sim loh Pasian dang mu ngei lo hi. Thuman nasep lungdam takin a semte, nangma deih bangin a nungtate, nangmah in na limbawl hi. En in, kote tungah nang na heh a, ahih zongin kote ka khial lai veve uh hi; tanglai pek-a kipanin ka mawh ngitnget uh hi. Tua bangpi-in kote hong kihon ding ahi hiam? Kote khempeuh mawhnei mi ka hi khin uh a, ka gamtat hoih khempeuh uh zong puansianin tawh kibang veve hi. Kote khempeuh singteh bangin ka vul uh a, ka mawhna hangun, huih letkhiat nahthel keu ka bang uh hi. Tua ahih ciangin nangmah hong pom dingin a hanciam tawm, nangma min a lo kuamah om lo hi; bang hang hiam cih leh kote kiang panin nang in na maitang na seel a, mawhna khut sungah kote nong pia hi. Ahi zongin, Topa aw, nangmah in kote’ Pa na hi hi; kote tungman bang hi-in, nang in beel seekpa bang na hi hi; kote khempeuh nangma bawl mite ka hi uh hi. Topa aw, nakpi takin sinso kei in la, mawhna ciamtehteh kei in. En in, kote khempeuh nangma mi ka hihna uh hong ngaihsun in. Nangma khuapi siangthote gamlak suak a, Zion zong gamlak suak a, Jerusalem khua gamkhing a suak hi. Kote’ biakinn a siangtho leh a hoihte, ka pate un nangmah hong phatna munte uh mei in kangtum khin a, kote’ neihsa na manpha khempeuh a sia suak khinta hi. Topa aw, hih nate ah nangmah ki-ip cip ding na hi hiam? Nang dai takin om dide-in nakpi takin kote hong gimsak ding na hi hiam? Hong ngen lo mite kiangah kei ka kilak hi; kei hong zong lo mite in kei hong mu uh hi. Ka min a lo lo gam khat kiangah, “Hiah om ing, hiah om ing,” ka ci hi. A hoih loin gamta-in, amau’ ngaihsutna bang a zui teitei a genhak mite lam nga-in, sun ni tawntungin ka khut ka zak hi. Ka maitang ah a tawntungin kei hong hehsak denin, biakna huan sungah biak piakna bawlin dawi biakna tau tungah paknamtui a hal mite, han sungah tu-in, mun simtham ah zanin mi site thu a dong mite, voksa ne-in amau beel sungah dawi biakna sa mehtui a nei mite, “Note kiang panin kote hong kituam koih ahih manin kihemkhia un la, ko kiangah hong pai kei un,” ci-in midangte tungah a gen mite in ni khat tawntung a kuang mei leh ka nak sunga meikhute bang ahi uh hi. Topa in hih bangin ci hi: Leenggahzu pen leenggah bom panin kingah a, mite in, ‘Tuate kimang thei ahih ciangin susia kei un,’ a cih mah bangun kei zong a minam bupin susia loin, keima na hong semte ka suakta sak ding hi. Jakob sung panin Judah minamte thupha ka pia ding a, amau’ suan leh khakte in mualtung gam a luah ding uh hi. Keima na hong sem, keima teel mite, tua gamah teeng ding uh hi. Amaute in kei hong zong ding uh a, Sharon gam pen amau’ tuu hon gamtatna mun suaksakin, Akhor Kuam pen amau’ bawng honte’ lupna mun a suaksak ding uh hi. Ahih hangin kei a hong nusia, keima mual siangtho a mangngilh, Gad pasian’ adingin sabuai phahin, Meni pasian’ adingin zu helsa hai sungah a dim note pen; namsau tawh a si dingin kong seh ding a, hong that dingte’ mai-ah na ngawng uh na dawh ding uh hi; bang hang hiam cih leh kong sap ciangin note in nong dawng kei uh a, thu ka gen ciangin nong ngai kei uh hi. Keima thu, man’ loh ding mah na utzaw uh a, a sia na gamta uh hi. Tua ahih ciangin Topa Pasian in hih bangin ci hi: En un, ka nasemte in ne ding a, ahih hangin note na gilkial ding uh hi; en un, ka nasemte in dawn ding uh a, ahih hangin note na dangtak ding uh hi; en un, ka nasemte lungdam ding uh a, ahih hangin note na mai uh zum ding hi; en un, ka nasemte in lungdamin lasa ding uh a, note in lungsim na-sa-in kiko-in, lungsim gimna hangin na thuum ding uh hi. Keima teel mite in ciamsiatna-in na min uh zang ding uh a, Topa Pasian in note hong that ding hi; ahih hangin ama nasemte pen min dang phuah ding hi. Leitungah thupha a kipiak ding a ngenpa in thuman Pasian min tawh thupha a kipiak ding ngen ding a, leitungah thuciamna a lapa in thuman Pasian min tawh a ciam ding hi; bang hang hiam cih leh a beisa huna haksatnate kimangngailh khin a, beimang khin ta hi. En un, vantung thak leh leitung thak ka piangsak hi; a beisa nate kiciamteh nawn lo, kiphawk kha nawn lo ding hi. Keima pian’saksa sungah lungdamin kipakin om tawntung un; bang hang hiam cih leh en un, Jerusalem khua lungdamna-in bawlin, a mite lung nuamin ka bawl hi. Jerusalem’ hangin ka lungdam ding a, ka mite hangin ka kipak ding hi; tua khua sungah kahna aw leh cimawh a, kikona aw om nawn lo ding hi. Naupangte a ngeek sih om lo ding a,, puteek khat in sauveipi nungta ding hi. Kumza bek a nungtate a khan’ sihin kingaihsun ding a,, kumza cing loin a site, hamsiatna ngahin kiciamteh ding hi. Amaute in inn lam ding uh a, a sungah teeng ding uh hi; amaute in leenggui lo bawl ding uh a, a gah ne ding uh hi. Amaute in inn lamin midang teeng cih om lo ding hi; amaute in suan-in adang khat in ne cih om lo ding hi; bang hang hiam cih leh keima mihingte’ hun pen singkung khat’ nuntak tan bang sawt ding a, keima teel mite in amau khut tawh a sepsa nate lungdamin ne suak ding uh hi. Amaute in a mawkna dingin na sem lo ding uh a, lungkham nadingin ta nei lo ding uh hi; bang hang hiam cih leh amaute pen Topa ’ thupha piak suan leh khakte hi ding uh a, amau’ tate amaute tawh nungta khawm ding uh hi. Amaute in hong sap ma-in ke’n ka dawng ding a, thu a gen laitakun ka za ding hi. Keivom leh tuuno in an ne khawm ding uh a, humpinelkai in bawngtal bangin buhkung ne ding hi; leivui pen gulpi’ an hi ding hi. Keima mual siangtho tung tengah amaute kiliamsak lo, kisusia lo ding uh hi, Topa in ci hi, a ci hi. Topa in hih bangin ci hi: “Vantung in keima tokhom hi a, leitung in keima khe ngakna ahi hi; kei’ adingin koi lai-ah inn lam ding a, keima tawlngakna mun koi lai ahi hiam? Hih nate khempeuh keima khut in a bawlsa hi a, tua ahih ciangin hih nate khempeuh kei’ aa ahi hi, Topa in ci hi. Ahih hangin, kiniamkhiatin kha lamah lungsim a kitamzan mipa, keima thu-ah lau-in a liing kelkelpa pen keima deih mipa ahi hi. “Biakna-in bawngtal a gopa in mihing zong that hi; biak piakna-in tuuno a gopa in ui ngawng zong tan hi; an tawh biak piakna a bawlpa in vok si zong pia hi; paknamtui tawh phawkna biak piakna a bawlpa in milim zong bia-in thupha pia hi. Hih mite in amau’ ut bang ciatin gamta uh a, amau’ kihhuai gamtatna uhah nuam sa uh hi. Tua ahih ciangin amaute tungah gimna ka tungsak ding a, amau’ kihtak thute mah amau tungah ka tungsak ding hi. Bang hang hiam cih leh ka sap ciangin kuamah in hong dawng lo a, thu ka gen ciangin kuamah in hong ngai lo uh hi; keima thu man’ loh ding mah ut zaw uh a, a sia-in gamta uh hi, a ci hi. Ama thu ah lau-in a liing mite aw, Topa ’ thu za un: Kei tungah note nong cihtakna hangun na mipihte pawlkhat un note hong mudahin hong hawlkhia ding uh a, zahpihna tawh note hong hopihin, “Lungdamin na om ding uh hong deihsak ka hih manun, Topa in ama liatna hong lak hen la, note hong honkhia ta hen,” hong ci vial ding uh hi. Hih banga hong paute pen mindaina a thuak ding mite ahi uh hi. Ngai un, khuapi sunga gamlumna! Biakinn sunga aw ging! Topa in a galte a daanpia a, a thukkikna huging ahi hi. Ka khuapi siangtho pen nausuak natna a thuak ma-in nau a suak nupi tawh kibang hi; nausuak gimna a tun’ ma-in amah in tapa khat nei hi. A tuaci bang kua’n za ngei na hi uh hiam? A tuaci bang kua’n mu ngei na hi uh hiam? Ni khat thu-in gam khat piang ngei ahi hiam? Tomno khat sungin minam khat piangkhia ngei ahi hiam? Bang hang hiam cih leh Zion in nausuak gimna a thuak phetin a minamte suak khia pah hi. Nau suah hun tungsak napi-in suakkhia sak lo ding ka hi hiam? Topa in ci hi; nau a suakkhiasak keimah in naugil khakcip ding ka hi hiam? na Pasian un ci hi. Topa in hih bangin ci hi: “En un, gunpi bangin nopsakna leh tui letkhia bangin minamte’ hauhna ama tungah ka tungsak ding hi; note pen a nu’ nawi teepin, a ang-ah kipua a, a khuk tungah a diang naungeek bangin hong kemin na lungkim ding uh hi. Ama hauhna ah na lungdam ding uh hi. A nu in a ta a hehnep bangin note kong hehnem ding a, note in Jerusalem khua sungah hehnepna na ngah ding uh hi. Hih thu hong piang na muh uh ciangin na lungdam ding uh hi; na guhte uh lopano a hing kilkel tawh kibang ding hi. Tua ciangin ka nasemte tungah ka huhna, leh ka galte tungah ka hehna ka lahna thu na thei ding uh hi, ci hi. Bang hang hiam cih leh en un, heh mahmahna tawh ama sin sona leh meikuang tawh daan a pia dingin meikuang sungah Topa hong pai ding a, huihpi bangin a leengte hong pai ding hi. Bang hang hiam cih leh Topa in mei tawh thukhenna sem ding a, a mawh mi khempeuh tungah a namsau tawh thukhen ding hi; Topa in a thah mite tam mahmah ding hi. Biakna huan sungah pai dingin amaute kisian’ suahin a kisiangthosak, a laizang-a om pen a zuite, voksa leh kihhuaina leh zusa a nete beimang khawm ding hi, Topa in ci hi. Bang hang hiam cih leh amau nasepnate leh amau ngaihsutnate ka thei a, minam khempeuh a khawm dingin ka hong pai hi; amaute hong pai-in ka minthan’na mu ding uh hi. Amaute’ lakah lim khat ka khai ding hi. Amau kiang panin, a suakta lai mite pen, minamte tung, Tarshish mite tung, Put mi leh Lud mite tung, Meshek mite tung, Tubal mi leh Javan mite tung, ka min hoihna a za ngei lo, ka minthan’na a mu ngei lo tuipi gei-a om gammite tungah ka sawl ding hi; amaute in minamte lakah ka minthan’na genthang ding uh hi. Israel mite in an tawh amau biakpiakna beel siangtho sungah tawi-in Topa ’ innah hong paipih uh mah bangin, amaute in minam khempeuhte lak panin Topa ’ tungah piak dingin na sanggamte khempeuh uh, sakolte, leengte, taalte, late, kalaoh hatte tungah hong pua-in ka mual siangtho Jerusalem ah hong paipih ding uh hi; Topa in ci hi. Amaute kimkhat zong, siampite leh Levi mite a suak dingin ka la ding hi, Topa in ci hi. Ka bawl ding vantung thak leh leitung thak pen ahih leh keima mai-ah kip ding hi; tua mah bangin na suan na khakte uh leh na min uh kip ding hi, Topa in ci hi. Khadet khat pan khadet khat, sabbath khat pan sabbath khat, kunsukin keimah a bia dingin Jerusalem ah mi khempeuh hong pai ding uh hi, Topa in ci hi. Amaute a ciah uh ciangin kei hong lehdo mite’ luanghawmte en ding uh hi; bang hang hiam cih leh amau a ne thante si ngei loin, amau a kihalna mei mit ngei lo ding a, amaute pen mi khempeuh’ kih hi ding uh hi, a ci hi. Benjamin gam Anathoth khua-a siampi khat ahi, Hilkiah’ tapa Jeremiah thu gente hih bang ahi hi. Amon’ tapa Josiah, Judah gamah kumpi a suah zawh kum sawm leh kum thum a cin’ kum-in Topa in Jeremiah a hopih hi. Josiah’ tapa Jehoiakim kumpi a suah ciangin Topa in Jeremiah a hopih leuleu hi. Tua khit ciangin Josiah’ tapa Zedekiah kumpi a suah zawh kum sawm leh kum khat a phak kum, a kha ngana, Jerusalem khua mite sal tang dinga a kipuak khiat dong tam veipi a hopihpih hi. Topa in kei hong hopih-a, “Gil sungah kong bawl ma-in nang kong thei khin zo hi; na suah ma-in kong teelkhia khin zo a, minam dangte’ tungah kamsang dingin kong koih khin zo hi,” hong ci hi. Tua ciangin keimah in, “Ah, Topa Pasian aw, en dih in! Thu gen ka siam kei hi; bang hang hiam cih leh naupang khat ka hi lel hi,” ka ci hi. Ahih hangin Topa in, “‘Naupang khat ka hi lel hi,’ ci kei in; bang hang hiam cih leh kong puakna khempeuhte’ kiangah na pai ding a, kong sawl peuhpeuh na gen ding hi. Amaute kihta kei in, bang hang hiam cih leh nangmah hong dal dingin kong ompih hi, Topa in kong ci hi,” hong ci hi. Tua ciangin Topa in a khut tawh hong zam phei-in ka muk hong lawn sak-a hong hopih hi. “En in, ka thute na kam sungah kong koih khin zo hi. Gam khempeuh leh kumpi khempeuhte’ tungah a botkhia ding leh a phelkhia dingin ahi zongin, a susia ding leh a suankhia dingin ahi zongin, a lam ding leh a phut dingin ahi zongin, tu ni-in za, nang kong pia zo hi,” hong ci hi. Tua ciangin Topa in kei tungah, “Jeremiah aw, bang na mu hiam?” ci-in hong dong hi. Kei zong, “Ngak a kici almond singhiang khat ka mu hi,” ci-in ka dawng hi. Tua ciangin Topa in, “Na maan hi; bang hang hiam cih leh ka thu gente ka tangtun’ sak nadingin kei zong ka ngak hi,” hong ci hi. Topa in a nih veina hong hopih leuleu-a, “Bang na mu hiam?” ci-in hong dong hi. Kei zong, “Beel a so khat ka mu-a, a leilu lam panin hong awnsuk hi,” ka ci hi. Tua ciangin Topa in, “Leilu lam panin hih gam mi khempeuhte’ tungah siatna hong sosuk ding hi. Bang hang hiam cih leh leilu-a om gam khempeuh keimah in ka sam a, amaute hong pai-in Jerusalem khua kongpite-ah ahi zongin, khua kimkot-a kulh kimte-ah ahi zongin, Judah gam khuapi khempeuh kimte-ah ahi zongin a kumpi tokhomte uh hong phut ciat ding uh hi. Ka mite in kei hong taisan uh ahih manin a mawhna uh hangin amau’ tungah thu ka khen ding hi; pasian dangte meihal biakna a pia uh a, a khut uh tawh a bawlsa milimte a bia uh hi. Tua ahih manin Jeremiah aw, na kawng gak in, Tho in la, kong sawl khempeuh amaute’ kiangah va gen in. Amaute kihta kei in; na kihtak leh amau mai-ah kong lau sak zawlai ding hi. En in, hih gambup langah ding dingin, Judah kumpite, uliante, siampite leh hih gam mi khempeuh langpan’ dingin tu ni-in nang, khuapi muanhuai khat bangin ahi zongin, sik khuampi khat bangin ahi zongin, sumngo kulhpi khat bangin ahi zongin kong bawl hi. Amaute in nang’ lang khatah hong do ding uh hi. Ahih hangin a hong zo kei ding uh hi; bang hang hiam cih leh, Topa in kong cih-inah, nangmah hong dal dingin kong ompih ding hi,” hong ci hi. Topa in kei hong hopih a, “Pai in la, Jerusalem khua’ zak dingin va tangko in: Topa in hong cih-inah, Na khangno lai-a nong kipiakna, na mothak lai-a nong itna, a kikho nai lo gamlak-a kei’ nung nong zuih hun lai ka phawk hi. Israel mite Topa ’ ading-a a tuam om hi a, ama’ an lakna-ah an palte ahi uh hi. Amaute a ne peuhpeuh a mawh suak uh a, gimna a thuak uh hi, Topa in hong ci hi, ci-in va gen in,” hong ci hi. Jokob’ suan leh Israel innkuan khempeuhte aw, Topa’ kammal ngai dih un. Topa in hih bangin ci hi: “Na pute na pate un kei kiang panin gamlapi paikhia-in, bangmah-a kimang lo milim peuh bia-in, amau mahmah zong bang mah-a kimang lo a suah khit nadingun kei’ tungah bang mawhna mu uh ahi hiam? Amaute in, ‘Izipt gam panin eite hong paikhiatpih-a sehnel lak leh dum lak, leikeu lak leh a lauhuai khuamial bekbak lak, kuama’ pai ngei lohna mun, kuama’ teen’ lohna gamlak-ah a hong makaih Topa koi-ah a om hiam?’ ci beek lo uh hi. Singgah leh a hoih nate na nek theih nadingun an tamna munah kong tun’pih hi. Ahih hangin no nong pai uh ciangin ka gam na nin sak uh a, ka neihsa gam a kihhuai mun na suak sak tazen uh hi. Siampite in, ‘ Topa koi-ah a om hiam?’ ci-in dong lo uh hi. Thukham theite nangawn in kei hong thei lo uh hi. Kumpi uliante kei’ tungah hong khial khin uh a, kamsangte in Baal min tawh thu genin, kiman’na nei lo nate’ nung a zui uh hi. “Tua ahih manin Topa in kong cih-inah, note kong mawhsak lai ding a, na tate-uh’ tate zong ka mawhsak ding hi. Bang hang hiam na cih uh leh nitumna lamah Saipras tuikulh mong dong kantan un la, va en dih un. Nisuahna lam Kedar gamah mi sawl un la, limtak kan dih un; tua bang na a piang ngei peuhmah hiam, en dih un. Gam khat in pasian ahi taktak beek lo a pasiante uh nangawn a khek ngei peuhmah uh hiam? Ahih hangin ka mite in a minthan’na uh ahi, keimah pen bangmah-a kimang lo na peuh tawh hong khek tazen uh hi. Tua thu phawk un la, lau un, vantungte aw, dah mahmah un la, liing un, Topa in kong ci hi. Bang hang hiam cih leh ka mite in mawhna nam nih a bawl zo uh hi: nuntakna ciktui ahi keimah a hong taisan zo uh hi; tuikhuk a to tawm uh a, tuikhuk keh-in tui a vung thei kei hi. “Israel sal ahi hiam? Sila namte ahi zenzen hiam? Hi lo ahih leh bang hangin a galte in luhgawp zo ahi hiam? Humpite bangin a galte in amah hawk uh a, nakpi takin a hawkgawp uh hi. A gam uh gam simtham a suah uh a, a khuapite cim-in kuamah teeng lo hi. Tham loin, Memfis leh Tahpanhes mite in zong a luguh a suktap sak zo hi. Israel aw, Topa na Pasian in lampi-ah hong makaih laitakin amah na nusiat manin hih teng nang’ tungah hong tung hilo ahi hiam? Tu-in Izipt gamah na pai manin bang phattuamna ngah ding na hi hiam? Nail guntui va dawn lel ding na hi hiam? Assiria gamah na pai manin bang phattuamna ngah ding na hi hiam? Eufrates guntui va dawn lel ding na hi hiam? Na gitlohna mah in nangmah hong thu hilh ding-a, na thu up nawn lohna in nangmah hong mawhsak ding hi. Topa na Pasian nong nusiat ciang, kei nong kihtak nawn loh ciangin, nuam hetlo-a kha keei hi, cih thu thei in la, mu in, a vanglian Topa Pasian in kong ci hi. “Sawt pek lai-a kipanin ka hakkol kuaitan-in ka ukna nong nial a, hong kihenna khau sutat-in, ‘Na na ka sem kei ding hi,’ nong ci hi. Hi hi, numei paktat na bang a, mualsang tung teng leh singliim nuai tengah milim na bia kawikawi hi. A kiteelteel leenggah gui ci hoihte bangin nang kong suan khin zo-a, ahih hangin nang kisia kik-in bang hangin leenggah gui a hoihlote na suak kik tazen hiam? Vuttui tawh na kisil-a satpiang tampi na zang zongin na mawhna nin ka mu lai veve hi, Topa Pasian in kong ci hi. Bangci bangin nangmah in, ‘Kei ka nin kei hi, Baal pasiante’ nung ka zui kei hi,’ na ci thei peuhmah ding hiam? Mualkuam zang-a na lampi totte en dih in; na hih sate mu dih in— a leh tai kawikawi kalaoh huk na bang tazen hi. Gamlak nuam a sa laano hukte na bang zen hi! A huk lai-in kua in khaam zo ding hiam? Amah a zong nuam peuhpeuh in gim kul se loin, a huk hunin a ngah lel ding uh hi. Na khe guakin lam pai kei in la, na dang taksak kei in, kong cih hangin, nangmah in, ‘Bang phamawh hiam? Khual mite ka it a, amau’ nung ka zui ding hi,’ na ci hi. “Guta khat a kimat cianga a zum bangin, Israel mite, a kumpite uh, uliante, a siampite uh leh a kamsangte uh zong a zum ding uh hi. Amaute in singtawng khat kiangah, ‘Nang ka pa na hi hi,’ peuh a ci uh a, suangtum khat kiangah, ‘Ka pian’na ka nu na hi hi,’ peuh a ci uh hi. Bang hang hiam cih leh amaute in kei hong nungngat uh a, a hong maingat kei uh hi. Ahih hangin haksatna a tuah uh ciangin, ‘Tho in la, hong hon in,’ hong ci uh hi. No ading-a na bawl uh na pasiante uh koiah om ahi hiam? Haksatna na tuah uh ciangin, a hong hot theih leh kihon sak ta ve un; bang hang hiam cih leh Judah gam aw, na khuapi zahzah-ah pasian na nei tazen uh hi. “Bang hangin kei hong mawh sak khin na hi uh hiam? Na vekpi-un nong langpan’ khin uh hi. Topa in kong ci hi. Na tate uh thu hilh-in ka sat hangin a mawkna suak zo hi, amaute kibawlpha tuan lo uh hi; na namsaute un humpi an zong bangin na kamsangte uh a that khin zo uh hi. No khangthakte aw, Topa’ kammal limtak ngai dih un. Israel mite adingin keimah in gamlak bang hi ngei ka hi hiam? A mial mahmah gam bang hi ngei ka hi hiam? Tua ahih leh bang hangin ka mite in, ‘Ko ka suakta uh hi, nang kiangah kong pai nawn kei ding uh hi,’ ci uh ahi hiam? Nungak khat in a kizepnate a mangngilh thei hiam? A kipi mothak nu in a mothak puante a mangngilh thei hiam? Ahih hangin ka mite in sim zawh loh ni tampi a hong mangngilh uh hi. “Na lawm ngaih ding na zon’ siam mahmah a, numei gilote nangawn na lampi na hilh zen hi! Mawhnei lo mizawngte’ sisan na puan tungah a baang hi; amaute in na inn hong luh ngei beek lo uh hi. Tua bang teng hi napi-in, nangmah in, ‘Kei ka mawh kei hi; kei tungah Pasian heh nawnlo taktak hi,’ na ci hi. En in, ‘Kei ka mawh kei hi,’ na cih manin nang’ tungah thu kong khen ding hi. Bang hangin na lungsim khel ziauziau na hi hiam? Assiriate in nang hong maizumsak ngei bangin Iziptte in zong hong maizum sak ding uh hi. Nangmah in zong tua gam panin maizumna tawh na lu tungah khut koih sa-in nong paikhia ding hi; bang hang hiam cih leh na muan’ mite Topa in ka nial zo-a, amaute’ hangin na zo ngei kei ding hi. “Mi khat in a zi ma hen la, tua nu in zong amah nusia-in, pasal dang khat’ zi suak leh, a pasal masa in tua nu la kik thei ding ahi hiam? Tua gam teng a nin suaksak khin ding hilo ahi hiam? Nang in numei paktat suak-in mi tampi tawh kingai khin zo napi cin tu’n kei’ kiang hong zuankik ding na hi hiam? Topa in kong ci hi. Khuadak in la, mualsang dawnte en dih in! Hong kilup khoppih lohna mun koi lai takah om ahi hiam? Arab mite in a suam dingun gamlakah mi a ngak uh bangin nang in lam geiah tu-in luppih ding mi na ngak hi. Na paktatna leh na gitlohna tawh hih gam na ninsak zo hi. Tua hang mah-in guahtui kikang sak a, guah nunung hong zu lo hi; ahih hangin numei paktatte bang hi napi-in, na zum thei kei lailai hi. Tu mahin kei nong sam a, ‘Ka pa aw, ka neu lai pek pan-a ka lawm na hi hi— nang heh tawntung ding na hi hiam, a tawp dongin lungham den ding na hi hiam?’ nong ci hi. En in, tua bang na cih hangin, na hih theih siatna khempeuh na hih khin zo hi,” a ci hi. Kumpipa Josiah a maan’ laitakin Topa in kei hong hopih a, “A zulhzau Israel, mual sang tung khempeuh-ah pai a, sing liim nuai khempeuh ah numei paktat banga om kawikawina na mu khin zo hiam? ‘Hih teng a hih khit ciangin kei’ kiangah hong kilehkik ngawn ding hi,’ ci-a ka up hangin amah hong kilehkik tuan lo hi; tua pen numei gina lo a sanggam nu Judah in zong a mu hi. A zulhzau Israel, midang tawh a khialhna hangin kimaakna lai pia-a ka hawlkhiat zong amah in a mu hi. Ahih hangin numei gina lo Judah lau tuanloin pai a, amah zong numei paktat khat mah a va suak veve hi. Tua bang hih ding amah in baih ngaihsut lel ahih manin suangtum leh singtawng peuh bia-in a khial a, gam a ninsak hi. Hih bang teng hi napi a sanggamnu, numei gina lo Judah, a lungsim khempeuh tawh hong kilehkik loin, a kilehkik hong kineih bek hi, Topa in kong ci hi,” hong ci hi. Tua ciangin Topa in kei hong hopih-a, “A zulhzau Israel in numei gina lo Judah sangin a mawhna tamzaw hi. Pai in la, leilu lam Israel gamah hih bangin va tangko in: ‘Hong kilehkik in, a zulhzau Israel aw, Topa in kong ci hi. Hehna tawh nang kong en kei ding hi, bang hang hiam cih leh a hehpih thei pa ka hi hi, Topa in kong ci hi; ka heh tawntung kei ding hi. Na mawhna na phawk ding bek kisam hi, Topa na Pasian na langpan’na, singliim nuai khempeuh-ah khualmite tawh na khialh kawikawina leh ka thu nong man’ lohnate pulak in, Topa in kong ci hi. Hong kilehkik un, a zulhzau ka tate aw, Topa in kong ci hi; bang hang hiam na cih uh leh keimah in note’ Topa ka hi a, khuapi khat panin mi khat ta leh beh khat sung panin nih ta hong la-in, Zion khua-ah kong puak ding hi. “‘Ka lungsim bang tuucing kong pia ding-a, amaute in pilna leh siamna tawh note hong uk ding uh hi. Tua hun ciangin gam sungah note pungin na tam uh ciangin Topa in kong cih-inah, mite in, “ Topa’ thuciamna singkuang” ci-in genin a nei nawn kei ding uh hi. Amaute in ngaihsun kha lo ding uh a, phawk kha loin, zong a goih beek kei ding uh hi. Tham loin zong a kibawl kik nawn kei ding hi. Tua hun ciangin Jerusalem khua pen Topa’ kumpi tokhom kici ding a, Jerusalem khua Topa’ omna ah Topa’ min pahtawi dingin, gam khempeuh hong kikhawm ding uh hi. Amaute in amau’ mawh nopna lungsim uh a zui tentan nawn kei ta ding uh hi. Tua hun ciangin Judah mite in Israel mite hong pawlpih ding uh a, leilu lam gam panin na pute na pate-uh’ luah dinga ka piak sa gamah hong paikhawm ding uh hi. “‘Israel aw, ka tapa bangin nang hong bawlin, gam khempeuh lakah a hoihpen luah dingin, gam nopci khat nang hong pia ning, ci-in ka ngaihsun hi. Ka Pa aw, ci-a hong sam ding leh ka nung hong zui den ding kong sa kha hi. Ahih hangin thuman lo zi in a pasal a nusiat bangin Israel mite aw, Topa in kong cih in ah, no zong kei’ tungah nong thuman kei uh hi,’ ci-in va tangko in,” hong ci hi. Mual tung pan awging khat kiza hi, Israel mite’ kahna leh tauna aw ahi hi. Lam a pialna hang uh leh Topa a Pasian uh a mangngilhna hang uh ahi hi. Topa in, “Hong kilehkik un, a zulhzau ka tate aw, na zulhzauna uh kong damsak ding hi,” a ci hi. Amau in zong, “En in, nang kiangah kong pai uh hi; bang hang hiam cih leh Topa kote’ Pasian na hi hi. Mual tungte leh mualsang tung-a gamlum lialuanate zuaupi taktak hi a, Israel mite hotkhiatna ahih leh Topa i Pasian’ sung bekah om takpi hi. “Ahih hangin i neu lai-a kipan a zumhuai Baal pasian i biakna hangin i pute i pate’ nasep sa ahi tuute leh bawngte, a tapate le a tanute uh khempeuh i sum khin zo hi. Tua ahih manin, zumin lum ni: i minsiatna silh ni. Bang hang hiam cih leh i neulai akipan tu ni ciang dong eite leh i pu i pate in Topa i Pasian’ tungah i mawh khin zo hi. Topa i Pasian’ thu i mang kei khin zo hi,” a ci uh hi. Topa in, “Israel mite aw, na kilehkik uh leh kei’ kiangah hong kilehkik un. Na kihhuainate uh kei kiang pan na paihkhiat uh a, na tai kawikawi kei uh leh, ‘ Topa a nuntak bangin,’ ci a, thuman tak, kip tak, thu tang tak-a thu na ciam nak uh leh, gam khempeuh in thupha ka piak ding hong ngen ding uh a, kei sungah amaute a lungdam ding uh hi,” a ci hi. Judah gam mite leh Jerusalem khuamite’ tungah Topa in hih bangin ci hi: “Na lote uh kal un la, ling lakah vawh kei un. Judah mite leh Jerusalem khua mite aw, Topa’ tungah vun at un la, na lungtang uh vun at un. Na tua cih kei leh na bawl uh mawhnate hangin, ka hehna mei bangin hong kuangkhia ding a, a phelh zo kuamah om lo ding hi,” a ci hi. Judah gamah va gen un la, Jerusalem khua-ah va tangko un. Gam sung khempeuh-ah peengkul mut-in awng un la, va gen un. ‘Hong kikhawm un la, khuapi muan’ huaite sungah va lut ni!’ va ci un. Zion mual lampi kihilh un la, na suahtak nadingun tai un, zekai kei un! Bang hang hiam cih leh leilu lam panin siatna lianpi kong puaksuk hi. Humpi khat a bukna sawl kawm lak pan hong kuankhia zo a, gamte susia dingpa hong paikhia khin zo hi. Na gam uh a kisia sak ding leh na khuapite uhah kuamah a teen’ loh nadingin a susia dingin ama’ omna panin hong kuankhia khin zo hi. Tua ahih manin ippi puan silh un la, tau-in kap un; bang hang hiam cih leh Topa’ hehna lauhuaipi eite’ kiang pan kiheikhia nai lo hi. Topa in, “Tua ni ciangin kumpipa leh kumpi uliante a lungkia ding uh a, siampite lau mahmah-in, kamsangte a dipkua ding uh hi,” a ci hi. Tua ciangin keimah in, “Aa, Topa Pasian aw, nangmah in hih mite leh Jerusalem khuamite khem cih tak-in na khem khin zo hi. Bang hang hiam cih leh amau’ kiangah, ‘Nopna hong om ding hi,’ ci napi cin, amau a sunlum dingin namsau khat a om gige hi,” ka ci hi. Tua hun ciangin hih mite leh Jerusalem khuamite’ kiangah, “A sa mahmah huih sehnel gam a sang mun panin ka mite’ tungah hong nung ding a, tua huih pen an vaite zapsiang dinga a nung huih bang hi lo hi. Ka sawl huih in tua bang dingin hat lua ding hi. Tu-in keimah in amaute’ tungah thu khen-in ka gen hi,” a kici ding hi. En un, i galpa meii bangin hong pai a, a sakol leengte pingpei tawh kibangin, a sakolte muvanlaite sangin manlang zaw hi. Gimna i thuak ding hi, bang hang hiam cih leh gallel ding i hi ta hi. Jerusalem khua aw, nang hong kihotkhiat nadingin, na lungsim sung panin gitlohna sawpkhia in. Na sungah gitlohna lungsim bang tan vei kem cip ding na hi hiam? Ngai un, Dan gam pan aw khat hong ging a, Efraim Mual pan kisiat nading thu hong kitangko hi! Minamte’ kiangah va gen un la, Jerusalem’ kiangah va tangko un. “Gamlapi panin galte hong pai uh a, Judah gam khuapite’ lang khatah hong kiko uh hi. Judah gam in kei hong langpan’ ahih manin a galte in lo hongte bangin a kimkot-ah a pang dimdiam uh hi, Topa in kong ci hi. Na lungsim leh na gamtatnate hangin hih thu nang’ tungah hong tung hi. Hih in nangma’ gitlohna hang hi a, kha-in na lungtang hong vut hi.” Aw, ka lungtang, ka lungtang! Na ka sa mahmah hi! Ka lungtang kisai vanvan a, ka om hithiat thei kei hi; bang hang hiam cih leh peengkul mutna aw, gal kisimna aw ka za hi. Siatna khat khit ciang’ khat hong tung a, gamsung khempeuh kisia khin hi. Tha khat thu-in ka bukte hong kisuksiat sak a, ka puan khaite hong kek gawp hi. Bang tan vei gal kisimna ka mu lai ding hiam? Bang tan vei peengkul aw ka za lai ding hiam? Topa in, “Ka mite hai uh a, kei hong thei lo uh hi; naupang haite bang uh a, bangmah thei lo uh hi. Siatna bawl siam bek uh a, hoihna, bawl thei lo uh hi,” a ci hi. Leitung ka et leh lim-le-mel nei lo a, vantungah lah khuavak om lo hi. Mualte ka et leh kiliing damdam uh a, mualneute kileh kawikawi uh hi. Ka khuadak leh mi khat beek ka mu kei a, van-a vasate zong a leeng mang khin uh hi. Ka et leh, logam leihoih teng sehnel gam suak khin-a, Topa’ mai leh a hehna lianpi mai-ah, khuapi khempeuh kisia khin uh hi. Bang hang hiam cih leh Topa in, “Gam buppi gamlak suak ding a, ahih hangin ka susia suak sam kei ding hi. Tua hangin leitung kap ding a, vantung a mial ding hi. Bang hang hiam cih leh ka gensa, ka khensat sa hi-a, ka kisikkik loh bangin ka lungsim zong ka khelkik kei ding hi,” a ci hi. Sakol tunga tuangte leh thal tawite’ aw a kizak ciangin mi khempeuh galtai mang uh a, gamlak-ah tai-in, suang lakah a kahto uh hi; khuapi khempeuh kinusia khin a, kuamah teeng nawn lo hi. A kisia ding nangmah in bang cih ding na hi hiam? Puan san silh-a kham tawh na kizep liatluat hangin, na mitte zemin na golsak hangin, a mawkna-a kizem na hi ta hi. Na lawm ngaihte in nang hong paaikhia uh a, hong that nuam uh hi. Nau suak ding numei kiko bang khat ka za hi, tacil a suak numei khat’ tauna tawh kibang hi. Zion’ tanu husam liang-a a kikona aw hi a, a khut tegel zakin, “Gimna ka thuak ding hi! Kei hong that ding uh hi!” a ci hi. Jerusalem khua sungah kileh kawikawi un. Khuadak un la, en dih un! A thuman gamtat leh thuman a zong mi khat beek na mu uh hiam, zong dih un. Na muh uh leh tua khua a mawhna ka maisak ding hi. “ Topa a nuntak bangin,” ci-in a kiciam uh hangin a zuaupi uh ahi hi. Topa aw, nangmah in thuman en gige hilo na hi hiam? Nangmah in amaute na sat hangin a awlmawh tuan kei uh hi; na sukgawp hangin na thu hilhna a ngai tuan kei uh hi. Amaute’ maitang suangtum sangin sakzaw a, a kisik nuam kei uh hi. Tua ciangin keimah in, “Hih mite mihai hi a, a hehpih huai uh hi: Topa’ lampi thei lo uh a, amau’ Pasian’ deihna a thei kei uh hi. Mi liante’a kiangah pai-in, ka va kiho ding uh hi; amaute in Topa’ lampi a thei uh a, amau’ Pasian’ deihna a thei uh hi,” ci-in ka ngaihsun hi. Ahih hangin a vekpi-in ka ukna hong nial khin uh a, ka hakkol kuaitan-in ka henna khaute a sutat khin zo uh hi. Tua ahih manin tuulak panin humpi khat in amaute that ding a, sehnel gam panin keivom khat in a petgawp ding hi. Kamkei khat in a khuapite uh vil gige a, a pusuak khia peuhpeuh balzan gawp ding hi; bang hang hiam cih leh amaute’ mawhna uh tamlua a, kei hong taisan mun lua uh hi. “Na mawhna uh hong koici maisak ding ka hi hiam? Na tate un kei hong nusia zo uh a, pasian ahi lopi peuh tawh kiciam zo uh hi. Amaute a gilvah dong uh an ka vak khit ciangin, ang kawmin numei paktatte’ innah a hon om uh hi. Sakol gilvah a lante bangin a innvengte’ zite uh neh-in a tau huthut uh hi. Hih thute hangin amaute daantat lo ding ka hi hiam? Topa in ka gen-inah, hi ci bang minam’ tungah thukkik lo ding ka hi hiam? “A gual-a a kisuan a leenggah huan sungah pai in la, suksiat sak in; ahi zongin suk maimangsak sam kei in. A hiangte heuh khiatsak in, bang hang hiam cih leh tuate Topa’ aa hi lo hi. Israel minamte leh Judah minamte, Topa in ka cih-inah, kei tungah hong thuman nawn het lo uh hi. Amaute in Topa hong nial uh a, ‘Amah in bangmah hih lo ding hi; i tungah siatna hong tung lo ding a, gal ahi zongin kial ahi zongin i thuak kei ding hi. Kamsangte lah huih bang hi lel uh a, a sung uhah thu teeng lo hi. Amau’ gen bangun amau mah in a thuak ding uh hi,” a ci uh hi. Tua ahih manin Topa, a vanglian Pasian in hong gen-inah: “Amaute in tu-a bangin gen uh ahih manin na kam sunga mei banga ka kuan’sak ka thute in sing tawh kibang hih minamte kangtum zaw ding hi. En un, Israel minamte aw, Topa in kong cih-inah, gamlapi panin note hong sim dingin gam khat kong kuansak ding hi. Tua gam in tanglai peka a om sa, a hat mahmah, amaute’ pau na theih loh uh gam khat ahi hi. Thal tawh a kap uh ciangin sisak lianlian uh a, a vekpi-in gal hang kim uh hi. Amaute in lo-a na ante leh na an huante uh hong gaihsak ding uh a, na tapate leh na tanute uh hong thahsak ding uh hi. Na tuu honte leh na bawng honte uh hong gaihsak ding uh a, na lenggahte leh na thei gahte uh hong nek mangsak ding uh hi. Na muan’ mahmah kulhpi tawh a ki-uum na khuapite uh, namsau tawh hong suksiat sak ding uh hi.” “Ahih hangin tua bang hun ciang nangawnin, Topa in kong cih-inah, note kong su maimang khin sam kei ding hi. Na mipihte un, ‘Bang hangin Topa i Pasian in hih bangin ei’ tungah hong bawl hiam? a cih uh ciangin nangmah in, ‘ Topa nusia-in na gam sung uhah gamdang pasiante’ na na sep uh bangin, note’ gam ahi lo gam dangah, gamdang mite’ na na sem ding uh hi,’ na ci ding hi,” hong ci hi. Jakob’ suante tungah gen in. Judah mite tungah hih bangin ci in: “Ngai un, ngaihsutna nei lo mihaite aw, mit nei napi-a mu lote, bil nei napi-a za lote aw. Kei hong kihta lo na hi uh hiam? Topa in kong ci hi. Ka mai-ah liing lo na hi uh hiam? Tuipi mongah sehnel keima’ koih hi-a, tui ka dal sak tawntung hi. Tuihualte in a lawhlawh hangin zozo lo uh a, a gin’ zuazua uh hangin kantan zo tuan lo uh hi. Ahih hangin hih mite lungsim khauhin hong langpan’ zen uh hi; hong kihei san uh a, hong paisan uh hi. A lungsim sung uhah, ‘A hun-a guah hong zusak a, tukguah khalguah hong pia a, anlak hun ding a hong sehsak den, Topa i Pasian zaktak ni,’ a ci kei uh hi. Na khialhnate un hih na hoihte khaktan a, na mawhnate hangun tuate na taan lawh uh hi. Ka mite lakah mi gilote kihel uh a, vasa thang siah bangin mite thang siah-in man uh hi. Bawm sung dimtak a, vasa kikhum bangin khemna tawh a ngah uh vante tawh a inn uh dim hi. Tua ahih manin amaute lianin hau uh a, thau-in a mai uh zol hi. Gitlohna lamah a hun bek a theithei kei uh hi. Tagahte’ phattuam nading khual loin thu a man lo pi-in khen uh a, mizawngte tungah thuman lo uh hi. Hih thute hangin amaute daantat lo ding ka hi hiam? Topa in ka ci hi. Hih bang minam’ tungah thukkik lo ding ka hi hiam?” A dipkuat huai, a patauh huai thu khat gam sungah a piang khin zo hi. Kamsangte in thuman gen lo uh a, siampite in amau’ ut bangun a uk uh hi; ka mite in phamawh a sa kei sawnsawn uh hi, a tawpna hun hong tun’ ciangin bang na cih ding uh hiam? Benjamin’ suante aw, na suahtak nadingun tai un! Jerusalem khua taisan un! Tikoa khua-ah peengkul mut un la, Bethhakkherim khua-ah theihsakna meikhu suaksak un. Bang hang hiam cih leh leilu lam panin, gimna leh siatna lianpi a hong pai ding hi. A mel hoih, a ngek dikdek, Zion’ tanu ka susia ding hi. Kumpite in a galkapte uh tawh ama’ kiang hong tung ding uh a, a kimkotah giah phual sat-in a deih peuhpeuh uh a la ding uh hi. Amau in, “Jerusalem khua sim dingin kisa un. Tho un, sun ciangin i sim ding hi,” a ci ding uh hi. Ahih hangin amau mah in, “Citciat aw, zekai lua hang! Ni tum dektak-a i liimte sau keei ta hi. Kithawi un, zan ciangin i sim ding a, a kumpi innte uh i susia ding hi,” a ci ding uh hi. Bang hang hiam cih leh a vanglian Topa in, “A singte phuksak un la, Jerusalem khua sim nadingin phungin ciang un. Hih khuapi daantah kul hi, bang hang hiam cih leh kinet niamna bekbek tawh a dim hi. Tuikhuk panin tui siang hong phul bangin, Jerusalem khua panin siatna phul hi. Khua sungah ngongtatna leh kisuksiatna ka za ngitnget a, cinatna leh liamnate ngentang ka mu hi. Jerusalem khuapi aw, kidawm in! Na tua cih kei leh kong taisan ding a, kuama’ teen’ lohna gam simtham na suak kha ding hi,” a ci hi. A vanglian Topa in kei hong hopih-a, “Lenggah lo-a a sanghte a kilawh kik bangin Israel mi a omlai sun teng losiang vet in,” hong ci hi. Keimah in ka dawngkik a, “Amaute in a zaktheih dingun kua’ kiangah va gen ding ka hi hiam? En in, a bil uh bing a, khua za thei lo uh hi. Topa’ thu simmawh uh a, lungdamna-in la lo uh hi. Tua ahih ciangin Topa aw, na hehna tawh ka dim a, ka thuak zo nawn kei hi,” ka ci hi. Tua ciangin Topa in hong hopih-a, “Ka hehna kongzing lak-a naupangte’ tungah bua in la, tangvalte’ kikhopna-ah zong bua in. Papite leh nupite zong kilakhia ding a, pitek putekte zong a kipai khiatpih ding hi. A innte uh midang in luah ding a, a lote leh a zite uh a taan ding uh hi. Bang hang hiam cih leh Topa in kong cih-inah, hih mite’ lang khatah ka khut zan-in daan ka tat ding hi. Bang hang hiam cih leh a neupen pan a lianpen dongin, thuman lopi tawh sum zongin a huaiham uh hi. Kamsangte-a kipan siampite dongin thuman lo khin uh hi. Amaute in ka mite’ thuaknate thupisim sak lo uh a, hoihna om keei lopi, ‘Hoih hi, hoih hi,’ ci mawkmawk uh hi. Hih a kihhuai nate a sep uh ciangin a maizum beek uh hiam? Maizum beek lo uh hi, kisuang thei beek lo uh hi. Tua ahih manin a site’ lak mahah amau zong a si ding uh a, ka daantah ni ciangin a kilawnkhia ding uh hi,” Topa in hong ci hi. Topa in mite tungah, “Lamka bomah ding un la, khuadak un. Lam hoih ahi, lampi luite dong un la, tawn un. Na kha uh ading tawldamna na mu ding uh hi,” a ci hi. Ahih hangin amau in, “Ka tawn kei ding uh hi,” a ci uh hi. Topa in, “Peengkul tumna aw ngai dingin galvil ding mi ka koih hi,’ kong ci hi,” a ci hi. Ahih hangin amau in, “Ka ngai kei ding uh hi,” a ci uh hi. Tua ahih manin Topa in: “Gamdangte aw, ngai un. Mite aw, amau’ tungah bang tung ding hiam, cih thei un. Leitung aw, ngai in! En in, hih mite tungah a thuak ding mah uh-a kilawm siatna ka tung sak ding hi; bang hang hiam cih leh ka thu hong ngai lo uh a, ka thukhamte a nial uh hi. Bang deihna tawh Sheba gam panin paknamtuite hong pai a, gamlapi panin singnamtui hong tung ahi hiam? Na meihal biaknate uh ka sang kei a, nong thoihnate uh deihhuai ka sa kei hi. Tua ahih manin Topa in kong cih-inah, En un, hih mite puk nadingin a mai uhah suangtum ka koih ding-a, pate leh tate, inn vengte leh lawmte pukin a si ding uh hi,” a ci hi. Topa in, “En un, leilu lam gam panin mi hong pai uh a, leimong gamlapen panin gam lian khat galsim dingin kithawithawi hi. Thal leh teipi tawi uh a, giloin hehpihna lungsim nei loin, a husa uh tuipi ging tawh kibang hi. Zion’ tanu aw, amaute sakol tungah tuangin, nangmah do dingin a kithawi uh hi!” a ci hi. Tua thu i za khin zo a, bangmah i cih thei kei hi. Lungkhamna in hong hencip a, nupi nau suak ding bangin na i sa hi. Gamlakah paikhia kei un la, lampi ah zong pai dah un; bang hang hiam cih leh i galte in namsau a tawi uh a, i kimkot khempeuh lauhuai khin hi. Ka tanu aw, ippi puan silh in la, vut lakah kikhuk in. Tapa khat neihsun sih suah bangin kap vangvang in, bang hang hiam cih leh a hong susia dingpa thakhat thu-in hong pai ding hi. “Jeremiah aw, ka mite ze-et dingin nang kong koih hi. Ze-et in la, a omdan uh thei in. A vekpi-un hong langpan’ tentan uh a, zuauthu gen kawikawi uh hi. Sumngo leh sik bangin khauh uh a, a vekpi-un a siat gamtat khin uh hi. Nakpi takin pum a kizap hangin a ninte tui thei loin luangkhia lo hi. Pum a kizapzap hangin a mawkna a suak hi, bang hang hiam cih leh mi gilote om lai veve hi. Amaute a kideih lo ngun a kici ding uh hi, bang hang hiam cih leh Topa in amaute ka deih kei hi.” Topa in Jeremiah kiangah hih bangin hopih hi: Topa’ biakinn kongkhakpi kiangah ding in la, hih thu teng va tangko in: Topa bia ding-a kongkhak sung-a hong tum Judah mite aw, Topa’ kammal ngai dih un. A vanglian Topa, Israel mite’ Pasian in hih bangin hong ci hi. Na nuntakzia uh leh na gamtatnate uh kikhel un. Tua hi leh hih munah kong teengsak bek ding hi. ‘Hih in Topa’ biakinn ahi hi, Topa’ biakinn ahi hi, Topa’ biakinn ahi hi,’ a kicici zuauthute um kei un. “Bang hang hiam na cih uh leh na nuntakzia uh leh na gamtatnate uh na kikhel uh a, khat leh khat kikal-ah thuman thutak-a na vaihawm uh leh, nam dang mite, pa nei lote leh meigongte na nuaisiah kei uh a, hih munah mawh nei lo mite that nawnloin, note’ gim nading mah ahi pasian dang peuh na biak nawn kei uh leh, tanglai-a na pute na pate un a neih tawntung ding uh-a ka piak hih gam sungah ka hong teengsak ding hi. “En un, phattuamna a om het lo zuauthu na um tazen uh hi. Note in na gu-in, tual that-in, angkawmin, a hi lopi kiciam-in, Baal kiangah meihal biakna pia-in, na theih ngei loh uh pasian dangte delhin, tua ciangin ka min tawh a kilo hih biakinn sungah ka mai-ah hong pai-in hong ding-in, ‘Hong kihonkhia zo hi,’ na cih khit uh ciangin hih a muh thadah huai nate khempeuh va hih kik zel ding na hi uh hiam? Ka min tawh a kilo hih biakinn no’ ngaihsutna-ah misuam buluhte’ bukna mun bang-a ngaihsun na hi uh hiam? Keimah in note’ hih khempeuh kong mu khin hi, Topa in kong ci hi. Ka min ka teen’sak masakna Shiloh khua-ah va pai un la, ka mi Israel mite’ gitlohna hang-a ka nasepna va en dih un. Tu-in zong, hih nate khempeuh na hih uh a, kong gengen hangin hong ngai tuan loin kong sap hangin hong dawng lo na hih manun, Topa in kong cih-inah, ka min tawh a kilo, note in na muan’ uh hih biakinn leh note leh na pu na pate-uh’ kiang-a kong piak hih mun, Shiloh tunga ka hih bangin ka hih ding hi. Efraim’ suan-le-khak ahi leilu lam-a na behte khempeuh uh ka paihkhiat bangin note zong ka muhna panin kong paaikhia ding hi. “Jeremiah aw, hih mite adingin thu ngetsak kei in. Amau adingin kapin kei’ tungah hong thuumsak kei in. Bang hang hiam cih leh nong thuumna kong ngai kei ding hi. Judah gam khuapite sung leh Jerusalem khua kongzing lakah bang hih uh cih mu lo na hi hiam? Naupangte in sing tom-in, a pate un mei a tawh uh a, nupite in a nusian uh vantung kumpinu’ ading tangho a su uh a, kei hong hehsak nadingun, pasian dangte’ dawn dingin biakna a pia tazen uh hi. Topa in kong cih-inah, tua hangin gimna a thuak, kei hi zenzen ka hi hiam? Hilo hi. Amau’ zum nadingin amau mah in thuak uh hi zaw lo ahi hiam? Tua ahih manin Topa in kong cih-inah: En in, ka hehna leh ka thangpaihna hih munah ka bua ding-a, mihingte tung leh ganhingte tung, lo lai-a singkungte leh lei laka singgahte tungah ka sung ding hi. Ka hehna a kuang ding a, a kisumit kei ding hi. “A vanglian Topa, Israel mite’ Pasian in hih bangin kong ci hi: Mei tawh haltum ding na meihal biaknate uh hal nawnloin, sa nek theih kithoihnate tawh kibangin ne vet un. Bang hang hiam cih leh Izipt gam panin na pute na pate uh ka lak khiat lai-in ka hopih kei-a meihal biakna pia ding leh kithoihna bawl dingin thu ka pia kei hi. Ahih hangin, ‘Ka thu hong mang un; tua hi leh note’ Pasian ka hi ding-a, note in ka hoih zawk nadingin na khempeuh-ah kong thupiak bang na zui un,’ ci-in thu ka piazaw hi. Ahih hangin amaute in ka thu hong mang lo uh a, a bil uh hong ngat lo uh hi. Amau’ gitlohna lungsim uh zui-in amau’ thuthu-in a omzaw uh a, mainawt loin a nungkin zaw uh hi. Na pu na pate uh Izipt gam pan-a a hong paikhiat ni uh-a kipan tu ni ciang dong, ni khat khit ni khat, ka nasemte ahi kamsangte ka sawl tawntung a, ahih hangin amau in ka thu hong ngai loin, a bil uh hong ngat lo uh a, a lung uh a khauhsak uh hi. A pute a pate uh sangin a siazaw uh hi. “Tua ahih manin Jeremiah aw, hih thute amau kiangah na va gen ding hi; ahih hangin amau in a hong ngai kei ding uh hi. Amaute na sap hangin a hong dawng kei ding uh hi. Tua ciangin nangmah in amaute’ kiangah, ‘Hih gam in, Topa amaute’ Pasian’ thu a mang lo gam hi a, thuhilhna sang loin, thuman om nawn lo a, genin zong a nei nawn kei uh hi,’ na ci ding hi. Jerusalem mite aw, na lu uh mettol un la, na sam uh paaimang un; mual tungah va kap un. Bang hang hiam cih leh Topa in hih a gilo khang mite ka nial zo a, ka taisan khin zo hi. “Bang hang hiam cih leh, Topa in kong cih-inah, Judah mite in hoih ka sak loh nate a hih khin zo uh hi. Ka min tawh a kilo ka biakinn a nit sak nadingun kihhuai milimte a koih uh hi. Ben-Hinnom mualkuam-ah a tapate a tanute uh mei sungah a hallup nading uh Tofeth a kici biakna tau khat a bawl uh hi. Tua pen kei’ sawl lah hi loin, zong ka ngaihsun kha beek kei hi. Tua ahih manin en un, Topa in kong cih-inah, tua mun pen Tofeth ahi zongin Ben-Hinnom mualkuam ahi zongin a kicih nawn loh hun hong tung ding hi. Kithahna mualkuam a kici zaw ding hi, bang hang hiam cih leh Tofeth ah mun awng om nawn lo zah dongin mi site a kivui ding hi. Misiluangte huih laka leeng vasate leh leitunga om ganhingte’ an suak ding uh a, tuate a delhmang ding kuamah om lo ding hi. Tua ciangin Judah gam khuapite leh Jerusalem khua kongzing lakah gualnopna leh lungdamna awte leh zi nei thakte leh mothakte’ awte ka gingsak nawn kei ding hi; bang hang hiam cih leh tua mun kinusia ding hi. “Tua hun ciangin, Topa in kong cih-inah, Judah gam kumpite’ guhte uliante’ guhte, siampite’ guhte, kamsangte’ guhte le Jerusalem khuamite’ guhte a han sung uh panin kilakhia ding a, amaute in a it uh, a na a sepsak uh, a delh uh, a zon’ uh leh a biak uh ahi ni leh kha leh van-a om nate khempeuh’ mai-ah a kipho khia ding hi. Tua guhte kikhawm nawn loin a kiphum nawn kei ding a, lei laka ek kinusia bang ahi lel ding hi. Hih a gilo minamte’ laka a omlai sun teng in ka hawlkhiatna munah nuntak ding sangin sih ding a teelzaw ding uh hi, a vanglian Topa in kong ci hi. “Jeremiah aw, Topa in hih bangin gen hi, ci-in amaute’ kiangah va gen in: Mi khat a puk ciangin thokik buang hilo ahi hiam? Mi khat in lam a khialh ciangin hong kilehkik buang hilo ahi hiam? Tua ahih leh bang hangin hih mite lam khial-in nungkin paisuak lawmlawm uh ahi hiam? Amau in pasian zuau milimte lenkip uh a, hong kilehkik nuam lo uh hi. Amau’ thu gente ka ngaihsak a, kuamah in thuman gen lo uh hi. A gitlohna uh kuamah kisik lo a, ‘Bang hih ka hi hiam?’ ci lel uh hi. Sakol galsim ding a tai bangin amau’ tum ciat-in a pai uh hi. Van-ah tui vapite nangawn in lal hun ding a thei uh a, sumkuangte, phialphiahte leh gun vapite in zong a hun ciangin hong tung zel uh hi. Ahih hangin ka mite in Topa ngeina kipte a thei kei uh hi. “Bangci bangin note in, ‘Ko ka pil uh a, Topa’ thukham ka nei uh hi,’ ci thei ding na hi uh hiam? En un, thuman lo laitheite in tua thukham zuauthu a suah uh hi. Na mipilte uh a maizum ding uh hi; lungmang-in a cih nading a thei kei ding uh hi. En un, amaute in Topa’ thu a nial uh hi, bang pilna a nei nawn uh hiam? Tua ahih manin a zite uh midangte ka piaksak ding a, a lote uh zong midangte ka luahsak ding hi. Bang hang hiam cih leh a neupen pan a lianpen dongin thuman lopi tawh sum zongin a huaiham uh hi. Kamsangte akipan siampite dongin thuman lo khin uh hi. Amaute in ka mite’ thuaknate thupi simsak lo uh a, hoihna om keei lopi, ‘Hoih hi, hoih hi,’ ci mawkmawk uh hi. Hih a kihhuai nate a sep uh ciangin a maizum beek uh hiam? Maizum beek lo uh hi; kisuang thei beek lo uh hi. Tua ahih manin a site’ lak mahah amau zong a si ding uh a, ka daantah ni ciangin a kilawnkhia ding uh hi, Topa in kong ci hi. Topa in kong cih-inah, amaute ka susia khin ding a, a lote uhah lenggah a om nawn kei ding hi; thei in zong gah a nei nawn kei ding hi. A tehte nangawn a keu ding a, amaute ka piaksa nate a bei ding hi. “Tua ciangin mite in, ‘Bang hangin tutu lai i hi hiam? Kikai khawm un la, khuapi muanhuaite va beel ni, tua laiah va si ni; bang hang hiam cih leh Topa tungah i mawh manin Topa i Pasian in eite a si dingin hong koih khin zo hi, i dawn dingin gutui hong piakhin zo hi. Nopna i zonga nopna hong pai lo hi. Cidamna i lamen-a siatna bek i ngah hi. Leilu lam Dan khua pek panin galte’ sakol nak ging kiza hi; a sakol hatte’ hamna awging in gam teng lei teng liingsak hi. Amau in i gam leh a sunga om teng tawh khuapi leh a sung-a teeng teng tawh a hong susia khin ding uh hi,’ a ci ding uh hi. Bang hang hiam cih leh en un, no lakah gul kong khah ding hi. A kikhim zo lo gulgu neite kong khah ding a, note hong tu ding uh hi,” Topa in hong ci hi. Ka dahna dam thei lo a, ka lungsim na mahmah hi. Ngai un, gamsung mun khempeuh panin ka mite’ tanute kap uh hi: “Zion khua-ah Topa om nawn lo ahi hiam? A kumpipa uh om nawn lo ahi hiam?” a ci uh hi. Topa in dawng kik a, “Bang hangin a milim bawl tawmte uh leh a gamdang milimte uh tawh kei hong hehsak uh ahi hiam?” a ci hi. Mite in, “An lah kila khin zo a, khuakhal hun zong bei ta a, eite lah hong kihon nai kei lailai hi,” a ci uh hi. Ka mite’ thuakna hangin ka lungsim kisia hi. Lung kham lua-in ka kap hi. Gilead-ah zatui om lo ahi hiam? Zato siam om lo ahi hiam? Bang hanga ka mite dam thei lo uhahi hiam? Aw, ka lu tuikhuk hi-in, ka mitte khitui nak hi tazen leh pawh, ka mite’ kithahlupna hangin a sun a zanin kapkap mai ning! Sehnel gamlakah khawl nading bukno khat nei thei-in ka mite nusia-in taisan thei hi leng maw! A vekpi-un angkawm hat hi khin uh a, thuman lo kim uh hi. A leii uh thalpeu bangin zang uh a, zuauthu a lawnkhia khia uh hi; gam sungah thuman om loin zuauthu bekbek a dim hi. Siatna lam manawh tektek uh a, Kei hong thei lo uh hi, Topa in a ci hi. Mi khempeuh in a inn vengte uh kidawm uh hen la, a sanggamte uh muang kei uh hen; bang hang hiam cih leh sanggamte khempeuh khemhat ciat uh a, innvengte khempeuh zong gensiat hat ciat uh hi. Mi khempeuh in a innvengte uh khem ciat uh a, thuman gen kuamah om lo hi; a leii uh zuauthu gen dingin kisinsak uh a, mawhna a bawl manun tawllua-in a kisikkik zo nawn kei uh hi. Khat khit khat-in mite a bawl sia uh a, zuau zong a phuakphuak uh hi. Kei hong thei nuam lo uh hi, Topa in ci hi. Tua ahih manin a vanglian Topa in a cih-inah: “En un, amaute a sian’tho nadingun ka suangtui dinga ka ze-et ding hi. Tua lo ka mite bang ka cih nawn ding hiam? A leii uh thaltang lauhuai bang hi a, zuauthu a gen hi. A kam uh tawh a innvengte’ kiangah a awzol uh hangin, a sih nading uh a lungsim sung uhah a ngaihsun veve mawk uh hi. Hih thute hangin daantat lo ding ka hi hiam? Topa in kong ci hi. Hih bang minam khat tungah ka phu la lo ding ka hi hiam? “Mualte adingin kap-in tau un la, gamlak lo nona munte adingin thuum un. Bang hang hiam cih leh tuate keu gawp a, kuamah pai nawn lo hi, bawng ham zong kiza nawn lo hi; van-a leeng vasate leh gamsate a taimang ta uh hi. Jerusalem khua ninkholna ka bangsak ding a, se-alte’ teen’na ka suak sak ding hi. Judah khuapite gamlak ka suak sak ding a, kuamah a teeng nawn kei ding hi,” a ci hi. Hih thu a tel thei ding mipil kua ahi hiam? Hih thu a genkhia dingin Topa in kua hopih na hi hiam? Kuamah in hih gam a kantan nawn loh nadingin bang hangin kisia-in gamlak tawh kibang ahi hiam? Topa in, “Amaute in a mai uh-a ka lah ka thukham a nusia uh a, ka thu hong mang loin ka cih bangin ta lo uh a, amau’ lungsim’ deihna zui tentan-in a pu a pate-uh’ hilhna bangin Baal nung a zuih man uh ahi hi. Tua ahih manin a vanglian Topa, Israel mite’ Pasian in kong cih-inah: En in, hih mite gamsai-in ka vak ding a, gutui ka dawnsak ding hi. Amaute le a pute a pate’ theih ngei lohna gamdangah ka kithehthang sak ding a, a sih khit dong uh namsau ka nungdelh sak ding hi,” a ci hi. Tua ahih manin a vanglian Topa in a cih-inah: “Ngaihsun un la, numei kapte hong pai dingin va sam un; a kahsiam tata vaikhak un. Va kinawhsak un la, i khitui a luan’ theih nading, i mitkhu a kawt theih nadingin eite hong kah uh hen. Bang hang hiam cih leh Zion khua pan-a kiza kahna aw ging in, ‘I kisia khin zo hi! I zumhuai mahmah khin zo hi; bang hang hiam cih leh amau in i innte hong suksiat sak uh ahih manin, i gam i nusia ding hi,’ ci-in a gen hi,” a ci hi. Numeite aw, Topa’ kammal ngai dih un, a kam pan-a hong gingkhia thu na bil uhah lut sak un; na tanute uh kahdan hilh un la, na inn vengte ciat uh kah la hilh un. Bang hang hiam na cih uh leh tawlet vangte panin sihna hong lutin, kumpipa’ inn sungah zong hong lut hi. Kong zinga naupangte a vatmang a, sumbuka tangvalte a vatlum hi. “ Topa in, ‘Gamlaka kitha ek bangin misiluang a kipaaithang ding a, buhlom atsa kinusia bangin kuamah in a khawm kei ding hi,’ ci-in a gen hi, va ci in,’ hong ci hi. Topa in a gen-inah: “Mipilte in a pilna uh kisak theihpih kei uh hen la, mihatte in a hatna uh kisak theihpih kei uh hen. Mihaute in zong a hauhna uh kisak theipih kei uh hen. A kisa theite in, keimah, leitungah migitna, thumanna leh thu tan’na zang ka hihna leh tuate sungah nuam a sapa ka hi hi, cih hong telna leh hong theihna uhah kisathei uh hen,” Topa in kong ci hi. “En un, Topa in kong cih-inah, vun ki-at hi napi-a vun ki-at taktak lote khempeuh ka daantah ni hun hong tung ding hi. Izipt mite, Judah mite, Edom mite, Ammon mite, Moab mite leh a sam uh a mettom sehnel gam-a omte khempeuh zong ka daantah ding hi. Bang hang hiam na cih leh hih gamte khempeuh in vun a at kei uh a, Israel mi khempeuh zong a lungsim sung uhah vun at lohpi ahi uh hi. Israel mite aw, note hong hopihna Topa’ kammal ngai dih un. Topa in hih bangin ci hi: “Gamdangte’ omdan ciing kei un la, vantunga lim lamdangte lunghih mawhna-in ngaihsun kei un. Bang hang hiam cih leh gamdang mite in tuate a lunghih mawhpih uh hi. Hih mite’ ngeinate a kiman’na om lo hi. Gamlakah sing khat kiphuk a, khut siampa in a hei tawh milim-in a bawl hi. Mite in tua pen kham leh ngun tawh a zem uh a, a kilakkhiat thei loh nadingin sik tawh a kilh uh hi. A milimte uh, tangmai huan-a vasate’ lau nading-a kikhai milimte tawh kibangin a pau thei kei uh a, lam pai thei lo uh ahih manin puak kul hi. Tuate kihta kei un; siatna bangmah bawl thei lo uh a, phatna zong bangmah bawl thei lo uh hi,” a ci hi. Topa aw, nang bang mi kuamah om lo hi; nang na lian a, na min vanglian mahmah hi. Gam khempeuhte’ Kumpipa aw, kua in nang hong kihta lo ding ahi hiam? Nang, kihtak ding mah na hi hi. Bang hang hiam cih leh leitung mipil khempeuhte’ lak leh amau’ gamsung khempeuh lakah, nang bang mi kuamah om lo hi. A mi pilte uh mihai mimawl ahi uh hi; sing milim in amaute bangci hilh theih mah ding ahi hiam? Tarshish khua panin ngun sek sa va la uh a, Uphaz khua panin kham va la uh hi. Khut siamte leh kham sekte in milim-in bawl uh a, siamgat siamte’ gat ahi, puan engdup leh puan sandup tawh zem uh hi. Ahih hangin Topa in Pasian man hi a, amah in a nungta Pasian leh tawntung Kumpipa ahi hi. A heh ciangin lei ki-liing-a, gamte in a hehna nang zo lo hi. Amaute tungah, “Vantungte leh leitung a bawl lo pasiante, leitung mun khempeuh panin a mangthang ding uh hi,” ci-in na gen ding hi. Pasian in ama’ vangliatna tawh leitung bawl a, ama’ pilna tawh leitung piang sakin, ama’ siamna tawh vantung a zalh hi. Amah a pau ciang vantungah tuite ging hunhun-a, leimong panin tuikhu a suaksak hi. Guah zuk nadingin khua phiasak a, a saal sung panin huih a nung sak hi. Mi khempeuh hai-in pilna nei lo hi khin uh a, kham sekte khempeuh in a milimte uh a maizum lawh uh hi. Bang hang hiam cih leh a milimte uh zuau hi lel a, naak thei lo uh hi. Kiman’na nei lo, a haihuaipi hi a, a kidaantah ni ciangin a kisia ding uh hi. Jakob’ Pasian in tua bang hi lo a, amah in na khempeuh a piangsakpa ahi hi. Ama’ mi dingin Israel mite teel a, Ama’ min in a vanglian Topa ahi hi. Galte’ umcih a thuak mite aw, na puanlom uh zial un! Bang hang hiam cih leh Topa in, “En un, tu-in hih gam sunga teeng mite ka lawnkhia ding a, a theih nadingun a tung uhah lungkhamna ka tungsak ding hi,” a ci hi. Ka thuakna hangin ka gim hi! Ka liamna nasia mahmah hi. Ahih hangin, “Hih gimna ka thuak ding mah hi,” ka ci hi. Ka puanbuk hong kisuksiat sak a, a kikan’na khau khempeuh kitat khin hi. Ka tate in hong taisan uh a, tu-in om nawn lo uh hi; ka puanbuk a hong lamsak ding leh ka kongkhak puante hong khaisak ding kuamah om nawn lo hi. Bang hang hiam cih leh makaite hai khin uh a, Topa ’ deihna dong lo uh hi; tua hangin amaute maapai lo uh a, a mite uh kikhenthang mang hi. Ngai dih un, thu khat kigen veh! Judah khuapite gamlak a suaksak ding leh se-alte’ kua a suaksak dingin leilu lam gam panin buaina lianpi khat hong pai veh! Topa aw, mihing’ omdan ama’ uk theih hi lo hi, cih ka thei ta hi; ama’ kalsuan nading ama’ geel theih hi lo hi. Topa aw, a hoih bek tak-in, heh loin kei hong hilh in; hong heh lecin kei ka si ding hi. Nangmah hong thei lo gamte tung leh nangma’ min a hong lo ngeilo mite’ tungah na hehna sungsuk in; bang hang hiam cih leh amaute in Jakob’ suan leh khakte that mangin a ma’ teen’na susia khin uh hi. Topa in kei hong hopih-a, “Hih thuciamna thute ngai in la, Judah mite leh Jerusalem khua mite kiangah va gen in. Topa, Israel mite’ Pasian in kong cih-inah, hih thuciamna a mang lo mi peuhmah in haamsiatna thuak ta hen, ci-in va gen in. Na pute na pate uh, sik haltuina meikhuk tawh a kiang Izipt gam pana ka lakkhiat ni-a ka thuciammna ahi hi. Tua ni-in, ka thu hong ngai a, kong thupiakna bangin na sep uh leh, note ka mi na hi ding uh a, keimah in note’ Pasian hi-in, tua bang na hih uh leh na pute na pate tung uh-a ka ciamsa, tu-a na neih uh bawngnawi leh khuaizu luan’na gam kong pia ding hi, ci-in thu ka pia hi,” hong ci hi. Tua ciangin keimah in, “Hi ta hen, Topa aw,” ci-in ka dawng kik hi. Tua ciangin Topa in kei kiangah, “Hih thuciamna thute ngai-a a sep nadingun Judah gam khuapite leh Jerusalem thute ngai-a a sep nadingun Judah gam khuapite leh Jerusalem khua kongzing lakah va tangko in. Bang hang hiam cih leh na pute na pate uh tungah Izipt gam pana ka lakkhiat pan-a kipan tuni ciang dong ka thu hong mang un, ci-in tam veipi, nakpi takin ka hilh ngitnget hi. Ahih hangin amaute in ka thu hong mang loin a bil uh hong ngat lo uh a, a gitlohna lungsim uh a zui tentan uh hi. Hih thuciamna a zuih ding uh thu ka piak hangin hong nial uh ahih manin tua sunga thute a vekpi-in ka tung sak ding hi,” hong ci hi. Tua ciangin Topa in hong hopih leuleu a, “Judah minamte leh Jerusalem khuamite in kei hong langpan’ uh hi. Ka thu a ngai nuam lo a pu a pate uh’ mawhna lamah a kileh hei khin zo uh a, pasian dangte’ na sem dingin a zui khin zo uh hi. Israel mite leh Judah mite in a pu a pate uh tawh ka bawlsa uh ka thuciamna a palsat khin zo uh hi. Tua ahih ciangin Topa in kong cih-inah, en un, a suahtak theih loh uh gimna amau’ tungah ka tungsak ding a, kei kiangah a hong kap liang uh zongin ka dawng nawn kei ding hi. Tua ciangin Judah mite leh Jerusalem khua mite in meihal biakna tawh a biak uh a pasiante uh kiangah pai-in na va thuum ding uh a, ahih hangin hih gimna hong tun’ ciangin a honkhia thei tuan kei ding uh hi. Bang hang hiam cih leh, Judah aw, na khua om zahzah uh pasian na nei uh a, Jerusalem khua kongzing om zahzah meihal biakna tawh Baal biak nading a zum huai biakna taute na bawl tazen uh hi. “Tua ahih manin Jeremiah aw, hih mite ading thungetsak kei in la, amau’ taangin thuumsak kei in. Bang hang hiam cih leh amau gim ngah a, hong sap uh ciangin ka ngai kei ding hi. Ka itte in siatna a bawl khit uh ciangin ka biakinn sungah bang thu nei thei nawn ding uh ahi hiam? Nong kamkhapte uh leh na kithoihna sate un na kisiat nading uh hong kipelh sak thei ding ahi hiam? Tua ciangin note na lungdam thei ding uh hiam? Khat vei lai-in Topa in note, a hing dikdek a gah pha oliv kung tawh kong genteh hi. Ahih hangin kong hal ding a, na hiangte kang tumin a ging huhu ding hi. Israel mite leh Judah mite in mei halna tawh Baal bia-in hong heh sak-a siatna a bawl manun, nang a hong phut keimah a vanglian Topa in nang’ tungah siatna tun’ nading thu kong pia zo hi,” a ci hi. Ka galte in kei hong sawmna uh Topa in nong hilh a, tua ciangin ke’n ka thei pan hi. A kithatlum dinga kipaipih mawhna nei lo tuuno bang ka hi hi. Amaute in, “Singkung a gah phat hun lai takin phuktan ni; ama’ min a kiphawk nawn loh nadingin, amah that lum ni,” ci-in a gen uh, kei hong sawmna uh ahih lam ka thei kei kha hi. Ahih hangin thuman tak-a thu khen a, mite’ lungsim leh ngaihsutna a entel a vanglian Topa aw, amaute na thukkikna kei hong musak in; bang hang hiam cih leh nang’ tungah ka thu kong ap khin hi. Tua ahih manin hong that nuam a, “ Topa’ min tawh thu hilh kei in. Na hilh leh kote’ khutlum-in na si ding hi,” a hong ci Anathoth khua mite tawh kisai-in a vanglian Topa in “En un, amaute ka daantat ding hi. A tangvalte uh namsau-in a si ding uh a, a tapate leh a tanute uh kial-in a puksi ding uh hi. Anathoth khua mite tungah siatna tungsak a, ka daantah hun ciangin a nungta lai kuamah a om nawn kei ding hi,” a ci hi. Topa aw, nang tawh thu i kisel ciangin nang a tawntungin na man den hi; ahih hangin thu khat nang tungah kong dong nuam lai hi. Bang hangin mi gilote a dau pai a, mi khem hatte gualzo sese ahi hiam? Nangmah in amaute na suan a, amau in zong zung kha-in, hong khangin, gah hong gah uh hi. A kam uh tawh nang hong phat uh a, a lungsim uh nang tawh kigamla hi. Ahih hangin Topa aw, nangmah in kei nong thei a, ka gamtatnate nong mu a, nang bang zah-a hong it cih nong entel hi. Amaute gawh dinga kikoih tuu bangin kaikhia in la, a kigawh ni a tun’ mateng tuam koih in. Ka gam bang tanvei a thuum ding hiam? Mun khempeuhah lopate bang tan vei a keu ding hiam? A teeng mite’ gitlohna hangin, gamsate leh vasate a mangthang sak khin uh hi. Bang hang hiam cih leh amau in, “I gamtatnate Pasian in hong mu kei ngawn,” a ci uh hi. Topa in, “Jeremiah aw, mite tawh tai kidem a, nang hong gimsak zo uh ahih leh, sakol bangci dem zawh ding na hi hiam? A nopna munah tuk lailai na hih leh Jordan gungei singkawm lakah bang cih ding na hi hiam? Bang hang hiam cih leh na sanggamte leh na innkuanpihte nangawn in nang hong zuak uh a, nang hong do ding mi honpi a kaikhawm uh hi. Kamkhum tawh nang a hong zol uh hangin um kei in,” ci-in hong dawng kik hi. Tua ciangin Topa in, “Ka inn ka nusia khin a, ka luahsa mite ka paaimang ta hi. Ka it mahmah ka mite, a galte’ khut sungah ka pia ta hi. Ka luah ding a ka teelsa mite in gamlak-a humpinelkai bangin kei’ lang khatah pangin hong hawksan uh a, tua ahih manin ka mudah hi. Ka mite in, sa sial ne vasa gial khat sa sial ne vasa dangte in a kimkot pan a tuk nainai uh tawh kibang hi. Gamsate aw hong kikhawm un la, pawi hong siim un. Tuucing dang tampi in ka lenggah lo hong suksiat sak uh a, kei aa teng hong tuatcilsak uh hi. A hoih mahmah ka lenggah lo pawn lak, gamlak suaksak uh hi. Pawn lak hong suaksak uh a, dah-in ka kap hi. Gamsung khempeuh a kisiat khit hangin kuamah in phamawh sa lo sawnsawn hi. Sehnel gam mualsang panin a susia dingte hong pai zo uh hi. Gam mong khat panin gammong khat dongah a lungmuang kuamah om lo hi. Bang hang hiam cih leh Topa ’ namsau in mi khempeuh a vattuk hi. Amau in mangbuh a tuh uh-a ling aat uh hi. Nasep a hahkat mahmah uh hangin bangmah a ngah kei uh hi. A kihtak huai Topa’ hehna hangin an lak hun ciangin a maizum ding uh hi,” a ci hi. Topa in ka mi Israel mite luah dinga ka piak gamh a susia nuam a gilo vengte tawh kisai-in ka cih-inah: “En un, a gam uh panin amau ka botkhia ding a, amau’ sung panin Judah mite ka lakhia ding hi. Ahih hangin amaute ka lakkhiat khit ciangin ka hehpih kik ding a, amau’ luah ding amau’ gam ciatciat uhah ka koihkik ding hi. Tua ciangin, ka mite’ omdan hoih takin a sin uh a, Baal min tawh kiciam dingin ka mite a sinsak mah bangun ‘ Topa a nuntak bangin,’ ci-a kei’ min tawh kiciam ding a sin uh leh ka mite’ lakah kip takin a om ding uh hi. Ahih hangin gam khatpeuh peuh in ka thu hong ngaih kei leh tua gam ka botkhia ding a, ka susia ding hi, Topa in kong ci hi.” Topa in kei’ tungah, “Pai in la, patpuan dialkaih khat na lei khit ciangin kawtsak loin teng in,” hong ci hi. Tua ciangin kei zong Topa’ hong gen mah bangin dialkaih khat ka lei-a ka teng hi. Topa in a nih veina hong hopih a, “Na kawng-a na teen’na dialkaih lui la in. Tho in la, Eufrates gunah pai in. Tua lai-ah suang hawm sungah va seel in,” hong ci leuleu hi. Kei zong ka pai a, Topa’ hong sawlna bangin Eufrates gun geiah ka seel hi. Tua zawh ni tampi khit ciangin Topa in kei kiangah, “Tho in. Eufrates gun-ah pai in la, na seel dinga kong sawl na dialkaih va la kik in,” hong ci hi. Tua ciangin kei zong Eufrates gunah ka pai-a dialkaih ka seelna mun khuat kik-in ka la hi. Dialkaih a na ngot gawp zo a, zat theih ding ahi nawn kei hi. Tua ciangin Topa in kei hong hopih a, “ Topa in kong cih-inah, hih mah bangin Judah mite’ kisaktheihna leh Jerusalem khua mite’ ki-uatsaknate ka susia ding hi. Ka thu hong ngai nuam lo-a, amau’ ngaihsutna bang bek-a a pai tentan nuam, pasian dangte’ nasem ding leh bia dinga a nung zuih hih mi gilote in zat theih ding ahi nawn lo, hih dialkaih bang ahi ding uh hi. Bang hang hiam cih leh dialkaih in mite’ kawng tungah a belh cinten mah bangin Israel mi khempeuh leh Judah mi khempeuh kei tungah hong belh cinten dingin ka bawl hi. Tua hi leh amaute ka mi ahi ding uh a, ka minthan’na, ka hoihna leh ka vangliatna ding ahi ding uh hi. Ahih hangin amau in ka thu hong mang lo uh hi, Topa in kong ci hi,” hong ci hi. “Jeremiah aw, amau kiangah, ‘ Topa, Israel mite’ Pasian in a hong gen-inah, “Zu beel khempeuh leenggahzu tawh a kidim ding hi,” hong ci hi,’ va ci in. Amaute in nang kiangah, ‘Beel khempeuh leenggahzu tawh kidim ding, cih kote in thei lo ka hi uh hiam?’ hong cikik ding uh hi. Tua ciangin nangmah in amaute kiangah, ‘ Topa in hong cih-inah, En un, David’ tokhom tung-a tu kumpite, siampite, kamsangte leh Jerusalem khua-a teeng mi khempeuh-a kipan gamsunga om mite khempeuh zu tawh kidim sakin ka khamsak ding hi. Pate leh tate-a kipan amaute khat leh khat ka kiphusak ding a, Topa in kong cih-inah, hehpih lo, dawm lo, it loin ka siasak ding hi, a ci hi,’ va ci in.” Ngai un la, na bil uh ngat un; kisathei kei un, bang hang hiam cih leh Topa in thu a gen zo hi. Topa in khua mialsak a, khuamialna mual tungah na tuk ma-un na lamet uh khuavak pen khua mial bikbek a suah ma-in, Topa na Pasian uh pahtawi un. Ahih hangin ka thu nong ngaih kei uh leh na kisaktheihna uh hangin ka kapsim ding a, khitui luangin nakpi takin ka kap ding hi. Bang hang hiam cih leh Topa ’ tuu honte sal dingin kikai zo hi. Kumpipa leh a nu’ kiangah, “Na kumpi tokhomte tung panin hong tuaksuk un, bang hang hiam cih leh na kumpi lukhute uh na lu tung pan-un kiakhin zo hi,” va ci un. Negeb gam khua kongpite lah kikhak a, kuamah lut thei nawn lo hi; Judah mite zong salin kikai a, a vekpi-un salin kikai khin uh hi. “Jerusalem khua aw, khuadak in la, leilu lam pan-a hong paite en dih in. Nang a hong kipia a hoih mahmah na tuu honte koi-ah om ahi hiam? Nangma’ lawm ding a, na bawl mite teekteek in nang hong uk ni ciangin bang na ci ding hiam? Numei nau suakte in na a sak uh bangin nang zong na na sa ding hi. ‘Bang hang-a hih thute kei’ tungah hong tung ahi hiam?’ ci-a na ngaihsut leh na mawhna a liatluat hang ahi hi. Tua hangin na nik hong kihawk gawp sak a, a hong kibuan gawp hi. Ethiopia mivomte in a vun uh a khek thei uh hiam? Kamkei in a gial a khek thei hiam? A khek theih uh leh siatna bawl ding a zongsang khin note in zong hoihna na bawl thei ding uh hi. Sehnel gam pan-a hong nung huih in buhvai a mutmang bangin note kong thehthang ding hi. Hih pen nangma’ tan’ dinga kong sehsa ahi hi, Topa in kong ci hi. Bang hang hiam cih leh kei nong mangngilh a, pasian zuau peuh na um hi. Keimahmah in na nik kong hawksak ding a, kong maizum sak ding hi. Na kihhuainate, na ang kawmna, na hukna leh gamlak mual tunga numei paktat banga milim pasian peuh na biak kawikawinate ka mu zo hi. Jerusalem aw, gimna ngah ta in! Na sian’tho nadingin bang tanvei sawt ding ahi hiam?” Guahzu lo-a khua keuna tawh kisai-in Topa in Jeremiah hih bangin a hopih hi: “Judah gam kap a, a khuapite maimang dekdek hi. A mite in puanvom khu-in lei lakah a bok uh a, Jerusalem khua mite’ kahna aw ging hi. Uliante in a nasemte uh tui tawi dingin sawl uh a, tuikhuk a zuat uh leh tui na om lo hi. A beel hawm uh tawh hong kilehkik uh a, lungkhamin cih nading thei loin a lu uh puan a khuh uh hi. Lokhote a lungmang uh a, a lu uh puan a khuh uh hi. Bang hang hiam cih leh guahzu lo ahih manin lei a keugawp hi. Lopa om lo lua ahih manin gamlak-ah sazuk in a no a nusia liang hi. Gam sakolte in bangmah om lohna mual tungah se-alte bangin a nak huhu uh hi. Lopa om lo ahih manin a hak zo kei uh hi. Ka mite in kei tungah, “ Topa aw, ka mawhna-un in kote’ lang khatah hong pang ahi ta zongin, nangma’ min hangin hong hehpih in. Kote in tam veipi kong nungngat uh a, nang tungah kong khial zo uh hi. Israel mite’ lamet pa aw, haksat hun ciangin ko a hong honkhia pa na hi hi. Bang hangin ka gamsung uhah mikhual bangin om-in khualzin, zan khat bek a taam bangin hong om na hi hiam? Bang hangin mi lungkia gawp bangin omin, a honkhia thei lo galkappa bangin om na hi hiam? Ahih hangin Topa aw, kote’ laizangah nangmah na om-a, nangma’ min-in kote hong kisam hi; hong nusia kei ta in,’ hong ci uh hi.” Hih mite tawh kisai-in Topa in hih bangin a gen hi: “Amaute in hih bangin kei kiang panin vakkhia kawikawi nuam uh a, a kidek kei uh hi. Tua ahih manin Topa in amaute ka sang kei a, a khialhnate uh phawk-in, a mawhnate uh ka daantat ding hi.” Topa in kei hong hopih a, “Hih mite’ thupha ngah nadingin thu hong gen nawn kei in. An a tan’ uh hangin amau’ thuumna ka ngai kei ding a, meihal biakna leh an tawh biaknate hong piak uh hangin ka sang kei ding hi. Amaute namsau tawh ahi zongin, kial tawh ahi zongin, pulnatna tawh ahi zongin ka sisak zaw ding hi,” hong ci hi. Tua ciangin keimah in, “Aa, Topa Pasian aw, en dih in, Kamsangte in amaute kiangah, ‘Note in namsau ahi zongin, kial ahi zongin na mu kha kei ding uh a, hih munah lungnopna kip Pasian in hong pia ding hi,’ a ci uh hi,” ka ci hi. Tua ciangin Topa in, “Tua kamsangte in kei’ min suang-in zuauthu hong gen uh hi. Amaute ka sawl kei a, thu ka pia kei a, zong ka hopih kei hi. Note kianga hong gen uh thute a manlo mangmuhna, bangmah kimang lo aisanna leh amau leh amau’ lungsim kikhem tawmna thute ahi hi. Tua ahih ciangin ka sawl lohpi, ‘Hih gam sungah namsau ahi zongin, kial ahi zongin hong tung lo ding hi,’ ci-a kei’ min suanga thu a gen kamsangte tawh kisai-in Topa in ka cih-inah, namsau leh kial tawh hih kamsangte a si khin ding uh hi. A hilh uh mite in zong kial leh namsau thuak-in amaute-a kipan a zite uh, a tapate uh leh a tanute uh Jerusalem khua kongzing lakah kipaaithang dinga, kuamah in a vui kei ding hi. Bang hang hiam cih leh amau’ gitlohna amau tung mahah ka buaksuk ding hi,” hong ci hi. “Jeremiah aw, amaute’ kiangah hih bangin va ci in: ‘Sun-le-zanin ka khitui luangluang hen la, kang ngei kei ta hen; bang hang hiam cih leh ka mite in nakpi-in liamna a thuak uh a, nakpi takin a kisat hi. Lo lai-ah paikhia leng, namsau-a kithat lumte bekbek ka mu a, khuapi sungah lut leng, kial-a puksite bekbek ka mu hi! Kamsangte leh siampite in koi-ah pai ding cih thei lo pi-in gam sungah an ngenin a vak kawikawi uh hi,’ ci-in va gen in.” Topa aw, nangmah in Judah gam nial khin siang zo na hi hiam? Zion khua kihhuai sa na hi hiam? Bang hangin kote hong thuaksak a, hong damsak nawn lo na hi hiam? Lungnopna ka lamen uh a, hoihna bangmah a hong tung kei hi; dam nading hun ka lamen uh a, lauhuaina bekbek ka mu uh hi. Topa aw, ka gitlohna uh leh ka pute ka pate’ gitlohna uh kong pulak uh hi. Bang hang hiam cih leh nang’ tungah kong mawh khin uh hi. Nangma’ min hangin kote hong nolh kei in; a vanglian na tokhom mindai sak kei ta in. Kote tawh nong thuciamna phawk in la, hong ciam pel kei ta in. Gamdang pasian zuaute lakah guahzu sak thei khat beek a om hiam? Ahih kei leh vantung in ama’ thu-in guahzu tawmsak thei ahi hiam? Tua bang a hih thei nang bek hilo na hi hiam? Topa kote’ Pasian aw, Nangmah in tuate khempeuh hih na hih manin nang sungah lametna kong nei uh hi. Tua ciangin Topa in kei hong hopih a, “Moses leh Samuel nangawn ka mai-ah a hong ding zawzen zongun ka lungsim hih mite lam a nga tuan kei ding hi. Ka muhna panin hawlkhia un la, paikhia sak un! Amaute in, “Koi-ah ding ka hi uh hiam?” ci-a hong dot uh leh hih bangin gen kik in: ‘ Topa in, “Pulnatna tawh a si dingte a si ding uh a, namsau tawh a si dingte a si ding uh hi; kial tawh a puksi dingte a puk si ding uh a, sal-a kikai dingte zong a kikai ding uh hi,” a ci hi,’ va ci in. “Amaute’ sih nadingin gimna nam li ka tungsak ding hi. A kithah nading uh namsau, a keizan gawp dingin ui, a valhtum ding leh a susia gawp dingin huih lak-a vasate leh lei lak-a ganhingte ka koih ding hi. Judah kumpipa Hezekiah’ tapa Manasseh in Jerusalem khua-a a bawl thu hangin leitung gam khempeuhte’ lau nadingin ka koih ding hi. “Kua in nang a hong hehpih ding hiam? Jerusalem aw, kua in nang hong kah ding hiam? Kua, hong lam baangin dam-le-nat kitheih sakna-in hong hawh ding ahi hiam? Nangmah in kei nong taisan zo hi, Topa in kong ci hi, kei nong nungngat niloh hi; tua ahih manin ka khut kong zan-a kong susia hi—ka hehna ka ki-ipip zo nawn kei hi. Na gamsung khua kongpite-ah huihpi’ mut bangin note kong mutmang ding hi. Na tate uh ka beisak ding-a, ka mite ka susia ding hi; bang hang hiam cih leh na gitlohna uh leh na om dan hoihlo panun na kiheikik kei uh hi. Tuipi-a sehnel om zah sangin nupi meigong ka tamsak zaw ding hi; na tangvalte uh a khan’ cin laitakin ka that ding a, a nute uh ka thuaksak ding hi. No’ tungah thakhat thu-in lungkhamna leh launa kong tungsak ding hi. Ta sagih a nei nupi nu khakham vei-in, a sibup hi. Sun kimlai hi napi ama adingin khuamial bang a, maizumna leh mindaina a thuak hi. No a nungta lai teng na galte un namsau-a a hong satlup dingun kong pia ding hi, Topa in kong ci hi.” Gimna ka thuak hi, ka nu aw, gamsung khempeuh-a mite tawh kitawng kisel ding a, kei nong suahsak se se! Ka sumte kuamah lah leitawi sak loin kuama’ aa lah leitawi lo napi a vekpi-un kei hong haamsiat teitei uh hi. Topa aw, amaute’ hoih nadingin nang tungah kong thuumsak kei a, gimna leh haksatna hun ciangin ka galte adingin nang tungah kong ngetsak kei leh tua haamsiatnate kei tungah hong tung ta hen! Mi khat in sik kuaitan zo lo ding ahih leh leilu lam-a sik le sumngo kihelkhawm kuaitan zo zaw ding ahi hiam? Topa in, “Na gam sung teng-a na bawl uh mawhna khempeuhte hangin na neih na lam uh leh na sum na paiite uh man ngah loin na galte uh ka tuahsak mang ding hi. Na theih ngei loh uh gam khatah na galte’ na ka hong semsak ding hi; bang hang hiam cih leh ka hehna kitawh kuang a, a mit nawn kei ding hi,” hong ci hi. Topa aw, nang’ na thei hi, hong phawk in la, hong veh in; kei hong bawlsiate tungah phu hong laksak in. Hong thuak in kei hong lakhia kei in la, nangma’ hangin minsiatna thuak ka hih lam hong thei in. Na thute in kei hong kem a, an bangin ka ne hi. Na thute kei adingin kipahna leh lungdamna ahi hi. Bang hang hiam cih leh nangma’ min-in kei hong kilo hi, Aw, Topa, a vanglian Pasian aw, Mi gualnuam mawkmawkte tawh ka kikhawl kei a, zong ka lungdam kei hi. Nangmah in na khut ka tungah hong nga-in, hehna tawh hong kidimsak na hih manin, kei guak bek ka tu hi. Bang hangin ka natna dai thei lo a, ka liamna dam thei loin dam ding ut lo ahi hiam? Kei adingin nang, tui a kang lui tawh kibangin hong lungkia sak ding na hi hiam? Tua ahih manin Topa in, “Nong kilehkik leh kong koihna ngei ah kong koih ding a, ka na na semkik ding hi. Thu manpha lo gen loin thu manpha na gen leh, ka kamsang-in kong zang ding hi. Amaute nang kiangah hong pai ding uh a, nang na hih leh amau’ kiangah na pai kei ding hi. Hih mite tungah sumngo tawh a kibawl khua kulhpi kong bang sak ding a, amaute in a hong sim uh hangin a hong zo kei ding uh hi. Bang hang hiam cih leh a hong honkhia ding leh a hong suahtak dingin nang kong om pih hi, Topa in kong ci hi. Mi gilote’ khut sungpan nang kong suahtak ding-a mi lauhuaite’ khut kol pan nang kong tankhia ding hi,” hong ci hi. Topa in kei hong hopih a, “Hih bang munah zi nei kei in la, tanu tapa zong nei kei in. Bang hang hiam cih leh hih mun-a a suak tanu tapate leh a nute a pate uh tawh kisai-in Topa in ka cih-inah: Natna lian tawh si ding uh a, kuamah in kah loin kuamah in lah a vui kei ding uh hi. Lei laka ek kitha bang ahi lel ding uh hi. Namsau kial tawh a si ding uh a, a siluangte uh huih laka leeng vasate leh lei laka ganhingte in a ne ding uh hi. “Bang hang hiam cih leh Topa in kong cih-inah, mi’ kahna inn sungah lut kei un la, thuum-in kuamah va kah se kei un. Bang hang hiam cih leh lungnopna lianpi leh ka hehpihna hih mite kiang panin ka lakhia khin zo hi, Topa in kong ci hi. Hih gamah miliante leh mineute a si ding uh a, kivui loin, amau adingin kuamah kap loin, kuamah in a pumpi uh kui liam loin, a sam uh a met kei ding uh hi. Misi kahte hehnem dingin kuamah in an a lui kei ding uh a, a nu ahih kei leh a pa a site nangawn kuamah in hehnepna hai a pia kei ding hi. Pawi kibawlna innah na pai kei ding a, amau tawh nekhawm dawnkhawm dingin na tu kei ding hi. Bang hang hiam cih leh a vanglian Topa, Israel mite’ Pasian in hih bangin kong ci hi: En un, hih mun panin note’ muh tektekin, note’ theih hun sung mahin gualnopna, lungdamna awte leh zi nei thakte, pasal neithakte’ awte ka gingsak nawn kei ding hi. “Hih thu teng hih mite tungah na gen ciangin amaute in, ‘Bang hangin Topa in hih gimna lianpi eite tungah hong tungsak ahi hiam? I khialhna bang ahi hiam? Topa i Pasian tungah bang mawhna bawl i hi hiam?’ hong ci ding uh hi. Tua ciangin nangmah in amaute’ kiangah, ‘ Topa in, “Na pu na pate un kei hong taisan khin uh a, kei hong nusia-in ka thukham a zui kei uh hi. Note in na pu na pate sangun na siahuai zaw uh hi. Bang hang hiam cih leh, en un, note’ utna bang ciat na zui tentan uh a, ka thu nong ngai nuam kei uh hi. Tua ahih manin hih gam panin note leh na pu na pate un na theih ngei nai loh uh gamah kong nawhkhia ding hi. Tua lai-ah sun-le-zan-in pasian dangte’ na na sem niloh ding uh hi; bang hang hiam na cih uh leh note kong ang-van nawn kei ding hi,” a ci hi,’ na ci ding hi. “Tua ahih manin, en un, Topa in kong cih-inah kuamah in, ‘Izipt gam pan-a Israel mite a hong lakhia Topa a nuntak bangin,’ ci-in kei’ minin a kiciam nawn loh hun hong tung ding hi. Amaute in, ‘Leilu lam gam leh eite hong hawlkhiatna gam khempeuh pana Israel mite a hong lakhia Topa a nuntak bangin,’ a ci zaw ding uh hi. Bang hang hiam cih leh a pu a pate uh ka piaksa, amau’ neihsa gamah amaute ka lakik ding hi. “En un, Topa in kong cih-inah, nga beng tampi ka khah ding a, amaute ka mansak ding hi. Tua khit ciangin sa beng tampi ka khah ding a, amaute in mual tung khempeuh leh suanghawmte panin amaute a bengmang ding uh hi. Bang hang hiam cih leh a omdan khempeuh uh ka mit-in ka mu a, kei’ kiang pana a kiseel bangmah om lo hi. A khialhna khempeuh uh zong ka mit panin a kiseel kei hi. Amaute’ khialhna leh a mawhnate uh a zah nih-in ka thuk ding hi; bang hang hiam cih leh amaute in a muh thadah huai siluang hawmte tawh kibang milimte tawh ka gam a ninsak uh a, kihhuaina tawh ka gam a dimsak uh hi,” hong ci hi. Aw Topa, ka hatna leh ka kulhpi, lungkham hun cianga ka bukna aw, leitung mong panin gamdang mite nang’ kiangah hong pai ding uh a, “Ka pu ka pate un zuauthu leh bangmah a, kimang lo milimte longal bangmah a luah kei uh hi. Mi in ama’ pasian ding bawltawm thei ahi hiam? Tuate pasian hi lo hi!” a ci ding uh hi. “Tua ahih manin, en un, amaute ka hilh ding hi. Tu tung peuhmahin ka min in Topa hi, cih a theih nadingun ka vangliatna leh ka hatna ka theisak ding hi,” ci-in Topa in a gen hi. “Judah mite’ mawhna sik laikung khat tawh kigelh hi. Suangmanpha muk zum tawh amaute’ lungtang pek tung leh biakna tau kite tungah khuak-in ki-at hi. A tate un singlim nuai khempeuh leh mualsangte’ tunga a biakna taute uh leh a nusian uh Asherah milimte a phawk veve uh a, zanglei-a om mualte tungah zong tua mawhna a kilang hi. Na gam sung khempeuh uh-a na bawl uh mawhnate hangin na neih na lam uh leh na sum na paite uh, na galte uh ka tuahmang sak ding hi. Nang kong piak na gam zong na taan ding a, na theih ngei loh uh gam khatah na galte’ na ka hong semsak ding hi; bang hang hiam cih leh ka hehna kitawh kuang a, a mit nawn kei ding hi. Topa in kong cih-inah: Mi bek muangin mi’ hatna bek suanga a lungsim Topa tawh a kilehngat mi in haamsiatna a ngah hi. Amah in sehnel gam-a po sawlbawk bang hi a, khangin a bawk pha zo kei ding hi. Kuama’ teen’ lohna ci gam, keugaw gamah amah a teeng ding hi. “ Topa muangin, Topa a beel mi in thupha a ngah hi. Amah in gun gei-a kisuan singkung bang hi a, lui geiah a zung kha hi. A tehte hing den ahih manin nisa kihta lo hi. Kitatsat loin gah den ahih manin guah zuk loh kum ciangin zong lungkham tuan lo hi. “Lungsim in na khempeuh lakah a khem hatpen hi a, a kisia pha mahmah hi; kua in a thei thei ding hiam? Keimah Topa in mi khempeuh’ nuntak zia leh gamtatna tawh kizui-a piakhia dingin ngaihsutna ka entel a, lungsim ka sittel hi.” Thu manlo pi tawh a hau mi in ama’ tui lopi keuhsak dinga a op sim vasa tawh kibang hi. A khan’ lai-in a neihsa teng a taan ding a, a tawpna-ah mihaipi a suak ding hi. I biakinnpi in a kipat cila mual tunga om a minthang kumpi tokhom tawh kibang hi. Aw Topa, Israel mite’ lametpa aw, nang a hong taisan mite a zahhuai ding uh hi. Nang a hong lehngat san mite leivui laka min gelh bangin a mang thang ding uh hi. Bang hang hiam cih leh nuntakna ciktui ahi Topa a hong taisan zo uh hi. Topa aw, hong damsak lecin kei ka dam ding a, hong honkhia lecin ka suakta ding hi; bang hang hiam cih leh nang kong phatpa na hi hi. En in, amaute in, “ Topa ’ hong tawn’nate koi lai takah om ahi hiam? Tu-in hong tung ta hen!” a ci uh hi. Ahih hangin amaute tungah gimna na tun’ sak ding kong ngen kei a, siatna ni hong tun’ ding ka deihsak loh lam zong nong thei hi. Ka kam pan-a hong gingkhia thu khempeuh na thei khin hi. Kei hong lausak kei in; gimna hong tun’ cianga kong belhpa na hi hi. Kei a hong bawl siate na zahhuaisak in la, ahih hangin kei hong zahhuai sak kei in. Amaute na lungamsak in, ahih hangin kei hong lungamsak kei in. Amaute’ tungah siatna ni tungsak in la, a zah nih-in susia in! Topa in hih bangin kei hong hopih hi: “Va pai in la, Judah gam kumpite’ lutna le pusuahna Mipite’ Kongpi leh Jerusalem khua kongpi khempeuh ah va ding in la, hih bangin va gen in: ‘Hih kongpi sunga hong lut no Judah gam kumpite, Judah mi khempeuh leh Jerusalem khua mi khempeuhte aw, Topa ’ kammal ngai un. Topa in hih bangin ci hi: Na nuntak nop lai uh leh kidawm un la, sabbath ni-in van pua kei un. Jerusalem khua kongpite-ah bangmah hong lutpih kei un. Sabbath ni-in na inn panun bangmah puakhia kei un la, bangmah sem kei un. Na pu na pate uh ka thupiak mah bangin sabbath ni siangthosak un. Ahih hangin na pu na pate un ka thu hong ngai lo uh a, a bil uh hong ngat lo uh hi. Hong mang loin ka hilhna a theih loh nadingun a lung uh a khauhsak uh hi. “Ahih hangin Topa in kong cih-inah, note in ka thu nong ngaih uh a, sabbath ni-in hih khua kongpite pan bangmah hong lutpih loin, sabbath ni siangtho sakin na na sep kei uh leh, na kumpite uh leh na uliante un David’ neih bang kumpi vangliatna a nei ding uh hi. Amaute in Judah mite leh Jerusalem khua mite tawh sakol leeng leh sakolte’ tungah tuangin hih khua kongpite-ah hong lut ding uh a, hih khuapi-ah zong mi a teeng tawntung ding hi. Mite in Judah gam khuapite leh Jerusalem khua kim panin ahi zongin, Benjamin gam, Shefelah zanglei gam, mualtung gam leh leitaw lam Negeb gamte panin ahi zongin meihal biakna leh kithoihnate, an tawh biakna, paknamtui leh lungdam biak piaknate Topa ’ biakinn-ah hong keng uh hi. Ahih hangin ka thu nong ngaih kei uh a, sabbath ni siangthosak loin, sabbath ni-in Jerusalem khua kongpite pan van pua-in nong lutpih uh leh, tua kongpite ka hal ding hi. A mei in Jerusalem khua kumpi innte lawhin a kangtum ding a, mei a kiphelh zo kei ding hi,’ va ci in,” hong ci hi. Topa in Jeremiah hong hopih-a, “Tho in, Beel sekpa’ innah paisuk in la, tua lai-ah ka thute kong hilh ding hi,” hong ci hi. Tua ciangin kei zong bel sekpa’ innah ka paisuk leh a bel sek laitak ka tuak hi. Buan tawh a bawl a beel ama’ khut sungah kisia ahih manin beelsekpa in hoih a sak bangin beel dang khatin a sek pha hi. Tua ciangin Topa in kei kiangah, “Israel mite aw, Topa in kong cih-inah hih beel sekpa’ hih bangin note zong hong hih thei lo ding ka hi hiam? En un, beelsekpa’ khut sunga buan tawh kibangin, Israel mite aw, note kei’ khut sungah na om uh hi. Minam khat peuhpeuh ahi zongin gam khat peuhpeuh ahi zongin bot khia-in, khen kham-in, ka suksiat nadingin hun khat peuhpeuh lai-in ka gen khin zo ahi zongin tua ka gen sa minam leh gam in a siatna panin a kihei kik leh, ama tung-a siatna tun’ sak ding-a ka seh sa pen ka kisikkik ding a, ka tungsak nawn kei ding hi. Minam khat peuhpeuh ahi zongin, gam khat peuhpeuh ahi zongin lam ding leh phut dingin hun khat peuhpeuh lai-in ka gen khin zo ahi zongin, amah in ka thu hong ngai lo-a hoih ka sak lohte a bawl teitei leh, ama tung-a hoihna bawl dinga ka sehsa pen ka kisikkik dinga ka bawl nawn kei ding hi. Tua ahih manin tu-in, Judah mite leh Jerusalem khua mite kiangah, ‘ Topa in a cih-inah, En un, note’ siat nadingin ka gal-a note’ langkhat ah ngimna khat ka nei hi. Na vekpi-un na siatna uh pan kilehkik un la, na dan uh leh na nasepnate uh bawlpha un,’ va ci in. Amau in, ‘Tua bang gen kul lo hi. Ko’ ngimna bangin ka zui ding uh a, mi khempeuh in ama’ lungsim sia’ deihna bangin ka gamta ding uh hi,’ hong ci ding uh hi. “Tua ahih manin Topa in kong cih-inah: Minam dangte lakah, hih bang thu a kiza ngei hiam, dong dih un. Ka mituam Israel in a mulkimhuai na khat a hih zo hi. Lebanon mualtung vuk in nusia ngei ahi hiam? Mualtung pan-a hong luang a vot kilkel luite kang ngei ahi hiam? Ahih hangin ka mite in kei hong mangngilh khin uh a, milim pasiante kiangah paknamtui a hal uh hi. Amau’ tot ding lampi-ah tuk uh ahih manin a tot ngei uh lampi lui zui nawnloin, lampi lopi a tawn uh hi. Amau’ gam uh a mulkimhuai leh simmawhna tawh a kiphitsan den ding gam a suaksak uh hi. A kantan mi khempeuh a mulkim uh a, lamdang sa-in a lu uh a pei uh hi. Ni suahna lam huih in nin a mut mang bangin a galte’ mai-ah amaute ka theh thang ding hi. Haksatna a tuah ni-un ka nungngat ding a, ka maingat kei ding hi,” hong ci hi. Tua ciangin amaute in, “Hong pai un, Jeremiah sawm ni. Bang hang hiam cih leh eite hong hilh dingin siampite ahi zongin, i dot dingin mipilte ahi zongin, Pasian’ thu hong gen dingin kamsangte ahi zongin i nei hi. Hong pai un, amah mawhsakin ama’ thu peuhmah mal khat zong i mang kei ding hi,” a ci uh hi. Hong en in, Topa aw, ka galte hong langpan’nate hong ngai in. Hoihna pen siatna tawh a kituak ding mah ahi hiam? Ka kiat nadingin dum a to uh hi. Nangma mai-ah kong ding a, amau ading thuhoih kong gensak a, na hehna amau tungah na tun’sak loh nading kong gennate hong phawk in. Tua ahih manin a tate uh kial tawh puksi sak in la, amaute namsau-in si sak in. A zite uh tasel sak in la, meigong suaksak in. A pasalte uh pulnatna tawh si sak in la, a tangvalte uh gal sungah namsau tawh kithatlumsak in. Amau a thatlum ding galkapte thakhat thu-in paisak in la, amau’ innte panin kahna aw kizasak in! Bang hang hiam cih leh ka kiat nadingin dum a to uh a, ka khete a awk nadingin thang hong siah uh hi. Ahih hangin Topa aw, amaute in thah dinga a hong sawmna uh nang na thei hi. Amau’ khialhna na maisak kei in la, nangma’ muhna panin amau’ mawhnate phiatmang sak kei in. Nangma’ mai-ah amaute guallelsak in la, na heh ni mahin hih ek in. Topa in hong hopih a, “Beel sekpa’ kiangah pai in la, leibeel khat va lei in. Mite’ lakah upa pawlkhat leh siampi upa pawlkhat tonpih in la, ni suahna lam kongpi gei, Ben-Hinnom Mualkuamah pai-in, tua lai-ah kong gen thute tangko in. Nangmah in, ‘ Topa ’ kammal ngai un, Judah kumpite leh Jerusalem khua mite aw, a vanglian Topa, Israel mite’ Pasian in hong cih-inah: En un, hih munah kong tun’sak ding siatna lian lua ahih manin a za mi khempeuhte’ bil sungah ging den ding hi. Bang hang hiam cih leh hih mite in kei hong taisan khin zo uh a, amaute-a kipanin a pu a pate uh leh Judah kumpite’ theih ngei loh pasian dangte’ kiangah paknamtui a hal uh a, hih mun a ninsak uh hi. Hih mun mawhna nei lo mite thahna sisan tawh a dimsak uh a, ka thupiak, ka sawl lah a hi lo, ka ngaihsut khak beek zong a hi lo, a tate uh meihal biakna tawh Baal biak nadingin Baal biakna tausangte a lam khin zo uh hi. Tua ahih manin, en un, Topa in kong cih-inah, hih mun pen Tofeth ahi zongin Ben-Hinnom Mualkuam ahi zongin a kicih nawn loh hun hong tung ding hi. Kithahna Mualkuam a kici zaw ding hi. Hih munah Judah mite leh Jerusalem mite’ ngimna ka tangtung sak kei ding a, a galte’ namsau leh a that nuamte’ khutlum-in amaute ka sisak ding hi. Amau’ si luangte huih laka leng vasate leh lei lak a ganhingte’ an dingin ka pia ding hi. Hih khuapi a mulkimhuai leh a simmawh huai ka suak sak ding a, a kantan mi khempeuh in khuapi kisiatna hangin lamdang sa-in zahpih-in a phitsan ding uh hi. A galte uh leh a that nuam mite in hong sim uh a, nek ding om lo lua ahih manin a tapate leh a tanute-uh’ sa ka nesak ding a, mi khempeuh in a innvengte’ sa a ne ding uh hi,’ va ci in. “Tua ciangin na tonpihte’ muhin na beel sukham in la, amaute kiangah, a vanglian Topa in a cih-inah, hih beelsekpa’ beel kisukham a, a kibawl phatkik theih nawn loh mah bangin hih mite leh hih khuapi ka sukham ding hi. Mun dangah si vui nading mun om nawn lo ding ahih manin Tofeth nangawn-ah a kivui ding uh hi. Topa in kong cih-inah, hih mun leh hih mun-a teeng mite tungah tu-a bangin ka hih ding a, hih khuapi Tofeth ka bang sak ding hi. Jerusalem khua-a innte leh Judah kumpite’ innte—inn khum tung pan vantunga aksite khempeuh tungah paknamtui hal biakna kipiakna innte leh pasian dangte tunga dawn ding biakna a kibuakna innte khempeuh a vek-in Tofeth mun bangin a nin a suak ding hi, a ci hi,’ va ci in,” hong ci hi. Tua ciangin Topa in thu gen ding a, hong sawlna Tofeth panin ka ciahkik a, Topa ’ biakinn sungah ding-in mi khempeuh’ kiangah, “A vanglian Topa, Israel mite’ Pasian in a cih-inah, En un, hih khuapi leh a kim-a khuaneute’ tungah ka gensa siatna khempeuh ka tung sak ding hi. Bang hang hiam cih leh amaute in a lung uh a khauhsak uh a, ka thute a ngai nuam kei uh hi, a ci hi,” ka ci hi. Jeremiah in hih thu a gente Immer’ tapa, Topa ’ biakinn uk pipa ahi, siampi Pashhur in a za hi. Tua ciangin Pashhur in kamsangpa Jeremiah sat a, Topa ’ biakinn Benjamin Kongpi sak nungah kol a bulh hi. A zing ciangin Pashhur in a kol bulhna panin Jeremiah a khahkik ciangin Jeremiah in, “ Topa in nang Pashhur ci-in hong sam nawn lo a, Mun khempeuhah Launa ci-in hong sam ta hi. Bang hang hiam na cih leh Topa in hong cih-inah, ‘En in, keimah in nang leh nang’ lau nadingin ahi zongin na lawmte’ lau nadingin ahi zongin nang kong bawl ding hi. Amaute a galte in namsau tawh a thahlup na mu ding hi. Judah gam khempeuh Babilon kumpipa’ khut sungah ka pia ding a, amah in sal dingin amaute Babilon khua-ah a paipih ding a, namsau tawh a thatlum ding hi. Tua tham loin khuapi sunga hauhna khempeuh, a nasep sa uh khempeuh, a neih a lam thupi teng khempeuh leh Judah kumpite’ sum leh pai khempeuhte a galte’ khut sungah ka pia ding a, amau in sutin, manin, Babilon khua-ah a paipih ding uh hi. Pashhur aw, nang leh na inn sung uh a, omte khempeuh sal dingin Babilon khua-ah na pai ding uh a, tua lai munah nang na si ding hi. Nang leh a man lopi-a na thuhilh a ngai na lawmte khempeuh tawh hong kivui ding uh hi,” a ci hi. Topa aw, kei nong khem a, khemna ka thuak takpi hi. Kei sangin nang na hatzaw a, keimah nong zo hi. Ni simin mite’ nuihsat lel ka hi a, Mi khempeuh in hong zahko uh hi. Bang hang hiam cih leh thu ka gen simin, “Ngongtatna leh kisiatna!” ci-in ka kiko den hi. Bang hang hiam cih leh Topa ’ kammal ka genkhiatna hangin ni simin simmawhna leh zahpihna ka thuak lawh hi. Keimah in, “Ama’ thu ka gen kei ding a, ama’ min ka lo nawn kei ding hi,” ci mah taleng zong, ama’ thu ka lungsim sungah meikuang bangin hong om a, ka guh ka tang sungah kikhum cip ahih manin ka ki-ip ipna-in ka gim lua a, gen loin ka om thei kei hi. Mite’ kihuau simna tampi ka za a, mun khempeuh lauhuai hi. Ka lawm itte khempeuh in, ka cihmawh ding hong ngak gige uh a, “A mawhna pulak un! A mawhna pulak ni! Amah i khem zo kha ding hi. Tua hi leh i zo pah ding a, tua ciangin i thukkik ding hi,” a ci uh hi. Ahih hangin Topa in a kihtak huai gal hangpa bangin, kei tawh hong omkhawm gige hi. Tua ahih manin kei hong bawlsiate a tuk ding uh a, kei hong zo lo ding uh hi. A tawntunga a mindaina uh kimangngilh ding hi. A thuman mite a en tel, lungsim leh ngaihsutna a mu a vanglian Topa aw, amaute na thuh kikna hong musak in. Bang hang hiam cih leh nangma’ kiangah ka thu kong ap khin hi. Topa ’ tungah la sa un la, Topa phat un! Mi gilote’ khut sung pan amah in mi cimawhte a honkhia hi. Ka suah ni in hamsiatna thuak ta hen! Ka nu in kei a hong suahkhiat sak ni in thupha ngah kei ta hen! Ka pa kiangah, “Tapa khat na nei hi,” ci-a va ko-a a lungdamsakpa in haamsiatna thuak ta hen. Topa in hehpih lo-a a lumlet khuapite bangin tuapa hi ta hen. Zing sangin kahna aw za hen la, sun ciangin gal patauhna aw za ta hen. Bang hang hiam cih leh amah in ka nu’ gil sungah hong that loin, ka nu ka han hong suaksak lo a, a gil sungah paai densak lo hi. Gimna leh dahna mu ding leh ni sim-a maizum den dingin bang hangin a gil sung panin suak khia sese ka hi hiam? Zedekiah kumpipa in Malkhiah’ tapa Pashhur leh Ma-aseiah’ tapa Zefaniah-te Jeremiah kiangah a sawl-a, “Kote adingin Topa ’ kiangah thu hong dot sak in. Babilon kumpipa Nebukhadnezzar in hong sim hi. Topa in a nalamdangte khat kei tungah hong sem leh amah a kilehkik sak kha thei ding hi,” ci-in a dong sak hi. Tua ciangin Jeremiah in dawng kik a, “Zedekiah kiangah hih bangin na gen kik un. ‘ Topa, Israel mite’ Pasian in a gen-inah, En un, khua kulhpi pua lam-a a hong umcih Babilon kumpipa leh Khaldea mite na dona uh ahi, na khut sung-ua na kep na galhiamte uh bangmah a, kimang lo ka suaksak ding a, amaute khempeuh hih khuapi laizangah kong paipih ding hi. Keimahmah in hehna leh thangpaihna lianpi tawh ka ban zan-in, a hat mahmah ka khut tawh note kong do ding hi. Hih khuapi sunga teengte a mi a sa ci loin ka thatlum ding a, pulnatna tawh a gam khin ding uh hi. Tua khit ciangin, Topa in kong cih-inah, Judah kumpipa Zedekiah leh a nasemte leh, pulnatna, namsau leh kial-a si lo a nungta lai teng pen, amaute a that nuam Babilon kumpipa Nebukhadnezzar leh a galte uh’ khut sungah ka pia ding hi. Amah in amaute namsau tawh a that ding a, hehpih loin, zong a siit kei ding a, itna lungsim a nei kei ding hi,’ va ci un,” a ci hi. Topa in Jeremiah hopih a, “Jeremiah aw, hih mite kiangah, ‘ Topa in a cih-inah, En un, na mai uhah nuntakna lampi leh sihna lampi ka khung hi. Hih khuapi sunga a om mi peuhmah namsau tawh ahi zongin, kial tawh a hi zongin, pulnatna tawh a hi zongin a si ding uh hi. Ahih hangin pusuak khia-a, note a hong do Khalde mite kianga a lut peuhmah a nungta ding uh a, a suakta liailiai ding uh hi. Bang hang hiam cih leh Topa in kong cih-inah, hih khuapi’ hoih nading hi lo siat nadingin ka lungsim ka khensat khin zo hi. Babilon kumpipa’ khut sungah ka pia ding a, amah in mei tawh a hal ding hi,’ na ci ding hi. “Judah kumpite innkuan tungah hih bangin va gen in: ‘ Topa ’ kammal ngai dih un, David’ suante aw! Topa in a cih-inah: Zingsang simin man takin thu khen un la, mi bawlsiapa’ khut sung pan a bawlsiatpa hon khia un. Tua bang na hih kei uh leh na siatna bawlnate hangun ka hehna mei bangin a kuang ding a, kuamah in a phelh zo kei ding hi. “Mualkuam zang pan kilam to a, zanglei laka suangtum banga sang to Jerusalem aw, Topa in kong cih-inah, nang’ lang khatah ka pang hi. Nangmah in, ‘Kua in kei hong simsuk ding a, i omna-ah kua hong lut ding hiam?’ na ci hi. Na nasepna gahte tawh kituakin nang kong daantat ding hi, Topa in kong ci hi. Tuulak-a sing hoihte tawh a kilam na kumpi innte uh mei tawh kihal ding a, a kimkot khempeuh ka kangtum sak ding hi,” a ci hi. Topa in hong hopih a, “Judah kumpipa’ innah va paisuk in la, hih bangin va hopih in. David’ tokhom tunga tu Judah kumpipa aw, nang leh na nasemte akipan hih kongpi-a hong lut na gammite khempeuh in Topa kammal ngai dih un. Topa in a cih-inah, thumanin diktat un la, bawlsiatna a thuakte a bawlsiate’ khut sung panin honkhia un. Minam dangte, pa neilote leh meigongte simmawh bawl kha loin amau tungah ngongtat kha kei un la, hih munah zong mawhna nei lo mite that kei un. Bang hang hiam na cih uh leh note in hih kammal na ngaih takpi uh leh David’ suante kumpi a suak tawntung ding uh a, amaute, a nasemte uh leh a mite uh sakolleeng leh sakolte’ tungah tuangin hih inn kongpite-ah hong lut ding uh hi. Ahih hangin note in hih kammalte na ngaih kei uh leh keimah Topa in kong gen-inah, hih in gamlak suaksak dingin ka kiciam hi. Bang hang hiam cih leh Judah kumpi inn tawh kisai-in Topa in kong cih-inah: Nangmah in Gilead gam bangin ahi zongin Lebanon mualvum bangin ahi zongin na hoih hi. Ahih hangin nang sehnel gam kong suaksak ding a, kuamah teen’ lohna khua kong suaksak ding hi. Nang’ lang khatah a hong susia ding mi ka kithawisak ding a, a hei uh hong keng ding uh hi. Amaute in na sidar khuam hoihpente hong phuksak ding uh a, mei-ah hong khul sak ding uh hi. “Tua ciangin minam dang tampi in hih khuapi a kantan ding uh a, a inn sak a inn khangte’ kiangah, “Bang hangin hih khuapilian hi ci bawl ahi hiam?” ci-in khat leh khat a kidong ding uh hi. Tua ciangin, “A Pasian uh Topa ’ thuciamna taisan uh a, pasian dang peuh bia-in a na a sepsak man uh ahi hi,” ci-in a kidawng kik ding uh hi,’ va ci in,” hong ci hi. Judah mite aw, misipa Josiah kah kei un la, khasiat kei un. A kipai khiatpih Shallum adingin nakpi takin kap zaw un, bang hang hiam cih leh a pian’na gam mu dingin amah hong kilehkik nawn lo ding hi. Bang hang hiam cih leh Judah kumpipa Josiah’ za luah a tapa, hih mun pan-a paikhiapa Shallum’ thu tawh kisai-in Topa in, “Amah hong kilehkik nawn kei ding a, sal-a a kikaihna munah a si ding hi. Hih gam a mukik nawn kei ding hi,” a ci hi. Thumanlo pi-a inn lam a, zuauthu tawh in dei tungnung a lam mi, a mawkna-a ama’ na a innvengte a semsak mi, a thaman a pia lo mi in gimna thuak ta hen. “Inn dei tungnung zapi a awng inn gol khat ka lam ding hi,” ci-a tawlet vangte bawl a, Taamtaak singpek tawh thuap sawm a, zasan a zut mi in gimna thuak ta hen. Taamtaak sing tawh inn na lam manin kumpi kisa na hi hiam? Na pa in an ne tui dawn a, thumanna leh diktatna tawh na a sep manin a maa pai hilo ahi hiam? Amah in mizawngte leh mi cimawhte thuman tawh thukhen a, na khempeuh hoih pah hi. Tu-a banga hihna in kei nong theihna-uh hilo ahi hiam? Topa in kong ci hi. Ahih hangin note in thu manlo tawh ngah nading ahi zongin, mimawh lote’ sisan luan’ nading ahi zongin, mi nuaisiahna leh ngongtat nading ahi zongin, na mitte uh leh na lungsim uh na zang uh hi. Tua ahih manin Judah kumpipa Josiah’ tapa Jehoiakim’ thu tawh kisai-in Topa in hih bangin kong ci hi: “Amaute in, ‘Sanggampa aw,’ ‘Sanggamnu aw,’ ci-a a sih ciang uh a, a kikah bangun amah a sih ciangin a kah kei ding uh a, ‘ Topa aw,’ ‘Kumpipa aw,’ ci-in a kah kei ding uh hi. La si kivui bang lelin amah a kivui ding a, Jerusalem kongpi pua lamah kikai tal-in kipaai ding hi. Jerusalem khua mite aw, Lebanon Mual tungah kahto un la, awng un; Bashan gamah va kiko un. Abarim mual tungah va kiko un, bang hang hiam cih leh na pawlte un gal a lel khin uh hi. Na daupai laitak-un kong hopih hangin na hong ngai nuam kei uh hi. Na neu tung-ua kipan nong tua cih ngitnget uh a, ka thu nong mang ngei kei uh hi. Na makaite uh huih in hong mut mangsak ding a, na pawlte uh sal-in kiman ding uh hi; tua ciangin na gitlohna uh hangin maizum-in na lunggam ding uh hi. Lebanon gam pan-a kila taamtaak inn sungah nuam takin na teeng uh hi. Ahih hangin gimna hong tun’ ciangin bang zah takin na tau ding uh hiam? Numei nausuak dingte na bang ding uh hi. Topa in Jehoiakim’ tapa Judah kumpipa Jekoniah’ tungah, “Kei a nungta Pasian ka hih mah bangin, nangmah in ka taklam khut-a khut zungbuh na hih hangin nang kong lakhia ding a, na kihtak, nang hong that nuamte’ khut sungah kong pia ding hi. Babilon kumpipa Nebukhadnezzar leh Khaldea mite’ khut sungah nang kong pia ding hi. Nangmah leh nang hong paai na nu, na suahna mun a hi lo gam dangah kong lawnkhia ding a, tua lai takah na si ding uh hi. Na ciahkik nopna gam uhah na ciahkik thei nawn kei ding uh hi,” a ci hi. Jekoniah in kuama’ deih loh a kipaimang beel kitam tawh kibang ahi hiam? Bang hangin amah leh a tate kilawnkhia a, a theih loh gamah kipaai mang ahi hiam? Aw, ka gam, ka gam, ka gam aw, Topa! Kammal ngai dih ven! Topa in hih bangin ci hi: “Hih pa, taselpa, a khan’ tawntung a gualzo ngeilo pa hi, ci-in ciamteh un. Ama’ suan leh khakte khat beek in David’ tokhom luahin, Judah gam a uk kei ding hi,” a ci hi. Topa in a gen-inah: “Ka mite sisak a, a kikhenthang sak gam ukte in gimna ngah ta hen!” a ci hi. Tua ahih manin ka mipihte a kem gam ukte tawh kisai-in Topa, Israel mite’ Pasian in hong gen-inah, “Note in ka mite kikhenthang sakin na hawlkhia mang uh a, amaute na don kei uh hi. En un, Topa in kong cih-inah, na gamtat siate uh hangin daan kong pia ding hi. Ka mite a om lai sun teng, ka hawl khiatna gamte panin ka kaikhawm kik ding a, a gam uhah ka ciahkik sak ding hi. Amaute pung-in a khang ding uh hi. Amaute don ding makaite ka koih ding a, lau nawn lo, lungkham nawn loin khat beek a mangthang nawn kei ding uh hi, Topa in kong ci hi. “En un, Topa in kong cih-inah, keimah in David’ suan lak panin kumpi dingin a diktat Hiang khat ka khan’ khiatsak ni hong tung ding hi. Amah gam uk siam ding a, gam sungah thuman thutang tawh thu hong khen ding hi. Ama’ hun hong tun ciangin Judah mite a kihonkhia ding a, Israel mite lungmuang takin a teeng ding uh hi. Amah a kilawh nadingin a min, Topa IN EITE’ DIKTATNA AHI HI, ci-in a kiphuak ding hi. “Tua ahih manin, en un, Topa in kong cih-inah, mite in, ‘Izipt gam panin Israel mite a hong paikhiatpih Topa a nuntak bangin,’ ci-in a kiciam nawn kei ding uh a, ‘a hawlkhiatna leilu lam gam leh gam dangte khempeuh panin Israel mite’ suan leh khakte pai khiatpih a, a makaih Topa a nuntak bangin,’ ci-in a kiciam zaw ding uh hi. Tua ciangin amaute, amau’ gamsung mah ah a teeng ding uh hi,” a ci hi. Kamsangte tawh kisai-in: Topa ’ hang leh ama’ thu gen kammal siangthote’ hangin ka sungah ka lungsim kitam kham a, ka guh ka tang a liing hi. Zu tam ne lua-a a kham mipa tawh ka kibang hi. Bang hang hiam cih leh mun khempeuh ah angkawmte dim hi. Topa ’ haamsiatna hangin gamsung tengah kahna dim a, gamlak lonona munte a keumang hi. Amaute gitlohna lamah pai uh a, a thuneih theihnate uh a man lopi-in a zang uh hi. Topa in a cih-inah: “Kamsangte leh siampite in Pasian a zahtak kei uh hi. Ka biakinn sung nangawn ah amau’ gitlohna ka mu hi. Tua ahih manin amaute’ lampi in, khuamial lak lam nal-a pai tawh a kibang ding a, amaute kinawhkhia gawpin a tuk ding uh hi. Bang hang hiam cih leh amaute’ thuakna hun hong tun’ ciangin amaute’ tungah gimna ka tung sak ding hi, Topa in kong ci hi. Samaria kamsangte’ sungah, a muhthadah huai khat ka mu hi; Baal min suangin thu a hilh uh a, Israel ka mite lam a pialpih uh hi. Ahih hangin Jerusalem khua-a kamsangte sungah a mulkimhuai zaw na khat ka mu hi. Angkawmin zuauthu a gen uh a, mite a gitlohna uh pan a kikhel loh nadingin mi hoihlote a hanthawn zawlai uh hi. A vekpiun kei’ muhna-ah Sodom khua mite tawh kibang khin ka sa a, Gomorrah khua mite tawh zong kilamdang lo uh hi. Tua ahih manin tua kamsangte tawh kisai-in a vanglian Topa in kong gen-inah: “En un, keimah in amaute gamsai tawh ka vak ding a, gu kisawh tui ka dawnsak ding hi. Bang hang hiam cih leh Jerusalem khua kamsangte’ kiang panin gamsung mun khempeuh ah Pasian zahtak lohna hong kizel hi,” a ci hi. A vanglian Topa in, “Note kiangah thu hong hilh a, a hong lamen khialsak kamsangte’ thu gennate ngai kei un. Amaute in a lungsim sung uh-a a geltawm uh hong gen uh ahi a, keima kiang pana hong pai thu ahi kei hi. Keimah Topa ’ thu genna a hong ngai lo mite kiangah, hong hoih na ve, ci-in a gen tawntung uh hi. Amau’ lungsim’ deihna bang ciat bek a zui tentan mi khempeuhte kiangah zong, gimna hong tung zenzen lo ding hi, ci-in a gen uh hi,” a ci hi. Amaute’ lakah kua in Topa tawh thu kikum khawm ngei-a, a thu gennate va thei ngei, va za ngei ahi hiam? Kua in ama’ kammal va ngai ngei a, va thupi ngaihsut ngei ahi hiam? En un, Topa ’ huihpi nung! A hehna hong kinuai nainai-in hong paikhia ta a, mi gilo pa’ lutang hong kiden’na ding hi. A lungsim sunga a tupna teng a tangtun’ sak matengin, Topa ’ hehna kilehkik lo ding hi. Hong pai lai ding hunte ah note in siang takin na telzaw semsem ding uh hi. Topa in, “Keimah in ka sawlkhiat hi lo napi-in tua kamsangte a kuankhia teitei uh hi. Thu bangmah ka gen lohpi, kei’ min-in thu a gen mawkmawk uh hi. Ahih hangin amaute in ka lungsim tawng dong thei uh hi leh ka thu gente ka mite tungah a tangko ding uh a, a nuntakna hoihlote panin kikhel sakin, a gamtat hoih lote panin zong a kikhelsak khin zo ding uh hi. “Keimah in mun khat bek-a om Pasian ka hi hiam? Mun khempeuh-a om Pasian hilo ka hi hiam? Topa in kong ci hi. Mi khat peuhpeuh kei’ muh loh dingin busim thei ding ahi hiam? Topa in kong ci hi. Leitung, vantung mun khempeuh ah ka om lamtak thei lo na hi uh hiam? Topa in kong ci hi. Ka min tawh zuau phuak-in, ‘Mang man zo ing, mang man zo ing,’ ci-a a gen kamsang zuau theite’ thuhilhnate zong ka za khin zo hi. Zuauthu tawh thu hilh a, a phuahtawm uh thu a hilh kamsangte’ lungsim sungah zuauthu bang tanvei teeng lai ding ahi hiam? A pute a pate in kei’ min hong mangngilh in Baal a biak uh bangin a mangmat uh a gen kawikawina uh tawh ka mite in ka min hong mangngilh ding uh hi, ci-in a ngaihsun uh hi. Kamsangpa in mang a mat leh a mang bek mah gen hen la, ahih hangin ka thu genna a za mipa in ka thu genna mah man takin gen ta hen. Buhtu leh buhtang bangci kibat theih ding ahi hiam? Topa in kong ci hi. Ka kammal in mei tawh ahi zongin, suangtum a sat nen zo sek tawh ahi zongin kibang hilo ahi hiam? Topa in kong ci hi. Tua ahih ciangin, en un, Topa in kong gen-inah, ka thu gente khat leh khat tung pana a gusim kamsangte’ langkhat-ah kei ka pang hi. En un, Topa in kong gen-inah, amau’ ngaihsut tawm thu gen napi a, ‘ Topa in ci hi,’ a ci khem kamsangte’ lang khatah kei ka pang hi. En un, Topa in kong gen-inah, ka sawl lohpi zuau mang manin tua thu hilh a, a zuauthu uh leh a kiphatsakna uh tawh ka mite a makaih khialhpih mite’ lang khatah kei ka pang hi. Ka mite adingin, amaute a kiman’na uh themkha beek om lo hi, Topa in kong ci hi. Jeremiah aw, ka mite khat peuhpeuh in ahi zongin, kamsang khat ahi kei leh siampi khat peuhpeuh in ahi zongin, ‘ Topa ’ thugen in bang ahi hiam?’ ci-a hong dot leh nangmah in, ‘ Topa ’ thugen in nangmah na hi a, nang in vangik khat na hi hi. Topa in nang, kong paaikhia ding hi, hong ci hi,’ ci in la, gen in. Kamsang khat, ahih kei leh siampi khat, ahih kei leh ka mite khat peuhpeuh in, ‘ Topa ’ thugen in vangik khat ahi hi,’ a cih leh tua pa leh a innkuanpihte khempeuh daan ka tat ding hi. Mi khempeuh in a lawmte’ kiangah ahi zongin, ‘ Topa in bangin hong dawng hiam? Topa in bangin hong gen hiam?’ ci-in na kidong zaw ding uh hi. ‘ Topa ’ thugen in vangik khat ahi hi,’ ci-in a gen nawn kei ding uh hi. Bang hang hiam na cih uh leh note’ thu genna note’ vangik ding ahi zaw hi. Note in eite’ Pasian ahi a nungta Pasian, a vanglian Topa ’ thu gennate na lumlet gawp uh hi. Kamsangpa kiangah, ‘ Topa in bangin hong dawng hiam! Topa in bang hong gen hiam?’ ci-in dong zaw un. Ahih hangin note in, ‘ Topa ’ thu gen in vangik ahi hi,’ na cih peuhmah uh leh Topa in kong cih-inah, note in na cih loh ding-ua kong hilh pen ci teitei na hih manun en un, keimah in note leh na pu na pate ka piaksa khuapi ka domto ding a, ka omna panin ka lawnkhia taktak ding hi. A tawntungin simmawhna leh maizumna kong thuaksak ding a, cik mah hunin na mangngilh ngei nawn kei ding uh hi,” a ci hi. Babilon kumpipa Nebukhadnezzar in Jerusalem khua panin Jehoiakim’ tapa Judah kumpipa Jekoniah leh Judah kumpi uliante, khutsiamte leh siksek siamte, Babilon khua-ah sal dingin a pai khiatpih khit ciangin Topa in hih mang hong musak hi. Topa ’ biakinnpi mai-ah theigah bawm nih dim ka mu hi. Bawm khat sunga theigahte, a min masate tawh kibangin limci mahmah hi. Ahih hangin a bawm khat pen sunga theigahte limci het loin nek theih ding bang hi dek lo hi. Topa in hong hopih a, “Jeremiah aw, bang na mu hiam?” ci-in hong dong hi. Kei zong, “Theigah ka mu hi. A limcite limci mahmah a, a limci lote limci lo lua ahih manin nek theih ding bang hi lo hi,” ka ci hi. Tua ciangin Topa in, “ Topa, Israel mite Pasian in kong cih-inah: Hih mun panin Khaldea mite’ gam a, ka puakkhiat Judah mi sal tangte hih theigah hoihte bangin a hoih-in ka ngaihsun ding hi. Amaute lim takin ka kem ding a, hih gamah ka lakik ding hi. Amaute ka khangto sak ding a, ka susia kei ding hi; ka suan ding a, ka botkhia kei ding hi. Keimah Topa ka hih lam theihtheihna lungsim ka pia ding hi. Amaute in a lungsim khempeuh uh tawh kei kiangah hong kileh ding uh ahih manin amaute ka mi ahi ding uh a, keimah in amaute’ Pasian ka hi ding hi. “Ahih hangin Topa in kong cih-inah: Judah kumpipa Zedekiah leh ama’ gam uk uliante-a kipan hih gama a om suak Jerusalem khua sunga a om lai sun teng leh Izipt gama teengte limci lo lua-a kine thei lo theigahte bangin ka bawl ding hi. Amaute ka hawlkhiat nading mun khempeuh mite in kihaamsiatna a, a zat dingun simmawhna leh zahkonate ka thuaksak ding a, amaute’ thuakna hangin leitung gam khempeuh ka lausak ding hi. Namsau tawh kithahna, kialpi leh pulnatnate ka tungsak ding a, amaute leh a pu a pate’ kianga ka piaksa gam sungah khat beek ka nungta sak nawn kei ding hi. Josiah’ tapa Jehoiakim, Judah gamah kumpi a suah zawh kumli a cin’ kumin Judah mite tawh kisai-in Topa in Jeremiah a hopih hi. (Hih hun in Babilon ah Nebukhadnezzar kumpi a suah kum ahi hi.) Kamsangpa Jeremiah in zong Judah gam mi khempeuh leh Jerusalem khuami khempeuhte’ tungah hih bangin a gen sawn hi: “Amon’ tapa Josiah, Judah gamah kumpi a suah zawh a kum sawm leh thum kum pan tu ciang dong kum sawmnih leh kumthum sung Topa in kei hong hopih a, ke’n zong note kiangah kong gen sawn tawntung hangin note in na ngai kei uh hi. Topa in ama’ nasem ahi kamsangte khempeuh hong sawl tawntung hi napi-in note in ngai loin na bil uh na dawh kei uh hi. Amaute in, ‘Tu-in na vekpi-un na giltohna uh leh na gamtat khialhnate uh panin na kihei uh leh Topa in note leh tanglai-a na pute na pate uh tungah na neih tawntung ding uh a, a hong piak gam sungah na teeng thei ding uh hi. pasian dangte’ nung delh loin, a na sem loin na biak kei uh a, na khut uh tawh na bawl uh milimte peuh bia-in nong hehsak kei uh leh, note bangmah kong cih kei ding hi,’ ci-in hong gen uh hi. Ahih hangin Topa in kong cih-inah, note in ka thu nong ngai kei uh a, note’ daan thuak nading mahin na khut uh tawh milim bawlin nong hehsak uh hi. “Tua ahih ciangin a vanglian Topa in kong cih-inah, ka thu note in hong mang lo na hih uh ciangin, en un, leilu lam-a om minam khempeuhte leh ka nasempa ahi Babilon kumpipa Nebukhadzezzar ka vaikhak ding a, hih gam leh a sunga teeng mi khempeuh leh hih kim-a om gam khempeuh a sim dingin ka va la ding hi. Keimah in amaute ka susia khin mang ding a, amaute a tawntungin siacip-in simmawhna ka thuaksak ding hi, ci-in Topa in kong gen hi. Tua tham loin lungdamna leh kipahna awte, zi nei thak pa leh mothaknu’ awte, angawina suang gingte ka gingsak nawn kei ding a, meivak taangte ka sumit ding hi. Gamsung khempeuh kisia-in gam simtham suak ding a, hih mite khempeuh kum sawmsagih sung Babilon kumpipa’ sal-in a om ding uh hi. Kum sawmsagih a cin’ khit ciangin Topa in kong cih-inah, Babilon kumpipa leh a gam amau’ mawhna hangin daan ka tat ding a, tua gam a tawntungin gam simtham ka suaksak ding hi. Tua gam kisiat na’ng a, ka gensa thute khempeuh hih laibu sungah kigelh a, Jeremiah in gam khempeuhte kiangah a gen hi. Tuate khempeuh ka tungsak ding hi. Bang hang hiam cih leh gam tampi leh kumpi liante in amaute salin a man ding uh a, amau’ gamtatna amau tungah ka thukkik ding hi.” Topa, Israel mite’ Pasian in hih bangin kei hong hopih a, “Ka khut tung panin hehna tawh a kidim hih leenggah tui hai la in la, kong sawlna gamte khempeuh dawn sak in. Amaute in a dawn ding uh a, amaute kiang-a ka sawl namsau hangin hoi dangdangin a hailawh ding uh hi,” hong ci hi. Tua ahih manin kei zong Topa ’ khut tung panin tua hai ka la a, Topa ’ hong sawlna gamte khempeuh ka dawn sak hi. Jerusalem leh Judah gama khuapite, a kumpite uh leh a gam uh uliante ka dawn sak a, tuni dongin gam simtham suakin, mite’ simmawhna thuakin, a min uh haamsiat nadingin a kizang hi. Izipt kumpipa Faro leh a nasemte, a kumpi uliante, a mite khempeuh leh amau’ lak-a teeng gamdang mite khempeuh; Uz gam sunga kumpite khempeuh leh Filistia gam sunga Ashkelon, Gaza, Ekron khuapite leh Ashdod khuapi-a om lai sunte’ kumpite khempeuh; Edom, Moab leh Ammon mite; Tai-ar kumpite khempeuh, Sidon kumpite khempeuh leh tuipi gei-a kumpite khempeuh; Dedan, Tema, Buz leh a sam uh a tom met khempeuhte; Arabia kumpi khempeuh leh sehnel gam sunga teeng minam kigawm khawmte’ kumpite khempeuh; Zimri kumpite khempeuh, Elam kumpite khempeuh, leh Media kumpite khempeuh; a gamla hi taleh a nai hi taleh leilu lama a om kumpite khempeuh khat khit ciangin khat ka dawn sak a, tua khit ciangin leitunga om gam khempeuh ka dawn sak hi. A tawpna ah Babilon kumpipa in a dawn ding hi. Tua ciangin Topa in hong hopih a, “Amaute kiangah, ‘A vanglian Topa, Israel mite’ Pasian in hih bangin ci hi: Dawn un. Kham un la, lua un. Note’ kiangah namsau hong pai sak ding ka hih manin tuk un la, tho zo nawn kei un,’ va ci in. “Amaute in na khut tung panin hai la-a dawn ding a, hong nial uh leh, amaute kiangah, ‘A vanglian Topa in hong gen-inah: Na dawn uh kul ding hi! Bang hang hiam cih leh, en un, ka min tawh a kilo khuapi sungah suksiatna ka pan ding hi. Note in bangmah a thuak lo ding kisa na hi uh hiam? Daan thuak loin na om kei ding uh hi, bang hang hiam cih leh a vanglian Topa in kong cih-inah, leitung-a teeng mi khempeuh that dingin namsau khat ka sawl hi,’ ci in. “Tua ahih manin nangmah in amaute thu na va hilh ding a, hih bangin na va gen ding hi: ‘ Topa a sang vantung pan hong hawk ding a, a teen’na siangtho panin hong paukhia ding hi. Ama’ mite’ lang khatah nasia takin hong hawkgawp ding a, leenggah cil mite bangin, leitung mi khempeuhte’ lang khatah hong kiko ding hi. A awging in leitung mong dongah kithawn ding hi, bang hang hiam cih leh gamte’ lang khatah Topa pang hi. Amah in mi khempeuh thu sit ding a, mi gilote namsau tawh a thatlum ding hi, Topa in ci hi. “A vanglian Topa in a cih-inah: En un, gam khat panin gam khatah siatna a paipai hi. Leitung a gamlapen mun panin huihpi hong nung hi! “Tua ni-a Topa ’ thahlup mite leitung mong khat panin mong khat dongah a kithehthang ding uh hi. Amaute kuamah in a kah kei ding a, kikaikhawm loin kiphum lo ding uh ahih manin lei lakah ek nusiat bangin a kinusia ding uh hi. “No makaite aw, tau un la, kap un, no uliante aw, vut lakah kikhuk un. Bang hang hiam cih leh hong kithahlup ni ding leh na kikhenthang ni ding uh hong tung zo hi; tuutal teelte bangin hong kithatlum ding hi. Makaite adingin buk nading om lo ding a, uliante adingin suahtak theih nading om lo hi. Ngai dih un, makaite’ kahna aw leh uliante’ tauna aw kiza hi! Bang hang hiam cih leh Topa in a gam uh suksiat sak hi. A lauhuai mahmah Topa ’ hehna hangin a nop mahmah a gam uh kisiagawp hi. Topa ’ namsau hangin ahi zongin a lauhuai ama’ hehna hangin ahi zongin, amau’ gam in gam simtham suak khin ahih manin humpi in a kua a nusiat bangin Topa in a mite a nusia zo hi. Josiah’ tapa Jehoiakim, Judah gamah kumpi a suah tungin, Topa in hih bangin Jeremiah hopih a, “ Topa in kong cih-inah, Topa ’ biakinnpi huang sungah va ding in la, Topa ’ biakinnpi sunga bia dinga hong pai Judah gam khuapite khempeuh kiangah gen ding a, kong sawl khempeuh va gen in. Kam khat beek im kei in. Amaute in na thu gen hong ngai-in, a gitlohna uh pan a kihei kha thei ding uh hi. Tua hi leh amau’ gitlohna hanga amau suksiat ding a, ka ngaihsut sa ka khelkik ding hi. Nangmah in amaute’ kiangah, ‘ Topa in hih bangin ci hi: Note in ka thu hong ngai loin, note’ mai-a kong lah sa ka thukham bangin na gamtat kei uh a, note in a thu na man’ ngei loh uh ahi, kong sawl zelzel ka nasem kamsangte’ thu na thupisim kei uh leh hih biakinnpi Shiloh khua ka bawl bangin ka bawl ding a, hih khuapi leitung gam khempeuhte’ kihaamsiatna-in ka zangsak ding hi,’ na ci ding hi,” a ci hi. Siampite, kamsangte leh mi khempeuh in Topa ’ biakinnpi sunga Jeremiah in hih thu a gen teng a za uh hi. Mi khempeuh’ tunga Topa in gen dinga a sawl teng Jeremiah in a gen khit ciangin, siampite, kamsangte leh mi khempeuhte in a man uh a, “Nang na si ding hi. Bang hangin, ‘Hih biakinnpi in Shiloh tawh kibang ding a, hih khuapi-ah a teeng om loin gam simtham a suak ding hi,’ ci-in Topa ’ minin thu hilh na hi hiam?” ci-in a gen uh hi. Topa ’ biakinnpi sungah mi khempeuh in Jeremiah a umcih uh hi. Judah gam uk uliante in hih thu a zak uh ciangin kumpipa’ inn sung pan Topa ’ biakinnpi ah hong paito uh a, Topa ’ biakinnpi lutna Kongpi Thakah a tu uh hi. Tua ciangin siampite leh kamsangte in kumpi uliante leh mi khempeuhte’ kiangah, “Note in na bil uh tawh na zak ciat uh mah bangin hihpa in hih khuapi langpan’in thu hilh ahih manin sihdaan piak tuak hi,” a ci uh hi. Tua ciangin Jeremiah in kumpi ulian khempeuhte leh mi khempeuhte’ kiangah, “ Topa in na zaksak uh ahi hih biakinnpi leh hih khuapi lang khatah ka gen thu khempeuh a gen dingin kei hong sawl hi. Tua ahih manin tu-in na nuntakdante uh leh na gamtatziate uh khel un la, Topa na Pasian uh’ thu ngai un. Tua hi leh Topa in note’ kisiat nading a gensa pen a khelkik ding hi. Ahih hangin kei ka hih leh, en un, note’ khut sungah ka om hi. Note in hoih na sak uh leh man na sak uh bangin kei tungah hong bawl un. Kei nong thah uh leh bel, mawhnei lo mi khat na thah manun note mahmah-a kipan hih khuapi leh a sunga teengte in na thuak ding uh hi, cih thei ta un. Bang hang hiam cih leh na bil mahmah a, na zak dingun hih thute a gen dingin Topa ’ hong sawl taktak ka hi hi,” a ci hi. Tua ciangin kumpi uliante leh mi khempeuhte in siampite leh kamsangte tungah, “Hih pa in Topa in Pasian’ min tawh thu hong gen ahih manin sihdaan piak tuak lo hi,” a ci uh hi. Gamsung upa pawlkhat in zong, ding-in tua a kikhawm mi khempeuhte kiangah, “Judah kumpipa Hezekiah a maan’ laitakin Moresheth khuami Mikah in Judah mi khempeuhte’ kiangah: ‘Lo dingin Zion mual a kikho ding hi; Jerusalem khua a kisiazan ding a, biakinn mual in gamlak a suak ding hi, ci-in a vanglian Topa in a gen hi,’ a ci hi. Judah kumpipa Hezekiah leh Judah mi khempeuhte in amah that zenzen uh ahi hiam? Kumpipa in Topa zahtakin Topa ’ pahtak ding a nget ciangin Topa in zong amau’ tunga siatna tun’sak dinga a gensa khelkik zaw hilo ahi hiam? Ahih hangin eite in eite’ tungah siatna lianpi khat i tungsak dekdek hi,” a ci uh hi. Kiriath-Jearim khua panin zong Topa ’ min tawh thu a hilh Shemaiah’ tapa Uriah a kici midang khat a om lai hi. Jeremiah’ gen mah bangin amah in zong hih khuapi leh hih gam lang khatah thu a gen hi. Jehoiakim kumpipa leh a galkapmang khempeuh leh kumpi ulian khempeuhte in ama’ thugente a zak uh ciangin kumpipa in thah dingin a zong hi. Ahih hangin Uriah in tua thu a zak ciangin lau-in Izipt gamah a taisim hi. Tua ciangin Jehoiakim kumpipa in Akbor’ tapa Elnathan leh midang pawlkhat Izipt gamah sawl a, amau in zong Izipt gam panin Uriah manin Jehoiakim kumpipa’ kiangah a puak uh hi. Amah in tua pa namsau tawh that-in a luanghawm mi mawkmawkte’ kivuina munah a paai hi. Ahih hangin Shafan’ tapa Ahikam in Jeremiah hu ahih manin mite’ khut sungah kipia loin thahna a thuak kei hi. Josiah’ tapa Zedekiah, Judah gamah kumpi a suah tungin Topa in Jeremiah hong hopih hi. Topa in kei’ tungah, “Savun khau tawh a kithuah hakkol bawl in la, na ngawngah thuah in. Edom kumpipa tung, Moab kumpipa tung, Ammon mite’ kumpipa tung, Tai-ar kumpipa tung leh Sidon kumpipa tungah Judah kumpipa Zedekiah tawh kimu ding a, Jerusalem khua-a hong pai a kumpi taangmite-uh tung tawnin thu zasak in. Amaute in a kumpite uh tungah, a vanglian Topa, Israel mite’ Pasian in hih bangin ci hi, ci-in gen uh hen. ‘Keimah in a lian mahmah ka vangliatna tawh ka khut zan-in, leitung leh leitung-a om mite leh ganhingte ka bawl a, piaktuak ka sakte’ tungah ka pia hi. Tu-in hih gamte, ka nasempa ahi Babilon kumpipa Nebukhadnezzar’ khut sungah ka pia khin zo hi. Gamsate nangawn ama’ nasem dingin ka pia lai hi. Ama’ gam kisiat hun a tun’ mateng gam khempeuh in amah-a kipan a tapa leh a tupa’ na a sepsak ding uh hi. Tua khit ciangin gam tampi leh kumpi liante in amah salin a leh neih kik ding uh hi. “‘Ahih hangin gam khat peuhpeuh ahih kei leh kumpi khat peuhpeuh in Babilon kumpipa Nebukhadnezzar’ na sem loin, Babilon kumpipa’ hakkol a ngawngah a puak kei leh, amah ka ukcip sak mateng tua gam, namsau tawh, kialpi tawh, pulnatna tawh ka daantat ding hi,’ Topa in kong ci hi. Tua ahih manin Babilon kumpipa’ na sem kei un, ci-a note’ kianga a hong gen na kamsangte uh, na aisan theite uh, na mang man’ theite uh, na khutlamen theite uh leh na mangsan theite uh’ thu gennate um kei un. Bang hang hiam cih leh note’ kianga hong gen uh thu in zuauthu hi a, tua hangin na gam uh panin gamla pi-ah note hong kipai khiatpih ding hi. Keimah in note kong hawlkhia ding a, note na si ding uh hi. Ahih hangin Babilon kumpipa’ hakkol pua a, ama’ na a sem gam pen, lo kho-a a teen’ theih nadingin ama’ sung mahah ka omsak ding hi, ci-in Topa in hong gen hi,’ ci-in gen uh hen,” hong ci hi. Judah kumpipa Zedekiah’ kiangah zong tua mah bangin ka gen-a, “Na nuntak theih nadingin Babilon kumpipa’ hakkol pua in. Amah leh a mite’ na va sem in. Bang hangin nang leh na mite, namsau tawh, kialpi tawh, pulnatna tawh si ding na hi uh hiam? Babilon kumpipa’ na a sem lo gam khat peuhpeuh tua ci sih ding hi, ci-in Topa in a gen hi. Babilon kumpipa’ na sem kei un, ci-a note’ kiang-a hong gen kamsangte’ thu gennate um kei un. Bang hang hiam cih leh note kiang-a hong gen uh thu in zuauthu ahi hi. Topa in kong cih-inah, keimah in amaute ka sawl kei hi. Ahih hangin amaute in kei’ min tawh a man lopi-in thu hilh uh a, tua hangin note leh note’ kianga thu hong hilh kamsangte kong hawlkhia khawm ding a, na si ding uh hi,” ci-in ka gen hi. Tua ciangin siampite leh hih mi khempeuhte kiangah, “ Topa in kong gen-inah, ‘En un, Topa ’ biakin beelte, Babilon khua panin kila kik baih ta ding hi,’ ci-a note kianga na kamsangte-uh’ hong thu gente um kei un. Bang hang hiam cih leh note kianga hong gen uh thu in zuauthu ahi hi. Amau’ thu na mang kei un. Na nuntak theih nadingun Babilon kumpipa’ na na sem zaw un. Bang hangin hih khuapi gam simtham suak laizang ding ahi hiam? Amaute kamsang taktak ahih uh a, Topa in ka hopih taktak ahih uh leh, Topa ’ biakinnpi sung, Judah kumpipa’ inn sung leh Jerusalem khua sunga a kinusia lai beelte Babilon khua-ah a kipuak khiat nawn loh nadingin a vanglian Topa kiangah hong thuum uh hen. Topa ’ biakinnpi sung, Judah kumpipa’ inn sung leh Jerusalem khua sunga a kinusia lai beelte tawh kisai-in ahi zongin a vanglian Topa, Israel mite’ Pasian in kong gen-inah: Tuate Babilon khua-ah kipuakhia ding a, ka kan mateng tua lai-ah a om suak ding hi. Tua khit ciangin tute ka la kik ding a, hih munah ka koih kik ding hi, Topa in kong ci hi,” ci-in ka gen hi. Tua kum mahin (Judah gamah Zedekiah kumpi suah zawh kum li leh kha nga a phak kum) Gibeon khua pana hong pai Azzur’ tapa kamsang Hananiah in Topa ’ biakinnpi sungah siampite leh mi khempeuh’ om kim laitakin hong hopih a, “A vanglian Topa, Israel mite’ Pasian in hong gen-inah: Babilon kumpipa’ hakkol ka kuaitan zo hi. Kum nih sungin Babilon kumpipa Nebukhadnezzar in hih mun pan lakhia-in Babilon khua-a a puak, Topa ’ biakinnpi sunga beelte hih munah ka la kik ding hi. Jehoiakim’ tapa Judah kimpipa Jekoniah leh Judah gam pana Babilon-a sal a, a paite khempeuh zong hih munah ka la kik ding hi, Topa in hong ci hi. Bang hang hiam cih leh Babilon kumpipa’ hakkol ka kuaitan ding hi, a ci hi,” hong ci hi. Tua ciangin kamsangpa Jeremiah in Topa ’ biakinn pi sungah ding-a a om siampite leh mi khempeuhte’ om kim laitakin kamsangpa Hananiah hopih a, “Amen! Topa in tua bangin sem ta hen. Topa in na thu bangin sem ta hen. Topa in na thu genkholhna bangin hong tangtung sak hen la, Babilon khua panin Topa ’ biakinnpi sunga beelte leh sal-a kimante khempeuh hih munah hong la kik tapeuh hen. Ahi zongin tu-in nang leh mi khempeuhte’ zak a, kong gen ding hih thu na ngai ta un. Nang leh kei’ ma-a a om, tang lai-a kamsangte in gam tampi leh gam liante tungah gal ahi zongin, kial ahi zongin, pulnatna ahi zongin hong tung ding hi, ci-in a gen khol zo uh hi. Ahi zongin, nopna hong tung ding hi, ci-a a gen kamsangpa pen Topa ’ hong sawl kamsangpa hi taktak hiam, cih kamsangpa’ gen bang hong tun’ ciangin a kithei pan ding hi,” a ci hi. Tua ciangin kamsangpa Hananiah in kamsangpa Jeremiah’ ngawng panin a hakkol lakkhiat sak a, a kuaihtan sak hi. Hananiah in zong mi khempeuhte’ om lai takin thu gen a, “ Topa in, tu-a bangin Babilon kumpipa Nebukhadnezzar’ hakkol, kum nih sungin gam khempeuhte’ ngawng panin ka kuaihtan sak ding hi, a ci hi,” ci-in a gen hi. Tua ciangin Jeremiah a paikhia hi. Kamsangpa Hananiah in Jeremiah kamsangpa’ ngawng panin a hakkol lakhia a, a kuaihtan sak zawh tawlkhat khit ciangin Topa in Jeremiah hopih a, “Pai in la, Hananiah kiangah, ‘ Topa in hih bangin hong ci hi: Nangmah in sing tawh kibawl hakkol na kuaitan zo hi. Ahih hangin keimah in sik tawh kibawl hakkol khat tawh ka laih ding hi. Bang hang hiam cih leh a vanglian Topa Israel mite’ Pasian in kong gen-inah: Hih gam khempeuhte’ ngawngah sik hakkol ka thuah khin zo a, amaute in Babilon kumpipa Nebukhadnezzar’ na a sem ding uh hi. Bang hang hiam cih leh gamsate nangawn ama’ tungah ka pia khin zo hi,’ va ci in,” a ci hi. Tua ciangin kamsangpa Jeremiah in zong Hananiah kamsangpa kiangah, “Na ngai in, Hananiah aw! Topa in nang hong sawl lohpi, hih mite zuauthu na umsak hi. Tua ahih manin Topa in a hong gen-inah: ‘En in, hih leitung panin nangmah kong lakhia ding hi. Topa langpan’na thu gen na hih manin tu kum sung mahin na si ding hi,’ hong ci hi,” a ci hi. Tua kum mah a kha sagih kha-in kamsangpa Hananiah a si ta hi. Jerusalem khua panin Nebukhadnezzar in Babilon khua-ah sal-a a paikhiat pih ulian om laite, siampite, kamsangte leh mi khempeuhte’ tungah kamsangpa Jeremiah in Jerusalem khua panin lai khat a khak hi. Tua hunin Jekoniah kumpipa leh a nu, a kumpi inn mangte, Judah gam leh Jerusalem khua-a makai upate, khutsiamte leh sik sekte, Jerusalem khua panin kipaikhiatpih khin zo hi. Tua laitak pen Shafan’ tapa Elasah leh Judah kumpipa Zedekiah in Babilon khua Nebukhadnezzar kumpipa’ kiang-a kumpi taangmi dinga a puak Hilkiah’ tapa Gemariah-te a puasak hi. Tua sungah: “Jerusalem pana Babilon-a hong kipuakkhia sal tang mi khempeuhte’ tungah a vanglian Topa, Israel mite’ Pasian in hih bangin hong ci hi: Inn lam un la, a sungah teeng un. Huan bawl un la, a sunga na ciin’te uh ne un. Zi pi un la, tanu tapa nei un. Na tapate uh ading mo la un la, na tanute uh mo khak un; tua hi leh amau in zong tanu tapa hong nei ding uh hi. Kiam kei un la, pung zaw un. Note sal-a kong koihna khuapi’ phattuam nading bawl un la, tua khuapi adingin Topa tungah thu ngetsak un. Bang hang hiam cih leh tua khuapi in phattuamna a ngah leh no zong phattuamna a ngah mah na hi uh hi. A vanglian Topa, Israel mite’ Pasian in kong gen-inah: note lak-a om na kamsangte uh leh na aisan theite uh’ khem sa-in ta kei un la, a mang mat hong gente uh na ngai kei un. Bang hang hiam cih leh ka min tawh no’ tunga hong gen uh thute zuauthu hi a, ka sawl lohpi ahi uh hi, Topa in kong ci hi. “ Topa in kong cih-inah: Babilon khua-ah kum sawmsagih na om khit uh ciangin, note kong kan kik ding a, kong kamciamna sa hong tangtung sakin, hih munah kong la kik ding hi. Bang hang hiam na cih uh leh Topa in kong cih-inah, note’ mai lamah lametna kong piak ding, na siat nading uh hi loin na phattuam nading uh geelna ka neihte kei bek in ka thei hi. Tua hun ciangin note in kei hong samin, hong pai-in thu nong ngen ding uh a, ke’n zong kong dawng ding hi. Note in kei nong zong ding uh a, na lungsim khempeuh uh tawh nong zon’ uh ciangin nong mu ding uh hi. Topa in kong cih-inah, note in nong mu ding uh a, na saltan’na uh hong bei sakin, kong hawlkhiatna gam khempeuh leh mun khempeuh panin kong kaikhawm kik ding a, note kong lak khiatna gam mahah kong tun’pih kik ding hi, Topa in kong ci hi. “Note in, ‘Eite adingin Topa in Babilon khua-ah kamsang hong koihsak hi,’ ci-in gen na hih manun David’ tokhom tunga tu kumpipa leh hih khuapi sunga om, note tawh sal tang ding a, a paikhawm lo na innkuan pihte khempeuh uh tawh kisai-in Topa in kong gen-inah: En un, amaute tungah namsau tawh kithahna, kialpi leh pulnatna ka tungsak ding a, amaute, a kine thei lo theigah muat ka bang sak ding hi. Amaute namsau, kialpi leh pulnatna tawh ka nung delh ding a, ka hawlkhiat nading mun khempeuh ah mite in kihaamsiatna-a a zat dingun simmawhna leh zahkonate ka thuaksak ding a, amaute’ thuakna hangin leitung gam khempeuh ka lausak ding hi. Bang hang hiam cih leh, Topa in kong cih-inah, ka nasem ka kamsangte’ tung tawnin kong puak ngitnget thute amaute in thupisim loin a hong mang kei uh hi. Jerusalem khua pana Babilon khua-a kong puakkhiat, no sal tangte khempeuh aw, Topa kammal ngai dih un: A vanglian Topa, Israel mite’ Pasian in kei’ min tawh note’ kianga zuauthu a hong hilh Ko-laiah’ tapa Ahab leh Ma-aseiah’ tapa Zedekiah-te tawh kisai-a kong gen-inah: En un, keimah in amaute Babilon kumpipa Nebukhadnezzar’ khut sungah ka pia ding a, amah in no’ muhin amaute a thatlum ding hi. Amaute’ hangin Judah gam pana Babilon khua-a sal tang mi khempeuh in: “Babilon kumpipa in Zedekiah leh Ahab, a hing tanga mei sunga a em bangin Topa in nang hong hih hen,” ci-in kihaamsiatna-in a zang ding uh hi. Bang hang hiam cih leh amaute Israel gamah hai gamtat uh hi: a innvengte’ zite mawhpih uh a, thu ka piak lohpi ka min tawh zuauthu a gen uh hi. Keimah Topa in ka mu a, teci ka hi hi, hong ci hi,” ci-in a gelh hi. ‘ Topa in siampi Jehoiada taangin nangmah siampi-in hong koih khin zo a, Topa ’ biakinnpi sungah a ukpi ding na hi ta hi. Tua ahih manin thu a hilh mawkmawk kamsang bang a, a gamta mihaite thongkia sakin kol na bulh ding hi. Bang hangin note’ kiang a, thu hong hilh Anathoth khuami Jeremiah taai lo na hi hiam? Bang hang hiam cih leh amah in Babilon khua-ate lai hong khakin, sawt veipi saltang ding na hih manun, inn lamin a sungah teeng un la, huan bawlin a sunga na ciin’te uh ne un, hong ci hi, ci-in na gen hi,’ ci-in Zefaniah kiangah lai na khak hi,” ci-a Shemai-ah kianga gen dingin Pasian in Jeremiah a sawl hi. Siampipa Zefaniah in hih laikhak kamsangpa Jeremiah’ kiangah a simkhia hi. Tua ciangin Topa in Jeremiah hopih a: “Sal tang mi khempeuhte kiangah Nehelam khuami Shemai-ah tawh kisai-in Topa in kong cih-inah: Kong sawl lohpi Shemai-ah in note kiangah thu hong gen a, zuauthu hong um sak ahih manin, Topa in kong cih-inah: En un, keimah in Nehelam khuami Shemai-ah leh a suan a khakte daan ka tat ding hi. Amah in keimah hong langpan nading thu gen ahih manin ka mite ading-a a hoih ka bawl ding nate, amah leh a suan a khakte khat beek in a mu kei ding uh hi,” Topa in kong ci hi,” a ci hi. Topa in Jeremiah hopih a, “ Topa, Israel mite’ Pasian in kong gen-inah: Kong gensa thute khempeuh laibu khat sungah khum in. Bang hang hiam cih leh Topa in kong cih-inah, Israel leh Judah ka mite, a saltan’na uh kong beisak kik ni a hong tung ding hi. A pute a pate-uh’ tunga ka piaksa gamah ka tun’pih kik ding a, amaute in tua gam a tang kik ding uh hi, Topa in kong ci hi,” a ci hi. Israel leh Judah mite tawh kisai-in Topa in hih bangin a gen hi: “ Topa in kong cih-inah: Launa leh patauhna aw ka za a, lungnopna aw ka za kei hi. Tu-in ngaihsun dih un. Pasalte nau a suak ngei uh hiam? Tua ahih leh bang hangin pasal khempeuh in numei nausuak dingte bangin, a taai uh hum ahi hiam? Bang hangin a mai uhah si teeng lo ahi hiam? Nu ei! tua ni lianpi hong tung ding a, nidang tawh teh theih hi lo ding hi! Jakob’ suante’ gimna ngah hun hi ding a, ahih hangin amau a suakta veve ding uh hi. “A vanglian Topa in kong cih-inah, tua ni ciangin amau’ ngawng panin a hakkolte uh ka kuaihtan sak ding a, a khaute ka sutat ding hi. Amaute in gamdang mite’ sal-in a om nawn kei ding uh hi. Topa, amau’ Pasian’ na ahi zongin, amaute’ kumpi-a ka koih ding David’ na ahi zongin a sem zaw ding uh hi. “Tua ahih manin Topa in kong cih-inah; Ka nasempa Jakob’ suante aw, lau kei un. Israel mite aw, patau kei un. Bang hang hiam cih leh gamlapi gam panin no kong honkhia ding a, na suan na khakte-uh’ saltan’na panin kong honkhia ding hi. Jakob’ suante hong ciahkik ding uh a, nuam takin a teeng kik ding uh hi. Kuamah in amaute a lausak nawn kei ding hi. Bang hang hiam cih leh Topa in kong cih-inah, a hong honkhia dingin note kong ompih hi. Note kong theh thangna gamte khempeuh ka susia khin ding a, ahih hangin note kong susia kei ding hi. A kilawm zahin kong thuhilh ding a, daantat loin kong mawk nusiat kei ding hi. “Bang hang hiam cih leh Topa in kong cih-inah: Na liamna uh dam thei lo a, na meima uh nasia mahmah hi. Note a hong don ding kuamah om lo a, na liamma uh ading zatui om loin, note’ dam nading om lo hi. Na lawm ngaihte un hong mangngilh khin uh a, hong don nawn lo uh hi. Bang hang hiam cih leh na khialhnate uh lian lua-in, na mawhnate uh nasia lua ahih manin, galte bangin note kong bawl-a, nasia takin daan kong thuaksak hi. Bang hangin na sa-in kapkap na hi uh hiam? Na natna uh a dam thei ding hi lo hi. Na khialhnate uh lian lua-in, na mawhnate uh nasia lua ahih manin hih bangin note kong thuak sak hi. Tua ahih manin no hong thatte kithat ding a, na galte khempeuh uh sal-in kiman khin ding hi. No hong buluhte kibuluh ding a, a hong mante, matin om zaw ding uh hi. Bang hang hiam cih leh Topa in kong cih-inah, na galte un note paampaih mi pawl, hong ci-in, ‘Kuama’ don loh Zion na hi hi,’ hong cih uh hangin note kong cidamkik sak ding a, na liammate uh ka damsak ding hi. “ Topa in kong cih-inah: En un, keimah in Jakob’ suante’ bukte ka lamkik ding a, a teen’nate uh ka hehpih ding hi. Khuapi zong a omna sa mualtung mah ah ki lamkik ding a, kumpipa’ inn zong a omna sa mah ah omkik ding hi. Tuate sung panin lungdamna la kisa ding a, gualnopna aw kiza ding hi. Amaute ka pungsak ding a, tawmkha bek a hi kei ding uh hi. Amaute ka kipahtawi sak ding a, ka neusak kei ding hi. A tate uh nidang bang mahin a omkik ding uh a, a mite uh zong kip takin ka mai-ah ka phut ding a, amau a bawlsiate ka daantat ding hi. A kumpi ding uh amaute khat mah hi ding a, amaute a uk ding amau’ sung mah pan a piang ding hi. Keimah in amah ka kai ding a, amah kei kiangah hong pai ding hi. Tua hi kei leh, ama’ thu-a kei kiang hong zuan ngam ding kua om ahi hiam? Topa in kong ci hi. Tua ciangin note in ka mite na hi ding uh a, keimah in note’ Pasian ka hi ding hi,” a ci hi. En un, Topa ’ huihpi nung! A hehna hong kinuai nainai-in hong paikhia ta a, mi gilopa’ lutang hong kiden’na ding hi. A lungsim sunga a tupna teng a tangtun’sak matengin, Topa ’ hehna a lauhuaipi kilehkik lo ding hi. Hong pai lai ding hunte ah note in na telzaw semsem ding uh hi. “ Topa in kong cih-inah, tua hun ciangin keimah in Israel mi khempeuhte’ Pasian ka hi ding a, amaute in ka mite ahi ding uh hi.” Topa in hong gen-inah: “Namsau tawh thahna a thuak kha lote in, gamlakah hehpihna a mu ding uh hi. Israel mite in tawldam nading a zon’ laitakun, gamlapi pek panin Topa ka kilang hi. Keimah in nang tawntung itna tawh kong it a, tua ahih manin nang’ tungah kong thuman tawntung hi. Aw, nungak siangtho ahi Israel aw, nang kong bawl pha kik ding hi. Na khuangte na man kik ding a, a gual nuamte’ laamna-ah na va kihel ding hi. Samaria gam mualtung tengah leenggah na suan kik ding a, huan bawlte in suan-in a gah ne-in nuam a sa ding uh hi. Bang hang hiam cih leh Efraim mualtung panin gal vilte in, ‘Tho un! Zion khua-ah, Topa, i Pasian kiangah va pai ni,’ ci-a hong kiko hun uh hong tung ding hi,” a ci hi. Bang hang hiam cih leh Topa in kong cih-inah, “Jakob adingin lungdamna tawh ngaih takin la sa un la, gam khempeuh lak a, gam lianpen adingin awng un. ‘ Topa in Israel mi a om laite, ama’ mite hong honkhia khin zo hi,’ ci-in tangko un la, phat un. En un, keimah in leilu lam gam panin amaute ka la ding a, leitung a gamla pen mun panin ka kaikhawm ding hi. Mittawte leh khelbaite zong hong kihel ding uh a, nupi gaite leh nau suak ding numeite-a kipan mi honpi hih lai munah hong ciahkik ding uh hi. Amaute kap kawmin hong pai ding uh a, keimah in hehnemin ka pikik ding hi. Tui omna lui geiah ka paipih ding a, lam nuamah paipih-in a tuk kei ding uh hi. Bang hang hiam cih leh Israel mite’ pa ka hi a, Efraim in ka tapa upapen ahi hi. “Aw, gamdangte aw, Topa ’ kammal ngai un la, gamla pi, tuipi gei-a omte kiangah va gen sawn un. ‘Israel mite a kithehthangsak pa in a kaikhawm kik ding a, tuucingpa in a tuute a cin’ bangin a cing ding hi,’ va ci un. Bang hang hiam cih leh Topa in Jakob ka tankhia khin zo a, a zawhzawh loh khutte sung pan ka lakhia khin zo hi. Amaute hong pai-in Zion mual tungah ngaihtakin la a sa ding uh a, Topa ’ hehpihna ahi, buh, leenggah tui, sathau leh tuuno, bawngnote’ hangin amaute a lungdam mahmah ding uh hi. A nuntakna uh, tui kibuak huan bang ahi ding a, a lungkham ngei nawn kei ding uh hi. Tua ciangin nungakte laam-in a lungdam ding uh a, tangvalte leh papite zong a nuam ding uh hi. Amaute’ kahnate lungdamna ka suaksak ding a, hehpihin a dahnate uh kipahna ka suaksak ding hi. Siampite an limpen tawh ka vaak ding a, ka mite khempeuh in ka hoihna hangin a lungkim ding uh hi, Topa in ka ci hi.” Topa in hong cih-inah: “Ramah khua ah aw khat kiza a, tauna leh kah ngutngutna aw ahi hi. Rachel in a tate adingin a kap hi. A tate om nawn lo ahih manin kinem zo lo hi.” Topa in hong cih-inah: “Kap nawn kei un la, na khitui uh nul un. Bang hang hiam cih leh Topa in kong cih-inah, na nasepna uh thaman na ngah ding uh hi. Amaute galte’ gam panin hong ciahkik ding uh hi. Na mailam uh adingin lametna a om hi, Topa in kong ci hi, na tate uh zong na gam mah uhah hong ciahkik ding uh hi. Efraim’ kahna aw ka za zo a, ‘ Topa aw, bawngtal sin loh bangin keimah nong thuhilh khin zo hi. Kong ciahkik theih nadingin hong la kik in, bang hang hiam cih leh nangmah in Topa ka Pasian na hi hi. Nangma’ kiang pan ka paikhiat khit phet-in ka kisik kik a, Nong thuhilh khit ciangin dah-in ka kun hi. Ka neu lai-a ka min siatna teng pua ka hih manin mai zumin ka lungam hi,’ a ci hi. Efraim, ka it ka tapa ahi hiam? Amah ka ngaihno ahi hiam? Bang hang hiam cih leh ama’ thu ka gen simin amah ka phawk lailai hi. Tua ahih manin amah ka ngaihsun tawntung a, ka hehpih taktak ding hi, Topa in ka ci hi. “Lampi-ah ciamtehna bawl un la, lam lahnate phut un. Na paikhiatna uh lampi mah limtakin hong zong kik un. Hong kilehkik un, nungak siangtho tawh a kibang Israel mite aw, na khuapi uh hong zuankik un. Bang tan vei lungka ding na hi hiam? a zulhzau ka tanu aw, Bang hang hiam cih leh Topa in leitungah na thak khat ka bawl a, numei in pasal a hon zo hi.” A vanglian Topa, Israel mite’ Pasian in hong gen-inah: “Keimah in amaute a gam uhah ka omkik sak ciangin, Judah gam leh a khuapite uhah amaute in, ‘Thuman thutak teen’na mual siangtho aw, Topa in thupha hong pia ta hen,’ ci-in a genkik leuleu ding uh hi. Judah gam leh khuapite sungah lokhote leh tuucing a, vak kawikawi mite a teeng khawm ding uh hi. Bang hang hiam cih leh a gim mite ka tawldam sak ding a, gil kial a, a tha zawm mite khempeuh an ka vak kham ding hi,” a ci hi. Tua khit ciangin ka khanglo-a ka khua dak hi. Ka khan’ lawh nuam ka sa mahmah hi. “En un, Topa in kong cih-inah Israel gam leh Judah gam, mihing leh ganhing tawh ka dimsak hun hong tung ding hi. Amaute a kibet khiat nading leh a kitap zan nading ahi zongin, a kisuan khiat nading leh a kisiat nading ahi zongin ka vaihawm mah bangin, Topa in ka cih-inah, amaute a kilam nading leh a kiphuh nadingin ka vaihawm ding hi. Tua ni ciangin amaute in: ‘Pate in leenggah thuk a ne uh a, a tate uh’ ha a kim hi,” cih paunak a zang nawn kei ding uh hi. Mi khempeuh in amau’ mawhna ciat uh hang bekin a si ding uh hi. Leenggah thuk a nete’ ha bek a kim ding hi. “En un, Topa in kong cih-inah, Israel minamte leh Judah minamte tawh thuciamna thak khat ka bawl ni hun hong tung ding hi. Tua pen, a pu a pate uh, Izipt gam pana ka lakkhiat nadingin a khut uh tawh ka kaih khiat huna ka bawl uh thu thuciamna tawh kibang lo ding hi. Tua lai-in amaute’ pasal ka hih hangin ka thuciamna a hong palsat uh hi, Topa in kong ci hi. Ahih hangin Topa in kong cih-inah, tua hun hong tun’ ciangin Israel minamte tawh hih bangin thuciamna ka bawl ding hi: amaute sungah ka thukham ka koih ding a, amaute’ lungtang tungah ka gelh ding hi. Keimah in amaute’ Pasian ka hi ding a, amaute in keima’ mite ahi ding uh hi. Kuamah in midangte leh a sanggamte uh’ kiangah, ‘ Topa thei in,’ ci-in a kihilh nawn kei ding uh hi: bang hang hiam cih leh Topa in kong cih-inah, amaute a neupen panin a lianpen dongin, a vekpi-un kei a hong thei ding uh hi. Bang hang hiam cih leh amaute’ khialhnate ka maisak ding a, amaute’ mawhnate zong phawkin ka nei nawn kei ding hi,” a ci hi. Topa in sun-a khuavak dingin ni hong pia a, zan-a khuavak dingin a kikhel ngei lo kha leh aksite hong pia hi. Tuipi a lawh ciangin tuihualte ging zuazua a, ama’ min in Vanglian Topa kici hi. Amah in, “ Topa in kong cih-inah, hih a kip mahmah leitung, vantung ngeinate a kikhel hun ciang bekin, Israel mite’ suan leh khakte in gam a nei ngei nawn kei pan ding uh hi,” a ci hi. Topa in hong gen-inah, “Vantung a kiteh theih ciang leh leinuai-a leitung bulte a kivel theih ciang bek-in Israelmite’ suan leh khakte khempeuh a mawhna uh hangin ka lawnkhia mang pan ding hi, Topa in kong ci hi,” “En un, Topa in kong cih-inah, nisuahna lam Hananel Tau sangpi panin nitumna lam khua kulh Kiu Kongpi dongin khuapi a kibawl phat hun hong tung ding hi. Tua lai panin khuapi huang dingin nitumna lamah Gareb mual dong kiteh suak ding a, Goah lamah a kihei ding hi. Misi luangte leh vutte a kibuakna kuam buppi leh, Kidron lui phak ma-a lo teng khempeuh tawh, tua panin nisuahna lam-a Sakol Kongpi kiu ciang dong, Topa adingin mun siangtho a suak ding hi. Cikmah ciangin tua khuapi kisusia-in a kisuankhia ngei nawn kei ding hi.” Nebukhadnezzar kumpipa a maan’ zawh kum sawm leh kum giat a phak kumin, Judah gamah Zedekiah kumpi a suah zawh kum sawm pha ta a, tua kumin Topa in Jeremiah a hopih hi. Tua hun laitakin Babilon kumpipa’ galkapte in Jerusalem khua a sim laitak hun hi a, kamsangpa Jeremiah zong Judah kumpipa’ inn huang sunga thong sungah a kikalhcip laitak ahi hi. Bang hang hiam cih leh Judah kumpipa Zedekiah in ama’ kiangah, “Bang hangin nangmah in thu genkhol a, ‘ Topa in a cih-inah: En un, hih khuapi Babilon kumpipa’ khut sungah ka pia ding a, amah in a la ding hi. Judah kumpipa Zedekiah zong Khaldea mite’ khut sung pan a suakta kei ding a, Babilon kumpipa’ khut sungah a kipia taktak ding hi. Amah tawh maitang kimu-in a ki-en ding uh a, a kiho ding uh hi. Amah in Babilon khua-ah Zedekiah a la ding a, ama tungah na ka sep mateng tua lai-ah a om ding hi. Khaldea mite na do uh hangin na zo kei ding uh hi, Topa in hong ci hi,’ ci-in bang hangin thu hilh na hi hiam?” ci-in thong sungah a khum ahi hi. Jeremiah in zong, “ Topa in kei hong hopih a, En in, na pano Shallum’ tapa Hanamel nang’ kiangah hong pai ding a, ‘Anathoth khua-a ka lo hong lei in. Bang hang hiam cih leh a lei thei ding lak panin ka kinaipihpen nangmah na om hi,’ ci-in hong gen ding hi, hong ci hi. Tua ciangin Topa ’ hong cihna mah bangin thong sungah ka inn lak sanggampa hong pai takpi-a hong hopihin, ‘Benjamin gam Anathoth khua-a ka lo hong lei in. Bang hang hiam cih leh, i ngeina bangin a nei ding leh a tankhia ding nangmah na hi hi. Nang’ adingin lei in,’ hong ci hi. Tua ciangin keimah in Topa ’ hong hopihna taktak hi, ci-in ka thei hi. “Keimah in zong ka innlak sanggampa Hanamel’ kiang panin Anathoth khua-a lo ka lei a, ama adingin ngun shekel sawm leh sagih ka tehkhia hi. Thukimna lai bawlin, min gelhin, gip khenin, a hong theihpih ding mite zong ka lak khit ciangin tawi khaina-ah sum ka teh hi. Tua ciangin ka kithukimna teng uh a kigelhna, gip a kikhen lai pen leh gip a kikhen lo lai pen ka la a, Nariah’ tapa ahi, Mahseiah’ tupa Baruk kiangah ka pia hi. Tua laite, ka innlak sanggampa Hanamel tawh, tua kileina laite tunga a min uh a gelh a hong theipih mite tawh, thong huang sunga a tu Judah mite tawh a om kim laitak-un ka pia hi. Amaute’ om laitakin Baruk kiangah, ‘A vanglian Topa, Israel mite’ Pasian in a hong gen-inah: Hih gip a kikhen lai leh gip a kikhen lo lai tegel la in la, sia lo-a sau veipi a kikep thei nadingin leibel khat sungah koih in. Bang hang hiam cih leh a vanglian Topa, Israel mite’ Pasian in a hong gen-inah: Hih gamah innte, lote leh leenggah lote mite in a lei kik ta ding hi, hong ci hi,” ci-in ka gen hi. “Neriah’ tapa Baruk kiangah kileina lai ka piak khit ciangin Topa ’ kiangah thu ka ngen a, ‘ Topa Pasian aw! Nangma’ vangpi leh na khut kizankhia tawh vantung teng leh leitung na bawl khin zo hi! Nang adingin a haksa lua khat beek om lo hi. Nangmah in mi tul tampite’ tungah a kikhel ngeilo itna na lak a, ahih hangin pate’ mawhnate tate’ tungah na thuk hi. A vanglian Topa a kici a lian mahmah a hat mahmah Pasian aw, na ngimnate lian mahmah a, na sepnate thupi mahmah hi. Mite’ nuntakzia khempeuh na mu a, amau’ nuntakdan leh a nasepna gahte tung tawnin mi khempeuh’ tungah thaman na pia kim hi. Izipt gamah lim leh nalamdangte na lak a, tu-in zong Israel gam leh minam dang khempeuhte’ tungah lakin, tu-in mun khempeuh ah na min lian mahmah hi. Na mi Israel mite Izipt gam panin lim leh nalamdang tawh ahi zongin, a khauh mahmah a kizan khia na khut tawh ahi zongin lauhuaina lianpi tawh ahi zongin na lakhia-a, a pute a pate uh’ tunga piak ding a, na ciamsa, bawngnawi leh khuaizu a luan’na hih gam na pia hi. Amau zong hong lut-in a luah pah uh hi. Ahih hangin amaute in na thu hong mang loin, thukham hong zui lo uh a, hih ding a, na thupiakte khat beek a hih kei uh hi. Tua ahih manin amau’ tungah hih siatna khempeuh na tungsak hi. En in, khuapi lak nadingin kan a to khin zo uh hi. Namsau tawh kithahna hang, kialpi hang leh pulnatna hangin a sim Khaldea mite’ khut sungah khuapi a kipia ding hi. Na gensa bangin hong tun’ loh phamawh ahih manin en in, nangmah in na mu ta hi. Ahih hangin Topa Pasian aw, hih khuapi Khaldea mite’ khut sung tung ding hi napi, nangmah in, “A hong theihpih ding mi sam in la,tua lo lei in,” ci-in nong sawl teitei hi,’ ci-in thu ka ngen hi,” a ci hi. Topa in Jeremiah hopih a, “En in, Keimah in Topa ka hi a, mi khempeuhte’ Pasian ka hi hi. Kei adingin a haksa lua bang om ahi hiam? Tua ahih manin, Topa in kong cih-inah: En in, hih khuapi Khaldea mite’ khut sung leh Babilon kumpipa Nebukhadnezzar’ khut sungah ka pia ding a, amah in a la ding hi. Hih khuapi a sim Khaldea mite hong pai-in khuapi mei tawh a hal ding uh a, ka heh nading-a inn khum tunga Baal milimte paknamtui halna tawh a biakna innte uh leh pasian dangte’ kianga tuidawn biakna a piakna uh innte zong a haltum ding uh hi. Bang hang hiam cih leh Israel mite leh Judah mite in a neu lai pek uh a, kipan ka muhna-ah siatna bekbek a bawl uh a, keimah Topa in kong cih-inah, Israel mite in a khut uh tawh milim a bawlna uh hangin kei hong heh sak uh hi. Hih khuapi in, a kisat cil-a kipan tu ni ciang dong hong hehsakin hong thangpaisak ahih manin ka muhna panin ka hemkhia ding hi. Bang hang hiam cih leh Israel mite leh Judah mite, a kumpite uh leh a kumpi uliante uh, a siampite uh leh a kamsangte uh akipan Judah mite leh Jeursalem khua mite khempeuh in kei hong heh sak nadingin siatna a bawl uh hi. Amaute in kei hong nung ngat-in hong thudon lo uh a, ka hilh tawntung hangin ka hilhna a hong mang kei uh hi. Amaute in ka min tawh a kilo biakinn sung nangawn ah a kihhuai milimte a koih uh a, a ninsak uh hi. En-Hinnom Mualkuam-ah a tapate leh a tanute uh meihal biakna tawh Molek pasian a biak nadingun Baal biakna tau sangte a bawl uh hi. Hih a kihhuai na semin, Judah mite mawhna a bawl sak nadingun amaute ka sawl kei a, zong ka ngaihsun kha ngei beek kei hi. “Jeremiah aw, nangmah in hih khuapi, namsau tawh thahna, kial leh pulnatna tawh Babilon kumpipa’ khut sungah kipia ding hi, na ci hi. Tu-in tua bang na cihna hih khuapi tawh kisai-in Topa, Israel mite’ Pasian in kong gen-inah: En in, Ka hehna, ka thangpaihna leh ka lungkimlohna lianpi tawh ka hawlkhiatna gam khempeuh panin amaute ka kaikhawm ding a, hih munah tun’pih kikin, lungmuang takin ka teengsak ding hi. Amaute ka mi ahi ding uh a, keimah in amaute’ Pasian ka hi ding hi. Amaute’ hoih nading leh amaute’ nung-a a tu a tate uh’ hoih nadingin a tawntungin kei hong zahtak nadingun lungsim kikhat leh nuntakdan kikhat ka pia ding hi. Amaute’ tungah a tawntungin hoihna ka bawl det nadingin amaute tawh tawntung thuciamna khat ka bawl ding hi. Kei’ kiang panin a kiheikhiat loh nadingun amaute’ sungah kei hong zahtakna lungsim ka koih ding hi. Amaute’ tungah hoihna ka bawl manin ka lungdam ding a, ka lungsim khempeuh leh ka kha khempeuh tawh thuman takin hih gamah amaute ka phut ding hi. “Bang hang hiam cih leh Topa in kong cih-inah, hih siatna khempeuh hih mite tungah ka tun’sak mah bangin, amaute tunga ka khapsa hoihna khempeuh zong ka tungsak pelmawh ding hi. Nangmah in hih gam in mihing leh ganhing’ teen’ lohna gam simtham hi a, Khaldea mite’ khut sungah kipia ding hi, ci-a na gen hangin hih gamah lo kilei kik ding hi. Benjamin gam, Jerusalem khua kimkot leh, Judah gam khuapite-a kipan mual tunga khuapite, Shefelah zanglei-a khuapite leh leitaw lam Negeb gama khuapite-ah sum tawh lo kilei ding a, a theihpih mite tawh thukimna min gelhin gip tawh a kikhen ding hi; bang hang hiam cih leh keimah in amaute a gam mah uhah ka om sak kik ding hi, Topa in kong ci hi,” a ci hi. Thong huang sungah Jeremiah a kikalhcip laitak mahin Topa in a nih veina hopih a: “Leitung bawla a kipsak Topa, a min Topa a kici Topa in kong gen-inah: Kei nong sap leh kong dawngkik ding a, na theih ngei nai loh a ki-im cip thu lianpite kong gen ding hi. Bang hang hiam cih leh galte’ kan tawhna leh namsaute do nadingin kizanga a kisusia gawp ding hih khuapi sunga innte leh Judah kumpite’ innte tawh kisai-in, Topa, Israel mite’ Pasian in kong cih-inah: Ka hehna leh ka thangpaihna tawh ka thahlup ding misi luangte tawh a kidimsak dingin Khaldea mite in a hong sim ding uh hi. Bang hang hiam cih leh hih khuapi sunga om mite’ gitlohna hangin hih khuapi panin ka mai ka seel hi. Ahih hangin en in, keimah in hih khuapi ka damsak ding a, cidamin ka om sak ding hi. A mite cidam sakin nopna leh lungmuan’na a kicing ka lak ding hi. Judah mite leh Israel mite ka hausak kik ding a, nidang-a a om ngei bangun ka om sak kik ding hi. Kei tunga hong bawl uh mawhna khempeuh panin amaute ka siangsak ding a, kei tunga hong mawhnate uh leh a hong langpan’na khempeuhte uh ka maisak ding hi. Jerusalem khuapi in kei adingin lungdamna, minphatna leh minthan’na ahi ding hi. A sunga om mite tungah hoihna leh hauhna ka tun’sakna thu a za minam dangte in lau-in a liing ding uh hi. “ Topa in kong cih-inah, note in, ‘Hih munah mihing, ganhing om loin mun dai suak hi,’ ci-in na gen uh mah bangin Judah gam khuapite leh Jerusalem khua kongzingte awng a, mihing ganhing kuamah a teeng kei hi. Ahih hangin lungdamna aw leh kipahna awte, zi nei thakte leh mothakte’ awte kiza kik ding hi. Mite in Topa ’ biakinn ah hong pai-in lungdam biakna pia-in: ‘A vanglian Topa tungah lungdamna pia un. Bang hang hiam cih leh Topa hoih a, ama’ itna kip kho tawntung hi!’ ci-a a lasakna awte uh a kiza kik ding hi. Bang hang hiam cih leh Topa in kong cih-inah a masa-a mah bangin hih gam ka hausak kik ding hi. “A vanglian Topa in kong cih-inah, mihing ganhing om lo-a mun awng ahi hih mun leh a khuapi khempeuhte ah tuucingte in tuu cing a, a teen’ theih nading mun hong om ding hi. Mual tunga khuapite, Shefelah zanglei-a khuapite leh leitaw lam Negeb gama khuapite, Benjamin gam, Jerusalem khua kimkot leh Judah gam khuapite ah, Topa in kong cih-inah tuucingte in a tuute uh a sim ding uh hi. “En un, Topa in kong cih-inah: Israel mite leh Judah mite’ tunga ka khapsa ka tangtun’ sak hun hong tung ding hi. Tua ni tua hun ciangin David’ suan lak panin kumpi dingin a diktat Hiang khat ka khangsak ding a, amah in gam sungah thuman thu tang tawh thu hong khen ding hi. Tua ni ciangin Judah mite kihonkhia ding a, Israel mite lungmuang takin a teeng ding uh hi. Amah a kisap nadingin a min, Topa in eite’ Diktatna ahi hi, ci-in a kiphuak ding hi. “Bang hang hiam cih leh Topa in kong cih-inah: Israel mite’ kumpi dingin David’ suan lak panin mi om lo ngei lo ding hi. Levi minam lak panin zong meihal biaknate, an tawh biakna leh kithoihnate a hih tawntung dingin ka mai-a ding ding siampi kitasam ngei lo ding hi,” a ci hi. Topa in Jeremiah hopih a, “ Topa in kong cih-inah: Sun hun leh zan hun a hun manman-a a hong tun’ loh theih nadingin sun tawh ka thuciamna leh zan tawh ka thuciamna na siat sak zawh ciang bek-in keimah leh ka nasem pa David tawh ka thuciamna a kisia pan ding a, amah in a kumpi tokhom luah ding tapa nei loin, ka na a sem siampi Levi minamte tawh ka thuciamna zong a kisia hi pan ding hi. Vana aksite kisim zo loin, tuipi-a sehnelte a kiteh zawh loh bangin keimah in ka nasempa David’ suan-le-khakte ahi zongin, siampi Levi’ minamte ahi zongin ka pungsak den ding hi,” a ci hi. Topa in Jeremiah hopih-a, “Hih mite in, Topa in a teelsa Israel leh Judah minam tegel a nusia ta hi, ci-a a gen uh thei kha lo na hi hiam? Tua bangin amaute in ka mite a simmawh uh a, amau’ muhna-ah gam khatin zong a sim nawn kei uh hi. Topa in kong gen-inah: Sun leh zan tawh ka thuciamna ahi zongin, vantung leh leitung ngeina kipte ahi zongin kipsak khin nai lo hi leng Jakob leh ka nasempa David’ suante ka nial ding a, Abraham, Isaak leh Jokob’ suante a uk dingin amaute’ lakah mi khat ka teel kei ding hi. Tu-in tua bang hi loin amaute ka hausak kik ding a, ka hehpih ding hi,” a ci hi. Babilon kumpipa Nebukhadnezzar in a galkapte khempeuh tawh, a ukna gam khempeuh leh a mi khempeuh tawh Jerusalem khua leh a kim-a khuapite a sim laitakin Topa in Jeremiah hopih a: “ Topa Israel mite’ Pasian in kong cih inah: Judah kumpipa Zedekiah kiangah pai in la, hih bangin va gen in; ‘ Topa in hong gen-inah, En in, keimah in hih khuapi Babilon kumpipa’ khut sungah ka pia ding a, amah in mei tawh a hal ding hi. Ama’ khut sung panin na suakta kei ding a, hong kimanin ama’ khut sungah nang hong kipia taktak ding hi. Nangmah in Babilon kumpipa tawh maitang kimu-in na kiho ding uh a, Babilon khua-ah na pai ding hi. Judah kumpipa Zedekiah aw, Topa ’ kammal ngai lai dih in. Topa in nangmah tawh kisai-a hong gen-inah, nang in namsau tawh thahna na thuak kei ding hi. Nuam takin na si ding a, nangma’ ma-a kumpi a suak na pute na pate adingin paknamtui a kihal mah bangin nang adingin zong paknamtui hong kihal ding a, “Aw, Topa aw!’ ci-in hong kah ding uh hi. Bang hang hiam cih leh Topa in hong gen khin zo hi,’ ci-in va gen in,” a ci hi. Jeremiah in zong hih thu teng khempeuh Jerusalem khua-a Judah kumpipa Zedekiah kiangah a gen hi. Tua laitakin Babilon kumpipa’ galkapte in Jerusalem khuapi leh Judah gama khuapi muanhuai lakah a om lai Lakhish khua leh Azekah khua tegel zong a sim laitak uh ahi hi. Mi khempeuh in a silate uh numei ahi zongin, pasal ahi zongin khah khia-in sila-in khawi kik thei nawn lo ding hi, ci-a thuciamna a nei kumpi uliante-a kipan mi khempeuh in mang uh a, a khahkhia uh hi. Ahih hangin tua nung ciangin a lungsim uh khel kik-in a khahkhiat sa uh numei leh pasal silate a la kik uh a, sila mahin a zang kik mawk uh hi. Tua ciangin Topa in Jeremiah hopih a: “ Topa, Israel mite’ Pasian in kong gen-inah, keimah in na pu na pate uh koltan’na Izipt gam pan ka lakkhiat laitakin amau tawh thuciamna khat ka bawl uh a, note kianga nasem dinga hong kizuak na Hebru mipihte uh in no adingin kum guk na hong sep sak khit a kum sagihna sungin na khah khia ding uh a, na na uh na sem sak nawn kei ding uh hi, ka ci hi. Ahih hangin na pute na pate un ka thu hong ngai lo uh a, hong mang lo uh hi. Zan diakin no na kisik kik uh a, na mipihte ciat uh suaktak nading tangko-in, ka min tawh a kilo biakinnpi sung ka mai-ah thuciamna na bawl uh a, ka muhna-ah a kilawm na khat na sem khin zo uh hi. Ahih hangin na lungsim uh na lehhei kik leuleu uh a, amau’ utna banga na khahkhiat sa uh sila numei leh pasalte na la kik uh a, na na uh sem sakin ka min nong daisak uh hi. Tua ahih manin Topa in kong cih-inah “Mi khempeuh in na sanggam na mipihte uh khahkhia loin suahtakna pia lo-a ka thu hong mang lo na hih uh leh en un, Topa in kong cih-inah, note kong khahkhia-a, suahtakna kong pia ta hi. Namsau tawh kithahna, pulnatna leh kialpite tawh na sih nadingun note kong khah khia a, kong suaktasak hi. Leitung gam khempeuhte’ hong lipkhap dingin kong bawl ding hi. A galte’ khut sungah amaute ka pia ding a, a that nuam mite’ khut sungah ka pia ding hi. A siluangte uh van-a vasate leh leitunga gam sate’ an a suak ding uh hi. Judah kumpipa Zedekiah leh a kumpi uliante, a galte uh’ khut sungah pia-in, amaute a that nuam mite leh note kiang pan-a a kilehkik khin zo Babilon kumpipa’ galkapte’ khut sungah ka pia ding hi. En un, Topa in kong cih-inah, keimah in thu ka pia ding a, hih khuapi-ah kong la kik ding hi. Amau in hih khuapi hong simin, hong la-in, mei tawh hong halsak ding uh hi. Judah gam khuapite kuama’ teen’ lohna mun awng ka suaksak ding hi,” a ci hi. Josiah’ tapa Jehoiakim, Judah gamah kumpi ahih laitakin Topa in Jeremiah hopih a: “Rekhab behte kiangah pai in la, amau tawh na kiho khit ciangin Topa ’ biakinn ah hong paipih in la, inndei khat sungah tumpih-in, tua ciangin a dawn dingin lenggahzu pia in,” ci-in a sawl hi. Tua ciangin Habazziniah’ tupa ahi Jeremiah dang khat’ tapa, Ja-azaniah leh a sanggamte, a tate khempeuh leh Rekhab behte khempeuh ka sam hi. Amaute, Topa ’ biakinn sung, kumpi uliante’ inn dei gei, Shallum’ tapa kongpi uk biakinn upa lian Ma-aseiah’ inndei tung-a, Igdaliah’ tapa, Pasian’ mi ahi Hanan’ tate’ inndei sungah ka lutpih hi. Tua ciangin Rekhab behte’ mai-ah leenggahzu a dim-a kikoih hai leh keute ka pia a, leenggahzu dawn un, ci-in ka sawl hi. Ahih hangin amaute in “Kote in leenggah zu ka ne kei ding uh hi, bang hang hiam cih leh Rekhab’ tapa, ka pa uh Jonadab in thu hong pia a, ‘Note-a kipan na tu na tate un leenggahzu na ne ngei peuhmah kei ding uh hi. Inn na lam kei ding uh a, khaici na tuh kei ding uh hi. Singno na suan kei ding uh a, leenggah lo na bawl kei ding uh hi. Ahih hangin na teen’ pakna uh gam sungah sau veipi na teen’ theih nadingun na nuntak hun sung teng uh puanbuk sungah na teeng ding uh hi,’ hong ci hi. Kote in Rekhab’ tapa ka pa uh Jonadab’ hong thupiak khempeuh ka mang uh a, ka nuntak hun sung teng uh ko-a kipan ka zite uh, ka tapate uh leh ka tanute uh in leenggahzu dawn loin, teen’ nading inn ka lam kei uh hi. Leenggah huan, lo leh khaici bangmah ka nei kei uh hi. Ka pu uh Jonadab’ hong sawl bangbangin ka mang uh a, puanbuk sungah ka teeng den uh hi. Ahih hangin Babilon kumpipa Nebukhadnezzar in hih gam hong sim ciangin kote in, ‘Hong pai un. Khaldea galkapte leh Siria galkapte kihta i hih manin Jerusalem khua-ah pai ni,’ ka kici uh a, tua mah bangin tu-in Jerusalem khua-ah ka teeng uh hi,” a ci uh hi. Tua ciangin Topa in Jeremiah hopih a: “A vanglian Topa, Israel mite’ Pasian in kong cih-inah: Pai in la, Judah mite’ kiang leh Jerusalem khua-a teeng mite’ kiangah, Topa in, Ka thuhilhna hong sang loin ka thu hong ngai lo ding na hi uh hiam? Rekhab’ tapa Jonadab in a tate’ tunga leenggahzu a dawn loh nading uh a thupiakna a zui uh a, tuni ciang dong bangmah a dawn kei uh hi. Bang hang hiam cih leh amaute in a pa uh’ thupiakna a mang uh hi. Keimah in note kong hopih tawntung hangin ka thu nong mang kei uh hi. Ka nasem ahi kamsangte khempeuh note kiangah hong sawl tawntungin, ‘Tu-in note khempeuh na hoih lohna-uh panin kihei un la, na gamtat hoihlote uh kipuah pha un. pasian dangte nung delh loin, ama’ na na sep kei uh leh note leh na pute na pate’ kianga kong piak gam sungah na teeng ding uh hi,’ ci-in hong gen uh hi. Ahih hangin note in na bil uh nong ngat kei uh a, ka thu nong ngai kei uh hi. Rakhab’ tapa Jonadab’ tate in a pa uh’ thupiakna a man’ uh hangin hih mite in ka thu hong mang lo uh hi. Tua ahih manin keimah Topa, a vanglian Pasian, Israel mite’ Pasian in kong gen-inah: En un, Judah mite leh Jerusalem khua-a teeng mi khempeuh tungah a tung ding a, ka gen khiatsa siatna khempeuh ka tungsak ding hi. Bang hang hiam cih leh amau tungah ka gen hangin amau in ka thu hong ngai lo uh a, amaute ka sap hangin hong dawngkik lo uh hi, ci hi, ci-in va gen in,” a ci hi. Ahih hangin Jeremiah in Rekhab behte’ kiangah, “A vanglian Topa, Israel mite’ Pasian in hong gen-inah: Na pa uh Jonadab’ hong thupiakna mangin, a hong thuhilhna bangin zui-in, a hong sawl khempeuh sem khin na hih manun a vanglian Topa, Israel mite’ Pasian in kong cih-inah: Rekhab’ tapa Jonadab’ suante’ lak panin ka mai-a a ding ding ka nasem ding pasal khat beek nei loin a om ngei kei ding hi, hong ci hi,” ci-in a gen hi. Josiah’ tapa Judah kumpipa Jehoiakim a maan’ zawh kum li a phak kumin Topa in Jeremiah hopih a: “Laizial khat la in la, tua sungah Josiah kumpi a suah kum, nang kong hopih masak hun-a kipan tuni ciang dong Israel gam, Judah gam leh gamdang khempeuhte’ lang khatah ka thugente khempeuh gelh in. Judah mite in amau tunga tun’sak dinga ka ngaihsut siatna khempeuh za-in mi khempeuh in a siatna lampi-uh panin kiheina-in a nei kha thei ding uh a, keimah in zong amau’ khialhna leh amau’ mawhnate ka maisak kha thei ding hi,” a ci hi. Tua ciangin Jeremiah in Neriah’ tapa Baruk sam a, Topa in ama’ tunga a gen khitsa thu khempeuh sit-in Baruk in laizial khat tungah a gelh hi. Jeremiah in Baruk sawl a, “ Topa ’ biakinn ah pai dingin kei hong kiphal lo ahih manin nang na pai in la, an tan’ ni ciangin Topa ’ biakinn sunga om mi khempeuhte’ zak dingin kong sit hih laizial sunga na gelh Topa ’ kammalte na sim ding hi. Amau’ khuapite pana hong paikhia Judah mi khempeuhte’ zakin zong na sim ding hi. Amaute in Topa tungah thuum-in a vekpi-un a hoihlohna uh panin a kihei kha thei ding uh hi. Bang hang hiam cih leh hih mite tungah Topa in tun’sak dinga a gensa a hehna leh a thangpaihna lian mahmah hi,” a ci hi. Neriah’ tapa Baruk in zong Topa ’ biakin sungah laizial sunga Topa ’ kammal sim khiat dinga kamsangpa Jeremiah’ sawl bangbangin a hih hi. Josiah’ tapa Judah kumpipa Jehoiakim a maan’ zawh kum nga a phak kum, a kha kua kha-in Jerusalem khua-a om mi khempeuh leh Judah gam khuapite pana Jerusalem khua-a hong pai mite khempeuh in Topa ’ mai-ah an tan’ ding thu a zasak uh hi. Tua ciangin Topa ’ biakinn sung, a Kongpi Thak tumna gei, adei tungnunga Shafan’ tapa thuvan pipa Gemariah’ inndei sungah mi khempeuh’ zak-in Baruk in laizial sunga Jeremiah’ kammalte a simkhia hi. Gemariah’ tapa, Shafan’ tupa ahi Mikaiah in laizial sunga thu teng khempeuh a zak ciangin Kumpipa’ inn sung, thuvanpipa’ inndei sungah a paisuk a, tua lai munah thuvanpipa Elishama, Shemiah’ tapa Delaiah, Akbor’ tapa Elnathan, Shafan’ tapa Gemariah, Hananiah’ tapa Zedekiah-te akipan kumpi ulian khempeuh tu-in a na om uh hi. Tua ciangin Mikaiah in, mi khempeuh’ zak-a Baruk in a sim a zaksa thu teng khempeuh a gen hi. Tua ciangin kumpi ulian khempeuh in, Kushi’ tusawn ahi, Shelemiah’ tupa, Nethaniah’ tapa Jehudi, Baruk kiangah a sawl uh a, “Mite kianga na sim na laizial hong la in la, hong pai in,” ci-in a sam sak uh hi. Tua ciangin Neriah’ tapa Baruk in zong tua laizial la-in amau kiangah hong pai hi. Amaute in, “Tu in la, hong sim dih in,” ci-in a gen uh hi. Baruk in zong amau kiangah a sim hi. Tua thute khempeuh a zak khit uh ciangin lau-in khat leh khat a ki-en gapgap uh a, Baruk kiangah, “Hih thute khempeuh kumpipa’ kiangah i koh kul ding hi,” a ci uh hi. Tua ciangin Baruk’ kiangah, “Hih thute khempeuh bangci gelh na hi hiam? Jeremiah in hong sit ahi hiam?” ci-in a dong uh hi. Baruk in zong, “Amah in hih thu khempeuh hong sit a, ke’n zong laizial sungah laitui tawh ka gelh hi,” ci-in a dawng kik hi. Tua ciangin kumpi uliante in Baruk’ kiangah, “Pai in la, nang leh Jeremiah va bu un. Na omna mun-uh kuamah thei sak kei un,” a ci uh hi. Tua ciangin amaute in thuvanpipa Elishama’ inndei sungah tua laizial a koih uh a, kumpipa’ omna inndei sungah a lut khit uh ciangin kumpipa kiangah tua thu khempeuh a gen uh hi. Kumpipa in zong tua laizial a la dingin Jehudi sawl a, amah in thuvanpipa Elishama’ inndei sung pan a va lakhia hi. Kumpipa leh kumpipa kianga ding ulian khempeuhte’ zakin Jehudi in a sim hi. Kha kua kha pen phalbi laitak ahih manin kumpipa zong a phalbi inn sungah tu-a meikhuk-a mei a awi hi. Jehudi in khawk thum khawk li bang a sim khit ciangin kumpipa in temta neu khat tawh aat khia-a, meikhuk sungah a khul hi. Tua bangin laizial buppi a kattum dong meikhuk sungah a paaipaai hi. Ahih hangin kumpipa ahi zongin hih thute a za khin a nasemte khat beek ahi zongin lau tuan loin, kisikkik lo uh ahih manin a puan uh balkek lo uh hi. Elnathan leh Delaiah leh Gemariah te in kumpipa’ kiangah laizial a hal loh nading a khoh uh hangin amah in a mang kei hi. Tua ciangin kumpipa in kumpipa’ tapa Jerahme-el tawh, Azriel’ tapa Seraiah tapa, Abde-el’ tapa Shelemiah tawh a sawl a, kumpi thuvanpipa Baruk leh kamsangpa Jeremiah man dingin thu a pia hi. Ahih hangin Topa in amau tegel a seel sim hi. Jeremiah’ sit banga, Baruk in a gelh laizial kumpipa in a haltum khit ciangin Topa in Jeremiah hopih-a: “Laizial dang khat la in la, tua tungah, Judah kumpipa Jehoiakim in a haltum a masa laizial sunga thu om teng khempeuh gelhkik in. Judah kumpipa Jehoiakim’ thu tawh kisai-in hih bangin ama’ kiangah va gen in: ‘ Topa in hong gen-inah, Nangmah in, “Jeremiah aw, bang hangin Babilon kumpipa hong pai taktak-in hih gam hong susia ding a, mihing leh ganhing a teeng sak nawn kei ding hi, ci-in hih lai sungah gelh na hi hiam?” ci-in na gen-a tua laizial na haltum hi. Tua ahih ciangin Judah kumpipa Jehoiakim’ thu tawh kisai-in Topa in kong gen-inah, amah in David’ tokhom tunga tu ding suan leh khak a nei kei ding a, ama’ luang in sun laitak-a ni sa kap ding leh zan laitaka vuksan vukngo tuam dingin a kipaaidak ding hi. Amah leh a suan a khakte leh a nasemte a mawhna uh hangin ka daantat ding a, amau’ tung leh Jerusalem khua-a teengte’ tunga kipan Judah mite’ tungah tun’sak dinga ka gensa gimna khempeuh ka tungsak ding hi. Bang hang hiam cih leh amaute in ka thu hong ngai lo uh hi,’ ci-in va gen in,” ci-in Jeremiah a sawl hi. Tua ciangin Jeremiah in zong laizial dang khat la a, Neriah’ tapa thuvanpipa Baruk a pia hi. Amah in zong Judah kumpipa Jehoiakim in meikhuk sunga a khul tumsa laizial sunga thu kigelh khempeuh, Jeremiah’ sit bangbangin a gelh hi. Kammal kibang zong tampi a kibehlap hi. Babilon kumpipa Nebukhadnezzar in Jehoiakim’ tapa Koniah’ taangin Judah gam uk dingin Josiah’ tapa Zedekiah a koih hi. Ahih hangin amahmah a, kipan a nasemte leh a gamsung mite in kamsangpa Jeremiah’ tung tawna Topa ’ thugennate a ngai kei uh hi. Zedekiah kumpipa in kamsangpa Jeremiah’ kiangah, Shelemiah’ tapa Jehukal leh Ma-aseiah’ tapa siampipa Zefaniah sawl a, “ Topa i Pasian’ kiangah kote’ adingin thu hong ngetsak in,” ci-in a gen sak hi. Hih hunin Jeremiah thongkia nai lo ahih manin mi lakah a vak kawikawi hi. Tua hun laitakin Khaldea mite in Jerusalem khua a sim laitak uh hi a, tua hun laitak mahin Faro kumpipa’ galkapte in galsim dingin Izipt gam panin hong kuankhia hi, cih thu a zak uh ciangin Jerusalem khua panin a nungkik uh hi. Tua ciangin kamsangpa Jeremiah Topa in hopih a: “ Topa ahi, Israel mite’ Pasian in kong cih-inah: Kei tung-a thu dong ding a, hong sawl Judah kumpipa kiangah hih bangin na va gen ding hi: ‘En in, nang hong huh ding a, hong pai Faro kumpipa’ galkapte a gam uhah ciahkik ding uh hi. Tua ciangin Khaldea mite hong kileh kikin hih khuapi hong sim ding uh a, khuapi la-in mei tawh a hal ding uh hi. Topa in kong cih-inah, Nang leh nang kikhemin, “Khaldea mite in hong kilehkik nawn lo taktak ding uh hi,” ci kha kei in. Bang hang hiam cih leh amau hong kilehkik ding uh hi. Nangmah in na gal Khaldea galkap khempeuh zo lua kisa-in buk sunga milian teng bek na suakta sak kha phial ahi zongin, amaute hong tho teitei ding uh a, hih khuapi hong hal sak veve ding uh hi,’ ci-in va gen in,” a ci hi. Faro galkapte Jerusalem khua hong naih ciangun Khaldea galkapte a nungkik uh hi. Tua laitakin Jeremiah zong Jerusalem khua panin a behte kiangah a gamh luah teng la dingin Benjamin gamah pai dingin a dingkhia hi. Benjamin Kongpi a tun’ ciangin Shelemiah’ tapa, Hananiah’ tupa Irijah a kici kong cingpa in kamsangpa Jeremiah kiangah, “Nang Khaldea mite lama tai sim ding na hi hi,” ci-in a na man hi. Tua ciangin Jeremiah in zong, “Hi lo hi’ng; Khaldea mite’ lamah ka tai sim kei ding hi,” a ci hi. Ahih hangin Irijah in ama’ cihna ngai loin Jeremiah man a, kumpi uliante’ kiangah a paipih hi. Kumpi uliante zong Jeremiah tungah heh mahmah uh a, a sat khit uh ciangin thong ding a, a kizang sa, kumpi thuvanpipa Jonathan’ innah thong a kia sak uh hi. Jeremiah zong lei sung thong mial sungah ni tampi a om khit ciangin kumpipa Zedekiah in a samsak hi. Kumipa in zong a inn sungah samin, “ Topa ’ hong thugenna kam khat beek a om hiam?” ci-in a dong sim hi. Jeremiah in zong, “Om mah hi,” a cih khit ciangin, “Babilon kumpipa’ khut sungah nang hong kipia ding hi,” a ci hi. Tua ciangin Jeremiah in kumpipa Zedekiah’ kiangah, “Kei thong nong kiatsak nadingin nang tungah ahi zongin, na nasemte’ tung leh hih mite tungah ahi zongin bang khialhna hong bawl ka hi hiam? Nang’ kiang a, ‘Babilon kumpipa in nang leh hih gam hong sim lo ding hi,’ ci-a thu a hong genkhol, na kamsangte tu-in koiah om uh ahi hiam? Tu-in ka Topa kumpipa aw, ka thugen nong ngaih nadingin kong thuum hi. Kumpi thuvanpipa Jonathan’ innah nong puak kik nawn loh nadingin na mai nuai-ah kiniamkhiatna tawh kong thuum hi. Bang hang hiam cih leh nong puakkik leh tua lai-ah ka si taktak ding hi,” a ci hi. Tua ahih manin kumpipa Zedekiah in kumpi thonginn sungah a kiat zawk nading thu pia a, khua sunga anlum a bei matengin anlum sai panin ni simin anlum khat ta a piasak den hi. Tua ahih manin kumpipa’ thong sungah Jeremiah a om suak hi. Mattan’ tapa Shefatiah, Pashhur’ tapa Gedaliah, Shelemiah’ tapa Jehukal, leh Malkhiah’ tapa Pashhur-te in mi khempeuh’ tunga Jeremiah’ thugenna a za uh hi. Jeremiah in mite’ kiangah, “ Topa in hong cih-inah, Hih khuapi sunga a om mi peuhmah namsau tawh ahi zongin, kial tawh ahi zongin, pulnatna tawh ahi zongin a si ding uh hi. Ahih hangin pusuak khia-in Khaldea mite a beel peuhmah a nungta ding a, a suakta liailiai ding uh hi. Topa in hong cih-inah, Babilon kumpipa’ khut sungah hih khuapi kipia taktak ding a, a kila ta ding hi,” a ci hi. Tua ciangin kumpipa’ uliante in kumpipa’ kiangah, “Hih mipa i thatlum ding hi. Bang hang hiam cih leh hih thute a gen manin hih khuapi sunga a om lai galkapte leh mi khempeuhte lungkia sakin thazaw sak hi. Hih mipa in i gam mite’ phattuam nading zong loin a gim ngah nading uh a zong zaw hi,” a ci uh hi. Kumpipa Zedekiah in, “En un, amah note’ khut sungah om hi, keimah in note kong kho thei kei hi,” a ci hi. Tua ciangin amaute in Jeremiah a man uh a, thong huang sunga om kumpipa’ tapa Malkhiah’ tuikhuk sungah khau tawh a khiasuk uh hi. Tuikhuk sungah tui om loin buan bek om a, Jeremiah buan sungah a tum hi. Kumpipa’ inn sunga na a sem kumpi ulian khat ahi Ethiopia mi Ebedmelek in tuikhuk sungah Jeremiah a kikhiat lam a za hi. Tua laitakin Benjamin Kongpi-ah kumpipa tu-in a om hi. Ebedmelek zong kumpi-inn panin hong paikhia a, kumpipa’ kiangah “Ka Topa kumpipa aw, hih mite in kamsangpa Jeremiah, tuikhuk sungah a khiatsuk uh a khial uh hi. Bang hang hiam cih leh khua sungah anlum om nawn lo ahih manin anngawlin a puk si ding hi,” a ci hi. Tua ciangin kumpipa in Ethiopia mipa Ebedmelek sawl a, “Hih lai panin mi thum tonpih in la, kamsangpa Jeremiah a sih ma-in tuikhuk sung pan va kaikhia un,” a ci hi. Tua ciangin Ebedmelek in zong a mite tonpih a, kumpipa’ innah pai-in van koihna sungah a lut khit uh ciangin tuikhuk sung pan Jeremiah khau tawh a kaihkhiat nading uh puansia sa leh puanlui pawlkhat a la uh hi. Tua ciangin Ethiopia mipa Ebedmelek in Jeremiah’ kiangah, “Na lenuai leh khau kikalah puansiate dap in,” ci-in a sawl hi. Jeremiah in zong tua bangin ahih hi. Tua ciangin amaute in tuikhuk sung panin khau tawh Jeremiah a kai khiato uh hi. Jeremiah zong thong huang sung mahah a om lai hi. Kumpipa Zedekiah in kamsangpa Jeremiah a vaikhak a, Topa ’ biakinn lutna kongkhak tumna-ah a sam hi. Kumpipa in Jeremiah kiangah, “Thu khat kong dong ding hi: bangmah hong im kei in,” a ci hi. Jeremiah in zong Zedekiah’ kiangah, “Thuman bangin hong gen leng kei nong that taktak ding hi. Ka ngaihsutna hong pia leng lah nong mang nuam kei ding hi,” a ci hi. Tua ciangin kumpipa Zedekiah in Jeremiah’ kiangah, “Eite nuntakna a hong pia Topa a nuntak bangin kong si sak kei ding a, nang a hong that nuam hih mite’ khut sungah zong kong pia kei ding hi,” ci-in kiciamna a pia sim hi. Tua ciangin Jeremiah in Zedekiah kiangah, “ Topa, a vanglian Pasian, Israel mite’ Pasian in hong gen-inah, Babilon kumpipa’ uliante na belh leh na nuntakna hong kihu ding a, hih khuapi in zong mei tawh hal tumna thuak loin nang leh na innkuanpihte na suakta ding uh hi. Ahih hangin Babilon kumpipa’ uliante na belh kei leh hih khuapi Khaldea mite’ khut sungah kipia ding a, amau in mei tawh hal-in amaute’ khut sung pan na suakta kei ding hi,” a ci hi. Kumpipa Zedekiah in Jeremiah kiangah, “Khaldea mite’ kianga a tai Judah mite ka kihta hi. Amaute’ khut sungah kei hong kipia leh amaute in kei hong bawlsia ding uh hi,” a ci hi. Jeremiah in, “Amaute kiangah nang hong kipia lo ding hi. Tu-a kong gen bangin Topa ’ thu mang in. Tua hi leh nang adingin hoih ding a, na nuntakna hong kihu ding hi. Ahih hangin na lut nop kei leh, Topa in ka mangmuhna sungah hih bangin hong lak hi: En in, Judah kumpipa’ inn sunga a kinusia numei khempeuh Babilon kumpipa’ uliante kiangah kipaipih uh a, tua numeite in Zedekiah’ kiangah, ‘Na lawm muan’te in hong khem uh a, nang hong zo ta uh hi; na khe buan sungah tum ahih manin, hong nungngat ta uh hi,’ ci-in a gen uh hi. Na zite leh na tate khempeuh Khaldea mite kiangah kipaipih ding a, nangmahmah zong amaute’ khut sung panin na suakta kei ding hi. Babilon kumpipa in hong man ding a, hih khuapi mei tawh a kangtum ding hi,” a ci hi. Tua ciangin Zedekiah in Jeremiah’ kiangah, “Hih thute kuamah thei sak kei in. Tua hi leh na si kei ding hi. Ahih hangin kumpi uliante in nang kong hopih lam a zak khak uh a, nang’ kiangah hong pai-in hong hopih-in ‘kumpipa’ kianga na gen thute leh kumpipa in nang kianga hong gen thute hong gen in. Bangmah hong im kei lecin kong that kei ding uh hi,’ ci-a hong gen khak uh leh, amau’ kiangah, ‘Kumpipa in kei, Jonathan’ innah a si dingin hong puakkik nawn loh nadingin a thuum hi’ng’ ci in la, dawng in,” ci-in a gen hi. Kumpi ulian khempeuh Jeremiah’ kiangah hong pai takpi uh a, thu a dong uh hi. Amah’n zong kumpipa’ vaikhakna bangin a dawng kik hi. Tua ciangin amau a gen ding uh om nawn lo hi. Bang hang hiam cih leh kumpipa tawh a kihona a za sim kuamah a om kei uh hi. Tua hi a, Jerusalem khua a kilak ciang dong Jeremiah zong thong huang sung mahah a om lai hi. Judah gamah Zedekiah kumpi a suah zawh kum kua leh kha sawm a phak laitakin, Babilon kumpipa Nebukhadnezzar leh a galkap khempeuh Jerusalem khua sim dingin hong pai uh hi. Zedekiah a maan’ zawh kum sawm leh kum khat, a kha lina, a ni kua ni-in, kumpipa’ khuapi kulh a phulet uh hi. Jerusalem khua a kilak laitakin, Nergalsharezer, Samgarnebo, galkapmang Sarsekhim leh sakol galkap mang Nergalsharezer-te akipan Babilon kumpipa’ kumpi uliante khempeuh hong pai-in kongpi laita penah hong tu uh hi. Judah kumpipa Zedekiah leh galkap khempeuh in amaute a muh uh ciangin a tai sim uh hi. Zan laitakin kumpipa’ huan sung tawnin kulh tegel kikal-a kongpi kan tan-in khuapi sung pan a paikhia uh a, Arabah leizang lam a manawh uh hi. Ahih hangin Khaldea galkapte in a nung delh uh a, Jerikho leizangah Zedekiah a pha uh hi. A mat khit uh ciangin Hamath gam Riblah khua-ah, Babilon kumpipa Nebukhadnezzar’ kiangah a paipih uh a, amah in thukhenna a pia hi. Riblah khua-ah Babilon kumpipa in Zedekiah’ muh mahin a tapate thahlup sak a, Judah gam kumpi ulian khempeuh zong a thatlum hi. Zedekiah’ mittang a khelkhiat sak khit ciangin kol bulh a, Babilon-ah a ciahpih hi. Khadea mite in kumpipa’ inn leh midangte’ innte a hal uh a, Jerusalem khua kulhpi a susia uh hi. Tua ciangin kumpi cing galkap mangpa Nebuzaradan in khuapi sunga a kinusia lai mite tawh, ama kianga a tai mite tawh, a omlai mite tawh, Babilon-ah sal dingin a paipih hi. Kumpi cing galkap mangpa Nebuzaradan in bangmah a nei lo mizawng pawlkhat Judah gamah nusia-in leenggah huan leh lo a pia hi. Babilon kumpipa Nebukhadnezzar in Jeremiah’ thu tawh kisai-in kumpi cing galkap mangpa Nebuzaradan thu pia a, “Jeremiah la un. Limtak-in kem un la, bawlsia kei un. Ama’ deih bangbangin na gamta un,” a ci hi. Tua ciangin kumpi cing galkapmang Nebuzaradan tawh, galkap mang Nebushazban leh sakol galkap mang Nergalsharezer-te akipan Babilon kumpipa’ ulianpite khempeuh in thong huang sung panin Jeremiah a lakhia uh hi. Ahikam’ tapa ahi, Shafan’ tapa Gedeliah kiangah, inn a, a ciahpih dingin a ap uh hi. Tua ahih manin Jeremiah a mipihte’ lak mahah a teeng hi. Jeremiah thong huang sungah kikalh cipa a om laitak-in Topa in hopih a: “Ethiopia mi pa Ebedmelek’ kiangah pai in la, ‘A vanglian Topa, Israel mite’ Pasian in hong gen-inah: En in, Hih khuapi hoih nading hi lo, a siat nading ka gen sate ka tungsak ding a, tua ni a hong tun’ ciangin nangmah in zong na mu ding hi. Ahih hangin Topa in kong cih-inah, tua ni ciangin nang kong honkhia ding a, na kihtak mite’ khut sungah hong kipia kei ding hi. Bang hang hiam cih leh nang kong honkhia taktak ding a, namsau tawh thahna na thuak kei ding hi. Topa in kong cih-inah, kei hong muang na hih manin na nuntakna na suahtak liailiai ding hi, hong ci hi,’ ci-in va gen in,” a ci hi. Jeremiah kol kibulh-in Jerusalem khua leh Judah gam-a saltangte khempeuh tawh Babilon khua-ah a kipuak khit ciangin Ramah khua panin kumpi cing galkapmang Nebuzaradan in a khahkhia kik hi. Tua khit ciangin Topa in Jeremiah a hopih hi. Kumpi cing galkap mangpa in Jeremiah samkhia a, hopihin, “ Topa na Pasian in hih mun siat nadingin thu gen khin zo hi. Ama’ gen mah bangin Topa in tu-in zong a hih khin zo hi. Note in Topa ’ tungah mawhin a thu mang lo na hih manun, note’ tungah hih na hong tung ahi hi. Tu-in, en in, na khuta kibulh kolte, tu ni-in kong sutkhiat sak kong khah khia ta hi. Babilon khua-ah kei tawh pai ding hoih na sak leh hong pai in. Keimah in nang lim takin kong kem ding hi. Ahih hangin Babilon khua-ah kei tawh pai ding hoih nasak kei leh hong pai kei in. Gam khempeuh na mai-ah om a, na pai nopna peuhpeuh ah na pai thei hi,” a ci hi. Jeremiah a pai loh ciangin Nebuzaradan in, “Babilon kumpipa in Judah gam khuapite uk ding a, a koih, Ahikam’ tapa, Shafan’ tupa Gedaliah, kiangah paikik in. Amah tawh na mipihte lakah teeng in. Na teen’ nop kei leh lah na pai nopna peuhpeuh ah pai in,” a ci hi. Tua ciangin kumpi cing galkap mangpa in amah an leh letsong pia-in a paisak hi. Tua ciangin Jeremiah zong Ahikam’ tapa Gedaliah’ omna Mizpah khua-ah pai-in gam sunga a om lai a mipihte tawh a teeng khawm hi. Babilon kumpipa in Ahikam’ tapa Gedaliah, gam uk dingin koih a, Babilon khua-a sal dinga a kipaipih lo gam sunga mizawng pente ahi papi, nupi leh naupangte a en dinga a koihna thu gamsung khua neu-a om galkap mangte leh a galkapte un a zak uh ciangin Mizpah khua Gedaliah’ kiangah a pai uh hi. Nethaniah’ tapa Ishmael, Kareah’ tapa Johanan, Tanhumeth’ tapa Seraiah, Netofah khua Efai’ tate, Ma-akath mi Jezaniah leh a galkapte a pai uh hi. Ahikam’ tapa, Shafan’ tupa Gedaliah in zong amaute kiangah kiciam-in gen a, “Khaldea mite’ khut nuai-a na om ding uh kihta tuan kei un. Hih gam sung mah ah teeng un la, Babilon kumpipa’ na sepsak le uh cin, no tungah thusia bangmah om lo ding hi. Kei ka hih leh Mizpah khua mah ah ka teeng ding a, eite kianga hong pai ding Khaldea mite’ kiangah no’ taangin ka ding ding hi. No na hih uh leh leenggah zute, khuakhal ante leh sathaute khawm un la, na bel sung uhah koih un. Na laksa uh khua sung ciat mah ah na teeng un,” a ci hi. Tua mah bangin Moab gam, Ammon gam, Edom gam leh gamdang a, teeng Judah mi khempeuh in, Babilon kumpipa in Judah gamah mi pawlkhat om sak lai a, tuate a uk dingin Ahikam’ tapa, Shafan’ tupa Gedaliah koih hi, cih thu a za uh hi. Tua ciangin Judah mi khempeuh a kitheh thangna mun khempeuh panin Judah gamah hong ciahkik uh a, Mizpah khua Gedaliah’ kiangah hong pai uh hi. Lenggahzu leh khuakhal an tampi a kaikhawm uh hi. Tua ciangin Kareah’ tapa Johanan leh gamsung khua neu-a om galkap mangte khempeuh Mizpah khua Gedaliah’ kiangah hong pai uh a, “Ammon kumpipa Baalis in nang hong suam dingin Nethaniah’ tapa Ishmael a sawl lam na thei hiam?” ci-in a dong uh hi. Ahih hangin Ahikam’ tapa Gedaliah in amau’ gen a um kei hi. Tua ciangin Kareah’ tapa Johanan in Mizpah khua-a Gedaliah kiangah, “Nethaniah’ tapa Ishmael hong that sak in. Kuamah in hong thei lo ding uh hi. Nang hong kithat leh nang hong beel Judah mite kikhenthang ding a, Judah mi a om lai sun teng in zong bei lawh ding uh ahih manin bang hangin amah in nang hong that laizang ding ahi hiam?” ci-in a hopih sim hi. Ahih hangin Ahikam’ tapa Gedaliah in Kareah’ tapa Johanan kiangah, “Tua bangin hih kei in; bang hang hiam cih leh Ishmael’ thu na genna man lo hi,” a ci kik hi. Kha sagih kha hong tun’ ciangin Nethaniah’ tapa, Elishama’ tupa, kumpi nam leh kumpipa’ ulian pente khat ahi Ishmael, mi sawm tawh Mizpah khua Ahikam’ tapa Gedaliah’ kiangah hong pai uh hi. Mizpah khua-ah amaute in an a nek khawm laitak-un, Nethaniah’ tapa Ishmael leh tua mi sawmte in, Babilon kumpipa in gam uk ding a, a koih Ahikam’ tapa, Shafan’ tupa Gedaliah pen namsau tawh a sat uh a, a thatlum uh hi. Ishmael in Mizpah khua-a Gedaliah tawh a omkhawm Judah mi khempeuh leh tua laitaka a om Khaldea galkapte zong a that hi. Gedaliah a kisuam ni zing ciang kuama’ theih ma-in Shekhem, Shiloh leh Samaria khuate panin mi sawmgiat hong pai uh hi. Amaute in a khamul uh metin a puan uh bal kek-in, a pumpi uh a kikui gawp sa-in Topa ’ biakinn ah an tawh biakna leh paknamtui tawh biakna a piak ding uh hong tawi khawm uh hi. Nethaniah’ tapa Ishmael zong Mizpah khua panin kap kawmin hong paikhia a, amau hong dawn tuah hi. Amau tawh a kimuh ciangin amah in “Ahikam’ tapa Gedaliah hong en dih un,” ci-in a sam hi. Khuapi sung a tun’ uh ciangin Nethaniah’ tapa Ishmael leh a mi sawmte in amaute a that uh a, a luang uh tuikhuk sung khatah a paai uh hi. Ahih hangin amaute’ lakah mi sawm in Ishmael’ kiangah, “Ko hong that kei in! Mangbuh, mangbuhham, sathau leh khuaizu ka seelsim uh lo lai-ah tampi a om hi,” a ci uh hi. Tua ahih manin amaute leh a lawmte a that kei uh hi. Ishmael in a thah sa misi luang khempeuh a paihna tuikhuk pen a gol khat hi a, kumpipa Asa in Israel kumpipa Baasha a gal nan’ nading a, a bawl ahi hi. Nethanniah’ tapa Ishamael in a thah sa mi si luangte tawh tua tuikhuk a dimsak hi. Tua ciangin kumpi cing galkapmang Nebuzaradan in, Ahikam’ tapa Gedaliah’ uk dinga a piak kumpipa’ tanute leh Mizpah khua-a a kinusia mite khempeuh-a kipan Mizpah khua-a a om lai mi vannuai khempeuh Nethaniah’ tapa Ishmael in a man a, Ammon gam lam zuanin a paikhiatpih hi. Ahih hangin Kareah’ tapa Johanan leh amah tawh a omkhawm galkapmang khempeuh in Nethaniah’ tapa Ishmael’ tatsiatna khempeuh a zak uh ciangin a galkap khempeuh uh tawh Nethaniah’ tapa Ishmael sim dingin a kuankhia uh hi. Gibeon tuikhuk pi a tun’ uh ciangin a pha uh hi. Ishmael’ mat mi khempeuh in Kareah’ tapa Johanan leh a hong tonpih galkap mangte khempeuh a muh uh ciangin a nuam uh hi. Tua ahih manin Mizpah khua pan-a Ishmael in manin a pai khiatpihte khempeuh hong kileh hei kikin Kareah’ tapa Johanan a bel uh hi. Ahih hangin Nethaniah’ tapa Ishmael leh mihing giat Johanan’ khut sung panin a suakta uh a, Ammon gamah a tai uh hi. Tua ciangin Kareah’ tapa Johanan leh a paipih galkap mangte khempeuh in, Nethaniah’ tapa Ishmael in Mizpah khua-ah Ahikam’ tapa Gedaliah a thah khit ciang manin a paikhiatpih galkapte, nupite, naupangte leh kumpi inn sung mangte akipan a om lai mite khempeuh Gibeon khua panin a ciahpih kik uh hi. Amaute Izipt gam zuan dingin a pai uh a, Bethlehem khua gei Khimham Khawlmun-ah a khawl uh hi. Bang hang hiam cih leh Khaldea mite a kihta uh hi. Babilon kumpipa in gam uk dinga a koih Ahikam’ tapa Gedaliah, Nethaniah’ tapa Ishmael in suamlum ahih manin a kihta uh ahi hi. Tua ciangin galkap mangte khempeuh, Kareah’ tapa Johanan, Hoshaiah’ tapa Azariah leh a neupen pan-a kipan a lianpen dongin mi khempeuh hong paipih uh a, kamsangpa Jeremiah’ kiangah, “Kong thuumna uh hong ngai in la, hih a hong kinusia teng adingin Topa na Pasian’ kiangah, thu hong ngetsak in. Bang hang hiam cih leh khat vei lai-in mi tampi ka hih uh hangin tu-in nong muh mah bangin, mi tawmno khat bek ka hi ta uh hi. Topa na Pasian in ka lam pai nading uh ahi zongin, ka nasep nading uh ahi zongin a hong lah nadingin thu hong ngetsak in,” a ci uh hi. Kamsangpa Jeremiah in zong amaute’ kiangah, “Nong genna-uh ka thei khin zo hi. En un, Topa na Pasian uh’ kiangah nong ngetna bangun thu ka ngen ding a, Topa ’ hong dawn’ kikna bangbang ka hong gen ding hi. Bangmah kong im kei ding hi,” a ci hi. Tua ciangin amaute in Jeremiah kiangah, “ Topa na Pasian in kote’ ading-a nang’ tunga a hong gen bangbang ka zuih kei tak mah uh leh Topa in man takin thei ta hen. Nang kong sawlna uh Topa i Pasian’ hong gen bangbang hoih taleh sia taleh ka mang ding uh hi. Bang hang hiam cih leh Topa i Pasian’ thu mang leng, ei’ adingin na hong hoih ding hi,’ a ci uh hi. Tua zawh ni sawm khit ciangin Topa in Jeremiah a hopih hi. Tua ciangin amah in Kareah’ tapa Johanan, amah tawh a omkhawm galkap mangte khempeuh leh a neupen pan-a kipan a lianpen dongin mi khempeuh a sam a, amaute kiangah, “Na deihna uh kong thuumsak nadinga nong sawlna uh Topa, Israel mite’ Pasian in a hong gen-inah: Hih gamah note na om suak uh leh note kong lam ding a, kong phel kei ding hi. Kong phut ding a, kong botkhia kei ding hi. Bang hang hiam cih leh note’ tungah siatna kong tun’ sak manin ka dah hi. Na kihtak uh Babilon kumpipa kihta nawn kei un. Topa in kong cih-inah, lau nawn kei un. Bang hang hiam cih leh amah’ khut sung pana hong honkhia ding leh hong lakhia dingin keimah in kong ompih hi. Amah in note hong hehpih-in na gam mah uhah na teen’ suak theih nadingun keimah in note kong hehpih ding hi. Ahih hangin note in, Topa na Pasian uh’ thu mang loin, ‘Hih gam sungah ka teeng nawn kei ding uh hi. Gal om lohna, peengkul kitum lohna, an duh gilkial lohna Izipt gamah pai-in tua laiah ka teeng ding uh hi,’ na cih uh leh Judah mi a om laite aw, Topa ’ kammal ngai un. A vanglian Topa, Israel mite’ Pasian in kong cih-inah: Izipt gam-a teeng dingin na pai teitei uh a, na teen’ teitei uh leh na kihtaktak uh namsau in Izipt gamah note hong that veve ding a, na kihtaktak uh kialpi in zong Izipt gamah note hong nung delh veve-in tua lai munah na si veve ding uh hi. Izipt gamah pai-in a teeng khempeuh namsau tawh ahi zongin, kialpi tawh ahi zongin, pul natna tawh ahi zongin a si ding uh hi. Amaute’ tunga ka tun’sak ding gimna panin kuamah a suakta kei ding hi. “Bang hang hiam na cih uh leh a vanglian Topa, Israel mite’ Pasian in kong cih-inah: Jerusalem khua-a teeng mite’ tungah ka hehna leh ka thangpaihna a kibuak mah bangin Izipt gam na pai uh leh note tungah ka hehna hong kibua ding hi. Mite in note hong lipkhap ding a, kihaamsiatna-in hong zangin hong zahko ding uh hi. Note in hih mun na mu kik nawn kei ding uh hi, ci-in a gen hi,” a ci hi. Tua ciangin Jeremiah in Judah gama a om lai sunte kiangah, “ Topa in note’ kiangah, Izipt gamah pai kei un, hong ci hi. Tu ni-in note kong hilh kholhnate tel takin thei un. Na sih nadingun lam na pial khin uh hi. Bang hang hiam cih leh Topa na Pasian uh’ kiangah, kei nong paisak uh a, ‘Ko adingin Topa i Pasian kiangah thu hong ngetsak in. Topa i Pasian in a hong gen peuhpeuh ko kiangah hong gen in. Ko zong ka mang ding uh hi,’ nong ci uh hi. Topa na Pasian un note’ kianga gen ding a, hong sawl teng tu ni-in kong gen khin zo hi. Ahih hangin note in khat beek na mang kei uh hi. Tua ahih manin na teen’ nopna mun uhah namsau tawh thahna, gilkialna leh pulnatna tawh sihna na thuak ding uh hi, ci-in tu-in tel takpi-in thei ta un,” a ci hi. Topa Pasian in mi khempeuh kiangah gen ding a, a sawl hih thu teng Jeremiah in a gen khit ciangin Hoshaiah’ tapa Azariah leh Kareah’ tapa Johanan-a kipan mi gilo dangte khempeuh in Jeremiah kiangah, “Nang in zuau na phuak hi. Topa i Pasian in, ‘Izipt gamah a teeng dingin pai kei un,’ ci-a gen dingin nang hong sawl lo hi. Neriah’ tapa Baruk in Khaldea mite’ khut sungah kote hong pia nuam-in hong kithah nading ahih kei leh Babilon-ah sal tang dinga hong kilak theih nading deih ahih manin ko a hong langpang dingin nang hong zang ahi zaw hi,” a ci uh hi. Tua ahih manin Kareah’ tapa Johanan leh galkap mangte khempeuh-a kipan mi khempeuh in Judah gama om suak nading Topa ’ thugenna a mang kei uh hi. Tua ciangin Kareah’ tapa Johanan leh galkap mangte khempeuh in, a kihawl khiatna uh gam khempeuh panin a hong ciahkik Judah mi a om lai sun teng Izipt gamah a paipih uh hi. Papi, nupi, naupang, kumpipa’ tanute-a kipan kumpi cing galkap mang Nebuzaradan in Ahikam’ tapa, Shafan’ tupa ahi Gedaliah’ kep dinga a nusiat mi khempeuh a paipih uh hi. Kamsangpa Jeremiah leh Neriah’ tapa Baruk zong a kipaipih hi. Amaute in Topa ’ thu mang lo uh a, Izipt gamah pai-in Tahpanhes khua a tung uh hi. Tua ciangin Tahpanhes khua-ah Topa in Jeremiah hopih a: “Suangtum gol pawlkhat la in la, Tahpanhes khua Faro kumpi inn lutna suangphah nuaiah phum in. Na phum lam Judah mite khempeuh kimusak in. Tua ciangin amaute kiangah, “A vanglian Topa, Israel mite’ Pasian in hong gen-inah: En un, Keimah in ka nasempa ahi Babilon kumpipa Nebukhadnezzar ka la ding a, hih ka suang phumte’ tungah ama’ kumpi tokhom a phut ding a, tuate tungah a kumpi puanbuk a lam ding hi. Amah hong pai-in Izipt gam hong simgawp ding a, pulnatna tawh a si ding mite pulnatna tawh si-in, sal-a mat dingte sal-in kiman-in, namsau-a si ding mite namsau tawh kithat ding uh hi. Izipt pasiante a kibiakna biakinnte a hal ding a, a pasiante uh hal-in a puakhia ding hi. Tuucingte in a puan uh tung-a khahte paai khia-a a sian’sak uh bangin amah in Izipt gam a siangsak ding a, tua khit ciangin ngaihmuang tak-in a ciahkik ding hi. Amah in Izipt gam Heliopolis khua-a mualsuangte a susia ding a, Izipt pasiante kibiakna biakinnte mei tawh a halsak ding hi, a ci hi,’ ci-in va gen in,” a ci hi. Izipt gam Migdel khua, Tahpanhes khua, Memfis khua leh leitaw lamah a teeng Judah mite tawh kisai-in Topa in Jeremiah hopih a, “A vanglian Topa, Israel mite’ Pasian in kong gen-inah: Note in Jerusalem khua leh Judah gam khuapi khempeuh tungah ka tun’sak gimna na mu zo uh hi. En un, tu ni-in tua khuate a siasa mahin om lai-a kuamah teeng lo hi. Bang hang hiam cih leh amaute in ka heh nadingin gitlohna bawl uh a, amaute-a kipan note leh na pute na pate un a theih ngei loh uh pasiante’ na semin paknamtui hal-in a bia uh hi. Ahih hangin note kiangah ka nasem kamsangte khempeuh kong sawl a, ‘Ka muhdah hih a kihhuai na na hih nawn kei un,’ ci-in kong gensak tawntung hi. Ahih hangin amaute in ka thu hong ngai loin a bil uh hong dawh lo uh a, a gitlohna uh panin kihei loin, pasian dangte’ kiangah paknamtui hal veve uh hi. Tua ahih manin Judah gam khuapite’ sung leh Jerusalem khua kongzing lakah ka hehna leh ka thangpaihna ka bua-a ka kuangsak hi. Tu ni-a na muh uh bangin tuate kisia-in gamlak suak khin ta hi. Tu-in a vanglian Topa Pasian, Israel mite’ Pasian in kong gen-inah: Bang hangin’ note in hih bangin note’ siat nadingin mawhna lianpi bawl na hi uh hiam? Judah gam sungah papi, nupi, naupang leh naungek-a kipan a nungta lai kuamah om nawn kei hen, cih na deihna uh ahi hiam? Note in si-in, leitunga minam dang khempeuhte in kihaamsiatna-a hong zat ding uh leh a hong simmawh nadingun bang hangin na khut uh tawh milim bawl-in na teen’ nadingun na zuat uh Izipt gamah pasian dangte’ kiangah paknamtui hal-in kei hong hehsak na hi uh hiam? Judah gam leh Jerusalem khua kongzing laka na pute na pate uh’ gitlohna, Judah kumpite’ gitlohna, a zite uh’ gitlohna, note mahmah’ gitlohna leh na zite uh’ gitlohnate mangngilh khin na hi uh hiam? Amaute in tuni ciang dong kiniamkhiat lo uh a, hong zaktak loin, note leh na pute na pate kianga kong piak ka thukhamte leh ka ngeinate na zui kei uh hi. “Tua ahih manin a vanglian Topa, Israel mite’ Pasian in kong gen-inah: En un, note susia dingin na langkhat uhah kei ka ding ding a, Judah gam khempeuh ka susia ding hi. Izipt gama teeng ding a, lungsim a khensat khin Judah mi a om laite, a vekpi-un ka si sak khin ding hi. Izipt gamah namsau tawh kithat sakin kial tawh ka puksisak ding hi. A neu penpen-a kipan a golpen dongin namsau leh kialpi tawh a si ding uh a, mite’ lipkhap, mite in kihaamsiatna-in a zat leh, mite’ simmawh ka suaksak ding hi. Jerusalem khua ka siatsak bangin Izipt gama teeng mite namsau tawh, kialpi tawh, pulnatna tawh sihna ka thuaksak ding a, Izipt gamah pai-a a teeng Judah mi a om laite in a zuatkik nop uh ahi Judah gamah ciahkik thei nawn loin khat beek suakta loin, zong a nungta suak kei ding uh hi. Galtai pawl khat longal khat beek a suakta kei ding uh hi,” a ci hi. Tua ciangin a zite un pasian dangte kiangah paknamtui a hal lam a thei papi khempeuh leh tua lai-a ding nupi khempeuh-a kipan Izipt gam leitaw lama teeng mi khempeuh, a vekpi-in mi tampi tak in Jeremiah’ kiangah: “ Topa ’ min a, nong gen thute kong mang kei ding uh hi. Ahih hangin ka ciamsa uh bangin kote, ka pute ka pate, ka kumpite uh leh kumpi uliante in Judah gam khuapite leh Jerusalem khua kongzing lakah ka hih ngei uh bangin vantung kumpinu kiangah paknamtui hal-in tuidawn biakna ka hih zaw ding uh hi. Bang hang hiam cih leh ka tuacih uh ciangin an tampi ka nei uh a, hau-in gimna zong ka thuak kei uh hi. Ahih hangin vantung kumpinu kiangah paknamtui halna leh tuidawn biakna ka hih nawn loh uh-a kipan bangmah ka nei nawn kei uh a, namsau leh kial in hong thatlum zawsop hi,” a ci uh hi. Nupite in zong, “Vantung kumpinu’ tungah ama’ lim a suun dingin moh bawl-in paknamtui halna leh tui dawn biakna ka bawl uh ciangin ka pasalte uh’ thukim loh pi-a bawl ka hi zenzen uh hiam?” a ci uh hi. Tua ciangin Jeremiah in tua bang a, a dawng kik papi, nupi-a kipan mi khempeuh kiangah, “Judah gam khuapite leh Jerusalem khua kongzing lakah note, na pute na pate uh, na kumpite uh leh kumpi uliante akipan gamsung mi khempeuh in paknamtui halna na bawl uh ciangin Topa in tua pen a phawk lo sa na hi uh hiam? A ngaihsun lo sa na hi uh hiam? Topa in na hoihlohnate uh leh na bawl uh kihhuainate hangin no hong thuak zo nawn lo hi. Tua ahih manin tuni mahmah-in zong na gam uh gamlak suak khin a, mite’ kihaamsiatna suakin kuamah teeng nawn lo hi. Note in paknamtui halin Topa tungah mawh tham loin, Topa ’ thu mang loin ama’ thukhamte, a ngeinate leh a hong thupiakte zui lo na hih manun tuni mahin zong hih gimna note tungah hong tung ahi hi,” a ci hi. Jeremiah in mi khempeuhte’ kiang leh nupi khempeuhte kiangah a gen laina-ah, “ Topa ’ kammal ngai dih un, no Izipt gama om Judah mite khempeuh aw, a vanglian Topa, Israel mite’ Pasian in hong gen-inah: note leh na zite un na khut bek uh tawh na sep uh hi loin na kam mahmah uh tawh, ‘Vantung kumpinu tungah paknamtui hal ding leh tui dawn biakna piak dinga ka kiciamna sa uh bangin ka sem taktak ding uh hi,’ ci-in na gen khin zo uh hi. Tua ahih leh na kiciamna uh kip sak ta un la, na kiciamna uh bangin sem dih ve un! Ahih hangin Topa ’ thugenna hong ngai un, no Izipt gama om Judah mite aw; en un, Topa in kong cih-inah, Izipt gama om Judah mi khat beek in, ‘ Topa a nuntak bangin,’ ci-in ka min zangin a kiciam nawn loh nadingun ka min lianpi tawh ka kiciam khin zo hi. En un, keimah in amaute tungah hoihna tung loin siatna a tun’ nadingin ka bawl ding hi. Izipt gam-a om Judah mite khempeuh namsau leh kialpi tawh a si ding uh a, khat beek a suakta kei ding uh hi. Namsau tawh thahna a thuak kha lo, mi tawmkhate in Izipt gam panin Judah gama teeng dingin a pai a nungta lai sunte in kei’ kammal leh amau’ kammal koi zaw, a manin tung cih a thei ding uh hi. Note’ siat nading ka gen sa thute a hong tung takpi ding ahihna thu na theih nadingun Topa in kong cih-inah, hih lim note kong pia ding a, hih munah kong thuaksak ding hi: Topa in kong gen-inah, En un, Judah kumpipa Zedekiah, a galpa ahi amah a that nuam Babilon kumpipa Nebukhadnezzar’ khut sungah ka piak mah bangin Izipt kumpipa Faro Hofra, a galte’ khut sung, amah a that nuam mite’ khut sungah ka pia ding hi,’ hong ci hi,” a ci hi. Josiah’ tapa Jehoiakim, Judah gamah kumpi a suah zawh kum li a cin’ ciangin Neriah’ tapa Baruk in kamsangpa Jeremiah’ gen bangbang laibu khat sungah a gelh hi. Tua ciangin Jeremiah in Baruk kiangah: “Baruk aw, Topa, Israel mite’ Pasian in nang hong hopih hi. Nangmah in, ‘Gimna ka thuak hi! Bang hang hiam cih leh Topa in ka dahna leh ka natna hong behlap hi. Ka tautauna-in ka gim khin zo a, ka tawlnga thei kei hi,’ na ci hi. Topa in nang’ tungah hih bang a gen dingin hong sawl hi: En in, keimah in ka lam sate ka phel kik a, ka phuh sate ka bot khia kik hi. Keimah in leitung buppi tua bangin ka hih ding hi. Tua panin nang a peng thei tuam dingin kingaihsun na hi hiam? Tua bangin kingaihsun kei in; bang hang hiam cih leh, en in, Topa in kong cih-inah, mi khempeuh’ tungah gimna ka tung sak ding hi. Ahih hangin nang pen na paina mun khempeuh ah kong suakta sak liailiai ding hi,” a ci hi. Gamdangte’ thu tawh kisai-in Topa in Jeremiah hopih hi. Josiah’ tapa Jehoiakim, Judah gamah kumpi a suah zawh kum li a phak hunin Babilon kumpipa Nebukhadnezzar in Eufrates gun gei Karkhemish khua-ah Izipt kumpipa Faro Neko simin a zo hi. Izipt kumpipa’ galkapte tawh kisai-in hih bangin a hopih hi: “Na lumte uh la un la, galsim dingin kuankhia un! Sakol vante vawh un la, tuang ta un, sakol galkapte aw. Na sik lukhute uh khu un la, na teipite uh tat hiam-in, na sik puante uh silh un. A bangci mawk a hia? Amaute lungmangin lah a nungkik ta uh-a! A galkapte uh kileh hawl a, lau-in taikek mang mawk uh hi. Kinunglehhei kik lo uh hi, mun khempeuh ah launa vive! Topa in a ci hi. A manlang pente zong paikhia thei tuan lo uh a, galkapte zong suakta lo uh hi. Leilu lam Eufrates gun geiah, hoi-in a tuk uh hi. “Nail gunpi bangin hong khang a, guntui khang a bang kua ahi hiam? Nail gunpi bangin Izipt gam hong khang a, guntui khang hong bang hi. Amah in, kei ka khang ding a, leitung khempeuh ka tuam ding hi. Khuapite leh a sunga teeng mite ka susia ding hi, a ci hi. Sakolte aw, mai nawt un, sakol leengte aw, hat un! Lum tawi Ethiopia mite leh Put mite aw, thal tawisiam Lud mite aw, na galkapte uh kuan sak un. Bang hang hiam cih leh tu ni-in a vanglian Topa Pasian’ ni hi a, phu a lak kik ni, a galte a thuhkik ni ahi hi. Namsau in amaute that ding a, a kham mateng a si uh a dawn ding hi. Bang hang hiam cih leh a vanglian Topa Pasian in, Eufrates gun gei leilu lamah amaute biakna piakna-in a nei hi. Gilead gamah pai un la, damna zatui va la un, Izipt-te’ nungakte aw! Zatui tampi na zat khit uh hangin, damna na ngah kei uh hi. Gamdangte in na zum huaina uh hong za khin uh a, leitung bup-ah na kahna aw uh kiza hi. Na galkapte uh khat leh khat kiphu kha-in, a nihun a pukkhawm uh hi,” a ci hi, Izipt gam sim dingin Babilon kumpipa Nebukhadnezzar’ hong paina tawh kisai-in Topa in kamsangpa Jeremiah hih bangin a hopih hi: “Izipt gam leh Migdol khua-ah va gen un; Memfis khua leh Tahpanhes khua-ah va tangko un: ‘Kigalging sa leh kithawi sa-in om un, bang hang hiam cih leh namsau-in note hong kithat khin ding hi,’ va ci un. Bang hangin na bawngtal pasian uh Apis guallel-in taimang ahi hiam? Topa in amah a vattuk hang ahi hi. Na mi uh tampi tak hoi-in a tuk uh a, amaute in khat leh khat kiangah, ‘Kithawi dih un, i mipihte kiangah, i suahna gamah va paikik ni; tua hi leh hih namsau tawh kithahna pan i suakta ding hi,’ a kici uh hi. Izipt kumpipa Faro, min thak khat pia un la, ‘Kam si bek-a hun mawk beisakpa’ ci un. “A vanglian Topa keimah in Kumpipa ka hi hi. Taber mual in mual khempeuh sangin sang zaw-in Karmel mual in tuipi tungah sangpi-in a dawktoh bangin, no hong simpa’ thahatna a lian mahmah ding hi. Sal-a hong kipaipih ciang ading na puanlomte uh, zial khol un, no Izipt gama teengte aw! Bang hang hiam cih leh Memfis khua in gamlak suak ding a, kisia-in kuamah teeng lo ding hi. “Izipt gam in bawngla hoih mahmah tawh kibang hi. Leilu lam panin hong leeng cippi in amah a pet hi. A galkap cialte nangawn amau lakah bawngno dawng hat lote a bang lel uh hi. Pangin do tentan lo uh a, nungkikin a tai kek uh hi. Bang hang hiam cih leh amau’ kisiat ding ni, amau’ daan thuak ding ni hong tung zo hi. “A galte in do dingin hong kuan uh ahih manin Izipt mite in gul tai bangin zut khat a kisuah uh hi. A galte in sing phuk ding bangin, hei tawh hong kuan uh hi. Gam pha lua-in a kiphut zawh loh hangin a galte un a singte uh a phukmai sak teitei ding uh hi, Topa in a ci hi. Bang hang hiam cih leh amaute kauphe sangin tamzaw uh a, sim zawh loh zahin tam uh hi. Izipt-te’ nungakte a maizum ding uh hi, Leilu lam pana hong pai mite’ khut sungah, amaute a kipia ding hi,” a ci hi. A vanglian Topa, Israel mite’ Pasian in: “En un, Keimah in Thebes khua-a Amon pasian leh Faro kumpipa-a kipan Izipt gam, a pasiante uh leh a kumpite uh, Faro kumpipa leh amah a muang mi khempeuh tungah daan ka tat ding hi. Amaute a that nuam Babilon kumpipa Nebukhadnezzar leh a uliante’ khut sungah amaute ka pia ding hi. Tua khit ciangin Topa in kong cih-inah, nidang lai bangin Izipt gamah mi a teeng kik ding hi. “Ahih hangin lau kei un, ka nasempa Jakob’ suante aw; patau kei un, Israel mite aw, Bang hang hiam cih leh gamlapi panin no kong honkhia ding a, na suan na khakte uh saltan’na gam panin kong honkhia ding hi. Jakob’ suante hong ciahkik ding uh a, nuam takin a teeng ding uh hi. Kuamah in amaute a lausak nawn kei ding hi. Topa in kong cih-inah, ka nasem pa Jakob’ suante aw, lau kei un. Bang hang hiam cih leh note kong ompih hi. Note kong thehthangna gamte khempeuh ka susia khin ding a, ahih bangin note kong susia khin kei ding hi. A kilawm zahin kong thuhilh ding a, daantat loin kong mawk nusiat kei ding hi,” a ci hi. Faro kumpipa in Gaza khua a sim ma-in Filistia mite tawh kisai-in Topa in kamsangpa Jeremiah a hopih hi. Topa in a cih-inah: “En un, leilu gam panin tui hong khang a, a let khia-in hong luang ding hi. Gamsung leh gam sunga om khempeuh hong tum ding a, khuapi leh khuapi sunga teeng khempeuh hong tum ding hi. Mite kiko-in, gam sunga om mite khempeuh a kap ding uh hi. Sakol khe gingte za-in, sakol leeng gingte leh a pei kigawi gingte a zak uh ciangin, pate in a khut uh zaw lua ta ahih manin a tate uh a don zo nawn kei uh hi. Filistia mite khempeuh kisia-in, Tai-ar leh Sidon pana huhnate khaktan-in, suksiat ni ding hong tung ta hi. Bang hang hiam cih leh Topa in Filistia mite leh Kaftor tuipi gei-a a om laite ka susia ding hi. Gaza khua-te maizum ta uh a, Ashkelon khua kisia ta hi. Aw, no Anakim mi a om laite aw, bang tan no leh no kisuliam ding na hi uh hiam? Note in, ‘Aa, Topa ’ namsau aw, Tawlnga nai lo ding na hi hiam? Na paai sungah lut kik in la, taang loin khawl dide in,’ na ci uh hi. Topa in ka sawl nak leh bangci-in khawl dide thei ding ahi hiam? Ashkelon khua leh tuipi gei teng sim dingin ka sawlsa ahi hi,” a ci hi. Moab gam tawh kisai-in a vanglian Topa, Israel mite’ Pasian in a gen-inah: “Nebo mite in gimna a thuak ding uh hi, bang hang hiam cih leh a gam uh a kisia ding hi. Kiriathaim khua kila khin zo a, a kulhpite uh cim khin hi. A mite in maizumna thuak uh a, Moab gam minthan’na bei ta hi. Heshbon khua-ah a galte un a sim nading uh a vaihawm uh a, ‘Hong pai un, Moab gam i beimang sak ding hi,’ a ci uh hi. Madmen khua aw, nang zong na gamdai ta ding hi. Namsau in nang hong nungdelh ding hi. “Ngai dih un! Horonain khua-ah mi kiko veh! ‘Ngongtatna leh siatna lianpi!’ ci uh hi. Moab gam kisusia khin ta a, a kahna aw uh Zoar khua dongin kiza hi. Luhith mual kahtohna lampi-ah, a pai kawm-un a kap uh hi. Horonain khua-ah a tuahsuk laitakun khuapi sia-a a kikona aw uh a za uh hi. ‘Tai un! Na suahtak nadingun tai un! Sehnel gam a, gamlak laate bangin taimang un!’ a ci uh hi. Na hatnate uh leh na neihsate uh na suan’ manun note zong hong kipai khiatpih ding hi. Na pasian uh Khemosh zong a siampi teng leh a ulian teng tawh, kipai khiatpih ding hi. Khua khempeuh kisia khin ding a, khat beek a suakta kei ding hi. Topa in ka gen sa bangin, mualkuam leh zangleite a kisia ding uh hi. Moab mite a leen’ khiat theih nadingun vasa’ kha pia un. A khuapite uh gamlak suak ding a, kuamah a teeng kei ding hi. “ Topa ’ na citak-a sem lopa in haamsiatna thuak ta hen. Thah nading a, a namsau a dok lopa in haamsiatna thuak ta hen. “Moab gam in a neu lai-a kipanin nuam takin a om den hi. Gam dangah kipaikhiatpih ngei lo a, thawl khat pan thawl khat-a tei kawikawi lenggahzu tawh kibang lo hi. A limna kilamdang ngei loin a gimnam zong kikhel ngei lo hi. “Tua ahih manin, en un, Topa in kong cih-inah, Moab mite leenggahzu buak banga a bua khia ding mi kong paisak hun hong tung ding hi. Amaute in a thawl a hawm dong bung khia-in tua khit ciangin thawl a sukham zan ding uh hi. Tua ciangin Israel mite, a muan’ uh Bethel pasian in a maizum sak mah bangin, Moab mite, a biak uh Khemoshpasian in a maizum sak ding hi. “Note in bang hangin, ‘Galhangte ka hi uh a, galsim hatte ka hi uh hi,’ ci thei na hi uh hiam? Moab gam leh a khuapite susia dingpa hong paito ta hi. A tangval hoihpente uh thahlup dingin a kipaipih khin zo hi, ci-in a vanglian Topa a kici keimah Kumpipa in kong gen hi. Moab gam kisiat ding sawt nawn lo hi; a gim nading hong nai ta hi. A kim-a teengte leh a min a thei mite aw, Moab gam kah un. ‘A minthan’na bei khin ta a, a vangliatna kumpi ciangkhut kitan ta hi,’ ci un. “Dibon khua-a teeng mite aw, na minthan’na mun sang panin hong kumsuk un la, leivui lakah hong tu un! Bang hang hiam cih leh Moab gam hong sim dingte hong pai-a na kulhte uh hong suksiatsak zo uh hi. Aroer khua-a teeng mite aw, lam geiah dingin na en un! A hong galtai numei leh pasalte kiangah, ‘Bang thu piang ahi hiam?’ ci-in dong un. Moab gam kisia khin zo hi, zumhuaina thuak khin zo hi. Thuum un la, kah un! Arnon gun dungah, Moab gam kisiatna thu va gen un. “Pasian’ thukhenna mualtung gam teng leh Holon khua, Jahzah khua, Mefa-ath khua, Dibon khua, Nobo khua, Bethdiblathaim khua, Kiriathaim, Bethgamul khua, Bethmeon khua, Kerioth khua leh Bozrah khua-a kipan Moab gam sung a gamla, a nai-a om khuapi khempeuh ah hong tung zo hi. Topa in kong cih-inah, Moab gam’ hatna teng bei khin ta hi. A ki ki-at tansak a, a ban kikuaihtansak hi. “Moab, zukham sak un, bang hang hiam cih leh amah in Topa langpanin kiliansak hi. Tua ahih manin amah in ama’ luak lakah a bual ding a, mi khempeuh in awi-in a nuihsan ding uh hi. Moab aw, nang zong Israel mite nuihsan hilo na hi hiam? Ama’ thu na gen simin na lu na sin’sin’, amah guta sa na hi hiam? “Moab gam a, teeng mite aw, khuapite nusia un la, kawl lakah teeng un! Ken pang-a vakhu bu bawl bangin va om un. Moab kiphatsakna ka za khin zo uh hi—kiphasak pha mahmah hi. Kilian sak-in kisathei a, kuamah thu sim loin mite neu-et hi. Ama’ hehna ka thei a, a kisialhna teng zuaupi hi-in, a sepna teng zong zuaupi ahi hi, Topa in kong ci hi. Tua ahih manin Moab adingin ka tau hi; Moab gam mi khempeuh adingin ka kap a, Kirheres khua adingin zong ka thuum hi. Sibmah khua aw, Jazer khua ading sangin nang’ adingin ka nak kah zaw hi. Nang in leenggah gui zam bangin na hiangte in tuipi kantan a, Jezer khua dongah na zamsuak hi. Na khuakhal ante na leenggah gahte hong kisuksiat sak ta hi. Lei hoih mahmah Moab gam panin lungdamna leh kipahna kila khia ta hi. Leenggah cilna panin leenggahtui ka luang khiasak nawn kei a, lenggah cil-in kuamah lungdamin a kiko nawn kei hi; a kikona uh lungdam kikona hi lo hi. “Heshbon khua panin Elealeh khua leh Jahaz khua dongah; Zoar khua panin Horonaim khua leh Eglath-sheli-shiah khua dongah mite’ kahna aw kiza hi. Bang hang hiam cih leh Nimrim tui nangawn keu ta a, kisusia ta hi. Moab gam mual sang tunga kithoihna bawl-a, milim pasiante’ tunga paknamtui a hal mite, Topa in kong cih-inah, tua bang ka hih sak nawn kei ding hi. Tua ahih manin Moab adingin ka kap a, Kirheres khua mite adingin misi vuina tamngai kitum bangin ka kapkhia hi: bang hang hiam cih leh a neih a lam khempeuh uh kisia mang khin ta hi. “Mi khempeuh in a lu uh met tol uh a, a khamul uh kiatsiang uh hi. A khutte uh kui kek uh a, a kawng uhah ippi puan a teeng uh hi. Moab gam innkhum khempeuh leh lam lianpi khempeuh ah kahna bekbek a om hi. Bang hang hiam cih leh Topa in kong cih-inah, leibeel suktap bangin Moab gam ka sutam a, kuamah in phamawh a sa kei hi. Moab gam kitam ta hi! A mite kap uh hi! Maizum-in hong nungngat ta uh hi! Tua ahih manin Moab in a kim-a om mite’ nuihsat ding leh lipkhap ding a suak zo hi. “ Topa in kong cih-inah: En in, muvanlai leeng bangin manlang takin gam khat hong leeng ding a, Moab gam sim dingin a kha hong zal ding hi. Khuapite kila-in kulhpite zong kila ding hi. Tua ni ciangin Moab galkapte in nupi nausuak dingte bangin a lau ding uh hi. Moab kisusia ding a, a minam-in a om nawn kei ding hi. Bang hang hiam cih leh Topa dem-in kiliansak uh hi. Moab gama teeng mite aw, Topa in kong cih-inah, launa, dum leh thangte in no hong pang hi! Lauhuaina pana a taisim mite dum sungah a kia ding hi. Dum sung pan a, a hong kah khia mite, thang ah a awk veve ding hi. Bang hang hiam cih leh Moab ka daantah ni-in hih nate ka tung sak ding hi, Topa in kong ci hi. A bah gawp galtaite in Heshbon khua hong beel uh hi. A hih hangin Sihon kumpipa a maan’na ngei Heshbon khua panin meikuang hong kipan khia veve hi. Galsim nuam mite’ teen’na Moab gam gammong dongin mualsangte zong a kangtum hi. Moab aw, gimna na thuak ding hi! Khemosh pasian a bia mite si khin ta uh hi. Na tapate uh sal dingin kipaipih khin a, na tanute uh zong thongkia dingin kipaipih hi. Ahih hangin Topa in kong cih-inah, nidang ciangin Moab gam a ngei bang sakin ka hausak kik ding hi,” a ci hi. Moab gam thukhenna tu-a zah ahi hi. Ammon mite tawh kisai-in Topa in a gen-inah: “Israel mite in tapa nei lo uh ahi hiam? Inn luah ding nei lo uh ahi hiam? Bang hangin Milkom pasian biate in Gad gam la-in a khuapite sungah teeng uh ahi hiam? Tua ahih manin, en un, Topa in kong cih-inah, Ammon gam Rabbah khua kisim a, galdona aw a kizak hun ka tung sak ding hi. Tua khuapi kisusia mang ding a, khuaneute kihaltum ding hi. Tua ciangin Topa in kong cih-inah, Israel mite in a gam uh a lak sak mite kiang panin a gam uh a ngah kik ding uh hi. “Heshbon khua mite aw, kap un! Ai khua kisia khin zo hi! Aw, Rabbah khua numeite aw, kap un! Ippi puan silh un la, kap un; Khua lakah lung-am-in kawi taitai un. Bang hang hiam cih leh na Milkom pasian uh leh a siampite leh a uliante hong kilak khiatsak ding hi. A zulhzau numei aw, bang hangin na hatna kisaktheihpih na hi hiam? ‘Kua in hong sim zo ding hiam?’ ci-in bang hangin na hauhna suang na hi hiam? En in, a vanglian Topa Pasian in kong cih-inah, na kim na pam panin nang tungah gimna kong tung sak ding hi. Nang hong kihawlkhia ding a, mi khempeuh amau’ tum ciatin a tai kek ding uh a, hong kaikhawm kik ding kuamah om lo ding hi. Ahih hangin Topa in kong cih-inah, nidang ciangin Ammon mite a ngei bang sakin ka hausak kik ding hi,” a ci hi. Edom gam tawh kisai-in, a vanglian Topa in a gen-inah: “Teman gamah pilna om nawn lo ahi hiam? Thu ngaihsut siamte in ngaihsun thei nawn loin a pilna uh bei ta ahi hiam? Dedan gama teengte aw, Kihei un la, gal tai un; guam sungah bu un! Bang hang hiam cih leh ka daantat ni ciangin Esau’ suan leh khakte tungah siatna ka tung sak ding hi. Mite in leenggah a lawh uh ciangin a gui tungah tawm a nusia lai uh hi. Zan-in gutate in na a guk uh ciangin a deih teng bek uh a gu uh hi.’ Ahih hangin Esau’ suan le khakte khempeuh ka guaksuak sak a, a bukna munte uh ka kilangkhia sak hi; tua ahih manin a bu thei nawn kei uh hi. A tate uh, a sanggamte uh leh a innvengte uh, si khin a, khat beek a suakta kei hi. A tagah na tate uh ka kiangah hong koih un; ke’n amau ka kem ding hi. Na meigong numeite uh zong, kei hong muangsak un. Bang hang hiam cih leh Topa in kong cih-inah: Daan thuakna hai dawn ding a, kilawm lo mite nangawn in dawnin thuak veve uh ahih leh note in zong thuak loin om ding na hi uh hiam? Note in daan thuak loin na om kei ding uh a, hai na dawn uh kul ding hi. Bang hang hiam cih leh Topa in kong cih-inah Bozrah khua in mite’ lipkhap ding, zahpih ding, nusiat ding leh kihaamsiatna a, a zat ding uh a suak ding hi,” a ci hi. Topa kiang pan thu ka za a, gam khempeuh ah thugen dingin mi khat kisawl hi: “Hong kikaikhawm un la, Edom gam sim dingin hong kithawi un! Bang hang hiam cih leh, en in, keimah in gamdangte sangin nang kong neusak zaw a, mite kong simmawhsak ding hi. Na kihtakhuaina leh na kisaktheihna in nang hong khem zo hi. Suangken lakah na teeng a, mualsang tungah na teeng hi. Muvanlai bu zahin sangpi-in na teen’ hangin tua lai mun panin kong lakhia suk veve ding hi, Topa in kong ci hi. “Edom gam in a mulkim huai gam suak ding a, a kantan mi khempeuh in a siat gawpna hangin lamdang sa-in a mulkim ding uh hi. Topa in kong cih-inah, Sodom khua, Gomorrah khua leh a kim-a khuate a kisiat gawp bangin, tua lai munah kuamah teeng lo ding a, kuamah a baang pak beek kei ding hi. En un, lonona a, nuam taka om tuute, Jordan gam tuulak pan a, a hong paito humpi in a delhmang bangin keimah in amaute a gam uh nusia-in thakhat thu-in ka tai mangsak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Ka to ding kua om lai ahi hiam? Ka mai-ah kua kumpi hong ding ngam ding ahi hiam? Tua ahih manin Edom mite’ thuak nading leh Teman gama teengte’ gim nading-a Topa ’ gelna leh ngimnate ngai dih un. A tangeekte nangawn uh kikaikhia ding hi. Mi khempeuh lau taktak ding uh hi. A pukna uh gin’ ngaih lua ahih manin leitung a kiliing ding hi. A kahna aw uh San Tuipi dongah kiza ding hi. En un, galte in muvanlai bangin manlang takin hong leengin Bozrah khua tungah a sim dingin a kha hong zal ding uh hi. Tua ni ciangin Edom galkapte in nupi nausuak dingte bangin a lau ding uh hi,” a ci hi. Damaskas khua tawh kisai-in, “Hamath khua leh Arpad khuate in thusia za uh ahih manin lung mangin a om uh hi. Tuipi dai thei lo bangin a launa uh dai thei lo hi. Damaska khua mite thazaw uh a, taimang dingin a kithawi uh hi. Lungkhamna, dahna leh launa in amau lencip a, nupi nausuak ding bangin a om uh hi. Tua khuapi minthang’ lungdamna khuapi, tu-in kinusia ta hi! Tua ahih manin a vanglian Topa in kong cih-inah, tua ni ciangin khuapi laizang-ah tangvalte si ding uh a, galkap khempeuh zong a kithat khin ding uh hi. Damaskas khua kulhpi mei tawh kihal ding a, Benhadad kumpipa’ inn zong a kangtum ding hi,” a ci hi. Babilon kumpipa Nebukhadnezzar in a zawh Kedar minamte leh Hazor khua ukte tawh kisai-in, Topa in a cih-inah: “Kisa un, Kedar mite va sim un! Nisuahna lama om amaute va thatlum un! A puan bukte uh leh a tuu honte uh-a kipan a buk kongkhak puante uh leh a nate khempeuh uh kilak sak ding hi. A kalaohte uh kipai khiatpih ding a, ‘Mun khempeuh ah launa!’ ci-in a kiko ding uh hi. Hazor khua-a teeng khempeuhte aw, Topa in kong cih-inah: gamla pi-ah taimang un la, guamthuk sungah bu un. Bang hang hiam cih leh Babilon kumpipa Nebukhadnezzar in no hong langpang dingin gelna leh ngimna a nei khin zo hi. “Babilon kumpipa aw, tho in. Nuamtak, ngaihmuang taka a om gam va sim in. Tua khuapite in kongpi lah nei loin a kalhna siktawn lah neilo uh a, a tuaci om mawk uh hi. A kalaohte uh kisutkhiat sak ding a, a bawnghonte uh kilakmang sak ding hi. A sam uh a met tom amaute mun khempeuh ah kithehthang sak ding hi. Mun khempeuh panin amau tungah siatna ka tung sak ding hi, Topa in kong ci hi. Hazor khua in se-alte’ teen’na a suak ding a, a tawntung-a a kisia den khua a suak ding hi. Kuamah teeng lo ding a, tawm vei beek zong a va zin kei ding uh hi,” a ci hi. Judah gamah Zedekiah kumpi a suah tungin Elam gam tawh kisai-in Topa in kamsangpa Jeremiah a hopih hi. A vanglian Topa in a cih-inah: “En in, Elam gam’ hatna bulpi ahi a thalpite ka kuaitan ding hi. Vantung mun li panin huihpi ka mutmang sak ding a, Elam gam pana ka hawlkhiatte mun khempeuh ah kikhen thangsak-in a tun’ lohna uh gam khat beek ka omsak kei ding hi. Amaute a that nuam, a galte uh’ mai-ah Elam mite ka lausak ding a, Topa in ka cih-inah, a lauhuai ka hehna amau’ tungah ka tung sak ding hi. Amaute ka thah siang mateng namsau ka nungdelh sak ding a, Topa in ka cih-inah, Elam gamah a kumpipa uh leh kumpi uliante that-in ka kumpi tokhom ka phut ding hi. “Ahih hangin nidang ciangin Elam gam nidang a, a ngei bangin om sakin ka hausak kik ding hi, Topa in ka ci hi,” a ci hi. Khaldea mite’ gam Babilon khuapi tawh kisai-in Topa ’ thugenna, kamsangpa Jeremiah in a gen-inah: “Gam khempeuh ah genin tangko un; dial khai un la, im kei un. ‘Babilon’ khuapi kila ta hi. Bel pasian maizum ta, a Merodak pasian kitangawp ta hi. A milimte uh maizum ta a, a pasiante uh kisiagawp ta hi,’ ci-in tangko un. “Bang hang hiam cih leh leilu lam panin Babilon gam a sim ding leh gamlak a suaksak dingin gam khat hong pai ding hi. Gam sungah kuamah teeng lo ding a, a mihing a ganhingin a taimang ding uh hi. “ Topa in kong cih-inah, tua ni tua hun ciangin Israel mite leh Judah mite kap kawmin, hong pai khawm ding uh a, Topa a Pasian uh hong zong ding uh hi. Zion khua lampi a dong ding uh a, tua khua lam maingat-in, ‘Hong pai un. A kimangngilh ngei nawn lo ding tawntung thuciamna khat Topa ’ tungah ciam khawm dih ni,’ a ci ding uh hi. “Ka mite tuu mangthang bang ahi khin uh hi. Makai tuucingte in mualtung tengah lam khialin a gam man’ pih uh hi. Mual khat panin mual khatah a pai kawikawi uh a, a giahna inn uh a thei nawn kei uh hi. Amau a mute in na negawp uh hi. A galte un, ‘Ko bangmah khialhna ka nei kei uh hi. Bang hang hiam cih leh a pute a pate uh a muan’ leh a lametna uh ahi Topa ’ tungah amaute a mawh uh hi,’ a ci uh hi. “Israel mite aw, Babilon khuapi pan taikhia un. Khaldel gam panin paikhia un. Kel hon laka keltal bangin a paikhia masa ding kituh un. Bang hang hiam cih leh, en un, keimah in leilu lam gam panin gam pawlkhat ka hanthawn ding a, Babilon ka simsak ding hi. Amaute in Babilon khua kimkotah gal pang-in tua khua a la ding uh hi. Galkap siamte’ lot bangin a thaltangte un khak loh a nei kei uh hi. Khaldel gam kiluhgawp ding a, Topa in kong cih-inah a luh khempeuh in a lungkim dong uh a la ding uh hi. “Babilon mite aw, note in ka gamh ahi, Israel mite na luhgawp uh a, lungdamin na kipah uh hangin, lopa kham bawngno bangin omin sakol bangin na ham uh hangin, na nu uh Babilon khuapi maizum ding a, no’ pian’na na nu uh a mindai ding hi. En un, na gam uh gam khempeuh lakah a gina lo pen hi ding a, leikeu, gamlak, sehnel gam a suak ding hi. Topa ’ hehna hangin kuamah teeng lo ding a, gamlakpi a suak ding hi. Babilon khua a kantan khempeuh in lamdang sa-in khuapi siatna hangin zahko-in a phit san ding uh hi. No thal tawite khempeuh aw, Babilon khua sim dingin a kimkotah gal pang un. Thaltang khat beek siit kei un la, kap un; bang hang hiam cih leh Topa ’ tungah a mawh zo uh hi. Khuapi sim dingin a kimkotah awng un. Babilon khua in hong lel khin zo hi. A galdalte uh cim khin a, a kulhte uh puk khin hi. Hih in Topa ’ phulakna ahih manin, amau’ tungah phu la un; mite’ tung-a ahih bangun amau tungah bawl un. Babilon khua khaici tuhte thatlum un la, an la ding a, phiaukawi tawite beisak un. Galte’ namsau kihta-in mi khempeuh in a mipihte lak mah uh zuankik ciat-in, a gam mah uhah a taikik ding uh hi.” “Israel mite humpi in a delhmang tuu tawh a kibang uh hi. A masa-in Assiria kumpipa in a ne a, tu-in a tawpna ah Babilon kumpipa Nebukhadnezzar in a guh dongin a teep tum hi. Tua ahih manin a vanglian Topa, Israel mite’ Pasian in kong cih-inah: En un, Assiria kumpipa daan ka piak mah bangin Babilon kumpipa leh a gam ka thuak sak ding hi. Israel mite pen a omna sa uh mun mah ah ka omsak kik ding a, Karmel leh Bashan mual ah an ne-in Efraim mual Gilead mualah lungkim takin a om ding uh hi. Tua ni tua hun ciangin, Topa in kong cih-inah, Israel gamah khialhna kizong ding a, kimu lo ding hi. Judah gamah mawhna kizong ding a, kimu lo ding hi. Bang hang hiam cih leh ka nuntaksak, ka nusiat lai mite a mawhna uh ka maisak ding hi,” “Merathaim gam sim dingin pai un la, Pekod mite zong va sim un. That un la, a vekpi-in susia mang un, Topa in kong ci hi. Kong sawl khempeuh hih un. Gam sungah gal simna aw kiza a, na tampi kisia hi! Leitung khempeuh sekpi bang a, a khen Babilon khuapi, tu-in tua sekpi kitanin kitam ta hi! Gamdangte’ lakah Babilon khuapi tu-in a mulkimhuai suak ta hi! Babilon khua aw, nang thang kong siah a, na awk pah hi; nang lah na thei kei hi. Topa langpang na hih manin, nang hong kimu-in hong kiman hi. Topa in a galhiam koihna hong zo a, a hehna galhiamte a lakhia hi. Bang hang hiam cih leh Babilon gamah a vanglian Topa Pasian in sep ding khat a nei hi. Mun khempeuh panin hong sim un; A an sal uh hon’sak un. An cian’ bangin amaute ciang un; A vekpi-in susia un la, bangmah nusiat nei kei un. A galkap hangte khempeuh uh thahsak un. Amaute in gimna a thuak ding uh hi, a thuak ni ding uh hun hong tung zo hi. “Ngai dih un! Topa i Pasian’ thuhkikna, ama’ biakinnpi hang-a a phulakna thu Zion khua-a tangko dingin ka mite in Babilon gam panin suakta-in a tai uh hi. “Babilon khua sim dingin thal kap siam, thal tawi theite va sam un. Khuapi umcih un la, kuamah suakta sak kei un. Ama’ hihna tawh kituak-in, ama tungah hih un. Ama’ hih ngei mah bangin ama tungah bawl un. Bang hang hiam cih leh amah in kisa thei-in Topa ahi, Israel mite’ Siangtho Pa a simmawh hi. Tua ahih manin khua sung laizangah a tangvalte uh si ding uh a, tua ni ciangin a galkapte uh a beimang khin ding uh hi. Topa in kong ci hi. “En un, a vanglian Topa Pasian in kong cih-inah, Nang a kisa thei Babilon aw, nang kong langpan hi. Bang hang hiam cih leh nang kong daantah hun ding na ni hong tung zo hi. A kisathei gam, hoi-in tuk ding a, kuamah in a phongto kei ding hi. A khuapite mei tawh ka hal ding a, a kim-a om khempeuh a kangtum ding hi. “A vanglian Topa in kong gen-inah: Israel mite leh Judah mite in netniamna a thuak uh a, sal ding-a a paipih mite in lencip-in a ciahsak kik nawn kei uh hi. Ahih hangin amaute a Tankhiapa hat a, a vanglian Topa kici hi. Amah in leitungah kilemna a om nading leh Babilon mite in gimna a ngah nadingin, amaute adingin a sem ding hi. “ Topa in kong cih-inah, Khaldea mite, Babilon khua-a teengte a kumpi uliante leh a mipilte namsau tawh kithat uh hen. Kamsang zuau mihaite namsau tawh kithat uh hen! A meidawi a galkapte namsau tawh kithat uh hen! Sakolte leh sakol leengte, numei tawh kibang a galkap cialte uh, namsau tawh kithat uh hen! A sum a pai khempeuh uh, kituahmang sak hen! Guahzu kei hen la, a gunte uh kang hen! Bang hang hiam cih leh milim biakna gam hi a, milimte a hailawh uh hi. “Tua ahih manin gamsate leh se-alte Babilon khua-ah a teeng ding uh a, kalaoh-vasapi zong a teeng ding hi. A khang a khangin, a tawntungin mi kuamah a teeng ngei nawn kei ding hi. Topa in kong cih-inah, Sodom khua, Gomorrah khua leh a kim-a khuate Pasian in a suksiat bangin tua lai-ah kuamah a teeng kei ding a, kuamah zong a va baang pak beek kei ding hi. “En un, leilu lam gam panin mi hong pai uh a, gamlian khat leh kumpi tampi leimong gamlapen panin galsim dingin kithawhthawi hi. A thal uh leh a teipi uh tawi uh a, giloin hehpihna lungsim nei lo uh hi. A husa uh tuipi ging bang hi a, sakol tungah tuangin Babilon mite aw, nangmah do dingin a kithawi uh hi! “Babilon kumpipa in tua thu a za khin zo a, bangmah a cih thei kei hi. Lungkhamin lumcip a, nupi nausuak ding bangin na a sa hi. “En un, lo nona-a nuam taka om tuute, Jordan gam tuulak pana hong paito humpi in a delh mang bangin keimah in amaute, a gam uh nusia-in thakhat thu-in ka taimang sak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Ka to ding kua om lai ahi hiam? Ka mai-ah kua kumpi hong ding ngam ding ahi hiam? Tua ahih manin Babilon khuapi’ thuak nading leh Khaldea gam’ gim nading a, Topa ’ geelna leh ngimnate ngai dih un, A tangeekte nangawn uh kikaikhia takpi ding a, mi khempeuh a lau taktak ding uh hi. A pukna uh gin’ ngaih lua ahih manin leitung a kiliing ding hi. A kahna aw uh, gam khempeuh ah a kiza ding hi,” a ci hi. Topa in a cih-inah: “En un, Babilon khuapi leh Khaldea gama teengte susia dingin keimah in huih ka nungsak ding hi. A zap siang ding mi Babilon-ah ka sawl ding a, amaute in tua gam a zapsiang ding uh hi. Gimna ni hong tun’ ciangin amah a sim dingin mun khempeuh panin hong pai ding uh a, gam sungah bangmah a omsak nawn kei ding uh hi. Thal tawite a thal uh lawnsak man kei un la, sikpuan silhte dingsak man kei un. A tangvalte uh hawi kei un la, a galkap honpi khempeuh uh nuaimang khin un. Khaldea gamah kongzing lakah a liamgawp ding uh a, a si ding uh hi. Bang hang hiam cih leh Israel leh Judah mite Israel mite’ Siangtho Pa tungah a mawh uh hangin, amaute’ Pasian, a vanglian Topa in taisan nai lo hi. “Babilon khuapi sung panin taikhia un; mi khempeuh kisuahtak tek un! Babilon’ mawhna sihpih kei un, bang hang hiam cih leh a mawhna banga a thuak nadingun hih hun in Topa ’ thuhkik hun ahi hi. Babilon khuapi in Topa ’ khut sunga khamhai tawh kibang a, leitung buppi zu a khamsak hi. Gamdangte in a zu a dawn manun, a hai khin uh hi. Thakhat thu-in Babilon puk a, kisiagawp hi. Amah kah ngutngut un! A liammate adingin zatui la un; dam zo kha thei lai ding hi. Babilon khua i damsak nop hangin, a dam thei kei hi. Nusia ta un la, i gam ciat zuanin ciah ni. Ama’ tunga thukhenna in vantung dong ban a, van dawn dong a phato hi. Topa in thuman i hihna hong kilangkhia sak zo hi. Hong pai un, Topa i Pasian’ nasepna Zion khua-ah va tangko ni. “Thaltangte hiam un! Lumte la un! Topa in Babilon khua susia nuam ahih manin Media kumpite a hanthawn hi. Bang hang hiam cih leh hih in a biakinnpi hanga Topa ’ thuhkikna ahi hi. Babilon khua kulhpi tungah dial khai un; galvil ding tampi koih un. Cing sak un la, galte buk sim dingin kithawi un. Bang hang hiam cih leh Babilon khua mite tawh kisai-a Topa in a gensa teng, a geel khin zo a, a sem khin zo hi. Aw, no tui tamna gei-a teengte, no sum a haute aw, na hun uh bei ta a, na nuntakna khau uh kitat ta hi. A vanglian Topa in; ‘Kauphe zah a, tam mite kong simsak ding a, Amaute in note hong zo-in a kiko ding uh hi,’ ci-in keima’ min tawh ka kiciam khin zo hi. “Pasian in ama’ vangliatna tawh leitung bawl a, ama’ pilna tawh leitung piangsakin, ama’ siamna tawh vantung a zalh hi. Amah a pau ciangin vantung-ah tuite ging hunhun a, leimong panin tuikhu a suaksak hi. Guahzuk nadingin khua phiasak a, a saal sung panin huih a nungsak hi. Mi khempeuh hai-in pilna nei lo hi khin uh a, kham sekte khempeuh in a milim uh a maizum lawh uh hi. Bang hang hiam cih leh a milim uh zuau hi lel a, nak thei lo hi. Kiman’na nei lo, a haihuaipi hi a, a kidaantah ni ciangin a kisia ding uh hi. Jakob’ Pasian in tua bang hi lo a, amah in na khempeuh a piangsakpa ahi hi. Ama’ mi dingin Israel mite teel a, ama’ min in a vanglian Topa ahi hi. “Babilon aw, nangmah in ka sekpi leh ka galhiam na hi a, nang hong zangin gamdangte ka satnen a, kumpi gamte ka susia hi. Nang hong zangin sakolte leh a tunga tuangte, sakollengte leh a hawlte, Papite leh nupite, khanghamte leh khangmoite, tangvalte leh nungakte, tuucingte leh a tuute, lokhote leh a tute, kumpite leh ukpite ka satnen hi. “ Topa in kong cih-inah, Babilon khua leh Khaldea gam-a teengte khempeuh in Zion khua-a siatna a bawl manun note’ muhna ah ka thuk ding hi. “En in, mualpi banga lian a, leitung khempeuh a susia zo Babilon aw, nang kong langpan’ hi, Topa in kong ci hi. Keimah in nang’ lang khatah ka khut ka zan ding a, mualdawn panin nang hong khuk khia-in, kong kangtumsak ding hi. Na suangte innkiu suangin kiciang lo ding a, innbul suangnuai phahin kizang lo ding hi. A tawntungin gam simtham na suak ding hi, Topa in kong ci hi. “Leitungbup galsim dingin thu pia un; gamdangte kiangah peengkul mut un. Amah sim dingin kithawi sak in; Ararat, Minni leh Ashkenaz gamte sim sak un. Makai khat teel un la, kauphe honpi bangin sakolte va la un. Amah sim dingin gamdangte kithawisak un; Media kumpipa, makaite, uliante leh a ukna gam khempeuh kithawi sak un. Babilon gam in na sa-in, kitom-in a liing hi; bang hang hiam cih leh ama tunga Topa ’ ngimna a tangtung a, Babilon gam simtham suak sakin kuamah a teengsak kei hi. Babilon galkapte in a do nawn kei uh a, a phualpi uhah a khawl uh hi. A tha uh om nawn lo a, numei tawh a kibang uh hi. A innte uh kihal sak a, a khua kongpi kalhna siktawnte uh a kitan hi. Babilon kumpipa kiangah, thu ko ding a, hong pai kamtaite, a ciah leh a kuan kiphamat uh a, mun khempeuh panin galte in Babilon khua hong sim-in, gun-a ngah mun teng la khin uh a, gal pan’na teng mei tawh kihalin, galkapte a lau mahmah uh hi, a ci uh hi. A vanglian Topa, Israel mite’ Pasian in kong gen-inah: Babilon mite tawlkhat khit ciangin anlak bangin a kila ding a, sual tunga ancil bangin, a kicilgawp ding hi.” “Babilon kumpipa Nebukhadznezzar in Jerusalem khua hong valhtum a, hong sukham gawp hi. Beel hawm bangin a hawmin hong koih a, gulpi bangin hong nawm valh hi. Ka neihsa a lim nono tawh amah kivak kham a, kei a hong hawlkhia hi. Kei’ tung leh ka mipihte’ tunga hong kibawl ngongtatna Babilon mite tungah tung ta hen, ci-in Zion khua-a teengte ci sak un. Khaldea mite in ka sisan man thuak ta uh hen, ci-in Jerusalem khua cisak un.” “Tua ahih manin Topa in kong cih-inah: En un, na thu uh kong sepsak ding a, no adingin kong thuk sak ding hi. A bual ka keusak ding a, a ciktui ka kangsak ding hi. Tua ciangin Babilon khuapi pen innsia losia suak ding a, se-alte’ teen’na mun suakin, a lipkhaphuai, simmawhna tawh a kiphitsan, kuama’ teen’ lohna mun a suak ding hi. “Babilon mite in humpi bangin a hawk khawm ding uh a, humpino bangin a ciak lualua ding uh hi. Ka hehna tawh amaute an ka vak ding a, khua a phawk nawn loh dong uh zu ka khamsak ding hi. A tawntungin a thuum paisuak ding uh a, a khanglo nawn kei ding uh hi, Topa in kong ci hi. Thahlup ding a, kipaipih tuuno bangin ahi zongin, tuutal leh keeltal bangin ahi zongin, amaute ka paipih suk ding hi. “Leitungbup’ pahtawi Babilon khuapi kila ta hi! Gamdangte’ lakah Babilon khua, a mulkimhuai suak ta hi! Babilon gamah tuipi hong kahto a, tuihual lauhuaite in tuam ta hi. A khuapite a mulkimhuai suak ta a, leikeuna sehnel gam suak ta hi. Gam sungah kuamah teeng lo a, kuamah in kantan ngei lo hi. Babilon khuate’ pasian Bel zong ka daantat ding a, a na guksa teng ka lak khiatsak kik ding hi. Gamdangte in amah a bia nuam kei ding uh hi; Babilon khua kulhpi a cim ta hi. “Ka mite aw, amau’ lak pan hong paikhia un! A lauhuai Topa ’ hehna panin mi khempeuh kisuahtak ciat un! Gam sunga kam dawn kigen sawnte hangin, lungkia kei un, lau kei un. Kum khatin thu khat kigen a, a kum kik ciangin thudang khat kigen lel hi. Gam sungah ngongtatna thu om a, kumpi khat leh kumpi khat kidona thu kigen thei hi. “Tua ahih manin, en un, Babilon khua-a milimte ka dantah hun hong tung ding hi. A gam buppi ka zumhuaisak ding a, khua sungah kithatin a tuk ding uh hi. Tua ciangin vantung teng leh leitung leh, a sunga om nate khempeuh in Babilon’ hangin lungdamin la a sa ding uh hi. Bang hang hiam cih leh leilu lam panin amau a susia ding mi hong pai ding uh hi, Topa in kong ci hi. Babilon khua in leitung khempeuh a, om mite a sihsak mah bangin, Israel mi tampi a sihsak manin tu-in amah in sihna a thuak ding hi. “Namsau in a hong thah khak loh a nungta lai note aw, pai un, dingding kei un! Gamlapi pek panin Topa hong phawk un la, Jerusalem khua zong mangngilh kei un. Note in, ‘Kote in maizumna ka thuak uh a, simmawhna kam ka za khin uh hi. Minsiatna in ka maitang uh hong tuam khin hi; bang hang hiam cih leh Topa ’ biakinn siangtho, gamdang mite in a hong lak sak uh hi,’ na ci uh hi. “Tua ahih manin, en un, Topa in kong cih-inah, Babilon khua-a a milimte uh’ tungah thu ka khen ni hun hong tung ding a, gam sung khempeuh ah a liamte in a tau ding uh hi. Babilon khua vantung-ah a kahtoh theih a, a sangpi-ah kip takin gal dalna a bawl theih hangin, Topa in kong cih-inah, kei’ kiang panin amah susia ding mi a hong pai teitei ding hi. “Ngai un! Babilon khua-ah mi kiko hi. Khaldea gam pana hong pai mite’ suksiatna lianpi hanga kahna aw ahi hi! Bang hang hiam cih leh Topa in Babilon khua a maimangsak a, a gamlumna zong a daisak hi. Galte in tuihual lum henhan bangin hong lut uh a, awng-in a gamlum henhan uh hi. Babilon khua a susia ding mi khat hong pai khin zo hi, A galkapte uh kiman khin a, a thalte uh a tum a tel suak khin hi. Bang hang hiam cih leh Topa in a thukkik thei Pasian hi a, a thukkik taktak ding hi. A kumpi uliante leh a mipilte uh akipan ukpite, uliante leh galkapte zu ka khamsak ding a, a tawntungin ihmu-in a khanglo nawn kei ding uh hi, ci-in a vanglian Topa a kici Kumpipa in kong gen hi. “A vanglian Topa in kong gen-inah: A sah Babilon khua kulhpi lei lakah cimsuk ding a, a sang khua kongpite zong mei tawh a kihal ding hi. Mite’ nasepna a mawkna suak a, minamte’ hanciamna vut leh vai suak hi,” a ci hi. Neriah’ tapa, Mahseiah’ tupa, Seraiah in Zedekiah kumpipa’ thuvanpa ahi hi, Kumpipa Zedekiah Judah gamah a maan’ zawh kum li ciangin Seraiah leh kumpipa Babilon-ah a pai uh hi. Tua hun laitakin kamsangpa Jeremiah in Seraiah thu a vaikhak hi, Jeremiah in Babilon khua tawh kisai-in Babilon khua-a a tung ding gimna khempeuh laibu khat sungah a gelh hi. Jeremiah in Seraiah’ kiangah, “Babilon khua na tun’ ciangin hih thute khempeuh na sim ding a, tua ciangin, ‘ Topa aw, hih munah mihing hi taleh, ganhing hi taleh bangmah teeng lo a, a tawntunga a kinusia gam a suah nadingin na suksiat nading na genkhia khin zo hi,’ ci-in thu gen in. Hih laibu mite’ zakin na sim khit ciangin suang khat tawh hen khawm in la, Eufrates gun sungah paai in. Tua khit ciangin, ‘Babilon khuapi’ gitlohna hangin a tungah gimna ka tung sak ding a, tu-a bangin Babilon khuapi zong tum sukin a hong dawkto kik nawn kei ding hi,’ ci-in gen in” a ci hi. Jeremiah’ thugenna tu-a ciang ahi hi. Zedekiah kumpi a suahin kum sawmnih leh kum khat a pha a, Jerusalem khua-ah kum sawm leh kum khat sung a maang hi. A nu’ min Hamutal hi a, Libnab khua-a teeng Jeremiah’ tanu ahi hi. Amah in Jehoiakim kumpipa mah bangin Pasian’ hoih sak lohte hong sem hi. Topa in Jerusalem khua leh Judah mite ama’ kiang panin a hawlkhiatna zah ding dongin a hehna a lian hi. Zedekiah kumpipa in Babilon kumpipa a langpan’ hi. Tua ciangin amah kumpi a suah zawh a kum kua kum, a kha sawmna, a ni sawm ni-in Babilon kumpipa Nabukhadnezzar in a galkap khempeuh tawh Jerusalem khua sim dingin hong kuan uh a, khuapi kimkotah galdalna a phut uh hi. Zedekiah kumpipa a maan’ zawh kum sawm leh kum khat a phak dong khuapi a kisim hi. A kha lina, a ni kua ni ciangin khuapi sungah kial nasia lua ahih manin, mite in an nek ding nei nawn lo uh hi. Tua ciangin khua kulhpi kiphutlet a, khuapi kimkotah Khaldea mite om napi-in, galkapte in zan laitak-in kumpipa’ huan gei-a kulh tegel kikal-a kongpi tawnin a taikhia sim uh a, Arabah leizang lam a manawh uh hi. Ahih hangin Khaldea galkapte in Zedekiah kumpipa a nungdelh uh a, Jerikho leizang-ah a phak uh ciangin a galkap khempeuh in kikhen thangin amah a taisan uh hi. Tua ciangin amaute in kumpipa a mat khit uh ciangin Hamath gam Riblah khua-ah Babilon kumpipa kiangah a puak uh a, amah in thukhenna a pia hi. Riblah khua-ah Babilon kumpipa in Zedekiah’ muh mahin a tate a thahlup sak a, Judah gam kumpi ulian khempeuh zong a thatlum hi. Babilon kumpipa in Zedekiah’ mittang a khelsak khit ciangin kol a bulh a, Babilon khuapi-ah paipihin a sih mateng thong sungah a koih hi. Babilon kumpipa Nebukhadnezzar a maan’ zawh kum sawm leh kum kua a phak kum, a kha ngana, a ni sawm ni-in Babilon kumpipa a cing galkap mangpa Nebuzaradan, Jerusalem khua sungah hong lut hi. Amah in Topa ’ biakinnpi akipan kumpipa’ inn leh Jerusalem khua-a inn lian khempeuh a hal hi. Amah tawh a omkhawm Khaldea galkap khempeuh in Jerusalem khua kimkot a, kulh khempeuh a susia uh hi. Kumpi cing galkap mangpa Nebuzaradan in, mizawngpen pawlkhat tawh, khuapi sunga a kinusia lai mite tawh, Babilon kumpipa’ lam-a tai mite tawh, khutsiam mi a om lai teng tawh sal dingin a paikhiat pih hi. Ahih hangin kumpipa a cing galkap mangpa Nabuzaradan in leenggah lo cing ding leh lokho dingin gam sunga a zawngpente pawlkhat a nusia lai hi. Khaldea mite in Topa ’ biakinnpi sunga a om sumngo khuamte, sumngo tuikuang leh a din’nate suzangawp uh a, sumngo khempeuh Babilon-ah a la uh hi. Tua banah, biak piakna-a kizang belte, vut luahnate, taitehte, kuangte, sikkeute leh biakinn kikhopna-a kizang sumngo tawh a kibawl kuangte khempeuh zong a la uh hi. Biak piakna-a kizang keu neute, meiam luahna kuang daite, kuangte, belte, khuaimeivak vakna khuamte, sikkeute leh tui buah nadinga kizang keute zong a la uh hi, Kham tawh a kibawl nate kham dingin ahi zongin, ngun tawh a kibawl nate ngun dingin ahi zongin kumpi cing galkap mangpa in a lakhia hi. Solomon kumpipa in Topa ’ biakinnpi adingin a bawl khuampi nih kuangpi khat leh tua nuai-a a pua, sumngo bawngtal sawm leh nih leh a din’nate sunga om sumngote a gihna kiteh zo lo hi. Tua khamte khat ciangin tong sawm leh tong giat sang a, a kimkot tong sawm leh tong nih pha a, a sahna zung li pha-in a sung hawm hi. A tunglam tong nga ciang sumngo hi-in tua mun teng a kimkotah sumngo tawh a kibawl mangkawlsing lim a kisuai hi. Mangkawlsing a vekpi-in a kimkotah zakhat om a, sawmkua leh guk bek kilang hi. Kumpi cing galkap mangpa in siampi lianpenpa Seraiah tawh, siampi lian a nihna Zefaniah leh kongpi uk biakinn upa thum tawh a paipih a, khuapi sung panin galkapte a uk galkapmang khat leh khua sunga a kimu kumpipa’ uliante sagih tawh, galkap zum lai a kem galkap mangpa’ lai-atpa tawh, a khua sunga kimu midang sawmguk tawh, khua sung panin a paikhiatpih hi. Kumpi cing galkap mangpa Nebuzaradan in amaute paipihin Riblah khua-ah Babilon kumpipa’ kiangah a tun’pih hi. Babilon kumpipa in zong Hamath gam Riblah khua-ah amaute sat-in a thatlum hi. Tu-a bangin Judah mite a gam panun sal dingin a kila khia hi. Nebukhadnezzar in sal ding a, a paipih mi phazah in hih bang ahi hi: a kum sagih kumin Judah mi tulthum sawmnih thum, a kum sawm leh giat kumin Jerusalem khua panin Nubukhadnezzar in mi zagiat sawmthum-nih sal dingin a paipih a; Nebukhadnezzar a maan’ zawh a kum sawmnih leh thum kumin kumpi cing galkap mangpa Nebuzaradan in sal dingin Judah mi zasagih sawmli-nga a pai khiatpih hi. A vekpi-in mi tulli leh zaguk a pha hi. Judah kumpipa Jehoiakhin a saltan’ zawh kum sawmthum leh sagih kum ciangin Babilon-ah Evil-merodak kumpi a suak hi. Tua kumpipa in Judah kumpipa Jehoiakhin hehpih a, tua kum kha sawm leh kha nihna, ni sawmnih leh ni nga ni-in thong sung panin a suakta sak hi. Hoih takin a hopih a, Babilon khua-a a ompih kumpi dangte sangin a sangzaw tutna a pia hi. Tua ahih manin Jehoiakhin in a thong puante a suahkhia hi. A nuntak hun sung teng khempeuh kumpipa’ sabuai-ah ni simin an a ne hi. A sih ni a tun’ mateng a nuntak hun sung tengin ni simin a kisapna bangin kumpipa in a pia tawntung hi. Khat vei lai-a mi a dim taka a teen’na Jerusalem khuapi in bang zah ta-a gamdai ahi hiam? Leitung bup in a zahtak khuapi tu-in meigong tawh a kibang hi. Leitung khuapi khempeuhte’ lak panin a thupipen tu-in sal-in a kiman khin zo hi. Amah zan khuavakin kap a, a khitui a biang tungah a tak kauhkauh hi. Amah a it ngeite khempeuh a hehnem ding khat beek a om nawn kei hi. A kipawl pihte khempeuh in kheemin, tu in a langpan’ khin ta uh hi. Judahmite, a huh ding nei lo silate bangin a inn panun a kihawl khia hi. Amaute gamdang ah teeng uh a, amau gam ding a om kei hi. Galte in umcih uh a, a suahtak theih na’ng uh lampi a om kei hi. Ni siangtho ni cianga a bia dingin Biakinnpi ah kuamah a pai nawn kei hi. Tua lai-a lasa numeite in gimna thuak uh a, siampite a tau uh hi. Khuapi kongpi-ah kuamah om nawn lo a, Jerusalem khuapi in gimna a thuak hi. A galte gualzo uh a, amaute a nuaisiah gawp uh hi. Mawhna tampi a neih manun, Topa in tua bangin gimna a thuaksak hi. Naupangte nangawn sila dingin a kipua khia hi. Jerusalem minthan’na teng a maimang zo hi. A makaite uh, lonona mun mu lo a, a vak kawikawi, sabengte a muh cianga taai lahpi-a a taai teitei sazuk tawh kibang uh hi. Tu in Jerusalem kisia zo ta a, nidanga a thupitnate a nung phawk kik uh hi. Galte in a sim lai takin a huh ding khat beek a om kei hi. Guallel ahih manun a galte in a nuihsan uh hi. A minthan’na teng a bei hi, a guaktang in om ahih manin a maizum hi. Thuum in tau a, a zum manin a mai a hum hi. Jerusalem in mawhna lian bawl ahih manin a kihhuai mahmah hi. A kihhuaina teng kimu khia pah hi napi, gimna thuak ding ahih lam bang mah a awlmawh thei tuan kei hi. Tua ahih manin gimna a thuakna lian lua mahmah a, kuamah in a hehnem zo kei hi. A galte in zo ahih manin Topa kiangah hehpihna a ngen hi. A galte in a neih a lam khempeuh a laksak hi. Biakinnpi sungah lut uh a, Topa in Gentailte pai nading a khamna munah a lut uh a mu uh hi. Amaute in thuum kawmsa-in annek zong dingin a paikhia uh hi. A nuntak theih nadingun a sum a pai uh tawh an a khek uh hi. Khuapi in “Hong en in Topa aw, ka thuakna teng hong mu in” ci-in a kiko hi. A kim a pama pai mi khempeuh kiangah, “Hong en in, kei’ thuak zah a gimna a thuak, Topa in a heh lai taka a hong thuaksak gimna a thuak kei longal midang kuamah om lo hi” ci-in a kiko hi. Amah in vantung panin meikuang hong khia a, ka sung lam a hong kang hi. Amah in thang hong siah a, awk-in lei lakah ka kipuk hi. Tua bangin natna ka thuak tawntung hi. Amah in ka mawhnate khempeuh ciamteh a, hen-in lom khat suahin ka ngawng zangah hong khih a, gik lua mahmah ahih manin ka taang zo peuhmah kei hi. Topa in ka galte khut sungah hong pia ahih manin bang mah ka hih thei nawn kei hi. Topa in ka galkap thahatpente nuihsan lel a, Amah in kei do ding leh ka khangnote susia dingin, galkap honpi a hong kuansak hi. Amah in ka mi thahatpente lenggah gawi zan bangin a hong gawizan sak hi. Tua ahih manin ka mit sung pan khitui a dim letin a luang hi. Hong hehnem ding leh hong hanthawn ding kuamah a om kei hi. Galte in hong zo khin a, ka mite a cimawh uh hi. Hong huh un ci-a khut ka vanvan hangin kuamah in a hong huh nuam kei hi. Topa in mun khempeuh panin galte hong paisak a, amaute in a kihhuai na khat bangin a hong gimneih uh hi. Topa in a thutang ahi hi. Bang hang hiam cih leh keimah in ama thu a mang lo ka hi hi. Mun khempeuh-a a om mite aw ka thu genna hong ngai un. Ka thuaknate hong mu dih un. Ka khangno numei pasalte sal-in a kipua khia hi. Ka kipawl pihte ka sapsap hangin a hong huh nuam kei uh hi. A nuntak nading uh an a zon’na lamun siampite leh makaite kongzing lakah a si uh hi. Topa aw, ka thuaknate, ka lung gimnate hong en in. Ka mawhna hangin dah ka hih manin ka lungtang a kitam hi. Kongzing lakah kithahna om a, innsung nangawn ah sihna a om hi. Ka tauna hong ngai in, hong hehnem ding kuamah dang a om nawn kei hi. Gimna nong thuaksak manin ka galte lungdam lua uh hi. Na ni ciam ni hong tungsak in la, kei thuak bangin ka galte zong thuaksak in. A gitlohna hangun amau tungah thukhen in. Ka mawhna hanga daan nong piak mah bangin amaute zong daan pia in. Gimna ka thuak manin ka tau a, ka lungtang a gim hi. Topa in a heh manin khuamial tawh Jerusalem a tuamcip hi. A vantung minthan’na teng uh kisiatna a suaksak hi. Amah in a heh ni-in a Biakinnpi nangawn a susia hi. Topa in Judah gama khuate khempeuh hehpih loin a susia hi. Amah in a galdalna kulhpite khempeuh balzan gawpin a gam leh a gam ukte a maizumsak hi. A hehna tawh Israelte’ tha hatnate hong suksiatsak gawp a, gal in a hong sim ciangin Amah in eite a hong huh nuam kei hi. Meikuang tawh kibangin eite langah hong pang a, na khempeuh a susia hi. Amah in galte bangin a thalpi tawh hong ngim a, i lungdamna teng leh i kisak theihpih teng a hong thah khit sak hi. I inn sung tekah a hehna meikuang i mu thei hi. Topa in galte bangin Israelte a susia hi. Amah in kulhpite leh kumpi innte a siasa-in a nusia hi. Amah in a bei thei lo dahna Judah gam sungah a tungsak hi. Amah i biakna Biakinnpi a zan gawpsak hi. Amah in ni siangtho nite leh sabbath nite a beisak hi. Kumpite leh siampite in a nasia Ama hehna a thuak khawm uh hi. Topa in a siangtho biakinnpi leh a biakna tau deih nawn lo a, biakinn kulhpi galte a susiasak hi. Lungdamna tawh Amah i biakna munah, amaute gal zoin a kiko uh hi. Topa in Jerusalem kulhpi a kipuk ding a ngaihsun khin zo hi. Amah in a vekpi in a kisia khin dingin a sehzo hi. Tausangte leh kulhpite tu-in a kisia khin pikpek ta hi. Kulh kongpite cim gawpin lei in vukcip a, kongpi kalhna zawlte a kitan gawp hi. Kumpipa leh miliante salin a om khin uh hi. Thukham kihilh nawn lo a, kamsangte in Pasian kiang pan mang a mu nawn kei uh hi. Jerusalem puteekte in pau loin leilakah tu uh a, dahna lim lahna in ippi puan silhin a lu zang uh leivui a buak uh hi. Jerusalem nungak note in a kun ngelhngalh uh hi. Ka kah kahna-in ka mit paat gawp a, ka lungsim a gim lua mahmah hi. Ka mite kisiatna hangin dahin husamin ka bah gawp hi. Naupangte leh naungeekte kongzing lakah a sibup uh hi. Gilkial dangtaakin nu aw, ci-in kapkap uh a, a liam a bai bangin kongzing tengah a tuk pekpak uh hi. Tua bangin damdamin a nute uh ang ah a si uh hi. Ka it Jerusalem khuapi aw, bang ci ding ka hi hiam? Bang hong ci hehnep thei ding ka hi hiam? Nang thuak banga thuak kuamah a om kei hi. Na tuahsiatna in tuipi cia pha a, a lamet huai bangmah a om nawn kei hi. Na kamsangte un zuau thu longal thudang gen ding nei lo uh a, a thu hilhna uh khemna thu bek ahih manin, a khial na hih lam uh a hong hilh tel kei uh hi. Amaute in lam hong lak khial uh a, kisikkik theih na’ng hun a hong pia kei uh hi. Tua khuapi siatna a mu peuh in awi-in khut a betsan uh hi. A kisia Jerusalem a muh uh ciangin awi-in, a lu uh pei-in a nuihsan uh hi. “Khuapi it huai i cih hih maw, leitung bup kisak theihpih hih khua maw?” ci-in a nui uh hi. Na galte in hong simmawh uh a, muhdahna tawh a hong siik-et uh hi. “Khuapi susia zo ta hang! I suksiat zawh mateng i cihcih niloh mah hi” ci-in a hagawi uh hi. Topa in a sehna bangin a tawp khakna ah a hong bawl hi. Sau veipi lai-a a hong hilhkholhsa bangin hong hehpih nawn loin a hong susia hi. Galte gualzawhna pia a, ei hong guallel sak a, amaute a lungdamsak hi. Jerusalem aw, na kulhpite mahmah Topa tungah kiko sak in! Sun-le-zanin na khitui guntui luang bang sak in. Dahna leh kahna tawh na hun beisak in. Zanin tho themthum in la, Pasian tungah kiko in. Na tate in hehpihna ngah nadingin na lungsim khempeuh pia in. Kongzing khempeuh ah naupangte puksi khin dektak uh hi. Topa aw hong en in. Na bawlsiat mite hong en dih in. Nupite in a it a tate’ sa uh ne tanghial uh hi. Siampite leh kamsangte in Biakinnpi sung mahmah ah thahna thuak uh hi. Khangno leh khanghamte kongzing tengah si uh hi. Galte in nungak tangval teng namsau tawh a thatlum uh hi. Amaute hehpih loin na heh ni-in na thatlum sak hi. Kei hong dipkua sak dingin ka galte pawisiim ding bangin na sam a, amaute in hong umcih uh a, na heh ni-in a suakta zo khat beek a om kei hi. Ka hawmthawh ka it ka tate hong thahsak uh hi. Pasian in daan hong piakna zia a thuak khinpa in keimah ka hi hi. Amah in a thuk semsem khuamial sungah a hong hawlkhia hi. Hong hehpih loin a khut tawh a hong tum niloh hi. Amah in a liam a bai guh kitan sa-in a hong nusia hi. Amah in lunggimna leh gentheihna thonginn sungah a hong kalhkhum hi. Amah in sihna khuamial uih sungah a teeng dingin aana tawh thu a hong pia hi. Amah in kol hong bulh a, taikhiat zawh lohna kulhpi sungah a hong koih hi. Hong huh un ci-a ka kiko hangin ka kikona aw a pua lamah a kiza zo kei hi. Hoi dangdang ka hih manin suang kulhpite ka kantan zo kei hi. Amah in vompi bangin hong buk a, humpinelkai bangin a hong bawh hi. Amah in lam pamah hong delh khia a, a hong balnen khit ciangin a hong nusia hi. Amah in a thalpi kek a, thaltang tawh kap dingin a hong ngim hi. Amah in a thaltang a thuk tum theithei dingin a hong kap hi. Mite in sun tawntung hong nuihsan uh a, leitung bup in ciamnuihna-in a hong nei uh hi. Amah in ut lopipi-in tuikha hong dawnsak a, ka duh lohpipi in an kha a hong nesak hi. Amah in ka maitang lei ah hong hiat a, suang tungah ka ha a hong tahtan sak hi. Lungnopna, cidamna, kipahna cihte bang ahi hiam cih mel ka thei nawn kei hi. Sau vei nuntak zawh lai na’ng ka nei nawn kei a, Topa tunga ka lametna teng a bei ta hi. Gimna ka thuak nate leh inn leh lo nei lo-a ka omna in gu kha bang hi a, tua in a tawntung lungkiatna ahi hi. Ahi zongin ka phawk giugiau thu khat in lametna khat hong nei theisak hi. A bei thei lo Topa hong itna leh a hehpihna in a kizom paisuak hi a, zingsang nisuak bangin thak tawntunga, ni a hong suah pelmawh mah bang ahi hi. Topa longal neih dang nei lo ka hih manin, Ama tung bekah lametna ka nei hi. Amah a muang khempeuh adingin Topa in a hoih hi. Tua ahih ciangin thuakzawhna tawh ngak kenkan zo leng hoih pen hi, a hong hotkhiat nadingin Amah ngak ni. Na khangno’ lai-in thuakzawh hat ding kisin leteh hoih pen hi. Gimna i thuak ciangin damtakin tu hithiat-in i thuak zo ding hi. Lametna om thei lai ahih manin phunphun huai pah deklo hi. Guallel-in bawlsiatna thuak taleng tua banga om lel ding ahi hi. Topa in hehpihna tawh kidim ahih manin hong nial paisuak lo ding hi. Dahna hong thuaksak thei ding hi, ahih hangin eite a hong itna in muanhuai in a kip tawntung hi. Dahna gimna a hong thuaksak ciangin amah lungdam pah sam lo hi. Topa in thong sunga lunggimna i thuaknate a hong thei hi. Mite in Pasian thusim lo-a, i hamphatnate hong paihkhiatsakin, zum thukhenna ah a maan-a thu a kikhen loh ciangin, Amah in a hong thei veve hi. Topa deihna bang bekin na khempeuh a piang hi. Ama thu piakna bangin a sia ahi-a a pha ahi zongin a piang hi. I mawhna hanga daan i thuak ciangin bang hanga phunphun ding i hi hiam? I gamtatna sate ki-en pha kikin Topa lamah kihei kik ni. Vantunga a om Pasian tungah i lungsim pia-in thungen ni. “ Topa aw ka khial khin uh a, nang hong lehdo kha ka hih manun ka mawhna uh na hong maisak kei hi. Kote nong nungdelh a, na hong that khin zo hi. Heh na hih manin na hehpihna a kisel cip hi. Na hehna in meiipi zahin sah lua ahih manin, ka thungetna uh na kiang a hong tung zo kei hi. Hi leitungah kote a kihhuai nahteh muat bangin na hong bawl hi. Ka galte khempeuh in hong simmawhin a hong zahpih uh hi. Siatna bekbek tawh kidimin, kihtakna leh launa tawh ka nungta uh hi. Ka mite a kisiat manin, ka khitui guntui luang a bang hi. Ka khitui kang thei loin luitui bangin luang tawntung a, vantung panin Topa in hong en sukin a hong muh matengin; ka khuapi kisiatna in ka lungsim a kitam khamsak hi. A thu om lopi in ka galte in hong mudah uh a, vasa siah bangin thang a hong siah uh hi. Leihawm thukpi a kawt sungah hong hing khiat uh a, suangtumpi tawh a hong sincip uh hi. Tui in hong tumcip gawp ahih manin a si khin ta-in ka kingaihsun hi. Topa aw, leihawm thukpi taw panin ka hong kiko to hi. Kong thuumna hong ngai in ci-a kong thuum ciangin na hong za hi. Na hong dawng a, lau lo dingin thu nong pia hi. Topa aw, nangmah in nong huh a, na hong nungtasak hi. A mawkna-a hong kimawhsaknate thei khin na hih ciangin thu hong khen in la, hong gum in. Ka galte’ hong muhdahna leh a vaihawm simna thute uh na thei khin zo hi. Topa aw amau’ hong simmawhnate na thei zo a, a ngimnate khempeuh uh zong na thei zo hi. Sun tawntung kei bawlsiat nading bekbek kamkumin vai a hawm tawntung uh hi. Zingsang a kipan nitak dong a hong zahpih uh hi. Topa aw, amau gamtatna bangin thukkik in. Amaute phuisam in la, a cimawh dingin hawlkhia in. Amaute delh kek in la, leitung panin nuaimang gawp in. Biakinnpi kisia a, suang kiciangte kongzing lakah a kithehthang hi. Khamtui tawh a kizut a tee daldalte a mualmang khin zo hi. Kham banga manpha Jerusalem tangval note, tu-in leibeel bang lel-in a kibawl hi. Keivompi nangawn in zong a note a nawi pia thei buang napi, ka mite in kalaoh vasa bangin a tanote a sugawp hi. Amaute in a tangeekte uh gilkial dangtak-in sisak uh a, naupang note anngen dingin vaksak uh a, kuamah in an a pia kei hi. An limpen a ne ngeite kongzing lakah puksi uh a, nuamsa a, khangkhia mite in nin buakna lak thai-in an a zong uh hi. Jerusalem’ mawhna in Sodom khuapi mawhna sangin lianzaw ahih manin, thakhatin Pasian khut sungpan kisiatna a ngah uh hi. Pasian’ mi dinga kipia Nazir-te in amau pumpi uh a siasak lo, vuuk banga ngo, a cidam, a thahat mite ahi uh hi. Tu-in amaute kuama theih lohin kongzing lakah tuk pekpak uh a, a si dingin a mai uh dup khin a, a vun uh sing bangin keu gaw-in, a guh guakin a om uh hi. Nek ding nei lo-a puksih sangin galsunga site hampha zaw lai hi. Annek ding nei lo-a site a puksi ahi uh hi. Ka mite a cihmawh lai takun, itna a nei nupite nangawn in, a tanote uh goin beel sungah a huan uh hi. Topa in a hehna khempeuh siit nawn loin hong buakhia-a, meikuang tawh Jerusalem hong hal ahih manin a kangtum hi. Namdangte’ gam ukte leh mi khempeuh in, Jerusalem sim zo ding kuamah om lo ding hi ci-a up lai takun; Hih thu a hong piang hi. Kamsangte leh siampite in mawhna a bawl manun mi siangtho midikte’ sihna a hong piang hi. Amaute mittaw bangin kongzing lakah vak uh a, kuama lawn’ngam loh dingin si-le-nai tawh a dim uh hi. Mite in “Paikhia un mi ninte aw, hong lawng kha kei un” ci-in a kiko uh hi. Tua bangin minam khat khit nam khat kiangah pai kawikawi uh a, ahih hangin kuamah in amaute a ngai kei uh hi. Topa in amaute a zat nopna om nawn lo ahih manin a thehthang hi. Amah in i makaite leh i siampite a awlmawh nawn kei hi. Huhna ngenin ka khawdakdak uh a, khawdak zo nawn lo zah dongin ka om uh hangin bangmah ka ngah kei uh hi. A hong pia zo lo ding minamte tungah huhna ka ngenngen kha uh hi. Galte in hong vilsim uh ahih manin kongzing lakah ka vakkhia ngam kei uh hi. Ka hun uh a beita hi. A beina hun a tung zo hi. Mu ak bawh sanga manlang zawin, amaute in a hong delh uh hi. Amaute in mualtung panin hong nawhsuk uh a, theihkholh lohin a hong man khin uh hi. Amaute in galte khut sung pana a hong hu zo dinga ka up uh, Pasian’ teel a muanhuai kumpi a hong matsak uh hi. Edom leh Uzmite aw nuinui mai un, ahih theih laiteng kipak un. Bang hang hiam cih leh siatna hun hong tung ding a, a hong tun’ ciangin na guaktangun om-in, maizum-in na om ding uh hi. Jerusalem in a mawhna thaman a sang khin zo hi. Ka thuak ding uh a nasiapen pen teng ka thuak khin zo uh hi. Ahih hangin Edom aw, Topa in nang daan hong pia ding a, na mawhna a hong pholak sak ding hi. Topa aw, kote tunga, thupiangte hong phawk in. Hong en in la, ka maizumna uh hong mu in. Ka neihsa teng uh gamdang mite’ khut sung tung khin a, ka innsung uhah gamdang mite a teeng uh hi. Ka pate uh gal in hong thahsak khin a, ka nute uh a meigong khin uh hi. Ka tuidawn ding uh lei ding kul a, ka sing cih ding uh lei ding a kul hi. Kalaoh van pua leh la van pua bangin nakpi takin a hong kihawl gawpgawp hi. Gim mahmah hi napi, tawlngak na’ng hun a hong kipia kei hi. Ka nuntak theih nadingun Assiria leh Izipt-te kiangah an ngen dingin ka pai uh hi. Ka pute ka pate un mawhna a bawl manun a si khin uh hi. Amau’ mawhna kote in ka thuak uh hi. Silate sanga a zahpih huaizaw mite in hong uk tazen uh a, kuamah in amau khut sung panin a hong honkhia thei kei hi. Gamsung tengah misuamte dim ahih manin, luang kham zen mahin an zong dingin ka pai uh hi. Gilkial luat manin cisa-in ka nattun uh a, ka pumpi uh mei-amsa a bang hi. Zion mual-ah ka zite uh hong kibuansak a, Judah khua khempeuh ah ka ta nungakte uh a hong kibuansak hi. Makaite hong kikhailupsak a, puteekte hong kithusimsak kei hi. Tangvalte sila bangin aana tawh an kigawi sak a, naupangnote sing kitomsakin a lelhpipi-un a kipuasak hi. Puteekte khuapi kongpi ah tu nawn lo uh a, khangnote in la a sa nawn kei uh hi. Lungnopna teng bei khin a, lungdamna teng lungkhamna a suak hi. Kisak theih nading bang mah om nawn lo-a, mawh i hih manin gimna i thuak hi. I lungsim mahmah cina a, khitui in i mit hong mialsak hi. Zion mual in gamdaihna-ah kinusia khin ahih manin se-alte a kawivak uh hi. Ahih hangin Topa aw nang na hih leh a tawntung kumpipa na hi a, huntawp dongin na uk ding hi. Bang hanga sau veipi hong pampaih na hi hiam? Kote hong phawkkik nawn lo ding na hi hiam? Topa aw kote hong kaikhawm kik in! hong kaikhawm kik in! A beisa sau veipi lai mah bangin hong thaksuaksak kik in. Kote hong nial tawntung takpi ding na hi hiam? Na hehna in ciangtan hun nei thei lo ding ahi hiam? Kum sawm thum ka phak kum, a kha lina, a ninga ni-in Babilon gam-a om Khebar Gun gei-ah sal-a om Judah midangte tawh ka om lai takin maang ka mu hi. Tua ka maang muhna-ah van hong kihong a, Pasian ka mu hi Tua hun pen Kumpi Jehoiakhin sal-in a kimat zawh a kum ngana, tua kha sungah a ni nga ni mah ahi hi. Tua Babilon gam Khebar Gun gei-ah ka om lai takin siampi Buzi’ tapa keimah Ezekiel in Topa ’ hong thugenna ka za a, ama vangliatna zong kei tungah hong tun’na ka phawk hi. Ka khuadak leh, leilu lam panin huihpi hong nung ka mu hi. Tua huihpi tawh a hong ton meiipi lak panin khua hong phia a, a kimkot teng taang pempam hi. Tua khua phiatna mun pen sumngo tawh kibangin taang hi. Tua huihpi laizangah ganhing li a om tawh a kibang pian ka mu hi. Tua ka muhte in mihing lim pua napi-in, maitang li leh kha li nei ciat uh hi. A khete uh mam zeza a, ahi zongin a khepeekte uh bawng khe tawh kibang hi. Tua ganhingte pen a kinawtngil sumngo tawh kibang uh hi. Maitang li leh kha li ciat a neih ban uhah, a khaphung nuai a pangpi uh panin a mengkhia mihing khut tawh a kibang li ciat mah nei lai uh hi. Tua ganhing lite in a kha nih ciat uh zalin, a mong leh a mong kimatsak uh a, ki-umcihin sikli nei-in kimu hi. Amaute a gamtat ciangin a li-in tat khatin tang uh ahih manin a pumpi uh kituam hei lo hi. Tua ganhingte in maitang li ciat nei uh hi. Maitang ngeina lamah mihing mai, taklam pangah humpinelkai mai, veilam pangah bawngtal mai, a dek lamah muvanlai mai nei ciat uh hi. Tua ganhingte in a kha nih ciat uh zal-in a zom-a omte’ kha mong dawn tawh kimatsak uh a, a om lai a kha nihte gel ciat uh khupin a pumpi uh tuam uh hi. Tua ganhingte in maitang li ciat nei-in mun khempeuh a maingatsa suak uh ahih manin, kha in a pai sak nopna peuhpeuh ah, a pumpi uh kihei kul loin a pai thei pahpah uh hi. Tua ganhingte lakah meikuang tawh a kibang a phia niloh om hi. Tua meikuang pen kuang pha mahmah a, khua phiasak zaizai hi. Tua ganhingte zong khuaphia mah bangin kin zalzal kawikawi uh hi. Tua ganhing lite ka et lai takin amaute in leengpei khat ciat a neih lam uh ka mu a, a leengpeite leilak ah kinga hi. Tua leengpeite a vekpi-in kibang kim a, suangmanpha bangin tee uh hi. Tua leengpeite in a kikantan lamin pei khat ciat nei thuah uh ahih manin, a utna lam peuhpeuh ah pai thei uh hi. Tua leengpei kualte tungah mittang vive a dimin om hi. Tua ganhingte a kin ciangin leengpeite tawh kinkhawm a, leilak panin tua ganhingte van lamah kangin a kahtoh ciangin a leengpeite tawh zong kangto khawm hi. Amau’ utna peuhpeuh uhah tua ganhingte pai uh a, tua leengpeite pen a ganhingte’ khutnuai ahih manin, ganhingte’ paina peuhpeuh ah pai uh hi. Tua leengpeite pen ganhingte’ khut nuai-a om ahih manin ganhingte pai leh pai-in, khawl leh khawlin, van-ah kahto leh kahto-in; a ganhingte’ tat bang teekteekin ta uh hi. Tua ganhingte’ lu tung san-ah limlang tawh a kibawl a kuum kiukiau pian khat om hi. Tua a kuum nuai-ah, ganhingte in a kizompih ciatte lamah a kha nihte ciat zal uh a, a kha nih ciat uh tawh amau pumpi ciat tuam uh hi. Tua ciangin amaute’ leen’na a khaging uh ka za hi. Tua a khaging in tuipi ging, galkap honpi huging, leh Vanglian Pasian’ awgingte tawh kibang hi. A leen’nawn loh uh ciangin a kha uh khup a, ahi zongin amaute’ lu tung san-a om a kuum tung san panin awging kiza lai hi. Tua a kuum tung zangah, sapfeiros suangmanpha tawh a kibawl kumpi tokhom bang pian khat om a, tua tokhom tungah mi tawh a kibang pian lim khat tu hi. Tua tokhom tunga tu ka muh pen, meikhuk sunga a kihalsan sumngo bangin taang heuhau a, a kimkot khempeuh zong tua mah bangin taang pempam hi. Tua a taang khuavak in meii lakah sakhituihup kai-in a neih mel nam tuamtuam khempeuh nei kim hi. Topa ’ vangliatna lim pen tu-a ka gen bang ahi hi; Hih bang ka muh ciangin lei lakah ka bok suk a, tua ciangin awging khat ka za hi. Tua awging in, “Mihing ahi Ezekiel aw, ding to in. Nang tungah thu kong gen nuam hi,” hong ci hi. Tua bangin thu hong gen lai takin Pasian’ Kha ka sungah hong lutin ka khe-in hong ding to sak hi. Tua ciangin awging kizom lai-in kei kiangah, “Ezekiel aw, kei hong langpan’ in a hong lehdo Israel minamte kiangah nang a hong sawl ka hi hi. A pu a pate uh mah bangin amaute in tu dongin kei hong lehdo uh hi. Amaute a lungsim uh khauhin paupeng uh hi. Keimah Topa Pasian in amaute tungah ka gen ding thute a va gen dingin a hong sawl ka hi hi. Amaute in nangma thu hong mang a, hong mang kei zongin, amaute lakah kamsang khat a om khit lam tak thei ding uh hi. Ahi zongin Ezekiel aw, amaute ahi a, a thugente uh ahi zongin na kihta kei ding hi. Amaute in nang ling hong kaihnelh ding a, mom-ai laka om na bang ding hi. Tua bang hita se leh, hih a lehdo thei mite’ maipuakzia leh amaute’ kampaunate hangin lau tuan kei in. Amaute in hong mang a, hong mang kei zongin, nang tungah kong gen khempeuh amaute tungah va gen in. Amaute pen a lehdo thei mi ahihna uh phawk in. “Ezekiel aw, nang tungah kong gen thute ngai in. Amaute bangin hong langpang kei in. Na kam ka in la, tu-in ka hong piak ding na ne in,” hong ci hi. Tua ciangin kei lamah khut khat hong kizan a, tua khut in laizial tawn khat a tawi ka mu hi. Tua ciangin tua khut in tua lai kizial hong phel a, a lang nih tuakah lai kigelhin, dahna kahna thu leh thuumna tauna thute vive a kigelh ka mu hi. Tua ciangin amah in kei kiangah, “Ezekiel aw, nang tungah ka hong piak hih laizial ne in. Tua ciangin va pai in la, Israel mite kiangah thu va gen in,” hong ci hi. Tua ahih manin kei zong ka kam ka ka a, ka nek dingin a laizial hong pia hi. Amah in, “Ezekiel aw, ka hong piak laizial ne in la, na gilpi dim takin ne in,” hong ci hi. Kei zong tua laizial ka ne a, khuaizu tawh kibangin khum ka sa mahmah hi. Tua ciangin amah in, “Ezekiel aw, Israel mite kiangah pai in la, nang tungah kong gen khempeuh, amaute tungah va gen in. Pau na theih loh minam dangte kiangah a hong sawl ka hi kei hi; na mipih Israel mite kiangah a hong sawl ka hi hi. A pau na theih loh, pau haksa a zang minam liante kiangah nang hong sawl hi leng, amaute in na thugen hong mang ding uh hi. Ahi zongin Israel mite khat beek in na thu hong ngai lo ding hi; keima kam teekteek nangawn ngai lo ding uh hi. Amaute a lungsim uh khauh a, dem nopna lungsim nei uh hi. Tu-in amaute mah bangin a khauh mahmah, a duai mahmahin nang kong bawl ding hi. Suang khempeuh sangin a sakzaw, diamond suang zahin a sakin na lungsim kong bawl ding hi. Tua ahih manin hih a lehdo thei mite kihta kei in,” hong ci hi. Tua khit ciangin amah in thu hong gen thuah lai a, “Ezekiel aw, nang tungah kong thugen khempeuh lim takin ngai in la, ciamteh in. Tua ciangin amaute in na thu hong ngai a, hong ngai kei zongin, sal-a a om na mipihte kiangah va pai in la, nang tungah kong thugen khempeuh amaute tungah va gen in,” hong ci hi. Tua ciangin Pasian’ Kha in hong paipih to a, ziin’ liing zahin a gin’ ngaih awging khat ka nungah ka za a, “Vantungah a om Topa, ama minthan’na hangin phat un,” ci-in a kiko hi. Ganhingte in huih lakah a kha zapna leh leengpei gingte ka za a, ziin’ liing zahin gin’ ngaih mahmah hi. Pasian’ Kha in hong pai khiatpih lai takin ka lungkim het loin ka heh suak mahmah hi. Ahi zongin Topa ’ vangliatna in kei hong zo zaw hi. Tua ahih manin ka mipih salte’ omna, Khebar Gun gei-a om Telabib munah ka va tung a, ka muhsa thute ngaihsunsunin tua lai a, amaute lakah ni sagih sung ka om hi. Ni sagih a cin’ khit ciangin Topa in kei hong hopih a, “Ezekiel aw, Israel minamte’ galvilpa dingin nang kong koih hi. Nangma tungah ka hong gen hilhkholhnate khempeuh amaute tungah na gen sawn ding hi. Mi gilopa khat pen, ‘Na si taktak ding hi,’ ci-in ka gen ciangin, amah kikhelin a nuntak theihna dingin thu na hilhkholh kei leh, tua mipa pen mawhnei mahin si ding a, ahi zongin ama sihna sisan thu ahih leh nang kong ngawh ding hi. Mi gilo khat hilhkhol napi-in a mawh bawlna a tawp nop kei leh, mawhnei mah in si ding a, ahi zongin nangma nuntakna suakta ding hi. “Mi hoih mahmah khat in gamtat siat ding hong kipan leh a lauhuaina munah amah ka koih ding hi. Amah hilhkhol kei lecin, si ding hi. Ama mawhna hangin si ding a, ama gamtat hoihsate phawkin ka nei kei ding hi. Ama sihna sisan thu nang kong ngawh ding hi. Ahi zongin a khialh loh nadingin mi hoih khat na hilh a, na thu hong mangin mawhna a bawl kei leh amah nungta ding hi. Nang zong na suakta ding hi,” hong ci hi. Ka sungah Topa ’ vangliatna hong om lamtak ka phawk a, amah in kei kiangah, “Ding in la, kuam sungah va pai in. Tua lai mun panin nang kiangah thu kong gen ding hi,” hong cihna ka za hi. Tua ahih manin kei zong kuam sungah ka va pai a, Khebar Gun gei-a ka muh bang teek mahin tua lai-ah Topa ’ minthan’na ka mu hi. Kei zong lei-ah ka bok suk a, ahi zongin ka sungah Pasian’ Kha hong lutin ka khe-in hong dingsak hi. Tua ciangin amahin, “Inn-ah ciah in la, inn kikhaknelh in. Ezekiel aw, khauhual tawh nang hong kikhih ding a, mite kiangah na paikhia thei kei ding hi. Na leii ka zawsak ding a, hih a lehdo thei mite na thuhilh thei kei ding hi. Ahi zongin nang kong hopih kik ciangin kong pausak thei kik ding a, amaute kiangah, “ Topa Pasian in hih bangin ci hi,’ na ci ding hi. Tua ciangin mi pawlkhat in na thu hong ngai ding a, ahi zongin amaute pen a lehdo thei minam ahih manin pawlkhat in na thu hong ngai lo ding uh hi,” hong ci hi. Tua khit ciangin, “Ezekiel aw, leisek khat la-in na mai-ah koih in la, Jerusalem khuapi lahna-in tua leitsek tung git in. Tua ciangin tua khuapi a kiumcihna na lah nadingin a kiim-ah dumte, phungte, galpan’na phualte leh kulh sukkhap nading molhtumte bawl in. Tua ciangin sikpeek khat la in la, nang leh tua khuapi kikal-ah kulh lim dingin koih in. Tua ciangin khuapi lam en in. Tua khuapi a kiumcih hi-in, nang pen a umcihte’ lim ding na hi hi. Hih in Israel mite’ adingin lim hi ding hi. “Tua ciangin na veilam pang delhphahin lum in. Israel minamte’mawhna daan nangma tungah kong nga ding hi. Tua lai munah lumin amaute’ mawhna ni zathum leh ni sawmkua sung na thuak ding hi. Bang hang hiam cih leh amau’ daan thuak ding kum khat sung tang dingin ni khat, amau’ thuak ding kum zah nangmah in a ni-in na thuak ding hi. Hih bangin na gamtat khit ciangin na taklam delhphahin na kihei leuleu ding a, Judah mite’ mawhna daan ni sawmli sung na thuak leuleu ding hi. Nangma thuak ni khat pen amau’ thuak ding kum khat tang ahi hi. Tua ciangin Jerusalem khuapi a kiumcihna sal gega in. Na puan-ak ban zialto in la, tua khuapi siat nading thu genkhol in. Nang pen khauhual tawh kong hencip ding a, tua khuapi umcihna a kiman mateng na kihei thei kei ding hi. “Tu-in, mangbuh, mangbuhham, belawi, beli, taang, leh mangbuhman pawlkhat la in la, tuate helkhawmin anlum-in bawl in. Na veilam delhphahin na lup hun ni zathum leh ni sawmkua sung tua na bawl anlum na ne ding hi. Nek khat-in anlum shekel sawmnih gik bek na ne ding a, ni khat-in khat vei bek na ne ding hi. Tui zong duh zahzah hi loin, ni khat-in thawl khat bek na dawn ding hi. Na nek ding anlum pen mite’ muh-in mihing’ ek keu khawmin tuate mei-in na cih khit ciangin tua sungah na em ding hi,” hong ci hi. Tua ciangin Topa in, “Israel mite, gamdangah ka thehthang hun ciangin thukham in nek dingin a kham an ninte tu-a mah bangin ne ding uh hi,” hong ci hi. Ahi zongin kei zong ka dawng kik a, “ Topa Pasian aw, cik mah-in kei ka kininsak ngei kei hi. Ka neu tunga kipan tu dongin ama thu-in a si tawm ganhing sa ahi a, gamsate’ nekbaang ahi zongin ka ne ngei kei hi. A nin-a a kiseh an khat peuhpeuh ka ne ngei nai kei hi,” ka ci hi. Tua ciangin amah in, “Tua ahih leh pha hi. Mihing’ ek tangin bawng’ ek na zang ding a, tua bawng-ek am sungah na anlum na em ding hi,” hong ci hi. Tua ciangin amah in thu hong gen thuah lai a, “Ezekiel aw, Jerusalem khuapi sungah an ka beisak ding a, mite in lunghihmawhna tawh a annek a tuidawnte uh ciangtan ding uh hi. An leh tui loin amaute om ding uh a, amaute lunggimin, a tawpna-ah a mawhna hangun beimang ding uh hi,” hong ci hi. Tua ciangin amah in, Ezekiel aw, namsau hiam khat la in la, na sam leh na khamul kiat khia in. Tua ciangin a multe tawi tehin seh thum suah in. Umcihna lim na man ciangin khuapi lim sungah seh khat haltum in. Tua ciangin seh khat la leuleu in la, khuapi kiim-ah na pai kawmin na namsau tawh satnen in. A om lai seh khat pen huih lakah lawn in. Keimah in namsau tawh ka sat ding hi. Tua ciangin a multe tawmno khat la in la, na puanmongteep-ah tun in. Tua ciangin na tunsate sung panin tawmcik khat la leuleu in la, meikuang sungah lawnin kangtum sak in. Tua sung panin mei hong kipanin Israel minam buppi hong lawh ding hi,” hong ci hi. Tua ciangin Topa Pasian in, “Hih Jerusalem khuapi lim en in. Leitung laizangah ka koih a, a kimkotah gamdang khempeuh ka omsak hi. Ahi zongin Jerusalem in ka thupiakna lehdo-in, minam dangte sangin a gilo zaw hong suak a, a kiim-a om gamdangte sangin a thumang lo zaw hong suak hi. Jerusalem in ka thupiakte nialin ka thukhamte zui nuam lo hi. Jerusalem aw, tu-in Topa Pasian ahi keima thugente ngai in. Ka thukhamte zui loin, ka thupiakte ngai lo na hih manin na kiim-a om minam dangte sangin siatna tamzaw na piangsak hi. Minam dangte’ gamtat ngeinate na zui hi. Tua ahih manin Topa Pasian ahi keimah in nang kong langpan’na thu a hong gen ka hi hi. Minam dang khempeuhte muh-in nang tungah thu kong khen ding hi. Ka deih loh hih nate khempeuh na gamtatna hangin cikmah-in ka hih ngei loh, cikmah ciangin zong ka hih nawn loh ding thu tawh nang Jerusalem kong daantat ding hi. Tua kong daantahna hangin nang Jerusalem khuapi sungah pate in a tapate’ sa ne-in, tapate in a pate uh’ sa ne ding uh hi. No a mite kong daantat ding a, a suakta kha sunsunte nangawn mun khempeuh ah kong thehthang gawp ding hi. Tua ahih ciangin Topa Pasian ahi keimah in a nungta ka hih mah bangin, note in siatna nam khempeuh leh a muhdahhuai gamtatna tawh ka biakinn ninsak na hih manun cikze het loin note kong sukmang taak kei leh, ci-in ka kiciam hi. Note seh thum suah seh khat pen cina leh gilkialin khuapi sungah na si ding uh hi. Seh thum suah seh khat, khuapi kiim-ah namsau-in na si ding uh hi. A om lai seh thum suah seh khat ahih leh mun khempeuh ah hong thehthangin namsau tawh kong delh ding hi. “Ka lung a kim dongin kong hih ding a, ka hehna leh ka sinsona teng na thuak ding uh hi. Note tungah hih thute hong tun’ ciangin, note cihtaklohna hangin deihsakluatna tawh a hong heh pau ka hihna na phawk ding uh hi. Na kiim uh a, om minamte in note hong muh khak uh ciangin hong phitsanin hong pelh ding uh hi. Note tungah hehin sinsona tawh daan kong piak ciangin na kiim uh a, om minam dangte khempeuh lau ding uh hi. Amaute in note hong muhdah etin hong simmawh bawl ding uh hi. Na annek ding uh hong khaktan sakin note kong puksi sak ding hi. Note susia ding thaltang’ kap khak bangin gilkialna pen na na sa velval ding uh hi. Na tate uh a sisak dingin kialpi hong tungsakin, a that dingin gamsate kong paisak ding a, natna, gal kidona leh gal kikapnate in note hong sisak ding hi. Topa ahi keimah in hih thu kong gen khin hi,” hong ci hi. Topa in kei kiangah thu hong gen a, “Ezekiel aw, Israel mualsang dawnte en in la, amaute tungah kong thupiak gen in. Topa Pasian ahi keimah in mual liante, mual neute, guam thukte, leh kuampite kiangah ka gen ding thute, Israel mualte in a ngaih nading uh gen in. Mite milim a biakna munte a vat gawp dingin namsau khat kong kuansak ding hi. Biakna taute kiphelkeek ding a, paknamtui taute kisatkham ding hi. Tua lai-a om mi khempeuh kithatin, a milimte uh mai-ah kipaithang gawp ding hi. Israel misi luang hawmte ka thehthang gawp ding a, a guhte uh biakna tau kiim-ah ka lawnthang gawp ding hi. Israel khuapite khempeuh beimang ding a, milim a biakna uh mun khempeuh kisusia ding hi. Tua ahih manin a biakna taute uh leh a milimte uh vut-le-vai suakin, a paknamtui taute uh kisatvui gawp ding ahih manin milim biak nadinga a bawlsa khempeuh uh maimang ding hi. Mun citeng-ah mi kithatlum ding a, a suakta sunsunte in kei pen Topa ka hih lamtak hong phawk ding uh hi. “Tua banga kihon thahna panin pawlkhat ka suakta sak ding a, minam dangte lakah thehthangin, salin om ding uh hi. Tua bangin sal-a a omna uh mun panin, amau’ lungsim cihtak lohna hangin kei hong nusiatna uh leh keimah sangin milim a deih zawkna uh hangin a maizum nadingun a daantat ka hih lamtak thei-in kei hong phawk ding uh hi. Amau’ gitlohna leh a haitatnasate uh hangin amau mahmah kimudah tawm ding uh hi. Tua ciangin kei pen Topa ka hih lamtak thei ding uh a, amaute daantah ding ka genkholhnate a mawk pau ka hih loh lam phawk ding uh hi,” hong ci hi. Tua ciangin Topa Pasian in, “Israel mite’ gitlohna leh a muhdahhuai a gamtatnate uh khempeuh hangin na khut singin lei tuan in la, a dahin kap in. Amaute gal sung leh kial leh natna hangin si ding uh hi. A gamla-a omte cina-in si ding uh a, a nai-a omte gal sungah si ding uh hi. A om lai sunte gilkialin puksi ding uh hi. Amaute in keima hehna thuak ding uh hi. Milimte lak leh biakna tau kim-ah siluang hawm kithehthang ding a, mual sang tung teng, mualdawnzang teng, singniim nuai citeng, tawsaw kung lian nuai khempeuh, leh milim biakna-in paknamtui a halna uh mun khempeuh ah siluang hawm om ziazua kawikawi ding hi. Tua ciangin Topa ka hih lamtak mi khempeuh in thei ding uh hi. Keimah in ka khut zanin a gam khempeuh uh ka susia ding hi. Leitaw lam gamlak pana kipanin leilu lam Riblah khuapi dongin, Israel mite’ omna mun khempeuh, siit nei loin ka vatmai ding hi. Tua ciangin Topa ka hih lamtak mi khempeuh in thei ding uh hi,” hong ci hi. Topa in kei kiangah thu hong gen a, “Ezekiel aw, Topa Pasian ahi keimah in Israel leitang tawh kisai-in ka gen thu in hih ahi hi: A beina hita! Gam buppi a beina hita hi. Israelte aw, tu-in na bei nading uh hong tung ta a, note in ka hehna tu-in na thuak ta ding uh hi. Na gamtatnasa uh tawh kizui-in thu kong khen ding a, na gamtatsiatna uh tawh kizui-in daan kong tat ding hi. Note kong zah kei ding a, zong kong khasiat kei ding hi. A muhdahhuai na gamtatnasa uh tawh kizui-in daan kong tat ding a, tua ciangin Topa ka hih lamtak na thei ding uh hi,” hong ci hi. Topa Pasian in a gen thu in, “Note tungah haksatna khat khit khat a ban banin hong tung thuahthuah ding hi. A beina hong tung ta hi. Note a man na hita uh hi. Israel gam sungah a teeng note’ bei nading hong tung ta ding hi. Mualsang dawn citeng-a biakna munte ah lungdamna om nawn loin buaina bek a omna ding hong nai ta hi. A sawt loin ka hehna thu na thuak ding uh a, na gamtatnasate uh hangin thu hong khenin, a muhdahhuai na gamtatnate uh hangin daan kong pia ding hi. Note kong zah kei ding a, zong kong khasiat kei ding hi. A muhdahhuai na gamtatnasate uh hangin daan a hong pia ding ka hi hi. Tua ciangin Topa ka hihna leh note a hong daantatpa ka hihna na thei ding uh hi. “Siat nading hun hong tung ta hi. Na ngongtatna uh khang a, na kiphatsakna uh lian hi. Mi gilote’ hauhna leh lungmuan’ nate haksa loin beimang ding hi. A hun hong tung ta a, a ni hong nai zo hi. Mi khempeuh tungah ka hehna hong tung ta ding ahih manin sumlei sumzuak nasepna in a kiman’na om nawn lo hi. A neihsa a zuak khiapa in a nuntak sungin a zuaksa van ngah kik lo ding hi. Mi khempeuh tungah hehna hong tung ahih manin a mawhna hangin kuamah nungta lo ding uh hi. “Amaute in gal peengkul tum uh a, a vekpi-in kiging uh hi. Ahi zongin mi khempeuh tungah ka hehna tung kim ding ahih manin galsim dingin kuamah kuan khia lo ding hi. Khua pua lamah gal kidona om a, khua sungah cinatna leh gilkialna om hi. Gamlak-a om mi khempeuh gal sungah si ding uh a, khua sunga om khempeuh cina leh gilkialin si ding uh hi. Mi pawl khatte in vakhu lau bangin mualtung tuh ding uh a, ahi zongin amau’ mawhna hangin si veve ding uh hi. Mi khempeuh’ khut zaw dakdakin, a khuk uh liing kelkel ding hi. Amaute dahna limin puanhampi silh ding uh a, pumliin’ gawp ding uh hi. A sam uh kimettolsak ding a, a min uh dai ding hi. Topa ’ hehna amau tungah a tun’ ni ciangin, a ngun a khamte un amaute suahtak thei lo ahih manin, a ngun a khamte uh nin bangin kongzing lakah pai ding uh hi. A gilkial uh ciangin zong an bangin tuate ne thei lo uh hi. Ngun leh khamte in amaute mawhna sung tumpih zaw hi. Amaute in a kiphatsakpih uh kizepna a manphate, a muhdahhuai milim dingin bawl uh hi. Tua ahih manin amaute’ hauhna pen amau mah in a kih dingin ka bawl hi. Amau’ nate, gamdang mite ka sutsak ding a, a neihsa khempeuh uh migilote sutsak in, ka ninsak ding hi. Ka biakinn a kinitsak ciangin ka kho kei ding hi. Gutate in ka biakinn luhin ninsak ding uh hi. “Na khuttum uh zial un. Bang hang hiam cih leh gam sungah mi kithahna dim a, khua sungah ngongtatna dim hi. Minam gilo pente hong paipihin na innte uh ka luahsak ding hi. Minam dangte in na biakna mun ngeite uh a nitsak ciangin mi thahat-a a kineite’ kimuan’na beita ding hi. Lungkhamna na tuah uh ciangin lungnopna na zong ding uh a, ahi zongin na mu kei ding uh hi. Lungkhamna khat khit khat a ban banin na tuak ding uh a, thusia bekbek na za za ding uh hi. Kamsangte kiangah thu na dong ding uh hi. Siampite in mite tungah hong hilh ding thu thei lo ding uh a, upate in hong gen ding mel thei lo ding uh hi. Kumpipa dahin thuum ding a, ulian penpa a cih nading thei loin om cipin, mi khempeuh lau-in liing ding uh hi. Na gamtatna uh tawh kizui-in daan kong pia ding a, midangte tungah thu na khen bangun note tungah thu kong khen ding hi. Hih bangin kong hih ciangin Topa ka hih lamtak na thei ding uh hi,” a ci hi. Sal-a ka om uh kum guk a phak kum, a kha gukna, a ni nga ni-in sal-a om Judah makaite tawh ka inn sungah thu genin ka tut lai takun, thakhatin Topa Pasian’ vangliatna ka sungah hong tum hi. Ka khuadak leh, mihing tawh a kibang pian khat ka mu hi. A kawng nuaisiah ding teng meikuang tawh kibang a, a kawng tungsiah ding teng sumsan kinawtngil tawh kibangin san heuhau hi. A khut ding tawh a kibang pian khat in hong sawkin ka sam-in hong man hi. Tua ciangin hih ka maang sungin, Pasian’ Kha in vanah hong leen’pih to-in Jerusalem khuapi hong tun’pih hi. Tua lai panin, Pasian a hehsuahna ahi milim a omna mun, biakinn tual sungnung lutna, leilu lam kongpi-ah hong paipih hi. Kuam sungah ka maang-a ka muh bang teekteekin, tua sanah Pasian’ minthan’na ka mu hi. Amah in kei kiangah, “Ezekiel aw, leilu lamah khuadak in,” hong ci hi. Kei zong ka khuadak leh, kongpi kianga biakna tau kiangah, Pasian’ hehsuahna milim ka mu hi. Tua ciangin amah in, “Ezekiel aw, amaute’ gamtatnate na mu hiam? Israel mite in a bawl uh a muhdahhuai gamtatnate, ka mun siangtho panin a gamla semsem-ah kei hong nawhkhiatnate en in. Hihte sangin a mindaihuai zaw nangawn na mu lai ding hi,” hong ci hi. Tua ciangin biakinntual puanung lutna gei-ah hong paipih a, tua lai-ah kulh a van’na mun khat hong lak hi. Amah in, “Ezekiel aw, hih kulh tovang in,” hong ci hi. Kei zong kulh ka tovang a, kongkhak khat ka tuak hi. Tua ciangin amah in, “A sungah tum in la, a muhdahhuai a gitloh gamtatnate uh va en in,” hong ci hi. Kei zong a sungah tumin ka khuadak hi. Kawm tung khempeuh ah gul lim, adang ganhing ninte lim, leh Israel mite’ biak milim khempeuh a kisuai ziazua ka mu hi. Tua lai-ah Israel minam makai sawmsagih na om a, tuate lakah Shafan’ tapa Jaazaniah zong na om hi. Amaute in paknamtui halna kuang khat ciat tawi uh a, paknamtui hal khute van lamah kahto biaibuai hi. Tua ciangin amah in, “Ezekiel aw, Israel mite in a kimu lo mun-a a gamtatnate uh tu-in na mu hiam? Amaute in milim a dimna inn sungah biakna bawl uh hi. Amaute in, ‘ Topa in hong mu lo hi. Topa in hih gam nusia khin ta hi,’ ci-in paulap zong uh hi,” hong ci hi. Tua ciangin, “Hihte sangin a muhdahhuai zaw a gamtatna uh zong na mu lai ding hi,” hong ci thuah lai hi. Tua ciangin leilu lam-a om biakinn kongpi-ah hong paipih a, Tammuz a cih uh pasian a sihna hangin dahin a kapin a om numeite hong lak hi. Tua ciangin amah in, “Ezekiel aw, na mu hiam? Hihte sangin a muhdahhuai zaw na mu lai ding hi,” hong ci hi. Tua ciangin biakinntual sungnung ah hong paipih hi. Tua lai-ah biakinn kongkhak gei, biaknatau leh innlim kikal san-ah mihing sawmnih leh nga khawng na om a, biaknatau nung ngatin nisuahna lam nga-in ni suak tuung na bia uh hi. Tua ciangin amah in, “Ezekiel aw, huate na mu hiam? Hih Judah mite in na muhsa a muhdahhuai a gamtatte uh tawh lungkim nai lo uh a, gam sung khempeuh ah ngongtatna dimsak uh hi. Tua banah ka heh semsem nadingin hih bangin gamta uh hi. A siathei tawpin hih bangin kei hong simmawh bawlna mu in! Tua ahih manin amaute in ka heh mahmahna thuak ding uh a, amaute ka zah kei ding a, zong ka khasiat kei ding hi. Amaute in a tha neih tawpun kei tungah thu hong nget uh hangin amaute’ thungetna ka ngai kei ding hi,” hong ci hi. Tua ciangin Pasian hong kiko a, “Hih khuapi a susia ding no mihingte hong pai un la, na hiam zat ding ciat uh zong hong keng un,” ci-in sam hi. Leilu lam biakinn kongpi pua lam panin thakhatin mihing guk hong pai a, hiam khat ciat hong tawi uh hi. Saihadial puan a silh, laigelh nading a tawi mi khat tawh zong hong paikhawm uh hi. A vekpi-un sumngo biaknatau gei-ah hong ding uh hi. Tua ciangin ama omnasa kherubte tung panin Israelte’ Pasian minthan’na hong pai-in biakinn kongah hong om hi. Tua ciangin amah in saihadial puan a silh, laigelh nading a tawipa samin, “Jerusalem khua sung khempeuh ah pai kawikawi in la, hih khuapi sungah a muhdahhuai gamtatnate a kisepna hangin dahin a lungkham mi khempeuhte’ taltang-ah ciamtehna va bawl in,” ci-in sawl hi. Tua ciangin Pasian in a midangte kiangah, “Khua sung khempeuh ah amah va zui un la, mi va that un. Kuamah hingkhawi kei un la, kuamah khasiat kei un. Puteek, nungak tangval, numei naupang dong takin va that un la, ahi zongin a taltangah ciamtehna a nei peuhmah su kei un. Hih ka biakinn mahmah panin kipan pah un,” a cihna ka za hi. Tua ahih manin tua biakinn sunga ding Israel makaite, kipatna in nei pah uh hi. Tua ciangin amaute kiangah, “Biakinn ninsak un. A tual tengah siluang hawm dimsak un. Tu-in kipan un,” ci hi. Tua ahih ciangin amaute kuan khia-in khua sungah mite thah ding kipan uh hi. Tua bangin mi a kithah lai takin keimah guak ka om hi. Kei zong lei-ah bokin, “ Topa Pasian aw, Jerusalem tungah na hehna hangin Israel mi a omlai sun khempeuh that mang khin ding na hi hiam?” ci-in ka kiko hi. Tua ciangin amah in hong dawng a, “Israel mite leh Judah mite’ mawhna nak liat mahmah hi. Gam sung khempeuh mi thahna tawh kidimsak uh a, Jerusalem khuapi, siatna namkim tawh kidimsak uh hi. Amaute in, ‘ Topa in i gam susia khin a, Topa in eite hong mu lo hi,’ ci uh hi. Tua ahih manin amaute kuamah ka zah kei ding a, kuamah ka khasiat kei ding hi. Amaute’ gamtatna, amaute tung mah ka tusak ding hi,” hong ci hi. Tua ciangin saihadial puan silhin laigelhna a tawi mipa in Topa kiangah thu hong zasak kik a, “Nong sawl bangin ka sem khin zo hi,” hong ci hi. Tua ciangin kherubte’ lu tung sanah a om a kuum ka et leh, sapfeiros suangmanpha tawh a kibawl kumpi tokhom bang pian khat, tua a kuum tungah om hi. Tua ciangin Pasian in saihadial puan a silhpa kiangah, “Na khut dimin mei-am tawi in la, kherubte nuai-a om leengpeite kikal-ah va om in. Tua ciangin khuapi tungah a mei-amte theh in,” ci-in sawl hi. Kei zong ama pai ka en gige hi. Tua mipa a pai lai takin kherubte pen biakinn leitaw lamah na ding uh a, biakinntual sungnung teng dimin meiipi kai hi. Kherubte’ tung panin Topa ’ minthan’na hong pai khia-in biakinn kongah va om hi. Tua ciangin biakinn sungah meiipi hong kai a, biakinntual ah Topa ’ minthan’na taang zeizai hi. Kherubte’ khazap ging pen biakinntual puanung ciang dongah kiza a, Vanglian Pasian a pau ciangin a awging tawh kibang hi. Kherubte’ nuai-a om leengpeite kikal panin mei a la dingin Topa in saihadial puan silhpa a sawl ciangin tua mipa zong va pai-in leengpei khat gei-ah va ding hi. Tua ciangin kherub khat in a khut zanin amaute’ kikal-a om meikhuk sawkin mei-am pawlkhat la a, saihadial puan a silhpa’ khut sungah koih hi. Saihadial puan a silhpa in zong tua mei-amte tawi-in paikhia hi. Tua kherubte in a kha nuai ciat uhah mihing khut tawh a kibang nei ciat uh hi. Tua kherubte gei-ah leengpei khat ciat omin, tua leengpeite suangmanpha bangin tee hi. Tua leengpeite a pianzia kibang kim a, leengpei khat in a kikantanin peei dang khat ciat nei thuah uh hi. Tua kherubte a pai ciangin kihei kul loin a utna lam peuhpeuh ah pai thei uh hi. A pai nading lam a nga a pei’ paipaina-ah adangte in zui-in kihei tuan lo uh hi. A leengpei kualte, a pei kan’na khaute leh a pei buppi dimin mittang om hi. Hih leengpeite pen maang ka muhmasakna sungate mah tawh kibang hi. Tua kherubte in maitang li ciat nei uh hi. A maitang khatna bawngtal maitang, a nihna mihing maitang, a thumna humpinelkai maitang, a lina muvanlai maitang tawh kibang hi. Hih Kherubte pen Khebar Gun gei-a ka muh ganhingte mah ahi hi. Tua ciangin hih kherubte leeng to uh a, amau a kin uh ciangin a leengpeite in zong zui uh hi. A leeng dingin a kha a zal uh ciangin zong leengpeite in zui lai uh hi. Kherubte a khawl ciangin leengpeite khawl a, kherubte a leen’ ciangin leengpeite in zong zui uh hi. Bang hang hiam cih leh tua leengpeite pen kherubte’ khut nuai-a om ahi uh hi. Tua ciangin biakinn kong panin Topa ’ minthan’na paikhia-in kherubte’ tung sanah va om hi. Tua banga ka et lai takin kherubte in zong a kha uh zalin lei lak panin leeng to uh a, leengpeite in zong zui uh hi. Biakinn nisuahna lam kongpi-ah khawl uh a, amaute tung sanah Israel Pasian’ minthan’na zong hong khawl hi. Hih kherubte pen, Israel Pasian a kumpitokhom tawh a pua, Khebar Gun gei-a ka muh ganhingte mah hi, ci-in ka thei hi. Amaute in maitang li, kha li, leh a kha nuai ciat uhah mihing khut tawh a kibang khut nei ciat uh hi. Amaute’ maitang pen Khebar Gun gei-a ka muhsa maitangte mah tawh kibang teekteek a, a pai uh ciangin a mailam ciat mah-ah tang takin pai thei uh hi. Tua ciangin Pasian’ Kha in biakinn nisuahna lam kongpi-ah hong paipih hi. Tua kongpi gei-ah mihing sawmnih leh nga na om a, tuate lakah minam makai ahi nihte, Azzur’ tapa Jaiazaniah leh Benaiah’ tapa Pelatiahte zong na kihel uh hi. Pasian in kei kiangah, “Ezekiel aw, hih mite pen khuapi sungah thu hoih lo a gen migilote ahi uh hi. Amaute in, ‘A sawt loin innlamna panin a meet i ngah ding hi. Hih khuapi in anhuanna beel tawh kibang a, eite in a sunga om sa kihuan tawh i kibang hi. Eite pen mei in hong kang thei lo ding hi,’ ci uh hi. Tua ahih ciangin Ezekiel aw, hih mite tungah thukhenna thu gen in,” hong ci hi. Topa ’ Kha ka sungah hong lutin hih bangin mite tungah thugen dingin hong sawl a, “Israel mite aw, na thugente uh leh na ngaihsutnate khempeuh uh ka thei hi. Hih khua sungah mi tampi tak that na hih manun kongzing khempeuh ah siluang hawm kidim hi. Tua ahih ciangin Topa Pasian ahi keimah in note kiangah kong gen thu in: Hih beel tawh kibang hi, na cih uh man hi. Beel sunga om sa pen na thahsa uh misi luanghawmte ahi hi. Ahi zongin note ahih leh khuapi sung panin kong lawnkhia ding hi. Note in namsau na kihta uh hi. Ahi zongin namsau tawh note a hong sat ding mi kong paisak ding hi. Khuapi sung panin note hong la khia-in gamdang mite khut sungah kong pia ding hi. Note a si dingin thu kong khen khin hi. Na gam sung uhah galin na si ding uh hi. Tua ciangin Topa ka hih lamtak mi khempeuh in thei ding uh hi. Note in beel sunga sa na hi kei uh hi. Hih khuapi in note hong hu lo ding hi. Israel gam sung na omna peuhpeuh uhah daan kong pia ding hi. Note’ kiim-a om minam dangte’ ngeinate zui-in na om lai takun, keimah in Topa ka hihna thu, na palsat uh thukhamte keima thukham ahihna, leh na zuih loh uh thupiaknate keima thupiak ahihna na thei ding uh hi,” ci-in gen in hong ci hi. Tua bangin mailam thupiang ding genin ka om lai takin Benaiah’ tapa Pelatiah hong din’sih hi. Kei zong lei-ah bok sukin ka kiko a, “ Topa Pasian aw, Israel gam sunga a om lai mi khempeuh thah khit sawm na hi hiam?” ka ci hi. Topa in kei kiangah thu hong gen a, “Ezekiel aw, Jerusalem khua sunga teeng mite in nang leh sal-a om na Israel mipihte’ thu gen uh a, ‘Sal-a om mite pen Topa tawh kigamla om lua khin ta uh hi. Amah in eima luah dingin hih gam hong pia khin ta hi,’ ci uh hi. Tua ahih ciangin na salpihte kiangah hih bangin keima thugente va gen sawn in: A gamlapi gamah a teeng dingin puak khia-in, gam dangah a thehthangpa in keimah ka hi hi. Ahi zongin amaute’ omna gam dangah tawl khat sung bek kei a hong bia dingin ka om sak ahi hi. Tua ahih manin Topa ahi keimah in amaute kiangah ka gen thu va gen in. Amaute ka thehthangna gam panin khawm kikin, amaute tungah Israel gam ka pia kik ding hi. Amaute hong ciahkik ciangin a nin nate khempeuh leh a muhdahhuai milimte khempeuh a nilkhia ding ahi uh hi. Amaute tungah kithu tuakin thumanna lungsim thak ka pia ding hi. Amaute’ suang lungtang paihkhiatsakin mihing lungtang ka guan ding hi. Tua ciangin amaute in ka thukhamte zui-in ka thupiak khempeuh citakin mang ding uh hi. Amaute in keima mi hi-in, keimah in amaute’ Pasian ka hi ding hi. Ahi zongin a nin a muhdahhuai milim bia nuamte ahih leh daan ka pia ding hi. Amau’ gamtatna tawh kizui-in daan ka pia ding hi. Topa Pasian ahi keimah in hih thu ka hong gen hi,” hong ci hi. Tua ciangin kherubte in leeng dingin a kha zal uh a, a leengpeite in zong zui hi. Israelte’ Pasian’ minthan’na amaute tung sanah om hi. Tua ciangin Topa ’ minthan’na zong khuapi sung panin paikhia-in khuapi nisuahna lam-a om mual tungah om hi. Tua ciangin ka maang sung mahin Pasian’ Kha in hong leen’pihin Babilon gama sal-a omte kiang hong tun’pih kik hi. Tua ciangin ka maang muhna hong bei a, Topa in kei hong muhsaksa thute khempeuh, sal-a om mite kiangah ka gen hi. Topa in kei kiangah thu hong gen a, “Ezekiel aw, a lehdo thei mite lakah a teeng na hi hi. Amaute in mit nei napi-in khua mu lo uh a, bil nei napi-in bangmah za thei lo uh hi. Amaute pen a lehdo thei mite ahihna hang uh ahi hi. Ezekiel aw, tu-in galtai dingte’ gamtat bangin na van puak ding guang in la, suntangpi-in paikhia in. Na omna panin na paikhiat lam mi khempeuh musak in. A lehdo thei mi ahih tei hangun a thu thei thei kha ding uh hi. Khuavak lai-in mite’ muhin sal-a pai dingin na van guang in, nitak ciangin sal-a pai ding bangin na pai khiatna mite musak in. Tua bangin amaute in hong et lai takin na kawm sulet in la, tua vang panin na van la khia in. Amaute’ muhna ah na van na liangko-ah kisuanto in la, na pai nading mun na muh theih loh nadingin mit tunsa-in khuamial lakah paikhia in. Hih banga na gamtatna pen Israel mite’ adingin hilhkholhna khat hi ding hi,” hong ci hi. Kei zong Topa ’ hong sawl bangin ka gamta hi. Galtaite’ hih ding bang teekin tua sunin ka van guangin, tua nitak khua a mial ciangin ka khut tawh kawm ka sulet hi. Amaute’ muh mahin ka liangko-ah van kisuanin ka paikhia hi. A zingsang ciangin Topa in kei kiangah thu hong gen a, “Ezekiel aw, a lehdo thei Israel mite in na gamtatna thu nang hong dong hi. Topa Pasian ahi keimah in amaute kiangah ka gen thu tu-in gen in. Tua thu in Jerusalem khua sung a uk ulianpa leh Jerusalem khua sunga teeng mi khempeuhte’ ading ahi hi. Na gamtatnasate pen amaute tunga thu piang ding lahna lim ahihna thu gen in. Amaute pen a kiman mi, sal a suak ding ahi uh hi. Amaute a uk ulianpa in khuamial lakah ama van a liangko-ah pua-in paikhia ding hi. Ama paikhiat nadingin amaute in kulh tawhvang sakin tua panin amah suakta ding hi. Amah in a mai humcip ding ahih manin a paina mun mu thei lo ding hi. Ama pai nading munah ka ngenthang ka zak ding a, amah awk ding hi. Tua ciangin Babilon khuapi-ah amah ka paipih ding a, a khuapi mu lopi-in tua lai-ah si ding hi. A ulianpite, a thu lamlakte, leh amah a cingte, mun citengah ka thehthang ding a, amaute a that dingin namsau ka nung delhsak ding hi. Minam dangte lak leh gam dangah amaute ka thehthang ciangin Topa ka hihna thu amaute in phawk ding uh hi. Ahi zongin gal sung, kialpi leh natna sung panin tawm khat ka suaktasak dinga minam dangte’ lak-a a omna mun panun a gamtatnasate uh a muhdahhuaina phawkin, keimah in Topa ka hihna thu hong thei ding uh hi,” hong ci hi. Topa in kei kiangah thu hong gen a, “Ezekiel aw, lau mahmahna tawh a liing kawmsa-in an ne-in tui dawn in. Hih banga na gamtatna pen, amaute gama om lai ahi Jerusalem khua mite tungah Topa Pasian’ thugenna ahihna thu va gen in. Amaute in launa liin’na tawh an ne-in tui dawn ding uh hi. Amau’ gam sunga teengte a gamtat hoih khat beek om lo ahih manin, a gam sunga om khempeuh kipaikhiatpih mang ding hi. Mihing a dimna khuapite kisusia ding a, gamsung khempeuh gamkhing suak ding hi. Tua ciangin Topa ka hihna thu hong thei ding uh hi,” hong ci hi. Topa in kei tungah thu hong gen a, “Ezekiel aw, bang hangin ‘Hun beibei a, genkholhnate a tung om lo hi,’ cih paunak pen Israel mite lakah zat belin kinei ahi hiam? Tua ahih ciangin Topa Pasian ahi keimah in tua tawh kisai-in ka thugenna amaute kiangah gen in. Hih paunak ka beisakta ding a, Israel mite in genin a nei nawn kei ding uh hi. Tu-in a hun a naina leh genkholhnate a manin a tun’ nading thu amaute kiangah gen in. Israel mite lakah maangmuhna man lo ahi a, genkholhna man lo ahi zongin om nawn lo ding hi. Topa ahi keimah in amaute tungah thu ka gen ding a, ka gen bangin tung takpi ding hi. Tu-in zekai nawn lo ding hi. A lehdo thei mihingte aw, hih dinga ka gen bangin nomau nuntak sung mahmahin ka tungsak ding hi. Topa Pasian ahi keimah in thu ka gen khin zo hi,” hong ci hi. Topa in kei kiangah thu hong gen leuleu a, “Ezekiel aw, na maang muhnate leh na thugen kholhnate pen mailam hun saupi ciangin a piang pan dingin Israel mite in ngaihsun kha uh hi. Tua ahih ciangin Topa Pasian ahi keima thu genna: ‘Zekai cih om nawn lo ding a, ka gensa bangin tung ding hi. Topa Pasian ahi keimah in ka gen khin zo hi,’ ci hi,’ ci-in gen in hong ci hi. Topa in kei tungah thu hong gen a, “Ezekiel aw, Israel kamsangte mawhsakna gen in. “ Topa ’ thugen ngai in,’ ci khemin amau’ lungsim bangin thu a gente’ tungah gen in. Topa Pasian’ thugen in hih bang ahi hi: hih kamsang haite in gimna thuak ding uh hi. Amaute in amau’ lungsim bangin thugen tawmin, maangmu kineih uh hi. Israel mite aw, na kamsangte uh ahih leh inn sia lak-a om ngiate tawh kibang uh hi. Amaute in kulh a kicipna munte cing lo uh a, a kicimte ciangkik lo uh ahih manin Topa ’ ni-in gal hong tun’ ciangin Israelte hu zo lo uh hi. Amaute’ maangmuhnate in zuaupi hi a, a thugen kholhnate uh zong thu zuau ahi hi. Keimah in amaute sawl lo napi-in, amaute in, ‘ Topa in hih bangin gen hi,’ ci khem uh hi. Tua bang hi napi-in amaute’ thugente ka tun’sak ding a lamen lai uh hi. Tua ahih manin amaute kiangah ka gen thu in: ‘Na maangmuhnate uh zuaupi hi a, na thugen kholhte uh thu zuau ahi hi. Note kiangah keimah in thu hong gen lo napi-in keima gen bangin na gen uh hi,’ ka ci hi,’ hong ci hi. Tua ahih ciangin Topa Pasian in amaute kiangah, “Na thugente uh zuaupi hi a, na maangmuhnate uh zuaupi ahi hi. Tua ahih manin note kong langpan’ hi. Zuau thu tawh maangmu kineihin, mite a khialh theih nadingin zuau thu a gen khol no kamsangte daan a hong pia ding ka hi ta hi, Ka mite a kikhop uh ciangin tuate lakah na kihel kei ding uh a, Israel mite’ min a kigelhna lakah note’ min kigelh lo ding hi. Na gam uhah na ciahkik ngei kei ding uh hi. Tua ciangin Topa Pasian ka hihna thu na thei ding uh hi. Bang hang hiam cih leh thu hoih lo napi-in hoih hi, ci khemin ka mite lam na kai khial uh hi. Ka mite in kulh dingin suang a cian’ uh ciangin no kamsangte in a tungtham buan tawh na zut uh hi. Tu-in na kulh zut uh kicim ding hi. Tu-in guahpi ka zusak ding a, gialpite in tua kulh kha-in huihpi hat in mutgawp ding hi. Tua bangin kulh a kicip ciangin na kulh zut uh bang phattuamna om ahi hiam, ci-in mite in hong dong ding uh hi. Tua ahih manin Topa Pasian ahi keima thugen in: Ka hehna tawh huihpi nungsakin, guahpi zusakin, gialpi kiasak in, tua kulhpi ka susia ding hi. A tungtham na zut uh kulh sukhamin, thehthangin, a bul dawksak ding a sawm ka hi hi. Tua bangin ka suksiat ciangin note a hong deng lum ding hi. Tua ciangin Topa ka hihna thu mi khempeuh in thei ding uh hi. Tua bangin kulh leh a zut note in ka hehna na thuak ding uh hi. Tua ciangin keimah in, ‘Tu-in kulh maimang ta a, tua mah bangin kulh a zut mite— thu hoih lo napi-in, thu hoih hi, ci-in Jerusalem a lungmuan’ nadingin thu a gen kamsangte zong bei khin ta hi,’ ka ci ding hi. Topa Pasian ahi keimah in hih thu ka gen hi,” a ci hi. Tua ciangin Topa in, “Ezekiel aw, na mite’ laka om a thugen ding uh a phuak tawm numeite en in. Amaute’ gamtatna hangin mawhsakna thu gen in la, Topa Pasian ahi keimah in amaute tungah ka gen thu hih bangin gen in: No numeite in gimna na thuak ding uh hi. Mi khempeuh in a khut-a a bulh ding uh leh a lu tungah a khip ding uh aite na bawl uh a, tua nate in mite’ lungsim uk hi. Note’ phattuam nadingin sihna ding leh hin’ nading vangliatna thu, ka mihingte tungah na zang nuam uh hi. Mangbuhham khut khat dim leh anlum them tawm khat na ngah theih nadingun ka mite mai-ah kei nong minsiasak uh hi. A si dingin a kilawm lopite na that nuam uh a, a hing dingin a kilawm lopite na hingsak nuam uh hi. Tua bangin ka mite tungah zuau thu genin, amaute in note’ thugen hong um uh hi. Topa Pasian ahi keimah in ka gen thu in: Sihna leh hin’na ukna-in na zat uh na aite uh ka deih kei hi. Note’ khut panin tuate hong bawhkhiatsakin, ukcip dingin na hanciam uh mite ka khahkhia ding hi. Na ai khipte uh zong hong hawkkhiatsakin note’ khut sung panin ka mite ka suaktasak paisuak ding hi. Tua ciangin Topa ka hihna thu na thei ding uh hi. Keima gen hilo pi-in, na thu zuau gen teng uh tawh mi hoihte na lunggimsak uh a, mi gilote a nuntak theih nadingun hong kihei loh nadingin na lehhanthot zawsop uh hi. Tua ahih ciangin tu-in na zuau maangmuhnate uh leh mi lam a khialsak thei na thugen kholhnate uh bei ta ding hi. Note’ khut sung panin ka mite ka honkhia ta dinga tua ciangin Topa ka hihna thu na thei ding uh hi,” hong ci hi. Tua ciangin Israel mi makai pawlkhat kei kiangah hong pai-in Pasian’ deihna bang hiam, ci-in hong dong uh hi. Tua ciangin Topa in kei kiangah thu hong gen a, “Ezekiel aw, hih mite in milim bia uh a, milim in mawhna sungah amaute tun’ pih hi. Amaute’ thu theih nopte a gen dingin hong um uh ahi hiam? Tua ahih ciangin Topa Pasian ahi keimah in amaute tungah ka gen hih thute gen in: Milim bia-in, mawhna sungah milimte kitun’sak a, tua khit ciangin kamsangte tungah thu dongin hong pai Israel mi peuhmah in keima thu dawn’na kam ngah ding uh hi. Tua thu dawn’na pen a milim tampite un a zak ding uh a, a kilawm dawn’na hi ding hi. Tua milimte in keima kiang panin Israel mite pai khiatpih uh a, ahi zongin tua bangin ka dawn’na tawh kei lamah ka mite ngahkik dingin ka kilamen hi. ”Tua ahih ciangin Topa Pasian ahi keima thugen pen Israel mite tungah gen in: Hong kihei kik un la, na milimte uh nusia un. Israel mite khatpeuh peuh ahi a, Israel mite lakah a om gamdang mi khatpeuh peuh in ahi zongin, kei kiang panin pai khia-in milim bia-a, milim in mawhna sungah a tun’pih khit ciangin kamsangpa tungah thu dong dingin a pai leh, Topa ahi keimah in ama thu theih nop ka gen ding hi. Amah nialin, midangte’ etteh dingin ka bawl ding hi. Keima mite lak panin amah ka la khia ding hi. Tua ciangin Topa ka hihna thu na thei ding uh hi. Kamsang khatpeuh peuh kikhemin a man loin thu hong dawn’ leh, Topa ahi keima’ khem hi ding hi. Israel mite lak panin tua kamsangpa ka la khia ding hi. Kamsangpa leh kamsang thu a dongpa a daantuahna uh kibang ding hi. Israel mite in kei hong nusiat loh nading leh a mawhna uh tawh a kinitsak loh nadingun hih bangin ka hih ding hi. Amaute in keima mi hi ding uh a, keimah in amaute’ Pasian ka hi ding hi. Topa Pasian ahi keimah in hih thu ka gen hi,” hong ci hi. Topa in kei kiangah thu hong gen a, “Ezekiel aw, gam khatpeuh peuh in khialhna bawlin kei tungah hong thuman kei leh keimah in a annek ding teng uh ka susia ding hi. Kialpi tungsakin a mihing a ganhing-in ka siasak ding hi. Noah, Daniel leh Job, hih mihing thumte nangawn, amaute’ lakah a om hi leh, amaute’ hoihna in amau’ nuntakna ciat bek mah suaktak zo ding uh hi. Topa Pasian in ci hi. Mite a that dingin gamsa kihtakhuaite khah khia-in, kuamah khual a zin ngam lo dingin tua gam sung a lauhuai-in om leh tua gam sungah hih mihing thumte nangawn a om bang hi leh, amaute’ tanute leh tapate nangawn uh suahtak zo loin, amaute’ nuntakna ciat bek mah suahtak zo ding uh a, tua gam in gamkhing suak takpi ding hi, ci-in a nungta Topa Pasian ka kiciam hi. Tua gam sungah gal tungsakin, mihing ganhing a siaksiang dingin a husia galhiamte kizang leh, tua sungah hih mihing thumte a om hangin amau’ pumpi ciat cih sim loh, amau’ tate nangawn suahtak zo tuan lo ding hi, ci-in a nungta Topa Pasian ka kiciam hi. Tua gamah pulpi tungsakin, ka hehna tawh mihing ganhing sisak leng, tua sungah Noah, Daniel, leh Jobte a om ahi zongin, amaute’ hoihna in amau’ nuntakna ciat bek a hut zawh cih loh, amaute’ tate nangawn hu zo het lo ding hi, ci-in a nungta Topa Pasian ka kiciam hi. “ Topa Pasian’ thugen in hih bang ahi hi. Mihing ganhing a sumai dingin daan nasia pen li ahi gal, kialpi, a kihtakhuai gamsate, leh natna, Jerusalem ah ka tungsak ding hi. A tanute a tapate a paikhiatpih dingin mi khatpeuh peuh a suakta zo kha a om a, nang kiangah hong pai leh, amaute’ omzia na en in. Amaute’ gitlohna zia na mu ding a, Jerusalem daan ka piakna a kilawm a thuman mah ahihna na phawk ding hi. Amaute’ gitlohna zia na muh ciangin ka hihnate khempeuh a kilawm mah ahihna na phawk ding hi. Topa Pasian in thu hong gen khin ta hi,” hong ci hi. Topa in kei kiangah thu hong gen a, “Ezekiel aw, leenggui pen singkung tawh bangci kiteh theih ding ahi hiam? Tulak-a om singkungte tawh tehna-in leenggui hiangte banga kimang ahi hiam? Leengguite na-in kizang thei ahi hiam? Vankhaina-a zat dingin singzum khet dingin kimang thei ahi hiam? Mei tawh nading bekin kimang hi. A mong tuak a kattum khit ciangin a om lai a zul kat teng, bangin kimang nawn ahi hiam? A kat ma-in zong bangmah in kimang lo ahih manin, kangin a vom khit ciangin a kiman’na om lo semsem hi. Tua ahih ciangin Topa Pasian in hih bangin ci hi: Tu laka om singte kiman’na nei hi. Ahi zongin leengguite kila-in a kihaltum mah bangin Jerusalem-a teeng mite, la khia-in, daan ka pia ding hi. Mei panin khat vei a suahtak khit hangin, tu-in mei in amaute kangtum ding hi. Amaute daan ka piak ciangin Topa ka hihna thu na thei ding hi. Kei tungah amaute hong citak lo uh ahih manin gam sung teng khempeuh gamkhing ka suaksak ding hi, Topa Pasian in ci hi,” hong ci hi. Topa in kei tungah thu hong gen kik a, “Ezekiel aw, a mudahhuai in a gamtatna thu Jerusalem tungah gen in. Topa Pasian in Jerusalem tungah ka gen hih thute gen in: Jerusalem aw, nang in Kanaan gam pan-a piang na hi hi. Na pa in Amor mite hi a, na nu in Hit mite ahi hi. Nang na suah lai-in kuamah in hong don lo hi. Na lai hong kitansak lo a, hong kisil lo a, ci tawh zong hong kizut lo a, puan tawh zong hong kitun lo hi. Hihte khempeuh a hong hih dingin kuamah in nang hehpihna lungsim hong nei lo hi. Na suah lai-in kuamah in nang hong it lo ahih manin gamlakah nang hong kipaidak lel hi. “Tua ciangin na kiangah kong pai kha a, sisan naisan lak-a na kitomtom kong mu hi. Tua bangin na om lai takin na sih loh nadingin thu kong pia hi. Singkung hoih bangin nang kong khangtosak hi. Nang cidamin nong khangto a, nungak nong suak hi. Na nawite zong hoih tak mahin hong bawk a, na mul zong hong po ta hi; ahi zongin guaktang-in na om hi. “Nang kong muhkhak kik ciangin pasal nei thei ding hun na hita hi. Na pum guak-a a om kimlai, ka puan tawh kong khuh a, na zumhuaina teng hong seelsakin, teen’pih dingin kam kong ciam hi. Kong kamciamna tangtung sakin nang in keima aa nong suak hi,’ Topa Pasian in ci hi. Kei zong tui la-in na tunga si baang teng kong sawpkhiatsak a, oliv thau tawh kong zut zol hi. Puanphan kizem hoihte tawh nang hong zemin, savun hoihpen tawh a kibawl khedap hong bulhsakin, saihadial puan hong khimsakin, naipuan tungsilh kong silhsak hi. Kizepna a manphate nang kong pia a, tau hong butsakin, khainiang kong oksak hi. Nakbahte, bilbahte leh na khuk ding kumpi lukhu hoih kong guan hi. Tua bangin kham leh ngun kibawl kizepnate tawh na kizem a, saihadial puan, naipuan, leh a kiphan a kizem bek na silh tawntung hi. Annel hoihpen pawl a, kibawl anlum ne-in, nek ding khuaizu leh oliv thaute na kitasam ngei kei hi. Na hoihna a kigen thei lo zahin hong om a, kumpinu na suak hi. A paubaang het lo dingin nang hong bawl ka hih manin na meel hoihna gam khempeuh ah kithang kawikawi hi, Topa Pasian in ci hi. “Ahi zongin na meel hoihna leh na minthan’na a sia lamin zangin, na tuah peuhpeuh luppih ding zolna-in na zang hi. Na puan pawl khatte, na biakna mun zep nadingin na zang a, numei paktat bangin mi citeng tungah na pumpi na pia hi. Nang kong piaksa kham leh ngun kibawl kizepnate, pasal limin na bawl a, tuate tawh paktatna na gamta hi. Nang ka hong piak, a kizem a kiphan puan hoihte la-in milimte na silhsak a, nang ka hong piak oliv thau leh paknamtuite, milim biakna-in na zang hi. Na nek dingin a limci pen annel, oliv thau, leh khuaizu kong pia a, ahi zongin milim maipha zon’ nadingin biakna-in tuate na zang hi. “Tua ciangin kei tawh na neih na tanute leh na tapate la-in milim biakna-in haltum dingin na pia hi. Kei tungah na cihtaklohna thuneu lua sa a, milim biak nadingin ka tate pia thuah lai na hi hiam? Hih bangin numei paktat nuntakna tawh a mindai huai-in na om lai takin na neu lai thu, tangguakin na om lai, sisan naisan lak-a na kitomtom lai thu na phawk kha kei hi. Topa Pasian in hih bangin ci hi: Gimna na thuak ding hi. Hih bang siatna nam khempeuh na gamta khin a, lam gei khempeuh ah milim biak nading mun bawlin, paktatna na gamta hi. Na meel hoihna beelmang na kizutnelh hi. Na kimuhpih peuhpeuh tungah na pumpi na kipia a, a ni ni-in na paktatna na khan’ semsem hi. A lan mahmah na veng Izipt mite na luppih a, na paktatna tawh kei nong hehsak hi. “Tu-in nangmah daan a pia ding leh na nopsakna teng a la khia dingin ka khut ka liik khin hi. Nang hong mudahin, na gamtat hoih lohna hangin nang a hong hua Filistia mite khut sungah nang kong pia zo hi. Bang hang hiam cih leh adangte tawh lungkim zo nai lo na hih manin Assiria mite na nungdelh lai hi. Tuate tawh na paktat a, ahi zongin na lungkim zo nai sam kei hi. Sumbawl Babilon mite tawh na paktat a, ahi zongin tuate tawh zong na lungkim zo tuan sam kei hi. “ Topa Pasian in hih bangin ci hi: A bangci lawmlawm na hi hiam? Zumna mel thei loin hih bangin na paktat hi. Kongzing citengah milim biak nading mun na bawl a, paktatna na gamta hi. Ahi zongin numei paktat dangte bangin sum a ngah zong na hi kei hi. A pasal it zaw loin, gamdang mite tawh mawhna a bawl numei tawh na kibang hi. Numei paktatte sum tawh kiguai a, ahi zongin nang in na lunggulhte tungah letsong pia zaw sopin, nang hong luppih dingin mun khempeuh panin mi na guai zaw hi. Nang in a tuampian numei paktat na hi hi. Kuamah in na tuaci gamtat nadingin hong zol lo hi. Nang tungah sum tawh guaihna hong kipia loin nang in na pia zawsop hi. Tua ahih manin a tuampian mahmah na hi hi. “Tua ahih ciangin numei paktat aw, Topa ’ thu ngai in. Topa Pasian in hih bangin ci hi: Nang in na puante suahkhia-in, numei paktat bangin na pumpi na lunggulh mite leh na milimte tungah kipia-in, milim biakna-in na tate that na hih manin, na lawm luite khempeuh—na itte hita leh, na mudahte hita leh, a vekpi-in ka kaikhawm ding hi. Na kimkot-ah amaute omsakin, tua ciangin na puan teng kong hawkkhiatsak ding a, na guaktangin na omna ka en sak ding hi. Midang tawh na mawhna hang leh na mi thahna hangin thu kong khen ding a, ka hehna tawh sihdaan kong pia ding hi. Na lunggulh mite’ khut sungah kong pia ding a, na paktat gamtatna munte leh na milim biakna munte, amaute in susia gawp ding uh hi. Na puante leh a manpha na kizepnate hong lakkhiatsakin, na guaktangin hong koih ding uh hi. Amaute in mihonte hanthawnin, tua mihonte in suang tawh nang hong deengin, a namsau uh tawh hong satzan ding uh hi. Amaute in na innte hong haltum sakin, na daantuahna, numei honpi en sak ding uh hi. Numei paktat na hihna kong khawlsak ding a, na mawhpih ding pasalte sum tawh na guaihna kong khawlsak ding hi. Tua ciangin ka hehna dam ding a, dai takin ka om ding hi. Na tungah ka heh nawn kei ding a, zong kong aam nawn kei ding hi. Na neu lai-a kong bawlna teng na mangngilh a, hih bang tenga na gamtatnate tawh kei nong hehsak hi. Tua ahih manin na gamtatna tawh kizui-in kong thuk hi. A muhdahhuai na gamtat dangte banah bang hangin hih paktatna gamta thuah na hi hiam, Topa in ci hi. Topa in, “Jerusalem aw, ‘Tanu in a nu sun,’ cih paunak pen mite in nang tungah hong zang ding uh hi. Nang pen na nu’ ta taktak na hi hi. Na nu in a pasal leh a tate mudah hi. A pasalte uh leh a tate uh a mudah na sanggam numeite mah tawh na kibang hi. Nang leh na sanggam numei khuapi dangte in nu-in Hit mi nei-in, pa-in Amor mi na nei uh hi. Na u nu in leilu lam-a om Samaria leh a khuaneute ahi hi. Na nau nu in leitaw lam-a om Sodom leh a khuaneute ahi hi. Amaute’ khekhap zui-in a muhdahhuai amaute’ gamtatnate bek tawh na lungkim zo nai kei lai a, tawmvei sungin na gamtatna khempeuh ah amaute sangin na sia zaw hi. Keimah in a nungta Topa Pasian ka hih takpi mah bangin kong cihin ah: Nang leh na khuaneute gamtat siat zahin na sanggamnu Sodom leh a khuaneute gamtat sia ngei nai lo hi. Na sanggamnu’ mawhna in: Amah leh a tanute in nek ding tampi nei-in nuamsa mahmahin dai takin om uh ahih manin amaute kiphasak uh a, a zawng a cimawhte don lo uh hi. Amaute kihisakin ka deih loh nate gamta uh ahih manin, na theih mah bangin amaute ka susia hi. Samaria in nangma gamtatsiat zah lang zong gamta lo hi. Na sanggamnu sangin gamtat sia zaw mahmah na hih manin, nang leh na sanggam numei dangte i etkak ciangin, amaute a mawh mah hi napi-in a mawh lo zah phialin hong kimu hi. Tu-in na mindaina teng na thuak kul hi. Na sanggam numeite’ mawhna sangin nangma mawhnate nak siatzaw lua ahih manin nang kiang panin amaute a mawh lo tawh kibang phial hi. Na sanggam numei dangte a siangtho bangsak phial na hih manin zahla in la, maizum in. “Ahi zongin, Sodom leh a khuaneute, leh Samaria leh a khuaneute a cithei-in ka bawl kik ding hi. Tua mah bangin nang Jerusalem zong kong citheisak kik ding hi. Na gamtatnasate hangin na maizum ding a, tua na maizumna in na sanggam numei dangte maingalsak tuam ding hi. Na sanggam numei Sodom leh a khuaneute, leh Samaria leh a khuaneute cithei kikin a ngei uh bangkik ding uh a, nang leh na khuaneute zong na cithei kik ding uh hi. Na gamtat hoih lohna, na zumhuai gamtatna teng na thuak kul hi, Topa in ci hi. “ Topa Pasian in hih bangin ci hi. Nang in i kamciamna leh i thuciamna don lo na hih manin nangma gamtatna bangin nang tungah kong gamta hi. Ahi zongin na neu lai-a nang tawh i thuciamna lenkipin, a kimang tawntung ding thuciamna nang tawh ka bawl ding hi. Na u nu leh na nau nu na ngahkik ciangin na gamtatnasa teng phawk kikin na mai a zum ding hi. Nang tawh i thuciamna sungah a kihel loh hangin amaute pen nangma tanu bangin hong om ding uh hi. Nang tawh ka thuciamna ka bawl pha ding a, tua ciangin Topa ka hihna thu na thei ding hi. Na gamtatnasa khempeuh kong maisak khit ciangin na gamtatnasa khempeuh na phawkkik ding a, maizum lua-in cihna ding mel thei loin na om ding hi, Topa Pasian in ci hi,” hong ci hi. Topa in kei tungah thu hong gen a, “Ezekiel aw, Israel mite kiangah thugentehna khat gen in la, Topa Pasian in hih bangin ci hi, ci-in gen in: Muvanlai a gol mahmah, a khate zong golin a kizal deda khat om hi. Tua muvanlai in khaveng hoih mahmah nei hi. Lebanon Mual tungah va leengin taamtaak kung khat a dawn va kuaitan a, sumbawlte omna gamah pua-in sumbuk bawlte khuapi sungah koih hi. Tua ciangin Israel gam panin leenggui no khat la-in, a khan’ theih nadingin tui a om tawntungna lei hoih mun khatah suan hi. Tua leenggui no hong khangin a hiangpha leengguipi hong suak hi. A hiangte pen muvanlai lamah zaam a, a zungte in lei sung thukpi-ah zung kha hi. Tua leenggui in hiang leh teh tampi tak nei hi. “Tua ciangin a gol mahmah, a khate golin a mul a pha mahmah muvanlai dang khat om hi. Tua ahih manin tua leenggui in ama kisuannasa mun-a tui a ngahsa sangin tui a tamzaw pia zo ding ci-in lametna tawh tua muvanlai lamah a zung kha-in a tehte zong tua lam mah ngasak hi. Ahi zongin tua leenggui pen, a teh no-in, a gah gah thei-in leenggui lianpi a suah theih nadingin lim takin tui a ngah theihna mun lei hoihna sungah a kisuan khinsa ahi hi. “Tua ahih ciangin Topa Pasian ahi keimah in ka dot nop thu in, ‘Hih leenggui hingin khang zo ding ahi hiam? Muvanlai masa pen in zung bawhin, a gahte zut khia-in, a hiangte kuaitanin, keutumsak ding hilo ahi hiam?’ cihna ahi hi. Tua leenggui bawh khiatna dingin thahatna ahi a, minam lianpi ahi zongin kisam lo hi. Hih leenggui pen a kisuan hi mah hi. Ahih zongin hingin khang zo ding ahi hiam? Nisuahna huihpi in a mutkhiat ciangin keutum ding hilo ahi hiam? Tua a kisuanna munah keutum lel ding hilo ahi hiam?” hong ci hi. Tua ciangin Topa in kei tungah, “Hih a lehdo thei mite in hih thugentehna a khiatna a thei uh hiam, dong in, Babilon Kumpipa Jerusalem khua-ah hong pai-in a kumpipa leh a uliante manin Babilon-ah a ciahpihna thu gen in. Amah in kumpipa’ innkuanpih mite khat la-in, amah tawh thuciamna khat bawl a, ama tungah a thuman taktakna dingin kiciamna bawlsak hi. Tua gam-a mi liante ciahpih hi. Bang hang hiam cih leh tua minamte in lehdo kik nawn loin, a thuciam bawlna uh a kizuih nading a deihna ahi hi. Ahi zongin Judah Kumpipa in amah lehdo veve a, sakol galkapte leh galkap honpite a ngen dingin Izipt gamah mi paisim sak hi. A deihna bangin tangtung ding ahi hiam? Tua banga a gamtatna tawh suakta zo ding ahi hiam? A thuciamna palsat napi-in daan thuak loin om thei ding ahi hiam? Keimah in a nungta Topa Pasian ka hih mah bangin, kumpi tokhom tungah a tusak, Babilon Kumpipa tawh a thuciamna palsat ahih manin Babilon gamah hih kumpipa si ding hi. Babilon mite in mi tampi a thah theihna dingun kan bawlin dum a tawh uh ciangin a thahat Faro’ galkap honpite nangawnin amah huh zo lo ding uh hi. Amah in a kiciamna leh a thuciamnasa palsatin hih bangin gamta khin ahih manin, amah suakta ngei lo ding hi. “Tua ahih ciangin keimah in a nungta Topa Pasian ka hih mah bangin a zuih dingin keima min tawh a kiciam thukimna palsat ahih manin daan ka pia ding hi. Amah a awk theih nadingin ngenthang ka zak ding a, amah ka awksak ding hi. Kei tungah amah hong thutak lo ahih manin Babilon-ah paipihin tua lai-ah daan ka pia ding hi. A galkap muanhuai pente, gal sungah si ding a, a suakta sunte zong mun citengah kithehthang ding hi. Tua ciangin Topa ahi keimah in thu a gen ka hih lam na phawk ding hi,” hong ci hi. Tua ciangin Topa Pasian in, “Keimah in taamtaak sangpi a dawn khat la-in, a dawnngeek khat ka satkhia ding a, mual sangpi dawn khatah ka suan ding hi. Israel mual sang pen dawn-ah suanin, a hiang zai-in a gah luai ding a, taamtaak lianpi khat suak ding hi. Tua tungah vasa nam khempeuh tawlnga ding a, bu bawlna munin nei ding uh hi. Tua ciangin singkung sangte phukin, singkung neute a liansakpa, singkung hingte keusakin, singkung keute a hingsak kik Topa ka hihna thu gam sunga om singkung khempeuh in thei ding uh hi. Topa ahi keimah in hih thu ka gen khin a, hih dingin ka gen bangin ka gamta ding hi,” hong ci hi. Topa in kei tungah thu hong gen leuleu a, “Israel gam sungah mite in zat bel-a a neih paunak, ‘A pate in leenggah thuk ne a, a tate’ ha kim,’ cihna pen bang a cih nopna ahi hiam? Keimah in a nungta Topa Pasian ka hih mah bangin kong genin ah: Israel gam sungah hih paunak na zang nawn kei ding uh hi. Mi khempeuh in keima aa hi a, pate ahi a, tate ahi zongin keima aa ahi hi. A mawh mipa bek si ding hi. “Gentehna-in mi a hoih mahmah, a thuman, a diktat mi khat om hi. Amah in Israel mite’ milim biakte biakpih lo a, milim biakna pia lo ding ci-in a kikhamna mun-a milim biakna sate zong ne lo hi. Midangte’ zi zong luppih dingin zol lo a, numei in nin a neih lai takin zong luppih lo hi. Kuamah khem lo a, kuama’ na zong sut lo hi. Sum leitawi a lapa in khapna van a apte zong pia kik hi. Gilkialte an vakin, puan nei lote puan guan hi. A meet bekbek lunggulhna-in sum leitawi pia lo hi. Gamtat siat ding ut lo a, mite’ thu a manin khensak hi. Amah in ka thupiakte mangin, ka thukhamte hoih takin zui hi. Tua bang mi in mihoih ahih manin nungta ding hi, Topa Pasian in ci hi. “Tua ciangin gentehna-in hih mi hoihpa in tapa khat nei a, tua tapa in mi’ na gu-in mi that a, a pa’ gamtat ngei loh a sia teng gamta hi. Amah in milim biakna pia lo ding a kici mun-a kipia biakna sate ne a, midangte’ zite zolin luppih hi. Mizawng mi cimmawhte khem-in, mi’ na sut a, sum leitawi a lapa in khapna-a a piak nate pia kik loin kem suak hi. Milim bia-in a zumhuai-in gamta hi. A meet lunggulhna-in sum leitawi pia a, a meet zong a kilawm loin tampi tak la hi. Hih bang mipa nungta ding ahi hiam? Nungta het lo ding hi. Hih bangin a mindai huaite khempeuh gamta ahih manin tuate’ hangin amah si ding hi. Ama sihna in ama mawhna hang ahi hi. “Gentehna-in hih mihoih lopa in tapa khat hong nei hi. Tua a tapa in a pa’ gamtat hoih lohna teng mu a, a pa’ gamtat bangin gamta lo hi. Israel mite’ milim biakte biakpih lo a, a kikhamna mun-a biakna-a a kipia biakna sa zong ne lo hi. Midangte’ zi zong zol lo, luppih lo hi. Kuamah bawlsia lo a, kuama na zong sut lo hi. Sum leitawi a lapa in khapna van a apte zong pia kik hi. Gilkialte an vak a, puan nei lote puan guan hi. Gamtat siat ding ut lo a, a meet bekbek lunggulhna-in sum leitawi pia lo hi. Ka thukhamte zui-in ka thupiakte mang hi. Tua ahih manin hih mipa pen nungta ding a, a pa’ mawhna hangin si het lo ding hi. A pa in ahih leh mi’ na sutin, mite tungah a sia gamta tawntung hi. Tua ahih manin ama mawhna hangin amahmah si hi. “Ahi zongin, ‘Bang hangin a pa’ mawhna a tapa in thuak lo ding ahi hiam?’ nong ci kha ding hi. A tapa a hoih, a manin a gamtatna hang ahi hi. Amah in ka thukhamte kemin hoih takin zui hi. Tua ahih manin pel loin amah nungta ding hi. A si dingpa pen a mawh mipa ahi hi. Ta in pa’ mawhna thuak lo ding a, tua mah bangin pa in ta mawhna thuak lo ding hi. Mi hoihpa in a hoihna thaman ngah ding a, mi gilopa in a gitlohna thaman thuak ding hi. “Mi gilo khat in a mawh bawlna khawlin ka thukham zui hen la, a hoih a manin gamta leh, tua mipa si lo ding hi; pel loin nungta ding hi. Ama mawhnasa khempeuh kimaisak ding a, amah a manin a gamtat manin nungta ding hi. Mi gilo khat a si ka muh ciangin a lungdam dingin hong ngaihsun na hi hiam? Ka lung dam het lo hi. Amah hong kisikin a nuntak ding pen keima deih ahi zaw hi. Ahi zongin mihoih khat in a gamtat hoihna teng khawlin, migilote’ gamtat bangin a mindaihuai, gamtat siate gamtat ding hong kipan leh, amah nungta paisuak ding ahi hiam? Nungta het lo ding hi. A hoih ama gamtatnasate kiphawksak lo ding hi. Ama cihtaklohna leh ama mawhna hangin si ding hi. “Ahi zongin note in, ‘ Topa ’ hihna zia man lo hi,’ na ci uh hi. Israel mite aw, ka thugen hong ngai un. Keima hihna zia a man loin ngaihsun na hi uh hiam? A man lo pen nomau’ ngaihsutna zia hi zaw hi. Mihoih khat in a gamtat hoih khawlin mawhna a bawl ciangin si ding hi. Ama sihna pen a gamtatsiatna hang ahi hi. Mi gilo khat in a gitlohna panin khawlin a hoih a manin gamta leh ama nuntakna a suahtak ahi hi. Amah in a gamtatna phawkin a mawh bawlna khawl hi. Tua ahih manin amah si het lo ding a, nungta paisuak ding hi. Ahi zongin no Israel mite in, ‘ Topa ’ hihna zia man lo hi,’ na ci uh hi. Israel mite aw, keima’ hihna zia man lo ahi zenzen hiam? A man lo pen nomau’ ngaihsutna zia hi zaw hi. “ Topa Pasian ahi keimah in note kiangah kong genin ah: Israel mite aw, na gamtatnasa bang ciatun thu kong khen ding hi. Kisik kikin na gamtatsiatna khempeuh panun khawl un la, na mawhna bangun kisiasak kei un. Na gamtatnasa uh mawhna khempeuh nusia un la, na lungsim leh na ngaihsutna uh thaksuahsak un. Bang hangin no Israel mite si nuam na hi uh hiam? Kuama’ sih ding ka deih kei hi. Tua ahih manin na mawh gamtatna uh khawl un la, nungta un. Topa Pasian in ci hi,” hong ci hi. Israel uliante hih bangin tamlawh in hong ci hi. Na nu uh, humpinelkai tawh kibang! Humpinelkai dangte tawh kikhawlin, a note khoi hi. A note khat thuhilh a, hong khang cing hi. Sabet zong hong siam a, mi hong ne hi. Mite in tua thu za uh a, gum sungah awksak uh hi. Bawm sungah khum uh a, Izipt gamah paipih uh hi. A pi’ lametna teng bei ta hi, a no dang khat pantah leuleu a, a khangcing khat suah hi. Amah hong khangcing a, adangte tawh kikhawl hi. Sabet zong hong siam a, mi hong ne hi. Kulhpite sugawp a, khuapite siasak hi. Hawk zelzel a, a za mite lau mahmah hi. Amah hih dingin mite kikaikhawm a, mun khempeuh panin hong kuan uh hi. A ngenthang uh zak uh a, a thang-ah awksak uh hi. Bawm sungah khum uh a, Babilon kumpipa kiang tun uh hi. Israel mual tungte ah a hawkna a kizak nawn loh nadingin kikhumcip hi. Na nu uh, lui tui gei-a a kisuan, leenggui tawh kibang hi. Tui tampi ngah a, a teh, a gah, pha hi. A gui hiangte hong lian a, kumpi ciangkhut hong suak hi. Leenggui khang a, van hong ban hi. A teh pha-in sang mahmah a, mi khempeuh in mu kim hi. Ahi zongin hehna tawh leenggui kizung bawh a, leilak kiden’na hi. Nisuahna huihpi hong nung a, a gah teng keutumsak hi. A hiangte kikuai-tan a, keu-in kihaltum hi. Tui om lohna lei keu gamah tu-in hih leenggui kituah hi. Hih leenggui mei in kang a, a hiang a gah kangtum mang hi, a hiangte lian kik nawn lo ding a, kumpi ciangkhut suak kik ngei nawn lo ding hi. Hih a tunga pen tamlawhna hi a, a kisa zelzel mun khat ahi hi. A kum sagih kum, a kha ngana, a ni sawm ni-in Topa ’ kiang panin thu a dong dingin Israel makai pawlkhat ka kiangah hong pai uh hi. Tua ciangin Topa in kei tungah thu hong gen a, “Ezekiel aw, Topa Pasian ahi keimah in amaute tungah ka gen, ‘Kei tungah thu a dong dingin hong pai na hi uh hiam? Keimah in a nungta Topa Pasian ka hih mah bangin note’ thudotin ka om het kei ding hi, ci-in gen in,’ hong ci hi. “Ezekiel aw, amaute tungah thukhen dingin na kiging nai hiam? Na kigin’ khit leh amaute tungah thu khen in. A pu a pate uh’ gamtat hoih lohna teng amaute phawksak in. Amaute tungah keima thugente gen in. Israel mite ka teel lai takin amaute tungah thuciamna khat ka bawl hi. Izipt gam sungah amaute tungah ka kilang a, keimah in Topa note’ Pasian ka hi hi, ci-in ka kigen hi. Izipt gam panin amaute paikhiatpihin, amaute’ adingin ka zon’ khiatsak, bawngnawi leh khuaizu a luan’na gam ahi, gamsung khempeuh panin a hoih penna munah amaute ka tun’pih nading thu tua ni teek mahin ka ciam hi. Keimah in Topa amaute’ Pasian ka hih manin a muhdahhuai a milim itte uh paikhia-in, Izipt mite’ pasian manlote tawh a kinitsak loh nading uh ka gen hi. Ahi zongin amaute in kei hong demin, ka thugen hong ngai lo uh hi. A muhdahhuai a milimte uh paikhia tuan lo uh a, Izipt pasiante zong nusia lo uh hi. Tua hi a, ka heh mahmahna teng Izipt gam sungah thuaksak gawp ning ci-in ka ngaihsun hi.– Ahi zongin, Izipt gam panin no Israel mite kong paikhiatpih ding hi, ci-in amau’ ompih mite’ zakin gen khin ka hih manin, tua bangin daan thuaksak leng, keima min a kidaisak suak ding cih ngaihsutna hangin daan ka pia kei hi. Tua ahih ciangin Izipt gam panin amaute pai khiatpihin gamlak ka tun’pih a, a zui peuhpeuh a nuntak theih nadingin ka thukhamte leh ka thupiaknate ka hilh hi. Topa ahi keimah in amaute pen misiangtho in ka bawlna thu a phawk nadingun kote’ kikalah thukimna limin sabbathte tan’ ding thu ka pia hi. Ahi zongin Israel mite in gamlak nangawn-ah kei hong dem uh a, a zui peuhpeuh in nuntakna a ngah nading uh ahi keima thukhamte leh ka thupiaknate nial uh hi. Ka sabbathte zong nakpi takin siasak uh hi. Tua ahih manin amaute a maiman’ nadingin ka hehna teng gamlakah a thuaksak gawp dingin ka kithawi hi. Ahi zongin Izipt gam panin amaute ka pai khiatpihna minam dangte in hong mu khin ahih manin tua bangin gamta leng, keimah mindai nading mah hi zel ahih manin amaute bangmah ka cih kei hi. Tua ahih manin bawngnawi leh khuaizu a luan’na gam hoihpen ahi, amaute tungah ka piaksa gamah amaute ka paipih loh nading thu, gamlakah ka kiciam hi. Tua bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka sabbathte siasak uh hi. Amaute in kei hong biak ding uh sangin milim biak ding ut zaw uh ahihna hang ahi hi. Ahi zongin amaute ka khasiat a, gamlakah amaute ka susia kei a, ka maimangsak kei hi. A tate uh kiangah, ‘Na pu na pate uh in a bawl thukhamte zui kei un la, amaute’ tat ngeinate zui kei un. A milim biaknate uh tawh zong kininsak kei un. Keimah in Topa ahi note’ Pasian ka hi hi. Ka thukhamte zui un la, ka thupiakna bangin, gamta un. Keimah in Topa ahi note’ Pasian ka hihna na phawk nading uh leh note tawh i bawlsa thukimna lim dingin sabbathte na siangthosak un,’ ka ci hi. “Ahi zongin a tate nangawn un kei hong dem uh hi. A zuite in nuntakna a ngah nading ahi ka thukhamte palsatin, ka thupiaknate mang lo uh a, sabbathte siasak uh hi. Tua ahih manin, ka hehna teng gamlakah thuaksak gawpin, amaute a sumai dingin ka kithawi hi. Ahi zongin tua bangin hih leng, Izipt gam panin Israel mite ka pai khiatpih hong mu mite lakah ka min dai ding ahih manin amaute ka susia kei hi. Tua ahih manin amaute leitung gam khempeuh ah ka thehthang gawp nading thu, amaute tungah kiciamna dang khat tua gamlakah ka bawl leuleu hi. Hih bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka sabbathte siasak uh hi. Tua banah a pu pate un a biak milimte mah a biakna hang uh ahi hi. Tua ahih manin kei zong amaute adingin nuntakna a piangsak lo thukhamte leh thupiaknate amaute tungah ka pia hi. Amaute’ biak piaknate mah tawh amau mah kinin sakin, a tapa upapente uh zong biakna-in ka pia sak hi. Hih banga ka hihna pen amaute daan piakna leh keimah in Topa ka hihna thu a theih nading uh ahi hi. “Tua ahih ciangin Ezekiel aw, Topa Pasian ahi keima thugen pen Israel mite tungah hih bangin gen in:” A cihtaklohna uh tawh na pu na pate un ka min hong daisakin kei hong hehsak uh hi. Amaute tungah piak dingin ka ciamna gamah amaute ka paipih hi. Amaute in mual sang ahi a, singniim khatpeuh peuh ahi zongin a muh uh ciangin tua bang mun khempeuh ah biakna pia uh hi. Meihal biakna a piakna uh leh tuiphih biakna a piaknate uh tawh kei hong hehsak uh hi. Amaute kiangah, ‘Na paina uh mun sangte bang ahi hiam?’ ci-in ka dong hi. Tua ahih manin tua hun-a kipanin tua munte pen ‘Mun Sang’ kici hi. Tua ahih ciangin Israel mite tungah Topa Pasian ahi keima thugen hih bangin gen in: Na pu na pate un a bawl mawhnate mah note in zong bawlin a milimte mah uh sul zuih ding na hi uh hiam? Tu ni ciang dongin note in a kipia ngei letsongte mah puakin tua milimte mah biakna-in na tate uh na hal uh ciangin no leh no a kininsak tawm na hi uh hi. Tua bangin na gamtat khit uh ciangin no Israel mite in kei kiangah thu a dong dingin nong pai lai uh hi. Keimah in a nungta Topa Pasian ka hih mah bangin, note’ thudotin ka om het kei taktak ding hi. Note in na lungsim ngaihsutna uh khentat khinin, gam danga a teeng minam dangte mah bangin sing leh suang na bia nuam uh hi. Ahi zongin note’ ut bang hi thei ngei lo ding hi. “Keimah in a nungta Topa Pasian ka hih mah bangin, khut khauh tak leh ka vangliatna leh ka hehna tawh note kong uk gawp taktak ding hi. Gam khempeuh-a note kong thehthangna panin kong kaihkhop kik ciangin note tungah ka vangliatna leh ka hehna kong lak ding hi. Note pen minam tuamtuamte’ gamah kong paipih ding a, tua munah maitang kituahin note tungah thu kong khen ding hi. Izipt gamsung Sinai gamlakah na pu na pate uh tungah thu ka khen mah bangin tu-in note tungah thu kong khen ding hi, Topa Pasian in ci hi. “Note khauh takin kong uk ding a, thuciamna kong zuisak ding hi. Note lak panin a lehdo thei mite leh kei tungah hong mawh mite ka la khia ding hi. Tu lai takin a om pakna uh gam panin ka la khia ding a, ahi zongin Israel gamah ka ciahsak kik kei ding hi. Tua ciangin Topa ka hihna thu na thei ding hi,” hong ci hi. Topa Pasian in, “Israel mite khempeuh aw, na milimte uh bia un! Ahih hangin tu-a kipanin keima thu nong man’ uh kul ding a, na milimte uh letsong piakna tawh ka min siangtho na daisak nawn kei ding uh hi,” hong ci hi. Topa Pasian in, “Ka mual siangtho, Israel mual sang tungah Israel mite khempeuh in kei nong bia ding uh hi. Note tungah kong lungdam ta ding a, biak piaknate, a limcipen piaknate, leh na letsong siangthote uh kong lamen ta ding hi. Na kithehthangna uh gam tuamtuam panin note kong kaihkhop khit ciangin a namtui na biak piaknate uh kong sang ding hi. Note in kei nong biak manun minam dangte in a siangtho ka hihna hong thei ding uh hi. Na pu na pate uh tungah piak dingin ka ciam Israel gam sungah note kong tun’pih ciangin Topa ka hihna thu na thei ding uh hi. Tua hun ciangin a kilawm loin na gamtatnate khempeuh uh leh nomau mah na kinitsak tawmna thute uh na phawk ding uh a, na gamtat siatnasate uh hangin nomau mah na kimudah tawm ding uh hi. Na gitlohna, na gamtatsiatna uh tawh kizui-in note tungah hong bawl loin, ka min a dai khak ding khualna tawh note tungah hong gamta ka hih manin keimah in Topa ka hihna thu no Israel mite in na thei ding uh hi, Topa Pasian in ci hi,” hong ci hi. Topa in kei tungah thu hong gen a, “Ezekiel aw, Leitaw lam gam en in la, Leitaw lam gam siatna ding thu genin, Leitaw lam gam tulakte a siat nading thu genkhol in. Leitaw lam tulakte kiangah thu gen in la, Topa ’ thugen ngai un. Topa Pasian in hih bangin ci hi: ‘En un, tu-in gam hal a kipan ding ka hi a, na sunga om singkung a hing, a keu-in kangtum mang ding hi. Kuamah in tua meikuang phelh zo lo ding hi. A taw panin a khung dongin kangtum mang ding hi. Hih gamsung a halpa in Topa ahi keimah ka hihna thu leh kuamah in a phelh zawh lohna thu mi khempeuh in thei ding uh hi,’ ci-in gen in,” hong ci hi. Tua ciangin kei zong, “ Topa Pasian aw, mi khempeuh in kei pen khiatna nei-a thu gen theipa hi, ci-a hong ngaihsut uh ka hi hi,” ka ci hi. Topa in kei tungah thu hong gen a, “Ezekiel aw, Jerusalem khuapi, leh mite in biakna a piakna uh mun tuamtuamte mawhsakna thu gen in. Israel gam mite tungah Topa ahi keima thugen, hih bangin gen in: ‘Note ka hong langpan’ hi. Ka namsau dokin, note a sia a pha a kibangin kong that mang khin ding hi. Tua bangin kong thah nadingin leitaw lam pan leilu lam dongin mi khempeuh tungah ka namsau ka zang ding hi. Topa ahi keimah in namsau ka dawh khitna leh a paai-ah ka siatkik loh nading thu mi khempeuh in thei ding uh hi,’ ci-in gen in. Tua ahih ciangin Ezekiel aw, a lungkham mahmah bangin khuisa in la, mi khempeuh’ muh dingin thuumin tau in. Tua bangin na omna thu mite in hong dot ciangin mai lama thupiang ding hangin a tuaci om na hihna gen in. Tua hun ciangin a lungsim uh launa tawh kidimin, launa hangin a khut uh liingcipin, a han’na lungsim uh bei-in, lau-in a khuk uh a liin’ kelkel nading thu leh, tua hun ding pen tu-in a hong tung ta, ahihna thu gen in,” Topa Pasian in hong ci hi. Topa in kei kiangah thu hong gen a, “Ezekiel aw, mailam thu hong genkhol in la, Topa in hih bangin ci hi, ci-in gen in: Namsau khat kitat hiam a, hoih takin kipuah kilkel hi. Mi thah nadingin kitat hiam sitset a, khuaphia bangin a tee zialzial dingin kipuah hi. Note in thuhilhna ngai nuam lo na hih manun, kuamah in tua namsau kho thei lo hi. Tua namsau limtakin kipuah a, zat pah lian dingin kikoih hi. Mi that dingpa’ zat dingin, kitat hiamin kipuah siang hi. Ezekiel aw, awng in la, kiko in, hih namsau pen, ka mihingte leh Israel makai khempeuh a kisawmna ahi hi. Amaute pen, ka mite khempeuh tawh, a kithat khawm ding uh hi. Dahna tawh na dip hum in. Note hong kize-et ahi hi. Note in thuhilhna nial lailai le uh cin, hih thute khempeuh piang loin om ding ahi hiam, Topa Pasian in ci hi. “Ezekiel aw, tu-in mai lam thu ding gen khol in. Na khut beng in. Namsau in sat sat ding hi. Tua namsau in mi that namsau, mi lausak namsau, mi a lom lomin a that namsau ahi hi. Tua namsau in ka mite meidawi sakin puk sak hi. Khuaphia bangin a tee zalzal, mi that dinga a kithawi ka namsau tawh a khuapi uh ka ngim hi. A hiam namsau aw, na ziat na vei vat gawp in! Na ngatna san peuhpeuh vat gawp in. Kei zong ka khut ka beng ding a, tua ciangin ka hehna dam ding hi. Topa ahi keimah in hih thu kong gen khin hi,” hong ci hi. Topa in kei tungah thu hong gen kik a, “Ezekiel aw, Babilon kumpipa a namsau tawh hong kuan theih nading lampi nih ciamtehna bawl in. Tua lampi nihte pen gam khat panin kipan khawm ding ahi hi. Tua lampi a katna munah ciamtehna khat phut in. Tua lamka khat in Ammon mite khuapi Rabbath-ah kumpipa a tun’ theihna dingin lak ding a, a khat pen in Judah gam sunga om Jerusalem khuapi sung teek a tun’ nadingin lak ding hi. Lamka a tun’ ciangin Babilon kumpipa khawl phot ding hi. A tot ding lampi a theihtheih nadingin ai nam tuamtuam saan ding a, a thaltangte sing seuhseuh-in, innsung pasian milimte thu dongin, biakna-in a gawh ganhing sin vel ding hi. Jerusalem ah a pai ding ai a phatna a lak a thaltangte a taklam khutah tawi hi. Tua ai in Jerusalem ah a pai nading, gal nan’ nading phung a cian’ nading galsim nadingin a kiko nading, kulhpite satkham nading molhtumte a bawl nading, kidal nading phung bawlin dumte a tawh nading gen hi. Jerusalem khua mite in khat leh khat a kihuh nading uh midangte tawh thukimna nei khin uh ahih manin hih bangin amau’ khuapi a kisawmna thu um lo uh hi. Ahi zongin hih bangin ai a kisan’na in amau’ mawhna a phawk theih nading uh leh amaute a kiman ding ahih lam a theih nading uh lim khat ahi hi. Tua ahih ciangin Topa Pasian ahi keimah in ka gen thu in; Na mawhna teng uh tu-in hong kipholak hi. Na mawhna uh mi khempeuh in thei hi. Na gamtatna panun na mawhna uh kilang hi. Mawhsakna a thuak ding na hita uh a, na galte uh khut sungah a hong pia ding ka hi hi. A gilo, a siangtho lo, Israel gam uk mi gilopa aw, nang’ hun zong hong tung ta a, na daantuah ni ding hita hi. Topa Pasian in hih bangin ci hi: Na kumpi lukhu leh na dial khip la khia in. Nidang bang nawn lo ding hi. Mi neute hong lian ding a, Miliante hong neu ta ding hi. Siacip! siacip! Hih khuapi ka siacimitsak ding a, a mel a mang zong kimu lo ding hi. A uk dingin a kilawm mipa hong om ciang bekin ama khut sungah ka pia ding hi. “Ezekiel aw, mailam thu gen in la, Topa Pasian ahi keimah in Israel mite a simmawh bawl Ammon mite tawh kisai-in ka thugen, hih bangin amaute kiangah gen in: A vatlum dingin namsau khat a baihsa-in om a, mi thah nadingin kinawtngil a, khuaphia bangin a tee zialzial dingin kibawl hi. No Ammon mite aw, a siangtho lo, mi gilote, a daantuah nading uh hun tungta ahih manin, sumai gawp un, ci-in a hong hanthawn, na mangmuhnate uh zuaupi hi a, na ai phate uh a mawkna hi. Do dingin kithawi vet kei un la, na namsau uh a paai-ah siatkik zaw un. Note na pian’na gam, na suahna mun uhah, thu a hong khen ding ka hi hi. Note tungah ka hehna kong khah ding a, mei-am kuang hong bang ding hi. Mi thah a siam, migilote khut sungah note kong pia ding hi. Mei in note hong kangtum ding a, note’ gam mah-ah na sisan uh luang-in, kuamah in hong phawk kha nawn lo ding hi. Topa in ci hi, ci-in gen in,” hong ci hi. Topa in kei kiangah thu hong gen a, “Ezekiel aw, mi thahna tawh a kidim khuapi tungah thukhen dingin na kiging nai hiam? A gamtat hoih lohna khempeuh tua khuapi kiangah gen in. Topa Pasian in hih bangin ci hi, ci-in gen in: Nangma mite mahmah tampi tak thatin, milim biakna tawh nangmah kininsak tawm na hih manin, tu-in na hun hong tung ta hi. Na mi thahna hang leh na milim bawlna hangin a mawh suak na hih manin tu-in nang adingin a ni cingin a kha cing ta hi. Tua ahih manin minam dangte’ simmawh bawl, gamdang khempeuh’ hih thopthop-in nang kong koih hi. A nai, a gamla-a om mi khempeuh in na gamtat hoih lohna hangin nang hong simmawh hi. Na sunga om Israel ulian khempeuh in amau’ thatang muang uh a, mi that uh hi. A nu a pa a zahtakbawl kuamah om lo hi. Peemtate kikhen gawp a, meigong leh tagahte zong kihih thothop hi. Mun siangthote zong zahtakna mel kinei loin, sabbathte zong kitang lo hi. Mi pawlkhat te in midangte a sih theih nadingin zuau thu phuak uh hi. Mi pawlkhat in milim biakna sa ne uh hi. Pawl khatte in amau’ lanna tawh kizui-in gamta tawntung hi. Pawl khatte in a pa’ zi mawhpih uh a, pawl khatte in numei nin nei kimlaipi buan uh hi. Pawlkhat in midangte’ zi tawh nu-le-pa mawhna bawl uh a, pawlkhat in a mote mawhpihin, pawlkhat in a sanggamnu ahi a pa’ tanu mawhpih hi. Pawlkhat in sum deih manin mi that uh hi. Pawl khatte in a Israel mipih sum leitawi late tungah nuamtak sa-in a met lakna tawh hauh lawh uh hi. Amaute in kei hong mangngilh uh hi, Topa Pasian in ci hi. “A man loin mi’ na na suhna leh na mi thahna hangin ka khuttum ka zial ding hi. Tua bangin kong hih ciangin hang nawn dingin ki-um a, na khuttum liik ngam dingin ki-um na hi hiam? Topa ahi keimah in thu ka gen khin a, ka gen bangin ka gamta ding hi. Gam khempeuh leh minam dang khempeuh lakah na mite ka thehthang gawp ding a, na gamtat hoih lohna teng ka beisak ding hi. Tua ahih ciangin minam dangte in hong mindaisak ding a, ahi zongin nang Jerusalem in Topa ka hihna thu na thei ding hi,” hong ci hi. Topa in kei tungah thu hong gen a, “Ezekiel aw, kei adingin Israel mite a kiman’na om nawn lo hi. Amaute pen, sumngo, dal, sik, hak, leh ngun a kihel khawm sung panin meikhuk sungah kihalin a ngun teng a kilak khit ciangin a om lai ngun-ek tawh kibang hi. Tua ahih ciangin Topa Pasian ahi keimah in ka gen in-ah: Note in tua ngun-ek bangin na kiman’na uh om nawn lo ahih manin Jerusalem ah kong kaikhawm ding hi. Mite in ngun, sumngo, sik, hak, leh, dalte kaikhawmin a tuisak dingun meikhuk sungah a khul bangin ka hehna tawh note hong kaikhawmin kong tuisuaksak mang ding hi. Jerusalem ah note hong khawm takpi-in na nuai uhah mei tawhin, ka hehna tawh kong hal tui ding hi. Meiphual sungah ngunte a kituisak bangin Jerusalem ah note hong kibawl ding hi. Tua ciangin keima hehna a thuak na hih lam uh na thei ding uh hi,” hong ci hi. Topa in kei tungah thu hong gen a, “Ezekiel aw, Israel mite pen, ka hehna hangin puah loin, a tungah guah ka zuksak lohna leitang tawh a kibatna uh amaute kiangah gen in. A uliante uh pen ganhing a that humpinelkai hawk tawh kibang uh hi. Amaute in mi thatin, a sum leh a neihsa khempeuh laksak uh a, a mi thahna hangun numei tampi tak meigong suaksak uh hi. A siampite un ka thukham palsatin, a siangtho biakna nate ninsak uh hi. A siangtho biakna nate leh a mawkmawk nate khenna mel nei lo uh a, a tate uh tungah a siang leh a nin a kilamdan’na zong hilh lo uh hi. Sabbathte zong donin nei lo uh hi. Tuate khempeuh hangin Israel mite in kei hong zahtak lo uh hi. A kumpi uliante uh pen a samatsa uh a bal gawpgawp ngia hon tawh kibang hi. Sum ngah theihna dingin mi that uh hi. Kulh nin kimlai leikang tui tawh a kizut kaang bangin a kamsangte un hih bang mawhnate iimcip uh hi. A man lopi maang mu uh a, a man lopi-in mailam thu gen uh hi. Topa ahi keimah in amaute tungah thu gen lo napi-in, Topa Pasian in hih bangin thu gen hi, ci-in zuau phuakin mite tungah thu gen uh hi. Mi cithei-a kineite in mi khemin a na sut uh hi. Mizawng mi cimawhte bawlsia-in, peemtate tungah nuamtak sa-in khualna mel nei loin a ut ut-un gamta uh hi. Keimah in ka hehna tawh ka suksiat ding hun ciangin kulh a ciang zo ding, kulh a kicipna munah a ding zo ding, leh gamsung a hu zo ding mi khat amaute lakah ka zong a, ahi zongin tua bang ding mi khat beek ka mu kei hi. Tua ahih ciangin amaute’ gamtatna tawh kizui-in daan piakna-in amaute tungah ka hehna khahin, mei in a kat bangin amaute ka maimangsak ding hi, Topa Pasian in ci hi,” hong ci hi. Topa in kei kiangah thu hong gen a, “Ezekiel aw, khat vei lai-in unau numei nih om hi. Amaute Izipt-ah a om lai, a khangno lai takun, a nungakna lim uh bei-in numei paktat suak uh hi. A u nu’ min in Oholah hi a, Samaria khuapi tawh kibang a cih nopna hi. A nau nu’ min in Oholibah hi a, Jerusalem khuapi tawh kibang a cih nopna ahi hi. Hih numei nihte ka ten’pih a, a nih-un kei tawh ta nei uh hi. Keima zi hi napi-in Oholah in numei paktatte mah bangin gamta lailai a, Assiria gam pan-a a lawm ngaihte lunggulh mahmah hi. Tua a lawm ngaihte pen, puansan a silh galkap hangte, gam uk mangte leh galkap mang liante hi a, a vekpi-un a ngaihhuai, sakol tung tuang galkap mang liante ahi uh hi. Amah pen Assiria uliante khempeuh tawh a mawhsa khat hi a, ama huk luatna in Assiria milimte nangawn va biakpih hi. A nungakna beisakin, Izipt gam-a a paktatna mah zom lailai hi. A nungak tunga kipanin mite in luppihin numei paktatte bangin bawlin a ut ut-un hih uh hi. Tua ahih ciangin a lunggulh mahmah, a it Assiria mite khut sungah amah ka pia hi. Assiria mite in a puan hawkkhiatsak uh a, a tanu leh a tapate matsakin, tua ciangin namsau tawh amah that uh hi. Mun khempeuh-a numeite in amah gentehna khatin nei uh a, ama tungah thu kikhen hi. “A nau nu Oholibah in hih thu thei napi-in, a u nu Oholah sangin zong a sia zaw, a suk zaw-in paktat lai hi. Amah in a vekpi-in a ngaihbaang Assiria mi tangval ahi gam ukte leh galkap mangte, puansan a silh galkapte, leh sakol tung tuang uliante nak lunggulh mahmah hi. Hih a nau nu zong a u nu zah mahin sia taktak hi, ci-in ka mu hi. Amah in tua limte a muh phetin amaute lunggulh mahmah pah a, a sam dingin Babilon gamah kamtai paisak pah hi. Babilon mite zong amah tawh a mawh dingin hong pai uh hi. Amaute in a lungkim dongun tua nu hih nilohin ninsak uh a, a tawpna-ah amaute a ngaih gen loh a kih zah ciang dongin a bawl uh hi. Amah numei paktat ahihna mi khempeuh thei sakin, tua bangin amah leh amah a kipholak ciangin a u nu ka muhdah zah mah bangin amah zong ka mudah hi. A paktatna uang semsem a, a nungak lai-in Izipt gamah a paktat mah bangin gamta niloh hi. Sakoltal lan bangin a zang a gol, a lan mahmah mi khempeuh ngai pahpah hi. Tua hi a, Oholibah aw, Izipt gamah nungakin na om lai-in na nawi hong kinuai gawpsakin, na nungakna na beisak hun-a na gamtat hoih lote mah a gamta kik nuam na hi hi. “Oholibah aw, Topa Pasian ahi keima hong gen thu in: Tu-in nang in hih na lunggulh mite na cimtak ta hi. Ahi zongin nangma tungah amaute ka hehsak ding a, nang a hong umcih dingin ka hong paipih ding hi. Babilon mite, Khaldea mite, Pekod mite, Shoa mite, Koa mite, leh Assiria mite khempeuh kong paipih ding hi. Amaute a vekpi-in tangval mel hoih ngaihbaang gam ukte leh galkapmangte hi a, a vekpi-un ulianpipi, sakol tung tuang galkap mang liante vive ahi uh hi. Amaute in leilu lam panin nang hong sim ding a, leeng galkap leh vanpua leeng tampi hong kengin galkap tampi tak tawh hong kuan ding uh hi. Lumte leh siklukhute tawh kidalin amaute in nang hong umcih ding uh hi. Amaute’ khut sungah nang kong ap ding a, amaute’ ngeina om bangin nangma tungah thu hong khen ding uh hi. Nangma tungah kei heh ka hih manin, nangma tungah amaute hong heh gamtat ding uh hi. Na nak leh na bilte hong atkhiatsakin na tate hong thahsak ding uh hi. Na tanu leh na tapate na kiang panin hong sutin a hing tangun hallum ding uh hi. Na puante hong hawkkhiatsakin, a manpha na kizepnate zong hong laksak ding uh hi. Na huknate leh Izipt gam-a kipan na gamtat hoih lohnate ka beisak ding hi. Milimte etin na nei nawn kei ding a, Iziptte zong na ngaihsun nawn kei ding hi. “Bang hang hiam cih leh Topa Pasian in hih bangin ci hi: Na muhdah na etsat mite khut sungah nang kong pia ding hi. Amaute zong nangma tungah hong muhdah gamtat ding uh a, na thalawhsa na khempeuh hong laksakin na hawm guakin hong nusia ding uh hi. Na paktat gamtatna teng hong kipholak ding hi. Na hukna leh na paktat gamtatna in nangma tungah hih bang teng hong tungsak hi. Minam dangte tawh na paktat a, a milimte uh tawh na kininsak hi. Na u nu’ khekhap teng mah tawn na hih manin amah daan ka piak bangin nang zong daan ka hong pia ding hi. Topa Pasian in hih bangin ci hi: Na u nu’ hai mah na dawn ding hi; tua hai golin thuk mahmah hi. A hai dim sitset ahih manin, mi khempeuh in hong simmawhin hong nuihsan ding uh hi. Na u nu Samaria’ hai in, launa leh siatna hai hi a, hong amsakin, hong lungkhamsak ding hi. Tua hai a tawdat nangawn na dawn kang ding a, a hai na petkham ding hi. A hai kitam themte tawh, na nawi na kuikham ding hi, Topa Pasian in ci hi. Tu-in Topa Pasian in hih bangin gen hi: Nangmah in kei hong mangngilhin hong nungngat na hih manin na hukna leh na paktatna hangin na thuak ding hi,” hong ci hi. Topa in kei kiangah thu hong gen a, “Ezekiel aw, Oholah leh Oholibah tungah thukhen dingin na kithawi nai hiam? A gamtat hoih lohna teng uh amaute tungah gen in. Amaute in milim biakna tawh nu-le-pa mawhna bawlin mi that uh hi. Milimte tawh mawhna gamta-in, kei tawh a neih a tapate uh that uh hi. A tapate uh milim biakna-in go uh hi. Amaute’ gamtatna tu-a bang teng bek hilo lai hi. Ka biakinn ninsak uh a, ka sabbathte zong palsat lai uh hi. Milim biakna-in ka tate a gawh khit uh ciangin tua ni mah-in ka biakinn-ah pai-in ninsak uh hi. Ka biakinn sungah hih bangin gamta tazen uh hi. Amaute in gamlapi-a om mite a sam dingin kamtai sawl uh a, a sap mite hong pai uh hi. Hih numeite kisilin, a mit uh zeemin, kizepna a manpha a tuamtuamte tawh kizemin kipuah uh hi. Lupna hoih mahmah tungah tu-in a mai uhah sabuai limtakin koih uh hi. Tua sabuai tungah keima piaksa paknamtui leh oliv thaute koih uh hi. Lungnuam-a om mihonte’ gamlumna kiza a, gamlak panin mihon mawkmawk pawlkhat zong hong kitun’pih hi. Amaute in tua numeite’ khutah tau butsak uh a, a lu tung uhah kumpi lukhu hoihte khusak uh hi. Nu-le-pa mawhna bawlin a paat ngingeisa khat, numei paktatte khat mah bangin a zang lailai hi tah a, ci-in ka ngaihsun hi. Numei paktatte kianga hawh bangin amaute pai niloh uh hi. Tu-a bangin a gamtat hoih lo Oholah leh Oholibahte kiangah a paktat dingin amaute pai uh hi. Amaute in nu-le-pa mawhna bawlin mi thahna tawh kipelh lo uh ahih manin mi dikte in nu-le-pa mawhna bawlna hang leh mi thahna hangin mawhsak ding uh hi. “ Topa Pasian in hih bangin ci hi: Amaute lausak gawpin a nate uh a sut gawp dingin mihon khat pai sak in. Tua mihonte in suang tawh amaute dengin namsau tawh amaute sugawp hen la, a tate uh thatin, a innte uh halsak hen. Amaute’ gamtat bangin kuamah a gamtat loh nadingun gam sunga om numei khempeuh hilhkholhna limin hih bang gamtat hoihlohnate, gam sung khempeuh ah ka beisak ding hi. No u nau numei nihte ahih leh, na paktatna uh leh na milim biakna hangun daan kong pia ding hi. Tua ciangin Topa Pasian ka hihna thu na thei ding uh hi,” hong ci hi. Zedekiah in a uk a kum kua kum, a kha sawmna sung ni sawm ni-in, Topa in kei kiangah thu hong gen a, “Ezekiel aw, tu ni pen Babilon kumpipa in Jerusalem khuapi a umcih ni ding ahih manin lai sungah tu ni lim takin ciamteh in. Topa Pasian ahi keimah in amaute’ adingin gentehna-in ka gen ahi hih thugentehna pen a lehdo thei ka mite tungah hih bangin gen in: Mei tungah beel suang in la, a sungah tui a dimin buk in. Sa a phei, a liang, a limcipente khah in la, a guh limcite tawh zong dimsak in. Tuu limcipente sa zang in la, beel nuai-ah mei cih in. A tui sosak in la, a guh leh a sate zong sosak in. “ Topa Pasian ahi keimah in ka gen thu in hih bang ahi hi: Mi thahna tawh a kidim khuapi tu-in a sia ding hita hi! Amah in a kang-op a kinawtkhia ngei lo beel tawh kibang hi. Beel sunga sate khat khatin kilakhia a, a vekpi-in bei khin ta hi. Khuapi sungah mi kithahna om a, a sisante, leivui in a vuh theih nading lei lakah taaksak loin, suang tungah taaksak uh hi. Ka heh suakin a phu a kilak theih nadingin a man’than’ theih loh nading munah a sisante tua ci-in ka omsak hi. Tua ahih manin Topa Pasian ahi keima gen thu in: Mi thahna tawh a kidim khuapi in tu-in a sia ding hita hi! Keimah mah in a mei ka cih ding hi. Sing hong cih beh un! A mei seem un! A sa huan un! A tui kangsak un! A saguhte kangtum sak un! Tua ciangin a taubeel hawm mei-am tungah suang un la, sansak veva un. Tua hi leh a kang-op nin teng kangtumin hong siang kik ding hi. Ahi zongin bang zahin hanciamin a kisep hangin, a kang-op in bun lua ahih manin siang zo lo ding hi. Jerusalem aw, na gamtat hoih lohnate in nang hong ninsak khin hi. A sian’suah dingin kong hanciamciam hangin a nin mahin na om lai veve hi. Ka heh mahmahna na thuak khit matengin na siang kik ngei kei ding hi. Topa ahi keimah in thu ka gen khin hi. Tu-in ka gamtat hun ding hong tung ta hi. Kong kiphawkmawh bawl nawn kei ding a, ki-ip nawn loin, zong kong khasiat ngaihsut kei ding hi. Na gamtatna bangin daan hong kipia ding hi, Topa Pasian in ci hi,” hong ci hi. Topa in kei kiangah thu hong gen a, “Ezekiel aw, na it penpen mi khat thakhatin a hong laksak ding ka hi hi. Na thuum na tau kei dinga zong kap loin, na khitui zong na luangsak kei ding hi. Mite’ zak dingin zong na kidiik kei ding a, dahna limin lukhu khu lo, khedap bulh lo, cih bangin na om kei ding hi. Na mai zong na khuh kei ding a, a dahte’ annekte pawl zong na ne kei ding hi,” hong ci hi. A zingsang lamin mite kiangah thu genin ka om a, a nitak ciangin ka zi hong si hi. Kei zong a zingciangin Topa hong sawl bang tektekin ka gamta hi. Tua ciangin mite in, “Bang hangin hici gamtat na hi hiam?” ci-in hong dong uh hi. Kei zong amaute kiangah, “ Topa in kei kiangah thu hong gen a, Israel mite kiangah hih bangin thu gen in hong ci hi. Ama cihna in: Note in na kisaktheihpih uh, a sungah paipai-in na etet nop uh ka biakinn pen a ninsak ding ka hi hi. Tua ciangin note’ nung-a a om lai na tate uh, namsau-in si ding uh hi, ci hi. Tua ciangin keima gamtat bangin note gamta-in, na mai uh na khuh kei ding uh a, a dahte’ annekte pawl zong na ne kei ding uh hi. Lukhu khu-in khedap na bulh ding uh a, thuum lo, tau loin na om ding uh hi. Note’ gitlohna hangin note maimangin, a tau khawm litlit ding na hi uh hi. Tua ciangin kei pen note’ adingin lim ka hi ding hi. Keima gamtat bangbangin a gamta ding na hi uh hi. Hih bangin thu hong pian’ ciangin, kei pen Topa Pasian ka hihna hong thei ding uh hi, hong ci hi,” ci-in ka dawng hi. Tua ciangin Topa in kei kiangah, “Ezekiel aw, amaute in a kisaktheihpih, a lungdampih, paipai-in a etet nop uh biakinnpi ka la khia ding a, a tanu a tapate uh zong ka laksak ding hi. Tua bangin ka hih ni ciangin tua siatna panin a suakta mi khat hong tai-in nangma kiangah a thu hong ko ding hi. Tua ni ciangin nang na pau thei kik ding a, amah tawh na kiho khawm thei ding hi. Tu-a bangin nangmah in mite’ adingin lim khat na hi ding a, tua ciangin Topa ka hihna amaute in hong thei ding uh hi,” hong ci hi. Topa in kei kiangah thu hong gen a, “Ezekiel aw, Ammon mite lam nga in la, amaute mawhsakna thu gen in. Topa Pasian ahi keimah in amaute tungah ka gen thu hih bangin gen in: Ka biakinn kininsakin, Israel gam kisusia-in, Judah mite salin a pai na muh uh ciangin nuamin na lungdam se uh hi. Tua ahih manin nisuahna lam panin a hong pai mite khut sungah note ka hong pia ding a, amaute in note’ gam sungah phual hong satin hong teeng ding uh hi. Note’ nek ding singgahte leh note’ dawn ding bawngnawite hong gaihsak mang ding uh hi. Rabbah khuapi pen kalaoh khawk ka suah ding a, Ammon khuapi dangte zong tuukhawk ka suaksak ding hi. Tua ciangin Topa ka hihna thu nong thei ding uh hi. Bang hang hiam cih leh Topa Pasian ahi keimah in kong genin ah: Note lungdamin khut bengin, kipakin na diang uh a, Israel gam na simmawh bawl uh hi. Hih bangin gamta se na hih manun note’ nate hong sut gawp ding minamte khut sungah kong pia ding hi. Note hong sumaimang ding ka hih manin a minam-in ahi a, a gam-in ahi zongin na ding zo nawn kei ding uh hi. Tua ciangin Topa ka hihna na thei ding uh hi, ci-in gen in,” hong ci hi. Topa Pasian in kei kiangah thu hong gen a, “Moab leh Seir mite in a thugenna uhah, Judah gam mite pen minam dangte bangmah hi lel uh hi, ci se uh hi. Tua ahih manin Moab gam hutna-in a kiphut a kiim-a om khuapite leh a khuapi minthang pente ahi Bethjeshimoth, Baalmeon, Kiriathaim khuapite khempeuh, midangte ka simsak ding hi. Ammon mite a zawh gawp mah bangin, Moab mite zong, nisuahna lam mite ka zo gawpsak ding a, Moab mite pen minam-in ding zo nawn lo ding uh hi. Tua bangin Moab mite daan ka pia ding a, tua ciangin Topa ka hihna thu hong thei ding uh hi,” hong ci hi. Topa Pasian in kei kiangah thu hong gen a, “Edom mite in Judah mite tungah a phu lakna uh nasia lua ahih manin tua a phu lakna hangun Edom mite tungah mawhna om hi. Tua ahih ciangin Edom mite daan pia-in, a mihing a ganhing-in ka thah mang nading thu tu-in kong pulak hi. Teman khuapi pan-a kipan Dedan khuapi dongin a gam sung khempeuh uh gamkhing ka suaksak ding a, a mite khempeuh uh gal sungah si ding uh hi. Keima mi Israelte in Edom mite tungah phu hong laksak ding uh a, ka heh mahmahna tawh kizui-in Edom mite thuaksak ding uh hi. Keima phulakna zia Edom mite in thei ding uh hi. Topa Pasian in thu gen khin hi,” hong ci hi. Topa Pasian in kei kiangah thu hong gen a, “Filistia mite in gal-in a neih tawntung mite uh tungah phu nasia lakin hehna tawh susia gawp uh hi. Tua ahih ciangin Filistia Kerethites mite simin ka beimang sak nading thu a hong genkhia ta ka hi hi. Filistia Zanglei-a om lai mi khempeuh ka susia mang ding hi. Amaute nakpi takin daan pia-in, a kicing zah dongin amaute tungah phu ka la ding a, ka hehna thuak ding uh hi. Tua ciangin Topa ka hihna thu hong thei ding uh hi.” hong ci hi. Zedekiah in a uk a kum sawm leh khat leh khat kum, tua kha a ni masa ni-in Topa in kei kiangah thu hong gen a, “Ezekiel aw, Tai-ar khuapi mite awngin hih bangin kiko uh hi. Amaute in, ‘Sum bawlna lam-a i kidempih Jerusalem khuapi zancip gawp hi. A kulhpite tu-in kihong keek a, amaute’ guallelhna tu-in eima hauhna suak ding hi,’ ci uh hi. Tua ahih ciangin Topa Pasian ahi keimah in ka gen-inah: Tai-ar khuapi aw, keimah in note’ lang ka hi hi. Nangmah a sim dingin minam tampi kong paipih ding a, tuipi hualte bangin hong kuan henhan ding uh hi. Tai-ar kulhpite susia-in na tausangte supai ding uh hi. Tua ciangin leitang khempeuh kiat khia-in suangtumte bek om lai ding hi. Ni dangin tuipi in a tup ngei suangte tungah tu-in ngasa bengte in a ngen uh pho ding uh hi. Topa Pasian keimah in thu ka gen khin hi. Minam dangte in nang Tai-ar khuapi hong luhgawp ding uh a, na gam sunga khuapi dangte sungah a teeng mi khempeuh, a namsau uh tawh that khin ding uh hi. Tua ciangin Topa ka hihna thu nang Tai-ar khuapi-in na thei ding hi, ci hi. “Tua ciangin kumpi khempeuh lak panin a lianpen ahi Babilon kumpipa Nebukhadnezzar, nang Tai-ar khuapi a sim dingin kong paipih ding hi. Amah leilu lam gam pan hong kipanin galkap honpi, sakolte leh a leengte, leh sakol galkap honte hong tonpih ding hi. Gam sunga om khuapi-a teeng mite khempeuh gal kidona sungah si ding uh hi. Note hong do nadingun galte in dum toin, phung ciang-in a kidal nadingun kulh muanhuai bawl ding uh hi. Amaute in molhtum tawh na kulhpite satkham ding uh a, na tau sangte uh zong hei tawh phuk gawp ding uh hi. A sakolte’ paina leivui khute in khuapi tuamcip ding hi. Van pua leeng leh leeng galkapte’ gin’na in khuapi kulhte cimsak ding a, a kisusiasa kulh kongpi-a pai bangin hong lut lel ding uh hi. Sakol galkapte in kongzing khempeuh tuancil gawp ding uh a, namsau tawh mi khempeuh vatlum ding uh hi. Innkhuam lianpipite leilak kiden’ nading hi. Note’ neihsa na hoih khempeuh, na galte un a ut ut-un zang ding uh hi. Kulhte supai-in inn hoihpipite satthang gawp ding uh hi. Inn-a kizang sing leh suang, leh na khempeuh la-in tuipi sung den’ nading uh hi. Khuapi sungah lasakna awging ka beisak ding a, tum theih awgingte khempeuh zong kiza nawn lo ding hi. Khuapi sungah bangmah om nawn loin, ngasa bengte in a ngen uh a pho theih nading suangtumte bek ka omsak lai ding hi. Nang Tai-ar khuapi hong kilam kik ngei nawn lo ding hi. Topa ahi keimah in hih thu ka gen khin ta hi,” hong ci hi. Topa Pasian in Tai-ar khuapi tungah hih bangin thu gen hi: “Nang hong kisimin hong kilak ni ciangin na sunga a kithat mite’ kut vengvengna in tuipi dunga teeng mite lau-in patausak ding hi. Tuipi a zang minamte’ kumpite, a kumpi tokhom tung uh panin kum khia ding uh a, a kumpi puante uh leh a puan hoih silhte uh suah khia-in, lei lakah tu-in, lau-in a liing ding uh hi. Nangma thuakna hong muh manun lau mahmah ding uh a, a ci-liing uh pha thei lo ding uh hi. Tua ciangin nang tawh kisai-in hih bangin dah la hong phuah ding uh hi: A minthang khuapi kisusia ta a, a teembawte tuipi pan maimang ta hi. Hih khuapi mite in tuipi uk ngei a, tuipi gei-a teeng mi khempeuh’ kihtak hi ngei hi. Tu-in hih khuapi kia ta a, tuikulh khempeuh lau in liing uh hi. Tua bang siatna hangin, tuikulh-a a teeng mite in lau-in lamdang sa uh hi. “Bang hang hiam cih leh Topa Pasian ahi keimah in hih bangin ka ci hi: Kuamah a ten’ lohna a kisia khuapi bangin a gamkhing khuapi-in nang kong bawl ding hi. Tuipi tuite kong tumsak ding hi. Tang lai-a a sisa mite tawh a teeng khawm dingin misite’ khua Leinuai-ah kong puak ding hi. Siatna a thuak tawntung lei nuai-a omte lakah kong koih ding a, a sisate tawh na om ding hi. Tua lai panin a hingte lakah a om kik dingin nong kik nawn kei ding hi. Nang pen mite’ etteh dingin a lauhuai mahmah-in kong bawl ding a, tua in nang adingin a beina hita ding hi. Mite in nang hong zon’ zon’ hangun hong mu zo nawn lo ding uh hi. Topa Pasian ahi keimah in hih thu ka gen khin hi,” hong ci hi. Topa in kei kiangah thu hong gen a, “Ezekiel aw, Tai-ar khuapi tamlawhna kah la khat sa in. Tuipi gei-ah omin tuipi dunga a om mite tawh sum lei sum zuakna a nei khuapi tungah, Topa Pasian keimah in ka gen thute hih bangin gen in: Tai-ar khuapi aw, na mel hoihna na kisaktheihpih hi. Nangma inn in tuipi hi a, nang hong lamte in teembaw hoih bangin hong bawl hi. A sing zat dingun Seir Mual-a taaksingte zang uh a, na puankhai khuam dingin Lebanon-a taamtaak singte zang uh hi. Nangmah hawh nadingin Bashan-a tawsaw singte la uh a, Grik tuikulh pana kila taaksante tawh, na sual ding bawl uh a, saiha pak tawh zem uh hi. Izipt gam saihadial puan kizemte tawh na puankhai kibawl a, gamlapi pek panin zong kithei thei hi. Saipras tuikulh pana kingah puan hoih pente, kumpi mel puante tawh na tungkhuh kibawl hi. Sidon leh Arvad khuapi mite in nang hong hot uh a, mi siam mahmahte in nang hong hawlte ahi hi. Nang hong lem innlam siamte in, Gebal khuapi mi khutsiam mahmahte ahi uh hi. Tuipi tung teembaw nasemte khempeuh in na sumbuk hong zuan uh hi. Persia gam, Lud gam, leh Put gam mite in nangma galkap hong sem uh a, na sungah a lumte uh leh a siklukhute uh khai uh hi. Amaute in nangma tungah minthan’na hong tun’pih uh hi. Arvad gam galkapte in na kulh cing a, Gamad gam mite in na tausangte cing uh hi. Amaute in na kulh tungah a lum uh khai uh hi. Nang a hong etlawmsak mite in amaute ahi uh hi. Tarshish gamte tawh sum lei sum zuakna-ah na kizom uh a, na van tampite hong leina-in ngun, sik, dal, leh haknawte hong pia uh hi. Grik gam mite, Meshech gam mite, Tubal sum zuakna-ah nang tawh kizopna nei uh a, na vante hong leina-in sila dingin mite leh sumngo beelte hong pia uh hi. Beth-togarmah gam mite in zong na vante hong leina-in van pua sakolte, sakol galkapte leh late hong pia uh hi. Rodes gam mite in zong nang tawh sum lei sum zuakna-ah kizopna nei uh a, tuipi gei-a om gam khempeuhte in na van hong leina-in saiha leh ningsing hong pia uh hi. Edom mite in zong na van tampi hong lei uh hi. Van leina-in emerald suangmanpha, puansan, a kizem puante, saihadial puan hoihte, suangkhi, leh rubi suangmanpha hong pia uh hi. Judah leh Israel gam mite in zong na van leina-in mangbuh, oliv thau leh theipal, khuaizu leh singnamtui tuamtuamte hong pia uh hi. Dedan mite in na van hong leina-in sakol dapphahte hong pia uh hi. Arabia mite leh Kedar gam ukte in tuuno, tuutal leh keeltal tawh na van hong lei uh hi. Sheba leh Raamah sumbukte in na van leina-in singnamtui hoihpente, suangmanphate, leh kham hong pia uh hi. Haran, Kanneh, Eden, Asshur leh Khilmad khuapite in zong nang tawh sum lei sum zuakna-in kizopna hong nei uh hi. Amaute in nang kiangah puan manpha mahmahte, puansan, a kizem puante, sualphah puante, leh limtakin a kiheek khauhual hoih nam khempeuh hong zuak uh hi. Nangma vante ahih leh Tarshish teembaw lianpente pawl in a honhonin pua uh hi. Nang in van a dim pua-in tuipi tunga a pai teembaw lianpi tawh na kibang hi. Nang hong hotte in tuipi thukna gamlapi-ah hong hot a, nisuahna huihpi-in, tuipi laizangah hong mutsia hi. Tua bangin nang na siat ni ciangin a tam mahmah na van khempeuh, na sunga om teembaw nasem khempeuh, na innlam siamte leh na sumbukte khempeuh, na sunga om na galkap khempeuh, a vekpi-in nang tawh tuipi sungah tum mang uh hi. Teembaw nasem tuikiate kikona in tuipi gei teng thawn hi. Teembaw dang a tuang mite khempeuh kum khia uh a, a vekpi in tuipi gei-ah pai uh hi. Nangma hangin nakpi takin kap uh a, a lu uh leivui thehin, vut lakah bual uh hi. Nangma hangin a lu uh mettol uh a, dahna limin puanhampi silh uh a, na sa lua-in kap uh hi. Amaute in nang hong tamlawh uh a: Tuipi sungah a daicip suak Tai-ar khuapi, kua dang tawh kiteh thei ding a, ama thuak bang kua’n thuak ngei hiam? Na sumbuk vante tuipi tungah a pai ciangin minam khempeuh tangsapna na cingsak hi. Nangma van hauhna in, kumpi dangte hauhlawh hi. Tu-in tuipi tungah na sia a, tuipi thuk sungah na kia suk hi. Na vante leh na mi khempeuh tui sungah nang tawh maimang ta hi, hong ci ding uh hi. Tuipi gei-a teeng mi khempeuh in, nang, lamdang hong sa ding uh hi. A kumpite uh zong lau mahmah ding a, a mai put uh laumai ding uh hi. Nang a maimang paisuak na hita a, nangma tuah bang a tuah khak ding uh, leitung a om sumbuk dang khempeuh, lau-in liing uh hi,” hong ci hi. Topa in kei kiangah thu hong gen a, “Ezekiel aw, Tai-ar khuapi a ukpa kiangah Topa Pasian keimah in ka gen nop thu, ama tungah hih bangin gen in: Kisak theihna lungsim lianpi nei-in tuipite’ laizang ah pasian’ tokhom tungah tu-in, kei in pasian khat ka hi hi, na ci hi. Nang in pasian bangin pil na kisak hangin, mihing khat na hi lel bek hi. Daniel sangin pil na kisa zaw a, theih loh a nei loin na kingaihsun hi. Na pilna leh na siamna tawh ngun leh kham tampi na nei hi. Sumbawl na siamna tawh na hauhna na behlap a, na hauhna na kisaktheihpih hi. Tua ahih manin Topa Pasian ahi, keimah in kong genin ah: Nang pen, pasian zahin a pil kisa na hih manin, thukhualna a nei het lo galte, nang ka hong simsak ding hi. Na pilna leh na siamna tawh na lamsa khempeuh amaute in hong vatmaisak ding uh hi. Amaute in nang hong that ding uh a, na hankhuk ding tuipi sungah hong khia ding uh hi. Nang hong that ding hong kuan ciangun, kei, pasian bang hi’ng, na ci lailai diam? Nang hong thatte na tuah ciangin, mihing na hih lelna kilang ding hi. Gamdang mite’ khut sungah, ui bang lelin na si ding hi. Topa Pasian ahi keimah in hih thu ka gen khin hi,” hong ci hi. Topa in kei kiangah thu hong gen kik a, “Ezekiel aw, Tai-ar kumpipa in a thuak ding tawh kisai-in tamlawh in la, Topa Pasian ahi keima thugen, hih bangin gen in: Nidang lai-in kicing etteh pha khat na hi a, pilna leh hoihna tawh na kidim hi. Pasian’ Eden huan sungah na teeng a, Suangmanpha nam khempeuh tawh na kizem hi. Karnelian, Topa z, leh Jasper, Khisolait, Beril, leh Onik, Safeiros, Karbankel, leh Emerald suangmanphate, nangma kizepna hi a, kham tawh kibawl kizepna tampi zong na nei hi. Hihte khempeuh nangma adingin na suah ni-in hong kibawlsak hi. Sathau a kinilh kherubte ka hong cingsak a, ka mual siangtho tungah na teeng a, a tee zaizai suangmanphate lakah na vak kawikawi hi. Gamtat siat ding na kipat ma hun ciang dong, na suah tunga kipanin na gamtatna khempeuh pauban’na khat beek om lo hi. Na sumbawl luatna hangin ngongtatin mawhna sung na tung kha hi. Tua ahih manin ka mual siangtho panin nang ka hong hawl khia a, a tee zaizai suangmanphate lak panin nang hong cing kherubte in hong hawlkhia uh hi. Na mel hoihna na kisaktheihpih kha a, na minthan’na in hong hai tatsak hi. Leilak ka hong den’na a, kumpi dangte hilhkholhna-in nang ka hong koih hi. A man loin sum na bawl luatna hang, tua bang na mawhna hangin, na biakna munte na siasak hi. Tua ahih manin khuapi sung ka hal a, a vekpi-in kangtum mang hi. Nang hong ente khempeuh’ muhna-ah, vut leh vai kong suah hi. Nang a maimang paisuak na hita a, nangma tuah bang a tuah khak ding uh, nang hong theisa minam khempeuh, lau-in liing uh hi,” hong ci hi. Topa in kei kiangah thu hong gen a, “Ezekiel aw, Sidon lam nga in la, a siat nading thu genkhol in. Topa Pasian ahi keimah in ka gen thu amaute kiangah hih bangin gen in: Sidon khuapi aw, keimah nangma lang ka hi a, nangma tungah kong bawlna hangin, mite in kei hong phat ding uh hi. Na sunga teeng mite daan piakna tawh, ka siangthona ka lah ciangin, Topa ka hihna thu, amaute in thei ding uh hi. Nangma sungah cinatna ka tungsak ding a, na kongzing khempeuh ah sisan ka luangsak ding hi. Na kimkot khempeuh panin hong kisim ding a, na mi khempeuh kithat lum mang ding hi. Tua ciangin Topa ka hihna thu na thei ding hi,” hong ci hi. Tua ciangin Topa in kei kiangah, “A kimkot-a om Israel mi a simmawh minam dangte in tu-in simmawh nawn lo ding uh a, Israel mite sunin a na sak thei ding ling leh lingkung tawh kibang nawn lo ding uh hi. Tua ciangin Topa ka hihna hong thei ding uh hi,” hong ci hi. Topa Pasian in kei kiangah, “Minam tuamtuamte lak-a ka thehthangna panin Israel mite ka kaikhawm kik ding a, keimah in a siangthopa ka hihna thu minam khempeuh in thei ding uh hi. Tua ciangin ka nasempa Jakob ka piak leitang ahi, amaute’ gam sungah Israel mite teeng ding uh hi. Tua gam sungah lungmuang takin teeng ding uh a, amaute in inn lamin, leengguite suan ding uh hi. Israel mite a simmawh minam dangte daan ka pia ding a, Israel mite ahih leh lungmuang takin om hithiat ding uh hi. Tua ciangin keimah in Topa amau’ Pasian ka hihna thu thei ding uh hi,” hong ci hi. Zedekiah in a uk kum sawmna, a kha sawm, a ni sawm-le-nih ni-in Topa in kei kiangah thu hong gen a, “Ezekiel aw, Izipt kumpipa Faro’ lam nga in la, amah leh Izipt gam khempeuh daan a kipiak nading thu genkhol in. Topa Pasian in hih bangin gen hi, ci-in Izipt kumpipa Faro kiangah gen in: Gun sungah a om, awle lianpi ahi, nang Izipt kumpipa aw, keimah in nangma lang ka hi hi. Nail Gunpi, nangma aa in na gen a, nangma bawlsa-in na ngaihsun hi. Na khaguh-ah sikkawi ka bulh ding a, na gun sunga ngasa om khempeuh nangma tungah ka belhsak ding hi. Tua ciangin na tunga ngasa belh khempeuh tawh Nail gun sung panin nang kong kaikhia ding hi. Nangmah leh na ngasa khempeuh gamlakah kong pai ding hi. Leilakah na pumpi kiphah ding a, phum lohin hong kikoih ding hi. Ganhingte leh huihlak vasate’ an dingin nang ka hong pia ding hi. Tua ciangin Topa ka hihna thu Izipt mi khempeuh in thei ding uh hi. Bang hang hiam cih leh nangmah in Israel mite’ muan’ leh suan’ khat na hi ngei a, ahi zongin nangmah in a khauh lo pumpeng kung khat bang na hi lel hi. Nangma tungah amaute hong kingap uh ciangin nang na kitan a, amaute sunin na puksak hi. Tu-in Topa Pasian in nang kiangah kong genin ah: Namsau tawh mi kong simsak ding a, na mite leh na ganhingte thatlum mang ding uh hi. Izipt gam khempeuh a kinusia gam simtham suak ding a, tua ciangin Topa ka hihna thu na thei ding hi. Nangmah in Nail Gunpi in keima aa hi a, keima bawlsa hi, ci na hih manin, keimah in nangmah leh na Nail Gunpi langah ka pang hi. Izipt gam khempeuh, leilu lam Migdol khuapi panin leitaw lam Siene khuapi, Ethiopia gamgi dong, a kinusia gamkhing ka suaksak ding hi. Na gam sung teng mihing in ahi a, ganhing in ahi zongin sik nawn lo ding hi. Kum sawmli sung bangmah om lo ding hi. Leitung gam khempeuh lakah Izipt gam pen a gamkhing penin ka bawl ding hi. Kum sawmli sung khuapi sia dang khempeuh sangin a sia zaw-in Izipt khuapite ka bawl ding hi. Izipt mite galtai-in ka bawl ding a, gam khempeuh leh minam dang khempeuhte kiangah tai-in ka kithehthang sak ding hi. “Bang hang hiam cih leh Topa Pasian in hih bangin ka ci hi: Kum sawmli khit ciangin a kithehthangna minamte lak panin Izipt mite ka kaikhawm kik ding a, amaute’ piancilna mun Izipt khanglam Pathros gamah ka teengsak ding hi. Tua lai-ah kumpi gam gina loin om ding uh a, kumpi gam khempeuh lakah a gina lopen suak ding uh a, minam dang kuamah uk zo nawn lo ding uh hi. A gina lo mahmah-in bawl ding ka hih manin amau’ deih bangin minam dang khat beek tasak zo lo ding uh hi. Israel mite in muan’ leh suan’ in amaute nei kik ngei nawn lo ding uh hi. Iziptte a tuahsiat ciangin a suang khial kha ahih lamtak uh Israel mite in a phawk ding uh hi. Tua ciangin Topa Pasian ka hihna thu Israel mite in thei ding uh hi,” hong ci hi. Zedekiah in a uk a kum sawmnih-le-sagih kum, a kha masa a ni masa ni-in Topa in kei kiangah thu hong gen a, “Ezekiel aw, Babilon kumpipa Nebukhadnezzar in, Tai-ar khuapi sim hi. A galkapte, nakpi takin hanciam sak lua ahih manin a sam nangawn uh pulhmangin a liangkote uh a sa nangawn lengkhia gawp a, ahi zongin tua bangin amau’ gim thamanin kumpipa leh a galkapte in bangmah phattuamna ngah lo uh hi. Tua ahih ciangin Topa Pasian ahi keimah in hih bangin thu kong gen hi: Tu-in Tai-ar khuapi a simna hangin Babilon kumpipa Nebukhadnezzar tungah Izipt gam ka pia ding hi. Amah in Izipt gam luhin a nate uh sut ding a, a galkapte’ thaman dingin Iziptte’ neihsa khempeuh pua khia mang ding hi. A galkapte in keima adingin na hong sepsak uh ahih manin, ama hong nasep sak ka thukkikna-in ama tungah Izipt gam a pia ka hi hi. Topa Pasian ahi keimah in hih thu ka gen khin hi. “Hih thu hong tun’ ciangin Israel mite a thahat minamin ka bawl kik ding a, mi khempeuh’ zak nading munah nang thu kong gensak ding hi. Tua ciangin Topa ka hihna thu amaute in hong thei ding uh hi,” hong ci hi. Topa in kei kiangah thu hong gen leuleu a, “Ezekiel aw, Topa Pasian keima thugen hih bangin pulak in: ‘A lauhuai ni’, ci-in awng in. Minamte’ siat nading hun, lungkham meiipi zin’ ding, Topa ’ ni hong nai ta hi. Izipt gamah galpi tung ding a, Ethiopia gamah lungkhamna lianpi om ding hi. Izipt gamah mi tampi kithat ding a, a neihsa khempeuh uh kipua khia-in, gam hawm guakin kinusia ding hi. “Tua galpi in Ethiopia gam, Put gam, Lud gam, Arabia gam, leh Libia gam panin a kicial galkap khempeuh that ding a, keima mite’ lak pan-a galkapte nangawn Izipt tawh si ding uh hi. “Leilu lam Migdol khuapi pan leitaw lam Siene khuapi dong, Izipt gam a hute khempeuh gal sungah si mang ding uh a, Izipt’ kiphatsakpih a galkap teng si mang ding hi, ci-in Topa Pasian in ka gen khin hi. Izipt gam in leitung gam khempeuh ah, a gamkhingpen suak ding a, khuapi dang a siate khempeuh sangin, a khuapite sia zaw ding hi. Izipt gam hal tumin, a gam a hute khempeuh a bei khit ciangin, Topa ka hihna thu hong thei ding uh hi. “Tua bangin Izipt gam a siatni hun hong tun’ ciangin bangmah khuaphawk loin a om Ethiopia mite kiangah kamtaite ka sawl ding a, amaute lau mahmah ding uh hi. Tua hun ding tu-in hong tung ta hi. “Izipt’ hauhna teng a sumai dingin, Babilon kumpi Nebukhadnezzar ka zang ding hi. Amah leh a kihtakhuaipen minam a galkapte hong pai ding a, gamsung khempeuh susia ding hi. Namsau tawh Izipt mite vatlum ding uh a, gamsung khempeuh ah misi luanghawm dim ding hi. Nail Gun a tui ka kangsak ding a, mi gilote khut sungah Izipt ka koih ding hi. Gamdang mite in susia gawpin, gamkhing suaksak ding uh hi. Topa ahi keimah in ka ci khin hi. “Milim khempeuh ka susia ding a, Memfis khuapi-a pasian man lote ka beisak ding hi. Izipt gam a uk ding om nawn lo ding a, mi khempeuh lau-in ka liingsak gawp ding hi. Izipt gam khanglam Pathros gam teng gamkhing ka suaksak ding a, Izipt gam saklam-a om Zoan khuapi ka hal ding a, kumpi khua ahi Thebes, daan ka pia ding hi. Izipt gam sungah khuapi muanhuaipen ahi Pelusium khuapi, ka hehna ka thuaksak ding a, Thebes khuapi mi khempeuh ka sumai ding hi. Izipt gamsung ka hal ding a, Pelusium khuapi in gimna lianpi thuak ding hi. Thebes khuapi kulh kicim ding a, tui in a khuapi tuum ding hi. Memfis in lungkham paisuak ding hi. On khuapi leh Pibeseth khuapi tangvalte, gal sungah si khin ding uh a, adang teng, sal-in kiman ding hi. Izipt’ vangliatna ka suksiat ciangin Tahpanhes khuapi-ah khim zing ding a, a kisaktheihpihna teng uh bei ding hi. Izipt gamsung meiipi in khuhcip ding a, a mi khempeuh sal-in pai ding uh hi. Hih bangin Izipt, daan ka piak ciangin, Topa ka hihna thu amaute in hong thei ding uh hi,” hong ci hi. Zedekiah in a uk a kum sawm-le-khat kum, a kha masa a ni sagih ni-in Topa in kei kiangah thu hong gen a, “Ezekiel aw, Izipt kumpipa Faro’ khut ka kuaihtansak zo hi. A khut dam kikin namsau a tawi zawh nadingin kuamah in a khut tuamsak lo hi. Tua ahih manin Topa Pasian ahi keima thugen in: Keimah in Izipt kumpipa Faro’ lang ka hi hi. A khut a lang nih-in, a dam lai leh a kitansa zong, ka kuaihtansak ding a, a khut panin namsau ka kiasak ding hi. Izipt mite pen, gam khempeuh leh minam khempeuhte lakah ka thehthang ding hi. Tua ciangin Babilon kumpipa’ khut ka khauhsak ding a, ama khut sungah ka namsau ka pia ding hi. Ahi zongin Izipt kumpipa Faro’ khut ka kuaihtansak ding a, a langte’ mai-ah tai-in si ding hi. Amah ka thanemsak ding a, Babilon kumpipa ka thakhauhsak ding hi. Tua ciangin Topa ka hihna thu amaute in hong thei ding uh hi. Babilon kumpipa khut sungah ka namsau ka piak ciangin amah in Izipt lam ngat ding hi. Tua ciangin gam khempeuh leh minam lakah Izipt mite ka thehthang ding hi. Tua ciangin Topa ka hihna thu amaute in hong thei ding uh hi,” hong ci hi. Zedekiah in a uk a kum sawm-le-khat kum, a kha thumna a ni masa ni-in Topa in kei kiangah thu hong gen a, “Ezekiel aw, Izipt kumpipa Faro leh ama mite’ kiangah hih bangin gen in: Na lian mahmah uh a, kong tehpih theih ding om lo hi. A hiangte hoih-in pha mahmah a, a kung sang mahmahin meii lak a ban, Lebanon-a taamtaak tawh na kibang uh hi. A khangsak ding tui om a, lei sung pan an a pia ding tui om hi. Tua sing a pona mun tui kawt a, gamsung sing khempeuh in zong tui ngah hi. Lim takin tui ngah ahih manin, singkung dang khempeuh sangin sang zaw hi. A hiangte zong golin sau mahmah hi. Vasa nam khempeuh in a hiang tungah bu tom uh a, ganhing nam khempeuh in a limnuai, ta suahna-in nei uh hi. Leitung minam khempeuh in zong, a limnuai belh-in nei uh hi. Tua singkung hoih mahmah a, a kung sang a, a hiang sau a, a zung in tui omna lei thukpi sung ban hi. Pasian’ huan-a taamtaakte tawh teh theih ding hi lo a, taaksing kung in tua bang hiang hoih nei ngei lo a, hiangpa kung in zong tua bang hiang hoih nei ngei lo a, Pasian’ huan-a singkungte zong, tua zahin hoih ngei lo hi. A meel hoih-in ka bawl a, a hiang ka zausak a, Pasian’ huan sunga a po, singkung khempeuhte’ en’in ka bawl hi. “Tua ahih ciangin Topa Pasian keimah in hih bangin ka ci hi. Tua sing in meiipi a bat dongin khangto a, ahi zongin a san’ semsemna tawh kizui-in kiphasak semsem hi. Tua ahih manin tua singkung ka deih nawn kei a, gamdang kumpi khat khut sungah ka pia ding a, ama thuak dingin a kilawm bangin tua kumpipa in bawl ding hi. Thu khualna a nei lo gamdang mite in tua singkung phukin nusia cip ding uh hi. Mual khempeuh leh guam khempeuh ah, a hiang kitante kia ding uh hi. A liim a beel minam khempeuh in taisan ta ding uh hi. Vasate hong leengin tua sing puk tungah tuang ding uh a, gamsate in a hiangte tuancil ding uh hi. Tua ahih ciangin tu-a kipanin singkung khat beek, bang zahin tui a ngah hangin tua zahin khangin, a dawn in meiipi banin sang zo ngei nawn lo ding hi. Misite omna Leinuai khua a zuan ding a si thei mihingte mah bangin, singkung khempeuh a si ding ahi ta hi. “ Topa Pasian in ka cihin ah: Tua singkung in misite khua Leinuai a zuat ciangin, lei nuai-a tuite tuumsakin ka thuumsak ding hi. Gun tuite leh lui tuite ka luangsak nawn kei ding a, Lebanon Mual maikhingin, gamlak sing khempeuh keutum ding hi. Mi site’ omna Leinuai khua-ah tua singkung ka khiat suk ciangin, a kiatna ging in minam khempeuh lok gawp ding hi. Tua singkung a kiat manin, Eden singkung khempeuh, leh a hoihpen, lim takin tui a ngah Lebanon singkungte khempeuh in zong Leinuai-ah nuamtuam na sa ding uh hi. Bang hang hiam cih leh a sisate a zuan dingin mi site omna Leinuai-ah amah tawh a paikhawm uh ahi hi. Ama liim nuai a beelte khempeuh, minam dangte lakah kithehthang mang uh hi. “Tua singkung in Izipt kumpipa Faro leh ama mite ahi hi. Eden huan-a singkungte nangawn tua zahin lianin hoih zaw lo hi. Ahi zongin, Eden huan-a singkungte mah bangin, Pasian thu a ngaihsun lo, gal sunga a sisate’ omna a zuan dingin, misite’ omna Leinuai a zuan ding ahi hi. Topa Pasian keimah in hih thu ka gen khin hi,” hong ci hi. Zedekiah in a uk a kum sawm-le-nih kum, a kha sawm-le-nih a ni masa ni-in Topa in kei kiangah thu hong gen a, “Ezekiel aw, Izipt kumpipa Faro tamlawh in la, hih bangin ci in: Minam dangte lakah, humpinelkai bangin na kingaihsun a, ahi zongin nangmah in gun sung tok gawpin gun a ninsak, awle tawh na kibang zaw hi. Topa Pasian ahi keimah in kong cihin ah: Minam tampi hong kuansakin, ka ngen kong khuhsak ding a, tui gei-ah kong kaisak ding hi. Lei lakah nang hong kai khia-in, leilak kong den’ nading a, vasate leh ganhingte, a kham takun kong ne sak ding hi. Mual teng guam teng, na sa ka dimsak ding hi. Na sisan tawh leitung khempeuh ka kawtsak ding a, mual teng guam teng na sisan tawh kidim ding hi. Nang kong suksiat ni ciangin, vanpi ka khuhcip ding a, aksi ka mialsak ding hi. Ni pen meiipi ka liahsak ding a, kha ka mialsak ding hi. Vantung khuavak khempeuh ka mialsak ding a, na gam khempeuh khim ziing ding hi, ci-in Topa Pasian in ka gen khin hi. “Na theih ngei loh gam dangte-ah salin kong omsak ciangin minam tampite lunggim ding hi. Nang tunga kong bawlna thu minam tampite in lamdang sa ding uh hi. Ka namsau ka viik ciangin kumpite lau-in kigaih ding uh hi. Nang na puk ni ciangin mi khempeuh a sih khak ding uh lau-in liing kelkel ding uh hi. Bang hang hiam cih leh Topa Pasian in hih bangin ka ci hi: Babilon kumpipa’ namsau na thuak ding hi. Minam dang a gilopente sung panin a galkapte uh a namsau uh dok sakin, na mihonpite ka thatsak ding hi. Na kisaktheihpih teng vatmai ding uh a, na mi khempeuh that mang ding uh hi. A tui nekna mun khempeuh uhah, na gan khawite ka that khin ding hi. Tui a sik nin ding mihing ganhing khat zong om nawn lo ding hi. Bangmah in su nawn lo ding ahih manin, tuite cim sitset ding a, gunte zong dum dide ding uh hi, ci-in Topa Pasian in ka gen khin hi. Izipt gamkhing suaksakin, a gam sunga om teng ka suksiat ciangin, Topa ka hihna thu hong thei ding uh hi. Hih in kah la-in a kisa ding tamlawhna hi a, Izipt leh a mite tamlawhna-in minam dang numeite in nei ding uh hi. Topa Pasian in hih thu ka gen khin hi,” hong ci hi. Zedekiah in a uk a kum sawm-le-nih kum, a kha masa a ni sawm-le-nga ni-in Topa in kei tungah thu hong gen a, “Ezekiel aw, Izipt mi tampite’ hangin kapin thuum in. Mi site’ omna Leinuai gamah a vanglian minam dangte tawh pai sak in. Amaute kiangah hih bangin ci in: Midang khempeuh sangin mel hoih zaw hilo na hi uh hiam? Pai un la, Pasian a thei lo mite han sungah lum un, ci-in gen in. Gal sunga a kithatte tawh si khawm ding uh hi. Izipt gam sunga om mi khempeuh a vatlum dingin namsau khat a baihsa-in om hi. Izipt mite a pan’pih galhang pente in mi site gam Leinuai panin amaute na dawn ding uh a, ‘Pasian a thei lo, gal sunga si mite hong paisuk uh a, hih lai-ah lum ta uh hi,’ ci-in kiko ding uh hi. “Assiria zong, a kimkot-ah a galkapte’ han tawh, tua lai mah-ah om hi. Amaute khempeuh zong gal sungah a si uh hi a, Leinuai a thukpenna munah amaute’ han om hi. A galkap khempeuh gal sungah a si hi a, a hante uh ama kimkotah om hi. Ahi zongin amaute pen ni dangin minam dangte a liinglawng sak zo ngeite ahi uh hi. “Elam zong a kimkotah a galkapte’ han tawh, tua lai mah-ah om hi. Amaute khempeuh gal sungah a si uh hi a, mi site gam Leinuai-ah Pasian a thei loin paisuk uh hi. A hin’ lai-un mi khempeuh a lausak ngeite hi uh a, ahi zongin tu-in amaute si-in mindai-in om uh hi. Gal sunga a site lak mah-ah Elam lum a, ama kimkot-ah a galkapte’ han om hi. Amaute in Pasian a thei loin, gal sungah si uh hi. A hin’ lai-un mite a lausak ngeite hi uh a, ahi zongin tu-in amaute si-in mindai-in om uh a, gal sunga site mah tawh kibangin gimna thuak uh hi. “Meshek leh Tubal zong tua lai mah ah om uh a, a kimkot uhah a galkapte uh’ han om hi. Amaute khempeuh in Pasian a thei lo, gal sunga a si ahi uh hi. Ahi zongin a hin’ lai-un mi dangte a lausak zo ngeite ahi uh hi. Hih mite pen mi site omna Leinuai-ah a galvan teng uh tawh pai-in a namsau uh kilukhamsakin, a lum uh a awm tung uhah a kikoihsak kawmin lim takin a kivui tanglai galkapte bangin pahtawi-a vuina ngah lo uh hi. Ahi zongin hih mite pen mi dangte a lausak zo dingin a vanglian ngeite ahi uh hi. Tua mah bangin nang Faro zong Pasian a thei lo, gal sunga a site lakah na om ding hi. “Edom zong a kumpite leh a gam ukte tawh tua lai mah ah om hi. Amaute in a thahat gakapte hi a, ahi zongin tu-in Pasian thei loin gal sunga a site lak, misite gam Leinuai-ah lum uh hi. “Leilu lam uliante leh Sidon mite zong tua lai mah ah om uh hi. Amaute’ vangliatna in midangte lausak ngei a, ahi zongin tu-in gal sunga si mite tawh mindai-in paisuk uh a, Pasian thei loin kivui uh hi. Misite gam Leinuai-a a pai sukte tawh a mindaina uh kibang hi. “Izipt kumpipa Faro in hih mite khempeuh a muh ciangin ama sihna leh a galkapte gal sungah a sihna thu tawh kisai-in a lung nuamtuam ding hi, Topa Pasian in ci hi. Bang hang hiam cih leh Faro in mi dangte lausak gawp ahih manin amah leh a galkapte khempeuh kithatin, Pasian thei loin gal sunga a si mite tawh kivui khawm ding hi. Topa Pasian keimah in hih thu ka gen khin hi,” hong ci hi. Topa in kei kiangah thu hong gen a, “Ezekiel aw, gam khatpeuh ah gal ka tun’sak ciangin a thu piang teng na mipihte tungah gen in. Tua gal tun’ nading gammite in amaute lak panin gal vil dingin mi khat seh uh hi. Galvilpa in galte hong pai a muh ciangin mi khempeuh a theihsak nadingin patau kohna peengkul tum hi. Mi khatpeuh in tua patau kohna za napi-in don loin om mawk a, a galte hong pai-in tua mipa a thah leh, ama sihna sisan pen amahmah ngawh ding ahi hi. Amah in patau kohna za napi-in don lo ahih manin, ama sisan luanna in ama khialhna hang ahi hi. Thudon hi leh amah a suakta ding ahi hi. Ahi zongin galvilpa in galte hong pai mu napi-in patau kohna peengkul a tum kei a, galte hong pai-in mi a thah leh, tua a site amau’ mawhna hangin a si ahi hi. Ahi zongin amaute’ sihna sisan pen galvilpa ka ngawh ding hi. “Ezekiel aw, tu-in Israel mi nam khempeuhte’ galvilpa dingin nang kong koih hi. Nang tungah kong piak hilhkholhna khempeuh amaute tungah na gen sawn ding hi. ‘Mi gilopa khat pen si ding hi,’ ci-in kong gen ciangin amah a nuntak theihna dingin a gamtatna a khel nading na hilh kei leh, tua mipa pen a mawhnei-in si ding a, ahi zongin ama sihna sisan nang kong ngawh ding hi. Nangmah in gilopa khat hilhkhol napi-in a mawh gamtatna a khawl kei leh, tua mipa a mawh nei mah-in si ding a, ahi zongin nang na suakta ding hi,” hong ci hi. Topa in kei kiangah thu hong gen a, “Ezekiel aw, Israel mite tungah hih bangin gen in: Amaute in, ‘Ka mawhna leh ka khialhnate un hong nencip a, ka tha uh beita ahih manin, bangci nuntak zawh ding ka hi uh hiam?’ ci uh hi. Amaute kiangah hih bangin gen in: Keimah in a nungta Topa Pasian ka hih mah bangin mawhnei mi khat a si ka muh ciangin nuam ka sa het kei hi. A mawh gamtatna khawlin a nuntak ding ka deihna hi zaw hi. Israel mite aw, na mawh gamtatnate uh khawl un. Bang hangin si nuam se na hi uh hiam? “Ezekiel aw, tu-in Israel mite kiangah hih bangin gen in: Midik khat in mawhna bawl leh, a beisa-a ama hoihna in amah suaktasak thei lo hi. Mi gilo khat a gitlohna khawl leh daan kipia lo ding a, midik khat in mawhna bawl leh nungta suak tuan lo ding hi. Midik khat tungah nuntakna ding kam ka ciam hangin, a beisa-a ama hoihna suangin mawh gamtat ding hong kipan leh, ama gamtat hoihnasate ka phawksak kei ding hi. Ama mawh gamtatna hangin si veve ding hi. Migilo khat kiangah, na si taktak ding hi, ci-in ka hilhkholh hangin, a mawh gamtatna khawlin a man a hoihin hong gamta kik hen la, gentehna-in, leitawi lapa in a ap khapna vante pia kikin, a guksa nate pia kikin, a mawh bawlnate khawlin, nuntakna a pia thei thukhamte a zuih leh, amah nungta taktak ding a, si het lo ding hi. Ama gamtatnasa mawhnate kimaisak ding hi. A man a hoih-in amah gamta ahih manin nungta ding hi. “Ahi zongin na mipihte in keima hihna zia thutang lo hi, ci-in ngaihsun uh hi. Tua bang hilo zaw a, amau’ ngaihsutna zia a man lohna hang hi zaw hi. Mi hoih khat in a gamtat hoih, khawlin gamtat siat ding hong kipan leh, tua a gamtat siatna hangin a mah si ding hi. Migilo khat in a gitlohna khawlin a man a hoih-in gamta leh, tua hangin amah suakta ding hi. Ahi zongin Israel mite in keima hihna zia a thutang loin gen uh hi. Keimah in amaute’ gamtatna tawh kizui-in thu a khen ding ka hi bek hi,” hong ci hi. Sal-a ka om zawh uh a kum sawm-le-nih kum, a kha sawmna a ni nga ni-in, Jerusalem panin a hong suakta mi khat kei kiangah hong pai in, “Jerusalem khuapi kila khin ta hi,” ci-in thu hong ko hi. Tua ama tun’ ni ding a zan nitakin Topa ’ vangliatna ka sungah hong om lam ka kiphawk a, tua mipa hong tun’ ni zingsangin Topa in kei hong pau thei sak kik hi. Topa in kei kiangah thu hong gen a, “Ezekiel aw, Israel gam khuapi siate sunga teeng mite in, ‘Abraham, mi khat bek hi napi-in gambup kipia hi. Tu-in eite in tampi i hih ciangin hih gamin eima aa hi taktak hi,’ ci uh hi. Tua ahih ciangin Topa Pasian ahi keima thugen, hih bangin amaute kiangah gen in: Note in sasi, a sa tawh na ne khawm uh a, milim zong na bia uh hi. Mi zong na that lai uh hi. Tua ahih manin bang ci-in hih gam in kote’ aa hi, ci thei na hi uh hiam? Note in namsau suan’in na nei uh a, na gamtatnate uh kihhuai mahmah hi. Mi khempeuh in nu-le-pa mawhna na gamta uh hi. Tua bangpi-in hih gam luah thei ding na hi uh hiam? ci-in gen in. Amaute kiangah hih bangin gen in: Keimah in a nungta Topa Pasian ka hih mah bangin, khuapi siate sunga teeng mite gal-in si ding uh a, khuaneu-a teeng mite khempeuh gamsate in ne ding uh hi. Dum muanhuai sung leh leihawm sunga bute khempeuh pulnatna tawh si ding uh hi. Gamsung khempeuh gamkhing ka suaksak ding a, amaute’ kisaktheihpih vangliatna teng bei ding hi. Israel mual tungte gamkhing suak ding ahih manin kuamah in kantan ngam lo ding uh hi. A mawhna hangun a mite daan pia-in, a gam uh gamkhing ka suahsak ciangin keimah in Topa ka hihna thu hong thei ding uh hi. “Ezekiel aw, khuapi kulh gei-ah ahi a, a inn kong gei uh ahi zongin na mipihte a kimuh uh ciangin nangma thu tawh kisai thu gen uh a, ‘Pai un, Topa in bang thu gen hiam, va za ni,’ ci-in khat leh khat kizawn uh hi. Tua ahih ciangin nangma thugen a za dingin ka mite hong kisutuah uh a, ahi zongin nangma gen bangin amaute gamta lo uh hi. Amaute a kam-un hoih khem napi-in, a lungsim uhah amau’ meet nading bek ngaihsun uh hi. Amaute’ adingin nang pen mite’ lungnop nadingin zawl la sa-in lasaknate a tum mipa tawh na kibang lel hi. Na thugen khempeuh hong ngai napi uh, khat beek zui lo uh hi. Ahi zongin a tung takpi ding ahih mah bangin, na thugente a tun’ ciangin amaute lakah kamsang khat a om ngei ahih lam thei ding uh hi,” hong ci hi. Topa in kei kiangah thu hong gen a, “Ezekiel aw, keima tuuhon ahi Israel mite a cingte mawhsakna thu gen in. Amaute kiangah thu gen khol in la, Topa Pasian ahi keima thugen, amaute kiangah hih bangin gen in: Israel mi a cing note aw, gimna na thuak ding uh hi. Nomau mahmah na kivak uh a, tuute na don kei uh hi. Tuu nawi ne-in, tuumul silhin, tuu thaute goin a sa na ne uh a, ahi zongin tuute na vak kei uh hi. Tuu zawngkhalte na khoi kei uh a, a cinate na damsak kei uh a, a liammate na tuamsak kei uh a, a lam pialte na khiang kei uh a, a mangte na zong kei uh hi. Na tuaci bawl gen loh uh, ngong bawlin na uk gawp zaw sop uh hi. Tua tuute in a cing ding nei lo uh ahih manin kithehthang gawp uh a, gamlak sate’ an suak lel uh hi. Tua ahih manin ka tuute kithehthang gawp uh a, mual tungte leh mualsang tung khempeuh ah vak mang uh hi. Leitung gam khempeuh ah ka tuute kithehthang uh a, kuamah in zon’ ding kan dingin ngaihsun lo uh hi. “Tua ahih manin no tuucingte aw, Topa ahi keima thugen ngai un: Keimah in a nungta Topa Pasian ka hih takpi mah bangin, keima thu nong ngaih zawk ding uh hi napi-in, tu-in a cing om lo ahih manin gamsate in ka tuute manin that in ne uh hi. Ka tuu a cingte in a tuu uh zong loin, amau pumpi bek mah kivakin ka tuute vak lo uh hi. Tua ahih manin no tuucingte aw, keima thugen ngai un. Topa Pasian ahi keimah in note’ lang ka hihna thu tu-in kong pulak hi. Note’ khut sung panin ka tuute ka la ding a, tuute don loin note bek a kidon no tuucingte khut sungah ka tuute ka omsak kik ngei nawn kei ding hi. Note’ khut sung panin ka tuute ka honkhia ding a, ka tuute, note’ nek-in ka omsak nawn kei ding hi. “ Topa Pasian keimah in note kiangah kong genin ah: Keimahmah in ka tuute ka zong ding a, ka kem ding hi. Tuucingte in a kithehthang tuute kaikhawmin a kep bangin keimah in donin ka kem ding hi. Tua bang a lauhuai siat nading hun lai takin a kithehthangna uh mun khempeuh panin ka kaikhawm ding hi. Gamdang panin amaute lakhia-in ka kaikhawm ding a, amaute’ leitangah ka tun’pih kik ding hi. Israel mual tungte, lui geite, leh mite’ ten’na mun khempeuh ah amaute ka gamta sak ding hi. Lungmuang takin Israel mual tung lonona leh guam sung mun nuamte leh Isreal gam lonona mun khempeuh ah ka gamta sak ding hi. Keimahmah in ka tuute ka cing ding a, nuam takin a om nading uh mun ka zon’ sak ding hi. Topa Pasian keimah in hih thu ka gen khin hi. Keimah in a mangte zongin, a lam pialte kaikhawmin, a liamte a liamna tuamsakin, a cinate damsakin, a cidam a thahatte zong a kibangin ka en ding hi. Bang hang hiam cih leh keimah in a manin a gamta tuucingpa ka hi hi. “No ka tuuhonte aw, Topa Pasian ahi keima thugen ngai un: Note a tuamtuam ciatin thu kong khen ding a, note sung panin a hoih leh a hoih lo hong khenin, tuu leh keel zong kong khen ding hi. Note pawlkhat, lopa limci na nek bek uh tawh na lungkim kei uh a, na nek lohte nangawn uh na tuancil gawp uh hi. Tui a siang na dawn uh a, na dawn loh teng uh na siknin uh hi. Ka tuu dangte in na tuatcilsa uh lopate ne-in na sikninsa uh tuite a dawn uh kul hi. “Tua ahih ciangin Topa Pasian keimah in ka thugen ngai un: No tuu thaute leh tuu gawngte kong khen ding hi. Note in a cidam lote na ki uh tawh si gawpin, a hon lak panin na nawtkhia uh hi. Keimah in ka tuuhonte ka hon ding a, a dangte ka bawlsiasak nawn kei ding hi. Ka tuute khat leh khat kikal-ah thu ka khen ding hi. Amaute a cing dingin ka nasempa David ka koih ding a, amah in amaute hoih takin an vakin kem ding hi. Topa ahi keimah in amaute’ Pasian ka hi ding a, ka nasempa David in amaute a ukpa hi ding hi. Topa ahi keimah in hih thu ka gen khin hi. Amaute lungmuang takin a om theih nadingun amaute tawh thuciamna khat ka bawl ding hi. Gam sung panin a lauhuai gamsa khempeuh ka beisak ding a, gamlakah nuam takin gamta-in lum thei ding uh hi. Amaute thupha pia-in ka mual siangtho kiim-ah ka om sak ding hi. A kisap hun hunin thupha guahtui ka zusak ding hi. Singkungte tampi tak gahin, lo-ah an tampi piang ding a, mi khempeuh a leitang ciatah nuam takin teeng ding uh hi. Sal ahihna panun ka mite suakta sakin, a kikhihna kolte uh ka sutsak khit ciangin, Topa ka hihna thu amaute in hong thei ding uh hi. Gamdang mite in hih gawpgawp nawn lo ding uh a, gamsate in thatin ne nawn lo ding uh hi. Amaute lungmuang takin om ding uh a, kuamah in lausak nawn lo ding uh hi. Amaute tungah logam hoih pia ding ka hih manin gam sungah gilkial dangtak om nawn lo ding hi. Minam dangte in amaute simmawh bawl nawn lo ding uh hi. Israel mite ka hutna leh amaute pen keima mi ahihna thu mi khempeuh in thei ding uh hi. Topa Pasian in hih thu ka gen khin hi. No ka tuute aw, an ka hong vak, tuuhon ahi keima mite na hi uh a, keimah in note’ Pasian ka hi hi. Topa Pasian ahi keimah in hih thu kong gen khin hi,” hong ci hi. Topa in kei kiangah thu hong gen a, “Ezekiel aw, Seir Mual lam nga in la, mawhsakna thu gen in. Topa Pasian ahi keima thugen, hih bangin gen in: Seir Mualtung gam aw, kei in nangma lang ka hi hi. Nang a gamkhingin ka hong bawl ding hi. Na khuapite ka siasak ding a, na gamsung teng gamkhing ka suaksak ding hi. Tua ciangin Topa ka hihna thu na thei ding hi. “Nang in Israel mite’ gal na hi tawntung a, a mawhna hangun a daan tuah ni a nunung pen, a lungkham thuak hun lai takun Israel mite na siasak mang hi. Tua ahih ciangin keimah in a nungta Topa Pasian ka hih takpi mah bangin, nangma sihna ding ka bawl ding a, na si takpi ding hi. Nangmah in mi sisak na hih manin nangma tungah sihna hong tung ding hi. Seir Mualtung gam khempeuh gamkhing ka suaksak ding a, tua gam sunga a vak mi khempeuh ka that ding hi. Mual tung khempeuh siluang hawm tawh ka kidimsak ding a, mual leh guam khempeuh dimin gal sunga a site’ luanghawm om ding hi. A gamkhingin kong bawl paisuak ding a, na khuapite sungah kuamah teeng kik nawn lo ding hi. Tua ciangin Topa ka hihna thu na thei ding hi. “Keimah in Israel leh Judah mite’ Topa Pasian hi napi-in, hih minam nihte nangma’ aa in, ngaihsunin a luah dingin na kigen hi. Tua ahih manin keimah in a nungta Topa Pasian ka hih takpi mah bangin, hih ka minam nihte tungah na heh gamtatna, na muhdah bawlna, leh na hazat bawlna tawh kizui-in nangma tungah kong thukkik ding hi. Amaute tungah na gamtatnasa hangin daan hong pia ka hihna thu amaute in thei ding uh hi. Tua ciangin, nangmah in, ‘Israel mualtungte gamkhing suakta a, keima ading hita hi,’ ci-in simmawhna tawh na kam paunate, Topa ahi keimah in a za ka hih lam na thei ding hi. Kei hong gensia-in na kiphatsak paunate khempeuh a vekin ka za khin hi. Tua ahih ciangin Topa Pasian in hih bangin ka ci hi: Leitung buppi a lungdam theih nadingin nang a gamkhing pha mahmah-in kong bawl ding a, keima mi Israelte a siat gawp manin na lungdamna zah tawh kizui-in nangma tungah kong bawl ding hi. Seir Mualtung gam, Edom, leitang khempeuh, gamkhing suak ding hi. Tua ciangin Topa ka hihna thu mi khempeuh in thei ding uh hi,” hong ci hi. Topa in kei kiangah, “Ezekiel aw, Israel mualte tungah thu gen in la, Topa Pasian ahi keimah in amaute tunga gen ding ka neih thute hih bangin gen in: Israelte’ galte in, ‘Hih tangtawng mualtung gamte tu-in eima aa hita hi,’ ci vial uh hi. Tua ahih ciangin mailam thu gen khol in la, Topa Pasian ahi keima thugen hih bangin pulak in: Na kimkot-a om minam dangte in no Israel mualtung gamte hong la-in na neihsate a hong suh uh ciangin, mite khempeuh in no Israel mite hong simmawh bawlin hong ciamnuih bawl lel uh hi. Tua ahih manin no Israel mualtung gamte aw, Topa Pasian ahi keimah in mual lian leh mual neute, luite leh guamte, a kisia-in a kinusia munte, leh a kiim-a minam dangte in luh gawpin a ciamnuih bawl khuapite tungah ka gen thute ngai un. Topa Pasian ahi keimah in a kimkot-a om minam dangte, leh a diak diakin Edom mite tungah ka heh luatna tawh thu ka gen hi. Amaute in lungdamin nuihna leh simmawhna tawh keima leitang la-in tang uh hi. Tua ahih ciangin Israel gam tawh kisai-in mailam thu genkhol in la, a kimkot-a om minam dangte in a simmawh bawlna hangin Topa Pasian ahi keimah in hehna tawh ka thugente, mual lian, mual neu, lui leh guamte’ tungah gen in. Topa Pasian ahi keimah in a kimkot-a om minam dangte ka mindaisak ding khauh takin ka kiciam hi. Ahi zongin Israel mualtung gamte-ah no ka mi Israelte’ adingin singkungte in teh leh gah hong nei kik ding a, a sawt loin note, inn-ah a hong ciah kik ding na hi uh hi. Keimah in note’ lamah kong pang a, pel loin na gam uh lo-in kikho kikin khaici kituh kik ding hi. A mi-in zong kong pungsak ding a, khuapite sungah teeng kikin a sia khempeuh na puahkik ding uh hi. A mihing a ganhing in kong pungsak ding a, a nidang sangin tam na phazaw ding uh hi. Ta tampi tak na nei ding uh hi. Ni dangin na om ngei bangun kong omsak kik ding a, a nidang sangin a cithei zaw-in kong bawl ding hi. Tua ciangin Topa ka hihna thu na thei ding uh hi. No ka mi Israelte, na leitang uhah kong gamtangsak kik ding hi. Note’ leitang suak ding a, tua leitang in na tate uh gilkial-in puksi sak nawn lo ding hi. Topa Pasian ahi keimah in kong genin ah: Israel mual tung gamte, mihing sane hi a, tua mual tung gamte in a gam sung mite’ tate laksak hi, ci-in a beisa hun-ah hong kigennate man hi. Ahi zongin tu-a kipanin mihing sa a ne, gamsung mite’ tate a laksak gam hi nawn lo ding hi. Topa Pasian in hih thu ka gen khin hi. Minam dangte’ hong ko bawlna za nawn loin, a hong mindaisakna uh na thuak nawn kei ding uh a, na sung uh a, teeng mite’ tate zong, no Israel mual tung gamte in na laksak nawn kei ding uh hi. Topa Pasian in hih thu ka gen khin hi,” hong ci hi. Topa in kei kiangah thu hong gen a, “Ezekiel aw, Israel mite amaute’ gamah a ten’ lai-un amaute’ gamtatna leh a sepnate uh tawh tua gam ninsak uh hi. Amaute’ gamtatnate pen numeite’ neih nin zahin a nin-in ka ngaihsun hi. Tua ahih manin gam sungah amaute’ mi thahna leh a milimte uh tawh gamsung teng a nitsakna hangun ka hehna teng ka thuaksak hi. Amaute’ nuntakna zia leh a gamtatnaziate uh tawh kizui-in amaute tungah thu ka khen a, gamdang mun citeng-ah amaute ka thehthang hi. Ahi zongin midangte in, ‘Hih mite pen Topa ’ mite hi napi-in, Pasian in amaute tungah a piak gam panin taikhia uh hi,’ ci-in a paina peuhpeuh uhah na kigen ahih manin, ka min siangtho hong daisak uh hi. Israel mite in a paina peuhpeuh uh gamdang mite lakah ka min siangtho hong daisak kawikawi uh ahih manin tua thu in ka lung hong himawhsak hi. “Tua ahih ciangin Topa Pasian keimah in Israel mite tunga ka gen ding thute hih bangin gen in: Israel mite aw, tu-a ka sep ding thu pen note kong khualna hang hi loin, minam dang khempeuhte lakah na daisak kawikawi uh ka min siangtho ka khualna ahi hi. Note in minamdangte lakah na daisaksa uh a lian ka min siangtho pen tu-in minam dangte lakah a siangthona ka langsak ding hi. Keimah in ka siangthona minam dangte lakah ka lah nadingin note kong zang ding hi. Tua ciangin Topa ka hihna thu amaute in hong thei ding uh hi. Topa Pasian ahi keimah in hih thu ka gen khin hi. Gam khempeuh leh minam khempeuhte lak panin note hong kaikhawm kikin na gam uhah kong tun’pih kik ding hi. Note tungah tui siangtho kong theh ding a, na milim biakna uh leh note hong ninsak na dang khempeuh panin kong siangsak ding hi. Note sungah lungtang thak leh kha thak kong guan ding a, na suang lungtang uh hong lak khiatsakin mihing lungtang kong guan ding hi. Note sungah keima kha kong guan ding a, note tungah kong piak ka thukhamte leh ka thupiakte lim takin kong zui sak ding hi. Tua ciangin na pu na pate uh tungah ka piaksa gamah na teeng ding uh a, note in keima mi hi-in; kei in note’ Pasian ka hi ding hi. Note hong ninsak thei ding na khempeuh panin kong hu ding hi. An tampi ka piangsak ding a, kial na thuak kha nawn kei ding uh hi. Na singgah kungte uh leh na lo lai ante uh tampi tak ka pha sak ding a, gil kial-a mindaina, minam dangte lakah na thuak kha nawn kei ding uh hi. Na gamtatnasa uh na gitlohnate uh leh na hoih lohnate uh na phawk kik ding uh a, na mawhna leh na khialhnate uh hangin nomau mahmah na kimudah tawm ding uh hi. Israel mite aw, hih thute khempeuh, note’ hangin a bawl ding ka hih lohna thu na theih ding uh ka deih hi. Na gamtatnasate uh hangin maizumin na mindai ding uh ka deihna ahi hi. Topa Pasian in hih thu kong gen khin hi. “Na mawhna khempeuh panun note kong sian’sak khit ciangin na khuapite uh sungah hong teengsak kikin, a sia khempeuh kong puahsak kik ding hi. Na lote uh a nawk kha ngei mite’ muhna-ah na lote uh gammang tulak a bat ngei hangin, tu-in tua lote kho-in note kong puah sak kik ta ding hi. Hih leitang pen gammang tulak a bang ngei hi napi-in tu-in Eden Huan a batna leh a kisusia, a kiluhgawp, a kinusiacip khuapite pen tu-in a muanhuai kulh tawh ki-umin a sungah mi a ten’na thu mi khempeuh in gen belin nei ding uh hi. Tua ciangin note kimkot-a om a suakta lai minam dangte in, a siasa khuapite lam kikin, a kinusiasa lote a puah kikpa in Topa ahi keimah ka hihna thu thei ding uh hi. Topa ahi keimah in hih thu ka gen khin a, ka gen bangin ka gamta ding hi. “Tu-a teng bek hi loin a dang zong ka hih lai ding hi. Keima tung pan Israel mite huhna ka ngensak ding a, tuuhonpi bangin Israel mite ka tamsak ding hi. Tu hun-in a sia-a a omcip khuapite pen, a kiseh pawi hun ciangin biak nadingin a kipaipih, Jerusalem-a tuu honpi om muamua bangin, mi tampi tawh kidim ding uh hi. Tua ciangin Topa ka hihna thu hong thei ding uh hi,” hong ci hi. Ka sungah Topa hong om lamtak ka kiphawk a, ama Kha in kei hong paipihin, misi guh tawh a kidim-a om kuampi khatah hong koih hi. Tua guhte lakah hong vakpih kawikawi a, tua guhte a tam mahmahna leh a keu mahmahna ka mu hi. Amah in kei kiangah, “Ezekiel aw, hih misi guhte a nungta kik thei ding hiam?” ci-in hong dong hi. Kei zong, “ Topa Pasian aw, hih thu nang bek in na thei ding hi,” ci-in ka dawng hi. Tua ciangin amah in, “Hih guhte tungah thu hilh inla, hih guhkeute in Topa ’thu a ngaih nadingun gen in. Topa Pasian ahi keimah in amaute tungah ka gen thu hih bangin gen in: Note sungah hu kong guan ding a, note kong nungtasak kik ding hi. Thagui leh sazang kong guan ding a, vun tawh kong tuam ding hi. Tua ciangin na sung uhah hu hong guan’in, kong nungtasak kik ding hi. Tua ciangin Topa ka hihna nong thei ding uh hi, ci-in gen in,” hong ci hi. Tua ahih ciangin hong sawl bangin thu ka gen hi. Tua bangin thu ka gen lai takin a kigawi ziazua a ging ka za a, tua guhte khat leh khat kizom kik uh hi. Tua bangin ka et lai takin thagui leh sazang in tua guhte tuam a, tua ciangin a vun in zong hong tuam hi. Ahi zongin tua pumpite sungah hin’ theihna hu om nai lo hi. Tua ciangin amah in kei kiangah, “Ezekiel aw, huihte tungah thu gen in la, hih a sisa pumpite sungah hu sangin a hingkik sak dingin mun khempeuh panin hong pai un, ci-in Topa Pasian in thu hong pia hi, ci-in gen in,” hong ci hi. Tua ahih ciangin hong sawl bangin ka gen hi. Tua pumpite sungah hin’ theihna hu lut a, tua ciangin amaute hingin a khe-un hong ding uh hi. Galkap honpi khat zah pha-in tam mahmah uh hi. Tua ciangin Pasian in kei kiangah, “Ezekiel aw, Israel mite pen hih guhte tawh kibang uh hi. Amaute in, ‘I keucip a, lamet ding bangmah om lo a, i nuntakna guipi beita hi,’ ci uh hi. Tua ahih ciangin ka mi Israelte tungah thu gen in la, Topa Pasian in hih bang ci hi, ci-in gen in: Ka mite aw, tu-in note’ hankhuk kong hon’sak ding a, note hong paikhiatpihin, Israel gam kong tun’pih kik ding hi. Note na kiphumna uh hankhuk hong hon’sakin kong paikhiatpih ciangin Topa ka hihna thu nong thei ding uh hi. Note sungah keima kha kong guan ding a, note hong hingsak kikin, na gam uhah kong teengsak kik ding hi. Tua ciangin Topa ka hihna thu nong thei ding uh hi. Hih bangin kong hih nading thu ka kiciam zo a, ka kiciam bangin kong hih ding hi. Topa ahi keimah in hih thu ka gen khin zo hi, ci-in gen in,” hong ci hi. Topa in kei kiangah thu hong gen a, “Ezekiel aw, sing ciangkhut khat la in la, a tungah, ‘Judah kumpi gam’, ci-in gelh in. Tua ciangin adang khat la leuleu in la, a tungah, ‘Israel kumpi gam’, ci-in gelh leuleu in. Tua ciangin tua ciangkhut tegel ciangkhut khat abat theih nadingin na khut sungah tawi khawm in. Bang a cih nopna ahi hiam, ci-in na mipihte in hong dot uh ciangin, amaute kiangah, Topa Pasian in hih bangin ci hi: Israel ciangkhut la-in Judah ciangkhut tawh ka koihkhawm ding hi. Tua ciangkhut nihte ciangkhut khat-in ka bawl ding a, ka khut sungah ka tawi ding hi, ci hi, ci-in gen in. Tua na gelh ciangkhut nihte mite’ muhin na khut sungah tawi in la, amaute kiangah, Topa Pasian in hih bangin ci hi, ci-in gen in: Amaute’ omna minam dangte lak panin Israel mite la-in ka kaikhawm ding a, amaute’ gamah ka paipih kik ding hi. Israel mual tung gamah, amaute minam khatin ka gawmkik ding hi. Amaute in a uk ding khat nei ding uh a, amaute minam nih-in kikhen nawn lo ding uh a, kumpi nih-in kikhen nawn lo ding uh a, kumpi gam nih-in zong kikhen nawn lo ding uh hi. Amaute pen a muhdahhuai milimte tawh kininsak nawn lo ding uh a, mawhnate tawh zong kisiasak nawn lo ding uh hi. Amaute’ mawhna leh kei hong lehheknate panin ka suakta sak ding hi. Amaute a siangtho mi-in ka bawl ding a, amaute in keima mi hi-in, kei in amaute’ Pasian ka hi ding hi. Ka nasempa David in amaute’ kumpi hi ding a, mi khat ukna nuai-ah amaute kigawmin, ka thukhamte hoih takin zui ding uh hi. A pu a pate uh a ten’ nasa ahi ka nasempa Jakob tungah ka piak leitangah amaute teeng ding uh a, amaute bek hi loin a suan a khak dongun teeng suak ding uh hi. Ka nasempa David in amaute uk tawntung ding hi. Amaute lungmuangin a om tawntung nading uh thuciamna khat ka bawl ding a, amaute thupha pia-in a mi ka pungsak ding hi. Amaute lakah a om tawntung dingin ka biakinnpi ka phut ding hi. Amaute tawh teeng khawmin, amaute’ Pasian ka hi ding a, amaute pen keima mite hi ding hi. Amaute lakah a om tawntung dingin ka biakinnpi ka koih ciangin, Topa ahi keimah in keima mi dingin Israel mite ka bawl khitna thu, minam dangte khempeuh in thei ding uh hi,” hong ci hi. Topa in kei kiangah thu hong gen a, “Ezekiel aw, Magog gama om Gog kumpipa mawhsakna thu gen in. Amah in Meshek minamte leh Tubal minamte a ukpipa ahi hi. Amah mawhsakna thu gen in la, Topa Pasian in hih bangin ci hi, ci-in gen in: Meshek leh Tubal minamte a ukpipa Gog aw, kei in nangma langah ka pang hi. Nang hong lehhei-in, na khaguh ah sikkawi kong bulh ding a, na galkap honpite khempeuh tawh kong kaikhia ding hi. Na galkap honpite pen a sakolte uh leh a sakol tung tuangte tawh tam mahmah a, na galkap khempeuh in lum leh namsau nei kim uh hi. Persia gam, Kush gam, leh Put gam mite in zong nang hong panpih uh a, amaute in lum leh siklukhu nei kim uh hi. Leilu lam gam peka om Gomer gama galkapte khempeuh leh Beth-togarmah gama galkapte khempeuh in nang hong pan’pih uh a, minam dang tampite in zong nang hong pawlpih uh hi. Tua ahih manin tu-in nang leh na pawlte khempeuh a kigalging sa-in om un la, na thupiakna bangin gamtang pah lian dingin na galkapte khempeuh om sak in. Minam tuamtuamte lak panin kikaikhawm kikin a gam uh a kitut kik zawh gal launa nei loin a om Israel mite’ gam a sim dingin kum tampi khit ciangin kong sawl ding hi. Sau veipi sung kinusia-in gamkhing a suak ngei hi napi-in, tu-in a mite khempeuh lungmuang takin a omna Israel mual tung gamte a sim ding na hi hi. Nang leh na galkap honpite leh nang hong pawlpih minam tampite in khuapi huih bangin na sim gawp ding uh a, meiipi bangin a gam sung khempeuh na tuamcip ding uh hi. “ Topa Pasian ahi keimah in nang Gog tungah kong gen in ah: Tua hun ding hong tun’ ciangin na lungsim sungah gitloh gamtat ding ngaihsut na kipan ding hi. A khuapite in gal nan’ nading kulh nei loin, lungmuang takin a om hithiat, a kihu tawm zo lo ding gam khat, simgawp ding na ngaihsun ding hi. A sia ngeisa khuapite sunga teeng mite luhin a nate uh na sut gawp ding hi. Tua mite pen minam tuamtuamte lak panin a kikaikhawm kik, tu-in ganhing leh neihsa van zong nei kikin, leitung lam lian khempeuh a kituahna lam kabom san-a teeng mite ahi uh hi. Sheba mite leh Dedan mite’ leh Tarshish khuapite-a teeng sumbukte in nang kiangah, ‘Ngun leh khamte, ganhingte leh vante na ngahna dingin luh gawpin a sutgawp ding leh gen zawh loh van tampite tawh a ciah khia dingin galsim dingin na galkapte na kaikhawm nai hiam?’ ci-in hong dong ding uh hi,” ci-in gen in hong ci hi. Tua ciangin Topa Pasian in kei kiangah, “Ezekiel aw, Gog kiangah hih bangin thu gen in hong ci hi: Keima mi Israelte lungmuang takin a om hun lai takin nangmah na kihanthawn tawm ding a, leilu lam pek-a na omna gam panin, sakol tung vive-ah a tuang, minam tampite kiang panin na kaihkhop a thahat galkap hon tampite masuanin na kuan khia ding a, khuapi huih in gam sung teng a nawk gawp bangin keima mi Israelte na sim ding hi. A hun a tun’ ciangin, nangmah zangin na ka sepna tawh minamte lakah ka siangthona ka lah theihna dingin keima gam a sim dingin kong sawl ding hi. Ni khat ni ciangin Israel mite a sim dingin mi khat ka sawl ding hi, ci-in keima nasemte ahi, Israel kamsangte tung tawnin, sawt pek lai-in ka gengen niloh mipa in nang na hi hi. Hih thu Topa Pasian in gen khin zo hi. Topa Pasian in: Ahi zongin Gog in Israel gam a sim ni ciangin ka heh suak mahmah ding hi. Tua ni ciangin ka heh luatna tawh Israel gamah nakpi takin ziin’ liing hen, ka ci ding hi. Ngasate leh vasate, ganhing a neu a lian, leh leitunga om mi khempeuh, keimah kihtakna hangin lau-in liing ding uh hi. Mualte pukin, keente cimin, kulh leh phung khempeuh kicim mang ding hi. Gimna a tuamtuamte tawh Gog ka lausak gawp ding hi. Topa Pasian in hih thu ka gen khin hi. Ama mite khat leh khat namsau tawh kisat gawp ding uh hi. Pulnatna leh sisan luan’na tawh amah daan ka pia ding hi. Amah leh a galkap honte leh amah a pan’pih minam tampite tungah guahpi, gialpi, meikuang leh kaat kuang, ka zusak ding hi. Hih bangin hihna tawh keimah in a lian a siangtho ka hihna thu, minam khempeuh tungah ka langsak ding a, tua ciangin Topa ka hihna thu amaute in hong thei ding uh hi,” hong ci hi. Topa Pasian in kei kiangah, “Ezekiel aw, Gog mawhsakna thu gen in la, Topa Pasian in hih bangin ci hi, ci-in gen in: Meshek leh Tubal minamte a ukpipa Gog aw, keimah in nangma lang khatah a pang ka hi hi. Mundang khatah nang kong pai sak ding a, leilu lam pek gam panin Israel mual tung gamah kong tun’pih ding hi. Tua lai mun panin na vei lam khutah na tawi na thal hong betkhiatsakin, na tak lam khutah na tawi na thaltangte zong kong betkhiatsak ding hi. Nang leh na galkap honte leh nang hong pan’pih minam khempeuhte pen Israel mual tung gamah na si mang ding uh a, vasa nam khempeuh leh gamsate in na sa uh ne ding uh hi. Topa Pasian in hih thu gen khin ka hih manin gamlakah na tuk zeizai ding uh hi. Kuamah in nawngkaisak loin nuam takin mite a om hithiatna Magog gam sung leh tuipih gei-a gamte ka hal ding a, tua ciangin Topa ka hihna thu mi khempeuh in hong thei ding uh hi. Keima mi Israelte lakah ka min siangtho ka kitheisak ding a, keima min a dai dingin ka om sak nawn kei ding hi. Tua ciangin keimah pen a Siangtho, Israelte’ Pasian ahi Topa ka hihna thu minam khempeuh in hong thei ding uh hi,” hong ci hi. Topa Pasian in, “Tua ka gengen ni thu hong tung takpi ding hi. Israel gam khuapite-ah a teeng mite kuankhia-in, tua a kinusia galhiamte sing cih dingin khawm ding uh hi. Tua a kinusia lumte, thal leh, thaltangte, molhtumte, leh teipite, mei-in cih ding uh a, kum sagih sung kikhom ding hi. Amaute in mei cih dingin a kinusia galhiamte nei uh ahih manin gamlakah sing tom kul lo ding a, tulakah sing phuk ding zong kisam lo ding hi. Amaute in amau’ na a sutte’ na sutin, a suksiatsakte’ na suksiatsak ding uh hi. Topa Pasian in thu ka gen khin hi,” hong ci hi. Topa in, “Hih thu hong pian’ ni ciangin Israel gam sung Si Tuipi nisuahna lama om khualzin mite’ Kuam a cihna sung teng, a kivui nadingun Gog ka pia ding hi. Gog leh a galkap honpite, tua lai munah kivui ding ahih manin khualzin mite’ lampi khaktan ding a, tua mun pen, ‘Gog’ Galkapte’ Kuam,’ kici ding hi. Israel mite in a gam sung uh a sian’sak kik nadingin misi vuina-in kha sagih sung hun bei ding hi. Gam sunga om mi khempeuh in misi vuina-ah huh ding uh a, tua bangin a huhna hangun ka gualzawh ni-in pahtawina ngah ding uh hi. Topa Pasian keimah in hih thu ka gen khin hi. Kha sagih a cin’ khit ciangin, a gam sung teng uh a siangthosak theih nadingun a kimangngilh kha siluang hawmte zongin a phum dingin gam sung tengah a zong kawikawi ding mi pawlkhat seh ding uh hi. Gam sung teng a zon’ kawikawina uhah misi guh a muh simun, misi vuite in hong tawmin Gog’ Galkapte’ Kuam-ah a vui hun ma sung teng a kitheih nadingin a gei-ah ciamtehna khat bawl pahpah ding uh hi. (Tua galkap honpite’ min tamin a gei-ah khuapi khat om hi.) Tua bangin gam sung siangsak kik ding uh hi,” hong ci hi. Topa Pasian in kei kiangah, “Ezekiel aw, amaute’ adingin ka bawlsak biak piakna sa a ne dingin mun khempeuh panin vasa khempeuh leh ganhing khempeuh hong pai nadingun sam in. Israel mual tung gamah pawi lianpi mahmah khat om ding a, a duh zahzahun sa ne-in si dawn ding uh hi. Bashan panin tuutalte, tuunote, keelte leh bawngtal thaute a kigawh bangin a kigo ahi galkapte’ sate ne-in, leitung gam ukte’ site a dawn ding ahi uh hi. Biak nadinga gawh bangin hih mite ka gawh ciangin vasate leh ganhingte in a nek zawh zahzah uh a thaute ne ding uh a, a kham dongin a si dawn ding uh hi. Amaute in ka sabuai tungah, sakolte leh a tunga tuangte, galkapte leh galkap mangte’ sa, a nek zawh zahzah uh ne ding uh hi. Topa Pasian in hih thu ka gen khin hi,” hong ci hi. Topa in kei kiangah, “Minamte lakah ka minthan’na ka lak ding a, thu a tangin ka khennate ka sep khiat theih nadingin ka vangliatna ka zatna dan amaute tungah ka lak ding hi. Tua khit-a kipanin amaute’ Topa Pasian ka hihna thu, Israel mite in hong thei ding uh hi. Tua ciangin kei tungah hong khialhna hangin Israel mite sal suak uh a, amaute nungngatin, a galte uh khut sungah pia-in gal sungah a vekun a sisak ka hihna, leh amaute’ nitna leh a gitlohna uh tawh kituakin amaute tungah bawlin, amaute a nungngat ka hihna thu, minam dangte in thei ding uh hi,” hong ci hi. Topa Pasian in kei kiangah, “Tu-in Jakob suan leh khakte saltan’na panin ka pikhia kik ding a, Israelte khempeuh ka hehpih ding a, amaute a cithei-in ka bawl kik ding hi. Keima min siangtho ka hu ta ding hi. Amaute gam sungah kuamah in su loin lungmuangin a om kik uh hun ciangin, kei hong lehbawlnate uh leh a mindainate uh mangngilh thei ta ding uh hi. Kei a siangtho ka hihna thu, minam tampite tungah ka lah nadingin a galte uh a omna gamdang khempeuh panin amaute la khia-in ka kaikhawm kik ding hi. Tua ciangin, minam dangte khut sungah sal-in amaute puakin, tua khit ciangin amaute khat zong siit loin kaikhawm kikin a gam sung uh ka tun’pih kimna hangin amaute Topa Pasian ka hihna thu, keima mite in hong thei ding uh hi. Israel mite tungah ka kha ka pia ding a, amaute ka nungngat nawn kei ding hi. Topa Pasian in hih thu ka gen khin hi,” hong ci hi. Jerusalem khuapi a kilak zawh a kum sawm leh lina kum, sal-a hong kipaipih zawh a kum sawmnih leh ngana, a kha masa a ni sawm ni-in ka sungah Topa hong om lamtak ka kiphawk a, amah in kei hong paikhiatpih hi. Ka maang sungah, Pasian in Israel gamah hong paipih a, mual sang khat tungah hong koih hi. Khuapi tawh a kibang inn honpi bang khat ka mai-ah ka mu hi. Amah in tua khuapi nai-ah hong paipih a, sumngo bangin a tee mi khat ka mu hi. Tua mipa in pikhau khat leh piciang khat tawi a, kongpi gei-ah ding hi. Tua mipa in kei kiangah, “Ezekiel aw, tu-a kong lah ding nate, na mit tawh lim takin en-in, na bil tawh lim takin ngai in la, lim takin ngaihsun in. Hih lai-ah nang kong paipihna pen hih thu hang mah ahi hi. Na muh na khempeuhte, Israel mite tungah a gen ding na hi hi,” hong ci hi. Ka muh pen biakinn na hi a, a kimkotah kulh om hi. A mipa in tong guk a sau tehna piciang la-in a kulh teh hi. A teh ciangin tong guk sahin, tong guk mah sang hi. Tua ciangin nisuahna lama om kulh kongpi-ah pai a, a kahlei-ah kahto-in a khung a tun’ ciangin kulh kongvang teh a, tong guk mah sang hi. Tua ban-ah lampi khat om a, a lampi pang tuakah galvilna inndei neu thum tuak om hi. Inndei neute a dung a vai kikim a, tong guk mah ahi hi. Inndei neu khat leh khat kikal tong nga sah hi. Tua galvilna inndei neute banah tong guk mah a sau lampi khat om a, biakinnpi lam a maingat inndei golzaw sung tung hi. Hih inndei golzaw a teh ciangin tong giat, pha hi. Hih inndei pen biakinn tun’ nading lampi tawpna hi a, a biakinn lam nehpen-a om kawm pen tong nih sah hi. (Hih lampi pang tuak-a om galvilna inndei neute pen a golna kikim a, a kikal-a kawmte zong a sahna kikim hi.) Tua ciangin a mipa in a lampi teh a, tong sawm zai-in tong sawm leh thum sau hi. Tua galvilna inndei neu mai ciatah tong khat sangin tong khat a sah kidalna khat om hi. (Hih galvilna inndei neute pen a dung a vai tong guk tuak ahi hi.) Tua ciangin inndei neu kawm nung panin lampi kantanin a gal san-a inndei neu kawm nung dong teh a, tong sawmnih leh nga pha hi. Inndei nunung pen zomah biakinntual om a, tua tual a teh ciangin tong sawmnih pha hi. Kulhkong pua panin inndei nawlnung kawm pua dong lampi sauna tong sawmnga pha hi. Hih inndei neute kawm a pua lam pangah khua-etna vangneu om a, inndei kikal-a om kawm tungah zong a vangneu om hi. Lampi omna lam pang, inndei kikal-a kawmte tungah nisuh kung lim kibawl hi. Tua ciangin a mipa in kongpi tawnin a tualah hong paipih hi. A tual pualam kawm tawh kizomin inndei sawmthum om a, tua inndeite mai-ah suang a kiphah lampi om hi. Hih suangphah pen a tual kimkotah om a, hih a pua lam-a tual pen a sung lama om tual sangin niamzaw hi. Tua ciangin a sung lam tual lut nadingin a sang zaw-ah kongpi khat om hi. A mipa in hih kongpi nih kikal a teh ciangin tong za khat pha hi. Tua ciangin a mipa in a pualam tual paina ahi, leilu lam pangah a om kongpi lampi hong teh hi. Tua bangin a teh ciangin lampi pang tuaka om galvilna inndei neu thumte, a kikal a, om kawmte leh a inndei golzaw pen, nisuahna kongpi-ate mah bangin a dung a vai kikim ciat hi. Tua kongpi lampi pen tong sawmnga sau a, tong sawmnih leh nga zai hi. A inndei golzaw, a kong vangneute, leh nisuh kung lim a kibawlte pen nisuahna lam kongpi-a omte mah tawh kibangin kikim hi. Hih lai-ah zong kongpi lampi tun’ nadingin kahlei dawl sagih om a, a nawlnung a, om a inndei golzaw pen in a tual lam maingat hi. Nisuahna lam pang-a om bang teek mahin, leilu lam kongpi pan a, lutna-a a tual gal khatah tual sungnung lutna kongpi lampi khat mah om hi. Tua kongpi nih kikal a teh ciangin tong za khat sau hi. Tua ciangin a mipa in leitaw lam pangah hong paipih a, tua lai-ah kongpi lampi khat mah na om leuleu hi. A teh ciangin a dangte mah tawh kikim hi. Kongpi dang-a omte mah bangin hih lai-ah zong inndeite in kongvangneu nei uh hi. A kongpi lampi pen tong sawmnga sau-in tong sawmnih leh nga zai hi. Tua kongpi lampi tun’ nadingin kahlei cial sagih mah om a, a inndei golzaw pen a nawlnung mahah omin a tual lam nga hi. Lampi omna lam pang, kawm sungnungte’ tungah nisuh kung lim mah kibawl hi. Hih lai-ah zong tual sungnung paina kong lampi khat mah om hi. A mipa in kong leh kong kikal a teh ciangin tong za khat pha hi. Tua ciangin Leitaw lam kongpi tawnin tual sungnungah hong paipih hi. A lampi a teh ciangin a dangte mah tawh kikim hi. A inndei golzaw pen in tual puanung lam nga hi. Lampi pang tuaka kawmte tungah nisuh kung lim kibawl a, hih kongpi lampi tun’ nadingin kahlei cial giat om hi. Tua ciangin nisuahna lam kongpi tawnin a tual sungnung-ah hong paipih hi. A lampi a teh ciangin a dangte mah tawh kikim hi. A galvilna inndei neute, a inndei golzaw, leh a kawm sungnungte zong, kongpi dang-ate mah tawh kikim hi. A kimkotah kongvangneute om a, a inndei golzaw ah zong om hi. A lampi tong sawmnga sau a, tong sawmnih leh nga zai hi. A inndei golzaw pen a tual puanung lam nga hi. Lampi pang tuaka om kawmte tungah nisuh kung lim kibawl a, hih kongpi lampi tun’ nadingin kahlei cial giat om hi. Tua ciangin leilu lam kongpi lampi-ah hong paipih a, a teh ciangin a dangte mah tawh kibang hi. A dangte mah bangin hih in zong galvilna inndei neute, kawm sung lam tung kizemte, inndei gol zaw pen, leh a kimkotah kongvangneute nei hi. A lampi tong sawmnga sau a, tong sawmnih leh nga zai hi. A inndei golzaw pen a tual puanung lam nga hi. Lampi pang tuaka om kawmte tungah nisuh kung lim kibawl a, hih kongpi lampi tun’ nadingin kahlei cial giat om hi. Tual puanung sungah lampi tawh a kimatin inndei gol khat om a, a inndei pen a tual lam nga hi. Hih lai munah biakna-in a pum a, a hal ding uh ganhing luangte silsiang uh hi. Hih inndei gol sungah sabuai li om a, a lang tuakah nih tuakin kikoih hi. Meihal biakna-a piak ding ahi a, mawhna leh khialhna hanga biakna-in piak ding ganhingte ahi zongin, hih sabuaite tungah go uh hi. Hih inndei pualam, leilu lam kongpi lutna pang tuakah zong sabuai nih tuak, a vekin sabuai li mah om hi. Tua ahih manin inndei sungah sabuai li, a pua-ah sabuai li, a vekpi-in giat om a, hih sabuaite pen, biakna-in piak ding ganhingte gawhna-a kizang ahi hi. Meihal biakna-in piak ding ganhingte bawl nadinga kizang sabuai lite pen suang a kiseek ahi hi. Tua sabuaite tong khat sang a, a dung a vai tong khat leh a lang tuak ahi hi. Biakna-in piak ding gangawhna-in a zat uh na khempeuh, hih sabuaite tungah koih uh hi. Hih sabuaite kimkotah khut peek cia bang a zai geihual kibawl hi. Biakna-in piak ding sa khempeuh hih sabuaite tungah kikoih hi. Tua ciangin a pualam panin a tual sungnungah hong paipih a, a tual sungnungah inndei nih na om hi. Khat pen leilu lam kongpi lam pangah omin leitaw lam nga a, a khat pen leitaw lam kongpi lam pangah omin leilu lam nga hi. A mipa in kei kiangah hih bangin hong gen hi: Leitaw lam a nga inndei pen biakinn sungah na a sem siampite’ ading hi a, leilu lam a nga inndei pen biakna tau-ah na a sem siampite’ ading ahi hi. Tua siampite khempeuh pen Zadok’ suan Levi mite vive ahi uh hi. Ama na a sem dingin Topa ’ omna-ah amaute bek kipaisak hi, hong ci hi. A mipa in hih tual sungnung a teh ciangin a dung a vai tong za khat tuak pha hi. A biakinn mai-ah biakna tau khat om hi. Tua ciangin biakinn sung lutna inndei-ah hong paipih hi. Amah in a sung lutna lampi teh a, tong nga sau-in, tong sawm leh li zai a, a pang tuaka kawmte tong thum tuak sah hi. Innsung lutna inndei pen tong sawmnih sau a, tong sawm leh nih zai a, tua lai tun’ nadingin kahlei cial sawm om hi. Innsung lutna inndei pang tuakah khuampi khat tuak om hi. Tua ciangin a mipa in a laizanga om inndei-ah hong paipih hi. Tua inndei lutna lampi teh a, tong sawm zai a, a pang tuaka om kawmte tong nga tuak sah hi. A laizanga om inndei sung a teh ciangin tong sawmli sau a, tong sawmnih zai hi. Tua ciangin inndei tawngnungah amah pai a, tua sung lutna lampi a teh ciangin tong nih sau-in tong guk zai a, a pang tuaka om kawmte tong sagih tuak sah hi. Tua inndei tawngnung a teh ciangin a dung a vai tong sawmnih tuak pha hi. Tua ciangin amah in kei kiangah, “Hih lai in Siangthopen Mun ahi hi,” hong ci hi. Tua ciangin amah in biakinn kawm puanung teh a, tong guk tak sah hi. Hih kawm tawh a kimatin biakinn kimkotah inndei neuneu om a, tuate tong li vive zai hi. Hih inndei neute dawl thum pha a, dawl khat gual paiphei suak-ah inndei neu sawmthum om hi. Tua inndei neute a dawl san’na tawh kizui-in a biakinn kawm pa to tektek a, tua inndei neute a nang dingin khuam a tuamin kul loin a biakinn kawm kimang toto hi. Tua biakinn kawm pang bel-a kibawl inndei neute sungah kahlei om to a, a dawl nuainung panin a tungnung dongin kizom to hi. A inndei neute a dawl a san’na lamah a biakinn kawm a paat tektek mah bangin a sang lama om inndei neute a sung zai semsem hi. Biakinn kimkot teng a lei kitawito a, a mun dangte sangin tong gukin sangto zaw hi. Tua mun panin biakinn kawm leh a kimkota inndei neute kipan to pan hi. Inndei neute a kawm sahna tong nga pha a, biakinn kimkotah suangphah bangin a kitawito-a kibawl a zaina in tong sawmnih ahi hi. Biakinn kimkot-a om inndei neute-ah paina ding kongvang, leilu lamah khat omin, leitaw lamah khat om hi. Tua biakinn kimkotah tong nga paisuak a zai cial khat om leuleu hi. Tua ciangin nitumna lamah biakinn lam a nga inn khat om hi. A inn dung tong sawmkua hi a, a vai tong sawmsagih hi a, a kimkota a kawm tong nga sah hi. Tua ciangin mipa in biakinnpi teh a, tong za khat pha hi. A kimkota mun awng, a innsung leh a kawm tawh kigawmin tong za khat ahi hi. Nisuahna lam pang biakinn mai lam a vai lamin a mun awng tawh kigawmin tong za khat mah ahi hi. Tua ciangin biakinn nitumna lam pangah a om, a tual lam a nga inn a sauna teh a, a kawm tegel tawh kigawmin tong za mah pha hi. Biakinn sung lut nading inndei, leh a inndeipi, leh Siangthopen Mun sungte pen a sual panin a kongvangneute ciang dong singpeek tawh kidap hi. A kongvangneute pen a pualam a kihui-a kibawl ahi hi. Biakinn sung lam kawmte pen kongkhak zang ciang dong lim kibawlte tawh kidim a, nisuh kungte leh kherub limte vive ahi hi. Amasa-in nisuh kung, tua ciangin kherub, nisuh kung, kherub cih bangin a kimkot khempeuh ah kihelh to dimdiam hi. Tua kherubte in maitang nih ciat nei uh hi. A mihing maitang in a pang khat lama om nisuh kung lam nga a, a humpinelkai maitang in a pang lang khat lama om nisuh kung lam nga hi. A biakinn sung kimkotah hih bangin kibawl a, sual panin kongkhak zang kikal sung khempeuh ah a dimin om hi. Biakinn deipi kongkhak khuamte pen a siik kikim vive ahi hi. Tua ciangin Siangthopen Mun mai-ah sing tawh a kibawl biakna tau tawh a kibang pian khat om hi. Tong thum sang a, a dung a vai tong nih ahi hi. A khete, a kingaknate leh a zawlte sing tawh a kibawl ahi hi. A mipa in kei kiangah, “Hih in Topa ’ mai-ah a kikoih sabuai ahi hi,” hong ci hi. Inndeipi sung lut nading leh Siangthopen Mun lut nading ah kongkhak om hi. Tua kongkhakte pen a laizang-a kituah, kongkhak peek nih nei-a kibawl ahi hi. Biakinn sung kawmte tungah a kibawl mah bangin hih biakinn deipi sung lutna-a kongkhakte tungah nisuh kung leh kherub limte kibawl hi. Kongkhak pualam, innsung lut nading inndei tung san-ah singpeek tawh liimsun khat kibawl hi. Hih inndeipi sung kawmte tungah a pualam a kihui kongvangneute om a, nisuh kungte tawh zepna zong kibawl hi. Tua ciangin mipa in a tual puanungah hong paipih a, biakinn nitumna lam mong-a om inn tawh a kigamla lo, biakinn leilu lam-a om inn khat hong tun’pih hi. Leilu lam pang hih inndung tong za khat hi a, a vai tong sawmnga ahi hi. Tua inn pang khat in biakinn gei-a mun awng tong sawmnih a zai a omna lam nga a, a pang lang khat in tua puanung a suangphah lam nga hi. Tua inn pen cial thum a pha a kitawito tungah kilam a, a tunga cialte pen a nuai-ate sangin neu to zaw tektek hi. Hih inn leilu lam pangah tong sawm zai-in, tong za a sau lampi khat tung a, lutna kong zong tua lam mahah om hi. A cial tungnung-a om inndeite pen a nuai-ate sangin neuzaw hi. Bang hang hiam cih leh tuate pen a sangto zaw, a kawcik zaw-ah om uh hi. Biakinn tual-a inn dangte mah bangin tua inndei dawl thumte pen a cial tungah kinga uh a, a tuamin khuam nei lo uh hi. Leilu lam pang-a om mah bangin hih inndeite mai-ah zong lampi khat om hi. A sauna, a zaina, a pianzia leh a kongte zong leilu lama om mah tawh kibang hi. Nisuahna lam pang-a kulh a kipatna mun a inn leitaw lamah kongkhakte om hi. Tua ciangin a mipa in kei kiangah, “Leilu lama om leh leitaw lama om hih inn nihte pen biakna inn siangtho ahi hi. Topa ’ omna-ah a lut siampite in biakna-in a kipia a siangthopente, hih innte sungah ne uh hi. Hih inndeite a siangtho ahih manin, a kipia nate an tawh biaknate leh mawhna leh khialhna hangin biakna-in a kipia sate, a sungah koih uh hi. Siampite in Topa tungah biakna pia-in biakinn sungah a lut khit uh ciangin a pualamah a pusuah nop uh leh, Topa tungah biakna a piak lai takun a silh uh puante suahin hih inndeite sungah koih ding uh hi. Tua lai panin puan dang silhin mihonte omna-ah pai thei pan uh hi,” hong ci hi. A mipa in biakinn sung lam teng a teh a zawh khit ciangin nisuahna lam kongpi tawnin hong pusuahpih a, biakinn pualam teng teh hi. Amah in tehna piciang la-in nisuahna lam pang teh a, tong za nga pha hi. Tua ahih manin a umna tua kulh a pang li-in a teh khit ciangin a pang li mah-in kikim a, pang khat ciangin tong za nga vive pha a, tua deina kulh pen biakna-a a siangtho leh a mawkmawkte khenna ahi hi. Tua khit ciangin a mipa in biakinn nisuahna lama om kongpi-ah hong paipih a, nisuahna lam panin Israelte’ Pasian’ minthan’na hong pai ka mu hi. Pasian’ awging pen tuipi ging tawh kibang a, ama minthan’na in leitung taangsak lela hi. Hih ka maang muhna pen, Pasian in Jerusalem khuapi susia dingin a pai lai-a ka muh leh Khebar Gun gei-a ka muh tawh kibang hi. Tua ciangin thakhatin leilak kiden’na-in ka boksuk hi. Topa ’ minthan’na in nisuahna lam kongpi tawnin biakinn sungah lut hi. Tua ciangin Kha in hong la-in a tual sungnungah hong paipih a, tua lai panin, Topa ’ minthan’na tawh biakinn sung a kidimna ka mu hi. Tua lai mun panin kei kiangah a mipa a din’ lai takin biakinn sung panin Topa in kei hong hopihna ka za a, “Ezekiel aw, hih lai munah ka kumpi tokhom om hi. Israel mite lak hih lai munah ka teeng ding a, amaute ka uk tawntung ding hi. Israel mite leh a kumpite un pasian dang biakna tawh ahi a, a kumpi sisate uh phawk nading mual bawlna tawh ahi zongin ka min siangtho daisak ngei nawn lo ding uh hi. Bang hang hiam cih leh a kumpite un a kongkhuam uh leh a kongzawlte uh keima biakinn kongkhuam leh kongzawlte tawh kimatin bawl uh a, ka kikal uh kawm bek in hong hal hi. A muhdahhuai a gamtatnate khempeuh uh tawh ka min siangtho hong daisak uh a, kei zong ka heh manin amaute ka susia mang hi. Ahi zongin tu-in amaute in pasian dangte bia nawn loin, a kumpi sisate uh phawkna a mual uh a phiat ding uh ahi hi. Tua bangin a gamtat nak uh leh amaute lakah ka teeng paisuak tawntung ding hi,” hong ci hi. Tua ciangin Topa in a thugen hong zom lai a, “Ezekiel aw, Israel mite tungah biakinn thu leh a geelna khempeuh a cing takin lak in la, amaute’ mawh gamtatna hangin maizum sak in. Amaute a gamtatnasate uh hang hong maizum theih uh leh, biakinn geelna, a lim, a lutna leh a pusuahna, a buppi lim, a na khempeuh a kigeelna, leh a zat dan ding khempeuh a cing takin amaute tungah lak tel in la, amaute in a kigeelnate thei-in a zat dan ding bangin a zuih theih nadingun amaute’ adingin lai-in gelhsak in. Biakinn tawh kisai ngeina-in: Mual tunga om biakinn kimkot mun khempeuh pen biakna tawh kisai-in a siangtho ahi hi. “Biakna-tau golna pen hih bang hi ding hi. A teh nadingin biakinn tehna-a kizang ngeite mah hi ding hi. A biaknatau bul kimkot pen tong khat sangin, tong khat zai ding a, a tua kimkotah khap khat a sangin geivial nei ding hi. A tau bul panun a tau zawl nuainung ciang tong nih hi ding a, a sahna tong khat hi ding hi. Tua ban siah tong li sangto ding a, tong khat sah ding hi. A tungnung pen, ganhing kihalna mun in tong li sang ding a, a kiu li-ah tong khat a sang ki om ciat ding hi. A biaknatau dawn zang pen a dung a vai a kikim hi ding a, tong sawm leh nih sau-in tong sawm leh nih zai ding hi. Biakna tau a paito a laizang san teng pen a dung a vai a kim, tong sawm leh li hi ding a, a nuai dawl sangin khap khat pai-in neuzaw ding hi. Tua a din’na a nuai gual kimkot tong khat pai-in zai ding hi. Biakna tau tung kah nading kahlei pen nisuahna lam pangah om ding hi,” hong ci hi. Tua ciangin Topa Pasian in kei kiangah, “Ezekiel aw, hih biakna tau zat nading ngeinate in hih bang hi ding hi: Biakna tau a kizawh khit ciangin a tungah meihal biakna piakna leh biakna piakna ganhing site thehna tawh apna a bawl ding na hi hi. Zadok suan leh khak ahi Levi siampite pen keima na a sem dingin ka omna-ah a hong pai dingte ahi uh hi. Topa Pasian keimah in hih thu kong pia hi. Mawhna hangin biakna-a piak dingin amaute tungah bawngtal khat na pia ding hi. Nangmah in a sisan pawlkhat la-in biaknatau kiu li-a om ki lite, biakna tau paito a laizang kiute, leh a kimkot-a om a geihualte na nuh ding a, hih bangin hihna tawh biakna tau sian’ suahin na ap ding hi. Mawhna hangin biakna-in a kipia bawngtal pen la-in biakinn huang pualam, a mun hong kigenna sanah a hal ding na hi hi. A zing ciangin pauban’na a om lo keeltal khat la-in mawhna hangin biakna-in na pia ding hi. Bawngtal si tawh na sian’ suah mah bangin hih keeltal si tawh zong biakna tau na sian’suah ding hi. Hih bangin sian’suahna na man khit ciangin, paubanna a om lo bawngtal khat leh tuutal khat na la ding a, Topa ahi keima kiangah nong paipih ding hi. Siampite in tua ganhingte tungah ci thehin, keimah hong biakna-in tua ganhingte hal ding uh hi. Mawhna hangin biak piakna-in ni sagih sung nisimin, paubanna a om lo keeltal khat, bawngtal khat, leh tuutal khat a pia ding na hi uh hi. Siampite in ni sagih sung biakna tau apna bawlin zat theih dingin a baihsa-in omsak ding uh hi. Hih bangin ni sagih sung a hih khit uh ciangin, a ni giat ni-a kipanin siampite in meihal biakna leh thunuam-a biak piaknate, biakna tau tungah piak ding kipan ding uh hi. Tua ciangin note tungah kei ka lungkim ding hi. Topa Pasian keimah in hih thu ka gen khin hi,” hong ci hi. Tua ciangin a mipa in nisuahna lam biakinn huang kongpi pua-ah hong paipih a, a kongpi na kikhak hi. Topa in kei kiangah, “Hih kongpi kikhak paisuak ding a, kihong kik ngei lo ding hi. Israelte’ Topa Pasian keimah in hih kongpi tawn khin ka hih manin kuamah dang in tawn thei nawn lo ding a, a kikhak den ding ahi hi. Ahi zongin hih lai-ah gam-uk na a sem laitak ulianpa pen keima omna-ah biakna an siangtho a ne dingin hong pai thei ding hi. Amah hong pai ciangin inndeipi tawnin inndei sungnung kongvangah hong lutin tua lai mahah pusuak ding hi,” hong ci hi. Tua ciangin a mipa in leilu lam kongpi tawnin biakinn mai-ah hong paipih a, ka khuadak leh, Topa ’ biakinn sung khempeuh, ama minthan’na tawh na kidim hi. Kei zong leilak kiden’na-in ka boksuk hi. Tua ciangin Topa in kei kiangah, “Ezekiel aw, tu-a na muh ding nate leh na zak ding thute khempeuh hoih takin ciamteh in. Ka biakinn a kizat nading ngeina om khempeuh tu-in a hong gen ding ka hi hi. Biakinn sunga pai thei dingte leh Siangthopen Munah a pai thei lo dingte khempeuh lim takin ciamteh in. A lehdo thei hih Israel mite’ tungah Topa Pasian keimah in ka gen thute, hih bangin gen in. No Israel mite aw, a beisa hun-a a muhdahhuai na gamtatnate khempeuh uh khawl un. Keimah biakna-in sathaute leh sasite nong piak uh ciangin, keima thu a mang lo, vun a ki-at lo gamdang mite a sungah na lutsak uh a, ka biakinn na ninsak uh hi. Tua bangin a muhdahhuai na gamtatnate uh tawh ka thuciamna na siasak uh hi. Ka biakinn sungah biakna ngeinate na zui kei uh a, ka biakinn sungah gamdang mite peuh na na semsak uh hi. “Tua ahih ciangin Topa Pasian in tu-in kong genin ah: Vun ki-at lo gamdang mite peuhmah ka biakinn sungah lut lo ding uh a, note lakah a teeng gamdang mite nangawn lut lo ding uh hi. No Israel midangte tawh kei hong nusia khawmin milim a bia Levi mite in zong daan thuak ding uh hi. Amaute in biakinn kong cin’ leh biakinn sung nasepte sem thei ding uh hi. Meihal biakna-a kipia ganhingte leh mite in biakna-in a piak ganhingte go thei ding uh a, mite’ na a sepsak dingin tavuan la ding uh hi. Ahi zongin amaute in milim biakna lamah Israel mite makaih-in mawhna sungah Israel mite tun’pih uh ahih ciangin, amaute daan ka piak ding, Topa Pasian keimah nakpi takin ka kiciam hi. Amaute in keima siampi na sem loin, keima biakna na a siangtho nate nai-ah pai thei loin, Siangthopen Munah zong lut thei lo ding uh hi. Hihte pen, a muhdahhuai a gamtatnasate uh hangin a daan uh ahi hi. Ahi zongin biakinn sunga nasep a kisam dangte a sem dingin amaute ka seh thei ding hi, ci-in gen in,” hong ci hi. Tua ciangin Topa Pasian in kei kiangah, “Zadok suan leh khak Levi mi siampite ahih leh, Israel mi adangte in kei hong nusiat lai takun, amaute in citakin biakinn sungah keima na hong sem uh ahih manin, tu-in amaute in keima na hong semin, keimah biakna-in sathaute leh sasite keima kiangah hong pia ding uh hi. Ka biakinn sungah amaute lutin, ka biakna tau-ah nasemin, biakinn sunga biaknate-ah makai ding uh hi. A tual sungnung paina kongpi-ah a lut uh ciangin saihadial puan silh ding uh hi. Tual sungnung sung leh biakinn sungah na a sep lai takun samul puan peuhmah silh lo ding uh hi. Amaute in saihadial puan khimin, saihadial puan tengin, khua-ul a suaksak thei kawnggak gak lo ding uh hi. Mi dangte a omna biakinntual puanung ah a pusuah ma-un, biakinn sungah na a sep lai takun a zat uh puante suahin inndei siangtho sungah nusia ding uh hi. Tua lai panin amaute in puan dangte silhin pusuak ding uh hi. Tua hi kei leh a biakna puan siangte un mi dangte lawh kha ding hi. “Amaute in a sam uh mettol lo ding uh a, a sau lua-in zong hawi lo ding uh hi. A kilawm ciang bek khat-in met ding uh hi. Biakinntual sungnung ah a lut ma-un siampite in leenggahzu ne lo ding uh hi. Meigong numei ahi a, a kimasa numei ahi zongin zi-in nei lo ding uh a, Israel nungak, ahih kei leh siampite’ zi meigongte ten’pih ding uh hi. “Amaute in ka mite tungah, biakna na a siangtho leh a mawkmawk nate, leh a nin leh a siang nate a kilamdan’na hilh ding uh hi. Thu nei khatpeuh peuh a om ciangin, keima ngeina omsa tawh kizui-in thu khen ding uh hi. A kiseh pawite a ngeina omsa bangin bawl ding uh a, sabbathte siangthosak ding uh hi. Siampite pen misi lawn’na tawh kininsak lo ding uh hi. Ahi zongin, a nu uh ahi a, a pa uh ahi a, a sanggam pasal uh ahih kei leh pasal a nei nai lo a sanggam numeite uh hangin kininsak thei ding uh hi. Amaute a kisian’suah khit uh nipi kal khat khit ciang bekin, biakinntual sungnung ah pai-in biakinn sungah na a sep kik theih nadingun kisian’suahna biakna pia ding uh hi. Topa Pasian in hih thu ka gen khin hi. “Israel mite tungah ka piak, khang khat pan khang khatah a kiluah suksuk ding sung panin siampite’ tanh in siampi nasepna za ahi hi. Amaute in Israel mite lakah neihsa gamh nei lo ding uh hi. Amaute’ kisapna khempeuh ah kei a kicing khin ka hi hi. An tawh biakna, mawhna leh khialhna hanga biakna, leh Israel mite lak panin keima adingin a kipia khiate khempeuh amaute in ne ding uh hi. Anpal sung panin a limcipen teng leh kei tungah hong kipia na khempeuh, amaute in tang ding uh hi. Israel mite’ inn sungah ka thupha a tun’ theihna dingin amaute in anlum a em simun, biakna-in siampite tungah a em masak penpen uh pia ding uh hi. Siampite in vasa ahi a, ganhing ahi zongin, sa nek baang hita leh ama thu-in a si tawm mawkte hita leh, ne lo ding uh hi. “Israel minamte tungah piak dingin leitang a kihawm ciangin, Topa tanh dingin seh khat kituam koih ding hi. Tua a kituam koih leitang in a dung tong tul sawmnih leh tul nga hi ding a, a vai tong tul sawmnih hi ding hi. Tua sung khempeuh a siangtho biakna leitang hi ding hi. Hih leitang sung panin biakinn ding tawh kisai-in a dung tong za nga, a vai tong za nga mah kisehin, tua banah a kimkot tong sawmnga paisuak mun awng tawh hi lai ding hi. Hih biakna leitang siangtho sung panin siangthopen mun leh biakinn mun dingin a sau lam tong tul sawmnih leh tul nga, a zai lam tong tul sawm kisehkhia ding hi. Hih a kisehkhia mun sung teng pen biakna leitang siangtho hi ding a, Topa ’ biakinn sungah na a sem siampite ading hi ding hi. Hih mun sung teng pen siampite’ inn lam nading mun leh biakinn lam nading mun siangtho hi ding hi. Hihte banah, a dung tong tul sawmnih leh tul nga, a vai tong tul sawm a pha seh khat kibawl leuleu ding a, biakinn sungah na a sem Levi mite’ ading hi ding hi. Tua sung tengah amaute’ ten’ nading khua om ding hi. Khuapi huang sung dingin a dung tong tul sawmnih leh tul nga, a vai tong tul nga a pha leitang khat kiseh khia ding hi. Hih mun pen a siangtho leitang tawh kizom pah ding a, Israel mite khempeuh ading hi ding hi. “Gam sung a uk uliante’ adingin zong leitang kiseh khia ding hi. A siangtho leitang leh khuapi huang panin kipanin nitumna lamah gamgi ciang, nisuahna lamah zong gamgi ciang mah hi ding a, nitumna pan nisuahna lam gamgi pen Israel minamte khat in a ngah zah tanh mah hi ding hi. Hih mun teng pen Israel gamsung panin a uk uliante’ neih hi ding hi. Tua ahih manin amaute in Israel mite bawlsia nawn lo ding uh a, mun a om lai teng khempeuh, a minam zui-in Israel minamte tangsak ding uh hi. “ Topa Pasian in hih bangin ci hi: No Israel a uk uliante aw, na mawh gamtatna uh sau vei lua zo ta hi. Na ngongtatnate uh leh mi na nenniamnate uh khawl un la, thuman thutangin na sem un. Amau leitang panun ka mite notkhia nawn kei un. Topa Pasian keimah in hih thu kong gen hi. “Mi khempeuh in tawisuang man leh tehna man zang ding uh hi. An tehna bung leh tui tehna bung kikim ding a, a kizang ding etkakna pen beem hi ding hi. Beem khatah an bung sawm, tui bung sawm mah hi ding hi. A gik tehna pen, gerah sawmnih ciang shekel khat, shekel sawmguk ciangin mina khat hi ding hi. “Biakna na piak nading zia uh pen, mangbuh na neih zah uh pan seh sawmguk suah sehkhat, mangbuhham zong seh sawmguk suah sehkhat mah, sathau na neih sung uh pan seh za-ah khat (bung tawh teh-in bung sawm ciangin beem khat-a seh), tuu na neih sung uh pan za nih ciangin khat hi ding hi. Hihte pen an tawh biakna, meihal biakna, thunuam-a biak piaknate hi a, na mawhnate uh a mai theih nading ahi hi. Topa Pasian in hih thu kong pia hi. Israel mi khempeuh in hihte pen biakna-a piak dingin, amau a uk ulianpa tungah puak ding uh hi. Gam uk ulianpa in meihal biakna-a piak ding ganhingte, an tawh biakna-a zat dingte, leh pawi khempeuh, kha det ni, sabbath nite-in Israel mibuppite’ adingin tuiphih biaknate a piak ding ama nasep ahi hi. Israel mite’ mawhna a mai theih nadingin mawhna hanga biakna, an tawh biakna, meihal biakna, leh thunuam-a biak piakna-a zat dingte khempeuh amah in a sikh ding ahi hi. “ Topa Pasian in hih bangin ci hi. Kha khat a, a ni masa ni-in pauban’na a om lo bawngtal khat biakna-in pia-in biakinn a siangsak ding na hi uh hi. Siampipa in mawhna hanga biak piakna ganhing si pawlkhat la-in biakinn kongkhuamte, biakna tau kiu lite, leh tual sungnung lutna kongkhuamte nuh ding hi. Tua mah bangin tua kha a ni sagih ni-in zong, tup lohpi leh theih lohna hangin a khial kha mite’ adingin sian’ suahna a bawl ding na hi uh hi. Tu-a bang danin biakinn na siangthosak ding uh hi. A kha masa a ni sawm-le-li ni-in Paisan Pawi bawl na kipan ding uh a, mi khempeuh in ni sagih sung silngo sawhloh anlum na ne ding uh hi. Tua pawi bawl a kipat ni-in gam uk ulianpa in amah leh gamsung mi khempeuh adingin mawhna hanga biak piakna-in bawngtal khat pia ding hi. Tua pawi ni sagih sung ni simin pauban’na a om lo bawngtal sagih leh tuutal sagih la-in Topa tungah meihal biakna-in pia ding a, tua ban-a mawhna hanga biakna-in nisimin keeltal khat zong a pia ding ahi hi. Bawngtal leh tuutal a kipia zah tawh kizui-in an tawh biak nadingin an bung khat pai leh sathau bing khat pai tawh piakhawm ding hi. A kha sagihna a ni sawm-le-nga ni-in nipi kal khat sung a kibawl ding Buk Pawi kipan ding a, mawhna hanga biak piakna, meihal biakna, leh an tawh biakna-a piak dingin an leh sathaute, nisimin a kisam zah, gam uk ulianpa in pia ding hi. “ Topa Pasian in hih bangin ci hi: Nisuahna lama om, tual sungnung kongpi pen nasep ni guk hun sung teng kikhakcip ding a, ahi zongin sabbath ni leh kha det ni-in kihong ding hi. Siampite in meihal biakna leh thunuam-a biakna a piak lai takun, gam uk ulianpa pen tual puanung lam panin inndei lianpi kongpi-ah pai-in kongpi khuamte gei-ah ding ding a, tua kongpi ah bia-in tua khit ciangin pusuak kik ding hi. Nitak mateng tua kongpi kikhak lo ding hi. Sabbath ni leh kha det ni simin mi khempeuh in zong tua kongpi mai-ah Topa bia-in kun ding uh hi. Gam uk ulianpa in sabbath ni-in meihal biak nadingin pauban’na a om lo tuuno guk leh tuutal khat pia ding hi. Tua ganhingte tawh a piak khawm ding an tawh biak piak nadingin zong, tuutal khat ciangin an bung khat kizuisak ding a, tuunote tawh piak khop ding pen ama piak nop zahzah hi ding hi. An bung khat a piakna-ah sathau bing dim khat tawh kizuisak ding hi. Kha det ni ciangin pauban’na a om lo bawngtal khat, tuuno guk, leh tuutal khat hi ding hi. Tuate tawh piakkhop dingin an tawh biak piak nadingin bawngtal, tuutalte khat ciangin an bung khat pai, leh tuunote tawh piakkhop ding pen ama piak nop zahzah hi ding hi. An bung khat a piakna-ah sathau bing dim khat tawh kizuisak ding hi. Gam uk ulianpa in a kuan lama a tot lampi teng mah, a ciah ciangin tawnin, inndeipi kongpi mah-ah pusuak ding hi. “A kiseh pawi hunte-ah Topa bia dingin hong pai mite khempeuh pen a lutna kongpi zui-in kileh kik lo ding uh a, tang takin paisuak ding uh hi. Leilu lam kongpi panin a lutte, leitaw lam kongpi-ah ciah ding uh a, leitaw lam kongpi panin a lutte, leilu lam kongpi-ah ciah ding uh hi. Gam uk ulianpa zong mihonte mah tawh lutin, amaute mah tawh pusuak khawm ding hi. Pawi nite leh a kiseh pawi hunte-ah an tawh biakna-a piak ding pen, bawngtal ahi a, tuutal ahi zongin khat ciangin an bung khat in zui ding a, tuunote tawh piakkhawm ding pen a mite’ piak nop zahzah hi ding hi. An bung khat a kipiak ciangin sathau bing dim khat in zui ding hi. Gam uk ulianpa in ama ut thu-in biakna pia a,meihal biakna ahi a, thunuam-a biakna ahi zongin khatpeuh peuh a piak ciangin, ama lut nadingin nisuahna lama om tual sungnung kongpi kihon’sak ding hi. Amah in sabbath ni-a biakna piakna a bawl mah bangin pia ding hi. Amah a ciahkik khit ciangin a kongpi kikhak ding hi. “Gam uk ulianpa in meihal biakna-a piak dingin pauban’na a om lo kum khat a pha tuuno khat, zingsang simin Topa tungah biakna-in pia ding hi. Hih pen nisimin a kipia ding ahi hi. Mangbuhnel lawh dim khat leh a meek khoppih ding sathau hai khat tawh, an tawh biakna-in zong, ni simin pia ding hi. Hih meihal biakna piakna ngeina in a kip paisuak ding ahi hi. Tua bangin tuuno, mangbuhnel, leh sathau, zingsang simin Topa tungah meihal biakna a kipia ngitnget ding ahi hi. “ Topa Pasian in hih bangin ci hi: Gam uk ulianpa in ama neihsa leitang mun khatpeuh peuh, a tapate khatpeuh peuh tungah a piak leh, tua leitang ngah a tapa in a luah gamh-in nei paisuak ding hi. Ahi zongin gam uk ulianpa in ama nasemte khatpeuh tungah leitang a piak leh, suahtakna kum a tun’ ciangin tua leitang pen a pia gam uk ulianpa’ neihsa suak kik ding hi. Bang hang hiam cih leh tua leitang in ama neihsa hi a, amah leh a tapate bek in nei paisuak thei ding uh hi. Gam uk ulianpa in mi dangte’ neihsa leitang laksak ngei lo ding hi. Ama tungah a kipia leitang sung panin a tapate khenkhia bek ding hi. Ka mite’ leitang laksakin, bawlsia lo ding hi, ci-in gen in,” hong ci hi. Tua ciangin a mipa in biakinn tual sungnung leitaw lama om kongpi gei-a inndeite-ah hong paipih hi. Hih inndeite pen siampite’ zat ding a siangtho inndeite ahi hi. Amah in tua inndeite omna nitumna lam pang mong hong kawk a, “Hih mun pen, siampite in mawhna leh khialhna hangin biakna-in a kipia sate a huanna mun, leh an tawh biak piaknate a em nading mun ahi hi. Hih pen, tual puanung ah biakna sa leh ante paipih kha loin, tua a siangtho nate tawh tual puanung-a om mite a lawhsak khak loh nading uh ahi hi,” hong ci hi. Tua ciangin tual puanung-ah hong pusuahpih a, a tual kiu lite hong lak hi. Tua tual kiu lite munah tualno khat ciat na om hi. Tua tualnote tong sawmli sau-in tong sawmthum zai a, a vekpi-in a golna kikim hi. Tua tualno lite a umna kawm dingin suang kiciang ciat a, tua a kawmte belin meikhuk om hi. A mipa in, “Hihte pen, mite in biakna-in a piaksate, biakinn sung nasemte in a huanna anbuk ahi hi,” hong ci hi. Tua ciangin biakinn lutna kongkhak-ah hong paipih kik hi. Biakinn kongkhak sangkil nuai panin tui luang a, biakinn ngatna nisuahna lamah luang sukin, biaknatau leitaw lam pang tawnsuk hi. Tua ciangin a mipa in a leilu lam kongpi tawnin hong pusuahpih a, nisuahna lam kongpi pua lamah hong paipih hi. Leitaw lam kulhkongpi-ah a tui hong luangkhia hi. A mipa in a tehna piciang tawi-in a tui luan’na nisuahna lam tong tul khat ciang dong teh suk a, a tui kei hong ngaptan sak hi. A tui pen siakmit ciang bek thuk hi. Tua ciangin tong tul khat ciang teh suk leuleu a, tua lai-ah a tui hong ngaptan sak a, khuk ciang tum hi. Tong tul khat ciang teh suk leuleu-in a tui hong ngaptan sak a, ka kawng ciang tum hi. Tua ciangin tong tul ciang mah teh suk lai leuleu a, a lui tui thuk lua ta ahih manin ka ngap zo kei hi. Thuk lua ahih manin a tui i peek loh buangin a kikantan zo ding hi lo hi. Tua ciangin amah in, “Ezekiel aw, hihte khempeuh hoih takin ciamteh in,” hong ci hi. Tua ciangin a mipa in tua gungei mahah hong paipih kik a, tua lai mun ka tun ciangin a gun lang nih tuakah singkung tampi tak a po ka mu hi. Amah in kei kiangah, “Hih tui pen nisuahna lam manawhin gam sung nawkin Jordan Kuam-ah luang sukin Si Tuipi sung tung hi. Si Tuipi a tun’ ciangin hih tui in tuipi tui pen, tuisiang suaksak kik hi. Hih tui a luan’na mun peuhpeuh ah ganhing namkim leh ngasa tampi om hi. Hih tui in Si Tuipi tui siangsak kikin, a luan’na peuhpeuh ah nuntakna omsak kik ding hi. En-gedi khua panin En-eglaim khua ciang dong tuipi dungah ngasa bengte omin, tua dungah a ngen uh zalin pho keu ding uh hi. Mediterranean Tuipi sungah ngasa om zah mah bangin ngasa nam tampite om ding hi. Ahi zongin tuipi dunga om nawng lakte leh bualte-a om tuite siang lo ding a, cikhuk dingin tuaci-in om lai ding uh hi. Hih gun pang tuakah a gah nek dingin singkung nam khempeuh po ding hi. A tehte pulh ngei lo ding a, a gah tawh zong kilawi ngei lo ding hi. Biakinn panin a luangkhia tui ngah ding uh ahih manin kha simin a gah thak gah tawntung ding uh hi. A singgahte an ding hi ding a, a tehte zatui in kizang ding hi,” hong ci hi. Tua ciangin Topa Pasian in kei kiangah, “Israel minam sawm leh nihte’ gamh dingin leitang hawm ding gamgi in hih bang hi ding hi. Josef minamte in a dangte’ ngah zah nih ngah ding uh hi. Hih gam amaute’ tanh dingin ka piak nading thu, na pu na pate uh tungah thupi takin ka kiciam khin zo hi. Tua ahih manin tu-in note lakah a kikim dimdiamin hawm un. “Leilu lam gamgi pen, Mediterranean Tuipi panin kipanin Hethlon khuapi-ah, Hamath khua lutna-ah, Zedad khuapi-ah, tua panin Berothah leh Sibraim khuapite-ah (hih khuate pen Damaskas kumpi gam leh Hamath kumpi gam kikalah om hi), tua panin Hazerhattikon khuapi (Hauran kumpi gam gamgi gei-a om) hi ding hi. Leilu lam gamgi pen Mediterranean tuipi-a kipanin nisuahna lam manawhin Damaskas leh Hamath gamgi-a om Hazarenan khuapi ciang hi ding hi. “Nisuahna lam gamgi pen, Damaskas leh Hauran gamgi kituahna panin hong kipan sukin, Jordan Gun zuisuk a, Jordan Gun nitumna lam pang Israel gam hi-in, nisuahna lam pang Gilead gam hi a, tua panin Si Tuipi kimang sukin Tamar khuapi ciang hi suk ding hi. “Leitaw lam gamgi pen, Tamar khuapi panin hong kipanin Meribathkadesh bual hong nawk a, tua panin sak nitumna lam manawhin Izipt gamgi zui toin Mediterranean Tuipi sun ding hi. “Ni tumna lam gamgi pen, Mediterranean Tuipi hi toin Hamath khua lutna tawh a kitang ciang hi to ding hi. “Tua ahih ciangin hih gam sung teng, no Israel minamte lakah hawm un. Note adingin na neih kip tawntung ding uh gamh hi ding hi. Hih leitang na hawm uh ciangin note lakah hong teengin ta a nei khinsa minam dangte zong note mah bangin tanh na pia ding uh hi. Amaute pen Israel minam taktakte mah bangin na ngaihsun ding uh a, Israel minam dangte mah bangin leitang hawmna-ah aii sawk thei ding uh hi. Note’ lakah a teeng gamdang mite in amau’ ten’na minamte tawh leitang ngah khawm ding uh hi. Topa Pasian in hih thu kong gen khin hi. “Leilu lam gamgi pen, Mediterranean Tuipi panin kipanin Hethlon khuapi-ah, Hamath khua lutna-ah, tua panin Damaskas leh Hamath gamgi kituahna san a, om Hazarenan khuapi ciang sun ding hi. Minam khat in leitang khen khat ciat ngah ding uh a, a kikal uh gamgite pen gambup nisuahna gamgi panin gambup nitumna gamgi ciang hi ding a, leilu lam panin a hawm uh kipan suk ding uh hi. Leilu lam a khungnungpen ah Dan minamte, a zomah Asher minamte, a zomah Naftali minamte, a zomah Manasseh minamte, a zomah Efraim minamte in nisuahna pan nitumna dongah Manasseh tawh kigamgi ding uh hi, a zomah Reuben minamte, a zomah Judah minamte, hi ding hi. “Tuate zomah, Pasian’ adingin a kipia leitang hi ding a, a zaina pen leilu lam panin a kipan leitaw lam tong tul sawmnih leh tul nga hi ding hi. A dung lam pen gambup nisuahna gamgi panin gambup nitumna gamgi dong, minam dangte’ ngah zah tanh mah hi ding a, a laizang sanah biakinn om ding hi. Topa ’ adingin a kipia leitang in a sauna tong tul sawmnih leh tul nga hi ding a, a zaina tong tul sawmnih hi ding hi. Siampite in hih a siangtho leitang sung panin tanh ngah ding uh a, leilu lam pang leh leitaw lam pang tong tul sawmnih leh tul nga tuak hi-in, nisuahna lam leh nitumna lam pang tong tul sawm tuak hi ding hi. Siampite’ ngahna sung hih leitang laizangah Topa ’ biakinn om ding hi. Hih mun teng pen Zadok’ suan leh khak siampite ading ahi hi. Bang hang hiam cih leh hih mite in Israel midangte a gamtat khialh uh ciangin Levi midangte bangin va zui lo uh a, citakin keima na hong sem uh hi. Tua ahih manin Levi midangte’ zomah hih bangin a mun tuam diak khat nei ding uh a, tua mun in a siangthopen mun khat hi ding hi. Hih siampite’ zomah Levi mite in leitang ngah ding uh a, a sauna tong tul sawmnih leh tul nga hi-in, a zaina tong tul sawm hi ding hi. Topa tungah a kipia hih leitang siangtho pen, leitang khempeuh panin a hoihpen hi a, hih leitang sung panin mun khatpeuh peuh zuak thei lo, adang tawh zong kheek thei lo, midang tungah zong pia thei lo ding hi. Hih leitang in a siangtho leitang hi a, Topa ’ aa ahi hi. “A om lai leitang, a sauna tong tul sawmnih leh tul nga, leh a zaina tong tul nga pen a siangtho leitang hi loin a mawkmawk leitang hi ding a, mite’ taang zat ding mun hi ding hi. Ten’ nading leh a mun awngthawl hi ding a, a laizang-ah khuapi om ding hi. A khuapi golna in a dung a vai-in a kikim hi ding a, a pang li-in pang khat ciangin tong tulli leh tong za nga hi ding hi. Khuapi kimkot pai suak-ah tong za nih leh tong sawmnga paisuak a zai mun awng om ding hi. Khuapi a kilam khit ciangin a siangtho leitang lamah a awng lai, nisuahna lam tong tul sawm, nitumna lam tong tul sawm a om lai teng pen khuapi sungah a teengmite in a khawh ding leitang hi ding hi. Khuapi sunga nasem-a om mi peuhmah in Israel minam sung panin kuamah deidanna om loin hih leitang kho thei ding uh hi. Hih a kisehkhia leitang buppi pen a pang li-in tong tul sawmnih leh tul nga pai hi ding a, hih pen leitang siangtho leh khuapi huam sung kigawm hi ding hi. “Hih leitang panin leitaw lam pangah, Israel minam a om laite in leitang ngah ding uh a, a kikal uh gamgite pen gambup nisuahna gamgi panin gambup nitumna gamgi ciang hi ding a, leilu lam panin a hawm uh kipan suk ding uh hi. Leilu lam a khungnung penah a ngah ding Benjamin minamte, a zomah Simeon minamte, a zomah Issakhar minamte, a zomah Zebulun minamte, a zomah Gad minamte, hi ding hi. Leitaw lam panin Gad minamte a kipia leitang banah gambup gamgi om ding a, Tamar khuapi panin kipanin Meribath-kadesh bual nawk ding a, tua panin sak nitumna lam manawhin Izipt-te tawh gamgi zui ding a, Mediterranean Tuipi-ah tawp ding hi. Tu-a ka gen bangin Israel minamte in a khang khangin a luah suksuk ding uh leitang dingin amaute tungah a kipia ding leitang ahi hi. Topa Pasian in hih thu kong gen khin hi. Khuapi kimkot a sauna tong tul sawm leh tul giat pha a, tu-a kipanin hih khuapi min in, ‘Hih lai-ah Topa om hi,’ (Jehovah Shammah) kici ding hi,” hong ci hi. Judah kumpipa Jehoiakim kumpi a suah zawh a kum thumna kumin, Babilon kumpipa Nebukhadnezzar in Jerusalem khuapi simin a umcih hi. Topa in, Jehoiakim kumpipa leh biakinnpi’ na manphate Nebukhadnezzar kumpipa a mansak hi. Amah in a mi matte Babilon gam ama pasian biakinnah paipih a, na manpha a matte sum koihna innah a koih hi. Kumpipa in Israel salte sunga kumpi nam leh mi lian namte lak pan mi pawlkhat a teel khia dingin innsung mang lianpen Ashpenaz thu a pia hi. Tua mite in kumpi inn sunga nasem siamte a suah theih nadingun a mel hoih, pumpi tung poina neilo, a navak, hoih taka pilna kisinsak, na a thei baih lungsim navakte ngentang ding ahi hi. Ashpenaz in amaute Babilon lai leh pau a hilh ding ahi hi. Amaute in kumpi inn sunga nasem dangte mah bangin ni simin an leh leenggahzu tawh vak dingin kumpipa in thu a pia hi. Tua banga kumthum sung sinna a neih khit uh ciangin amaute kumpipa’ mai-ah a kilak kik ding uh ahi hi. Tua banga a kiteelte in Judah mi vive ahi Daniel, Hananiah, Mishael leh Azariahte ahi uh hi. Innsung mang lianpenpa in amaute minthak phuah a, Daniel’ min dingin Belteshazzar, Hananiah min dingin Shadrak, Mishael min dingin Meshak, Azariah min dingin Abednego a phuak hi. Daniel in kumpi inn sunga an leh leengahzu tawh a pumpi a thanghuai sak loh nadingin a lungsim a khentat hi. Amah in innsung mang lianpen Ashpenaz kiangah tua bang an a kipiak loh nadingin a ngen zaw hi. Tua ciangin Pasian in Ashpenaz in Daniel tungah maipha leh hehpihna a neih theih nadingin a bawlsak hi. Ahih hangin Ashpenaz in Daniel kiangah, “Kumpipa in na an nek ding uh leh na dawn ding uh sehsa-a nei khin zo ahih ciangin, khangno dangte ban zo kei kha zenzen leteh a hong thah ding ka lau hi” a ci hi. Tua ciangin Daniel in Ashpenaz in amah leh a dang thumte cing dinga a koihpa kiangah a pai hi. Amah in, “Nisawm sung hong encik in, anteh bek hong nesak in la, tui bek hong dawnsak in. Tua ciangin kumpi’ an ne khangnote tawh hong enkak khawm in la, nong muhna bang bangin thukhen ta in,” a ci hi. Amah in amau nget bang mangin nisawm sung etcik dingin a thukim hi. Nisawm a cin’ khit ciangin amaute kumpi’ an nete sangin cidam zaw uh a, a ci a sa uh a hoih zaw hi. Tua ciangin a cingpa in kumpi’ an leh lenggahzu pia loin amaute anteh an a pia hi. Pasian in tua khangno lite lai theih siamna leh pilna thukte a pia hi. Daniel pen mangmuhna leh mang khiat siamna a pia hi. Kumpipa sehsa kumthum a cin’ khit ciangin Ashpenaz in khangnote khempeuh kumpipa kiangah a paipih hi. Kumpipa in amaute khempeuh hopih a, Daniel, Hananiah, Mishael leh Azariahte adang teng khempeuh sangin a hoih zawk tuan lam uh a mu hi. Tua ahih ciangin kumpi inn-a vaihawm pawl a suak uh hi. Kumpipa in bangbang thu haksa nono a dot hangin, hi mi lite in ama gamsung khempeuh a, mitphial siamte leh aisan theite khempeuh sangin a zah sawmin a siamzawk lam uh a mu hi. Sairas, Babilon kumpi a suah dong kumpi innah Daniel a om to paisuak hi. Nebukhadnezzar kumpi a suah zawh a kumnih lai takin mang khat a man’ hi. A lungsim patau lua mahmah ahih manin a ihmu thei kei hi. Tua ahih ciangin bang mang man’ cih a hilh dingin mitphial siamte, mi bum theite, leh khongkhai siamte a samsak hi. Amaute hong pai uh a, kumpipa mai-ah a din’ uh ciangin kumpipa in, “Mang khat ka man a, tua ka mang pen bang hiam cih thei nuam ka hih manin ka lungsim a patau mahmah hi,” a ci hi. Amaute in Aram pau tawh, “Kumpipa aw, na khan’ sau ta hen! Na mang hong gen leteh a khiatna kong gen ding uh hi,” a ci uh hi. Kumpipa in, “Ka mangmat leh a khiatna nong gen theih kei uh leh note kong semnen gawp ding a, na inn uh suksiat gawp dingin ka ngaihsun khin zo hi. Ahi zongin ka mangmat leh a khiatna nong gen theih uh leh, letsong leh minphatna lianpi ka hong pia ding hi. Tua ahih ciangin tu-in ka mangmat bang hi a, a khiatna bang ahi hiam cih hong gen un,” a ci hi. Amaute in, “Kumpipa aw, na mang hong gen phot leteh a khiatna ka hong gen ding uh hi,” ci-in a dawngkik uh hi. Kumpipa in “Ka ngaihsutna sa teng hong zasak khin zo ka hih manin hunsau theihtheih nang a zong na hih lam uh tel takin kithei hi. Ka mangmat nong gen kei uh leh note khempeuh thukhenna khat bek ka hong pia ding hi. No teng khempeuh in lungsim kikhat in zuau thu gengen leng a ngaihsutna hong kikhel ding hi a ci nuam na hi tazen uh hi. Tua ahih ciangin ka mangmat hong gen phot un, tua hi leh a khiatna zong hong gen thei ding ci-in ka hong muang ding hi,” a ci hi. Khongkhai theite in, “Kumpipa aw, na deihna bang a hong gen thei ding hih leitungah mihing khat beek om lo hi. Kumpi gen loh mi lianpen leh mi thupi pen khat beek in aisan theite, mitphial siamte leh khongkhai theite’ tungah tua bang thu a dong ngei kuamah om nailo hi. Kumpipa’ thu dotna pen haksa lua mahmah ahih manin, mihing ahi lo pasiante longal a gen thei ding kuamah om lo hi,” a ci uh hi. Tua thu hangin kumpipa heh mahmah a, Babilon sunga kumpi’ thudot mi pilte khempeuh thahlup khit dingin thu a pia hi. Tua ahih ciangin mi pilte khempeuh thahlup khit nang thu kipia a, tua thahlup dingte sungah Daniel leh a lawmte teng zong a kihel uh hi. Tua ciangin Daniel in Babilon gamsunga mipil teng that lum dinga a kisawl kumpi cing Ariok kiangah kampau kidawm takin a va pai hi. Amah in Ariok kiangah, “Bang dinga kumpipa in hi zah taka thu khauh suaksak ahi hiam? ci-in a dong hi. Ariok in thu piang khempeuh a gen hi. Tua ciangin Daniel kumpipa’ kiangah pai a, a mangmat a khiatna a hilh theih nadingin, hun tawmvei sung a kingak lai nadingin phalna a ngen hi. Tua ciangin Daniel innah ciah a, thu piang teng khempeuh a lawmte Hananiah, Mishael leh Azariahte kiangah a ko hi. Amah in vantung Pasian in amaute hehpih a, tua thu thukpi genkhia thei a, Babilon gamsunga mipil dangte tawh thahna a thuak khawm loh nadingun thu i ngen ding hi ci-in a gen hi. Tua ciangin tua zanin tua thu thukpi mangmuhna tawh Daniel’ tungah kihilh a, amah in vantung Pasian’ min a phat hi. “Pasian min kiphat tawntung ta hen; amah pilin a vanglian hi. Amah in hun leh khuahunte kheel; kumpite a koih a, lah a lakhia hi. Amah in mite pilna leh theihna a pia hi. Amah in thu thukpite leh thu simte a lakkhia hi. Amah in khuamial sunga kiselte thei a, amah khuavak in a umcih hi. Nang ka pu ka pate’ Pasian na hi a, Ka hong phat a, ka hong zahtak hi. Nangmah in pilna leh thahatna na hong pia zo hi; thungetna zong za a, kumpipa kianga ka gen ding thu nong lak zo hi,” a ci hi. Tua ahih ciangin Daniel in kumpipa in Babilon mipilte that dinga a sawlpa Ariok kiangah pai a, “Babilon gamsunga mipilte that kei in. Kumpipa kiangah hong paipih in, tu-in a mangmat a khiatna ka gen ding hi,” a ci hi. Tua ciangin Ariok in thakhatin Daniel kumpipa kiangah paipih pah a, “Kumpipa aw, na mangmat a khiatna a hong gen thei ding Judah salte khat ka va mu hi,” ci-in a gen hi. Kumpipa in Belteshazzar a kici Daniel kiangah, “Ka mangmat bang hi a, a khiatna bang hiam cih hong gen thei ding na hi hiam?” ci-in a dong hi. Daniel in, “Kumpipa aw, tua na theih nop thu a hong gen thei ding khongkhaithei, mitphial siam, aisan siam kuamah om lo hi. Ahih hangin thusim a lak thei vantungah Pasian khat a om hi. Amah in mai lamah bang thu hong piang ding cih nangmah Nebukkhadnezzar kumpipa tungah a hong hilh zo hi. Kumpipa na ihmut lai takin mai lama hong piang ding mang khat na man’ a, thu thukpi a lakkhia Pasian in a piang ding thu a hong lakkhol zo hi. Tu-in midangte sangin ka pil zawk mana kei tungah tua a hong kilak hi loin, Kumpipa in na mangmat a khiatna leh na ngaihsut thu na theih nadingin a hong kilak ahi zaw hi. “Kumpipa aw, na mangin a tee daldal milim lian mahmah khat na mu a, kihtak huai mahmahin na mai-ah a ding hi. Tua milim lutang pen kham hoih mahmah tawh a kibawl hi. A awm leh a bante ngun tawh kibawl a, a gil leh a pheite sumngo tawh a kibawl hi. A khete sik tawh kibawl a, a khepekte khenkhat sik leh khenkhat tungman kigawm ahi hi. Tua banga na et lai takin, kuama khuk lohin mual tung pan suangtumpi khat hong tuk a, sik leh tungman kigawm milim khete deng tanin a kithehthang hi. Thakhatin sik, tungman, sumngo, ngun leh khamte kitam nen gawp a, khualkhal hun-a ansi zap bangin a lengmang hi. Huih in leen’ mangkhin ahih manin them kha beek a kimu nawn kei hi. Ahih hangin tua suangtum hong khangkhanga mual cia hong phain leitung khempeuh a dim hi. “Na mangmat pen tu-a teng ahi hi. Tu-in a khiatna ka hong gen ding hi. Kumpipa aw, kumpi khempeuh lak pan nang a lianpen na hi hi. Vantung Pasian in nang kumpi-in hong koih a, ukna, vangliatna, thahatna leh minthan’na hong pia hi. Amah in mi’ teen’na leitung teng, ganhing teng leh vasate uk dingin a hong koih hi. Tua kham lutang in nangmah na hi hi. Nang khit ciangin nang sanga neuzaw kumpi gam adang khat hong piang ding a, tua khit ciangin sumngo ahi kumpigam thumna in leitung khempeuh a uk ding hi. Tua khit ciangin kumpi gam lina hong piang ding a, sik bangin a khauh ding hi. Sik in na khempeuh sat nen a, a gawivui bangin, amasa kumpi gam teng khempeuh a sukham ding hi. A khepek leh a khemete khen khat sik leh khen khat tungman kigawm ahi na mu hi. Tua in kumpigam kikhenthang ding hi cihna ahi hi. Tungman leh sik kigawm ahih mah bangin sik bangin a hoih khop khat khauhna ciang a nei ding hi. Khemete khenkhat sik hi a, khenkhat tungman ahih mah bangin kumpi’ gam khenkhat thahatin khenkhat a thahat kei ding hi. Sik leh tungman kigawm na muh mah bangin tua kumpi gam’ukte in kigawm ding hanciamin zi leh ta-in a kiman ding uh hi. Ahih hangin sik leh tungman a kimat theih loh mah bangin a kigawm thei kei ding uh hi. Tua kumpite a maan’ lai takun, vantung Pasian in a bei thei ngei lo ding kumpigam a hong phut ding hi. Tua kumpigam kuamah in zo zo lo ding a, tua gam in gam dang khempeuhte zo gawpin, a kip tawntung ding hi. Kuama lawn’ loh a, mualtung pan hong tuksuk suangtum in sik, sumngo, tungman, ngun leh kham tawh kibawl milim a den paih na mu hi. A lian Pasian in mai lamah bang hong piang ding cih Kumpipa a hong hilh hi. Na mangmat pen ahi bang tektekin kong gen a, a khiatna zong a maan bangin kong gen zo hi,” a ci hi. Tua ciangin Nebukhadnezzar kumpipa in Daniel’ mai lei lakah kun sukin, Daniel tungah sagawh biakna leh namtui biakna piakna bawl dingin thu a pia hi. Kumpipa in, “Hih thu thukpi hong gen thei na hih manin na Pasian in thu thuk a lak, pasian khempeuh sung pan a lianpen, kumpite tunga Topa ahi hi,” a ci hi. Tua ciangin kumpipa in Daniel letsong hoih tampi pia a, a za liansak a, Babion gam teng uk sakin, Babilon mipil thu dotte ukpipa dingin a koih hi. Kumpipa in Daniel’ ngetna mah bangin Shadrak, Meshak, leh Abednego-te Babilon gam khawk uk dingin koih a, Daniel pen kumpi inn sungah a omsak hi. Nebukhadnezzar kumpipa in a dung tong sawmguk a sang, a vai lam tongguk a gol kham milim pi khat bawl saka Babilon gamsung Dura zanglei-ah a koih hi. Kumpipa in a milian khempeuh, kumpi tapate, gam ukpite, gam ukpi huhte, mangpite, sumkem mangte, thukhen mangte, khuapi uk mangte leh milian dangte khempeuh, Kumpipa’ milim bawl apna-a paikim tek dingin sapna thu a pia hi. Tua ciangin tua mangliante khempeuh milim apna dingin milim mai-ah a ding uh hi. Tua ciangin “Mi namkimte, minam tuamtuamte leh paunam tuamtuamte khempeuh aw! peengkul ging na za ding uh a, tua khit ciangin tamngaite, laiza lasakna gingte, harp lasakna gingte, gawsemte leh tum theih a tuamtuamte a hong kitum ciangin Nebukhadnezzar kumpipa’ koih kham milim mai-ah kunin na bia ding uh hi. Kun-a a bia lo peuhmah thakhat thu-in mei phualpi sungah kikhul pah ding hi,” ci-in ngaih takin kitangko hi. Tua mah bangin minam kimte, minam tuamtuamte leh paunam tuamtuamte khempeuh in tum theih gingte a zak khit phetun, kun sukin Nebukhadezzar Kumpipa’ kham milim koih a bia uh hi. Tua ciangin Babilon mite pawl khat pai-in Judah mite a hek sim uh hi. Amaute in Nebukhadnezzar kumpipa kiangah, “Kumpipa aw, na khan sau hen! Kumpipa in, tum theihte a hong kitum khit phetin mi khempeuh kham milim mai-ah kunin bia ding uh hi ci-in thu na pia khin zo hi. Tua milim mai-ah kun loin a bia lo khempeuh mei phualpi sungah kikhul ding hi. Babilon gam khawk uk dinga na koih Shadrak, Meshak, leh Abednego kici Judah mi pawlkhat a om uh hi. Amaute in kumpipa’ thupiakna a mang kei uh hi. Amaute in na pasiante bia nuam loin, na milim koih mai-ah a kun nuam kei uh hi,” a ci uh hi. Tua thu hangin kumpipa heh mahmah a, tua mi thumte ama mai-ah a kipaipih nadingin thu a pia hi. Amah in “Shadrak, Meshak leh Abednego aw, ka pasian bia nuam loin, ka kham milim koih mai-ah kun nuam lo na hi uh hiam? Tua ahih ciangin tu in peengkulte, tamngaite, laiza lasakna gingte, harp lasakna gingte, gawsem leh tum theih dang gingte na zak khitphet uh ciangin kunin milim na bia ding uh hi. Na biak kei uh leh thakhatin mei phualpi sungah hong kikhul ding ahih ciangin a hong honkhia zo ding pasian peuhmah omin na um uh hiam?” a ci hi. Shadrak, Meshak leh Abednego-te in Nebukhadnezzar kumpipa kiangah, “Kumpipa aw, hi thu kong dawng kei ding uh hi. Mei phualpi sung panin hong honkhia thei pasian a om leh ka biak ka Pasian uh hi ding a, na khut sung panin a hong honkhia ding hi. Kumpipa aw, a hong hotkhiat kei zenzen taak leh zong, na pasian lah ka bia tuan kei ding uh a, na kham milim mai-ah zong ka kun kei ding uh hi ci-in thei ta in,” a ci uh hi. Tua ciangin Nebukhadnezzar kumpipa in Shadrak, Meshak leh Abednego-te tungah heh mahmah ahih manin a mai a san pempam hi. A sat ngeina zah sagih vei a sazaw meiphualpi cih dingin a mite thu a pia hi. Tua ciangin a galkap thahat penpente in Shadrak, Meshak leh Abednego a hencip ding leh mei phualpi sunga khul dingin thu a pia hi. Tua ciangin amaute puanak leh puan tualpi silhsa leh lukhu khusa-in hencip uh a, mei phualpi sungah a khul uh hi. Bang hang hiam cih leh kumpipa’ thupiakna lah kinawh lua mahmah a, mei phualpi lah sa lua mahmah ahih manin a khulte nangnawn meikuang in a hul lum hi. Tua ahih ciangin Shadrak, Meshak leh Abednego hencip sa-in meikuangpi laizangah a kiasuk uh hi. Tua ciangin Nebukhadnazzar in lamdang sa mahmahin a ding vat hi. Amah in a thudotte kiangah, “Mihing thum hencipsa-in mei phualpi sungah khul hilo i hi hiam?” ci-in a dong hi. Amaute in, “Himah hi, Kumpipa aw,” ci-in a dawng kik uh hi. “Tua ahih leh bang hanga meikuang sungah mihing li a kawi paipai mu ka hi hiam? Amaute lah kihen cip lo a, liam zong liam tuak beek lo uh hi — a lina penpa hoh pasian khat tawh a kibang hi,” ci-in a dawng hi. Tua ahih ciangin Nebukhadnezzar mei phualpi kong gei-ah paito a, “Shadrak! Meshak! Abednego! Sangpen Pasian’ nasemte hong paikhia un,” ci-in a sam hi. Tua ciangin amaute zong thakhatin a hong paikhia pah uh hi. Kumpi tapate, gam ukpite, gam ukpi huhte, leh kumpipa thudotte khempeuh kikhawm uh a, mei in a kat loh mite a en uh hi. A sam uh zang khat beek mei in kanghul lo a, a puan uh zong kang loin meikhu gim zong a nam beek kei uh hi. Tua ciangin kumpipa in “Shadrak,’ Meshak,’ Abednego’ Pasian phat un. Amah in a vantungmite sawl a, amah a muang ama nasem hih mite a honkhia hi. Amaute in ka thupiakna mang loin, amau’ Pasian longal pasian dang mai-ah kunin bia nuam lo uh ahih manin mei phualpi sunga khul ding a ut zaw uh hi,” a ci hi. Tu-in minam kimte, minam tuamtuamte, paunam tuamtuamte mi khat peuhpeuh in Shadrak,’ Meshak,’ Abednego-te’ Pasian gensiatna kam pau a om leh kibalnen gawp ding a, a inn uh a kisuksiat sak ding hi ci-in thukhamna ka bawl hi. Bang hang hiam cih leh hi banga hon thei pasian dang peuhmah om lo hi,” a ci hi. Tua ciangin kumpipa in Shadrak, Meshak leh Abednego-te Babilon gam khawk tungah a golzaw ukna za a pia hi. Nebukhadnezzar kumpipa in leitunga om minam kimte, minam tuamtuamte, paunam tuamtuamte khempeuh tungah a nuai-a thute a khak hi: “Note tungah nopna om ta hen! Sangpen Pasian in kei tunga lim leh nalamdang a hong lahna thute ka hong gen nuam hi. Pasian hong lah nalamdangte, bang zahin lian ahi hiam! A bawl nalamdangte, bang zahin vanglian ahi hiam! Pasian in a tawntungin kumpi hi ding a, Amah in a tawntungin a uk ding hi. “Keimah Nebukhadnezzar in dai takin kumpi innah ka teeng a, nuamsa mahmahin ka om hi. Ahih hangin ka ihmut lai takin a lauhuai mang khat ka man a, a dipkuat huai mang ka mu hi. Ka mangmat a khiatna a hong hilh dingin, Babilon gam kumpi thudotte khempeuh a hong pai nadingun thu ka pia hi. Tua ciangin aisan theite, mitphial siamte, khongkhaitheite, aksi et siamte khempeuh hong pai uh a, amaute kiangah ka mang ka gen hi. Ahih hangin a khiatna a hong gen thei kei uh hi. Tua ciangin Daniel (a min dang Belteshazzar ka pasian min tam a, kiphuakpa) a hong pai hi. A siangtho pasiante’ kha ama sungah om ahih ciangin, ama kiangah ka mangmat ka gen hi. Ama kiangah, aisan theite laka alianpen Balteshazzar aw, a siangtho pasiante’ kha na sungah om ahih manin thu thuk khempeuh na theihtheih lam ka thei hi. Hih ka mang a khiatna hong gen in, ka ci hi. Ka ihmut lai takin mangmuhna khat ka nei a, leitung laizangah a po singkung sang mahmah khat ka mu hi. Tua singkung pen khangkhangin gol semsema, vantung dong banto ahih ciangin leitung mi khempeuh in a mu thei uh hi. A tehte hoih mahmah a, leitung bup kham khop ding zahin gah a gah hi. Gamsate in a liim bel uh a, vasate in a hiangah bu bawl uh a, a nungta thei khempeuh in a gah a ne uh hi. Ka mangmuhna ngaihsuna ka om lai takin ka khuadak leh, a vil tawntung vantungmi khat vantung pan a hong tuaksuk ka mu hi. Amah in nakpi-in kiko-in, “Singkung phuk in la, a hiang teng sattan in; a teh teng heuh siang in la, a gah teng thehthang in. A nuai-a ganhing teng leh a hiang tunga vasa teng hawlkhia in, Ahih hangin a bul leh lei sunga a zungte nusia in. Sik leh sumngo kual tawh vial in la, gamlak lopate tawh nusia khawm in. Hi mipa tungah daitui kai hen la, ganhingte leh lopate tawh teeng khawm hen. Amah in mihing lungsim nei nawn loin, kumsagih sung ganhing lungsim a nei ding hi. Hih in a vil tawntung vantungmi’ thukhenna ahi hi. Tua ahih ciangin mun khempeuh ah a om mi khempeuhte in, Sangpen Pasian in mite’ kumpi gamah vai a hawm hi cih a thei ding uh hi. Amah in a teel peuhpeuh a neupente nangawn kumpi a suaksak thei hi. Keimah Nebukhadnezzar Kumpipa in, Belteshazzar aw, ka mangmat pen hi bang ahi hi. Tu’n a khiatna hong gen in. Ka thudot mite khat beek a khiatna a hong gen thei a om kei uh hi. Ahi zongin nang sungah a siangtho pasiante’ kha om ahih manin na hong gen thei ding hi,’ ka ci hi,” a ci hi. Tua ciangin Belteshazzar zong a kici Daniel in a lungmang lua ahih manin tawmvei sung bangmah gen thei loin a om hi. Kumpipa in, “Belteshazzar aw, mang leh a khiatna huhau in na lung mangsak zenzen kei in,” a ci hi. Belteshazzar in, “Kumpipa aw, na mangmat leh a khiatna pen na galte tungah tungzaw hen. Singkung sang mahmah na muh pen hong khangkhangin khauh mahmah a, vantung dong banto-a leitunga teeng mi khempeuh in a mu thei uh hi. A tehte hoih mahmah a, leitung bup a vak zo ding gah a gah hi. Gamsate in anuai-ah tawlnga uh a, vasate in a hiangah bu a bawl uh hi. Kumpipa aw, nangmah in tua singkung na hi hi. Nang na lian a, na thahat hi. Nakpi takin khanga lian mahmah na hih manin vantung dong na banto a, na vangliatna in leitung khempeuh ah a kizel hi. Kumpipa in na et lai takin, vantungmi khat vantung panin hong paisuk a, ‘Singkung phuk in la susia in, ahih hangin lei sungah a bul leh a zungte nusia in. A bulah sik leh sumngo kual vial in la, gamlak lopate tawh nusia khawm in. A tungah daitui kia hen la, kumsagih sung ganhingte tawh omkhawm ta hen,’ a ci hi. Kumpipa aw, a khiatna pen hi bang ahi hi. Sang pen Pasian in na tunga hong tung ding a thukhennasa a hong lak ahi hi. Mite sung panin hong kihawlkhia ding a, gamsate tawh na teeng khawm ding hi. Bawngtal bangin lopa na ne ding a, pua lamah lumin, kumsagih sung na tungah daitui a hong kia ding hi. Tua ciangin Sangpen Pasian in mihingte’ kumpigam uk a, a teel mi peuhpeuh kumpi a suaksak thei hi na ci ding hi. Vantungmi in singbul leh a zungte lei sungah nusia dingin thu a pia hi. Tua in, Pasian in leitung khempeuh uk hi, cih na theih ciangin kumpi na suakkik ding hi a cih nopna ahi hi. Tua ahih ciangin kumpipa aw, kong thuhilhna hong mang in. Mawhna bawl nawn kei in la, dik takin gamta in. Mizawngte hehpih leteh, tua in a sia a na gamtatna sate hong puahsak dinga na nuamsa toto ding hi,” a ci hi. Hi thu teng khempeuh Nebukhadnezzar kumpipa tungah a hong tung hi. Tua zawh khasawm leh khanih khit ciangin kumpipa in Babilon khua kumpi innkhum zang huan sungah vak a, “Babilon khua bang zah takin lian ahi hiam! Kumpi ding leh, ka vangliatna ka thahatna kilat nadinga ka lam ahi hi,” a ci hi. Tua thute a kamsung pan a pusuah ma-in vantung panin aw khat hong ging a, “Nebukhadnezzar kumpipa aw, ka thu gen na ngai in. Na kumpigam a hong kilakkhiat sak zo hi. Mite sung pan hong kihawlkhia ding a, gamsate tawh na teeng khawm ding hi. Bawngtal bangin kumsagih sung lopa na ne ding hi. Tua ciangin Pasian in mihingte’ kumpigam uk a, a teel mi peuhpeuh kumpi a suaksak thei hi na ci ding hi,” a ci hi. Tua hun lianin Nebukhadnezzar tungah tua thukhenna a hong tung hi. Mite lak panin Nebukhadnezzar kihawlkhia a, bawngtal bangin lopa a ne takpi hi. A pumpi tungah daitui kia a, a sam kelmul bangin sau a, a khutcinte muvanlai’ khecin bangin a hong sau hi. A kisehsa hun a cin’ ciangin keimah Nebukhadnezzar in vantung lam ka ento a, ka khua theihna a hong tungkik hi. A nungta tawntung Sangpen Pasian’ min phatin, zahtakna leh minthan’na hih bangin ka pia hi: “Amah in a tawntungin uk ding a, a gam in a kip tawntung ding hi. Amah in leitung mite bang mahin a sim kei a; vantung mite leh leitung mite in, ama’ khut nuai ahi hi. Ama deihna kuamah in nial thei lo a, A bawl nate kuamah in ahang a kan thei kei hi. Ka khua theihna a hong tun’ kik ciangin ka kumpi-za ka minthan’na leh, ka gam minthan’nate a hong kipia kik hi. Ka u liante leh ka thudot mite in hong muak uh a, nidang sanga lianzaw minthan’na leh ka kumpi za a hong kipia kik hi. Tu in keimah Nebukhadnezzar in Vantung Kumpipa phatin, zahtakin a min ka thangsak hi. A bawlna khempeuh a man hi. Amah a tawntungin thuman a, kiphasak-a gamtate a neusak hi.” Belshazzar in kumpi a suah ciangin pawi lianpi bawl a, u liante tulkhat samin amaute tawh zu a dawn uh hi. Zu a nek lai takun, Belshazzar in a pa Nebukhadnezzar in Jerusalem biakinnpi pana a puakkhiat ngunhai, khamhai leh kuangte va la dingin thu a pia hi. Kumpipa in a miliante leh a zite leh, a zi neute in tua haite tawh zu a dawn theih nadingun hai la dingin thu a pia hi. Thakhatin khamhai leh kuangte hong paipih uh a, a vekpi-un tua haite tawh zu a dawn uh hi. Amaute in zu dawn uh a, kham tawh, ngun tawh, sumngo tawh, sik tawh, sing tawh, suang tawh kibawl pasiante a phat uh hi. Thakhat thu-in kumpi inn sung meivak tan’ penna lam kawm tungah mihing khut khat hong kilang a, lai a hong gelh hi. Kumpipa in tua khut in lai a gelh laitak a mu hi. Tua ciangin kumpipa lau lua mahmah a, a mai daang gawpin a khut a liing kauhkauh hi. Amah in mitphial siamte, aisan siamte, aksi et siamte va sam pak un ci-in Babilon mipilte kiangah a gen hi. Tua mite a hong tun’ uh ciangin kumpipa in, “Hih laigelh a sim thei, a khiatna a hong gen thei peuhmah kumpi puanpi san silh sakin, minphatna khamkhi a ngawngah ka ok sak ding a, kumpi gam sungah a za lian thumna-in ka koih ding hi,” a ci hi. Kumpipa’ thudot mite hong tung uh a, ahih hangin tua lai a sim thei leh kumpipa tunga a khiatna a gen thei kuamah a om kei uh hi. Tua ciangin Belshazzar kumpipa a lungkham mahmah a, a mel daang semsem a, a u liante in a cih nading meel a thei kei uh hi. Kumpipa leh a u liante gamlum ngeingai-a a om lai takun, kumpinu pawi inn sungah hong lut a, “Kumpipa aw, sau veipi nungta in. Bang hangin lungkham lua-in na mel daangsak ngeingai zenzen na hi hiam? Na gam sungah a siangtho pasiante’ kha a nei mi khat a om hi. Na pa kumpi ahih lai takin, tua mipa in pasiante’ pilna tawh a kibang pilna, theihna leh lungsim navakna a nei hi. Tua hi a, na pa Nebukhadnezzar kumpipa in tua pa aisan theite, mitphial siamte, khongkhai siamte leh aksi et siamte’ ukpi dingin a koih hi. Amah in a kan zaw siamna nei a, mang khiat siamna, thu dotna haksa nonote dawn’ theihna leh thu thukpite gentel theihna a nei hi. Tua ahih ciangin kumpipa in Belteshazzar ci-a a kiphuakpa Daniel sam sak in, tua hi leh amah in a khiatna a hong gen thei pah ding hi,” a ci hi. Tua ciangin Daniel thakhatin kumpipa kiangah a paipih uh hi. Kumpipa in, “Nang Daniel pen ka pa kumpipa in Judah gam pana a hong lakkhiat Judah salte khat hilo na hi hiam? Na sungah pasiante’ kha om ahih manin siamna na nei a, lung pilna leh theihna na neih lam ka thei hi; Ka thudot mite leh mitphial siamte in hih lai kigelh sim ding leh a khiatna gen dinga hong pai uh hi napi, a khiatna a thei zo kei uh hi. Ahih hangin nangmah in thu thukpi leh kuama theih zawh loh thute gen thei hi ci-in kong za zo hi. Hi lai kigelh na sim theih a, a khiatna nong gen theih leh, kumpi puanpi san kong silhsak ding a, minphatna khamkhi na ngawngah hong ok sakin, kumpigam sungah a za lian thumna-in ka hong koih ding hi,” a ci hi. Daniel in kumpipa kiangah, “Letsong pen kei hong pia kei in la, midang khatpeuh pia zaw in. Ahi zongin tua lai kigelh kong simsak ding a, a khiatna kumpipa kong hilh ding hi. Sangpen Pasian in na pa Nebukhadnezzar kumpi lianin koih a, zahtakna leh vangliatna a pia hi. Amah lian lua mahmah ahih manin gam khempeuh, nam khempeuh, pau khempeuhte in kihta in a liing uh hi. Mi khatpeuh a thah nop leh that a, a nuntak sak nop leh a nungta sak hi. A ut leh mi khatpeuh pahtawi-in, a ut leh a daisak thei hi. Ahih hangin amah a lungkhauhin kiphasak a, gilo lua ahih manin a kumpi tokhom panin kilakhia a, a minthan’na a taan hi. Amah mihingte lak panin kihawlkhia a, ganhing lungsim a nei hi. Gam sakolte tawh teeng khawmin, bawngtal bangin lopa ne a, daitui dal ding nei loin a pua lamah a lum hi. A tawp khakna ah Sangpen Pasian in mihingte’ kumpi gamte uk a, a teel peuhpeuh kumpi a suak hi ci-in a phawk thei hi. Ahih hangin a tapa ahi nang mah Belshazaar in hih thu khempeuh na theih hangin na kiniamkhiat tuan kei hi. Vantung Topa langah na pang hi. A biakinnpi hai leh kuangte la-in sabuai tungah nangmah tawh, na u liante tawh, na zite leh na zi-neute uh tawh zu dawnna-in na zang uh hi. Theihna a neilo, a mu thei lo, khua a za thei lo, ngun, kham, sumngo, sik, sing leh suang tawh a kibawl pasiante’ min na phat uh hi. Na nuntakna leh na hihna khempeuh a hong uk Pasian na zahtak kei hi. “Tua ahih ciangin Pasian in hih lai malte tua khut a hong gelhsak hi. Tua a kigelh laimal in hi bang ahi hi: MENE, MENE, TEKEL, PARSIN, A khiatna in: MENE: Pasian in na gam ukna nite hong sim sak a, a beisak zo hi. TEKEL: nang a hong kitawikhai a, na leek zo kei hi. PARSIN: na gam kikhen kham a, Media leh Persiate a kipia zo hi,” ci-in a dawng kik hi. Tua ciangin Belshazzar in Daniel kumpi puansan silhsak dingin thu pia pah a, minphatna khamkhi a ngawngah a oksak hi. A gam sunga a za lian thumna dingin a koih hi. Tua zan mahmah in Babilon kumpipa Belshazzar kithat a, Media mi Darias kumpi a suak hi. (Tua lai takin, Darias kum sawmguk leh kumnih a pha hi). Darias in a gamsung khempeuh a uk dingin gam ukpi za leh sawmnih koih dingin a ngaihsun hi. Tua ahih ciangin amah in tua gam ukpite tunga vaihawmpi ding leh kumpi deih bang a sem dingin Daniel leh adang mi nih a teel hi. Daniel in gam ukpi dangte leh vaihawmpi dangte sangin nasep a siam zaw diak se hi. Tua banga siam zaw diak se ahih manin kumpipa in gam buppi uk a, koih dingin a ngaihsun hi. Tua ciangin vaihawmpi dangte leh gam ukpi teng in Daniel’ nasepna en cikin a mawhna zon’ ding a hanciam uh hi. Ahih hangin Daniel pen a thuman leh a citak khat ahih manin a mawhna leh a simtatna a mu zo kei uh hi. Tua banga nasep kizen’ lohna leh a tatkhialhna a muh loh uh ciangin, “Hih Daniel pen a biakna tawh kisai-a thu i muh kei ngal leh mawhsak nading dang i mu kei ding hi,” ci-in a kikum uh hi. Tua ciangin amaute kumpipa kiangah pai uh a, “Darias kumpipa aw, sau veipi nungta in! Na gam sung nasem ko vaihawmpite, gam ukpite, gam ukpi huhte leh kumpipa thudot mite khempeuh in, Kumpipa in ngat taka zuih ding thukham khat na bawl ding ka thukim uh hi. Tu zawh ni sawmthum sungin nang kumpipa’ kiang longal, pasian kiang ahi a, midang khatpeuh kiang ahi zongin thungen om thei lo ding hi ci-in na kham ding hi. Hih na thupiakna a mang lo peuhmah humpinelkai koihna khuk sungah kikhia ding hi. Tua ahih ciangin kumpipa aw, thupiakna lai hawmkhia in la, a tungah na min gelh in. Tua hi leh Mediate leh Persiate’ upadi pen kikhel thei lo ding a, ngat taka a kizuih kul ding hi,” a ci uh hi. Tua mah bangin Darias kumpipa in a min gelhin thu piakna lai a hawmkhia hi. Daniel in tua bang thu piakna lai kihawm khia khin zo ta hi cih a theih ciangin a innah a ciah hi. A inn tungnung dei sungah Jerusalem lam a nga kongvang neu thum a om hi. Tua lai takah kongvang neu honsa-in ahih ngei bangin khukdin’ in, ni khatin thum vei ta Pasian kiangah thu a ngen hi. Tua ciangin amah a encik mite in Daniel in pasian kianga thu a nget a mu uh hi. Amaute khempeuh kumpipa kiangah Daniel hek dingin a pai uh hi. Amaute in “Kumpipa aw, tu zawh ni sawmthum sungin kumpipa kiang longal, pasian kiang ahi a, mi khatpeuh kiang ahi zongin thungen a om leh, humpinelkai koihna khuk sungah kikhia ding hi ci-in thu piakna lai hawmkhia in na min gelh hilo na hiam?” a ci uh hi. Tua ciangin kumpipa in, “Hi mah hi, Mediate leh Persiate’ upadi bangin a kikhel thei lo ding a ngat thu piakna ka bawl hi,” a ci hi. Amaute in kumpipa kiangah, “Judah salte khat ahi Daniel in kumpipa hong zahtak lo a, na thu piakna a mang nuam kei hi. Ni simin thum vei ta thu a ngen tawntung hi,” a ci uh hi. Kumpipa in hi thu a zak ciangin lungmang a, Daniel a suahtak theih nading lampi hanciamin ni tum dong a ngaihsun hi. Tua ciangin tua mite kumpipa’ kiangah hong paikik uh a, “Kumpipa aw, Mediate leh Persiate’ upadi bangin kumpipa in a hawm khiatsa thupiakna kikhel kik thei lo hi cih na thei hi,” a ci uh hi. Tua ciangin kumpipa in Daniel humpinelkai koihna khuk sunga khiat dingin thu a pia hi. Amah in Daniel kiangah, “Thuman taka na biak tawntung na Pasian in hong honkhia ta hen,” a ci hi. Tua ciangin humpinelkai koihna khuk sungah Daniel a khia uh hi. Amaute in suangtum khat la uh a, humpinelkai koihna khuk gong a hu uh hi. Kumpipa in ama ciamtehna leh a u liante ciamtehna tawh kuamah in Daniel a hotkhiat theih loh nadingin a ciamteh hi. Kumpipa a innah ciahkik a, tua zan tawntung an ngawl a, gualnopna zong a bawl kei hi. Tua zanin a ihmu thei peuhmah kei hi. Zingsang khuavak tung phetin kumpipa tho a, humpinelkai koihna khukah a va pai pah hi. Humpinelkai koihna khuk a tun’ dektak lai takin aw liing kawmin, “Daniel, a nungta Pasian nasempa! Thuman taka na biak tawntung na Pasian in humpinelkai’ kam sung panin a hong honkhia thei hiam?” ci-in a kiko hi. Daniel in, “Kumpipa aw, sau veipi nungta in. Pasian in a vantungmi hong sawl a, ka liam loh nadingin humpinelkaite’ kam a humcip sak hi. Kumpipa aw, mawhna ka bawl loh lam leh, nang tunga zong khialhna ka bawl lohna amah in hong thei ahih manin tua bangin a hong bawl hi,” a ci hi. Kumpipa a lungdam mahmah a, humpinelkai koihna khuk sung pan Daniel kaihkhiat dingin thu a pia hi. Tua ahih ciangin Daniel kaikhiato uh a, liamna themcik zong a neih loh lam a mu uh hi. Bang hang hiam cih leh amah in Pasian a muang hi. Tua ciangin kumpipa in a hek teng khempeuh a zi a ta tek uh tawh humpinelkai koihna khuk sunga khiat dingin thu a pia hi. Amaute humpinelkai khuk taw a tun’ ma-un humpinelkai in bak khat suahin a guh a taang-in a balzan gawp hi. Tua ciangin Darias kumpipa in leitunga om minam kimte, minam tuamtuamte leh paunam tuamtuamte khempeuh tungah lai khak a: “Na tung uhah nopsakna om ta hen. Ka gam sunga om mi khempeuh in Daniel’ Pasian kihta-in a zahtak nadingun thu ka pia hi. “Bang hang hiam cih leh, Amah in a nungta Pasian hi a; atawntungin a uk ding hi. Ama gam in kisia ngeilo ding a, a vangliatna a bei ngei kei ding hi. Amah in gumkhiapa leh tankhiapa hi a, vantung leh leitungah, lim leh nalamdangte a bawl hi. Humpinelkaite’ thahatna panin, Daniel a suakta sak hi,” a ci hi. Tua ahih manin Darias kumpi ahih laitak leh Persia mi Sairas kumpi ahih lai takin, Daniel nuamsa-in a om hi. Belshazzar in Babilon kumpi a suah zawh a kum masa kumin keimah Daniel in ka lup sungin, mang khat ka man a, zanin maang ka mu hi: Ka mangmat lai-in ka gelh a, tua zana ka mangmuhnate ka ciamtehna hi bang ahi hi. Vantung kui li panin huihpi hong nunga tuipi tung a seem gawp hi. Tua ciangin tuipi sung panin a kibang lo sapi gol li a hong pusuak to uh hi. Amasa pen humpinelkai tawh kibang a, ahi zongin muvanlai’ kha tawh a kibang kha a nei hi. Ka et lai takin a kha tegel a hong kibotkhia hi. Tua ganhing leitung panin kidom kaang to a, mihing bangin a khe nih in kiding sak a, mihing’ lungsim ama tungah a kipia hi. Tua ciangin a nihna sapi vompi tawh a kibang khat ka mu hi. A nunglam khe tawh ding-in a kam sung a ha kikalah nakguh thum pet a, “Tho in la, sa tampi ne in,” cihna aw khat a hong ging hi. Ka et lai leh kamkei tawh a kibang sapi dang khat ka mu hi. A nungzangah vasa-kha tawh a kibang kha li a nei hi. Tua sapi in lutang li nei a, ukna aana ama tungah a kipia hi. Ka et lai leh sapi lina ka mu hi. Tua sapi kihtak huai mahmah a, lipkhap huai-in a thupi mahmah hi. Amah in a gol mahmah sik-ha a nei hi. Amah in nene in a nek val teng a khe tawh a tuancil gawp hi. Amah in sapi dangte tawh kibang loin ki sawm a nei hi. Tua kite ka et lai takin a dang kineu khat hong po a, a omsa ki thumte a bot khia hi. Tua ki tungah mihing’ mittang tawh a kibang mittang leh kam om a, kiphatsakna kam tampi a pau hi. Ka et lai takin kumpi tokhomte a hong kikoih hi. A nungta tawntung mi Pa khat in tua tokhomte khat tungah a tu hi. A puante vuk bangin ngo a, a samte tuumul hoih tawh a kibang hi. A tokhom in meikuang lengpei tungah kinga-in meikuang zuazua a; tua sung panin meikuang gunpi a hong luangkhia hi. Ama nasem ding mihing tulza om a, a mai-ah mihing tul zasawm a ding uh hi. Thukhen nading hun kipana laibute a kiphen hi. Ka et lai takin tua kineu in kiphatsakna kamsia a pau ka za hi. Ka et lailai leh tua sapi lina kithat a, a pumpi meikuang sungah kikhulin a kisia hi. Sapi dangte ahih leh a vangliatna uh kilakkhiat sak a, ahih hangin a nuntak lai nading uh hun ciangtan’ khat a kipia hi. Zan ka mangmuh hun sungin ka khuadak leh mihing tapa tawh a kibang mi khat meii tunga hong pai ka mu hi. A nungta tawnung mipa’ kiangah pai-in, ama kiangah a kipia hi. Amah in vangliatna, minthan’na leh kumpi za ngah ahih manin, minam kimte, minam tuamtuamte, paunam tuamtuamte khempeuh in ama na a sem ding uh hi. Amah in a tawntungin uk ding a, a kumpi gam a bei ngeikei ding hi. Ka mangmuhnate in hong linglawng sakin a hong patausak mahmah hi. Ka pam-a ding mite khat kiangah pai-in hihte khempeuh a khiatna hong hilh in ci-in ka dong hi. Tua ciangin amah in a khiatna a hong hilh hi. “Hih sapi lite in leitung pana hong khangkhia ding kumpi gam li ahi hi. Ahih hangin Sangpen Pasian’ mite in kumpi za a ngah ding uh a, a tawntungin a nei tawntung ding uh hi,” a ci hi. Tua ciangin a dangte tawh a kibang lo a kihtak huai sik-ha leh sumngo khecin a nei sapi lina thu ka thei nuam hi. Amah in nene-in na khempeuh a tuancil gawp hi. Tua ciangin a lutanga ki sawm leh, a nung ciangin ki khat hong po-a, ki thum a kitanna thu ka thei nuam hi. Amah in mittang leh kiphatsakna kam sia pau na’ng kam a nei hi. A dangte sangin nakpi takin a kihtak huaizaw hi. Ka et lai takin, tua ki in Pasian’ mite gal-in do a, amaute a zo gawp hi. Tua ciangin a nungta tawntung mipa hong pai a, Sang pen Pasian’ mite ading a hoih thukhenna a hong gen hi. Pasian mite in kumpi za a ngah nading uh hun a hong tung hi. Hih hilhtelna kei a hong kipia hi: “Sapi lina in leitung-a hong om ding kumpi gam lina ding hi a, kumpigam dangte tawh a kilamdang mahmah ding hi. Amah in leitung buppi valhtum ding a, tuancil gawpin a sukham ding hi. Ki sawmte in tua kumpigam sung pana hong piang ding kumpi sawmte ahi uh hi. Tua ciangin kumpi dang khat hong piang leuleu ding a, amah in a om sate tawh kilamdang mahmahin kumpi thum a nuaisiah ding hi. Amah in Sangpen Pasian langpan’ in thu gen ding a, Pasian’ mite a bawlsia ding hi. Amah in amaute’ biakna tawh kipawl thukham leh pawi bawlna hunte kheel sak ding hanciam ding a, Pasian’ mite in ama khut sungah kumthum leh a lang a om ding uh hi. Tua ciangin thukhenna hun hong kipan ding a, ama vangliatna lakkhiat sakin, amah a kisusia maimang ding hi. Hih leitung kumpigam leh, vangliatna leh liatna khempeuh Sangpen Pasian mite tungah a kipia ding hi. Amau’ kumpi za in cikmah hunin bei ngeilo ding a, leitung ukna za a nei khempeuhte in a thu uh mangin amau’ na a sem ding uh hi. Hih tangthu a beita hi. Hih thu ka ngaihsut ciangin kei, Daniel ka lau mahmah a, ka meel a daang gawp hi. Ahih hangin hih thu keima lungsim sung bekah ka koih hi. Belshazzar kumpi a suah zawh a kum thumna kumin keimah Daniel in a nih veina maang ka mu hi. Ka mangmuhna-ah thakhatin Elam gam khen sung Susa khuapi kulh sunga a om-in ka kingaihsun a, Ulai gun gei-ah ka ding hi. Ka khuadak toh leh gun gei-ah tuutal khat ding-a om ka mu hi. Amah in a sau mahmah ki nih nei a, a ki po nunung pen a po masa sangin a sauzaw hi. Tua tuutal in a ki tawh, nitumna lam, sak lam, khang lam a si kawikawi ka mu hi. Ama ut bangin kiphasak-in gamta ahih manin, amah a kho zo ding leh a thahatna pan a suakta zo ding ganhing khat beek a om kei hi. A bangci hi ding hiam ci-a ngaihsun thei lo-a ka om lai takin, ni tumna lam panin keeltal khat a hong tai veva hi. Hat lua mahmah ahih manin a khe in lei a sukha kei hi. A mit tegel kikal-ah a tuam pian ki lamdang khat a nei hi. Ki nih a nei gun gei-a ding ka muh tuutal kiang a hong phak ciangin a tha neih zahin a sii hi. Heh lua mahmah ahih manin tua tuutal tuangawp a, a ki tegel a suktan sak hi. Tuutal in a nan’ zawh na’ng thahatna nei lo ahih manin lei kiden’na a, a huh zo ding kuamah a om kei hi. Tua keeltal a thahatna hong khangto semsem a, ahih hangin a thahatpen lai takin a ki a kitan hi. Tua ki pona munah a lamdang ki li hong po to kik a, vantung kiu lite a kawk hi. Tua ki lite lak pan khat tungah kineu dang khat hong kipan a, a vangliatna khang lam, ni suahna lam leh, Thuciamna Gam lamah a vangliatna a khang hi. Amah in vantung galkapte nangawn dong a ban dingin a thahatna hong khangto a, aksi pawl khatte leitungah lawnkhia-in a tuancil gawp hi. Amah in vantung galkap kumpipa nangawn do-in ama tunga kipia nisim biakna piaknate nangawn khawlsakin, biakinnpi biaknate a beisak hi. Nisim biakna piaknate-ah mawhna dim a, biakna maan lei lakah a kipaikhia hi. Ahihna peuhpeuhah tua ki a thahat mahmah hi. Vantungmi khat in a dang vantung mi khat kiangah thu a dot ka za a, “Hih mangmuhna a tangtun’ nading bang tan vei sawt ding a, a muhdah huai mawhna in nisim biakna piakna bang tan vei khak ding hiam? Vantung galkapte leh biakinnpi bang tan vei kituancil ding ahi hiam?” a ci hi. Amah in, “Zingsang leh nitak biakna piakna tulnih leh zathum vei a cin’ khit ciangin biakinnpi kipuahkik ding hi,” ci-in a dawng hi. Keimah Daniel in mangmuhna a khiatna thei nuamin ka hanciam hi. Thakhat thu-in mihing meel tawh a kibang khat ka mai-ah a hong ding hi. Ulai gungal panin mihing’ aw khat hong kiko a, “Gabriel aw, ama kiangah a muh nate a khiatna hilh in,” cihna ka za hi. Gabriel hong pai-in ka kiangah hong ding a, lau lua mahmah ka hih manin lei tungah ka puk hi. Amah in, “Leitungmi aw, a khiatna thei in. Mangmuhna pen hun beina ding lahna ahi hi,” ci-in ka kiangah a hong gen hi. Amah in thu a hong gen lai takin, sibupin lei lakah ka tuk hi. Ahih hangin amah in hong domto-in a hong dingsak kik hi. Amah in, “Pasian’ hehna hanga a kisehsa hun a, thupiang dingte ka hong lak ding hi. Mangmuhna in hun bei nading lahna ahi hi. Na muh ki nih a nei tuutal in Media leh Persia gam kumpite a cih nopna ahi hi. Keltal in Grik kumpi gam hi a, a mit kikal-a po ki in kumpi masapen a cih nopna ahi hi. Ki po masapen a kitan’ khit ciangin a nunga hong po ki lite in, tua gam panin kumpi gam li hong piang ding cih nopna ahi hi. Ahih hangin tua gamte in a masapen kumpi zahin a thahat kei ding uh hi. Tua kumpi gamte a bei ding a nunung zaw hun a nai ciangin, gilo lua mahmah ding uh ahih manin daan a kipia ding hi. Tua ciangin ama thu bek thu a sa, mawhna pawlpawl tawh kidim, hehmel a pua kumpi khat a hong om ding hi. Amah thahat mahmah ding a, ahih hangin ama thahatna ahi kei ding hi. Amah in a dipkuat huai siatna piangsak ding a, a hihna khempeuh ah a thahat mahmah ding hi. Amah in mi thahatte leh Pasian mite a susia ding hi. A lungsim daplan lua ahih manin zuau phuah siamna tawh a hih peuhpeuh a tangtun’ ding hi. Amah kiliansak lua-in, theihkholh lohin mi tampi susia-in, a lianpen kumpite’ kumpipa nangawn a langpan’ ding hi. Ahih hangin mihing thahatna kizang loin amah a kisusia ding hi. Hih zingsang leh nitak biakna piakna mangmuhna thu a hong kihilhtelna in a maan ahi hi. Tu in hih mangmuhna thu a hong tun’ ding hun sawtpi hi lai ahih manin imcip phot in,” hong ci hi. Keimah Daniel in, ni tawmvei sung thazaw gawpin ka ci a na hi. Tua ciangin tho-in, ka nasep ngei semkik dingin kumpi innah ka pai hi. Ka mangmuhna thu thei zo lo ka hih manin cih nading meel thei loin dap takin ka om hi. Media mi ahi Ahasu-eras’ tapa Darias in Babilon gam teng a uk hi. Amah kumpi a suah zawh a kum masa kumin keimah Daniel in, Topa in kamsang Jeremiah tunga Jerusalem kum sawmsagih sung kisia ding hi, ci-a a genna laibute simin, tua thute ka ngaihsun hi. An ngawlin, ippi puan silhin, vut lakah tu-in, Topa ’ kiangah deihtakin thu ka ngen hi. Topa ka Pasian kiangah thungenin, ka mite’ mawhna pulakin: “ Topa Pasian aw, nang na lian-a ka hong zahtak uh hi. Nang na thuman a, itna thuciamna leh na thupiakna bang a mangte leh a hong itte a tawntungin na it hi. Kote ka hih uh leh ka gi kei uh a, ka mawh khin uh a, ka khial khin uh hi. Na hong sawlna bang ka mang kei uh a, na thupiakna leh na thukhamte ka taisan khin uh hi. Ka kumpite uh, ko hong ukte uh, ka pu ka pate uh leh minam khempeuhte tunga na min tawh thu a hong gen na nasem kamsangte’ thu ka ngai kei uh hi. Topa aw, nang na hih leh na dik a, ahih hangin kote ka hih uh leh a zumhuai-in ka gamta uh hi. Judah gam leh Jerusalem khua sunga teeng Israel mite khempeuh na tungah hong thuman lo uh ahih manin, a nai a gamla gam tuamtuamah na thehthang zo hi. Ka kumpite uh, ko hong ukte leh ka pu ka pate uh a zumhuai-in gamta uh a, nangmah hong uk Topa tungah a khial khin uh hi. Nangmah in hehpihna tawh kidimin mawhna maisak a, ahih hangin kote in nang ka hong langpan’ uh hi. Topa Pasian aw, na nasem kamsangte tung tawna kote zuih dinga thukhamte nong piak hangin, tua thu ka mang tuan kei uh hi. Israelte khempeuh in na gensa thute leh na thukhamte khempeuh a palsat khin zo uh hi. Na tungah khialhna ka hong bawl manun, na nasem Moses thukham sunga kigelh bangin kote tungah samsiatna leh thukhenna a hong tung hi. Na gensa bangin kote tung leh ko hong ukte tungah a nasia gimna nong tungsak zo hi. Leitunga om khuapi dang khatpeuh na hih ngei loh pen Jerusalem tungah na hih hi. Moses’ thukham sunga kigen daan khempeuh ka thuak uh hi. Topa Pasian aw, tu nangawnin zong nangma maipha hong zong loin, na thuman ka zuih theih nangun mawhna ka kisik kei uh hi. Topa Pasian aw, nangmah in kote daan pia dingin na kithawi a, na hong pia takpi hi. Bang hang hiam cih leh na hihna khempeuh thuman hi a, kote in na thu ka hong mang kei uh hi. Kote’ Topa Pasian aw, na mihingte Izipt gam panin a vanglian khut tawh nong lakhia a, na min tu dongin a kiphawk lai hi. Ka mawh khin uh a, ka khial khin uh hi. Nang na diktat hi, tua ahih ciangin Jerusalem na mual siang tungpan na hehna na lakhia in. Tua in na khuapi hi a, na mual siangtho ahi hi. Kote leh ka pute ka pate uh khialhna leh gitlohna hangin ka kiim ka paam uh a mite khempeuh in Jerusalem leh na mite a hong simmawh uh hi. Pasian aw, ka thungetna leh ka thuumna hong za in. A kisiasa na biakinnpi maipha hong piakik in. Mi khempeuh in nangmah Pasian na hih lam a theihtheih nadingun hong puahkik in. Pasian aw, ka thungetna uh na bil tawh hong ngai in la hong za in. Hong en in la, kote’ siatna leh na min pua khuapi’ siatna hong mu in. Kote’ gamtatna pha suang hi loin, nangma’ migitna suangin thu kong ngen uh hi. Topa aw, ka thungetna uh hong za in la, ka mawhna uh hong maisak in. Topa aw, hong ngai in la, na hong sem in! Na min na khualna tawh hong zekai kei in. Hih khuapi leh hih mite in nangma neihsa ahi hi,” ka ci hi. Keima mawhna leh ka mipih Israelte’ mawhna pulakin, ka Topa Pasian kiangah a mual siangtho a hong puahkik nadingin thuumin thu ka ngenngen hi. Tua ka nget lai takin, ka mangmuh masak sunga ka muh mipa Gabriel, ka omna munah a hong leengsuk hi. Tua hun in nitak lam biakna piakna hun laitak ahi hi. Amah in, “Daniel aw, hilhkholhna thu a theisak dingin ka hong pai zo hi. Pasian tunga thuum dinga na kisak lai takin Amah in a hong za zo hi. Pasian in nang hong it ahih manin, tua thu gen dingin ka hong pai zo hi. Tu in, tua mangmuhna thu ka hong hilh tel lai takin, ciamteh in. “Na mite leh khuapi siangtho ading leh, mawhna leh gamtat khialhnate a bei nadingin nipi kal sawmsagih a kiseh zo hi. Tua ciangin mawhna kimaisak ding a, a tawntung thumanna a hong tung ding hi. Genkholhna leh mangmuhna thu man takin a hong tangtung ding a, a Siangthopen Mun biakinnpi a kisiansuah ding hi. Hih thu ciamteh in la, thei in: Jerusalem lamkik nading thupiak khiat huna kipan sathau kinilhpa’ ukpa hong pai dong nipi kalsagih leh nipi kal sawmguk leh nih ahi ding hi. Jerusalem kongzing lampi nei leh kulhpi nei-in kilamkik ding a, ahih hangin buai hun sung ahi ding hi. Nipi kal sawmguk leh nih a bei khit ciangin sathau kinilhpa thuman lopi-in kithat ding hi. Hong pai ding mite a ukpa in khuapi le biakinnpi a susia ding hi. A beina in tuiciin tung bang hi ding a, a tawp dongin galdona leh kisiatna vive hi dingin Pasian in thu a khen zo hi. Tua makaipa in mi tampite tawh nipi kal khat sung thu ciamna kip bawl ding uh hi. Gangawh biakna leh biakna piakna nipi kal lang sung a khawlsak ding hi. Biakinn dawn sangpen tungah Pasian’ sehsa bangin a koihpa a bei mateng a Lipkhaphuai na om ding hi,” hong ci hi. Sairas in Persia gam kumpi-a a suah zawh kumthum a phak lai takin, Belteshazzar a kici Daniel tungah thu khat a kipia hi. Tua thu pen a maan hi a, theihtel hak mahmah ahih manin mangmuhna tawh tel takin a kilak hi. Tua hun lai takin keimah Daniel in, nipi kalthum sung khakunin dahin ka om hi. Zu leh sa ahi a, an lim ahi zongin bangmah ka ne kei a, nipi kalthum a bei mateng ka sam zong ka hiat kei hi. Tua kum kha masa ni sawmnih leh nili ni-in Tigris gunpi gei-ah ka ding hi. Ka tung lam ka ettoh leh puanpak silh-a kham kawnggak tawh a kawng a gak mi khat ka mu hi. A pumpi in suangmanpha tawh kibangin a tang hi. A maitang in khawphelep bangin tang a, a mittangte in mei bangin a kuang zalzal hi. A ban leh a khete sumngo zut siang bangin tee daldal a, a aw in mi honpi kiko tawh kibangin a ging zuazua hi. Tua mangmuhna keimah bekin ka mu hi. Ka gei-a om mi dangte in bangmah a mu kei uh hi. Ahih hangin lau-in taimangin a bu uh hi. Kei guak bek hong kinusia ahih manin tua a lamdang mangmuhna keimah guak bek mah in ka mu hi. Ka tha neih teng bei khin a, ka mel kikhel gawp ahih manin ka cimawh hi. Tua mipa’ kam pau ka zak ciangin ka khup lamin lei lakah ka tuksuk a, khua ka phawk nawn kei hi. Tua lai takin khut khat in kei hong lenin, ka khut leh ka khuk-ah hong phong to a, liing kankan kawmin ka ding to hi. Amah in, “Daniel hong kizahtak mahmah pa aw, Ding in la, kong thu gente limtakin ciamteh in. Na kiangah thu gen dingin kei hong kisawl zo hi,” a hong ci hi. Amah in hi thu teng a hong gen khit ciangin liing kankan kawmin ka ding hi. Tua ciangin amah in, “Daniel aw, lau kei in. Kiniamkhiat dinga na lungsim na khentat masak pen ni a kipan, tua thu na theihtheih nadingin Pasian in na thungetna a hong za zo hi. Na thungetna bang a hong pia dingin ka hong pai hi. Persia gam a uk kumpipa in ni sawmnih leh nikhat sung a hong nial hi. Tua ciangin vantungmi thupite khat ahi Mikhael in kei hong panpih dingin a hong pai hi. Bang hang hiam cih leh Persia gam sungah keimah guak bek ka om hi. Mai lam hunah na mipihte’ tunga hong tung ding thu hilhkhol dinga hong pai ka hi hi. Hih in mai lama hong piang lai ding mangmuhna ahi hi. Amah in hih thu a hong gen ciangin keimah in bangmah pau thei loin lei ka en suk gega lel hi. Tua ciangin pasal mel tawh a kibang mi khat thakhatin ka mai-ah hong suak-a ka muk a hong lawn’sak hi. Tua ciangin kamka-in thugen dingin ka kisa hi. Ka mai-a dingpa kiangah, “ Topa aw, ka mangmuhna in ka tha hong zawsak lua ahih manin ka ci liin a pha thei kei hi. A Topa mai a ding sila khat tawh ka kibang hi. Bang ci banga thu hong gen thei ding ka hi hiam? Husan’ zawh nading thatang nangawn ka nei kei hi,” ka ci hi. Amah in khat vei hong lenkik leuleu a, ka tha a hong khauh kik zaw deuh hi. Amah in, “Lungnuam in la, lau kei in. Kihat sak in, zahtakna ngah pa aw,” a hong ci hi. Tua teng a hong gen khit ciangin ka tha hong khauh zaw a, “ Topa aw, na gen ding peuhpeuh hong gen in, ka ci a hong damzaw diak hi,” ka ci hi. “Media mi Darias a kum khatna hunin keimah in amaute hansuahin a kip a kho nadingun ka hanciam hi. “Tu-a na tunga kong gen ding thu in thuman ahi hi. Kumpi thum in Persia gam uk lai ding a, tua banah a lina a hong khang ding hi. Tua pa in a dang teng sangin a hau zaw ding hi. Amah in a hauhpen pen laitak leh a thahat pen lai takin Grik kumpi a to ding hi. Tua ciangin a thahat kumpi khat a hong kilang ding hi. Amah in gam zapi tak uk ding a, ama thuthu-in a gamta ding hi. Ahih hangin a thahat pen lai takin a gam hong kitam dinga khen li a kisuah ding hi. A suan a khakte in ama gam uk kha loin ama vangliatna zah vaang a nei zo kei ding uh hi; bang hang hiam cih leh ama ukna kibotkhia-in midangte’ tungah kipia ding hi. “Khanglam kumpi a hong thahat ding hi. Ahi zongin a galkap mang lianpente khat thahatpen dinga gam lianzaw a uk ding hi. Kum sauvei sim khit ciangin Izipt kumpipa in kipawl khop theih nadingin a tanu leh Siria kumpipa a kiteng sak ding hi. Ahih hangin tua kipawl khopna kip lo ding a, tua numei nu leh a tonpih a nasemte leh a ta leh a pasal a kithat lum ding hi. “A sawt loin tua nu behte khat in Siria sim ding a, a kulhpi sungah tumin amaute a zo gawp ding hi. Amah in amaute’ milim pasiante leh na manpha ngun leh khamte Izipt gamah a pua ding hi. Kum tawm vei sung bek kilemna a om ding hi. Siria kumpipa in Izipt gam sim ding a, ahih hangin zo zo loin a nungkik ding hi. “Siria kumpipa’ tate in galdo dingin kithawi-in galkap ding mi tampi a kaikhawm ding uh hi. Tua galkap mangte khat thahat diakin tuikhang bang dinga galte’ kulhpi a luh zo ding hi. Izipt kumpipa zong heh mahmahin Siria kumpipa in zo gawp ding a, a galkapte tampi tak a matsak ding hi. A galhat man leh galkap tampi a thahna hangin kisa thei mahmah ding a, ahih hangin a gualzo tawntung kei ding hi. Siria kumpipa khatvei kuan kikin amasa sanga a tam zaw galkap a kaikhawm ding hi. A hun kicingta a kisak ciangin galkap tampi leh galhiam kicing pikpek tawh a kuankhia ding hi. “Tua hun ciangin mi tampi takin Izipt kumpipa a lehdo ding uh hi. Daniel’ mipihte ahi, mi hoih lo pawl khat in zong a muhsa uh mangmuhna hangin a lehdo ding uh a, ahih hangin a guallel ding uh hi. Tua ahih ciangin Siria kumpipa in kulhpi tawh a kiumcih khuapite luh zo-in a la khin ding hi. Izipt galkapte in galdo suak zo nawn lo ding uh a, galkap thahatpente a thaneem ding uh hi. Galdo zo ding om nawn lo uh ahih manin a galte a ut utin a gamta ding uh hi. Thuciam Gamah zong lutin a khut sungah tua gam a suksiat nading thahatna a nei ding hi. Siria kumpipa in a galkap neih khempeuh zangin galsim ding a ngaihsun ding hi. Olno taka a gualzawh theih nadingin a tanu leh a galte teen’ sak ding a ngaihsun ding hi. Ahih hangin a lawhcing zo kei veve ding hi. Tua khit ciangin tuipi gei-a, minam dangte sim ding a, tampi tak mah a zo ding hi. Ahih hangin gamdang makaipa khat in amah zo gawp ding a, a kiphatsakna teng amah in a thuakkik ding hi. Kumpipa in a kulhpi zuankik dingin a gamah hong ciah ding a, ahih hangin gal lel-in tuk ahih manin amah a kimu nawn kei ding hi. “Tua ciangin kumpi dang khat in ama nung hong zuikik leuleu ding a, kumpi gamsung khantoh nadingin phiangsiah tampi a dong dingin mi khat a sawl ding hi. Tawlno khat khit ciangin tua kumpipa kithat lum ding a, ahih hangin gal sunga si ahi kei ding hi. A zom-a Siria kumpi ding pen mi gilo, kumpi dinga kilawm lo mi khat ahi ding hi. Ahih hangin amah in thakhat thu-in zuau siamna tawh kumpi a hong suak vat ding hi. Ama mai-ah galkap honpite kisiak khia ding a, thuciamna tawh kipawl kumpipa zong a kisia mang ding hi. Zuau gensiamna zangin minam dangte tawh kilemna a bawl ding hi. Minam tawmno khat bek a uk hangin a thahatna a khang semsem ding hi. Amah in a pu a pate’ hih ngei loh, gam hau, gam kilemte nangawn a sim ding hi. Tua ciangin gal sunga a lak vante leh nate a nungzuite tawh a hawm ding uh hi. Amah in galdalna kulhpite khempeuh luh ding hanciam ding a, ahih hangin tawm vei sung bek hun a nei ding hi. Izipt gam hang taka a sim theih nadingin galkap tampi a kaikhawm ding hi. Bang hang hiam cih leh Izipte in zong galkap tampi tawh nasia takin a na do ding uh hi. Izipt kumpipa in kheemna thuak kha ding ahih manin gal a zo kei ding hi. Ama muan pen a thudot mipilte in amah lehbawlin a siasak ding uh hi. A galkapte tampi tak si ding ahih manin gal a lel ding hi. Tua kumpi tegel in sabuai khat tungah tu in, an a ne khawm ding uh hi. Ahih hangin a ngaihsutna uh a hoih zaw sang om tuan lo ahih manin a kikhem tuak ding uh hi. A hun tung nai lo ahih manin a deih bang uh a ngah zo kei ding uh hi. Tua ciangin Siria kumpipa in a galvan lak teng tawh a gamah ciahkik ding a, a siangtho thuciamna langpan ding a lungngai ding hi. A ut bang peuhin gamta ding a, tua ciangin a gam lamah a ciahkik ding hi. “Tua nung ciangin Izipt gam sim kik leuleu ding a, ahih hangin a masa-a bangin a piang kei ding hi. Nitumna tuipi gei a, gamte in teembaw tawh hong pai-in amah do ding uh ahih manin a lau ding hi. Tua ciangin amah kileh kik ding a, a thangpaihna tawh Pasian’ mite biakna suksiat ding a hanciam ding hi. Amah in tua biakna a nusia mite’ zol simna a mang ding hi. A galkapte pawl khat in biakinnpi leh biakinnpi huang a niinsak ding uh hi. Amaute in nisim biak piaknate khawlsak ding uh a, Lipkhaphuai na a suang ding uh hi. Kumpipa in tua biakna a nusia khinsa mite a thu zawh theih nadingin zuau gen siamna a zang ding hi. Ahih hangin Pasian nung a zui mite in ahih uh leh kiptakin a nial ding uh hi. Pilna a nei mite in a pilna uh midang tampite a hilh ding uh hi. Ahih hangin tawl khat sung mi pawlkhat in gal sunga sihna leh meikuang sunga thahna a thuak ding uh hi. Mi kim khatte in lawkgawpna leh thongkiatna thuak ding uh hi. Tua banga thahna a thuak lai takun, pawlkhat in huhna a ngah ding uh hi. Ahih hangin mi tampi in huhna a piak uh hangin, amau ading meetna a zong bek ahi uh hi. Mi pawlkhat in thahna a thuak ding uh hi. Tua banga a pian’na thu in, beina a tun’ mateng sian’tho sakna leh mipha leh misia khentelna, Pasian’ sehsa hun a tun’na ahi hi. “Siria kumpipa in a ut bangbangin a gamta ding hi. Amah in pasiante sangin ka lianzaw a, Sangpen Pasian sangin zong ka thupi zaw lai hi ci-in a kisathei ding hi, a kiza ngei lo thu genin pasiante’ Pasian lang khatah thu gen ding hi. Hehna hun a kicing matengin amah gualzo ding hi, bang hang hiam cih leh a kiseh kholsa bang a, a tun’ nading ahi hi. Kumpipa in a pu a pate’ biak pasian leh, numeite’ it pasian a thusim kei ding hi. Pasian a kici peuhmah thusim khat beek a nei kei ding hi. Bang hang hiam cih leh tuate sangin amah a lian zaw-in a kingaihsun hi. Tua pasiante sangin kulhpi a dal pasian a thupi sim zaw ding hi. Amah in kham, ngun, suangmanpha leh a thupi letsongte, a pu a pate’ biak ngei loh pasian kiangah a pia ding hi. Amah in a kulhpi cing dingin pasian dang a biate a sawl ding hi. Amah in amah kumpi-a a sangte minphatna, zaliatna pia-in, leitang nangawn letsongin a pia ding hi. Siria kumpipa hun a bei dektak ciangin, Izipt kumpipa in amah a sim ding hi. Siria kumpipa in a tha neih teng siit loin tuikhang bangin, sakol tawh, sakol galkapte tawh, teembaw tampi tawh Izipt a do ding hi. Amah in Thuciam Gam zong sim ding a, tul tampi tak a that ding hi. Ahih hangin Edom gam, Moab gam leh Ammon gam sunga a om lai sun teng a suakta ding uh hi. Amah in gam tampi tak sim ding a, Izipt nangawn zong a suakta kei ding hi. Amah in Izipt gam sunga kisel, ngun leh kham leh a neihsa uh na manpha teng khempeuh a la ding hi. Amah in Libia leh Nubiate gam zong a zo ding hi. Tua ciangin, nisuahna lam leh saklam pan-a thu piang in amah patau sak ding a, thangpaihna tawh gal do-in mi tampi tak a that ding hi. Amah in a kumpi puanbuk lianpite biakinn din’na mualtung leh tuipi kikalah a lam ding hi. Ahih hangin amah a si ding hi. Bang hang hiam cih leh amah a huh ding kuamah a om kei hi. “Tua hun ciangin na mite a cing, a lian vantungmi Mikhael a hong kilang ding hi. Tua ciangin leitunga mihing a pian’ zawh akipan a nasia penpen gimna hun a hong tung ding hi. Tua hun a hong tun’ ciangin Pasian’ laibu sunga a min kigelh, na mite khempeuh in gupna a ngah ding uh hi. A sisa mi tampite in nuntakna a ngah kik ding uh hi. Pawl khatte in nungta tawntung ding uh a, pawl khatte in a tawntung zumna leh minsiatna a ngah ding uh hi. A pilte ahih uh leh vantung khuavak tawh a taang khawm ding uh hi. A pha-a a gamtat nading uh mi tampi thu a hilhte in aksi bangin a taang tawntung ding uh hi. Tu-in Daniel aw, beina hun a tun’ mateng laibu khakcip in la, a tungah ciamtehna koih in. A kal lakah mi tampite’ pilna khangin, bang thu piang hiam cih thei tel nuamin kileh kawikawi ding uh hi,” hong ci hi. Tua ciangin keimah Daniel in gun pang tuaka ding mi nih ka mu hi. Tua mite khat in puanpak silh a, gungal a gamla zaw deuh-a a ding pa’ kiangah, “Hih nalamdangte a bei nading bang tanvei sawt ding ahi hiam?” ci-in a dong hi. Puanpaak silhpa in a khut tegel vantung lamah lamto kawm sa-in, A tawntung Pasian’ min tawh thuciamna a bawl hi. Amah in, “Kum thum leh a lang ahi ding hi. Pasian’ mite kibawlsiatna a bei ciangin hih thute khempeuh a hong piang ding hi,” ci-in a gen ka za hi. A thugen ka za a, ahih hangin tel takin ka thei kei hi. Tua ahih ciangin, “ Topa aw, bang ci bangin beina a hong piang ding hiam?” ci-in ka dong hi. Amah in, “Daniel aw, tu-in ciah in, bang hang hiam cih leh hih thute in beina hun a tun’ mateng selcip a, ciamteh ding ahi hi. Mi tampite kisiansuahin a hoih leh a hoih lo lam a kikhentel ding hi. Mi gilote in bangmah thei tel thei lo uh ahih manin a gi kei semsem ding uh hi. Ahih hangin mi pilte in theih tel theihna a nei ding uh hi. Amaute in nisim biak piakna a khawlsak leh a Lipkhaphuai na a hong pian’ ciang ni tulkhat leh zanih leh sawmkua a sawt ding hi. Ni tulkhat leh zathum leh sawmthum leh nga dong muan’ huai taka a ngak zo kenkante in thupha a ngah ding uh hi. Nang, Daniel na hih leh a tawp dong muanhuai takin om in. Tua ciangin na si ding a, ahih hangin hun a bei ciangin thaman sang dingin na thokik ding hi,” hong ci hi. Judah kumpite Uzziah, Jotham, Ahaz, Hezekiah, leh Israel kumpi Joash’ tapa Jeroboam’ hun lai-in Be-eri’ tapa Hosea tungah Topa in thu na gen hi. Topa in Hosea tung tawnin Israelte tungah thu a na gen cil lai-in, amah in Hosea kiangah, “Hih gam mite kei tungah citak loin pasian dangte bia uh ahih manin, nang zong hong tulpih lo ding numei paktat khat ten’pih in la, tua nu tawh ta nei in,” a ci hi. Tua ahih manin Hosea in zong Diblaim’ tanu Gomer ten’pih a, tua nu hong gai-in tapa khat hong nei hi. Tua ciangin Topa in Hosea kiangah, “Na tapa’ min dingin Jezre-el phuak in: bang hang hiam cih leh ama pute Jehu in Jezre-el khua-ah a mi thahna hangin, Israel kumpipa tungah daan ka pia baih ding a, Israel mite tungah Jehu’ suan-le-khakte’ ukna ka beisak ding hi. Tua ni ciangin Israel mite’ galhatna khempeuh ka sumai ding hi,” a ci hi. Tua ciangin Gomer gai kikin tanu khat nei hi. Topa in zong Hosea kiangah, “Na tanu’ min dingin hehpih loh, a cih nopna Lo-ruhamah phuak in; bang hang hiam cih leh Israel mite ka hehpih nawn kei ding a, a mawhna uh ka maisak kei ding hi. Ahi zongin Judah mite ka hehpih ding a, namsau leh thal, sakol leh sakol tung tuangte, leh galsimna tawh hi loin, amaute’ Topa, Pasian ahi keimah mah in amaute ka honkhia ding hi,” a ci hi. Lo-ruhamah a tei khit ciangin Gomer gai-in tapa khat nei leuleu hi. Tua ciangin Topa in, “Na tapa’ min dingin ka mi hi lo, a cih nopna Loammi phuak in; bang hang hiam cih leh no Israel mite, ka mi na hi kei uh a, keimah in note’ Pasian ka hi kei hi,” a ci hi. Ahi zongin, teh zawh loh, sim zawh loh zah dongin tuipi sehnel bangin Israel mite tampi pha ding uh a, tu hunin, “Note ka mi hi lo,” a kicih hangin ni khat ni ciangin, “A nungta Pasian’ tate,” kici ding hi. Judah mite leh Israel mite kigawm kik ding uh a, amaute a makai dingin mi khat seh ding uh hi; amaute khangin ci-thei kik ding uh a, tua Jezre-el hun pen a nuam mahmah hun hi ding hi. Tua ahih ciangin na Israel mipihte, “Pasian’ mi,” ci in la, “ Topa in a hehpih mite,” zong ci in. Tate aw, na nu uh zol bawl un. Amah in ka zi hi buang a, kei in ama pasal hi buang hilo ka hi hiam? A paktatna leh midang tawh a mawhnate a khawl nadingin zol un. A gamtat hoih lohna khawl kei leh, a nu sung pan a suah lai-in a guaktangin a om mah bangin, a puan teng hawk khiatsakin a guaktangin ka om sak ding a, a keu, bangmah a po zawh lohna gamlak bangin ka bawl ding a, dangtakin a si ding hi. Ama tate, paktatna pana piang tate ahih manin, tua a tate zong ka hehpih kei ding hi. A nu uh a paktat hi a, tua ahih manin amaute, tua a paai numei in zumna mel thei loin a gamta ahi hi. Amah in, “Ka it pasal dangte kiangah ka pai ding hi; amaute in an leh tui, samul puan leh saihadial puan, leh oliv thau leh zu hong pia uh hi,” a ci zaw lai hi. Tua ahih ciangin amah a paikhiat zawh loh nadingin ling ka kaihnelh ding a, a kimkotah kulh ka ciang ding hi. Amah in a pasal it dangte a delh ding a, ahi zongin amaute kiang tung zo lo ding hi; amah in amaute zong niloh ding a, ahi zongin mu zo lo ding hi. Tua ciangin amah in, “Ka pasal masa kiangah ciahkik ning; tu-a banga ka om sangin ama kiang nuam zaw hi,” a ci ding hi. Ama tungah an, leenggahzu, leh oliv thau ka piakna, leh Baal pasian biak nadingin a zat ngun leh kham tampi tak a piapa ka hih lam phawk kha lo hi. Tua ahih manin anlak hun ciangin ama tungah ka piak ngei an leh leenggahzute ka pia nawn kei ding a, silh dingin ka piak samul puan leh saihadial puante ka pia nawn kei ding hi. Tua ciangin ama it pasal dangte’ muhna-ah a puante hawk khiatsakin a guak tangin ka om sak ding a, kuamah in kei’ khut sung panin amah honkhia zo lo ding hi. Ama lungdam theihna, a kumsim pawite, a khasim pawite, a nipi sim pawite, a biakna kikhop khempeuh ka beisak ding hi. Ka pasal it dangte in thaman-a hong piak hi, ci-a a gen leengguite leh a theikungte ka susia ding a, gamsate in tuate suksiatsakin gamlakpi suak ding hi. Kei hong mangngilh tan vei sung, Baal pasian tungah paknamtui a hal tan vei sung, leh a pasal it dangte tawh kikhawl dingin a manpha kizepna a tuamtuamte tawh a kizep hun tan vei sung zah mah daan ka pia ding hi. Tua ahih ciangin gamlakah amah ka paipih kik ding a, itna kam tawh amah hopihin ka zol kik ding hi. Tua lai panin a leenggui lote ka pia kik ding a, Lungkhamna Kuam pen lametna kongpi ka suaksak ding hi. Izipt panin a paikhiat a nungakno hun lai mah bangin ka thugennate hong ngai ding hi. Tua ciangin kei pen, ka pasal, hong ci kik ding a, kei pen ka Baal pasian, hong ci nawn lo ding hi. Ama kam panin Baal pasian min ka pulaksak nawn kei ding a, a min kilo kha nawn lo ding hi. Tua ciangin, ka mite a suksiat loh nadingun gamlaka om gamsate, huih laka leeng vasate, leh leitung a bokvak ganhingte tawh thuciamna ka bawl ding a, thalte, namsaute, galhiam khempeuh, leitung panin ka phiat khia ding hi. A lungnuam, lungmuang hithiatin ka mite ka om sak ding hi. Israel aw, nang, zi-in kong nei kik ding a, nang tungah thuman thutangin kong gamta ding hi. Nang hong itin kong hehpih tawntung ding a, keima’ aa na hi tawntung ding hi. Kei’ aa ahi tawntung dingin nang kong la ding hi. Tua ciangin Topa ka hih lam tak nong thei ding hi. Tua ni ciangin keima mi Jezre-elte’ thungetna ka pia ding a, leitungah guah ka zusak ding hi. Leitung in an, leenggahzu, leh sathaute piangsak ding hi. Leitungah ka mite kipsakin a cithei-in ka bawl ding a, hehpih loh, a kici mite ka hehpih ding a, ka mi hi lo, a kici mite, ka mi na hi uh hi, ka ci ding a, amaute in, “Nang in kote’ Pasian na hi hi,” hong ci ding uh hi, Topa in a ci hi. Topa in kei kiangah thu hong gen kik a, “Lawm a ngai khinsa, pasal tawh a lumkhawmsa numei khat tawh va kingai in, Israel mite, pasian dangte kiangah pai uh a, leenggah phehkeu tawh a va biak uh hangin, amaute ka it lai veve mah bangin tua numei va it in,” hong ci hi. Tua ahih ciangin ngun shekel sawm-le-nga leh mangbuhham seu sawm-le-nga tawh ka lei a, ama kiangah, “Sau veipi sung keima zi bangin na om ding a, midang tawh na paktat nawn kei ding hi. Midang tawh na lupkhop loh mah bangin kei nangawn tawh zong i lumkhawm kei ding hi,” ka ci hi. Hih in, kumpi ahi a, makai ahi zongin, biak piakna leh biak piakna khuampite ahi zongin, siampi puanpi leh milim pasiante nei loin hun saupi sung Israel mite om ding a cihna ahi hi. Tua khit ciangin Israel mite in Topa amau’ Pasian leh a kumpipa uh David lamah hong kihei kik ding uh hi. Tua hun ciangin amaute in Topa zahtakin, ama letsongte sang ding uh hi. Israel mite aw, Topa ’ thugen ngai un. Hih gamsung a a teeng mite tungah Topa lungkim lo a, hih bangin mawhsak hi: Hih gam sungah cihtakna ahi a, itna ahi zongin om lo a, mite in kei pen Pasian-in hong ngaihsun lo uh hi. Mite in thuciamna bawl napi-in a thuciamte uh palsat uh hi; zuau genin, mi thatin, guta-in, nu-le-pa mawhna bawl uh hi; a sia khat khit a sia khat a ban banin gamta-in a mawhna uh kibehlap lap hi. Tua ahih ciangin leitang keugaw-in a tunga teeng khempeuh tawh si ding a, leitunga om gamsa khempeuh leh huih lak a, leeng vasa khempeuh tawh si mang ding uh a, tuipi sunga om ngasate nangawn si mang ding hi. Kuamah in mite mawhsakin, mite taai kei hen. Kei’ lungkim lohna no siampite tung ahi hi. Na nasepnate uh a sun a zan cih om loin, a kiman’na mel om lo hi; kamsangte zong note bangmah hi lel hi. Na nu uh Israel ka susia ding hi. Ka mite in kei hong phawk lo uh ahih manin ka susia ding hi. No siampite in kei hong phawk nuam loin, ka thuhilhnate nial na hih manun ka siampi dingin kong deih nawn kei a, na tate uh zong siampi-in ka zang kei ding hi. Siampi tam semsem leh kei tungah a khialhna uh tam semsem hi. Amau’ minthan’na mindaina ka suaksak ding hi. Ka mite’ mawhna hangin amaute in hauh lawh uh a, ka mite a mawh semsem uh ut uh hi. Mite’ thuak dinga kilawm daantahna mah siampite in zong thuak ding uh a, amau’ gamtatna bangin daan pia-in amau’ siatna bangin ka thukkik ding hi. Amaute in pasian dangte a bia dingin kei kiang panin kihei khia uh ahih manin biak piakna a sa tanhte uh a nek hangun a gil uh vah tuan lo ding hi. Mi pun’na ding deihna-in biakna piakna-in numei tawh mawhna a bawl uh hangin mi pung tuan lo ding hi. Leenggahzu in ka mite’ thu ngaihsut theihna beisak hi. Ka mite in aisanin sing them peuh thu dotin nei uh a, amau thu theih nopte, ciangkang peuhin gen tazen hi. Amaute in kei hong taisan uh a, a paktat numei bangin pasian dangte zuan uh hi. Amaute in mual sangte’ dawn-a biakna munte-ah biakna pia uh a, a nuai liim hoih ahih manin mual neute tungah a po tawsaw kung, poplar kung, leh terebinth kungte nuai-ah paknamtui halin bia uh hi. Tua thu hangin na tanute uh numei paktat suak uh a, na mote un midang tawh mawhna a bawl uh hi. Na tanute uh a paktat manun daan ka pia kei ding a, na mote uh midang tawh a mawh manin zong daan ka pia tuan kei ding hi; bang hang hiam cih leh note mahmah numei paktatte tawh na mawh uh a, biakinn numeite tawh nu-le-pa mawhna biakna na bawl uh hi. Paunak-ah, “Thu hoih phawk theihna a nei lo mite in siatna thuak ding hi,” kici hi. No Israel mite, kei tungah citak loin nong taisan hangun, note bangin Judah mite khial kei ta hen. Gilgal-ah ahi a, Beth-aven-ah ahi zongin pai kei un la, tua lai munah Topa ’ min tawh na kiciam kei un. A kizualsak zo lo bawngla bangin Israel mite phengphi uh ahih manin, lonona munah tuunote an vak bangin amaute bangci an vak ding ka hi hiam? Israel mite, milim biak uuk lua uh a, cih theih hi lo hi. Amaute, zukham honpi hi uh a, nu-le-pa mawhna bawlbawl uh hi. Min phat ding sangin min siat ding ut zaw uh hi. Huihpi nung in a mut khiat bangin amaute a phiat khia mang ding lungsim paai uh hi. Amau’ biak pasiante in amaute huh lo ding hi. No siampite aw, hih thu ngai un! No Israel mite aw, thu don un. Kumpipa’ innkuante aw, Ngai un! Note in midangte tungah thu a khen ding hi napi-in, note tungah thukhenna hong tung ding hi. Bang hang hiam cih leh note in mite’ awk nadingin Mizpah mual-ah thang na hi uh a, mite’ awk nadingin Tabor mual-ah ngen thang na hi uh hi. Note in mite’ kiat nadingin Shittim-ah gum a thukpi-in na to uh hi; hih thu hangin note kong thuhilh ding hi. Israelte’ gamtatna khempeuh ka thei khin a, kei tungah bangmah hong iim thei lo ding uh hi. Kei tungah hong citak lo uh a, amaute, misia suak khin uh hi, a ci hi. Amaute’ gamtatna in a Pasian kiang uh zuansak thei lo hi. Amaute in nakpi takin biak nopna lungsim nei uh ahih manin Topa phawk kha lo uh hi. Israelte’ kiphatsakna in amau mah’ siat nading ahi hi. Amau’ mawhna in amaute puksak ding a, Judah mite in zong pukpih ding uh hi. A tuute uh leh a bawngte uh tawh Topa tungah biakna pia dingin paipih ding uh a, ahi zongin a mawkna suak ding hi. Topa in amaute nusia khin ahih amanin amah mu zo lo ding uh hi. Topa ’ tungah amaute citak lo uh a, midangte tawh zawlta nei uh hi. Tu-in amaute leh a neihsa khempeuh uh kisusia ding hi. Galdo nading zaksakna-in Gibeah khua-ah tuutal’ ki tum un la, Ramah khua-ah peengkul tum un. Beth-aven khua-ah pataukohna gingsak un. Benjamin mite aw, kithawi un! Daan thuak ni hun hong tun’ ciangin Israel mite in siatna thuak ding uh hi. A tung taktak ding thu, Israel mite’ lakah a gen ka hi hi. Topa in hih bangin ci hi: Judah mi uliante in gisuang khinin midangte’ leitang keeksak uh ahih manin amaute tungah ka heh a, amaute tungah daantahna tuikhang bangin ka tungsak ding hi. Israel in zong gimna thuakin a cimawh hita hi; bang hang hiam cih leh piak ding bang mah a nei lote kiangah huh ngen dingin pai hamtang hi. Tua ahih manin Israel ka beitumsak ding a, Judah ka beimang sak ding hi. Israel in ama ci natna kithei a, Judah in ama liamna a muh ciangin, kumpi lianpa kiangah huh ngen dingin Assiria gamah Israel va pai hi. Ahi zongin amah in amau’ natna na damsak thei lo a, a liamna uh zong na damsak thei tuan lo hi. Humpinelkai’ sukgawp bangin Israel leh Judah ka sugawp ding hi. Keimah teekteek in amaute balgawpin ka paisan ding hi. Amaute ka tal kaih gawp ding a, kuamah in hon zo lo ding hi. Ka mite in a mawhna hangun gimna thuakin kei hong zon’ kik mateng ka tuaci nusiat phot ding hi. A lungkham uh ciangin kei hong zong ding uh a, “Hong pai un, Topa kiangah ciahkik ni; amah in eite hong balgawp hangin hong damsak kik ding a, eite hong liamsak hangin i liamnate hong tun’sak kik ding hilo ahi hiam? Ni nih sungin eite hong thahatsak ding a, ni thum sungin i ngei hong bangsak ding hi. Tua ciangin amah tawh i kikhawl ding hi. Topa i theih zawh nadingin hanciam ni. Zingsang sialin pel loin khua a vak mah bangin pel loin eite kiangah amah hong pai ding a, lei a kawtsak khuapi guah a pelh loin hong zuk bangin eite kiangah amah hong pai hamtang ding hi,” a ci ding uh hi. Israel leh Judah aw, note bang hong cih thei nawn ding ka hi hiam? Note’ hong itna in zingsang meiilum bangin theng pak a, a mangthang pak daitui tawh kibang lel hi. Tua ahih manin note hong thuhilh ding leh note hong taii dingin ka kamsangte kong sawl hi. No ka mite’ gamtat ding ka deih zia kitel sinsen hi. Gan tawh nong biakna uh sangin a kip a kho nong itna uh ka deih zaw hi. Meihal biakna sangin kei nong theih ding uh ka deih zaw hi. Ahi zongin ka ciamna gam a tun’ uh ciangin amaute in Adam khua-ah ka thuciamna palsat uh a, kei tungah hong thuman lo uh hi. Gilead in mi hontangte’ omna khuapi hi a, amau’ sul in mi thahna sisan luang tawh kidim hi. Zawhthawh thu-in mi’ na sut dingin a pangsim mite bangin siampite gamta uh a, biakna pia dingin Shekhem khua-ah a pai mite nangawn, lam kal-ah that uh hi. Amaute’ gamtatna sia-huai mahmah hi. Israel mite’ lakah siatna lianpi khat ka mu hi. Milim biakna tawh amaute kininsak uh hi. No Judah mite zong daan kong piak ding hun kiseh khin zo hi. Israelte a ci uh damsak kik ning, ci-in ka ngaihsut ciangin, amau’ mawhna leh amau’ siatna bekbek kimu thei hi. Amaute in mi khemin, inn luhin na gu uh a, konglak nangawn-ah mi’ na sut uh hi. Amau’ gamtatsiatna khempeuh ka phawk lam tak amaute in ngaihsutin nei kha lo uh hi. Amau’ mawhna in amaute gakcip a, ka muhna mahmah-ah om gige uh hi. Amaute in a zuaupi teng uh tawh kumpipa lungdamsak uh a, a khemna teng uh tawh a uliante nuam sak uh hi. Amaute zuau-tatin citak lo uh hi. Amaute pen, moh bawlpa in a annel lom meek a pawm mateng, moh emna meikhuk sunga a tawhsa mut loh seem lohin a koih phot mei tawh kibang uh hi. I kumpipa in pawi a bawl ni-in amaute in uliante zu kham sakin haisak uh a, amau’ ngimna thei lopi-in kumpipa zong tua lakah hong kihel hi. Tua bangin amau’ sawmsimna mei bangin hong kuang hi. Zan tha pai-in a hehna uh mei bangin khu khu a, zingsang ciangin mei bangin hong kuang khia hi. A heh luatna uh tawh amau a ukte that lum uh hi. A kumpite uh khat khit khat a ban banin kithat a, ahi zongin kuamah in kei kiangah huhna hong ngen lo uh hi. Israel in a kiim-a om mi namdangte tawh kipawlin tua mite muan’in nei a, a kihei lo moh ki-em tawh kibang uh hi. A kipawlpih mi namdangte in a thahatna teng uh tep tum a, ahi zongin a kitep tum lam phawk kha lo uh hi. A lu tung uh a, om a sam uh a kan’ lam nangawn phawk kha lo uh hi. Israel mite’ kiphatsakna in amau’ langkhat ah teci pang hi. Ahi zongin hih thu khempeuhah zong, amau’ Topa Pasian ahi kei lamah hong kihei lo uh a, kei hong zong lo uh hi. Israel in a khem nop kawl vakhu hai tawh kibang hi. Izipt-te kiangah huhna va ngen masa uh a, tua ciangin Assiria-te kiangah va tai uh hi. Amaute a vapai lai takun ka ngen tawh amaute ka na siah ding a, vasa mat bangin ka ngen tawh amaute ka man ding hi. Amau’ gamtat siatna hangin daan ka tat ding hi. Amaute in kei hong taisanin hong lehdo ding uh ahih manin gimna ngahin siatna thuak ding uh hi. Amaute ka hotkhiat nop hangin amaute in kei hong lehgen zawsop uh hi. Amaute in lungsim takpi tawh kei tungah huhna hong ngen lo uh a, a lupna tung panun phunphun bek uh hi. An leh leenggahzu hong ngen loin milimte a bia uh hi. Amaute in kei hong lehdo uh hi. Amaute khoi-in a thahat mite suaksak napi-in, amaute in kei hong lehsawm zawsop uh hi. Amaute, kei lam hong nga loin, Baal pasian lam nga tawntung uh hi. A khakna san ding a kha thei lo thal peu tel tawh kibang uh hi. Amau’ kiphatsak pauna hangun a uliante uh namsau-in si ding uh a, Izipt mite in, amaute nuihsan lel ding uh hi. Patau kohna peengkul tum in. Muvanlai bangin galte in ka gam tunga len’ vat dingin hong kithawi uh hi. Bang hang hiam cih leh ka mite in ka thuciamna uh pelhin, ka thuhilhnate hong nial uh hi. Amaute in kei pen amau’ Pasian hong ci-in, nangma mite hi ung, ci napi-in, amaute in a hoih nate paai khia uh ahih manin a galte un delh ding uh hi. Amaute in kei hong dong loin kumpi ding vaihawm uh a, kei’ theihpih lohin ulian koih uh hi. A ngun a khamte uh tawh amau’ siat nading milim bawl uh hi. Samaria khuapi mite in a biak kham bawngno ka deih kei hi. Tua a bia mite tungah ka heh hi. Amaute in mihoih a suah nading uh bang tan vei ngak lai ding uh ahi hiam? Israel sunga om mi khat in tua milim bawl a, tua milim in Pasian hi lo hi. Samaria mite in a biak milim kisuzan ding hi. Paunak-ah, Huih a tuhte in huihpi ngah kik ding a, a vui om lo an kung in an nek ding piang sak lo hi, kici hi. A vui om lo an kung panin an kingah mah taleh zong gamdang mite in a netum ding hi. Israel khempeuh kinawmvalh-in kisusia ding a, tu nangawnin mi namdangte in bangmahin ngaihsun nawn lo uh hi. A hon lak panin a taikhia a, a thumang lo gam la bangin Assiria mite tung panin huhna ngen dingin va tai uh hi. A huh ding uh a deihna-in midangte tungah amau pumpi va zuak uh hi. Tua bangin mi namdangte a cial hangun keimah in amaute kaikhawmin daan ka pia ding hi. Assiria kumpipa’ bawlsiatna tawh a sawt loin gimna ngah ding uh hi. Israel mite in mawh maisak nading mun biakna tau tam bawl semsem leh mawh nading mun tam a behlap semsem suak zawsop uh hi. Amaute hilh nading sim zawhloh thukham tampi gelh ta leng zong, amaute in don loin thu lamdangpi khatin ngaihsun lel uh hi. Amaute in gan tawh biak ding utin, a biakna sate ne nuam uh hi. Ahi zongin Topa ahi keimah ka hih leh amaute tungah ka lungkim kei a, amaute’ mawhna phawkin tua mawhnate hangin amaute daan ka pia ding hi. Izipt-ah amaute ka sawl kik ding hi. Bang hang hiam cih leh Israel mite in amau a Piangsakpa mangngilh uh a, inn lianpipite lam uh hi. Judah mite in zong kulh nei khuapi tampi lam thuah uh hi. Keimah in tua khuapite mei tawh halin a inn lianpite uh ka kangtumsak ding hi, ci hi. Israel mite aw, mi dangte bangin lungdamin kipak kei un. Na Pasian uh na nusia uh a, ama tungah na citak kei uh hi. Numei paktatte bangin mun citeng ah Baal tungah na kizuak uh a, a hong leina ante hangin na lungdam uh hi. Ahi zongin tua ante, oliv thaute leh leenggahzute na kham takun na nei kha kei ding uh hi. Bang hang hiam cih leh Topa ’ gam sungah na om suak kei ding uh a, Izipt gamah pai kikin, Assiria gam sungah an siang lo na ne ding uh hi. Gam dangah na om lai takun Topa tungah leenggahzu tawh biakna na pia kei ding uh a, gan gawh biakna zong na bawl kei ding uh hi. Sihna phual-a annek bangin, na annekte un zong a ne teng hong ninsak ding hi. Na ante uh zong na gilvah nading bek uh hi ding a, Topa ’ inn-ah khat zong na tun’ kei ding uh hi. A kiseh pawi hunte leh Topa ’ pawi hun hong tun’ ciangin bang cih ding na hi uh hiam? Lungkhamna hun hong tungin, mite na kithehthang uh ciangin, Izipt mite in note hong saangin hong kaikhawm ding a, amau gam Memfis khuapi-ah vui ding bek na hi uh hi. Na inn na lote uh, kiak leh lopa in khuhcip lel ding hi. Daan tahna hun hong tung ta a, thukkikna hun hong tung ta hi. Tua hun ciangin Israel mite in na thei ding uh hi. Note’ mawhna hang leh note in kei nong muhdah luat manun, “Hih kamsangpa mi hai hi; hih thumu-pa lungsim kicing lo hi,” nong ci uh hi. Ama mi Israelte a vil dingin kamsang nasemin Pasian in kei hong sawl hi napi-in, ka paina khempeuh ah vasa bangin thang nong siah uh a, Pasian’ gam sung teekteek mahmah ah mite pen kamsangpa’ gal suak mawk hi. A gamtatna uh gen theih lohin siahuai uh a, Gibeah khua-a a gamtat ngeite uh tawh kibang hi. Pasian in amau’ mawhnate thei-in daan tat ding hi. Topa in hih bangin gen hi. Israel kong muh cilin hoih mahmah a, sehnel gam sungah gah a zun kiuhkeuh leenggah tawh kibang hi. Na pu na pate uh ka muh cilin hoih mahmah a, a hun ciangin a min a zun sitset theigah muh tawh kibang hi. Ahi zongin Baalpeor a tun’ uh ciangin amaute in Baal milim bia pah uh ahih manin, amau’ biak milimte ka muhdah zahin amaute nangawn ka mudah pah hi. Israel’ min liatna teng vasa bangin leeng mang ding a, amau’ sung panin nau suak nupi gai, nau paai cih om nawn lo ding hi. Amaute in ta a khoi uh hangin suan-le-khak a neih theih ma-un ka khan’sihsak khin ding hi. Hih mite ka nungngat ciangin amaute tungah a lungkhamhuai lianpite tung ding hi. Tu-in ka mu khol khin hi. Mite in sa bet-a a bet ding leh, a thah ding bekin, Israel mite in a naupangte uh khah khia ding uh hi, a ci hi. Topa aw, hih mite tungah na piak ding bang hong ngen ding ka hi hiam? Amaute tatolhsak in la, a nawizu uh kangsak in. Topa in hih bangin gen hi. Amau’ gamtatsia khempeuh Gilgal phual pan akipan hi a, tua mun-a kipanin amaute ka muhdah a kipan ahi hi. Amaute’ gamtatsiatna hangin ka gam sung panin ka hawlkhia ding hi. Amaute ka it nawn kei ding hi. A uliante un kei hong langpang uh hi. Israel mite ahih leh a zung a keu, gah a gah lo ding singkung tawh kibang hi. Amaute in ta a neih uh hangin amau’ it mahmah tua a tate uh ka thahsak veve ding hi, ci hi. Amaute in a thu ngai lo uh ahih manin ka Pasian in a mite nial ding hi. Minam dangte lakah a vakvai mite suak ding uh hi. Israel mite ahih leh a gah pha mahmah leenggui tawh kibang hi. Cithei semsem leh biakna tau tam semsem lam uh hi. A gam sung uh cithei semsem leh biakna khuampi hoih bawl semsem uh hi. A lungsim uh man lo ahih manin tu-in a mawhna uh thuak ding uh hi. Topa in amau’ biakna taute suzanin, a biakna khuampite suksiatsak ding hi. Hih mite in a sawt loin, “ Topa kihta lo i hih manin kumpi i nei kei hi. Kumpi khat in eite’ adingin bang hong hihsak thei lel ding ahi hiam?” ci ding uh hi. Amaute a kampi bek uh hi a, a kampi bek-un thu genin thuciamna bawl uh hi. Lo lai-a tumakuakte sungah gunei kiak a po mah bangin thusia neihna hong khang hi. Beth-aven khua a bawngno milim a taanna hangun Samaria khuapi sunga a teeng mite lau-in liing ding uh a, amaute leh tua milim na a sem siampite thuum ding uh hi. A etlawmna teng a maiman’ ciangin tau ding uh hi. Bang hang hiam cih leh Assiria gama kumpi lianpa tungah siah a piak dingin tua milim kipuakhia ding hi. Thu kigen zui-in milim a biakna hangun Israel mindai-in maizum ding uh hi. Tui tunga tuiphuan laam bangin a kumpipa uh maimang ding hi. Israelte in milim bia-in mawhna a bawlna munte kisusia ding a, a biakna taute uh tungah ling leh kiak po ding hi. Tua ciangin mite in mual liante kiangah, “Hong vuk cip un,” ci ding uh a, mual neute kiangah, “Hong deng cip un,” ci ding uh hi. Gibeah khua-a a khialh uh-a kipanin kei tungah hong khialhna uh Israel mite tawp nai lo uh hi. Tua ahih manin Gibeah khua-ah gal in amaute pha ding hi. Hih mi mawhte thuhilh nadingin daan ka pia ding a, a thuap thuap-a a mawhna hangun thuhilh nadingin minam dangte in amaute hong sim ding uh hi. Israel in lim takin a kihilhsa, an a cil nuam bawngla tawh kibang hi. Ahi zongin a etlawm a ngawng zangah kol bulhin lo khawhsak ding ka ngaihsun hi. Lo khawhna leeng, Judah ka kaisak a, lei kalhkhapna singka, Israel ka kaisak hi. Khai tuh bangin thuman tuhin, kei nong itna hangun a piang thuphate at un. Note’ Topa keima lamah nong kihei nading uh a hun hita ahih manin lo thak lei kalkham un. Tua hi leh kei hong pai-in note tungah thupha kong pia ding hi, ka ci hi. Ahi zongin note in thusia na tuh zawsop uh a, thusia gah na at uh hi. Na zuauna uh hanga piang gahte na ne uh hi. Note in na sakol leengte uh leh na galkap tamna uh muang kha na hih manun, gal in na mite uh hong sim ding a, na kulh muanhuaite uh kisusia ding hi. Kumpi Shalman in a galsimna-ah Bethar-bel khuapi sugawpin, nupite leh a tate leilak den’na-in a sih mangsak hun lai mah bang ding hi. Israel mite aw, note’ gamtat hoih lohna hangin tu-a bang teekin note tungah thu hong piang ding hi. Gal do a kipat phetin Israel kumpipa si pah ding hi. Israel a neu lai-in ka it mahmah a, Izipt gam a nusiat-a kipanin ka tapa aw, ka ci hi. Ahi zongin tapa bangin limbawl semsem leng, kei kiang panin gamla pai semsem hi. Ka mite in Baal tungah biakna pia uh a, milim biakna-in paknamtui hal uh hi. Ahi zongin Israel mite lam a pai theih nading a hilhpa in keimah ka hi a, ka ang sungah amaute ka tawi hi. Ahi zongin amaute ka don lamtak phawk kha lo uh hi. Amaute, itna leh hehpihna tawh ka len a, dom toin ka biang ciangah ka tawi a, awn sukin an ka pia hi. Tua hi napi, kei lamah amaute hong kihei nuam lo uh ahih manin, Izipt gamah pai kikin, Assiria mite, amau’ kumpi hi ding hi. Galte in a khuapi sung uh luhin, a khuapi kulh kongpi zawlte uh suktansak ding hi. Ka mite in thuhoih lo zui kha uh ahih manin gal in susia mang ding hi. Ka mite in kei kiang panin pial ding ngaihsun tawntung ahih manin amaute in kol bulhna thuak ding uh a, kuamah in a kol sutsak lo ding hi. Israel aw, bang ci-a hong nusia thei ding a, bang ci-a hong paidak thei ding ka hi hiam? Bang ci-in Admah khua banga hong bawl ding a, bang ci-in Zeboi-im khua bangin hong bawl ding ka hi hiam? Note hong khasiat mahmah ka hih manin tua banga hih ding ka lungsim ah om lo hi. Ka heh manin daan kong pia kei ding a, no Israelte kong susia kei ding hi. Bang hang hiam cih leh keimah in mihing hi loin, Pasian ka hi hi. Kei a Siangtho Pa note tawh kong omkhawm a, a hehsa-in note kiangah kong pai kei ding hi. Humpinelkai bangin a galte uh ka hawksan gawp ding a, tua ciangin ka mite in kei hong zui ding uh hi. Nitumna lam gam panin kei kiangah hong nawh tai ding uh hi. Izipt gam panin vasa bangin lawp takin hong leeng ding uh a, Assiria gam panin vakhu bangin hong leeng ding uh hi. Tua ciangin keimah in amaute’ inn ngeisa-ah ka tun’pih kik ding hi, Topa in ci hi. Topa in hih bangin ci hi. Israel mite in zuauna leh khemna bekbek tawh kei hong khuhcip uh hi. Judah mite in zong a citak a Siangtho Pa keimah hong langpang lai uh hi. Israel mite, a nung kawikawi huih tawh kibangin, sun tha pai-a a nasepna uh a mawkna ahi hi. Zuauna leh siatna lamsang bekbek khangsak uh hi. Assiria tawh kipawlna bawl uh a, Izipt tawh kizopna nei uh hi. Topa in Judah mite a mawhsak nading a thu om hi. Jakob a gamtatna tawh kizui-in daan pia ding a, ama gamtatna bangin thukkik ding hi. Jakob in a nu’ sung nangawn pek panin a sanggampa sawk pah a, a khangham ciangin zong Pasian tawh kilai hi. Vantungmi tawh kilai-in lel hi. Tua ciangin Jakob zong kapin ama tung panin hehpihna ngen hi. Pasian in Bethel munah amah mu-in hopih hi. Ama min in Topa, mihon tampite’ Topa Pasian ahi hi. Pasian’ huhna tawh note khempeuh kihei kik un la, thuman thutangin gam ta un. Pasian muang tawntung un. Sumbukte in tawi tehna man lo zang uh a, amaute in mi khem ding nuam a sa uh hi. Israel mite in, “Tu-in ka hau uh a, kote’ adingin neihsa tampi ka ngah uh hi,” ci uh hi. Ahi zongin a hauhna teng un a mawhna teng uh loh zo lo hi. Izipt-te gamah na om lai pek uh-a kipanin keimah in note’ Topa Pasian ka hi a, ahi zongin tu-in tanglai hun bangin puanbuk sungah note kong tengsak kik ding hi. Kamsangte tungah thu ka gen hi. Mangmuhna a ban banin pia-in, kamsangte tungah thugentehna tawh thu a genpa in keimah ka hi hi. Gilead gamah milim biakna om a, tuate in a kiman’na om lo hi. Gilgal gamah bawngtal tawh bia uh a, lo khote in a suang deih loh teng uh a phualphualin a cian’ kawikawi tawh kibangin, a biakna taute uh bangmahin kimang lo ding hi. Aram gamah Jakob tai a, Israel in tua lai-ah zi khat thalawhin na sem a, zi thalawhna tuu cing hi. Topa in kamsang khat zangin Izipt panin Israelte paikhiatpih a, kamsang khat nasepna tawh amaute suakta-in nungta uh hi. Heh mahmah theih nading Israel mite gamta uh ahih manin amaute’ Topa in amau tung mahah a mawhna uh tungsak ding a, amaute’ mawhna mah thuaksak ding hi. Efraimte beh in thu a gen ciangin adangte lau uh a, Israel minam beh dangte in Efraimte beh tung et uh hi. Ahi zongin Baal milim biakna hangin amaute khial uh hi; tua hangin si ding uh hi. Tua hi napi-in amaute khial thuah semsem uh a, a biak ding uh milim bawl uh hi. Amau’ ngunte milimin bawl uh a, a hoih takin khutsiamte bawlsak uh hi. Tua ciangin, “Hihte tungah biakna pia un,” ci uh hi. Mihing in milim bia-in nam tazen uh hi. Tua ahih ciangin amaute pen zingsanga kai meiilum, a maimang pak daitui, ancilna panin huih in a let khiat ansi, meikhu suahna-a a pai meikhu bangin maimang ding uh hi. Keimah in Izipt gam pana kipan note’ Topa Pasian ka hi hi. Tua hun lai-in kei sim loh Pasian dang na thei kei uh a, note a hong honkhiapa in kei bek ka hi hi. Sehnel gam keuna sungah note a hong kempa in keimah ka hi hi. Ahi zongin gam hoihna mun tungin na gil uh a vah ciangin na lungsim uh kiphasakin kei nong mangngilh uh hi. Tua ahih manin humpinelkai bangin note hong sugawpin, kamkei bangin na pai nading uh lampi-ah kong pang hi. A no a kilaksak vompi bangin note hong sugawpin kong balgawp ding hi. Humpinelkai bangin hong phual nek pahin, gamsate bangin kong balthang gawp ding hi. No Israelte kong sugawp ding hi. Kua in note hong huh zo ding ahi hiam? Na kumpi ding uh leh na makai dingte uh nong ngen uh hi. Tu-in note hong hon dingin na hong nget uh na kumpipa uh koi-ah om a, note hong huh ding na makaite uh koi lai tung khin ahi uh hiam? Na kumpi dangte uh kong ngawh piak a, ka hehluatna hangin tuate ka la khia kik khin hi. Israel mite’ mawhna leh khialhna teng lim takin kiciamteh a, tua ciamtehnate lim takin kikem hi. Israel mite, naungeek bangin a suah khiat hun tung khin napi-in, a hai luat manin suak khia loin a nu sung mahah omom lai hi. Leinuai-a misite’ omna-ah a pai nading uh panin honin, sihna panin tankhia ding ka hi hiam? Sihna aw, gimna na piakna-ah amaute ka hehpih kei hi. Leinuai-a mi site gam aw, na suksiatna-ah amaute ka khasiat kei hi. Israel mite kiak bangin a pung ahi zongin sehnel gam panin nisuahna huih sa mahmah ka nungsak ding a, a tuikhukte uh leh a tuinakte uh a kangsak ding hi. Tua huih in a manpha nate leh deih theih peuhmah leen’ mang ding hi. Israelte in a Pasian uh lehdo ahih manin a mawhna uh thuak ding uh hi. Gal sungah amaute si ding uh a, a naungeekte uh lei kiden’ nading a, a nupi naupaaite uh kikuikham ding hi, ci hi. Israelte aw, note’ Topa Pasian lamah kihei kik un. Na mawhna hangun note na puk khin uh hi. Topa ’ lamah kihei un la, “Ka mawhna khempeuh uh hong maisak in la, kong thuumna uh hong ngai in. Ka kam pauna bangun kong gamta ding uh hi. Assiria mite in hong honkhia zo ngei lo ding a, sakol galkapte zong suan’in, ka nei kei ding uh hi. Kote’ bawlsa milimte pen Pasian hi, ka ci nawn kei ding uh hi. A cimawh mite in nangma tung panin hehpihna a ngah theih lam ka thei uh hi,” ci-in thu ngen un. Ka mite tungah heh nawn lo ka hih manin ka mite ka kiangah ka sam kik ding a, lungsim takpi tawh amaute ka it ding hi. Gam keuna mun-a guahzu bangin Israel mite tungah nuntakna guah ka hi ding hi. Unok Paak bangin amaute palh ding a, Lebanon gama singkungte bangin zung thuk kha-in kip ding uh hi. Amaute meeng thakin oliv kung bangin meel hoih ding a, Lebanon Mual bangin namtui ding uh hi. Keima liim nuai-ah khat vei hong om kik ding uh hi. Huan hoih sunga a po ankung hoihte bang ding uh a, leenggui gah pha bangin tampi pha ding uh hi. Lebanon gam leenggahzu bangin minthang ding uh hi. Israel mite in milim bia kha nawn lo ding uh hi. Amaute’ thungetna pia-in amaute ka kem ding hi. Amaute, a hing tawntung singkung kep bangin ka kem ding a, amaute’ thupha ngah khempeuh keima kiang pan ahi hi. Mipil, thu ngaihsun theite in hih thute thei telin lim takin ciamteh ta hen. Topa ’ lampi tang mahmah a, thutang mite in tua lampi tawn uh hi. Mawhneite in tua lampi tawn lo uh ahih manin puk uh hi. Pethuel’ tapa Joel tungah hih bangin Topa ’ thu hong tung hi. Ngai un, no a khangham zawdiakte aw, na bil uh ngat un, Judah gam mi khempeuh aw, Note’ khan’ sung ahi a, na pu na pate uh khan’ sung ahi zongin, hih bang thu piang ngei peuhmah ahi hiam? Hih thu na tate uh kiangah gen un la, na tate un amau’ tate tungah na gensawn uh hen la, amaute in a khangsawnte tungah na gen uh hen. A pettan kauphete’ nek bang teng, kauphe honte in ne tum a, kauphe honte’ nek bang teng, a tuan kuaphete in ne tum a, a tuan kauphete’ nek bang teng, a susia kauphete in ne mang khin hi. No zukhamte aw, tho un la kap un. No leenggahzu dawnte aw, thuumin tau un. Na zu dawn ding teng uh beimang ta hi. Kauphe honpi in i gam hong simin, amaute tam mahmah a, hat mahmah uh hi. A ha uh humpinelkai ha bangin hiam a, humpinelkai pi ha bangin gupha hi. Amaute in i leenggui teng susia a, i theikung teng ne tum uh a, a hiangte kang sengsang hi. Nungak khat, a ten’pih ding a lawmpa in a sihsan ciangin puanhampi silh a, a kah bangin, note zong kapin thuum un. Topa ’ inn-ah biakna-a piak ding an leh leenggahzu om nawn lo a, Topa ’ na a sem siampite thuumin tau uh hi. Lo ante kisusia a, leengguite keutum a, oliv kungte keugaw ahih manin, lo lai-ah bangmah om nawn lo a, leitang lungzuangin thuum hi. Lo khote aw, dah un; leenggui ciingte aw, kap un; mangbuh leh mangbuhham, leh lo an khempeuh bei ta hi. Leengguite keu a, theikungte vuai ta hi. Mang kawlsingte, nisuhte, leh apple kungte-a kipan, singkung khempeuh keu mang khin hi. Mihingte’ lungdamna teng zong maimang ta hi. Siampite aw, puanhampi silhin kap un la, biakna tau-a nasemte aw, thum un. Ka Pasian’ na a semte aw, biakinn sungah tum un la, zan thapai-in dahna lim puanhampi silh un. Note’ Pasian’ inn sungah piak ding, an leh leenggahzu om nawn lo hi. An tan’ ding thu pia un la, a thupi biak kikhopna bawl un. Note’ Topa Pasian’ inn sungah, makaite leh gam mi khempeuh khawm un la, Topa ’ tungah kiko-in thuum un. Kalai! A hun hong nai ta! Topa ’ ni hong nai ta a, Vanglianpa’ suksiatna hong nai ta hi. Eima mit muh mahmahin lo ante kisusia a, eite’ Pasian’ inn sungah lungdamna bei ta hi. Guahtui om lo ahih manin, khai kituhte lei sungah keucip a, an khol ding om nawn lo ahih manin, ansal khempeuh kisia khin ta hi. A gilkial tuu leh bawngte cimawhin ham uh a, lonona mun om nawn lo ahih manin ganhing honte cimawh uh a, tuuhonte in zong haksatna thuak uh hi. Topa aw, nangma tungah kong kiko hi, Bang hang hiam cih leh mei in a kattum tawh kibangin, lonona leitang khempeuh leh singkung khempeuh keu mang khin hi. Lui tui khempeuh kangcip khin a, mei kattum bangin lonona khempeuh keucip ahih manin, nangma tungah gamsate nangawn hong kiko uh hi. Zion mual tungah peengkul tum un la, Pasian’ mual siangtho tungah pataukohna tum un. Topa ’ ni hong nai ta ahih manin, gamsung mi khempeuh lau ta uh hen. Tua ni a mial, a lungzin’ huai ni, meii kai-in khuazin’ ni hi ding hi. Mual tungah meiipi a kai bangin, sim zawh lohin kauphe honpi hong leeng hi. Cik mahin hih bang om ngei nai lo a, cik mah ciangin zong omkik nawn lo ding hi. A madawkte in a haltum thei meikuang bang a, a nungdalte in mei-am alh tawh kibang hi. Amau’ hong tun’ ma-in gam sung teng Eden huan bang hi a, amau’ khit ciangin a kinusia a keugawp gam tawh kibang hi. Amaute kiang pan a suakta bangmah om lo hi. Amau’ meel in sakolte tawh kibang a, sakol galkapte bangin tai uh hi. Mual tungah a tuan zaizai laitakun, sakol leeng ging ziazuate, gamlaka lopa omte kangin a puak ziazua tawh kibang uh a, galsim dingin a kithawi, galkap honpi tawh kibang uh hi. Amaute hong nai ciangin mi khempeuh lau uh a, a maitangah si teeng kuamah om nawn lo hi. Galhangte bangin hong sim uh a, galkapte bangin kulh tungah hong kah uh hi. A vekpi un tang takin mai hong nawt uh a, hong heem pai kuamah om lo hi. Amau’ lampi san ciat hong tawn uh a, kuamah a kiphukha om lo uh hi. Amau mah dalna dinga kibawlte hong phu gawp uh a, khawl het loin hong paisuak uh hi. Khuapi sung hong kiden’na uh a, kulh tung khawngah tai zaizai uh hi. Inn tung khawngah kahto ngeingai uh a, guta bangin kongvangneu-ah hong lut uh hi. Amau’ mai-ah leipi liing a, vanpi nangawn liing damdam hi. Ni leh kha zong mial ta a, aksite zong taang nawn lo hi. Ama mi honpite tam mahmah uh ahih manin, amaute thu pia-in a mai uh-ah Topa awng a, ama thupiakna banga a semte hat mahmah uh hi. Topa ’ ni ding nak kihtakhuai mahmah ahih manin, kua in thuak zo peuhmah ding ahi hiam? Topa in hih bangin ci hi, “Tu mahmah nangawnin, lungsim tak tawh kisik kikin, an tangin, kapin, thuumna tawh kei kiangah hong paikik un. Na dah taktakna uh lungkhamna tawh langsak un la, na puan uh a balkeek bek hi kei un,” hong ci hi. Topa, note’ Pasian kiangah ciahkik un. Amah migi-in hehpihna a nei hi a, a lung duai-in hong huh nuam tawntung a, daan hong tat loin hong maisak nuam tawntung hi. Topa, i Pasian in a lungsim kheelin, an hauhsakna tawh thupha hong pia kha ding hi. Tua hi leh ama tungah an leh leenggahzu tawh biakna i pia thei ding hi. Zion mual tungah peengkul tumin, antan’ nading thu pia un la, biak kikhopna khat nei un. Mite kaikhawm un la, amaute sian’ suah un. A khangham mite sam un la, naupangte zong kaikhawm un la, nawine lai naungekte zong paipih un. A kiteng cil nungak leh tangvalte nangawn in, a omna uh nusia-in hong pai uh hen. Topa ’ na a sem siampite, biakinn sung innlim leh biakna tau kikal-ah, kapin thu ngen uh hen la, “ Topa aw, na mite hong hehpih in. Minam dangte in, ‘Na Pasian uh koi-ah om hiam?’ ci-in kote hong simmawhsak kei in la, amaute’ nuihsatin hong omsak kei in,” ci uh hen. Tua ciangin Topa in ama leitang donin, ama mite hehpih hi. Topa in ama mite’ thungetna dawng a, “Tu-in note tungah an, leenggahzu leh sathau, ka hong pia a, na kham takun na ne ding uh hi. Minam dangte’ simmawhin na om nawn kei ding uh hi. Leilu lam panin hong pai mite, note kiang panin sehnel gamah ka hawl khia ding a, a madawkte uh nisuahna tuipi sungah khia-in, a nungdalte uh nitumna tuipi sungah ka khia ding a, amaute in note tungah hong bawlna hangin, a luanghawmte uh uih gawp ding hi. Topa in na lianpite bawl taktak zo hi. “Lote aw, lau nawn kei un la, lungdamin kipakin om un. Topa in note adingin a lianpi hong bawlsak zo hi. Ganhingte aw, lau nawn kei un; gamsung tengah lo no ta a, singkungte gah ta-in, theigah leh leenggah tampi om hi. “Zion mite aw, kipak un la, Topa, na Pasian uh tungah lungdam un. Note in an na hauh theih nadingun, ni danga bangin khuapi guah, tuk guah leh phalbi guah, a hoih bek hong zusak hi. Na ancilna phual uh an tawh kidim ding a, na koihna uh um-le-beel khempeuh, leenggahzu leh sathau tawh kidim ding hi. Note a hong sim dingin ka hong sawl, kauphe honpi, a tuan kauphe, a susia kauphe, a pettan kauphe hih ka galkap honte’ hong neksak kum sunga piang teng taang kong piakik ding hi. “Tu-in nek ding tampi nei-in na gil uh vah ding a, note’ adingin a lamdang nate a hong bawlsak, Topa na Pasian uh na phat ding uh hi. Tua ciangin ka mite hong kisimmawh nawn lo ding hi. Tua ciangin, no Israel mite lakah kei ka omna thu, leh keimah Topa in note’ Pasian ka hihna thu, kei sim loh kuamah dang a om lohna na thei ding uh hi. Ka mite hong kisimmawh kik ngei nawn lo ding hi. “Tua khit ciangin mi khempeuh tungah ka Kha ka bua ding a, na tanute uh leh na tapate un kamsang ding uh a, na puteekte un mang manin, na tangvalte un maang mu ding uh hi. Tua hun ciangin nasem numei leh nasem pasalte tung nangawn-ah, ka Kha ka bua ding hi. “Tua ciangin vantung leh leitungah hilhkholhna lim ahi, sisan kiluan’ sakna, meikatna, leh meikhu lompi hong om ding hi. Topa ’ ni, tua a lauhuai hun hong tun’ ma-in, ni hong mialin, kha, sisan hong bang ding hi. Tua ciangin Topa ’ min tawh thu a ngen khempeuh in, gupkhiatna ngah ding uh hi. Topa ’ gensa mah bangin, Zion Mual leh Jerusalem khua sungah a suakta mi om ding uh hi. Topa in a sap mite suakta ding uh hi. “Tua hun ciangin Judah leh Jerusalem, a nidang hun uh ka bangsak kik ding hi. Minam khempeuhte kaikhawmin, Jehoshafat Kuam-ah ka paipih ding hi. Ka mihingte tungah a bawlnasa hangun, tua munah amaute thu ka khen ding hi. Amaute in Israel mite, gamdangah thehthang uh a, ka gamsung teng phelhawm uh hi. A gal matte uh kua in ngah ding, ci-in ai saan uh a, zu leh numei lei nadingin, numeino leh naupangnote, sila-in zuak uh hi. “Tai-ar khua, Sidon khua, leh Filistia gam khempeuh aw, kei bang hong cih nuam-a kinei na hi uh hiam? Bang khat peuh hangin hong thukkik nuam-a kinei na hi uh hiam? Kei a hong thukkik na hih leh, kei zong manlang takin kong thukkik pah ding hi. Ka ngun, ka kham, leh ka na manpha tampite la-in, na biakinn sung uhah na puak uh hi. Judah leh Jerusalem mite, amau’ gam panin gamlapi-ah paipihin, Grik mite tungah na zuak uh hi. Tu-in amaute na zuakna uh mun, panin a la khia kik ding ka hi a, amaute tungah na bawl bangun note tungah kong bawl ding hi. Na tanute uh leh na tapate uh, Judah mite tungah ka kizuaksak ding a, a gamlapi-a om Seba minamte tungah kizuak ding uh hi. Bang hang hiam cih leh Topa in gen khin zo hi,” a ci hi. Minamte tungah hih bangin thuzaksakna bawl in: Gal hang mite sam un la, gal do dingin kithawi un la, galkap khempeuh khawmin hong kuan un! Lo khawhna tuute namsau-in seek un la, singhiang heuhna temkawite teipi-in seek un. A thanemte in “Ka tha a hat hi” ci ta uh hen. Kiimkot-a om minamte khempeuh aw, manlangin hong kuan un la, tua kuam-ah hong kikaikhawm un. Topa aw, na galhangte hong paipih suk in. Minamte hong kithawi hen la, Jehoshafat Kuam-ah hong kuansuk uh hen. Kiimkot-a om minam khempeuhte’ thu khen dingin, Topa ahi keimah, tua munah ka tu ding hi. Amaute gilo mahmah uh ahih manin, anlak huna buh at bangin at gawp un la, leenggahtui dawhna dim letin a luang leenggah cilna kuang sunga om leenggah bangin, tuancil gawp un. Thukhenna Kuam-ah, a tul a thenin om uh hi. Bang hang hiam cih leh, tua lai munah Topa ’ ni hong tung baih ding hi. Ni leh kha mial a, aksite zong taang nawn lo hi. Zion Mual panin Topa hong hawk suk a, Jerusalem panin hong awngkeek a, vanpi leh leipi liing damdam hi. Ahi zongin Topa in, ama mite’ belhpa hi a, Israel mite’ munmuanhuai ahi hi. Tua ciangin Israelte aw, ka mual siangtho Zion tungah a teeng keimah in, Topa, note’ Pasian ka hihna na thei ding uh hi. Jerusalem in a siangtho biakna khuapi hi ding a, gamdang mite in zo kik ngei nawn lo ding uh hi. Tua hun ciangin mual tung gam khempeuh leenggui lo hi ding a, mual neute khempeuh tungah bawng nawi luang ding a, Judah gam sung khempeuhah tui tampi om ding hi. Topa ’ biakinn panin lui tui khat hong luang khia ding a, Shittim kuam khempeuh kawtsak ding hi. Amaute in Judah gam simin, mawhnei lo mite that uh ahih manin, Izipt gam in sehnel gam suakin, Edom gam in gamsia suak ding hi. Tekoa khua-a teeng tuucingte lakah Amos a kici mi khat om hi. Uzziah in Judah kumpi hi-in, Joash’ tapa Jeroboam in Israel kumpi a sep laitak, zinlin’ ma kumnih hun lai takin, Pasian in Amos tungah hih thute kilangsak hi. Amos in, “Zion Mual panin Topa hong hawksuk a, Jerusalem khua panin hong awngkek hi. Tua ahih manin, lonona gam teng keugawp a, Karmel mual dawn dum dide teng kausan ta hi,” a ci hi. Topa in hih bangin ci hi: Damaskas khuamite a khialh kikkik nilohna hangun, pel loin amaute daan ka tat ding hi. Bang hang hiam cih leh amaute in, angawina suang tawh gawizan bangin, Gilead gam mite gawi gawp uh hi. Tua ahih manin Hazael innkuante mei tawh ka hal ding a, a meikuang in kumpi Benhadad’ munmuanhuaite kangtum ding hi. Damaskas khua kulhkongpi zawlte ka sutan ding a, Aven Kuam-a teeng mite khempeuh leh Beth-eden Kuam sunga om gam ukte, Keimah in ka susia ding a, Siria mite ahih leh Kir gamah salin kipaipih ding hi. Topa in hih bangin ci hi: Gaza khuamite a khialh kikkik nilohna hangun, pel loin amaute daan ka tat ding hi. Bang hang hiam cih leh amaute in, minam bup khat sal dingin, manin, Edom mite tungah ap uh hi. Tua ahih ciangin Gaza khuapi kulh ka kangsak ding a, a mun muanhuai teng kangtum mang ding hi. Ashdod khuapi-a teeng mite ka lakhia ding a, Ashkelon khuapi ukte ka beisak ding hi. Ekron khuapi ka sugawp ding a, Filistia mi a om laite si ding uh hi. Topa in hih bangin ci hi: Tai-ar khuamite a khialh kikkik nilohna hangun pel loin amaute daan ka tat ding hi. Bang hang hiam cih leh amaute in, minam bup khat Edom mite tungah ap uh a, lawmta dinga a thuciamna uh zui lo uh hi. Tua ahih ciangin Tai-ar khuapi kulh ka kangsak ding a, a mun muanhuai teng kangtum ding hi. Topa in hih bangin ci hi: Edom mite a khialh kikkik nilohna hangun, pel loin amaute daan ka tat ding hi. Bang hang hiam cih leh amaute in, a sanggam uh Israelte namsau tawh delh uh a, hehpihna lungsim nei lo uh hi. A hehna uh damsak ngei lo uh a, a tawntungin heh niloh uh hi. Tua ahih ciangin Teman gamsung ka kangsak ding a, Bozrah khuapi mun muanhuai teng kangtum ding hi. Topa in hih bangin ci hi: Ammon mite a khialh kikkik nilohna hangun, pel loin amaute daan ka tat ding hi. Bang hang hiam cih leh amaute in, huaihamin gam a deih thuah manun, Gileah gamsung simgawp uh hi. Tua ahih ciangin Rabbah khuapi kulh ka hal ding a, a mun muanhuai teng kangtum ding hi. Gal do-a kikona aw ging ding a, tua kidona awging khuapi huih nung bang ding hi. A kumpipa uh leh a uliante salin kiman ding hi. Topa in hih bangin ci hi: Moab mite a khialh kikkik nilohna hangun, pel loin amaute daan ka tat ding hi. Bang hang hiam cih leh leiseek cian’na-a kizang leikang dingin, Edom kumpipa’ guhte hal uh hi. Tua ahih ciangin Moab gamsung ka kangsak ding a, Kerioth khuapi munmuanhuai teng kangtum ding hi. Galkapte’ otna leh peengkul kitumna lak, gal kidona gamlum sungah Moab mite si ding uh hi. Tuate lakah Moab gam ukte ka sisak ding a, a uliante ka that ding hi. Topa in hih bangin ci hi: Judah mite a khialh kikkik nilohna hangun, pel loin amaute daan ka tat ding hi. Bang hang hiam cih leh amaute in, ka thukhamte nialin ka thuhilhnate zui lo uh hi. A pu a pate un a na biaksa pasian man lote mah in amaute lam pialsak hi. Tua ahih ciangin Judah gamsung ka kangsak ding a, Jerusalem munmuanhuai teng kangtum ding hi. Topa in hih bangin ci hi: Israelte a khialh kikkik nilohna hangun, pel loin amaute daan ka tat ding hi. Bang hang hiam cih leh amaute in, leiba a loh zawh loh man bekin midik kim lai zuak uh a, khedap bu khat man a loh zawh loh man bekin mi cimawhte sila-in zuak uh hi. Amaute in mi zawngte’ lutang leivui lakah tuancil uh a, keima min siangtho a ninsak dingin, biakinn-a numei paktatte kiangah tangvalte leh papite pai uh hi. Biakna tau gei khempeuhah lum uh a, sum leitawi tang-a a puan kepsakte uh phah uh hi. Amaute in a Pasian uh biakinn sungah, leibate kiangpan a laksak uh leenggahzu dawn uh hi. Ahi zongin amaute ka khualna-in, taamtaak sing bangin a sang mahmah, tawsaw kung bangin a khauh tuak mahmah, Amor mite amau adingin ka suksiatsak a, a dawn pana kipan a zung dongin ka sukmaisak hi. No ka mihingte, Izipt gam panin hong paikhiatpihin, gamlakah kum sawmli sung kong makaih a, note’ adingin Amor mite’ gam kong pia hi. Na tapate uh pawl khat kamsang dingin ka teel a, na tangvalte uh pawl khat Nazir mi dingin ka teel hi. Israelte aw, tu-a ka gen bangmah hilo ahi hiam? Topa in kong ci khin hi. Ahi zongin note in Nazir mite, leenggahzu na dawnsak uh a, kamsangte in ka thu a genloh nadingun thu na pia uh hi. Tu-in, a puak buhlomte in bawngleeng a netcip suk bangin, note na omna mun uhah kong nengcip suk ding hi. A tai hatte nangawn suakta zo lo ding a, a thahatte a hatna bei ding a, galhangte in amau’ nuntakna hu zo lo ding hi. Thal tawite nangawn in do zo lo ding a, a tai hatte nangawn kisuahtak zo lo ding a, sakol tung tuangte nangawn in a nuntakna suahtak zo lo ding hi. Tua ni ciangin galhang pente nangawn, tai mang ding uh hi, Topa in ci hi. Israel mite aw, note lang khata Topa ’ thugen, hih thu lim takin ngai un: Izipt gam panin na minam bup-un note kong paikhiatpih hi. Leitung minam khempeuh lakah note bek hong thei-in, note bek ka hong don hi. Tua ahih manin na khialhna khempeuh uh hangin, note daan ka hong pia ding hi. Mi nih thukimna om masa lopi-in, lampi-ah tonkhawm ahi hiam? A samat ding mu lopi-in, gamlakah humpinelkai mawk hawk ahi hiam? Samat nei lopi-in, a kua sungah humpinelkai khanglai mawk hawk ahi hiam? Thang antah om lopi-in lei laka thangah, vasa mawk awk ahi hiam? A su khat om lopi-in, thang kimawksai ahi hiam? Khuapi sungah pataukohna gal peengkul a kitum ciangin, mite lau loin om mawk thei ahi hiam? Topa ’ tun’ sak lohpi-in khuapi sungah, lauhuaina mawk tun’ ahi hiam? Topa Pasian in ama nasem kamsangte tungah, ama geelna theisak lopi-in bangmah hih het lo hi. Humpinelkai a hawk ciangin, kua lau loin om thei ahi hiam? Topa Pasian in thu a gen ciangin, kua in ama thu gen loin om thei ding ahi hiam? Assiria gam mun muanhuaina sunga om mite, leh Izipt gam mun muanhuainna sunga om mite tungah thu zasak un la, “Samaria-ah hong kikhawm un la, tua lai-a buaina lianpite, kinen’niamnate hong mu in,” ci un. Topa in hih bangin ci hi: Hih mite in a manin gamtat ding thei lo uh a, giloin mi’ na a suh uh vante tawh, a inn lianpipite uh kidimsak uh hi. Tua ahih ciangin galte in a gam uh umcihin, a panmun teng uh susia ding a, a inn lianpipite uh luh gawp ding uh hi. Topa in ci hi. Topa in hih bangin ci hi: Tuucingpa in humpinelkai’ nek baang tuu khebom nih ahi a, a bil them khat beek ahi zongin a ngah teei mah bangin, tutphah nip kiu khat leh lupna them khat tawh a kibang, Samaria sunga om Israel mi tawmno khat suakta tei ding hi. Tu-in ngai un la, Jakob’ suan leh khakte hilhkhol un, mihonpite’ Pasian ahi, Topa Pasian in ci hi. Amau’ khialhna hangin Israelte daan ka piak ni ciangin, Beth-el a, biakna taute zong ka susia ding a, biakna tau kite kitanin lei-ah kia ding hi. Keimah in phalbi leh khuakhal innte ka susia ding a, saiha tawh a kibawl innte kisia-in, inn lian khempeuh beimang ding hi, Topa in ci hi. Bashan gam bawngpite bangin a thau mahmah, mi zawngte nengniamin, mi cimawhte a sugawp, na pasalte uh kiangah, “Ka dawn ding bang khat peuh hong puak in,” ci-in a vaikhak no Samaria numeite aw, hih thu lim takin ngai un: Topa Pasian a siangtho ahih mah bangin, amah in kamciamna khat bawl khin a, “Amaute in sikkawi tawh note hong kaihkhiat hun ding, ni khat ni ciangin hong tung taktak ding a, note khempeuh sikkawi-a awk ngasa na bang ding uh hi. Na omna uh tawh a kinaipen kulh vang tawnin, ganhing sisa kaihkhiat bangin hong kikai khia ding a, ninlom lakah hong kilawn khia ding hi,” Topa in ci hi. Israel mite aw, Beth-el-a mun siangtho ah va pai un la, tua lai-ah khialhna va bawl un. Gilgal ah va pai un la, va khial semsem un. Zingsang simin biakna va pia un la, nithum simin sehsawm suah sehkhat pia un. Lungdam kohna-in silngo sawh anlum va pia un la, ut thu-a biak piaknate va pia-in va kisial un. Hihte pawl in note’ hih nop pawl ahi hi, Topa in ci hi. Na khuapi khempeuh uhah kial tungsakin, an nek ding nei loin note a hong koihpa in keimah hi napi-in, keima lamah nong kihei tuan kei uh hi, Topa in ci hi. Tua ahih manin an lak hun ding kha thum bek in a sap laitak, an in guahtui a sap mahmah hun lai takin guah ka zusak kei a, khuapi khat bekah zusakin, a dangte ah ka zusak kei hi. Lo khat bekah guahzu a, a zuk lohna lote keutum hi. Dangtak manin thanemin khuapi nih, khuapi thum mite tui zong dingin a khuavengte kiangah pai uh a, ahi zongin tuidawn tawm ding nangawn a kicing om lo hi. Tua hi napi-in kei kiangah nong kihei kei uh hi, Topa in ci hi. Na ankungte uh lung ne sakin ka vulsak a, na ankungte uh cina sakin a kaang dikdekin ka bawl hi. Na huante uh leh na leenggui lote uh, a hawm guakin ka koih hi. Na theikungte uh leh na oliv kungte uh kauphe in gai khin hi. Tua bang hi napi-in kei lamah nong kihei kei uh hi, Topa in ci hi. Izipt gama kong tun’sak bangin, note lakah gimna kong tungsak hi. Gal sungah na tangval teng uh ka sisak a, na sakolte uh kong paihkhiat sak hi. Na giahphual sungte uh, a uihna na nakngeek uh kong zensak hi. Tua bang hi napi-in kei lamah nong kihei kei uh hi, Topa in ci hi. Sodom leh Gomorrah khuapite ka suksiat bangin, note pawl khat kong susia hi. Meikhuk panin a kitenkhia, singkhuah khat tawh na kibang uh hi. Tua bang hi napi-in kei lamah nong kihei kei uh hi, Topa in ci hi. Tua ahih ciangin Israel mite aw, hih bangin note tungah kong bawl ding hi. Hih bangin hong hih ding ka hih manin, Pasian’ thukhenna thuak dingin kiging un. Bang hang hiam cih leh mualte bawlin, huihte a piangsakpa, ama ngaihsutna mihingte tungah kilangsakin, sun nitaang kimlai zanin a bawlpa, leitung khempeuh a ukpa’ min in Topa, mihonpite’ Pasian ahi hi. Israel mite aw, kap kawm-a kong thugenna, lim takin na ngai un: Israel puk khin a, thokik ngei nawn lo ding hi. Lei lakah lum dildel a, a phongto ding kuamah om lo hi. Tua ahih manin Topa in hih bangin ci hi: Israel khuapi khat in galkap tul khat kuankhiasak a, ahi zongin za khat bek hong ciahkik hi. Khuapi dang khat in galkap za khat kuankhia sak a, ahi zongin sawm khat bek hong ciahkik hi. Tua ahih manin Topa in Israel mite tungah hih bangin ci hi: Kei hong zong un, tua hi leh na nungta ding uh hi. A bia dingin Be-ersheba-ah pai kei un. Beth-el-ah hong zong kei un, a mawkna suak ding hi. Gilgal-ah zong lut kei un, Gilgal mite, sal a suak ding uh hi lel hi. Topa zong un, tua hi leh na nungta ding uh hi. Amah na zon’ kei uh leh, Josef mite tungah amah mei bangin hong kuang ding a, tua mei in Bethel-a om mite kang tumin, tua mei a phelh ding kuamah om lo ding hi. Thutang lumletin thuman mite lei a den’na, note’ adingin bangzahin nasia ding ahi hiam? Van-a aksi Seguk leh Zawlzawngte bawlin, khuamial pen khuavak suaksak a, sun pen zan suaksakin, tuipi panin tuite samkhia a, leitungah tui a bua khiapa a min in, Topa ahi hi. Amah in kulh muanhuaite leh mun muanhuaite thakhatin susia thei hi. Note in thukhen zumah thutang a deihpa na mudah uh a, thuman a genpa na hua uh hi. Note in mi zawngte tuancilin, a an teng uh laksak na hih manun, suangseek inn na lam hangun a sungah na teeng kha kei ding uh a, leenggui lo hoih na neih hangun a leenggahzu na dawn kha kei ding uh hi. Bang hang hiam cih leh na khialhna tampite uh, leh na mawhna tampite uh ka thei khin a, thuman mite gimsakin, sumgolh na la uh a, thukhenna zumah mi zawngte’ thu a manin na khen kei uh hi. Tua ahih manin hih bang hun siat hun lai takin, thu ngaihsun thei mite pau loin a om khikhe, lamdangsak ding hi lo hi. Note na nuntak theih nadingun, siatna gamta loin, thuman-a gamtat ding hanciam un. Tua hi leh na gensa uh mah bangin, Topa, mihonpite’ Pasian in note hong ompih ding hi. Thusia mudahin thupha deih un la, thukhen zumah a manin thu khen un. Tua hi leh, Josef minam a suakta sunte tungah, Topa, mihonpite’ Pasian hong thunuam kha thei ding hi. Tua ahih ciangin Topa, mihonpite’ Pasian in hih bangin ci hi: Mihon omna lamkabom khempeuh ah, mite in nasa-in thuumin tau ding uh a, kongzing khempeuh ah kap ding uh hi. Khua neu-a mite a thuum dingin kisam ding a, a kah siam mite a kap dingin kicial ding hi. Note daan pia dingin hong pai ding ka hih manin, leenggui lo khempeuh ah kahna aw ging ding hi, Topa in ci hi. Topa ’ ni hong tun’ ding a ngaklah note’ adingin, bangzahin lauhuai ding hiam? Note’ adingin tua ni a hoihna bang om ding hiam? Tua ni in lungzin’ ni hi a, lungtaii ni hi lo hi. Humpinelkai kihta-in a taikhiat hang, vompi a tuakpa tawh kibang ding hi. Tua ahih kei leh, mi khat inn-ah hong tai a, a kawm-ah a khut a ngak ciangin gul in a tuk tawh kibang ding hi. Topa ’ ni in khuavak ni hi loin khuamial ni hi a, maitaiina om lo, lungzin’ni ahi hi. Na biakna pawite uh mudahin ka deih kei a, na biak kikhopna te uhah ka lung a kim kei hi. Meihal biakna leh an tawh biakna nong paipih uh hangin, tuate kong sang kei ding a, Thu-nuam-a biakpiak nading a, nong paipih uh a thau mahmah ganhingte zong, et-in ka nei vet kei ding hi. La sa-in na gamlumnate uh khawl un; na lasakna uh a gingte ka za nuam kei hi. Thutang, tui bangin luang khiasak un la, thuman, a kang ngei lo lui tui bangin luangsak un. Israel mite aw, gamlakah kum sawmli na om sungun, gan go-a biakna leh piakna bangmah nong nei kei uh hi. Tua hi napi-in tu-in, note’ adingin na bawl tawm uh, aksi pasiante ahi Sakkuth leh Kaiwan milimte na biak manun, Damaskas khengin gam khatah, salin note kong paisak ding hi, Mihonpite’ Pasian min nei Topa in ci hi. Israel minamte in muan-a hong neih, minam laka ulian ahi, Zion-ah nuntak nuama a om hithiat, Samaria-ah lungmuang taka a om note’ adingin, zumhuai mahmah hi. Kalneh khua-ah pai un la va en un. Tua ciangin Hamath khuapi lian ah paisuak un la, Filistiate’ khuapi Gath dong va paisuk un. Judah leh Israel kumpi gamte sangin hoih zaw a, amau’ gam in note’ gam sangin lianzaw ahi hiam? Note tungah siatna hong tun’ ni ding, a kipelh theih nading na hanciam uh a, ahi zongin tua bang na hihnate un, siatna khangsak semsem zawsop hi. Saiha kibawl lupna tungah a lum hithiat, tutphah nip tungah a kizia hiathiat, tuuno sa leh bawngno sa, duhduha a ne, note in gimna na thuak ding uh hi. David bangin la phuah nuam na sa uh a, la saknate na tum nuam uh hi. Leenggahzu, hai lianpi pi-in na dawn uh a, sathau hoih pente tawh na kizut uh hi. Ahi zongin Josef minamte’ siatna hangin, them khat zong na dah het kei uh hi. Tua ahih ciangin note in salin a pai masapente na hi ding uh a, na nopsakna teng uh bei ta ding hi. Topa Pasian thupi takin kiciam khin a, Topa, mihonte’ Pasian in hih bangin ci hi: Israelte’ kiphatsakna ka hua a, a munmuanhuaite uh ka mu nuam kei hi. Tua ahih manin a khuapi leh a sunga om teng, galte khut sungah ka pia ding hi. Inn khat sungah mi sawm bek nangawn a suakta a om laina a om leh, tuate khempeuh zong si khin ding hi. Mi khatpeuh a sihna inn panin, mi si pua khia-in a vui dingin, a behte khatpeuh hong pai ciangin, innsung tawng-a a bu mi khatpeuh kiangah, “Hih lai-ah a si dang a om hiam?” ci-in a dot ciangin, “Om lo hi, pau kei in. Topa ’ min na lawh khak ding kidawm in,” ci-in kidawng kik ding hi. Topa in thu a piak ciangin, inn liante kisatzanin, inn neute kisatnen ding hi. Sakolte, suangken tungah tai thei ngei a, bawngtalte tawh tuipi tung kikho thei ngei ahi hiam? Tua hi napi-in note in, thutang pen, gu na suaksak uh a, thuman zong, a khial na suaksak uh hi. Lodebar khua bang lel na lak zawhna uhah na lungdam uh a, “Eima thahatna tawh Karnaim khua i la zo hi,” na ci uh hi. Topa, mihonpite’ Pasian in hih bangin ci hi: No Israel mite a do dingin minam khat ka khangsak ding a, Leilu lamah, Hamath khua lutna ciangka panin, leitaw lamah, Arabah lui kikal dong, note hong nuai gawp ding uh hi, a ci hi. Topa Pasian in hih bangin hong mu sak hi: Kumpipa’ gan an ding lopa a ki-at khit phet, sel kik dingin a kisak lai takin, Topa in kauphe honpi piangsak hi. Kauphe in gamsung lopate a gaih khit ciangin, keimah in Topa tungah ka thuum a, “ Topa Pasian aw, na mihingte’ mawhna maisak in. Amaute minam tawm hi-in zawngkhal uh ahih manin bangci thuak zawh ding uh ahi hiam?” ka ci hi. Topa in zong a lungsim hong kheel kik a, “Tua na muh bangin hong piang nawn lo ding hi,” hong ci hi. Tua ciangin Topa Pasian in hih bangin hong musak leuleu hi: Amah in meikuang tawh a mite daan pia dingin hong kithawi a, tuipite keutum sak a, leitung zong haltum dingin hong kipan hi. Tua ciangin Topa Pasian kiangah ka thuum a, “ Topa aw, khawl dih in. Na mite, minam tawm hi-in zawngkhal mahmah uh ahih manin, amaute in bangci thuak zawh peuhmah ding uh ahi hiam?” ka ci hi. Tua ciangin Topa in zong a lungsim hong kheel kik a, “Na muh bangin hih zong hong piang nawn lo ding hi,” Topa Pasian in hong ci hi. Topa in hih bangin hong musak hi. Khaukhai zang-a a kiciang kulh gei khatah, Topa a ding ka mu a, a khut sungah khaukhai khat tawi hi. Tua ciangin Topa in kei kiangah, “Amos aw, bang na mu hiam?” hong ci hi. Kei zong dawngin, “Khaukhai khat mu ing,” ka ci hi. Tua ciangin Topa in, “En in, ka mi Israelte a khialhna uh a kitheih nadingin, hih khaukhai tawh ka en hi. Amaute daan ka piak ding ka khiamkik nawn kei ding hi. Isaak’ suan leh khakte’ biakna munte kinusia cipin, Israel mite’ siangtho munte kisusia ding a, Kumpi Jeroboam’ innkuante a do dingin gal ka kuansak ding hi,” hong ci hi. Beth-el a, om siampi Amaziah in Israel Kumpi Jeroboam kiangah thu puak a, “Amos in Israel mite lakah nang hong sawm hi. Ama thugen in i gamsung siasak ding hi. Amah in hih bangin thu gen a, ‘Gal sungah Jeroboam si ding a, Israel mite amau’ gam panin, salin kipaikhiatpih ding hi,’ ci hi,” ci-in a khia hi. Tua ciangin Amaziah in Amos kiangah, “Kamsanga kineipa aw, na Judah gamah ciah in la, tua lai-ah na nuntak nading nasemin, thu va gen gen in. Hih lai in kumpipa’ biakna mun, minam bup biakinn ahih manin, Bethel-ah thu hong gen nawn kei in,” a ci hi. Amos in Amaziah dawng a, “Keimah in kamsang ka hi kei a, kamsangte’ ta zong ka hi beek kei hi. Keimah in tuucing ka hi a, theiba huan puah tawh a thuah ka hi hi. Ka tuucin’na panin Topa in hong samkhia a, ama mi Israelte tungah thugen dingin hong sawl hi. Tu-in Topa ’ thugen ngai in. Israel mite lang khatah ka thugen ding nong kho a, Isaak’ suan leh khakte lang khatah ka thugen ding nong kham hi. Amaziah aw, tua bangin kampau na hih manin Topa in nang kiangah, “Na zi pen khua sungah numei paktat suak ding a, na tate, gal sungah si ding uh hi. Na gam kiphelkhamin midang tungah kipia ding a, lawkite gam sungah nang na si ding hi. Israel mite, gal matin kipai khiatpih ding hi,” ci hi,” a ci hi. Topa in hih bangin hong musak hi: Seeng sunga kikoih singgah min ka mu hi. Topa in, “Amos aw, bang na mu hiam?” hong ci a, “Seeng sunga kikoih singgah min ka mu hi,” ci-in ken zong ka dawng hi. Tua ciangin Topa in, “Ka mi Israelte adingin a bei hun uh tung ta hi. Amaute daan ka piak ding ka khawl nawn peuhmah kei ding hi. Tua ni ciangin kumpi inn sunga lungdam lasakna awgingte, kahna awging suak ding hi. Mun khempeuhah mi siluang dim ding a, mun citengah kipaithangin gamdai ding hi,” Topa in ci hi. Mi cimawhte tuancil gawpin, gamsung mi zawngte a susia gawp mite aw, hih thu ngai un. Note in na lungsim sung uhah, “I ante i zuak theih nadingin, zumkhak hun sung i ngak lah hi. I mangbuhte i zuak theih nadingin, cik ciangin sabbath ni bei ding hiam? I an tehna seu neu seekin, sum tampi i ngen nuam a, tawi khaina man lo zangin, a hong leite i khem nuam hi. Khedap bu khat man dingin, mizawngte sila-in i zuak nuam a, i mangbuh hoih lote, sum tampi i khawng nuam hi,” na ci uh hi. Topa, Israel Pasian in ama min liatna tawh kiciam a, “Na gamtat siatnate uh ka mangngilh ngei kei ding hi. Tua ahih manin ziin hong liing ding a, leitunga om mi khempeuh kap ding uh hi. Nail Gunpi bangin leitung khempeuh khang toin kiamsuk ding hi. Tua ni ciangin sun kim laipi mahin ni ka tumsak ding a, sunkim laipi mahin leitungah khua ka mialsak ding hi. Topa Pasian ahi keimah in hih thu kong gen khin hi. Na lungdam pawite uh dahna ka suaksak ding a, na lasaknate uh kahna awging ka suaksak ding hi. Dahna limin puanhampi na silh ding uh a, na sam uh zong na mettol ding uh hi. A tapa khat neihsun a sihsuah nupa na bang ding uh hi. Tua hun in a tawp dongin nasia semsem ding hi. Keimah in leitungah kial kong tun’sak hun hong tung ding hi. Tua kialpi in an leh tui duhna kial hi lo ding a, Topa ’ thu zak nop mahmahna kial hi ding hi. Topa Pasian ahi keimah in hih thu kong gen khin hi. Mihingte, leilu pan leitaw dong, nisuahna pan nitumna dong, Topa ’ thu kanin vak kawikawi ding uh a, ahi zongin mu zo lo ding uh hi. Tua ni ciangin nungakte leh tangvalte, dangtakin puk ding uh hi. Samariah milim pasian Ashimah min tawh kiciam a, ‘Dan khuapi pasian a nungta ahih mah bangin,’ a ci mite leh ‘Beersheba khuapi pasian a nungta ahih mah bangin,’ a ci mite pukin thokik nawn lo ding uh hi,” ci hi. Biaknatau gei-ah Topa a ding ka mu a, hih bangin thu a pia hi: “Biakinn lim khempeuh a kilin’ theih nadingin biakinn khuampi luzang satgawp in. Tuate satkham in la mite’ luzang tusak in. Tua lai panin a suakta kha teng, gal sungah ka sisak ding hi. A taikhia, a suakta, kuamah om lo ding hi. Lei to sukin misite omna Leinuai-ah a va tun uh hangin tua lai-ah amaute ka su ding a, vantungah a kah toh uh hangin zong, tua lai mahah amaute ka su veve ding hi. Karmel mual dawnah a buk uh hangin, amaute zongin ka man khia ding a, kei kiang panin tuipi tawng sungah bu ta le uh zong, tuipi gulpite in a tuk nading thu ka pia ding hi. Galte in sal dingin hing mat ta le uh zong, namsau tawh a thah nadingun thu ka pia ding hi. Amaute’ hoih nading ngaihsun het loin, amaute suksiat ding ka sawm hi,” ci hi. Mihonpite’ Topa Pasian in, leitung lawngin leitung in tuisuak a, leitunga teeng mi khempeuh kap uh hi. Nail Gunpi bangin leitung buppi khang toin kiamsuk ding hi. Topa in vantungah a inndeite bawl a, vankuumpi tawh leitung a khuhsuk hi. Amah in tuipi panin tuite samkhia a, lei tungah tua tuite sung hi. Hih bangin a bawlpa’ min in Topa ahi hi. Topa in hih bangin ci hi: Israel mite aw, Ethiopia mite tawh a kibangin note ka hong bawl a, Izipt panin note ka hong paikhiatpih bangin, Kaftor gam panin Filistia mite ka paihkhiatpih a, Kir gam panin Siria mite ka paikhiatpih hi. Keimah in hih a khial Israel kumpigam ka encik a, hih leitung panin amaute ka susia ding hi. Ahi zongin a vekpi-un susia mang loin, pawlkhat ka siit lai ding hi. Keimah in thu ka pia ding a, anhaihna ciang tawh an a kihaih mah bangin keimah in Israel mite ka lok niloh ding hi. A hoih lo teng a kipaihkhiat theih nadingin minam dangte lakah ka haih ding hi. Keima mite sung panin, “I tungah siatna hong tung ngei lo ding hi,” a ci mawh neite khempeuh, gal sungah si ding uh hi. Tua ni ciangin inn tawh kibangin a siasa David innkuan, keimah in ka puahkik ding a, a vang teng hu-in, a sia teng ka puahkik ding a, nidanga a ngeina lui mah uh ka bangsak kik ding hi. Tua ciangin Israel mite in, Edom gam a, om lai teng leh keima mi ahi ngei minam khempeuh zo-in ngah kik ding uh hi, Topa in ci hi. Topa in hih bangin ci hi: An a kihauh luat manin, anlak a kizawh ma-in lo khawhkik hun tungin, leenggahte, leenggahzu-a bawl a kizawh ma-in, a suankik hun hong tun’ ding hun nuam hong tung ta ding hi. Mual lian khempeuh panin leenggahzu khum hong taak khia-in, mual neu khempeuh tungah leenggahzu luang ding hi. Ka mi Israelte, amaute’ gam ka tun’ kik ding a, a kisia a khuapite uh lampha kikin, a sungah teeng ding uh hi. Amaute in leenggui suanin, a zu dawn ding uh a, huan bawlin, a sunga piangte ne ding uh hi. Amau adingin ka piak gam sungah amaute ka koih kik ding a, tua ka piaksa gam panin kuamah in amaute lakhia kik nawn lo ding hi, Topa, note’ Pasian in ci hi, a ci hi. Obadiah gen kholhna: Edom mite gam tawh kisai-in Topa Pasian in hih bangin a gen hi. Minamte lakah kamtai khat kisawl zo a, “Kithawi un! Edom mite do dingin kuankhia ni” a cihna thu ka za zo hi. En in, minamte lakah note kong neusak ding a, nakpi takin a hong kisimmawh ding hi. Na lungsim kiphatsakna un note a hong khem zo hi. Note in suang kulhpi beelin, mual dawnah na teen manun, “kua in a hong kiasak zo ding hiam?” ci-in na ngaihsun uh hi. Muvanlai bangin sangpi-ah lengin, aksite lakah bu na bawl hangun, No kong khiasuk veve ding hi, Topa in a ci hi. Zan-in na kiangah gutate leh misuamte a hong pai a, supna tampi na thuak hangin; a deih teng bek hong guksak ding hilo ahi hiam? Lenggah late na kiangah a hong pai leh a sanghte nusia lai teei uh hilo ahi hiam? Ahih hangin Esau, kibuluh khin zo a, a sum a pai khempeuh a kilak sak zo hi! Na pawl teng in hong khem zo uh a, gamgi ciang dong a hong hawlkhia zo uh hi; na pawlte teng in a hong zo khin ta hi. Na ankuang umpihte in na nuai-ah thang siah khin uh a, “A pilna koi-ah a om hiam?” a hong ci uh hi. Topa in: “Tua ni ciangin Edom sungpan a mipilte ka susia ding a, Esau mualah pilna ka siit nawn kei ding hi,” a ci hi. Teman khua aw, Esau mual ah mi khempeuh a kithahlup khit nadingin, na galhangte a thanem ding uh hi. Bang hang hiam cih leh, na sanggampa Jakob bawlsia-a na thahna hangin; mai zumna in nang hong khuh ding a, na khan tawnin na mangthang ding hi. Lang khata na gaaldin’ ni-in, Namdangte in a neihsa teng a puak khiat ni-in; gamdang mite a kongpi sungah lut-a Jerusalem ading ai a san’ ni-in, nang zong a thukimpih na hi hi. Na sanggamte a tuahsiat ni-un munuam dah hoh un. Judah mite a kisiat ni-un nuam kei un. A kisiat ni-un lungdam kei un. A cihmawh ni-un nuihsan kei un. Ka mite in haksatna a tuah ni-un a kongpi sungah tum kei un. A tuahsiat ni-un a thuaknate uh munuam kei un. A tuahsiat ni-un a sum a paite laksak kei un. A suakta sunte khaktan dingin lamka lai-ah na ding kei ding hi. A cihmawh ni-a a hing lai sun teng, a galte khut sungah na pia kei ding hi. Bang hang hiam cih leh minam kimte tunga ka thukhen nading ni a nai zo hi. Na bawl bangin nangma tungah a hong kibawl ding hi. Na hih bangin na lu bukah a hong tu kik ding hi. Bang hang hiam cih leh, ka mual siangtho tunga na thuak mah bangun; na kim na pama mi namte khempeuh in zong ka daan piakna a thuak ding uh hi. Thuak tawntung ding uh a, a piang ngei lo mah a bang ding uh hi. Ahih hangin Zion mualah pawlkhat a suakta ding uh a, mun siangtho a suak ding hi. Jakob innkuante in amau gam mah a luah kik ding uh hi. Tua ciangin Jakob innkuante mei ahi ding uh a, Josef innkuante meikuang ahi ding uh hi. Esau innkuante niinpa ahi ding uh a, amaute in a hal ding uh hi. A kangtum khin ding uh a, Esau innkuante khat beek a suakta kei ding uh hi. Bang hang hiam cih leh Topa in a gen zo hi. Negeb gam mite in Esau mual a luah ding uh a, Shefelah mite in Filistia gam a luah ding uh hi. Amaute in Efraim gam leh Samaria gam a luah ding uh a, Benjamin in Gilead gam a luah ding hi. Israel mi sal-a omte in Kanaan gam Zarefat ciang dong a luah ding uh a, Jerusalem mi Sardis khua-a sal-a omte in, Negeb gam khuapite a la ding uh hi. Esau mual-a thukhen ding, a honkhia ding mite Zion mualah hong paito ding uh a, tua gam in Topa ’ gam ahi ding hi. Topa in Amittai’ tapa Jonah tungah, “Kithawi in la, a lian mahmah Nineveh khuapi-ah va pai-in va thu hilh in; bang hang hiam cih leh amau’ gitlohna thu ka za khin zo hi,” a ci hi. Ahih hangin Topa kiangpan Jonah tai khia-in Tarshish khua lamah taisim dingin a kithawi zawsop hi. Joppa khua-ah a paisuk-a Tarshish khua a zuan ding teembaw khat a mu hi. A sap man pia-in a tungah kah a, Topa kiang pan taikhia dingin teembaw hawlte tawh Tarshish khua-ah a pai hi. Ahih hangin Topa in tuipi tungah huih nakpi-in nung sak-a huihpi hat lua ahih manin teembaw a kisia dekdek hi. Tua ciangin teembaw hawlte lau uh a, a pasian ciat uh kiangah a kiko ciat uh hi. Teembaw a zan’ tuam nadingin a sung-a vante tuipi sungah a paai uh hi. Tua bang hi napi-in Jonah in teembaw sung a tawng lamah na lutsuk a, a na ihmu hithiat hi. Teembaw ukpa in amah a muh ciangin, “Ihmu pa aw, bang na cihna hiam? Tho in la, na pasian kiangah thu ngen in! I sih loh nadingin amah in eite hong ngaihsun kha thei ding hi,” a ci hi. Tua khit ciangin teembaw hawlte in, “Hong pai dih un. Kua’ hangin hih gimna ei tungah hong tung hiam, cih i theih nadingin ai san dih ni,” ci-in khat-le-khat a kikum uh hi. Ai a san uh leh Jonah tung a tu hi. Tua ciangin amaute in, “Kua hangin hih gimna ei tungah hong tung hiam, hong gen in. Na nasep bang hiam? Koi lai pan-a hong pai na hi hiam? Na gam bang hiam? Kua minam na hi hiam?” ci-in a dong uh hi. Amah in, “Keimah in Hebru mi ka hi hi; tuipi leh leitung a bawl, vantungte’ Pasian ahi Topa ka bia hi,” a ci hi. Tua ciangin tua mite a lau mahmah uh a, “Bang hangin hih bangin hih mawk na hi hiam?” a ci uh hi. Bang hang hiam cih leh Topa kiangpan amah a taikhia sim ahih lam a gen khit sa ahih manin a thei khin zo uh hi. Tua ciangin amaute in, “Ei adingin tuipi a hong daih theih nadingin nang bang kong cih ding uh hiam?” ci-in a dong uh hi. Bang hang hiam cih leh huihpi a lauhuai semsem hi. Amah in, “Hong domto un la tuipi sungah hong khia un; tua hi leh no adingin tuipi a hong daai ding hi; bang hang hiam cih leh hih huihpi na thuakna uh keima’ hang ahi hi, cih ka thei hi,” ci-in a dawng kik hi. Tua bang a cih hangin amaute in teembaw khawl sak dingin hahkatin lei lamah a hot teeiteei uh hi. Ahih hangin a hih zo kei uh hi, bang hang hiam cih leh huihpi a hat semsem hi. Tua ahih ciangin amaute in Topa ’ kiangah kiko-in, “ Topa aw, hih mipa ka sihsak manun kote hong sisak kei in la, mi that hi, ci-in hong ngawh kei ta in, ci-in kong thuum uh hi; bang hang hiam cih leh Topa aw, nangmah in pha na sak banga na bawl ahi hi,” ci-in thu a ngen uh hi. Tua ciangin Jonah dom to-in tuipi sungah a khiat uh leh tuipi a daai pah hi. Tua ciangin tua mite in Topa a kihta mahmah uh a, Topa ’ tungah biakna pia-in thuciamna a bawl uh hi. Ahih hangin Jonah a nawmvalh dingin Topa in ngapi khat a geelkholh sa hi a, tua ngapi’ gil sungah Jonah sun thum leh zan thum sung a om hi. Tua ciangin Jonah in tua ngapi gil sung panin Topa a Pasian’ kiangah thu ngen a, “Ka cihmawhna panin Topa ka sam a, amah in hong dawng hi; Sihna gam Sheol panin ka kiko-a, nangmah in ka aw nong za hi. Nang in tuipi thuk sungah nong khia-a, tui in kei hong tumcip hi; na tuihualte khempeuh in kei hong tum hi. Tua ciangin keimah in, ‘Na omna panin kei hong kihawl khia hi; na biakinn siangtho hong koici et kik thei ding ka hi hiam?’ ka ci hi. Tui in ka tungah hong tuamcip a, ka kimkot-ah hong umcih hi. Tuipi tunga lopate in ka lu hong vialcip hi. Mualte’ bul tuipi taw dong ka va pai suk a, kongkhak hong kikhak nelh tawntungna mun ka tun’ hangin tua lei sung Hawmpi sung panin a nungta-in nong la to veve hi, Topa, ka Pasian aw, Kei ka lung a kiat ciangin, Topa ka phawk a; ka thungetna, na biakinn siangtho sung, nangma kiang hong tung hi. Kiman’na nei lo milim a biate in nangmah hong tai san uh hi. Ahih hangin keimah in ka hih leh lungdamna aw tawh biakna kong pia ding hi; ka ciamsa ka tangtung sak ding hi. Gupkhiatna in Topa ’ aa ahi hi!” a ci hi. Tua ciangin Topa in tua ngapi sawl a, amah in lei keu tungah Jonah a luakhia hi. Tua ciangin Topa in Jonah tungah a nih veina thu gen a, “Kithawi in la, a lian mahmah Nineveh khuapi-ah va pai-in kong gen sa thu va tangko in,” a ci hi. Jonah zong kithawi pah-a Topa ’ cih bangin Nineveh khua-ah a pai hi. Nineveh khua pen khuapi lian mahmah khat hi a, nithum sung tak kikantan hi. Jonah zong khua sung lam manawh-in kipan-a, nikhat sung lam a pai khit ciangin, “Ni sawmli khit ciangin Nineveh khuapi a kisusia ding hi,” ci-in a kiko hi. Nineveh khuamite in kisik kik-in Pasian a um uh a, antan’ nading thu thang sakin, a golpen pana kipan a neupen dongin ippi puan a silh uh hi. Nineveh khua kumpipa in tua thu a zak ciangin a kumpi tokhom tung pan ding khia-in, a kumpi puan suah khia-a, ippi puan silhin vut lakah a tu hi. Tua ciangin amah in Nineveh khua sung khempeuh thu thang sak-in a tangko sak a, “Kumpipa leh uliante’ thu tawh: Mihing ahi-a ganhing ahi zongin, bawng hon ahi-a tuu hon ahi zongin, bang mah ciam thei lo ding, an ne thei lo ding, tuidawn thei lo ding uh hi. Mihing leh ganhingte in ippi puan silhin Pasian tungah nakpi-in kiko ta uh hen. Hi hi, mi khempeuh in a khialhnate uh leh a gitlohnate uh panin kihei ta uh hen. Eite i sih loh nadingin Pasian kisik kik-in a hehna damsak lo ding hi, kua in ci thei na hi uh hiam?” a cisak hi. Pasian in amau’ hihnate mu a, a khialhnate uh panin a kihei uh a muh ciangin kisik kik a, amaute tungah hih dinga a cihsa siatna a tungsak nawn kei hi. Ahih hangin tua thu hangin Jonah lungkim het loin a heh hi. Topa ’ kiangah thungen a, “Kong ngen hi, Topa aw, ka gam sungah ka om lai pekin hi ci mah in teh, ci hilo ka hi hiam? Tarshish khua-ah hanciam-a ka tai simna zong tua hang mah ahi hi; bang hang hiam cih leh nangmah in a hehpih thei Pasian, a heh hak, a migi mahmah, siatna tun’ sak nading a kisik kik nuam Pasian na hihna kong thei hi. Tua ahih ciangin Topa aw, tu-in ka nuntakna hong la in, ci-in kong thuum hi: bang hang hiam cih leh ka nuntak sangin si leng kei adingin a hoih zaw hi,” a ci hi. Topa in zong, “Na heh ding kilawm na sa hiam?” a ci hi. Tua ciangin khuapi pua lamah Jonah paikhia-a nisuahna lamah tu-in tua lai-ah ama ading bukno khat a lam hi. Tua khuapi bang hong ci ding hiam, cih en dingin a liim nuai-ah tu-in a ngak hi. Topa Pasian in zong Jonah a liah ding leh a lungkhamna a tawldamsak dingin umgui khat a tungah a zaamsak hi. Tua ahih ciangin tua umgui hangin Jonah a lungdam mahmah hi. Ahih hangin a zingsang khuavak ciangin Pasian in tua umgui lungno khat nesak-a a keu hi. Ni hong suah ciangin Pasian in nisuahna lam panin huih a sa mahmah nungsak a, ni in zong Jonah lu zang kapsuk veva ahih manin a gim mahmah hi. Tua ciangin amah in, “Ka nuntak sangin si leng kei adingin a hoihzaw hi,” ci-in a sih nading thu a ngen hi. Ahih hangin Pasian in Jonah kiangah, “Tua umgui hangin na heh ding kilawm na sa hiam?” a ci hi. Jonah in, “Ka heh ding kilawm sa tham loin heh lua-in ka si zongin kilawm ka sa veve hi,” a ci hi. Tua ciangin Topa in, “Nang in na gimpih lohpi, na khan’ sak lohpi, zan khat thu-a hong piang-a zan khat thu mah a, a si tua umgui pammaih na sa hi. Tua ahih leh keimah in ganhing tampi thamlo, a taklam khut leh a veilam khut nangawn a khen thei nai lo naupang tulza leh tulsawmnih sanga tam zawte’ teen’na, a lian mahmah Nineveh khuapi pammaih sa lo ding ka hi hiam?” ci-in a dawng kik hi. Judah gam kumpi Jotham, Ahaz, leh Hezekiahte’ hun laitakin, Moresheth khuami Mikah tungah Topa in hih bangin thupia hi. Samaria leh Jerusalem tawh kisai-in Topa in Mikah tungah hih thute lak hi. No minam khempeuhte aw, hih thu za un. Leitunga teeng mi khempeuh aw, hih thu ngai un. Note’ lang khatah Topa Pasian in teci pang a, a vantung biakinn panin thu hong gen hi. Ama mun siangtho panin Topa hong pai a, amah in leitung mualsang dawnte hong siksuk ding hi. Meikhuk sunga khuainun kikoih bangin, ama khe nuai-ah mual liante tuisuak ding a, mual tung panin tui a luan’sak bangin, guam sungah tua mualte luang suk ding hi. Pasian tungah Israelte’ mawhna leh khialhna hangin hih thute khempeuh piang hi. Israelte’ khialhna kua ngawh ding i hi hiam? Samaria mite ngawh ding ahi hiam? Judah gam sungah milim bia-a khial kua ahi hiam? Jerusalem mite ahi hi. Tua ahih ciangin Topa in hih bangin ci hi: Samaria khuapi, gamlaka ninkholna mun, leenggui suan’na mun lel dingin ka bawl ding hi. A khua sunga suangte zong guam sungah ka nil suk ding a, a khuapi bulpite ka dawksak ding hi. A milim manphate khempeuh kisuzanin, mei tawh kisusia ding hi. Pasian tungah a thuman lohna hangun mihingte in hih milimte nei uh ahih manun, a paktatna uh tawh kizui-in tu-in thuak kik ding uh hi, ci hi. Tua ahih manin kei kapin ka thuum ding a, ka dahna thu ka lah nadingin khe guak leh guaktangin ka vak ding hi. Gam-ui bangin ka ham ding a, kalaoh-vasa bangin ka tau ding hi. Bang hang hiam cih leh Samaria’ meima kidamsak thei lo a, Judah in zong tua bangmah a thuak ding ahi ta hi. Ka mite’ teen’na Jerusalem khua kongpi mahmah, tua siatna in hong ban ta hi. I guallelhna, Gath khuamite theisak kei un la, na kahna uh amaute musak kei un. Bethle-afrah khua sungah na lungkhamna uh langsakin, leivui lakah kikhuk un. Shafir khua-a teeng mite aw, guaktangin maizumna tawh salin pai un. Za-anan khua-a teeng mite, a hingin paikhia ngei lo ding hi. Beth-ezel khuamite kahna leh thuumna na zak uh ciangin, tua khua sungah belh ding munmuanhuai a om lohna na thei ding uh hi. Topa in Jerusalem kulh kongpi ciang dongah, gimna lianpi tungsak ta ahih manin Maroth khuamite in thuhoih lamenin gim uh hi. Lakhish khua-a teeng mite aw, na sakol galkapte uh a leng bulh pak un. Note in Zion tanute’ khialhna teng zui kha na hih manun, Jerusalem zong a khialsakte na hi uh hi. Tu-in no Judah mite aw, Moreseth-gath khua, mangpha khak un. Israel kumpite tungah Akzib khua in a zuauthei khat ahi hi. Mareshah khuamite aw, note a hong zo dingpa ka hong paisak ding hi. Topa in ci hi. Adullam leihawm sungah Israel kumpipa bu ding hi. Judah mite aw, na it mahmah uh na tate uh, sal-in hong kilaksak ding ahih manin, amaute hangin na dahna lim-un na sam uh met un la, musane bangin na lu uh tolsak un. A lupna tungah lumin gitlohna a geelgeelte in gimna ngah ta hen. Zingsang khua a vak ciangin, a hih theih ding hun a ngah phetun, a ngaihsutsa uh gitlohnate semkhia uh hi. Lo deih le uh, mi’ aa sut uh a, inn deih le uh, mi’ aa mah sut uh hi. Mite bawlsia-in, a inn leh a neihsa sut uh hi. Tua ahih ciangin Topa in hih bangin ci hi: Note tungah gimna tun’sak ding ka ngaihsun a, tua gimna tawh na kipelh thei kei ding uh hi. Note’ adingin hun hoih lo hi ding ahih manin, na kiphatsak gamtat nawn kei ding uh hi. Tua bang hun hong tun’ ciangin, mite in note’ gim ngahna thu gentehna-in zangin, dah la phuakin sa ding uh a, “Eite i sia khin taktak hi. Topa in i gam hong laksak a, ei hong mante tungah hong piaksak hi,” ci ding uh hi. Tua ahih ciangin Topa ’ mite lakah leitang a kihawm ciangin, kuamah in aisaanna tawh leitang na ngah kha kei ding uh hi. Amaute in kei kiangah, “Tua bang thu hong gen kei in. Tua bang thu gen dingin kilawm lo hi. Tua bangin Pasian in hong minsiasak lo ding hi,” ci uh hi. Israel mite aw, “ Topa a lungtom ta a, hihte, ama hong bawlna mah ahi hiam?” na cih ding uh kilawm lo hi. Ka thugenna kammalte in a thuman mite adingin a hoih hilo ahi hiam? Ahi zongin Topa in hih bangin hong ci hi: Note in ka mite’ gal na suak uh a, gal sung panin a hong ciahkik, lungmuanga a om mite’ puantualpi ngahte na sut uh hi. Ka mihingte’ numeite amau’ inn nuam panin na hawlkhia uh a, a tate un a ngah ding keima thuphate na taan paisuak sak uh hi. Tu-in ding un la paikhia un. Na khialhna hangun a lauhuai suksiatna tuak ding na hih manun, hih lai mun in note adingin tawlngakna mun hi lo hi. Zuau genin khemna tawh thu gen kawikawi a, “Note adingin leenggahzu leh kham theih zu tampi tak hong om ding hi,” a hong ci kamsangte pawl note’ deih kamsangte ahi hi. Ahi zongin no Israel mi a om laite khempeuh pel loin kong kaikhawm kik taktak ding hi. Tuubuk sunga tuu khum bangin, gankhawk sunga tuuhon kaihkhop bangin, note kong kaikhawm kik ding a, na gam sung uh, mi tampite’ husa tawh kidim kik ding hi, ci hi. Pasian in lampi hong hon’sakin, na maiah hong paikhiatpih ding hi, Salsuahna khuapi kulh kongpi panin paikhia-in na suakta ding uh hi. Kumpi ahi Topa mahmah in hong makaih ding hi. Israel a uk makaite aw, hih thu ngai un. Note in thutang thuman a deih dinga kilawm hi napi-in, thuhoih deih loin thusia na deih zawsop uh hi. Note in mite vun na hing hawkkhiat uh a, a guh uh na hing kheuh uh hi. Ka mite’ sa na netum uh hi. A vun uh hawkin, a guh uh na satkham uh a, beel-a meh huan ding bangin na satnen gawp uh hi. Topa tungah huhna ngenin na kiko hun uh hong tung ding a, ahi zongin amah in note hong dawng lo ding hi. Note gamtatsia na hih manun, na ngetna uh hong ngai lo ding hi. Sum a pia zo mite kiangah thunuam gen a, a pia lo mite kiangah, gal tuah ding a gen, kamsangte in mite lam khialsak uh hi. Topa in tua bang kamsangte kiangah, “Ka mite lam khialsak na hih manun, mailam thugen theihna maang na mu nawn kei ding uh a, bangmah na genkhol thei nawn kei ding uh hi. Kamsangte aw, note’ hun bei ta ding a, ni in hong tumsan ta ding hi,” ci hi. Kamsanngte in maizumna thuak ding uh a, thu-mu theite in zumna thuak ding uh hi; amaute in a muk uh hum ding uh hi, bang hang hiam cih leh Pasian’ dawnna om lo hi. Ahi zongin kei ka hih leh, Israel mite tungah a mawhna uh a gen khia dingin, Topa ’ Kha vangliatna tawh kidimin, thutang gen ngamna lungsim ka nei hi. Ngai un! Israel a uk makaite aw, Note in thutang deih loin, thuman kimlai a khialin na hei uh hi. Mi thahna leh thuman lohna tawh, Pasian’ khuapi, Jerusalem na lam uh hi. Khuapi ukte in sumgolh ngah nading bekin thu khenin, siampite in sum ngah nading bekin thu gen uh a, kamsangte in zong sum ngah theih nading bek mahin, mailam thu genkhol uh hi. Tua bang hi napi-in amaute in Topa, muan’in nei uh a, “ Topa in eite hong ompih a, i tungah siatna hong tung lo ding hi,” ci uh hi. Tua ahih manin note hangin, lo khawh bangin Zion kikho-in, Jerusalem, nin kipaihna phualpi suak ding a, biakinn omna mual, gamlak suak ding hi. Mai lam hunah, Topa ’ biakinn a omna mual, a sang pen mual hong suak ding a, minam tampi in hong zuan ding uh hi. Minam tampite hong pai-in, “Jakob’ Pasian’ biakinn, Topa ’ mualah va paito ni. Tua lai-ah ama deihna hong hilh ding a, ama deihna bangin i gamta ding hi,” ci ding uh hi. Bang hang hiam cih leh Zion panin thuhilhna hong ging khia a, Jerusalem panin Topa ’ thu hong pai khia hi. Amah in minam tampite’ thu khensak ding a, Israel gam panin a gamla peka om, minam vangliante’ thu khensak ding hi. Amaute in a namsaute uh lo khawhna tu-in seek ding uh a, a teipite uh singhiang heuhna temkawi-in seek ding uh hi. Minam khat leh khat kido nawn lo ding uh a, gal kidona thei kha nawn lo ding uh hi. A kuamah peuh lungnuamin, a leenggui phung leh a theikung nuai-ah ta hithiat ding a, kuamah in patausak nawn lo ding hi. Bang hang hiam cih leh Topa ’ kam mahmah in hih thu gen khin ta hi. Bang hang hiam cih leh mi khempeuh in, amau’ pasian ciat bia-in a thu mang ding uh a, ahi zongin eite in i hih leh i Topa Pasian a tawntungin bia-in a thu i mang ding hi. Topa in hih bangin ci hi: Tua ni ciangin keimah in khebaite kaikhawmin, a kihawlkhiate leh gimna ka thuaksak mite ka kaikhawm ding hi. Khebaite ka om sak lai ding a, a kipaikhia mite a thahat minamte ka hisak ding hi. Tua hun akipan a tawntungin, Zion Mual panin amaute ka uk paisuak ding hi. Pasian in a mite a etna Jerusalem khuapi aw, nidang a, na vangliatna ngah kikin, kumpi khuapi na suak kik ding hi. Bang hangin tu-in nakpi-in kap a, numei nausuak ding bangin na sa na hi hiam? Kumpi nei lo a, na thulamlakte si ahi hiam? Jerusalem khuamite aw, numei nausuak ding bangin tha saan un. Tu-in khuapi nusia-in, gam sung khua-ah a teeng ding na hi ta uh a, Babilon khuapi a zuan ta ding na hi uh hi. Ahi zongin tua lai-ah note hong kihonkhia-in, na galte uh khut sung panin Topa in hong tankhia ding hi. Note a sim dingin minam tampi hong kikhawm uh hi. Amaute in, “Jerusalem kisusia ding a, a mit in hih khuapi a siasa-in mu ding hi,” ci uh hi. Ahi zongin hih minamte in Topa ’ lungsim tawng thei lo uh a, ancilna phualah anphalte kaihkhop bangin, kaikhawmin a cil gawp ding ahih lam phawk lo uh hi. Topa in hih bangin ci hi: Jerusalem khuamite aw, kipan un la, na galte uh sugawp un. Sumngo khe leh sik ki a nei bawngtal bangin note kong thahatsak ding hi. Minam tampite’ na sugawp zo ding uh a, amau’ neihsa teng keima aa na suaksak ding uh a, amau’ hauhna teng, leitung khempeuhte’ Topa ’ neihsa na suaksak ding uh hi. Jerusalem khuamite aw, na kulh sung uhah lut un. Eite hong ki-umcih a, Israel makaipa’ biang ciang tawh sat ding uh hi. Bethlehem Efrathah khua aw, nang in Judah gamah khuaneupen khat na hi a, ahi zongin nang’ sung panin Israel a uk ding khat ka piangsak ding hi. Ama gui in nidang lai, taangtawng pek tawh kizom hi. Tua ahih ciangin, numei naupai nu, a nau a suah khit mateng, amau’ galte khut sungah Topa in amaute pia phot hi. Ama hong khan’ ciangin, sal-a om a gam mite, a mipihte uh tawh hong kigawm kik ding hi. Amah in Topa ’ thahatna tawh a tuute uk ding a, Topa ama Pasian’ min vangliatna tawh uk ding hi. Leitung mi khempeuh in ama liatna phawk ding uh ahih manin, ama mite lungmuang takin om thei ding uh hi. Amah in lungnopna hong omsak ding hi. Assiria mite in i gam hong simin, i gal dalna teng hong suk ciangin amaute a do dingin, i makai hatpen teng i sawl ding hi. A namsau uh tawh Assiria gam zo-in Nimrod gam zo ding uh a, Assiria mite in i gamgi dong hong sim ciangin amaute’ kiang panin eite hong honkhia ding uh hi. Tua ciangin a om lai Israel mite pen, Topa in minam tampite’ adingin a piak, zing daitui, lopate a khangsak guahtui bang ding uh hi. Amaute in mihing muanin nei loin Pasian bek muang ding uh hi. A om lai Israel mite pen minam dangte lakah, gamlakah sa a beng, tuute a tuah ciangin manin balnen gawp a, a kam sung pan a honkhia zo a om lo, humpinelkai bang ding uh hi. Israel mite in a galte’ tungah a khutte uh lamto-in, a gal khempeuh uh zo gawpin susia mang ding uh hi. Topa in hih bangin ci hi: Tua hun ciangin na sakolte uh hong paihkhiatsakin, na leengte uh ka susia ding hi. Na gam sung uh-a khuapite susia-in, na galpan’na munte uh ka phelkhia ding hi. Na mitphial siamnate uh susia-in, ai saan thei kong omsak nawn kei ding hi. Note in na biak uh milimte leh na biakna songte ka susia gawp ding a, note’ bawlsa nate na bia nawn kei ding uh hi. Na gam sung uhah a om Asherah biakna songte botkhia-in na milimte uh ka susia ding hi. Ka thu hong mang lo minamte tungah hehna tawh phu ka la ding hi. Topa leh Israel a kitotna ngai un. Topa aw, kipan in la, mual liante leh mual neute mai-ah, na thu sung in. No mual liante leh a kip tawntung leitung bulpite aw, Topa a kinialna thu ngai un. Topa in ama mite tawh thu nei a, Israel tawh thu kisel ding hi. Topa in hih bangin thu sung a, “Ka mite aw, note bang hong cih kha ka hi hiam? Bang thu-ah note hong lunggimsak ka hi hiam? Tu-in hong dawng dih un! Bang hang hiam cih leh, Izipt gam panin note kong paikhiatpih a, salsuahna panin note ka hong tankhia hi. Note hong makai dingin, Moses, Aaron, leh Miriam ka hong sawl hi. Ka mite aw, Moab Kumpi Balak in note suk nading a vaihawmna teng, leh Beor’ tapa Balaam in ama nget bangin a sepna teng, limtakin phawk kik un. Note hotkhiat nadingin ka sepna thu na theih nadingun, Shittim leh Gilgal kikal-a thu piangte ngaihsun kik un,” a ci hi. Vantung Pasian ahi Topa mai-ah bang va keng ding ka hi hiam? Amah biakna-in hal dingin kum khat a pha bawngno thaute paipih ding ka hi hiam? Topa kiangah, tuu a tul tulin va puakin, gun tui bangin sathau va luangsak leng, tuate tawh amah lungdam ding ahi hiam? Ka mawhnate maisak nadingin ka ta upa pen tawh va bia ding ka hi hiam? Mun khempeuh-a om no mihingte aw, Topa in a hoih nate hong gen khin zo hi. Topa in note tung panin hong kalh nate in: thuman thute sem ding a, itna kip nei tawntungin, kiniamkhiatna tawh Pasian’ thu man’ ding ahi hi. Khuapi lamah Topa kiko hi; mipil in ama min a zahtak ding ahi hi: Aw, minamte leh khuapi-a kikhawm mite in za un! Thuman lopi-in a ngah uh, migilote’ inn sunga van omte, leh ka deih loh tawitehna man lo zatnate, mangngilh thei ding ka hi hiam? Tawi khaina man lo leh tawisuang man lo a zangte, khahkhong ding ka hi hiam? Na mi haute uh mi zawngte tungah tatsia mahmah in, na khua sung mi khempeuh uh zuau gen vive hi uh a, a kam un khemna thu bekbek gen hi. Tua ahih ciangin na mawhna hangun, note kong suksiat ding ka kipan ta hi. An na nek hangun na kham kei ding uh a, na gil uh kial lai veve ding hi. Nate na koihcing uh hangin phatuam lo ding hi. Galte in tua na koihcing uh nate susia veve ding hi. Khai na tuh uh hangin a gah na at kei ding uh hi. Oliv gah na cil uh hangin a thau na zang kha kei ding uh a, leenggah na cil uh hangin a zu na dawn kha kei ding uh hi. Bang hang hiam cih leh Kumpi Omri’ gamtatna teng zui-in, ama tapa Kumpi Ahab’ sep khempeuh na sem uh a, amau’ gamtat khempeuh na zui uh hi. Tua ahih manin note kong susia ding hi. Minam dangte in note hong nuihsanin, amaute’ simmawhna na thuak ding uh hi. Kei a kamsia hi’ng! Singgah leh leenggah a heu laitak, a gilkial mipa tawh ka kibang hi. Leenggah nek ding om nawn lo a, ka lunggulh theigah beita hi. Leitungah mihoih teng bei khin ta a, Pasian tungah a thuman mi kuamah om nawn lo hi. Mi khempeuh in mi thah ding bek ngaihsun uh a, a kuamah peuh in a sanggampa ngen tawh beng hi. A sia lam-a gamtat ding siam mahmah uh a, uliante leh thukhente in sumgolh ngenin, mi liante in amau’ deih teng pulak uh a, kipawlin vaihawm khawm uh hi. Amaute lakah a hoih pen a, kineite lingkung bang hi a, a thutang pen a, kineite, linghiam bang hi lel uh hi. Pasian in amaute a hilhkholh bangin, a daan piak ding hun hong tung ta a, a lungman’ ding hun uh hi ta hi. Na vengte’ thu up-in nei kei in la, na lawmte zong muan’in, nei kei in. Na ang-a lum na zi kiang nangawn ah thu na gen ding kidawm in. Tu hunin tapate in pate hai bawlin, tanute in nute langpan’ uh a, mote in a teeknu uh lang neih uh hi. Mi khat adingin ama innkuanpihte mah a gal suak mawk hi. Ahi zongin kei ka hih leh Topa ka en ding a, kei hong suaktasak Pasian ka ngak ding hi. Ka Pasian in ka thu hong ngai ding hi. Ka galte aw, kei tungtang ah lungdam kei un. Ka puk hangin ka thokik ding hi. Khuamial sungah ka om hangin Topa in khuavak hong pia ding hi. Amah in ka thu hong sun’sakin, kei adingin thu hong khensak mateng Topa ’ hehna ka thuak ding hi; bang hang hiam cih leh ama’ tungah ka mawh khin zo hi. Amah in khuavak ah hong paipih ding a, ama’ hotkhiatna ka mu ding hi. Tua hun ciangin ka galte in hih thu mu ding uh a, “Na Topa Pasian koi-ah om hiam? ci-in hong tawng ka galte maizum ding uh hi. Amaute guallel ding a, kongzing buan bangin a kisik gawp mu-in kei ka nuam ding hi. Jerusalem khuamite aw, na khuapi kulh uh a kician’ kik ding hun hong tung ding a, tua hun ciangin na gamgi uh nakpi takin kikhan’ ding hi. Nisuahna lam Assiria gam pan hita leh, leitaw lam Izipt gam pan hita leh, a gamlapi tuipi khen’ pan leh a gamlapi mualte, mun khempeuh panin na mite uh hong ciahkik ding uh hi. Ahi zongin a tunga teeng mite’ gitlohna hangin, leitung in sehnel gamkhing suak ding hi. Topa aw, nangma tuu ahi na mite na ciangkhut tawh hong cing in. Gamnuam lei hoihna sungah amau guakin om uh hi. Taanglai huna mah bangin, Bashan leh Gileah gam nuamah tasak in. Izipt gam pan na paikhiat hun lai uh mah bangin, amau’ adingin a lamdang nate ka bawl ding hi. Minam dangte in hih thu mu ding uh a, minam thahat hi napi-in maizum ding uh hi. Lamdang sa-in kam khat zong pau lo ding uh a, hih thu a zakzakna-un a bil uh ngong liang ding hi. Amaute in gul bangin leivui liakin, a bokvak ganhing bangin hong awmtal ding uh a, a bukna uh mun muanhuaite panin lau-in a lingsa-in hong pusuak ding uh a, Topa Pasian hong kihta ding uh hi. Topa aw, nang tawh a kibang Pasian dang om lo a, a om lai na gamluah mite’ mawhna na maisak hi. Nang na heh paisuak kei a, na itna kip nong lak hi. Kote nong khasiat kik ding a, ka mawhnate uh hong sawpkhiatsakin, tuipi taw-ah nong paihsak ding hi. Ka pu ka pate uh tungah nidang lai a, na ciamsa bangin, Abraham’ suan-le-khak ahi nangma mite tungah na cihtakna leh nong itna kip nong lak ding hi. Hih in Nineveh khua tawh kisai thugenna hi a, Elkosh khuami Nahum’ mangmuhna a kiciamtehna lai ahi hi. Topa Pasian in amah a demte koihkhong lo a, amah a langpangte daantatin, a galte thukkik hi. Topa a lungduai mahmah a, a vang zong lian a, ahih hangin mimawhte khahkhong ngei lo hi. A paina peuhpeuh ah huihpi nungin, pingpei kipei a, ama paina hanga leivui leeng in meiipite ahi hi. Amah in tuipi a taii ciangin tuipi kangcip pah a, gunpite zong kangcip sak hi. Bashan gam keu gawpin, Karmel Mual kausan a, Lebanon Mual-a pakpalhte vul hi. Ama mai-ah mualliante liing a, Mualneute tuisuak hi. Ama mai-ah leitang kicim a, leitung leh a tunga om khempeuh liing uh hi. Ama hehna kua in nang zo ding a, a lunghamna kua in thuak zo ding ahi hiam? A hehna meikuang bangin hong khahkhia a, ama mai-ah suangtumpi kitamzan hi. Topa hoih hi; lungkham hunin a mite huh a, amah a bel mite lim takin kem hi. Tuikhang in a suksiat bangin a langte susiagawp a, a galte, khuamial sungah nawhkhia hi. Bang hangin Topa sawm ngam na hi hiam? Amah in nang hong susia ding hi. A su peuhpeuh a dingkik zo om ngei lo hi. Amaute, linglom bangin om uh a, zu leh sa tawh kidiahin a om lai takun ham bangin kihaltum ding hi. Nineveh khuapi aw, gitlohna tawh thu vaihawmin, Topa a sawm, nang’ sungah mi khat om hilo ahi hiam? Topa in ama mite tungah hih bangin thu gen a, “Assiria mite thahat-in a tam mahmah hangin, amaute kisusia-in maimang ding hi. No ka mite na hih uh leh, khat vei kong gimsak khit hangin, kong gimsak kik nawn kei ding hi. Note tungah Assiria mite’ aana neihna ka beisak ta ding a, note hong khihna sikkhaute ka sutat ding hi,” ci hi. Topa in Assiria mite tawh kisai-in hih bangin thu pia hi: “Note na cimang ding uh a, note’ pasiante’ biakinn sunga om milimte ka susia ding hi. Note siahuai lua na hih manun, na hankhuk ding uh a bawlbawl ka hi ta hi,” ci hi. En un, mual tungah kamtaipa hong tai a, gualzawhna thupha hong gen ding ahi hi. Judah mite aw, pawi bawl un la, Pasian’ tunga na ciam bangun gamta un. Bang hang hiam cih leh mi gilote kisusiacip khin a, na gam uh hong simkik ngei nawn lo ding uh hi. Nineveh khuapi aw, nang hong kisim ta a, nang hong sugawp dingpa hong tung ta hi. Na kan uhah pang un la, lampi vil un. Kithawi un la, galdo dingin kiging un. (Israel mite, a galte’ sukgawp ma, a nidang ngeina bangun, Topa in a om sakkik ding a kipan ahi hi). A galkapte in lum san hong keng uh a, puan zong a san mah hong silh uh hi. A sim dingin hong kipan uh a, a sakol leengte uh khuaphia bangin, a sakolte uh hong koplen hi. Sakol leengte kongzing lakah, kisuk leh kito leh uh a, lamkabom khempeuh nawkin leeng kawikawi uh hi. Meikuang bangin kikhawh uh a, khuaphia bangin leeng uh hi. Galkap mangte kikaikhawm a, a galkapte uh thupia hi. Amaute, kan phung lam kiden’na uh a, a lum uh tawh kidal uh hi. Tui luan’ na gei-a kulh kongpite kisatkham a, kumpi inn sungah patauhna om hi. Kumpinu kimanin kipua khia a, a nasemte thuumin kap uh a, dahin a dip uh hum uh hi. Tuibeem kitam pan-a tui luang khia bangin, Nineveh khuapi panin mite taikhia uh hi. “Khawl un, khawl un,” a kicih hangin, khat beek nunghei lo uh hi. Ngunte la un! Khamte la un! Khua sungah sum manpha bei cih om thei lo a, van manpha bei cih om thei lo hi. Nineveh khuapi kisusia-in kinusiacip a, gamkhing suak hi. Launa lungsim tawh kidimin khukte liing kelkel a, mi khempeuh lunggimin a mai-ah si teeng lo hi. Humpinelkai note an a kivakna mun, humpinelkai leh a note lung muanga a omna mun, humpinelkaite’ kua koi-ah om ta ahi hiam? Humpinelkai in sa manin, a zi leh a tate’ adingin balnensak a, a kua sung, sa kibalnen tawh kidimsak ngei hi. Topa in hih bangin ci hi: “Keimah in note’ gal ka hi a, na sakol leengte uh ka haltum ding hi. Na humpinelkai note uh namsau in vattum ding a, midangte’ na na suh teng uh ka susia mang khin ding hi. Na kamtaite uh awging koimah ah kiza nawn lo ding hi,” ci hi. Zuauna leh mithahna tawh a kidim khuapi, van top ding tampi a omna khuapi, tu-in a siacip ding hi ta hi. Ngai un; sakol kisatna a ging, leh leengpei kigawi sakol kop taina khe ging, leh sakol leeng tuan lauhlauh gingte; sakol tung tuangte’ galsimna, namsau phe zalzal, teipi te zalzal! Siluang hawm sim zawh ding hi lo, kiciangin vum venvan. Tua tung mah tawnin gal kido! Nineveh khuapi in a paktatna hangin daan thuak hi. Ngaih baang mel pua-in bum siamna nei a, minamte zolin a khem hi. Tua ahih manin Vanglianpen Topa in hih bangin ci hi: “Nineveh khuapi aw, daan kong pia ding hi. Na nik kong hawkkhiatsak ding a, minamte in guak tanga na omna hong mu ding a, na zumhuaina teng mu ding uh hi. Nang hong huat bawlin, ninbulom tawh kong dimsak ding a, mite in lamdang sakna tawh hong en ding uh hi. Nang hong mu khempeuh nungkik gaih-in, ‘Nineveh khuapi siacip ta hi; kua in khasiat ding hiam?’ ci ding uh hi. Ahi zongin nang hong hehnem nuam kuamah om lo ding hi,” ci hi. Nineveh aw, a kimkot ah tui in a umcih a, amah a dal dingin tuipi nei a, a kulh dingin a kimkot ah tui a om, Thebes khuapi sangin gina zaw kisa zenzen na hi hiam? Nail Gun dung, gam khempeuh uk khin ahih manin, gen zawh lohin a vanglian hi. Put mite leh Libia mite zong ama pawl ahi hi. Tua bang hi napi-in, Thebes khuamite kipua khia-in sal suak uh hi. Konglak mun citengah a tate uh kisatlum hi. A miliante, sikkol kibulhin kipua khia a, amau a man galte in hawm uh hi. Nineveh khuapi aw, nang zong zukham bangin khua na phawk kei ding a, na galte kiang panin tai-in bukna na zong ding hi. Na kulh muan’huaite pen a gah a zun theikung tawh kibang ding a, a kung sing lecin, a gah na kam sung hong tu tawh kibang ding hi. Na galkapte, numei bang hi lel ding a, na galte a lut zawh lohna dingin, na gamsung kihu zo lo ding hi. Mei in na kulh kongpi zawlte kangtum ding hi. Hong ki-umcihna na nan’ nadingin tui tawi-in, na kulhte cian’beh in la, Leiseek seek dingin buan cilin, leiseekna kuang a baihsa-in nei ta lecin zong, tua bang na hih laitakin mei in hong kangtumin, galte in hong vatlum ding hi. Kauphe honpite in an a nek tum bangin, nang na beimang ding hi. Kauphe bangin tampitak na pha khin uh hi. Van-a aksi sangin a tam zaw-in, sum bawl mi na om khin ta uh hi. A kha zalin a leengmang kauphe hon bangin, tu-in amaute om nawn lo uh hi. Na uliante uh ahih leh, phalbi lai-in kulh tungah a bawm miamua, ni a suah ciangin leeng khia mangin, a omna mel a kithei lo kauphe hon tawh kibang hi. Assiria kumpipa aw, na gamsung a ukte si ta a, na uliante ihmu paisuak uh hi. Na mite, mualtung tengah kithehthang a, inn-ah a kaikhawm ding kuamah om lo hi. Na liammate a dam theihna ding om lo a, na meimate a dam thei lo pawl ahi hi. Na thuakna thu a za mi khempeuh in lungdamin a khut uh beng ding hi. Bang hang hiam cih leh na gitlohna a thuak kha lo kuamah om lo hi. Hih in kamsang Habakkuk tungah Topa in mangmuhna sungah a gen ahi hi. Topa aw, bang tan vei huhna hong ngen ding a, hong za lo niloh ding na hi hiam? Gimna thuak ung, ci-in bang tan vei hong kiko ding a, hong hon loin om niloh ding na hi hiam? Bang hangin hih bang siatnate leh lungkhamnate hong musak na hi hiam? Kisuksiatna leh kisukgawpna in hong umcih a, kitotna leh kiseelna, mun citeng ah om hi. Thukham in thu nei zo loin a mawkna suak a, thu a manin kisem ngei lo hi. Thutang thute kileh hei-in, migilote in thuman mite zo zawsop hi. Tua ciangin Topa in a mite kiangah thu gen a, “No, a thuman lo ka minamte aw, na kiim uh a, om minam dangte en dih un, lamdang na sa mahmah ding uh hi. Note kiangah hong kigen ciangin na up zawh het loh ding uh thu khat, tu-in a bawl ding ka hi hi. A om khong thei lo, a kihtak-huai, Khaldea mite ka vang liansak ding a, leitung khempeuh ah amaute pai-in, gam khempeuh zo mang khin ding uh hi. Amaute, lauhuai-in, kihtak-huai mahmah uh a, a gen khempeuh uh nial theih hi lo hi. A sakolte uh, kamkei sangin tai hatzaw a, keivom gilkial sangin kihtakhuai zaw hi. Gamlapi pek panin a sakol tung tuangte hong kipan uh a, a sakolte un lei-ah a khe phut uh hi. Muvanlai in sa a bawh bangin, a galte len’lak uh hi. A susia gawp dingin hong kuankhia uh a, a sukkhak ding uh mi khempeuh lau mahmah uh hi. A gal matte uh tam mahmah a, sehnel zahin kisim zo lo hi. Kumpite simmawh bawl uh a, uliante, nuihsan lel uh hi. Kulh muan’huaite zong nuihsan lel uh a, a kulh pua-ah lei sung vumin, tua tung tawnin khuapi la uh hi. Tua ciangin huih nung bangin paisuak uh a, amau’ hatna bek suang uh hi,” ci hi. Topa aw, a cil pek-a kipan a tawntungin Pasian na hi a, nang in tawntung keima Pasian, a Siangtho Pa na hi hi. Topa aw, kote daantat dingin amaute na seh hi bek a, ka belh Suangpi aw, kote nong thuhilhna ding bekin amaute vang a pia pak bek na hi hi. Ahi zongin hih a gilo zuautat mite bangci thuak zawh na hi hiam? Hih bang siatna a mu dingin na mit siangtho lua a, a gamtat sia mite na thuak zo kei hi. Tua ahih manin, amaute sangin a dikzaw mite a suksiatna-ah, bang hangin daicip na hi hiam? Bang hangin tuipi ngasa bang lelin mihingte bawl a, a uk ding om lo ganhingnote bangin om sak na hi hiam? Amaute in ngasa mat bangin sikkawi tawh mite man uh a, a ngen uh tawh khuhin manin, a ngenpi uh tawh kaikhia a, tua banga a matna hangun lungdamin awng uh hi. A ngente un amau’ deih peuhpeuh ngahsak ahih manin, amaute in a ngente uh bia-in, biak piakna zong pia uh hi. Amaute in a namsau uh zangin, hehpihna mel nei loin mi thatthat ding uh ahi hiam? Ka khuadakna tausang tungah kahin, Topa in kei tungah bang hong gen ding a, ka lungkim lohna teng bang hong ci dawn’ hiam, cih ka ngak ding hi. Tua ciangin Topa in hih bangin hong dawng a, “Nang ka hong muhsak thu khempeuh, a sim nop mahmah dingin tungman peek tungah gelh in. Hih thu a tun’ nading hun hi pah nai lo ahih manin, lai-in ciamteh in. Ahi zongin hong tung baih ta ding a, kong lah khempeuh a manin hong tung ding hi. A tung hak tawh a kibang kha ahi zongin ngak keikai in. Ka seh hun a cin’ ciangin hong tung takpi ding a, hong zekai lua nawn lo ding hi. Tua a hong tung ding thu in, ‘A gilo mite suakta lo ding a, ahih hangin thuman mi in ama upna tawh a nungta ding hi,’” hong ci hi. Hauhna in zuaupi hi a, a huaiham mi in kiphasakin omkhong thei lo a, hankhuk mah bangin, pha zo, cih om sak thei lo a, lungkim hun cih nei thei lo hi. Tua ahih manin minam dangte a ban banin simin uk hi. A zawhna gam mite in amau a zo mite simmawh bawlin, “No aa a hilopi kim lai no’ aa dingin na la uh hi; ahi zongin tu-in gimna na thuak ding uh hi. Note tungah lei hong bate khem bawlin bang tan vei na hauhna uh behlap nuam lai na hi uh hiam?” ci ding uh hi. Note in na phawk ma-un, no mahmah leiba neite na suak ding uh a, na leiba uh a meet hong kisungsak ding hi. Galte in note hong liingsak keuhkeuh ding a, na nate uh hong laksak mang khin ding hi. Note in minam dang tampite’ na na sut uh a, tu-in a om lai mite in note’ na hong sut ding uh hi. Bang hang hiam cih leh note in mite thatin, khuapite leh a sunga teeng mite na bawlsia uh hi. Mi’ van na suhna uh tawh na mite uh hausakin, lauhuaina leh siatna a ngah loh nadingin na inn uh bawl na hih manun, gimna na ngah ding uh hi. Note’ vaihawmna mah in na mite uh tungah maizumna hong tun’ a, minam dangte na suksiatna uh tawh, note mahmah siat nading a bawl na hi uh hi. Note hong langpan’ dingin kulh suangte nangawn kiko ding a, innkamte in zong kikopih ding uh hi. Note in mi thahna tawh khuapi satin, mawhna tawh khuapi phut na hih manun, gimna na ngah ding uh hi. Na zawh uh minamte’ nasepna sate a mawkna suakin, amau’ sepsa teng a khu-in leng mang hi. Hih thu in Vanglianpen Topa ’ pian’sak ahi hi. Tuipi in tui tawh a kidim mah bangin, leitung in Topa ’ minthan’na theihna tawh kidim ding hi. Na hehna uh tawh na gam vengte uh niamkhiatin na mindaisak uh a, zukham bangin amaute hoisak na hih manun, gimna na ngah ding uh hi. Tua ahih manin note in zong minthan’na ngah loin, maizumin mindaina tawh na kidiah ding uh hi. Note mahmah in na hoi dongun na dawn ding uh hi. Topa in daanpiakna hai, note hong dawnsak ding a, na minthan’na uh mindaina suak ding hi. Note in Lebanon gam singkungte phuk na hihmanun note zong hong kiphuk ding a, a ganhingte zong that na hih manun, tu-in ganhingte in note hong lausak ding uh hi. Gam sung khempeuh ah mi thatin na bawlsiatna hang uh, leh khuapite leh a sunga teengte na suksiatna hangun, note tungah hih bangin a hong piang ding ahi hi. Milim, banga kimang ahi hiam? Mihingte’ bawl na khat hi lel a, thuman hong gen thei lo hi. Tua bang a pau thei beek lo pasian khat, a bawlpa in muan’in a neih bang phatuam ahi hiam? Sing a kibawl na khat kiangah, “Khanglo in,” ci-in, a pau thei lo suangtum kiangah, “Tho in,” ci na hih manun, gimna na ngah ding uh hi. Hih bang milim in na hong hilh thei ding ahi hiam? Ngun leh kham tawh a kizut hangin, a sungah nuntakna om lo hi. Topa, a biakinn siangtho sungah om hi; leitung mi khempeuh, ama mai-ah dai dide-in om ta hen. Kamsang Habakkuk in hih bangin thu ngen hi: Topa aw, nangma sepsa thute ka za a, lamdang ka sa mahmah hi. Na hih ngeisa na liante, ko’ hunin zong hong hih kik in. Na heh hun ciang nangawnin zong, hehpihna lungsim hong nei in. Teman khua panin Pasian hong pai a, Paran Mual panin Siangtho Pa hong pai hi. Ama minthan’na in vanpi tuam a, leitung khempeuh, amah phatna tawh kidim hi. Khuaphialep taang bangin hong pai a, a khut sung panin khuavak taang khia hi; tua in a vangliatna a koihna mun ahi hi. Ama mai-ah cinatna tungsak a, tua nungah sihna zuisak pah hi. Amah a khawl ciangin leitung liing a, a et ciangin minam khempeuh liing uh hi. Taangtawng lai-a a totsa, taanglai mualliante kitamkham a, a om tawntung mualneute kimetcip hi. Kush gam mite a lau mahmahna, leh Midian gam mite a liin’na uh ka mu hi. Topa aw, na sakolte tungah nang hong tuangin, na gualzawhna leengte tawh nong pai nadingin, gunpite tungah na hehsuak a, tuipi tungah na thangpai ahi hiam? Na thal lawn dingin na kithawi a, na thallawng sungah thaltang a dimin om hi. Tuipi tawh leitung na phelkhap hi. Mualliante in nang hong muh ciangin liing uh a, van panin guah tampi hong zu hi. Lei nuai-a om tuite ging zuazua a, a tuihualte in sangpipi banto hi. Na thaltang leeng a muh ciang, na teipi tee zalzal a muh ciangin, ni leh kha a omna san-ah khawlcip uh hi. A hehsa-in leitungah na pai a, a sinsosa-in minamte na tuancil hi. Na mihingte a honkhia dingin na paikhia a, na teel kumpipa, a honkhia dingin na kuankhia hi. Mi gilote a makaipa na sugawp a, a nungzui khempeuh tawh zong na sumai hi. Mi cimawhte, mun simtham ah a sugawpte bangin, kote hong suthang dingin huihpi bangin hong pai laitakin, na thal tawh, a galkapmangpa na kaplet hi. Nangmah in na sakolte tawh tuipi na tuancil a, tui lianpite phuan zuazua hi. Hih thute khempeuh ka zak ciangin ka liing gawp a, lau lua-in ka muk liing sapsap hi. Ka guh ka taang hong zen a, guh nei lo bangin ka pukcip suk hi. Ko hong simgawp mite Pasian in a daan piak ding hun, dai takin ka ngak khikhe ding hi. Thei gahte hut khin a, leengguite a gah kei zongin, olive kungte gah lo a, lo-ah an a piang kei zongin, tuu khempeuh si khin a, ganbuk khempeuh a hawm khin zongin, Topa Pasian in keimah hong honkhiapa ahih manin, lungdamin ka kipak lai veve ding hi. Topa Pasian in keima thahatna ahi hi; sakhi khe bangin ka khe hong zaptelsak a, mun sangna ah, lungmuang takin hong paisak hi. (Bang hang hiam cih leh amah in khausai lasakna vante tawh tum theihte hong makaihpa ahi hi). Amon’ tapa Josiah in Judah gamah kumpi ahih lai takin, Topa in Zefaniah’ tungah hih thu pia hi. Zefaniah’ pa Kushi hi a, Kushi’ pa Gedaliah hi a, Gedaliah’ pa Amariah hi a, Amariah’ pa in Kumpi Hezekiah ahi hi. Topa in hih bangin thu gen a, “Leitunga om na khempeuh ka susia ding hi. Mihing leh ganhing, van-a leeng vasa leh tui sunga ngasa, a vekpi-in ka susia ding hi. Mi gilote ka susia ding a, leitunga om mihing khempeuh ka susia ding hi. Topa ahi keimah in hih thu ka gen khin hi. Judah gam mi khempeuh susia-in, Jerusalem khua-a teeng mi khempeuh ka sumai ding hi. Baal milim biakna a them bang lai khempeuh leh tua milim na a sem siampite hih mun panin, a vekpi-in ka sumai ding hi. Innkhumzang ah kahto-in, ni, kha leh aksi a bia mi khempeuh ka susia ding a, keimah hong bia-in, keima tungah thuman ding gen napi-in, Milkom pasian’ min tawh a kiciam teiteite zong, ka susia ding hi. Lam pial a, kei hong zui nawn lote, thu dong dingin kei kiangah hong pai lote, ka susia ding hi,” ci hi. Topa Pasian’ mai-ah gamdai takin om un! Topa ’ ni hong nai ta hi. Topa in biakna-a sa gawh bangin a mite a go dingin kithawi a, a gawh ding mite sian’suah khin hi. Topa in hih bangin thu gen a, “Tua banga mite a kigawh ni-in, uliante leh kumpipa’ tapa, leh gamdang mite’ ngeina a zuite khempeuh, daan ka pia ding hi. Midangte’ sangkil kanin zawhthawh bawl a, khemna leh thahna tawh a ngah uh vante tawh, a Topa uh inn a dimsakte khempeuh, tua ni mahin daan ka pia ding hi,” ci hi. Topa in hih bangin thu gen a, tua ni-in “Jerusalem khua Ngasa Kulh kongpi-ah mite’ kikona na za ding uh a, tua khuapi Veng Nihna sungah mite’ kahna, leh mual neute tungah a puak zaizai-a ging na za ding uh hi. Khuapi Veng Nuainung sunga teeng mite aw, hih bang gamlumna na zak uh ciangin kapin thuum un. Bang hang hiam cih leh sumbukte khempeuh kisia ding uh hi. Tua hun lai takin Jerusalem khua sung, meivak tawh ka zong ding a, thu phawk loin amau’ ngeina bang bangin om cip a, ‘ Topa in a pha hita leh a sia hita leh, bangmah bawl ngei lo hi,’ a ci mite, daan ka pia ding hi. Amau’ neihsa khempeuh kisut ding a, a innte uh kisuksiatsak ding hi. Inn a lam hangun a sungah teeng kha lo ding uh a, leenggui a suan hangun leenggahzu dawn kha lo ding uh hi,” ci hi. Topa ’ ni hong nai ta a, nai mahmahin hong tung hathat hi. Tua Topa ’ ni hong tun’ciangin, galhang pente nangawn cimawhin kap ding uh hi. Tua ni in heh mahmah ni, lungkham sinkham ni, tuahsia-in kisuksiat gawp ni, khua ziingin maimial ni, meiipi kai-in huihpi nun’ ni, galdo nading peengkul a kitum ni, leh kulh nei khuapite leh a tausangte a kisimna-a galkapte’ kiko ni, hi ding hi. Topa in hih bangin thu gen a, “Mihingte tungah lungkhamna lianpi ka tungsak ding a, amaute in mittaw bangin khua zawt ding uh hi. Keima tungah amaute hong khial uh ahih manin, tui bangin a sisan uh kithehthang ding a, a luanghawm uh, leilakah muatcip ding hi,” ci hi. Topa ’ heh thukna ni hong tun’ ciangin, amau’ ngun leh amau’ khamte in honkhia zo lo ding hi. Ama hehna meikuang in leitung khempeuh kangtum ding a, thakhat thu-in leitunga teeng mi khempeuh sumai ding hi. A maizum thei lo minam aw, hoih takin thu ngaihsun in. Ansi bangin hong kizapkhiat ma, Topa ’ hehna na tungah hong tuk ma, Topa in a hehna hong lah ni hun a tun’ ma-in, thu ngaihsun in kikheel in. Kiniamkhiatin, Topa ’ thupiakna a mang, Judah gam mi khempeuh aw, Topa ’ kiang zuan un. A manin gamta un la, kiniamkhiat un. Tua hi leh, Topa ’ hehna hong kilat ni ciangin, tua hehna daan panin na peng thei ding uh hi. Gaza khuapi-ah kuamah om nawn lo ding a, Ashkelon khuapi kinusia ding hi. Ashdod khuamite, sun tangpi-in kihawlkhia ding a, Ekron khuamite kipaikhiatpih mang ding hi. Tuipi gei-a gual teen, no Filistia gam mite aw, gimna na ngah ding uh hi. Filistia mite’ ten’na Kanaan leitang aw, Topa in nang tungah thu hong khen zo hi. Mi khempeuh a bei mang dongin, hong susia ding hi. Tuipi gei-a om leitang aw, tuute’ gamtatna mun, gamlak na suak lel ding hi. Judah mi a om laite in na gamsung luah ding a, amaute in tuu cin’na-in hong nei-in, Ashkelon khua sunga innte sungah zanin lum ding uh hi. Topa ahi amaute’ Pasian in amaute ompih ding a, amaute, citheisak kik ding hi. Vanglianpen Topa in hih bangin thu gen a, “Moab mite in ka mite a simmawhna, Ammon mite in ka mite a zahkona, leh ka mite’ gam sutgawp dingin, a kisaktheih paunate uh ka za khin hi. Keimah in a nungta Israel Pasian ka hih mah bangin, Moab mite, Sodom khuamite bangin kisusia-in, Ammon mite, Gomorrah khuamite bangin kisusia-in, a gam sung uhah lingkung bek po zoin, a gam uh cikhuk tawh kidimin a sia tawntung suakin, a suakta lai ka mite in a neihsa uh sutin, a gam uh a laksak tak kei leh, ci-in ka kiciam hi,” ci hi. Amaute in Vanglianpen Topa’ mite, simmawhin kihisak uh ahih manin, a kiphatsakna hangun Moab mite leh Ammon mite in hih bangin daan thuak ding uh hi. Topa in amaute lausak gawp ding a, leitung pasiante, neu bawl gawp ding hi. Tua ciangin, minam khempeuh in amau’ gam ciat panun amah bia ding uh hi. No Ethiopia mite zong, Topa in namsau tawh hong that ding hi. Topa in leilu lamah a khut hong zanin, Assiria gam susia ding a, Nineveh khuapi susia gawpin, sehnel gamlak suaksak ding hi. Tuuhon leh bawnghonte, tua khua sungah lumin, ganhing namkim phualpi suak ding hi. Gunva leh gunvapite, bangtung zawl-ah tuang ding uh a, kongvangneu-ah keising khuang-in, sangkil tungah va-ak ham ding hi. Taamtaak sing tawh a kilam innte maimang ding hi. A vangliatna a kisak theihpih, lungmuang taka om khuapi tungah, tu-a bangin piang ding hi. Leitungah amau’ khuapi a lianpenin ngaihsun uh hi. Tua hi napi-in gamlak suakin, gamsate’ omna suak ta hi. A mu mi khempeuh in lamdang sa-in ciksa ding uh hi. Ama mite mah nengniamin, thumang loin a tatsia, Jerusalem khuapi in gimna ngah ding hi. Topa ’ thu ngai nuam lo a, a thuhilhna sang nuam lo hi. Topa muang nuam lo a, a Pasian naih nuam lo hi. A uliante, a hawk thei humpinelkai gilkial bang a, a thukhente, keivom gilkial bang uh hi. Zing khuavak mateng a saguh nek a nusia nuam lo, a huaiham gamsate tawh kibang uh hi. A kamsangte kihisak uh a, kamsang citak hi lo uh hi. A siampite in a siangtho nate ninsak a, amau’ angsung ding bek khualna-in Pasian’ thukham lehhei uh hi. Ahi zongin tua khuapi sungah Topa om a, a thuman na bek semin, a khial-in gamta ngei lo hi. Zingsang simin mihingte tungah pelh ngei loin thutang lak hi. Ahi zongin tua lai-a mihing thuman lote, a sia-in gamta teitei uh a, maizumna meel thei thei lo uh hi. Topa in hih bangin thu gen a, “A kiphasak mite ka nilkhia a, a gal panmunte uh ka susia hi. A kongzing lampite uh ka kinusiacip sak a, kuamah in tua lampi tawn nawn lo hi. A khuapi uh kisia gawpin kinusia a, a sungah kuamah om nawn lo hi. Tua ahih manin ka mite in kei hong zahtakin, amau ka thuhilhnate mangngilh lo ding hi, ci-in ka ngaihsun hi. Ahi zongin a gamtatsiat ngei bangin gamta lai veve uh hi,” ci hi. Topa in hih bangin thu gen a, “Tua ahih ciangin minamte ka mawhsak ni hun dong kei hong ngak phot dih un. Minamte leh kumpi gamte kaikhawmin, ka hehna ka thuaksak ding, ka lungsim ka khentat khin hi. Ka heh luatna meikuang tawh, leitung khempeuh kangtum ding hi. Tua ciangin minamte’ lungsim ka hei ding a, amaute in Topa tung bekah thu ngenin, lungsim kikhatin Topa ’ na sem ding uh hi. A gamlapi Ethiopia gam peka om, a kithehthang ka mite nangawn in biakna hong puak ding uh hi. Tua hun ciangin, ka mite in kei nong lehdona hangun, maizumna ding bangmah om nawn lo ding hi. Note’ lak panin a kiphasak a kihisak mite ka hawlkhia ding a, Jerusalem khua a, ka mual siangtho tungah kei nong lehdo nawn kei ding uh hi. Note lakah a kiniamkhiat, mi lungnemte bek, ka suakta sak lai ding a, keima min suangin thu hong ngen ding uh hi. Israel mi a om lai sunte, midang tungah gilo nawn lo ding a, zuauthu gen nawn loin, mi kheem ding zong ngaihsun nawn lo ding uh hi. Amaute cithei-in lungmuangin om ding uh a, kuamah kihta nawn lo ding uh hi,” ci hi. Zion’ tanu aw, nakpi takin la sa in la, Israel aw, lungdamin kiko in, Jerusalem tanu aw, na lungsim khempeuh tawh lungdam in. Topa in na galte hong paihkhiatsak khin a, hong langpang khempeuh hong hawlkhiatsak khin hi. Topa ahi Israel Kumpipa in nang tawh hong om a, na lau nading thu om nawn lo hi. Tua ni ciangin Jerusalem khuapi kiangah, “Lau kei in, Zion aw, Na khut thazaw sak kei in,” kici ding hi. Topa na Pasian un note hong ompih a, ama vangliatna in hong gualzo sak hi. Note tungah Topa lungkim ding a, ama itna tawh hong thak bawl ding hi. Note hangin Topa lungdamin la sa ding a, pawi hun sunga mi lungdamte bang ding hi. Topa in hih bangin thu gen a, “Note adingin a lauhuai thu ka beisak khin a, na mindai nading teng uh kong paihkhiatsak khin hi. En un, tua hun ciangin no hong bawlsiate, daan ka pia ding a, a khebaite honkhia-in, a kipaikhiatpih mite ka ciahpih ding hi. Amau’ maizumna, minthan’na ka suaksak ding a, mi khempeuh in amaute phat ding uh hi. Tua hun ciangin, a kithehthang na mite uh kong kaikhawm ding a, leitung mi khempeuh in note hong pahtawi-in hong phat ding uh hi. A tawpna-ah note na cithei kik ding uh hi,” Topa in ci hi, a ci hi. Persia gam uk kumpi Darias in a uk a kum nihna kum, a kha gukna a ni masa ni-in, kamsang Haggai tungah Topa in thu gen hi. Tua a thu gen pen, Shealtiel’ tapa Zerubbabel, Judah gam ukpa, leh Jehozadak’ tapa Joshua, siampi lianpa tungah gen ding ahi hi. Vanglianpen’ Topa in thu gen a, “Hih mite in, biakinn lamkik ding hun nai lo hi, ci uh hi,” a ci hi. Tua ciangin kamsang Haggai tungah Topa in hih bangin thu gen a, “Ka mite aw, ka biakinn a siacipin a om lai takin, inn hoihpipi sungah note na om ding uh kilawm ahi hiam? Tu laitak-a na omzia uh lim takin ngaihsun un. Khaici tampi na tuh uh hangin an tawm bek na la uh a, an nek ding na neih tei uh hangin na kham ding uh na nei kei uh hi. Dawn ding leenggahzu na neih tei uh hangin na kham ding uh na nei kei uh hi. Puan silh ding na neih tei uh hangin a lum khop ding na nei kei uh hi. Sum thalawhte in zong a khamkhop ding uh thalawh zo lo uh hi. Tu laitak-a na omzia uh lim takin ngaihsun un. Tu-in mual tungah kuanto un la, sing sui un. Tua singte tawh biakinn lamkik le uh cin, kei ka lungdam ding a, nong biak ding uh akilawm bangin kei nong bia thei ding uh hi. An hau dingin na kilamet uh hangin tawmcik bek na nei uh hi. Na neihsunte nangawn uh inn na tun’pih uh hangin kong mutkhiatsak mang khin hi. Bang hangin hong tua cih ka hi hiam? Note khempeuh, nomau’ inn ding ciat lamin na manlah uh a, ka biakinn a siapi-in na koihdakna hang uh ahi hi. Tua thu hangin guah zu lo a, leitang panin bangmah khangkhia zo lo hi. Keimah in gam sung teng, mual tung khempeuh, lo khempeuh, leenggui lo khempeuh, oliv cin’na lo khempeuh, leitang pan-a piang kung khempeuh, mihing, ganhing, leh mite’ nasepna khempeuh ah keuna ka tungsak hi,” a ci hi. Tua ciangin Shealtiel’ tapa Zerubbabel, Jehozadak’ tapa Joshua ahi siampi lianpa, leh salsuahna panin hong ciahkik mi khempeuh in Topa ahi amau’ Pasian’ thu mang uh a, Topa Pasian’ kamtai ahi kamsang Haggai’ gen bangin gamta-in, Topa zahtakin lau uh hi. Tua ciangin Topa ’ kamtai Haggai in mite tungah Topa ’ thugente gensawn a, “ Topa in note kong ompih hi, ci hi,” ci-in gen hi. Tua hi a, Topa in Judah gam ukpa Zerubbabel, siampi lianpa Jehozadak’ tapa Joshua leh salsuahna panin a hong ciahkik mi khempeuh’ sungah biakinn lam nopna lungsim a guan hi. Topa, amau’ Pasian’ biakinn lam dingin hong kithawi uh a, Darias in kumpi a sep a kum nihna kum, a kha gukna a ni sawmnih leh ni li ni-in biakinn lam hong kipan uh hi. Tua kum mah, a kha sagihna a ni sawm nih leh ni khat ni-in kamsang Haggai tungah Topa in thu gen a, Judah gam ukpa Zerubbabel, siampi lianpa Jehozadak’ tapa Joshua leh sal suahna panin hong ciakkik mi khempeuh tungah thu a gen dingin sawl a, “Ni danga biakinn a hoihna dan a ciamteh thei lai na om uh hiam? Tu-in bangci na sa uh hiam? Note’ muhna-ah a gen taak het lo tawh kibang ding hi. Tu-in Zerubbabel aw, thahat in Siampi lianpa, Jehozadak’ tapa Joshua aw, thahat in gam sunga om mi note khempeuh aw, thahat un Topa in ci hi. Note tawh hong omkhawm ka hih manin nasep kipan un. Izipt gam panin na paikhiat lai un, note kong ompih tawntung nading thu kong ciam hi. Tu-in zong ka lungsim in note hong ompih lai ahih manin lau kei un. A sawt loin vanpi leh leipi, tuipi leh leitung ka lokgawp ding hi. Minam khempeuh lokgawp ding ka hih manin, a neihsa uh sum leh paiite, hih munah hong kipuak ding a, biakinn sungah a dimin van hong om ding hi. Leitunga om ngun leh kham khempeuh in keima aa ahi hi. Biakinn thak in a lui sangin hoih zawin thupizaw ding hi. Hih biakinn-ah cihtheihna leh nopsakna kong pia ding hi,” ci sak hi. Gam uk kumpipa Darias in a uk kum nihna mah, a kha kuana a ni sawmnih leh nili ni-in kamsangpa Haggai tungah Topa in thu gen leuleu a, “Hih thu tawh kisai-in siampite’ ngaihsutna dong in: Mi khatpeuh in biakna-a kipia sa siangtho them khat, a puantualpi thep kawm-ah pua kha hen la, tua a puantualpi tawh anlum khatpeuh peuh ahi a, a kihuan an khat peuhpeuh ahi a, leenggahzu, ahih kei leh oliv thau, ahih kei leh an nam khatpeuh peuh ahi zongin su kha leh, tua a sukkhak an pen biakna an siangtho a suak ding hiam?” ci-in dong sak hi. Tua bangin a kidot ciangin siampite in, “Tua puantualpi in a sukkhak ante, biakna an siangtho suak tuan lo hi,” ci-in dawng uh hi. Tua ciangin Haggai in, “Mi khat in misi tawh a kisukkhak manin mi nin a suah khit ciangin hih ante khatpeuh peuh lawng kha leh tua a lawn’ khak ante a nin a suak ding hiam?” ci-in dong hi. Siampite in, “A nin suak ding hi,” ci-in dawng uh hi. Tua ciangin Haggai in thu gen a, “ Topa in hih bangin ci hi: Tu-a nong dawn’na uh mah bangin hih mite’ sepna khempeuh ah tua bangin piang ahih manin, biakna tau tungah a piak uh na khempeuh a nin suak hi. Note tungah a piangsa thute lim takin ngaihsun un. Topa ’ biakinn lam ding na kipat ma-un bangci na hi uh hiam? An seu sawmnih pha ding ci-in ansal-ah na pai uh ciangin seu sawm bek na pha a, leenggahzu thawlpi sawmnga pha ding ci-in leenggahzu kholna beelpi ah na pai uh ciangin thawlpi sawmnih dim bek a na pha hi. Na an ciin’ khempeuh uh cingteek sakin ka kausansak a, tuate nangawn a susia dingin gialpi ka kiatsak hangin note na kisik nuam kei lai lai uh hi, Topa in ci hi. Tu-in, kha kuana a ni sawmnih leh nili ni, biakinn bulpi a kiphuh khit, tu ni-a kipanin lim takin ngaihsun un. Na ansal uh ah na upmawh zah sangun an na tawm zaw lai ding ahi hiam? Leenggui leh theikung, mangkawlsing leh oliv kungte, gah nai lo lai ding ahi hiam? Tua bang hi nawn lo ding a, tu ni-a kipanin note thupha kong pia ding hi, ci hi,” a ci hi. Tua kha a ni sawmnih leh nili ni mahin Topa in Haggai tungah a nih veina thu gen kik a, “Vanpi leh leipi a lokgawp ding ka hihna thu, Judah gam ukpa Zerubbabel kiangah gen in. Kumpi gam khempeuh lumletin a vangliatna uh a beisak ding ka hi hi. Leengte leh leeng hawlte ka lawnthal ding a, sakol leengte leh a tung tuangte puk ding uh a, amaute khat leh khat kithat lum ding uh hi. Ka nasem Zerubbabel aw, tua ni ciangin nang hong la-in ka min gelhna zungbuhin kong bawl ding hi. Bang hang hiam cih leh nang in ka hong teelpa na hi hi, Vanglianpen Topa in ci hi, ci-in gen in,” a ci hi. Persia gam uk Kumpipa Darias in a uk a kum nihna kum, a kha giatna sungin, Topa in kamsang Zekhariah tungah thu gen hi. (Zekhariah in Berekhiah’ tapa hi a, ama pu in Iddo ahi hi.) Topa in Zekhariah kiangah, “Mite tungah hih bangin thu gen in la, ‘Na pu na pate uh tungah Topa ahi keimah ka heh mahmah hi. Ahi zongin tu-in kei kiangah hong ciahkik le uh cin, kei zong note kiangah kong paikik ding hi. Na pu na pate uh bang nawn kei un. Nidanga kamsangte in amaute kiangah ka thu gen uh a, gamtatsia gamta loin, a mawh nawn lohna ding uh hilh uh hi. Ahi zongin amaute in ka thu ngai nuam loin, ka thu hong mang lo uh hi. Tu-in na pu na pate uh koi-ah om ahi hiam? Tua kamsangte nungta lai sa na hi uh hiam? Ahi zongin ka nasem ahi kamsangte’ tung tawnin ka hilhkholhna leh ka thupiaknate in note dongin hong su kha lo ding sa na hi uh hiam? Tua ahih ciangin a tawpna-ah amaute kisik uh a, hih dinga ka lungsimah ka geelsa bangin amau’ gamtatna tawh kizui-in daan ka piakna thu phawk uh hi,’ ci in,” a ci hi. Darias in a uk a kum nihna kum, kha sawm leh kha khatna ahi Shebat kha ni sawmnih leh ni li ni-in Topa in kei tungah thu hong gen a, zanin mang hong musak hi. Topa ’ vantungmi khat, sakol san khat tungah a tuang ka mu hi. Kuam sunga om mui singkungte lakah amah khawl a, ama nungah sakol dang a san, a gial, a kang om hi. Tua ciangin keimah in, “Sia aw, hih sakolte bang a cih nopna ahi hiam?” ci-in ka dong hi. Vantungmi in hong dawng a, “Bang a cih nopna hiam cih kong lak ding hi. Hih sakol tung tuangte pai kawikawi-in leitung a en dingin Topa in a sawl ahi hi,” hong ci hi. Tua ciangin mui kung lakah a khawl Topa ’ vantungmite kiangah amaute in, “Leitung khempeuh ka en kawikawi khin uh a, leitung khempeuh khua phawk loin nuam takin om uh hi,” ci-in thu zasak uh hi. Tua ciangin Topa ’ vantungmi in, “Vanglianpen Topa aw, Jerusalem khuapi leh Judah gam khuapite tungah kum sawmsagih sung na heh khin ta hi. Amaute hehpih loin bang tan vei om lai ding na hi hiam?” ci hi. Tua ciangin Topa in dikna leh hehnepna kam tawh vantungmi dawng a, Vanglianpen Topa in ama tungah a gensa thute keimah in ka taangko sawn nadingin tua vantungmi in kei hong sawl a, “Ka khuapi siangtho Jerusalem, nakpi takin itin ka lunghimawh hi. Tua banga nuam taka a om hithiat minamte tungah ka heh mahmah hi. Ka mite tungah ka hehna ki-ip tentanin ka om lai takin, hih minam dangte in ka mite’ gimna nasiasak semsem uh hi. Tua ahih ciangin Jerusalem khuapi tungah ka hehpihna a lak dingin ka hong paikik hi. Tua khuapi sungah ka biakinn kilam kik ding a, khuapi kulh zong kiciang kik ding hi, Topa in ci hi, ci-in gen in,” hong ci hi. Tua ciangin vantungmi in ka taangko nading hong genkik leuleu a, “Ama khuapite nakpi takin cithei kikin, Jerusalem khuapi a hehnep kik nading, leh ama khuapi-in Zion a neihkik nading, Topa in gen hi, ci-in gen in,” hong ci hi. Ka khuadak leh saki li ka mu hi. Bang a cih nopna ahi hiam, ci-in vantungmi kiangah ka dong hi. Amah in hong dawng a, “Judah mite, Israel mite, leh Jerusalem mite a theihthang gawp leitung vangliatnate saki a cih nopna hi,” hong ci hi. Tua ciangin Topa in sek tawi mihing li hong lak hi. Hih mite a bang hih ding ahi hiam, ci-in ka dong hi. Amah in hong dawng a, “Hih saki lite in Judah mite thehthang gawp a, a lang uhah kuamah pang ngam lo ahih manin, tu-in hih sek tawi lite in Judah gam sugawpin a mite a thehthang gawp minamte lau sakin a lawnthal ding ahi hi,” hong ci hi. Ka muhna dang khat leuleu-ah, a khut sungah tehna khau a tawi mi khat ka mu hi. “Koi-a pai ding na hi hiam?” ci-in ka dong a, amah in “Jerusalem khuapi a sauna leh a zaina ka theih nadingin a teh dingin a pai ding ka hi hi,” hong ci hi. Tua ciangin vantung mipa hong paikhia a, vantungmi dang khat in amah na dawntuah hi. Tua ciangin vantungmi a masapa in a dawntuahpa kiangah, “Va tai in la, tehna khau a tawi tangvalpa kiangah hih thu va gen in, Jerusalem khua sungah mihing leh ganhing tam mahmah ding ahih manin Jerusalem kulh huam sungah ta zo lo ding uh hi. Tua khuapi a hu dingin meikulh bangin Topa mahmah a om nading, leh tua khua sungah a minthan’na tawh a teen’ nading thu, Topa in kamciam zo hi, ci-in va gen in,” a ci hi. Topa in ama mite kiangah, “Mun khempeuhah note kong thehthang khin hi. “Hong pai un! Hong pai un! Saklam gam panin taikhia un.” Babilon-ah a om ka mite aw, Zion-ah tai un,” ci hi. Hih bangin mang ka muh khit ciangin, ama mite’ na a sut gawp minam dangte kiangah thu a gen dingin Vanglianpen T opa in kei hong sawl a, “ Topa ’ mite a su mi peuhpeuh in a mit nauta banga a na manpha pen khat a su ahi hi. Topa mahmah in note hong su ding a, ni danga note’ na hong sepsak mite in tu-in note’ nate hong lehsuh kik ding uh hi,” hong cisak hi. Hih bangin thu hong pian’ ciangin Vanglianpen T opa in kei hong sawl lam tak na thei ding uh hi. Topa in hih bangin ci hi: “Jerusalem mite aw, lungdamin la sa un. Note tawh hong omkhawm ta ding ka hi hi,” ci hi. Tua hun ciangin T opa kiangah minam tampi hong pai ding uh a, ama mite suak ding uh hi. T opa in note hong ompih ding a, tua ciangin note kiangah kei a hong sawlna thu na thei ding uh hi. Judah mite in gam siangtho sungah Topa ’ neihtuam mite hong suakkik ding a, Jerusalem khua pen a it penpen khuapi hong hi kik ding hi. Mi khempeuh aw, T opa ’ mai-ah gamdai-in om un. Bang hang hiam cih leh a siangtho ama omna mun panin amah hong paikhia ta hi. Topa in mang hong musak a, Topa ’ vantungmi mai-ah siampi lian Joshua ding-in, a mawhna a zong dingin a kiangah Satan zong a om ka mu hi. Topa ’ vantungmi in Satan kiangah, “Satan aw, Topa in nang hong taai hi. Jerusalem a it Topa in nang hong taai hi. Hih Joshua pen, meikhuk sung panin a kiteenkhia singkhuah tawh kibang hi,” a ci hi. Joshua ahih leh vantungmi’ mai-ah ding a, puan a nin mahmah silh hi. Vantungmi in ama sawltak van mi dangte kiangah, “Hih mipa’ silh a puan ninte suah khiatsak un,” ci-in thu pia hi. Tua ciangin vantungmi in Joshua kiangah, “Na mawhna teng kong paih khiatsak khin a, tu-in na silh dingin puan thak ka hong pia ding hi,” ci hi. Tua ciangin a sawltak vanmite thu pia a, Joshua’ lu tungah dial siangtho a khipsak ding uh sawl hi. Topa ’ vantungmi tua munah a din’ sung mahin, amaute in zong Joshua, dial siangtho khimsakin, tua khit ciangin puan siangtho zong silhsak uh hi. Tua ciangin Topa ’ vantungmi in Joshua kiangah lim takin thu gen a, Vanglianpen Topa in hih bangin ci hi: “Ka thukhamte zui a, kong sawl thute na sep leh, ka biakinn sung leh biakinn huang sung teng na uk ding a, hih ka kianga om vantungmite’ thu ka ngaih bangin nangma thu zong ka ngai ding hi. Tua ahih ciangin siampi lian Joshua aw, ngai in; ama siampi pih ahi no adangte in zong ngai un. Note in mai lam thu hoih nadingin lim na hi uh hi. Sing bangin A Sel ka nasempa khat kong paisak ding hi. Joshua’ omna mai-ah, mittang sagih a nei suang khat ka koih hi; tua suang tungah lai ka gelh ding a, ni khat sungin hih gam mite’ mawhna ka paihkhiatsak ding hi. Tua ni ciangin note khempeuh in leenggui leh theikungte hau-in nuam na sa ding uh a, na veengte ciat un hong nekpihin hong lungdampih nadingun na sam ding uh hi, Vanglianpen Topa in ci hi,” a ci hi. Kei tawh a kiho vantungmi mah hong paikik a, a ihmu kimlai a kiphong bang keekin kei hong khanglosak hi. Amah in, “Bang na mu hiam?” ci-in hong dong hi. Kei zong, “Kham tawh a kibawl meivakkhuam khat ka mu hi. Tua meivakkhuam in meivak sagih nei a, meivak tui koih nading hai khat zong a khuam dawnah om hi. Tua meivak sagihte in meivakkhau nei ciat uh hi. Meivakkhuam gei-ah oliv kung nih zong om a, meivakkhuam lang tuakah om uh hi,” ci-in ka dawng hi. Tua ciangin kei zong vantungmi kiangah, “Sia aw; hihte bang a cih nopna ahi hiam?” ci-in ka dot ciangin, amah in, “A cih nopna thei lo na hi hiam?” ci-in hong dong a, kei zong “Sia aw, ka thei kei hi,” ci-in ka dawngkik hi. Tua ciangin vantungmi in kei kiangah, “ Topa in Zerubbabel’ tungah hih bangin thu gen hi; Thagum hat hang hi lo, vangliatna hang zong hi lo, keima tung panin na ngah Kha hang bek tawh na ma na tun’ zo ding hi. Thu haksa pente nangawn in na ma hong khaktan zo lo ding hi. Biakinn na lamkik ding a, mite in, ‘Hoih mahmah hi,’ ci-in a ot ngeii-ngai lai takin a khupna suang na ciang ding hi, hong ci hi,” a ci hi. Topa in kei tungah thu hong gen hi. Amah in, “Zerubbabel in biakinn bulpi phut khin a, biakinn lam zong zo ding hi. Tua ciangin ka mite in, amaute kiangah nang kong sawlna thu thei ding uh hi. A ma uh a telh loh manin ka mite lungkia uh a, ahi zongin Zerubbabel in biakinn lam nasep a makaihna a muh uh ciangin a lung uh damkik ding hi,” hong ci hi. Vantungmi in, “Meivak sagihte in, leitung khempeuh a etna Topa ’ mittang sagih ahi hi,” hong ci hi. Tua ciangin kei zong ama kiangah, “Meivakkhuam pang tuak-a om oliv kung nihte bang a cih nopna ahi hiam? Oliv thau a luan’ khiatna kham tuizawl nihte’ gei-a om oliv hiang nihte bang a cih nopna ahi hiam?” ci-in ka dong hi. Amah in, “Thei lo na hi hiam?” ci-in hong dong a, kei zong, “Sia aw, thei kei ing,” ci-in ka dawng hi. Tua ciangin amah in, “Leitung khempeuh’ Topa ’ na a sem dingin Pasian in teelin sathau a nilh mi nihte a cih nopna ahi hi,” hong ci hi. Ka khuadak kik leh huih lakah a leeng laizial khat ka mu hi. Vantungmi in, “Bang mu na hi hiam?” ci-in hong dong a, kei zong, “Laizial a leeng khat ka mu a, a dung pi sawmthum pha-in, a vai pi sawm leh pi nga pha hi,” ci-in ka dawng hi. Tua ciangin amah kei kiangah, “leitung gam khempeuhah a pai ding hamsiatnate, hih lai tungah kigelh hi. Guta khempeuh, gam sung panin kisiak khia mang ding hi, ci-in laizial dal lang khatah kigelh a, a man lopi-in ka min tawh thuciam mi khempeuh zong kisiak khia mang ding hi, ci-in a lang khatah kigelh hi. Vanglianpen Topa in hih samsiatna a khahkhiatna ding thu gen a, guta mite khempeuh leh a man loin ka min tawh thuciam mite khempeuh’ inn sungah lut ding hi. Tua bang mite’ inn sungah a tawntungin hamsiatna omin, amaute-a kipan a sing a suang, a vekpi-in kisumai ding hi,” hong ci hi. Tua ciangin vantungmi hong kilang kikin kei kiangah, “Tu-a hong pai ding en in,” hong ci hi. Kei zong, “Bang ahi hiam?” ci-in ka dong hi. Amah in hong dawng a, “Tua in ciangpi hi a, gamsung khempeuh’ mawhna lim ahi hi,” hong ci hi. Tua ciangpi a sin in haknaw kibawl ahi hi. Tua banga ka et lai takin haknaw kibawl tua ciangpi sin pen kidomto a, tua ciangpi sungah numei khat tu hi. Tua ciangin vantungmi in, “Hih numei in gitlohna lim ahi hi,” hong ci hi. Tua ciangin vantungmi in ciangpi sungah tua numei hensuk kik a, a sin tawh tua ciangpi sinkik hi. Tua ciangin ka khuadak leh numei nih ka mu a, tui-vapi bangin kha nei-in, keima lamah hong leeng uh hi. Van lamah tua ciangpi leh’pih to uh hi. Tua ciangin vantungmi kiangah, “Koi lai-ah len’pih ding ahi uh hiam?” ci-in ka dong hi. Amah in, “Biakinn khat a lamsak dingin Babilon gamah a len’pih ding ahi uh hi. Biakinn a lamsak uh a zawh uh ciangin, biak dingin tua ciangpi kikoih ding hi,” ci-in hong dawng hi. Mang adang khat ka mu leuleu hi. Sumngo mual nih kikal panin sakolleeng li hong paikhia ka mu hi. A leeng masa pen sakol san in kai a, a nihna, sakol vom in kai a, a thumna, sakol kang in kai a, a lina, sakol gial in kai hi. Tua ciangin vantungmi kiangah, “Sia aw, hih sakolleengte bang a cih nopna ahi hiam?” ci-in ka dong hi. Tua ciangin amah in hong dawng a, “Hihte in vantunga om kha lite a cih nopna hi a, leitung khempeuhte’ Topa kiang panin a hong paikhia ahi uh hi,” hong ci hi. Sakol vomte in a kaih leeng pen leilu lam Babilon gamah a pai ding hi a, sakol kangte nitumna lam, sakol gialte leitaw lam, sakol sante nisuahna lam gamah a pai ding ahi hi. Tua sakolte, pai khia-in leitung teng a et ding uh ngaklah mahmah uh hi. Tua ahih manin vantungmi in, “Pai un la, leitung teng va en un,” ci-in thu pia hi. Amaute zong pai-in va en uh hi. Tua ciangin vantungmi in kei hong otsan a, “Leilu lam Babilon gamah a paite in Topa ’ hehna damsak hi,” hong ci hi. Topa in kei tungah thu hong gen hi. Amah in, “Babilon gam salsuahna pan a hong ciahkik Heldai, Tobijah, leh Jedaiahte’ hong piak letsongte la in la, tua na lak ni mahin, Zefaniah’ tapa Josiah’ innah paipih in. Amaute’ hong piak ngun leh khamte zangin kumpi lukhu khat bawl in la, Johozadak’ tapa, siampi lian a sem Joshua khusak in. Ama kiangah, ‘ Topa in hih bangin ci hi: “Hih mipa in sing bangin A Sel a kici mipa ahi hi. A omna peuhpeuh-ah amah cithei ding a, Topa ’ biakinn lamkik ding hi. Amah in Topa ’ biakinn a lam dingpa hi a, kumpite’ ngah theih minliatna ngahin, ama mite uk ding hi. Ama kumpi tokhom gei-ah siampi khat om ding a, kithutuakin kilemin na semkhawm ding uh hi,” ci hi,’ va ci in. Tua kumpi lukhu pen Heldai, Tobijah, Jedaiah, leh Josiahte pahtawi-in phawk nadingin biakinn sungah om ding hi,” hong ci hi. Gamlapi-a teeng mite hong pai-in Topa ’ inn lam nasep hong huh ding uh hi. Tua biakinn a kilam kik ciangin Vanglianpen Topa in note kiangah kei a hong sawlna thu na thei ding uh hi. Topa na Pasian uh’ thupiaknate cing takin na zuih nak uh leh tu-a ka gen bangin hong piang ding hi. Kumpi Darias in a uk a kum lina, a kha kuana Khislev kha a ni li ni-in Topa in Zekhariah tungah thu gen hi. Tua ahih manin Topa in kei tungah thu hong gen a, “Gam sung mi khempeuh leh siampite tungah hih bangin gen in: Amaute in a beisa kum sawmsagih sung kha ngana leh kha sagihna sungin an tangin a kahna uh, kei hong pahtawina uh hi lo hi. A an nek a tui dawnte uh zong amau’ duh man bek hi,” hong ci hi. Jerusalem cithei-in a khua sungah mi tampi omin, leitaw lam gam, nitumna lam gam, a kim a pam khuapite-ah mi tampi teengin a om hun lai takin, tu-a mah bangin Topa in a kamsang masate’ tung tawnin a gensa thu ahi hi. Topa in Zekhariah tungah thu gen a, “Note in thu a tangin khenin, khat leh khat tungah itna leh hehpihna kilakin, note lakah a om meigong, tagah, gamdang mite, ahih kei leh mi zawngte gim pia loin, khat leh khat kisiatsak nading na ngaihsut loh nading uh thu ka hong pia zo hi,” ci hi. Ahi zongin amaute in mang nuam het lo uh a, hih thute ngaihsutin zong nei nuam lo uh hi. Amaute in a lungsim uh suangtum bangin saksak uh a, Vanglianpen Topa in taanglai kamsangte tung tawnin a Kha Siangtho tawh a gen thuhilhnate ngai nuam lo uh hi. Tua ahih manin Topa heh mahmah hi. Amaute ka hopih ciangin hong ngai nuam lo uh hi; kei zong amaute’ hong thungetna ka ngai kei ding hi, Topa in ci hi. Tua ahih manin Topa in “Huihpi’ mut khiat bangin amaute thehthang gawpin, a theih ngei lohna uh gam dangah amaute teeng ding uh hi. Amau’ nusiat leitang hoih in zong gamkhing suak ding a, a sungah kuamah om nawn loin daicip ding hi,” a ci hi. Vanglianpen Topa in kei tungah thu hong gen a, amah in, “Jerusalem mite ka it luatna hangin Jerusalem khuapi ka huh nuam mahmah a, hih ka it luatna in a galte tungah ka heh hong suaksak hi. Ka khuapi Zion ah ciahkikin Jerusalem ah ka teeng ding hi. Tua ciangin Jerusalem pen a citak khuapi ci-in minthang ding a, Vanglianpen Topa ’ mual in mual siangtho kici ding hi. Jerusalem khuapi kongzing leh lamkabomte-ah a tu dingin puteekte omkik ding a, teek lua kisa-in ciangkhut khunin pai ding uh hi. Kongzing khempeuh ah numei naupang kimawlin phezaizai ding uh hi. Tu-in a om lai note adingin hih thu a hi thei lo ding tawh a kibat hangin kei adingin ahi mawh ding thu hi lo hi. Nisuahna leh nitumna gamte panin ka mite ka honkhia ding a, Jerusalem khua sungah ka tun’pih kik ding hi. Amaute in keima mi hi-in, kei in amau’ Pasian ka hi ding a, amau tawh ka thuciamnate uh lim takin ka zui ding uh hi. “Thakhauhin lungsim hang un. Ka biakinn a kilamkik nading a bul a kiphuh lai takin kamsangte in a gen thute mah a za na hi uh hi. Tua hun ma-in mi ahi a, ganhing ahi zongin na a sem dingin kuamah in cial zo lo a, galte kihtakna hangin kuamah a ut utin om thei lo hi. Mi khat leh khat ka kidosak hi. Ahi zongin tu-in a suakta lai hih minamte, ni danga-te ka bangsak kei ding hi. Lungnuam takin lo kho sing pua-in nuamsa ding uh hi. Leengguite gah pha-in, lo-ah an tampi piang-in, guah tampi zu ding a, a suakta lai ka minamte tungah hih bang thupha khempeuh ka tungsak ding hi. A beisa hun-ah, Judah gam mite leh Israel gam mite pen, minam dangte in hamsiatna kamin zang uh a, ‘Judah leh Israelte thuak bangin thuak un,’ kici uh hi. Ahi zongin note kong honkhia ding a, tu-in midangte in, ‘Judah leh Israel bangin thupha ngah un,’ ci-in thupha piakna-in kinei ding uh hi. Tua ahih manin na lungsim uh hangsak un la lau kei un. “Na pu na pate un kei hong hehsak ciangin amaute tungah siatna tun’sak ding ka ngaihsun a, ka lungsim ka khiam het kei hi. Ahi zongin tu-in Jerusalem khuamite leh Judah gam mite tungah thupha piak ding ka ngaihsun hi. Tua ahih ciangin lunghimawh kei un. Note, hih bangin gamta un: Note khat leh khat tungah thuman thutak kam kipau un. Thukhenna zumah, kilemna a piangsak ding thutang zang un. Khat leh khat kisiatsak nading vaihawm kei un la, a man lopi-in teci pangin kiciam kei un. Zuauna, thuman lohna, leh kibawlsiatnate ka deih kei hi,” hong ci hi. Vanglianpen Topa in kei tungah thu hong gen a, amah in, “Kha lina, kha ngana, kha sagihna, leh kha sawmna sunga antan’nate pen, Judah gam mite’ adingin lungdamin kipakin pawi bawlna hun suak ta ding hi. Tua ahih manin thuman leh kilemna deih pha un,” hong ci hi. Vanglianpen Topa in hih bangin ci hi: “Minam liante leh khuapi liante panin Jerusalem ah mi hong pai hun hong tung ding hi. Khuapi khat-a om mite in khuapi danga om mite kiangah, ‘Vanglianpen Topa bia-in ama tung panin thupha ka ngen ding uh hi. Hong zui un,’ ci ding uh hi. A vanglian a thahat minamte in Vanglianpen Topa a bia ding leh ama tung pan thupha a ngen dingin Jerusalem ah hong pai ding uh hi. Tua hun ciangin minam tuamtuamte sung panin mi sawm, Judah mi khat kiangah hong pai-in, ‘Pasian in note hong ompihna thu za ka hih manun na nung hong zuisak in,’ ci-in thuum ding uh hi,” a ci hi. Topa ’ thugenna: Hadrak gamte’ daantuah nading Topa in thukhen zo a, Damaskas khuapi in zong tuak ding hi. Israel minam khempeuh, Topa ’ aa ahih mah bangin, leitung minam khempeuh zong Topa ’ aa ahi hi. Hadrak tawh a kigizawng Hamath zong, ama’ aa hi a, siamna a nei Tai-ar khuapi leh Sidon khuapite zong, ama’ aa mah ahi hi. Tai-ar khuapi in galnan’na kulh bawl a, leivui zahin ngun leh kham hau a, kongzing nin zahin kiciang venvan hi. Ahi zongin, Topa in a neih khempeuh laksakin, tuipi sungah paihsak ding a, a khuapi haltum ding hi. Ashkelon khuapi in hih thu mu-in lau ding a, Gaza khuapi in zong gimlawh ding hi. A lametna teng bei ding ahih manin, Ekron khuapi in zong gimlawh ding hi. Gaza khuapi in a kumpipa taan ding a, Ashkelon khuapi kinusiacip ding hi. Ashdod khuapi-ah kahbia mite teeng ding a, a kiphasak Filistia mite ka beisak ding hi. Amaute in sa, a sisan tawh ne nawn lo ding uh a, a kikham ante zong tang ding uh hi. A suakta sun teng, keima mite suak ding uh a, Judah minam lakah beh khat bang ding uh hi. Jebus mite mah bangin Ekron khuamite zong, keima mi suak ding uh hi. Tua ciangin ka gamsung ka hu ding a, galte ka nawksak kei ding hi. Ka mihingte’ thuakna mu khin ka hih manin, mi gilote ka bawlsiasak nawn kei ding hi. Zion mite aw, nakpi takin lungdam un. Jerusalem mite aw, lungdamin awng un. En un, na kumpipa uh hong pai hi. Amah, dikna leh gupkhiatna tawh hong pai a, ahi zongin kiniamkhiatna tawh hong pai-in sin nai loh lano tungah hong tuang hi. Gal kidona leengte, Israel gam pan beisakin, sakol galkapte, Judah gam pan ka la khia ding a, galdona-a kizang thalte, kisusia ding hi. Na kumpipa un, minamte lakah kilemna thu gen ding a, amah in, tuipi mong khat pan tuipi mong khat dong, Eufrates gunpi panin leimong dongin uk ding hi. Sisan tawh a kikipsak, note tawh ka thuciamna hangin, na salsuahna uh keugaw gam panin, note ka hong suaktasak ding hi. Lametna a om ta, no salte aw, ciahkik un la, a muanhuai na mun ngei uh zuankik un. Note’ thuaknasa a zah nihin, thupha ka hong piak nading, tu ni-in note kiangah ka hong gen hi. Grik mite sim nadingin, Judah thal bangin keek-in, Israel thaltang-in ka zang ding a, Zion mite namsau-in ka zang ding hi. Ama mite tungah Topa kilang ding a, a thaltang lot khuaphia bang ding hi. Topa Pasian in peengkul tum ding a, leitaw lam pan-a hong nung huihpi tawh va kuankhia ding hi. Vanglianpen Topa in ama mite hu ding a, ama mite in a galte uh susia ding hi. Galdona sungah, zukham bangin awng gawp ding uh a, a galte uh’ sisan luangsak gawp ding uh hi. Biakna site, biakna tau tungah, hai-a sun tawh kibangin luangsak ding uh hi. Tuucingpa in a tuuhonte, lauhuaina pan a hot bangin, tua ni ciangin Topa, amau’ Pasian in a mite honkhia ding hi. Kumpi lukhu tunga suangmanphate bangin, ama gam sungah a mite taang ding uh hi. Tua thu bangzah takin hoihin nuam ding ahi hiam! Anlim nekna in tangvalte thahatsak ding a, leenggahtui thak dawnna in nungakte thadimsak ding hi. Singkung lopa a sel hunin, Topa ’ kiang pan guah ngen un. Meii kaisakin, guah zusak a, ankung khempeuh a dumsakpa in Topa ahi hi. Mihingte in milim peuh, thudotin nei uh a, a thu ngahte uh, zuauthu leh a mawkna hi lel hi. Mang khia thei-a kineite in lamlak khial uh a, amau’ hehnepnate, a mawknapi hi lel hi. Tua ahih manin, tuu bangin mite mangthang uh a, makai a neih loh manun gimna ngah uh hi. Ka mi a makaite tungah ka heh suak a, amaute daan ka pia ding hi. Judah mite in, Vanglianpen Topa ahi keima aa hi a, amaute lim takin keemin, ka sakol galkap thahatte hi ding uh hi. Amaute sung panin innkiu suang khetphim galkap mangte, gam ukte, hong khangkhia ding uh hi. Kongzing buannawng lakah, a galte a tuancil gawp galkapte bangin, amaute gualzo ding uh a, Topa in a ompih manin amaute in galdo ding uh a, a galte’ sakol galkapte zo gawp ding uh hi. Judah mite, ka thahatsak ding a, Josef’ innkuan ka honkhia ding hi. Amaute ka khasiat ding a, innah ka ciahpih kik ding hi. Amaute cik mah-a ka nial ngei loh bang keekin, nuam takin om ding uh hi. Keimah in Topa, amau’ Pasian ka hi a, amau’ thungetnate ka pia ding hi. Israel mite’ galkap hatte bang ding uh a, zukham lungnuam, bang ding uh hi. A suan a khakte un hih gualzawhna phawkin lungdam ding uh a, Topa ’ bawlna hangin kipak ding uh hi. Amaute samin, ka kaikhawm ding a, amaute honkhia-in, ni danga zahin mi tampi ka phasak ding hi. Mi namdangte lakah amaute ka thehthang hangin, a gamlapi gam panin kei hong phawk ding uh hi. Amaute leh a tate uh suakta-in, innah hong ciahkhawm ding uh hi. Izipt leh Assiria gam panin amaute ka ciahpih kik ding a, amau’ gam amau’ lei-ah ka teengsak ding hi. Gilead gam leh Lebanon gamah zong ka teengsak ding a, gam khempeuhah mi dim ding hi. Amaute in, lungkhamna tuipi a phutkhak uh ciangin, keimah in tuipi hualte ka vatmai ding a, Nail gun tuithukte kangcip ding hi. Assiria mite ka niamkhiat ding a, Izipt in a vangliatna taan ding hi. Ka mite ka thahatsak ding a, amaute in kei hong bia-in ka thu hong mang ding uh hi, Topa in ci hi. Mei in na taamtaak kungte a kat theih nadingin, na kongpite hong in, Lebanon aw, Taaksan kungte aw, kapin thuum un; taamtaak kungte pukkhin a, a minthang singkungte kisia ta hi. Bashan tawsaw kungte aw, kapin thuum un; gammang tupi sing teng kiphuk ta hi. Tuucingte, a minthan’na uh beita ahih manin, dahin kap uh hi. A tulak inn uh kisusia khin ahih manin humpinelkaite’ hawkna za un. Topa ka Pasian in kei tungah thu hong gen a, “Gawh dinga kikoih tuuhonte va cing in. Tuu neite in a tuute go uh a, ahi zongin daan kipia lo hi. Amaute in a tuusa zuak uh a, ‘ Topa in thupha ngah ta hen. Tu-in i hau ta hi,’ ci uh hi. A tuucingte mahmah in a tuute hehpihna nei lo uh hi. Tua ahih ciangin hih gam-a a teeng mite ka hehpih nawn kei ding hi. Amaute a ukpa leh a kumpipa’ khut nuai-ah mi khempeuh ka koih ding hi. Gam uk mite in gam sung teng susia gawp dinga amau’ suksiatna panin kuamah ka honkhia kei ding hi,” hong ci hi. Tua summeet bawlte in kei hong cial uh a, a kigo ding tuute a cingpa ka suak hi. Kei zong ciangkhut nih ka la a, khat pen Hehpihna ci-in min ka phuak a, a khat pen Kipawlna ci-in min ka phuak hi. Tua hi a, kei zong tua tuute a cingin ka om hi. Kha khat sungin tuucing thumte ka notkhia hi. Bang hang hiam cih leh amaute tungah ka lungduai zo nawn kei a, amaute in kei hong mudah uh hi. Tua ciangin kei zong tuuhonte kiangah, “Note ka hong cing nawn kei ding hi. A si ding teng si un la, a kisusia ding teng siacip un. A om lai sun teng khat leh khat kisanek un,” ka ci hi. Tua ciangin Hehpihna a kici ciangkhut la-in ka kuaitan a, minam khempeuh tawh ka bawl thuciamna ka phiat hi. Tua ahih manin tua ni-in thuciamna kiphiat hi. Tuu summeet bawlte in hong en giugiau uh a, hih banga ka gamtatna panin Topa ’ thugen ahih lam phawk uh hi. Tua ciangin kei zong amaute kiangah, “Hoih na sak uh leh ka tuucin’ thaman hong pia un. Hoih na sak kei uh leh lah tang lel un,” ka ci hi. Tua ciangin ka thaman dingin ngun shekel sawmthum hong pia uh hi. Tua ciangin Topa in kei kiangah, “Biakinn sum koihna sungah tuate koih in,” hong ci hi. Tua ciangin kei zong, kei tawh kituak-a tam a sak mahmah uh tua dangka sawmthum la-in biakinn sumkoihna sungah ka koih hi. Tua ciangin Kipawlna a kici ciangkhut la-in ka kuaitan leuleu a, Judah leh Israel a kipawlna kiphiat hi. Tua ciangin Topa in kei kiangah, “Khat vei tuucing nasep semkik in la, tu tungin kiman’na a nei lo tuucing nasep sem in. Ka tuuhonte a cing dingin tuucing khat ka koih a, ahi zongin ka tuu a sia dingte huh loin, a mangthangte zong loin, a liamte bawl loin, a cidamte zong an vak lo hi. Amah in tuu thau pente’ sa ne-in, a khecinte nangawn hawkkhiatsak zawsop hi. Kiman’na a neilo tuucingpa, a tuuhonte a nusiapa in gimna ngah ta hen! Namsau in a ban bantan hen la, a taklam mit satkham hen. A ban beimang hen la, a taklam mit tawcip hen!” hong ci hi. Vanpi zalin, leitung piangsak a, mihingte tungah nuntakna a pia Topa in Israel mite tawh kisai-in thu gen a, “Leenggahzu bangin Jerusalem khuapi ka bawl ding a, a kiim-a om minam dangte in a nek ciangin khamin hoi ding uh hi. Jerusalem khuapi a umcih uh ciangin Judah gam khuapi dangte zong umcih ding uh hi. Tua hun hong tun’ ciangin suangtumpi gik mahmah bangin Jerusalem khuapi ka bawl ding a, liik khiat a sawm minam khatpeuh peuh in liamlawh ding hi. Leitung minam dang khempeuh kipawlin Jerusalem sim ding uh hi. Tua ni ciangin a sakolte uh ka lausak ding a, a sakol tung tuangte uh ka haisak ding hi. Ahi zongin Judah mite ka kem ding a, a galte uh’ sakolte, a mit ka tawsak ding hi. Tua ciangin Judah minamte in, ‘Jerusalem-a a teeng mite, Vanglianpen Topa ahi amau’ Pasian’ hangin thahat uh hi,’ ci ding uh hi. Tua ni ciangin, Judah minamte, tulak kang leh buhphal kang ka bangsak ding a, a kiim-a om minam dangte khempeuh susia ding uh hi. Ahi zongin Jerusalem mite a khuapi sungah lungmuangin om hithiat ding uh hi. Tua ciangin Judah galkapte tungah gualzawhna ka pia masa ding a, David’ suan-le-khakte leh Jerusalem khuamite’ minthan’na in Judah mi dangte’ minthan’na sangin lianzaw tuan lo ding hi. Tua ni ciangin Jerusalem-a teeng mite, Topa in hu ding a, a gina lo pente nangawn, David zahin thahat ding hi. David’ suan-le-khakte in Topa ’ vantungmi bangin ahi zongin Pasian mahmah bangin ahi zongin amaute makaih ding uh hi. Jerusalem sim ding a hanciam minam khempeuh, tua ni ciangin ka susia ding hi. David’ suan-le-khakte leh Jerusalem khuamite tungah, hehpihna leh thunget nopna lungsim ka guan ding hi. Amaute in a sut lup uh mipa enin, ta khat neihsun a sihsuahte bangin kap ding uh a, a tacil a khuaisuahte bangin nakpi takin kapin thuum ding uh hi. Tua hun lai takin Jerusalem khua sunga kap-a thuumna in, Megiddo zanglei-a Hadadrimmon pasian’ sihna hangin kahna leh thuumna zah mahin nasia ding hi. Gam sung khempeuh ah a innkuan kuanin dahin kap ding uh hi. David’ suan-le-khakte sung panin a innkuan kuanin kapin, a zite uh zong a tuam mahin kap ding uh hi. Nathan’ suan-le-khakte zong a innkuan kuanin kapin, a zite uh zong a tuam mahin kap ding uh hi. Levi’ suan-le-khakte leh a zite, Shimei’ suan-le-khakte leh a zite, leh beh dang khempeuhte zong a behbehin, a zite uh tawh a tuam ciatin kapin thuum ding uh hi. Tua ni hong tun’ ciangin David’ suan-le-khakte leh Jerusalem khuamite’ mawhna leh nitna teng khempeuh a silsiang dingin tuinak khat hong kihong ding hi. Tua ni ciangin gam sung panin milim khempeuh ka phiatsiang ding a, kuamah in a milim min nangawn phawk kha nawn lo ding uh hi. Kamsang zuautheite zong phiatin, milim biak nopna lungsim ka beisak ding hi. Mi khatpeuh kamsang a kineih lai teitei leh, a pian’na a nu leh a pa mahmah in kho ding uh a, ‘ Topa ’ min paulamin zuauthu gen na hih manin na si ding hi,’ ci ding uh hi. Tua bangin thu a gen teitei leh, a nu leh a pa mahmah in tem tawh sun lum ding uh hi. Tua ni hong tun’ ciangin, kamsangte in a mangmuh theihna uh kisialhpih ngam loin, kamsangte bangin zong puansilh ngam loin, kamsang zong kineih ngam lo ding uh hi. Kamsang ka hi kei hi; lo kho mi ka hi a, ka khan’ tawnin lo kho-in a om ka hi hi, ci zawsop ding uh hi. Mi khatpeuh in, ‘Na awm-a na liammate bang ahi hiam?” ci-in a dot ciangin, ‘Ka lawmte’ inn khatah zukham sul-a kitotna-a liam ka hi hi,’ ci-in dawng ding hi. Namsau aw, ka tuucingpa a su dingin kipan in la, kei tawh nasem khawmpa lang pang in. Tuucingpa sat in. Tuute kithehthang ding a, ka tuute gim ka pia ding hi. Leitung khempeuh ah, seh thum suah seh nih si ding a, seh khat bek suakta lai ding hi. Tua a suakta seh khatte pen, meikhukah ngun a kisian’sak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ hong ngetna ka pia ding hi. Keima mi ahihna uh, amaute tungah ka gen ding a, amaute in, kei pen, amau’ Pasian ka hihna thu, a kam uh tawh pulak ding uh hi,” a ci hi. Topa in na hong sep hun hong tung ding hi. Jerusalem khuapi kiluh gawpin, note’ muh mahmahin a na lakte uh hawm ding uh hi. Jerusalem khuapi a sim dingin Topa in minam khempeuh kaikhawm ding hi. A khuapi kila-in, innte kiluh gawpin, numeite zong kibuan ding hi. Mi a lang bang sal-in kipaikhiatpih ding a, a dangte ahih leh kipaikhiatpih lo ding hi. Tua ciangin Topa hong kuankhia ding a, a beisa hun-a a sim ngei bangin hih minam dangte hong sim ding hi. Tua ni ciangin Jerusalem nisuahna lama om Oliv Mual tungah Topa ’ ding ding hi. Tua ciangin nisuahna lam pan nitumna lamah Oliv Mual kitamin phel nih suak ding a, a kikalah kuampi om ding hi. A mual kimkhat leilu lamah kikhinin, kimkhat, leitaw lamah kikhin ding hi. Hinnom kuam sung kivukcip ding a, Judah kumpi Uzziah’ hun lai-a zin lin-a kivukcip mah bang ding hi. Tua ciangin Topa ka Pasian hong pai ding a, a mi siangthote khempeuh hong tonpih ding hi. Tua ni hong tun’ ciangin khuavak, khuadam, vukkiat cihte om nawn lo ding a, khuamial hun cih zong om lo ding hi. Zan hun nangawnin sun khuavak bek om ding hi. Hih thu a pian’ ding hun, Topa bek in a thei hi. Tua ni hong tun’ ciangin Jerusalem khua panin tuiciim hong luang khia ding a, kimkhat, nisuahna lama om Si Tuipi ah luang ding a, kimkhat, nitumna lama om Mediterranean Tuipi-ah luang ding hi. Tua tui in kan’ hun cih nei loin luang tawntung ding hi. Tua ciangin Topa pen leitung khempeuh’ kumpi suak ding a, mi khempeuh in amah bek thei-in bia ding uh hi. Leilu lam Geba khua panin leitaw lam Rimmon khua dong, leitang khempeuh, zanglei suak ding hi. Ahi zongin Jerusalem khuapi pen bangmah ci loin a sangpi-in om ding a, Benjamin Kongpi pan-a kipan, ni danga kongpi a omnasa Kiu Kongpi dong, leh Hananel Tausang panin kumpipa’ leenggahcilna phual ciang dong ban ding hi. Tua khuapi sungah lungmuang takin mi teeng ding uh a, lauhuaina tuak kha nawn lo ding uh hi. Tua ciangin Jerusalem khuapi a sim minam dang khempeuhte tungah Topa in gimna lianpi tungsak ding hi. A khe-un a ding thei kimlai mahin a sa uh muat mang ding a, a mitkhuk sung uhah a mittangte uh muatin, a kam sung uhah a leiite uh muat ding hi. Tua ni ciangin Topa in amaute amkhamsak gawp ding a, mite in a gei-a a mat khak mite manin khat leh khat kilaithang gawp ding uh hi. Judah mite in Jerusalem khuapi hutna-in galsim ding uh a, minam dang khempeuhte’ neihsa, kham, ngun, leh puante tampi tak laksak ding uh hi. Galte’ phual-a om sakolte, lasakolte, kalaohte, late, leh ganhing om khempeuh tungah gimna lianpi tung ding hi. Tua bangin galte a kizawh gawp khit ciangin, galte sung panin a nungta lai mite in Vanglianpen Topa, kumpi ahihna hangin a bia ding, leh ama gualzawhna pawi a bawl dingin kum simin Jerusalem ah pai tawntung ding uh hi. Minam khatpeuh peuh in Vanglianpen Topa ahi kumpipa a bia dingin Jerusalem ah a pai nop kei leh amau’ gam sungah guahzu lo ding hi. Tua gualzawhna pawi a bawl dingin Izipt mite a pai nop kei leh, tua bang-a a pai nuam lo minamte’ thuak gimnate mah, amau tungah tung ding hi. Gualzawhna pawi bawl dingin a pai nuam lo Izipt mite leh minam dangte khempeuh tungah a tung ding gimna in tu-a bang ahi hi. Tua ni ciangin sakol khilongte khempeuh tungah, “ Topa ’ tungah sian’thona” ci-in ciamtehna kibawl ding hi. Biakinn sunga om beelte khempeuh pen biakna tau mai-a kikoih kuangte mah bangin a siangtho-in kinei ding hi. Jerusalem khua sung leh Judah gam sunga om beelte khempeuh, Vanglianpen Topa biakna-in zat dingin a tuamin kisiangthosak ding hi. Biakna pia dingin a hong pai mi khempeuh in tua beelte zangin, biakna sa huanna-in nei ding uh hi. Tua ni hong tun’ ciangin, Vanglianpen Topa ’ biakinn ah sumzuak van zuak cihte om nawn lo ding hi. Topa in Malakhi tung tawnin Israelte tungah thu gen hi. Topa in, “Note kong it hi,” ci hi. Ahi zongin note in, “Kote hong bangci it na hi hiam?” na ci uh hi. Topa in hong dawng a, “Esau leh Jakob in unau hi a, ahi zongin Jakob leh a suan a khakte itin, Esau leh a suan a khakte ka mudah hi. Esau’ neih mualtung gamte ka susia a, gamlak gamsate tungah ka pia hi,” ci hi. Esau’ suan-le-khak Edom mite in, “I khuapite a kisiat khit hangin i lamkik ding hi,” ci le uh, Topa in, “A ut uh leh lam uh hen, ahi zongin ka susia kik veve ding hi. Midangte in, ‘Gam gilo, Topa ’ heh tawntungna minamte,’ ci-in ko ding uh hi,” ci-in dawng ding hi. Note’ mit mahmah tawh hih thu piang na mu ding uh a, “Israel gam pualam nangawn ah, Topa in vangliatna nei hi,” na ci ding uh hi. Vanglianpen Topa in siampite tungah hih bangin hong ci hi: “Tapa in a pa zahtak a, nasempa in a topa kihta hi. Keimah in na pa uh hi napi, bang hangin hong zahtak lo a, na Topa uh hi napi, bang hangin hong kihta lo na hi uh hiam? No siampte in kei hong simmawh napi-in, ‘Bang hong ci simmawh ka hi uh hiam?’ na ci lai uh hi. Note in ka biakna tau tungah keimah biakna-in an ginalopite hong pia hi napi-in, ‘Kong zahtak bawl lohna uh bang om ahi hiam?’ na ci uh hi. Ka biakna tau simmawh bawl na hih manun hong zahtak bawl lo na hi uh hi. Ganhing a mittawpite tawh kei nong biak uh ciangin, a hoih mahin kingaihsun na hi uh hiam? A khebai a, a cina ganhingte tawh nong biak uh ciangin, a hoih mah kisa na hi uh hiam? Tua bang ganhing khatpeuh peuh, note hong ukpa kiangah va puak dih un. Note tungah nuamin hong pakta ding ahi hiam?” ci hi. Tua ciangin no siampite aw, Pasian in eite hong hehpih theih nadingin ama kiangah thuum un. Na hih ngeisa bangun na ngetnate uh hong pia lo ding a, tua in nomau’ khialhna ahi hi. Vanglianpen Topa in, “Ka biakna tau tungah, bangmah-a a kimang lo mei na tawh mawkmawk theih loh nadingun, note khatpeuh in biakinn kongkhakte khak le uh cin ka ut hi. Note tungah ka lungkim kei a, nong puak uh biak piaknate kong sang kei ding hi. Leitung khempeuh-a om minam khempeuh in kei hong zahtak uh a, kei’ adingin mun khempeuh ah paknamtui halin, a kisang thei ding biak piakna hong pia uh hi. Mi khempeuh in kei hong zahtak uh hi. Ahi zongin note in keima biakna tau bangmah a man nei loin genin, tua biakna tau tunga na piak uh ante na thupi ngaihsut loh uh ciangin, keimah a hong simmawh na hi uh hi. Note in, ‘Hihte cimtak khin hang,’ ci-in nap nong nitsan lel uh hi. Keimah biak nadingin a kigu ganhing khatpeuh ahi a, a liam a bai, ahih kei leh a cina peuh nong paipih uh hi. Tua bangte, a sang dingin hong ngaihsun na hi uh hiam? A tuuhon lakah tuutal cidam nei napi-in, a kamciamsa bangin kei tungah hong piak ciangin, a sitbaang ganhing hong pia mi khempa in samsiatna thuak ta hen. Bang hang hiam cih leh keimah in a lian mahmah Kumpipa ka hi a, minam khempeuh in kei hong zahtak uh hi,” a ci hi. Vanglianpen Topa in hih bangin ci hi: “Siampite aw, note’ adingin hih lai-ah thupiakna khat om hi. Na gamtatna uh tawh kei nong zahtak ding uh hi. Ka thugente ngai loin, thupi takin na lak kei uh leh note tungah samsiatna ka hong tungsak ding a, siampi hihna tawh na ngah uh thuphate tungah samsiatna ka tungsak ding hi. A taktakin ci lehang, note in ka thupiaknate thupilak lo na hih manun na thupha ngahte uh tungah samsiatna ka tungsak zo hi. Na suan-le-khakte uh nakpi takin ka thuhilh ding a, note ahih leh, na biak piakna ganhing uh a ekte tawh na maitang uh hong zut gawpin tuate tawh kong lawnkhia khawm ding hi. Tua ciangin, Levi’ suan-le-khakte ahi siampite tawh ka thuciamna a kip nawn lo ahihna thu, hih thu kong genna-ah na thei ding uh hi. Amaute a nuntak nading leh a nopsak nading thu ka ciam a, amaute in kei hong zahtak theih nadingun hih ka thuciamte khempeuh ka pia hi. Amaute in kei hong zahtakin hong kihta takpi uh hi: Amaute in thuman taktakte mah hilhin gen uh a, amaute’ kam panin zuauna thu ging khia lo hi. Ka deihna bangin amaute gamta uh a, a khial ding mi tampite, thuman lamah paisak uh hi. Siampite’ nasep in Pasian a man-a theih nading a hilh ding uh ahi hi. Amaute pen Vanglianpen Topa ’ kamtaite ahih manin, mite in keima deihna a theih nadingun amaute tungah thu a dot ding uh ahi hi. Ahi zongin, no, siampite na hih uh leh lampi man panin na pial khin uh hi. Na thuhilhnate un mi tampi tak khialsak hi. Note tawh ka bawl thuciamna na palsat khin uh hi. Tua ahih manin, note in ka thuhilhna zui loin, keima thu na hilh uh ciangin zong a kibangin hilh loin mi na deidan mah bangun, kei zong, mi khempeuh mai-ah simmawhna leh niamkhiatna kong ngahsak hi,” a ci hi. Eite khempeuh in, eite a hong piangsak Pasian ahi pa khat bek nei hilo i hi hiam? Tua hi napi-in bang hangin eite khat leh khat tungah citak loin, i pu i pate tawh a bawl, Pasian’ thuciamna palsat i hi hiam? Judah mite citak loin, Pasian’ tungah a thuciamna uh palsat uh a, Israel mite’ lak leh Jerusalem khua sungah siatna tampi gamta uh hi. Topa in a it mahmah biakinn ninsak uh hi. Topa ahi lo, pasian dang a bia numeite zi-in la-in ten’pih uh hi. Hih banga a gamta mi peuhmah, a kua a kua hita leh, Topa in sugawp hen la, Vanglianpen Topa ’ tungah biakna a paipih ei minamte tawh hong kigawmsak ngei nawn kei hen. Note’ gamtatna adang khat om lai hi. Tua in, note in Topa ’ biakna tau, khitui tawh na kawtsak uh a, kapin thuumin na om uh hangin note’ paipih biaknate, amah in hong sang nawn lo hi. Bang hangin hong sang lo hiam, na ci uh hi. Na khangno lai uh a, na ten’pih na zite uh tungah na cihtak lohna uh amah in hong thei a, na zite uh tungah na cihtak tawntung nading uh Pasian tungah thuciamin, na zite uh zong na lawmnu mah uh hi napi-in amaute tawh na thuciamna uh na pelhna hang uh ahi hi. Pasian in na zite uh tawh pum khat, lungsim khat ahi dingin hong bawl hilo ahi hiam? Hih banga hong bawlna in bang a deihna ahi hiam? Pasian’ mi taktak ahi ding tate i neih theih nading ahi hi. Tua ahih manin na khangno lai-un na ten’pih na zi uh tawh na thuciamna uh na palsat khak loh nadingun kidawm un. Vanglianpen Topa in hih bangin ci hi: “Zi makna ka deih kei a, mi khatpeuh in a khangno lai-a a teen’pih a zi tungah tua bang gitlohna a gamtatna ka mudah hi. Tua ahih ciangin hoih takin kidawm un la, a citak dingin na zite uh tungah na thuciamna uh palsat kei un,” ci hi, a ci hi. Na thugen genna uh tawh Topa na gimsak uh hi. Note in, “Bangci gimsak ka hi uh hiam?” na ci uh hi. “ Topa in a sia-a gamtate a hoihin ngaihsun a, zong itin amaute tungah lungkim takpi hi,” na cihna khawng uh leh, “A thutang gen Pasian koi lai-ah om ahi hiam?” ci-in na dotnate uh tawh na gimsak uh hi. Hih banga na thu genna uh tawh kisai-in Vanglianpen Topa in hong dawng a, “Ka pai nading lampi a bawl khol dingin ka kamtaipa ka sawl ding hi. Tua ciangin na ngakngak uh Topa a biakinn sungah thakhat thu-in hong pai ding hi. Na muh nop uh kamtaipa hong pai-in ka thuciamna hong taangko ding hi,” a ci hi. Ahi zongin ama hong pai ni ciangin kua in thuak zo ding a, amah hong kilat ciangin kua nungta zo ding ahi hiam? Amah in, sikte a siangthosak mei, leh puante a siangthosak satpiang tawh kibang hi. A ninte kangtumsakin, ngunte a siangsakpa bangin thukhen dingin hong pai ding hi. Ngun leh khamte a kisian’sak bangin amah in Levi’ suan-le-khak ahi siampite siangsak ding hi. Tua ciangin Topa tungah a kilawm biakna pia ding uh hi. Tua ciangin Judah mite leh Jerusalem mite’ piak biaknate pen, nidang-ate mah bangin Topa ’ mai-ah a lungkimhuai hi ding hi. Vanglianpen Topa in hih bangin ci hi: “Note tungah thukhen dingin ka hong pai ding a, ai tawite, numei tawh mawhte, a man lopi-a teci pangte, nasemte’ thaman piakna ah khemna a zangte, meigong, tagah, leh gamdang mite a zawhthawh bawlte, leh kei hong zahtak lo mi khempeuhte’ lang khatah thakhatin teci pangin thu ka khen ding hi. Keimah in Topa ka hi a, lungsim a kheel lo mi ka hi hi. No Jakob’ suan-le-khakte aw, a sia cimit na hi nai kei uh hi. Note in, na pu na pate uh mah bangin ka thukhamte panin na pialkhia uh a, ka thukhamte na zui kei uh hi. Ahi zongin keima lamah hong kihei kik un; kei zong note lamah kong kihei ding hi. Ahi zongin note in, ‘Nang lamah kong kihei nadingun bang hih ding ka hi uh hiam?’ na ci uh hi. Keimah in note kong dot nop thu in, mi khatpeuh in Pasian’ na a guksak ding kilawm ahi hiam? Kilawm lo hi napi-in note in nong guksak uh hi. Ahi zongin note in, ‘Bang hong guksak ka hi uh hiam?’ na ci uh hi. Sawm-ah khat piakna leh biak piaknate ah nong guksak uh hi. Na minam bup-un keima neihsa hong guksak na hih manun note khempeuh tungah samsiatna hong tung hi. Ka biakinn ah an a om theih nadingin sawm-ah khat a kimin hong paipih un. Kei hong ze-et dih un; vantung kongkhakte hongin, note’ adingin na hoih tampi kong piakna na mu ding uh hi. Lo panin a piang na ante uh, kauphe ka nesak nawn kei ding a, na leenggui uh gah pha mahmah ding hi. Tua ciangin na gam uh, ten’ nadingin a hoih mahmah leitang hong suak ding ahih manin, minam dang khempeuh in note pen a nuamsa minam, hong ci ding uh hi,” Vanglianpen Pasian in a ci hi. Topa in hih bangin ci hi: “Kei tawh kisai-in na kam paunate uh khauh mahmah hi. Note in, ‘Bang kam pau ka hi uh hiam?’ na ci uh hi. Note in, ‘Pasian’ na i sep a mawkna hi. Ama hong sawl bangin i sep hangin bang a kiman’na om a, i gamtatnasate hangin i dahna lim, Vanglianpen Topa ’ mai-ah i lah hangin bang phattuamna om ahi hiam? I muhna bang leh, mi kiphasak teng mah in thupha ngahin nuamsa uh hi. Mi gamtatsiate ahih leh cithei bek loin, a gamtat siatnate uh tawh Pasian ze-et napi-un bangmah tuak se lo uh hi,’ na ci uh hi,” a ci hi. Topa a zahtak mite khat leh khat in tua bangin thu kigen uh a, amaute’ thugennate, Topa in ngai-in za hi. Topa in laibu khat nei a, amah zahtakin a thupi ngaihsut mite khempeuh tua sungah kiciamteh hi. Topa in hih bangin ci hi: “Tua a kiciamteh mite pen keima mite hi ding uh hi. Keimah in na ka sep ni ciangin, amaute in keima neihtuam taktak mite hi ding uh hi. Pa in ama thu a mang a tapa a hehpih mah bangin, kei zong amaute ka hehpih ding hi. Tua ciangin, midikte leh migilote, leh keima na hong semte leh hong sem lote a kilamdan’na na mu kik ding uh hi,” a ci hi. Vanglianpen Topa in hih bangin ci hi: “En un, mi kiphasak khempeuh leh migilo khempeuh, a zung a hiang cih om loin buhtu bangin a kattum ding hun hong tung ding hi. Tua ni ciangin khat zong suakta loin a vekpi-in kangtum khin ding uh hi. Ahi zongin ka thu a hong mang note tungah dikna ni hong taang ding a, tua in nizang bangin note tungah cidamna hong tun’ ding hi. Bawngkhumna panin a kikhah bawngnote bangin suakta-in nuam na sa ding uh hi. Keimah in na kong sep ni ciangin, migilote nuaisiahin, leivui bangin na tuancil ding uh hi,” ci hi. “Israel mite khempeuh in a zuih dingin Horeb Mual panin ka nasem Moses tungah ka piak ahi, Moses’ thukhamte, ngeinate, leh biakna ngeina kipte khempeuh lim takin phawk un. “Ahi zongin tua a lauhuai a lian mahmah Topa ’ ni hong tun’ ma-in note kiangah kamsangpa Elijah kong paisak ding hi. Amah in pate leh tapate, tapate leh pate lemtuahin kilemsak kik ding hi. Tua bang hi kei leh keimah hong pai-in na gam khempeuh uh ka susiagawp ding hi,”ci hi, a ci hi. Abraham’ suan, David’ suan, Zeisu Khazih’ khang ciamtehna lai inah: Abraham’ tapa Isaak, Isaak’ tapa Jakob, Jakob’ tapa Judah, leh a unaute teng hi. Judah in a zi Tamar tawh a neih a tapa Perez leh Zerah, Perez’ tapa Hezron, Hezron’ tapa Aram, Aram’ tapa Amminadab, Amminadab’ tapa Nashon, Nashon’ tapa Salmon, Salmon in a zi Rahab tawh a neih a tapa Boaz, Boaz in a zi Ruth tawh a neih a tapa Obed, Obed’ tapa Jessi, Jessi’ tapa David kumpipa hi. David in Uriah’ zi ahi ngei tawh a neih a tapa Solomon, Solomon’ tapa Rehoboam, Rehoboam’ tapa Abijah, Abijah’ tapa Asa, Asa’ tapa Jehoshafat, Jehoshafat’ tapa Joram, Joram’ tapa Uzziah, Uzziah’ tapa Jotham, Jotham’ tapa Ahaz, Ahaz’ tapa Hezekiah, Hezekiah’ tapa Manasseh, Manasseh’ tapa Amon, Amon’ tapa Josiah, Josiah in Babilon khuapi-ah a paipih lai takin a neih a tapa Jekhoniah leh a unau teng hi. Babilon khuapi-ah a paipih khit ciangin Jekhoniah’ tapa Shealtiel, Shealtiel’ tapa Zerubbabel, Zerubbabel’ tapa Abiud, Abiud’ tapa Eliakim, Eliakim’ tapa Azor, Azor’ tapa Zadok, Zadok’ tapa Akhim, Akhim’ tapa Eliud, Eliud’ tapa Eleazar, Eleazar tapa Matthan, Matthan’ tapa Jakob, Jakob’ tapa Josef, Mari’ pasal ahi hi. Tua Mari in Khazih kici Zeisu’ nu ahi hi. Tua hi a, a khang kigawmin Abraham pan David dongin khang sawm leh khang li, David pan Babilon khuapi-ah a paipih dongin khang sawm leh khang li, Babilon khuapi-ah a paipih pan Khazih dongin khang sawm leh khang li hi. Zeisu Khazih’ suahna thu in hih bang ahi hi. A nu Mari in Josef tawh kingai a, a kiten’ ma-in Kha Siangtho in a gaisak hi. A lawmpa Josef in mi lungsim pha ahih maninah Mari mindaisak nuam loin, maksim ding a lungngai hi. Tua banga a lungngaih lai takin a mang sungah Pasian’ vantungmi khat kilang a, “David’ suan Josef aw, na lawmnu Mari na ten’pih dingin lunghimawh kei in. Ama gaina in Kha Siangtho in a gaisak hi. Amah in tapa a nei ding hi. Tua tapa in ama mipawlte’ mawhnate sung pan a gumkhia ding ahih ciangin a min Zeisu na phuak ding hi,” ci-in a hilh hi. Tua thu khempeuh in Topa in a kamsangte tungah a genkholh bangin a tun’ nading ahi hi. Tua thu genna in: “En un, nungak khat gai ding a, Tapa a nei ding hi. Tua a tapa a min Emmanuel kici ding hi,” a ci hi. Emmanuel a khiatna in ‘Eite tawh Pasian hong omkhawm hi’ a cihnopna hi. Josef in a ihmutna pan a khan’lawh ciangin Pasian’ vantungmi in a thu hilh bangin mangin a lawmnu a ten’pih hi. Ahih hangin a ta a suah matengin a luppih kei hi. Tua a tapa a min Zeisu a phuak hi. Judah gam Herod Kumpipa a man’ lai takin, Bethlehem khua-ah Zeisu a suah khit ciangin mipilte in ni suahna gam lam panin Jerusalem khuapi-ah tung uh a, tu lai taka suak Judah kumpipa koi lai takah om hiam? Ni suahna gam lam pan ama aksi ka mu zo uh hi. A bia dinginah ka hong pai uh hi,” ci-in a dong uh hi. Herod kumpipa in tua thu a zak ciangin Jerusalem khuami khempeuh tawh a lunghimawh uh hi. Pasian siampi leh laithei upa teng khawm a, “Khazih in koi lai-ah suak ding ahi hiam?” ci-in a dong hi. Amaute in, “Pasian’ kamsangpa khat in: ‘Judah gam Bethlehem khua aw, Judah gam khuapi lakah nang, khua neu, khua gina lo na hi kei hi. Bang hang hiam na cih leh, keima mipawl Israel mite cing dingin, Nangma sungah mangpa khat a piang ding hi, ci-in Lai Siangtho sungah a kigelh mah bangin Judah gam Bethlehem khua-ah Khazih a suak ding hi,” ci-in kumpipa kiangah a gen uh hi. Herod in mipilte sam sim a, aksi kilat hun pha takpi-in dong a, a theih khit ciangin, “Note pai un la, tua naupang va hah zon’ un. Na muh uh leh, kei kiangah hong gen kik in. Kei zong pai-in tua naupang ka va bia ding hi,” ci-in vaikhak a, Bethlehem khua-ah a paisak hi. Tuate in kumpipa’ thu a zak khit uh ciangin paikhia uh a, ni suahna gam lam pan a kimusa aksi in amau mai-ah pai a, naupang’ omna tung a tun’ ciangin a khawl hi. Mipilte in tua aksi a muh uh ciangin nuam mahmah uh a, inn sungah a lut uh leh, naupang leh a nu Mari a muh uh ciangin a bia uh hi. Amau van a suah khit uh ciangin kham leh paknamtui leh mirrah a pia uh hi. Tua nung ciangin Herod kumpipa kiangah a pai nawn loh nadingun a mang sung uhah thu kipiakna bangin, amaute khua-ah ciah dingin lampi dang a tawn uh hi. Tua mite a pai khit uh ciangin Pasian’ vantungmi khat in Josef’ mang sungah kilang a, “Tho in, naupangno leh a nu sam in la, Izipt gamah taipih in. Ka hong hilh kik matengin tua gamah va om in. Herod kumpipa in naupang that nuamin a zong ding hi,” a ci hi. Tua ciangin Josef tho a, naupang leh a nu zankimpi-in samkhia a, Izipt gamah a taipih hi. Herod kumpipa a sih matengin tua gamah a va om hi. Tua bang va omna in Pasian in a kamsangpa tungah, “Ka tapa Izipt gam panin ka sam zo hi,” ci-a a genkholhsa thu a tun’ nading hi. Herod kumpipa in mi pilte’ khemna a theih ciangin a thangpai mahmah a, mite sawl a, mipilte kiangah a tel taka a dot hun tawh kizui-in Bethlehem khua-a kipan khua kimah a om kum nih nuaisiah pasalno khempeuh a thatsak hi. Pasian’ kamsangpa Jeremiah in a gensa bangin tua lai takin a tung hi. A genna in: “Ramah gamah nakpi kahna kiza hi. Rachel in ama tate ading a kap hi. A tate om lo ahih ciangin kinem zo lo hi,” a ci hi. Herod kumpipa a sih khit ciangin Izipt gamah Josef’ mang sungah Pasian’ vantungmi khat kilang kik a, “Tho in la, naupang leh a nu sam in la, Israel gamah na ciahpih in. Naupang that nuama a zongte in a si zo uh hi,” a ci hi. Tua ciangin amah tho a, naupang leh a nu sam a, Israel gamah a tung kik hi. Herod’ za a tapa Arkhelaus in luah a, Judah gamah a man’ thu a zak ciangin tua gamah tung ngam lo a, a mang sungah a kihilh ciangin Galile gamah pai a, “Khazih in Nazereth mi kici ding hi,” ci-a Pasian’ kamsangte’ gen bangin a tun’ nadingin Nazareth kici khua khatah tungin a teeng hi. Tua lai takin Baptaiz-pa Johan hong kilang a, “Vantung Gam a hong nai zo hi. Tua ahih ciangin na mawhna uh kisik kik ta un,” ci-in Judah gam, gampa lakah a hilh hi. Pasian in kamsangpa Isaiah tungah a hilh ngei bangin: “Gampa lakah a kikopa’ aw in, ‘Topa paina lam na sial un, Ama lampi na tangsak un,’ a ci hi,” a cihna in tua mipa a cihnopna hi. Johan in kalaoh mul kigan puan silh a, savun kawnggakin a kawng a gak hi. Kauphe leh gampa lak khuaizu in a kivak hi. Tua lai takin Jerusalem khuapi, Judah gam, Jordan gun gei-ah a om mi khempeuhte Johan kiangah va pai uh a, amau mawhna khialhna pulakin Jordan gun sungah ama khut tungah kibaptaiz uh hi. Farisai-te leh Saddusi-te a kibaptaiz dinga hong pai Johan in a muh ciangin, “No mualtan’ suante aw, a hong tung ding hehna pan na taikhiat nadingun kua in hong hilhkhol hiam? Mawhna kisik kikna tawh kilawm gah na gah un. ‘Abraham ka pa uh,’ ci-in na lungsim sung uhah lungngai kei un. Ke’n kong cih-inah, Pasian in hih suangte zong Abraham’ tate a suaksak thei hi. Tu-in zong sing phungah hei a om hi. A gah hoihte a gah lo kung khempeuh phuk paii-in mei sungah kikhul ding hi. Keimah in na mawhna na kisikkikna uh hangin tui sungah ka hong baptaiz hi. Ahih hangin ka nungah hong paipa in kei sangin a lianzaw hi. Ama khedap tawi ding nangawn ka kilawm kei hi. Amah in Kha Siangtho leh mei sungah note hong baptaiz ding hi. A khut in lawhpi tawi a, ama buhphual zap siang ding a, a tak teng a sal sungah a koih ding hi. A site ahih leh, mit ngei lo mei in a hal ding hi,” ci-in Johan in a gen hi. Tua lai takin Zeisu kibaptaiz dingin Galile gam panin Jordan gun gei Johan kiangah va pai hi. Johan in, “Nangmah in kei nong baptaiz ding kilawm zaw napi-in kei kiangah hong pai na hi hiam?” ci-in a nial hi. Zeisu in, “A dik thu khempeuh i zuih ding a kilawm ahih ciangin tu-in thu hong mang in,” a ci hi. Tua ciangin Johan in a mang hi. Zeisu a kibaptaiz khit tui sung pan a thawhtoh lai takin van kihong a, Pasian’ Kha Siangtho vakhu bangin hong kum sukin, ama tungah a khawl a mu hi. “Hih pa in ka lung hong damsak ka it ka Tapa ahi hi,” ci-in vantung panin aw khat a ging hi. Tua ciangin dawimangpa’ kheemna thuak nadingin Kha Siangtho in, Zeisu gampa lakah a sawl hi. Zeisu in ni sawmli leh zan sawmli an a tan’ khit ciangin a gilkial hi. Tua lai takin a kheem dingpa in va nai a, “Nang in Pasian’ Tapa na hih takpi leh, hih suangte khomun suaksak in,” a ci hi. Zeisu in, “Mi in khomun bek tawh nungta lo hi, Pasian’ kam sung pan hong pusuak thu khempeuh tawh a nungta hi,’ ci-in Lai Siangtho sungah kigelh hi,” a ci kik hi. Tua khit ciangin dawimangpa in, Zeisu khua siangtho sungah paipihin, biakna innpi khum zangah a koih khit ciangin, “Nang in Pasian’ Tapa na hih takpi leh, na pumpi kikiasuksak in. Bang hang hiam cih leh: “Amah in ama vantungmite, nang ading thu a pia ding hi,” leh, ‘Na khe in suang tawh a kisuk khak loh nadingin, amau in a khut un, nang hong dom ding uh hi; ci-in Lai Siangtho sungah kigelh hi,” dawimangpa in a ci hi. Zeisu in, “Na Topa Pasian na ze-et kei in ci-in Lai Siangtho sungah kigelh hi,” a ci hi. Dawimangpa in mual sangpi dawnah Zeisu paipihto a, leitungah a om gam khempeuh leh gam sungah a om, minthan’na a lah khit ciangin, “Nangmah in bokin hong bia leteh, kong lah peuhpeuh ka hong pia ding hi,” a cih ciangin Zeisu in “Satan aw, kihemkhia in. Na Topa Pasian na bia ding hi; ama na bek na sem ding hi,’ ci-in Lai Siangtho sungah kigelh hi,” a ci hi. Tua khit ciangin, dawimangpa in Topa kiang pan paikhia a, vantungmite hong pai-in an a vaak uh hi. Johan’ kimatna thu Zeisu in a zak ciangin, Galile gamah pai a, Nazareth khua khengin Zebulun gam leh Naftali gam kikalah, tuili tawh kinai Kapernaum khua-ah tungin a teeng hi. Tua a va omna in Pasian’ kamsangpa Isaiah in a gen bang a tun’ nading hi. A genna thu in: “Zebulun gam leh Naftali gam ahi, Jordan gun galah tuipi lian lam, Gentailte omna Galile gamah, Khuamial sungah a om mite in, Khuavakna a mu uh hi; Sihna liim gam sungah a tute tungah, Khuavak a taang zo hi,” a ci hi. Tua nung ciangin Zeisu in, “Na mawhna uh kisikkik ta un. Bang hang hiam na cih uh leh, Vantung Gam a hong nai zo hi,” ci-in thuhilh a kipan hi. Galile tuili gei lamah a pai lai-in, Piter kici Simon leh Andru te unau, ngabengte ahih uh ciangin tui sungah ngen paai-a om uh a mu hi. Zeisu in, “Ka nung hong zui un. Mi mante kong suaksak ding hi,” a cih ciangin, amaute in thakhatin a ngen uh nusia-in Zeisu nung a zui uh hi. Tua mun a khen ciangin, unau dang nih, Zebedi’ ta Jakob leh Johan-te, a pa tawh gunkuang sungah ngen khui-a a om a muh ciangin a sam hi. Amau in thakhatin a pa leh a gunkuang uh nusia-in Zeisu nung a zui pah uh hi. Zeisu in amaute kikhopna inn sungah Vantung Gam’ Lungdamna Thu hilh a, cinate damsakin Galile gam sung tengah a vak kawikawi hi. A thu khempeuh in Siria gam teng zeel a, dawi lut, sibup, khut leh khe si akipan, cinatna pawl khempeuh a veite ama kiangah hong paipih uh a, cinatna khempeuh a damsak hi. Galile gam, Dekapolis gam, Jerusalem khuapi akipan, Judah gam, Jordan gungal khat pan mi tampi hong pai uh a, a nung a zui uh hi. Tua mihonpi a muh ciangin, Topa in mual tungah kahto a, tu-a a om lai takin, a nungzuite in ama kiangah va nai uh hi. Amah in kam ka a, a nungzuite thu a hilh inah: “Lungsim niamkhiatte in thupha a ngah ding uh hi. Bang hang hiam na cih uh leh, Vantung Gam in amau gam uh ahi ding hi.” “A dahte in thupha a ngah ding uh hi. Bang hang hiam na cih uh leh, amau in lungdamna a ngah ding uh hi.” “Lungnemte in thupha a ngah ding uh hi. Bang hang hiam na cih uh leh, amau in leitung a luah ding uh hi.” “Gilkial a, an duh banga lungsiangtho a deihte in thupha a ngah ding uh hi. Bang hang hiam na cih uh leh, amau in vaakna a ngah ding uh hi.” “Midang a hehpih theite in thupha a ngah ding uh hi. Bang hang hiam na cih uh leh, amau in zong hehpihna a ngah kik ding uh hi.” “Lungsim siangthote in thupha a ngah ding uh hi. Bang hang hiam na cih uh leh, amau in Pasian a mu ding uh hi.” “Mi kitawng kilemsak kik theite in thupha a ngah ding uh hi. Bang hang hiam na cih uh leh, Pasian’ tate cihna a ngah ding uh hi.” “Dikna thu hanga bawlsiatna a thuakte in thupha a ngah ding uh hi. Bang hang hiam na cih uh leh, Vantung Gam in amau gam uh ahi ding hi. Kei hanga note in gensiatna, bawlsiatna, ahi lo kimawhsakna na thuak uh leh, thupha na ngah ding uh hi. Lungdamin na nuam un. Bang hang hiam na cih uh leh, Vantung Gamah a lian noptuamna na ngah ding uh hi. Note pian’ ma a piang kamsangte zong tua mah bangin a bawlsia uh hi.” “Note in leitung’ ci na hi uh hi. Ci in a alna a man’ leh, bangci a al kik ding hiam? Dai pua lamah paikhia-in mite sikgawp ding longal kiman’na om lo hi. Note in leitung khuavak na hi uh hi. Mual dawnah a om khua kiliah zo lo hi. Mite in meivak a vak khit uh ciangin seeng a khuh kei uh hi. Inn sungah mi khempeuh in meivak a muh nadingun, a kho sangah a vaak uh hi. Tua mah bangin, midangte in na gamtatna phate a muh uh ciangin, vantungah a om na Pa uh Pasian’ min a phat nadingun, na khuavak uh mite mai-ah na tangsak un.” “Thukhamna leh Pasian’ kamsangte’ thu siasak dingin hong pai hi ci-in hong um kei un. Siasak dinga hong pai ka hi kei hi. A kicingsak dingin hong pai ka hi hi. Aman takpi kong cih-inah, van leh lei a mangthang zongin thu khempeuh a kicin’ matengin Pasian’ Thukham a neupen nangawn kisia ngei lo ding hi. Tua ahih ciangin, mi khatpeuh mah in Thukham a neupen khial a, midangte zong hilh a, a khialhsak leh, tua mi, Vantung Gam sungah mi neupen a kici ding hi. Mi khatpeuh mah in thukham zui a, midangte hilh a, a zuih sak leh, tua mi, Vantung Gam sungah milian a kici ding hi. Note’ gamtatnate in laitheite leh Farisaite’ gamtatnate sangin a phat zawk kei leh, Vantung Gamah na tung zo peuhmah kei ding uh hi.” “Mi na that kei un. Mi thatte in zum innah thukhenna thuak ding hi,’ ci-in tanglai mite kiangah cihna na za zo uh hi. Ke’n kong cih-inah, a sanggamte tungah a hehte khempeuh in zum innah thukhenna a thuak ding uh hi. A sanggam a gensiate in upa vaihawmna pan thukhenna a thuak ding uh hi. A sanggam a phuisamte in meikuang sungah kikhulna a thuak ding uh hi. Pasian’ biakna tau-ah biakna pia ding na om lai takin, na sanggamte khat na tungah lungkim lo hi cih na phawk leh, biakna tau mai-ah na biakna koih phot inla, ciah kik-in na sanggam tawh na kilem khit ciangin pai kik inla, biakna na pia in. Na kitotpihpa tawh lam na tonkhawm lai takin na kilem mengmeng in. Tua ahih kei leh, amah in thukhen mangpa kiangah hong khia ding hi. Thukhen mangpa in palikte kiangah hong pia ding a, palikte in thong sungah hong khum ding hi. Aman takpi kong cih inah, na liau ding dangkasan a khitna na piak khit matengin thong sung pan na paikhia thei kei ding hi.” “Mi’ zi tawh na mawh kei in,’ a cihna thu na za uh hi. Ke’n kong cih-inah, numei khat peuhmah khialh nopna lungsim tawh a ente in, a lungsim sungah tua numei tawh a mawh zo hi. Tua ahih ciangin na mit taklam in hong puksak leh, khelkhia inla paai in. Bang hang hiam na cih leh, na pumtangin hel khua sungah na kiat sangin na na khat kisia leh, nang adingin a phazaw ding hi. Na khut taklam in hong puksak leh, sat tan inla, paai in. Bang hang hiam na cih leh, na pumtangin hel khua sungah na pai sangin, na na khat kisia leh, nang adingin a phazaw ding hi,” “A zi a ma nuam peuhmah in kikhenna lai pia ta hen,’ a cihna thu a om zo hi. Ke’n kong cih inah, pasal dang tawh a mawh longal thudang hangah zi a mate in midang tawh a zi angkawmsak a suak hi. A maksa numei a teen’pihte a vekpi un mi’ zi tawh a mawh uh hi,” “Khat vei: ‘A hi lopi-in na kiciam kei in, Pasian tawh na kiciamnate na tungsak in,’ ci-inah tanglai mite tungah a kigen thu na thei zo uh hi. Ke’n kong cih inah, na kiciam peuhmah kei un. Vantung in Pasian’ tokhom ahih ciangin vantung tawh na kiciam kei un. Leitung in Pasian’ khe ngakna ahih ciangin leitung tawh na kiciam kei un. Jerusalem khuapi in a lian Kumpipa’ khua ahih ciangin Jerusalem khuapi tawh na kiciam kei un. Na lu tawh na kiciam kei un, bang hang hiam na cih uh leh, na samzang khat a kang a vom dingin na bawl thei kei uh hi. A hite ‘A hi mah hi’, a hi lote, ‘A hi lo mah hi,’ na ci un. Tua sang a kan zawk leh, a gilo mi’ sung pan a piang hi.” “Mittang khat tangin mittang khat, ha khat tangin ha khat,’ a cihna thu na za zo uh hi. Ke’n kong cih-inah, a gilo mi na thukkik kei un. Na pang taklam mi khatpeuh in hong bet leh, pang langkhat zong na dawh lai un, Na puanak hong deihgawh manin zum innah hong heekte puanza zong na lasak un, Zawhthawh thu-in tai khat hong paipih nuamte tai nih na zui un. A hong ngente na pia un. A hong leitawite na nungngat kei un.” “Na pawlte na it in, na galte na mudah in a cihna thu na za zo uh hi. Ke’n kong cih-inah vantungah a om na Pa uh Pasian’ tate na suah nadingun na galte na it un. Hong bawlsiate ading thu na ngetsak un. Bang hang hiam na cih uh leh, Pasian in miphate leh migilote tungah ama ni a tangsak kim hi. Misiangthote leh misiangtho lote tungah guah a zusak kim hi. Hong itte bek na it uh leh, na gitna uh bang phattuamna na ngah ding uh hiam? Siahdongte in zong tua bang ahih uh hilo ahi hiam? Na sanggamte tung bekah na kamsiam uh leh, midangte sangin na siamna uh om tuan lo hilo ahi hiam? Gentailte in zong tua bang ahih uh hilo ahi hiam? Tua ahih ciangin, vantungah a om na Pa uh a migi mah bangin na migi ta un.” “Mi mai-ah kisialin, gamtatna a pha mite muh dingin na bawl loh nadingun na kikem un. A hih kei leh vantungah a om na Pa uh kiangah nopna na ngah kei ding uh hi.” “Tua ahih ciangin, note in hehpihna na piak uh ciangin mi simtatte in phatna a ngah nop manun, kikhopna inn sung leh lam lai-a a mai-ah peengkul a tumsak uh bangin na hih kei un. Aman takpi kong cih-inah, amau in a phattuamna uh a ngah zo uh hi. Note in hehpihna na piak uh ciangin a kithei lo dingin na taklam khut’ hihna na veilam khut theisak kei un. A kilang lona-ah a mu thei na Pa un phattuamna hong pia ding hi.” “Thu na nget uh ciangin mi simtatte bangin na hih kei un. Bang hang hiam na cih uh leh, mi muh nadingin a ut manun kikhopna inn sung leh lamka bomah dingin thu a ngen nuam uh hi. Aman takpi kong cih-inah, amau in a phattuamna uh a ngah zo uh hi. No thu na nget uh ciangin inn sung tawngah lut un la, kong na khak khit uh ciangin a kilang lona munah a om na Pa uh kiangah na ngen un. A kilang lona-ah a om na Pa un phattuamna a hong pia ding hi. Thu na nget uh ciangin, Gentailte bangin kam nainawng ci tuan kei un. Amau in kam tampi gen leeng ngai deuh ding a sa uh hi. Tuate tawh kibangin na hih kei un. Bang hang hiam na cih uh leh, na deihna khempeuh uh na nget ma un na Pa un a thei zo hi. Tua ahih ciangin, thu na nget uh ciangin hih bangin na ngen un: ‘Vantunga a om kote Pa aw, nangma min siangtho ta hen. Na Gam hong piang ta hen. Vantungah na deihna a kicin’mah bangin, leitungah kicing ta hen. Tu ni-a ka khamkhop ding uh an hong pia in. Kote tungah hong mawhte ka maisak uh bangin, Kote mawhna zong hong maisak ta in. Kheemna hong thuaksak kei in. Gilopa kiang pan hong honkhia in,” ci-in tua bangin thu na ngen un, Note in mite mawhna na maisak uh leh, vantungah a om na Pa un note mawhna uh hong maisak ding hi. Note in midangte mawhna na maisak kei uh leh, na Pa un note mawhna uh hong maisak lo ding hi.” “Note in an na tan’ uh ciangin, mi simtatte bangin na mai uh vulsak kei un. Bang hang hiam na cih uh leh, amau in antang ahih uh mite theih ding a ut manun a mai a siasak uh hi. Ke’n aman takpi kong cih-inah, amau in a phattuamna uh a ngah zo uh hi. Nomau in an na tan’ uh ciangin na an tan’na uh mi mai-ah kilang loin, a kilang lona-ah a om na Pa uh mai-ah a kilat nadingin na sam sathau nilh un la, na mai uh phiat un. A kilang lona-ah a muthei na Pa un phattuamna hong pia ding hi.” “Na sum na paite uh kekseu thei, nget in ne thei leh, gutate in luh a, a guktheihna hih leitungah na khol kei un. Kekseu thei lo, nget in ne thei lo, gutate in luha a guk theih lohna vantungah na sum uh khol un. Bang hang hiam na cih uh leh, na sum omna munah na lungsim uh a om ding hi.” “Mittang in pumpi meivak ahi hi. Tua ahih ciangin, na mit a ciim leh, na pumpi zong a vaak kim ding hi. Na mit a man’ leh na pumpi khempeuh a mial ding hi. Na pumpi sungah a om khuavak in khuamial ahih leh, tua khuamial in a mialpha mahmah hi.” “To nih’ na kuamah in semkhawm zo lo hi. Bang hang hiam na cih uh leh, a tote khat mudahin khat a it ding hi. Khat beelin khat a simmawh ding hi. Note in Pasian’ na leh leitung’ na na semkhawm zo kei ding uh hi. Tua ahih leh ‘Bang ka ne, bang ka dawn ding hiam?’ ci-in na nuntak nading uh lunghimawh kei un, ‘Bang ka silh ding hiam?’ ci-in na pumpi ading lunghimawh kei un. An sangin nuntakna a lianzaw hi. Puan sangin pumtak lianzaw hilo ahi hiam?” “Vanah a om vasate na lungngai un. Amaute in khaici tuhin, vawhin, buh atin, beem sungah a khol kei uh hi. Ahih hangin vantungah a om na Pa un tuate a vaak hi. Tuate sangin note in man tampha zaw hilo na hi uh hiam? A lunghihmawh manin tong khat beek a khangkhan thei note lakah kua a om hiam? Puan silh dingah bang hangin lunghimawh na hi uh hiam? Gamlakah unok kungte in bangci khang thei ahi uh hiam ci-in lungngai un. Amaute in na lah sem lo, khau lah kheek lo uh hi. Ahih hangin Solomon nangawn a minthan’na puan a silh lai takin tua unok khat bangin kizeem lo hi, ci-in kong gen hi. Upna neute aw, tuni-in om a, zing ciangin mei khukah kikhul thei lopate Pasian in puan silhsak ahih ciangin, tua tham loin note zong puan hong silhsak ding hilo ahi hiam? Tua ahih ciangin, ‘Bang ka ne ding hiam? Bang ka dawn ding hiam? Bang ka silh ding hiam?’ ci-in lunghimawh kei un. Gentailte in tua nate khempeuh hangah a lungmang uh hi. Tua na khempeuh na sap uh vantungah a om na Pa un a thei hi. Pasian’ Gam leh ama dikna zong masa un. Na zon’ uh leh, tua na khempeuh a hong pia thuah ding hi. Tua ahih ciangin, zing ciang ading na lunghimawh kei un. Zing ciang in ama ading a lunghimawh ding hi. Tuni a, om lungkhamna in tuni ading a kicing hi.” “Thukhenna tawh na kipelh theih nadingun midangte’ thu na khen kei un. Bang hang hiam na cih uh leh, midangte tungah na khen uh bangin note in thukhenna na thuak ding uh hi. Midangte na piakna uh seeng bangin no zong seengin hong kipia kik ding hi. Na mit sunga singluang lungngai loin na u na nau’ mit sunga ninneng tang bang hangin na en hiam? Na mit sungah singluang om napi-in na u na nau kiangah, ‘Na mit sungah a om ninneng tang hong paaikhiasak in,’ bang hangin ci na hi hiam? Nang mi simtatpa aw, na mit sungah a om singluang paaikhia masa in. Tua khit ciangin, na u na nau’ mit sunga a om ninneng tang paihkhiat ding na tel muh thei ding hi.” “Na a siangthote uite na pia kei un. Vok mai-ah suangmanphate na paai kei un. Tuate in a khe uh tawh a sikgawp khit uh ciangin, kihei-in hong pet kha ding uh hi.” “Ngen un. Na nget uh leh, hong pia ding hi. Zong un. Na zon’ uh leh, na mu ding uh hi. Kongkhak na kiu un. Na kiuh uh leh, hong hon’ ding hi. Bang hang hiam na cih uh leh, a ngente khempeuh in a ngah uh hi. A zongte khempeuh in a mu uh hi. A kiute khempeuh ading kongkhak a hon’ ding hi. A ta in khomun ngen leh, suang a pia ding, ngasa ngen leh, gul a pia ding, note lakah kua a om hiam? Note in migilo na hi napi-un na tate uh a hoih na piak uh leh, tua sangin vantungah a om na Pa un a ngente a hoih, a bang zah a hong pia zaw ding hiam? Tua ahih ciangin, nang tungah hong kibawl ding na deih bangin, midangte tungah na bawl in. Hih thu in Pasian’ Thukham leh Pasian’ kamsangte thu sung pan a bulpi ahi hi.” “Kong kawciik ah lut un. Bang hang hiam na cih uh leh, siatna mun tun’ nading kong leh lampi tanzau a, mi tampi a lut uh hi. Bang hang hiam na cih uh leh, nuntakna mun tun’ nading kong kawciik a, lam neu a, mi tawmcik a lut uh hi.” “A sungah hangsan ngia hi napi-in tuuvun silh a, no kiangah hong pai thuzuau hilhte na kingaihsun un. Amau gah en le uhteh, amau lungsim na thei ding uh hi. Lingkungah leenggah kilo thei hiam? Thangling kungah theigah kilo thei hiam? A kung hoih khempeuh in gah hoih a gah thei uh hi. Kung hoih lo in gah hoih lo a gah thei hi. A kung hoih in a gah hoih lo gah thei lo hi. A kung hoih lo in a gah hoih gah thei lo hi. A gah hoih lo kung khempeuh kiphuk tan a, mei sungah kikhul ding hi. Tua hi a, tua mite’ lungsim uh a gahin na thei ding uh hi.” “Topa aw, Topa aw,’ hong ci khempeuhte Vantung Gam sungah tum thei kim lo ding uh hi. Vantungah a om ka Pa’ deih bang a gamtate bek a tung ding uh hi. Tua Ni ciangin, ‘Topa, Topa, kote in nangma min tawh Pasian thu hilh hilo ka hi uh hiam? Nangma min tawh dawite hawlkhia hilo ka hi uh hiam? Nangma min tawh nalamdang tampi hih hilo ka hi uh hiam?’ ci-in mi tampite in hong gen ding uh hi. Tua bang a hong gen uh ciangin, ‘Note cikmahin kong thei ngei kei hi. Mawhna a hihte aw, kei kiang panin taikhia un,’ ka ci ding hi.” “Tua ahih ciangin, ka thuhilhna za a, a zuite khempeuh in suang tunga inn lam mipil tawh kibang ahi cih ka genteh ding hi. Guah tampi zu a, tui luang a, huih nung a, tua inn a mut ciangin, suang tungah kilam ahih maninah puk lo hi. Tu-a ka thuhilhte za napi, a ngai lo mi khempeuhte in sehnel tungah inn lam mihai tawh kibang ahi cih ka genteh ding hi. Guah tampi zu a, tui luang a, huihpi nung a, tua inn a mut ciangin, sehnel tungah kilam ahih maninah a puk hi. Tua pukna in pukna lian ahi hi,” ci-in Zeisu in a hilh hi. Hih bangin Zeisu in thu khempeuh a hilh khit ciangin, mihonpite in Topa’ thuhilhna lamdang a sa uh hi. Bang hang hiam i cih leh, amah in laitheite bangin a hilh kei hi, ukpa bangin thu a hilh hi. Zeisu mual tung pan hong kumsuk khit ciangin, mihonpi in a nung a zui uh hi. Tua lai takin miphak khat in Zeisu kiangah va pai-in bia a, “Topa aw, nong hih nop leh, kei nong damsak zo ding hi,” ci-in a ngen hi. Zeisu in a khut zanin lawng a, “Ka hih nuam hi, na dam ta in,” a cih leh, thakhatin a dam pah hi. Zeisu in, “Hih thu kuamah kiangah na gen kei in. Pasian’ siampi kiangah pai inla, va kilak in. Amau in a theih nadingun Moses’ thu piaksa bangin biakna na pia in,” a ci hi. Zeisu in Kapernaum khuapi-ah a tum ciangin galkap mangpa khat in a kiangah va nai a, “Topa aw, keima nasempa khat a khut a khe si-in gim mahmah a, inn sungah a lum hi,” ci-in a ko hi. Zeisu in, “Hong pai-in ka damsak ding hi,” a ci hi. Galkap mangpa in, “Topa aw, keima inn khum nuaiah nong lut dingin ka kilawm kei hi. Na kam bekin thupia lecin zong ka nasempa a dam ding hi. Bang hang hiam cih leh, keimah in zong za nuai ah hong kikoih hi. Keima nuai ah zong galkapte a om hi. Tua galkapte khat, ‘Pai in,’ ka cih ciangin a pai hi, khat ‘hong pai in’ ka cih ciangin a hong pai hi. Ka nasempa, ‘Hih na sem in,’ ka cih ciangin a sem hi,” a ci hi. Zeisu in tua thu a zak ciangin lamdang sa a, “Ke’n aman takpi kong cih-inah, hih zah alian upna Israel mipawl lakah ka mu ngei kei hi. Ke’n kong cih-inah, mi tampi in nisuahna lam, nitumna lam panin hong pai-in, Abraham, Isaak leh Jakobte tawh Vantung Gam sungah a tukhawm ding uh hi. Gamsung mite ahih uh leh, pualam khuamial lakah a hawlkhia ding hi. Kahna leh ha gawina a om ding hi,” ci-in a nungzuite kiangah a gen hi. Zeisu in galkap mangpa kiangah, “Na ciah in. Na upna bangin nangma ading piang ta hen,” a ci hi. Tua a nasempa in tua hunin a dam pah hi. Zeisu in Piter’ inn sungah a tum ciangin, Piter’ sungnu nattun’ a, lum a mu hi. Zeisu in, a khut a lawn’ ciangin a nattun’ dam a, tho-in zinte a vaak hi. Nitak ciangin a sungah dawi lut tampi Zeisu kiangah hong paipih uh a, thu khat bek tawh dawi a hawlkhia a, cinate khempeuh a damsak hi. Tua thu khempeuh in kamsangpa Isaiah tungah a gen ngei bangin a tun’ nading ahi hi. A genna thu in, “Amah in eite gimna tawlna la a, eite cinatna lunatna a thuak hi,” a ci hi. Mihonpi in amah a uum Zeisu in a muh ciangin, “Galkhat ah pai ni,” a ci hi. Tua lai takin laitheipa khat hong pai a, “Sia aw, na paina khempeuh ah kong zui ding hi,” a ci hi. Zeisu in, “Ngiate in kua nei uh hi. Vasate in zong bu a nei uh hi. Ahih hangin Mihing Tapa in ahih leh, a lutang ngak nading mun a nei kei hi,” a ci hi. A nungzuite khat in, “Topa aw, ka pa vui masak nadingin ah thu hong pia in,” ci-in a ngen hi. Zeisu in, “Misite in amau misite na vui ta hen. Ka nung hong zui in,” a ci hi. Tua khit ciangin Zeisu in gunkuang tungah tuang a, a nungzuite in a zui uh hi. Huih nakpi nung a, tui kilok-in gunkuang a pap hi. Zeisu a ihmu hi. A nungzuite in Zeisu a phong uh a, “Topa aw, kote ka si dek tak uh hi. Hong hon in,” a ci uh hi. Zeisu in, “Upna neute aw, bang dinga lau na hi uh hiam?” a cih khit ciangin, tho a, huih leh tuihual a taai khit ciangin a dai ta hi. Tua mite in, “Hih pa in bangci mi ahi hiam? Huih leh tuipi nangawn in a thu a ngai tazen uh hi!” ci-in lamdang a sa uh hi. A galkhatah Gadara gam a tun’ uh ciangin, lampi ah kuama pai ngam lohna dinga om, a hangsan mahmah dawi lut nih in han lak pan pusuakin Zeisu va dawn uh hi. “Pasian’ Tapa aw, kote in nang tawh bang kikum i hi hiam? A hun hong tung nai lopi-in kote susia ding hong pai na hi hiam?” ci-in a kiko uh hi. Tua mite tawh kigamla-ah vok honkhat gamta-in a om uh hi. Dawite in, “Topa aw, kote nong hawlkhiat leh, vok hon sungah hong lutsak in,” ci-in a ngen uh hi. “Pai ta un,” a cih ciangin dawite a paikhia uh a, vokte sungah a lut uh leh, vok hon in keen sang tung pan nakpi-in taisuk uh a, tui sungah a si khin uh hi. Vok cingte tai uh a, khua sungah a lut khit uh ciangin, dawi lutte’ thu a kipan thu khempeuh a ko uh hi. Tua ciangin, khuazangin Zeisu dawn dingin a kuankhia uh a, Zeisu a muh uh ciangin, “Ko gam pan taikhia in,” ci-in a thuum uh hi. Tua ciangin Topa zong gunkuang sungah tuang a, a galkah khit ciangin a teen’na khua-ah a tung hi. Tua lai takin a khut a khe si mi khat a lupna tawh pua uh a, Zeisu kiangah a va paipih uh leh, Zeisu in amaute’ upna a theih ciangin, a khut leh khe sipa kiangah, “Ka ta aw, na lunghimawh kei in. Na mawhnate kimaisak zo hi,” a ci hi. Laitheite kimkhat in, “Hihpa in Pasian tungah a pau khial hi,” ci-in a lungngai uh hi. Zeisu in amau lungsim a theih ciangin, “Na sin sung uhah hoih lohna thu bang hangin ngaihsun na hi uh hiam? Bang ci leng a baih zaw hiam? ‘Na mawhnate kimaisak zo hi,’ ci leng a baih zaw hiam? ‘Tho inla, pai in,’ ci leng a baih zaw hiam? Ahih hangin Mihing Tapa in leitungah mawhna a maisak theih nading thu a neih lam na theih nadingun, ‘Tho in, na lupna puan la inla, na innah ciah in,’” ci-in a khut a khe sipa kiangah a ci hi. Amah tho-in a innah a ciah pah hi. Mihonte in a muh uh ciangin a lau uh a, hih bang bawl theih nading thu mi tungah a pia Pasian a phat uh hi. Zeisu in tua mun panin paikhia a, Mattiu kici mi khat siah don’na buk sungah tu-a om a mu hi. “Ka nung hong zui in,” a cih ciangin ding-in a zui hi. Zeisu in inn sungah an a nek lai takin, siahdongte leh mawhnei tampite va pai uh a, Zeisu leh a nungzuite a tukhawm uh hi. Farisaite in a muh uh ciangin a nungzuite kiangah, “Na Siapa uh siahdongte leh mawhneite tawh bang hangin an ne khawm ahi hiam?” a ci uh hi. Zeisu in a zak ciangin, “Cidamte in zato deih lo uh hi. Cinate bek in a deih uh hi. ‘Sagawh biakna sangin hehpihna ka deih zaw hi,’ a cihna thu na theih nadingun pai un la, va sin un. Miphate sam dinga hong pai ka hi kei hi. Mawhneite sam dinga hong pai ka hi hi,” a ci hi. Tua khit ciangin Johan’ nungzuite in Zeisu kiangah va pai uh a, “Ko leh Farisaite in an nek ka tang zeel uh hi. Bang dinga na nungzuite in an nek tang lo ahi uh hiam?” a cih uh ciangin Zeisu in, “Zipipa in a lawmte tawh a omkhawm lai takin tuate a dah thei ding uh hiam? Ahih hangin zipipa in a lawmte tawh a kikhen ni a hong tung ding hi. Tua ciangin a lawmte in an nek a tang ding uh hi. Kuamah in puanlui pen puan thak tawh a thuap kei uh hi. Tua bangin a thuap leh, a thuapna puan in a luisa kai keek semsemin a vang gol ding hi. Mite in leenggahtui thak savun uum lui sungah a thun kei uh hi. Tua bangin a thun leh, savun a puakkham sak ding hi. Leenggahtui luangkhia-in savun a kisia gawp thei hi. Leenggahtui thak savun uum thak sungah a kithun leh, a nihin kisia lo ding uh hi,” a ci hi. Tua bangin thu a hilh lai takin, ukpa khat in va nai a, Zeisu a biak khit ciangin, “Ka tanu a si zo hi. Ahih hangin Topa hong pai-in a tungah na khut nga leteh, a nungta kik ding hi,” ci-in a ngen hi. Zeisu ding a, a nungzuite tawh tua pa nung a zuikhawm uh hi. Tua lai takin kum sawm leh kum nih tawntung si luang natna a vei numei khat in, “Ama puan bek lawng kha leng ka dam ding hi,” ci-in lungngai a, Zeisu nung lamah pai-in a puan mong teep a lawng hi. Zeisu kihei a, tua numei a muh ciangin, “Ka tanu aw, na lunghimawh kei in. Na upna in nang hong damsak zo hi,” a cih ciangin, thakhatin a dam pah hi. Zeisu in ukpa’ inn sungah a lut leh, tamngai tumte leh mihonpi gamlum a, om a muh ciangin, “Taikhia un. Numeino a si hi lo hi, a ihmu hi,” a cih leh, tua mite in zahpihin a nuihsan uh hi. Zeisu in mihonpi a hawlkhiat khit ciangin inn sungah tum a, numeino’ khut a let leh, numeino a thokik hi. Tua thu in gam sung khempeuh zelin a thang hi. Zeisu tua mun panin a paikhiat ciangin, mittaw nih in a nung zui uh a, “David’ Tapa aw, ko hong hehpih in,” ci-in a kiko uh hi. Innah a lut ciangin mittawte in Zeisu kiangah va nai uh a, Zeisu in, “Hih thu bawl thei-in na hong um uh hiam?” ci-a a dot ciangin amau in, “Ka um uh hi, Topa aw,” a ci uh hi. Tua ciangin Zeisu in tuate’ mittang lawng a, “Na up uh bangin note ading hong piang ta hen” a cih ciangin amau mit uh a vak hi. Zeisu in, “Hih thu kuama theih loh nadingin kikeem un,” ci-in nakpi-in a kham hi. Ahih hangin amau tegel paikhia uh a, tua thu gamsung khempeuh zelin a thangsak uh hi. Tua mite a paikhiat lai takun dawivei, pau theilo mi khat Zeisu kiangah va kipaipih hi. Zeisu in dawi a hawlkhiat leh, pau theilopa in kam a gen thei pah hi. Mihonte in lamdang a sa uh a, “Israel pawlte sungah hih bang thu kimu ngei lo hi,” a ci uh hi. Farisaite in, “Dawi mangpa suangin dawite a hawlkhia hi,” a ci uh hi. Zeisu in kikhopna inn sungah thu hilhin, gamsung khuapi, khuaneu khempeuh ah vak kawikawi a, Vantung Gam Lungdamna Thu hilh a, cina, luna khempeuh a damsak hi. Amah in mihonpite a muh ciangin hehpihhuai a sa hi. Bang hang hiam i cih leh, tua mite in a cing om lo, kikhenthang a, a gim tuute bangin a om uh hi. Tua ciangin Zeisu in a nungzuite kiangah, “Buh at ding tampi a om hi. Ahih hangin a at ding mite a tawm hi. Tua ahih ciangin, ‘buh at nasem ding mi hong sawl in’ ci-in buh nei Topa kiangah thu na ngen un,” a ci hi. Tua ciangin Zeisu in a nungzuite sawm leh nihte a sap khit ciangin, kihhuai dawite hawlkhiat theih nading ahi zongin, cinatna pawl khempeuh damsak theih nading ahi zongin thu a pia hi. Sawltak sawm leh nihte a min un: a masa bel Piter kici, Simon leh a naupa Andru, Zebedi’ tapate Jakob leh Johan, Filip leh Bartholomai, Thomas leh siahdong Mattiu, Alfe-as’ tapa Jakob leh Thaddeas, Kanaan mi Simon leh Zeisu a lehheekpa Judah Iskarot-te ahi uh hi. Tua sawm leh nihte Zeisu in sawl a, “Gentailte omna-ah pai kei un. Samaria-te khua sungah lut kei un. Israel pawl a gammang tuute kiangah na pai zaw un, Na pai uh ciangin, ‘Vantung Gam hong nai zo hi,’ ci-in na hilh un. Cinate na damsak un, misite na hing kiksak un. Miphakte na dam sak un. Dawite na hawlkhia un. Man piak lohin na ngah uh bangin, man sang loin na pia un. Kham, ngun, sumngote, na kawnggak sung uh ah na vom kei un. Lampi-ah na zat dingun thungip, puanak nih, khedapte, ciangkhut, tuate na keng kei un. Bang hang hiam na cih uh leh, nasempa in neek ding dawn ding a ngah tuak hi. Khuapi, khuaneu khatpeuh mah na lut uh ciangin, ‘Hih khua-ah tun’ nading kua kilawm ahi hiam?’ ci-in na dong un la; na paikhiat matengun tuapa’ innah va om un. Inn sungah na lut uh ciangin, ‘Thupha om ta hen,’ na ci un, Tua inn a kilawm leh, note thupha a tungah tung ta hen. A kilawm kei leh, note kiangah hong kileh kik ta hen. Mi khatpeuh mah in no hong nolh a, na thu uh a ngaih nop kei leh, tuapa’ inn pan ahi zongin, a khua pan ahi zongin na paikhiat uh ciangin, na khepeek uhah leivuite na singkhia un. Ke’n aman takpi kong cih-inah, thukhen ni ciangin tua khua in, Sodom leh Gomorrah khuate sangin a thuakzaw ding hi.” “Ngia hon lakah tuute bangin no kong sawl hi. Tua ahih ciangin, note in gul bangin na pil un la, vakhu bangin gilo nei loin na om un. Mite na kikeem un. Bang hang hiam na cih uh leh, amau in upa vaihawmte thukhenna inn sungah kikhopna inn sungah note hong sat ding uh hi. Tuate akipan Gentailte mai-ah teci-in na pan’ nadingun, mangte leh kumpite mai-ah keima hangin note hong paipih ding uh hi. Ahih hangin amaute in note hong piak uh ciangin, bang ka ci pau ding hiam, bang thu ka gen ding hiam ci-in lunghimawh kei un. Bang hang hiam na cih uh leh, na gen ding uh thu tua lai takin na ngah ding uh hi. Bang hang hiam na cih uh leh, note a gen ding na hi kei uh hi; na Pa uh’ Kha Siangtho in note tungah a gen ding hi. Unau khat leh khat ahi zongin, pa in a tapa ahi zongin, sih nadingin a kiheek ding uh hi. Tate in a nu leh a pate galin do ding uh hi. Tate in a nu leh a pate galin do ding uh a, thah dingin a pia ding uh hi. Keima min hangin, mite khempeuh in note hong mudah ding uh hi. A tawp dongin a thuak zote in gupna a ngah ding uh hi. Khua khatah note hong bawlsiat uh leh, khua khatah na tai un. Ke’n aman takpi kong cih-inah, Israel khua khempeuh na vak kim khit ma-un Mihing Tapa hong pai ding hi.” A nungzuite in a siapa sangin lianzaw lo hi. Nasempa in a topa sangin lianzaw lo hi. A nungzuite in a siapa bangin, a silapa in a topa bangin ahih leh, a pha hi. Inn teekpa ‘Beelzebub’ a cih uh leh, a innkuanpihte tua sangin a ci nuam zaw sem ding uh hilo ahi hiam?” “Tua ahih ciangin, amaute na kihta kei un. Bang hang hiam na cih uh leh, a kilak lo dinga kisincip bangmah om lo hi. A kithei lo dinga bu bangmah om lo hi. Khuamial lakah no kiangah ka gennate, khuavak lakah na gen un. Na bil sung uhah kong gennate, innkhum vumah kiko-in na gen un. Pumpi a thah theih hangin kha a that zo lote na kihta kei un. Pumpi leh kha hel khua sungah a khul zopa na kihta zaw un. Gitta nih in dangkasan peek khat tawh kizuak hilo ahi hiam? Na Pa un thu pia kei leh, tua gitta khat beek lei tungah kia mawk lo hi. Na sam uh zong a kisim khin hi. Tua ahih ciangin, na lau kei un. Note in gitta tampi sangin na manpha zaw uh hi.” “Mite mai-ah kei hong mang hong ngai peuhmah, vantungah ka Pa mai-ah zong ka ngai ding hi. Mite mai-ah hong nial peuhmah, vantungah ka Pa mai-ah ke’n zong ka nial ding hi.” “Leitungah kilemna khah dingin hong pai hi,’ ci-in hong um kei un. Kilemna khah dingin hong pai ka hi kei hi. Namsau khat khah dingin hong pai ka hi hi. A tapa leh a pa, tanu leh a nu, teeknu leh monu, khat leh khat kitawngsak dinga hong pai ka hi hi. Mi khat adingin ama innkuanpihte mah a gal hong suak ding hi. Kei hong it sangin a nute a pate a it zaw mi in, kei tawh kituak lo hi. Kei hong it sangin a tapa a tanu a it zawte in, kei tawh kituak lo hi. A singlamteh pua-a ka nung hong zui lote in, kei tawh kituak lo hi. Ama nuntakna a ngahte in, a nuntakna a mangthang ding hi. Keimah hanga nuntakna a mangsakte in, nuntakna a ngah ding uh hi.” “No hong ngaite in kei hong ngai hi. Kei hong ngaite in kei hong sawlpa zong a ngai hi. Pasian’ kamsangpa in kam sangpa ahih maninah, tua kamsangpa a ngaite in Pasian’ kamsangpa’ phattuamna a ngah ding hi. Misiangtho in mi siangtho ahih maninah, tua misiangtho a ngaite in misiangtho’ phattuamna a ngah ding hi. Keima thu zui ahih maninah, hih naupang a neupen tui hai khat a pia peuhmah in, aman takpi kong cih inah phattuamna ngah loin a om kei ding hi,” ci-in Zeisu in a gen hi. Zeisu in a nungzui sawm leh nihte tua bangin a vaikhak khit ciangin, khua sungah thu gen ding, thu hilh dingin tua mun pan a paikhia hi. Khazih in a bawlna thu thong sung pan Johan in a zak ciangin a nungzuite sawl a, “Nangmah in a hong pai dingpa taktak na hi hiam? Ahih kei leh, midang khat ka lamen lai ding uh hiam?” ci-in a dong sak hi. Zeisu in, “Note pai un la, na zaksa uh, na muhsa uh, Johan kiangah va gen un. Mi mittawte in khua mukik thei uh hi. Khebaite in lam a pai thei uh hi. Miphakte in damna a ngah kik uh hi. Bengngongte in khua za thei uh hi. Misite in hin’kikna a ngah uh hi. Mizawngte kiangah Lungdamna Thu kihilh hi. Keimah hangah puk nading a nei lo peuhmah in thupha a ngah ding uh hi,” a ci hi. Tua mite a paikhiat khit uh ciangin, Zeisu in mihonte kiangah Johan’ thu a geninah, “Note in bang en dingin gampa lakah paikhia na hi uh hiam? Huih mut a, vuang pumpeeng en dingin paikhia na hi uh hiam? Ahih kei leh, bang en dingin paikhia na hi uh hiam? Puannel silhte en dingin paikhia na hi uh hiam? Puannel silhte in kumpipa’ inn sungah a om uh hi. Ahih kei leh, bang en dingin paikhia na hi uh hiam? Pasian’ kamsangpa en dingin paikhia na hi uh hiam? Ahi mah hi. Pasian’ kamsangpa sang a lianzaw hi, kong ci hi. Lai Siangtho sungah a kigelh bangin: ‘En in, na pai nading lam sial ding, Na mai-ah ka sawltakpa ka paisak ding hi,’ a cihna in tua mipa a cihna ahi hi. Ke’n aman takpi kong cih-inah, numei sung pan a suakte lakah Baptaizpa Johan sanga lianzaw khat beek a om kei hi. Ahih hangin Vantung Gam sungah a neupen in tuapa sangin a lianzaw hi. Baptaizpa Johan pan akipan tu dongin Vantung Gam in zawhthawh bawlna thuak a, a zawhthawh bawlte in gam a sut uh hi. Bang hang hiam cih leh Pasian’ kamsangte khempeuh leh thukham in Johan hun donga a piang ding thute a genkhol hi. Note in na san’ nop uh leh hong pai ding hi ci a, a kigenpa Eijah in amah ahi hi. Khua zak nading bil nei mi in za ta hen!” “Tu lai khang mite bang tawh ka genteh ding hiam? Sumbukah tu-a a om naupangte in a lawmte saminah, ‘Tamngai ka tum uh hangin na laam kei uh hi. Ka thuum uh hangin na kap kei uh hi,’ a kici naupangte tawh kibang hi. Bang hang hiam na cih uh leh, Johan in an ne lo, tui dawn loin hong pai a, amaute in, ‘Hih pa in dawi lawm a nei hi,’ a ci uh hi. Mihing Tapa in an ne, tui dawnin hong pai a, amaute in, ‘Hih pa in an hai, zu haipa hi. Siahdongte leh mi gilote tawh zawlin a kiman hi,’ a ci uh hi. Ahih hangin lungpilna in a tate tung panin diksakna a ngah hi,” a ci hi. Tua khit ciangin vangliatna tampi a lahna khuate in, a mawhna kisik kik lo uh ahih ciangin Zeisu in a mawhsakinah, “Khorazin khuapi aw, nangmah in gimna na thuak ding hi. Bethsaida khuapi aw, nangmah in gimna na thuak ding hi. Bang hang hiam na cih uh leh, note sungah hong kilak vangliatnate in Tai-ar khuapi leh Sidon khuapi sungah kilak ngei leh, amau in sawtpi pekin khautang puan silhin, vut tawh kibuakin a kisik kik zo ding uh hi. Ke’n aman takpi kong cih-inah thukhen ni ciangin, note in Tai-ar khuapi leh Sidon khuapi sangin na thuak zaw ding uh hi. Kapernaum khuapi aw, vantung dongin minthan’na na ngah ding hiam? Nang in hel khua dongin na kiasuk ding hi. Bang hang hiam na cih leh, nangma sungah a kilak vangliatnate in Sodom khuapi sungah kilak ngei leh, tu-ni dongin a kip lai ding hi. Ke’n kong cih-inah, thukhen ni ciangin nang in Sodom khuapi sangin na thuakzaw ding hi,” a ci hi. Tua ciangin Zeisu in, “Vantung leh leitung a uk ka Pa aw, nangmah in hih nate mipilte leh misiamte kiangah im-inah, naupangte tungah lak na hih ciangin na hehpihna ka phat hi. A hi mah hi, ka Pa aw, tua bangin na deih hi. Ka Pa in na khempeuh kei hong pia zo hi. Pa longal kuamah in Tapa a thei kei hi. Tapa leh Tapa in a theihsak nopte longal kuamah in Pa a thei kei hi. Van gik pua a, a gim mi khempeuhte aw, ka kiangah hong pai ta un. Tawldamna ka hong pia ding hi. Keima hakkol na kisuan un la, kei kiangah kisin ta un. Bang hang hiam na cih uh leh, keimah in lungsim niam mi ka hi hi. Note in lungsim noptuamna zong na ngah ding uh hi. Bang hang hiam na cih uh leh, ka hakkol puak nop a, ka van zong a zang hi,” ci-in Zeisu in a gen hi. Tua lai takin Zeisu in, Nipi ni khatvei, buh lei-ah a vak leh, a nungzuite gilkial uh a, buhvui lo-in a ne uh hi. Farisaite in a muh uh ciangin Topa kiangah, “En in, Nipi ni-in ahih tuak lo na, na nungzuite in ahih uh hi,” a ci uh hi. Zeisu in, “David in ama lawmte tawh a gilkial lai takin, Pasian’ biakna inn sungah lut a, amah leh a lawmte nek dinga kilawm lo, siampite bek nek dinga kilawm khomun siangtho a nek thu, sim ngeilo na hi uh hiam? Pasian biakna inn sungah a om siampite in, Nipi ni a tan’ khialh uh hangin a mawh kei uh hi, a cihna Pasian’ Thukham Lai Siangtho sungah sim ngeilo na hi uh hiam? Hih san takah Pasian biakna inn sangin a lianzaw khat a om hi, kong ci hi. ‘Sagawh biakna sangin, hehpihna ka deih zaw hi,’ a cihna thu na theih uh leh, mawh neilo mite na mawhsak kei ding uh hi. Bang hang hiam na cih uh leh, Mihing Tapa in Nipi ni ukpa ahi hi,” ci-in a gen hi. Tua mun pan paikhia a, amaute kikhopna inn sungah a lut hi. Tua lai-ah khut langkhat si mi khat a om hi. Amaute in Topa a mawhsak nop manun, “Nipi ni-in cinatna damsak tuak ahi hiam?”ci-in a dong uh hi. Zeisu in, “Ama tuu khat bek a neih Nipi ni-in leihawm sungah kia leh, a lakhia lo ding note lakah kua om ahi hiam? Mi khat in tuu sangin a manpha zaw hi. Tua ahih ciangin Nipi ni-in phatna bawltuak hi,” a ci hi. Tua ahih ciangin a cinapa kiangah, “Na khut zan in,” a cih ciangin ama khut a zan leh, a khut langkhat mah bangin a dam hi. Tua lai takin Farisaite paikhia a, “Amah bangci leeng susia thei ding i hi hiam?” ci-in a vaihawm uh hi. Zeisu in a theih ciangin tua mun pan a paikhiat leh, mihonpi in a nung a zui uh a, cina khempeuh a damsak hi. “Kei kua mi ka hih lam kuamah kiangah na gen kei un,” ci-in a kham hi. Bang hangin hih bangin a kham hiam i cih leh, Pasian in kamsangpa Isaiah tungah a genna thu a tun’ nading hi. A thu genna in: “Ka teelsa ka nasempa, Ka lung hong damsak, ka it mahmah pa en un. Ama tungah ka Kha Siangtho ka omsak ding hi. Amah in Gentailte tungah thukhenna thu a hilh ding hi. Amah in thuseel lo kiko lo ding a, Lampi ah a aw kuamah in za lo ding hi. Thu a khensak khit matengin A awnsa pumpeeng kuai tan lo a, A khu suaksa meivak khau a sumit kei ding hi. Ama min zong Gentailte in a muang ding uh hi,” a ci hi. Tua ciangin dawi lut a, mittaw, a pauthei lo mi khat Zeisu kiangah a paipih uh a, a damsak ciangin, tua pa in khua mu thei a, a pau thei pah hi. Tua gama mi khempeuh in lamdangsa-in, Hih pa in David’ ta ahi hiam?” ci-in a dong uh hi. Farisaite in a zak uh ciangin, “Hih pa in Beelzebub suangin dawite a hawlkhia hi,” a ci uh hi. Zeisu in amau lungsim ngaihsutna a theih ciangin, “Gamsung mi kilem lo-a a kikhen gam khempeuh kisia ding hi. A mi kilem lo, a kikhen khua leh inn khempeuh zong a kip zo kei ding hi. Satan in Satan a hawlkhiat leh, amah leh amah kilem lo a, kikhen hi. Tua ahih ciangin, ama gam bangci a kip zo ding hiam? Keimah in Beelzebub suangin dawite hawlkhia leng, na tate un kua suangin dawite hawlkhia ding ahi uh hiam? Tua ahih ciangin, amaute in note tungah thukhen dingte ahi uh hi. Keimah in Kha Siangtho suangin dawite ka hawlkhiat leh, Pasian’ Gam in note kiangah hong tung zo hi. Mi khat in, thahatpa hen masa kei leh, a inn sungah bangci tumin a sumte a sut zo ding hiam? Mi thahatpa a hen khit ciangin, a inn sungah sumte kisut zo bek ding hi. Kei tawh kipawl lote in, ka lang khatah a om hi. Keimah tawh a khawmkhawm lote in a kithehthang sak hi. Tua thu hangin ke’n kong cih-inah, mawhna leh Pasian gensiatna khempeuh, maisak nading thu mite in a ngah ding uh hi. Ahih hangin Kha Siangtho gensiatna kimaisak nading thu mite in ngah zo lo ding hi. Mihing Tapa a gensiate, a mawhna kimaisak thei ding hi. Kha Siangtho a gensiate’ mawhna ahih leh, tu khang laitak ahi zongin, tu nung khang ahi zongin kimaisak zo lo ding hi.” “A kung hoih a, a gah hoih hi, na ci un. Ahih kei leh, a kung hoih lo a, a gah hoih lo na ci un. Bang hang hiam na cih uh leh, a kung a gahin kithei hi. No mualtan’ suante aw, no gilo na hih uh ciangin kam hoih bangci gen theih ding na hi uh hiam? Bang hang hiam na cih uh leh, lungsim dima om bangin kam in a gen thei hi. Miphate in a sumkholna hoih sung pan a pha nate a pusuaksak hi. Mipha lote in a hoih lo sumkholna sung panin a pha lo nate a pusuaksak hi. Ke’n kong cih-inah, mite in mawkna kampauna khempeuh hangin thukhen ni ciangin teldotna a thuak ding uh hi. Bang hang hiam na cih uh leh, na thu genna hangin mawhsakna tawh na kipelh ding uh hi. Na thu genna hangin thukhenna na thuak ding uh hi,” ci-in a hilh hi. Tua lai takin laitheite leh Farisaite kimkhat in, “Topa aw, lim khat hong lak le-cin kote in ka mu nuam uh hi,” a cih uh ciangin Zeisu in, “Mipaktat leh mi gilo khang mite in lim a nget uh hangin, Jonah lim longal lim dang amau tungah a kilak kei ding hi. Jonah in ngapi’ gil sungah ni thum a om mah bangin, Mihing Tapa in ni thum lei sungah a om ding hi. Thukhen ni ciangin Nineveh khuamite in tu-a khang mite lang khatah ding-in a mawhsak ding uh hi. Bang hang hiam na cih uh leh, Jonah in thu a hilh manin amau in mawhna a kisikkik uh hi. Hih lai takah Jonah sangin a lianzaw mi khat a om hi. Khang lam gam kumpinu in, a thukhen ciangin, tu-a khang mite lang khatah ding-in a mawhsak ding hi. Bang hang hiam na cih uh leh, amah in Solomon’ lungpilna thu ngai dingin, lei mong panin a pai hi. Hih lai takah Solomon sangin a lianzaw mi khat a om hi.” “A kihhuai dawi in mi khat sung pan a paikhiat khit ciangin, mun keuna ah vakin khawl nading a zong hi. A muh loh ciangin, ‘Ka paikhiatna inn lam ciahkik ning,’ ci-a a pai leh, a tun’ ciangin tua inn awngin, kiphiat kipuah a, om a mu hi. Tua ciangin pai a, amah sangin a gilo zaw dawi sagih va sam a, tua pa sungah a lut uh hi. Tua ahih ciangin, tuapa a pian’ nunung pen in a pian’ masak sangin a siazaw hi. Tua mah bangin hih a gilo khang mite zong ahi ding hi,” a ci hi. Zeisu in mihonpi thu a hilh lai takin a nu leh a sanggamte in amah hopih nuamin, inn pua lamah ding-in a om uh hi. Mi khat in, “Na nu leh na sanggamte in nang hong hopih nuamin inn pua lamah ding-in a om uh hi,” a cih ciangin Zeisu in, “Ka nu leh ka sanggamte kua ahi uh hiam?” ci-in dong a, a khut zanin a nungzuite kawk a, “En un, hih mite in ka nute, ka sanggamte ahi uh hi. Bang hang hiam na cih uh leh, vantungah a om ka Pa’ deihna bangin a gamtate in, ka sanggampa, ka sanggamnu, ka nu ahi uh hi,” a ci hi. Tua ni-in Zeisu in inn panin paikhia a, tuili geiah a tut lai takin, mihonpi a kiangah kikhawm uh a, amah in gunkuang tungah tuangin a tu hi. Mihonpite khempeuh tuili geiah, lei tungah a ding uh hi. Zeisu in thugentehna tawh thu tampi a hilhinah, “En un, khaici vawhpa in khaici vawh dingin a kuankhia hi. Khaici a vawh lai takin, kimkhatte lampi geiah kia a, vasate hong pai-in, tawmin a ne uh hi. Kimkhatte lei tam lohna suang lakah kia a, lei a dai manin, a po pah hangin, ni suak a, a sat ciangin, zung kha zo lo ahih manin a vul gawp hi. Kimkhatte ling lakah kia a, lingkungte a khan’ ciangin dep gawp uh hi. Kimkhatte in lei hoihna-ah kia a, a zah zakhat, a zah sawmguk, a zah sawmthumin a gah hi. Zak nading bil a nei teng in za ta un!” a ci hi. A nungzuite in va nai uh a, “Topa aw, bang hangin thu gentehna tawh hih mite hilh na hi hiam?” a cih uh ciangin Zeisu in, “Note in Vantung Gam thu theih hakte na theih nadingun thu hong pia hi. Amaute ahih uh leh, a theih nadingun thu kipia lo hi. A neite kipia beh ding a, a hauzaw ding hi. A neilote kiang pan a neihsa nangawn kilakhia ding hi. Tua ahih ciangin, tua mite thugentehna tawh ka hilh hi. Bang hang hiam na cih uh leh, amau enin, en napi-in mu lo ding uh hi. Ngai-in, ngai napi-in za lo uh a, akhiatna a thei kei ding uh hi. Pasian’ kamsangpa Isaiah’ hilh ngeina thu in amau tungah a tung ding hi. Isaiah thu in: ‘Note in ngai-in, na za napi-un a khiatna na thei kei ding uh hi. Note in enin, na en napi-un na mu kei ding uh hi. Bang hang hiam na cih uh leh, hih mipawlte in a mit un khua mu lo, A bil un khua za lo, A lungsim un thei lo, A gamtatna uh kikhel lo, Amau cinatna uh ka damsak loh nadingin, Amau lungsim uh khauh a, A bil uh ngong a, A mit uh a si uh hi,’ a ci hi. Note na mittang un mu thei ahih ciangin thupha na ngah ding uh hi. Na bil un khua za ahih ciangin, thupha na ngah ding uh hi. Ke’n aman takpi kong cih-inah, na muhte uh Pasian’ kamsangte leh misiangthote tampi in a muh nop uh hangin a mu kei uh hi. Na zakte uh a zaknop uh hangin a za kei uh hi. Tua ahih ciangin, khaici vawhpa thugentehna na ngai un. Mi khat in Vantung Gam thu a zak ciangin, thei lo ahih ciangin dawimangpa hong pai a, a sin sunga kivawh khaici a lakhia hi. Tuate in lampi geiah a kia khaici ahi hi. Suang lakah a kiate in, thu a zak ciangin lungdamin a man’ pah hangin, a sungah zung kha lo ahih ciangin tawlkhat kikal bek a kip hi. A thu hangah gimna ahi zongin, bawlsiatna ahi zongin a thuak ciangin, thakhatin a pukte ahi hi. Ling lakah a kiate ahih leh, thu a zak ciangin leitung lunghihmawhna, sum leh pai khemna in depgawp uh a, a gah zo lote ahi hi. Lei hoihna ah a kiate in, thu a zak ciangin a khiatna thei-in a zah zakhat, a zah sawmguk, a zah sawmthumin a gah theite ahi hi,” a ci hi. Thugentehna khat in, “Vantung Gam in khaici hoih a vawh mi tawh kibang hi. Mite ihmut kalun a galpa pai a, tahum tang, taang lakah a vawh khit ciangin a paikhia hi. Taang po a, hong vuih khit ciangin tahum zong hong kilang hi. A nasemte in a topa uh kiangah pai a, ‘Topa aw, lo lai-ah khaici hoih vawh hilo na hi hiam? Tahum in koi pan a hong piang hiam? ci-a a koh uh ciangin a topa un, ‘Hih thu in galte hong bawlna thu hi,’ a ci hi. A nasemte in, “Tahum kungte va bot le-ung nong awi hiam?’ a cih uh leh, a topa un, ‘Bot nai kei un. Bang hang hiam na cih uh leh, na bawh uh leh, taang kung tawh na botkhawm kha ding uh hi. Taang lak hun matengin a nam nihin khangkhawm tadih hen. Taang lak hun hong tun’ ciangin, lopa teng bot masa un la, mei ah hal dingin lom hen un. Taang ahih leh, ka sal sungah hong koih un,’ ci-in taang late ka vaikhak ding hi,” a ci hi. Thugentehna adang inah, “Vantung Gam in, mi khat in lo lai-ah a cin’ ankamtang tawh kibang hi. Ankamtang in tang khempeuh lakah a neupen hi. Ahih hangin a khan’ khit ciangin, ankung khempeuh sangin golzaw a, vana vasate in leengin a hiangah a tuang thei uh hi,” a ci hi. Thugentehna adang a geninah, “Vantung Gam in numei khat in buhnel seeng thum a tawk khit matengin a sawh, silngo tawh kibang hi,” a ci hi. Zeisu in tuate khempeuh thugentehna tawh mihonpite a hilh hi. Thugentehna loin thu a hilh kei hi. Bang hang hiam i cih leh; “Ka kam ka-in thugentehna-in ka hilh ding hi. Lei pian’cil a kipan, thu ki-im khempeuh ka pulak ding hi,” ci-a Pasian’ kamsangte tungah a gensa a tun’ nading hi. Tua ciangin Zeisu in, mihonpi lak pan paikhia-in, inn sungah a lut khit ciangin, a nungzuite a kiangah va pai uh a, “Lo lai-ah a po tahum kung gentehna thu a khiatna ko hong hilh tel in,” ci-in a dot uh leh, Zeisu in, “Khaici vawhpa in Mihing Tapa hi. Lo lai in leitung mite hi. Khaici hoih in Gam sung tate ahi uh hi. Tahum tang in gilomi’ tate ahi uh hi. Tahum tang vawh galpa in dawimangpa hi. Taang lak hun in leitung bei nading hi. Taang la mite in vantungmite ahi uh hi. Lopa kungte botkhia a, mei tawh a hal uh mah bangin, leitung a bei ciangin a piang ding hi. Mihing Tapa in ama vantungmite sawl ding a, a khialte leh a puksakte khempeuh a Gam sung pan nilkhia-in, meiphual sungah a khul ding uh hi. Kahna leh ha gawina a om ding hi. Tua lai takin miphate in amau Pa’ Gam sungah ni bangin a taang ding uh hi. Zak nading bil a nei teng in na za ta un!” “Vantung Gam in lo lai-ah a kiseel sum tawh kibang hi. Tua sum a mupa in khatvei seel kik a, lungdam mahmahin pai a, a neih khempeuh zuakin tua lo a va lei hi.” “Vantung Gam in suang manpha a zong, sum zuakpa tawh kibang hi. Tuapa in suang manpha pen a muh ciangin ciah a, a neih khempeuh a zuak khit ciangin tua suang manpha va lei hi.” “Khatvei, Vantung Gam in tuili a, kipaai, ngasa nam tampi a awk thei ngeen tawh kibang hi. Ngasa a dim tak a awk ciangin, ngabengte in tui geiah kaikhia uh a, tu-in nga a hoihte teelin bawm sungah a guang uh hi. Ngasa a hoih lo teng a pam khawng ah a paii uh hi. Tua mah bangin leitung a bei ciangin, vantungmite hong kumsuk ding uh a, mi siangthote lakah a gilo teng lakhia-in meiphual sungah a khul ding uh hi. Kahna leh ha gawina a om ding hi,” a ci hi. “Hih thu khempeuh note’n na thei uh hiam?” ci-in a dot ciangin, “Ka thei khin uh hi,” a cih uh leh, Zeisu in, “Tua ahih leh, Vantung Gam thuzui a suak laithei khempeuh in sumkholna pan a thak leh a lui a lakhia thei inn teekpa tawh kibang uh hi,” a ci hi. Zeisu in tua bang thugentehna khempeuh a hilh khit ciangin, tua mun pan a paikhia hi. Ama khua-ah a tun’ ciangin, kikhopna inn sungah thu hilh hi. Khuapihte in lamdang a sa uh hi. “Hihpa in hih bang pilna leh vangliatna koi pan a ngah hiam? Amah in khutsiampa’ tapa hilo ahi hiam? A nu min Mari hilo ahi hiam? Ama sanggamte in Jakob, Josef, Simon, Judah te hilo ahi uh hiam? Ama sanggamnute in i kiangah om hilo ahi uh hiam? Tua ahih leh, amah in hih thute khempeuh koi pan a ngah hiam?” ci-in a kidong uh hi. Amaute in amah hanginah a lungkia uh hi. Tua ciangin Zeisu in, “Pasian’ kamsangpa in ama khua, ama inn longal mun dangah minthan’na ngah loin om lo hi,” ci-in amaute kiangah a ci hi. A khuapihte in a thu um lo uh ahih ciangin tua san takah nalamdang tampi a bawl zo kei hi. Tua lai takin Herod Kumpipa in Zeisu thu a zak ciangin, “Tua pa in Baptaizpa Johan ahi hi. Amah in sihna pan a tho kik zo hi. Tua ahih ciangin, hih vangliatna in ama tungah ahih hi,” ci-in a nasemte kiangah a ci hi. Herod in a nau Filip’ zi Herodias thu hangin Johan a matsak khit ciangin, henin, thong sungah a khia hi. Bang hang hiam i cih leh, Johan in, “Tua numei na teen’pih ding kilawm lo hi,” ci-in Herod kiangah a hilh hang hi. Herod in Johan a thah nop hangin mihonpite in Johan Pasian’ kamsangpa hi sa uh ahih ciangin a lau hi. Tua nung ciangin Herod a suah ni a tun’ ciangin pawi kham a, Herodias’ tanu in pawi khamna-ah a lam ciangin, Herod a nuam hi. “Na hong nget peuhpeuh kong pia ding hi,” ci-in thu a ciam hi. Tua numei in a nu hilhna bangin, “Baptaizpa Johan’ lutang dalkuang sungah hong pia in,” ci-in a ngen hi. Kumpipa a dah hangin a kiciam zawhna leh, sabuaiah a tut khawmpihte a zahtak manin, “Pia ta un,” ci a, mi khat sawl a, thong sungah Johan’ ngawng a tan sak hi. A lutang dalkuang sungah koih a, tua numeino a piak leh, numeino in a nu kiangah a paipih hi. Johan’ nungzuite hong pai-in a luang a la uh a, a vui khit uh ciangin Zeisu a ko uh hi. Zeisu in a zak ciangin, gunkuang tungah tuangin gam daihna munah amah bek a pai hi. Mihonte in a theih uh ciangin khuapi, khuaneu panin paikhia uh a, lei lamah a delh uh hi. Zeisu paikhia a, mihonpi a muh ciangin hehpih huai sa a, cinate khempeuh a damsak hi. Nitak ciangin a nungzuite in Topa kiangah va pai uh a, “Hih lai tak in gampa lak ahi hi. Ni lah a tum zo hi. Hih mihonte khua sungah an lei dingin paisak ta in,” a va ci uh hi. Zeisu in, “Ka paisak nuam kei hi; amau nek ding an note’n na pia ding uh hi,” a ci hi. A nungzuite in, “Khomun pum nga leh ngasa tawn nih longal a dang nek ding bangmah ka nei kei uh hi,” a cih uh ciangin, Zeisu in, “Tua khomun leh ngasa hong paipih un,” a ci hi. Tua ciangin, “Mihonte lopa tungah tusak un,” a cih khit ciangin Zeisu in khomun nga leh ngasa tawn nih la a, vantung lam ento-in hehpihna a phat khit ciangin, khomun leh ngasa balnenin a nungzuite a pia hi. A nungzuite in zong mihonte a lui uh hi. Mi khempeuhte in a ne uh a, a kham khit uh ciangin, khamval a neng a themte tawm uh a, seeng sawm leh seeng nih dim a ngah uh hi. An ne mite in numei leh naupang sim loh pasal tul nga bang pha hi. Zeisu in mihonte a paikhiatsak lai takin, a nungzuite gunkuangah thakhatin tuang sakin, a gal khatah a paisak masa hi. Zeisu in mihonpite a paikhiatsak khit ciangin, thu ngen dingin mual tungah amah guak kahto a, nitak dongin a va om hi. Gunkuang ahih leh, tuili laizangah om a, a deih lohna uh lam panin huih in lehmut ahih ciangin, tui nakpi-in kilok a, gunkuangah a tuangte in a gim uh hi. Zingsang khuavak ma nai thum ciangin, Zeisu in tuili tungah a nungzuite kiangah va pai hi. Tui tungah a pai, a nungzuite in a muh uh ciangin, “Sikha hi,” ci-in lau-in a kiko uh hi. Zeisu in, “Na lungdam ta un; keimah ka hi hi, na lau kei un,” a cih pah leh, Piter in, “Topa, nang na hih leh, kei zong nangma kiangah kong tun’ nading, tui tungah hong pai theisak in,” ci-in a nget ciangin, “Hong pai in,” Zeisu in a ci hi. Piter gunkuang sung pan kum a, Zeisu kiang zuan dingin tui tungah a pai hi. Ahih hangin huihpi nung a muh ciangin lau a, a tum dektak ciangin, “Topa aw, hong hon in,” ci-in a kiko hi. Zeisu in thakhatin a khut zan a, Piter lenin, “Upna neupa aw, bang hangin um khial na hi hiam?” a ci hi. Gunkuang tungah a kahtoh ciangin, huih nung a dai hi. Gunkuang sungah a omte in, “Pasian’ Tapa na hi takpi hi,” ci-in bokin a bia uh hi. Tua gal khatah a kah khit uh ciangin, Gennesaret gamah a tung uh hi. Tua munah a om mite in Topa’ meel thei uh ahih ciangin, a kimkot gam khempeuhah mi sawl uh a, cina khempeuh a samsak uh hi. Cinate in Zeisu’ puan mongteep a lawn’ nadingun a ngen uh hi. A lawng khempeuhte in cidamna a ngah uh hi. Tua khit ciangin, Jerusalem khua panin Farisaite leh laitheite Zeisu kiangah va pai uh a, “Tanglai upate’ ngeina, na nungzuite in bang hangin palsat ahi uh hiam? Khut sil loin an a ne uh hi,” ci-in a ko uh hi. Zeisu in, “Note in tanglai ngeina zui-in Pasian’ thukham bang hang palsat na hi uh hiam? Bang hang hiam na cih uh leh, Pasian in, ‘Na nu leh na pa na zahtak in. A nu a pa a gensiate in sihna thuak ta hen,’ a ci hi. Note na hih uh leh, ‘Keima kiangah na zat theih keima sum, Pasian ka pia zo hi,’ ci-in mi khat in a nu a pate zahtak kei ta hen,’ na ci uh hi. Na tanglai ngeina uh zui-in, Pasian’ thukham na valmawk sak uh hi. Isaiah in mi simtat note tungah a kituakin a gen khol hi. Isaiah a genna in: “Hih mipawlte in amau’ kam uh tawh kei hong zahtak uh hangin, A lungsim uh, kei tawh kigamla hi. Mite’ thukham a hilh uh a, A mawkna-in kei hong bia uh hi,” a ci hi. Tua lai takin Zeisu in mihonpite sam a, “Note in ngai un la, na thei ta un. Kam sungah a tumte in mi a ninsak kei hi. Kam sung pan a paikhiate in mi a ninsak thei hi,” a ci hi. A nungzuite’n va nai uh a, “Tua thugentehna Farisaite in a zak uh ciangin, a lungmang uh na thei hiam? a ci uh hi. Zeisu in, “Vantungah a om ka Pa in a suan loh kung khempeuh kibotkhia ding hi. Tua mite amau ut bangin om sak un. Amau in mittaw lamhilhte ahi uh hi. Mittaw leh mittaw lam kihilh leh, a nih un leihawm sungah a kiakhawm ding uh hi,” a ci hi. Piter in, “Tua thugentehna kote hong hilh in,” ci-in a dot ciangin Zeisu in, “Note in zong lungpilna nei nai lo na hi uh hiam? Kam sungah a lut khempeuh in gil sungah tumsuk a, gilpi sung pan a kithakhia, thei lo na hi uh hiam? Kam sung pan a paikhiate in lungsim sung pan paikhia ahih ciangin mi a ninsak thei hi. A hoih lo ngaihsutna, mithahna, mi’ zi tungah mawhna, numei tawh mawhna, mi’ sum gukna, zuauthu teci pan’na, mi gensiatna, tuate in lungsim sung pan a paikhia hi. Tuate in mi a ninsak thei hi. Khut sil loin an nekna in hong ninsak thei lo hi,” a ci hi. Zeisu in tua mun pan paikhia a, Tai-ar khua leh Sidon khua nai lamah a pai ciangin, Kanaan numei khat in tua gam panin paikhia a, “David’ Tapa aw, kei hong hehpih in. Keima tanu in dawi’ bawlsiatna nakpi-in a thuak hi,” ci-in a kiko hangin, Zeisu in kam khat beek a dawng kei hi. A nungzuite in a kiangah va nai uh a, “Tua numei na paikhiasak ta in. I nung hong zui-in hong kiko hi,” a ci uh hi. Zeisu in, “Israel pawl a mangthang tuute longal adang mipawlte kiangah kei hong sawl lo hi,” a ci hi. Tua numei in va nai a, “Topa aw, hong huh in,” ci-in a bia hi. Zeisu in, “Tate an nek ding la a, uite piak ding kilawm lo hi,” a cih leh numei in, “Ahi mah hi, Topa aw, uite in a topa sabuai panin anneng kiate a ne uh hi,” a ci hi. Zeisu in, “Numei aw, na upna a lian hi. Nangma deih bangin na tungah hong piang ta hen,” a ci hi. Tua lai tak akipan tua numei’ tanu a cidam hi. Zeisu in tua gam pan paikhia a, Galile tuipi gei a tun’ ciangin mualah kahto-in a tu hi. Mi tampi a kiangah va tung uh a, khezawte, mittawte, mi pautheilote, mi cingtak lote a kipan, adang cinatna a vei khempeuh hong paipih-in Zeisu kiangah a nga uh hi. Zeisu in cinate a damsak hi. Mi pautheilote a pau thei uh hi; mi cingtak lote a cingtak uh hi; khezawte in lam a pai thei uh hi; mittawte in khua a mu kik thei uh, mihonpite in a muh uh ciangin lamdang a sa uh a, Israel pawlte’ Pasian’ min a phat uh hi. Tua lai takin Zeisu in a nungzuite sam a, “Hih mite hehpih huai ka sa hi. Bang hang hiam na cih uh leh, ni thum tawntung kei tawh a omkhawm uh a, an nek ding a nei kei uh hi. Lampi ah a gim ding uh, ka lunghihmawh manin, an ne loin ka paisak nuam kei hi,” a ci hi. A nungzuite in, “Mi hih zahpi kham ding khomun, hih gampa lakah ko bang lak pan ngah ding ka hi uh hiam?” a cih uh ciangin Zeisu in, “Khomun pum bangzah na nei uh hiam?” ci-in a dot ciangin amaute in, “Pum sagih leh ngasa tawm a om hi,” a ci uh hi. Tua ciangin Zeisu in, “Mihonpi lei tungah tusak un,” ci-in sawl hi. Tua ciangin, khomun pum sagih leh ngasa la a, hehpihna a phat khit ciangin khomun leh ngasa balnenin a nungzuite a pia hi. A nungzuite in mihonpi a lui uh hi. Tua a om khempeuh in a ne uh a, a kham khit uh ciangin, a khamval a neng a themte tawm uh a, seeng sagih a ngah uh hi. A ne mite in numei leh naupang sim loh, pasal tul li pha hi. Amah in tua mihonpi a paikhiatsak khit ciangin, gunkuang tungah tuangin Magadan gamah a pai hi. Tua lai takin Farisaite leh Saddusite in, Zeisu ze-et dingin va nai uh a, “Vantung panin lim hong lak in,” ci-in a ngen uh hi. Zeisu in, “Note in nitak ciangin, ‘Meii san ahih ciangin khua a pha ding hi,’ na ci thei uh hi. Zingsang ciangin, ‘Khua nim a, van vom ahih ciangin, tu ni-in huih nung a, guah hong zu ding hi,’ na ci thei uh hi. Note in van maitang na khen theih uh hangin, leitung hunte a lim na khen thei kei uh hi. Gilo a pangtat khang mite in lim a nget uh hangin, Pasian’ kamsangpa Jonah lim longal lim dang a kilak kei ding hi,” a cih khit ciangin tua mite’ omna pan a paikhia hi. A nungzuite gal khatah a pai uh ciangin, khomun puak ding a mangngilh uh hi. Zeisu in, “Farisaite leh Saddusite’ silngo kikeem un la, tang un,” a cih ciangin a nungzuite in, “Eite in khomun i pua kei hi,” ci-in khat leh khat a kikum uh hi. Zeisu in a theih ciangin, “Upna neu mite aw, khomun na neih loh manun, bang hangin khat leh khat na kikum uh hiam? Khomun pum nga mi tul nga in a kham val seeng bangzah na khawm uh hiam? Khomun pum sagih, mi tul li in a kham val, seeng bangzah na khawm uh hiam ci-in note in phawk nawn lo a, thei nai lo na hi uh hiam? Khomun gen ka hih loh lam bang hangin thei lo na hi uh hiam? Farisaite leh Saddusite’ silngo na tang un, kong ci hi,” a ci hi. Tua lai takin amaute in, Khomun leh silngo tang un, a ci kei hi; “Farisaite leh Saddusite’ thuhilhna na tang un,” a ci ahih lam a thei uh hi. Zeisu in Filippi-Kaisaria khua a tun’ ciangin, “Mite in kei, Mihing Tapa kua mi hi hong ci uh hiam?” ci-in a nungzuite a dong hi. Amaute in, “Mi kimkhat in, ‘Baptaizpa Johan,’ a ci uh hi. Kimkhat in, ‘Elijah’ a ci uh hi. Midangte in, ‘Jeremiah akipan Pasian’ kamsangte khatpeuh hi,’ a ci ciat uh hi,” ci-in a gen uh hi. Zeisu in, “Note in kei kua mi hi nong ci uh hiam?” ci-in a dot ciangin Simon Piter in, ‘Nangmah in a nungta Pasian’ Tapa, Khazih na hi hi,” a ci hi. Zeisu in, “Jonah’ tapa Simon aw, thupha na ngah ding hi. Bang hang hiam na cih leh, hih thu, si-le-sa in nang hong hilh ahi kei hi. Vantunga om ka Pa in hong theisak hi. Ke’n kong cih-inah, nang, Piter na hi hi. Hih suang tungah ka pawlpi ka lam ding hi. Hel khua kongkhakte in tua pawlpi a zo kei ding uh hi. Vantung Gam kong hon’nate nang kong pia ding hi. Nang in leitungah na hen khempeuh, vantung gamah kihen ding hi. Leitungah na phel khempeuh, vantungah zong a kiphel ding hi,” a cih khit ciangin, amah Khazih ahi, ci-in kuamah kiangah gen lo dingin a nungzuite a kham hi. Zeisu in Jerusalem khuapi pai dinga upate, siampi liante laitheite khut tungah gimna tampi a thuak khit ciangin, thahna zong thuak ding a; ni thum ni-in a thokik ding hi, ci-in tua huna kipanin a nungzuite kiangah a pulak hi. Tua lai takin Piter in Zeisu sam sim a, “Topa aw, hih thu bangin piangsak kei ta in! Hih thu in nangma tungah a tung kei ding hi,” ci-in seel ding a kipat ciangin, Zeisu kihei a, “Satan aw, ka nungah kinkhia in. Nang in keima suih khak nading na hi hi. Nang in Pasian thu na ngaihsun kei hi; mite thu bek na ngaihsun hi,” ci-in Piter a taai hi. Tua ciangin Zeisu in, “Mi khatpeuh in kei hong zuih nop leh, a pumpi nial a, ama singlamteh pua-in hong zui ta hen. Bang hang hiam na cih uh leh, ama nuntakna a gum nuamte in a nuntakna a mangthangsak ding hi. Kei hangin a nuntakna a mangsakte in nuntakna a ngah kik ding hi. Mi khat in leitung khempeuh a ngah hangin ama nuntakna mangthang leh, bang phattuamna ngah ding ahi hiam? Mi khat in ama nuntakna bang sum tawh lei kik thei ding ahi hiam? Mihing Tapa in, a Pa vangliatna nei-in, vantungmite tawh hong paikhawm ding hi. Tua ciangin mi khempeuh a gamtatna ciat uh bangin a thuksak ding hi. Ke’n aman takpi kong cih-inah, Mihing Tapa, ama Gam sungah hong pai kik, hih san takah a ding mi kimkhat in a muh matengun a si kei ding uh hi,” ci-in a nungzuite kiangah a gen hi. Ni guk khit ciangin Zeisu in Piter, Jakob leh a nau Johan-te samin, mualsang tungah, gam daihna munah paipih a, amaute mai-ah a meel kilamdang a, a maitang ni bang tang a, a puan in khuavak tawh kibangin a ngo hi. Amau kiangah Moses leh Elijah kilang a, Zeisu tawh a kiho uh hi. Tua lai takin Piter in, “Topa aw, hih lai takah kote kong om uh a hoih hi. Nang ading buk khat, Moses ading buk khat, Elijah ading buk khat, buk thum ka hong lam ding na ut hiam?” ci-in a dong hi. A dot lai takin meii ngo khat in amau tuam a, “Hihpa in, ka lung hong damsak ka it ka Tapa ahi hi. Ama thu na ngai ta un,” ci-in meii lakah aw khat a ging hi. A nungzuite in tua thu a zak uh ciangin lau mahmahin a bok uh hi. Zeisu hong pai a, a khutin lawng a, “Tho un, lau kei un,” a cih ciangin amaute a khuadak uh leh, Zeisu longal kuamah dang a mu kei uh hi. Amaute mualtung pan a kumsuk lai takun Zeisu in, “Mihing Tapa in sihna pan a thawhkik matengin, tua mangmuhna thu kuamah kiangah na gen kei un,” ci-in a nungzuite a kham hi. A nungzuite in, “Elijah hong pai masa ding hi,’ ci-in laitheite in bang hangin a gen uh hiam?” ci-in a dot uh leh Zeisu in, “Elijah hong pai takpi ding a, na khempeuh a bawl kik ding hi. Ke’n kong cih-inah Elijah hong tung zo a, mite in amah a theih loh manun, ama tungah ahih nop bangun ahih zo uh hi. Tua mah bangin Mihing Tapa in zong tua mite khut tungah a thuak ding hi,” a cih ciangin, Baptaizpa Johan a cihna ahih lam a nungzuite in a thei uh hi. Mihonpi omna-ah a tun’ uh ciangin mi khat in, Zeisu kiangah va nai-in khukdin’ a, “Topa aw, ka tapa hong hehpihsak in. Amah in sibup natna vei-in a gim mahmah hi. Meikhuk sung leh tui sungah, tam veipi a puk ngei zo hi. Na nungzuite kiangah ka paipih hangin, amau in a damsak zo kei uh hi,” ci-in a ko hi. Zeisu in, “Upna nei lo, a lungkhauh pawlte aw, kei note tawh bang tan vei omkhawm ding ka hi hiam? Note bang tan vei hong thuak zo ding ka hi hiam? Tua naupang ka kiangah hong paipih un,” a ci hi. Zeisu in tua dawi a taai ciangin, naupang sung pan paikhia a, tua hun akipanin naupang a dam hi. Tua ciangin a nungzuite in gamdaihna mun, Zeisu kiangah va nai uh a, “Kote in tua dawi bang hangin hawlkhia zo lo ka hi uh hiam?” ci-in a dot uh leh, Zeisu in, “Na upna uh a neu hang hi. Ke’n aman takpi kong cih-inah, note in ankamtang khat cia bang upna nei le-uh teh hih mual kiangah, “Kinkhia in,’ na cih uh leh, kikhin ding hi. Note in upna nei le-uh teh, bawl zawh loh na khat beek na nei kei ding uh hi,” ci-in a gen hi. Galile gamah a om lai takun Zeisu in, “Mihing Tapa mite khut tungah a kipia ding hi. Tua mite in amah a that ding uh hi. Ni thum ni-in a thokik ding hi,” ci-in a nungzuite a hilh ciangin, amaute a dah mahmah uh hi. Kapernaum khua-ah a tun’ ciangin, biakna innpi siahdongte Piter kiangah pai uh a, “Na Siapa in biakna innpi siah hamu liau lo ahi hiam?” ci-in a dot ciangin, Piter in “A liau hi,” a ci hi. Piter inn sungah a tum ciangin Zeisu in, “Simon aw, nang bangci ngaihsut na hi hiam? Leitung kumpite in kua kiangah phiangsiah a dong uh hiam? Amau tate tungah a dong uh hiam? Midangte tungah a dong uh hiam? ci-in a dot leh, Piter in, “Midangte tungah dong ahi uh hi,” a ci hi. Zeisu in, “Tua bang ahih leh, a tate a peng uh hi. Ahih hangin, tua mite in eite’ hangin a puk loh nadingun, tuili-ah pai in la, nga thang va siah in. Nga na mat masak la in la, a kam na phen ciangin peekkhat na mu ding hi. Tua dangka la in la, kei ading leh nang adingin siahdongte na pia in,” a ci hi. Tua lai takin a nungzuite in Zeisu kiangah va nai uh a, “Vantung Gam sungah kua a lian bel ding hiam?” ci-in a dong uh hi. Zeisu in naupang khat samin, amaute laizang ah a koih khit ciangin, “Ke’n aman takpi kong cih-inah na kikheel uh a, hih naupangno bang na suah kei uh leh, Vantung Gam sungah na tum zo kei ding uh hi. Tua ahih ciangin, naupang mah bangin lungsim a kiniamsakte in, Vantung Gam sungah a lianbel ahi ding hi. Keima min hangah hih bang naupangno khat a ngai peuhmah in kei zong hong ngai hi.” “Kei hong um hih naupang khat a puksak mi peuhmah in, a ngawng ah an gawina suang lian khat khih-in, tuipi thuk sungah a tumcip leh, amah ading a hoihzaw ding hi.” “Puk nading om ahih ciangin, leitung mite in gimna a thuak ding uh hi. Bang hang hiam na cih uh leh, puk nading thu a om hi. Ahih hangin, a puksakpa in gimna a thuak ding hi. Na khut ahi zongin, na khe ahi zongin, hong puksak leh, na khut na khe sattan in la, paii in. Khut leh khe kim nei-in tawntung meikuang sungah khulna na thuak sangin, khut bui, khe bui, a poi sa-in nuntakna sungah na tum leh, nang ading a hoihzaw ding hi. Na mittang in hong puksak leh, khelkhia in la, paai in. Na mittang kim nei-in meikuang sungah khulna na thuak sangin, mittang khat guak tawh nuntakna sungah na tum leh, nang ading a hoihzaw ding hi.” “Note in hih naupangte khatpeuh mah na simmawh loh nadingun na kikeem un. Bang hang hiam cih leh, amau’ vantung mite in, vantungah a om ka Pa’ maitang a mu niloh uh hi, ka ci hi. (Bang hang hiam na cih uh leh Mihing Tapa in a mangthang mite gumkhia dingin hong pai ahi hi). Bangci na lungngai uh hiam? Tuu zakhat a neipa in, a tuu khat mangthang leh, tuu sawmkua-le-kua nusia a, mualtungah a mangthang tuu khat zong thei hilo ahi hiam? A muh leh, a mangthang lo tuu sawmkua leh kuate sangin, a mang tuu pen tungah a lungdam zaw hi, aman takpi-in kong ci hi. Tua mah bangin vantungah a om na Pa un, tua naupangte khat a kisiat nading a ut kei hi.” “Na u na nau in na tungah hong khialh leh, ama kiangah pai in la, no gel bek omin ama mawhna pulakin thu hilh in. Amah in na thu hong man’ leh, na u na nau na ngah zo hi. Nangma thu hong man’ nop kei leh, teci nih bang thum bang kampauna tawh thu khempeuh a kip theih nadingin, midang nih bang thum bang samin paipih in. Amah in tua mite’ thu a man’ nop kei leh, pawlpite kiangah na ko in. Pawlpite’ thu a man’ kei leh, amah Gentail leh siahdongte bangin na ngaihsun in.” “Ke’n aman takpi kong cih-inah, leitungah na hen peuhmah, vantungah a kihen ding hi. Leitungah na phel peuhmah vantungah a kiphel ding hi. Khatvei kong gen kikinah, leitungah note nih kithutuak a, thu na nget uh leh, na nget khempeuh vantung khua-ah a om ka Pa in hong pia ding hi. Bang hang hiam na cih uh leh, nih bang thum bang ka min tawh a kikhop uh ciangin, amau laizangah ka om hi,” ci-in Zeisu in a gen hi. Tua khit ciangin Piter in va nai a, “Topa aw, ka u ka nau in kei tungah hong khial leh, ama mawhna bangzah vei ka maisak ding hiam? Sagih vei dongin ka maisak ding hiam?” ci-in a dot ciangin Zeisu in, “Sagih vei dong maisak in kong ci kei hi. Sawm sagih mun sagih vei dongin maisak in kong ci hi. Tua ahih ciangin, Vantung Gam in ama nasemte ciamtehna lai a en nuam kumpipa khat tawh kibang hi. A ciamtehna lai a et lai takin, talen tulsawm a ba nasempa khat a mai-ah hong paipih uh hi. Tua pa in a leiba loh nading nei lo ahih ciangin, ‘Amah a kipan, a zite, a tate, a sum khempeuh zuakin a leiba hong loh ta hen,’ a topa in a ci hi. Tua ahih ciangin, tua nasempa in a mai-ah bokin, ‘Topa aw, kei hong hehpih in la, na ngak lai in, ka leiba khempeuh kong loh ding hi,’ a cih leh, a topa in hehpih a, a leiba khempeuh maisakin a khah hi. Ahih hangin, tua nasempa paikhia a, ama dangka zakhat a ba, ama lawmpa’ nasem khat a muh ciangin a gawl meekin, ‘Na leiba hong loh in,’ a ci hi. Tua nasempa bokin, ‘Kei hong hehpih in la, na ngak lai in, ka leiba khempeuh kong loh ding hi,’ ci-in a thuum hangin, sum neipa in hehpih nuam lo a, a leiba khempeuh a loh khit matengin thong sungah a khum hi. Tua thu adang nasemte in a theih uh ciangin, a dah uh a, a gamtatna thu khempeuh a topa uh kiangah ko uh hi. Tua ahih ciangin a topa un leibapa sam a, ‘Gilo nasempa aw, nang in kei kiangah nong thuum ciangin, na leiba khempeuh kong maisak hi. Kei in nang ka hong hehpih bangin, nang zong tua na lawmpa hehpih thei lo na hi hiam?’ ci-in heh mahmah a, a leiba a loh khit matengin mi bawlsiate’ khut sungah a pia hi. Note in zong na u na nau uh’ khialhna na lungsim panun maisak kei le-uh teh, vantung khua-ah a om ka Pa in tua kumpipa mah bangin, note khempeuh tungah hong bawl ding hi.” a ci hi. Tua thu Zeisu in a hilh khit ciangin, Galile gam panin pai a, Judah gam Jordan gun gal khatah a tung hi. Mi tampite in a nung zui uh a, tua munah cinate a damsak hi. Farisaite in a kiangah va nai uh a, “Thu khempeuh hangin zi a mak tuak hiam?” ci-in a ze-et nadingin a dot uh ciangin, Zeisu in, “A piangsakpa in a kipat cilin, numei leh pasal a piangsak hi. ‘Tua ahih ciangin pasal in a nu a pa nusia-in, a zi a bel ding hi. Tua nihte in sakhat, pumkhat a suak ding uh hi,’ a cihna thu Lai Siangtho sungah sim ngeilo na hi uh hiam? Tua ahih ciangin amaute in nih hi lo, khat bek ahi uh hi. Tua ahih ciangin Pasian in a gawm khawmsate mite in kikhensak kei uh hen,” a ci hi. Amaute in, “Tua bang ahih leh, kikhenna lai pia-in, a zi ma hen,’ ci-in Moses in bang hangin thu a pia hiam?” ci-a a dot uh ciangin, Zeisu in, “Note na lungsim uh khauh lua ahih ciangin, a zi a mak theih nadingin Moses in thu a pia hi. Ahih hangin a kipat cilin tua bang ahi kei hi. Ke’n kong cih-inah, adang pasal tawh a mawh longal, thu dang hangah ama zi ma a, numei dang tawh a kiteengte in angkawm ahi uh hi. A maksa numei a teen’pihte in mi’zi tawh a mawh hi,” a ci hi. A nungzuite in, “Nupate thu in hih bang ahih leh, kiteeng kei leeng a pha ding hi,” a ci hi. Zeisu in, “Hih thu mi khempeuh in mang zo lo ding uh hi. A nu sung pan geh bang mi a om hi. Midangte in a geh bang a om hi. Vantung Gam hangah geh bang a suak zong om hi. Hih thu a mang zote in na mang ta un,” a ci hi. Tua ciangin naupangte tungah a khut nga a, thu a ngetsak nading deihin, Zeisu kiangah paipih uh a, a nungzuite in a kham uh hi. Zeisu in, “Naupangte omsak ta un. Ka kiangah hong pai ding uh kham kei un. Bang hang hiam na cih uh leh, Vantung Gam in tua bangte gam ahi hi,” a ci hi. Naupangte tungah a khut a ngak khit ciangin, tua mun panin a paikhia hi. Tua lai takin mi khat in Zeisu kiangah va nai a, “Sia aw, nuntak tawntungna ka ngah nadingin, a pha bang ka bawl ding hiam?” ci-a a dot ciangin, Zeisu in, “Bang hangin kei kiangah phatna thu hong dong na hi hiam? Mipha khat bek a om hi. Ahih hangin nuntakna sungah na tum nop leh, thukhamte na tang in,” a ci hi. Tangvalpa in, “Bang thukhamte tang ding ka hi hiam?” a cih kik ciangin Jeus in, “Mi na that kei in. Mi’ zi tawh na mawh kei in. Mi’ sum na gu kei in. A hi lo teci na pang kei in. Na nu leh na pa zahtak in. Na pumpi na it bangin na lawmte zong na it in,” a ci hi. Tua tangvalpa in, “Tua thu khempeuh ka tang zo hi. Bang sam lai ka hi hiam?” a cih kik ciangin, Zeisu in, “Nang a siangtho nuam na hih leh, pai in la, na neihsa teng zuakin mizawngte na pia in. Tua ahih leh, vantung gam sungah sum na nei ding hi. Tua khit ciangin ka nung hong zui in,” a ci hi. Tua tangvalpa in tua thu a zak ciangin lungkim loin a paikhia hi. Bang hang hiam i cih leh, sum tampi a nei hi. Zeisu in, “Ke’n aman takpi kong cih-inah, sumhaute in Vantung Gam sung lut nading a haksa mahmah hi. Khatvei kong cih kikinah, sai khat in phim bil vangah a khumhak sangin, sumhau mite in Pasian’ Gam sungah lut nading a haksa zaw hi,” ci-in a nungzuite kiangah a gen hi. A nungzuite in tua thu a zak uh ciangin, lamdang mahmah a sa uh hi. “Tua bang ahih leh, kua in gupna ngah zo ding hiam?” a ci uh hi. Zeisu in amaute enin, “Hih thu mite in ahih zo kei uh hi. Ahih hangin Pasian in na khempeuh ahih thei hi,” a ci hi. Tua lai takin Piter in, “Kote in ka neihsa khempeuh uh nusia-in, nangmah ka hong zui uh hi. Tua ahih ciangin bang ka ngah ding uh hiam?” ci-in a dong hi. Zeisu in, “Ke’n aman takpi kong cih-inah, na khempeuh a thak kibawl kik a, Mihing Tapa in vangliatna tokhom tungah a tut ciangin ka nung hong zui note in thukhen tokhom sawm leh nih tungah tu-in, Israel mipawl sawm leh nihte tungah thu na khen ding uh hi. Kei min hangin a inn, a sanggampa, a sanggamnu, a nu a pa, a tate, tua teng a nusiate khempeuh in a zah zakhat ngah a, nuntak tawntungna a luah ding uh hi. Ahih hangin, a masate tampi in a nunung ding uh hi. A nunung tampite in a masa ding uh hi.” “Vantung Gam in leenggah lo sungah nasem dingte cial dingin zingsanga a kuankhia inn teekpa tawh kibang hi. Amah in, ‘Ni khatin peek khat hong pia ning, ci-in nasem dingte tawh a kiciam khit uh ciangin, leenggah lo-ah a sawl hi. Nai kua ciangin kuankhia leuleu a, midang kimkhat nasem loin sumbuk ah a ding mawkte a muh ciangin, ‘Note zong ka leenggah lo-ah va pai un. A kituak zah ka hong pia ding hi,’ ci-a tua mite a kuan uh hi. Sun lai tak khatvei, nitak nai thum ciangin khatvei pai kik a, ahih ngei bangin ahih hi. Nitak nai nga ciangin kuankhia leuleu a, midang nasem lo-a ding a muh ciangin, ‘Note in ni khat tawntung nasem loin bang hangin hih lai-ah ding-in na om uh hiam,’ ci-a a dot ciangin, tua mite in, ‘Kote kuamah in hong cial lo hi,’ a cih uh ciangin, ‘Tua ahih leh, no zong ka leenggah lo-ah pai un,’ a ci hi. Nitak ciangin, leenggah lo neipa in, ‘Nasemte samin a tum nunungpen pan a kipanin, a tum masate dongin thaman na pia in,’ ci-in, sumkeempa kiangah thu a pia hi. Tua ahih ciangin, nitak nai nga lai takin a cialte in hong pai uh a, peekkhat tek a ngah uh hi. A tum masate in ‘Eite in a tamzaw i ngah kha ding hi,’ ci-a a ki-upmawh uh hangin, peek khat tek mah a ngah uh hi. Amaute in a ngah khit uh ciangin, inn teekpa a gensia uh hi. ‘A tum nunungte in nai khat bek na a sem uh hi. Sun nilohin nakpi na sem a, nisa thuak kote tawh hong kibangsak hi,’ a ci uh hi. Inn teekpa in tuate khat kiangah, ‘Lawm aw, nangma tungah ka khial kei hi. Note in kei tawh dangka peek khat piak ding i kiciamna mang hilo na hi uh hiam? Na sum uh la un la, pai un. A tum nunungte note tawh a kikim ka pia nuam hi. Ka sumte ka ut bangin zang thei lo ka hi hiam? Ahih kei leh, kei mipha ka hih ciangin, hong mudah na hi uh hiam?’ a ci hi. Tua mah bangin, a nunungte in a masa ding uh hi. A masate in a nunung ding uh hi,” ci-in a hilh hi. Zeisu Jerusalem khuapi-ah a pai lai takin, a nungzui Sawm-le-nihte gam daihna-ah sam a, “Eite Jerusalem khuapi ah i pai ding hi. Mihing Tapa in siampi liante leh laitheite khut tungah a kipia ding hi. Amaute in amah a sih nading thu a khen khit uh ciangin, zahko-in sat uh a, singlamteh tungah thah dingin Gentailte’ khut tungah a pia ding uh hi. Ni thum ni-in a thokik ding hi,” a ci hi. Tua lai takin Zebedi’ tapate, a nu leh a tate tawh Zeisu kiangah paikhawm uh a, thu khat a ngen uh hi. Zeisu in, “Bang deih na hi uh hiam?” ci-in a dot ciangin, “Topa na Gam sungah ka tapate, na taklam khat, na veilam khat a tut theih nadingun thu hong pia in,” ci-in a ngen uh hi. Zeisu in, “Note in na hong ngetna uh na thei kei uh hi. Ka dawn ding hai dawn zo ding na hi uh hiam?” a cih ciangin, “Ka dawn zo ding uh hi,” a ci uh hi. Zeisu in, “Ka dawn ding hai na dawn takpi ding uh hi. Ahih hangin, ka taklam leh veilam ah tut nading, ke’n thu ka hong pia thei kei hi. Ka Pa in ngah dinga a bawlsate in a ngah ding uh hi,” a ci hi. A nungzui sawmte in a zak uh ciangin, tua unaute gel tungah a heh uh hi. Zeisu in a nungzuite sam a, “Gentailte a hausate in amau tungah a mang uh a, miliante in amaute a uk uh note in na thei uh hi. Note laka tua bang ahi kei hi. Note laka milian a suak nuamte in nomau’ na sem uh hen. Note lakah makai a suak nuamte in note sila suak uh hen. Tua mah bangin, Mihing Tapa in midangte na sem sak dingin hong pai ahi kei hi. Midangte’ na sem ding a, mi tampi tankhia ding leh, a nuntakna pia dingin a hong pai hi,” a ci hi. Jerikho khuapi pan a paikhiat lai takun, mi tampi in Zeisu nung a zui uh hi. Zeisu hong pai thu a zak uh ciangin, lam gei-ah a tu mittaw nih in, “David’ Tapa Topa aw, kote hong hehpih in,” ci-in a kiko uh hi. Mihonpite in a tawp nadingun tuate a taai uh hangin, “David’ Tapa aw, kote hong hehpih in,” ci-in a kiko sawnsawn uh hi. Zeisu ding-in mittawte sam a, “Note ading bang kong bawl ding deih na hi uh hiam?” ci-in a dot ciangin, “Topa aw, ka mittang uh hong vaksak leteh ka ut uh hi,” a ci uh hi. Zeisu in hehpihhuai sa a, amau’ mittang a khut tawh a lawn’ ciangin, thakhatin amau in khua mu thei uh a, a nung a zui pah uh hi. Amaute in Jerusalem khuapi a naih uh a, Oliv Mual tungah a om Bethfage khua-ah a tun’ uh ciangin, Zeisu in a nungzuite nih sawl a, “Na mai-uh ah a om khua-ah pai un. Tua khua-ah khau khihsa a om, la nuta thakhatin na mu ding uh hi. La khau sut un la, ka kiangah hong paipih ta un. Mi khatpeuh in na kiang uhah thu khat peuhmah hong gen leh, ‘Topa in a deih hi,’ ci le-uh teh amau in thakhatin hong khah ding uh hi,” ci-in a vaikhak hi. Tua bang hihna in, Pasian in a kamsangpa tungah a genkholhsa bang a tun’ nading ahi hi. A genna in: “En in, na Kumpipa, lungsimniam tawh, Lapi’ ta lano leh la tungah tuangin, Na kiangah hong pai ding hi,’ ci-in, Zion’ tanu kiangah na gen ding hi,” ci-in a gen hi. A nungzuite in Zeisu’ vaikhak bangin a pai uh a, la nuta hong paipih uh a, a tung uhah amau puante a phah khit uh ciangin, Topa a tuang sak uh hi. Mihonpite in lampi-ah amau puante a phah uh hi. Adangte in singhiang satin lampi-ah a phah uh hi. A mai pai, a nung a zui mihonpite in, “David’ Tapa tungah Hosanna! Pasian’ min tawh hong paipa in thupha ngah ta hen! Van a sangbelna-ah Hosanna!” ci-in a kiko uh hi. Jerusalem khuapi a tun ciangin, khua zangpi-in kising hehu uh a, “Hihpa in kua mi ahi hiam?” ci-in a dot uh leh, mihonte in, “Hihpa in Galile gam Nazareth khua kamsangpa Zeisu hi,” a ci uh hi. Zeisu in Pasian biakna innpi sungah a lut ciangin, biakna innpi sungah sumzuakte leh sumleite khempeuh hawlkhia in, dangka kheekte’ sabuaite leh vakhu zuakte’ tutphahte sawnthal sak a, “Ka inn in thungetna inn a kici ding hi,’ ci-in Lai Siangtho sungah a kigelh hangin, note in guta buluhte omna na piangsak tazen uh hi,” a ci hi. Tua khit ciangin, mittawte leh khe-baite, biakna innpi sungah Topa kiangah a pai uh ciangin amaute a damsak hi. Nalamdangte a bawl leh, naupangnote in, “David’ Tapa tungah Hosanna!” ci-in biakna innpi sungah kiko uh siampi liante leh laitheite in a zak uh ciangin, a heh uh hi. “Hih naupangte in bang thu a gen uh cih na za hiam?” ci-in a dot uh ciangin Zeisu in, “Ka za hi. ‘Naupangte leh nawi nete kam sung pan Nang in minphatna na piangsak hi,’ a cihna thu, note in khatvei beek sim ngeilo na hi uh hiam?” a ci hi. Tua lai takin, amaute paisanin khua sung pan paikhia a, Bethani khua tungin tua san takah a giak hi. Zing ciangin khuapi sungah a pai kik lai takin, Zeisu a gil kial hi. Lampi geiah theikung khat a muh ciangin a kiangah a va pai leh, a teh longal bangmah a mu kei hi. Zeisu in, “Tu-a kipan gah loin om tawntung in,” a cih ciangin theikung dinggaw pah hi. A nungzuite in a muh uh ciangin, “Hih theikung thakhatin a dinggaw hi,” ci-in lamdang a sa uh hi. Zeisu in, “Ke’n aman takpi kong cih-inah, note in um khial loin upna taktak na neih uh leh, hih theikung tungah ka hih bangin na bawl thei uh tham loin, hih mual kiangah, ‘Na omna pan na kinkhia in la, tuipi sungah na kipaai in,’ ci le-uh teh na cih uh mah bangin a piang ding hi. Upna tawh thu na nget uh leh, na nget khempeuh uh na ngah ding uh hi,” a ci hi. Zeisu biakna innpi-ah lut a, thu a hilh lai takin siampi liante leh upate a kiangah pai uh a, “Hih nate bang thuneihna tawh bawl na hi hiam? Hih thu kua in hong pia ahi hiam?” ci-in a dot uh ciangin, Zeisu in zong, “Note ke’n kam khat kong dong ding hi. Na hong dawn’ theih uh leh, hih nate kua thu tawh ka bawl kong gen ding hi. Johan’ baptaizna thu in koi panin hong piang ahi hiam? Vantung pan hong piang ahi hiam? Mi tung pan hong piang ahi hiam?” ci-in a dot ciangin, “Vantung pan hong pai hi,” ci leeng, ‘Note in ama thu bang hangin um lo na hi uh hiam?” ci-in hong dong zel ding hi. “Mi tung pan hong piang hi,’ ci leeng, mite i kihta hi. Bang hang hiam i cih leh mi khempeuh in Johan kamsangpa a sa uh hi,” ci-in khat leh khat a kikup khit uh ciangin, “Ka thei kei uh hi,” ci-a a gen uh ciangin Zeisu in, “Tua mah bangin hih nate kua thu tawh ka bawl, kong gen kei ding hi.” “Note in bangci ngaihsut na hi uh hiam? Mi khat in tapa nih a nei hi. Tua pa a ta lianpen kiangah pai a, ‘Ka ta aw, tuni-in ka leenggah lo-ah kuanin va sem in,’ a cih ciangin, a ta upa bel in, ‘Kei kuan kei ning,’ a cih hangin, a nung ciangin kisikkik a, a kuan hi. A pa a tapa neu kiangah pai a, a sawl masak bangin a sawl kik ciangin, a ta in, ‘Va kuan ning, pa aw,’ a cih hangin a kuan kei hi. Tua tate gel koi pen in a pa’ deihna banga ta ahi hiam?” ci-in a dot ciangin amaute in, “A tapa upa pen a ta hi,” a ci uh hi. Zeisu in, “Ke’n aman takpi kong cih-inah, phiangsiah dongte leh numei gilote in Pasian Gam sungah note sangin a lut masa zaw ding uh hi. Bang hang hiam cih leh, Johan in thuman lam tawh na kiang uhah hong pai hangin, ama thu na um kei uh hi. Siahdongte leh numei gilote in ama thu a um uh hi. Note in tua thu na muh uh ciangin, Johan’ thu um dingin na kisik kei uh hi,” ci-in a gen hi. “Adang thugentehna khat na ngai un: Inn neipa khat in lo lai-ah leenggah kungte suan a, gawlin a um khit ciangin, leenggah cil nading to a, tausang buk khat a lam khit ciangin, lo khote khawh lawhsakin khual a zin san hi. A gah hun a tun’ dektak ciangin, a gah ngah dingin lo neipa in a nasemte, lo khawh lawhte kiangah a sawl hi. Tua lo khawh lawhte in a nasemte a mat khit uh ciangin, khat sat, khat that, khat suang tawh a deeng uh hi. Khatvei a masa sang a tam zaw nasemte a sawl kik ciangin, lo khawh lawhte in amasa bangin ahih zel uh hi. A nunung pen ciangin lo neipa in, ‘Tua mite in ka tapa a zahtak ding uh hi,’ ci-in a tapa a sawl hi. Ahih hangin, lo khawh lawhte in a tapa a muh uh ciangin, ‘Hihpa in a inn luah dingpa ahi hi. Hong pai un, amah thatin a sum luah ding teng eite in tang ni,’ ci-in khat leh khat a kikum uh hi. Lo neipa’ tapa a mat khit uh ciangin leenggah lo nawlah paikhiatpihin a that uh hi. Tua ahih ciangin, lo neipa a tun’ ciangin, lo khawh lawhte tungah bangci a bawl ding hiam?’ a ci hi. ‘Tua migilote sugawp ding a, a gah a tun’ ciangin a gah a pia ding lo kho dangte a khawh lawhsak ding hi,” ci-in a gen uh hi. Tua ciangin Zeisu in: “‘Inn lamte’n a nilkhiat suang in, A nung ciangin innkiu suang a piang hi. Tua thu Pasian in bawl a, Eite mai-ah a lamdang hi,’ a cihna Lai Siangtho sungah note in khatvei beek sim ngeilo na hi uh hiam? Tua ahih ciangin, ke’n kong cih-inah Pasian Gam note kiang pan kilakhia ding a, tampi gah a gahsak thei mipawl dangte kipia ding hi. Hih suang tungah a kiate in a kitan ding hi. A tungah hih suang kia a, a deen’ khak peuhmahte kizangawp ding hi,” a ci hi. Tua thugentehna Farisaite leh siampi liante in a zak uh ciangin, amau cihna a, a gen ahih lam a thei uh hi. Amau in Zeisu mat dingin a zon’ uh hangin mihonpi a kihta uh hi. Bang hang hiam i cih leh, mi khempeuh in Topa in Pasian’ kamsangpa hi a ci uh hi. Zeisu in mihonpite kiangah thugentehna a genkik inah: “Vantung Gam in a tapa ading molakpawi a kham kumpipa tawh kibang hi. Amah in a nasemte sawl a, a khohsate a sapsak hangin a hawh nuam kei uh hi. Khatvei, adang nasemte sawl a, ‘Kei ka pawikham nading ka kisa khin zo hi. Ka bawng leh bawngno thaute kigo khin zo hi. Na khempeuh a baihsa-in a om hi. Mopina pawi sungah hong hawh ta un,’ ci-in ka khohsate va hilh kik un,’ ci-in a sawl hi. Ahih hangin a sapte in thusim lo uh a, khat lo a kuan hi; khat sumzuakin a pai hi. A om laite in a nasemte manin, bawlsia-in a that uh hi. Kumpipa in a zak ciangin, heh mahmah a, a galkapte kuan sakin tua mi thatte khempeuh thatin a khua uh mei-in a halsak hi. Tua laitakin kumpipa in a nasemte kiangah, ‘Ka mopina pawi ding teng a baihsa-in a om hi. Ahih hangin ka sapsate a kilawm kei uh hi. Tua ahih ciangin lamka-ah pai un la, na muh khempeuh uh hong sam un,’ a ci hi. A nasemte in lampi-ah paikhia uh a, a gi, a gilote, a muh khempeuh a kikhawmsak uh a, mopina pawi sungah mi a dim hi. Kumpipa in a hawhte en dingin a lut ciangin, molakna puan silh lo-a om mi khat a mu hi. ‘Zawl aw, molakna puan silh loin, bang ding hong lut na hi hiam?’ ci-in a dot ciangin tua pa in a dawn’ nading a thei kei hi. Tua laitakin kumpipa in, ‘Tua pa a khut leh a khe hen un la, pua lam khuamialna sungah na paaikhia un,’ ci-in a nasemte a sawl hi. Kahna leh hagawina a om ding hi. A kisam mite a tam hangin, a kiteel mite a tawm ding uh hi,” a ci hi. Tua laitakin Farisaite paikhia uh a, “Bangci leeng Zeisu kam tawh i siah zo ding hiam” ci-in a kikup khit uh ciangin, amau’ nungzuite leh Herod’ nungzuite, Zeisu kiangah sawlin, “Sia aw, nang in thutak genpa na hi hi. Kuamah na kihta kei a, mi maitang zahtak loin Pasian thu a tangtakin na hilh cih ka thei uh hi. Tua bang ahih ciangin, Sia aw, bangci ngaihsut na hi hiam? Kaisar kumpipa siah piak tuak ahi hiam, piak tuak lo ahi hiam hong hilh in” ci-in a dongsak uh hi. Zeisu in amaute gitlohna a theih ciangin, “Mi simtatte aw, bang hangin kei hong ze-et na hi uh hiam? Phiangsiah dangka hong lak un,” a cih leh denarias peek khat hong paipih uh hi. Zeisu in, “Hih kua min, kua lim ahi hiam?” ci-in a dot ciangin, “Kaisar kumpipa lim leh min hi,” a ci uh hi. Tua ciangin Zeisu in, “Kaisar kumpipa’ sum Kaisar kumpipa na pia un. Pasian’ sum Pasian na pia un,” a ci hi. Amaute in tua thu a zak uh ciangin lamdangsa-in a kiang pan a paikhia uh hi. “Misite’ thawhkikna om lo hi,” a ci Saddusite in, tua ni-in Zeisu kiangah va pai uh a, “Topa aw, mi khat in ta nei loin a sih leh, ama zi a nau in luah hen la, a u’ khang a man’ loh nadingin kizom ta hen,’ ci-in Moses in thu a pia hi. Kote lakah unau sagih a om uh hi. A upa pen in zi nei a, a si hi. Ta a neih loh manin ama zi a nau tawh a nusia hi. Tua mah bangin a nihna leh a thumna a kipan a sagihna dongin ahi uh hi. A nunung penin a numei zong a si hi. Tua bang ahih leh, thawhkik ni ciangin tua numei in unau sagih lakah kua pen’ zi hi ding hiam? Bang hang hiam na cih leh, amaute a vekpi un tua numei tawh a kiteeng uh hi,” a ci uh hi. Zeisu in, “Note in Lai Siangtho ahi zongin, Pasian vangliatna ahi zongin thei lo na hih uh ciangin, na um khial uh hi. Thawhkik ni ciangin kipina, kiteen’na om lo ding hi. Amaute in vantungmite tawh kibang ding uh hi. Thawhkikna thu panin Pasian in, ‘Kei in Abraham’ Pasian, Isaak’ Pasian, Jakob’ Pasian ka hi hi,’ a cihna thu note in sim ngeilo na hi uh hiam? Pasian in a site’ Pasian hi lo, a nungtate’ Pasian ahi hi,” a ci hi. Mihonte in tua thu a zak uh ciangin a thuhilhna lamdang a sa uh hi. Saddusite kam Zeisu in a dongkhak, Farisaite in a zak uh ciangin kikhawm uh a, amau laitheipa khat in Zeisu ze-et a, “Sia aw, Thukhamnate lakah bang thukham lianbel ahi hiam?” ci-in a dot ciangin, Zeisu in, “Na Topa Pasian na lungsim khempeuh, na kha khempeuh, na pilna khempeuh tawh na it in. Hih thukham in a masapen leh a lianpen thukham ahi hi. Na pumpi na it bangin na lawmte zong na it in, a cihna thukham nihna in tua a masa thukham tawh kibang hi. Hih thukham nih in, Thukhamna khempeuh leh Pasian’ kamsangte thuhilhna khempeuh a meen’na bulpi hi,” a ci hi. Farisaite a kikhop lai takun Zeisu in, “Note in Khazih kua hi ci-in na um uh hiam? Kua ta hi na ci uh hiam?” ci-in a dot ciangin, “David’ Tapa hi,” a ci uh hi. Zeisu in, “Tua ahih leh, David in Kha Siangtho tawh, ‘Topa hi,’ bangci-a ci thei ahi hiam?” a ci hi. David cihna in: “Topa in, ‘Na galte na khe nuai-ah ka koih matengin, Ka ziat lamah na tu in,’ ci-in, ka Topa kiangah a ci hi,” ci-in David in a ci hi. Tua mah bangin David in, ‘Khazih, Topa hi,’ ci ahih ciangin bangci-in ama ta hi thei ding ahi hiam?” ci-a a dot ciangin, kuamah in kamkhat beek dawng kik thei lo a, tua ni a kipanin kuamah in thu a dong ngam kei uh hi. Tua khit ciangin Zeisu in mihonpi leh a nungzuite thu a hilhinah, “Farisaite leh laitheite in Moses’ tokhom tungah a tu uh hi. Tua ahih ciangin, amau thukham khempeuh na zui un la, na tang un. Ahih hangin a gamtat uh bangin na ta kei un. Bang hang hiam na cih uh leh, amaute in a hilh bangun a gamta kei uh hi. A gik mahmah, a puak hak van guangin, midangte’ liangko tungah a suat uh hangin, a khutme nangawn uh tawh khin nuam lo uh hi. Amaute gamtatna khempeuh, mi mai-ah a kilat nadingin ahih uh hi. Amaute in a taubuh leh baanbuh liansak uh a, a puan mong teepkai a sausak uh hi. Pawikhamna sungah tutna phabel leh kikhopna inn sungah tokhom a sangbel a deih uh a, sumbukah zahtakna tawh hopih ahi zongin, ‘Rabbi aw,’ cihna ahi zongin a deih uh hi. Note in, ‘Rabbi,’ hong cih ding na ut kei un, Bang hang hiam na cih uh leh, na to uh khat bek a om hi. Note khempeuh in unau pawlkhat na hi uh hi. Leitungah kuamah, ‘Pa,’ na ci kei un, Vantungah a om na Pa uh khat bek a om hi. ‘Topa,’ hong cih ding na deih kei un. Bang hang hiam na cih uh leh, Khazih ahi, na Topa uh khat bek a om hi. Note lakah a lianpen in, na nasem uh ahi ding hi. Ama pumpi a kilamsang peuhmah in niamkhiatna a thuak ding hi. A kiniamkhiat peuhmah a kilamsang ding hi.” “A simtat laitheite leh Farisaite aw, note in gimna na thuak ding uh hi. Bang hang hiam na cih uh leh, Vantung Gam kongkhak mi mai-ah na khak uh hi. No lah lut loin, a lut nuamte zong na kham uh hi.” “A simtat laitheite leh Farisaite aw, meigongte’ neihsa teng na nektumsak uh a, kineihna tawh saupipi thu na ngen uh hi. Tua ahih ciangin thukhenna lauhuaizaw na thuak ding uh hi. “A simtat Farisaite aw, note in gimna na thuak ding uh hi. Bang hang hiam na cih uh leh, mi khat na nungzui uh na suahsak nadingun, lei lam leh tui lam na pai kawikawi uh a, na ngeina uh hong zuite, note mah bangin, a nihvei khang dongin hel khua’ ta na suaksak uh hi.” “Lamhilh mittawte aw, note in gimna na thuak ding uh hi. Bang hang hiam na cih uh leh, ‘Biakna innpi tawh thu kiciam peuhmah in, a ciamna a pelh leh phamawh lo hi. Biakna innpi’ kham tawh a kiciam peuhmah in, leiba a nei hi,’ na ci uh hi. Mihai mittawte aw, koi lianpen ahi hiam? Kham in lianzaw ahi hiam? Tua kham a siangthosak biakna innpi lianzaw ahi hiam? ‘Biakna tau tawh a kiciam peuhmah in, a ciamna a pelh leh phamawh lo hi. Biakna tau tungah a om piakna tawh a kiciam peuhmah in leiba a nei hi,’ na ci uh hi. Mittawte aw, koi pen lianzaw ahi hiam? Biakna tau lianzaw ahi hiam? Tua biakna tau a siangthosak piakna lianzaw ahi hiam? Tua ahih ciangin, biakna tau tawh a kiciamte in biakna tau a kipan, biakna tau tungah a om khempeuh tawh a kiciam hi. Biakna innpi tawh a kiciamte in biakna innpi ahi zongin, innpi sungah a teengpa tawh ahi zongin a kiciam hi. Vantung gam tawh a kiciamte in, Pasian’ tokhom tungah a tu mipa tawh a kiciam hi.” “A simtat laitheite leh Farisaite aw, note in gimna na thuak ding uh hi. Bang hang hiam na cih uh leh, leengmasel, anis leh, kummin, sehsawm suah sehkhat na piak uh hangin, thuman thukhenna, midangte hehpihna, gamtatna phate ahi Thukham sungah a lianpen thute na tang kei uh hi. Adangte sangin, hihte na tan’ ding uh a kilawm zaw hi. Thuhilh mittawte aw, note in thovai om loh nadingin tui na khaih uh hangin, saipi na valh uh hi.” “A simtat laitheite leh Farisaite aw, note in gimna na thuak ding uh hi. Bang hang hiam na cih uh leh, note in hai leh dalkuangte a pualam na silsiang uh hangin, a sung lamah han’ sanna leh huaihamnate a dim hi. Mittaw Farisaite aw, hai leh dalkuang pualam a sian’ nadingin a sunglam sil siang masa un.” “A simtat laitheite leh Farisaite aw, note in gimna na thuak ding uh hi. Bang hang hiam na cih uh leh, suangkangtui a kizut, han tawh kibang na hi uh hi. Tua hante a pualam a hoih uh hangin, a sungah misi guh leh kihhuaina khempeuh tawh a kidim hi. Tua mah bangin note zong, na pualam uh mi mai-ah misiangtho bangin na om uh hi. Na sung lam uh simtatna leh gitlohna tawh na dim uh hi.” “A simtat laitheite leh Farisaite aw, note in gimna na thuak ding uh hi. Bang hang hiam na cih uh leh, Pasian’ kamsangte’ han na bawl uh a, miphate’ han na zeem uh hi. Note in, ‘Ka pute ka pate’ khanglai-in om le-ung Pasian’ kamsangte thahna-ah ka kihel kei ding uh hi,’ na ci uh hi. Tua bang na hih uh ciangin, note in Pasian’ kamsangte a that mite’ tate na hi uh a, no langkhatah teci na pang uh hi. Tua ahih ciangin, na pute na pate’ mawhna tehna seeng na dimsak un. Mualtan’ suante aw, note in hel khua khiat ding thu tan’na bangci na suakta thei ding uh hiam? Tua ahih ciangin, kamsangte, lungpilte, laitheite, na omna uhah kong sawl ding hi. Note in tuate kimkhat na that ding uh a, kimkhat singlamteh tungah na khai ding uh hi. Kimkhat na kikhopna inn sung uhah na sat ding uh a, khua khat pan khua khatah bawlsia-in na hawlkhia ding uh hi. Tua ahih ciangin, mipha Abel’ si pan akipan biakna innpi leh biakna tau kikal a, na thah uh, Barakhiah’ tapa Zekhariah’ si dongin leitungah a kibuasa miphate’ si khempeuh in, note tungah hong tung ding uh hi. Ke’n aman takpi kong cih-inah, hih thu khempeuh in hih khang mite tungah a tung ding uh hi.” “Pasian’ kamsangte that a, na omna ah hong kisawlte zong suangtum tawh a deeng Jerusalem khuapi aw, akpi in a nongeekte a kha nuai-ah a khop bangin, na tate tamveipi ka khawm nuam zo a, nang na ut kei hi. En un, na inn uh mi omlo gam simthamin kinusia ding hi. Ke’n kong cih-inah, ‘Pasian min tawh hong paipa in thupha ngah ta hen,’ na cih matengun, tu-a kipan kei nong mu kei ding uh hi,” a ci hi. Zeisu in biakna innpi pan a paikhiat lai takin, a nungzuite in biakna innpi lak dingin a kiangah va nai uh hi. Zeisu in, “Hihte khempeuh mu hilo na hi uh hiam? Ke’n aman takpi kong cih-inah, a kiphelkhia loin suang khat tungah suang kiciang khat beek a om kei ding hi,” a ci hi. Tua lai takin Zeisu in, Oliv Mual tungah tu-a a om lai takin a nungzuite in a kiangah va pai sim uh a, “Tua thute in cikciang a hong piang ding hiam? Topa, nong kum ding ahi zongin, leitung bei ding ahi zongin, bang limin hong kihil ding cih hong hilh in,” ci-in a dong uh hi. Zeisu in, “Kuamah in hong khem zawh loh nadingin na kikem un. Bang hang hiam na cih uh leh, mi tampi in, ‘Kei Khazih ka hi hi,’ ci-in keima min tawh hong pai-in mi tampi a khem ding uh hi. Galdona thu leh galkap nading thu na za ding uh hi. Ahih hangin na lunghihmawh loh nadingun na kingaihsun un. Bang hang hiam na cih uh leh, tua thu khempeuh a piang ding uh hi. Ahih hangin, a beina a tung nai kei ding hi. Mi nam khat leh nam khat, gam khat leh gam khat hong kido ding uh hi. Mun khat khatah kial hong tung ding a, ziin hong liing ding hi. Tuate khempeuh in gimna kipat cilna ahi hi.” “Tua ciangin amaute in note hong bawlsiat nadingun hong pia ding uh a, hong that ding uh hi. Keima min hangin mi khempeuh in note hong mudah ding uh hi. Tua lai takin mi tampi a puk ding uh a, khat leh khat a kiheek ding uh hi, khat leh khat a kimudah ding uh hi. Kamsang zuautheite hong piang ding uh a, mi tampi a khem ding uh hi. Gitlohna thu tam ding ahih manin, mi tampite’ ki-itna uh a kiam ding hi. A bei dongin a kipte in gupna a ngah ding uh hi. Mi namkimte tungah teci a pan’ nadingin leitung khempeuhah Lungdamna Thu kihilh ding hi. Tua khit ciangin beina a piang ding hi.” “Tua ahih ciangin kamsangpa Daniel a hilh ngei bangin, a kisia thei kihhuaina in a siangtho munah ding-a a om note in na muh uh ciangin, (Lai Siangtho a sim theite in thei ta hen.) Judah gamah a omte in mual tungah tai ta hen. Innkhum tungah a omte in zong a inn sungah sum la dingin kumsuk kei hen. Lo lai-ah a omte in zong puan la dingin ciahkik kei hen. Tua lai takin naupai numeite leh naungeek nei numeite in gimna a thuak ding uh hi. Na tai uh a hun ding in phalbi laitak leh, Nipi ni a, a hong tun’ loh nadingin thu na ngen un. Bang hang hiam na cih uh leh, lei a pian’cil pan akipan tudongin a piang ngei lo, a nung ciang a piang nawn lo ding gimna lianpi tua lai takin a piang ding hi. Tua nite a kitomsak kei leh kuamah suakta zo lo ding hi. Ahih hangin a teelsate adingin a kitomsak ding hi. Tua lai takin mi khatpeuh in, ‘Hih lai-ah Khazih a om hi; hua lai-ah a om hi,’ hong cih leh um kei un. Bang hang hiam na cih uh leh, zuauthu gen kamsangte leh Khazih zuautheite hong piang ding uh a, a teelsate nangawn a khem zawh leh a khem nadingun, lim leh nalamdang a liante hong lak ding uh hi. En un, tua thu kong genkhol zo hi. Tua ahih ciangin, amaute in, ‘Khazih gam lakah a om hi,’ hong cih uh hangin pai kei un. ‘Inndei sungah a om hi,’ hong cih uh hangin um kei un. Bang hang hiam na cih uh leh, khuaphialep in nisuahna lam pan phia a, nitumna lam dongin a taang mah bangin, Mihing Tapa hong kumna a piang ding hi. Sapul omna peuhah musanete hong kikhawm ding uh hi.” “Tua gimna ni khit ciangin thakhatin ni hong mial ding a; kha a hong taang nawn kei ding hi; aksite hong kia ding uh a, vanah a om vangliatnate a kiliing ding uh hi. Tua lai takin van panin Mihing Tapa’ lim a kilang ding hi. Leitung minam khempeuh a kap ding uh a; vangliatna leh minthan’na tawh, Mihing Tapa in meii tungah tuanga hong kumsuk a mu ding uh hi. Amah in peengkul nakpi-in tumsak ding a; ama vantungmite sawlin, amaute in a teelsa mite, lei kiu li pan, van mong khat pan mong khat dongin a kikhawmsak ding uh hi.” “Theikung kiangah thugentehna na sin un. Theikung a hiang meeng a, a teh a no ciangin khuakhal a nai zo ta hi,’ ci-in na thei uh hi. Tua mah bangin ka gensa khempeuh na muh uh ciangin, Mihing Tapa kongbiang dongin hong nai zo hi, ci-in na thei ta un. Ke’n aman takpi kong cih-inah, hih khang mite a beima-in, hih thu khempeuh hong piang ding uh hi. Van leh lei a mangthang ding hi; ka thu ahih leh a mangthang ngei kei ding hi.” “Tua ni leh tua hun kuamah in thei lo hi. Vantungmite in thei lo uh hi. Mihing Tapa in zong thei lo hi. Pa khat bek in a thei hi. Noah khan’ lai bangin Mihing Tapa hong kum ciangin hong piang ding hi. Tuiciin a tun’ ma-inah, Noah teembaw sungah a lut ni dongin mite in an ne, tui dawnin, kipi, kiteengsakin a om uh hi. Tuiciin a tun’ ciangin mi khempeuh a suksiat mateng, bangmah ngaihsun loin a om uh bangin, Mihing Tapa hong pai ciangin a om ding hi. Tua tak ciangin, lo lai-ah a om mi nih in khat kila a, khat kinusia ding hi. Angawi khawm numei nih in khat kila a, khat kinusia ding hi. Tua ahih ciangin ngak un. Bang hang hiam na cih uh leh, na Topa uh hong pai ding ni na thei kei uh hi. Gutate hong pai ding hun inn neipa in theikhol leh, ama inn a suksiat loh nadingin a pang ding hi, ci-in na thei ta un. Tua ahih ciangin note in zong kigingkhol un. Bang hang hiam na cih uh leh, na ngaihsut loh lai takun Mihing Tapa hong tung ding hi.” “A topa in a hun a tun’ cianga a innkuanpihte annek tuidawn a hawmsak ding a koih, a diktat, a lungpil nasempa kua ahi hiam? A topa hong ciah ciangin tua banga a om a muh nasempa in thupha a ngah ding hi. Ke’n aman takpi kong cih-inah, a topa in a sum khempeuh tua nasempa a uksak ding hi. Ahi zongin nasem gilopa khat in, ‘Ka topa hong pai hak ding hi,’ ci-in a lungsim sungah ngaihsun a; nasem dangte satgawp a, zukhamte tawh an ne, zu dawn khawm a, khuadon lo leh a theih loh kalin a topa hong tung ding a; tua nasempa vua-in misimtatte tawh a omkhawmsak ding hi. Kahna leh ha gawina a om ding hi.” “Tua ahih ciangin Vantung Gam in zipipa dawn dingin, a meivak tawi kawma paikhia nungak sawm tawh kibang hi. Tua nungak lakah nga a pil uh hi, nga pil lo uh hi. A pil lo nungakte in meivak a tawi uh hangin namgimtui a pua kei uh hi. A pilte ahih uh leh, meivak leh thawl sungah namgimtui a tawikhawm uh hi. Zipipa a tun’ma kikalin tua nungakte a vekpi-un lusu-in a ihmu uh hi. Zankim lai takin, ‘En un, zipipa hong pai zo hi. Dawn dingin hong paikhia un,’ ci-in a kiko ciangin; tua nungakte tho-in a meivak ciat a bawl uh hi. A pil lote in, ‘Ka meivak uh a mit zo hi. Na namgimtui uh hong hawm un,’ ci-in lungpilte kiangah a ngen uh hi. A pilte in, ‘Kong piak uh leh, no ading leh ko ading namgimtui a kicing kei ding hi. Tua ahih ciangin, namgimtui zuakte kiangah va pai un la, no ading va lei le-uhcin a hoihzaw ding hi,’ a ci uh hi. Amaute in namgimtui lei dingin a va pai lai takun, zipipa hong tung a; a baihsa a om nungakte tawh mopina pawi sungah a lut khawm khit uh ciangin, kong a khak uh hi. Tua nung ciangin, namgimtui lei dinga pai nungakte hong pai uh a, ‘Topa aw, Topa aw, kote zong kong hong hon’ in,’ ci-in a ngen uh hi. Topa in, ‘Ke’n aman takpi kong cih-inah, note kong thei kei hi,’ a ci hi. Tua ahih ciangin, a ni ahi zongin, a hun ahi zongin, thei lo na hih uh ciangin ngak ta un.” “Tua thu in mi khat gam dangah pai ning a cih lai takin a nasemte sam a, sum a keemsakpa tawh kibang hi. Tua mi in a lungpilna uh tawh kituakin khat talen nga, khat talen nih, khat talen khat a piak khit ciangin a paikhia hi. Talen nga a sangpa in a metbawl leh, adang amet talen nga a ngah hi. Tua mah bangin talen nih sangpa in zong, adang amet talen nih mah a ngah hi. Talen khat a sangpa in pai-in, lei a tawh khit ciangin a topa’ dangka a seel hi. A sawtvei ciangin tua nasemte’ topa hong ciah a, amaute sum ciamtehna lai a en hi. Talen nga a sangpa in va nai a, adang talen nga paipihin, ‘Topa aw, talen nga nong pia hi. En in, adang talen nga amet ka ngah hi,’ a ci hi. A topa in, ‘Thuman, mi diktat nasempa aw, a pha hi. Nang thuneute tungah na diktat zo hi. Thu tampi nang kong uk sak ding hi. Na topa tawh lungdam khawm in,’ a ci hi. Talen nih a sangpa in zong va nai a, ‘Topa aw, talen nih nong pia hi. En in, adang talen nih amet ka ngah zo hi,’ a ci hi. A topa in, ‘Thuman, mi diktat nasempa aw, a pha hi. Nang thuneute tungah na diktat zo hi. Thu tampi nang kong uk sak ding hi. Na topa tawh lungdam khawm in,’ ci-in a gen hi. Talen khat sangpa in zong va nai a, ‘Topa aw, nang mi haksa na hi a, na vawh lohna, na suan lohna munah na at hi; na pawi lohna munah na khopna ke’n ka theih ciangin, kong kihta a, mun dangah pai-in na talen khat lei sungah ka seel hi. Tu-in na sum na la in,’ a ci hi. A topa in, ‘Gilo, mi thadah nasempa aw, keimah in ka pawi lohna munah ka khawm hi, ci-in thei na hi hiam? Ka dangka sumsinte pia leteh kong paikik ciangin, ka dangka teng leh amet ka ngahkhawm thei ding hi. Tua ahih ciangin, talen khat ama khut sung pan lakhia un la, talen nga keempa pia un. Bang hang hiam na cih uh leh, a neite khempeuh kipiak beh ding a, a hau ding hi. A nei lote kiang pan a neihsa nangawn kilakhia ding hi. Na-a kimang lo nasempa khuamial pua lamah hawlkhia un,’ a ci hi. Kahna leh ha gawina a om ding hi.” “Mihing Tapa in a minthan’na tawh, vantungmite tawh hong paikhop ciangin, minthan’na tokhom tungah hong tu ding hi. A mai-ah mi namkim kikhawmsakin gancingpa in tuu leh keelte a tuam khen mah bangin, mi khempeuh a tuam tuakin hong kikhensak ding hi. Tuute a ziatlam, keelte a veilam a koih ding hi. Tua ciangin a ziatlamah a omte kiangah Kumpipa in, ‘Ka Pa kiangah hehpihna ngahte aw, leitung pian’cil akipan, note ading a kibawlkholsa Gamah hong pai un la hong luah un. Bang hang hiam na cih uh leh, ka gilkial lai takin nong vaak uh hi. Ka dangtak lai takin tui nong pia uh hi. Khualzin ka hih lai takin zin nong do uh hi. Puan nei lo-a ka om lai takin puan nong silhsak uh hi. Cina-a ka om lai takin nong veh uh hi. Thong sungah ka om lai takin ka kiangah nong hawh uh hi,’ a ci ding hi. Miphate in, ‘Topa aw, na gilkial lai takin cika hong mu a, an hong pia ka hi uh hiam? Na dangtak lai takin cika hong mu a, na dawn ding tui hong pia ka hi uh hiam? Zin na hih lai takin cika hong mu a, zin hong do ka hi uh hiam? Puan na neih loh lai takin cika hong mu a, puan hong silhsak ka hi uh hiam? Cina-a na om ahi zongin, thong sungah na om ahi zongin, cika hong mu a, na kiangah hong pai ka hi uh hiam?’ a ci ding uh hi. Kumpipa in, ‘Ke’n aman takpi kong cih-inah, note in ka sanggamte ahi hih mineupen khat tungah na bawl uh ciangin, kei tungah zong hong bawl na hi uh hi,’ a ci ding hi. Tua ciangin, a veilamah a omte kiangah Kumpipa in, ‘Ciamsiatna a thuak mite aw, dawimangpa leh ama nungzuite ading a kibawl meikuang tawntung sungah kei kiang panin paikhia un. Bang hang hiam na cih uh leh, ka gilkial lai takin nong vaak kei uh hi. Ka dangtak lai takin ka dawn ding tui nong pia kei uh hi. Zin ka hih lai takin nong do kei uh hi. Puan nei loin ka om lai takin puan nong silhsak kei uh hi. Ka cinat laitak ahi zongin, thong sungah ka om laitak ahi zongin nong veh kei uh hi,’ a ci ding hi. Amaute in, ‘Topa aw, na gilkial laitak, na dangtak lai tak, khualzin na hih lai tak, puan na neih loh lai tak, na ci nat lai tak, thong sungah na om lai takin cika hong mu a, hong keem hong khoi lo ka hi uh hiam?’ a ci ding uh hi. Kumpipa in, ‘Ke’n aman takpi kong cih-inah, hih mite laka a neupen khat tungah na bawl loh uh ciangin, kei tungah zong hong bawl lo na hi uh hi,’ a ci ding hi. Tua mite in tawntung gimna thuak dingin a paikhia ding uh hi. Miphate ahih uh leh, nuntak tawntungna ngah dingin a paikhia ding uh hi,” ci-in thu a hilh hi. Zeisu in tua thu khempeuh a hilh khit ciangin a nungzuite kiangah, “Ni nih khit ciangin Paisan pawikhamna hong tung ding cih na thei uh hi. Tua lai takin Mihing Tapa in singlamteh tungah thah dingin kipia ding hi,” a ci hi. Tua lai takin siampi liante leh upate in Kaiafas kici, siampi ukpa’ inn tualah kikhawm uh a, Zeisu bangci kheembawlin, a mat khit uh ciangin thatlum thei ding ci-in a vaihawm uh hi. Ahih hangin, “Mihonpi a gamlum khak ding a lau manunah pawikham laitak hih kei ni,” a ci uh hi. Bethani khua-ah miphak Simon’ inn sungah Zeisu a om lai takin, numei khat in a manpha mahmah paknamtui suangngo thawl khat a kiangah paipih a, Topa sabuaiah a tut lai takin, a lu tungah a buak hi. A nungzuite in a muh uh ciangin heh uh a, “Bang dingin a mawkna-in a kizangsak hiam? Tua paknamtui man tampi-in zuakin mizawngte a kipia thei hi,” a ci uh hi. Zeisu in a theih ciangin, “Tua numei bang hangin bawlsia na hi uh hiam? Amah in kei tungah thupha hong bawl zo hi. Mizawngte in no kiangah a om tawntung ding uh hi. Kei ka hih leh, no tawh omkhawm tawntung ding ka hi kei hi. Hih paknamtui ka pum tungah a hong buakna in keima luang vui ding a hong bawl khol zo hi. Ke’n aman takpi kong cih-inah, hih Lungdamna Thuhilhna mun leitung khempeuhah hih numei a kiphawk nadingin ama hong bawlna thu kigen ding hi,” a ci hi. Tua lai takin sawm-le-nihte laka Judas Iskariot in siampi liante kiangah va pai a, “Kei in no khut sungah Zeisu kong piak leh, bangzahin nong guai ding uh hiam?” ci-in a dot ciangin, amau in dangka peek sawmthum ama ading a tawikhai uh hi. Tua a kipan Judas in amaute khut sungah Topa a piak theih nading a zong hi. Silngo om lo Khomun nek kipat ni-in, a nungzuite Zeisu kiangah va pai uh a, “Paisan pawi na nek theih nadingin koi lai tak hong bawlsak le-ung na deih hiam?” ci-in a dong uh hi. Zeisu in, “Khua sungah hih bang mi khat kiangah pai un la, ‘Sia in, Ka hun a nai zo hi. Nangma innah ka nungzuite tawh Paisan pawi ka ne ding hi, ci-in hong vaikhak hi,’ va ci un,” a ci hi. A nungzuite in Zeisu cih mah bangin ahih uh a, Paisan pawi nek nading a bawl khol uh hi. Nitak ciangin Zeisu in a nungzuite Sawm-le-nih tawh sabuai ah an ne-in a tukhawm hi. An a nek lai takun Zeisu in, “Ke’n aman takpi kong cih-inah, note lakah khat in kei hong lehheek ding hi,” a ci hi. A nungzuite dah mahmahin, “Topa aw, kei ka hi hiam?” ci-in a dong tek uh hi. Zeisu in, “Kei tawh kuang sungah an ka sawk khawmpihpa in kei hong lehheek ding hi. Mihing Tapa in Lai Siangtho sungah a kigelh kholsa mah bangin a pai ding hi. Ahih hangin Mihing Tapa a lehheekpa in gimna a thuak ding hi. Tua mipa in a nu sung pan suak kei leh, amah ading a hoihzaw ding hi,” a ci hi. Zeisu a lehheekpa Judas in, “Topa, kei ka hi hiam?” ci-in a dot ciangin Zeisu in, “Nang cih bang ahi hi,” a ci hi. Amau in an a nek lai takun Zeisu in khomun la a, hehpihna a phat khit ciangin khomun balnenin, “Hih khomun in ka pumpi ahi hi. La un la, ne un,” ci-in a nungzuite a pia hi. Hai zong la a, hehpihna a phat khit ciangin amau pia a, “Note’n na vekpi-un dawn un. Bang hang hiam na cih uh leh, hih in mi tampite’ mawhna kimaisak nading a kibuasa, thuciamna thak ka sisan ahi hi. Ke’n kong cih-inah, leenggahtui ka Pa’ Gam sungah no tawh ka dawn thak ni matengin, tu-a kipan ka dawn nawn kei ding hi,” a ci hi. Amaute in la a sak khit uh ciangin, Oliv Mualah a paikhia uh hi. Tua lai takin Zeisu in, “Tuucingpa ka satlum a, tuu honpite a kithehthang ding uh hi,’ ci-a Lai Siangtho sungah a kigelh bangin note na vekpi-un kei hangin, tuzan ciangin na lungkia ding uh hi. Ahih hangin ka thawhkik khit ciangin note maiah Galile gamah ka pai ding hi,” a cih ciangin Zeisu in, “Ke’n aman takpi kong cih-inah, tuzan ak a khuan ma-in thumvei kei na hong nial ding hi,” a ci hi. Piter in, “Nang tawh ka si khawm zongin, nangmah kong nial ngei kei ding hi,” a ci kik hi. A nungzuite khempeuh in zong tua mah bangin a ci uh hi. Tua lai takin Zeisu in amaute tawh Gethsemane kici mun khatah a tun’ uh ciangin, “Keimah hua lam pai a, thu ka nget lai takin, hih lai takah na tu un,” ci-in a nungzuite kiangah a cih khit ciangin, Piter leh Zebedi’ tate nih sam a, a lungdahna leh lungman’na a kipan hi. Tua ciangin Zeisu in, “Si dek takin ka dah hi. Hih san takah kei tawh ngak un,” ci-in thu a pia hi. Zeisu mai lamah tomkha pai-in boksukin, “Ka Pa aw, hih hai in kei tawh a kipelh zawh leh, hong kipelhsak in. Ahih hangin keima deihna bang hi kei hen. Nangma deihna bang hi ta hen,” ci-in thu a ngen hi. A nungzuite kiangah a pai kik leh, amaute ihmu a, om uh a muh ciangin, “Note in nai khat nangawn kei tawh ngakkhawm zo lo na hi uh hiam? Kheemna tawh na kipelh theih nadingun thu ngen un la, ngak un. Lungsim a ut hangin pumpi a thazawng hi,” ci-in Piter kiangah a gen hi. Nihveina va pai a, “Pa aw, hih hai kei dawn lohin kei tawh a kipelh theih kei leh, nangma deihna bangin hi ta hen,” ci-in thu a ngen kik hi. A hong pai kik ciangin a nungzuite ihmu a, om uh a mu hi. Bang hang hiam i cih leh, a mit uh a kham hi. Tua ahih ciangin, amaute omsak a, khatvei va pai kikin a masa-a a nget bangin thumveina thu a ngen hi. A nungzuite kiangah pai kik a, “Tu-in nuam takin ihmu un. En un, Mihing Tapa in migilote’ khut sungah hong lehheek ding a hun hong tung zo hi. Tho un, pai ni. Kei hong lehheekpa hong nai zo hi,” a ci hi. Zeisu in a gen lai takin a nungzui sawm-le-nihte khat ahi Judas hong pai a, siampi liante leh upate’n a sawl mi honpite in, namsau leh molhtumte tawi-in amau tawh hong tonkhawm uh hi. Zeisu lehheekpa in, “Ka nappa in Zeisu ahi hi. Tua pa na man un,” ci-in amaute kiangah a lim a hilhkhol hi. Topa kiangah thakhatin va pai a, “Topa aw, nang na cidam ta in,” ci-in a nam hi. Zeisu in, “Lawm aw, bawl dinga na hong paina thu na bawl in,” a cih ciangin amaute hong pai uh a, Zeisu a mat khit uh ciangin a kai uh hi. Tua lai takin Zeisu a tonpihpa khat in a khut zan a, namsau a dawh khit ciangin siampi lian ukpa’ nasem khat a sat leh, a bil a satkhia hi. Tua ciangin Zeisu in, “Na namsau a paai sungah siat kik in. Namsau tawite namsau-in a si ding hi. Tu nangawnin ka Pa kiangah ngen leng vantungmi kuan sawm leh kuan nih sanga tamzaw ka kiangah hong sawl ding um lo na hi hiam? Tua bang ahih leh, hih bang a piang ding hi, ci-a Lai Siangtho sungah a om bangci a tung ding hiam?” a ci hi. Tua lai takin Zeisu in, “Note in galgu mat bangin kei man dingin namsau leh molhtum tawi-in hong pai na hi uh hiam? Keimah in nisimin biakna innpi sungah tu a, thu ka hilh lai takin na hong man kei uh hi. Hih thute khempeuh in Pasian’ kamsangte’ gelhsa Lai Siangtho hong tun’ nading ahi hi,” ci-in mihonpite kiangah a gen hi. Tua ciangin, a nungzuite khempeuh in Topa a taisan uh hi. Zeisu a mante in upate leh laitheite’ kikhopna, siampi ukpa Kaiafas’ innah a paipih uh hi. Piter in siampi ukpa’ inntual dongin gamla sim a kihalin Zeisu zui a, hih thu a tawpna a theih nadingin inntualah lut a, palikte tawh a tukhawm hi. Siampi liante leh upate in Zeisu thah nadingin thuzuau teci a zong uh hi. Thuzuau teci pangte tampi hong pai uh hangin amah thah theih nading teci a mu zo kei uh hi. A nung ciangin thuzuau teci nih hong pai uh a, “Hihpa in, ‘Keimah in Pasian biakna innpi ka susia ding a, ni thum khit ciangin ka lam kik zo ding hi,’ a ci hi,” ci-in teci a pang uh hi. Siampi ukpa ding a, “Nang kam khat beek dawng kik lo na hi hiam? Hih mite in nangma lang khatah teci bangci-a pang uh hiam? ci-in Zeisu kiangah a cih leh, Zeisu pau loin a om hi. Siampi ukpa in, “Nang, Pasian’ Tapa Khazih na hi hiam, na hi kei hiam kote kiangah nong gen nadingin a nungta tawntung Pasian min tawh ka hong sawl hi,” a ci hi. Zeisu in, “Nang gen bangin ka hi hi. Tua tham loin, ke’n kong cih-inah, tunung ciangin Mihing Tapa in Vanglian Pa’ ziat lamah tu a, meii tungah hong tuangsuk note in na mu ding uh hi,” a ci hi. Tua tak ciangin, Siampi ukpa in a puan balkeek a, “Hih mipa in Pasian tungah a pau khial zo hi. Adang bang teci deih lai i hi hiam? Pasian tungah ama paukhialhna thu na za zo uh hi. Bangci ngaihsut na hi uh hiam? a ci hi. Amau in, “Hih mipa thahlup dingin a kilawm hi,” a ci uh hi. Tua lai takin amau in Zeisu’ maitang cil tawh phih uh a, khut tumin a tum uh hi. Kimkhat in khutpeek-in a beeng uh hi. “Khazih aw, nang kua in hong beeng hiam? ci-in kamsangte bangin hong gen in,” a ci uh hi. Piter inntualah a tut lai takin numei khat a kiangah pai a, “Galile mi Zeisu tawh na kipawl hi,” a cih ciangin Piter in, “Nang na cih pen ka thei kei hi,” ci-in mi khempeuh mai-ah a nial hi. Tua nung ciangin Piter inn liimah a paikhiat khit ciangin numei adang khat in mu a, tua munah a om mite kiangah “Hihpa zong Nazareth mi Zeisu tawh a kipawl hi,” a cih ciangin Piter in, “Tua pa ke’n ka thei kei hi,” ci-in kiciamin a nial hi. Tua nung a sawt nai loin tua munah a dingte in Piter kiangah hong pai uh a, “Hua mite khat na hi takpi hi. Na pau in hong kitheisak hi,” a cih uh ciangin Piter in, “Tua pa ke’n ka thei kei hi,” ci-in hamsia tawh a kiciam khit phetin ak a khuang pah hi. Piter in, “Ak khuan’ ma-in nang in thumvei nong nial ding hi,” Zeisu in a cihna thu a phawk ciangin pusuak a, nakpi-in a kap hi. A zingsang ciangin siampi liante leh upate khempeuh in Zeisu thah dingin a vaihawm uh a; khau tawh a hen khit uh ciangin Pilat mangpa kiangah a paipih uh hi. Tua lai takin a lehheekpa Judas in, Zeisu a sih nadingin thu a kikhen a theih ciangin kisikkik a, dangka sawmthum siampite leh upate kiangah va pia kik a; “Ka khial zo hi, mawh nei lo’ si kong pia kha zo hi,” a ci hi. Amau in, “Kote in bang hong kuppih thei ding ka hi uh hiam? Hih thu nangma thu hi ta hen,” a ci uh hi. Judas in biakna innpi sungah dangka paai a, mun dangah a pai khit ciangin a awklum hi. Siampite in dangka la uh a, “Si man sumpi kholna sungah koih ding kilawm lo hi,” a ci uh hi. A vaihawm khit uh ciangin zinte vui nading beel seekpa’ lei khawk khat a lei uh hi. Tua ahih ciangin tudongin tua lei in ‘Si Lei’ a kici hi. Pasian in kamsangpa Jeremiah tungah, “Israel mite in a man a tansa mipa man dangka sawmthum a la uh a, Pasian in kei kiangah a hong cih mah bangin, beel seekpa’ leikhawk khat a lei uh hi,” a cihna tua lai takin a tangtung hi. Zeisu in mangpa mai-ah a din’ ciangin mangpa in, “Nang, Judah Kumpipa na hi hiam?” ci-in a dot leh, Zeisu in, “Na cih mah bangin ka hi hi,” a ci hi. Siampi liante leh upate in amah a mawhsak uh ciangin, Zeisu in kamkhat beek a dawng kei hi. Tua lai takin Pilat in, “Nang lang khatah hih zah tak teci pangte thu za lo na hi hiam?” ci-in a dot ciangin, Zeisu in kamkhat beek a dawn’ kik loh mangpa in lamdang a sa mahmah hi. Pawikham ciangin mangpa in mihonpite deih bangin, thong sungah a kikhum mi khat a khah khiat nading ngeina khat a om hi. Tua lai takin Barabbas kici misuam minthang khat thong sungah a kikhum hi. Tua ahih ciangin, mi a kikhop lai takun Pilat in, “Note in kua khah leng na ut uh hiam? Barabbas na ut uh hiam? Ahih kei leh, Khazih a kici Zeisu na ut uh hiam?” ci-in mite a dong hi. Bang hanga hih bang dong ahi hiam i cih leh, amaute in Zeisu a een’ man-unah a piak uh a thei hi. Pilat in thukhenna tokhom tungah a tut lai takin a zi in ama kiangah mi khat sawl a, “Tua miphapa tawh bangmah kikumin na hih kei in. Bang hang hiam na cih leh, tuni-in ka mang sungah tua pa hangin gimna nakpi-in ka thuak hi,” ci-in kam a khak hi. Barabbas ngen a, Zeisu a siatsak nadingun siampi liante leh upate in mihonpi a hansuah uh hi. Tua ciangin mangpa in, “Tua mi tegel kua pen khah leng na ut uh hiam?” ci-in a dot kik ciangin, “Barabbas khah in,” a ci uh hi. Pilat in, “Tua ahih leh, Khazih kici Zeisu bang ka ci hih ding hiam?” ci-in a dot leh, mihonpite in, “Tuapa singlamteh tungah si ta hen,” ci-in a kiko uh hi. Pilat in, “Bang hang hiam? Amah in mawhna bang ta khial ahi hiam?” ci-in a dot ciangin, “Singlamteh tungah sihna thuak ta hen,” ci-in mi khempeuh in nakpi-in a kiko semsem uh hi. Pilat in kham zo lo tham loin mi’ gamlumna a khangto semsem a muh ciangin, tui la-in mihonpite maiah a khut silin, “Hih miphapa’ si tungah kei ka mawh kei hi. Hih thu note thu thu hi ta hen,” a ci hi. Mi khempeuh in, “Ama si in ko tung leh ka tu ka tate tungah om tawntung ta hen,” a ci uh hi. Pilat in amaute kiangah Barabbas khah a, Zeisu ahih leh, a satsak khit ciangin singlamteh tungah thah dingin a pia hi. Tua lai takin mangpa’ galkapte in manginn tualah Zeisu paipih uh a, galkap khempeuh a kikhawmsak khit uh ciangin, Zeisu puan suahkhia uh a, puansan khat a silhsak uh hi. Tua ciangin ling tawh kigan lukhu a khusak uh a, pumpeeng khat a tak lamah a tawisak khit uh ciangin, ama maiah khukdin’in, “Judah kumpipa aw, nang na ci dam ta hen!” ci-in a zahko uh hi. Zeisu cil tawh phih uh a, pumpeeng la-in a lutang a sat uh hi. Tua bangin Zeisu a khelbawl khit uh ciangin puansan suahkhia uh a ama puan a silhsak kik khit uh ciangin, singlamteh tungah thah dingin a paipih uh hi. A paikhiat lai takun a min Simon kici, Sairin mi khat mu uh a, zawhthawh bawlin Zeisu singlamteh pua dingin a zuisak uh hi. “Lutang guh’cih nopna Golgotha kici mun a tun’ uh ciangin, zatui kha tawh kihel leenggahtui a dawn dingin Zeisu a piak uh hangin, a ciap ciangin a dawn nuam kei hi. Zeisu singlamteh tungah a khai khit uh ciangin lai aisaanin a puante a hawm uh a, tua san takah tu-in a en uh hi. ‘HIH PA IN JUDAHTE’ KUMPIPA ZEISU HI,’ ci-in a mawhsakna lai a lu tungah a suang uh hi. Tua lai takin Topa tawh misuamte nih, a veilam khat, a ziatlam khat singlamteh tungah a khaikhawm uh hi. Lampi-ah a pai mite in, “Biakna innpi susia a ni thum sunga a lam kik theipa aw, nangma pumpi na kigum in. Pasian’ Tapa na hih takpi leh, singlamteh tung pan hong kumkhia in,” ci-in a lu uh pei-in a zahko uh hi. Tua mah bangin siampi liante, laitheite leh upate in, “Hih mipa in midangte a gup theih hangin ama pumpi kigum zo lo hi. Israel Kumpipa ahih takpi leh, tu mahmahin singlamteh tung pan hong kumsuk ta hen. Hong kum leh, ka um ding uh hi. Amah in Pasian a muang hi. Pasian in amah a deih leh, tu mahmahin amah hong gum ta hen. Bang hang hiam i cih leh, amah in, ‘Pasian’ Tapa ka hi hi,’ a ci hi,” ci-in a zahko uh hi. Tua mah bangin singlamteh tungah Zeisu tawh kikhai khawm misuamte in zong a zahko uh hi. Sun laitak nai sawm leh nai nih pan a kipan, nai thum dongin leitung khempeuhah khua mial hi. Nai thum lai takin Zeisu in, “Eloi, Eloi, lama sabakthani,” ci-in nakpi-in a kiko hi. A khiatna in, “Ka Pasian, ka Pasian aw, bang dingin kei hong paisan na hi hiam?” a cihnopna hi. Tua munah a ding mi kimkhat in a zak uh ciangin, “Amah in Elijah a sam hi,” a ci uh hi. Amaute khat in thakhatin va tai a, tui hupna la-in tuithuk sungah a diah khit ciangin, pumpeeng dawnah suangin Zeisu tawp dingin a pia hi. Midangte in, “Om dih ni, Elijah in amah gum dingin hong pai ding, hong pai lo ding en dih ni,” a ci uh hi. Zeisu in khatvei nakpi-in a kiko kik khit ciangin a si hi. Tua lai takin Pasian biakna innpi’ dalna puan a tung lam pan a nuai lam dongin phel nih kisuah hi. Ziin liinga suangpite zong a kitam hi. Hante kihong a, a sisa misiangthote’ luang tampi hong tho kik uh a, a thawhkik khit ciangin han sung pan a paikhia uh a, khua siangtho-ah a lut uh a, mi tampi maiah kilang uh hi. Zeisu a cing galkap mangpa akipan amah tawh a omkhawmte in ziin liing a muh uh ciangin lau mahmah uh a, “Hih pa in Pasian’ Tapa taktak ahi hi,” a ci uh hi. Galile gam ah Zeisu a vak lai-a a nung a zui numei tampite in zong a gamla panin a gal et uh hi. Tua numeite lakah Magdala khua Mari leh Jakob leh Josef nu Mari leh Zebedi’ tate’ nute zong a om uh hi. Nitak ciangin Arimathea khuami Zeisu’ thu zui, a min Josef kici sum haupa khat, Pilat kiangah va pai a, Zeisu’ luang a ngen hi. Pilat in, “A luang pia un,” a ci hi. Josef in Zeisu’ luang la a, a siangtho saihadial puan tawh a tun khit ciangin; suang kikhuak ama han thak sungah sial a, han kong vangah suangpeek lian khat lik a, a khak khit ciangin a pai hi. Magdala khua Mari leh a dang Mari-te han kongah tu-in a om uh hi. Kigin-ni khit a zing ciangin, siampi liante leh Farisaite in Pilat mangpa kiangah kikhawm uh a, “Topa aw, tua mi khempa in, ‘Ni thum ni-in ka thokik ding hi,’ ci-in a nun’tak lai-in a cih tu-in ka phawk uh hi. Tua ahih ciangin ama nungzuite in zanin pai uh a, a luang a gukkhiat khit uh ciangin, ‘Amah in sihna panin thokik zo hi,’ ci-in mite kiangah gen le-uh khialhna masa sangin khialhna nunung a lianzaw ding hi, ci-in lunghihmawhna thu om ahih ciangin, han ni thum sung a kicin’ nading thu hong pia in,” ci-in a ngen uh hi. Pilat in, “Note in micing pawlkhat na nei uh hi. Pai un la, na hih zawh zahun cingsak un,” a ci hi. Tuate in micing pawlte tawh pai uh a, han khakna suang a ciamteh khit uh ciangin a cingte koihin han a bit tak-in a bawlsak uh hi. Nipini khit ciangin, ni sagih lakah ni kipat ni, khua a vak pat lai takin Magdala khua Mari leh adang Mari-te in daihawh dingin a pai uh hi. Tua lai takin lei nakpi-in a liing hi. Bang hang hiam i cih leh, Pasian’ vantungmi khat in vantung panin hong kumsuk a, han kong khakna suangpi a likkhiat khit ciangin a tungah a tu hi. Ama meel in khuaphialep bang hi a, a puan zong vuuk bangin a paak hi. Hancingte in zong vantungmi kihta-in liing uh a, misi tawh kibangin a sibup uh hi. Vantungmi in, tua numeite kiangah, “Lau kei un; singlamteh tunga kithat, Zeisu na zon’ uh ke’n ka thei hi. Hih lai takah om nawn lo hi. A hong hilhkholh bangin a thokik zo hi. Hong pai un la, Topa lupna hong en un. Pai mengmeng un la, ‘Sihna pan thokik a, na mai uhah Galile gamah a pai ding hi. Tua san takah Topa na mu ding uh hi,’ ci-in a nungzuite kiangah na hilh un. Ke’n kong gen zo hi,” ci-in tua numeite a sawl hi. Tua numeite in launa tawh, nuamna tawh han panin a nungzuite thu ko dingin a tai mengmeng uh hi. Tua lai takin Zeisu in lampi-ah va dawn a, “Note na cidam ta un,” a cih ciangin numeite in va nai uh a, a khe lenin a bia uh hi. Zeisu in, “Lau kei un, Pai un la, ka sanggamte kiangah, ‘Galile gamah na pai un. Tua san takah kei hong mu ding uh hi,’ a ci hi, ci-in va gen un,” a ci hi. Tua numeite a pai lai takun hancingte kimkhat khua sungah lut uh a, thupiang khempeuh siampi liante a zasak uh hi. Siampite leh upate kikhawm uh a, a vaihawm khit uh ciangin galkapte dangka tampi a pia uh a; “Zan a, ka ihmut kal-un a nungzuite hong pai-in a luang hong gu uh hi,’ ci-in mite kiangah va gen un. Hih thu mangpa in a theih leh, note hong mawhsak loh nading, mangpa a lungkim nadingin ka na genpih ding uh hi,” a ci uh hi. Galkapte in dangka sang uh a, thu a kihilh bangin a gen uh a; tua thu Judah mite lakah kizelin tudongin a um uh hi. A nungzuite sawm-le-khat in Zeisu in a vaikhakna mualah a pai uh hi. Topa tawh a kimuh uh ciangin a bia uh a, ahih hangin kimkhat in a um khial lai uh hi. Zeisu in amau kiangah va pai a, “Vantungah ahi zongin, leitungah ahi zongin, vangliatna khempeuh kei hong kipia zo hi. Tua ahih ciangin, note vak kawikawi un la; mi khempeuh nungzuite na suahsak khit uh ciangin, Pa’ min, Tapa’ min leh Kha Siangtho’ min tawh na baptaiz ta un. Keimah in note kong piak thukham khempeuh a tan’ dingun na hilh ta un. Keimah in leitung a bei dongin note tawh ka omkhawm tawntung ding hi,” ci-in a vaikhak hi. Pasian’ Tapa Zeisu Khazih’ Lungdamna Thu a kipatna in hih bang hi. Kamsang Isaiah’ Lai Siangtho sungah: “En in, na pai nading lam sial ding, Na mai-ah ka sawltakpa ka paisak ding hi. Gampa lakah a kikopa’ aw in, ‘Topa paina lam na sial un, Ama lampi na tangsak un,’ a ci hi,” ci-in kigelh hi. Johan hong kilang a, gampa lakah baptaiz a, mawh kimaisak nadingin, mawhna kisik kikna thu leh baptaizna thu a hilh hi. Jerusalem khuapihte akipan Judah gamah a om mi khempeuhte in ama kiangah va pai uh a, amau mawhna pulakin ama khut tungah, Jordan gun sungah a kibaptaiz uh hi. Johan in kala-oh mul kigan puan silh a, savun kawnggak in a kawng a gak hi. Kauphe leh gamlak khuaizu-in kivak hi. Ama thuhilhna in, “Kei sangin a lian zawpa khat in ka nungah hong pai ding hi. Ama khedap khau sut ding nangawn ka kilawm kei hi. Keimah in note tui sungah kong baptaiz hi. Amah in Kha Siangtho sungah note hong baptaiz ding hi,” ci-in a gen hi. Tua lai takin Zeisu in Galile gam Nazareth khua panin va pai a, Johan khut tungah Jordan gun sungah a kibaptaiz hi. Thakhat a, tui sung pan a thawhtoh lai takin van kihong a, Kha Siangtho in vakhu bangin ama tungah hong kumsuk a mu hi. “Nang in ka lung hong damsak ka it ka Tapa na hi hi,” ci-in vantung panin aw khat a ging hi. Tua ciangin, Kha Siangtho in Zeisu gampa lakah a sawl pah hi. Gampa lakah ni sawmli omin, Satan’ khemna thuak a, gampa lak ganhingte tawh omkhawm a; vantungmite in a vak uh hi. Johan a kimat khit ciangin Zeisu Galile gamah pai a, Pasian’ Lungdamna Thu a hilh-inah, “A hun a kicing zo hi. Pasian Gam a hong nai zo hi. Na mawhna kisikkik un la, Lungdamna Thu na um ta un,” a ci hi. Galile tuili gei lamah a pai lai takin, Simon leh Andru te unau, ngabengte ahih uh ciangin tui sungah ngen paai a om uh a mu hi. Zeisu in, “Ka nung hong zui un. Mi mante kong suaksak ding hi,” a ci hi. Amaute in thakhatin a ngen uh nusia-in Zeisu nung a zui uh hi. A tomkha a pai khit ciangin, Zebedi’ tate Jakob leh a nau Johan zong gunkuang sungah ngen khui-a om a muh ciangin thakhatin a sap leh, amaute in gunkuang sungah thacialte tawh a pa Zebedi nusia-in Zeisu nung a zui uh hi. Amaute Kapernaum khua-ah lut uh a, Nipi ni-in Zeisu kikhopna inn sungah thakhatin lut a, thu a hilh hi. Amaute in ama thuhilhna lamdang a sa uh hi. Bang hang hiam i cih leh, amah in laitheite bangin a hilh kei hi, ukpa bangin thu a hilh hi. Amaute’ kikhopna inn sungah thakhatin kihhuai dawi lut mi khat a om hi. “Nazareth mi Zeisu aw, kote in nang tawh bang kikum i hi hiam? Kote susia dingin hong pai na hi hiam? Nang kua mi na hih ke’n kong thei hi. Pasian’ mi siangtho na hi hi,” ci-in a kiko hi. Zeisu in, “Pau kei in la, ama sung pan paikhia in,” ci-in a taai hi. Kihhuai dawi in tua pa a kongkawsak khit ciangin nakpi-in kiko a, ama sung pan a paikhia hi. Mi khempeuhte in lamdang a sa uh a, “Hih thu in bang thu ahi hiam? Thuhilhna thak ahi hiam? Uk neihna tawh kihhuai dawite thu a piak ciangin amau in a thu a mang uh hi,” ci-in khat leh khat a kikum uh hi. Thakhatin ama thu in Galile gam sung khempeuh kizeel hi. Kikhopna inn sung pan a paikhiat khit uh ciangin Simon leh Andrute’ inn sungah Jakob leh Johan tawh thakhatin a tum uh hi. Simon’ sungnu nattun’a, lumin a om hi. Amau in thakhatin Zeisu a ko uh hi. Zeisu in va nai a, tua numei khut len a, a phot leh, a nattun’ dam a, zinte a vak hi. Ni tum a, nitak ciangin cinatna a vei khempeuh leh a sungah dawi lutte Zeisu kiangah paipih uh a; khua zangpi-in kongkhak kiangah a kikhawm uh hi. Zeisu in cinatna nam tuamtuam a vei tampi damsak a, dawi tampi a hawlkhia hi. Dawite in Zeisu a theih manun ah kamkhat beek gen lo dingin a kham hi. Zingsang khua a vak ma-in Zeisu tho a, gampa lakah paikhia a, tua san takah thu a ngen hi. Simon leh amah tawh a omkhawm mite in zui uh a, Zeisu a muh uh ciangin, “Mi khempeuh in nang hong zong uh hi,” a ci uh hi. Ahih hangin Zeisu in, “Thuhilh dingin hih kiim nai khua dangte ah zong pai ni. Bang hang hiam na cih uh leh, tua bang deihna-in kei ka hong pai zo hi,” ci-in amau kiangah a gen hi. Amah in Galile gam khempeuh kikhopna inn tengah pai kawikawi a, thu hilhin dawite a hawlkhia hi. Tua lai takin miphak khat Zeisu kiangah pai a, a mai-ah khukdin’in, “Topa aw, nong hih nop leh, nong damsak zo ding hi,” ci-in a thuum hi. Zeisu in hehpihhuaisa-in a khut zanin lawng a, “Ka hih nuam hi, na dam ta in,” a cih leh, thakhatin phak natna in ama tung pan paikhia a, a dam pah hi. Zeisu in tua pa thakhatin paisak a, “Hih thu kuamah kiangah na gen loh nadingin na kikem in. Ahi zongin siampi kiangah pai in la, va kilak in. Amau in a theih nadingun Moses thu piakna bangin biaknate na pia in,” ci-in nakpi-in a sawl hi. Ahih hangin tua pa paikhia a, a thu genthangin a kizeelsak hi. Tua ahih ciangin Zeisu in a nung ciangin a kilangin khua sungah tum thei lo a, khuanawl gampa lakah a om hi. Mun khempeuh panin a kiangah mite a pai uh hi. Ni tomno khit ciangin Zeisu in Kapernaum khua-ah lut kik a, inn sungah a om thu mite in a za uh hi. Kongvang gei nangawn ah om nading om lo zah dongin mi tampite a kikhawm uh a, Zeisu in amaute kiangah thu a hilh hi. Tua lai takin khut-le-khe si mi khat, mi li in hong pua uh a, ama kiangah a paipih uh hi. Mihonpi om ahih ciangin Zeisu kiangah a nai zo kei uh a, ama omna tungsan innkhum a vuhlet khit uh ciangin lupna tawh cinapa a khaisuk uh hi. Zeisu in amaute’ upna a theih ciangin a khut-le-khe sipa kiangah, “Ka ta aw, na mawhnate kimaisak zo hi,” a ci hi. Tua munah a tu laitheite kimkhat in, “Hih pa in bang hangin tua bangin a gen hiam? Pasian tungah a pau khial hi. Pasian longal kua in mawhna maisak zo hiam?” ci-in amaute’ sinsung uh ah a ngaihsun uh hi. Zeisu in amaute’ lungsim sung uh ah a ngaihsut uh a kha in a theih ciangin, “Note in bang hangin na lungsim sung uh ah hih thu ngaihsun na hi uh hiam? Khut-le-khe sipa kiangah bang pen ci leng a baih zaw hiam? ‘Na mawhna kimaisak zo hi,’ ci leng baih zaw hiam? ‘Tho in la, pai in,’ ci leng a baih zaw hiam? Ahih hangin Mihing Tapa in leitungah mawhna a maisak theih nading, thu a neih lam na theih nadingun, “Tho in, na lupna pua in la, na innah na ciah in, kong ci hi,” ci-in a khut-le-khe sipa kiangah a gen hi. Amah thoin thakhatin a lupna pua a, amau khempeuh mai pan a paikhia hi. Tuate khempeuh in lamdang a sa uh a, “Hih bang khatvei beek ka mu ngei kei uh hi,” ci-in Pasian a phat uh hi. Tua lai takin Zeisu tuili geiah a pai kik leh, mihonpi khempeuh a kiangah pai uh a, amaute thu a hilh hi. Amah in lam a pai lai takin Alefas’ tapa Levi in siahdon’na buk sungah tu-in a om a mu hi. “Ka nung hong zui in,” a cih ciangin ding-in a zui hi. Zeisu in Levi’ inn sungah an a nek lai takin siahdongte leh mawhnei tampite in Zeisu leh a nungzuite tawh a tukhawm uh hi. Bang hang hiam i cih leh, mi tampite in a nung a zui uh hi. Zeisu in mawhneite leh siahdongte tawh an a nek khawm Farisaite leh laitheite in a muh uh ciangin, a nungzuite kiangah, “Amah in siahdongte leh mawhneite tawh bang hangin an nekhawm, tui dawnkhawm ahi hiam?” a ci uh hi. Zeisu in a zak ciangin, “Cidamte in zato deih lo uh hi. Cinate bek in a deih uh hi. Miphate sam dingin hong pai ka hi kei hi. Mawhneite sam dingin hong pai ka hi hi,” a ci hi. Khatvei Johan’ nungzuite leh Farisaite in an nek a tan’ lai takun Zeisu kiangah va pai uh a, “Johan’ nungzuite leh Farisaite in an nek a tang zel uh hi. Bang hangin na nungzuite in an nek tang lo ahi uh hiam?” a ci uh hi. Zeisu in, “Zipipa in a lawmte tawh a omkhawm lai takin tuate in an a tang thei uh hiam? A omkhawm lai teng an nek a tang thei kei uh hi. Ahih hangin, zipipa in a lawmte tawh a kikhen ni hong tung ding hi. Tua ni ciangin amaute in an nek a tang ding uh hi. Kuamah in puanlui, puanthak tawh a thuap kei uh hi. Tua banga a thuap leh, a thuapna puanthak in puanlui keeksakin a vang gol thei hi. Kuamah in savun um lui sungah leenggahtui thak a thun kei uh hi. Tua bangin a thun leh, leenggahtui in savun a puak khamsak ding a, leenggahtui leh savun a kisia gawp ding uh hi. Leenggahtui thak savun thak sungah a thun uh hi,” a ci hi. Tua lai takin Zeisu in Nipi ni khatvei buhleiah a vak leh, lam a pai lai takun a nungzuite in buhvuite a zut uh hi. Farisaite in Topa kiangah, “En in, Nipi ni-in a kituak lo na bang hangin a hih uh hiam?” a ci uh hi. Zeisu in, “Siampipa Abiathar a khan’ lai takin, David in a lawmte tawh a gilkial lai takun, Pasian biakna inn sungah lut a, siampi longal midang nek dinga kilawm lo khomun siangtho ne a, a lawmte zong a piak thu sim ngeilo na hi uh hiam? Nipi ni mite ading a piang hi; mite Nipi ni ading a piang kei hi. Tua ahih ciangin, Mihing Tapa in Nipi ni nangawn ukpa ahi hi,” a ci hi. Zeisu in kikhopna inn sungah khatvei lut kik a, tua munah khut langkhat sipa khat a om hi. Nipi ni-in cinatna a damsak ding hiam, damsak lo ding hiam ci-in amaute in Zeisu a mawhsak nop manun a en uh hi. Zeisu in, “A lai zangah ding in,” ci-in khut sipa kiangah a cih khit ciangin, “Nipi ni-in phatna bawl tuak hiam? Siatna bawl tuak hiam? Nuntakna khatpeuh gup tuak ahi hiam, thah tuak ahi hiam?” ci-in amaute kiangah a dot ciangin mihonpi pau loin a om uh hi. Tua ciangin Zeisu in hehna tawh a kim en a, amaute lungkhauhna hangin dah a, tua pa kiangah, “Na khut zan in,” ci hi, a khut a zan leh, a dam hi. Tua lai takin Farisaite paikhia uh a, “Zeisu bangci leeng susia thei ding i hi hiam?” ci-in thakhatin Herod’ nungzuite tawh a vaihawm uh hi. Zeisu in a nungzuite tawh tuili geiah pai a, Galile gam pan mi tampi in a nung a zui uh hi. Judah gam pan, Jerusalem khuapi pan, Idumia gam pan, Jordan gun gal khat pan, Tai-ar leh Sidon khua kim pan kipan mi tampite in Zeisu’ bawlna thu khempeuh a zak uh ciangin a kiangah a pai uh hi. Mihonpite in Zeisu a sukkhak loh nadingun, ama kiangah gunkuang khat omsak khol dingin a nungzuite a hilh hi. Bang hang hiam i cih leh, Zeisu in mi tampi damsak ahih ciangin, cina, luna, bawlsiatna a thuak mite in amah a lawn’ nadingun a va neh nuam uh hi. A kihhuai dawite in Topa a muh uh ciangin a mai-ah bok uh a, “Nangmah in Pasian’ Tapa na hi hi,” ci-in a kiko uh hi. Amah kua mi ahi cih gen lo dingin nakpi-in a kham hi. Zeisu in mual tungah kahto a, a deih mite a sap khit ciangin a kiangah a pai uh hi. Amah tawh a omkhawm nading ahi zongin, thuhilh a paisak ding ahi zongin, dawite hawlkhiat theihna thu a neih nading uh ahi zongin sawltak mi Sawm-le-nih a koih hi. Tua Sawm-le-nihte in: Simon, a min thak a phuah Piter, Zebedi’ tapate Jakob leh Johan (vanging tate a cihnopna a min thak a phuah Boanerges), Andru, Filip, Bartholomai, Mattiu, Thomas, Alefas’ tapa Jakob, Thaddeas, Kanaan mi Simon leh Topa a lehheekpa Judas Iskariot te ahi uh hi. Zeisu innah lut a, an kine thei lo zawzenin mihonpite khatvei a kikhawm kik uh hi. Ama lawmte in a zak uh ciangin a man dingin a pai uh hi. Bang hang hiam i cih leh, “Amah a hai hi,” a ci uh hi. Jerusalem khuapi pan a hong paisuk laitheite in, “Hih pa in Beelzebub a nei hi. Dawimangpa suangin dawite a hawlkhia hi,” a ci uh hi. Zeisu in amaute sam a, thugentehna tawh thu a hilh-inah, “Satan in Satan bangci a hawlkhia zo ding hiam? Gamkhat sung mi kilem loin a kikhen leh, a kip zo kei ding hi. Ami kilem lo a kikhen inn sung in zong a kip zo kei ding hi. Satan in amah leh amah kidoin kikhen leh, kip zo loin a bei ding hi. Mi thahatpa a hen masak kei leh, kuamah in mi hatpa’ inn sungah tumin ama sumte a sut zo kei ding hi. Mi thahatpa a hen khit ciangin, ama inn sungah sumte a sut ding hi.” “Ke’n aman takpi kong cih-inah mawhna leh Pasian gensiatna khempeuh maisak nading thu mite in a ngah ding uh hi. Ahih hangin, Kha Siangtho a gensiate in mawh maisak nading thu cikmah hunin a ngah kei ding hi. Tua pa in a tawntung khialhna thuakpa ahi ding hi,” a ci hi. Bang hangin hih thu gen ahi hiam i cih leh, “Amah in kihhuai dawi a nei hi,” a ci uh hi. Tua lai takin a nu leh a sanggamte va pai uh a, inn pua lamah ding-in Zeisu sam dingin mikhat a sawl uh hi. A kiim ah a tu mihonpite in, “Na nu leh na sanggamte in nang hong zongin inn pua-ah a om uh hi,” ci-in a gen uh hi. Zeisu in, “Ka nu leh ka sanggamte kuate ahi hiam?” ci-in a kimkot ah a tu mite en kawikawi a, “En un, hih mite in ka nute, ka sanggamte ahi uh hi. Bang hang hiam na cih uh leh, vantung khua-ah a om ka Pa’ deihna bang a gamtate in ka sanggampa, ka sanggamnu, ka nute ahi uh hi,” a ci hi. Khatvei Zeisu in tuili geiah thu a hilh lai takin, mihonpite a kiangah kikhawm uh a, amah in tui gei nai-ah a om gunkuang tungah tuangin a tu hi. Mihonpite in tuili geiah lei tungah a om uh hi. Zeisu in thugentehna tawh thu tampi hilh a, a thuhilhna sungah a gen-inah, “Ngai un, khaici vawhpa in khaici vawh dingin a kuankhia hi. Khaici a vawh lai takin kimkhatte in lampi geiah kia a, vasate hong pai-in, tawmin a ne uh hi. Kimkhatte in lei tam lohna suang lakah kia a, lei a dai manin a po pah hangin, ni suak a, a sat ciangin zung kha zo lo ahih manin a vulgawp hi. Kimkhatte in ling lakah a kia hi. Ling kungte khang uh a, dep gawp uh ahih ciangin a gah kei hi. Kimkhatte in lei hoihna-ah kia a, po-in khang a, a zah sawmthum, a zah sawmguk, a zah zakhat a gah hi. Zak nading bil a nei teng in za ta un!” a ci hi. Zeisu in gam daina-ah a om lai takin, sawm-le-nihte tawh a kimkot a omkhawmte in thugentehna a dong uh hi. Zeisu in, “Pasian’ Gam thu theih hakte na theih nadingun thu hong pia hi. A pua lam a omte ahih uh leh, kikheela amau mawhna uh a kimaisak loh nadingin, amau enin, a en napi-un a mu kei ding uh a; ngai-in, a ngai napi-un a khiatna thei lo ding uh ahih ciangin, amaute thugentehna tawh ka hilh hi.” “Note in hih thugentehna thei lo na hi uh hiam? Na theih kei uh leh, thugentehna khempeuh bangci theih ding na hi uh hiam? Khaici vawhpa in thu a vawh hi. Lampi geiah khaici a kiate in, thu a zak uh ciangin thakhatin Satan hong pai a, amau sungah a kivawh thu a lakkhiatte ahi uh hi. Tua mah bangin, suang lakah a kiate in thu a zak uh ciangin, lungdamin a mang pah uh hi. Amaute sungah zung kha lo uh ahih ciangin, tawlkhat kikal bek a kip uh hi. A thu hangah gimna ahi zongin, bawlsiatna ahi zongin a thuak uh ciangin thakhatin a puk uh hi. Ling lakah a kiate in, thu a zak uh ciangin leitung lunghihmawhna, sum leh pai khemna leh, adang deihgawhna lutin thu depgawp a, gah zo lo uh hi. Lei hoihna ah a kiate in thu a zak uh ciangin mang uh a, a zah sawmthum, a zah sawmguk, a zah zakhat a gah thei ahi uh hi,” a ci hi. Zeisu in, “Meivak kho sangah vak loin, seeng khuh ding ahi zongin, lupna nuai-ah koih ding ahi zongin hong kitawi ahi hiam? A kilak ding longal, a kibu bangmah om lo hi. A kilang ding longal, a ki-im bangmah om lo hi. Zak nading bil a nei mi khatpeuh a om leh, za ta hen,” a ci hi. Zeisu in, “Note in bang na ci zak uh hiam ci-in na kikeem ta un. Midangte na piakna uh seeng mahin no zong hong kipia kik ding a, a tam zawin a hong pia ding hi. Bang hang hiam na cih uh leh, a neite a kipiak beh ding hi. A nei lote kiang pan a neihsa nangawn a kilakhia ding hi,” a ci hi. Zeisu in, “Tua ahih ciangin Vantung Gam in, mi khat in lei tungah khaici a vawh tawh kibang hi. Sun tawh zan tawh tua pa ihmu zel, tho zel a, ama theih lohin a kung po a, hong khangto hi. Lei in ama thuin gahsak hi. A masa belin a kung, tua khit ciangin a vui, tua khit ciangin a vui sungah gah taksa a piang thei hi. A gah a min ciangin, thakhatin ama phiaukawi tawh a at hi. Bang hang hiam na cih uh leh, taang lak hun a tung zo hi,” a ci hi. Zeisu in, “Pasian Gam bang tawh ka genteh ding hiam? Bang thugentehna tawh ka lak ding hiam? Ankam tang tawh a kibang hi. Ankam tang lei-ah a kicin’ lai takin, leitungah a om tang khempeuh lakah a neupen hi. Ahih hangin a kicin’ khit ciangin khang a, ankung khempeuh sangin gol zaw a, vanah vasate in a lim belh dingin hiang gol a meeng thei hi,” a ci hi. Zeisu in tua bang thugentehna tawh amaute in a theih zawh nadingun thu a hilh hi. Thugentehna loin thu a hilh kei hi. Ahih hangin thu khempeuh gam daihna-ah a nungzuite a hilh hi. Tua ni, nitak ciangin Zeisu in a nungzuite kiangah, “Gal khatah pai ni,” a ci hi. Amaute in mihonpi nusia-in paikhia uh a, gunkuangah amah a om bangin amaute in Topa tawh tuang khawmin a pai uh hi. Gunkuang dangte zong amau tawh a paikhawm uh hi. Tua lai takin huih nakpi nung a, tui kilok in gunkuang kipap a, gunkuang sungah tui a dim hi. Zeisu in gunkuang tawlam lukham tungah a ihmu hi. Amaute in phong uh a, “Topa aw, kote kisiat ding nong awi hiam?” a cih uh ciangin Zeisu thoin huihpi taai a, “Dai in,” ci-in thu a piak ciangin huihnung tawpa a dai pah hi. Tua lai takin Zeisu in, “Note in bang dinga lau na hi uh hiam? Upna nei lo na hi uh hiam?” ci-in a dong hi. Amaute in lau mahmah uh a, “Hih pa in kua mi ahi hiam? Huih leh tuipi nangawn in a thu ngai tazen uh hi,” ci-in khat leh khat a kikum uh hi. Tuili gal khat Gerasa gamah a tung uh a, Zeisu in gunkuang sung pan a pusuah khit ciangin, thakhatin a kihhuai dawi lutpa khat in han lak panin a dawn hi. Tua pa omna in han lak ahi hi. Kuamah in amah sikkhau nangawn tawh a hen zo kei uh hi. Bang hang hiam i cih leh, kolbulh leh sikkhau tawh tamveipi a kihen ngei hangin sikkhau a peeksat a, kolbulh a kuai tan hi; kuamah in amah a zo zo kei hi. Sun leh zan a tawntungin han lakah ahi zongin, mualtung ah ahi zongin kiko a, suang tawh a pumpi a kikuisak hi. A gamla pan Zeisu a muh ciangin a kiangah tai a, bokin, “A sang bel Pasian’ Tapa Zeisu aw, nang tawh bang kikum i hi hiam? Kei nong bawlsiat loh nadingin, Pasian’ min tawh thu kong pia hi!” ci-in nakpi-in a kiko hi. Hih thu bang hangin a gen hiam i cih leh, “Kihhuai dawi aw, tua mipa sung pan taikhia in,” ci-in Zeisu in thu a pia zo hi. Zeisu in, “Na min bang ahi hiam?” ci-in a dot ciangin, “Kote tampi ka hih uh ciangin, ka min un Legion ahi hi,” a ci hi. Tua gam sung panin amaute a hawlkhiat loh nadingin nakpi-in a thuum uh hi. Tua san tak mual tungah vok honpi khat gamta-in a om uh hi. Dawite in, “Kote tua vokte sungah ka lut nadingun vok hon lakah hong paisak in,” ci-in a ngen uh hi. Zeisu in thu a piak ciangin kihhuai dawite paikhia uh a, vokte sungah a lut uh leh, vok honpite kensang tung pan taisukin tuili sungah a si khin uh hi. Vokte kisim leh, tulnih bang pha ding hi. Vokcingte tai uh a, khua sung leh gam sungah hih thu a gen uh ciangin, mite in bang thu a piang hiam ci-in en dingin a kuankhia uh hi. Amaute Zeisu kiang a tun’ uh ciangin Legion a nei dawi lutpa in puan silhin, lungpilte bangin tu-in a om a muh uh ciangin a kihta uh hi. A mu mite in dawi lutpa ahi zongin, vokte ahi zongin, bangci a piang ci-in amaute a zaksak uh ciangin, amaute’ gam panin Zeisu paikhia dingin a ngen uh hi. Zeisu in gunkuang ah a kah lai takin, dawi lutpa in amah tawh omkhawm nading thu a nget ciangin, Zeisu in thu pia loin, “Na innah ciah in la, Pasian in nangma tungah bangzah takin noptuamna hong pia a, nangma tungah bangci a hehpihna hong pia hiam cih na behte kiangah na zasak in,” ci-in thu a pia hi. Tua pa pai-in Zeisu in bangzah tak noptuamna ama tungah bawl hiam ci-in Dekapolis gamah thu zeelsak a, mi khempeuhte in lamdang a sa uh hi. Zeisu in gunkuang sungah tuang a, a galkah khit ciangin tuili geiah a om lai takin, mihonpi a kiangah kikhawm uh hi. Tua lai takin Jairas a min nei, kikhopna inn ukpa khat in va nai a, Zeisu a muh ciangin a khe kiangah bokin, “Ka tanu a si dektak zo hi. Topa hong pai-in, damkik a, a hin’ theih nadingin ama tungah na khut ngak nadingin kong ngen hi,” ci-in a thuum hi. Zeisu in tua pa tawh paikhawm a, mi tampite in a nung zui-in a phukha uh hi. Tua lai takin kum sawm leh kum nih tawntung si luang cinatna vei a, zato tampi khut tungah gimna tampi thuak a, a neihsa teng bei-in a noptuam lo tham loin a gim semsem numei khat in; Thakhatin a si luang kang a, a cinatna dam pah hi ci-in a pum sungah a thei hi. Zeisu in ama tung pan vangliatna paikhia a theih khit ciangin, mihonpi lamah kihei a, “Ka puan kua in lawng hiam?” a ci hi. A nungzuite in, “Mi tampi in Topa hong phukha na mu napi-in, ‘Kua in hong lawng hiam?’ ci-in na dong hi,” a ci uh hi. Zeisu in a lawng pen a muh nadingin a kimkot a en hi. Numei in amahmah tungah bang thu a piang cih thei ahih ciangin lau-in liing a, Zeisu kiangah pai-in a thu khempeuh tel takpi-in a gen hi. Zeisu in, “Ka tanu aw, na upna in nang hong damsak zo hi. Nuam takin na ciah in, na cidam ta in,” a ci hi. Zeisu in tua thu a gen lai takin, kikhopna ukpa’ inn panin mite hong pai uh a, “Na tanu a si zo hi. Siapa bang dingin na gimsak lai ding hiam?” ci-in a ko uh hi. Ahih hangin Zeisu in tua thu mang loin, “Lungmang kei in, upna bek nei in,” ci-in kikhopna inn ukpa kiangah a gen hi. Zeisu in Piter, Jakob leh Jakob’ nau Johante longal midang kuamah zuih nadingin thu a pia kei hi. Kikhopna inn ukpa’ inn a tun’ uh ciangin gamlum leh mi tampi kap a, thuum a om uh a mu hi. Inn sungah a lut ciangin, “Bang hangin gamlum a, kapin om na hi uh hiam? Numeino a si hi lo hi, a ihmu hi,” a ci hi. Tua mite in zahpihin a nuihsan uh ciangin Zeisu in amaute khempeuh hawlkhia a, numeino’ pa leh a nu tawh amah tawh a omkhawm mite a sap khit ciangin numeino’ omna phualah tum a, a khut lenin, “Talitha kumi,’ a ci hi. A khiatna in, “Numeino aw, tho in kong ci hi,” a cihnopna hi. Thakhatin numeino tho pah a, kalsuan hi. Bang hang hiam i cih leh, amah in kum sawm leh kum nih a pha zo hi. Amaute in thakhatin lamdang a sa mahmah uh hi. Tua thu kuamah in a theih loh nadingin Zeisu in amaute nakpi-in a kham khit ciangin, numeino an piak dingin thu a pia hi. Zeisu in tua mun pan paikhia a, ama khua-ah pai-in a nungzuite in a zui uh hi. Nipi ni a tun’ ciangin kikhopna innah thu a hilh hi. Mi tampite in a thu a zak uh ciangin, lamdang a sa uh hi. “Hih pa in hih thute koi pan a ngah hiam? Hih pa kipia pilna in bang pilna ahi hiam? Ama khut tawh hihzah tak nalamdangte bangci a bawl thei hiam? Amah in Mari’ ta hilo ahi hiam? Khutsiampa ahi, Jakob, Josef, Judas leh Simon-te’ sanggampa hilo ahi hiam? Ama sanggamnute in i kiangah om hilo ahi uh hiam?” ci-in a gen uh hi. Amaute in ama hangin a lungkia uh hi. Zeisu in, “Pasian’ kamsangpa in ama inn, ama khua, ama behte kiangah longal mun dangah minthan’na ngah loin om lo hi,” ci-in amaute kiangah a ci hi. Cina tawmte tungah khut nga a, a damsak sim loh, tua santakah nalamdang lian a bawl kei hi. Amaute up lohna lamdang a sa hi. Zeisu in khuapite leh khuaneute sungah thuhilhin a vak kawikawi hi. Tua lai takin Zeisu in a nungzui sawm-le-nihte a sap khit ciangin, kihhuai dawite a zawh nading thu pia a, nih tek, nih tekin a sawl hi. “Note in ciangkhut khat sim loh, lampi ah zat ding a dang bangmah na keng kei un. Khomun, thungip, kawnggak sungah dangkasan na vom kei un. Khedap bulh un la, puanak na silh thuah kei un. Inn khat peuhah na lut uh leh, tua khua pan na paikhiat matengun tua innah va om un. Mun khat peuhah mite in hong nolh a, na thu uh a ngaih kei uh leh, amau omna pan na paikhiat uh ciangin, amau lang khatah teci pang dingin, na khepeek nuai uh ah leivuite na singkhia un,” ci-in thu a pia hi. Tuate paikhia uh a, mite mawhna kisik nading thuhilhin, dawi tampi hawlkhia uh a, cidam lo mi tampi sathau tawh zutin a damsak uh hi. Tua lai takin Herod kumpipa in tua thu za hi. Bang hang hiam i cih leh, Zeisu min a thang hi. “Baptaizpa Johan in sihna pan a thokik zo hi. Tua ahih ciangin, hih vangliatna in ama tungah a kilang hi,” a ci uh hi. Mi kimkhat in, “Hih mi in Elijah ahi hi,” a ci uh hi. Midangte in, “Tanglai kamsangte khatpeuh tawh kibang, kamsangpa ahi hi,” a ci hi. Ahih hangin Herod in a zak ciangin, “A ngawng ka tansak Johan a thokik zo hi,” a ci hi. Herod in a nau Filip’ zi Herodias thu hangin Johan a matsak khit ciangin, thong sungah a hen hi. Bang hang hiam i cih leh, Herod in tua Herodias tawh a kiteen’ ciangin, Johan in, “Na nau’ zi teen’pih ding kilawm lo hi,” ci-in Herod kiangah a gen hi. Herodias in Johan mudah a, a that nuam hangin that zo lo hi. Bang hang hiam i cih leh, Johan in mi thuman, mi siangthopa ahih Herod in thei ahih ciangin, Johan kihta a, amah a kem hi. Amah in Johan thu a zak ciangin lungmang a, lungdamna tawh ama thu a ngai hi. Tua nung ciangin a kilawm ni tung a, Herod’ suah ni-in a upate, galkap mangte, leh Galile gam za liante an a vak hi. Tua lai takin Herodias’ tanu lutin a laam ciangin, Herod akipan amah tawh an a nekhawmte a nuam uh hi. Herod in, “Na deih peuhpeuh hong ngen in kong pia ding hi,” ci-in numeino thu a pia hi. Khatvei, “Na hong nget khempeuh ka gam langkhat dongin kong pia ding hi,” ci-in thu a ciam hi. Numeino in paikhia a “Bang ka ngen ding hiam?” ci-in a nu a dot ciangin a nu in, “Baptaizpa Johan’ lutang ngen in,” a ci hi. Numeino thakhatin kumpipa kiangah tum a, “Baptaizpa Johan’ lutang dalkuang sungah hong pia le-cin ka ut hi,” a ci hi. Kumpipa a dah mahmah hangin, a kiciam zawhna leh sabuai ah a tut khawmpihte a zahtak manin numeino a nial nuam kei hi. “Johan’ lutang hong paipih in,” ci-in galkap khat a sawl ciangin tua pa pai a, thong sungah Johan’ ngawng a tan khit ciangin, dalkuang sungah a lutang paipih a, tua numeino a piak khit ciangin numeino in a nu a pia hi. Johan’ nungzuite in a zak uh ciangin pai uh a, a luang paipihin hankhuk sungah a vui uh hi. Sawltakte in Zeisu kiangah kikhawm uh a, a hihna khempeuh leh a thuhilhna khempeuh a zasak uh hi. Zeisu in, “Gam daihna-ah hong pai un la, tomkha tawldam na’ngin khawl un,” a ci hi. Bang hangin hih bangin a gen hiam i cih leh, mi tampite in a vak a ciah uh ahih ciangin, amau in an ne man lo zawzenin a om uh hi. Tua ahih ciangin, gunkuang tungah tuangin gamlak gam daihna-ah a pai uh hi. A pai lai takun mite in mu uh a, kimkhat in amaute ahih lam a theih uh ciangin, khuapi khempeuh panin paikhia uh a, tai-in a tung masa uh hi. Zeisu paikhia a, mihonpi a muh ciangin, a cing om lo tuute tawh kibang hi ci-in hehpihhuai sa a, thu tampi a hilh hi. Ni a tum dektak ciangin a nungzuite Topa kiangah va pai uh a, “Hih lai tak in gamlak ahi hi. Ni lah a tum zo hi. Amaute a kimkot khuaneu leh lo lai-ah pai-in an nek ding lei dingin paisak ta in,” a cih uh leh, Zeisu in, “Amau nek ding an note’n na pia ding uh hi,” a ci hi. Amaute in, “Kote pai-in dangka zakhat tawh khomun ka lei khit uh ciangin, amaute nek dingin ka pia ding uh hiam?” ci-in a dong uh hi. Zeisu in, “Khomun pum bangzah na nei uh hiam? Pai un la, va en un,” a ci hi. Amaute in a theih khit uh ciangin, “Khomun pum nga leh ngasa tawn nih a om hi,” ci-in a gen uh hi. Tua ciangin Zeisu in, “Mi khempeuh lopa hing tungah a pawlpawlin tusak un,” a ci hi. Amaute in pawlkhat za, pawlkhat sawmnga, a pawlpawlin a tu uh hi. Zeisu in khomun nga leh ngasa tawn nih la a, vantung lam ento-in hehpihna a phat khit ciangin, khomun balnenin mite mai-ah lui dingin a nungzuite a pia hi. Ngasa tawn nih zong amaute khempeuh lakah a hawmsak hi. Mi khempeuh in a ne uh a, a kham khit uh ciangin khomun leh ngasa, a neng a themte khawm uh a, seeng sawm leh seeng nih dim a ngah uh hi. Khomun a ne pasal bek tul nga a pha hi. Zeisu in mihonte a paikhiatsak lai takin, a nungzuite gunkuang ah thakhatin tuangsakin, a gal khat Bethsaida khua-ah ama mai-ah a paisak hi. Zeisu in mihonpite tawh a kikhen khit ciangin, thungen dingin mual tungah a kahto hi. Nitak ciangin gunkuang in tuili lai zangah a om hi. Zeisu ahih leh, lei tungah amah guakin a om hi. A deih lohna uh lam panin huih in lehmut ahih ciangin, a nungzuite in gunkuang hot a gim mahmah a om uh Zeisu in mu a, khua vak dektak nai thum ciangin tuili tungah amaute kiangah pai a, a pel ding bangin a pai hi. Ahih hangin tuipi tungah a pai amaute in a muh uh ciangin sikha sa-in a kiko uh hi. Bang hang hiam i cih leh, amaute khempeuh in Zeisu mu uh a, a lau uh hi. Ahih hangin Zeisu in, “Na lungdam ta un, keimah ka hi hi. Na lau kei un,” a ci pah hi. Gunkuang tungah amaute kiangah a kahtoh ciangin huihnung dai hi. Amaute in a lungsim sung uh ah lamdang a sa uh hi. Bang hang hiam i cih leh, amau lungsim uh pil lo ahih ciangin khomun thu ciamteh lo uh hi. Tui gal khatah a kah khit uh ciangin, Gennesareth gamah a tung uh a, gunkuang tui geiah a khawlsak uh hi. Amaute in gunkuang sung pan a paikhiat uh ciangin mite khempeuh in Zeisu’ meel a thei uh hi. A kimkot gam khempeuh ah tai-in, koi lai takah a om ci-in a zak uh ciangin tua munah mi cinate lupna tawh a paipih uh hi. Khuapi, khuaneu, gamlak, a tun’na khempeuh ah cidam lo mite lam kiangah a koih uh a, ama puan mong teep beek a lawn’ nadingun a ngen uh hi. Amah a lawng khempeuh in cidamna a ngah uh hi. Tua khit ciangin, Jerusalem khua panin hong tung Farisaite leh laithei kimkhatte in Zeisu kiangah hong kikhawm uh a, a nungzui kimkhatte in a nin cihnopna, a kisil lo khut tawh an ne uh a mu uh hi. (Farisaite akipan Judah mi khempeuh in tanglai upate’ ngeina zui-in khut phatakin sil loin an ne lo uh hi. Sumbuk panin hong ciah uh ciangin zong pumpi kisil loin an ne lo uh hi. Tua lo adang ngeinate in haite, sumngo kuangte, dalkuangte tui tawh sawpna ngeina a zuih uh tampi a om hi). Farisaite leh laitheite in, “Tanglai upate’ ngeina na nungzuite in zui loin, khut nin tawh bang hangin an ne ahi uh hiam?” ci-in a dong uh hi. Zeisu in, “Isaiah in mi simtat note tungah a kituakin a genkhol zo hi. Tua Lai Siangtho in: ‘Hih mipawlte in amau kam uh tawh kei hong zahtak uh hangin, A lungsim uh kei tawh kigam la hi. Mite thukham ngeina a hilh uh a, A mawkna in kei hong bia uh hi,’ a ci hi. Note in Pasian thukham na paai uh a, mite kiang pan na ngah uh ngeina na zui uh hi.” “Note in na ngeina uh na zuih theih nadingun Pasian’ thukham na nial uh hi. Bang hang hiam na cih uh leh, Moses in, ‘Na nu leh na pa na zahtak in. A nu a pa a gensiate in sihna thuak ta hen,’ a ci hi. Note in na cihna uh ah, keima kiangah na zat theih keima sum, Pasian kipia zo cihnopna ahi, ‘Korban’ hi ci-in mi khatin a cih leh, tua mi in a nu a pate tungah neukha beek bawl theih loh na’ng na kham uh a, na kipiak ngeina uh zui-in Pasian thu na mawk valsak uh hi. Tua bang gamtatna tampi na zui uh hi,” a ci hi. Tua lai takin Zeisu in mihonpite sam kik a, “Note khempeuh in ngai un la, na thei ta un. Mi sungah a pua lam pan a lutsuk na in mi a ninsak zo na khat beek a om kei hi. Mi sung pan a paikhiate in mi a ninsak thei hi, zak nading bil a nei mi in za ta hen” a ci hi. Zeisu in mihonpi lak pan kikhen a, inn sungah a lut khit ciangin, a nungzuite in tua thungentehna a dong uh hi. Zeisu in, “Note in zong lungpilna nei nai lo na hi uh hiam? Mi pua lam pan a sungah a lut khempeuh in, mi a ninsak zo lo thei lo na hi uh hiam? Bang hang hiam na cih uh leh, ama lung sungah lut loin a gilpi sungah tumsuk a, gil sung pan a kithakhia hi,” a ci hi. Tua bang a gen ciangin sa khempeuh a siangthosak hi. Khatvei Zeisu in, “Mi sung pan a paikhiate in mi a ninsak thei hi. Bang hang hiam na cih uh leh, mi sung pan a hoih lo ngaihsutna, numei tawh mawhna, mi’ sum gukna, mi thahna, mi’ zi tungah mawhna, huaihamna, gitlohna, mi kheemna, kihhuai deihna, een’na, mi gensiatna, kiphatsakna, mawktatna, hih gitlohna khempeuh in sung lam pan a paikhia uh a, mi a ninsak uh hi,” a ci hi. Zeisu tua mun pan tho a, Tai-ar leh Sidon khua nai lamah a pai ciangin, inn khatah lut a, kuamah in a theih loh nading a ut hangin bu-in a kiseel zo kei hi. A tanu sungah dawi lut numei khat in Zeisu a om thu a zak ciangin, thakhatin hong pai a, a khe kiangah bokin, a tanu’ sung pan dawi a hawlkhiat nading thu a ngen hi. Tua numei in Sirofoenisia pawl, Grik numei ahi hi. Zeisu in, “Amasa-in tate kivak kham ta hen. Bang hang hiam na cih leh, tate an nek ding la a, uite piak ding kilawm lo hi,” a cih leh, numei in, “Ahi mah hi, Topa aw, uite in tate anneng kiate sabuai nuai-ah a ne uh hi,” a ci hi. Zeisu in, “Tua thu hangin nang pai in, na tanu’ sung pan dawi a paikhia zo hi,” a ci hi. Numei a innah ciah a, numeino in lupna tungah lum a, dawi a paikhia zo cih a mu hi. Zeisu in Tai-ar gam pan paikhia a, Sidon gam a paltan khit ciangin, Dekapolis gam paisuakin Galile tuili a tung kik hi. Tua lai takin bengngong, paumawl mi khat a kiangah a paipih uh a, ama tungah a khut a ngak nadingin a thuum uh hi. Zeisu in tua pa mihonpi lak pan samkhia a, gam daihna munah a paipih khit ciangin, a khutmete a bil lang nih sungah guangin, a cil phih a, a leii zong a lawng hi. Vantung ento-in khuisa a, kihong ta hen cihnopna-in “Effatha” a ci hi. Tua lai takin mipa a bil kihong a, a leii gui kikhah khia-in pha takpi-in kam a pau thei hi. Tua thu kuamah kiangah a gen loh nadingin amaute a kham hi. A kham semsem hangin, amaute in tua thu a tangko semsem uh hi. Amaute in a kigen thei lo zah dongin lamdang a sa uh a, “Amah in na khempeuh phatakin a bawl zo hi. Bengngongte khua zasak zo a, pau thei lote a pausak thei zo hi,” ci-in a gen uh hi. Tua lai takin mihonpi tam kik a, an nek ding a neih loh uh ciangin Zeisu in a nungzuite sam a, “Hih mite hehpihhuai ka sa hi. Bang hang hiam na cih uh leh, ni thum tawntung kei tawh a omkhawm uh hi. An nek ding a nei kei uh hi. An ne loin innah ka ciahsak leh, lampi ah a gim ding uh hi.Tuate kimkhat in gamlapi panin hong pai uh hi,” a ci hi. A nungzuite in, “Hih mite an kham ding bang lak pan kingah thei ding hiam?” a ci uh hi. Zeisu in, “Khomun pum bangzah na nei uh hiam? ci-in a dot ciangin amaute in, “Pum sagih a om hi,” a ci uh hi. Tua ciangin Zeisu in, “Mihonpi lei tungah tusak un,’ ci-in a sawl hi. Tua ciangin khomun sagih la a, hehpihna a phat khit ciangin, khomun balnenin mite mai-ah lui dingin a nungzuite a pia hi. A nungzuite in mihonpi a lui uh hi. Ngasa tawmkha nei uh ahih ciangin, hehpihna a phat khit ciangin, tuate zong mite lui ding thu a pia hi. Amaute in a ne uh a, a kham khit uh ciangin, a khamval uh a neng a themte tawm uh a, seeng sagih a ngah uh hi. Tuate tul li bang a pha uh hi. Zeisu in amaute a paikhiatsak khit ciangin a nungzuite tawh gunkuang tungah thakhatin tuangin, Dalmanutha gam a tung uh hi. Tua lai takin Farisaite hong pusuak uh a, Zeisu tawh thu a kinial uh ciangin, ze-et nadingin vantung pan lim a ngen uh hi. Zeisu in a lungsim sungah khuisa a, “Hih khang mite in bang hangin lim a ngen uh hiam? Ke’n aman takpi kong cih-inah, hih khang mite ading lim a kilak kei ding hi,” a ci hi. Amaute omna pan paikhia a, khatvei gunkuang tungah tuang kikin tui gal khatah a pai hi. A nungzuite in khomun puak ding a mangngilh uh a, gunkuang tungah khomun pum khat bek a nei uh hi. Zeisu in, “Farisaite leh Herod’ silnngo kikeem un la, tang un,” a cih ciangin, a nungzuite in, “Eite in khomun i nei kei hi,” ci-in khat leh khat a kikum uh hi. Zeisu in a theih ciangin, “Note in khomun na neih loh manun bang hangin khat leh khat na kikum uh hiam? Thei lo lai ngaihsun lo lai na hi uh hiam? Na lungsim uh khauh khauh lai ahi hiam? Mittang nei napi-in mu lo, bil nei napi-in za lo, phawk lo na hi uh hiam? Khomun pum nga mi tul nga ading ka balnen ciangin, a neng a them seeng bangzah na tawm uh hiam?” ci-in a dot ciangin, “Seeng sawm leh seeng nih,” a ci uh hi. “Khomun sagih tul li ading ka balnen ciangin, a neng a themte seeng bangzah na tawm uh hiam?” ci-in a dot ciangin amaute in, “Seeng sagih,” a ci uh hi. Zeisu in, “Note in thei nai lo na hi uh hiam?” a ci hi. Amaute in Bethsaida khua-ah a tun’ uh ciangin, mittaw mi khat a kiangah hong paipih uh a, tua pa a lawn’ nadingin a thuum uh hi. Zeisu in mittawpa a khut tawh kai a, khua nawlah a paipih khit ciangin, a mittang cil phih a, a tungah khut a ngak khit ciangin, “Na khatpeuh peuh na mu thei hiam?” ci-in a dong hi. Amah a ettoh leh, “Mite ka mu hi; amaute singkung pai bangin ka mu hi,” a ci hi. Tua lai takin Zeisu in a khut khatvei a mittang ah nga kik a, tua pa in tel takpi a et kik ciangin dam a, na khempeuh tel takin a mu thei hi. Zeisu in tua pa innah ciahsak a, “Khua sungah na lut kei in,” ci-in thu a pia hi. Zeisu in a nungzuite tawh Kaisaria Filippi gam khua neute-ah a pai uh hi. Lampi-ah a pai lai takun, “Mite in kei kua hi hong ci uh hiam?” ci-in a nungzuite a dong hi. Amaute in, “Baptaizpa Johan,” a ci uh hi. Kimkhat in, ‘Elijah,’ a ci uh hi. Ahih hangin midang kimkhat in, ‘Kamsangpa khatpeuh,’ a ci ciat uh hi,” ci-in a gen uh hi. Zeisu in, “Note in kei kua mi hi nong ci uh hiam?” ci-in a dot ciangin, Piter in, “Nangmah in Khazih na hi hi,” a ci hi. Amah kua mi ahi ci-in kuamah kiangah gen lo dingin a nungzuite a kham hi. Zeisu in, “Mihing Tapa in gimna tampi thuak ding a, upate, siampi liante, leh laitheite in nial ding uh a, amah in thahna thuakin ni thum khit ciangin a thokik ding hi,” ci-in tua a kipanin a nungzuite a hilh hi. Tua thu im loin a gen khin hi. Piter in Zeisu samsim a, seel ding a kipat ciangin, Zeisu kihei a, a nungzuite a muh ciangin, “Satan aw, ka nungah kinkhia in; nang in Pasian thu na ngaihsun kei hi, mite thu bek na ngaihsun hi,” ci-in Piter a taai hi. Tua ciangin Zeisu in a nungzuite leh mihonpite a sap khit ciangin, “Mi khatpeuh in kei hong zuih nop leh, ama pumpi nial a, a singlamteh pua-in hong zui ta hen. Bang hang hiam na cih uh leh, ama nuntakna a gum nuamte in a nuntakna a mangthangsak ding hi. Kei hang ahi zongin, Lungdamna Thu hang ahi zongin nuntakna a mangsakte in a nuntakna a gum ding hi. Mi khat in leitung khempeuh a ngah hangin, ama nuntakna mangthangsak leh, bang phattuamna ngah ding ahi hiam? Mi khatpeuh in ama nuntakna bang sum tawh lei kik thei ding ahi hiam? Mi paktat leh gilo hih khang mite lakah, kei ahi zongin, ka thu ahi zongin a daisak peuhmah Mihing Tapa in zong a Pa minthan’na leh a siangtho vantungmite tawh hong paikhawm uh ciangin, tua mite a daisak ding hi.” “Ke’n aman takpi kong cih-inah, Pasian Gam in vangliatna tawh hong tung, hih santakah a ding mi kimkhat in a muh matengin a si kei ding uh hi,” a ci hi. Ni guk khit ciangin Zeisu in Piter, Jakob leh Johan-te samin mual sang tungah, gam daihna munah paipih a, amaute mai-ah a meel kilamdang a, a puan zong leng a, hih leitungah puansawp mi kuamah in a paaksak zawh loh ding zah dongin a paak mahmah hi. Amaute kiangah Moses leh Elijah kilang a, Zeisu tawh a kiho uh hi. Tua lai takin Piter in, “Topa aw, hih lai takah kote kong om uh a hoih hi. Nang ading buk khat, Moses ading buk khat, Elijah ading buk khat, buk thum kote hong lamsak in,” a ci hi. Bang hangin hih bangin a gen hiam i cih leh, amaute lau mahmah uh ahih ciangin, Piter in a gen ding dang a thei kei hi. Tua lai takin meeingo khat in amaute tuam a, “Hih pa in ka it ka Tapa ahi hi. Ama thu na ngai ta un,” ci-in meii lakah aw khat a ging hi. Amaute in thakhatin a kim a pam en uh a, amaute tawh Zeisu bek omkhawm longal kuamah dang a mu kei uh hi. Amaute mualtung pan a kumsuk lai takun Zeisu in, “Mihing Tapa in sihna pan a thawhkik matengin na muhte uh kuamah kiangah gen kei un,” ci-in a nungzuite a kham hi. Amaute in a lungsim sung uh ah hih thu a khol uh a, sihna pan a thawhkik nading thu in bang cihnopna ahi hiam ci-in khat leh khat a kidong uh hi. Tua lai takin amaute in, “Elijah hong pai masa ding hi,” ci-in laitheite in bang hangin a gen uh hiam?” ci-in a dot uh leh, Zeisu in, “Elijah hong pai masa takpi ding a, na khempeuh a bawl kik ding hi. Mihing Tapa in zong gimna tampi leh nialna a thuak ding ci-in Lai Siangtho sungah kigelh zo hilo ahi hiam? Ahih hangin, ke’n kong cih-inah Elijah hong tung zo hi. Amaute in Lai Siangtho sungah ama thu a kigelh khol mah bangin, ama tungah ahih nop bangun ahih zo uh hi,” ci-in a gen hi. A nungzuite omna-ah a tun’ uh ciangin, mi tampite in amaute uum uh a, laitheite in amaute tawh thu kikum kidongin a om uh a mu hi. Thakhatin mihonpite khempeuh in Zeisu a muh uh ciangin lamdang a sa uh a, a kiangah tai-in amah a hopih uh hi. Zeisu in, “Note in amaute tawh bang thu kidong na hi uh hiam?” ci-in a dong hi. Mihonpite lakah mi khat in, “Topa aw, a pau thei lo dawi lut ka tapa na kiangah kong paipih hi. Tua dawi in a matna peuhpeuh ah lei tungah puksak a, a kam sung pan cilphuan bua a, a ha gawi a, a kongkaw gawp thei hi. Dawi a hawlkhiat nadingun na nungzuite kiangah ka nget hangin ahih thei kei uh hi,” a ci hi. Zeisu in, “Upna nei lo pawlte aw, kei in no tawh bang tanvei omkhawm ding ka hi hiam? Tua naupang ka kiangah hong paipih un,” a ci hi. Amaute in a hong paipih uh leh, Zeisu a muh ciangin dawi in naupang thakhatin kongkawsak a, lei tungah puk a, cilphuan bua-in a kipeek sawnsawn hi. Zeisu in, “Hih natna a kipat zawh bang tanvei pha zo ahi hiam?” ci-in naupang’ pa a dot ciangin a pa in, “A neu lai pek pan akipan hi. Naupang a kisiat nadingin tamveipi meikhuk sungah, tamveipi tui sungah a puksak hi. Ahih hangin, na khat peuhmah na bawl theih leh, kote hong hehpih in la, hong huh in,” ci-in ngen hi. Zeisu in, “Na bawl theih leh,’ na ci hiam? A um mi ading ahi thei lo a om kei hi,” a ci hi. Naupang’ pa in thakhatin kiko a, “Ke’n ka um hi. Ka up lohna hong huh in,” ci-in a ngen hi. Tua lai takin mihonpite kikhawm dingin hong tai uh a, Zeisu in a muh ciangin, “Bengngong leh pauthei lo dawi aw, ama sung pan paikhia in. Tu nung ciangin tum kik nawn kei in, thu kong pia hi,” ci-in kihhuai dawi a taai ciangin, dawi in kiko-in naupang nakpi-in a kongkawsak khit ciangin a paikhia hi. Naupang in misi tawh kibang ahih ciangin mi tampi in, “A si zo hi,” a ci uh hi. Ahih hangin, Zeisu in naupang’ khut len a, a phottoh ciangin amah a tho hi. Zeisu inn sungah a lut khit ciangin a nungzuite in, “Kote in bang hangin tua dawi hawlkhia zo lo ka hi uh hiam?” ci-in a dot uh leh, Zeisu in amaute kiangah, “Hih bang dawi namte thungetna leh antan’na longal tawh a paikhia thei kei hi,” a ci hi. Tua mun panin amaute paikhia uh a, Galile gam paltanin kuamah in a theih ding a ut kei hi. Bang hang hiam i cih leh, “Mihing Tapa in mite’ khut tungah kipia ding hi. Tua mite in amah a that ding uh a, amah in thahna a thuak zawh ni thum khit ciangin a thokik ding hi,” ci-in nungzuite a hilh hi. A nungzuite in tua thu a theih loh uh hangin a dong kik ngam kei uh hi. Kapernaum khua a tung uh a, inn sungah a om lai takun, “Lampi-ah bang thu kikum na hi uh hiam?” ci-in Zeisu in a nungzuite a dot ciangin, pau loin a om uh hi. Bang hang hiam i cih leh, kua lianbel hiam ci-in lampi-ah khat leh khat a kiseel uh hi. Zeisu tu a, sawm-le-nihte a sap khit ciangin, “Mi khatpeuh in makai pen a suah nop leh, a khak pen hi hen la, mi khempeuh nasem ahi ding hi,” a ci hi. Naupang khat samin, amau laizangah a koih khit ciangin a angah tawi-in, “Keima min tawh hih bang naupangno khat a ngai peuhmah in, kei zong hong ngai hi. Kei hong ngai peuhmah in, kei hong sawlpa zong a ngai hi,” ci-in a gen hi. Johan in, “Sia aw, nangma min tawh dawite a hawlkhia mi khat ka mu uh hi. Amah in eite hong zui lo ahih ciangin ka kham uh hi,” ci-in Zeisu kiangah a gen hi. Zeisu in, “Tua pa na kham kei un. Bang hang hiam na cih uh leh, keima min tawh nalamdang bawlin, a hong kosia pah thei mi khat beek a om kei hi. Bang hang hiam na cih uh leh, eite lang khatah a pang lote in, eite tawh a kipawl hi. Khazih’ mi na hih manun ah tui hai khatpeuh hong pia mi in, aman takpi kong cih-inah, noptuamna ngah loin a om kei ding hi.” “Kei hong um hih naupang khat a puksak mi peuhmah in a ngawngah an-gawina suang lian khat khihin tuipi sungah kikhia leh, ama ading a hoihzaw ding hi. Na khut in hong puksak leh, na sattan in. Khut kim nei-in a mit ngeilo mei, hel khua sungah na pai sangin, khutbui khebui-in nuntakna sungah na tum leh, nang ading a hoihzaw ding hi. Na khe in nang hong puksak leh, na sattan in. Khe kim nei-in hel khua sungah hong khul sangin, khutbui khebui-in nuntakna sungah na tum leh, nang ading a hoihzaw ding hi. Na mittang in hong puksak leh, na khelkhia in. Than a sih lohna, mei a mit ngeilo hel khua sungah mittang kim nei-in hong khul sangin, mittang khat guak tawh Pasian Gam sungah na tum leh, nang ading a hoihzaw hi. Bang hang hiam na cih leh, mi khempeuh mei tawh cisawh bangin a kisawh ding uh hi. Ci in a hoih hangin a alna mang leh, bangci a al kik thei ding hiam? Note sungah ci omsak un la, khat leh khat kilemin om un,” ci-in a gen hi. Tua mun panin Zeisu tho a, Judah gam leh Jordan gun gal khatah a tung hi. Mi tampi in ama kiangah kikhawm kik uh a, a ngeina bangin thu a hilh hi. Farisaite in Zeisu kiangah va nai uh a, “Mi in a zi a mak tuak hiam?” ci-in a ze-et nadingun thu a dong uh hi. Zeisu in, “Moses in note tungah bang thu hong pia hiam?” ci-in a dong hi. Amaute in, “Kikhenna lai pia-in zi mak nading thu hong pia hi,” a ci uh hi. Zeisu in, “Note na lungsim uh khauh lua ahih ciangin, Moses in tua thukhamna a gelh hi. Ahih hangin a kipat cil panin pasal leh numei a piangsak hi. Tua ahih ciangin, pasal in a nu a pa nusia-in a zi a beel ding hi. Tua nihte in sakhat pumkhat a suak ding uh hi. Tua ahih ciangin, amaute in nih hi loin, mi khat bek ahi uh hi. Tua ahih ciangin Pasian in a kigawmsakte mite in kikhensak kei uh hen,” a ci hi. Amaute in inn sungah a om lai takun a nungzuite in hih thu a dong kik uh hi. Zeisu in, “A zi ma a, numei dang tawh a kiteeng peuhmah in numei tungah a mawh hi. Numei in zong, a pasal ma a, pasal dang tawh a kiteen’ leh, a pasal thak tungah a mawh hi,” a ci hi. Tua lai takin naupangte a lawn’ nading deihin Zeisu kiangah hong paipih uh a, a nungzuite in a kham uh hi. Zeisu in a muh ciangin heh a, “Naupangte omsak ta un. Ka kiangah hong pai ding uh kham kei un. Bang hang hiam na cih uh leh, Pasian Gam in tua bangte gam ahi hi. Ke’n aman takpi kong cih-inah, naupang bangin Pasian Gam a sang lo mi peuhmah in tua gam sungah a lut kei ding uh hi,’ ci-in thu a gen hi. Tua khit ciangin naupang tawi a, amaute tungah a khut nga-in thupha a pia hi. Lampi-ah a pai lai takin mi khat Zeisu kiangah va tai a, khukdin’in, “Sia pha aw, nuntak tawntungna ka luah nadingin bang ka gamta ding hiam?” ci-in a dong hi. Zeisu in, “Bang hangin kei mipha hong ci na hi hiam? Pasian sim loh mipha khat beek a om kei hi. Thukhamte na thei hi. Mi na that kei in. Mi’ zi tawh na mawh kei in. Mi’ sum na gu kei in. Ahi lo teci na pang kei in. A kilawm loin mi’ sum na laksak kei in. Na nu leh na pa na zahtak in,” a ci hi. Tua pa in, “Sia aw, tua thu khempeuh ka neu lai akipan ka tang zo hi,” a ci hi. Zeisu in tua pa a et ciangin it a, “Na khat na sam lai hi. Pai in la, na neihsa teng zuakin mizawngte na pia in. Tua ahih leh, vantung gam sungah sum na nei ding hi. Tua khit ciangin ka nung hong zui in,” a ci hi. Tua pa in tua thu hangin a mai khing a, lungkim loin a paikhia hi. Bang hang hiam i cih leh, sum tampi a nei hi. Zeisu in a kimkot en a, “Sum tam a neite adingin Pasian Gam sung lut nading a haksa mahmah hi,” ci-in a nungzuite kiangah a gen hi. A nungzuite in ama thu lamdang a sa uh hi. Khatvei Zeisu in, “Ka tate aw, sum leh pai a suangte in Pasian Gam sungah a tum nading bangzah tak a haksa hiam? Sai khat phim bil vangah a khum hak sangin, sum hau mite Pasian Gam sungah lut nading a haksa zaw hi,” a ci hi. Amaute in lamdang a sa mahmah uh hi. “Tua bang ahih leh, gupna kua in ngah zo ding hiam?” a ci uh hi. Zeisu in amaute enin, “Hih thu mite in ahih zo kei uh hi. Ahih hangin Pasian in ahih theih loh a om kei hi. Bang hang hiam na cih uh leh, Pasian in na khempeuh ahih thei hi,” a ci hi. Tua lai takin Piter in, “Kote in ka neihsa khempeuh uh nusia-in nangmah kong zui uh hi,” ci-in gen ding a kipat ciangin, Zeisu in, “Ke’n aman takpi kong cih-inah, kei hang ahi zongin, Lungdamna Thu hang ahi zongin a inn, a sanggampa, a sanggamnu, a nu a pa, a lo a nusiat leh, tu lai takin a zah zakhat innte, sanggampate, sanggamnute, nute, pate, tate, lote, bawlsiatna tawh ngah a, nung ciangin hong piang ding hunah nuntak tawntungna ngah lo ding kuamah a om kei hi. Ahih hangin a masate tampi in a nunung ding uh hi. A nunung mi tampite in a masa ding uh hi,” a ci hi. Amaute Jerusalem khua paina lampi ah a pai lai takun, Zeisu in a nungzuite mai-ah a pai masa hi. Amaute in lamdang sa uh a, a nung zui mite in a lau uh hi. Tua lai takin Zeisu in sawm-le-nihte sam kik a, “En un, eite Jerusalem khuapi ah i pai ding hi. Mihing Tapa in siampi liante leh laitheite’ khut tungah a kipia ding hi. Amaute in ama sih nadingin thu a khen khit uh ciangin, Gentailte’ khut tungah a pia ding uh hi. Tua mite in zong amah zahkoin, cil tawh phihin, satin, a that ding uh hi. Ni thum khit ciangin a thokik ding hi,” ci-in ama tungah a tung ding thute a nungzuite kiangah a gen hi. Tua lai takin Zebedi’ tapa Jakob leh Johan-te in Zeisu kiangah pai uh a, “Sia aw, nangma kiangah kong nget peuh uh nong piak nading ka deih uh hi,” ci-in a gen uh hi. Zeisu in, “Note tungah kong piak ding bang na deih uh hiam?” ci-in a dot ciangin, “Topa aw, na minthan’na sungah kote na taklam khat, na veilam khat ka tut theih nadingun thu hong pia in,” ci-in a ngen uh hi. Zeisu in, “Note in nong ngetna uh na thei kei uh hi. Ka dawn ding hai dawn zo ding na hi uh hiam? Ka thuak ding baptaizna thuak zo ding na hi uh hiam?” a ci hi. “Ka hih zo uh hi,” a cih uh ciangin, Zeisu in, “Ka dawn ding hai na dawn takpi ding uh hi. Ka thuak ding baptaizna zong na thuak ding uh hi. Ahih hangin ka taklam leh ka veilamah tut nading ke’n thu kong pia thei kei ding hi. A ngah dinga a bawlsate in a ngah ding uh hi,” a ci hi. A nungzui sawmte in a zak uh ciangin, Jakob leh Johan tungah a heh uh hi. Zeisu in amaute sam a, “Gentailte tungah uk ding a kilawmte in a mang uh a, miliante in thu neihna tawh a uk uh note in na thei uh hi. Note lakah tua bang a hi kei ding hi. Note lakah milian a suak nuamte in nomau nasem suak uh hen. Note lakah makai a suak nuamte in note sila suak uh hen. Bang hang hiam na cih uh leh, Mihing Tapa in midangte na semsak dingin hong pai ahi kei hi. Midangte’ na sem ding a, mi tampi tankhia ding leh, a nuntakna pia dingin hong pai ahi hi,” a ci hi. Jerikho khuapi tung uh a, Zeisu in a nungzuite akipan mihonpite tawh Jerikho khuapi pan a paikhiat lai takun, Timeus’ tapa Bartimai a min nei, mittaw khutdawh ngen khat lampi geiah a tu hi. Nazareth mi Zeisu ahih thu a zak ciangin, “David’ Tapa Zeisu aw, kei hong hehpih in,” ci-in a kiko hi. Mihonpite in a daih nadingin a taai uh hangin, “David’ Tapa aw, kei hong hehpih in,” ci-in a kiko sawnsawn hi. Zeisu ding-in, “Tua pa vasam un,” a ci hi. Amaute in mittawpa sam uh a, “Nuam in la, tho in, nang hong sam hi,” a ci uh hi. Amah in a puan a paih khit ciangin thakhatin ding-in Zeisu kiangah a pai hi. Zeisu in, “Nang ading bang kong bawl ding deih na hi hiam?” ci-in a dot ciangin, “Topa aw, ka mittang’ khua muh nading ka deih hi,” a ci hi. Zeisu in, “Pai in, na upna in hong damsak zo hi,” a ci hi. Amah in thakhatin khua mu thei a, lampi ah Zeisu nung a zui hi. Amaute Jerusalem khuapi tawh kinai Oliv Mualah a om Bethfage khua leh Bethani khua-ah a tun’ uh ciangin, Zeisu in a nungzuite nih sawl a, “Na mai uh ah a om khua-ah pai un la; tua khua-ah na lut uh ciangin kuama tuan’ ngei lohna lano khat khau khihsa a, om thakhatin na mu ding uh hi. Lano khau sut un la, ka kiangah hong paipih ta un. Mi khatpeuh in, ‘Bang hangin hih bangin hih na hi uh hiam?” hong cih leh,‘Topa in a deih hi,’ ci le uhteh amau in thakhatin hong khah ding hi,” ci-in a vaikhak hi. Amaute pai uh a, lampi ah inn kongkhak mai-ah lano khat kikhihsa a muh uh ciangin a khau a sut uh hi. Tua san takah a ding kimkhatte in, “Bang hangin la khau sut na hi uh hiam?” a cih uh ciangin, Zeisu in a vaikhak bangin a gen uh a, tua mite in a khah uh hi. Amaute in lano Zeisu kiangah paipih uh a, a tungah amau puante a phah khit uh ciangin Topa a tuangsak uh hi. Mi tampite in lampi ah amau puante a phah uh hi. Adangte in lo lai-ah singhiangte satin a phah uh hi. A mai pai, a nung a zuite in, “Hosanna! Pasian’ min tawh hong paipa in thupha ngah ta hen! A hong piang ding i pa David’ Gam in thupha ngah ta hen! Van a sang belna-ah Hosanna!” ci-in a kiko uh hi. Jerusalem khua biakna innpi sungah Zeisu lut a, na khempeuh a kawivel khit ciangin, nitum ahih manin Sawm-le-nihte tawh Bethani khua-ah a pai uh hi. Zing ciangin Bethani khua pan a paikhiat lai takin Zeisu a gilkial hi. Teh a nei theikung a gamla pan mu a, tua kung tungah gah a mu kha ding hi, ci-in va pai a, a tun’ ciangin a teh longal bangmah a mu kei hi. Bang hang hiam i cih leh, a gah hun ahi kei hi. Zeisu in, “Tu-a kipanin na gah kuamah in ne kik nawn kei ta hen,” a ci hi. A nungzuite in zong hih thu a za uh hi. Jerusalem khua-ah Zeisu a tun’ ciangin biakna innpi sungah lut a, biakna innpi sunga sumzuakte leh sum leite khempeuh hawlkhia a, dangka kheekte’ sabuaite leh vakhu zuakte’ tutphahte sawnthal sak a; biakna innpi sungah beel khat nangawn, kuamah in a paipih loh nadingin a kham hi. “Ka inn in mipawl khempeuhte thungetna inn a kici ding hi,’ ci-in Lai Siangtho sungah kigelh hilo ahi hiam? Ahih hangin note in tua inn guta buluhte omna na piangsak tazen uh hi,” ci-in a hilh hi. Siampi liante leh laitheite in a zak uh ciangin, Zeisu thah nading thu a zong uh hi. Bang hang hiam i cih leh, mihonpite khempeuh in Zeisu’ thuhilhna lamdangsa mahmah uh ahih ciangin, amaute in amah a kihta uh hi. Nitak simin Zeisu in khua nawl ah a paikhia hi. A zing ciangin lampi ah a pai lai takun, theikung a zung pan akipan na dinggaw a om a mu uh hi. Piter in phawk a, “Rabbi aw, na samsiat theikung a dinggaw zo hi,” ci-in a gen hi. Zeisu in, “Pasian na um un. Ke’n aman takpi kong cih-inah, mi khatpeuh mah in a lungsim sungah um khial lo a, ama cih bangin piang ding, ci-in a up leh, hih mual kiangah, ‘Na omna pan na khinkhia in la, tuipi sung kiden’na in,’ a cih leh, a cih mah bangin a piang ding hi. Tua ahih ciangin, ke’n kong cih-inah thu ngen a, na nget khempeuh uh ngah ding cih na up uh leh, na ngah ding uh hi. Note ding-in thu na nget uh ciangin, midang peuhmah tungah lungkim lohna na neih uh leh; vantungah a om na Pa un note’ mawhnate hong maisak theih nadingin ama mawhnate na maisak un,” a ci hi. Amaute khatvei Jerusalem khua ah a tun’ kik uh ciangin, Zeisu in biakna innpi tual ah a kawivak lai takin, siampi liante, laitheite leh upate a kiangah hong pai uh a, “Hih nate kua thu tawh bawl na hi hiam? Hih nate bawl nadingin kua in thu hong pia hiam?” ci-in a dong uh hi. Zeisu in, “Note ke’n zong kam khat kong dong ding hi. Na hong dawn’ theih uh leh, hih nate kua thu tawh ka bawl, kong hilh ding hi. Johan baptaizna thu in vantung pan hong piang ahi hiam, mi tung pan hong piang ahi hiam hong dawng un,” ci-in a dong hi. “Vantung pan hong piang hi,’ ci leeng, ‘Note in ama thu bang hangin um lo na hi uh hiam?’ ci-in hong dong zel ding hi. ‘Mi tung pan hong piang,’ ci leeng mite i kihta hi. Bang hang hiam i cih leh, mi khempeuh in Johan pen kamsangpa a sa uh hi,” ci-in khat leh khat a kikum uh hi. “Ka thei kei uh hi,” ci-a a gen uh ciangin Zeisu in zong, “Tua mah bangin hih nate kua thu tawh ka bawl kong gen kei ding hi,” a ci hi. Tua lai takin Zeisu in thugentehna tawh thu a hilh-inah, “Mi khat in lo lai-ah leenggah kungte suan a, gawlin uum a, leenggah cil nading to a, tausang buk khat a lam khit ciangin, lo khote khawhlawhsakin gamdangah a pai hi. Anlak hun a tun’ ciangin lo khawhlawhte’ khut tung panin a gah ngah dingin lo neipa in nasempa khat a sawl hi. Tua lo khawhlawhte in a nasempa man uh a, a sat khit uh ciangin khut guak tawh a ciahsak uh hi. Khatvei nasem a dang khat sawl kik a, tua pa’ lutang a liamsak khit uh ciangin a zahhuaisak uh hi. Nasem adang khat a sawl kik ciangin amau in tua pa a that uh hi. Nasem dang tampi sawl a, kimkhat satin kimkhat a that uh hi. Lo neipa in a it mahmah tapa sawltak khat bek a neih, ‘Tua mite in ka tapa a zahtak ding uh hi,’ ci-in a nunung penin a sawl hi. Ahih hangin lo khawhlawhte in, ‘Hihpa in a inn luah dingpa ahi hi. Hong pai un, a luah nading teng i ngah theih nadingin amah that ni,’ ci-in khat leh khat a kikum uh hi. Lo neipa’ tapa a mat khit uh ciangin, that uh a, leenggah lo nawl ah a paaikhia uh hi. Tua ahih ciangin lo neipa in bangci a bawl ding hiam? Amah hong pai-in, lo khawhlawhte sugawp a, leenggah lo midangte a cingsak hi. Inn lamte’n a nilkhiat suang in, A nung ciangin innkiu suang a piang hi. Tua thu Pasian in bawl a, Eite mai-ah a lamdang hi,” a cihna thu Lai Siangtho sungah a om note in khatvei beek sim ngeilo na hi uh hiam?” ci-in a gen hi. Amaute in amah mat nading a zon’ uh hangin mihonpi a kihta uh hi. Bang hang hiam i cih leh, amau a cihna a gen ahih lam a thei uh hi. Tua lai takin amah nusia-in a paikhia uh hi. Tua lai takin Zeisu’ kam tawh a mawhna man dingin Farisaite kimkhat leh Herod’ nungzuite kimkhat a kiangah a sawl uh hi. Tuate in ama kiang a tun’ uh ciangin, “Sia aw, nang thutak genpa na hi hi. Kuamah na kihta kei a, mi maitang zahtak loin Pasian lam thu a tang takin na hilh cih ka thei uh hi. Kaisar kumpipa siah piak tuak ahi hiam, piak tuak lo ahi hiam? Ka pia ding uh hiam, ka pia kei ding uh hiam?” ci-in a dong uh hi. Zeisu in amaute’ simtatna a theih ciangin, “Bang hangin kei hong ze-et na hi uh hiam? Denarias peek khat ka et dingin hong paipih un,” a ci hi. A hong paipih uh ciangin Zeisu in, “Hih in kua lim, kua min ahi hiam?” ci-a a dot ciangin, “Kaisar kumpipa’ lim leh min hi,” a ci uh hi. Zeisu in, “Kaisar kumpipa’ sum, Kaisar kumpipa na pia un. Pasian’ sum, Pasian na pia un,” a ci hi. Amaute in amah lamdang a sa uh hi. Misite’ thawhkikna om lo hi a ci Saddusi-te in, tua lai takin Zeisu kiangah va pai uh a, “Topa aw, ‘Mi khat in a sih ciangin a zi nusia-in, ta a neih kei leh, a nau in a zi luah hen la, a u’ khang a man’ loh nadingin kizom ta hen,’ ci-in Moses in kote lai hong pia hi. Unau sagih a om uh hi. A upa pen in zi nei a, ta nei loin a si hi. A nau upa pen in a zi luah a, ta nei loin a si hi. Tua bangin a thumna in a hih hi. Unau sagihte in ta nei lo uh hi. A nunung penin numei zong a si hi. Thawhkik ni ciangin tua numei in tuate lakah kua pen’ zi ahi ding hiam? Bang hang hiam na cih leh, sagihte in tua numei tawh a kiteeng zo hi,” ci-in a dong uh hi. Zeisu in zong, “Note in Lai Siangtho ahi zongin, Pasian’ vangliatna ahi zongin thei lo na hih uh ciangin, um khial hilo na hi uh hiam? Bang hang hiam na cih uh leh, sihna pan a thawhkik uh ciangin kipi-in a kiteengsak kei ding uh hi. Amaute in vantungmite tawh kibangin a om ding uh hi. A sisate thawhkikna ding thu panin Pasian in, ‘Kei in Abraham Pasian, Isaak’ Pasian, Jakob’ Pasian ka hi hi,’ ci-in Moses in a gelh Lai Siangtho sunga sawlbawk meikuang thu sim ngeilo na hi uh hiam? Pasian in a site’ Pasian hi loin a nungtate’ Pasian ahi hi. Nakpi-in na khial uh hi,” a ci hi. Laitheipa khat hong pai a, thu kidongte Zeisu in kituak mahmahin a dawn’ kik a theih ciangin, “Thukham lianbel bang ahi hiam?” ci-in a dong hi. Zeisu in, “Thukham a lianpen in, ‘Israel mipawlte aw, ngai un: eite Topa Pasian in Topa khat bek ahi hi. Na Topa Pasian na lungsim khempeuh, na kha khempeuh, na pilna khempeuh, na hatna khempeuh tawh na it in. Thukham a nihna in, ‘Na pumpi na it bangin na lawmte na it in,’ ahi hi. Hih thukhamte sangin thukham lianzaw a om kei hi,” a ci hi. Laitheipa in, “Topa aw, Pasian khat bek hi a, tua Pasian sim loh adang Pasian a om kei hi cih thu na gen in ahi takpi hi. Tua Pasian lungsim khempeuh tawh it a, ama pumpi a it bangin a lawmte zong a it ding in, a pum mei a khul biakna leh sagawh biakna sangin a pha zaw hi,” ci-in a gen hi. Tua pa in pilna tawh a gen kik Zeisu in a theih ciangin, “Nang in Pasian Gam tawh na kigamla kei hi,” a ci hi. Tua nung ciangin mi khat beek in thu a dong ngam nawn kei uh hi. Zeisu in biakna innpi sungah thu a hilh lai takin, “Khazih in David’ Ta ahi,’ ci-in laitheite in bangci a gen thei uh hiam? David in: ‘Topa in, Na galte na khe nuai-ah ka koih matengin, Ka ziat lamah na tu in, ci-in ka Topa kiangah a ci hi,’ ci-in Kha Siangtho tawh a gen hi. David in, ‘Khazih, Topa hi,’ ci ahih ciangin, bangci-in ama ta ahi thei ding hiam?” ci-in a dong hi. Mihonte in nuam mahmahin a thu a ngai uh hi. Zeisu in thu a hilh lai takin, “Laitheite na kikeem un. Amaute in puantual silhin a vak nuam uh hi. Sumbuk ah zahtakna tawh hopihna, kikhopna inn sungah tokhom phabel, pawikhamna sungah tutna phabel a deih uh hi. Amaute in meigongte’ neihsa a ne mang uh a, mawhna seel nadingin sau veipi thu a ngen uh hi. Tuate in mawhsakna lianzaw a thuak ding uh hi,” a ci hi. Tua lai takin Zeisu in sumkholna mai-ah tu a, mihonpite in dangka sumkholna sungah a khiat uh a en hi. Sumhau mi tampite in tampi a khia uh hi. A zawng meigong khat hong pai a, dangkasan pai nih a khia hi. Zeisu in a nungzuite sam a, “Ke’n aman takpi kong cih-inah, sumkholna sungah a khia mi khempeuh lak panin tua a zawng meigong in tam a khia bel hi. Bang hang hiam na cih uh leh, amaute in a sum val lak pan a khia uh hi. Tua numei ahih leh, a zawng napi-in ama kivak nading nangawn sit loin a khia zo hi,” ci-in a gen hi. Zeisu in biakna innpi pan a paikhiat lai takin a nungzuite in, “Topa aw en in, bangzah lamdang suangte leh bangzah lamdang innte ahi uh hiam?” ci-in a gen uh ciangin, Zeisu in, “Hih a lian mahmah innte na mu uh hiam? A kiphelkhia loin suang khat tungah suang kiciang khat beek a om kei ding hi,” a ci hi. Tua lai takin Zeisu in Oliv Mual tungah biakna inn pam ah tu a a om lai takin Piter, Jakob, Johan leh Andru te in, “Tua thute in cik cianga hong piang ding hiam? A pian’ nading a naih ciangin bang lim hong piang ding ci-in hong hilh in,” ci-in a sim dot uh hi. Zeisu in, “Kuamah in hong kheem zawh loh nadingin na kikeem un. Mi tampi in, ‘Kei tua pa ka hi hi,’ ci-in keima min tawh hong pai-in mi tampi a kheem ding uh hi. Galdona thu leh gal kikapna thu na zak uh ciangin lunghimawh kei un. Tuate a piang ding uh hi. Ahih hangin a beina a tung nai kei ding hi. Mi namkhat leh namkhat, gamkhat leh gamkhat hong kido ding uh hi. Mun khat khatah ziin hong ling ding hi. Kial zong hong tung ding hi. Tuate in gimna kipat cilna ahi hi.” “Ahih hangin na kikem un. Bang hang hiam na cih uh leh, amaute in upa vaihawmte’ thukhenna sungah note hong pia ding uh hi. Kikhopna inn sungah satna na thuak ding uh hi. Tuate mai-ah teci na pan’ nadingun mangte leh kumpite mai-ah keimah hangin na ding ding uh hi. Lungdamna Thu a masa belin mipawl khempeuh a kihilh ding hi. Amaute in zum innah note hong paipih, hong piak uh ciangin bang thu ka gen ding hiam ci-in lunghimawh khol kei un. Tua hun lai taka na ngah uh bangin na gen un. Bang hang hiam na cih uh leh, a gen ding no na hi kei uh hi. Kha Siangtho in a gen ding hi. Unau khat leh khat sih nadingin a kiheek ding uh a, pa in zong a ta a lehheek ding hi. Tate in a nu leh a pate galin a do ding uh a, thah dingin a lehheek ding uh hi. Keima min hangin mi khempeuh in note hong mudah ding uh hi. A tawp dongin a thuak zote in gupna a ngah ding uh hi.” “A kisia thei kihhuaina in a kilawm lo munah ding-in a om na muh uh ciangin, (Lai Siangtho a sim theite in thei ta hen) Judah gamah a omte in mual tungah tai ta uh hen. Inn khum tungah omte in zong ama inn sungah sum khatpeuh la dingin kumsukin lut kei hen. Lo lai-ah a omte in zong puan la dingin ciahkik kei hen. Tua lai takin naupai numeite leh naungeek nei numeite in gimna a thuak ding uh hi. Tua hun in phalbi laitak a, hong tun’ loh nadingin thu na ngen un, Bang hang hiam na cih uh leh, Pasian’ bawlsa leitung pian’cil a kipan tudongin a piang nawn lo ding gimna lianpi tua lai takin a piang ding hi. Topa in tua nite a tomsak kei leh, kuamah in suakta zo lo ding hi. Ahih hangin, a teelsate adingin a tomsak ding hi. Tua lai takin mi khatpeuh in, ‘Hih lai-ah Khazih a om hi; hua lai-ah a om hi.’ hong cih leh, um kei un. Bang hang hiam na cih uh leh, kamsang zuautheite leh Khazih zuautheite hong piang ding uh a, a teelsate nangawn a kheem zawh leh, a kheem nadingun lim leh nalamdang a lian hong lak ding uh hi. Na kikeem ta un. Thu khempeuh kong genkhol zo hi.” “Tua gimna khit ciangin ‘Ni hong mial ding a, kha a hong tang nawn kei ding hi; Aksite in van pan hong kia ding uh a, vanah a om vangliatnate a kiliing ding uh hi.’ Tua lai takin, vangliatna leh minthan’na tawh Mihing Tapa meii tungah hong kumsuk a mu ding uh hi. Tua lai takin amah in a vantungmite sawlin, amaute in a teelsa mite lei kiu li pan, lei mong khat pan van mong khat dongin a kikhawmsak ding uh hi.” “Theikung kiangah thugentehna na sin un. Theikung a hiang meeng a, a teh a no ciangin khuakhal a nai zo ta hi ci-in na thei uh hi. Tua mah bangin, tuate a piang na muh uh ciangin, amah in kongbiang dongin a hong nai zo hi, ci-in na thei ta un. Ke’n aman takpi kong cih-inah, hih khang mite a beima-in, hih thu khempeuh hong piang ding hi. Van leh lei a mangthang ding uh hi; ahi zongin ka thu a mangthang kei ding hi.” “Tua ni leh tua hun kuamah in thei lo hi. Vantungmite in thei lo uh hi. Mihing Tapa in zong thei lo hi. Pa khat bek in a thei hi.” “Tua hun cik ciang hong tung ding thei lo na hih uh ciangin, kikem un la, thu ngenin ngak un. Mi khat in gam dangah pai ning, ci-in a inn nusia-in a nasemte kiangah nasep nading ciat thu a piak khit ciangin, kong khakpa kiangah, ‘Na ngak un,’ ci-in a vaikhak mah bangin, na ngak un. Tua ahih ciangin na ngak un. Bang hang hiam na cih uh leh, inn teekpa in nitak ahi zongin, zankim laitak ahi zongin, ak khuan’ laitak ahi zongin, zingsang ciang ahi zongin cik cianga hong tung ding, note’n thei lo na hih uh ciangin na ngak un. Ahih kei leh, thakhatin hong tung leh, note ihmu-in hong mu kha ding hi. Note kiangah kong cih mah bangin, mi khempeuh kiangah zong, ‘Ngak un,’ ka ci hi,” ci-in Zeisu in a gen hi. Ni nih khit ciangin, Paisan pawi leh silngo om lo khomun pawikhamna tung ding hi. Tua lai takin siampi liante leh laitheite in zuauthu tawh Zeisu man-a a thah theih nading lampi a zong uh hi. Ahih hangin mihonpi a gamlum khak ding a lunghihmawh manun, “Pawikham laitak hih kei ni,” a ci uh hi. Bethani khua-ah miphak Simon’ inn sungah Zeisu om a, an a nek lai takin numei khat in a manpha mahmah, nard paknamtui suangngo thawl khat a suk khap khit ciangin, Topa’ lu tangah a nilhsak hi. Mi kimkhatte heh uh a, “Paknamtui bang dingin a mawkna-in kizangsak hiam? Tua paknamtui dangka za thumin kizuakin mizawngte a kipia thei hi,” a cih khit uh ciangin, tua numei a mawhsak uh hi. Zeisu in, “Tua numei om sak ta un. Bang hang bawlsia na hi uh hiam? Amah in kei tungah thupha hong bawl zo hi. Mizawngte in note tawh a omkhawm tawntung ding hi. Cikmah peuhin amaute tungah thupha hehpihna na bawl nop uh leh, na bawl thei uh hi. Kei ka hih leh, note tawh omkhawm tawntung ding ka hi kei hi. Hih numei in ahih zawh zahin a hih zo hi. Keima luang vui nadingin ka pumpi paknamtui tawh a hong nilhkhol zo hi. Ke’n aman takpi kong cih-inah Lungdamna Thu hilhna leitung khempeuh ah hih numei a kingaihsut nadingin ama hong bawlna thu a kigen ding hi,” a ci hi. Tua lai takin Sawm-le-nihte lakah Judas Iskariot in, amaute khut tungah Zeisu pia dingin siampi liante kiangah va pai hi. Amaute’n a zak uh ciangin nuam uh a, “Dangka-in kong guai ding uh hi,” ci-in a kiciam uh hi. Amah in Topa amaute’ khut sungah piak theih nading a zong hi. Paisan tuuno a kigawh ni, silngo om lo khomun nek kipat ni-in a nungzuite in, “Paisan pawi na nek theih nadingin koi laitak mun hong bawlsak le-ung na deih hiam?” ci-in Zeisu kiangah a dong uh hi. Zeisu in, “Khua sungah pai un la, tuibeel khat a pua mi khat tawh na kituak ding uh hi. Tua mi nung zui un la, koimah peuh ci loin a lutna inn neipa kiangah, ‘Sia in, Keimah in ka nungzuite tawh Paisan Pawi ka nek nadingin na zin tun’na inndei koi lai-ah a om hiam? a ci hi,’ na ci un. Tua mi in a kibawlsa dei tungnung a lian khat hong lak ding hi. Tua dei sungah ei ading na bawl khol un,” ci-in a nungzui nihte a sawl hi. Tua nungzuite pai uh a, khua sung a tum uh ciangin Zeisu in a genkholh mah bangin a mu uh a, Paisan pawi a bawl khol uh hi. Nitak ciangin Zeisu in Sawm-le-nihte tawh hong paikhawm uh hi. Tu-a an a nek lai takun Zeisu in, “Ke’n aman takpi kong cih-inah, note lakah kei tawh an a ne khawm khat in kei hong lehheek ding hi,” a ci hi. A nungzuite a dah uh a, “Kei ka hi hiam?” ci-in khat nungah khat in a dong uh hi. Zeisu in, “Sawm-le-nihte lakah khat, kei tawh ankuang ka sawk khawmpihpa ahi hi. Mihing Tapa in Lai Siangtho sungah a kigelh mah bangin a pai ding hi. Ahih hangin Mihing Tapa a lehheekpa in gimna a thuak ding hi. Tua mipa in a nu sung pan suak kei leh, ama adingin a hoihzaw ding hi,” a ci hi. Amau in an a nek laitakun Zeisu in khomun la a, hehpihna a phat khit ciangin khomun balnenin, “Hih khomun in ka pumpi ahi hi. La un,” ci-in a nungzuite a pia hi. Hai zong la a, hehpihna a phat khit ciangin amau pia a, tuate khempeuh in a dawn uh hi. Zeisu in, “Hih in mi tampi ading a kibuasa, kiciamna si ahi hi. Ke’n aman takpi kong cih-inah, leenggahtui Pasian Gam sungah ka nek thak ni matengin tu-a kipan ka dawn nawn kei ding hi,” a ci hi. Amaute in la a sak khit uh ciangin, Oliv Mual ah a paikhia uh hi. Tua lai takin Zeisu in, “Tuucingpa ka satlum a, tuute a kithehthang ding hi,” ci-a Lai Siangtho sunga a kigelh bangin, note na vekpi un na lungkia ding uh hi. Ahih hangin ka thawhkik khit ciangin, note mai-ah Galile gamah ka pai ding hi,” a cih ciangin, Piter in, “Mi khempeuh a lungkia uh hangin keimah in ka lungkia kei ding hi,” a ci hi. Zeisu in, “Ke’n aman takpi kong cih-inah, tuzan aak nihvei a khuan’ ma-in thumvei na hong nial ding hi,” a ci hi. Piter in, “Nang tawh ka sikhawm zongin nangmah kong nial kei ding hi,” ci-in lungkhauhna tawh a gen hi. Amaute khempeuh in zong tua mah bangin a ci uh hi. Tua lai takin Gethsemane kici mun khatah amaute a tun’ uh ciangin Zeisu in, “Keimah in thu ka nget lai takin hih lai-ah na tu un,” a nungzuite kiangah a cih khit ciangin, Piter, Jokob leh Johan-te sam a, a lungman’na leh dahna a kipan hi. Amah in, “Si dek takin ka dah hi; hih san takah ngakin na om un,” ci-in thu a pia hi. Zeisu mai lamah tomkha pai-in lei-ah boksuk a, tua hun in amah tawh a kipelh zawh leh, a kipelh nadingin thu a ngen hi. “Abba, Pa aw, na khempeuh na bawl thei hi. Hih hai kei tawh kipelhsak in; ahih hangin keima deihna bang hi kei hen, nangma deihna bang hi ta hen,” a ci hi. A nungzuite kiangah a paikik leh, amaute ihmu a, om uh a muh ciangin Piter kiangah “Simon aw, ihmu na hi hiam? Nai khat nangawn kei tawh ngakkhawm zo lo na hi hiam? Kheemna tawh na kipelh theih nadingin thu ngen in la, ngak in. Lungsim a ut hangin pumpi a thazawng hi,” a ci hi. Khatvei va pai kikin a masa a nget bangin a ngen hi. A hong pai kik leh, a nungzuite ihmu a, om uh a mu hi. Bang hang hiam i cih leh, a mit uh a kham hi. Ama kiangah a dawn kik nading a thei kei uh hi. Thumveina hong paikik a, “Tu-in nuam takin ihmu un. A kicing zo hi. A hun hong tung zo hi. Mihing Tapa migilote’ khut sungah kilehheek zo hi. Tho un, pai ni. Kei hong lehheekpa hong nai zo hi,” a ci hi. Zeisu in a gen lai takin a nungzui sawm-le-nihte lak a khat, Judas in thakhatin hong pai a, siampi liante, laitheite leh upate in a sawl uh mihonpite in, namsau leh molhtumte tawi-in amah tawh hong tonkhawm uh hi. Zeisu a lehheekpa in, “Ka nappa in Zeisu ahi hi; tua pa na man un la, paipih un,” ci-in amaute kiangah a lim a hilhkhol hi. Amah a tun’ ciangin Topa kiangah thakhatin va nai a, “Topa aw,” ci-in a nam hi. Amaute in Zeisu a mat khit uh ciangin a kai uh hi. Tua lai takin a kianga dingte khat in, a namsau dokin siampi lian ukpa’ nasem khat a sat leh, a bil a satkhia hi. Tua ciangin Zeisu in, ‘Note in galgu mat bangin kei man dingin namsau leh molhtum tawi-in na hong pai uh hiam? Keimah in ni simin biakna innpi sungah thu hilh a, note tawh ka omkhawm lai takin nong man kei uh hi. Hih thute in Lai Siangtho hong tun’ nading ahi hi,” ci-in mihonpite kiangah a gen hi. Tua ciangin, a nungzuite khempeuh in Topa a taisan uh hi. Tangval khat in saihadial puan khat bek silhin Zeisu nung zui a, amaute in a mat uh ciangin, a saihadial puan nusia-in puan nei loin a tai hi. Amaute in siampi ukpa kiangah Zeisu a paipih uh hi. Siampi liante, upate leh laitheite khempeuh amah tawh a kikhawm uh hi. Piter in siampi ukpa’ inntual dongin gamla sim a kihalin Zeisu zui a, palikte tawh mei a awi khawm hi. Siampi liante leh upate khempeuh in Zeisu that dingin teci a zon’ uh hangin a mu kei uh hi. Bang hang hiam i cih leh, mi tampi in Zeisu lang khatah zuau teci a pan’ uh hangin a kithutuak kei uh hi. Ahih hangin amau teci pan’na a kituak kei hi. Siampi ukpa in amaute lai zangah ding a, “Nang kam khat beek dawng kik lo ding na hi hiam? Hih mite in nangma lang khatah teci bangci a pang uh hiam?” ci-in Zeisu kiangah a dot leh, Zeisu pau loin a om hi. Khatvei siampi ukpa in, “Nang Thupha a nei, Pasian’ Tapa Khazih na hi hiam?” a cih kik ciangin, Zeisu in, “Ka hi hi. Mihing Tapa in vangliatna ziatlam ah tu a, meii tungah hong kumsuk note in na mu ding uh hi,” a ci hi. Tua tak ciangin siampi ukpa in a puan balkeek a, “Adang bang teci deih lai i hi hiam?” Pasian tungah a pau khialhna thu na za zo uh hi. Bangci ngaihsut na hi uh hiam?” a ci hi. Amaute khempeuh in, “Hih pa thah tuak hi,” a ci uh hi. Tua lai takin kimkhatte in Zeisu cil tawh phih uh a, a maitang tuamin a khut uh tawh a tum uh hi. “Pasian’ kamsangte bangin hong hilh in,” a ci uh hi. Palikte in khut tawh pang betin a paipih uh hi. Piter in a nuai-ah inntual ah a om lai takin siampi ukpa’ nasem numei khat a kiangah pai a, Piter mei awi-a om a muh ciangin lim takpi-in en a, “Nazareth mi Zeisu tawh na kipawl hi,” a ci hi. Piter in, “Nang na cih pen ka thei kei, zong ka tel kei hi,” ci-in a nial hi. Inn limah a paikhiat khit ciangin aak a khuang hi. Numei in Piter a muh kik ciangin tua munah a ding mite kiangah, “Hih pa zong tua mite khat ahi hi,” a ci hi. Piter in a nial kik hi. Tua nung a sawt nai loin Piter kiangah a dingte in, “Hua mite khat na hi takpi hi, bang hang hiam na cih leh, Galile mi na hi hi,” a cih uh ciangin, Piter in, “No na gen uh mi pen ke’n ka thei kei hi,” ci-in hamsia tawh a kiciam hi. Tua phetin nihveina aak a khuang hi. Piter in, “Aak nihvei a khuan’ ma-in thumvei nong nial ding hi,” Zeisu in a cihna thu phawk a, a ngaihsut ciangin a kap hi. A zingsang ciangin siampite in thakhatin upate, laitheite leh vaihawmte khempeuh tawh a vaihawm uh a, Zeisu khau tawh a hen khit uh ciangin paipihin, Pilat Mangpa tungah a pia uh hi. Pilat in, “Nang Judah Kumpipa na hi hiam?” ci-in a dot ciangin Zeisu in, “Na cih mah bangin ka hi hi,” a ci hi. Siampite in amah thu tampi tawh a mawhsak uh hi. Khatvei Pilat in, “Kam khat beek dawngkik lo ding na hi hiam? Nang lang khatah amaute in hih zah tak hong mawhsakna en in,” a cih hangin, Zeisu in kam khat beek dawngkik lo a, Pilat in lamdang a sa hi. Pawikham ciangin mangpa in amaute ngetna bangin, thong sungah a kikhum mi khat a khah leng hi. Tua lai takin misuam thong kiate lakah mi a that Barabbas kici mi khat thong sungah a kikhum khawm hi. Mihonpite in Pilat kiangah pai to-in, amaute tungah a bawl ngei bangin a bawl nadingin a ngen uh hi. Pilat in, “Judah Kumpipa khah leeng na ut uh hiam?” ci-in a dong hi. Bang hangin hih bangin a dong hiam i cih leh, siampi liante in Zeisu a een’ manun ah a piak uh a thei hi. Zeisu khah loin Barabbas a khah nadingin siampi liante in mihonpi a hansuah uh hi. Khatvei Pilat in, “Tua ahih leh, Judah Kumpipa na cih uh mi bang ka ci hih ding hiam?” ci-in a dong hi. Mihonpite in, “Tua pa singlamteh tungah that in,” ci-in a kiko uh hi. Pilat in, “Bang hang hiam? Amah in mawhna bang takhial ahi hiam?” ci-a a dot ciangin, “Singlamteh tungah that in,” ci-in nakpi-in a kiko uh hi. Pilat in mihonpi a lungdamsak nadingin Barabbas amaute kiangah khah a, Zeisu ahih leh, a sat khit uh ciangin, singlamteh tungah thah dingin a pia hi. Tua lai takin galkapte in manginn tual ah Zeisu paipih uh a, galkap khempeuh a kikhawmsak uh hi. Zeisu puansan khat silhsak uh a, ling tawh kigaan lukhu a khusak uh hi. “Judah Kumpipa aw, nang na ci dam ta hen,” ci-in a kiko uh hi. Pumpeeng tawh ama lutang sat uh a, cil tawh phihin, a mai-ah khukdin’in a bia uh hi. Tua bangin Zeisu a khelbawl khit uh ciangin, puansan suahkhia uh a, ama puan a silhsak khit uh ciangin, singlamteh tungah thah dingin a paipih uh hi. Alekzandar leh Rufas’ pa Simon kici, Sairin mi khat gamlak panin hong pai a, zawhthawh thu tawh Zeisu’ singlamteh pua dingin a kizuisak uh hi. ‘Lutangguh Mun’ a cihnopna, ‘Golgotha’ kici munah paipih uh a, zatui kha tawh kihel leenggahtui dawn dingin Zeisu a piak uh hangin amah in a sang kei hi. Zeisu singlamteh tungah a khai khit uh ciangin, bang a la ciat ding uh hiam, ci-in lai aisaan-in a puante a hawm uh hi. Zeisu singlamteh tungah a thah laitakun zingsang nai kua a pha hi. “ JUDAHTE’ KUMPIPA HI ”, ci-in a mawhsakna lai a tungah a kigelh hi. Zeisu tawh misuamte nih, a ziatlam khat a veilam khat, singlamteh tungah a khai uh hi. Lai Siangtho sungah, “Thupalsat mite tawh amah a kisimkhawm hi,” a cihna thu tua lai takin a tangtung hi. Lampi-ah a pai mite in, “Hei, biakna innpi susia-a nithum sunga a lam kik dingpa aw, nangma pumpi kigum in, singlamteh tung panin hong kumsuk in,” ci-in lu pei-in a zahko uh hi. Tua mah bangin siampi liante leh laitheite in, “Hih mipa in midangte a gup theih hangin ama pumpi kigum zo lo hi. Ka muh uh a, ka up nadingun Israel’ Kumpipa Khazih in singlamteh tung pan hong kumsuk ta hen,” ci-in khat leh khat a kici uh a, a zahko uh hi. Singlamteh tungah Zeisu tawh a kikhai khawmte in zong a zahko uh hi. Sun laitak, nai sawm leh nai nih a phak ciangin, nai thum dongin leitung khempeuh khua a mial hi. Nai thum lai takin Zeisu in,”Elio, Elio, Lama Sabakthani,” ci-in nakpi-in a kiko hi. A khiatna in, ‘Ka Pasian, ka Pasian aw, bang dingin kei hong taisan na hi hiam?’ a cihnopna hi. A kiangah a ding mi kimkhat in a zak uh ciangin, “Amah in “Elijah a sam hi,” a ci uh hi. Mi khat va tai a, tui hupna la a, tuithuk sungah a diah khit ciangin, pumpeeng dawnah suangin, a tawp dingin Zeisu pia a, “Om dih ni. Elijah in amah lakhia dingin hong pai ding, hong pai lo ding en dih ni,” a ci hi. Zeisu in khatvei nakpi-in a kiko khit ciangin a si hi. Tua lai takin Pasian biakna innpi dalna puan, a tung lam pan a nuai lam dongin phel nih kisuah hi. Zeisu lang khatah a ding galkap mangpa in, tua bangin Zeisu a si a muh ciangin, “Hihpa in Pasian’ Tapa taktak ahi hi,” a ci hi. Numei kimkhat in zong gamlapi panin a gal et uh hi. Tua numeite lakah Magdala khua Mari, a nau Jakob leh Joses te’ nu Mari leh Salome a om uh hi. Amaute in Zeisu Galile gamah a om lai-in a nung zui-in a vak uh hi. Jerusalem khua dongin Zeisu tawh a pai, a dang numei zong tampi a om uh hi. Tua ni in Kigin ni, nino ni ahih ciangin nitak ciangin, Arimathea khua Josef, a minthang upa ahi, Pasian Gam a lamenpa hong pai-in, Pilat kiangah lau loin va lut a, Zeisu’ luang a ngen hi. Zeisu tu-in a sih zawh Pilat in lamdang sa a, galkap mangpa samin, “A sihna a sawt zo hiam?” ci-in a dong hi. A sihna thu galkap mangpa kiang pan a theih ciangin, a luang Josef a pia hi. Josef in saihadial puan lei a, Zeisu’ luang a laksuk khit ciangin saihadial tawh tun a, suang kikhuak ama han sungah sialin, han kongvang ah suangpeek khat a liik hi. Magdala khua Mari leh Joses’ nu Mari-te in a luang vuina mun a mu uh hi. Nipi ni a bei khit ciangin, Magdala khua Mari, Jakob’ nu Mari leh Salome te pai uh a; Zeisu’ luang zut nadingin paknamtui a lei uh hi. Ni sagih lakah ni kipat ni, zingsang tuung, nisuah lai takin hanah a pai uh hi. Amaute in, “Han kong pan kua in suangpi hong likkhiatsak ding hiam?” ci-in khat leh khat a kikum uh hi. Tua lai takin a et uh leh, tua suangpi kilikkhia a, om a mu uh hi. Tua suang in a gol mahmah suang ahi hi. Han sungah a lut khit uh ciangin, puanpak silh, tangval khat taklam ah tu-in a muh uh ciangin lamdang a sa uh hi. Tua tangvalpa in, “Lamdang sa kei un, singlamteh tungah kithat Nazareth mi Zeisu na zong uh hi. A thokik zo hi. Hih lai takah om nawn lo hi. Ama luang koihna mun hong en un. Tu-in pai un la, ‘Na mai uh ah Galile gamah a pai ding hi. Thu a piakkholh mah bangin, tua san takah Topa na mu ding uh hi,’ ci-in Piter akipan a nungzuite na hilh un,” a ci hi. Amaute paikhia uh a, han panin a tai uh hi. Bang hang hiam i cih leh, lamdang sa-in a liing uh hi. Amaute lau mahmah ahih manunah kuamah kiangah a gen kei uh hi. Zeisu in ni sagih lakah ni kipat ni, zingtuungin a thawhkik khit ciangin, a sung pan dawi sagih a hawlkhiat Magdala khua Mari kiangah a masa penin a kilak hi. Tua Mari pai a, Zeisu tawh kipawlte dah a, a kah laitakun amaute kiangah tua thu a hilh hi. Amaute in a zak uh ciangin, Zeisu a thawhkik thu ahi zongin, Mari in a muhna thu ahi zongin a um kei uh hi. Tua nung ciangin, nungzuite nih, khuaneu ah a pai laitakun Zeisu in meel kilamdan’na tawh a pumpi a kilak hi. Tuate pai uh a, nungzui dangte a zaksak uh hangin amau thu a um kei uh hi. Tua nung ciangin, nungzui sawm-le-khatte in an a nek laitakun Zeisu amaute kiangah kilang a, amah a thawhkik khit ciangin a mu mite’ thugen um lo ahih uh ciangin, amaute’ upkhialhna leh lungkhauhna hangin a mawhsak hi. “Note leitung khempeuh ah vak kawikawi un la, mi khempeuh kiangah Lungdamna Thu na hilh un. Thu um a, a kibaptaizte in gupna a ngah ding uh hi. A um lote in mawhna thutan’na a thuak ding uh hi. Thu um mite tungah hih na lamdang a piang ding hi: Keima min tawh dawite a hawlkhia ding uh a, kamthakin a pau ding uh hi; gulte man ding uh a, sihna gu a dawn uh hangin gimna a thuak kei ding uh hi. Cinate tungah a khut uh a ngak uh ciangin a dam ding uh hi,” ci-in Zeisu in a vaikhak hi. Tua ciangin Topa Zeisu in amaute kiangah a gen khit ciangin, vantungah kila to a, Pasian’ ziat lamah a tu hi. Amaute paikhia uh a, mun khempeuh ah thu a hilh uh hi. Topa in amaute’ tungah nasem a, lim tawh amaute’ thu a kipsak hi. Amen. A lian mahmah Theofilas aw, a cil panin mittang in a muh teci leh Pasian thuhilh na a sem mite in hong gen uh mah bangin, eite lakah a hong piangsa thu teng, eite hong zaksak a kizomin lai a gelh mi tampi a om hi. Keimah in zong tua thu khempeuh a cil panin tel takin ka dot ciangin nangmah hong kihilhsa thute aman takpi hi, cih na theih nadingin a kizomin gelhin zasak ning, ci-in ka ngaihsun hi. Judah gam Herod kumpipa a man’ lai-in Abijah pawlte lakah Zekhariah a min nei siampi khat a om hi. Tuapa’ zi in Aaron suan hi a, a min Elisabeth ahi hi. Tua tegel in Pasian’ thukham khempeuh leh Pasian’ ngeina khempeuh zui uh a, mawhsak na’ng om loin Pasian mai-ah mipha ahi uh hi. Elisabeth in tasel ahih ciangin, a khan’ teek dongin ta a nei kei uh hi. Paknamtui mei tawh a hal hun lai takin mi khempeuh in inn pua lamah thu ngenin a om uh hi. Tua lai takin Topa’ vangtungmi khat hong kilang a; paknamtui tau taklam ah a ding hi. Zekhariah in vantungmi a muh ciangin lunghimawhin a lau hi. Vantungmi in, “Zekhariah aw, lau kei in. Na thungetna hong ngai zo hi. Na zi Elisabeth in tapa khat nang ading a nei ding hi. Tua tapa’ min Johan na phuak ding hi. Nangmah in zong lungdamna leh nuamna na ngah ding a, ama suahna hangin mi tampite zong a lungdam ding uh hi. Bang hang hiam na cih leh, tua tapa in Topa mai-ah milian ahi ding hi. Amah in leenggahtui leh zu neukha beek dawn loin, a nu gil sung pan akipan Kha Siangtho tawh a kidim ding hi. Israel mipawl tampi amau Topa Pasian kiangah a kiheisak kik ding hi. A pate’ lungsim un tate kiangah kiheisak nading ahi zongin, thu ngai lo mite in midikte’ pilna lampi ah kiheisak nading ahi zongin, Topa ading a kibawlkhol mite a pian’ nading ahi zongin amah in Elijah’ lungsim leh vangliatna tawh Pasian mai-ah a pai ding hi,” ci-in a gen hi. Zekhariah in, “Tua banga na piang ding bangci-in ke’n ka thei ding hiam? Kei puteek ka hi hi; ka zi zong a khan’ sawt zo hi,” ci-in a gen ciangin, vantungmi in, “Keimah in Pasian kiangah a ding Gabriel ka hi hi. Nangmah hopih a, hih lungdamna thu hong zasak dingin hong sawl hi. Nangmah in a hun a cin’ cianga a tung ding ka thu um lo na hih ciangin, hih thu a pian’ ni dongin pau thei loin na om ding hi,” a ci hi. Mite in Zekhariah ngak uh a, biakna inn sungah sawtpi a om ciangin lamdang a sa uh hi. Amah hong paikhiat ciangin, amaute kiangah pau thei lo ahih ciangin, biakna innpi sungah maang mu hi, ci-in a thei khin uh hi. Zekhariah in lim bek lak a, pau loin a om hi. Siampi nasepna a bei ciangin Zekhariah innah a ciah hi. Tua nung ciangin, ama zi Elisabeth a gai hi. “Midangte kiangah ka thuak gensiatna, Topa in hong paihkhiatsak nadingin kei hong en-in, hih bangin keima tungah hong bawl zo hi,” ci-in kha nga tawntung inn sungah a bucip hi. Kha nga khit ciangin, Galile gam Nazareth kici khua khatah, David’ suan Josef min neipa tawh a kingai nungak kiangah, Pasian in a vangtungmi Gabriel a sawl hi. Tua nungak’ min in Mari ahi hi. Gabriel in ama kiang a tun’ ciangin, “Thupha a ngah nungak aw, na cidam ta hen. Topa in nang tawh a omkhawm hi,” a ci hi. Mari in tua thugenna hangin lungmang a, “Hih hopihna in bangci bang hopihna ahi ding hiam?” ci-in a ngaihsun hi. Vantungmi in, “Mari aw, lau kei in. Nang in Pasian maipha na ngah zo hi. Gai-in tapa na nei ding hi. Tua tapa’ min Zeisu na phuak ding hi. Tua ta in milian hi ding a, Sang Bel Pasian’ Tapa kici ding hi. A pa David’ tokhom Pasian in pia ding a, amah in Jakob’ suante a tawntungin uk ding a, ama gam in a bei ngei kei ding hi,” a ci hi. Mari in, “Hih thu in bangci piang ding ahi hiam? Pasal ka nei kei hi,” a ci hi. Vantungmi in zong, “Kha Siangtho in nangma tungah hong tung a, Sang Bel Pasian’ vangliatna in nang hong liah ding hi. Tua ahih ciangin, tua siangtho a piang ta in Pasian’ Tapa a kici ding hi. Tua longal, tasel kici na beh Elisabeth in zong a teek zawh hangin tapa gai a, tu-in kha guk a pha zo hi. Bang hang hiam na cih leh, Pasian in sep theih loh a nei kei hi,” a ci hi. Mari in, “Pasian’ sila numei ka hi hi, nangma thu bangin kei tungah hong piang ta hen,” a cih khit ciangin, vantungmi in ama kiang panin a paikhia hi. Tua lai takin Mari ding a, khamtungah Judah khuapi khatah manlangin pai a, Zekhariah’ innah lutin Elisabeth va hopih hi. Mari hopihna thu Elisabeth in a zak ciangin, a gil sunga om naungeek diang a, amah in Kha Siangtho tawh kidim hi. “Nangmah in numei lakah thupha ngah na hi hi. Na gil sunga om naungeek in thupha a ngah ding hi. Ka Topa’ nu kei kiangah hong pai nadingin bang hangin hehpihna ke’n ka ngah hiam? Nong hopihna aw ke’n ka zak ciangin ka gil sunga om naungeek in lungdamna tawh a diang hi. Thu-um numei in thupha a ngah ding hi. Bang hang hiam na cih leh, tua numei kiangah Topa’ thugente hong tangtung ding hi,” ci-in aw lian tawh a gen hi. Mari in zong, “Keima lungsim in Topa a pahtawi hi. Keimah hong gum Topa Pasian hangin ka kha a nuam hi. Bang hang hiam na cih leh, ama sila numei’ kiniamsakna hong en zo hi. Tu-a kipanin khang khempeuhte in kei thupha a ngah mi hong ci ding hi. Bang hang hiam na cih leh, vangliatna a neipa in keima tungah a lian thute hong hih zo hi. Tua pa min’ a siangtho hi. Amah kihta mite tungah, Khang khat pan khang khat dongin ama hehpihna a om tawntung ding hi. Ama ban tawh vangliatna a lak zo hi. Amau ngaihsutna lungsim uh a kiphasakte kikhenthang sak zo hi. Amah in kumpite a kumpi tokhom tung pan kiasak a, mizawngte khangtosak zo hi. A gilkial mite an pha tawh vak a, Sum haute khut guak tawh a paikhiasak zo hi. I pu i pate kiangah a gen ngei mah bangin, Abraham akipan ama suan leh khakte tungah, Hehpihna thupha a tawntungin a ngaihsut theih nadingin, Ama sila Israel kiangah huhna a pia zo hi,” a ci hi. Mari in Elisabeth kiangah kha thum a om khit ciangin, innah a ciahkik hi. Elizabeth suah hun a cin’ khit ciangin, tapa a suak hi. Topa in a lian hehpihna Elisabeth tungah a bawl, a inn vengte leh a behte in a zak uh ciangin, amah tawh kibangin lungdamin a nuam uh hi. Ni giat ni khit ciangin, naungeek’ vun at dingin amaute hong pai uh a, a pa min zui-in Zekhariah a phuak nuam uh hi. Ahih hangin a nu in, “Hi lo hi, a min Johan kiphuak ding hi,” a cih ciangin, amaute in, “Hih min in na behte lakah khat beek kiphuak lo hi,” a ci uh hi. A pa kiangah, “Bang phuak nuam na hi hiam?” ci-in lim tawh a dong uh hi. Zekhariah in lai ngen a, “Ama min in Johan ahi ding hi,” ci-in a gelh ciangin amaute khempeuh in lamdang a sa uh hi. Tua leh, thakhatin Zekhariah kam kihong a, a leii kikhah a, Pasian phatin a pau thei hi. A inn vengte khempeuh lau uh a, tua thu khempeuh Judah gam khamtung khempeuh ah kizeel hi. A za khempeuhte in a lungsim sung uh ah ciamteh uh a, “Hih naungeek in bangci bang mi hi ding ahi hiam?” a ci uh hi. Bang hang hiam i cih leh, Topa’ khut in amah tawh a omkhawm hi. Tua naungeek’pa Zekhariah in Kha Siangtho tawh kidim a, kamsan’na tawh a gen-inah: “Israel mipawl’ Topa Pasian in thupha ngah ta hen. Bang hang hiam i cih leh, tanglai ama kamsang siangthote’ kam tawh a gen kholh mah bangin, Eite in i galte’ khut sung pan i kikhahkhiat khit ciangin, Ama mai-ah i khan’ tawntung sian’thona leh thumanna in, Lau loin ama’ na i sep theih nading ahi zongin, i pa Abraham tungah thuciamna leh A siangtho ama kamciamsa thu a ngaihsut nading ahi zongin, i pu i pate tungah hehpihna thupha hong bawl nading ahi zongin, Ama mi pawlte hong veh in, a hong tankhia zo hi, Eite in i galte khut sung pan ahi zongin, A hong mudah khempeuhte khut sung pan ahi zongin, hong gupkhiat nadingin, Ama sila David’ suan lak panin, Eite adingin kii khat ahi alian hong Gumpa a piangsak zo hi. Ahi hi, naungeek aw, nangmah in Sang Bel Topa’ kamsangpa hong kici ding hi. Bang hang hiam na cih leh, eite Pasian hong hehpihna thupha hangin ah Ama mi pawlte’ khialhna maisakna tawh, Gupna thu ama mipawlte na theihsak nading ahi zongin, ama lampi na sial nading ahi zongin, Nang in Topa mai-ah na pai ding hi. Tua hehpihna hangin Khuamial leh sihna lim sungah a tu mite tungah, khuavak hong tan’ nading ahi zongin, Nopna lampi ah eite hong kha ding ahi zongin, A tung panin ni suakin eite kiangah hong tang ding hi,” ci-in a gen hi. Tua naungeek khang a, a lungsim siamna khangto a, Israel mite kiangah a kilah ni matengin gampa lakah a om hi. Tua lai takin leitung mi khempeuh a kisim nadingin, Kaisar kumpipa Augustas in thu a pia hi. Kurinias in Siria gam menzi ahih lai takin hih kisimna a masa pen ahi hi. Mi khempeuhte in kisim dingin amau khua ciatah a pai uh hi. Josef in zong David’ suan ahih ciangin, a kidongsa a lawmnu Mari tawh kisim dingin, Galile gam Nazareth khua panin Judah gam Bethlehem kici David’ khua-ah a pai uh hi. Tua Mari a gai zawh a sawt zo hi. Amau Bethlehem khua-ah a om lai takun a suah hun tung a; a ta cil suak a, puanin a tun khit ciangin zin tun’na innah omna ding om lo ahih ciangin, bawng ankuang sungah naungeek a sial hi. Tua gamah tuucingte in gam lakah giakin amau tuu honte zanin a cing uh hi. Topa’ vantungmi khat in amaute kiangah ding a, a kiimkot ah Pasian’ vang tang a, amaute in a kihta mahmah uh hi. Ahih hangin vantungmi in, “Lau kei un. Bang hang hiam na cih uh leh, mi khempeuh ading nakpi nuamna thu note kong zasak ding hi. Tuni-in, David’ khua-ah Topa Khazih ahi hong Gumpa in note adingin a suak zo hi. Note in, ‘Bang limin thei ding ka hi uh hiam?’ na cih uh leh naungeek puanin kitun a, bawng an nekna kuang sungah kisialin a om na mu ding uh hi,” a ci hi. Tua khit ciangin vantungmi tawh vantung galkap tampite in thakhatin hong kikhawm uh a, “Van a sang belna-ah Pasian minthang ta hen. Leitung a deih mite tungah nopna om ta hen,” ci-in Pasian a phat uh hi. Vantungmite in vantungah a ciah khit uh ciangin tuucingte in, “Eite Bethlehem khua-ah pai-in, Pasian hong lah hih a piangsa thu va en ni,” ci-in khat leh khat a kihopih uh hi. Manlangin pai uh a, Mari, Josef leh bawng an nekna kuang sungah kisial a, om naungeek a mu uh hi. A muh khit uh ciangin, amau kiangah naungeek thu kigensa thu teng a zasak uh hi. Tuucingte’ thugenna zate khempeuh in lamdang a sa uh hi. Mari in ahih leh, tua thute khempeuh ciamteh a, a lungsim sungah a lungngai hi. Tuucingte in amau kiangah a gensa mah bangin, a zaksa a muhsa uh khempeuhte hangin Pasian’ min phatna lasa-in a ciah uh hi. Tua naungeek’ vunat nading ni giat a cin’ khit ciangin, a gai ma-a vantungmi in a phuah kholh mah bangin a min Zeisu a phuak uh hi. Tua nung ciangin Moses’ Thukham bangin, amau kisian’thosak nading ni a cin’ ciangin, amaute in naungeek Jerusalem khuapi ah a paipih uh hi. “A ta upa pasal khempeuh in Topa ading a siangtho hi, a kici ding hi,” ci-in Topa’ Thukhamna lai sungah a kigelh bangin, Topa kiangah a piak khit uh ciangin, “Vakhu nupa kop ahi zongin, kawl vakhu neu ahi zongin,” ci-in Topa’ Thukhamna lai sungah a kigelh bangin biakna a pia uh hi. Tua lai takin Simeon kici mi khat Jerusalem khuapi ah a om hi. Tua pa dik a, Pasian zahtak a, Israel mipawlte’ nopsak nading a lamen hi. Kha Siangtho in ama tungah a om hi. “Topa Khazih na muh matengin na si kei ding hi,” ci-in Kha Siangtho in a hilh zo hi. Tua lai takin amah in Kha Siangtho tawh biakna innpi-ah pai a, a nu leh pate in naungeek Zeisu hangah Thukham ngeina bang hih dingin a paipih lai takun, Simeon in Zeisu a ang-ah pomin Pasian a phat-inah” “Topa aw, na genkholh mah bangin, Na sal in nopsakna tawh a pai nadingin thu hong pia in. Bang hang hiam na cih leh, na mipawl Israelte’ minthan’na ahi zongin Gentailte tungah khuavak nading ahi zongin, Mipawl khempeuhte mai-ah na bawl gupna, Ka mitin ka mu zo hi,” a ci hi. A nu leh pate in naungeek a genna thu lamdang a sa uh hi. Simeon in amaute thupha a piak khit ciangin a nu Mari kiangah, “Hih naungeek in Israel mi tampite kipuk nading ahi zongin, thawh nading ahi zongin, mi tampi a lungngaihna a kilat nading ahi zongin, nialna a thuak nading lim a pian’ nading ahi zongin a kikoih hi. Ahi hi. Namsau in nangma lungsim hong sun ding hi,” a ci hi. Tua lai takin Asher pawl ahi, Fanuel’ tanu Anna min nei numei kamsang khat a om hi. Amah teek a, a nungak lai pan akipanin kum sagih bek pasal tawh a teen’ khit ciangin, kum sawmgiat leh kum li dong meigong a, thungetna leh an tan’na tawh sun tawh zan tawh pelh loin bia-in biakna innpi lawi loin a om hi. Amah tua lai takin tunga Pasian hehpihna phatin, Jerusalem khuapi suahtak nading a lamen mi khempeuhte kiangah tua naungeek thu teng a gen hi. Amaute in Topa’ Thukhamna bangin na khempeuh a bawl khit uh ciangin, Galile gam amau khua Nazareth-ah a ciah uh hi. Naupang khangto a, a thahatna khang a, lungpilna tawh a kidim hi. Pasian’ hehpihna thupha zong ama tungah a om hi. A nu leh pate in kum simin Paisan pawikhamna Jerusalem khua ah a pai uh hi. Zeisu kum sawm leh kum nih a phak ciangin, ngeina bangin Paisan pawikhamna-ah a paito uh hi. Pawikham ni a cin’ khit ciangin, a nu leh pate a ciah lai takin naupang Zeisu in Jerusalem khua-ah a om lai hi. A nu leh pate in thei loin a lawmte tawh naupang ton hi ci-in um-in ni khat lam a pai uh hi. Tua ciangin a behte a meeltheihte lakah a zong uh a; a muh loh uh ciangin Jerusalem khua-ah nungkikin a zong uh hi. Ni thum khit ciangin, naupang biakna innpi sungah thuhilhte lai zangah tu a, amaute thu ngai a, amaute kiangah thu dongin a om a mu uh hi. Ama thu a za khempeuhte in a pilna leh a dawn’ kiknate lamdang a sa uh hi. A nu leh pate in amah a muh uh ciangin lungmang uh a, a nu in, “Ka ta aw, bang hangin kote tungah hih bangin hong bawl na hi hiam? Na pa leh keimah in dahna lungsim tawh kong zong uh hi,” a ci hi. Naupang in, “Bang hangin kei hong zong na hi uh hiam? Ka Pa innah om ka hih lam thei lo na hi uh hiam?” a ci hi. Amau kiangah a genna thu amaute in a thei kei uh hi. Amah in amaute tawh ciahsuk khawm a, Nazareth khua-ah tungin amaute thu mangin a om hi. A nu in hih thu khempeuh a lungsim sungah a ciamteh hi. Zeisu’ lungpilna leh pumpi khang semsem a, Pasian mai leh mite mai-ah maipha a ngah semsem hi. Kaisar kumpipa Tiberias a man’ zawh kum sawm leh kum nga ciangin, Judah gamah Pontias Pilat mangpi hi a, Galile gamah Herod menzi hi a, Iturea gam leh Trakhonis gamah Herod’ nau Filip menzi hi a, Abilene gamah Lisanias menzi hi a; Annas leh Kaiafas in siampi ukte ahih lai takin, khamtung a, om Zekhariah’ tapa Johan tungah Pasian thu a tung hi. Kamsangpa Isaiah’ Lai Siangtho sungah a kigelh mah bangin Johan in Jordan gun dungah vak kawikawi a, mawhna maisak nading kisik kikna tawh kituakin baptaizna thu a hilh hi. Isaiah gelhna in: “Gampa lakah kikopa’ aw in, ‘Topa paina lam na sial un. Ama lampi na tangsak un. Mualkuam thuk khempeuh kivuk dim ding a, Mual lian leh mual neu khempeuh kito niam ding a, Lam kawi khempeuh kitangsak ding hi, Lei hamte a kinelsak ding hi;’ Mi khempeuh in Pasian’ gupna thu a thei ding uh hi,” ci-in a gelh hi. Tua lai takin Johan in ama khut tungah kibaptaiz dingin hong pai mihonpite kiangah, “No mualtan’ suante aw, a hong tung ding hehna pan na taikhiat nadingun kua in hong hilhkhol hiam? Tua ahih ciangin kisikkikna tawh kilawm gah na gah un. ‘Abraham ka pa uh hi,’ ci-in na lungsim sung uh ah lungngaih ding na kipan kei un. Ke’n kong cih-inah, Pasian in hih suangte nangawn zong Abraham’ tate a suaksak thei hi. Tu-in zong sing phungah hei a om zo hi. A gah hoih gah lo kung khempeuh phuk pai-in mei sungah kikhul ding hi,” a ci hi. Mihonpite in, “Tua bang ahih leh, kote in bang ci hih ding ka hi uh hiam?” ci-in a dot uh ciangin, Johan in, “Puan ak nih a neite in puan ak nei lote tawh hawm ta hen. An nek ding a neite in zong tua bangin hih ta hen,” a ci hi. Siahdongte in zong kibaptaiz dingin hong pai uh a, “Sia aw, kote in bang ci hih ding ka hi uh hiam?” ci-in a dot uh ciangin, Johan in, “Note in thu hong kipia zah khengin dong kei un,” a ci hi. Galkapte in zong, “Kote in zong bang ci hih ding ka hi uh hiam?” ci-in a dot uh ciangin Johan in, “Note in kuama kiangah zawhthawhna tawh la kei un la, midangte zuau thu tawh na mawhsak kei un. Na khasum ngah zah uh tawh lungkim un,” ci-in a gen hi. Mi khempeuh in Johan in Khazih ahi kha ding hiam ci-in, lamenin a lungsim sung uh ah a lungngai uh hi. Johan in, “Note tui sungah ka hong baptaiz hi. Kei sangin a lian zaw pa khat hong pai ding hi. Ama khedap khau sut dingin zong ka kilawm kei hi. Tua pa in Kha Siangtho leh mei sungah note hong baptaiz ding hi. Ama buh phual a zapsiang nadingin a khutin lawhpi a tawi hi. A tak teng a sal sungah koih ding hi. A site ahih leh, mit ngeilo mei-in hal ding hi,” ci-in a hilh hi. Tua bangin Johan in hansuahna tawh Lungdamna Thu mite kiangah a hilh hi. Ahih hangin, menzipa in a nau’ zi Herodias leh ama mawhna teng hangin Johan in taai ahih ciangin, Herod in ama mawhna khempeuh tungah hih mawhna behlapin, Johan thong sungah a khia hi. Mi khempeuh a kibaptaiz khit uh a ciangin, Zeisu in zong kibaptaiz a, thu a nget lai takin van kihong a, Kha Siangtho pum nei-in vakhu bangin ama tungah kumsuk a, “Nangmah in ka lung hong damsak ka it, ka Tapa na hi hi,” ci-in vantung panin aw khat a ging hi. Zeisu in thuhilh a kipat ciangin kum sawmthum bang a pha hi. Mite upna bangin Zeisu in Josef ta ahi hi. Josef in Heli’ ta hi, Heli in Matthat’ ta hi, Matthat in Levi’ ta hi, Levi in Melkhi’ ta hi, Melkhi in Jannai’ ta hi, Jannai in Josef ta hi. Josef in Mattathias’ ta hi, Mattathias in Amos’ ta hi, Amos in Nahum' ta hi, Nahum in Esli’ ta hi, Esli in Naggai’ ta hi, Naggai in Maath’ ta hi, Maath in Mattathias’ ta hi, Mattathias in Semein’ ta hi, Semein in Josek’ ta hi, Josek in Joda’ ta hi, Joda in Joanan’ ta hi, Joanan in Resa’ ta hi, Resa in Zerubbabel’ ta hi, Zerubbabel in Shealtiel’ ta hi, Shealtiel in Neri’ ta hi, Neri in Melkhi’ ta hi, Melkhi in Addi’ ta hi, Addi in Kosam’ ta hi, Kosam in Elmadam’ ta hi, Elmadam in Er’ ta hi, Er in Joshua’ ta hi, Joshua in Eliizer’ ta hi, Eliezer in Jorim’ ta hi, Jorim in Matthat’ ta hi, Matthat in Levi’ ta hi, Levi in Simeon’ ta hi, Simeon in Judah’ ta hi, Judah in Jonam’ ta hi, Jonam in Eliakim’ ta hi, Eliakim in Melea’ ta hi, Melea in Menna’ ta hi, Menna in Mattatha’ ta hi, Mattatha in Nathan’ ta hi, Nathan in David’ ta hi, David in Jessi’ ta hi, Jessi in Obed’ ta hi. Obed in Boaz’ ta hi, Boaz in Shelah’ ta hi. Shelah in Nahshon’ ta hi, Nahshon in Amminadab’ ta hi, Amminadab in Admin’ ta hi, Admin in Arni’ ta hi, Arni in Hezron’ ta hi. Hezron in Perez’ ta hi, Perez in Judah’ ta hi, Judah in Jakob’ ta hi, Jakob in Issak’ ta hi, Issak in Abraham’ ta hi, Abraham in Terah’ ta hi, Terah in Nahor’ ta hi, Nahor in Serug ta hi, Serug in Reu’ ta hi, Reu in Peleg’ ta hi, Peleg in Ebar’ ta hi, Ebar in Shelah’ ta hi, Shelah in Kainan’ ta hi, Kainan in Arfasat’ ta hi, Arfasat in Shem’ ta hi, Shem in Noah’ ta hi, Noah in Lamek’ ta hi, Lamek in Methuselah’ ta hi, Methuselah in Enok’ ta hi, Enok in Jared’ ta hi, Jared in Mahalate-el’ ta hi, Mahalale-el in Kainan’ ta hi, Kainan in Enos’ ta hi, Enos in Seth’ ta hi, Seth in Adam’ ta hi, Adam in Pasian’ ta hi. Zeisu in Kha Siangtho tawh kidimin Jordan gun pan a ciah ciangin, Kha Siangtho in gampa lakah paipih a, ni sawmli tawntung dawimangpa in a kheem hi. Tua hun sung khempeuh Zeisu in an ne lo a, a ni a cin’ ciangin a gil kial hi. Dawimangpa in, “Nang in Pasian’ Tapa na hih takpi leh, hih suang khomun suaksak in,” a ci hi. Zeisu in, “Mite in khomun bek tawh nungta lo hi, ci-in Lai Siangtho sungah kigelh hi,” a ci hi. Tua lai takin dawimangpa in Zeisu paipihto a, leitung gam khempeuh neukha sungin a lak hi. “Hih vangliatnate leh amau minthan’nate kong pia ding hi. Bang hang hiam na cih leh, kei hong kipia zo a, ka piak nop mi kiangah ka pia thei hi. Tua ahih ciangin, hong bia leteh hihte khempeuh nangma aa ahi ding hi,” a ci hi. Zeisu in zong, “Na Topa Pasian na bia ding hi. Ama na bek na sem ding hi, ci-in Lai Siangtho sungah kigelh hi,” a ci hi. Tua khit ciangin, dawimangpa in Zeisu Jerusalem khuapi sungah paipihin, biakna innpi khum zangah a koih khit ciangin, “Nang in Pasian’ Tapa na hih takpi leh, na pumpi kikiasuk sak in. Bang hang hiam na cih leh: ‘Amah in ama vantungmite nang ading thu a pia ding hi,’ leh ‘Na khe in suang tawh a kisuk khak loh nadingin, Amau in khut tawh nang hong dom ding uh hi,’ ci-in Lai Siangtho sungah kigelh hi,” a ci hi. Zeisu in, “Na Topa Pasian na ze-et kei in,’ a kici hi,” a ci hi. Dawimangpa in kheemna a vekpi-in ahih khit ciangin a kiang panin tomkha sung a paikhia hi. Zeisu in Kha Siangtho’ vangliatna tawh, Galile gamah ciahkik hi. Ama thu a kimkot gam khempeuh ah kizeelin a thang hi. Amaute kikhopna innah thu hilh a, mi khempeuh in amah a phat uh hi. A khan’na Nazareth khua-ah Zeisu pai a, ngeina bangin Nipi ni-in kikhopna innah lut a, Lai Siangtho sim dingin a ding hi. Kamsangpa Isaiah’ Lai Siangtho a kipiak ciangin phen a: “Topa’ Kha Siangtho in keima tungah a om hi. Bang hang hiam i cih leh, mizawngte kiangah Lungdamna Thu zasak dingin hong sawl zo hi. A kiman a kikhum mite a kikhah nading ahi zongin, Mittawte in khua a muh kik theih nading ahi zongin, Bawlsiatna a thuak mite khah nading ahi zongin, Topa’ hehpihna kum ahi, ci-in zaksak nading ahi zongin, Kei hong sawl zo hi,” ci-in kigelhna mun a mu hi. Lai Siangtho zial a, kikhopna inn nasempa a piak khit ciangin a tu hi. Kikhopna inn sungah a om mi khempeuh in tel takpi-in a en uh hi. Zeisu in, “Tuni-in hih Lai Siangtho thu in note zak dingin tangtung zo hi,” a ci hi. Mi khempeuhte in Zeisu thu mang uh a, ama kam sung pan a paikhia lungsim phawn’sakna thu, lamdang a sa uh a, “Hih pa in Josef tapa hilo ahi hiam?” a ci uh hi. Zeisu in, “A tel takpi-in note in, ‘Zatopa aw, nangmahmah na kidamsak in. Kapernaum khua-ah na bawlna khempeuh kote in ka zak bangun, nangma gamah zong bawl in,’ ci-in thugentehna tawh kei kiangah nong ci ding uh hi. Ke’n aman takpi kong cih-inah, kamsang kuamah peuhmah ama gamah mite in a deih kei uh hi. Ahih hangin ke’n aman takpi kong cih-inah, Elijah khan’ lai-in kum thum leh kha guk tawntung guahtui kang a, gam sung khempeuh ah kial a tun’ lai takin, Israel mipawlte lakah meigong tampi a om uh hi. Tua meigong khat beek kiangah Elijah a sawl kei hi. Sidon gam Zarephat khua a, meigong khat kiang bekah a sawl hi. Kamsang Elisha a khan’ lai takin, Israel mipawlte lakah miphak tampi a om uh hi. Ahih hangin Siriapa Na-aman longal kuamah in damna a ngah kei uh hi,” ci-in a gen hi. Kikhopna innah a om mi khempeuh in tua a zak uh ciangin, a heh mahmah uh hi. Amaute ding-in Zeisu khua nawlah a hawlkhiat khit uh ciangin, khua omna mual dawn kui-ah bungbu sawnkhiat dingin a paipih uh hi. Ahih hangin Zeisu in amaute lai zang pan paikhia-in a pai mang hi. Zeisu Galile gam Kapernaum khua-ah a paisuk khit ciangin, Nipi ni-in thu a hilh hi. Amaute in ama thuhilhna lamdang a sa uh hi. Bang hang hiam i cih leh, amah in ukpa bangin thu a hilh hi. Tua kikhopna inn sungah kihhuai dawi kha a lut mi khat a om hi. Amah in, “Nazareth mi Zeisu aw, kote in nang tawh bang kikum i hi hiam? Kote susia dingin hong pai na hi hiam? Nang kua mi na hih ke’n kong thei hi. Pasian’ misiangtho na hi hi,” ci-in aw lianpi tawh a kiko hi. Zeisu in, “Pau kei in la, ama sung pan paikhia in,” ci-in a taai hi. Dawi in amaute lai zangah amah a puksak khit ciangin, natna bawl loin ama sung pan a paikhia hi. Mi khempeuh in lamdang a sa uh a, “Hih thu in bang thu ahi hiam? Thu tawh, vangliatna tawh, kihhuai dawite thu a piak ciangin amau a paikhia uh hi,” ci-in khat leh khat a kikum uh hi. Ama thu in a kimkot mun khempeuh ah a thang hi. Zeisu in kikhopna inn pan a paikhiat khit ciangin Simon’ innah a lut hi. Simon’ sungnu in nakpi-in nattun’ a, a dam nading Zeisu kiangah a thuum uh hi. Zeisu in ama kiangah ding-in cinatna a taai khit ciangin, a nattun’ dam a, thakhatin thoin zinte a vak hi. Ni a tum ciangin, cinatna pawlpawl a neite khempeuh Zeisu kiangah hong paipih uh a, amah in amaute khempeuh tungah khut nga-in a damsak hi. Dawite in zong, “Nang in Pasian’ Tapa na hi hi,” ci-in kikoin mi tampite sung pan a paikhia uh hi. Amah in Khazih ahih lam a theih manun, Amah in amaute taii-in kam khat beek a pausak kei hi. Khua a vak ciangin Zeisu paikhia a, gampa lakah a pai hi. Mihonpite in zong uh a, a kiang a tun’ uh ciangin, amaute kiang pan a paikhiat loh nadingin a kho nuam uh hi. Ahih hangin Zeisu in, “Pasian Gam’ Lungdamna Thu khua dangah zong ka hilh ding hi. Bang hang hiam na cih uh leh, tua bang deihna-in kei hong sawl hi,” a ci hi. Tua lai takin Zeisu in Galile gam kikhopna innte ah thu hilhin a om hi. Tua lai takin Zeisu kiangah, mihonpite in neh uh a, Pasian thu a ngaih lai takun Gennesaret tuili geiah amah a ding hi. Tua lai takin tuipi gei a, khawl gunkuang nih om a mu hi. Ngasa bengte in gunkuang sung panin paikhia uh a, ngente a sawp uh hi. Simon’ gunkuang ahi tua gunkuangte khat tungah Zeisu a tuan’ khit ciangin, gunkuang tuipi gei pan tomno a kihal nadingin Simon kiangah a gen hi. Zeisu in gunkuang tungah tu-a mihonpite thu a hilh hi. A thuhilh a tawp khit ciangin, “Tui thukna-ah khin in la, ngasa khuh na’ng ngen paai in,” ci-in Simon thu a pia hi. Simon in zong, “Topa aw, kote in zankhua-in ka hahkat uh hangin, khat beek ka man kei uh hi. Ahih hangin thu nong piak bangin ngen ka paai ding hi,” a ci hi. Tua banga a paih khit ciangin, ngasa tam mahmah khuh kha a, ngen a kikeek hi. Adang gunkuang khatah a om a lawmte zong hong pai-in, hong huh nadingin amaute khut van a, amaute hong pai-in gunkuang nih ngasa tawh kidim-in a tum dek tak hi. Simon Piter in a muh ciangin Zeisu khuk kiangah bokin, “Topa aw, mawhnei mi ka hih ciangin ka kiang pan paikhia in,” a ci hi. Bang hangin hih bangin gen hiam i cih leh, amah tawh a omkhawm mi khempeuhte in a khuhsa ngasate lamdang a sa uh hi. Tua mah bangin Simon’ lawmte Zebedi’ tapa Jakob leh Johante in zong lamdang a sa uh hi. Zeisu in Simon kiangah, “Lau kei in. Tu-a kipan nang in mite na man ding hi,” ci-in a gen hi. Amaute in tuipi geiah gunkuang a khawlsak khit uh ciangin, amaute neihsa khempeuh nusia-in Zeisu’ nung a zui uh hi. Khua khatah Zeisu a om lai takin, a pumtang a phak mi khat a om hi. Tua pa in Zeisu a muh ciangin bok a, “Topa aw, nong hih nop leh, kei nong damsak zo ding hi,” ci-in a thuum hi. Zeisu in a khut zanin lawng a, “Ka hih nuam hi, na dam ta in,” a cih leh, thakhatin a dam pah hi. Zeisu in hih thu kuama kiangah a gen loh nadingin thu a pia hi. “Pasian’ siampi kiangah pai in la, va kilak in. Amau in a theih nadingun Moses’ thu piaksa bangin biakna na pia in,” a ci hi. Ahih hangin Zeisu thu kizeel semsem a, mihonpite in thu ngai ding ahi zongin, cinate in damna ngah ding ahi zongin a kikhawm uh hi. Ahih hangin amah gampa lakah pai a, thu a ngen hi. Ni khat Zeisu in thu a hilh lai takin, Jerusalem khuapi pan a kipan Galile gam leh Judah gam khua khempeuh pan hong pai Farisaite leh Pasian’ Thukham siate in a kiangah a tu uh hi. Cinatna a damsak thei dingin Topa’ vangliatna Zeisu tungah a tung hi. Tua lai takin mite in khut leh khe si mi khat a lupna tawh a puak uh ciangin inn sungah paipih a, Zeisu mai-ah koih nading a zong uh hi. Mihonpi kikhawm ahih manin, lut nading lam a muh zawh loh uh ciangin, innkhum tungah kahto uh a, innkhum a vuhlet khit uh ciangin, lupna tawh cinapa Zeisu mai-ah mite lai zangah a khiasuk uh hi. Zeisu in amaute’ upna a theih ciangin, “Lawm aw, na mawhnate kimaisak zo hi,” a ci hi. Laitheite leh Farisaite in, “Pasian tungah a pau a khial hih mi kua mi ahi hiam? Pasian longal kua in mawhna maisak zo hiam?” ci-in a ngaihsun uh hi. Zeisu in amaute ngaihsutna a theih ciangin, “Note in bang hangin na lungsim sung uh ah tua bangin ngaihsun na hi uh hiam? Bang ci leng a baih zaw hiam? ‘Na mawhnate kimaisak zo hi,’ ci leng a baih zaw hiam? ‘Tho in la pai in,’ ci leng a baih zaw hiam? Ahih hangin Mihing Tapa in leitungah mawhna a maisak theih nading thu a neih lam na theih nadingun, ‘Tho in, na lupna pua in la, na innah ciah in,’” ci-in khut leh khe sipa kiangah a ci hi. Amah in amaute mai-ah thakhatin tho a, a lupna pua-in Pasian’ min phatin a ciah hi. Tuate khempeuh in lamdang a sa uh a, Pasian a phat uh hi. “Eite in tuni-in nalamdang a tuam i mu zo hi,” ci-in a lau uh hi. Tua nung ciangin Zeisu paikhia a, Levi kici siahdon’na bukah tu-in a om a mu hi. “Ka nung hong zui in,” a cih ciangin, ding-in, a neihsa khempeuh nusia-in a nung a zui hi. Levi in ama innah lawmvakna pawi a bawl hi. Siahdongte leh midang tampite in amaute tawh an ne-in a tu khawm uh hi. Farisaite leh laitheite in, “Note in siahdongte leh mawhneite tawh, bang hangin an nekhawm tui dawnkhawm na hi uh hiam?” ci-in a nungzuite a ko uh hi. Zeisu in, “Cidamte in zato deih lo uh hi. Cinate bek in a deih uh hi. Miphate sam dingin hong pai ka hi kei hi. Mawhneite sam dingin hong pai ka hi hi,” a ci hi. Amaute in, “Johan’ nungzuite in an nek tang zeelin, thu a ngen uh hi. Farisaite’ nungzuite in zong tua bangin ahih uh hi. Ahih hangin na nungzuite in an ne-in tui a dawn uh hi,” a ci uh hi. Zeisu in zong, “Zipipa in a lawmte tawh a omkhawm lai takin tuate in an a tang sak zo ding uh hiam? Ahih hangin a hun hong tung ding a, zipipa in a lawmte tawh a kikhen khit ciangin, tua ni-in amaute in an nek a tang ding uh hi,” a ci hi. Tua lai takin Zeisu in thugentehna thu a hilh-inah, “Kuamah in puan thak bek khat eukhia a, puan lui a thuap ngei kei uh hi. Tua bang a thuap leh, a puan thak keek a, puan thak bek in puan lui tawh a kilem kei ding hi. Kuamah in savun um lui sungah leenggahtui thak a thun ngei kei hi. Tua bangin a thun leh, leenggah tui in savun tamsak ding a, leenggahtui luangkhia-in, savun zong a kisia gawp ding hi. Leenggahtui thak savun um thak sungah a kithun ding hi. Kuamah in leenggahtui lui a dawn khit ciangin, leenggahtui thak a duh kei hi. Bang hang hiam na cih uh leh, Leenggahtui lui a pha hi, a ci hi,” ci-in Zeisu in a gen hi. Nipi ni khatvei Zeisu in buhlei ah a vak leh, a nungzuite in buhvui zut uh a, khut tawh nuai-in a ne uh hi. Farisaite kimkhat in, “Nipi ni-in ahih tuak loh na bang dingin na hih uh hiam?” a ci uh hi. Zeisu in, “David in ama lawmte tawh a gilkial lai takin, Pasian biakna inn sungah lut a, siampite longal midangte nek ding kilawm lo khomun siangtho la-in ne a, a lawmte zong a piak thu sim ngeilo na hi uh hiam? Mihing Tapa in Nipi ni ukpa ahi hi,” a ci hi. Adang Nipi ni-in Zeisu in kikhopna inn sungah lut a, thu a hilh hi. Tua lai-ah a khut langkhat a si mi khat a om hi. Nipi ni-in cinatna damsak ding hiam damsak lo ding hiam, ci-in laitheite leh Farisaite in Zeisu a mawhsak nop manun a en uh hi. Ahih hangin Zeisu in amau’ sinsung ngaihsutna uh a theih ciangin, “Tho in la, a lai zangah ding in,” ci-in khut sipa kiangah a ci hi. Amah thoin a ding hi. Zeisu in, “Note kong dong ding hi; ‘Nipi ni-in phatna bawl tuak hiam? Siatna bawl tuak hiam? Nuntakna khatpeuh a gup tuak hiam? Nuntakna siatsak tuak ahi hiam?’” ci-in amaute kiangah a dong hi. Amaute khempeuh en kawikawi a, “Na khut zan in,” ci-in tuapa kiangah ci-a, a khut a zan leh, a dam hi. Ahih hangin amaute heh mahmah uh a, Zeisu tungah, “Bangci i hih ding hiam?” ci-in khat leh khat a kikum uh hi. Tua lai takin Zeisu in thu ngen dingin mual tungah kahto a, Pasian kiangah thu ngenin zan khat tawntung a om hi. Khua a vak ciangin a nungzuite sam a, Sawm-le-nihte teelin, ‘Sawltakte’ ci-in a phuak hi. Tuate in: Simon, a min thak a phuah Piter leh a naupa Andru, Jakob leh Johan, Filip leh Bartholomai, Mattiu leh Thomas, Alefas’ tapa Jakob leh Zealot kici Simon, Jakob’ tapa Judas leh Topa lehheekpa Judas Iskariot ahi uh hi. Zeisu in amaute tawh mual tung pan kumsuk khawm a, mun zangah a ding hi. Thu ngaih nading ahi zongin, cidamna ngah nading ahi zongin, Judah gam pan akipan, Jerusalem khuapi pan, Tai-ar leh Sidon khua tuipi gei pan, mi tampite leh ama nungzuite tampite zong hong pai uh hi. A kihhuai dawi’ bawlsiatna a thuak mite in zong cidamna a ngah uh hi. Mihonpite khempeuh in Zeisu a lawn’ nading a zong uh hi. Bang hang hiam i cih leh, ama tung pan vangliatna paikhia a, mi khempeuh a damsak hi. Zeisu in a nungzuite en a, “Mizawng note in thupha na ngah ding uh hi. Bang hang hiam na cih uh leh, Pasian’ Gam in note gam ahi ding hi. Tu lai taka gilkial note in, thupha na ngah ding uh hi. Bang hang hiam na cih uh leh, gilvahna na ngah ding uh hi. Tu lai taka a kap note in thupha na ngah ding uh hi. Bang hang hiam na cih uh leh, na nui ding uh hi. Mite in Mihing Tapa hangin note muhdah uh a, hong hawlkhiat uh a, hong kosiat uh a, na min uh hong siatsak ciangin, thupha na ngah ding uh hi. Tua lai takin nuam un la, lungdamin na diang un. Bang hang hiam na cih leh, vantungah nop tuamna lian na ngah ding uh hi. A pute a pate un zong kamsangte tua bangin a bawlsia uh hi. Sumhau note in gimna na thuak ding uh hi. Bang hang hiam na cih uh leh, nopna na ngah zo uh hi. Tu lai takin an kham note in gimna na thuak ding uh hi. Bang hang hiam na cih uh leh, note na gilkial ding uh hi. Tu lai taka nui note in gimna na thuak ding uh hi. Bang hang hiam na cih uh leh, note in thuumin na kap ding uh hi. Mi khempeuh in note hong phat ciangin, gimna na thuak ding uh hi. Bang hang hiam na cih uh leh, a pute a pate un thuzuau kamsangte tungah tua bangin a bawl uh hi. Ka kam a za note kiangah kong cih-inah, na galte na it un. Hong mudahte tungah thupha na bawl un. Hong phuisamte tungah thupha na pia un. Hong bawlsiate ading thu na ngetsak un. Na pang langkhat hong bengte, pang langkhat zong na bengsak un. Na puanza a late, na puan ak lak ding na khaam kei un. A hong ngen khempeuhte na pia un. Na sum a late kiangah, na sum na ngen kik kei un. Note tungah hong kibawl ding na deih bangun, mite tungah zong na bawl un. Hong itte bek na it uh leh, bang phattuamna na nei uh hiam? Migilote in zong amau a itte a it uh hi. Note tungah thupha hong bawl mite tung bekah thupha na bawl uh leh, bang phattuamna na nei uh hiam? Migilote in zong tua bangin ahih uh hi. Midangte sum na leitawisak uh ciangin, hong lohkik ding ci-in, lamenin na tawisak uh leh, bang phattuamna na nei uh hiam? Migilote in zong a piak bang a ngah kik nadingin migilote a leitawisak uh hi. Note na hih uh leh, na galte na it un, amaute tungah thupha na bawl un. Na khatpeuh ka ngah ding hi ci-in lamen loin na leitawisak un. Tua bang na hih uh leh, na noptuamna uh lian ding a, Sang Bel Pasian’ tate na hi ding uh hi. Bang hang hiam na cih uh leh, amah in hehpihna a thukkik lo mi leh migilote a hehpih hi. Na Pa un hehpihna lungsim a neih bangin note in zong hehpihna lungsim na nei un.” “Midangte’ thu na tan kei uh leh, thu tanna tawh na kipelh ding uh hi. Midangte na mawhsak kei uh leh, mawhsakna tawh na kipelh ding uh hi. Midangte’ mawhna na maisak uh leh, note mawhna a kimaisak ding hi. Midangte na piak uh leh, note hong kipia ding hi. Seeng a, teh hoih bek tham lo, a kinengcip, a kilok a kitat a dimlet a, om na ang sung uh ah hong kisung ding hi. Bang hang hiam na cih uh leh, midangte na piakna uh seengin, note zong hong kipia kik ding hi,” a ci hi. Tua lai takin Zeisu in thugentehna a hilh-inah, “Mittawte in mittawte lam a hilh zo ding hiam? A nih mahin leihawm sungah kia ding hilo ahi uh hiam? A nungzuite in a siapa sangin lianzaw lo hi. Ahih hangin a kicingsa-a om a nungzui khempeuhte in a siapa mah bangin ahi ding uh hi. Na mit sungah singluang lungngai loin, na u na nau’ mit sungah ninneng tang bang hangin na en hiam? Na mit sungah singluang om napi-in na u na nau kiangah, ‘Unau aw, na mittang sungah a om ninneng tang hong paaikhiasak in,’ bang hangin ci na hi hiam? Nang mi simtatpa aw, na mit sungah a om singluang paaikhia masa in. Tua khit ciangin, na u na nau’ mit sunga ninneng tang paihkhiat ding na tel muh thei ding hi.” “Gah hoih lo a gah singkung hoih a om kei hi. Gah hoih a gah kung hoih lo a om kei hi. Kung khempeuh a gahin kithei hi. Bang hang hiam na cih uh leh, lingkungah mite in thei gah a lo ngei kei uh hi. Thangling kungah leenggah a lo ngei kei uh hi. Miphate in ama lungsim sung sumkholna hoih sung pan a pha nate a pusuaksak hi. Mipha lote in a hoih lo sumkholna sung pan a pha lo nate a pusuaksak uh hi. Bang hang hiam na cih uh leh, tua pa’ lungsim a dim bangin a kam in a gen hi.” “Keima thu ngai loin, ‘Topa aw, Topa aw,’ ci-in bang hangin hong ci na hi uh hiam? Ka kiangah hong pai a, ka thu za a, a ngaite khempeuh in, kua mi tawh kibang ahih lam kong lak ding hi. Amah in inn a lam ciangin, thukpi-in to a, suang tungah khuam a phut mi tawh kibang hi. Tui a khan’ ciangin hawktui in tua inn a nawt hangin, pha takin kilam ahih ciangin a liingsak zo kei hi. Ka thu a zak ciangin a zui lo mi in, khuam phut lo lei tungah inn a lam mi tawh kibang hi. Hawktui in tua inn a nawk ciangin thakhatin a puk hi. Tua inn siatna in siatna lian ahi hi,” ci-in a gen hi. Zeisu in thu khempeuh mihonpite zak dingin a hilh khit ciangin, Kapernaum khua-ah a lut hi. Galkap mangpa khat in a it mahmah nasempa khat nei a, tua nasempa cina-in a si dek tak hi. Galkap mangpa in Zeisu thu a galzak ciangin, Judah upate a kiangah va sawl a, Topa hong pai-in tua nasempa a damsak nadingin a ngensak hi. Tua upate in Zeisu kiang a tun’ uh ciangin, “Tua thu ama ading na hih nadingin tua pa a kilawm hi. Bang hang hiam na cih leh, amah in ei pawl hong it a, eite kikhopna inn a lamsak hi,” ci-in a va thuumsak uh hi. Zeisu in amaute tawh a paikhawm hi. Galkap mangpa’ inn hong naih uh ciangin, galkap mangpa in a lawmte khat sawlin “Topa aw, na kigimsak kei in. Keima inn khum nuai-ah nong lut dingin ka kilawm kei hi. Tua mah bangin Topa kiangah kong pai ding kilawm ka sa kei hi. Na kamin thu pia leteh, ka nasempa a dam ding hi. Bang hang hiam na cih leh, keimah in zong mangza-ah hong kikoih hi. Ka nuai-ah zong galkapte a om hi. Tua galkapte khat kiangah, ‘Pai in,’ ka cih ciangin a pai hi. Adang khat kiangah, ‘Hong pai in,’ ka cih ciangin a hong pai hi,” ci-in a gensak hi. Zeisu in tua thu a zak ciangin lamdang sa a, ama nung a zui mihonte kiangah kihei a, “Ke’n kong cih-inah, hih zah tak upna Israel mipawlte lakah ka mu ngei kei hi,” ci-in a gen hi. A sawltakte in inn a tun’ uh ciangin nasempa damin a om a mu uh hi. A sawt loin Zeisu in Nain kici khua khatah pai a, a nungzuite leh mihonpite in amah tawh a pai khawm uh hi. Khua kongpi kiang a tun’ uh ciangin, numei in ta khat bek a neih si a, a luang a puakkhiat lai tak uh ahi hi. Tua numei in meigong hi a, khuapihte tampi amah tawh a paikhawm uh hi. Zeisu in tua numei a muh ciangin hehpihhuaisa a, “Kap kei in,” a ci hi. A khut tawh lang lawng a, a puate a khawlsak hi. Zeisu in, “Tangvalpa aw, tho in ci-in nangma kiangah kong ci hi,” a cih leh, misipa tho a, thu a gen hi. Zeisu in tua pa a nu kiangah a pia hi. Mi khempeuh in lau uh a, “A lian mahmah kamsangpa in eite lakah hong piang zo hi. Pasian in ama mipawlte kiangah hong hawh zo hi,” ci-in Pasian’ min a phat uh hi. Tua thu in Judah gam khempeuh akipan a kimkot gam sung khempeuh ah a kizeel khin hi. Johan’ nungzuite in hih thu a vekpi-in ama kiangah a gen uh hi. Johan in ama nungzuite nih sam a, Topa kiangah sawlin, “Nangmah in hong pai dingpa taktak na hi hiam? A hih kei leh midang khat ka lamen lai ding uh hiam?” ci-in a dongsak hi. Tuate in Zeisu kiang a tun’ uh ciangin, “Nangmah in hong pai dingpa taktak na hi hiam? Ahih kei leh, midang ka lamen lai ding uh hiam? ci-in baptaizpa Johan in nangma kiangah kote hong dongsak hi,” a ci uh hi. Tua hun lai takin Zeisu in cinatna, zawngkhalna leh, dawi gilo a vei mi tampi damsak a, mittaw tampite zong khua a musak thei hi. Tua ciangin, “Note pai un la, na zaksa, na muhsa uh thute Johan kiangah va gen un. Mittawte in khua mukik thei uh hi. Khebaite in lam a pai thei uh hi. Phakte in damna a ngah kik uh hi. Bengngongte in khua a za thei uh hi. Misite in hin’na a ngah kik uh hi. Mizawngte kiangah Lungdamna Thu kihilh hi. Keimah hangin pukna a ngah lo peuhmah in thupha a ngah ding hi,” a ci hi. Johan’ kamtaite a paikhiat khit uh ciangin, Zeisu in mihonte kiangah Johan thu a gen-inah, “Note in bang en dingin gampa lakah paikhia na hi uh hiam? Huih mut a, a vuang pumpeeng en ding paikhia na hi uh hiam? Bang en ding paikhia na hi uh hiam? Puanneel silhte en dingin paikhia na hi uh hiam? En un, puan hoih tawh kizeem a, mi nuamsate in kumpite’ inn sungah a om uh hi. Ahih kei leh, bang en dingin paikhia na hi uh hiam? Kamsangpa en dingin paikhia na hi uh hiam? Ahi mah hi. Pasian’ kamsangpa sang in a lianzaw hi kong ci hi. Lai Siangtho sungah a kigelh bangin: ‘En in, na pai nading lam sial ding, Na mai-ah ka sawltakpa ka paisak hi,’ a cihna in, tua mipa a cihna ahi hi. Ke’n kong cih-inah, numei sung pan a suakte lakah Johan sangin a lianzaw khat beek a om kei hi. Ahih hangin, Vantung Gam sungah mi neupen in tuapa sangin a lianzaw hi,” a ci hi. Siahdongte akipan mite khempeuh in hih thu a zak uh ciangin, Johan’ baptaizna a ngah manun Pasian dik a sa uh hi. Ahih hangin, Farisaite leh laitheite in amau noptuam nadingin Pasian’ deihna a nial uh a, Johan’ baptaizna a sang kei uh hi. Zeisu in, “Tulai khang mite bang tawh ka genteh ding hiam? Kua mi tawh kibang ahi uh hiam? Sumbukah tu-a a om naupangte in khat leh khat kiko-inah, ‘Tamngai ka tum uh hangin, na laam kei uh hi. Ka thuum uh hangin na kap kei uh hi.’ A kici naupangte tawh kibang uh hi. Bang hang hiam na cih uh leh, baptaizpa Johan in an lum ne lo, leenggahtui dawn loin hong pai a, note in, ‘Hihpa dawilawm nei hi,’ na ci uh hi. Mihing Tapa in an ne tui dawnin hong pai a, note in, ‘Hihpa in an hai zu haipa hi. Siahdongte leh migilote tawh zawlin a kiman hi,’ na ci uh hi. Lungpilna in a tate khempeuh tung panin diksakna a ngah hi,” ci-in a gen hi. Tua lai takin Farisaite khat in an vak dingin Zeisu a sap khit ciangin, tua Farisaipa’ inn sungah lutin an a ne hi. Tua khua sungah numei gilo khat a om hi. Amah in Farisaipa’ innah Zeisu in an ne, ci-in a theih ciangin paknamtui suangngo thawl khat paipih a, a nung lam pan a khe kiangah ding-in kap a, a khe khitui tawh kawtsakin, a sam tawh a nul hi. Ama khe zong nam a, paknamtui tawh a zut hi. Zeisu an a vak Farisaipa in a muh ciangin, “Hih mi in Pasian’ kamsangpa ahih takpi leh, a lawng hih numei in bang mi ahi, a gilo numei hi, ci-in a thei ding hi,” ci-in a lungsim sungah a gen hi. Zeisu in zong, “Simon aw, nangma kiangah kong gen ding khat a om hi,” a cih ciangin amah in, “Sia aw, hong gen in,” a ci hi. Zeisu in, “Sum neipa khat in leiba mi nih a nei hi. Khat in dangka zanga, khat in dangka sawmnga a ba hi. Amaute in leiba loh nading a neih loh uh ciangin sum neipa in, tuate gel’ leiba a maisak hi. Tua bang ahih leh, tua nihte lakah kua pen in sum neipa a it zaw ding hiam?” ci-in a dong hi. Simon in, “A maisakna tam zaw a ngah mi in it zaw-in ka um hi,” a ci hi. Zeisu in, “Na up bang a man hi,” ci-in a gen hi. Tua ciangin numei lam kihei a, “Nang in hih numei na mu hiam? Na innah kong lut lai-in khe sil nading tui nong pia kei hi. Hih numei in ka khe khitui tawh kawtsak a, a sam tawh a nul zo hi. Na hong nam kei hi. Amah in ahih leh, inn kong lut khit phet akipan ka khe a nam tawntung hi. Ka lu sathau nong nilhsak kei hi. Amah in ahih leh, ka khe paknamtui tawh hong nilhsak hi. Tua ahih ciangin, ke’n kong cih-inah ama mawhna tam napi-in a kimaisak hi. Bang hang hiam na cih leh, amah in tampi-in a it hi. A tawmno khat mawhna a kimaisak mi in tawmkha-in a it thei hi,” ci-in Simon kiangah a gen hi. Numei kiangah, “Na mawhna kimaisak zo hi,” a ci hi. Amah tawh an ne khawmte in, “Mawhna teng a maisak hih pa in kua mi ahi hiam?” ci a, amau lungsim sung uh ah a gen uh hi. Zeisu in,”Na upna in nang hong gum zo hi. Nuam in la, pai in,” ci-in numei thu a pia hi. Tua nung a sawt loin, Zeisu in khuapi khuaneu-ah vak kawikawi in thu hilh a, Pasian’ Gam Lungdamna Thu a zasak hi. Amah tawh Sawm-le-nihte a pai khawm uh hi. Dawi gilo lut leh cinatna a damsak numeite in a zui uh hi. Tuate lakah dawi gilo sagih a hawlkhiatna, Magdalene kici Mari, Herod’ nasempa Khuza’ zi Joanna leh Susanna a kipan adang tampite in zong amau sum tawh amaute kivakin a zui uh hi. Mi tampite hong kikhawm uh a, khua khempeuh panin mite in ama kiangah hong pai lai takun, Zeisu in thugentehna tawh thu a hilh-inah, “Khaici vawhpa in khaici vawh dingin a kuankhia hi. Khaici a vawh lai takin kimkhatte in, lam geiah kia a, kisik gawpna thuak a, van a, vasate in tawmin a ne uh hi. Kimkhatte in suang lakah kia a, a po ciangin lei kawt zo lo ahih manin a vul gawp hi. Kimkhatte in ling lakah a kia hi. Ling kungte in amau tawh pokhawm uh a, a dep gawp uh hi. Kimkhattte in lei hoihna-ah kia a, kung po a, a zah zakhat a gah hi,” ci-in a gen khit ciangin, “Zak nading bil a nei teng in na za ta un!” ci-in a kiko hi. A nungzuite in, “Tua thugentehna bang ahi hiam?” ci-in a dong uh hi. Zeisu in, “Note in Pasian’ Gam thusimte na theihtheih nadingun thu hong kipia hi. Midangte ahih leh, en napi-in mu lo ding uh hi. Ngai napi-in a khiatna a theih loh nadingun thugentehna tawh kihilh ding hi.” “Thugentehna in hih bang ahi hi; Khaici in Pasian’ thu ahi hi. Lampi geiah a kiate in, thu a zak khit uh ciangin thu um uh a, gupna a ngah loh nadingun, dawimangpa hong pai-in, a sinsung uh pan thu a lakkhiatte ahi uh hi. Suang lakah a kiate in, thu a zak ciangin lungdamin a mang pahte ahi uh hi. Amaute in zung kip nei lo uh a, tawlkhat kikal a up uh hangin khemna a thuak uh ciangin a tawp kik uh hi. Ling lakah a kiate in, thu a zak khit uh ciangin amau deihna bang zui-in, lunghihmawhna, sum hauhna leh leitung lungdamnate in dep gawp a, gah a gah lote ahi uh hi. Lei hoih ah a kiate in, thuman leh apha lungsim tawh thu a zak khit uh ciangin keem uh a, lungkipin a gahte ahi uh hi.” “Meivak a vak khit ciangin beel a khuh ahi zongin, lupna nuai-ah a koih ahi zongin kuamah a om kei hi. A lut mite in meivak taang a muh nadingun kho sangah a vak uh hi. Bang hang hiam na cih uh leh, a kipholaak lo ding thusim bangmah om lo hi. Khuavak in taan’ in, a kithei lo dinga a kiseelsim thei bangmah om lo hi. Tua ahih ciangin note in bangci na zak uh hiam, na kikeem un. Bang hang hiam na cih uh leh, a neite kipiak beh ding hi. A nei lote kiang pan a neihsa a upmawh nangawn kilakhia ding hi,” ci-in thu a hilh hi. Tua lai takin Zeisu’ nu leh a sanggamte in a kiangah a pai uh hangin, mihonpi a om manun ah a va nai thei kei uh hi. “Na nu leh na sanggamte in hong hopih nuamin inn pua lamah ding-in a om uh hi,” a cih uh ciangin, Zeisu in, “Pasian’ thu za-a a mangte in ka nu, ka sanggampa, ka sanggamnu ahi uh hi,” a ci hi. Ni khat Zeisu in a nungzuite tawh gunkuang ah a tuang hi. “Tuili gal khatah pai ni,” a cih khit ciangin a pai uh hi. Gunkuang tungah tuangin a pai lai takun Zeisu a ihmu hi. Tuipi tungah huihpi nakpi nungsuk a, gunkuang sungah tui kidim a, amaute in kisiat ding a lau uh hi. Zeisu kiangah pai uh a, “Topa, Topa aw, kote ka si dek tak uh hi,” ci-in a phong uh hi. Zeisu tho a, huihpi leh tui kilok a taai khit ciangin khawlin, a dai hi. Zeisu in, “Na upna uh koi-ah om hiam?” ci-in a dong hi. Amaute lau uh ahih ciangin, lamdang a sa uh a, “Hih mi in kua mi ahi hiam? Huih leh tui nangawn thu a piak ciangin a ngai tazen uh hi,” ci-in khat leh khat a kikum uh hi. Galile gam galah Geresa gam a tung uh a, Zeisu lei tungah a kahtoh ciangin tua khua panin dawi lut mi khat in a dawn hi. Tua pa in sawtveipi puan silh lo a, innah om loin han lakah a om hi. Amah in Zeisu a muh ciangin, a mai-ah bokin, “Sang Bel Pasian’ Tapa Zeisu aw, nang tawh bang kikum i hi hiam? Kei nong bawlsiat loh nadingin kong thuum hi,” ci-in nakpi-in a kiko hi. Hih thu bang hangin a thuum hiam i cih leh, Zeisu in kihhuai dawi in tua pa sung pan a taikhiat nadingin thu a pia hi. Dawi in tua pa tamveipi a man zo hi. Sikkhau tawh kihen a, kolbulh in, a kikhum hangin, a sikkhau peeksat a, dawi in gampa lakah a hawlkhia hi. Zeisu in, “Na min bang ahi hiam?” ci-in a dot ciangin, “Ka min Legion ahi hi,” a ci hi. Bang hang hiam i cih leh, dawite tampi in ama sungah a lut zo uh hi. A thuk leinuai-ah pai nading thu a piak loh nadingin dawite in a thuum uh hi. Tua san tak mual tungah vok honpi khat gamta-in a om uh hi. Amaute in vok sungah lut nading thu a piak na’ng dawite in a nget uh ciangin, Zeisu in thu a pia hi. Dawite in tua pa sung pan paikhia uh a, vokte sungah a lut uh leh, vok honpite in kensang tung pan taisuk uh a, tuili sungah tuakin a si khin uh hi. Vokcingte in tua thu a muh uh ciangin, tai uh a, khua sung leh gam sungah hih thu a gen uh hi. Mite in bang thu piang hiam ci-in en dingin a kuankhia uh hi. Amaute in Zeisu kiang a tun’uh ciangin, dawi paikhiatnapa puan silhin mipil bangin Zeisu’ khe kiangah tu-in a om a mu uh a, a lungmang uh hi. A mu mite in dawi lutpa in bangci cidamna ngah hiam ci-in amaute in a zasak uh hi. Geresa gam mi khempeuhte in launa lungsim nei uh ahih ciangin, amaute kiang pan a paikhiat nading Zeisu a nget uh ciangin, gunkuang sungah tuangin a ciah hi. Dawite a paikhiatnapa in Zeisu tawh a omkhawm nadingin thu a nget ciangin, Zeisu in, “Na innah ciah in la, Pasian in nangma tungah bangzah takin noptuamna hong bawl cih na zasak in,” ci-in a sawl hi. Tua pa pai a, Zeisu in ama tungah bangzah tak noptuamna bawl hiam ci-in khua sung khempeuh thu a kizeelsak hi. Zeisu a ciahkik ciangin, mihonpite in nuamin a tungsak uh hi. Bang hang hiam i cih leh, amah lamenin a om uh hi. Tua lai takin Jairas min nei, kikhopna inn ukpa khat in va nai a, Zeisu’ khe kiangah bokin ama innah a pai nading thu a ngen hi. Bang hang hiam i cih leh, kum sawm leh kum nih a pha tanu khat nei a, tua a tanu si dek tak hi. Zeisu a pai lai takin, mihonpi in amah a phukha uh hi. Tua lai takin, kum sawm leh kum nih tawntung si luang cinatna vei a, a neihsa tengin zatote a guaih hangin kuamah in a damsak zawh loh numei khat in, a nung lamah pai-in a puan mongteep a lawn’ ciangin thakhatin a si suahna a kang hi. Zeisu in, “Kua in hong lawng hiam?” ci-in a dong hi. Mi khempeuh in a nial uh ciangin Piter in, “Topa aw, mihonpite in nang hong phukha a, hong sukha uh hi,” a ci hi. Zeisu in, “Mi khat in kei hong lawng hi. Bang hang hiam na cih uh leh, ka tung panin vangliatna a paikhia ka thei hi,” a ci hi. Numei in amah bu zo lo ci-in a theih ciangin, liingin hong pai a, Zeisu mai-ah bokin, bang hangin Zeisu lawnga thakhatin bangci damna a ngah pah thu, mi khempeuh mai-ah a gen hi. Zeisu in, “Ka tanu aw, na upna in nang hong damsak zo hi. Nuam takin na ciah in,” a ci hi. Zeisu in tua thu a gen lai takin, kikhopna inn ukpa’ inn panin mi khat hong pai a, “Na tanu a si zo hi. Siapa gimsak kei in,” ci-in a gen hi. Ahih hangin Zeisu in a zak ciangin, “Lungmang kei in, upna na neih leh, amah a dam ding hi,” ci-in kikhopna inn ukpa kiangah a gen hi. Zeisu in a inn a tun’ ciangin Piter, Johan, Jakob leh numeino’ nu leh pate longal, midang kuamah amah tawh inn sungah a lut khawm nading thu a pia kei hi. Mi khempeuh in numeino hangin nakpi-in a kap uh a, thuumin a om uh hi. Zeisu in, “Kap kei un. Amah a si kei hi, a ihmu hi,” a cih ciangin, numeino a si cih amau thei uh ahih ciangin, Zeisu zahpihin a nuihsan uh hi. Zeisu in numeino’ khut len a, “Numeino aw, tho in,” a ci hi. Tua ciangin a kha ciahkik a, thakhatin a tho hi. Amah an a piak nadingin thu a pia hi. A nu leh pate in lamdang a sa uh hi. Ahih hangin Zeisu in a kihih nate kuamah kiangah gen lo dingin a kham hi. Tua lai takin Zeisu in Sawm-le-nihte a sap khit ciangin, dawite zawh nading leh cinate a damsak theih nadingun thu a pia hi. Tuate in Pasian’ Gam thu hilh ding ahi zongin, cinate damsak ding ahi zongin a sawl hi. “Note in lampi ah zat ding bangmah na keng kei un. Ciangkhut ahi zongin, thung-ip ahi zongin, khomun ahi zongin, dangka ahi zongin, na keng kei un. Puanak nih na nei kei un. Inn khatpeuh ah na lut uh ciangin, tua inn ah na paikhiat matengun na om un. Mi khatpeuh in note hong nolh leh, amau khua pan na paikhiat uh ciangin, amau lang khatah teci a pang dingin, na khepeek nuai-a leivuite na singkhia un,” ci-in thu a pia hi. Amaute paikhia uh a, Lungdamna Thu hilhin, cinate damsakin, khuapi leh khuaneute ah a pai kawikawi uh hi. Tua lai takin Menzipa Herod in Zeisu hihna thu khempeuh a zak ciangin a lungmang hi. Bang hang hiam i cih leh, mi kimkhat in, “Johan in a sihna pan a thokik zo hi,” a ci uh hi. Mi kimkhat in, “Elijah hong kilang kik zo hi,” a ci uh hi. Mi kimkhat in, “Tanglai kamsangte khatpeuh mah a thokik zo hi,” a ci uh hi. Herod in, “Johan’ ngawng ka tan zo hi. Hih bang thu ka zakna hih pa in kua ahi hiam?” ci-in Zeisu mu dingin a zong hi. Sawltakte in Zeisu kiangah a paikik uh ciangin, ahihna thu khempeuh a zasak uh hi. Zeisu in amaute paipih a, gam daihna Bethsaida kici khua khatah a tung uh hi. Mihonpite in a theih uh ciangin a delh uh hi. Zeisu in amaute hawlkhia loin Pasian’ Gam thu hilh a, dam nading a deihte a damsak hi. Ni a tum dektak ciangin, sawm-le-nihte in va nai uh a, “Mihonpite in a kimkot khuaneu leh lo lai-ah pai-in, giah na’ng leh an nek ding zong dingin paisak ta in. Bang hang hiam na cih uh leh, hih laitak in gamlak ahi hi,” a ci uh hi. Zeisu in, “Amau nek ding an note’n na pia ding uh hi,” a ci hi. Amaute in “Kote in pai-in hih mi khempeuh ading an ka lei kei uh leh, khomun pum nga leh ngasa tawn nih longal bangmah ka nei kei uh hi,” a ci uh hi. Bang hangin hih bangin a gen uh hiam i cih leh, pasal bek zong tulnga bang a pha uh hi. Zeisu in, “Mite pawl khat sawmnga, a pawlpawlin tusak un,” ci-in a nungzuite thu a pia hi. A nungzuite in a thupiak mah bangin a hih uh a, a om mite khempeuh a tusak uh hi. Zeisu in khomun pum nga leh ngasa tawn nih la a, vantung lam ento-in thupha a piak khit ciangin balnen a, mite mai-ah lui dingin a nungzuite a pia hi. Amaute’n ne uh a, a vekpi un a kham khit uh ciangin, a val a neng a themte a tawm uh a, seeng sawm leh seeng nih dim a ngah uh hi. Khatvei Zeisu in gam daihna-ah thu a nget lai takin, amah tawh a nungzuite a omkhawm uh hi. Zeisu in, “Mihonpite in kei kua hi hong ci uh hiam?” ci-in a dot ciangin amaute in, “‘Baptaizpa Johan,’ a ci uh hi. Kimkhatte in, ‘Elijah,’ a ci uh hi. Midangte in, ‘Tanglai kamsangte khatpeuh a hingkik hi,’ a ci ciat uh hi,” ci-in a gen uh hi. Zeisu in, “Note in kei kua hi nong ci uh hiam?” ci-in a dot ciangin Piter in, “Nangmah in Pasian’ Khazih na hi hi,” a ci hi. Zeisu in hih thu kuamah kiangah gen lo dingin a nungzuite a kham hi. “Mihing Tapa in gimna tampi thuak ding a, upate, siampi liante leh laitheite in nial ding uh a, amah in thahna zong thuak ding a, ni thum khit ciangin a thokik ding hi,” a ci hi. Mi khempeuh kiangah Zeisu in, “Mi khatpeuh in kei hong zuih nop leh, a pumpi nial a, ama singlamteh ni simin pua-in hong zui ta hen. Bang hang hiam na cih uh leh, a nuntakna a gum nuamte in a nuntakna a mangthangsak ding hi. Keima hangah a nuntakna a mangsakte in a nuntakna a gum ding hi. Mi khatpeuh in leitung khempeuh a ngah hangin, ama nuntakna mangthang leh, bang phattuamna ngah ding ahi hiam? Keimah hang ahi zongin, ka thu hang ahi zongin a maizum peuhmah, Mihing Tapa in ama phatna, Pa phatna leh a siangtho vantungmite’ phatna tawh hong pai ciangin, tua mi a maizumsak ding hi. Ke’n aman takpi kong cih-inah, Pasian’ Gam hih san takah a ding mi kimkhat in a muh uh matengin a si kei ding uh hi,” a ci hi. Hih thu a gen khit ni giat bang a phak ciangin, Zeisu in Piter, Johan leh Jakob te samin, thungen dingin mual tungah a kahto uh hi. Thu a nget lai takin a meel kilamdang a, a puan zong paak a, a leng mahmah hi. Moses leh Elijah ahi nihte in meel lamdangin kilang uh a, Zeisu tawh kihoin Jerusalem khuapi-ah sihna a thuak nading thu a gen uh hi. Piter leh amah tawh a omkhawmte a lusu uh hi. Ahih hangin a khan’lawh khit uh ciangin, Zeisu’ minthan’na leh amah tawh a ding khawmte a mu uh hi. Tuate in Zeisu tawh a kikhen lai takun Piter in, “Topa aw, hih lai takah kote kong om uh ahoih hi. Nang ading buk khat, Moses ading buk khat, Elijah ading buk khat, buk thum kote hong lamsak in,” ci-in gen ding adang thei loin a gen hi. Hih thu a gen lai takin meii khat in amaute tuam a, amaute in meii sungah a tum lai takun a lau uh hi. “Hih pa in ka teelsa ka Tapa ahi hi. Ama thu na ngai un,” ci-in meii lak pan aw khat a ging hi. Aw a gin’ khit ciangin Zeisu bek om a kimu hi. Amaute pau loin, tua hun lai taka a muh uh nate kuamah kiangah a gen kei uh hi. Zingsang ciangin amaute mual tung pan a kumsuk khit uh ciangin, mihonpite in Topa a dawn uh hi. Mihonpi lak pan mi khat in, “Sia aw, ka tapa hong en in, ci-in kong thuum hi. Bang hang hiam na cih leh, amah bek ta ka nei hi. Dawi in amah manin amah thakhatin kiko a, a kam sung pan cilphuan bua dongin kongkawsak a, nakpi-in bawlsia-in a paikhia hak mahmah hi. Dawi hawlkhia dingin na nungzuite kiangah ka nget hangin ahih thei kei uh hi,” ci-in a kiko hi. Zeisu in, “Thu upna nei lo a lungkhauh pawlte aw, kei in note tawh bang tanvei omkhawm ding ka hi hiam? Note bang tanvei hong thuak zo ding ka hi hiam? Na tapa ka kiangah hong paipih in,” a ci hi. A pai lai takin dawi in naupang lei ah puksakin a kongkawsak hi. Zeisu in kihhuai dawi taai a, naupang a damsak khit ciangin a pa kiangah a pia hi. Amau khempeuh in Pasian’ vangliatna lamdang a sa uh hi. Ahih hangin mi khempeuh in Zeisu hihna khempeuh lamdang a sak uh ciangin, a nungzuite kiangah Zeisu in, “Na lungsim uh ah hih thute tum ta hen. Mihing Tapa in mite khut tungah kiheek ding hi,” a ci hi. Amaute in tua thu a thei kei uh a, a theih loh nadingun a kiseel hi. A cihnopna zong amaute in a dong ngam kei uh hi. Tua lai takin a nungzuite in amaute lakah kua lianbel hiam ci-in khat leh khat a kiseel uh hi. Zeisu in amaute lungsim sungah kiseelna a theih ciangin, naupang khat samin ama kiangah a koih khit ciangin, “Keima min tawh hih naupangno a ngai peuhmah in, kei zong hong ngai hi. Bang hang hiam na cih uh leh, note lakah a neu penpa in milian ahi ding hi,” a ci hi. Johan in, “Sia aw, nangma min tawh dawite a hawlkhia mi khat ka mu uh hi. Amah in eite hong zui lo ahih ciangin ka kham uh hi,” ci-in a gen hi. Zeisu in, “Tua pa na kham kei un. Bang hang hiam na cih uh leh, note lang khatah a pang lo mi in note tawh kipawlin a om hi,” ci-in a gen hi. Vantungah kilaktoh ding hun a tun’ dek tak ciangin, Zeisu in Jerusalem khua lam mainawhin a pai hi. A mai-ah kamtaite a paisak hi. Tuate pai uh a, Zeisu ading mun bawl khol dingin Samaria khua khatah a lut uh hi. Zeisu in Jerusalem khua lam pai dingin a mainawt ahih ciangin tua khua mite in a nolh uh hi. Tua thu a nungzuite Jakob leh Johan in a muh uh ciangin, “Topa aw, kote in vantung panin mei kiasakin tua mite a kat nading na awi hiam?” ci-in a dong uh hi. Lampi ah a pai lai takun mi khat in, “Na paina khempeuh ah kong zui ding hi,” ci-in Zeisu kiangah a gen hi. Zeisu in, “Ngiate in kua a nei uh hi. Vasate in zong bu a nei uh hi. Ahih hangin, Mihing Tapa ahih leh, a lutang ngak nading mun a nei kei hi,” a ci hi. Midang khat kiangah, “Kei hong zui in,” a cih ciangin amah in, “Topa aw, ka pa ka vui masak nading thu hong pia in,” ci-in a ngen hi. Zeisu in, “Misite in amau misite na vui ta hen. Nang na hih leh, pai in la, Pasian’ Gam’ thu na hilh in,” a ci hi. Midang khat in, “Topa aw, nangmah kong zui ding hi. Ahih hangin ka innah a om mite mangpha ka vaikhak masak nading thu hong pia in,” a cih ciangin, Zeisu in, “Lawi lokhawhna leeng letsan len kawm a, nunglam a en mi in Pasian’ Gam tawh kituak lo hi,” a ci hi. Tua khit ciangin Topa in a dang sawmsagihte koih a, a pai nading khuapi, khuaneu tengah ama mai-ah nih tek, nih tekin a sawl hi. Tuate kiangah thu a piakna in, “Buh at ding tampi om hi. Ahih hangin a at ding mite tawm hi. Tua ahih ciangin buh-at nasem ding hong sawl in ci-in, buh nei Topa kiangah thu na ngen un. Pai un. Ngia hon lakah tuuno kikhahte bangin no kong sawl hi. Dangka-ip, thung-ip, khedap, tuate na keng kei un. Lampi ah na pai lai takun kuamah na hopih kei un. Inn khatpeuh mah na lut uh ciangin, ‘Hih inn sungah thupha om ta hen,’ ci-in a masa-in na gen un. Tua innah thupha deih mi a om leh, note thupha a tungah a tung ding hi. A om kei leh, note kiangah hong kileh kik ding hi. Tua innah na om uh ciangin an ne tui dawnin, amau hong piak uh bangin na ne un. Bang hang hiam na cih uh leh, nasempa in thaman ngah ding kilawm hi. Inn khat panin inn khatah kawm themthum kei un. Khua khatpeuh mah na lut uh ciangin, khua mite in hong tun’sak uh leh, note mai-ah hong lui khempeuh na ne un. Cinate na damsak un. ‘Pasian’ Gam in note kiangah hong nai zo hi,’ ci-in thu na hilh un. Khua khatpeuh mah na lut uh ciangin, khua mite in no hong nolh leh, tua khua lampi ah na paikhia un la, ‘Ka khepeek uh ah hong belh no khua leivui nangawn note langkhat ah ka nulkhia uh hi. Ahih hangin Pasian’ Gam hong nai zo hi ci-in na thei ta un,’ ci-in na gen un. Ke’n kong cih-inah, tua Ni ciangin tua khua in Sodom khua sangin gimna a thuak zaw ding hi.” “Khorazin khuapi aw, nangmah in gimna na thuak ding hi. Bethsaida khuapi aw, nangmah in gimna na thuak ding hi. Bang hang hiam na cih uh leh, note sungah hong kilak vangliatna in Tai-ar khuapi leh Sidon khuapi sungah kilak ngei hi leh, amau in sawtpekin khautang puan silhin, vut tawh kibuakin a kisik kik zo ding uh hi. Thukhen ni ciangin note in Tai-ar leh Sidon khuapi sangin gimna na thuak zaw ding uh hi. Nang Kapernaum khuapi aw, vantung khua dongin minthan’na na ngah ding hiam? Nang in hel khua dongin na kiasuk ding hi. Note thu a ngaite in ka thu a ngai hi. Note hong nolhte in kei zong hong nolh hi. Kei hong nolhte in kei hong sawlpa zong a nolh hi,” ci-in Zeisu in a gen hi. Tua sawmsagihte in lungdamna tawh hong ciahkik uh a, “Topa aw, na minin dawite nangawn ka zo uh hi,” a ci uh hi. Zeisu in, “Satan in khuaphia bangin vantung pan hong kiasuk ke’n ka mu zo hi. En un, note in gul gilote leh aikamte na sikgawp nading uh leh na galte’ vangliatna khempeuh na zawh nadingun thu ke’n kong pia hi. Note bangmah in hong bawlsia kei ding hi. Ahih hangin dawite na zawh uh hangin lungdam kei un. Vantung khua sungah na min uh a kigelh manin na lungdam ta un,” a ci hi. Tua lai takin Zeisu in Kha Siangtho tawh lungdam a, “Vantung leh leitung a uk ka Pa aw, nangmah in hih thute mipilte leh misiamte kiangah im-inah, naupangte tungah lak na hih ciangin, na hehpihna ka phat hi. Ahi mah hi ka Pa aw, tua bangin na deih hi. Ka Pa in na khempeuh kei hong pia zo hi. Pa longal kuamah in Tapa a thei kei hi. Tapa mahmah leh Tapa in a theihsak nopte longal kuamah in Pa a thei kei hi.” a ci hi. Zeisu in a nungzuite lamah kihei a, “No na muh nate a mu mittangte in thupha a ngah ding uh hi. Bang hang hiam na cih uh leh, na muhte uh Pasian’ kamsang tampite leh kumpi tampite in a muh nop uh hangin a mu kei uh hi. Na zakte uh a zak nop uh hangin a za kei uh hi ci-in kong gen hi,” ci-in a gen hi. Thukham siapa khat ding-in Zeisu ze-et a, “Sia aw, tawntung nuntakna luah nadingin bang ka hih ding hiam? ci-in a dong hi. Zeisu in, “Thukhamna sungah bang a kigelh hiam? Bangci na sim hiam?” ci-in a dot ciangin, amah in, “Na Topa Pasian, na lungsim khempeuh, na kha khempeuh, na thahatna khempeuh, na pilna khempeuh tawh na it in. Na pumpi na it bangin na lawmte na it in,” ci-in a gen hi. Zeisu in, “Na dawn’na thu ahi takpi hi. Tua bangin na hih leh, na nungta ding hi.” a ci hi. Tua pa in ama phatna thu a lah nop manin, “Ka lawmte kuate ahi hiam?” ci-in Zeisu a dong hi. Zeisu in zong, “Mi khat in Jerusalem khua panin Jerikho khua-ah a paisuk lai takin, misuamte tawh kituak hi. Misuamte in tua pa’ puan hawkkhia a, nakpi-in a sat khit uh ciangin, si dek takin a nusia uh hi. Tua lampi ah siampi khat paikha zenzen a, tua pa a muh ciangin peelin a nusia hi. Tua mah bangin Levi mi khat hong tung a, tua pa a muh ciangin peelin a pai leuleu hi. Ahih hangin Samaria mi khat in khualzinin a pai lai takin ama omna hong tung a; a muh ciangin hehpihhuai sa a, va nai-in ama liammate sathau leh leenggahtui nuh a, puan tawh a gak khit ciangin ama la tungah tuangsakin, zintun’na innah paipihin a khoi hi. Zingsang a paikhiat ciangin peek nih la a, zintun’ inn ukpa a piak khit ciangin, “Hih mi na khoi in, a bei khempeuh kong paikik ciangin kong loh ding hi,” a ci hi. Nang bangci ngaihsut na hi hiam? Tua mi thum sung panin kua pen in misuamte tawh a kituakpa’ lawm ahi hiam?” ci-in a dong hi. Thukham siapa in, “Tua a hehpihpa in a lawmpa ahi hi,” ci-in a dawng hi. Zeisu in, “Nang zong pai in la, tua mah bangin na hih in,” a ci hi. Amaute lampi ah a pai lai takun, khua khatah lut uh a, Martha kici numei khat in ama innah a tungsak hi. Tua numei in Mari a kici sanggam numei khat a nei hi. Tua Mari in Zeisu khe kiangah tu-in ama thu a ngai hi. Ahih hangin Martha ahih leh, an bawlin gim a, Zeisu kiangah va nai-in, “Topa aw, kei bek in an bawlin ka nau in hong huh loh ding na awi hiam? Amah in kei hong huh nading thu pia in,” ci-in a ngen hi. Zeisu in, “Martha aw, Martha aw, nang in na tampi na lunghimawh a, gimna na thuak hi. Ahih hangin sapna khat bek a om hi. Mari in ahih leh, na hoih khat a teel zo hi. Tua na in ama tung pan kilakhia lo ding hi,” ci-in a gen hi. Zeisu in mun khatah thu ngen a, a tawp khit ciangin a nungzuite khat in, “Topa aw, Johan in ama nungzuite thunget nading ahilh mah bangin, kote zong hong hilh in,” ci-in a ngen hi. Zeisu in, “Note in thu na nget uh ciangin hih bangin na ngen un: ‘Pa aw, Nangma min siangtho ta hen; Na Gam hong piang ta hen; Ni simin ka khamkhop ding uh an hong pia in; Ko tungah hong mawhte ka maisak uh bangin, kote mawhna zong hong maisak ta in; Kheemna hong thuaksak kei in,’ ci-in na ngen un,” a ci hi. Zeisu in, “Note khatpeuh in lawm nei a, zankim lai takin ama innah pai a, ‘Lawm aw, keima lawmte khat hong zin a, kei kiangah hong tung zo hi. Amah ka vak nading bangmah om lo ahih ciangin, khomun pum thum hong leitawisak in,’ a ci hi. A lawmpa in inn sung panin, ‘Kei hong bawlsia kei in. Tu-in kong kikhak zo hi. Ka tate tawh ka lum khin zo uh hi. Kei thoin nang kong pia zo kei ding hi,’ a ci ding hiam? Ke’n kong cih-inah ama lawmpa ahih man-inah, thoin a pia kei zongin, ngen teitei ahih manin thoin a deih teng khempeuh a pia ding hi.” “Khatvei ka cih-inah, ngen un. Na nget uh leh, hong pia ding hi. Zong un, Na zon’ uh leh, na mu ding uh hi. Kongkhak kiu un. Na kiuh uh leh, hong kihon’ ding hi. Bang hang hiam na cih uh leh, a ngente khempeuh in a ngah ding uh hi. A zongte khempeuh in a mu ding uh hi. A kiute khempeuh ading kongkhak a hon’ ding hi. A ta in khomun ngen leh, suang a pia ding, ngasa ngen leh, gul a pia ding, aktui ngen leh, aikam a pia ding note lakah kua a om hiam? Note in mi gilo na hi napi-un na tate uh a hoih na piak uh leh, tua sangin vantungah a om na Pa un a ngen mite Kha Siangtho hong pia zaw ding hilo ahi hiam?” ci-in a gen hi. Zeisu in a pau thei lo dawi a hawlkhia hi. Dawi a paikhiat khit ciangin, a pau thei lopa a pau thei hi. Mihonpite in lamdang a sa uh hi. Ahih hangin mi kimkhat in, “Amah in Beelzebub suangin dawite a hawlkhia hi,” a ci uh hi. Kimkhat in zong ze-et nuamin vantung pan lim a ngen uh hi. Zeisu in amau lungsim ngaihsutna thei-in, “Gam sung mi kilem loin a kikhen gam khempeuh in kisia ding hi. Inn khat zong inn dang tawh kilem loin a kikhen leh, a puk ding hi. Keimah in Beelzebub suangin dawite ka hawlkhia hi, ci-in note’n nong gen man-unah Satan in amah leh amah kilem loin a kikhen leh, ama gam bangci a kip zo ding hiam? Keimah in Beelzebub suangin dawite hawlkhia leng na tate un kua suangin dawite a hawlkhia ding uh hiam? Tua ahih ciangin, amaute in note tungah thukhen dingte ahi uh hi. Ahih hangin, Pasian’ khutme tawh dawite ka hawlkhiat leh, Pasian’ Gam in note kiangah hong tung zo hi. Mi thahat in hiam tawi-in ama inn tualah a cin lai takin ama sumte a bit hi. Ahih hangin amah sangin a hatzaw mi hong pai a, a zawh khit ciangin, amah in a muan a hiamte sut a, a sumte la-in a hawm ding hi. Keimah tawh a kipawl lote in keima langkhat ah a pang hi. Keimah tawh a khawmkhawm lote in a kithehthangsak hi.” “A kihhuai dawi in mi sung pan a paikhiat khit ciangin, mun keuna-ah vakin khawl nading a zong hi. A muh loh ciangin, ‘Ka paikhiatna inn lamah ciahkik ning,’ ci-a a pai leh, a tun’ ciangin tua inn awng a, kiphiat a, kipuah a, om a mu hi. Tua ciangin pai a, amah sangin a gilo zaw dawi sagih va sam a, tua pa sungah a lut uh hi. Tua ahih ciangin, tua pa a pian’ nunung pen in a pian’ masak sangin a sia zaw hi,” a ci hi. Zeisu in tua thu a gen lai takin, mihonpi lak panin numei khat in, “Nang hong paii gil leh na teep nawi in thupha a ngah ding hi,” ci-in a kiko hi. Zeisu in, “Pasian thu za a, a mangte in thupha a ngah zaw ding hi,” ci-in a gen hi. Mihonpite in Zeisu kiangah a kikhop lai takun amah in, “Hih khang mite in mi gilote ahi uh hi. Amau in lim a zon’ uh hangin Jonah lim longal, lim dang amau tungah a kilak kei ding hi. Jonah in Nineveh khuapihte tungah lim ahih bangin, Mihing Tapa in hih khang mite tungah lim ahi ding hi. Khanglam gam kumpinu in thu a khen ciangin tu-a khang mite langkhat ah ding a, amaute a mawhsak ding hi. Bang hang hiam na cih uh leh, amah in Solomon’ lungpilna thu ngai dingin, leimong panin a hong pai hi. Hih lai takah Solomon sangin a lianzaw mi khat a om hi. Thu a khen ni ciangin Nineveh khua mite in tu-a khang mite langkhat ah ding-in a mawhsak ding uh hi. Bang hang hiam na cih uh leh, Jonah in thu a hilh manin amau mawhna a kisikkik uh hi. Hih lai takah Jonah sangin a lianzaw mi khat a om hi.” “Kuamah in mei a vak khit uh ciangin buliahna-ah a koih kei a; seeng zong a khuh kei hi. A lut mite in meivak a muh nadingun kho sangah a vak hi. Na mittang in na pumpi’ meivak ahi hi. Na mit a vak leh, na pumpi zong a vak kim ding hi. Na mit a man’ leh, na pumpi khempeuh zong a mial ding hi. Tua ahih ciangin, na sungah a om khuavak in khuamial ahi hiam, hi lo hiam na en in. Tua ahih ciangin, mun khat beek mial loin, na pumpi a vak leh, meivak’ vang tang in nang khuavak a hong pia bangin, na pumpi in khuavak tawh a kidim ding hi,” a ci hi. Tua thu a gen lai takin Farisaite khat in, Zeisu an vak dingin a sap leh, pai a, an ne dingin a sabuai ah a tu hi. Zeisu in an a nek ma-in a kisil loh Farisaipa in a muh ciangin lamdang a sa hi. Topa in, “No Faraisaite in hai leh dalkuangte a pua lam na silsiang uh hangin, na sung lam uh ah ngongtatna leh gitlohna tawh na kidim uh hi. No mi pilote aw, a pualam a bawlpa in a sunglam zong bawl hilo ahi hiam? Ahih hangin kuang sunglam a om nate mizawngte na pia un. Tua bang na hih uh leh, na khempeuh note mai-ah a siangtho ding hi.” “Farisaite aw, note in gimna na thuak ding uh hi. Bang hang hiam na cih uh leh, leengmasel leh anis leh meh namkim sehsawm suah sehkhat na piak uh hangin, aman thukhenna leh Pasian itna na nusia uh hi. Adangte tang lo tuan loin, hihte zong tan’ ding kilawm hi. Farisaite aw, note in gimna na thuak ding uh hi. Bang hang hiam na cih uh leh, kikhopna inn sungah tokhom sang bel ahi zongin, sumbuk ah zahtakna tawh hopihna ahi zongin na deih uh hi. Note in gimna na thuak ding uh hi. Bang hang hiam na cih uh leh, a kilang lo hankhuk tawh kibang na hi uh hi. A tungah a pai mite in han om ci-in a thei kei uh hi,” ci-in a gen hi. Thukham siate khat in, “Sia aw, tua bang na gen ciangin ko zong na hong taai hi,” a cih ciangin, Zeisu in, “No thukham siate aw, no zong gimna na thuak ding uh hi. Bang hang hiam na cih uh leh, a puak hak van midangte na suat uh hangin, na khutme khat nangawnun na lawng nuam kei uh hi. Note in gimna na thuak ding uh hi. Bang hang hiam na cih uh leh, na pu na pate un a thah Pasian’ kamsangte’ han na bawl uh a, tua ahih ciangin na pu na pate’ hihsa nate thei-in na awi uh hi. Bang hang hiam na cih uh leh, amaute in Pasian’ kamsangte a that uh a, note in amau han bawlin teci na pang uh hi. Tua ahih ciangin, Pasian’ lungpilna in, ‘Kamsangte leh sawltakte amaute kiangah ka sawl ding hi. Amau in tuate kimkhat that uh a, a bawlsia ding uh hi!’ Tua ahih ciangin Abel’ si akipan biakna tau leh biakna innpi kikal a, kithat Zekhariah’ si dongin, leitung pian’ akipan a kibuasa Pasian’ kamsangte khempeuh’ si in hih khang mite tungah a kingen ding hi. Ahi hi. Ke’n kong cih-inah, tua si tu lai khang mite tungah a kisiik ding hi. No Thukham siate aw, gimna na thuak ding uh hi. Bang hang hiam na cih uh leh, note in lungpilna’ konghon’na na lakhia uh hi. No lah lut loin, a lut nuamte zong na kham uh hi,” a ci hi. Zeisu in tua mun pan a paikhiat lai takin, laitheite leh Farisaite in nakpi-in hansuahin, ama kam pan mat nading a pang uh a, kam tampi a gen nadingin thu tampi a dong kawikawi uh hi. Tua lai takin khat leh khat khe kisik kha dongin mi tul tampite a kikhawm uh hi. Zeisu in a nungzuite kiangah a gen masak pen-inah: “Mi simtatna ahi Farisaite’ silngo kikem un la, na tang un. A kilak lo ding a kisincip bangmah om lo hi. A kithei lo ding a ki-imcip bangmah om lo hi. Tua ahih ciangin, khuamial sungah na gen khempeuh khuavakna-ah kiza ding hi. Inndei sung leh bil sunga na gen thu in innkhum vumah a kiko ding uh hi.” “Ka lawmte aw, note kong hilh-inah, pumpi a thah khit cianga bangmah ahih zo lo nate kihta kei un. Kua mi na kihta ding ci-in kong gen ding hi; pumpi a thah khit ciangin hel khua sungah a khul zo Pa na kihta un. Ahi hi, tua pa na kihta un kong ci hi. Gitta nga in dangkasan peek nih tawh kizuak hilo ahi hiam? Tuate khat beek Pasian in a mangngilh kei hi. Na sam uh zong kisim khin hi. Na kihta kei un; note in gitta tampi sangin na manpha zaw uh hi.” “Ke’n kong cih-inah, mite mai-ah kei hong mang hong ngai khempeuh, Mihing Tapa in Pasian’ vantungmite mai-ah a ngai ding hi. Mite mai-ah hong nialte Pasian’ vantungmite mai-ah kinial ding hi. Mihing Tapa a gensiate in maisak nading thu a ngah ding uh hi. Kha Siangtho a gensiate in maisak nading thu a ngah kei ding uh hi. Amaute in kikhopna inn mai-ah ahi zongin, upate mai-ah ahi zongin, thukhente mai-ah ahi zongin, note hong paipih uh ciangin bangci ka thukkik ding hiam, bang thu ka gen ding hiam ci-in lunghimawh kei un. Bang hang hiam na cih uh leh, na gen ding uh thu tua hun lai takin, Kha Siangtho in hong hilh ding hi,” ci-in a gen hi. Mihonpi lakah mi khat in, “Sia aw, ka u in ka pa’ gamh sum hong hop nadingin thu na pia in,” a cih leh, Zeisu in, “Mipa aw, nomau thukhen ding ahi zongin, sum hawmsak ding ahi zongin kua in kei hong koih hiam?” a ci hi. Tua zawh ciangin Zeisu in, “Note in huaihamna khempeuh kikemin na tang un. Bang hang hiam na cih uh leh, mihing nuntakna in sum hauh nading ahi kei hi,” a ci hi. Thugentehna khat a gen-inah, “Sumhaupa khat in a lo panin an tampi a nei hi. An teng koih nading om lo ahih ciangin, bang ka ci hih ding hiam ci-in a lungsim sungah a ngaihsun hi. Hih bangin bawl ning; ka sal ka phel ding a, a lianzaw ka lam ding hi. Tua sal sungah ka an leh ka sum khempeuh ka koih ding hi. Ka kha kiangah, ‘Kha aw, kum tampi zat ding na tampi a kikhol zo hi. Khawl in la, anne tuidawn, nuamsa-in om in, ka ci ding hi,’ a ci hi. Ahih hangin Pasian in, ‘Mi haipa aw, tu nitakin na kha a kila ding hi. Na kholsa nate kua in luah ding hiam?’ a ci hi. Tua mah bangin, ama ading sum a khol hangin, Pasian mai-ah a zawng mi in tua pa tawh kibang ahi hi,” a ci hi. Khatvei Zeisu in, “Tua ahih ciangin note kiangah kong gen-inah, bang ka ne ding hiam ci-in na nuntak nading uh lunghimawh kei un. Bang ka silh ding hiam ci-in na pumpi ading uh lunghimawh kei un. Bang hang hiam na cih uh leh, an sangin nuntakna a lianzaw hi. Puan sangin pumpi a lianzaw hi. Va-akte na lungngai un. Amaute in khaici tuh lo, a at kei uh hi. Beem ahi zongin, saal ahi zongin a nei kei uh hi. Ahih hangin Pasian in tuate a vak hi. Vasate sangin note in bangzahvei a manpha zaw na hi uh hiam? A lunghihmawh manin na tun san’na uh tong khat bek a khangsak thei note lakah kua a om hiam? Tua ahih ciangin, a neupen thu nangawn na hih zawh kei uh leh, adangte ading bang hang lunghimawh na hi uh hiam? Unok kungte in bangci khang thei ahi uh hiam ci-in na lungngai un. Amaute in na lah sem lo, khau lah kheek lo uh hi. Ahih hangin Solomon nangawn in a minthan’na puan a silh lai takin, tua unok khat bangin kizeem lo hi ci-in kong gen hi. Upna neute aw, tuni-in om a, zing ciangin meikhuk ah kikhul thei lopate Pasian in puan silhsak ahih ciangin, tua tham loin note zong puan hong silhsak ding hilo ahi hiam? Bang ka ne ding hiam, bang ka dawn ding hiam ci-in na ngaihsun kei un. Upkhialh lungsim nei kei un. Bang hang hiam na cih uh leh, leitung mipawlte in hih nate khempeuh a zong uh hi. Note ahih leh, na Pa un tua nate khempeuh na sap uh ahih lam a thei hi. Ama Gam na zong masa un. Na zon’ uh leh tua nate khempeuh zong hong kipia thuah ding hi.” “Tuu honno aw, na lau kei un. Bang hang hiam na cih uh leh, na Pa un note kiangah Gam a hong pia nuam hi. Na neihsa teng zuak un la, hehpihna na pia un. A lui thei lo dangka-ip na bawl un. Gutate’n naih zo lo a, nget in a suksiat theih lohna vantungah a bei thei lo sum na khol un. Bang hang hiam na cih uh leh, na sum kholna munah na lungsim uh zong a om ding hi.” “Note in na kawng uh gak un la, meivak vaksa-in na om un. A topa in mo la lawm an vakna pan hong ciah a, kong a kiuh ciangin thakhatin ama ading kong hon’ thei ding a lamente tawh kibangin na om un. Topa hong ciah ciangin, ngakin a om nasemte in thupha a ngah ding uh hi. Ke’n aman takpi kong cih-inah, topa in a kawng gakin tua naseemte an ne dingin tusak a, hong pai-in amaute a vak ding hi. Zankim lai tak ahi zongin, khuavak dek lai tak ahi zongin, topa hong ciah ciangin tua banga om a muh nasemte in thupha a ngah ding uh hi. Ahih hangin gutate hong pai ding hun, inn neipa in theikhol leh, ama inn a suksiat loh nadingin a pang ding hi ci-in na thei ta un. Note in zong kigingkhol un. Bang hang hiam na cih uh leh, na ngaihsut loh uh hun lai takin, Mihing Tapa a hong pai ding hi,” a ci hi. Piter in, “Topa aw, hih thugentehna ko bek hong hilh na hi hiam? Ahih kei leh, mi khempeuh na hilh hiam?” ci-in a dong hi. Topa in, “A topa in a hun a tun’ ciangin, a innkuanpihte’ annek tuidawn a hawmsak dinga a koih, a diktat a lungpil nasempa kua ahi hiam? A topa hong ciah ciangin, tua banga gamta-a a om a muh nasempa in thupha a ngah ding hi. Ke’n aman takpi kong cih-inah, ama topa in a sum khempeuh tua nasempa a uksak ding hi. Ahi zongin tua nasempa in, “Ka topa hong pai hak ding hi,” ci-in a lungsim sungah ngaihsun a, nasem pasalte leh nasem numeite satgawp a, anne tuidawnin, zu kham an khamin; a lamet loh ni leh a theih loh kalin a topa hong tung ding a, tua nasempa vua-in, a diktat lote tawh a omkhawm sak ding hi.” “Nasempa in ama topa’ deihna thei napi-in kiging khol lo a, a topa’ deihna bangin na sem kei leh, nakpi satna a thuak ding hi. A topa’ deihna thei lo a, sat nading a kilawm a gamta nasempa in tawmno satna a thuak ding hi. Hehpihna tampi a ngahte tung panin tampi kingen ding hi. Amaute in mi khatpeuh mah tampi a piak leh, tua mi kiang pan na tampi a ngen kik ding uh hi.” “Leitungah mei kuangsak dingin hong pai ka hi hi. Tua mei tu-in kihal leh, bang ka deih lai ding hiam? Ahih hangin, baptaizna khat thuak ding ka nei hi. Tua baptaizna ka thuak matengin ka lungkim lo ding hi. Leitungah kilemna pia dingin hong pai hi, ci-in na um uh hiam? Ahi kei hi. Kikhenna pia dingin hong pai ka hi hi. Bang hang hiam na cih uh leh, tu-a kipanin innkuanpih nga a om sung pan nih pawlkhat, thum pawlkhat in a kikhen ding uh hi. Pa leh tapa, tapa leh pa, nu leh tanu, tanu leh nu, teeknu leh monu, monu leh teeknu, khat leh khat a kikhen tek ding uh hi,” ci-in thu a hilh hi. Zeisu in mihonpite kiangah a cihna in, “Note in ni tumna lamah meii kai khat na muh uh ciangin, ‘Guah hong zu ding hi,” thakhatin na ci uh hi. Na cih uh mah bangin ahi thei hi. Khanglam pan huih hong nung na muh uh ciangin, ‘Ni hong sa ding hi,’ na ci uh hi. Na cih uh mah bangin ahi thei hi. Mi simtatte aw, note in van leh lei maitang na khen thei uh hi. Tu lai tak hun bang hangin khen thei lo na hi uh hiam?” “Note in zong bang hangin thu khatpeuh aman hiam, man lo hiam ci-in khen thei lo na hi uh hiam? Na kitotpih pa tawh thukhen mangpa kiangah na paikhop lai takin, kilem dingin na hahkat in. Tua ahih kei leh, amah in thukhen mangpa kiangah hong kai ding hi. Thukhen mangpa in palikte kiangah hong pia ding a, palikte in thong sungah hong khum ding uh hi. Na liau ding dangkasan na piak khit matengin, thong sung pan na paikhia thei kei ding hi,” a ci hi. Tua lai takin mi kimkhat hong pai-in Pilat mangpa in Galile mite’ sisan amau pasian biakna sa tawh a hel gawpna thu Zeisu kiangah a gen uh hi. Zeisu in, “Tua bang a thuak Galile mite in Galile midangte khempeuh sangin mawhna a hauh zawk uh um na hi uh hiam? Ahi kei hi, kong ci hi. Note in zong na mawhna uh na kisikkik kei uh leh, tua mah bangin na kisia khin ding uh hi. Tua tham loin Siloam inn sangpi puk a, a delhlup mi sawm leh giatte in Jerusalem khua sungah a om mi khempeuhte sangin mawhna a hauh zawk uh um na hi uh hiam? Ahi kei hi, kong ci hi. Note in zong na mawhna na kisikkik kei uh leh, tua mah bangin na kisia khin ding uh hi,” a ci hi. Zeisu in hih thugentehna a gen-inah, “Mi khat in a lo lai-ah theikung khat a suan hi. Theigah zong dingin tua kung kiangah a pai hangin, gah a om kei hi. “Topa in lo nasempa kiangah, ‘En in, kum thum tua theikung’ gah zong dingin kong pai hangin ka mu kei hi. Na phuk in. Bang hangin lei a nainawngsak hiam?’ ci-in thu a pia hi. Lo nasempa in, ‘Topa aw, tukum hici koih phot dih in. Keimah in a phung kimkot ah tovungin, eklei ka sung ding hi. Tu nung ciangin gah hong gah leh, a hoih hi. Ahih kei leh na phuk ding hi,’ a ci hi,” ci-in a gen hi. Nipi ni khatin Zeisu in kikhopna inn sungah thu a hilh hi. Tua lai-ah kum sawm leh kum giat a cina numei khat a om hi. Ama nung kulgawp a, a pum neukha beek a kizan thei kei hi. Zeisu in tua numei a muh ciangin sam a, “Numei aw, nang na cinatna pan hong kikhah ta hi,” a cih khit ciangin a tungah a khut a ngak leh, thakhatin a pumpi tang a, Pasian’ min a phat hi. Zeisu in Nipi ni-in cina a damsak man-inah kikhopna inn ukpa heh a, mihonpite kiangah, “Nasep nadingin ni guk a om hi. Tua nite sungin hong pai un la, cidamna na ngah ding uh hi. Nipi ni-in hong pai kei un,” ci-in a gen hi. Ahih hangin Topa in, “Mi simtatte aw, no na vekpi-un Nipi ni-in na bawng ahi zongin, na la ahi zongin, buk sung pan khahkhia-in tui ne dingin paipih hilo na hi uh hiam? Kum sawm leh kum giat Satan in a hencip Abraham’ tanu hih numei in Nipi ni-in kikhah tuak hilo ahi hiam?” ci-in a gen hi. Zeisu in hih thu a gen ciangin, a galte a vekpi-un a zum uh hi. Mihonpite khempeuh in ama bawlna pha hangin a nuam uh hi. Zeisu in, “Pasian’ Gam in bang tawh kibang ahi hiam? Bang tawh ka genteh ding hiam? Mi khat in huanah a cin ankam tang tawh kibang hi. Ankam tang khangin kung suak a, vana vasate in a hiangah a tuang thei uh hi,” a ci hi. Khatvei Zeisu in, “Pasian’ Gam in bang tawh ka genteh ding hiam? Numei khat in buhneel seeng thum a pawm khit mateng a sawh silngo tawh kibang hi,” a ci hi. Zeisu in khuapi leh khuaneu ah pai kawikawi a, thu hilhin Jerusalem khuapi zuanin a zin hi. Mi khat in, “Topa aw, gupna ngahte tawm ding ahi uh hiam?” ci-in a dong hi. Zeisu in, “Kong kawciik ah na lut zawh nadingun hahkat un. Bang hang hiam na cih uh leh, tampi in a lut nop ding uh hangin a lut zo kei ding uh hi, kong ci hi. Inn neipa tho a, kongkhak a khak khit ciangin, inn pua lamah ding-in kong na kiu uh a, ‘Topa aw, kong hong hon’ in,’ na cih uh hangin topa in, ‘Note kuami na hi uh hiam ke’n kong thei kei hi,’ hong ci ding hi. Tua lai takin note in, ‘Nang tawh an i ne tui i dawn khawm zo hi. Ko khua lamzingte ah thu na hilh ngei hi,’ ci-in na gen uh hangin, topa in, ‘Note kuami na hi uh hiam, ke’n kong thei kei hi. Mawhna ahih te aw, kei kiang pan paikhia un kong ci hi,’ ci-in hong gen ding hi. Abraham, Isaak leh Jakob-te akipan, Pasian’ kamsangte khempeuh in Pasian’ Gam sungah a om na muh uh ciangin, note in hawlkhiatna na thuak ding uh a, kahna leh hagawina om ding hi. Ni suahna lam leh ni tumna lam pan, khang lam leh sak lam panin amaute hong pai ding uh a, Pasian’ Gam sungah a tu ding uh hi. A nunung kim khatte in a masa ding uh hi.” a ci hi. Tua lai takin Farisaite kimkhat hong pai uh a, “Paikhia in la, tai in. Herod in nang hong that nuam hi,” a ci uh hi. Zeisu in, “Pai un la, ‘Tuni leh zingsang ciangin dawi ka hawlkhia ding a, cinatna ka damsak ding a, ni thum ni-in ka kikhin ding hi,’ ci-in tua ngia kiangah na hilh un. Ahih hangin tuni, zing ciang leh thai ciangin ka pai ding hi. Bang hang hiam na cih uh leh, kamsangpa in Jeursalem khua sim loh mun dangah a si thei kei ding hi.” “Pasian’ kamsangte that a, na kiangah hong kisawlte zong suang tawh a deeng Jerusalem, Jerusalem khuapi aw, akpi in a nongeekte a kha nuai-ah a khop bangin, na tate tamveipi ka khawm nuam zo a; nang na ut kei hi. En in, na inn in mi om lo gam simthamin kinusia ding hi. Ke’n kong cih-inah: ‘Pasian’ min tawh hong paipa in thupha ngah ta hen,’ na cih matengin kei nong mu kei ding hi,” a ci hi. Nipi ni khatvei Zeisu in Farisaite upa khat’ inn sungah an ne dinga a lut ciangin, amaute in amah a en uh hi. Tuipuak natna vei khat in ama mai-ah a om hi. Zeisu in, “Nipi ni-in cinatna damsak tuak ahi hiam, damsak tuak lo ahi hiam?” ci-in thukham siate leh Farisaite kiangah a dot ciangin pau loin a om uh hi. Tua ciangin, Zeisu in tua pa a damsak khit ciangin a paikhiasak hi. Zeisu in, “Mi khat in la ahi zongin, bawng ahi zongin nei a, Nipi ni-in leihawm sungah kia leh, thakhatin a lakhia lo ding note lakah kua ahi hiam?” ci-in a dot ciangin, amau in a dawng kik thei kei uh hi. A kisamte in tokhom sangbel a teel uh Zeisu in a muh ciangin, amaute kiangah thugentehna a hilh-inah, “Mi khatpeuh in mo la lawmvakna-ah note hong sap ciangin, tokhom a sang belna-ah na tu kei un. Tua bangin na tut leh, nangmah sangin a lianzaw khat kisam kha a; hong sampa leh amah hong pai-in, ‘Hih pa ading omna na awn in,’ hong ci ding hi. Tua ciangin zumna tawh a niampen munah na tu ding hi. Mi khatpeuh in hong sap ciangin pai in la, omna niam ah na tu in. Nang hong sampa hong pai ciangin, ‘Lawm aw, a sangah na tuto in,’ hong ci ding hi. Tua lai takin, nang tawh an a ne khawm mi khempeuhte mai-ah minthan’na na ngah ding hi. Bang hang hiam na cih uh leh, ama pumpi a phat mi khempeuh in niamkhiatna a ngah ding uh hi. A kiniamkhiat mi in minphatna a ngah ding uh hi,” a ci hi. A sampa kiangah Zeisu in, “Sun an ahi zongin, nitak an ahi zongin na vaak ciangin, na lawmte ahi zongin, na u na nau ahi zongin, na beh na phung ahi zongin, sumhau na inn veengte ahi zongin na sam kei in. Tua bangin na sap leh, amaute in nang hong sam kikin, nang hong thuk ding uh hi. Pawi na kham ciangin mizawngte, mipoite, khebaite leh mittawte na sam in. Amaute in nang hong thukkik nading bangmah nei lo uh ahih ciangin, thupha na ngah ding hi. Bang hang hiam na cih uh leh, midikte’ thawhkik ni ciangin nang hong kithukkik ding hi,” a ci hi. Zeisu tawh an a nekhawm mi khat in tua thu a zak ciangin, “Pasian’ Gam sungah an a nei dingte in thupha ngah ding hi,” a cih leh, Zeisu in, “Mi khat in pawipi kham a, mi tampi a sam hi. An nek a hun ciangin, ‘Hong pai un. Tu-in na khempeuh a baihsa-in om hi,’ ci-in a khohsate kiangah gen dingin a nasempa a sawl hi. Amaute khempeuh in kithutuakin kam a zong uh hi. A masa pen in, ‘Lo ciing khat ka lei a, pai-in ka va en ding hi. Kei hong maisak in,’ ci-in a ngen hi. Khat in, ‘Ke’n bawng kap nga ka nei zo hi. Tel-et dingin ka va pai ding hi. Kei hong maisak in,’ ci-in thu a ngen hi. Khat leuleu in, ‘Ke’n zi ka pi zo hi. Tua ahih ciangin kong hawh man kei ding hi,’ a ci hi. Nasempa ciah a, tua thu khempeuh a topa a zasak hi. Tua lai takin inn teekpa heh a, “Khua sung lamlian ah ahi zongin, lamneu ah ahi zongin pai in la, mizawngte, mipoite, mittawte, khebaite hong tumpih in,’ ci-in a nasempa sawl hi. A nasempa in, ‘Topa aw, na cih mah bangin ka sap hangin omna a awng lai hi,’ a ci hi. A topa in, ‘Ka inn a dim nadingin lampi leh lo lamah pai in la, amaute zawhthawhna tawh hong tumsak in. Ke’n kong cih-inah, a kikhosate ahih uh leh, khat beek in ka an a ciam kei ding hi,’ ci-in a nasempa thu a pia hi,” ci-in a gen hi. Tua lai takin mihonpite in Zeisu tawh a paikhawm uh hi. Amah kihei a, “Kei kiangah hong pai nuamte in a nute, a pate, a zite, a tate, a sanggampate, a sanggamnute ahi zongin, tua tham loin ama nuntakna nangawn a muhdah kei leh, keima nungzui a suak zo kei ding hi. A singlamteh pua a, ka nung hong zui lote in keima nungzui a suak zo kei ding hi. Bang hang hiam na cih uh leh, mi khat in inn sangpi a lam nop leh, a zawhzawh nading dangka a nei hiam ci-in a masa-in tu-in, a sim phot lo note lakah kua om ahi hiam? Ahih kei leh, a khuam a phuh khit ciangin, inn a zop zawh kei leh, a mu mi khempeuh in “Hih pa in inn lam ding a kipat khit ciangin a zom zo kei hi,’ ci-in amah a ko ding uh hi. Ahih kei leh, kumpi khat in adang kumpipa tawh kido dingin a paikhiat ciangin, then nih tawh hong kuante then khat tawh nang zo ding hiam ci-in a masa-in tu-a lungngai lo kumpi om ding hiam? A zawh kei ding leh, adang kumpipa gamla-ah a om lai takin upa sawl a, gal kilem nading thu a ngen ding hi. Tua mah bangin note lakah mi khatpeuh in a neihsa khempeuh a nusiat kei leh, ka nungzui a suak zo kei ding hi.” “Tua ahih ciangin ci apha hi. Ahih hangin a alna a man’ leh, bangci a al kik ding hiam? Lei ading ahi zongin, eekkholna ading ahi zongin apha kei hi. Mite in pua lamah a paikhia uh hi. Zak nading bil a nei teng in na za ta un!” a ci hi. Tua lai takin siahdongte leh migilote khempeuh in Zeisu’ thu ngai dingin a kiangah a nai uh hi. Farisaite leh laitheite in, “Hihpa in migilote ngai a, amau tawh an a nekhawm hi,’ ci-in a ko uh hi. Tua lai takin Zeisu in hih thugentehna a gen-inah, “Mi khat in tuu zakhat nei a, tuu khat a man’sak leh, tuu sawmkua leh kua gam lakah nusia-in a mang tuu khat a muh matengin a zong lo ding note lakah kua ahi hiam? A muh kik ciangin lungdamin a liangko ah pua a, inn a tun’ ciangin, a lawmte leh a inn veengte sam a, ‘Hong lungdampih ta un. Bang hang hiam na cih uh leh, ka man’suahsa tuu ka mukik zo hi,’ a ci hi. Ke’n kong cih-inah, tua bangin vantungah kisikkikna kisam a kisa lo sawmkua leh kuate sangin, mawhna a kisik migilo khat tungah nuamna a lianzaw hi.” “Lam khat panin, numei khat in dangka sawm nei a, khat a man’suah leh’ meivak vakin a muh matengin a inn phiatin a zong kawikawi lo ding kua ahi hiam? A muhkik ciangin a lawmte leh a inn veengte sam a, ‘Hong lungdampih ta un. Bang hang hiam na cih uh leh, ka man’suahsa dangka ka mukik zo hi,’ a ci hi. Ke’n kong cih-inah, tua mah bangin a kisikkik mawhneipa khat hangin Pasian’ vantungmite’ omna munah nuamna a om ding hi,” a ci hi. Khatvei Zeisu in, “Mi khat in tapa nih a nei hi. A taneu in a pa kiangah va pai a, ‘Pa aw, ka ngah dinga kilawm luahna sum hong pia in,’ ci-in a ngen hi. A pa in a tate tungah a sum hawmsak hi. Tua nung ciangin sawtvei kihal loin a taneu in ama sum khempeuh khawm a, gamlapi gamah pai-in tua santak ah noptatna lamsang uang lua ahih ciangin, a sum teng a zang khin hi. A sum khempeuh a beikhit ciangin tua gamah nakpi-in kial tung a, amah in nakpi a zawng hi. Tua lai takin amah pai-in tua gam mi khat beel a, vok cing dingin a topa in lo lamah a sawl hi. Amah in vok an nek begapte nangawn duhgawhin a nekpih nuam hi. Ahih hangin kuamah in an a pia kei hi. A lungngaih kik ciangin, ‘Ka pa’ inn sungah nasemte khamval bangzah tak a om hiam! Kei ka hih leh hih gamah gilkialin puksi dek takin ka om hi. Kei thoin ciah ning! Ka pa kiangah, ‘Pa aw, Pasian tung leh nangma mai-ah ka khial zo hi. Tu-a kipanin na ta kicih nadingin ka kilawm kei hi. Nangma nasemte khat mah bangin hong koih in, ka ci ding hi,’ a ci hi. Tua lai takin tho a, a pa kiangah va ciah hi. Ahih hangin inn pan gamlapi-ah a om lai takin a pa in mu a, hehpihhuai sa-in delh meengmeeng a, a ta ngawngkawi-in a nam hi. A ta in, ‘Pa aw, Pasian tung leh nangma mai-ah ka khial zo hi. Tu-a kipanin na ta kicih nadingin ka kilawm kei hi,’ a ci hi. Ahih hangin a pa in, ‘Puan hoih bel hong la meengmeeng un la, silhsak un. Ama khut ah zungbuhte hong butsak un. Khedap zong bulhsak un. Bawngno a thau hong paipihin go un la, an ne-in nuamsa ni. Bang hang hiam na cih uh leh, a sisa ka tapa a nungta kik hi. A mangsa ahih hangin tu-in kimu kik hi,’ ci-in a nasemte a sawl hi. Amaute in lungdamin pawi a kham uh hi.” “A tapa lianzaw in lo kuanin a om hi. Amah hong ciah a, inn a naih ciangin lasakna leh laamna hu ging a za hi. Nasemte khat sam a, ‘Hih a ging bang ahi hiam?’ ci-in a dong hi. Nasempa in, ‘Na naupa hong ciah zo hi. Cidamin na pa in mu kik ahih ciangin bawngno thau a go zo hi,’ ci-in a gen hi. Ahih hangin amah heh a, inn sungah a lut nuam kei hi. A pa pusuakin a zol hi. A ta in, ‘Hih tanvei, kum sawtpi nangma na ka sem zo hi. Nangma thukham khat beek ka khial kei hi. Ahih hangin ka lawmte tawh nopna ka bawl nadingin keelno khat zong khatvei beek nong pia ngei kei hi. Ahih hangin numei gilote tawh kikhawla na sum na pai a mangsak, na tapa hong tun’ ciangin ama ading bawngno thau na gawhsak hi,’ a ci hi. A pa in, ‘Ta aw, keimah tawh na om tawntung a, ka neih ka lam khempeuh nangma neih nangma lam ahi hi. Ahih hangin, na nau ahih leh tuma-in a si hi, tu-in a nungta kik hi. Tuma-in a mang hi, tu-in a kimu kik ahih man-inah nopna leh lungdamna bawl tuak hi,’ ci-in a gen hi,” ci-in a hilh hi. Khatvei Zeisu in a nungzuite kiangah, “Sumhaupa khat in sumkempa khat a nei hi. Tua sumkempa in a topa sum a thangbawl thu midangte in topa kiangah a ko uh hi. A topa in sumkempa sam a, ‘Nang thu ka zak teng bangci thu ahi hiam? Na sumkep ciamtehna lai hong pia in. Bang hang hiam na cih leh, sumkep na nasem nawn kei ding hi,’ a ci hi. Sumkempa in, ‘Tu-in ka topa in sumkep za panin hong kiasak zo ahih ciangin, bang ka ci hih ding hiam? Lo laih nading tha ka nei kei hi. Khutdawh ngen dingin ka maizum hi. Sumkepna za hong kiatsak khit ciangin, midangte in amau innah hong tun’sak nadingun bang ka ci hih ding hiam ka thei ta hi,’ ci-in a ngaihsun hi. Tua khit ciangin a topa’ sum bate a vekpi-un sam a, ‘Ka topa kiangah leiba bangzah loh ding a om hiam?’ ci-in a masa penpa a dong hi. Amah in, ‘Sathau langva phel zakhat ka ba hi,’ ci hi. Sumkempa in, ‘Na kiciamna lai la in la, tu-in sawmnga at meegmeeng in,’ a ci hi. Midang khat kiangah, ‘Nang in bangzah na ba hiam” ci-in a dot ciangin amah in, ‘Mangbuh seeng zakhat ka ba hi,” a ci hi. Sumkempa in, ‘Na kiciamna lai la in la, sawmgiat na at ding hi,’ a ci hi. Thuman lo sumkempa in pilna tawh ahih ciangin a topa in a phat hi. Bang hang hiam na cih uh leh, leitung’ tate in amau khang lakah khuavak’ tate sangin a pil zaw uh hi. Ke’n kong cih-inah, aman lo sum tawh lawmte na ngah ding uh hi. Tua hi leh, tua sumte a bei ciangin a om tawntung buk sungah amaute in a hong tungsak ding uh hi.” “Thu neute tungah a diktat mi in, thu liante tungah a diktat ding hi. Thu neute tungah a diktat lo mi in thu liante tungah a diktat kei ding hi. Tua ahih ciangin leitunga a naman lo sum tungah na diktat kei uh leh, sum taktak kua in no hong kemsak ding hiam? Midangte’ sum tungah na diktat kei uh leh, kua in note sum hong kemsak ding hiam? To nih’ na a sem khawm zo nasempa a om kei hi. Bang hang hiam na cih uh leh, a tote khat mudahin khat a it ding hi. Khat beelin khat a simmawh ding hi. Note in Pasian’ na leh leitung sum na nasem khawm zo kei ding uh hi,” ci-in a gen hi. Dangka a deihgawh Farisaite in hih thu khempeuh a zak uh ciangin Zeisu a zahko uh hi. Zeisu in, “Note in mite mai-ah phatna na lak nuam uh hi. Ahih hangin Pasian in note lungsim uh a thei hi. Bang hang hiam na cih uh leh, mite phatna in Pasian mai-ah kihhuaina ahi hi.” ‘Johan hong pai dongin Pasian’ Thukham leh Pasian’ kamsangte thu akipanin Pasian’ Gam Lungdamna Thu kihilh a, mi khempeuh in tua gam sungah zawhthawh bawlin a lut nuam uh hi. Ahih hangin Pasian’ Thukham neupen a kipaihkhiat ding sangin, van leh lei a man’than nading a baihzaw ding hi.” “A zi ma-a numei dang tawh a kiteengte in numei tawh a mawh hi. Pasal tawh a kikhensa numei a teen’pihte in numei tawh a mawh hi.” “Nidang lai-inah sumhaupa khat a om hi. Tua pa in puansan leh saihadial puan silhin ni simin nuamin an pha bel ne-in a om hi. Lazaras kici mizawng khat in a pumtangin meima vei a; sumhaupa’ kongbiang kiangah, a sabuai tung pan an neng kiate a ngen hi. Uite in zong pai a, a meimate a liak uh hi. Tua nung ciangin mizawngpa si a, vantungmite in Abraham’ ang ah a pua uh hi. Sumhaupa zong si a, a kivui hi. Meikuang sungah gimna nakpi a thuak lai takin a khuadak leh, Abraham leh Abraham’ ang ah Lazaras a om gamlapi panin a gal muh hi. ‘Pa Abraham aw, kei hong hehpih in, Lazaras in a khutme dawn tui ah diah hen la, ka lei hong votsak nadingin ka kiangah hong sawl in. Bang hang hiam na cih leh, hih meikuang sungah gimna nakpi ka thuak hi,’ ci-in a kiko hi. Abraham in, ‘Ka ta aw, nang na nuntak lai-in nopsakna na ngah a, tua mah bangin Lazaras in zong a pha lo nate ngah hi ci-in na ngaihsun kik in. Tu-in ahih leh, amah in nopna a ngah kik hi. Nang na hih leh, gimna na thuak hi. Tua tham loin nang leh ko kikalah a thuk mahmah guam khat a om hi. Tua ahih ciangin hih santak panin nangma kiangah a galkah nuamte in, a galkah zo kei uh hi. Tua santak pan ko kiangah hong galkah nuamte in zong hong galkah zo kei uh hi,’ a ci hi. Sumhaupa in, ‘Pa aw, tua bang ahih leh, keimah in sanggam nga ka nei hi. Amaute in hih gimna sungah a tun’ loh nading thu a hilh dingin ka pa’ innah Lazaras nong sawlsak nadingin kong ngen hi,’ a ci hi. Abraham in, ‘Amaute in Moses leh Pasian’ kamsangte a nei uh hi. Tuate thu ngai ta hen,’ a ci hi. Sumhaupa in, ‘Hi kei, pa Abraham aw, mi sisa khat hong thokikin amaute kiangah a pai leh, amaute in mawhna a kisikkik ding uh hi,’ a ci hi. Abraham in, ‘Tuate in Moses’ thu leh Pasian’ kamsangte’ thu a ngaih kei uh leh, mi khat in sihna pan a hingkik zongin a taksang kei ding uh hi,’ a ci hi,” ci-in Zeisu in a gen hi. Tua lai takin Zeisu in a nungzuite kiangah, “Puk nading om loh na’ng thu a om kei hi. Ahih hangin a puksakpa in gimna a thuak ding hi. Hih naupangte khatpeuh a puksakpa in a ngawngah an-gawina suang khihin tuipi thuk sungah tumcip leh, ama ading a hoih zaw ding hi. Note na kikem un. Na u na nau in a khialh leh, thu hilhin na taai in. A kisik kik leh, a mawhna na maisak in. Ni khatin na tungah sagih vei hong khialh khit ciangin hong kihei a, sagih vei dongin, ‘Ka kisikkik hi,’ hong cih leh, ama khialhna na maisak in,” a ci hi. Sawltakte in, “Komau’ upna khangsak ta in,” ci-in Topa kiangah a gen uh hi. Topa in, “Note in ankamtang khat cia bang upna nei le-uhteh hih theikung kiangah, ‘Zung tawh kibotkhia-in tuipi sungah na po in,’ na cih uh leh, na thu uh a mang ding hi.” “Note in nasem khat nei-in, lo kuanin ahi zongin, tuu cingin ahi zongin hong ciah ciangin ama kiangah, ‘Thakhatin hong pai in la, an nekna sabuai ah hong tu in,’ a ci ding no lakah kua ahi hiam? ‘Keima an nek ding hong bawl in; an ka nek tui ka dawn khit matengin kawnggak in la, an hong pia in. Tua nung ciangin nangin an ne-in tui na dawn ding hi,’ ci-in nasempa kiangah gen ding hilo ahi hiam? Nasempa in a topa thupiak bangin a hih maninah a topa in a phat hiam? Tuamah bangin note in zong thu khempeuh hong piak bang na hih khit uh ciangin, ‘Kote in a pha bawl lo nasemte ka hi uh hi. Nasemte ka hih uh ciangin a kituak bek ka hih zo uh hi,’ na ci ding uh hi,” ci-in a gen hi. Zeisu in Jerusalem khuapi lamah a pai lai takin, Samaria gam leh Galile gam a paisuak hi. Khua khat sungah a lut lai takin miphak sawm in amah dawn uh a, a gamla pan ding-in, “Topa Zeisu aw, kote hong hehpih in,” ci-in a kiko uh hi. Zeisu in tuate a muh ciangin, “Pai un la, Pasian’ siampi kiangah va kilak un,” ci-in thu a pia hi. Amaute a pai lai takun damna a ngah uh hi. Amaute lakah khat in damna a ngah a theih ciangin pai kik a, aw lianpi tawh Pasian phat a; Zeisu khe kiangah bokin hehpihna a phat hi. Tua pa in Samaria mi ahi hi. Zeisu in, “Mi sawmte in damna ngah hilo ahi hiam? Adang kua teng koiah om ahi uh hiam? Hih mi namdangpa khat sim loh hong paikik a, Pasian a phat kuamah om lo ahi hiam? Nang ding in la, pai in. Na thu upna in nang hong damsak zo hi,” a ci hi. Farisaite in, “Pasian’ Gam in cik ciangin hong tung ding hiam?” ci-in a dot ciangun Zeisu in, “Pasian’ Gam in mittangin kimu loin a hong tung hi. ‘En in, hih san takah om hi; hua san takah om hi,’ a kici thei kei hi. Bang hang hiam na cih uh leh, Pasian’ Gam in note sungah a om hi,” a ci hi. Zeisu in khatvei a nungzuite kiangah, “Note in Mihing Tapa’ hun leh nite khat na muh nop hun uh a hong tung ding hi; ahih hangin na mu kei ding uh hi. Mite in, ‘En un, hih lai takah a om hi. En un, hua lai takah a om hi,’ ci-in note kiangah hong gen uh hangin na paikhia kei un la, amau nung na zui kei un. Bang hang hiam na cih uh leh, khuaphialep in van mongkhat panin phia a, van mongkhat dongin a taan’ mah bangin, Mihing Tapa’ ni ciangin a hong tung ding hi. Ahih hangin a masa-in amah in gimna tampi thuakin, hih khang mite in hong nial ding uh hi. Noah khan’ lai bangin Mihing Tapa’ ni ciangin zong a hong piang ding hi. Noah in teembaw sungah a lut ni dongin mite in an ne tui dawnin, kipi kiteengsakin a om uh a, tuiciin a tun’ ciangin amaute khempeuh kisia uh hi. Tua mah bangin, Lot a khan’ lai takin amaute in an ne tui dawn, sum lei sum zuak, an tuh inn lamin a om uh hi. Ahih hangin Lot in Sodom khua sung pan a taikhiat ni-in, vantung panin mei leh kat guah bangin hong zu a, amaute khempeuh kang gawp hi. Mihing Tapa a kilat ni ciangin tua tawh kibangin a piang ding hi. Tua ni-in inn khum tungah a om mi in inn sunga a sum koih la dingin kumsuk kei hen. Lo lai-ah a omte in tua mah bangin ciahkik kei hen. Lot’ zi na lungngai un. Ama nuntakna a gum nuam peuhmah in nuntakna a mangthangsak ding hi. A nuntakna a mangthangsak peuhmah in nuntakna a gum ding hi. Ke’n kong cih-inah, tua zanin lupna tungah a omkhawm mi nih in, khat kila-in khat kinusia ding hi. An gawi khawm numei nih in khat kila-in khat kinusia ding hi; lo lai-a nasem khawm mi khat kila-in khat kinusia ding hi,” ci-in thu a hilh hi. Amaute in, “Topa aw, koi lai takah tua bangin a piang ding hiam?” ci-in a dot uh ciangin, Zeisu in, “Sapul omna peuhah musanete zong hong kikhawm ding uh hi,” ci-in a gen hi. Amaute in lungkia loin thu a nget ngitnget nadingun, Zeisu in thugentehna tawh thu a hilh-inah, “Khuapi khat sungah Pasian kihta lo, mi zahtak lo thukhen mangpa khat a om hi. Tua khuapi sungah meigong khat a om hi. Amah in thukhen mangpa kiangah tamveipi pai-in, ‘Keima galte a kituak bekin thu hong khensak in,’ ci-in a ngen hi. Ahih hangin thukhen mangpa in thu khensak loin sawtpi a om hi. Tua nung ciangin amah in, ‘Keimah in Pasian kihta loin mite ka zahtak loh hangin, hih meigong in kei hong nainawn’sak man-inah ama ading thu ka khen ding hi. Ahih kei leh, hong pai ngitngetin ka lung hong gimsak ding hi,’ ci-in a lungsim sungah a ci hi,” ci-in a gen hi. Topa in, “Aman lo thukhen mangpa’ thugenna na ngaihsun un. Pasian’ teelsate in sun leh zanin ama kiangah kiko-in thu a nget uh leh, amaute’ thu khensak ding hilo ahi hiam? Amaute sawtpi thuak ding ahi hiam? Ke’n kong cih-inah, amaute ading thu a khensak mengmeng ding hi. Ahih hangin Mihing Tapa hong kum ciangin leitungah upna a mu ding hiam?” a ci hi. Amaute kidiksak a, midang khempeuh a zahtak lo mite kiangah, hih thugentehna Zeisu in a gen-inah, “Mi nih in thu ngen dingin biakna innpi ah a paito uh hi. Khat in Farisai hi a, khat pen siahdongpa ahi hi. Farisaipa ding-in amah leh amah kigen-in thungen a, ‘Pasian aw, keimah in mi zawhthawh bawla sut ahi zongin, mi thuman lo gamta ahi zongin, mi’ zi tawh mawh thei mi tham loin, hia siahdongpa tawh kibang ka hi kei hi. Nangma hehpihna ka phat hi. Keimah in ni sagih lakah ni nih an ka tang hi. Ka neih ka lam khempeuh sung pan sehsawm suah sehkhat ka khia hi,’ ci-in kisialin thu a ngen hi. Siahdongpa ahih leh, gamlapi-ah ding-in vantung lam nangawn en ngam loin a awm beengin, ‘Pasian aw, mawhnei keimah hong hehpih in,’ ci-in thu a ngen hi. Ke’n kong cih-inah, hihpa in mawhmaisakna ngahin innah a ciah hi. Farisaipa in ahih leh, mawhmaisakna a ngah kei hi. Bang hang hiam na cih uh leh, amah leh amah a kiphat mi khempeuh in niamkhiatna a ngah ding hi. A kiniamkhiatte in minphatna a ngah ding uh hi,’” a ci hi. Tua lai takin amaute in naupangte a lawn’ nading deihin Zeisu kiangah hong paipih uh hi. Ahih hangin a nungzuite in a muh uh ciangin a kham uh hi. Zeisu in naupangte sam a, “Naupangte ka kiangah hong pai ta hen; na kham kei un. Bang hang hiam na cih uh leh, Pasian’ Gam in tua bangte’ gam ahi hi. Ke’n aman takpi kong cih-inah, naupang bangin Pasian’ Gam a sang lo peuhmah in tua gam sungah a lut kei ding uh hi,” a ci hi. Tua lai takin hausa khat in, “Sia pha aw, tawntung nuntakna ka luah nadingin bang ka gamta ding hiam?” ci-in a dong hi. Zeisu in, “Bang hangin kei mipha hong ci na hi hiam? Pasian sim loh mipha khat beek a om kei hi. Thukhamte na thei hi. Mi’zi tawh na mawh kei in. Mi na that kei in. Mi’ sum na gu kei in. Ahi lo teci na pang kei in. Na nu leh na pa zahtak in,” a ci hi. “Tua thu khempeuh ka neu lai a kipan ka tang zo hi,” a ci hi. Zeisu in tua a zak ciangin, “Na khat na sam lai hi. Na neihsa teng zuak in la, mizawngte kiangah na hawmsak in. Tua hi leh, vantungah sum na nei ding hi.Tua khit ciangin ka nung hong zui in,” a ci hi. Hausapa in tua thu a zak ciangin, nakpi-in a lungkim kei hi. Bang hang hiam i cih leh, sum a hau hi. Zeisu in tua pa a et lai takin, “Sum tam neite adingin Pasian’ Gam sung lut nading a haksa mahmah hi. Sai khat phim vangah a khumhak sangin sumhau mite in Pasian’ Gam sungah lut nading a haksa zaw hi,” a ci hi. Tua thu a zate in, “Tua bang ahih leh, gupna kua in ngah zo ding ahi hiam?” a ci uh hi. Zeisu in, “Mihing in ahih zawh loh nate Pasian in ahih thei hi,” a ci hi. Tua lai takin Piter in, “Kote in ka neih khempeuh uh nusia-in nangmah kong zui uh hi,” a cih ciangin, Zeisu in, “Ke’n aman takpi kong cih-inah, Pasian’ Gam hangin a inn, a zi, a sanggamte, a nu a pa, a tate a nusia leh, tu lai takin a zah tampi ngah a, a hong piang ding hunah tawntung nuntakna a ngah lo ding kuamah a om kei hi,” a ci hi. Tua lai takin Zeisu in sawm-le-nihte sam a, “En un, eite Jerusalem khuapi ah i pai ding hi. Pasian’ kamsangte gelh kholhsa thu khempeuhte in Mihing Tapa tungah a tung ding hi. Bang hang hiam na cih uh leh, Gentailte khut tungah kipia ding a, zahkona, bawlsiatna leh cilphihna a thuak ding hi. Amaute in amah satgawpin, a that ding uh hi. Ni thum ni ciangin a thokik ding hi,” a ci hi. Amaute in hih thu khat beek a thei kei uh hi. Hih thu heem gen ahih ciangin a cihnopna a thei kei uh hi. Zeisu in Jerikho khuapi a naih ciangin, mittaw khat in khutdawh ngenin lam geiah a tu hi. Tua mittawpa in mi tampi lam pai a zak ciangin, “Kuate ahi hiam?” ci-in a dong hi. Amaute in, “Nazareth mi Zeisu hong pai hi,” a ci uh hi. “David’ Tapa, Zeisu aw, hong hehpih in,” ci-in a kiko hi. A mai-a a pai mite in tua pa a tawp nadingin a taai uh hangin, “David’ Tapa aw, kei hong hehpih in,” ci-in a kiko sawnsawn hi. Zeisu ding-in, “Tua pa hong paipih un,” a ci hi. Mittawpa in a kiang a naih ciangin, “Nang ading bang ka bawl ding deih na hi hiam?” ci-in Zeisu in a dot ciangin, “Topa aw, ka mittang khua muh nading ka deih hi,” a ci hi. Zeisu in, “Na mit in khua mu hen. Na upna in hong damsak zo hi,” a ci hi. Amah in thakhatin khua mu thei a, Pasian’ min phatin Zeisu nung a zui hi. Mi khempeuhte in a muh uh ciangin Pasian a phat uh hi. Zeisu Jerikho khuapi sungah lut a, khua sung a paisuak lai takin, Zakkhias kici mi khat a om hi. Amah in siahdongte’ ukpa ahih manin sum a hau hi. Tua pa in Zeisu bang mi ahi hiam ci-in a mu nuam hi. Ahih hangin a tun’ tom mi ahih ciangin mi a tam luat manin a mu thei kei hi. A mai lam tai a, Zeisu en dingin theitheek kung khat tungah a kahto hi. Bang hang hiam i cih leh, tua lampi in Zeisu pai nading lam ahi hi. Zeisu in tua mun a tun’ ciangin ento a, “Zakkhias aw, a manlangin hong kum in. Tuni-in nangma innah kong taam ding hi,” a ci hi. Zakkhias kum mengmeng a, nuam mahmahin Topa a tungsak hi. Tua thu amaute in a muh uh ciangin, “Mawhneipa’ inn sungah a taam hi,” ci-in a zahko uh hi. Zakkhias ding a, “Topa aw, keimah in ka neihsa kimkhat mizawngte ka pia ding hi. Mi khatpeuh na ka lakkhak leh, a zah li-in ka loh kik ding hi,” a ci hi. Zeisu in, “Hih pa in Abraham’ tapa ahih man-inah tuni-in hih inn sungah gupna a tung hi. Bang hang hiam na cih uh leh, Mihing Tapa in a mangthang mite zong ding leh gum dingin hong pai ahi hi,” a ci hi. Tua thu a zak lai takun Jerusalem khuapi tawh kinai tung ta a, Pasian’ Gam a manlangin hong tung ding hi ci-in mite in a up man-unah, thugentehna khat Zeisu in a hilh hi. Tua ahih ciangin amah in, “Mihau khat in gam dang khatah kumpi za ngah ding leh tua khit ciangin a ciahkik dingin a paikhia hi. Amah in a nasemte sawm sam a, sum tawi sawm a pia hi. ‘Ka hong tun’ kik matengin summet na bawl un,’ ci-in thu a pia hi. A gam mite in amah mudah uh a, ‘Hih mi in eite kumpi dingin ka deih kei uh hi,’ ci-in ama kiangah mi a sawl uh hi. Hausapa in a gam a ngah khit ciangin hong ciahkik a, a sum a kepsak nasemte in sum bawlna pan a met bangzah a ngah uh hiam cih a theih nadingin tuate a samsak hi. A masa belpa in a topa va nai a, ‘Topa aw, na dangka tawi khat-in tawi sawm a met kingah zo hi,’ a ci hi. A topa in, ‘Thuman nasempa aw, a pha hi: Nang thu neute tungah diktat na hih maninah khuapi sawm na uk ding hi,’ ci-in a gen hi. A nihna nasempa in va nai a, ‘Topa aw, na sum tawi khat in tawi nga a met kingah zo hi,’ a ci hi. Topa in, ‘Nang in khuapi nga na uk in,’ a ci hi. Adang khat in va nai a, ‘Topa aw, en in. Ka dial ah tunin ka kepsa na sum tawi hiah a om hi. Nang mi haksa na hi hi. Na koih lohna pan na la hi; na vawh lohna-ah na at ahih maninah kong kihta hi,’ a ci hi. A topa in, ‘Nasem gilopa aw, nangma kam sung panin thu kong khen ding hi. Keimah in mi haksa ka hi a, ka koih lohna pan ka lak leh ka vawh lohna-ah ka at hi ci-in na thei hi. Tua ahih ciangin, kong tun’ kik ciangin dangka teng leh a met ka ngah khop nadingin, sum sinpa kiangah ka sum bang hangin pia lo na hiam?’ a ci hi. A kianga dingte kiangah, ‘Sum tawi khat hihpa khut sung pan lakhia un la, tawi sawm neipa na pia un,’ ci-in a gen hi. Amaute in, ‘Topa aw, hihpa in dangka tawi sawm a nei zo hi,’ a ci uh hi. ‘Ke’n kong cih-inah, a neite khempeuh a kipiak beh ding hi. A nei lote kiang pan a neihsa nangawn a kilakhia ding hi. Tua tham loin kei uk ding a ut lo ka galte hong paipih un la, keima mai-ah na that un,’ ci-in thu a pia hi,” a ci hi. Tua thu a gen khit ciangin, Zeisu Jerusalem khuapi-ah pai dingin a pai masa hi. Zeisu in Oliv kici mualah a om Bethfage khua leh Bethani khua a naih ciangin a nungzuite nih sawl a, “Na mai uh ah a om khua-ah pai un. Tua khua-ah na lut uh ciangin, kuama tuan’ ngei lohna khau kikhihsa a, om lano khat thakhatin na mu ding uh hi. Lano khau sut un la, ka kiangah hong paipih ta un. Mi khatpeuh in, “Bang hangin lano khau sut na hi uh hiam?” hong cih leh, ‘Topa in a deih hi,’ na ci un,” ci-in a vaikhak hi. A sawltakte pai uh a, Zeisu cih bangin a mu uh hi. La khau a sut lai takun la neite in, “Bang hangin khau sut na hi uh hiam?” ci-in a dot uh ciangin, “Topa in a deih hi,” a ci uh hi. Amaute in lano Zeisu kiangah paipih uh a, a tungah amau puante a phah khit uh ciangin Zeisu a tuangsak uh hi. Amah a pai lai takin lampi-ah puante a phah uh hi. Jerusalem khua tawh kinai Oliv Mual tung pan a paisukna mun a tun’ lai takun, a nungzuite khempeuh lungdam uh a, a muhsa uh nalamdangte khempeuh hangin nakpi-in Pasian a phat uh hi. “Pasian’ min tawh hong pai Kumpipa in thupha ngah ta hen; Vantungah nopna leh, A sang belna-ah minthan’na om ta hen,” ci-in a kiko uh hi. Mihonpi lakah Farisaite kimkhat in, “Sia aw, na nungzuite na taai in,” a ci uh hi. Zeisu in, “Ke’n kong cih-inah, hih mite a daih uh leh, suangte in a kiko ding uh hi,” a ci hi. Zeisu in a naih ciangin khuapi mu-in kap a, “Nang in tu lai taka nopsakna tawh kipawl nate thei lecin nang ading a pha ding hi. Tu-in ahih leh, na mittang pan a kiseel hi. Bang hang hiam na cih leh, na galte in na kimkot ah kan bawlin hong uumcip a, mun khempeuh panin hong khakcip ding uh hi. Nang akipan na sunga om na tate leitungah a kipuksak ding ni a hong tung ding a; na sunga suang khat tungah suang kiciang khat beek a omsak kei ding uh hi. Bang hang hiam na cih leh, Pasian hong hawhna hun na thei kei hi,” a ci hi. Zeisu biakna innpi sungah a lut ciangin sum zuakte hawlkhia a; “Ka inn in thungetna inn ahi ding hi,” ci-in Lai Siangtho sungah a kigelh hangin, note in guta buluhte omna na suaksak tazen uh hi,” a ci hi. Zeisu in ni simin biakna innpi sungah thu a hilh hi. Ahih hangin siampi liante, laitheite leh miliante in amah thah nading a zong uh hi. Ahih hangin mite in ama thu ngai-in beel uh ahih ciangin amah thah nading thu a mu zo kei uh hi. Ni khat Zeisu in biakna innpi sungah mite thu hilh a, Lungdamna Thu a gen lai takin, siampi liante, laitheite leh upate ama kiangah a pai uh hi. “Hih nate kua thu tawh bawl na hi hiam? Hih thu kua in hong pia ahi hiam?” hong hilh in ci-in a dong uh hi. Zeisu in, “Note zong ke’n kam khat kong dong ding hi. Hong dawng un. Johan’ baptaizna thu koi pan hong piang ahi hiam? Vantung pan hong piang ahi hiam, mi tung pan hong piang ahi hiam?” ci-in a dong hi. Amaute in, “Vantung pan hong piang hi ci leeng, ‘Note in ama thu bang hangin um lo na hi uh hiam?’ ci-in hong dong zel ding hi. ‘Mi tung pan hong piang hi ci leeng mi khempeuhte in suang tawh hong deeng ding uh hi.’ Bang hang hiam i cih leh, amaute in Johan in kamsangpa a sa uh hi,” ci-in khat leh khat a kikum uh hi. Tua khit ciangin, “Koi pan hong piang cih ko ka thei kei uh hi,” ci-in Zeisu kiangah a gen uh ciangin, Zeisu in, “Tua mah bangin hih nate, kua thu tawh ka bawl kong gen kei ding hi,” a ci hi. Tua lai takin Zeisu in hih thugentehna mihonpite kiangah a gen-inah, “Mi khat in lo lai-ah leenggah kungte suan a, lo khote khawhlawhsakin gamdang ah pai a, sawtpi a tam hi. A hun a cin ciangin lo khawhlawhte in leenggah a piak nadingin ama nasemte khat a sawl hi. Tua lo khawhlawhte in a nasempa satin khut guak tawh a ciahsak uh hi. Khatvei nasem dang khat sawl kik a, tua pa zong satin a zahhuaisak khit uh ciangin, khut guak tawh a ciahsak uh hi. Khatvei nasem thumna zong sawl leuleu a, amau in tua pa satgawpin a hawlkhia uh hi. Tua ciangin lo neipa in, ‘Bang ka ci hih ding hiam? Ka it mahmah ka tapa ka sawl ding hi. Amaute in ka tapa a zahtak kha ding uh hi,’ a ci hi. Ahih hangin lo khawhlawhte in a tapa a muh uh ciangin, ‘Hih pa in a inn luah dingpa ahi hi. Luah na’ng teng i ngah theih nadingin amah that ni,’ ci-in khat leh khat a kikum uh hi. Lo neipa’ tapa leenggah lo nawlah paikhiatpihin a that uh hi. Tua ahih ciangin lo neipa in lo khawhlawhte tungah bangci a bawl ding hiam? Amah hong pai-in tua lokhawh lawhte sugawpin, a leenggah lo midangte a cingsak ding hi,” a ci hi. Amaute in hih thu a zak uh ciangin, “Tua bang hi kei hen!” a ci uh hi. Zeisu in amaute a et lai takin, “Tua ahih leh, ‘Inn lamte in a nilkhiat suang in anung ciangin innkiu suang a piang hi,’ ci-in a kigelh thu, bang cihnopna ahi hiam? Hih suang tungah a kiate khempeuh a kitan ding uh hi. A tungah hih suang kia a, a deen’khak peuhmahte in leivui bangin kizan gawp ding hi,” a ci hi. Tua lai takin laitheite leh siampi liante in Zeisu mat dingin a zon’ uh hangin mite a kihta uh hi. Bang hang hiam i cih leh, amau cihna-a hih thugentehna a gen ahih lam a thei uh hi. Tua lai takin amaute in Zeisu ensim uh a, mangpipa’ vaihawmna leh thukhente tungah a piak nadingun, ama kampau tawh mat theih nadingin thusim kante a kiangah a sawl uh hi. Tuate in, “Sia aw, nang in thutak genin thu na hilh a, mi khentuam nei loin Pasian’ lampi a tang takin na hilh hi cih ka thei uh hi. Kote in Kaisar kumpipa kiangah siah piak tuak ahi hiam, piak tuak lo ahi hiam?” ci-in a dong uh hi. Zeisu in amaute khemna a theih ciangin, “Denarias peek khat hong lak un. Kua lim leh kua min ahi hiam?” ci-in a dot ciangin, “Kaisar kumpipa’ lim leh min hi,” a ci uh hi. Zeisu in, “Tua ahih leh Kaisar kumpipa’ sum Kaisar kumpipa na pia un; Pasian’ sum Pasian na pia un,’ a ci hi. Amaute in mite mai-ah hih thu panin a man zo kei uh hi. Zeisu’ dawn’na thu lamdang a sa uh a, pau loin a om uh hi. “Misite’ thawhkikna om lo hi,” a ci Saddusite kimkhat in tua lai takin Zeisu kiangah va pai uh a; “Topa aw, ‘Mi khat in zi nei a, ta nei loin a sih leh, a nau in a zi luah hen la, a u’ khang a man’ loh nadingin kizom ta hen,’ ci-in Moses in eite lai hong pia hi. Tua ahih ciangin, unau sagih a om uh hi. A upa pen in zi nei a, ta nei loin a si hi. A nung ciangin numei zong a si hi. Tua bang ahih leh, thawhkik ni ciangin tua numei in amaute lakah kua pen’ zi ahi ding hiam? Bang hang hiam na cih leh, tua sagihte in tua numei tawh a kiteeng uh hi,” a ci uh hi. Zeisu in, “Tu lai khang mite kiteengin, a kiteen’sak uh hangin, hong tung ding hun leh thawhkikna ngah dinga kilawm, misite lak pana a thokik mite kipi kiteengin a om nawn kei ding uh hi. Amaute cikmah hunin a si thei kei ding uh hi. Bang hang hiam na cih uh leh, amaute in vantungmite tawh kibangin, thawhkikna’ tate ahih manunah Pasian’ tate ahi ding uh hi. Moses in sawlkawm lakah Topa a hopih lai-in ‘Abraham’ Pasian, Isaak’ Pasian, Jakob’ Pasian aw, a cih ciangin misite kithokiksak ding hi cih a lak ahi hi. Pasian in a site’ Pasian hi loin, a nungtate’ Pasian ahi hi. Bang hang hiam na cih uh leh, mi khempeuhte in Pasian ading a nungta uh hi,” a ci hi. Laithei kimkhatte in, “Sia aw, a kituak mahmahin na gen zo hi,” a ci uh hi. A nung ciangin, amaute in thudang a dong ngam nawn kei uh hi. Zeisu in, “Khazih in David’ Ta hi bangci a kici thei hiam? David in: ‘Topa in Na galte na khe nuai-ah ka koih matengin, Ka ziat lamah na tu in, ci-in ka Topa kiangah a ci hi,’ ci-in Late Lai Siangtho sungah a ci hi. Tua ahih ciangin David in, ‘Khazih in Topa hi,’ a cih leh bangci-in ama ta hi thei ding ahi hiam?” ci-in a dong hi. Mi khempeuhte in a thu a ngaih lai takin Zeisu in a nungzuite kiangah, “Laitheite na kikeem un. Amaute in puantual silhin a vak nuam uh hi. Sumbukah zahtakna tawh hopih ahi zongin, pawikhamna sungah tutna phabel ahi zongin a deih uh hi. Amaute in meigongte’ neihsa a ne mang uh a, mawhna a kilat loh nadingin sauveipi thu a ngen uh hi. Tuate in mawhsakna lianzaw a thuak ding uh hi,” a ci hi. Tua lai takin Zeisu in en a, sumhaute in sumkholna sungah sum a khiat uh a mu hi. A zawng meigong khat in dangka pai nih a khiat a muh ciangin, “Ke’n aman takpi kong cih-inah, mi khempeuh lak panin tua numei in tam a khia bel hi. Bang hang hiam na cih uh leh, tua mi khempeuhte in a sumval lak pan a khia uh hi. Tua numei ahih leh, zawng napi-in a kivaak nading khempeuh nangawn a khia hi,” ci-in a gen hi. Mi kimkhat in biakna innpi suangmanpha leh mite piakna tawh kizepna thu a gen uh ciangin, Zeisu in, “Tua na muh uh nate ahih leh, a kiphelkhia lo ding suang khat tungah suang kiciang khat beek a om theih loh ding hun a hong tung ding hi,” a ci hi. Amaute in “Topa aw, tua thute in cikciangin hong tung ding ahi hiam? A pian’ ding hong naih ciangin bang limin a hong kihil ding hiam?” ci-in a dong uh hi. Zeisu in, “Note kuamah in hong kheem zawh loh nadingin na kikem un. Bang hang hiam na cih uh leh, mi tampite in, ‘Kei tua pa ka hi hi. A hun hong tung dektak hi,’ ci-in keima min tawh hong pai ding uh hi. Tua mite na zui kei un. Galdona thu leh gamlumna thu na zak uh ciangin lunghimawh kei un. Bang hang hiam na cih uh leh, tua thute a piang masa ding uh hi. Ahih hangin, a beina a tung nai kei ding hi,” a ci hi. Tua ciangin Zeisu in, “Mi namkhat leh namkhat, gamkhat leh gamkhat hong kido ding uh hi. Ziin nakpi hong liing ding a, mun khat khatah kial leh pul hong tung ding hi. Van panin kihtakhuai nate leh lim lianpite hong kilang ding uh hi. Tua thu khempeuh a pian’ ma-in, keima min hangin amaute in hong man ding uh a, kikhopna inn sung leh thong sungah hong pia ding uh a; kumpite leh mangpite mai-ah hong paipih ding uh a, hong bawlsia ding uh hi. Tuate in note’ teci pan nading ahi hi. Tua ahih ciangin, ‘Bang ka ci thukkik ding hiam?’ ci-in na ngaihsut kholh loh nadingun, na lungsim sung uh ah na ciamteh un. Bang hang hiam na cih uh leh, na galte khempeuh un hong nial theih loh hong sel theih loh nadingin gen theihna kam leh pilna note kong pia ding hi. Na nute na pate, na sanggampate, na behte leh na lawmte nangawn in note hong pia ding uh a, note kimkhat zong hong sisak ding uh hi. Keima min hangin mi khempeuh in note hong mudah ding uh hi. Ahih hangin na sam uh zang khat beek a kisia kei ding hi. Lung kipna tawh nuntakna na ngah ding uh hi.” “Jerusalem khuapi galkapte in a uumcip na muh uh ciangin, tua khua siat nading a nai cih na thei ta un. Tua lai takin Judah gamah a omte in mual tungah tai ta hen. Jerusalem khuapi sungah a omte in paikhia ta hen. Gampa lakah a omte in a sungah lut loin om ta hen. Bang hang hiam na cih uh leh, tua ni ciangin a kigelh kholsa khempeuh a tun’ nadingin daanpiak ni ahi ding hi. Tua lai takin naupai numeite leh naungeek nei numeite in gimna a thuak ding uh hi. Bang hang hiam na cih uh leh, hih gamah gimna tung ding a, hih pawlte tungah hehna a tung ding hi. Amaute in tem tawh sihna a thuak ding uh a, gam khempeuh ah salin kipaipihna a thuak ding uh hi. Gentailte’ hun a cin’ matengin, Gentailte in Jerusalem khuapi khe tawh a tuancil ding uh hi.” “Tua lai takin ni, kha leh aksite tungah lim kilang ding a, leitungah mi a pawlpawlte in tuipi lian leh tui kilok ging hangin lungmangin, gimna a thuak ding uh hi. Leitungah a tung ding gimna teng mite in a lamen ding uh a, kihta-in a sibup ding uh hi. Bang hang hiam na cih uh leh, vanah a om vangliatnate a kiliing ding uh hi. Tua lai takin vangliatna leh minthan’na tawh, Mihing Tapa in meii tungah hong kumsuk a mu ding uh hi. Ahih hangin hih thu hong piang a kipat lai takin note suahtakna hun nai zo ta ahih maninah, khuadakin na lutang uh phongto ta un,” ci-in a gen hi. Khatvei Zeisu in thugentehna a hilh-inah, “Theikung akipan kung khempeuh va en un. A tehno na muh uh ciangin khuakhal a nai zo hi ci-in no na thei uh hi. Tua mah bangin, tua thu hong piang na muh uh ciangin, Pasian’ Gam hong nai zo hi ci-in na thei ta un. Ke’n aman takpi kong cih-inah, hih khang mite a beima-in hih thu khempeuh hong piang ding hi. Van leh lei a mangthang ding hi; ka thu ahih leh, a mangthang ngei kei ding hi.” “Note na kikeem ta un. Ahih kei leh, annek tuidawn hih nuntakna leh lungman’na hangin na lungsim uh a gim lai takin, tua Ni in thang kisai bangin note tungah a hong tung ding hi. Tua mah bangin leitungah a teeng mi khempeuh tungah hong tung ding hi. Ahih hangin, note in hong piang ding tua thute khempeuh tawh na kipelh theih nading uh leh, Mihing Tapa mai-ah na din’ theih nadingun a tawntungin thungen un la, na ngak ta un,” ci-in a gen hi. Zeisu in ni simin biakna innpi sungah thu hilh a, nitak simin paikhia a, Oliv kici mualah a giak hi. Zingsangin mi khempeuh in a thu ngai dingin biakna innpi-ah ama kiangah a kikhawm uh hi. Paisan kici silngo om lo khomun pawikham ding a nai zo hi. Siampi liante leh laitheite in Zeisu bangci thatlum ding ci-in a zong uh hi. Bang hang hiam i cih leh, amaute in mite a kihta uh hi. Tua lai takin Satan in sawm-le-nihte lakah khat Iskariot kici Judah sungah a lut hi. Amah siampi liante leh biakna innpi palik mangte kiangah va pai a, amaute khut tungah Zeisu bangci piak theih ding ci-in a vaihawm uh hi. Amaute nuam uh a, “Dangka-in kong guai ding uh hi,” ci-in a kiciam uh hi. Amah in zong mang a, mihonpi a om loh lai takin Topa amaute khut tungah a piak theih nading a zong hi. amau in, “Koi lai takah hong bawlsak le-ung na deih hiam?” ci-in a dong uh hi. Zeisu in, “Khua sungah na tum uh ciangin, tuibeel a pua mi khat tawh na kituak ding uh hi. Tua mi a lutna inn sungah na zui un la, inn neipa kiangah, ‘Sia in, Keimah in ka nungzuite tawh Paisan pawi ka nek nadingin zin tun’na inndei koi lai-ah a om hiam? a ci hi,’ ci-in na gen un. Tua mi in a kibawlsa dei tungnung a lian khat hong lak ding hi. Tua dei sungah na bawl khol un,” ci-in a sawl hi. Amaute pai uh a, Zeisu gen mah bangin a mu uh a; Paisan pawi nek ding a bawl uh hi. A hun a tun’ ciangin Zeisu in a sawltakte tawh a tukhawm hi. Zeisu in, “Ka sih ma-in hih Paisan pawi note tawh nekkhop ka ut mahmah hi. Ke’n kong cih-inah, Pasian’ Gam sungah deihna a kicin’ matengin, hih pawi ka ne nawn kei ding hi,” a ci hi. Tua lai takin Zeisu in hai la a, hehpihna a phat khit ciangin, “Hih hai la un la, note lakah na hawm tek un. Bang hang hiam na cih uh leh, Pasian’ Gam a hong tun’ matengin tu-a kipan, leenggahtui ka dawn nawn kei ding hi,” a ci hi. Amah in khomun la a, hehpihna a phat khit ciangin, khomun balnenin, “Hih khomun in note ading a kipia ka pumpi ahi hi. Kei nong ngaihsut nadingun hih bangin na hih un,” ci-in a nungzuite a pia hi. Tua mah bangin an a nek khit uh ciangin hai la a, “Hih hai in note ading a kibua, kiciamna thak a lak ka si ahi hi. Ahih hangin kei hong lehheekpa’ khut in sabuai tungah keima khut tawh a omkhawm hi. Mihing Tapa in a kisehkhol mah bangin a pai ding hi. Ahih hangin amah a lehheekpa in gimna a thuak ding hi,” a ci hi. A nungzuite in, “Hih ahih ding kua ahi hiam?” ci-in khat leh khat a kidong uh hi. Amaute lakah kua lianbel hiam? ci-in nungzuite khat leh khat a kiseel uh hi. Zeisu in, “Gentaile’ hausate in amau tungah a mang uh a; amau tungah a ukte mi hehpihpa a ci uh hi. Ahih hangin note tua bang na hi kei ding uh hi. Note lakah a lianpen in a neupen bangin om ta hen. A makaipa in nasem bangin om ta hen. Kua lianzaw hiam: sabuai ah tupa lianzaw hiam? Nasempa lianzaw hiam? Sabuai ah a tupa lianzaw hilo ahi hiam? ahih hangin note lakah nasempa mah bangin ka om hi. Gimna ka thuak lai takin, note in kei tawh hong omkhawm mi na hi uh hi. Ka pa in Kumpi Gam khat hong piak mah bangin; note zong keima Gam sungah ka sabuai ah an ne-in tui na dawn theih nadingun note thu kong pia ding hi. Note in thukhen tokhom tungah tu-in, Israel mipawl sawm leh nihte tungah thu na khen ding uh hi,” a ci hi. Zeisu in, “Simon, Simon aw, Satan in buhhum bangin nang hong haih nuam hi. Ahih hangin nangma upna a siat loh nadingin ke’n thu kong ngetsak zo hi. Na kikheel kik khit ciangin ute naute na kipsak in,” a ci hi. Simon in, “Topa aw, thong kiatna ahi zongin, sihna ahi zongin nang tawh ka thuakkhawm ngam ding hi,” a ci hi. Zeisu in, “Piter aw, ke’n kong cih-inah, nangmah in, ‘Ke’n ka thei kei hi,’ ci-in kei thumvei nong nial matengin, tuni-in aak a khuang kei ding hi,” a ci hi. Khatvei Zeisu in, “Dangka-ip, thung-ip, khedapte keng loin note kong sawl lai-in, na sapna uh a om hiam?” ci-in a dot ciangin, “Sapna khat beek a om kei hi,” a ci uh hi. “Tu-in ahih leh, dangka-ip a nei mi in la ta hen. Tua mah bangin thung-ip a nei mi in la ta hen. Namsau a nei lo mi in a puan zuak hen la, namsau lei ta hen. Ke’n kong cih-inah, ‘Amah mawhneite tawh a kisimkhawm ding hi,’ ci-in Lai Siangtho sungah a kigelhna thu in keima tungah hong tung ding hi. Bang hang hiam na cih uh leh, keima thu khempeuh in a tangtung ding hi,” a ci hi. Amaute in, “Topa aw, namsau nih a om hi,” a cih uh ciangin, “Pha hi,” a ci hi. Tua lai takin Zeisu paikhia a, a ngeina bangin Oliv Mual tungah kahto a, a nungzuite in a zui uh hi. Tua mun a tun’ ciangin, “Kheemna tawh na kipelh theih nadingun thu na ngen un,” a cih khit ciangin, a nungzuite tawh suang lot khat tan bang kikhen a, khukdin’in, “Pa aw, na deih leh, hih hai kei tawh hong kipelhsak in. Ahih hangin keima deihna bang hi kei hen; nangma deihna bang hi ta hen,” ci-in thu a ngen hi. Vantung panin vantungmi khat hong pai a, Zeisu’ tha a hatsak hi. Amah gim mahmah ahih ciangin, nakpi-in thungen a, a khua-ul in lei tungah sisan malgol bangin a kia hi. Thu a nget khit ciangin tho a, a nungzuite kiangah a paikik ciangin, amaute dahna tawh ihmu a om uh a mu hi. Amaute kiangah, “Note in bang hangin ihmu na hi uh hiam? Tho un la, kheemna tawh na kipelh theih nadingun thu na ngen un,” a ci hi. Zeisu in a gen lai takin mihonpi hong pai uh a, nungzui sawm-le-nihte lakah khat Judah kici in amai ah a pai hi. Zeisu nam dingin a kiangah a va naih ciangin, Zeisu in, “Judah aw, nang in napna tawh Mihing Tapa na lehhek ding hiam?” ci-in a dong hi. Zeisu kimkot ah a omte in a piang ding thu a theih uh ciangin, “Topa aw, kote in namsau tawh ka sat ding uh hiam?” a ci uh hi. Khat in siampi ukpa’ nasem khat a sat leh, a bil taklam a satkhia hi. Zeisu in, “Tua zah hisak in,” ci-a a bil a khut tawh lawngin a damsak hi. Tua ciangin Zeisu in amah man dinga hong pai siampi liante, biakna inn mangte leh upate kiangah, “Note in galgumat bangin kei man dingin namsau leh molhtumte tawi-in hong pai na hi uh hiam? Keimah in ni simin biakna innpi sungah note tawh ka omkhop lai takin na hong man kei uh hi. Ahih hangin hih hun in note hun leh khuamial’ vangliatna hun ahi hi,” a ci hi. Amaute in Zeisu man uh a, siampi ukpa’ innah a paipih uh hi. Piter in gamla sim kihalin a zui hi. Amaute in inntual lai zangah mei cih uh a, a tutkhawm khit uh ciangin, Piter zong amau lakah a tu hi. Piter mei awi-a om numeino khat in a muh ciangin lim takin en a, “Hih mi in Zeisu tawh a kipawl hi,” a ci hi. Piter in, “Numei aw, tua pa ke’n ka thei kei hi,” ci-in a nial hi. Tua nung a sawt loin midang khat in Piter mu a, “Hua mite khat na hi hi,” a ci hi. Piter in, “Lawm aw, ka hi kei hi,” a ci hi. Tua nung nai khat bang ciangin midang khat in, “Hih mi in Zeisu tawh a kipawl takpi hi. Bang hang hiam na cih uh leh, amah in Galile mi ahi hi,” ci-in uphuaina tawh a ci hi. Piter in, “Lawm aw, nang na cih pen ke’n ka thei kei hi,” a ci hi. A gen lai takin thakhat mahin aak a khuang pah hi. Tua lai takin Topa kihei-in Piter a en hi. Piter in, “Tuni-in aak a khuan’ ma-in nang in thumvei nong nial ding hi,” Topa in a cihna thu a phawk kik hi. Amah pusuak a, nakpi-in a kap hi. Zeisu a len mite in amah zahkoin a sat uh hi. A maitang a tuam khit uh ciangin, “Nang kua in hong beeng hiam? Kamsangte bangin hong gen in,” a ci uh hi. Kam dang tampi tawh Zeisu lang pangin a zahko uh hi. Khua a vak ciangin mite lakah upate, siampi liante leh laitheite kikhawm uh a, Zeisu amau zumah a paipih uh hi. “Nang Khazih na hih leh, kote hong hilh in,” a cih uh ciangin, “Ke’n kong gen leh, nong um kei ding uh hi. Ke’n kong dot leh, nong dawng kik kei ding uh hi. Ahih hangin tu-a kipanin Mihing Tapa in Pasian’ vangliatna ziat lamah a tu ding hi,” a ci hi. Amaute khempeuh in, “Tua ahih leh, Pasian’ Tapa na hi hiam?” ci-in a dong uh hi. Zeisu in, “Na gen bangun ka hi hi,” a ci hi. Tua lai takin amaute in, “Adang bang teci thu deih lai i hi hiam? Ama kam pan eite in i thei zo hi,” a ci uh hi. Tua lai takin a kikhawm mi khempeuhte ding-in Zeisu Pilat mangpa kiangah a paipih uh hi. “Hih pa in komau pawlte kheem a, ‘Khazih kici kumpipa ka hi hi. Kaisar kumpipa phiangsiah pia kei un,’ ci-in a kham kote’n ka za uh hi,” ci-in Zeisu a mawhsak uh hi. Pilat in, “Nang Judah Kumpipa na hi hiam?” ci-in a dot leh, Zeisu in, “Na cih mah bangin ka hi hi,” a ci hi. Pilat in, “Hih pa tungah mawhna ka mu kei hi,” ci-in siampi liante leh mihonpite kiangah a gen hi. Amaute kiko semsemin, “Amah in Galile gam pan akipan hih lai gam dongin, Judah gam sung khempeuh ah thu hilhin mi a zol hi,” a ci uh hi. Pilat in hih thu a zak ciangin, “Hih mi in Galile mi ahi hiam?” ci-in a dong hi. Zeisu Herod’ uksung mi ahih lam a theih ciangin, Herod kiangah a paisak hi. Bang hang hiam i cih leh, tua lai takin Herod Jerusalem khuapi-ah a om hi. Herod in Zeisu a muh ciangin nakpi-in a lungdam hi. Bang hang hiam i cih leh, Zeisu thu za ngei ahih maninah a muh nopna sauvei zoin, Zeisu’ nalamdang bawl a mu nuam hi. Amah in thu tampi a dot hangin, Zeisu in kam khat beek a dawng kik kei hi. Tua lai takin siampi liante leh laitheite ding-in nakpi-in a mawhsak uh hi. Herod in a galkapte tawh Zeisu simmawhin a zahko uh a, puan hoih a silhsak khit uh ciangin, Pilat kiangah a paisak kik uh hi. Tua ni-in Pilat leh Herod te, khat leh khat a kilem kik uh hi. Bang hang hiam i cih leh, nidangin a kiho thei kei uh hi. Pilat in siampi liante, upate leh mite sam a, “Mite a kheem thei mi bangin hih mipa kei kiangah nong paipih uh hi. Note mai-ah amah ka dot hanginah, na mawhsakna uh bangin mawhna khat beek ama tungah ka mu kei hi. Herod in zong a mu kei hi. Bang hang hiam na cih uh leh, Herod in kei kiangah hong puak kik zo hi. Hih mi in sihna thuak nading a kilawm bangmah a hih kei hi. Tua ahih ciangin, ka sat khit ciangin ka khah ding hi,” a ci hi. Ahih hangin mite in, “Tua pa that in la, ko kiangah Barabbas hong khah in,” ci-in aw khatin a kiko uh hi. Tua Barabbas in khua sungah misuam a, mi a thah manin thong sungah a kikhum hi. Pilat in Zeisu khah nuamin amaute kiangah thu a gen kik hi. Ahih hangin amaute in, “Tua pa singlamteh tungah that in, singlamteh tungah that in,” ci-in a kiko uh hi. Pilat in, “Bang hang hiam? Amah in mawhna bang ta khial ahi hiam? Ama sih nadingin a kilawm ama tungah thu khat beek ka mu kei hi. Tua ahih ciangin ka sat khit ciangin ka khah ding hi,” ci-a thumveina a gen hi. Ahih hangin amaute in Zeisu singlamteh tungah thah nading nakpi takin a kiko uh hi. Amaute aw in zo a; Pilat in amaute’ ngetna bang a piang dingin thu a khen hi. Mi suam a, mi a thah maninah thong sungah a kikhumpa amaute’ ngetna bangin khah a, amau ut bangin a bawl dingun Zeisu a pia hi. Amaute in Zeisu a paipih lai takun, gampa lak panin hong pai Simon kici Sairin mi khat, Zeisu nung lamah singlamteh pua dingin a tungah a suan uh hi. Mi tampi leh Zeisu hangin nakpi a thuum numei tampite in a nung a zui uh hi. Zeisu in kihei a, “Jerusalem’ tanute aw, kei adingin kap kei un. No ading leh na tate uh ading na kap zaw un. Bang hang hiam na cih uh leh, ‘Tasel numei leh ta a paii ngeilo gil leh a kine ngeilo nawite in thupha a ngah ding uh hi,’ a cih ding uh hun hong tung ding hi. Tua lai takin mite in, ‘Komau tungah hong kia un. Komau hong vuk un,’ ci-in mualte a sam ding uh hi. Bang hang hiam na cih uh leh, sing hing tungah a hici bawl uh leh, sing keu tungah bangci bawl ding ahi uh hiam?” ci-in a gen hi. Tua lai takin Zeisu tawh migilo, mi that ahi adang mi nih thah dingin a paipih khawm uh hi. ‘Lutang Guh’ kici mun a tun’ uh ciangin, Zeisu tawh migilo nih a ziatlam khat, a veilam khat singlamteh tungah a khaikhawm uh hi. Zeisu in, “Pa aw, amau in bang ahih uh cih thei lo ahih uh ciangin amau mawhna na maisak in,” a ci hi. Amau in lai aisaan-in a puante a hawm uh hi. Mite in enin a ding uh hi. A ukte in, “Hih pa in midangte a gum thei hi. Pasian’ teelsa Khazih ahih takpi leh, ama pumpi kigum ta hen,” ci-in a zahko uh hi. Galkapte zong pai uh a, tuithuk pia-in, “Nang Judah Kumpipa na hih takpi leh, na pumpi kigum in,” ci-in a zahko uh hi. “HIHPA IN JUDAHTE’ KUMPIPA HI,” ci-in kigelhna lai a tungah a om hi. Tua lai takin a kikhai migilote khat in, “Nang Khazih hilo na hi hiam? Nang leh ko hong gum in,” ci-in Zeisu a zahko hi. Khat in ahih leh, “Nangmah in hih pa mah bangin mawhna thu tanna na thuak napi-in, Pasian kihta lo na hi hiam? Eite in thuman thu tanna i thuak hi. Bang hang hiam na cih leh, eite’ hihna tawh kituak i thuak hi. Hih pa ahih leh, bangmah mawhna a bawl kei hi,” ci-in a lawmpa a taai hi. Zeisu kiangah, “Topa aw, na Gam sungah na lut khit ciangin kei hong ngaihsun in,” ci-in a gen hi. Zeisu in, “Ke’n aman takpi kong cih-inah, tuni-in nangmah in kei tawh Paradis ah na omkhawm ding hi,” a ci hi. Tua lai takin sun nai sawm-le-nih lai tak ahi hi. Nai thum dongin nitaang a bei maninah, leitung khempeuh ah khua a mial hi. Biakna innpi dalna puan a lai zang pan a kikeek hi. Zeisu in, “Ka Pa aw, ka kha nangma khut tungah ka pia hi,” ci-in nakpi-in a kiko khit ciangin a si hi. Galkap mangpa in tua thu piangte a muh ciangin, “Hih pa in mi diktat mi ahi hi,” ci-in Pasian’ min a phat hi. Tua thu en dinga hong pai mihonpi khempeuhte in, tua thu piangte a muh uh ciangin awm beengin a ciah uh hi. Tua lai takin Zeisu a thei mi khempeuhte leh Galile gam pan hong zui numeite in zong gamlapi panin tuate a gal-et uh hi. Tua pa Pilat kiangah pai a, Zeisu’ luang a ngen hi. Amah in Zeisu’ luang lasukin saihadial puan tawh a tun khit ciangin, mi kivui ngei lohna suang kikhuak han sungah a sial hi. Tua ni in Kigin ni hi a, Nipi ni a nai hi. Galile gam pan Zeisu tawh hong pai numeite in zui uh a, han leh a luang bangci koih ahi hiam ci-in a en uh hi. Amaute ciah uh a, paknamtui leh sathau namtui a bawl uh hi. Thukham bangin Nipi ni-in nasem loin a om uh hi. Ni sagih lakah ni kipat ni zingtungin numeite in amau bawlsa paknamtui tawi-in hanah a pai uh hi. Han vang pan suang kilikkhia a, om mu uh a, a sungah a tum uh leh, Zeisu’ luang a mu kei uh hi. Amaute in lamdang a sak lai takun, mi nih in mit leng thei puan silhin amaute kiangah a ding uh hi. Numeite in kihta ahih manunah boksukin a om lai takun tua tangvalte in, “Note in misite lakah a nungta mi bang hangin zong na hi uh hiam? Hih lai takah om nawn lo hi. A thokik zo hi. Mihing Tapa in migilote khut sungah kipia-in, singlamteh tungah kithat ding a, nithum khit ciangin a thokik ding hi,’ ci-in Galile gamah a om lai-in, note hong hilhna thu ngaihsun un,” a cih uh ciangin numeite in a phawk kik uh hi. Han pan paikhia uh a, tua thu khempeuh sawm-le-khatte akipan adang Christiante kiangah a ko uh hi. Tua numeite in Magdalene khua Mari leh Joanna leh Jeim’ nu Mari te ahi uh hi. Numei dangte in tuate tawh tua thu sawltakte kiangah a ko khawm uh hi. Sawltakte in tua thute a mawkna thu sa uh a, a um kei uh hi. Ahih hangin Piter tho-in hanah a tai hi. A tun’ ciangin kumsuka a et leh, saihadial puan bek a muh ciangin tua banga piangte lamdangsa-in innah a ciah hi. Tua ni-in Christian nih Jerusalem khuapi pan tai giat a kigamla Emmaus kici khua-ah a pai uh hi. Tua lai takin a piangsa thu khempeuh khat leh khat a kikum uh hi. A kikup lai takun Zeisu in va nai a, amaute tawh a paikhawm hi. Amaute in Zeisu ahih lam a theih loh nadingun a mit uh a mang hi. Zeisu in, “Note in lam na pai lai takun na kikup uh thu in bang thu ahi hiam?” ci-in a dot leh, maikhingin a khawl uh hi. Tuate khat Kleopas kici in, “Jerusalem khuapi-ah hawh napi-in tulai taka tua khua a, thu piangte khempeuh thei lo nang bek na hi hiam?” a ci hi. Zeisu in, “Bang thu ahi hiam?” ci-a a dot leh, tua pa in, “Nazareth mi Zeisu’ thu ahi hi. Tua pa in Pasian mai-ah ahi zongin, mite mai-ah ahi zongin, kam siamna leh khut siamna tawh a dim kamsangpa ahi hi. Siampi liante leh ei upate in tua pa a sih nadingin pia uh a, singlamteh tungah a that uh hi. Tua pa in Israel pawlte tan dingpa ahi hi ci-in kote in ka lamen uh hi. Tua tham loin, hih thu khempeuh a pian’ zawh ni thum pha zo hi. Ko pawlpi numei kimkhatte zingtungin hanah pai uh a, a luang a muh loh uh ciangin hong pai uh a, ‘Zeisu a nungta zo hi,’ ci-a a gen vantungmite a kilang a muh thu hong gen uh a, lamdang ka sa uh hi. Tua lai takin kote lakah mi kimkhatte hanah pai uh a, numeite’ gen mah bangin a muh uh hangin Zeisu a mu kei uh hi,” a ci hi. Zeisu in, “Kamsangte hong genkholh thu khempeuh up nadinga pilna nei lote aw, Zeisu in hih bang teng thuakin minthan’na a ngah nading thu om lo ahi hiam?” a cih khit ciangin, Moses leh kamsangte khempeuh pan akipan, Lai Siangtho sungah amah a cihnopna thute tel takin a hilh hi. Amaute in a paina khua a naih uh ciangin, Zeisu in tua khua paisan ding bangin a pai leh, amaute in, “Kote tawh hong giakkhawm in. Ni tumin khua a mial dek zo hi,” ci-in Zeisu nakpi-in a khoh uh ciangin, amah in amaute tawh giakkhawm dingin inn sungah a lut hi. Sabuai-ah amaute tawh a tutkhawm lai takin khomun la a, hehpihna a phat khit khit ciangin khomun balneenin a pia hi. Tua lai takin amaute’ mit kihong a, Zeisu ahih lam a thei uh a; tua ciangin amau kiang panin amah a mang hi. Amaute in, “Lampi-ah eite hong hilh a, Lai Siangtho thu hong gen lai takin, i dip kuasak hilo ahi hiam?” ci-in khat leh khat a kiho uh hi. Tua hun lai takin amaute tho uh a, Jerusalem khuapi-ah a ciahkik uh a, sawm-le-khatte a lawmte tawh kikhawm a om a mu uh hi. Tuate in, “Topa thokik takpi a, Simon kiangah a kilang hi,” a cih uh ciangin, amaute in zong lampi-ah thu piang khempeuh leh khomun a balnen lai takin a kilakna thu a gen uh hi. Tua thu a gen lai takun Zeisu amaute lai zangah ding a, “Nopna ngah ta un,” a cih ciangin; amaute in sikha sa uh a, kigaihin a lau uh hi. Zeisu in, “Bang hangin lauin lungmang na hi uh hiam? Bang hangin na lungsim sung uh ah up khialhna na nei uh hiam? Ka khut hong en un la, ka khe zong en un. Kei pumpi mahmah ahih lam hong en un la, na khut uh tawh hong lawng un. Nong muh uh bangin guh leh sa ka nei hi; sikha in a nei kei hi,” ci-in a khut leh khe a lak hi. Amaute in lamdang sa uh a, lungdam lua ahih uh ciangin um zo lo lailai-in, “Note in nek ding khatpeuh na nei uh hiam?” ci-in a dot khit ciangin; Khatvei Zeisu in, “Moses’ Thukhamna ahi zongin, kamsangte’ gelhna thu ahi zongin, Lai Siangtho sungah a kigelh thu ahi zongin keima thu a kigelhsa khempeuh a tangtung ding hi ci-in ke’n note tawh ka om khop lai takin kong gen khempeuhte in hih thu ahi hi,” a ci hi. Tua lai takin Lai Siangtho a theih nadingun amaute lungsim a hon’sak hi. Khatvei Zeisu in,, “Khazih in sihna thuak a, ni thum khit ciangin thokik ding a; ama min tawh kisikkikna thu leh mawhmaisakna thu Jerusalem khua pan akipan mi pawl khempeuhte’ kiangah a kigen ding hi ci-in kigelh hi. Hih thute-ah teci na hi uh hi. Pa’ thuciamna kong pia ding hi. Ahih hangin vantung pan vangliatna na ngah matengun, hih khua-ah na ngak lai un,” a ci hi. Tua khit ciangin Zeisu in amaute paipih a, Bethani khua pam a tun’ uh ciangin a khut lamto-in thupha a pia hi. Tua bang a thupha a piak lai takin, amaute tawh kikhen a, vantungah kilato hi. Amaute in Zeisu a biak khit uh ciangin lungdamna tampi tawh Jerusalem khua-ah ciah uh a; Pasian’ min phatin biakna innpi sungah a pai tawntung uh hi. A kipatcil-in Thu a om hi. Thu in Pasian tawh a omkhawm hi. Thu in Pasian ahi hi. Amah in a kipatcil-in Pasian tawh a omkhawm hi. Thu tawh na khempeuh a kipiangsak hi. A kipiangsak khempeuh lakah, Thu loin a kipiangsak khat beek a om kei hi. Ama sungah nuntakna a om hi. Tua nuntakna in leitung mite ading khuavak ahi hi. Tua khuavak in khuamial lakah taang a, khuamial in amah a zo zo kei hi. Johan kici mi khat Pasian in hong sawl hi. Mi khempeuh in ama hangin thu um dingin teci pang a, khuavakna thu teci pang dingin a hong pai hi. Amah in khuavak ahi kei hi. Khuavakna thu teci pang dingin hong pai bek ahi hi. Khuavak taktak a om hi. Tua khuavakna in leitung a, piang mi khempeuh a vaksak hi. Amah in leitungah a om zo hi. Amah tawh leitung kipiangsak hi. Leitung in amah a thei kei hi. Amah in ama mite kiangah hong pai-in, ama mite in amah a sang kei uh hi. Ahih hangin amah sang a, ama min a umte khempeuh in Pasian’ tate suah theih na’ng thu a pia hi. Tua tate in si leh sa tawh suak ahi kei uh hi; mihing’ deihna bangin a suak kei uh hi, Pasian’ deihna bangin a suak uh hi. Thu in mi bangin hong suak a, hehpihna leh thuman thutak tawh kidimin eite lakah a om hi. Pa in a Ta khat bek a piaksa minthan’na bangin ama minthan’na ka mu uh hi. Johan in ama ading teci pangin a kikona in, “Ka nungah hong paipa in kei om ma-in om ahih ciangin, kei sangin a lianzaw hi, kong cihna in hih pa ahi hi,” ci-in a kiko hi. Ama kicin’na pan i ngah hehpihna in khat banah khat i ngah sawnsawn hi. Bang hang hiam i cih leh, Thukhamna Moses khut tungah kipia hi; ahih hangin hehpihna leh thuman thutak in Zeisu Khazih khut tungah a hong piang hi. Pasian kuamah in a mu ngei kei hi. Pa’ ang sungah a om Tapa khat bek in Pasian hong kilangsak hi. Judah mite in, “Nang kua na hi hiam?” ci-in Johan dong dingin siampite leh Levite Jerusalem khua panin a paisak uh hi. Johan in tua a teci pan’na im loin, “Kei in Khazih ka hi kei hi,” ci-in tel takin a gen hi. Tuate in zong, “Tua ahih leh, nang kua na hi hiam? Elijah na hi hiam?” ci-in a dot uh ciangin amah in, “Elijah ka hi kei hi,” a ci hi. “Pasian’ kamsangpa na hi hiam?” a cih uh ciangin, “Ka hi kei hi.” ci-in a dawngkik hi. Tua ciangin amau in, “Nang kua na hi hiam? Ko hong sawlte kiangah ka genkik theih nadingun, nangmah mah bang kici na hi hiam?” ci-in a dongkik uh hi. Johan in, “Kamsangpa Isaiah in a gen bangin, ‘Topa paina lam na tangsak in,’ ci-in gampa lakah a kiko aw ka hi hi,” a ci hi. Tua mite in Farisaite’ paisak ahi uh hi. Amaute in, “Khazih hi lo, Elijah hi lo, kamsangpa hi lo na hih leh, bang dingin na baptaiz hiam?” ci-in a dongkik uh hi. Johan in zong, “Keimah in tui sungah ka baptaiz hi. Nomau lakah ding-in a om na theih loh uh ka nungah hong pai mi khat a om hi. Ama khedap khau phel ding nangawnin ka kilawm kei hi,” a ci kik hi. Johan baptaizna mun Jordan gun galkhat Bethani khua-ah hih thu khempeuh a piang hi. Zingsang ciangin Zeisu hong pai Johan in a muh ciangin, “En un, leitung’ mawhna a puakhia Pasian’ Tuuno! Kei ka om ma-in om ahih ciangin kei sangin a lianzaw ka nungah hong pai hi kong cihpa in hihpa ahi hi. Kei in tua pa ka thei hi. Ahih hangin amah in Israel mite kiangah a kilat nadingin, keimah in tui sungah baptaiz-in hong pai ka hi hi,” ci-in a gen hi. Tua lo adang Johan teci pan’na in, “Kha Siangtho vantung pan vakhu bangin hong kumsuka, tua pa tungah a tuang ka mu hi. Tua pa ka thei kei hi. Ahih hangin tui sungah baptaiz dingin kei hong sawlpa in, ‘Mi khat tungah Kha Siangtho hong kumsuka, a tuang na muh leh, tuapa in Kha Siangtho sungah baptaizpa ahi hi,’ ci-in thu hong pia hi. Keimah in ka mu zo a, hih pa in Pasian’ Tapa hi ci-in teci ka pang zo hi,” ci-in Johan in a gen hi. A nungzui nihte in ama thu a zak uh ciangin, Zeisu’ nung a zui uh hi. Zeisu kihei a, amaute in a nung a zui uh a muh ciangin, “Bang zong na hi uh hiam?” ci-in a dong hi. Amaute in, “Rabbi aw, koi lai-ah om na hi hiam?” ci-in a dawng uh hi. Rabbi a khiatna in ‘Sia’ cihnopna ahi hi. Zeisu in, “Hong pai le-uh teh na mu ding uh hi,” a ci hi. Tua ahih ciangin amaute pai-in ama omna a mu uh hi. Tua laitak in nitak nai li hi a, ama kiangah a tamkhawm uh hi. Johan’ thu za a Zeisu’nung a zui nihte khat in Simon Piter’ nau Andru ahi hi. Amah in a u Simon zong masa a, “Messiah ka mu zo uh hi,” ci-in Zeisu kiangah a paipih hi. Messiah a khiatna in ‘Khazih’ cihnopna ahi hi. Zeisu in tua pa en a, “Nang in Johan’ tapa Simon na hi hi. Kefas hong kici ding hi,” a ci hi. Kefas in Piter cihnopna hi. Zing ciangin Zeisu in Galile gamah pai ning ci a, Filip a muh ciangin, “Ka nung hong zui in,” a ci hi. Filip in Andru leh Piter-te’ teen’na khua Bethsaida khuami ahi hi. Filip in Nathanael zong a, “Moses in Pasian’ Thukhamna Lai Siangtho sung leh kamsangte in lai sungah a gelhkholhsa Nazareth mi Josef’ tapa Zeisu ka mu zo uh hi,” a ci hi. Nathanael in, “Nazareth khua sung pan na hoih khat hong piang thei ding hiam?” ci-in a dot leh, Filip in, “Hong pai in la, hong en in,” a ci hi. Nathanael hong pai Zeisu in a muh ciangin, “En un, ama sungah kheemna om lo Israel mi taktak ahi hi,” ci-in tua pa’ thu a gen hi. Nathanael in, “Topa aw, bangci hong theih na hi hiam?” ci-in a dot ciangin Zeisu in, “Filip in nang hong sap ma-in Theikung nuai-ah na om lai takin ke’n kong mu hi,” ci-in a gen kik hi. Nathanael in, “Rabbi aw, nangmah in Pasian’ Tapa na hi hi. Israel mite’ kumpipa lah na hi hi,” a ci hi. Zeisu in, “Theikung nuai-ah nang kong mu hi ka cih manin hong um na hi hiam? Tua sang a lianzaw nate na mu ding hi. Ke’n aman takpi kong cih-inah, van kihongin Pasian’ vantungmite in Mihing Tapa tungah kahsuk kahto a, om na mu ding hi,” a ci hi. Ni nih khit ciangin, Galile gam Kana khua-ah mo la lawmvakna om a, Zeisu’ nu zong tua lai-ah a om hi. Zeisu leh a nungzuite zong lawmvakna-ah a sam uh hi. Leenggahtui a bei ciangin Zeisu’ nu in Zeisu kiangah, “Leenggahtui a nei kei uh hi,” ci-in a ko hi. Zeisu in, “Numei aw, kei tawh bang kikum i hi hiam? Ka hun a tung nai kei hi,” a ci hi. A nu in nasemte kiangah, “Ama hong sawl khempeuh na hih un,” ci-in a gen hi. Judah mite ngeina bangin, siangtho biakna adingin tua munah seeng nih seeng thum bang a ta thei leibeel guk a kikoih hi. Zeisu in, “Hih tui beelte tui na dimsak un,” ci-in nasemte a sawl hi. Tuate in let dektakin a dimsak uh hi. “Tu-in suak un la, lawmvakna pawi ukpa kiangah paipih un,” a cih ciangin a paipih uh hi. Pawi ukpa in tui a ciap ciangin, leenggahtui suak a, tui tawi nasemte in tua leenggahtui ngahna a theih uh hangin pawi ukpa in a thei kei hi. Zipipa sam a, “Mi khempeuh in leenggahtui hoihte hawm masa-in, mite in a kham khit uh ciangin a hoih lote a hawm uh hi. Nang in a hoih leenggahtui tudongin na koihcing hi,” a ci hi. Zeisu in a masapen hih nalamdang Galile gam Kana khua-ah bawl a, ama minthan’na kilangsakin a nungzuite in zong amah a um uh hi. Tua nung ciangin a nu akipan a naute leh a nungzuite tawh Zeisu in Kapernaum khua-ah a pai uh hi. Tua khua-ah sawt lo khat a tam uh hi. Judah mite’ Paisan pawikham hun ahih ciangin, Jerusalem khua-ah Zeisu a paito hi. Biakna innpi sungah bawngte, tuute, vakhute a zuakte leh sumkheekte tu-a om uh a muh ciangin; a sat nading khautep a bawl khit ciangin tuate khempeuh, tuu leh bawngte biakna inn sung pan hawlkhia a, sumkheekte’ dangkate bua-in amaute sabuaite a sawnpai hi. Vakhu zuakte kiangah zong, “Hih nate na paimangpih un. Ka Pa’ inn sumzuakna inn na suaksak kei un,” a ci hi. Tua lai takin a nungzuite in, “Nangma inn ka deih luatna in kei hong netum ding hi,” ci-a a kigelh a phawk uh hi. Tua ahih ciangin Judah mite in, “Nang in hih bang na hihna tawh bang nalamdang hong lak na hi hiam?” a ci uh hi. Zeisu in zong, “Hih biakna innpi na phel gawp uh leh, ni thum sungin ka lamkik ding hi,” a ci hi. Judah mite in, “Hih biakna innpi kum sawmli leh kum guk tawntung kilam hi. Ni thum bek lam ding na hi hiam?” a ci uh hi. Ahih hangin tua bang a genna in ama pumpi biakna inn a cihnopna-in a gen ahi hi. Tua ahih ciangin, sihna pan a thawhkik ciangin hih thute a nungzuite in phawkkik uh a, Lai Siangtho leh Zeisu thu a um uh hi. Paisan pawi sung Jerusalem khua-ah a om lai takin, Zeisu in nalamdang a lahte mi tampi in a muh uh ciangin Zeisu a um uh hi. Ahih hangin Zeisu in amaute’ thu mang lo hi. Bang hang hiam i cih leh, amah in mi khempeuh thei a; mite sungah a omte khempeuh zong thei ahih ciangin, mi khat in midang khat thu ama kiangah a gensak ding a kul kei hi. Judah upa ahi Nikodemas kici, Farisaite lakah mi khat a om hi. Tua pa zan lai takin Zeisu kiangah pai a, “Rabbi aw, nangmah in Pasian kiang pan hong pai thuhilhpa na hi cih kote in ka thei uh hi. Bang hang hiam na cih leh, na bawl nalamdangte Pasian in nangmah tawh a omkhawm kei leh, kuamah in a bawl thei kei ding hi,” a ci hi. Zeisu in, “Ke’n aman takpi kong cih-inah, mi khatpeuh mah in khatvei a suahkik kei leh, Pasian’ Gam a mu thei kei ding hi,” a ci hi. Nikodemas in, “Mi khat a teek zawh ciangin bangci suakkik thei ding ahi hiam? A nu gil sungah tum kikin suakkik thei ding ahi hiam?” a ci hi. Zeisu in, “Ke’n aman takpi kong cih-inah, mi khatpeuh in tui leh Kha Siangtho tawh a suakkik kei leh, Pasian’ Gam sungah a tum thei kei ding hi. Ci-le-sa ah a piang mi in ci-le-sa ahi hi. Kha Siangtho ah a piang mi in kha ahi hi. Khatvei na suakkik ding hi ka cihna lamdang sa kei in. Huih in ama ut bangin a nung hi. Tua huih ging na zak hangin koi pan hong pai a, koilam pai ding cih na thei kei hi. Kha Siangtho tawh a suakte khempeuh in tua bang ahi uh hi,” a ci hi. Nikodemas in, “Hih thute bangci piang zo ding ahi hiam?” ci-in a dot ciangin; Zeisu in, “Nang in Israelte’ siapa na hi napi-in, hih thute thei lo na hi hiam? Ke’n aman takpi kong cih-inah, kote in ka theih uh thu ka gen uh hi. Ka muhte uh teci ka pang uh hi. Ahih hangin kote’ teci pan’na na mang kei uh hi. Leitung thu kong gen ciangin na up kei leh, vantung thu kong gen hangin bangci up ding na hi hiam? Vantungah om a, vantung pan hong kumsuk Mihing Tapa khat longal kuamah vantungah a kahto ngei kei hi.” “Moses in gamlakah gul a khai bangin Mihing Tapa a kikhai ding hi. Bang hang hiam na cih leh, amah a um mi khempeuh in nuntak tawntungna a ngah nading uh ahi hi.” “Pasian in a Tapa a um mi khempeuhte in kisia lo a, nuntak tawntungna a ngah nadingin a Tapa khat bek a piak dongin leitung mite a it hi. Bang hang hiam i cih leh, leitung mite’ thukhen dingin Pasian in a Tapa leitungah hong paisak kei hi. Leitung mite in amah hangin gupna a ngah nadingun a hong paisak hi. Amah a um mi in thukhenna a thuak kei hi. Amah a um lo mi ahih leh, tu-in thukhenna a thuak zo hi. Bang hang hiam i cih leh, amah in Pasian’ Tapa khat bek min a um kei hi. Thukhenna thu in leitungah khuavakin hong tunga; mite in khuavak sangin khuamial a deihzaw uh hi. Bang hang hiam i cih leh, amaute’ gamtatna man lo ahih hang hi. A hoih lo-a gamta mi khempeuh in khuavak a mudah uh a; amau gamtatnate a kilat loh nadingin khuavakna-ah a pai kei uh hi. Ahih hangin thuman a gamta mi in ama gamtatna Pasian’ deihna tawh kituak cih a kilatsak nadingin khuavakna-ah a pai hi,” ci-in a gen hi. Tua nung ciangin Zeisu a nungzuite tawh Judah gamah pai a, tuasan takah amaute tawh omkhawmin a baptaiz hi. Johan in zong Salim tawh kinai Ainon khua-ah baptaiz-in a om hi. Bang hang hiam i cih leh, tuasan takah tui tam a om hi. Mite hong pai uh a, a kibaptaiz uh hi. Bang hang hiam i cih leh, Johan thong sungah kikhia nai lo hi. Tua ahih ciangin Johan’ nungzuite in siangtho biakna thu Judah mi khat tawh a kiseel uh ciangin, Johan kiangah a pai uh a, “Rabbi aw, Jordan gun gal khatah nangmah tawh a omkhawm, ama thu teci na pan’na pa in baptaiz a, mi khempeuh ama kiangah a pai uh hi,” a ci uh hi. Johan in, “Vantung panin a kipiak kei leh, kuamah in bangmah a ngah thei kei hi. Keimah in Khazih ka hi kei hi. Khazih mai-ah hong paipa ka hi hi ke’n kong ci zo a, note zong ka teci na hi uh hi. Zipipa in zi neipa ahi hi. Ahih hangin zi neipa kiangah ding a, ama thu a za a lawmpa in zi pipa’ aw a zak manin a lungdam mahmah hi. Tua mah bangin keima lungdamna a kicing hi. Tua pa in lian semsem ding a, kei ka kiam semsem ding hi,” a ci hi. A tung pan hong kumpa in na khempeuh tungah a uk hi. Leitungah a hong piang mi in leitung mi hi a, leitung thu a gen hi. Vantung pan hong paipa in na khempeuh tungah a uk hi. A muhsa leh a zaksa thute teci a pang hi. Kuamah in ama teci pan’na thu a mang kei uh hi. Ama teci pan’na thu a mangte in, Pasian in thuman thutak hi ci-in a ciamteh hi. Pasian hong sawl mi in Pasian’ thu a gen hi. Bang hang hiam i cih leh, Pasian in Kha Siangtho kiteh loin a pia hi. Pasian in a Tapa it a, na khempeuh ama khut sungah a pia zo hi. Tapa thu a umte khempeuh in nuntak tawntungna a nei hi. Ahih hangin Tapa a um lo mi in nuntakna a ngah kei ding hi, Pasian’ hehna in tua pa tungah a om hi. Zeisu in Johan sangin nungzui tamzaw a suahsakna leh a baptaiz thu, Farisaite in thei cih Topa in a theih ciangin, Judah gam pan Galile gamah a paikik hi. Ahih hangin Zeisu in a baptaiz kei hi; a nungzuite in a baptaiz uh hi. Amah in Samaria gam paltan a; Jakob in a tapa Josef a piak lo cing khat tawh kinai, Samaria gam Saikhar kici khua-ah a tung hi. Tua munah Jakob’ tuikhuk a om hi. Tua ahih ciangin, Zeisu a lam paina gim ahih ciangin tuikhuk gei-ah a tu hi. Tua hun in sun laitak ahi hi. Samaria numei khat in tuitawi dingin hong pai ciangin Zeisu in, “Ka dawn ding tui hong pia in,” ci-in a ngen hi. Bang hang hih bangin ngen hiam i cih leh, a nungzuite an lei dingin khua sungah a pai khin zo uh hi. Samaria numei in, “Nang Judah mi na hi napi-in kei Samaria numei kiangah bang hangin tui dawn ding hong ngen na hi hiam?” a ci hi. Bang hang hiam i cih leh, Judah mite in Samaria mite tawh a kihopih thei kei uh hi. Zeisu in, “Pasian’ hehpihna leh ‘Dawn ding tui hong pia in,’ ci-a hong ngenpa kua mi ahih thei le-cin ama kiangah tui na ngen ding a, amah in nuntakna tui a hong pia ding hi,” a ci hi. Numei in, “Topa aw, nangmah in tui dip nading na nei kei hi. Tuikhuk lah a thuk hi. Tua nuntakna tui bangci ngah ding na hi hiam? Hih tuikhuk hong piapa leh, amah akipan a tate leh a ganhingte in a dawn uh i pu Jakob sangin na lianzaw hiam?” ci-in a dawng hi. Zeisu in, “Hih tui a dawn mi khempeuh in a nung ciangin tui a duh kik ding uh hi. Ahih hangin ke’n ka piak tui a dawnte in a tawntungin a dangtak nawn kei ding hi. Ke’n ka piaksa tui in tua mi sungah nuntak tawntungna tuikhukin a piang ding hi,” a ci hi. Numei in, “Topa aw, kei in tui ka duh nawn loh nadingin ahi zongin, tuitawi dingin hihsan takah kong pai nawn loh nading ahi zongin tua tui hong pia in,” ci-in a ngen hi. Zeisu in, “Pai in, na pasal sam in la, hong paikik in,” a ci hi. Numei in, “Ke’n pasal ka nei kei hi,” a cih ciangin Zeisu in, “Pasal ka nei kei hi,’ na cihna thu aman hi. Bang hang hiam na cih leh, pasal nga na nei ngei zo hi. Tu-a na neih mi in na pasal ahi kei hi. Hih thu aman takpi-in na gen hi,” a ci hi. Numei in, “Topa aw, nangmah in Pasian’ kamsangpa na hih lam ka thei hi. Ka pute ka pate un hih mual tungah Pasian a bia ngei uh hi. Note in ahih leh, ‘Jerusalem khua bekah mite in Pasian a bia ding uh hi,’ na ci uh hi,” a ci hi. Zeisu in, “Numei aw, ka thu hong um in. Hih mual tungah ahi zongin, Jerusalem khua sungah ahi zongin Pa Pasian na biak loh nading uh hun hong tung ding hi. Note in na theih lohpi uh na bia uh hi. Kote in ka theih uh ka bia uh hi. Bang hang hiam na cih leh, Judah mite sung pan gupna a piang hi. A bia taktakte in Kha leh thuman thutak tawh, Pa Pasian a biak ding uh hun hong tung ding tham loin a hong tung zo hi. Bang hang hiam na cih leh, Pa Pasian in amah bia dingin tua bang mite a zong hi. Pasian in Kha ahi hi. Amah a biate in Kha leh thuman thutak tawh a bia ding uh hi,” ci-in a gen hi. Numei in, “Khazih kici Messiah hong tung ding ke’n ka thei hi. Amah hong tun’ ciangin thu khempeuh hong hilh ding hi,” a ci hi. Zeisu in, “Nang tawh a kiho keimah in Messiah ka hi hi,” a ci hi. Tua ciangin ama nungzuite hong pai uh a, numei tawh a kihopihna lamdang a sa uh hi. Ahih hangin, “Bang deih na hi hiam? Tua numei tawh bang hangin thugen na hi hiam?” ci-in kuamah in a dong ngam kei uh hi. Numei in a tuiphel nusia-in, khua sungah ciah a; “Hong pai un la, ka gamtatna khempeuh hong lakpa en un. Tua pa in Khazih ahi hiam?” ci-in mite kiangah a ko hi. Amaute khua sung pan paikhia uh a, a kiangah a pai uh hi. Amaute a tun’ ma-in a nungzuite in, “Rabbi aw, an ne in,” a ci uh hi. Zeisu in, “Note theih loh an nek ding ka nei hi,” a ci hi. Tua ahih ciangin a nungzuite in, “Mi khatpeuh in an nek ding hong puak zo hiam?” ci-in khat leh khat a kikum uh hi. Zeisu in, “Keimah hong sawlpa’ deihna bang hih a, ama nasepna ka zawhna in ka an nekna ahi hi. Tu-a kipan kha li ciangin buh at a hun ding hi, ci thei hilo na hi uh hiam? Ke’n kong cih-inah, buh min zo a, a at hun ta hi ci-in khua dakin en un. Buh atte in thaman ngah thei a, nuntak tawntung nadingin gah a khawm ding uh hi. Tua bang ahih ciangin, a vawhte leh a atte a lungdam khawm ding uh hi. Tua ahih ciangin, ‘Mi khat in a vawh hi; midang in a at hi,’ a cihna thu a man hi. Lo na khawh lohna uh ah buh at dingin ke’n note kong sawl hi. Midangte in a kho uh a, note in amau sepna-ah na tum zo uh hi,” a ci hi. Numei in, “Ka gamtatna khempeuh hong lak hi,” ci-a teci a pan’na thu hangin tua Samaria khuami tampite in Zeisu thu a um uh hi. Tua hi a, Samaria mite a kiangah a tun’ uh ciangin, amau khua-ah a tam nadingin a thuum uh ciangin ni nih a tam hi. Ama thu hangin mi tampi in a up beh uh hi. Amaute in numei kiangah, “Tu-in ahih leh, kote in na genna hangin um ka hi kei uh hi. Kote in zong ka za teekteek uh a, hih pa in leitung mite’ Gumpa ahi takpi hi ci-in ka thei uh hi,” a ci uh hi. Zeisu in ni nih ciangin tua mun pan paikhia a, Galile gam a tung hi. Bang hang hiam i cih leh, Zeisu in, “Kamsangpa in ama omna gamah minthan’na ngah lo hi,” ci-in a tel takpi-in a gen hi. Tua ahih ciangin, Galile gam a tun’ ciangin Galile mite in amah a ngai uh hi. Bang hang hiam i cih leh, Jerusalem khua pawikhamna-ah a bawl nate khempeuh a mu uh hi. Bang hang hiam i cih leh, tuate zong pawikhamna-ah a pai uh hi. Tui leenggahtui a suah sakna mun; Galile gam Kana khua-ah a paikik hi. Tua lai takin Kapernaum khua-ah upa khat’ tapa cina-in a om hi. Zeisu in Judah gam pan Galile gamah a tun’ tua pa in a zak ciangin ama kiangah pai a, hong paisukin a si dektak a tapa a damsak nadingin a thuum hi. Zeisu in, “Note in nalamdang leh lim na muh kei uh leh, na um kei ding uh hi.” a cih ciangin, upa in, “Topa aw, ka tapa a sih ma-in hong paisuk in,” a ci hi. Zeisu in, “Ciah in, na tapa a nungta ding hi,” a ci hi. Tua pa in Zeisu’ thupiakna umin a ciah hi. Amah lampi-ah a paisuk lai takin a silate in hong dawn uh a, “Na tapa a dam zo hi topa aw,” ci-in a ko uh hi. Tua ahih ciangin, “Bang hunin a noptuam a kipan hiam?” ci-in a dot ciangin amau in, “Zanni-in nai sawm leh nai khat lai takin a natna a dam hi,” a ci uh hi. Tua hun in, “Na tapa a nungta ding hi,” ci-in Zeisu in a cih hun ahi hi ci-in a theih ciangin, amah akipan a innkuanpihte khempeuh tawh Zeisu thu a um uh hi. Hih nalamdang Zeisu in Judah gam panin Galile gamah hong tun’ khit ciangin a bawl nihveina ahi hi. Tua nung ciangin Judah mite’ pawikhamna a tun’ lai takin, Zeisu Jerusalem khua-ah a paito hi. Jerusalem khua-ah Tuu Kongkhak tawh kinai, Hebru pau-in Bethzatha kici bual khat a om hi. Tua bual kimkot ah buk nga a om hi. Tuate ah mittaw, khezaw, pum langkhat si akipan cina tampite a lum uh hi. (Topa’ vantungmi khat ahun hunin hong paisuk zel a, tui a kiloksak hi. Tui a kilawh hun sungin tua bualtui sung a tung masapen pen, a natna peuhpeuh a damsiang pahpah hi). Kum sawmthum leh kum giat tawntung a kumzawn mi khat in tuasan takah a om hi. Tua pa luma om Zeisu in a mu hi. Sawt veipi cina-a om cih a theih ciangin, “Nang cidam na ut hiam?” ci-in a dong hi. Cinapa in, “Topa aw, tui a tat ciangin bual sungah hong koih ding mi ka nei kei hi. Kei ka pai lai takin midangte ka mai-ah a tum uh hi,” ci-in a dawng hi. Zeisu in, “Tho in, na lupna pua in la, pai in,” a cih ciangin, thakhatin tuapa dam a, a lupna pua-in lam a pai hi. Tua ni in Sabbath ni ahi hi. Tua ahih ciangin Judah mite in a kiangah, “Tuni in Sabbath ni ahi hi; lupna puak tuak lo hi,” ci-in a gen uh hi. Amah in, “Kei hong damsakpa in, ‘Na lupna pua in la, lam pai in,’ hong ci hi,” a ci hi. Judah mite in, “Na lupna pua in la, lam pai in,” hong ci kua ahi hiam? ci-in a dong uh hi. Ahih hangin cidamna a ngahpa in kua ahi hiam a thei kei hi. Bang hang hiam i cih leh, tua munah mihonpi om ahih ciangin Zeisu a paikhia sim hi. Tua nung ciangin Zeisu in biakna innpi sungah tua pa a muh ciangin, “Nang na ci dam zo hi. Tua gimna sangin a haksa zaw na thuak loh nadingin, a nung ciangin mawhna na hih nawn kei in,” a ci hi. Tua pa paikhia a, amah a damsakpa in Zeisu hi, ci-in Judah mite kiangah a gen hi. Tua thu Sabbath ni-in bawl ahih ciangin, Judah mite in Zeisu bawlsia-in thah theih nading thu a zong uh hi. Zeisu in, “Ka Pa in tudongin a sem hi; ke’n zong ka sem hi,” ci-in a dawng kik hi. Tua ahih ciangin amah in Sabbath ni siasak tham loin, Pasian nangawn “Ka Pa hi” ci-in Pasian bangin kibawl hi ci-in, Judah mite in Zeisu a that nuam semsem zaw uh hi. Tua ahih ciangin Zeisu in, “Ke’n aman takpi kong cih-inah, Tapa in ama deih bangin a hih thei kei hi. Pa’ hihna a muh bangin a bawl thei hi. Pa in a bawl mah bangin Ta in zong a bawl hi. Bang hang hiam na cih uh leh, Pa in Ta it a, a hihna khempeuh Tapa a musak hi. Note in lamdang nasak nadingun hih sangin a lianzaw nate Tapa a musak ding hi. Pa in mi sisate a thosak, a hingsak kik mah bangin Tapa in zong ama deihte a hingsak thei hi. Mi khempeuh in Pa a zahtak bangin Tapa zong a zahtak nadingin, Pa in kuamah thu a khen kei hi. Thukhen nading thu khempeuh Tapa a pia hi. Tapa a zahtak lo mi in Tapa a sawlpa zong a zahtak kei hi.” “Ke’n aman takpi kong cih-inah, keima thu za a, keimah hong sawlpa a um mi in, nuntak tawntungna ngah zo ahih ciangin, thukhenna a thuak kei hi; sihna pan paikhia a, nuntakna-ah a tung zo hi. Ke’n aman takpi kong cih-inah, a sisate in Pasian’ Tapa’ aw a zak nading uh a hun hong tung ding tham loin tu-in zong a tung zo hi. Tua aw a zate in a nungta ding uh hi. Bang hang hiam na cih uh leh, Pa in a sungah nuntakna a neih bangin, Tapa in zong a sungah nuntakna a neih nadingin thu a pia zo hi. Tapa in Mihing Tapa ahih maninah thukhen dingin Pa in thu a pia hi. Hih thu lamdang na sa kei un. Bang hang hiam na cih uh leh, han sungah a omte khempeuh in ama aw za uh a, a hong pusuak hun hong tung ding hi. A pha-a gamtate in nuntakna ngah dingin hong thokik ding uh a; a sia-a gamtate in thukhenna thuak dingin hong thokik ding uh hi.” “Keimah in ka ut bangin ka hih thei kei hi. Ka zak bangin thu ka khen hi. Ka thukhenna in thu taktak ahi hi. Bang hang hiam na cih uh leh, keima deihna bang hi loin, kei hong sawlpa’ deihna bangin ka hih hi. Keima ading teci ka pan’ leh, ka teci pan’na thu a man kei hi. Kei ading teci pang ding mi khat a om hi. Kei adinga ama teci pan’na thu in aman hi ci-in ka thei hi. Note in Johan kiangah na sawl zo uh hi. Amah in thuman thutak teci a pang zo hi. Ahih hangin ka teci pan’na thu in mite’ teci pan’na ahi kei hi. Note in gupna na ngah nadingun hih thu teng kong gen hi. Amah in kuanga a taang meivak hi a, note in ama khuavakna-ah tawlkhat nopsak ding bek na ut uh hi. Ahih hangin Johan’ teci pan’na sangin teci pan’na a lianzaw ka nei hi. Bang ahi hiam na cih uh leh, nasepna ka zawh nading ka Pa in hong piak tu-a ka sepna thute in, Pa in kei hong sawl ahihna thu keima ading teci hong pang uh hi. Kei hong sawl ka Pa in kei ading teci hong pang zo hi. Note in tua Pa’ aw na za kei uh a, a meel na mu ngei kei uh hi. Ama thu in zong nomau sungah a om kei hi. Bang hang hiam na cih uh leh, a hong sawlpa no na um kei uh hi. Lai Siangtho hangah nuntak tawntungna ngah nung ci-in na up manunah Lai Siangtho na tel et uh hi. Hih Lai Siangtho in keima ading teci ahi hi. Note in nuntakna na ngah nadingun ka kiangah nong pai kei uh hi. Mite piak minthan’na ka sang kei hi. Ahih hangin, Pasian itna lungsim na neih loh uh ke’n ka thei hi. Kei in ka Pa’ min tawh kong pai hangin nong sang kei uh hi. Midang khatpeuh amahmah min tawh hong pai leh, na sang ding uh hi. Khat leh khat kipiak minthan’na na ngah uh a, Pasian khat bek’ piak theih minthan’na a zong lo note in bangci up theih ding na hi uh hiam? Pa mai-ah hong mawhsak ding hi ci-in hong um kei un. Note hong mawhsak ding mi khat a om lai hi. Tua pa in kua mi ahi hiam ci-in na dot uh leh, na muanpa uh Moses ahi hi. Note in Moses’ thu na up uh leh, keima thu zong nong um ding uh hi. Bang hang hiam na cih uh leh, Moses in keima thu a gelh hi. Ama gelhna lai na up kei uh leh, keima thu bangci up thei ding na hi uh hiam?” ci-in a gen hi. Tua nung ciangin Zeisu in Tiberias tuili kici, Galile tuili gal khatah a pai hi. Cinate tungah a lamdang lim a lahna a mu mihonpite in a nung a zui uh hi. Zeisu mual tungah kahto a, a nungzuite tawh a tukhawm hi. Tua lai takin Judah mite’ Paisan pawikham hun a nai zo hi. Tua ahih ciangin, Zeisu in a khuadak leh mihonpite ama kiangah hong pai a muh ciangin Filip kiangah, “Hih mite nek ding khomun bang lak pan i lei ding hiam?” ci-in a dong hi. Tua bang a dotna in bang hang hiam i cih leh, amah in bangci a bawl ding thei napi-in Filip ze-etna bekin a dong hi. Filip in, “Mi a vekpi-in themkha khat tek a ngah nadingun dangka zanih man khomun a cing kei ding hi,” ci-in a dawng hi. Simon Piter’ nau Andru a kici ama nungzui khat in, “Hihsan takah khomun pum nga leh nganeu tawn nih a nei naupang khat a om hi. Ahih hangin mi hizah tak a tam lakah hih khomun leh ngasa nih in bang tham hi ding hiam?” a ci hi. Zeisu in, “Mite na tusak un,” a ci hi. Tua munah lopa tampi a om hi. Amaute sim le-hang pasal tul nga bang a tu uh hi. Zeisu in khomun la a, hehpihna a phat khit ciangin a tute lakah a hawmsak hi. Tua mah bangin ngasa zong mite’ deih zahzahin a hawm uh hi. Amaute in a kham khit uh ciangin Zeisu in, “Bang mah a man’ loh nadingin khamval teng tawm kik un,” ci-in a nungzuite thu a pia hi. Tua ahih ciangin, khomun pum nga panin an nete’ khamval a neng a themte a top uh ciangin, seeng sawm leh seeng nih dim a ngah uh hi. Tua bangin Zeisu in nalamdang a bawl tua mite in a muh uh ciangin, “Hih pa in leitungah hong pai ding Pasian’ kamsangpa taktak ahi hi,” a ci uh hi. Tuate hong pai-in Topa kumpipa-a koih nadingin a hahbawl ding uh cih Zeisu in a theih ciangin, mual tungah amah guak a kahto kik hi. Nitak ciangin a nungzuite tuili-ah paisuk uh a, gunkuang ah tuangin Kapernaum khua tung dingin a pai uh hi. Tua lai takin khua miala Zeisu amaute kiang a hong tung nai kei hi. Huih nakpi nung ahih ciangin tui a kilok hi. Tua ahih ciangin, tai nih tai thum bang a hot khit uh ciangin, Zeisu tuili tungah pai a, gunkuang hong naih a muh uh ciangin a lau uh hi. Zeisu in, “Keimah ka hi hi, lau kei un,” a cih ciangin, lungdamin Topa gunkuang tungah a la uh a; gunkuang in amau pai nopna lei thakhatin a tun’ hi. Zingsang ciangin, tuili gal khatah a ding mihonpite in gunkuang khat longal gunkuang dang a mu kei uh hi. Amau in khomun a nekna phual uh tawh kinai Tiberias khua pan gunkuangte hong tung uh hi. Zeisu in a nungzuite tawh tua gunkuang sungah lut khawm loin, a nungzuite bek a pai uh a mu uh hi. Tua ahih ciangin tuasan takah Zeisu ahi zongin, a nungzuite ahi zongin a om loh uh mihonpite in a theih uh ciangin, amau zong gunkuang tungah tuangin Zeisu zong dingin Kapernaum khua-ah a pai uh hi. Tuili gal khatah Zeisu a muh uh ciangin amaute in, “Rabbi aw, cik a, hih lai-ah hong tung na hi hiam?” ci-in a dong uh hi. Zeisu in, “Ke’n aman takpi kong cih-inah, note in nalamdang na muh manun kei hong zong na hi kei uh hi; khomun na ne uh a, na kham uh ciangin hong zong na hi uh hi. A sia thei an ngah nadingin hahkat kei un; Mihing Tapa in no hong piak ahing tawntung nuntak tawntungna an na ngah nadingun hahkat un. Bang hang hiam na cih uh leh, Pasian’ ciamtehna a ngahpa in tua Tapa ahi hi,” a ci hi. Tua ciangin tuate in, “Pasian’ na ka sep theih nadingun bangci ka hih ding uh hiam?” ci-in a dong uh hi. Zeisu in, “Pasian hong sawlpa upna in Pasian nasepna ahi hi,” a ci hi. Tua ahih ciangin, amau in, “Topa aw, kong muh uh a, kong up na’ngun nalamdang bang hong lak na hi hiam? Bang hong bawl ding na hi hiam? Vantung panin khomun a mau nek ding a pia hi ci-in Lai Siangtho sungah a kigelh bangin, i pute i pate in gampa lakah khomun a ne uh hi,” a ci uh hi. Tua ahih ciangin, Zeisu in, “Ke’n aman takpi kong cih-inah, vantung pan khomun a piapa in Moses ahi kei hi; ka Pa in vantung khomun taktak note hong pia hi. Pasian’ khomun in vantung pan hong paisuk a, leitung mite nuntakna a pia khomun ahi hi,” a cih leh, “Topa aw, tua khomun ko hong pia tawntung in,” a ci uh hi. Zeisu in, “Keimah in nuntakna khomun ka hi hi. Kei kiangah hong pai mi in a nung ciangin a gilkial ngei nawn kei ding hi. Kei hong um mi in a nung ciangin a dangtak nawn kei ding hi. Ahih hangin note in kei hong mu napi-in nong um kei uh hi kong ci zo hi. Pa in kei hong piakte khempeuh kei kiangah hong pai ding uh hi. Ka kiangah hong pai mite ka hawlkhia ngei kei ding hi. Bang hang hiam na cih uh leh, keima deih bangin gamta dingin vantung pan hong kumsuk ka hi kei hi; kei hong sawlpa’ deihna bang gamta dingin hong kumsuk ka hi hi. Kei hong sawlpa’ deihna in kei hong piak mite khempeuh khat beek ka man’suah loh nadingin Ni tawp ni ciangin ka thokik sak ding hi. Tapa mu a, a umte khempeuh in nuntak tawntungna a ngah nading in Pa’ deihna ahi hi,” a ci hi. “Vantung pan hong kumsuk khomun ka hi hi,” Zeisu in a cih ciangin Judah mite in, “Hih pa in Josef’ tapa Zeisu hilo ahi hiam? A nu leh pa thei hilo i hi hiam? Tua ahih leh, ‘Vantung pan kong paisuk zo hi,’ bang hangin ci thei hiam?” ci-in a gensia uh hi. Zeisu in, “Khat leh khat in hong gensia kei un. Kei hong sawl Pa in a sawl kei leh, kuamah in ka kiangah hong pai thei kei hi. Keimah in ni tawp Ni ciangin tua mi ka thosak ding hi. ‘Pasian in tuate a hilh ding hi,’ ci-in Pasian’ kamsangte’ lai sungah a kigelh hi. Pa kiangah thu ngai a, a kisin mite khempeuh keima kiangah hong pai uh hi. Tua bang ka cih ciangin, Pasian kiang pan hong paipa longal mi khat beek in Pasian a mu zo hi ka cihnopna ahi kei hi. Vantung pan hong paipa in Pa a mu zo hi. Ke’n aman takpi kong cih-inah, a hong umte in nuntak tawntungna a nei uh hi. Nuntakna khomun ka hi hi. Na pute na pate un gampa lakah khomun a ne uh a, a si uh hi. Vantung pan hong kumsuk hih khomun a nete in sihna tawh a kipelh ding hi. Keimah in vantung pan hong kumsuk nuntakna khomun ka hi hi. Hih khomun a nete in a tawntungin a nungta ding hi. Ahi hi. Ka hong piak khomun in leitung mite’ nuntak nading ka piak ka sa ahi hi,” a ci hi. Tua ciangin Judah mite in, “Hih pa in ama sa nek dingin bangci hong piak thei ding ahi hiam?” ci-in khat leh khat a kiseel uh hi. Zeisu in, “Ke’n aman takpi kong cih-inah, Mihing Tapa’ sa ne-in a si na dawn kei uh leh, note sungah nuntakna a om kei ding hi. Keima sa ne a, ka si a dawnte in nuntak tawntungna a nei uh hi. Ni tawp ni ciangin tua mi ka thokiksak ding hi. Bang hang hiam na cih uh leh, ka sa in an taktak ahi hi; ka si in dawn ding taktak ahi hi. Ka sa ne a, ka si a dawnte in kei sungah om a, ama sungah kei ka om ding hi. A nungta Pa in hong sawl a, Pa hangin ka nuntak mah bangin, keimah hong nete in kei hangin a nungta ding hi. Hih khomun in vantung pan hong kumsuk khomun ahi hi. Pute pate in khomun ne-in a si uh bang hi loin, hih khomun a nete in a nungta tawntung ding uh hi,” a ci hi. Kapernaum khua-ah kikhopna inn sungah Zeisu in a hilh lai takin hih thu teng a gen hi. Tua ahih ciangin, ama nungzui tampite in hih thu a zak uh ciangin, “Hih thu a haksa mahmah hi, kua in theitel zo ding ahi hiam?” a ci uh hi. Ahih hangin Zeisu in tua thu hangin ah a nungzuite in a phunpihna thu a sin sungah a theih ciangin, “Hih thu in note hong puksak hiam? Mihing Tapa in ama omna ngeiah a kahtokik na muh uh ciangin, bangci na ngaihsun ding uh hiam? Nuntakna a piapa in kha ahi hi. Sa in phattuamna a pia zo kei hi. Note kiangah kong thugenna in kha leh nuntakna ahi hi. Ahih hangin note lakah a um lo mi kimkhat a om hi. Tua ahih ciangin, ka Pa in thu a piak kei leh, kuamah kei kiangah hong pai thei kei hi kong ci hi,” a ci hi. Tua bang a cihna in bang hang hiam i cih leh, kua in um lo ding ahi zongin, kua in lehheek ding cih ahi zongin Zeisu in a cil panin a thei hi. Tua-a kipanin ama nungzui tampite in Zeisu tawh kipawl nawn loin a kihei kik uh hi. Zeisu in, “Note zong paikhia ding na hi uh hiam?” ci-in sawm-le-nihte kiangah a dot ciangin, Simon Piter in, “Topa aw, kote in kua kiangah pai ding ka hi uh hiam? Nang in nuntak tawntungna thu na nei hi. Nangmah in Pasian’ misiangtho na hi ci-in kote in umin ka thei uh hi,” a ci hi. Zeisu in, “sawm-le-nihte hong teel hilo ka hi hiam? Ahih hangin note lakah khat in dawi hilo ahi hiam?” a ci hi. Tua bang a cihna in, sawm-le-nihte lakah amah lehheek ding Simon Iskariot’ tapa Judas a cihnopna hi. Tua nung ciangin Zeisu Galile gam sungah a vak hi. Bang hang hiam i cih leh, Judah mite in Topa thah dingin zong uh ahih ciangin, Judah gam sungah vak ding a ut kei hi. Tua lai takin Judah mite’ Buk pawikham ding a nai zo hi. Zeisu’ sanggamte in, “Na bawl nate na nungzuite in a muh nadingun, hih pan paikhia in la, Judah gamah na pai in. Bang hang hiam na cih leh, mite kiangah a kithei nuampa in a kilang lona sungah bangmah a hih kei hi. Hih nate na bawl leh, leitungah na pumpi na kilangsak in,” ci-in a gen uh hi. Bang hangin tua bangin a ci uh hiam i cih leh, a sanggamte in zong Zeisu a um kei uh hi. Tua ahih ciangin Zeisu in, “Ka hun a tung nai kei hi; note hun ahih leh, a kicingkhol niloh hi. Leitung mite in no hong mudah thei kei uh hi. Kei hong mudah uh hi. Bang hang hiam na cih uh leh, amau’ gamtatna a hoih kei ci-in teci ka pang hi. Tua pawikhawmna ah no na pai un. Kei hih pawikhamna sungah ka pai nai kei ding hi,” a ci hi. Tua thu a gen khit ciangin, Galile gamah a om lai hi. A sanggamte pawikhamna-ah a paikhit uh ciangin, Zeisu zong a kilang loin a paisim hi. Tua ahih ciangin Judah mite in, “Koi lai-ah a om hiam?” ci-in dong uh a, pawi sungah a zong uh hi. Mihonpite in ama hangin thu tampi kikum uh hi. Mi kimkhat in, “Amah mipha ahi hi,” ci uh a, mi kimkhat in, “Mipha ahi kei hi, mihonpite a kheempa ahi hi,” a ci uh hi. Ahih hangin Judah mite a kihtak manunah kuamah in a tel takin a gen ngam kei uh hi. Pawikhamna a kimkhat a bawl lai takun, Zeisu biakna innpi-ah paito-a thu a hilh hi. Tua ahih ciangin Judah mite in, “Hih mi in laisim ngei lo napi-in bangci lai a thei hiam?” ci-in lamdang a sa uh hi. Tua ciangin Zeisu in, “Ka thuhilhna in keima thu ahi kei hi; kei hong sawlpa’ thu ahi hi. Mi khatpeuh mah in Pasian’ deih bangin a gamtat nop leh, hih thu Pasian’ thu ahi hiam, keima utthu banga gen ka hi hiam a thei ding hi. Ama utthu bang a hihpa in ama minthan’na a zong hi. A hong sawlpa minthan’na a zong mi ahih leh, thuman thutak mi hi a, ama sungah diklohna a om kei hi. Moses in Thukhamna no hong pia hilo ahi hiam? Ahih hangin note khat beek in hih Thukhamna na tang kei uh hi. Kei thah dingin bang hangin na hong zong uh hiam?” a ci hi. Mihonpite in, “Nang dawilawm nei na hi hi. Nang thah dingin kua in hong zong ahi hiam?” a ci uh hi. Zeisu in, “Sabbath ni-a ka bawlna thu khat note khempeuh in lamdang na sa uh hi. Moses in vunatna thu no hong pia hi. Ahih hangin Moses kiang pan na ngah uh ka ci kei hi; tanglai i pu i pate kiang pan na ngah uh hi. Tua ahih ciangin, Sabbath ni-in vun na at uh hi. Moses’ Thukhamna a siat thei loh nadingin Sabbath ni-in mi in vunatna a ngah hi. Ahih hangin Sabbath ni-in mi’ pumpi khat ka damsak ciangin bang hangin kei tungah heh na hi uh hiam? Maitang zahtakna tawh thu na khen kei un; aman takin thu na khen un,” a ci hi. Tua ahih ciangin Jerusalem khuami kimkhat in, “Hih pa in thah dinga a zon’pa uh hilo ahi hiam? En un, amah in a kilangin thu a hilh hangin kuamah in a kham kei hi. Hih pa in Khazih hi cih upa vaihawmte in a thei takpi uh hiam? Ahih hangin hihpa koipan hong pai cih i thei hi. Khazih hong pai ciangin ama pian’na kuamah in a thei kei ding hi,” a ci uh hi. Tua ahih ciangin Zeisu in, “Note in kei nong thei uh hi. Ka pian’na lah nong thei uh hi. Ahih hangin keima ut bangin hong pai ka hi kei hi. Kei hong sawlpa in thuman thutak tawh a dim hi. Tua pa na thei kei uh hi. Keimah in ka thei hi. Bang hang hiam na cih uh leh, ama kiang panin kong pai a, amah in kei hong sawl hi,” ci-in biakna innpi sungah a hilh lai takin a kiko hi. Tua ahih ciangin amaute in Topa mat nadingin a vaihawm uh hangin ama hun tung nai lo ahih ciangin, kuamah in ama tungah khut a nga kei hi. Mihonpi lakah mi tampite in amah um uh a, “Khazih hong pai ciangin hih pa’ lah sangin nalamdang zaw a lak ding hiam?” a ci uh hi. Mihonpite kikupna thu a theih uh ciangin, siampite leh Farisaite in Topa man dingin palikte a sawl uh hi. Tua ahih ciangin Zeisu in, “Note tawh tawlkhat bek ka om khit ciangin kei hong sawlpa kiangah ka ciahkik ding hi. Nong zon’ uh hangin nong mu kei ding uh hi. Ka omna mun nong tung zo kei ding uh hi,” a ci hi. Tua ahih ciangin, Judah mite in, “Ei muh zawh loh dingin amah koilam pai ding hiam? A kitheh zak a, om Grik mite lakah pai ding a, Grik mite kiangah thu a hilh ding hiam? ‘Nong zon’ uh hangin nong mu kei ding uh hi,’ leh, ‘Ka omna mun na tung zo kei ding uh hi,’ a cihna in bang a cihnopna ahi hiam?” ci-in khat leh khat a kikum uh hi. Pawikham a tawp ni alianpen ni-in Zeisu ding a, “Mi khatpeuh in tui a duh leh, ka kiangah hong pai-in dawn ta hen. Kei hong umte Lai Siangtho sungah a kigelh bangin, ama sung pan nuntakna guntui a luangkhia ding hi,” ci-in a kiko hi. Tua bang a cihna in a umte’ ngah ding Kha Siangtho a cihna ahi hi. Bang hang hiam i cih leh, Zeisu in minthan’na ngah nai lo ahih ciangin Kha Siangtho a kipia nai kei hi. Tua ahih ciangin mihonpi kimkhat in tua thu a zak uh ciangin, “Hih pa in aman takpi-in kamsangpa ahi hi,” a ci uh hi. Kimkhat in, “Hih pa in Khazih hi,” a ci uh hi. Kimkhat in, “Khazih in Galile gam pan hong suak thei ding hiam? Khazih in David’ suan hi a, David’ omna Bethlehem khua sungah a suak ding hi,” ci-in Lai Siangtho in ci hilo ahi hiam?” a ci uh hi. Tua ahih ciangin, mihonpite lakah amah hangin thu kituak loin a kikhenthang uh hi. Tua bangin mi kimkhatte in Topa a mat nop uh hangin kuamah in ama tungah khut a nga kei hi. Tua ahih ciangin palikte, siampi liante leh Farisaite kiangah a ciahkik uh ciangin tuate in, “Bang hangin hong paipih lo na hi uh hiam?” ci-in a dong uh hi. Palikte in, “Tua pa’ hilh bangin kuamah in a hilh ngei kei hi,” a ci uh hi. Tua ahih ciangin, Farisaite in, “No nangawn hong kheem zo ahi hiam? Upa vaihawmte lakah ahi zongin, Farisaite lakah ahi zongin amah a um mi khat beek a om hiam? Thukhamna a thei lo hih mihonpite in kosiatna ngahte ahi uh hi,” a ci uh hi. A nidanga Zeisu kiangah hong pai, amaute laka khat Nikodemas in, “Eite Thukhamna in mi thu za a, a gamtatna thu a theih ma-in a thu khen thei hiam?” a ci hi. Amaute in, “Nang zong Galile mi na hi hiam? Galile gam sung pan kamsangpa a piang ngei hiam ci-in na zon’ leh piang ngei lo ci-in na thei ding hi,” a ci uh hi. Tua ahih ciangin, mi khempeuh amau innah a ciah uh hi. Zeisu Oliv Mual ah a pai hi. Zingsang tungin biakna innpi-ah a paikik leh, mi khempeuh ama kiangah hong pai uh a, Zeisu in tua mite thu a hilh hi. Laitheite leh Farisaite in numei khat pasal tawh a mawh laitak a muh uh ciangin, manin hong paipih uh a, mite lai zangah a koih khit uh ciangin, “Sia aw, hih numei a khialh laitak kimu hi. Thukhamna sungah hih bang mi, ‘Suang tawh deenglum un,’ ci-in Moses in thu hong vaikhak hi. Ahih hangin nang bang na ci hiam?” a ci uh hi. Tua bang a cih uh ciangin, Zeisu tungah mawhna zon’ nadingun ci-in a ze-et uh hi. Ahih hangin Zeisu kun a, a khutme tawh leiah lai a gelh hi. Amaute in a dot sawnsawn uh ciangin ding a, “Note lakah mawh nei lo mi khat in numei suang tawh deeng masa hen,” a cih khit ciangin, khatvei kun kikin a khutme tawh leiah a gelh hi. Tua thu a zak uh ciangin, a teekpen pan a khangnopen dongin khat nungah khat a paikhia uh hi. Zeisu guak om a, numei zong a lai zangah a om hi. Zeisu ding kik a, “Numei aw, amaute koi lai-ah a om uh hiam? Kuamah in nang thu hong khen lo hiam?” ci-in a dong hi. Numei in, “Kuamah in hong khen lo hi, Topa aw,” a ci hi. Zeisu in, “Ke’n zong kong khen kei ding hi. Pai in la, a nung ciangin na mawh nawn kei in,” a ci hi. Khatvei Zeisu in, “Keimah in hih leitung khuavak ka hi hi. Ka nung hong zuite in khuamial lakah pai loin nuntakna khuavak a ngah ding hi,” a ci hi. Tua ahih ciangin Farisaite in, “Nang ading nangma’n teci na pang hi. Na teci pan’na aman kei hi,” a ci uh hi. Zeisu in, “Keimah in kei ading teci ka pan’ hangin ka teci pan’na a man hi. Bang hang hiam na cih uh leh, keimah in koi lam pan hong pai a, koi lamah ka pai ding cih ka thei hi. Note in ahih leh, koi lam pan hong pai a, koi lamah ka pai ding cih na thei kei uh hi. Note in si leh sa khen bangin thu na khen uh a; kei in kuamah thu ka khen kei hi. Ahi hi. Keimah in thu ka khen zongin ka thukhenna a man hi. Bang hang hiam na cih uh leh, keimah guak ka hi kei hi; kei hong sawl Pa in kei tawh a omkhawm hi. Ahi hi; teci nih a om leh, thu aman hi ci-in note Thukhamna lai sungah kigelh hi. Keimah in keima ading teci ka pang hi. A hong sawl Pa in keima a ding teci a pang hi,” ci-in a gen hi. Tua hi-a amaute in, “Na Pa koi lai-ah om hiam?” ci-a a dot uh ciangin Zeisu in, “Note in kei nong theih kei uh leh, ka Pa zong na thei kei ding uh hi. Kei nong theih uh leh, ka Pa zong na thei ding uh hi,” a ci kik hi. Biakna innpi sungah thu a hilh lai takin, sumkholna dei sungah hih thu a gen hi. A hun tung nai lo ahih ciangin kuamah in a man kei uh hi. Tua ahih ciangin khatvei Zeisu in, “Kei ka ciah ding hi. Note in nong zon’ uh hangin nomau mawhna sungah na si ding uh hi. Ka paina mun nong tung zo kei ding uh hi,” a ci hi. Tua ahih ciangin Judah mite in, ‘Ka paina mun nong tung zo kei ding uh hi,” ci ahih ciangin amahmah kithat ding hiam?” a ci uh hi. Zeisu in, “Note in nuailam mi na hi uh hi. Kei in tunglam mi ka hi hi. Note in hih leitung pan a piang na hi uh hi. Kei in hih leitung pan a piang ka hi kei hi. Tua ahih ciangin, nomau mawhna sungah na si ding uh hi kong ci hi. Bang hang hiam na cih uh leh, keimah in tua pa ka hih lam na up kei uh leh, nomau mawhna sungah na si ding uh hi,” a ci hi. Tua ahih ciangin amaute in, “Nang kua na hi hiam?” ci-in a dot uh ciangin Zeisu in, “Keimah in a cil pek panin note kiangah kong gen bangin ka hi hi, Note tungah gen ding leh khen ding thu tampi ka nei hi; ahih hangin kei hong sawlpa in thumanpa ahi hi. Ama kiang pan ka zak bang bekin leitung mite kiangah ka hilh hi,” a ci hi. Amah in Pa thu a gen ahih lam a thei kei uh hi. Tua ahih ciangin Zeisu in, “Note in Mihing Tapa na khaitoh khit uh ciangin, tua pa ka hih leh ka deih bang hih loin ka Pa in hong sinsak bangin hih thu ka gen hi cih note’n na thei ding uh hi. Kei hong sawlpa in kei tawh a omkhawm hi. Amah in kei hong nusia kei ding hi. Bang hang hiam na cih uh leh, ama deihna bangin ka hih tawntung hi,” a ci hi. Tua thu a gen lai takin mi tampi in a um uh hi. Tua ahih ciangin Zeisu in amah a um Judah mite kiangah, “Ka thuhilhna na zuih uh leh ka nungzui taktakte na hi ding uh hi. Thuman taktak zong na thei ding uh a, tua thuman thutak in note hong suaktasak ding hi,” ci-in a gen hi. Tuate in, “Kote in Abraham’ suante ka hi uh hi. Cikmah hunin mi’ sila-in ka om ngei kei uh hi. Note hong suaktasak ding hi, bang hangin ci na hi hiam?” ci-in a dong kik uh hi. Zeisu in, “Aman takpi kong cih-inah, ‘Mawhna a bawlte khempeuh in mawhna’ sila ahi uh hi. Sila in inn sungah a om tawntung kei hi; ahih hangin tapa ahih leh a om tawntung hi. Tua ahih ciangin, Tapa in note hong suahtaksak leh suaktate taktak na hi ding uh hi. Note in Abraham’ suante na hih uh ka thei hi. Ahih hangin, ka thuhilhna in note sungah om nading ngah lo ahih ciangin note in thah dingin kei nong zong uh hi. Keimah in ka Pa kiangah ka muh bangin kong hilh hi. Note in zong na pa uh kiangah na zak bangun na gamta uh hi,” a ci hi. Amaute in, “Ka pa uh Abraham ahi hi,” a ci uh hi. Zeisu in zong, “Note in Abraham’ suan na hih uh leh, Abraham gamtat bangin na gamta ding uh hi. Ahih hangin ka Pa kiangah ka zak bangin note kiangah thuman thutak hong hilhpa keimah thah dingin tu-in na hong zong uh hi. Abraham in tua bangin a gamta kei hi. Note in na pa uh a gamtat bangin na gamta uh hi,” a ci hi. Amaute in, “Kote in zawlta ka hi kei uh hi; Pasian kici Pa khat bek ka nei uh hi,” a ci uh hi. Zeisu in, “Pasian in note’ Pa ahih takpi leh, note in kei nong it ding uh hi. Bang hang hiam na cih uh leh, keimah in Pasian kiang pan hong pusuakin kong pai hi. Keima ut bangin kong pai kei hi, Amah in kei hong sawl hi. Bang hangin ka thu thei lo na hi uh hiam? Ka thuhilhna ngai nuam lo na hih uh ciangin, ka thu na thei kei uh hi. Note in na pa uh dawimangpa’ suan na hi uh hi. A gilo na pa uh deihna bangin na gamta nuam uh hi. Amah in a cil panin mi thatpa hi a, thumanna nei lo ahih ciangin thuman thutak sungah a kip kei ding hi. Amah in thuzuau a gen ciangin ama thu a gen hi. Bang hang hiam na cih uh leh, amah in zuauthu gen leh thuzuaupa lah ahi hi. Thuman thutak ka gen ciangin ka thu na um kei uh hi. Ka tungah mawhna a om hi ci-in note lakah kua in hong lak ahi hiam? Keimah in thuman thutak hilh ka hih leh, bang dingin kei hong um lo na hi uh hiam? Pasian tawh a kipawlte in Pasian’ thu a ngai thei hi. Note in Pasian tawh kipawl lo na hih uh ciangin ka thu na ngai kei uh hi,” ci-in a gen hi. Judah mite in, “Nang Samaria mi na hi a, dawilawm nei na hi kong cihna uh man hilo ahi hiam?” a ci kik uh hi. Zeisu in, “Keimah in dawilawm nei ka hi kei hi. Ka Pa ka zahtak a, note in kei nong simmawh uh hi. Ahih hangin keimah in minthan’na ka zong kei hi. Ka minthan’ nading a zong thukhen ding khat a om hi. Ke’n aman takpi kong cih-inah, mi khatpeuh in ka thu a ngaih leh, sihna tawh a tawntungin a kipelh ding hi,” a ci hi. Judah mite in, “Nang dawilawm nei na hi ci-in tu-in ka thei uh hi. Abraham akipan kamsangte a si khin zo uh hi. Nang in, ‘Mi khatpeuh in keima thu a ngaih leh, sihna a thuak kei ding hi,’ na ci hi. A sisa ka pa uh Abraham sangin lianzaw na hi hiam? Pasian’ kamsangte zong a si zo uh hi. Nang kua lima kibawl na hi hiam?” a ci uh hi. Zeisu in, “Keima minthan’na kong lah leh, ka minthan’na a mawkna ahi ding hi. Ka min a thangsakpa in ka Pa ahi hi. Tua Pa in, ‘Kote Pasian ahi hi,’ na cihpa uh ahi hi. Note in tua Pasian na thei kei uh hi. Ahih hangin ke’n ahih leh, ka thei hi. Ka thei kei hi ci leng, note bangin zuauthu gen ka hi ding hi. Ahih hangin tua Pasian thei-in ama thu ka ngai hi. Na pa uh Abraham in keima ni a mu nuam hi. A mu-a a lungdam mahmah hi,” a ci hi. Tua ahih ciangin Judah mite in, “Kum sawmnga zong na pha nai kei hi. Abraham mu zo na hi hiam?” a ci uh hi. Zeisu in, “Ke’n aman takpi kong cih-inah, Abraham’ pian’ ma-in kei ka om hi,” a ci hi. Tua ahih ciangin amaute in Zeisu suang tawh deeng dingin suang tawm uh a, ahih hangin Zeisu bu-in biakna innpi sung pan a paikhia hi. Zeisu lampi-ah a pai lai takin a nu’ sung pan mittaw khat a mu hi. A nungzuite in, “Rabbi aw, kua mawhna hanga hihpa’ mittaw ahi hiam? Ama mawhna hang ahi hiam, a nu leh pa’ mawhna hang ahi hiam?” ci-in a dong uh hi. Zeisu in, “Hih pa’ mawhna hang ahi zongin, a nu leh pa’ mawhna hang ahi zongin ahi kei hi. Pasian’ nasepna ama tungah a kilat theih nadingin mittaw-in a suak hi. Ni a om lai teng kei hong sawlpa’ na i seem ding hi. Kuamah in na a sep theih loh hun zan hong tung ding hi. Leitungah ka om lai tengin leitung’ khuavak ka hi hi,” a ci hi. Tua khit ciangin lei tungah a cil sia a, cil tawh buan a bawl khit ciangin mittawpa’ mit ah buan nuhsak a, “Pai in la, Siloam bual tui sungah na mit na sil in,” ci-in a sawl hi. Siloam a khiatna in “Hong sawl hi” cihnopna hi. Tua ahih ciangin, tua pa pai-in a sil khit ciangin a mit in khua mu-in hong ciahkik hi. Tua ahih ciangin amah in khutdawh ngen mi ahih lam a inn veengte leh amah a mu ngeite in, “Hih pa in tu-a khutdawh ngenpa hilo ahi hiam?” a ci uh hi. Midangte in, “Ahi hi,” a ci uh hi. Kimkhat in, “Ahi kei hi, a kibang hi,” a ci uh hi. Amah in, “Kei tua pa ka hi hi,” a ci hi. Tua ahih ciangin amau in, “Tua ahih leh, na mittang bangci-a hong vak ahi hiam?” a ci uh hi. Amah in, “Zeisu kici mi khat in buan bawla ka mitah a nuh khit ciangin, ‘Siloam bualah pai in la, sil in,’ hong cih bangin pai-in ka sil leh, khua ka mu hi,” a ci hi. Amau in, “Tua pa koi lai-ah om hiam?” ci-a a dot uh ciangin, “Ka thei kei hi,” a ci hi. Amaute in tua mittawpa Farisaite kiangah a paipih uh hi. Zeisu in buan bawlin mit a vaksak ni in Sabbath ni ahi hi. Tua ahih ciangin khatvei Farisaite in zong, “Na mitang bangci a hong vak hiam?” ci-in a dong kik uh hi. Amah in, “Ka mitah buan hong nuh a, ka sil khit ciangin khua ka mu thei hi,” a ci hi. Tua ahih ciangin Farisaite kimkhat in, “Hih mi in Sabbath ni tang lo ahih ciangin Pasian sawl mi ahi kei hi,” a ci uh hi. Kimkhat in, “Mawhnei mi khat in hih bang nalamdang a lak thei ding hiam?” a ci uh hi. Tua ahih ciangin amaute kithutuak loin a kikhenthang uh hi. Tua ciangin khatvei amau in, “Na mit hong vaksakpa kua tawh kibang ahi hiam? Bangci na ngaisun hiam?” ci-in mittaw ngeipa a dong uh hi. Amah in, “Pasian’ kamsangpa ahi hi,” a ci hi. Tua ciangin Judah mite in mittaw khua mukikpa’ nu leh pa sam uh a, “Hih pa in a suahpih mittaw ahi na cih na tapa uh ahi hiam? Tua ahih leh, bangci tu-in khua mu thei hiam?” ci-in a dot matengun amah in nidang lai mittawsa a nung ciangin khua mu kik cih a um kei uh hi. A nu leh pate in, “Hih pa in komau tapa hi a, a suahpih mittaw ahih ka thei uh hi. Ahih hangin tu-in bangci a khua mukik thei hiam ci-in ka thei kei uh hi. Kua in ama mit vaksak hiam ci-in ka thei kei uh hi. Amah khan’ cing zo hi; amah na dong un, amah in ama thu hong gen ding hi,” a ci uh hi. A nu leh pate in Judah mite a kihtak manunah tua bangin a gen uh hi. Bang hang hiam i cih leh, “Zeisu in Khazih ahi hi a ci mi khempeuh biakna innpi pan kihawlkhia ding hi,” ci-in amaute in a vaihawm zo uh hi. Tua ahih ciangin amaute in, “Amah a khan’ cing zo hi, amah na dong un,” a ci uh hi. Tua ahih ciangin, a mittaw ngeipa sam kik uh a, “Pasian phat in, hih mi in mawhnei mi ahih kote’n ka thei uh hi,” a cih uh ciangin, amah in, “Mawhnei mi hiam hi lo hiam ka thei kei hi. Thu khat ka thei hi; nidangin mittaw ka hi a, tu-in khua ka mu thei hi,” a ci hi. Tua ciangin amaute in, “Nangma tungah bang hong bawl ahi hiam? Na mittang bangci a hong vaksak hiam?” ci-in a dot kik uh leh, amah in, “Keimah in khatvei kong gen khit hangin na ngai kei uh hi. Bang hangin za kik nuam na hi uh hiam? Ama nungzui suak nuam na hi uh hiam?” ci-in a dawng kik hi. Amaute in, “Nangmah in ama nungzui na hi hi. Ahih hangin kote ka hih uh leh, Moses’ nungzuite ka hi uh hi. Pasian in Moses kiangah thu pia zo cih ka thei uh hi. Ahih hangin hih pa ahih leh, koi pan hong piang hiam ka thei kei uh hi,” ci-in a gensia uh hi. Amah in, “Ka mittang hong vaksak hi napi-in a pian’na na theih loh uh lamdang hi. Pasian in mawhneite’ thu ngai lo hi ci-in eite i thei hi. Pasian zahtaka ama deihna a zui mite thu Pasian in a ngai hi. Lei piancil akipanin kuamah in suahpih mittaw khua a musak kik hi ci-in a kiza ngei kei hi. Hih pa in Pasian kiang pan hong pai kei leh, bangmah a hih thei kei ding hi,” a ci hi. Amaute in, “Nangmah in na suah akipan khialhna tawh kidim hi napi-in, kote thu hong hilh ding na hi hiam?” ci-in tua pa biakna innpi pan a hawlkhia uh hi. Amaute in amah a hawlkhiatna thu Zeisu in za a, tua pa a muh ciangin, “Pasian’ Tapa na um hiam?” ci-in a dong hi. Amah in, “Topa aw, amah ka up nadingin Pasian’ Tapa kua ahi hiam?” ci-in a dawng kik hi. Zeisu in, “Amah na mu zo tham loin nang tawh tu-in thu genpa in Pasian’ Tapa ahi hi,” a ci hi. Amah in, “Topa aw, ka um hi,” ci-in amah a bia hi. Zeisu in, “Khua mu thei lote a muh nading ahi zongin, khua mu theite in mittawt nading ahi zongin thu khen dingin leitungah kong pai hi,” a ci hi. Ama kiangah a om Farisaite kimkhat in tua thu a zak uh ciangin, “Ko zong mittaw ka hi uh hiam?” ci-in a dong uh hi. Zeisu in, “Note mittaw na hih uh leh, mawhna na nei kei ding uh hi. Ahih hangin ‘Khua ka mu uh hi,’ ci na hih uh ciangin na mawhna uh a om lai hi,” ci-in a gen hi. “Ke’n aman takpi kong cih-inah, tuukhumna sungah kongpi lam pan lut lo a, lamdang pan kahto-a a lut mi in guta buluh ahi hi. Kongpi pan a lut mi in tuucing ahi hi. Kongcingpa in ama ading hon’ thei a, a tuute in ama kam a ngai uh hi. Amah in tuute a minin sam a, pua lamah a paipih hi. Ama tuute khempeuh a khah khit ciangin a mai-ah pai a, tuute in a zui uh hi. Bang hang hiam na cih uh leh, amaute in ama aw a thei uh hi. Ahih hangin midang nung a zui kei ding uh a; a kiang pan a taikhia ding uh hi. Bang hang hiam na cih uh leh, midangte’ aw a thei kei uh hi,” ci-in Zeisu in a hilh hi. Tua thugentehna Zeisu in a hilh hangin, amaute in a khiatna a thei kei uh hi. Tua ahih ciangin khatvei Zeisu in, “Ke’n aman takpi kong cih-inah, keimah in tuukhumna kongpi ka hi hi. Ka mai-a hong paite khempeuh in guta buluhte ahi uh hi. Ahih hangin tuate’ aw tuute in a ngai kei uh hi. Keimah in kongpi ka hi hi. Mi khat in kei tung tawnin a lut leh, gal tawh kipelh ding a, sungtum pusuakin an nek ding lonona mun a mu ding hi. Gutate in gu ding that ding leh susia ding longal a hong pai kei uh hi. Kei ka hih leh, tuute in nuntakna ngah tham loin nuntakna a dimtak a ngah nadingun kong pai hi. Keimah in migi tuucing ka hi hi. Migi tuucing in a tuute tang dingin a nuntakna a paai hi. Tuu neipa hi lo a kicial tuucing ahih leh, ngia hong pai a muh ciangin tuute nusia-in tai a; ngia in tuute manin a kithehthangsak hi. Amah in a kicial hi a, tuute’ phat nading ngaihsun loin a taisan hi. Migi tuucing ka hi hi. Pa in kei hong thei-a kei in Pa ka theih bangin, ka tuute ka thei a; ka tuute in zong kei hong thei uh hi. Keimah in zong tuute tangdingin ka nuntakna ka paai hi. Hih tuukhumna sunga om lo tuute zong ka nei lai hi. Tua tuute zong ka hong paipih lai ding hi. Amaute in ka aw a ngai ding uh a, amaute hon’ khat suakin tuucing khat a om ding hi. Tua ahih ciangin keimah in ka nuntakna ka lak kik dingin paai ka hih ciangin, ka Pa in kei hong it hi. Ka nuntakna kuamah in hong sut kei hi, keima ut thu-in ka paai hi. Ka nuntakna paaikhia-a lakkik theih nading thu ka nei hi. Tua thu ka Pa in hong pia hi,” ci-in a gen hi. Tua thu hangin Judah mite kithutuak loin a kikhenthang kik uh hi. Amau lakah mi tampite in, “Amah dawilawm nei mihai ahi hi; ama thu bang hangin ngai na hi uh hiam?” a ci uh hi. Kimkhat in, “Tua thu in dawilawm neite’ thu ahi kei hi. Dawi in mittawte khua musak thei ding ahi hiam?” a ci uh hi. Jerusalem khua-ah ki-apna pawikhamna a om lai takin phalbi lai hi a; Zeisu biakna innpi tual Solomon’ innliim ah a kawi pai hi. Tua lai takin Judah mite in Zeisu kimkotin hong kikhawm uh a, “Bang tanvei ko hong lungkhamsak ding na hi hiam? Nang Khazih na hih leh, tangtakpi-in hong gen in,” a ci uh hi. Zeisu in, “Kong hilh khit hangin na um kei uh hi. Ka Pa’ min tawh ka bawl nalamdangte in ka teci ahi hi. Ahih hangin note ka tuuhon sungah om lo na hih uh ciangin na um kei uh hi. Ka tuute in keima aw a ngai uh a, ka tuute ka thei a, keima nung hong zui uh hi. Keimah in amaute nuntak tawntungna ka pia a, cikmah ciangin a kisia kei ding uh hi. Kuamah in ka tuute ka khut sung pan hong sut zo kei ding hi. Amaute hong pia ka Pa in na khempeuh sangin lianzaw ahih ciangin, ka Pa’ khut pan kuamah in a sut zo kei ding hi. Keimah in ka Pa tawh pumkhat ka hi uh hi,” ci-in a gen hi. Tua ahih ciangin Judah mite in suang tawh deeng dingin suang a tawm kik uh hi. Zeisu in, “Pasian kiang pan ka ngah thupha tampi kong lak zo hi. Tua thu lakah bang thu hangin suang tawh deeng dingin hong kipan na hi uh hiam?” ci-in a dong hi. Judah mite in, “Apha bawlna hangin suang tawh hong deeng ding ka hi kei uh hi. Nang mihing hi napi-in Pasian bangin na kibawl a, Pasian na gensiat maninah suang tawh hong deeng ding ka hi uh hi,” a ci kik uh hi. Zeisu in, “Note in pasiante na hi uh hi ka ci hi,’ ci-in note’ Thukhamna lai sungah kigelh hilo ahi hiam? Pasian thu a ngahte in pasiante ahi uh a kicih leh, Pasian Lai Siangtho kinial lo ahih ciangin, Pa in ama adingin a sian’thosak a, leitung ah a paisak keimah in, ‘Pasian’ Tapa ka hi,’ ka cih ciangin, ‘Pasian na gensia hi,’ hong ci na hi uh hiam? Kei in ka Pa’ ut bangin ka gamtat kei leh, hong um kei un. Ahih hangin, ka gamtat leh, kei nong um kei uh zongin ka bawlna thu um un. Tua bangin na up uh leh, Pa in kei sungah om a, kei in Pa sungah ka om cih thei-in na ciamteh ding uh hi,” a ci hi. Amaute in Topa mat nading a zon’ kik uh ciangin amaute’ khut sung pan a paikhia hi. Johan in a masa bel a baptaizna mun Jordan gun galah Zeisu pai kik a, tuasan takah a om hi. Mi tampite a kiangah va pai uh a, “Johan in nalamdang a lah loh hangin hih mi thu Johan in a genna khempeuh a man hi,” a ci uh hi. Tuasan takah mi tampite in Topa a um uh hi. Mari leh a sanggamnu Martha omna Bethani khua-ah Lazaras kici mi khat cina-in a om hi. Cinapa Lazaras’ sanggamnu Mari in Zeisu’ khe sathau nuh a, a sam tawh a nulsaknu hi. Tua hi a, a sanggamnute in Zeisu kiangah mi sawl uh a, “Topa aw, na itpa cina-in a om hi,” ci-in a ko uh hi. Zeisu in tua thu a zak ciangin, “Hih cinatna in sih nading natna ahi kei hi. Pasian’minthan’ nading leh Pasian’ Tapa’ minthan’na a kilah nading hi,” a ci hi. Zeisu in Martha, a sanggamnu leh Lazaras a it hi. Tua ahih ciangin Lazaras’ cinat thu a zak ciangin pai loin ama omna munah ni nih a om lai hi. Tua nung ciangin, “Tu-in Judah gam lamah pai kik ni,” ci-in a nungzuite kiangah a gen hi. A nungzuite in, “Rabbi aw, Judah mite in tu nangawnin nang suang tawh deen’ dingin hong zong uh ahih ciangin, tua lam pai kik ding na hi hiam? a ci uh hi. Zeisu in, “Nisuah leh nitum kikal nai sawm leh nai nih pha hilo ahi hiam? Mi khat in sun lai takin a pai leh, leitung khuavak a muh maninah a kipuk thei kei ding hi. Ahih hangin mi khat in khuamial lai takin a pai leh, ama sungah khuavak om lo ahih ciangin a puk thei hi,” a ci hi. Tua thu amah in gen a, tua nung ciangin Zeisu in, “I lawmpa Lazaras ihmu-in a om hi. A phong dingin ka pai ding hi,” a ci hi. A nungzuite in, “Topa aw, a ihmut leh, a nuamtuam ding hi,” a ci uh hi. Zeisu in Lazaras’ sihna thu a gen hangin a ihmu taktak a cihna bangin a nungzuite in a ngaihsun uh hi. Tua ahih ciangin Zeisu in, “Lazaras a si zo hi, note in na up nadingun tuasan takah om lo ka hih ciangin ka lungdam hi. Ahih hangin tu-in ama kiangah va pai ni,” ci-in a tel gen hi. Didimas kici Thomas in nungzui a lawmte kiangah, “Ei zong Topa tawh sihna thuakkhawm dingin pai ni,” a ci hi. Zeisu a tun’ ciangin Lazaras han sungah ni li a pha zo hi ci-in a thei hi. Bethani khua in Jerusalem khua tawh tai nih dektak a kigamla hi. Martha leh Mari’ sanggampa si ahih ciangin, a hehnem dingin Judah mite tampi a hong pai uh hi. Zeisu hong paina thu Martha in a zak ciangin a dawn dingin a pai hi. Mari ahih leh, inn sungah tu-in a om lai hi. Martha in, “Topa aw, nang om lecin ka sanggampa a si kei ding hi. Tu nangawnin Pasian kiangah na nget khempeuh Pasian in hong pia ding cih ka thei hi,” a ci hi. Zeisu in, “Na sanggampa a thokik ding hi,” a cih ciangin Martha in, “Ni tawp Ni-a thawhkikna-ah a thokik ding cih ka thei hi,” a ci hi. Zeisu in, “Keimah in thawhkikna leh nuntakna ka hi hi. Kei hong umte in a sih hangin a nungtakik ding hi. Kei hong um a nungtate in zong cikmah ciangin a si ngei kei ding hi. Hih thu na um hiam?” ci-in a dot ciangin, amah in, “Ka um hi, Topa aw, Leitungah hong pai ding Pasian’ Tapa Khazih na hih ka um hi,” a ci hi. Tua bang a cih khit ciangin Martha ciah a, a sanggamnu kiangah, “Sia hong tung zo a, nang hong sam hi,” ci-in a ko sim hi. Tua thu a zak ciangin Mari thakhatin tho a, Zeisu va dawn hi. Tua lai takin Zeisu khua sungah a lut nai kei hi; Martha’ dawnna munah a om lai hi. Tua ciangin dahna hehnem dinga inn sungah Mari tawh a omkhawm Judah mite in, amah tho meengmeenga a paikhiat a muh uh ciangin, amah kap dingin hanah a pai ding hi ci-in a nung a zui uh hi. Tua ahih ciangin, Mari in Zeisu omna munah tung a, Topa a muh ciangin a khe mai-ah bokin, “Topa aw, nang om lecin ka sanggampa a si kei ding hi,” a ci hi. Mari akipan amah tawh hong paikhawm Judah mite a kap uh Zeisu in a muh ciangin, a sin sungah khuisa-a lungmangin, “Koiah, na vui uh hiam?” ci-in a dot leh, “Topa, hong pai in la, hong en in,” a ci uh hi. Zeisu a kap hi. Tua ahih ciangin Judah mite in, “En un, amah in bangzah takin Lazaras a it hiam!” a ci uh hi. Amaute lakah mi kimkhatte in, “Mittawpa khua a musak thei hih pa in hih mi zong a sih loh nadingin bawl thei lo ahi hiam?” a ci uh hi. Tua ciangin Zeisu in a sungah khuisa kawmin hanah a pai hi. Tua han in leihawm hi a, suang tawh a kisin hi. Zeisu in, “Suang lemkhia un,” a ci hi. Misipa’ sanggamnu Martha in, “Topa aw, tu-in ahih leh, a uih zo ding hi. Bang hang hiam na cih leh, ni li pha zo hi,” a cih leh, Zeisu in, “Nang na up leh, Pasian’ minthan’na na mu ding hi, hong ci zo hilo ka hi hiam?” a ci hi. Tua ahih ciangin amau in suang a lemkhia uh hi. Zeisu dakto a, “Pa aw, nang in keima thu hong ngai na hih ciangin na hehpihna ka phat hi. Nang in keima thu nong ngai niloh cih ke’n ka thei hi. Ahih hangin kei na hong sawl ka hih hong um mihonpite in a up nadingun, amau ading tua thu ka gen hi,” a ci hi. Tua bang a cih khit ciangin, “Lazaras aw, hong paikhia in,” ci-in nakpi-in a kiko hi. A sipa in a khut a khe han puan tawh kitun a, a maitang dial tawh kitunin a paikhia hi. Zeisu in, “Amah phel un la, na khahkhia un,” a ci hi. Tua ahih ciangin Mari kiangah hong pai Judah mi tampite in Zeisu’ bawlna a muh uh ciangin a um uh hi. Ahih hangin kimkhat ahih leh, Farisaite kiangah a pai uh a, Zeisu bawlna thu khempeuh a zasak uh hi. Tua ahih ciangin siampi liante leh Farisaite in upa vaihawmte kikhawmsak uh a, “Eite in bangci hih ding i hi hiam? Hih mi in nalamdang tampi a lak hi. Hih mi i koihkhong leh, mite khempeuh in amah a um ding uh a, Rom mite hong pai-in eite omna gam ahi zongin, eite pawl ahi zongin hong susia ding uh hi,” a ci uh hi. Amau lakah mi khat, tua kum siampi ukpa ahi Kai-afas in, “Note in bangmah na thei kei uh hi. Mi tampi tangding mi khat hong sih leh, Judah mite a kisiat sangin a pha zaw ci-in ngaihsun lo na hi uh hiam?” a ci hi. Tua bang a cihna in ama ut thu gen ahi kei hi. Tua kumin amah siampi ukpa ahih ciangin, Zeisu in mite tangding a si ding tham loin, mun khempeuh ah a kikhenthang Pasian’ tate a kikhawm kiksak dingin a si ding hi,” ci-in kamsangpa bangin a gen hi. Tua ahih ciangin tua ni-a kipan Zeisu a thah nadingun amaute kikumin a vaihawm uh hi. Tua ahih ciangin Judah mite lakah a kilangin Zeisu a pai nawn kei hi. Tua mun panin paikhia-in, gammang tawh kinai Efraim kici khua-ah pai a, a nungzuite tawh a omkhawm hi. Judah mite’ Paisan pawikham ding nai a, mi tampi in a kisian’thosak nadingun Paisan pawi ma-in gam khempeuh panin Jerusalem khua-ah a paito uh hi. Tua ahih ciangin, tuate in Zeisu zong uh a, “Bangci na ngaihsun uh hiam? Amah pawikhamna sungah hong pai lo ding hi ci-in na um uh hiam?” ci-in biakna innpi sungah ding-in a kidong uh hi. Siampi liante leh Farisaite in Zeisu’ omna mun a thei a om leh, amaute in a mat theih nadingun hong hilh ta hen, ci-in tua lai takin lai a hawm uh hi. Tua ahih ciangin Zeisu in Paisan pawikham nading ni guk a sap lai takin a sisa a thawhkiksakpa Lazaras omna Bethani khua-ah a pai hi. Tua ciangin tuasan takah nitak an a vak uh hi. Martha in an a vak hi. Lazaras in Topa tawh an ne pawlte lakah a om hi. Tua lai takin Mari in tampi a man mard paknamtui thawl khat la a, Zeisu’ khe nuhin a sam tawh a nul hi. Tua paknamtui in inn sung teng a zeel hi. A nungzuite khat Zeisu lehheekpa Judas Iskariot in, “Hih paknamtui dangka zathum tawh zuakin mizawngte bang hangin pia lo ahi hiam?” a ci hi. Tua bang a cih in mizawngte phattuamna ding ngaihsun hi lo hi; amah in gutapa hi a, dangka-ip tawi ahih ciangin, a sunga omsa teng sawk thei ahih hang hi. Zeisu in, “Ka luang vui ding ni dongin amah in hih paknamtui koihkhol ta hen. Bang hang hiam na cih uh leh, mizawngte in note tawh a omkhawm ngitnget uh hi. Kei ka hih leh, note tawh omkhawm ngitnget ding ka hi kei hi,” a ci hi. Tuasan takah Zeisu a om Judah mite in a theih uh ciangin, amaute in Zeisu hang bek hi lo, a sisa a thawhkiksak Lazaras zong en dingin a hong pai uh hi. Ahih hangin siampi liante in Lazaras zong thah dingin a vaihawm uh hi. Bang hang hiam i cih leh, amah hangin Judah mi tampite paikhia uh a, Zeisu a um uh hi. Zingsang ciangin pawikhamna-ah a hong pai mite in, Jerusalem khua-ah Zeisu hong pai ding cih a thei uh hi. Tua ciangin nisuh hiang tawi-in Topa dawn dingin a paikhia uh a, “Hosanna, Pasian’ min tawh hong pai Israel Kumpipa in, Thupha ngah ta hen!” ci-in a kiko uh hi. Lai Siangtho sungah a kigelh bangin, Zeisu in lano khat ngah a, a tungah tuangin, “Zion’ tanu aw, lau kei in; En in, na Kumpipa in, Lano tungah tuangin hong pai ding hi.” a ci hi. Tua thute a cilin a nungzuite in a theih loh uh hangin, Zeisu in minthan’na a ngah khit ciangin Topa thu tua bangin kigelh a, ama tungah tua bangin a bawl ding hi a cihna thu a phawk uh hi. Lazaras han sung pan samkhia a, sihna pan a thawhkiksak lai takin, Zeisu tawh a omkhawm mihonpite in teci a pang uh hi. Tua theihsakna lim a bawlna mihonpite in a zak uh ciangin a dawn dingin a paikhia uh hi. Tua ahih ciangin Farisaite in, “En un, bangmah na zo kei uh hi. Leitung mite khempeuh in ama nung a zui khin ta uh hi,” ci-in khat leh khat a kici uh hi. Pawikhamna sungah Pasian bia dinga hong paite lakah Grik mi zong a om uh hi. Tua ahih ciangin tuate in Galile gam Bethsaida khuami Filip kiangah va pai uh a, “Zeisu ka mu nuam uh hi, lawm aw,” ci-in a gen uh hi. Filip pai-a Andru va hilh hi. Andru leh Filip in a nih un Zeisu kiangah a ko uh hi. Zeisu in, “Mihing Tapa in minthan’na a ngah hun hong tung zo hi. Ke’n aman takpi kong cih-inah, buhhum khat in lei tungah kia-a a sih kei leh, amah bek a om ding hi. Ahih hangin a sih leh, tampi a gah thei ding hi. Ama nuntakna a itte in nuntakna a mangthangsak ding hi. Hih leitungah a nuntakna a mudahte in nuntak tawntungna a nei ding hi. Ka na hong semte in ka nung hong zui ta hen. Keima omna munah ka nasemte zong a om ding hi. Ka na hong semte Pa in a pahtawi ding hi.” “Tu-in ka lungmang a, bang ka gen ding hiam! Pa aw, hih hun pan hong gum in ka ci ding hiam? Hi lo hi, hih thu hangin hih hun kong tung zo hi. Pa aw, na min na thangsak in,” a ci hi. Tua ciangin, vantung pan aw khat ging a, “Ka thangsak zo a, khatvei ka thangsak kik ding hi,” a ci hi. A kimkot a, ding mihonpite in hih thu a zak uh ciangin, “Van ging hi,’ a ci uh hi. Kimkhat in, “Vantungmi khat in amah tawh kiho hi,” a ci uh hi. Zeisu in, “Hih aw in kei ading hong pai ahi kei hi, note’ adinga hong pai ahi hi. Tu-in hih leitung in thukhenna a thuak ding hi. Tu-in hih leitung ukpa kihawlkhia ding hi. Keimah leitung pan hong kikhai ciangin mi khempeuh keima kiangah ka kai ding hi,” a ci hi. Tua bang a cih ciangin ama sihna ding lim a genna ahi hi. Tua hi a, mihonpite in, “Khazih a om tawntung ding hi,’ ci-in Thukhamna sungah ka za zo uh hi. Tua bang ahih leh, ‘Mihing Tapa in kikhaina a thuak ding hi,’ bang hangin ci na hi hiam? Hih Mihing Tapa kua mi ahi hiam?” ci-in a dong uh hi. Tua ciangin Zeisu in, “Khuavakna in note kiangah tawlkhat a om lai ding hi. Khuamial in no hong lap loh nadingin khuavak a om lai takin na pai un. Khuamial lakah a pai mi in a tun’na ding a thei kei hi.” “Khuavak in note tawh a omkhawm lai takin khuavak’ tate na suah nadingun khuavak na um un,” ci-in a gen hi. Tua thu teng Zeisu in a gen khit ciangin, paikhia-in a bu hi. Tua zah nalamdang tampi amaute mai-ah a lah hangin, amau in a um kei uh hi. Bang hang hiam i cih leh, Pasian’ kamsangpa Isaiah hilhna thu a tun’ nading hi. Tua thu in: “Topa aw, ka genna thu uh kua in hong um ahi hiam? Pasian’ khut kua kiangah kilang ahi hiam?” a ci hi. Khatvei Isaiah in a gen kikna thu in: “A mit uh tawsakin, a lungsim uh a khauhsak hi. Tua bang hih kei leh, a mit uh tawh mu-in, A lungsim uh tawh thei ding uh a; Amau cinatna ka damsak ding hi,” a cihna thu hangin amaute in a um kei uh hi. Isaiah in Zeisu’ minthan’na mu khol ahih ciangin tua bangin ama thu a genkhol hi. Tua bang ahih hangin upa vaihawm tampite nangawn in Zeisu a up uh hangin, biakna innpi sung pan Farisaite in a hawlkhiat ding a lau manunah a kilangin a mang kei uh hi. Bang hang hiam i cih leh, Pasian’ piak minthan’na sangin mite piak minthan’na a deih zaw uh hi. Zeisu in, “Kei hong um mi in kei bek hong um kei hi. Kei hong sawlpa zong a um hi. Kei hong mu mi in kei hong sawlpa zong a mu hi. Kei hong um mi in khuamial lakah a om loh nadingin kei khuavakin leitungah kong pai hi. Ka thu za a, a zui lo mi ke’n thu ka khen kei ding hi. Bang hang hiam na cih uh leh, leitung mite thu khen dingin hong pai ka hi kei hi. Leitung mite gum dingin hong pai ka hi hi. Kei hong nolh a, ka thu a ngai lo mi in thukhen ding mi khat a nei hi. Ka hilhna thu in ni tawp Ni ciangin tua mi tungah thu a khen ding hi. Bang hang hiam na cih uh leh, ka ut bangin ka gen kei hi, kei hong sawl Pa kiang panin bangci gen ding, bangci hilh ding ci-in thupiakna ka ngah hi. Ama hong thupiakna in nuntak tawntungna ahi hi ci-in ka thei hi. Tua ahih ciangin ka hilhna teng Pa in keima kiangah hong piak bangin a hilh ka hi hi,” ci-in a kiko hi. Paisan pawikham ma-in Zeisu in leitung pan Pa kiangah a ciah ding hun tung cih a theih ciangin, leitungah a om ama mite it ahih ciangin a tawp dongin a it hi. Dawimangpa in Simon’ tapa Judas Iskariot sungah Zeisu a lehheek nadingin lungsim a guan’ khit ciangin; nitak an a nek lai takun, Pa in na khempeuh ama khut tungah a apna thu ahi zongin, amah in Pasian kiang pan a hong paina thu ahi zongin, Pasian kiangah a paikik nading ahi zongin a theih ciangin, Zeisu ding a, a puanza suahin dial tawh a kawng a gak hi. Tua ciangin kuang sungah tui sungin a nungzuite’ khe silsak a, a kawng a, a ten’ dial tawh a nul hi. Tua ahih ciangin Simon Piter kiang a tun’ ciangin Piter in, “Topa aw, kei’ khe zong sil ding na hi hiam?” a ci hi. Zeisu in, “Tu lai taka ka bawlna thu na thei kei hi. Tu nung ciangin na thei ding hi,” a ci hi. Piter in “Ka khe cikmah hunin na sil kei ding hi,” a cih ciangin Zeisu in, “Nang kong sil kei leh, kei tawh na kipawl thei kei ding hi,” ci-in a gen hi. Tua ciangin Simon Piter in, “Topa aw, ka khe bek hong sil kei in, ka khut leh ka lu zong hong silsak in,” a ci hi. Zeisu in, “A kisilsate in khe longal sil ding a deih kei hi, a pumpi a siang hi. No na sian’ uh hangin na vekpi-un na siang kim kei uh hi,” a ci hi. A lehheek ding pa theikhol ahih ciangin, “Note na vekpi-un na siang kei uh hi,” a ci hi. Tua bangin amau khe a sil khit ciangin a puan silh a, a tut khit ciangin, “Tu-a note tungah kong bawlna thu na thei uh hiam? Note in keimah ‘Sia’ leh ‘Topa’ nong ci uh hi. Tua thu aman hi, nong cih uh bangin ka hi hi. Tua ciangin keimah in note Topa leh Sia ka hi napi-in na khe uh kong silsak leh, note in zong khat leh khat’ khe na kisilsak ding uh hi. Bang hang hiam na cih uh leh, keimah in note tungah ka hih bangin note in na hih nadingun lim kong lak hi. Ke’n aman takpi kong cih-inah, sila in a topa sangin a lianzaw kei hi. Sawltak in a sawlpa sangin a lianzaw kei hi. Tua nate thei-in na hih le-uh teh, thupha na ngah ding uh hi. Note khempeuh kong ci nuam kei hi. Ka teel mite ka thei hi. ‘Keima an a ne mi in a khetul tawh hong peek hi,” ci-a Lai Siangtho thu a tun’ nading ahi hi. Hih thute hong tun’ ciangin tua pa ka hih lam na theih nadingun, hong tun’ ma-in no kiangah kong genkhol hi. Ke’n aman takpi kong cih-inah, ka sawlpa a ngai mi in kei zong hong ngai hi. Kei hong ngai mi in kei hong sawlpa zong a ngai hi,” a ci hi. Tua bangin Zeisu in a gen khit ciangin, a lungmang mahmah a, “Note khat in hong lehheek ding hi,” ci-in a tel gen hi. Kua a cihna hiam ci-in a nungzuite kimuangmawh ciatin, khat leh khat a ki-en uh hi. Zeisu in a it nungzui khat in Zeisu’ ang-ah lumin, kingamin a om hi. “Kua a cihna hiam?” ci-a dong dingin Piter in lim a lak hi. Tua pa in Zeisu’ ang ah kingamin lum a, “Topa aw, kua ahi hiam?” a ci hi. Zeisu in, “Ama ading khomun kam khat ka diah khit ciangin ka piakpa ahi hi,” a cih khit ciangin, khomun kamkhat diah a, Simon’ tapa Judas Iskariot a pia hi. Tua khomun kam khat a san’ khit ciangin Satan ama sungah a lut hi. Tua ciangin Zeisu in, “Na bawl nading thu a manlangin hih in,” a ci hi. Bang hangin tua bang a gen hiam ci-in a sabuai-a tute kuamah in a thei kei uh hi. Bang hang hiam i cih leh, mi kimkhat in Judas in dangka-ip tawi ahih ciangin, “Pawikhamna-ah i zat ding na khatpeuh peuh lei in,” ci ahih kei leh, “Mizawngte na khatpeuh na pia in,” a ci hi ci-in a ngaihsun uh hi. Amah in khomun kamkhat a san’ khit ciangin thakhatin a paikhia hi. Tua lai tak zan ahi hi. Tua ahih ciangin Judas a paikhiat khit ciangin Zeisu in, “Tu-in Mihing Tapa kiminthangsak a, ama sungah Pasian a kiminthangsak ding hi. Ama sungah Pasian a kiminthan’sak leh, Pasian in Tapa a minthangsak ding a, thakhatin a min a thangsak ding hi. Ka tanote aw, keimah in note tawh tawlkhat bek ka omkhawm ding hi. Note in kei nong zong ding uh hi. ‘Ka paina munah nong tung zo kei ding uh hi,’ ci-in Judah mite kiangah ka cih mah bangin, tu-in note kiangah kong ci hi. Thupiakna thak kong pia hi: Note khat leh khat na ki-it un la, keimah in note kong it mah bangin khat leh khat na ki-it un. Note khat leh khat na ki-it uh leh, mite khempeuh in note ka nungzuite na hih lam uh a thei ding uh hi,” a ci hi. Simon Piter in, “Topa aw, koi lam pai ding na hi hiam?” a cih ciangin Zeisu in, “Ka paina lamah tu-in nong zui zo kei ding hi. Tu nung ciangin na hong zui ding uh hi,” a ci kik hi. Piter in, “Topa aw, keimah in tu-in bang hangin hong zui zo lo ding ka hi hiam? Nang adingin ka nuntakna ka paai ding hi,” a ci hi. Zeisu in, “Kei adingin na nuntakna na paai ding hiam? Ke’n aman takpi kong cih-inah, thumvei na hong nial ma-in aak a khuang kei ding hi,” ci-in a gen kik hi. Khatvei Zeisu in, “Note lungmang kei un; Pasian um un la, kei zong hong um un. Ka Pa’ inn sungah omna tampi a om hi. A om kei leh, no kiangah kong gen zo ding hi. Note om nading mun bawlkhol dingin ka pai ding hi. Pai-in na om nading uh ka bawl leh, no kiangah kong paikik ding a; ka omna munah na om nadingun ka hong la ding hi. Ka pai nading mun lampi na thei uh hi,” a cih leh, Thomas in, “Topa aw, na pai nading thei lo ka hih uh ciangin, lampi bangci theih ding ka hi uh hiam?” a ci hi. Zeisu in, “Keimah in lampi ka hi hi, thuman thutak ka hi hi, nuntakna lah ka hi hi. Kei hong suang loin kuamah in Pa kiang a tung zo kei ding hi. Note in kei nong theih uh leh, ka Pa zong na thei ding uh hi, tu-a kipanin ka Pa na mu zo uh hi,” a ci hi. Filip in, “Topa aw, Pa hong lak lecin ka deihna uh a kicing ding hi,” a ci hi. Zeisu in, “Filip aw, kei in note tawh hih tanvei ka omkhawm hangin hong thei lo na hi hiam? Kei hong mu mi in Pa zong a mu zo hi. ‘Pa hong lak in,’ bang hangin na ci hiam? Pa sungah ka om a, kei sungah Pa a om cih um lo na hi hiam? Note kiangah kong gen thu in keima thu hong hilh ka hi kei hi. Kei sunga teeng ka Pa in na hong sem ahi hi. Pa sungah ka om a, Pa in kei sungah a om thu hong um in. Ahih kei leh zong ka bawl nalamdangte’ thu ngaihsunin hong um un.” “Ke’n aman takpi kong cih-inah, kei hong um mi in ka bawl bang nate bawlin tua sangin a lianzaw a bawl ding hi. Bang hang hiam na cih uh leh, Pa kiangah ka ciah ding hi. Note in keima min suangin thu na nget khempeuh uh Ta tungah Pa’ minthan’na a kilat nadingin ka hih ding hi. Kei min suangin na nget peuhmah uh kong hih ding hi.” “Kei nong it uh leh, ka thupiakna na mang ding uh hi. Keimah in Pa kiangah thu ka ngen ding a, note tawh a omkhawm tawntung dingin Kha Siangtho ahi adang Huhpa hong pia ding hi. Tua Kha Siangtho leitung mite in mu loin thei lo uh ahih ciangin a sang zo kei uh hi. Tua Kha Siangtho in note tawh omkhawmin, note sungah om ding ahih ciangin amah na thei ding uh hi.” “Keimah in note tagahte bangin kong nusia kei ding a, note kiangah kong pai lai ding hi. Tawlkhat khit ciangin leitung mite in kei hong mu lo ding uh hi. No na hih uh leh, nong mu ding uh hi. Keimah nungta ka hih ciangin, note zong na nungta ding uh hi. Pa sungah kei om a, kei sungah note na om uh leh, note sungah kei ka om tua ni ciangin na thei ding uh hi. Ka thupiakna nei a, a zui mi in kei hong it hi. Kei hong it mi ka Pa in a it ding hi. Keimah in zong amah ka it ding a, ama kiangah ka kilang ding hi,” a ci hi. Judas Iskariot hi lo adang Judas in, “Topa ko kiangah na kilat hangin, leitung mite kiangah bang hang kilang lo ding na hi hiam?” a ci hi. Zeisu in, “Kei hong it mi in ka thu zui ding a, ka Pa in amah a it ding a, ama kiangah hawhin, amah tawh ka omkhawm ding uh hi. Kei hong it lo mi in ka thu a zui kei hi. Note zak thute in kei thu hi lo kei hong sawl Pa’ thu ahi hi.” “Note tawh ka omkhawm lai takin hih thu kong hilh zo hi. Ahih hangin ka min tawh Pa in hong sawl ding Huhpa a kici Kha Siangtho in na khempeuh hong hilh ding a, no kiangah kong gen khempeuh hong phawkkik sak ding hi. Nopna note kong pia hi; keima nopna kong pia hi. Leitung mite in a piak bangin kong pia kei hi. Na lungmang kei un la, na lau kei un. ‘Ka ciah hangin no kiangah kong paikik ding hi,’ ka cihna thu na za uh hi. Nong it uh leh, Pa kiangah ciah ding ka hih ciangin na nuam ding uh hi. Bang hang hiam na cih uh leh, kei sangin Pa a lianzaw hi. Tua thu a tun’ ciangin na up nadingun, hong tun’ ma-in kong genkhol zo hi. Tu-a kipanin note kiangah thu tampi kong gen nawn kei ding hi. Bang hang hiam na cih uh leh, hih leitung ukpa hong pai a; ahih hangin kei tungah thu a nei kei ding hi. Ahih hangin keimah in Pa’ hong thupiakna bangin ka hih a, Pa ka it cih leitung mite in a theihtheih nading ahi hi. Tho un, paikhia ni.” “Keimah in leenggah gui ka hi a, ka Pa in leenggah gui locingpa ahi hi. Kei tungah a gahlo hiangte khempeuh a sattan ding hi. A gah thei hiang khempeuh in a gah semsem nadingin a hahsiang ding hi. Ka thuhilhna hangin note tu-in na siangtho uh hi. Kei sungah om un. Keimah in zong note sungah ka om ding hi. Leenggah hiang in gui tungah a om kei leh, ama ut bangin a gah zo lo bangin, note in zong keima sungah na om kei uh leh, na gah zo kei ding uh hi. Keimah in leenggah gui ka hi hi. Note in a hiang na hi uh hi. Keima sungah om a, ama sungah ka om leh, tua mi in tampi a gah thei hi. Bang hang hiam na cih uh leh, kei sungah na om kei uh leh, bangmah na hih thei kei ding uh hi. Kei sungah a om lote in a kipaiikhia hiangte bangin a kikeusak hi. Tua ciangin mite in khawm uh a, mei sungah khulin mei in a kangtum hi. Kei sungah na om uh a, ka thu in note sungah a om leh, na ngetpeuh peuh uh na ngah ding uh hi. Note in tampi na gah uh leh, ka Pa’ minthan’na na kilangsak ding uh a, note in ka nungzuite na hi takpi ding uh hi. Pa in kei hong it bangin no kong it hi; ka itna sungah om un. Keimah in ka Pa’ thupiaknate zui a, hong itna sungah ka om mah bangin, note in ka thupiaknate na zuih uh leh, kei sungah na om ding uh hi. Note sungah ka lungdamna om a, note lungdamna a kicin’ nadingin hih thute note kiangah kong gen zo hi.” “Ka thupiakna ahih leh, keimah in no kong it mah bangin note khat leh khat na ki-it un. Ama lawmte tangding a nuntakna a paai itna sangin, itna lianzaw kuamah in a nei kei hi. Note in ka thupiakna bangin na hih uh leh, ka lawmte na hi ding uh hi. Tu-a kipanin note sila kong ci nawn kei ding hi. Bang hang hiam na cih uh leh, silate in a topa bawlna thu a thei kei uh hi. Lawmte kong ci ding hi. Bang hang hiam na cih uh leh, ka Pa kiangah thu ka zakte no kong theisak zo hi. Note in kei nong teel kei uh hi; no kong teel hi. Note pai-in, a tampi na gah khit uh ciangin, na gah uh a kip nadingin kong koih zo hi; tua ciangin ka min tawh thu na nget khempeuh uh Pa in hong pia ding hi. Hih in keima thupiakna ahi hi; Khat leh khat na ki-it un.” “Leitung mite in no hong muhdah uh leh, note hong muhdah ma-in kei hong mudah uh hi ci-in na thei ta un. Note in leitung mite tawh na kipawl uh leh, leitung mite in amau mipawl note hong it ding uh hi. Ahih hangin leitung mite lak pan note kong teelkhia hi; leitung mite tawh na kipawl kei uh a, tua ahih ciangin leitung mite in no hong mudah uh hi. ‘Sila in a topa sangin lianzaw kei,’ ci-in ka gensa thu na ngaihsun un. Amau in kei hong bawlsia uh ahih manin note zong hong bawlsia ding uh hi. Amau in kei thu zui le-uh, note thu zong a zui ding uh hi. Amau in kei hong sawlpa thei lo uh ahih ciangin, ka min hangin tua thu khempeuh no tungah hong bawl ding uh hi. Kei hong pai loin amau kiangah thu hilh lo hi leng, amaute in mawhna a nei kei ding uh hi. Tu-in ahih leh, amau mawhna pan suahtak theih nading a nei kei uh hi. Kei hong mudah mi in ka Pa zong a mudah hi. Midangte in a bawl ngei loh nalamdangte amaute lakah bawl lo hi leng, mawhna a nei kei ding uh hi. Ahih hangin tu-in amaute in hih nalamdangte mu khin napi-in kei leh ka Pa hong mudah veve uh hi. Tua ahih ciangin, ‘Thu om loin kei hong mudah uh hi,’ ci-in amau Thukhamna sungah a kigelh bangin a tun’ nading ahi hi.” “Pa kiang pan a pusuak, thuman thutak Kha Siangtho ahi Pa kiang pan no kiangah kong sawl ding Huhpa in a hong tun’ ciangin, keima ading teci a pang ding hi. Note in zong a cil pan akipan kei tawh omkhawm na hih uh ciangin, teci na pang ding uh hi.” “Note na kipuk loh nadingun hih thu kong genkhol hi. Amau in kikhopna innsung pan note hong hawlkhia ding uh hi. Ahi hi; hong that mite khempeuh in Pasian’ na ka sem hi ci-in a ki-um ding uh hi. Amaute in ka Pa thei loin kei zong hong thei lo uh ahih ciangin, tua thu a bawl ding uh hi. Amau hun a tun’ ciangin kong gensa hih thute na phawk kik nadingun tu-in kong genkhol hi.” “Acil panin hih thute note kiangah kong gen ngei kei hi. Bang hang hiam na cih uh leh, note tawh keimah ka omkhawm lai hi. Ahih hangin tu-inah kei hong sawlpa kiangah pai ding ka hih ciangin, ‘Koi lai-ah pai ding na hi hiam?’ ci-in note lakah kuamah in nong dong kei uh hi. Ahih hangin hih thute note kiangah kong gen ciangin, note lungsung uh dahna tawh a kidim zo hi. Ke’n aman takpi kong cih-inah, kei ka ciah leh, note’ ading a pha zaw ding hi. Bang hang hiam na cih uh leh, kei ka ciah kei leh, Huhpa in note kiangah hong pai lo ding hi. Ahih hangin ka ciah leh, tua pa note kiangah kong sawl ding hi. A hong tun’ ciangin, mawhna, siangthona leh thukhenna leitung mite kiangah a pulak ding hi. Amau in kei hong um lo uh ahih ciangin, a mawhna uh a pulak ding hi. Pa kiangah kei ciah ding a, note in kei hong mu nawn lo ding na hih uh ciangin, sian’thona a pulak ding hi. Hih leitung ukpa in thukhenna thuak zo ahih ciangin, thukhenna a pulak ding hi.” “Note kiangah gen ding thu tampi a om hangin tu-in na sang zo kei ding uh hi. Ahih hangin thuman thutak Kha Siangtho hong tun’ ciangin, thuman thutak a vekpi-in note hong hilh ding hi. Bang hang hiam na cih uh leh, ama ut bang hong gen ahi kei hi, a zaksa thu khempeuh hong gen ding hi. Anung ciangin hong piang ding thu khempeuh zong hong hilh ding hi. Amah in keima minthan’na hong langsak ding hi, bang hang hiam na cih uh leh, keima’ aa la-in note kiangah hong gen ding hi. Ka Pa’ neihsa khempeuh keima’ aa ahi hi. Tua ahih ciangin, keima’ aa la-in note kiangah a hong gen ding hi kong ci hi.” “Tawlkhat khit ciangin nong mu kei ding uh hi. Tawlkhat khit ciangin na hong mu kik ding uh hi,” a ci hi. Tua ahih ciangin, a nungzuite kimkhat in, “Tawlkhat khit ciangin nong mu kei ding uh hi. Tawlkhat khit ciangin na hong mu kik ding uh hi,’ leh ‘Pa kiangah ka pai man-inah, a cihna in bang thu ahi hiam?” ci-in khat leh khat a kici uh hi. Tua ahih ciangin, “Tawlkhat khit ciangin,’ a cihna in bang ahi hiam? Bang a cihnopna hiam ka thei kei uh hi,” ci-in a gen uh hi. Amaute in a dot nop uh Zeisu in a theih ciangin, “Tawlkhat khit ciangin note in kei nong mu nawn kei ding uh hi. Tawlkhat khit ciangin, note in kei nong mu kik ding uh hi ka cihna thu note na kidong tek uh hiam? Ke’n aman takpi kong cih-inah, note kapin na kiko ding uh hi. Leitung mite ahih leh, a lungdam ding uh hi. Note na dah ding uh hangin, na dahna uh lungdamna a suak ding hi. Numei in ta a suah lai takin a hun tung ahih ciangin a dah hi. Ahih hangin ta a suah khit ciangin leitungah mi khat suak ahih ciangin lungdam a, a gimna a phawk nawn kei hi. Tua ahih ciangin tu-in na dah uh hangin a nung ciangin keimah in note kong mukik ding a, no na lungdam ding uh hi. Note lungdamna kuamah in hong sut zo kei ding hi. Tua ni ciangin kei kiangah bangmah nong dong kei ding uh hi. Ke’n aman takpi kong cih-inah, note in keima min tawh Pa kiangah thu na nget khempeuh uh a hong pia ding hi. Tudongin ka min suangin bangmah na ngen kei uh hi. Na lungdamna uh a kicin’ nadingin ngen un, na ngah ding uh hi.” “Tua thute thugentehna tawh kong gen zo hi. Thugentehna tawh gen loin, Pa’ thu note kiangah a tel takin kong gen nading ahun hong tung ding hi. Tua ni ciangin note in ka min suangin thu na ngen ding uh hi; note ading Pa kiangah ke’n ngen ning ka ci kei hi. Bang hang hiam na cih uh leh, note in kei nong it uh a, Pa kiang pan kong pai hi cih um na hih uh ciangin, Pa in zong note hong it ding hi. Keimah in Pa kiang pan pusuakin leitungah kong kumsuk a; khatvei leitung pan pusuakin Pa kiangah ka pai kik ding hi,” ci-in a gen hi. A nungzuite in, “Tu-in thugentehna zang loin a tel takpi-in nong gen hi! Na khempeuh na thei khin a, kuamah in nang hong dot nading thu a om kei hi ci-in tu-in ka thei uh hi. Tua ahih ciangin nangmah in Pasian’ kiang pan hong pai na hi ci-in ka um uh hi.” a ci uh hi. Zeisu in zong, “Tu-in nong um uh hiam? En un, note in na omna ciat uhah na kikhenthang ding uh a, kei guak na hong nusiat nading uh ahun hong tung ding a, a tung zo hi. Ahih hangin kei guak ka om kei hi; Pa in kei tawh a omkhawm hi. Note in keima sungah nopna na neih nadingun hih thute kong genkhol hi. Note in leitungah gimna na thuak ding uh hi. Ahih hangin lunghimawh kei un, leitung ka zozo hi,” ci-in a gen hi. Zeisu in hih thute a gen khit ciangin vantung lam ento a, “Pa aw, ahun a tung zo hi. Tapa in nang hong minthan’sak nadingin, na Tapa hong minthangsak in. Nang in Ta’ khut sungah na piaksate khempeuh, nuntak tawntungna a piak nadingin mi pawl khempeuh uk nading thu Ta na pia hi. Amaute in nang Pasian taktak khat bek leh na sawlpa Zeisu Khazih a theihna un nuntak tawntungna ahi hi. Ka sep dinga nong piak na khempeuh sem zo ka hih man-inah leitungah na min ka thangsak zo hi. Pa aw, leitung a om ma-in nangma kiangah ka neihsa minthan’na tawh tu-in nangma kiangah kei hong minthangsak in.” “Leitungah na hong piaksa mite kiangah na min ka lak zo hi. Tuate in nangma neihsa ahi uh a, kei nong pia zo hi. Nangma thu amaute in a zui uh hi. Tu-in kei na hong piakte khempeuh in nangma’ aa ahi hi cih amaute in a thei uh hi. Bang hang hiam na cih leh, nong piak thute amaute ka pia a, amaute in a sang uh a; nangma kiang pan kong pai cih thei-in nangmah in na hong sawl hi cih a um takpi uh hi. Amaute ading thu ka ngen hi. Leitung mite ading thu ka ngen kei hi. Na hong piak mite in nangma mi ahih man-unah amau ading thu ka ngen hi. Ka neihsate khempeuh nangma’ aa ahi hi. Nangma neihsate khempeuh keima’ aa ahi hi. Amaute hangin minthan’na ka ngah hi. Tu-a kipanin leitungah ka om kei ding hi. Hih mite in leitungah a om lai ding uh hi. Nangma kiangah kei kong pai ding hi. A siangtho Pa aw, nang leh kei in pumkhat i hih mah bangin, amaute zong pumkhat a suah nadingun kei nong piaksa mite nangma min tawh kipsak in. Amaute tawh ka omkhawm lai takin nong piaksa mite nangma min tawh ka kipsak zo a; amaute ka kem zo hi. Lai Siangtho a tun’ nadingin, amaute lakah kisiatna’ tapa khat longal kuamah a kisia kei hi. Tu-in keimah in nangma kiangah kong pai ding hi. Keima lungdamna hih mite sungah a dim nadingin hih thute leitungah ka om lai-in ka gen hi. Amaute kiangah nangma thu ka pia zo hi. Keimah in leitung tawh ka kipawl loh bangin, amaute zong leitung tawh kipawl lo ahih uh ciangin, leitung mite in amaute a mudah uh hi. Amaute leitung pan na lakhia in ci-in thu kong ngen kei hi. Gilopa tawh a kipelh nadingun amaute na kep nadingin thu kong ngen hi. Keimah in leitung tawh ka kipawl loh bangin, amaute zong leitung tawh a kipawl kei uh hi. Thuman thutak tawh amaute na siangthosakin. Nangma thu in thuman thutak ahi hi. Nang in leitungah kei nong sawl mah bangin, amaute leitungah ka sawl hi. Amaute zong thutak tawh a kisian’thosak nadingun, keimah ka kisiangthosak hi.” “Hih mite ading bekin thu kong ngen kei hi. Amaute’ thuhilhna hangin kei hong um mite adingin zong thu kong ngen hi. Nang in kei nong sawl cih leitung mite in a up nadingun Pa aw, keima sungah na om a, kei in nangma sungah ka om bangin, amaute zong eimau sungah om-in pumkhat a suah nadingun thu kong ngen hi. “Pa aw, kei nong piak mite in zong nong piaksa minthan’na a muh nadingun ka omna-ah na omkhawmsak dingin ka deih hi. Bang hang hiam na cih leh, lei pian’ ma-inah nong it hi. A siangtho ka Pa aw, leitung mite in nang a hong theih loh uh hangin, kei in kong thei hi. Hih mite in kei nong sawlpa ka hihna a thei uh hi. Kei nong it bang itna amaute sungah om a, keimah in amaute sungah ka om nadingin, nangma min amaute kiangah ka lak zo a, ka lak lai ding hi,” ci-in thu a ngen hi. Zeisu in hih bangin thu a nget khit ciangin, a nungzuite tawh tua mun nusia-in Kidron Kuam a kantan uh hi. Tua kuam galkhat ah Oliv huan khat a om hi; tua huan sungah amah leh a nungzuite a lut uh hi. Amah a lehheekpa Judas in zong tua mun a thei hi. Bang hang hiam i cih leh, Zeisu leh a nungzuite in tuasan takah tamveipi a pai uh hi. Tua lai takin Judas in galkap pawlkhat tawh, siampi liante leh Farisaite’ paisak palik mangte tawh a kipawl khit ciangin, meivak, meilah leh hiamte tawi-in tua munah a pai uh hi. Tua ahih ciangin Zeisu in ama tungah a piang ding thu khempeuh thei ahih ciangin paikhia a, “Note in kua zong na hi uh hiam?” ci-in a dong hi. Amaute in, “Nazareth mi Zeisu ka zong uh hi,” a cih uh leh, “Kei tua pa ka hi hi,” a ci hi. A lehheekpa Judas in amaute tawh a ding khawm hi. Tua lai takin Zeisu in, “Kei tua pa ka hi hi,” ci-in a gen ciangin amaute nunglamah kin uh a, lei ah a puk uh hi. Tua ciangin Zeisu in, “Note in kua zong na hi uh hiam?” ci-in a dot kik leh, amaute in, “Nazareth mi Zeisu ka zong uh hi,” a ci uh hi. Zeisu in, “Kei tua pa ka hi hi kong ci zo hi,” a ci hi. ‘Kei na hong piak mite khat beek a mangthang kei hi,’ a cihna thu a tun’ nadingin Zeisu in, “Kei hong zong na hih uh leh, hih mite paikhia ta hen!” a ci hi. Tua lai takin Simon Piter in a namsau puak a dawh khit ciangin, siampi ukpa’ silapa sat a, a taklam bil a satkhia hi. Tua silapa min in Malkhas ahi hi. Tua lai takin Zeisu in Piter kiangah, “Namsau a pai sungah siat kik in. Pa in kei hong piak hai dawn lo ding ka hi hiam?” ci-in a gen hi. Tua lai takin galkapte akipan galkap mangpa leh Judah upa nasemte in Zeisu a man uh a; khau tawh a hen khit uh ciangin, Annas kiangah a paipih masa uh hi. Bang hang hiam i cih leh, Annas in tua kuma siampi ukpa Kai-afas’ sungpa ahi hi. Tua Kai-afas in, “Mite tangdingin mi khat a sih leh a pha hi,” ci-a Judah mite tawh a vaihawmpa ahi hi. Simon Piter leh adang nungzuite khat in Zeisu nung a zui uh hi. Tua nungzuipa in siampi ukpa tawh kimeeltheih a, Zeisu tawh siampi ukpa’ inn tualah a lut khawm hi. Ahih hangin Piter in pualam kongpi kiangah a ding hi. Tua ahih ciangin siampi ukpa tawh a kimeeltheih nungzuipa paikhia a, kongpi a cing numei kiangah a gen khit ciangin Piter a lutsak hi. Tua lai takin kongpi a cing numei in, “Nang hih mi’ nungzui khat hilo na hi hiam?” a cih ciangin, “Ka hi kei hi,” a ci hi. Tua lai takin silate leh nasemte in meiphual cih uh a, tuasan takah mei awi-in a ding uh hi. Bang hang hiam i cih leh, khua a dam hi. Piter zong amaute tawh omkhawm a, ding-in mei a awi hi. Tua ahih ciangin siampi ukpa in ama nungzuite leh ama thuhilhna thu Zeisu kiangah a dong hi. Zeisu in, “Leitung mite mai-ah a kilangin ka gen zo hi. Judah mite’ kikhopna innte leh biakna innpi sungah a tawntungin thu ka hilh a, thu ka hilhsim ngei kei hi. Bang dingin kei hong dong na hi hiam? Ka thu hong zate kiangah bang thu ka gen cih na dong in. Ka thugenna amaute in a thei ding uh hi,” ci-in a dawng hi. Tua bangin a dawn’ ciangin, a kianga ding nasemte khat in, “Tua bangin siampi ukpa na dawngkik hiam?” ci-in a khut tawh Zeisu a beeng hi. Zeisu in, “Aman lo ka gen leh, aman lohna hong lak in. Aman ka gen leh bang hangin hong beeng na hi hiam?” ci-in a dawng kik hi. Tua ciangin Annas in siampi ukpa Kai-afas kiangah kihensa-in Zeisu a paisak hi. Tua lai takin Simon Piter ding a, mei a awi lai takin amaute in, “Nang Zeisu a nungzui khat hilo na hi hiam?” ci-in a dot uh ciangin, “Ka hi kei hi,” ci-in a nial hi. Piter in a bil a satpa tawh a kibeh, siampi ukpa’ sila khat in Piter kiangah, “Nang Zeisu tawh huan sungah hong mu hilo ka hi hiam?” a cih ciangin, Piter in a nial kik hi. Tua ciangin thakhatin aak a khuang hi. Tua ahih ciangin amau in Kai-afas kiang pan mang innah a paipih uh hi. Tua laitak in zingsang tung ahi hi. Amaute in Paisan pawi a nek theih nadingun kisian’suah nuam uh ahih manin mang inn sungah a tum kei uh hi. Tua ahih ciangin Pilat in amaute kiangah paikhia a, “Hih mi’ tungah mawhsakna bang na nei uh hiam?” ci-in a dong hi. Amaute in, “Hih pa migilo hi kei leh, nang kiangah kong pia kei ding uh hi,” a ci uh hi. Tua ahih ciangin Pilat in, “Hih pa la un la, note ngeina bangin thu na khen un,” a ci hi. Judah mite in, “Kote in mi thah theih nading thu ka nei kei uh hi,” a ci uh hi. Tua bang a cihna in, Zeisu in bangci a sih ding ci-in lim lak a, a genkholh mah bangin a tun’ nading ahi hi. Pilat mang inn sungah a lut khit ciangin Zeisu sam a, “Nang Judah Kumpipa na hi hiam?” ci-in a dong hi. Zeisu in, “Nangma ut bangin hih bangin hong dong na hi hiam? Ahih kei leh, midangte in keima thu hong gen zo ahi hiam?” ci-in a dawng hi. Pilat in, “Judah mi na hi hiam? Nangma mipawlte leh siampi liante in nang kei khut sungah hong pia uh hi. Nang in bang hih khial na hi hiam?” ci-in a dot ciangin, Zeisu in, “Keima gam in leitung gam ahi kei hi. Keima gam in leitung gam hi leh, Judah mite khut sung ka tun’ loh nading ka mite in a do ding uh hi. Tu-in, ka gam in hih lai takah a om kei hi,” a ci hi. Pilat in, “Tua bang ahih leh, nang Kumpipa na hi hiam?” ci-in a dot ciangin Zeisu in, “Kumpipa na hi nong ci hi. Kei ka hih leh, thuman thutak ading teci pang dingin ah leitungah kong kum a, kong suak hi. Thuman thutak a deih mi khempeuh in keima’ aw a ngai uh hi,” ci-in a gen hi. Pilat in, “Thuman thutak bang ahi hiam?” a ci hi. Tua thu a gen khit ciangin Judah mite kiangah paikhia a, “Hih mi tungah mawhna ka mu kei hi. Ahih hangin Paisan Pawi khamna-ah mi khat no kiangah ka khah ding ngeina khat a om hi. Tua ahih ciangin no kiangah Judahte’ Kumpipa ka khah ding nong awi uh hiam?” a ci hi. Amaute in, “Hih mi khah ding ka deih kei uh hi; Barabbas na khah ding ka deih uh hi,” ci-in nakpi-in kiko kikin a ngen uh hi. Barabbas in misuampa ahi hi. Tua lai takin Pilat in Zeisu a sap khit ciangin a satsak hi. Galkapte in ling tawh lukhu ganin ama lu tangah a khusak uh a, puanza san a silhsak khit uh ciangin, “Judahte’ Kumpipa aw, nang na ci dam ta hen!” ci-in khut tawh a beeng uh hi. Pilat va paikhia kik a, “Hih mi tungah bangmah mawhna ka muh loh na theih nadingun note kiangah kong lakhia hi,” a ci hi. Tua ahih ciangin, Zeisu in ling lukhu khu-in, puanza san silhin a paikhia hi. Pilat in, “En un, hih pa,” a ci hi. Siampi liante leh upate in Zeisu a muh uh ciangin, “Singlamteh tungah that in! “Singlamteh tungah that in!” ci-in a kiko kik uh hi. Pilat in, “Nomau in amah la un la, singlamteh tungah that un. Ama tungah mawhna ka mu kei hi,” a ci hi. Tua ciangin Judah mite in, “Kote in thukhamna ka nei uh hi. Tua thu tawh kituakin hih pa si dingin kilawm hi. Bang hang hiam na cih leh, amah in, ‘Pasian’ Tapa ka hi hi,’ a ci hi,” ci-in a gen uh hi. Tua thu Pilat in a zak ciangin lau semsem a; mang inn sungah lut kikin, “Nang koi pan hong piang na hi hiam?” ci-in a dot ciangin, Zeisu in kamkhat beek a dawng kei hi. Tua ahih ciangin Pilat in, “Kei kiangah thu hong gen nuam lo na hi hiam? Keimah in nang kong khah nading thu ahi zongin, singlamteh tungah thah nading thu ahi zongin ka neih thei lo na hi hiam?” a ci hi. Zeisu in, “Tung lam pan thu na ngah kei leh, kei tungah bangmah na hih thei kei ding hi. Tua ahih ciangin nangma khut sungah kei a hong piapa in khialhna golzaw a nei hi,” ci-in a thuk hi. Tua a kipanin Pilat in Zeisu a khah nading a zong zaw hi. Ahih hangin Judah mite in, “Hih pa na khah leh, Kaisar kumpipa’ lawm na hi kei hi; Kaisar kumpipa’ gal ahi kumpipa-a kibawl tawm mi na hi hi,” a ci uh hi. Tua thu a zak ciangin Pilat in Zeisu paikhiatpih a, Hebru kamin ‘Gabbatha’ kici ‘Suangphah’ a cihna munah thukhenna tokhom tungah a tu hi. Tua lai takin, Paisan pawi kigin ni sun lai tak nai sawm leh nai nih ahi hi. Pilat in, Judah mite kiangah, “En un, note’ Kumpipa,” ci-a a gen ciangin amaute in, “Tua pa that in, tua pa that in, singlamteh tungah that in!” ci-in a kiko uh hi. Pilat in, “Note’ Kumpipa singlamteh tungah that ding ka hi hiam?” ci-in a dot ciangin, “Kaisar kumpipa longal adang kumpipa ka nei kei uh hi,” ci-in siampi liante in a dawng kik uh hi. Tua ciangin, Pilat in Zeisu singlamteh tungah thah dingin amaute’ khut sungah a pia hi. Tua lai takin amaute in Zeisu la-in a paipih uh hi. Zeisu in ama singlamteh pua a, Hebru kamin ‘Golgotha’ kici ‘Lutangguh Mun’ kicihna ah pai dingin a paikhia hi. Tua san takah amaute in Zeisu singlamteh tungah a khai uh hi. Amah tawh a lang tuakah mi nih zong a khai uh hi. Zeisu a lai zangah a om hi. Pilat in laigelh a, singlamteh tungah a suang hi. Tua lai in, “JUDAHTE’ KUMPIPA, NAZARETH KHUAMI ZEISU AHI HI,” ci-in a kigelh hi. Hih lai Judah mi tampite in a sim uh hi. Bang hang hiam i cih leh, Zeisu singlamteh tungah a kithahna mun in khuapi tawh kinai a; Hebru kam, Latin kam leh Grik kam tawh a kigelh hi. Tua ahih ciangin, Judah siampi liante in Pilat kiangah va pai uh a, ‘Judahte’ Kumpipa, ci-in gelh kei in; ‘Kei in Judahte’ Kumpipa ka hi hi, a ci hi,’ ci-in laigelh in,” a cih uh ciangin Pilat in, “Ka gelhsa in ka gelhsa hi,” a ci hi. Galkapte in Zeisu singlamteh tungah a khai khit uh ciangin, a puante la a, seh li suahin seh khat ciatin a hawm uh a; puanak zong a la uh hi. Hih puanak kikhui loin a lu pan a taw dongin a kiphan ahi hi. Tua ahih ciangin, “Hih puan balkeek kei ni. Kua in ngah ding hiam lai-ai i saan ding hi,” ci-in, Lai Siangtho sungah a kigelhna thu a tun’ nadingin galkapte a kikum uh hi. Tua thu in: “Amaute khat leh khat in ka puan a hawm uh hi; Ka puan tungah lai-ai a saan uh hi,” ci-in a kigelh hi. Galkapte in tua thu a bawl uh hi. Zeisu’ singlamteh kiangah a nu leh a nu’ sanggamnu, Klopas’ zi Mari leh Magdala khua Mari-te a ding uh hi. Tua hi a, Zeisu in a nu leh a it nungzuipa a kianga ding a muh ciangin, “Numei aw, nang in na tapa en in!” a ci hi. A nungzuipa kiangah, “Nang na nu en in!” a ci hi. Tua akipanin tua nungzuipa in, Zeisu’ nu ama innah a khoi hi. Tua nung ciangin Zeisu in thu khempeuh kizo khin zo cih a theih ciangin, Lai Siangtho sungah a kigelh mah bangin a tun’ nadingin, “Tui ka duh hi,” a ci hi. Tua munah tuikha tawh kidim beel khat om a, amaute in tuipaan khat tuikha sungah a diah khit uh ciangin, pumpeeng dawnah bulhin ama kamah a bak uh hi. Tua hi a, Zeisu in tui a ngah khit ciangin, “A zo zo hi,” ci-a a lu su-in a si hi. Tua ni in kigin ni ahih ciangin, Nipi ni-in a luang singlamteh tungah a om loh nadingin, Judah mite in Pilat kiangah a khe kuaitanin a luang a paihkhiat nading thu a va ngen uh hi. Bang hang hiam i cih leh, tua Nipi ni in ni lian mahmah ahi hi. Tua ahih ciangin galkapte hong pai uh a, Zeisu tawh singlamteh tungah kithat mi khat’ khe a kuaih tan khit uh ciangin, adang khatpa’ khe a kuaitan uh hi. Zeisu kiang a tun’ uh ciangin amah si zo ta cih a muh uh ciangin, a khe a kuaitan kei uh hi. Ahih hangin galkap khat in a pang teipi tawh sun a, si leh tui thakhatin a luangkhia hi. Tua thu a mu mi in teci a pang hi. Ama teci pan’na thu aman hi. Note in na up theih nadingun ama genna thu aman hi ci-in a thei hi. Bang hang hiam i cih leh, “A guh khat beek a kikuaitan kei ding hi,” ci-a Lai Siangtho sungah a gen bangin a tun’ nadingin hih teng a kibawl hi. Adang Lai Siangtho sungah “Tua mite in amaute sutpa a en ding uh hi,” ci-in a kigelh hi. Tua nung ciangin, Arimathea khua Josef in Judah mite a kihtak manin a kilang loin Zeisu’ thu a zui mi hi a; Zeisu’ luang a paipih nadingin Pilat kiangah a ngen hi. Pilat in thu a pia hi. Tua ahih ciangin tua pa hong pai a, Zeisu’ luang a paipih hi. Nidanga zan lai taka Zeisu kiangah a pai Nikodemas in pound zakhat a khai mirrah leh aloes kihel paknamtui a paipih hi. Tua lai takin amaute in Zeisu’ luang la uh a, Judah mite’ kivui ngeina bangin paknamtui tawh dial sungah a tun uh hi. Singlamteh tungah thahna mun tawh kinai-ah huan khat om a, tua huan sungah kuama kivui ngei lohna han thak khat a om hi. Judah mite kigin kholh ni nai ahih ciangin, tua hanah Zeisu a vui uh hi. Bang hang hiam i cih leh, tua han a nai hi. Ni sagih lakah a kipat ni, khuavak ma zingtungin Magdala khua Mari hanah pai a, han kong khakna suang kilakhia zo-a om a mu hi. Tua ahih ciangin tai mengmeng a, Piter leh Zeisu’ it nungzuipa kiangah tungin, “Han sung pan Topa’ luang a paikhiatpih zo uh hi. Koi lai takah a koih uh hiam ka thei kei hi,” ci-in a gen hi. Tua lai takin, Piter leh adang nungzuipa paikhia uh a, han lamah a tai uh hi. Amaute nih a kibangin a tai uh hi; ahih hangin adang nungzuipa in Piter makhelhin han a tung masa hi. Amah kunsukin a sung a et ciangin dial puan a om a muh ciangin han sungah a lut kei hi. Simon Piter in a nung zui a, a tun’ ciangin han sungah lut a; dial puan a om hangin, a lu tunna puan tawh omkhawm loin a tuamtuak a, kizialin a om a mu hi. Tua lai takin, han a tung masa adang nungzuipa zong han sungah lut a, a muh ciangin a um hi. Bang hang hiam i cih leh, Zeisu in sihna pan thokik ding a cihna Lai Siangtho sungah a om thu a thei nai kei uh hi. Tua ahih ciangin tua nungzuite amau innah a ciah uh hi. Ahih hangin Mari in han pua lamah ding-in a kap hi. A kah lai takin kunsuk-in han sung en a, vantungmi nih puanpak silhin Zeisu’ luang a kisialna a lu lam ah khat, a taw lam ah khat tu-a om a mu hi. Amaute in, “Numei aw, bang hangin kap na hi hiam?” ci-a a dot uh ciangin Mari in, “Ka Topa a paikhiatpih zo uh a, koi-ah a koih uh cih ka thei kei hi,” a ci hi. Tua banga a gen khit ciangin a nung lam a kihei leh, Zeisu ding-a om a mu hi; ahih hangin Zeisu a hih lam a thei kei hi. Zeisu in, “Numei aw, bang hangin kap na hi hiam? Kua zong na hi hiam?” ci-in a dot leh, Mari in Zeisu pen huan cingpa a sak man-inah, “Topa aw, amah na paikhiatpih leh koi-ah na koih hiam hong gen in. Keimah in ka va la ding hi,” a ci hi. Zeisu in, “Mari aw,” a cih ciangin Mari kihei a, Hebru kamin, “Rabboni aw,” a ci hi. Rabboni a khiatna in ‘Topa’ a cihnopna hi. Zeisu in, “Hong len kei in. Bang hang hiam na cih leh, ka Pa kiangah ka kahto nai kei hi. Ka sanggamte kiangah pai in la, ‘Ka Pa ahi note’ Pa, ka Pasian ahi note’ Pasian kiangah ka kahto ding hi,’ ci-in amaute kiangah va gen in,” ci-in a sawl hi. Tua mah bangin Magdala khua Mari zong pai a, “Topa ka mu zo a, tua thute hong gen zo hi,” ci-in a nungzuite kiangah a gen hi. Ni sagih lakah ni kipat ni, a nitak ciangin Judah mite a kihtak man-unah a nungzuite in kikhopna-ah kongkhakte khakin a om uh a, tua sungah Zeisu hong lut a, amau lai zangah ding-in, “Nopna na ngah ta un!” a ci hi. Tua bang a cih khit ciangin a khut leh a pang a lak hi. Tua nungzuite in Topa a muh uh ciangin a lungdam uh hi. Zeisu in khatvei, “Nopna na ngah ta un, Pa in kei hong sawl bangin note kong sawl hi,” a ci kik hi. Tua ciangin amaute tungah mut a, “Kha Siangtho na sang ta un. Mi’ mawhna na maisak uh leh, tua mi’ mawhna kimaisak ding hi. Mi’ mawhna na maisak kei uh leh, tua mi’ mawhna kimaisak lo ding hi,” ci-in thu a pia hi. Zeisu hong pai lai takin, sawm-le-nihte laka khat Didimas kici Thomas in amaute tawh a omkhawm kei hi. Tua ahih ciangin nungzui dangte in, “Topa ka mu zo uh hi,” ci-in Thomas kiangah a gen uh ciangin amah in, “A khut a, sikkhetna pawn mu-in, sikkhetna pawn sung ka khutme tawh lawng a, ama pang zong ka khut tawh ka lawn’ kei leh, ka um kei ding hi,” a ci hi. Tua nung ni giat ni ciangin, a nungzuite inn sungah khatvei kikhawm kik uh a, Thomas zong a om hi. Kongkhakte a kikhak lai takin Zeisu zong hong pai a, amau laizang ah ding-a “Nopna na ngah ta un,” a ci hi. Tua lai takin Thomas kiangah, “Na khutmete zan in la, ka khut en in. Na khut zan in la, ka pang hong lawng in, um khial kei in la, um in,” a ci hi. Thomas in, “Ka Topa leh ka Pasian aw,” a cih ciangin, Zeisu in, “Nong muh man-inah um na hi hiam? Hong mu lo napi-in a um mite in thupha a ngah uh hi,” a ci hi. Hih laibu sungah a kigelh lo lim dang tampi zong Zeisu in a nungzuite mai-ah a lak hi. Zeisu in Khazih hi a, Pasian’ Tapa ahih note’n na up theih nading uh leh, ama min umin tua min hangin nuntakna na ngah theih nadingun hih laibu a kigelh zo hi. Tua nung ciangin, Tiberias tuili geiah a nungzuite kiangah Zeisu a kilak hi. A kilahna thu in hih bang ahi hi. Simon Piter leh Didimas kici Thomas akipan, Galile gam Kana khuami Nathanael leh Zebedi’ tate nih in adang nungzuite nih tawh a omkhawm uh hi. Simon Piter in, “Kei nga beng dingin pai ning,” a cih ciangin, “Ko zong kong pai ding uh hi,” a ci uh hi. Amaute paikhia uh a, gunkuang sungah lutin tua zanin ngasa khat beek a man kei uh hi. Khua a vak lai takin Zeisu tui geiah a ding hi. Ahih hangin Zeisu ahih lam a nungzuite in a thei kei uh hi. Tua lai takin Zeisu in, “Ka taneute aw, ngasa na man uh hiam?” ci-in a dot ciangin, “Ka man het kei uh hi,” ci-in a dawng kik uh hi. Zeisu in, “Khatvei gunkuang ziat lamah ngen na paai un. Tua hi leh ngasa na man ding uh hi,” ci-in a hilh hi. Tua bangin amau in ngen a paih uh leh, ngasa tampi khuhkha uh ahih ciangin, ngen a kai zo kei uh hi. Tua lai takin Zeisu’ it nungzuipa in Piter kiangah, “Topa ahi hi,” a ci hi. Topa ahih lam Simon Piter in a theih ciangin, puanak tungsilh guak tawh tuili sungah a tuaksuk hi. A dang nungzuite in tui gei tawh kigamla lo, lam sawmnga bek kihal ahih maninah ngasa tawh kidim ngen a kai uh a, gunkuang tungah tuangin a pai uh hi. Amaute leilak a tun’ uh ciangin mei-am leh a am tungah ngasa leh khomun kihanga om a mu uh hi. Zeisu in, “Tu-a na mat uh ngasa kimkhat hong paipih un,” ci-in thu a pia hi. Simon Piter gunkuang tungah kahto-in ngasa za leh sawmnga leh thum tawh a dim ngen lei ah a kaito hi. Tua zahin a tam hangin ngen a kikeek kei hi. Zeisu in, “Hong pai un la, zing an ne un,” a ci hi. Topa ahih lam a nungzuite in a theih uh ciangin, “Nang kua na hi hiam?” ci-in kuamah in a dong ngam kei uh hi. Zeisu hong pai a, khomun leh ngasa a lak khit ciangin amaute a pia hi. Hih kilakna in Zeisu sihna pan a thawhkik khit ciangin, a nungzuite kiangah thumvei a kilakna ahi hi. Tua ahih ciangin an a nek khit uh ciangin Zeisu in, “Johan’ tapa Simon aw, hih mite in kei hong it sangin nang hong itzaw na hi hiam?” ci-in Simon Piter a dong hi. Piter in, “Ahi hi, Topa aw, nang kong it na thei hi,” a cih ciangin, “Ka tuunote na vak in,” ci-in thu a pia hi. Khatvei Zeisu in Piter kiangah, “Johan’ tapa Simon aw, kei hong it na hi hiam?” ci-in a dot ciangin, “Ahi hi, Topa aw, nang kong it na thei hi,” a cih ciangin, “Ka tuute na cing in,” a ci hi. Zeisu in, “Johan’ tapa Simon aw, kei na hong it hiam?” ci-in thumveina a dong hi. “Nang in kei na hong it hiam?” ci-in thumvei a dot man-inah Piter dah a, “Topa aw, nang in na khempeuh na thei a, ke’n nang kong it na thei hi,” a cih ciangin Zeisu in, “Ka tuute na vak in. Ke’n aman takpi kong cih-inah, nang na tangval lai-in na kawng gakin, na utna mun khempeuh ah na pai thei hi. Ahih hangin na teek ciangin na khut zan-inah midangte in nang hong hen ding uh a, na ut lohna munah hong paipih ding uh hi,” a ci hi. Tua a genna in, Piter in bang ci-in a sihna tawh Pasian minthangsak ding cih lim a lah nopna ahi hi. Tua thu a gen khit ciangin Piter kiangah, “Ka nung hong zui in,” ci-in a gen hi. Zeisu in nitak an a nek lai takin a ang-ah kingam a, “Topa aw, nang kua in hong lehheek ding hiam?” ci-a a dong Zeisu’ it nungzuipa Piter in kihei-in a muh ciangin, Piter in Zeisu kiangah, “Topa aw, hih mipa in bang ahih ding hiam?” ci-in a dong hi. Zeisu in, “Kong paikik hun matengin hih mi a om nading ka ut leh, nang in bang phamawhsa na hi hiam? Nang na hih leh, ka nung hong zui in,” ci-in thu a pia hi. Tua thu hangin sanggamte in, “Tua nungzuipa a si kei ding hi,” ci-in a gen thang uh hi. Ahih hangin, “A si kei ding hi,” ci-in Zeisu in a ci kei hi. “Kong paikik hun matengin tua pa a om nading ka ut leh, nang in bang phamawhsa na hi hiam?” a ci hi. Hih thu khempeuh ading teci pang a, a gelhpa in tua nungzuipa ahi hi. Ama teci pan’na aman hi ci-in kote in ka thei uh hi. Zeisu’ hihna thu adang tampi a om lai hi. Tua ahih nate khempeuh gelh khin lehang a kigelhna laibu leitungah ta zo lo ding hi ci-in ka um hi. Theofilas aw, Zeisu in ama teelsa sawltakte Kha Siangtho tawh a vaikhak khit ciangin, a tunglam a kilaktoh ni dong matengin a bawlsa leh a thuhilh khempeuh, a masa lai sungah ka gelh zo hi. Tua Zeisu in gimna a thuak khit ciangin amau kiangah ni sawmli tawntung kilangin, hihna tampi tawh a nungta taktak ahihna lak a, Pasian’ Gam thu a hilh hi. Tua sawltakte tawh a omkhawm lai takin, Jerusalem khuapi panin paikhia loin, “Keimah kiangah na zaksa uh Pa’ kamciamna letsong na ngak un. Bang hang hiam na cih uh leh, Johan in tui sungah hong baptaiz hi. Ahih hangin a sawt loin note in Kha Siangtho sungah na kibaptaiz ding uh hi,” a ci hi. Amaute a kikhop lai takun, “Topa aw, tu lai takin Israel mipawlte in amau gam na ki-uksak kik ding hiam?” ci-in a dong uh hi. Zeisu in, “Pa in ama ukna-ah a koihsa a hun ahi zongin, a ni ahi zongin na theih nadingun thu a om kei hi. Ahih hangin Kha Siangtho in nomau tungah hong kumsuk khit ciangin vangliatna na ngah ding uh a, Jerusalem khua-a kipan Judah gam, Samaria gam khempeuh leh leimong dongin ka teci na hi ding uh hi,” a ci hi. Tua thu a gen khit ciangin sawltakte in a et lai takun, Zeisu vantung lamah kilato a, amau in a muh loh nadingun meii khat in a liah hi. Zeisu a paito amaute in vantungah a et cian lai takun, mi nih in puanpaak silhin amau kiangah dingin, “Galile mite aw, bang hangin vantung lam ento na hi uh hiam? Note kiang pan vantungah a kilato Zeisu in vantungah a pai na muh uh bangin khatvei hong kumsuk kik ding hi,” a ci uh hi. Tua ciangin Jerusalem khua tawh kinai, Nipi ni pai theih tan a gamla Oliv Mual panin sawltakte Jerusalem khua-ah a paikik uh hi. A tun’ uh ciangin Piter, Johan, Jeim leh Andru, Filip leh Thomas, Bartholomai leh Mattiu, Alfe-as’ tapa Jeim, Simon Zealot leh Jeim’ tapa Judas-te a tun’na uh inndei tungah a paito uh hi. Tua mi khempeuhte in Zeisu’ nu Mari a kipan numeite leh Zeisu’ sanggamte tawh lungsim kikhatin thu a ngen niloh uh hi. Tua lai takin mi za leh sawmnihte a kikhop lai takun, Piter in amau laizang ah ding-a (Tua pa in a gilohna thaman tawh lo khat a lei khit ciangin, a bungbu-in kia a, a gilpi kitamin a gil khempeuh a buakhia hi. Tua thute Jerusalem khua-ah mite in a zak uh ciangin amau kam in tua lo “Akeldama” ci uh a, tua in “Sisan’ Lo” a cihnopna hi). Bang hang hiam na cih uh leh: “Ama omna mundai suak hen, Ama omna-ah kuamah teeng kei hen,” cih leh, “Ama za midang khat in ngah ta hen,” ci-in Late Lai Siangtho sungah a kigelh hi. Tua ahih ciangin Johan’ baptaizna pana kipan Topa Zeisu in eite tawh a kikhen ni dongin, a sungah a lutkhawm, a pusuak khawm lai takin, kote tawh a tawntung a kikhawl mite sung panin khat in kote tawh Zeisu’ thawhkikna thu teci a suak ding hi,” a ci hi. Tua ciangin mi nih, Barsabbas kici, a mindang Justas ahi Josef leh Matthias a teel uh hi. “Mi khempeuh’ lungsim a thei Topa aw, Judas in ama omna phualah pai dingin thuhilh-za leh sawltak-za pan tawp kik a, tua za a ngah dingin hih mi nih lakah na teel penpen hong lak in,” ci-in thu a nget khit uh ciangin lai-ai a san uh a, Matthias in a ngah ciangin sawltak sawm-le-khatte tawh a kisimkhawm hi. Pentekost pawikham ni a tun’ ciangin amaute khempeuh mun khatah a omkhawm uh hi. Tua lai takin huihpi nung bangin vantung panin awging khat thakhatin hong suak a, amau tutna inn a dim sak hi. Tua lai takin meikuang tawh kibang leiite kikhenin, amaute kiangah kilang uh a, amau a vekpi tungah tung kim uh a, amaute khempeuh in Kha Siangtho tawh kidimin, Kha Siangtho in thu a piak bangin kam tuamtuam tawh thu a hilh uh hi. Tua lai takin van nuai gam khempeuh panin a hong pai, Pasian a zahtak Judah mite Jerusalem khua-ah a om uh hi. Tua awging a zak uh ciangin mihonpi kikhawm uh a, mi kim in ama kam ciat tawh thu a gen a zak ciangun lamdang a sa uh hi. Amaute khempeuh in lamdang a sa uh a, lungmangin, “Hih thuhilhte khempeuh in Galile mite hilo ahi uh hiam? Tua bang ahih leh, eite a tuamtuam i pian’pih kam tawh bang ci-in i za thei hiam? Parthia mi a kipan Media mi, Elam mi, Mesopotamia gam, Judah gam, Kappadokia gam, Pontas gam, Asia gam, Frigia gam, Pamfilia gam, Izipt gam, Sairin khua kimkot Libia gam sungah a teeng mite, Rom khua pan hong pai zinte, Mi kimkhat in, “Hih mite in leenggahzu thak a kham uh hi,” ci-in a zahko uh hi. Tua lai takin sawm leh khatte tawh Piter ding a, kiko-in tua mite kiangah thu a hilh inah: “Jerusalem khua-ah a teengte khempeuh leh Judah mite aw, note in hih thu na thei un la, ka thu a tel takin na ngai ta un. Tu hun in zingsang nai kua ahih ciangin na up uh bangin hih mite in zukhamin a om kei uh hi. Hih thute in kamsangpa Joel in a hilh ngeisa thu ahi hi. ‘A nunung nite ciangin Mi khempeuh tungah ka Kha ka bua ding hi. Na tapate na tanute un thu hilhkhol ding uh hi. Na tangvalte un mang a mu ding uh a, Na puteekte un mang a man’ ding uh hi. Tua lai takin ka nasem pasal leh numeite tungah, Ka kha ka bua ding a, thu a hilhkhol ding uh hi. Tunglam vantungah nalamdang ka lak ding a, Van nuai leitungah lim ka lak ding hi. Si tawh, meikuang tawh, meikhu tawh ka lak ding hi. Topa’ Ni vanglian leh lamdang hong tun’ ma-in Ni hong mial ding a, Kha in sisan a suak ding hi. Tua lai takin Topa’ min tawh thu a ngen peuhmahte in Gupna a ngah ding uh hi, ci-in Pasian in a gen hi,’ a ci hi. “No Israel mite aw, hih thu na ngai ta un. No na theih uh mah bangin Pasian in Nazareth mi Zeisu tungah vangliatnate leh nalamdangte leh lungman’nate, note lakah hong hih theihna tawh Pasian in note kiangah tua Zeisu a dik hi ci-in a lak hi. Tua Zeisu Pasian’ hanciamna leh theihkholhna hangah a kipiak khit ciangin note in migilote’ khut tungah pia-in singlamteh tungah na sisak uh hi. Ahih hangin sihna in tua pa lencip zo lo ahih ciangin Pasian in sihna gimna a sutkhiat khit ciangin, a hing kiksak hi. David in tua mi a genkholhna in: ‘Kei in Topa Pasian ka maitang ah a om ka mu tawntung hi, Bang hang hiam i cih leh, ka kikhin theih loh nadingin ka ziat lamah a om hi. Tua ahih ciangin ka lungdam a, Ka leii zong a nuam hi. Tua tham loin, ka sa in lamenin a nungta ding hi. Bang hang hiam i cih leh, nangmah in ka Kha, Sihna gam sungah na nusia kei ding hi. Na Misiangtho zong muatna na thuaksak kei ding hi. Nangmah in nuntakna Lampi nong hilh zo a, Na meel mu-in lungdamna tawh Kei nong dimsak ding hi,’ a ci hi. “Ute naute aw, pian’na pu David thu a tel takin note kiangah kong gen-inah, tua David si a, a kivuina han in tuni dongin eite kiangah a om hi. Tua Zeisu Pasian in a thawhkiksakna thu kote khempeuh in teci ka hi uh hi. Tua ahih ciangin amah in Pasian’ ziat lamah pahtawina ngah a, Pa kiangah Kha Siangtho kiciamna a ngah khit ciangin, no na muh na zak uh nate hong bua zo hi. David in vantung ah a kahto kei hi. Ahih hangin amah in: ‘Topa in ka to kumpipa tungah, Na galte nangma khe ngakna-in ka bawl matengin Ka taklam ah tu in,’ a ci hi. Tua ahih ciangin note in singlamteh tungah na thah uh Zeisu pen Pasian in Topa leh Khazih a suaksak hi ci-in Israel mi khempeuh in a man takpi thei ta uh hen,” a ci hi. Tua mite in hih thu a zak uh ciangin a lung uh vut a, “Ute naute aw, bang ka ci hih ding uh hiam?” ci-in Piter a kipan adang sawltakte kiangah a dong uh hi. Piter in, “Na mawhnate uh kisikkik un la, na vekpi un, mawh kimaisak nadingin Zeisu Khazih’ min tawh kibaptaiz un, Tua bang na hih uh leh, Kha Siangtho’ thupha letsong na ngah ding uh hi. Bang hang hiam na cih leh, kiciamna in note leh na tate uh ahi zongin, gamla-ah a om Topa i Pasian in a sap ding mi khempeuh ading ahi hi,” ci-in a gen hi. “Hih gilo khang mite lak panin kigumkhia un,” ci-in thudang tampi tawh hansuah a, thu a hilh hi. Tua thu a mang mite in kibaptaiz uh a, tua ni-in mi tulthum bang a kibehlap uh hi. Amaute in sawltakte’ thuhilhna a mang uh a, kipawl khawmna, khomun balnenna leh thungetna a bawl tawntung uh hi. Mi khempeuh a lau uh a, sawltakte in nalamdang tampi leh lim tampi a bawl uh hi. Thu-um mi khempeuh pawlkhat bekin a om uh a, amaute neihsa khempeuh gawmin a zangkhawm uh hi. Amaute in a neih a lamte uh a zuak khit uh ciangin mite’ kisapna bangin a hawmsak uh hi. Amaute in biakna innpi sungah ni simin lungsim kituakin a om uh a, amau innah anlum balnenin, a siangtho lungdamna tawh anne tuidawn uh a, Pasian a phat uh hi. Mi khempeuh mai-ah maipha a ngah uh hi. Gupna a ngah mite zong ni simin Pasian in a kibehlapsak hi. Tua lai takin Piter leh Johan in thungetna hun nai thum lai takin biakna innpi-ah a kahtoh lai takun, a nu gil sung pan a khebai mi khat midangte in pua uh a, biakna innpi-a lut mite kiangah khutdawh ngen dingin Hoih Kongkhak kici gei-ah ni simin a koih uh hi. Piter leh Johan-te in biakna innpi sungah a lut ding uh tua pa in a muh ciangin a khut dawhin hehpihna a ngen hi. Piter leh Johan in tua pa lim takin en uh a, “Hong en in,” a cih uh ciangin, amah in na khat peuhmah a ngah ding lamenin sawltakte a ento hi. Piter in, “Kham leh ngun ka nei kei hi. Ahih hangin ka neihsa kong pia ding hi. Nazareth khua mi Zeisu Khazih’ min tawh tho in la, kalsuan in,” ci-in a ziatlam khut lenin a phot lai takin a khepeek leh a siakmit guh hat a, thakhatin tho a, a din’ khit ciangin lam pai-in diang a, Pasian’ min phatin sawltakte tawh biakna innpi sungah a lutkhawm hi. Tua bangin kalsuan a, Pasian’ min phatin a om, mihonpite in a muh uh ciangin, biakna innpi Hoih Kongkhak gei-ah khutdawh ngen-a om mipa ahih lam thei uh a, ama tungah a piang thu hangin lamdangsakna leh lungman’na tawh a kidim uh hi. Tua pa in Piter leh Johan beela a om lai takin Solomon’ Talap kici sungah mi khempeuh in lungmangin a tai uh a, amau kiangah a va kikhawm uh hi. Piter in tua mite a muh ciangin, “Israel mite aw, hih thu bang hangin lamdangsa na hi uh hiam? Kote vangliatna leh phatna tawh kote in hih pa lam a paisak bangin bang hangin kote hong en gega na hi uh hiam? Abraham, Isaak leh Jakob’ Pasian, i pu i pate’ Pasian in ama Sila Zeisu a min thangsak zo hi. Note in tua Topa pen gam vaihawmte tungah pia-in, Pilat in khah ding a sawm hangin ama maitang ah tua pa na nial uh hi. Note in Mi Pha Mi Siangtho na nial uh a, mi thatpa khah nadingin na ngen uh a, nuntakna hong pia Mangpa na that tazen uh hi! Ahih hangin Pasian in amah a thawhkiksak thu kote in teci ka hi uh hi. Tua min upna hangin tua Topa’ min in na muh na theih uh hih mi a hatsak hi. Ahi hi, tua Zeisu hanga kingah upna in nomau khempeuh mai-ah hih mi a kicingsak zo hi. “Tu-in ute naute aw, note akipan no hong ukte in thei loin ahih uh ka thei hi. Amah Khazih in gimna a thuak ding hi ci-in Pasian in kamsang khempeuhte’ kam tawh a genkholh bangin a tungsak khin zo hi. Tanglai panin ama kamsang siangthote’ kam uh tawh a genkholh mah bangin na khempeuh a bawl thak kik hun matengin, vantung in Zeisu a sang ding hi. Moses in, ‘Topa Pasian in nomau ute naute lakah keimah bangin kamsangpa khat note ading a piangsak ding hi. Amah in nomau kiangah thu a gen khempeuh na ngai ding uh hi. Tua kamsangpa’ thugenna a ngai lo khempeuhte in amau pawl lak pan kimangthangsak ding hi,’ a ci hi. Samuel pan akipan Pasian’ kamsangte khempeuh leh a nung cianga hong piangte in a gen khempeuhte in, hih nite thu a genkhol zo uh hi. Note in kamsangte’ suante na hi uh hi. Pasian in Abraham kiangah, ‘Nang na suante hangin leitung mipawl khempeuh in thupha a ngah ding uh hi,’ ci-in na pute na pate uh tawh kiciamna a bawlpihte’ suante zong na hi uh hi. Pasian in a Silapa hong thawhsak khit ciangin, note na vekpi un na khialhna uh pan hong kikheelsakin, note thupha hong pia dingin note kiangah hong paisak masa hi,” a ci hi. Piter leh Johan in mihonpite kiangah thu a gen lai takun biakna innpi ukpa akipan siampite leh Saddusi mite hong pai uh a, sawltakte in mite kiangah thu a hilh uh a, Zeisu hangin sihna pan thawhkikna thu a hilh manunah a lungmang uh hi. Amaute a mat khit uh ciangin nitak ahih maninah, a zingsang dongin thong sungah a khum uh hi. Ahih hangin thuhilhna a za mi tampite in um uh a, pasal teng tulnga bang a pha uh hi. Amaute laizangah sawltakte ding sak uh a, “Note in bang vangliatna tawh, a kua min tawh, hih na hi uh hiam?” ci-in a dong uh hi. Tua lai takin Piter in Kha Siangtho tawh kidim a, “Makaite leh upate aw, a zawngkhal mi khat tungah noptuamna pia a, ama cinatna bangci dam hiam ci-in note in tuni-in nong dot uh leh, note in singlamteh tungah na thah khit uh ciangin, Pasian in sihna pan a thawhkik sak Nazareth mi Zeisu’ min tawh hih pa in note mai-ah cidamin a ding hi cih, note akipan Israel mi khempeuh in thei ta un. Tua Topa in innlam note in na paih uh, a nung cianga kiukawi bul a suakkik suang ahi hi. Tua mi simloh midang tungah gupna thu a om kei hi. Bang hang hiam na cih uh leh, ama min simloh eite’ gupna ngah nadingin hong kipia mindang khat beek van nuai mite lakah a om kei hi,” ci-in a gen hi. Amaute in Piter leh Johan’ han’na mu uh a, lai siam lo, pilna hau lo ahih lam uh a theih uh ciangin lamdang a sa uh a, Zeisu tawh a omkhawm ngei zo uh hi ci-in a phawk uh hi. Cidamna a ngahpa in amaute tawh ding khawma om a muh uh ciangin nial nading a mu zo kei uh hi. Sawltakte vaihawmna pan a paikhiat ding uh thu a piak khit uh ciangin, “Hih mite tungah bang i ci hih ding hiam? Amaute tung tawnin nalamdang lian a kilak zo hi ci-in Jerusalem khua mi khempeuh in a thei uh a, eite in i nial zo kei hi. Ahih hangin mite lakah a kizelh semsem loh nadingin tu nung ciangin tua min tawh kuama kiangah thu hilh nawn lo dingin amaute tawngin thu pia ni,” ci-in khat le khat a kikum uh hi. Tua ciangin sawltakte sam kik uh a, ‘Zeisu’ min tawh thu gen nawn peuhmah lo ding leh thu hilh nawn peuhmah lo dingin a kham uh hi. Piter leh Johan in, “Topa’ thu sangin note’ thu ngaih ding Pasian mai-ah a kilawm zaw hiam, kilawm lo zaw hiam cih note in thu na khen ta un. Kote ka hih uh leh, ka muhsa uh, ka theihsa uh thute gen loin ka om thei kei ding uh hi,” ci-in a dawng uh hi. Amaute in mihonpi hangin Piter leh Johan mawhna daan piak na’ng thu a ngah loh uh ciangin, khatvei a tawn’ kik khit uh ciangin a khah uh hi. Bang hang hiam i cih leh, hih bawlna thu hangin mi khempeuh in Pasian’ min a phat uh hi. Bang hang hiam i cih leh, hih cidamna a ngah nalamdang bawlna a ngahpa in kum sawmli val a pha zo mi ahi hi. Sawltakte a kikhah khit uh ciangin amau mipawlte kiangah a pai uh a, siampi liante leh upate in amau kiangah a genna khempeuh a zasak uh hi. Tua mite in a zak uh ciangin lungsim kikhatin, Pasian kiangah kiko-in, “Vantung leh leitung, tuipi leh tuipi sungah a om khempeuh a Bawlpa, Topa aw, ‘Gentailte in bang hangin a gamlum uh hiam? Mihonpite in bang hangin a mawkna-in a hanciam uh hiam? ‘Topa leh ama Khazih do dingin Leitung kumpite ding uh a, Gam-ukte in a kikhawm uh hi,’ci-in Kha Siangtho tawh nang in ka pa uh David’ kamin na cih mah bangin, hih khua sungah Herod leh Pontias Pilat in Gentailte leh Israelte tawh nangmah na khut leh na ciamtehna in hong piang ding thu a piakkholh bangin, sathau na nilhsa na Sila siangtho Zeisu tungah hih ding a kikhawm takpi uh hi. Tu-in Topa aw, amau tawn’na thu na ciamteh in la, cinatna a damsak nadingin na khut na zan lai takin na silate in, lau loin na thu a gen na’ngun a siangtho Sila Zeisu’ min tawh lim leh nalamdang a kibawl theih na’ngin hong hehpih in,” ci-in thu a ngen uh hi. Tua thu a nget khit uh ciangin a kikhopna mun uh liing a, amaute khempeuh Kha Siangtho tawh kidimin Pasian’ thu hang takin a gen uh hi. Thu-um mite in a lungsim leh a ngaihsut uh kikhat a, kuamah in ama neihsa khatpeuh peuh pen ama’ aa tuamin ngaihsun loin, a neih khempeuh uh a neikhawm uh hi. Sawltakte in Topa Zeisu’ thawhkikna thu vangliatna tawh teci a pang uh a, amaute khempeuh in hehpihna thupha tampi a ngah uh hi. Amaute lakah mizawng khat beek a om kei uh hi. Bang hang hiam i cih leh, inn ahi zongin, lo ahi zongin, a neih khempeuh uh a zuak khit uh ciangin a ngah a mante, Sawltakte’ khe mai-ah koih uh a, mikim in a sapna tawh kituakin a vekpi-un a hawm ciat uh hi. Josef kici, “Hehnem’ Ta” cihnopna ahi sawltakte in Barnabas min a phuah thak uh, Levi pawl, Saipras mi khat in lo nei a, a zuak khit ciangin a dangka ngah teng hong paipih a, sawltakte’ khe kiangah a koih hi. Ahih hangin Ananias leh a zi Sapfira min nei nupa khat in a neihsa kimkhat a zuak khit uh ciangin, a zi tawh lungsim kituakin a man kimkhat seel-in, kimkhat hong paipih khit uh ciangin, sawltakte’ khe kiangah a koih uh hi. Piter in, “Ananias aw, nang in Kha Siangtho kheem a, lei na zuak a man kimkhat na seel nadingin Satan in nang lungsim bang tawh hong dimsak hiam? Tua lo, nangma khut sungah a om lai takin nangma neihsa hilo ahi hiam? Na zuak khit ciangin na ngah a man in nangma sum hilo ahi hiam? Bang dingin na lungsim sungah hih bang hanciam na hi hiam? Mi tung bek a, zuauthu gen na hi kei hi, Pasian tungah zuauthu gen na hi hi,” a ci hi. Ananias in tua thute a zak ciangin pukin a si hi. Tua thu a zate khempeuh in nakpi-in a lau uh hi. Tangvalte ding uh a, a luang puan tawh a tun khit uh ciangin a paipih uh a, a vui uh hi. Tua nung nai thum bang ciangin a zi in tua a piangsa thute thei loin a hong tum hi. Piter in, “Hi zah tawh na lo zuak na hi hiam? Hong gen in,” ci-in a dot ciangin amah in, “Ahi mah hi, hih zah tawh ka zuak uh hi,” a ci hi. Piter in, “Note in Topa’ Kha ze-et dingin bang hangin kilungtuak na hi uh hiam? En in! Na pasal vuite’ khe in kongkhak kiangah a om uh hi; nang zong a hong puakhia ding uh hi,” a ci hi. Tua lai tak thakhatin amah in Piter’ khe kiangah pukin a si hi. Tangvalte in hong tum uh a, tua numei a si-a om a muh uh ciangin a puakhia uh a, ama pasal kiangah a vui uh hi. Pawlpi buppi akipan tua thu a zate khempeuh in nakpi launa tawh a dim uh hi. Sawltakte’ khut tungah mite mai-ah lim leh nalamdang tampi tak a kihih hi. Amaute in Solomon’ Talap-ah lungsim kikhatin a omkhawm uh hi. Midangte khat beek in a pawlpih ngam loh uh hangin mite in amaute a phat uh hi. Tua bangin thu-um mi pasal leh numei tampi in Topa tawh a kibehlap uh hi. Tua ahih ciangin Piter lam a pai lai takin khatpeuh peuh ama liim in a liah nadingin, mi cinate a puakhia uh a, a lupna puan tungah lam kiangah a koih uh hi. Jerusalem kimkot khuate panin mi tampite in cina khempeuh leh dawi bawlsiatte hong paipihin a kikhawm uh a, tua micinate khempeuh in damna a ngah kim uh hi. Tua lai takin siampi ukpa leh amah tawh a kipawl Saddusi mite khempeuh a ding uh a, hazatna tawh a dim uh hi. Amaute in sawltakte a mat khit uh ciangin thong sungah a khum uh hi. Ahih hangin zan lai takin Topa’ vantungmi khat in thonginn kongkhak a hon’ khit ciangin amaute lakhia a, “Note pai un la, biakna innpi sungah ding un la, hih Nuntakna thu mite kiangah va hilh un,” ci-in thu a pia hi. Amaute in tua thu a zak uh ciangin a zingsang tungin biakna innpi sungah a lut uh a, thu a hilh uh hi. Pasian’ siampi ukpa leh amah tawh kipawlte hong pai uh a, upa vaihawmte akipan Israel upate khempeuh a kikhopsak khit uh ciangin, sawltakte hong paipih dingin thong sungah mi a sawl uh hi. Palikte a pai uh a, sawltakte thong sungah a muh loh uh ciangin a ciahkik uh hi. “Thong kongkhak pha takpi-in kikhak a, thong cingte kong pua lamah dingin a om uh ka mu uh hi. Ahih hangin ka hon’ khit uh ciangin thong sungah mi khat beek ka mu kei uh hi,” a ci uh hi. Biakna innpi ukpa leh siampite in hih thu a zak uh ciangin, hih thu in bangci thu hi ding hiam ci-in a lunghimawh uh hi. Tua lai takin mi khat hong pai a, “Thong ah na khum mite in biakna innpi sungah ding-in mite thu a hilh uh hi,” ci-in a ko hi. Tua ciangin biakna innpi ukpa leh palikte a paikik uh a, amau mite in suang tawh a den’ ding uh a lau manun ah gamlum loin a paipih uh hi. A paipih uh ciangin upa vaihawmte mai-ah a koih uh a, siampi ukpa in, “Tua min tawh thu na hilh loh nadingun kote in pha takpi-in kong kham uh hangin, Jerusalem khua note’ thuhilhna tawh na dimsak zo uh a, kote tungah hihpa’ si hong tun’ nading note in na hanciam uh hi,” ci-in a gen hi. Piter leh adang sawltakte in, “Mi’ thu sangin Pasian’ thu ka man’ ding uh a kilawm zaw hi. Note in singlamteh tungah khai-in na thah uh Zeisu, i pu i pate’ Pasian in hong thokiksak zo hi. Israel mipawl kisikkikna leh mawh kimaisakna thu a piak nading tua mi in Ukpa leh Gumpa a suah na’ngin Pasian in ama ziat lamah a koih sang hi. Komau in hih thu khempeuh ah teci ka hi uh hi. Topa Pasian in ama thu a mangte a piaksa Kha Siangtho in zong teci ahi hi,” ci-in a dawng uh hi. Amaute in hih thu a zak uh ciangin lungsim kitamkhia dektak zahin heh uh a, sawltakte that dingin khat leh khat a kikum uh hi. Tua lai takin mi khempeuh in a zahtak uh Pasian’ Thukham sia ahi Gamaliel, Farisai khat in vaihawmna lakah ding-a sawltakte pua lamah tomkha sung pusuak sak dingin thu a piak khit ciangin, “Israel mite aw, hih mite tungah bang bawl sawm na hi uh hiam na kikem un. Bang hang hiam na cih uh leh, tuma-in Thudas kici mi khat tho a, ‘Kei in mi mawk ka hi kei hi’ ci-in mi zali bang in a belh khit uh ciangin amah kithat a, ama thu umte khempeuh kikhen thangin a kisia uh hi. Tuapa khit ciangin, mi a kisim lai takin Galille mi Judas tho a, ama nungzui dingin mi kimkhat a zol hi. Amah zong si a, a thu zui mite a kikhenthang uh hi. Tu-in note kong cih inah, tua mite kham loin, hi ci omsak mai un. Bang hang hiam na cih uh leh, hih hanciamna thu in mite’ hanciamna thu ahih leh, a sia ding hi; ahih hangin Pasian’ hanciamna ahih leh, amaute na siasak zo kei ding uh hi. Bang hang hiam na cih uh leh, Pasian tawh na kido loh nadingun na kikem un,” a ci hi. Ama kam a ngai uh a, sawltakte a sap khit uh ciangin a sat uh a, Zeisu’ min tawh thuhilh lo dingin a khamcip uh a, a khah uh hi. Tua ciangin sawltakte in Zeisu’ min hanga zumhuaina thuak dinga kilawm a kisak manun ah lungdamin, upa vaihawmna pan a paikhia uh hi. Biakna innpi sungah ahi zongin, amau innah ahi zongin, ni simin, “Zeisu in Khazih ahi hi” ci-in Lungdamna Thu tawlnga loin hilhin, thu a gen uh hi. Tua lai takin nungzui mite a tam tektek uh a, Grik Judah mi meigongte in nisim kivakna a ngah loh manun ah Grik Judah mite in Hebru mite tungah a phun uh hi. Tua ciangin Sawm-le-nihte in nungzui mihonpite a sap khit uh ciangin, “Kote in Pasian’ thu nusia-in anneek sabuai nasep ding pen kilawm lo hi. Tua ahih ciangin ute naute aw, Kha Siangtho tawh ahi zongin, lungpilna tawh ahi zongin a kidim leh zahtakna a ngah, nomau lakah pasal sagih zong un la, hih na a sem dingin kote in ka koih ding uh hi. Kote ka hih uh leh, thungetna, leh thugenna ka hih niloh ding uh hi,” a ci uh hi. Hih thu in mite lungkimsak ahih manin upna leh Kha Siangtho tawh a kidim Stefen akipan Filip, Prokhoras, Nikanor, Timon, Parmenas, Judah ngeina a zui Antiok khua mi Nikolas-te teel uh a, sawltakte mai-ah a koih uh hi. Sawltakte in a lutung uh ah a khut uh nga-in thu a ngetsak uh hi. Pasian’ thu kizel-in, Jerusalem khua-ah thu-um mi hong tam semsem a, siampite tampi in zong upna thu hong mang ta uh hi. Stefen in hehpihna thupha leh vangliatna tawh kidimin mite mai-ah nalamdang a bawl hi. Tua lai takin Sal Suakta a kici mipawlte akipan Sairin mi leh Alekzandria mi leh Kilikia mi leh Asia mi kimkhatte in a ding uh a, Stefen tawh a kiseel uh hi. Amaute in Stefen in a zat lungpilna leh Kha Siangtho’ piak kammalte a nial zo kei uh hi. Tua ahih ciangin, “Hih mi in Moses leh Pasian tungah simmawhna thu a gen ka za uh hi!” ci-in a gen ding mite a cial sim uh a, mi honpite, upate leh laitheite a hansuah uh a, Stefen kiangah pai-in a mat khit uh ciangin vaihawmna-ah a paipih uh hi. Mizuau tecite a sam uh a, tuate in, “Hih mi in hih mun siangtho leh Thukham khempeuh tungah a simmawh tawntung hi. Bang thu a gen hiam na cih uh leh, ‘Tua Nazareth mi Zeisu in hih inn a sugawp ding a, Moses in eite hong piak ngeina a kikheelsak ding hi,’ ci-a a gen thu ka za zo uh hi,” ci-in teci a pang uh hi. Vaihawmna sungah a tu mi khempeuh in Stefen a tel takpi a et uh ciangin ama maitang in vantungmi’ maitang tawh a kibat lam a mu uh hi. Tua lai takin siampi ukpa in, “Hih thu a man hiam?” ci-in a dot ciangin Stefen in, “Ute naute, pate aw, na ngai ta un. Eite i pa Abraham in Haran gamah a om ma-in Mesopotamia gamah a teen’ lai takin minthan’na Pasian kilang a, ‘Nang na gam leh na behte kiang pan na paikhia in la, kong lahna gamah pai in,’ ci-in ama kiangah thu a pia hi. Tua lai takin Abraham in Khaldea gam pan paikhia a, Haran khua tung a, a teeng hi. A pa a sih khit ciangin Pasian in tu-a a omna uh hih gamah tua khua panin a lalsak hi. Hih gamah khe sik nading nangawn luahna a piak loh hangin, ‘Nang akipan na tate na tute kiangah hih gam kong pia ding hi,’ ci-in ta khat beek a nei nai lopi-in thu a ciam hi. Pasian in, “Na suante in gam dangah zin ahi ding uh a, midangte kiangah sila a suak ding uh a, amaute in kum zali a bawlsia ding uh hi. Amaute sila-a a koihte tungah thu ka khen ding hi. A nung ciangin amaute paikhia-in hih gam sungah kei hong bia ding uh hi,’ ci-in thu a piakhol hi. Pasian in vunat kiciamna thu a pia hi. Tua mah bangin Abraham in a tapa Isaak nei a, ni giat ni-in vun a at hi. Isaak’ tapa Jakob, Jakob’ tate, mipawl sawm leh nihte’ pate ahi uh hi. Tua pawlte’ pate in Josef a haza uh a, Izipt gamah a zuak uh hi. Ahi zongin Pasian in amah tawh omkhawm a, gimna tawlna khempeuh lak pan gumkhia a, Izipt kumpi Faro kiangah maipha leh lungpilna pia a, tua kumpipa in Izipt gam leh ama inn Josef a uk sak hi. Tua lai takin Izipt gam leh Kanaan gam khempeuh ah kialpi tung a, nakpi-in gimna a tun’ ciangin i pate in annek ding mu zo lo uh hi. Izipt gamah buhtang a om thu Jakob in a theih ciangin i pate a masa-in a pai sak hi. A nih veina ciangin Josef in a ute a naute kiangah kilak a, tua ciangin Faro in Josef pawlte a thei hi. Tua lai takin Josef in a pa Jokob leh ama behte sawmsagih leh nga thu a kamtai sak hi. Izipt gamah Jakob paisuk a, amah leh i pate zong tua gamah a si khin uh hi. A sih khit uh ciangin a luang uh Shekhem khua-ah pua uh a, Shekhem khua sungah Hamor’ tate tung pan ngun tawh Abraham in a leisa han sungah a vui uh hi. “Pasian in Abraham kiangah a thuciam a hun tun’ dektak lai takin Izipt gam sungah tua mite nasia takin a khangto uh a, Josef a thei lo kumpipa khat in gam a uk hi. Tua kumpipa in ei mipawlte lungpilna tawh kheem a, naungeekte a hin’ theih loh nadingin a paihmang nadingun i pute i pate a bawlsia hi. Tua lai takin a meel hoih mahmah Moses suak a, kha thum tawntung a pa inn sungah a kikhoi hi. Tua nung a kipaihkhiat ciangin Faro’ tanu in tawm a, ama ta bangin a vaak a khoi hi. Moses in Izipt mite’ pilna khempeuh sin a, kam tawh nasepna tawh a siam hi. Kum sawmli a phak tak ciangin Israel pawl ama ute naute et ding a lungngai hi. Izipt mi khat in Israel mi khat a bawlsiat laitak a muh ciangin phula-in, a bawlsiatpa honkhia-in Iziptpa a that hi. Pasian in ama khut tawh amaute a gumkhia ding hi ci-in a sanggamte in thei dingin Josef in a up hangin a thei kei uh hi. Zingsang ciangin amau kiangah pai a, “Lawmte aw, u leh nau hi napi-in bang hangin khat leh khat na kibawlsia uh hiam?’ ci-in kilemna thu a gen hi. A lawmte a bawlsiapa in, ‘Kua in nang ko hong uk ding, thu hong khen dingin hong koih hiam? Zana Izipt mi na thah bangin kei zong hong that nuam na hi hiam?’ ci-in Moses a nial hi. Tua kam a zak ciangin Moses tai a, Media gamah zinin a om hi. Tua gamah ta nih a nei hi. Tua nung kum sawmli a phak khit ciangin Sinai Mual gampalakah, mei a kuang sawl kawm sungah Pasian’ vantungmi khat kilang hi. Moses in tua lamdang na a muh ciangin a lungmang hi. A en cian dinga a naih ciangin, ‘Keimah in na pute na pate’ Pasian, Abraham’ Pasian, Isaak’ Pasian, Jakob’ Pasian ka hi hi,’ ci-in Topa’ aw a za hi. Tua lai takin Moses liingin a en ngam kei hi. Topa in, ‘Na din’na mun a siangtho ahih ciangin na khedap na suah in. Izipt gamah a om ka mite thuak bawlsiatna ka mu zo a, amau tauna’ aw uh ka za zo hi. Amaute gumkhia dingin kong kumsuk zo hi. Tu-in pai in la, Izipt gamah kong paisak ding hi,” ci-in a gen hi. “A kua in nang uk ding leh thu hong khen dingin hong koih ahi hiam?’ ci-a nialna a thuak hih Moses in a uk ding, a gum dingin Pasian in sawlkawm sungah a kilang vantungmi’ sawlna tawh a paisak hi. Tua pa in Israel mipawlte paikhiatpih a, kum sawmli tawntung Izipt gam San Tuipi sung leh gampa lakah nalamdangte leh limte a bawl hi. ‘Pasian in na ute na naute lakah kei tawh kibang kamsangpa khat note ading kong piangsak ding hi,’ ci-in Israel mipawlte a genna mi in tua Moses ahi hi. Amah in gampalak mi kikhopna lakah ahi zongin, Sinai mual tungah amah tawh a hopih vantungmi tawh ahi zongin, eite pate tawh ahi zongin, omkhawm a, ei hong piak dingin hin’na thu a ngah hi. I pate in ama thu mang loin a nial uh a, ‘Komau mai-ah a pai dingin pasiante hong bawlsak in, Bang hang hiam na cih leh, kote Izipt gam pan hong paikhiatpih hih Moses in bang ci ta hiam, kote in ka thei kei uh hi,’ ci-in Aaron kiangah genin, Izipt gamah a lung a heikik uh hi. Tua lai takin amaute in bawngno milim khat a bawl uh a, tua milim bia-in, amau khut tawh a bawl uh na tawh a lungdam uh hi. Tua ahih manin Pasian in amaute nungngat-in milim biakna sungah a piakhia hi. Pasian’ kamsangte’ laibu sungah: ‘Israel mipawlte aw, note in ganhingte gawhna tawh, biakna-in Gampalakah kum sawmli tawntung kei hong bia na hi uh hiam? Note in Molok biakna inn leh Refan pasian’ aksi bia dingin na bawlsa milim uh na pua ta uh hi. Tua ahih ciangin keimah in note, Babilon khua gal khatah kong paipih ding hi,’ a cih mah bangin, Pasian in a nungngat a, vantung nate biak nadingin tua mite don nawn lo hi. “Na muhsa lim tawh kibang ciamna puanbuk na bawl in,’ ci-in Moses kiangah a genpa in a vaikhak mah bangin gampa lakah i pate in a nei uh hi. A piang nunung eite pate in tua buk Gentailte’ lei a luah uh ciangin Joshua tawh a paipih uh hi. Tua Gentailte Pasian in David’ khang dongin i pu i pate mai pan a hawlkhia hi. Tua David in Pasian’ thupha ngah a, Jakob’ Pasian om nading mun a lam dingin thu a ngen hi. Ahih hangin Solomon in Pasian ading inn a lam hi. Sang Pen Pasian in mi khut tawh kibawl inn sungah a teeng zo kei hi. Pasian’ kamsangpa in: ‘Vantung in keima tokhom ahi hi. Leitung in keima khe sikna ahi hi. A bang ci bang biakna innpi kei ading na lam ding hiam? Ka khawlna mun in koi lai takah a om ding hiam? Ka khut in hih na teng bawl hilo ahi hiam? ci-in Pasian in a gen hi,’ a ci hi. “Lungkhauh a, lungsim leh bil tawh vunat loh mite aw, note in Kha Siangtho a tawntungin na nial uh hi. Na pute na pate uh a gamtat bangin na gamta uh hi. No na pute na pate un a bawlsiat loh kamsang kua ahi hiam? ‘Midik Pa hong pai ding ci-a a genkholh mite a that uh hi. Tu-in tua Midik Pa a heekte, a thatte na suak zo uh hi. Note in vantungmi hong piak bangin Thukham na ngah uh hangin na tang kei uh hi,” a ci hi. Amaute in hih thu a zak uh ciangin a lungso uh a, Stefen tungah a ha a gawi uh hi. Amah in Kha Siangtho tawh dim a, vantung a ettoh ciangin Pasian’ vangliatna leh Pasian’ ziat lamah a ding Zeisu a muh ciangin, “En un, van kihong a, Mihing’ Tapa in Pasian’ ziat lamah a ding ka mu hi,” a ci hi. Ahih hangin amaute in nakpi-in kiko uh a, a bil uh humin ama kiangah lungsim kikhatin a tai uh a, khua nawlah a hawlkhiat khit uh ciangin suang tawh a deeng uh hi. Teci a pangte in a puan uh Saul kici tangvalpa khat khe kiangah a koih uh hi. Suang tawh a den’ lai takun Stefen in Pasian kiangah thungenin, “Topa aw, ka kha hong la ta’n,” a cih khit ciangin, khukdin’a, “Hih khialhna tawh amaute na mawhsak kei in,” ci-in nakpi-in a kiko khit ciangin a si hi. Saul in Stefen sih nading a thukim hi. Tua lai takin Jerusalem khua-ah a om pawlpite nakpi-in bawlsia uh a, sawltakte sim loh thu-um midangte khempeuh in Judah gam leh Samaria gam mun khempeuh ah a kithehthang uh hi. Thu a zahtakte in Stefen a vui uh a, ama hangin nakpi-in a kap uh hi. Saul a hih leh, pawlpite bawlsia a, inn khempeuh ah a lut khit ciangin pasal leh numeite kaikhia a, thong sungah a khum hi. Tua ahih ciangin gam khempeuh ah a kithehthang mite a vak kawikawi uh a, thu a hilh uh hi. Filip in Samaria khua-ah pai-in Khazih thu a gen hi. Mihonte in a za uh a, Filip hih nalamdangte a muh ciangin tua thu lungsim kikhatin a ngai ciat uh hi. Bang hang hiam i cih leh, dawivei mi tampite pan dawite in nakpi-in kiko-in a pusuak uh hi. A pum langkhat a si mi leh khebai mi tampi in damna a ngah uh hi. Tua khua sungah lungdamna tampi a piang hi. Simon min nei mi khat in tua khua sungah mitphial dawi bawlin, “Kei zong milian khat ka hi hi,” ci-in Samaria mite lamdang a sasak ngei hi. A neu a lian a om khempeuh in, “Hih mi in Lian kici Pasian’ vangliatna mah hi,” ci-in ama thu a ngai uh hi. Amah in mitphial bawlin, sawt veipi mite lamdang sasak ahih ciangin amaute in a thu a ngai uh hi. Filip in Pasian’ Gam leh Zeisu Khazih’ minin Lungdamna Thu gen a, tua mite in a up uh ciangin numeite leh pasalte a kibaptaiz uh hi. Simon in zong um a, a kibaptaiz khit ciangin Filip kiangah om a, nalamdang lian leh lim a bawl a muh ciangin lamdang a sa hi. Samaria khuapihte in Pasian’ thu a mang uh a, Jerusalem khua-ah a om sawltakte in a zak uh ciangin Piter leh Johan a sawl uh hi. Tuate a tun’ uh ciangin amaute in Kha Siangtho a ngah nadingun amaute ading thu a ngetsak uh hi. Bang hang hiam i cih leh, Topa Zeisu’ min tawh a kibaptaiz khit uh hangin Kha Siangtho in khat beek tungah a tung nai kei hi. Amaute in tua mite tungah a khut uh a ngak khit uh ciangin Kha Siangtho a ngah uh hi. Sawltakte in khut a ngak uh ciangin Kha Siangtho kipia Simon in a muh ciangin, “Keima khut a tungah ka ngaksate in Kha Siangtho a ngah nadingin kei zong thu hong pia in,” ci-in dangka a lui hi. Piter in, “Pasian’ hehpihna dangka tawh kilei thei hi cih ngaihsun na hih ciangin nang tawh na dangka siakhawm ta hen. Nang in hih thu tawh na kikum na kituak kei hi. Bang hang hiam na cih leh, nangma lungsim in Pasian mai-ah a man kei hi. Tua ahih ciangin na khialhna na kisikkik in la, na lungsim ngaihsutna a kimaisak nadingin Pasian kiangah thu na ngen in. Bang hang hiam na cih leh, nangmah in a kha sinkha na nei a, mawhna kikhihna na thuak hi cih ka thei hi,” a ci hi. Simon in, “Na thupiak khat beek keima tungah a tun’ loh nadingin Pasian kiangah thu hong ngetsak in,” a ci hi. Amaute in teci a pang uh a, Topa’ thu a hilh khit uh ciangin Jerusalem khuapi-ah a ciah uh a, Samaria mite khua tampi sungah Lungdamna Thu a hilh uh hi. Pasian’ vantungmi khat in Filip kiangah, “Nang tho in la, Jerusalem khua panin Gaza khua lam paina khanglam pai in,” ci-in a gen mah bangin Filip tho a, a pai hi. Tua mun in gamlak ahi hi. Tua lai takin Ethiopia gam a uk Kandake kumpinu nuai-ah a vanglian, a vaihawm mang, ama sum khempeuh a uk, Ethiopia mi khat in Pasian bia dingin Jerusalem khua-ah a pai khit ciangin, a ciahkik lai takin a leeng tungah tuangin kamsangpa Isaiah Lai Siangtho a sim hi. Kha Siangtho in, “Tua leeng va nai in la, beel in,” ci-in Filip kiangah thu a piak ciangin Filip in ama kiangah tai a, kamsangpa Isaiah’ lai a sim za a, “Na simna thu na thei hiam?” ci-in a dong hi. Tua mangpa in, “Hong hilh a om kei leh, bang ci theih ding ka hi hiam?” a cih ciangin, Filip in amah tawh kahto a, tukhawm dingin mangpa in a ngen hi. Lai Siangtho a simna in: “Thah dinga a kipaipih tuu bangin amah kipaipih hi. Tuuno in a mul mette mai-ah a ham loh banginah, Amah in zong a kam a ka kei hi. A kilungnemsak lai takin midangte in ama tungah thu a khen uh hi. Ama hin’na leitungah kilakhia ahih ciangin, Ama suante kua in a lak ding hiam?” cih ahi hi. Mangpa in, “Kamsangpa in a kua thu a gen hiam? Amah a kicihnopna-a a gen hiam? Ahih kei leh, midang cihnopna-a a gen hiam?” ci-in Filip kiangah a dong hi. Filip in kam ka a, tua Lai Siangtho pan akipan Zeisu thu a gen hi. Lampi a pai lai takun tui omna-ah a tung uh a, Mangpa in, “Tui a om hi. Keimah kibaptaiz loh nadingin bang thu in hong kham ahi hiam?” a ci hi. Filip in, “Na lungsim khempeuh tawh na up leh ahi thei hi,” a ci hi; Mangpa in zong, ‘Zeisu Khazih in Pasian’ Tapa ahihna thu ka um hi,’ ci-in a pulak ciangin, Mangpa in leeng khawlsak a, Filip leh Mangpa a nihun tui sungah a pai uh a, Filip in a baptaiz hi. Tui sung pan a kahtoh khit ciangin Kha Siangtho in Filip lakhia a, Mangpa in a nung ciangin Filip a mu nawn kei hi; lungdam mahmahin lam a paikik hi. Ahih hangin Filip Azotas khua-ah kimu hi. Tua khua panin Kaisaria khua dongin khua khempeuh ah pai kawikawi-in Lungdamna Thu a hilh hi. Saul in Topa’ nungzuite langpanin tawng a, thah dingin nakpi-in a nakkhiat lai takin, hih Lampi a zui numeite ahi zongin, pasalte ahi zongin a muh ciangin, khau tawh a khih khit ciangin Jerusalem khua-ah paipih dingin Damaskas khua kikhopna inn ukte kiangah vaikhakna lai piak nading siampi ukpa kiangah a ngen hi. Amah lam pai a, Damaskas khua a naih ciangin vantung pan khuavakpi in ama kimkot ah thakhatin a taang hi. Amah in lei tungah puksuk a, “Saul aw, Saul aw, bang dingin kei hong bawlsia na hi hiam?” a cihna aw a za hi. Saul in, “Topa aw, kua na hi hiam?” ci-in a dong hi. Zeisu in, “Na hong bawlsiat Zeisu ka hi hi, ciang hiam na khe tawh peek leteh a haksa hi; Ahih hangin tho in la, khua sungah tum in, na gamtat nadingin thu hong kihilh ding hi,” a ci hi. Saul tawh a paikhawm mite in tua aw a zak uh hangin kuamah mu loin, pau thei loin, ding-in a om uh hi. Saul lei pan a thawh ciangin a mit hak a, kuamah mu thei lo ahih maninah amaute in a khut len uh a, Damaskas khua-ah a paipih uh hi. Ni thum sung tawntung bangmah mu loin, an ne lo, tui dawn loin a om hi. Tua lai takin Damakas khua-ah Ananias kici nungzuipa khat a om hi. Tua pa a mang sungah Topa in, “Ananias aw,” ci-in a sap leh, Ananias in, “Ka om hi, Topa aw,” a ci hi. Topa in “Tho in la, Tang a kici lampi-ah pai in; Saul kici Tarsas mi, Judah innah va zong in. Bang hang hiam na cih leh, amah in thungen a, Ananias kicipa khat a kiangah hong pai-in, ama khua muh nading a tungah a khut a nga khat, a mang sungah a mu zo hi,” ci-in a sawl hi. Ananias in, “Topa aw, hih pa in Jerusalem khua-ah na misiangtho hi zah tak a bawlsiatna thu mi tampi kiangah ka za zo hi. Hi san takah zong na min tawh thungen khempeuh khau tawh hen nadingin siampi liante kiangah thu a ngah hi,” a ci hi. Topa in, “Pai ta in. Bang hang hiam na cih leh, amah in Gentailte mai-ah ahi zongin, kumpite mai-ah ahi zongin, Israelte mai-ah ahi zongin, ka min a puak dingin ka teelsa beel ahi hi. Keima min hangah bangzah takin a thuak nading ke’n ka lak ding hi,” ci-in a gen hi. Ananias pai a, inn sungah lutin Saul tungah a khut nga a, “Ka nau Saul aw, na paina lampi-ah na kiangah hong kilang Topa Zeisu in khua na muhkik theih nading ahi zongin, Kha Siangtho tawh na dim nading ahi zongin, kei hong sawl hi,” a ci hi. Tua lai takin thakhatin Saul’ mit tungah ngasa lip bangin na khat kia pah a, khua mu thei a, tho-in a kibaptaiz khit ciangin an ne a, a thahat kik hi. Saul in Damaskas khua nungzuite tawh ni tawmkha omkhawm a, ‘Zeisu in Pasian’ Tapa hi’ ci-in kikhopna inn sungah thakhatin thu a hilh hi. Thu a za mite in lamdang a sa uh a, “Hih pa in Jerusalem khua sungah tua min tawh thungente a bawlsiapa hilo ahi hiam? Amaute khau-in a hen khit ciangin siampi liante kiangah paipih dingin hih lai takah hong pai hi,” a ci uh hi. Saul khangto-in siam semsem a, Judah mite’ thugenna hoih takin thukkikin, Zeisu in Khazih ahi takpi hi, ci-in a lak hi. Ni tampi a sawt khit ciangin Judah mite in Saul thah ding a vaihawm uh hi. Amau vaihawmna thu Saul in a thei hi. Amaute in Saul thah nading kongpi kiangah sun leh zanin a pang uh hi. Nungzuite in Saul zan lai takin la uh a, seeng khat sungah kulh tung pan amah a khiasuk uh hi. Saul Jerusalem khua a tun’ ciangin nungzuite tawh kipawl ding a ut hangin amaute in Saul nungzui a suahna taksang loin a kihta uh hi. Ahih hangin Barnabas in Pasian’ sawltakte kiangah Saul paipihin, amah in lampi-ah Zeisu a muhna thu ahi zongin, amah tawh a kihona thu ahi zongin, Damaskas khua-ah Zeisu’ min tawh lau loin thu hilhna thu ahi zongin a gen hi. Saul in amaute tawh Jerusalem khua-ah omkhawm a, a pai zel, a ciah zel a, lau loin Zeisu’ min tawh thu hilh a, Grik Judah mite tawh thu kinialin a om hi. Tuate in Saul thah nading a zong uh hi. Ute naute in tua thu a zak uh ciangin Saul Kaisaria khua-ah a kha uh a, Tarsas khua-ah a paisak uh hi. Tua ahih ciangin Judah gam, Galile gam, Samaria gam mun khempeuh ah pawlpite in lungkimin kipna a ngah uh hi. Pasian kihtakna leh Kha Siangtho huhna tawh omin a khang semsem uh hi. Tua lai takin Piter in mun khempeuh ah a kawivak lai takin Lidda khua-ah a om misiangthote kiangah a tung hi. Tua khua-ah Aineas kici a khut a khe a si, kum giat tawntung a lupna tungah a om mi khat a mu hi. Piter in, “Aineas aw, Zeisu in nang hong damsak zo hi. Tho in la, na lupna na phah in,” a cih ciangin amah in thakhatin a tho hi. Lidda khua akipan Saron gamah a om mi khempeuhte in tua pa a muh uh ciangin Topa kiangah a kihei uh hi. Joppa khua-ah Dorkas a cihnopna ahi Tabitha min nei, nungzui a suak numei khat a om hi. Tua numei in a pha gamtatna leh mi hehpihna lungsim a nei hi. Tua lai takin amah a ci na a, a si hi. Amaute in ama luang a sil khit uh ciangin dei tungnung ah koih uh hi. Lidda khua in Joppa khua tawh kinai ahih ciangin Piter tua khua-ah a om ci-in nungzuite in a theih uh ciangin mi nih sawl uh a, “Zekai loin ko kiangah hong pai in,” ci-in a thuum uh hi. Piter tho a, amaute tawh paikhawm hi. A tun’ ciangin dei tungnung sungah a paipihto uh hi. Meigong khempeuh a kiangah a ding uh a, kapin, Dorkas in amaute tawh a omkhawm lai taka a bawlsa puan-akte leh puante a lak uh hi. Piter in tua mi khempeuh a paikhiatsak khit ciangin khukdin’in thungen a, si-luang lam kihei-in, “Tabitha aw, tho in,” a ci hi. Ama mit hak a, Piter a muh ciangin tho-in, a tu hi. Piter in a khut lenin a din’sak khit ciangin misiangthote leh meigongte sam a, Dorkas a nungta-in a lak hi. Tua thu in Joppa khua-ah kithei khin a, mi tampi in Topa a um uh hi. Piter in Joppa khua-ah savun bawlpa Simon kiangah sawt veipi a taam hi. Kaisaria khua-ah Italy kici galkap kuan khat a uk, galkapbu Kornelias kici mi khat a om hi. Tua mi in a diktat mi hi a, a innkuanpihte tawh Pasian kihta a, mite tungah hehpihna tampi pia a, Pasian kiangah thungen nilohin a om hi. Nikai nai thum ciangin mangmu-in, Pasian’ vantungmi khat hong pai tel takin mu a, “Kornelias aw,” ci-in a sam hi. Amah in entel a, lau mahmah ahih ciangin, “Topa aw, bang ahi hiam?” a ci hi. Vantungmi in, “Na thungetna leh hehpihna na piak teng Pasian in a ngaihsut nadingin hong kahto zo hi. Tu-in Joppa khua-ah mi na paisak in la, a min thak Piter kici Simon na samsak in. Tua pa in tuipi gei-ah a om, savun bawlpa Simon’ innah a tung hi,” a ci hi. Ama kiangah a gen vantungmi a paikhiat khit ciangin Korenelias in a nasem nih leh ama nasem niloh Pasian a zahtak galkap khat sam a, thu khempeuh a gen khit ciangin Joppa khua-ah a pai sak hi. A zingsang ciangin amau lam pai-in Joppa khua-ah a naih lai takun, nai sawm leh nai nih ciangin Piter in thungen dingin innkhum tungah a kahto hi. A gilkial a, an a duh hi. Mite in an a thuk kholh lai takun amah in mangmu-in, vantung kihong a, puanza bangin kiu li nei-in leitungah hong kiasuk na khat a mu hi. Tua sungah khe li nei ganhing leh bokvak a, pai thei ganhing leh vanah vasa pawlte a om hi. “Piter aw, tho in, go in la, ne in,” cih aw khat a za hi. Piter in, “Topa aw, hi thei lo ding hi. Bang hang hiam na cih leh, a siangtho lo na leh a nin na ke’n khatvei beek ka ne ngei kei hi,” a ci hi. Khatvei aw in hong kiko a, “Pasian in a sian’ thosakte a siangtho lo na sa kei in,” a ci kik hi. Tua mah bangin thumvei a hih khit ciangin tua na vantungah a kilato kik hi. Piter in a mangmuhna a cihnopna bang ahi hiam ci-in a lunghihmawh lai takin, Kornelias in a sawl mite in, “Simon’ inn koi lai-ah a om hiam?” ci-a a dot khit uh ciangin inn kongkhak mai-ah ding-in “Piter kici min thak nei Simon hi lai-ah a om hiam?” ci-in a kiko uh hi. Piter in a mangmuhna a ngaihsut lai takin Kha Siangtho in, “Mi thumte in nang hong zong uh hi. Tho in la, kumsuk in. Lunghimawh kei in la, amau tawh na paikhawm in. Bang hang hiam na cih leh, tuate keimah in kong sawl hi,” a ci hi. Piter in tua mite kiangah kumsuk a, “Na zon’ uh mi ka hi hi. Bang thu om a, hong pai na hi uh hiam?” ci-in a dot ciangin amaute in, “Pasian a kihta, Judah mi khempeuh in a zahtak, midik, galkap mangpa Kornelias in nangmah hong sam a, nangmah kiang pan thu a zak nading, vantungmi siangtho khat in thu a pia hi,” a ci uh hi. Tua ahih ciangin Piter in tuate inn sungah sam a, a tung sak hi. Zingsang ciangin Piter tho a, amaute tawh a paikhawm hi. Joppa khua unau kimkhatte in zong a zui uh hi. Zingsang ciangin Kaisaria khua-ah a lut uh hi. Kornelias in a behte, a lawmte kikhawm sakin, lamenin a om hi. Piter a tum ciangin Kornelias in dawn a, a khe mai-ah bokin a bia hi. Piter in amah phongto a, “Tho in. Keimah zong mi ka hi hi,” a ci hi. Amah in Kornelias tawh a kihopih lai takin inn sungah tum uh a, mi tampi kikhawmin a om uh a mu hi. Piter in, “Judah mite in mipawl dangte tawh kipawl a, amau kiangah pai ding a kilawm lo cih na thei uh hi. Ahih hangin a siangtho lo, a nin hi, kuamah ka cih loh nadingin Pasian in hong hilh zo hi. Tua ahih ciangin kei nong sap uh ciangin seel loin ka hong pai hi. Tua ahih ciangin bang thu-in kei hong sam na hi uh hiam?” a ci hi. Kornelias in, “Tuni-in ni li a phak zawh ni, tu hun lai tak nai thum thungetna ka inn sungah ka bawl lai takin, puan taang mahmah a silh mi khat in ka mai-ah a ding hi. Kornelias aw, na thungetna teng ka za zo hi. Na hehpihna na piak teng Pasian in a ngaihsun zo hi. Tua ahih ciangin Joppa khua-ah mi paisak in la, a min thak Piter kici Simon va samsak in. Tua pa in tuipi gei savun bawlpa Simon’ innah a tung hi,” ci-in thu a hong pia hi. Tua ahih ciangin nangma kiangah a manlangin mi kong paisak hi. Tu-in nang hong tung na hih ciangin thuhoih ahi hi. Tua ahih ciangin hih san takah Pasian in nangma kiangah thu hong piaksa teng ngai dingin kote khempeuh in Pasian mai-ah ka om uh hi,” a ci hi. Piter in a kam ka-in thu a hilh-inah, “Pasian in mite maitang et tuam a nei kei hi cih ka thei takpi hi. Mipawl khempeuh lakah amah kihta uh a, thuman thutak a bawlte amah in a sang hi. Mi khempeuhte’ Topa ahi, Zeisu Khazih hangah thupha Lungdamna Thu kihilhin, Israel mite a vaikhak mah bangin, Johan in baptaizna thu a hilh khit ciangin Galile gam pan akipan Judah gam mun khempeuh dongin a kihilh khin thu note in na thei uh hi. Pasian in Nazareth khua mi Zeisu, Kha Siangtho leh vangliatna tawh sathau a nilh khit ciangin tua Zeisu pai kawikawi a, thupha bawlin dawimangpa in a bawlsiatte khempeuh a damsak hi. Bang hang hiam na cih uh leh, Pasian in amah tawh a omkhawm hi. Judah gam sung leh Jerusalem khuapi sungah a bawl na khempeuh’ teci ka hi uh hi. Amaute in amah singkhuam tungah khai-in a that uh hi. Ni thum khit ciangin Pasian in sihna pan a thokik sak a, mi khempeuh’ mai hi lo, Pasian’ teel kholhsa a teci, kote bek mai-ah hong kilat nadingin thu a pia hi. Sihna pan a thawhkik khit ciangin amah tawh an ka nekhawm uh hi. Amah in ‘Mi khempeuh kiangah thuhilh un la, mi nungta leh misite thu khen dingin Pasian’ koihsa mi in tua mi ahi hi ci-in teci na pang un,’ ci-in kote thu hong pia hi. Amah a um mi khempeuh in ama min hangin mawhna maisakna a ngah ding hi ci-in Pasian’ kamsangte khempeuh in teci a pang zo uh hi,” ci-in thu a hilh hi. Piter in thu a hilh lai takin ama thu a za khempeuh tungah Kha Siangtho a tung hi. Piter tawh a paikhawm Pasian thu-um vunatte khempeuh in Gentailte tungah Kha Siangtho a tung a muh uh ciangin a lungmang uh hi. Bang hang hiam i cih leh, tua mite in kamtuam tawh pau-in, Pasian’ min a phat uh cih a za uh hi. Tua ciangin Piter in, “Eite bangin Kha Siangtho a ngahte in tui sungah kibaptaiz loh nadingin kua in tui a kham zo hiam?” a cih ciangin, amaute Zeisu Khazih’ min tawh kibaptaiz dingin thu a pia hi. Piter ni tawmkhat sung a tam lai na’ngin a thuum uh hi. Gentailte in Pasian’ thu a san’ uh Judah gamah a om sawltakte leh u leh naute in a za uh hi. Piter in Jerusalem khua-ah a paitoh ciangin vunatte in, “Nang in vunat lote kiangah pai-in amau tawh an na ne khawm hi,” ci-in a mawhsak uh hi. Piter in a kizom a kizomin a gen-inah: “Keimah in Joppa khua sungah thu ka ngen hi. Ka nget lai takin mang sungah vantung panin kiu li tawh a kikhaisuk puanza tawh kibang na khat ka muh leh, keima kiangah hong tungsuk hi. Hih puan a tel takpi-in en a, ka ngaihsut lai takin leitungah khe li nei ganhingte tawh, gamsate tawh, bokvak ganhingte tawh, vana vasate tawh ka mu hi. ‘Piter aw, tho in, go in la, ne in,’ hong ci aw khat ka za hi. Keimah in, ‘Topa aw, tua bang hi thei lo hi. Bang hang hiam na cih leh, a nin a siangtho lote keima kam sungah khatvei beek a tum ngei kei hi,’ ka ci hi. ‘Pasian in a sian’ thosakte a siangtho lo na sa kei in,’ ci-in vantung panin nihvei aw in hong ci hi. Tua mah bangin thumvei a hih khit ciangin tua khempeuh vantungah a kaito kik hi. Kaisaria khua pan ka kiangah hong sawl mi thum in thakhatin ka omna inn kiangah a ding uh hi. Kha Siangtho in, ‘Na lung himawh sak loin amau tawh na paikhawm in,’ hong ci hi. Hih unau gukte in zong keimah tawh a paikhawm uh a, tua mipa’ innah a tum uh hi. Amah in, ‘Vantungmi khat in ka inn sungah ding-a om ka mu a, ‘Joppa khua-ah a min thak Piter kici Simon sam dingin sawl in. Tua pa in nangmah leh na innkuanpihte gupna na ngah nadingun hong hilh ding hi,’ hong ci hi’ ci-in hong gen hi. Keimah in thuhilh ka kipat lai takin, amasa-a eite tungah Kha Siangtho a hong tun’ mah bangin amaute tungah a tung hi. ‘Johan in tui sungah hong baptaiz hangin note in Kha Siangtho sungah na kibaptaiz ding uh hi,’ ci-in Topa’ thugenna ka phawk hi. Tua ahih ciangin eite in Topa Zeisu Khazih’ thu i up ciangin Pasian in thupha hong piak mah bangin Pasian in tuate a piak leh, Pasian a nial dingin kei kua ka hi hiam?” ci-in Piter in a gen hi. Amaute in hih thu a zak uh ciangin nial loin, “Pasian in Gentailte zong a nuntak nadingin kisikkikna thu a pia hi,” ci-in Pasian a phat uh hi. Stefen tungah kibawlsiatna thu hangin a kithehthang mite in Foenisia gam leh Saipras gam leh Antiok khua dongin a pai uh a, Judah mite kiang bekah Pasian’ thu a hilh uh hi. Ahih hangin Saipras mi leh Sairin mi kimkhat in Antiok khuapi-ah a tun’ uh ciangin Topa Zeisu’ Lungdamna Thu Grik mite kiangah zong a hilh uh hi. Pasian’ khut in amaute tawh omkhawm a, thu-um mi tampi in Pasian kiangah a kihei uh hi. Tua mite thute Jerusalem khua pawlpite in a zak uh ciangin Antiok khua-ah Barnabas a sawl uh hi. Barnabas a tun’ ciangin Pasian’ hehpihna thupha a muh ciangin a lungdamin amaute in a lungsim tawh Pasian beel dingin mi khempeuh a hansuah hi. Bang hang hiam i cih leh, Barnabas in mipha hi a, Kha Siangtho leh thu-upna tawh dim a, Topa tawh mi tampi a kibehlap hi. Tua khit ciangin Saul a zong dingin Barnabas paikhia a, Tarsas khua a tung hi. A muh ciangin Antiok khua-ah a paipih hi. Tuate in pawlpi tawh kum khat omkhawm uh a, mi tampi kiangah thu a hilh uh hi. Zeisu’ nungzuite in Antiok khua-ah Christian a kici masa bel hi. Tua lai takin Jerusalem khua panin Antiok khua-ah Pasian’ kamsangte hong tung uh hi. Tuate lakah Agabas kici khat in ding a, “Gam khempeuh sungah kial hong tung ding hi,” ci-in Kha Siangtho tawh a hilh hi. Tua kialpi in kumpipa Klaudias a man’ lai-in a hong tung hi. Nungzuite in a hih theih zah ciat bangun Judah gamah a om u leh naute kiangah huhna sum khak dingin a vaihawm uh hi. Tua mah bangin a bawl uh a, upate kiangah Barnabas leh Saul te’ khut tawh a khak uh hi. Tua lai takin Herod kumpipa in pawlpite kimkhat a kibawlsiat theih nadingin thu pia a, Johan’ sanggampa Jeim namsau tawh a that hi. Hih thu hangin Judah mite a nuam uh a muh ciangin Piter zong a man hi. Tua lai takin Silngo-omlo Anlum pawikham hun ahi hi. Amah in Piter a mat khit ciangin galkap li tek a om, galkap pawl li kemsak a, thong sungah a khia hi. Paisan pawi ni a bei khit ciangin mi honpi mai-ah lahkhiat ding a hanciam hi. Tua ahih ciangin Piter in thong sungah a om lai takin pawlpite in Pasian kiangah amah ading hahkatin thu a ngetsak uh hi. Herod kumpipa in a lakkhiat hun dek tak ni zanin Piter sikkhau nih tawh kihen a, galkap nih kikalah ihmu a, thong kong mai-ah a cingte in a cing uh hi. Pasian’ vantungmi khat in ama kiangah ding a, thong inn sungah khuavak a tang hi. Vantungmi in Piter’ pang beeng a, phongin, “Tho mengmeng in,” a cih ciangin sikkhaute a khut tung pan a kitolkhia hi. Vantungmi in, “Na kawnggak gak in la, na khedap bulh in,” a cih ciangin tua mah bangin a hih hi. “Na puan silh in la, hong zui in,” a ci hi. Piter paikhia a, vantungmi’ nung a zuih hangin vantungmi ahih takpi lam thei loin, mangmu a kisa hi. A cingte mun khatna leh mun nihna khengin, khua sungah lutna sik kongpi a tun’ uh ciangin, ama thu thu-in amau ading kihong a, amaute a paikhia uh a, lam khat a pai khit uh ciangin thakhatin vantungmi in Piter tawh kikhenin a paikhia hi. Piter in khua a phawk khit ciangin, “Topa in vantungmi hong sawl a, Herod kumpipa’ khut leh Judah mite’ lametna sung pan kei hong suaktasak takpi ahih ka thei hi,” a ci hi. Tua bang a ngaihsut khit ciangin Marka, a min thak Johan’ nu Mari’ innah a pai hi. Tua san takah mi tampi hong kikhawm uh a, thu a ngen uh hi. Piter in kong a kiuh ciangin Roda min nei nungak khat in va ngai dingin a pai hi. Amah in Piter’ aw hi cih a theih ciangin a lungdam mahmah a, kong hong loin inn sungah tai a, “Piter kongkhak kiangah a ding hi,” ci-in a gen hi. Amaute in, “A hai hi teh,” a cih uh ciangin, amah in, “Piter om takpi hi,” a ci teitei hi. Amaute in, “Piter’ vantungmi hi ding hi,” a ci uh hi. Piter in kong kiu lailai a, amaute in kong a hon’ ciangin a mu uh a, a lungmang uh hi. Amah in amaute pau lo-a a om na’ngun a khut a vaan khit ciangin Topa in amah thong sung pan bang ci-a lakhia hiam cih thu a gen hi. “Tua thu Jeim leh sawltakte kiangah va gen un,” a cih khit ciangin tua mun pan paikhia a, a mun dangah a pai hi. A zingsang ciangin Piter koi lamah a om hiam ci-in galkapte in a gamlum uh hi. Herod in amah zongsak a, a muh loh ciangun a cingte thu a dot khit ciangin a thatsak hi. Tua ciangin amah in Judah gam pan Kaisaria khua-ah paisukin, tua lai-ah tawlkhat a om hi. Herod kumpipa in Tai-ar leh Sidon khuapihte tungah heh a, amaute in a lungsim kikhatin ama kiangah a pai uh a, mangpa’ thu vaihawmpipa Blatas amau lawma a mat khit uh ciangin kilemna thu a gen uh hi. Bang hang hiam i cih leh, amaute gam in kumpipa gam panin an a ngah uh hi. A kiciam kholh ni-in Herod in kumpipuan silhin tokhom tungah tu a, amaute kiangah thu a gen hi. Mi honpite in, “Hih aw in mi’ aw hi lo Pasian’ aw ahi hi!” ci-in a kiko uh hi. Amah in Pasian’ min phat lo ahih ciangin Pasian’ vantungmi khat in thakhatin amah sat a, thante in a ne uh a, a si hi. Ahih hangin Pasian’ thu in khangto a, a kizel semsem hi. Barnabas leh Saul in a sep ding bang bang uh a zawh khit uh ciangun Marka kici a min thak Johan tonpihin, Jerusalem khua panin a ciah uh hi. Antiok khua pawlpi sungah kamsangte leh thuhilhte a om uh hi. Tuate in Barnabas, Niger kici Simeon, Sairin mi Lukias, Herod tawh a khangkhawm Manean leh Saul-te ahi uh hi. Topa’ na sem uh a, an a tan’ lai takun Kha Siangtho in “Barnabas leh Saul keima nasem ding ka sapsa bangin hong khenkhiat un,” a ci hi. Tua ciangin an tangin thu a nget khit uh ciangin, a tunguh ah a khut uh a ngak khit uh ciangin a pai sak uh hi. Tua bangin Kha Siangtho in amaute pai sak a, Seleukia khua-ah a paisuk uh hi. Tua khua panin teembaw tuangin Saipras gamah a tung uh hi. Salamis khua-ah a om lai takun Judah mite’ kikhopna inn sungah Pasian’ thu a hilh uh hi. Johan in amaute huh dingin a om Pafos khua dongin tua gam khempeuh a paisuak khit uh ciangin Pafos khua-ah tung uh a, Judah mi dawi aisan ahi, a min Bar-Zeisu kici thuzuau kamsangpa khat a mu uh hi. Tua pa in a pil mahmah Sargias Pawlas mangpa kiangah a om hi. Tua mangpa in Pasian’ thu za nuamin, Barnabas leh Saul a sam hi. Ahih hangin mi bum theipa ahi Elimas in amaute nial a, mangpa in thu up loh nadingin a bawl hi. Ahih hangin Paul kici Saul in Kha Siangtho tawh dimin tua pa lim takin enin, “Thuzuaute leh kheemna pawl khempeuh tawh a dim, dawimangpa’ ta, thuman thutak’ gal aw, Pasian’ Lampi tang siasak dingin tawp lo ding na hi hiam? Tu-in na tungah Pasian’ khut om ding a, ni mu loin tawlkhat na mit taw ding hi,” a cih ciangin thakhatin meii leh khuamial in a tungah tung a, a khut kilenin a paipih dingin mi kawi zon’in a om hi. Tua thu a muh ciangin mangpa in Pasian’ thu lamdangsa-in a um hi. Paul leh a lawmte in Pafos khua panin teembaw tungah tuangin Pamfilia gam sung Perga khua-ah a tung uh hi. Tua khua panin Johan in amaute tawh kikhen a, Jerusalem khua-ah a ciah hi. Amaute in Perga gam a paisuak uh a, Pisidia gam sung Antiok khua-ah a tung uh a, Nipi ni-in kikhopna inn sungah tumin, a tu uh hi. Thukhamna Lai leh Pasian’ kamsangte’ lai a sim khit ciangin kikhopna inn ukpa in amaute kiangah paisakin, “Ute naute aw, mite thu hilh ding na neih uh leh, thu hong gen un,” a ci hi. Tua lai takin Paul ding a, a khut vaanin thu a hilh inah: “Israel mite leh Pasian kihta-te aw, ngai un. Hih Israel mipawlte Pasian in i pu i pate teel a, Izipt gamah a om lai takun, tua mite pahtawi a, tua san tak panin a khut tawh a paikhiatpih hi. Kum sawmli tawntung gampa lakah naungeek bangin kemin a vaak hi. Kanaan gam sung mipawl sagih a suksiat khit ciangin tuate gam ama mite in a luah dingun kum zali leh sawmnga tawntung a hawmsak hi. Tua nung ciangin kamsangpa Samuel dongin thukhen mangte a pia hi. Tua nung ciangin amaute in kumpipa ding ngen uh a, Benjamin pawl mi Kish’ tapa Saul kum sawmli tawntung a pia hi. Tua pa a khinkhiat khit ciangin David kumpipa a koih hi. ‘Ka deih bangin a sem ding, ka lungsim tawh kituak mi, Jessi’ tapa David ka mu zo hi,’ ci-in amah ading teci a pang hi. Tua Johan in a nasepna a zawh lai takin, ‘Kei in kua mi ka hi hong um na hi uh hiam? Amah ka hi kei hi. Ahih hangin ka nungah hong pai mi khat a om lai hi. Ama khedap sut ding ka kilawm kei hi,’ a ci hi. “Abraham’ suan akipan ute naute leh no lakah Pasian a kihtate aw, hih gupna thu eite kiangah hong khak zo hi. Bang hang hiam na cih uh leh, Jerusalem khuapihte leh amau ukte in amah ahi zongin, Nipi ni simin a kisim Pasian’ kamsangte’ lai ahi zongin thei lo uh ahih ciangin tua thute a tungsak dingin Zeisu a daantat uh hi. A sih nading a kituak thu khatbeek a muh loh uh hangin, thah dingin Pilat mangpa kiangah a ngen uh hi. Ama thu a kigelhkhol a tun’sak khit uh ciangin singlamteh tung pan a lakhia uh a, han sungah a vui uh hi. Ahih hangin sihna sung panin Pasian in a nungta kiksak a, Galile gam panin Jerusalem khua-ah nungzuite mai-ah ni tampi sung a kilang hi. Tua mite in mite mai-ah tu lai takin amah ading teci ahi uh hi. ‘David kiangah a siangtho leh kip taka ka piak hehpihna thupha note kong pia ding hi,’ ci-in a genkholh mah bangin, tua Topa sihna pan a nungtakik sak a, a nung ciangin a muat nawn kei ding hi. Bang hang hiam na cih uh leh, ‘Na Mi Siangtho a muat nading ka pia kei ding hi,’ ci-in Late Lai Siangtho adang sungah a gen hi. David in Pasian’ deih bangin ama khan’ lai-in na a sep khit ciangin si a, a pute a pate tawh kivui khawm a, muatna a thuak hi. Pasian in sihna panin a nuntakkik sakpa in ahih leh, muatna a thuak kei hi. Tua ahih ciangin ute naute aw, tua pa hangah mawhna kimaisakna thu nomau kiangah hong kihilh zo hi ci-in na thei ta un. Amah a um khempeuh in Moses’ Thukham hangah suakta zo lote zong amah hang inah na suakta thei uh hi. Tua bang ahih leh, Pasian’ kamsangte’ thu in note tungah a tun’ loh nading na kikem un. Tua thu in: ‘Mi gilote aw, en un, Lungmang un la, taimang un! Bang hang hiam na cih uh leh, nomau khang lai takin na khat ka bawl ding hi, tua bawlna thu mi khat in hong hilh hangin na um kei ding uh hi,’ a ci hi,” ci-in a hilh hi. Paul leh Barnabas kikhopna inn panin a paikhiat lai takun Nipi ni kik ciangin hih thu hilh dingin amaute in a ngen uh hi. Kikhopna a bei khit ciangin Judah mi leh Judah ngeina sungah a tum Pasian zahtak mi tampite in Paul leh Barnbas nung a zui uh a, Pasian’ hehpihna thupha sungah a kip nadingun amaute in thu hilhin, a hansuah uh hi. Nipi ni kik ciangin Pasian’ thu ngai dingin khuazang dektak a kikhawm uh hi. Ahih hangin Judah mite in mihonpi a muh uh ciangin haza uh a, Paul’ thuhilhna a gensia uh hi. Paul leh Barnabas in, “Note kiangah Pasian’ thu hilh masa dingin thu a om hi. Ahih hangin no na paikhia uh a, nuntak tawntungna ngah dingin kilawm kisa lo na hih uh ciangin, Pasian in kote thu hong piak mah bangin Gentailte kiangah ka kihei ding uh hi. Bang hang hiam na cih uh leh, Pasian’ thupiakna in: ‘Leimong dongin gupna na pian’sak nadingin, Gentailte’ khuavak dingin ka hong koih zo hi,’ a ci hi,” ci-in lau loin a gen uh hi. Gentailte in hih thu a zak uh ciangin a lung uh a dam mahmah a, Pasian’ thu a phat uh hi. Nuntakna ngah ding Pasian in a teelsate in thu a um uh hi. Topa’ thu in tua gam khempeuh ah a kizel hi. Ahih hangin Judah mite in Pasian a zahtak numei liante leh khua sung miliante a hansuah uh a, Paul leh Barnabas bawlsia-in, amau khua sung pan a hawlkhia uh hi. Ahih hangin amaute in a khepeek tungah leivui amau langkhatah sin’ khiatin, Ikonium khua-ah a pai uh hi. Nungzuite in lungdamna leh Kha Siangtho tawh a kidim uh hi. Ikonium khua Judah mi kikhopna inn sungah a lut uh a, thu a hilh uh ciangin, Judah mi leh Grik mi tampite in a um uh hi. Thu-um lo Judah mite in unaute a huat bawlna dingun Gentailte a hansuah uh hi. Tua ahih ciangin a sawtpi tua san takah a om uh a, lau loin Topa’ min tawh thu a hilh uh hi. Topa in amaute’ khut tungah lim leh nalamdang bawl dingin thu pia-in, ama hehpihna thu ading teci a pang hi. Khua sung mi honpite a kikhen uh a, kimkhat in Judah mite lamah, kimkhat in sawltakte lamah a kipawl uh hi. Gentailte leh Judahte in upate tawh bawlsia uh a, suang tawh a deng dingin nakpi-in a delh ding uh, amaute in a theihkholh uh ciangin Likaonia khua, Listra khua leh Derbe khua akipan, tua khua kim gamah a tai uh a, tua gamah Lungdamna Thu a hilh uh hi. Listra khua-ah a nu gil sung pan a khe zaw a, khatvei beek lam pai ngei lo thahat lo mi khat in tu-in a om hi. Amah in Paul’ thu a ngaih lai takin Paul in amah a tel-et ciangin a dam theih nading upna a neih a muh ciangin, “Na khe tawh na dingtang ta in,” ci-in nakpi-in a kiko ciangin, tua pa ding-in lam a pai hi. Paul hihna mihonpite in a muh uh ciangin, “Pasiante in mi meel bangin eite kiangah hong kumsuk hi,” ci-in Likaonia pau-in a kiko uh hi. Barnabas pen Zeas ci uh a, Paul in thugen penpa ahih ciangin Hermes a ci uh hi. Khua mai-ah a om Zeas biakna innpi siampipa in pak leh bawngpi la-in kongpi kiangah paipih a, mihonpi tawh bia dingin a kisa uh hi. Sawltakpi Paul leh Barnabas-te in a zak uh ciangin a puan balkek uh a, mihonpi lakah tai-in “Mite aw, bang hangin hih bangin bawl na hi uh hiam? Komau in note tawh kibang lungsim nei mite ka hi uh a, hih a mawkna paaikhia-in van leh lei, tui lianpi akipan leh a sungah a om teng a piangsak a nungta Pasian kiangah na kihei nadingun Lungdamna Thu kong hilh uh hi. Tua Pasian in khang masa hun lai-in mipawl khempeuhte in, amau ut bangin a gamtat nading uh thu a pia hi. Ahih hangin tecipan’na om loin amahmah a kinusia kei hi; amah in ama gitna hong lakin, vantung pan guahtui leh amau hun ciat a, a gah an hong pia hi; amah in an tampi hong pia-in na lungtang uh lungnopna tawh hong dimsak hi,” a ci hi. Tua thu tawh mi honpite in a biak loh nadingun haksapi-in a kham uh hi. Ahih hangin Antiok khua leh Ikonium khua panin Judah mite hong pai uh a, mihonte a hansuah khit uh ciangin Paul suang tawh a deng uh a, a si khin ta hi ci-in khua nawlah a kaikhia uh hi. Ahih hangin nungzuite in ama kimkot ah a om lai takun tho a, khua sungah a tum kik hi. Zingsang ciangin Barnabas tawh taikhia a, Derbe khua-ah a tung uh hi. Amaute in tua khua sungah Lungdamna Thu a hilh uh a, tampitak nungzuite a suaksak khit uh ciangin Listra khua, Ikonium khua leh Antiok khua-ah ciahkik-in, nungzuite a lungkipsak uh a, “Eite in gimna tampi thuakin Pasian’ Gam sungah i tum ding ahi hi,” ci-in upna sungah a kip nadingun, hansuahin thu a hilh uh hi. Pawlpite khempeuh ah amaute’ adingin upate a koih sak uh a, an tangin thu a nget khit uh ciangin, amaute in a up uh Pasian’ khut sungah a ap uh hi. Pisidia gamah a paisuak uh a, Pamfilia gamah a tung uh hi. Perga khua-ah Pasian’ thu a hilh khit uh ciangin Attalia khua-ah a paisuk uh hi. Tua khua panin tu-in a zawh khitsa a nasep adingin Pasian’ hehpihna thupha sungah ki-ap uh a, teembaw tuangin Antiok khua a tungkik uh hi. A tun’ uh ciangin pawlpite kikhawmsak uh a, amaute tungah Pasian’ bawlna leh Gentailte ading thu upna kong kihon’na thu teng a zasak uh hi. Nungzuite tawh sawtpi a omkhawm uh hi. Judah gam panin mi kimkhatte hong pai uh a, “Note in Moses’ Thukham bangin vun na at kei uh leh, gupna na ngah kei ding uh hi,” ci-in ute naute kiangah a gen uh hi. Paul leh Barnabas in tua mite tawh tampi a kinial, a kiseel khit uh ciangin Paul, Barnabas leh adang thu-um kimkhatte tua thu kikum dingin Jerusalem khua-ah a om sawltakte leh pawlpi upate’ kiangah a paisak uh hi. Pawlpite in amau lampi-ah kha-in, Paul leh Barnabas in Foenisia leh Samaria gam lam a tawn uh a, Gentailte kiheina thu a zaksak uh ciangin ute naute in nakpi-in a lungdam uh hi. Amaute Jerusalem khua a tun’ uh ciangin pawlpi leh sawltakte leh upate in a tungsak uh a, amau tungah Pasian hihna thu khempeuh a zasak uh hi. Farisai pawl lakah a um kimkhat in a ding uh a, “Gentailte in vun at a, Moses’ Thukham a zuih na’ng uh thu hilh ding a kilawm hi,” a ci uh hi. Sawltakte leh upate in tua thu vaihawm dingun a kikhawm uh hi. A tampi mah a kiseel khit uh ciangin Piter in ding a, thu a gen-inah: “Ute naute aw, Topa Pasian in a masa-in note lak pan keima kam tawh Gentailte in Lungdamna Thu za uh a, a up nadingun hong teel na thei uh hi. Lungsim a thei Pasian in Kha Siangtho kote hong piak mah bangin amaute kiangah pia-in, amaute leh eimaute atuam atuam khen loin upna tawh, amaute lung sungah siangthosakin amau ading teci a pang hi. Tua bang ahih leh, eite ahi zongin, i pu i pate ahi zongin, a puak zawh loh hakkol nungzuite’ ngawng tungah suan dingin bang hangin Pasian na ze-et uh hiam? I Topa Zeisu’ hehpihna bek tawh tua mite in gupna a ngah khit mah bangin, eite in zong gupna i ngah hi cih thu i um hi,” a ci hi. Barnabas leh Paul in amaute tungah Gentailte kiangah Pasian in nalamdang leh lim a bawlna thu a zaksak lai takun mihonpite in pau loin a ngai uh hi. Amaute in a gen khit uh ciangin Jeim in a gen-inah: “Ute naute aw, kei thu ngai lai ta un. Pasian in ama min ading Gentailte sung pan kimkhat a teelkhiat ding, amasa-in amau kiangah a pai zawh thu Simon in hong hilh zo hi. Lai Siangtho sungah a kigelh mah bangin tua thu in kamsangte thu tawh kibang hi. Tua thu in: ‘Kei min tawh kiphuak Gentailte leh A om lai mite in Topa a zon’ na’ngin, A nung ciangin ka hong paikik ding a, A kipuksa David’ buk ka lamkik ding hi. A sia gawpsate zong, ka bawl kik khit ciangin Ka dingsak kik ding hi, ci-in a cil pan hih thu hong theisak Pasian in a gen hi,’ ci-in kigelh hi. Tua ahih ciangin Gentailte lak pan Pasian kiangah hong kiheite bawlsia loin, milim kihhuaite ahi zongin, numei tawh khialhna ahi zongin, gawl meek kithat sa ahi zongin, si ahi zongin, a tan’ nadingun a vaikhak ding kilawm ka sa hi. Bang hang hiam na cih uh leh, tanglai panin kikhopna innah Moses’ Thukham Lai Siangtho Nipi ni simin kisimin, khua khempeuh ah thuhilhte a om uh hi,” ci-in a gen hi. Tua ciangin sawltakte leh upate leh pawlpi khempeuh in amaute lakah, unaute lakah milian ahi uh Barsabbas, a min thak Judah leh Silas teelin, Antiok khua-ah Paul leh Barnabas tawh pai khawmsak leng a hoih hi ci-in a ki-awi uh hi. Amaute in lai khat gelh uh a, tuate’ khut tawh hih bangin a khak uh hi: “Sawltakte leh upate ahi uh ute naute in Antiok khua akipan Siria gam leh Kilikia gamah a om Gentail ute naute kiangah itna lai tawh kong zasak uh hi. Mi kimkhatte in ko thupiak lohin kote kiang panin a paikhia uh a, note lungsim uh hong lumletin, hong gimsak zo cih thu ka za uh hi. Tua ahih ciangin kote in Topa Zeisu’ min hangin a nuntakna a paaikhia ka it uh Barnabas leh Paul tawh ka teel uh mite, note kiangah kong pai khawmsak nading uh ka ki-awi uh hi. Tua ahih ciangin note kiangah kam tawh hong zasak dingin Judas leh Silas kong paisak uh hi. Bang hang hiam na cih uh leh, milim biakna ganhing sa ahi zongin, si ahi zongin, a gawl meek kithat sa ahi zongin, numei tawh khiahlna ahi zongin na tan’ nading uh thukham sim loh van dang note tungah suat nading Kha Siangtho leh kote in ka ki-awi kei uh hi. Tuate tang le-uh teh note ading a pha ding hi. Na cidam ta un,” ci-in lai gelhin a pia hi. Tuate a kikhak khit uh ciangin Antiok khua-ah a pai uh a, mi honpi a kikhopsak khit uh ciangin laikhak a pia uh hi. Amaute in tua lai a sim khit uh ciangin tua noptuamna thute hanginah a lungdam uh hi. Judah leh Silas in Pasian’ kamsang ahih uh ciangin ute naute kiangah thu tampi hilhin, a lungkipsak uh hi. Amaute in sawtpi a tam khit uh ciangin, lungdamna tawh amau in a sawltakte kiangah ute naute a ciahkik sak uh hi. Ahih hangin Paul leh Barnabas in Antiok khua-ah a om uh a, midangte tawh Topa’ thu hilhin a om uh hi. Ni tampi khit ciangin Paul in, “Eite in Topa’ thu i hilhnasa khuate-ah a om u leh naute bang ci-a om uh hiam ci-in en dingin paikik ni,” ci-in Barnabas kiangah a gen hi. Barnabas in Marka kici Johan sap ding a lungngai hi. Paul in Pamfilia khua panin Marka in amaute tawh kikhen ahih ciangin, tua banga nasem ding nung zui lo mipa pen sap loh dingin a ngaihsun hi. Tua thu hangin amaute khat leh khat a kinial ciangun a kikhen uh a, Barnabas in Marka a sap khit ciangin teembaw tungah tuangin Saipras gamah a pai hi. Ute naute in Pasian’ hehpihna sungah Paul a ap khit uh ciangin amah in Silas samin a paikhia hi. Amaute in pawlpi omsate kipsakin Siria gam leh Kilikia gam sungah a pai uh hi. Paul in Derbe khua leh Listra khua-ah a tung hi. Tua Listra khua-ah Timoti min nei nungzui khat a om hi. A nu in thu-um Judah numei ahi hi. A pa ahih leh, Grik mi ahi hi. Tua pa in Listra khua leh Ikonium khua-ah a om ute naute kiangah maipha a ngah mi ahi hi. Paul in amah a tonpih nuam hi. A pa Grik mi ahih lam tua gamah a om Judah mite in a theih manunah ama vun a atsak hi. Amaute in khuapite-ah a pai lai takun Jerusalem khua-ah a om sawltakte leh upate in thukhensatnate a man’ nadingun pawlpite a pia uh hi. Tua ahih ciangin pawlpite’ upna a kip semsem a, ni simin mimal a khang semsem uh hi. Frigia gam leh Galati gamah a paisuak khit uh ciangun Asia gamah Pasian thu hilh lo dingin Kha Siangtho in a kham hi. Misia gamah a tun’ uh ciangin Bithinia gamah pai ding thu a ngaihsut lai takun Zeisu’ Kha in thu a pia kei hi. Misia gam nawlah pai-in Troas khua-ah a tung uh hi. Zan ciangin Paul in mang a mu hi. Tua mang sungah Makedonia mi khat ding-in, “Makedonia gamah galkah in la, kote hong huh in,” ci-in a thuum hi. Paul in mang a muh khit ciangin Makedonia gamah pai-in, amaute kiangah Lungdamna Thu hilh dingin Pasian in kote hong sawl zo hi ci-in ka ciamteh ka ngaihsun uh ahih ciangin, tua gamah thakhatin pai na’ng ka hanciam uh hi. Tua ahih ciangin Troas khua panin teembaw tungah tuangin Somathroasia kici tuikulh gamah tang takin ka pai uh hi. A zingsang ciangin Neapolis khua-ah ka tung uh hi. Tua khua panin paikhia-in Rom khua kici Makedonia gam sungah a lianbel khua ahi, Filippi khua ka tung uh a, sawt veipi ka tam uh hi. Nipi ni-in komau in khua nawlah paikhia-in, thungetna mun om ngei-a ka upna uh gun gei-ah pai-in, ka tut khit uh ciangin tua san takah a kikhawm numeite thu ka hilh uh hi. Puansan a zuak Thiatira khua mi ahi, Pasian a bia numei a min Lidia in komau thu a za hi. Tua numei in Paul’ thuhilhna a san’ theih nadingin Pasian in ama lungsim a hon’sak hi. Amah in a innkuanpihte tawh a kibaptaiz khit ciangin, “Keimah in Topa sungah thu-um mi khat ka hihna nong up uh leh, keima innah hong tung un la, tam un,” ci-in thuumin, hong kho hi. Tua nung ciangin thungetna mun lam ka pai lai takun aisanin ama tote ading summeet ngah thei, dawi-lut sila nungak khat in kote hong dawn hi. Tua nungak in Paul leh komau hong zui a, “Hih mite in gupna Lampi eite hong hilh, Sang Pen Pasian’ nasemte ahi uh hi,” ci-in a kiko hi. Tua bangin ni tampi a hih hi. Paul in lungdam lo a, kihei-in, “Zeisu Khazih’ min tawh ama sung pan na paikhia in, thu kong pia hi,” a cih ciangin tua dawi in thakhatin a taikhia hi. Ama tote in summeet ngah na’ng lametna om lo hi cih a theih ciangun, Paul leh Silas man uh a, khua ukte mai-a sumbuk lamah a paipih uh hi. Thukhen mangte kiangah a tun’ uh ciangin, “Hih mite in Judah mi hi napi-in kote khua hong bawlsia uh a, Rom mi ahi eite in i san’ ding leh i zuih dinga kilawm lo ngeina thute hong hilh uh hi,” ci-in a ko uh hi. Mihonpite in amau langkhatah a ding uh a, thukhen mangte in amau puan balkek uh a, ciangpum tawh sat nadingin thu a pia uh hi. A tampi a liam khit uh ciangin, “Pha takpi na cing in,” ci-in thong ukpa vaikhakin thong sungah a khum uh hi. Thong ukpa in tua banga vaikhakna thu a ngah khit ciangin thong tawngnung sungah khumin, amau khe ah kol a bulh hi. Zan kim lai takin Paul leh Silas in thungenin Pasian’ min phatna la a sa uh a, thongkia mite in a ngaih lai takun, thakhatin zin nakpi liing a, thong innbul zong liing a, kongkhak khempeuh kihong a, mi khempeuh kisutkhia uh hi. Thong ukpa tho a, kongkhakte hon’sa-a om a muh ciangin, thongkiate khempeuh suakta khin hi ci-in a up ciangin a namsau a paai pan dok a, amahmah kithat dingin a kisa hi. Ahih hangin Paul in, “Nang tungah bangmah na hih kei in, kote khempeuh ka om uh hi,” ci-in nakpi-in a kiko hi. Thong ukpa in meivak a nget khit ciangin lut pahin, Paul leh Silas’ khe mai-ah bokin, launa tawh a liing hi. Amah in amaute inn pua-ah a paipih khit ciangin, “Tote aw, gupna ngah nadingin bang ka hih ding hiam?” ci-in a dong hi. Amaute in, “Topa Zeisu na up leh, nangmah tawh, na innkuanpihte tawh gupna na ngah ding uh hi,” ci-in, amah akipan a innkuanpihte Topa’ thu a hilh uh hi. Tua nai lai takin thong ukpa in Paul leh Silas la a, a kisatna ma a sawpsak khit ciangin, amah leh a innkuanpihte tawh thakhatin a kibaptaiz uh hi. Ama innah lutpih a, an vaak a, Pasian a up manin, a innkuanpihte khempeuh tawh a lungdam uh hi. A zingsang ciangin thukhen mangte in palik bute pai sakin, “Tua mite na khah un,” ci-in a vaikhak uh hi. Thong ukpa in, “Na kikhah nading uh thu thukhen mangte in hong paisak zo hi. Tua ahih ciangin tu-in na paikhia un la, nuam takin na pai un,” ci-in tua thute Paul kiangah a gen hi. Ahih hangin Paul in, “Rom mi ahi kote thukhen loin a kilangin a hong sat khit uh ciangin, thong sungah a hong khum zo uh hi. Tu-in hong khahkhia sim ding ahi uh hiam? Hi lo hi! Amaute hong pai hen la, a kilangin komau hong lakhia uh hen,” ci-in palik bute kiangah a gen hi. Palik bute in hih thu, thukhen mangte kiangah a koh uh ciangin, Paul leh Silas in Rom ahih lam a zak uh ciangin a lau mahmah uh a, amaute mah hong pai uh a, thuumin a lakkhiat khit uh ciangin khua sung pan a paikhiat nading a ngen uh hi. Tua ciangin Paul leh Silas in thong sung pan paikhia-in, Lidia’ innah a lut uh a, ute naute tawh kimu-in, amaute a lungkipsak khit uh ciangin a paikhia uh hi. Amaute in Amfipolis khua leh Apollonia khua-ah a ban’ khit uh ciangin, Thesalonika khua-ah a tung uh hi. Tua khua-ah Judah mi kikhopna inn a om hi. Paul in a ngeina bangin kikhopna innah tumin, amaute kiangah Nipi ni thumvei Lai Siangtho thu panin tuate tawh kiseel a, Khazih in sihna a thuak khit ciangin sihna pan a thawhkik nading thu om a, “Kong thu hilh Zeisu in Khazih ahi hi,” ci-in a tel takin lakin thu a hilh hi. Amaute kimkhat in thu um uh a, Pasian a bia uh Grikte tampi leh a minthang numeite in Paul leh Silas tawh a kipawl khawm uh hi. Ahih hangin Judah mite in eengin, mi gilo kimkhatte a sap khit uh ciangin, mihonpi kikhawmsak-in khua sung a gamlumsak uh a, Jason’ innah a uumcip uh a, amaute mite mai-ah kaihkhiat nading a zong uh hi. A muh loh uh ciangin Jason leh ute naute kimkhat khua ukte kiangah a paipih uh a, “Leitung gam khempeuh a kilumletsak hih mite in hih san dongin hong tung zo uh a, Jason in ama innah a tung sak hi. Tua mi khempeuh in Kaisar kumpipa thu nialin, ‘Zeisu kici kumpipa adang khat a om hi,’ a ci uh hi,” ci-in a kiko uh hi. Mihonpi akipan khua ukte in hih thu a zak uh ciangin a lungmang uh hi. Tua ciangin Jason akipan midangte kikhamna sum a piaksak khit uh ciangin a khah uh hi. Ute naute in Paul leh Silas zan lai takin Berea khua-ah thakhatin a paisak uh hi. Tua khua-ah a tun’ uh ciangin Judah mi kikhopna innah a tum uh hi. Tua mite in Thesalonika khua mite sangin a dikzaw uh hi. Bang hang hiam i cih leh, deih phat mahmahna lungsim tawh Pasian’ thu sangin, hih thute a man hiam a man lo hiam cih a theih nadingun ni simin Lai Siangtho tel takin a sin uh hi. Tua ahih ciangin amaute tampi akipan a minthang Grik numeite leh pasalte in thu a um uh hi. Ahih hangin Paul in Berea khua-ah Pasian’ thu a hilh thu Thesalonika khua Judah mite in a zak uh ciangin, Berea khua-ah hong pai uh a, mihonpi a hansuah khit uh ciangin, a nawngkai sak uh hi. Tua ciangin ute naute in Paul tuipi dongin thakhatin a paisak uh hi. Silas leh Timoti in a tam lai uh hi. Paul a kha mite in Athen khua dongin a khak khit uh ciangin Silas leh Timoti a manlangin hong pai nading vaikhakna thu a ngah khit uh ciangin, a ciah uh hi. Paul in Athen khua-ah Silas leh Timoti ngakin a om lai takin, khua sungah milim a dim a om a muh ciangin a lungmang hi. Tua ahih ciangin kikhopna inn sungah Judah mite tawh akipan Pasian a bia mite leh sumbuk lamah a kituahpihte tawh thu a kikum uh hi. Epikura leh Stoik lungpilte kimkhat in Paul tawh kidem uh a, kimkhatte in, “Hih kam tam pau theipa in bang gen nuam ahi hiam?” a ci uh hi. Kimkhatte in, “Hih pa in gamdang pasiante thu hilh hi leh kilawm hi,” a ci uh hi. Bang hangin hih bangin a gen uh hiam i cih leh, Paul in Zeisu leh hin’kikna thu a hilh hang hi. Tua ciangin amau in Paul a sam uh a, Areopagas mualno tungah a paipih khit uh ciangin, “Nang na hilhna thu thak kote theih ding a kilawm hiam? Bang hang hiam na cih leh, kote in ka zak ngeiloh uh thu na hong zasak hi. Tua thu in bang a cihnopna hiam ka thei nuam uh hi,” a ci uh hi. Athen khua mite khempeuh leh Athen khua-ah a tung zinte in thungaih nading, thu hilh nading sim loh, nadang a sem kei uh hi. Paul in Areopagas mualno tungah ding-in a gen-inah: “Athen mite aw, note in biakna na hahkat mahmah uh cih ka thei hi. Bang hang hiam na cih uh leh, lampi-ah ka pai lai takin, na biaknate uh ka et ciangin, ‘Kithei-lo Pasian Ading,’ ci-a kigelh biakna tau khat ka mu hi. Note in na theih lohpi uh a, na biak uh Pasian’ thu kong hilh ding hi. Leitung akipan leitung sung na khempeuh a piangsak Pasian in, van leh lei uk mangpa ahih ciangin, mi’ khut tawh kibawl biakna innah a teeng ahi kei hi. Amah in hin’na tawh, naksuk naktoh akipan na khempeuh hong pia ahih ciangin na khat peuhmah a deih bangin, mite’ khut tawh kivaak ahi kei hi. Amah in leitung mi khempeuh minam khat bek pan bawl a amaute nuntak nading hun ahi zongin, amau omna atuam atuam ahi zongin a ciamteh zo hi. Bang hang hiam na cih uh leh, mite in Pasian zongin a muh khak theih nading hang ahi hi. Tua bang i cih hangin Topa Pasian in eite khempeuh panin a gamla om ahi kei hi. Bang hang hiam na cih uh leh, Pasian hangin eite i hing, i tang, i nungta hi. Tua mah bangin note’ lai-atpa khat in a gen mah bangin, ‘Eite in ama suan i hi hi,’ a ci hi. Pasian’ suan i hih ciangin Pasian pen mi lungsim siamna leh khutsiamna tawh a kibawl kham tawh, ngun tawh, suang tawh kibang hi ci-a i up ding a kilawm kei hi. Pasian in mihingte’ theih nai loh hun bang mahin a sim loh hangin tu-in amau mawhna kisik kik nadingun mun khempeuh mite kiangah thu a pia zo hi. Bang hang hiam na cih uh leh, amah in a sehkholhpa tawh leitung mite, thuman tawh thukhen nading ni a genkhol zo hi. Tua pa sihna pan a thawhkik ciangin a kitel zo hi ci-in mi khempeuh a thei sak zo hi,” ci-in Paul in a gen hi. Amaute in misite hin’kikna thu a zak uh ciangin, kimkhat in a kosia uh hi, kimkhat in, “Hih thu tu nung ciangin ka ngaikik nuam uh hi,” a ci uh hi. Tua ciangin Paul in amaute kiang pan a paikhia hi. Mi kimkhat in Paul beelin thu a um uh hi. Tua mite lakah Areopagas mi Dionisias leh Damaris min nei numei khat akipan midangte zong a om uh hi. Tua nung ciangin Paul in Athen khua pan paikhia a, Korin khua-ah a tung hi. Tua lai takin Klaudia kumpipa in Judah mi khempeuh Rom khua pan a paikhiat nadingun thu pia zo ahih ciangin Pontas gammi ahi, a min Akuila kici Judah mi khat a zi Prisilla tawh, Italy gam panin a sawt loin hong tung uh a, Paul in a muh ciangin a kiangah a tung hi. A nasepna uh a kibang ahih ciangin Paul in amau’ innah teeng a, na a semkhawm uh hi. Bang hang hiam i cih leh, amaute in puanbuk khuite ahi uh hi. Paul in Nipi ni simin kikhopna inn sungah thuhilhin Judah mi leh Grik mite a zol hi. Silas leh Timoti in Makedonia gam panin hong tun’ uh ciangin, Paul in thuhilh bek semin, Zeisu in Khazih hi ci-in Judah mite nakpi-in a hilh hi. Judah mite in thu nial uh a, a selpho uh ciangin Paul in langpanna tawh ama puan singkhia-in, “Note’ si uh note lu tungah om ta hen! Keimah ka siang hi. Tu-a kipanin Gentailte kiangah ka pai ding hi,” a cih khit ciangin tua san tak pan paikhia-in, Pasian a bia Titu Justas min nei, mi khat’ innah a pai hi. Tua pa’ inn in kikhopna inn tawh kinai-in a om hi. Kikhopna inn ukpa Krispas in ama innkuanpihte tawh Topa a um hi. Korin mi tampite in zong thu ngai uh a, umin a kibaptaiz uh hi. Zan lai takin Topa in mang sungah Paul kiangah a gen-inah “Lau kei in. Pau loin om kei in, thu na gen ding hi. Bang hang hiam na cih leh, nangmah tawh hong omkhawm ka hih manin kuamah in nang hong doin hong liamsuah kei ding hi. Bang hang hiam na cih leh, hih khua sungah keimah in mi tampi ka nei hi,” a ci hi. Paul in tua khua mite kiangah Pasian’ thu hilhin kum khat leh kha guk tawntung a om hi. Gallio in Akhaia gam mangpa za a ngah ciangin Judah mite in lungsim kikhatin Paul a man uh a, thukhenna tokhom mai-ah a paipih khit uh ciangin, “Hih pa in ngeina hi lopi-in Pasian biak nading mite a zol hi,” a ci uh hi. Paul in kam pau ding a kisak lai takin Gallio in, “Judah mite aw, ngeina ahi lo thu ahi zongin, gitlohna kihhuai thu ahi zongin ahih leh, nomau thu ka ngaih ding a kilawm hi. Tua ahih kei a, thu ahi zongin, min ahi zongin, nomau biakna thukhamna thu ahi zongin ahih leh, no na vaihawm ding uh hi. Tua thute khen ding ka ut kei hi,” a ci hi. Tua ciangin thukhenna tokhom kiang panin a hawlkhia hi. Mihonpite in kikhopna inn ukpa Sosthenes manin thukhenna tokhom mai-ah a sat uh hi. Gallio in ahih leh, tua thu phamawh sa loin a om hi. Paul in ni tampi a tam khit ciangin ute naute tawh kikhen a, nidang lai-a a kiciamsa bangin Kenkhrea khua-ah a sam a met khit ciangin, Prisilla leh Akuila tawh teembaw tuangin Siria gamah a pai hi. Efesa khua-ah a tun’ uh ciangin Akuila leh Prisilla a nusia hi. Paul ahih leh, kikhopna inn sungah lut a, Judah mite tawh a kikum hi. Amaute in amaute tawh Paul a om lai nadingin thu a nget uh hangin mang loin, “Pasian in hong awi leh, khatvei kong paikik ding hi,” ci-in amaute tawh kikhenin teembaw tuangin Efesa khua pan a paikhia hi. Paul in Kaisaria khua a tun’ khit ciangin pawlpite tawh kihopih dingin a paitoh khit ciangin Antiok khua-ah a paisuk hi. Tua khua-ah sawtpi a om khit ciangin paikik a, Galati gam leh Frigia gam pai-in nungzuite khempeuh a kipsak hi. Alekzandria khua mi Apollos min nei, thuhilh siam, Judah mi khat in Efesa khua-ah a tung hi. Tua pa in Lai Siangtho siam a, Topa’ Lampi thu sintel-in, lungsim lawpna tawh Zeisu thu a tel takpi a hilh hangin, Johan baptaizna thu bek a thei hi. Amah in kikhopna inn sungah lau loin thu a hilh hi. Prisilla leh Akuila in ama thu a zak uh ciangin, a sam uh a, Pasian’ ngeina thu a tel zaw-in a hilh uh hi. Tua ciangin amah in Akhaia gamah pai a sawm ciangin, ute naute in tua lai-a om nungzuite in a tun’sak nadingun vaikhakna lai a pia uh a, a hansuah uh hi. Amah in a tun’ ciangin hehpihna thupha tawh a um mite nakpi-in a huh hi. Bang hang hiam i cih leh, Zeisu in Khazih ahi hi cih thu Lai Siangtho tawh tel takin lak a, mite mai-ah Judah mite’ kam a nial hi. Apollos in Korin khua-ah a om lai takin Paul in saklam gam a paisuak khit ciangin, Efesa khua-ah tungin nungzuite tawm a mu hi. “Note in na up khit uh ciangin Kha Siangtho na ngah uh hiam?” ci-in a dot leh, “Kha Siangtho om hi cih thu kote in zak zong ka za kei uh hi,” a ci uh hi. Paul in, “Tua bang ahih leh, kua min tawh na kibaptaiz uh hiam?” ci-a a dot ciangin, “Johan’ baptaizna ka ngah uh hi,” a ci uh hi. Paul in, “Johan in, ‘Kei nungah hong paipa na um ding uh hi,’ ci-in mite kiangah genin, mawhna a kisikkik manunah a baptaiz hi. Tua bang a cihna in Zeisu ahi hi,” ci-in Paul in a gen hi. Amaute in hih thu a zak uh ciangin Topa Zeisu’ min sungah a kibaptaiz uh hi. Paul in amaute tungah a khut a ngak khit ciangin, Kha Siangtho in amaute tungah hong tung a, amaute in kamtuam pau thei-in thu a hilh uh hi. Tua mite a kisim ciangin pasal sawm-le-nih pha hi. Paul in kikhopna innah lutin kha thum tawntung Pasian’ Gam thu gen a, zolin, lau loin a hilh hi. Mi kimkhat in lungkhauh a, um loin a om uh a, Lampi thu mite mai-ah a kosia uh ahih ciangin Paul in amaute kiang pan paikhia a, nungzuite atuamin a khen khit ciangin Tirannas laihilhna sanginn ah ni simin thu a kikum uh hi. Tua mah bangin kum nih tawntung hilh ahih ciangin Asia gam sungah a om Judah mi leh Grik mi khempeuhte in Topa’ thu a za za uh hi. Pasian in Paul’ khut tungah nalamdang liante lak a, Paul’ pumpi tung pan mainulna puan ahi zongin, kawnggak ahi zongin, khatpeuh peuh cinate kiangah a puak uh ciangin cinatna dam a, dawi gilote a paikhia uh hi. Ahih hangin a vak kawikawi aisan Judah mi kimkhatte in dawigilo a lut mite tungah Topa Zeisu’ min tawh thupia-in, “Paul in a hilh Zeisu’ min tawh kong sawl hi,” a ci uh hi. Skeva kici Judah siampi khat’ tapa sagihte in tua bangin ahih uh hi. Dawi gilote in, “Zeisu ka thei hi, Paul zong ka thei hi. Note in kua mi na hi uh hiam?” a cih khit ciangin, dawigilo lutpa in tuate tungah diangin amah in zo zaw a, amaute in puan nei loin, liamin, inn pan a taikhia uh hi. Tua thu Efesa khua-ah a om Judah mite leh Grik mite khempeuh in a zak ciangin a lau uh a, Topa Zeisu’ min a phat uh hi. A um mi tampite in hong pai uh a, pulakin a gamtatna thu a gen uh hi. A tawm hi lo aisan theite in zong amau laibute hong paipih uh a, mi mai-ah mei-in a hal uh hi. Hih laibute’ man a kiseh ciangin ngun thennga man ahih a kithei hi. Tua bangin Topa’ thu in vangliatna tawh khang a, a gualzo hi. Tua nung ciangin Paul in Makedonia gam leh Akhaia gamah a pai khit ciangin Jerusalem khua-ah pai ding a lungsim sungah hanciamin, “Tua khua ka tun’ khit ciangin Rom khua ka phak teitei kul ding hi,” a ci hi. Ama nasem mi nih, Timoti leh Erastas Makedonia gamah a paisak khit ciangin amah in Asia gamah tawlkhat khawl lai hi. Tua lai takin Lampi thu hangin thusia a piang hi. Bang hang hiam i cih leh, Demetrias min nei sum sungpa khat in Diana dawi-numei ngun biakna inn neute bawlin, sumsungte a meetsak thei hi. Tua pa in sumsungte leh tua bang nasemte a kikhopsak khit ciangin, “Lawmte aw, hih bang nasepna tawh eite in sum i ngah cih na thei uh hi. Hih Paul in, ‘Mi’ khut tawh kibawl Pasian om lo hi,’ ci-in Efesa khua bek hi lo, Asia gam khempeuh ah mi tampi zol a, a uuksak cih na mu uh, na thei uh hi. Eite nasepna hong siagawp ding tham loin, a lian dawi-numei Diana biakna inn nasim lo a, Asia gam akipan mi khempeuhte in a biak uh a minthan’na zong a kisiat ding lunghihmawh huai hi,” ci-in a gen hi. Amaute in hih thu a zak uh ciangin hehna tawh a dim uh a, “Efesa khua Diana a lian hi!” ci-in a kiko uh hi. Khua sung khempeuh gamlumna tawh kidim hi. Amaute in Makedonia pana Paul’ khualzinpihte, Gaias leh Aristarkhus a mat khit uh ciangin, pawikhamna inn sungah lungsim kikhatin a tai uh hi. Paul in kikhopna sungah lut ding a kisak ciangin nungzuite in a kham uh hi. Ama lawmte Asia gamneute a uk ulian kimkhatte in zong pawikhamna inn sungah pai lo dingin, mi sawlin Paul kiangah a thuum uh hi. A kikhawm mite zong gamlumin om uh ahih ciangin, a thu atuam atuam a kiko uh hi. Mi tamzawte in amaute in bang hangin kikhawm ahi uh hiam cih zong a thei kei uh hi. Judah mite in Alekzander sawlin, mihonpi lak pan a sam uh a, mite mai-ah a paisak uh hi. Alekzander in a khut zanin kham a, mite mai-ah mawh kiphelna thu a gen nop hangin, Judah mi ahih lam amaute in a theih uh ciangin, “Efesa khua Diana a lian hi!” ci-in nai nih sung dektak aw kikhatin a kiko uh hi. Khua lai-atpa in mihonpi a daihsak khit ciangin, “Efesa khuapihte aw, Efesa khua in van pan a kiasuk milian Diana biakna inn a kem khuapi hi cih a thei lo kua om ahi hiam? Hih thute kinial thei lo ahih ciangin note in daitakin na om ding uh kilawm hi. Ngaihsun khol loin bangmah mawk hih kei un. Bang hang hiam na cih uh leh, biakna inn hong sut lo, eite pasiannu a kosia lo hih mite nong paipih zenzen uh hi. Tua ahih ciangin Demetrias akipan amah tawh a omkhawmte in mi khatpeuh mah tungah thu nei ahih uh leh, zum inn om a, thukhen mangte zong om uh a, amaute in khat leh khat kimawhsak ta uh hen. Ahih hangin thu dang na koh nop uh leh, a ngeina om bangin mi kikhopna sungah thu kikhen ding hi. Bang hang hiam na cih uh leh, tuni-a gamlumna hangin mawhsakna i thuak khak ding lunghihmawhhuai hi. Hih kikhopna-ah thu i gen ding bangmah om lo hi,” a ci hi. Tua thu a gen khit ciangin mi kikhawmte a paikhia sak hi. Tua gamlumna a bei khit ciangin Paul in nungzuite sam a, a hansuah khit ciangin, amaute tawh kikhenin Makedonia gamah a pai hi. Tua gamah paisuakin thu-um mite a hansuah khit ciangin Grik gam a tung hi. Kha thum a om khit ciangin teembaw tawh Siria gamah pai dinga akisak lai takin Judah mite in ama tungah bawlsiatna ding a hanciam uh ahih ciangin, Makedonia gam lamah paikik ding a hanciam kik uh hi. Paul tawh Asia gam a zin dingin a paikhawm mite in Bera khua mi Pirras’ tapa Sopater, Thesalonika khua mi Aristarkhus leh Sekundus, Derbe mi Gaia, Listra mi Timoti, Asia gam mi Tikhikas leh Trofimas-te ahi uh hi. Hih mite a pai masa uh a, Troas khua-ah kote hong ngak uh hi. Silngo-sawh loh Anlum pawikham ni a bei khit ciangin kote in Filippi khua pan teembaw tuangin ka pai uh a, ni nga ni-in amaute kiang Troas khua-ah ka tung uh hi. Tua khua ah ni sagih ka tam uh hi. Ni sagih sung pan ni masa bel ni-in khomun balnen dingin ka kikhop lai takun, Paul in zingsang cianga pai sawm ahih manin amaute tawh kihopih a, zankim dongin thu a hilh hi. Inn dei tungnung kote kikhopna-ah meivak tampi a om hi. Eutikhas min nei tangval khat in kongvangneu gei-ah a tut lai takin lusu-in, a ihmu hi. Paul in sawtveipi thu hilh ahih ciangin tua tangval ihmu a, inn thuap thum tung pan kiasuk a, a si hi. Paul in a nuai-ah kumsukin, ama tungah lum a, a kawi khit ciangin, “Gamlum kei un. Ama sungah hin’na a om lai hi!” a ci hi. Paul paito kik a, khomun balnenin a neek khit uh ciangin, amaute tawh khuavak dongin sawtveipi a kihopih khit uh ciangin paikhia hi. Mite in tangvalnopa a nungta-in innah a paipih uh a, a lungdam mahmah uh hi. Kote in Paul mai-ah teembaw tawh pai-in Assos khua pan amah lak ding ka hanciam uh a, tua khua-ah ka pai uh hi. Bang hang hiam i cih leh, Paul in tua khua dongin lei lam zui a, pai ding a hanciam hi. Assos khua panin ka kituah uh ciangin amah ka la uh a, Mitilena khua-ah ka pai uh hi. Tua khua panin ka paikik uh ciangin, a zingciangin Khios tuikulh kiangah ka tung uh a, ni khat khit ciangin Samos tuikulh ka tung uh a, ni khat khit kik leuleu ciangin Miletas khua ka tung uh hi. Bang hang hiam i cih leh, Paul in Pentekost pawikham ni a tun’ ma-in Jerusalem khua a tun’ zawh man khak leh ci-in hahkat a, Asia gamah sawtpi om nuam lo ahih ciangin, Efesa khua-ah khawl loin pai ding a hanciam zo hi. Miletas khua panin Paul in Efesa khua-ah mi paisakin pawlpi upate a sam hi. Amaute a tun’ uh ciangin Paul in a gen-inah: “Asia gam ka tun’ ni-a kipan tu dongin nomau tawh bang ci gamtat-in a tawntungin ka omkhawm nong thei uh hi. Lungsim kiniamsakin, khitui luangin Judah mite’ hanciamna hoih lo bawlsiatna thuakin, Topa’ na ka sem hi. Note ading thupha khat beek siit loin mi kikhopna sungah ahi zongin, inn khat pan inn khatah ahi zongin, ka hong hilh hi. Pasian mai-ah kisikkikna thu ahi zongin, eite Topa Zeisu Khazih upna ahi zongin, Judah mi leh Grik mite kiangah ka hilh hi cih note’n na thei uh hi. Tu-in Kha Siangtho kikhihna thuakin Jerusalem khua-ah ka pai ding hi. Tua khua panin ka tungah bang thu a piang ding hiam ka thei kei hi. Ahih hangin kihenna leh thong sung khiat nadingte in kei hong ngak hi ci-in Kha Siangtho in khua khempeuh ah kei hong hilh hi. Ahih hangin Pasian’ hehpihna Lungdamna Thu hilh nading Topa Zeisu’ khut sung pan ka ngah za ahi, ka nasepna ka zawh theih nadingin ka nuntakna keimah ading phamawh ka sa kei hi. Ka pai kawikawi-a Pasian’ Gam thu kong hilh note khempeuh in keima maitang na mu nawn kei ding uh hi cih tu-in ka thei hi. Tua ahih ciangin mi khempeuh’ si tungah khial loin ka om hi ci-in nomau kiangah ka hong lak hi. Bang hang hiam na cih uh leh, Pasian’ thu buppi note kiangah gen dingin ka pelh kei hi. Tua ahih ciangin Topa in a si tawh a lei pawlpi vaak dingin Kha Siangtho in note a hong koih, tuunote leh nomau pumpi uh pha takin na kem un. Ka pai khit ciangin gilo ngiate in nomau lakah lutin, a tuute a hehpih kei ding uh hi. Nungzuite a zolkhia dingin thuzuau a gen mite in note lakah a piang ding uh hi cih ka thei hi. Tua ahih ciangin kikem un. Keimah in kum thum tawntung sun tawh zan tawh pelh loin mi khempeuh khitui tawh hilhin, ka om na mangngilh kei un. Tu-in Pasian kiangah note kong pia hi. Note hong kipsak nading ahi zongin, misiangthote khempeuh tawh a kibangin note in luahna na ngah nading uh ahi zongin, ahih thei Pasian’ hehpihna thupha ah note kong ap hi. Kuama kham ahi zongin, ngun ahi zongin, puan ahi zongin ka deihgawh kei hi. Hih ka khut in keimah leh keimah tawh a omkhawmte hong vaak note in na thei uh hi. Tua bangin note in na nasep uh a, thahat lo mite na huh ding uh a, ‘Ngahna sangin piakna-ah thupha lianzaw hi,’ ci-in Zeisu in a genna kammal na ngaihsut dingun na khempeuh ah note kiangah thugentehna kong lak zo hi,” ci-in a gen hi. Paul in tua bang a gen khit ciangin khukdin’ a, amaute tawh thu a ngen hi. Amaute khempeuh in nakpi-in a kap uh a, Paul’ ngawng kawi-in a nam uh hi. Tu nung ciangin ama maitang a mu nawn kei ding uh hi a cihna kammal hangin a dah pen uh hi. Amaute in Paul teembaw ah a kha uh hi. Tua mite tawh ka kikhen khit uh ciangin teembaw tungah tuangin Kos khua tang takin ka tung uh a, a zingsang ciangin Rodes tuikulhah tungin tua khua panin Patara khua ka tung uh hi. Foenisia gamah a pai ding teembaw khat ka muh uh ciangin tuangin ka pai uh hi. Saipras tuikulh ka muh uh ciangin a tak lamah pai-in Siria gam galkahin Tai-ar khua-ah ka khawl uh hi. Bang hang hiam i cih leh, teembaw in tua khua-ah a van puak teng suahkhia ding ahi hi. Tua lai-ah nungzuite ka muh uh ciangin ni sagih tawntung ka tam uh hi. Paul in Jerusalem khua ah pai lo dingin amaute in Kha Siangtho theihsakna tawh a gen uh hi. Ni sagih khit ciangin ka paikik uh a, nungzuite khempeuh in, a zite a tate uh tawh khua nawlah kote hong kha uh a, tuipi gei-ah khukdin’in thu ka nget khit uh ciangin, khat-le-khat mangpha ka kikhak khit uh ciangin teembaw tungah ka kahto uh a, amaute a ciahkik uh hi. Tai-ar khua pan Tolemias khua-ah ka tun’ uh ciangin teembaw tawh paina a om nawn kei hi. Tua khua-a om u leh naute ka hopih uh a, ni khat ka tam khit uh ciangin, zingsang ciangin paikikin Kaisaria khua-ah ka tung uh a, Sagihte laka khat ahi thuhilhsia Filip, innah tungin ka om uh hi. Tua pa in thuhilh thei tanu li a nei hi. Tua innah sawtpi ka om lai takin Agabas min nei kamsangpa khat in Judah gam panin hong paisuk hi. Tua pa in kote kiangah hong tung a, Paul’ kawnggak la-in, a khut a khe a hen khit ciangin, “Hih kawnggak neipa Jerusalem khua-ah a om Judah mite in hih bangin henin, Gentailte’ khut tungah a pia ding uh hi,’ ci-in Kha Siangtho in hong ci hi,” a ci hi. Tua thu ka zak uh ciangin kote leh tua khua-ah a om mite in, “Jerusalem khua-ah pai kei in,” ci-in Paul ka thuum uh hi. Paul in zong, “Bang dingin kapin ka lungsim kizan nading na hih uh hiam? Topa Zeisu’ min hangin Jerusalem khua-ah kihen tham loin, sihna nangawn thuak dingin ka omkhol hi,” a ci hi. Ka zolna uh hong man’ loh ciangin kote in, “Topa’ deih bangin hi ta hen,” ci-in zol loin ka om uh hi. Tua nung ciangin ka vante uh la-in Jerusalem khua-ah ka paito uh hi. Kote Kaisaria khua nungzuite kimkhat in hong zui uh hi. Kote zin tun’ nading Manason min nei Saipras gam mi, nungzui a suah zawh a sawt zo, thu-um mipa’ innah hong kha uh hi. Jerusalem khua-ah ka tun’ uh ciangin ute naute in lungdamna tawh hong tungsak uh hi. A zing ciangin Paul tawh Jeim kiangah ka tumkhawm uh a, upate khempeuh a kikhawm uh hi. Paul in tua mite a hopih khit ciangin ama thuhilh nasepna hanga Pasian in Gentailte tungah ahihna thu khempeuh khat nungah khat a gen hi. Amaute in a zak uh ciangin Pasian’ min a phat uh hi. Paul kiangah zong, “Sanggam aw, thu-um Judah mi then bangzah a om na thei hi. Tua mite khempeuh in Thukham hahkatin a zui uh hi. Gentailte lakah a om Judah mite khempeuh in amaute’ tate vun atsak lo tham loin ngeina tang loin Moses thu nusia dingin na hilh hi ci-in hih mite in a za zo uh hi. Tua ahih ciangin bang ci hih ding na hi hiam? Na tun’na thu a za ding uh hi. Tua ahih ciangin ka cih uh mah bangin na hih ta in. Thu kiciamsa mi li ka nei uh hi. Tua mite la in la, amaute tawh na kisiangtho sak in la, amaute a sam met nadingin dangka na sik ding hi. Tua bang na hih leh, mi khempeuh in nangma thu a zak uh ahi lo thu hi a, Thukham thu tangin khial loin na om hi cih a thei ding uh hi. Thu-um Gentailte ahih uh leh, milim biakna tawh, si tawh, gawl meeka kithat sa tawh, numei tawh khialhna tawh tan’ nadingin thu khenin lai ka gelh zo uh hi,” ci-in amaute in a gen uh hi. Tua ciangin Paul in tua mite paipih a, zingsang ciangin amaute tawh a kisian’thosak khit ciangin biakna innpi sungah pai-in, tuate khempeuh ading biakna a piak khit dongin, kisian’thosakna ni a cing sak hi. Tua ni sagih a cin’ dek tak ciangin Asia gam Judah mite in biakna innpi-ah Paul a muh uh ciangin, mi honpite hansuahin, “Israel mite aw, hong huh un! Hih pa in ei mi pawlte ahi zongin, Thukhamna ahi zongin, hih mun ahi zongin, a kituak loin bawl a, mun khempeuh ah mi vekpi kiangah thu a hilh hi. Tua tham loin Grik mite biakna innpi sungah lut sakin, hih mun siangtho a nin sak hi,” ci-in a man uh hi. Bang hangin hih bangin ahih uh hiam i cih leh, a beisa hun lai-inah Paul leh Trofimas min nei Efesa khua mipa khua sungah a omkhawm a mu zo uh a, Paul in tua mipa biakna innpi sungah a tumsak hi ci-in a um uh hi. Khuazangin kigamlum a, mi tampite tai-in kikhawm uh a, Paul a mat khit uh ciangin biakna innpi sung pan a kaihkhiat khit uh ciangin kong a khak kik uh hi. Amaute in Paul that ding a kisak lai takun, Jerusalem khuazang gamlumin a om uh galkap mangpa kiangah kam a tun’ ciangin, galkapte leh bute a manlangin kisam a, tua mite kiangah a taisuk uh hi. Amaute in galkap mangpa leh galkapte a muh uh ciangin, Paul sat nawn lo uh hi. Tua ciangin galkap mangpa in va nai a, Paul a mat khit ciangin sikkhau nih tawh hen ding thu a piak khit ciangin, “Hih mi kua mi ahi hiam? Bang hih khial ahi hiam?” ci-in a dong hi. Mi kimkhat in kam khat a kiko uh hi, kimkhat in kam khat a kiko uh hi. Mangpa in gamlumna hangin a tel takpi-in thei zo lo ahih ciangin galkap innah Paul a kipaipih nading thu a pia hi. Kahlei-ah a tun’ ciangin mite heh mahmah uh ahih ciangin, galkapte in Paul domin a pua uh hi. Bang hang hiam i cih leh, mi honpite in a nung zui-in, “Amah that ni,” ci-in a kiko uh hi. Paul in galkap’ inn sungah a tum lai takin, “Kam khat kong gen thei ding hiam?” ci-in galkap mangpa kiangah a dot ciangin, “Nang Grik pau siam na hi hiam? Nang in, nidang lai-inah mi suam ding hansuahin, a suamte tuili gampa lakah a paipih Izipt mi hilo na hi hiam?” ci-in a dong hi. Paul in zong, “Kilikia gam Tarsus khua-a suak, Judah mi ka hi hi. Kei teen’na in khua gina lo ahi kei hi. Hih mite kiangah thu ka gen theih na’ngin thu hong pia in cih kong thuum hi,” a ci hi. Galkap mangpa in thu a piak ciangin Paul in kahlei tungah ding-in a khut zanin mite kham a, amaute in a daih khit uh ciangin Hebru pau-in: “Ute naute leh pate aw, tu-ni ka mawhna kiphelh nading kong genna thu hong ngai ta un,” a ci hi. Hebru pau-in a gen mite in a zak uh ciangin pau lo semsemin a om uh hi. Paul in a gen-inah: “Kilikia gam, Tarsas khua-a suak, Judah mi ka hi hi. Ahih hangin hih khua sungah Gamaliel’ khe kiangah anvaakna ngahin, i pu i pate’ thukhamte sinin a siamsa ka hi a, tuni-a note khatpeuh peuh zahin Pasian’ ading a hahkat mipa ka hi hi. Hih lampi a zui numei leh pasal henin, thong sungah khumin, a sih dongin ka bawlsia hi. Hih thu ah siampi liante leh upate khempeuh in kei lamah teci ahi uh hi. Amaute kiang panin zong ute naute kiangah vaikhakna lai ka ngah khit ciangin Damaskas khua-ah a omte zong daantat dingin, henin, Jerusalem khua-ah paipih dingin ka pai hi. “Lampi ka pai lai takin Damaskas khua ka naih ciangin, sun lai takin vantung panin khuavak a taang mahmah ka kimkot ah thakhatin hong taang hi. Lei tungah ka puk ciangin, ‘Saul aw, Saul aw, bang hangin kei hong bawlsia na hi hiam?’ ci-in hong ci aw ka za hi. ‘Topa aw, kua na hi hiam?’ ci-in ka dot ciangin, ‘Na bawlsiat, Nazareth khua mi, Zeisu ka hi hi,’ hong ci hi. Keimah tawh a tonkhawmte in khuavak a muh uh hangin kei kiangah hong genpa’ aw a za kei uh hi. Keimah in zong, ‘Topa aw, bang ka hih ding hiam?’ ci-in ka dot ciangin, ‘Tho in la, Damaskas khua sungah na tum ding hi. Tua khua panin na nasep ding vaikhakna thu khempeuh hong kihilh ding hi,’ hong ci hi. Tua khuavak khauh luatna hangin ka mit in khua mu zo lo ahih ciangin ka tonpihte in khut tawh hong kai-in, Damaskas khua-ah ka tung uh hi. “Tua lai takin thukham lamsangah mawhsakna a om lo, tua san takah a om Judah mi khempeuh tungah minphatna a ngah, Ananias in hong pai a, kei kiangah ding-in ‘Sanggampa Saul aw, na mit in khua mu ta hen! hong cih ciangin, thakhatin amah ka mu thei hi. Amah in zong, ‘I pu i pate’ Pasian in ama deihna na theih ding ahi zongin, ama Mi Siangtho na muh ding ahi zongin, ama kam sung pan aw na zak ding ahi zongin, nangmah hong koih zo hi. Bang hang hiam na cih leh, na muh teng, na zak teng, mi khempeuh mai-ah amah ading teci na hi ding hi. Tu-in zong bang ngak na hi hiam? Tho in, kibaptaiz in la, Pasian kiangah thugenin, na mawhna na kisawpsiang ding hi,’ hong ci hi. “Tua nung ciangin Jerusalem khua-ah ka tun’ ciangin biakna innpi sungah thu ka nget lai takin mang ka mu a, ‘Nang thakhatin Jerusalem khua pan a manlangin na paikhia in. Bang hang hiam na cih leh, keima thu na genna amaute in hong sang kei ding uh hi,’ ci-in Pasian in hong gen ka mu hi. Keimah in zong, ‘Topa aw, nangmah hong umte thong sungah ka khum a, kikhopna inn khempeuh sungah ka sat hi ci-in amaute in hong thei uh hi. Nangma teci Stefen’ si a kibuak lai takin, a kiangah ding-in ka thukim tham loin, a that mite’ puan ka cing hi,’ ci-in ka gen ciangin, amah in, ‘Paikhia in. Gentailte kiangah gamlapi-ah nang kong sawl ding hi,’ hong ci hi,” ci-in a gen hi. Hih thute a gen khit dongin amaute in a ngai uh hi. Tua ciangin, “Hih bang mipa, leitung pan paaikhia mang un’. Amah a hing dingin a kilawm kei hi!” ci-in nakpi-in a kiko uh hi. Amaute kiko uh a, amau puan suahkhia-in leivui van lamah a lot uh ciangin galkap mangpa in bang hangin kiko ahi uh hiam cih a theih nadingin, satna tawh Paul thu a kidot nadingin galkap inn sungah tumpih dingin thu a pia hi. Amaute in Paul savun khau tawh a hen khit uh ciangin Paul in a kiangah a ding bupa kiangah, “Thukhenna thuak loin Rom mi sat ding a kilawm hiam?” ci-in a dong hi. Galkap bupa in tua thu a zak ciangin galkap mangpa kiangah pai a, “Bang na cih ding hiam? Hih mi in Rom mi ahi hi,” a ci hi. Galkap mangpa in Paul kiangah pai a, “Nang, Rom mi na hi takpi hiam?” a cih ciangin, “Ka hi hi,” a ci hi. Galkap mangpa in, “Dangka tampi pia-in hih nam min ka ngah hi,” a cih ciangin Paul in, “Ka pian’na panin Rom mi ka hi hi,” a ci hi. Tua ciangin thu dong dinga akisa mite in Paul kiang panin a paikhia pah uh hi. Amah Rom mi ahih thei a, amah khau tawh hen zo ahih ciangin galkap mangpa a lau mahmah hi. A zing ciangin bang hangin Judah mite in Paul a mawhsak uh hiam cih galkap mangpa in tel takpi thei nuamin Paul khahkhia a, siampi liante leh upate a kikhopsak khit ciangin paipihsuk a, amaute mai-ah a koih hi. Paul in upate a tel takpi-in en a, “Ute naute aw, tuni dongin Pasian mai-ah keimah pumpi ka kimawhsak nading om loin ka om hi,” a cih ciangin siampi mangpa Ananias in, “Ama muk sat un,” ci-in a kiangah a dingte thu a pia hi. Tua ciangin Paul in, “Leikang tawh kizut suangcian’ aw, Pasian in nang hong sat ding hi. Nang in Thukham tawh kei tungah thukhen dingin na tu napi-in, Thukham tawh kibang loin hong sat ding thu na pia hiam?” a ci hi. A kiangah a ding mite in zong, “Nang in Pasian’ siampi mangpa zahko na hi hiam?” a cih uh ciangin, Paul in, “Ute naute aw, amah in Pasian’ siampi mangpa ahih lam ka thei kei hi. ‘No mipawlte a uk mangpa na kosia kei ding hi,’ ci-in Lai Siangtho sungah kigelh zo hi,” a ci hi.. Upa kimkhat Farisai-te, kimkhat Saddusi-te ahih uh Paul in a theih ciangin, “Ute naute aw, Farisai mi ka hi hi. Farisai’ ta ka hi hi. Mi sisate hong thokik ding hi ci-in ka lamet hangin thu dotna ka thuak hi,” ci-in upate kiangah a ko hi. Paul in tua thu a gen ciangin Farisai-te leh Saddusi-te khat leh khat kiseel uh ahih ciangin a kikhawmte a kikhen uh hi. Bang hang hiam i cih leh, Saddusi-te in, “Hin’kikna ahi zongin, vantungmi ahi zongin, kha ahi zongin a om kei hi,” a ci uh hi. Farisai-te in ahih leh, a nihin a om uh hi a ci uh hi. Tua ciangin gamlumna piang a, Farisai-te laka laitheite kimkhat ding-in nakpi-in a nial uh a, “Hih pa tungah bangmah mawhna ka mu kei uh hi. Kha ahi zongin, vantungmi ahi zongin ama kiangah a gen leh, bang phamawh ahi hiam?” a ci uh hi. Kiseelna a tam ciangin amaute in Paul a sukgawp khak ding uh galkap mangpa lunghimawh ahih ciangin, galkapte paisakin Paul amaute lak pan zawhthawh thu-in la a, galkap innah a paipih dingun a sawl hi. Zing nitak ciangin Topa in Paul kiangah ding a, “Paul aw, lunghimawh kei in. Keima thu Jerusalem khua-ah na gen zo hi. Tua mah bangin Rom khua-ah zong ka teci thu na pang lai ding hi,” a ci hi. Khua a vak ciangin Judah mite kikhawm uh a, “Paul i thah khit matengin an i ne kei ding hi, tui i dawn kei ding hi,” ci-in a kiciam uh hi. Tua banga a kiciamte a kisim ciangin sawmli val pha hi. Tua mite in siampi liante leh upate kiangah a pai uh a, “Kote in Paul ka thah khit matengun bangmah ka ne kei ding uh hi ci-in ka kiciam uh hi. Tua ahih ciangin note in upa vaihawmte tawh Paul thu a pha takpi khen ding bangin a hong paipihsuk nadingun galkap mangpa kiangah na ngen un. Paul in note kiangah hong tun’ ma-in lam kalah that dingin ka omkhol ding uh hi,” ci-in a gen uh hi. Paul’ sanggamnu’ tapa in tuate lampi kiangah pangin a om uh cih a theih ciangin, galkap inn sungah lut a, Paul kiangah a zasak hi. Paul in galkap khat sam a, “Hih tangval galkap mangpa kiangah va kha in. Bang hang hiam na cih leh, thugen ding khat a nei hi,” a ci hi. Galkap bupa in tangvalpa pen galkap mangpa kiangah paipih a, “A kikhum Paul in kei hong sam a, ‘Mangpa kiangah koh nop a nei hih tangvalpa nang kiangah va paipih in,’ hong ci hi,” a ci hi. Galkap mangpa in tangvalpa’ khut lenin, a kilang lona-ah paipih a, “Bang thu hong ko nuam na hi hiam? ci-in a dong sim hi. Tangvalpa in, “Zing ciangin upa kikhopna-ah Paul hong paipihsuk a, Judah mite in ama thu tel takin a dong ding bangin, nang kiangah hong ngen dingin a vaihawm zo uh hi. Tua ahih ciangin amau deihna bangin zui kei in. Bang hang hiam na cih leh, Paul a thah khit matengun an ne lo, tui dawn lo ding ci-in a kiciam mi sawmli val lampi gei-ah a ding uh hi. Tu-in tuate in amau thu na man’ ding a ngak uh hi,” a ci hi. Tua ahih ciangin galkap mangpa in, “Nang in kei kiangah hih thu nong gen kuamah na gen kei in,” ci-in tangvalpa thu pia-in a khah hi. Tangval a ciah khit ciangin galkap mangpa in galkap bupa sam a, “Tu nitak nai kua ciangin Kaisaria khua pai dingin galkap zanih tawh, sakol tuang galkap sawmsagih tawh, teipi tawi galkap zanih tawh kithawisak in. Paul tuan’ nading sakolte pia in. Mangpipa Feliks kiangah pha takpi-in a paipih ding uh hi,” ci-in thu a pia hi. Amah in hih bangin lai a gelhinah: “Klaudis Lisias in Mangpipa Feliks kiangah lungdamna lai kong khak hi. Judah mite in hih pa a man uh a, a that ding a kisak lai takun, amah in Rom mi ahih thu ka theih ciangin galkapte tawh pai-in, amah ka honkhia hi. Amaute in bang hangin a mawhsak uh hiam cih ka thei nuam a, amaute upa vaihawmte kiangah ka paipihsuk hi. A kithahna ding ahi zongin, thong sungah a kikhum nading ahi zongin a kilawm a khialhna hang ahi lo, amau thukham thu bek in a mawhsak uh hi cih ka thei hi. Tua pa bawlsia dingin amaute a hanciam thu hong kizaksak ciangin, thakhatin kong paisak a, amah mawhsakte in nangma kiangah hong ko dingin thu ka pia zo hi,” ci-in a gelh hi. Tua ciangin galkap mangpa’ vaikhak bangin galkapte in Paul a la uh a, zan lai takin Antipatris khua-ah a tung uh hi. A zing ciangin sakol galkapte in Paul paipih uh a, galkapte a ciah uh hi. Sakol tuang galkapte in Kaisaria khua-ah a tun’ uh ciangin, Mangpipa’ khut tungah lai a pia uh hi. Paul zong Mangpipa mai-ah a koih uh hi. Mangpipa in lai a sim ciangin, “Kua gam mi na hi hiam?” ci-in a dot leh, Kilikia gam mi ahih a theih ciangin, “Nang hong mawhsakte hong tun’ uh ciangin, na thu ka ngai ding hi,” ci-in Herod’ kumpi-inn ah khum dingin thu a pia hi. Ni nga khit ciangin siampi ukpa Ananias in Tertullas kici thugen siampa leh upa vaihawmte tawh Kaisaria khua-ah hong tungsuk uh a, Paul’ thu Mangpipa a ko uh hi. Paul a sap khit uh ciangin, Tertullas in mawhsakna thu a gen-inah: “Alian Mangpipa Feliks aw, kote in nangma hangin lau loin nuam takin ka om uh ahi zongin, nong kepna leh na thumuhkholhna tawh mipawlte tungah kipuah phatna om ahih ciangin, gam khempeuh ah apawlpawl na hehpihna phatin ka om uh hi. Ahih hangin nang kong nokkhak sak loh nadingin, hehpihna tawh komau thu tawm nong ngaih ding kong thuum hi. Bang hang hiam na cih leh, Nazareth mipawl ukpa ahi, leitung mun khempeuh ah Judah mi khempeuh misuam dingin a hansuah, hih mi gilo kote’n ka mu zo uh hi. Tua tham loin, amah in biakna innpi a simmawh ciangin ka man uh hi. (Kote Thukham bangin amah thusit ding ka geel zo uh hi; ahih hangin galkap mangpa Lisias hong pai-in, zawhthawh thu tawh amah ko tung panin hong kaihkhiat sakin, nangma mai-ah ama langte hong pai nading thu a pia hi.) Ama kiangah thu na dot leh, ka mawhsakna thu uh na thei ding hi,” ci-in a ko hi. Judah mite in zong, “Hih thu ahi takpi hi,” ci-in a mawhsak uh hi. Mangpipa in a khut vanin Paul in a gen dingin thu a piak ciangin Paul in, “Nang in hih pawlte sawtpi sung na uk ka thei ahih ciangin, lungdamin ka mawh kiphelna thu kong gen ding hi. Keimah in bia dingin Jerusalem khua-ah ka paitoh tuni-in nisawm-le-nih bek pha cih na thei zo hi. Biakna innpi sungah kuamah tawh ka kinialna hong mu kei uh hi. Kikhopna inn sung ahi zongin, khua sung ahi zongin, mihonpite ka hansuahna amaute in hong mu kei uh hi. Tua tham loin, kei tungah hong mawhsakna thu a gentel dingin teci hong lak thei kei uh hi. Ahih hangin amaute in biakna pawl tuam a cih uh Lampi thu bangin ka pute ka pate’ Pasian ka bia hi ci-in kong pulak hi. Thukham lai leh Pasian’ kamsangte’ Lai Siangtho sungah a kigelh khempeuhte ka um hi. Midik leh midik lote khempeuh in sihna pan a thokik ding hi ci-in amaute’ lamet bangin Pasian suangin ka om hi. Tua ahih ciangin Pasian tungah ahi zongin, mite tungah ahi zongin, ka lungsim sungah kimawhsakna a om lohna dingin, a tawntungin ka hahkat hi. Tu-in kum sawtpi khit ciangin keima pawlte hehpihna leh lungdamna letsong pia dingin kong pai hi. Tua hehpihna ka piak lai takin biakna innpi sungah mi kikhawm lo, gamlum lo, siangtho takin ka bawl Asia gam panin a hong pai Judah mi kimkhatte in hong mu uh hi. Tua mite in kei tungah mawhsak nading a om leh, na mai-ah hong pai-in hong mawhsak leh a kilawm hi. Ahih kei leh, upa vaihawmte mai-ah ka om lai takin, ‘Misite’ thawhkikna thu hangin note mai-ah tuni-in thu dotna ka thuak hi,’ cih ka kikona aw kam khat longal, keima tungah mawhna dang bang hong mu ahi uh hiam, tu-in hih mite in hong gen ta uh hen,” ci-in a gen hi. Mangpipa in, “Galkap mangpa Lisias hong paisuk ciangin note ka hong dong ding hi,” ci-in tua Lampi thu thei zo ahih ciangin thu khen loin, amaute a khahkhia hi. “Paul thong sungah khum loin, kicingin om hen. Ama lawmte in ama kiangah pai-in, an a piak nop uh leh, na kham kei un,” ci-in galkap bupa kiangah a vaikhak hi. Tua nung ciang a sawt loin Feliks Mangpipa in Judah mi ahi, a zi Drusilla tawh hong paikhawm a, Paul samin Zeisu Khazih upna thu a ngai uh hi. Paul in dikna thu, kidekna thu leh hong tung ding Thukhenna Ni thu a hilh ciangin Feliks Mangpa lau a, “Tu-in pai ta in. Tu nung a kilawm hun ciangin kong samkik ding hi,” a ci hi. Paul in amah kisut nading golhguk a piak khak leh ci-in ummawhin tam veipi samin, a hopih hi. Kum nih a cin’ ciangin Porsias Festas in Feliks za a laih hi. Tua Feliks in Judah mite lungdamsak nuamin Paul thong sungah a omsak lai hi. Festas Mangpa tua gamah a tun’ khit ni thum khit ciangin Kaisaria khua panin Jerusalem khua-ah a paito hi. Tua lai takin siampi liante leh Judah miliante in Paul’ thu a ko uh hi. Lampi-ah bukin thah ding a vaihawm uh a, Jerusalem khua-ah a paisak nadingin a thuum uh hi. Ahih hangin Festas in zong, “Paul in Kaisaria khua-ah kikhumin a om hi. Tua khua-ah a sawt loin ka pai ding hi. Tua ahih ciangin note lakah ahi theite in kei hong zui-in, tuapa tungah mawhna a om leh, na mawhsak ta un,” a ci hi. Festas in amaute lakah ni giat bang, ni sawm bang a taam khit ciangin Kaisaria khua-ah pai a, a zing ciangin thukhen tokhom tungah tu-in Paul a samsak hi. Paul a tun’ ciangin Jerusalem khua pan hong pai Judah mite in amah uumin, teci a lak zo lo, a lian mahmah mawhna tampi tawh Paul a mawhsak uh hi. Paul in, “Keimah in Judah ngeina Thukham ahi zongin amau biakna innpi tungah ahi zongin, Kaisar Kumpipa tungah ahi zongin ka khial kei hi,” a ci hi. Ahih hangin Festas in, “Jerusalem khua pai a, keimah in hih thu ka hong khensak ding na ut hiam?” ci-in Judah mite lungdamsak nuamin Paul kiangah a dong hi. Paul in zong, “Kaisar Kumpipa’ thukhenna tokhom mai-ah ka ding hi, hih tokhom mai-ah kei’ thu nong khensak ding kilawm hi. Nang na theih bangin Judah mite tungah bangmah ka mawh kei hi. Tua ahih ciangin mi gilo ka hih a, sih nading a, kilawm mawhna ka hih leh, sihna tawh ka kipelh kei ding hi. Ahi zongin tua mite hong mawhsaknate khat beek a man kei leh kuamah in amaute khut tungah hong pia zo kei ding hi. Kaisar Kumpipa kiangah azu ka khan ding hi,” a ci hi. Tua ciangin Festas Mangpa in upate tawh a vaihawm khit ciangin, “Nang in ‘Kaisar Kumpipa kiangah azu ka khan ding hi,’ na ci ahih ciangin, Kaisar Kumpipa kiangah na pai ding hi,” a ci hi. Tu nung a sawt loin, Agrippa Kumpipa in ama zi Bernike tawh Kaisar a tun’ ciangin Festas a hopih hi. Sau veipi a om khit ciangin Festas Mangpipa in Paul’ thu kumpipa kiangah a gen-inah, “Feliks Mangpipa in thong sungah khumin a nutsiat mi khat a om hi. Jerusalem khua-ah ka om lai takin siampi liante leh Judah upate in tuapa thu hong ko uh a, hong khensak in ci-in hong thuum uh ciangin, keimah in zong, ‘Mawhsakna a thuak mi in a mawhsak mite tawh kimaituah sak a, a tungah a koih mawhna a phelna thu a gen khit matengin kuamah kiangah piak ding Rom ngeina ahi kei hi,’ ci-in ka gen hi. Tua mite in hih san takah hong kikhop uh ciangin khawl loin, a zing ciangin thukhen tokhom tungah tu-in tuapa ka samsak hi. Amaute a ding uh a, ama tungah ka upmawh bangin thusia a koih kei uh hi. Amaute biakna thu leh a sisa mi khat ahi, Zeisu hangah kidongin a mawhsak uh hi. Paul in, ‘Tua Zeisu a nungta hi,’ a ci hi. Tua thudotna ka theihtel loh lai takin, ‘Jerusalem khua-ah pai a, hih thu tanna na thuak ding hiam?’ ci-in amah ka dot leh, a lian Kumpipa kiangah azukhan nuam a, amah a kikhum lai nading hong ngen ahih ciangin, Karsar Kumpipa kiangah ka paisak mateng dongin ka khumsak hi,” a ci hi. Agrippa in zong, “Tua pa thu ka za nuam hi,” a cih ciangin, Festas in, “Zing ciangin ama thu na za ding hi,” a ci hi. Tua ahih ciangin zingsang ciangin Agrippa leh Bernike in kithupi bawlna tawh khua sung uliante tawh hong tung uh a, kikhopna inn sungah a tum uh ciangin Festas in thu a piak ciangin Paul a lutsak uh hi. Festas in, “Kumpipa Agrippa akipan kote tawh a omkhawm mite aw, hih pa na mu uh hi. Jerusalem khua leh hi lai-ah Judah mite khempeuh in ama thu kei hong ko uh a, ‘Amah in tomkha nangawn nungta ding a kilawm kei hi,’ hong ci uh hi. Amah in sihna thuak ding akilawm mawhna ahih loh ka thei a, kumpi lianpa kiangah azukhan nuam ahih ciangin, a pai nading thu ka khensat hi. Ama thu gelh a, Kumpipa kiangah piak ding thu a kitel tak khat beek ka nei kei hi. Tua ahih ciangin note in na dottel khit uh ciangin lai gelh ding ka neih nadingin nomau mai-ah ahi zongin, kumpipa Agrippa kiangah ahi zongin amah kong paipih zo hi. Bang hang hiam na cih uh leh, a kikhumpa a kimawhsakna lai pia loin paisak leng akilawm kei hi ci-in ka um hi,” a ci hi. Tua ciangin Agrippa in, “Nang in nang ading na gen thei ding hi,” a cih ciangin Paul in a khut zanin a gen-inah: “Agrippa Kumpipa aw, nangma mai-ah Judah mite in hong mawhsakna kiphelna thu, tuni-in gen thei ding ka hih ciangin ka nuam hi. Bang hang hiam cih leh nang in Judah ngeina thu leh thu kidotna khempeuh na siam hi. Tua ahih ciangin dam takin ka thu na ngai ta in. “Jerusalem khua sungah ka mipawlte lakah ka om lai takin, ka neu lai pan akipan ka omzia leh ka hihnate Judah mi khempeuh in a thei uh hi. Judah ngeina tel takpi a zui pen pawl Farisai mi ka hihna hih mite in teci a pan’ nop uh leh, a thei masa bel ahi uh hi. Tu-in Pasian in i pute i pate kiangah a piak thu kiciamna lametna hanginah thukhenna thuakin ka om hi. Judah mipawl sawm-le-nihte in sun leh zanin hahkatin Pasian bia-in, thu kiciamna bangin ngah ding a lamen uh hi. Kumpipa aw, hih lametna hangin Judah mite in hong mawhsak uh hi. Pasian in misite a thokiksak ding hi cih thu up theih ding hilo hi ci-in bang hangin ngaihsun na hi uh hiam? “Nazareth khua mi Zeisu’ min langpanin ahi thei zahzaha sep ding mah hi ci-in ka kizo khin a, Jerusalem khua-ah tua bangin ka hih zo hi. Siampi liante kiang pan thu ka ngah khit ciangin misiangthote thong sungah ka khia hi. Amaute in sihna a thuak uh ciangin ka thukim hi. Mite in Pasian tungah a pau khialh nadingin thatang hat thu-in hanciamin, kikhopna inn khat pan khat ah tamveipi ka pai hi. Nakpi-in ka heh maninah gamdangte khua dongin amaute ka bawlsia hi. “Tua ahih ciangin siampi liante thupiakna leh lai pua-in Damaskas khua lampi ka pai lai takin, ni sangin a tangzaw, kei leh kei tawh hong paikhawmte kimkot ah hong taang, sun lai takin vantung pan khuavak khat ka mu hi, Kumpipa aw, Kote khempeuh in lei tungah ka puk lai takun, ‘Saul aw, Saul aw, bang hangin hong bawlsia na hi hiam? Ciang hiam na khe tawh peek leteh a haksa hi,’ ci-in Hebru kamin a hong ci aw khat ka za hi. ‘Topa aw, nang kua na hi hiam?’ ci-in ka dot leh, ‘Na hong bawlsiat Zeisu ka hi hi. Ahih hangin tho in ding in, Judah mite leh Gentail mite khut sung pan nang hong gumkhia a, nang in na muhsa thute leh a nung ciangin kei in nang kiangah kong kilatsak ding thute, hilh a, teci-a pang za-ah nang kong koih nadingin nang kiangah ka hong kilang zo hi. Tua Gentailte in khuamial sung pan khuavak lamah galkah a, Satan’ ukna pan Pasian kiangah kihei ding a, mawhna kimaisakna a ngah ding uh a, kei hong up manunah sian’thosakna a ngahsa mite tawh luahna a ngah khawm nadingun, amau mittang uh na hon’sak dingin, amau kiangah kong paisak ding hi,’ ci-in thu hong pia hi. “Tua ahih ciangin Agrippa Kumpipa aw, vantung mangmuhna ngai loin ka om kei hi. Amaute kisikkik a, kisikkikna tawh kilawm gamtatna bawlin Pasian kiangah a kihei na’ngun Damaskas khua-ah ka gen masak khit ciangin Jerusalem khua akipan Judah gamah a om mi khempeuh kiangah ahi zongin, Gentailte kiangah ahi zongin ka hilh hi. Tua thu hangin Judah mite in biakna innpi sungah kei hong man uh a, hong thah nading uh a hahkat uh hi. Tua ahih ciangin Pasian kiang panin huhna ka ngah khit ciangin tuni dongin ka om a, Khazih in sihna thuak ding a, sihna pan a thokik masabel ahih ciangin, Judah mipawl leh Gentailte kiangah khuavakna thu a piang ding hi ci-in Moses akipan Pasian’ kamsangte’ thugenna mah kei in behlap loin milian, mineute kiangah teci-in ka pang hi,” a ci hi. Tua mah bangin Paul in mawhna kiphelhna thu a gen lai takin Festas in, “Paul aw, nang mihai bang na hi hi! Lungpilna tam sinin, mihai na suak zo hi,” ci-in nakpi-in a kiko hi. Paul in, “Mangpa Festas aw, ka hai kei hi. Thuman leh sanhuai thute ka gen hi. Bang hang hiam na cih leh, kumpipa mai-ah ka gen ngam hih thute kumpipa in a thei hi. Hih thu a thei lo khat beek a om kei hi ci-in ka sin sungah ka um hi. Bang hang hiam na cih leh, hih thute a kilang lo-na munah kibawl ahi kei hi. Kumpipa Agrippa aw, nang in kamsangte thu um na hi hiam? Na um cih ka thei hi,” a ci hi. Agrippa in, “Nang in zolna thu tawm tawh kei Christian nong suaksak dektak hi,” ci-in Paul kiangah a ci hi. Paul in, “Nang akipan tuni-in ka thu a za khempeuh in hih sikkol sim lohin, thu tam tawh ahi zongin, thu tawm tawh ahi zongin, kei tawh kibang na suah theih nadingun Pasian kiangah thu ka ngen hi!” a ci hi. Tua ciangin Kumpipa leh Bernike, mangpipa leh amau tawh a tukhawmte a ding uh a, a paikhiat khit uh ciangin, “Hih mi in sih nading ahi zongin, kikhum nading ahi zongin a bawl kei hi,” ci-in khat leh khat a kikum uh hi. Agrippa in, “Tua pa in, ‘Kaisar kumpipa kiangah azu ka khan ding hi,’ ci hi kei leh, a khah tuak hi,” ci-in Festas kiangah a ci hi. Italy gam teembaw-ah tuangin ka pai ding uh a kitel khit ciangin, Julias min nei Augustus pawl galkap mangpa’ khut tungah Paul leh thong sunga kikhum midangte a pai uh hi. Asia gam tuipi gei-ah a om khuate ah pai dinga kisa Adramittium teembaw tungah tuangin ka pai uh hi. Makedonia gam Thesalonika khua mi Aristarkhas kote tawh a omkhawm hi. A zing ciangin Sidon khua ka tun’ uh ciangin, ama lawmte kiangah pai-in an vakna a ngah theih nadingin Julias in Paul hehpihin thu a pia hi. Tua khua pan ka paikhia uh a, huih kituak lo ahih ciangin Saipras lam gam huih dalsakin pai-in, Kilikia gam leh Pamfilia gam kikal tuipi ka galkah uh ciangin Licia gam Mura khua-ah ka tung uh hi. Tua khua-ah Italy gamah a pai ding Alekzandria teembaw khat galkap mangpa in mu a, tua teembaw tungah kote hong tuang sak hi. Damdamin pai-in, ni tampi ka pai khit uh ciangin Nidas khua tawh a kitang mun haksapi-in ka tun’ khit uh ciangin, huih kiphu zo nawn lo ahih ciangin Krete gam huih kidalsakin Salmone leizum tawh a kitang takin ka pai uh a, Krete gam pamah pai-in Lasia khua tawh kinai Khawlmun Nuam kici mun khatah haksapi-in ka tung uh hi. Ni tampi bei a, antan’na hun bei zo ahih ciangin, tuipi galkah nading launa om ahih manin Paul in, “Tote aw, tuipi galkah leng teembaw leh vante tham loin, eite nuntakna zong kisia ding hi ci-in ka thei hi,” ci-in kikep nading thu a hilh hi. Ahih hangin galkap mangpa in Paul’ kam ngai loin teembaw ukte leh teembaw neite thu a ngai hi. Tua teembaw khawlna munah phalbi sung tawntung om huai lo ahih ciangin, “Tua lai mun pan paikhia-in Foenik khua i tun’ zawh leh, phaibi sung tawntung tua lai-ah tam leng a hoihzaw ding hi,” ci-in mi a tamzaw in a gen uh hi. Foenik khua in Krete gam teembaw khawlna mun hi a, saklam nitumna leh khanglam nitumna lam a maingat khawm hi. Khang lam huih in damtakin hong nun’ ciangin kipai thei ding hi ci-in ngaihsunin khawlna sikkawi lian a khai khit uh ciangin a pai uh a, Krete tuipi gei kinai-ah a pai uh hi. A sawt kihal loin Eurakuilo kici huihpi in lei lam panin nung a, tembaw in phu zo lo ahih ciangin kote in nial zo loin huih mutna lam ka zui uh hi. Kauda kici tuikulh huih kidalsakin ka pai uh a, gunkuang kisia lo dingin haksapi-in ka la uh a, teembaw tungah a khai khit uh ciangin, khau tawh teembaw a gak uh hi. Sirti kici sehnel tungah ka awk khak ding uh hi cih ka lunghihmawh manunah puan a sutkhiat khit ciangin huih in hong mut a, hong lenpih hi. Tui kihot pha mahmaha kiliing ahih ciangin zingsang ciangin vante tui sungah a paaikhia uh hi. Ni thum khit ciangin amaute khut uh tawh teembaw nate a paaikhia uh hi. Ni leh kha leh aksite sawt veipi kimu loin, huihpi nakpi nung ahih ciangin, ka suahtak ding uh lametna a om kei hi. Amaute in an ne loin, sawt veipi a om khit uh ciangin Paul in amaute laizangah ding-in “Tote aw, ka thu na ngaih uh leh, Krete gam panin pai loin na om le-uhcin, hih kisiatna tawh na kipelh ding uh hi. Tu-in ahih leh, lungmang kei un. Bang hang hiam na cih uh leh, teembaw longal, kuamah a kisia kei ding hi. Bang hang hiam na cih uh leh, hong uk leh kei in a na ka sepsak Pasian’ vantungmi khat in tuzanin ka kiangah ding a, ‘Paul aw, nang lunghimawh kei in. Kaisar kumpipa mai-ah na ding ding hi. Nangmah tawh teembaw sungah a omkhawm mi khempeuhte Pasian in nang hong pia zo hi,’ hong ci hi. Tua ahih ciangin tote aw, lungnuamin om un. Bang hang hiam na cih uh leh, kei tungah thu hong piak bang ahih ding Pasian suangin ka om hi. Ahih hangin tuikulh khatpeuh tungah i kipaaikhia ding hi,” a ci hi. Ni sawm-le-li ni zaninah Andria tuipi sungah ka kikawi heihei lai takun, zan kim ciangin a kinaipen gam khat peuhmah ka tung dektak uh ci-in teembaw nasemte in ummawh uh a, tui a teh ciangun lam sawmnih a thuk a thei uh hi. Tawmvei khit ciangin tui a tehkik uh ciangin, lam sawm-le-nga a thuk a thei uh hi. Suangpi ka phut khak ding uh a lunghimawh manunah, teembaw tawlam a mong gei panin teembaw khawlna sikkawi li a khia uh a, khuavak ding ka ngak uh hi. Teembaw nasemte in teembaw a taisan nuam uh a, teembaw lu lam panin teembaw khawlna sikkawi khiatsuk bangin, gunkuang a khiatsuk lai takun, Paul in, “Hih mite in teembaw tungah a om kei uh leh, note na suakta kei ding uh hi,” ci-in galkap mangpa leh galkapte kiangah a gen hi. Tua ciangin galkapte in gunkuang khau sat tat uh a, a khahkhia uh hi. Khua a vak dektak lai takin an ne dingin Paul in mi khempeuh hansuah a, “Note in ni sawm-le-li tawntung an ngawlin, gil kialin na om uh hi. Tua ahih ciangin an ne dingin kong thuum hi. Bang hang hiam na cih uh leh, note noptuam nading ahi hi. Bang hang hiam na cih uh leh, note samzang khat nangawn kisia lo ding hi,” ci-in a gen khit ciangin Paul in, khomun la a, tua mite mai-ah Pasian’ hehpihna a phat khit ciangin balnenin a ne hi. Tua ciangin amaute khempeuh in zong lungnuamin an a ne uh hi. Teembaw sungah a om komau khempeuh in zanih sawm-sagih-guk ka pha uh hi. An a nek khit uh ciangin buhhumte tuipi sungah khia-in teembaw a zangsak uh hi. Khua a vak ciangin tua gam a theih loh uh hangin, tui gei-ah sehnel a om, tui dawk khat a mu uh hi. Tua sehnel tungah teembaw kikhangsak ding hiam, kikhangsak lo ding hiam ci-in a vaihawm uh hi. Sikkawi a khahkhia uh a, tuipi sungah a nutsiat khit uh ciangin, a hawhna a phel uh a, teembaw lu lam panin a puan huih lakah khai-in tui dawk lamah teembaw a phusak uh hi. Tui kilokna nih kituahna mun a phak uh ciangin teembaw leitungah kingam a, teembaw a lulam teng tang thei loin om a, a nung lam tui kilok in satkhia a, a sia hi. Tua lai takin thongkiate in tui peeka a taimang ding uh a lunghihmawh manunah galkapte in, “That ni,” ci-in a vaihawm uh hi. Ahih hangin galkap mangpa in Paul a suahtaksak nop maninah galkapte’ hihna kham a, “Tui peek siamte in peek masa uh a, lei tungah a tung masa ding uh hi. A om laite in singpeek tung ahi zongin, teembaw sungah a om nadangte tung ahi zongin, tuangin a pai ding uh hi.” ci-in thu a pia hi. Tua ahih ciangin mi khempeuhte in lei tungah a suakta uh hi. Ka suahtak khit uh ciangin Malta tuikulh gam hi cih ka thei uh hi. Guahzu a, khua dam ahih ciangin tua gam mite in mei cihin kote khempeuh pha takpi hong hehpih uh hi. Paul in sing lom khat la a, mei tungah a khul lai takin gul khat in meikhu lak pan pusuakin Paul’ khut a tu hi. Tua gam mite in gul in a khutah a om a muh uh ciangin, “Hih pa in mi thatpa ahi takpi zo hi. Tuipi launa pan a suahtak hangin a hin’ nadingin thuman in thu a pia kei hi,” ci-in khat leh khat a kici uh hi. Ahih hangin Paul in gul mei sungah singkhia a, bangmah natna thuak lo hi. Ama pumpi khempeuh bawk ahi zongin, thakhatin pukin a si ding ahi zongin, tua mite in a sawt veipi a ngak uh hangin, ama tungah siatna khat beek piang lo a muh uh ciangin, a lungsim uh kikheel a, “Hih pa in pasian ahi hi,” a ci uh hi. Tua mun pan kigamla lo Publias kici tuikulh gam sung hausapa a om hi. Tua hausapa in kote hong tung sak a, ni thum tawntung pha takpi-in hong vaak hi. Publias’ pa in nattun leh gilsan vei-in a lum hi. Tua cinapa kiangah Paul in lut a, thu a nget khit ciangin a tungah a khut nga-in, cinatna a damsak hi. Tua bang ahih ciangin tua tuikulh-a cina dangte hong pai uh a, damna a ngah uh hi. Tua mite in lungdamna tampi hong pia uh a, teembaw tungah ka tuan’ kik uh ciangin ka sapnate uh teembaw tungah a koih uh hi. Kha thum khit ciangin Ta Peeng milim a om, tua tuikulh gamah phalbi sung tawntung a khawl Alekzandria teembaw tungah ka tuang kik uh a, Sirakhas khua tungin ni thum ka taam uh hi. Tua san tak panin ka paikik uh ciangin kawi pai-in, Regium khua ka tung uh a, ni khat ka taam khit uh ciangin, khang lam pan huih nung a, ni nihin Puteoli khua ka tung uh hi. Tua khua-ah ute naute tawh kimu-in, “Ni sagih sung hong taam un,” hong cih mah bangun ka taam khit uh ciangin, Rom khua-ah ka pai uh hi. Rom khua-ah a om ute naute in kote paina thu a zak uh ciangin hong dawn ding kimkhatte in Appias Sumbuk dongin, kimkhatte in Mangbuk Thum dongin hong pai uh hi. Paul in tua mite a muh ciangin Pasian’ hehpihna phatin a lungdam uh hi. Rom khua-ah ka tun’uh ciangin Paul in a cing galkap tawh a ut bangin a om theih na’ng thu a ngah hi. Ni thum khit ciangin Paul in Judah mi upate a kikhopsak khit ciangin, “Ute naute aw, kei in Judah mite tung ahi zongin, i pute i pate’ ngeina tung ahi zongin, ka khial lo napi-in, Jerusalem khua mite in hong man uh a, Rom mite’ khut sungah hong pia uh hi. Amaute in kei hong dot khit uh ciangin sih nading mawhna thu a muh loh uh ciangin, hong khah nuam uh hi. Tua bang a deihna, Judah mite in a nial uh ciangin, Kaisar Kumpipa kiangah azukhan ding ka ngaihsun hi. Tua bang ka cihna in ka mi pawlte tungah mawhsak nading ka cihna ahi kei hi. Tua ahih ciangin note mu-in, hong hopih dingin kong sam hi. Bang hang hiam na cih uh leh, Israel pawlte’ lametna thu hangin hih sikkhau khihna ka thuak hi,” a ci hi. Tua mite in “Nang thu zaksakna lai Judah gam panin ka ngah kei uh hi. Tua gam pan a hong tung a, nangmah hong mawhsak ute naute kuamah a om kei hi. Ahih hangin hih biakna in gam khempeuh ah kosiatna a thuak cih thei ka hih manun, na upna thu nangma kiang pan ka ngai nuam uh hi,” a ci uh hi. Kimuh nading ni a seh uh ciangin mi tampite in Paul’ omna-ah hong pai uh a, Paul in Pasian’ Gam thu teci pang a, tuate in Zeisu thu a up nadingun Moses’ Thukham lai leh Pasian’ kamsangte lai paulamin thu hilhin, zingsang akipan nitum dongin a zol hi. Kimkhatte in Paul’ thu gen a um uh hi. Kimkhatte in a um kei uh hi. Tua mah bangin khat leh khat thu kituak loin, Paul in thu khat a gen khit ciangin a paikhia uh hi. Paul in, “Kha Siangtho in kamsangpa Isaiah tungah na pute na pate kiang uh ah a kituakin a gen hi. ‘Pai in la, hih mite tungah hih bangin ci in, zaza napi tel lo; mumu napi thei lo, Amaute in a mit uh tawh a muh loh nading, a bil uh tawh a zak loh nading, A lungsim uh tawh thu a theihtel loh nading, amaute kihei-in damna a ngah loh nadingun, amau lungsim uh mawl a, amau bil uh ngong a, a mit uh a si hi,’ a ci hi. Tua ahih ciangin Pasian in hong piak hih gupna thu Gentailte kiangah kipuak ding a, amaute in zong a sang ding uh hi ci-in note in thei ta un,” ci-in a gen hi. Paul in kum nih tawntung a sap innah om a, ama kiangah a pai khempeuh tung sak hi. Nawngkaina khat beek om loin, nop takin Pasian’ Gam thu gen a, Topa Zeisu Khazih’ thu a hilh hi. Mipawl lamsang ah David’ suan ahi, sihna pan a thawhkikna hangin a siangtho Kha lamsang ah vangliatna a nei, Pasian’ Ta kici i Topa Zeisu Khazih ahi, Nomau thu-upna in leitung gam khempeuh ah kizel ahih ciangin nomau hangin Zeisu Khazih tawh Pasian’ hehpihna ka phat masa bel hi. Keimah in thu ka nget ciangin, note thu tawh zomin thu ka ngen niloh hi ci-in a Tapa’ Lungdamna Thu hilhin ka lungsim sungah a na ka sep Pasian in keima lamah teci ahi hi. A nunung belin Pasian’ deihna in hong awi leh, nomau kiangah kong tun’ nadingin thu ka ngen hi. Note na lungkip theih nadingun note kiangah Kha Siangtho’ thupha hehpihna khat peuhmah kong piak na’ngin nomau mu nuam ka hi hi. Tua bang ka cihna in keimah leh nomau in thu-upna tawh khat leh khat nopna i ngah khawm ding ka cihnopna hi. Ute naute aw, Gentail adangte lakah gah ka ngah mah bangin nomau lakah zong ka ngah nadingin nomau kiangah pai ning ci-in tamveipi ka hanciam ci-in note in na theih loh ding uh ka deih kei hi. Ahih hangin tu dongin, hong kham a om hi. Grik mite ahi zongin, mi pil lote ahi zongin, siamna a nei mite ahi zongin, siamna a nei lo mite ahi zongin tuate khempeuh tungah leiba nei ka hi hi. Tua ahih ciangin ka hih theih zahin Rom khua-ah a om note kiangah zong Lungdamna Thu kong hilh nuam hi. Khazih’ Lungdamna Thu hangin ka maizum kei hi. Bang hang hiam na cih uh leh, tua thu in a masa-in Judah mite, a nung ciangin Grik mite akipan a um mi khempeuh in gupna a ngah nading Pasian’ vangliatna ahi hi. “Midikte in thu-upna tawh a nungta ding hi,” ci-in Lai Siangtho sungah a kigelh mah bangin, thu-up nadingin thu-upna tawh Pasian’ dikna a kilang zo hi. Gitlohna tawh thuman thutak a nial mite a gitlohna tungah Pasian’ hehna in vantung panin hong kilang hi. Bang hang hiam na cih uh leh, Pasian’ thu a kiteltakin amaute lakah a kilang hi. Bang hang hiam na cih uh leh, ama tawntung vangliatna leh siangthona ahi, mit tawh kimu thei lo nate, lei apian’cil a kipan kilangin a kimu hi. Tua ahih ciangin amaute in a kisuahtak thei kei ding uh hi. Amaute in Pasian a thei uh hi napi-in Pasian phat ding a kilawm zahin a phat kei uh a, ama hehpihna phat lo uh tham loin, amau in mawkna-in a ngaihsun uh a, ciamteh thei loin amau lungsim uh a mial hi. “Lungpil mi ka hi uh hi,” a cih uh hangin mihai suak uh a, kisia thei lo Pasian’ vangliatna in a sia thei mite ahi zongin, vasate ahi zongin, khe li nei ganhingte ahi zongin, bawkbak a, paite ahi zongin, tuate a milim tawh a kheek uh hi. Tua ahih ciangin Pasian in amau pumpi uh, amau mah in a siatsak theih nadingun amaute in lunggulhna a neih uh bangin kihhuaina sungah a pia hi. Bang hang hiam na cih uh leh, Pasian’ thuman thutak pen thuzuau tawh a kheek uh a, a Piangsakpa nusia-in a pian’sakte a bia uh hi. Tua Topa in thupha a ngah tawntung hi. Amen. Tua bang ahih uh ciangin Pasian in amaute zumhuai lunggulhna khut sungah a pia hi. Amau numeite in a ngeina bang zui loin, a ngeina tawh kituak lo lam a zui uh hi. Tua mah bangin pasalte in zong numeite tawh bawlna ngeina nusia-in, khat leh khat kilunggulh uh a, pasal khat leh khat zumhuai kibawl uh a, amaute mawhna tawh kituak daan a pum sung uh ah a thuak uh hi. Amaute in Pasian thei nuam lo uh ahih ciangin a kituak lo nate ahih nading Pasian in amaute gitlohna lungsim sungah a piak mah bangin, diklohna tawh, gitlohna tawh, duhgawh huaihamna tawh, hazatna tawh, en’na tawh, mi thahna tawh, kitotna tawh, kheemna tawh, etsat muhdahna tawh a dim uh hi. Amaute in mi gendai thei mi, hangsan mi, Pasian mudah mi, kheltat mi, kisathei mi, kiphasak mi, mi’ gitlohna a piangsak mi, a nute a pate’ thu a ngai lo mi, kikepna nei lo mi, kiciam pelh mi, unau it lo mi, hehpih lungsim nei lo mi a suak uh hi. Tua bang gamtate in sihna daan a thuak ding uh ci-in Pasian’ thukham thei napi-in, amaute in ahih uh tham loin, tua bang ahih mite a awi uh hi. Tua ahih ciangin midangte thukhenpa aw, na kisuahtak thei kei ding hi. Bang hang hiam na cih leh, midangte tungah thu na khen bangin nangmah in na hih ahih ciangin midangte thu na khenna in nangma mawhna om hi cih thukhen na suak hi. Tua bang ahihte tungah Pasian’ thukhenna in a mantak hi cih i thei hi. Tua bang ahihte tungah thu na khen lai takin tua bang a hilhpa aw, Pasian’ thukhenna tawh na kipelh ding cih na ki-um hiam? Pasian’ hehpihna thupha in nang kisikna lamah hong zol ciamteh loin na om lai takin, a kicing hehpihna leh lungduaina leh itnate don lo na hi hiam? Tua bangin na lungkhauh leh, a kisik nuam lo na lungsim mah bangin Pasian’ hehna leh Pasian’ thuman thukhenna a kilat Ni ciangin na pumpi tungah hehna na khol hi. Pasian in tua Ni ciangin a gamtatna tek bangin mi khempeuh mawhna a thukkik ding hi. A pha lamsang ah gamta a, minthan’na, zahtakna, leh muat lohna a zong mite nuntak tawntungna a pia ding hi. Paupeng lungsim mi, thuman thutak a ngai lo mi, a dik lo thu a ngai mite tungah hehna leh thangpaihna a koih ding hi. A masabel Judah mi, a nung ciangin Grik mi, gitlohna ahihte khempeuh a kha tung uh ah gimna leh dahnate a tung ding uh hi. Amasa belin Judah mi, a nung ciangin Grik mi, a hoih a gamta mi khempeuh tungah minthan’na leh vangliatna leh nopnate a tung ding uh hi. Bang hang hiam na cih uh leh, Pasian in kuama maitang a zahtak kei hi. Thukham thei lo-a khialte in Thukham loin a sia ding uh hi. Thukham thei napi-in mawhna ahihte in Thukham bangin thukhenna a thuak ding uh hi. Bang hang hiam na cih uh leh, Thukham a zate in Pasian mai-ah dikkisakna a ngah kei ding uh hi; Thukham banga a zuite bek in dikkisakna a ngah ding uh hi. Pasian Thukham a thei lo Gentailte in amau ngeina thu bangin zui-in Thukham mah bangin ahih uh ciangin, tuate in Thukham a thei lo uh napi-in amau in amaute ading thukham ahi uh hi. Bang hang hiam na cih uh leh, amau kitheihna lungsim un teci pangin, amau kingaihsutnate in khat leh khat kikumin, kimawhsakin ahi zongin, kimaisakin ahi zongin, amaute lungsim sungah Thukham deihna tawh kituak ciamtehna a om cih a kilangsak hi. Ka thuhilh Lungdamna Thu bangin Pasian in Zeisu Khazih tawh mite’ selsim lungngaihna a khen Ni ciangin tua bangin a khen ding hi. Nang Judah mi kicihna ngah a, Thukham muang a, Pasian hangah kisathei-in ama deihna thei a, Thukham simin lamdang nate a khen thei mi na hi a, mittawte lam hilh mi, khuamial sungah a omte khuavaksak mi, mihaite thuhilh mi, naupangte zong thuhilh mi, Thukham hanga pilna leh thuman thutak a nei mi na hi ci-in na kingaihsun takpi ahih leh, midangte thuhilhpa aw, nangmah zong kihilh lo na hi hiam? Mi’ sum gu kei in ci-a thuhilhpa aw, nangmah in zong na gu hiam? Mi’ zi tawh mawh kei in ci-a thuhilhpa aw, nangmah in zong mi’ zi tungah mawh na hi hiam? Milim a kihhuaisapa aw, nangmah in milim biakna inn luhgawp na hi hiam? Thukham suangin a kisatheipa aw, Thukham na khialh maninah Pasian’ min daisak na hi hiam? Bang hang hiam na cih leh, Lai Siangtho sungah a kigelh mah bangin, nangmah hangin Gentailte lakah Pasian’ min kigensia hi. Pasian’ Thukham na zuih leh, vun atna hangin noptuamna a om hi. Ahi zongin Thukham na khialh leh, na vun atna in vun at lohna a suak kik hi. Tua ahih ciangin vun ki-at lo mi in Thukham a zuih leh, ama vun at lohna in vun atna bangin kingaihsun ding hilo ahi hiam? Vun at lo mi in ama thuthuin Thukham a zuih leh, Lai Siangtho leh vun atna a nei napi-in Thukham a khial nangma tungah thu hong khen ding hilo ahi hiam? Pua lam Judah mi in Judah mi hi takpi lo hi. Pua lam pan pumpi tungah sa-ah vun atna in vun atna takpi hi lo hi. A sung lam Judah mi in Judah mi ahi takpi hi. Vun atna in zong thukham Lai Siangtho thu bang hi lo, Kha Siangtho bangin lungsim tawh a kipawl hi. Tua banga vun at mite in mite kiangah phatna ngah loin, Pasian kiangah phatna a ngah uh hi. Tua ahih leh, Judah mite bang a hampha uh hiam? Vun ki-at hangin hamphatna a om hiam? A pawlpawl phattuamna tampi a om hi. A lianbel phattuamna ahih leh, amaute kiangah Pasian’ thu a kipia zo hi. Judah mi kimkhatte in upna nei lo ahih uh leh, a up lohna un Pasian’ dikna a siasak ding hiam? Tua bang hi lo ding hi! “Na thupiakna in na thutan’na kilangsak hi, Thukhenna na thuak ciangin na gualzo ding hi,” ci-in Lai Siangtho sungah a kigelh mah bangin mi khempeuhte in thuciamna a pelh mi a kicih uh hangin, Pasian in thuman thutakpa hi ta hen. Ahih hangin eite diklohna in Pasian’ dikna a kilatsak leh, bang thu gen ding a om hiam? Daan hong pia Pasian in ahi lopi-in bawl ahi hiam ci-in leitung ngeina bangin ka gen hi. Tua bang hi zenzen lo ding hi. Tua bang ahih leh, Pasian in leitung mite bang ci thu a khen thei ding hiam? Keima thuzuau hanga Pasian’ thuman in a vangliatna a khan’sak leh, bang hangin kei mawhna nei bang hong khen lai ding hiam? Phatna a pian’ nadingin phat lohna gamta ni ci-in mi kimkhatte in hong kosia uh a, komau kam hong dawn’ kik uh mah bangin ka gen kik lai ding uh hiam? Tua bang a gente in thuman daan a thuak ding uh hi. Tua ahih leh, bang kici ding hiam? Ei Judah mite in tua Gentailte sangin phazaw i hi hiam? Phazaw i hi zenzen kei hi. Bang hang hiam na cih uh leh, Judah mi leh Grik mi khempeuhte in mawhna nei tuak uh hi cih thu a masa-in ka lak zo hi. Lai Siangtho sungah: “Midik khat beek a om kei hi. A thei khat beek a om kei hi. Pasian a zong mi khat beek a om kei hi. Amau khempeuh in lam a pial zo uh hi, A vekpi-un a kiman’na om lo hi. A hoih a, gamta a om kei hi, Khat nangawn a om kei hi. Amau gawlgui un a kihongsa hankhuk ahi uh hi. Amau leii uh tawh mi a kheem zo uh hi. Amau muk sung uh ah gul hangsante’ gu a om hi. Amaute kam un hangsan’na leh kamkhauh tawh a dim hi. Amau khe un mi sisan suah dingin a manlang hi. Amau paina lampi-ah kisiatna leh gimna a dim hi. Nopna lampi amau in a thei kei uh hi. Pasian kihtakna thu Amau mittang mai uh ah a om kei hi,” ci-in a kigelh hi. Thukham in a gen thu khempeuh thukham nuai-ah a om mite kiangah a gen hi cih i thei hi. Tua ahih ciangin kam a vekpi kikham uh a, leitungmi khempeuhte in Pasian mai-ah mawhsakna a thuak ding uh hi. Bang hang hiam na cih uh leh, thukham tawh mawhna kilang ahih ciangin thukham a zuihna tawh, Pasian mai-ah kuamah in dikkisakna a ngah kei ding hi. Tu-in Thukhamna leh kamsangte in teci a pan’ uh mah bangin, thukham loin Zeisu Khazih sungah thu-um mite khempeuh tungah upna hangin hong tung Pasian’ dikna kilang hi. Kilamdan’na neukha beek a om kei hi. Bang hang hiam na cih uh leh, mi khempeuh a mawh uh a, Pasian’ maipha a ngah nading uh kisia hi. Ahih hangin Zeisu Khazih in hong tan ahih maninah, a man pia loin Pasian’ hehpihna hangin dikkisakna i ngah hi. Pasian in hong hehpihin a kihih khinsa mawhna a ngaihsut lohna in ama dikna thu kilat nangin ahi zongin, tu laitak ama dikna hong kilangsak a, Zeisu a um mite diksa a, amahmah in dikna a bawl ding ahi zongin, Zeisu’ si thu-upna tawh mawh kimaisakna ding Zeisu a koih hi. Tua ahih ciangin kisaktheih nading koi-ah a om hiam na cih uh leh, a kipaaikhia zo hi. Bang thu tawh kipaai hiam? Gamtatna tawh kipaaikhia ahi hiam? Hi lo hi! Thu-upna tawh kipaaikhia hi. Tua ahih ciangin mi khat in thukham bang gamta loin upna tawh dikkisakna a ngah hi ci-in i ciamteh hi. Pasian in Judah mite’ Pasian bek ahi hiam? Gentailte’ Pasian zong hilo ahi hiam? Ahi mah hi. Pasian khat bek a om leh, Gentailte’ Pasian zong ahi hi. Tua Pasian in upna bangin vun atte leh vun at lote a dik a sa ding hi. Tua ahih leh, upna hangin eite in thukham paaikhia i hi hiam? Tua bang hi lo hi. Thukham i kip sak hi. I pu Abraham in mi lamsang ah bang phattuamna a ngah i ci ding hiam? Abraham in gamtatna hangin dikkisakna a ngah leh, kisaktheih na’ng thu a om hi. Ahih hangin Pasian mai-ah tua bang hi lo hi. Lai Siangtho sungah bang kigelh ahi hiam? “Abraham in Pasian’ thu um ahih ciangin ama upna in amah tang ding dikna-in kiciamteh hi,” Nasem mi in phattuamna a ngah ciangin hehpihna a ngah hi kici lo hi; thaman a ngah hi kici hi. A sem lo a, Pasian zahtak lo mi a diksakpa’ thu a um mi’ upna in amah tang ding dikkisakna-in kiciamteh hi. Tua mah bangin David in sem loin Pasian’ diksakna a ngah mi thupha a pia hi: “A khialhna uh maisakna leh a mawhna uh seelna a ngah mite in Thupha a ngah uh hi. Pasian’ mawhsakna tawh kipelh mi in Thupha a ngah hi,” ci-in a gen hi. Tua ahih ciangin hih thupha vun atte bek a pia hiam? Ahih kei leh, vun at lote a pia hiam? Bang hang hiam na cih uh leh, “Abraham tang ding ama thu-upna in dikna-in kiciamteh hi,” i ci hi. Tua bang i cih leh, bang ci kiciamteh hiam? Vun atna a thuak khit ciangin a kiciamteh hiam? Vun atna a thuak ma-in a kiciamteh hiam? A thuak khit ciangin a kiciamteh kei hi. Vun atna a thuak nai loh hangin upna dikna bangin kiciamteh nading i pa Abraham in tua mite’ pa a suah na’ng ahi zongin, vun atna a thuak tham loin i pa Abraham in vun atna a thuak nai loh lai takin upna lam a zuite khempeuh’pa uh a suah nading ahi zongin, Abraham in vun atna a thuak nai loh lai takin upna a neih dikna-a ciamtehna ahi vun atna lim a ngah hi. Bang hang hiam na cih uh leh, leitung a luahsak nading Abraham ahi zongin, a suante ahi zongin, a thuciamna a ngahna in thukham tawh a ngah kei uh hi; upna tawh kipawl dikna hangin a ngah uh hi. Thukham tawh kipawlte bek in gamh a luah uh leh, upna thu a siasak a, kiciamna zong a mawkna ahi hi. Bang hang hiam na cih leh, thukham in hehna a piangsak hi. Ahih hangin thukham om kei leh, khialhna zong a om kei hi. Tua ahih ciangin kiciamna in Thukham tawh kipawlte tham loin, Abraham’ upna tawh kipawlte zong Abraham’ suan-le-khakte khempeuh tungah a kip nadingin hehpihna tawh kibangin a pian’ nadingin upna hangin kiciamna a ngah uh hi. “Ke’n nangmah mipawl tampite’ pa ka hong suaksak zo hi,” ci-in Lai Siangtho sungah a kigelh mah bangin a site thosak a, a piang nai lote a piangsa bangin a ciamtehpa Pasian ahi, amah in a up Pasian mai-ah Abraham in eite khempeuh’ pa ahi hi. “Na suan na khakte in tua bang a piang ding hi,” ci-in thu piakkholhna bangin mipawl tampite’pa a suah nading amah in lawp nading om lo napi-in umin, lawpin a om hi. Tua upna kiam loin ama kum in zakhat dektak pha a, a pum in a sih thu ahi zongin a zi Sarah’ gil a sih thu ahi zongin a ngaihsut hangin, upkhialhna tawh Pasian’ thuciamna lungka loin, upna a lianin Pasian phat a, a ciampa in a ciamna bangin a bawl thei ding hi ci-in pha takpi-in a um hi. Tua ahih ciangin upna in ama tangding dikna-in a kiciamteh hi. Tua bang ciamtehna in Abraham ading bekin Lai Siangtho sungah gelh ahi kei hi. Eite adingin zong a gelh hi. Eite in Topa Zeisu sihna pan a tho kiksakpa i up leh, tua upna eite ading dikna bangin hong ciamteh ding hi. Tua Topa in eite khialhna hangin kipia a, eite in dikkisakna i ngah nadingin a kithosak kik hi. Tua ahih ciangin i upna tawh dikkisakna i ngah ahih ciangin eite Topa Zeisu Khazih hangin Pasian tawh i kilem hi. Tua Topa hangin eite omna hehpihna sungah upna hangin tum theihna thu i ngah hi; Pasian’ vangliatna lamenin lungdamin i om hi. Tua tham loin gimna i thuak ciangin i lungdam hi. Bang hang hiam na cih uh leh, gimna in thuakzawhna a piangsak hi. Thuakzawhna in teci kilatsakna a piangsak hi. Teci kilatsakna in lawpna a piangsak hi. Lawpna in hong zumsak lo ding hi. Bang hang hiam na cih uh leh, hong piak Kha Siangtho in Pasian’ itna eite sin sungah hong sung zo hi. Eite in thaneemin i om lai takin a kilawm hunin Khazih in mi gilote tangding a si hi. A dik mi tangdinga a si ding mi haksa hi. Midik tangding a si ngam mi a om kha ding hi taleh, eite in mawh nei i hih lai takin Khazih in eite tang ding si ahih ciangin Pasian in eite hong itna hong kilangsak hi. Tua ahih ciangin ama si tawh dikkisakna i ngah khit ciangin tua Topa hangin Pasian’ hehna tawh i kipelh zaw ding hi. Bang hang hiam na cih uh leh, eite in galte i hih lai takin ama Tapa in sihna a thuakna hangin eite in Pasian tawh kilem i hih leh, ama hin’na tawh gupna i ngah zaw ding hi. Tua tham loin, i Topa Zeisu Khazih hangin kilemna thu i ngah zo ahih ciangin, tua Zeisu hangin Pasian kiangah i lungdam hi. Tua ahih ciangin mi khat hangin khialhna in leitungah tung a, mawhna hangin sihna a piang mah bangin, mi khempeuhte in zong a mawh zo uh ahih ciangin, mi khempeuh tungah sihna hong tung hi. Bang hang hiam na cih uh leh, thukham a om ma-inah leitungah mawhna a om hi. Ahih hangin thukham om lo hi leh, mawhna a om hi cih nading a om kei hi. Ahih hangin Adam’ khang pana kipan Moses’ khang dongin sihna in Adam’ khialhna bangin a khial lote nangawn a uk hi. Tua Adam in a nung ciangin hong piang ding mi’ lim ahi hi. Ahih hangin mawhna leh hehpihna kibang lo hi. Bang hang hiam na cih uh leh, mi khat a khial ahih maninah, mi tampi a si uh ahih leh, Zeisu Khazih kici mi khat’ hehpihna thupha hanga i ngah lungdamna leh Pasian’ hehpihna thupha in mi tampi ading a kicing hi. Mi khat’ mawhna hangin a piang na leh hehpihna a kibang kei hi. Bang hang hiam na cih uh leh, mawhna khat hangin daan thuak hen cihna thu a khen hi. Hehpihna panin mawhna tampi om napi-in mai ta hen cihna thu a khen hi. Mi khat a khial ahih maninah, tua mi hangin sihna in a uk leh, Zeisu Khazih kici mi khat hangah hehpihna thu kicing a, dikna leh hehpihna a ngah mite in nuntakna a ukzaw ding uh hi. Tua ahih ciangin mi khat hangin mi khempeuh in daan thuak hen ci-in thu kikhenna a thuak uh mah bangin dikna tawh kipawl hihna khat hangin mi khempeuhte in nuntakna tawh kipawl dikkisakna a ngah uh hi. Mi khat in thu a ngaih loh maninah, mi tampite in mawhnei mite a suah mah bangin, mi khat in thu a ngaih maninah mi tampite in zong dikna a ngah mite a suak uh hi. Khialhna a khan’ nadingin Thukham in zong a hong tum hi. Ahih hangin khialhna a khan’ hangin hehpihna a khang zaw semsem hi. Tua ahih ciangin mawhna in sihna a pian’sak mah bangin hehpihna in i Topa Zeisu Khazih hangin dikna piangsak a, nuntak tawntungna hong ngah sak hi. Tua ahih ciangin bang i ci gen ding hiam? Hehpihna a khan’ theih nadingin mawhna hihin i om ding hiam? Tua bang hi zenzen lo ding hi! Mawhna ah a si eite in tua mawhna sungah bangci-in i hing lai ding hiam? Khazih Zeisu sungah a kibaptaiz eite khempeuh in ama sihna sungah kibaptaizna i ngah hi ci-in thei lo na hi uh hiam? Tua ahih ciangin sihna ah baptaizna-in Zeisu tawh i kivui khawm hi. Khazih in Pa’ vangliatna tawh sihna pan hong thawhkik mah bangin eite in zong hin’na thak i zuih theih nading ahi hi. Bang hang hiam na cih uh leh, ama sihna lim la-in amah tawh eite pumkhat sakhat i suah takpi leh, Topa thawhkikna lim zong la-in pumkhat sakhat i suak hi. Khialhna tawh kipawl pumpi a kisuksiat nading ahi zongin, eite in mawhna’ sila a, i om loh nading ahi zongin, eite pumpi lui in amah tawh singlamteh tungah sihna a thuak khawm zo hi cih i thei hi. Bang hang hiam na cih uh leh, a sisa mi in mawhna panin a suakta hi. Khazih in sihna pan thokik ahih ciangin, sihna tawh kipelh tawntung a, sihna in a nung ciangin amah a uk loh nading i thei ahih ciangin, eite in Khazih tawh i sih khawm leh, amah tawh i nungta khawm ding hi, ci-in i um hi. Khazih in sihna a thuakna pen khialhna lam pan khatvei bek a si hi. A nuntakna in Pasian ading a nungta hi. Tua mah bangin mawhna lam pan a si mi na hi uh a, Khazih Zeisu hangin Pasian lam pan mihing na hi uh na ciamteh un. Tua ahih leh, note in deihgawhna na zuih nadingun, khialhna in a si thei na pumpi sung uh ah na ki-uksak kei un. Tua tham loin na pum tung nate in diklohna’ hiam a suah nadingun mawhna kiangah na pia kei un. Sihna pan a thokik mi bangin, Pasian kiangah na pumpi uh na pia un. Dikna’ hiam bangin Pasian kiangah na pumpi tung nate zong na pia un. Bang hang hiam na cih uh leh, thukham nuai-ah om loin, hehpihna nuai-ah na om uh ahih ciangin na mawhna un note hong uk lo ding hi. Tua bang ahih leh, bang i ci hih ding hiam? Thukham nuai-ah om loin, hehpihna nuai-ah i om ahih ciangin khialhna i hih ding hiam? Tua bang hi zenzen lo ding hi. Mi khat kiangah sila dingin note na tum uh leh, tua mi in sihna tawh kituak mawhna thu ahi zongin, dikna tawh kituak thu ngaihna ahi zongin, note’ to ahih thei lo na hi uh hiam? Note in mawhna sila na hih ngei uh hangin, tu-in na ngahsa uh thuhilhna, deihna lungtang tawh na ngai uh ahih ciangin Pasian’ hehpihna ka phat hi. Mawhna’ khut sung pan na suahtak khit uh ciangin, dikna’ sila na suak uh hi. Na lungsim uh nem lai ahih ciangin, leitung ngeina bangin thu kong hilh hi. Note in na pum tung uh nate, kihhuaina leh kheltatna’ sila-ah na om sak uh mah bangin, tu-in na pum tung uh nate a kisian’thosak nadingun dikna’ sila-ah na omsak un. Mawhna’ sila-ah na om lai takun dikna tawh na kipelh uh hi. Tua ahih leh, tu-in zumhuai na sak uh tua gamtatna na bawl lai takun, bang phattuamna na ngah uh hiam? Tua gamtatnate’ tawpna lampi in sihna ahi hi. Tu-in mawhna’ khut sung pan na suakta uh a, Pasian’ sila suak khin na hih ciangun siangtho nadingin phattuamna na ngah uh a, a tawpna-ah nuntak tawntungna na ngah ding uh hi. Bang hang hiam na cih uh leh, sihna in mawhna’ thaman ahi hi. Ahih hangin i Topa Khazih Zeisu hanga nuntak tawntungna in man kipia lo Pasian’ letsong ahi hi. Thukham a thei ute naute aw, mi khat a nuntak lai takin thukham in tua mi a uk hi cih thei lo na hi uh hiam? Bang hang hiam na cih uh leh, pasal a nei numei in a pasal a sih matengin thukham bangin a pasal tawh a kikhih khawm hi. A pasal a sih leh, numei in a pasal’ thukham tawh a kipelh hi. Tua ahih ciangin a pasal a nuntak lai-in midang’ zi a suah leh, numei gilo a kici ding hi. Ahih hangin a pasal a sih leh, tua numei in thukham tawh a kipelhkhia a, midang tawh a kiteeng zongin numei gilo a kici kei ding hi. Tua mah bangin ka ute ka naute aw, note in zong midang a kici sihna pan a thokik mi’ zi na hi uh a, Pasian’ deihna bangin gah na gah nadingun Khazih’ pumpi hangin na si uh a, Thukham tawh na kikhen uh hi. Eite in i pumpi ngeina bangin gamta-in i om lai takin, mawhna tawh akipawl i lungsim in Thukham hangin piang a, sihna suahna gah a gah nadingin i pumpi tung nate sungah nasem hi. Tu-in ahih leh, thukham lui muang loin, Kha Siangtho’ nuntakna thak sungah na i sep nadingin hong ukpa lamah i sih khit ciangin thukham pan i suakta zo hi. Tua bang ahih leh, bang i ci gen ding hiam? Thukham in mawhna ahi i ci ding hiam? Tua bang hi zenzen lo hi. Ahi zongin thukham bek hangin mawhna lungsim ka thei hi. Bang hang hiam na cih uh leh, “Huaihamna lungsim nei kei in,” ci-in Thukham in na ci kei leh, huaihamna lungsim ke’n ka thei kei ding hi. Ahih hangin mawhna thu in thukham hangah thu ngah ahih ciangin ka lungsim sungah huaihamna apawlpawl a piangsak hi. Thukham om kei leh, mawhna a si ding hi. Nidang lai-inah thukham loin ka nungta hi. Ahih hangin thukham hong pian’ ciangin mawhna nungta kik a, kei ka si hi. Hin’na tawh kipawl thukham in sihna tawh kipawl ahih lam keimah in ka thei hi. Bang hang hiam na cih uh leh, mawhna in thukham hangin thu ngah a, thukhamna tawh hong kheemin hong that hi. Tua hi a, Thukham in a siangtho hi. A thu in zong a siangtho, a dik, a pha hi. Tua bang ahih leh, a hoih a pha na in keima tungah sihna a suak ahi hiam? Tua bang hi zenzen lo hi. Mawhna in mawhna taktak ahihna a kilat nadingin a pha nate hangin keima sungah sihna thu a piangsak hi. Bang hang hiam na cih uh leh, mawhna in thukham hangin mawhna taktak a pian’ theih nading ahi hi. Thukham in Kha Siangtho tawh kipawl ci-in i thei hi. Keimah in mawhna khut sungah a kizuak, a si thei leitungmi ka hi hi. Bang hang hiam na cih uh leh, ka gamtatna ka thei kei hi. Ka gamtat nop bangin ka gamta kei hi. Ka muhdah gamtatna ka hih hi. Ahih hangin ka gamtat nop lohna ka gamtat leh, Thukham in a pha hi ka ci hi. Tua ahih ciangin gamtatna a hoih lo keimah in ka hih kei hi, keima sungah a om khialhna in a hih hi. Ka sa ahi ka pum sungah a pha khat beek a om kei hi cih ka thei hi. Bang hang hiam na cih leh, a pha gamtat nopna lungsim ka neih hangin a pha gamtat theih nading ka mu kei hi. A pha ka gamtat nop ka hih thei kei hi. Ka gamtat nop loh gitlohna ka hih hi. Ahih hangin gamtat nop loh na ka gamtat leh, keimah in ka gamta kei hi; ka sungah a om mawhna in a gamta hi. Tua hi a, a hoih a gamta nuam keima sungah mawhna thu a om cih ka thei hi. Ka sung mi hangin Pasian’ Thukham a pha ka sa hi. Ahi zongin ka pum tung nate lakah adang thukham khat ka lungsim tawh kido a, ka pum tung nate mawhna khut sungah manin a piak theih ka mu hi. Lunggim mi ka hi takpi hi! Hih a si ding pumpi panin kua in hong honkhia ding hiam? Eite hong hon Topa Zeisu Khazih hangin Pasian’ hehpihna ka phat hi! Tua ahih ciangin ka lungsim hangin Pasian’ thukham deihna ka zuih hangin, ka pumpi hangin mawhna’ Thukham deihna ka zui hi. Tua ahih ciangin si-le-sa deihna bangin kalsuan loin Kha deih bangin a kalsuan, Khazih sungah a om mite in mawhna thukhenna tawh a kipelh zo uh hi. Bang hang hiam na cih uh leh, Khazih Zeisu hanga a om nuntakna’ Kha tawh kipawl thukham in mawhna leh sihna’ thukham sung pan kei hong honkhia zo hi. Thukham in i ci i sa hangin a thanem ahih ciangin a kibawl zo lo nate, Pasian in mawhna tawh a dim pumpi lim bangin a Tapa mawhna maisak dingin hong sawlin, ci leh sa sungah mawhna a hong khen hi. Bang hang hiam na cih uh leh, ci leh sa deihna zui loin Pasian’ Kha Siangtho’ deihna zui-in a nungta eite tungah a Thukham hanciamna thu a tun’ nading hi. Ci leh sa a zuite in ci leh sa’ thu a ngai uh hi. Pasian’ Kha Siangtho a zuite in Pasian’ Kha Siangtho’ thu a ngai uh hi. Bang hang hiam na cih uh leh, ci leh sa lungsim in sihna tawh kituak hi. Kha Siangtho lungsim in nuntakna leh nopna tawh kituak hi. Bang hang hiam na cih uh leh, ci leh sa lungsim in Pasian’ Thukham mang lo tham loin a mang zo lo ahih maninah Pasian tawh a kido hi. Ci leh sa sungah a omte in Pasian a lungdamsak zo kei uh hi. Pasian’ Kha Siangtho in note sungah a teen’ leh, note in ci leh sa sungah na om kei uh hi; Pasian’ Kha Siangtho sungah na om uh hi. Bang hang hiam na cih uh leh, Khazih’ Kha Siangtho a nei lo mite in Khazih’ mi ahi kei uh hi. Khazih in note sungah a om leh, na pumpi un mawhna hangin a sih hangin na kha un dikna hangah a nungta hi. Zeisu a thokiksak Pasian’ Kha Siangtho in note sungah a om leh, Khazih Zeisu a thokik sakpa in, note sungah a teeng a Kha Siangtho hangin, a si thei na pumpi uh zong hin’na a pia ding hi. Tua ahih ciangin ute naute aw, eite in ci leh sa thu zuih nadingin, ci sa lei i ba kei hi. Note in ci leh sa thu zui-in na nuntak uh leh, na si ding uh hi. Kha Siangtho hangin na pumpi uh a gamtatna na sihsak uh leh, na nungta ding uh hi. Pasian’ Kha Siangtho’ thuhilhna a mang mi khempeuhte in Pasian’ tate ahi uh hi. Note in kihtak kikkik nading sila’ lungsim na ngah kei uh hi. “Abba, Pa aw,” i cih mah bangin ta suahna lungsim na ngah uh hi. Eite in Pasian’ tate i hi ci-in Kha Siangtho in eite lungsim tawh teci a pang khawm hi. Tate i hih leh, gamhluahte i hi hi. Khazih tawh kibangin vangliatna ngah nadingin amah tawh gimna thuak khawm leng, amah tawh gamluah khawm ding i hi hi. Eite tungah hong kilang ding vangliatna ka ngaihsut ciangin, tu laitak i thuak gimnate ngaihsut tham ka sa kei hi. A kipiangsak nate in Pasian’ tate a kilat ding lamenin, lawp pha-in a ngak uh hi. Bang hang hiam na cih leh, a kipiangsak nate in a kisia gam lam, amau ut bangin zui ahi kei uh hi. Pasian’ tate’ vangliatna tawh kipawl khahkhiat nopsakna ahi, kisiatna hen gawpna panin kikhahkhia-in nopsakna ah a tum ding ci-in lamet nading thu pia a, a kisia thei gam lam a zuisakpa’ deihna bang bek a zui uh hi. Bang hang hiam na cih uh leh, a kipiangsak nate khempeuh in tu dongin a tau uh a, gimna thuakin a om uh i thei hi. Tua tham loin Kha Siangtho a kipatna gah a ngah eite in zong a tate za-ah koihna thu ahi, i pumpi gupkhiatna ngakin i pumpi sungah tau-in i om hi. Eite in lametna hangin gupna i ngah hi. Ahih hangin lametna in i muhsa ahih leh, lamet nading a om kei hi. Bang hang hiam na cih uh leh, a muhsate kua in a lamen nawn ding hiam? I muh loh nate i lamet leh, tuate lungnemna tawh ngakin i om hi. Tua mah bangin Kha Siangtho in i thahat lohnate hong huh hi. Bang hang hiam na cih uh leh, eite in thunget ding a kilawm bangin thunget ding i thei kei hi. Kha Siangtho mah in muk tawh kipau thei lo tauna tawh, eite ading thu hong ngetsak hi. Lungsim sung a zongpa in Kha Siangtho’ lungsim a thei hi. Bang hang hiam na cih uh leh, tua Kha Siangtho in misiangthote ading Pasian’ deihna tawh kituakin thu a ngetsak hi. Pasian a it mite ahi uh, a geelna banga a sap mite adingin na khempeuh in hoih nadingin a piang uh hi cih i thei hi. Pasian’ Tapa in unau tampite lakah a upa bel a suah nadingin Pasian in nidang lai-a a theihkhol mite, a Tapa’ lim tawh kibang a suahsak nadingin, nidang lai-in a ciamteh khol hi. Pasian in a ciamtehsa mite a sam hi. A sapsa mite zong a diksak hi. A diksak mite vangliatna a pia hi. Tua bang ahih leh, hih thu hangin bang gen ding i hi hiam? Pasian in eite lamsang ah a om leh, kua in eite lang khatah a pang zo ding hiam? Ama Tapa khat bek haza lo a, eite khempeuh ading a piapa in man ngen loin nate khempeuh ama Ta tawh hong pia khawm loin a om ding hiam? Pasian’ teelsate kua in a mawhsak ding hiam? A diksakpa in Pasian ahi hi. Mawhsakna thu a khenpa in kua ahi hiam? Sihna a thuak tham loin, sihna pan thokik a, Pasian’ ziat lamah omin, eite ading thu hong ngetsakpa in Khazih ahi hi. Khazih hong itna tawh eite kua in hong kikhensak zo ding ahi hiam? Gimna, kahna, bawlsiatna, gilkialna, puan neih lohna, kihtakna, namsaute in Khazih hong itna tawh eite hong kikhensak thei ding hiam? Lai Siangtho sungah: “Nangma tang dingin kote in sunthapai-in thahna ka thuak uh hi; Gawh dinga a kikoih tuu tawh kibangin mite in kote hong ciamteh uh hi,” ci-in kigelh hi. Khen thei lo ding hi! Ei hong itpa hangin hih nate khempeuh tungah gualzo pente i hi hi. Bang hang hiam na cih uh leh, sihna ahi zongin, hin’na ahi zongin, vantungmite ahi zongin, ukna ahi zongin, tu lai taka omte ahi zongin, tu nung ciangin a om dingte ahi zongin, a san’na ahi zongin, a niamna akipan a kipiangsaksa khat beek in i Topa Khazih Zeisu hanga i ngah Pasian hong itna tawh hong kikhensak zo kei ding hi ci-in man takin ka um hi. Keima pumpi kitheihna lungsim in Kha Siangtho tawh kibangin kei lamsang ah teci hong pang khawmin, zuauthu gen loin Khazih mai-ah aman takpi ka cih-inah, ka dah mahmah a, ka lungsim sungah tawlnga loin lungmangin gimin ka om hi. Bang hang hiam na cih uh leh, ci leh sa lamsang ah ka pawl ahi ka u ka naute tang ding Khazih tawh kikhenin hamsiatna thuak dingin lungsim ka nei hi. Tua mite in Israel mite ahih uh ciangin a ta za-a kikoih nading ahi zongin, vangliatna ahi zongin, thu kiciamnate ahi zongin, Thukham koihna ahi zongin, Pasian biakna ahi zongin, thuciamnate ahi zongin, amau ading a pute a pate tawh kizoma piang mi zong ahi uh hi. Khazih in zong ci leh sa lamsang ah tua mite pawl ahi hi. Tua Khazih in zong na khempeuh uk a, thupha a ngah tawntung Pasian ahi hi. Amen. Tua bang ka cih hangin Pasian’ thu a kip kei hi, ka cihnopna ahi kei hi. Bang hang hiam na cih uh leh, Israel’ suante khempeuh in Israel mi taktak ahi kei uh hi. Tua mah bangin Abraham’ suan khempeuh in Abraham’ tate taktak ahi kei hi, “Isaak bekah na suan a kici ding hi,” ci-in Pasian in Abraham kiangah a gen hi. Tua ahih ciangin ci leh sa tate in Pasian’ tate taktak ahi kei uh hi, thuciamna tawh kipawl tate in a suan taktak a kici hi. Bang hang hiam na cih uh leh, thuciamna in, “Tu hun hong tung kik ciangin ka hong pai kik ding a, Sarah in ta a nei ding hi,” a ci hi. Tua tham loin Rebekah in eite pu Isaak tawh a gai khit ciangin Pasian teelkhiatna tawh kipawl hanciamna in gamtatna hang hi lo, a hong sampa’ deihna hangin a kip theih nading ta a suah ma-in amaute in gamtat hoih, gamtat hoih lo a neih ma-un “A ta uzaw in a ta nauzaw’ na sem ding hi,” ci-in tua numei kiangah a ci hi. Tua mah bangin, “Jakob ka it hi, Esau ka mudah hi,” ci-in kigelh hi. Tua bang ahih leh, bang i ci gen ding hiam? Pasian in thuman lo bawlpa ahi, i ci ding hiam? Tua bang i ci zenzen kei ding hi. “Keimah in ka hehpih nopte ka hehpih ding hi. Ka gup nopte ka gum ding hi,” ci-in Moses kiangah thu a pia hi. Tua bang ahih ciangin a deih mi tawh a kikum kei hi, a hanciam mi tawh zong a kikum kei hi, hong hehpih thei Pasian bek tawh kikum hi. Lai Siangtho sungah Faro kumpipa kiangah, “Ka vangliatna nangma tungah ka lah nading ahi zongin, ka min leitung khempeuh ah a kizelh nading ahi zongin nangmah kong sangsak zo hi,” a ci hi. Tua mah bangin a hehpih nopte a hehpih hi, a lungkhauhsak nopte a lungkhauhsak hi. “Tua bang ahih ciangin, ‘Pasian in bang hangin ko hong mawhsak lai hiam? Kua in a deihna a khamsak hiam’” ci-in keimah hong dong ding na hi uh hi. Pasian a nial mi aw, nang kua mi na hi hiam? A kibawl mi in, “Bang hangin kei hong hi ci bawl hiam?” ci-in a bawlpa kiangah a gen ding hiam? Beel seekpa in beel lei uk hilo ahi hiam? Beel lei lom khat tawh beel manpha ahi zongin, beel manpha lo ahi zongin bawl thei hilo ahi hiam? Pasian in ama hehna hong lak a, a vangliatna a kitheihsak nading a deih maninah a kisia ding a bawlsa, hehna a thuak beelte a lungneemna tawh a thuak leh, bang gen ding a om lai hiam? A vangliatna a lah nading a masa a bawlsa hehpihna a ngah belte ahi Judah mipawl sung pan bek hi lo, Gentailte sung panin zong hong sap eite tungah a kicing vangliatna a kilat nadingin hong bawl leh, bang gen ding a om hiam? Hosea Lai Siangtho sungah: “Keima mi ahi lote, ‘Keima mite hi,’ ka ci ding hi; Ka ngaih loh mi in, ‘Ka ngaih mi hi,’ ka ci ding hi. Note in, ‘Keima mite na hi kei uh hi,’ a cihna munah, ‘A nungta Pasian’ tapate kicihna a ngah ding uh hi,” ci-in a gen bang ahi hi. Isaiah in Israel thu panin, “Israel mipawlte in tuipi sehnel zahin a tam hangin a kimkhat bek in gupna a ngah ding uh hi. Bang hang hiam na cih uh leh, Topa in leitung ah ama thukhenna kipsak a, manlangin a zo ding hi,” ci-in a kiko hi. Isaiah in:, “Vantung Topa in eite ading khaici hong omsak lai hi kei leh, Eite in Sodom leh Gomorrah khuate i bang zo ding hi,” ci-in a masa-a a gen bang ahi hi. Tua bang ahih leh, bang i ci gen ding hiam? Dikna a delh lo Gentailte in tua-upna tawh kipawl dikna a cihnopna ahi dikna a tung uh hi. Ahih hangin dikna thukhamna a delh uh Israelte in tua dikna thukham ah a tung zo kei uh hi. Bang hangin tung zo lo ahi uh hiam na cih uh leh, thu-upna tawh a delh kei uh hi, thukham gamtatna tawh a delh uh hi. Lai Siangtho sungah a kigelh mah bangin, amaute in sui-a kipuk na’ng suang a sui kha uh hi. A kigelhna in: “Ngai un, sui-a kipuk khak na’ng suangpi leh mawhsak na’ng suangpi Zion mual tungah ka koih hi. Tua suangpi a um mi in zumna a thuak kei ding hi,” ahi hi. Ute naute aw, Israel mite in gupna a ngah nadingun ka lungsim in deihin, Pasian kiangah thu ka ngetsak hi. Amaute in Pasian lamah lungsim lian a neih uh hangin, lungpilna man ahi kei hi ci-in amaute ading teci ka pang hi. Bang hang hiam na cih uh leh, amaute in Pasian’ dikna thei loin, amau dikna kipsak nading a zong uh ahih ciangin, Pasian’ dikna thu a mang kei uh hi. Bang hang hiam na cih uh leh, thu-um mi khempeuh in a dik nadingun thukham’ mong in Zeisu ahi hi. Moses in, “Thukham tawh a kipawl dikna thu a zuite in, tua dikna thu bangin a nungta ding hi,” ci-in a gelh hi. Ahih hangin upna tawh kipawl dikna in: “Vantungah kua in a kahto ding hiam? A thuk sungah kua in a kumsuk ding hiam?” ci-in na lung sungah na ngaihsun kei un a ci hi. Tua bang a cihna in, Khazih hong paipihsuk dingin kua in a kahto ding hiam? Khazih sihna pan a thosak dingin a thuk sungah kua in a kumsuk ding hiam? a cihnopna ahi hi. Bang a ci hiam? Tua thu in nang tawh kinai-in na kam sungah, na lungsim sungah a om hi; ka hilh uh upna thu a cihnopna hi. Bang hang hiam na cih uh leh, “Zeisu in Topa ahi hi” ci-in na kam in mang a, Pasian in amah sihna pan a thosak kik zo hi ci-in na lungsim sungah na up leh, gupna na ngah ding hi. Dikkisakna ngah nadingin lung sungah ki-um hi. Gupna ngah nadingin kam tawh kipulak hi. “Amah a um mi peuhmah in zumna a thuak kei ding hi,” ci-in Lai Siangtho sungah a kigelh hi. Bang hang hiam na cih uh leh, Judah mipawl, Grik mipawl teeltuam a nei kei hi. Mi khempeuh a uk Pasian khat bek om a, ama kiangah thu a ngen mi khempeuh in a kicing hehpihna a ngah ding uh hi. Bang hang hiam na cih uh leh, Topa’ min tawh thu a ngen mi khempeuh in gupna a ngah ding uh hi. Ahih hangin a thu-um lo mite in bang a ci thunget ding uh hiam? A thu a zak ngei loh uh Topa bang ci a um thei ding uh hiam? A hilh mi om kei leh, bang ci a za thei ding uh hiam? A kisawl kei leh, bang ci a hilh thei ding hiam? Lai Siangtho sungah a kigelh mah bangin, “Nopna Lungdamna Thu hong zasak mite’ khe in bang zahin kilawm ahi hiam!” Ahih hangin mite khempeuh in Lungdamna Thu a ngai kei uh hi. Bang hang hiam na cih uh leh, kamsangpa Isaiah in, “Topa aw, kote thuhilhna kua in um ahi hiam?” a ci hi. Tua ahih ciangin upna in thu zakna hangin a piang hi. Zakna in zong Khazih’ thu hangin a piang hi. Ahih hangin amaute in za hilo ahi uh hiam? A mantakpi a za uh hi: “Amaute aw un leitung khempeuh ah a zel zo hi; Amau thu un leimong dongin a tung zo hi.” Khatvei ka cih-inah, Israel mite in hih thu thei lo ahi uh hiam? Moses in: “Mipawl ahi lo mite hangin note in een’na lungsim na neih nadingun ahi zongin, Pilna nei lo mipawlte hangin na heh nadingun ahi zongin ka bawl ding hi,” a ci masa hi. Isaiah in hang takin: “Kei hong zong lo mite in hong mu zo uh hi, Kei thu hong kan lo mite tungah ka kilang zo hi,” a ci hi. Israel mipawlte thu panin, “Thungai lo, thu seel thei mipawlte lamah ni khat tawntung ka khutpeek ka zan hi,” a ci hi. Tua bang ahih leh, Pasian in ama mipawlte a paaikhia hiam? A paaikhia kei hi, ka ci hi. Keimah in zong Abraham’ suan, Benjamin’ mipawl Israel mi ka hi hi. Pasian in a theih kholh ama mite a paaikhia kei hi. Kamsangpa Elijah in, “Topa aw, amaute in nangma kamsangte a that zo uh hi; nangma biakna taute a sugawp zo uh hi. Kei guak ka om lai hangin keima nuntakna hong zong uh hi,” ci-in Pasian mai-ah Israel mite lang khatah thu a ngen hi cihna Lai Siangtho thu thei lo na hi uh hiam? Pasian in zong ama kiangah bang ci gen ahi hiam? “Baal mai-ah a khukdin’ lo mi tul sagih keimah ading ka om sak zo hi,” a ci hi. Tua mah bangin tu lai takin hehpihna hangah a kiteelsa kimkhat a om lai uh hi. Hehpihna hangah ahih leh, gamtatna hang ahi kei hi. Tua bang ahih kei leh, hehpihna in hehpihna ahi kei hi. Tua bang ahih leh, bang ci ahi hiam? Israel mite in a zon’ uh hangin a mu kei uh hi. A teelsate bek in a ngah uh hi. A om lai mite in a lung a khauhsak uh hi. Tua mah bangin Lai Siangtho sungah, “Pasian a mu thei lo mittang ahi zongin, khua a za thei lo bil ahi zongin, a ihmu nuam lungsim tua mite tungah tuni dongin a pia hi,” ci-in a kigelh hi. David in: “Amau’ ankuang un amau tungah tehlop ahi zongin, thangzak ahi zongin, kisuih khak a, kipukna ahi zongin, daantatna ahi zongin hi ta hen. Amaute in a muh zawh loh nadingun amau mittang uh mial ta hen. Amau nung uh a tawntungin na kulsak in,” ci-in a gelh hi. Tua bang ahih leh, amaute a puk dongun a sui kha uh hiam? Tua bang hi zenzen lo hi. Amau sungah een’na om nadingin, amaute a pukna hangin Gentailte in gupna a ngah uh hi. Amau pukna un leitungmite hauhna hi a, amau tan’na un Gentailte hauhna ahih leh, amaute kicin’na un hauhna tamzaw piang sak ding hilo ahi hiam? Gentailte ahi note kiangah kong gen hi. Gentailte’ sawltak ka hi ahih ciangin, ka ci ka sa pawlte lung sungah een’na piang sakin lam khatpeuh mah tawh, kimkhat ka gup zawh khak nadingin, ka za ka phat hi. Tua mite kipaih khiatna un leitung mite’ kilem kikna a pian’sak leh, amau kikoihcin’na un sihna pan thawhkikna hilo ahi hiam? A kipia masa buhneel a sian’tho leh, a lompi in a siangtho ding hi. A zung a sian’tho leh, a hiangte zong a siangtho ding uh hi. A hiang kimkhat in a kitan khit ciangin gamlak oliv hiang ahi nangmah in, amau pum tungah pehin kibulh a, hiangte tawh kibangin oliv sing thazung tui zomin na neek leh, a kitankhia hiangte kosia-in na kisathei kei in. Na kisaktheih leh, nangmah in a zung na pua kei hi, zung in nang hong pua zaw hi. Tua ahih ciangin nang in, “Kei hong peh nadingin hiangte a kitan hi,” ci-in nong ci ding hi. Hi ta hen. Upna lungsim nei lo ahih ciangun amaute a kitan uh a, nangmah in na upna hang bekin na kip hi. Na kisathei kei in, na kihta in. Bang hang hiam na cih leh, Pasian in a hiang taktakte pammaih a sak kei leh, nangmah zong pammaih hong sa ding ahi kei hi. Tua ahih ciangin a puk mite tungah a thukhenna ahi zongin, ama hehpihna sungah na kip leh, nangmah tungah Pasian’ hehpihna ahi zongin, hih thu nih na ngaihsun in. Ama hehpihna sungah na kip kei leh, phuk tanna na thuak ding hi. Amaute in zong amau up lohna sungah a om kei uh leh, a kung tungah zom kikin peh kik nading thu a ngah ding uh hi. Bang hang hiam na cih uh leh, Pasian in amaute khatvei a peh kik thei hi. Bang hang hiam na cih uh leh, gamlak oliv kung taktak panin hong sat tanin, oliv kung hoih tungah ngeina zui loin nang hong kipeh leh, hiang taktakte ahi uh tua mite in amau oliv kungah zomin peh kik nading a ngah zaw ding uh hilo ahi hiam? Ute naute aw, na kisaktheih loh nadingun Gentailte khempeuh hong lut khit matengin, Israel mite tungah khuamialna tawm a tung hi ci-in hih thuthuk thei loin na om ding uh ka ut kei hi. Tua ahih ciangin Lai Siangtho sungah a kigelh mah bangin Israel mite khempeuh in gupna a ngah ding uh hi. Tua a kigelhna in: “Zion Mual tungah Gumpa hong pai ding a, Pasian zahtak lohna Jakob’ suante lak pan a lakhia ding hi. Amaute mawhna ke’n ka lakkhiat khit ciangin, Amau tungah ka piak thuciamna in, tua thu ahi ding hi” a ci hi. Amaute in Lungdamna Thu pan note hangin galte ahi uh hi. Teelkhiatna thu panin pute pate hangin a ki-it mi ahi uh hi. Bang hang hiam na cih uh leh, Pasian’ hehpihna thupha leh hong sapna in a thu a kidok kik ngei kei hi. Note in nidang lai-inah Pasian’ thu na man’loh uh hangin, tu-in amau thuman’lohna hangin hehpihna na ngah uh mah bangin, note ngahsa hangah amaute in zong hehpihna a ngah nadingun, tu-in thungai loin a om uh hi. Pasian in mi khempeuh hong hehpih theih nadingin mi khempeuh thungaih lohna sungah a khumcip hi. Pasian’ hauhna leh pilna leh siamna in bang zahin thuk hiam! A thukhennate kuamah in thei zo lo hi! A paina lampi zui-in i zon’ hangin i mu zo kei hi! Topa’ lungsim kua in a thei ngei hiam? Amah tawh a vaihawm kua ahi ngei hiam? A thukkik dingin na khat peuhpeuh kua in Pasian tungah pia ngei hiam? Bang hang hiam na cih uh leh, na khempeuh in amah panin ahi zongin, amah hangin ahi zongin, amah adingin ahi zongin a piang uh hi. A tawntungin amah in minthan’na ngah ta hen. Amen. Tua ahih ciangin ute naute aw, a hing biakna, a siangtho leh Pasian’ deihna tawh kituakin, na pumpi uh Pasian kiangah na piak nadingun Pasian’ hehpihna tawh kong thuum hi. Bang hang hiam na cih uh leh, tua bang hihna in a kilawm biakna nasepna ahi hi. Hih leitung mite bangin na om kei un. A hoih, a deihhuai, a kicing ahi Pasian’ deihna in bang ahi hiam ci-in na khen theih nadingun na lungsim uh bawl thakin, na lim uh na kilamdangsak un. Kei tunga hong kipia hehpihna thupha hangin note’ kiangah kong gen-inah: No-le-no na kingaihsut ding zah valun kithupi ngaihsut kei un; Pasian in mikim tunga hong hawmsak upna zah tawh kizui-in a man thukhenna tawh nomau ciat kingaihsun un. Bang hang hiam na cih uh leh, pumpi khat sungah na tampi i nei a, tua nate in nasepna-za khat guak a neih loh uh mah bangin, a tampi ahi eite in Khazih sungah pum khat bek i hi a, i vekpi-in pumpi’ nate i hi hi. Hong piak hehpihna thupha mah bangin eite in nam tampi hehpih phatna i ngah tek a, kamsangpa za i ngah leh, upna zah bangin kamsang na sem ni. Nasepna za i ngah leh, tua na sem ni. Thuhilh mi in thuhilh na sem ta hen. Hansuah mi in mi hansuah na sem ta hen. Hehpihna a pia mi in lungkimin pia ta hen. A uk mi in hahkatin uk ta hen. Midang a hehpih mi in hehpihna lungsim tawh pia ta hen. Simtat loin itna lungsim om ta hen. Gitlohna mudahin gamtat hoih beel un. Ute naute itna panin, khat leh khat dawmin na ki-it ta un. Minphatna panin midangte na pumpi uh sangin na phat zaw un. Nasep hahkat un la, thadah kei un. Lungdamna tawh Topa’na na sem un. Lawpin lungdam un. Gimna hong tun’ ciangin thuak un. Thungen tawntung un. Misiangthote a sapna bangun na hawm un. Zindo na hahkat un. No hong bawlsiate thupha na pia un. Hamsiat loin thupha na pia un. Mi lungdamte tawh kibangin na lungdam khawm un. A kapte tawh na kap khawm un. Khat leh khat na lungsim uh na kituaksak un. Min san’na na lunggulh kei un. Lung kiniamsakna deih un. Kei mipil mi ka hi ci-in kingaihsun kei un. Midangte in note hong bawlsiat bangin na thuk kei un. Mi khempeuh mai-ah a kilawm gamtatna na hanciam un. Note in na hih zawh zahun mi khempeuh tawh na kilem un. Ka itte aw, midangte in note tungah hong khialh leh, a mawhna na thuk kei un. Pasian’ hehpihna na pia un. Bang hang hiam na cih uh leh, “Thukkikna in keima aa ahi hi. A mawhna tawh kituakin ka thuk ding hi, Topa in a ci hi,” ci-in Lai Siangtho in a gen hi. Tua tham loin, “Na gal a gil a kial leh, an na vaak in. Tui a duh leh, a dawn ding na pia in. Tua bangin na bawl leh, ama lu tungah mei-amte a koih na hi ding hi. Gitlohna na lel kei un, gamtatpha tawh gitlohna na zo un. A hong uk mangte ukna khempeuh na mang un. Bang hang hiam na cih uh leh, Pasian in thu a piak kei leh, ukna aana a nei kei ding uh hi. Ukna za a nei khempeuh Pasian piak za ahi hi. Tua ahih ciangin ukna a nial mi in Pasian’ thu a nial ahi hi. Tua bang a nialte in mawhna daan a thuak ding uh hi. Bang hang hiam na cih uh leh, ukna za a neite in, gamtat hoih mite kihtak ding ahi kei uh hi, gamtat hoih lote kihtak ding ahi uh hi. Ukna za a neite na kihtak nop kei leh, ahoihin gamta in. Tua bang na hih leh ukna neite kiangah pahtawina na ngah ding hi. Amah in nang noptuam nadinga Pasian’ na sem ahi hi. A hoih lo a gamta mi na hih leh, na kihta in. Bang hang hiam na cih leh, amah in a valkhong a, namsau tawi ahi kei hi. Gamtat hoih lo ahihte a mawhna daan pia ding Pasian’ sawltak ahi hi. Tua ahih ciangin, daan kihtakna hang bekin a mang na hi kei uh hi; nomau kitheihna lungsim hangin na mang uh hi. Tua thu hangin phiangsiah na pia uh hi. Bang hang hiam na cih uh leh, amaute in Pasian’ sawltak ahi uh ciangin, tua nasepna a tawntung a sem uh hi. Mi khempeuh ngah ding a kilawm bangin na pia un. Phiangsiah ngah ding a kilawmte phiangsiah na pia un. Kihtak ding a kilawmte na kihta un. Zahtak ding a kilawmte na zahtak ta un. Khat leh khat ki-itna longal bangmah na kibasak kei un. A lawmte a it mi in Thukham a zui khin zo hi. Bang hang hiam na cih uh leh, “Mi’ zi tawh na mawh kei in, Mi na that kei in, Mi’ na na gu kei in, Mi’ na na deihgawh kei in, a cihna thukhamte akipan adang thukham khempeuh in, “Na pumpi na it bangin na lawmte na it in,” cihna thukham khat sungah a om uh hi. Itna in lawmte a siasak thei kei hi. Tua ahih ciangin itna in thukham zuihna thu kicin’na ahi hi. Tua tham loin, eite hong gupna in eite upna ni tawh a nai sangin, tu-in hong naizaw ahih ciangin note in ihmutna pana khan’lawh nading hun hong tung zo hi ci-in na thei un. Zan a bei dektak hi, sun hong nai zo hi. Tua ahih ciangin khuamial gamtatna paaikhia-in khuavak galnan’na silh ni. Pawikhamna, guih theih zu kham luatna ahi zongin, hukna, lanna kihhuaina ahi zongin, kitotna, kidemna ahi zongin tangin, sun laitak mah bangin kilawmin gamta ni. Topa Zeisu Khazih silh un la, na pumpi huaiham na’ng uh note in na ngaihsun kei un. Upna neu mi na mang un. Ahih hangin up khialh nading thute tua mi tawh na kikum kei un. Mi khat in an pawl khempeuh neek theih nadingin upna a nei hi. Ahih hangin mi a thaneem mi in gah leh teh bek a ne hi. An pawl khempeuh a ne mi in a ne lo mi simmawh kei hen. A ne lo mi in a ne mi dongtel kei hen. Bang hang hiam na cih uh leh, Pasian in tua pa a mang zo hi. Mi dang’ sawltak a dongtel nangmah in kua mi na hi hiam? Tua pa in a Topa thu dotna-ah a kip ahi zongin, a kip lo ahi zongin ahi ding hi. Ahih hangin a Topa in tua pa kipsak theihna a nei ahih ciangin a kipsak ding hi. Mi khat in ni khat sangin ni khat a manpha zaw hi ci-in a ciamteh hi. Mi khat in ni khempeuh a kibang hi ci-in a ciamteh thei hi. Mikim in ama lungsimah pha a sak bang hi ta hen. Ni a tang mi in Topa hangin a tang hi. An a ne mi in Topa hangin an a ne hi. Bang hang hiam na cih uh leh, amah in Pasian’ hehpihna a phat hi. An ne lo mi in Topa hangin ne lo a, Pasian’ hehpihna a phat hi. Bang hang hiam na cih uh leh, eite lakah kuamah in ama ading a nungta kei hi; kuamah in ama ading a si kei hi. Eite i nuntak leh, Topa ading i nungta hi. Eite i sih leh, Topa ading i si hi. Tua ahih ciangin eite i nungta ahi zongin, i si ahi zongin, Topa’ aa i hi hi. Khazih in misite leh mi nungtate’ Topa a suah nadingin sihna thuak a, a sih khit ciangin a hing kik hi. Nang in bang hangin na u na nau dongtelin thu na khen hiam? Na u na nau bang hangin na simmawh hiam? Eite khempeuh in Pasian’ thukhenna tokhom mai-ah i ding ding hi. Bang hang hiam na cih uh leh, Lai Siangtho sungah: “Ka nuntak bangin ka mai-ah mi khempeuhte a khukdin’ ding uh a, Leii khempeuh in Pasian a phat ding uh hi, ci-in Pasian in thu a pia hi,” ci-in a kigelh hi. Tua ahih ciangin eite khempeuh in eima thu tekah Pasian’ thudotna i thuak ding hi. Tua ahih ciangin eite in tu-a kipanin khat leh khat thu kisuah loin om ni. Unau khat puk nading ahi zongin, a khialh nading ahi zongin hih loh nadingin na ciamteh zaw un. Bangmah in a pian’pih tawh a kihhuai kei hi, keimah in Topa Zeisu muangin thei-in ka lungkim hi. Ahih hangin a kihhuai a sa mi khat a om leh, ama tungah a kihhuai hi. Na u na nau in nang an nekna hangin a dah leh, nang in itna tawh na gamta kei hi. Amah tang ding Khazih a si khin mi khat na an nekna tawh na siasak kei in. Tua ahih ciangin na hih theihna uh ah gensiat nading omsak kei un. Bang hang hiam na cih uh leh, Pasian’ Gam in an nekna, tui dawnna-ah a kip kei hi. Kha Siangtho hanga kingah dikna, kilemna leh lungdamna-ah a kip hi. Tua bang gamta a, Khazih’ na a sem mi in Pasian lungdam sak a, mite mai-ah minphathuai ahi hi. Tua ahih ciangin kilem nading, khat leh khat kikipsak nading tawh kizom nate zui ni. An nekna hangin Pasian bawlna na susia kei un. An khempeuh a siangtho hangin midangte a puk nading a ne mi in a khial hi. Sa nekna, leenggahtui dawnna-a kipan na u na nau puk nading na khempeuh tan’huai hi. Na neihsa na upna, nangmah ading Pasian mai-ah na om sak in. A man’sa thu-ah amah le amah a kimawhsak lote in mi hampha ahi uh hi. A um khial mi in a nek leh, upna lungsim nei loin ne ahih ciangin amah le amah a kimawhsak ahi hi. Upna lungsim tawh kituak lo gamtatna khempeuh in mawhna ahi hi. A thahat eite in eite deih bang zui loin thahat lote a thanemna i thuakpih ding hi. Eite khempeuh in i lawmte noptuam na’ng ngaihsunin, amah i kipsak nading ama deihna zui ni. Bang hang hiam na cih uh leh, Khazih in zong ama deihna zui lo a, Lai Siangtho sungah a kigelh mah bangin, “Nang hong simmawhte a simmawhna kam in keima tungah hong tung hi,” a ci hi. Eite in Lai Siangtho pan i ngah thuakzawhna leh hehnepna hangah lawpna i neih nadingin, Lai Siangtho-ah nidang lai-a a kigelhsa thu in eite hong thu hilhna-in a kigelh hi. Note in eite Topa Zeisu Khazih’ Pa ahi Pasian, lungsim kituakin na kam uh tawh na phat nadingun, Khazih Zeisu deih bangin khat leh khat kilung tuakin na om nadingun, kithuakzawhna leh hehnepna a pia Pasian in hong hehpih ta hen. Tua ahih ciangin Khazih in note hong man’ mah bangin note in Pasian’ minphatna kilangsakin, khat leh khat na kimang un. Khatvei amah in: “Gentailte aw, note in ama mipawlte tawh na lungdam khawm un,” a ci hi. Khatvei leuleu: “Gentailte khempeuh aw, Topa phat un, mipawl khempeuhte in amah phat ta un,” a ci hi. Kamsangpa Isaiah in: “Jessi bul meeng in Gentailte a uk ding mi ahi ding hi. Gentailte in amah a muang ding uh hi,” a ci hi. Note in Kha Siangtho’ vangliatna hangah lametna pha tawh na dim nadingun, upna nei-in lungdamna, noptuamna a pawlpawlte tawh na dim nadingun, muan’na hong pia Pasian in hong pia ta hen. Ute naute aw, note in lungsim pha tawh dimin, pilna tawh na dim uh a, khat leh khat thu na kihilh thei uh, ci-in ka um hi. Kha Siangtho in hong sian’ thosak deihhuai biakna ahi Gentailte pia dingin, keimah in Pasian’ Lungdamna Thuhilh na semin Gentailte tungah Khazih’ nasem ka hih nading, Pasian in kei hong piak hehpihna thupha hanginah ute naute aw, note hong phawksak kikin, lau loin lai ka gelh hi. Tua ahih ciangin Pasian tawh a kituak nate hangah note lamsang ah keimah in Khazih Zeisu suangin ka kisathei hi. Gentailte in kam tawh ahi zongin, gamtatna tawh ahi zongin, thungaih nading Khazih in lim leh nalamdang vangliatna leh Kha Siangtho’ vangliatna lakin keima tungah a bawl nate bek ka gen ngam hi. Tua ahih ciangin Jerusalem khua panin Ilirikum gam dongin, kimkot mun khempeuh ah, Khazih’ Lungdamna Thu a vekpi-in ka hilh khin zo hi. Ahi hi. Midangte khuamphuhna tungah ka lam loh na’ngin, Khazih’ min a kizak ngeilohna munah Lungdamna Thu hilh dingin lungsim takpi tawh ka hahkat hi. Lai Siangtho sungah: “Tua mi thu, kuamah in a lah ngei loh hangin amaute in a mu ding uh hi. A za ngei lo mite in a thei ding uh hi,” ci-in a kigelh hi. Tua ahih ciangin note omna munah kong pai theih loh nading tam veipi hong kikham zo hi. Tu lai takin hih munte-ah ka hih ding om lo ahih ciangin note omna-ah kong pai ding pen sau veipi-in deihin, Spain ka pai ciangin lampi-ah note tawh kimu-in, note tawh kikhawl khawmin, deihna teng a kicin’ khit ciangin tua gamah note hong khakna thupha ka ngah ding hi ci-in ka lamen hi. Tu-in ahih leh, misiangthote vaakin Jerusalem khuapi-ah ka pai ding hi. Bang hang hiam na cih uh leh, Makedonia gam mite leh Akhaia gam mite in Jerusalem khuapi-ah misiangtho zawngte sum hawm uh a, lungsim takpi tawh a pia zo uh hi. Ahi hi, lungsim takpi a nei uh ka cih hangin amaute in tuate tungah leiba nei-in a kingaihsun uh hi. Bang hang hiam na cih uh leh, Gentailte in Kha Siangtho piak thuphate Judah mite tawh a ngah khawm uh ahih leh, leitung sum pia-in amau zong Judah mite a vaak ding uh a kilawm hi. Tua ahih ciangin hih na ka sep a, hih na piakna lim takin ka koih khit ciangin, note kiang tawnin Spain gamah ka pai ding hi. Note omna mun kong tun’ ciangin a kicing Khazih’ thupha tawh kong pai ding, ke’n ka thei hi. Nopna hong pia Pasian in note khempeuh tawh omkhawm ta hen. Amen. Kenkhrea khua-ah a om pawlpi nasem numei ahi, i sanggamnu Foebe note kiangah kong tungsak hi. Misiangthote in ahih ding a kilawm bangin, Pasian hangah tua numei na tungsak un la, amah huh dinga a kisapnate khempeuh na huh ta un. Bang hang hiam na cih uh leh, amah in mi tampi ahi zongin, keimah ahi zongin hong huh mi ahi hi. Kei tawh kibang Khazih Zeisu’ nasem khawm Prisilla leh Akuila na hopihsak un. Amaute in keima nuntakna tang ding amau ngawng a dawh ngamte ahi uh hi. “Amau in hehpihna a nei uh hi,” ci-in kei guak hi lo, Gentail pawlpite khempeuh in a phat uh hi. Amau inn sungah a om pawlpi zong na hopihsak un. Asia gamah Khazih ading a gah masabel ka it Epainetas zong na hopihsak un. Note nasem a hahkat Mari na hopihsak un. Kei tawh thongkia khawm, keima behte ahi Andronikas leh Junias zong na hopihsak un. Amaute in sawltak lakah maiphatna a ngah mi ahi uh a, kei mai-ah Khazih’ sunga om mite ahi uh hi. Pasian hangah ke’n ka it Amflias na hopihsak un. Kote tawh Khazih’ nasem khawmpa Urbanas leh ka it Stakhus zong na hopihsak un. Nungzui taktak ahi Epelles leh Aritobulus’ innkuante zong na hopihsak un. Ka beh Herodion leh Narkissas’ innkuante lakah Topa nung a zuite zong na hopihsak un. Topa’ nasemte ahi Trifana leh Trofosa na hopihsak un. Topa’ nasem ahi it ding a kilawm numei Persis zong na hopihsak un. Topa’ teelsa Rufas leh a nu ahi, ke’n zong nu ka cih, na hopihsak un. Asinkritas, Flegon, Hermes, Patrobas, Hermas akipan, amaute tawh a omkhawm sanggamte na hopihsak un. Filologas, Julia, Nereas leh a sanggamnu leh Olimpas akipan, amaute tawh a omkhawm misiangthote na hopihsak un. Khat leh khat siangtho kinapna tawh na kihopih un. Khazih’ pawlpite khempeuh in note hong hopih uh hi. Ute naute aw, na san’sa uh thuhilhna tawh kituak lo, kikhenna leh pukna a bawl thei mite ciamteh un la, tang un, ci-in kong thuum hi. Bang hang hiam na cih uh leh, eite Topa Khazih’ na sem loin amau gilpi na bek a sem uh a, kamsiam leh kamzol tawh a pha mite a kheem thei uh hi. Note’ thuman’na in mi khempeuhte lakah kithang ahih ciangin, note hangin ka lung a dam hi. Ahih hangin note in thuhoih lamsang ah lungpilna nei-in, gitlohna lamsang ah mawhna a om loh nading ka hong deih hi. Nopna hong pia Pasian in a sawt loin note khe nuai uh ah Satan a bawlsia ding hi. Eite Topa Zeisu Khazih’ hehpihna thupha in note tungah om ta hen. Kei tawh na a semkhawm Timoti akipan ka behte ahi uh Lukias, Jason leh Sosipater-te in note hong hopih uh hi. Hih lai a gelh keimah Tertias in Topa hangin kong hopih hi. Kei ahi zongin, pawlpi khempeuh ahi zongin, zin hong do thei Gaias in note hong hopih hi. Khuapi dangka keem Erastas leh i sanggampa Kuartas-te in note hong hopih uh hi. ( I Topa Zeisu Khazih’ hehpihna thu note khempeuh tawh omkhawm ta hen.) pilna tawh a dim Pasian, Zeisu Khazih hangin a tawntungin minthan’na ngah ta hen! Amen. Pasian’ deihna hangin Khazih Zeisu’ sawltak za-ah hong koih, keimah Paul leh i sanggampa Sosthenes in Khazih Zeisu hangin mawhna tawh kipelh, misiangtho dinga hong koih ahi Korin khua ah a om Pasian’ pawlpite akipan, mun khempeuh ah eite Topa bek hi lo amau Topa zong ahi, Topa Zeisu Khazih kiangah thu a ngen mi khempeuhte kiangah thu kong zasak uh hi. Topa Zeisu Khazih leh i Pa Pasian kiang panin hehpihna thupha leh nopna nomau tungah hong tung ta hen. Khazih’ thu tecipan’na nomau lakah a kip ahih ciangin note in amah hangah thu genna leh lungpilna a kipan, na khempeuh na kicing uh a, Khazih Zeisu hangah no hong piak thupha hehpihna suangin, note hangin ka Pasian’ hehpihna ka phat tawntung hi. Tua ahih ciangin note in i Topa Zeisu Khazih hong kilat ding ngakin na om lai takun hong piakna thupha khat beek na sam kei uh hi. Tua Topa in eite Topa Zeisu Khazih’ Ni-inah mawhsak nading tawh na kipelh nadingun a tawp dongin no hong kipsak ding hi. I Topa ahi ama Tapa Zeisu Khazih tawh kipawlna sungah hong sam Pasian in ciam pelh mi ahi kei hi. Ute naute aw, note khempeuh in kam kikhat na gen uh a, kikhenthang loin, lungsim kikhatin, kiciamtehna kikhatin, kicing takin na om nadingun i Topa Zeisu Khazih’ min tawh kong thuum hi. Bang hang hiam na cih uh leh, ka ute ka naute aw, note lakah a kitawng om hi ci-in Khlo-e te innkuanpih kimkhat in hong zasak uh hi. Note in, “Kei Paul’ mi ka hi, kei Apollos’ mi ka hi, kei Kefas’ mi ka hi, kei Khazih’ mi ka hi,” na ci tek uh ka cihna ahi hi. Khazih a kikhen hiam? Paul in note tang dingin singlamteh tungah a si hiam? Ahih kei leh, Paul’ min tawh kibaptaiz na hi uh hiam? Krispas leh Gaias longal note lakah kuamah ka baptaiz kei hi ci-in Pasian’ hehpihna ka phat hi. Tua ahih ciangin, “Paul’ min tawh baptaizna ka ngah hi,” ci-in kuamah in a gen thei kei ding hi. Stefanas-te innkuan zong ka baptaiz hi. Midangte ka baptaiz lam ka thei kei hi. Khazih in baptaiz dingin kei hong sawl lo hi; Lungdamna Thu hilh dingin hong sawl hi. Ahih hangin Khazih’ singlamteh a mawkna ahih loh nadingin kam pilna tawh hilh ding hong sawl kei hi. Bang hang hiam na cih uh leh, siatna a thuakte’ ading singlamteh thu in haina thu ahi hi. Gupna a ngah eite ading tua thu in Pasian’ vangliatna ahi hi. Bang hang hiam na cih uh leh, Lai Siangtho sungah: “Pilna a neite a pilna ka sugawp ding hi. Lungpil a neite a lungpilna ka sugawp ding hi, Lungpil a neite a lungpilna ka paaimang ding hi,” ci-in a kigelh hi. Lungpil mi koi-ah a om hiam? Laithei mi koi-ah a om hiam? Hih leitung thu kidong thei mi koi-ah a om hiam? Pasian in leitung pilna a haisak hilo ahi hiam? Bang hang hiam na cih uh leh, Pasian’ vaihawm bangin leitung mite in amau lungpilna hangah Pasian thei lo uh ahih ciangin, Pasian in a umte thuhilhna hai tawh a gup nading lungsim a nei hi. Judah mite in nalamdang a ngen thei uh hi. Grik mite in lungpilna a zong thei uh hi. Eite i hih leh, singlamteh tungah a si Khazih’ thu i hilh hi. Tua thu in Judah mite ading kipukna ahi hi. Gentailte ading haina ahi hi. Ahih hangin Judah mi hi taleh, Grik mi hi taleh, a kisamte adingin Pasian’ vangliatna leh Pasian’ pilna ahi hi. Bang hang hiam na cih uh leh, Pasian’ haina in mite’ pilna sangin a pilzaw hi; Pasian’ thanemna in mite’ thahatna sangin a hatzaw hi. Ute naute aw, note hong sapna thu na ngaihsun un. A hong sap mite lakah leitung pilna a nei mi tampi a om kei uh hi; minthan’na a nei tampi a om kei uh hi; a nam liante tampi a om kei uh hi. Pasian in lungpilte zumsak nadingin leitung mihaite a teelkhia hi. A thahatte a zumsak nadingin leitungah a thanemte a teelkhia hi. A omte a man’than sak nadingin leitungah a gina lote leh a kigina sim lote akipan, a om lote nangawn a teelkhia hi. Tua ahih ciangin Pasian mai-ah kuamah a kisathei ding a om kei hi. Tua Pasian hangin note in Khazih Zeisu sungah na om uh hi. Tua Khazih Zeisu in eite ading Pasian kiang pan pilna, dikna, sian’thona leh tatkhiatna hong suak zo hi. Tua ahih ciangin Lai Siangtho sungah a kigelh mah bangin, “A kisatheite in Pasian hangah kisathei ta hen,” a ci hi. Ute naute aw, note’ omna-ah kong pai ciangin kamsiamna leh pilna tawh Pasian’ teci thu note kiangah gen dingin hong pai ka hi kei hi. Bang hang hiam na cih uh leh, note lakah ka om lai takin Zeisu Khazih’ thu leh ama singlamteh thu longal, thudang ka ngaihsut loh nadingin ka lungsim ka hanciam hi. Note tawh ka omkhawm lai takin thanemin, lau-in, liingin ka om hi. Note’ upna un mite’ pilna-ah kip loin Pasian’ vangliatna-ah a kip nadingin, ka kam leh ka thuhilhna in mite’ pilna tawh kipawl zolna kam ahi kei hi; Kha Siangtho hong lahna vangliatna ahi hi. A kicing mite kiangah pilna thu i gen hi. Ahih hangin leitung pilna thu ahi zongin, a mangthang ding hih leitung ukte’ pilna thu ahi zongin ka hilh kei uh hi. Leitung pian’ ma-in eite minthan’ nadingin Pasian in a vaihawm kholh pilna ahi, Pasian’ pilna thu thukpi tawh ka hilh uh hi. Tua pilna pen leitung ukte khat beek in a thei kei uh hi. Thei uh hi leh, minthan’na Topa singlamteh tungah a that kei ding uh hi. Lai Siangtho sungah a kigelh mah bangin: “Pasian a itte adingin Pasian bawlsate in, mittang tawh kimu lo, bil tawh kiza lo, mite’ lungsim sungah a tum lo nate ahi hi,” a ci hi. Pasian in ama Kha Siangtho tawh tua nate eite hong lak hi. Bang ci hiam na cih uh leh, Kha Siangtho in Pasian’ thu a thukpi dongin na khempeuh a zong hi. Mi sungah a om kha longal mi khatpeuh tawh kipawl lungsimte kua in a theithei ding hiam? Tua mah bangin Pasian’ Kha Siangtho longal Pasian’ nate a thei kuamah a om kei hi. Ahih hangin eite in leitung tawh kipawl Kha i ngah kei hi; Pasian in aman ngen loin hong piakte i theih nadingin Pasian kiangpan hong kipia Kha i ngah zo hi. Tua nate kote in mi pilna hong hilh kam tawh ka gen kei uh hi; Kha Siangtho in hong hilh kam tawh kha thute khamite kiangah ka gen uh hi. Kha Siangtho a nei lo mi in Pasian’ Kha Siangtho’ thute a mang kei hi. Bang hang hiam na cih uh leh, tuate haina a sa a, tua thute Kha Siangtho bek tawh kikhentel thei ahih ciangin amah in a thei zo kei hi. Kha Siangtho a nei mi in na khempeuh khen thei a, amah ahih leh kuamah in a khen thei kei hi. Topa a hilh dingin ama lungsim a thei kua ahi hiam? Eite in ahih leh, Khazih’ lungsim i nei hi. Ute naute aw, Kha Siangtho a nei mite hilh bangin note kong hilh thei kei hi; leitung lungsim a nei mite, Khazih sungah nawi ne naungeekte ka hilh bangin kong hilh hi. Note in an haizan zo nai lo na hih uh ciangin sa tawh kong vaak nai kei hi, nawizu bek kong tulh hi. Tu-in na haizan zo kei uh hi. Bang hang hiam na cih uh leh, leitung lungsim a nei mite na hi lai uh hi. Note lakah ki-en’na leh kitotna a om lai tengin leitung lungsim a nei mite hilo na hi uh hiam? Leitung mite’ ngeina bangin gamta hilo na hi uh hiam? Mi khat in, “Paul’ mi ka hi,” ci a, khat in, “Apollos’ mi ka hi,” na cih uh ciangin leitung lungsim a nei mite hilo na hi uh hiam? Tua ahih ciangin Apollos kua ahi hiam? Paul kua ahi hiam? Topa in thu a hong piak ciat mah bangin note thu up nadingin nasemte hilo ka hi uh hiam? Keimah in a suanpa ka hi hi. Apollos in tuibuakpa ahi hi. A kung a khangsakpa ahih leh, Pasian ahi hi. Tua ahih ciangin a suanpa in mi phamawh ahi kei hi; tuibuakpa in mi phamawh ahi kei hi; a khangsakpa Pasian in mi phamawh ahi hi. Ahih hangin a suanpa leh tui buakpa in mikhat ahi uh a, amau nasep bangin amau ciat in thaman a ngah ding uh hi. Bang hang hiam na cih uh leh, kote in Pasian tawh nasem khawm mi ka hi uh a, note in Pasian’ huan, Pasian’ inn na hi uh hi. Pasian in thupha hehpihna hong piaksa ka ngah bangin inn lam siampa bangin inn khuam ka phut hi. Midangte in a ban zomin a lam uh hi. Ahi zongin mi khempeuh in tua khuam tungah zomin bangci-in a lam hiam ci-in kikem ta uh hen. Bang hang hiam na cih uh leh, khuam a kiphut zo Zeisu Khazih longal innkhuam dang kuamah in phut zo lo hi. Tua khuam tungah kham, ngun, suangmanpha, sing, lopa, buhkungte a lam a om leh, mi khempeuh ahihna hong kilang khia ding hi. Bang hong ci kilang ding ahi hiam na cih uh leh, tua Ni-in mei tawh kilangsak ding hi. Mikhempeuh’ nasepna in bang ci nasepna ahi hiam ci-in mei-in a kize-et ding hi. Tua khuam tungah zomin a lam mi in a nasepna a kip leh, thaman a ngah ding hi. Mikhat a nasepna a kattum leh, tuapa a zaang ding hi. Ahi zongin ama pumpi mei katna tawh a kipelh mah bangin gupna a ngah ding hi. Note in Pasian’ biakna innpi na hi uh a, Pasian’ Kha Siangtho note sungah a ten’ lam thei lo na hi uh hiam? Mikhat in Pasian’ biakna innpi a sukgawp leh, Pasian in tua pa a sugawp ding hi. Bang hang hiam na cih uh leh, Pasian’ biakna innpi a siangtho hi; note in tua biakna innpi na hi uh hi. Kuamah peuhmah amah leh amah kikheem kei hen. Note lakah mi khatpeuh mah in hih leitung pilna ka nei hi ci-in a ki-up leh, tuapa in mi lungpil a suah nadingin mihai suak hen. Bang hang hiam na cih uh leh, leitungmi’ pilna in Pasian mai-ah haina ahi hi. Bang hang hiam na cih uh leh, Lai Siangtho sungah, “Pasian in mi pilte amaute’ zuauthu tawh a man hi,” ci-in a kigelh hi. Khat vei, “Mi pilte’ hanciamna in a mawkna hi ci-in Pasian in a thei hi,” ci-in a kigelh hi. Tua ahih ciangin kuamah in mite hangin kisathei kei hen. Bang hang hiam na cih uh leh, na khempeuh note ading ahi uh hi. Paul ahi zongin, Apollos ahi zongin, Kefas ahi zongin, leitung ahi zongin, hin’na ahi zongin, sihna ahi zongin, tu-in a omte ahi zongin, tu nung ciangin hong piang dingte ahi zongin, tuate khempeuh note ading ahi uh hi. Note in Khazih’ mi na hi uh a, Khazih in Pasian’ mi ahi hi. Khazih’ sawltakte bang leh Pasian’ thuthuk a kemte bangin midangte in kote hong ciamteh uh hen. Tua tham loin, sumpi keempa in lungsim dik a nei ding hi. Ahi zongin note akipan midangte in kei thu hong khen leh, a thukhenna thu neu ka sa hi. Ahi hi. Keima pumpi zong ke’n ka kikhen kei hi. Bang hang hiam na cih uh leh, mawhsak nadingin ka pumpi tungah bangmah ka mu kei hi. Ahi zongin tua thu hangin kei in thukhenna tawh kipelh mi ka hi kei hi. Kei thu hong khen mi in Topa ahi hi. Tua ahih ciangin khuamial lakah a kiselte leh lungsim sungah hanciamnate a kilangsak ding, Pasian hong pai dong matengin, a hun hong tun’ ma-in thu na khen kei un. Tua hun ciangin Pasian kiang pan phatna thu a ngah ciat ding uh hi. Ute naute aw, note in kote hangin, “A kigelhsa thu khen kei un,” a cihna na theih nading uh ahi zongin, kisathei-in khat muangin khat na nial loh nading uh ahi zongin, ka gensa thu note adingin keimah leh Apollos gentehin kong hilh hi. Kua in note hong kilamdang sak hiam? Na ngah loh, na san’ loh uh khat beek na nei uh hiam? Na ngah, na san’ uh leh, a sang lo, a ngah lo bangin bang hangin kisathei na hi uh hiam? Tu-in na kicing zo uh hi! Sum na hau zo uh hi! Komau tawh loin na maang uh hi. Note tawh ka man’ theih nadingin note na maang takpi le-uh teh ka ut hi. Thah dinga kikoih mite bangin, mi khempeuh nungah sawltak kote, Pasian in hong lak zo hi ci-in ka um hi. Bang hang hiam na cih uh leh, vantungmite leh leitungmite mai-ah pawikham siim mi-in hong kikoih hi. Kote in Khazih hangin mihai ka hi uh hi. Note na hih uh leh, Khazih sungah mipil na hi uh hi! Kote in mi thanem ka hi uh hi. Note na hih uh leh, thahatte na hi uh hi! Note in minphatna na ngah uh hi. Kote in zumna ka thuak uh hi! Tu hun dongin gil kialin, dangtakin, puansilh nei loin, satna leh bawlsiatna thuakin ka om uh hi. Inn zong ka nei kei uh hi. Ka khut uh tawh gimpi-in na semin ka om uh hi. Hong kikosiat ciangin thupha pia-in ka thuk uh hi. Hong kibawlsiat leh, ka thuak uh hi. Gensiatna ka thuak uh ciangin ka thuum uh hi. Tu dongin kihhuainate bangin ahi zongin, mun khempeuh ah a kiphiatkhia ninte bangin ka hi uh hi! Kong zumsak nadingin hih bangin gelh ka hi kei hi. Ka it ka tate bangin hilh nadingin kong gelh hi. Khazih sungah thuhilh thenkhat na neih uh hangin pa tampi na nei kei uh hi! Bang hang hiam na cih uh leh, keimah in Lungdamna Thu hangin Khazih Zeisu’ sungah note’ pa kong suak zo hi. Tua ahih ciangin kei’ gamtat bang na gamtat nadingun kong thuum hi. Tua hangin Topa’ nasepna pan a diktat, ka it ka ta Timoti note kiangah kong sawl hi. Mun khempeuh ah pawlpi khempeuh thu ka hilh mah bangin, kei in Khazih sungah ka gamtatnate amah in note hong phawksak ding hi. Kei hong pai lo ding ci-in mi kimkhat in a kihisak uh hi. Ahi zongin Topa’n a hong awi leh, a manlangin kong pai ding hi. Kong tun’ ciangin a kihisak mite’ kam ciamteh loin, amau vangliatna ka ciamteh ding hi. Bang hang hiam na cih uh leh, Pasian’ Gam in kampau hangin a kip kei hi; vangliatna hangah a kip hi. Koici bang deih na hi uh hiam? Ciangduai tawi-in note kiangah hong pai ding ka hi hiam? Ahih kei leh, itna lungsim leh lungnemna lungsim tawh hong pai ding ka hi hiam? Numei tawh mawhna tham lo a pa’ zi, zi-a a nei Gentailte lak nangawn ah a kiza ngei lo mawhna, note lakah a om thu a kithang zo hi. Tua banga gamtate note lakah na hawlkhiat nadingun, lungsim dahna na neih loh uh tham loin, na kisathei uh hi. Tua ahih ciangin ka pum in note tawh a kigamlat hangin ka kha in note tawh a omkhawm mah bangin, tua bang a gamta mi tungah thu ka khen zo hi. Ka thukhenna in i Topa Zeisu’ min tawh note in keima kha tawh na kikhop uh ciangin, i Topa Zeisu’ vangliatna suangin, Topa Zeisu’ Ni ciangin tua mipa’ kha in gupna a ngah theih nadingin ama pumpi a kisiat na’ng Satan’ khut sungah na pia ta un ci-in ka khen hi. Na kisaktheihna uh a hoih kei hi. Silngo tawmkha in annel sial lom khat a tawksak ding thei lo na hi uh hiam? Note in silngo tawh na kipelh mah bangun annel sial thak na suah theih nadingun silngo lui na mangsak khin un. Bang hang hiam na cih uh leh, Khazih ahi eite Paisan’ Tuuno a kigo zo hi. Tua ahih ciangin silngo lui tawh, hai leh gilo silngote tawh hi loin silngo om lo siangtho leh thuman anlum tawh pawikham ni. Numei tawh a mawhte tawh na kikholh loh nadingun tu ma-in lai sungah ka gelh zo hi. Tua bang ka gelhna in hih leitung numei tawh mawhte, huaiham-a duhhopte, zawhthawh bawla a sutte leh milim a biate tawh kikhawl peuhmah kei un ka cihnopna ahi kei hi. Tua bang ci leng leitung pan na paikhia ding uh hi! Unau kici numei tawh a mawhte, huaiham-a duhhopte, milim a biate, hangsana kosiate, zukhamte, zawhthawh bawl-a a sutte, tua bang a hihte tawh kikhawl lo tham loin an nangawn na nekhawm kei un, ci-in ka gelh hi. Bang hang hiam na cih uh leh, a pualam mite thukhenna tawh bang kikum ka hi hiam? A sung lamah a om note in thukhen hilo na hi uh hiam? A pua lamah a omte Pasian in thu a khen ding hi. Tua a gilopa note lak pan na hawlkhia un. Khat leh khat thu na neih uh ciangin misiangthote khensak loin Lawkite a khensak ngam ding note lakah khat beek na om uh hiam? Misiangthote in leitung mite thu a khen ding uh thei lo na hi uh hiam? Note in leitung mite thukhen takpi ding na hih uh leh, thuneute a khen dingin kilawm lo na hi uh hiam? Eite in vantungmite thu i khen ding thei lo na hi uh hiam? Tua ahih ciangin leitung thu a khen dingin kilawm zaw hilo na hi uh hiam? Tua ahih ciangin leitung thu na khen ding uh leh, pawlpi sungah mi ginalote thukhen ding za-ah bang hangin na koih uh hiam? Tua bang ka cih inah, note zum nadingin kong ci hi. A ute a naute thu khensak thei ding note lakah lungpil nei mi khat beek om lo ahi hiam? U tawh nau tawh kisel tham loin, thu-um lote mai-ah na kikhia tazen uh hi! Tua bangin note in khat leh khat na kitot uh ciangin na guallelhna uh a kilang mahmah hi. Thuum loin bawlsiatna bang hangin thuak zaw lo na hi uh hiam? Bang hangin sum zatna thuak zaw lo na hi uh hiam? Tua bang thuak lo tham loin, ahi lopi kibawlna na kihih tazen uh a, u leh nau, khat leh khat in sum na kilaksak uh hi. Mi diklote in Pasian’ Gam a luah theih loh ding thu thei lo na hi uh hiam? Na kikheem kei un: Numei tawh a mawhte, milim a biate, mi’ zi tawh a mawhte, pasal leh pasal a khialte, tua thute ah thuneite; sum gutate, huaiham duhhopte, zukham theite, hangsan kosiate, zawhthawh bawla sum sutte in Pasian’ Gam a luah kei ding uh hi. Note kimkhat in nidang lai-inah tuate bangin na om uh zongin, tu-in Topa Zeisu Khazih’ min leh i Pasian’ Kha Siangtho tawh na kisilsiang uh a, siangthona leh dikkisakna na ngah uh hi. Keimah in na khempeuh ka bawl theih hangin na khempeuh hih ding a kilawm kei hi. Na khempeuh ka hih theih hangin tuate khat’ sila-in ka kai kei ding hi. An leh tui in gilpi ading, gilpi in zong an leh tui ading ahih hangin tua tegel Pasian in a siasak ding hi. Pumpi in numei tawh khialhna ading ahi kei hi: Topa ading hi a, Topa in zong pumpi ading ahi hi. Pasian in ama vangliatna tawh Zeisu thosak a, eite zong hong thosak ding hi. Note pumpi un Khazih’ pumpi’ nate ahi uh hi cih thei lo na hi uh hiam? Tua ahih ciangin Khazih’ pumpi’ nate la-in numei gilo’ nate ka piangsak ding hiam? Tua bang hi lo ding hi. Numei gilo tawh kipawlte in numei gilo tawh pumkhat sakhat ahi uh hi cih thei lo na hi uh hiam? Bang hang hiam na cih uh leh, “Tua tegel in pumkhat sakhat ahi ding hi,” kici hi. Topa tawh kipawlte in Topa tawh lungsim khat ahi ding hi. Numei tawh mawhna pan taikhia un. Mi in ahih theih khialhna a vekpi-in pumpi pua lamah om hi. Numei tawh a khial mi in ahih leh, ama pum tungah a khial hi. Note pumpi in Pasian hong piak, na sung uhah a teeng Kha Siangtho’ biakna inn ahi zong, na pumpi uh no’ aa ahi lo ahi zongin thei lo na hi uh hiam? Bang hang hiam na cih uh leh, man tawh a kilei zo na hi uh hi. Tua ahih ciangin na pumpi sung uhah Pasian na phat un. Keima kiangah nong khak uh lai sung thu in, pasal in numei tawh kiteeng kei leh, a hoih hi. Ahi zongin numei tawh mawhna thute hangin pasal khempeuh in zi nei ciat uh hen. Numei khempeuh in zong pasal nei ciat uh hen. Pasal in a bawl ding a kilawm bang a zi tungah hih ta hen. Tua mah bangin numei in a bawl ding a kilawm bang a pasal tungah hih ta hen. A zi in ama pumpi uk lo hi, a pasal in a uk hi. Pasal in ama pumpi uk lo hi, a zi in a uk hi. Thungen dingin na lungsim uh kikhatin, tawlkhat bek tan’na longal note in khat leh khat na kinial kei un. Tua ahih ciangin na pum uh na kham zawh lohna uh hangah Satan in hong zol loh nadingin, a nung ciangin omkhawm kik un. Ahih hangin thukham hi loin thupiakna bek hangin hi bangin kong gen hi. Mi khempeuh in kei tawh kibangin om le-uh ka awi hi. Ahi zongin mi khempeuh in Pasian’ piakna mah bangin atuamtuam thupha a ngah ciat uh hi. Zi nei lo, pasal nei lo, leh meigong numeite kiangah ka cih-inah, amaute in keimah bangin a om uh leh, a pha ding hi. Ahi zongin a pumpi uh a kikham zawh kei uh leh, kiteeng uh hen. A kat sangin kiteeng leh a phazaw hi. Zi nei, pasal neite tungah kei thukham hi lo Pasian’ thukham in, zi in a pasal ma kei hen. A mak leh, pasal dang nei loin om hen. Ahih kei leh, a pasal tawh kilemin omkik hen. Pasal in zong a zi ma kei hen. Midangte kiangah Pasian’ thukham hi lo, keima cihna in: unau khat in thu-um lo zi nei a, a zi in a pasal kiangah om nuam ahih leh, kikhen kei uh hen. Tua mah bangin numei in thu-um lo pasal nei a, pasal in a zi kiangah om nuam ahih leh kikhen kei uh hen. Bang hang hiam na cih uh leh, thu-um lo pasal in a zi hangin a siangtho hi. Thu-um lo zi in a unau hangin a siangtho hi. Ahih kei leh, na tate uh a siangtho kei ding uh hi. Tu-in ahih leh, a siangtho uh hi. Ahi zongin thu-um lo mi in kikhen a ut leh, kikhen ta hen. Tua bang ahih leh, sanggampa ahi zongin, sanggamnu ahi zongin kihencipna om lo hi. Bang hang hiam cih leh, eite in kilem a, om nadingin Pasian in hong sam zo hi. Zi aw, nang na pasal na gup theih ding, na gup theih loh ding bangci theih na hi hiam? Pasal aw, na zi na gup theih ding, na gup theih loh ding bangci theih na hi hiam? Topa in mi khempeuh hawmsak a, Pasian in mi khempeuh a sapna thu tawh kituakin mi khempeuh in gamta uh hen. Pawlpi khempeuh kiangah hih thukham ka pia hi. Vunat mi hong sap leh, vunat loh mi suak kei hen. Vunat loh mi hong sap leh, vun ki-atsak kei hen. Vunatna hangin phattuamna om lo hi; vunat lohna hangin phattuamna om lo hi; Pasian’ thupiaknate zuihna hang bekin phattuamna a om hi. A hong sap lai taka a om bangin mi khempeuh om ta uh hen. Sila na hihna-ah hong sam hiam? Hong sap leh, lunghimawh kei in. Ahih hangin suahtakna na ngah theih leh, suahtakna la zaw in. Bang hang hiam cih leh, sila ahihna-ah Topa’ sapna a ngah mi in Topa-ah suakta mi ahi hi. Tua mah bangin to neih lohna pan sapna a ngah mi in Khazih’ sila ahi hi. Note in man tawh a kilei zo mi na hi uh hi. Tua ahih ciangin mite’ sila suak kei un. Ute naute aw, hong sap laitaka na om bangun mi khempeuh in Pasian’ adingin omsuak ta uh hen. Nungakte thu panin, Topa’ thupiakna ka ngah loh hangin mipha ka hih nadingin Topa’ hehpihna a ngah mi bangin thu ka pia hi. Tua ka thupiakna in tu laitak a, kithuak bawlsiatna hangin, mi in a om bangbangin om leh, pha-in ka um hi. Zi na neih leh, kikhen nading na ngaihsun kei in. Zi tawh na kikhen leh, zi zongkik kei in. Ahih hangin zi na neih leh, mawhna om lo hi. Nungak in pasal a neih leh, mawhna om lo hi. Ahih hangin tua bang a neite in amau pum tungah haksatna thuak ding uh hi. Tua bang na thuak ding uh ka deih kei hi. Ute naute aw, ke’n kong cih-inah, a hun a tom ahih ciangin zi neite in a nei lo mah bang ding uh hi, a kapte in a kap lo mah bang ding uh hi; a lungdamte in a lungdam lo mah bang ding uh hi; sumleite in bangmah nei lo mah bang ding uh hi; hih leitung a zangte in a zang lo mah bang ding uh hi. Bang hang hiam na cih uh leh, hih leitung’ lim leh meel in a mangthang ding uh hi. Note in lunghihmawhna tawh na kipelh nading uh ka ut hi. Zi nei lo mi in Pasian lungdamsak nadingin Pasian’ thu a ngaihsun hi. Zi nei mi ahih leh, a zi lungdamsak nadingin leitung thu a ngaihsun hi. Tua mah bangin pasal a nei numei leh pasal a nei lo numei in kilamdang uh hi. Pasal nei lo numei in a pumpi leh a lungsim a siangtho nadingin Pasian’ thu a ngaihsun hi. Pasal a nei numei ahih leh, a pasal a lungdamsak nadingin leitung thu a ngaihsun hi. Tua bang ka cih ciangin note noptuam nadingin ka ci hi. Note tungah thang kam dingin ka gen kei hi. Note in a kituak na gamtat uh a, lungsim buaina om loin Pasian na biak theih nading bekun ci-in ka hong gen hi. Nungak in pasal nei loin a khangham luat leh, a kilawm kei hi ci-in tua nungak a nei mi in ngaihsun a, kiten’ pihsak nop a neih leh, tua mi in a deih bangin hih ta hen; khialhna a om kei hi, kiteengsak hen. Ahih hangin a lungsim kip nei a, kulsakna nei lo a, ahih nop bang ahih theih ding thu thei a, a nungakna lim takin kem zo ning ci-in a lungsim sungah a khen zo mi in a hoih a gamta hi. Tua ahih ciangin a tanu a kiteengsak mi in a hoih a gamta hi. A kiteengsak lo mi in a hoihzaw a gamta hi. A zi in a pasal a nuntak laitengin a pasal tawh kihenin a om hi. A pasal a sih leh, a deih bangin midangte tawh a kiten’ theih hangin a lawmpa in Topa’ mi hi ding hi. Ahih hangin a om mah bangin a om lai leh, a lungdamzaw ding hi ci-in ka um hi. Pasian’ Kha Siangtho ka nei hi, ci-in ka ki-um hi. Milim kipia ganhing thu panin, eite khempeuh in pilna i neih i thei hi. Pilna in hong kisathei sak hi; itna in hong kipsak thei hi. Mikhat in hih thu ka thei hi ci-in a ki-up leh, a theih ding a kilawm zahin a thei nai kei hi. Mikhat in Pasian a it leh, Pasian in tua mi a thei hi. Milim biakna sa nekna pan ahih leh, leitungah milim in a mawkna taktak hi a, Pasian khat bek longal Pasian dang a om kei hi cih i thei hi; pasian a tampi leh topa a tampi a om bangin, vantung leh leitungah pasian akici a tampi a om uh hangin, Pasian khat bek ahi Pa sung pan na khempeuh piang a, amah bek adingin eite i om a, tua Pasian khat bek i nei hi. Topa khat bek hangin eite akipan na khempeuh a pian’na, Zeisu Khazih khat bek i nei hi. Ahih hangin mi khempeuh in tua bang pilna a nei kei uh hi. Kimkhatte in tu dongin milim biakna sa a nek uh ciangin milim ngaihsutna lungsim tawh a ne uh a, amau kitheihna lungsim a zawm manin a kihhuai a piang hi. Ahih hangin annek tuidawn hangah Pasian’ maipha kingah lo hi. An tan’na bek tawh ginatna om lo hi; annekna bek tawh a pha zong hi lo hi. Ahih hangin note in na ngah uh hih thu in upna neute puk khakna a suah loh nadingin na kikem un. Bang hang hiam na cih uh leh, lungpilna a nei nangmah in milim biakna inn sungah tu-in an ne-in na om, lungsim thanem-a kithei midang khat in hong muh ciangin milim biakna sa nek ding a hang ding hilo ahi hiam? Amah tang ding Khazih a si, upna neu sanggampa in nangma pilna hangin kisia tazen hi! Tua ahih ciangin note in ute naute lungsim kisuan’na a thanem lai takin susia-in, ama tungah na mawh uh ciangin Khazih tungah zong na mawh uh hi. Tua ahih ciangin ka annekna, ka tuidawnna in ka u ka nau a puksak leh, ka u ka nau ka puksak loh nadingin sa ka tang tawntung ding hi. To nei lo mi hilo ka hi hiam? Sawltakpa hilo ka hi hiam? I Topa Zeisu a mu mi hilo ka hi hiam? Note in Pasian sungah ka nasepna gah hilo na hi uh hiam? Midangte kiangah sawltak ka hih loh hangin note kiangah sawltak ka hi hi. Bang hang hiam na cih uh leh, Topa sungah a om note in sawltak ka hi hi cih ciamtehna na hi uh hi. Keimah hong teldotte kiangah ka mawh phel nading hih thu-in ka dawng thei hi. Kote in an neek na’ng, tui dawn na’ng thuneihna nei lo ka hi uh hiam? Kefas leh Topa’ sanggamte akipan adang sawltakte bangin thu-um zite ka tonpih kawikawi nading uh thu nei lo ka hi uh hiam? Ahih kei leh, keimah leh Barnabas bek nasem loin om theih nading thu om lo ahi hiam? Ama sum zangin kua in galkap-na sem ding ahi hiam? Kua in lo kho a, a gah ne lo ding hiam? Kua in tuu cing a, tuu-nawi ne lo ahi hiam? Leitungmite a gen uh bangin hih thu ka hong gen hiam? Thukham in zong hih bang ci hilo ahi hiam? Moses’ Thukham lai sungah: “Bawng in buh a cil lai takin a muk na hen kei un,” ci-in kigelh hi. Pasian in bawng bek ngaihsun ahi hiam? Ahih kei leh, eite ading gen ahi hiam? Ahi hi, eite ading a gen hi. Bang hang hiam na cih uh leh, lokho mi leh buhcil mi in hamphatna ngah ciat nading lawpin a sem tuak uh hi. Kote in note lakah Kha Siangtho khaici ka tuh khit uh ciangin note lak panin leitung gah ka lak uh leh, genhuaina bang om ahi hiam? Midangte in note tungah hih bang thu a ngah theih uh leh, kote in ka ngah ding uh kilawmzaw hilo ahi hiam? Ahih hangin kote in tua thu ka zang kei uh hi. Khazih’ Lungdamna Thu ka khaktan khak loh nadingun na khempeuh ka thuak uh hi. A siangtho nate a semte in biakna innpi panin an a ne uh hi. Biakna tau na a semte in biakna tau tawh kipawlin an a ngah uh thei lo na hi uh hiam? Tua mah bangin Lungdamna Thu a hilhte in Lungdamna Thu pan a kivaak nadingun Topa in thu a pia hi. Ahih hangin ka zat theih nate ka zang kei hi. Note in kei tungah tua bang nong bawl nadingun hih lai ka gelh kei hi. Bang hang hiam na cih uh leh, ka kisaktheihna mikhat in hong sukgawp sangin si leng a phazaw tham hi. Lungdamna Thu ka hilh manin kisaktheih nading thu om lo hi. Bang hang hiam na cih uh leh, thu hilh loin ka om thei kei hi. Thu ka hilh kei leh, gimna ka thuak hi. Ka ut thu-in hih na ka sep leh, phattuamna ka ngah hi. Ka ut thu loin ka sep leh, za lianah hong kikoih mi ka hi hi. Tua ahih leh, ka noptuamna bang ahi hiam? Lungdamna Thu ka hilh ciangin thuhilhte ngah ding nate zang loin, Lungdamna Thu a ngaite sum beisak lo dingin ka sep leh, noptuamna a om ding hi. Keimah in kuamah’ sila ka hih loh hangin mi tampi ka ngah nadingin mi khempeuh’ sila ka suak hi. Judah mite ka ngah nadingin Judah mite ading Judah mi bang ka hi hi. Thukham zui lo mi ka hi napi-in Thukham a zuite ka ngah nadingin Thukham a zuite ading Thukham zui mi ka hi hi. Pasian’ thukham zui lo bangin ka om loh hangin, Khazih’ thukham khut nuaiah om napi-in Thukham zui lote ka ngah nadingin, Thukham zui lo mite ading Thukham zui lo bang ka hi hi. Thazawngte ka ngah nadingin thazawngte ading thazawng bang ka hi hi. Mi kimkhat lam khatpeuh mah tawh ka gupkhiat theih nadingin mi khempeuh ading na khempeuh ka suak hi. Midangte tawh Lungdamna Thu ka ngah khawm nadingin Lungdamna Thu ading na khempeuh ka bawl hi. Tai kidemte khempeuh a tai uh hangin khat bek in pahtawina a ngah hi cih thei lo na hi uh hiam? Tua ahih ciangin note in zong pahtawina na ngah theih nadingun na tai un. Pawikhamna sungah a kidemte khempeuh in na khempeuh ah a pumpi uh a kham cip thei uh hi. Tuate in a vulgawp thei pahtakna lukhu a ngah nop manun a kidem uh hi. Eite i hih leh, a vul thei lo, a sia thei lo pahtakna lukhu ngah nadingin i kidem hi. Tua ahih ciangin ka tai ciangin a mawkna bangin ka tai kei hi. Mi tawh ka kitup ciangin huih tum bangin ka tum kei hi. Midangte thu ka hilh khit ciangin hawlkhiatna ka thuak loh nadingin ka pumpi tumin, ka bawlsia hi. Ute naute aw, i pute in meii nuai-ah a om uh a, San Tuipi laizang a kantan uh ahi zongin, a vekpi-un meii leh tuipi sungah Moses’ baptaizna a ngah uh ahi zongin, a vekpi-un kha an a nekhawm uh ahi zongin, kha tawh kipawl tui a dawnkhawm uh ahi zongin, note in thei loin na om ding uh ka deih kei hi. Bang hang hiam na cih uh leh, tuate khempeuh in amau nung a zui, kha tawh kipawl suangpi pan a luangkhia tui a dawn uh hi. Tua suangpi in Khazih ahi hi. Ahih hangin Pasian in amaute lakah a tampite tungah a lungkim kei a, gampa lakah a sigawp uh hi. Amaute in a hoih lote a deihgawh uh bangin i deihgawh loh nadingin hih thute in eite adingin lim kilahna ahi hi. “Mite in an ne, tui dawnin a tu uh a, a nung ciangin laam dingin a ding uh hi,” ci-in a kigelh mah bangin tuate kimkhat in milim a biak uh mah bangin bia kei ni. Tuate in numei leh pasal mawhna bawl uh a, nikhat sunga mi thennih le tulthum tak a sih uh bangin numei leh pasal mawhna hih kei ni. Tuate kimkhat in Topa a ze-et uh a, gul in a sukgawp bangin eite in Pasian ze-et loin om ni. Tuate kimkhat in kihhuaina a bawl uh a, a susia vantungmi’ khut sungah a kisiat uh bangin eite in kihhuaina bawl kei ni. Tua thu khempeuh in limlahna ahih nadingin tuate tungah a na tung hi. Leitung khang a nunung bela piang eite hong kihilh nadingin a kigelh hi. Tua ahih ciangin ka lungkip hi ci-in a ki-um mi in a puk loh nadingin kikem hen. Mi in a thuak theih loh ze-etna khat beek na thuak kei uh hi. Pasian in thumanna lungsim tawh kidim ahih ciangin na thuak zawh loh uh ze-etna hong tun’ nadingin thu a pia kei ding hi. Note in na thuak ding uh ze-etna a hong tun’sak ciangin na thuak zawh nadingun suahtak nading lampi zong hong bawlsak ding hi. Tua ahih ciangin ka itte aw, milim biakna na taisan un. Lungpil mi kiangah ka gen mah bangin note kiangah kong gen hi. Ka thu na ngaihsun un. Eite in hehpihna i phatna thupha’ hai in Khazih’ si tawh kizopna hilo ahi hiam? Eite balnen khomun in Khazih’ pumpi tawh kizopna hilo ahi hiam? Khomun pumkhat bek om a, eite khempeuh in pumkhat bek i hi a, tua khomun zomin i ne ahih ciangin a tampi ahi eite in pumkhat bek i hi hi. Ci-le-sa lamsangah Israelte na en ta un. Biakna sa a nete in biakna tau tawh kipawl hilo ahi uh hiam? Tua bang ka cihna in bang ka cihnopna ahi hiam? Milim ahi a, milim biakna sa ahi zongin thupi hi a ci nuam ka hi hiam? Tua bang ahi kei hi. Gentailte’ biakna in Pasian a biakna uh hi loin, dawigilote a biakna uh ahi hi. Note dawigilote tawh na kipawl ding uh ka deih kei hi. Topa’ hai leh dawigilote’ hai na dawnkhawm zo kei ding uh hi. Topa’ sabuai leh dawigilote’ sabuai-ah an na nekhawm zo kei ding uh hi. Ahih kei leh, Topa’ heh nadingin phin ding i hi hiam? Amah sangin hatzaw i hi hiam? Na khempeuh i bawl theih hangin na khempeuh hih ding a kilawm kei hi. Thu khempeuh i hih theih hangin thu khempeuh in hong kipsak thei kei uh hi. Ama noptuamna bek kuamah in zong kei hen; midangte’ noptuamna zong hen. Kitheihna lungsim tawh ngaihsunin sumbuka kizuak khempeuh teldot loin na ne un. Bang hang hiam na cih uh leh, leitung leh leitung-ah a om khempeuh in Topa’ aa ahi hi. A um lote khat in no hong vaak dingin hong sam a, na hawh nop uh leh, kitheihna lungsim tawh ngaihsunin na mai uhah hong kilui khempeuh teldot loin na ne un. Ahi zongin mikhat in, “Hihte milim biakna sa ahi hi,” ci-in hong gen leh, tua hong lak mi na khualna uh leh kitheihna lungsim tawh ngaihsunin na ne kei un. Kitheihna lungsim ka cihna ah, nangma kitheih theihna lungsim ka cihna ahi kei hi. Ama kitheih theihna lungsim ka cihnopna hi. Bang hang hiam na cih uh leh, midangte’ kitheih theihna lungsim in bang hangin kei thu hong khen ding ahi hiam? Lungdamna kohna tawh hehpihna phatin an ka nek leh, bang hangin gensiatna thuak ding ka hi hiam? Tua ahih ciangin note in anneek tuidawn akipan na khempeuh na bawl uh ciangin Pasian’ minthan’ nading ngaihsunin na hih un. Midang tampite in gupna a ngah nadingun kei in keima noptuamna zong loin mi tampite’ noptuamna zongin, mi khempeuh’ deihna na khempeuh ah ka zuih bangin note in zong Judah mi ahi zongin, Grik mi ahi zongin Pasian’ pawlpi ahi zongin, tuate khempeuh a puk loh nadingun kikem un. Kei in Khazih bangin ka gamtat mah bangin note zong kei gamtat bangin na gamta un. Note in na khempeuh sung pan kei nong ngaihsut uh a, ka hong piak bangin thu na zuih uh ciangin note ka hong phat hi. Pasalte’ lu un Khazih ahi hi, numeite’ lu un pasal ahi hi, Khazih’ lu in Pasian ahi hi ci-in note in na theih nading uh ka deih hi. Thungen ahi zongin, thuhilh ahi zongin a lu sin pasalte khempeuh in amau lu uh ahi, Khazih a daisak uh hi. Ahih hangin thungen ahi zongin, thuhilh ahi zongin lu sin lo numei khempeuh in amau lu uh ahi, pasal a daisak uh hi. Bang hang hiam na cih uh leh, tua bangin ahih uh leh, sam met tawh kibang numei ahi uh hi. Numei in a lu a tuam kei leh, a sam met ta hen. Sam at tanna, sam metna a zum huai ahih leh, a lu zong tuam hen. Pasal in Pasian’ lim leh minthan’na ahih ciangin a lu sit ding a kilawm kei hi. Numei ahih leh, pasal’ minthan’na ahi hi. Pasal in numei pan piang ahi kei hi, numei in pasal pan piang ahi hi. Numei ading pasal piang ahi kei hi,numei in pasal ading piang ahi hi. Tua ahih ciangin vantungmite hangin numei in a lu tungah ukna lim a om nading a kilawm hi. Ahih hangin Topa sungah pasal loin numei piang ahi kei hi, numei loin pasal piang ahi kei hi. Numei in pasal pan a pian’ mah bangin pasal in zong numei pan piang ahi hi; nate a vekpi-in Pasian pan a piang uh hi. Numei in a mai tuam loin Pasian kiangah thungen leh, a kilawm hiam kilawm lo hiam ci-in na khen ta un. Pasal in sam sau a neih leh, zumhuaina ahi ci-in leitung ngeina thu nangawn in hong hilh hilo ahi hiam? Ahih hangin numei a sam a sau leh, ama minthan’na ahi hi. Bang hang hiam na cih uh leh, numei’ sam in ama kituam nading ahi hi. Ahih hangin mi khat peuhmah in hong nial leh, kote lakah ahi zongin, Pasian’ pawlpi lakah ahi zongin tua lo adang ngeina a om kei hi. Ahih hangin note in hoih zawk nading hi loin, na siat zawk nadingun kikhawm na hih uh ciangin anuai-a thu kong piak mah bangin ka hong phat kei hi. Amasa bel thu in pawlpi kikhopna-ah na kikhop uh ciangin khat leh khat na kikhen thangna thu uh ka za hi. Ka zak bangin kimkhat hi takpi dingin ka um hi. Note lakah miphate a kilat nadingin pawlpi sungah kikhenna a om ding hi. Note na kikhop uh ciangin na nek pen uh Topa’ Nitak-an ahi kei hi. Bang hang hiam na cih uh leh, na neek uh ciangin kuamah kingak loin na manek tek uh a, khat gilkialin khat in kham lua-in na om uh hi. Na nek nading na dawn nading uh inn nei lo na hi uh hiam? Ahih kei leh Pasian’ pawlpi kikhopna simmawh-in, a nei lote na zumsak uh hiam? Kei in bang ci ka hong gen ding hiam? Hih thu ah note kong phat ding hiam? Kong phat kei ding hi. Bang hang hiam na cih uh leh, note kiangah ka hong piak thu in Topa kianga ka ngahsa hi. Ka ngahna in: Topa Zeisu a galte’ khut sungah a kipiak ding nitakin khomun la a, hehpihna a phat khit ciangin khomun balnen a, “Hih khomun in note ading a kipia keima pumpi ahi hi. Kei nong ngaihsut nadingun hih bangin na bawl un,’ a ci hi. Tua mah bangin nitak an a nek khit uh ciangin hai zong la a, “Hih hai in ka sisan in a kipsak thuciamna thak hai ahi hi. Hih hai na dawn uh ciangin kei nong ngaihsut nadingun na dawn un. Bang hang hiam na cih uh leh, note in hih khomun ne-in, hih hai na dawn simun, Topa hong paikik matengin ama’ sihna thu a lak na hi uh hi. Tua ahih ciangin Topa’ khomun leh hai a kilawm loin a ne a dawn mi in Topa’ pumpi leh a sisan tungah a mawh ding hi. Mi khat in a pumpi a kiteldot khit ciangin khomun ne in, hai dawn ta hen. Bang hang hiam na cih uh leh, a ne a dawn mi in Topa’ pumpi a khen theih kei leh, ama tungah mawhna a tun’ nadingin a ne a dawn hi. Tua thu hanginah note lakah thanem leh cidam lo mi tampi a om uh a, a si mi zong a om uh hi. Eite in i pumpi i teldot leh, thukhenna i thuak kei ding hi. Thukhenna i thuak ciangin leitungmite tawh mawhsakna i thuakkhawm loh nadingin Topa’ hilhna a thuak i hi hi. Tua ahih ciangin ka ute ka naute aw, Topa’ an ne dingin na kikhop uh ciangin khat leh khat na kingak kim un. Na kikhopna uh mawhna kikhopna a suah loh nadingin a gilkial mi in ama innah an ne hen. Thu a om laite ka hong tun’ ciangin i vaihawm ding hi. Ute naute aw, note in Kha Siangtho’ piak thupha thu na theih loh ding uh ka deih kei hi. Note in Gentailte na hih lai takun, bang ci lam tawh na zuih uh ahi zongin, a pau thei lo milim omna lamah a zui mi na hih ngei uh na thei uh hi. Tua ahih ciangin Pasian’ Kha Siangtho tawh, “Zeisu in hamsiatna a thuak hi,” ci-in kuamah in a gen theih loh mah bangin, “Zeisu in Topa hi,” ci-in kuamah in Kha Siangtho suang loin a pulak thei kei hi, ci-in kong theisak hi. A hong piaksa hehpihna atuam atuam a om hangin a hong pia Kha Siangtho khat bek a om hi. Nasepna za atuam atuam a om hangin Topa khat bek a om hi. Nasepna atuam atuam a om hangin mi khempeuh tungah na khempeuh a bawl Pasian khat bek a om hi. Ahi zongin a hoih a phattuam om nadingin Kha Siangtho’ kilatkhiat nading mikim tungah a pia hi. Bang hang hiam na cih uh leh, tua Kha Siangtho tawh mi khat kiangah pilna thu a pia hi. Tua Kha Siangtho tawh mi khat kiangah siamna thu a pia hi. Tua Kha Siangtho tawh mi khat kiangah thu upna a pia hi. Tua Kha Siangtho tawh mi khat kiangah cina damsak theihna a pia hi. Mi khat kiangah nalamdang bawlna thu, mi khat kiangah kamsan’na thu, mi khat kiangah lungsim kha khentel theihna thu, mi khat kiangah paunam tampi gen theihna thu, mi khat kiangah tua paute a khiatna gen theihna thute a pia hi. Hih thu khempeuh Kha Siangtho khat bek in bawl a, ama deihna bangin mikim tungah a hawmsak hi. Pumpi in khat bek hi-in na tampi nei a, tua pumpi khat tungah nate tampi a om napi-in pumpi khat bek a om mah bangin Khazih in ahi hi. Bang hang hiam na cih uh leh, Judah mi hi taleh, Grik mi hi taleh, sila hi taleh, to nei lo hi taleh, eite khempeuh in Kha Siangtho khat bek tawh pumpi khat sungah baptaizna i ngah a, eite khempeuh in Kha Siangtho khat sung pan i dawn hi. Pumpi in na khat bek nei loin, na tampi a nei hi. Khe in, “Kei khut ka hih loh ciangin pum tawh ka kikum kei hi,” a cih leh, tua bang a cih ciangin kikum lo ahi kei hi. Bil in zong, “Mittang ka hih loh ciangin pum tawh ka kikum kei hi,” a cih leh, tua bang a cih ciangin kikum lo ahi kei hi. Pumpi khempeuh in mittang ahih leh, bang ci-a khua za ding hiam? Pumpi khempeuh in bil ahih leh, bang ci-a nam ding hiam? Tu-in ahih leh, Pasian in a deihna bangin na atuam atuamin pumpi sungah a guang kim hi. Tuate khempeuh in na khat ahih leh, pumpi koi-a om ding hiam? Tu-in na tampi a om napi-in pumpi khat bek a om hi. Mittang in khut kiangah, “Nang kong deih kei hi,” ci thei lo hi. Tua mah bangin lutang in khete kiangah, “Note kong deih kei hi,” ci thei lo hi. Tua tham loin, a gina lo tawh a kibang nate in a kisamzaw ahi hi. A thupi lo tawh a kibang pumpi nate minthan’na tamzaw i pia thei hi. A kilawmna nei lo nate in kilawmna tamzaw a ngah thei uh hi. A kilawmna om nate in kilawmna a sam kei uh hi. Pumpi sungah nate khat leh khat kikhen loin, khat leh khat a kingaihsut ciat nadingun Pasian in pumpi awhsak a, phatna a nei lo nate, phatna a piazaw hi. Tua ahih ciangin na khat in gimna a thuak leh, na khempeuh in zong a thuak kim uh hi. Na khat in phatna a ngah leh, na khempeuh in zong lungdam khitna a ngah kim uh hi. Note in Khazih’ pumpi na hi uh hi. Na vekpi-un a nate na hi uh hi. Pasian in a masa belin sawltakte, a nihna thuhilhte, a thumna laihilhte, tua khit ciangin nalamdang a lak theite, tua khit ciangin cina damsak theite, huhte, pawlpi ukte, paunam tuam tampi a gen theite, pawlpi sungah a koih zo hi. Mi a om khempeuh in sawltakte ahi uh hiam? A om khempeuh in thuhilhte ahi uh hiam? A om khempeuh in laihilhte ahi uh hiam? A om khempeuh in nalamdang bawl theite ahi uh hiam? A om khempeuh in cina damsak theite ahi uh hiam? A om khempeuh in pautuam tampi gen theite ahi uh hiam? A om khempeuh in tua kamte a khiatna gen theite ahi uh hiam? Note in Kha Siangtho’ piak thupha a lianbelte na deih un. Tua tham loin lam phazaw kong lak ding hi. Keimah in leitungmite’ kam ahi zongin, vantungmite’ kam ahi zongin ka gen theih hangin itna ka neih kei leh, a ging thei dak, a ging thei daltuah tawh kibang ka hi ding hi. Kamsangte’ pilna nei-in, thuthuk khempeuh, pilna khempeuh thei siam a, mual kinsak zawh nading upna apawl apawl ka neih hangin itna ka neih kei leh, a mawkna teitei ka hi hi. Mizawngte vaak dingin ka sum khempeuh ka hawmsak tham loin, ka pumpi meikhul dingin ka piak hangin itna ka neih kei leh, ka phattuamna om lo hi. Itna in a lungduai thei hi, a hehpih thei hi. Itna in ki-elna a om kei hi. Itna in a kisathei kei hi, a kiphasak thei kei hi, a kituak loin a gamta kei hi, ama phat nading a zong kei hi, a heh baih thei kei hi, gitlohna a ciamteh kei hi, gitlohna thu-ah a lungdam thei kei hi, thuman thutak ah a lungdam thei hi, na khempeuh a thuak thei hi, na khempeuh a um thei hi, na khempeuh a thuak keeikaai hi. Itna in a mangthang kei ding hi. Kamsangte’ thu a om leh a mangthang ding hi. Pautuam gen theihna a om leh, a bei ding hi. Lungpilna a om leh, a mangthang ding hi. Bang hang hiam na cih uh leh, eite in kicing loin i thei hi, kamsangte’ pilna tawh kicing loin i hilh hi. Ahih hangin kicin’na a tun’ ciangin a kicing lote a mangthang ding uh hi. Naupang ka hih lai takin naupang bangin thu ka gen hi, naupang bangin ka ngaihsun hi, naupang bangin ka hanciam hi. Ahih hangin ka khan’ khit ciangin naupang nate ka paaikhia hi. Tu lai takin kimu tel loin limlang sungah i en hi. Tu nung ciangin i maitang a tel takin i mu ding hi. Tu-in a kicing loin ka thei hi. Tu nung ciangin Pasian in kei hong theih bangin ka thei ding hi. Tu-in upna, lawpna, itna hih thute thum a om uh hi. A thumte sungpan itna thu a lianbel hi. Itna na delh tham loin Pasian’ Thu hilh nadingin Kha Siangtho hong piak thuphate na deih pha un. Bang hang hiam na cih uh leh, kamtuam tawh a gen mi in mite kiangah a gen ahi kei hi, Pasian kiangah a gen hi; kuamah in ama kam a thei kei hi, Kha Siangtho tawh thuthuk a gen hi. Ahi zongin kamsang mi in kipsakna thu, hansuahna thu, nopsakna thute mite kiangah a hilh hi. Kamtuam tawh a gen mi in ama pumpi bek a kipsak hi. Kamsang mi in pawlpi a kipsak hi. Note khempeuh in kamtuam tawh gen thei le-uh teh ka deih hi. Ahih hangin kamsang le-uh teh ka deihzaw hi. Bang hang hiam na cih uh leh, pau namtuam tawh a gen mi in pawlpi kipsak nadingin a khiatna a gen kei leh, amah sangin kamsang mi a lianzaw hi. Ute naute aw, note kiangah kong tun’ ciangin pau namtuam tawh kong gen hangin hong piak kholhna gen kikna ahi zongin, lungpilna lahna ahi zongin, kamsan’na ahi zongin, thupiakna ahi zongin tuate khat beek hih loin note kiangah kong hilh leh, bang phattuamna a om ding hiam? Tua mah bangin a aw a ging thei, hin’na a nei lo gawsem ahi zongin, tamngai ahi zongin, a aw a kilamdangin a gin’ kei leh, gawsem aw ahi zongin, tamngai aw ahi zongin bangci kitheih ding ahi hiam? Peengkul in zong a man lopi-in a gin’ leh, galkap ding kua in a kisa ding hiam? Tua mah bangin note in a theih baih ding kam na gen kei uh leh, na thu gen uh bangci kitheih ding ahi hiam? Huih laka gen tawh na kibang ding uh hi. Leitungah kam pawl tampi om a, khiatna a nei ciat hi. Tua ahih ciangin kam khiatna ka theih kei leh, a hong hilhpa ading kei in mipil lo bang ka hi ding hi; a hong hilhpa in zong kei ading mipil lo ahi ding hi. Tua ahih ciangin note in zong Kha Siangtho hong piak thuphate na deih mahmah uh ahih ciangin pawlpi kipsak nading, na kicin’ nadingun na hahkat un. Tua ahih ciangin pau namtuam a gen mi in a khiatna zong a gen theih nadingin thu ngen hen. Pau namtuam tawh thu ka nget leh, ka lungsim in thu a nget hangin ka pilna in phattuamna a ngah kei hi. Tua ahih leh, bang kici ding hiam? Kha tawh thu ka ngen ding hi, pilna tawh zong thu ka ngen ding hi. Kha tawh la ka sa ding hi, pilna tawh zong la ka sa ding hi. Ahih kei leh, kha tawh hehpihna na phat ciangin a siam lo mi in na kam thei lo ahih ciangin hehpihna phatna-ah zui-in, “Amen” bang ci-a ci thei ding hiam? Nang in hehpihna pha takpi-in na phat hangin midang ading kipna a piang kei hi. Note khempeuh sangin keimah in pautuam dang gen thei ka hih ciangin Pasian’ hehpihna ka phat hi. Ahih hangin pawlpi lakah pautuam dang tawh kam thenkhat ka gen theih sangin midangte hilh thei nadingin kam nga bek lungpilna tawh hilh theih nading ka deihzaw hi. Ute naute aw, pilna lamah naupang bang kei un. Gitlohna lamah nawine naungeek bang un. Lungpilna lamah a khan’ khinte bang un. Thukham lai sungah: “Pautuam a neite leh mipawl dangte’ kam tawh hih mipawlte ka hilh ding hi. Ahih hangin ka thu a ngai kei ding uh hi, ci-in Topa in thu a pia hi,” ci-in kigelh hi. Tua ahih ciangin pautuam dangte in thu-umte ading lim ahi kei hi, a um lote ading lim ahi hi. Kamsan’na ahih leh, a um lote ading lim ahi kei hi; a umte ading lim ahi hi. Tua ahih ciangin pawlpi khempeuh kikhawmin, pautuam dang tawh na kihilh lai takun a um lote ahi zongin, a siam lote ahi zongin hong tum leh, “Note mihai na hi uh,” hong ci ding uh hilo ahi hiam? Mi khempeuhte in kamsangin a om lai takin a um lo mi ahi zongin, a siam lo mi ahi zongin hong tum ciangin pawlpi khempeuh in tua pa mawhsakin, nakpi takin amah kingaihsun sak ding uh hi. Tua pa in a lungsim sunga a selsim khempeuh kilang khia-in, amah in, “Pasian in note lakah a om takpi hi,” ci-in genin, bokin Pasian a bia ding hi. Ute naute aw, koici bang ahi hiam? Na kikhop uh ciangin lasakna ahi zongin, thuhilhna ahi zongin, Pasian’ lahkhiat thugenna ahi zongin, pau namtuam pauna ahi zongin, a khiatna gen theihna ahi zongin na nei ciat uh ahih ciangin pawlpi kipsak nadingin na khempeuh na hih un. Pau namtuam dang tawh kamsan’na a om leh, nih ahi zongin, a tam belin thum ahi zongin, khat khit ciangin khat in gen uh hen la, khat in a khiatna genkik ta hen. Kamphen a om kei leh, tua mipa in pawlpi lakah gen loin om hen; amahmah ahi zongin, Pasian kiang ahi zongin gen hen. Kamsangte in nih ahi zongin, thum ahi zongin kamsang uh hen la, midangte in sittel uh hen. A tu mite’ kiangah na khatpeuh peuh a kilah leh, a gen masapa pau loin om ta hen. Bang hang hiam na cih uh leh, a om mi khempeuh in theitel-a tha a ngah theih nading ahi zongin, note khat nungah khat in kamsan’na na nei thei uh hi. Kamsangte’ kha in kamsangte’ ukna nuai-ah a om ding uh hi. Pasian in kitotna tawh kipawl Pasian hi loin kilemna tawh kipawl Pasian ahi hi. Misiangthote’ pawlpi khempeuh sung panin numeite in pawlpi lakah pau loin om ta uh hen. Bang hang hiam na cih uh leh, amau in thuhilh nading thu a om kei hi. Thukham in a tan’sa bangin amau in ukna nuai-ah om ta uh hen. Numeite in thu khatpeuh peuh a sin nop uh leh, innah a pasalte kiangah dong ta uh hen. Bang hang hiam na cih uh leh, pawlpi lakah thu a gen ding uh a zumhuai hi. Pasian’ thu in note pana hong piang ahi hiam? Ahih kei leh, note tung beka hong tung ahi hiam? Mi khat peuhpeuh in kamsang mi ka hi hi ci-in ahi zongin, Kha Siangtho piaksa thupha a ngah mi ka hi hi ci-in ahi zongin, a ki-up leh note’ kiangah kong piak thute in Topa’ thupiakna ahi hi, ci-in mang ta hen. A kitheih mawhbawl mi, a thusim lo mi a om leh amahmah thu thei loin a omcip ding hi. Tua ahih ciangin ka ute ka naute aw, note in kamsan’ ding na ut takpi ta un. Kamtuam tawh pau ding na khaam kei un. Na khempeuh akilawm akituakin na hih un. Ute naute aw, note kiangah kong hilh ngei mah bangin na san’ uh a, na belh uh Lungdamna Thu kong zasak kik ding hi. Tu-ma a, thu kong hilh thu in a mawkna hi ci loin umin na lungkip uh leh, tua thu hangin gupna na ngah ding uh hi. Ka ngah bangin note kiangah ka hong gen masak thu in: Lai Siangtho sungah a kigelh mah bangin Khazih in eite mawhna taang ding sihna a thuak hi. A kivui khit ciangin Lai Siangtho sungah a kigelh mah bangin, nithum ni-in a thokik hi. Kefas kiangah a kilat khit ciangin sawm-le-nihte kiangah a kilang hi. Tua nung ciangin ute naute za nga tham lote kiangah thakhatin a kilang hi. Tuate a tampi in tudong a nungta lai uh hi. Kimkhat a si zo uh hi. Tua nung ciangin Jeim kiangah a kilang hi. Tua nung ciangin sawltakte khempeuh kiangah a kilang hi. A nunung belin a hun cing lopi-a suak keima kiangah hong kilang hi. Keimah in a beisa hunin Pasian’ pawlpite a bawlsiapa ka hih ciangin a neubel sawltak ka hi a, sawltak kici dinga kilawm ka hi kei hi. Ahih hangin Pasian’ hehpihna thupha hangin ka hi bangin ka hi hi. Ka ngahsa hehpihna thupha a mawkna ahi kei hi, sawltakte khempeuh sangin hahkat zaw-in ka sem hi. Tua bang ka cih hangin kei a hahkat ka hi kei hi; keimah tawh a omkhawm Pasian’ hehpihna thupha in a hahkat hi. Tua ahih ciangin kei ka hi zongin, amau ahi zongin tua bangin ka hilh uh a, tua mah bangin note in zong na um uh hi. Tu-in Khazih in sihna pan a thawhkikna thu a kihilh ciangin, “Misite thawhkikna a om kei hi,” ci-in note lakah mi kimkhat in bang hangin a ci uh hiam? Misite’ thawhkikna om lo hi leh, Khazih zong a thokik kei ding hi. Khazih thokik lo hi leh, kote’ thuhilhna a mawkna ahi hi. Note upna zong a mawkna ahi hi. Tua tham loin, kote in Pasian thu hilhna panin zuau teci ka hi ding uh hi. Bang hang hiam na cih uh leh, misite thokik lo hi leh, Pasian in Khazih a thokik sak kei ding hi. Tu-in Khazih a thokik sak hi ci-in Pasian ading teci ka hi uh hi. Misite a thokik lo hi leh, Khazih zong a thokik kei ding hi. Khazih a thokik lo hi leh, na upna uh a mawkna ahi hi; mawhna khialhna sungah a om lai na hi uh hi. Tua tham loin, Khazih’ thu-um a sisate in zong a mangthang ahi ding uh hi. Eite in hih leitung nuntakna sung ading bek a, Khazih sungah lawpna nei i hih leh, mi khempeuh sangin a hehpih huaizaw mi i hi ding hi. Tu-in Khazih in misite lakah a gah masabel suak a, sihna pan a thokik zo hi. Tua ahih tak ciangin mi khat hangin sihna thu a piang mah bangin misi thawhkikna thu in zong mi khat hangin a piang ahi hi. Adam sungah mi khempeuh a sih mah bangin Khazih sungah mi khempeuh a nungta uh hi. Ahih hangin mi khempeuh in amau hun bang a zui ciat ding uh hi. Khazih in a gah masa bel ahi hi. Tu nung ciangin Khazih hong pai ciangin ama mite in thawhkikna a ngah ding uh hi. Tua ciangin Khazih in ukna aana leh vangliatna apawl pawlte khempeuh siangsakin Pa Pasian tungah Gam a piak khit ciangin leitung a bei ding hi. Pasian in galte khempeuh ama khe nuai-ah a khiat khit dong matengin Khazih in a maang ding hi. A khakbel a gal ahi sihna mangpa in lelhna a thuak ding hi. “Na khempeuh ama khe nuai-ah a khia hi,” ci-in Lai Siangtho sungah a kigelh hi. Ahih hangin, “Na khempeuh a khia hi,” a cih ciangin na khempeuh Khazih’ nuai-ah a khiatsakpa Pasian a om lai hi cih a kilang hi. Na khempeuh Khazih nuai-ah a khiat khit ciangin na khempeuh ama nuai-ah a khiapa, Pasian’ ukna, Tapa in zong a mang ding hi. Tua ahih ciangin Pasian in na khempeuh ah na khempeuh ahi ding hi. Ahih kei leh, misite tang ding bang hangin kibaptaiz ahi uh hiam? Misite a thokik lo takpi ahih leh, amaute tang ding bang hangin a kibaptaiz uh hiam? Kote in zong hong tung ding gimna tawh bang hangin kituak niloh ka hi uh hiam? Ute naute aw, keimah in nisimin sihna ka thuak hi ci-in i Topa Zeisu Khazih sungah note hangin kisathei-in, lungdamin ka hong gen nuam hi. Leitung ngeina bangin Efesa khua ah sahangte tawh ka kitot hangin bang lawhtak ka hi hiam? Mi sisate thokik lo ding ahih leh, ‘Ne ni, dawn ni, zing ciangin i si ding hi.’ Na kikheem kei un, ‘Mipha lote tawh kikholhna hangin gamtatna pha kisia thei hi. Note kimkhat in Pasian kitheih mawhbawl na hih uh ciangin kilehkik un, mawhna hih nawn kei un – tua bang ka cih ciangin note zum nadingin kong ci hi. “Misite bangci-in thokik ding uh ahi hiam? Bang ci pumpi hong suak ding uh hiam?” ci-in mi kimkhat in hong dong uh hi. Lungpil lo mi aw, nang na tuh khaici in a kisiat kei leh, a hing thei kei ding hi. Khaici na tuh uh ciangin a nung ciangin a hong piang ding a kungpi pen a tuhpah na hi kei uh hi. Mangbuh ahi zongin, buh dangte ahi zongin a tang taktak na tuh uh hi. Pasian in a deih bangin tua tang kung a pia hi; khaici a vekpi-in amau pawl bangin kung a pia ciat hi. Sa khempeuh nam khat bek ahi kei hi. Mihing’ sa namkhat, ganhing’ sa namkhat, vasa namkhat, ngasa namkhat atuamtuam a om ciat uh hi. Vantung pumpite a om uh hi, leitung pumpite a om uh hi. Vantung pumpite’ vangliatna pawl khat, leitung pumpite’ vangliatna nam khat a om ciat hi. Ni a vangliatna a om hi, kha a vangliatna a om hi, aksite a vangliatna a om hi. Bang hang hiam na cih uh leh, aksite a vangliatna in atuam tuamin a kilamdang hi. Tua mah bangin misite a thawhkikna thu ahi hi. Pumpi a kituh ciangin muat theihna a om hi. A thawhkik ciangin muat theih lohna a om hi. A kituh ciangin maizum theihna a om hi, a thawhkik ciangin minthan’na tawh a dim hi. A kivui ciangin thahatna a om kei hi, a thawhkik ciangin thahatna tawh a dim hi. A kituh ciangin leitung pumpi ahi hi. A thawhkik ciangin kha pumpi ahi hi. Leitung pumpi a om leh, kha pumpi zong a om hi. Lai Siangtho sungah a kigelh mah bangin, “A masa bel Adam in a nungta mihing a suak hi,” kici hi. A nunung bel Adam in nuntakna a pia thei kha a suak hi. Ahih hangin kha pumpi a piang masa hi lo hi. Leitung pumpi a piang masa hi. A nung ciangin kha pumpi a piang hi. A masa bel mi in lei pan hong piang ahih ciangin leitung mi ahi hi. A nihna mi in vantung pan a hong piang hi. Leitung mite in leitungmite tawh kibang hi. Vantungmite in vantungmite tawh a kibang hi. Eite in leitungmi’ lim i neih mah bangin vantungmi’ lim i nei ding hi. Ute naute aw, ke’n kong cih-inah, si-le-sa in Pasian’ Gam a luah zo kei ding hi. A muat theite in a muat theih lohna a luah zo kei ding hi. En un, thuthuk khat kong gen ding hi. Eite khempeuh sicip ding i hi kei hi. A nunung peengkul a hong mut ciangin tomkha sung mitphiat kikalin eite khempeuh i kikheel ding hi. Tua peengkul a mut ding a, misite in muat thei nawn lo dingin hong thokik ding uh hi. Eite khempeuh in zong i kikheel khin ding hi. Bang hang hiam na cih uh leh, hih a muat theite in muat theih lohna a silh ding hi. Hih muat theihna in muat theih lohna silh a, hih sih theihna in sih theih lohna a silh ciangin, “Zawhna sungah sihna kivalh tum zo hi” ci-a Lai Siangtho sungah a kigelhsa thu in a tangtung ding hi. ‘Sihna aw, na zawhna koi lai-ah om hiam? Sihna aw, na gu koi lai-ah a om hiam?’ Sihna’ gu in mawhna ahi hi. Mawhna’ vangliatna in thukham ahi hi. Ahih hangin i Topa Zeisu Khazih hanga eite zawhna hong pia Pasian’ hehpihna ka phat hi. Tua ahih ciangin ka it ka ute ka naute aw, Topa’ nasep na hahkatna uh in Pasian tungah a mawkna hi lo hi cih thei na hih ciangun lungkipin, kicingin, kiam loin, hoi loin hahkat-in sem un. Mi siangthote ading sumpi khiatna thu ahih leh, Galati gam pawlpite ka vaikhak mah bangin na hih un. Ka hong tun’ ciangin kaihkhop tawm a kul nawn loh nadingin nisagih laka ni masa bel ni-in mi a vekpi in na ngah bangun na khia khol ciat un. Ka hong tun’ ciangin mi na deihte uh laitai sakin na piak uh sumpi Jerusalem khua ah puak dingin ka sawl ding hi. Kei zong ka pai theih leh, amau in keimah tawh a paikhawm ding uh hi. Makedonia gam lam ka pai khit ciangin note kiangah ka hong tung ding hi. Bang hang hiam na cih uh leh, Makedonia gam lam ka tawn ding hi. Tua nung ciangin mundang ah ka pai ciangin, note hong khak, thupha ka ngah nadingin, note kiangah phalbi tawntung ka om kha ding hi. Bang hang hiam na cih uh leh, lam lai-ah kimuh ding bek ka ut kei hi. Topa in thu hong piak leh, sauveipi note tawh omkhawm dingin ka lamen hi. Pentekost pawikham ni dongin Efesa khua ah ka om ding hi. Bang hang hiam na cih uh leh, lawhcin’ nadingin alian kongkhak a mansa-in kei ading a kihong hi. Hong langpan mi zong tampi a om uh hi. Timoti in note kiangah hong tun’ leh, amah lungmang loin note tawh a omkhawm theih nadingin na kiging un. Amah in zong keimah bangin Pasian’ nasem ahi hi. Tua ahih ciangin amah kuamah simmawhsak kei un. Ka kiangah hong paikik nadingin lungman’na om lo dingin hong kha un. Amah in ute naute tawh hong tonkhawm ding hi ci-in lawpin ka om hi. I sanggampa Apollos thu panin, ute naute tawh note kiangah hong pai dingin ka zol hangin amah in tu-in pai ding ut nai lo hi. A nung ciangin ahih theih leh, a hong pai ding hi. Note in kikemin ngak un. Upna ah na kip un. Pasal tawh kibangin thacingin, thahat un. Itna lungsim tawh na khempeuh na hih un. Ute naute aw, Stefanas-te’ innkuan in Akhaia gamah a gah masabel ahi uh a, misiangthote’ nasem dingin amau pumpi uh hong piak uh mah bangin, tua bang mite’ ukna ahi zongin, nasepna ah a hahkat mi khempeuh a ukna uh ahi zongin na man’ nadingun ka hong thuum hi. Stefanas, Fortunatas leh Akhaikas-te hong tung ahih ciangin ka lung a dam hi. Bang hang hiam na cih uh leh, note in na hong bawl uh a kicing lote amaute in a hong kicingsak kik uh a, ka lungsim leh note lungsim uh hong tawldam sak zo uh hi. Tua bang mite na ciamteh un. Asia gama pawlpite in note hong hopih uh hi. Akuila leh Prisilla in, amau innah a om pawlpite tawh, Topa suangin note tampi-in hong hopih uh hi. Ute naute khempeuh in note hong hopih uh hi. Khat leh khat a siangtho napna tawh na kihopih ciat un. Keimah Paul in kihopih nading ka khut tawh kong gelh hi. Mi khat peuhmah in Topa a it kei leh, tua mi in hamsiatna thuak ta hen. Topa hong pai hi! Topa Zeisu’ hehpihna thupha note tungah om ta hen. Ka itna in Khazih Zeisu sunga om note khempeuh tawh omkhawm ta hen. Amen. Pasian’ deihna hangin Khazih Zeisu’ sawltak keimah Paul leh i sanggampa Timoti in Korin khua-ah a om Pasian’ pawlpi akipan Akhaia gam tengah a om misiangthote khempeuh thu kong zasak uh hi. I Pa Pasian leh Topa Zeisu Khazih kiang panin hehpihna thupha leh nopna nomau tungah om ta hen. Hehpihna Pa leh hehnepna apawl pawl khempeuh’ Pasian ahi, i Topa Zeisu Khazih’ Pa leh Pasian in thupha ngah ta hen. Kote in Pasian’ hehpihna thupha hangah komau hehnepna hong piak mah bangin, gimna pawl khempeuh a thuakte a hehnem thei dingin gimna khempeuh sungah Pasian in kote hong hehnem hi. Bang hang hiam na cih uh leh, Khazih hanga gimna tampi ka thuak uh mah bangin Khazih hanga kote ngah hehnepna tampi a om hi. Tua ahih ciangin kote in gimna ka thuak uh zongin note in hehnepna leh gupna na ngah nading uh ahi hi. Kote in hehnepna ka ngah uh zongin kote in gimna ka thuak uh zongin note in na thuak zawh nadingun hong bawlpha thei hehnepna na ngah nading uh ahi hi. Note ading ka lametna uh a kip hi. Bang hang hiam na cih uh leh, note in gimna na hong thuak khawmpih uh mah bangin hehnepna zong nong ngah khawmpih ding uh hi ci-in ka thei uh hi. Ute naute aw, Asia gamah kote in ka thuak uh gimna ahi nuntakna nangawn ka suakta zo kei ding uh hi ci-in um a, thuak zawh loh ding dongin a gik mahmah gimna ka thuak thu uh thei loin na om ding uh ka deih kei uh hi. Kote in ka pumpi uh muang loin, misite a thosak Pasian muan nadingin sihna thukhenna a thuak mi bang ka hi uh hi. Tua Pasian in tua zah-a lian sihna sung pan hong gumkhia a, hong gumkhia lai ding hi. Note in hong huhin, kote ading thu hong ngetsak le-uh teh, tunung ciangin zong hong gum ding hi ci-in kote in umin ka muang uh hi. Tua ciangin kote tunga hong hehpihna hangin mi tampite’ lungdamkohna in kote hangin Pasian kiang a tung ding hi. Kote kisaktheihna in leitung pilna suang loin, Pasian’ hehpihna thupha suangin Pasian hong piak lungsim siangthona leh dikna tawh, a lian belin gen lehang, kote in note lakah ahi zongin, leitungah ahi zongin gamta-in ka bawl uh hi ci-in ka theihna lungsim un teci hong pang hi. Note in simin, na man’sate uh longal adang nate gelh-a hong pia ka hi kei uh hi. Note in Topa Zeisu’ Ni ciangin kote kisaktheihna lungdamna na hih uh bangin kote in note kisaktheihna ka hi ding uh hi ci-in note in kote’ thu a cingin thei lo a, nong man’ uh mah bangin, a tawp dongin na mang ding uh hi, ci-in kote in lawpin ka om uh hi. Tua bang lamenin ka om a, note in nih vei thupha na ngah nadingun note kiangah hong pai masa ning, ci-in ka lungngai hi. Note kiang pan kileh kikin Makedonia gamah ka pai khit ciangin note kiangah hong pai kikin, Judah gam dongin note’ hong khakna thupha ka ngah ding ka geel hi. Tua bang ka hanciam ciangin lungkheel mi ka hi hiam? Ahih kei leh, keima kamin, “Ahi hi, ahi hi,” ci ding ahi zongin, “Ahi kei hi, ahi kei hi,” ci ding ka hi zongin a suah nadingin ka hanciamnate in ci leh sa lungsim ahi hiam? Pasian in dikna tawh a dim bangin note kiangah ka kam in, “Ahi hi,” ci ding ahi zongin, “Ahi kei hi,” ci ding ahi zongin ahi kei hi. Bang hang hiam na cih uh leh, keimah-a kipan Silvanas leh Timoti-te in note kiangah kong hilh uh Pasian’ Tapa Zeisu Khazih in, “Ahi hi,” ci ding ahi zongin, “Ahi kei hi,” ci ding ahi zongin ahi kei hi; “Ahi hi,” a cihna bek ahi den hi. Thuciamnate in bang zahin a tam hangin Pasian’ minthan’na kilatsak nadingin, “Ahi hi,” cih ding ahi zongin, kote hangin, “Amen,” cih ding ahi zongin ahi hi. Note tawh kote, Khazih sungah a hong kipsak, hong pahtawipa in Pasian ahi hi. Tua Pasian in, eite Kha Siangtho sathau hong nilhin hong neihna ciamtehna hong khen-a, i lungsim sungah Kha Siangtho ahi kiciamna maleep hong guan’ hi. Keimah in note ka hong dop manin Korin khua-ah ka hong pai kei ci-in ka lungsim ah teci dingin Pasian ka koih hi. Tua bang ka cih ciangin kote in note’ upna uk ka hi kei uh hi. Note lungdam nading huhin nasemte bek ka hi uh hi. Bang hang hiam na cih uh leh, upna hangah note kipin na om uh hi. A nung ciangin dahna lungsim tawh note kiangah ka hong pai kei ding ci-in ka lungsim ka hanciam hi. Bang hang hiam na cih uh leh, keimah in note ka hong dahsak leh, ka hong dahsakte longal, kei kua in hong lungdamsak ding hiam? Ka lungdamna in note khempeuh lungdamna ahi hi ci-in ka lungmuang a, ka hong tun’ ciangin ka lung a hong damsak ding a kilawm mite pan dahna hong suah loh nadingin tu ma-in lai in ka hong khak hi. Bang hang hiam na cih uh leh, lungman’na leh dahna tawh khitui tampi luangin lai ka hong gelh hi. Note heh nadingin ka hong gelh ahi kei hi: note ka hong itna lungsim na theih nadingun ka hong gelh hi. Mi khatpeuh in dah nading ahih leh, kei hong dahsak lua ahi kei hi; note lak panin pawlkhat hangin hong dahsak hi. Tua bang ka hong cih ciangin nakpi-a lungkham luat loh nading ka ci hi. Mi tampite’ thukhenna daan in tua bang mi ading a cing hi. Tua ahih ciangin tua bang mi in dah mahmahin kiphumcip a, a tummang loh nadingin note in ama mawhna maisakin amah na hehnep ding uh a kilawm hi. Tua ahih ciangin note in amah na it takpi uh na kilatsak nadingun kong thuum hi. Tua tham loin, note in thu khempeuh na ngai uh hiam, na ngai kei uh hiam cih theih nopna tawh na zia uh enin, tu ma-in lai kong gelh hi. Midangte mawhna na maisak uh leh, tuate’ mawhna keimah in zong ka maisak ding hi. Bang hang hiam na cih uh leh, keimah in mi khat mawhna ka maisak ngei leh, note hong ngaihsunin Khazih’ mai-ah ka maisak hi. Tua ahih kei leh, Satan in ei hong zawh khak ding lunghihmawh huai hi. Ama hanciamna eite in i thei hi. Khazih’ Lungdamna Thu hilh dingin Troas khua-ah ka tung a, Topa hangin kei ading kongkhak a kihon’ ciangin ka sanggampa Titu ka muh loh ciangin ka lungnuam thei lo ahih manin, amaute mangpha khakin Makedonia gamah ka pai hi. Khazih tawh zawhna pawikhamna-ah kote a tawntung hong paipih a, tua Topa theihtelna namtui, ko hangin mun khempeuh ah a kizeelsak Pasian’ hehpihna phatna a om hi. Bang hang hiam na cih uh leh, eite in gupna a ngahte tungah ahi zongin, kisiatna a ngahte tungah ahi zongin Khazih-a namtui i hi hi. A kisia mite ading sih dongin sihna namtui i hi hi. Gupna a ngah mite adingin nuntakna a ngah dongun namtui i hi hi. Tua ahih ciangin hih nate tawh kua kilawm ahi hiam? Met nadingin Pasian’ thu a zuak kawikawi mite tawh kote kibang loin, lungsim siangthoin Pasian’ sawltak mite bangin Pasian mai-ah lungsim tak tawh Khazih’ thu ka hilh uh hi. Kote in ko-le-ko kiphattawm ka hi uh hiam? Ahih kei leh, kiphatna lai note kiangah midangte piak nading ahi zongin, note in midangte kiangah piak nading ahi zongin, kote in mi kimkhat bangin deih ka hi uh hiam? Note in kei lungtang tungah a kigelh, mi khempeuh in a sim theih kote’ lai na hi uh hi. Koici bang hiam na cih uh leh, note in laitui tawh kigelh hi lo a, a nungta Pasian’ Kha Siangtho tawh kigelh na hi uh ahi zongin, suangpeek tungah kigelh ahi lo, lungtang satak peek tungah kigelh na hi uh ahi zongin, kote’ nasepna ah Khazih laikhak na hihna uh kitel takin na lak zo uh hi. Kote in Khazih hangin Pasian mai-ah tua bangin ka lungkim uh hi. Ahih hangin kote in ko’ siamna suangin komau ut thuin na khat peuhpeuh na hanciam nadingun a hih thei ka hi kei uh hi. Pasian sungah kihih khinzo bek ahih mah bangin kiciamna thak’ nasemte suah zawh nading siamna Pasian in kote hong pia hi. Tua bang ka cih ciangin Thuciam lui thu cihnopna hi lo, Kha Siangtho thu cihnopna hi. Bang hang hiam na cih uh leh, Thuciam lui thu in hin’na a that thei hi, Kha Siangtho thu in a hingsak thei hi. Tua tham loin, a mang thei vangliatna ahi Moses’ maitangah a kilang vangliatna hangin Israel mite in a maitang a tel et ngam loh dongin, suangpeek tungah laimalin kigelh sihna tawh kipawl nasepna in vangliatna tawh a dim leh, Kha Siangtho tawh kipawl nasepna in vangliatna tawh a dimzaw ding hilo ahi hiam? Bang hang hiam na cih uh leh, mawhna thutanna nasepna in vangliatna a neih leh, tua tham loin dikna nasepna in vangliatna a neizaw ding hi. Tunung ciangin a hong piang ding vangliatna in a lian mahmah ahih ciangin a omsa vangliatna in a mangthang hi. A mangthang na in vangliatna a neih leh, a kip na in vangliatna a neizaw ding hi. Tua bang muan’na ka nei uh ahih ciangin kote in im loin a tel takin ka hilh uh hi. A mangthang na a beina Israel mite in a tel et loh nadingun Moses in a mai a sit bangin ka hih kei uh hi. Tuate lungsim in theih hakin, tu-ni dongin thuciamna lui a sim uh ciangin, tua mai sitna in a sin hi; Khazih hangin kipaaikhia zo hi cih a thei kei uh hi. Tu nangawnin Moses’ lai a sim uh ciangin amau lungsim uh a kisin lai hi. Ahih hangin Topa kiangah a kihei uh ciangin tua a kisitna a kipaaikhia hi. ‘Topa’ a cih ciangin Kha Siangtho a cihnopna hi. Topa’ Kha Siangtho’ omna-ah suahtak nopsakna a om hi. Eite khempeuh in mai sitna om loin limlang i et mah bangin Topa’ minthan’na mu-in, Kha Siangtho ahi Topa in hong sawl mah bangin eite minthan’na khang semsemin ama meel sun-in i kikheel hi. Tua ahih ciangin komau in tua nasepna za ka ngah uh ahih ciangin, a hong hehpihna thupha ka ngah uh mah bangin thanem lungkiatna ka nei kei uh hi. Zumhuaina tawh kipawl a kiseel nate ka paaikhia zo uh hi. Kikheemna zang loin Pasian’ thu im loin, lumlet loin, thuman a tel takin hilhin Pasian mai-ah mi khempeuh in a kitheihna lungsim tawh hong phat nading phathuaina ka gamta uh hi. Kote in ka hilh uh Lungdamna Thu in kisin ahih leh, a kisia ding mite tung bekah kisinin a om hi. Tua bang mite in Pasian’ meel ahi Khazih’ minthan’na tawh a dim Lungdamna Thu khuavak taang a muh theih loh nadingun hih leitung a uk topa in a um lo tua mite’ lungsim mittang uh a tawsak hi. Kote in komau thu ka hilh kei uh hi. Zeisu Khazih in Topa ahi hi cih ahi zongin, kote in Zeisu Khazih ading note’ sila ka hi uh hi, cih ahi zongin ka hilh uh hi. “Khua mial sungah khuavak a hong taang ding hi” a ci Pasian in Zeisu Khazih’ maitangah Pasian’ minthan’na theihna a vang hong piak nadingin kote lungsim uhah khuavak a hong tangsak hi. Ahih hangin a lian mahmah vangliatna in ko kiang pan hi lo, Pasian kiang pan ahih nadingin tua sum leibeel sungah kiguangin kote in ka nei uh hi. Kote in bawlsiatna apawl apawl ka thuak uh hangin ka phattuamna uh a kiam kei hi, a kingaihsut zawh loh hangin ka lungkia kei uh hi, delhin hong kibawlsiat hangin hong nusia kei hi, puksakna ka thuak uh hangin kisiatna ka thuak kei uh hi. Zeisu’ nuntak kikna kote pumpi sung uhah a kilat nadingin Zeisu’ sihna ka pumpi sung uhah ka pua tawntung uh hi. Bang hang hiam na cih uh leh, Zeisu’ nuntakna in a si thei komau pumpi sung uhah a kilat nadingin a nungta kote in Zeisu hangin sihna’ khut sungah piakna ka thuak tawntung uh hi. Tua ahih ciangin sihna in kote sungah na hong seem hi. Note sungah ahih leh, nuntakna in na hong sem hi. Tua ahih ciangin, “Keimah in umin, ka gen hi” ci-a a kigelh mah bangin kote in zong upna lungsim nei ka hih ciangun ka gen uh hi. Topa Zeisu sihna pan a thosakpa in Zeisu tawh kote zong hong thosak kik ding a, note tawh a kiangah a hong tum khawmsak ding hi cih ka thei hi. Bang hang hiam na cih uh leh, hehpihna in mite hangin khang a, Pasian’ minthan’na ading hehpihna phatna a kicin’ nadingin na khempeuh note ading ahi uh hi. Tua ahih ciangin thanem lungkia loin ka om uh hi. Kote uh pum pua lamah a om mi in a kisiatsiat hangin ka pum sung uhah a om mi in ni khat nung ni khat kibawl thakna a ngah hi. Bang hang hiam na cih uh leh, kote maitangah a kilangte in tawlkhat bek kip a, a kilang lo nate a kip tawntung ahih ciangin a kilang nate en lo ciamteh loin, a kilang lo nate ka en ka ciamteh uh ciangin tawlkhat bek ka thuak uh gimna a zangin a tawntung a gik minthan’ nading a piangsak hi. Kote omna ahi leibuk in a siat leh, khut tawh kibawl lo Pasian’ bawlsa, a kisia ngei lo vantungah inn a om cih ka thei uh hi. Kote in vantung pan a piang omna silh nadingin thuumin ka om uh hi. Tua bang silh lehang puan nei loin om ding i hi kei ding hi. Hih bukah a om kote in vangik pua-in thuumin ka tau uh hi. Puan silh loin om nuam ka hih manun a thuum ka hi kei uh hi; a si thei nuntakna in nuntakna sungah a phumcip dingin puan silhin om nuam ka hih manunah ka thuum uh hi. Tua bang thupha ngah nading a hong bawlpa in Pasian ahi hi. Tua Pasian in hong tung ding hun ading Kha Siangtho ahi maleep eite hong pia zo hi. Tua ahih ciangin pumpi-ah ka om lai tengun Pasian tawh ka kigamla uh hi cih thei-in lau loin ka om uh hi. Kote in mit’ muhna tawh hi loin, upna tawh ka nungta uh hi. Pum leh tak tawh kikhenin Topa tawh innah omkhawm tawntung dingin ut zaw-in lau lohna lungsim ka nei uh hi. Tua ahih ciangin kote in pumpi sung ahi innah ka om uh hi taleh, pumpi tawh kikhenin ka om uh hi taleh, Pasian ka lungdamsak nading uh ngimna nei-in ka hahkat uh hi. Bang hang hiam na cih uh leh, eite khempeuh in pumpi-ah i gamtatna ahoih ahoih lo bangin thukhenna ngah ciat dingin Khazih’ tokhom mai-ah i tung tek ding hi. Tua ahih leh, Topa kihtakna kote in thei-in midangte ka zol lai takun Pasian mai-ah ka kilang uh hi. Note lungsim mai-ah zong ka kilang uh hi ci-in ka um uh hi. Kote in note mai-ah komau pumpi uh kiphat kik ka hi kei uh hi; lungsim ngaihsun loin, a meel ngaihsunin a kisathei mite’ kam na thukkik theih nadingun, kote hangah kisaktheih nading bek kong gen uh hi. Bang hang hiam na cih uh leh, mihai hi le-ung Pasian ading ka hai uh hi. Mipil hi le-ung note ading mipil ka hi uh hi. Bang hang hiam na cih uh leh, mi khempeuh tang ding mi khat bek si ahih ciangin mi khempeuh a si uh ahi zongin, a nungta mite in amau deih bang uh a hin’ loh uh a, amaute tang ding si-a a thokik pa’ deihna bang a hin’ nadingun mi khempeuh tangding sihna a thuak ci-in ahi zongin ka ciamteh uh a, Khazih hong itna in zawhthawhna tawh kote hong zol ahi hi. Tua ahih ciangin tu-a kipan kote in ci-le-sa pawlte ngaihsunin kuamah ka thei kei uh hi. Ci-le-sa pawlte ngaihsunin Khazih ka theih ngei uh hangin tu-a kipanin tua bang ka thei ngei nawn kei uh hi. Tua ahih ciangin Khazih sungah a om mi in mithak a suak hi. Alui nate kikheel a, athak a piang zo hi. Na khempeuh Pasian panin a piang hi. Pasian in Khazih hangin amah tawh hong kilemsak a, tua kilemna thu tawh kipawl nasepna za kote hong pia hi. Tua thu in, Pasian in Khazih sungah om a, leitungmite’ mawhna ciamteh loin amah tawh kilemsak a, tua kilemsakna thu kote hong pia hi. Tua ahih ciangin kote in Khazih tang ding sawltak ka hi uh hi. Note in Pasian tawh na kilem un ci-in Pasian in kote tungah hong hansuah mah bangin kote in zong Khazih tang ding kong thuum uh hi. Pasian in mawhna a nei lo Khazih, eite tangding mawhna a suaksak hi. Bang hang hiam na cih uh leh, eite in tua mi hangin Pasian’ dikna i suah theih nading ahi hi. Note in Pasian’ hehpihna thupha na ngah uh a mawkna na suaksak kei un ci-in kote in Topa tawh nasem khawm mi ka hih ciangun note hong hansuahin kong zol uh hi. Bang hang hiam na cih uh leh: “A kilawm hun ciangin nangma kam ka ngai hi, gupna ni ciangin nang kong huh hi,” Pasian in a cih mah bangin tu laitak in a kilawm hun ahi hi, tu laitak in gupna ni hun ahi hi. Ka nasepna uhah mawhsakna a om loh nadingin kipuk nading sukkhakna khat beek ka hih kei uh hi. Bawlsiat thuakna, zawn’khal thuakna, a kipelh zo lo gimna thuakna, satna tupna thuakna, thong sung khumna, mi tawh kitotna, nasepna, ihmu lo a, ngakna, gilkial thuakna, lungsim siangthona, pilna, lungduaina, hehpihna bawlna, Kha Siangtho ngahna, it kheem lo it takpina, thuman thuhilhna, Pasian’ vangliatna lahna, dikna galhiam ziat lam leh vei lamah silhna hang ahi zongin, minthan’na leh simmawhna ahi zongin, phatna leh kosiatna thuakin ahi zongin, mikheemte bang ahi zongin, thuman gen mi hi-in, kuama theih loh mi bangin ahi zongin minthan’na a ngahte hi-in, sihna a thuak mite bangin ahi zongin a hing mite hi-in, thahna a thuak mi bang ahi zongin thahna tawh kipelh mite hi-in, a dahte bang ahi zongin a nuam tawntung mi hi-in, a zawng mite bang ahi zongin a ngah a hau mite hi-in, sum khat beek a nei lo mi bang ahi zongin na khempeuh a nei mite hi-in Pasian’ nasemte ka hi takpi uh a, na khempeuh tawh kilangin ka lak uh hi. Korin mite aw, kote kam un note kiangah hon’sa-in a om hi. Ka lungsim uh zong a zai hi. Kote-ah note in a kawcik na hi kei uh hi: ki-itna hehpihna-ah na kawcik uh hi. Kote’ thupha nong thukkik nadingun lungsim a zai nei un. Tua bang ka cih ciangin ka tate ka hilh bangin kong ci hi. A thu-um lote tawh kipawlin kithutuak lo hakkol na puakhawm kei un. Bang hang hiam na cih uh leh, dikna thu in gitlohna tawh bang ci-a kigawm thei ding hiam? Khuavak in khuamial tawh bang ci kizom thei ding hiam? Khazih in Belial tawh bang ci kilem theih ding hiam? Thu-umte leh thu-umlote in bangci ngah khawm thei ding hiam? Pasian’ biakinnpi in milimte tawh bangci kizom thei ding hiam? Bang hang hiam cih leh, eite in a nungta Pasian’ biakinnpi i hi hi. Pasian’ thupiakna in: “Amaute sungah ka teeng ding a, amau sungah ka vak kawikawi ding hi; Amau Pasian ka hi ding a, amaute in zong keima mi ahi ding uh hi,” a ci hi. Tua ahih ciangin: “Tua mite lak pan paikhia un la, a tuamin om un. A siangtho lote na lawng kei un. Note’ Pasian ka hi ding hi, Note zong ka tanu ka tapa na hi ding uh hi,” Vanglian Topa in a ci hi. Tua ahih ciangin ka itte aw, tua thuciamna eite tawh kikum ahih ciangin i pumpi kihhuainate leh lungsim kihhuainate khempeuh panin kisiangthosakin, Pasian kihta-in, a siangtho gamtatna tawh dimin om ni. Kote ading na lungsim uh na za sak un. Kote in kuamah tungah ka khial kei uh hi. Kuamah ka bawlsia kei uh hi. Kuamah kheemin a sum ka la kei uh hi. Note hong mawhsak nadingin hih bang ka ci kei hi. No tawh nuntak khawm nadingin ahi zongin, sih khawm nadingin ahi zongin ka deih dongin note ka lungtang sungah kong it hi ci-in tuma-in ka hong ci zo hi. Note kiangah lau loin ka hong ci hi; note hangin ka kisathei mahmah hi. Hehnepna tawh ka dim hi. Ka thuakna uh gimna khempeuh ah a kigen thei loin ka lungdamzaw hi. Makedonia gamah ka tun’ uh ciangin ka pumpi ading tawlngakna bangmah om lo hi. Na khempeuh panin bawlsiatna ka thuak uh hi. Pua lamah kidona a om hi, sung lamah launa a om hi. Ahih hangin a kinuaisiah mite a hehnem thei Pasian in Titu hong tun’na hangin kote hong hehnem hi. Titu hong tun’na hang bekin hong kihehnem hi loin note kiangah Titu in a ngah hehnepna hangin zong hong hehnemsak hi. Bang hang hiam na cih uh leh, na lunggulhna uh, na thuumna uh, komau phat nading na deihna lungsim uh a lian hi, ci-in kote kiangah a hong gen ciangin ka lung uh a dam semsem hi. Tuma-a kong khak lai in note hong dahsak hangin a masa-in ka kisik zongin tu-in ka kisik kei hi. Bang hang hiam na cih uh leh, tua lai in note tawlkhat bek hong dahsak hi cih ka thei hi. No hong dahsak ahih maninah a nuam ka hi kei hi, hong dahsaka hong kisiksak ahih manin ka lung a dam hi. Kote hangin note noptuamna uh a neukha beek a kisiat loh nadingin Pasian’ deihna tawh kituakin ka hong dahsak hi. Bang hang hiam na cih uh leh, Pasian’ deihna tawh kituak dahna in hong gup nading tawh kizom kisik kikna lungsim hi a, a kikheel kik thei lo kisikna lungsim hong pia hi. Leitunga dahna in sihna a piangsak hi. Pasian’ deihna tawh kituak note dahna in note sungah bang ci bang phawkna, bang ci bang mawh kiphelna, bang ci bang hehna, bang ci bang launa, bang ci bang lunggulhna, bang ci bang deihna lungsim, bang ci bang thuman tawh daan piak thu-a bawlphatna ci-in en ta un. Note in hih thu sung pan mawhsakna tawh na kipelh uh hi ci-in na khempeuh hangin na lak zo uh hi. Tua mah bangin keimah in note kiangah gelh a, kong piak ciangin mawhna a hih mi leh mawhna a thuak mi bek ngaihsuna gelh ka hi kei hi; kote phattuamna ading Pasian mai-ah bawl nopna lungsim na neih uh na kilatsak nadingun ka hong gelh hi. Tua ahih ciangin kote in hehnepna ka ngah zo uh hi. Tua hehnepna-ah zong note khempeuh in Titu’ lungsim na noptuamsak zo uh a, ama lungdamna hangin kote ka lungdam semsem uh hi. Keimah in note hangin ka kisaktheihna kam ama kiangah ka gen zo ahih ciangin tu-in ka zum nading a om kei hi. Kote in na khempeuh note kiangah thuman kong gen uh bangin Titu mai-ah ka kisaktheihna kam zong a mantak ahih lam a kitel hi. Note in launa leh liin’na tawh amah na tungsak uh a, a thu na ngaihna uh amah in a ngaihsut ciangin note hong itna hehpihna lungsim a dim hi. Keimah in na khempeuhah note tawh kipawlin ka lungmuang semsem a, ka nuam hi. Ute naute aw, Makedonia gamah a om pawlpite tungah a bawl Pasian’ hehpihna thupha note zong kong zasak uh hi. Tua pawlpite in a zawn’ khalna hanga ze-etna tampi a thuak lai takun, a lungdamna uh lian ahih ciangin nakpi zawngkhal napi-in sumpi piakna nasia takin a khang hi. Bang hang hiam na cih uh leh, amau in a hih theih zah tham loin, a hih theih zah sanga tamzaw amau lungsim ut thu-in piak nopna lungsim a nei uh hi ci-in teci ka pang hi. Amaute in misiangthote’ vakna huhna a nasep theih nading uh hansuahna zolna kam tampi tawh kote kiangah hong thuum uh hi. Tua bang a hih uh ciangin kote lawpna zah tham loin a hih uh a, Pasian deihna tawh kituakin a masa-in Pasian kiangah ahi zongin, kote kiangah ahi zongin, amau mahmah hong kipia uh hi. Tua ahih ciangin Titu in note kiangah hong kipatsa bangin hih hehpihna zong a zawh khit nadingin kote in amah ka hanthawn uh hi. Ahih hangin note in upna, thuhilhna, pilna, hahkatna a pawlpawl leh nong itna uh-a kipan na khempeuh tawh na dim uh mah bangin hih hehpih piakna zong na dimsak ta un. Tua bang kong cih ciangin thupiakna tawh hong ci ka hi kei hi. Midangte’ hahkatna paulamin note itna lungsim in a man hiam, a man lo hiam, ze-etna tawh kong ci hi. Bang hang hiam na cih uh leh, i Topa Zeisu Khazih in a hau napi-in zawngkhalna a thuakna tawh note in hauhna na ngah nadingun note tangdingin zawngkhalna a thuak thupha hehpihna na thei uh hi. Hih thu panin keimah in ka lungsim ngaihsutna kong lak hi. Bang hang hiam na cih uh leh, nikumin lungsim hanciamna-ah zong note in a pia masa bek hi loin a ut masa na hi uh hi. Tua ahih ciangin nidang lai-inah hih nopna lungsim hanciamna a om mah bangin tu-in na hih theih zahun hih un la, hih thu na zosiang un. Bang hang hiam na cih uh leh, hih nopna lungsim a om leh, hih zawh lohna ngaihsun loin, hih zawh ding bek ngaihsutna in a deihhuai na ahi hi. Hih thu kong gen ciangin midangte in noptuamna ngahin note in zawn’na na thuak nading uh hanciam ka hi kei hi. Note ading huhna hahkatna ka hanciamna bang uh Titu’ lungsim sungah a guang Pasian in phatna ngah ta hen. Amah in kote hanthotna thu a ngai tham loin, hih nopna lungsim nei a, ama thu-in note kiangah hong pai hi. Pasian’ Lungdamna Thu hilhna-ah pawlpi khempeuh lakah phatna a ngah sanggampa zong Titu tawh kong sawl khawm uh hi. Tua sanggampa in Pasian’ pahtawina ahi zongin, komau lungsim phatna ahi zongin kilangsak a, hehpihna sumpi piakna nasepna-ah kote tawh hong tonkhawm dingin pawlpite in teelin a koihpa ahi hi. Kote in tua a tampi sumpi piak hehpihna na ka sep lai takun mawhsakna a om loh nadingin ka kikem uh hi. Bang hang hiam na cih uh leh, Topa mai bek hi lo, mite mai-ah zong a kilawm a kituaka gamtat ding ka hanciam uh hi. Tua nihte tawh a dang sanggampa zong kong paisak uh hi. Tua sanggampa na khempeuh ah tam veipi ka ze-et uh a, ka theih bangin a hahkatpa ahi hi. Tu-in note a hong muan’ mahmah maninah a hahkat semsem hi. Titu in bang ci bang mi ahi hiam ci-a hong dong mi a om leh, ka kikholhpih ka lawmpa ahi hi, note huh dingin kei tawh a semkhawm mi zong ahi hi. I sanggamte zong bang ci bang mite ahi uh hiam ci-a hong dong mi a om leh, pawlpi’ sawltakte ahi uh hi, Khazih in a pahtawi mite zong ahi uh hi. Tua ciangin note ki-itna uh ahi zongin, kote in note hangah ka kisaktheih nading uh ahi zongin pawlpite mai-ah tuate tungah a kilangin na lak un. Misiangthote’ vakna thu note kiangah kong gelh hangin na phattuamna uh om tuam lo ding hi. Bang hang hiam na cih uh leh, note in huh nopna lungsim na neih uh ka thei hi. Tua huh nopna lungsim hangin ka kisathei hi. “Akhaia gam mite in nikum pekin a khol zo uh hi,” ci-in Makedonia gam mite kiangah ka gen thei hi. Note’ thanopna lungsim in mi tampi a hansuah zo hi. Ahih hangin note hanga kote’ kisaktheihna in a mawkna suak loin, tua kam mah bangin a kigingkholsa-in na om nading uh ka u ka naute kong sawl hi. Tua bang a hih kei leh, Makedonia mi kimkhat in kei tawh hong pai khawmin note a kholsa-a na om loh uh hong mu le-uh note’ zum ding gen loh, lau lo-a kong muan’na sa uhah kote in ka maizum ding uh hi. Tua ahih ciangin nidang a, kiciamsa note’ sumpi piakna, zawhthawh thu-a piak sum bang hi loin, hehpihna bangin khol kholh nadingin ka u ka naute in no kiangah hong pai masa-in, tua sumpi na kiginkholh nadingun hong hansuah loin om leng, kilawm ka sa kei hi. Khaici tawmkha a vawhte in tawmkha a at ding hi, citpiakna tawh a tampi a vawhte in a tampi a at ding hi ci-in na ciamteh un. Mi khempeuh in amau lungsim sung uhah a hanciam bangin pia uh hen. Hazatna lungsim tawh ahi zongin, khia loin om thei lo ding cihna lungsim tawh ahi zongin kipia lo ding hi. Bang hang hiam na cih uh leh, piak nopna lungsim tawh a pia mi bek Pasian in a it hi. Note in na khempeuhah na zat khop ding uh sum a pawlpawl na neih niloh uh a, gamtatpha apawlpawl tawh na dim mahmah nadingun thupha apawlpawl a kicin’ nading Pasian in a hih thei hi. Lai Siangtho in: “Amah in a hawmthang zo hi, mi zawngte a thupha a hawm zo hi; Ama dikna in a kip tawntung hi,” a ci hi. Khaici vawhte’ khaici ahi zongin, nek theih an ahi zongin a piapa in note vawh ding khaici hong pia a, a khangsak ding a, note dikna’ gahte a tamsak ding hi. Tua bangin note in hehpihna lungsim tawh apawl apawl hawmsak a, na piak nadingun na khempeuh na hauh uh ciangin kote tungah Pasian’ hehpihna phatna ding a om ding hi. Bang hang hiam na cih uh leh, hih nasepna in Pasian’ mite lak-a, mizawngte zawn’na a huh tham loin, Pasian’ hehpihna phat nadingin na tampi tawh a dim hi. Note in Khazih’ Lungdamna Thu deihna-ah a kilanga na zuih uh ahi zongin, tua misiangthote-a kipan mi khempeuh hehpihna lungsim tawh hawmin na piakna uh ahi zongin, amau in a ngaihsut uh ciangin tua kivakna lim teci paulamin Pasian’ hehpihna a phat thei uh hi. Note tungah a lamdang Pasian’ hehpihna thupha amaute in ngaihsunin, note ading thungenin, note hong lunggulh uh hi. A kigen khin zo lo hong piakkhong letsong thupha hangin Pasian tungah hehpihna phatna om ta hen! Note kiangah kiniamsak a, note tawh a kikhen ciangin a hang keimah Paul in Khazih’ lungnemna leh hehpihna tawh note kong thuum hi. Kote in ci-le-sa ngeina bangin a gamta mi ka hi uh ci-in hong ngaihsun mi kimkhatte kiangah lau lo-a ka hanciam bangin, note kiangah ka hong tun’ ciangin tua zah lau lohnate om loh nadingin kong thuum hi. Bang hang hiam na cih uh leh, kote in ci-le-sa ngeina bangin ka gamtat uh hangin ci-le-sa ngeina bangin gal ka do kei uh hi. Kote’ galdona-a ka zat uh hiamte in ci-le-sa tawh kipawl ahi kei hi: khuapi kulhte a cim gawpsak thei, Pasian mai-ah vangliatna tawh a dim hiam ahi uh hi. Tua hiamte tawh mi hanciamna ahi zongin, Pasian theihna pilna lang khatah a kiphasak ngaihsutnate ahi zongin khuplet gawpin, lungsim khempeuh manin khumcipin Khazih’ thu ka ngaisak uh hi. Note thungaihna in a kicin’ khit ciangin thungai lo khempeuh daan pia dingin a baihsa-in ka om uh hi. Note in na maitang uh a, omte bek en na hi uh hi. Mi khat in, “Kei Khazih’ mi ka hi,” ci-in amahmah a ki-up leh, tuapa in Khazih’ mi a hih bangin kote zong Khazih’ mi ka hih thu uh, khat vei amahmah in ngaihsun ta hen. Note sukgawp nading hi lo, hong kipsak nadingin Topa in kote a hong piak thuneihna-ah a tampi ka kisaktheih hangin zumna ka thuak kei ding hi. Ka hong piak lai tawh note hong tawng bangin ka hi nuam kei hi. Bang hang hiam na cih uh leh, “Ama lai in a gik a vanglian tawh kidim lai a hih hangin ama pumpi ahih leh, hatna nei lo, thu-a kimang lo kam a pau thei mi hi,” a ci mi a om thei hi. Kote in ka pumpi uh a om loh ciangin lai sungah ka gelh uh kammal bangin ka hih uh bangin, komau pumpi uh a om ciangin zong a hihte ka hi uh hi, ci-in tua mite in ciamteh ta uh hen. Amau mah a kiphatte tawh kisimkhopna ahi zongin, kidemna ahi zongin ka hih ngam kei uh hi. Tuate in khat leh khat kitehin kidem uh a, pilna nei lo uh hi. Kote ka hih uh leh, ka sep ding uh kheng a, ka bawlna uhah ka kisathei kei ding uh hi. Pasian in hong hawmsak ka nasep ding uh kitehna sungah ka hihna uh bekah ka kisathei ding uh hi. Tua kitehna in note dongin ka hong ban uh hi. Note dong hong ban lo bangin kote in khengin sem ka hi kei uh hi. Bang hang hiam na cih uh leh, Khazih’ Lungdamna Thu hilh dingin note omna dongin kong tung zo uh hi. Kote in ka nasep nading uh khenin mi dangte’ nasepna sungah ka tum uh ahih maninah kisathei ka hi kei uh hi. Tua bang amau sepna sungah a kibawlsa nate-ah kisathei loin, note gam lang khatah galkah-in Pasian’ Lungdamna Thu hilh theihna om nadingin note thu-upna a khan’ lai takin kote nasepna in a tanzau mahmah ding hi ci-in ka lawp uh hi. Tua ahih ciangin a kisathei mi in Topa sung bekah kisathei ta hen. Bang hang hiam na cih uh leh, amahmah a kiphat mi in san’ huai lo hi; Topa’ phatna a ngah mi in san’ ding a kilawm hi. Ka haina neukha note in na thuak le-uh teh ka ut hi. Na thuak taktak un. Bang hang hiam na cih uh leh, keimah in note nungak siangtho bangin Khazih kiangah kong piak nadingin pasal khat tawh ka hong kiteengsak zo ahih ciangin, Pasian tawh kipawl lunghihmawhna tawh, note ading ka lunghimawh hi. Gulpi in ama zuauna tawh Evua a kheem mah bangin note lungsim ngam-in kisia-in, Khazih lamah a om khin na lungsim siangtho uh a mangthang ding hi ci-in ka lunghihmawh hi. No omna-ah a hong pai mi in ko hong hilh loh Zeisu khat hong hilh zongin, na ngah ngei loh uh Kha Siangtho na ngah uh zongin, na ngaih nai loh uh Lungdamna Thu na ngai uh zongin tua-pa na thuak thei uh hi. Keimah in sawltak liante nuaiah neukha bek a neuzaw ka hi kei hi. Ka kam hangin a pil lo mi ka hi zongin pilna lamsangah pil lo mi ka hi kei hi. Hih thu khempeuh note apawl pawlin kong lak zo uh hi. Note pahtawi nadingin keima pumpi ka niamsak a, thaman la loin note kiangah Pasian’ Lungdamna Thu kong gen kong hilh ciangin ka mawh hiam? Note nasem dingin adang pawlpite tung pan thaman dangka sang a, amau sum a sut ka suak ta hi. No tawh ka omkhawm lai takin na khat peuhpeuh ka deih ciangin kuamah tungah vangik ka guan’ kei hi. Bang hang hiam na cih uh leh, Makedonia gam pan a hong pai ute naute in ka deihna khempeuh hong pia hi. Note tungah gimna khat ka suah loh nadingin kei in na khempeuhah ka kikem hi. A nung ciangin zong ka kikem lai ding hi. Khazih’ thuman thutak in keima sungah a om mah bangin Akhaia gamah hi bang ka kisaktheihna kuamah in hong khaam zo kei ding hi. Bang hang hiam? Note ka hong it loh hang ahi hiam? Kong it cih Pasian in a thei hi. Thu nei nuamte in a neih theih loh nading ahi zongin, amau kisaktheihna-ah kote banga tel taka, kilat theih nading ahi zongin ka hih bangin ka hih lai ding hi. Bang hang hiam na cih uh leh, tua bang mite in sawltak zuau ahi uh hi. Khazih’ sawltak banga kibawl a kheem thei nasemte ahi uh hi. Hih thu in lungmanhuai hi lo hi. Satan nangawn in khuavak tawh kipawl vantungmi bangin a kibawl thei hi. Tua bang ahih ciangin ama nasemte zong thudikna’ nasem bangin a kibawl leh, bang genna a om ding hiam? Amau in amau gamtatna hangin a tawpna-ah a thuak ding uh hi. Khatvei ka genin ah, keimah in mihai hi ci-in kuamah in hong um kei hen. Ahih kei leh, kei zong a neukha ka kisaktheih na’ngin, kei mihai bangin hong ngaihsunin hong thuak un. Hih bang ka genna in Topa’ thupiak bangin gen ka hi kei hi, mihai bangin, lau loin, kisathei-in ka gen hi. Mi tampite in ci-le-sa ah kisathei uh ahih ciangin keimah in zong ka kisathei ding hi. No mipilte na hih uh ciangin ki-itna lungsim tawh mihaite na thuak uh hi. Mi khat in note sila hong suaksak ahi zongin, hong ne ahi zongin, hong man ahi zongin, a kiphasak ahi zongin, na biang uh hong beeng ahi zongin na thuak uh hi. Kote hatna nei lo hi ci-a hong kikosiatna paulamin kong ci hi. Ahih hangin na khat peuhpeuh ah mi khat lau loin a om leh, keimah in zong lau loin ka om hi ci-in mihai bangin ka gen hi. Amaute in Hebru mi ahi uh hiam? Kei in zong ka hi hi. Amaute in Israel mi ahi uh hiam? Kei in zong ka hi hi. Amaute in Abraham’ suan ahi uh hiam? Kei in zong ka hi hi. Amaute in Khazih’ nasemte ahi uh hiam? Kei in zong ka hizaw hi ci-in mihai bangin ka gen hi. Gim mahmaha nasem zaw mi, thong sungah khiatna a thuakzaw mi, satna tupna kisim zo lo a thuak mi, sihna ding tawh tam veipi kituak ka hi hi. Nga vei dongin Judah mite’ khut sungah sawmli-ah khat a kiam satna ka thuak zo hi. Thum vei dongin ciing pum tawh satna ahi zongin, khat vei suang tawh den’na ahi zongin ka thuak zo hi. Thum vei dong teembaw siatna ka thuak zo hi. Sun khat leh zan khat tawntung tuipi sungah ka om zo hi. Tam veipi thuhilhin ka zin hi, gun galkah kihtakna, mi suamte kihtakna, ka mi pawlte’ hong bawlsiatna launa, Gentailte’ bawlsiatna launa, khuapi sungah a tung launa, gam lakah a tung launa, tuipi launa, u leh nau banga kibawl mite’ bawlsiatna launa, hih gimna khempeuh ka thuak zo hi. Gim mahmah a, hahkatna tawh nasepna, tamveipi gilkialna dangtakna, tam veipi antan’na, khuadam thuakna, puan nei lo-a omna, hih gimna khempeuh ka thuak zo hi. A pua lamah a om tua thute tham loin, pawlpi khempeuh lunghihmawhna tawh nisimin gimna ka thuak hi. Ka tha kiam lohin kua tha kiam ahi hiam? Ka lunggim lohin kua in khial ahi hiam? Kisathei ding ka hih leh, ka thanemna bek suangin ka kisathei ding hi. Keimah in zuau thu ka gen kei hi cih a tawntung thupha a ngah Topa Zeisu’ Pa leh Pasian in a thei hi. Damaskas khua-a Aretas kumpipa’ khua ukpa in kei hong man dingin Damaskas khua ah hong pan’ lai takin, nungzuite in seeng sungah khuapi kulh tung panin hong khiasuk uh a, ama khut sungpan ka suakta hi. Keimah in kisaktheihna ka bawl ding a kilawm loh hangin ka bawl ding hi. Ahih hangin Topa hong muhsak mangmatna leh thupiakkholhna thu kong gen ding hi. Tuma kum sawm leh li lai takin Khazih sungah a om mi khat, thumna vantung dongin a paipih ka thei hi. Ama pumpi tonpih hiam, tonpih lo hiam ka thei kei hi—Pasian in a thei hi. Tuapa Paradis khua-ah a paipih hi. Mite gen dinga kilawm lo, kigen thei lo kam a zakna thu a thei hi. A pumpi a thei hiam, thei lo hiam ka thei kei hi—Pasian in a thei hi. Tua bang mi hangin ka kisathei ding hi. Keimah pumpi a hih leh, thanemna sim loh, ka kisathei kei ding hi. Kisathei nuam hi leng zong mihai ka hi kei ding hi. Bang hang hiam na cih uh leh, keimah in a man takin thu ka gen ding hi. Midang khat in kei hong muh sangin, ka thu a zak sangin, keimah hong up zawk loh nadingin gen loin ka om ding hi. Ka ngah mangmatnate a lamdan’ mahmah hangin kisaktheihna lungsim ka neih loh nadingin kei hong daantat na’ng Satan’ sawltak ahi, ka pum hong sun ling khat hong pia hi. Tua zawn’khalna tawh kipelh nadingin Topa kiangah thum vei dongin ka ngen hi. Ka thuum khit ciangin, “Ka hehpihna thupha in nang ading a kicing hi, ka vangliatna in thanemna ah a kicing hi,” ci-in thu hong pia hi. Tua ahih ciangin Khazih’ vangliatna in kei tungah hong tun’ nadingin ka thanemna hangin ka kisaktheih zawk nading ka utzaw hi. Tua ahih ciangin Khazih hangin thanemna, kosiatna, zawn’khalna, bawlsiatna, a haksa gimna ka thuak ciangin ka nuam hi. Bang hang hiam na cih uh leh, ka thanem ciangin ka thahat hi. Mihai ka suak zo hi! Note in kei, zawhthawhna tawh mihai nong suaksak zo uh hi. Bang hang hiam na cih uh leh, note phatna ngah ding ka kilawm hi. Keimah in bangmah ka hih loh hangin sawltak a lian belte nuaiah neukha beek a gina lozaw ka hi kei hi. Ahi takpi-in na khempeuh ah thuakna tawh nalamdangte leh dipkuat huaite, vangliatnate tawh, sawltakte’ lim note lakah a kilang khinzo hi. Keimah in note ading vangik ka suah lohna sim loh, note in pawlpi dangte sangin bangah a gina lozaw na hi uh hiam? Tua bang ka khialhna hong maisak un. Thum veina note kiangah hong pai dingin a kigingin ka om hi. Ahih hangin note’ adingin vangik ka hi kei ding hi. Bang hang hiam na cih leh, note neihsate deihin, a zong ka hi kei hi, nomau mahmah kong zong hi. Tanute tapate in a nu a pate ading sum khol ahi kei uh hi; a nute a pate in a tanute a tapate ading sum a khol uh hi. Keimah in note kha uh nopsak nadingin ka neihsate ahi zongin, ka pumpi ahi zongin, lungdamna tawh ka beisak nuam hi. Keimah in note a tam zaw-in kong it leh, note in kei a tawm zaw-in nong it ding uh hiam? Keimah in note tungah vangik khat ka suah lohna maan ta hen. Ahi zongin mipil ka hih ciangin kheemna tawh note hong man hi ta leng zong, note kiangah ka hong paisak mi khatpeuh tung tawnin note’ neihsa kheemna tawh la ngei ka hi hiam? Titu in note kiangah a pai nading ka thuum a, amah tawh i sanggampa khat kong paisak hi. Titu in kheemna tawh note sum a la hiam? Kote in lungsim kibangin a gamta hilo ka hi uh hiam? Lam khat bek zui hilo ka hi uh hiam? Kote in note mai-ah tu dongin kisuan’takna kampau hi ci-in nong um uh hiam? Khazih sungah kipin Pasian mai-ah ka gen uh hi. Ahih hangin ka itte aw, ko ka hihna uh na khempeuh note kipsak nadingin ka hih uh hi. Bang hang hiam na cih uh leh, ka hong tun’ ciangin note in ka deih mi na hih loh uh a, keimah in zong no deih loh mi hi ding ahi zongin, note lakah kitotna, gendaina, nakpi-a hehna, kiseelna, kiphunsanna, kikhenna, kiphatsak theihna, buaina a suah ding ahi zongin, nidang hunin khialin kihhuai gamtatna, numei tawh mawhna, huk luatna, lan luatnate hih kha-in, tu dongin kisik lo-a om mi tampi hangin lungsim nuam loin ka thuum a, note mai-ah ka Pasian in kei hong niamkhiatin amaute hanga hong kidahsak khak ding ka lau hi. Hih in note kiangah kong pai ding a thum veina ahi hi. Teci nih bang thum bang kam hangin thu khempeuh a kip ding hi. Khat vei kong tun’ ciangin ka hong dawm kei ding hi ci-in a masa-a mawh neite-a kipan a om lai mite khempeuh kiangah nidang a, ka gen tham loin, tu-in zong no tawh ka omkhawm loh hangin, nih veina-a omkhawm lai mah bangin khat vei kong genkhol hi. Note lakah thanem lo-a a thahat Khazih in keima tungah hong genna teci note in na zong uh ahih ciangin, ka hong tun’ ciangin ka hong dawm kei ding hi. Bang hang hiam na cih uh leh, tua Khazih in thanemna hangin singlamteh tungah sihna a thuak zongin Pasian’ vangliatna tawh a nungta hi. Kote in zong Khazih sungah ka thanem uh zongin Pasian’ vangliatna hangin Khazih tawh note lakah ka nungta khawm ding uh hi. Note in thu-upna sungah kipin na om uh hiam, na om kei uh hiam, nomau pumpi uh na kisittel ciat un. Nomau pumpi uh na kize-et un. A kisittel zo lote na hih kei uh leh, Zeisu Khazih in note sungah a om hi ci-in nomau thu nomau in thei lo na hi uh hiam? Kote in a kisittel zo lote ka hi kei uh hi cih thu note in na theih ding uh kong muang hi. Kote in a kisittel zo mi ka hihna uh a kilat nading deihna hi loin, a kisittel zo lo mi bang ka hi uh zongin, note in ahoih na gamtat theih nadingun, gamtat hoih lo khat beek na gamtat loh nadingun Pasian kiangah thu ka ngen uh hi. Kote in thuman lang khatah bangmah ka hih thei kei uh hi, thuman lamah ka hih thei bek uh hi. Kote in thanemin note in na thahat lai takun ka lung uh a dam hi. Note na kicin’ nadingun thu ka ngen uh hi. Tua ahih ciangin a kiphel khiatsuk nading hi lo, a kilam nadinga Topa in kei hong piak thuneihna thu a om mah bangin, kong tun’ ciangin nakpi-a kong bawl loh nadingin no tawh ka omkhawm loh lai takin hih thu kong gelh hi. A tawpna thu in ute naute aw, na cidam ta un. Kicin’na, kihehnepna na nei un. Lungsim kikhatin om un. Khat leh khat kilemin om un. Tua bang na hih uh leh, itna nopna Pasian in no tawh hong omkhawm ding hi. Khat leh khat a siangtho napna tawh na kihopih un. Misiangthote khempeuh in note hong hopih uh hi. Topa Zeisu Khazih’ hehpihna thupha ahi zongin, Pasian hong itna ahi zongin, Kha Siangtho’ kihotheihna ahi zongin note khempeuh tawh omkhawm ta hen. Mite kiang pan hi lo, mite’ thu tawh hi lo, Zeisu Khazih’ thu tawh ahi zongin, tua Zeisu sihna panin a thosak Pa Pasian’ thu tawh ahi zongin sawltak ahi keimah Paul akipan, keimah tawh a omkhawm ute naute khempeuh in Galati gamah a om pawlpite kiangah ka hong zasak uh hi. I Pa Pasian leh Topa Khazih kiang pan hehpihna thupha leh nopna in nomau tungah om ta hen. Tua Zeisu in Pasian’ deihna tawh kituakin a gilo ahi hih leitung pan eite hong gumkhia dingin ah eite khialhna ading ama pumpi kipia hi. Tua Pasian in minthan’na ngah tawntung ta hen! Amen. Khazih’ hehpihna thupha hangah note hong sampa tawh hih zah taka manlangin kikhenin ‘lungdamna thu’ na sang uh ahih ciangin lamdang ka sa hi! Tua Lungdamna Thu in ‘lungdamna thu dang’ ahi kei hi. Note hong bawlsia-in Khazih’ Lungdamna Thu a lumlet nuam mi kimkhat a om uh hi. Ahih hangin nomau kiangah ka hong hilh uh Lungdamna Thu longal adang Lungdamna Thu kote ahi zongin, vantung pana hong pai vantungmi khat ahi zongin, hong hilh mi in hamsiatna thuak ta hen. Na san’sa uh Lungdamna Thu sim loh lungdamna thu a dang, mi khatpeuh peuh in hong hilh leh, tua mi in hamsiatna thuak ta hen, ci-in ka cihsa bangin tu-in ka ci kik hi. Tu-in keimah in mi’ deihna zui ka hi hiam? Ahih kei leh, Pasian’ deihna zui ka hi hiam? Mite’ pahtak ding hanciam ka hi hiam? Mite’ pahtak nading hanciam ka hih leh, Khazih’ sila ka hi kei hi. Ute naute aw, keimah in ka hilh Lungdamna Thu in mite’ thu ahi kei hi, mite kiang pan ka ngah ahi kei hi, mite kiangah ka sin zong ahi kei hi. Zeisu Khazih’ thupiakna hang bekin ka ngahna thu note kiangah ka hong zasak hi. Bang hang hiam na cih uh leh, nidang lai-in Judah ngeina zui-in ka om a, ka gamtat ahi Pasian’ pawlpi a kigen thei loin ka bawlsiat a, ka sukgawp thu ahi zongin, ka pu ka pate’ khut tung pan ka ngah ngeina siamin ka zuih zawk thu ahi zongin note in na thei uh hi. Ahih hangin ka nu’ gil sung pan hong teelkhia a, ama hehpihna thupha tawh hong sam Pasian in, a Tapa’ Lungdamna Thu Gentailte kiangah hilh dingin, ama deihna tawh kituakin ama Tapa kei sungah a kilatsak ciangin, keimah in si-le-sa tawh vaihawm loin, eimah sawltak a suak mite omna Jerusalem khua-ah zong pai loin Arabia gamah pai-in khatvei Damasakas khua-ah ka ciahkik hi. Tua nung kumthum khit ciangin Kefas tawh kimeltheih nadingin Jerusalem khua-ah pai-in amah tawh nisawm leh ninga ka omkhawm hi. Amah leh Topa’ nau Jeim longal adang sawltakte khat beek ka mu kei hi. nomau kiangah hih bangin ka zaksakna-ah thu zuau ka zang kei hi ci-in Pasian mai-ah ka kiciam hi. Tua nung ciangin Siria gam leh Kilikia gamah pai-in Judah gama Khazih sungah a om pawlpi mite in ka meel-in hong ciamteh uh hi loin, “Eite hong bawlsia ngei mi in nidang lai a, a sukgawpsa upna thu, tu-in amahmah in a hilh hi,” ci-in a zakna bek uh tawh keimah hangin Pasian’ min a phat uh hi. Tua nung kumsawm leh kumli khit ciangin keimah in Titu samin, Barnabas tawh Jerusalem khua-ah ka paito kik hi. Pasian in thu hong piak bangin pai-in Gentailte kiangah Lungdamna Thu ka hilhnate, amaute ka zasak hi. Ahih hangin ka nasep thu leh ka sepsate in a mawkna a suah loh nadingin, a minthang mite kiangah ka gen sim hi. Ahih hangin keimah tawh a tonkhawm Titu in Grik mi ahi napi-in a vunat dingin thu a pia kei uh hi. Khazih Zeisu hangah i ngahsa suahtakna thu en simin eite sila hong suahsak nadingun kheemna tawh a hong tumsim ute naute banga kibawl mite’ thu hangin tua bang hong bawl uh hi. Thuman thu ahi Lungdamna Thu in nomau sungah kip-a, a om nadingin kote in tua mite thu mitphiat sung nangawn ka mang ka ngai kei uh hi. Mi lian a kicite in nidang lai-inah bang ci mi ahih thu kei tawh kisai lo hi, Pasian in mi maitang zahtak a nei kei hi. Tua mite tawh kipawlin bangmah ka ngah lo tham loin, vunatna a thuak mite lakah Piter in sawltak a suah nadingin Piter tungah a bawlpha mi in Gentailte lakah kei sawltak ka suah nadingin keimah tungah hong bawlpha a, vunatte tawh a kipawl Lungdamna Thu Piter tungah a piak mah bangin vunat lote tawh a kipawl Lungdamna Thu kei tungah a hong piakna, amaute in a theih uh ciangin khuamte a kici Jeim, Kefas, leh Johan-te in ka ngah hehpihna thupha a theih uh ciangin, amaute in vunatte kiangah pai nadingin leh kote in Gentailte kiangah pai nadingin, amaute in Barnabas leh kei tungah kilawmtatna tawh a khut taklam uh hong pia uh hi. komau in mizawngte ka ngaihsut nadingun amaute’ deihna khat bek a om hi. Tua na zong kei in sep ding hahkatna lungsim ka nei hi. Tua nung ciangin Antiok khua-ah Kefas hong pai ciangin amah mawhsak nading thu om ahih maninah, kei in amah tel takin nialin ka kham hi. Bang hang hiam na cih uh leh, mi kim khat in Jeim kiang pan a hong tun’ ma-in Gentailte tawh an a ne khawm hi. Ahih hangin tuate hong tun’ khit uh ciangin amah in vunatte a kihtak maninah nungkinin a tuam om hi. A dang Judah mite in zong amah tawh simtat khawmin, amau simtat manin Barnabas nangawn in amaute lam a zui hi. Amaute in Lungdamna Thu tawh kituak thuman thutak bangin a tang takin a zuih loh uh ka muh ciangin mite khempeuh mai-ah Kefas kiangah, “Nang, Judah mi na hi napi-in Judah ngeina bang gamta loin, Gentailte’ ngeina bang na gamtat leh, Gentailte in Judah ngeina bang a zuih nadingun bang hangin amaute zawhthawh thu tawh na bawl hiam?” ka ci hi. Thukham zuihna hangin diktan’sakna kingah lo hi, Zeisu Khazih’ thu-upna bek hangin diktan’sakna kingah hi ci-in mawhna a nei Gentailte hi loin, a pian’na pan Judah mite ahi eite in i theih mah bangin Thukham zuihna hangin diktan’sakna a ngah lo, Khazih upna hangin diktan’sakna a ngah eite in zong Zeisu Khazih’ thu i um zo hi. Bang hang hiam na cih uh leh, Thukham zuihna hangin kuamah in dikkisakna a ngah kei ding hi. Khazih sungah diktan’sakna ngah nading ka hahkat napi-in eite mahmah in zong mawhna nei mi i hih a kilat leh, Khazih in mawhna thu bawl mi ahi hiam? Tua bang hi lo hi. Bang hang hiam na cih uh leh, nidanga ka suksiatna ka lamkik leh, mawhnei mi ka hi ci-in kilangsak hi. Keimah in Pasian hangin ka nuntak theih nadingin Thukham tawh Thukham hangin si-in ka om hi. Keimah in Khazih tawh singlamteh tungah sihna ka thuakkhawm zo hi. Keima pumpi a nungta lai ahi kei hi, Khazih in keima sungah a nungta hi. Tu-in ka pum sungah a nungta ka nuntakna in kei hong it a, keimah tangding ama pumpi a paai Pasian Tapa’ upna tawh a nungta hi. Pasian’ hehpihna thupha ka paaikhia kei hi. Bang hang hiam cih leh, thukham zuihna hangin dikkisakna kingah leh, Khazih in a mawkna-in sihna a thuak hi. Pilna a nei lo Galati mite aw, singlamteh tungah sihna a thuak Zeisu Khazih in no mai-ah a tel takin hong kilak napi-in, note a kua in hong bum hiam? Thukham zuihna hangin Kha Siangtho na ngah uh hiam, ahih kei leh, upna thu na ngahna uh hangin na ngah uh hiam ci-in thu khat bek note kiangah ka thei nuam hi. Hih zah takin pilna nei lo na hi uh hiam? Kha Siangtho suangin na kipat khit uh ciangin ci-le-sa suangin na tangtun’ zo ding uh hiam? Hih zah tak gimna a mawkna-in na thuak uh hiam? A mawkna taktak ding ahi hiam? Tua tham loin, Kha Siangtho note hong pia a, note lakah nalamdang hong lakpa in Thukham na zuihna hangun hong bawl ahi hiam, ahih kei leh, upna thu na ngaihna hang bek uh ahi hiam? Tua bangin “Abraham in Pasian um a, a upna hangin Pasian in amah midikin a sang hi,” Lai Siangtho in a ci hi. Tua ahih ciangin upna a nei mite in Abraham’ suante taktak ahi uh na thei un. Pasian in upna tawh Gentail mite’ dikkisakna a kipsak hi ci-in Lai Siangtho in thei kholin, Abraham kiangah, “Nangmah hangin mi pawl khempeuh in thupha a ngah ding uh hi,” ci-in Lungdamna Thu a na hilh khol hi. Tua ahih ciangin thu-upna a nei mite in a um Abraham tawh thupha a ngah khawm uh hi. Thukham tawh kipawl gamtatna a suang mi khempeuh in hamsiatna nuai-a om mi ahi uh hi. Bang hang hiam na cih uh leh, “Thukham laibu sungah a kigelh thu khempeuh a zui tawntung lo mi khempeuh in hamsiatna a thuak uh hi,” ci-in Lai Siangtho sungah a kigelh hi. Thukham zuihna hangin mi khat beek in Pasian mai-ah diktansakna a ngah kei hi cih tel takin a kilang hi. Bang hang hiam na cih uh leh, “Midik in thu upna tawh a nungta ding hi,” ci-in a kigelh hi. Thukham in upna tawh a kikum kei hi. Bang hang hiam na cih uh leh, “Tua gamtatna a gamta mi in tua gamtatna hangin a nungta ding hi,” ci-in kigelh hi. Tua ahih ciangin Pasian mai-ah Thukham hangin kuamah in diktan’sakna a ngah zo kei ding hi. “Sing khuam tungah kikhaina a thuak mi khempeuh in hamsiatna a thuak mi ahi uh hi,” ci-in Lai Siangtho sungah a kigelh mah bangin Khazih in eite tang dingin hamsiatna a thuak ciangin Thukham’ hamsiatna pan eite a hong tankhia zo hi. Tua in Khazih Zeisu hangin Abraham’ thupha in Gentailte tungah a tun’ na’ng ahi zongin, eite in thu-upna hanga Kha Siangtho tawh kipawl thuciamna i ngah na’ng ahi hi. Ute naute aw, leitung mi bangin thu ka geninah, mi ahih hangin kiciamnate a kibawl khit ciangin kuamah in a paaikhia thei kei a, kuamah in behlapin thu a guang thei kei hi. Thuciamna Abraham leh a suan a khakte tungah a koih zo hi. “A suan a khakte,” ci-in mi tampite ngaihsunin thu a pia kei hi. “Nangma suan mi khat bek,” ci-in ngaihsunin thu a pia hi. Tua mi khat in Khazih ahi hi. Ke’n kong cih inah, Pasian in a kipsak kiciamna kum zali leh kum sawmthum khit ciangin a piangkik Thukham in a mawkna a suah nadingin a paaikhia ahi kei hi. Bang hang hiam na cih uh leh, innluahna in thukham tawh kipawl ahih leh, kiciamna thu tawh kipawl lo hi. Ahih hangin Pasian in Abraham kiangah kiciamna hangin tua luahna a pia zo hi. Tua ahih ciangin Thukhamna in a bang phatuam ahi hiam? Kiciamna a ngah a suan a khakte a hong pai matengin khialhna hangah a pia thuah hi. Tua thukham in vantungmite hangah sepkhiat dingin a kikham mi’ khut ah a kikoih hi. A kikham mi in lang khat bek tawh a kipawl kei hi. Ahih hangin Pasian in khat bek ahi hi. Tua ahih ciangin Thukham in Pasian’ thukhamnate lang khatah om ahi hiam? Tua bang hi lo hi. Bang hang hiam na cih uh leh, nuntakna a pia thei thukham a om leh, a man takpi tua thu hangin dikna kingah zo hi. Tu-in ahih leh, a um mite in Zeisu Khazih upna tawh kipawl kiciamna a ngah nadingun Lai Siangtho in na khempeuhte mawhna sungah a khakcip hi. Upna thu hong tun’ma-in eite in thukham nuaiah ukna thuakin i om a, a nung ciangin a kilang ding upna lamenin kikhum cipna thuakin i om hi. Tua ahih ciangin eite in upna hangin diktan’sakna i ngah nadingin Thukham in eite Khazih kiangah hong kha dingin eite hong cingpa a suak hi. Tu-in ahih leh, upna thu hong tung ahih ciangin tua hong cing khut nuaiah i om nawn kei hi. Bang hang hiam na cih uh leh, note khempeuh in Khazih Zeisu upna hangin Pasian’ tate na hi uh hi. Bang hang hiam na cih uh leh, Khazih sungah bataizna a ngah mi khempeuh in Khazih a silh uh hi. Khazih Zeisu sungah Judah mi a om kei, Grik mi a om kei, sila a om kei, sila lo a om kei, pasal a om kei, numei a om kei hi. Bang hang hiam na cih uh leh, Khazih Zeisu sungah note khempeuh in pum khat bek na hi uh hi. Note in Khazih aa na hi uh leh, Abraham suan leh khakte na hi uh a, thuciamna bangin innluah mi na hi uh hi. Ahih hangin ke’n kong cih-inah, innluahpa in sum khempeuh a ukpa ahih hangin a neu lai takin sila tawh a kilamdang kei hi. A pa thuciamna a hun a tun’ matengin amah in a cingte leh a keemte’ khut nuai-ah a om hi. Tua mah bangin eite i neu lai takin leitung thungeek khut nuai-ah sila in, i om hi. Tua bangin note in tate na suak uh ahih ciangin,“Abba, Pa,” cisakin a Tapa’ Kha Siangtho eite lungsim sungah Pasian in hong sawl hi. Tua ahih ciangin sila hi nawn loin tapa na hi uh hi. Tapa na hih uh leh, Pasian hangin innluahpa zong na hi uh hi. Ahih hangin note in tua hun lai takin Pasian na theih loh lai takun a pian’ lim in Pasian ahi lo mite’ sila-in na om uh hi. Tu-in ahih leh, note in Pasian na thei khin uh tham loin, Pasian in note hong theih khit ciangin, thahat lo, nopna hong pia thei lo thungeek lamah, a bang hangin kihei kikin sila kaikik nuam na hi uh hiam? Note in nite, khate, hunte, kumte na tang ta uh hi! Note adingin a mawkna-in ka hahkat hi ci-in note thu hangin lunghimawhin ka om hi. Ute naute aw, keimah in note bang ka hih maninah keimah bangin na hi un ci-in ka hong thuum hi. Keima tungah note in a neukha beek na khial kei uh hi. Ahih hangin keimah in a masa-in pumpi dam lohna hangin note kiangah Lungdamna Thu ka hong hilh na thei uh hi. Keima sungah a om note thuak ze-etna note in ngaihsun loin, nial loin Pasian’ vantungmi bang ka hi zongin, Khazih Zeisu bang ka hi zongin, na hong sang uh hi. Tua ahih leh, note lungdamna thupha koi lam tungsak ta na hi uh hiam? Na mittang uh lakhia-in, kei hong pia thei hi le-uh cin nong pia zo ding uh hi ci-in note ading teci ka pang hi. Tua ahih leh, keimah in thuman thutak note kiangah ka hong gen ciangin note’ gal suak ka hi hiam? Tua mite in note a kilawmin hahkatin hong zo lo tham loin, note in amaute na zon’ nadingun a pua lamah note hong koih nuam ahi uh hi. Ahih hangin a hoihna zon’na ngahna in nomau tawh ka omkhawm laitak bek hi loin, a tawntung hoihna ahi hi. Khazih in note sungah kip-a, a om matengin note ading ta suak gimna ka thuak ka ta neute aw, tu-in note tawh omkhawmin ka kam pauna ka kheel nuam hi. Bang hang hiam na cih uh leh, nomau hangah ka lungmang hi. Thukham nuai-ah a om nuamte aw, note in Thukham za lo na hi uh hiam, kei kiangah hong gen un. Lai Siangtho sungah: “Abraham in tapa nih a nei hi. Khat in sila numei tawh a neih tapa ahi hi, khat in sila hi lo numei tawh a neih tapa ahi hi,” ci-in a kigelh hi. Sila numei’ tapa in ci-le-sa ngeina bangin a suak hi. Sila lo numei’ tapa ahih leh, thuciamna hangin a suak hi. Tua thute-ah genteh nadingin a om hi. Tua numeite in thuciamna nih ahi uh hi. Hagar ahi numei khat in Sinai Mual tung pan hong piang, sila suahsak nading thu ahi hi. Tua Hagar in Arabia gam Sinai Mual hi a, tu-in a om Jerusalem khua tawh kibang hi. Bang hang hiam na cih uh leh, amah in a tate tawh sila-in a om hi. Ahih hangin tung lamah a om Jerusalem khua ahih leh, eite nu ahi, sila numei hi lo numei ahi hi. Lai Siangtho sungah: “Ta suak ngei lo a ciing numei aw, na lungdam in! Nausuak gimna a thuak ngei lo numei aw, kiko in! Bang hang hiam na cih uh leh, pasal a nei numei’ tate sangin, A kipaaikhia numei in ta tamzaw a nei hi,” ci-in a kigelh hi. Ute naute aw, eite in Isaak bangin kiciamna tawh kipawl tate i hi hi. Ahih hangin tua lai taka ci-le-sa ngeina bangin a suak ta in Kha Siangtho vangliatna tawh a suak ta pen a bawlsiat mah bangin tu-in zong ahi hi. Ahih hangin Lai Siangtho in bang ci gen hiam? “Sila-numei a tapa tawh hawlkhia in. Silanu’ tapa in sila lo numei’ tapa tawh innluah khawm thei lo ding hi,” ci-in a gen hi. Tua ahih ciangin ute naute aw, eite in sila-numei’ tate i hi kei hi: sila-lo numei’ tate i hi hi. Khazih in eite suahtakna thu i ngah nadingin hong suaktasak hi. Tua ahih ciangin kipin om un la, sila suahna hakkol pua-in, kikhihna zangkik nawn kei un. En-un, keimah Paul in kong geninah, vunatna na thuak uh leh, Khazih hangin bangmah noptuamna na ngah kei ding uh hi. Tua bang ahi hi. Vunatna a thuak mi khempeuh teci ka pankik inah, tua bang mite in Thukham khempeuh siit loin a zuih nadingin leiba nei mi ahi uh hi. Thukham hangah diktan’sakna a ngah nuam note in, Khazih tawh kikhenin, ama hehpihna pan na puk zo uh hi. Bang hang hiam na cih uh leh, kote in upna tawh dikna ngah ding ci-in lamenin Kha Siangtho tung tawnin ngakin ka om uh hi. Bang hang hiam na cih uh leh, Khazih Zeisu sungah vunatna in phattuamna a om kei hi, vunat lohna in zong phattuamna a om kei hi; itna tawh nasep theihna upna bek in phattuamna a om hi. Nidangin note in a pha takpi-in na tai uh hi. Thuman thutak na ngaih loh nadingun a kua in hong kheem hiam? Hih kheemna zolna in note hong sampa kiang pan piang ahi kei hi. Silngo tawm khat in annel lom a vekpi a tawksak thei hi. Note in lungsim tuamdang na nei kei ding uh hi ci-in keimah in Topa sungah note tawh kipawlin upna taktak ka nei hi. Note hong khelbawl mi in kuakua ahih hangin ama mawhna dan a thuak ding hi. Ka ute naute aw, kei ka hih leh, vunatna thu ka hilh lai leh, a bang hangin bawlsiatna ka thuak hiam? Tua bang ka hilh leh, singlamteh tawh kipawl pukna thu in paihkhiatna a thuak zo hi. Note hong khialsak mite in amaute mah kiget ta uh hen ka ci hi! Ute naute aw, note in suahtakna thu ngah dinga hong sap mi na hih uh leh, si-le-sa nopsak na’ngin tua suahtakna zang kei un. Ki-itna tawh khat leh khat’ nasem mi na suak zaw un. Bang hang hiam na cih uh leh, “Na pumpi na it bangin na lawmte na it in,” a cihna thukham na zuih uh leh, Thukham khempeuh a zui khin na suak uh hi. Ahih hangin khat leh khat na kipeh, na kinek uh leh, khat leh khat na kisiasak ding uh hi ci-in lunghimawhin kikem un. Ke’n kong cihinah, Kha Siangtho hangin na nungta un. Na nuntak uh leh, na si-le-sa uh deihna zui loin na om ding uh hi. Bang hang hiam na cih uh leh, si-le-sa in Kha Siangtho tawh kido hi. Kha Siangtho in si-le-sa tawh kido hi. Bang hang hiam na cih uh leh, na sep nop uh bangin na sep theih loh nadingun tuate nih in khat leh khat kilem lo uh hi. Kha Siangtho in note hong kha leh, thukham nuaiah na om kei uh hi. Si-le-sa’ gamtatnate a kilang zo hi. Tua gamtatnate in: numei tawh mawhna, kihhuai gamtatna, lunggulh luat khialhna, milim biakna, mibumna, kitot na’ng bawlna, kitotna, kidemna, hehna, kiseelna, kithutuah lohna, kipawl khenna en’na, zukham luatna, pawikhamna akipan tua bang gamtatnate ahi uh hi. Tau banga gamta mite in Pasian’ Gam a luah kei ding uh hi ci-in nidanga kong cih mah bangin tu-in zong ka hong ci khol hi. Kha Siangtho’ gah in: itna, lungdamna, kilemna, lungduaina, mi hehpihna, gitna, diktatna, lungnemna, pumpi’ deihna khamna te ahi uh hi. Tua bangin a gamta mite thukham in a kham kei hi. Khazih Zeisu’ aa-te in si-le-sa’ deihna leh lunggulhnate singlamteh tungah a khencip zo uh hi. Eite in Kha Siangtho hangah nungta i hih leh, Kha Siangtho hangin gamta ni. Khat leh khat kibawlsiatna, khat leh khat kihazatna tangin mawkna minthan’nate lunggulhin om kei ni. Ute naute aw, mi khat kikeem khialin mawhna khatpeuh ahih khak leh, Kha Siangtho a nei note in mawhna hong zolna tawh na kipelh nadingun kikeemin, lungnemna tawh tua bang mi na kipsak un. Van puak ding a omte khat leh khat kihuhin na pua un la, Khazih’ thukham na zui un. Bang hang hiam na cih uh leh, mi khat in bangmah ahi lo napi-in na khat peuhpeuh ka hi ci-in a ki-up leh, tua mi in ama pumpi a kheem hi. Ahih hangin mi khempeuh in ama bawlna thu kidong ciat uh hen. Tua bang ahih leh, midangte tawh kiteh loin ama tung bekah lung kiphat theihna a om ding hi. Bang hang hiam na cih uh leh, mi khempeuh in ama van ciat a pua ding uh hi. Pasian’ Thu a sin mi in a hilhpa tungah a hoihna a om khempeuh hawmsawn ta hen. Note in na ngaihsun khial kei un. Pasian in thudon lohnate mang ahi kei hi. Mi khatpeuh in khaici a vawh bangin a gah a at kik ding hi. Ama pumpi ading khaici a vawh mi in ama ci-le-sa hangah muatna a at ding hi. Kha Siangtho hangah khaici a vawh mi in Kha Saingtho hangah nuntak tawntungna a at ding hi. Eite in lungkia loin gamtat hoih gamta ni. Bang hang hiam na cih uh leh, lungkia loin i om leh, a hun a tun’ ciangin a gah i at ding hi. Tua ahih ciangin eite in a kilawm a kituak hun i neih bangin mi khempeuh tungah thupha bawlin, adiak diakin thu-um innkuanpihte tungah nakpi-in bawl ni. Bang zah a lian laimalte tawh ka khutin ka gelh, na en un. Amaute pumpi uh tawh kipawl minthan’na a deih mite in, Khazih’ singlamteh hangah thuakna leh bawlsiatna tawh kipelh nuam bekin, note vunat thuak nadingin zawhthawh thu tawh hong zol uh hi. Bang hang hiam na cih uh leh, vunatna a thuak mite in Thukham zui loin note’ pumpi uh hangin kisathei nuamin note vunat nading a deih uh hi. Kei ka hih leh, eite Topa Zeisu Khazih’ singlamteh sim loh, bangmah dangah ka kisathei het kei ding hi. Tua singlamteh ah hih leitung in kei ading kikhenin a om hi. Keimah in zong leitung ading kikhenin ka om hi. Bang hang hiam na cih uh leh, vunatna in phattuamna a om kei hi, vunat lohna in zong phattuamna a om kei hi: mi thak suahna bek in phattuamna a om hi. Hih ngeina a zui mi khempeuh tungah ahi zongin, Pasian’ Israel mi pawlte tungah ahi zongin nopna leh hehpihna om ta hen. Tu-a kipanin kuamah in kei hong nawngkaisak kei hen. Bang hang hiam na cih uh leh, ka pumpi tungah Zeisu’ ciamtehnate ka pua hi. Ute naute aw, i Topa Zeisu Khazih’ hehpihna thupha in note lungsim uh tawh omkhawm ta hen. Amen. Pasian’ deihna hangin Khazih Zeisu’ sawltak ahi keimah Paul in Efesa khua-ah a om misiangthote leh Khazih Zeisu sunga midikte kiangah thu kong zasak hi. I Pa Pasian leh Topa Zeisu Khazih kiang pan hehpihna thupha leh nopna note tungah om ta hen. Tua Pasian in a it a Tapa hanga eite hong hehpihna vangliatna a phate phat dinginah Zeisu Khazih hangin ama tapa-za i ngah nadingin hong deih hong hehpihna hangin, amahmah adingin amasa-ah hong koih khol hi. Pasian in a ngimsa bangin hih a, Khazih hanga a sepsawm a sehsa thuthuk eite hong thei sak hi. A hun a kicin’ cianga a sep ding Pasian’ geelna in vantung leh leitungah a om na khempeuh gawmin Khazih uk sak ding ahi hi. Ama deihna tawh kipawl hanciamna bangin tanglai peka eite hong ciamtehsa bangin eite in tua Khazih sungah luahna na i hi hi. Tua bang ahihna in Khazih hanga a muang zo eite in a vangliatna phat dingte i suah na’ng hi. Note in zong note hong gupna thu tawh kipawl Lungdamna Thu ahi thuman thutak ngai-in, tua Khazih na up khit uh ciangin thuciamna tawh kipawl Kha Siangtho-a ciamtehna na ngah zo uh hi. Pasian’ neihsa leh Pasian’ vangliatna a phat nading deihna-in tua Kha Siangtho in tatkhiatna hun dong eite luahna maleep ahi hi. Tua ahih ciangin note in Topa Zeisu upna leh misiangtho khempeuhte na itna uh thu ka theih khit ciangin, note paulamin hehpihna ka phat niloh a, note ading thungenin ka om hi. Ka thungetna in: eite Topa Zeisu Khazih’ Pasian, vangliatna Pa in amah theihtel nadingin pilna ahi zongin, theih baihna lungsim ahi zongin hong piak nadingin, hong sapna tawh kipawl lametna in bang ci bang lametna hi ahi zongin, misiangthote’ neih Topa luahna vangliatna bangzaha lian ahi zongin, eite tungah hong bawlpha a lian mahmah vangliatna bangzaha lian ahi zongin note in na theih nadingun, na pilna mittang uh a vak nadingin thu ka ngen hi. Tua vangliatna in Khazih sihna pan a thawh sak kik ciangin Khazih tungah a bawl vangliatna ahi hi. Na khempeuh a sang belna, ukna, vangliatna leh aana-a kipan tu laitak leitung bek hi lo, nung ciangin a piang ding leitungah a kisam a kiphuak min khempeuh tung, vantungah ama ziat lam a sang mahmah omna-ah a tu sak hi. Pasian in Khazih’ khe nuai-ah na khempeuh khiasukin, na khempeuh tungah a uk lutang suak sakin pawlpi adingin a pia hi. Tua pawlpi in na khempeuh, na khempeuh tawh a kicing sakpa’ kicin’na a hi Khazih’ pumpi ahi hi. Tua mite tawh eite khempeuh in zong nidang lai-in i ci-le-sa deihna ah lungsim deihna zui-in, si-le-sa deihna bangin gamta-in i om a, adang mite bangin ngeina bangin a hehna a thuak mi i hi hi. Ahih hangin hehpihna tawh kidim Pasian in eite hong it phat maninah, mawhna khialhna sungah si-a om eite Khazih tawh hong hing khawm sak zo hi. Note in hehpihna hang bekin gupna na ngah uh hi. Khazih tawh eite hong tho sak a, vantung khua tawh kipawl omna-ah Khazih Zeisu tawh hong tu sak khawm hi. Bang hang hiam na cih uh leh, Khazih Zeisu hangah eite hong hehpih a, a kicing mahmah ama hehpihna thupha a nung ciangin a kilatsak nading ahi hi. Bang hang hiam na cih uh leh, note in thu-upna hangah hehpihna tawh gupna na ngah zo uh hi. Note ut thu-a ngah na hi kei uh hi: Pasian’ letsong ahi hi. Kuamah in a kisaktheih loh nadingin note’ gamtat pha hangin gupna na ngah kei uh hi. Bang hang hiam na cih uh leh, eite in gamtat hoih i gamtat nadingin Khazih Zeisu sungah a pian’sak ama bawlsa i hi hi. Tua gamtatna pha eite in i gamtat nadingin Pasian in tua gamtatna a na siam khol zo hi. Tua ahih ciangin khut tawh kibawl ci-le-sa sungah kibawl ‘vunat’ kici mite in vunat lo a cih uh, ci-le-sa pan Gentail mi ahi note in, tua hun lai takin Khazih tawh kikhenin, Israel mi pawl hi loin, kiciamna a om thuciamna thute tawh kikum loin, lametna om loin, leitungah Pasian nei loin na om uh na ngaihsun ta un. Ahih hangin nidang lai a, gamlapi-ah a om note in tu-in Khazih’ sisan hangin Khazih Zeisu kiang nai na tung zo uh hi. Bang hang hiam na cih uh leh, tua Khazih in eite gal kilemna hi a, ngeina tawh kipawl Thukham kilemlohna thu a pumpi sungah a paihkhiat khit ciangin kikhen khia a, om kikal dalna kawm phelkhia-in, mi pawl nihte pawl khat bek a suak sak hi. Bang hang hiam na cih uh leh, gal kilem sakin ama sungah tua pawl nihte in pawl thak khat bek a suah nadingin bawl pha a, pawl khat bek suah khin a, Khazih in singlamteh hangin kilemlohna thatin, tua mi pawl nihte pawl khat bek suak sakin Pasian tawh hong kilem sak nading ahi hi. Amah hong kumsuk a, a gamla-in a om mite kiangah ahi zongin, a nai-in a om mite kiangah ahi zongin gal kilemna Lungdamna Thu a hilh hi. Bang hang hiam na cih uh leh, Khazih hangin ei pawl nihte in Kha Siangtho khat tawh Pa kiangah nai-in lut theih nading thu i ngah hi. Tua ahih ciangin note in tu-a kipanin mi pawl dangte ahi zongin, khual mite ahi zongin, na hi nawn kei uh a, Pasian’ mite tawh gammi khat na hi uh hi; Pasian’ innkuanpihte zong na hi uh hi. Bang hang hiam na cih uh leh, sawltakte-a kipan kamsangte ahi, khuam tungah note in zomin a kilam mi na hi uh hi. Khazih in tua innkiunuai suang ahi hi. Tua suang leh inn khempeuh in kizomin khang a, Topa sungah a siangtho biakinnpi ahi hi. Topa sungah note in zong Kha Siangtho hangin Pasian’ teenna na suah nadingun a kilam na hi uh hi. nidang lai-inah thu tawm ka gelh mah bangin, Pasian’ thupiak kholhna hangin thuthuk hong kilang sak hi. Tua thute na sim le-uh teh, Khazih’ thuthukte ka theih note in na thei ding uh hi. Tua thuthukte in a siangtho sawltakte leh Pasian’ kamsangte kiangah tu lai taka Kha Siangtho hangin a kilat mah bangin, nidang lai-inah mihingte kiangah a kilang ngei kei hi. Tua thuthuk in: Gentailte in Lungdamna Thu hangin Judah mite tawh a luah khawm mi, pumpi khat’nate suak khawmin Khazih Zeisu tawh kipawl thuciamna a zomkhawm mi a suak uh hi. na khempeuh a bawl Pasian sungah tanglai tawntungin kiseelin a om thuthuk tawh kipawl thu in bang ci bang ahi cih mi khempeuh a theih sak nading ahi zongin Pasian mite lakah a neu bel mi sangin a neuzaw keimah tua hehpihna thupha hong pia zo hi. Tua Topa Zeisu sungah upna hangin eite lungkimin, lau lohna lungsim nei-in, Pasian kiangah tum theihna i ngah hi. Tua ahih ciangin note’ minthan’ nading ngaihsunin note ading ka thuak gimna hangin lungkia kei un ci-in kong hanthawn hi. Ka thungetna in: Topa in ama Kha Siangtho hangin note sung mi un hatna tawh kip tawntungin, upna hangin Khazih in note lung sungah a om nadingin, minthan’na tawh a dim mah bangin note hong pia-in, itna thu-ah zungkha-in, khuam zong kiphut kipin note in, misiangthote tawh a dung, a vai, a sang, a niamte khenin na theih khawm nading uh ahi zongin, nomau pilna tawh na theih zawh loh uh Khazih’ itna na theih tel nading uh ahi zongin, note in hih thei-in Pasian’ kicin’na a om khempeuh tawh na kidim nading uh thu ka ngen hi. Tua ahih ciangin a hong sapna thupha note in na ngah uh tawh kituakin na zuih nadingun, Topa hanga thongkia keimah in hansuahin kong zol hi. Na khempeuh panin kiniamsakna tawh, lungnemna tawh, lungduaina tawh dimin, itna lungsim tawh khat leh khat kithuakin, kilem a, kipawlin, kikhopna hangin note in Kha Siangtho hanga na ngah uh pum khat bek ahihna na zuih nadingun na hahkat un. Note hong sapna lametna khat bek hangah hong koih ahih mah bangin, pumpi khat, Kha Siangtho khat bek a om hi. Ahih hangin Khazih in a hong hawm sak mah bangin i vekpi-in a hehpihna thupha i ngah ciat hi. Tua ahih ciangin Lai Siangtho in: “A sang munah amah a kahtoh ciangin, mi tampi manin paipih a, mite kiangah thupha letsong a pia hi,” a ci hi. “Amah a kahtoh”, a cih ciangin lei nuai-ah a kumsuk thu ngaihsunin ci hilo hiam? A kumsuk mi in midang ahi kei hi, na khempeuh a kicing sak dingin, vantung na khempeuhte a dawn khengin a kahto mi ahi hi. Bang hang hiam na cih uh leh, eite khempeuh in thu-upna lamah ahi zongin, Pasian’ Tapa theihna ah ahi zongin, kipum khatin Khazih’ kicin’na lim mun ahi, a khangham mi suahna i tun’ dongin i piang hi. Bang hang hiam na cih uh leh, mi dangte in mi kheemna mawhna lamah zol dingin, kheemna thu gen ahih ciangun, eite in a nung ciangin thuhilhna khempeuh ah huih in a let kawikawi naupang suak loin, itna tawh thuman thutak geninah lutang ahi Khazih dongin na khempeuh i khan’ nading ahi hi. Tua lutang pan guh-le-tangte in thahatna ngahin, a pumpi khempeuh kizom kimatin, na khempeuh in amau nasep tek a sep mah bangin, itna tawh ama pumpi lam dingin a khang sak hi. Tua ahih ciangin Gentailte in a lungsim kiphatsakna uh tawh a gamtat bangun note in na gamtat nawn loh nadingun Topa’ deihna bangin thuumin kong hanthawn hi. Tua mite in a lungsim uh khauh a, neu kha beek thei lo ahih ciangun pilna khuavak kiliahin Pasian’ nuntakna tawh a kikhen uh hi. Amaute in maizumna nei lo uh a, a deihgawhna uh a lian mahmah kihhuai gamtatna nam khempeuh a gamtat nadingun, amau pumpi in a lunggulhna uh khut sungah a kipia uh hi. Ahih hangin tua bang suah nading note in Khazih thu na sin kei uh hi. Tua ahih ciangin zuau thu paaikhia un la, thuman thutak tawh khat leh khat na kigen un. Bang hang hiam na cih uh leh, eite in pumpi khat’ nate ciat i hi hi. Hehna tawh khialhna om sak kei un. Na hehna uh dam loin ni na tum sak kei un. Dawimangpa hun na pia kei un. Nidang lai-a guta mi in gu nawn loin, sapna neite a hop zawh, a piak zawh nadingin ama khut tawh nasepna a hoih hahkatin sem ta hen. Nomau kam sungpan kam hoih lo khat beek pusuak kei hen. A za mite phattuamna a piang sak dingin, a sapna bangin a kipsak nadingin kam hoih na zang un. Tatna’ Ni a tun’ dongin note hong ciamtehna ahi Pasian’ Kha Siangtho na dah sak kei un. Kimuhdahna khempeuh, hehna khempeuh, thangpaihna khempeuh, han’sanna khempeuh, mindai nading mi gensiatna khempeuh, hazatna khempeuhte note kiang pan na paaikhia un! Khat leh khat na kihehpih un, thupha na kibawl un la, Khazih’ hangah Pasian in na mawhna uh hong maisak mah bangin note khat leh khat mawhna kimaisak un. Tua ahih ciangin note in Pasian’ it tate na hih uh mah bangin Pasian a suun mite na suak un. Khazih in note hong it maninah Pasian mai-ah namtui om nadingin ama pumpi kipia-in, kibia-in, eite tangding a kipaih mah bangin note in itna tawh gamta un. Numei tawh khialhna, lunggulh kihhuaina, apawl pawl huaihamnate, misiangthote in tan’ ding a kilawm ahih maninah kampau nangawnin kizom kei un. A kilawm lo kihhuaina kam, a mawkna kam, amawkna kamsiate zong paaikhia un la, Pasian’ hehpihna phatna kamte zang un. Bang hang hiam na cih uh leh, numei tawh a khial mi ahi zongin, mi kihhuai mi ahi zongin, milim bia mi ahi huaiham mi khat beek in Khazih leh Pasian’ Gam sungah luahna a ngah kei ding hi ci-in na thei uh hi. A mawkna kam tawh note kuamah kikheem sak kei un. Bang hang hiam na cih uh leh, tuate hangin Pasian’ hehna in a nial thei mite tungah a tung hi. Tua ahih ciangin amaute tawh na gamta khawm kei un. Bang hang hiam na cih uh leh, nidang lai-inah note in khuamial na hi uh hi; tu-in na hih uh leh, Topa sungah khuavak na hi uh hi. Tua ahih ciangin khuavak’ tate bangin na gamta un. Bang hang hiam na cih uh leh, khuavak’ gah in a hoihna khempeuh, dikna khempeuh, thuman thutak ahi hi. Topa lungdam sakna in bang ahi hiam ci-in kanin, a gah nei lo khuamial gamtatna tawh kipawl lo tham loin, tua gamtatna a mawhna na lak un, Bang hang hiam na cih uh leh, amaute in munbu-na sungah a gamtatnate uh gen ding nangawn a zumhuai ahi hi. A om na khempeuh in a mawhna a kilat ciangin khuavak tawh a kilang hi. Kilatna a ngah khempeuh in khuavak ahi hi. Tua ahih ciangin: “A ihmu mi aw, Khanglo in la, sihna pan thokik in! Tua bang ahih leh, Khazih in nang tungah hong taang ding hi,” a ci hi. Tua ahih ciangin note in bang na ci gamtat uh hiam na kikem un. Pilna nei lo bang hi loin, pilna nei bangin na hi un la, tuni hunte in a gilo ahih maninah, ahun na teel un. Tua ahih ciangin mihai suak loin, Topa’ deihna in bang ahi hiam ci-in na thei un. Hong khamsak thei leenggahzu tangin, Kha Siangtho tawh kidimin om un. Late-a kipan kha la leh phatna la apawlpawlte tawh khat leh khat na kikum un la, na lungsim tak uh tawh Topa mai-ah la sa un. Na khempeuh ah hong hehpihna lian hi ci-in i Topa Zeisu Khazih’ min suangin Pa Pasian tungah lungdamna na puak tawntung un. Khazih zahtakna hangin khat leh khat nuai-ah na pumpi uh na kiniamsak un. Zite aw, Topa’ ukna na man’ uh mah bangin na pasalte uh ukna na mang un. Bang hang hiam na cih uh leh, Khazih in pawlpi’ lutang ahih mah bangin pasal in a zi’ lutang ahi hi. Khazih in ama pumpi’ Honpa ahi hi. Ahih hangin pawlpi in Khazih’ ukna a man’ mah bangin zite in zong a pasalte uh ukna khempeuh mang ta uh hen. Pasalte aw, Khazih in pawlpi a it mah bangin na zite uh na it un. Tua pawlpi in siangtho-in mawhsakna om lo ahih ciangin, a nin ban’na om lo, sa tonna om loin, a mel kilawma om pawlpi, Khazih in amahmah a kipiak nading-inah Pasian’ thu tawh tui-ah a sil khit ciangin, siangthosak nadingin tua pawlpi adingin ama pumpi a pia hi. Tua mah bangin pasalte in zong amau pumpi uh a it uh mah bangin a zite uh a it ding uh kilawm hi. A zi a it mi in ama pumpi a it mi ahi hi. Bang hang hiam na cih uh leh, ama ci-le-sa a mudah mi khat beek a om kei hi. Khazih in pawlpi a vaak a kep mah bangin mi in zong ama sa a vaak a kem hi. Eite in Topa’ pum tung nate i hi hi. Tua ahih ciangin pasal in a nu a pa nusia-in a zi a beel ding a, tua mi nih in pumkhat sakhat a suak ding uh hi. Hih thu in thuthukpi ahi hi. Tua bang ka cih ciangin Khazih leh pawlpi ngaihsunin ka gen hi. Ahih hangin note in zong na pumpi ciat uh na it uh mah bangin na zite uh na it un. Numeite in zong a pasalte uh zahtak uh hen. Tanute tapate aw, Topa’ deih bangin na nute na pate thu uh na mang un. Bang hang hiam na cih uh leh, hih gamtatna in thuman ahi hi. Pate aw, na tapate na tanute uh heh nading bawl kei un. Pasian’ deihna tawh kituakin tai-in hilh un la, vaak un. Silate aw, Khazih thu na ngaih uh mah bangin launa tawh, kihta-in, liingin, lungka loin, ci-le-sa bangin na tote uh thu na mang un. Thuhoih bawla gamta mi in sila hi taleh, sila lo hi taleh, Topa khut sung pan thaman a ngah ding na thei ta un. Tote aw, tawn’na om loin na silate uh tungah tua bangin na bawl un. No leh amau Topa in vantungah om a, amah in kuama maitang zahtak lo hi cih na thei un. A khak belin, Topa-ah ahi zongin, ma vangliatna’ hatna-ah ahi zongin, thahatin om un. Dawimangpa’ kheemna na nan’ zawh nadingun Pasian’ galhiam khempeuh silh un. Bang hang hiam na cih uh leh, eite in ci-le-sa tawh kido i hi kei hi; asang belte tawh ahi zongin, ukte tawh ahi zongin, vangliatna tawh ahi zongin, leitung tawh kipawl khuamial ukte tawh ahi zongin, vantung tawh kipawl munah a om gilo khate tawh ahi zongin i kido hi. Tua ahih ciangin a haksa gitlohna ni a tun’ ciangin khaam zo-in, phatmawhna khempeuh manin na do zawh nadingun Pasian’ hiamte khempeuh na silh un. Tua ahih ciangin thuman thutak kawnggak na gak un la, dikna awmdalna na bulh un la, kilemna tawh kipawl Lungdamna Thu-a kipan kisak kholhna khedap bulh un la, do un. Dawimangpa hong kapna mei-thaltang a dal zo upna lum tawi-in hiam khempeuh tungah na silh un. Gupna sik-lukhu khu un la, Pasian’ Thu ahi Kha Siangtho tem tawi un. Thungetna pawlpawlte, thuumna pawlpawlte, Kha Siangtho tawh a tawntungin thu na ngen un. Tua bang thunget nading thakiam loin, misiangtho khempeuh ading thu nget sakin om un. Note in keima tungah thu hong piang khempeuh na theih nadingun Topa sungah lungsim nei a, sawltak na a sem Tikhikas in nomau kiangah thu a vekpi-in hong gen ding hi. Note in kote thu na theih nading uh leh amah in note lungsim hong hehnep nadingin note kiangah ka hong sawl hi. Ute naute tungah nopna om ta hen. Pasian leh Topa Zeisu Khazih kiang pan na ki-itna un upna tawh om ta hen. Kisia lo itna tawh i Topa Zeisu Khazih a it mite khempeuh tungah hehpihna thupha om ta hen. Khazih Zeisu’ silate ahi uh Paul leh Timoti in Filippi khua-ah a om pawlpi siate leh upate-a kipan Khazih Zeisu sungah kip-a a om misiangthote khempeuh thu kong zasak uh hi. I Pa Pasian leh Topa Zeisu Khazih kiang pan hehpihna thupha leh nopna in note tungah om ta hen. Tua bang ka phatna-ah note tungah a pha nasep hong panpa in Zeisu Khazih’ Ni dongin a kicingin hong bawlin, hong zosak ding hi ci-in ka lungkim hi. Note khempeuh ading tua bang lungsim ka neih ding a kilawm hi. Bang hang hiam na cih uh leh, note khempeuh in keimah tawh thupha na ngah khawm uh a, keima thongkiatna-ah ahi zongin, Lungdamna Thu lamah hutna leh kipsakna-ah ahi zongin nong huh uh a, tua thu hangin note kong phawk tawntung hi. Keimah in note khempeuh Khazih Zeisu’ hehpihna tawh bang zah takin kong ngaihna thu Pasian in keima teci ahi hi. Ute naute aw, keimah tungah hong tung nate in Lungdamna Thu khaam lo tham loin, a khangsak zaw hi ci-in na theih nadingun ka deih hi. Tua ahih ciangin ka thongkiatna in Khazih hang ahi hi cih kumpipa a vil galkap khempeuh-a kipan midangte lakah a kilang hi. Topa sungah a om ute naute lak pan a tampite in kei thuak khau kikhihna hangin thu-upna ah lungkimin lau loin, Pasian’ Thu a hilh ngam semsem uh hi. Mi kimkhatte in ki-en’na lungsim leh kitotna lungsim tawh Khazih’ thu a hilh uh hi. Keimah in Lungdamna Thu hu dingin hong kikoih ka hihna thu kimkhatte in thei-in, ki-itna lungsim tawh a hilh uh hi. Kimkhat ahih uh leh, lungsim siangtho nei lo uh a, kihenna ka thuak lai takin hong gimsak behlap nuamin hanciam uh a, kitotna lungsim tawh Khazih’ thu a hilh uh hi. Tua bang ahih ciangin bang ci bang hiam? Kheemna tawh hi taleh, dikna tawh hi taleh bang ci bangin thuhilh ahi zongin Khazih thu a hilh uh hi. Tua ahih ciangin keimah in ka lungdam a, tunung ciangin zong ka lung a dam lai ding hi. Kei ka nuntakna in Khazih ahi hi; si leng a hoihzaw ding hi. Ahih hangin ka pumpi sungah nungta-in, tua nuntakna in ka nasepna-ah gah a pian’sak ding leh, ka teel ding ka thei kei hi. Thu nih kikal ah cih nading meel thei loin ka om hi. Pai-in Khazih tawh ka om ding ka lunggulh hi. Bang hang hiam cih leh, keima adingin a phazaw mahmah ding hi. Ahih hangin ka pum sungah om leng nomau ading a phazaw ding hi. Note in galte hangin lau loin, lungsim kha khatah kipin, Lungdamna Thu tawh kipawl upna ading, lungsim kituakin na hahkatna uh, ka hong tun’ ciangin note tawh kimu-in ahi zongin, a kikhenin i om ahi zongin ka zak theih nadingin Khazih’ Lungdamna Thu tawh akilawm akituakin gamtat ding na hanciam un. Tua bangin galte hangah lau lohna in amaute’ adingin kisiat nading lim ahi hi; note’ adingin ahih leh, Pasian’ vaihawmna bangin gupna lim ahi hi. Huaihamna lungsim, a mawkna minthan’ deihna lungsim neihna tawh bangmah na hih kei un. Midangte in note sangin a phazaw hi ci-in lungsim niamkhiatna tawh khat leh khat na kingaihsun un. Nomau noptuamna bek ngaihsun loin, midangte’ noptuam nadingin khat leh khat na kingaihsun un. Khazih Zeisu sungah a om lungsim note sungah om ta hen: Amah in Pasian’ lim leh meel tawh dimin a om napi-in, Pasian tawh kibatnate ka khah kei ding hi ci loin, Ama minthan’na paai-in, sila lim la-in, Mi tawh kibatna-ah a suak hi. Tua bang lim tawh dimin kimu a, Sihna a thuak tham loin, singlamteh tungah a sih dongin, Thumang-in ama pumpi a kiniamsak hi. Tua ahih ciangin Pasian in amah pahtawi-in Min khempeuhte sangin min a lianzaw a pia hi. Tua ahih ciangin ka itte aw, note in thu na man’ tawntung uh bangin keimah maitangah tham loin, ka muh lohna-ah zong thungai-in, launa liin’na lungsim tawh, gupna na ngahna uh semkhia un. Bang hang hiam na cih uh leh, note in ama deihna bangin na sepnop nading uh leh na sep theih nadingun Pasian mahmah in nomau sungah hong sem ding hi. Note in na hihna khempeuh uh ah thuum lo, tau lo, kinial loin na hih un. Tua bangin na hih uh leh, mawhsak nading om loin, kuama tungah khialhna om loin, lungkawi-a kisia mi pawlte lakah mawhna neu kha beek a nei lo Pasian’ tate na suak ding uh hi. Nuntakna tawh kipawl thu hilhin, vantunga aksite bangin tua mi pawlte lakah na taang ding uh hi. Tua ahih leh, kei in a mawkna-in tai ka hi kei a, a mawkna-in nasemin hahkat ka hi kei hi ci-in Khazih’ Ni ciangin lungdam kisathei-in ka om ding hi. Tua tham loin, na piak uh biakna, note upna biakna tungah ka pumpi ka piakhia zongin, ka nuam hi; note khempeuh tawh ka lungdam khawm hi. Tua mah bangin note in zong nuam un la, keimah tawh lungdam khawm un. Ahih hangin note thu thei-in ka lungnop tuam nadingin, note kiangah Timoti ka hong sawl ding hi ci-in Zeisu sungah ka lamen hi. Bang hang hiam na cih uh leh, amah in note phattuam nading lungsim pha a neih bangin a nei khat beek keima kiangah a om kei hi. Amaute in Zeisu Khazih’ phattuamna zong loin amaute’ phattuamna bek a zong uh hi. Ahih hangin ta in a pa tawh na a sepkhawm mah bangin Timoti in kei tawh Lungdamna Thu khan’sakna-ah na a semkhawm hi ci-in ama teci thu note in na thei uh hi. Tua ahih ciangin keima tungah bang thu a piang ka theih khit ciangin, amah note kiangah amanlangin kong sawl ding hi ci-in lamenin ka om hi. Ahih hangin keimahmah zong note kiangah a sawt loin ka hong pai ding hi, ci-in Topa sungah ka um hi. Ahih hangin nasepna leh galdona ah keimah hong vaak, hong khoi mi ahi, note sawltak ahi, ka naupa Epafroditas, note kiangah tu-in ka hong sawl ding kilawm ka sa hi. Bang hang hiam na cih uh leh, a ci natna thu note in na zak uh bangin, amah in note hong ngai-in, nakpi lungzuangin a om hi. Amah in si dek takin a gim mahmah hi. Ahih hangin Pasian in amah a hehpih hi. Amah bek ahi kei hi, keima dahna a kibehlap sawnsawn loh nadingin kei zong hong hehpih hi. Tua ahih ciangin note in amah na muhkik uh ciangin na lungdam nading uh ahi zongin, keima dahna zong a kiam nading ahi zongin nomau kiangah hahkatin ka hong sawl hi. Tua ahih ciangin Topa sungah lungdamna tawh amah na tungsak un la, tua bang mite na zahtak un. Bang hang hiam na cih uh leh, note in kei nong vaak, nong khoina uh a kicing lote amah in kicingsak dingin Khazih adingin ama nuntakna a sih dektak zah dongin a hanciam zo hi. A khak bel thu in: ka it ka ute ka naute aw, Topa sungah na lungdam ta un. Hih bangin ka hong gelhkik hangin ka gim kei hi, note ading bitna ahi hi. Tua uite, gilo-a gamtate na peel un, vun-atna thu ah a kineih mite na peel un. Bang hang hiam na cih uh leh, Pasian Kha Siangtho hangin bia a, i pumpi muang loin, Khazih Zeisu hangah lungdamna kisaktheihna bek a nei eite in, vun-atna taktak a ngah mite i hi hi. Ahih hangin kei ka hih leh, ci-le-sa ah zong suan’ ding ka nei hi. Midang khatpeuh in ci-le-sa ah suan’ ding ka nei hi ci-in a ki-up leh, keimah in ka nei zaw hi. Keimah in ni giat ni-in vun-atna ka thuak hi. Israel mi Benjamin’ suan ka hi hi. Hebru mi pana piang Hebru mi taktak ka hi hi. Thukham lam pan ci leeng Farisai mi ka hi hi. Lungsim khauhna pan ci leeng pawlpi bawlsiapa ka hi hi. Thukham hangin kingah dikna lam pan ci leeng mawhsak nading om lo mi ka hi hi. Ahih hangin keima phattuamna hong piangsak na khempeuh Khazih ading supna hi ci-in ka ngaihsun hi. Tua tham loin keimah in Khazih Zeisu ka Topa ka theih tel nadingin na khempeuh supna hi ci-in ka ngaihsun hi. Tua bang ka cih ciangin ka ngah zo hi ahi zongin, kicin’na-ah ka tum zo hi ahi zongin ci nuam ka hi kei hi. Ahih hangin noptuamna khat pia dingin Khazih Zeisu in kei hong man a, tua noptuamna ka let khak nading-inah, zui-in ka delh hi. Ute naute aw, tua noptuamna keimah in ka len zo hi ka cih loh hangin, ka nasepna khat in ka nungah a om nate ngaihsun loin, ka mai lamah a omte zamin, Khazih Zeisu sungah Pasian in tung lam pan hong sapna tawh kipawl lungdamna ngah nadingin, kidemin kung dongin hahkatin ka tai hi. Tua ahih ciangin a kicing eite khempeuh in tua bangin lungsim nei ciat ni. Note in na khatpeuh peuh ah na lungsim ngaihsutna uh a kibat kei leh, Pasian in tua na a hong lak ding hi. Ahih hangin i phak zawh zah bangin lam khat bek zui ni. Ute naute aw, kei’ gamtat mah bangin a kituakin na gamta un. Note lakah ka hong piak uh lim tawh kituakin a gamta mite zong na ciamteh un. Bang hang hiam na cih uh leh, nidang lai-in tam veipi kong genkhol a, tu-in zong khitui luangin ka hong gen mah bangin, Khazih’ singlamteh galin do-in a gamta mi tampi a om hi. Tua mite in kisiatna-ah a tung ding uh hi, amaute’ pasian in a gilpi uh ahi hi; amaute in a maizumhuai a gamtatnate uh ah a kiphasak uh hi. Amaute in leitung nate a lunggulh uh hi. Eite in i hih leh, vantung gam tawh kipawl mi i hi hi. Tua gam panin Honpa ahi Topa Zeisu Khazih hong paisuk kik ding hi ci-in eite in ngakin, lamenin i om hi. Topa in na khempeuh ama nuai-ah a khia thei, a bawlphatna vangliatna hangin a ginalo eite pumpi, minthan’na tawh a dim pumpi a suahsak nadingin hong kikheelsak ding hi. Tua ahih ciangin ka lungnopna leh ka kisaktheihna lukhu, ka it ka ngaih ahi ute naute aw, tua bangin Topa sungah kipin om un, ka itte aw! Eu-odia leh Sintikhe in Topa sungah a lung kituak nadingun ka thuum hi. Lawm naseppih taktak aw, tua numeite huh dingin ka hong thuum hi. Bang hang hiam na cih uh leh, amaute in kei leh Klement-a kipan nuntakna laibu sungah min kikhum adang ka naseppihte tawh Lungdamna Thu ka hilh khawmna-ah hong huhin, a hahkat mi ahi uh hi. Topa sungah lungdam tawntungin om un. Khatvei ka hong genkik-in ah lungdam un! Mi khempeuh mai-ah na lungsim nemna uh na lak un. Topa hong tun’na a nai zo hi. Bangmah thu-ah lungmang loin, na khempeuh ah hehpihna phatin na nget nopnate uh Pasian kiangah na ko un. Tua bang na hih uh leh, kuamah in a tel zawh loh Pasian’ nopna in Khazih Zeisu sungah note lungsim uh leh na ngaihsutnate uh hong keem ding hi. A khak bel thu in: ute naute aw, thuman thu tawh kipawl nate, zahtakhuai nate, adik nate, a siangtho nate, deihhuai nate, phathuai nate khempeuh ahi zongin, tatna pha khatpeuh peuh, thu phatna khatpeuh peuh tawh a kipawl nate ahi zongin na lungsim sung uhah na ngaihsun un. Note in nidang lai-in keima kiangah sinin na zaksa, na muhsa, na ngahsa uh nate na zui un, Tua bangin na zuih uh leh, nopna’ Pasian in note tawh hong omkhawm ding hi. Tu-in zong keimah adingin na phawkkik uh ahih maninah, keimah in Pasian sungah ka lungdam mahmah hi. Ni dangin na hong phawk uh hangin hih theihna thu na ngah kei uh hi. Tua bang ka cih ciangin keimah tunga kitangsapna ngaihsunin ci ka hi kei hi. Bang hang hiam na cih uh leh, kei in ka thuakna khempeuh ah ka lungkim nadingin ka kisin zo hi. Simmawhna ahi zongin, hauhna ahi zongin ka thuak thei hi. Ankhamna, gilkialna, sum hauhna, zawn’nate thuak dinginah na khempeuh panin ka kisin zo hi. Hong thahatsakpa Khazih hangin na khempeuh ka hih thei hi. Ahih hangin gimna ka thuak lai takin note in kei tawh kizopna hangin a pha-in na bawl zo uh hi. Lawm Filippi mite aw, Lungdamna Thu hilh ding kipanin Makedonia gam pan ka paikhiat lai takin, piakna leh ngahna in note sim loh kuamah pawlpi in kei tawh a kizom kei uh hi. Bang hang hiam na cih uh leh, Thesalonika khua-ah ka om lai takin ka sapnate note in khatvei nong piak khit uh ciangin, nong piakik lai uh hi. Tua bang ka cih ciangin huhna sumpi a zong ka hi hi, a ci ka hi kei hi. Note ading a gah a khan’na bek ka zong hi. Keimah in na khempeuh ka nei ta a, ka hau hi! Pasian tungah a lungdamhuai, a san’ huai gim namtui biak piakna ahi note’ hong khak huhnate Epafroditas’ khut sung pan ka ngah maninah ka hau hi. Ka Pasian in ama vangliatna tawh kipawl hauhna a om mah bangin, note kisapna khempeuh Khazih Zeisu sungah hong kicingsak ding hi. Eite’ Pa leh Pasian tungah a tawntungin minthan’na om tawntung ta hen. Amen. Khazih Zeisu sungah a om misiangthote khempeuh na hopihsak un. Kei tawh a omkhawm ute naute-a kipan misiangthote in note hong hopih uh hi. Kaisar kumpipa’ inn sungah a om misiangthote in hong hopih pha diak uh hi. Topa Zeisu Khazih’ hehpihna thupha in note lungsim kha tawh omkhawm ta hen. Amen. Tua thu in leitung khempeuh ah a kizelh khit mah bangin, note kiangah zong hong tung zo hi; note’ sungah hih Lungdamna Thu in a gah gahin, a khan’ toh mah bangin mi khempeuh tungah zong a piang thei hi. Kote ading Khazih’ nasem muanhuai, ka it uh sila ka hih khawmpih uh Epafras in note hong hilh bangin, note in na zak uh Pasian’ hehpihna a man taka na theih ni uh pana kipan tua nopna na ngah uh hi. Amah in Kha Siangtho sungah a om note’ ki-itna zong kote kiangah hong gen zo hi. Tua ahih ciangin kote in zong ka zak uh ni pan akipan, note ading thungen tawntungin ka om uh hi. Ka thungetna un: note in gamtat hoihna apawlpawl ahi gah gahin, Pasian theihna pilna khan’ tohna nei-in ahi zongin, lungdamna tawh na khempeuh thuakin lungduai nadingin ama minthan’na, vangliatna bangin, thahatna tawh dimin ahi zongin Topa tawh a kilawmin gamta-in, na khempeuh ah a hong theihsak nadingin Pasian tawh kipawl theihna leh pilna apawlpawl tawh, ama deihna khempeuh na tel nadingun thu ka ngen uh hi. Tua a Tapa’ sisan hangin i mawhnate maisakna ahi hong tatkhiatna thupha i ngah hi. Tua Tapa in mittang a, kimu thei lo Pasian’ lim hi a, a om khempeuhte mai-ah zong ta Upa ahi hi. Bang hang hiam na cih uh leh, tua Tapa hangin Pasian in vantung ahi zongin, leitung ahi zongin-ah a om khempeuh a kimutheite, a kimu thei lote, kumpi tokhomte ahi zongin uknate ahi zongin, a sang belnate ahi zongin, vangliatna ahi zongin, na khempeuh a piangsak hi. Tua Tapa hangah ahi zongin, tua Tapa ading ahi zongin na khempeuh a piangsak hi. Tapa in na khempeuh a pian’ ma-in om a, amah hangin na khempeuh a kip hi. Amah in pawlpi ahi, pumpi’ lutang ahi hi. Na khempeuh ah amahmah a sangbel a suah nadingin a kipahtawi hi a, misite lakpan Ta upa a suak hi. Bang hang hiam na cih uh leh, a kicin’na khempeuh a Tapa sungah a kipsak nading ahi zongin, singlamteh tungah a buak sisan hangin gallemna piangsakin, leitung nate ahi zongin, vantung nate ahi zongin, na khempeuh in Tapa hangah Pasian tawh a kilem theih nading ahi zongin a deih hi. Nidang lai-inah Pasian tawh kikhenkhia-in, gilo gamtatnate in na lungsim sung uhah gal ahi uh note zong, Tu-in note adingin gimna thuakna ah lungdamin, Khazih’ gimna neu kha a kisam lai, pawlpi ahi ama pumpi adingin keima pumpi sungah hong kicingsak hi. Gentailte lakah hih thu thukpi tawh kipawl alianpi nopsakna bang zahin lian ci-in misiangthote in a theih nadingin Pasian in a deih hi. Tua thu thukpi in: vanglian lametna thu ahi, note sungah a om Khazih ahi hi. Khazih hangin mi khempeuh in kicin’na ngahin mi khempeuh tungah pia dingin, kote in mi khempeuh phawksakin pilna apawlpawl tawh tai-in, hilhin Khazih’ thu ka hilh uh hi. Tua bang deihna-in kei in hahkatin keima tungah, vanglianpi tawh hong bawlphatna bangin semin, demin ka om hi. Tua Khazih sungah pilna sum, theihna sum a om khempeuh kiseelin om hi. Kuamah in kheemna kam tawh note hong kheem zawh loh nadingin hih thu ka hong gen hi. Keima pumpi in note tawh kikhenin ka om hangin, ka lungsim note tawh omkhawm a, note in a ngeina bangin na bawl theihna uh ahi zongin, Khazih sungah upna kipin na om uh ahi zongin ka muh ciangin ka lung a dam hi. Khazih thu zui lo mite’ tangthu leh leitung thungeek zui-in, leitung pilna leh mawkna khempeuh hangin note kuamah in hong sut, hong bawlsiat theih loh nadingin kikem un. Bang hang hiam na cih uh leh, Pasian’ lim tawh a dim khempeuh in Khazih’ pum sungah kilangin a om hi. Ukna thu leh vangliatna thu a uk Topa sungah note in kicingin na om uh hi. Mawhna-ah ahi zongin, pumpi vunatna ngah lohna-ah ahi zongin si-in a om note, Khazih tawh kibangin hong hingsak a, eite khialhna khempeuh a hong maisak hi. Eite lang khatah kilem lo-a a om ngeina tawh kipawl kiciamna lai sumangin, singlamteh tungah khen a, eite kikal sung pan a paaimang hi. A sangbel vangliatna leh uknate a laksak khit ciangin, kitel takin lak a, singlamteh hangin zawhna pawi a khaam hi. Tua ahih ciangin annek tuidawn ahi zongin, pawikham ni, kha det ni, Nipi ni tawh kipawl thute ahi zongin, note kuamah in kidongin thu kikhensak kei un. Tua nate in a nung ciangin a hong piang ding lim hi a, pumpi ahih leh, Khazih ahi hi. Lutang suang loin, pumpi ci-le-sa tawh kipawl ama lungsim tawh kisathei mawkin, ama theih loh a muh loh thute kantelin lungsim kiniamsakna-ah ahi zongin, vantungmi biakna-ah ahi zongin, nuamsa-a a om mi khat nangawn note lungdamna kisutsak kei un. Lu tung pan pumpi khempeuh in a guh a taang tawh a kipawlnate hangin thahatna piangin, Pasian’ deihna tawh kituakin a khang thei hi. Tua nate khempeuh zatna hangin muat nading a piang ding hi. Tua bang ngeina in ut thu biakna, lung kiniamsakna, pumpi bawlsiatna tawh kipawl pilna a nei bangin a om hangin, pumpi deihna zuih loh nading, khaam nadingin a kiman’na khat beek a om kei hi. Tua ahih ciangin note in Khazih tawh thokik khawm na hih uh leh, Pasian’ ziat lamah a tu Khazih’ omna mun, tung lamah a om nate na zong un. Leitungah a om nate lunggulhin om kei un, atung lam nate bek lunggulhin om un. Bang hang hiam na cih uh leh, note in na si zo uh a, note nuntakna in Khazih tawh Pasian sungah kiseel khawmin a om uh hi. Eite nuntakna ahi Khazih hong kilat ciangin, note in zong tua Topa tawh minthang khawmin na kilang ding uh hi. Tua ahih ciangin numei tawh mawhna, kihhuai gamtatna, nu leh pa kilunggulh luatna, deihgawhna, milim biakna ahi, huaihamna note sungah a om nate sisak un. Tua khialhna hangin Pasian’ hehna in a nialte’ tate tungah a tung hi. Tua mite tawh note zong nidanga na kipawl lai takun tua khialhnate na gamta uh hi. Tu-in ahih leh, tua khialhna khempeuh ahi zongin, hehna, thangpaihna, hazatna, mindai nading gensiatna, kam kihhuai zatnate ahi zongin, na muk uh pan paaikhia un. Tua bawlphatna-ah Grik mi a om kei hi, Judah mi a om kei hi, vunat mi a om kei hi, vunat lo mi a om kei hi, mi pil lo a om kei hi, Sithia mi a om kei hi, sila a om kei hi, sila lo mi a om kei hi; Khazih in na khempeuh hi a, na khempeuh sungah a om hi. Tua ahih ciangin note in Pasian’ teel mi, a siangtho mi, a it mite bangin hehpihna, thupha bawlna, sin kiniamsakna, lungneemna, heh baih lohna lungsimte na silh un. Khat leh khat na kimawhsak nading uh a om ciangin kithuak un la, na kiniamsak un. Topa in note mawhna hong maisak mah bangin note zong khat leh khat na kimaisak ciat un. Kicin’na tawh a kipawl pawlkhat suahna ahi ki-itna, tua nate tungah thuahin silh un. Note lungsim sung uhah Khazih’ nopna na uksak un. Tua bang deihna-in note in pum khat bek sungah hong sapna a ngah na hi uh hi. Hehpihna phatna lungsim na nei un. Khazih’ thu in pilna apawlpawl tawh note sungah om ta hen. Late-a kipan biakna la leh Kha Siangtho tawh kipawl la apawlpawl tawh note khat leh khat kihilhin, kitai-in, hehpihna thupha lungsim nei-in, Pasian tungah lasa-in phat un. Kampau ahi zongin, bawlna ahi zongin, na hihna khempeuh uhah Topa Zeisu’ min suangin, tua Topa hangah Pa Pasian’ hehpihna phatin na khempeuh na bawl un. Numeite aw, Topa sungah a kilawm mah bangin, pasalte hong ukna na mang un. Pasalte aw, na zite uh na it un la, a tung uhah na hangsan kei un. Tapate tanute aw, thu khempeuhah na nute na pate uh thu na mang un. Bang hang hiam na cih uh leh, nute pate thuman’na in Pasian’ deihna ahi hi. Pate aw, na tapate na tanute uh lungkiat nading, thanem nading a om loh nadingin amaute hehsak kei un. Silate aw, Pasian kihta-in, mihing pahtaak ding ut-a mi’ maitang bekah mang hi loin, lungka loin, ci-le-sa tawh kipawl na tote uh thu khempeuh na mang un. Mi’ nasem bang bek hi loin, Topa’ nasem bangin na hihna khempeuh uhah itna lungsim tawh hih ta un. Bang hang hiam na cih uh leh, Topa Khazih’ nasem na hih uh ciangin luahna ahi thaman tua Topa’ khut tung pan na ngah ding uh hi ci-in na thei un. Bang hang hiam na cih uh leh, dik lo-a gamta mi in ama hihna mawhna a thuak ding hi. Kuama maitang zahtakna a om kei ding hi. Tote aw, note in zong vantungah om Topa khat na neih uh na thei un la, thuman thutak leh a kilawm a kituakin na silate uh na bawl un. Thungen tawntung un la, hong hehpihna phatin ngak un. Pua lamah a om mite mai-ah pilna tawh gamta un la, a hun na teel un. Mi khempeuh tungah bang ci dawn’ kik ding cih na theih nadingun, note kam in ci al bangin a al limna tawh dimin kilawm tawntung ta hen. Topa sungah dikna nei-in nasem khawm sila ka hihpih, a it huai mi ahi sanggampa Tikhikas in keima thu a om khempeuh note kiangah a hong gen ding hi. Kei tawh thong a kia khawm mi Aristarkhas akipan Barnabas’ nau Marka leh Justas a kici Zeisu te in note a hong hopih uh hi. Marka thu tawh kipawl note kiangah ka hong khak zo hi. Amah note kiangah a hong tun’ ciangin dawnin na tungsak un. Vunatna a thuak mite lakah hih mite bek Pasian’ Gam ading ka naseppihte ahi uh a, kei hong hehnem uh hi. Note lakah a piang Khazih Zeisu’ sila Epafras in note hong hopih hi. Note kicingin Pasian’ deihna khempeuh ah lunghihmawhna om loin na lungkim nadingun, note ading hahkatin thu a ngen tawntung hi. Note-a kipan Laodikia khua leh Hierapolis khua ah a om mite adingin nakpi-in a hahkatna thu keimah in amah ading teci ka pang hi. Itna a ngah zato mangpa Luka leh Demas in note hong hopih uh hi. Laodikia khua-ah a om ute naute a hi zongin, Nimfa akipan ama innah a om pawlpi ahi zongin na hopihsak un. Hih lai na sim khit uh ciangin Laodikia khua-ah a om pawlpite zong na simsak un. Laodikia khua pan a kingah ding lai zong na sim un. Arkhippas kiangah zong, “Nangmah in Topa’ khut sungah na ngah nasepna na zawh khit nadingin ciamteh in,” ci-in na gen un. Kei Paul in ka khut tawh note hopihna hih lai kong gelh hi. Kei’ thuak kikhihna na ngaihsun un. Note tungah hehpihna thupha om ta hen. Paul, Silvanas leh Timoti-te in Pa Pasian leh Topa Zeisu Khazih sungah kip-a a om Thesalonika pawlpi kong zasak uh hi: Hehpihna thupha leh nopna in nomau tungah om ta hen. Bang hang hiam na cih uh leh, kote in note tawh ka omkhawm lai takun, note adingin bang ci mi ka hih uh na theih uh mah bangin, kote’ hilh Lungdamna Thu in note sungah kampau bek hi loin vangliatna tawh ahi zongin, up khialhna om loin lungkim taktakna tawh a dim thu ahi hi. Note in gimna lian na thuak uh hangin Kha Siangtho tawh akipawl lungdamna tawh, Pasian thu sangin kote tawh Topa ngeina bangin a gamta mite na hi uh hi. Tua ahih ciangin Makedonia gam leh Akhaia gamah thu-um mite khempeuh ading note in limpha a lak mi na hi uh hi. Bang hang hiam na cih uh leh, note kiang panin Topa thu in Makedonia gam leh Akhaia gamah kizeel tham loin, note in Topa’ thu na upna uh mun khempeuh a tung hi. Tua ahih ciangin kote in bangmah ka gen ding uh a om kei hi. Ute naute aw, kote in note kiangah ka hong lutna uh a mawkna suak lo hi cih nomau mah in na thei uh hi. Note in na theih uh mah bangin kote in Filippi khua-ah zawn’khalna leh bawlsiatnate ka thuak khit uh ciangin, i Pasian suangin nakpi-in nialna tawh Pasian’ Lungdamna Thu nomau kiangah lau loin ka hong hilh uh hi. Kote in zuauthu hilhna, kihuaina, kheemna tawh hong hansuahin hong zol thei ka hi kei uh hi. Lungdamna Thu zui dinga kilawm mi ci-in Pasian in ko hong koih mah bangin mite lungsim uh kimsak bang hi loin, lungsim a hong dongtel Pasian lungkimsak bangin thu ka hilh uh hi. Bang hang hiam na cih uh leh, note in na theih uh mah bangin, kote in mi phatna kam khat beek ka zang kei uh a, a kiseel huaihamna lungsim neu kha beek a om loh thu, Pasian in kote ading teci a pang hi. Tua tham loin, Khazih’ sawltak ka hi uh ahih ciangin vangik a suan thei mi ka hi uh napi-in, mite’ piak minthan’na note kiangah ahi zongin, midangte kiangah ahi zongin zong loin, note lakah dam damin ka sem uh hi. Ute naute aw, kote in gimpi mahmahin nasemin ka hahkatna thu uh na thei uh hi. Note lakah mi khat peuhmah tungah vangik ka suah loh nadingun kote in sun tawh, zan tawh nasemin Pasian’ Lungdamna Thu note kiangah ka hong hilh uh hi. Ka hilh uh Pasian’ thu note in ngahin na san’ lai takun, mi kam sung pan a pusuak thu bangin sang loin, Pasian’ thu a man taktak hi ci-in a um note sungah a bawlpha Pasian’ thu bangin na san’na uh ngaihsunin, kote in Pasian’ hehpihna ka phat tawntung uh hi. Bang hang hiam na cih uh leh, Judah gamah Khazih Zeisu sungah a om pawlpite in Judah mite’ khut tung pan gimna a thuak uh bangin, ute naute aw, note in zong na mipawlte khut sung uh ah tua bangin na thuak uh ahih ciangin, Judah gamah a om pawlpite bangin a gamta mi na hi uh hi. Tua Judah mite in, Topa Zeisu akipan kamsangte a that zo uh hi. Kote zong hong hawlkhia uh a, Pasian lungsim tawh kituak loin mi khempeuh tawh zong kilem lo uh hi. Tua mite in amau mawhna a dimsak tawntung nadingun Gentailte in gupna sungah a tun’ nadingun kote thuhilh hong khaam uh hi. Amau tungah hehna a vekpi-in a tung zo hi! Ute naute aw, kote in lungsim tawh hi lo, pum bek tawh note tawh a tom kha i kikhen hangin, nomau maitang uh mu nuamin, kong ngaih mahmah uh lungsim tawh hahkat zaw-in ka om uh hi. Tua ahih ciangin kei Paul in note kiangah kong pai nading nihvei dong ka hanciam hangin Satan in kote hong kham hi. I Topa Zeisu hong kum ciangin a mai-ah kote lametna, lungdamna leh kisaktheihna lukhu in bang ahi hiam? Note hilo na hi uh hiam? Bang hang hiam na cih uh leh, note in kote minthan’na leh lungdamna na hi uh hi. Tua ahih ciangin kote in lunghimawhin ka thuak zawh nawn loh uh ciangin Athen khuapi-ah komau bek ka om lai nading uh ka ut uh hi. Khazih’ Lungdamna Thu hilhin, i sanggampa Timoti note kiangah ka hong sawl uh hi. Hih gimnate hangin kuamah a lungkiat loh nadingin, note hong kipsak a, na upna uh ah note hong hansuah nadingin amah ka hong sawl uh hi. Hih gimnate thuak dingin kote hong kikoih hi ci-in nomau mah in na thei uh hi. Bang hang hiam na cih uh leh, eite in gimna i thuak ding hi ci-in note tawh ka omkhawm lai takun ka hong gen zo uh hi. Kong gen uh mah bangin zong a piang hi ci-in na thei uh hi. Tua ahih ciangin a ze-et thei, a zol theipa in no hong ze-et a, ka sepna un a mawkna a suak kha ding hi ci-in lunghimawhin ka thuak zawh nawn loh ciangin, note upna ka theih nadingin ka hong sawl hi. Tu-in ahih leh, Timoti in note kiang pan hong ciahkik a, note upna leh ki-itna uh a kip hi ci-in ahi zongin, kote in note kong ngaih uh mah bangin note in kote hang ngai-in, ni simin hong ngaihsun a, hong phawk uh hi ci-in ahi zongin, lungdam thu hong zasak ahih ciangin, ute naute aw, kote in lunghihmawhna khempeuh leh ko thuak gimna-ah note thu-upna uh hangin hehnepna ka ngah uh hi. Bang hang hiam na cih uh leh, note in Topa sungah na kip uh leh, kote ka nungta uh hi. I Pasian mai-ah note thu hangah kote lungdamna khempeuh ngaihsunin, note hangin Pasian’ hehpihna bang ci thukkik zawh ding ka hi uh hiam? Note maitang uh mu-in, nomau’ kisap lai khempeuh a kicin’sak nadingun kote in sun tawh zan tawh nakpi-in thu ka ngenngen uh hi. Note omna-ah ka hong pai nading lampi i Pa Pasian mahmah leh i Topa Zeisu in hong bawlsak ta hen. A khak bel thu in ute naute aw, note in bang ci nuntak ding ahi zongin, Pasian lungdamsak nadingin bang ci gamtat ding ahi zongin kote kiang pan na ngah khin zo uh hi. Tua ahih manin tua mah bangin na khangto semsem un ci-in Topa Zeisu paulamin, hong thuumin kong hansuah uh hi. Topa Zeisu’ thuneihna tawh hih bang lamlahnate kong piak uh na thei uh hi. Pasian’ deihna in note in numei tawh khialhna tangin na sian’tho nading uh ahi zongin, hih thu-ah kuamah in a u, a nau tungah kheemna tawh a khialh loh nading ahi zongin a hong deih hi. Kote in hilhin, thuciam ka hong piaksa uh bangin Topa in tua banga khialhna khempeuh a thuk mi ahi hi. Pasian in kihhuaina-ah eite hong sam ahi kei hi, sian’thona-ah hong sam hi. Tua ahih ciangin hih thu a nial mi in mi bek nial ahi kei hi, note Kha Siangtho a hong pia Pasian nial ahi hi. Ute naute ki-itna thu ahih leh, note kiangah gelhin mi khatpeuh kong piak nading a om kei hi. Bang hang hiam na cih uh leh, note khat leh khat na ki-it nading uh Pasian’ hilhna a ngah mi na hi uh hi. Tua tham loin, Makedonia gam mun khempeuh ah a om ute naute khempeuh tungah tua bang na hih uh hi. Ahih hangin ute naute aw, note in khangin, na hauh semsem theih nadingun ahi zongin, Ute naute aw, muan’na a nei lo midangte a dah bangun note in na dah loh nadingun a si mite’ thu thei loin na om ding uh ka deih kei uh hi. Zeisu in a sih khit ciangin a thawhkik eite in i up leh, tua bangin Zeisu sungah a si mite zong amah tawh Pasian in a kha khawm ding hi. Topa’ thupiak kholhna bangin kote in note kiangah kong gen uh thu in: Topa hong kumsuk dongin nungta-in a om lai eite in a si mite mai-ah omna ngah ding i hi peuhmah kei ding hi. Bang hang hiam na cih uh leh, Topa mah in kikona tawh, vantungmi mangpa’ kikona tawh, Pasian’ peengkul tumna tawh, vantung pan hong kumsukin, Khazih sungah a sisa mite in a tho masa ding uh hi. Tua khit ciangin nungta-a om lai eite in van kim lai-ah Topa dawn dingin tua mite tawh meii tungah puakna i ngah mah bangin, Topa tawh i omkhawm tawntung ding hi. Tua ahih ciangin hih thute tawh note khat leh khat na kihehnem un. Ute naute aw, a hun leh a nite thu gelh a, kong piak nading a om kei hi. Bang hang hiam na cih uh leh, zan a, gutate hong pai mah bangin Topa’ Ni in hong tung ding hi ci-in note mah in a tel takin na thei uh hi. Amaute in, “Nopsakna a om hi, launa om lo hi,” ci-in a gen lai takun, ta gai numei tungah ta suah hun gimna a tun’ bangin amaute tungah kisiatna gal in thakhatin tung ding a, suahtakna neukha beek a ngah kei ding uh hi. Ahih hangin ute naute aw, tua Ni in guta mi bangin note tungah a hong tun’ nadingin ah note in khuamial lakah a om na hi kei uh hi. Bang hang hiam na cih uh leh, note khempeuh in khuavak’ tate, sun lai’ tate na hi uh hi. Eite in zan tawh ahi zongin, khuamial tawh ahi zongin a kipawl i hi kei hi. Tua ahih ciangin adang mite a ihmut bangun eite ihmu loin, pilvangin kikem ni. Bang hang hiam na cih uh leh, a ihmu mite in zanin a ihmu thei uh hi. A kham a guite in zong zanin a kham thei uh hi. Eite i hih leh, sun lai tawh kipawl mite i hih ciangin ei mahmah kikepna nei-in, upna leh itna tawh kipawl awmdalna ahi zongin, bulhin, gupkhiatna’ lametna tawh kipawl siklukhu ahi zongin khu-in om ni. Tua ahih ciangin note in na hihsa uh bangin, khat leh khat kihansuah un la, khat leh khat kikipsak un. Tua tham loin, ute naute aw, note lakah nasep a hahkatte leh Topa sungah hong makaih a, thu hong hilh mite na ciamteh un la, a bawlnate hangah ki-itna lungsim tawh na zahtak nadingun, kote in kong thuum uh hi. Khat leh khat kilemin na om un. Ute naute aw, thadah zulhtat mite a kikep nadingun na hilh un, lungsim zawmte na hansuah un, thanemte na huh un, mi khempeuh tungah na lungduai un. Mi dangte tungah hehna na thukkik loh nadingun na kikeem un. Khat leh khat tungah ahi zongin, mi khempeuh tungah ahi zongin thuhoih lamsang hahkat tawntungin na bawl un. A tawntungin na lungdam ta un. Thungen niloh un. Na khempeuh ah a hong hehpihna phat un. Bang hang hiam na cih uh leh, note in tua bang na bawl dingun Zeisu Khazih hangah Pasian’ deihna ahi hi. Kha Siangtho’ huhna na mitsak kei un. Pasian kamsangte’ thu na simmawh kei un. Na khempeuh sinin ahoih nate na len tawntung un; khialhna nam kim na tang un. Nopna hong pia Pasian mah in note khempeuh hong siangthosak ta hen. Note lungsim, na kha leh na pumpi uh, i Topa Zeisu Khazih hong pai kik ciangin mawhsakna tawh a kipelh nadingun hong keem ta hen. Note a hong sampa in thuman tawh dim ahih ciangin, tua bangin a hong bawl ding hi. Ute naute aw, kote ading thu hong ngetsak un. Ute naute khempeuh, a siangtho kinapna tawh na kihopih un. Hih lai ute naute khempeuh kiangah na simsak nadingun Topa paulamin note thu kong pia uh hi. I Topa Zeisu Khazih’ hehpihna thupha note tungah om ta hen. Paul, Silvanas leh Timoti te in i Pa Pasian leh Topa Zeisu Khazih sungah kip-a a om Thesalonika pawlpi kong zasak uh hi. Pa Pasian leh Topa Zeisu Khazih kiang pan hehpihna thupha leh nopna in nomau tungah om ta hen. Ute naute aw, na upna uh khang mahmahin, note khempeuh khat leh khat na ki-itna uh zong khang ahih ciangin, kote in hih ding a kilawm bangin note hangin Pasian’ hehpihna ka phat tawntung uh hi. Tua ahih ciangin note in bawlsiatna khempeuh ahi zongin, na thuak uh gimna ahi zongin, thuakzawhna leh upna na neih uh kote in ngaihsunin, Pasian’ pawlpi lakah note hangin ka kisathei uh hi. Note in Pasian’ Gam hangin gimna thuakin, tua Gam tawh a kilawm mi-in hong simna thu na ngah nadingun, thuman tawh Pasian’ thukhenna tua bangin a kilang hi. Tua ahih ciangin i Pasian leh Topa Zeisu Khazih’ hehpihna thupha tawh kizui-in tua i Topa Zeisu’ min in note hangin vangliatna a ngah nading ahi zongin, note in zong tua Topa hangin vangliatna na ngah nading uh ahi zongin note in hong sapna thupha a ngah ding a kilawm mi ci-in eite Pasian in hong ciamtehin, hoihna tawh kipawl deihna khempeuh leh upna tawh kipawl gamtatna khempeuh a vangliatna tawh a kicin’ nadingin kote in note ading thu ka hong ngetsak tawntung uh hi. Ute naute aw, i Topa Zeisu Khazih hong paina leh eite in ama kiangah i kikhopna thu panin, Topa’ Ni a hong tun’ hun a nai zo bangin kamsan’na hang ahi zongin, kam pan pusuak thu hang ahi zongin, kote kiang pan hong khak uh lai hang ahi zongin, note in lungkiatna leh lunghimawh lin’na a manlangin na thuak loh nadingun ka hong thuum uh hi. Kuamah in note bangmah hangin hong kheem kei hen. Bang hang hiam na cih uh leh, tua Ni hong tun’ ma-in langpan’na lian a piang masa ding a, kisiatna’ ta ahi Gilo Mi in hong piang ding hi. Tua mi in thu nial a, pasian a kici khempeuh ahi zongin, a kibia na khempeuh ahi zongin, tuate sangin ama pumpi pahtawi zaw-in, Pasian’ biakinnpi sungah tu-in, “Pasian ka hi hi,” ci-in a pumpi lakin a om ding hi. Keimah in note tawh ka omkhawm lai takin hih thu ka hong gen zo hi ci-in phawk lo na hi uh hiam? Tua mi in ama hun laitak a kilatsak nadingin a kikhamna thu zong tu-in na thei uh hi. Bang hang hiam na cih uh leh, a kiseel gitlohna in tu nangawnin na a sep laitak ahi hi. Ahih hangin a nial mi a kilakkhiat dongin a kham mi khat a om hi. Tua ciangin a kiseel Gilo Mi a kilang ding hi. Tua mi Topa Zeisu in ama kam sung pan a pusuak hu tawh siasakin, ama hong kilatna’ vangliatna tawh a mangthang ding hi. Tua a kiseel Gilo a hong pian’na thu in, Satan bawlna bangin zuauna tawh kipawl vangliatna, nalamdang leh dipkuat huaina apawl pawlte tawh ahi zongin, kisiatna a ngah mite ading diklohna khemna apawl pawlte tawh ahi zongin a piang ding hi. Bang hang hiam na cih uh leh, tua mite in gupna a ngah nadingun ki-itna tawh kipawl thuman a sang kei uh hi. Ahih hangin Pasian in a it ute naute aw, note in Kha Siangtho’ sian’thosakna tawh, thuman thutak na upna uh tawh, gupna na ngah nadingun Pasian in a masa belin note hong teel ahih ciangin kote in hih ding a kilawm bangin, note’ hangin Pasian’ hehpihna ka phat tawntung uh hi. Tua bang deihna hangin ka thu hilh uh Lungdamna Thu tawh note hong sam zo hi. Bang hang hiam na cih uh leh, note in i Topa Zeisu Khazih’ vangliatna na ngah nading uh ahi hi. Tua ahih ciangin ute naute aw, kam sung pan hong pusuak thu hang ahi zongin, kote lai hang ahi zongin note in na sinsa uh ngeinate ah kipin lenin, deih un. I Topa Zeisu Khazih mahmah leh, eite hong it-a hong hehnep tawntungna thu ahi zongin, hehpihna thupha tawh apha lametna ahi zongin a hong pia, i Pa Pasian in, note’ lungsim hong hehnemin, na ahoih leh thu ahoih apawl apawlah note hong kipsak ta hen. A khak bel thu in ute naute aw, Topa thu in note kiangah a piang mah bangin kizeelin, vangliatna a ngah nading leh, a nial mite leh migilote’ khut tung pan kote hong hotkhiat nading thu hong ngetsak un. Bang hang hiam na cih uh leh, mi khempeuh in thu-um mi ahi kei uh hi. Ahih hangin Topa in midik hi a, note hong kipsakin thu hoih lote tawh hong kipelhsak ding hi. Kote’ thupiakna bangin note in tu-in na gamta uh tham loin, a nung ciangin zong na gamta ding uh hi ci-in Topa suangin kote in ka lungkim uh hi. Pasian it nading ahi zongin, Khazih bangin thuak zawh nading ahi zongin Topa in note lungsim hong hilh ta hen. Ute naute aw, kote kiangah na san’ uh ngeina thu bangin a gamta lo, thadahin a zulhtat ute naute khempeuh na pel un ci-in i Topa Zeisu Khazih’ min tawh thu kong pia uh hi. Bang hang hiam na cih uh leh, kote hong piak lim zui-in note na gamtat nading uh a kilawm hi ci-in na thei uh hi. Bang hang hiam na cih uh leh, kote in note lakah thadah zulhtatin ka gamta kei uh hi. A man pia loin kuama an ka ne kei uh hi. Note lakah kuamah tungah vangik ka suah loh nadingun gimpi-in hahkatin, sun tawh zan tawh na ka sem uh hi. Tua bang ka bawl uh ciangin a ngah ding, a la dingin kilawm ka kisak lohna hang uh hi loin, note zuih dingin komau pumpi in limpha ka suah nadingun ka bawl uh hi. Bang hang hiam na cih uh leh, kote in note tawh ka omkhawm lai takun, “Mi khat peuhmah in na a sep nop kei leh, tua mi in an ne kei hen,” ci-in thu kong pia uh hi. Note lakah amau’ na bangmah sem lo a, amau tawh kisai lo thute ah a kitaaklah, a vakthap mi kimkhat a om hi cih thu ka za uh hi. Tua bang mite in nuamtakin nasemin, amau khut pana piang an a neek nadingun i Topa Zeisu Khazih suangin thu ka pia uh a, hansuahin ka zol uh hi. Ute naute aw, no na hih uh leh, thakiam loin ahoih nate na gamta un. Hih lai sungah ka gelh uh thupiaknate mi khat peuhmah in a ngaih kei leh, tua mi na ciamteh un; a maizum nadingin amah tawh na kipawl kei un. Ahih hangin gal bangin na ngaihsun kei un; sanggam bangin na hilh un. Nopna’ Topa mahmah in note a tawntungin nopna apawl pawl hong pia ta hen. Topa in note khempeuh tawh omkhawm ta hen. Keimah Paul in note hopihna ka khut tawh kong gelh hi. Hih banga ka gelh thuhilhna lai khempeuh pen a tuam a, keima ciaptehna ahi hi. I Topa Zeisu Khazih’ hehpihna thupha in note khempeuh tawh omkhawm ta hen. Eite Honpa Pasian leh i lametna Khazih Zeisu thupiakna tawh Khazih Zeisu sawltak keimah Paul in: Upna sungah ka ta taktak ahi Timoti kiangah kong zasak hi. Pa Pasian leh Khazih Zeisu i Topa’ hehpihna thupha, hehpihna leh nopna nangma tungah om ta hen. Hih thupiakna’ deihna bulpi in, lungsim siangtho, lungsim kisuan’na om lohna leh thuman upna tawh a kipawl itna ahi hi. Tua gamtatnate mi kimkhatte in zui tawntung loin, a mawkna kampauna lamah a pialkhia uh hi. Tuate in Thukham hilhna a sep nop uh hangin amau kampau ahi zongin, bang ci thu lamah amaute in a kiptakin ahilh uh ahi zongin a thei kei uh hi. Tua bang i cih ciangin thupha a ngah a vanglian Pasian in kei hong kepsak Lungdamna Thu tawh a kituak hi. Tua thu kei hong keemsak ahih ciangin tha hong dimsak i Topa Khazih Zeisu’ hehpihna ka phat hi. Bang hang hiam cih leh, keimah in Pasian a kosia ngei mi, a bawlsia ngei mi, a khialtat ngei mi ka hih hangin thudik mi ci-in Topa in hong ciamteh a, thuhilh za-ah hong koih hi. Bang hang hiam cih leh, upna nei lo, thu thei loin ka bawlna hang hi. Eite Topa’ hehpihna thupha in zong Khazih Zeisu sungah a om upna leh itna tawh, a kigen khin zo loin tamin a om hi. Zeisu Khazih in mawhneite gum dingin leitungah hong paisuk hi, a cihna thu in thuman thutak hi a, a vekpi-in san’ ding a kilawm hi. Tua mawhnei mite lakah keimah in a mawhnei bel mi ka hi hi. Ahih hangin nuntak tawntungna ngah ding, a nung ciangin a um ding mite’ zuih ding lim ka hih nadingin mawhna a lianbel a nei keima tungah, Khazih in ama thuakzawhna lungsim khempeuh hong lah nadingin kei hong hehpih zo hi. A om tawntung Kumpipa ahi, a si thei lo, mit in a muh theih loh, khat bek a om Pasian in a tawntungin pahtawina leh minthan’na ngah ta hen. Amen. Ka ta Timoti aw, nangmah hong ngaihsunin a kigensa thu genkholhna kam bangin nang in upna leh theihna lungsim siangtho suangin, a pha galdona na do nadingin, a tungah ka hong gensa thupiakna kikoihna thu, nang ka hong pia hi. Mi kimkhat in tua upna a nial uh a, amau upna teembaw a siasak uh hi. Tua mite lakah Himenaius leh Alekzander a om uh hi. Tuate in thu gensiatna kam a gen nawn loh nading uh a kisin nadingun Satan ka keemsak zo hi. Tua bang hihna in hihna pha hi a, eite hong Honpa Pasian’ deihna tawh kituak ahi hi. Tua Pasian in mi khempeuh in gupna ngahin, thuman thutak a theih nading a deih hi. Bang hang hiam cih leh, Pasian khat bek om a, Pasian leh mite kikal ah mimah ahi hong kikham Khazih Zeisu khat bek a om hi. Tua Zeisu in mi khempeuh tankhia dinginah ama pumpi a pia hi. Amah a hun a tun’ ciangin teci pang dingin a om hi. Keimah in tua teci pang mi za-ah ahi zongin, sawltak za-ah ahi zongin, upna thu leh thuman thutak thu Gentailte kiangah a hilh za-ah ahi zongin hong koih hi, ka cih ciangin thuzuau ka gen kei hi, thuman thutak ka gen hi. Tua ahih ciangin mun khempeuh ah pasalte in hehna, kinialna om loin a khut siangtho lamto-in thu a nget ding uh ka deih hi. Numei in na khempeuh ah ukna mangin pau loin om hen. Numei in thuhilh ding ahi zongin, pasal tungah a uk ding ahi zongin thu ka pia kei hi; amah in pau loin a om ding ka deih hi. Bang hang hiam cih leh, Adam a piangsak masa a, a nung ciangin Evua a piangsak hi. Tua tham loin, Adam in kheemna a thuak kei hi, numei in kheemna thuak a, a khial hi. Ahih hangin numeite in khuaval lohna, upna, itna leh siangthona-ah kipin a om uh leh, nausuahna-ah gupna a ngah ding uh hi. Thuhilhpa za a deih mi in na pha a deih hi, a cihna in thuman thutak ahi hi. Tua ahih ciangin thuhilhpa in mawhsak nading tawh a kipelh mi, zi khat bek a nei mi, a lungsim kip mi, a khuaval lo mi, a kilawm a kituak-a gamta mi, zindo siam mi, thuhilh siam mi ahi ding hi. Tua pa in zu ne loin, midang a sat a vua mi hi loin, a lungduai mi, thusia lamah a kiseel hat lo mi, sum a duh lo mi ahi ding hi. Amah in ama inn pha takpi-in uk zoin a tate, na khempeuhah khuaval loin, a uk thei mi ahi ding hi. Bang hang hiam cih leh, mi khat in a inn a uk zawh kei leh, Pasian’ pawlpi a bangci kep theih ding hiam? Kisaktheihna tawh hai-in, Dawimangpa’ thuak mawhna thukhenna a thuak ding lauhuai ahih ciangin pawlpi sungah a tum thak mi ahi kei ding hi. Tua tham loin, amah in kosiatna leh mawhsakna leh Dawimangpa’ thangsiahna tawh a kipelh nadingin a pualam mi lakah zahtakna a ngah mi ahi ding hi. Tua mah bangin pawlpi upate in zong khuaval lo mi, thu lang gen lo mi, zu dawnin a noptat lo mi, sum siangtho lo deih lo mi ahi ding uh a, theihna lungsim siangtho tawh upna thu thukpi a zang ding uh hi. Tua mite in a masa-in ze-etna thuak ta uh hen. Tua nung ciangin mawhsak nading a om kei leh, pawlpi upa na sem ta uh hen. Tua mah bangin amau’ zite in zong khuaval lo ding uh a, mite’ dai nading thu gensiam mi hi loin thuman thutak a nei mi, na khempeuhah a diktat mi ahi ding uh hi. Upate in zi khat bek nei-in, amau’ tate leh a inn uh a pha takpi-in uk ta uh hen. Bang hang hiam cih leh, upa na pha takpi-a a semte in amau adingin a hoih a phatna ahi zongin, Khazih Zeisu sungah a om upna hangah launa om lohna a ngah uh hi. Pasian biakna thu thukpi in bang zah lian hiam cih nial nading a om kei hi: ‘Amah in pumpi-ah a kilang hi, a thumanna Kha Siangtho tawh a kilang hi, vantungmite in a mu uh hi, minam khempeuh lakah a thu kihilh hi, Leitung khempeuh ah a thu ki-um hi, minthan’na tawh vantungah kilak tohna a ngah hi.’ Kha Siangtho in a tel taka a genkholh inah, a tawpna hun ciangin, Pasian’ bawlsa khempeuh a pha hi a, hehpihna phatin a kisan’ leh, bangmah tan’ ding a om kei hi. Bang hang hiam cih leh, Pasian’ thu tawh ahi zongin, thungetna tawh ahi zongin a kisiangthosaksa ahi hi. Hih nate nang in ute naute kiangah na hilh leh, upna thu leh tu dongin nang na zuih thuhilhna a hoih tawh kivakin, Khazih Zeisu’ nasem hoihpa na hi ding hi. Numei teekte in a gen theih uh ahi mawkna tangthute paaikhia in. Pasian biakna lamah nuamsa a, na om nadingin na kiseksak in. Bang hang hiam cih leh, pumpi ading kiseksakna in phattuamna tawmkha a pia thei hi; Pasian biakna lamah nopsakna in tu laitak nuntakna leh tu nung ciangin a piang ding nuntakna tawh kipawl thu kiciamna ngah a, na khempeuhah phattuamna hong pia thei hi, a cihna kam in thuman thutak hi a, a vekpi-in san’ ding a kilawm kam zong ahi hi. Tua ahih ciangin mi khempeuh Gumpa ahi, a um mite a man takpi a gum, a nungta Pasian, eite in muangin i um a, hahkatin semin, simmawhna zong i thuak hi. Hih thute vaikhak in la, hilh in. Khangno lai na hih hanginah kuamah kisimmawhsak kei in. Thugenna, gamtat ngaihsutna, midang itna, upna, siangthona sung pan a um mite ading limpha na suak in. Ka hong pai matengin Lai Siangtho simin, mi hansuahna leh thuhilhnate hahkatin om in. Genkholhna tawh, pawlpi upate’ khutngakna tawh nang hong kipia thupha letsong zang loin om kei in. Na khan’tohna mi khempeuh mai-ah a kilat nadingin hih nate deihpha in la, hahkat in. Nangmah ahi zongin, na thuhilhna ahi zongin, kikeem in la, na om in. Hih nate-ah na kip tawntung in. Tua bang na hih leh, nangmah ahi zongin, na thu a ngaite ahi zongin gupna na ngahsak ding hi. Khangham upate na taai kei in, pa bangin na thuum in. Tangvalte na sangampa bangin ahi zongin, nupite nute bangin ahi zongin, nungakte na khempeuhah a siangtho tawh ahi zongin thu na hilh in. Meigong taktak ahi numeite na zahtak in. Ahih hangin ta leh tu a nei meigongnu ahih leh, a tute a tate in a masa-in amau innkuanpihte zahtakin, a pa, a pite’ hehpihna thukkik nading sin uh hen. Bang hang hiam cih leh, tua bang hihna in Pasian mai-ah a deihhuai ahi hi. Meigongnu taktak hi a, khat guak a om lai numei in Pasian muang a, sun tawh zan tawh thungenin a om tawntung hi. Ahih hangin a mawktatna-ah, nopsa-a a om meigongnu ahih leh, a nuntak hangin si-in a om hi. Tua mite in mawhsakna tawh a kipelh nadingun hih thute vaikhak in. Mi khat in ama mite, ahi takpi gen leeng ama innkuanpihte, a kep kei leh, thu-upna nial a, a um lo mite sangin a gilo zaw hi. Meigongnu in kum sawmguk a phak kei leh, a min na khum kei in. Amah in pasal khat a nei ngei, na pha sem a, maipha a ngah, a tate a khoi thei, zin a do thei, mi siangthote’ khe a sil thei, gimna thuakte a hehnem thei, nasepna a pha khempeuh a sem thei numei ahih leh, tua numei a min na khum ta in. A khangno lai meigongnute ahih uh leh, a min uh khum kei in. Bang hang hiam cih leh, tua numeite in nopsakna lungsim nei-in, Khazih tawh kilem loin pasal nei nuam uh a, a masa thuciamna siasak uh ahih ciangin thukhenna a thuak uh hi. Tua tham loin, inn khat pan inn khatah vak kawikawi-in, thadah tham loin, kam tamin, a gen tuak lo nate genin, amau tawh kikum lo thu-ah a kihel thei uh hi. Tua ahih ciangin a khangno meigongnute in pasal a neih nading, ta zong a neih nading, a inn sung a uk nading, i galte in hong gensiat theih loh nading ahih nadingun ka deih hi. Bang hang hiam cih leh, a kimkhat in tu lai nangawnin Satan nung a zui uh hi. Thu-um numei khatpeuh in a inn sungah meigongte a neih leh, pawlpi tungah van suan loin amahmah in vaak hen. Tua bang ahih leh, meigongnu taktak ahi-te pawlpi in a vaak thei ding hi. Pawlpi a pha takpi-a ukte, a man takpi ci leeng Pasian’ thu gen a, thuhilhin a hahkatte in, a zah nih zahtakna ngah ding a kilawm na ciamteh in. Bang hang hiam cih leh: “Buh a cil bawng’ kam na hencip kei in,” leh “Nasemte in thaman ngah ding a kilawm hi,” ci-in Lai Siangtho in a gen hi. Teci nih bang thum bang a om kei leh, pawlpi ukpa tungah mawhsakna kam na ngai kei in. Midangte in zong a lau theih nadingun, a khial mite, mi khempeuh mai-ah na taai in. Thu ma khen loin, gup tuam neihna lungsim tawh bangmah bawl loin, hih thute na zuih nadingin Pasian’ mai, Khazih Zeisu’ mai leh a kiteel vantungmite mai-ah pha takpi-in thu kong pia hi. Thu ngaihsun masa loin kuama tungah a manlangin khutngakna nei kei in. Midangte mawhna tawh na kikum kei in, nangma nuntakna siangtho sak in. Na gilpi ading leh na cinatna ading tu-a kipan tui bek dawn loin leenggahzu tawm na zang in. Mi kimkhatte a gitlohna uh kilangin thu kikhen masa thei hi. Mi kimkhat a gitlohna un, a nung uh hong zui hi. Tua mah bangin a kilang gamtatna hoih a om thei hi, a kilanglo gamtatna hoih a kiseel zo kei hi. Pasian’ min leh a thuhilhna in gensiatna a thuak loh nadingin, hakkol nuai-ah a omte in a tote uh a zahtak mahmah nading uh kilawm hi ci-in ciamteh uh hen. A tote in thu-um mi ahih uh leh, unau khat ahih uh ciangin nasim lo, thudon loin, om kei uh hen. A nasepna-ah noptuamna a ngah mite in, a um mite leh it tuak mite ahih uh ciangin a nasep pha takin seem zaw ta uh hen. Hih thute hilh in la, hansuah in. Thuhilhna tuam hilhin, i Topa Zeisu Khazih’ kam ahi, kam siangtho ahi zongin, Pasian biakna lamah nopsakna tawh a kilawm thuhilhna ahi zongin, a mang lo mi khatpeuh a om leh, tua mi in kisathei-in, bangmah thei loin thu kidotna kikumin, a kam bek tawh a seel mihai ahi hi. Tua bang a bawl leh, en’na, kitotna, gensiatna, hazatna tawh upkhialhna lungsim neihna in thuman thu tawh a kipelh mite kitotnate a piang thei hi. Tuate in Pasian biakna lamah nopsakna in sum hauhna hong piangsak hi ci-in a um uh hi. Lungkimin Pasian biakna lamah nopsakna in hauhna lianpi a piangsak thei hi. Bang hang hiam cih leh, eite in leitungah bangmah pua loin i tung a, bangmah pua loin i paikhia ding hi. Tua ahih ciangin neek ding, puansilh ding a om zah tawh lungkimin i om ding hi. Sum a hau nuam mite in kheemna sungah, thang awkna sungah, hai-a noptuamna a siasak thei, deihgawhna atuam atuamte sungah a kia thei uh hi. Tua bang deihgawhna in mite kisiatna sungah a tum mangsak thei hi. Bang hang hiam cih leh, sum hauh nopna in khialhna pawl khempeuh bul ahi hi. Mi kimkhat in sum hauh nopna hangin upna lampi pan paikhia-in, lunggimna apawlpawl tawh amau pumpi uh a vut let zo uh hi. Pasian’ mi aw, nang na hih leh, tua mawhnate pel in la, dikna, Pasian biakna lamah nopsakna, upna, itna, thuakzawhna, lungnemnate na phak matengin na delh in. Upna thu tawh kipawl galdona a pha na do in. Nuntak tawntungna na len in. Tua nuntakna ngah dingin nang in hong sapna na ngah a, teci tampite maiah na pang ngei hi. Timoti aw, nang hong kipia na, a pha takpi-in kem in. Nate’ thu pilna hi ci a, kiphuak khial, pilna thu tawh kipawl hi lo a, mawkna kamte, nate’ pilna khamna kinialnate na pel in. Tua nate’ pilna, mi kimkhat in a mang uh a, a bawl manun upna lam pan a pial zo uh hi. Nangma tungah hehpihna thupha om ta hen. Khazih Zeisu sungah a om nuntakna hong pia ning ci-in a thuciamna mah bangin, Pasian’ deihna hangin Khazih Zeisu sawltak keimah Paul in: Ka it ka tapa Timoti kong zasak hi. Pa Pasian leh i Topa Khazih Zeisu kiangpan hehpihna thupha, hehpihna leh nopna nang tungah om ta hen. Tua ahih ciangin nangma tungah ka khut ngakna tawh, nang, Pasian in hong piak letsong thupha na kuan’sak det nadingin kei in ka hong phawksak hi. Bang hang hiam cih leh, Pasian in eite launa lungsim hong pia ahi kei hi; vangliatna, itna leh ei-le-ei ki-uk zawhna Kha hong pia zo hi. Tua ahih ciangin Topa teci pan’na ahi zongin, tua Topa’ thongkiapa ahi keimah ah ahi zongin zum kei in. Pasian hong piak a vangliatna bangin Lungdamna Thu tawh kizomin gimna na thuak in. Tua Pasian in eite gamtatna hang hi lo, tang lai a hun hong tun’ ma-in, Khazih Zeisu sungah eite ading ama hanciamna leh a hong piak hehpihna a ngaihsut kholhsa bangin eite hong gumkhia a, a siangtho sapna tawh hong sam hi. Tua hehpihna thupha in eite hong Gumpa Topa Zeisu Khazih hong kilatna hangin tu-in a kilang zo hi. Tua Topa in sihna mangthang sak a, nuntakna leh a kisia thei lo nuntakna, Lungdamna Thu hangin hong langsak hi. Tua thu hilh ding za-ah ahi zongin, sawltak za-ah ahi zongin, laihilh za-ah ahi zongin kei hong koih zo hi. Tua thu hangah hih gimnate zong ka thuak hi. Ahih hangin ka zum kei hi. Bang hang hiam cih leh, ka uppa ka thei a, ama kiangah ka piak nate zong tua Ni dongin a kem zo ding hi ci-in ka um hi. Keima kiangah na zaksa, na ngahsa a pha hilhnate, Khazih Zeisu sungah a om upna leh itna tawh na lenkip in. Nangma kiangah hong kipia a pha na, eite sungah a om Kha Siangtho huhna tawh na kem in. Asia gamah a om mi khempeuh in kei kiangpan a pialkhiat zawh uh na thei hi. Tuate lakah Figelas leh Hermogenes zong a om uh hi. Topa in Onesiforas’ innkuanpihte tungah hehpihna tungsak ta hen. Bang hang hiam cih leh, amah in kei tam veipi hong thakhauh sak hi. Keima sikkhau hangin zong zum loin, Rom khuapi sungah a hong tun’ ciangin hahkatin kei hong zong a, hong mu hi. Amah in tua Ni ciangin Topa khut sung panin hehpihna a ngah nading Topa in thupha pia ta hen. Amah in Efesa khua-ah zong bang zah takin hong kem hiam cih nangmah in a pha takpi-in na thei hi. Tua ahih ciangin ka ta aw, nangmah in, Khazih Zeisu sungah a om hehpihna thupha tawh thahatin om in. Teci tampi mai-ah keima kiang pan na zaksa nate, dikna tawh dimin midangte a hilhsawn thei ding mite’ tungah na ap in. Nang in Khazih Zeisu’ galkap siampa bangin keimah tawh gimna na thuak khawm in. Na a sep lai takin galkap in amah galkap a tumsak mi’ deihna bangin ahih theih nadingin, hih leitung vaite tawh a kikai-awk sak kei hi. Tua mah bangin mi khat in tai a kidem ciangin ngeina bangin a kidem kei leh, a gualzote’ ngah lukhu a ngah kei ding hi. Nasep hahkat lokho mi in a gahte a ngah masapen ahi ding hi. Ka thu na ciamteh in. Bang hang hiam cih leh, Topa in na khempeuh ah pilna a hong pia ding hi. Kei’ gen Lungdamna Thu bangin David’ suan ahi, sihna pan a hingkik Zeisu Khazih na ngaihsun in. Tua Lungdamna Thu hangin keimah in mi gilo bangin khau kikhihna dongin gimna ka thuak hi. Ahih hangin Pasian’ thu ahih leh, a kikhihna om lo hi. Tua ahih ciangin a kiteel mite in zong a tawntung minthan’na tawh Khazih Zeisu sungah gupna a ngah nadingun na khempeuh ka thuak hi. A dikna thu panin: ‘Amah tawh sihna i thuakkhawm zawh leh, Amah tawh i hingkhawm ding hi; I thuak leh, amah tawh i maangkhawm ding hi. Eite in amah i nial leh, Amah in eite hong nial ding hi. Eite i muanhuai loh hangin, Ama muanhuaina a kip den hi. Bang hang hiam cih leh, Amah in amah leh amah a kitheihmawh bawl thei kei hi. Hih thu teng amaute na phawksak in. Bangmah phattuamna a piangsak lo, a za mite’ lungsim a siasak ding kam bek hangin kinialna a om loh nadingin, Topa mai-ah amaute ciamna thu na pia in. Nangmah in zumhuaina om loin thuman thutak a man takin a khen theipa na suah nadingin Pasian mai-ah a deihhuai mi suakin, na pumpi na piak nadingin ah hahkat in. Thutak hi lo, a mawkna kamte na tang in. Bang hang hiam cih leh, tuate in Pasian biak lohna lamah khangto-in, a dam ngei lo meima bangin a ne ding hi. Tua mite lakah Himenaius leh Filetas a om uh hi. Amaute in, “Misite’ thawhkikna a kheng zo hi,” ci-in thu-upna lam pan pialin mi kimkhatte’ upna a siasak uh hi. Ahih hangin, “Topa in ama mite a thei hi,” ci-in ahi zongin, “Topa’ min a muangte in dik lohna pan paikhia hen,” ci-in ahi zongin ciamtehna a om, a to mahmah Pasian’ bulpi in, kipin a om hi. Inn lian mahmah sungah kham leh ngun nate bek a om kei hi; sing nate leh lei nate zong a om hi. Tua nate lakah kimkhat in minthan’na ding a om hi, kimkhat in minthan’ loh nading a om hi. Tua ahih ciangin tua nate tawh ama pumpi a kisiangthosak mi in minthan’na na, siangthona na, inn neipa zat ding a kilawm na, nasepna pha pawl khempeuh ading a suak ding hi. Khangno’ deihgawhna lungsim na tang in la, lung siangthona tawh Pasian kiangah thu a ngen mite tawh, dikna, upna, itna leh nopna delhin na zuikhawm in. Hai-a pilna om lo thu kidotna in kitotna piangsak thei hi ci-in thei in la, tang in. Pasian’ sila in a kitawng thei kei hi, mi khempeuhte thu dam takin ahih thei mi, thu a hilh thei mi, a thuak zo mi ahi ding hi. A nunung bel nite lai takin a haksa hunte a hong piang ding hi ci-in na ciamteh in. Bang hang hiam cih leh, mite in amau pumpi uh it mi, sum it mi, a kisathei mi, lungkhauh mi, mi gensia thei mi, a nute a pate thu a mang lo mi, hehpihna a phawk lo mi, a siangtho lo mi, ngeina bang itna a nei lo mi, kitotna lungsim nei mi, mi a gendai thei mi, a pumpi kikem zo lo mi, a hangsan mi, a hoih lam a deih lo mi, thuciam a siasak mi, thuhilh a ngai nuam lo mi, kisaktheihna tawh a hai thei mi, Pasian sangin leitung nopsakna a it zaw mi, Pasian biakna puatham teng zui uh a, ahih hangin a vangliatna a nial mi ahi ding uh hi. Tua bang mite na peel in. Tua mite lakah simtatin innte sungah a lut khit uh ciangin, deihgawhna atuam atuam zui-in, a kihilh niloh hangin cikmah hunin thuman thutak a thei thei lo numei haite’ thuzawh mite a om uh hi. Zannes leh Zabres in Moses a nial uh mah bangin tua mite in zong thuman thutak a nial uh hi. Amaute a lungsim uh kisia-in upna thu-ah thudotna a thuak zo lo mi ahi uh hi. Tua mi nihte’ haina in mi khempeuh mai-ah a kilang mah bangin, hih mite’ haina zong kilang ding a, amaute in sotto khangto thei lo ding uh hi. Nang na hih leh, keima thu hilhna, ka gamtatna, ka hanciamna, ka upna, ka lungduaina, ka itna, ka zawhna, ka thuak bawlsiatna leh gimna-a kipan, Antiok khua, Ikonium khua leh Listra khuate-ah ka thuak gimna na thei hi. Tua thu khempeuhte pan Topa in kei hong gumkhia hi. Ahi hi. Khazih Zeisu sungah kipin a nungta nuam mi khempeuhte in zong bawlsiatna a thuak ding uh hi. A gilo leh mi kheem thei mite a hih uh leh, gilo semsem ding uh a, midangte kheemin, amau mahmah zong a kikheem ding uh hi. Pasian mai-ah ahi zongin, a nungta mi leh mi si tungah thu a khen ding Khazih Zeisu mai-ah ahi zongin, Zeisu hong kilat nading leh ama kumpigam suangin thu ka hong piakna in: Pasian thu hilh in, a hun a om zongin a om kei zongin hahkatin mawhna lakin, taai in; lungnemna khempeuh tawh thu hilhin hansuah in. Bang hang hiam cih leh, mite in thu hilhna pha mang loin, a bil uh thakin, amau deihgawhna bang thuhilh a tampi, amau ading a koih ding uh a, thuman thutak ngai loin, tangthu ngai-in a paikhiat hun uh a tung ding hi. Nangmah na hih leh, na khempeuh sungah na lungsim na kikeem in, gimna thuak in, thuhilh sia’ na mah na sem in; nang nasep ding nasepna a vekpi-in na sem in. Bang hang hiam cih leh, keimah in tu lai takin biakna tau tungah kisungin ka om lai hi. Ka paina hun a hong tung zo hi. Galdona a pha ka do zo hi, tai nading lam a mong dongin ka tai zo hi, upna thu ka keem zo hi. Tu-a kipanin dikna lukhu, keimah ading a kikoih khol zo hi. Tua Ni ciangin thuman tawh a khenpa in tua lukhu kei hong pia ding hi. Keimah bek hong pia kei ding hi, ama kilat ding thu a lamente khempeuh zong a pia ding hi. Ka kiangah a manlangin na hong pai nading hahkat in. Bang hang hiam cih leh, Demas in tu lai nuntakna a it maninah kei hong taisanin, Thesalonika khua-ah a pai zo hi. Kresen in Galati gamah a pai zo hi. Titu in Dalmatia gamah a pai zo hi. Luka bek ka kiangah a om hi. Marka hong zawn in la, hong tonpih in. Bang hang hiam cih leh, ama nasepna ka phattuampih mahmah hi. Tikhikas ahih leh, Efesa khua-ah ka sawl zo hi. Troas khua-ah Karpas kiangah ka koih ka puanza leh laibute, leh a man takin savun lai dalte ahi zongin, na hong pai ciangin hong pua in. Sumsungpa Alekzander in keimah tungah a hoih lo tampi hong bawl hi. Amah in a hihna bangin ama tungah Topa in a thuk ding hi. Tua mi nangmah zong na kikeem in. Bang hang hiam cih leh, amah in eite thu nakpi-in a nial hi. Amasa-a ka kihutna thu ka gen lai takin keima lamah kuamah a om kei hi, mi khempeuh in kei hong taisan uh hi. Tua thu hangin amaute tungah mawhsakna om kei hen. Thuhilhna khempeuh ka hilh theih nading ahi zongin, Gentail mi khempeuh in a zak nadingun ahi zongin, Topa in kei lamah om a, keima tha hong dimsak a, humpinelkai’ kam sung pan hong honkhia hi. Topa in thu hoih lo khempeuh pan hong honkhia a, ama vantung dongin hong kha ding hi. Tua Topa in a tawntungin minthan’na ngah ta hen. Amen. Prisilla leh Akuila a kipan Onesiforas’ innkuante na hopihsak in. Erastas in Korin khua-ah a om lai hi. Trofimas in cina ahih ciangin Miletas khua-ah ka nusia hi. Phalbi ma-in hong pai dingin na hahkat in. Eubulus, Pudens, Linas leh Klandia akipan ute naute khempeuh in nang hong hopih uh hi. Topa in na kha tawh omkhawm ta hen. Nangma tungah hehpihna thupha om ta hen. A kibang khawm upna thu sungah ka ta taktak ahi Titu kiangah thu ka hong zasak hi. Pa Pasian leh eite Honpa Khazih Zeisu kiang pan hehpihna thupha leh nopna nangma tungah om ta hen. Keimah in nang kong vaikhak mah bangin Krete gamah a kisam lai nate vaihawm kikin, khua khempeuh ah pawlpi upa koih nading tua gamah nang kong nusia zo hi. Upate in mawhsak nading tawh a kipelh mi, zi khat bek a nei mi, a tate zong thu-um mi hi-in, leitung nopsakna-ah uang lua hi ci-in mawhsakna a nei lo, thumang lo mi hi lo ding uh hi. Bang hang hiam na cih leh, Pawlpi siapa in Pasian’ neihsa kempa bangin mawhsak nading tawh a kipelh mi ahi ding hi. Ama deihna a zui mi, mi lungtom mi, zu ne a, a kitawng thei mi, midang a vua thei mi, a siangtho lo a deihgawh mi ahi kei ding hi. Zindo a siam thei mi, a hoih lam a deih mi, khuaval zulhtat lo mi, a dik mi, a siangtho mi, a pumpi a kikeem zo mi ahi ding hi. Tua tham loin, amah in thuhilhna siangtho tawh hansuah theih nading ahi zongin, a nial mite kam a thukkik theih nading ahi zongin, thuhilhna thu tawh kilawm dikna kam a zui tawntung mi ahi ding hi. Bang hang hiam na cih leh, ukna mang loin, mawkna kam genin midangte a kheem thei mi tampi om uh hi; vunatna a thuak mite lakah a om thei bel uh hi. Tua mite kam kihu cip ding hi. Bang hang hiam na cih leh, amaute in sum siangtho lo hangin ahilh tuak lo thu hilhin, innkuanpih khempeuh lumlet thei uh hi. Amau lakah amau mipawl ahi kamsangpa khat in: “Krete mite in a zuau thei mi, ganhing gilo, anhai thadah mi ahi uh hi,” a ci zo hi. Mi siangtho mai-ah na khempeuh a siangtho hi. A siangtho lo leh thu-um lo mite mai-ah ahih leh, bangmah a siangtho kei hi; amaute lungsim uh leh amau lungsim-theihna uh zong a siangtho kei hi. Amaute in, “Pasian ka thei tel uh hi,” a cih uh hangin, a gamtatna uh tawh Pasian a nial uh hi. A kihhuai mi, thungai lo mi, nasepna hoih khat beek ah kiman’na om lo mi ahi uh hi. Nangmah na hih leh thuhilhna siangtho tawh a kituak thute na hilh in. A teek pasalte in a pumpi deihna khaam nading, a khuaval zulhtat loh nading, a lungkip nading, upna lamah a kip nading, itna a neih nading, a thuak zawh nading na hilh in. a khuaval zulhtat loh ding, mi siangtho hi ding, a inn sung khempeuh a keem ding, migi ding, a pasal’ ukna a mang ding, thu a hilh theih nadingun na hilh in. Tua mah bangin tangvalte in zong khuaval zulhtat loh nading na hilh in. Na khempeuh ah gamtatna pha lim, nangmah mah in na pumpi-in na lak in. Thu na hilh ciangin kheemna thu om loin, khuaval zulhtat loin, mawhsakna om lo thu siangtho na hilh in. Tua bang na hih leh, lang khatah a om mi in eite hong gensiat nading thu ngah loin a maizum ding hi. nialin; tu lai hunin khuaval zulhtat lohna, thuman gamtatna, Pasian biakna lamah nopsakna bawl nadingin, Pasian’ hehpihna thupha hong kilang a, mi khempeuh kiangah gupna thu hong paipih zo hi. Tua Topa in mawhna khempeuh sungpan eite hong tankhia dingin ahi zongin, gamtatna ahoihte ah lungsim utna nei-in, ama hong neihtuam dingin, ama ading siangthosak dingin ahi zongin eite ading ama pumpi a pia hi. Hih thute hilhin, hansuahin zol in, thuneihna aana khempeuh tawh amaute na taai in. Kuamah kisimmawhsak kei in. Mite in gam ukte leh mangte’ ukna uh a man’ nading, nasepna pha khempeuh a sep nading a kigin’ kholh nading; kuamah gensia loin, kitawng loin, lungkhuah nei loin, mi khempeuh tungah lungnem takpi nading a ngaihsut nadingun thu na hilh in. Bang hang hiam na cih leh, nidang lai-inah eite in zong a pil lo mi, thungai lo mi, kheemna a thuak mi, deihgawhna a pawlpawl leh gualnop uukna’ sila i hi a, hazatna, en’na a gamta mi, a muhdahhuai mi, khat-le-khat kimudah mi i hi ngei hi. Eite Honpa Pasian’ hehpihna leh mite a hong itna hong kilat ciangin, eite gamtatna pha hang hi loin ama hehpihna bangin nihvei suahna tawh kipawl sawp siangna tawh ahi zongin, Kha Siangtho’ hong bawlphat thakna tawh hong gum hi. Eite Honpa Zeisu Khazih hangin eite tungah tua Kha Siangtho a kicingin hong sung hi. Pasian’ hehpihna thupha hangin diktan’sakna i ngah khit ciangin nuntak tawntungna lametna bangin a luah mite i hih nading ahi hi. Hih thu in thuman thutak ahi hi. Hih thu ngaihsunin Pasian a um mite in gamtatna ahoihte ahih tawntung nading a kikep nadingun, hahkatin na hilh nading ka hong deih hi. Hih thute a pha uh tham loin mite’ phattuamna a piangsak thei uh hi. Thu kidong hainate leh khangciamtehna laite, kitotnate, thukham hangin kiseelnate tang in. Bang hang hiam na cih leh, tua nate in phattuamna hong pia lo uh hi, a mawkna ahi uh hi. Thu nial a, kikhenthang mi, khatvei, nihvei bang taai-in na hilh khit ciangin, tua bang mi in amahmah thu a kikhen manin mawhna bawlin khialhna ahih mi ahih thei-in paaikhia in. Artemas ahi zongin, Tikhikas ahi zongin, na kiangah kong sawl ciangin Nikopolis khua keima kiangah na hong pai nading na hahkat in. Bang hang hiam na cih leh, tua khua-ah phalbi hun sung teng khawl ning ci-in ka hanciam zo hi. Sitni Zenas leh Appolos-te in sapna a neih loh nadingun hahkatin na kha in. I mite in zong a gah nei lo mi hi loin, kisapnate a ngah nadingun, gamtatna ahoih a hih tawntung nadingun sin uh hen. Keima kiangah a om mi khempeuh in nang hong hopih uh hi. Upna sungah ko hong itte na hopihsak in. Note khempeuh tungah hehpihna thupha om ta hen. Khazih Zeisu hanga thongkia kei, Paul leh i sanggampa Timoti in kote tawh nasem a, ka it uh Filemon, leh i sanggamnu Apfia leh ko tawh galkap ahi khawm Arkhippas akipan, nangma inn sungah a om pawlpite ka hong zasak uh hi. I Pa Pasian leh i Topa Zeisu Khazih kiangpan hehpihna thupha leh nopna note tungah om ta hen. Upna na zopna a vanglian-in, Khazih Zeisu sungah eite’ aa ahi, ahoih na a om khempeuhte midangte in a theih nadingun thu ka ngen hi. Sanggam aw, nangma hangin misiangthote in lungsim thaksuahna a ngah uh ahih ciangin nangma itna ngaihsunin lungdam mahmahin ka nuam zo hi. Kikhihna ka thuak lai takin ka tapa a hong suak, nidangin nang adingin kiman’na om lo mi, tu-in ahih leh, kei leh nang adingin a kizang thei ding mi Onesimas ading ka hong thuum hi. Keima pumpi bang ahi, amahmah na kiangah ka hong ciahsak kik hi. Lungdamna Thu hangin kikhihna ka thuak lai takin, amah in nangmah tangdingin kei hong kep nadingin ka koih nop hangin, nang in kei tungah, thupha na hong bawl ciangin, zawhthawh thu bang hi loin, na ut thu-a na bawl ahih nading ka deih a, sawlzawh thu tawh ka hong hih nuam kei hi. Tua tham loin, nangmah in amah tawh na omkhop tawntung nadingin, amah in nang tawh tawlkhat a kikhen cih huai hi. Tua bang ka cih ciangin sila bangin ngaihsun nawn loin, tham loin kei in ka it taktak ka nau hi a, nang adingin pumpi sungah ahi zongin, Pasian sungah ahi zongin bang zahin a it huai semsem naupa bangin na ngaihsut nading ka cihnopna hi. Tua ahih ciangin nangmah in kei pen na lawmpa banga nong ngaihsut leh, amah zong keimah bangin na tungsak in. Amah in nangma tungah na khatpeuh hong khial ahi zongin, leiba khatpeuh peuh a nei ahi zongin, keima tungah ciamteh in. Hong lohkik ning ci-in keimah Paul in ka khut tawh ka hong gelh hi. Ahih hangin keima tungah na hong lohkik ding leiba om hi ka cihna a hi kei hi. Ahi hi, ka sanggam aw, nangmah hangin Topa sungah keima lungsim tawldam ta hen; Khazih sungah ka lungsim hong thakhauh sak in. Nangmah in ka thu hong mangin, ka genna zah sangin zong ahoihzaw-in na hih ding ci-in ka theih maninah lai ka hong gelh hi. Tua tham loin, ka giah nading omna mun zong na bawlkhol in. Bang hang hiam na cih leh, nangma thungetna hangin na kiangah tun’ theih nading thu ka ngahkik ding ka lamen hi. Eite Topa Zeisu Khazih’ hehpihna thupha in nangma kha tawh omkhawm ta hen. Amen. Tua a Ta in Pasian’ vangliatna meel leh pianlim hi a, ama vangliatna tawh na khempeuh kipin, eite mawhnate amahmah in a sian’sak khit ciangin, a sang mun vangliatna ziat lamah tu-in a om hi. Vantungmite a ngah uh min sangin a phazaw min a ngah mah bangin vantungmite sangin a lianzaw mi ahi hi. Bang hang hiam na cih uh leh: “Nang in ka Tapa na hi hi, Tuni-in na Pa ka suak zo hi,” ci-in ahi zongin, “Keimah in ama Pa ka hi ding hi, Amah in zong ka Tapa ahi ding hi,” ci-in ahi zongin a kua vantungmi kiangah khatvei beek thupia ngei ahi hiam? Lam khat panin a Tapa upa leitungah a hong sawl ciangin: “Pasian’ vantungmi khempeuh in bokin Amah a bia uh hi,” ci-in a gen hi. Lam khat panin: “Ama vantungmite in huih nung bang ahi zongin, A nasemte meikuang bang ahi zongin a piangsak hi,” ci-in vantungmite ngaihsunin a gen hi. A Tapa thu ahih leh: “Pasian aw, na tokhom in A om tawntung tokhom ahi hi, Dikna ahi ukna Ciang in Na gam ukna ciang ahi hi. Nang in dikna thu na deih a, Gitlohna thu na mudah hi; Tua ahih ciangin nangma Pasian ahi Pasian in, Nangma lawmte khempeuh sangin Nang hong pahtawi zaw-in, Lungdamna sathau tawh hong nilh zo hi,” a ci hi. Khatvei: “Topa aw, nang in a kipat cilin Leitung bul na piangsak hi; Vantung zong na khut tawh Na bawl na ahi hi. Tuate a kisiat ding uh hangin, Nang na om tawntung ding hi; Tuate puan bangin a tul ding hi. Amaute puan bangin na zial ding hi, Amaute puan bangin a kikheel ding uh hi. Nang na hih leh, na kikheel ngei kei ding hi, Na nuntakna a bei ngei kei ding hi,” a ci hi. Tua tham loin: “Na galte khempeuh na khe nuai-ah Ka koih matengin, Ka ziat lamah na tu in,” ci a, kua vantungmi khatvei beek thupia ngei ahi hiam? Vantungmite khempeuh in gupkhiatna luah ding mite kem dingun, sawltak nasem khate hilo ahi uh hiam? Tua ahih ciangin eite in i zaksa thute panin kinkhia lo paikhiat loh nading, lungsim takpi tawh kidophuai hi. Tua teci a pang mite tawh Pasian in lim tawh ahi zongin, a lamdang nate tawh ahi zongin, nalamdang tuamtuamte tawh ahi zongin, ama deihna bang a hawmsak Kha Siangtho piak thupha tawh ahi zongin teci a pang khawm hi. Eite in i hilh a nung ciangin a piang ding leitung in vantungmite nuai-ah a koih kei hi. Lai Siangtho khat sungah mi khat in: “Na lungngaih nadingin mi in bang hi lel ahi hiam? A en dingin na hong pai nadingin mihing tapa in bang ahi hiam? Amah vantungmite nuai-ah a neukha na nuaikhiat zo hi, Amah minthan’na leh pahtawina na khusak hi. Na khut-a na pian’sakte na uksak a, Na khempeuh ama khe nuai-ah na koih zo hi,” ci-in teci a pang hi. Na khempeuh a koih zo hi a cih ciangin a koih loh a om lai khat beek a om kei hi. Tu hunin na khempeuh ama khe nuai-ah a koihna i mu nai kei hi. Tu-in ahih leh, vantungmite nuai-ah neukha bek niamkhiatna a thuak mi Zeisu in Pasian’ hehpihna hangin mi khempeuh taang dingin sihna a thuak nading thu sang ahih ciangin, minthan’na leh pahtawina a ngahna thu i thei hi. Bang hang hiam na cih uh leh, ta tampite vanglian nopsakna-ah a khak nadingin, tua mite’ gupna a piangsakpa in gimna a thuakna hangin kicin’na a tun’ nadingin na khempeuh bawl a, a uk Pasian in a kilawm hi. A siangthosak theipa leh siangthona a ngah mite in innkuan khat pan a piang uh hi. Tua ahih ciangin Zeisu in amaute, “Ute naute aw,” ci-in sap ding a maizumpih kei hi. Tua bang a cihna in: “Ka ute ka naute kiangah Na min ka gen ding hi, Mihon laizangah nangmah phatna la ka sa ding hi,” ci-in a gen hi. Mun khat panin, “Pasian ka muang ding hi,” a ci hi. Khatvei leuleu: “Kei-a kipan Pasian hong piak tate a om uh hi,” ci-in a kigen hi. Bang hang hiam na cih uh leh, amah in a man takin vantungmite a huh kei hi; Abraham’ suante a huh hi. Tua ahih ciangin amah in mite mawhna tang ding Pasian tawh kipawl nate ah hehpihna tawh ahi zongin, dikna tawh ahi zongin a dim Siampi Ukpa a suah nadingin, a u a naute tawh a kibat taktak nading thu a om hi. Bang hang hiam i cih leh, amahmah in ze-etna thuakin gimna thuak ngei zo ahih ciangin ze-etna a thuakte a huh nadingin a siam hi. Tua bang ahih leh, vantunggam tawh kipawl hong sapna thupha a ngah misiangtho ute naute aw, a thuman Sawltak leh Siampi Ukpa ahi ci-a i san’ Zeisu tel takin enin ngaihsun un. Moses in Pasian’ innpi sung khempeuh ah a diktat mah bangin Zeisu in amah a koihpa mai-ah a diktat hi. Inn lampa in inn sangin minthan’na a neih zawk mah bangin Zeisu in Moses sangin a lianzaw minthan’na ngah dingin a kilawm hi ci-in eite in i ciamteh hi. Inn khempeuh mi khat peuhmah in a lam hi. Na khempeuh a piangsakpa in Pasian ahi hi. Moses in a nung ciangin a kigen ding nate-ah teci pang dingin nasem hi a, innpi sung khempeuh ah a diktat hi. Khazih ahih leh, Tapa ahihna tawh innpi uk a, a diktat hi. Eite in lau lohna ahi zongin, lametna tawh kipawl lungdam kisaktheihna ahi zongin, a tawp mateng i let kip leh, tua innpi i hi hi. Tua ahih ciangin hih khangmite Ka deih kei a, ‘Amaute lungsim sung uhah a khial tawntung uh hi; Keima hih ngeinate a thei kei uh hi,’ ka ci hi. Tua ahih ciangin amaute in Keima nopsakna sungah a tum thei ngei kei ding uh hi, ci-in hehin ka kiciam hi,” ci-in a gen mah bangin, ute naute aw, note lakah khatpeuh peuh in mawh nopna uplahna lungsim tawh a nungta Pasian kiang pan na kinkhiat loh nadingun na kikeem un. Mawh kheemna hangin note lakah a lung khauh mi a om khak loh nadingin, “Tu ni,” a kicih lai takin nisimin khat leh khat kihansuah un. Bang hang hiam na cih uh leh, eite in i kipat cil upna bangin a tawp dongin i kip leh, Khazih tawh a ngah khawmte i hi ding hi. Lai Siangtho sungah a gen mah bangin: “Tuni-in note in ama aw na zak uh leh, kilemlohna bawlin hehsakna hunah na om ngei bangun, na lungsim uh na khauhsak kei un.” Thu za napi-un kilemlohna bawlin a hehsak mite kua ahi hiam? Moses nungzui-in Izipt gam pan a paikhia uh mi khempeuhte in tua bang hilo ahi uh hiam? Kum sawmli tawntung a deih lo mite in kuate ahi uh hiam? Mawhna khialhna bawlin gam lakah pukin a si mite hilo ahi uh hiam? “Note in keima nopsakna sungah na tum kei ding uh hi,” ci-in ciamsiatna a thuak mite, a thungai lote sim loh, kua mite ahi uh hiam? Tua ahih ciangin amau in a up loh manunah a tum zawh loh uh i thei hi. Tua ahih ciangin Pasian’ nopsakna sungah tum zawh nading thu hong kiciamna in eite ading a om lai napi-in, note lakah khat peuhmah in a phak zawh loh khak ding lung hihmawhhuai hi. Bang hang hiam na cih uh leh, eite in Lungdamna Thu tuate mah bangin i za zo hi. Ahih hangin amau a zak uh thu in a za mite lakah upna tawh a kigawm lo ahih ciangin, phattuamna a om kei hi. A um eite in Pasian’ nopsakna sungah i tum hi. Tua bang a genna in: ‘“Amaute in ka nopsakna sungah a tum thei kei ding uh hi,’ ci-in hehin ka kiciam hi,” a ci hi. Ahih hangin Pasian in a cil panin a na khempeuh a zo khin hi. Ni sagih ni thu, Lai Siangtho sung mun khatah a genin, “Pasian in ama bawl na khempeuh a zawh khit ciangin, ni sagih ni-in tawhnga-in a om hi,” a ci hi. Tua Lai Siangtho sungah a om kik in: “Amaute in ka nopsakna sungah a tum thei kei ding uh hi,” ci-in a om hi. Tua ahih ciangin mi kimkhat a tum theih ding uh hangin, Lungdamna Thu nidang lai-inah a za mite in a up loh manunah a tum thei kei uh a, Khatvei: “Tuni-in note in ama aw na zak uh leh, na lungsim uh na khauhsak kei un,” ci-in hih zah a sawt zo, “Tu ni,” ci-in David tungah a gen ciangin, nidang lai-in a genna bangin ni khat peuhpeuh ciamtehin a ngaihsun hi. Bang hang hiam i cih leh, Joshua in tua mite nopsakna pia hi leh, tua nung ciangin a nidang ni thu Pasian in a gen kei ding hi. Tua ahih ciangin Pasian’ mite ading Nipi ni nopsakna a om lai hi. Pasian in ama nasepna khempeuh zo khinin tawlnga-a a om bangin, tua nopsakna sungah a tum mi in zong ama nasepna khempeuh zoin tawlnga-in a om hi. Tua ahih ciangin Israel mite in thu ngaih lohna lungsim a neih uh ciangin, a kipuk uh bangin, kuamah kipuk loin tua nopsakna sunga tum nadingin hahkat ciat ni. Bang hang hiam i cih leh, Pasian’ thu in nungta a, vangliatna nei a, lang nih a hiam namsau sangin hiamzaw a, nuntakna leh kha ahi zongin, guh-le-tang leh guhngeek ahi zongin, khenin pailet thei a, lungsim ngaihsutnate leh hanciamnate khempeuh a thei thei hi. Tua tham loin, eite thu hong khenpa mai-ah a kilang lo na khat beek a om kei hi; na khempeuh a liah a dal om loin Pasian mai-ah kipho laakin a om hi. Tua ahih ciangin vantung kheng a, pai Siampi Ukpa lian ahi Pasian’ Tapa Zeisu in, eite aa ahih ciangin eite in i man’sa thu-ah kip takin om ni. Bang hang hiam na cih uh leh, eite siampi ukpa in eite hat lohna hong hehpih zo lo mi ahi kei hi; eite thuak mah bangin ze-etna apawl apawl a thuak ngei mi, ahih hangin— mawhna khialhna nei lo ahi hi. Tua ahih ciangin eite in hehpihna leh a kilawm hunah hong huhna thupha ngah nadingin, lau lohna lungsim tawh hehpihna’ tokhom kiangah nai ni. Mi lakah a kiteelkhia siampi ukpa in mawhna taang ding biaknate leh piaknate mite ading a pia dingin Pasian tawh kipawl nate-ah a kikoih hi. Amah in thanem ahih ciangin a pil lo mite, a mawh mite a thuakpih dingin a siam hi. Tua ahih ciangin mite mawhna leh ama mawhna taang dingin biakna a pia hi. Pasian in Aaron a sap bangin a sap mite longal, kuamah in tua za a lian a la thei kei ding hi. Tua mah bangin Khazih in zong siampi ukpa za a ngah nadingin ama pumpi a pahtawi kei hi. “Nang in ka Tapa na hi hi; Tuni-in nang kong piangsak hi,” ci-in a thu a piapa in Khazih a pahtawi hi. Tua mah bangin Lai Siangtho mun khatah a gen-inah: “Nang in Melkhizedek’ pawl a tawntung Siampipa na hi hi,” a ci hi. Tua Khazih in mi pumpi bangin a om lai takin, sihna pan a honkhia zopa kiangah kikona, khitui luan’na tawh thungenin thuum a, Pasian kihtakna lungsim hangin thungaihna ngahin, Ta taktak ahi napi-in gimna tawlna a thuakna tawh thuman’na a sin hi. Tua bangin a kicin’na a tun’ khit ciangin a thumang khempeuhte ading gup tawntungna a bawl mi suak a, Melkhizedek’ pawl siampi lian hi ci-in Pasian in a min a phuak hi. Tua Melkhizedek thu kote gen ding tampi a om hi. Ahih hangin note bil pil lo na hih uh ciangin a gen nading a haksa hi. Note in a sawt vei zo-in thuhilhte a suak khin ding na kilawm napi-un, Pasian thupiakna lakah a kisim masa, a bulpi thute, midangte kiangah khatvei na sin kik nading uh om ahih ciangin zan hak an sam loin, nawizu nete bek na hi uh hi! Nawi bek a ne mi in naupang bang ahih ciangin dikna tawh kipawl thu a siam kei hi. Ahih hangin an tak in a sia a pha khen theihna pilna a nei, zakna muhnate zangin zongsang a, amau leh amau a kiseksa, a picing mite’ ading ahi hi. Pasian in thu hong piak leh, tua bang i bawl ding hi. Bang hang hiam na cih uh leh, a tungah a kia ngitnget guahtui dawnin, a sem mite ading anteh an-gah a piangsak thei leitang in Pasian kiang pan thupha a ngah hi. Ahi zongin lingkung leh thangling a pian’sak leh, paihkhiatna thuakin hamsiat a thuak nadingin, a tawpna-ah meikhuk khulna a thuak ding hi. Ka itte aw, tua bang ka cih hangin note in gupna tawh kipawl na leh a hoihzaw nate tawh na kizom uh ci-in kote in ka lungkim uh hi. Bang hang hiam na cih uh leh, nomau nasepna uh akipan nidang lai-in misiangthote na vaak uh tham loin, tu nangawnin na vaak uh ahi zongin, tua bang hihin ama min hangin na lah uh ki-itna ahi zongin Pasian in a mangngilh dingin thumanlo-pa ahi kei hi. Pasian in Abraham thuciamna a piak ciangin, amah sangin a lianzaw tawh ciam ding om lo ahih ciangin amahmah tawh, “Nang a man takpi thupha kong pia ding hi, nang a man takin kong khangsak ding hi,” ci-in a ciam hi. Tua mah bangin Abraham in thuakin a ngak khit ciangin a thuciamna bangin a ngah hi. Mite in amau sang a lianzawte tawh a kiciam thei uh hi. Kinialna khempeuh kiciamna in a beisak hi. Tua ahih ciangin thuciamna a luah ding mite in Pasian’ hanciamna a kikheel zo lo a theih tel nadingun, Pasian in kiciamna tawh a kikham hi. Bang hang hiam na cih uh leh, Pasian in zuauthu a zang zo lo thu nih hangin eite mai-ah hong kikoih lametna len a, a beel dinga tai eite in hansuahna khauh i ngah nading ahi hi. Tua lametna in puan dalna sungah tumin, lungsim kipna siklum bangin eite ading a om hi. Tua sungah Zeisu in Melkhizedek’ pawl ahi, a kip tawntung Siampi Ukpa a suah khit ciangin eite taang dingin a masa in a tum hi. Kumpite a thahna panin a ciahkik Abraham dawn a, thupha a piak khit ciangin, Abraham in a ngah sum khempeuh seh sawm suah seh khat khenin a piak, Salem Kumpipa ahi, Sang Bel Pasian’ Siampi Melkhizedek in, a min bulpi a khiatna pen dikna’ Kumpipa, tua tham loin, nopsakna’ Kumpipa a cihnopna, Salem Kumpipa hi a, pa om lo, nu om lo, a suan a khak om lo, a nuntakna kipatna ahi zongin, a beina ahi zongin nei loin, Pasian’ Tapa tawh kibangin siampi-in a tawntungin a om hi. I pu Abraham in a sum ngah ahoih bel seh sawm suah seh khat pia-a a sang tua pa in bang zah a lian na lunggai un. Levi’ tate lakah siampi za a ngahte in Abraham’ suante ahi uh a, amau unaute’ khut tung uh panin Thukham mah bangin seh sawm suah seh khat a san’ nadingun thu a ngah uh hi. Ahih hangin amau pawl hi lo, tua pa in Abraham’ khut tung pan seh sawm suah seh khat sang a, thuciamna a ngah mi zong thupha a pia hi. Milian in mi neute thupha a piakna thu nial nading a om kei hi. Tua tham loin, a si thei mite in tu lai takin seh sawm suah seh khat a sang uh hi. Tua lai takin ahih leh, a nungta hi ci-in teci pan’na a ngah mi in seh sawm suah seh khat a ngah hi. Tua ahih ciangin seh sawm suah seh khat a ngah theipa Levi in Abraham tung pan seh sawm suah seh khat a pia hi ci-in gen ding thu a om hi. Bang hang hiam na cih uh leh, Melkhizedek in Abraham a dawn lai takin Levi in ama pupi’ pumpi sungah a om lai hi. Lam khat panin, Levi’ suan siampi pawlte tawh kizomin mite in Thukham a ngah uh ciangin tua mi pawlte hangin kicin’na a om leh, adang siampi in Aaron’ pawl bangin kisam loin Melkhizedek’ pawl hong pian’ nading thu bang hangin om lai ding ahi hiam? Siampi pawl kikheel ahih leh, Thukham zong kikheel loin a om thei kei ding hi. Tua thu genkholhna tawh kipawl mi in biakna tau-ah khatvei beek na a sem ngei lo pawl sung pan a piang hi. Bang hang hiam na cih uh leh, eite Topa in Judah pawl sung pan hong piang hi ci-in a kilang hi. Tua pawl thu-ah siampite thu Moses in kam khat beek a gen kei hi. Tua tham loin, Melkhizedek bangin adang siampipa a piang zo ahih leh, a tungah laigelhna in a maan ahihna a kilang zaw hi. Tua siampi in pum tawh kipawl ngeina thu bang hi loin, a nungta tawntung vangliatna bangin kikoihin a om hi. Bang hang hiam na cih uh leh: “Nang in Melkhizedek’ pawl bangin A tawntung Siampipa na hi hi,” ci-in teci a pang hi. Thukham in bangmah kicingsak zo lo ahih ciangin tanglai thukham in thahatna nei lo a, phattuamna pia zo lo ahih ciangin paihkhiatna a ngah zo hi. Ahih hangin tua sang a phazaw lametna thu hong piangsak hi. Tua lametna tawh eite in Pasian i nai thei hi. Tua mite in kiciamna om loin siampi-za a ngah uh hi. Tuate in si-in a kip tawntung zawh loh man-inah a tampi siampi a suak uh hi. Zeisu ahih leh, a tawntung kip ahih ciangin a kikheel ngei lo siampi-za a ngah hi. Tua ahih ciangin Zeisu hangin Pasian kiangah a naite’ taang a, a thuum dingin Topa in a nungta tawntung ahih ciangin, a tawntungin hong gum thei hi. Tua bang siampi ukpa in siangtho-in, dikin, kihhuaina om loin, mawhneite tawh kikhen khia a, vante sangin a sangzaw munah a tung mi ahih ciangin, eite ading a kilawm hi. Siampi ukpa dangte in, a masa-in amau mawhna uh taang ding ahi zongin, tua nung ciangin midangte mawhna –uh taang ding ahi zongin, nisimin biakna a piak uh bangin tua Topa in biakna a piak ding a kisam kei hi. Bang hang hiam na cih uh leh, ama pumpi tawh mite ading khatvei bek a piak hang ahi hi. Thukham in a khial thei mite siampi-uk za-ah a koih hi. Thukham nungah kiciamna thu piakkholhna thu in, a tawntung kicingin a om Tapa a koih hi. Tu-a-kigensa thute a bulpi in tua bang siampi ukpa i nei a, Amah in vantung vanglianpi tokhom ziat lamah tu-in a om hi. Amah in mite lam hi lo, Pasian lam ahi buk taktak, a siangthona munah biakna na a sem mi ahi hi. Siampi ukpa khempeuh in biakna leh piakna pia dingin a kikoih ahih ciangin hih siampi ukpa in zong biak nading na khatpeuh mah a nei ding hi. Thukham bangin biakna pia ding mite a om uh ahih ciangin tua Topa leitungah a om leh, siampi ahi kei ding hi. Moses in buk lam dingin a kisak ciangin, “Mual tungah nang kong lahsa lim bangin na khempeuh na bawl nading na ciamteh in, ci-in thupiakna a ngah bangin, tua siampite in vantung nate a lim leh liim tawh kipawl na a sem uh hi. Tu-in ahih leh, Zeisu in a phazaw thuciamnate tungah kip-a a kikoih a phazaw thuciam kikhapna ahih mah bangin, tua sang a lianzaw biakna nasepna za a ngah hi. Bang hang hiam na cih uh leh, a masa thuciamna-ah mawhsak nading thu om lo hi leh, a nihna thuciamna om nading thu zon’na a om kei ding hi. A nung ciangin Israel’ innkuanpihte tawh ka thuciamna in, keimah in ka thukhamte, Amaute lungsim sungah ka guang ding hi, a lungtang uhah ka gelh ding hi, amaute Pasian ka hi ding hi, amaute in ka mite ahi ding uh hi. Tuate in, ‘Topa thei un,’ ci-in, amau pawl ciat, u leh nau khat leh khat thu kihilh lo ding uh hi. Bang hang hiam na cih uh leh, a neubel akipan a golbel dongin amaute khempeuh in kei hong thei ding uh hi. Bang hang hiam na cih uh leh, keimah in amaute mawhnate ka thuak ding hi. Amau mawhnate ka ciamteh kei ding hi, ci-in Topa in thu a pia hi,” a ci hi. ‘Thuciam thak’ ci-a thu a piak ciangin, thuciamna masa a luisak hi. A kiam a, a luisa in a man’than nading a nai zo hi. Lam khat panin, thuciamna masa in biakna ngeina ahi zongin, hih leitung tawh kipawl siangtho mun ahi zongin a nei hi. Bang hang hiam na cih uh leh, puanbuk khat a kibawl hi. A masa dei sungah meivakna, sabuai leh Pasian mai-ah a kikoih khomunte a om uh hi. Hih mun in Siangtho Mun a kici hi. A nihna puan dalna sungah Siangtho Bel Mun kici dei khat a om hi. Tua dei sungah paknamtui halna, kham tawh a kizut thuciamna singkuangte a om uh hi. Tua singkuang sungah mana koihna kham beel tawh, a paak a paak Aaron’ ciangkhut tawh, thuciamna kigelhna suangpeekte a om uh hi. Tua singkuang tungah vangliatna tawh kipawl vantungmi milimte in mawhphelna tokhom khuhin a om uh hi. Tua nate tu-in ka gen siang khin zo kei uh hi. Tua ahih ciangin hih na khempeuh kibawla a om ciangin, siampite in biakna bawl dingin buk masa bel ah a tum niloh uh hi. A nihna dei sungah siampi ukpa in ama ading ahi zongin, midangte ading ahi zongin, biakna ganhing sisan paipihin, kum khatin, khatvei bek a tum hi. A masa dei a om lai tengin Siangtho Bel Munah paina lampi a kilang nai kei hi ci-in Kha Siangtho in hih thu tawh a lak hi. Tua dei in biakna leh piaknate tu lai tak hun ading lim ahi hi. Lungsim theihna tawh ngaihsun leng, tua biakna leh piaknate in a bia mite a kicingsak zo lo tham loin, neek ding dawn ding, silsiang nading apawl pawlte tawh, pumpi tawh kipawl ngeinate ahi uh a, a kibawl thak hun a tun’ dongin a kip bek uh hi. Bang hang hiam na cih uh leh, bawng’ si, keel’ si leh bawngnuno’ kangvute in a nin mite tungah a kitheh ciangin amau pum uh a siangtho sak thei ahih uh leh, tua tham loin, mawhna nei loin a tawntung Kha Siangtho tawh amahmah Pasian biakna-a kipia Khazih’ sisan in a nungta Pasian biak nadingin nomau pumpi kisuan’na lungsim uhah a om sihna tawh kipawl gamtatnate tawh kipelhin a siangthosak nadingin a bawl theizaw ding hilo ahi hiam? Tua ahih ciangin thuciamna masa hun lai takin mawhna a tatkhiat nadingin, sihna thuakna om zo ahih ciangin a sap mite in a luah tawntungna tawh kipawl thuciamna ngah nading, tua Topa in thuciamna thak khamna a suak hi. Bang hang hiam na cih uh leh, sih khit ciang a, luah nading lai a kip leh, sih ciamna lai-at mi a sih phot kul ding hi. A sih khit ciangin sih ciamna lai a kip ding hi. Bang hang hiam na cih uh leh, sih ciamna lai-atpa a nuntak lai takin sih ciamna lai in a kip kei hi. Tua ahih ciangin thuciamna masa in si tawh loin a kiciam kei hi. Bang hang hiam na cih uh leh, Thukham khempeuh Moses in mi khempeuh kiangah a hilh khit ciangin tui tawh kihel bawngno’ si, keel’ si, a san tuumul leh pumpeeng ngeekte la-in Lai Siangtho ahi zongin, mi khempeuh tungah ahi zongin a theh a, “Hih si in note kiangah Pasian hong piak thukham thuciamna si ahi hi,” a ci hi. Biakna buk leh, a biakna nate zong tua mah bangin si tawh a theh hi. Thukham thu bangin na khempeuh sisan tawh kisiangthosak hi cih ding ahi hi. Sisan kibua loin mawhna maisakna a om kei hi. Tua ahih ciangin vantungah a om nate limte in tuate tawh a siangthosak hi. Ahih hangin vantung nate ahih uh leh, a phazawte tawh a siangthosak hi. Tua mah bangin a siangthona mun taktak lim ahi, mi khut tawh kibawl a siangtho mun sungah Khazih tum lo hi. eite taang dingin tu-in Pasian mai-ah a pumpi a lah nadingin vantungah a tum hi. Tua tham loin, siampi ukpa in Siangthona Mun sungah ama aa ahi lo sisan tawh kum simin a tum bang hi loin, Khazih in a pum tawh tam veipi bia kikkik ahi kei hi. Tua banga bia hi leh, lei piancil akipan tam veipi sihna a thuak zo ta ding hi. Tu-in ahih leh, hun tawpna-ah khatvei bek a pumpi paai-in biakna tawh mawhna a paai siang dingin a kilang zo hi. Mite in khatvei bek si-in tua nung ciangin thukhenna a thuak uh hi; tua mah bangin Khazih in zong mi tampi mawhna puakhia dingin khatvei bek biakna sihna a thuak khit ciangin, amah a lamente gum dingin mawhna tawh kipawl loin, nih veina a hong a paikik ding hi. Lam khat panin, Thukham in a nung cianga hong piang ding thuhoihte’ lim taktak hi loin, a liim bek hong lak ahih ciangin kum simin a kipia biaknate tawh a nai mite a kicingsak zo kei hi. Ahih kei leh, a bia mite in khatvei bekin a sian’ tho khit uh ciang lungsim kisuan’na om nawnlo ding ahih manin biak piakna piak kikkik ding kisam nawnlo ding hilo ahi hiam? Tu-in ahih leh, hih biakna pia-in, mawhnate kum simin kingaihsunin a om hi. Bang hang hiam na cih uh leh, bawngtal’ si leh keel’ si in mawhna paaikhia zo lo uh hi. Tua ahih ciangin Khazih in leitungah hong pai ciangin: “Pasian aw, gangawh biakna leh piakna na deih kei hi, keimah ading pumpi khat na bawlkhol zo hi. Mawhna maisak nading pumpi mei tawh kihal biakna leh, piaknate hangin na lungkim kei hi. Tua lai takin keimah in, Lai Siangtho sungah keimah ngaihsunin a kigelh mah bangin, ‘Na deihna bangin sem dingin hong pai ka hi hi, Pasian aw,’ a ci hi. Thukham bang bawlnate pan Khazih in, “Biaknate, piaknate, pumpi mei tawh kihal biaknate, mawh maisakna biaknate, nang in na deih kei, na lungkim kei hi,” ci-in a masa-in a cih khit ciangin, khatvei, “Na deihna bang sem dingin ka hong pai hi,” a cihna in a nihna a kipsak nadingin a masa pen a paaikhia hi. Tua deihna tawh, Zeisu Khazih’ pumpi khatvei piakna hangin eite in siangthona i ngah hi. Siampi peuhmah in ni simin na semin, cikmah hunin mawhna a maisak zo lo piaknate pia kikkikin a ding uh hi. Tua Topa ahih leh, mawhna maisak nadingin biakna khat bek a piak khit-a kipan, Pasian’ ziat lamah a tawntungin tu-in, a galte khempeuh a khe ngakna nuai-ah a khiat dong matengin ngakin a om hi. Bang hang hiam na cih uh leh, siangthona a ngah mite, khatvei biakna tawh kicin’ tawntungna a ngahsak hi. Kha Siangtho in zong eite kiangah teci hong pan’na in: “Tua hun khit ciangin amau tawh ka kiciamna un, kei Topa in, “Ka thukhamte amaute lungtang sung uhah ka guan’sak ding hi, Amau lungsim tung uhah ka gelh ding hi,” ci-in tu ma-in thu a piak khit ciangin khatvei: “Amaute mawhnate khialhnate, Lungngai nawn loin ka om ding hi,” a ci hi. Tuate kimaisak leh a nung ciangin mawhna hanga biakna bawl nading thu om nawn lo hi. Pasian’ innpi a uk siampi ukpa om ahih ciangin eite in lungsim kisuan’na om loh nadingin kitheh a, tui siangtho tawh i pumpi i kisil khit ciangin up khialhna om lo, upna kipin dikna tawh a dim lungsim nei-in Pasian kiangah nai ni. Lametna thu tawh kipawl i man’nate sawisak loin lenkip ni. Bang hang hiam na cih uh leh, thuciamna a koihpa in thuman mi ahi hi. Tua tham loin, itna lungsim neih nading ahi zongin, a pha-a gamtat nadingin kihansuah nading ahi zongin, khat leh khat kidomto ni. Mi kimkhatte’ ngeina bangin khat leh khat kikhopna thu pelh loin, khat leh khat kihansuah ni. A Ni hong nai zo ahih thu na thei uh ahih ciangin na hahkat zaw un. Bang hang hiam na cih uh leh, thuman i theih khit ciangin i deihna zui-in i mawh kik leh, a nung ciangin mawh maisak nading biakna a om kei ding hi; daantatna thuak ding cih kihtakhuai a piang ding thu leh thu nial mite a siasak ding hehna meikuang bek a om lai hi. Moses’ Thukham a nial mi in teci nih bang, thum bang a om leh, hehpihna ngah loin a si hi. Tua bang tham loin, Pasian’ Tapa, a khe tawh sik a, amah a siangthosak thuciamna si a siangtho lo ci-in ngaihsun a, thupha a pia Kha Siangtho a simmawh mi in bang zah a lianzaw daantatna a thuak ding na um uh hiam? “Phulakna in keima thu ahi hi, A mawhna tawh kituakin ka thukkik ding hi,” cih leh, “Pasian in ama mite thu a khen ding hi,” cih thu a piapa i thei hi. A nungta Pasian khut sungah puk nading thu in a lauhuai taktak thu ahi hi. Tua lai-in note in khihna a thuak mite na khasiat uh tham loin, neihsa a phazaw a kip tawntung sum a om hi ci-in thei-in na sum na paite uh hong kisuh ciangin na lungdam uh a, na mang uh hi. Tua ahih ciangin phattuamna lian mahmah tawh kizom na lau lohna lungsim uh na paaikhia kei un. Bang hang hiam na cih uh leh, Pasian’ deihna bang na nasep khit uh ciangin ama kamciamna na ngah nadingun thuakzawhna lungsim na kisam uh hi. “Bang hang hiam na cih uh leh, A hong pai dingpa in khawl loin, Tawlno khat khit ciangin a hong tung ding hi. Ka midik in upna tawh a nungta ding hi, a nung kin leh, ka lungsim in Tua mi hangin lungdamna a nei kei hi,” ci-in Pasian in thu a pia hi. Eite i hih leh, kisiatna tung dingin a nungkin mite lakah i om kei hi; gupkhiatna a ngah upna a nei mite lakah i om hi. Upna in lametnate telcianna hi a, a kimu nai lo nate theihtelna ahi hi. Tua upna hangin tanglai mite in teci pan’na a ngah uh hi. A kimu nate in a kilang nate sung pan piang hi loin, leitungte in Pasian’ thupiakna tawh a piang hi ci-in eite in upna tawh i thei hi. Abel in Kain’ biakna sangin a hoihzaw biakna, upna tawh Pasian a bia hi. Tua ahih ciangin dik hi ci-in teci pan’na a ngah hi. Bang hang hiam na cih uh leh, ama piaknate Pasian in a sang hi. Tua ahih ciangin Abel in a si napi-in a upna hangin thu a hilh lai hi. Enok in upna hangin sihna tawh kipelhin a kilato hi. Pasian in amah kilatosak ahih ciangin a kimu nawn kei hi. Amah a kilak toh ma-in Pasian a lungdamsak hi ci-in teci pan’na a ngah hi. Upna loin Pasian kilungdamsak zo lo hi. Bang hang hiam na cih uh leh, Pasian kiang a nai mi-in Pasian a om hi cih ahi zongin, cihtakna tawh amah a zong mite amah in thaman a piapa hi cih ahi zongin a um ding hi. Noah in a muh nai loh thute-ah thupiakkholhna a ngah khit ciangin upna tawh Pasian kihta-in ama innkuanpihte gum dingin teembaw a lam hi. Tua upna hangin amah in leitung mite mawhna thu khenin a upna tawh kipawl dikkisakna a luah hi. Abraham in a luah nading a cih gamah a paikhiat nading Pasian in a sap ciangin amah in koi lamah pai ding cih thei lo napi-in, upna tawh thungai-in a paikhia hi. Ama theih lohna gamah zinte bangin om a, thuciamna tawh a kipawl gamah upna tawh zin mi-in a om hi. Tua a thuciamna a luahpih Isaak leh Jakob tawh bukte sungah teengkhawm uh hi. Bang hang hiam na cih uh leh, a luah ding Pasian’ lamsa, bulpi kip a nei khuapi a lamen hi. Sarah in a teek khit ciangin ta gai theihna thu vangliatna, upna tawh a ngah hi. Bang hang hiam na cih uh leh, thu a ciampa in thumanpa ahi ci-in a um hi. Tua ahih ciangin mi si tawh a kibang dektak, mi khat bek ahi Abraham panin a kisim ciangin aksi zah ahi zongin, tuipi gei-ah a kisim zo lo sehnelte zah ahi zongin tampite a suak uh hi. Tua a kigensa mi khempeuhte in thuciamna tawh kipawl noptuamna ngah kha loin, gamlapi pan galet-in hopihin, amaute leitungah gamdang mi zinte ahih man-unah upna sungah a si uh hi. Tua bang a mang mite in, amau ading gam zongin a om uh ci-in a lak uh hi. Tuate in a paikhiatna gam uh a ngaihsun kik hi le-uh tua gamah ciahkik nading thu a om lai hi.  Ahih hangin amaute in vantung gam ahi, tua sangin a phazaw gam a deih uh hi. Tua ahih ciangin Pasian in amau Pasian a kicihna maizum loin, amau om nading khuapi a bawlkhol hi. Tua bang a piak ciangin Pasian in sihna pan a thosak thei ding hi ci-in a lungkim hi, etkakna lim-in ci leng, sihna panin a tapa a ngahkik ahi hi. Isaak in zong upna tawh a piang ding nate ngaihsunin Jakob leh Esau thupha a pia hi. Jakob in zong a sih ding a naih ciangin upna tawh Josef’ tate nih thupha pia-in, a ciangkhut dawnah kinangin Pasian a bia hi. Josef in a sih hun a naih ciangin upna tawh Israel mipawlte paikhiatna thu lakin, ama guhte tawh kisai thu a vaikhak hi. Moses a suah khit ciangin a meel pha a nu leh pa in mu uh a, upna tawh kumpipa’ thupiakna kihta loin, kha thum tawntung a seel uh hi. Kumpipa’ hehna lau loin upna tawh Izipt gam a taisan hi. Bang hang hiam na cih uh leh, mittang tawh kimu thei lo Pasian a mu zo bangin a lung kip hi. Ta upate a sisakpa in Israel mite’ ta upate a sukgawp loh nadingin upna tawh Paisan Pawi ahi zongin, sisan tawh kithehna ahi zongin a bawl uh hi. Israel mite in upna tawh San Tuipi laizangah lei keu tung tawn bangin a pai uh hi. Tua mite bangin Izipt mite in ahih sawm uh a, tui sungah a tummang uh hi. Jerikho khuapi ni sagih tawntung uum-in a kimkot khit uh ciangin upna tawh a khuapi kulh a cimkhiasak uh hi. Numei gilo Rahab in gam ente zawlin manin a inn tungsak ahih manin thungai lote tawh kisia khawm loin, upna tawh a suakta hi. Tua longal bang ci gen lai ding a om hiam? Gideon, Barak, Samson, Jefthah, David, Samuel akipan kamsangte thu teng gen nading hun kicing zo lo hi. Tua mite in upna tawh gamte a zo uh hi, thuman thu a khen uh hi, thuciamna a ngah uh hi, humpinelkai’ kam a khak uh hi, meikuang a mitsak uh hi, namsau mai-ah a suakta uh hi, thanemna pan a thahat uh hi, galdona-ah a hang uh hi, gamdang galkapte a taisak uh hi. Numeite in sihna pan thokikin amau misite a ngah kik uh hi. Kimkhat in a phazaw thawhkikna a ngah nadingun suahtakna sang loin nakpi satna a thuak uh hi. Kim khatte in kosiatna, satgawpna tham loin, leh-henna, thongkiatnate tawh ze-etna a thuak uh hi. Suang tawh denna, sing-atna tawh at tanna, ze-etna, namsau tawh thahna a thuak uh hi. Nakpi-in zawngkhalin, bawlsiatna thuakin, tuuvun keelvun silhin a kawivak uh hi. Hih leitung in tua mite tawh kilawm lo hi. Amaute in gamlak, mual kuam, leihawm, ken hawm sungah a lal kawikawi, a vak kawikawi uh hi. Tua mite khempeuh in upna tawh teci pan’na a ngah uh hangin kamciamna thu a ngah kei uh hi. Bang hang hiam na cih uh leh, tua mite eite tawh loin, kicin’na a tum loh nadingun Pasian in eite ading a phazaw na a ciamteh hi. Tua ahih ciangin hih zaha tam teci pan’nate in ei hong uum ahih ciangin, eite in van khempeuh ahi zongin, hong bawlsia thei mawhna ahi zongin, paaikhia-in eite upna a piangsakpa a kicingsakpa Zeisu a tel takin enin, i mai-ah a om kitaitehna-ah thakiamsak loin kidem ni. Tua Topa Zeisu in ama mai-ah a koih lungnopna thu hangin zumna ngaihsun loin, singlamteh a thuak khit ciangin Pasian’ tokhom ziat lamah a tu hi. Thakiamna lungkiatna a om loh nadingin mawhna a nei mite kiangah tua zah khamna a thuak Topa ngaihsun un. Note in mawhna khialhna tawh kido-in sisan suah dongin na thuak nai kei uh hi. Tua tham loin: “Ka tapa aw, Topa’ thuhilhna ciamteh loin om kei in, na mawhna hong teldot ciangin lungkia kei in. Bang hang hiam na cih uh leh, Pasian in a itte thu a hilh thei hi, a san’ a tate khempeuh a sat thei hi,” ci-in tate kiangah a cih bangin note hong kigen thuhilhna kam na mangngilh zo uh hi. Note in thu hong hilh nading thuak un. Tate tungah kibawl bangin Pasian in note hong bawl hi. Bang hang hiam na cih uh leh, a pa in a hilh loh ta kua mi ahi hiam? Tate khempeuh in a thuak theih thuhilhna thuak lo na hih uh leh, ta taktak na hi kei ding uh hi, zawlta na hi ding uh hi. Lam khat panin, pumpi tawh kipawl pate’ khut tungah eite in hilhna i thuak ciangin, amau i zahtak hi. Tua tham loin, khalam-a i Pa’ ukna thuakin nungta zaw ding hilo i hi hiam? Bang hang hiam na cih uh leh, tua pate in a kilawm ci-in amaute ut bangin tawlkhat bek hong hilh uh hi. Pasian in a hih leh, ama siangthonate eite in i zop nadingin eite noptuamna ding ngaihsunin hong hilh hi. Thuhilhna i thuak lai takin lungdamna-in kingaihsun loin dah nading bang kisa thei hi. Ahih hangin thulhilhna a thuak mite in a nung ciangin nopsakna ahi dikna gah a ngah uh hi. Tua ahih ciangin thanem-a a om khutte leh tha a nei lo khukte na khauhsak un. A khe zawte in a kilawi taktak loh nading, cidamna a ngah nadingin na paina lampi uh na tangsak un. Mi khempeuh tawh kilemin nopsakna ahi zongin, a siangtho gamtatna ahi zongin na phak matengun delh un. Tua siangtho gamtatna a om kei leh, kuamah in Pasian a mu thei kei ding hi. Note lakah khatpeuh mah in Pasian’ hehpihna thupha ngah loin a om loh nading ahi zongin, a kha kung a zung poin, note hong bawlsia-in mi tampi hong ninsak ding ahi zongin, numei gilo tawh a mawhte a om loh nading ahi zongin, khatvei neek bek tawh ama ta upa-za a zuak Esau bangin Pasian’ thu a simmawh mi a om loh nadingin kikemin kidawm un. Note in na theih uh mah bangin Esau in a nung ciangin a luah nop hangin nialna a ngah hi. Khitui luangin a zon’ hangin a pa’ lung kikheel nading thu a mu kei hi ci-in na thei uh hi. Bang hang hiam na cih uh leh, “Ganhing nangawn in tua mual a sukkhak leh, suang tawh kideeng lum ta hen,” ci-a thukhamna aw mite bil in a thuak zo kei uh hi. Tua bang a kilatna in kihtakhuai mahmah ahih ciangin Moses in, “Keimah in kihta-in ka liing hi,” a ci hi. Note in thu hong piapa’ kam na nial loh nadingun kikem un. Bang hang hiam na cih uh leh, leitungah thu genkholhna hong pia mi’ kam a nial mi in mawhna tawh kipelh lo ahih leh, tua tham loin vantung pan thu hong pia kholpa kiang pan eite in pialkhia lehang, mawhna pan i suakta kei zawtham ding hi. Tua lai takin a thu piakkholhna aw in leitung a liingsak hi. Tu-in ahih leh, “Khatvei keimah in lei tham loin, van nangawn ka liingsak kik ding hi,” cih kamciamna a om hi. “Khatvei,” a cihna kam a khiatna in, a liing lo nate a kip nadingin a liing nate, a pian’sak nate a paaikhia ding hi a cihnopna hi. Tua ahih ciangin eite in a liing zo lo gam ngah i hih ciangin kihtakna zahtakna lungsim tawh Pasian a lungdamsak thei biakna na i sep zawh nadingin hong hehpihna lungsim nei ni. Bang hang hiam na cih leh, i Pasian in a kangtum thei mei ahi hi. Ute naute ki-itna kip ta hen. Zinte do nading na mangngilh kei un. Bang hang hiam na cih uh leh, mi kimkhat in zin a do laitakun vantungmite ahih lam thei loin zin a do kha uh hi. Khau khihna a thuak mi tawh kikhih khawm bangin kingaihsun un: pumpi tawh kipelh lo na hih uh ciangin bawlsiatna a thuakte na ngaihsun un. Mi khempeuh lakah kiteen’na kithupisim ta hen. Pasalte leh zite in khat leh khat a thuman ciat ding uh ahi hi. Bang hang hiam na cih uh leh, numei tawh a mawhte leh mi’ zi tungah a mawhte Pasian in thu a khen ding hi. Sumduh luatna tawh na kipelh un. Na neihsa zah uh sum tawh lungkim un. Bang hang hiam na cih uh leh, “Keimah in nang kong paisan ngei kei ding hi, zong kong nusia ngei kei ding hi,” ci-in Pasian in hong gen zo hi. Tua ahih ciangin: “Topa in kei hong huhpa hi a, ka lau kei ding hi. Mite in kei tungah bang hong cih thei ding ahi uh hiam?” ci-in kimuan’na lungsim tawh i gen thei hi. Pasian’ thu note kiangah hong hilh uh a, note hong uk ngei mite na ngaihsun un. Amaute in bangci gamtatin a si uh teltakin lungngai un la, amau upna lim na zui un. Zeisu Khazih in zanni, tuni, atawntungin kikheel loin a om hi. A tuam dangdang, a lamdangdang thuhilhna thak zui kei un. An nek hang hi lo, thupha hehpihna hangin lungkhauh a, na om uh leh, a pha hi. An nekna bek a ngaihsun mite in na manpha a ngah zo kei uh hi. Buk sungah biakna nasem mite in a nek theih ding ahi lo, biakna tau eite in i nei hi. Bang hang hiam na cih uh leh, siampi ukpa in mawh maisakna ding biakna gan si, a siangtho mun sungah a tumpih khit ciangin, biakna gan pumpi giahbuk pua lamah mei in a hal hi. Tua mah bangin Zeisu in ama sisan tawh mite a siangthosak nadingin khuapi kongkhak pua lamah sihna a thuak hi. Tua ahih ciangin eite in Topa tawh kosiatna thuakin giahbuk pualam ama kiangah nai ni. Bang hang hiam na cih uh leh, eite in hih lai takah a kip ding khuapi i nei kei hi: tunung ciangin a hong piang ding khuapi i zong hi. Tua ahih ciangin tua Topa hangin eite in ama min i man’ muk’ gah ahi, phatna biakna Pasian kiangah a tawntungin pia ni. Thupha bawlna, sum hawmnate na mangngilh kei un. Bang hang hiam na cih uh leh, Pasian in hih bang biaknate ah a lungdam hi. No hong uk mite’ thu ngai un la, amau hong gen bangin gamta un. Bang hang hiam na cih uh leh, amaute in thusitna a thuakkik ding mite bangin note kha uh noptuam nadingin a kem uh hi. Note noptuamna uh a pian’sak theih nadingin dahna tawh hi loin, lungdam nadingin amaute in sittelna a thuak zawh nadingun kikemin om un. Kote ading thu hong ngetsak un. Bang hang na cih uh leh, kote in komau pumpi theihna lungsim a pha nei-in, na khempeuh ah a hoihin gamtat nadingin a deih mi ka hi uh hi ci-in ka lungkim uh hi. Keimah in note kiangah a manlang zaw-a kong paikik theih nadingin, kote ading thu hong ngetsak un ci-in kong hansuah hi. A tawntung kiciamna sisan hangin Tuucing lianpa ahi, i Topa Zeisu sihna pan a thokiksak nopna Pasian in, ama deihna thu Zeisu Khazih hangin eite sungah hong bawlna, note in a deihna na zuih nadingun ahoih na khempeuh ah hong kicingsak ta hen. Tua Topa in a tawntungin minthan’na ngah ta hen. Amen. Ute naute aw, keimah in a tomin gelhin hong zasak ka hih ciangin hansuahna kam na thuak siam un ci-in keimah in note kong thuum hi. I sanggampa Timoti a kikhah khitna thu na thei un. Amah in a sawt loin hong tung leh, keimah in amah tawh hong paikhawmin note kong mu ding uh hi. Note hong uk mite khempeuh leh misiangthote khempeuh na hopih un. Itali mite in note hong hopih uh hi. Note khempeuh tungah hehpihna thupha om ta hen. Amen. Pasian leh Topa Zeisu Khazih’ sila ahi keimah Jeim in mun khempeuh ah kikhen thangin a om, pawl sawm leh pawl nihte kong hopih hi. Ka u ka naute aw, ze-etna apawlpawl na thuak uh ciangin lungdam nading bek a hi ci-in na ciamteh un. Bang hang hiam na cih uh leh, note upna uh hong ze-etnate in thuakzawhna hong khangsak hi ci-in na ciamteh un. Note in a neu kha beek kisam loin na kicin’ nadingun, thuakzawhna lungsim in kicing takin hong bawlpha ta hen. Note lakah khatpeuh peuh in lungpilna a deih leh, kosiatna a nei lo, mi khempeuh a kigen thei lo-a a pia nuam Pasian kiangah thungen ta hen. A nget leh a ngah ding hi. Ahih hangin um khial loin upna tawh ngen ta hen. Bang hang hiam na cih uh leh, upkhialhna a nei mi in huih nunga kilok thei tui kilok tawh kibang hi. Mi kiniamsak sanggamte in a ngah a san’ na uhah kilungdamsak thei ta uh hen. Sumhau sanggam in kiniamsakna a thuakna ah kilungdamsak thei ta hen. Bang hang hiam na cih uh leh, amah in lopa paak bangin mangthang hi. Ni in a satna tawh hong suah ciangin lopa kung in keugaw a, a paak a vul thei a, a kilawmna a meelte zong a mangthang thei hi. Tua mah bangin sumhau mi in ama nate-ah vulin a mangthang ding hi. Ze-etna a thuak zo mi in thupha a ngah ding hi. Bang hang hiam na cih uh leh, ze-etna a thuak zawh khit ciangin Topa in a it mite a ciamna bangin nuntakna kumpi lukhu a ngah ding hi. Mi khat in ze-etna a thuak ciangin, “Pasian in kei hong ze-et hi,” ci-in gen kei hen, Bang hang hiam na cih uh leh, ahoih lo tawh Pasian a kize-et zo kei hi, amah in zong kuamah ahoih lo na tawh a ze-et thei kei hi. Ama lunggulhna in kai a, zolna a thuak ciangin mi khempeuh in ze-etna a thuak hi. Tua nung ciangin lunggulhna in gai-in mawhna a suak hi; mawhna in zong a kicin’ ciangin sihna a suak hi. Ka it ka ute ka naute aw, na kikheem kei un. A pha a kicing hong piak thupha a om khempeuh in khuavakna’ Pa kiang vantung panin hong pai uh hi. Tua pa in kikheel lo tham loin, kihei-in a lim zong a kiasak kei hi. Ama pian’ sakte lakah eite in a gah masa bel i suah nadingin thuman thutak tawh ama deihna bangin eite hong piangsak hi. Ka it ka u ka naute aw, hih thu na thei uh hi. Ahih hangin mi khempeuh in khuazak nading manlang hen, kampau nading ahi zongin, heh nading ahi zongin, manlang kei hen. Bang hang hiam na cih uh leh, mi’ hehna in Pasian’ dikna thu a piangsak kei hi. Tua ahih ciangin a kihhuai na khempeuh leh hazat luatna lungsimte paaikhia-in, na kha uh hong gum thei note’ lung sungah a kituh Pasian’ thu lungnemna tawh na sang un. Note’ pumpi uh kikheemin thungaite bek hi kei un; thu banga gamtate na hi un. Mi khat in thu zui lo-a a ngaih bek leh, tua pa in limlang ah ama maitang a en mi tawh kibang hi. Bang hang hiam na cih uh leh, a mai a et khit ciangin mun dangah pai-in ama meel bang ci bang mi ahi hiam cih a mangngilh pah hi. Suahtakna tawh kizom a kicing thukham lim takin entel a, a zuisuak mi in thu a zak ciangin mangngilh loin zui ahih manin a sepna ah thupha a ngah ding hi. Mi khat in, “Pasian ka bia hi,” ci-in amah a ki-up hangin ama kam a kham kei leh, tua mi in a kikheem suak a, ama biakna in a mawkna ahi hi. I Pa Pasian mai-ah a nin lo, a siangtho biakna in pa nei lo naupangte leh meigong numeite a dah lai takun a en a keem thei a, ama pumpi zong leitung kihhuai nitna tawh kipelh nadingin a kikep theihna ahi hi. Ka u ka naute aw, a minthang Topa ahi i Topa Zeisu Khazih upna thu-ah mi maitang zahtak tuam nei kei un. Ka it ka u ka naute aw, ngai un. Leitung mite mai-ah mizawngte in upna tawh a dim nading ahi zongin, Pasian in a it mite a thuciamna gam a luah nading ahi zongin, tua mite a teel hilo ahi hiam? Note na hih uh leh, mizawngte na thudon kei uh hi. Sum haute in note hong bawlsia uh a, thukhenna tokhom mai-ah hong kai uh hilo ahi hiam? Note hong kiphuahna min ngaih amaute in a gensia uh hilo ahi hiam? “Na pumpi na it bangin na lawmte na it in,” a kici Thukham na zuih uh leh, a pha in na gamta zo uh hi. Ahih hangin mi maitang zahtak tuam na neih uh leh, gitlohna a bawl mi na hi uh hi; thungai lo mi cihna Thukham in note tungah thu hong khen ding hi. Bang hang hiam na cih uh leh, Thukham khempeuh a zuih hangin khatpeuh peuh a khial mi in, Thukham khempeuh a khial zo hi. Bang hang hiam na cih uh leh, “Mi’ zi tungah na mawh kei in,” a cipa in, “Mi na that kei in,” ci-in a kham lai hi. Tua ahih ciangin nang in mi zi tungah na mawh loh hangin mi na thah leh, Thukham a khial mi na hi hi. Suahtakna thu mah zui-in thukhenna a thuak ding mi bangin thu genin gamta un. Bang hang hiam na cih uh leh, hehpihna a nei lo mi in, hehpihna ngah loin thukhenna a thuak ding hi. Hehpihna in thukhenna zoin a kisathei thei hi. Ka u ka naute aw, mi khat in, “Upna ka nei hi,” a cih hangin ahoih a gamtat kei leh, bang phattuamna a om hiam? Tua upna in tua mi gumkhia zo ding ahi hiam? Unau numei leh pasal khat peuhmah in puan nei loin omin ni sim an nek ding a neih loh ciangin, note lakah mi khat in, “Nuam takin pai in la, na khua lum-in, gil vah in,” a cih hangin, tua mi pumpi tawh a kituak na zat ding a piak kei leh, bang phattuamna a om hiam? Tua mah bangin gamtatna hoih om lo, upna in khat bek om a hih ciangin si-in a om hi. Ahi hi, khat in, “Nangmah in upna na nei hi. Kei ka hih leh, gamtatna hoih ka nei hi: hong ci ding hi. Gamtatna hoih om lo na upna hong lak in. Keimah in ka hih leh, ka gamtatna tawh ka upna ka hong lak ding hi. Pasian khat bek a om ci-in na um hi. A pha hi. Dawi gilote in zong umin, kihta-in a liing uh hi. Kiphasakpa aw, gamtatna hoih om loin upna in phattuamna om lo hi cih theinuam na hi hiam? I pa Abraham in ama tapa Isaak pen biakna tau tungah a piak ciangin a gamtatna hoih hangin dikkisakna ngah hilo ahi hiam? Upna in ama gamtatna tawh bawlpha khawm a, gamtatna hoih hangin a upna a kicing hi ci-in na thei ta in. ‘Abraham in Pasian um a, ama upna in amah adingin dikna-in kiciamteh hi,’ ci-in a genna a kicing tham loin, ‘Pasian’ lawmpa,’ hi,’ cihna zong a ngah hi. Mi khat in upna bek tawh dikkisakna a ngah ahi kei hi, gamtatna tawh a ngah hi ci-in na thei uh hi. Tua mah bangin numei gilo Rahab in sawltakte a tun’sak khit ciangin lam tuam khatah a ciahsak maninah gamtatna hoih hangin dikkisakna ngah hilo a hi hiam? Kha tawh a om lo pumpi in a si ahih mah bangin gamtatna hoih om lo upna in a si hi. Ka u ka naute aw, Sia a sem kote in a khauhzaw thukhenna thuak ding ka hih manun note a tampi Sia suah ding na sawm kei un. Bang hang hiam na cih uh leh eite in thudotna i thuak zaw ding hi ci-in na thei ta un. Eite khempeuh in na tampi-ah i khial thei hi. Mi khat in kampau a khialh kei leh, tua mi in a kicing mi hi a, ama pumpi khempeuh a keem thei mi zong ahi hi. Sakol uk nading kamkaih bulh leeng, a pumpi khempeuh i kiheisak thei hi. Ngai un, teembawte a lian mahmah uh a, huihpi in nakpi-in a mut hangin heina lenpa in a deih bangin, a neu mahmah heina tawh a hei thei hi. Tua mah bangin leii in na neu ahih hangin alianpi nate a kisaktheihpih thei hi. Bang zah alian sing tampi a neu mahmah mei tawh a kikangsak thei hi cih no na en un. Leii in mei a hi hi. A gilo na, leitung na ahi eite’ pumpi sungah om a, pumpi khempeuh ninsak a, pumpi hih theihna khempeuh zong hal a, amahmah in hel khua ah halna a thuak hi. Ganhing apawlpawl khempeuh, vasa apawl apawl khempeuh leh tuipi sungah a om apawl apawl khempeuh mite in a zualsak zo uh hi. Leii ahih leh, kuamah in a zozo kei hi. Leii in a ommawk thei lo, a gilo ahi, sih theihna a piangsak gu khal tawh a dim hi. Tua leii tawh eite in i Topa leh i Pa i phat thei hi, Pasian’ lim banga kibawl mite, leii tawh i samsia thei hi. Kam khat bek panin phatna leh samsiatna a paikhia thei mawkmawk hi. Ka u ka naute aw, tua banga hih ding kilawm lo hi. Ciktui in a vang khat bek sung pan tuilim leh tuikha phul khia khawm thei ahi hiam? Ka u ka naute aw, theikung in oliv gah a gah thei hiam? Leengkung in theigah a gah thei hiam? Tua mah bangin tui al in tui lim a piangsak thei kei hi. Note lakah kua in pilna leh theihna a nei hiam? Tua mi in gamtatna hoihte hihin, pilna, lungnemna tawh ama gamtatnate lak ta hen. Ahih hangin note lungsim sung uhah hazatna leh kidemna siatna a om leh, thuman thutak tawh kilem loin kisathei kei un. Tua bang pilna in vantung pan hong tung pilna ahi kei hi; leitung pilna, pumpi pilna, dawi gilo pilna ahi hi. Bang hang hiam na cih uh leh, hazatna leh kidem nopna a om leh, gamlumna leh a kihhuai gilo bawlna apawl apawl a piangsak uh hi. Vantung pan hong tung pilna in a masa belin a siangtho hi. A nung ciangin kilemna ahi hi, lungnemna ahi hi, zol baihna ahi hi, hehpihna leh gah pha tawh a dim hi, maitang zahtakna leh simtatna a om kei hi. Kilemna a piangsak thei mite ading dikna thu khaici kilemna tawh kivawhin a om hi. Note lakah galdona leh kitotna koi pan hong piang ahi hiam? Note’ pumpi sung uhah a om nate lakah gal a bawl thei na deihgawhnate uh pan piang hilo ahi hiam? Note in na deihgawh uh hangin na ngah kei uh hi, na that uh a, na deih uh hangin na ngah kei uh hi, na kitawng uh a, na kido uh hi. Thu ngen lo na hih ciangun na ngah kei uh hi. Thu na nget uh hangin na deihgawh nopsakna hoih lote na ngah nadingun ngen khial na hih ciangun na ngah kei uh hi. Apangtatte aw, leitung tawh kipawlna in Pasian tawh kilem lohna ahih lam thei lo na hi uh hiam? Tua ahih leh, leitung tawh a kipawl mi peuhmah in Pasian’ gal a suak hi. Lai Siangtho’ thu in: “Eite sunga teeng Kha Siangtho in eite hong aam mahmah hi,” a cihna in a mawkna ahi ci-in na um uh hiam? Topa in thupha hehpihna a tamzaw hong pia hi. Tua ahih ciangin Lai Siangtho sungah a gen-inah, “A kisatheite Pasian in kham a, ahih hangin lung kiniamkhiat mite thupha hehpihna a pia hi,” ci-in a gen hi. Tua ahih ciangin Pasian’ ukna na mang un. Dawimangpa na kham un; na kham uh leh, note kiang pan a taikhia ding hi. Pasian kiangah nai un. Tua bang na hih uh leh, nomau kiangah a hong nai ding hi. Mawhneite aw, na khut uh siangthosak un. Lungka mite aw, na lungsim uh na siangthosak un. Lunggimna thuakin, thuumin, kapin, om un. Note’ nuihna pen dahna suahsak un. Note’ lungdamna uh zong dahna suaksak un. Topa mai-ah na kiniamkhiat un. Tua bang na hih uh leh, amah in note hong pahtawi ding hi. Ute naute aw, khat leh khat na kikosia kei un. A u a nau a kosia mi ahi zongin, a u a nau thukhen mi ahi zongin Pasian’ Thukham a kosia hi; Thukham tungah thu a khen hi. Pasian’ Thukham tungah thu na khen uh leh, Pasian’ thu zui na hi kei uh hi; Thu a khen na hi uh hi. Thukham a pia mi leh thukhen mipa khat bek a om hi. Tua pa in gup ding ahi zongin, siatsak ding ahi zongin a hih thei hi. Na lawmte tungah thu a khen nang in kua mi na hi hiam? “Tu-ni ahi zongin, zingciang ahi zongin hih bang khuapi sungah pai-in kum khat tawntung omin sumbawlin, a meet ngah nading ka bawl ding uh hi,” a ci mite aw, ngai un. Zingciangin bang thu a piang ding na thei kei uh hi. Note’ nuntakna un bang tawh a kibang hiam? Note in tawlkhat a kilat khit ciangin a mangthang thei tuikhu na hi uh hi. “Pasian in hong awi leh, eite in nungta-in hih bang ahi zongin, tua bang ahi zongin i hih ding hi,” ci-in na gen dingun a kilawm hi. Tu-in ahih leh, note na kiphatsakna uhah na kisathei uh hi. Tua bang kisaktheihna ahoih kei hi. Tua ahih ciangin gamtatna hoih thei napi-in a gamta lo mi tungah mawhna a om hi. Sum haute aw, tu-in hong pai un; note tungah hong tung ding gimna tawlna hangin kiko-in kap un. Na sum na paaite uh muat gawpin a om hi. Na puante uh zong nget in a ne khin zo hi. Na kham na ngunte uh zong a keekseu khin hi. Tuate keekseuna in note lang khatah teci hi a, mei bangin note’ sa hong ne ding uh hi. Note in a nunung bel ni hi napi-in sum na khol uh hi. Ngai un, note’ lo lai-ah an atte na kheem uh a, a thaman uh pia loin na om uh a hih ciangin tua thaman in kiko-in a om hi. Tua lo-ah a at mite a kikona aw un zong vantungmite’ Topa’ bil sungah a tum zo hi. Note in leitungah lungdam nopsakna ngahin na om zo uh hi. Kithah ni adingin na lungsim uh na vaak thau zo uh hi. Midik tungah thu na khen uh a, na that zo uh hi. Amah in no hong thuk kei hi. Tua ahih ciangin ute naute aw, Topa hong pai matengin thuakin ngak un. Lokho mi in guahzu masa leh guahzu nunung a zuk matengin a manpha leitungah gahte thuum loin ngakin a lamen hi. Tua mah bangin note in zong thuakin ngak un. Na lungsim uh na kipsak un. Bang hang hiam na cih uh leh, Topa hong pai ding a nai zo hi. Ute naute aw, thukhenna tawh na kipelh nadingun khat leh na kiphunsan kei un. En un, kongkhak kiangah Thukhenpa ding-in a om hi. Ute naute aw, gimna tawlna-ah Topa’ min tawh thu a hilh kamsangte’ lim na ciamteh un. En un, a thuak zo mite in thupha a ngah mite a hi uh ci-in i gen hi. Job’ thuakna thu na za zo uh hi. Pasian in ama thu a zawh khit ciangin a hehpih theih mahmahna thu zong na thei zo uh hi. Ka u ka naute aw, thu khempeuh tungah kiciamna pha takin na tang un; vantung tawh na kiciam kei un, leitung tawh na kiciam kei un. Bangmah dang tawh na kiciam kei un. Thukhenna tawh na kipelh theih nadingun ah, “Ahi hi,” na cih uh ahi mah hi ta hen; “Ahi kei hi,” na cih uh a hi lo mah hi ta hen. Note lakah mi khat peuhmah gimna thuak a om hiam? Amah in thungen ta hen. Khat peuhmah a lungdam leh, la sa ta hen. Note lakah cina a om leh, pawlpi upate sam hen. Tuate in Topa’ min suangin mi cina sathau tawh zutin ama tungah thungen ta uh hen. Tua bang na bawl uh leh, upna thungetna in cinate a noptuamsak ding a, Topa in amah a thosak ding hi. Amah in mawhna ahih khak leh zong, tua mawhna a maisak ding hi. Tua ahih ciangin khat leh khat na mawhna uh kipulaakin, na cidam nadingun khat leh khat ading thu na kingetsak un. Midik’ thungetna in nakpi vanglianin muibun mahmah hi. Elijah in eite bangin leitung mi bek a hi napi-in guah zuk loh nading nakpi-in thu a nget ciangin kumthum leh khaguk tawntung leitungah guah a zu kei hi. Khatvei thu a nget kik ciangin vantung in guah zusakin, leitung in zong a gah a gah hi. Ka u ka naute aw, note lakah mi khatpeuh mah in thuman thutak lam pan pial a, a khialh ciangin, midang khat in tua mi a kiheisak kik leh, mawhnei mi’ lam pialna pan kihei kiksak a, kha khat sihna pan gumkhia a, mawhna tampi a khuhsak mi ahi ding hi ci-in thei ta hen. Zeisu Khazih’ sawltak keimah Piter in thungaihna leh Zeisu Khazih’ sisan tawh thehna a ngah nading Kha Siangtho in a sian’thosak a, Pa Pasian’ theih kholh bangin a teelkhiat mite ahi, Pontas gam, Galati gam, Kappadokia gam, Asia gam, Bithunia gam leitung mun khempeuh ah kikhen thangin lal-a om mite kiangah ka hong zasak hi. Hehpihna thupha leh nopna in note tungah hong khang semsem ta hen. Tua luahna in a nunung bel hun ciangin hong kilat nadingin a kibawlkholsa-a om gupkhiatna i ngah nadingin i upmanin Pasian’ vangliatna in hong kipsak note ading, vantungah kikhol-a a om luahna ahi hi. Tua gupkhiatna thu kamsangte in a tel takin dongin, zongin, note tungah a hong piak ding thupha hehpihna a hilhkhol uh a, Khazih’ thuak gimnate ahi zongin, tua gimna a thuak khit ciangin a kilang ding minthan’na ahi zongin, amaute sungah a om Khazih’ Kha Siangtho in teci a pan’ kholh ciangin a bang ci, a bang hun a cihnopna ci-in a zong uh hi. Amaute’ thuhilh nasepnate in amaute ading hi lo, note ading ahi ci-in amaute kiangah a kilang hi. Vantung pan hong sawl Kha Siangtho tawh note kiangah Lungdamna Thu hong hilh mite in tua nate note kiangah tu-in hong hilh uh hi. Tua nate vantungmite in zong a en nuam uh hi. Tua ahih ciangin lungsim kawnggak gakin om un la, khuaval zulhtat loin Zeisu Khazih a kilat ciangin note kiangah hong tung ding hehpihna thupha lamen khin takpi-in om un. Note in siamna na neih loh lai takun deihgawhna thu tu-in zui loin, thu a mangthei naupangte bangin piang un la, a hong sampa a siangtho mah bangin na hihna khempeuh uh na siangthosak un. Bang hang hiam na cih leh, “Keimah ka siangtho ahih ciangin note in zong na siangtho ta un,” ci-in Lai Siangtho sungah kigelh hi. Mi maitang zahtak loin, mi khempeuh ahihna bang thu a khenpa kiangah note in Pa bangin ngaihsunin thu na nget uh leh, leitungah lal-a na om lai tengun launa lungsim tawh na gamta un. Na pute na pate’ ngeina uh ahi mawkna gamtatna pan kham leh ngun-a kipan a kisia thei sum tawh note hong tankhia ahi kei hi; hoih lohna om lo, a nin baang lo tuuno tawh kibang ahi Khazih’ manpha bel sisan tawh hong tankhia hi ci-in na thei un. Tua Khazih in leitung a kipian’sak ma-in a kiciamteh khol hangin, amah hangin Pasian a um note ading a nunung bel hun ciangin hong kilang hi. Note upna leh na lametna uh, Pasian paulamin a kip theih nadingin, Pasian in tua Topa sihna pan tho kiksakin minthan’na a pia hi. Bang hang hiam na cih uh leh: “Mi pawl khempeuh in lopa kung tawh kibang uh hi, Amaute’ minthan’na khempeuh zong lopa pak tawh kibang hi. Lopa kung a keu thei a, a pak zong a pulh thei hi; Pasian’ thu ahih leh, a kip tawntung ding hi.” Tua thu in note kiangah hong kihilh Lungdamna Thu ahi hi. Mite in a nilkhiat hangin Pasian’ teel nuntakna suangpi ahi, tua Topa kiangah pai-in, note in zong a nungta suangte bangin a kilam, Kha inn na hi uh hi; Zeisu Khazih hangin Pasian san’ theih ding akilawm biakna a pia thei, a siangtho siampi pawl-in zong a piang na hi uh hi. Bang hang hiam na cih uh leh: “A kiteel a manpha inn kiu khuam bul suangpi, Zion mual tungah ka koih hi. Tua suangpi a beel mi in, Zumna a thuak kei ding hi,” ci-in Lai Siangtho sungah a kigen hi. Tua ahih ciangin a um note adingin tua suangpi in a manpha mahmah hi. A um lote ading ahih leh: “Inn lamte’n a nilkhiat suang in, Anung ciangin inn kiu suang a piang hi,” cih ahi zongin, “A puksak nading suangpi, a khialhsak nading suangpi zong ahi hi,” ci-in a kigelh zo hi. Bang hang hiam na cih uh leh, amaute in ngai loin, Pasian’ thu suikha-in a puk uh hi. Tua thu tawh a kituak nadingun tua mite a kikoih uh hi. Note na hih uh leh, khuamial sung pan a lamdang khuavak sungah a hong sampa’ vanglian hehpihna na lahkhiat nadingun, a hong teel mi pawl, man’na nuam a nei siampi pawl, mi siangtho pawl, Pasian in a uk, a neih mi pawlte na hi uh hi. Note in nidang lai-inah a mi pawlte na hih loh uh hangin tu-in Pasian’ mi pawlte na hi uh hi. Nidang lai-inah hehpihna na ngah loh uh hangin tu-in na ngah zo uh hi. Ka itte aw, kha tawh a kido thei pumpi tawh kipawl deihgawhnate khempeuh na tan’ nadingun, khualzinte, mi peemte bang ahi note ka hong thuum hi. Gentailte in gitlohna a bawl mite ci-in note hong kosiat uh hangin Pasian in hong en a, thu a khen ni ciangin na gamtatna uh a pha amaute in a muh uh ciangin Pasian’ min a phat nadingun, amaute mai-ah a kilawm a kituakin na gamta un. Bang hang hiam na cih uh leh, note in a pha na gamtat uh leh, mi haite a lungpil lohna kam na thukkik theih nadingun Pasian in tua bangin a deih hi. To neilo na hih uh hangin to nei lo na hihna uh tawh gitlohna a seel mite bangin na gamta kei un; Pasian’ sila bangin na gamta un. Mikhempeuh zahtak un. Ute naute na it un. Pasian na kihta un. Kumpipa na zahtak un. Silate aw, kihtakna tawh na tote uh ukna na mang un. Na tote un mi gi a, lungnemna hoih nei uh ahi zongin, lungkhauh nei uh ahi zongin na mang un. Mi khat in ahi lo bawlsiatna a thuak ciangin Pasian maitang ngaihsunin a thuak zawh leh, thupha a ngah ding hi. Mawhna na bawl manunah daan na thuak uh ciangin lungnemin na thuak uh leh, bang phattuamna a om hiam? A pha na bawl uh a, gimna na thuak uh ciangin lungnemin na thuak uh leh, Pasian mai-ah phatna na ngah ding uh hi. Bang hang hiam na cih uh leh, tua bang deihna in note hong sam zo hi. Khazih in zong note ading gimna thuak a, ama khekhap na zuih nadingun a lim a koih zo hi. Amah in mawhna ahih kei hi, a kam panin zong thu zuau a kimu kei hi. Kosiatna a thuak lai takin a kosia kik kei hi, gimna a thuak lai takin lau nadingin tawngkik loin, thuman a khenpa’ khut sungah ama pumpi a pia hi. Eite in mawhna lamah a si i hih khit ciangin dikna lamah i nuntak nadingin, eite mawhnate amahmah in singkhuam tungah ama pumpi-in a thuak hi; ama liamnate hangin damna i ngah zo hi. Nidang lai-inah note in tuute bangin lam na khialh uh hangin tu-in ahih leh, note kha uh hong Ukpa leh Tuucingpa kiangah na tungkik zo uh hi. Numeite kizepna pan samphekna, kham leh suangmanpha leh puansilhna ahi pualam kizemsak loin, Pasian mai-ah a manpha, lungnemna lungsim, a kisia thei lo kizepna ahi, a kimu thei lo lungsim sung kizepna hi ta hen. Bang hang hiam na cih uh leh, Pasian lamenin a om numei siangthote in zong tang lai-in tua bangin a kizeem uh hi. Sarah in Abraham, “topa,” ci-in a thu a man’ mah bangin, a pasalte’ ukna uh a mang uh hi. Note in zong a pha-in na gamtat uh a, launa na neih kei uh leh, Sarah’ tanute na suak ding uh hi. Tua mah bangin pasalte aw, na thungetna uh nialna a om loh nadingin, nuntakna thupha hehpihna tawh kizomin a luahkhawm mite bangin, lungpilna leh thukhualna nei-in, na zite uh tawh omkhawmin, a hat lo zaw a panpih bangin kingaihsunin, na zite uh dawmin na hehpih un. A tawpkhakna kam in, note khempeuh lungsim kikhatin om un, hehpihna lungsim nei un. Unau bangin na ki-it un, na kidahpih un, lungniamkhiatna na nei un. Kitawng thuk kei un, kikosia kik kei un. Thupha na kipia un. Bang hang hiam na cih uh leh, note in thupha na luah nadingun hong sapsa mite na hi uh hi. Bang hang hiam na cih uh leh: “Nuntakna-ah nuamsa a, ni hoih a nuam a mu nuam mi in, a leii in phatlohna a bawl loh nadingin kham hen. A muk in zuauthu a gen loh nadingin kham hen: Gitlohna peelin, gitna bawl hen: Mi tawh kilem nading zongin, a phak dongin delh hen. Bang hang hiam na cih uh leh, Topa’ mit in mi dikte a en hi, a bil in zong amau thungetna a ngai hi. Mawhna ahihte ahih uh leh, Topa in a nungngat hi.” Note in thupha lamah lungsim a nei mi na hih uh leh, kua in note hong bawlsia ding hiam? Thuman thutak hangin gimna na thuak uh leh, thupha na ngah ding uh hi. Amaute’ tawn’na na lau kei un, na lungmang kei un. Na lungsim sung uhah Khazih in Topa ahi ci-in zahtakna nei un. Note’ lametna thu hong dong mi khempeuh kiangah lungnemna tawh, thusimna lungsim tawh na genkik theih nadingun, a kigingsa-in om tawntung un. Khazih-ah note gamtat hoih uh a simmawhte in hong kosiat ciangin, note pumpi uh a maizum loh nadingun note lungsim kisuan’na om lo, siangtho-in na om un. Pasian’ deihna a om leh, phatna na bawl manun na thuakna un, gitlohna na bawl man uh a, thuakna sangin a hoih zaw hi. Bang hang hiam na cih uh leh, Khazih in a pum tawh sihna thuakin, kha tawh nuntakna ngah a, eite Pasian kiangah hong khak nadingin a mi dik mi in, mi diklote tangding mawhna hangin khat vei bek gimna a thuak hi. Tua kha tawh Khazih pai a, thong sungah a kikhum khate kiangah thu a hilh hi. Tua khate in nidang lai-inah Noah a khan’ lai-in tawmkhat ahi, mi giatte tui tawh a gup nading teembaw a bawl lai takun, Pasian in thuakin a ngak lai takin, thu a ngai lo khate ahi uh hi. Tu-in baptaizna ahi tua tui in lim bangin, Zeisu Khazih’ thawhkikna hangin note hong gum hi. Tua note a hong gum baptaizna ka cih ciangin pumpi nin a kihhuaina sawp siang a cihnopna hi lo hi; lungsim kisuan’ lohna siangtho tawh Pasian mai-ah a mang ka cihnopna hi. Tua Topa vantungah kahto a, Pasian’ ziat lamah a tu hi. Vantungmite akipan, a ukte leh vangliatnate in ama nuai-ah kikoihin a om hi. Tua bangin Khazih in ama pumpi-in gimna thuak ahih ciangin, note in zong a nung ciangin mite deihna bang zui loin, Pasian’ deihna bang zui-in, na pumpi uh a nuntakna a om lai hun a bei dongin, tua bang lungsim nei-in om un. Bang hang hiam na cih uh leh, gimna a thuak mi in mawhna tawh a kikhen hi. Gentailte’ deihna zui-in lunggulhna a nin deihgawhna, leenggahzu khamna, pawikhamna, tam dawn luatna, a kihhuai milim biakna-ah om theih nading hunte a kicing ta hi. Tua hihnate-ah note in amaute tawh kipawlin noptatna-ah kihhuaina na bawl lohna uh amaute in lamdangsa-in hong ko thei uh hi. Tua mite in a nungta mite leh a si mite tungah thukhen dingin a om kholpa mai-ah thusuahna a thuak ding uh hi. Tua hanginah a nungta mite in a thuak uh bangin pumpi tawh thukhenna a thuak uh hangin Pasian’ deihna tawh kituak kha tawh a nuntak theih nadingun mi site kiangah Lungdamna Thu a kihilh zo hi. Na khempeuh a beina hong nai zo hi. Tua ahih ciangin pha takpi kikeemin pil un, thungenin ngak un. Hihna khempeuh tham loin, note in khat leh khat nakpi-in na ki-it un. Bang hang hiam na cih uh leh, ki-itna in mawhna tampi a seel hi. Phun loin khat leh khat zin na kido un. Note in hehpihna letsong na ngah ciat uh mah bangin Pasian’ hehpihna thupha atuamtuam a keem mi phate bangin, khat leh khat na kihawm un. Pasian in na khempeuhah Topa Zeisu hangin phatna a ngah theih nadingin, mi khatpeuh in thu a hilh leh, Pasian’ thupiak bangin hilh ta hen; mi khatpeuh in na a sep leh, Pasian piak tha bangin sem ta hen. Tua Pasian in a tawntungin minthan’na leh vangliatna nei ta hen. Amen. Ka itte aw, note hong ze-et nadingin na thuak uh mei tawh kisit, bawlsiatna in note tungah lamdangsak huaina ahi ci-in ngaihsun kei un, na lungmang kei un. Note in Khazih’ gimna a zom na hih uh ciangin ama minthan’na hong kilat ciangin lungdam mahmahna tawh na nuam nadingun, tu-in zong nuam un. Khazih’ min hangin kosiatna na thuak uh leh, thupha na ngah ding uh hi. Bang hang hiam na cih uh leh, minthan’na tawh kipawl kha ahi Pasian’ Kha Siangtho in note tungah a om hi. Note lakah kuamah in mi that mi bang ahi zongin, mi sumgu mi bang ahi zongin, a gilo hih bang ahi zongin, midangte’ thusia-a kihel mi bang ahi zongin thuak kei hen. Ahih hangin Christian ahihna hangin gimna a thuak mi khat a om leh, zum kei hen; ahih hangin tua min puakna hangin Pasian’ min phat ta hen. Bang hang hiam na cih uh leh, Pasian’ innkuante a masa belin thukhen nading hun a tung zo hi. Eite a masa-in thu hong khen leh, Pasian’ Lungdamna Thu a mang lo mite bang suak ding ahi hiam? “Mi dikte in gupna ngah nading haksa ahih leh, Pasian a nei lo, mawhna a nei mite in bang suak ding ahi uh hiam?” Tua ahih ciangin Pasian’ deihna bangin gimna a thuak mite in, a pha a gamtatna uh zomin, thuman ahi amaute a Bawlpa’ khut sungah amau kha uh pia ta uh hen. Tua ahih ciangin upa ahi tham loin, Khazih’ gimna thuakna a mu teci hi a, a kilang ding vangliatna a zom ding keimah in note lakah a om upate kong hansuah hi. Note lakah a om Pasian’ tuu honte cin’ nading thu panin, zawhthawhna tawh cing loin, a siangtho lo sum hauh nading hi loin, hehpihna lungsim tawh, atuam atuam na uk uh pawlpite, aana tawh hi loin, tuu honte maiah na pumpi uh limpha suakin, Pasian’ deihna bangin na cing un. Tua bang ahih leh, Tuucing Ukpa hong kilat ciangin note in, a vul thei lo vangliatna lukhu na ngah ding uh hi. Tua mah bangin khangnote aw, a khan’ sawt upate ukna na mang un. Ahi hi. Note khempeuh in khat leh khat na kizep nadingun kiniamsakna na silh un. Bang hang hiam na cih uh leh, “Pasian in a kisatheite a kham hi; a lungniamsakte kiangah hehpihna thupha a pia hi.” Tua ahih ciangin a hun a cin’ ciangin Pasian in note hong pahtawi nadingin, ama khut vanglian nuai-ah na kiniamsak un. Pasian in note hong keem ahih ciangin, na lunghihmawhna khempeuh uh ama tungah na koih un. Kipin kikeem un. Kikepna tawh na ngak un. Bang hang hiam na cih uh leh, na gal uh ahi Dawimangpa in a hawk thei humpinelkai bangin kua mi ka ne ding hiam ci-in zong kawikawi-in a om hi. Leitung mun khempeuhah a om na u na naute un tua bang gimna thuakin a om uh hi ci-in thei un la, upna tawh kipin Dawimangpa na nial un. Khazih hangin note, ama vangliat tawntung minthan’na ah hong sam, hehpihna thupha khempeuh’ Pasian in tawlkhat gimna na thuak khit uh ciangin, hong cingsak, hong kipsak, hong khauhsak ding hi. Tua Pasian in a tawntungin vangliatna nei ta hen. Amen. Keimah in note hong hansuahin, hih thute in Pasian’ hehpihna thupha thu a man takpi ahi ci-in teci pangin hih lai a tomin ka gelh khit ciangin, midik ka sak sanggampa Silvanas’ khut sung pan ka hong pia hi.Tua sungah na kip un. Ka tapa Marka akipan Babilon khuapi sungah a om note tawh a kiteel khawm pawlpite in note hong hopih uh hi. Khat leh khat ki-itna napna tawh kihopih un. Khazih sungah a om note khempeuh tungah nopna om ta hen. Zeisu Khazih’ sila leh sawltak keimah Simon Piter in, eite Pasian leh Honpa Zeisu Khazih’ dikna hangin kote thu-up bangin a manpha upna a ngah mite ka hong zasak hi. Pasian leh i Topa Zeisu’ theihtel pilna hangin hehpihna thupha leh nopna in note tungah kicing takin om ta hen. Tua mah bangin ama minthan’na leh ama dikna tawh hong sam Pasian’ theihtel pilna hangin, eite nuntakna leh Pasian lamah nopsakna tawh kipawl na khempeuh ama vangliatna siangtho a hong pia zo hi. Tuate hangin zong a manpha a lian mahmah thuciamnate eite hong pia zo hi. Bang hang hiam na cih uh leh, hih thuciamnate suangin deihgawhna hangin hih leitungah a om kisiat gawpna tawh note in kipelhin, Pasian’ nuntakna tawh kizom mi na suah nading uh ahi hi. Ahi hi. Tua thu hangin note in upna tungah hoihna, hoihna tungah lungpilna, lungpilna tungah noptat khamna, noptatna khamna tungah thuakna, thuakna tungah Pasian biakna lamah nopsakna, Pasian biakna lamah nopsakna tungah ki-unau itna, ki-unau itna tungah ki-itna hahkat mahmahin na koih thuap un. Bang hang hiam na cih uh leh, tua thupha teng note in nei-in na hauh uh leh, i Topa Zeisu Khazih’ theihtelna-ah thadah loh nading ahi zongin, a gah om lo mawkna ahih loh nading ahi zongin, hong bawlpha thei uh hi. Tua gamtat pha a nei lo mi in mittaw a, a muhna tom a, ama mawhna luite sawp siangna thu a mangngilh hi. Tua ahih ciangin ute naute aw, note hong sapna leh hong teelna kipsak nadingin, nakpi-in hahkat zaw un. Tua bang na hih uh leh, na puk ngei kei ding uh hi. Tua bang hangin eite Topa leh Honpa Zeisu Khazih’ tawntung Gam sung lut theihna thu note a kicingin hong kipia ding hi. Tua ahih ciangin na ngahsa uh thuman thutak note in thei-in tua thu-ah kip khin na hi uh zongin tua nate ngaihsunin note hong phawksak kik dingin ka om khol tawntung ding hi. I Topa Zeisu Khazih in hong lah sa mah bangin a sawt loin ka pumpi nuntakna ka nutsiat ding thei ka hih ciangin, hih pumpi nuntakna-ah ka om lai takin note hong phawksakin, kong hansuah ding kilawm ka sa hi. Ahi hi. Ka sih khit ciangin note in hih thute na phawk tawntung nading uh ka hahkat ding hi. Kote in i Topa Zeisu Khazih’ vangliatna ahi zongin, a hong paikikna thu ahi zongin, note kiangah kong gen uh ciangin pilna tawh kibawl tangthu zui loin, a thupitna leh a liatna mu-in teci ka hi uh hi. Bang hang hiam na cih uh leh, “Hihpa in ka lung hong damsak ka it ka Tapa hi,” ci-in Vanglian Bel sung pan tua Topa tungah aw khat hong tun’ ciangin, Pa Pasian kiang pan minthan’na leh liatna a ngah hi. Kote in mual siangtho tungah Topa tawh ka omkhawm lai takun, van panin tua aw ka za uh hi. Tua bang hangin kamsangte’ thugenna thu, eite adingin a kip zaw hi. Note lungsim sungah khuavakin, zingsol suak a, khua hong vak dongin tua thu, khuamialna-ah a tang meivak bangin ngaihsunin na belh dingun a kilawm hi. Lai Siangtho-ah a om Pasian’ kamsangte’ thu in mi ut thu bangin a khiatna dawk lo hi ci-in a masa belin na thei un. Bang hang hiam na cih uh leh, Pasian’ kamsangte’ thu in mi’ deih bangin hong tung ngei kei hi, Kha Siangtho hansuahna ngahin mite in Pasian kiang pan a gen sawn uh hi. Ahih hangin mite lakah kamsang zuau hong piang mah bangin a kikhenthang thei up khialhna ngeina, kheemna tawh guangin, amau pumpi uh a lei Topa nangawn nialin, amau tungah a manlangin kisiatna a tungsak thu zuau hilh siate in note lakah zong a om ding uh hi. Amau kihhuai gamtatnate mi tampi in mangin, thuman thutak lampi kosiatna a thuaksak ding uh hi. Amaute huaiham luatna in zuau thu genna tawh note hong kheem ding uh hi. Amaute tungah thukhenna in tang lai-a kipanin ol lo, zekai lo a, amaute kisiatna in zong a ihmu kei hi. Bang hang hiam na cih uh leh, Pasian in a khial vantungmite pammaih sa loin, hel khua sungah a khiat khit ciangin thukhen Ni dongin khuamial khuk sungah a khum hi. Tang lai leitung zong pammaihsa loin, dikna thu a hilh Noah leh mi sagihte keem a, Pasian bia lote leitungah tuicin a tumsak hi. Sodom leh Gomorrah khuapite, mei vut suakin, cip siatna daan thu khen a, a nung ciangin Pasian bia lote adingin limin a koih hi. Tua lai takin mi gilote’ kihhuai gamtatna hangin bawlsiatna a thuak, midik Lot a gumkhia hi. Tua midik pa in amaute lakah a omkhawm lai takin, amaute’ gitloh gamtatna ni simin a mit tawh mu-in, a bil tawh za ahih manin ama dikna lungsim nakpi-in a buai hi. Tua ahih ciangin Topa in Pasian a biate ze-etna sung pan gumkhia ding ahi zongin, atak takin ci leeng kihhuai deihgawhna tawh pumpi deihna zui-in, ukna thusim lo-a a dik lo mite thu a khen Ni dongin daantatsakin kikhum nading ahi zongin ahih thei hi. Tua mite in lau loin amau deihna a zui thei mi hi uh a, a lian a ukte a kosia ngam uh hi. Vantungmite in ahih uh leh, amaute sangin a hat zawk, a vangliat zawk uh hangin Pasian mai-ah amaute in kosiatna mawhsakna a bawl kei uh hi. Hih mite ahih uh leh, ngaihsut pilna nei lo ganhingte bangin ahi uh a, siatna a thuak ganhingte taktak bangin amaute in a theih tel loh uh nate kosia-in, a siatsak uh hangin, kisiatna a man takin tungin, gitlohna thaman ahi gitloh bawlna a thuak ding uh hi. Tua mite in sun lai takin pawikham uh a, noptatin a om uh hi. Note tawh pawi a kham uh ciangin amau kheemna tawh noptat lua-in a nin baang kinuh mi ahi uh hi. Amaute in mi’ zi tungah mawh nop lunggulhna tawh a dim uh a, a kham thei lo mittang nei mi ahi uh hi. A kip lo mite a zol thei uh hi; huaiham luatna-ah a siam thei lungsim nei-in, hamsiatna’ tate ahi uh hi. Amaute in thuman thutak lam pan pialin, a mangthang uh a, Beora’ tapa Balaam’ lampi a zui uh hi. Tua Balaam in a hoih lo gamtatna thaman deihgawh a, ama mawhna hangin taaina a thuak hi. Bang ci-a thuak hiam na cih uh leh, kam a pau thei lo la khat in, mi kam pau tawh pau-in tua kamsangpa’ haina a kham hi. Tua mite in tui om lo-a a kang cikte ahi zongin, huih nakpi-in nunga a leeng meiite ahi uh hi. Amaute ading a mial pha mahmah khuamial a kikoih khol zo hi. Bang hang hiam na cih uh leh, khialhna ahih thei mite sung pan a taisuak dek takte tungah kisaktheihna kam mawkna genin pumpi deihna lunggulh luatna tawh, mawhna-ah a zol thei uh hi. Amaute pumpi uh kisiatna’ sila ahi napi-in, “Suahtakna ka hong pia ding uh hi,” a ci uh hi. Bang hang hiam na cih uh leh, mi a zo thei na in tua mi’ topa ahi hi. I Topa leh Honpa Zeisu Khazih theihtelna hangin leitung kihhuaina tawh a suahtak khit uh ciangin, khat vei awk kikin a lelh uh leh, a nung ciangin a pian’ in a pian’masak sangin a gilo zaw hi. Dikna thu lampi a theih khit uh ciangin thukham siangtho a paaikhia kik sangin tua lampi thei loin a om uh leh, amau ading a pha zaw hi. ‘Ui in ama luak a ne kik hi; vokpi in a kisil khit ciangin buan lakah a bual kik hi,’ ci-in a man thugentehna bangin tua mite tungah a piang zo hi. Ka itte aw, hih nih veina lai kong gelh hi. Note in a siangtho kamsangte in nidang lai-inah a gensa thute ahi zongin, note sawltakte tungah hong piak Topa leh Honpa’ thupiakna ahi zongin, na ngaihsut nadingun, hih laikhak nihna sungah note lungsim siangtho uh hong phawksakin ka hong hansuah hi. Amasa bel-a theih ding akilawm thu in a nunung bel nite ciangin a kosia thei mite in amaute’ deihgawhna bang gamta-in: “Topa hong paikik ding cih thuciamna in koi-ah a om hiam? I pute i pate a si khin zo uh hi; ahi zongin na khempeuh a pian’sak cila kipan a pian’ ngei bangin a om lai hi,” ci-in kosiatna tawh a hong pai ding uh hi. Tang lai-in Pasian’ thupiakna in van ahi zongin, tui sung pan pusuakin, tui tawh a kip lei ahi zongin, tua thu tawh tua lai takin a om leitung, tui tawh tumin a kisiatna thu ahi zongin tua mite in a ciamteh nuam kei uh hi. Tu-in a om van leh lei in Pasian bia lo mite kisiatna thukhen ni ading, tua thu hangin mei khul nadingin a kikoih khol zo hi. Ahih hangin ka itte aw, Pasian ading ni khat in kum tul khat bang ahi zongin, kum tul khat in ni khat bang ahi zongin, hih thu khat na mangngilh kei un. Mi kim khat in zekai-a a ciamteh theih uh bangin Pasian in a thuciamna-ah a zekai kei hi. Kuamah kisia loin, mi khempeuhte in kisikkikna a ngah nadingun deihin, amah in note hong thuak hi. Guta bangin Topa’ Ni in hong tung ding hi. Tua Ni ciangin vantungte in aw lian mahmah tawh mangthang ding a, a nate zong sa lua-in a kisia ding uh hi. Leitunga kipan leitungah kibawl na khempeuh a kangtum ding uh hi. Ama thuciamna bangin dikna a om van thak leh lei thak eite in i lamen hi. Tua ahih ciangin ka itte aw, note in hih nate lamenin na om uh ahih ciangin, ama mai-ah mawhsakna om lo, ninna tawh kinuh loin nuam takin na om nadingun na hahkat un. I it i sanggampa Paul in a ngah lungpilna bangin no kiangah gelhin hong piak lai ahi zongin, ama thuhilhna lai khempeuh ah ahi zongin, hih nate tawh kizomin a gelh mah bangin i Topa’ thuakna in gupna thu ahi ci-in na ciamteh un. Tua laite sungah a tel hak thu zong a om hi. A siam lo mi, a kip lo mite in tua thute-a kipan a om lai Lai Siangtho khiatna lumletin amau pumpi uh a siasak uh hi. Tua ahih ciangin ka itte aw, mi gilote khialhna note in zui-in note lungkipna uh pan na puk loh nadingun, tua nate thei khol na hih ciangun na kikem un. Hehpihna thupha ah ahi zongin, i Topa leh Honpa Zeisu Khazih theihtelna ah ahi zongin na khangto un. Tua Topa tungah tu-a kipan a tawntungin minthan’na om ta hen. Amen. A cil panin piang a, komau in za-in, ka mittang uh tawh mu-in, a tel takpi enin, ka khut uh tawh ka lawn’ khitsa uh nuntakna Thu tawh kipawl thute, note kiangah kong zasak uh hi. Tua nuntakna hong kilang zo a, kote in zong ka mu zo uh a, Pa tawh omkhawm ngei-in, kote kiangah hong kilangsa tua nuntak tawntungna thu, note kiangah teci pangin kong hilh uh hi. Ahi hi. Pa tawh, ama Tapa Zeisu Khazih tawh ka kihopih uh ahih ciangin, note in kote tawh na hong kihopih theih nadingun ko ka muh uh nate, ka zak uh nate, note kiangah ka hong lak uh hi. Note lungdamna a kicin’ nadingin hih thute ka hong gelh uh hi. Ama kiangah ko ka zak uh a, note kiangah kong hilh uh thu in: Pasian in khuavak hi a, ama sungah khuamial a om peuhmah kei hi. “Eite in Pasian tawh i kiho thei hi,” i ci napi-in khuamial lakah i gamtat leh, thuman thutak zui loin zuauthu a zang mi i hi hi. Amah in khuavak sungah a om mah bangin eite zong khuavak sungah i om leh, khat leh khat kihothei-in, a Tapa Zeisu’ si in eite mawhna khempeuh hong sawpsiang hi. Eite in, “Ka mawhna a om kei hi,’ ci leng eimah mah kikheem i hi a, thuman thutak eite sungah a om kei hi. I mawhnate pulakin thuum lehang, i mawhnate maisakin, i gitlohna khempeuh sawpsiang nadingin amah in thuman thutak tawh ahi zongin, dikna thu tawh ahi zongin a dim hi. “Ka mawh kei hi,” i cih leh, amah thuzuau gen ahi ci-in i mawhsakna suak a, ama thu in zong eite sungah a om kei hi. Ka ta neute aw, note in na mawh loh nadingun hih thute lai sungah kong gelh hi. Mi khat peuhmah in a mawh leh, midik Zeisu Khazih ahi, eite hong huhpa Pasian kiangah i nei hi. Tua Topa in eite mawhna tham loin, leitung mi khempeuh’ mawhna maisak nading ahi hi. Eite in amah bang i ci theih tel thei ding hiam na cih uh leh, ama thupiaknate i zuih leh, i thei ding hi. “Tua Topa ka thei hi,” ci napi-in ama thupiaknate a zui lo mi in thuzuau genpa hi a, ama sungah thuman thutak a om kei hi. Ama thu a ngai mi sungah Pasian’ itna in a kicing taktak hi. Ama sungah i om thu hih bangin i thei hi: “Ama sungah ka om hi,” a ci mi in tua Zeisu’ gamtat bangin a gamta ding hi. Ka itte aw, note kiangah thupiakna thak kong gelh kei hi. A kipat cil panin na neih lui uh kong pia hi. Tua thupiakna lui in a masa belin na zak uh thuhilhna ahi hi. Khat vei thupiakna thak note kiangah kong gelh hi. Tua thupiakna in tua Topa sungah ahi zongin, note sungah ahi zongin thuman thutak ahi hi. Bang hang hiam na cih uh leh, khuamialna mangthang zo a, a maan khuavak a tan’ laitak ahi hi. “Khuavak sungah ka om hi,” ci napi-in a u a nau a mudah mi in, tu dongin khuamial sungah a om lai hi. A u a nau a it mi in khuavak sungah om a, ama tungah puk nading a om kei hi. A u a nau a mudah mi in khuamial sungah om a, khuamial sungah zong lam pai-in a gamta hi. Khuamial in ama mit khua musak thei lo a, a paina mun a thei kei hi. Ka ta neute aw, ama min hangin na mawhna uh a kimaisak ahih ciangin, note kiangah lai kong gelh hi. Pate aw, a cil panin a om mi na thei uh ahih ciangin, note kiangah lai kong gelh hi. Tangvalte aw, note in a gilopa na zo uh ahih ciangin, note kiangah lai kong gelh hi. Naupang neute aw, note in Pa na thei uh ahih ciangin, note kiangah lai kong gelh hi. Pate aw, a cil pan a om mi na theih manunah note kiangah lai kong gelh hi. Tangvalte aw, na thakhauh uh a, note sungah Pasian’ thu om a, a gilopa na zo uh ahih ciangin note kiangah lai kong gelh hi. Leitung ahi zongin, leitungah a om nate ahi zongin na it kei un. Leitung a it mi sungah Pa itna a om kei hi. Bang hang hiam na cih uh leh, leitungah a om na khempeuh ahi, pumpi deihgawhna, mittang deihgawhna, kisaktheih mawknate in Pa tawh kipawl hi loin, leitung bek tawh kipawl ahi uh hi. Leitung leh leitung deihgawhnate in a mangthang ding ahi uh hi. Pasian’ deihna bang a gamta mi ahih leh, a kip tawntung ding hi. Ta neute aw, tu laitak hun in a nunung bel hun ahi hi. Khazih’ gal ahi Anti Khazih hong piang ding thu note in na za zo uh mah bangin, tu-in Anti Khazih tampi a om uh hi. Tua ahih ciangin tu hun in a nunung bel hun ahi hi cih i thei hi. Tua mite in eite kiang pan a paikhiat uh hangin nidang lai-inah eite tawh a kipawl kei uh hi. Bang hang hiam na cih uh leh, eite tawh kipawl uh hi leh, eite tawh a omkhawm ding uh hi. Tua mite in eite tawh a kipawl loh thu a kilat nading eite kiang pan a paikhia uh hi. Note in Siangtho Pa’ Kha Siangtho sathau nilhsa na hi uh a, na khempeuh na thei uh hi. Note in thuman thutak na thei loh manun lai hong gelh ka hi kei hi. Note in thuman thutak na thei uh ahi zongin, thuzuau khat beek in thuman tawh kipawl lo ahi zongin na theih manunah lai kong gelh hi. Zuauthu a gen mi kua ahi hiam? “Zeisu in Khazih ahi kei hi,” ci-in a nial mi ahi hi. Hih mi in Pa leh Tapa nial a, Anti Khazih ahi hi. Ta a nial mi in Pa a nei kei hi. Ta a mang mi in Pa zong a nei hi. Note na hih uh leh, a cil panin na zak uh thuhilhna note sungah na kipsak un. Note in a cil pan na theih uh thuhilhna in note sungah a om leh, note in Pa sungah ahi zongin, Tapa sungah ahi zongin na kip ding uh hi. Eite a hong piak thuciamna in nuntak tawntungna kiciamna ahi hi. Note hong kheem mite thu uh hih bangin kong gelh hi. Note na hih uh leh, ama khut pan na ngah uh Kha Siangtho sathau nilhna in note sungah kipin a om a, kuamah in note thu hong hilh ding na kisam kei uh hi. Ama’ Kha Siangtho sathau nilhna in note na khempeuh hong hilh a, tua Kha Siangtho sathau nilhna in thuman thutak hi a, thuzuau hi lo ahih ciangin note hong hilh mah bangin ama sungah kipin na om un. Ka ta neute aw, Tapa hong pai a, hong kilat ciangin eite in maizumna om loin, lungmuan’na tawh ama kiangah i om theih nadingin ama sungah kipin om un. Amah in midik ahih note in na theih uh leh, dikna thu a sem mi khempeuh in zong ama pian’sak mi ahi uh hi, cih na thei uh hi. Eite in Pasian’ tate cihna i ngah nadingin Pa in eite tungah bang zah itna hong pia hiam ci-in ngaihsun un. Eite in tate taktak i hi hi. Tua hangin leitungmite in amah a theih loh manunah eite zong hong thei kei uh hi. Ka itte aw, tu-in Pasian’ tate i hi hi. A nung ciangin bang ci mi i hi ding a kilang nai kei hi. Ahih hangin amah hong kilat ciangin eite in amah tawh i kibang ding hi ci-in i thei hi. Bang hang hiam na cih uh leh, ama pum a om bangin amah i mu ding hi. Hih bang a lamen mi khempeuh in Topa a sian’tho bangin amau pumpi uh zong a kisiangthosak uh hi. Mawhna ahih mi khempeuh in thukham a kan uh hi. Khialhna in thukham kanna ahi hi. Topa in mawhna a pua dingin a hong kilang na thei uh hi. Ama sungah mawhna khialhna a om thei kei hi. Ama sungah a om mi in mawhna ah a zongsang kei hi. Mawhna ahih zom mi in amah a mu ngei lo, amah a thei ngei lo ahi hi. Ka ta neute aw, lam hong khialsak thei dingin kuamah kizolsak kei un. A diktat mi in Topa a dik mah bangin a dik hi. Mawhna a bawl mi in Dawimangpa tawh a kipawl hi. Bang hang hiam na cih uh leh, a cil panin Dawimangpa in mawhna a bawl zo hi. Dawimangpa’ bawl nate a siasak dingin Pasian’ Tapa hong kilang zo hi. Pasian’ pian’sak mi in ama sungah Pasian’ khaici a om man-inah mawhna a bawl zom thei kei hi. Amah in Pasian’ pian’sak mi ahih maninah a mawh nuam kei hi. Tua bangin Pasian’ tate leh Dawimangpa’ tate a kikhen uh hi. Dikin gamta lo mi ahi zongin, a u a nau a it lo mi ahi zongin Pasian tawh a kipawl lo mi ahi hi. Note in a cil panin na zak uh thu in, Dawimangpa tawh a kipawl a nau a that Kain bang hi loin eite khat leh khat ki-it ding ci-in hong kigen hi. Kain in bang hangin a nau a that hiam na cih uh leh, ama gamtatnate hoih lo a, a naupa’ gamtatnate a dik hi. Ute naute aw, leitungmite in note hong muhdah uh leh, lamdangsa kei un. Eite in ute naute khat leh khat ki-it i hih man-inah sihna panin nuntakna ah i galkah zo hi cih i thei hi. A it lo mi in sihna sungah a om lai hi. A u a nau a mudah mi in mi that mi ahi hi. Mi that mi khat peuhmah sungah nuntak tawntungna a om kei hi ci-in na thei uh hi. Khazih in eite tangding a nuntakna a paih maninah eite in itna i thei hi. Eite in zong ute naute tangding i nuntakna paih ding a kilawm hi. Mi khat in leitung sumte nei-in a u a nau a zawngte a muh hangin hehpihna lungsim a neih kei leh, tua mi sungah Pasian itna bang ci om ahi hiam? Ka ta neute aw, eite in kampau bek tawh ahi zongin, leii bek tawh ahi zongin ki-it loin, sepna bawlna tawh a mantak ki-it ni. Tua bangin i hih leh, thuman tawh kipawlin i om kithei-in, eima lungsim kimawhsakna bangmah om loin, a mai-ah lungnopna thu i ngah ding hi. Bang hang hiam na cih uh leh, i lungsim in hong mawhsak leh, i lungsim sangin Pasian lian zaw a, amah in na khempeuh a thei hi. Ka itte aw, eite lungsim in eite hong mawhsak kei leh, Pasian mai-ah launa a om kei ding hi. A piak thupiaknate zui-in, amah a lungdamsak ding nate i bawl maninah i ngetna peuhmah ama kiang pan i ngah hi. Ama thupiakna in a Tapa Zeisu Khazih’ min eite in umin, ama hong piaksa thu bangin khat leh khat ki-it nading ahi hi. Ama thupiakna a zui mi in ama sungah kipin om a, amah in zong tua mi sungah a om hi. Tua tham loin, amah in eite sungah a om thu a hong piak Kha Siangtho hangin eite in i thei hi. Ka itte aw, kha khempeuh um kei un. Khate in Pasian tawh kipawl hiam, kipawl lo hiam dongtelin, en un. Bang hang hiam na cih uh leh, zuauthu a gen kamsang tampi leitungah a paikhia zo uh hi. Pasian’ Kha Siangtho theih nadingin Zeisu Khazih mipum bangin hong pai zo hi ci-in a mang kha khempeuh in Pasian tawh kipawl hi. Tua banga Zeisu a mang lo kha khempeuh in Pasian tawh kipawl lo hi. Hih kha in a hong tung ding ci-a na zaksa uh Anti Khazih’ kha ahi hi. Tua kha in leitungah tu nangawnin a om zo hi. Ka ta neute aw, note in Pasian tawh kipawlin tua khate na zozo uh hi. Bang hang hiam na cih uh leh, note sungah a om mi in leitungmite sungah a om mi sangin a lianzaw hi. Amaute in leitung tawh kipawl uh ahih maninah, leitung tawh kipawl mite bangin thu a gen uh a, leitungmite in amaute thu gen a ngai uh hi. Eite i hih leh, Pasian tawh i kipawl hi. Pasian a thei mite in eite thu a thei uh hi. Pasian tawh a kipawl lo mi in eite thu a ngai thei kei uh hi. Tua bangin thuman thutak kha leh zuau kha eite in i thei thei hi. Ka itte aw, eite khat leh khat ki-it ni. Bang hang hiam na cih uh leh, itna in Pasian kiang panin hong pai hi. A it thei mi khempeuh in Pasian’ pian’sak mi hi a, Pasian a thei hi. A it thei lo mi in Pasian a thei kei hi. Bang hang hiam na cih uh leh, Pasian in itna ahi hi. Eite in Tapa hangin i nuntak nadingin Pasian in ama Tapa khat bek leitungah hong sawlna ah Pasian’ itna eite sungah a kilang hi. Eite in Pasian i itna hang hi lo hi, Pasian in eite hong it a, eite mawhna hong tat nadingin ama Tapa hong sawlna ah itna hong kilang hi. Ka itte aw, Pasian in eite hih zahin hong it ahih leh, eite khat leh khat ki-it ding a kilawm hi. Cikmah hunin kuamah in Pasian a mu ngei kei hi. Eite khat leh khat i ki-it leh, Pasian in eite sungah om a, ama itna eite sungah hong kicing hi. Amah in ama Kha Siangtho hong pia ahih ciangin eite in ama sungah ahi zongin, amah in eite sungah ahi zongin a om thu i thei hi. Pa in a Tapa leitungmite’ Gumpa a suah nadingin hong sawl thu kote in thei-in teci ka pang uh hi. Zeisu in Pasian’ Tapa ahi ci-a mang mi khempeuh in Pasian sungah om a, Pasian zong tua mi sungah a om hi. Pasian in eite hong itna thu eite in thei-in i um zo hi. Pasian in itna ahi hi. Itna sungah a om mi in Pasian sungah a om hi. Pasian in zong tua mi sungah a om hi. Tua bangin eite in ki-itna tawh i dim maninah thukhen Ni ciangin lau lohna thu i ngah ding hi. Bang hang hiam na cih uh leh, eite in amah bangin leitungah i piang hi. Itna in launa tawh kigawm thei lo hi. Launa in dantatna piangsak thei ahih ciangin, a kicing itna in launa a hawlkhia hi. A laupa in itna sungah a kicing nai kei hi. Pasian in eite hong it masak maninah eite in amah i it hi. Mi khat peuhmah in, “Pasian ka it hi,” ci napi-in a u a nau a it kei leh, tua mi in thuzuau gen mi ahi hi. Bang hang hiam na cih uh leh, a muh theih a u a nau a it kei leh, a muh theih loh Pasian bang ci a it zo ding hiam? Pasian a it mi in a u a nau a it ding hi a cihna thupiakna kote in Khazih kiang pan ka ngah uh hi. Zeisu in Khazih ahi ci-a a um mi in Pasian’ pian’sak mi ahi hi. Pa a it mi in Pa’ pian’sak mi zong a it ding hi. Eite in Pasian itin a thupiaknate bangin i gamtat lai takin Pasian’ tate i it hi ci-in i thei hi. Bang hang hiam na cih uh leh, Pasian’ itna in ama thupiaknate zuihna ahi hi. Pasian’ thupiaknate zong a haksa lua ahi kei hi. Bang hang hiam na cih uh leh, Pasian’ pian’sak peuhpeuh in leitung a zo thei hi. Eite upna in leitung zawhna ahi hi. Zeisu in Pasian’ Tapa ahi ci-in a um mi sim loh, leitung a zo kua mi ahi hiam? Tui leh sisan tawh hong pai Topa in Zeisu Khazih ahi hi. Tui bek tawh hi loin, tui tawh ahi zongin, sisan tawh ahi zongin a hong pai hi. Kha Siangtho in teci hong pang hi. Bang hang hiam na cih uh leh, Kha Siangtho in thuman thutak ahi hi. Bang hang hiam na cih uh leh, teci a pang thum ahi Kha Siangtho, tui leh sisan-te om a, tua thumte in pumkhat bek ahi uh hi. Mite teci pan’na eite in i man’ leh, Pasian’ teci pan’na a lianzaw hi. Bang hang hiam na cih uh leh, Paisan’ teci pan’na in a Tapa ading teci a pan’ zawhna thu ahi hi. Pasian’ Tapa a um mi in ama sungah teci pan’na a ngah hi. Pasian a um lo mi in Pasian pen zuau gen mi hi cih a suaksak hi. Bang hang hiam na cih uh leh, Pasian in ama Tapa ading a teci pan’na thu, tua mi in a um kei hi. Tua teci pan’na in, Pasian in eite nuntak tawntungna hong pia a, tua nuntakna in Tapa sungah a om hi. Tapa a nei mi in nuntakna a nei hi, Pasian’ Tapa a nei lo mi in nuntakna a nei kei hi. Pasian’ Tapa’ min a um note in nuntak tawntungna na ngahna thu uh na theih nadingun, hih thute kong gelh zo hi. Ama mai-ah eite in i ngah lau loh nading thu in, ama deihna bangin na khempeuh thuumin i nget leh, a hong ngaih nading thu ahi hi. Thu i ngetna khempeuh a hong ngai hi ci-a i theih leh, ama kiangah i nget khempeuh i ngah ding i thei hi. Mi khatpeuh in a sanggampa in sihna thuak ding a kilawm lo mawhna a bawl a muh leh, thungen ta hen. Sihna a thuak ding a kilawm lo mawhna a bawl mite ading Pasian in nuntakna a pia ding hi. Sihna thuak ding a kilawm mawhna a om hi. Tua bang mawhna maisak nading thungen ding ka ci kei hi. A dik lo na khempeuh in mawhna ahi hi. Ahih hangin sihna thuak dinga kilawm lo mawhna a om hi. Pasian’ pian’sak mi khempeuh in mawhna ahih zom kei hi ci-in i thei hi. Pasian’ pian’sak mi in ama pumpi kem a, a gilo mi in tua mi a sukha thei kei hi. Eite in Pasian’ tate i hi hi cih thu i thei hi, leitung khempeuh in a gilo mi’ khut sungah a om thu zong i thei hi. Tua banah Pasian’ Tapa hong pai a, thuman thutak Topa i theih nadingin pilna eite a hong piak thu zong i thei hi. Tua tham loin, a Tapa Zeisu Khazih ahi tua thuman Topa sungah i om hi ci-in i thei hi. Hih Topa in Pasian taktak ahi hi; nuntak tawntungna zong ahi hi. Ka ta neute aw, milimte na tang un. Pa Pasian kiang pan ahi zongin, Pa’ Tapa Zeisu Khazih kiang pan ahi zongin thuman thutak leh itna thu tawh hehpihna thupha, hehpihna leh nopna eite tungah a om ding uh hi. Eite in Pa kiang pan thupiakna i ngah bangin, na tate kimkhat in thuman thutak lam zui-in a om uh ka muh ciangin ka lung a dam mahmah hi. Tu-in Tonu aw, thupiakna thak hong gelh bang hi loin eite in a cil pan i neih pen mah hong gelhin, khat leh khat ki-it nadingin ka hong thuum hi. Ama thupiaknate bangin i thuman’na in ki-itna ahi hi. Note in thupiakna tawh kituak a, na gamtat nadingun a cil panin no na zak uh mah bangin ama thupiakna in tua bang deihna ahi hi. Zeisu Khazih in mi pum bangin ci-le-sa tawh hong pai hi ci-a sang lo mi kheem tampi, leitungah hong pai zo uh hi. Hih bang mi in mi kheem mi leh Anti Khazih ahi hi. Note in na bawl uh nate mangthangsak loin, a kicing thaman na ngah nadingun na kikem un. Khazih’ thuhilhna-ah kip loin a zui khial mi in Pasian a nei lo mi ahi hi. Khazih’ thuhilhna-ah a kip mi in Pa leh Tapa a nihin a neikhawm hi. Mi khat in note kiangah hong pai a, hih thu a vom kei leh, amah note innah na tungsak kei un; “Thupha ngah in,” ci-in hopih kei un. Bang hang hiam na cih uh leh, tua banga a hopih mi in tua mi gilo’ gamtatnate tawh a kipawl a suak hi. No kiangah ka hong gelh nop thu tampi a om hangin lai tungah laitui tawh gelh ding ka deih kei hi. Note kiangah hong pai-in, khat leh khat lungdamna a kicin’ nadingin note tawh maitang kimu-a kihopih ding ka lamen hi. A kiteel na naunu’ tate in nang hong hopih uh hi. Upa in a man takin ka it Gaias kong zasak hi. Ka it mi aw, na lungsim a nopsak mah bangin nangmah in na khempeuhah nopsakna leh cidamna na ngah nading thu ka ngen hi. Nang in thuman thutak na zuih mah bangin na neihsa thuman thutak ah na cihtakna thu ute naute in hong pai a, teci hong pan’ uh ciangin ka nuam mahmah hi. Ka tate in thuman thutak lam a zuih thu ka zak cianga ka nuamna sangin nuam zawkna a om kei hi. Ka it mi aw, nangmah in ute naute tungah ahi zongin, zinte tungah ahi zongin na bawlna khempeuh, dikna tawh kipawlin a bawl na hi hi. Tua mite in na itna thu pawlpi mai-ah teci a pang uh hi. Nangmah in Pasian’ deihna tawh kituakin tua mite amau lampi ah na khak leh, a pha a bawl na hi ding hi. Bang hang hiam na cih leh, amaute in Topa’ min hangin Gentailte lakah huhna la loin a pai uh hi. Tua hi a, eite in thuman thutak a huh mi i suah nadingin tua bang mite zin i do ding a kilawm hi. Pawlpi kiangah vaikhakna lai gelhin ka pia zo hi. Ahih hangin a uk a lian a suak nuam Diotrefes in ka thu a mang kei hi. Tua a hih ciangin ka hong pai ciangin amah in a bawlna thu ka phawksak kik ding hi. Amah in en’na, siatsak nopna kam tawh kote hong kosia tham loin, ute naute ama innah a tungsak nuam kei hi. A tungsak nuam mite zong khamin, pawlpi sung pan a hawlkhia hi. Ka it mi aw, a sia lam zui kei in, a hoih lam zui in. A hoih a gamta mi in Pasian tawh kipawl hi. A hoih lo a a gamta mi in Pasian a mu nai kei hi. Mi khempeuh in Demetrias ading teci a hi uh hi. Thuman thutak in zong ama teci a hi hi. Ahi hi, kote in zong tua mi lamah teci ka pang uh hi. Kote teci pan’na thu in a man hi ci-in na thei hi. Ka gelh ding thu tampi a om hangin laikung leh laitui tawh gelh ding ka deih kei hi. A sawt loin nang tawh kimu-in, khat leh khat kihopihin i kikup khop ding ka lamen hi. Nangma tungah nopna om ta hen. Lawmte in nang hong hopih uh hi. Na kiangah a om lawmte a minin lo-in na hopihsak in. Zeisu Khazih’ sila leh Jeim’ sanggampa keimah Juda in, Pa Pasian hangin itna ngahin, Zeisu Khazih adingin kikemin, sapna a ngah mite kiangah ka hong zasak hi. Note tungah hehpihna, nopna leh itna khang semsem ta hen. Ka itte aw, eite in i ngah khawm gupna thu tawh kizomin note kiangah ka hong gelh thu hahkat a, ka bawl lai takin, misiangthote kiangah khatvei bek a piaksa upna thu ading, lungsim khauhin na do nadingun hansuahin ka hong gelh hi. Bang hang hiam na cih uh leh, eite Pasian’ hehpihna thupha in kihhuai tat nopna suaksakin, eite hong uk khat bek ahi Topa Zeisu Khazih nialin, Pasian’ thu a deih lo mite in hih thutanna thuak dingin tanglai pek a, a kiciamtehsa mi kimkhat in note’ lakah hong lutsim uh hi. Note in na khempeuh thakhatin na theih uh hangin note ka hong phawksak nop thu in: Topa in Izipt gam sung mi pawlkhat a gupkhiat khit ciangin, a nung nihveina ah a um lo mite a siasak hi. Amau thu ngahna uh kem lo uh a, amau omna uh pan a paikhia vantungmite zong ni lian Ni-a thukhenna dongin khuamial sungah a tawntungin hencipin a khum hi. Tua mah bangin Sodom leh Gomorrah khuapi akipan a kimkot ah a om khuapite zong tua mite bangin a kihhuai noptatna ah gamta-in, a man lo pumpi’ deihna lungsim zui uh ahih maninah, meikuang tawntung daan thuakin, thu hilhkholh nading lim ahihna uh a kilang hi. Tua mah bangin tua mite in tua bangin a pumpi uh kihhuaisak a, ukna thu nial-in, vanmite a gensia uh hi. Vantungmite a ukpa Mikhael nangawn in Dawimangpa tawh kidoin, Moses’ luang tawh kizomin a kinial lai takin, kisiatna bawl ngam loin, “Topa in nang hong taai hen,” a ci bek hi. Tua mite in ahih uh leh, amau theih loh na peuhpeuh a kosia uh hi. A ngaihsun thei lo ganhingte bangin ngeina bangin a theihtheih nate uh hangin, amau pumpi uh a siasak uh hi. Amaute in gimna a thuak ding uh hi. Bang hang hiam na cih uh leh, amaute in Kain’ lampi zui-in thaman ngah dingin Balaam’ mawhna a manlangin zui-in a delh uh a, Korah’ lehdona bangin a kisia uh hi. Tua mite in note ki-itna pawite ah note tawh an a nekkhawm a dawn khawm lai takun, lau loin amaute kham tak kivakin pawi sungah a nin a kisawh tuucing ahi uh hi; tui om lo, huih in a leen’pih meii bang ahi zongin, pulhkhia-in a gah om lo nihvei si-in a bul pan a kibotkhia singkung bang ahi zongin; amau zumna thu a phuansak tui kilok gilo bang ahi zongin, khuamial pha mahmah a tawntungin amaute ading a kikoih khol a, a om aksi leeng bang ahi zongin a suak uh hi. Adam pan akipan khang sagihna mi Enok in kamsangpa thu a gen-inah, “Topa in mi khempeuh thukhenin, Pasian’ thu a deih lo mi khempeuh in Pasian deih loh a bawlna uh na khempeuh akipan Pasian’ thu a deih loh uh mawhna a neite in, Topa tungah gensiatna kam khempeuh a kilangsak ding ahi zongin, Topa in a kisim zo lo misiangthote tawh hong paikhawm ding hi,” ci-in a genkhol hi. Tua mite in phunin a mawhsak thei mi, amaute lunggulh deihgawhna bangin a gamta thei mi, a kam un kisaktheihna thu a gen thei mi, amau noptuamna ngaihsunin mi maitang a zahtak thei mi ahi uh hi. Ka itte aw, note na hih uh leh, i Topa Zeisu Khazih’ sawltakte in a masa-in a genkholh thute na phawk un. Amaute in, “A nunung bel hunin Pasian’ deihlohna tawh kipawl amau pumpi uh deihgawhnate bangin zui-in, a kosia thei mite hong kilang ding uh hi,” ci-in note kiangah hong gen zo uh hi. Tua mite in Kha Siangtho nei lo uh a, pawlpi kikhenna a bawl thei mi, pumpi deihna bek a zui thei mite ahi uh hi. Ka itte aw, note in na hih uh leh, a siangtho mahmah upna tungah na pumpi uh lamin, Kha Siangtho tawh thungenin, nuntak tawntungna ngah nadingin i Topa Zeisu Khazih’ hehpihna na ngak lai takun, Pasian’ itna sungah na pumpi uh kemin om un. A um khial kimkhat na hehpih un. Mi kimkhat mei sung pan kaikhia-in na gum un. Mi kimkhat zong pumpi deihgawhna hangin nin tawh a kisawh a puante nangawn uh muhthadah huaisa-in, lauthawng kawmin na hehpih un. A sawt loin a piang ding nate ama silate tungah lah dingin Pasian in a piaksa Zeisu Khazih’ mangmuhna lai ahi hi. Tua Topa in ama vantungmi khat sawl a, ama silapa Johan kiangah hilh hi. Tua Johan in ama muhna khempeuh tawh kizomin Pasian’ thu ahi zongin, Zeisu Khazih’ teci pan’na thu ahi zongin teci a pang hi. Hih lai simin, hih hilhkholhna thu za-in, lai sungah a kigelh nate a ngai mite in thupha a ngah ding uh hi. Bang hang hiam i cih leh, a hun a nai zo hi. ama Pa Pasian mai-ah eite kumpi za-ah ahi zongin, siampi za-ah ahi zongin hong koih Topa tungah minthan’na leh vangliatna om tawntung ta hen! Amen. En un, Topa in meiite tawh hong kumsuk ding a, mittang khempeuh a, kipan amah a sun mite in amah hong mu ding uh hi. Leitung mipawl khempeuh in zong amah hangin a kap ding uh hi. Tua bang a man hi. Amen. “Keimah in Alfa leh Omega ka hi,” ci-in tu lai taka om, a om ngei, tu nung ciangin hong pai ding mi ahi Vanglianpen Topa Pasian in a gen hi. Zeisu sungah a om gimna-a kipan gam ahi zongin, thuakzawhna ahi zongin, note tawh a thuak khawm, note’ u ahi keimah Johan in Pasian’ thu leh Zeisu tawh kipawl teci pan’nate hangin Patmos kici tuikulh gamah ka om hi. Topa’ ni-in Kha Siangtho sungah ka om lai takin ka nung lam pan peengkul aw bangin nakpi gingin, “Nangmah in na muhte, lai sungah gelh in la, Efesa khua, Smurna khua, Pergamum khua, Thiatira khua, Sardis khua, Filadelfia khua, Laodikia khua-ah om pawlpi sagihte kiangah khak in,” ci-in hong genna kam ka za hi. Kei kiangah hong gen aw a nei mi mu dingin kihei-in ka et ciangin, kham meivak khuam sagih ahi zongin, tua meivak sagih laizang ah mihing tapa tawh kibang mi khat ahi zongin ka mu hi. Tua mi in a khe dongin puanza silhin, a awmah kham kawnggak gakin, a lutang leh a sam in tuumul paak bangin ahi zongin, vuk paak bangin ahi zongin a ngo hi. A mittangte in meikuang bangin ahi uh a, a khete in zong mei sunga kisiangthosaksa sumngo tak tawh kibang hi. A aw in zong tuipi lian aw tawh kibang hi. A khut tak lamah aksi sagih a tawi hi. A kam sungpan a lang nih a hiam namsau a pusuak hi. A maitang meel in a tang pha mahmah ni tawh kibang hi. Tua mi ka muh ciangin kei in a khe kiangah mi si bangin ka puk hi. Tua lai takin amah in a khut taklam ka tungah nga-in, “Lau kei in Keimah in a masa bel leh a nunung bel mi ka hi hi. Nidang lai-in ka sih ngei hangin tu-in en in, a tawntungin ka nungta a,! sihna leh sihna gam konghon’na ka nei hi. Tua ahih ciangin na muhsa nate ahi zongin, tu-a om nate ahi zongin, nung ciangin a piang ding nate ahi zongin gelhin koih in. Ka khut taklamah na muh aksi sagihte-a kipan kham meivak sagihte’ thu thukna na gelh in. Aksi sagihte in pawlpi sagihte’ vantungmite ahi uh hi. Meivak sagihte in pawlpi sagihte ahi uh hi. “Efesa khua-ah a om pawlpi’ vantungmi kiangah hih bangin gelh in. ‘A khut taklamah aksi sagih tawi-in, kham meivak sagih laizangah a pai kawikawipa’ thupiakna in: “Nangma gamtatna ahi zongin, na hahkatna leh na thuakzawhna ahi zongin, mi gilote na thuak zawh loh tham loin, amau sawltak hi lopi ‘Sawltak ka hi uh’ a ci mite dongtel entelin, a man lo mi ahih uh thu na muh ahi zongin, nang in thuakzawhna nei-in ka min hangin zong, gim lo cim loin na thuak thu ahi zongin ka thei hi. Ahih hangin nang tungah gen ding thu ka nei hi. Bang thu ahi hiam na cih leh, a masa bel a, na neih itna na paihkhiat thu ahi hi. Tua ahih ciangin nang in bangci omna pan na kiam zawh thu na phawk kik khit ciangin na kisikkik in la, a cil-a na gamtat ngei na gamta kik in. Tua bang na hih kei leh, na kiangah ka hong pai ding a, na kisikkik kei leh, na meivakna a omna pan ka khin ding hi. Nangma tungah a om phatnate in ka muhdah Nikolas pawlte’ gamtatnate kei’ muhdah mah bangin nangmah in zong na muhdahna ahi hi. Kha Siangtho in pawlpite a thupiakna bil nei mi in ngai ta hen. A zo mi keimah in Pasian Paradis gam sungah a om nuntakna gah a nek theihna thu ka pia ding hi.” “Smurna khua-ah a om pawlpi’ vantungmi kiangah hih bangin gelh in. ‘A masa bel leh a nunung bel ahi tham loin, nidang lai-inah sihna a thuak zo, tu-in a nungta mi’ thupiakna in: “Nangmah in gimna na thuakna, na hau napi-in na zawnna-a kipan Judah mipawl hi lo napi-in ‘Judah mipawl ka hi uh, a kici Satan pawlte in hong kosiatna thute ka thei hi. Nang in na thuak ding lai takte kihta kei in. Ze-etna na thuak nadingun note kimkhat Dawimangpa in thong sungah hong khia-in, note in nisawm sung gimna na thuak ding uh hi. Nangmah in sihna na thuak dongin thumanin om in. Tua hi leh, nuntakna kumpilukhu nang kong pia ding hi. Kha Siangtho in pawlpite a thupiakna bil nei mi in ngai ta hen. A zo mi nihvei sihna in a su kha kei ding hi.” “Pergamum khua-ah a om pawlpi’ vantungmi kiangah hih bangin gelh in. ‘Lang nih a hiam namsau a nei mi’ thupiakna in: “Nangmah in Satan’ tokhom omna-ah na om thu ka thei hi. Ka min len cipin, Dawimangpa’ teen’na munah note lakah thahna a thuak ka teci, ka midik pa Antipas’ khan’ lai nangawnin keima upna thu na nial kei hi. Ahih hangin nangma tungah gen ding neukha a om hi. Bang hang hiam na cih leh, milim mai-ah biakna sa nek ding ahi zongin, numei leh pasal tawh khialhna gamtat ding ahi zongin, Israel mipawlte mai-ah suih khak nading Barak a hilh Balaam’ thu hilhna a zui mi kimkhat nangma sungah a om hi. Tua tham loin, Nikolas pawlte thuhilhna a zui mi kimkhat zong tua bangin a om hi. Tua ahih ciangin na kisikkik in. Tua bang ahih kei leh, nangma kiangah a manlangin kong pai ding a, ka kam sungpan a pusuak namsau tawh tua mite ka do ding hi. Kha Siangtho in pawlpite a thupiakna bil nei mi in ngai ta hen. A zo mi a kiseel maana ahi zongin, a ngah mi sim loh kuamah in a thei zawh loh min thak kigelhna suangpak ahi zongin ka pia ding hi.’” “Thiatira khua-ah a om pawlpi’ vantungmi kiangah hih bangin gelh in. ‘Meikuang bang mittang a nei, sumngo taktak bang khete a nei Pasian’ Tapa’ thupiakna in: “Na gamtatna, na itna, na upna, na nasepnate, na thuakzawhnate ahi zongin, a nununga na gamtatnate in a masa na gamtatnate sangin a tamzawk thu ahi zongin ka thei hi. Ahih hangin nang tungah gen ding thu ka nei hi. ‘Kamsang numei ka hi’ a ci Jezebel nang in na nial kei a, numei leh pasal khialhna gamtat nading ahi zongin, milim mai-ah biakna sa nek nading ahi zongin tua numei in ka silate hilhin a zol hi. Tua numei a kisikkik nading hun ka hehpih zawh hangin, amah in a gitloh gamtatna a kisik nuam kei hi. En in, amah a lupna tungah ka paai ding a, amah tawh a mawh mite in a gamtatna hoih lo uh a kisikkik kei uh leh, gimna lianpi ka tungsak ding hi. Ama tate zong ka that ding hi. Tua ahih ciangin keimah in lungsung sinsung a zong kawikawi thei Topa ka hih thu, pawlpi khempeuh in a thei ding uh hi. Note khempeuh zong na gamtatna uh tawh kituakin ka hong thukkik ding hi. Ahih hangin kong gensa thuhilhna a mang lo, Satan thu thukpi a kici nate a thei lo, a siam lo Thiatira khua-a a om lai mite kiangah kong geninah: no tungah adang van ka hong suan kei ding hi. Ahih hangin note in na ngahsa khempeuh uh ka hong pai dongin kip takin len un. Zo-in, keima deihnate a tawp dongin a zui mi, mipawlte tungah ukna aana ka pia ding a, kei in ka Pa kiangpan thu ka ngah bangin beel seekte in beelte a suk khap zan bangin, amah in sik ciangkhut tawh a uk ding hi. Zingsol zong amah ka pia ding hi. Kha Siangtho in pawlpite a thupiakna bil nei mi in ngai ta hen.’” “Sardis khua-ah a om pawlpi’ vantungmi kiangah hih bangin gelh in. ‘Pasian’ Kha Siangtho sagih leh aksi sagih a nei mi’ thupiakna in: “Nangma gamtatnate ahi zongin, na nungta hi ci-in minthan’na na ngah hangin a si na hih thu ka thei hi. Nang in khanglo in la, a sidek tak a om lai-te hanthawn in. Bang hang hiam na cih leh, nang gamtatna khat beek ka Pasian mai-ah a kicingin ka mu kei hi. Tua ahih ciangin bangci na san’, bangci na zak thu phawkkik in la, zui in, kisikkik in. Tua ahih ciangin ngakin na om kei leh, guta bangin ka hong pai ding a, na kiangah bang hunin ka hong tun’ ding na thei kei ding hi. Ahih hangin nang in amau puanza a ninsak lo mi neukha Sardis khua-ah na nei hi. Tua mite in a kilawm ahih manunah puanpaak silhin kei tawh a paikhawm ding uh hi. A zo mi in tua bang puanpaak a silh ding hi. Ama min zong nuntakna laibu pan ka su mang ngei kei ding hi. Ama min ka Pa mai-ah ahi zongin, ka Pa’ vantungmite mai-ah ahi zongin ka gum ding hi. Kha Siangtho in pawlpite a thupiakna bil nei mi in ngai ta hen.”’ “Filadelfia khua-ah a om pawlpi’ vantungmi kiangah hih bangin gelh in. ‘A siangtho mi, a thuman mi, David’ konghon’na a nei mi, kuama khak theih loh dingin hongin, kuama hon’ theih loh dingin a khak thei mi’ thupiakna in: En in, kuama khak zawh loh ding kong na mai-ah ka hong hi. Na gamtatnate ahi zongin, nang in tawmkha thahatna nei-in, ka thute zui-in, ka min nial loin, na om thu ahi zongin ka thei hi. En in, ‘Judah mipawl khat ka hi uh,’ a ci zuau thu a gen mipawl ahi, Satan pawlte ahi mite kong pia a, amau in nang khe kiangah bia-in, nang kong it, ci-in amaute ka theisak ding hi. Nangmah in kei thuakzawhna tawh kipawl thute na zui zo ahih ciangin, leitungah a om mite thu dong dingin leitung khempeuhah a tung ding ze-etna hun panin nang kong liah ding hi. A manlangin ka hong pai ding hi. Na kumpilukhu kuamah in a lakkhiat loh nadingin, na neihsa na a kip takin len in. A zo mi ka Pasian’ biakinnpi khuampi ka suaksak ding hi. Tunung ciangin tua mun panin pua lamah cikmah hunin a paikhia nawn kei ding hi. Tua mi tungah ka Pasian’ min ahi zongin, ka Pasian kiang vantung panin hong kumsuk ding Jerusalem khua thak ahi, ka Pasian’ khuapi min ahi zongin, keima min thak ahi zongin ka gelh ding hi. Kha Siangtho in pawlpite a thupiakna bil nei mi in ngai ta hen,” “Laodikia khua-ah a om pawlpi’ vantungmi kiangah hih bangin gelh in. ‘Amen ahi mi, a dik a man teci a pang, Pasian’ piancilna kipatna bulpi ahi pa’ thupiakna in: “Na gamtatnate ahi zongin, nang in vot lah vot lo, sa lah sa lo na hih thu ahi zongin ka thei hi. Vot hi taleh, ahih kei leh, sa hi taleh ka deih hi. Tua ahih ciangin nang ka kam sungpan ka hong siakhia ding hi. Kei in ka hau hi, sumte nate nei-in sapna a om nawn kei hi na cih hangin pumpi lunggimna, hehpihhuaina, zawnna, mittawtna, puan neih lohna na thuak lamtak thei na hih ciangin, nang in na hauh nadingin mei tawh kisiang saksa kham ahi zongin, puan nei loin omin na zumhuaina a kilat loh nadingin nangma silh ding puanpaak ahi zongin, mit khuamuh nadingin nuh ding mit-za ahi zongin kei kiang pan na lei nading kong hansuah hi. Ka it khempeuhte a mawhna uh lakin ka hilh thei hi. Tua ahih ciangin lungsim citak-in kisikkik in. En in, kei in kongkhak kiangah ding-in kiu-in ka om hi. Mi khatpeuh in ka aw za-in kong khak hong hon’ leh, tua mi kiangah ka tum khit ciangin amah tawh an ne khawm, tui dawn khawmin ka om ding hi. Amah in kei tawh an ne khawm tui dawn khawmin a om ding hi. Keimah in ka zawh khit ciangin ka Pa tawh tokhom tungah ka tut khawm bangin, a zo mi in kei tawh ka tokhom tungah tut khawm theihna thu ka pia ding hi. Kha Siangtho in pawlpite a thupiakna bil nei mi in ngai ta hen,’ ci-in thu hong pia hi.” Tua thute khit ciangin ka et leh, vantungah kong vang khat kihongin a om ka mu hi. “Hong kahto in. A nung ciangin a piang ding nate ka hong lak ding hi,” ci-in a masa-a, kei kiangah hong gen peengkhul aw banga nakpi-a kiko aw ka zak ciangin, thakhatin Kha Siangtho sungah ka om a, vantungah kikoih tokhom khat ahi zongin, tua tokhom tungah tu-a a om mi khat ahi zongin ka mu hi. Tua mi a meel in jasper suangmanpha leh sardis suangmanpha meel tawh kibang hi. Tokhom kimkotah zong emerald suangmanpha meel tawh kibang sakhituihup a om hi. Tokhom kimkotah tokhom adang sawmnih leh li, leh tua tokhomte tungah puanpaak silh, kham kumpilukhu a khu upa sawmnih leh li tu-in a om uh hi. Tokhom sung pan khuaphialep tawh, a aw gin’na tawh, vangin’na tawh a pusuak uh hi. Tokhom mai-ah Pasian’ Kha Siangtho sagih ahi, meivak sagih kivakin a om uh hi. Tokhom mai-ah kristal tawh kibang limlang tuipi bang a om hi. Tokhom laizang leh a kimkotah, a mai a nungah mittang dimin a nei ganhing li a om hi. Khatna ganhing in humpinelkai tawh kibang hi, a nihna ganhing in bawngno tawh kibang hi, a thumna ganhing in mi maitang tawh kibang maitang a nei hi, lina ganhing in a leeng kawikawi muvanlai tawh kibang hi. Tua ganhing lite khat in kha guk ciat a nei uh a, a khate uh a sung a pua, mittang tawh dimin, sun tawh zan tawh khawl loin: “A om ngei, a om laitak, a hong om ding Vanglianpen Topa Pasian in, Siangtho hi, siangtho hi, siangtho hi,” ci-in kiko-in a om uh hi. Tua ganhingte in tua bangin a tawntung nungta-in tokhom tungah tu-a a om minthan’na, pahtawina leh vangliatna leh hehpih phatnate a phat lai takun, tokhom tungah tu-in a om mi mai-ah upa sawmnih leh lite in bokin, a tawntungin a nungta mi bia-in, tokhom mai-ah amaute kumpilukhu a khiatsuk khit uh ciangin: “Kote’ Topa, kote’ Pasian aw, nang in na khempeuh na piangsak a, Nangma deihna hangin piangin a om uh ahih ciangin, tua minthan’na, pahtawina leh vangliatnate ngah dingin na kilawm hi.” ci-in a phat uh hi. Tokhom tungah tu-in a om mi’ khut taklamah, ciamtehna sagih tawh kip taka kiciamteh a, a sung leh a pua a kigelhsa laibu khat ka mu hi. Tua lai takin a thahat vantungmi khat in, “Tua laibu phen ding ahi zongin, ciamtehnate hong ding ahi zongin kua kilawm ahi hiam?” ci-in nakpi-in a kiko ka mu hi. Vantungah ahi zongin, leitungah ahi zongin, leinuai-ah ahi zongin tua laibu a phen zo, a en zo kuamah a om kei hi. Tua laibu phen-in en dingin a kilawm mi khat beek a kimuh zawh loh maninah nakpi-in ka kap hi. Tua lai takin upa khat in, “Kap kei in. En in, David’ Zung, Judah pawl pan Humpinelkai in tua laibu leh ciamtehnate a hong thei dingin a zo zo hi,” hong ci hi. Tua khit ciangin tokhom laizang, ganhingte laizang, upate laizangah leitung khempeuh ah a kisawl Pasian’ Kha Siangtho sagih ahi, ki sagih tawh, mittang sagih a nei, a kithatsa tawh kibang Tuuno ding-in a om ka mu hi. Tua Tuuno in hong pai-in tokhom tungah tu-a om mi khut taklam pan laibu a la hi. Tua lai takin gawsemte tawi tham loin, misiangthote’ thungetna ahi, paknamtui tawh a dim kham haite a tawi tek uh a, ganhing li tawh upa sawmnih leh lite in Tuuno mai-ah bokin: “Nangmah in laibu la-in, ciamtehnate hong dingin na kilawm hi. Bang hang hiam na cih leh, thahna na thuak khit ciangin mi nam khempeuh, kam khempeuh, pawl khempeuh, gam khempeuhte sung panin, Pasian ading na sisan tawh lei-in, Ko’ Pasian mai-ah kumpi za-ah ahi zongin, siampi za-ah ahi zongin na koih hi; tuate in leitung ukin a om ding uh hi,” ci-in la thak a sa uh hi. Tua lai takin tokhom-a kipan ganhingte leh upate kimkotah vantungmi tampi ka mu a, amau aw zong ka za hi. Amau a kisim ciangin tultul, thenthen ahi uh hi. Tua vantungmite in: “Thahna a thuak Tuuno in, vangliatna, hauhna, pilna, hatna, pahtawina leh phatna thuphate ngah dingin a kilawm hi,” ci-in nakpi-in kiko-in a phat uh hi. Vantung, leitung, leinuai leh tui tungah a om a bawlsa ganhing khempeuhte akipan, tua vantung, leitung, lei nuai leh tui tungah a om na khempeuh in zong: “Tokhom tungah a tu mi leh Tuuno tungah, phatna, pahtawina, minthan’na leh vangliatnate a tawntung pan a tawntung dongin om ta hen,” ci-in a phat uh hi. Ganhing lite in zong, ‘Amen,” a ci uh hi. Tua lai takin upate in bokin a bia uh hi. Tuuno in ciamtehna sagih laka khat a hon’ ka mu hi. Tua lai takin ganhing lite-ah khat in vanging aw bang aw tawh, “Hong pai in,” hong cih ka za a, ka et ciangin sakol kang khat ka mu hi! Tua sakol tung tuang mi in thal a tawi hi. Tua mi kumpilukhu khat a kipia hi. Amah in zong zoin ahi zongin, zawh nadingin ahi zongin a pusuak hi. Tuuno in nihna ciamtehna a hon’ ciangin, nihna ganhing in, “Hong pai in,” hong cih ka za hi. A san ahi sakol dang khat hong pusuak hi. Tua sakol tung tuang mi in leitung pan nopsakna lakkhiat theihna thu leh leitung mi khat leh khat kithahsak theihna thu a pia hi. Amah namsau saupi khat zong a kipia hi. Tuuno in thumna ciamtehna a hon’ ciangin thumna ganhing in, “Hong pai in,” hong cih ka za a, ka et ciangin sakol vom khat ka mu hi! Tua sakol tung tuang mi in a khut sungah tawikhaina a tawi hi. Tua lai takin, “Mangbuh pawta khatah hamu, tang pawta thumah hamu man hen. Sathau leh leenggahzute ahih leh, su kha kei in,” ci-in ganhing lite laizang pan mah bangin aw khat ka za hi. Tuuno in lina ciamtehna a hon’ ciangin ganhing lina in, “Hong pai in,” hong cih ka za a, ka et ciangin sakol puang khat ka mu hi. Tua sakol tung tuang mi’ min in Sihna hi a, Hel gam in amah tawh a tonkhawm hi. Leitung seh li suah seh khat namsau tawh, kialpi tawh, pulnatna tawh, leitung gam sahangte tawh thah theihna thu amaute a pia hi. Tuuno in ngana ciamtehna a hon’ ciangin Pasian’ thu hang ahi zongin, a san’ uh teci pan’na hang ahi zongin, thahna a thuak mite’ khate biakna tau nuai-ah ka mu hi. Amaute in zong, “A siangtho, a dik Vanglianpen Topa aw, leitungah a om mite, kote’ sihna sisan hangin thu khenin daantat loin bang tan vei sawtpi na om ding hiam?” ci-in nakpi a kiko uh hi. Tua lai takin amau khempeuh, puanpaak khat ciat a piak khit ciangin, amaute tawh nasem khawm mite akipan amaute mah bangin thahna a thuak ding sanggamte in kicin’na a tun’ dongin tomkha a ngak lai nading thupiakna a ngah uh hi. Tuuno in gukna ciamtehna hon’ khit ciangin ka en a, nakpi-in zin a liing hi. Ni in samul tawh kigan puan bangin vom-in a suak hi. Kha in zong sisan bangin a piang hi. Huih in theikung nakpi-in a mut ciangin a min nai lo gahte a pulhkhiat bangin vantung aksite in leitungah a pulhkhia uh hi. Van in laidal zial bangin kizial mang hi. Mualte leh tuikulhte khempeuh in a omna uh pan a kinkhia uh hi. Leitung kumpi mangte leh vaihawm lian upate, galkap mangte, sumhaute, thahatte, silate, to nei lote khempeuh in suanghawm leh mual suangpi lakah a bu uh hi. “Ko tungah hong cim in; tokhom tungah tu-in a om mi maitang pan ahi zongin, Tuuno’ hehna pan ahi zongin, hong liah in. Bang hang hiam na cih uh leh, tuate hehna a lianpi Ni hong tung zo hi. Kua in a thuak zo ding hiam?” ci-in mualte leh suangte kiangah a ci uh hi. Tua nung ciangin vantungmi li in lei kiu li mong ah ding-in leitungah ahi zongin, tui tungah ahi zongin, singkung khatpeuh peuh tungah ahi zongin, huih nun’ loh nadingin leitung kiu lite len cipin a om uh ka mu hi. Tua lai takin a nungta Pasian’ ciamtehna a tawi vantungmi khat in, nisuahna lam pan hong kahto ka mu hi. Tua mi in leitung leh tuipi gimna a bawl thei vantungmi lite kiangah, “I Pasian’ silate a taltangah ka ciamteh khit matengin leitung ahi zongin, tuipi ahi zongin, singkungte ahi zongin, na gimsak kei un,” ci-in nakpi-in a kiko hi. Israel’ suan mipawlte khempeuh lak panin ciamtehna a ngah mi a kisim zong ka za a, sangkhat leh thenli leh tulli ahi hi. Tuate in: Judah pawl lak pan thenkhat leh tulnih, Reuben pawl lak pan thenkhat leh tulnih, Gad pawl lak pan thenkhat leh tulnih, Asher pawl lak pan thenkhat leh tulnih, Naftali pawl lak pan thenkhat leh tulnih, Manaseeh pawl lak pan thenkhat leh tulnih, Simeon pawl lak pan thenkhat leh tulnih, Levi pawl lak pan thenkhat leh tulnih, Issakhar pawl lak pan thenkhat leh tulnih, Zebulun pawl lak pan thenkhat leh tulnih, Josef pawl lak pan thenkhat leh tulnih, Benjamin pawl lak pan thenkhat leh tulnih, ahi uh hi. Tua khit ciangin ka et leh, gam khempeuh, nam khempeuh, pawl khempeuh, kam khempeuh sung panin kuama sim zawh loh mihonpi in tokhom leh Tuuno mai-ah puanpak silhin, a khut uhah nisuh hiang tawi-in a ding uh ka mu hi. Tua mite in: “Tokhom tungah a tu eite Pasian leh Tuuno tungah, Gupna thu a piang hi,” ci-in nakpi-in a kiko uh hi. Tua lai takin tokhom-a kipan upate leh ganhing lite kimkotah ding-in a om vantungmi khempeuh in tokhom mai-ah bokin Pasian bia-in: “Amen! i Pasian tungah a tawntungin phatna leh minthan’na, pilna leh hehpih phatna, pahtawina, vangliatna leh hatnate om tawntung ta hen, Amen,” a ci uh hi. Tua lai takin upa khat in kei kiangah, “Puanpaak silh hua mite kua mi hiam? Koi pan hong pai uh hiam?” ci-in hong dot ciangin keimah in, “Topa aw, nang na thei hi,” ka ci kik a, tua upa in, “Tua mite in gimna lianpi sung pan hong pusuakkhia mi ahi uh hi. Amau puante zong Tuuno’ sisan tawh kisawp siang a, a kipaaksak uh hi. Tua ahih ciangin amaute in Pasian’ tokhom mai-ah omin ama biakinnpi sungah sun tawh zan tawh ama’ na a sem uh hi. Tokhom tungah tu-in a om mi in amau tungah a buk zal-in a lam ding hi. Amaute in a nung ciangin bangmah hunin gilkial dangtak nawn lo ding uh hi. Cikmah hun ciangin zong ni sa-a kipan a sa khempeuh tawh a kisu kha nawn kei ding uh hi. Bang hang hiam na cih uh leh, tokhom laizangah a om Tuuno in amaute’ tuucing suak a, amaute nuntakna ciktui omna-ah lam a hilh ding hi. Pasian in zong amaute mittang pan khitui khempeuh a nul siang ding hi,” ci-in hong gen hi. Tuuno in sagihna ciamtehna a hon’ khit ciangin, vantungah nai lang sung bang ging loin a om hi. Tua nung ciangin Pasian mai-ah ding-in a om vantungmi sagih ka mu hi. Tuate peengkul sagih a kipia hi. Kham kuang a tawi adang vantungmi khat in zong hong pai-in biakna tau kiangah ding a, tokhom mai-ah a om kham biakna tau tungah a om misiangthote khempeuh thungetna tungah sun’ sawn dingin paknamtui a pia hi. Tua misiangthote thungetna tawh, paknamtui khu in zong tua vantungmi khut sung pan Pasian mai-ah tungto hi. Tua nungciangin vantungmi in kuang la-in biakna tau pan mei tawh a dimsak khit ciangin leitungah a khiatsuk leh, vanging, aw-ging, khuaphelepte leh zinliingte a piang hi. Tua lai takin peengkul sagih a nei vantungmi sagihte in peengkul mut dingin a kisa khol hi. Khatna vantungmi in peengkul a mut leh, sisan tawh kihel gial leh mei leitungah kia-in, lei seh thum suah seh khat, sing seh thum suah seh khat leh lopa hing khempeuh a kangtum hi. Nihna vantungmi in peengkul a tum ciangin, mei in a kat mualpi bang na khat in tuipi sungah kia a, tuipi seh thum suah seh khat sisan suakin, tuipi sungah a om nuntakna a nei ganhing seh thum suah seh khat a si uh hi. Teembaw seh thum suah seh khat a kisia hi. Thumna vantungmi in peengkul a tum ciangin meilah kuang bangin kuangin a om aksi lianpi khat in van panin gun seh thum suah seh khat leh ciktui seh thum suah seh khat tungah a kia hi. Tua aksi a min in Gamsai kici hi. Tua lai takin tui seh thum suah seh khat in gamsai-tui suak a, tua tui kha ahih ciangin mi tampi a si uh hi. Lina vantungmi in peengkul a tum ciangah ni seh thum suah seh khat, kha seh thum suah seh khat, aksite seh thum suah seh khatte su kha a, seh thum suah seh khat a mial hi. Sun seh thum suah seh khat a tang kei hi, zan seh thum suah seh khat in khuavakna nei loin a piang hi. Tua lai takin ka et ciangin muvanlai khat in van kim lai-ah leengin, “A om lai vantungmi thumte tum ding peengkulte’ awte hangin leitungah a om mite tungah gimna, gimna, gimna a om ding hi!” ci-in nakpi-a kiko ka za hi. Ngana vantungmi in peengkul a tum ciangin vantung pan leitungah hong kia aksi khat ka mu a, tua mi kiangah kuam thukpi hon’na tawh a pia hi. Amah in tua kuam thuk a hon’ ciangin, mei phualpi sung pan bangin kuam sung pan meikhu pusuakin tua meikhu hangin ni leh vantung a mial hi. Tua meikhu sung pan leitungah kauphete hong piangkhia a, tuate leitungah a om momaite’ vangliatna bang vangliatna pia a, Amaute in lopa kung-a kipan a hing kung singkung khempeuh gai loin a taltangah Pasian ciamtehna a ngah lo mite bek bawlsiat nading thu a maute kiangah a pia hi. Ciamtehna a ngah lo mite thah nading thu a pia kei hi, kha nga tawntung a haksa mahmah gimna a pian’sak nading thu a pia hi. Tuate gimna in momai in mi a sut ciangin a natna tawh kibang hi. Tua nite lai takin mite in sih nading a zon’ uh hangin a mu kei ding uh hi. Amaute in a sih nop mahmah uh hangin sihna mangpa in amaute kiang pan a taikhia ding hi. Tua kauphete meel in galsim dinga kisa khol sakol tawh kibang hi. Amau lu tung uhah kham kumpi-lukhu tawh kibang a om hi. A maitang un pasal’ maitang tawh kibang hi. Numeite sam bangin sam a nei uh hi. A ha uh humpinelkai’ ha bang ahi hi. A awmdalna un sik awmdal tawh kibang hi. A khazap ging in galkapna-ah a kidelh sakolleengte’ gin tawh kibang hi. A mei un momai’ mei tawh kibang a, gu nei ling a om hi. Mite kha nga tawntung a bawlsiat theih nading amau mei sungah vangliatna a om hi. Amau tunga kumpipa in Hebru kam-in Abaddon kici, ahi zongin, Grik kam in Apollion kici ahi zongin kiphuak a, kuam thukpi’ sawltak ahi hi. Gimna khatna a bei zo hi. Gimna nih hong tung lai ding hi. Gukna vantungmi in peengkul a tum ciangin Pasian mai-ah a om kham biakna tau ki li sung pan a pusuak aw in, “Eufrates gunpi kiangah kikhiha a om vantungmi lite khah un,” ci-in peengkul a nei vantungmi gukna kiangah a gen ka za hi. Tua lai takin mi seh thumsuah seh khat thah nading tua nai, ni, kha, kum hun ading a kikoih khol vantungmi lite a kikhahkhia hi. Sakol galkap pawl a kisim ciangin then nih mun then khat ahi hi. Tua kisimna nambat ka za hi. Mang sungah tua sakolte leh a tuang mite ka mu a, tua mite in mei bang a san, engdum leh kat banga eng awmdalnate a nei uh hi. Sakolte’ lutangte in humpinelkai’ lutang tawh kibang hi. Amau kam sung pan mei leh meikhu leh kat a pusuak hi. Tua banga a pusuak mei, meikhu leh kat ahi gimna pawl thum hangin mi seh thum suah seh khat a si uh hi. Tua sakolte’ vangliatna in a kam sung uhah ahi zongin, a mei uhah ahi zongin a om hi. A meite uh gul tawh kibang uh a, lutang nei-in gimna a bawl thei uh hi. Tua gimna hanga a si lo a om lai mite in dawi gilote tawh, a za ngeilo, amu ngeilo, a pai thei ngeilo kham milim, ngun milim, sumngo milim, suang milim, sing milimte, a biak loh nadingun a mau khut tawh a bawlnate a kisik lo tham loin, amaute thahnate, mi bumnate, numei leh pasal mawhnate, guktaknate zong a kisik kei uh hi. Tua ciangin adang a thahat vantungmi khat in vantung meii silhin vantung pan hong kumsuk ka mu hi. Ama lutang tungah sakhituihup a om hi, a maitang ni bang ahi hi, a khete meikuang bang ahi hi. A khut sungah laibu neu khat phenin a tawi hi. A taklam a khe tui tungah ahi zongin, a veilam khe leitungah ahi zongin a ngak khit ciangin, humpinelkai a hawk bangin nakpi aw tawh kiko a, a kiko ciangin vanging sagihte in amau kam awte a gen uh hi. Tua bangin vanging sagihte genna gelh dingin ka kisak leh, “Vanging sagihte in a gen uh thute ciamtehin gelh kei in,” ci-in vantung pan hong pusuak aw ka za hi. Tua lai takin tuitung leh leitungah ding-in a om ka muh vantungmi in a khut taklam vantung lamah lamto a, Tua lai takin ka zak ngeisa vantungmi’ aw in khat vei kei kiangah, “Tuipi tung leh lei tungah ding-in a om vantungmi khut sungah kiphenin a om laibu pai in la, va la in,” hong ci hi. Tua vantungmi kiangah pai-in tua laibu neu ka va nget ciangin vantungmi in, “La in la, ne in. Na gil sungah a kha ding hi, na kam sungah ahih leh, khuaizu bangin a khum ding hi,” hong ci hi. Tua bangin kei in vantungmi khut sung pan laibu neu la-in ka nek leh, ka kam sungah khuaizu bangin a khum hi, ka nek khit ciangin ka gil sungah a kha hi. Tua lai takin, “Nangmah in mipawlte, gamte, kamte, kumpi tampite thu tawh kizomin a nungcianga piang ding thu na genkhol ding hi,” ci-in hong gen uh hi. Tua nung ciangin ciangkhut tawh kibang pumpeeng khat kei hong piak khit ciangin, “Tho in la, Pasian’ biakinnpi ahi zongin, biakna tau ahi zongin, biakinnpi sungah a bia mite ahi zongin teh in. Biakinnpi pua lamah a om gawl sung teh kei in, siit in. Bang hang hiam na cih leh, tua gawl sung mun Gentailte ading a kipia zo hi. Amaute in Khuapi Siangtho zong kha sawmli leh kha nih tawntung a sik gawp ding uh hi. Ka teci nihte zong thu ka pia ding a, amaute in khautang puan silhin ni tul khat, zanih leh sawmguk dongin kamsangte bangin thu a hilh ding uh hi,” hong ci hi. Tua mite in leitung Topa mai-ah a om oliv kung nih, meivak koihna nih ahi uh hi. Mi khatpeuh mah in amaute tungah gimna a bawl nop leh, amaute kam sungpan mei pusuakin a galte a kangtum thei hi. Mi khatpeuh in tua bang gimna a bawl nop leh, tua bangin thahna a thuak ding hi. Tua mite nih in kamsangin a om uh hun lai takin guahzuk loh nadingin vantung khak theihna vangliatna a ngah uh tham loin, tui, sisan a suahsak theih nading ahi zongin, a deih peuhpeuh ciangin leitung pulnatna pawl khempeuh tawh a daantat theih nading thu a nei uh hi. Amaute in a teci pan’na a zawh khit uh ciangin kuam thukpi sung pan hong kahto sahang in amau doin zoin a that ding hi. Amaute luangte zong a Topa uh singlamteh tungah a sihna khuapi ahi, a khiatna in Sodom leh Izipt a kici khuapi sungah a om lampi tungah a om uh a, mipawl, minam, kam, gamte sungpan mite in tua a luangte vuisak loin nithum leh nilang tawntung a en ding uh hi. Leitungah a om mite in zong tua kamsang nihte in a bawlsia ngei ahih manin, tua a luangte hangin lungdamin khat leh khat nuamna nate a kipia ding uh hi. Nithum leh nilang a cin’ khit ciangin tua mite sungah Pasian kiang pan nuntakna huih lutin amaute in a thawh uh, a din’ uh ciangin a en mite khempeuh a lau mahmah ding uh hi. Vantung panin zong, “Hih lai takah hong kahto un,” ci-in nakpi-in thupiakna aw a za uh a, vantung meii tungah tuangin a kahto uh amaute galte in a mu uh hi. Tua hun lai takin zin nakpi liingin khuapi seh sawm suah seh khat cimin, mi tulsagih a si uh hi. A om lai mite lau-in liingin, vantung Pasian’ vangliatna a phat uh hi. Nihna gimna a bei zo hi. En in, thumna gimna a manlangin hong tung ding hi. Sagihna vantungmi in peengkul a tum ciangin, “Hih leitung gam in i Topa leh ama Khazih gam a suak zo hi. Amah in a tawntungin a uk ding hi,” ci-in vantungah nakpi-in a genna aw ka za hi. Tua lai takin Pasian mai-ah amau tokhom tungah a tu uh upa sawmnih leh lite in bokin Pasian bia-in: “Tu lai takin a om, a om ngeizo, Vanglianpen Topa Pasian aw, nang in a lian bel vangliatna la-in na uk ciangin na hehpihna ka phat uh hi. Mipawl khempeuh a heh uh a, na hehna ahi zongin, a si mite thukhen nading hun ahi zongin, na sila kamsangte-a kipan misiangthote leh, na min a kihta milian leh mineu lungdamna na piak nading hun ahi zongin, leitung a siasak mite a siatsak nading ahi zongin a tung zo hi,” ci-in a gen uh hi. Vantungah a om Pasian’ biakinnpi kihongin thuciamna singkuang biakinnpi sungah a kimuh khit ciangin khuaphelepte, kam aw gingte, vangingte, zinliingte, nakpi gialkiatnate a piang uh hi. Vantungah lamdang lian khat a kilang hi. Numei khat in ni silhin, kha in ama khe nuai-ah omin, aksi sawm leh nih a tuang kumpilukhu a lu tangah a khu hi. Tua numei in tagai-in om a, tasuah ding natna nakpi-in tung a, kiko-in a om hi. Tua tham loin, adang nalamdang khat vantungah kilang hi; gulpi san a lian mahmah khat hi a, lutang sagih leh kisawm a nei hi. A lute tungah kumpilukhu sagih a nei hi. Tua gul in a mei tawh vantung aksi sehthum suah sehkhat kaikhia a, leitungah a khiat khit ciangin tasuak dinga kisa numei mai-ah ding-in ta a suah ciangin ne dingin a om hi. Numei in mipawl khempeuh sik ciangkhut tawh a uk ding tapa a suah ciangin Pasian kiangah ahi zongin, ama tokhom kiangah ahi zongin kipaipih hi. Tua numei in zong ni tul leh zanih sawmguk sung teng, vakin a kikhoi nadingin Pasian in a bawl kholhna gam lakah a tai hi. Tua ciangin vantungah galkido-in, Mikhael leh ama vantungmite in gulpi tawh a kido uh hi. Gulpi leh a nungzuite in a do uh a, A guallelh uh ciangin amaute in vantungah a om thei nawn kei uh hi. Leitung khempeuh a kheem Dawimangpa, Satan kici tang lai gulpi pen ama nungzuite tawh leitungah a kikhiasuk hi. Vantung pan nakpi aw khat in: “Tu-in eite Pasian’ gupna-a kipan vangliatna, gam leh ama Khazih’ ukna aana a hong tung zo hi. Bang hang hiam i cih leh, i ute i naute, i Pasian mai-ah sun tawh zan tawh a mawhsak mi in khiatsukna a thuak zo hi. Amaute in Tuuno’ sisan hangin ahi zongin, amaute teci pan’ na hangin ahi zongin zoin, sihna thuak dongin a nuntakna uh haza lo uh hi. Tua ahih ciangin vantungte leh vantungah a omte aw, nuam un! Leitung leh tuipi ahih uh leh, lunggimna a om hi. Bang hang hiam na cih uh leh, Dawimangpa in hun tomkha bek ngah lai ahih thei-in, thangpaai mahmahin note omna-ah a paisuk zo hi!” ci-in a gen aw ka za hi. Leitungah a kikhiasuk zo hi cih a theih ciangin gulpi in tapa suak numei a bawlsia hi. Hun khat, hun nih leh hun lang sung teng amah vak nadingin ama omna gamlakah, tua gulpi kiang pan a suakta dingin leengin a tai theih nading muvanlai gol kha lang nih tua numei a kipia hi. Gulpi in tua numei a taimang dingin ama kam sung pan a nungah gunpi bangin tui a suaksak hi. Lei in numei huh a, gulpi in a kam sungpan a suahsak gunpi pen a kam ka-in a valh hi. Gulpi in tuipi gei sehnel tungah ding-in a om hi. Tua laitakin ki sawm, lutang sagih, ki tungah lukhu sawm, lutangte zong kosiatna pawl a min nei sahang khat in tuipi sung pan hong kahto ka mu hi. Ka muh sahang in kamkei tawh kibang hi. A khete vomkhe tawh kibang hi. A kam in humpinelkai’ kam tawh kibang hi. Gulpi in a vangliatna ahi zongin, a tokhom ahi zongin, a aana ahi zongin tua sahang a pia hi. Tua sahang lutang khat in si dektaka sukkhakna liamma a nei hi. Tua liamma in a dam khin zo hi. Leitung mi khempeuh in tua sahang zui-in, lamdangsa-in, amah aana a pia gulpi a bia uh hi. Sahang zong, “Kua in hih sahang tawh kibang hiam? Kua in amah tawh kido zo ding hiam?” ci-in a bia uh hi. Tua sahang kiangah a lianpi thute leh kosiatna thu tampi a gen thei muk ahi zongin, kha sawmli leh kha nih tawntung om nading thu ahi zongin, a pia hi. Sahang in Pasian ahi zongin, Pasian’ min ahi zongin, a buk ahi vantungah a om mite ahi zongin a gensia dingin a kam a ka hi. Misiangthote tawh zong kido a, a zawh nading thu a pia hi. Minam, mipawl, kam, gam khempeuh tungah ukna thu a ngah hi. Leitung a cil panin thahna a thuak khin Tuuno’ nuntakna laibu sungah a min uh a kigelh lo leitung mi khempeuh in sahang a bia ding uh hi. Mi khatpeuh in bil a neih leh, ngai ta hen. A kiman dingte a kiman ding hi. Mi khatpeuh in namsau tawh midang a thah leh, tua in zong namsau tawh thahna a thuak ding hi. Hih thu-ah misiangthote’ thuakna leh upna a om hi. Tua khit ciangin lei sung panin adang sahang khat pusuak ka mu hi. Tua sahang in tuuno bangin ki nih nei a, gulpi bangin a pau thei hi. Amah in a masa sahang mai-ah a masa sahang’ ngah aana khempeuh nei-in, a si dektak a liamna ma a dam kik a masa sahang pen leitung leh leitung mi khempeuh a biasak hi. Mite maitangah vantung panin leitung dongin mei a kiatsak dongin nalamdang a lian mahmah a lak hi. Sahang mai-ah amah lah theih ding a ngah nalamdangte hangin amah in leitungah a om mite kheemin, tem satna ma a om, a nungta sahang’ milim khatpeuh peuh bawlsak in ci-in leitungah a om mite kiangah a cih khit ciangin, tua milim kam a pau theih nading nuntakna a thun theih na’ng thu a ngah tham loin, tua milim a bia lo mi khempeuh a thahsak theih na’ng thu a ngah hi. Hih thu-ah pilna a om hi. Pilna a nei mi in sahang’ nambat sim ta hen. Bang hang hiam i cih leh, mi khatpeuh’ nambat ahi hi. Tua nambat in zaguk sawmguk-guk ahi hi. Tua lai takin ka et leh, Zion Mual tungah ding-in a om Tuuno-a kipan amau taltang tung uhah Tuuno’ min tawh, ama Pa’ min tawh kigelha a om mi sangkhat-thenli-tulli amah tawh a om ka mu hi. Tua lai takin vantung pan tui tampi ging bang ahi zongin, vanging bang ahi zongin aw khat ka za hi. Ka zak aw in gawsem tumte’ gawsem tum aw tawh kibang hi. Tua mite in tokhom mai-a ganhing lite leh upate mai-ah la thak a sa uh hi. Tua la thak zong leitung pana lei khitsa tua mi sangkhat-thenli-tullite sim loh kuamah in a sin thei kei uh hi. Tua mite ahih uh leh, tangval ahi uh a, numei tawh khialhna nin a nei ngei lo ahi uh hi. Amaute in Tuuno paina teng a zui mite ahi uh hi. Pasian ading leh Tuuno ading a gah masa bel ahih nadingun mite lak pan a kilei mite ahi uh hi. Amaute’ kam sung uhah zuau thu a om kei hi. Amaute in mawhsak nading a om lo mi ahi uh hi. Leitungah a teeng mite-a kipan gam khempeuh, nam khempeuh, pau khempeuh, pawl khempeuhte kiangah tawntung Lungdamna Thu hilh dingin vantungmi adang khat in vankim lai-ah a leeng ka mu hi. Tua vantungmi in, “Pasian kihta un la, a vangliatna phat un. Bang hang hiam na cih uh leh, a thukhen ding hun a tungzo hi. Vantung, leitung, tuipi leh cikte a piangsakpa na bia un,” ci-in nakpi-in kiko-in a gen hi. Tua nung ciangin nihna vantungmi in zui-in, “Nu leh pa’ khialhna tawh kipawl ama hehna leenggahzu mipawl khempeuh a dawnsak khuapi lian Babilon a cim zo hi! a cim zo hi!” ci-in a gen hi. Tua nung ciangin thumna vantungmi khat in zui-in, “Mi khatpeuh mah in sahang leh ama milim bia-in, ama taltang tung ahih kei leh, a khut tungah ciamtehna a ngah leh, Pasian’ hehna hai-ah a kihel khawm lo-a kikoih hehna leenggahzu tua mi in a dawn ding hi. Tua tham loin a siangtho vantungmite mai leh Tuuno’ mai-ah tua mi in mei leh kat tawh bawlsiatna a thuak ding hi. Tua mite gimna a thuakna meikhu in a tawntungin a kahto hi. Sahang leh ama milim a bia mi, sahang min ciamtehna a ngah mite in sun tawh zan tawh khawl hun nei loin a om uh hi.” Hih na-ah Pasian’ thukhamte leh Zeisu upna a zui misiangthote thuakna a om hi. Tua lai takin, “Tu-a kipan Topa sungah a si mite in thupha ngahte ahi uh hi ci-in gelh in,” ci-in vantung pan hong gen aw ka za hi. Kha Siangtho in zong, “Tua thu a man hi. Tua mite in tua bang ciangin nasepna bei-in khawlna tawlngakna thu a ngah ding uh hi. Bang hang hiam na cih uh leh, amaute nasepna un zong amaute a zui ding uh hi,” ci-in a gen hi. Tua lai takin ka et leh, a kaang van meii ka mu hi. Tua meii tungah mihing tapa tawh kibang mi khat kham kumpilukhu a lu tungah khu-in, phiaukawi hiam tawi-in a tu hi. Tua lai takin vantungmi khat biakinnpi sungpan paikhia-in meii tungah a tu mi kiangah, “Na phiaukawi sawl in la, at in. Bang hang hiam na cih uh leh, at hun tung zo a, leitung gah a min zo a, kuai gawp zo hi,” ci-in nakpi-in a kiko hi. Meii tungah a tu mi in phiaukawi leitungah a khiatsuk leh, leitung in atsa a suak hi. Tua nung ciangin adang vantungmi khat in, vantungah a om biakinnpi sung pan a hiam phiaukawi tawi-in a paikhia hi. Tua tham loin, mei a uk vantungmi khat in biakna tau sung pan a pusuah khit ciangin, phiaukawi a tawi vantungmi kiangah, “Leitungah a om leenggahte pha takpi-in min zo ahih ciangin a bawkte at ding, la dingin na phiaukawi hiam sawl in,” ci-in a kiko khit ciangin, tua vantungmi in ama phiaukawi leitungah a khiatsuk leh, leitungah a om leenggahte a at khit ciangin a cilna phual ahi Pasian’ hehna sungah a paai hi. Tua leenggah in khua pua lam phualah kicil hi. Tua phual sungpan a pusuak sisan in tai zanih dongin sakol kamkaih banin a luang hi. Tua nung ciangin a lian mahmah nalamdang khat vantungah ka mu hi. Gimna nam sagih a nei vantungmi sagihte ahi uh hi. Tua gimnate in a nunung bel gimna ahi uh hi. Bang hang hiam na cih uh leh, Pasian’ hehna tua gimna tawh a kicing hi. Tua nung ciangin mei tawh kihel, limlang tuipi banga om ahi zongin, sahang tung, ama milim leh ama min nambat gimna pan suakta-in a zo mite in, Pasian’ gawsemte tawi-in tua limlang tuipi kiangah ding-in a om uh ahi zongin ka mu hi. Tua mite in Pasian’ sila Moses’ la leh Tuuno’ la sa-in: “Vanglianpen Topa Pasian aw, Na bawlnate lianin, a lamdang mahmah hi! Mipawl khempeuhte’ Kumpipa aw, Na gamtatnate in a dikin, a man hi! Topa aw, nang min kua in kihta lo, phat loin a om ding hiam? Bang hang hiam na cih uh leh, Nang bek na siangtho a, Nangma dikna gamtatnate in a kilang zo ahih ciangin Mipawl khempeuh in na mai-ah hong thuumin, hong bia ding uh hi,” ci-in a phat uh hi. Tua thute khit ciangin vantungah teci tawh kipawl buk ahi, biakinnpi a kihong ka mu hi. Gimna pawl sagih a nei vantungmi sagihte in a siangtho, a taang suangmanpha silhin, a awm-ah kham awmgak gakin tua biakinnpi pan a pusuah khit uh ciangin, ganhing lite khat in vantungmi sagihte kiangah, a tawntung a nungta Pasian’ hehna tawh a dim kham hai sagih a pia hi. Tua lai takin biakinnpi in Pasian’ vangliatna hangin meikhu tawh dimin, tua vantungmi sagihte’ gimna sagih a bei matengin biakinnpi sungah kuamah a lut thei kei ding hi. Tua vantungmi sagihte kiangah, “Note pai un la, Pasian’ hehna hai sagihte leitungah bua un,” ci-in biakinnpi sung pan nakpi kiko aw ka za hi. Khatna vantungmi pai-in, ama tawi hai leitungah a buak leh, sahang ciamtehna nei-in, ama milim a bia mite tungah kihhuai meima a piang hi. Nihna vantungmi in ama tawi hai, tuipi tungah a buak leh, tuipi tui in misite’ sisan bang suak a, tuipi sungah a om ganhing khempeuh a si uh hi. Thumna vantungmi in ama tawi hai, gunte leh cikte tungah a buak leh, tui in sisan suak a, tui ngak vantungmi in, “Tu lai takin a om, a om ngei zo, Siangtho Topa aw, nangmah in hih bangin thu na khen ahih ciangin midik na hi hi. Bang hang hiam na cih leh, amaute in misiangthote’ sisan leh kamsangte’ sisan a bua uh a, amaute sisan na dawnsak zo hi. Amaute zong a dawn dingun kilawm hi,” a cihna ka za hi. Biakna tau in zong, “Ahi hi. Vanglianpen Topa Pasian aw, na thukhennate a man a dik uh hi,” a cih thu ka za hi. Lina vantungmi in ama tawi hai ni tungah a buak leh, ni in mite mei a katsak nading thu a ngah hi. Mei sa pha lua-in mite a kang tum uh a, gimnate a uk Pasian’ min a kosia uh hi. Topa’ vangliatna phat nading a kisik kei uh hi. Ngana vantungmi in ama tawi hai sahang tokhom tungah a buak leh, sahang gam in khuamial suak a, a gamsung mite in na sa-in a leii uh a gawi uh hi. Amau natna meimate hangin vantung Pasian a kosia uh hi. Amaute gamtatnate zong a kisik kei uh hi. Gukna vantungmi in ama tawi hai Eufrates gunpi tungah a buak leh, ni suahna lam pan hong pai uh kumpite ading a baihsa a pian’ nadingin guntui a kang hi. Tua lai takin gulpi kam, sahang’ kam, thuzuau hilhte’ kam uh sung pan uiphuk tawh kibang a kihhuai kha gilo pawl thum a pusuakkhia ka mu hi. Amaute in nalamdangte lakin Vanglianpen Pasian’ ni lianpi-ah galdo-in leitung khempeuh pan kumpite kikhawmsak dingun a paikhia dawigilo’ khate ahi uh hi. En in, keimah in guta hong pai bangin ka hong tung ding hi! Puan silh loin pai-in mi mai-ah zumna om loh nadingin ngakin, ama puante a keem mi in thupha a ngah ding hi. Dawigilo khate in kumpite, Hebru kamin Armageddon a kici munah a kikhawmsak uh hi. Sagihna vantungmi in ama tawi hai huih lakah a buak leh, “A zo zo hi!” ci-in biakinnpi sung tokhom pan nakpi-in aw kiko a, khuaphialepte, awte, vangingte a piang uh hi. Mite in leitungah a om uh-a kipan cikmah huna piang ngei lo a lian a haksa mahmah zinlin’na a piang hi. Khuapi in seh thumin a kikhen hi. Gam sungah a om khuapite zong a cim uh hi. Babilon khuapite zong Pasian’ hehna lianpi leenggahzu hai a dawnsak dingin Pasian mai-ah tua khuapi kiciamtehin a om hi. Tuikulh gam khempeuh a mangthang hi. Mualte zong kimu lo hi. Tua lai takin vantung pan tawi zali bang a gik gialpi kia a, mite in tua gialpi gimna hangin Pasian a kosia uh hi, bang hang hiam na cih uh leh, tua gimna in a lian mahmah hi. Tua nung ciangin hai sagih a tawi vantungmite khat in hong pai-in kei kiangah, “Hih lai takah hong pai in, tui lianpi tungah tu-in a om a lian numei gilo in a thuak ding thukhenna kong musak ding hi. Tua numei tawh leitung kumpite in a mawh uh a, leitungmite in ama nu leh pa mawhna leenggahzu a kham uh hi,” hong ci hi. Tua lai takin amah in Kha Siangtho tawh keimah gam lakah hong paipih a, Pasian tungah paukhialhna min a dim, lutang sagih leh ki sawm a nei, sahang san tungah tu-a a om numei khat ka mu hi. Tua numei in a san a eng puante silhin, kham tawh, suangmanpha tawh, kep suangmanpha tawh kizeemin, a khutah ama gitlohna gamtatna kihhuaina ahi muhdahhuai nate tawh a dim kham tawh a dim khamhai a tawi hi. A taltang tungah, thu thukpi, “Leitungah a om Numei Gilote leh leitung Kihhuainate’ Nu Babilon Khuapi,” ci-in a min kigelh hi. Tua numei in zong misiangthote’ sisan ahi zongin, Zeisu’ teci pangte’ sisan ahi zongin dawnin kham a, om ka mu hi. Kei in ka et ciangin lamdang ka sa mahmah hi. Vantungmi in, “Bang hangin lamdang sa na hi hiam? Tua numei-a kipan lutang sagih leh ki sawm a nei tua numei tuan’na sahang’ thu thukpi kong gen ding hi. Na muh sahang in a om ngei zo hi, tu-in om lo hi; kuamthuk sung pan a hong pusuakkhia ding a, kisiatna-ah a pai ding hi. Leitung pian’ cil-a kipan nuntakna laibu sungah a min kikhum lo leitungah a om mite in tua sahang a om ngei thu, tu-in a om loh thu, a omkik ding sahang ahihna thu a muh uh ciangin lamdang a sa ding uh hi. Hih thu-ah pilna lungsim a om hi. Lutang sagih in tua numei tutna mual sagih ahi hi. Kumpi sagih zong ahi hi. Nga a kia zo hi. Tu-in khat a om hi. A om lai khat a piang nai kei hi. A hong pian’ ciangin tomkha bek a kip ding hi. A om ngei, tu-in a om lo sahang mah in zong giatna kumpi ahi tham loin sagihte lakah zong ahi hi. Amah in kisiatna-ah a pai ding hi. Na muh ki sawm in gam a ngah nai lo kumpi sawm ahi uh hi. Ahih hangin amaute in sahang tawh kumpi za aana nai khat sung a ngah uh hi. Tuate in ngimna khat bek a nei uh a, amaute vangliatna leh aana sahang kiangah a pia uh hi. Amaute in Tuuno tawh a kido uh ciangin Tuuno in amau a zo gawp ding hi. Bang hang hiam na cih uh leh, amah in topate’ Topa, kumpite’ Kumpipa ahi hi. Kiteelkhia, kisamin, thuman mi ahi Topa tawh a omkhawm mite in zong a zo gawp ding uh hi,” ci-in kei kiangah hong gen hi. Khat vei amah in, “Numei gilo tutna-a na muh tuite in mipawl, mihon, gam, kamte ahi uh hi. Nangma muh ki sawm leh sahangte in tua numei gilo a muhdah khit uh ciangin amah belh ding suan ding nei lo suakin ama sa ne-in, amah a kat tum nadingin mei tawh a hal ding uh hi. Bang hang hiam na cih uh leh, amau lungsim kibang uh ahih theih nading ahi zongin, Pasian’ thute a kicingsak dongin, amaute gam sahang tungah ap ding ahi zongin, amau lungkim ding ahi zongin Pasian in ngaihsutna a pia hi. Na muh numei zong leitung kumpite a uk khuapi ahi hi,” ci-in ka kiangah hong gen hi. Tua thute khit ciangin aana a lian mahmah a nei vantungmi khat in vantung pan pusuakin a hong kumsuk ka mu hi. Lei in ama vangliatna tawh a taang hi. Amah in, “Babilon khuapi a cim hi, a cim hi! Dawigilote’ omna, kihhuai kha khempeuh kikhumna, kihhuai leh gilo vasate kikhumna a suak zo hi. Bang hang hiam na cih uh leh, tua khuapi in a bawl nu leh pa mawhna bawlna leenggahzu hangin mipawl khempeuh kipukin a kisia uh hi. Leitung kumpite in zong amah tawh a mawh uh a, ama hauh luat-na hangin leitungah a om sumbukte in a hauh lawh uh hi,” ci-in nakpi aw tawh a kiko hi. Tua lai takin vantung pan aw khat ka zak in, “Ka mipawlte aw, tua khuapi gilohnate tawh na kipawl loh nading uh ahi zongin, ama pulnatnate na thuak loh nading uh ahi zongin, pusuakin hong paikhia un. Bang hang hiam na cih uh leh, tua khuapi-a gitlohnate in vantung dongin tung a, Pasian in tua gitlohna thute a phawk zo hi. Amah in mi a piak bangin piakik in. Ama gamtatna a zahnih thukkik in. Ama bawl hai, amah ading a zahnih bawlsak in. Amah in ama pumpi pahtawi-in nopsakna a khan’ mah bangin, nakpi-a bawlsiatna leh kahna kikona thuaksak in. Bang hang hiam na cih uh leh, amah in, “Kei kumpinu ka hi hi, meigongnu ka hi kei hi. Cikmah hunin ka kap ngei kei ding hi,” ci-in a lungsim sungah a kingaihsun hi. Tua ahih ciangin ama gimna ahi sihna, kahna, kikona, kialpite in ni khat sungin a tung ding uh hi. Amah zong mei in a kang tum khin ding hi. Bang hang hiam i cih leh, ama tungah thu a khen Topa Pasian in a vanglian ahi hi. “Amah tawh mawhin nopsakna a ngah ngei leitung kumpite in zong tua khua-ah mei katna pan a pusuak meikhu a muh uh ciangin, tua khua in a thuak gimna kihta-in gamlapi pan ding-in ‘Babilon khuapi, a to khuapi in gimna a thuak zo hi! Gimna a thuak zo hi! Nai khat sung bekinah thutanna na thuak ta hi,’ ci-in amah hangin kapin kiko-in a gen ding uh hi.” “Leitungah a om sumbukte in zong amah hangin kapin a kiko uh hi. Bang hang hiam i cih leh, kuamah in amaute sum ahi kham, ngun, a manpha suangte, suangmanpha, saihadial, puansan, nai puan leh puan eng; sahawk khum kung, saiha nate, amanpha sing tawh, sumngo tawh, sik tawh, suangkaang tawh kibawl kuangte; kinnamon, masala, paknamtui, mirrah, paknamtui khal, leenggahzu, sathau, buhneel, mangbuh, bawng, tuu, sakol, leeng, sila, mi nuntakna kha pumpite cikmah hunin kuamah in a lei nawn kei ding hi. Tua khuapi in a deih bel a gahte, a tehte-a kipan a hoih a kizang thei nek theihte mangthang khin ahih ciangin a nung ciang cikmah hunin kimu zo lo ding hi! Tua sumte kizuak kilei-in, tua khuapi hangah hauhna a ngah sumbukte in tua khuapi in a thuak gimna kihta-in gamlapi pan ding-in, “Saihadial, a san a eng puante, kham nate, a manpha suangte, suangmanphate, tawh a kizem khuapi lian in gimna a thuak hi, gimna a thuak hi! Nai khat sung bekinah tua zaha nopsaknate a beisak ta hi,” ci-in kapin a kiko ding uh hi.” “Teembaw ukte khempeuh-a kipan tembaw tawh sum lei sum zuakte leh tembaw nasemte leh tuipi-ah nuntakna a zong mite in gamlapi pan ding-in, tua khua meikatna pan a pusuak meikhu en in, ‘Tua khuapi tawh kua khua a kibang hiam?’ ci-in a gen khit uh ciangin, a lutang uhah leivui kibuakin, “Tua khuapi lian in gimna a thuak hi, gimna a thuak hi.’ Ama na zat a manpha nate hangin tuipi tungah a pai tembaw a neite khempeuh in sum a hauhna uh khua, nai khat sunginah amah in a kisia ta hi,” ci-in kapin a kiko uh hi. Vantung-a kipan misiangthote, sawltakte, kamsangte aw, tua khuapi hangin nuam un! Bang hang hiam na cih uh leh, Pasian in note tawh kipawlin ama tungah thu a khen zo hi!” a ci hi. Tua lai takin a thahat vantungmi khat in a lian angawina suang tawh kibang suang khat la-in tuipi sungah a khiatsuk ciangin, “Babilon khuapi lian in hih bangin nakpi khiatsukna thuakin a nung ciangin cikmah hunin kimu zo nawn lo ding hi. Gawsem tumte, la siamte, tamngai tumte, peengkul tumte tumna’ aw nang sungah a nung ciangin cikmah hunin kiza nawn lo ding hi. Khutsiam pilna pawlte cikmah hunin nang sungah kimu nawn lo ding hi. An gawina ging nang sungah cikmah hunin kiza nawn lo ding hi. Meivakna nang sungah cikmah hunin kivak nawn lo ding hi. Mo leh Mopipa’ aw nang sungah cikmah hunin kiza nawn lo ding hi. Bang hang hiam na cih uh leh, na sumbukte in leitung upate ahi ngei uh hi. Nangma bum theih siamna in zong mipawlte a kheem hi. Kamsangte leh misiangthote’ sisan leh leitungah thahna a thuak mi khempeuh’ sisan tua khua-ah kimu zo hi,” a ci hi. Tua thute khit ciangin vantungah a om mihonpite’ aw tawh kibang aw ka zak in, “Hallelujah! gupna thu-a kipan vangliatna leh minthan’na in i Pasian tawh kipawl hi. A thukhenna a man a dik hi. Bang hang hiam i cih leh, a gilo nu leh pa khialhna tawh leitungmite a siasak nuam numei gilo tungah thu khenin, a sisa a silate’ sisan hangin ama tungah daan a tat zo hi,” ci-in a gen uh hi. “Hallelujah!” ci-in nih veina a phat kik uh hi. Tua khuapi meikhu in a tawntungin a kahto hi. Upa sawm nih leh lite tawh ganhing lite in, tokhom tungah tu-a a om Pasian mai-ah bokin bia-in, “Amen, Hallelujah!” a ci uh hi. Tokhom sung pan a pusuak aw in: “Topa a kihta a neu a lian mi, a silate aw, eite Pasian phat un,” a ci hi. Tua lai takin mi honpi’ aw, tui lianpi’ aw, nakpi vanging’ aw bang kampau’ aw in: “Hallelujah! Bang hang hiam i cih leh, Vanglianpen Topa i Pasian in a mang hi. Lungdamin nuam ni, a min phat ni! Bang hang hiam i cih leh, Tuuno’ zipi hun a tung zo hi. A lawmnu in kiging kholsa-in a om hi. A siangtho, a ngo mahmah saihadial puan silhna thu a ngah hi. Bang hang hiam i cih leh, tua saihadial puan in misiangthote’ dik gamtatna ahi hi,” ci-in a gen hi. Tua lai takin vantungmi in, “Tuuno’ zipina pawi-ah a kisam mite thupha ngah ahi uh hi,” ci-in na gelh in ci-in ahi zongin, “Hih kam in Pasian’ thuman thu ahi hi, ci-in ahi zongin a hong gen ciangin, kei in tua vantungmi’ khe kiangah bokin bia dingin ka kisak leh, amah in, “Kei hong bia kei in! Kei in nang tawh ahi zongin, Zeisu’ teci pan’na a sang na sanggamte tawh ahi zongin sila ka hi khawm hi, Pasian bia in! Bang hang hiam na cih leh, Zeisu’ teci pan’na thu in kamsangte lungsim ahi hi,” ci-in kei kiangah hong gen hi. Tua khit ciangin vantung kihongin ka et leh, sakol kaang khat ka mu hi. Tua sakol tung tuang mi in Dikna leh Thuman kici hi. Tua mi in dik takin thu a khen thei, gal a do thei hi. Ama mittangte in meikuang ahi hi. A lu tungah kumpilukhu tampi a om hi. Amah sim loh kuamah in a theih zawh loh min zong a nei hi. Sisan tawh kitheh puanza a silh hi. Ama min in Pasian’ Thu ahi hi. Vantunga om galkapte in zong a siangtho a paak saihadial silhin sakol kaang tungah tuangin ama nung a zui uh hi. Mipawl pawlte sat nading ama kam sungpan namsau a hiam a pusuak hi. Amaute zong sik ciangkhut tawh a uk ding hi. Vanglianpen Pasian’ hehna leenggahzu kicilna phual amah in a cil hi. Ama puanza tung leh a phei tungah, “kumpite’ Kumpi, topate’ Topa ” ci-in min a kigelh hi. Tua nung ciangin vantungmi khat in ni sungah ding-in a om ka mu hi. Amah in van kim lai-ah a leeng vasate kiangah, “Pasian’ nitak an nekna lianpi-ah kikhawmin hong pai un. Kumpite’ sa, galkapte’ sa, a vanglian mite’ sa, sakol leh sakol tung tuang mite’ sa, sila leh to nei lo mi lian, mi neu a om khempeuhte’ sa uh ne dingin hong pai un,” ci-in nakpi-in a kiko hi. Tua lai takin sahang-a kipan leitung kumpite leh amau galkapte in sakol tungah tuang mi akipan, galkapte tawh kigaldo dingun a kikhawm uh ka muh khit ciangin, sahang tawh, sahang mai-ah nalamdangte lakin, sahang ciamtehna nei-in, sahang milim a bia uh mite a kheem, a zuau kamsangpa in kimatna a thuak khit ciangin, amau nih in kat meiphual sungah a hing tangin kikhiatna a thuak uh hi. A om lai mite in sakol tungah a tuang mipa’ kamsung pan a pusuak namsau tawh thahna thuakin, ka gensa vasate in amaute’ sa kham takin a ne uh hi. Tua nung ciangin vantungmi khat in kuampi kong hon’na tawh leh sikkhau lian khat tawi-in vantung pan hong kumsuk ka mu a, amah in Dawimangpa Satan ahi, tanglai gulpi manin, kum tulkhat tawntung hen cipin, kuampi sungah a khiatsuk khit ciangin tua kum tul a cin’ matengin mipawlpawlte a kheem kik zawh loh nadingin kuampi kong khak cipin a tungah a ciamteh hi. Tua hun a bei ciangin amah tomkha sung a khahkhia ding hi. Tua lai takin kumpi tokhomte ka mu hi. Tokhom tungah a tu mite in thukhen theihna a ngah uh hi. Tua tham loin Zeisu’ teci pan’na hang leh Pasian’ thu hangin lu kitanna a thuak mite a nuntakna khate a kipan sahang leh sahang milim bia lo, ama ciamtehna a taltang tung leh khut tungah a nei lo mite nuntakna khate zong ka mu hi. Tua mite in kum tulkhat sung nungta-in, Khazih tawh a mang khawm uh hi. A om lai a si mite in kum tul a cin’ ma-in a nungta kei uh hi. Hih thawhkikna in a masa thawhkikna ahi hi. A masa thawhkikna-ah a om mi in thupha ngah a, misiangtho ahi hi. Tua mite tungah nihna sihna in neukha beek uk kha lo ding hi. Amaute in Pasian leh Khazih’ siampite suakin amah tawh tua kum tul sung a mang khawm ding uh hi. Kum tul a cin’ khit ciangin Satan in a kikhumna pan kikhahin, leitung kiu li-ah a om Gog leh Magog ahi uh mipawlte galdona phualah kikhawmsak dingin, kheem dingin pusuaksak ding hi. Tua mipawlte a kisim ciangin tuipi gei sehnel zah a pha uh hi. Amaute zanglei tungah a kahtoh khit uh ciangin siangtho giahna phual leh a ithuai khuapi a uum uh ciangin, vantung panin mei kia-in tua mite a valh hi. Amaute a kheem Dawimangpa in zong sahang leh thuzuau hilh kamsangte omna kat meiphual sungah khiatsukna thuakin, amaute in sun tawh zan tawh a tawntungin bawlsiatna a thuak ding uh hi. Tua nung ciangin kumpi tokhom a kaang a lian khat ahi zongin, tua tokhom a, a tu Topa ahi zongin ka mu hi. Tua Topa maitang pan lei leh van in a taikhia uh a, amau adingin omna a om nawn kei hi. Tua lai takin a si mi a neu a liante in tua kumpi tokhom mai-ah ding-a a om uh ka mu hi. Laibute zong kiphen uh hi. Nuntakna laibu ahi adang laibu khat a kiphen hi. Tua a si mite in a gamtatnate bang laibu sungah a kigelh mah bangin thukhenna a thuak uh hi. Tua lai takin tuipi in a sungah a om mi site a puak hi, Sihna leh Sihna Gam in a sung uhah a om mi site a puak uh a, mi khempeuh in a gamtatnate bangin thukhenna a thuak uh hi. Sihna leh Sihna Gam mei li sungah a kiasuk hi. Tua mei li in nihna sihna ahi hi. Nuntakna laibu sungah a min om lo mi peuhmah tua mei li sungah a khiasuk hi. Tua nung ciangin van thak leh lei thak ka mu hi. Bang hang hiam na cih uh leh, a masa van leh lei a mang uh hi. Tuipi zong om nawn lo hi. Tua lai takin Jerusalem khua thak ahi Khuapi Siangtho in a pasal ading a kizeemsa-in a om, a kipi mo bangin kiging kholin Pasian kiang vantung pan hong kiasuk ka mu hi. Kumpi tokhom sung pan zong, “En in, Pasian buk mite lakah om a, amah in amaute tawh a omkhawm ding hi. Amaute in zong Topa’ mipawlte suakin, Pasian mahmah in amaute tawh omkhawmin amaute Pasian ahi ding hi. Amaute mittang uh pan khitui khempeuh a nul siang ding hi. Sihna zong a nung ciangin a om nawn kei ding hi. Tua tham loin, thuumna, kahna, natna zong a om kei ding hi. A masa nate mangthang khin zo uh hi,” ci-in nakpi-in aw tawh kiko ka za hi. Tua nung ciangin tokhom tungah a tu mi in, “En in, na khempeuh ka bawl thak hi,” hong ci hi. Tua tham loin, “Gelh in Hih thute a dikin a man hi,” ci-in thu hong pia hi. “Tua bangin a piang khin zo hi. Keimah in Alfa leh Omega, a kipatna leh a tawpna ka hi hi. Tuiduh mite nuntakna ciktui man nei loin ka pia ding hi. A zo mi in hih nate luahin, kei in ama Pasian ka hi ding a, amah in ka ta ahi ding hi. Lau-in a um lo mi, a kihhuai mi, mi that thei mi, nu leh pa mawhna a bawl mi, mi bum thei mi, milim bia mi, zuauthu gen mi khempeuh ahih uh leh, nihna sihna ahi kat leh mei lipi sungah a kituakin a thuak ding uh hi,” ci-in keima kiangah hong gen hi. Tua lai takin a nunung bel gimna pawl sagih a omsa hai sagih a tawi vantungmi sagihte khat hong pai-in, kei kiangah, “Hih lai-ah hong pai in. Tuuno’ zi ahi mo kong lak ding hi,” hong cih khit ciangin, Kha Siangtho tawh kei a sang mual lian dawnah hong paipih a, Pasian kiang vantung pan Pasian’ vangliatna pua-in hong kiasuk Jerusalem Khuapi Siangtho hong lak hi. Tua khuapi a taan’na a vang in kristal bangin jasper suangmanpha bangin a om hi. Tua khuapi kimah a lian a sang khua kulh, khuapi kong vang sawm leh nih, tua kong vangte ah vantungmi sawm leh nih a om tham loin, Israel mipawl sawm leh pawl nihte’ minte zong kigelhin a om hi. Khuapi ni suahna lamah kong vang thum, sak lamah kong vang thum, khang lamah kong vang thum, ni tumna lamah kong vang thum a om uh hi. Khuapi kulh nuai-ah a nuaiphah sawm leh nih om a, tuate tungah Tuuno’ sawltak sawm leh nihte’ minte kigelh hi. Kei tawh kiho mi in khuapi tawh, khuapi kong vangte, kulhte teh nadingin kham pumpeeng khat a tawi hi. Tua khuapi in kiu li nei-in om a, a dung a vai a kikim hi. Tua pumpeeng tawh khuapi a teh ciangin tai tulkhat leh zanga a pha hi. Khuapi a dung, a vai, a san’na a kikim hi. Khuapi kulh a teh ciangin mi’ tong tawh kibang vantungmi’ tong za leh sawmli leh li a pha hi. Tua khuapi kulh pen jasper suangmanpha tawh kibawl hi. Khuapi in a siangtho limlang tawh kibang kham taktak ahi hi. Khuapi kulh nuaiphahte suangmanpha a pawlpawl tawh kizeem hi. A masa bel nuaiphah in jasper suangmanpha, a nihna in sapfeiros suangmanpha, a thumna in khalsidoni suangmanpha, a lina in emerald suangmanpha, ngana in sardonik suangmanpha, a gukna in sardius suangmanpha, a sagihna in khrisolait suangmanpha, a giatna in beril suangmanpha, a kuana in topaz suangmanpha, a sawmna in khirsoprase suangmanpha, a sawm-le-khatna in jakinth suangmanpha, a sawm-le-nihna in amethist suangmanpha ahi uh hi. Khuapi kong khak sawm leh nih in, suangmanpha peek sawm leh nih ahi hi. Kongkhak khempeuh in suangmanpha khat tek ahi uh hi. Khuapi sung lampi in a siangtho limlang tawh kibang kham taktak ahi hi. Tua khuapi sungah biakinnpi ka mu kei hi. Bang hang hiam na cih uh leh, Vanglianpen Topa Pasian leh Tuuno in tua khuapi biakinnpi ahi uh hi. Ni tan’na, kha tan’na zong tua khuapi-ah a kisam kei hi. Bang hang hiam na cih uh leh, Pasian’ vang in tua khuapi a tangsak a, Tuuno in zong tua khuapi’ meivak ahi hi. Mipawl pawl khempeuh in tua khuavak tawh lam pai-in leitung kumpite in tua khuapi sungah amaute vangliatna pua-in a tung uh hi. Tua san takah zan om lo hi. Sun lai takin kongkhak kikhak ngei lo hi. Mipawl pawl khempeuh in a vangliatna leh phatna tua khuapi sungah a paipih ding uh hi. A kihhuainate-a kipan muhdahhuai, thuman lo nate a bawl mi khat beek tum thei ngei lo ding hi. Tuuno’ nuntakna laibu sungah a kigelh mite bek in tum theihna thu a ngah ding uh hi. Tua nung ciangin vantungmi in kei kiangah kristal suangmanpha tawh kibangin tangin, Pasian leh Tuuno’ tokhom pan pusuakin, khuapi lampi laizang tawntungah a luang nuntakna gun hong lak hi. Tua gun lang tuakah nuntakna sing kung khat om a, tua kung tungah a gah pawl sawm leh pawl nih, kha khatin pawl khat ciat a gah thei hi. A tehte in zong mipawl pawlte natna dam nading ahi hi. Hamsiatna cikmah hunin omkik lo ding hi. Pasian leh Tuuno’ silate in Topa bia-in, a maitang a mu ding uh hi. A min zong amaute taltang tung uhah a om ding hi. A nung ciangin zan om nawn lo ding hi. Amaute in meivakna ahi zongin, ni tan’na ahi zongin a kisam kei ding uh hi. Bang hang hiam na cih uh leh, Topa Pasian in amau khuavakna a pia ding hi. Amaute in zong a tawntungin a mang ding uh hi. Tua lai takin vantungmi in, “Hih thute a dikin a man hi. Kamsangte’ khate a uk Topa Pasian in a sawt loin a piang ding nate a silate hilh dingin a vantungmi khat a sawl hi. En in, a manlangin ka hong pai ding hi! “Hih laibu-ah a om, a nung ciangin a piang ding nate genkholhna thute a zui mi in thupha ngah mi ahi hi,” hong ci hi. Tua nate a za, a mu mi in keimah Johan ka hi hi. Ka zak ka muh lai takin a hong lak vantungmi bia dingin a khe kiangah ka boksuk leh, vantungmi in, “Kei hong bia kei in! Kei in nanga kipan na u na nau na sanggam kamsangte tawh ahi zongin, hih laibu-ah a om thute a zui mite tawh ahi zongin a sila ka hi khawm hi. Pasian bia in,” hong ci hi. Tua nung ciangin amah in, “Hih laibu sungah thu genkholhnate imcip kei in. Bang hang hiam na cih leh, a hun a hong tung dektak zo hi. A thuman lo mi in thuman loin omsuak hen, a kihhuai mi in kihhuai lai ta hen, a dik mi in a dikin gamta lai ta hen, a siangtho mi in siangtho lai ta hen. “En in, kei a manlangin ka hong pai ding hi! Mi khempeuh a gamtatnate tawh kituakin pia dingin thaman ka hong pua hi. Keimah in Alfa leh Omega, a masa bel, a nunung bel, a kipatna leh a tawpna ka hi hi. “Nuntakna kung kiangah pai ding kilawm a, khuapi sungah khuapi kongpi pan tum theih nading thu ngah nadingin, amau puan uh a sawpsiang mite in thupha ngah mite ahi uh hi. Pua lamah ahih leh, uite, mi bum theite, nu leh pa mawhna a bawl theite, mi that theite, milim biate leh a man lo nate deihin a gamta thei mite a om uh hi. “Pawlpite ading hih thute teci pang dingin kei Zeisu in ka vantungmi nangma kiangah kong sawl hi. Kei in David’ bulpi leh David’ suan, a taang khuavak Zingsol ka hi hi,” ci-in thu hong pia hi. Kha Siangtho leh a kipi Mo in, “Hong pai in!,” ci-in a gen uh hi. A za mi in zong, “Hong pai in,” ci ta hen. A dangtak mi hong pai ta hen. A dawn nuam mi in nuntakna tui man pia loin dawn ta hen. Hih laibu-ah a om thu genkholhna thute a za mi khempeuh kiangah teci ka pan’na in, kua mi kua mi hi taleh, hih laite belapin a guan’ beh leh, hih laibu sungah a kigelh gimnate tua mi’ tungah Pasian in a koih thuah ding hi. Tua genkholhna thu tawh kipawl hih laibu sungah a om thute kua mi hi taleh, a paihkhiat leh zong laibu sungah a kigelh nuntakna kung leh Khuapi Siangtho pan tua mi’ ngah ding khempeuh Pasian in a lakkhiatsak ding hi. Hih thute teci a pang Topa in, “A man takin a manlangin ka hong pai ding hi,” ci-in thu hong pia hi. Amen. Topa Zeisu aw, hong pai ta in! Topa Zeisu’ hehpihna thupha misiangthote tawh omkhawm ta hen. Amen.