Yezu Krista buruju filɛ nin ye. Yezu Krista buruju bɔra Dawuda la, Dawuda fana buruju bɔra Ibrayima na. Ibrayima tun ye Isiyaka facɛ ye. Isiyaka fana tun ye Yakuba facɛ ye. Yakuba fana tun ye Zuda n'a balimaw facɛ ye. Zuda fana tun ye Farɛsi ni Zara sɔrɔ Tamari ma. Farɛsi fana tun ye Ɛsirɔn facɛ ye. Ɛsirɔn fana tun ye Aramu facɛ ye. Aramu fana tun ye Aminadabu facɛ ye. Aminadabu fana tun ye Naasɔn facɛ ye. Naasɔn fana tun ye Salimɔn facɛ ye. Salimɔn fana tun ye Boozi sɔrɔ Araabu ma. Boozi fana tun ye Zobɛdi sɔrɔ Uruti ma. Zobɛdi fana tun ye Zese facɛ ye. Zese fana tun ye masacɛ Dawuda facɛ ye. Dawuda fana tun ye Solomani facɛ ye. Solomani bamuso tun ye Uri ka muso ye. Solomani fana tun ye Orobowamu facɛ ye. Orobowamu fana tun ye Abiya facɛ ye. Abiya fana tun ye Aza facɛ ye. Aza fana tun ye Zozafati facɛ ye. Zozafati fana tun ye Zoramu facɛ ye. Zoramu fana tun ye Oziyasi facɛ ye. Oziyasi fana tun ye Zowatan facɛ ye. Zowatan fana tun ye Akazi facɛ ye. Akazi fana tun ye Ezekiyasi facɛ ye. Ezekiyasi fana tun ye Manase facɛ ye. Manase fana tun ye Amɔn facɛ ye. Amɔn fana tun ye Zoziyasi facɛ ye. Zoziyasi fana tun ye Zekoniyasi n'a balimaw facɛ ye. Zekoniyasi ka tile la, Babilɔnikaw ye see sɔrɔ u kan, u ye u cɛ ka taa u kɛ jɔɔnw ye Babilɔni. U bɔnin kɔ jɔnya la Babilɔni, Zekoniyasi ye Salatiyɛli wolo. Salatiyɛli fana ye Zorobabɛli wolo. Zorobabɛli fana ye Abiyudi wolo. Abiyudi fana ye Eliyakimu wolo. Eliyakimu fana ye Azɔri wolo. Azɔri fana ye Sadɔki wolo. Sadɔki fana ye Akimu wolo. Akimu fana ye Eliyudi wolo. Eliyudi fana ye Eleyazari wolo. Eleyazari fana ye Matan wolo. Matan fana ye Yakuba wolo. Yakuba fana ye Yusufu wolo. Yusufu ye Mariyamu furu. Mɔgɔw bɛ Yezu min wele ko Krista, Mariyamu ye ale bamuso ye. K'a ta Ibrayima ma ka n'a bila Dawuda la, faa tan ni naani bɛ olu cɛ. K'a ta Dawuda ma ka n'a bila u taawaati ma jɔnya la, faa tan ni naani bɛ o waati cɛ. K'a ta jɔnya waati ma Babilɔni ka n'a bila Krista la, faa tan ni naani fana bɛ o waati cɛ. Yezu Krista wolola cogo min na, o filɛ. A bamuso tɔgɔ tun ko Mariyamu, a maminɛnin tun bɛ Yusufu fɛ. Sanni u ka furu kɛ, o y'a sɔrɔ Mariyamu ye kɔnɔ ta Nii Senuman barika la. Yusufu tun ye mɔgɔnyuman ye minkɛ, a tun t'a fɛ ka Mariyamu tɔgɔ cɛn mɔgɔw nyana. O la, a y'a; naniya ko a bɛna ban Mariyamu na dogo la. O; naniya tanin kɔ, Matigi ka mɛlɛkɛ dɔ y'a yɛrɛ yira a la sigo la k'a fɔ a ye ko: “Dawuda deen Yusufu, i kana siran ka Mariyamu furu, bari a ye kɔnɔ ta Nii Senuman barika la. A bɛna dencɛ wolo, i k'a tɔgɔ la ko Yezu, bari ale le bɛn'a ka mɔgɔw kisi u ka kojuguw tɔɔrɔ ma.” O koow bɛɛ kɛra ten janko kira tun ye Matigi ka kuma min fɔ, o ka kɛ. A tun y'a fɔ ko: “Sunguru dɔ bɛna kɔnɔ ta ka dencɛ wolo. O deen nin tɔgɔ bɛna la ko Emanuwɛli, o kɔrɔ ko Ala b'an cɛma.” Yusufu kununna tuma min na, Matigi ka mɛlɛkɛ tun ye min fɔ a ye, a y'o kɛ. A ye Mariyamu furu siri. Nga, u ma jɛn fɔɔ Mariyamu nana jigi dencɛ la. Yusufu ye o deen nin tɔgɔ la ko Yezu. Yezu wolola Bɛtilehɛmu, Zuda mara la. O waati la, Erɔdi tun ye o yɔrɔ masacɛ ye. A wolola minkɛ, lɔnnikɛla dɔw bɔra kɔrɔn fɛ ka taa Zeruzalɛmu k'a koo nyininga ko: “Zuwifuw ka masacɛ min wolola sisan, o bɛ min? An nan'a bonya bari an y'a ka lolo ye k'an to kɔrɔn fɛ.” Masacɛ Erɔdi y'o mɛn tuma min na, ale ni Zeruzalɛmukaw bɛɛ kɔnɔnafilila. Erɔdi ye sarakalasebagaw kuntigiw ni sariya karamɔgɔw bɛɛ lajɛn k'u nyininga ko Ala ka Mɔgɔ wolomanin nin ka kan ka wolo min. U y'a jaabi ko: “A ka kan ka wolo Bɛtilehɛmu, Zude mara la, bari kira dɔ tun y'a sɛbɛn ko: ‘Bɛtilehɛmu min ye Zude mara dugubaw dɔ ye, kuntigi bɛna bɔ yen ka Isirayɛlidenw mara olu minw ye ne ka mɔgɔw ye.’ ” O kɔ, Erɔdi ye lɔnnikɛla nunu wele dogo la k'u nyininga ko: “Aw ye lolo nin ye waati jumɛn?” A ye sira d'u ma k'a fɔ u ye ko: “Aw ye taa Bɛtilehɛmu ka dennyɛnin yɔrɔ nyini ka nya. N'aw y'a ye, aw ye kɔsegi ka n'a fɔ ne ye janko ne fana ka ta'a bonya.” Masacɛ tilanna a ka kuma na tuma min na, u ye sira minɛ. K'u to taama na, u tun ye lolo min ye k'u to kɔrɔn fɛ, u y'o ye u nyafɛ tugu. Dennyɛnin tun bɛ yɔrɔ min na, lolo nin bilara u nyafɛ fɔɔ ka taa lɔ o yɔrɔ sanfɛ. U ye lolo nin ye tuma min na, u nisɔn diyara kosɛbɛ. U donna soo kɔnɔ, ka dennyɛnin n'a bamuso Mariyamu ye. U y'u kunbiri gwan ka deen bonya. O kɔ, u y'u ka minanw dayɛlɛ, ka sanu ni wusulan ani tulu kasa diman di deen ma. Ala y'a fɔ lɔnnikɛla nunu ye sigo la k'u kana segi ka taa bɔ Erɔdi kan. O la, u ye sira wɛrɛ ta ka taa u ka jamana na. Lɔnnikɛlaw taanin kɔ, Matigi ka mɛlɛkɛ dɔ y'a yɛrɛ yira Yusufu la sigo la. A y'a fɔ Yusufu ye ko a ka wili ka boli ka taa ni deen n'a baa ye Ezipiti jamana na, bari Erɔdi bɛna deen yɔrɔ nyini ko a b'a faga. Ko a ka to o yɔrɔ la fɔɔ n'ale ka kuma sera a ma tuma min na. Yusufu wilila o suu nin yɛrɛ la ka taa ni deen n'a baa ye Ezipiti jamana na. U tora yen fɔɔ Erɔdi nana sa. O koow kɛra janko kira tun ye Matigi ka kuma min fɔ, o ka kɛ. A tun y'a fɔ ko: “Ne ye n dencɛ wele ka bɔ Ezipiti jamana na.” Erɔdi y'a lɔn tuma min na ko lɔnnikɛlaw y'ale janfa, a dimina kosɛbɛ. A y'a ka sɔlidasiw ci Bɛtilehɛmu n'a dafɛ duguw la, ka deen cɛmanw bɛɛ faga minw bɛɛ sii ma tɛmɛ saan fila kan, bari a tun y'a jati ko deen sii ma tɛmɛ saan fila kan, ka kɛnyɛ ni lɔnnikɛlaw ka fɔta ye. O tuma na, kira Zeremi tun ye min fɔ, o kɛra. A tun y'a fɔ ko: “Kulekan bɔra Arama. Kasikan ni mankan caaman lo. Arasɛli le bɛ kasira bari a deenw sara. A t'a fɛ ka je bari a ka deenw banna.” Erɔdi sanin kɔ, ka Yusufu to Ezipiti, Matigi ka mɛlɛkɛ dɔ y'a yɛrɛ yira a la sigo la, k'a fɔ a ye ko a ka wili ka segi ni deen n'a bamuso ye Isirayɛli jamana na, bari mɔgɔ minw tun b'a fɛ ka deen faga, olu banna. O la, a wilila ka taa ni deen n'a bamuso ye Isirayɛli jamana na. Nga, a y'a mɛn minkɛ ko Arikelayusi kɛra masa ye Zude mara la a facɛ Erɔdi nɔɔ na, a siranna, a ma sɔn ka taa sigi yen. Ala y'a fɔ Yusufu ye sigo la ko a ka taa Galile mara la. O la, a taara yen, ka taa sigi dugu dɔ la, min tɔgɔ ko Nazarɛti. O kɛra ten janko kiraw tun ye min fɔ, o ka kɛ. U tun y'a fɔ ko: “U bɛn'a wele ko Nazarɛtika.” O waati la, Zan batizelikɛla tun bɛ waajuli kɛ Zude kongo kɔnɔ. A tun b'a fɔ mɔgɔw ye ko: “Aw ye nimisa ka faran aw ka kojuguw la, bari Sankolo tigi ka masaya waati surunyana.” Kira Ezayi tun ye mɔgɔ min koo fɔ ko: “Mɔgɔ dɔ bɛ pɛrɛnna kongo kɔnɔ ko: ‘Aw ka Matigi ka sira dilan k'a tilen,’ ” o ye Zan ye. Zan ka fani tun ye nyɔgɔmɛsi ye, a ka cɛsirilan tun ye golo ye, ani a tun b'a yɛrɛ balo ni tɔɔn ni lii ye. Mɔgɔw tun bɛ bɔ Zurudɛn baa daa la ani Zeruzalɛmu ni Zude mara faan bɛɛ la ka taa Zan sɛgɛrɛ. U tun ye kojugu minw kɛ, u tun b'olu fɔ kɛnɛ kan, o kɔ, Zan tun b'u batize Zurudɛn baji la. Zan y'a ye ko Farizinyɛ caaman ni Sadusenyɛ caaman bɛ nana batize ale fɛ minkɛ, a y'a fɔ u ye ko: “Aw fɔnfɔnnidenw, jon y'aw lasɔmi ko aw ka boli Ala ka kiti nata nya? Aw ka kɛwalinyumanw kɛ k'a yira ko aw nimisara ka faran aw ka kojuguw la. Aw kan'a fɔ aw yɛrɛ kɔnɔ ko Ala bɛna aw kisi bari Ibrayima ye aw faa ye. Ne b'a fɔ aw ye ko Ala bɛ se ka kabakuru nunu yɛlɛma k'u kɛ Ibrayima deenw ye. Jende labɛnnin lo yiriw tigɛli kama. Yiri o yiri tɛ dennyuman kɛ, o bɛɛ bɛna tigɛ ka fili tasuma na. “Ne b'aw batize ni jii ye k'a yira ko aw nimisara ka faran aw ka kojuguw la. Nga, min bɛna na ne kɔ, o ka sebagaya ka bon ni ne ta ye. K'a ka sanbara bɔ a seen na, ne kuun ka dɔgɔ o ma. Ale bɛna aw batize ni Nii Senuman ni tasuma ye. A ka sumanfiyɛminan b'a bolo. A bɛn'a ka suman gosinin fiyɛ k'a kisɛ don a ka bondo kɔnɔ k'a nyaga jɛni tasuma fagabali la.” O tuma na, Yezu bɔra Galile mara la ka taa Zan sɛgɛrɛ Zurudɛn baa daa la ko a k'ale batize. Zan tun b'a fɛ ka ban, o la, a y'a fɔ Yezu ye ko: “E lo ka kan ka ne batize. E do nana ne sɛgɛrɛ ko ne k'i batize cogo di?” Yezu y'a fɔ a ye ko: “A to a ka kɛ ten fɔlɔ, bari a bɛnnin lo an ka Ala ka kuma bɛɛ labato.” Zan sɔrɔla ka sɔn. Yezu batizenin kɔ, a bɔra jii la. O yɔrɔnin bɛ sankolo dayɛlɛla. Yezu ye Ala Nii jigitɔ ye a yɛrɛ kan i n'a fɔ tubanin bɛ cogo min na. Kumakan dɔ bɔra sankolo la k'a fɔ ko: “Nin ye ne Dencɛ ye. A koo ka di ne ye haali. A diyara ne ye, n y'a woloma.” O kɔ, Nii Senuman y'a to Yezu taara kongo kɔnɔ janko Sutana k'a nigɛ. Yezu ye tile bi naani ni suu bi naani kɛ a ma dumuni kɛ, kɔngɔ y'a minɛ. Sutana gwɛrɛla a la k'a fɔ a ye ko: “N'i ye Ala Deen ye, a fɔ ko kabakuru nunu ka yɛlɛma ka kɛ buru ye.” Yezu y'a jaabi ko: “A fɔra Ala ka kuma na ko: ‘Mɔgɔ tɛna balo ni dumunifɛn dama ye, a bɛ balo ni Ala ka kuma fana ye.’ ” O kɔ, Zeruzalɛmu min ye dugu senuman ye, Sutana taara n'a ye o kɔnɔ k'a bila Alabatosoba kuun na k'a fɔ a ye ko: “N'i ye Ala Dencɛ ye, pan ka cun bari a fɔra Ala ka kuma na ko: ‘Ala bɛn'a fɔ a ka mɛlɛkɛw ye ko u k'i ta u bolo la janko i seen kana mandimi kabakuru la.’ ” Yezu y'a fɔ a ye ko: “A fɔra Ala ka kuma na fana ko: ‘I kana i Matigi Ala kɔrɔbɔ.’ ” O kɔ, Sutana taara n'a ye kulu jamanjan dɔ kan ka dinyɛ n'a kɔnɔnafɛnw bɛɛ yira a la, k'a fɔ a ye ko: “N'i y'i kunbiri gwan ne kɔrɔ ka ne bato, ne bɛna nunu bɛɛ d'i ma.” Yezu y'a fɔ a ye ko: “Taa ka bɔ yan Sutana, bari a fɔra Ala ka kuma na ko: ‘E k'i Matigi Ala bato k'ale kelenpe sago kɛ.’ ” O tuma na, Sutana taara k'a to yen. Mɛlɛkɛ dɔw nan'a mako nya. Yezu y'a mɛn tuma min na ko Zan donna kaso la, a taara Galile mara la. Nga a ma sigi Nazarɛti, a taara sigi Kafaranamu Galile baa daa la Zabulɔn ni Nɛfutali mara la. A taara sigi o yɔrɔ la janko kira Ezayi ye min fɔ, o ka kɛ. A tun ko: “Zabulɔn ni Nɛfutali mara mɔgɔw, kɔgɔji faan mara mɔgɔw, Zurudɛn baa kɔfɛ mara mɔgɔw Galile mara lonanw, jama min siginin bɛ dibi la, yeelenba bɔra u ye. Alalɔnbali minw siginin bɛ dibiba la yeelen bɔra u ye.” Kabini o tuma, Yezu y'a daminɛ ka waajuli kɛ. A tun b'a fɔ mɔgɔw ye ko: “Aw ye nimisa ka faran aw ka kojuguw la bari Sankolo tigi ka masaya waati surunyana.” Yezu yaalayaalatɔ Galile baa daa la, a ye balimacɛ fila dɔ ye. Simɔn min tɔgɔ ko Piyɛri fana, a n'a dɔgɔcɛ Andere tun lo. U tun bɛ jɔɔ filila baji la bari u tun ye mɔnikɛlaw ye. Yezu y'a fɔ u ye ko: “Aw ka tugu ne kɔ. Aw bɛ baa mɔ cogo min na, ne bɛna aw kɛ dinyɛ mɔlaw ye ten ka mɔgɔw sɔrɔ Ala ye.” O yɔrɔnin kelen, u y'u ka jɔɔw to yen ka tugu a kɔ. A taara nyafɛ tugu, a ye balimacɛ fila wɛrɛ ye, olu tun ye Zebede ka deenw ye, Zaki n'a dɔgɔcɛ Zan. U tun b'u ka jɔɔw lalagara kurun kɔnɔ n'u facɛ Zebede ye. Yezu y'u wele. O yɔrɔnin bɛ, u ye kurun n'u facɛ to yen ka tugu Yezu kɔ. Yezu tun bɛ Galile mara bɛɛ yaala ka mɔgɔw kalan u ka Alabatosow kɔnɔ. A tun bɛ sankolo tigi ka masaya kibaru diman fɔ u ye. A tun bɛ banabagatɔ sifa bɛɛ kɛnɛya. Yezu tɔgɔ bɔra u ka mara bɛɛ la fɔɔ ka taa se Siri jamana na. O la, mɔgɔw tun bɛ ta'a sɛgɛrɛ n'u ka banabagatɔw bɛɛ ye: jinatɔw, ni kirikirimasinyɛtɔw ani nanbaranw tun bɛ yen, Yezu tun b'u kɛnɛya. Jamaba tugura Yezu nɔɔ fɛ. U dɔw bɔra Galile mara la, dɔw bɔra Dugu Tan mara la, dɔw fana bɔra Zude mara la. Zurudɛn baa kɔfɛ mɔgɔw ni Zeruzalɛmukaw tun bɛ yen fana. Yezu ye jama ye minkɛ, a yɛlɛla kulu kan ka sigi. A ka kalandenw gwɛrɛla a la. A y'a daminɛ k'u kalan. A ko: “Mɔgɔ minw b'a lɔn k'u mako bɛ Ala la, olu ye dubadenw ye, bari sankolo tigi ye u ka masa ye. Mɔgɔ minw bɛ kasira, olu ye dubadenw ye, bari Ala bɛna u dusu saalon. Mɔgɔ minw sabalinin lo, olu ye dubadenw ye, bari u bɛna dugukolo tɔnɔ sɔrɔ. Ala sago kɛli nigɛ bɛ minw na i n'a fɔ kɔngɔ ni minnɔgɔ, olu ye dubadenw ye, bari Ala bɛna see d'u ma k'a kɛ. Mɔgɔ minw bɛ makari tɔw la, olu ye dubadenw ye, bari Ala bɛna makari u la. Mɔgɔ minw kɔnɔ gwɛnin lo, olu ye dubadenw ye, bari u bɛna Ala ye. Hɛrɛnyinibagaw ye dubadenw ye, bari u bɛna wele ko Ala deenw. U bɛ minw tɔɔrɔ u ka tilenninya kɔsɔn, olu ye dubadenw ye, bari sankolo tigi ye u ka masa ye. “Ni mɔgɔw b'aw nɛni, k'aw tɔɔrɔ, ka galon la aw kan ko aw bɛ kojugu sifa bɛɛ kɛ, bari aw ye ne ka kalandenw ye, o tuma na, aw ye dubadenw ye. Aw ka nisɔndiya kosɛbɛ, bari aw bɛna tɔnɔba sɔrɔ sankolo la. Kira minw tɛmɛna aw nya, u ye olu fana tɔɔrɔ ten. “Aw kɛra dinyɛ ka kɔgɔ ye. Nga ni kɔgɔ ka timiya bɔra a la, a bɛ mun nya tugu? A tɛ foyi nya tugu. A ka nyi ka fili le, mɔgɔw ka taama a kan. Aw kɛra i n'a fɔ yeelen dinyɛ kɔnɔ. Dugu min siginin bɛ kulu kan, o tɛ se ka dogo. Mɔgɔ si tɛ lanpan mana k'a bila daga jukɔrɔ, nga a b'a bila fɛɛn dɔ kan janko a ka yeelen bɔ soo kɔnɔ mɔgɔw bɛɛ ye. Aw ka kɛwalinyumanw kɛ ka yeelen bɔ mɔgɔw ye ten, waasa u ka aw sankolo la Faa bonya. “Sariya minw sigira aw ye Musa ka waati la, aw kan'a miiri ko ne nana olu bɔ yen, ani ka kiraw ka kuma cɛn. Nga ne nana janko u tun y'a fɔ ko koo minw bɛna kɛ, olu ka kɛ. Tinyɛ na, ne b'a fɔ aw ye ko ka sankolo ni dugukolo to yen, Ala ye sariya minw sigi, foyi tɛna bɔ u la, hali kuma kelen tɛna yɛlɛma u la, a bɛɛ ka kan ka labato fɔɔ a bɛɛ ka kɛ. O le y'a to, sariya minw sigira, min koo ka nɔgɔ u bɛɛ ye, ni mɔgɔ min t'o labato, n'a b'a fɔ mɔgɔw ye k'u kan'a labato, o tigi tɛna jati mɔgɔba ye sankolo tigi nyakɔrɔ. Nga, ni mɔgɔ min b'o sariyaw labato, n'a b'a fɔ mɔgɔw ye k'u k'o labato, o tigi bɛna jati mɔgɔba ye sankolo tigi nyakɔrɔ. Ne b'a fɔ aw ye ko ni aw ka tilenninya ma tɛmɛ sariya karamɔgɔw ni Farizinyɛw ta kan, aw tɛna se ka don arijana na fewu. “Aw b'a lɔn ko a fɔra an faaw ye ko: ‘I kana mɔgɔ faga,’ ko mɔgɔfagala ka kan ka kiti. Ayiwa, ne b'a fɔ aw ye ko ni mɔgɔ o mɔgɔ dimina a balima kɔrɔ, o tigi ka kan ni kiti ye. Ni mɔgɔ min y'a balima nɛni ko naloman, o tigi fana ka kan ni kiti ye. Ni mɔgɔ min y'a balima nɛni ko fatɔ, o tigi ka kan ni jahanama tasuma ye. O kama, n'i b'i ka saraka bɔ Ala ye, n'i hakili jigira a la ko i balima dɔ diminin bɛ i kɔrɔ, i k'i ka saraka bila fɔlɔ ka taa yafa dali a fɛ. O kɔ, i ka segi k'i ka saraka bɔ. Ni koo dɔ bɛ e n'i balima dɔ cɛ, i ka banba k'o nyanabɔ janko a kana taa n'i ye faamaw fɛ, faamaw kana i di polisiw ma, olu kana i don kaso la. Tinyɛ na, ne b'a fɔ i ye ko i tɛna bɔ o kaso la n'e m'i ka juru nin bɛɛ sara. “Aw y'a mɛn, a fɔra ko: ‘I kana kakalaya kɛ.’ Ayiwa, ne b'a fɔ aw ye ko ni mɔgɔ o mɔgɔ ye muso filɛ k'a nyaa bɔ a fɛ, o tigi ye kakalaya kɛ a dusu la n'o muso ye ka ban. O la, n'i kinibolo nyaa bɛ kɛ sababu ye k'i don kojugu la, a wɔgɔbi ka fili yɔrɔjan. I ka bɔnɔ i farikolo yɔrɔ dɔ la, o ka fisa a bɛɛ dafanin ka don jahanama kɔnɔ. N'i kinibolo bɛ kɛ sababu ye k'i don kojugu la, a tigɛ ka fili yɔrɔjan. I ka bɔnɔ i farikolo yɔrɔ dɔ la, o ka fisa a bɛɛ dafanin ka don jahanama kɔnɔ. “A fɔra fana ko: ‘Ni cɛɛ min b'a fɛ k'a muso bila, a ka kan ka sɛbɛ di muso ma min b'a yira ko a banna a la.’ Nga, ne kɔni b'a fɔ aw ye ko ni mɔgɔ o mɔgɔ y'a ka muso bila ni kakalaya kama tɛ, o tigi b'a ka muso bila kakalaya la. Cɛɛ min y'a ka muso bila, ni cɛɛ wɛrɛ y'o muso nin furu, o tigi bɛ kakalaya kɛ. “Aw y'a mɛn fana, a fɔra an faaw ye ko: ‘I ka kɛ kantigi ye i ka fɔtaw bɛɛ la, n'i y'i daa di Ala ma koo min na, i ka banba k'o kɛ.’ Ayiwa, ne b'a fɔ aw ye ko aw kana kali fewu. Aw kana kali sankolo la, bari Ala siginin bɛ masaya la o yɔrɔ la. Aw kana kali dugukolo la bari o ye Ala seen bilayɔrɔ ye. Aw kana kali Zeruzalɛmu na bari o ye masaba Ala ka dugu ye. I kana kali i kungolo fana na bari i tɛ se k'i kunsigi deen kelen gwɛya walima k'a fin. Aw ka jaabili ka kɛ ɔnhɔn ye, walima ɔn ɔn ye. Ni dɔ farala o kan, o bɔra Sutana fɛ. “Aw y'a mɛn, a fɔra ko: ‘N'i ye mɔgɔ dɔ nyaa ci, u ka kan k'i fana ta ci. N'i ye dɔ nyiin kari, u ka kan k'i fana ta kari.’ Ayiwa, ne b'a fɔ aw ye ko aw kana kojugu juru sara ni kojugu ye. Ni mɔgɔ dɔ y'i tulo kelen ci, i ka tɔ kelen nin sin a ma fana. Ni mɔgɔ dɔ b'a fɛ k'i wele faamaw fɛ janko a k'i ka funteni duloki bɔsi i la, i k'i ka nɛnɛ duloki fana d'a ma. Ni mɔgɔ dɔ y'i karaba ko i k'a ka doni nyun ka kilo kelen nyɔgɔn kɛ n'a ye, i ka kilo fila nyɔgɔn kɛ n'a ye. Ni mɔgɔ o mɔgɔ ye fɛɛn dɔ dali i fɛ, i k'o d'a ma. Ni mɔgɔ dɔ nana fɛɛn dɔndɔ i fɛ, i kana ban. “Aw y'a mɛn, a fɔra ko: ‘I ka i nyiin kanu k'i jugu kɔniya.’ Ayiwa, ne b'a fɔ aw ye ko aw ka aw juguw kanu ka Ala dali aw tɔɔrɔbagaw ye. Aw k'o kɛ janko aw ka kɛ aw sankolo la Faa deenw ye, bari ale bɛ tile bɔ mɔgɔjuguw ni mɔgɔnyumanw ye, ka sanji di konyumankɛlaw ni kojugukɛlaw ma. N'aw b'aw nyiinw dɔrɔn kanu, aw bɛna mun tɔnɔ sɔrɔ o la? Hali wusuruminɛlaw tɛ o nyɔgɔn kɛ wa? N'aw b'aw balimaw dɔrɔn fo, aw bɛ mun koo kɛ ni tɔw t'a kɛ? Hali Alalɔnbaliw tɛ o nyɔgɔn kɛ wa? Aw ka kɛ mɔgɔnyumanw ye i n'a fɔ aw Faa min bɛ sankolo la. “Aw ka aw yɛrɛw kɔlɔsi. Aw kana aw ka Alasira taama kɛ tɔgɔnyini koo ye. N'o tɛ, aw Faa min bɛ sankolo la, o tɛna tɔnɔ d'aw ma. O la, n'i bɛ fɛɛn dɔ di dɛsɛbagatɔw ma, i kana buru fiyɛ i nyafɛ i n'a fɔ tɔgɔnyinilaw b'o kɛ cogo min na Alabatosow kɔnɔ, ani sira daaw la janko mɔgɔw k'u tando. Tinyɛ na, ne b'a fɔ aw ye ko olu y'u ka tɔnɔ sɔrɔ ka ban. E kɔni, n'i bɛ fɛɛn dɔ di dɛsɛbagatɔw ma, i kan'a to mɔgɔ si ka bɔ a kala ma. I k'a kɛ dogo la. I Faa Ala min bɛ kodogoninw ye, ale bɛna i sara. “N'aw bɛ Ala dali, aw kan'a kɛ i n'a fɔ tɔgɔnyinilaw b'a kɛ cogo min na. Ka lɔ Alabatosow kɔnɔ ani sira daaw la ka Ala dali, o le ka di u ye. U b'a kɛ ten janko mɔgɔw k'u ye. Tinyɛ na, ne b'a fɔ aw ye ko u y'u ka tɔnɔ sɔrɔ ka ban. E kɔni, n'i b'a fɛ ka Ala dali tuma min na, i ka don i ka soo kɔnɔ ka daa tugu. I Faa Ala min b'o yɔrɔdogonin na, i k'ale dali yen. I Faa Ala min bɛ kodogoninw ye, ale bɛna i sara. N'aw bɛ Ala dali tuma min na, aw kana segi kuma kelen kan sinyɛ caaman i n'a fɔ Alalɔnbaliw, bari olu bɛ miiri ko u ka kuma caaman le bɛn'a to Ala b'u jaabi. Aw kana olu ladege, bari aw mako bɛ fɛɛn minw na, aw Faa Ala bɛ olu lɔn sanni aw k'u dali a fɛ. “Aw ka kan ka Ala dali cogo min na, o filɛ: ‘An Faa min bɛ sankolo la, i tɔgɔ ka bonya. I ka kɛ an ka masa ye tuma bɛɛ. I sago ka kɛ dugukolo kan i n'a fɔ a bɛ kɛ sankolo la cogo min na. An ka bii dumuni di an ma. E ka yafa an ma i n'a fɔ an fana bɛ yafa an hakɛ tabagaw ma cogo min na. I kan'a to Sutana ka se an kɔrɔ, an tanga kojugu ma. Bari masaya ni sebagaya ani nɔɔrɔ y'i ta ye waati bɛɛ. Amiina.’ “N'aw bɛ yafa aw hakɛ tabagaw ma, aw Faa min bɛ sankolo la, ale fana bɛna yafa aw ma. Nga, n'aw tɛ yafa aw hakɛ tabagaw ma, aw Faa min bɛ sankolo la, ale fana tɛna yafa aw ma. “N'aw bɛ suun na tuma min na, aw kana aw nyaa kumu i n'a fɔ tɔgɔnyinilaw b'a kɛ cogo min na. Olu b'u nyaa kumu janko mɔgɔw k'a lɔn k'u bɛ suun na. Tinyɛ na, ne b'a fɔ aw ye k'u y'u ka tɔnɔ sɔrɔ ka ban. E kɔni, n'i bɛ suun na tuma min na, i k'i nyaa ko k'i kunsigi lalaga, janko mɔgɔw kan'a lɔn ko i bɛ suun na fɔɔ i Faa Ala min bɛ yɔrɔdogonin na. I Faa Ala min bɛ kodogoninw ye, o bɛna i sara. “Aw kana nafolo caaman lajɛn aw yɛrɛw ye dinyɛ nin kɔnɔ, bari bagabaga ni tumuw bɛ cɛnni kɛ, soonw fana bɛ daaw kari ka don ka fɛɛnw cɛ. Nga, aw ye nafolo caaman lajɛn aw yɛrɛw ye sankolo la. O yɔrɔ la, bagabaga ni tumuw tɛ se ka cɛnni kɛ yen, soonw fana tɛ se ka daa kari ka don. I ka nafolo bɛ yɔrɔ min na, i ka miiriya bɛ t'o yɔrɔ la fana. “Mɔgɔ nyaa kɛra i n'a fɔ a fari ka lanpan. N'i nyaa ma cɛn, i bɛ yeli kɛ. Nga, n'i nyaa cɛnna, i tɛ yeli kɛ, i bɛ to dibi la. Ayiwa, e min ye mɔgɔnyuman ye, n'e nana tilan ka kɛ mɔgɔjugu ye, o ye juguya daan ye. “Mɔgɔ si tɛ se ka baara kɛ kuntigi fila ye, bari a bɛna kelen kɔniya ka kelen kanu, walima a bɛna nɔrɔ kelen na k'a mako bɔ kelen na. O cogo la, aw tɛ se k'aw jigi la nafolo kan, ka baara kɛ Ala ye fana. “O le y'a to ne b'a fɔ aw ye ko aw kana jɔɔrɔ aw baloko la k'a fɔ ko aw bɛna mun dumu ka mun min? Aw kana jɔɔrɔ aw fɛɛrɛbɔko la fana k'a fɔ ko aw bɛna mun fani don? Aw nii koo man fisa ni dumuni koo ye wa? Farisogo koo man fisa ni fani koo ye wa? Aw ka kɔnɔw filɛ, u tɛ danni kɛ, u tɛ suman tigɛ. U tɛ suman don bondo kɔnɔ. Nga aw Faa min bɛ sankolo la, ale b'u balo. Aw man fisa ni kɔnɔw ye kosɛbɛ wa? Aw la, jon bɛ se ka tile kelen dama fara a sii kan hami fɛ? Mun y'a to aw bɛ jɔɔrɔ aw ka fɛɛrɛbɔko la? Binfeeren minw bɛ bɔ kongo kɔnɔ, aw ka olu wilicogo filɛ. U tɛ baara kɛ, u tɛ kɔɔri fana parata. O n'a ta bɛɛ, ne b'a fɔ aw ye ko masa Solomani n'a ka faamaya bɛɛ, a ma fani sɔrɔ min ka cɛnya ye feeren nunu ta bɔ. O biin min bɛ kongo kɔnɔ bii, ni tasuma bɛn'a jɛni sini, ni Ala b'a janto o la ten, a tɛna aw fɛɛrɛ bɔ ka tɛmɛ o kan kosɛbɛ wa? Mun na aw tɛ aw jigi la Ala kan? Aw kana jɔɔrɔ aw ka dumuni koo ni minnifɛn koo la, walima fani koo la. Alalɔnbaliw le b'o fɛɛnw nyinina tuma bɛɛ. Aw Faa min bɛ sankolo la, ale b'a lɔn ko aw mako b'o fɛɛnw bɛɛ la. Aw kɔni ka jija Alako la fɔlɔ, ani k'a sago kɛ. N'o kɛra, Ala bɛna fɛɛn tɔw bɛɛ d'aw ma. Aw kana jɔɔrɔ aw ka sini makoya koow la, bari aw ka sini makoya koow bɛna nyanabɔ sini. Loon o loon n'a kunko lo. “Aw kana tɔw kiti, janko Ala kana aw kiti. Aw bɛ tɔw kiti cogo min na, Ala bɛna aw kiti ten. Aw bɛ tɔw kiti k'u jalaki cogo min na, Ala fana bɛna aw kɛ ten. Kalafitini min b'i balima nyaa na, mun na i b'o filɛ k'a sɔrɔ lɔgɔkuru b'i ta la? I m'o lɔn? I bɛ se k'a fɔ i balima ye cogo di ko: ‘A to n bɛ kala nin bɔ i nyaa na’, k'a sɔrɔ lɔgɔkuru b'i ta la? Nanbaranmɔgɔ, lɔgɔkuru bɛ e min nyaa na, o bɔ fɔlɔ. N'i ye o kɛ, o tuma na, i bɛna yeli kɛ ka nya k'a sɔrɔ k'i balima ka kala nin bɔ. “Aw kana fɛɛn senuman di wuluw ma, n'o tɛ, u bɛna yɛlɛma k'aw cin. Aw kana aw ka fɛnnyumanw bila lɛɛw kɔrɔ, n'o tɛ, u bɛna na u dɔn k'u cɛn. “Aw k'aw ka makoyafɛn dali Ala fɛ, a bɛna o d'aw ma. Aw mako bɛ fɛɛn min na, aw k'o nyini, aw bɛn'a sɔrɔ. Aw ka daa kɔkɔ, daa bɛna yɛlɛ aw ye. Bari mɔgɔ o mɔgɔ man'a makoyafɛn dali Ala fɛ, Ala bɛna o di o tigi ma. Min mana a makoyafɛn nyini, o tigi b'o sɔrɔ. Daa bɛna yɛlɛ dakɔkɔbaga ye. Denfa jumɛn bɛ sɔn ka kabakuru d'a deen ma k'a sɔrɔ a ye buru le dali a fɛ? Walima n'a ye jigɛ dali a fɛ, n'a bɛna sɔn ka saa d'a ma? Aw minw ka jugu, n'aw bɛ sɔn ka fɛnnyumanw di aw ka deenw ma, aw Faa min bɛ arijana na, ale tɛna fɛnnyuman di a dalibagaw ma ka tɛmɛ aw ta kan wa? “Aw b'a fɛ mɔgɔ tɔw ka koo min kɛ aw ye, aw fana k'o nyɔgɔn kɛ u ye. O le fɔra sariya ni kiraw ka sɛbɛw kɔnɔ. “Aw ka sirafitini ta. Siraba kɔni taama ka di, nga a bɛ taa ni mɔgɔ ye halakiyɔrɔ la. Mɔgɔ caaman do b'o le ta. Aw ka sirafitini ta ka taa don ni dafitini ye, a taama kɔni ka gwɛlɛ, a taabagaw man ca, nga a bɛ taa ni mɔgɔ ye hɛrɛ yɔrɔ la. “Mɔgɔ minw bɛ galon tigɛ k'olu ye kiraw ye, aw k'aw yɛrɛw kɔlɔsi olu la. N'u bɛ na aw fɛ, u b'u yɛrɛw kɛ sagaw ye k'a sɔrɔ waraw lo. Aw bɛna u lɔn u ka kɛwaliw fɛ. Mɔgɔ tɛ pekun tigɛ; nɔniyiri kan. Toro fana tɛ sɔrɔ balansanyiri la. Yirinyuman deen le ka di, nga yirijugu ka deen man di. Yirinyuman tɛ se ka denjugu kɛ, yirijugu fana tɛ se ka dennyuman kɛ. Yiri o yiri tɛ dennyuman kɛ, u bɛna o tigɛ k'a fili tasuma na. O cogo la, mɔgɔ minw bɛ galon tigɛ k'olu ye kira ye, aw bɛna u lɔn u ka kɛwaliw fɛ. “Mɔgɔ minw bɛ ne wele ko ‘Matigi, Matigi,’ olu bɛɛ tɛna don arijana na, fɔɔ ne Faa min bɛ sankolo la, o sagokɛlaw. Ni Ala ka kitilon nana se, mɔgɔ caaman bɛn'a fɔ ne ye ko: ‘Matigi, an ye kiraya kɛ e tɔgɔ la, ka jinaw gwɛn ka bɔ mɔgɔw la e tɔgɔ la, ka kabako caaman kɛ e tɔgɔ la.’ O loon na, ne bɛn'a fɔ u ye ko: ‘Ne t'aw lɔn, aw ye taa ka bɔ ne kɔrɔ kojugukɛla nunu.’ “Ne ye kuma minw fɔ sisan, ni mɔgɔ min y'o labato, o tigi bɛ i n'a fɔ hakilitigi min y'a ka boon lɔ fara kan. Sanjiba nana ni fɔnyɔba ye, jii cayara, nga o si ma se ka boon nin ben, bari a juu siginin tun bɛ fara kan. Nga, mɔgɔ min b'o kuma mɛn, n'a t'o labato, o tigi bɛ i n'a fɔ naloman min y'a ka soo lɔ cɛncɛn kan. Sanjiba nana ni fɔnyɔba ye, jii cayara, boon benna. A mugumugura.” Yezu y'o kumaw fɔ ka ban tuma min na, jama bɛɛ kabakoyara a ka mɔgɔ kalancogo la, bari a tun m'u kalan i n'a fɔ sariya karamɔgɔw bɛ to k'u kalan cogo min na. Nga a tun b'u kalan i n'a fɔ fanga bɛ mɔgɔ min bolo. Yezu jigira ka bɔ kulu kan tuma min na, jamaba tugura a kɔ. O kɔ, kunatɔcɛ dɔ gwɛrɛla, k'a kunbiri gwan Yezu kɔrɔ k'a fɔ a ye ko: “Matigi, n'i sɔnna, i bɛ se ka n kɛnɛya.” Yezu magara a la, k'a fɔ a ye ko: “N sɔnna ko i ka kɛnɛya. O yɔrɔnin bɛ, cɛɛ kɛnɛyara.” Nga Yezu y'a fɔ a ye ko: “I yɛrɛ kɔlɔsi, i kan'a fɔ mɔgɔ si ye ko ne le y'i kɛnɛya dɛ. Nga, taa i yɛrɛ yira sarakalasebaga la, Musa tun ye saraka min koo fɔ kunatɔ ka kɛnɛya koo la, i k'o bɔ k'a yira mɔgɔw la ko i kɛnɛyara.” Yezu donna Kafaranamu dugu kɔnɔ tuma min na, sɔlidasi kuntigi do gwɛrɛla a la ka dɛmɛ nyini a fɛ ko: “Matigi, n ka baaraden lanin bɛ soo, a man kɛnɛ, murukubana b'a la. A tɔɔrɔnin lo kosɛbɛ.” Yezu y'a fɔ a ye ko ale bɛna ta'a kɛnɛya. Nga sɔlidasi kuntigi y'a fɔ Yezu ye ko: “Matigi, ne kuun ka dɔgɔ i ka taa ne ka soo. I ka kuma kelen fɔ dɔrɔn, o bɛna ne ka baaraden kɛnɛya. Kuntigi dɔw bɛ ne fɛ, ne fana bɛ sɔlidasi dɔw kuun na. Ne bɛ se k'a fɔ kelen ye ko: ‘Taa yan fɛ’, a bɛ taa. K'a fɔ dɔ wɛrɛ fana ye: ‘Na yan’, a bɛ na. K'a fɔ n ka jɔɔn ye ko: ‘Nin kɛ ten’, a b'o kɛ.” Yezu y'o kuma mɛn tuma min na, a kabakoyara. A y'a fɔ a nɔfɛmɔgɔw ye ko: “Tinyɛ na, ne b'a fɔ aw ye ko ne ma mɔgɔ si ye Isirayɛlidenw fɛ, min lara ne la ten fɔlɔ. Ne b'a fɔ aw ye ko mɔgɔ caaman bɛna bɔ kɔrɔn ni tileben fɛ ka taa sigi Ibrayima ni Isiyaka ani Yakuba fɛ sankolo tigi ka masaya yɔrɔ la ka dumuni kɛ. Nga mɔgɔ minw tun ka kan ka taa sankolo tigi ka masaya yɔrɔ la, olu bɛna to dibi la kɛnɛma. U bɛna kasi yen k'a fɔ ko n'u tun y'a lɔn.” O kɔ, Yezu y'a fɔ sɔlidasi kuntigi nin ye ko: “I lara ne la minkɛ, i bɛ fɛɛn min fɛ, o ka kɛ i ye. Taa soo.” Yezu y'o kuma nin fɔ tuma min na, sɔlidasi kuntigi ka baaraden kɛnɛyara o waati yɛrɛ la. O kɔ, Yezu taara Piyɛri ka soo. A taara Piyɛri biranmuso lanin sɔrɔ farigwan bolo. Yezu magara a bolo la, a ka farigwan banna. A wilila ka dumuni tobi a ye. Wulafɛ, mɔgɔw taara ni jinatɔ caaman ye Yezu fɛ. A ye jinaw gwɛn ka bɔ u la ni kumakan kelen ye ka banabagatɔ dɔ wɛrɛw kɛnɛya. O kɛra janko kira Ezayi tun ye kuma min fɔ, o ka kɛ. A tun ko: “A y'an ka bana n'an ka sɛgɛn ban.” Yezu y'a ye ko jamaba y'ale lamini minkɛ, a y'a fɔ a ka kalandenw ye ko: “An ka taa baa kɔ.” Sanni u ka taa, sariya karamɔgɔ dɔ gwɛrɛla a la k'a fɔ a ye ko: “Karamɔgɔ, i mana taa yɔrɔ o yɔrɔ, ne bɛna tugu i kɔ.” Yezu y'a fɔ a ye ko: “Dingɛ bɛ kongowuluw fɛ, nyaga bɛ kɔnɔw fɛ, nga layɔrɔ tɛ Mɔgɔ Dencɛ tɔgɔ la.” A ka kalanden dɔ wɛrɛ fana y'a fɔ a ye ko: “Matigi, sira di n ma fɔlɔ n bɛ taa n facɛ suu don ka na.” Yezu y'a fɔ a ye ko: “A to mɔgɔ saninw bɛ taa u ka suu don. E ka tugu ne kɔ.” Yezu n'a ka kalandenw donna kurun kɔnɔ ka taa. O tuma na, fɔnyɔba wilila fɔɔ kurun tun bɛ nyini ka tunu. O y'a sɔrɔ Yezu tun bɛ sinɔgɔra. A ka kalandenw y'a kunun k'a fɔ a ye ko: “Matigi, an bɛna sa jii la, an kisi.” Yezu y'a fɔ u ye ko: “Mun na aw bɛ siran ten? Jigitan nunu!” O kɔ, a wilila ka sɔngɔ fɔnyɔ ni baji kunna. Yɔrɔ malara tɔntɔntɔn. U bɛɛ kabakoyara. U tora k'a fɔ nyɔgɔn ye ko: “Cɛɛ nin ye mɔgɔ sifa jumɛn ye? Hali fɔnyɔ ni baji b'a ka kuma labato.” Yezu sera baa kɔ, Gadare mara la tuma min na, jinatɔ fila bɔra kaburutu la ka ta'a kunbɛn. U tun ka fari kosɛbɛ. Mɔgɔ si tun tɛ se ka tɛmɛ n'o yɔrɔ sira ye. U y'a daminɛ ka pɛrɛn ko: “Mun bɛ an ni e cɛ Ala Dencɛ? I nana an tɔɔrɔ sanni an tɔɔrɔwaati ka se wa?” O y'a sɔrɔ lɛkuluba dɔ tun bɛ dumuni kɛra o yɔrɔ masurun na. Jina nunu ye Yezu dali ko: “N'i b'an gwɛn, a to an ka taa don lɛɛ nunu na.” Yezu y'a fɔ u ye k'u ka taa don lɛɛw la. U bɔra cɛɛ fila nunu na ka taa don lɛɛw la. Lɛkulu bɛɛ girinna ka jigi kulu jigijigijugu fɛ ka taa don baji la. U bɛɛ sara yen. Mɔgɔ minw tun bɛ lɛɛw kɔlɔsira, olu bolila ka taa dugu kɔnɔ ka lɛɛw, ni jinatɔkɔrɔ fila nunu ka koo bɛɛ lakali mɔgɔw ye. Dugu mɔgɔw bɛɛ bɔra ka taa Yezu sɛgɛrɛ. U sera a fɛ tuma min na, u y'a dali k'a ka sabali ka taa ka bɔ olu ka mara la. Yezu donna kurun kɔnɔ ka segi ka baa tigɛ ka ta'a ka dugu la. O yɔrɔ la, mɔgɔ dɔw taara Yezu fɛ ni muruku dɔ ye dilan kan. Yezu y'a ye k'o mɔgɔw lara ale la minkɛ, a y'a fɔ muruku nin ye ko: “N teri, kana i jigi tigɛ. Ne y'i ka kojuguw yafa.” O tuma na, sariya karamɔgɔ dɔw y'a daminɛ k'a fɔ u kɔnɔ ko: “Cɛɛ nin bɛ Ala tɔgɔ cɛn.” Yezu y'u kɔnɔna ta lɔn minkɛ, a ko: “Mun na miiriyajugu b'aw kɔnɔ ten? K'a fɔ muruku ye ko: ‘I ka kojuguw yafara i ma’, walima k'a fɔ a ye ko: ‘Wili ka taama’, o kuma fila la, jumɛn fɔko ka nɔgɔ? Ayiwa, n b'a fɛ aw k'a lɔn ko see bɛ Mɔgɔ Dencɛ ye dinyɛ na ka mɔgɔw ka kojuguw yafa.” O la, a y'a fɔ muruku ye ko: “Wili k'i ka dilan ta ka taa soo.” Cɛɛ wilila ka taa soo. Jama y'o ye tuma min na, u siranna kosɛbɛ. U ye Ala tando bari ale le ye see di adamaden ma ka koo nin nyɔgɔn kɛ. Yezu bɔra o yɔrɔ la n'a bɛ taara nyafɛ. A ye cɛɛ dɔ siginin ye wusuruminɛlaw ka baarakɛyɔrɔ la, a tɔgɔ ko Matiyo. Yezu y'a fɔ a ye ko: “Tugu ne kɔ.” Matiyo wilila ka tugu a kɔ. O kɔ, Yezu taara Matiyo ka soo. K'u to dumuni na, wusuruminɛlaw ni kojugukɛla wɛrɛw nana sigi n'u bɛ dumuni kɛra ni Yezu n'a ka kalandenw ye. U tun ka ca. Farizinyɛw y'o ye tuma min na, u y'a fɔ a ka kalandenw ye ko: “Mun na aw ka karamɔgɔ bɛ dumuni kɛ ni wusuruminɛlaw ani kojugukɛla wɛrɛw ye?” Yezu y'u ka kuma mɛn minkɛ, a y'a fɔ ko: “Mɔgɔ minw ka kɛnɛ, olu mako tɛ furakɛla la, banabagatɔw le mako b'a la. Aw ye taa miiri Ala ka kuma nin kɔrɔ la. A tun y'a fɔ ko: ‘Ne b'a fɛ ko mɔgɔw ka makari nyɔgɔn na le, nga n tɛ u ka sɔnnifɛnw fɛ,’ bari ne ma na mɔgɔnyumanw wele, nga ne nana kojugukɛlaw wele.” O kɔ, Zan batizelikɛla ka kalandenw gwɛrɛla Yezu la k'a nyininga ko: “Mun na anw ni Farizinyɛw bɛ to ka suun don, k'a sɔrɔ e ka kalandenw tɛ suun don?” A y'u jaabi ko: “Aw b'a lɔn ko kɔnyɔcɛ teriw nyaa tɛ se ka sisi k'u ni kɔnyɔcɛ to nyɔgɔn fɛ. Nga, loon dɔ bɛna se, kɔnyɔcɛ bɛna bɔsi u la. U bɛna suun don o tuma na. N'i y'i ka fani kɔrɔman bari ni fanikura kunkurun ye, kunkurunkura nin bɛna fani kɔrɔman sama k'a faran. A faranyɔrɔ bɛna bonya ni fɔlɔta nin ye. O cogo kelen na, mɔgɔ si tɛ duvɛnkɛnɛ kɛ foroko kɔrɔman na. Ni mɔgɔ min y'o fana kɛ, a ka foroko bɛna faran duvɛn kɔgɔtuma na. A bɛna bɔnɔ a ka foroko, ni duvɛn na. Mɔgɔw bɛ duvɛnkɛnɛ kɛ forokokura le kɔnɔ. N'u y'a kɛ ten, a tɛ bɔnɔ a si la.” Ka Yezu to o kuma nunu na, Zuwifuw ka kuntigi dɔ nana a kunbiri gwan a kɔrɔ k'a fɔ a ye ko: “N denmuso banna sisan sisan. Nga, sabali ka na i bolo la a kan, a bɛna kunun.” Yezu n'a ka kalandenw wilila ka tugu a kɔ. O y'a sɔrɔ, muso dɔ tun bɛ yen, a ka koli tun b'a tɔɔrɔla kabini saan tan ni fila. Joli tun tɛ lɔ ka ye. A gwɛrɛla Yezu la a kɔfɛ ka maga a ka fani dakun na, bari a tun y'a fɔ a yɛrɛ kɔnɔ ko: “Ni n sera ka maga a ka fani dɔrɔn na, n bɛna kɛnɛya.” Yezu y'a nyaa yɛlɛma kɔfɛ ka muso nin ye. A y'a fɔ a ye ko: “N dɔgɔmuso, i jigi kana tigɛ. I kɛnɛyara ka ban bari i lara ne la.” O yɔrɔnin bɛ, muso nin kɛnɛyara. Yezu taara se Zuwifuw ka kuntigi nin ka soo tuma min na, a ye jamaba ye. Dɔw tun bɛ fɔli kɛra, dɔw tun bɛ kasira. A y'a fɔ u ye ko: “Aw ye bɔ yan, bari sungurunin nin ma sa, nga a bɛ sinɔgɔra le.” U yɛlɛla Yezu ma. U ye jama bɔ kɛnɛma tuma min na, Yezu donna ka suu bolo minɛ, a kununna. Mɔgɔw y'o koo lakali o yɔrɔ mara bɛɛ la. Yezu bɔra o yɔrɔ la n'a bɛ taara, finyɛntɔ fila wilila ka tugu a nɔɔ fɛ, n'u b'a fɔ ko: “Dawuda dencɛ, makari an na.” Yezu sera soo tuma min na, finyɛntɔ nunu gwɛrɛla a la. A y'u nyininga ko: “Aw lanin b'a la ko ne bɛ se k'aw nyaa yɛlɛ wa?” U y'a jaabi ko: “Ɔnhɔn Matigi, an lanin b'a la.” O kɔ, Yezu magara u nyaa na k'a fɔ ko: “Aw jigi b'a la ko ne bɛ se ka fɛɛn min kɛ aw ye, o ka kɛ aw ye.” U nyaa yɛlɛla. Yezu y'a gwɛlɛya u ma k'u kan'a fɔ mɔgɔ si ye ko ale le y'u nyaa yɛlɛ. Nga, u taara dɔrɔn, u y'a daminɛ ka Yezu koo fɔ mɔgɔw ye u ka mara bɛɛ la. U bɔra n'u bɛ taa, mɔgɔ dɔw nana ni bobo jinatɔ dɔ ye Yezu fɛ. Yezu ye jina gwɛn ka bɔ a la dɔrɔn, cɛɛ y'a daminɛ ka kuma. Jama bɛɛ kabakoyara, u tora k'a fɔ k'u ma deli ka nin nyɔgɔn ye Isirayɛli jamana na fɔlɔ. Nga Farizinyɛw y'a fɔ ko: “Jinaw ka kuntigi le bɛ see d'a ma ka jinaw gwɛn ka bɔ mɔgɔw la.” Yezu tun bɛ taa dugubaw ni dugudenninw na ka mɔgɔw kalan u ka Alabatosow kɔnɔ. A tun bɛ Sankolo tigi ka masaya koo fɔ a ka waajuli la, ani ka banabagatɔ sifa bɛɛ kɛnɛya. N'a ye jama ye, u hinɛ bɛ don a la, bari u sɛgɛnnin tun lo, u dusu kasinin tun lo fana. U tun kɛra i n'a fɔ sagaw, kɔlɔsibaga tɛ minw na. O le y'a to a y'a fɔ a ka kalandenw ye ko: “Suman tigɛta ka ca, nga baarakɛlaw man ca. Ala min ye sumantigi ye, aw k'o dali ko a ka baarakɛlaw ci ka ta'a ka suman tigɛ.” Yezu y'a ka kalanden tan ni fila wele. A ye see d'u ma ka jinaw gwɛn ka bɔ mɔgɔw la, ani ka banabagatɔ sifa bɛɛ kɛnɛya. A ye mɔgɔ tan ni fila minw kɛ cidenw ye, olu tɔgɔ filɛ: Ciden fɔlɔ tɔgɔ ko Simɔn, u b'a wele Piyɛri fana, n'ale dɔgɔcɛ Andere, Zebede ka dencɛ fila, Zaki n'a dɔgɔcɛ Zan, Filipi ni Baritelemi, Toma ni Matiyo wusuruminɛla, Tade ni Alife ka dencɛ Zaki, Simɔn Zelɔti ni Zuda Isikariyɔti min ye Yezu don a juguw bolo. Yezu y'o mɔgɔ tan ni fila ci tuma min na, a y'a fɔ u ye ko: “Aw kana taa siya wɛrɛw fɛ. Aw kana taa Samari mara dugu si la. Nga, Isirayɛliden minw bɛ i n'a fɔ sagatununinw, aw ka taa olu fɛ. N'aw taara, aw ye waajuli kɛ ko Sankolo tigi ka masaya waati surunyana. Aw ye banabagatɔw kɛnɛya, ka suuw kunun, ka kunatɔw kɛnɛya, ka jinaw gwɛn ka bɔ mɔgɔw la. Ne y'o koow kɛ see d'aw ma gwansan, o la, aw fana k'o kɛ mɔgɔw ye gwansan. “Aw kana taa ni sanu ni wari ye. Aw kana dugutaaminan ta, aw kana duloki filanan ta, aw kana sanbara fila ta, aw kana bere ta, bari baarakɛla ka kan n'a ka dumuni ye. N'aw sera dugu min kɔnɔ, duguba lo wo, dugudennin lo wo, mɔgɔ min sɔɔn ka nyi, aw y'o tigi yɔrɔ nyini ka jigi a fɛ. Aw ye to yen fɔɔ aw ka bɔ o dugu nin kɔnɔ. N'aw bɛna don luu min kɔnɔ, aw k'a fɔ ko Ala ka hɛrɛ kɛ o luu kɔnɔ mɔgɔw ye. N'u sɔnna ko aw ka jigi u fɛ, aw ye duba min kɛ u ye, u bɛna o hɛrɛ sɔrɔ. Nga n'u banna ko aw tɛ jigi u fɛ, aw tun ye duba min kɛ u ye, u tɛna o hɛrɛ sɔrɔ. Ni luu min mɔgɔw ma sɔn aw ka jigi u fɛ, walima ni dugu mɔgɔ minw banna k'aw lamɛn, aw bɔtɔ yen, hali u ka buguri min nɔrɔla aw seen na, aw k'o furan k'o to yen. O kɔ, aw ye bɔ yen. Tinyɛ na, ne b'a fɔ aw ye, ko Ala bɛna dinyɛ mɔgɔw kiti loon min na, o dugu mɔgɔ nunu ka tɔɔrɔ bɛna tɛmɛ Sodɔmukaw ni Gomɔrikaw ta kan. “Ayiwa, ne b'aw ci i n'a fɔ sagaw waraw cɛma. O la, aw ka kɛ yɛrɛkɔlɔsibagaw ye i n'a fɔ saa, aw ka koo ka nɔgɔya i n'a fɔ jɛnɛtugan. “Aw k'aw yɛrɛw kɔlɔsi bari mɔgɔw bɛna aw minɛ ka taa n'aw ye kititigɛlaw fɛ. U bɛna aw bugɔ ni golokami ye u ka Alabatosow kɔnɔ. U bɛna aw minɛ ka taa n'aw ye faamaw ni masaw fɛ bari aw ye ne ka kalandenw ye. O bɛna kɛ sababu ye aw bɛna ne koo fɔ u ye, ani siya wɛrɛw ye. N'u taara n'aw ye kititigɛlaw fɛ, aw kana jɔɔrɔ aw ka kuma fɔta, n'a fɔcogo fana na. Ni kuma sera aw ma tuma min na, aw ka kan ka kuma min fɔ, Ala bɛna o don aw daa la, bari aw bɛna kuma min fɔ, o tɛna kɛ aw yɛrɛ ka kuma ye, nga Faa Ala ka Nii Senuman le bɛna o don aw daa la. Mɔgɔ dɔw bɛna kɛ sababu ye u balimaw bɛ faga. Dɔw bɛna u deenw faga. Deen dɔw bɛna wili u wolobagaw kama k'u faga. Mɔgɔ bɛɛ bɛna aw kɔniya ne kɔsɔn. Nga ni mɔgɔ min munyuna fɔɔ ka se a laban ma, o tigi le bɛna kisi. Ni mɔgɔw bɛ aw tɔɔrɔ dugu dɔ la, aw ye boli ka taa dugu wɛrɛ la. Tinyɛ na, ne b'a fɔ aw ye ko aw tɛna Isirayɛli duguw bɛɛ kɛ nyɔgɔn kan ka ban ni Mɔgɔ Dencɛ ma segi ka na. Kalanden si man fisa n'a ka karamɔgɔ ye. Baaraden si fana man fisa n'a ka kuntigi ye. Kalanden ka kɛ i n'a fɔ a ka karamɔgɔ, baaraden fana ka kɛ i n'a fɔ a ka kuntigi. Ni mɔgɔw ye sotigi yɛrɛ wele ko Sutana, u bɛna tɔgɔ minw la a ka somɔgɔw la, olu bɛna juguya. “Aw kana siran mɔgɔ si nya. Fɛndogonin si tɛ yen, min tɛna bɔ kɛnɛ kan. Gundo si tɛ yen, min tɛna mɛn. Ni n ye min fɔ aw ye dogo la, aw k'o fɔ kɛnɛ kan. N'u ye min; nunu;nunu aw tulo kɔrɔ, aw k'o wango la. Mɔgɔ minw bɛ se k'aw faga n'u tɛ se ka foyi kɛ aw la lahara, aw kana siran olu nya. Ala min bɛ se k'aw faga ka tila k'aw don jahanama na, aw ka siran ale dɔrɔn nya. Kɔnɔnin fila bɛ se ka sɔrɔ dɔrɔmɛ kelen. Nga, o n'a ta bɛɛ, u si tɛ sa n'aw Faa Ala ma sɔn. Aw kunsigi yɛrɛ, Ala b'o bɛɛ daa lɔn. O kama, aw kana siran. Aw ka fisa ni kɔnɔnin caaman ye Ala nyakɔrɔ. “Ni mɔgɔ min y'a fɔ mɔgɔw nyana ko ale ye ne ka mɔgɔ ye, ne fana bɛn'a fɔ n Faa Ala nyana k'o tigi ye ne ka mɔgɔ ye. Nga, ni mɔgɔ min banna ne la mɔgɔw nyana, ne fana bɛna ban o tigi la n Faa Ala nyana. “Aw kana miiri ko ne nana ni hɛrɛ ye dinyɛ na. Ne ma na ni hɛrɛ ye, nga ne nana kɛlɛ le don mɔgɔ ni nyɔgɔn cɛ. Ne nana ka dencɛ n'a facɛ bila nyɔgɔn na, ka denmuso n'a bamuso bila nyɔgɔn na, ka furumuso n'a biranmuso bila nyɔgɔn na. I ka mɔgɔw bɛna kɛ i juguw ye. “Ni mɔgɔ min b'a facɛ walima a bamuso kanu ka tɛmɛ ne kan, o tigi tɛ se ka kɛ ne ka kalanden ye. Mɔgɔ min b'a ka dencɛ walima a ka denmuso kanu ka tɛmɛ ne kan, o tigi tɛ se ka kɛ ne ka kalanden ye. Ni mɔgɔ min tɛ sɔn ka tɔɔrɔ munyu ka tugu ne kɔ, o tigi tɛ se ka kɛ ne ka kalanden ye. Ni mɔgɔ min b'a fɛ ka koo bɛɛ kɛ waasa a kana sa, o tigi bɛna sa. Nga, ni min sara ne kɔsɔn, o tigi bɛna sini hɛrɛ sɔrɔ. “Ni mɔgɔ min ye aw minɛ ka nya, o tigi ye ne minɛ ka nya. Mɔgɔ min ye ne minɛ ka nya, o tigi ye ne cibaga fana minɛ ka nya. Ni mɔgɔ min ye kira minɛ ka nya, a ka kiraya kɔsɔn, o tigi bɛna kira ka sara nyɔgɔn sɔrɔ. Ni mɔgɔ min ye mɔgɔnyuman minɛ ka nya, a ka nyumanya kɔsɔn, o tigi bɛna mɔgɔnyuman ka sara nyɔgɔn sɔrɔ. Tinyɛ na, ne b'a fɔ aw ye ko ne ka kalanden minw lɔyɔrɔ ka dɔgɔ mɔgɔw nyana, ni min ye jii suma di olu dɔ ma, bari ne ka kalanden lo, hali ni filen nyaa kelen lo, o tigi bɛn'a tɔnɔ sɔrɔ.” Yezu y'o ladili di a ka kalanden tan ni fila ma ka ban tuma min na, a bɔra yen ka taa mɔgɔw waaju k'u kalan gɛrɛfɛ duguw la. O waati la, Zan batizelikɛla tun bɛ kaso la. A ye Yezu ka koo kɛtaw kibaru mɛn minkɛ, a y'a ka kalanden dɔw ci, k'a nyininga ko: “Ala ka Mɔgɔ wolomanin min ka kan ka na, ele lo wa, walima an ka kan ka dɔ wɛrɛ makɔnɔ?” Yezu y'u jaabi ko: “Aw bɛ min mɛnna, an'aw bɛ min yera, aw ye taa o lakali Zan ye. Finyɛntɔw bɛ yeli kɛra, nanbaranw bɛ taamana, kunatɔw bɛ kɛnɛyara, tulogwerenw bɛ mɛnni kɛra, suuw bɛ kununna, kibaru diman bɛ fɔra faantanw ye. Ni mɔgɔ min ma tigɛ ne la, o tigi ye dubaden ye.” Zan ka kalandenw kɔsegira ka taa tuma min na, Yezu y'a daminɛ ka kuma jama fɛ Zan koo la. A y'u nyininga ko: “Aw tun taara mun le filɛ kongo kɔnɔ? Fɔnyɔ bɛ waga min lamaga wa? N'aw ma taa o filɛ, o tuma na, mɔgɔ min bɛ dakamana fani don, aw taara ale le filɛ wa? Nga, mɔgɔ minw bɛ dakamana fani don, olu bɛ sɔrɔ masaluw le kɔnɔ. Aw taara mun filɛ sa? Kira lo wa? Tinyɛ na, ne b'a fɔ aw ye ko a tɛmɛna kira yɛrɛ kan. Bari ciden min koo fɔra Ala ka kuma na, o ciden nin ye Zan ye. A fɔra Ala ka kuma na ko: ‘Lamɛnni kɛ, ne Ala bɛna n ka ciden ci i nya k'i ka sira labɛn.’ “Tinyɛ na, ne b'a fɔ aw ye ko mɔgɔ si ma wolo dinyɛ na min kɛra mɔgɔba ye ka tɛmɛ Zan batizelikɛla kan. Nga Sankolo tigi ka mara kɔnɔ, mɔgɔ min lɔyɔrɔ ka dɔgɔ n'u bɛɛ ye, o tigi ka fisa ni Zan ye. K'a ta Zan ka waajuli kɛtuma ma fɔɔ ka na se bii ma, mɔgɔ bɛɛ bɛ jijara ka donyɔrɔ sɔrɔ sankolo tigi ka masaya yɔrɔ la. Ni mɔgɔ minw jijara, olu le bɛna don yen. Musa ni kiraw bɛɛ kumana sankolo tigi ka masaya koo la fɔɔ ka na se Zan ka waati ma. N'aw b'a fɛ k'o faamu, u tun y'a fɔ ko Eli min bɛna segi ka na, Zan ye o Eli nin le ye. Ni min b'a fɛ ka mɛnni kɛ, o k'a tulo malɔ ka nya. Bii mɔgɔw bɔnin bɛ jon fɛ? U bɔnin bɛ denmisɛn dɔw fɛ minw siginin bɛ kɛnɛba la, ka to k'u kaan sama nyɔgɔn ma ko: ‘Anw ye fɔli kɛ aw ye, aw ma dɔɔn kɛ. Anw ye sanga dɔnkili la, aw ma kasi fana.’ “N b'o fɔ bari Zan nana, a tɛ dumuni kɛ, a tɛ dɔrɔ min, mɔgɔw ko faa b'a la. Mɔgɔ Dencɛ nana, a bɛ dumuni kɛ, a bɛ dɔrɔ min, mɔgɔw ko a nugu ka bon, ko a ye dɔrɔtɔ ye. U ko wusuruminɛlaw ni kojugukɛla wɛrɛw teri lo. Nga, nafa min sɔrɔla Ala ka baara la, o b'a ka hakilitigiya yira.” O kɔ, Yezu y'a ka kabako caaman kɛ dugu minw kɔnɔ, a y'a daminɛ ka kumajugu fɔ o dugu mɔgɔw ma, bari u ma nimisa ka faran u ka kojuguw la. A ko: “Aw Korazɛnkaw ni Bɛtisayidakaw, bɔnɛ bɛna kɛ aw ta ye, bari ne ye kabako minw kɛ aw fɛ, ni olu tun kɛra Tirikaw ni Sidɔnkaw fɛ, bii tun y'a sɔrɔ u ye dusukasifani don u kaan na, ka bugurigwɛ mɔ u yɛrɛ la k'a yira k'u bɛ nimisara ka faran u ka kojuguw la. O le y'a to ne b'a fɔ aw ye ko Ala bɛna dinyɛ mɔgɔw kiti loon min na, Tirikaw ni Sidɔnkaw ka tɔɔrɔ bɛna nɔgɔya ka tɛmɛ aw ta kan. Aw Kafaranamukaw, aw bɛ miiri ko aw ka dugu bɛna taa nya wa? Abada! A bɛna halaki pewu. Bari ne ye kabako minw kɛ aw fɛ, ni olu tun kɛra Sodɔmu dugu kɔnɔ, bii tun bɛn'a sɔrɔ n'a bɛ yen. O kama, ne b'a fɔ aw ye ko Ala bɛna dinyɛ mɔgɔw kiti loon min na, Sodɔmukaw ka tɔɔrɔ bɛna nɔgɔya ka tɛmɛ aw ta kan.” O waati la, Yezu y'a fɔ ko: “Ne bɛ barika la i ye n Faa, sankolo ni dugukolo ka masa, bari i ye koo minw dogo lɔnnikɛlaw ni hakilitigiw la, i ye olu yira kolɔnbaliw la. I y'o kɛ ten bari a diyara i ye tinyɛ na.” O kɔ, a y'a fɔ mɔgɔw ye ko: “N Faa Ala ye sebagaya bɛɛ di ne ma. Mɔgɔ si tɛ Dencɛ lɔn n'a Faa dɔrɔn tɛ. Mɔgɔ si tɛ Faa fana lɔn fɔɔ Dencɛ kelenpe. Ni Dencɛ b'a fɛ ko mɔgɔ min k'a Faa lɔn, o tigi bɛn'a lɔn. “Aw minw nii tɔɔrɔnin lo, ni sɛgɛn b'aw kan, aw ka na ne fɛ, ne bɛna lafiya di aw ma. Aw ka kɛ ne ka kalandenw ye, bari ne sabalinin lo, n tɛ mɔgɔ si dɔgɔya fana. N'aw sɔnna ne ka kuma ma, aw bɛna lafiya sɔrɔ, bari ne tɛna jɔnya ni sɛgɛn gwiliman la aw kan.” Loon dɔ, Yezu n'a ka kalandenw tun bɛ tɛmɛna forow dɔw kɔnɔ. Lafinyɛlon tun lo. Kɔngɔ tun b'a ka kalandenw na. O la, u y'a daminɛ ka suman tigɛtigɛ ka to k'o nyimi. Farizinyɛw y'o ye minkɛ, u y'a fɔ Yezu ye ko: “A filɛ, koo min daganin tɛ lafinyɛlon na, i ka kalandenw b'o kɛra.” Yezu y'u jaabi ko: “Kɔngɔ tun ye Dawuda n'a teriw minɛ loon min na, u ye koo min kɛ, aw m'o kalan ka ye Ala ka kuma na wa? Buru minw maranin tun bɛ Ala ye, u donna Ala ka soo kɔnɔ ka olu nyimi, k'a sɔrɔ mɔgɔ wɛrɛ man kan k'o nyimi ni sarakalasebagaw dɔrɔn tɛ. Aw m'a kalan ka ye sariya sɛbɛ kɔnɔ wa, ko sarakalasebagaw bɛ baara kɛ Alabatosoba kɔnɔ lafinyɛlon, k'a sɔrɔ u tɛ jalaki fana. Ne b'a fɔ aw ye ko mɔgɔ bɛ yan min ka fisa ni Alabatosoba ye. Ala y'a fɔ a ka kuma na ko: ‘N b'a fɛ aw ka makari nyɔgɔn na le, nga n t'aw ka sɔnnifɛnw fɛ.’ N'aw tun b'o kɔrɔ lɔn, mɔgɔ minw ma kojugu kɛ, aw tun tɛna sariya boli olu kɔɔ kan, bari Mɔgɔ Dencɛ ye lafinyɛlon kuntigi ye.” Yezu bɔra o yɔrɔ la ka taa don Alabatoso dɔ kɔnɔ. Cɛɛ tigɛ janin dɔ tun bɛ mɔgɔw cɛma yen. Mɔgɔ dɔw ye Yezu nyininga ko: “A daganin bɛ mɔgɔ ka banabagatɔw kɛnɛya lafinyɛlon na wa?” U y'a nyininga o la bari u tun b'a fɛ k'a minɛ sababu sɔrɔ. Yezu y'u jaabi ko: “Ni saga kelen bɛ aw dɔ fɛ, n'o saga benna kɔlɔn kɔnɔ lafinyɛlon na, o tigi tɛn'a bɔ wa? Mɔgɔ ka fisa ni saga ye kosɛbɛ. O kama, a bɛnnin lo mɔgɔ ka konyuman kɛ mɔgɔ ye lafinyɛlon na.” Yezu sɔrɔla k'a fɔ cɛɛ tigɛjanin ye ko a k'a tigɛ jan. A y'a jan, a kɛnɛyara ka kɛ i n'a fɔ tɔ kelen nin bɛ cogo min na. Farizinyɛw bɔra ka taa nyɔgɔn ye ka Yezu fagacogo nyini. Yezu bɔra Farizinyɛw ka koo nin kala ma minkɛ, a bɔra o yɔrɔ la ka taa. Jamaba tugura a kɔ. A ye banabagatɔw bɛɛ kɛnɛya. Nga a y'a gwɛlɛya u ma k'u kana ale koo fɔ mɔgɔ si ye. O kɛra ten janko Ala tun ye min fɔ kira Ezayi ye, o ka kɛ. A tun ko: “Ne ye baaraden min woloma, o filɛ nin ye. Ne b'a kanu, a diyara ne ye k'a woloma. Ne bɛna n ka Nii Senuman d'a ma, a bɛna n ka kuma fɔ siyaw bɛɛ ye. A tɛna kɛlɛ kɛ ni mɔgɔ si ye, a tɛna pɛrɛn. Mɔgɔ si tɛn'a kaan mɛn sira daa la. A tɛna fariya barikatanw ma. A bɛna baara kɛ ten fɔɔ ne ka kuma ka see sɔrɔ. Siyaw bɛɛ bɛna u jigi la a kan.” O kɔ, mɔgɔw taara ni jinatɔ dɔ ye Yezu fɛ. Finyɛntɔ tun lo, a tun tɛ se ka kuma fana. Yezu ye jina gwɛn fɔɔ cɛɛ sera ka kuma, a nyaa fana yɛlɛla. Jama bɛɛ kabakoyara. U ko: “An bɛ masacɛ Dawuda dencɛ min kɔnɔna, kɔni ale le tɛ nin ye?” Nga Farizinyɛw y'o kuma mɛn tuma min na, u y'a fɔ ko: “Jinaw ka kuntigi Belezebuli le bɛ see dir'a ma ka jinaw gwɛn ka bɔ mɔgɔw la.” Yezu y'u ka miiriya lɔn minkɛ, a y'a fɔ u ye ko: “Ni jamana min mɔgɔw bɛ nyɔgɔn kɛlɛ, o jamana nin tɛ se ka nya. Ni dugu, walima somɔgɔ minw bɛ nyɔgɔn kɛlɛ, o bɛ ci. Ni Sutana b'a yɛrɛ ka mɔgɔw gwɛn, a b'a yɛrɛ kɛlɛ, a ka fanga bɛna taa nya cogo di? Aw ko Belezebuli le bɛ see dira ne ma ka jinaw gwɛn ka bɔ mɔgɔw la. Jon le bɛ see dira aw ka kalandenw ma k'u gwɛn? Sutana tɛ dɛ! Aw ka kalandenw yɛrɛ le bɛna kɛ sababu ye aw bɛ jalaki aw ka kuma nunu kɔsɔn. Ni n bɛ jinaw gwɛn ka bɔ mɔgɔw la Nii Senuman barika la, o b'a yira ko Ala sera aw ma n'a ka masaya ye. Mɔgɔ si tɛ se ka don cɛɛ barikaman ka soo kɔnɔ k'a bololafɛnw cɛ n'a m'o cɛɛ minɛ k'a siri fɔlɔ. N'a y'a siri tuma min na, a bɛ se k'a ka soo kɔnɔ fɛɛnw bɛɛ cɛ. Ni mɔgɔ min tɛ ne nyiin ye, o tigi ye ne jugu ye. Ni mɔgɔ min tɛ ne dɛmɛ ka nyani kɛ, o tigi bɛ cɛnni le kɛ. “O le y'a to ne b'a fɔ aw ye ko Ala bɛna mɔgɔw ka kojuguw bɛɛ yafa n'u ka Ala tɔgɔcɛnkumaw bɛɛ. Nga ni mɔgɔ min ye Nii Senuman tɔgɔ cɛn, Ala tɛna yafa o tigi ma. Ni mɔgɔ min ye Mɔgɔ Dencɛ tɔgɔ cɛn, Ala bɛna yafa o tigi ma, nga ni mɔgɔ min ye Nii Senuman tɔgɔ cɛn, Ala tɛna yafa o tigi ma bii, a tɛna yafa a ma sini fana. “Yirinyuman deen ka di, nga yirijugu ka deen man di, bari mɔgɔ bɛ yiri lɔn a ka deen le fɛ. Aw minw ka jugu i n'a fɔ fɔnfɔnni, aw bɛ se ka kumanyuman fɔ cogo di, bari aw ka jugu. Mɔgɔ kɔnɔ fanin bɛ miiriya min na, a daa b'o le fɔ. Kumanyuman bɛ bɔ mɔgɔnyuman daa la, kumajugu bɛ bɔ mɔgɔjugu daa la. Ne b'a fɔ aw ye ko Ala bɛna mɔgɔw kiti loon min na, u ye kuma kuntan minw bɛɛ fɔ, a bɛna u nyininga u fɔkun na. Ala bɛna i kiti ka kɛnyɛ n'i ka dalakuma ye. O sababu la, Ala bɛ joo d'i ma, walima a b'i jalaki.” O kɔ, sariya karamɔgɔ dɔw, ni Farizinyɛ dɔw y'a fɔ Yezu ye ko: “Karamɔgɔ, an b'a fɛ i ka kabako dɔ kɛ an b'o ye.” Yezu y'u jaabi ko: “Bii mɔgɔw ka jugu, u murutira Ala ma. U b'a fɛ ne ka kabako kɛ u nyana, nga ne tɛna kabako si kɛ k'a yira u la ni kira Zonasi ta nyɔgɔn tɛ. Jigɛba ye Zonasi kunu a ye tile saba ni suu saba kɛ a kɔnɔ cogo min na, Mɔgɔ Dencɛ fana bɛna tile saba, ni suu saba kɛ kaburu kɔnɔ ten. Ala bɛna mɔgɔw kiti loon min na, Ninivukaw ni bii mɔgɔw bɛna kunun nyɔgɔn fɛ. Ninivukaw ka kɛwali bɛna kɛ sababu ye Ala bɛ bii mɔgɔw jalaki, bari Zonasi taara Ninivukaw waaju tuma min na, u nimisara ka faran u ka kojuguw la. Mɔgɔ bɛ yan min lɔyɔrɔ ka bon ni Zonasi ta ye. Ala bɛna mɔgɔw kiti loon min na, muso min tun kɛra masa ye Saba jamana na, bii mɔgɔw n'o muso bɛna kunun nyɔgɔn fɛ. A ka kɛwali bɛna kɛ sababu ye Ala bɛ bii mɔgɔw jalaki, bari a bɔra yɔrɔjan ka taa a tulo malɔ Solomani ka hakilitigiya kuma na. Mɔgɔ bɛ yan min lɔyɔrɔ ka bon ni Solomani ta ye. “Ni jina bɔra mɔgɔ la tuma min na, a bɛ taa yɔrɔlakolon yaala ka lafinyɛyɔrɔ wɛrɛ nyini. N'a m'o sɔrɔ, a b'a fɔ a yɛrɛ kɔnɔ ko: ‘Ne bɔra yɔrɔ min na, ne bɛna segi ka taa yen.’ N'a segira tuma min na, a bɛ taa o yɔrɔ lakolon sɔrɔ, a labɛnnin lo kosɛbɛ. O tuma na, a bɛ segi ka taa jina wolonwula wɛrɛw wele minw ka jugu n'ale yɛrɛ ye, ka na n'u ye. U bɛ sigi yen nyɔgɔn fɛ. O tuma na, cɛɛ ka bana bɛ wili, ka juguya ka tɛmɛ fɔlɔta kan. O nyɔgɔn le bɛna kɛ bii mɔgɔw la.” Yezu tun bɛ kumana jama fɛ. K'a to o la, a bamuso n'a dɔgɔninw sera. U lɔra kɛnɛma. U tun b'a fɛ ka kuma a fɛ. Mɔgɔ dɔ sɔrɔla k'a fɔ Yezu ye ko: “I bamuso n'i dɔgɔninw lɔnin bɛ kɛnɛma, u mako b'i la.” Yezu y'a fɔ o tigi ye ko: “Jon ye ne bamuso ye? Jon ni jon le ye ne dɔgɔninw ye?” O kɔ, a y'a bolo sin a ka kalandenw ma k'a fɔ ko: “Ne bamuso ni ne dɔgɔninw filɛ yan, bari mɔgɔ min bɛ ne Faa Ala sago kɛ, o tigi le ye ne dɔgɔcɛ, walima ne dɔgɔmuso walima ne bamuso ye.” O loon na, Yezu bɔra ka taa sigi bada la. Jamaba taara lajɛn a kɔrɔ fɔɔ a y'u to kɛnɛma ka don kurun kɔnɔ ka sigi. A ye kuma caaman fɔ u ye talen na. A ko: “Loon dɔ, sɛnɛkɛla dɔ bɔra ka taa suman seri a ka foro la. K'a to serili la, kisɛ dɔw taara ben sirada la. Kɔnɔw nana olu kunu. Dɔw fana kɛnyɛna fara yɔrɔ ma, bɔgɔ bɛrɛ tun tɛ yen. U falenna joona bari u ma don duguma ka se yɔrɔjan. Tile nana gwan tuma min na, yɔrɔ jara, u sara, bari lili nyanaman tun t'u la. Dɔw fana kɛnyɛna binjugu yɔrɔ ma, u ni biin falenna nyɔgɔn fɛ. Biin wilila joona joona k'u datugu. Nga dɔw kɛnyɛna dugukolonyuman ma. O yɔrɔ suman nyana kosɛbɛ. Dɔw ye deen kɛmɛ sɔrɔ, dɔw ta bi wɔɔrɔ, dɔw ta bi saba.” Yezu sɔrɔla k'a fɔ ko: “Ni min b'a fɛ ka mɛnni kɛ, o k'a tulo malɔ ka nya.” O kɔ, Yezu ka kalandenw gwɛrɛla a la k'a nyininga ko: “Mun na i bɛ to ka kuma mɔgɔw fɛ talen na?” A y'u jaabi ko: “Aw kɛra Ala ka masaya gundo lɔnbagaw ye, nga a lɔnniya ma di tɔw ma, bari fɛɛn bɛ mɔgɔ min bolo, Ala bɛna dɔ fara o tigi ta kan kosɛbɛ. Nga, fɛɛn tɛ mɔgɔ min bolo, hali dɔɔni min b'a bolo, Ala bɛna o bɔsi a la. O le y'a to ne bɛ talen la u ye, bari u bɛ filɛli kɛ, nga, u tɛ foyi ye, u b'u tulo malɔ, nga, u tɛ foyi faamu. O cogo la, kira Ezayi ye kuma min fɔ, o bɛ kɛ. A tun ko: ‘U bɛna u tulo malɔ ka sɛgɛn, u tɛna foyi faamu. U bɛna filɛli kɛ fɔɔ u nyaa ka ja, u tɛna foyi ye. Bari u tulo ka gwɛlɛ, u tɛ miiri, u t'a fɛ ka yeli kɛ, u t'a fɛ ka mɛnni kɛ. N'u tun ye yeli kɛ ka mɛnni kɛ, u tun bɛna sɔn ne Ala ma. Ne tun bɛna u kisi.’ “Aw kɔni ye dubadenw ye bari aw nyaa yɛlɛnin lo, aw tulo bɛ mɛnni kɛ. Tinyɛ na, ne b'a fɔ aw ye ko aw bɛ fɛɛn minw yera, kira caaman ni Ala ka mɔgɔ caaman tun b'a fɛ k'u ye, nga u nyaa ma la u kan. Aw bɛ kuma minw mɛnna, u tun b'a fɛ k'u mɛn, nga, u m'u mɛn. “Ne ye serilikɛla koo fɔ talen min na, aw k'aw tulo malɔ o talen kɔrɔ la. Minw bɛ Ala ka kuma mɛn n'u t'a faamu, olu bɔnin bɛ sira daa fɛ, kisɛ benna o yɔrɔ min na. U man'a mɛn dɔrɔn, Sutana bɛ na o bɔ u kɔnɔ. Mɔgɔ minw b'o kuma mɛn ka sɔn a ma joona ni nisɔndiya ye, olu bɔnin bɛ fara yɔrɔ fɛ. U t'a to o kuma ka sigiyɔrɔ sɔrɔ u kɔnɔ, u bɛ nyinɛ a kɔ joona. O le y'a to ni mɔgɔ b'u tɔɔrɔ o kuma kɔsɔn dɔrɔn, u bɛ sin ka ban Ala ma. Mɔgɔ minw bɛ o kuma mɛn, nga, ni nafolo koo, ni dinyɛ hami koo, ni nyanagwɛ koow b'o kuma kɛ kuma gwansan ye u nyana, n'a tɛ foyi nya u ye, olu bɔnin bɛ binjugu yɔrɔ fɛ. Mɔgɔ minw bɛ kuma nin mɛn, k'o faamu, olu bɛ kɛ i n'a fɔ suman nyanin. Dɔw bɛ kisɛ kɛmɛ kɛ, dɔw ta bɛ se bi wɔɔrɔ, dɔw ta bi saba.” Yezu ye talen wɛrɛ la u ye. A ko: “Koo min bɛ masa Ala ka baara kɛcogo gwɛya aw ye, o filɛ: Cɛɛ dɔ ye sumansi nyanaman dan a ka foro la. Ka mɔgɔ bɛɛ to sinɔgɔ la sufɛ, a jugu taara binjugu kisɛ seri suman cɛma ka tɛmɛ n'a yɛrɛ ye. U nana falen, u y'a daminɛ ka kuun bɔ tuma min na, binjugu lɔnna ka bɔ suman na. Forotigi ka baaradenw taar'a fɔ a ye ko: ‘I tun ma sumansi nyanaman le dan i ka foro la wa? Binjugu nin do bɔra min?’ A y'u jaabi ko: ‘Ne jugu dɔ le y'o baara kɛ.’ Baaraden nunu tilara k'a nyininga ko: ‘I b'a fɛ an ka taa binjugu nin bɔn ka bɔ yen wa?’ A y'u jaabi ko: ‘Ayi. Aw kana ta'a bɔn, bari aw bɛ se ka fili ka suman dɔ bɔn. Aw k'a to u ka wili nyɔgɔn fɛ fɔɔ sumantigɛtuma ka se. N'o tuma sera, n bɛn'a fɔ sumantigɛlaw ye k'u ka binjugu nin tigɛ fɔlɔ, k'a siri, k'a jɛni, u ka sɔrɔ ka suman tigɛ k'a kɛ n ka bondo kɔnɔ.’ ” Yezu ye talen wɛrɛ la u ye tugu. A ko: “Ala ka masaya koo bɔnin bɛ mutaridi kisɛ fɛ, cɛɛ dɔ y'o min ta k'a dan a ka foro la. Mutaridi kisɛ ka dɔgɔ ni fɛɛn bɛɛ kisɛ ye. Nga, n'a falenna, a bɛ bonya ka tɛmɛ nankɔ fɛɛn sɛnɛta tɔw bɛɛ kan. A bɛ kɛ yiri ye, kɔnɔw b'u ka nyaga la a bolo kan.” O kɔ, Yezu ye talen wɛrɛ la u ye ko: “Koo min bɛ Ala ka masaya koo gwɛya aw ye, o filɛ: Muso dɔ ye burufununan ta k'a kɛ farinimugu fiyɛ nyaa kelen na k'a nɔɔni, k'a bila fɔɔ a bɛɛ fununa.” Yezu y'o kuma bɛɛ fɔ jama ye talen na. A tun tɛ kuma u fɛ n'a ma talen la u ye. A tun b'a kɛ ten janko kira tun ye min fɔ, o ka kɛ. A tun y'a fɔ ko: “N bɛna kuma u fɛ talenw na. Mɔgɔw ma koo minw lɔn kabini dinyɛ dantuma, ne bɛna olu fɔ u ye.” Yezu bɔra jama kɔrɔ ka taa soo tuma min na, a ka kalandenw gwɛrɛla a la k'a fɔ a ye ko: “I ye talen min la ko mɔgɔ dɔ taara binjugu kisɛ seri a jugu ka foro la, o talen kɔrɔ fɔ an ye.” Yezu y'u jaabi ko: “Mɔgɔ min ye sumansi nin dan, o ye Mɔgɔ Dencɛ ye. Foro nin, o ye dinyɛ ye. Sumansi, o ye Ala ka mɔgɔw ye. Binjugu nin, o ye Sutana ka mɔgɔw ye. Jugu min ye binjugu kisɛ seri foro nin kɔnɔ, o ye Sutana yɛrɛ ye. Sumantigɛtuma, o ye dinyɛ laban tuma ye. Sumantigɛlaw ye mɛlɛkɛw ye. U bɛ binjugu tigɛ k'a jɛni cogo min na, o koo nyɔgɔn bɛna kɛ dinyɛ laban tuma na. Mɔgɔ Dencɛ bɛn'a ka mɛlɛkɛw ci. Mɔgɔ minw bɛɛ bɛ kojugu kɛ ka tɔw fana nigɛ k'u bila a la, u bɛna olu woloma k'u bɔ Ala ka mɔgɔw cɛma. Mɛlɛkɛw bɛna o mɔgɔjuguw fili tasuma kɔnɔ. U bɛna kasi yen k'a fɔ ko n'u tun y'a lɔn. O kɔ, mɔgɔ minw bɛ Ala sago kɛ, olu bɛɛ bɛna bonya sɔrɔ ka manamana i n'a fɔ tile, u Faa Ala ka masaya yɔrɔ la. Ni min b'a fɛ ka mɛnni kɛ, o k'a tulo malɔ ka nya. “Ala ka masaya yɔrɔ bɛ sɔrɔ cogo min na, koo min b'o gwɛya aw ye, o filɛ: A bɛ i n'a fɔ cɛɛ dɔ taara nafolo dogonin sɔrɔ foro dɔ la. A y'a ta k'a dogo tugu. A nisɔn diyara kosɛbɛ, fɔɔ a taar'a bololafɛn bɛɛ feere ka segi ka taa foro nin san. “Ala ka masaya yɔrɔ bɛ sɔrɔ cogo min na, koo min b'o gwɛya aw ye, o filɛ: A bɛ i n'a fɔ jagokɛla dɔ, min bɛ kɔnɔkisɛnyuman nyini. A nana dɔ ye min ka nyi, a taar'a bololafɛn bɛɛ feere k'o kɔnɔkisɛ nin san. “Ala ka masaya koo bɔnin bɛ mɔnikɛla dɔ fɛ min y'a ka jɔɔ fili baji la, a ye jigɛ sifa bɛɛ minɛ. A fanin kɔ, a y'a sama ka bɔ jii la ka sigi ka jigɛw woloma. Jigɛ minw ka nyi, a ye olu kɛ minan kɔnɔ. Jigɛ minw man nyi, a ye olu fili. O koo nyɔgɔn bɛna kɛ dinyɛ labantuma na. Mɛlɛkɛw bɛna na mɔgɔjuguw woloma k'u bɔ mɔgɔnyumanw na. U bɛna o mɔgɔjuguw fili tasuma na. O yɔrɔ la, u bɛna kasi k'a fɔ ko n'u tun y'a lɔn.” O kɔ, Yezu y'u nyininga n'u y'o talenw bɛɛ faamu. U y'a jaabi ko ɔnhɔn. A y'a fɔ u ye tugu ko: “Ayiwa. Sariya karamɔgɔ min kalanna kosɛbɛ Ala ka masaya koo la, a bɔnin bɛ sotigi dɔ fɛ min bɛ fɛnkura ni fɛɛn kɔrɔman sɔrɔ a ka nafolo la.” Yezu y'o talenw la ka ban tuma min na, a bɔra yen ka ta'a ka dugu la. O yɔrɔ la, a donna Alabatoso kɔnɔ ka mɔgɔw kalan. Mɔgɔ minw tun bɛ yen, u bɛɛ kabakoyara. U tora k'a fɔ ko: “Haan! A bɔra ni hakilitigiya nin ye min? A bɛ kabako nunu kɛ cogo di? Yirilɛsɛbaga ka deen nin tɛ wa? Mariyamu t'ale le bamuso ye wa? A dɔgɔcɛw tɛ Zaki ni Yusufu ni Simɔn ani Zude ye wa? A dɔgɔmusow bɛɛ tɛ dugu nin kɔnɔ yan wa? A do ye hakilitigiya ni kabako kɛ see nin sɔrɔ min?” O miiriya le y'a to u ma la Yezu la. O la, Yezu y'a fɔ u ye ko: “Kira tɛ bonya sɔrɔ a ka dugu mɔgɔw n'a ka somɔgɔw fɛ ka ye.” Yezu ma kabako caaman kɛ yen bari u ma la a la. O waati la, Erɔdi min tun ye masacɛ ye Galile mara la, ale ye Yezu koo mɛn. A y'a fɔ a ka baaradenw ye ko: “Zan batizelikɛla yɛrɛ yɛrɛ lo. Ale le kununna. O le y'a to a bɛ se ka kabakow kɛ.” Tinyɛ na, Erɔdi yɛrɛ tun ye Zan minɛ k'a siri k'a don kaso la. Fɛɛn min y'a to a y'o kɛ, o filɛ: Ale Erɔdi tun y'a yɛrɛ dɔgɔcɛ Filipi ka muso Erodiyadi bɔsi a la k'a furu. O le y'a to Zan tun b'a fɔ a ye ko: “I man kan ka Erodiyadi bɔsi i dɔgɔcɛ la k'a furu.” Erɔdi tun b'a fɛ ka Zan faga, nga a tun bɛ siran Zuwifuw nya, bari u bɛɛ tun bɛ Zan jati kira ye. O bɛɛ la, Erɔdi ka wololon saan yɛlɛma nyanagwɛ la, Erodiyadi ka denmuso wilila ka dɔɔn kɛ nyanagwɛ dumunikɛlaw nyana. O diyara Erɔdi ye kosɛbɛ, fɔɔ a kalila ko n'a ye fɛɛn min dali ale fɛ, ko ale bɛna o d'a ma. A bamuso ye kuma min fɔ a ye, a y'o le ta k'a fɔ Erɔdi ye ko: “Zan batizelikɛla kuun don minan dɔ kɔnɔ k'a di ne ma.” Masacɛ nyaa sisira. Nga, a kalila nyanagwɛ dumunikɛlaw nyana minkɛ, a sɔnna. O la, a ye mɔgɔ dɔ ci ko a ka taa Zan kuun tigɛ kaso boon na ka na n'a ye. U ye Zan kuun tigɛ k'a bila minan dɔ kɔnɔ ka n'a di sungurunin nin ma. Ale fana y'a ta ka ta'a di a bamuso ma. Zan ka kalandenw taar'a suu ta ka ta'a don. O kɔ, u taar'a nyafɔ Yezu ye. Yezu ye Zan fagako mɛn tuma min na, a bɔra o yɔrɔ la. A kelen donna kurun kɔnɔ ka taa kongo kɔnɔ. Nga, mɔgɔw bɔra a taatuma kala ma, u bɔra duguw kɔnɔ ka ta'a fɛ u seen na. Yezu bɔra kurun kɔnɔ tuma min na, ka jamaba ye, u hinɛ donna a la, a y'u ka banabagatɔw kɛnɛya. Wulafɛ, Yezu ka kalandenw gwɛrɛla a la k'a fɔ a ye ko: “Suu bɛ nyini ka ko, yan yɔrɔ fana ye kongo ye, e tɛ sira di jama ma u ka taa dugudenninw na ka dumuni san u yɛrɛw ye wa?” Yezu y'u jaabi ko: “A daganin tɛ u ka taa yɔrɔ dɔ la, aw yɛrɛ ka dumuni d'u ma.” U y'a fɔ a ye ko: “Burukun duuru ni jigɛ deen fila le b'an fɛ yan.” Yezu y'a fɔ u ye ko: “Aw ka na n'u ye yan.” O kɔ, a y'a fɔ jama ye k'u ka sigi biin kan. A ye burukun duuru ni jigɛ deen fila nunu ta, k'a nyaa kɔrɔta sanfɛ ka barika la Ala ye, k'o tilantilan k'o di a ka kalandenw ma, kalandenw y'o tilan jama cɛ. Mɔgɔ bɛɛ ye dumuni kɛ fɔɔ ka fa, kalandenw ye dumuni tɔɔ cɛ ka segi tan ni fila fa n'o ye. Mɔgɔ minw ye dumuni kɛ, cɛɛw dama tun ye mɔgɔ waa duuru nyɔgɔn ye, musow ni denmisɛnw ma jati. O koo kɛnin kɔ dɔrɔn, Yezu y'a fɔ a ka kalandenw ye ko u ka don kurun kɔnɔ ka taa ale nya baa kɔfɛ, yan ni ale bɛ sira di jama ma u ka taa soo. Yezu ye sira di ka ban jama ma waati min na, a yɛlɛla kulu kan a kelen na waasa ka Ala dali, suu kora k'a sɔrɔ o yɔrɔ la yen. O y'a sɔrɔ kurun yɔrɔ tun janyana ka ban dugukolo la. Kalandenw tun tɛ se ka kurun boli jikuru fɛ, bari fɔnyɔ tun b'u kunbɛnna. Dugu tun bɛ nyini ka gwɛ waati min na, Yezu taamana jii kan ka taa u fɛ. Kalandenw ye Yezu taamatɔ ye jii kan, u jaa tigɛra siranya bolo, fɔɔ u b'a fɔra ko suja lo, u y'a daminɛ ka kule kosɛbɛ. O yɔrɔnin kelen, Yezu kumana u fɛ k'a fɔ ko: “Aw k'aw jaa gwɛlɛya, ne lo, aw kana siran.” Piyɛri y'a fɔ Yezu ye ko: “Matigi, ni ele lo tinyɛ na, a fɔ ko ne ka na e fɛ yen jii kan.” Yezu y'a fɔ a ye ko: “Na.” Piyɛri bɔra kurun kɔnɔ ka taama jii kan n'a bɛ taara Yezu fɛ. Nga Piyɛri y'a ye ko fɔnyɔ fanga ka bon minkɛ, siranya y'a minɛ. A daminɛna ka jigi jii jukɔrɔ, o la, a kulera ko: “Matigi, n dɛmɛ.” O yɔrɔnin kelen, Yezu y'a minɛ k'a fɔ a ye ko: “I ma la ne la wa? Mun na i sigasigara?” U donna kurun kɔnɔ tuma min na, fɔnyɔ lɔra. Kalanden tɔ minw tun bɛ kurun kɔnɔ, olu y'u kunbiri gwan Yezu kɔrɔ k'a fɔ a ye ko: “Tinyɛ na, i ye Ala Deen ye.” U ye jii tigɛ ka ban waati min na, u sera Zenezarɛti mara la. O yɔrɔ mɔgɔw ye Yezu ye k'a lɔn minkɛ, u ye mɔgɔw ci ka taa yɔrɔ bɛɛ la, k'a fɔ ko Yezu nana. U y'u ka banabagatɔw bɛɛ ta ka na n'u ye a fɛ. U ye Yezu dali ko a ka sɔn u bɛ maga a ka fani dakun dama na. Minw bɛɛ magara o la, olu bɛɛ kɛnɛyara. O kɔ, Farizinyɛ ni sariya karamɔgɔ dɔw bɔra Zeruzalɛmu ka na Yezu nyininga ko: “Mun na i ka kalandenw tɛ an bɛmaw ka landa labato? Bari u bɛ dumuni kɛ n'u tɛ u tigɛ ko ka nya.” Yezu y'olu nyininga fana ko: “Aw do, mun na Ala bɛ fɛɛn minw nyini aw fɛ, aw t'o kɛ, aw ka landaw kɔsɔn? Bari Ala y'a fɔ ko i ka i faa n'i baa bonya, ko ni mɔgɔ min y'a faa walima a baa dɔgɔya, k'o tigi ka kan ka faga. Nga aw b'a fɔ ko ni mɔgɔ dɔ y'a fɔ a faa, walima a baa ye ko ale tun ka kan k'a dɛmɛ ni fɛɛn min ye, ko ale y'o di Ala ma, o cogo la a ma kɛ wajibi ye o tigi ma k'a faa n'a baa dɛmɛ tugu. Aw bɛ ban Ala ka kuma na ten k'a kɛ fu ye aw ka landaw kɔsɔn. Nanbaranmɔgɔ nunu! Kira Ezayi bɛ min fɔ, o bɛnna aw ka kɛwaliw ma kosɛbɛ. A ko: ‘Nin mɔgɔ nunu bɛ ne bonya u daa la dɔrɔn, nga u kɔnɔnako yɔrɔ ka jan ne la. U bɛ ne bato gwansan, bari u bɛ nyɔgɔn kalan koo minw na, o ye mɔgɔw ka sariya ye, ne ta tɛ.’ ” Yezu ye jama wele k'a fɔ u ye ko: “Aw k'aw tulo malɔ ka n ka kuma faamu. A ma kɛ i n'a fɔ ko mɔgɔ bɛ fɛɛn min dumu, o le b'a nɔgɔ, nga a kɔnɔnako le b'a nɔgɔ.” A ka kalandenw gwɛrɛla a la k'a fɔ a ye ko: “I m'a lɔn ko i ka kuma nin digira Farizinyɛw na k'u hakili nyagami wa?” Yezu y'u jaabi ko: “Ne Faa min bɛ sankolo la ma yiri o yiri tutu, olu bɛna bɔn ka bɔ yen. Aw y'u ye k'u to yen, finyɛntɔw lo. Ni finyɛntɔ ye a tɔnyɔgɔn ka bere minɛ, u fila bɛɛ bɛna kori ka ben dingɛ kɔnɔ.” Piyɛri ye kuma ta, k'a fɔ Yezu ye ko: “Talen nin kɔrɔ fɔ an ye.” Yezu y'a fɔ u ye ko: “Aw fana tɛ faamuli kɛ halibi wa? Aw m'a lɔn ko mɔgɔ bɛ fɛɛn min dumu, k'o bɛ don a kɔnɔ na, o kɔ a bɛ taa o fili banakɔ wa? Nga mɔgɔ daa bɛ fɛɛn min fɔ, o bɛ bɔ a kɔnɔ le. Olu le bɛ mɔgɔ nɔgɔ. Bari miirijugu bɛɛ bɛ bɔ mɔgɔ dusu le la, i n'a fɔ mɔgɔfaga, kakalaya, mɔgɔkolonya, sonyali, galontigɛ, ani mɔgɔnɛni. O koo nunu le bɛ mɔgɔ nɔgɔ, nga ka dumuni kɛ n'i ma i tigɛ ko, o tɛ mɔgɔ nɔgɔ.” Yezu bɔra o yɔrɔ la ka taa Tiri ni Sidɔn mara la. Muso dɔ tun b'o yɔrɔ la, Zuwifu tun tɛ. Ale nana Yezu fɛ ka pɛrɛn ko: “Dawuda dencɛ, makari ne la Matigi, ne ka denmuso tɔɔrɔnin lo kosɛbɛ, jina b'a la.” Nga Yezu m'a jaabi. A ka kalandenw gwɛrɛla a la k'a dali ko a ka muso nin nyafilɛ, ko n'o tɛ, a bɛ tugura u kɔ n'a ka mankan ye. Yezu y'a fɔ ko: “Ne cira Isirayɛli ka soo dama ma, o min tununa i n'a fɔ sagaw.” Nga muso nin nana a kunbiri gwan Yezu kɔrɔ k'a fɔ ko: “Matigi, n dɛmɛ.” Yezu y'a jaabi ko: “A daganin tɛ ka denmisɛnw ka dumuni ta k'a di wuluw ma.” Muso y'a fɔ Yezu ye ko: “O ye tinyɛ ye Matigi, nga wulutigi ka dumuni murumuru minw bɛ ben, wuluw b'o dumu.” Yezu y'a fɔ a ye ko: “Muso, i lara ne la kosɛbɛ. I bɛ min fɛ, o ka kɛ i ye ka kɛnyɛ n'i ka lanyini ye.” O waati kelen na, a denmuso kɛnɛyara. Yezu bɔra o yɔrɔ la ka taa Galile baa daa la. A yɛlɛla kulu dɔ kan ka sigi yen. Jamaba tun nan'a fɛ n'u ka banabagatɔw ye. O banabagatɔ dɔw tun ye senkelenninw ye, ni finyɛntɔw, ani murukuw, ni bobow, ani banabagatɔw sifa wɛrɛw. U tun bɛ na n'u ye Yezu fɛ, n'a b'o kɛnɛya. Mɔgɔw y'a ye ko bobow bɛ kumana, ni murukuw bɛ kɛnɛyara, ani senkelenninw bɛ taamana ka nya, ni finyɛntɔw bɛ yeli kɛra, u kabakoyara kosɛbɛ, fɔɔ u y'a daminɛ ka Isirayɛli ka Ala tando. Yezu y'a ka kalandenw wele k'a fɔ u ye ko: “Mɔgɔ nunu makari bɛ ne la, u bɛ ni ne ye, a tile saba ye bii ye. N y'a lɔn ko dumunifɛn si tɛ u bolo tugu. N t'a fɛ ka sira d'u kɔngɔtɔman ma, u barika bɛna dɛsɛ sira la.” Kalandenw y'a nyininga ko: “Anw bɛna se ka jama nin nyɔgɔn daladumuni sɔrɔ yɔrɔ jumɛn yan kongo nin kɔnɔ?” A y'u nyininga ko: “Burukun joli le b'aw fɛ?” U ko burukun wolonwula ni jigɛmisɛn damani. O kɔ, a y'a nyini jama fɛ k'u ka sigi duguma. A ye buru ni jigɛ nunu ta ka barika la Ala ye k'o tilantilan k'o di kalandenw ma, olu y'o tilan jama ye. Mɔgɔw bɛɛ ye dumuni kɛ fɔɔ ka fa, kalandenw ye dumuni tɔɔ cɛ ka segi wolonwula fa n'o ye. Mɔgɔ minw y'o dumuni kɛ, cɛɛw dama tun ye mɔgɔ waa naani ye, musow ni denmisɛnw ma jati. Yezu ye sira di ka ban jama ma waati min na, a donna kurun kɔnɔ ka taa Magadan mara la. Farizinyɛ ni Sadusenyɛ dɔw gwɛrɛla Yezu la waasa k'a kɔrɔbɔ. U y'a fɔ Yezu ye ko a ka kabako dɔ kɛ min b'a yira ko a ka sebagaya bɔra Ala fɛ. Yezu y'u jaabi ko: “Wuladafɛ ni tilekun bɛ nyini ka don tuma min na, aw b'a fɔ ko suu bɛna diya, bari sankolo wulennin lo. Sɔgɔmadafɛ fana, aw b'a fɔ ko bii tɛna diya bari yɔrɔ nyaa man nyi. Aw bɛ se ka sankolo filɛ ka waati cogoya faamu, nga koo minw bɛ kɛra waati nin na, aw tɛ sera k'olu faamu. Bii mɔgɔw ka jugu, u murutinin bɛ Ala ma, u b'a fɛ ko ne ka kabako dɔ kɛ u nyana, nga kabako si tɛna kɛ u k'o ye, ni kira Zonasi ta nyɔgɔn tɛ.” O kɔ, a y'u lɔnin to yen ka tɛmɛ n'a ka sira ye. Tuma min na u tun bɛ taara baa kɔfɛ, kalandenw tun nyinɛna ka buru ta. Yezu y'a fɔ u ye ko: “Aw k'aw yɛrɛ kɔlɔsi Farizinyɛ ni Sadusenyɛw ka burufununan ma.” Kalandenw tora ka miiri u yɛrɛ kɔnɔ k'olu ma buru ta minkɛ, k'o la Yezu ye kuma nin fɔ. Nga Yezu y'u ka miiriya lɔn, k'a fɔ u ye ko: “Jigi t'aw fɛ wa? Mun na aw bɛ miiri ten, ko aw nyinɛna buru kɔ? Aw fana tɛ faamuli kɛ halibi wa? Ne ye cɛɛ waa duuru balo ni burukun duuru ye waati min na, aw ye segi daa min cɛ dumuni tɔɔ la, aw hakili tɛ o la wa? Ani ne ye cɛɛ waa naani balo ni burukun wolonwula ye tuma min na, aw tun ye segi daa min fa dumuni tɔɔ la, aw hakili t'o fana na wa? Ne tun b'aw ladira Farizinyɛ ni Sadusenyɛw ka burufununan koo la tuma min na, mun na aw tun m'a faamu ko ne tun tɛ kumana buru koo la?” O tuma na, u y'a faamu ko a tun tɛ kumana u fɛ burufununan yɛrɛ koo la, nga ko a tun bɛ kumana u fɛ Farizinyɛ ni Sadusenyɛw ka kalan le koo la. Yezu n'a ka kalandenw sera Sezare Filipi mara la. A y'a ka kalandenw nyininga ko: “Mɔgɔw b'a fɔra ko Mɔgɔ Dencɛ ye jon ye?” U y'a jaabi ko: “Dɔw ko Zan batizelikɛla lo, dɔw ko Eli, dɔ wɛrɛw ko kira Zeremi, walima kira dɔ wɛrɛ.” Yezu y'u nyininga ko: “Aw do? Aw b'a miiri ko ne ye jon ye?” Simɔn Piyɛri y'a jaabi ko: “I ye Ala ka Mɔgɔ wolomanin nin ye, Ala Dencɛ.” Yezu y'a fɔ a ye ko: “Zonasi dencɛ Piyɛri, i ye dubaden ye, bari mɔgɔ si ma nin fɔ i ye, nga ne Faa min bɛ sankolo la, o le y'o lɔnniya d'i ma. I ye Piyɛri ye, o kɔrɔ ko fara, ne bɛna n ka egilizi lɔ o min kan, saya tɛna se ka foyi kɛ a la. Ne bɛna arijana daa konnigɛ d'i ma. I mana ban fɛɛn o fɛɛn na dugukolo kan, u bɛna ban o fana na sankolo la. I mana sɔn fɛɛn o fɛɛn ma dugukolo kan, u bɛna sɔn o fana ma sankolo la.” O kɔ, Yezu y'a fɔ a ka kalandenw ye k'u kana sɔn k'a fɔ mɔgɔ si nyana ko ale ye Ala ka Mɔgɔwolomanin nin ye. K'a ta o waati ma Yezu y'a daminɛ k'a fɔ ka gwɛ a ka kalandenw ye, ko: “Ne ka kan ka taa Zeruzalɛmu, cɛkɔrɔbaw ni sarakalasebagaw ani sariya karamɔgɔw bɛna ne tɔɔrɔ yen kosɛbɛ. U bɛna ne faga. Nga tile saba ne faganin kɔ, ne bɛna kunun.” Piyɛri y'a wele danna k'a jalaki. A y'a fɔ a ye ko: “Matigi, Ala k'i kisi o koow ma. O tɛna i sɔrɔ.” Yezu ye Piyɛri filɛ k'a fɔ a ye ko: “E sutana nin, taa ka bɔ n kɔrɔ. E bɛ ne ka koow cɛnyɔrɔ le nyinina. Ele ka miiriya ni Ala ta ma kɛ kelen ye, adamadenya miiri le b'i fɛ.” Yezu y'a fɔ a ka kalandenw ye ko: “Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa koo la. A ka tɔɔrɔ bɛɛ munyu ne kɔsɔn ka tugu ne kɔ. Mɔgɔ o mɔgɔ b'a ka dinyɛlatigɛ nyako dɔrɔn fɛ, o tigi tɛna sini hɛrɛ sɔrɔ. Nga ni mɔgɔ min ka dinyɛlatigɛ cɛnna ne kɔsɔn, o tigi bɛna sini hɛrɛ sɔrɔ. Mɔgɔ ka sini hɛrɛ ka cɛn dinyɛ nafolo kɔsɔn, o bɛna mun nya a tigi ye? Walima fɛɛn jumɛn bɛ dinyɛ na n'o ka fisa ni mɔgɔ nii ye, n'i bɛ se k'i nii falen o la? Ayiwa, Mɔgɔ Dencɛ bɛna na n'a ka mɛlɛkɛw ye a Faa ka sebagaya la, o cogo la a bɛna mɔgɔw bɛɛ kelen kelen sara ka kɛnyɛ n'u ka kɛwaliw ye. Tinyɛ na, ne b'a fɔ aw ye ko aw minw bɛ yan, aw dɔw tɛna sa n'u ma Mɔgɔ Dencɛ natɔ ye n'a ka masaya ye.” Tile wɔɔrɔ o kɔ, Yezu taara ni Piyɛri ni Zaki an'a dɔgɔcɛ Zan ye kulujan dɔ kan u danna. O yɔrɔ la, Yezu cogo yɛlɛmana u nyana, a nyada tun bɛ manamana i n'a fɔ tile, a ka fani tun gwɛra parapara. O yɔrɔnin kelen, kalanden saba nunu ye Musa ni Eli lɔnin ye n'u bɛ kumana ni Yezu ye. O la, Piyɛri y'a fɔ Yezu ye ko: “Matigi, n'anw tora yan, o ka nyi dɛ! N'i sɔnna, ne bɛna bugu saba lɔ yan: e ta kelen, Musa ta kelen, Eli ta kelen.” Ka Piyɛri t'o kuma na, sankaba manamananin dɔ nana lɔ u kuun na. Kumakan dɔ bɔra o sankaba nin kɔnɔ k'a fɔ ko: “Nin ye ne dencɛ ye, a koo ka di ne ye haali. Ne sagoladen lo, n y'a ci, aw ka mɛnni kɛ a fɛ.” Kalanden saba nunu y'o kuma mɛn minkɛ, u lara k'u nyaa biri duguma, bari u tun siranna kosɛbɛ. Yezu gwɛrɛla u la, ka magamaga u la k'a fɔ ko: “Aw kana siran, aw ye wili.” U y'u nyaa kɔrɔ ta tuma min na, u ye Yezu dama le ye yen. U jigitɔ ka bɔ kulu kan, a ye kangari la u ye ko: “Aw ye koo minw ye kulu kan, aw kana o lakali mɔgɔ si ye, fɔɔ ni Mɔgɔ Dencɛ sara ka kunun tuma min na.” Yezu ka kalandenw y'a nyininga ko: “Mun na sariya karamɔgɔw ko Eli ka kan ka na kisibaga nya?” A y'u jaabi ko: “Tinyɛ na, Eli ka kan ka na kisibaga nya ka fɛɛn bɛɛ labɛn fɔlɔ. Ne b'a fɔ aw ye ko Eli nana ka ban, nga u m'a lɔn, u y'a kɛ u yɛrɛ sago ye. O cogo la, u bɛna Mɔgɔ Dencɛ fana tɔɔrɔ.” Kalandenw y'a faamu o cogo la ko a bɛ kumana Zan batizelikɛla le koo la. Yezu n'a ka kalanden saba nunu sera jama yɔrɔ la waati min na, cɛɛ dɔ nana a kunbiri gwan a kɔrɔ k'a fɔ ko: “Matigi, makari ne ka deen na, bari kirikirimasinyɛ b'a la. Tuma o tuma a bɛ wili a la k'a ta k'a ben, a y'a ben tasuma na ani jii la sinyɛ caaman. Ne nana n'a ye i ka kalandenw fɛ, nga u ma se k'a kɛnɛya.” Yezu y'a fɔ ko: “Bii mɔgɔw ka jugu, u tɛ la Ala la, ne bɛna to n'aw ye k'aw ka koo munyu fɔɔ tuma jumɛn? Aw ka na ni deen nin ye yan.” Yezu ye jina nin sɔngɔ, a bɔra deen nin na, o yɔrɔnin bɛ a kɛnɛyara. O kɔ, Yezu ka kalandenw gwɛrɛla a la u danna, k'a nyininga ko: “Mun na an ma se ka jina nin gwɛn k'a bɔ deen nin na?” Yezu y'a fɔ u ye ko: “Aw tɛ la ne la kosɛbɛ minkɛ, o lo. Tinyɛ na, ne b'a fɔ aw ye, ko n'aw ka lanaya bonya tun bɛ fonikisɛ bɔ, aw tun bɛ se k'a fɔ kulu nin ye ko a ka wili ka bɔ yan ka taa lɔ yen fɛ. O tun bɛn'a kɛ. O fɛɛn tɛ yen n'aw tɛna se ka min kɛ. [ Nga nin jina nyɔgɔn tɛ se ka gwɛn ka bɔ mɔgɔ la n'i ma suun don ka Ala dali.]” Loon dɔ, kalandenw ye nyɔgɔn lajɛn Galile, Yezu y'a fɔ u ye ko: “U bɛna Mɔgɔ Dencɛ don mɔgɔjuguw bolo, k'a faga, tile saba a faganin kɔ, a bɛna kunun.” U bɛɛ hakili nyagamina kosɛbɛ. Yezu n'a ka kalandenw sera Kafaranamu tuma min na, bolomafara min bɛ di Alabatosoba koo la, mɔgɔ minw tun bɛ to k'o minɛ, olu nana Piyɛri nyininga ko: “Aw ka karamɔgɔ nin tɛ to ka bolomafara di wa?” Piyɛri y'u jaabi ko: “Ɔnhɔn, a bɛ to k'a di.” Piyɛri sera soo tuma min na, Yezu kɔnna k'a nyininga ko: “Simɔn, ele ka miiriya ye jumɛn ye koo nin na? Mɔgɔ jumɛnw le ka kan ka nisɔngɔ, walima wusuru sara faamaw ye? U deenw wa, walima mɔgɔ wɛrɛw?” Piyɛri y'a jaabi ko: “Mɔgɔ wɛrɛw lo.” Yezu y'a fɔ a ye ko: “O kɔrɔ k'u ka deenw lafoninin bɛ kɛ! Nga waasa miiriyajugu kana don mɔgɔ nunu kuun na, o kama, i ka dulen ta ka taa baa la k'a fili yen. N'i kɔnna ka jigɛ min minɛ, i k'o daa yɛlɛ ka filɛ yen. I bɛna wari sɔrɔ yen min bɛ i ka bolomafara ni ne ta bɔ. I ka taa o di.” O waati la, Yezu ka kalandenw gwɛrɛla a la k'a nyininga ko Ala ka masaya yɔrɔ la, jon le ye mɔgɔba ye? Yezu ye denmisɛn dɔ wele k'o lɔ u cɛma, k'a fɔ u ye ko: “Tinyɛ na, n b'a fɔ aw ye ko n'aw m'aw sɔɔn yɛlɛma k'a kɛ i n'a fɔ denmisɛnw ta, aw tɛna don Ala ka masaya yɔrɔ la. O la, mɔgɔ min b'a yɛrɛ majigi ka kɛ i n'a fɔ denmisɛn nin, o tigi bɛna bonya sɔrɔ Ala nyakɔrɔ. Mɔgɔ o mɔgɔ bɛ denmisɛn nin nyɔgɔn minɛ ka nya ne kɔsɔn, o tigi bɛ ne le minɛ ka nya fana. “Mɔgɔ minw lara ne la a ma mɛn, ni mɔgɔ dɔ kɛra sababu ye k'olu dɔ kunna cɛn, yan ni a k'o kɛ, ni kabakuru belebeleba tun sirila a kaan na, k'a fili kɔgɔji kɔnɔ, o bɛ fisaya a ma. Bɔnɛ ye dinyɛ mɔgɔw ta ye. Olu bɛ kɛ sababu ye ka mɔgɔ caaman kunna cɛn. Wajibi lo dɔw kunna bɛna cɛn, nga mɔgɔ min bɛna kɛ o dɔ sababu ye, bɔnɛ y'o tigi ta ye. N'i bolo kelen, walima n'i seen kelen bɛ kɛ sababu ye i bɛ kojugu kɛ, i k'a tigɛ k'a fili yɔrɔjan. I bolo kelenman, walima i seen kelenman ka don arijana na, o ka fisa i ma, i ka don jahanama na n'i bolo fila, walima n'i seen fila ye. N'i nyaden kelen le bɛ kɛ sababu ye i ma ka kojugu kɛ, i k'a wɔgɔbi k'a fili yɔrɔjan. Ka don arijana na n'i nyaden kelen ye, o ka fisa i ma, k'i nyaden fila to i fɛ ka don jahanama na. “Aw k'aw yɛrɛ kɔlɔsi, aw si kana denmisɛn nunu dɔ dɔgɔya, bari ne b'a fɔ aw ye k'olu mɛlɛkɛw bɛ Ala nyakɔrɔ arijana na tuma bɛɛ. [ Mɔgɔ minw ni Ala cɛ bɛnnin tɛ, Mɔgɔ Dencɛ nana ka bɛɛn sigi olu ni Ala cɛ.] Aw ka miiri la, ni saga kɛmɛ bɛ mɔgɔ dɔ fɛ, ni olu dɔ tununa, sagatigi nin tɛna saga bi kɔnɔntɔn ni kɔnɔntɔn to kulu kan ka taa kelen nin yaala wa? Ne b'a fɔ aw ye ko n'a y'a ye, a nisɔn bɛna diya ale koo la ka tɛmɛ bi kɔnɔntɔn ni kɔnɔntɔn nunu kan. O cogo la, aw Faa min bɛ sankolo la, a t'a fɛ denmisɛn nunu dɔ ka tunu. “N'i balima ye kojugu kɛ, ta'a fɛ k'a ladi i kelen ale kelen. N'a sera k'i faamu ka sɔn a la, i y'i balima tanga. Nga n'a banna k'i lamɛn, i ka mɔgɔ kelen walima fila fara i kan ka ta'a fɛ tugu, waasa mɔgɔ fila walima mɔgɔ saba k'o koo nyanabɔ. N'a ma sɔn olu ka fɔta ma, i k'o koo fɔ Ala ka jama ye. N'a ma sɔn olu ka fɔta ma fana, i k'a jati Alalɔnbali, walima wusuruminɛla ye. Tinyɛ na, ne b'a fɔ aw ye ko aw mana ban fɛɛn o fɛɛn na dugukolo kan, Ala bɛna ban o fana na sankolo la. N'aw sɔnna fɛɛn o fɛɛn ma dugukolo kan, Ala bɛna sɔn o fana ma sankolo la. “Tinyɛ na, ne b'a fɔ aw ye tugu ko ni mɔgɔ fila aw cɛma bɛnna ka Ala dali fɛɛn o fɛɛn na k'u to dugukolo kan yan, ne Faa min bɛ sankolo la bɛna o d'u ma. Bari ni mɔgɔ fila walima mɔgɔ saba mana nyɔgɔn lajɛn yɔrɔ o yɔrɔ ne tɔgɔ la, ne b'u cɛma.” Piyɛri gwɛrɛla Yezu la k'a nyininga ko: “Matigi, ni n balima bɛ to ka ne hakɛ ta tuma bɛɛ, ne ka kan ka yafa a ma sinyɛ joli? Fɔɔ ka taa se sinyɛ wolonwula wa?” Yezu y'a jaabi ko: “Ayi, ne t'a fɔ i ye sinyɛ wolonwula dɛ, nga sinyɛ wolonwula sigiyɔrɔman bi wolonwula. “O le y'a to Ala ka koo bɔnin bɛ masacɛ dɔ ta fɛ. Ale tun b'a fɛ k'a ka nafolo jati minɛ n'a ka baaradenw ye. K'a to jatili la, u nana ni baaraden dɔ ye min tun ka kan ka talan waa tan sara. Masacɛ nin y'a ye ko a tɛna se k'a bɛɛ sɔrɔ k'a sara minkɛ, a k'u ka baaraden nin, n'a ka muso, an'a ka denmisɛnw, n'a bololafɛn bɛɛ feere, waasa juru nin ka se ka sara. Baaraden nin y'a kunbiri gwan a ka kuntigi kɔrɔ k'a dali ko a ka munyu ale kɔrɔ dɔɔni, ko ale bɛna juru nin bɛɛ sara. A ka kuntigi makarila a la, ka yafa a ma juru nin koo la. O baaraden nin bɔra a ka kuntigi ka soo waati min na, a y'a tɔnyɔgɔn dɔ ye min tun ka kan ka deniye wari kɛmɛ d'ale ma. A y'o minɛ k'a kaan dɛrɛ kosɛbɛ fɔɔ a ninakili degunna, k'a fɔ a ye ko: ‘N ka wari sara.’ A ka tɔnyɔgɔn nin y'a yɛrɛ majigi a kɔrɔ k'a dali ko: ‘I ka munyu ne kɔrɔ, ne bɛn'a sara.’ Nga baaraden nin ma sɔn, a y'a don kaso la, k'a fɔ ko ni ale ka juru ma sɔrɔ, ko a tɛ bɔ. A ka tɔnyɔgɔn dɔw fana y'u ye minkɛ, olu nii tɔɔrɔla kosɛbɛ. Olu taara o koo fɔ u ka kuntigi ye. O tuma na, u ka kuntigi k'u ka taa baaraden nin wele ka na. U taar'a wele, a nana tuma min na, a ka kuntigi y'a fɔ a ye ko: ‘Baaradenjugu, ne tun yafara i ma juru nin koo la, bari i ye ne dali. Ne makarila i la cogo min na, ele fana tun ka kan ka makari i tɔnyɔgɔn na ten.’ A ka kuntigi dimina kosɛbɛ, a ye baaraden nin don kaso la, a ko ni juru nin bɛɛ ma sara, ko a tɛ bɔ.” O kɔ, Yezu ye nin fɔ k'a la a kan ko: “Ne Faa min bɛ sankolo la, o bɛna aw kɛ o cogo la, n'aw tɛ sɔn ka yafa aw tɔnyɔgɔn ma aw dusu bɛɛ la.” Yezu tilara kuma na tuma min na, a bɔra Galile mara la ka taa Zude mara yɔrɔ dɔ la, Zurudɛn baa kɔfɛ. O yɔrɔ la jamaba tugura a kɔ, a y'olu ka banabagatɔw kɛnɛya. Farizinyɛ dɔw nana ka Yezu darabɔ k'a filɛ. U y'a nyininga ko: “A daganin bɛ cɛɛ k'a muso furu sa koo sugu bɛɛ la wa?” Yezu y'u jaabi ko: “Aw m'a mɛn Ala ka kuma na, ko Ala ye dinyɛ dan tuma min na, a ye cɛɛ ni muso dan wa? A y'a fɔ fana k'o le kɔsɔn cɛɛ bɛn'a faa n'a bamuso to yen ka nɔrɔ a muso la, u fila bɛɛ bɛna kɛ kelen ye. O cogo la, u tɛna kɛ mɔgɔ fila ye tugu, fɔɔ kelen. Ala ye min jɛn ka kɛ kelen ye, mɔgɔ si kana o faran.” U ye Yezu nyininga ko: “Mun na Musa y'a fɔ ko wajibi lo n'an b'a fɛ ka muso furu sa, ko an ka kan ka furu sa sɛbɛ kɛ k'o d'a ma?” Yezu y'a fɔ u ye ko: “Aw ka dusukungwɛlɛya le y'a to Musa sɔnna ko aw bɛ se k'aw ka muso bila, n'o tɛ, fɔlɔfɔlɔ a tun tɛ ten. Ne b'a fɔ aw ye ko mɔgɔ min b'a ka muso furu sa, ni nyamɔgɔya sababu tɛ, ka tila ka dɔ wɛrɛ furu, o tigi ye kakalaya kɛ.” Yezu ka kalandenw y'a fɔ a ye ko: “Ni nin le kɛra furuko cogo ye, o tuma na, kuun t'a la mɔgɔ ka furu kɛ.” Yezu y'a fɔ u ye ko: “Mɔgɔ bɛɛ tɛ se k'o kɛ, fɔɔ ni Ala y'a see di mɔgɔ min ma. Nga mɔgɔ dɔw bɛ wolo ni furubaliya ye. Dɔw kɛra cɛgwanaw ye mɔgɔ wɛrɛ sababu la. Dɔw fana banna furu ma Ala ka baara kɔsɔn. Mɔgɔ min bɛ se ka sɔn furubaliya ma, o tigi k'a sɔn.” Mɔgɔw nana Yezu fɛ ni denmisɛnw ye, waasa a k'a bolo la u kan ka Ala dali u ye. Nga kalandenw y'u sɔngɔ. Yezu y'a fɔ u ye ko: “Aw ka denmisɛnw to u ka na ne fɛ, aw kana u bali, bari mɔgɔ minw sɔɔn kɛra i n'a fɔ denmisɛnw ta, olu le bɛ se ka don arijana na.” A y'a bolo la u kan, o kɔ, a taara. Cɛɛ dɔ gwɛrɛla Yezu la k'a nyininga ko: “Karamɔgɔ, ne ka kan ka konyuman jumɛn le kɛ, waasa ne ka hɛrɛ banbali sɔrɔ?” Yezu y'a fɔ a ye ko: “Mun na i bɛ ne nyininga konyuman koo la? Fɛɛn kelen dama le ka nyi. N'i b'a fɛ ka hɛrɛ banbali sɔrɔ, i ka Ala ka sariyaw labato.” Cɛɛ nin ye Yezu nyininga ko: “O ye sariya jumɛn ye?” Yezu y'a fɔ a ye ko: “ ‘I kana mɔgɔ faga, i kana nyamɔgɔya kɛ, i kana sonyali kɛ, i kana galon tigɛ. E k'i faa n'i bamuso bonya. Ani k'i mɔgɔnyɔgɔn kanu i n'a fɔ i b'i yɛrɛ kanu cogo min na.’ ” Kanbelen nin y'a jaabi ko ale sera k'o bɛɛ labato, ko mun b'ale jɛn tugu. Yezu y'a fɔ a ye ko: “N'i b'a fɛ i ka koow bɛɛ ka dafa, taa k'i bololafɛnw bɛɛ feere k'o wari tilan faantanw cɛ, o cogo la, i bɛna nafoloba sɔrɔ arijana na. O kɔ, e ka na ka tugu ne kɔ.” Nga kanbelen nin y'o kuma mɛn tuma min na, a hakili nyagaminin le taara, bari nafoloba tun b'a fɛ. Yezu y'a fɔ a ka kalandenw ye ko: “Tinyɛ na, ne b'a fɔ aw ye ko nafolotigi donko ka gwɛlɛ Ala ka mara kɔnɔ. Ne b'a fɔ aw ye tugu ko nyɔgɔmɛ donko ka nɔgɔ miseli woo fɛ ka tɛmɛ nafolotigi donko Ala ka mara kɔnɔ.” Kalandenw y'o kuma mɛn minkɛ, u kabakoyara kosɛbɛ. Olu tun b'a fɔra k'o tuma na, jon le bɛna se ka kisi? Yezu y'u filɛ, o kɔ, a y'a fɔ u ye ko mɔgɔw fɛ, o tɛ se ka kɛ, nga koo bɛɛ ka nɔgɔ Ala fɛ. Piyɛri ye Yezu nyininga ko: “A filɛ, an y'an ka fɛɛn bɛɛ to yen, ani ka tugu ele kɔ. An ta bɛna kɛ cogo di?” Yezu y'a fɔ u ye ko: “Tinyɛ na, ne b'a fɔ aw ye ko ni dinyɛ nana kɛ dinyɛkura ye tuma min na, Mɔgɔ Dencɛ bɛna sigi a ka masasigilan kan. Aw minw tugura a kɔ, aw fana bɛna sigi masasigilan tan ni fila kan, ka Isirayɛli jama ka koow nyanabɔ. Ani mɔgɔ o mɔgɔ min y'a ka soo bila, walima a balimacɛw, walima a balimamusow, walima a facɛ, walima a bamuso, walima a deenw, walima a ka foro ne ka baara kɔsɔn, o tigi bɛna o nyɔgɔn caaman sɔrɔ, ani ka sini hɛrɛ banbali sɔrɔ. Nga nyafɛmɔgɔ caaman bɛna kɛ kɔfɛmɔgɔw ye, ani kɔfɛmɔgɔ caaman bɛna kɛ nyafɛmɔgɔw ye. “Ala ka koo bɔnin bɛ forotigi dɔ ta fɛ. A bɔra sɔgɔma joona ko a bɛ sɛnɛkɛlaw ta k'u ci a ka foro kɔnɔ. A kɔnna ka minw sɔrɔ, a bɛnna n'olu ye ko a bɛna u sara ni deniye wari kelen ye tile kɔnɔ, ka sɔrɔ k'u ci a ka foro la. Tile gwanna dɔɔni, forotigi bɔra tugu ka dɔ wɛrɛw siginin ye yiriba kɔrɔ, u tun tɛ baara la. A y'a fɔ olu fana ye ko: ‘Aw ye taa ne ka foro la ka baara kɛ, ni tile banna, ne bɛna aw sara.’ Olu taar'a ka foro la. Tilefɛ forotigi nin bɔra tugu ka mɔgɔ dɔw sɔrɔ, n'u tɛ baara la, tile sumana dɔɔni, a ye dɔ wɛrɛw sɔrɔ fana, k'u bɛɛ ci a ka foro la. Tile banna tuma min na, a ye mɔgɔ dɔ wɛrɛw ye tugu minw tun tɛ baara la. A y'a fɔ olu ye ko: ‘Mun n'aw ye tile bɛɛ ban yan n'aw ma taa baara la?’ U y'a jaabi k'u ma baara sɔrɔ mɔgɔ si fɛ. A y'a fɔ olu ye k'u ka taa baara kɛ ale ka foro la. Baara jigira tuma min na, forotigi y'a fɔ a ka baarakuntigi ye ko a ka baarakɛla nunu wele k'u ka sara d'u ma, k'a daminɛ minw taara laban na fɔɔ ka ta'a bila fɔlɔ taw ma. Mɔgɔ minw taara o y'a sɔrɔ tile banna, olu gwɛrɛla, a ye deniye wari kelen kelen di olu bɛɛ ma. Mɔgɔ minw taara sɔgɔmadafɛ, olu nana gwɛrɛ. U tun b'a miiri k'u bɛna sɔrɔli kɛ ka tɛmɛ dɔ nunu kan. Nga u kelen kelen bɛɛ ye deniye wari kelen kelen le sɔrɔ. Olu y'u ka sara minɛ tuma min na, u tun bɛ; nunu;nunu forotigi kama. U tun b'a fɔra ko: ‘Nunu nana kɔfɛ, u yɛrɛ ma tile kelen baara kɛ ani u ma sɛgɛn i n'a fɔ anw. U ye baara kɛ waati dɔɔni dɔrɔn. Ele y'olu ka sara kɛ kelen ye n'an ta ye.’ Forotigi y'a fɔ u kelen ye ko: ‘N teri, ne ma i tɔnyɔ. An tun ma bɛn a la ko ne bɛna i sara ni deniye wari kelen ye wa? E k'i ka sara minɛ ka tɛmɛ ka bɔ yan. Mɔgɔ minw taara baara la kɔfɛ, ne bɛna e ka sara nyɔgɔn di olu bɛɛ ma. O tuma na, ne man kan ka n sago kɛ ni n ka wari ye wa, walima ne ye konyuman min kɛ, o nyagoya le b'i la?’ ” Yezu tilara k'a fɔ ko: “O cogo la, kɔfɛmɔgɔw bɛna kɛ nyafɛmɔgɔw ye, ani nyafɛmɔgɔw bɛna kɛ kɔfɛmɔgɔw ye.” Yezu n'a ka kalandenw tun bɛ taara Zeruzalɛmu. K'u to sira kan, a ye kalanden tan ni fila nunu wele u danna k'a fɔ u ye ko: “Ayiwa, an bɛ taara Zeruzalɛmu. O yɔrɔ la, u bɛna Mɔgɔ Dencɛ don sarakalasebagaw ni sariya karamɔgɔw bolo. U bɛn'a fɔ ko a ka kan ka faga. U bɛn'a don siya wɛrɛw bolo, olu bɛna yɛlɛ a ma, k'a bugɔ ni golokami ye, k'a gwengwen lɔgɔ kan. Nga tile sabanan loon a bɛna kunun.” O kɔ, Zebede ka muso nana Yezu fɛ n'a ka dencɛw ye. A y'a kunbiri gwan Yezu kɔrɔ waasa k'a dali. Yezu y'a nyininga ko: “E bɛ mun le fɛ?” A y'a jaabi ko: “N'i sigira i ka masaya la tuma min na, a to n deen fila nunu ka sigi i kɔrɔ, mɔgɔ kelen i numanbolo fɛ, kelen i kinibolo fɛ.” Yezu y'u jaabi ko: “Aw bɛ fɛɛn min dali, aw m'o lɔn. Ne bɛna tɔɔrɔ min sɔrɔ, aw bɛna se k'o nyɔgɔn munyu wa?” U y'a fɔ ko: “An bɛna se.” Yezu y'a fɔ u ye ko: “Aw kɔni bɛna o munyu. Nga mɔgɔ min ka kan ka sigi ne kinibolo, walima ne numanbolo fɛ, ne t'o latigɛbaga ye. N Faa y'o yɔrɔw labɛn mɔgɔ minw ye, u maranin bɛ olu ye.” Kalanden tan nunu y'o mɛn minkɛ, u dimina mɔgɔ fila nunu kɔrɔ. Yezu y'u bɛɛ wele k'a fɔ u ye ko: “Aw b'a lɔn ko dinyɛ kɔnɔ, jamana kuntigiw b'u ka jamana mɔgɔw tɔɔrɔ, mɔgɔbaw bɛ fanga yira tɔw la. A man kan ka kɛ ten aw cɛma. N'aw dɔ b'a fɛ ka kɛ kuntigi ye, o tigi ka kan k'a yɛrɛ kɛ aw ka baaraden ye. Ni mɔgɔ min b'a fɛ ka kɛ nyamɔgɔ ye aw cɛma, o ka kan ka kɛ aw ka jɔɔn ye. O cogo la, Mɔgɔ Dencɛ ma na waasa mɔgɔw ka baara kɛ a ye. Nga, a nana mɔgɔw mako nya, ani k'a yɛrɛ nii di ka kɛ mɔgɔ bɛɛ nii kunmabɔ sara ye.” Yezu n'a ka kalandenw tun bɛ bɔra Zeriko tuma min na, jamaba tun tugura a kɔ. Finyɛntɔ fila dɔ tun siginin bɛ sira daa la, olu y'a mɛn tuma min na ko Yezu le bɛ tɛmɛna, u y'a daminɛ k'a fɔ ko: “Matigi, makari an na, Dawuda dencɛ.” Jama sɔngɔra u kunna k'u ka je, nga u pɛrɛnna ka tɛmɛ fɔlɔta kan. U ko: “Makari an na Matigi, Dawuda dencɛ.” Yezu lɔra k'u wele, k'u nyininga ko: “Aw b'a fɛ ne ka mun le kɛ aw ye?” U y'a jaabi ko: “An b'a fɛ i k'an nyaaw yɛlɛ, Matigi.” U hinɛ donna Yezu la minkɛ, a magamagara u nyaa na. O yɔrɔnin bɛ mɔgɔ fila nunu nyaa yɛlɛla. U wilila ka tugu Yezu kɔ. Yezu n'a ka nɔfɛmɔgɔw surunyana Bɛtifaze la, Olivuyirikulu gɛrɛfɛ. U yɔrɔ tun man jan Zeruzalɛmu na tugu. A y'a ka kalandenw fila ci a nyafɛ. A y'a fɔ u ye ko: “Aw ye taa aw nyafɛ dugu nin na. Aw bɛna falimuso n'a deen sirinin sɔrɔ yen. Aw k'u foni ka na n'u ye yan. Ni mɔgɔ dɔ y'aw nyininga, aw k'a fɔ o tigi ye ko Matigi mako le b'u la, o yɔrɔnin bɛ, a bɛna aw to aw bɛ na n'u ye.” O koo kɛra ten waasa kira tun ye kuma min fɔ, o ka kɛ. A tun ko: “Aw y'a fɔ Zeruzalɛmukaw ye, k'u ka masacɛ bɛ nana u fɛ, a y'a yɛrɛ majigi ka yɛlɛ faliden kan.” Kalanden nunu taar'a kɛ i n'a fɔ Yezu tun y'a fɔ u ye cogo min na. U nana ni falimuso n'a deen ye, k'u ka faniw la u kan. Yezu sigira faniw kan. Mɔgɔ caaman tora k'u ka faniw lala sira kan, dɔw tun bɛ yiri furaburu tigɛ k'o lala sira kan fana k'a bonya n'o ye. Jama min tun bɛ taama Yezu nyafɛ, ani minw tun b'a kɔfɛ, olu bɛɛ tun bɛ pɛrɛnna k'a fɔ ko: “An b'i tɔgɔ tando Dawuda dencɛ! E min bɛ nana Matigi tɔgɔ la, Ala ka barika don i la. Ala tɔgɔ ka tando arijana na.” Yezu donna Zeruzalɛmu dugu kɔnɔ tuma min na, dugu mɔgɔw bɛɛ nyagamina, u tun bɛ nyɔgɔn nyiningana ko cɛɛ nin ye jon ye. U tun bɛ nyɔgɔn jaabi ko kira Yezu lo ka bɔ Nazarɛti, Galile mara la. Yezu donna Alabatosoba kɔnɔ waati min na, a ye feerekɛlaw, ni sannikɛlaw gwɛn ka bɔ yen, ka warifalenbagaw ka tabaliw ni jɛnɛtugan feerebagaw ka sigilanw nyɔnti k'u benben duguma. O kɔ, a y'a fɔ u ye ko a fɔra Ala ka kuma na ko: “Ne Ala ka soo bɛna kɛ dalili kɛyɔrɔ ye. Nga aw kɔni y'a kɛ soonw ka yɔrɔ ye.” Finyɛntɔw ni senkelenninw taara Yezu fɛ Alabatosoba kɔnɔ. Yezu y'u kɛnɛya. Sarakalasebagaw ani sariya karamɔgɔw y'o kabako kɛninw ye tuma min na, ani denmisɛnw tun bɛ pɛrɛn n'u b'a fɔra ko: “An b'i tando Dawuda dencɛ,” u dimina kosɛbɛ. U ye Yezu nyininga ko: “I ma denmisɛn nunu ka kuma mɛn wa?” Yezu y'u jaabi ko: “Ɔnhɔn, aw fana m'a mɛn Ala ka kuma na ka ye wa? A ko: ‘E y'e tandoli kuma don denmisɛnw ani dennyɛninw daa la.’ ” A y'o kuma fɔ ka ban, a y'u to yen ka bɔ dugu kɔnɔ ka taa si Betani. Sɔgɔmadafɛ Yezu tun bɛ kɔsegira ka taa Zeruzalɛmu, kɔngɔ y'a minɛ. A ye torosun dɔ ye sira daa la minkɛ, a gwɛrɛla a la k'a filɛ, nga a ma deen si sɔrɔ a la furaburu kɔ. Yezu y'a fɔ yiri nin ma ko: “A banna, ele kɔni tɛna deen kɛ tugu!” O waati yɛrɛ la yiri nin jara. Kalandenw y'o ye minkɛ, u kabakoyara kosɛbɛ. U y'a nyininga ko a kɛra cogo di torosun nin jara yɔrɔnin kelen. Yezu y'u jaabi ko: “Tinyɛ na, ne b'a fɔ aw ye ko n'aw lara ne la, n'aw tɛ sigasiga fewu, ne ye min kɛ torosun na, aw bɛna se k'o nyɔgɔn kabakow kɛ. Aw bɛna dɔ wɛrɛw yɛrɛ kɛ ka tɛmɛ a kan. Hali n'aw y'a fɔ kulu nin ye ko: ‘Bɔ i lɔyɔrɔ la ka taa ben kɔgɔji kɔnɔ,’ o bɛn'a kɛ. N'aw lara ne la, n'aw ye Ala dali fɛɛn o fɛɛn na, a bɛna o d'aw ma.” Yezu taara Alabatosoba kɔnɔ. K'a to mɔgɔw kalan na, sarakalasebagaw ni Zuwifu ka cɛkɔrɔbaw nana k'a nyininga ko: “E bɛ koo minw kɛ, jon le y'o sira d'i ma? Jon le y'o kɛ see d'i ma?” Yezu y'u jaabi ko: “Ne fana bɛna aw nyininga koo kelen dɔrɔn na. N'aw ye ne jaabi, o tuma na, min ye see di ne ma ka koo nunu kɛ, ne bɛna o fɔ aw ye. Jon le tun ye Zan ci ka na mɔgɔw batize, Ala lo wa, walima mɔgɔw lo?” Nga u tora ka nyɔgɔn sɔsɔ gɛrɛfɛ k'a fɔ ko: “N'an y'a jaabi ko Ala lo, a bɛna an nyininga ko mun na an ma la a la? Nga n'an y'a fɔ ko mɔgɔw lo fana, an bɛ siran jama nya, bari mɔgɔ bɛɛ tun lar'a la ko Zan ye kira ye.” O la, u ye Yezu jaabi ko: “An t'o lɔn.” Ale fana y'a fɔ u ye ko: “N'o lo, mɔgɔ min ye sira di ne ma ka koo nunu kɛ, ne fana tɛna o fɔ aw ye.” Yezu y'u nyininga tugu ko: “Aw bɛ mun le miiri nin na? Deen fila tun bɛ cɛɛ dɔ fɛ. A y'a fɔ deen fɔlɔ ye ko: ‘Bii, ne b'a fɛ i ka taa baara kɛ foro kɔnɔ.’ Deen fɔlɔ nin y'a jaabi ko: ‘Ne tɛna se ka taa.’ Dɔɔni a nimisara, a ye sira minɛ ka taa foro la. Facɛ nin taara deen filanan fɛ, k'a fɔ ale ye fana, ale ko: ‘Ɔnhɔn baba, ne bɛna taa.’ Nga a ma taa. O deen fila nunu cɛma, jumɛn le ye o facɛ sago kɛ?” U y'a jaabi ko deen fɔlɔ kɛ. Yezu y'a fɔ u ye ko: “Ne b'a fɔ aw ye tinyɛ na ko wusuruminɛlaw ni kakalamusow bɛna kɔn ka don aw nya Ala ka mara kɔnɔ. Bari Zan nana aw fɛ ka taamacogonyuman yira aw la. Aw ma sɔn o ma, nga wusuruminɛlaw ni kakalamusow sɔnna o ma. Aw y'o ye, aw ma sɔn k'aw dusu yɛlɛma ka la a la.” Yezu y'a fɔ u ye tugu ko: “Aw y'aw tulo malɔ talen dɔ wɛrɛ la. Forotigi dɔ ye foro bɔ ka ɛrɛzɛnyiriw tutu yen. A ye kogo kɛ k'a koori, ka dingɛ sogi ka ɛrɛzɛn nin jii bɔyɔrɔ dilan, ka sangaso lɔ a kɔlɔsibagaw ye. A y'a don baarakɛla dɔw bolo. O kɔ, a taara taama na. Ɛrɛzɛn mɔna tuma min na, a y'a ka jɔɔnw ci baarakɛla nunu fɛ k'u ka taa ale niyɔrɔ minɛ. Baarakɛla nunu y'o jɔɔnw minɛ, ka kelen bugɔ kosɛbɛ, ka kelen faga ani ka tɔ kelen nin bon ni kabakuruw ye. Forotigi y'a ka jɔɔn dɔ wɛrɛw ci minw cayara ni fɔlɔtaw ye. Baarakɛla nunu y'olu minɛ k'u kɛ i n'a fɔ u tun ye fɔlɔtaw kɛ cogo min na. A laban na, a y'a dencɛ ci u ma, a tun y'a fɔ a yɛrɛ kɔnɔ ko: ‘U bɛna ale bonya, bari n dencɛ lo.’ Nga baarakɛlaw y'o ye tuma min na, u y'a fɔ nyɔgɔn ye ko: ‘A ka cɛntala filɛ, an k'a faga. A ka cɛɛn bɛna kɛ an ta ye.’ U y'a sama ka bɔ n'a ye foro kɔnɔ k'a faga k'a fili yen.” Yezu y'u nyininga ko: “Sisan ni forotigi nana tuma min na, a bɛna mun le kɛ o baarakɛlaw la?” U y'a jaabi ko: “Wajibi lo, a tɛna makari o mɔgɔjugu nunu na, a bɛna u faga, k'a ka foro kalifa baarakɛla dɔ wɛrɛw ma, o minw bɛn'a ka niyɔrɔ d'a ma ɛrɛzɛnmɔtuma na.” O kɔ, Yezu y'a fɔ u ye ko: “Min fɔra Ala ka kuma na, aw m'o mɛn ka ye wa? Ko: ‘Bonlɔlaw tun banna kabakuru min na, ale lo nana kɛ jigilakabakuru ye ka boon nin kogo tilen. O ye Matigi ka baara ye, a kɛra kabako ye an nyana.’ ” Yezu y'a fɔ u ye tugu ko: “Ne b'a fɔ aw ye k'o cogo la, Ala ka koo nyamɔgɔya bɛna bɔsi aw la, ka di siya wɛrɛw ma. Olu bɛna kɛwalinyuman kɛ. [ Ni mɔgɔ min benna o kabakuru nin kan, o tigi kolow bɛna karikari, nga n'o kabakuru nin benna mɔgɔ min kan, a bɛna o tigi nyɔnyɔ.]” Sarakalasebagaw ani Farizinyɛw ye Yezu ka talen nunu mɛn ka ban tuma min na, u y'a faamu ko Yezu tun bɛ kuma olu le koo la. U tun bɛ cogoya nyinina waasa ka Yezu minɛ, nga u siranna jama nya, bari olu bɛɛ tun bɛ Yezu jati kira ye. Yezu kumana u fɛ talen na tugu k'a fɔ ko: “Ala ka koow bɔnin bɛ masacɛ dɔ ta fɛ: A y'a deen ka kɔnyɔya dumuni labɛn. A tun y'o dumuni koo fɔ minw ye, a y'a ka baaradenw ci k'u ka taa olu wele, nga olu tun t'a fɛ ka na. O kɔ, a y'a ka baaraden dɔ wɛrɛw ci tugu k'u ka ta'a fɔ mɔgɔ nunu ye ko: ‘Ne ye dumuni bɛɛ labɛn ka ban. Ne ye n ka turaw ani n ka begɛn tulɔninw faga ka ban. Fɛɛn bɛɛ labɛnna, aw ye na o dumu.’ Nga minw welela, olu ma miiri u welekun na. U taara u nyana taw la: Dɔ taar'a ka foro la, dɔ fana taar'a ka jago kɛyɔrɔ la. Tɔ nunu ye baaradenw minɛ k'u tɔɔrɔ kosɛbɛ ani k'u faga. Masacɛ dimina kosɛbɛ, a y'a ka sɔlidasiw ci ka taa o mɔgɔfagala nunu halaki ani ka u ka dugu jɛni. O kɔ, a y'a fɔ a ka baaraden dɔ wɛrɛw ye ko: ‘Kɔnyɔya dumuni labɛnna ka ban, nga minw tun welela, olu tun man kan n'a ye. Aw ye taa sirabaw daa la, n'aw ye mɔgɔ o mɔgɔ sɔrɔ, aw k'u wele, u ka na ka dumuni nin dumu.’ Baaraden nunu taara sira daaw la. U ye mɔgɔ o mɔgɔ sɔrɔ yen, u y'u wele, a nyumaman fara jugumanw kan, fɔɔ kɔnyɔya dumuni labɛnna soo min kɔnɔ, o fara. Masacɛ donna ko a bɛ mɔgɔ welenin nunu filɛ waati min na, a ye cɛɛ dɔ ye kɔnyɔya fani tun tɛ min kaan na. A y'a fɔ o cɛɛ nin ye ko: ‘N teri, ele kɛra cogo di ka don yan ni kɔnyɔya fani t'i kaan na?’ O cɛɛ nin lɔra, a ma se ka kuma. Masacɛ y'a fɔ a ka baaradenw ye ko: ‘Aw k'a seen n'a bolow siri, k'a ta k'a fili kɛnɛma dibi la. O yɔrɔ la, a bɛna tɔɔrɔ ka kasi.’ Ala bɛ mɔgɔ caaman wele waasa u ka don a ka masaya yɔrɔ la, nga minw bɛ se ka don, olu man ca.” Farizinyɛw taara nyɔgɔn ye kɛ, waasa ka cogo nyini ka se ka Yezu minɛ n'a yɛrɛ dalakuma ye. U y'u ka kalanden dɔw, ni Erɔdi ka mɔgɔ dɔw ci, waasa u k'a fɔ Yezu ye ko: “Karamɔgɔ, an y'a lɔn ko i bɛ tinyɛ fɔ, an'i bɛ mɔgɔ kalan ni tinyɛ ye Ala ka sira la. E fana tɛ siran mɔgɔ si nya ka sɔn o tigi ka miiriya ma, i tɛ mɔgɔ bɔ mɔgɔ la. I ka miiriya fɔ an ye, a daganin bɛ ka nisɔngɔ sara Ɔrɔmu masacɛ ye wa, walima a daganin tɛ?” Nga Yezu bɔra u ka miiriyajugu kala ma minkɛ, a y'a fɔ u ma ko: “Nanbaranmɔgɔw, mun na aw bɛ ne dakɔrɔbɔ? Aw bɛ nisɔngɔ sara ni wari min ye, aw k'o dɔ yira ne la.” U ye deniye wari kelen yira a la. A y'u nyininga ko: “Jon jaa n'a tɔgɔ le b'a kan?” U y'a jaabi ko: “Masacɛ ta lo.” O kɔ, Yezu y'a fɔ u ye ko: “Fɛɛn min ye masacɛ ta ye, o ka di masacɛ ma, ka Ala ta di Ala ma.” U y'o kuma mɛn minkɛ, u kabakoyara kosɛbɛ, o kɔ, u tɛmɛna ka taa ka Yezu to yen. Sadusenyɛw le tun b'a fɔ ko suuw tɛna kunun. O loon kelen na, olu dɔw taara Yezu fɛ k'a fɔ a ye ko: “Karamɔgɔ, Musa y'a fɔ ko ni mɔgɔ dɔ sara k'a sɔrɔ a ma deen sɔrɔ a muso ma, k'o tigi dɔgɔcɛ ka kan ka muso nin ta, waasa a ka deen sɔrɔ a baden ye o muso nin ma. Nga balima mɔgɔ wolonwula tun b'an fɛ. Kɔrɔcɛman ye muso furu, a sara k'a muso to yen, a ma deen sɔrɔ a ma. O cogo la, dɔgɔcɛ fɔlɔ ye muso nin ta, o kɔ, filanan fana y'a ta, ani sabanan. Olu si ma deen sɔrɔ muso nin ma, fɔɔ u mɔgɔ wolonwula bɛɛ ta kɛra ten. Olu bɛɛ sanin kɔ, muso nin fana sara. Ayiwa, suuw bɛna kunun loon min na, o muso nin bɛna kɛ jon ta ye u mɔgɔ wolonwula cɛma? Bari u bɛɛ y'a furu ka ye.” Yezu y'u jaabi ko: “Aw filila, bari aw tɛ Ala ka kuma faamu, aw tɛ Ala ka sebagaya lɔn fana. N'o tɛ, suuw bɛna kunun waati min na, furu tɛna kɛ. Mɔgɔw bɛɛ bɛna kɛ i n'a fɔ mɛlɛkɛw sankolo la. Min ye suuw ka kununko ye, aw m'o kalan ka ye Ala ka kuma na wa? A ko: ‘Ne ye Ibrayima, ni Isiyaka, ani Yakuba ka Ala ye.’ Ala ma kɛ suuw ka Ala ye, nga mɔgɔ nyanamanw ka Ala lo.” Jamaba y'a ka kuma nin mɛn, olu bɛɛ kabakoyara kosɛbɛ. Farizinyɛw y'a mɛn ko Yezu ye Sadusenyɛw minɛ kuma na minkɛ, olu ye nyɔgɔn lajɛn. U dɔ, min tun ye sariya karamɔgɔ ye, ale tun b'a fɛ ka Yezu dakɔrɔbɔ. O la, a y'a nyininga ko: “Karamɔgɔ, sariya kɔnɔ, cii jumɛn le koo ka gwɛlɛ?” Yezu y'a jaabi ko: “ ‘I ka i Matigi Ala kanu i dusu la, i kɔnɔ na, n'i hakili la.’ O le ye cii fɔlɔ ye, ani o koo le ka gwɛlɛ fana. A filanan bɛ yen min koo ka gwɛlɛ i n'a fɔ fɔlɔ. O ko: ‘I k'i mɔgɔnyɔgɔn kanu i n'a fɔ e b'i yɛrɛ kanu cogo min na.’ Sariya ni kiraw ka kalan bɛɛ bɔra nin cii fila la.” Ka Farizinyɛw lajɛnnin to, Yezu y'u nyininga ko: “Aw ka miiri la, Ala ka Mɔgɔ wolomanin nin ye jon ye? Jon ka deen lo?” U y'a jaabi ko Dawuda dencɛ lo. Yezu y'a fɔ u ye ko: “Nii Senuman barika la, Dawuda ye Krista wele ko a Matigi, bari a y'a fɔ ko: ‘Matigi Ala y'a fɔ ne Matigi ye ko: Sigi ne kinibolo fɛ fɔɔ ne ka i juguw cɔnkɔn i seen kɔrɔ.’ Ni Dawuda y'a wele Matigi, a bɛ se ka kɛ a deen dama ye cogo di?” U mɔgɔ si ma se k'a jaabi. K'a ta o loon na, mɔgɔ si ma sɔn k'a nyininga tugu. Yezu tun bɛ kumana a ka kalandenw ni jama fɛ. A tun y'a fɔ u ye ko: “Ala ye sariya min di Musa ma, sariya karamɔgɔw ni Farizinyɛw le ka kan ka mɔgɔw kalan o la. N'u y'aw kalan ni sariya koo min ye, aw k'o kɛ. Nga aw kana u ka kɛwali filɛ, bari u bɛ min fɔ, u t'o kɛ. U bɛ doni gwiliman siri k'o la mɔgɔw kuun na, nga olu yɛrɛ tɛ sɔn k'u dɛmɛ haali dɔɔni. U ka koo bɛɛ kɛra tɔgɔnyini ye. O le y'a to u bɛ sɛbɛ minw bɛɛ siri u teen na, ani u bolo la, u bɛɛ ka bonbon. U b'u ka faniw kalan ka masirifɛn kɛ u la. Sigiyɔrɔnyuman koo le ka d'u ye, forobadumuni kɛyɔrɔw la, ani Alabatoso kɔnɔ nyafɛ sigiyɔrɔnyumanw. Jamayɔrɔw la, u b'a fɛ ko mɔgɔw k'u fo i n'a fɔ mɔgɔbaw, ani k'u wele karamɔgɔ. Nga aw kɔni, aw kana sɔn u b'aw wele karamɔgɔ, bari aw bɛɛ ye balimaw ye, aw bɛɛ ka karamɔgɔ ye kelen ye. Aw kana mɔgɔ si wele ko aw facɛ, dugukolo kan, bari aw Facɛ ye kelen ye, Ala min bɛ sankolo la. Aw kana sɔn u b'aw wele ko kuntigi, bari aw ka kuntigi ye kelen ye, o ye Ala ka Mɔgɔwolomanin nin ye. Mɔgɔ min ye mɔgɔba ye aw cɛma, o ka kan ka kɛ aw ka baaraden ye. Ni mɔgɔ min b'a yɛrɛ majigi, Ala bɛna o tigi kɔrɔta, ni mɔgɔ min b'a yɛrɛ kɔrɔta, Ala bɛna o tigi majigi. “Bɔnɛ y'aw ta ye, aw sariya karamɔgɔw ni Farizinyɛ nanbaranmɔgɔw, bari aw bɛ Ala ka masaya yɔrɔ donda tugu, aw tɛna don, minw b'a fɛ ka don fana, aw t'a to olu fana ka don. [Bɔnɛ y'aw ta ye, aw sariya karamɔgɔw ni Farizinyɛ nanbaranmɔgɔw, bari aw bɛ firiyamusow bololafɛnw bɛɛ bɔsi u la, o kɔ, aw bɛ mɛn Ala dali la, waasa k'aw yɛrɛ yira mɔgɔsɛbɛw ye. O la, aw ka jalaki tɔɔrɔ bɛna bonya kosɛbɛ.] Bɔnɛ y'aw ta ye, aw sariya karamɔgɔw ni Farizinyɛ nanbaranmɔgɔw, aw bɛ kɔgɔji tigɛ ka taa dugukolo faan bɛɛ la ka tuubiden nyini. Ni dɔ sɔrɔla, aw b'a kɛ jahanamaden ye ka tɛmɛ aw yɛrɛ kan fɔɔ sinyɛ fila. Aw sirayirabaga finyɛntɔw, bɔnɛ y'aw ta ye. Aw b'a fɔ ko ni mɔgɔ dɔ kalila Alabatosoba la, k'o tɛ jati, nga ko ni mɔgɔ min kalila Alabatosoba kɔnɔ sanu na, k'o le bɛ jati. Naloman ni finyɛntɔw, jumɛn le ka fisa u fila la: sanu wa, walima Alabatosoba? Aw b'a fɔ fana ko ni mɔgɔ kalila sarakabɔlan na, k'o tɛ jati, nga ko saraka min b'a kan, ko ni mɔgɔ kalila o la, k'o le bɛ jati. Finyɛntɔ nunu, jumɛn ka fisa u fila la: saraka wa, walima sarakabɔlan? Ayiwa, mɔgɔ min bɛ kali sarakabɔlan na, o tigi kalila a sanfɛ saraka fana na. Mɔgɔ min bɛ kali Alabatosoba la, o tigi kalila Ala fana na. Mɔgɔ min bɛ kali sankolo la, o tigi kalila Ala ka masasigilan na, ani Ala min siginin bɛ o kan. Bɔnɛ b'aw ye, aw sariya karamɔgɔw ni Farizinyɛ nanbaranmɔgɔw, aw bɛ nanaye, ani nanfuraburu sifa bɛɛ jaka bɔ. Nga sariya ka koo minw ka gwɛlɛ, i n'a fɔ tilenninya, ni makari ani kantigiya, aw tɛ olu labato. Aw tun ka kan ka olu le kɛ fɔlɔ ka dɔ nunu fara o kan. Sirayirabaga finyɛntɔw, aw b'aw ka minji sɛnsɛn ka limɔgɔmisɛnw bɔ, ka sɔrɔ k'o min, k'a sɔrɔ aw bɛ nyɔgɔmɛ kunu. Bɔnɛ b'aw ye, aw sariya karamɔgɔw ani Farizinyɛ nanbaranmɔgɔw, aw bɛ filen ni tasa kɔfɛlaw ko k'o gwɛ, nga u kɔnɔ fanin bɛ aw ka sonyalifɛnw na, ani aw ka miirijuguw la. Farizinyɛ finyɛntɔ, i ka filen kɔnɔ ko fɔlɔ, ka sɔrɔ k'a kɔfɛla ko. Bɔnɛ b'aw ye, aw sariya karamɔgɔw ni Farizinyɛ nanbaranmɔgɔw, aw minw bɛ i n'a fɔ kaburu, u ye min dilan k'a kɛ gwɛman ye. Kɛnɛmala filɛ ka di nyaa na, nga a kɔnɔna bɛɛ fanin lo kolo, ni nyamanyama sifa bɛɛ la. Aw fana bɛ ten, kɛnɛma aw kɛra mɔgɔnyumanw ye, nga nanbaran, ani juguya jiidinin bɛ aw kɔnɔ. “Bɔnɛ y'aw ta ye, aw sariya karamɔgɔw ni Farizinyɛ nanbaranmɔgɔw, aw minw bɛ kiraw ka kaburuw lalaga k'u lɔ ka nya. Mɔgɔ minw tun kɛra mɔgɔtilenninw ye Ala sira la, aw bɛ olu ka kaburuw masiri ni feerennyumanw ye. Aw bɛ sɔrɔ k'a fɔ ko n'aw tun bɛ yen aw bɛmaw ka waati la, ko aw tun tɛna sɔn k'u dɛmɛ ka kira nunu faga. O cogo la, aw b'a yira aw yɛrɛ ma ko aw kɛra kira nunu fagabagaw ka deenw ye. O ka nyi, aw ka taa nya ka aw bɛmaw ka kɛwali tɔɔ dafa. Aw bɛ i n'a fɔ saaw, fɔnfɔnniden nunu, aw bɛn'a kɛ cogoya jumɛn na ka tila jahanama tasuma na? Ayiwa, aw ye mɛnni kɛ. Ne bɛna n ka ciradenw ci aw ma, hakilitigiw ani mɔgɔkalanninw. Aw bɛna dɔw faga ka dɔw gwengwen lɔgɔ kan, ka dɔw bugɔ ni golokami ye Alabatosow kɔnɔ, ani aw bɛna tugu dɔw kɔ ka taa u tɔɔrɔ dugu wɛrɛw la. Mɔgɔtilennin minw fagara, olu ka fagako jalaki bɛna ben aw kan, k'a ta Abɛli ma, ale min tun kɛra mɔgɔtilennin ye, fɔɔ ka na se Barasi dencɛ Zakari ma, aw tun y'o min faga Alabatosoba yɔrɔ senuman ni sarakabɔlan cɛ. Ne b'a fɔ aw ye tinyɛ na k'olu ka fagako kunkow bɛna la bii mɔgɔw kan.” Yezu y'a fɔ ko: “Zeruzalɛmukaw, Zeruzalɛmukaw, aw minw bɛ kiraw faga, ka Ala ka cidenw bon ni kabakuru ye k'u faga, sinyɛ joli ne tun b'a fɛ k'aw lajɛn n kɔrɔ, i n'a fɔ sisɛ b'a deenw lajɛn a gamanw kɔrɔ cogo min na, aw ma sɔn. Ayiwa, aw ka dugu lakolon bɛna to aw fɛ. O la, ne b'a fɔ aw ye ko aw tɛna ne ye tugu, fɔɔ loon min na aw bɛn'a fɔ ko: ‘Mɔgɔ min natɔ ye, Matigi ka barika don o la.’ ” Yezu tun bɔra Alabatosoba kɔnɔ, n'a bɛ taara, a ka kalandenw gwɛrɛla a la ka kuma a fɛ Alabatosoba lɔcogo koo la. Yezu y'a fɔ u ye ko: “Aw nyaa bɛ soo nin lɔcogo la kɛ? Tinyɛ na, ne b'a fɔ aw ye ko loon dɔ, kabakuru nunu si tɛna to nyɔgɔn kan, u bɛɛ bɛna walaka.” Yezu taara sigi Olivuyirikulu kan. A ka kalandenw gwɛrɛla a la u danna k'a fɔ a ye ko: “O koow bɛna kɛ waati min na, i ka o fɔ an ye, e k'i nako taamasinyɛ, ni dinyɛ laban taamasinyɛ fɔ an ye.” Yezu y'u jaabi ko: “Aw k'aw yɛrɛ kɔlɔsi janko mɔgɔ si kana aw lafili. Bari, mɔgɔ caaman bɛna na ne tɔgɔ la u yɛrɛ kan k'a fɔ k'olu ye Ala ka Mɔgɔwolomanin nin ye. O cogo la, u bɛna mɔgɔ caaman lafili. Aw bɛna yɔrɔjan kɛlɛw kibaru mɛn, ani ka yɔrɔsurun kɛlɛw mankan mɛn. O kana aw hakili nyagami. Wajibi lo o koow ka kɛ, nga o tɛ dinyɛ laban ye. Siya dɔ bɛna wili siya wɛrɛ kama. Jamana dɔ bɛna wili jamana wɛrɛ kama. Kɔngɔ bɛna don yɔrɔ dɔw la, dugukolo bɛna yɛrɛyɛrɛ yɔrɔ dɔw la fana. O koow bɛɛ bɛna kɛ tɔɔrɔw daminɛ ye, i n'a fɔ muso ka tiin daminɛ. Mɔgɔw bɛna aw don mɔgɔjuguw bolo waasa k'aw tɔɔrɔ, u bɛna aw faga, Alalɔnbaliw bɛna aw kɔniya ne kɔsɔn. O waati la, mɔgɔ caaman bɛna Alasira bila, u bɛna nyɔgɔn janfa ka nyɔgɔn kɔniya. Mɔgɔ caaman bɛna wili ka galon tigɛ k'olu ye kiraw ye, u bɛna mɔgɔ caaman lafili. Kojugu bɛna fanga sɔrɔ fɔɔ mɔgɔ caaman tɛna Ala, n'u tɔnyɔgɔnw kanu tugu. Nga ni mɔgɔ min munyuna fɔɔ ka se a laban ma, o tigi bɛna kisi. Ala ka kibaru diman bɛna fɔ dinyɛ yɔrɔ bɛɛ la, waasa dinyɛ mɔgɔw bɛɛ k'a koo mɛn. O kɔ, dinyɛ laban bɛ sɔrɔ ka se. “Kira Daniyɛli tun ye mɔgɔjugu cɛnnikɛla min koo fɔ, n'aw y'o ye Alabatosoba yɔrɔ senuman na tuma min na, (mɔgɔ min bɛ nin kalan, o tigi ka hakili sɔrɔ k'o faamu kosɛbɛ), o tuma na, mɔgɔ minw bɛ Zude mara la, olu ka boli ka taa kulu yɔrɔw la. N'o kɛra ka mɔgɔ min sɔrɔ a ka boon sanfɛ, o tigi kan'a fɔ ko a bɛna jigi ka minan dɔ ta soo kɔnɔ, ka taa n'o ye. N'o y'a sɔrɔ ni min bɛ foro la, o tigi kan'a fɔ ko a bɛna kɔsegi ka na a ka foroca ta soo. O waati la, muso kɔnɔmanw, ni dennyɛnintigiw bɛna tɔɔrɔ kosɛbɛ. Aw ka Ala dali waasa o boli nin kana kɛ waatigwɛlɛn tuma na, walima lafinyɛlon na. O bɛna kɛ tɔɔrɔba ye, min nyɔgɔn ma kɛ ka ye kabini dinyɛ dantuma, fɔɔ ka na se bii ma, ani o tɔɔrɔ nyɔgɔn fana tɛna kɛ tugu abada. Ni Ala tun m'a latigɛ ko a bɛna dɔ bɔ o tɔɔrɔ waati la, mɔgɔ si tun tɛna kisi, nga a ye minw woloma k'u kɛ a yɛrɛ taw ye, olu kɔsɔn, dɔ bɛna bɔ a la. Ni mɔgɔ dɔ y'a fɔ aw ye o tuma na ko Ala ka Mɔgɔwolomanin nin bɛ yan, walima ko a bɛ yen fɛ, aw kana la o la, bari mɔgɔ dɔw bɛna galon tigɛ, k'olu ye Ala ka Mɔgɔwolomanin nin ye. Dɔw fana bɛn'a fɔ k'olu ye kira ye. U bɛna kabakobaw kɛ ka mɔgɔw lafili n'o ye. Ala ye mɔgɔ minw woloma k'u kɛ a yɛrɛ taw ye, n'u tun bɛ se, u tun bɛna olu fana lafili. Aw y'o mɛn dɛ, ne y'aw lasɔmi ka ban. “N'u y'a fɔ aw ye ko Ala ka Mɔgɔwolomanin nin bɛ kongo kɔnɔ, aw kana taa yen. N'u y'a fɔ aw ye ko a bɛ yɔrɔ dogonin dɔ la, aw kana la o la. Saan bɛ manamana kɔrɔn fɛ ka ye tileben fɛ cogo min na, Mɔgɔ Dencɛ bɛna kɛ ten fana a nalon na. Fɛnsu bɛ yɔrɔ min na, o yɔrɔ la dugaw bɛ nyɔgɔn lajɛn. “N'o waati tɔɔrɔ tɛmɛna dɔrɔn, tile bɛna fin, kalo tɛna yeelen bɔ tugu, lolow bɛna ben ka bɔ sankolo la, ani sankolo kɔnɔfɛnw bɛɛ bɛna nyagami nyɔgɔn na. O tuma na, Mɔgɔ Dencɛ taamasinyɛ bɛna bɔ sankolo la ka ye dugukolo kan. Mɔgɔw bɛɛ bɛna kasi kosɛbɛ, u bɛna Mɔgɔ Dencɛ natɔ ye sankaba kan ni sebagaya, ni nɔɔrɔ ye. A bɛn'a ka mɛlɛkɛw ci ni buru fiyɛta belebele ye. A ye mɔgɔ minw woloma k'u kɛ a taw ye, u bɛna taa dinyɛ faan naani bɛɛ la k'olu lajɛn. “Aw ka koo nunu faamu ka kɛnyɛ ni torosun cogo ye. N'a nugura tuma min na ka furaburu bɔ, aw b'a lɔn ko saminya sera. O cogo kelen na, aw mana o koow bɛɛ kɛtɔ ye tuma min na, aw k'a lɔn ko Mɔgɔ Dencɛ natuma sera ka ban, a bɛ sira la. Tinyɛ na, ne b'a fɔ aw ye ko bii mɔgɔ nunu bɛɛ tɛna sa, ni koo nunu bɛɛ ma kɛ. Sankolo ni dugukolo bɛna wili ka bɔ u nɔɔ na, nga ne ka kuma tɛna bɔ a nɔɔ na abada. “Mɔgɔ si tɛ ne nalon, n'a waati lɔn, hali mɛlɛkɛw t'a loon lɔn, ne min ye Ala Dencɛ ye, ne yɛrɛ fana t'a lɔn, fɔɔ n Faa Ala, a kelenpe. Koo min tun kɛra Nuhun ka tile la, o nyɔgɔn le bɛna kɛ fana Mɔgɔ Dencɛ nawaati la. Bari sanni jiba ka na, mɔgɔw tun bɛ dumunibabaw kɛ ka minni kɛ, ani ka furu kɛ fɔɔ ka taa se Nuhun donlon ma kurunba kɔnɔ. O tun tɛ miiri foyi la, fɔɔ jiba nana u halaki. O cogo la, Mɔgɔ Dencɛ ka nako bɛna kɛ ten fana. Cɛɛ fila bɛna to foro kelen kɔnɔ, u bɛna kelen ta ka kelen nin to yen. Muso fila bɛna to sinni kɛyɔrɔ la, u bɛna kelen ta ka kelen nin to yen. O la, aw labɛnnin ka to tuma bɛɛ la, bari aw t'aw ka Matigi nalon lɔn. Aw yɛrɛ b'a lɔn, ni sotigi tun bɛ se ka soon natuma lɔn sufɛ a ka soo kɔnɔ, a tun bɛna to a nyana k'a kɔnɔ, waasa a kana don a ka soo kɔnɔ ka cɛnni kɛ. O kɔsɔn, aw labɛnnin ka kan ka to tuma bɛɛ, bari aw tɛ miiri waati min koo la, o waati la Mɔgɔ Dencɛ bɛna na. “Baaradennyuman hakilitigi ye jumɛn ye? O ye nin ye: A ka kuntigi taatɔ taama na, a y'a ka baaraden tɔw kalifa a ma, ko a ka dumuni d'u ma a diwaati la. N'a ka kuntigi nin kɔsegira ka n'a sɔrɔ a b'o baara nin na, baaraden nin bɛna bonya sɔrɔ. Tinyɛ na, ne b'a fɔ aw ye ko a ka kuntigi bɛn'a ka nafolo bɛɛ nyamɔgɔya don a bolo. Nga n'o baaraden nin kɛra baaradenjugu ye, n'a y'a miiri ko a ka kuntigi bɛna mɛn ka sɔrɔ ka na, o la, n'a tora k'a tɔnyɔgɔnw bugɔ, ka to dumunibaba la ni ka minni kɛ ka fa ni dɔrɔtɔw ye, o baaraden tɛ miiri loon min, ani waati min na, o loon yɛrɛ la, a ka kuntigi bɛna na. A bɛna o baaraden nin minɛ k'a tɔɔrɔ, nanbaranmɔgɔw tɔɔrɔcogo la. O la, a bɛna kasi kosɛbɛ k'a fɔ ko n'a tun y'a lɔn. “Ala ka masaya yɔrɔ donko bɛna kɛ i n'a fɔ sunguru tan dɔw ka koo. U tun y'u ka fitinɛw ta k'u bɛ taa kɔnyɔcɛ kunbɛn. Mɔgɔ duuru tun ye nalomanw ye, duuru tun ye hakilitigiw ye. Minw tun ye nalomanw ye, olu y'u ka fitinɛw ta, u ma tulu dɔ ta minan wɛrɛw la. Nga hakilitigiw y'u ka fitinɛw ta, ka tila ka tulu dɔ ta minan wɛrɛw la. Kɔnyɔcɛ mɛnna a tun tɛ nana minkɛ, sinɔgɔ ye sunguru tan nunu minɛ, u bɛɛ sinɔgɔra. Dugutilama, pɛrɛnkan dɔ bɔra ko: ‘Kɔnyɔcɛ filɛ, a bɛ nana, aw ye bɔ ka ta'a kunbɛn.’ O tuma na, sunguru tan nunu wilila k'u ka fitinɛw labɛn. Naloman nunu y'a fɔ hakilitigiw ye ko: ‘Aw y'an sɔn ni tulu dɔɔni dɔɔni ye, bari an ka fitinɛw b'a fɛ ka faga.’ Hakilitigi nunu y'a fɔ u ye ko: ‘Ayi, bari an ka tulu tɛna se k'an bɛɛ labɔ. Min ka fisa, aw ye taa tulufeerebagaw fɛ, ka dɔ san aw yɛrɛ ye.’ Naloman nunu taara tulu sanyɔrɔ la tuma min na, kɔnyɔcɛ sera. Hakilitigiw donna ni kɔnyɔcɛ ye kɔnyɔbon na. U ye daa tugu. O kɔ, naloman nunu kɔsegira ka na tuma min na, u ye daa kɔkɔ k'a fɔ ko: ‘Matigi, Matigi, daa yɛlɛ an ye.’ Nga kɔnyɔcɛ y'u jaabi ko: ‘Tinyɛ na, ne b'a fɔ aw ye, ne tɛ aw lɔn.’ O la, aw labɛnnin ka kan ka to tuma bɛɛ la, bari aw t'o loon n'a waati lɔn. “A bɛna kɛ i n'a fɔ cɛɛ dɔ, min tun bɛ taara taama na. A y'a ka baaradenw wele k'a ka nafolo kalifa u ma. A ye talan duuru di kelen ma, ka fila di kelen wɛrɛ ma, ani ka kelen di tɔ kelen nin ma, ka kɛnyɛ n'u kelen kelen bɛɛ seko ye. O kɔ, a taar'a ka taama na. Baaraden min tun ye talan duuru sɔrɔ, ale taara ka jago kɛ ka duuru wɛrɛ sɔrɔ tɔnɔ ye. Min tun ye fila sɔrɔ, ale fana taara ka jago kɛ ka fila wɛrɛ sɔrɔ tɔnɔ ye. Nga baaraden min tun ye talan kelen sɔrɔ, ale taara dingɛ sogi k'a kuntigi ka wari nin dogo yen. Baaraden nunu ka kuntigi mɛnna kosɛbɛ, o kɔ, a nana k'u wele waasa u ka na n'a ka nafolo ye a k'a jati. Baaraden min tun ye talan duuru sɔrɔ, ale gwɛrɛla ni talan duuru wɛrɛ ye, k'a fɔ ko: ‘Matigi, e tun ma talan duuru le di ne ma wa? A filɛ, ne ye duuru wɛrɛ sɔrɔ tɔnɔ ye.’ A ka kuntigi y'a fɔ a ye ko: ‘O nyana, mɔgɔnyuman ani mɔgɔsɛbɛ. I kɛra mɔgɔsɛbɛ ye kofitini nin na, o la, ne bɛna koo caaman kalifa i ma. Na, an ka nisɔndiya nyɔgɔn fɛ.’ Min tun ye fila sɔrɔ, ale fana gwɛrɛla k'a fɔ ko: ‘Matigi, e tun ma talan fila le kalifa ne ma wa? A filɛ, ne ye fila wɛrɛ sɔrɔ tɔnɔ ye.’ A ka kuntigi y'a fɔ a ye ko: ‘A nyana, mɔgɔnyuman ani mɔgɔsɛbɛ. I kɛra mɔgɔsɛbɛ ye kofitini nin na, o la, ne bɛna koo caaman kalifa i ma. Na, an ka nisɔndiya nyɔgɔn fɛ.’ Ayiwa, baaraden min tun ye talan kelen sɔrɔ, ale fana gwɛrɛla k'a fɔ ko: ‘Matigi, ne tun y'a lɔn ko e ka koo ka gwɛlɛ, e ma danni kɛ foro min na, e b'a fɛ o suman ka kɛ i ta ye, e ma serili kɛ yɔrɔ min na, e b'a fɛ o fana ka kɛ i ta ye. Ne siranna, n taara i ka wari dogo dingɛ kɔnɔ, i ka wari filɛ, a minɛ.’ A ka kuntigi y'a jaabi ko: ‘Mɔgɔjugu, salabagatɔ, e tun y'a lɔn ko ne ma danni kɛ foro min na, ko ne b'a fɛ o suman ka kɛ n ta ye, k'a lɔn ko ne ma serili kɛ yɔrɔ min na, ko ne b'a fɛ o suman ka kɛ n ta ye, o la, e tun ka kan ka ne ka wari di jagokɛlaw ma. Ni ne tun segira tuma min na, n tun bɛna n ka nafolo n'a tɔnɔ sɔrɔ. Aw ye talan nin bɔsi a la k'a di talan tan tigi ma, bari fɛɛn bɛ mɔgɔ min fɛ, dɔ bɛna d'o tigi ma ka fara a ta kan k'a caya, nga foyi tɛ min fɛ, hali dɔɔni min b'a tigi fɛ, o bɛna bɔsi a la. Baaradenjugu nin kɔni, aw y'ale minɛ k'a fili kɛnɛma dibi la. O yɔrɔ la, a bɛna kasi kosɛbɛ k'a fɔ ko n'a tun y'a lɔn.’ “Tuma min na Mɔgɔ Dencɛ bɛna na ni mɛlɛkɛw ye, a bɛna sigi a ka masasigilan kan. Mɔgɔ bɛɛ bɛna lajɛn a nyafɛ, a bɛna mɔgɔw faran k'u bɔ nyɔgɔn na i n'a fɔ sagadɛndɛbaga bɛ sagaw faran ka bɔ baaw la cogo min na. A bɛna mɔgɔtilenninw bila a kinibolo la, ka mɔgɔjuguw bila a numanbolo la. O kɔ, a bɛn'a fɔ a kinibolo la taw ye ko: ‘Aw ye na ne Faa ka dubadenw, ka don a ka masaya yɔrɔ la, o min tun labɛnna aw ye kabini dinyɛ dantuma. Bari kɔngɔ tun bɛ ne la, aw ye dumuni di ne ma, minnɔgɔ tun bɛ ne la, aw ye jii di ne ma. Ne tun kɛra lonan ye, aw ye jigiyɔrɔ di ne ma. Fani tun tɛ ne fɛ, aw ye fani di ne ma. Ne tun bananin lo, aw y'aw janto ne la. Ne tun bɛ kaso la, aw nana ne filɛ yen.’ Mɔgɔtilenninw bɛn'a fɔ ko: ‘Matigi, an y'i ye tuma jumɛn ni kɔngɔ b'i la, n'an ye dumuni d'i ma? An y'i ye tuma jumɛn ni minnɔgɔ b'i la n'an ye jii d'i ma? An y'i lonanman ye tuma jumɛn ka jigiyɔrɔ d'i ma, ani k'i fari lakolon ye n'an ye fani d'i ma? Tuma jumɛn an y'i ye n'i bananin bɛ, walima n'i bɛ kaso la n'an taara bɔ i ye k'i dɛmɛ?’ A bɛna u jaabi ko: ‘Tinyɛ na, ne b'a fɔ aw ye, ko aw y'o koo minw kɛ ne balima o balima ye, aw y'o kɛ ne le ye.’ O kɔ, a bɛn'a fɔ a numanbolo la mɔgɔw ye ko: ‘Aw ye taa ka bɔ ne kɔrɔ, Ala juguw. Aw ye taa jahanama na, o min labɛnna Sutana n'a kɔmɔgɔw ye, bari kɔngɔ tun bɛ ne la, aw ma dumuni di ne ma. Minnɔgɔ tun bɛ ne la, aw ma jii di ne ma. Ne tun kɛra lonan ye, aw ma jigiyɔrɔ di ne ma. Ne fari lakolon tun lo, aw ma fani di ne ma. Ne bananin tun lo ani ne tun bɛ kaso la, aw ma na bɔ ne ye ka ne mako nya.’ Olu fana bɛn'a jaabi ko: ‘Matigi, an tun y'i ye tuma jumɛn ni kɔngɔ b'i la, walima minnɔgɔ, walima n'i kɛra lonan ye, walima ni fani t'i fɛ, walima n'i bananin lo, walima kaso la, n'an m'i mako nya?’ A bɛna u jaabi ko: ‘Tinyɛ na, ne b'a fɔ aw ye, ko aw banna k'o koo nunu kɛ ne dɔgɔnin dɔw ye minkɛ, aw banna k'o kɛ ne yɛrɛ le la.’ ” Yezu y'o kuma laban ko: “O mɔgɔjugu nunu bɛna taa tɔɔrɔ banbali yɔrɔ la, mɔgɔtilenninw bɛna don Ala ka hɛrɛ banbali yɔrɔ la.” Yezu tilanin kɔ a ka kuma na, a y'a fɔ a ka kalandenw ye ko: “Aw b'a lɔn ko yan ni tile fila, Hɔrɔnya nyanagwɛ bɛna se, u bɛna Mɔgɔ Dencɛ don mɔgɔjuguw bolo, waasa u k'a gwengwen lɔgɔ kan.” O waati la yɛrɛ, sarakalasebagaw ni cɛkɔrɔbaw tun ye nyɔgɔn lajɛn sarakalasebagaw ka kuntigiba ka luu kɔnɔ, ale min tɔgɔ tun ko Kayifu. Olu bɛnna a la k'u bɛna Yezu minɛ dogo la k'a faga. U tun b'a fɔra k'u man kan k'a minɛ Hɔrɔnya nyanagwɛ tuma na, ko n'o tɛ, mɔgɔw bɛna muruti. Ka Yezu to kunatɔ Simɔn ka soo Betani, muso dɔ gwɛrɛla Yezu la ni daga cɛnyumannin dɔ b'a bolo. O daga nin tun dilannin bɛ ni kabakuru ye, min bɛ wele alabatiri. A fanin tun bɛ tulu kasadiman dɔ la min sɔngɔ ka gwɛlɛ. A ye Yezu to dumuni na ka tulu nin bon a kuun na. Kalandenw y'o ye minkɛ, u dimina k'a fɔ ko: “Mun na a ye tulu kasadiman nin cɛn ten? An tun bɛ se k'a feere sɔngɔgwɛlɛn na, k'a wari tilan faantanw cɛ.” Yezu y'o kuma mɛn u fɛ minkɛ, a y'a fɔ u ye ko: “Mun na aw b'a dusu kasi? A ye konyuman le kɛ ne ye ten. Aw bɛna to ni faantanw ye tuma bɛɛ. Nga ne tɛna to n'aw ye tuma bɛɛ. Muso nin ye tulu nin bɔn ne fari kan, waasa ka ne fari labɛn ne suu donlon kama. Ne b'a fɔ aw ye tinyɛ na ko ni kibaru diman nin mana fɔ dinyɛ yɔrɔ o yɔrɔ, muso nin ye min kɛ ne ye, a tɔgɔ bɛna fɔ u hakili bɛ jigi a koo la.” O tuma na, Yezu ka kalanden tan ni fila kelen, min tɔgɔ ko Zuda Isikariyɔti, ale taara sarakalasebagaw fɛ, k'a fɔ u ye ko: “Aw bɛna mun le di ne ma, ni ne y'aw dɛmɛ ka Yezu minɛ?” Olu ye warigwɛ bi saba d'a ma. Kabini o waati la Zuda tun bɛ cogonyuman nyinina waasa ka Yezu don u bolo. Buru funubali nyanagwɛ loon fɔlɔ, Yezu ka kalandenw y'a nyininga ko: “I b'a fɛ an ka taa Hɔrɔnya nyanagwɛ dumuni labɛn min?” Yezu y'a fɔ u ye ko: “Aw ye taa dugu kɔnɔ, karimasina fɛ, k'a fɔ a ye ko karamɔgɔ ko ale taawaati sera, ko ale n'a ka kalandenw bɛna Hɔrɔnya nyanagwɛ dumuni kɛ a fɛ.” Kalandenw y'a kɛ i ko Yezu tun y'a fɔ u ye cogo min na. U ye Hɔrɔnya nyanagwɛ dumuni labɛn yen. Sufɛ, Yezu n'a ka kalanden tan ni fila nunu tun siginin bɛ dumuni na. K'u to dumuni na, Yezu y'a fɔ u ye ko: “Tinyɛ na, ne b'a fɔ aw ye ko aw dɔ bɛna ne don mɔgɔjuguw bolo.” Kalandenw dusu kasira kosɛbɛ, fɔɔ u bɛ Yezu nyininga kelen kelen ko: “Ne lo wa, Matigi?” Yezu y'u jaabi ko: “Mɔgɔ min y'a bolo don ni ne ye minan kɔnɔ, ale lo bɛna ne don mɔgɔjuguw bolo. Mɔgɔ Dencɛ bɛna sa i n'a fɔ a fɔra Ala ka kuma na a koo la cogo min na. Nga min bɛna Mɔgɔ Dencɛ don mɔgɔjuguw bolo, bɔnɛ b'o tigi ye. N'a tigi yɛrɛ tun ma wolo, o le tun ka fisa a ma.” Zuda min tun b'a la k'a janfa, ale y'a nyininga ko: “Ne lo wa, karamɔgɔ?” Yezu y'a jaabi ko: “Ele yɛrɛ daa le y'a fɔ.” Ka Yezu n'a ka kalandenw to dumuni na, a ye buru ta ka barika la Ala ye, k'a tilantilan k'a di a ka kalandenw ma, k'a fɔ u ye ko: “Nin ye ne fari ye. Aw k'o minɛ k'a dumu.” O kɔ, a ye duvɛn ta ka barika la Ala ye, k'o di kalandenw ma fana, k'a fɔ ko: “Aw bɛɛ k'o min, bari o ye ne joli ye, joli min bɛ Ala ka layidu dafa, o min bɛna bɔn mɔgɔ bɛɛ ka kojugu yafa kɔsɔn. Ne b'a fɔ aw ye ko ne tɛna duvɛn min tugu, fɔɔ loon min na ne bɛn'a min n'aw ye arijana na.” U ye Ala tando ni dɔnkiliw ye ka ban tuma min na, u bɔra ka taa Olivuyirikulu kan. O kɔ, Yezu y'a fɔ u ye ko: “Bii suu nin na, aw bɛɛ bɛna boli ka ne to, bari, a fɔra Ala ka kuma na ko: ‘Ne Ala bɛna sagadɛndɛbaga bugɔ ka faga, sagaw bɛ boli ka jɛnsɛn.’ Nga ne kɔni b'a fɔ aw ye ko ni ne nana kunun tuma min na, ne bɛna taa aw nya Galile mara la.” Piyɛri y'a fɔ a ye ko: “Hali ni mɔgɔw bɛɛ bolila k'i to, ne kɔni tɛna boli abada.” Yezu y'a fɔ a ye ko: “Tinyɛ na, ne b'a fɔ i ye ko yan ni dondo ka kasi bii suu nin na, ele bɛn'a fɔ sinyɛ saba ko i tɛ ne lɔn.” Piyɛri y'a fɔ a ye ko: “Hali ni ne ka kan ka sa n'i ye, ne kɔni tɛn'a fɔ ko n t'i lɔn fewu.” Kalanden tɔ nunu fana ko ten. Yezu n'a ka kalandenw taara yɔrɔ dɔ la u bɛ min wele ko Zɛtisemane. A y'a fɔ u ye ko: “Aw ye sigi ka ne kɔnɔ yan, ne bɛna taa nyafɛ ka Ala dali.” A taara ni Piyɛri ni Zebede dencɛ fila nunu ye. A hakili daminɛna ka nyagami, siranya y'a minɛ. A y'a fɔ u ye ko: “Dusukasi bɛna n faga. Aw ye to yan ni ne ye, aw kana sinɔgɔ.” A taara nyafɛ dɔɔni k'a kunbiri gwan k'a nyaa biri duguma, ka Ala dali ko: “N Faa, ne kisi tɔɔrɔ nin ma n'o bɛ se ka kɛ. Nga o kana kɛ ne sago la fɔɔ ele ta.” O kɔ, a segira ka na kalanden saba nunu fɛ, ka u sɔrɔ sinɔgɔ la. A y'a fɔ Piyɛri ye ko: “Aw ma se ka to aw nyaa na ni ne ye hali waati dɔɔni yɛrɛ wa? Aw ye to nyana ka Ala dali, waasa ni Sutana y'aw nigɛ, a kana se aw kɔrɔ. Konyuman kɛ miiriya bɛ mɔgɔw kɔnɔ, nga a kɛ see t'u ye.” A kɔsegira ka taa sinyɛ filanan na, ka Ala dali tugu ko: “N Faa, n'a kɛra ko ne tɛ se ka kisi o tɔɔrɔ nin ma, e sago ka kɛ.” A kɔsegira ka na u sɔrɔ u bɛ sinɔgɔra, bari sinɔgɔ tun b'u la kosɛbɛ. Yezu y'u to yen ka kɔsegi ka taa Ala dali a sinyɛ sabanan na n'o kuma kelen ye. O kɔ, a kɔsegira a ka kalandenw yɔrɔ la, k'a fɔ u ye ko: “Aw bɛ sinɔgɔra ka lafinyɛ halibi wa? Ayiwa, waati sera. U bɛna Mɔgɔ Dencɛ don mɔgɔjuguw bolo. Aw ye wili an ka taa. Mɔgɔ min bɛna ne don mɔgɔjuguw bolo, ale natɔ filɛ.” Ka Yezu t'o kuma na, Zuda min tun ye kalanden tan ni fila dɔ ye, ale sera ni jamaba ye. Murujan ni berew tun b'u bolo. Sarakalasebagaw ni cɛkɔrɔbaw le tun y'u ci. Yezu janfabaga Zuda tun y'a fɔ jama ye ko: “Ne bɛna cɛɛ min fo ka n bolo meleke a kaan na, o le ye Yezu ye. Aw k'a minɛ.” O yɔrɔnin kelen, Zuda gwɛrɛla Yezu la k'a fɔ a ye ko: “I ni suu, karamɔgɔ.” O kɔ, a y'a bolo meleke Yezu kaan na. Yezu y'a fɔ a ye ko: “N teri, i b'a fɛ ka koo min kɛ, o kɛ.” Mɔgɔ minw tun bɛ ni Zuda ye, olu ye Yezu minɛ. Mɔgɔ minw tun bɛ ni Yezu ye, olu dɔ y'a ka murujan bɔ a foroko la, ka sarakalasebagaba ka baaraden tulo caron. Yezu y'a fɔ o tigi ye ko: “I ka murujan don a foroko la yen, bari mɔgɔ minw bɛ kɛlɛ kɛ ni murujan ye, murujan le bɛna u faga fana. E m'a lɔn ko ne bɛ se k'a fɔ n Faa ye ko a ka n dɛmɛ wa? O yɔrɔnin bɛ fana, a bɛ se ka mɛlɛkɛ waa caaman ci ka na n dɛmɛ. N'o kɛra, Ala ka kuma min b'a fɔ k'o koow ka kan ka kɛ ten, o bɛna dafa cogo di?” O kɔ, Yezu y'a fɔ jama ye ko: “Aw nana ni murujan ni berew ye ne kama, i n'a fɔ ne ye benkannikɛla ye. Ne tun bɛ to ka sigi Alabatosoba kɔnɔ loon bɛɛ ka mɔgɔw kalan yen, aw ma ne minɛ o yɔrɔ la. Nga, o koo bɛɛ kɛra waasa kiraw ye min fɔ, o ka kɛ.” O cogo la, kalandenw bɛɛ bolila k'a to. Mɔgɔ minw tun ye Yezu minɛ, olu taara ni Yezu ye sarakalasebagaw kuntigiba Kayifu ka luu kɔnɔ. Sariya karamɔgɔw ni cɛkɔrɔbaw tun ye nyɔgɔn lajɛn o yɔrɔ la. Piyɛri tugura u kɔ ka furancɛba to u ni nyɔgɔn cɛ fɔɔ ka se sarakalasebagaw kuntigiba ka luu kɔnɔ. A donna ka sigi ni yɔrɔ kɔlɔsibagaw ye ka filɛli kɛ, koo nin bɛna laban cogo min na, a k'o ye. O y'a sɔrɔ sarakalasebagaw kuntigiw ni Zuwifuw ka kititigɛlaw bɛɛ tun bɛ galon dɔ nyinina k'a la Yezu kan, waasa ka se k'a faga. Mɔgɔ caaman nana ka galon tigɛ ka la a kan, nga u ma se k'a jalakita sɔrɔ. O kɔ, mɔgɔ fila dɔ nana, olu y'a fɔ ko: “Cɛɛ nin tun y'a fɔ ko ale bɛ se ka Alabatosoba ci, ka tila k'a lɔ tile saba kɔnɔ.” Sarakalasebaga kuntigiba wilila ka Yezu nyininga ko: “Mɔgɔ nunu bɛ kuma min fɔra i koo la, i tɛ foyi fɔ o la wa?” Yezu m'a jaabi. Sarakalasebaga kuntigiba y'a fɔ a ye ko: “Ni ele lo ye Ala ka Mɔgɔwolomanin, ni Ala Dencɛ ye, a fɔ an ye Ala kɔsɔn.” Yezu y'a jaabi ko: “Ele yɛrɛ le y'a fɔ, nga ne b'a fɔ aw ye ko k'a ta sisan ma, aw bɛna Mɔgɔ Dencɛ siginin ye Setigi Ala kinibolo la, o kɔ, aw bɛn'a natɔ ye sankaba kan.” Sarakalasebaga kuntigiba dimina fɔɔ a y'a yɛrɛ ka fani faran k'a fɔ ko: “A ye Ala tɔgɔ cɛn! An mako tɛ mɔgɔ la k'a jalaki tugu. Aw yɛrɛ ye Ala tɔgɔcɛnkuma mɛn a daa la kɛ! Aw bɛ mun le miiri o la?” U y'a jaabi ko: “A ka kan ka faga.” O kɔ, dɔw y'u daji tutu a nyaa na, k'a bugɔbugɔ ni bolokuruw ye. Dɔw y'a tulo cici n'u b'a fɔra ko: “Ala ka Mɔgɔwolomanin, kiraya kɛ k'a fɔ an ye, jon y'i bugɔ?” Piyɛri tun siginin bɛ kɛnɛma luu kɔnɔ. Sarakalasebagaba ka baaraden musoman dɔ gwɛrɛla Piyɛri la k'a fɔ a ye ko: “Ele fana tun bɛ ni Yezu ye ka bɔ Galile.” Nga Piyɛri y'a sɔsɔ u bɛɛ nyana ko: “E bɛ min fɔra, ne t'o lɔn.” Piyɛri bɔra o yɔrɔ la ka taa luda faan fɛ. Sarakalasebagaba ka baaraden musoman dɔ wɛrɛ nana tugu. Ale y'a fɔ o yɔrɔ mɔgɔw ye ko: “Cɛɛ nin tun bɛ ni Yezu Nazarɛtika ye.” Piyɛri y'a fɔ tugu ko: “Ala kama, n tɛ cɛɛ nin lɔn.” Yan ni dɔɔni mɔgɔ minw tun b'o yɔrɔ la, olu gwɛrɛla Piyɛri la k'a fɔ a ye ko: “Tinyɛ na, ele ye mɔgɔ nunu dɔ ye. Hali i ka kuma b'a yira.” Nga Piyɛri ko: “Ni ne bɛ galon tigɛra, Ala kana n to, ne tɛ cɛɛ nin lɔn fewu.” O yɔrɔnin bɛ, dondo kasira. O tuma na, Piyɛri hakili jigira Yezu ka kuma na Yezu tun y'o min fɔ a ye ko: “Yan ni dondo ka kasi, i bɛn'a fɔ sinyɛ saba ko i tɛ ne lɔn.” Piyɛri bɔra luu kɔfɛ ka kasi kosɛbɛ. Dugu gwɛra tuma min na, sɔgɔmadafɛ, sarakalasebagaw ni cɛkɔrɔbaw ye nyɔgɔnye kɛ ka bɛn a la k'u bɛna Yezu faga. U ye Yezu siri ka ta'a di masacɛ ka lasigiden Pilati ma. Zuda min tun ye Yezu don bolo la, a y'a mɛn ko Yezu bɛna faga minkɛ, a nimisara kosɛbɛ ka taa ni warigwɛ bi saba nunu ye sarakalasebagaw ni cɛkɔrɔbaw fɛ, k'a fɔ u ye ko: “Ne ye kojugu kɛ ka mɔgɔ jalakibali don aw bolo n'a bɛna faga.” Olu y'a jaabi ko: “O tɛ an ka sira la, o y'i ka koo ye.” Zuda ye wari nin fili Alabatosoba kɔnɔ ka tɛmɛ ka taa a yɛrɛ kaan don juru la. Sarakalasebagaw ye wari nin cɛ k'a fɔ nyɔgɔn ye ko: “A daganin tɛ an ka nin wari nin nyɔgɔn don Alabatosoba kɛsu la, bari mɔgɔ dɔ ka nii sɔngɔ lo.” O kɔ, u bɛnna a la k'u bɛna o wari ta ka taa dagadilanbaga ka foro san n'o ye, waasa o yɔrɔ ka kɛ lonanw suu donyɔrɔ ye. O le y'a to, fɔɔ ka na se bii ma, u b'o yɔrɔ nin wele ko Nisɔngɔ foro. O cogo la, kira Zeremi tun ye min fɔ, o kɛra. A tun ko: “U ye warigwɛ bi saba ta, o min kɛra mɔgɔ tilennin ka nii sɔngɔ ye, Isirayɛlidenw bɛɛ tun sɔnna o min na. U y'o wari di dagadilanbaga ma a ka foro sɔngɔ ye, i n'a fɔ Matigi tun y'a latigɛ cogo min na.” Yezu lɔra masacɛ ka lasigiden nyafɛ. Lasigiden y'a nyininga ko: “I ye Zuwifuw ka masacɛ ye wa?” Yezu y'a jaabi ko: “E ko ten.” Sarakalasebagaw ni cɛkɔrɔbaw tun bɛ galon minw lara a kan waasa k'a jalaki, a ma sɔn ka foyi fɔ o koo la. Pilati y'a fɔ a ye ko: “Mɔgɔ nunu bɛ minw fɔra i koo la, i t'o mɛnna wa?” Nga Yezu ma sɔn k'a jaabi. O yɔrɔ la masacɛ ka lasigiden kabakoyara kosɛbɛ. Hɔrɔnya nyanagwɛ o nyanagwɛ la, masacɛ ka lasigiden Pilati tun bɛ deli ka kasoden dɔ labila, ka kɛnyɛ ni jama ka lanyini ye. O waati la, cɛɛ dɔ tun bɛ kaso la, o min tɔgɔjugu tun bɔra kosɛbɛ, a tɔgɔ tun ko Barabasi. Pilati ye jama nyininga ko: “Aw b'a fɛ ne ka Barabasi labila wa, walima Yezu, u ko Ala ye min woloma?” Bari a tun y'a lɔn ko nyagoya le y'a to u y'a minɛ ka na n'a ye ale fɛ. K'a to kiti tigɛyɔrɔ la, a ka muso ye cii bila k'a fɔ a ye ko: “I kana i niin don mɔgɔtilennin nin ka koo la, bari kunun sufɛ ne ye sigojugu kɛ a koo la.” Sarakalasebagaw ni cɛkɔrɔbaw ye jama kɔnɔnasu, waasa u ka Pilati dali ko a ka Barabasi labila ka Yezu faga. A y'u nyininga tugu ko: “U mɔgɔ fila la, aw b'a fɛ ne ka jon le labila?” U y'a jaabi ko Barabasi. A y'u nyininga ko: “Ne ka mun kɛ Yezu la u bɛ min wele Ala ka Mɔgɔwolomanin?” U y'a jaabi ko: “A ka kan ka gwengwen lɔgɔ kan.” A y'u nyininga ko: “A ye kojugu jumɛn le kɛ min kɔsɔn a ka kan ka faga?” U pɛrɛnna kosɛbɛ ko: “A ka kan ka gwengwen lɔgɔ kan.” Pilati y'a ye ko jama bɛ murutira ka taa minkɛ, ko ale tɛna se ka foyi kɛ, a ye jii nyini k'a tigɛ ko u bɛɛ nyana, k'a fɔ u ye ko: “Ne seen tɛ mɔgɔtilennin nin ka fagako la, o y'aw yɛrɛ ka koo ye.” Jama bɛɛ y'a fɔ ko: “An kɔni n'an deenw bɛ lɔ n'a ka saya kunko ye.” O kɔ, a ye Barabasi labila, ka sira di k'u ka Yezu bugɔ, ka sɔrɔ ka ta'a gwengwen lɔgɔ kan. Masacɛ ka lasigiden ka sɔlidasiw taara ni Yezu ye a ka luu kɔnɔ, ka sɔlidasi tɔw bɛɛ wele k'a lɔ u cɛma. U y'a ka fani bɔ a kaan na ka fani wuleman dɔ don a la. U ye; nɔni tigɛ k'o meleke k'o kɛ i n'a fɔ masafugulan, k'a don a kuun na. U ye bere dɔ don a bolo la, n'u bɛ to k'u kunbiri gwan a kɔrɔ, ka to ka yɛlɛ a ma, k'a fɔ a ye ko: “I dansɛ, Zuwifuw ka masacɛ,” ka to k'u daji tutu a kan, ani ka bere nin minɛ a la k'a bugɔbugɔ a kuun na. U y'a lɔgɔbɔ ka ban tuma min na, u ye dulokiwulen nin bɔ a kaan na, k'a ka fani don a ye. O kɔ, u taara n'a ye gwengwenyɔrɔ la. U taatɔ, u ye cɛɛ dɔ kunbɛn min tun ye Sirɛnika ye ka bɔ Libi jamana na, a tɔgɔ ko Simɔn. U y'ale karaba ka Yezu ka gwengwenlɔgɔ ta. U taara se yɔrɔ dɔ la u bɛ min wele ko Gɔligota, o kɔrɔ ko kungolo yɔrɔ. U ye duvɛn nyagami ni kunakuna ye, k'u b'o di Yezu ma waasa a k'o min. Yezu y'o nɛnɛ tuma min na, a ma sɔn k'a min. U y'a gwengwen ka ban tuma min na, u ye kala bon ka Yezu ka faniw tilantilan ka kɛnyɛ n'o ye. U bɛɛ tun sigira n'u b'a kɔlɔsira. U tun y'a fagakun sɛbɛn k'o gwengwen a kuun sanfɛ. A tun sɛbɛnna ko: “Nin ye Yezu ye, Zuwifuw ka masacɛ.” Benkannikɛla mɔgɔ fila tun gwengwenna a gɛrɛfɛ fana. Kelen tun b'a kinibolo la, tɔ kelen a numanbolo la. Mɔgɔ minw tun bɛ tɛmɛna, olu tun bɛ Yezu nɛni ka to k'u kuun karikari. U tun b'a fɔra ko: “E min bɛ se ka Alabatosoba ci, ani ka tila k'a lɔ tile saba kɔnɔ, e k'i yɛrɛ kisi. N'i ye Ala Deen ye, i ka jigi ka bɔ gwengwenlɔgɔ kan.” Sarakalasebagaw ni sariya karamɔgɔw ani cɛkɔrɔbaw tun b'a lɔgɔbɔra fana ko: “A ye mɔgɔ dɔw kisi, nga a tɛ se k'a yɛrɛ kisi. N'a ye Isirayɛli ka masacɛ ye, a ka jigi ka bɔ gwengwenlɔgɔ kan. O la, an bɛna la a la. A y'a jigi bɛɛ la Ala kan k'a fɔ ko ale ye Ala Deen ye. An k'a filɛ sisan ni Ala bɛn'a kisi.” O cogo la, benkannikɛla minw tun gwengwenna a gɛrɛfɛ, olu tun b'a nɛni fana. Tilegwangwanfɛ, dibi donna yɔrɔ bɛɛ la, fɔɔ ka taa se tile sumawaati ma. Tile sumana tuma min na, Yezu pɛrɛnna k'a fɔ ko: “Eli, Eli, lamasabakitani”, o kɔrɔ ko: “Ne ka Ala, ne ka Ala, mun na e bɔra ne kɔ?” Mɔgɔ minw tun lɔnin bɛ yen, olu dɔw y'o mɛn minkɛ, u y'a fɔ ko a bɛ kira Eli welela. Olu dɔ bolila ka taa fuu ta, k'a don kumuji la k'a siri kalajan dɔ la, ko a bɛna o d'a ma a k'a min. A tɔnyɔgɔnw y'a fɔ a ma ko: “A to yen, an bɛn'a filɛ ni Eli bɛna n'a kisi.” O kɔ, Yezu kulera kosɛbɛ ka sɔrɔ ka sa. O yɔrɔnin bɛ, Alabatosoba cɛtigɛfani faranna fila ye, k'a ta a sanfɛ fɔɔ duguma. Dugukolo yɛrɛyɛrɛla, kabakuruw cicira. Kaburuw daa yɛlɛla. Ala ka mɔgɔ minw tun sara, olu caaman kununna. Olu bɔra kaburuw la ka don dugu senuman kɔnɔ Yezu kununnin kɔ. Mɔgɔ caaman y'u ye. Sɔlidasi kuntigi min tun bɛ Yezu kɔlɔsira n'a ka sɔlidasiw ye, olu ye dugukolo ye a yɛrɛyɛrɛla, ani koo minw kɛra o waati la, u y'o bɛɛ ye, u siranna kosɛbɛ. U y'a fɔ ko tinyɛ na, cɛɛ nin tun ye Ala Deen ye. Muso caaman tun lɔra yɔrɔjan ka to k'o filɛ. O muso nunu tun tugura Yezu kɔ ka bɔ Galile mara la, waasa k'a dɛmɛ. O muso nunu cɛma, Mariyamu ka bɔ Magidala tun bɛ yen, ni Zaki ani Yusufu bamuso Mariyamu, ni Zebede muso. Wuladafɛ, nafolotigi dɔ nana, Arimateka tun lo, a tɔgɔ tun ko Yusufu. Ale fana tun ye Yezu ka kalandenw dɔ ye. O cɛɛ nin taara Pilati fɛ ka Yezu suu dali. Pilati k'u k'a d'a ma. Yusufu taara Yezu suu ta k'a meleke fanikura gwɛman kɔnɔ, ka ta'a don a yɛrɛ ka kaburu kɔnɔ, a tun y'o min bɔ fara la a yɛrɛ ka suturali kama. A ye kabakuru belebele dɔ kolonkolon ka kaburu datugu n'o ye, ka sɔrɔ ka taa. O y'a sɔrɔ, Mariyamu ka bɔ Magidala, ni Mariyamu dɔ nin tun bɛ yen. Olu tun siginin bɛ kaburu nyafɛ. O dugusagwɛ, n'o kɛra lafinyɛlon ye, sarakalasebagaw ni Farizinyɛw ye nyɔgɔn lajɛn ka taa Pilati fɛ. U y'a fɔ a ye ko: “An hakili jigira a la ko galontigɛla nin tun y'a fɔ ko n'ale sara, ko ale bɛna kunun a tile sabanan loon. O la, an b'a fɛ i ka sira di kaburu daa ka kɔlɔsi fɔɔ ka taa se tile saba, bari an bɛ siran, a ka kalandenw kana taa a suu bɔ, ka tila k'a fɔ jama ye ko a kununna. O galon bɛna juguya ka tɛmɛ fɔlɔta kan.” Pilati y'a fɔ u ye ko: “Kɔlɔsilikɛbaga bɛ aw fɛ fana. Aw ye taa ka kaburu daa kɔlɔsi ka kɛnyɛ n'aw seko ye.” U taara taamasinyɛ kɛ kabakuru kan. O kɔ, u ye kɔlɔsilikɛbagaw bila k'olu ka kaburu kɔlɔsi. Lafinyɛlon tɛmɛna, lɔgɔkun daminɛlon sɔgɔmadafɛ, Mariyamu ka bɔ Magidala ni Mariyamu dɔ nin taara kaburu yɔrɔ la. O yɔrɔnin bɛ, dugukolo yɛrɛyɛrɛla kosɛbɛ. Ala ka mɛlɛkɛ dɔ jigira ka kabakuru kolonkolon k'a bɔ kaburu daa la, ka sigi a kan. Mɛlɛkɛ nin nyada tun bɛ manamana i n'a fɔ saan manamanatɔ, a ka fani tun gwɛra parapara. Kɔlɔsilikɛbagaw siranna kosɛbɛ fɔɔ u yɛrɛyɛrɛla ka kirin. Mɛlɛkɛ y'a fɔ muso nunu ye ko: “Aw kana siran, bari ne y'a lɔn ko aw bɛ Yezu le yɔrɔ nyinina, u tun ye min gwengwen lɔgɔ kan. A tɛ yan tugu, bari a kununna i n'a fɔ a tun y'a fɔ cogo min na. Aw ye na a layɔrɔ filɛ. Aw ye teliya ka ta'a fɔ a ka kalandenw ye ko a kununna, a ko a bɛ taa aw nya Galile mara la. Aw bɛna ta'a sɔrɔ o yɔrɔ la. Koo min tun bɛ ne fɛ k'a fɔ aw ye, o le ye nin ye.” Muso nunu siranna ka teliya ka bɔ kaburu la. U nisɔn nana diya, u bolila k'u bɛ taa o kibaru fɔ Yezu ka kalandenw ye. O yɔrɔnin bɛ, Yezu y'u kunbɛn k'a fɔ u ye ko: “Aw dansɛ.” U gwɛrɛla a la k'u kunbiri gwan a kɔrɔ, k'a bato. Yezu y'a fɔ u ye ko: “Aw kana siran, aw ye ta'a fɔ n balimaw ye k'u ka taa Galile, k'u bɛna n ye o yɔrɔ le la.” Ka muso nunu to sira la, kɔlɔsilikɛbaga nunu dɔw taara dugu kɔnɔ, k'o koow bɛɛ lakali sarakalasebagaw ye. Olu ni cɛkɔrɔbaw ye nyɔgɔnye kɛ, ka bɛn a la, ka wari caaman di kɔlɔsilikɛbagaw ma, k'a fɔ u ye ko: “Aw ka to k'a fɔ ko k'aw to sinɔgɔ la sufɛ, a ka kalandenw nana k'a suu bɔ ka taa n'a ye. N'o koo mana se masacɛ ka lasigiden ma tuma min na, an bɛna koo bɛɛ kɛ k'a dusu suma, waasa a kana kojugu kɛ aw la.” Kɔlɔsilikɛbagaw y'o wari minɛ, k'a daminɛ k'o kibaru jɛnsɛn i n'a fɔ u tun y'a nyini u fɛ cogo min na. O cogo la, o kibaru sera yɔrɔ bɛɛ la Zuwifuw cɛma fɔɔ ka na se bii ma. Yezu ka kalanden tan ni kelen nunu taara Galile, A tun ye kulu min koo fɔ u ye, u taara ale kan. U ye Yezu ye tuma min na, u y'a bato, nga u dɔw sigasigara. Yezu gwɛrɛla u la k'a fɔ u ye ko: “Ala ye sebagaya bɛɛ di ne ma sankolo la ani dugukolo kan. O la, aw ye taa siyaw bɛɛ kɛ ne ka kalandenw ye k'u batize Faa, ni Dencɛ ni Nii Senuman tɔgɔ la, k'u kalan, waasa u ka ne ka kuma labato. Ne kɔni bɛna to n'aw ye loon o loon fɔɔ ka taa dinyɛ wili.” Kibaru diman min bɛ Ala Dencɛ Yezu Krista koo fɔ, o bɛ daminɛ yan. Kira Ezayi ye kitabu min sɛbɛn, a fɔra o kɔnɔ ko: “Lamɛnni kɛ, ne Ala bɛna n ka ciden ci i nya, k'i ka sira labɛn. Mɔgɔ dɔ bɛ pɛrɛnna kongo kɔnɔ ko: ‘Aw ka Matigi ka sira dilan k'a tilen.’ ” O cogo la, Zan batizelikɛla y'a yɛrɛ yira kongo kɔnɔ. A tun bɛ mɔgɔw waaju k'u ka nimisa ka faran u ka kojuguw la ka batize, janko Ala ka yafa u ma. Zude mara mɔgɔw ani Zeruzalɛmukaw bɛɛ tun bɛ bɔ ka ta'a sɛgɛrɛ. U tun ye kojugu minw kɛ, u tun b'olu fɔ kɛnɛ kan, o kɔ, Zan tun b'u batize Zurudɛn baji la. Zan tun bɛ nyɔgɔmɛsi fani don k'a cɛɛ siri ni cɛsirilan gololaman ye. A tun b'a yɛrɛ balo ni tɔɔn ni lii ye. A tun b'a fɔ mɔgɔw ye ko: “Min bɛna na ne kɔ, o ka sebagaya ka bon ni ne ta ye. Hali ka biri k'a ka sanbara juru foni, ne kuun ka dɔgɔ o ma. Ne y'aw batize ni jii ye, nga ale bɛna aw batize ni Nii Senuman ye.” O tuma na, Yezu bɔra Nazarɛti Galile mara la ka taa Zan sɛgɛrɛ. Zan y'a batize Zurudɛn baji la. Yezu bɔtɔ jii la, a ye sankolo dayɛlɛnin ye ka Nii Senuman jigitɔ ye a kan i n'a fɔ jɛnɛtugan bɛ cogo min na. Kumakan dɔ bɔra sankolo la k'a fɔ ko: “I ye ne Dencɛ ye, i koo ka di ne ye haali. A diyara ne ye, n y'i woloma.” O yɔrɔnin kelen, Nii Senuman y'a kɛ Yezu taara kongo kɔnɔ. A ye tile bi naani kɛ kongo kɔnɔ. Kongosogow dama tun b'o yɔrɔ la. K'a to yen, Sutana y'a nigɛ ka dɛsɛ. Mɛlɛkɛw tun b'a mako nya. Zan donnin kɔ kaso la, Yezu taara Ala ka kibaru diman fɔ Galile mara la. A tun b'a fɔ ko: “Ala tun ye waati min latigɛ, o sera. Ala ka masaya waati surunyana. Aw ye nimisa ka faran aw ka kojuguw la ka la kibaru diman na.” Yezu tɛmɛtɔ Galile bada la, a ye mɔnikɛla fila ye, Simɔn n'a dɔgɔcɛ Andere. U tun bɛ jɔɔ filila baji la. Yezu y'a fɔ u ye ko: “Aw ye tugu ne kɔ, aw bɛ baa mɔ cogo min na, ne bɛna aw kɛ dinyɛ mɔlaw ye ten ka mɔgɔw sɔrɔ Ala ye.” O yɔrɔnin kelen, u y'u ka jɔɔw to yen ka tugu Yezu kɔ. A taara nyafɛ dɔɔni, a ye Zebede ka dencɛw ye, Zaki n'a dɔgɔcɛ Zan. U tun b'u ka jɔɔw lalagara kurun kɔnɔ. O yɔrɔnin bɛ, a y'u wele. U y'u faa Zebede ni baaradenw to yen kurun kɔnɔ ka tugu a kɔ. Yezu n'a ka kalandenw sera Kafaranamu dugu kɔnɔ. Lafinyɛlon na, Yezu donna Alabatoso kɔnɔ ka mɔgɔw kalan. U kabakoyara a ka mɔgɔ kalan cogo la, bari a tun t'u kalan i n'a fɔ sariya karamɔgɔw b'u kalan cogo min na, nga a tun b'u kalan i n'a fɔ fanga bɛ mɔgɔ min bolo. O waati yɛrɛ la, cɛɛ jinatɔ dɔ tun bɛ yen, o pɛrɛnna ko: “Mun bɛ an ni e cɛ, Nazarɛti Yezu? I nana k'an halaki wa? I ye mɔgɔ min ye, ne b'o lɔn. I ye Ala ka ciden senuman ye.” Yezu sɔngɔra a kunna k'a fɔ a ye ko: “I daje ka bɔ cɛɛ nin na!” Jina ye cɛɛ yuguyugu kosɛbɛ ka bɔ a la ni kule ye. Mɔgɔ bɛɛ kabakoyara fɔɔ u tun bɛ nyɔgɔn nyininga ko: “Nin ye mun ye? A bɛ kuma barikaman fɔ ka fɛnkura nyaa yira mɔgɔw la. Hali jinaw bɛ sɔn a ta ma.” O sababu fɛ, Yezu tɔgɔ bɔra joona Galile mara bɛɛ la. O kɔ, Yezu ni Zaki ani Zan bɔra Alabatoso kɔnɔ ka taa Simɔn ni Andere ka soo. Simɔn biranmuso lanin tun bɛ farigwan bolo. Yezu sera dɔrɔn, u y'o muso koo fɔ a ye. Yezu gwɛrɛla a la k'a bolo minɛ ka wili. O yɔrɔnin kelen, a ka farigwan banna. A ye dumuni tobi u ye. Tilekun donnin kɔ, mɔgɔw taara Yezu sɛgɛrɛ ni jinatɔw ani banabagatɔw bɛɛ ye. Dugu kɔnɔ mɔgɔw bɛɛ y'u lajɛn boon daa la. A ye banabagatɔ sifa caaman kɛnɛya ka jinaw gwɛn ka bɔ mɔgɔ caaman na. A tun tɛ sɔn jinaw ka kuma, bari olu tun b'a lɔn. O dugusagwɛ sɔgɔma joona, sanni kɛnɛ ka bɔ, Yezu kununna. A bɔra ka taa Ala dali kongo kɔnɔ. Simɔn n'a tɔnyɔgɔnw kununna tuma min na, u taar'a yɔrɔ nyini. U y'a ye tuma min na, u y'a fɔ a ye ko: “Mɔgɔ bɛɛ b'i yɔrɔ nyinina.” A y'u jaabi ko: “An ka taa gɛrɛfɛ duguw la, ne bɛna Ala ka kuma fɔ o yɔrɔw la fana, bari ne nana dinyɛ na o le kama.” O la, a taara Galile mara faan bɛɛ la ka Ala ka kuma fɔ Alabatosow kɔnɔ ani ka jinaw gwɛn ka bɔ mɔgɔw la. Kunatɔcɛ dɔ gwɛrɛla k'a kunbiri gwan Yezu kɔrɔ k'a dali ko: “N'i sɔnna, i bɛ se ka ne kɛnɛya.” A hinɛ donna Yezu la minkɛ, a magara a la k'a fɔ a ye ko: “N sɔnna, ko i ka kɛnɛya.” O yɔrɔnin bɛ, cɛɛ kɛnɛyara. O kɔ, sanni Yezu k'a fɔ a ye ko a ka taa, a y'a gwɛlɛya a ma kosɛbɛ ko: “I yɛrɛ kɔlɔsi, i kan'a fɔ mɔgɔ si ye ko ne le y'i kɛnɛya dɛ! Nga taa i yɛrɛ yira sarakalasebagaw la. Musa tun ye saraka min koo fɔ kunatɔ ka kɛnɛyali koo la, i k'o bɔ k'a yira mɔgɔw la ko i kɛnɛyara.” O n'a ta bɛɛ, cɛɛ taara tuma min na, koo min tun kɛra a ye, a y'a daminɛ k'o lakali fɔɔ Yezu tun tɛ se ka don dugu si kɔnɔ tugu mɔgɔw nyana. A tun bɛ to kongo kɔnɔ. Mɔgɔw tun bɛ bɔ faan bɛɛ la ka ta'a sɛgɛrɛ yen. Tile dama tɛmɛnin kɔ, Yezu segira ka taa Kafaranamu. Mɔgɔw y'a mɛn ko a bɛ soo kɔnɔ minkɛ, jamaba taara lajɛn a fɛ fɔɔ lɔyɔrɔ dɛsɛra, hali kɛnɛma boon daa la. Yezu tun bɛ Ala ka kuma fɔra u ye. O tuma na, mɔgɔ naani taar'a fɛ ni muruku dɔ ye. U tun tɛ se ka gwɛrɛ Yezu la jama kɔsɔn minkɛ, Yezu tun bɛ boon kɔnɔ yɔrɔ min na, u yɛlɛla k'o yɔrɔ sanfɛla walaka ka muruku jigi ni juru ye o woo fɛ k'a lanin to dilan kan. Yezu y'a ye k'o mɔgɔw lara ale la minkɛ, a y'a fɔ muruku ye ko: “N teri, ne y'i ka kojuguw yafa.” O y'a sɔrɔ sariya karamɔgɔ dɔw siginin tun bɛ yen. U y'a daminɛ ka miiri ko mun na cɛɛ nin bɛ kuma ten, ko a bɛ Ala tɔgɔ cɛn, ko jon le bɛ se ka mɔgɔ ka kojuguw yafa ni Ala kelen tɛ? O yɔrɔnin kelen, Yezu y'u ka miiriya lɔn a yɛrɛ ma, a y'a fɔ u ye ko: “Mun y'a to aw b'a la ka miiri ten? K'a fɔ muruku ye ko: ‘Ne y'i ka kojuguw yafa’, walima k'a fɔ a ye ko: ‘Wili k'i ka dilan ta ka taama’, o kuma fila la, jumɛn fɔli ka nɔgɔ? Nga n b'a fɛ aw k'a lɔn ko see bɛ Mɔgɔ Dencɛ ye ka mɔgɔ ka kojuguw yafa ka n to dugukolo kan.” O kɔ, a y'a fɔ muruku ye ko: “N b'a fɔ i ye, wili k'i ka dilan ta ka taa soo.” O yɔrɔnin bɛ, cɛɛ nin wilila k'a ka dilan ta ka bɔ u bɛɛ nyana. U bɛɛ kabakoyara fɔɔ u tun bɛ Ala tando n'u b'a fɔ ko: “An ma nin nyɔgɔn ye abada.” Yezu bɔra ka taa Galile bada la tugu. Jama bɛɛ taar'a fɛ yen. A y'u kalan. A tɛmɛtɔ, a ye Alife dencɛ Levi siginin ye wusuruminɛlaw ka baara kɛyɔrɔ la. Yezu y'a fɔ a ye ko: “Tugu ne kɔ.” Levi wilila ka tugu a kɔ. O kɔ, ka Yezu n'a ka kalandenw to dumuni na Levi ka soo, mɔgɔ caaman tun sigira u fɛ ka dumuni kɛ. Wusuruminɛlaw ani mɔgɔw tun bɛ mɔgɔ wɛrɛ minw fana jati kojugukɛlaw ye, olu tun lo, sabu o mɔgɔ sifa nunu le tun bɛ to ka tugu Yezu nɔɔ fɛ caaman. Sariya karamɔgɔ minw ye Farizinyɛw ye, olu dɔw y'a ye ko Yezu n'o mɔgɔw bɛ dumuni kɛra nyɔgɔn fɛ minkɛ, u y'a ka kalandenw nyininga ko: “Mun na a bɛ dumuni kɛ ni wusuruminɛlaw ani kojugukɛlaw ye?” Yezu y'u ka kuma mɛn minkɛ, a y'a fɔ u ye ko: “Mɔgɔ minw ka kɛnɛ, olu mako tɛ furakɛla la, banabagatɔw le mako b'a la. Mɔgɔ minw b'u yɛrɛw jati mɔgɔnyumanw ye, ne ma na olu wele, nga mɔgɔ minw b'a lɔn ko u ye kojugukɛlaw ye, ne nana olu le wele.” Loon dɔ, Zan ka kalandenw ni Farizinyɛw tun bɛ suun na. Mɔgɔ dɔw taara Yezu nyininga ko: “Mun na Farizinyɛw ka kalandenw ni Zan taw bɛ suun don k'a sɔrɔ e taw tɛ suun don?” Yezu ye talen la u ye a yɛrɛ koo la ko: “Kɔnyɔcɛ teriw bɛ se ka suun don k'u ni kɔnyɔcɛ to nyɔgɔn fɛ wa? K'u ni kɔnyɔcɛ to nyɔgɔn fɛ, u tɛ se ka suun don. Nga waati dɔ bɛna se, kɔnyɔcɛ bɛna bɔsi u la, u bɛna suun don o tuma na.” A ye talen la u ye tugu a ka kalan koo la ko: “Mɔgɔ si tɛ fani kunkurunkura bari fani kɔrɔman na. N'o kɛra, fani kunkurunnin kuraman nin bɛna fani kɔrɔman sama k'a faran ka juguya ni fɔlɔta ye. Mɔgɔ si tɛ duvɛnkɛnɛ kɛ foroko kɔrɔman kɔnɔ. N'o kɛra, duvɛn kɔgɔtɔ, a bɛna foroko faran, foroko bɛna cɛn, duvɛn bɛna bɔn. Nga duvɛnkɛnɛ ka kan ka kɛ forokokura le kɔnɔ.” Lafinyɛlon dɔ la, Yezu n'a ka kalandenw tɛmɛtɔ foro dɔw furancɛ la, a ka kalandenw y'a daminɛ ka suman dɔw tigɛ. Farizinyɛw ye Yezu nyininga ko: “A filɛ, koo min daganin tɛ lafinyɛlon na, mun na i ka kalandenw b'o kɛ?” Yezu y'u jaabi ko: “Kɔngɔ ye Dawuda n'a kɔmɔgɔw minɛ tuma min na k'a sɔrɔ dumunifɛn tun t'u fɛ, a ye min kɛ, aw m'o kalan ka ye Ala ka kuma na wa? A donna Ala ka soo kɔnɔ sarakalasebagaw kuntigiba Abiyatari ka tile la. Burukun minw tun bilanin bɛ Ala ye, a ye olu dɔ nyimi ka tila ka dɔ d'a kɔmɔgɔw ma, k'a sɔrɔ mɔgɔ si tun man kan k'olu nyimi fɔɔ sarakalasebagaw dɔrɔn.” O kɔ, Yezu y'a fɔ u ye ko: “Ala ye lafinyɛlon sigi mɔgɔ nafa kɔsɔn, a ma mɔgɔ dan lafinyɛlon kɔsɔn. O le y'a to Mɔgɔ Dencɛ ye lafinyɛlon fana kuntigi ye.” Loon wɛrɛ, Yezu segira ka don Alabatoso kɔnɔ. Cɛɛ tigɛjanin dɔ tun bɛ yen. Mɔgɔ minw tun bɛ yen, u tun bɛ Yezu kɔlɔsira yala n'a bɛna o cɛɛ kɛnɛya lafinyɛlon na, janko u ka se ka ta'a kɔrɔfɔ u ka faamaw nyana. Yezu y'a fɔ cɛɛ tigɛjanin ye ko: “Wili ka na lɔ yan mɔgɔw bɛɛ nyafɛ.” O kɔ, Yezu y'u nyininga ko: “A daganin bɛ ka konyuman kɛ lafinyɛlon na wa, walima ka kojugu kɛ? Ka mɔgɔ kisi wa, walima k'a faga?” U m'a jaabi. Yezu diminin y'u filɛfilɛ, a nyaa sisira u ka tulogwɛlɛya kɔsɔn. A y'a fɔ cɛɛ ye ko: “I tigɛ jan.” A y'a jan, a tigɛ kɛnɛyara. O yɔrɔnin bɛ, Farizinyɛw bɔra ka taa nyɔgɔn ye ni masacɛ Erɔdi kɔmɔgɔw ye ka cogo nyini Yezu fagako la. Yezu n'a ka kalandenw taara Galile bada la. Jamaba tugura u kɔ. U dɔw bɔra Galile mara yɛrɛ la, dɔw bɔra Zude mara la, dɔw bɔra Idume mara la. Dɔw bɔra Zeruzalɛmu, dɔw bɔra Zurudɛn baa kɔfɛ, dɔw fana bɔra Tiri ni Sidɔn gɛrɛfɛ duguw la. O jamaba taara Yezu sɛgɛrɛ, bari u tun y'a ka kɛwaliw kibaru mɛn. A y'a fɔ a ka kalandenw ye k'u ka kurunfitini dɔ labɛn ale ye, janko jama kana na ale nyɔntinyɔnti. Yezu tun bɛ mɔgɔ caaman kɛnɛya, o kama banabagatɔ bɛɛ tun bɛ girin a nɔɔ fɛ, janko u ka se ka maga a la. Ni jinatɔw y'a ye tuma o tuma, u tun b'u kunbiri gwan a kɔrɔ ka pɛrɛn ko: “I ye Ala Dencɛ ye.” Nga Yezu tun b'a gwɛlɛya u ma k'u kana to mɔgɔw k'a lɔn ko ale ye Ala Dencɛ ye. O kɔ, Yezu yɛlɛla kulu dɔ kan k'a sagolamɔgɔw wele. U taar'a fɛ. A ye mɔgɔ tan ni fila woloma olu cɛma k'u kɛ cidenw ye, janko u ka kɛ a taamanyɔgɔnw ye an'a ka to k'u ci ka taa waajuli kɛ. A ye see d'u ma ka jinaw gwɛn ka bɔ mɔgɔw la. A ye mɔgɔ tan ni fila minw woloma, olu tɔgɔ filɛ: Simɔn, Yezu y'o tɔgɔ la ko Piyɛri, o kɔrɔ ko fara, ani Zebede ka dencɛ fila, Zaki n'a dɔgɔcɛ Zan, Yezu ye olu tɔgɔ la ko Bowanɛrizɛsi, o kɔrɔ ko mɔgɔ minw ka fari i n'a fɔ sanpɛrɛn, Andere ni Filipi, Baritelemi ni Matiyo, Toma ni Alife ka dencɛ Zaki, Tade ni Simɔn Zelɔti, ani Zuda Isikariyɔti min ye Yezu don a juguw bolo. O kɔ, Yezu taara soo. Jamaba taara lajɛn yen tugu fɔɔ Yezu n'a ka kalandenw tun tɛ se ka waati yɛrɛ sɔrɔ ka dumuni kɛ. Yezu ka somɔgɔw y'o kibaru mɛn minkɛ, u taara k'u b'a minɛ bari u tun bɛ miiri ko a kuun wilila. Sariya karamɔgɔ minw bɔra Zeruzalɛmu ka taa yen, olu ko: “Jinaw ka kuntigi Belezebuli b'a fɛ.” Ani ko: “Ale bɛ see dir'a ma ka jinaw gwɛn ka bɔ mɔgɔw la.” Yezu y'u wele ka talen la u ye. A ko: “Sutana bɛ se k'a yɛrɛ gwɛn cogo di? Ni jamana min ka mɔgɔw bɛ nyɔgɔn kɛlɛ, o jamana nin tɛ se ka nya. Ni soo min ka mɔgɔw bɛ nyɔgɔn kɛlɛ, o soo nin bɛ ci. O la, ni Sutana tun bɛ wili a yɛrɛ kama, a ka masaya tun bɛna nagasi. O masaya tun tɛna se ka mɛn, o tun bɛna ban joona. “Mɔgɔ si tɛ se ka don cɛɛ barikaman ka soo kɔnɔ k'a bololafɛnw cɛ n'a m'o cɛɛ minɛ k'a siri fɔlɔ. N'a y'a siri, o tuma na, a bɛ se k'a ka sokɔnɔfɛnw bɛɛ cɛ. “Tinyɛ na, ne b'a fɔ aw ye ko mɔgɔw ka kojugu bɛɛ, n'u ka Ala tɔgɔcɛn kuma bɛɛ bɛ se ka yafa, nga ni mɔgɔ o mɔgɔ ye Nii Senuman tɔgɔ cɛn, Ala tɛna yafa o tigi ma fewu. O tigi ye kojugu yafabali kɛ.” Yezu y'o fɔ bari sariya karamɔgɔw tun ko jina b'a fɛ. Yezu baa n'a dɔgɔninw taara lɔ kɛnɛma. U ye mɔgɔ bila ka taa Yezu wele. Mɔgɔ caaman siginin tun bɛ yen ka Yezu lamini. Dɔ y'a fɔ a ye ko: “Hakɛ to. I baa n'i dɔgɔninw lɔnin bɛ kɛnɛma, u b'a fɛ k'i ye.” Yezu y'a jaabi ko: “Jon ye ne baa ye? Jon ni jon ye ne dɔgɔninw ye?” O kɔ, mɔgɔ minw siginin tun bɛ yen k'a lamini, a ye olu filɛ k'a fɔ ko: “Ne baa ni ne dɔgɔninw filɛ yan. Mɔgɔ o mɔgɔ bɛ Ala sago kɛ, o tigi ye ne dɔgɔcɛ, walima ne dɔgɔmuso, walima ne baa ye.” Sinyɛ wɛrɛ, Yezu y'a daminɛ ka mɔgɔw kalan tugu bada la. Mɔgɔw taara lajɛn a kɔrɔ. Jama nana bonya fɔɔ a donna kurun dɔ kɔnɔ ka sigi. Jama bɛɛ lɔra bada la. A y'u kalan koo caaman na ni talenw ye. A y'a fɔ u ye a ka kalan na ko: “Aw ka lamɛnni kɛ. Sɛnɛkɛla dɔ bɔra ka taa sumansi seri a ka foro la. K'a to serili la, kisɛ dɔw taara ben sira daa la. Kɔnɔw nana olu kunu. Kisɛ dɔw fana taara ben fara yɔrɔ la, bɔgɔ bɛrɛ tun tɛ yen. U falenna joona, sabu u ma don duguma ka se yɔrɔjan. Nga tile fariyara tuma min na, u jara bari lili nyanaman tun t'u la. Kisɛ dɔw fana taara ben binjugu yɔrɔ la. Biin wilila k'u degun fɔɔ u ma nya hali dɔɔni. Nga kisɛ dɔw taara ben dugukolonyuman na. U falenna ka bonya ka nya kosɛbɛ. U dɔw ye deen bi saba kɛ, dɔw bi wɔɔrɔ, dɔw fana kɛmɛ.” O kɔ, Yezu y'a fɔ u ye ko: “Mɔgɔ min b'a fɛ ka mɛnni kɛ, o k'a tulo malɔ ka nya.” Yezu bɔra jama kɔrɔ tuma min na, a nɔfɛmɔgɔw n'a ka kalanden tan ni fila y'a nyininga o talen kɔrɔ la. A y'u jaabi ko: “Mɔgɔw tun ma se ka fɛɛn min faamu Ala ka masaya koo la, Ala ye aw nyaa yɛlɛ k'o faamu. Nga tinyɛ bɛɛ bɛ fɔ mɔgɔ tɔw ye talen na. O cogo la, ‘U bɛna filɛli kɛ fɔɔ u nyaa ka ja, u tɛna foyi ye, u bɛna lamɛnni kɛ ka sɛgɛn, u tɛna foyi faamu. N'u tun b'a faamu, u tun bɛna tuubi Ala ye, Ala tun bɛna yafa u ma. Nga u tɛ miiri o la.’ ” Yezu taara nya ni kuma ye k'a fɔ u ye ko: “Aw ma talen nin faamu wa? Aw do bɛna talen tɔw bɛɛ faamu cogo di? Serilikɛla bɛ Ala ka kuma le seri. Kuma serituma na, mɔgɔ dɔw bɛ i n'a fɔ sira daa. N'u y'o kuma mɛn dɔrɔn, Sutana bɛ na k'o kuma bɔ u kɔnɔ. O cogo la, mɔgɔ dɔw fana bɔnin bɛ fara yɔrɔ fɛ. N'u y'o kuma mɛn, o yɔrɔnin bɛ, u bɛ sɔn a ma ni nisɔndiya ye. Nga u t'a to o kuma liliw ka dunya u kɔnɔ. U tɛ munyuli kɛ, ni gwɛlɛya nana, walima ni mɔgɔw b'u tɔɔrɔ o kuma kama dɔrɔn, o bɛ kɛ sababu ye u kunna bɛ cɛn. Mɔgɔ dɔw fana bɛ i n'a fɔ binjugu yɔrɔ. Ni olu b'o kuma mɛn, dinyɛ kɔnɔ hakilinyagamikow, ni nafoloko, ani fɛɛn wɛrɛw nigɛ bɛ kɛ sababu ye, u b'o kuma kɛ kuma fu ye fɔɔ nafa dɔɔni yɛrɛ tɛ sɔrɔ a la. Mɔgɔ dɔw fana bɔnin bɛ dugukolonyuman fɛ. Ni olu b'o kuma mɛn, u bɛ sɔn a ma. U bɛ deen kɛ Ala ye. Dɔw b'u nyɔgɔn bi saba kɛ, dɔw bi wɔɔrɔ, dɔw kɛmɛ.” O kɔ, Yezu y'a fɔ u ye ko: “Mɔgɔ si tɛ lanpan mana k'a bila gongo jukɔrɔ walima kalaka jukɔrɔ. Tinyɛ tɛ wa? A t'a sigi fɛɛn dɔ kan wa? Koo o koo dogonin bɛɛ, Ala bɛna o yira. Gundo si tɛ yen ni Ala tɛn'a bɔ kɛnɛ kan. Tulo b'aw fɛ ka mɛnni kɛ. O la, aw ka aw tulo malɔ ka nya.” Yezu y'a fɔ u ye tuguni ko: “Aw bɛ kuma min mɛn, aw k'aw janto o la kosɛbɛ. Ala bɛna aw sɔn ka kɛnyɛ n'aw ka lamɛnni kɛcogo ye. A bɛna dɔ fara aw ta kan yɛrɛ, bari fɛɛn bɛ min bolo, dɔ bɛna d'o ma ka fara a ta kan, nga fɛɛn tɛ min bolo, hali dɔɔni min b'a bolo, o bɛna bɔsi a la.” Yezu y'a fɔ tuguni ko: “Ala ka masaya barika bɛ bonya cogo min na, o filɛ nin ye. A bɛ kɛ i n'a fɔ cɛɛ dɔ min ye sumansi seri a ka foro la. O kɔ, cɛɛ bɛ to ka sinɔgɔ sufɛ ka kunun sɔgɔma. O waati la, kisɛ bɛ falen ka bonya k'a sɔrɔ cɛɛ m'a falen n'a bonyacogo lɔn. Kisɛ bɛ falen a yɛrɛ ma ka bɔ dugukolo la. A bɛ wili dɔɔni dɔɔni fɔɔ ka na kuun bɔ, o kɔ, a bɛ fa ni kisɛ ye. Ni kisɛw kɔgɔra dɔrɔn, cɛɛ b'a tigɛ ni wɔrɔsɔ ye, bari suman tigɛtuma sera.” Yezu y'a fɔ tugu ko: “Masa Ala ka baara bɛ taa nya cogo min na, an bɛna o gwɛya cogo di? A bɔnin bɛ mutaridikisɛ fɛ. O kisɛ ka dɔgɔ ni dinyɛ kɔnɔ dannifɛnw bɛɛ ye. Nga n'a serila ka ban, a bɛ falen ka bonya ka tɛmɛ nankɔ fɛɛn sɛnɛta tɔw bɛɛ kan. A bolow bɛ bonya fɔɔ kɔnɔw bɛ se k'u ka nyagaw la u kan.” Yezu tun bɛ mɔgɔw kalan n'o bɔnyɔgɔnko talen caaman ye ka kɛnyɛ n'a lamɛnbagaw ka faamuli danyɔrɔ ye. A tun tɛ kuma mɔgɔw fɛ n'a ma talen la u ye. Nga ni Yezu n'a ka kalandenw b'u danna, a b'o talenw bɛɛ kɔrɔ fɔ olu ye. O loon yɛrɛ wulafɛ, Yezu y'a fɔ a ka kalandenw ye ko: “An ka taa baa kɔ.” U taara ka jama to yen. Yezu tun bɛ kurun min kɔnɔ, a ka kalandenw taara n'a ye o kɔnɔ. Kurun dɔ wɛrɛw tun b'u kɔ. U taatɔ, fɔnyɔba wilila. Jikuruw tun bɛ ben kurun kɔnɔ fɔɔ kurun tun bɛ nyini ka fa jii la. Yezu tun bɛ sinɔgɔra kurun kɔfɛla la, a kuun lanin tun bɛ piti kan. A ka kalandenw y'a kunun k'a fɔ a ye ko: “Karamɔgɔ, an bɛna halaki jii la, i tɛ hami o la wa?” Yezu kununna ka sɔngɔ fɔnyɔ kunna, k'a fɔ a ye ko a ka lɔ. Fɔnyɔ lɔra. A y'a fɔ baji ye ko a ka mankan dabila. Jii ye mankan dabila. O kɔ, a y'a fɔ a ka kalandenw ye ko: “Mun na aw bɛ siran ten? Aw ma la ne la halibi wa?” U siranna kosɛbɛ fɔɔ u ye nyɔgɔn nyininga ko: “Cɛɛ nin ye jon ye ni fɔnyɔ ni baji yɛrɛ bɛ sɔn a ta ma?” Yezu n'a ka kalandenw sera baa kɔ Gadarekaw ka mara la. Yezu jigira ka bɔ kurun kɔnɔ dɔrɔn, cɛɛ jinatɔ dɔ bɔra kaburutu la ka ta'a kunbɛn. Kaburutu tun kɛra o cɛɛ sigiyɔrɔ ye. Mɔgɔ si tun tɛ se k'a minɛ k'a siri tugu, hali n'u y'a siri ni jɔrɔkɔ ye, a b'o tigɛ. Sinyɛ caaman u y'a seenw n'a bolow siri ni jɔrɔkɔ ye, nga a tora k'o tigɛtigɛ. Mɔgɔ si ma se k'a kolo. A tun bɛ yaalayaala kaburutu la ani kuluw kan suu ni tile ka to ka kule ani k'a yɛrɛ mandimi ni kabakuruw ye. A ye Yezu ye k'a to yɔrɔjan minkɛ, a bolila ka ta'a kunbiri gwan a kɔrɔ. A pɛrɛnna ko: “Mun b'an cɛ, Ala kɔrɔtaninba Dencɛ Yezu? N b'i dali Ala kama, i kana n tɔɔrɔ.” A y'o kuma fɔ, bari Yezu tun b'a fɔra jina ye ko a ka bɔ cɛɛ la. O tuma na, Yezu y'a nyininga ko: “I tɔgɔ bɛ di?” A y'a jaabi ko: “Jamaba, bari an ka ca.” A ye Yezu dali kosɛbɛ ko a kana u gwɛn ka bɔ o mara kɔnɔ. O y'a sɔrɔ, lɛkuluba dɔ tun bɛ dumuni kɛra kulu gɛrɛfɛ. O la, jina nunu ye Yezu dali ko: “Sabali k'an bila ka taa don lɛɛ nunu na.” Yezu sɔnna. Jinaw bɔra cɛɛ la ka taa don lɛɛw la. Lɛkulu bɛɛ girinna ka jigi kulu jigijigijugu fɛ ka taa don baji la. O lɛɛw tun bɛ waa fila nyɔgɔn bɔ, u bɛɛ sara jii la. Lɛɛ nunu dɛndɛbagaw bolila ka taa o kibaru fɔ dugu kɔnɔ ni dafɛ duguw la. Koo min kɛra, mɔgɔw bɔra ka taa o filɛ. Jina caaman tun bɛ cɛɛ min na, mɔgɔw sera Yezu fɛ k'o jinatɔkɔrɔ siginin ye. Sisan fani b'a kaan na, a nyamalɔnin lo. U siranna. Koo min kɛra jinatɔkɔrɔ ye, ani min kɛra lɛɛw la, mɔgɔ minw y'o ye, u y'o lakali tɔw ye. O koow mɛnnin kɔ, mɔgɔw y'a nyini Yezu fɛ ko a ka taa ka bɔ u ka mara la. Yezu dontɔ kurun kɔnɔ, jinatɔkɔrɔ nin y'a dali ko a ka sɔn ale ka ta'a fɛ. Yezu ma sɔn, nga a y'a fɔ a ye ko: “Taa soo. Matigi Ala hinɛna i la ka koba min kɛ i ye, i ka taa o lakali i ka somɔgɔw ye.” Yezu ye koba min kɛ a ye, a taara o kibaru jɛnsɛn Dugu Tan mara la. O koo mɛnbagaw bɛɛ kabakoyara. Yezu kɔsegira kurun kɔnɔ ka taa baa kɔ. Mɔgɔ caaman taara lajɛn a kɔrɔ bada la. Alabatoso dɔ kuntigi taara yen. A tɔgɔ tun ko Zayirisi. A ye Yezu ye tuma min na, a y'a kunbiri gwan Yezu kɔrɔ, k'a dali kosɛbɛ ko: “N denmuso bɛ nyini ka sa. Sabali ka na i bolo la a kan janko a ka kɛnɛya ka to nii na.” U ye Zayirisi ka soo sira ta. Jamaba tugura Yezu nɔɔ fɛ k'a degun. O y'a sɔrɔ muso dɔ tun bɛ jama cɛma min ka koli tun b'a sɛgɛnna kabini saan tan ni fila, joli tɛ lɔ ka ye. A tun tɔɔrɔla kosɛbɛ furakɛla caaman bolo. A bololafɛn bɛɛ banna. O n'a ta bɛɛ, a ka bana ma nɔgɔya, nga a tun bɛ juguya ka taa. A ye Yezu kibaru mɛn minkɛ, a donna jama cɛma Yezu kɔfɛ ka maga a ka fani na. A tun y'a fɔ a yɛrɛ kɔnɔ ko: “Ni n sera ka maga a ka fani dɔrɔn na, n bɛna kɛnɛya.” A magara Yezu ka fani na tuma min na, o yɔrɔnin bɛ, joli lɔra, a y'a lɔn ko a ka bana banna. O yɔrɔnin kelen, Yezu y'a lɔn a yɛrɛ ma ko sebagaya dɔ bɔra ale la. A y'a nyaa yɛlɛma jama cɛma k'a fɔ ko: “Jon le magara n ka fani na?” A ka kalandenw y'a jaabi ko: “I nyaa b'a la jama y'i degun, i bɛ tila k'a fɔ tugu ko jon magara i la.” Yezu y'a daminɛ k'a gɛrɛfɛ mɔgɔw filɛ janko a k'o kɛbaga ye. O muso tun bɛ yɛrɛyɛrɛla siranya bolo, bari koo min kɛra a yɛrɛ la, a y'o lɔn. A taar'a kunbiri gwan Yezu kɔrɔ ka tinyɛ bɛɛ fɔ a ye. Nga Yezu y'a fɔ a ye ko: “N dɔgɔmuso, i kɛnɛyara bari i lara ne la, taa hɛrɛ la, i kɛnɛyanin ka to.” Ka Yezu to o kuma na, mɔgɔ dɔw bɔra kuntigi Zayirisi ka soo ka n'a fɔ a ye ko: “I denmuso banna. Mun na i bɛ karamɔgɔ sɛgɛn tugu?” Nga Yezu ma u ka kuma jati, a y'a fɔ Zayirisi ye ko: “I kana siran, la ne la dɔrɔn.” O kɔ, a ma sɔn mɔgɔ si ka ta'a fɛ Zayirisi ka soo, fɔɔ Piyɛri ni Zaki ani Zaki dɔgɔcɛ Zan. U sera Alabatoso kuntigi nin ka soo tuma min na, Yezu y'a ye ko mankanba bɛ yen. Mɔgɔw tun bɛ kasira ka kule. Yezu donna soo kɔnɔ k'a fɔ u ye ko: “Nin ye mun mankan ye? Mun na aw bɛ kasi? Deen ma sa, a bɛ sinɔgɔra le.” Mɔgɔw yɛlɛla Yezu ma. O tuma na, a ye mɔgɔ bɛɛ bɔ kɛnɛma. Deen suu lanin tun bɛ boon min kɔnɔ, a donna yen ni deen faa n'a baa an'a yɛrɛ ka kalanden saba ye. A y'a bolo minɛ k'a fɔ a ye u ka kaan na ko: “Talita kumi,” (o kɔrɔ ko: “Sungurunin, n b'a fɔ i ye, wili!”) O yɔrɔnin bɛ, sungurunin wilila ka taama. (A sii tun ye saan tan ni fila ye.) U kabakoyara ka dama tɛmɛ. Yezu y'a fɔ u ye k'a gwɛlɛya k'u kan'a fɔ mɔgɔ si ye. O kɔ, a y'a fɔ u ye k'u ka dumuni d'a ma. Yezu bɔra o yɔrɔ la ka ta'a ka dugu la. A ka kalandenw tugura a kɔ. Lafinyɛlon sera minkɛ, a donna Alabatoso kɔnɔ ka mɔgɔw kalan. A lamɛnbagaw bɛɛ kabakoyara kosɛbɛ. U tun b'a fɔra ko: “Haan! A bɔra ni nin ye min? Hakili min b'a fɛ, a y'o sɔrɔ min? A bɛ kabako minw kɛ, a b'o kɛ cogo di? Yirilɛsɛla tɛ wa? Mariyamu ka dencɛ nin tɛ wa? A dɔgɔcɛw tɛ Zaki ni Zoze ni Zude ani Simɔn ye wa? A dɔgɔmusow t'an fɛ yan wa”? O miiriya le y'a to u ma la a la. Nga Yezu y'a fɔ u ye ko: “Kira bɛ bonya sɔrɔ yɔrɔ bɛɛ, fɔɔ a ka dugumɔgɔw n'a balimaw an'a ka somɔgɔw cɛma.” Yezu y'a bolo la banabagatɔ dɔw kan k'u kɛnɛya. A ma se ka kabako si kɛ yen ka fara o kan. U ma la Yezu la minkɛ, o y'a kabakoya. O kɔ, a taara u lamini duguw la ka mɔgɔw kalan. Yezu y'a ka kalanden tan ni fila wele k'u ci fila fila. A ye see d'u ma ka jinaw gwɛn ka bɔ mɔgɔw la. A y'a fɔ u ye ko: “Aw kana fɛɛn si ta bere dama kɔ. Dumuni wo, dugutaaminan wo, wari wo, aw kana taa n'o si ye. Aw ka sanbara don nga aw kana duloki fila don.” A y'a fɔ u ye fana ko: “N'aw sera dugu o dugu la, n'aw jigira mɔgɔ min fɛ, aw ka to o tigi fɛ fɔɔ aw ka bɔ o dugu nin kɔnɔ. Ni yɔrɔ dɔ ka mɔgɔw ma sɔn aw ka jigi u fɛ, n'u ma sɔn k'aw ka kuma lamɛn, n'aw bɛ bɔ yen tuma min na, aw k'aw sennabuguri furanfuran ka bɔ aw seen na. O bɛna kɛ taamasinyɛ ye k'a yira u la ko a bɛna bɔ u nyaa na.” Kalanden tan ni fila taara mɔgɔw waaju k'u ka nimisa ka faran u ka kojuguw la. U ye jina caaman gwɛn ka bɔ mɔgɔw la ka tulu mɔ banabagatɔ caaman na k'u kɛnɛya. O waati la, masacɛ Erɔdi fana ye Yezu koo mɛn, bari Yezu tɔgɔ tun bɔra yɔrɔ bɛɛ la. Mɔgɔ dɔw tun b'a fɔ ko: “Zan batizelikɛla le kununna a sanin kɔ. O le y'a to a bɛ se ka kabakow kɛ.” Dɔw tun ko kira Eli lo. Dɔw fana tun ko fɔlɔfɔlɔ kiraw nyɔgɔn lo. Nga Erɔdi y'o mɛn tuma min na, a y'a fɔ ko: “Ne tun ye Zan min kuun tigɛ, ale le kununna.” Fɛɛn min y'a to Erɔdi tun ye Zan kuun tigɛ, o filɛ nin ye: Erɔdi yɛrɛ tun ye mɔgɔ bila ka taa Zan minɛ k'a don kaso la a dɔgɔcɛ Filipi ka muso kama. Muso nin tɔgɔ tun ko Erodiyadi. Erɔdi tun y'o furu. Zan tun y'a fɔ Erɔdi ye o tuma na ko: “I man kan k'i dɔgɔcɛ ka muso bɔsi a la k'a furu.” O kuma kɔsɔn, Erodiyadi tun dimina Zan kɔrɔ kosɛbɛ. A tun b'a fɛ Erɔdi ka Zan faga nga a tun dɛsɛra Erɔdi kɔrɔ, bari Erɔdi tun bɛ siran Zan nya. Erɔdi tun y'a lɔn ko Zan ye mɔgɔnyuman ni mɔgɔsɛbɛ ye. A tun bɛ Zan tanga kojugu ma. N'a ye Zan ka kuma lamɛn tuma o tuma, a hakili bɛ nyagami. O n'a ta bɛɛ, a tun ka d'a ye k'a lamɛn. Erɔdi y'a wololon sanyɛlɛma nyanagwɛ kɛ loon min na, o kɛra Erodiyadi ka lonnyuman ye. O loon nin na, Erɔdi y'a kɔfɛ mɔgɔw ni sɔlidasi kuntigiw ani Galile mara mɔgɔbabaw wele ka dumuniba d'u ma. K'u to dumuni na, Erodiyadi denmuso donna u fɛ ka dɔɔn kɛ. O diyara Erɔdi n'a ka mɔgɔ weleninw ye, Erɔdi y'a fɔ sunguru nin ye ko: “I bɛ fɛɛn min fɛ, o fɔ ne ye, ne bɛna o d'i ma.” Erɔdi y'i kali a ye ko: “I mana fɛɛn o fɛɛn dali ne fɛ, ne bɛna o d'i ma, hali ne ka jamana tilancɛ.” Sunguru bɔra ka ta'a baa nyininga ko: “I b'a fɛ ne ka mun dali?” A y'a jaabi ko: “Zan batizelikɛla kungolo.” O yɔrɔnin bɛ, sunguru teliyara ka kɔsegi ka taa masacɛ fɛ k'a fɔ a ye ko: “N b'a fɛ i ka Zan batizelikɛla kuun di n ma minan dɔ kɔnɔ sisan sisan.” Masacɛ nyaa sisira nga a y'i kali minkɛ mɔgɔ weleninw nyana, a tun tɛ se ka ban. O yɔrɔnin kelen sɔlidasi minw ka baara ye mɔgɔfaga ye, a y'o dɔ ci ko a ka taa Zan kuun tigɛ ka na n'a ye. Sɔlidasi nin taara Zan kuun tigɛ kasobon na, k'a bila minan dɔ kɔnɔ, ka n'a di sunguru nin ma. O fana taar'a d'a bamuso ma. Zan ka kalandenw y'o mɛn tuma min na, u taar'a suu ta k'a don. Yezu tun ye mɔgɔ minw ci, olu kɔsegira ka taa lajɛn a kɔrɔ. U ye mɔgɔw kalan fɛɛn minw na ka koo minw kɛ, u y'o bɛɛ lakali a ye. A y'a fɔ u ye ko: “Aw ye na an ka taa an danna yɔrɔ dɔ la janko aw ka lafinyɛ yen dɔɔni.” A y'o fɔ bari mɔgɔ caaman tun bɛ taa u fɛ, dɔw bɛ taa ni dɔw bɛ segi fɔɔ Yezu n'a ka kalandenw tun tɛ waati yɛrɛ sɔrɔ ka dumuni kɛ. U donna kurun kɔnɔ k'u bɛ taa u danna yɔrɔ dɔ la. Mɔgɔ caaman y'u taatɔ ye k'u lɔn. Mɔgɔw bɔra dafɛ duguw bɛɛ la ka boli ka kɔn u nya u taayɔrɔ la. Yezu n'a ka kalandenw sera yen tuma min na, a bɔtɔ kurun kɔnɔ, a ye jamaba ye. U hinɛ donna a la, bari o mɔgɔw tun bɛ a nyana i n'a fɔ dɛndɛbaga tɛ saga minw na. A y'a daminɛ k'u kalan fɛɛn caaman na. A ka kalandenw gwɛrɛla a la wuladafɛ k'a fɔ a ye ko: “Tile bɛ nyini ka ban, yan do ye kongo ye. Sira di jama ma u ka taa dafɛ duguw la ka dumuni san u yɛrɛ ye.” A y'u jaabi ko: “Aw yɛrɛw ka dumuni d'u ma.” U y'a nyininga ko: “O tuma na, i b'a fɛ an ka taa buru san ni wari deniye kɛmɛ fila ye ka na a d'u ma wa?” Yezu y'a fɔ u ye ko: “Burukun joli b'aw fɛ? Aw ka ta'a lajɛ.” U taar'a filɛ minkɛ, u segira ka ta'a fɔ a ye ko burukun duuru ni jigɛ fila. A y'a fɔ u ye ko: “Aw ka mɔgɔw tilantilan k'u ka sigi duguma, binkɛnɛ kan.” U dɔw sigira mɔgɔ kɛmɛ kɛmɛ, u dɔw bi duduuru. Yezu ye burukun duuru ni jigɛ fila nunu ta, k'a nyaa kɔrɔ ta sanfɛ ka barika la Ala ye. A sɔrɔla ka burukunw tilantilan k'u di a ka kalandenw ma, k'u k'a tilan mɔgɔw cɛ. A ye jigɛ fila fana tilan u bɛɛ cɛ. U bɛɛ ye dumuni kɛ fɔɔ ka fa. Buru ni jigɛ tɔɔ min tora, kalandenw y'o cɛ ka segi tan ni fila fa n'o ye. Mɔgɔ minw tun y'o dumuni kɛ, cɛɛw tun ye mɔgɔ waa duuru ye u cɛma. O yɔrɔnin bɛ, Yezu y'a fɔ a ka kalandenw ye k'u ka don kurun kɔnɔ ka taa ale nya baa kɔ Bɛtisayida faan fɛ, sanni ale bɛ jama labila. Yezu y'a fɔ jama ye k'u ka taa soo. O kɔ, a taara yɛlɛ kulu dɔ kan ka Ala dali. Suu kora ka kalandenw to kurun kɔnɔ baji cɛmancɛ la. O waati la, Yezu kelenpe tun bɛ duguma. Yezu y'a ye ko a ka kalandenw tɔɔrɔnin bɛ kurun boli fɛ, bari fɔnyɔba tun b'u kunbɛnna. A taamana baji kan ka taa u faan fɛ dondo kasi filanan waati la. A tun bɛ nyini ka tɛmɛ u kan. U y'a taamatɔ ye baji kan minkɛ, u y'a miiri ko suja lo. U kulera, bari u bɛɛ tun y'a ye, ani u jaa tun wilila. O yɔrɔnin bɛ, Yezu kumana u fɛ k'a fɔ u ye ko: “Aw k'aw jaa gwɛlɛya, ne lo, aw kana siran.” A sɔrɔla ka don u fɛ kurun kɔnɔ. Fɔnyɔ lɔra. U kabakoyara ka dama tɛmɛ, bari Yezu tun ye kabako min kɛ ni burukunw ye, u tun m'o faamu, u hakili tun ka dɔgɔ o faamuli ma. Yezu n'a ka kalandenw ye baa tigɛ ka se Zenezarɛti mara la. U y'u ka kurun lɔ bada la. U bɔra kurun kɔnɔ dɔrɔn, mɔgɔw ye Yezu lɔn. U bolila ka ta'a fɔ yɔrɔ bɛɛ. Ni mɔgɔw y'a mɛn ko Yezu bɛ yɔrɔ o yɔrɔ, u bɛ banabagatɔw ta lafɛn dɔw kan ka ta'a fɛ yen. Yezu mana taa yɔrɔ o yɔrɔ, dugubaw la wo, dugudenninw na wo, walima togodaw la, mɔgɔw tun bɛ taa ni banabagatɔw ye kɛnɛgwɛ yɔrɔw la k'a dali ko a ka sɔn u ka maga a ka fani dakun dama na. Banabagatɔ minw bɛɛ magara a la, olu kɛnɛyara. Farizinyɛw ni sariya karamɔgɔ dɔw bɔra Zeruzalɛmu ka taa lajɛn Yezu kɔrɔ. U y'a ye ko a ka kalanden dɔw bɛ dumuni kɛra n'u tigɛnɔgɔninw ye, bari u tun m'u tigɛw ko ka kɛnyɛ ni Farizinyɛw ka landa ye. Tinyɛ na, Farizinyɛw ni Zuwifu tɔw si tun tɛ dumuni kɛ n'u m'u tigɛw ko ka nya ka kɛnyɛ n'u faaw ka landa ye. Hali n'u kɔsegira ka bɔ lɔgɔ la, u tun tɛ dumuni kɛ n'u ma ko fɔlɔ. U tun bɛ landa caaman labato fana i n'a fɔ jifilenw kocogo, ani duunw ni nigɛdagaw kocogo. O le y'a to Farizinyɛw ni sariya karamɔgɔw ye Yezu nyininga ko mun na a ka kalandenw tɛ u faaw ka landa labato, ko mun na u bɛ dumuni kɛ n'u tigɛnɔgɔninw ye. Yezu y'u jaabi ko: “Ezayi ye kiraya kuma min fɔ aw filankafɔw koo la, o bɛnna kosɛbɛ. A y'a sɛbɛn ko Ala y'a fɔ ko: ‘Mɔgɔ nunu bɛ ne bonya n'u daa dɔrɔn ye nga u dusukun yɔrɔ ka jan ne la. U bɛ ne bato gwansan, bari u bɛ nyɔgɔn kalan koo minw na, o ye mɔgɔw ka sariya ye, ne ta tɛ.’ ” Yezu y'a fɔ u ye k'u bɛ Ala ka sariyaw to yen ka mɔgɔw ka landaw labato. A y'a fɔ u ye tugu ko: “Aw bɛ sababu sɔrɔ ka ban Ala ka sariyaw la k'aw yɛrɛw ka landa kɛ. Musa y'a fɔ ko mɔgɔ k'a faa n'a baa bonya, ko ni mɔgɔ min y'a faa walima a baa dɔgɔya, k'o tigi ka kan ka faga. Aw do b'a fɔ ko ni mɔgɔ dɔ y'a fɔ a faa walima a baa ye ko a tun bɛ se k'a dɛmɛ n'a bololafɛn min ye, ko ale y'o di Ala ma, aw t'a to o tigi k'a faa walima a baa dɛmɛ n'a bololafɛn si ye tugu. O cogo la, aw bɛ Ala ka kuma jati kuma fu ye. Aw bɛ nyɔgɔn kalan landako minw na, aw b'olu fisaya ni Ala ka kuma ye. Aw b'o bɔnyɔgɔnko caaman kɛ.” Yezu ye jama wele tugu k'a fɔ u ye ko: “Aw bɛɛ k'aw tulo malɔ ka n ka kuma faamu: Mɔgɔ bɛ fɛɛn o fɛɛn don a daa la, o tɛ se k'a nɔgɔ, nga min bɛ bɔ a dusu la, o le b'a nɔgɔ. [ Tulo b'aw fɛ ka mɛnni kɛ. O la, aw ye aw tulo malɔ ka nya.]” Yezu bɔra jama kɔrɔ ka taa don soo kɔnɔ tuma min na, a ka kalandenw y'a nyininga o kuma kɔrɔ la. A y'u jaabi ko: “Aw fana ye hakilitanw ye wa? Aw m'a faamu ko mɔgɔ bɛ fɛɛn o fɛɛn don a daa la, k'o tɛ se k'a nɔgɔ wa? O t'a nɔgɔ, bari o tɛ don a dusu la, nga o bɛ don a kɔnɔbara la, o kɔ, a bɛ taa banakɔ.” (O cogo la, Yezu y'a yira a ka kuma fɛ ko dumunifɛn bɛɛ bɛ se ka dumu.) A y'a fɔ u ye fana ko: “Fɛɛn minw bɛ bɔ mɔgɔ dusu la, olu le b'a nɔgɔ. Miiriyajuguw bɛ bɔ mɔgɔ dusu le la. Olu le b'a to mɔgɔ bɛ kakalaya kɛ, a bɛ sonyali kɛ, a bɛ mɔgɔ faga. Olu le b'a to fana a bɛ nyamɔgɔya kɛ, a tɛ wasa, a ka jugu, a bɛ mɔgɔ nigɛ ka don koo la, a bɛ mɔgɔkolonya kɛ, a nyaa bɛ bɔ mɔgɔ ka fɛɛn fɛ, a bɛ mɔgɔ tɔgɔ cɛn, a b'a yɛrɛ bonya, a tɛ miiri. Kojugu nunu bɛɛ bɛ bɔ mɔgɔ dusu la, olu le b'a nɔgɔ.” O kɔ, Yezu bɔra Zuwifuw ka mara la ka taa Tiri gɛrɛfɛ dugu dɔ la. A jigira mɔgɔ dɔ ka soo. A tun t'a fɛ mɔgɔ si k'a lɔn ko ale b'o soo kɔnɔ, nga mɔgɔw nana bɔ a kala ma. Muso dɔ tun bɛ yen, jina tun b'a denmuso la. A ye Yezu kibaru mɛn dɔrɔn, a taar'a kunbiri gwan Yezu kɔrɔ. O muso tun tɛ Zuwifu ye. A wolola Siri gɛrɛfɛ jamana dɔ la min tɔgɔ ko Fenisi. A ye Yezu dali ko a ka jina gwɛn ka bɔ a denmuso la. Nga Yezu ye talen la a ye ko: “A to n ka Zuwifuw dɛmɛ ban, bari mɔgɔ man kan ka denmisɛnw ka dumuni ta, k'a di wuluw ma.” A ye Yezu jaabi ko: “Matigi, o ye tinyɛ ye, nga ka denmisɛnw to dumuni na, dumuni murumuru minw bɛ ben duguma, wuluw b'o dumu.” O tuma na, Yezu y'a fɔ a ye ko: “I ka kuma nin kɔsɔn, jina bɔra i denmuso la ka ban. Segi ka taa soo.” Muso segira ka taa soo. A taara deen lanin sɔrɔ kalaka kan. Jina tun bɔra a la ka ban. Yezu bɔra Tiri mara la ka taa tɛmɛ Sidɔn, ka Dugu Tan mara cɛɛ tigɛ ka sɔrɔ ka taa Galile baa faan fɛ. Mɔgɔ dɔw taara Yezu sɛgɛrɛ ni cɛɛ tulogweren dɔ ye. A tun tɛ se ka kuma ka nya fana. U ye Yezu dali ko a k'a bolo la o cɛɛ kan k'a kɛnɛya. O la, Yezu taara n'a ye a danna. A y'a bolokunandenw don cɛɛ tulo la k'a daji mɔ a nɛnkun na. O kɔ, Yezu y'a nyaa kɔrɔ ta sanfɛ ka ninakili ni fanga ye k'a fɔ a ye u ka kaan na ko: “Efata!” (o kɔrɔ ko i tulo ka yɛlɛ.) O yɔrɔnin bɛ, cɛɛ tulo yɛlɛla, a nɛnjuru fonina, a y'a daminɛ ka kuma ka nya. Yezu y'a fɔ u ye k'a gwɛlɛya k'u kan'a fɔ mɔgɔ si ye. Nga a tora k'a gwɛlɛya u ma cogo min na, u tora ka koo nin kibaru jɛnsɛn ten. Mɔgɔw kabakoyaninba tun b'a fɔra ko: “A bɛ koo minw kɛ, o bɛɛ ka nyi kosɛbɛ! A bɛ tulogwerenw yɛrɛ tulo yɛlɛ, ka bobow nɛnjuru foni.” Loon dɔ la, jamaba lajɛnnin tun bɛ Yezu kɔrɔ tugu. Foyi tun tɛ jama fɛ k'a dumu minkɛ, a y'a ka kalandenw wele k'a fɔ u ye ko: “Jama nin hinɛ bɛ ne la, sabu, bii ye u tile saba ye ne fɛ, foyi t'u fɛ k'a dumu tugu. Ni ne y'a to u taara soo ni kɔngɔ ye, u barika bɛna dɛsɛ sira la, bari u dɔw bɔyɔrɔ ka jan.” A ka kalandenw y'a jaabi ko: “An bɛna se ka dumuni sɔrɔ min kongo nin kɔnɔ ka mɔgɔ nunu bɛɛ fa?” Yezu y'u nyininga ko burukun joli b'u fɛ. U y'a jaabi ko burukun wolonwula. O tuma na, Yezu y'a fɔ jama ye k'u ka sigi duguma. A y'o burukunw ta ka barika la Ala ye. O kɔ, a y'o tilantilan k'u d'a ka kalandenw ma k'u k'a tilan. U y'a tilan jama cɛ. Jigɛmisɛn dɔ tun b'u fɛ fana. Yezu ye barika la Ala ye o koo la, k'a fɔ a ka kalandenw ye k'u k'o fana tilan jama cɛ. U ye dumuni kɛ fɔɔ ka fa. Dumuni tɔɔ min tora, kalandenw y'o cɛ ka segi wolonwula fa n'a ye. Mɔgɔ minw tun y'o dumuni kɛ, olu tun bɛ mɔgɔ waa naani nyɔgɔn bɔ. O kɔ, Yezu y'a fɔ u ye k'u ka taa soo. O yɔrɔnin kelen, Yezu n'a ka kalandenw donna kurun kɔnɔ ka taa Dalimanuta mara la. Farizinyɛw taara Yezu sɛgɛrɛ ka sɔsɔli daminɛ n'a ye. U tun b'a fɛ ka Yezu kɔrɔbɔ minkɛ, u y'a nyini a fɛ ko a ka kabako dɔ kɛ k'a yira ko a ka sebagaya bɛ bɔ Ala fɛ. Yezu ninakilila ni fanga ye k'a fɔ ko: “Mun na bii mɔgɔ nunu b'a fɛ ne ka kabako dɔ kɛ? Tinyɛ na, ne b'a fɔ aw ye ko ne tɛna kabako si kɛ k'a yira u la ko ne ka sebagaya bɛ bɔ Ala fɛ.” O kɔ, Yezu bɔra u kɔrɔ ka taa don kurun kɔnɔ tugu ka taa baa kɔ. Kalandenw tun nyinɛna ka dumunifɛn ta. Foyi tun t'u fɛ kurun kɔnɔ fɔɔ burukun kelenpe. Yezu y'u ladi ko: “Aw k'aw yɛrɛw kɔlɔsi Farizinyɛw ka burufununan ni Erɔdi ta ma.” Kalandenw y'a fɔ nyɔgɔn ye ko: “Buru t'an fɛ minkɛ, o le y'a to Yezu bɛ kuma ten.” Yezu bɔra u ka kuma kala ma, a y'u nyininga ko: “Mun na aw b'a la k'a fɔ nyɔgɔn ye ko: ‘Buru t'an fɛ minkɛ,’ k'o le y'a to ne bɛ kuma ten? Aw tɛ koo faamu halibi wa? Aw hakili ka dɔgɔ wa? Nyaa b'aw fɛ, aw do tɛ yeli kɛ. Tulo b'aw fɛ, aw do tɛ mɛnni kɛ. Ne ye burukun duuru karikari k'a di cɛɛ waa duuru ma tuma min na, aw hakili t'o la wa? Aw ye segi joli fa n'a tɔɔ ye?” U y'a jaabi ko segi tan ni fila. A y'u nyininga tugu ko: “Ne ye burukun wolonwula tilantilan k'u di mɔgɔ waa naani ma tuma min na, aw ye segi joli fa n'a tɔɔ ye?” U y'a jaabi ko segi wolonwula. Yezu y'a fɔ u ye ko: “Aw tɛ koo faamu halibi wa?” Yezu n'a ka kalandenw taara Bɛtisayida. Mɔgɔ dɔw taara Yezu sɛgɛrɛ ni finyɛntɔ dɔ ye. U ye Yezu dali ko a ka sabali ka maga o finyɛntɔ nin na k'a kɛnɛya. A y'a bolo minɛ ka bɔ n'a ye dugu kɔnɔ. O kɔ, a y'a daji mɔ finyɛntɔ nin nyaa na k'a bolo la a kan k'a nyininga ko: “I nyaa bɛ fɛɛn dɔ la wa?” Finyɛntɔ y'a nyaa yɛlɛ k'a fɔ ko: “Ne nyaa bɛ mɔgɔw la, u bɛ i n'a fɔ yiriw nga u bɛ taamana.” Yezu y'a bolo la cɛɛ nyaa kan tugu. O kɔ, cɛɛ y'a nyaa yɛlɛ, a ye fɛɛn bɛɛ ye ka nya. O tuma na, Yezu y'a fɔ a ye ko: “Tilen ka taa soo, i kana taa bɔ dugu nin kɔnɔ yɛrɛ.” Yezu n'a ka kalandenw taara Sezare Filipi dafɛ duguw la. K'u to sira kan, a y'a ka kalandenw nyininga ko: “Mɔgɔw b'a fɔ ko ne ye jon ye?” U y'a jaabi ko: “Dɔw ko i ye Zan batizelikɛla ye, dɔw ko i ye kira Eli ye, dɔw fana ko i ye fɔlɔfɔlɔ kiraw dɔ ye.” Yezu y'u nyininga tugu ko: “Aw ka miiri la do, ne ye jon ye?” Piyɛri y'a jaabi ko: “I ye Ala ka Mɔgɔwolomanin nin ye.” O la, Yezu y'a gwɛlɛya u ma k'u kana o fɔ mɔgɔ si ye. O kɔ, Yezu ye kuma ta k'a ka kalandenw kalan. A y'a fɔ u ye ko: “Wajibi lo Mɔgɔ Dencɛ ka tɔɔrɔ kosɛbɛ. Cɛkɔrɔbaw ni sarakalasebagaw ani sariya karamɔgɔw bɛna ban a la, u bɛn'a faga, nga tile saba a faganin kɔ, a bɛna kunun.” A y'o kuma nin fɔ u ye k'a gwɛ. O la, Piyɛri taara n'a ye gɛrɛn na k'a daminɛ k'a jalaki. Nga Yezu y'a nyaa yɛlɛma k'a ka kalanden tɔw filɛ k'a fɔ Piyɛri ye ko: “I Sutana nin, taa ka bɔ n kɔrɔ, bari i ka miiriya ni Ala ta tɛ kelen ye, i bɛ miiri i n'a fɔ adamaden tɔw.” O kɔ, Yezu y'a ka kalandenw ni jama wele k'a fɔ u ye ko: “Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa koo la. A ka tɔɔrɔ bɛɛ munyu ne kɔsɔn ka tugu ne kɔ, hali n'a ka kan ka sa ne kɔsɔn gwengwenlɔgɔ kan i n'a fɔ ne bɛna sa gwengwenlɔgɔ kan cogo min na. Mɔgɔ o mɔgɔ b'a ka dinyɛlatigɛ nyako dɔrɔn fɛ, o tigi tɛna sini hɛrɛ sɔrɔ. Nga ni mɔgɔ min ka dinyɛlatigɛ cɛnna ne ni kibaru diman kɔsɔn, o tigi bɛna sini hɛrɛ sɔrɔ. A bɛ mun nya mɔgɔ ye ka dinyɛ fɛɛn bɛɛ sɔrɔ n'a tɛna sini sɔrɔ? Mɔgɔ bɛ se ka mun di Ala ma k'a kɛ a nii kunmabɔ sara ye? Bii mɔgɔw banna Ala la, u bɛ kojugu kɛ. Ni mɔgɔ min maloyara olu nyana ka ne koo fɔ, ne bɛna na ni n Faa nɔɔrɔ ye tuma min na ni mɛlɛkɛ senumanw ye, Mɔgɔ Dencɛ fana bɛna maloya k'a fɔ k'o tigi ye a ka kalanden ye.” A y'a fɔ u ye tugu ko: “Tinyɛ na, ne b'a fɔ aw ye ko Masa Ala bɛna setigiya baara min kɛ, mɔgɔ minw bɛ yan, u dɔw tɛna sa n'u m'o ye.” Tile wɔɔrɔ o kɔ, Yezu taara ni Piyɛri ni Zaki ani Zan ye kulu jamanjan dɔ kan u danna. A cogo yɛlɛmana u nyana. A ka faniw gwɛra ka manamana cogo dɔ la fɔɔ mɔgɔ si tɛ dugukolo kan min bɛ se ka fani ko, a ka gwɛ k'o bɔ. Kalanden saba nunu ye Eli ni Musa ye. U fila tun bɛ baro kɛra ni Yezu ye. O la, Piyɛri ye kuma ta k'a fɔ Yezu ye ko: “Karamɔgɔ, a ka nyi an ka to yan. Anw bɛna bugu saba lɔ, e ta kelen, Musa ta kelen, Eli ta kelen.” Piyɛri tun ka kan ka min fɔ, a m'o lɔn bari olu kalandenw tun siranna kosɛbɛ. Sankaba dɔ bɔra ka suma kɛ u kan. Kumakan dɔ bɔra o sankaba la k'a fɔ ko: “Nin ye ne Dencɛ kanunin ye, aw ka mɛnni kɛ a fɛ.” O yɔrɔnin bɛ, kalanden nunu y'u gɛrɛfɛlaw filɛ, nga u ma mɔgɔ si ye tugu ni Yezu kelen tɛ. U jigitɔ ka bɔ kulu kan, Yezu y'a fɔ u ye k'a gwɛlɛya k'u ye koo min ye, k'u kana o lakali mɔgɔ si ye, fɔɔ Mɔgɔ Dencɛ ka kunun a sanin kɔ. U y'o kuma nin labato, nga u tora ka nyɔgɔn nyininga ko ka kunun i sanin kɔ, k'o kɔrɔ ye mun ye? U ye Yezu nyininga ko: “Mun na sariya karamɔgɔw ko Eli ka kan ka na kisibaga nya?” A y'u jaabi ko: “Tinyɛ lo. Eli ka kan ka na fɛɛn bɛɛ labɛn fɔlɔ, nga mun na a fɔra Ala ka kuma na ko Mɔgɔ Dencɛ ka kan ka tɔɔrɔ kosɛbɛ, ko mɔgɔw bɛna ban a la? Ayiwa, ne b'a fɔ aw ye ko Eli nana ka ban, ko mɔgɔ dɔw y'u yɛrɛ sago kɛ a la i n'a fɔ a fɔra Ala ka kuma na a koo la cogo min na.” Yezu ni Piyɛri ni Zaki ani Zan kɔsegira kalanden tɔw fɛ tuma min na, u taar'a sɔrɔ jamaba y'u lamini. Sariya karamɔgɔ dɔw tun bɛ sɔsɔli kɛra ni kalandenw ye. Yezu taara bari jama na. Mɔgɔw y'a ye dɔrɔn, u girinna ka ta'a fo. Yezu y'a ka kalandenw nyininga ko: “Aw ni sariya karamɔgɔw bɛ nyɔgɔn sɔsɔra mun koo la?” Cɛɛ dɔ tora jama cɛma k'a jaabi ko: “Karamɔgɔ, jina bɛ n dencɛ la. A y'a kɛ bobo ye, o le y'a to, n nana n'a ye i fɛ. N'a wilila a fɛ yɔrɔ o yɔrɔ, a b'a ta k'a ben duguma, a daa bɛ kanga, a b'a nyiinw nyimi, a bɛ ja kankan. Ne y'i ka kalandenw dali k'u ka jina gwɛn ka bɔ a la, nga u ma se.” Yezu y'a fɔ u ye ko: “Aw bii mɔgɔ minw tɛ la Ala la, ne bɛna to aw fɛ fɔɔ tuma jumɛn? Aw ka na n'a ye.” U taara n'a ye Yezu fɛ. Jina ye Yezu ye dɔrɔn, a ye kanbelennin yuguyugu kosɛbɛ. Kanbelennin benna duguma ka kolonkolon. A daa kangara. Yezu ye kanbelennin faa nyininga ko: “Kabini tuma jumɛn jina nin b'a tɔɔrɔ ten?” A y'a jaabi ko: “Kabini a denmisɛn tuma. Sinyɛ caaman, jina y'a ta k'a ben tasuma na ani jii la janko a ka faga. Nga n'i bɛ se ka fɛɛn dɔ kɛ, hinɛ an na k'an dɛmɛ.” Yezu y'a fɔ a ye ko: “Mun na i ko: ‘N'i bɛ se’? Ni mɔgɔ min lara Ala la, Ala bɛ se ka fɛɛn bɛɛ kɛ o tigi ye.” O yɔrɔnin kelen, kanbelennin faa pɛrɛnna ko: “Ne lara Ala la. Ne dɛmɛ janko ne kana sigasiga.” Yezu y'a ye ko jama bɛ girinna ka na u kɔrɔ minkɛ, a sɔngɔra jina kuun na k'a fɔ a ye ko: “E min bɛ mɔgɔ kɛ bobo ni tulogweren ye, n b'a fɔ i ye, bɔ kanbelennin nin na, i kana don a la tugu.” Jina kulera ka kanbelennin yuguyugu kosɛbɛ ka bɔ a la. Kanbelennin benna ka kirin ka kɛ i n'a fɔ suu fɔɔ mɔgɔ bɛɛ tun ko a sara. Nga Yezu ye kanbelennin bolo minɛ k'a wili. A wilila ka lɔ. Yezu taara soo tuma min na, k'a to n'a ka kalandenw ye nyɔgɔn fɛ, u y'a nyininga ko: “Mun na anw ma se ka jina nin gwɛn?” A y'u jaabi ko: “Mɔgɔ tɛ se ka jina nin nyɔgɔn gwɛn cogo si la n'a ma Ala dali.” Yezu n'a ka kalandenw wilila ka bɔ o yɔrɔ la ka taa tɛmɛ Galile mara la. Yezu tun t'a fɛ mɔgɔw ka bɔ u tɛmɛtɔ kala ma, bari a tun b'a ka kalandenw kalanna. A tun b'a fɔra ko: “U bɛna Mɔgɔ Dencɛ don mɔgɔjuguw bolo, u bɛn'a faga, tile saba a faganin kɔ, a bɛna kunun.” Nga kalandenw tun t'o kuma faamu, u tun bɛ siran k'a nyininga o kuma kɔrɔ la fana. Yezu n'a ka kalandenw sera Kafaranamu. U donna soo kɔnɔ tuma min na, a y'u nyininga ko: “Aw tun bɛ mun sɔsɔli la sira kan?” Nga u jera, bari u tun bɛ nyɔgɔn sɔsɔra sira kan ko jon le ye kuntigi ye u cɛma. O tuma na, Yezu sigira k'a fɔ u mɔgɔ tan ni fila bɛɛ ye ko: “Ni mɔgɔ dɔ b'a fɛ ka kɛ nyamɔgɔ ye, o tigi ka kan ka kɛ bɛɛ kɔmɔgɔ ye ani bɛɛ ka baaraden ye.” A ye denmisɛn dɔ minɛ ka na n'a ye u cɛma. O kɔ, a y'a ta a disi la k'a fɔ u ye ko: “Ni mɔgɔ o mɔgɔ mana denmisɛn nin nyɔgɔn minɛ ka nya ne kɔsɔn, o b'a yira k'o tigi sɔnna ne ma. Ni mɔgɔ o mɔgɔ sɔnna ne ma, o tigi ma sɔn ne dɔrɔn ma, nga o b'a yira ko a sɔnna ne cibaga fana ma.” Zan y'a fɔ Yezu ye ko: “Karamɔgɔ, an ye cɛɛ dɔ ye, a bɛ jinaw gwɛn ka bɔ mɔgɔw la i tɔgɔ la. An y'a bali k'o kɛ, bari an dɔ tɛ.” Yezu y'a jaabi ko: “Aw kan'a bali, sabu, mɔgɔ si tɛ se ka kabako kɛ ne tɔgɔ la ka tila ka ne tɔgɔjugu fɔ o yɔrɔnin bɛ. Mɔgɔ min tɛ an jugu ye, o ye an nyiin ye. Mɔgɔ o mɔgɔ mana filen nyaa kelen jii minta d'aw ma bari aw ye ne ta ye, tinyɛ na, ne b'a fɔ aw ye k'o tigi bɛna o tɔnɔ sɔrɔ. “Mɔgɔ minw lara ne la, a ma mɛn, ni mɔgɔ dɔ kɛra sababu ye k'olu dɔ kunna cɛn, yan ni a tigi k'o kɛ, ni kabakuru belebeleba tun sirila a kaan na k'a ta k'a fili kɔgɔji la, o tun ka fisa a ma. N'i bolo bɛ kɛ sababu ye k'i don kojugu la, a tigɛ k'a bɔ i la. I ka don arijana na n'i bolo kelen ye, o ka fisa bolo fila ka to i fɛ, i ka taa jahanama tasuma fagabali la. [ Tumu minw bɛ mɔgɔ tɔɔrɔ o yɔrɔ la, olu tɛ sa. O yɔrɔ tasuma fana tɛ faga fewu.] N'i seen bɛ kɛ sababu ye k'i don kojugu la, a tigɛ k'a bɔ i la. I ka don arijana na n'i seen kelen ye, o ka fisa seen fila ka to i fɛ, i ka fili jahanama na. [ Tumu minw bɛ mɔgɔ tɔɔrɔ o yɔrɔ la, olu tɛ sa. O yɔrɔ tasuma fana tɛ faga fewu.] N'i nyaa bɛ kɛ sababu ye k'i don kojugu la, a wɔgɔbɛ k'a bɔ yen. I ka don Ala ka mara kɔnɔ n'i nyaa kelen ye, o ka fisa nyaa fila ka to i fɛ, i ka fili jahanama na. Tumu minw bɛ mɔgɔ tɔɔrɔ o yɔrɔ la, olu tɛ sa. O yɔrɔ tasuma fana tɛ faga fewu. U tun bɛ kɔgɔ kɛ sarakafɛn dɔw la cogo min na k'u mara, u tɛ cɛn, tɔɔrɔ bɛna kɛ tasuma ye mɔgɔ bɛɛ ma k'u dusu saniya, k'u mara Ala ye ten. “Kɔgɔ ye fɛnnyuman ye, nga ni kɔgɔ ka timiya bɔra a la, mun bɛn'a timiya tugu? Kɔgɔ ye fɛnnyuman ye cogo min na, aw fana ka kɛ mɔgɔnyumanw ye ten. Hɛrɛ ka to aw ni nyɔgɔn cɛ.” Yezu wilila ka bɔ o yɔrɔ la ka taa Zude mara la, Zurudɛn baa kɔ. Jamaba taara lajɛn a kɔrɔ tugu. A ye kuma ta k'u kalan i n'a fɔ a tun bɛ to k'a kɛ cogo min na ka kɔrɔ. Farizinyɛ dɔw gwɛrɛla a la k'a nyininga ko: “A daganin bɛ cɛɛ k'a muso furu sa wa?” U y'o fɔ k'a darabɔ. Yezu fana y'u nyininga ko: “Musa ye sariya jumɛn sigi aw ye o koo la?” U y'a jaabi ko: “Musa sɔnna ko cɛɛ ka furusasɛbɛ dilan ka sɔrɔ k'a muso bila.” Yezu y'a fɔ u ye ko: “Aw ka dusugwɛlɛya le y'a to Musa y'o sariya sigi aw ye. N'o tɛ, dinyɛ daminɛtuma na, ‘Ala ye cɛɛ ni muso dan.’ O le y'a to, cɛɛ bɛn'a faa n'a baa to yen ka nɔrɔ a muso la. U fila bɛna jɛn ka kɛ kelen ye. O cogo la, u tɛ fila ye tugu, nga kelen. O la, Ala ye fɛɛn min jɛn k'a kɛ kelen ye, mɔgɔ si kana o faran.” Yezu n'a ka kalandenw kɔsegira soo tuma min na, u y'a nyininga o koo la tugu. A y'a fɔ u ye ko: “Mɔgɔ o mɔgɔ y'a muso bila ka dɔ wɛrɛ ta, o tigi bɛ kakalaya kɛ, a b'a muso fɔlɔ hakɛ ta. Ni muso min bɔra a cɛɛ fɛ ka taa furu dɔ wɛrɛ fɛ, o fana bɛ kakalaya kɛ.” Mɔgɔw taara Yezu sɛgɛrɛ ni denmisɛn dɔw ye ko a k'a bolo la u kan ka duba kɛ u ye, nga a ka kalandenw wilila o mɔgɔw kama. Yezu y'o ye minkɛ, a dimina kalandenw kɔrɔ k'a fɔ u ye ko: “Aw k'a to denmisɛnw ka na ne fɛ, aw kana u bali, sabu, olu bɔnyɔgɔnkow le bɛ don arijana na. Tinyɛ na, ne b'a fɔ aw ye ko ni mɔgɔ min ma sɔn Ala ka koo ma i n'a fɔ denmisɛn bɛ sɔn a facɛ ka kuma ma cogo min na, o tigi tɛna se ka don Ala ka mara kɔnɔ fewu.” O kɔ, Yezu ye denmisɛn nunu ta kelen kelen k'a bolo la u kan ka duba kɛ u ye. Yezu taatɔ dugu wɛrɛ la, cɛɛ dɔ bolila ka ta'a kunbiri gwan a kɔrɔ k'a nyininga ko: “Karamɔgɔnyuman, ne ka kan ka mun kɛ ka hɛrɛ banbali sɔrɔ?” Yezu y'a fɔ a ye ko: “Mun na i bɛ ne wele karamɔgɔnyuman? Mɔgɔnyuman si tɛ yen ni Ala kelen tɛ. I bɛ Ala ka sariyaw lɔn: ‘I kana mɔgɔ faga, i kana kakalaya kɛ, i kana sonyali kɛ, i kana galon la i mɔgɔnyɔgɔn kan, i kana mɔgɔ si tɔnyɔ, i faa n'i baa bonya.’ ” Cɛɛ y'a jaabi ko: “Karamɔgɔ, ne ye olu bɛɛ labato kabini n denmisɛn tuma.” O la, Yezu y'a filɛ, a koo diyara a ye. A y'a fɔ a ye ko: “Fɛɛn kelen b'i jɛn. Taa i bololafɛn bɛɛ feere k'a wari tilan faantanw cɛ. O kɔ, na tugu ne kɔ. Ala bɛna nafoloba d'i ma sini.” O kuma ye cɛɛ nyaa sisi. A dusu kasinin taara, bari nafoloba tun b'a fɛ. Kalandenw tun ye Yezu lamini. A y'u filɛ k'a fɔ u ye ko: “Nafolotigiw donko ka gwɛlɛ Ala ka mara kɔnɔ dɛ!” O kuma ye kalandenw kabakoya. Yezu ye kuma ta tugu k'a fɔ u ye ko: “N balimaw, minw jigi bɛ nafolo kan, olu donko ka gwɛlɛ Ala ka mara kɔnɔ dɛ! Nyɔgɔmɛ donko ka nɔgɔ miseli woo fɛ ka tɛmɛ nafolotigi donko kan Ala ka mara kɔnɔ.” Kalandenw kabakoyara tugu ka dama tɛmɛ fɔɔ u tun b'a fɔra nyɔgɔn ye ko: “Pati! O tuma na, jon le bɛ se ka kisi?” Yezu y'u filɛ k'a fɔ ko: “Mɔgɔw tɛ se k'u yɛrɛ kisi, nga Ala bɛ se k'u kisi, bari Ala bɛ se fɛɛn bɛɛ la.” Piyɛri y'a fɔ Yezu ye ko: “A filɛ, an jɛnna an bololafɛn bɛɛ kɔ ka tugu i kɔ.” Yezu y'a jaabi ko: “Tinyɛ na, ne b'a fɔ aw ye ko ni mɔgɔ o mɔgɔ jɛnna a ka dugu kɔ, walima a dɔgɔw, walima a kɔrɔw, walima a faa, walima a baa, walima a deenw, walima a ka forow, ne ni kibaru diman kɔsɔn, siga t'a la, o tigi bɛna olu bɛɛ nyɔgɔn kɛmɛ kɛmɛ sɔrɔ dinyɛ nin na. A bɛna duguw sɔrɔ, ka dɔgɔ ni kɔrɔw sɔrɔ, ka baaw sɔrɔ, ka deenw sɔrɔ, ka forow sɔrɔ. A bɛna tɔɔrɔ fana sɔrɔ, nga a bɛna sini hɛrɛ sɔrɔ. Nyamɔgɔ caaman bɛna kɛ kɔmɔgɔw ye, kɔmɔgɔw bɛna kɛ nyamɔgɔw ye.” Yezu n'a ka kalandenw tun bɛ sira kan ka taa Zeruzalɛmu. Yezu tun bɛ taamana u nyafɛ. Kalandenw hakili nyagaminin tun lo. Mɔgɔ minw tun b'u nɔɔ fɛ, siranya tun bɛ olu la. Yezu taara n'a ka kalanden tan ni fila ye u danna tuguni. Koo min bɛn'a sɔrɔ, a y'a fɔ u ye. A y'a fɔ ko: “Ayiwa, an bɛ taara Zeruzalɛmu. O yɔrɔ la, u bɛna Mɔgɔ Dencɛ don sarakalasebagaw ni sariya karamɔgɔw bolo. U bɛn'a fɔ ko a ka kan ni saya ye, k'a don siya wɛrɛw bolo. U bɛna yɛlɛ a ma, k'u daji tu a kan, k'a bugɔ ni busan ye, k'a faga, nga tile saba a faganin kɔ, a bɛna kunun.” O kɔ, Zebede ka dencɛ fila, Zaki ni Zan, gwɛrɛla Yezu la k'a fɔ a ye ko: “Karamɔgɔ, an bɛna fɛɛn min nyini i fɛ, an b'a fɛ i k'o kɛ an ye.” Yezu y'u nyininga ko: “Aw b'a fɛ ne ka mun kɛ aw ye?” U y'a jaabi ko: “I bɛna sigi masaya la ni nɔɔrɔ ye tuma min na, i ka sɔn an kelen ka sigi i kinibolo fɛ, kelen ka sigi i numanbolo fɛ.” Yezu y'a fɔ u ye ko: “Aw bɛ fɛɛn min fɛ, aw t'o lɔn. Tɔɔrɔ ni sɛgɛn min bɛna ne sɔrɔ, aw bɛ se k'o nyɔgɔn munyu wa?” U y'a jaabi ko: “An bɛna se.” Yezu y'a fɔ u ye ko: “Tɔɔrɔ ni sɛgɛn min bɛna ne sɔrɔ, o nyɔgɔn bɛna aw fana sɔrɔ, nga, mɔgɔ min ka kan ka sigi ne kinibolo fɛ walima ne numanbolo fɛ, ne t'o latigɛbaga ye. Ala y'o yɔrɔw labɛn mɔgɔ minw ye, u maranin bɛ olu ye.” Kalanden tɔ nunu y'o mɛn minkɛ, u dimina Zaki ni Zan kɔrɔ. O tuma na, Yezu y'u bɛɛ wele k'a fɔ u ye ko: “Aw b'a lɔn ko dinyɛ kɔnɔ, jamana kuntigiw b'u ka jamana mɔgɔw tɔɔrɔ, mɔgɔbabaw bɛ fanga yira tɔw la. A man kan ka kɛ ten aw cɛma. Ni mɔgɔ min b'a fɛ ka kɛ kuntigi ye aw cɛma, o ka kan ka kɛ aw ka baaraden ye. Ni mɔgɔ min b'a fɛ ka kɛ nyamɔgɔ ye aw cɛma, o ka kan ka kɛ aw bɛɛ ka jɔɔn ye, bari Mɔgɔ Dencɛ ma na ko mɔgɔw ka baara kɛ a ye, nga a nana ka mɔgɔw mako nya, ani k'a yɛrɛ nii di ka kɛ mɔgɔ bɛɛ nii kunmabɔ sara ye.” Yezu n'a ka kalandenw ni jamaba sera Zeriko. U bɔtɔ o dugu kɔnɔ, Time dencɛ Baritime min kɛra finyɛntɔ ye, o siginin tun bɛ sira daa la ka dalili kɛ. A y'a mɛn ko Nazarɛti Yezu bɛ tɛmɛna minkɛ, a y'a daminɛ ka pɛrɛn ko: “Masacɛ Dawuda ka deen Yezu, makari ne la.” Mɔgɔ caaman sɔngɔra a kunna ko a ka je, nga a pɛrɛnna ka tɛmɛ fɔlɔta kan ko: “Dawuda ka deen, makari ne la.” Yezu lɔra k'a fɔ ko: “Aw k'a wele n ye.” O la, u ye finyɛntɔ wele k'a fɔ a ye ko: “I hakili sigi. Wili, a ko i ka na.” A y'a ka duloki fili ka pan ka lɔ. A taamana ka taa Yezu fɛ. Yezu y'a nyininga ko: “I b'a fɛ ne ka mun kɛ i ye?” A y'a jaabi ko: “Karamɔgɔ, ne ka yeli kɛ tuguni.” Yezu y'a fɔ a ye ko: “Taa. I kɛnɛyara bari i lara ne la.” O yɔrɔnin kelen, a nyaa yɛlɛla, a tugura Yezu nɔɔ fɛ. Yezu n'a nɔfɛmɔgɔw surunyana Bɛtifaze ni Betani na. U yɔrɔ tun man jan Zeruzalɛmu na tugu. U tun bɛ Olivuyirikulu gɛrɛfɛ. K'u to yen, Yezu y'a ka kalandenw fila ci. A y'a fɔ u ye ko: “Dugu min bɛ aw nyafɛ, aw ye taa yen. Aw dontɔ, aw bɛna faliden dɔ sirinin ye, mɔgɔ si ma deli ka yɛlɛ a kan fɔlɔ. Aw k'a foni ka na n'a ye. Ni mɔgɔ dɔ ye aw nyininga ko mun na aw b'a foni, aw k'o tigi jaabi ko aw ka Matigi mako b'a la, ko yan ni dɔɔni, ko a bɛna mɔgɔ bila ka segi n'a ye.” O la, u taara faliden nin sirinin sɔrɔ boon dɔ daa la sira gɛrɛfɛ. U y'a daminɛ k'a foni. Mɔgɔ minw tun b'o yɔrɔ la, u dɔw y'u nyininga ko: “Aw bɛ mun kɛra? Mun na aw bɛ faliden nin foni?” Kalandenw y'u jaabi i n'a fɔ Yezu tun y'a fɔ u ye cogo min na. O mɔgɔw sɔnna k'u ka taa ni faliden ye. U taara ni faliden ye Yezu fɛ. U y'u ka faniw la a kɔɔ kan. Yezu yɛlɛla a kan. Mɔgɔ caaman y'u ka faniw la sira kan, dɔw fana ye furaburuw tigɛ waga kɔnɔ k'u lala sira kan. Mɔgɔ minw tun bɛ Yezu nyafɛ ani minw tun b'a kɔfɛ, olu tun bɛ pɛrɛn ko: “An bɛ Ala tando. Mɔgɔ min natɔ ye Matigi tɔgɔ la, Ala ka barika don o la! An faa Dawuda ka masaya nyɔgɔn min bɛna sigi, Ala ka barika don o la. An bɛ Ala tando.” Yezu sera Zeruzalɛmu minkɛ, a taara don Alabatosoba kɔnɔ ka fɛɛn bɛɛ filɛ. O kɔ, tilekun tun bɛ nyini ka don minkɛ, a n'a ka kalanden tan ni fila bɔra ka taa Betani. O dugusagwɛ, Yezu n'a ka kalandenw bɔtɔ Betani, kɔngɔ y'a minɛ. K'a to yɔrɔjan, a ye torosun dɔ ye, furaburu tun b'a la. A taar'a filɛ yala n'a bɛna deen sɔrɔ a la. Nga a gwɛrɛla a la tuma min na, a ma foyi ye a la furaburu kɔ, bari toro denwaati tun tɛ. O tuma na, Yezu ye torosun danga ko: “Mɔgɔ si tɛna i deen dumu tugu abada.” A ka kalandenw y'o kuma mɛn. Yezu n'a ka kalandenw sera Zeruzalɛmu tuma min na, a donna Alabatosoba kɔnɔ. Jagokɛla ni sannikɛla minw tun bɛ yen, a y'a daminɛ k'olu gwɛn, ka warifalenbagaw ka tabaliw ni tubanifeerelaw ka sigilanw nyɔnti k'u benben. A ma sɔn tugu mɔgɔ si ka tɛmɛ Alabatosoba luu kɔnɔ ni feerefɛn ye. O kɔ, a ye mɔgɔw kalan ko: “A fɔra Ala ka kuma na ko: ‘Ne ka soo bɛna kɛ siyaw bɛɛ ka dalili kɛyɔrɔ ye.’ Nga aw kɔni y'a kɛ soonw ka yɔrɔ ye.” Sarakalasebagaw ni sariya karamɔgɔw y'o mɛn tuma min na, u y'a daminɛ ka fɛɛrɛ nyini Yezu fagako la. U siranna Yezu nya, bari a ka kalan tun diyara mɔgɔ caaman ye. Tilekun donnin kɔ, Yezu n'a ka kalandenw bɔra dugu kɔnɔ. O dugusagwɛ sɔgɔma, Yezu n'a ka kalandenw tɛmɛtɔ torosun danganin yɔrɔ la, u y'o torosun nin ye. A jara fɔɔ ka se a liliw ma. Yezu tun ye kuma min fɔ, Piyɛri hakili jigira o la minkɛ, a y'a fɔ Yezu ye ko: “Karamɔgɔ, a filɛ, i tun ye torosun min danga, a jara.” Yezu y'a fɔ u ye ko: “Aw ye la Ala la. Tinyɛ na, ne b'a fɔ aw ye ko ni mɔgɔ dɔ y'a fɔ kulu nin ye ko: ‘Wili ka bɔ yan ka taa ben kɔgɔji la,’ n'o tigi ma sigasiga a dusukun na, n'a lara a la ko a ye min fɔ, k'o bɛna kɛ, o bɛna kɛ a ye. O le y'a to, ne b'a fɔ aw ye ko aw mana fɛɛn o fɛɛn dali Ala fɛ, aw ka la a la ko aw bɛna o fɛɛn sɔrɔ, aw bɛn'a sɔrɔ. K'aw lɔnin to Ala dalili la, n'o y'a sɔrɔ dɔ ye aw hakɛ ta, aw ka yafa o ma janko aw Faa min bɛ sankolo la, o k'aw ka hakɛw yafa fana. [ Nga n'aw ma yafa tɔw ma, aw Faa min bɛ sankolo la, o tɛna aw ka hakɛw yafa fana.]” Yezu n'a ka kalandenw segira Zeruzalɛmu tuguni. Ka Yezu to yaalayaala la Alabatosoba kɔnɔ, sarakalasebagaw ni sariya karamɔgɔw ani cɛkɔrɔbaw taar'a sɛgɛrɛ. U y'a nyininga ko: “Jon le ye sira d'i ma ka koo nunu kɛ? Jon y'o kɛ see d'i ma?” Yezu y'u jaabi ko: “Ne bɛna aw nyininga koo kelen dɔrɔn na. N'aw ye ne jaabi, o tuma na, min ye sira di ne ma ka koo nunu kɛ, ne bɛna o fɔ aw ye. Jon le ye Zan ci ko a ka mɔgɔw batize, Ala lo wa, walima mɔgɔw lo? Aw ka ne jaabi.” O tuma na, u y'u ka miiriya fɔ nyɔgɔn ye ko: “N'an y'a jaabi ko Ala lo, a bɛna an nyininga ko mun na an ma la a la? N'an y'a fɔ ko mɔgɔw lo fana, haya!” (U tun bɛ siran jama nya, bari mɔgɔ bɛɛ tun bɛ Zan jati kira tigitigi ye.) O la, u ye Yezu jaabi ko: “An t'a lɔn.” Yezu y'a fɔ u ye ko: “Ayiwa, n'o lo, mɔgɔ min ye sira di ne ma ka koo nunu kɛ, ne fana tɛna o fɔ aw ye.” O kɔ, Yezu y'a daminɛ ka talen la Zuwifuw ka nyamɔgɔw ye ko: “Cɛɛ dɔ ye foro bɔ ka ɛrɛzɛnyiriw tutu yen. A ye kogo lɔ k'a koori, ka dingɛ sogi ka ɛrɛzɛn nin jii bɔyɔrɔ dilan, ka sangaso lɔ a kɔlɔsibagaw ye. A y'a don baarakɛla dɔw bolo. O kɔ, a taara jamana wɛrɛ la. Ɛrɛzɛn mɔna tuma min na, a y'a ka jɔɔn dɔ ci baarakɛla nunu fɛ ko a ka taa ale niyɔrɔ minɛ. U y'o jɔɔn nin minɛ k'a bugɔ k'a bolo lakolon bila ka segi. Forotigi ye jɔɔn wɛrɛ ci u fɛ. U y'o fana bugɔ a kuun na k'a nɛni. Forotigi ye jɔɔn wɛrɛ bila ka taa, u y'o faga. O kɔ, a ye jɔɔn caaman ci u fɛ tugu, u ye dɔw bugɔ ka dɔw faga. Mɔgɔ kelen min tora forotigi fɛ sisan, o y'a dencɛ ye. A tun b'o kanu kosɛbɛ. A y'o fana ci u fɛ a laban na. A tun y'a fɔ a yɛrɛ kɔnɔ ko: ‘U bɛna ale bonya bari n dencɛ lo.’ Nga baarakɛlaw y'a fɔ nyɔgɔn ye ko: ‘Nin le ye cɛntala ye, aw ka na an k'a faga, a faa cɛɛn bɛna kɛ an ta ye.’ U y'a minɛ k'a faga k'a suu fili waga kɔnɔ. “Forotigi bɛna mun kɛ sa? A bɛna segi ka taa o baarakɛlaw faga ka baarakɛla dɔ wɛrɛw ta k'u bila foro kɔnɔ. Siga t'a la, aw ye yɔrɔ dɔ kalan Ala ka kuma na min b'a fɔ ko: ‘Bonlɔlaw tun banna kabakuru min na, o nana kɛ boon nɔnkɔn lɔ kabakuru ye. Matigi le y'o kɛ. O ye kabako ye an nyana.’ ” Zuwifuw ka nyamɔgɔw y'a faamu ko Yezu ka talen nin nyaa sinna olu yɛrɛ ma. U tun b'a fɛ ka Yezu minɛ, nga u tun bɛ siran jama nya minkɛ, u taara k'a to yen. Zuwifuw ka nyamɔgɔw ye Farizinyɛ dɔw ni Erɔdi kɔmɔgɔ dɔw ci Yezu fɛ, janko u ka se k'a minɛ a yɛrɛ dalakuma fɛ. U taar'a fɔ a ye ko: “Karamɔgɔ, an y'a lɔn ko i bɛ tinyɛ fɔ, ko i tɛ siran mɔgɔ si nya fana, bari i tɛ mɔgɔ bɔ mɔgɔ la. I bɛ mɔgɔw kalan Ala sira la ni kuma minw ye, o bɛɛ ye tinyɛ ye. An b'i nyininga yala n'a daganin bɛ an ka nisɔngɔ sara Ɔrɔmu masacɛ ye. An ka kan k'a sara wa, walima an man kan k'a sara?” Yezu y'a lɔn ko koo wɛrɛw b'u kɔnɔ. O la, a y'a fɔ u ye ko: “Mun na aw bɛ ne darabɔ? Aw ka na ni deniye wari dɔ ye, n b'a filɛ.” U ye wari deniye dɔ yira a la. A y'u nyininga ko: “Jon jaa n'a tɔgɔ ye nin ye a kan?” U y'a jaabi ko: “Ɔrɔmu masacɛ ta lo.” O tuma na, Yezu y'a fɔ u ye ko: “Fɛɛn min ye masacɛ ta ye, aw k'o di masacɛ ma, ka Ala ta di Ala ma.” O kuma nin y'u kabakoya kosɛbɛ. Sadusenyɛw le tun b'a fɔ ko suuw tɛna kunun. U dɔw taara Yezu fɛ k'a fɔ a ye ko: “Karamɔgɔ, Musa ye sariya min sigi an Zuwifuw ye, o filɛ nin ye: A ko ni cɛɛ dɔ sara k'a ka muso to k'a sɔrɔ a muso ma deen sɔrɔ, a dɔgɔcɛ ka kan k'o muso nin ta, janko ka deen sɔrɔ muso nin ma ka kɛ a kɔrɔcɛ sii ye. Ayiwa, dencɛ wolonwula tun bɛ cɛɛ dɔ fɛ. Kɔrɔcɛman ye muso furu. A sara k'a muso to yen n'a ma deen sɔrɔ. Filanan y'o muso kelen nin ta. O fana sara ka to a ma deen sɔrɔ ni muso nin ye. A sabanan fana kɛra ten. U wolonwula la, mɔgɔ si ma deen sɔrɔ ni muso nin ye. U bɛɛ sanin kɔ, muso fana sara. Suuw bɛna kunun loon min na, n'o mɔgɔw kununna, muso nin bɛna kɛ u jumɛn ta ye, bari u mɔgɔ wolonwula bɛɛ y'a furu ka ye.” Yezu y'u jaabi ko: “Aw m'a lɔn ko aw filila wa? Aw filila, bari aw tɛ Ala ka kuma faamu, aw tɛ Ala ka sebagaya lɔn fana. N'o tɛ, suuw bɛna kunun waati min na, furu tɛna kɛ. Mɔgɔw bɛɛ bɛna kɛ i n'a fɔ mɛlɛkɛw sankolo la. Aw b'a fɛ k'a lɔn ni suuw bɛna kunun. Taadi? Tasuma tun wilila tufitini min na, Musa y'o koo sɛbɛn a ka kitabu yɔrɔ dɔ la, aw m'o yɔrɔ kalan wa? A sɛbɛnnin b'o yɔrɔ la ko Ala y'a fɔ Musa ye ko: ‘Ne ye Ibrayima ni Isiyaka ani Yakuba ka Ala ye.’ O mɔgɔ minw tun sara ka kɔrɔ, n'a fɔra ko Ala ye olu ka Ala ye, o b'a yira k'o mɔgɔw bɛ nii na, bari Ala tɛ suuw ka Ala ye. Aw filila kojugu bari aw ko suuw tɛna kunun.” Sariya karamɔgɔ dɔ tun y'a tulo malɔ Yezu ni Sadusenyɛw ka kuma na. A y'a ye ko Yezu y'u jaabi ka nya minkɛ, a gwɛrɛla Yezu la k'a nyininga ko: “Ala ka sariya jumɛn koo ka gwɛlɛ a ma ka tɛmɛ tɔw bɛɛ kan?” Yezu y'a jaabi ko: “Sariya min koo ka gwɛlɛ Ala ma ka tɛmɛ tɔw bɛɛ kan, o filɛ nin ye: ‘Isirayɛlidenw, aw ka mɛnni kɛ. Matigi an ka Ala ye Matigi kelenpe le ye. I k'i Matigi Ala kanu i dusu la, i kɔnɔ na, i hakili la n'i barika bɛɛ ye.’ Min bɛ tugu o la, o filɛ nin ye: ‘I k'i mɔgɔnyɔgɔn kanu i n'a fɔ i b'i yɛrɛ kanu cogo min na.’ Sariya wɛrɛ si koo man gwɛlɛ Ala ma ka olu fila bɔ.” Sariya karamɔgɔ nin y'a fɔ Yezu ye ko: “Cɔ! Karamɔgɔ, i ye tinyɛ fɔ. Ala kelenpe le bɛ yen, dɔ wɛrɛ si tɛ yen n'ale tɛ. Ka Ala kanu i dusu la, i hakili la n'i barika bɛɛ ye, ani k'i mɔgɔnyɔgɔn kanu i n'a fɔ i b'i yɛrɛ kanu cogo min na, o ka fisa ni saraka sifa bɛɛ ye, saraka jɛnitaw fara jɛnibaliw kan.” Yezu y'a ye ko a kumana ni hakilitigiya ye minkɛ, a y'a fɔ a ye ko: “Fɛɛn bɛrɛ m'i jɛn ka don Ala ka masaya yɔrɔ la.” O kɔ, mɔgɔ si m'a jaa gwɛlɛya ka Yezu nyininga foyi la tugu. Ka Yezu to mɔgɔw kalan na Alabatosoba kɔnɔ, a y'u nyininga ko: “Sariya karamɔgɔw bɛ se k'a fɔ cogo di ko Ala bɛna mɔgɔ min woloma k'a ci, k'o ye Dawuda ka deen dama ye? Dawuda yɛrɛ y'a fɔ Nii Senuman barika la ko: ‘Matigi Ala y'a fɔ ne Matigi ye ko: Sigi ne kinibolo fɛ fɔɔ ne k'i juguw cɔnkɔn i seen kɔrɔ.’ Dawuda yɛrɛ b'a wele ko ale Matigi, a do bɛ se ka kɛ Dawuda ka deen dama ye cogo di?” Jamaba tun b'a lamɛnna ni nisɔndiya ye. Ka Yezu to mɔgɔw kalan na, a y'a fɔ u ye ko: “Aw k'aw yɛrɛ kɔlɔsi sariya karamɔgɔw la. A ka d'u ye ka forocaw don ka yaala. U b'a fɛ mɔgɔw k'u bonya ni foli ye jama yɔrɔ la. A ka d'u ye fana ka sigi nyafɛ, mɔgɔbaw ka sigiyɔrɔ la, Alabatosow kɔnɔ ani jama dumuni kɛyɔrɔw la. Olu le bɛ firiyamusow bololafɛn bɛɛ bɔsi. O kɔ, u bɛ mɛn Ala dali la janko mɔgɔw k'u filɛ mɔgɔnyumanw ye. Olu ka jalaki tɔɔrɔ bɛna juguya ka tɛmɛ tɔw ta kan.” Wari tun bɛ don kɛsu min na Alabatosoba kɔnɔ, Yezu sigira k'a nyaa sin o ma. A tun bɛ mɔgɔw ka wari doncogo filɛ. Nafolotigi caaman ye wari caaman don o kɛsu kɔnɔ. Firiyamuso dɛsɛbagatɔ dɔ nana ka warimisɛn deen fila don yen. O wari hakɛ tun tɛ tɛmɛ tama kelen nyɔgɔn kan. O tuma na, Yezu ye muso nin yira kalandenw na k'a fɔ u ye ko: “Tinyɛ na, ne b'a fɔ aw ye ko firiyamuso dɛsɛbagatɔ nin ye wari min don kɛsu kɔnɔ, o ka ca ni mɔgɔ tɔw bɛɛ ta ye. Mɔgɔ tɔw ye dɔɔni dɔrɔn bɔ u ka nafolo la k'a di, nga ale kɔni n'a ka faantanya bɛɛ, a y'a cɛɛn bɛɛ di. A ma foyi to a kun ka kɛ dumuni sɔngɔ ye k'a sɔrɔ dumunifɛn si t'a fɛ.” Yezu bɔtɔ Alabatosoba kɔnɔ, a ka kalandenw kelen y'a fɔ a ye ko: “Karamɔgɔ, soba nin lɔcogo filɛ ni kabakurubabaw ye dɛ!” Yezu y'a fɔ a ye ko: “I nyaa bɛ sobaba nunu na kɛ? Kabakuru si tɛna to a tɔnyɔgɔn kan, u bɛɛ bɛna ben.” Yezu taara sigi Olivuyirikulu kan k'a nyaa sin Alabatosoba ma. K'a to yen, Piyɛri ni Zaki ni Zan ani Andere taar'a nyininga u danna ko: “Koo nunu bɛna kɛ tuma jumɛn? Mun ni mun bɛna kɛ fɔlɔ k'a yira k'o koow kɛ tuma sera?” Yezu ye kuma ta k'a fɔ u ye ko: “Aw k'aw yɛrɛw kɔlɔsi janko mɔgɔ si kana aw lafili. Mɔgɔ caaman bɛna na ne tɔgɔ la u yɛrɛ kan k'a fɔ ko ye Ala ka mɔgɔwolomanin nin ye. U bɛna mɔgɔ caaman lafili. N'aw ye yɔrɔjan kɛlɛw kibaru mɛn, ka yɔrɔsurun taw mankan mɛn tuma min na, aw hakili kana nyagami. Wajibi lo o koow ka kɛ, nga o tɛna kɛ a laban ye fɔlɔ. Siya dɔ bɛna wili siya dɔ wɛrɛ kama. Jamana dɔ bɛna wili jamana dɔ wɛrɛ kama. Dugukolo bɛna yɛrɛyɛrɛ yɔrɔ caaman na, kɔngɔ fana bɛna don. Olu bɛna kɛ tɔɔrɔ daminɛ ye fɔlɔ. “Aw k'aw yɛrɛw kɔlɔsi, sabu, u bɛna aw don kititigɛlaw bolo. U bɛna aw bugɔ Alabatosow kɔnɔ. U bɛna taa n'aw ye jamanatigiw ni masacɛw fɛ ne kɔsɔn. O bɛna kɛ sababu ye aw bɛ ne koo fɔ u ye. Sanni laban tuma ka se, wajibi lo kibaru diman ka fɔ siyaw bɛɛ ye fɔlɔ. N'u y'aw minɛ ka taa aw don kititigɛlaw bolo tuma o tuma, aw kɔnɔ kana gwan ko aw bɛna mun fɔ. Kuma min bɛna bila aw hakili la o waati yɛrɛ la, aw k'o fɔ. Bari aw tɛna kuma aw yɛrɛw ma, nga aw bɛna kuma Nii Senuman barika la. Faa kelen deenw bɛna kɛ sababu ye u b'u dɔ faga. Faaw bɛna o nyɔgɔn kɛ u deenw na. Deenw bɛna kɛ sababu ye u b'u wolobagaw faga. Mɔgɔ bɛɛ bɛna aw kɔniya ne kɔsɔn, nga mɔgɔ min bɛna o koow munyu fɔɔ a laban na, o tigi bɛna kisi. “Fɛnjugu cɛnnikɛla man kan ka to yɔrɔ min na, aw bɛna o siginin ye o yɔrɔ la. (Mɔgɔ min bɛ nin kalan, o ka kan k'a faamu dɛ!) O tuma na, kuluw bɛ yɔrɔ min na, Zude mara mɔgɔw ka boli ka taa yen. N'o y'a sɔrɔ mɔgɔ min bɛ boon kunna, n'o tigi jigira, a kana don soo kɔnɔ k'a bololafɛn dɔ ta. Ni min bɛ foro la, o kana segi soo ka ta'a ka nɛnɛ duloki ta. O waati la, muso kɔnɔmanw, ani minw ka deen bɛ siin min, olu bɛna tɔɔrɔ kosɛbɛ. Aw ka Ala dali k'o boli kana kɛ saminya tuma na, bari o loon tɔɔrɔ bɛna bonya kojugu. O tɔɔrɔ nyɔgɔn ma sɔrɔ fɔlɔ kabini Ala ye dinyɛ dan fɔɔ ka na se bii ma. O bɔnyɔgɔnko tɔɔrɔ tɛna mɔgɔw sɔrɔ tugu abada. Ni Matigi tun m'a latigɛ ko a bɛna dɔ bɔ o tɔɔrɔ waati la, mɔgɔ si tun tɛna se ka kisi. Nga, a ye mɔgɔ minw woloma k'u kɛ a yɛrɛ taw ye, olu kɔsɔn a bɛna dɔ bɔ a la. “Ni mɔgɔ dɔ y'a fɔ aw ye o tuma na ko: ‘A filɛ, Ala ka Mɔgɔ wolomanin nin bɛ yan’, walima n'a ko: ‘A bɛ yen fɛ’, aw kana la a la. Mɔgɔ dɔw bɛna galon tigɛ ko olu ye Ala ka Mɔgɔ wolomanin nin ye. Dɔw fana bɛna galon tigɛ ko olu ye kira ye. U bɛna kabakow kɛ ka mɔgɔw lafili n'o ye. Ala ye mɔgɔ minw woloma k'u kɛ a yɛrɛ taw ye, n'u tun bɛ se, u tun bɛna olu fana lafili. O la, aw k'aw yɛrɛw kɔlɔsi dɛ! Koo minw bɛna kɛ, ne y'o bɛɛ fɔ aw ye ka ban. “Tɔɔrɔba waati tɛmɛnin kɔ, tile bɛna fin, kalo tɛna yeelen bɔ tugu. Lolow bɛna bɔ sankolo la ka ben, sankolo bɛna yɛrɛyɛrɛ. O tuma na, mɔgɔw bɛna Mɔgɔ Dencɛ natɔ ye sankabaw cɛma ni sebagaya ni nɔɔrɔ ye. A ye mɔgɔ minw woloma k'u kɛ a yɛrɛ taw ye, a bɛna mɛlɛkɛw ci dinyɛ faan naani bɛɛ la ka taa olu lajɛn, k'a daminɛ sankolo ni dugukolo daan na kɔrɔn fɛ, fɔɔ ka ta'a bila sankolo ni dugukolo daan na tileben fɛ. “Mɔgɔw bɛ fɛɛn min lɔn torosun fɛ, o filɛ nin ye: N'a bolow nugura ka ban tuma min na, aw b'a lɔn ko saminya surunyana. O cogo kelen na, n'aw y'a ye o koow bɛ kɛ tuma min na, aw k'a lɔn ko Mɔgɔ Dencɛ natuma sera ka ban, a bɛ sira la. Tinyɛ na, ne b'a fɔ aw ye ko bii mɔgɔw bɛɛ tɛna sa ka ban ni koo nunu bɛɛ ma kɛ. Sankolo ni dugukolo bɛna wili ka bɔ u nɔɔ na, nga ne ka kuma tɛna bɔ a nɔɔ na abada. “Mɔgɔ si tɛ ne nalon n'a waati lɔn, hali mɛlɛkɛw t'a loon lɔn. Ne min ye Ala Dencɛ ye, ne yɛrɛ fana t'a lɔn fɔɔ n Faa Ala kelenpe. Aw k'aw yɛrɛw kɔlɔsi, aw kana nyina, bari aw t'a waati lɔn. Ayiwa, a bɛna kɛ i n'a fɔ cɛɛ dɔ ta. A taara taama na. Sanni a ka taa, a y'a ka soo kalifa a ka jɔɔnw ma, ka baara di u bɛɛ kelen kelen ma. A y'a fɔ soda kɔlɔsibaga ye ko a ka to ka daa kɔlɔsi ka nya. O la, aw ye to aw nyana, bari sotigi bɛna segi ka na wulafɛ wa, walima dugutilama wa, walima dondo kasituma wa, walima sɔgɔma wa, aw t'o lɔn. Aw ye to aw nyana janko a kana na bari aw la k'aw sɔrɔ sinɔgɔ la. Ne bɛ min fɔra aw ye, mɔgɔ bɛɛ seen b'a la: Aw ye to aw nyana.” A tun tora tile fila Hɔrɔnya nyanagwɛ ni Buru funubali nyanagwɛ ka se. O y'a sɔrɔ sarakalasebagaw ni sariya karamɔgɔw tun bɛna se ka Yezu minɛ dogo la cogo min na k'a faga, u tun b'o cogo le nyinina. U tun b'a fɔra k'u man kan k'a minɛ nyanagwɛ tuma na, ko n'o tɛ, mɔgɔw bɛna muruti. Ka Yezu to dumuni na kunatɔ Simɔn ka soo kɔnɔ Betani, muso dɔ donna ni daga cɛnyumannin dɔ ye. O daga nin tun dilannin bɛ ni kabakuru dɔ ye min bɛ wele alabatiri. A fanin tun bɛ tulu kasadiman dɔ la min sɔngɔ ka gwɛlɛ kosɛbɛ. A y'o dayɛlɛ ka tulu nin kɛ Yezu kuun na. Mɔgɔ minw tun bɛ yen, olu dɔw dimina k'a fɔ nyɔgɔn ye ko: “Mun na a ye tulu kasadiman nin cɛn ten? O tun bɛ se ka feere ka wari deniye kɛmɛ saba nyɔgɔn sɔrɔ k'o tilan faantanw cɛ.” U dimina muso nin kɔrɔ kosɛbɛ k'a kɔrɔfɔ. Nga Yezu y'a fɔ u ye ko: “Aw k'a to yen. Mun na aw b'a dusu kasi? A ye konyuman le kɛ ne ye ten. Aw bɛna to ni faantanw ye tuma bɛɛ. N'aw b'a fɛ ka konyuman kɛ u ye tuma o tuma, aw bɛ se k'a kɛ u ye. Nga ne tɛna to n'aw ye tuma bɛɛ. A y'a seko le kɛ. A kɔnna ka ne fari kasa diya ni tulu nin ye sanni ne ka sa u ka ne suu don. Tinyɛ na, ne b'a fɔ aw ye ko kibaru diman mana fɔ dinyɛ yɔrɔ o yɔrɔ, muso nin ye min kɛ, a tɔgɔ bɛna fɔ u hakili bɛ jigi a koo la.” Zuda Isikariyɔti, n'o tun ye kalanden tan ni fila dɔ ye, o taar'a fɔ sarakalasebagaw ye ko ale b'a fɛ ka Yezu don u bolo. A ka kuma diyara u ye kosɛbɛ. U bɛnna a la k'u bɛna wari hakɛ dɔ d'a ma. Zuda bɛna cogonyuman min sɔrɔ ka Yezu don u bolo, a y'a daminɛ k'o nyini. Buru funubali nyanagwɛ loon fɔlɔ, sagaden tun bɛ faga loon min na ka kɛ Hɔrɔnya nyanagwɛ saraka ye, Yezu ka kalandenw y'a nyininga ko: “I b'a fɛ an ka taa Hɔrɔnya nyanagwɛ dumuni labɛn i ye yɔrɔ jumɛn?” O la, Yezu y'a ka kalandenw fila ci. A y'a fɔ u ye ko: “Aw ye taa Zeruzalɛmu. Aw ni cɛɛ dɔ bɛna nyɔgɔn kunbɛn, duun fanin bɛ jii la a kuun na, aw ye tugu a nɔɔ fɛ. O cɛɛ bɛna taa don luu min kɔnɔ, aw k'a fɔ o lutigi ye ko karamɔgɔ ko a n'a ka kalandenw bɛna Hɔrɔnya nyanagwɛ dumuni kɛ boon min kɔnɔ, k'o bɛ min? A bɛna bonba dɔ yira aw la sangaso la min labɛnnin lo. An mako bɛna se fɛɛn minw ma, o bɛɛ b'a kɔnɔ. Aw ka Hɔrɔnya nyanagwɛ dumuni labɛn an ye o yɔrɔ la.” O kalanden nunu taara ka don Zeruzalɛmu. Yezu tun y'a fɔ u ye cogo min na, a kɛra ten fana. U ye Hɔrɔnya nyanagwɛ dumuni labɛn yen. Tilekun donnin kɔ, Yezu n'a ka kalanden tan ni fila taara don o boon kɔnɔ. K'u siginin to dumuni na, Yezu y'a fɔ u ye ko: “Tinyɛ na, ne b'a fɔ aw ye ko aw minw bɛ dumuni kɛra ni ne ye, aw dɔ bɛna ne don mɔgɔw bolo.” Kalandenw dusu kasira. U y'a nyininga kelen kelen ko: “Ne lo wa?” A y'u jaabi ko: “Aw mɔgɔ tan ni fila nunu dɔ lo. A tigi b'a bolo donna minan kelen kɔnɔ ni ne ye. Mɔgɔ Dencɛ bɛna sa i n'a fɔ a fɔra Ala ka kuma na a koo la cogo min na, nga min bɛn'a don mɔgɔw bolo, bɔnɛ bɛna o tigi sɔrɔ. N'o tigi tun ma wolo yɛrɛ, o tun ka fisa a ma.” Ka Yezu n'a ka kalandenw to dumuni na, a ye buru ta ka barika la Ala ye. O kɔ, a y'a tilantilan k'a di a ka kalandenw ma, k'a fɔ u ye ko: “Aw k'a minɛ, nin ye ne fari ye.” O kɔ, a ye duvɛn ta ka barika la Ala ye, k'a d'u ma. U bɛɛ ye dɔ min. A y'a fɔ u ye ko: “Nin ye ne joli ye, joli min bɛ Ala ka layidu dafa, o min bɛna bɔn mɔgɔ bɛɛ ka kojugu yafa kɔsɔn. Tinyɛ na, ne b'a fɔ aw ye ko ne tɛna duvɛn min tugu, fɔɔ ne ka se Ala ka masaya yɔrɔ la ka sɔrɔ k'a min cogo wɛrɛ la.” U ye Ala tando ni dɔnkiliw ye ka ban tuma min na, u bɔra ka taa Olivuyirikulu kan. Yezu y'a fɔ a ka kalandenw ye ko: “Aw bɛɛ bɛna boli ka ne to, bari a fɔra Ala ka kuma na ko: ‘Ne Ala bɛna sagadɛndɛbaga bugɔ ka faga, sagaw bɛna boli ka jɛnsɛn.’ ” Yezu taara nya ni kuma ye k'a fɔ ko: “Ni ne kununna n sanin kɔ tuma min na, ne bɛna bila aw nya Galile mara la.” Piyɛri y'a fɔ a ye ko: “Hali ni tɔw bɛɛ bolila k'i to, ne kɔni tɛna o kɛ fewu.” Yezu y'a fɔ a ye ko: “Tinyɛ na, ne b'a fɔ i ye ko bii suu nin na yɛrɛ, sanni dondo ka kasi sinyɛ fila, i bɛn'a fɔ sinyɛ saba ko i tɛ ne lɔn.” Nga, Piyɛri y'a daa gwɛlɛya k'a fɔ Yezu ye ko: “Hali n'an fila ka kan ka faga nyɔgɔn fɛ, ne tɛn'a fɔ ko n t'i lɔn abada.” Tɔw bɛɛ fana y'a fɔ ten. Yezu n'a ka kalandenw taara dugu banakɔ yɔrɔ dɔ la min tɔgɔ ko Zɛtisemane. A y'a fɔ a ka kalandenw ye ko: “Aw ka sigi yan, ne bɛ taa Ala dali ka na.” A taara nyafɛ dɔɔni ni Piyɛri ni Zaki ani Zan ye. A hakili daminɛna ka nyagami. Siranya y'a minɛ. A y'a fɔ u ye ko: “Dusukasi bɛna n faga. Aw ye to yan yɔrɔ la, aw kana sinɔgɔ.” A taara nyafɛ dɔɔni k'a kunbiri gwan ka Ala dali k'o waati tɔɔrɔ kana ale sɔrɔ n'a ma kɛ wajibi ye. A ko: “Ne Faa, i bɛ se fɛɛn bɛɛ la. I ka ne kisi tɔɔrɔ nin ma. O n'a ta bɛɛ, ne sago kana kɛ, fɔɔ e sago.” O kɔ, a segira ka na kalanden saba nunu fɛ ka u sɔrɔ sinɔgɔ la. A y'a fɔ Piyɛri ye ko: “Simɔn, i bɛ sinɔgɔ wa? I ma se ka to nyaa na ka hali waati dɔɔni yɛrɛ kɛ wa? Aw ye to nyaa na ka Ala dali janko ni Sutana y'aw nigɛ, a kana se aw kɔrɔ. Konyuman kɛ miiriya bɛ mɔgɔw kɔnɔ, nga a kɛ see t'u ye.” A bɔra u kɔrɔ tugu ka taa Ala dali fɔlɔta cogo la. O kɔ, a segira u fɛ tugu ka taa u sɔrɔ sinɔgɔ la, bari sinɔgɔ tun b'u la kojugu. U kununna, u m'a lɔn u bɛna kuma min fɔ Yezu ye. A sinyɛ sabanan, Yezu segira u fɛ tuma min na, a y'a fɔ u ye ko: “Aw bɛ sinɔgɔra halibi wa? Aw bɛ lafinyɛna kɛ! A banna. Waati sera. A filɛ, u bɛna Mɔgɔ Dencɛ don kojugukɛlaw bolo sisan sisan. Aw ye wili, min bɛ ne don u bolo, o natɔ filɛ, an ka ta'a kunbɛn.” Ka Yezu to kuma na, Zuda min tun y'a ka kalanden tan ni fila dɔ ye, ale sera o yɔrɔnin bɛ ni jama ye. Murujan ni berew tun b'u bolo. Sarakalasebagaw ni sariya karamɔgɔw ani cɛkɔrɔbaw le tun y'u ci. Yezu janfabaga Zuda tun y'a fɔ jama ye ko: “Ne bɛna cɛɛ min fo ka n bolo meleke a kaan na, o le ye Yezu ye. Aw k'a minɛ ka taa n'a ye. Aw taatɔ, aw b'a kɔlɔsi ka nya.” Zuda sera dɔrɔn, a sinna Yezu ma k'a fɔ a ye ko: “Karamɔgɔ!” O kɔ, a y'a bolo meleke Yezu kaan na. O tuma na, mɔgɔ nunu tonna Yezu kan k'a minɛ. Yezu ka kalanden dɔ y'a ka murujan bɔ ka sarakalasebagaw kuntigiba ka baaraden tulo caron. Yezu ye kuma ta k'a fɔ jama ye ko: “Aw nana ni murujanw ni berew ye aw bolo ka ne minɛ, i n'a fɔ ne ye benkannikɛla ye. Ne tun b'aw cɛma loon o loon Alabatosoba kɔnɔ ka mɔgɔw kalan, aw do ma ne minɛ. Nga a kɛra ten janko min fɔra ne koo la Ala ka kuma na, o ka kɛ.” O waati la, kalandenw bɛɛ bolila ka Yezu to yen. Kanbelen dɔ tun bɛ Yezu nɔɔ fɛ, a tun ye birifani dɔrɔn meleke a yɛrɛ la. Mɔgɔ dɔw bɔra jama cɛma k'a minɛ. Nga, a y'a yɛrɛ fosi ka birifani to u bolo ka boli ka tunu n'a fari lakolon ye. Mɔgɔ minw tun ye Yezu minɛ, u taara n'a ye sarakalasebagaw kuntigiba ka soo. Sarakalasebagaw ni cɛkɔrɔbaw ani sariya karamɔgɔw bɛɛ taara lajɛn yen. Piyɛri tun tugura Yezu ni jama nɔɔ fɛ ka furancɛba to u ni nyɔgɔn cɛ, fɔɔ ka taa don sarakalasebagaw kuntigiba ka luu kɔnɔ. A sigira ni Alabatosoba kɔlɔsibagaw ye tasuma gɛrɛfɛ k'a fari ja. O y'a sɔrɔ, sarakalasebagaw ni Zuwifuw ka kititigɛlaw bɛɛ tun bɛ Yezu jalakiyɔrɔ nyinina janko ka se k'a faga. Nga u ma jalakiyɔrɔ sɔrɔ a la. Mɔgɔ caaman ye galon tigɛ ka la a kan, nga, u kaan ma kɛ kelen ye. Dɔw wilila ka galon tigɛ ka la a kan ko: “An y'a mɛn a daa la ko mɔgɔw ye nin Alabatosoba min lɔ, ko ale bɛna o ci ka dɔ wɛrɛ lɔ tile saba kɔnɔ, ko mɔgɔw tɛna o lɔ.” Nga, hali o kuma nin faan fɛ, u kaan ma kɛ kelen ye. O tuma na, sarakalasebagaw kuntigiba wilila ka taa lɔ jama cɛma ka Yezu nyininga ko: “Mɔgɔ nunu bɛ kuma min fɔra i koo la, i tɛ foyi fɔ o la wa?” Nga Yezu y'a daje, a ma foyi fɔ. Sarakalasebagaw kuntigiba y'a nyininga tugu ko: “Ele lo ye Ala ka Mɔgɔ wolomanin nin ye wa? Ala Dencɛ?” Yezu y'a jaabi ko: “Ɔnhɔn. Ne y'o ye. Aw bɛna Mɔgɔ Dencɛ siginin ye Setigi Ala kinibolo fɛ. O kɔ, aw bɛn'a natɔ ye fana sankabaw cɛma ka bɔ sankolo la.” Yezu y'o fɔ dɔrɔn, sarakalasebagaw kuntigiba dimina, fɔɔ a y'a yɛrɛ kannaduloki minɛ k'a faran k'a fɔ ko: “An mako tɛ mɔgɔ la tugu k'a jalaki. Aw ye Ala tɔgɔcɛn kuma mɛn a daa la kɛ! Aw bɛ mun miiri?” U bɛɛ y'a fɔ ko a ka kan ka faga. Dɔw y'a daminɛ k'u daji tu Yezu kan. U y'a nyaa siri ka sɔrɔ k'a bugɔ ni bolokuruw ye k'a nyininga ko: “Jon y'i bugɔ?” O kɔ, Alabatosoba kɔlɔsibagaw y'a minɛ k'a tulo fata, k'a fata. Ka Piyɛri to luu kɛnɛ la duguma, muso dɔ sera. O muso nin tun bɛ baara kɛ sarakalasebagaw kuntigiba fɛ. A ye Piyɛri ye n'a b'a fari jara tasuma na. A ye Piyɛri nyada filɛ ka nya k'a fɔ a ye ko: “I fana tun bɛ ni Nazarɛti Yezu ye.” Piyɛri y'a sɔsɔ. A ko: “N t'a lɔn. Ne m'i ka kuma faamu.” Piyɛri bɔra ka taa lɔ luu daa la. Dondo kasira. O kɔ, o muso kelen nin ye Piyɛri ye tugu k'a fɔ o yɔrɔ mɔgɔw ye ko: “Cɛɛ nin ye u dɔ ye.” Piyɛri y'a sɔsɔ tugu. Waati dɔɔni o kɔ, o yɔrɔ mɔgɔw y'a fɔ Piyɛri ye tugu ko: “Siga t'a la, i ye u dɔ ye, bari i fana ye Galileka ye.” O tuma na, Piyɛri kalila ko: “Ni ne ye galon tigɛ aw ye, Ala kana n to. Aw bɛ kuma cɛɛ min koo la, ne t'o lɔn.” O yɔrɔnin kelen, dondo kasira a sinyɛ filanan. Yezu tun y'a fɔ Piyɛri ye ko: “Sanni dondo ka kasi sinyɛ fila, i bɛn'a fɔ sinyɛ saba ko i tɛ ne lɔn.” Piyɛri hakili jigira o kuma na. A y'a daminɛ ka kasi. Sɔgɔma joona, sanni tile ka bɔ, sarakalasebagaw ni sariya karamɔgɔw ni cɛkɔrɔbaw ani Zuwifuw ka kititigɛlaw bɛɛ ye nyɔgɔn ye Yezu ka koo la. U y'a bolow siri ka ta'a don Pilati bolo. Pilati y'a nyininga ko: “I ye Zuwifuw ka masacɛ ye wa?” Yezu y'a jaabi ko: “Ɔnhɔn, i yɛrɛ y'a fɔ ka ban.” Sarakalasebagaw y'a jalaki kosɛbɛ. Pilati y'a nyininga tugu ko: “I tɛ foyi fɔ wa? U y'a fɔ ko i ye kojugu minw kɛ, i m'o mɛn wa?” Nga Yezu ma foyi fɔ tugu. O ye Pilati kabakoya. Saan o saan Hɔrɔnya nyanagwɛ tuma na, Pilati tun bɛ kasoden dɔ bila ka kɛnyɛ ni jama ka lanyini ye. O y'a sɔrɔ cɛɛ dɔ tun bɛ yen min tɔgɔ ko Barabasi. O tun bɛ kaso la n'a murutinyɔgɔnw ye o waati la, bari olu tun murutira Ɔrɔmu faamaw ma tuma min na, u tun ye mɔgɔ dɔ faga. Jama taara Pilati fɛ k'a dali ko: “I bɛ to ka koo min kɛ an ye saan o saan Hɔrɔnya nyanagwɛ tuma na, o kɛ an ye.” Pilati y'u nyininga ko: “Aw b'a fɛ ne ka Zuwifuw ka masacɛ le bila wa?” Pilati tun y'a lɔn ko nyagoya le y'a to sarakalasebagaw ye Yezu don ale bolo. Nga sarakalasebagaw ye jama kɔnɔnasu k'u ka Pilati dali ko a ka Barabasi bila. Pilati y'u nyininga tugu ko: “O tuma na, aw bɛ min wele Zuwifuw ka masacɛ, aw b'a fɛ ne ka mun kɛ o la?” U pɛrɛnna ko: “A gwengwen lɔgɔ kan.” Pilati y'u nyininga tugu ko: “Mun na? A ye kojugu jumɛn kɛ?” U pɛrɛnna ka tɛmɛ fɔlɔta kan ko: “A gwengwen lɔgɔ kan.” Pilati tun b'a fɛ ka jama sago kɛ minkɛ, a ye Barabasi bila. A ye mɔgɔ bila ka Yezu bugɔ ni golokami ye, ka sɔrɔ k'a don sɔlidasiw bolo k'u ka ta'a gwengwen lɔgɔ kan. Sɔlidasiw taara ni Yezu ye Zude mara kuntigi ka luu kɔnɔ. U ye sɔlidasi tɔw bɛɛ wele k'u lajɛn yen. U ye duloki wuleman don a kaan na. U ye masafugulan dan ni; nɔni ye k'a don a kuun na. O kɔ, u y'a daminɛ ka Yezu fo ko: “I dansɛ, Zuwifuw ka masacɛ.” U tora k'a bugɔ a kuun na ni bere ye, k'u daji tu a kan, ani k'u kunbiri gwan a kɔrɔ i n'a fɔ u b'a bonya. U yɛlɛla a ma ka ban tuma min na, u ye duloki wuleman nin bɔ a kaan na, k'a yɛrɛ ka duloki ta k'a don a la. U bɔra ka taa n'a ye a gwengwenyɔrɔ la. Sɔlidasiw taatɔ Yezu gwengwenyɔrɔ la, u ye cɛɛ dɔ tɛmɛtɔ ye ka bɔ kongo la. O cɛɛ tun ye Sirɛnika ye, a tɔgɔ ko Simɔn. Alɛkisandiri ni Urufusi facɛ tun lo. Sɔlidasiw y'a karaba ka Yezu gwengwenlɔgɔ ta. U taara ni Yezu ye yɔrɔ dɔ la u bɛ min wele u ka kaan na ko Gɔligota, o kɔrɔ ko kungolo yɔrɔ. U ye fura dɔ nyagami duvɛn na k'u b'a d'a ma a k'a min, nga a banna. O kɔ, u y'a gwengwen lɔgɔ kan. U ye kala bon janko u bɛna Yezu ka faniw tilantilan nyɔgɔn cɛ cogo min na, u k'o lɔn. U ye faniw tilantilan nyɔgɔn cɛ ka kanya n'o ye. U y'a gwengwen lɔgɔ kan tuma min na, o y'a sɔrɔ tilekun bɔra a bɛ lɛrɛ saba bɔ. U y'a gwengwen kuun min na, u y'o sɛbɛn walaka dɔ kan ko: “Zuwifuw ka masacɛ.” U ye benkannikɛla fila gwengwen lɔgɔ dɔw kan Yezu gɛrɛfɛ. Kelen tun b'a kinibolo fɛ, kelen tun b'a numanbolo fɛ. [ O cogo la, min sɛbɛnnin bɛ Ala ka kuma na ko: “U y'a jati kojugukɛlaw dɔ ye”, o kɛra.] Mɔgɔ minw tun bɛ tɛmɛna, u tun b'u kuun karikari ka Yezu nɛni ko: “Anhaan! E min bɛ se ka Alabatosoba ci k'a lɔ kura ye tile saba kɔnɔ, jigi ka bɔ gwengwenlɔgɔ kan k'i yɛrɛ kisi.” O cogo kelen na, sarakalasebagaw ni sariya karamɔgɔw tun bɛ yɛlɛ Yezu ma n'u b'a fɔ nyɔgɔn ye ko: “A ye mɔgɔ wɛrɛw kisi, nga a tɛ se k'a yɛrɛ kisi. N'a ye Ala ka Mɔgɔ wolomanin nin ye, Isirayɛli ka masacɛ, a ka jigi ka bɔ gwengwenlɔgɔ kan sisan. N'an ye o ye, an bɛna la a la.” U tun ye mɔgɔ minw gwengwen lɔgɔ kan Yezu gɛrɛfɛ, olu fana tun b'a nɛnina. Tilegwangwan fɛ, dibi donna yɔrɔ bɛɛ ka taa se tile sumawaati ma. Tile sumana tuma min na, Yezu pɛrɛnna u ka kaan na ko: “Eloyi, Eloyi, lamasabakitani?” O kɔrɔ ko: “Ne ka Ala, ne ka Ala, mun na i bɔra ne kɔ?” Mɔgɔ minw tun bɛ yen, u dɔw y'o pɛrɛnkan mɛn minkɛ, u y'a fɔ ko: “Aw k'aw tulo malɔ. A bɛ kira Eli welela.” U dɔ bolila ka taa fuu ta, k'a don kumuji la, k'a bila bere jamanjan dɔ kunna, ko a b'a di Yezu ma a k'a min. O cɛɛ nin y'a fɔ ko: “Aw ye lɔ. An bɛn'a filɛ yala ni Eli bɛna na a bɔ gwengwenlɔgɔ nin na.” Yezu kulera ka sɔrɔ ka sa. O tuma na, Alabatosoba cɛtigɛfani faranna fila ye k'a daminɛ sanfɛ fɔɔ duguma. Sɔlidasi kɛmɛ kuntigi min tun lɔnin bɛ Yezu nyafɛ, o y'a ye ko a sara ten minkɛ, a y'a fɔ ko: “Siga t'a la, cɛɛ nin tun ye Ala Deen ye.” Muso dɔw fana lɔnin tun bɛ yɔrɔjan k'o koow filɛ. Magidala Mariyamu, Zaki fitini ni Zoze bamuso Mariyamu, ani Salome tun b'o musow cɛma. Yezu tun bɛ Galile mara la tuma min na, olu tun bɛ to ka tugu a kɔ k'a dɛmɛ. Muso caaman tun b'u cɛma fana minw tun taara ni Yezu ye Zeruzalɛmu. U tun ye Yezu faga loon min na, a dugusagwɛ tun bɛna kɛ lafinyɛlon ye. Wuladafɛ, Arimate Yusufu y'a jaa gwɛlɛya ka taa Pilati sɛgɛrɛ ka Yezu suu dali a fɛ janko lafinyɛlon ka koow kana nyagami. Yusufu tun ye mɔgɔba ye Zuwifuw ka kititigɛlaw cɛma. Ale fana tun bɛ Ala ka masaya waati kɔnɔna. Pilati y'a mɛn ko Yezu sara joona ten minkɛ, o y'a kabakoya. A ye sɔlidasi kuntigi wele k'a nyininga yala ni Yezu satuma mɛnna. A ye kunnafoni sɔrɔ ka bɔ sɔlidasi kuntigi fɛ tuma min na, a sɔnna Yusufu ka taa Yezu suu ta. Yusufu taara bagi san. O kɔ, a taara Yezu suu bɔ gwengwenlɔgɔ kan ka bagi nin meleke a la. U tun ye kaburu min sogi farakulu la, a y'a suu don o kɔnɔ. O kɔ, a ye kabakuru belebeleba dɔ kolonkolon ka kaburu datugu n'a ye. Magidala Mariyamu ani Zoze bamuso Mariyamu ye Yezu suu don yɔrɔ filɛ. Lafinyɛlon banna tuma min na, Magidala Mariyamu ni Zaki bamuso Mariyamu, ani Salome ye wusulan san k'u bɛna ta'a mɔ Yezu suu la. Lɔgɔkun loon fɔlɔ, u ye kaburu sira ta sɔgɔma, tilekun bɔtuma. U taatɔ, u tun bɛ nyɔgɔn nyininga ko: “Jon le bɛna kabakuru nin kolonkolon ka bɔ kaburu daa la an ye?” U surunyana kaburu la tuma min na, u y'u kuun kɔrɔ ta dɔɔni k'a ye ko dɔ tun ye kabakuru nin kolonkolon ka bɔ a daa la, k'a sɔrɔ kabakuru nin tun ka bon kosɛbɛ. U donna kaburu kɔnɔ ka kanbelen dɔ siginin ye u kinibolo fɛ ni foroca gwɛman ye a kaan na. U siranna kosɛbɛ. Kanbelen nin y'a fɔ u ye ko: “Aw kana siran. U tun ye Nazarɛti Yezu min gwengwen lɔgɔ kan, aw b'o le yɔrɔ nyinina. A tɛ yan. A kununna. A suu tun lara yɔrɔ min na, o filɛ nin ye. Aw ka ta'a fɔ kalandenw ye ani Piyɛri ye kɛrɛnkɛrɛnniya la ko Yezu bɛna bila u nya Galile mara la, k'u bɛn'a ye o mara la i n'a fɔ a tun y'a fɔ u ye cogo min na.” U yɛrɛyɛrɛla siranya bolo, u bɔra kaburu kɔnɔ ka boli. U ma foyi fɔ mɔgɔ si ye, bari u tun siranna. [ Lɔgɔkun loon fɔlɔ sɔgɔma joona, Yezu kununna a sanin kɔ. A tun ye jina wolonwula gwɛn ka bɔ Magidala Mariyamu min na, a y'a yɛrɛ yira o la fɔlɔ. Mariyamu taara o kibaru fɔ Yezu ka kalandenw ye. Olu nyaa sisinin tun bɛ kosɛbɛ, u tun bɛ kasira. Mariyamu y'a fɔ u ye tuma min na ko Yezu bɛ nii na, ko ale y'a ye, u ma la o kuma na. O kɔ, kalanden fila taatɔ dugudennin dɔ la, Yezu y'a yɛrɛ yira olu la cogo wɛrɛ la. Olu fana segira ka taa o fɔ tɔw ye. U ma la olu la fana. O kɔ, ka kalanden tan ni kelen to dumuni na, Yezu y'a yɛrɛ yira u la. A sɔngɔra u kunna k'u ma la ale ka kuma na, k'u tulo ka gwɛlɛ, bari mɔgɔ minw tun y'a fɔ u ye ko a kununna, k'olu y'a ye, u tun ma la olu ka kuma na. A tilara k'a fɔ u ye ko: “Aw ye taa dinyɛ yɔrɔ bɛɛ ka kibaru diman fɔ mɔgɔ bɛɛ ye. Ni mɔgɔ min lara a la ka batize, o tigi bɛna kisi, nga ni mɔgɔ min ma la a la, o tigi tɛna kisi. Mɔgɔ minw bɛna la a la, u bɛna olu lɔn taamasinyɛ minw fɛ, olu filɛ: U bɛna jinaw gwɛn ka bɔ mɔgɔw la ne tɔgɔ la, u bɛna kuma kaan wɛrɛw la. Hali n'u ye saa minɛ, hali n'u ye baga min, a tɛna foyi kɛ u la. N'u y'u bolo la banabagatɔ minw kan ka Ala dali u ye, olu bɛna kɛnɛya.” Matigi Yezu kumana kalandenw fɛ ka ban tuma min na, Ala y'a ta ka taa n'a ye sankolo la. A sigira Ala kinibolo fɛ. Kalandenw taara kibaru diman fɔ yɔrɔ bɛɛ. Matigi Yezu tun b'u fɛ u ka baara bɛɛ la. A ye see d'u ma ka kabakow kɛ k'a yira k'u ka waajuli kuma ye tinyɛ ye.] Koo minw kɛra an fɛ, mɔgɔ dɔw y'a daminɛ ka olu kibaru sɛbɛn. O koow kɛra minw nyana kabini u daminɛtuma, n'u nana kɛ Ala ka kuma fɔbagaw ye, olu y'o koow lakali an ye cogo min na, u sɛbɛnbagaw y'o sɛbɛn ka kɛnyɛ ni olu ka seereya ye. Ne fana ye sɛgɛsɛgɛli kɛ kosɛbɛ o koow bɛɛ la kabini u daminɛtuma, o le y'a to, ne miirila ko a ka nyi ne fana k'o koow sɛbɛn k'u tugutugu nyɔgɔn na e ye, kɔrɔ Tewofili, waasa i k'a lɔn ko u y'i kalan koo minw na, ko tinyɛ yɛrɛyɛrɛ lo. Zude mara masacɛ Erɔdi ka tile la, sarakalasebaga dɔ tun bɛ yen min tɔgɔ ko Zakari. Abiya tɔgɔ lara sarakalasebaga minw ka jɛnkulu la, olu dɔ tun lo. A muso buruju bɔra sarakalasebagaw kuntigi Arɔn na. A tɔgɔ tun ko Elizabɛti. U fila bɛɛ tilennin tun bɛ Ala nyakɔrɔ, u tun bɛ Matigi ka sariyaw bɛɛ labato a nyaa ma. Deen si tun t'u fɛ, bari Elizabɛti tun kɛra muso wolobali ye, ka fara o kan, u fila bɛɛ tun kɔrɔla. Loon dɔ, Zakari tun bɛ sarakalasebaga baara la n'a ka jɛnkulu mɔgɔw ye Alabatosoba kɔnɔ, bari u ka baara kɛ loon tun lo. Ka kɛnyɛ ni sarakalasebagaw ka landa ye, u tun bɛ to ka mɔgɔ kelen woloma, ale bɛ don Alabatosoba yɔrɔ senuman na ka wusulan jɛni, o wolomani kɛnyɛna Zakari ma. Ka Zakari to wusulan jɛni na, jama bɛɛ tun bɛ Ala dalili la Alabatosoba lukɛnɛ na. Matigi ka mɛlɛkɛ dɔ y'a yɛrɛ yira Zakari la, o mɛlɛkɛ lɔnin tun bɛ kinibolo nyafan fɛ wusulan jɛniyɔrɔ la. Zakari y'o ye tuma min na, a hakili nyagamina, a siranna kosɛbɛ. Nga mɛlɛkɛ y'a fɔ a ye ko: “Zakari, i kana siran, bari i ka dalili minɛna. I ka muso bɛna dencɛ wolo i ye, i k'a tɔgɔ la ko Zan. A woloko bɛna kɛ nisɔndiya dafanin ye i fɛ, ani mɔgɔ caaman nisɔn bɛna diya a koo la. A bɛna kɛ mɔgɔba ye Matigi nyakɔrɔ. A tɛna duvɛn, walima minnifɛn fariman si min. Nii Senuman bɛna to a fɛ kabini a wolotuma na. A bɛna kɛ sababu ye Isirayɛlidenw caaman bɛna segi ka sɔn u Matigi Ala ma. A bɛna taama Nii Senuman barika la Ala nyakɔrɔ ni sebagaya ye, o min nyɔgɔn tun dira kira Eli ma, waasa ka faaw ni u deenw kaan bɛn. A bɛna mɔgɔ murutininw hakili yɛlɛma k'a kɛ mɔgɔtilenninw hakili ye. A bɛna jama labɛn k'a bila Matigi ye.” Zakari ye mɛlɛkɛ nyininga ko: “Ne bɛ se ka la o la cogo di ko tinyɛ lo, bari ne ni n muso bɛɛ kɔrɔla.” Mɛlɛkɛ y'a jaabi ko: “Ne ye Gabiriyɛli ye. Ne le bɛ lɔ Ala nyakɔrɔ k'a ka ciiw lamɛn. A ye ne ci ka na nin kibaru diman nin fɔ i ye. Ayiwa, i bɛna kɛ bobo ye, fɔɔ ka taa se nin koow kɛwaati ma, bari i ma la ne ka kuma na, k'a sɔrɔ o koow bɛna kɛ n'u kɛlon sera.” O y'a sɔrɔ jama tun bɛ Zakari kɔnɔna. U tun kabakoyara, bari a mɛnna ka tɛmɛ Alabatosoba yɔrɔ senuman na. Nga Zakari nana bɔ tuma min na, a ma se ka kuma u fɛ. U y'a faamu ko a ye yelifɛn dɔ ye Alabatosoba yɔrɔ senuman kɔnɔ. A kumana u fɛ n'a bolo ye. A tora boboya la. Zakari ka baara kɛlonw dafara loon min na, a segira ka taa soo. O koow tɛmɛnin kɔ, Zakari muso ye kɔnɔ ta. Nga, a y'o kɔnɔ dogo fɔɔ kalo duuru. A tun b'a fɔ a yɛrɛ kɔnɔ ko: “Matigi ye koo min kɛ ne ye, a filɛ: A ye ne yɔrɔ filɛ sisan ka ne ka maloya koo bɔ n kuun na mɔgɔw bɛɛ nyana.” Elizabɛti kɔnɔ kalo wɔɔrɔnan na, Ala ye mɛlɛkɛ Gabiriyɛli ci Galile mara dugu dɔ la min tɔgɔ ko Nazarɛti. A y'a ci yen ka taa sunguru dɔ fɛ min tɔgɔ tun ko Mariyamu. A maminɛnin tun bɛ Yusufu fɛ, min buruju bɔra masacɛ Dawuda la. Mɛlɛkɛ sera Mariyamu fɛ k'a fɔ a ye ko: “I ni ce, i koo diyara Ala ye, Matigi Ala b'i fɛ.” O kuma nin ye Mariyamu hakili nyagami, a y'a yɛrɛ nyininga k'o foli sifa kɔrɔ ye mun ye. Mɛlɛkɛ y'a fɔ a ye ko: “Mariyamu, i kana siran, bari i koo diyara Ala ye. A filɛ, i bɛna kɔnɔ ta ka dencɛ wolo, i k'a tɔgɔ la ko Yezu. A bɛna kɛ mɔgɔba ye, a bɛna wele Setigi Ala Dencɛ. Matigi Ala bɛn'a kɛ masa ye i n'a fɔ a faa Dawuda. A bɛna sigi masaya la Isirayɛlidenw kunna fɔɔ tuma bɛɛ, a ka masaya tɛna ban abada.” Mariyamu ye mɛlɛkɛ nyininga ko: “Ne bɛna se ka kɔnɔ ta cogo di, k'a sɔrɔ ne ma cɛɛ lɔn fɔlɔ.” Mɛlɛkɛ y'a jaabi ko: “Nii Senuman bɛna jigi i kan, Setigi Ala bɛn'a ka setigiya yira i la. O kama, i bɛna Deen senuman min wolo, o bɛna wele Ala Dencɛ. A filɛ, i balimamuso Elizabɛti fana ye kɔnɔ ta a n'a ka kɔrɔya bɛɛ, a kalo wɔɔrɔnan ye nin ye. A bɛna dencɛ wolo, ale min tun bɛ jati muso wolobali ye. O bɛɛ bɛna kɛ bari Ala tɛ dɛsɛ foyi la.” O la, Mariyamu y'a fɔ a ye ko: “Ne ye Matigi ka jɔnmuso ye, i y'a fɔ cogo min na, Ala m'a kɛra ne ye ten.” O kɔ, mɛlɛkɛ bɔra a kɔrɔ ka taa. O tile fila nin na, Mariyamu wilila ka teliya ka taa dugu dɔ la Zude mara la, kuluw ka ca yɔrɔ min na. A taara don Zakari ka soo kɔnɔ ka Elizabɛti fo. Elizabɛti ye Mariyamu ka folikan mɛn tuma min na, deen lamagara a kɔnɔ. Nii Senuman barika la, Elizabɛti kabara k'a fɔ ko: “I ye nɛɛma sɔrɔ Ala fɛ ka tɛmɛ musow bɛɛ kan, ani deen min bɛ i kɔnɔ, o fana ye nɛɛma sɔrɔ. Ne ye jon ye fɔɔ ne Matigi bamuso yɛrɛ bɛ na bɔ ne fɛ? A filɛ, ne ye i ka folikan mɛn tuma min na, ne deen lamagara nisɔndiya fɛ ne kɔnɔ. I ye dubaden ye, bari mɛlɛkɛ ye Matigi ka kuma min fɔ i ye, i lara a la k'o bɛna kɛ.” O la, Mariyamu ko: “Ne bɛ Matigi bonya n dusukun na, ne nisɔn diyanin bɛ n Kisibaga Ala kɔsɔn, bari, a y'a hakili to a ka jɔnmuso majiginin na. Kabini sisan, mɔgɔw bɛn'a fɔ waati bɛɛ ko ne ye dubaden ye, bari Setigi ye kobaw kɛ ne ye, a tɔgɔ ka senu. Minw bɛ siran Ala nya k'a bonya, a bɛ makari olu la waati bɛɛ. A ye kabakow kɛ n'a bolo barikaman ye, a ye yɛrɛbonyalaw hakili nyagami. A ye fanga bɔsi faamaw na ka faantanw kɛ mɔgɔbaw ye. A ye fɛnnyuman caaman di kɔngɔtɔw ma ka fɛntigiw bolo lakolon bila ka taa. A nana ni dɛmɛ ye Isirayɛli jama ma, o min y'a ka jɔɔnw ye, k'a hakili to a ka nyumanya la Ibrayima n'a kɔmɔgɔw faan fɛ, i n'a fɔ a tun y'a daa di an faaw ma cogo min na.” Mariyamu tora Elizabɛti fɛ ka kalo saba nyɔgɔn kɛ, o kɔ, a segira ka taa soo. Elizabɛti jigi loon nana se, a ye dencɛ wolo. A siginyɔgɔnw n'a ka mɔgɔw y'a mɛn minkɛ ko Matigi y'a ka makari bonya a faan fɛ, u nisɔn diyara ka fara Elizabɛti kan. A tile seegi, deen kɛnɛkɛnɛlon sera. U nan'a kɛnɛkɛnɛ, u tun b'a fɛ k'a facɛ tɔgɔ la a la ko Zakari. Nga a bamuso y'a fɔ ko: “Ayi, a tɔgɔ bɛna la ko Zan.” U y'a jaabi ko: “I ka mɔgɔ si tɔgɔ tɛ ten.” U ye deen faa nyininga bobow ka kuma cogo la ko a b'a fɛ tɔgɔ jumɛn ka la a deen kan. Zakari ye walaka nyini u fɛ k'a sɛbɛn o kan ko: “A tɔgɔ ko Zan.” U bɛɛ kabakoyara. O yɔrɔnin bɛ, Zakari ka boboya banna, a y'a daminɛ ka kuma ka Ala tando. U ka mara mɔgɔw bɛɛ siranna, Zude mara kuluyɔrɔ bɛɛ mɔgɔw tun bɛ o koow lakali nyɔgɔn ye yen. Mɔgɔ minw mana o kibaru mɛn, u bɛɛ tun bɛ miiri a la k'u yɛrɛ nyininga ko: “O tuma na, deen nin bɛna kɛ mun le ye sa?” Tinyɛ na, Matigi Ala tun b'a fɛ. Nii Senuman barika la, deen facɛ Zakari ye kiraya kuma fɔ ko: “Tandoli ka kɛ Matigi ye, Isirayɛli ka Ala, bari a y'a janto a ka mɔgɔw la k'u hɔrɔnya. A ye kisibaga barikaman lawili an ye, a y'a bɔ a ka jɔncɛ Dawuda buruju la, i n'a fɔ a tun ye o kuma don a ka fɔlɔfɔlɔ kiraw daa la cogo min na ko a bɛna an kisi an juguw ma, k'an tila ka bɔ an kɔniyabagaw bɛɛ bolo. O cogo la, a makarila an faaw la, a y'a hakili to a ka layidu la. A tun ye layidu ta an Faa Ibrayima ye, tinyɛ na, ko a bɛna an tila an juguw la, waasa an jaa gwɛlɛyanin ka baara kɛ ale ye a ka an jati mɔgɔ senumanw ni mɔgɔtilenninw ye an sii bɛɛ la. E kɔni, ne deen, i bɛna wele Setigi Ala ka kira, bari i bɛna taama Matigi nyakɔrɔ k'a ka sira labɛn. I bɛna kisili sira yira a ka mɔgɔw la u ka kojuguw yafali seen fɛ, an ka Ala ka makari n'a ka nyumanya barika la. A bɛna kɛnɛ ci an ye ka bɔ sanfɛ i n'a fɔ tile bɔtɔ kɛnɛ, ka yeelen bɔ dibi la mɔgɔw ye, ni minw bɛ siran saya nya, ani k'an bila hɛrɛ sira kan.” Ayiwa, Zan tun bɛ kɔgɔra, n'a hakili bɛ bonya ka taa. A tora kongo kɔnɔ fɔɔ ka taa se a yɛrɛ yira loon ma Isirayɛlidenw na. O waati la, Ɔrɔmu masacɛ Ogusiti tun b'a fɛ k'a ka mɔgɔw daa lɔn. O la, a ye cii bila ko a ka jamana mɔgɔw bɛɛ tɔgɔ ka sɛbɛn. O tɔgɔsɛbɛn fɔlɔ kɛra ka Kiriniyusi sɔrɔ Siri mara kuun na. Mɔgɔw bɛɛ taara u ka dugu la waasa u tɔgɔ ka sɛbɛn yen. Yusufu fana bɔra Nazarɛti, Galile mara la, ka taa Zude mara dugu dɔ la min tɔgɔ ko Bɛtilehɛmu, n'o ye masacɛ Dawuda ka dugu ye, bari a buruju tun bɔra Dawuda la. A taara yen n'a maminɛmuso Mariyamu ye, waasa u tɔgɔ ka sɛbɛn yen. Mariyamu kɔnɔman tun lo. Ka u to Bɛtilehɛmu, Mariyamu jigi loon nana se. A jigira dencɛ la, o tun y'a deen fɔlɔ ye. A ye fani meleke a la k'a la kolokolo kɔnɔ, bari u tun ma yɔrɔ sɔrɔ lonanw jigiso kɔnɔ. Sagadɛndɛbaga dɔw tun bɛ o mara la, u tun bɛ si nyana kongo kɔnɔ k'u ka sagaw kɔlɔsi. Matigi ka mɛlɛkɛ dɔ y'a yɛrɛ yira u la. O yɔrɔnin bɛ, Matigi nɔɔrɔ manamanana ka u lamini. U siranna kosɛbɛ. Nga mɛlɛkɛ y'a fɔ u ye ko: “Aw kana siran, bari ne nana kibaru diman dɔ fɔ aw ye min bɛna aw ka jamana mɔgɔw bɛɛ nisɔn diya. A filɛ, bii suu nin na, Kisibaga wolola aw ye Dawuda ka dugu la, ale lo ye Ala ka Mɔgɔwolomanin nin ye, an Matigi lo. Aw bɛn'a lɔn taamasinyɛ min fɛ, o filɛ: Aw bɛna dennyɛnin dɔ lanin ye kolokolo dɔ kɔnɔ, fani melekenin b'a la.” O yɔrɔnin bɛ, mɛlɛkɛ caaman dɔ bɔra sankolo la ka na fara mɛlɛkɛ dɔ nin kan. U tun bɛ Ala tando ko: “Ala ka tando sanfɛ yɔrɔjan na, hɛrɛ ka to dugukolo kan a diyana mɔgɔw fɛ.” O mɛlɛkɛw segira ka taa sankolo la tuma min na, sagadɛndɛbagaw y'a fɔ nyɔgɔn ye ko: “An ka taa fɔɔ Bɛtilehɛmu, mɛlɛkɛ ye ko min kibaru fɔ an ye ka bɔ Matigi fɛ, an ka taa o filɛ.” U teliyara ka taa. U taara Mariyamu ni Yusufu ani dennyɛnin sɔrɔ yen. Dennyɛnin lanin tun bɛ kolokolo dɔ kɔnɔ. Dennyɛnin yenin kɔ, kuma min tun fɔra u ye o deen nin koo la, u y'o lakali. Minw bɛɛ ye sagadɛndɛbagaw ka kuma mɛn, u bɛɛ kabakoyara. Nga Mariyamu tun b'o koow bɛɛ mara a hakili la ka miiri u la. O kɔ, sagadɛndɛbagaw kɔsegitɔ u ka yɔrɔ la, u tun ye koo minw bɛɛ mɛn ka koo minw bɛɛ ye, u tun bɛ Ala bonya k'a tando o bɛɛ kɔsɔn, bari a bɛɛ kɛra i n'a fɔ a tun fɔra u ye cogo min na. Deen wolola, a tile seeginan, a kɛnɛkɛnɛlon sera minkɛ, a tɔgɔ lara ko Yezu i n'a fɔ mɛlɛkɛ tun y'a fɔ cogo min na sanni a baa k'a kɔnɔ ta. Saniyali min ka kan ka kɛ ka kɛnyɛ ni Musa ka sariya ye, o loon dafara minkɛ, Yusufu ni Mariyamu taara ni Yezu ye Zeruzalɛmu k'a kalifa Ala ma, bari a fɔra Matigi ka sariya la ko ni deen fɔlɔ min kɛra cɛɛ ye, k'o ka kan k'a kalifa Matigi ma, ani ka tubanin fila, walima jɛnɛtugan fila bɔ saraka ye i n'a fɔ Matigi y'a nyini cogo min na. O y'a sɔrɔ cɛɛ dɔ tun bɛ Zeruzalɛmu min tɔgɔ ko Simiyɔn. O cɛɛ tun ye mɔgɔnyuman ye, a tun bɛ Ala ka sariyaw bɛɛ labato. A tun bɛ Isirayɛli ka kunmabɔbaga nali kɔnɔna. Nii Senuman tun b'a fɛ. Nii Senuman tun y'a yira a la ko a tɛna sa n'a nyaa ma la Matigi ka Mɔgɔwolomanin kan. A ka sebagaya y'a to Simiyɔn taara Alabatosoba kɔnɔ. Yezu wolobagaw taara ni Yezu ye o yɔrɔ la waasa k'a kalifa Ala ma, ani k'o sarakaw bɔ ka kɛnyɛ ni sariya ye. Simiyɔn y'a ta a bolo la ka Ala tando k'a fɔ ko: “Matigi, i ye min fɔ, o kɛra. I bɛ se k'i ka kalifa minɛ ne la sisan, ne ka taa hɛrɛ la, bari i ye kisibaga min ci, ne nyaa lara o kan, i y'o min labɛn mɔgɔw bɛɛ ye. A bɛna yeelen bɔ dinyɛ mɔgɔw bɛɛ ye k'i yira u la. A bɛna bonya la an Isirayɛli deenw kan, an minw ye i ka mɔgɔw ye.” Simiyɔn ye kuma minw fɔ Yezu koo la, deen facɛ n'a bamuso kabakoyara olu la. Simiyɔn ye duba kɛ u ye. O kɔ, a y'a fɔ a bamuso Mariyamu ye ko: “A filɛ, deen nin bɛna kɛ sababu ye Ala bɛna Isirayɛliden caaman jalaki, ka sɔn caaman fana ma. A bɛna kɛ taamasinyɛ ye, mɔgɔw bɛna nyɔgɔn sɔsɔ min koo la. O cogo la, mɔgɔ caaman kɔnɔna koo bɛna bɔ kɛnɛ kan. E kɔni, i nii bɛna tɔɔrɔ i n'a fɔ u y'i sɔgɔ ni muru ye.” Muso dɔ fana tun bɛ Zeruzalɛmu, a tɔgɔ ko Anɛ, kira tun lo. A facɛ Fanuwɛli buruju bɔra Azɛri la. Anɛ tun kɔrɔla kosɛbɛ. A sunguruman furunin kɔ, saan wolonwula, a cɛɛ ye dinyɛ to. A tora firiya la fɔɔ a sii nana se saan bi seegi ni naani ma. Tuma o tuma a tun bɛ to ka taa Alabatosoba kɔnɔ. A tun bɛ suun don ka Ala dali tuma bɛɛ. O cogo la, a tun bɛ Ala bato suu ni tile. Yezu kalifatuma Ala ma, o waati yɛrɛ la Anɛ fana donna Alabatosoba kɔnɔ. A y'a daminɛ ka barika la Ala ye. Mɔgɔ minw tun bɛ Zeruzalɛmu kunmabɔbaga nali kɔnɔna, a ye Yezu koo fɔ olu bɛɛ ye. Yezu wolobagaw ye Matigi ka sariya labato ka ban tuma min na, u segira n'a ye Nazarɛti, Galile mara la, bari u siginin tun bɛ yen. Dɔ tora ka fara deen kundama n'a barika kan ka taa. Hakilitigi tun lo, a koo tun ka di Ala ye. Yezu wolobagaw tun bɛ to ka taa Hɔrɔnya nyanagwɛ la Zeruzalɛmu saan o saan. Yezu ye saan tan ni fila sɔrɔ saan min na, u bɛɛ taara nyɔgɔn fɛ Zeruzalɛmu ka kɛnyɛ ni nyanagwɛ ka landa ye. Nyanagwɛ banna loon min na, mɔgɔw ye soo siraw ta. Nga Yezu tora Zeruzalɛmu, a wolobagaw ma bɔ a kala ma. U tun y'a miiri ko Yezu bɛ u taamanyɔgɔnw fɛ sira kan. U ye tile kelen taama kɛ, u sɔrɔla k'a daminɛ k'a yaala u balimaw ni u lɔnbagaw cɛma. U ma Yezu ye yɔrɔ si fɔɔ u segira ka ta'a yaala Zeruzalɛmu. Tile saba, nyanagwɛ bannin kɔ, u taar'a sɔrɔ Alabatosoba kɔnɔ. A siginin tun bɛ sariya karamɔgɔw fɛ k'u lamɛn ani k'u nyininga koo dɔw la. A lamɛnbagaw bɛɛ kabakoyara a ka hakilitigiya n'a ka jaabili cogo la. A wolobagaw y'a ye tuma min na, u kabakoyara. A bamuso y'a nyininga ko: “Ne deen, mun y'a to i ye nin kɛ an na ten? A filɛ, ne n'i facɛ hakili nyagaminin tun b'i yɔrɔ nyinina.” A y'u jaabi ko: “Mun na aw tun bɛ ne yɔrɔ nyini? Aw tun m'a lɔn ko ne ka kan ka sɔrɔ n Faa ka soo kɔnɔ wa?” Nga a ye kuma min fɔ u ye, u m'o faamu. O kɔ, u segira ka taa nyɔgɔn fɛ ni Yezu ye Nazarɛti. A tun b'u bonya kosɛbɛ. A bamuso tun b'o koow bɛɛ mara a hakili la. Dɔ tora ka fara Yezu kundama n'a hakili kan. A koo diyara Ala ni mɔgɔw ye. Ɔrɔmu masacɛ Tibɛri ka masaya saan tan ni duurunan na, o y'a sɔrɔ Pɔnsi Pilati tun bɛ Zude mara kuun na, Erɔdi tun bɛ Galile mara kunna, a balimacɛ Filipi tun bɛ Iture ni Tarakoniti maraw kuun na, ani Lizaniyasi tun bɛ Abilɛni mara kuun na. O waati kelen na, Anɛ ni Kayifu tun ye sarakalasebagaw ye. O tuma na, Ala kumana Zakari dencɛ Zan fɛ k'a to kongo kɔnɔ. O la, Zan ye Zurudɛn baa dafɛ duguw bɛɛ yaala ka mɔgɔw waaju ko u ka nimisa ka faran u ka kojuguw la ka batize waasa Ala ka yafa u ma. O kɛra i n'a fɔ kira Ezayi tun y'a sɛbɛn a ka kitabu kɔnɔ cogo min na ko: “Mɔgɔ dɔ bɛ pɛrɛnna kongo kɔnɔ ko: ‘Aw ka Matigi ka sira labɛn, k'a tilen. Dingɛw bɛɛ bɛna fa, kuluw ni tintinw bɛɛ bɛna ci ka dakɛnyɛ. Tɛmɛyɔrɔ gɔngɔrɔninw bɛna tilen, sirajuguw bɛna dilan. Ala bɛ adamadenw kisi cogo min na, bɛɛ bɛna o ye.’ ” Jamaba min tun bɛ taa Zan fɛ ko a ka u batize, a tun b'a fɔ olu ye ko: “Aw fɔnfɔnnidenw, jon y'aw lasɔmi ko aw ka boli Ala ka kiti nata nya? O tuma na, yiri minw bɛ dennyuman kɛ, aw ka kɛ i n'a fɔ olu. Aw ka kɛwalinyumanw kɛ k'a yira ko aw nimisara ka faran aw ka kojuguw la. Aw kan'a fɔ aw yɛrɛ kɔnɔ ko Ala bɛna aw kisi bari Ibrayima ye aw faa ye. Ne b'a fɔ aw ye ko Ala bɛ se ka kabakuru nunu yɛlɛma k'u kɛ Ibrayima deenw ye. Jende labɛnna ka ban yiriw tigɛli kama. Yiri o yiri tɛ dennyuman kɛ, o bɛɛ bɛna tigɛ ka fili tasuma na.” Jama tun b'a nyininga ko: “O tuma na, an ka kan ka mun kɛ?” A tun b'u jaabi ko: “Ni duloki fila bɛ mɔgɔ min fɛ, duloki tɛ min fɛ, a ka kelen di o ma. Ni dumunifɛn bɛ mɔgɔ min fɛ, a k'o tilan ni kɔngɔtɔ ye.” Wusuruminɛla dɔw fana taara Zan fɛ ko a k'u batize. Olu y'a nyininga ko: “Karamɔgɔ, anw ka kan ka mun kɛ?” A y'u jaabi ko: “Wari hakɛ min fɔra aw ye, aw k'o dama minɛ, aw kana dɔ wɛrɛ minɛ ka fara o kan.” Sɔlidasi dɔw fana y'a nyininga ko: “Anw do, anw ka kan ka mun kɛ?” A y'u jaabi ko: “Aw kana mɔgɔ si ka wari minɛ ni fanga ye, aw kana mɔgɔ si tɔnyɔ fana, nga aw ka sara ka aw wasa.” Mɔgɔw tun b'u kisibaga nali makɔnɔna minkɛ, u bɛɛ tun b'u yɛrɛ nyiningana yala ni Zan le tɛ Ala ka Mɔgɔwolomanin nin ye fewu. O la, Zan y'a fɔ u bɛɛ ye ko: “Ne b'aw batize ni jii ye, nga min bɛna na ne kɔ, o ka sebagaya ka bon ni ne ta ye. K'a ka sanbara juru foni, ne kuun ka dɔgɔ o ma. Ale bɛna aw batize ni Nii Senuman ni tasuma ye. A ka sumanfiyɛminan b'a bolo. A bɛn'a ka suman gosinin fiyɛ k'a kisɛ don a ka bondo kɔnɔ k'a nyaga jɛni tasuma fagabali la.” Zan tun bɛ mɔgɔw ladi n'o kuma nyɔgɔn caaman ye. O cogo la, a tun bɛ kibaru diman fɔ mɔgɔw ye. Nga Zan ye Zude mara kuntigi Erɔdi kɔrɔfɔ, bari a tun y'a balimacɛ muso Erodiyadi bɔsi a la k'a kɛ a yɛrɛ ta ye, ani a tun ye kojugu wɛrɛw kɛ fana. A m'a dan olu ma, a ye Zan yɛrɛ minɛ k'a don kaso la. Zan ye mɔgɔw bɛɛ batize, ka Yezu fana batize. Ka Yezu to Ala dali la, sankolo dayɛlɛla, Nii Senuman y'a yɛrɛ kɛ i n'a fɔ jɛnɛtugan, ka jigi a kan. Kumakan dɔ bɔra sankolo la k'a fɔ ko: “I ye ne Dencɛ ye, ne le y'i Faa ye.” Yezu y'a ka baara daminɛ tuma min na, a sii tun bɛ saan bi saba nyɔgɔn bɔ. Mɔgɔw tun bɛ miiri ko Yezu ye Yusufu deen ye. Yusufu tun ye Eli ka deen ye. Eli tun ye Matati ka deen ye, Matati fana tun ye Levi ka deen ye, Levi fana tun ye Mɛliki ka deen ye, Mɛliki fana tun ye Zannayi ka deen ye, Zannayi fana tun ye Yusufu ka deen ye. Yusufu fana tun ye Matatiyasi ka deen ye, Matatiyasi fana tun ye Amɔsi ka deen ye, Amɔsi fana tun ye Nahumu ka deen ye, Nahumu fana tun ye Ɛsili ka deen ye, Ɛsili fana tun ye Nagayi ka deen ye. Nagayi fana tun ye Maati ka deen ye, Maati fana tun ye Matatiyasi ka deen ye, Matatiyasi fana tun ye Semeyini ka deen ye, Semeyini fana tun ye Zozɛki ka deen ye, Zozɛki fana tun ye Zoda ka deen ye. Zoda fana tun ye Zowanan ka deen ye, Zowanan fana tun ye Ereza ka deen ye, Ereza fana tun ye Zorobabɛli ka deen ye, Zorobabɛli fana tun ye Salatiyɛli ka deen ye, Salatiyɛli fana tun ye Neri ka deen ye. Neri fana tun ye Mɛliki ka deen ye, Mɛliki fana tun ye Adi ka deen ye, Adi fana tun ye Kozamu ka deen ye, Kozamu fana tun ye Ɛlimadan ka deen ye, Ɛlimadan fana tun ye Ɛri ka deen ye. Ɛri fana tun ye Zozuwe ka deen ye, Zozuwe fana tun ye Eliyezɛri ka deen ye, Eliyezɛri fana tun ye Zorimu ka deen ye, Zorimu fana tun ye Matati ka deen ye, Matati fana tun ye Levi ka deen ye. Levi fana tun ye Simiyɔn ka deen ye, Simiyɔn fana tun ye Zuda ka deen ye, Zuda fana tun ye Yusufu ka deen ye, Yusufu fana tun ye Zonamu ka deen ye, Zonamu fana tun ye Eliyakimu ka deen ye. Eliyakimu fana tun ye Meleya ka deen ye, Meleya fana tun ye Mɛnna ka deen ye, Mɛnna fana tun ye Matata ka deen ye, Matata fana tun ye Natan ka deen ye, Natan fana tun ye Dawuda ka deen ye. Dawuda fana tun ye Zese ka deen ye, Zese fana tun ye Zobɛdi ka deen ye, Zobɛdi fana tun ye Boozi ka deen ye, Boozi fana tun ye Sala ka deen ye, Sala fana tun ye Naasɔn ka deen ye. Naasɔn fana tun ye Aminadabu ka deen ye, Aminadabu fana tun ye Adimɛn ka deen ye, Adimɛn fana tun ye Aramu ka deen ye, Aramu fana tun ye Ɛsirɔn ka deen ye, Ɛsirɔn fana tun ye Perɛsi ka deen ye, Perɛsi fana tun ye Zuda ka deen ye. Zuda fana tun ye Yakuba ka deen ye, Yakuba fana tun ye Isiyaka ka deen ye, Isiyaka fana tun ye Ibrayima ka deen ye, Ibrayima fana tun ye Tera ka deen ye, Tera fana tun ye Nawɔri ka deen ye. Nawɔri fana tun ye Serugi ka deen ye, Serugi fana tun ye Arago ka deen ye, Arago fana tun ye Falɛki ka deen ye, Falɛki fana tun ye Ebɛri ka deen ye, Ebɛri fana tun ye Sala ka deen ye. Sala fana tun ye Kayinan ka deen ye, Kayinan fana tun ye Aripakisadi ka deen ye, Aripakisadi fana tun ye Sɛmu ka deen ye, Sɛmu fana tun ye Nuhun ka deen ye, Nuhun fana tun ye Lamɛki ka deen ye. Lamɛki fana tun ye Matusala ka deen ye, Matusala fana tun ye Enɔki ka deen ye, Enɔki fana tun ye Yerɛdi ka deen ye, Yerɛdi fana tun ye Maleleyɛli ka deen ye, Maleleyɛli fana tun ye Kayinan ka deen ye. Kayinan fana tun ye Enɔsi ka deen ye, Enɔsi fana tun ye Sɛti ka deen ye, Sɛti fana tun ye Adama ka deen ye, Adama fana tun ye Ala ka deen ye. Ala tun ye Adama dan. Nii Senuman tora Yezu fɛ. A bɔra Zurudɛn baa daa la ka taa kongo kɔnɔ. Nii Senuman tun b'a taayɔrɔ yira a la. Sutana y'a nigɛ yen ka dɛsɛ tile bi naani kɔnɔ. A ma dumuni si kɛ o tile bi naani kɔnɔ. O loonw tɛmɛnin kɔ, kɔngɔ y'a minɛ. O tuma na, Sutana y'a fɔ a ye ko: “N'i ye Ala Dencɛ ye, a fɔ ko kabakuru nin ka yɛlɛma ka kɛ buru ye.” Yezu y'a jaabi ko: “A fɔra Ala ka kuma na ko: ‘Dumunifɛn dɔrɔn tɛ se ka mɔgɔ balo.’ ” O kɔ, Sutana taara n'a ye kulu jamanjan dɔ kan ka jamanaw bɛɛ yira a la yɔrɔnin kelen na, k'a fɔ a ye ko: “Ne bɛna nin bɛɛ ka kuntigiya n'a ka nafolo d'i ma. Ni ne b'a fɛ k'a di mɔgɔ min na, ne b'a di o tigi ma, bari a bɛɛ ye ne ta ye. O la, ni e kɔni y'i kunbiri gwan ne kɔrɔ ka ne bato, a bɛɛ bɛna kɛ i ta ye.” Yezu y'a jaabi ko: “A fɔra Ala ka kuma na ko: ‘I k'i Matigi Ala bato, k'a kelenpe sago kɛ.’ ” A laban na, Sutana taara n'a ye Zeruzalɛmu Alabatosoba kuun na, k'a fɔ a ye ko: “N'i ye Ala Dencɛ ye, pan ka cun duguma, bari a fɔra Ala ka kuma na ko: ‘Ala bɛn'a fɔ a ka mɛlɛkɛw ye ko u k'i tanga kojugu ma.’ A fɔra yen fana ko: ‘U bɛna i ta u bolo la waasa i seen kana gosi kabakuru la.’ ” Yezu y'a jaabi ko: “A fɔra Ala ka kuma na fana ko: ‘I kana i Matigi Ala kɔrɔbɔ.’ ” Sutana y'a nigɛ cogo bɛɛ la ka dɛsɛ tuma min na, a taara k'a to yen fɔlɔ. Yezu segira ka taa Galile mara la ni Nii Senuman ka sebagaya ye. A tɔgɔ bɔra o mara yɔrɔ bɛɛ la. A tun bɛ mɔgɔw kalan Alabatosow kɔnɔ, mɔgɔw bɛɛ tun b'a bonya. Yezu taara Nazarɛti a mɔna o dugu min na. Lafinyɛlon, a donna Alabatoso kɔnɔ i n'a fɔ a tun bɛ to k'a kɛ cogo min na. A wilila waasa ka kitabu kalan. Kira Ezayi ye kitabu min sɛbɛn, o dira a ma. A y'o dayɛlɛ ka yɔrɔ dɔ kalan. A sɛbɛnnin b'o yɔrɔ la ko: “Matigi Ala Nii bɛ ne fɛ, bari a ye ne woloma ka kibaru diman fɔ faantanw ye. A ye ne ci ko n k'a fɔ jɔɔnw ye ko u bɛna hɔrɔnya, ko n k'a fɔ finyɛntɔw ye k'u nyaa bɛna yɛlɛ, ko n ka mɔgɔtɔɔrɔninw bɔ u juguw bolo k'u bila, Matigi bɛn'a ka nyumanya kɛ saan min na, ko n k'o koo fɔ mɔgɔw ye.” O kɔ, a ye kitabu datugu k'a di Alabatoso kɔlɔsibaga ma ka sigi. Mɔgɔ minw tun bɛ yen, u bɛɛ y'u nyaa basa Yezu la. O tuma na, a ye kuma ta k'a fɔ u ye ko: “Aw ye kitabu nin kɔnɔnakuma minw mɛn sisan, o koow kɛra ka dafa bii.” U bɛɛ tun b'a tɔgɔnyuman fɔ. Yezu ka kumanyuman ye u bɛɛ kabakoya, fɔɔ u tun b'a fɔ ko: “Nin tɛ Yusufu dencɛ ye wa?” Yezu y'a fɔ u ye ko: “Siga t'a la, aw bɛna talen nin la ne ye ko: ‘Furakɛla, i yɛrɛ kɛnɛya sa.’ Aw bɛna a fɔ ne ye fana ko: ‘I ye koo minw bɛɛ kɛ Kafaranamu, an y'o mɛn, i k'o nyɔgɔnw kɛ yan fana i yɛrɛ ka dugu la.’ “Tinyɛ na, ne b'a fɔ aw ye ko kira si tɛ bonya sɔrɔ a yɛrɛ ka dugu la.” O kɔ, a y'a fɔ u ye ko: “Ne b'a fɔ aw ye ko kira Eli ka tile la, sanji banna ka na saan saba ni tilan kɔnɔ, tuma min na kɔngɔba tun donna jamana yɔrɔ bɛɛ la. Firiyamuso caaman tun bɛ Isirayɛli jamana na, nga Ala ma kira Eli ci u si fɛ. A y'a ci firiyamuso dɔ fɛ Sarɛpita, Sidɔn mara la. Kunatɔ caaman tun bɛ Isirayɛli, kira Elize ka tile la fana, nga u si ma kɛnɛya, fɔɔ kunatɔ Naman, ka bɔ Siri jamana na.” Alabatoso kɔnɔ mɔgɔw y'o kuma nunu mɛn tuma min na, u dimina kosɛbɛ. U wilila ka Yezu minɛ ka bɔ n'a ye dugu kɔnɔ ni fanga ye. U ka dugu siginin tun bɛ kulu min gɛrɛn na, u taara n'a ye o kunna. U tun b'a fɛ k'a nyɔnti ka ben fɔɔ duguma. Nga Yezu kɔni tɛmɛna u furancɛ la ka taa. Yezu taara Galile mara dugu dɔ la, min tɔgɔ ko Kafaranamu. A tun bɛ mɔgɔw kalanna lafinyɛlon na yen. U kabakoyara a ka mɔgɔ kalan cogo la, bari a tun bɛ kuma i n'a fɔ fanga bɛ mɔgɔ min bolo. Cɛɛ jinatɔ dɔ tun bɛ u fɛ Alabatoso kɔnɔ. O cɛɛ nin pɛrɛnna kosɛbɛ ko: “E! Mun bɛ an ni e cɛ? Yezu ka bɔ Nazarɛti, i nana k'an halaki wa? I ye mɔgɔ min ye, ne b'o lɔn. I ye Ala ka ciden senuman ye.” Yezu jamana a kuun na k'a fɔ a ye ko: “I daje! Bɔ cɛɛ nin na.” Jina ye cɛɛ ta k'a ben duguma u cɛma ka bɔ a la. Nga foyi ma kɛ cɛɛ la. Mɔgɔ bɛɛ kabakoyara fɔɔ u tun bɛ nyɔgɔn nyininga ko: “Haan! Nin ye mun kuma ye? A bɛ kuma jinaw fɛ ni fanga ni setigiya ye. U bɛ bɔ mɔgɔw la fana.” O sababu fɛ, Yezu tɔgɔ bɔra o mara yɔrɔ bɛɛ la. Yezu bɔra Alabatoso kɔnɔ ka taa Simɔn ka soo. Simɔn biranmuso tɔɔrɔnin tun bɛ kosɛbɛ farigwan bolo. U ye Yezu dali ko a k'a kɛnɛya. Yezu taara biri a kunna k'a fɔ ko a ka kɛnɛya. Farigwan banna. A wilila o yɔrɔnin bɛ ka dumuni d'u ma. Tilekun donnin kɔ, mɔgɔw taara Yezu sɛgɛrɛ n'u ka banabagatɔw bɛɛ ye. A y'a bolo la u bɛɛ kelen kelen kan k'u kɛnɛya. Jinaw fana bɔra mɔgɔ caaman na. U bɔtɔ, u tun bɛ pɛrɛn ko: “I ye Ala Dencɛ ye.” Nga Yezu ye kangari la u ye. A tun tɛ sɔn u ka kuma, bari olu tun b'a lɔn ko Ala ka Mɔgɔwolomanin nin lo. Dugu gwɛra dɔrɔn, Yezu bɔra ka taa yɔrɔmalanin dɔ la. Jama y'a daminɛ k'a yɔrɔ nyini. U taar'a ye tuma min na, u y'a dali ko a ka to u kɔrɔ, ko a kana taa yɔrɔjan. Nga a y'a fɔ u ye ko: “Ne ka kan ka Ala ka masaya kibaru diman fɔ dugu tɔw la fana, bari ne cikun ye o le ye.” O la, a tun bɛ waajuli kɛ Alabatosow kɔnɔ Zude mara la. Loon dɔ la, ka Yezu to Zenezarɛti baa daa la, jama tun y'a lamini n'u bɛ nyɔgɔn nyɔntinyɔntira waasa ka Ala ka kuma lamɛn. A ye kurun fila ye bada la. Mɔnikɛlaw tun bɔra u kɔnɔ, u tun bɛ u ka jɔɔw kora. Yezu donna o kurun nunu kelen kɔnɔ min tun ye Simɔn ta ye. A y'a nyini Simɔn fɛ ko a ka taa ni kurun ye jii cɛmancɛ la dɔɔni. O kɔ, k'a siginin to kurun kɔnɔ, a y'a daminɛ tugu ka mɔgɔw kalan. A tilara kuma na tuma min na, a y'a fɔ Simɔn ye ko: “Jii ka dun yɔrɔ min na, taa ni kurun ye o yɔrɔ la. Aw k'aw ka jɔɔ fili yen.” Simɔn y'a jaabi ko: “Karamɔgɔ, an ye baara kɛ ka dugu gwɛ, an ma foyi sɔrɔ. Nga i ka kuma kɔsɔn, ne bɛna jɔɔ fili jii la.” O la, u ye jɔɔ fili. U ka jɔɔ ye jigɛ caaman minɛ fɔɔ jɔɔw daminɛna ka faranfaran. U y'u bolo kɛ ka u tɔnyɔgɔnw wele kurun dɔ nin kɔnɔ ko u ka na u dɛmɛ. Olu taara, u ye kurun fila nunu bɛɛ fa jigɛ la fɔɔ kurunw tun bɛ nyini ka jigi jii jukɔrɔ. Simɔn Piyɛri y'o ye minkɛ, a y'a kunbiri gwan Yezu kɔrɔ k'a fɔ ko: “Matigi, i kana gwɛrɛ n na, bari ne ye kojugukɛla ye.” A y'o fɔ bari a tun siranna. Ale ni minw tun bɛ nyɔgɔn fɛ kurun kɔnɔ, u bɛɛ tun siranna bari u ye jigɛ caaman sɔrɔ. Zebede ka dencɛw, Zaki ni Zan tun ye Simɔn baarakɛnyɔgɔnw ye, olu fana tun siranna. Nga Yezu y'a fɔ Simɔn ye ko: “I kana siran. Kabini sisan, i tɛna kɛ mɔnikɛla ye tugu, nga i bɛna kɛ waajulikɛla ye, ka mɔgɔw sɔrɔ Ala ye.” O tuma na, u segira ka na u ka kurunw bila bada la, k'u ka fɛɛnw bɛɛ to yen ka tugu Yezu kɔ. Loon dɔ, ka Yezu to dugu dɔ la, cɛɛ dɔ fana tun bɛ yen, kunatɔbana diginin tun b'o la. A ye Yezu ye tuma min na, a taara biri a kɔrɔ k'a dali ko: “Matigi, n'i sɔnna, i bɛ se ka ne kɛnɛya.” Yezu magara a la, k'a fɔ ko: “N sɔnna ko i ka kɛnɛya.” O yɔrɔnin bɛ, cɛɛ kɛnɛyara. O kɔ, Yezu y'a gwɛlɛya a ma kosɛbɛ ko: “I kan'a fɔ mɔgɔ si ye ko ne le y'i kɛnɛya dɛ. Nga taa i yɛrɛ yira sarakalasebaga la. Musa ye saraka min koo fɔ saniyali faan fɛ, i k'o bɔ k'a yira mɔgɔw la ko i kɛnɛyara.” O bɛɛ n'a ta, Yezu tɔgɔ bɔra ka taa nya fɔɔ mɔgɔ caaman tun bɛ to ka taa u lajɛn a kɔrɔ waasa k'a ka kuma lamɛn, walima a k'u kɛnɛya. Yezu tun bɛ to ka taa kongo kɔnɔ a kelen ka Ala dali yen. Loon dɔ, ka Yezu to mɔgɔw kalan na, Farizinyɛw ni sariya karamɔgɔ dɔw siginin tun bɛ yen. U tun nana ka bɔ Galile ni Zude mara dugudenninw bɛɛ la, ani Zeruzalɛmu. Matigi Ala ka sebagaya tun bɛ Yezu fɛ n'a bɛ banabagatɔw kɛnɛya. Cɛɛ dɔw taara ni muruku dɔ ye o yɔrɔ la. A lanin tun bɛ dilan kan. U tun bɛ cogo nyinina ka don n'o cɛɛ ye soo kɔnɔ k'a la Yezu nyakɔrɔ. U m'a cogo sɔrɔ ka don n'a ye jama kɔsɔn. O la, u yɛlɛla soo kunna k'o yɔrɔ dɔ walaka. Ka muruku nin to a ka dilan na, u y'a jigi o woo fɛ jama cɛma ni juru ye Yezu nyakɔrɔ. Yezu y'a ye k'o mɔgɔw lara ale la minkɛ, a y'a fɔ muruku nin ye ko: “Cɛɛ, i ka kojuguw yafara i ma.” Sariya karamɔgɔw ni Farizinyɛw y'a daminɛ ka miiri u kɔnɔ ko: “Nin ye jon ye n'a bɛ Ala tɔgɔ cɛn ten? Jon le bɛ se ka mɔgɔ ka kojuguw yafa a ma ni Ala kelen tɛ?” Nga Yezu y'u ka miiriya lɔn k'a fɔ u ye ko: “Mun y'a to aw b'a la ka miiri aw kɔnɔ ten? K'a fɔ muruku ye ko: ‘I ka kojuguw yafara i ma,’ walima k'a fɔ a ye ko: ‘Wili ka taama,’ o kuma fila la, jumɛn fɔko ka nɔgɔ? Nga ne b'a fɛ aw k'a lɔn ko see bɛ Mɔgɔ Dencɛ ye ka mɔgɔ ka kojuguw yafa a ma k'a to dugukolo kan. O la, cɛɛ, n b'a fɔ i ye, wili k'i ka dilan ta ka taa soo.” O yɔrɔnin bɛ, cɛɛ nin wilila mɔgɔw nyana k'a ka dilan ta ka taa soo. A tun bɛ Ala tando n'a bɛ taa. U bɛɛ kabakoyara. U ye Ala tando. U siranninba y'a fɔ ko: “An ye kabako ye bii dɛ!” O kɔ, Yezu bɔra yen, a ye wusuruminɛla dɔ ye min tɔgɔ ko Levi, a siginin tun bɛ wusuruminɛlaw ka baarakɛyɔrɔ la. Yezu y'a fɔ a ye ko: “Tugu ne kɔ.” Levi y'a ka baara to yen ka wili ka tugu a kɔ. O kɔ, Levi ye dumuniba labɛn a ka soo Yezu ye. Wusuruminɛlaw ni mɔgɔ wɛrɛw tun bɛ yen caaman. U tun bɛ dumuni kɛra ni Yezu n'a kɔmɔgɔw ye. Farizinyɛw n'u ka sariya karamɔgɔw tun bɛ; nunu;nununa. U ye Yezu ka kalandenw nyininga ko: “Mun na aw bɛ dumuni kɛ ka minni kɛ ni wusuruminɛlaw ani kojugukɛlaw ye?” Yezu ye kuma ta k'u jaabi ko: “Mɔgɔ minw ka kɛnɛ, olu mako tɛ furakɛla la, banabagatɔw le mako b'a la. Ne ma na mɔgɔtilenninw wele, nga ne nana kojugukɛlaw le wele waasa u ka nimisa ka faran u ka kojuguw la.” Mɔgɔ dɔw y'a fɔ Yezu ye ko: “Zan ka kalandenw ni Farizinyɛw ka kalandenw bɛ suun don tuma caaman ka Ala dali, k'a sɔrɔ e taw bɛ dumuni kɛ ka minni kɛ.” Yezu y'u jaabi ko: “Aw tɛ se ka kɔnyɔcɛ teriw wajibiya ka suun don k'u ni kɔnyɔcɛ to nyɔgɔn fɛ. Tinyɛ tɛ wa? Nga waati dɔ bɛna se, kɔnyɔcɛ bɛna bɔsi u la, u bɛna suun don o tuma na.” Yezu ye talen nin la u ye fana ko: “Mɔgɔ si tɛ fanikura faran ka fani kɔrɔman bari n'a ye. N'o kɛra, fanikura cɛnna, kunkurunnin nin fana tɛna bɛn ni fani kɔrɔman ye. Mɔgɔ si tɛ duvɛnkɛnɛ kɛ foroko kɔrɔman kɔnɔ. N'o kɛra, duvɛnkɛnɛ bɛna foroko faran, foroko bɛna cɛn, duvɛn bɛna bɔn. Nga duvɛnkɛnɛ ka kan ka kɛ forokokuraw le kɔnɔ. Ni mɔgɔ min delila duvɛnkɔrɔ min na, o tigi tɛ duvɛnkɛnɛ fɛ, bari a b'a fɔ ko duvɛnkɔrɔ le ka di.” Lafinyɛlon dɔ la, Yezu n'a ka kalandenw tun bɛ tɛmɛna foro dɔw kɔnɔ. A ka kalandenw ye suman dɔw tigɛ k'u tereke u tigɛ la k'u nyimi. Farizinyɛ dɔw y'a fɔ u ye ko: “Koo min daganin tɛ lafinyɛlon na, mun na aw b'o kɛ?” Yezu y'u jaabi ko: “Kɔngɔ ye Dawuda n'a kɔmɔgɔw minɛ tuma min na, a ye min kɛ, aw m'o kalan ka ye wa? A donna Ala ka soo kɔnɔ, burukun minw tun bilanin bɛ Ala ye ni mɔgɔ si man kan k'olu dumu fɔɔ sarakalasebagaw dɔrɔn, a ye olu ta ka dɔ dumu ka tila ka dɔ di a kɔmɔgɔw ma.” Yezu y'a fɔ u ye fana ko: “Mɔgɔ Dencɛ ye lafinyɛlon kuntigi ye.” Lafinyɛlon dɔ wɛrɛ la, Yezu donna Alabatoso kɔnɔ k'a daminɛ ka mɔgɔw kalan. O y'a sɔrɔ cɛɛ dɔ tun bɛ yen min kinibolo sanin lo. Sariya karamɔgɔw ni Farizinyɛw tun bɛ Yezu kɔlɔsira yala n'a bɛna mɔgɔ dɔ kɛnɛya lafinyɛlon na, waasa u ka se k'a jalaki. Nga Yezu tun y'u ka miiriya lɔn, o la, a y'a fɔ cɛɛ bolo sanin ye ko: “Wili ka lɔ mɔgɔw cɛma yan.” A wilila ka lɔ. O kɔ, Yezu y'a fɔ u ye ko: “Ne b'aw nyininga, a daganin bɛ ka konyuman kɛ lafinyɛlon na wa, walima ka kojugu kɛ? Ka mɔgɔ kisi wa, walima k'a faga?” A y'u bɛɛ filɛfilɛ ka sɔrɔ k'a fɔ cɛɛ ye ko: “I bolo jan.” A y'a jan, a bolo kɛnɛyara. U dimina kosɛbɛ, u tora ka nyɔgɔn nyininga ko yala u bɛna se ka mun le kɛ Yezu la. Loon dɔ la, Yezu taara kulu dɔ kan ka Ala dali. A sira nyana Ala dalili la. Dugu gwɛra tuma min na, a y'a ka kalandenw wele, ka mɔgɔ tan ni fila woloma u cɛma k'olu tɔgɔ la ko cidenw. O cidenw tɔgɔ filɛ: Simɔn, Yezu ye min tɔgɔ la ko Piyɛri, an'a dɔgɔcɛ Andere, Zaki ni Zan, Filipi ni Baritelemi, Matiyo ni Toma, Alife dencɛ Zaki ni Simɔn u bɛ min wele Zelɔti, Zaki dencɛ Zuda ani Zuda Isikariyɔti min ye Yezu don a juguw bolo la. Yezu jigitɔ n'a ka kalanden tan ni fila ye ka bɔ kulu kan, a sera kɛnɛba dɔ la ka lɔ yen. Jamaba tun bɛ o yɔrɔ la. A ka kalandenw tun ka ca u cɛma. Dɔw tun bɔra Zeruzalɛmu ni Zude mara bɛɛ la. Dɔw fana tun bɔra kɔgɔjida la dugubaw la, Tiri ani Sidɔn. U tun nana waasa ka Yezu ka kuma lamɛn ani a ka u kɛnɛya. Minw tɔɔrɔnin tun bɛ jinaw bolo, olu fana kɛnɛyara. Jama bɛɛ tun bɛ cogo nyini ka maga Yezu la, bari sebagaya dɔ tun bɛ bɔ a la k'u bɛɛ kɛnɛya. O tuma na, Yezu y'a ka kalandenw filɛ, k'a fɔ ko: “Aw minw ye faantanw ye, aw ye dubadenw ye, bari Ala ye aw ka masa ye. Kɔngɔ bɛ aw minw na sisan, aw ye dubadenw ye, bari aw bɛna fa. Aw minw dusu kasinin bɛ sisan, aw ye dubadenw ye bari aw dusu bɛna diya. Ni mɔgɔw b'aw kɔniya tuma min na, ka ban aw la, k'aw nɛni ani k'aw tɔgɔjugu fɔ Mɔgɔ Dencɛ kɔsɔn, o tuma na, aw ye dubadenw ye. N'o bɛ kɛ tuma min na, aw ka nyanagwɛ ka panpan nisɔndiya fɛ, bari aw bɛna tɔnɔba sɔrɔ sankolo la. U faaw fana tun ye kiraw tɔɔrɔ ten. Nga bɔnɛ ye aw nafolotigiw ta ye, bari aw ye aw ka nyasuma sɔrɔ ka ban. Aw minw bɛ dumuni kɛ ka fa sisan, bɔnɛ ye aw ta ye sini, bari kɔngɔ bɛna aw minɛ. Aw minw bɛ yɛlɛ sisan, bɔnɛ ye aw ta ye sini, bari aw nyaa bɛna sisi ka kasi. Ni mɔgɔ bɛɛ bɛ aw tɔgɔnyuman fɔ tuma min na, bɔnɛ ye aw ta ye, bari u faaw tun bɛ kira galontigɛlaw bonya o cogo la. “Nga aw minw bɛ n lamɛnna, ne b'a fɔ aw ye ko aw k'aw juguw kanu, aw ka konyuman kɛ aw kɔniyabagaw ye. Aw ka duba kɛ aw dangabagaw ye, ka Ala dali aw tɔɔrɔbagaw ye. Ni mɔgɔ dɔ y'i tulo kelen ci, i ka tɔ kelen nin sin a ma fana. Ni dɔ y'i ka foroca bɔsi i la, i kan'a bali k'i ka dulokidennin fana ta. Ni mɔgɔ o mɔgɔ ye fɛɛn dɔ dali i fɛ, i k'o d'a ma. Ni mɔgɔ dɔ y'i ka fɛɛn dɔ minɛ i fɛ, i kan'a koo nyininga. Aw b'a fɛ mɔgɔ tɔw ka koo min kɛ aw ye, aw k'o nyɔgɔn kɛ u ye. “N'aw b'aw nyiinw dɔrɔn kanu, aw bɛna mun tɔnɔ sɔrɔ o la? Bari, kojugukɛlaw fana b'o nyɔgɔn kɛ. Mɔgɔ minw bɛ konyuman kɛ aw ye, ni aw bɛ konyuman kɛ olu dɔrɔn ye, aw bɛna mun tɔnɔ sɔrɔ o la? Bari, kojugukɛlaw fana b'o nyɔgɔn kɛ. Aw jigi bɛ mɔgɔ minw kan ko u bɛna aw ka juru sara, ni aw bɛ juru don olu dɔrɔn na, aw bɛna mun tɔnɔ sɔrɔ o la? Bari, kojugukɛlaw fana bɛ juru don nyɔgɔn na k'u hakili to u ta nyɔgɔn sɔrɔli la kɔfɛ. Nga, aw juguw koo ka diya aw ye, aw ka konyuman kɛ u ye. Aw ka juru don mɔgɔw la, ka nyinɛ o kɔ. O la, aw bɛna tɔnɔba sɔrɔ. Aw bɛna kɛ Setigi Ala deenw ye, bari, ale bɛ nyumanya kɛ nyumanlɔnbaliw ni mɔgɔjuguw ye. Aw ka makari mɔgɔw la i n'a fɔ an Faa bɛ makari u la cogo min na. “Aw kana tɔw kiti, o la, Ala tɛna aw kiti. Aw kana tɔw jalaki, o la, Ala tɛna aw jalaki. Aw ka yafa tɔw ma, o la, Ala bɛna yafa aw ma. Aw ka tɔw sɔn. O la, Ala bɛna aw sɔn. A bɛna minan nyanaman ta k'aw ta suma k'a digidigi k'a yuguyugu k'a fa fɔɔ a ka bɔn, k'o yɛlɛma aw ka fani daa la cogo min na, aw ka tɔw ta kɛ ten. Bari aw bɛ tɔw ta suma ni minan min ye, a bɛna aw ta suma n'o minan le ye.” Yezu ye talen la u ye fana ko: “Finyɛntɔ bɛ se ka finyɛntɔ wɛrɛ ka bere minɛ wa? U fila bɛɛ tɛna ben dingɛ kɔnɔ wa? Kalanden si man fisa n'a ka karamɔgɔ ye. Nga kalanden o kalanden kalanna ka se a daan na, o bɛna kɛ i n'a fɔ a ka karamɔgɔ. “Kalafitini min b'i balima nyaa na, mun na i b'o filɛ k'a sɔrɔ lɔgɔkuru min bɛ i yɛrɛ nyaa na, i t'o miiri? I do bɛ se k'a fɔ i balima ye cogo di ko: ‘Kala b'i nyaa na, a to n k'a bɔ.’ Nanbaranmɔgɔ, lɔgɔkuru min bɛ i nyaa na, o bɔ fɔlɔ. O la, i bɛna yeli kɛ ka nya, k'i balima ka kala bɔ a nyaa na. “Yirinyuman si tɛ denjugu kɛ, yirijugu si fana tɛ dennyuman kɛ. Yiri bɛ lɔn a deen fɛ. Toro tɛ bɔ; nɔniyiri kan, kunan fana tɛ bɔ sɛgɛnɛyiri kan. Mɔgɔnyuman bɛ kɛwalinyumanw kɛ bari a dusu ka nyi. Mɔgɔjugu fana bɛ kɛwalijuguw kɛ bari a dusu man nyi. Mɔgɔ dusu fanin bɛ fɛɛn min na, a daa b'o le fɔ. “Mun na aw bɛ ne wele Matigi, Matigi, k'a sɔrɔ ne bɛ min fɔ aw ye, aw t'o kɛ? “Mɔgɔ o mɔgɔ bɛ na ne fɛ ka ne ka kuma lamɛn k'a labato, o bɔnin bɛ min fɛ, ne bɛna o fɔ aw ye. O bɔnin bɛ bonlɔla dɔ fɛ min ye dugukolo sogi k'a dunya fɔɔ ka se fara ma, k'a ka boon juu sigi o kan. Baa nana fa jii la tuma min na, a karila, jii woyora ka taa gosi o boon nin na, nga a ma se k'a yuguyugu, bari cɛɛ nin tun y'a ka boon lɔ ka nya. Nga mɔgɔ min bɛ ne ka kuma lamɛn n'a tɛ o labato, o tigi bɔnin bɛ bonlɔla dɔ fɛ min ma dugukolo sogi ka sɔrɔ k'a ka boon juu sigi. Baji sera o boon nin ma tuma min na, a benna o yɔrɔnin bɛ, a bɛɛ mugumugura.” Yezu kumana jama fɛ ka ban minkɛ, a taara Kafaranamu. O yɔrɔ la, sɔlidasi kuntigi dɔ tun bɛ yen min ka jɔncɛ tun man kɛnɛ, fɔɔ a tun bɛ nyini ka sa. O jɔɔn koo tun ka di a kuntigi ye kosɛbɛ. O cɛɛ ye Yezu koo mɛn minkɛ, a ye dugu cɛkɔrɔba damani ci a fɛ k'a dali ko a ka na ale ka jɔɔn kɛnɛya. Olu sera Yezu fɛ, u y'a dali k'a dali kosɛbɛ ko: “Cɛɛ nin ka kan n'i ka dɛmɛli ye, bari an ka siya koo ka di a ye. Ale le lɔra n'an ka Alabatoso lɔli musakaw ye.” O la, Yezu taara n'u ye. U surunyana sɔlidasi kuntigi nin ka soo la tuma min na, o cɛɛ y'a teriw dɔw ci k'u ka ta'a fɔ Yezu ye ko: “Matigi, i kana i yɛrɛ sɛgɛn, bari ne ka dɔgɔ i ka na fɔɔ ne ka soo. Ne y'a ye ko n ka dɔgɔ minkɛ, o le y'a to ne yɛrɛ ma taa i fɛ yen. Nga kuma kelen dama fɔ ne ka jɔɔn bɛna kɛnɛya, bari kuntigi dɔw bɛ ne fɛ, ne fana bɛ sɔlidasi dɔw kuun na. N bɛ se k'a fɔ kelen ye ko: ‘Taa yan fɛ.’ A bɛ taa. K'a fɔ dɔ wɛrɛ ye: ‘Na yan.’ A bɛ na. K'a fɔ n ka jɔɔn ye ko: ‘Nin kɛ ten.’ A b'o kɛ.” Yezu y'o kuma mɛn minkɛ, a kabakoyara. A y'a nyaa yɛlɛma k'a fɔ a nɔfɛmɔgɔw ye ko: “Ne b'a fɔ aw ye ko hali Isirayɛli mɔgɔw fɛ, ne ma mɔgɔ sɔrɔ min lara ne la ten fɔlɔ.” Sɔlidasi kuntigi nin ka ciraden nunu kɔsegira ka taa a sɔrɔ jɔɔn nin kɛnɛyara. O kɔ, Yezu taara dugu dɔ la min tɔgɔ ko Nayin. A ka kalandenw ni jamaba tun taara n'a ye yen. U surunyana dugu donda la, u ye mɔgɔ dɔw kunbɛn n'u bɛ taara ni suu ye kaburutu la. Firiyamuso dɔ ka dencɛ kelenpe tun lo. Jamaba tun bɛ yen. Matigi ye muso nin ye minkɛ, a hinɛ donna a la kosɛbɛ. A y'a fɔ a ye ko a kana kasi tugu. O kɔ, a gwɛrɛla ka maga sukɛsu la. Suu tabagaw lɔra. Yezu y'a fɔ kanbelen suu ma ko a ka wili. Suu nin kununna, a wilila ka sigi k'a daminɛ ka kuma. Yezu y'a fɔ muso ye ko a k'a deen minɛ ka taa. Mɔgɔ bɛɛ kabakoyara, a tun bɛ Ala tando k'a fɔ ko: “Kiraba wilila an cɛma, Ala sɔnna k'a ka jama nyaa filɛ.” O kuma jɛnsɛnna Zude faan bɛɛ la, ani a lamini maraw bɛɛ la. Zan ka kalandenw ye Yezu ka koo kɛnin bɛɛ lakali a ye. O la, a y'a ka kalandenw mɔgɔ fila wele k'u ci Matigi Yezu fɛ ko u ka ta'a nyininga ko: “Ala ka Mɔgɔwolomanin min ka kan ka na, ele lo wa? Walima an ka kan ka mɔgɔ dɔ wɛrɛ kɔnɔ?” Olu sera Yezu fɛ k'a fɔ a ye ko: “Zan batizelikɛla y'an ci ko an ka na i nyininga ko Ala ka Mɔgɔwolomanin min ka kan ka na, ko ele lo wa? Walima an ka kan ka mɔgɔ dɔ wɛrɛ kɔnɔ?” O waati yɛrɛ la, Yezu ye banabagatɔ caaman kɛnɛya ka jinaw gwɛn ka bɔ mɔgɔw la, ka finyɛntɔ caaman nyaa yɛlɛ. O kɔ, a ye ciradenw jaabi ko: “Aw ye min ye, ani aw ye min mɛn, aw ye taa o lakali Zan ye. Aw k'a fɔ a ye ko finyɛntɔw bɛ yeli kɛra, senkelenninw bɛ taama ka nya, kunatɔw bɛ kɛnɛyara, tulogwerenw bɛ mɛnni kɛra, suuw bɛ kununna, kibaru diman bɛ fɔra faantanw ye. Ni mɔgɔ min ma tigɛ ne la, o tigi ye dubaden ye.” Zan ka ciradenw taanin kɔ, Yezu y'a daminɛ ka kuma mɔgɔw fɛ Zan koo la. A y'u nyininga ko: “Aw tun taara mun le filɛ kongo kɔnɔ? Fɔnyɔ bɛ waga min lamaga wa? Aw do taara mun le filɛ sa? Dakamana fani tigi wa? N'o lo, minw bɛ dakamana faniw don ka faama dumuni kɛ, olu bɛ sɔrɔ masaluw le kɔnɔ. O tuma na, aw do taara mun le filɛ? Kira wa? Tinyɛ na, ne b'a fɔ aw ye ko a ka bon ni kira yɛrɛ ye! A fɔra Ala ka kuma na ko: ‘Ayiwa, ne Ala bɛ n ka ciden ci i nya, waasa a k'i ka sira labɛn.’ ” Yezu ko: “O ciden nin ye Zan ye. Ne b'a fɔ aw ye ko mɔgɔ si ma wolo dinyɛ na min kɛra mɔgɔba ye ka tɛmɛ Zan kan. Nga Ala ka mara kɔnɔ, mɔgɔ min lɔyɔrɔ ka dɔgɔ n'u bɛɛ ye, o tigi ka fisa ni Zan ye. “Mɔgɔ minw ye Zan lamɛn, hali wusuruminɛlaw, u bɛɛ y'a lɔn ko Ala ka koo bɛɛ tilennin lo. O le y'a to u sɔnna Zan y'u batize. Nga Farizinyɛw ni sariya karamɔgɔw ma sɔn Ala ka koo latigɛtaw ma. O la, u ma sɔn Zan k'u batize.” Yezu y'a fɔ tugu ko: “Ne bɛna bii mɔgɔw kɛnyɛ ni mun ye? U bɔnin bɛ mun fɛ? U bɔnin bɛ denmisɛnw fɛ minw siginin bɛ kɛnɛba la ka to k'u kaan sara nyɔgɔn ma ko: ‘Anw ye fɔli kɛ aw ye, aw ma dɔɔn kɛ. Anw ye sanga dɔnkili la aw ye, aw ma kasi fana.’ Bari, Zan batizelikɛla nana, a tun tɛ dumuni kɛ, a tun tɛ duvɛn min. Aw ko a kuun tɛ yen. Mɔgɔ Dencɛ nana, a bɛ dumuni kɛ ka minni kɛ, aw ko: ‘Cɛɛ nin tɛ miiri foyi la ni dumuni ni minni tɛ. Wusuruminɛlaw ni kojugukɛla wɛrɛw ka teri lo.’ Nga mɔgɔ minw sɔnna Ala sago ma, olu ye joo di Ala ma a ka hakilitigiya baara kɔsɔn.” Farizinyɛ dɔ ye Yezu wele dumuni na. Yezu taara o ka soo ka sigi dumuni na. O dugu nin na, muso kojugukɛla dɔ tun bɛ yen. A y'a mɛn ko Yezu bɛ dumuni na farizinyɛ nin ka soo minkɛ, a taara ni daga cɛnyumannin dɔ ye. O daga nin tun dilannin bɛ ni kabakuru dɔ ye min bɛ wele alabatiri. A fanin tun bɛ tulu kasadiman na. A sera minkɛ, a birila Yezu seen kunna ka kasi daminɛ. A kasira fɔɔ a nyaji ye Yezu seen nyigi. O kɔ, a y'a kunsigi kɛ k'o jɔsi n'a b'o saalon. Ka tilan ka tulu kasadiman bɔn u kan. Farizinyɛ min tun ye Yezu wele dumuni na y'o ye minkɛ, a y'a fɔ a yɛrɛ kɔnɔ ko: “Ni cɛɛ nin tun kɛra kira sɛbɛ ye, a tun bɛn'a lɔn ko muso min bɛ magara a la, ko mɔgɔnyuman tɛ, nga ko kojugukɛla lo.” O la, Yezu ye kuma ta k'a fɔ a ye ko: “Simɔn, kuma bɛ n fɛ k'a fɔ i ye.” Simɔn y'a jaabi ko: “Karamɔgɔ, a fɔ.” Yezu ko: “Cɛɛ dɔ ka juru tun bɛ mɔgɔ fila dɔ la. Kelen ka juru tun ye deniye wari kɛmɛ duuru, tɔ kelen ta tun ye deniye wari bi duuru. U fila si tun tɛ sera k'u ka juru sara minkɛ do, cɛɛ y'u wele k'a fɔ u ye ko: ‘Ne yafara aw ma juru nunu koo la.’ ” O kɔ, Yezu ye Simɔn nyininga ko o cɛɛ koo bɛna diya jurumantigi fila nunu jumɛn ye ka tɛmɛ? A y'a jaabi ko: “Ne ka miiri la, min ka juru tun ka ca.” Yezu ko: “I ye tinyɛ fɔ.” O kɔ, Yezu y'a nyaa yɛlɛma k'o muso nin filɛ ka sɔrɔ k'a fɔ Simɔn ye ko: “I nyaa bɛ muso nin na kɛ, ne nana i ka soo, i ma senkoji di ne ma. Nga ale ye ne seen ko n'a nyaji ye k'a jɔsi n'a kunsigi ye. I ma ne fo ka n fari saalon, nga ale, kabini ne nana i fɛ, a ma ne seen saalon dabila. I ma tulu bɔn ne kuun na, nga ale ye tulu kasadiman le bɔn ne seen kan. O kama, kanuyasɛbɛ min b'a dusu la, ne b'a fɔ i ye k'o kɔsɔn, a ka kojuguw bɛɛ yafara a ma. U ma mɔgɔ min ka kojuguw bɛɛ yafa, kanuyasɛbɛ tɛna kɛ o dusu la.” O kɔ, Yezu y'a fɔ muso nin ye ko: “Ne y'i ka kojuguw yafa.” Yezu ni minw tun bɛ dumuni na nyɔgɔn fɛ, olu y'a daminɛ k'a fɔ u kɔnɔ ko: “Nin ye jon ye fɔɔ a bɛ kojuguw yafa mɔgɔ ma?” Nga Yezu y'a fɔ muso nin ye tugu ko: “I lara ne la minkɛ, i kisira, taa hɛrɛ la.” O kɔ, Yezu tun bɛ yaala duguba ni dugudenninw na ka waajuli kɛ ka Ala ka masaya kibaru diman koo fɔ. A ka kalanden tan ni fila tun bɛ n'a ye, ani muso damani fana, Yezu tun ye jina gwɛn ka bɔ o minw dɔw la, ka dɔw kɛnɛya: Mariyamu ka bɔ Magidala, Yezu tun ye jina wolonwula gwɛn ka bɔ o min na, ni Zaani min ye Erɔdi ka nafolokɔlɔsibaga Suza muso ye, ni Suzani, ani muso wɛrɛw, o minw tun bɛ Yezu n'a ka kalandenw dɛmɛ n'u bololafɛnw ye. Mɔgɔw tun bɛ bɔ duguw bɛɛ la ka taa Yezu sɛgɛrɛ. O la, a ye talen la jama ye ko: “Sɛnɛkɛla dɔ bɔra ka ta'a ka suman seri. K'a to serili la, kisɛ dɔw taara ben sira daa la. Tɛmɛbagaw y'u dɔn, kɔnɔw y'u kunu. Dɔw fana taara ben fara yɔrɔ la. U falenna dɔrɔn, nga u sara bari sumaya tun tɛ u kɔrɔ. Dɔw fana taara ben binjugu yɔrɔ la, u falenna, u ni biin wilila nyɔgɔn fɛ, biin y'u degun. Dɔ wɛrɛw fana taara ben dugukolonyuman na. U falenna ka wili ka kisɛ kɛ. Olu y'u nyɔgɔn kɛmɛ kɛmɛ sɔrɔ.” O kuma fɔnin kɔ, Yezu pɛrɛnna ko: “Mɔgɔ min b'a fɛ ka mɛnni kɛ, o k'a tulo malɔ ka nya.” Yezu ye talen min la, a ka kalandenw y'a nyininga o kɔrɔ la. A y'u jaabi ko: “Aw kɛra Ala ka masaya gundow lɔnbagaw ye. Nga a koo bɛ fɔ tɔw ye talen le la, waasa u filɛli kɛtɔ, u kana foyi ye, u mɛnni kɛtɔ, u kana foyi faamu. “N ye talen min la, o kɔrɔ filɛ nin ye: Sumansi, o ye Ala ka kuma le ye. Mɔgɔ dɔw bɔnin bɛ sirada fɛ, kisɛ benna o yɔrɔ min na. U mana Ala ka kuma mɛn, Sutana bɛ na o kuma bɔ u kɔnɔ, janko u kana la a la ka kisi. Mɔgɔ dɔw fana bɔnin bɛ fara yɔrɔ fɔ. U mana kuma mɛn, u bɛ sɔn o ma ni nisɔndiya ye. U tɛ miiri o kuma na kosɛbɛ, u bɛ la o kuma na tumanin kelen dɔrɔn, ni gwɛlɛya nana, u bɛ ban o kuma na. Mɔgɔ dɔ wɛrɛw fana bɔnin bɛ binjugu yɔrɔ fɛ. Olu mana kuma mɛn, nin dinyɛ hami koow, ni nafolo koo, ni diyanakow b'o kuma nagasi fɔɔ nafa tɛ sɔrɔ a la. Dɔw fana bɔnin bɛ dugukolonyuman fɛ. Olu mana kuma mɛn, u b'a minɛ ni dusunyuman ye fɔɔ nafa bɛ sɔrɔ a la.” Yezu y'a fɔ tugu ko: “Mɔgɔ si tɛ lanpan mana k'a bila gongo jukɔrɔ walima kalaka jukɔrɔ. Nga o b'a bila fɛɛn dɔ kan, janko mɔgɔ minw bɛ don soo kɔnɔ, u ka yeli kɛ. “Fɛɛn o fɛɛn dogonin bɛ, o bɛɛ bɛna ye. Gundo si tɛ yen min tɛna bɔ kɛnɛ kan. “Aw k'aw ka mɛnni kɛcogo kɔlɔsi, bari mɔgɔ min bɛ koo mɛn k'a faamu, dɔ bɛna fara o ka lɔnniya kan, nga mɔgɔ min tɛ koo faamu, a bɛ miiri ko a bɛna min faamu, a tɛna o yɛrɛ faamu.” Yezu tun bɛ yɔrɔ min na, a baa n'a dɔgɔninw taara yen. Nga u tun tɛ sera ka gwɛrɛ Yezu la minkɛ jama kɔsɔn, dɔ y'a fɔ a ye ko: “Karamɔgɔ, i baa n'i dɔgɔninw lɔnin bɛ kɛnɛma k'u mako b'i la.” Nga Yezu ye o tigi jaabi ko: “Mɔgɔ minw bɛ u tulo malɔ Ala ka kuma na k'a sira taama, olu le ye ne baa ni ne dɔgɔninw ye.” Loon dɔ la, Yezu donna kurun kɔnɔ n'a ka kalandenw ye. A y'a fɔ u ye ko: “An ka taa baa kɔ.” K'u to baa cɛma kurun boli la, Yezu sinɔgɔra. Fɔnyɔba dɔ wilila yen, fɔɔ kurun tun bɛ nyini ka fa jii la. U tun bɛ farati la. O la, a ka kalandenw gwɛrɛl'a la k'a kunun k'a fɔ a ye ko: “Karamɔgɔ, karamɔgɔ, an halakitɔ filɛ.” Yezu wilila, a jamana fɔnyɔ ni jii kuun na. Fɔnyɔ lɔra, jii malara. O kɔ, Yezu y'a fɔ a ka kalandenw ye ko: “Aw jigi bɛ min?” Kalandenw kabakoyara fɔɔ siranya donna u la n'u bɛ nyɔgɔn nyininga Yezu koo la ko: “Nin cɛɛ ye mɔgɔ sifa jumɛn ye ni fɔnyɔ ni baji yɛrɛ bɛ sɔn a ka kuma ma?” Yezu n'a ka kalandenw sera Gadarekaw ka mara la. Baa ye o mara ni Galile mara daan bɔ nyɔgɔn na. Yezu jigira ka bɔ kurun na dɔrɔn, cɛɛ dɔ nan'a kunbɛn, jinatɔ tun lo. Kabini tumajan, a tun tɛ fani don. A tun tɛ si dugu kɔnɔ tugu fɔɔ kaburutu la. Cɛɛ ye Yezu ye minkɛ dɔrɔn, a kulera kosɛbɛ ka taa a kunbiri gwan Yezu kɔrɔ ka pɛrɛn ko: “Mun b'an cɛ, Setigi, Ala Dencɛ Yezu? Ne b'i dali, i kana ne tɔɔrɔ.” Cɛɛ nin y'o fɔ, bari Yezu tun b'a fɔra ko jina ka bɔ a la. O jina nin tun b'a tɔɔrɔ tuma caaman, mɔgɔw tun b'a bolo n'a seenw bɛɛ siri ni jɔrɔkɔw ye k'a bila. Nga a tun bɛ to k'u tigɛtigɛ, jina bɛ taa n'a ye kongo kɔnɔ. Ayiwa, Yezu ye cɛɛ nyininga ko a tɔgɔ bɛ di? A y'a jaabi ko Jinakulu. A y'o fɔ bari jina caaman tun b'a la. Jina nunu ye Yezu dali kosɛbɛ ko a kana olu gwɛn ka taa u nyagwanyɔrɔ la. O y'a sɔrɔ lɛkuluba dɔ tun bɛ dumuni kɛra kulu kan. Jina nunu y'a nyini Yezu fɛ ko a k'a to u ka taa don o lɛɛw la. Yezu sɔnna o la. Jinaw bɔra cɛɛ la ka taa don lɛɛw la. Lɛkulu bɛɛ girinna ka bɔ kulu kan ka taa ben baji la. U bɛɛ sara yen. O lɛɛw dɛndɛbagaw y'o koo ye minkɛ, u bolila ka taa o kibaru fɔ dugu kɔnɔ ni dafɛ duguw la. Koo min kɛra, mɔgɔw bɔra ka taa o filɛ. Jina tun bɛ cɛɛ min na ka kɔrɔ, u sera k'o nyamalɔnin siginin ye Yezu kɔrɔ ni fani b'a kaan na. U siranna kosɛbɛ. Cɛɛ kɛnɛyara cogo min na, minw y'o ye, olu y'o lakali mɔgɔw ye. O la, u bɛɛ y'a nyini Yezu fɛ ko a ka bɔ u ka mara la, bari a siranya bonyana u fɛ. Yezu donna kurun kɔnɔ ko a bɛ taa, cɛɛ y'a nyini a fɛ ko ni ale bɛ se ka taa n'a ye. Nga Yezu y'a jaabi ko: “Segi ka taa i ka soo, Ala ye koba min kɛ i ye, i ka o bɛɛ lakali.” Yezu ye koba min kɛ cɛɛ ye, a taara o koo lakali dugu bɛɛ kɔnɔ. Yezu kɔsegira ka bɔ baa kɔ tuma min na, mɔgɔw bɛɛ y'a kunbɛn ni nisɔndiya ye, bari u bɛɛ tun b'a makɔnɔna. O tuma na, cɛɛ dɔ sera min tɔgɔ ko Zayirisi. Alabatoso kuntigi tun lo. A taar'a kunbiri gwan Yezu kɔrɔ, k'a dali ko a ka sabali ka taa ale fɛ a ka soo, bari ale denmuso man kɛnɛ, ko a bɛ nyini ka sa, k'o denmuso nin dɔrɔn le ye ale deen ye. Deen nin sii tun bɛ saan tan ni fila nyɔgɔn. Yezu taatɔ o yɔrɔ la, mɔgɔw tun b'a digidigi fɔɔ k'a degun. O y'a sɔrɔ, muso dɔ tun b'u cɛma, min ka koli tun tɛ banna n'a kɛra a ma bana ye kabini saan tan ni fila. A bololafɛn bɛɛ banna, bari a tun taara furakɛla caaman fɛ. Nga a ka bana ma nɔgɔya. A gwɛrɛla Yezu la jama cɛma ka maga a ka fani dakun na a kɔfɛ. O yɔrɔnin bɛ, a ka koli lɔra. Yezu ye nyiningali kɛ ko: “Jon magara ne la?” Mɔgɔ si ma sɔn k'a fɔ ko ale lo. Piyɛri ye kuma ta k'a fɔ ko: “Karamɔgɔ, i nyaa b'a la ni mɔgɔw b'i digidigira fɔɔ k'i degun.” Nga Yezu ko: “Mɔgɔ dɔ magara ne la, bari ne y'a lɔn ko ne ka fanga ye kabako dɔ kɛ sisan.” Muso nin y'a lɔn ko koo nin tɛna se ka dogo tugu minkɛ, a yɛrɛyɛrɛtɔ taar'a kunbiri gwan Yezu kɔrɔ. A magara a la kuun min na, ani a kɛnɛyara yɔrɔnin kelen cogo min na, a y'o bɛɛ lakali Yezu ye mɔgɔw bɛɛ nyana. Yezu y'a fɔ a ye ko: “N balimamuso, i lara ne la minkɛ, i kisira, taa hɛrɛ la.” Ka Yezu to o kuma na, mɔgɔ dɔ bɔra kuntigi Zayirisi ka soo ka na a fɔ a ye ko: “I denmuso banna, kana karamɔgɔ sɛgɛn tugu.” Yezu y'o kuma mɛn minkɛ, a y'a fɔ Zayirisi ye ko: “I kana siran, la ne la dɔrɔn, i denmuso nii bɛna segi a ma.” U sera Zayirisi ka soo tuma min na, Yezu ma sɔn mɔgɔ si ka don n'a ye boon kɔnɔ fɔɔ Piyɛri, ni Zan, ni Zaki, ani sungurunin faa n'a baa dɔrɔn. Mɔgɔw bɛɛ tun bɛ mankanci ani kule la sungurunin ka saya koo la. Yezu y'a fɔ u ye ko: “Aw kana kasi, sungurunin ma sa, nga a bɛ sinɔgɔra le.” Mɔgɔw y'a lɔn ko sungurunin sara tinyɛ na minkɛ, u yɛlɛla Yezu ma. Yezu donna ka sungurunin suu minɛ a bolo ma k'a fɔ a ye ko: “Sungurunin, wili.” O yɔrɔnin bɛ, deen nii segira a ma, a wilila. Yezu y'a fɔ u ye ko u ka dumuni d'a ma. Deen wolobagaw kabakoyara kosɛbɛ. Nga Yezu y'a fɔ u ye k'a gwɛlɛya ko u kana o koo nin nyafɔ mɔgɔ si ye. Yezu y'a ka kalanden tan ni fila lajɛn ka sebagaya ni fanga d'u ma ka jinaw gwɛn, ani ka banabagatɔw kɛnɛya. O kɔ, a y'u ci ka taa Ala ka masaya koo fɔ, ka banabagatɔw kɛnɛya. A y'a fɔ u ye ko: “Aw kana fɛɛn si ta, bere wo, dugutaaminan wo, dumuni wo, wari wo, aw kana o si ta. Aw kana duloki fila don. N'aw ye jatigila sɔrɔ yɔrɔ o yɔrɔ, aw ye to yen fɔɔ aw bɔtuma ka se o dugu kɔnɔ. Ni dugu dɔ mɔgɔw banna ka jigiyɔrɔ d'aw ma, aw ye bɔ yen, k'aw ka sennabuguri furanfuran ka bɔ aw seen na. O bɛna kɛ taamasinyɛ ye k'a yira u la k'u bɛn'a ye.” Kalandenw taara yaala duguw la ka Ala ka kibaru diman fɔ ani ka banabagatɔw kɛnɛya o yɔrɔw bɛɛ la. O tuma na, Galile mara kuntigi tun ye Erɔdi ye. Ale ye kokɛnin nunu bɛɛ kibaru mɛn minkɛ, a hakili nyagamina, bari dɔw tun ko Zan batizelikɛla le kununna. Dɔw fana ko kira Eli le segira ka na. Dɔ wɛrɛw ko kirakɔrɔw dɔ le kununna. Nga Erɔdi ko: “Ne y'a to u ye Zan kuun tigɛ. Ne do bɛ min ka koo kɛnin kibaru mɛnna, o ye jon le ye?” O la, a tun b'a fɛ a nyaa ka la Yezu kan. Cidenw kɔsegira tuma min na, u ye koo minw kɛ, u y'o bɛɛ lakali Yezu ye. A taara n'u ye danna dugu dɔ faan fɛ min tɔgɔ ko Bɛtisayida. Nga jama nana a lɔn minkɛ, u taar'a fɛ. Yezu y'u kunbɛn ni nisɔndiya ye, ani ka u kalan Ala ka masaya koo la. Minw tun bɛ kɛnɛyali fɛ, a ye olu kɛnɛya. Tile tun bɛ nyini ka ban minkɛ, a ka kalandenw gwɛrɛla a la k'a fɔ a ye ko: “Sira di jama ma u ka taa dafɛ duguw la ka dumuni ani la yɔrɔ nyini u yɛrɛ ye, bari an bɛ kongo le kɔnɔ yan.” Nga Yezu y'u jaabi k'u yɛrɛ ka dumuni d'u ma. U y'a fɔ a ye ko foyi t'u fɛ ni burukun duuru ani jigɛ fila tɛ. Ko fɔɔ n'u taara dumuni san ka n'a d'u ma sa. Bari cɛɛw tun bɛ mɔgɔ waa duuru bɔ. Yezu y'a fɔ a ka kalandenw ye k'u k'a fɔ mɔgɔw ye k'u ka sigi jɛnkulu jɛnkulu, mɔgɔ bi duduuru. Kalandenw y'a kɛ ka kɛnyɛ n'a ka kuma fɔli ye, jama bɛɛ sigira. Yezu ye burukun duuru ni jigɛ fila nunu ta, k'a nyaa kɔrɔ ta sanfɛ ka barika la Ala ye k'u tilantilan k'u di a ka kalandenw ma k'u k'o tilan mɔgɔw cɛ. U bɛɛ ye dumuni kɛ ka fa. Dumuni tɔɔ min tora, u y'o cɛ ka segi tan ni fila fa n'a ye. Loon dɔ, ka Yezu to Ala dali la a kelen, a ka kalandenw tun b'a gɛrɛfɛ. A tilara tuma min na, a y'u nyininga ko: “Mɔgɔw b'a fɔra ko ne ye jon ye?” U y'a jaabi ko: “Dɔw ko i ye Zan batizelikɛla ye. Dɔw ko i ye Eli ye. Dɔw fana ko i ye kirakɔrɔw dɔ ye min kununna.” Yezu ko: “Aw ka miiri la do, ne ye jon ye?” Piyɛri y'a jaabi ko: “I ye Ala ka Mɔgɔwolomanin nin ye.” Yezu y'a fɔ k'a gwɛlɛya u ma k'u kana o fɔ mɔgɔ si ye. A y'a fɔ u ye tugu ko: “Mɔgɔ Dencɛ ka kan ka tɔɔrɔ kosɛbɛ. Cɛkɔrɔbaw ni sarakalasebagaw ani sariya karamɔgɔw bɛna ban a la. U bɛn'a faga, nga tile saba a faganin kɔ, a bɛna kunun.” O kɔ, a y'a fɔ jama ye ko: “Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa koo la. A ka tɔɔrɔ bɛɛ munyu ne kɔsɔn loon o loon ka tugu ne kɔ. Mɔgɔ o mɔgɔ b'a ka dinyɛlatigɛ nyako dɔrɔn fɛ, o tigi tɛna sini hɛrɛ sɔrɔ. Nga ni mɔgɔ min ka dinyɛlatigɛ cɛnna ne kɔsɔn, o tigi nii bɛna kisi. A bɛ mun nya mɔgɔ ye ka dinyɛ kɔnɔ fɛɛn bɛɛ sɔrɔ n'o tigi bɛna bɔnɔ a nii la walima n'a yɛrɛ bɛna halaki? Ni mɔgɔ min maloyara, a ma sɔn ne ni n ka kuma ma, Mɔgɔ Dencɛ mana segi tuma min na n'a ka nɔɔrɔ ye, n'a Faa ta, ani mɛlɛkɛ senumanw ta ye, a fana tɛna sɔn o tigi ma. Tinyɛ na, ne b'a fɔ aw ye ko mɔgɔ minw bɛ yan, u dɔw tɛna sa ni u ma Ala ka sebagaya ye.” Tile seegi nyɔgɔn o kuma nunu fɔnin kɔ, Yezu taara ni Piyɛri ni Zan ani Zaki ye kulu jamanjan dɔ kan ka Ala dali. Ka Yezu to dalili la, a nyada yɛlɛmana, a ka fani gwɛra fɔɔ a bɛ manamana. O yɔrɔnin bɛ, cɛɛ fila dɔ lɔra n'u bɛ kumana Yezu fɛ. Olu tun ye Musa ni Eli ye. Nɔɔrɔ tun b'u la. Yezu bɛna taa Zeruzalɛmu ka sa cogo min na k'a ka baara dafa, u tun b'o kuma le la. Sinɔgɔ tun bɛ Piyɛri n'a tɔnyɔgɔnw na, u sinɔgɔra, u nana kunun tuma min na, u ye Yezu ka Alaya nɔɔrɔ ye, ani cɛɛ fila nunu a gɛrɛfɛ. Cɛɛ fila nunu taatɔ ka bɔ Yezu kɔrɔ, Piyɛri y'a fɔ a ye ko: “Matigi, a ka nyi an ka to yan. Anw bɛ bugu saba lɔ, e ta kelen, Musa ta kelen, Eli ta kelen.” Piyɛri tun bɛ min fɔra, a tun m'a lɔn. Ka Piyɛri to o kuma na, sankaba dɔ jigira k'u datugu. Kalanden saba nunu y'o ye minkɛ, u siranna. Kumakan dɔ bɔra o sankaba la k'a fɔ ko: “Nin ye ne Dencɛ ye ne ye min ci aw ma, aw k'a lamɛn.” Kumakan nin bɔ tuma na, kalandenw ma mɔgɔ si ye tugu Yezu kelen kɔ. Olu ye min ye, u y'o mara u kɔnɔ, u m'o lakali mɔgɔ si ye o waati la. O dugusagwɛ, u jigitɔ ka bɔ kulu nin kan, jamaba dɔ taara Yezu kunbɛn. Cɛɛ dɔ tora jama cɛma ka pɛrɛn ko: “Karamɔgɔ, ne b'i dali, i ka n dencɛ cogoya filɛ, bari ale dama le ye n dencɛ ye. Jina dɔ bɛ to ka wili a fɛ, n'a wilila a kama, a bɛ bari ka kule, a b'a yuguyugu kosɛbɛ fɔɔ a daa bɛ kanga. A b'a tɔɔrɔ kosɛbɛ, a tɛ bɔ a la joona. Ne y'i ka kalandenw dali ko u k'a gwɛn ka bɔ a la, nga u ma se.” Yezu y'a fɔ ko: “Aw bii mɔgɔw kɔni, aw ka jugu, aw tɛ la Ala la. Ne bɛna to n'aw ye k'aw ka koo munyu fɔɔ tuma jumɛn?” A y'a fɔ deen faa ye ko: “Na n'i dencɛ ye yan.” Deen gwɛrɛtɔ, jina y'a ta k'a ben duguma k'a yuguyugu kosɛbɛ. Nga Yezu jamana jina kunna k'a gwɛn. Deen kɛnɛyara, a y'a d'a faa ma. Mɔgɔw bɛɛ kabakoyara Ala ka sebagaya nin kɔsɔn. Yezu ka kokɛninw bɛɛ tun bɛ mɔgɔw kabakoya minkɛ, a y'a fɔ a ka kalandenw ye ko: “N bɛna kuma min fɔ sisan, aw k'o lamɛn ka nya: U bɛna Mɔgɔ Dencɛ don mɔgɔjuguw bolo.” Nga olu m'o kuma faamu, a kɔrɔ dogonin tora u ma ten. U tun bɛ siran k'a nyininga o kuma kɔrɔ la. Kalandenw bɛɛ tun bɛ miiri ko jon le bɛna kɛ nyamɔgɔ ye. Yezu y'u ka miiriya lɔn minkɛ, a ye denmisɛn dɔ ta k'a lɔ a gɛrɛfɛ. A y'a fɔ u ye ko: “Mɔgɔ o mɔgɔ mana nin denmisɛn nyɔgɔn minɛ ka nya ne kɔsɔn, o tigi bɛ ne le minɛ ka nya. Mɔgɔ min bɛ ne minɛ ka nya, o tigi bɛ ne cibaga le minɛ ka nya. Aw tɛ mɔgɔ min jati aw cɛma, o tigi le ye nyamɔgɔ ye.” Zan ye kuma ta k'a fɔ Yezu ye ko: “Karamɔgɔ, an ye cɛɛ dɔ ye min bɛ jinaw gwɛn ka bɔ mɔgɔw la n'i tɔgɔ ye. An tun b'a fɛ k'a bali, bari an dɔ tɛ.” Yezu y'a jaabi ko: “Aw kan'a bali, bari mɔgɔ min tɛ aw jugu ye, o ye aw nyiin ye.” Yezu tun ka kan ka bɔ dinyɛ na ka ta'a Faa fɛ waati min na, o tuma surunyana minkɛ, a y'a; naniya ko a bɛ taa Zeruzalɛmu. O la, a ye cidenw bila ka ta'a yɛrɛ nya. Olu taara don Samari mara dugu dɔ kɔnɔ ka jatigiso nyini Yezu ye. Nga o dugu mɔgɔw ma sɔn ka Yezu ladon, bari a tun bɛ taara Zeruzalɛmu. A ka kalanden dɔw Zaki ni Zan y'o mɛn minkɛ, u y'a fɔ Yezu ye ko: “Matigi, i b'a fɛ an b'a kɛ tasuma bɛ jigi ka bɔ sankolo la k'u halaki wa?” Yezu y'a nyaa yɛlɛma k'u sɔngɔ kosɛbɛ. O kɔ, u tɛmɛna ka taa dugu wɛrɛ la. K'u to sira kan, cɛɛ dɔ y'a fɔ Yezu ye ko: “I mana taa yɔrɔ o yɔrɔ, ne bɛna tugu i kɔ.” Yezu y'a jaabi ko: “Dingɛ bɛ kongo wuluw fɛ, nyaga bɛ kɔnɔw fɛ, nga layɔrɔ tɛ Mɔgɔ Dencɛ tɔgɔ la.” Yezu fana y'a fɔ cɛɛ dɔ ye ko: “Tugu ne kɔ.” Nga o cɛɛ ko: “Matigi, a to ne bɛ taa n facɛ suu don fɔlɔ.” Yezu y'a jaabi ko: “Minw tora soo, a to olu ka u ka suuw don. E kɔni, e ka ta'a wango la ko Ala ye masa ye.” Cɛɛ wɛrɛ y'a fɔ Yezu ye ko: “Ne bɛna tugu i kɔ, Matigi. Nga i b'a to ne bɛ ta'a sara n ka somɔgɔw la fɔlɔ.” Yezu y'a jaabi ko: “Mɔgɔ o mɔgɔ bɛ misidaba minɛ ko a bɛ sɛnɛ kɛ, n'a bɛ filɛli kɛ a kɔfɛ, o tigi man kan ni Ala ka baara ye.” O kɔ, Matigi ye kalanden bi wolonwula ni fila wɛrɛ woloma. A yɛrɛ tun ka kan ka taa duguba ni dugudennin minw na, a y'u ci ka taa o yɔrɔw la a yɛrɛ nya mɔgɔ fila fila. A y'a fɔ u ye ko: “Suman tigɛta ka ca, nga baarakɛlaw man ca. Aw ka forotigi dali a ka baarakɛla caaman ci ka ta'a ka suman tigɛ. Ayiwa, aw ka taa! Ne bɛ aw ci, aw kɛra i n'a fɔ sagaw, waraw cɛma. Aw kana wari ta, ni dugutaaminan, ni sanbara. Aw kana lɔ mɔgɔ si fɛ sira kan foli kama. N'aw sera dugu min na ka don luu min kɔnɔ, aw ka kɔn k'a fɔ ko hɛrɛ ka kɛ luu nin kɔnɔ mɔgɔw ye. N'o y'a sɔrɔ ni mɔgɔ dɔ bɛ o luu nin kɔnɔ n'a bɛ hɛrɛ nyinina, o tigi bɛna aw ka hɛrɛ foli duba sɔrɔ. N'o tɛ, aw ka hɛrɛ foli n'a duba bɛna segi aw ma. Aw ka to o luu kɔnɔ, u mana fɛɛn o fɛɛn d'aw ma, aw k'o dumu, bari baarakɛla ka kan n'a ka sara ye. Aw kana bɔ jatigiso dɔ la ka yɛlɛma dɔ wɛrɛ la. N'aw donna dugu min na, n'u y'aw ladon ka nya, u mana dumunifɛn min d'aw ma, aw k'o dumu. Aw k'o dugu banabagatɔw kɛnɛya, k'a fɔ dugu mɔgɔw ye ko: ‘Ala bɛna aw mara tuma min na, o waati sera.’ N'aw donna dugu min na, n'u m'aw ladon ka nya, aw ka bɔ ka lɔ u ka forobayɔrɔ la k'a fɔ u ye ko: ‘Hali aw ka dugu buguri min nɔrɔla an seen na, an b'o yuguyugu ka bɔ an seen na k'a to aw ye. Nga aw k'a lɔn ko Ala ka masaya waati sera.’ “Ne b'a fɔ aw ye ko Sodɔmukaw n'u ka juguya bɛɛ, olu ka tɔɔrɔ bɛna nɔgɔya ka tɛmɛ o dugu mɔgɔw ta kan kiti tigɛlon na.” “Aw Korazɛnkaw, ni Bɛtisayidakaw, bɔnɛ bɛna kɛ aw ta ye, bari ne ye kabako minw kɛ aw fɛ, ni olu tun kɛra Tirikaw ni Sidɔnkaw fɛ, bii tun y'a sɔrɔ u ye dusukasifani don u kaan na, ka bugurigwɛ mɔn u yɛrɛ la k'u bɛ nimisara ka faran u ka kojuguw la. O kama, Tirikaw ni Sidɔnkaw ka tɔɔrɔ bɛna nɔgɔya ka tɛmɛ aw ta kan kiti tigɛlon na. Aw Kafaranamukaw, aw bɛ miirila ko aw ka dugu bɛna taa nya wa? Abada! A bɛna halaki pewu.” O kɔ, a y'a fɔ a ka kalandenw ye ko: “Mɔgɔ minw mana aw lamɛn, o tigiw bɛ ne yɛrɛ le lamɛn. Mɔgɔ minw mana ban k'aw ladon, a bɛ kɛ i n'a fɔ u banna ka ne yɛrɛ le ladon. Ni mɔgɔ minw do banna ka ne ladon, olu bɛ banna ne cibaga le la.” Kalanden bi wolonwula ni fila nunu segira ni nisɔndiya ye ka n'a fɔ Yezu ye ko: “Matigi, i tɔgɔ barika la, hali jinaw tun tɛ se ka ban an ka fɔta ma.” A y'a fɔ u ye ko: “Ne nyaa tun bɛ Sutana porokototɔ la ka bɔ sankolo la ka ben duguma. N kɔni ye see d'aw ma ka taama saaw ni bunteniw kan, ani ka see d'aw ma k'aw jugu Sutana ka sebagaya nagasi. Fɛnjugu si ka dabari tɛna se aw kɔrɔ. Aw kana nisɔndiya bari jinaw tun tɛ se ka ban aw ka fɔta ma. Nga aw ka nisɔndiya bari Ala y'aw tɔgɔ sɛbɛn a fɛ sankolo la.” O waati yɛrɛ la, Yezu nisɔndiyara kosɛbɛ Nii Senuman barika la k'a fɔ ko: “N bɛ barika la i ye n Faa, sankolo ni dugukolo ka masa, bari, i ye koo minw dogo lɔnnikɛlaw ni hakilitigiw la, i ye olu yira kolɔnbaliw la. I y'o kɛ ten, bari a diyara i ye tinyɛ na.” O kɔ, a y'a fɔ mɔgɔw ye ko: “N Faa ye fɛɛn bɛɛ sebagaya di ne ma. Mɔgɔ si tɛ Dencɛ lɔn n'a Faa dɔrɔn tɛ, mɔgɔ si tɛ Faa fana lɔn, fɔɔ Dencɛ kelenpe. Ni ne b'a fɛ mɔgɔ min k'a lɔn, o tigi bɛn'a lɔn.” O kɔ, a y'a nyaa yɛlɛma ka sin a ka kalandenw ma k'a fɔ u dɔrɔn ye ko: “Koo minw bɛ kɛra nin ye, aw minw bɛ olu yera, aw ye dubadenw ye. Bari aw bɛ koo minw yera, ne b'a fɔ aw ye ko kira caaman ni masacɛ caaman tun b'a fɛ k'o ye, nga u ma se k'o ye. Aw bɛ minw mɛnna, u tun b'a fɛ k'o mɛn, nga u ma se k'o mɛn.” Sariya karamɔgɔ dɔ tun b'a fɛ ka Yezu kɔrɔbɔ. O la, a wilila k'a nyininga ko: “Karamɔgɔ, ne ka kan ka mun kɛ ka hɛrɛ banbali sɔrɔ?” Yezu fana y'ale nyininga ko: “Mun fɔra sariya sɛbɛ kɔnɔ? N'i b'a kalan, i b'o faamu cogo di?” A y'a jaabi ko: “I ka i Matigi Ala kanu n'i dusukun bɛɛ ye, ani e nii bɛɛ ye, n'i fanga bɛɛ ye, ani e hakili bɛɛ ye. I ka i mɔgɔnyɔgɔn kanu i n'a fɔ i b'i yɛrɛ kanu cogo min na.” Yezu y'a fɔ a ye ko: “I ka jaabili nyana. A kɛ o cogo la, i bɛna hɛrɛ banbali sɔrɔ.” Nga sariya karamɔgɔ nin tun b'a fɛ ka joo di a yɛrɛ ma. O la, a ye Yezu nyininga ko: “Jon le ye ne mɔgɔnyɔgɔn ye?” Yezu y'a jaabi ko: “Cɛɛ dɔ tun bɔra Zeruzalɛmu n'a bɛ taara Zeriko. K'a to sira kan, benkannikɛlaw girinn'a kan, k'a ka faniw n'a bololafɛnw bɛɛ bɔsi a la, ka tila k'a bugɔ fɔɔ k'a kirin. U sɔrɔla ka taa k'a to yen sira kan. O y'a sɔrɔ sarakalasebaga dɔ tun b'o sira kelen kan ka na. A ye cɛɛ mandiminin ye tuma min na, a faranna ka tɛmɛ sira faan dɔ fɛ. Levi kɔmɔgɔw dɔ fana nana se o cɛɛ ma, a y'a ye ka tɛmɛ sira faan dɔ fɛ. Nga Samarika dɔ dugutaatɔ nana se cɛɛ nin ma, a y'a ye minkɛ, a hinɛ donn'a la kosɛbɛ. A gwɛrɛl'a la k'a ka jolidaw ko, ka fura kɛ u la, k'u siri. O kɔ, a y'a ta k'a la a ka fali kan ka taa n'a ye lonan jigiyɔrɔ dɔ la, k'a janto a la yen. O dugusagwɛ, a ye deniye wari fila di jatigicɛ ma k'a fɔ a ye ko a k'a janto a la. Ko n'a ye musaka minw kɛ ka tɛmɛ wari hakɛ nin kan, ko n'ale kɔsegira tuma min na, ko ale bɛna o sara a ye.” Yezu sɔrɔla ka sariya karamɔgɔ nin nyininga ko: “Benkannikɛlaw ye cɛɛ min mandimi wo, e ka miiri la, mɔgɔ saba nunu jumɛn y'o cɛɛ mɔgɔnyɔgɔn ye?” A y'a jaabi ko: “A hinɛ donna min na, o le y'a mɔgɔnyɔgɔn ye.” Yezu ko a ma: “I fana ka taa o nyɔgɔn kɛ.” K'u to taama na, Yezu sera dugu dɔ kɔnɔ n'a ka kalandenw ye. U jigira muso dɔ fɛ min tɔgɔ ko Marita. Marita ka dɔgɔmuso tun bɛ yen n'o tɔgɔ ko Mariyamu. Ale taara sigi Matigi gɛrɛfɛ ka to k'a ka kalan lamɛn. Gwabaaraw kɛnin tun bɛ ka Marita degun. A nan'a fɔ Yezu ye ko: “Matigi, n dɔgɔmuso bɛ sigi ka ne kelen to baara la, o ka nyi wa? I t'a fɔ a ye ko a ka wili ka na n dɛmɛ wa?” Nga Matigi y'a jaabi ko: “Marita, Marita, i bɛ boliboli k'i hakili nyagami koo caaman na gwansan, k'a sɔrɔ mɔgɔ mako bɛ fɛɛn kelen dama le la. Mariyamu y'o le ta, mɔgɔ si tɛna se ka min bɔsi a la.” Loon dɔ, Yezu tun bɛ Ala dali la yɔrɔ dɔ. A tilara tuma min na, a ka kalandenw kelen y'a fɔ a ye ko: “Matigi, an dege Ala dali la i n'a fɔ Zan y'a taw dege cogo min na.” A y'a fɔ u ye ko: “N'aw bɛ Ala dali tuma min na, aw k'a fɔ ko: ‘An Faa, i sago ka kɛ. I ka kɛ an ka masa ye. An sɔn n'an ka makoya dumuni ye loon o loon. I ka hakɛ to an ye, bari an fana bɛ hakɛ to an hakɛ tabagaw ye. An kisi kojugu ma.’ ” Yezu y'a fɔ u ye tugu ko: “Ni aw dɔ taar'a tericɛ fɛ dugutilama k'a fɔ a ye ko: ‘N teri, nya ne ma ni burukun saba ye, bari ne tericɛ dɔ bɔra dugu la ka na n fɛ, dumunifɛn foyi tɛ n fɛ k'a d'a ma,’ n'a teri nin tora soo kɔnɔ k'a jaabi ko: ‘Kana n tɔɔrɔ, daa sɔgɔra ka ban, ne ni n deenw lara fana, ne tɛ se ka wili ka buru d'i ma,’ ne b'a fɔ aw ye ko n'a ma wili k'a d'a ma teriya kɔsɔn, a bɛna wili k'a makoyafɛn bɛɛ d'a ma, bari a tericɛ b'a la k'a tɔɔrɔ. “Ayiwa, ne b'a fɔ aw ye ko aw k'aw ka makoyafɛn dali Ala fɛ, a bɛna o d'aw ma. Aw mako bɛ fɛɛn min na, aw k'o nyini, aw bɛn'o sɔrɔ. Aw ka daa kɔkɔ, daa bɛna yɛlɛ aw ye, bari mɔgɔ o mɔgɔ mana a makoyafɛn dali Ala fɛ, Ala bɛna o di o tigi ma, min mana a makoyafɛn nyini, o tigi bɛn'o sɔrɔ. Daa bɛna yɛlɛ daa kɔkɔbaga ye. Denfa jumɛn bɛ sɔn ka saa di a deen ma, k'a sɔrɔ deen ye jigɛ dali a fɛ? Walima denfa jumɛn bɛ sɔn ka bunteni di a deen ma, k'a sɔrɔ deen ye sisɛfan le dali a fɛ? Aw minw ka jugu, n'aw bɛ sɔn ka fɛnnyuman di aw ka deenw ma, aw Faa min bɛ arijana na, ale tɛna Nii Senuman di a dalibagaw ma ka tɛmɛ aw ka fɛɛn ditaw kan wa?” Yezu ye cɛɛ dɔ kɛnɛya jina tun y'o min kɛ bobo ye. O jina bɔra cɛɛ la tuma min na, a y'a daminɛ ka kuma fɔɔ jama kabakoyara. Nga u dɔw y'a fɔ ko Yezu bɛ jinaw gwɛnna jinaw ka kuntigi Belezebuli le barika la. Dɔw tun b'a fɛ ka Yezu kɔrɔbɔ, o la, u y'a fɔ a ye ko a ka kabako dɔ kɛ min bɛna kɛ taamasinyɛ ye k'a yira ko a ka sebagaya bɛ bɔ Ala fɛ. Yezu y'u ka miiriya lɔn minkɛ, a y'a fɔ u ye ko: “Ni jamana min mɔgɔw bɛ nyɔgɔn kɛlɛ, o jamana nin tɛ se ka nya. U ka soow bɛna ci. O tuma na, ni Sutana wilila a yɛrɛ kama, a ka masaya bɛna se ka taa nya cogo di? Bari aw b'a fɔra ko jinaw ka kuntigi Belezebuli le bɛ see dira ne ma ka se ka jinaw gwɛn. Aw ko ne bɛ jinaw gwɛn Belezebuli barika la, o tuma na, aw ka kalandenw bɛ u gwɛn jon barika la? Olu yɛrɛ bɛna aw jalaki aw ka kuma nunu kɔsɔn. Nga ni ne bɛ jinaw gwɛn Ala barika la, o b'a yira ko Ala sera aw ma n'a ka masaya ye. “Ni maramanfɛn bɛ cɛɛ barikaman bolo n'a b'a ka soo kɔlɔsira, a ka soo kɔnɔ fɛɛnw bɛɛ bɛ sutara la. Nga ni cɛɛ wɛrɛ cunna ale kan min fanga ka bon n'a ta ye, o b'a ka maramanfɛn bɔsi a la, a jigi lanin tun bɛ o min kan. O la, a b'a ka soo kɔnɔ fɛɛnw bɛɛ cɛ k'u di mɔgɔ wɛrɛw ma. “Mɔgɔ min tɛ ne nyiin ye, o ye ne jugu le ye. Mɔgɔ min tɛ ne dɛmɛ ka nyani kɛ, o tigi bɛ cɛnni le kɛ. “Ni jina gwɛnna ka bɔ cɛɛ dɔ la, a bɛ taa yaalayaala kongo kɔnɔ, janko ka lafinyɛyɔrɔ nyini yen. N'a m'o sɔrɔ, a b'a fɔ ko ale bɛna segi a bɔyɔrɔkɔrɔ la. N'a segira tuma min na, a bɛ taa o yɔrɔ sɔrɔ a labɛnnin lo i n'a fɔ mɔgɔ ye boon furan ka kɛ cogo min na. O la, a bɛ taa jina wolonwula wele, o minw ka fari n'ale ye. U bɛ na don cɛɛ la. Cɛɛ ka koow bɛna juguya ka tɛmɛ a ka fɔlɔtaw kan.” Yezu y'o kuma nunu fɔ ka ban minkɛ, muso dɔ y'a kaan kɔrɔ ta jama cɛma k'a fɔ a ye ko: “Muso min y'i wolo, o ye dubaden ye.” Nga Yezu y'a jaabi ko: “Mɔgɔ min bɛ Ala ka kuma lamɛn, k'a labato, o le ye dubaden ye.” Jama tun bɛ cayara Yezu kɔrɔ minkɛ, a y'a fɔ u ye ko: “Bii mɔgɔw ka jugu. U bɛ kabako le fɛ. Nga foyi tɛna kɛ ka yira u la ni kira Zonasi ta dɔrɔn tɛ. Zonasi kɛra taamasinyɛ ye Ninivukaw fɛ cogo min na, Mɔgɔ Dencɛ fana bɛna kɛ taamasinyɛ ye bii mɔgɔw fɛ ten. Kiti tigɛlon na, worodugu nyafan fɛ masamuso bɛna bii mɔgɔw jalaki, bari a bɔra fɔɔ dugukolo daan na ka na Solomani ka hakilitigiya kumaw lamɛn. Ayiwa, mɔgɔ bɛ yan min hakili ka bon ni Solomani ta ye. Kiti tigɛlon na, Ninivukaw bɛna bii mɔgɔw jalaki, bari Zonasi ye waajuli min kɛ Ninivu dugu kɔnɔ, Ninivukaw sɔnna o ma. U nimisara ka faran u ka kojuguw la. Ayiwa, mɔgɔ bɛ yan min ka bon ni Zonasi ye. “Mɔgɔ si tɛ lanpan mana k'a bila yɔrɔdogonin na walima gongo jukɔrɔ, nga a b'a bila sanfɛ le janko mɔgɔ minw bɛ don soo kɔnɔ, u ka yeli kɛ. “Mɔgɔ nyaa kɛra i n'a fɔ a fari ka lanpan. N'i nyaa ma cɛn, i bɛ yeli kɛ. Nga n'i nyaa cɛnna, i tɛ yeli kɛ. O cogo la, i ka kɔlɔsili kɛ n'o y'a sɔrɔ n'i kɔnɔ gwɛnin lo walima n'a finnin lo. N'a gwɛnin lo, ni dibi yɔrɔ t'a la, i kɛra yeelen ye i n'a fɔ lanpan bɛ yeelen bɔ mɔgɔ ye cogo min na.” Yezu tilara a ka kuma na tuma min na, Farizinyɛ dɔ y'a nyini a fɛ ko a ka taa dumuni kɛ ale ka soo. A taara se, a sigira dumuni na. Farizinyɛ nin y'a kɔlɔsi k'a ye ko Yezu m'a tigɛ ko ka kɛnyɛ n'u ka landa ye ka sɔrɔ ka sigi dumuni na, o y'a kabakoya. Matigi y'a fɔ a ye ko: “Aw Farizinyɛw kɔni bɛ ten. Aw bɛ jifilenw ni tasaw kɔɔ ko k'u saniya, k'a sɔrɔ benkanni ani juguya le fanin bɛ aw kɔnɔ. Naloman nunu! Ala min ye kɛnɛmala dilan, o tuma na ale ma kɔnɔna fana dilan wa? Aw k'aw bololafɛnw di saraka ye faantanw ma, o la, aw ka koo bɛɛ saniyanin bɛna to. “Aw, Farizinyɛw, bɔnɛ ye aw ta ye, bari aw bɛ jija ka nanaye ni nanfuraburu sifa bɛɛ jaka bɔ. Ala bɛ tilenninya ni kanuya minw fɛ, aw b'olu to yen, o minw koo ka gwɛlɛ a ma kosɛbɛ, aw ka kan ka olu le sira taama fɔlɔ ka sɔrɔ ka tɔw kɛ. “Aw, Farizinyɛw, bɔnɛ ye aw ta ye, bari aw bɛ sigiyɔrɔnyumanw le fɛ Alabatosow kɔnɔ, aw b'a fɛ mɔgɔw k'aw fo forobayɔrɔw la i n'a fɔ u bɛ mɔgɔba fo cogo min na. Bɔnɛ ye aw ta ye, bari aw kɛra i n'a fɔ kaburuw, mɔgɔw bɛ taama minw kan n'u nyaa tɛ se k'u ye.” O la, sariya karamɔgɔ dɔ y'a fɔ Yezu ye ko: “Karamɔgɔ, n'i kumana ten, i bɛ don anw fana gasi la.” A y'a jaabi ko: “Bɔnɛ ye aw sariya karamɔgɔw fana ta ye, bari aw bɛ mɔgɔw bila doni gwiliman nyun na, k'a sɔrɔ aw t'u dɛmɛ hali dɔɔni yɛrɛ a nyunni na. Aw faaw ye kira minw faga, aw minw bɛ olu kaburuw lalaga k'u lɔ sisan, bɔnɛ ye aw ta ye. Aw b'a yira o cogo la ko aw faaw tun ye min kɛ, k'olu bɛnna aw ma, bari, olu ye kiraw faga, aw bɛ u kaburuw lɔ. O le y'a to Ala tun y'a fɔ ko ale bɛna kiraw ni cidenw ci aw ma. Ko aw bɛna u dɔw faga, k'u dɔw bila tɔɔrɔ la. O seen fɛ, bii mɔgɔw bɛna kiti kiraw ka jolibɔnninw kama, olu joli min bɔnna kabini dinyɛ daminɛtuma na, k'a daminɛ Abɛli ka jolibɔnnin ma fɔɔ ka n'a bila Zakari ta ma, u ye ale min faga Alabatosoba yɔrɔ senuman ni sarakabɔlan furancɛ la. Tinyɛ na, n b'a fɔ aw ye ko bii mɔgɔw bɛna nyininga o bɛɛ la. “Aw sariya karamɔgɔw, bɔnɛ ye aw ta ye, bari aw b'aw yɛrɛ jati tinyɛlɔnbagaw ye k'a sɔrɔ aw t'a lɔn. Minw b'a fɛ ka tinyɛ lɔn, aw t'a to olu fana k'a lɔn.” Yezu bɔra o yɔrɔ la tuma min na, sariya karamɔgɔw ni Farizinyɛw dimina a kɔrɔ kosɛbɛ. U tun b'a nyinina ni dabari sifa bɛɛ ye. O la, u tun b'a nyininga koo caaman na, janko n'a ka jaabili ma nya, u k'a sɔrɔ. O tuma na, jamaba taara lajɛn fɔɔ u tun bɛ nyɔgɔn seen dɔn cayakojugu fɛ. Yezu y'a daminɛ k'a fɔ a ka kalandenw ye fɔlɔ ko: “Aw k'aw yɛrɛ kɔlɔsi Farizinyɛw ka miiriya n'u ka nanbarankow nyɔgɔn ma. Fɛɛn o fɛɛn dogonin bɛ, o bɛɛ bɛna ye. Gundo si tɛ yen min tɛna bɔ kɛnɛ kan, bari aw mana fɛɛn o fɛɛn fɔ dibi la, o bɛ nana mɛn kɛnɛma. Aw mana fɛɛn o fɛɛn fɔ nyɔgɔn tulo kɔrɔ soo kɔnɔ, o wango bɛna la sanbon kan. “Aw minw ye ne teriw ye, ne b'a fɔ aw ye ko mɔgɔ minw bɛ mɔgɔ faga n'u tɛ se ka dɔ wɛrɛ kɛ a la o kɔ, aw kana siran olu nya. Aw ka kan ka siran min nya, ne bɛna o fɔ aw ye. See bɛ Ala min ye ka mɔgɔ nii minɛ, o kɔ, a bɛ se k'a fili jahanama kɔnɔ, aw ka siran ale dɔrɔn nya. “Mɔgɔ tɛ kɔnɔnin duuru feere pɔpɔrɔ fila la wa? K'a sɔrɔ Ala tɛ nyina olu si kɔ. Hali aw kunsigi, Ala b'o daa lɔn. O la, aw kana siran, Ala b'aw jati ka tɛmɛ kɔnɔninw kan. “Ne b'a fɔ aw ye ko ni mɔgɔ o mɔgɔ sɔnna k'a fɔ mɔgɔw nyana ko ale ye Mɔgɔ Dencɛ ka mɔgɔ ye, Mɔgɔ Dencɛ fana bɛn'a fɔ Ala ka mɛlɛkɛw nyana k'o tigi ye a ka mɔgɔ ye. Nga ni mɔgɔ o mɔgɔ banna ne la mɔgɔw nyana, ne fana bɛna ban o tigi la Ala ka mɛlɛkɛw nyana. “Mɔgɔ o mɔgɔ mana Mɔgɔ Dencɛ tɔgɔ cɛn, o tigi bɛna o yafa sɔrɔ. Nga ni mɔgɔ min ye Nii Senuman tɔgɔ cɛn, o tigi tɛna o kɔni yafa sɔrɔ. “N'u y'aw minɛ tuma min na ka taa n'aw ye Alabatosow kɔnɔ, walima kititigɛlaw fɛ, walima faamaw nyafɛ, aw bɛna min kɛ k'u jaabi, walima aw bɛna min fɔ ka tinyɛ sɔrɔ, aw hakili kana nyagami o koo la. Nii Senuman bɛna aw ka fɔta don aw daa la o yɔrɔnin bɛ la.” Cɛɛ dɔ y'a kaan to Yezu ma jama cɛma ko: “Karamɔgɔ, a fɔ n kɔrɔcɛ ye ko a k'a to an b'an faa cɛɛn tilan.” Yezu y'a jaabi ko: “Cɛɛ, jon ye ne sigi ka kɛ aw ka koow kititigɛla ye? Walima ka kɛ aw ka cɛɛn tilanbaga ye?” O kɔ, Yezu y'a fɔ jama ye ko: “Aw k'aw yɛrɛ kɔlɔsi nafolo koo hamikojugu ma, bari hali ni nafolo ka ca mɔgɔ fɛ cogo o cogo, o tɛ se ka kɛ a tigi nii suturanin ye.” O la, a ye talen la u ye ko: “Nafolotigi dɔ tun bɛ yen, a ka foro nyana kosɛbɛ. A y'a fɔ a yɛrɛ kɔnɔ ko: ‘Ne bɛna n ka suman don yɔrɔ min na, o tɛ yen. Ne do bɛna mun kɛ?’ O kɔ, a y'a fɔ ko: ‘Ne bɛna min kɛ, ne y'o lɔn. Ne bɛna n ka bondow ci, ka belebelebaw lɔ. O la, ne bɛna n ka suman ni n ka bololafɛnw bɛɛ lajɛn olu kɔnɔ. O kɔ, n bɛ lafinyɛ, ka dumuni kɛ, ka minni kɛ, ka n nisɔn diya, bari saan damani dumunifɛn bɛ n fɛ ka ban.’ Nga Ala y'a fɔ a ye ko: ‘I naloman, bii suu nin na yɛrɛ, n bɛna n ka kalifa minɛ i la. O tuma na, i ye nafolo min bɛɛ lajɛn ka sɔrɔ, o bɛna kɛ jon ta ye?’ ” Yezu y'a fɔ ko: “Mɔgɔ min bɛ nafolo lajɛn k'o kɛ a jigi ye, ka Ala to yen, Ala nyana, o tigi ye faantan ye, nin nyɔgɔn le b'o tigi sɔrɔ.” O kɔ, Yezu y'a fɔ a ka kalandenw ye ko: “O kama n b'a fɔ aw ye ko aw ka dumuni koo, walima aw fɛɛrɛbɔko, o minw y'aw ka fari makoyafɛnw ye, aw kana jɔɔrɔ olu koo la, bari aw nii koo ka gwɛlɛ ni dumuniko ye, aw fari koo ka gwɛlɛ ni fani koo ye. Aw ye kaankaanw ka koo jati ta k'a filɛ. U tɛ danni kɛ, u tɛ suman tigɛ. Bondo t'u fɛ. Nga Ala b'u balo. Aw man fisa n'o kɔnɔw ye wa? Aw jon bɛ se ka tile kelen dama fara a yɛrɛ sii kan a ka koo jɔɔrɔtaw sababu fɛ? Ayiwa, koo min ye kofitini ye, n'aw tɛ se k'o kɛ, mun na aw bɛ koo tɔw jɔɔrɔ? Aw ka waga kɔnɔ feerenw ka cɛnya filɛ. U tɛ baara kɛ, u tɛ fani dan u yɛrɛ ye. Ayiwa, ne b'a fɔ aw ye ko masacɛ Solomani n'a ka faamaya bɛɛ, a ma fani sɔrɔ min ka cɛnya tun ye feeren nunu ta bɔ. O feeren minw bɛ kongo la, olu ka cɛnya bɛ bɔ Ala fɛ, k'a sɔrɔ tasuma bɛna u jɛni sini. Ala tɛn'a janto aw ka fani koo la wa? Jigitan nunu! “Aw bɛna fɛɛn min dumu, walima aw bɛna fɛɛn min min, aw kana aw hakili nyagami o sɔrɔko la. Alalɔnbaliw le bɛ o fɛɛnw bɛɛ nyini ka nyini. Nga aw Faa b'aw makoyafɛnw lɔn. Ayiwa, aw kɔni ka jija Alako la fɔlɔ, n'o kɛra, Ala bɛna fɛɛn tɔw d'aw ma. “Aw kɛra i n'a fɔ sagakulufitini. O n'a ta bɛɛ, aw kana siran, bari a diyara aw Faa ye k'a ka masaya d'aw ma. “Aw k'aw bololafɛnw feere k'a wari tilan faantanw cɛ. Nafolo min bɛ Ala fɛ sankolo la, aw k'o nyini. O nafolo nin tɛ cɛn ka ye, a tɛ ban, soonw tɛ se yen, bagabaga tɛ se k'a cɛn. Aw ka nafolo maranin bɛ yɔrɔ min na, aw ka miiriya bɛ o yɔrɔ le la fana. “Aw k'aw cɛɛ siri, k'aw ka lanpan mananin minɛ aw bolo. Aw ka kɔnɔni kɛ i n'a fɔ baaraden dɔw, minw b'u ka kuntigi kɔsegitɔ kɔnɔna ka bɔ kɔnyɔya kɛyɔrɔ la. N'a kɔsegira tuma o tuma ka daa gosi, u bɛ daa yɛlɛ a ye. Tinyɛ na, ne b'a fɔ aw ye ko, ni baaraden minw ka kuntigi kɔsegitɔ nana u sɔrɔ kɔnɔni na, u ka kuntigi yɛrɛ bɛna baara kɛ faniw don ka dumuni koo nyanabɔ u ye. N'u ka kuntigi kɔsegira dugutilama, walima dondo kasituma na ka n'u sɔrɔ kɔnɔni na, u bɛna nisɔndiya. Aw b'a lɔn ko ni sotigi tun bɛ soon na waati lɔn, a tun bɛn'a bali ka don soo kɔnɔ. Aw labɛnnin ka kan ka to tuma bɛɛ, bari, aw tɛ miiri waati min koo la, o waati la, Mɔgɔ Dencɛ bɛna na.” O tuma na, Piyɛri ye Yezu nyininga ko: “Matigi, i ka talen nin nyaa sinnin bɛ anw kalandenw le ma wa, walima mɔgɔ bɛɛ lo?” Matigi y'a jaabi ko: “Baaraden kuntilennin hakiliman jumɛn bɛ yen, n'a ka kuntigi y'a ka nafolo nyamɔgɔya don a bolo janko a bɛ baaraden tɔw ka dumuni d'u ma a dituma na n'a tɛ a kɛ? N'a ka kuntigi kɔsegira ka na a sɔrɔ a b'o baara nin na, baaraden nin bɛna bonya sɔrɔ. Tinyɛ na, n b'a fɔ aw ye ko a ka kuntigi bɛn'a ka nafolo bɛɛ le nyamɔgɔya don a bolo. Nga ni baaraden nin miirila ko a ka kuntigi tɛna kɔsegi joona, o la, ni ale y'a daminɛ ka to k'a tɔnyɔgɔn baaradenw bugɔ, ka to dumunibaba la, ani ka to dɔrɔbaba min na, a hakili tɛ loon min, ni waati min na dɛ, a ka kuntigi bɛna kɔsegi o loon na le. A bɛna o baaraden nin halaki pewu, k'a jati mɔgɔ tilenbaliw fɛ. “Baaraden min b'a ka kuntigi ka sago lɔn, n'a tɛ jija k'o kɛ, a ka kuntigi bɛn'a bugɔ kosɛbɛ. Nga ni baaraden min t'a ka kuntigi ka sago lɔn, n'a ye kokolon dɔ kɛ min b'a bugɔkun bɔ, a ka kuntigi bɛn'a bugɔ dɔɔni dɔrɔn. O la, Ala ye fɛɛn caaman di mɔgɔ min ma, a bɛna caaman nyini o tigi fɛ. A ye fɛɛn caaman kalifa min ma, a bɛna caaman koo nyininga o tigi fɛ. “Ne nana ni tasuma le ye dinyɛ na. N b'a fɛ o tasuma nin ka mana kabini sisan. Tɔɔrɔ dɔ bɛna ne sɔrɔ, ni n m'a sɔrɔ n dusu tɛ suma. “Aw nyana ko ne nana bɛɛn le sigi mɔgɔw ni nyɔgɔn cɛ wa? Ayi! Ne b'a fɔ aw ye ko ne nana bɛnbaliya le don u ni nyɔgɔn cɛ. O le y'a to kabini sisan, soo min kɔnɔ mɔgɔw ye duuru ye, u bɛna faran. Mɔgɔ saba bɛna wili mɔgɔ fila kama. Mɔgɔ fila bɛna wili mɔgɔ saba kama. Faa bɛna wili a dencɛ kama, dencɛ bɛna wili a faa kama. Baa bɛna wili a denmuso kama, denmuso bɛna wili a baa kama. Bamuso bɛna wili a yɛrɛ dencɛ muso kama, dencɛ muso bɛna wili a biranmuso kama.” Yezu y'a fɔ jama ye fana ko: “Ni aw ye sankaba wilitɔ ye kɔrɔn fɛ, aw b'a fɔ o yɔrɔnin bɛ ko saan bɛna na. A do bɛna na tinyɛ na. Ni fɔnyɔ bɛ fiyɛra ka bɔ kɔgɔdugu nyafan fɛ, aw b'a fɔ ko yɔrɔ bɛna wusu. A do bɛna kɛ tinyɛ na. Taamasinyɛ minw bɛ ye sankolo la ni dugukolo kan, aw bɛ se ka olu kɔrɔ lɔn. Ala bɛ koo minw kɛra aw cɛma sisan, mun na aw tɛ olu kɔrɔ lɔn? Naloman nunu! “Mun na aw tɛ miiri aw yɛrɛ ma ka konyuman kɛ? Ni mɔgɔ dɔ b'a fɛ ka taa n'i ye faamaso, i k'i jija ka bɛɛn nyini n'o tigi ye n'aw ma se faamaw fɛ, janko a kana taa i don faamaw bolo, olu kana i don polisiw bolo, polisiw kana i don kaso la. N b'a fɔ i ye ko i tɛna bɔ kaso la n'i m'o tigi ka juru bɛɛ sara ka ban.” O waati la, Pilati tun ye Galileka dɔw nii bɔ k'u to begɛnw faga la Ala ye. Mɔgɔ dɔw nana o lakali Yezu ye. Yezu y'a fɔ u ye ko: “Aw bɛ miiri k'o Galileka nunu sara ten bari u tun bɛ kojugu kɛ ka tɛmɛ Galileka tɔw bɛɛ kan wa? Ne b'a fɔ aw ye ko tinyɛ t'o ye. Ni aw ma nimisa ka faran aw ka kojuguw la, aw bɛɛ bɛna halaki fana. Silowe ciin sangaso benna mɔgɔ tan ni seegi minw kan k'u faga, aw bɛ miiri ko olu tun ye kojugukɛlaw ye ka tɛmɛ Zeruzalɛmuka tɔw bɛɛ kan wa? Ne b'a fɔ aw ye ko tinyɛ t'o ye. Ni aw ma nimisa ka faran aw ka kojuguw la, aw bɛɛ bɛna halaki fana.” O kɔ, Yezu ye talen nin la u ye ko: “Torosun tun bɛ cɛɛ dɔ fɛ a ka foro la. Loon dɔ, a taara toro nyini a la, nga a ma foyi sɔrɔ. O loon nin na, a y'a fɔ a ka baaraden ye ko: ‘Ne saan saba filɛ nin ye, ne bɛ na toro nyini torosun nin na, ne tɛ foyi sɔrɔ a la. A tigɛ. Kuun t'a la a ka to foro kɔnɔ gwansan.’ Nga baaraden y'a jaabi ko: ‘A to nyinan tugu. Ne bɛna dingɛ sogi k'a lamini ka nɔgɔ kɛ a kɔrɔ. Ni o kɛra, n'a sɔrɔ a bɛna deen kɛ saan wɛrɛ. N'a ma deen kɛ, i bɛn'a tigɛ.’ ” Lafinyɛlon dɔ la, Yezu tun bɛ mɔgɔw kalanna Alabatoso dɔ kɔnɔ. Muso dɔ tun bɛ o yɔrɔ la, jinabana tun b'a la kabini saan tan ni seegi. Bana nin tun y'a kɔɔ kuru, a tun tɛ se ka tilen ka lɔ. Yezu y'a ye tuma min na, a y'a wele k'a fɔ a ye ko: “Muso, i kɛnɛyatɔ filɛ nin ye.” Yezu y'a bolo la muso kan. O yɔrɔnin bɛ, a kɔɔ tilenna, a y'a daminɛ ka Ala tando. Nga Alabatoso kuntigi dimina bari Yezu ye mɔgɔ kɛnɛya lafinyɛlon na. A ye kuma ta k'a fɔ jama ye ko: “An ka kan ka baara kɛ tile wɔɔrɔ kɔnɔ. Aw ka na o loonw na, a k'aw kɛnɛya. Aw kana na lafinyɛlon na.” Matigi y'a fɔ ko: “Aw ye nanbaranmɔgɔw le ye! Lafinyɛlon na, aw bɛɛ kelen kelen tɛ aw ka misi, walima aw ka fali foni ka taa u sɔn jii la wa? Muso nin min buruju bɔra Ibrayima na, ni Sutana tun y'a siri ni bana ye kabini saan tan ni seegi, a tun ma daga k'o muso kɛnɛya lafinyɛlon na wa?” Yezu ye kuma nin fɔ tuma min na, a juguw bɛɛ maloyara. Jama bɛɛ nisɔn tun ka di Yezu ka kabakokɛninw kɔsɔn. Yezu y'a fɔ tugu ko: “Ala ka masaya bɔnin bɛ mun fɛ? Ne bɛn'a kɛnyɛ ni mun ye? A bɛ i n'a fɔ mutaridikisɛ cɛɛ dɔ ye min ta k'a dan a ka nankɔ la. A falenna ka bonya ka kɛ yiri ye. Kɔnɔw ye u ka nyagaw la a bolow kan.” Yezu taara nya ni kuma ye k'a fɔ ko: “Ne bɛna Ala ka masaya ni mun kɛnyɛ tugu? A bɔnin bɛ burufununan fɛ muso dɔ ye min ta k'a kɛ farinimugu fiyɛ nyaa kelen na k'a nɔɔni. Tuma dɔɔni o kɔ, a bɛɛ fununa.” Yezu taatɔ Zeruzalɛmu, a tun bɛ duguba ni dugudenninw cɛɛ tigɛ, an'a bɛ mɔgɔw kalanna. Mɔgɔ dɔ y'a nyininga ko: “Matigi, mɔgɔ caaman tɛna kisi wa?” A y'a jaabi ko: “Aw ye jija ka don ni dafitini ye bari ne b'a fɔ aw ye ko mɔgɔ caaman bɛna cogo nyini ka don, nga u tɛna se. “Ni sotigi wilila ka daa sɔgɔ tuma min na k'aw to kɛnɛma, aw bɛn'a daminɛ ka daa kɔkɔ k'a fɔ ko: ‘Matigi, daa yɛlɛ an ye.’ A bɛna aw jaabi ko a t'aw bɔyɔrɔ lɔn. “O tuma na, aw bɛn'a fɔ a ye ko aw ye dumuni kɛ n'a ye, ko a y'aw kalan aw ka dugu forobayɔrɔw la. A bɛn'a fɔ aw ye tugu ko ale t'aw bɔyɔrɔ lɔn, ko aw ka taa ka bɔ yan, kojugukɛla nunu. “O yɔrɔ la, n'aw ye Ibrayima, ni Isiyaka, ani Yakuba ani kiraw bɛɛ ye arijana na tuma min na, k'a sɔrɔ aw tonin bɛ kɛnɛma, o tuma na, aw bɛna kasi k'a fɔ ko ni aw tun y'a lɔn. Mɔgɔ dɔw bɛna na ka bɔ kɔrɔn, ni tileben, ani kɔgɔdugu nyafan, ni worodugu fɛ. U bɛna sigi dumuni na masa Ala ka soo. “O tuma na, kɔmɔgɔ dɔw bɛna kɛ nyamɔgɔw ye, nyamɔgɔ dɔw bɛna kɛ kɔmɔgɔw ye.” O tuma na, Farizinyɛ dɔw gwɛrɛla Yezu la k'a fɔ a ye ko: “Taa yɔrɔ wɛrɛ ka yan bila, bari Erɔdi b'a fɛ k'i faga.” Yezu y'u jaabi ko: “Aw ka ta'a fɔ o nanbaranmɔgɔ nin ye ko ne bɛ jinaw gwɛn ka bɔ mɔgɔw la, ka banabagatɔw kɛnɛya bii ni sini, ani a tile sabanan loon, ne bɛna tila n ka baara la. Nga wajibi lo ne ka taa ni n ka sira ye bii ni sini ani sinikɛnɛ, bari a bɛnnin tɛ kira ka faga yɔrɔ wɛrɛ Zeruzalɛmu kɔ. “Zeruzalɛmukaw, Zeruzalɛmukaw, aw minw bɛ kiraw faga, ka Ala ka cidenw bon ni kabakuruw ye k'u faga, sinyɛ joli ne tun b'a fɛ k'aw lajɛn n kɔrɔ i n'a fɔ sisɛ b'a deenw lajɛn a gamanw kɔrɔ cogo min na, nga aw ma sɔn! Ayiwa, aw ka dugu bɛna to aw ye. Ne b'a fɔ aw ye ko aw tɛna ne ye tugu fɔɔ loon min na aw bɛn'a fɔ ko: ‘Min natɔ filɛ Matigi tɔgɔ la, Ala ka barika don a la.’ ” Lafinyɛlon dɔ la, Yezu taara Farizinyɛw ka kuntigi dɔ ka soo ka dumuni kɛ yen. Mɔgɔ minw tun bɛ yen, olu tun b'a kɔlɔsira. Cɛɛ dɔ tun bɛ Yezu nyafɛ, funubana tun b'a la. Yezu ye kuma ta ka sariya karamɔgɔw ni Farizinyɛw nyininga ko: “A daganin bɛ ka banabagatɔ kɛnɛya lafinyɛlon na wa, walima a daganin tɛ?” Nga u m'a jaabi. O tuma na, Yezu magara banabagatɔ nin na k'a kɛnɛya. O kɔ, a y'a fɔ a ye ko a bɛ se ka taa. A sɔrɔla k'a fɔ u ye ko: “Jon le bɛ yan aw cɛma n'a dencɛ, walima a ka misi benna kɔlɔn na lafinyɛlon na, n'a tɛna o bɔ joona?” U ma se ka o nyiningali jaabi. Ka Yezu to o dumunikɛyɔrɔ nin na, mɔgɔ minw tun welela yen fana, a ye ladili di olu ma, bari a tun y'a kɔlɔsi k'a ye ko mɔgɔ nunu bɛ sigiyɔrɔnyuman le nyinina. O la, a y'a fɔ u ye ko: “Ni mɔgɔ dɔ y'i wele kɔnyɔ dumuni na, i kana taa sigi sigiyɔrɔnyuman na. E bɛ ta'a sɔrɔ tuma dɔ ko mɔgɔ wɛrɛ welela min ka fisa i ye. Mɔgɔ min y'aw fila bɛɛ wele, ni ale nana k'a fɔ i ye ko i ka wili ka sigiyɔrɔ nin d'a ma, o tuma na, i bɛna wili ni maloya ye, ka taa sigi mɔgɔ bɛɛ kɔfɛ. Nga n'i welela o nyɔgɔn na, taa sigi kɔfɛ sigiyɔrɔ la, waasa n'i welebaga nana tuma min na, a k'a fɔ i ye ko: ‘Ne teri, na sigi nyafɛ.’ O cogo la, i bɛna kunkɔrɔta sɔrɔ i dumunikɛnyɔgɔnw nyana. Mɔgɔ o mɔgɔ b'a yɛrɛ bonya, o bɛna dɔgɔya. Mɔgɔ o mɔgɔ b'a yɛrɛ majigi, o bɛna bonya.” Min tun ye Yezu wele dumuni na, a y'a fɔ o fana ye ko: “N'i ye dumuniba labɛn mɔgɔw ye, i kana i teriw wele, walima i badenw, walima i balimaw walima i siginyɔgɔn nafolotigiw. Bari u fana bɛ se k'i wele dumuni na k'i ta juru sara. Nga, n'i bɛna dumuniba di mɔgɔw ma, i ka faantanw ni senkelenninw ni nanbaranw ani finyɛntɔw le wele. N'i y'o kɛ, i bɛna duba sɔrɔ, bari olu tɛ se k'i ta juru sara, nga Ala bɛna i sara sini.” Dumunikɛlaw kelen ye kuma nin mɛn minkɛ, a y'a fɔ Yezu ye ko: “Mɔgɔ minw bɛna dumuni kɛ masa Ala ka soo, olu dusu bɛna diya dɛ!” Yezu y'a jaabi ko: “Cɛɛ dɔ tun ye dumuniba labɛn ka mɔgɔ caaman wele. Dumunikɛwaati sera tuma min na, a y'a ka baaraden ci ka ta'a fɔ mɔgɔweleninw ye ko: ‘Aw ka na bari dumuni bɛɛ labɛnna ka ban.’ Nga u bɛɛ ye yafa dali a fɛ kelen kelen. Mɔgɔwelenin fɔlɔ y'a fɔ baaraden ye ko: ‘Ne ye foro dɔ san, ne ka kan ka taa o filɛ. Ne b'i dali, ta'a fɔ a ye ko a ka yafa ne ma.’ Mɔgɔ wɛrɛ y'a fɔ a ye ko: ‘Ne ye sɛnɛkɛmisi tan san, ne bɛ taara baara kɛ n'u ye k'a filɛ. Ne b'i dali, ta'a fɔ a ye ko a ka yafa ne ma.’ Dɔ wɛrɛ fana y'a fɔ a ye ko: ‘Ne ye muso furu sisan, o le y'a to ne tɛ se ka na yen.’ “Baaraden kɔsegira ka taa o koow bɛɛ nyafɔ a ka kuntigi ye. A ka kuntigi dimina k'a fɔ a ye ko: ‘I ka teliya ka taa dugu forobayɔrɔw la, ani siradaw la, ka faantanw ni nanbaranw ni finyɛntɔw ani senkelenninw wele ka na n'u ye yan.’ Baaraden nin y'o kɛ ka ban tuma min na, a taar'a fɔ a ka kuntigi ye ko: ‘I ye min fɔ, ne y'o kɛ, nga soo ma fa halibi.’ O la, a ka kuntigi y'a fɔ a ye ko: ‘Bɔ ka taa dugu dafɛ nankɔw la, i mana mɔgɔ minw sɔrɔ yen, i ka koo bɛɛ kɛ u ka na, waasa ne ka soo ka fa. Ne b'a fɔ aw ye ko mɔgɔ minw tun welela, olu si tɛna ne ka dumuni nin nɛnɛ tugu.’ ” O kɔ, Yezu taatɔ dugu dɔ la, jamaba tun tugunin b'a nɔɔ fɛ. A lɔra k'a fɔ u ye ko: “Mɔgɔ o mɔgɔ bɛ na ne nɔɔ fɛ, n'a ma ne fisaya n'a faa ye, n'a baa, n'a muso, n'a deenw, n'a balimacɛw, n'a balimamusow an'a yɛrɛ fana ye, o tigi tɛ se ka kɛ ne ka kalanden ye. Ni mɔgɔ min ma sɔn tɔɔrɔ ma k'a yɛrɛ saraka ka tugu ne nɔɔ fɛ, o tigi tɛ se ka kɛ ne ka kalanden ye. “Aw cɛma ni mɔgɔ dɔ b'a fɛ ka sangaso jamanjan lɔ, a tɛ sigi fɔlɔ k'a lɔ sɔngɔ jati k'a filɛ yala n'a ka wari bɛna se k'o baara laban wa? N'o tɛ, n'a y'o sangaso juu sigi, n'a ma se k'a laban, mɔgɔ minw bɛɛ bɛna o ye, u bɛna yɛlɛ a ma, k'a fɔ ko: ‘Cɛɛ nin ye soo lɔli daminɛ, nga a ma se k'a laban.’ “Ni masacɛ dɔ b'a fɛ ka taa masacɛ dɔ wɛrɛ kɛlɛ, a bɛ sigi fɔlɔ ka miiri k'a filɛ n'a bɛ se ni mɔgɔ waa tan ye k'a jugu mɔgɔ waa mugan tigi kunbɛn. N'a tɛ se, a bɛ lasigidenw ci ka taa kɛlɛ bancogo nyini a jugu nin fɛ k'a to yɔrɔjan. O cogo la, n'aw dɔ b'a fɛ ka kɛ ne ka kalanden ye, fɔɔ a k'a ka bololafɛn bɛɛ ye k'a to yen. “Bɛɛ b'a lɔn ko kɔgɔ ye fɛnnyuman ye, nga ni kɔgɔ ka timiya bɔra a la, mun bɛna se k'a timiya tugu? O tuma na, a tɛ se ka kɛ nɔgɔ ye ka foyi nya dugukolo ye. A bɛ fili le. Mɔgɔ min b'a fɛ ka mɛnni kɛ, o ka jija k'a tulo malɔ.” Wusuruminɛlaw ni kojugukɛlaw bɛɛ tun bɛ to ka gwɛrɛ Yezu la k'a ka kuma lamɛn. Farizinyɛw ni sariya karamɔgɔw tun bɛ to ka; nunu;nunu. U tun b'a fɔ ko: “Cɛɛ nin bɛ kojugukɛlaw minɛ ka nya ka dumuni yɛrɛ kɛ n'u ye.” O la, Yezu ye talen nin la u ye ko: “Ni saga kɛmɛ bɛ aw dɔ fɛ, ni kelen tununa, a tɛna a tɔɔ bi kɔnɔntɔn ni kɔnɔntɔn nunu to kongo kɔnɔ ka taa kelen nin yaala fɔɔ k'a ye wa? N'a y'a ye tuma min na, a b'a ta k'a bila a kaan kan ni dusudiya ye. N'a kɔsegira ka see soo tuma min na, a b'a teriw n'a siginyɔgɔnw wele k'a fɔ u ye k'u ka nisɔndiya nyɔgɔn fɛ, bari ko ale y'a ka sagatununin ye. O cogo la, ne b'a fɔ aw ye ko ni kojugukɛla kelen nimisara ka faran a ka kojuguw la, mɛlɛkɛw bɛna nisɔndiya sankolo la o tigi kɔsɔn. Mɔgɔtilennin bi kɔnɔntɔn ni kɔnɔntɔn minw mako tɛ nimisali la, nisɔndiya min bɛ kɛ olu kɔsɔn, o tɛ se mɔgɔ kelen nin ta ma. “Ni darakimu wari tan bɛ muso dɔ fɛ, ni kelen tununa, a tɛna lanpan mana ka soo furan k'a yaala ka nya fɔɔ k'a ye wa? N'a y'a ye tuma min na, a b'a teriw n'a siginyɔgɔnw wele k'a fɔ u ye k'u ka nisɔndiya nyɔgɔn fɛ, bari ko ale ka darakimu wari kelen min tun tununa, k'a y'a ye. O cogo la, ne b'a fɔ aw ye ko ni kojugukɛla kelen nimisara ka faran a ka kojuguw la, nisɔndiya bɛ kɛ Ala ka mɛlɛkɛw fɛ o tigi kɔsɔn.” Yezu y'a fɔ tugu ko: “Dencɛ fila tun bɛ cɛɛ dɔ fɛ. Dɔgɔcɛman y'a fɔ a facɛ ye ko: ‘N Faa, ne bɛna min sɔrɔ i cɛɛn na, o di ne ma.’ O tuma na, facɛman y'a ka nafolo tilan u cɛ. Tile dama tɛmɛnin kɔ, dɔgɔcɛman nin ye fɛɛn minw sɔrɔ cɛɛn na, a y'u feere ka taa n'a wari ye jamanajan dɔ la, k'o bɛɛ cɛn kakalaya la. A ka wari bɛɛ banna tuma min na, kɔngɔba donna o jamana na, a ka dumuni dɛsɛra. A taara don baara la dugulen dɔ fɛ, ale y'a bila ka taa lɛɛw dɛndɛ a ka forow la. A tun b'a fɛ ka lɛɛw ka dumuni dumu kɔngɔ kɔsɔn, nga mɔgɔ si tun t'o d'a ma. A miirila o tuma na k'a fɔ a yɛrɛ kɔnɔ ko: ‘Baaraden caaman bɛ ne faa fɛ, u bɛ dumuni kɛ fɔɔ k'a tɔɔ to, ne do bɛ halakira kɔngɔ bolo yan.’ Ne bɛna wili ka taa ne faa fɛ k'a fɔ a ye ko: ‘N faa, ne ye Ala hakɛ ta, k'i fana hakɛ ta. Ne man kan ka wele ko i deen tugu. I ka ne minɛ i n'a fɔ i ka baaraden.’ A wilila k'a faso sira ta. “K'a to yɔrɔjan, a faa y'a ye, a hinɛ donna a la. A bolila ka ta'a bolow meleke a dencɛ kaan na. Deen y'a fɔ a faa ye ko: ‘N faa, ne ye Ala hakɛ ta k'i fana hakɛ ta. Ne man kan ka wele ko i deen tugu.’ Nga a faa y'a fɔ a ka baaradenw ye ko: ‘Aw ka teliya ka na ni foroca ye, min ka nyi tɔw bɛɛ ye, a b'o don. Aw ka bololanigɛ don a bolo la ka sanbara d'a ma, a b'o don. Aw ka na ni misiden tulɔnin ye k'a faga ka dumuni tobi. An b'o dumu ka nyanagwɛ, bari ne deen min filɛ nin ye, a tun tununa, a yera. A kɛra i n'a fɔ a sara ka kunun.’ U ye nyanagwɛ daminɛ. “O waati la, cɛɛ nin ka dencɛ kɔrɔba tun bɛ foro la. Ale segitɔ, a surunyana soo la tuma min na, a ye fɔlifɛnw ni dɔnsen mankan mɛn. A ye baaradenw kelen wele k'a nyininga ko mun le kɛra soo. Baaraden nin y'a jaabi ko: ‘I dɔgɔcɛ segira ka na, i faa ye misidentulɔnin faga, bari a segira kɛnɛya la.’ “O la, dencɛ kɔrɔba dimina, a tun t'a fɛ ka don soo. A faa bɔra ka ta'a dali ko a ka don. O tuma na, a y'a fɔ a faa ye ko: ‘A filɛ, ne saan caaman ye nin ye, ne bɛ baara kɛra i ye. Ne ma ban i ta ma tuma si. O n'a ta bɛɛ, i ma deli ka hali baden yɛrɛ di ne ma waasa ne ni n teriw ka nyanagwɛ nyɔgɔn fɛ. Nga i deen min filɛ nin ye, a y'i ka nafolo bɛɛ cɛn sungurubaw la. A segira ka na tuma min na, i ye misidentulɔnin faga a ye.’ Nga a faa y'a fɔ a ye ko: ‘Ne deen, i bɛ ne fɛ tuma bɛɛ, fɛɛn minw bɛɛ bɛ ne fɛ, o bɛɛ ye i ta ye. Nga an ka kan ka nisɔndiya ka nyanagwɛ, bari i dɔgɔnin min filɛ nin ye, a kɛra i n'a fɔ a sara ka kunun, a tun tununa, nga a yera.’ ” Yezu y'a fɔ a ka kalandenw ye ko: “Cɛɛ nafolotigi dɔ tun bɛ yen. A tun ye mɔgɔ dɔ ta k'a bila a ka nafolo kunna. Mɔgɔw y'o kɔrɔfɔ a ka kuntigi ye ko a b'a ka nafolo cɛn. A ka kuntigi y'a wele k'a fɔ a ye ko: ‘Ne bɛ min mɛnna i koo la, o man di. I ye baara kɛ cogo min na, o nyafɔ ne ye, bari i tɛna se ka to ne ka nafolo kunna tugu.’ O kuma mɛnnin kɔ, a y'a fɔ a yɛrɛ kɔnɔ ko: ‘Ne bɛna mun kɛ sa? Bari ne ka kuntigi bɛna ne bɔ a ka nafolo kunna. Ne tɛ se ka sɛnɛ kɛ. Ka dalili kɛ, o bɛna kɛ maloya ye ne ma. Ni ne gwɛnna ka bɔ baara nin na tuma min na, ne bɛna min kɛ mɔgɔ dɔw ka se ka ne dɛmɛ, ne y'o lɔn.’ “O tuma na, mɔgɔ minw ye juru ta a ka kuntigi fɛ, a y'u wele kelen kelen. Min kɔnna ka na, a y'ale nyininga ko: ‘Ne ka kuntigi ka juru min b'i la, joli lo?’ O y'a jaabi ko: ‘Tulu daga kɛmɛ.’ A y'a fɔ o ye ko: ‘I ka juru sɛbɛ filɛ nin ye, sigi ka tulu daga bi duuru sɛbɛn joona joona.’ O kɔ, a y'a fɔ dɔ wɛrɛ ye ko: ‘E do, joli b'i la?’ O y'a jaabi ko: ‘Suman bɔɔrɔ kɛmɛ.’ A y'a fɔ o ye ko: ‘I ka juru sɛbɛ filɛ nin ye, suman bɔɔrɔ bi seegi sɛbɛn.’ “Cɛɛ nanbarantɔ nin ka kuntigi y'a tando a ka cekuya kɔsɔn. Tinyɛ na, nin dinyɛ mɔgɔw bɛ koow kɛ ni cekuya ye u ni nyɔgɔn cɛ ka tɛmɛ Alalɔnbagaw kan.” Yezu taara nya ni kuma ye k'a fɔ ko: “Ne b'a fɔ aw ye ko aw ka teriw nyini ni dinyɛ nafolo ye, waasa n'o nana ban tuma min na, olu ka se k'aw kunbɛn arijana na. Mɔgɔ min ye mɔgɔsɛbɛ ye kofitiniw na, o ye mɔgɔsɛbɛ ye kobaw la fana. Min ye janfamɔgɔ ye kofitiniw na, o ye janfamɔgɔ ye kobaw la fana. N'aw ma kɛ mɔgɔsɛbɛw ye nin dinyɛ nafolo koow la, jon le bɛna nafolosɛbɛ kalifa aw ma? N'aw ma kɛ mɔgɔsɛbɛw ye mɔgɔ wɛrɛ ka nafolo koo la, min bɛna kɛ aw ta ye, jon bɛn'a d'aw ma? “Mɔgɔ si tɛ se ka baara kɛ kuntigi fila ye, bari a bɛna kelen kɔniya ka kelen kanu, walima a bɛna kelen bonya ka tɔ kelen nin dɔgɔya. Aw tɛ se ka nafolo kɛ aw jigi ye, ka baara kɛ Ala ye fana.” Nafolo koo ka di Farizinyɛ ye minkɛ, u y'o kuma bɛɛ mɛn tuma min na, u tun bɛ yɛlɛla Yezu ma. A y'a fɔ u ye ko: “Mɔgɔw nyana, aw kɔni b'aw yɛrɛw kɛ mɔgɔtilenninw ye, nga min b'aw dusukun na, Ala b'o lɔn, bari adamadenw bɛ fɛɛn min jati fɛnba ye, o ye fɛɛn nafatan ye Ala nyana. “Kabini fɔlɔfɔlɔ, u tun bɛ mɔgɔw kalan ni Ala ka sariya, ni kiraw ka kuma ye fɔɔ ka na se Zan batizelikɛla ka waati ma. K'a ta o ma, Ala ka masaya kibaru diman bɛ fɔra mɔgɔw ye. Bɛɛ bɛ jijara fana ka kɛ o masaden ye. “Sankolo ni dugukolo ka tunu, ka nɔgɔ ni sariya ka kuma fɔnin dakuru nyaa kelen cɛnni ye. “Mɔgɔ o mɔgɔ y'a muso bila ka dɔ wɛrɛ ta, o tigi bɛ kakalaya kɛ. Ni mɔgɔ o mɔgɔ ye muso furusanin furu, o tigi bɛ kakalaya kɛ fana. “Nafolotigi dɔ tun bɛ yen, a tun bɛ dakamana fani don ka faama dumuni kɛ ka nyanagwɛ kɛ loon o loon. Faantan dɔ fana tun bɛ yen min tɔgɔ ko Lazari. A fari yɔrɔ bɛɛ tun ye joli ye. A tun bɛ la nafolotigi ka soo daa la. Dumuni murumuru minw tun bɛ ben nafolotigi fɛ, a tun b'a fɛ ka olu dumu, nga a tun t'o sɔrɔ. Ka fara o kan, wuluw tun bɛ na k'a ka jolidaw nɛɛmu. “O faantan nana sa, mɛlɛkɛw y'a ta ka taa sigiyɔrɔ d'a ma Ibrayima gɛrɛfɛ arijana na. Nafolotigi fana nana sa, u y'a suu don. A tun bɛ tɔɔrɔba la jahanama na, a y'a nyaa kɔrɔ ta ka Ibrayima ye yɔrɔjan ni Lazari fana b'a gɛrɛfɛ. O tuma na, a pɛrɛnna ko: ‘Ne faa Ibrayima, makari ne la. A fɔ Lazari ye ko a ka ta'a bolokɔni sun jii la ka na ne kaan nyigi n'a ye, bari ne tɔɔrɔnin bɛ kojugu tasuma nin kɔnɔ.’ “Nga Ibrayima y'a fɔ a ye ko: ‘N deen, e yɛrɛ y'a lɔn ko k'i to dinyɛ na, i tun bɛ nyasuma na, ni Lazari bɛ sɛgɛn na. Sisan, Lazari fana bɛ nyasuma na, e bɛ sɛgɛn na. Hali n'o tɛ, dingɛbelebeleba bɛ an ni aw cɛ. O cogo la, ni mɔgɔ min b'a fɛ ka bɔ yan ka taa aw fɛ, a kana se, ani mɔgɔ fana kana se ka bɔ aw fɛ ka na yan.’ Nafolotigi y'a fɔ ko: ‘O tuma, ne faa, ne b'i dali, i ka Lazari bila ka taa ne ka somɔgɔw fɛ, bari dɔgɔcɛ duuru bɛ ne fɛ. A ka taa u lasɔmi waasa olu fana kana na nin tɔɔrɔ yɔrɔ la.’ “Ibrayima y'a jaabi ko: ‘Ala ka sariya ni kiraw ka sɛbɛw bɛ u bolo, u ka olu kɔnɔnakuma labato.’ Nafolotigi ko: ‘Ayi, o tɛ labɔli kɛ ne faa Ibrayima, nga ni mɔgɔ min sara ka ban, n'ale kununna ka taa kuma u fɛ, u bɛna nimisa ka faran u ka kojuguw la.’ Ibrayima tilara k'a fɔ a ye ko: ‘N'u ma Ala ka sariya ni kiraw ka sɛbɛw kɔnɔnakuma labato, hali ni mɔgɔ sanin dɔ kununna ka taa kuma u fɛ, u tɛna la o la.’ ” Yezu y'a fɔ a ka kalandenw ye ko: “Sababu bɛna sɔrɔ min b'a to mɔgɔw bɛ kojugu kɛ tuma o tuma, nga mɔgɔ min bɛna kɛ o sababu nin ye, bɔnɛ bɛ o tigi ye. Mɔgɔ minw lara ne la a ma mɛn, ni mɔgɔ dɔ kɛra sababu ye k'olu dɔ kunna cɛn, yan ni a tigi k'o kɛ, ni kabakuru belebeleba tun sirila a kaan na k'a fili kɔgɔji la, o bɛna fisaya a ma. Aw k'aw yɛrɛw kɔlɔsi o koow ma. “N'i balima y'i hakɛ ta, i k'a filiyɔrɔ fɔ a ye. N'a nimisara, yafa a ma. N'a y'i hakɛ ta sinyɛ wolonwula tile kelen kɔnɔ, n'a segira i fɛ a sinyɛ wolonwula bɛɛ la ko i ka yafa ale ma, i ka yafa a ma.” Cidenw y'a fɔ Matigi ye ko: “Matigi, a to an ka la i la kosɛbɛ.” Matigi y'u jaabi ko: “N'aw tun bɛ la ne la dɔɔni dɔrɔn, hali n'o lanaya tun bɛ fonikisɛ bɔ, aw tun bɛna se k'a fɔ yiriba nin ye ko a ka bɔn ka bɔ yan ka ta'a yɛrɛ tutu kɔgɔji la. A tun bɛna sɔn aw ta ma. “Ni baaraden b'aw dɔ fɛ, n'a bɛ sɛnɛ kɛ walima n'a bɛ begɛnw le kɔlɔsi, n'a segira ka bɔ kongo la tuma min na, a tigi bɛn'a fɔ a ye ko a ka teliya ka na aw bɛ dumuni kɛ wa? Ayi. Nga a bɛn'a fɔ o baaraden ye ko a k'a cɛɛ siri ka dumuni labɛn k'a d'a ma. Ko ni ale tilara dumuni na tuma min na, o kɔ a fana bɛ sɔrɔ ka dumuni kɛ ka minni kɛ. Yala a bɛna barika la o baaraden ye bari a y'a ka baara kɛta kɛ wa? N ma la o la. O cogo la, baara min kalifara aw fana ma, n'aw y'o dama kɛ, aw k'a fɔ aw yɛrɛ ye ko aw tɛ foyi nya.” Yezu tun bɛ taara Zeruzalɛmu, a ye Galile ni Samari mara cɛɛ tigɛ. A tun bɛ nyini ka don dugu dɔ kɔnɔ, kunatɔ mɔgɔ tan taar'a kunbɛn. U lɔra yɔrɔjan ka furancɛ dɔɔni to u ni Yezu cɛ. U y'u kaan kɔrɔ ta k'a fɔ ko: “Karamɔgɔ Yezu, makari an na.” Yezu y'u ye, a y'a fɔ u ye k'u ka taa u yɛrɛw yira sarakalasebagaw la. K'u to sira kan ka taa, u bɛɛ kɛnɛyara. U dɔ y'a ye ko a kɛnɛyara minkɛ, a segitɔ ka taa Yezu fɛ, a tora ka Ala tando kosɛbɛ. A sera Yezu fɛ, a y'a kunbiri gwan a kɔrɔ k'a nyaa biri duguma ka barika la a ye, k'a sɔrɔ o cɛɛ tun ye Samarika ye. O tuma na, Yezu y'a fɔ ko: “O mɔgɔ tan bɛɛ ma kɛnɛya wa? U tɔɔ kɔnɔntɔn nunu bɛ min? U si ma kɔsegi ka na Ala tando ni lonancɛ nin kelen tɛ!” O kɔ, a y'a fɔ o Samarika nin ye ko: “I lara ne la, o le y'a to i kɛnɛyara. Wili ka taa.” Farizinyɛw ye Yezu nyininga ko Ala bɛna na sigi masaya la u cɛma tuma jumɛn. A y'u jaabi ko: “Aw tɛn'a ye i n'a fɔ mɔgɔw ta bɛ ye cogo min na. U tɛn'a fɔ fana ko: ‘A filɛ yan’ walima ‘A filɛ yen fɛ’, bari Ala sigira a ka masaya la aw cɛma ka ban.” O kɔ, a y'a fɔ kalandenw ye ko: “Loon dɔ bɛna se, a bɛna diya aw ye ka Mɔgɔ Dencɛ ye, nga aw tɛn'a ye. “Mɔgɔw bɛn'a fɔ aw ye ko: ‘A bɛ yan,’ walima ko: ‘A bɛ yen fɛ.’ Aw kana tugu u kɔ dɛ! Saan bɛ manamana ka kɛnɛ bɔ sankolo faan kelen na ka ye a faan dɔ la cogo min na, Mɔgɔ Dencɛ fana bɛna kɛ ten a nalon na. Nga sanni o loon ka se, wajibi lo ne ka tɔɔrɔ kosɛbɛ ani bii mɔgɔw ka ban ne la. “Koo min tun kɛra Nuhun ka tile la, o nyɔgɔn bɛna kɛ fana Mɔgɔ Dencɛ natuma na. Mɔgɔw tun bɛ dumunibabaw kɛ ka minni kɛ, ka furu kɛ, fɔɔ ka taa se Nuhun donlon ma kurunba kɔnɔ. O tuma na, sanjiba nana k'u bɛɛ halaki. A bɛna kɛ o cogo kelen na i n'a fɔ Lɔti ka waati la. Mɔgɔw tun bɛ dumunibabaw kɛ, ka minni kɛ, ka sanni ni feereli kɛ, ka sɛnɛ kɛ, ka soow lɔ. Nga Lɔti bɔra Sodɔmu dugu kɔnɔ loon min na, Ala y'u bɛɛ halaki ni tasuma ni kiribi ye ka bɔ sankolo la. Mɔgɔ Dencɛ bɛna segi loon min na, a bɛna kɛ ten o loon. “O loon na, n'a ye mɔgɔ min sɔrɔ a ka boon kuun na, o tigi kan'a fɔ ko a bɛ jigi ka don boon kɔnɔ k'a bololafɛnw ta. N'a ye mɔgɔ min sɔrɔ foro la, o fana kana kɔsegi soo. Koo min kɛra Lɔti ka muso la, aw k'aw hakili jigi o la. Mɔgɔ min bɛ fɛɛrɛ nyini janko a kana sa, o tigi bɛna sa. Nga ni min sara, o tigi bɛna sini hɛrɛ sɔrɔ. Ne b'a fɔ aw ye k'o loon sufɛ, ni mɔgɔ fila bɛ dilan kelen kan, u bɛna kelen ta ka kelen to yen. Ni muso fila bɛ sinni kɛ yɔrɔ kelen na, u bɛna kelen ta ka kelen to yen. [ Ni cɛɛ fila bɛ foro kɔnɔ, u bɛna kelen ta ka kelen to yen.]” Kalandenw y'a nyininga ko: “O bɛna kɛ yɔrɔ jumɛn, Matigi?” A y'u jaabi ko: “Ni fɛnsu bɛ yɔrɔ min na, dugaw bɛ lajɛn o yɔrɔ la.” Yezu ye talen dɔ la kalandenw ye k'a yira u la ko mɔgɔ ka kan ka Ala dali tuma bɛɛ, a kan'a fari faga o la. A ko: “Kititigɛla dɔ tun bɛ dugu dɔ la. O kititigɛla nin tun tɛ siran Ala nya, a tun tɛ mɔgɔ si bonya. O dugu kelen nin kɔnɔ, firiyamuso dɔ tun bɛ yen min tun bɛ to ka ta'a fɔ a ye ko koo min bɛ ale n'a kɛlɛnyɔgɔn cɛ, ko a k'o nyanabɔ ale ye. Muso mɛnna o la. Kititigɛla nin tun t'a fɛ k'a nyanabɔ. A nana se waati dɔ la, a y'a fɔ a yɛrɛ kɔnɔ ko: ‘Ne tɛ siran Ala nya ani ne tɛ mɔgɔ si bonya, o ye tinyɛ ye. Nga ne bɛna firiyamuso nin ka koo nyanabɔ a ye, n'o tɛ, a bɛna to ka na ne nii tɔɔrɔ tuma bɛɛ.’ ” O la, Matigi ko: “Aw ka kititigɛla tinyɛfɔbali nin ka kuma lajɛ. Ayiwa, Ala ye minw woloma k'u kɛ a ta ye, ni olu bɛ dɛmɛ nyini a fɛ suu ni tile, yala a bɛna mɛn k'u dɛmɛ wa? Ne b'a fɔ aw ye ko a bɛna u ka koo nyanabɔ joona. Nga Mɔgɔ Dencɛ bɛna segi tuma min na, yala a bɛna na a sɔrɔ ni mɔgɔw bɛ la Ala la wa?” Mɔgɔ minw tun b'u yɛrɛ jati mɔgɔtilenninw ye, n'u bɛ tɔw lɔgɔbɔ, Yezu ye talen nin la olu koo la. A y'a fɔ ko: “Loon dɔ, cɛɛ fila taara Alabatosoba kɔnɔ ka Ala dali. Kelen tun ye Farizinyɛ ye, kelen tun ye wusuruminɛla ye. “Farizinyɛ nin lɔra ka Ala dali a yɛrɛ kɔnɔ ko: ‘Ala, ne bɛ barika la i ye, bari ne tɛ i n'a fɔ mɔgɔ tɔw, olu minw bɛ benkanni kɛ, u bɛ tilenbalikow kɛ, ka kakalaya kɛ, ani n tɛ i n'a fɔ nin wusuruminɛla. Ne bɛ suun don sinyɛ fila lɔgɔkun o lɔgɔkun. Ne bɛ fɛɛn o fɛɛn sɔrɔ, ne b'o bɛɛ jaka bɔ.’ “Wusuruminɛla nin lɔnin tun bɛ kɔfɛ yɔrɔjan. A ma sɔn k'a nyaa kɔrɔ ta sanfɛ yɛrɛ, nga a y'a disi gosigosi, o min b'a yira ko a nimisara. A y'a fɔ ko: ‘Ala, makari ne la, ne ye kojugukɛla ye.’ ” Yezu y'o kuma kuncɛ k'a fɔ ko: “Ne b'a fɔ aw ye ko Ala ye wusuruminɛla nin jati mɔgɔtilennin ye a ka sɔrɔ ka segi soo. Nga a ma Farizinyɛ nin jati mɔgɔtilennin ye, bari mɔgɔ o mɔgɔ b'a yɛrɛ bonya, o tigi bɛna dɔgɔya, min b'a yɛrɛ majigi, o bɛna bonya.” Mɔgɔw tun bɛ taa ni dennyɛninw fana ye Yezu fɛ waasa a k'a bolo la u kan ka duba kɛ u ye. A ka kalandenw y'o ye minkɛ, u y'a daminɛ ka sɔngɔ u kuun na. Yezu ye denmisɛnw wele k'a fɔ a ka kalandenw ye ko: “Aw k'a to denmisɛnw ka na ne fɛ, aw kana u bali, bari olu bɔnyɔgɔnkow le bɛ don arijana na. Tinyɛ na, ne b'a fɔ aw ye ko ni mɔgɔ min ma sɔn Ala ka koo ma i n'a fɔ denmisɛn bɛ sɔn a facɛ ka kuma ma cogo min na, o tigi tɛna don Ala ka mara kɔnɔ fewu.” Zuwifuw ka kuntigi dɔ ye Yezu nyininga ko: “Karamɔgɔnyuman ne ka kan ka mun kɛ ka hɛrɛ banbali sɔrɔ?” Yezu y'a fɔ a ye ko: “Mun na i bɛ ne wele karamɔgɔnyuman? Mɔgɔnyuman si tɛ yen ni Ala kelen tɛ. Ala ye min fɔ a ka sariya kɔnɔ, i b'o lɔn kɛ, ko: ‘I kana kakalaya kɛ, i kana mɔgɔ faga, i kana sonyali kɛ, i kana galon tigɛ, i faa n'i baa bonya.’ ” A ye Yezu jaabi ko: “Ne y'o sariyaw bɛɛ labato kabini ne denmisɛnman.” A y'a jaabi ten minkɛ, o la, Yezu y'a fɔ a ye ko: “Fɛɛn kelen b'i jɛn halibi. Taa i bololafɛn bɛɛ feere k'o wari tilan faantanw cɛ, o cogo la, i bɛna nafoloba sɔrɔ sankolo la. O kɔ, i ka na tugu ne kɔ.” Nga o kuma ma cɛɛ dusu minɛna, a nyaa sisira kosɛbɛ, bari nafolobatigi tun lo. Yezu y'a ye ko a nyaa sisira minkɛ, a y'a fɔ ko: “A ka gwɛlɛ kosɛbɛ nafolotigi ma ka don Ala ka mara kɔnɔ. Nyɔgɔmɛ donko ka nɔgɔ miseli woo fɛ ka tɛmɛ nafolotigi donko kan Ala ka mara kɔnɔ.” Yezu lamɛnbagaw y'a fɔ ko: “O tuma na, jon le bɛ se ka kisi?” A y'u jaabi ko: “Mɔgɔw tɛ se k'u yɛrɛ kisi, nga Ala bɛ se k'u kisi.” Piyɛri y'a fɔ o tuma na ko: “A filɛ, an jɛnna an bololafɛn bɛɛ kɔ ka tugu i la.” Yezu y'a fɔ u ye ko: “Tinyɛ na, ne b'a fɔ aw ye ko ni mɔgɔ o mɔgɔ y'a ka soo to, walima a muso, walima a balimaw, walima a wolobagaw, walima a deenw Ala ka baara kɔsɔn, o tigi bɛna olu nyɔgɔn caaman sɔrɔ dinyɛ nin na. A bɛna hɛrɛ banbali fana sɔrɔ sini.” Yezu taara n'a ka kalanden tan ni fila ye u danna k'a fɔ u ye ko: “Ayiwa, an bɛ taara Zeruzalɛmu. O yɔrɔ la, kiraw tun ye minw sɛbɛn Mɔgɔ Dencɛ koo la, o bɛɛ bɛna kɛ i n'a fɔ u y'a fɔ cogo min na. U bɛn'a don siya wɛrɛ bolo, olu bɛna yɛlɛ a ma, k'a tɔɔrɔ, k'u daji tu a kan, k'a bugɔ ni busan ye ka sɔrɔ k'a faga. Nga tile saba a faganin kɔ, a bɛna kunun.” Nga, a ka kalandenw m'o kuma faamu. O kɔrɔ tun dogonin bɛ u ma. O la, u ma se k'o lɔn. Yezu surunyana Zeriko la tuma min na, o y'a sɔrɔ finyɛntɔ dɔ tun siginin bɛ sira daa la n'a bɛ dalili kɛ. O finyɛntɔ nin ye jama mankan mɛn n'u bɛ tɛmɛna minkɛ, a ye dɔw nyininga ko: “Mun le kɛra?” U y'a fɔ a ye ko Nazarɛti Yezu le bɛ tɛmɛna. O tuma na, a pɛrɛnna ko: “Dawuda dencɛ Yezu, makari ne la.” Minw tun bɛ nyafɛ, olu y'a sɔngɔ ko a k'a daje, nga a tun bɛ dɔ fara a ka pɛrɛn kan n'a b'a fɔra ko: “Dawuda dencɛ, makari ne la.” Yezu lɔra k'a fɔ k'u k'a minɛ ka na n'a ye. Finyɛntɔ gwɛrɛla Yezu la tuma min na, Yezu y'a nyininga ko: “I b'a fɛ ne ka mun kɛ i ye?” A y'a jaabi ko: “Matigi, ne nyaa ka yɛlɛ.” Yezu y'a fɔ a ye ko: “I lara ne la minkɛ, i kisira. Ayiwa, i nyaa ka yɛlɛ.” O yɔrɔnin kelen, a nyaa yɛlɛla, a tugura Yezu nɔɔ fɛ n'a bɛ Ala tando. Jama bɛɛ y'o ye minkɛ, u ye Ala tando. Yezu sera Zeriko. A tun bɛ o dugu cɛtigɛra tuma min na, wusuruminɛlaw ka kuntigi dɔ tun bɛ yen, a tɔgɔ ko Zase. Nafolobatigi tun lo. A tun b'a fɛ k'a nyaa la Yezu kan k'a lɔn, nga a tun tɛ se k'a ye jama kɔsɔn, bari ale Zase tun ka surun. A dɛsɛra ka boli ka taa yɛlɛ torosun dɔ kan nyafɛ waasa a ka se ka Yezu ye, bari a tun ka kan ka tɛmɛ yen. Yezu sera o yɔrɔ la tuma min na, a y'a nyaa kɔrɔ ta k'a fɔ a ye ko: “Zase, jigi joona joona. Wajibi lo ne ka jigi i ka soo kɔnɔ bii.” Zase jigira joona joona ka taa n'a ye a ka soo ni nisɔndiya ye. Mɔgɔ minw bɛɛ ye u taatɔ ye, u tun bɛ; nunu;nunu ko: “Cɛɛ nin bɛ taara jigi mɔgɔjugu fɛ.” Nga Zase y'a fɔ Matigi ye ko: “Matigi, sisan ne bɛna n ka nafolo tilancɛ di faantanw ma, ni ne ye mɔgɔ min nanbaran, ne bɛna o nyɔgɔn naani segi o tigi ma.” Yezu y'a fɔ ko: “Cɛɛ nin ka soo kisira bii, bari ale fana ye Ibrayima ka deen dɔ ye. Mɔgɔ minw ni Ala cɛ bɛnnin tun tɛ, Mɔgɔ Dencɛ nana olu yaala, ka bɛɛn sigi u ni Ala cɛ.” Mɔgɔ minw tun bɛ Yezu lamɛnna, olu kɔni tun bɛ miirila ko Ala tun bɛn'a ka masaya yira o waati yɛrɛ la. O y'a sɔrɔ, a tun surunyana Zeruzalɛmu na, o la, Yezu ye talen la u ye ko: “Masacɛ dɔ ka deen taara jamanajan dɔ la masacɛw bɛɛ ka kuntigi fɛ k'a fɔ a ye ko n'a ye sira di, ale b'a fɛ ka sigi a facɛ nɔɔ na masaya la. N'a ye sira sɔrɔ o yɔrɔ la, a bɛ kɔsegi a yɛrɛ ka dugu la ka sigi masaya la. Sanni a ka taa, a y'a ka baaradenw mɔgɔ tan wele ka sanukuru kelen kelen di u bɛɛ kelen kelen ma k'a fɔ u ye k'u ka jago kɛ n'o ye fɔɔ ale ka taa ka na. Nga a koo tun man di a ka jamana mɔgɔw ye. A taanin kɔ, olu ye mɔgɔw bila ka ta'a fɔ masacɛba ye k'olu t'a fɛ cɛɛ nin bɛ kɛ u ka masa ye. “O n'a ta bɛɛ, masacɛba sɔnna ko a ka kɛ masacɛ ye. O kɔ, a segira ka ta'a ka jamana na. A tun ye sanukuru di a ka baaraden minw ma, a ye mɔgɔ bila ka taa olu wele. U ye tɔnɔ minw sɔrɔ, a tun b'a fɛ k'o lɔn. Baaraden min kɔnna ka na, ale y'a fɔ masacɛ ye ko: ‘I ye sanukuru min di ne ma, ne y'a nyɔgɔn tan sɔrɔ tɔnɔ ye.’ Masacɛ y'a fɔ a ye ko: ‘I ye baaradennyuman ye. I kɛra mɔgɔsɛbɛ ye kofitini na minkɛ, n b'i sigi dugu tan kunna.’ Baaraden min tugura, ale y'a fɔ masacɛ ye ko: ‘I ye sanukuru min di ne ma, ne ye a nyɔgɔn duuru sɔrɔ tɔnɔ ye.’ Masacɛ y'a fɔ o fana ye ko: ‘N b'i sigi dugu duuru kunna.’ “Dɔ wɛrɛ nana k'a fɔ masacɛ ye ko: ‘I ye sanukuru min di ne ma, o filɛ nin ye. Ne tun y'a don kɔɔrimugu la k'a mara ka nya. Ne tun bɛ siran i nya bari i ka koo ka gwɛlɛ. I ma fɛɛn min kalifa mɔgɔ ma, i b'o le koo nyininga a tigi fɛ. I ma danni kɛ foro min na, i b'a fɛ o suman ka kɛ i ta ye.’ Masacɛ y'a fɔ a ye ko: ‘Baaradenjugu, ne bɛna i kiti ka kɛnyɛ n'i yɛrɛ ka kuma ye. I tun y'a lɔn ko ne ka koo ka gwɛlɛ, ko ne ma fɛɛn min kalifa, n b'o koo nyininga, ko ne ma danni kɛ foro min na, ko n b'a fɛ o suman bɛ kɛ n ta ye. Mun na i ma ne ka sanu di jagokɛla ma? N'i tun y'o kɛ, ne tun bɛna segi ka na ne ka sanu n'a tɔnɔ sɔrɔ.’ “O kɔ, minw tun bɛ yen, masacɛ y'a fɔ olu ye k'u ka sanukuru nin bɔsi a la, k'a di tan tigi ma. U y'a fɔ masacɛ ye ko: ‘O sanukuru nin nyɔgɔn tan b'ale bolo ka ban!’ Masacɛ y'u jaabi ko: ‘Ne b'a fɔ aw ye ko fɛɛn bɛ mɔgɔ min fɛ, dɔ bɛna d'o tigi ma k'a fara a ta kan, nga fɛɛn tɛ min bolo, hali dɔɔni min b'a bolo, o bɛna bɔsi a la. Sisan, ne jugu minw tun t'a fɛ ne ka kɛ u ka masacɛ ye, aw ka na ni olu ye yan k'u faga ne nyana.’ ” Yezu kumana ten ka ban tuma min na, a tɛmɛna u nya, u ye sira minɛ ka taa Zeruzalɛmu. Yezu n'a nɔfɛmɔgɔw sera Olivuyirikulu gɛrɛfɛ Bɛtifaze ni Betani masurun na. A y'a ka kalandenw mɔgɔ fila ci k'a fɔ u ye ko: “Dugu min bɛ aw nyafɛ, aw ye taa yen. Aw dontɔ o dugu kɔnɔ, aw bɛna faliden dɔ sirinin ye, mɔgɔ si ma deli ka yɛlɛ min kan fɔlɔ. Aw k'a foni ka na n'a ye. Ni mɔgɔ dɔ y'aw nyininga ko mun na aw b'a foni, aw k'o tigi jaabi ko Matigi mako le b'a la.” Ciraden nunu taara faliden sɔrɔ i n'a fɔ Yezu tun y'a fɔ u ye cogo min na. U k'u b'a foni, nga falitigiw y'u nyininga ko mun na u b'a foni. U y'u jaabi ko Matigi mako le b'a la. O kɔ, u taara ni faliden ye Yezu fɛ. U y'u ka faniw la a kɔɔ la, Yezu ka sɔrɔ ka yɛlɛ a kan. Yezu taatɔ, mɔgɔw tun b'u ka faniw lala sira kan k'a bonya. K'u to kulu nin kan, u surunyana a jigijigi la tuma min na, a ka kalandenw bɛɛ lajɛnnin nisɔn diyara k'a daminɛ ka Ala tando kosɛbɛ a ka kabakokɛninw bɛɛ kɔsɔn. U tun b'a fɔ ko: “Masacɛ min natɔ filɛ nin ye Matigi tɔgɔ la, Ala ka barika don o la. Hɛrɛ ka kɛ sankolo la, tandoli ka kɛ Ala ye fɔɔ ka se sankolo la.” Farizinyɛ dɔw tora jama cɛma k'a fɔ Yezu ye ko: “Karamɔgɔ, a fɔ i ka kalandenw ye, k'u ka mankan dabila.” Yezu y'u jaabi ko: “Ne b'a fɔ aw ye ko hali n'u jera, kabakuruw bɛna mankan kɛ.” Yezu surunyana kosɛbɛ ka Zeruzalɛmu ye tuma min na, a kasira. A y'a fɔ ko: “Zeruzalɛmukaw, koo min bɛ se ka hɛrɛ d'aw ma, n'aw fana tun b'o lɔn bii yɛrɛ, o tun bɛna nya. Nga, aw tɛ foyi lɔnna o la. Loon dɔ bɛna se, aw juguw bɛna dogoyɔrɔw lalaga k'aw lamini, k'aw dɛrɛ faan bɛɛ la. U bɛna aw ka dugu n'aw yɛrɛ bɛɛ halaki, u bɛna boonw bɛɛ ci. O koow bɛɛ bɛna aw sɔrɔ, bari Ala tun b'a fɛ k'aw dɛmɛ waati min na, aw ma sɔn.” Yezu taara don Alabatosoba kɔnɔ, a y'a daminɛ ka jagokɛlaw gwɛn ka bɔ yen. A y'a fɔ u ye ko: “A fɔra Ala ka kuma na ko: ‘Ne Ala ka soo bɛna kɛ dalili kɛ yɔrɔ ye.’ Nga, aw kɔni y'a kɛ nanbarankɛlaw ka yɔrɔ ye.” Yezu tun bɛ mɔgɔw kalan loon o loon Alabatosoba kɔnɔ. Sarakalasebagaw ni sariya karamɔgɔw ani Zuwifuw ka mɔgɔbabaw tun b'a faga cogo nyinina. Nga, u tun bɛn'a kɛ cogo min na, u m'o lɔn, bari a ka kuma tun ka di jama bɛɛ ye. Loon dɔ la, Yezu tun bɛ mɔgɔw kalanna Alabatosoba kɔnɔ ka kibaru diman fɔ u ye. Sarakalasebagaw ni sariya karamɔgɔw ani dugu cɛkɔrɔbaw taar'a sɔrɔ, k'a nyininga ko: “I bɛ koo minw kɛ, i y'o fanga sɔrɔ min? Jon le y'o fanga d'i ma?” A y'u jaabi ko: “Ne fana bɛna aw nyininga koo kelen na. Jon le ye Zan ci ko a ka na mɔgɔw batize, Ala lo wa, walima mɔgɔw lo?” O tuma na, olu ye nyɔgɔn ye, k'u ka miiriyaw fɔ nyɔgɔn ye ko: “N'an y'a jaabi ko Ala lo, a bɛna an nyininga ko mun na an ma la a la. N'an y'a fɔ ko mɔgɔw lo fana, mɔgɔw bɛna an bon ni kabakuru ye k'an faga, bari u lara a la ko Zan tun ye kira ye tigitigi.” O bɛɛ le y'a to u ye Yezu jaabi k'u t'a lɔn. Yezu y'a fɔ u ye ko: “Ayiwa, n'o lo, mɔgɔ min ye sira di ne ma ka koo nunu kɛ, ne fana tɛna o fɔ aw ye.” O kɔ, Yezu y'a daminɛ ka talen nin la jama ye. A ko: “Cɛɛ dɔ ye foro bɔ ka ɛrɛzɛnyiriw tutu yen, k'a don baarakɛla dɔw bolo, ka taa mɛn jamana wɛrɛ la. Ɛrɛzɛn mɔna tuma min na, a y'a ka jɔɔn dɔ ci baarakɛla nunu fɛ ko a ka taa ale niyɔrɔ minɛ. Nga baarakɛla nunu y'a minɛ k'a bugɔ k'a bolo lakolon bila ka taa. Forotigi ye jɔɔn wɛrɛ ci u fɛ. U y'o fana nɛni k'a bugɔ k'a bolo lakolon bila ka taa. A ye jɔɔn sabanan ci, u y'ale fana bugɔ fɔɔ k'a mandimi k'a ta k'a fili waga kɔnɔ. Forotigi sɔrɔla k'a fɔ ko: ‘Ne bɛna mun kɛ? N dencɛ min koo ka di n ye, n bɛna o ci, n'a sɔrɔ, u bɛna ale bonya.’ Nga ɛrɛzɛn baarakɛlaw nyaa lara a kan tuma min na, u y'a fɔ nyɔgɔn ye ko: ‘Nin le ye cɛntala ye, an bɛn'a faga janko a faa cɛɛn ka kɛ an ta ye.’ U y'a minɛ ka taa n'a ye waga kɔnɔ k'a faga.” Yezu ye jama nyininga ko: “Forotigi bɛna mun kɛ u la sa? A bɛna taa o baarakɛlaw faga ka dɔ wɛrɛw ta k'u bila foro kunna.” Mɔgɔw y'o mɛn tuma min na, u ko: “Ala k'an kisi o ma.” Nga Yezu y'u filɛ k'a fɔ u ye ko: “Min fɔra Ala ka kuma na, o kɔrɔ bɛna kɛ mun ye sa? A ko: ‘Bonlɔlaw tun banna kabakuru min na, o le nana kɛ kabakuruw bɛɛ la nyuman ye.’ Ayiwa, ni mɔgɔ o mɔgɔ benna o kabakuru nin kan, o tigi kolow bɛna karikari. N'o kabakuru nin benna mɔgɔ min kan, a bɛna o tigi nyɔnyɔ.” Sariya karamɔgɔw ni sarakalasebagaw tun b'a fɛ ka Yezu minɛ o waati yɛrɛ la, bari u tun y'a faamu ko Yezu ka talen nin nyaa sinnin tun bɛ olu le ma. Nga u tun bɛ siran jama nya. Sariya karamɔgɔw ni sarakalasebagaw y'a daminɛ ka Yezu kɔlɔsi kosɛbɛ. O la, u ye nafigi dɔw ci Yezu fɛ. Olu y'u yɛrɛw kɛ i n'a fɔ mɔgɔtilenninw waasa ka Yezu minɛ a yɛrɛ daa la kuma fɛ ni nyiningali dɔ ye. O cogo la, u tun b'a fɛ ka sababu dɔ sɔrɔ ka Yezu don Ɔrɔmu masacɛ ka lasigiden bolo. Nafigi nunu taara k'a fɔ a ye ko: “Karamɔgɔ, an y'a lɔn ko i ka kuma n'i ka kalan tilennin bɛ, i tɛ mɔgɔ bɔ mɔgɔ la, Alasira ka kan ka taama cogo min na, i bɛ mɔgɔw kalan o la tinyɛ na. A daganin bɛ an ka nisɔngɔ sara Ɔrɔmu masacɛ ye wa, walima a daganin tɛ?” Nga Yezu bɔra u ka nafigiya kala ma. O la, a y'a fɔ u ye ko: “Aw bɛ wari min kɛ ka nisɔngɔ sara, aw y'o dɔ di yan n k'a filɛ.” A ko: “Jon jaa n'a tɔgɔ le b'a kan?” U ko masacɛ. O tuma na, a y'a fɔ u ye ko: “Fɛɛn min ye masacɛ ta ye, o ka di masacɛ ma, ka Ala ta di Ala ma.” U ma se ka Yezu minɛ a yɛrɛ dalakuma dɔ fɛ jama nyana, nga a ka jaabili y'u kabakoya fɔɔ u jera. Sadusenyɛw le tun b'a fɔ ko suuw tɛna kunun. U dɔw gwɛrɛla Yezu la k'a nyininga ko: “Karamɔgɔ, Musa y'a fɔ an ye ko: ‘Ni mɔgɔ dɔ sara k'a ka muso to yen n'a ma deen sɔrɔ, a dɔgɔcɛ ka kan k'o muso nin ta ka deen sɔrɔ o muso ma ka kɛ a kɔrɔcɛ sii ye.’ Ayiwa, dencɛ wolonwula tun bɛ cɛɛ dɔ fɛ. Dencɛ kɔrɔba ye muso furu. A sara n'u ma deen sɔrɔ. Filanan y'o muso kelen nin ta, o kɔ, sabanan y'a ta. O cogo la, dencɛ wolonwula nunu bɛɛ sara ten, u si ma deen sɔrɔ muso nin ma. A laban, muso nin fana sara. Ni suuw kununna loon min na, muso nin bɛna kɛ jon ta ye u cɛma? Bari u mɔgɔ wolonwula bɛɛ y'a furu ka ye.” Yezu y'u jaabi ko: “Bii bii nin na, dinyɛ kɔnɔ, mɔgɔw bɛ furu nyɔgɔn ma. Nga Ala ye mɔgɔ minw jati mɔgɔnyumanw ye n'a bɛna u kunun u sanin kɔ, ani ka sini hɛrɛ di u ma, olu tɛna furu nyɔgɔn ma. Olu tɛna sa tugu, bari u bɛna kɛ i n'a fɔ mɛlɛkɛw. Ala bɛna u jati a ka deenw ye bari a y'u kunun u sanin kɔ. Ayiwa, suuw bɛna kunun. Musa yɛrɛ fana tun y'o fɔ ka gwɛ tufitini yɔrɔ la. A ye Matigi wele ko Ibrayima ka Ala, ni Isiyaka ka Ala, ani Yakuba ka Ala. Ala tɛ suuw ka Ala ye fɔɔ nyanamanw, bari Ala fɛ, u sanin tɛ, nga u nyanaman lo.” Sariya karamɔgɔ dɔw y'a fɔ Yezu ye ko: “Karamɔgɔ, i ka kuma nyana.” O kɔ, mɔgɔ si m'a jaa gwɛlɛya ka Yezu nyininga foyi la tugu. Yezu y'a fɔ u ye ko: “Mɔgɔw bɛ se k'a fɔ cogo di ko Ala ka Mɔgɔ wolomanin nin ye Dawuda ka deen dama ye? Dawuda yɛrɛ y'a fɔ Ala tandoli dɔnkiliw la ko: ‘Matigi Ala y'a fɔ ne ka Matigi ye ko: Sigi ne kinibolo fɛ fɔɔ ne ka i juguw cɔnkɔn i seen kɔrɔ.’ Dawuda yɛrɛ y'a wele ko Matigi, a do bɛ se ka kɛ Dawuda ka deen dama ye cogo di?” Yezu y'a fɔ a ka kalandenw ye jama nyana ko: “Aw ka aw yɛrɛw kɔlɔsi sariya karamɔgɔw la. Ka forocaw don ka yaala, o ka d'u ye, u b'a fɛ fana ko mɔgɔw k'u fo i n'a fɔ mɔgɔbaw jamayɔrɔ la. Ka sigi nyafɛ, mɔgɔbaw ka sigiyɔrɔ la, Alabatosow kɔnɔ ani jama dumunikɛyɔrɔw la, o fana ka d'u ye. Olu le bɛ firiyamusow bololafɛn bɛɛ nanbaran. O kɔ, u bɛ mɛn Ala dalili la janko k'u yɛrɛw yira mɔgɔtilenninw ye. Olu ka jalaki tɔɔrɔ bɛna juguya ka tɛmɛ tɔw ta kan.” Ka Yezu to Alabatosoba kɔnɔ, a ye nafolotigiw ye n'u bɛ wari donna Alabatosoba kɛsu kɔnɔ. A ye firiyamuso dɛsɛbagatɔ dɔ fana ye n'a bɛ tama fila donna yen. O tuma na, Yezu y'a fɔ ko: “Tinyɛ na, ne b'a fɔ aw ye ko firiyamuso dɛsɛbagatɔ nin ye wari min don kɛsu kɔnɔ, o ka ca ni tɔw bɛɛ ta ye, bari olu mako tɛ se u ka nafolo min ma, u ye dɔ bɔ o le la k'o don, nga ale kɔni n'a ka faantanya bɛɛ, min tun b'a kun ka kɛ dumuni sɔngɔ ye, a y'o bɛɛ don.” O kɔ, mɔgɔ dɔw tun bɛ kumana Alabatosoba koo la, ko a lɔra ni dakamana kabakuruw ye, ko a masirinin bɛ ni fɛnnyumanw ye, mɔgɔw tun y'o minw di ka Ala bonya n'o ye. O la, Yezu ko: “Aw nyaa bɛ o fɛɛn minw na dɛ, loon dɔ bɛna se, o si tɛna to nyɔgɔn kan yan, u bɛɛ bɛna walaka.” U ye Yezu nyininga ko: “Karamɔgɔ, i ye kuma min fɔ sisan wo, o koow bɛna kɛ tuma jumɛn? Mun bɛna kɛ taamasinyɛ ye k'a yira k'o koow kɛtuma sera?” Yezu y'u jaabi ko: “Aw k'aw yɛrɛw kɔlɔsi janko mɔgɔ si kana aw lafili, bari mɔgɔ caaman bɛna na ne tɔgɔ la u yɛrɛ kan k'a fɔ k'olu ye Ala ka Mɔgɔwolomanin nin ye, ko dinyɛ labantuma surunyana. Aw kana la u la. N'aw ye kɛlɛw ni jama muruti koo mɛn tuma min na, aw kana siran. Wajibi lo o koow ka kɛ fɔlɔ, nga o t'a yira ko dinyɛ bɛna ban o yɔrɔnin kelen.” O kɔ, a y'a fɔ u ye ko: “Siya dɔ bɛna wili siya dɔ wɛrɛ kama. Masacɛ dɔ bɛna wili masacɛ dɔ wɛrɛ kama. Dugukolo bɛna yɛrɛyɛrɛ kosɛbɛ yɔrɔ dɔw la. Fɔnyɔbanaw ni kɔngɔ bɛna don yɔrɔ dɔw la fana. Jatigɛkow ni taamasinyɛbaw bɛna ye sankolo la. “Nga sanni o koow bɛɛ ka kɛ, mɔgɔw bɛna aw minɛ k'aw tɔɔrɔ kosɛbɛ. U bɛna aw don Alabatoso kuntigiw bolo k'aw don kaso la. U bɛna taa n'aw ye masacɛw ni jamanatigiw fɛ ne kɔsɔn. O bɛna kɛ sababu ye, aw bɛ ne koo fɔ u ye. Aw k'aw hakili to a la ko aw man kan ka jɔɔrɔ aw ka fɔta la u nyakɔrɔ, bari ne yɛrɛ bɛna hakilitigiya kuma don aw daa la fɔɔ aw jugu si tɛna se k'aw sɔsɔ, walima k'aw ka kuma kɔɔ kari. Hali aw wolobagaw, ni aw badenw, n'aw balimaw, an'aw teriw yɛrɛ, olu bɛna aw don aw juguw bolo k'aw dɔw faga. Mɔgɔ bɛɛ bɛna aw kɔniya ne kɔsɔn. Nga hali aw kunsigiden kelen tɛna tunu. Aw ka munyuli bɛn'a to aw bɛna hɛrɛ sɔrɔ Ala fɛ sini. “N'aw y'a ye ko Zeruzalɛmukaw juguw ka kɛlɛbolo ye dugu lamini tuma min na, aw k'a lɔn ko a halakituma sera. O tuma na, Zude mara mɔgɔw ka boli ka taa dogo kulu yɔrɔw la. N'o ye minw sɔrɔ Zeruzalɛmu kɔnɔ, olu ka boli ka bɔ. Minw bɛ kɛ kongo kɔnɔ, u kan'a fɔ k'u bɛna u yɛrɛ sutara Zeruzalɛmu kɔnɔ, bari a waati bɛna kɛ kojuguw juru sara waati ye. Kiraw tun ye minw fɔ, o bɛɛ bɛna kɛ, hali foyi tɛna u jɛn. O waati la, muso kɔnɔmanw, ani dennyɛnintigiw bɛna tɔɔrɔ kosɛbɛ, o tɔɔrɔ nin bɛna se Isirayɛli jamana mɔgɔw bɛɛ ma, bari Ala bɛn'a yira u la ko a dimina u kɔrɔ. U bɛna dɔw faga ni murujan ye, ka dɔw minɛ ka taa u kɛ jɔɔnw ye siya wɛrɛ cɛma. Siya minw tɛ siran Ala nya, olu bɛna Zeruzalɛmu halaki pewu fɔɔ sarati min tun dira u ma, fɔɔ o ka dafa. “Tile, ni kalo, ani lolow bɛna kɛ cogo dɔ la. Kɔgɔji bɛna mankanba kɛ, adamadenw kɔnɔ bɛna gwan, u dabari bɛna ban. Mɔgɔ caaman bɛna sa jatigɛkojugu bolo, kabako minw bɛ nana kɛ dugukolo kan olu miiri kɔsɔn. Sankolofɛnw bɛɛ bɛna nyagami nyɔgɔn na. O tuma na, mɔgɔw bɛna Mɔgɔ Dencɛ natɔ ye sankabaw cɛma ni sebagaya, ni nɔɔrɔ ye. N'o koow daminɛna ka kɛ tuma min na, aw ka dɔ fara aw jigi n'aw ka jagwɛlɛya kan, bari aw ka hɔrɔnyali waati sera.” O kɔ, Yezu ye talen dɔ la u ye ko: “Aw ka torosun ni yiri tɔw bɛɛ filɛ. N'aw y'a ye u bolow daminɛna ka nugu tuma min na, aw b'a lɔn ko saminya surunyana kelen. O cogo la, aw mana o koow kɛtɔ ye tuma min na, aw k'a lɔn ko Ala ka masaya waati surunyana. “Tinyɛ na, ne b'a fɔ aw ye ko bii mɔgɔw bɛɛ tɛna sa ni o koow bɛɛ ma kɛ. Sankolo ni dugukolo bɛna wili ka bɔ u nɔɔ na, nga ne ka kuma tɛna bɔ a nɔɔ na abada. “Aw k'aw yɛrɛw kɔlɔsi, aw kan'a to nugubatɔya, ni dɔrɔtɔya, ani dinyɛ hamikow k'aw hakili nagasi, n'o tɛ, laban loon bɛna bari aw la, bari o loon bɛna cun dinyɛ mɔgɔw bɛɛ kan i n'a fɔ jaan bɛ fɛɛn minɛ cogo min na. Aw ye jija ka Ala dali tuma bɛɛ, ka kɛ mɔgɔ timinadiyaninw ye, waasa aw ka se ka kisi o koo nataw bɛɛ ma, ani aw ka se ka lɔ Mɔgɔ Dencɛ nyakɔrɔ.” Loon o loon tile kɔnɔ, Yezu tun bɛ mɔgɔw kalan Alabatosoba kɔnɔ. Ni suu kora, a tun bɛ bɔ ka taa si Olivuyirikulu yɔrɔ la. Sɔgɔmada joona, mɔgɔ bɛɛ tun bɛ ta'a sɛgɛrɛ Alabatosoba kɔnɔ k'a lamɛn. Buru funubali nyanagwɛ, o min tɔgɔ ko Hɔrɔnya nyanagwɛ fana, o tun surunyana. Sarakalasebagaw ni sariya karamɔgɔw bɛna se ka Yezu faga cogo min na ni jama ma bɔ a kala ma, u tun b'o cogo nyinina bari u tun bɛ siran ko jama bɛna muruti. O tuma na, Zuda min bɛ wele Isikariyɔti n'o ye kalanden tan ni fila nunu dɔ ye, Sutana y'a daminɛ k'o hakili yɛlɛma. A taar'a fɔ sarakalasebagaw ni Alabatosoba kɔlɔsibagaw kuntigiw ye ko cogo b'ale fɛ ka Yezu don u bolo. O diyara u ye kosɛbɛ. U bɛnna a la k'u bɛna wari hakɛ dɔ d'a ma. Zuda sɔnna. A y'a daminɛ ka cogoyanyuman nyini waasa k'a don u bolo ni jama ma bɔ a kala ma. Buru funubali nyanagwɛ loon fɔlɔ nana se. Sagaden tun ka kan ka faga o loon ka kɛ Hɔrɔnya nyanagwɛ saraka ye. Yezu y'a fɔ Piyɛri ni Zan ye k'u ka taa Hɔrɔnya nyanagwɛ dumuni labɛn u ye. U y'a nyininga ko: “I b'a fɛ an k'o labɛn yɔrɔ jumɛn?” A y'u jaabi ko: “Aw dontɔ dugu kɔnɔ, aw ni cɛɛ dɔ bɛna nyɔgɔn kunbɛn, duun fanin bɛ jii la a kuun na. Aw ka tugu o cɛɛ nin nɔɔ fɛ. N'a donna luu min kɔnɔ, aw ye don yen, k'a fɔ o lutigi ye ko karamɔgɔ ko a n'a ka kalandenw bɛna Hɔrɔnya nyanagwɛ dumuni kɛ boon min kɔnɔ, k'o bɛ min? A bɛna bonba dɔ yira aw la sangaso la. An mako bɛna se fɛɛn minw ma, o bɛɛ b'a kɔnɔ. Aw ka nyanagwɛ nin dumuni labɛn o yɔrɔ la.” Piyɛri ni Zan taara. Yezu tun y'a fɔ u ye cogo min na, a kɛra ten fana. U ye dumuni nin labɛn yen. Dumuni kɛtuma sera minkɛ, Yezu n'a ka ciden tan ni fila sigira dumuni na. A y'a fɔ u ye ko: “Ne tun b'a fɛ kosɛbɛ ka Hɔrɔnya nyanagwɛ nin ka dumuni kɛ n'aw ye sanni ne bɛ tɔɔrɔ, bari ne b'a fɔ aw ye ko ne tɛna Hɔrɔnya nyanagwɛ wɛrɛ ka dumuni kɛ tugu fɔɔ a dumukun ka dafa Ala ka mara kɔnɔ.” O tuma na, a ye duvɛn ta ka barika la Ala ye k'a fɔ ko: “Aw k'a minɛ k'a min, bari ne b'a fɔ aw ye ko ne tɛna duvɛn min tugu ni Ala ma na n'a ka masaya ye dugukolo kan.” O kɔ, Yezu ye buru ta ka barika la Ala ye. A y'a tilantilan k'a d'u ma k'a fɔ ko: “Nin ye ne fari ye [min bɛna kɛ saraka ye aw ka nafa kɔsɔn. Aw ye to ka nin kɛ k'aw hakili to ne la.” Dumuni kɛnin kɔ, a ye duvɛn fana ta ka barika la Ala ye. A y'a di u ma k'a fɔ ko: “Nin ye ne joli ye, Ala bɛ jɛnnyɔgɔnyakura sigi n'o min ye. O joli nin bɛna bɔn aw ka nafa kɔsɔn.] “Mɔgɔ min bɛna ne don mɔgɔjuguw bolo, o tigi bɛ dumuni kɛra ni ne ye. Tinyɛ lo, Mɔgɔ Dencɛ bɛna sa i n'a fɔ Ala y'a latigɛ cogo min na, nga min bɛn'a don u bolo, bɔnɛ bɛna o tigi sɔrɔ.” Kalandenw y'a daminɛ ka nyɔgɔn nyininga k'o bɛna kɛ jon ye u cɛla. Kalandenw y'a daminɛ ka nyɔgɔn sɔsɔ kosɛbɛ, bari u tun b'a fɛ k'a lɔn ni mɔgɔ min ye nyamɔgɔ ye u cɛma. Yezu y'a fɔ u ye ko: “Dinyɛ ka masacɛw bɛ kuntigiya koow kɛ tɔw la, ani fanga bɛ minw bolo, olu b'a fɛ u k'u tɔgɔnyuman fɔ. Nga aw ta man kan ka kɛ ten. Mɔgɔ min ye nyamɔgɔ ye aw cɛma, o tigi ka kan ka kɛ aw bɛɛ makonyala ye i n'a fɔ aw ka dɔgɔnin. Fanga bɛ min bolo aw cɛma, o tigi ka kan ka kɛ aw bɛɛ ka jɔɔn ye. Mɔgɔ min bɛ dumuni labɛnna an'a bɛ di min ma wo, jon le ye mɔgɔba ye u fila cɛla? Dumuni bɛ di min ma, o tɛ wa? Ayiwa, ne bɛ aw cɛma i n'a fɔ jɔɔn. “Aw kɔni munyuna ka to ne fɛ n ka sɛgɛnw waati la. O le y'a to, ne Faa ye masaya di ne ma cogo min na, ne fana b'a di aw ma o cogo la, janko aw ka dumuni kɛ ka minni kɛ ne ka masaso kɔnɔ ani aw ka kɛ masaw ye ka sigi Isirayɛli jama kunna.” Yezu y'a fɔ ko: “Simɔn, Simɔn, Sutana ye sira nyini waasa k'i yuguyugu i n'a fɔ mɔgɔ bɛ mugu tɛntɛn cogo min na, nga, ne ye Ala dali i ye waasa i kana tigɛ ne la. N'i segira ka kɛ ne ta ye tuma min na, i k'i tɔnyɔgɔnw dɛmɛ.” Piyɛri y'a fɔ a ye ko: “Matigi, hali ni ne ka kan ka fara i kan u k'an don kaso la, walima u k'an faga, ne bɛ sɔn.” Nga Yezu y'a fɔ a ye ko: “Piyɛri, ne b'a fɔ i ye ko dondo tɛna kasi bii n'i m'a fɔ ko i tɛ ne lɔn fɔɔ sinyɛ saba.” O kɔ, Yezu y'a fɔ a ka kalandenw ye ko: “Ne y'aw ci tuma min na k'a fɔ aw ye ko aw kana taa ni wari ni dugutaaminan ani sanbara ye, fɛɛn dɔ ye aw dɛsɛ wa?” U y'a jaabi ko foyi m'u dɛsɛ. A y'a fɔ u ye tugu ko: “Nga sisan, ni wari bɛ min fɛ, o k'a ta. O cogo la fana, ni dugutaaminan bɛ min fɛ, o k'a ta. Ni murujan tɛ min fɛ, o k'a ka nɛnɛ duloki feere ka dɔ san. Ne b'a fɔ aw ye, Ala ka kuma ye min fɔ ne koo la ko: ‘U y'a jati kojugukɛlaw dɔ ye,’ wajibi lo o ka kɛ. Ayiwa, o kɛ tuma surunyana.” Kalandenw y'a fɔ a ye ko: “Matigi, murujan fila filɛ.” A y'u jaabi ko o ka nyi ten. Yezu bɔra ka taa Olivuyirikulu kan i n'a fɔ a tun bɛ deli ka taa cogo min na. A ka kalandenw tugura a kɔ. A sera o yɔrɔ la tuma min na, a y'a fɔ u ye ko: “Aw ka Ala dali waasa Sutana kana aw nigɛ ka don koo la.” O kɔ, a bɔra u kɔrɔ dɔɔni ka se bɛrɛ fili koo kelen janya ma. A y'a kunbiri gwan k'a daminɛ ka Ala dali ko: “Ne Faa, n'i b'a fɛ, i ka ne kisi tɔɔrɔ nin ma, nga ne sago kana kɛ fɔɔ e sago.” [ O tuma na, mɛlɛkɛ dɔ bɔra sankolo la k'a yɛrɛ yira a la, ka barika don a la. Yezu nii tɔɔrɔnin tun bɛ. A ye dɔ fara Ala dalili kan. A wasiji nyaa kɛra i n'a fɔ joli n'o bɛ tɔnitɔni duguma.] A ye Ala dali ka ban tuma min na, a wilila ka taa kalandenw sɛgɛrɛ. A taara u sɔrɔ sinɔgɔ la nyanafinkojugu bolo. A y'a fɔ u ye ko: “Mun na aw bɛ sinɔgɔ? Aw ye wili ka Ala dali janko Sutana kana aw nigɛ k'aw don koo la.” Ka Yezu to kuma na, Zuda min tun kɛra kalanden tan ni fila nunu dɔ ye, ale bilara jama nya ka na, a gwɛrɛla Yezu la ko a b'a fo. Nga Yezu y'a fɔ a ye ko: “Zuda, i bɛ Mɔgɔ Dencɛ don mɔgɔjuguw bolo ni foli le ye wa?” Mɔgɔ minw tun bɛ ni Yezu ye, koo min bɛna kɛ, olu y'o faamu minkɛ, u ye Yezu nyininga ko: “Matigi, an ka murujanw ta u kama wa?” U dɔ ye sarakalasebagaw kuntigiba ka jɔncɛ kinibolo tulo caron. Nga Yezu y'u jaabi ko: “Aw k'a dan nin ma.” A magara o jɔncɛ tulo la k'a kɛnɛya. O kɔ, sarakalasebagaw ni Alabatosoba kɔlɔsibagaw kuntigiw ani cɛkɔrɔba minw tun taara k'u b'a minɛ, a y'a fɔ olu ye ko: “Mun na aw nana ne kama ni murujanw ani berew ye i n'a fɔ ko ne kɛra benkannikɛla ye? K'a sɔrɔ ne tun bɛ n'aw ye tile o tile Alabatosoba kɔnɔ, aw ma ne minɛ, nga nin ye aw ka waati ye ani Sutana, ale min bɛ baara kɛ dibi la.” U ye Yezu minɛ ka taa n'a ye sarakalasebagaw kuntigi ka luu kɔnɔ. Piyɛri tugura u nɔɔ fɛ ka furancɛba to u ni nyɔgɔn cɛ. Mɔgɔw tun ye tasuma mana luu cɛmancɛ la ka sigi a daa la. Piyɛri taara sigi olu cɛma. Ka Piyɛri siginin to tasuma daa la, jɔnmuso dɔ y'a ye, a y'a nyaa basa a la k'a fɔ ko: “Cɛɛ nin fana tun bɛ ni Yezu ye.” Piyɛri y'o muso sɔsɔ k'a fɔ ko: “Ne t'a lɔn.” Waati dɔɔni o kɔ, cɛɛ dɔ fana y'a ye k'a fɔ a ye ko: “Ele fana ye u dɔ ye.” Nga Piyɛri ye o cɛɛ jaabi ko: “Ne tɛ u dɔ ye.” Lɛrɛ kelen nyɔgɔn tɛmɛnin kɔ, cɛɛ dɔ wɛrɛ segira k'a fɔ ko: “Siga t'a la, cɛɛ nin tun bɛ n'a ye bari Galileka lo.” Nga Piyɛri y'a jaabi ko: “E bɛ min fɔra, ne t'o faamu.” K'a to o kuma na, o yɔrɔnin bɛ dondo kasira. Matigi y'a nyaa yɛlɛma ka Piyɛri filɛ. Piyɛri hakili jigira Matigi ka kuma na, a tun ye min fɔ a ye ko: “Sanni dondo bɛ kasi bii, i bɛn'a fɔ fɔɔ sinyɛ saba ko i tɛ ne lɔn.” Piyɛri bɔra kɛnɛma ka kasi kosɛbɛ. Yezu kɔlɔsibagaw tun bɛ yɛlɛ a ma n'u b'a bugɔ. U tun y'a nyaa siri ka sɔrɔ ka to k'a bugɔ, ani ka tugu k'a nyininga ko: “Jon le y'i bugɔ?” U ye kumajugujugu wɛrɛw fɔ a ma. Dugu gwɛra tuma min na, dugu cɛkɔrɔbaw, ni sariya karamɔgɔw ani sarakalasebagaw y'u lajɛn. U taara ni Yezu ye u ka kiti tigɛyɔrɔ la waasa k'a kiti. U y'a fɔ a ye ko: “N'i ye Ala ka Mɔgɔwolomanin nin ye, a fɔ an ye.” Yezu y'u jaabi ko: “Ni ne y'a fɔ aw ye, aw tɛna la a la. Ni ne y'aw nyininga fana, aw tɛna ne jaabi. Nga, kabini sisan, Mɔgɔ Dencɛ bɛna sigi Setigi Ala kinibolo fɛ.” U bɛɛ y'a fɔ ko: “O tuma na, e ye Ala Dencɛ ye wa?” A y'a fɔ u ye ko: “Aw yɛrɛ y'a fɔ ka ban do, ne lo.” U y'a fɔ nyɔgɔn ye ko: “An mako tɛ mɔgɔ ka fɔta la tugu ka sɔrɔ k'a jalaki, bari an yɛrɛw y'a dalakuma mɛn.” O tuma na, kititigɛlaw bɛɛ sinna ka wili ka taa ni Yezu ye Pilati fɛ. U y'a daminɛ ka Yezu jalaki ko: “An y'a ye ko cɛɛ nin b'an ka siya kuun cɛnna. A b'u bali ka nisɔngɔ sara Ɔrɔmu masacɛ ye. A ko ale ye Ala ka Mɔgɔwolomanin nin ye, o kɔrɔ ko ale ye masa ye.” Pilati y'a nyininga ko: “I ye Zuwifuw ka masa ye wa?” Yezu y'a jaabi ko: “E ko ten.” Pilati y'a fɔ sarakalasebagaw ni jama ye ko: “Ne ma kuun ye cɛɛ nin bɛ se ka jalaki min na.” Nga u segira k'a fɔ ko: “A bɛ mɔgɔw kalan an ka jamana yɔrɔ bɛɛ la. O le b'a to mɔgɔw bɛ muruti. A y'a daminɛ Galile mara la fɔɔ ka na se yan Zude mara la.” Pilati ye Galile tɔgɔ mɛn mɔgɔw daa la minkɛ, a ye nyiningali kɛ ko yala ni Yezu ye Galileka ye. A y'a lɔn ko Yezu bɔra Erɔdi ka mara la tuma min na, a y'a fɔ u ye k'u ka taa n'a ye Erɔdi fɛ, bari Erɔdi fana tun bɛ Zeruzalɛmu o loon nin na. Erɔdi ye Yezu ye minkɛ, o diyara a ye kosɛbɛ. A tun b'a fɛ ka Yezu ye kabini tumajan bari a tun y'a ka koo mɛn. A tun bɛ miiri fana ko Yezu bɛna kabako dɔ kɛ ale nyana. A ye Yezu nyininga koo caaman na, nga Yezu m'a jaabi. Sarakalasebagaw ni sariya karamɔgɔw tun bɛ yen. U tun b'a la ka kumajugu fɔ waasa k'a ka koo juguya. Erɔdi n'a ka sɔlidasiw ye Yezu lɔgɔbɔ kosɛbɛ ka dulokinyuman dɔ don a kaan na. O kɛnin kɔ, a y'u bila ka segi ni Yezu ye Pilati fɛ. O loon nin na, Pilati ni Erɔdi kɛra teriw ye k'a sɔrɔ u tun ye nyɔgɔn juguw ye fɔlɔ la. Pilati ye sarakalasebagaw, ni Zuwifuw ka kuntigiw ani jama wele k'a fɔ u ye ko: “Aw le nana ni cɛɛ nin ye k'a fɔ ne ye ko a bɛ mɔgɔw kuun cɛn. Ayiwa, ne y'a nyininga aw nyana. Aw ye koo minw fɔ k'olu y'a jalakikun ye, ne y'a ye ko a jalaki tɛ u si la. Erɔdi fana m'a jalakikun ye, bari a segira k'a bila ka na anw fɛ. O la, ne ma koo si ye cɛɛ nin ka kan ka faga min kama. O la, ne bɛn'a to u b'a bugɔ ni golokami ye. O kɔ, ne bɛn'a bila ka taa.” [ Saan o saan, Hɔrɔnya nyanagwɛ tuma, Pilati tun ka kan ka kasoden dɔ labila.] U bɛɛ pɛrɛnna ko: “Cɛɛ nin faga, ka Barabasi labila.” Barabasi tun donna kaso la murutili ni mɔgɔfaga kɔsɔn. O murutili tun kɛra dugu kɔnɔ. Pilati tun b'a fɛ ka Yezu bila minkɛ, a kumana jama fɛ tugu. Nga u pɛrɛnna ko: “A gwengwen lɔgɔ kan. A gwengwen lɔgɔ kan.” Pilati kumana u fɛ a sinyɛ sabanan na ko: “A ye kojugu jumɛn kɛ? A ye koo min kɛ n'o b'a fagakun bɔ, ne m'o ye. O la, ne bɛn'a to u b'a bugɔ ni golokami ye. O kɔ, ne bɛn'a to a bɛ taa.” Nga u tora ka pɛrɛn ko fɔɔ Pilati ka Yezu gwengwen lɔgɔ kan. U ka mankan bonyana fɔɔ ka see sɔrɔ. O tuma na, Pilati y'a fɔ ko u ye min dali, k'o bɛna kɛ u ye. Barabasi min tun donna kaso la murutili ni mɔgɔfaga kɔsɔn, a y'ale labila i n'a fɔ u y'a nyini cogo min na. Nga a ye Yezu don u bolo waasa u k'u sago kɛ a la. U taatɔ ni Yezu ye, u ye cɛɛ dɔ kunbɛn min tun bɛ bɔra a ka foro la. Sirɛnika tun lo, a tɔgɔ tun ko Simɔn. U y'ale karaba ko a ka Yezu ka gwengwenlɔgɔ nyun ka tugu a kɔ. Jamaba tugunin tun bɛ Yezu nɔɔ fɛ. Muso caaman nyaa sisinin tun bɛ, ani u tun bɛ kasira Yezu ka tɔɔrɔ kɔsɔn. Nga Yezu y'a nyaa yɛlɛma k'a fɔ u ye ko: “Zeruzalɛmu musow, aw kana kasi ne kɔsɔn. Aw ye kasi aw yɛrɛw n'aw ka deenw kɔsɔn, bari loon dɔ bɛna se, mɔgɔw bɛn'a fɔ ko: ‘Muso minw ma deen sɔrɔ ka ye, ni minw tɛ se ka deen sɔrɔ, ani minw ma siin di deen ma ka ye, olu ye dubadenw ye.’ O tuma na, mɔgɔw bɛn'a daminɛ k'a fɔ kuluw ye ko: ‘Aw ka ben an kan.’ U bɛn'a fɔ tintinw ye ko: ‘Aw k'an sutara.’ Ne bɛ kuma ten bari aw yɛrɛ y'a ye u bɛ nin kɛra yirikɛnɛ na, yiri jalan ta bɛna kɛ cogo di?” U tun bɛ taara ni kojugukɛla fila fana ye k'olu ni Yezu faga nyɔgɔn fɛ. U taara se kulunin dɔ kan, u b'o min wele ko Kungolokolo. U ye Yezu gwengwen lɔgɔ kan yen, ka kojugukɛla fila nunu fana gwengwen lɔgɔ dɔw kan, kelen a kinibolo fɛ, kelen a numanbolo fɛ. Nga Yezu y'a fɔ ko: “N Faa, yafa u ma bari u bɛ min kɛra u m'o lɔn.” U ye kala bon ka Yezu ka faniw tilantilan nyɔgɔn cɛ ka kɛnyɛ n'o ye. Mɔgɔw bɛɛ tun lɔra n'u bɛ filɛli kɛ. Zuwifuw ka kuntigiw kɔni tun bɛ yɛlɛla Yezu ma. U ko: “A ye mɔgɔ wɛrɛw kisi, a k'a yɛrɛ kisi sa. N'a ye Ala ka Mɔgɔwolomanin nin ye tigitigi, a k'a yɛrɛ kisi.” Sɔlidasiw fana tun bɛ yɛlɛla a ma. U gwɛrɛla a la k'u bɛ kumuji d'a ma. U y'a fɔ ko: “N'i ye Zuwifuw ka masa ye, i yɛrɛ kisi.” U y'a sɛbɛn fɛɛn dɔ kan k'a dulon gwengwenlɔgɔ la Yezu kunna ko: “Nin ye Zuwifuw ka masa ye.” Kojugukɛla minw tun gwengwenna fana, olu kelen tun b'a nɛnina ko: “I tɛ Ala ka Mɔgɔ wolomanin nin ye wa? I yɛrɛ kisi k'an fana kisi kɛ!” Nga kojugukɛla tɔ kelen nin ye dɔ nin sɔngɔ ko: “E min b'o tɔɔrɔ nyɔgɔn na, i tɛ siran Ala nya! An kɔni ka kan ni tɔɔrɔ nin ye bari an ye kojugu kɛ, nga ale ma kojugu si kɛ.” O kɔ, a y'a fɔ Yezu ye ko: “Matigi, n'i nana sigi i ka masaya la tuma min na, i k'i hakili to ne la.” Yezu y'a jaabi ko: “Tinyɛ na, ne b'a fɔ i ye, i bɛna kɛ ne fɛ arijana na bii yɛrɛ.” Tilegwangwanfɛ, dibi donna yɔrɔ bɛɛ fɔɔ ka lɛrɛ saba kɛ. Alabatosoba cɛtigɛ fani faranna fila ye. Yezu pɛrɛnna kosɛbɛ ko: “N Faa, ne bɛ ne nii kalifa i ma.” A y'o fɔ ka ban tuma min na, a nii bɔra. Sɔlidasi kɛmɛ kuntigi ye koo nunu bɛɛ ye ten, a ye Ala bonya k'a fɔ ko: “Siga t'a la, cɛɛ nin tun ye mɔgɔnyuman ye.” O koo minw tun kɛra, mɔgɔ minw tun taara olu filɛ, u kɔsegitɔ tun b'u kuun firinfirin dɔrɔn. Yezu lɔnbagaw bɛɛ lɔnin tun bɛ yɔrɔjan k'o koow filɛ. Muso minw tun tugura Yezu kɔ ka bɔ Galile mara la, olu fana tun b'u cɛma. Cɛɛ dɔ fana tun bɛ yen, a tɔgɔ ko Yusufu, Zuwifuw ka kititigɛlaw dɔ tun lo. Mɔgɔnyuman tun lo, a tun tɛ sɔn ka mɔgɔ tɔnyɔ. A tun ma sɔn a tɔnyɔgɔnw ka koo latigɛli ani u ka kɛtaw ma. A tun bɔra Zuwifu dugu dɔ la min tɔgɔ ko Arimate. A tun bɛ Ala ka masaya waati kɔnɔna. A taara Pilati sɛgɛrɛ ka Yezu suu dali a fɛ. O kɔ, Yusufu taara Yezu suu bɔ lɔgɔ la, k'a kasange ni bagi gwɛman ye, k'a don kaburu dɔ kɔnɔ. O kaburu soginin tun bɛ fara la. Mɔgɔ si suu tun ma don yen fɔlɔ. Jumalon tun lo. Lafinyɛlon tun bɛ nyini ka daminɛ. Muso minw tun tugura Yezu kɔ ka bɔ Galile mara la, olu taara ni Yusufu ye Yezu suu don yɔrɔ la. U ye kaburu nin ye ka Yezu suu don cogo bɛɛ filɛ. O kɔ, u segira ka taa dugu kɔnɔ. U ye wusulan ni tulu kasadiman labɛn. U ye lafinyɛlon labato i n'a fɔ a fɔra cogo min na Ala ka sariya la. Lɔgɔkun loon fɔlɔ sɔgɔma joona, muso nunu tun ye wusulan min labɛn, u wilila ka taa n'o ye kaburu la. Kabakurubelebeleba min tun kɛra ka kaburu datugu, u taar'a sɔrɔ kabakuru nin tɛ kaburu daa la. U donna kaburu kɔnɔ, u ma Matigi Yezu suu ye. K'u hakili nyagaminin to o koo la, u barila ka cɛɛ fila dɔ ye. U ka faniw tun bɛ manamana haali. Muso nunu siranna k'u nyaa biri duguma minkɛ, cɛɛ nunu y'a fɔ u ye ko: “Mɔgɔ min bɛ nii na, aw do b'o tigi yaala suuw cɛma mun na? A tɛ yan, a kununna ka ban. A tun ye kuma min fɔ aw ye k'a to Galile mara la, aw ka aw hakili jigi o la kɛ. A tun y'a fɔ ko wajibi lo Mɔgɔ Dencɛ ka don mɔgɔjuguw bolo, u k'a gwengwen lɔgɔ kan, ko tile saba a faganin kɔ, ko a bɛna kunun.” O tuma na, muso nunu hakili jigira Yezu ka kuma na. U bɔra kaburu la ka taa o koow bɛɛ lakali kalanden tan ni kelen nunu ye, ani k'a lakali tɔw bɛɛ ye fana. O koo nunu lakalibagaw tun ye Zaki bamuso Mariyamu ye, ni Zaani, ani Mariyamu ka bɔ Magidala. Muso wɛrɛ minw tun bɛ n'u ye, olu fana ye koo nunu lakali kalandenw ye ten. Kalandenw ma la muso nunu ka kuma na, u tun b'o jati nalomanya kuma ye. O n'a ta bɛɛ, Piyɛri wilila ka boli ka taa kaburu la. A sera, a ye filɛli kɛ kaburu kɔnɔ, a ye bagi gwɛman dɔrɔn lanin ye duguma. Koo minw tun kɛra, olu y'a kabakoya, a segira ka taa soo. O loon na yɛrɛ, Yezu ka kalandenw mɔgɔ fila tun bɛ taara dugu dɔ la min tɔgɔ ko Emayusi. O dugu ni Zeruzalɛmu cɛ tun ye kilo tan ni kelen nyɔgɔn ye. Koo minw bɛɛ tun kɛra, u tun bɛ olu baro la nyɔgɔn fɛ. K'u to baro ni sɔsɔli la, Yezu yɛrɛ nana fara u kan ka taama n'u ye, nga a kɛra i n'a fɔ u nyaa tun sirinin bɛ, u ma se ka Yezu lɔn. Yezu y'u nyininga ko: “Aw bɛ mun baro la nyɔgɔn fɛ?” O tuma na, u lɔra. U nyaa sisinin tun bɛ. Mɔgɔ kelen tɔgɔ ko Kilewopasi, ale y'a jaabi ko: “Koo minw kɛra tile fila nin na, mɔgɔ si tɛ Zeruzalɛmu min tɛ o koow kala ma fɔɔ e dɔrɔn kɛ?” Yezu y'u nyininga ko: “O ye mun koow ye?” U y'a jaabi ko: “Yezu Nazarɛtika ka koo kɛ! A tun kɛra kira ye, a ye kabakow kɛ, ani ka setigiya kumaw fɔ Ala ni mɔgɔw bɛɛ nyakɔrɔ. Nga an ka sarakalasebagaw n'an ka dugu nyamɔgɔw y'a don mɔgɔjuguw bolo waasa u k'a faga. Olu y'a gwengwen lɔgɔ kan. An kɔni jigi tun b'a kan ko mɔgɔ min ka kan ka Isirayɛli deenw kunmabɔ, ko ale tun lo. Nga, koo nunu kɛra, a tile saba ye bii ye. An kalandenw cɛma, musow bɛ yen. Olu dɔw tun taara sɔgɔma joona kaburu la, ka segi ka na an kabakoya ko u m'a suu ye. U y'a fɔ an ye ko mɛlɛkɛ dɔw y'u yɛrɛw yira u la k'a fɔ u ye ko a bɛ nii na. An tɔnyɔgɔn dɔw taara kaburu la k'a lajɛ fana. Musow tun y'a fɔ cogo min na, u taar'a sɔrɔ o cogo la, nga u ma a yɛrɛ ye.” O tuma na, Yezu y'a fɔ u ye ko: “Aw ye hakilitanw ye dɛ! Aw tɛ la kiraw ka kuma fɔnin na joona fana. Wajibi tun lo Ala ka Mɔgɔwolomanin nin tun ka tɔɔrɔ ten ka sɔrɔ ka bonya sɔrɔ Ala fɛ.” O kɔ, Ala ka kuma ye min fɔ a koo la, a ye olu bɛɛ fɔ k'a gwɛya u ye, k'a ta Musa ye kuma min sɛbɛn ma, fɔɔ ka n'a bila kiraw bɛɛ ka sɛbɛnninw ma. U tun bɛ taara dugu min na, u surunyana o la tuma min na, Yezu y'a kɛ i n'a fɔ a b'a fɛ ka taa k'u to yen. Nga u y'a dali ko a ka to u fɛ yen, bari ko tile bɛ nyini ka ban. O la, a tora u fɛ u ka jatigiso kɔnɔ. Dumunikɛtuma, Yezu sigira n'u ye dumuni na, a ye buru ta ka barika la Ala ye, k'a tilantilan k'a d'u ma. O tuma na, u nyaa yɛlɛla, u y'a lɔn, nga a tununa ka bɔ u nyakɔrɔ. U y'a fɔ nyɔgɔn ye ko: “A tun bɛ kumana an fɛ sira kan tuma min na ka to ka Ala ka kuma nyafɔ an ye ka gwɛ, an dusukun ma diya wa?” O yɔrɔnin bɛ, u wilila ka segi ka taa Zeruzalɛmu. U taara ciden tan ni kelen ni kalanden tɔw lajɛnnin sɔrɔ yen. Olu y'a fɔ mɔgɔ fila nunu ye ko Matigi kununna tinyɛ na, u ko a y'a yɛrɛ yira Simɔn na. O tuma na, olu fila ye Yezu ye sira kan cogo min na, ani k'a lɔn cogo min na dumunikɛtuma na, u y'o lakali kalanden tɔw ye. Ka kalanden fila nunu to o kuma na dɔrɔn, u barila ka Yezu ye u cɛma. A y'a fɔ u ye ko: “Ala ka hɛrɛ kɛ aw ye.” U siranna kosɛbɛ bari u tun bɛ miiri ko suja dɔ lo. Nga Yezu y'a fɔ u ye ko: “Mun na aw bɛ siran? Mun y'a to aw bɛ sigasiga ten? Aw ka ne tigɛ ni ne seenw filɛ, ne yɛrɛ lo tigitigi. Aw ye maga ne la k'a filɛ, aw bɛn'a ye ko farisogo ni kolo bɛ ne la k'a sɔrɔ olu tɛ suja la.” O fɔnin kɔ, a y'a tigɛ n'a seenw yira u la. U nisɔn diyara kosɛbɛ, ka kabakoya, o le y'a to u ma la a la ko Yezu lo. O la, Yezu y'u nyininga ko: “N bɛ dumunifɛn dɔ sɔrɔ aw fɛ yan wa?” U ye jigɛwusunin kunkurun dɔ d'a ma. A y'a minɛ k'a nyimi u nyana. O kɔ, a y'a fɔ u ye ko: “Tuma min na ne tun ma sa ban, koo minw fɔra Ala ka kuma na, Musa y'o min sɛbɛn ni kiraw ye minw sɛbɛn, ani Ala tandoli dɔnkili kɔnɔnakumaw ne koo la, ne tun y'a fɔ aw ye ko wajibi lo o bɛɛ ka kɛ.” O tuma na, a ye hakili d'u ma waasa u ka se ka Ala ka kuma faamu. A y'a fɔ u ye ko: “A fɔra Ala ka kuma na ko mɔgɔw bɛna Ala ka Mɔgɔwolomanin tɔɔrɔ, k'a faga, a bɛna kunun a tile sabanan loon. A ka kibaru ka kan ka fɔ siyaw bɛɛ ye waasa u ka nimisa ka faran u ka kojuguw la, Ala ka yafa u ma. O ka kan ka daminɛ Zeruzalɛmu. Aw ka kan ka kɛ o koow lakalibagaw ye, bari aw y'a bɛɛ ye. Ne Faa y'a daa di ko a bɛna fɛɛn min d'aw ma, ne yɛrɛ bɛna o ci aw ma. Aw kɔni ka to dugu nin kɔnɔ fɔɔ aw ka sebagaya sɔrɔ ka bɔ Ala fɛ.” O kɔ, Yezu taara ni kalandenw ye fɔɔ Betani faan fɛ. A y'a bolow kɔrɔ ta ka duba kɛ u ye. K'a to duba kɛli la u ye, a bɔra u kɔrɔ, ka yɛlɛ sankolo la. Kalandenw birila k'a bato. O kɔ, u segira Zeruzalɛmu ni nisɔndiyaba ye. O yɔrɔ la, u tun bɛ to ka taa Alabatosoba kɔnɔ tuma bɛɛ ka Ala tando. Fɔlɔfɔlɔ, sanni dinyɛ ka dan, Kuma tun bɛ yen, o Kuma nin tun bɛ ni Ala ye, o Kuma nin tun ye Ala yɛrɛ ye. A tun bɛ ni Ala ye fɔlɔfɔlɔ. Fɛɛn bɛɛ danna ale barika la. O fɛɛn si tɛ yen min ma dan a barika la. Nii tun bɛ sɔrɔ ale barika la, o min bɛ yeelen bɔ adamadenw ye. O yeelen nin bɔra dibilamɔgɔw ye. Nga u ma sɔn o ma. Ala ye cɛɛ dɔ ci min tɔgɔ ko Zan. Ale nana waasa ka kɛ yeelen nin seere ye k'a koo fɔ mɔgɔw ye janko u bɛɛ ka la yeelen nin na ale sababu la. Ale Zan tun tɛ yeelen nin ye, nga a nana waasa ka yeelen le koo fɔ. O yeelen nin le tun ye yeelen yɛrɛ yɛrɛ ye, min nana dinyɛ na ka kɛnɛ bɔ mɔgɔw bɛɛ ye. A tun bɛ dinyɛ na, ale le ye dinyɛ dan, nga dinyɛ mɔgɔw banna a la. A nana jigi a yɛrɛ ka soo, a ka siya banna a la. Nga minw sɔnna a ma, ka la a la, a ye see di olu ma u kɛra Ala deenw ye. O minw ma sɔrɔ adamaden joli n'a fari sababu la. Nga u sɔrɔla Ala yɛrɛ sababu la. O kuma nin kɛra mɔgɔ ye, ka na sigi n'an ye, tinyɛtigi ni makaritigi lo. An y'a ka nɔɔrɔ ye. Dencɛ kelen b'o min sɔrɔ a Faa fɛ. Zan y'a koo fɔ ko: “Ne tun ye min koo fɔ ko a bɛna na ne kɔfɛ, ale le ye nin ye. A ka bon ni ne ye, bari sanni ne ka wolo, ale tun bɛ yen.” Anw bɛɛ ye duba caaman sɔrɔ a ka nɛɛma barika la. Ala ka sariya sɔrɔla Musa sababu la. Nga Yezu Krista le nana ni Ala ka nɛɛma, n'a ka tinyɛ ye. Mɔgɔ si ma deli ka Ala ye abada, nga a Deen kelenpe, min ye Ala ye fana, ale n'a Faa Ala bɛ nyɔgɔn fɛ, ale le nana Ala cogo yira an na. Zuwifuw tun ye sarakalasebaga dɔw ni Levi kɔmɔgɔ dɔw ci ka bɔ Zeruzalɛmu ka taa Zan sɛgɛrɛ tuma min na, u y'a nyininga ko: “E ye jon ye?” Zan y'u jaabi ni kuma min ye, o filɛ. A ma sigasiga, a y'a fɔ ka gwɛ u ye ko: “Ne tɛ Ala ka Mɔgɔ wolomanin ye dɛ.” U y'a nyininga ko: “O tuma na, e ye jon ye? E ye Eli ye wa?” A y'u jaabi ko: “Ne tɛ Eli ye.” U ko: “E ye kiraba nin ye wa?” A ko ayi. O tuma na u y'a fɔ a ye ko: “E ye mɔgɔ min ye, o fɔ an ye, waasa an ka se ka taa o fɔ an cibagaw ye. Ɔnhɔn. O tuma na, e ye jon ye?” A ye kira Ezayi ka kuma ta k'u jaabi ko: “Mɔgɔ min bɛ pɛrɛnna kongokolon kɔnɔ ko: ‘Aw ka siratilennin labɛn Matigi ye,’ ” a ko o y'ale Zan ye. Ciraden nunu tun ye Farizinyɛw ye. U ye Zan nyininga tugu ko: “Ni e tɛ Ala ka Mɔgɔ wolomanin nin ye, ni e tɛ Eli ye, walima kiraba, e do bɛ mɔgɔw batize mun na?” A y'u jaabi ko: “Ne kɔni bɛ mɔgɔw batize jii la. Nga mɔgɔ dɔ b'aw cɛma, aw m'ale lɔn, ale bɛ na ne kɔ, ne kuun ka dɔgɔ k'a ka sanbara juru foni.” O koo nunu bɛɛ kɛra Betani faan fɛ Zurudɛn baa kɔfɛ, Zan tun bɛ mɔgɔw batizera yɔrɔ min na. O dugusagwɛ, Zan ye Yezu natɔ ye a fɛ, a y'a fɔ ko: “Ala ye Sagaden min di mɔgɔw ka kojuguw yafa kama, o filɛ nin ye. N tun bɛ ale le koo fɔra ko mɔgɔ dɔ bɛna na ne kɔ min ka bon ni ne ye, bari sanni ne ka wolo, ale tun bɛ yen. Ne yɛrɛ tun t'a lɔn, ne nana ka to ka mɔgɔw batize jii la, waasa Isirayɛlidenw k'a lɔn.” Zan y'a fɔ tugu ko: “Ne ye Nii Senuman jigitɔ ye a kan ka bɔ sankolo la, i na fɔ tubanin, ka to a kan. Ne tun t'a lɔn, nga min ye ne ci ka na mɔgɔw batize jii la, ale le y'a fɔ n ye ko ni ne ye Nii Senuman jigitɔ ye ka sigi min kan, k'o tigi le bɛna mɔgɔw batize ni Nii Senuman ye. Ne y'o ye, o la ne ko ale le ye Ala Deen ye.” O dugusagwɛ, Zan tun b'o yɔrɔ kelen nin na, n'a ka kalandenw mɔgɔ fila ye. A ye Yezu tɛmɛtɔ ye, a y'a fɔ ko: “Ala ka sagaden filɛ nin ye.” A ka kalanden fila nunu y'o mɛn minkɛ, u tugura Yezu kɔ. Yezu y'a nyaa yɛlɛma k'u ye a kɔ, a y'u nyininga ko: “Aw bɛ mun le nyinina?” U y'a jaabi ko: “Arabi, e ka yɔrɔ bɛ min?” (Arabi kɔrɔ ko karamɔgɔ.) A ko: “Aw ye na, aw bɛn'a ye.” U taara n'a ye k'a ka yɔrɔ ye. Wuladafɛ tun lo. U tora n'a ye o loon na. Mɔgɔ fila minw tun ye Zan ka kuma mɛn ka tugu Yezu kɔ, u kelen tun ye Simɔn Piyɛri dɔgɔcɛ Andere ye. A sinna ka ta'a fɔ a kɔrɔcɛ Simɔn ye ko: “Anw ye Krista ye”, o kɔrɔ ko Ala ka Mɔgɔ wolomanin nin. U taara Yezu fɛ. Yezu y'a filɛ furututu k'a fɔ a ye ko: “E ye Zan dencɛ Simɔn ye. An bɛna i wele ko Sefasi”, girɛkikan na, o ye Piyɛri ye. O dugusagwɛ, Yezu y'a; naniya ta ko a bɛ taa Galile mara la. A ye Filipi ye, k'a fɔ a ye ko: “Tugu ne kɔ.” Filipi ni Andere ani Piyɛri nunu bɛɛ tun ye Bɛtisayidakaw ye. Filipi ye Natanayɛli kunbɛn k'a fɔ a ye ko: “Mɔgɔ min koo fɔnin bɛ Musa ka sariya sɛbɛ ni kiraw ka sɛbɛw kɔnɔ, anw y'a ye. Yezu lo, Yusufu dencɛ, ka bɔ Nazarɛti.” Natanayɛli ko: “Ka bɔ Nazarɛti? Fɛnnyuman bɛ se ka bɔ Nazarɛti wa?” Filipi y'a jaabi ko: “E ka na sa, e bɛn'a ye.” Yezu ye Natanayɛli natɔ ye a fɛ, a y'a fɔ ko: “Nin ye Isirayɛliden yɛrɛ ye tigitigi. Nanbaranmɔgɔ tɛ.” Natanayɛli ko: “I ye ne lɔn min?” Yezu y'a jaabi ko: “Yan ni Filipi k'i wele, ne nyaa tun b'i la torosun kɔrɔ.” Natanayɛli y'a jaabi ko: “Karamɔgɔ, i ye Ala Deen ye, i ye Isirayɛli ka masa ye.” Yezu ko a ma: “Ne y'a fɔ ko ne y'i ye torosun kɔrɔ minkɛ o la i lara ne la kɛ. I bɛna fɛɛn wɛrɛw ye minw bɛna tɛmɛ nin kan.” Yezu y'a fɔ tugu ko: “Tinyɛ tinyɛ na, aw bɛna sankolo dayɛlɛnin ye ka Ala ka mɛlɛkɛ yɛlɛtɔw n'u jigitɔw ye Mɔgɔ Dencɛ kan.” Tile fila tɛmɛnin kɔ, kɔnyɔya dɔ tun kɛra Kana, Galile mara la. Yezu bamuso tun bɛ yen. Yezu n'a ka kalandenw fana welenin tun bɛ yen. Duvɛn tun banna minkɛ, Yezu baa taar'a fɔ a ye ko: “U ka dɔrɔ banna.” Nga Yezu y'a jaabi ko: “Muso! E ko ne ka mun kɛ? Ne ka waati ma se fɔlɔ.” A baa taar'a fɔ baaradenw ye ko: “N'a ye fɛɛn o fɛɛn fɔ aw ye, aw k'o kɛ.” Daga wɔɔrɔ tun bɛ o yɔrɔ la, olu tun bilanin bɛ Zuwifuw ka yɛrɛ saniyali kɔsɔn ka kɛnyɛ n'u ka landa ye, o kelen kelen bɛɛ tun bɛ litiri kɛmɛ nyɔgɔn bɔ. Yezu y'a fɔ u ye ko: “Aw ye daga nunu fa jii la.” U y'u fa. Yezu y'a fɔ u ye ko: “Aw ye dɔ bɔ sisan ka ta'a di nyamɔgɔ ma.” U ye dɔ bɔ ka ta'a d'a ma. A ye jii nin nɛnɛ, o jii min tun yɛlɛmana ka kɛ duvɛn ye. Cɛɛ m'o duvɛn bɔyɔrɔ lɔn. Nga baaradenw kɔni tun b'a lɔn, bari olu yɛrɛw le tun ye dagaw fa jii la. Nyamɔgɔ ye kɔnyɔcɛ wele k'a fɔ a ye ko: “O nyɔgɔn na, mɔgɔ bɛɛ bɛ bɔ ni duvɛn diman le ye fɔlɔ. Ni mɔgɔ weleninw bɛ nyini ka fa tuma min na, u bɛ sɔrɔ ka bɔ ni dɔrɔ kumunin ye. Nga ele kɔni ye dɔrɔ diman mara fɔɔ sisan!” Yezu y'a ka kabako fɔlɔ kɛ ten le Kana, Galile mara la. A y'a ka sebagaya yira ten a ka kalandenw na, u lar'a la. O kɔ, a taara Kafaranamu n'a bamuso, n'a dɔgɔninw n'a ka kalandenw ye. Nga u ye tile damani dɔrɔn le kɛ yen. Zuwifuw ka Hɔrɔnya nyanagwɛ tun surunyana, Yezu taara Zeruzalɛmu. A donna Alabatosoba kɔnɔ ka misiw ni sagaw ni tubaninw feerebagaw ani warifalenbagaw sɔrɔ yen. A ye juru kɛ busan ye k'u bɛɛ gwɛn ka bɔ Alabatosoba kɔnɔ, misiw ni sagaw bɛɛ. A ye warifalenbagaw ka tabaliw bɛɛ nyagami nyɔgɔn na k'u ka wariw bɛɛ yɛrɛkɛ! A y'a fɔ tubanin feerebagaw ye ko: “Aw ye nunu ta ka bɔ yan! Aw kana n Faa ka soo kɛ jago kɛyɔrɔ ye.” O la, a ka kalandenw hakili jigira a la ko a fɔra Ala ka kuma na ko: “Ala, e ka soo hami bɛ ne tɔɔrɔ n dusu la kosɛbɛ.” O tuma na, Zuwifuw nyamɔgɔw y'a nyininga ko: “I ye koo min kɛ sisan, i bɛ se ka kabako jumɛn kɛ min b'a yira an na ko i ka kan ka nin kɛ?” Yezu y'u jaabi ko: “Aw ka Alabatosoba nin ci, ne bɛn'a bɛɛ lɔ tile saba kɔnɔ.” Zuwifuw y'a jaabi ko: “I ko di? Soo nin lɔra saan bi naani ni wɔɔrɔ kɔnɔ, e ko i bɛna o lɔ tile saba kɔnɔ kɛ!” Yezu tun bɛ Alabatosoba min ma, o tun ye a yɛrɛ koo ye. Ayiwa, Yezu sara ka kunun tuma min na, a ka kalandenw hakili sɔrɔla ka jigi a ka kuma fɔnin na. O tuma na, u lara Ala ka kuma na, ka la ale Yezu ka kuma fɔninw fana na. Ka Yezu to Zeruzalɛmu Hɔrɔnya nyanagwɛ la, a ye kabako minw kɛ mɔgɔw nyana, caaman lara a la olu kɔsɔn. Nga Yezu kɔni tun ma la olu la, bari a tun b'u bɛɛ kɔnɔnakow lɔn. Ka mɔgɔw ka koo nyafɔ a ye, a mako tun tɛ o la, bari a bɛ adamaden n'a kɔnɔnako bɛɛ lɔn. Farizinyɛ dɔ tun bɛ yen, a tɔgɔ ko Nikodɛmu. Zuwifuw ka mɔgɔba dɔ tun lo. Ale nana Yezu sɔrɔ sufɛ k'a fɔ a ye ko: “Karamɔgɔ, anw y'a lɔn ko Ala le y'i ci. Bari i bɛ kabako minw kɛ, ni Ala tɛ e mɔgɔ min fɛ, e tɛ se k'o kɛ.” Yezu y'a fɔ a ye ko: “Tinyɛ tinyɛ na ne b'a fɔ i ye ko ni mɔgɔ min ma segi ka wolo tugu, o tigi tɛ se ka don Ala ka mara kɔnɔ.” Nikodɛmu ko: “Ni mɔgɔ kɔrɔla ka ban, o tigi bɛ se ka segi ka wolo tugu cogo di? A bɛ se ka segi ka don a baa kɔnɔ ka wolo tugu wa?” Yezu y'a jaabi ko: “Tinyɛ tinyɛ na, ne b'a fɔ i ye ko ni mɔgɔ min ma wolo jii, ani Nii Senuman barika la, o tigi tɛ se ka don Ala ka mara kɔnɔ. Mɔgɔ min wolola adamaden barika la, o tigi ye adamaden ye. Mɔgɔ min wolola Nii Senuman barika la, o tigi ye Ala deen ye. Ne y'a fɔ ko fɔɔ mɔgɔ ka segi ka wolo, e kan'a to o b'i dabari ban. Yɔrɔ min ka di fɔnyɔ ye, a bɛ taa o yɔrɔ la. I b'a mankan mɛn, i t'a bɔyɔrɔ n'a taayɔrɔ lɔn. Ala ka baara lo, adamaden tɛ se ka min faamu. Mɔgɔ min wolola Nii Senuman barika la, o fana bɛ ten.” Nikodɛmu y'a fɔ ko: “Uun! O koow bɛ se ka kɛ cogo di?” Yezu y'a jaabi ko: “I ye Isirayɛli karamɔgɔ dɔ ye, e ma o lɔn wa? Tinyɛ tinyɛ na, ne b'a fɔ i ye ko an bɛ koo min lɔn, an b'o le fɔ. An ye koo min ye, an bɛ lɔ n'o le seereya ye. Aw do tɛ sɔn o ma. Ne bɛ dinyɛ koow fɔra aw ye, aw tɛ lara o la. Ni ne ye arijana koow fɔ aw ye, aw bɛna la o la cogo di? Mɔgɔ si ma yɛlɛ ka taa arijana na fɔɔ Mɔgɔ Dencɛ min bɔra o yɔrɔ la. “Ayiwa, Musa ye saa nigɛlaman kɔrɔ ta sanfɛ lɔgɔ kan cogo min na kongokolon kɔnɔ, fɔɔ Mɔgɔ Dencɛ fana kɔrɔ ka ta ten, waasa ni mɔgɔ min y'a jigi la a kan, o tigi ka hɛrɛ banbali sɔrɔ. Ala ye dinyɛ kanu haali, fɔɔ a y'a Deen kelenpe ci mɔgɔw ma, waasa ni mɔgɔ min y'a jigi la a kan, o tigi kana halaki, nga o ka hɛrɛ banbali sɔrɔ. Ala m'a Dencɛ ci dinyɛ na waasa ka mɔgɔw jalaki, nga waasa k'u kisi le. Ni mɔgɔ min y'a jigi la a kan, o tigi kisira kiti ma, nga ni min m'a jigi la a kan, o tigi jalakira ka ban bari a ma sɔn ka la Ala Dencɛ kelenpe nin na. U jalakira ka ban bari yeelen bɔra dinyɛ mɔgɔw ye. O bɛɛ n'a ta, dibi koo diyara u ye ka tɛmɛ yeelen kan. Bari u ka kɛwaliw man nyi. O ye wajibi ye, bari yeelen koo man di kojugukɛla ye, a bɛ siran k'a ka kɛwaliw kɛ kɛnɛ kan, bari, u bɛna ale ye. Nga mɔgɔnyuman b'a ta kɛ yeelen na, waasa mɔgɔw k'a ka kɛwalinyumanw ye, a b'o minw kɛ Ala sago la.” O tɛmɛnin kɔ, Yezu n'a ka kalandenw nana to Zude mara la. A tun bɛ mɔgɔw batize. Zan fana tun bɛ mɔgɔw batizera Ayinɔn, o ni Salimu man jan. Jii tun ka ca o yɔrɔ la. Mɔgɔw tun bɛ na batize yen. O y'a sɔrɔ u tun ma Zan minɛ k'a don kaso la fɔlɔ. Loon dɔ la, sɔsɔli wilila Zan ka kalanden dɔw ni Zuwifu dɔ cɛ ka taa saniyako faan fɛ ka kɛnyɛ ni landa ye. U taara Zan sɛgɛrɛ k'a fɔ a ye ko: “Karamɔgɔ, cɛɛ min tun bɛ n'i ye Zurudɛn baa kɔfɛ dɛ, fɔɔ e tun y'o min koo fɔ, a b'a la fana ka mɔgɔw batize, bɛɛ bɛ taara ale kɔ.” Zan y'u jaabi ko: “Adamaden tɛ se ka foyi sɔrɔ ni Ala m'a d'a ma. Ne y'a fɔ tuma min na ko ne tɛ Ala ka Mɔgɔ wolomanin nin ye, ko ne cira a nya le, aw ye ne seerew ye. Kɔnyɔmuso ye kɔnyɔcɛ ta le ye. Nga kɔnyɔcɛ tericɛ bɛ lɔ gɛrɛfɛ le, ka to ka mɛnni kɛ a fɛ. A nisɔn bɛ diya bari a bɛ mɛnni kɛra kɔnyɔcɛ fɛ. O nisɔndiya nyɔgɔn le bɛ n na. N nisɔn ka di kosɛbɛ. Wajibi lo, ale ka kunkɔrɔta sɔrɔ, ne ka dɔgɔya. “Mɔgɔ min bɔra sankolo la, o tigi bɛ fɛɛn bɛɛ kunna. Min bɛ dugukolo kan, o ye dinyɛ mɔgɔ le ye, o bɛ dinyɛ koow le fɔ. Mɔgɔ min bɔra arijana na, a ye min ye, ka min mɛn, a b'o le fɔ. Nga adamadenw tɛ sɔn o le ma. Ni mɔgɔ min lara a ka kuma fɔninw na, o tigi b'a yira ko Ala ye tinyɛtigi ye. Ala ye mɔgɔ min ci, o tigi bɛ Ala ka kuma yɛrɛ le fɔ bari Ala bɛ Nii Senuman d'a ma, daan tɛ o min dili la. Faa b'a Deen kanu fɔɔ a ye fɛɛnw bɛɛ don a bolo. Ni mɔgɔ min y'a jigi la Ala Deen kan, o tigi ye hɛrɛ banbali sɔrɔ ka ban. Nga ni mɔgɔ min ma sɔn k'a jigi la a Deen kan, o tigi tɛna sini hɛrɛ sɔrɔ, Ala bɛn'a tɔɔrɔ kosɛbɛ.” Yezu bɔra a kala ma ko Farizinyɛw y'a mɛn ko ale ye kalanden caaman sɔrɔ ka tɛmɛ Zan kan ani ka to ka mɔgɔw batize ka tɛmɛ a kan fana. K'a sɔrɔ Yezu yɛrɛ tun tɛ mɔgɔw batizera. A ka kalandenw le tun bɛ mɔgɔw batize. O la, Yezu bɔra Zude mara la ka segi ka taa Galile. Sanni a ka se Galile mara la, fɔɔ a ka Samari mara cɛtigɛ. A sera Samari dugu dɔ la min tɔgɔ ko Sikari. Yakuba tun ye foro min di a deen Yusufu ma, o n'o dugu nin man jan. Yakuba ka kɔlɔn tun b'o yɔrɔ la. Yezu sɛgɛnna taama fɛ, a taara sigi o kɔlɔn nin daa la. O y'a sɔrɔ tile tun gwanna. Samari muso dɔ nana jii bɔyɔrɔ, Yezu y'a fɔ a ye ko: “N sɔn jii la n b'a min.” O y'a sɔrɔ a ka kalandenw tun taara dumuni sanyɔrɔ dugu kɔnɔ. Muso nin y'a jaabi ko: “Uun! E min ye Zuwifu ye, i bɛ sɔn ka jii dali ne Samarika fɛ wa?” (Tinyɛ na, bɛɛn tun tɛ Samarikaw ni Zuwifuw cɛ.) Yezu y'a jaabi ko: “Ala bɛ min di mɔgɔ ma, n'i tun bɛ o lɔn, ani mɔgɔ min ko i k'ale sɔn jii la, n'i tun b'o fana lɔn, e yɛrɛ le tun bɛna kɔn k'ale dali. A tun bɛna jii d'i ma o min bɛna hɛrɛ banbali d'i ma.” Muso y'a jaabi ko: “Juru t'i bolo, kɔlɔn fana ka dun. I bɛna o jinyuman nin bɔ min? O tuma na, an bɛma Yakuba min ye kɔlɔn nin sogi an ye, e ka fisa o ye wa? Ale n'a deenw n'a ka begɛnw bɛɛ y'a jii min.” Yezu y'a jaabi ko: “Ni mɔgɔ o mɔgɔ ye kɔlɔn nin jii min, minnɔgɔ bɛna o tigi minɛ tugu. Nga jii min bɛ ne fɛ, ni ne y'o di mɔgɔ min ma k'a min, minnɔgɔ tɛna o tigi minɛ tugu fewu. Ne bɛna jii min d'o tigi ma, o bɛna kɛ jii woyota ye min bɛ woyo a kɔnɔ tuma bɛɛ, o min bɛ sini hɛrɛ di.” Muso nin y'a fɔ a ye ko: “Matigi, o jii nin di ne ma waasa minnɔgɔ kana n minɛ tugu ani n kana na yan jita kama tugu.” A y'a fɔ muso nin ye ko: “Taa i cɛɛ wele ka na.” Muso y'a jaabi ko: “Cɛɛ tɛ n fɛ.” Yezu ko: “I ye tinyɛ fɔ ko cɛɛ t'i fɛ. Bari i furula cɛɛ duuru fɛ ka tɛmɛ. E ni min bɛ nyɔgɔn fɛ sisan, i cɛɛ tɛ, o ye tinyɛ ye.” Muso ko: “Matigi, ne y'a lɔn, i ye kira le ye. An faaw ye Ala bato kulu nin kan, nga aw Zuwifuw ko fɔɔ Zeruzalɛmu.” Yezu y'a jaabi ko: “Muso, la a la ko loon bɛna se, mɔgɔw tɛna na Faa Ala bato kulu nin kan ani Zeruzalɛmu tugu. Aw bɛ min batora aw t'o lɔn. Nga anw b'an ka batofɛn lɔn, bari Kisibaga bɛna bɔ an Zuwifuw le cɛma. Ayiwa, loon bɛna se, a yɛrɛ sera ka ban. Alabatobagasɛbɛw bɛna na Faa Ala bato u dusu la ni tilenninya ye. Bari Faa b'o mɔgɔw nyɔgɔn le fɛ. Ala ye Nii le ye, mɔgɔ minw b'a bato, u ka kan k'a bato n'u dusu bɛɛ ye tilenninya la.” Muso ko: “Ne y'a lɔn ko Ala ka Mɔgɔ wolomanin ka kan ka na, min bɛ wele ko Krista. N'ale nana, a bɛna koo bɛɛ fɔ an ye.” Yezu y'a jaabi ko: “Ale le bɛ kumana n'i ye ten.” K'u to kuma na, a ka kalandenw sera. Olu kabakoyara ka Yezu barokɛtɔ ye ni muso ye. Nga u si ma se k'a nyininga ko: “A kɛra di?” Walima ko: “Mun na i bɛ kuma a fɛ?” Muso y'a ka duun filinin to o yɔrɔ la ka boli ka n'a fɔ dugu kɔnɔ ko: “Ee! Aw ye bɔ ka na cɛɛ dɔ filɛ! N ye koo minw bɛɛ kɛ n sii la, a y'a bɛɛ fɔ n ye. N'a sɔrɔ Ala ka Mɔgɔ wolomanin nin lo!” Mɔgɔw bɔra dugu kɔnɔ n'u bɛ taara Yezu sɛgɛrɛ. O tuma na, a ka kalandenw y'a daminɛ k'a dali ko a ka dumuni kɛ. U tun b'a fɔ ko: “An karamɔgɔ, sabali ka dumuni kɛ sa.” Nga a y'u jaabi ko: “Dumuni bɛ ne fɛ aw tɛ min lɔn.” A ka kalandenw tora ka nyɔgɔn nyininga ko: “Mɔgɔ dɔ nana dumuni d'a ma le wa?” O la, Yezu y'a fɔ u ye ko: “Ka n cibaga sago kɛ, o le ye n ka dumuni ye. Ne ka kan k'a ka baara kɛ fɔɔ ka se a daan na. N ko aw bɛ to k'a fɔ ko yan ni kalo naani ko suman tigɛtuma bɛ se. Ayiwa, ne b'a fɔ aw ye ko aw k'aw kuun kɔrɔ ta ka filɛli kɛ. Sumanw mɔnin lo kongo kɔnɔ. Mɔgɔ min y'o tigɛbaga ye, o tigi bɛ sumankisɛ lajɛn sini kama. A b'a ka sara sɔrɔla ka ban. O min ye sini hɛrɛ ye. O bɛ kɛ, waasa sumantigi ni sumantigɛbaga bɛɛ ka jɛn ka nisɔndiya nyɔgɔn fɛ. Talen dɔ ko: ‘Dɔ bɛ suman dan, dɔ wɛrɛ b'a tigɛ.’ O ye tinyɛ yɛrɛ le ye. Ne y'aw ci ko aw ka taa suman tigɛ foro dɔ la aw m'o min sɛnɛ. Dɔw le sɛgɛnna a sɛnɛ na, aw ye nafa sɔrɔ olu barika la.” Dugu nin mɔgɔw caaman lara Yezu la. Bari muso nin tun y'a fɔ u ye ko ale ye koo min bɛɛ kɛ a sii la, ko a y'o bɛɛ fɔ ale ye. O Samarika nunu nana se Yezu fɛ fana, u y'a dali ko a ka to n'u ye. A ye tile fila kɛ u fɛ. Mɔgɔ caaman lara a la a ka kuma kɔsɔn ka tɛmɛ muso ta kan. U tora k'a fɔ muso nin ye ko: “K'i ka kuma yɛrɛ bɔ a la, anw lara a la bari an y'a yɛrɛ lamɛn. An lanin b'a la ko nin le ye dinyɛ kisibaga yɛrɛ yɛrɛ ye.” Tile fila tɛmɛnin kɔ, Yezu bɔra o yɔrɔ la ka taa Galile mara la. Yezu yɛrɛ tun y'a fɔ ka kɔrɔ ko kira si tɛ bonya sɔrɔ a yɛrɛ ka dugu la. A sera Galile tuma min na, u y'a minɛ ka nya. Bari a ye koo minw bɛɛ kɛ nyanagwɛ tuma na Zeruzalɛmu, u y'o bɛɛ ye, bari u bɛɛ tun taara yen nyanagwɛ la. Yezu tun ye jii yɛlɛma k'a kɛ dɔrɔ ye dugu min na n'o ye Kana ye Galile mara la, a segira ka taa yen. Masacɛ ka baarakɛlaw kuntigi dɔ tun bɛ yen, a deen tun man kɛnɛ Kafaranamu. A y'a mɛn ko Yezu segira ka bɔ Zude ka na yen minkɛ, a taara bɔ a fɛ k'a dali ko a ka sabali ka taa ale deen kɛnɛya, ko n'o tɛ, a bɛ nyini ka sa. Yezu y'a fɔ a ye ko: “N'aw ma kabakobabaw kɛnin ye, aw tɛ la ne la fewu.” Cɛɛ ko: “Matigi, an ka taa ni n deen ma sa.” Yezu y'a fɔ a ye ko: “Taa, i deen kɛnɛyara.” Cɛɛ lara Yezu ka kuma na, a ye sira ta. K'a to sira kan, a ka baaradenw tun y'a kɔɔ gwɛn, u nan'a kunbɛn sira kan k'a fɔ a ye ko a deen kɛnɛyara. A y'u nyininga ko a nɔgɔyara waati jumɛn. U ko kunun tilefɛ lo, a ka farigwan banna. Cɛɛ y'a ye k'o waati yɛrɛ lo Yezu tun y'a fɔ ale ye ko: “Taa, i deen kɛnɛyara.” O la, ale n'a ka somɔgɔw bɛɛ lara Yezu la. Yezu y'o kabako filanan nin kɛ Galile mara la, a seginin kɔ ka bɔ Zude mara la. O tɛmɛnin kɔ, Zuwifuw ka nyanagwɛ dɔ tun bɛ kɛra Zeruzalɛmu. Yezu taara yen. U bɛ don ni sagaw ye daa min fɛ dugu kɔnɔ, o gɛrɛfɛ, jii lɔyɔrɔ dɔ tun bɛ yen, u b'o yɔrɔ nin wele eburukan na ko Bɛtizata. U y'a yɔrɔ nin lɔ ka bolonda duuru kɛ a la. O bolon nunu kɔnɔ, banabagatɔw tun bɛ la yen caaman: finyɛntɔw, senkelenninw, ani murukuw. [U tun bɛ la yen ka jii magamagatuma kɔnɔ. Bari tuma dɔ, Matigi ka mɛlɛkɛ dɔ tun bɛ jigi ka jii lamaga. Ni banabagatɔ min kɔnna ka jigi jii la a maganin kɔ, o tigi bɛ kɛnɛya, hali n'a ka bana tun bɛ cogo o cogo.] Cɛɛ dɔ tun bɛ yen, ale saan bi saba ni seegi tun lo a ka bana na. Yezu ye cɛɛ lanin ye, k'a lɔn ko a banatuma mɛnna kosɛbɛ. Yezu ye cɛɛ nyininga ko: “I b'a fɛ ka kɛnɛya wa?” A y'a jaabi ko: “Matigi, mɔgɔ tɛ n fɛ n'a bɛ n ta ka n jigi jii la a magamagawaati la. Sanni ne b'a fɔ ko n bɛ dɛmɛdɛmɛ ka jigi, dɔ bɛ kɔn ka jigi ne nya.” Yezu y'a fɔ a ye ko: “Wili k'i ka dilan ta ka taama.” O yɔrɔnin bɛ, cɛɛ kɛnɛyara, a wilila k'a ka dilan ta ka to ka taama. O loon nin tun ye lafinyɛlon ye. O la, Zuwifuw ka nyamɔgɔw y'a fɔ cɛɛ ye ko: “Cɛɛ, bii ye lafinyɛlon ye, a ma daga k'i ka dilan ta ka taa.” Nga a y'u jaabi ko: “Cɛɛ min ye ne kɛnɛya, ale le ko ne ka n ka dilan ta ka taa dɛ!” U y'a nyininga ko: “Jon le y'a fɔ i ye ko i k'i ka dilan ta ka taa?” Nga mɔgɔ min tun ye cɛɛ kɛnɛya, a tun m'o lɔn. Bari Yezu yɔrɔ tun janfara o yɔrɔ jama na. O kɔ, Yezu ye cɛɛ kunbɛn Alabatosoba kɔnɔ, a y'a fɔ a ye ko: “Ayiwa, i kɛnɛyara sisan, i kana kojugu wɛrɛ kɛ tugu waasa o sara kana juguya ni fɔlɔta ye.” Cɛɛ taar'a fɔ Zuwifuw ye ko a kɛnɛyabaga ye Yezu le ye. Kabini o tuma na, Zuwifuw tun bɛ Yezu darabɔ, bari a tun ye koo nin kɛ lafinyɛlon na le. Nga Yezu y'a fɔ u ye ko: “N Faa bɛ baara la halibi, o la, ne fana b'a kɛ.” O kama, Zuwifuw tun b'a nyini jagoya la janko k'a faga. Lafinyɛlon labatobaliya dama tun t'a kuun ye. Nga u ko a bɛ Ala wele ko ale Faa, ani ko a b'a yɛrɛ suma ni Ala ye. O la, Yezu ye kuma ta k'a fɔ u ye ko: “Tinyɛ tinyɛ na, ne b'a fɔ aw ye ko Deen tɛ se ka foyi kɛ a yɛrɛ ma. A b'a Faa ka kɛta le filɛ. Ni Faa ye fɛɛn o fɛɛn kɛ, Deen fana b'o nyɔgɔn kɛ. Bari Deen koo ka di a Faa ye, o la a b'a ka koo kɛta bɛɛ yira a la. A bɛna dɔ wɛrɛw yɛrɛ yira a la minw bɛ tɛmɛ nunu kan fɔɔ aw yɛrɛ bɛna kabakoya. N Faa bɛ suuw kunun ka nii di u ma cogo min na, o cogo kelen na, a Deen fana bɛ nii di a diyanamɔgɔw ma. N Faa tɛna mɔgɔ si kiti. Bari a ye kitiko bɛɛ to a Deen bolo, waasa bɛɛ k'a Deen bonya i n'a fɔ u bɛ Faa bonya cogo min na. Ni mɔgɔ min m'a Deen bonya, o tigi ma Faa fana bonya, o min y'a cibaga ye. Tinyɛ tinyɛ na, ne b'a fɔ aw ye ko ni mɔgɔ min ye n ka kuma lamɛn ka la n cibaga la, o tigi ye hɛrɛ banbali sɔrɔ. A tɛna kiti, a niin bɔra saya la ka don hɛrɛ la ka ban. Tinyɛ tinyɛ na, ne b'a fɔ aw ye ko waati dɔ bɛna se. A yɛrɛ sera ka ban. Suuw bɛna mɛnni kɛ n fɛ. N'u minw ye n ka kuma mɛn, Ala bɛna nii d'u ma. N Faa ye nii tigi ye, o la, a ye nii diko see di a Dencɛ fana ma. A ye kiti tigɛko see d'a ma, bari Mɔgɔ Dencɛ lo. Ayiwa, o kana aw kabakoya. Waati dɔ bɛna se, suuw bɛna ne kaan mɛn. U bɛna kunun. Minw tun bɛ nyuman kɛ, olu bɛna kunun ka sini hɛrɛ sɔrɔ. Kojugukɛlaw bɛna kunun kiti kama. Ne tɛ se ka foyi kɛ n yɛrɛ ma. Ne bɛ min mɛn, ne bɛ kiti tigɛ ka kɛnyɛ n'o le ye. Ne ka kiti fana tilennin lo. Bari ne tɛ n yɛrɛ sago kɛra fɔɔ ne cibaga sago.” Yezu y'a fɔ ko: “N'a tun kɛra ko ne yɛrɛ le bɛ n yɛrɛ koo fɔra, o tinyɛ yɔrɔ tun tɛ lɔn. Nga mɔgɔ wɛrɛ le ye ne seere ye. Ale bɛ min fɔ n koo la, o ye tinyɛ yɛrɛ le ye. Aw tun ye mɔgɔw ci Zan fɛ k'a nyininga. A ye tinyɛ fɔ aw ye ne koo la. A ma kɛ ko ne mako bɛ adamaden ka seereya la. Nga ne bɛ kuma ten waasa aw ka kisi. Zan kɛra lanpan ye min bɛ yeelen bɔ. Aw tun b'a fɛ ka nisɔndiya a ka yeelen fɛ waatinin kɔnɔ. Ayiwa, seere wɛrɛ bɛ ne la, min ka seereya ka bon ni Zan ta ye. N Faa ye baara minw di ne ma, ne bɛ olu minw kɛ, o le b'a yira ko Faa ye ne ci. N Faa min ye ne ci, ale fana bɛ ne koo fɔ. Nga aw ma deli k'a ka kuma lamɛn, ani min b'a yira aw la, aw m'o lɔn. A ka kuma sigiyɔrɔ tɛ aw dusu la fana, bari a ye min ci, aw lanin tɛ ale la. Aw bɛ to ka Ala ka kuma kalan kosɛbɛ bari aw bɛ miiri ko aw bɛna sini hɛrɛ sɔrɔ o kalan fɛ. K'a sɔrɔ o sɛbɛ nunu bɛ ne le koo fɔ. Aw do t'a fɛ ka la ne la waasa ka sini hɛrɛ sɔrɔ. Ne ka bonya sɔrɔ, o tɛ bɔ adamadenw fɛ. Ne b'aw lɔn, aw tɛ Ala kanu sa. Ne nana n Faa Ala tɔgɔ la, nga aw ma sɔn ne ma. Ni mɔgɔ dɔ nana a yɛrɛ tɔgɔ la sisan, aw bɛ sɔn ale ma. Aw bɛ se ka la ne la cogo di? Aw minw b'aw ka bonya sɔrɔ aw adamaden nyɔgɔnw le fɛ, sanni aw k'o nyini Ala kelen fɛ. Aw kan'a miiri ko ne lo bɛna aw jalaki kiti tigɛlon na n Faa nyakɔrɔ dɛ! Aw jalakibaga ye Musa le ye, aw y'aw jigi la ale min kan. N'aw tun lara Musa la, aw tun bɛna la ne la. Bari Musa ye ne le koo fɔ a ka sɛbɛ kɔnɔ. A ye min sɛbɛn, n'aw ma la o la, ne bɛ min fɔra, aw bɛna se ka la o la cogo di?” O kɔ, Yezu tɛmɛna Galile baa faan dɔ fɛ, min bɛ wele fana ko Tiberiyadi baa. Jamaba tugur'a kɔ bari u tun b'a ye n'a bɛ kabakow kɛ ka banabagatɔw kɛnɛya. O la, Yezu yɛlɛla ka sigi kulu dɔ kan, ale n'a ka kalandenw. O y'a sɔrɔ Hɔrɔnya nyanagwɛ tun surunyana, o min ye Zuwifuw ka nyanagwɛ ye. Yezu ko a bɛ filɛli kɛ, a ye jamaba natɔ ye a fɛ, a y'a fɔ Filipi ye ko: “Filipi, an bɛna taa dumuni san min k'a di jama nin ma waasa u bɛɛ ka se ka fa?” A kumana ten waasa ka Filipi kɔrɔbɔ le. N'o tɛ, ale tun bɛna min kɛ, a tun b'o lɔn. Filipi y'a jaabi ko: “Hali n'an taara deniye wari kɛmɛ fila buru san, u bɛɛ tɛna dɔɔni dɔɔni sɔrɔ.” Simɔn Piyɛri dɔgɔcɛ Andere n'o y'a ka kalandenw dɔ ye, ale y'a fɔ a ye ko: “Cɛdennin dɔ bɛ yan ni burukun duuru ni jigɛmisɛn deen fila ye. Nga o bɛ mun nya nunu ma?” Yezu y'a fɔ a ka kalandenw ye k'u k'a fɔ mɔgɔw ye u ka sigi. Biin tun ka ca o yɔrɔ la. U sigira, cɛɛw tun ye mɔgɔ waa duuru nyɔgɔn ye. O tuma na, Yezu ye buru nunu ta ka barika la Ala ye k'u tilan mɔgɔw cɛ. A ye jigɛ nunu fana kɛ ten. U bɛɛ ye sɔrɔli kɛ fɔɔ ka wasa. U bɛɛ fara minkɛ, Yezu y'a fɔ a ka kalandenw ye ko: “Aw ye buru tɔɔ bɛɛ tɔmɔ a si kana cɛn.” O la, u ye buru tɔɔ cɛ ka segi tan ni fila fa n'o ye. Mɔgɔw y'o kabako nin ye minkɛ, u ko: “Kiraba min ka kan ka na dinyɛ na dɛ, nin yɛrɛ lo!” Nga, Yezu y'a lɔn k'u b'a fɛ k'ale minɛ ka sigi masaya la minkɛ, a dogora ka segi ka yɛlɛ kulu kan tugu a kelen. Tile banna, Yezu ka kalandenw jigira jida la. U ye kurun dɔ ta k'u kuun sin Kafaranamu faan fɛ. Suu tun kora ka ban nga Yezu tun ma kɔsegi u fɛ. Fɔnyɔba dɔ wilila, jii tora ka kurukuru. U tun ye kilo duuru walima wɔɔrɔ nyɔgɔn taama ka ban ni kurun ye. U ye Yezu taamatɔ ye jii kan ka gwɛrɛ u ka kurun na. U siranna kosɛbɛ. Nga Yezu y'a fɔ u ye ko: “Aw kana siran, ne lo.” U k'u b'a ta dɔrɔn, u y'a ye k'u sera badagolo la u tun bɛ taara yɔrɔ min na. O dugusagwɛ, ka jama to baa kɔ, u nana bɔ a kala ma ko kurun kelen dama le tun bɛ yen, kalandenw dɔrɔn le tun donna o kɔnɔ ka taa. Yezu tun ma taa n'u ye. Matigi ye barika la Ala ye ka buru caya k'a di mɔgɔw ma yɔrɔ min na, kurun dɔw bɔra Tiberiyadi ka na se o yɔrɔ. Jama nan'a ye ko Yezu n'a ka kalandenw si tɛ o kurun nunu kɔnɔ. O la, u donna u kɔnɔ ka taa Yezu yɔrɔ nyini Kafaranamu. U taar'a ye baa kɔ tuma min na, u y'a nyininga ko: “Karamɔgɔ, i sera yan tuma jumɛn?” Yezu y'u jaabi ko: “Tinyɛ tinyɛ na, ne b'a fɔ aw ye ko ne ye kabako minw kɛ aw nyana, aw tɛ ne yɔrɔ nyinina olu kɔsɔn, nga aw bɛ ne yɔrɔ nyinina bari aw ye buru sɔrɔ k'a nyimi fɔɔ ka fa a la. Aw kana baara kɛ dumuni tolita kɔsɔn dɛ! Nga dumuni min tɛ cɛn, aw ye baara kɛ o le kɔsɔn, o min bɛ sini hɛrɛ di. O dumuni nin, Mɔgɔ Dencɛ bɛna o d'aw ma. A Faa Ala y'a ka taamasinyɛ bila ale kan.” U y'a nyininga ko: “An ka kan ka mun le kɛ, waasa ka Ala sago kɛ?” Yezu y'u jaabi ko: “Ala ye min ci, fɔɔ aw ka la ale la. O le ye Ala sago ye.” Olu y'a nyininga ko: “I bɛ se ka kabako jumɛn kɛ k'a yira an na, waasa an bɛ la i la? I bɛna mun kɛ? An faaw ye maanɛ dumu kongokolon kɔnɔ, i n'a fɔ a fɔra Ala ka kuma na cogo min na ko: ‘A ye dumuni di u ma, o min bɔra sankolo la.’ ” Yezu y'a fɔ u ye ko: “Tinyɛ tinyɛ na, ne b'a fɔ aw ye ko min ye dumuni di aw ma ka bɔ sankolo la, o tɛ Musa ye. N Faa le b'a yɛrɛyɛrɛ di aw ma ka bɔ sankolo la. Bari Ala bɛ dumuni min di, o bɔra sankolo la min bɛ nii kura don dinyɛ mɔgɔw la.” U y'a fɔ Yezu ye ko: “Matigi, to k'o dumuni nin di an ma tuma bɛɛ kɛ!” Yezu ko u ma: “Ne le ye dumunifɛn ye min bɛ nii kura don mɔgɔ la. Ni mɔgɔ min sɔnna ne ma, kɔngɔ t'o tigi minɛ tugu. Ni min lara ne la, minnɔgɔ t'o tigi minɛ tugu. Ne tun kɔnna k'a fɔ aw ye, aw y'a ye nga aw ma la ne la. Ni n Faa ye mɔgɔ o mɔgɔ di ne ma, o bɛna la ne la, ne fana tɛna ban o tigi la. Ne bɔra sankolo la ka na dinyɛ na n cibaga sago kɛli kama, n'o tɛ ne ma na n yɛrɛ sago kama. Ne cibaga sago ye jumɛn ye? A ye mɔgɔ minw di ne ma, ne kan'a to u si ka tunu. Nga ko ne k'u bɛɛ kunun dinyɛ labanlon na. N Faa ko ni mɔgɔ o mɔgɔ ye ne ye k'a jigi la ne kan, k'o tigi bɛna sini hɛrɛ sɔrɔ. Ne fana bɛn'a kunun labanlon na.” K'a ta o tuma na, Zuwifuw tora ka; nunu;nunu a koo la, bari a tun ko ale ye dumunifɛn ye min bɔra sankolo la. U tora k'a fɔ ko: “O tuma na Yusufu dencɛ Yezu tɛ wa? An b'a faa lɔn, k'a baa lɔn! A bɛ se k'a fɔ sisan cogo di ko ale bɔra sankolo la?” Yezu ye kuma ta tugu k'a fɔ u ye ko: “Aw ye; nunu;nunu dabila aw ni nyɔgɔn cɛ. Mɔgɔ si tɛ se ka sɔn ne ma ni n Faa sababu tɛ. Ne fana bɛna o tigi kunun labanlon. A sɛbɛnnin bɛ kiraw ka kitabuw kɔnɔ ko: ‘Ala bɛna u bɛɛ ladi.’ Ayiwa, mɔgɔ o mɔgɔ ye mɛnni kɛ Faa Ala fɛ ka sɔn a ta ma, olu bɛɛ bɛ la ne la. Mɔgɔ si nyaa ma deli ka la Faa Ala kan, fɔɔ min bɔra a fɛ ka na, ale lo y'a ye. Tinyɛ tinyɛ na, ne b'a fɔ aw ye ko ni min lara ne la, o tigi ye hɛrɛ banbali sɔrɔ. Ne ye dumunifɛn ye min bɛ hɛrɛ banbali di mɔgɔw ma. Aw faaw ye maanɛ dumu kongokolon kɔnɔ, u bɛɛ ma sa wa? Nga dumuni min bɛ bɔ sankolo la, ni min y'o dumu, o tigi tɛ sa abada. “Dumuni nyanaman min bɔra sankolo la, ne lo. Ni min y'o dumu, o tigi bɛ to nii na tuma bɛɛ. Ne bɛna dumuni min di, o ye ne fari yɛrɛ le ye. Ne bɛ n yɛrɛ di waasa dinyɛ ka se ka hɛrɛ banbali sɔrɔ.” Zuwifu nunu tora ka nyɔgɔn sɔsɔ kosɛbɛ ka to k'a fɔ ko: “Nin bɛ se k'a fari di anw ma cogo di k'a dumu?” O tuma na, Yezu y'a fɔ u ye ko: “Tinyɛ tinyɛ na, ne b'a fɔ aw ye ko n'aw ma Mɔgɔ Dencɛ farisogo dumu k'a joli min, aw tɛna hɛrɛ banbali sɔrɔ. Ni mɔgɔ min ye ne farisogo dumu ka ne joli min, o tigi bɛna hɛrɛ banbali sɔrɔ, ne b'o tigi kunun labanlon na. Bari ne farisogo ye dumunifɛnsɛbɛ ye, ne joli ye minnifɛnsɛbɛ ye. Ni mɔgɔ min ye ne farisogo dumu ka ne joli min, ne bɛ to o tigi fɛ, o tigi fana bɛ to ne fɛ. N Faa ye ne ci, ale ye nii tigi ye, ne bɛ nii na ale barika la, o cogo la, ni min ye ne sɔrɔ dumuni ye, o tigi fana bɛna to nii na ne barika la. Dumuni min bɔra sankolo la, ne lo. Aw faaw ye dumuni min kɛ kongokolon kɔnɔ, u bɛɛ nana sa, ne ta n'o tɛ kelen ye. Ni min ye ne ta nin dumu, o tigi bɛ to nii na tuma bɛɛ.” Yezu ye mɔgɔw kalan ni kuma nunu ye Alabatoso dɔ kɔnɔ Kafaranamu. O kuma nunu mɛnnin kɔ, a ka kalandenw caaman y'a daminɛ k'a fɔ ko: “A ka kuma nunu ka gwɛlɛ dɛ! Jon bɛ se ka sɔn o ma?” Yezu y'a lɔn ko a ka kalandenw bɛ; nunu;nununa a ka kuma koo la minkɛ, a y'u nyininga ko: “O ka gwɛlɛ aw fana ma wa? Aw bɛna kɛ cogo di n'aw ye Mɔgɔ Dencɛ yɛlɛtɔ ye a bɔyɔrɔ la? Nii Senuman le b'a to mɔgɔ bɛ barika sɔrɔ, n'o tɛ n'a danna farisogo ta ma, o tɛ foyi ye. Ne ye kuma minw fɔ aw ye, o bɛ bɔ Nii Senuman fɛ ka nii don mɔgɔ la. Nga dɔw bɛ aw cɛma minw tɛ lara ne la.” Kabini koow daminɛwaati la, Yezu tun b'o tigiw lɔn. Min tun bɛn'a don mɔgɔjuguw bolo fana, a tun b'o fana lɔn ka ban. Yezu y'a fɔ tugu ko: “O le y'a to ne tun y'a fɔ aw ye ko mɔgɔ si tɛ se ka sɔn ne ma ni n Faa sababu tɛ.” Kabin'o tuma, a ka kalandenw caaman segira kɔ, u tun tɛ tugura a kɔ tugu. O la, a y'a ka ciden tan ni fila nunu nyininga ko: “Aw fana b'a fɛ ka taa wa?” Simɔn Piyɛri y'a jaabi ko: “An bɛna taa jon fɛ? Mɔgɔ bɛ hɛrɛ banbali sɔrɔ ele ka kuma barika la. Anw kɔni lara e la, an y'a lɔn fana ko i ye Ala ka mɔgɔnyuman ye a ye min ci.” Yezu y'a fɔ u ye ko: “Ne m'aw mɔgɔ tan ni fila woloma wa? O bɛɛ n'a ta, mɔgɔ kelen b'aw cɛma min ye Sutana ye.” O kuma nin tun sinnin bɛ Simɔn Isikariyɔti deen Zuda le ma, ale min tun ye ciden tan ni fila nunu dɔ ye, min tun bɛna Yezu don mɔgɔjuguw bolo. O kɔ, Yezu tora ka Galile mara yaalayaala. A tun t'a fɛ ka taa Zude mara yaala, bari o yɔrɔ Zuwifuw tun b'a fɛ k'a faga. O bɛɛ n'a ta, Zuwifuw ka Sumanladon nyanagwɛ tun surunyana ka ban, a dɔgɔninw y'a fɔ a ye ko: “Bɔ yan ka taa Zude, waasa i ka kalandenw k'i ka kabako kɛtaw ye fana. N'i b'a fɛ mɔgɔw k'i lɔn, e t'i ka kɛwaliw kɛ dogo la. I bɛ kabakow kɛ cogo min na, taa i yɛrɛ yira dinyɛ na.” O y'a sɔrɔ a dɔgɔninw yɛrɛ tun ma la a la. Yezu y'u jaabi ko: “Ne ka waati ma se ban. Aw kɔni, waati bɛɛ ka nyi aw fɛ. Adamadenw kɔni tɛ se k'aw kɔniya. Nga u bɛ ne kɔniya, bari ne bɛ to k'a fɔ ko u ka kɛwaliw ka jugu. Aw yɛrɛ ka taa o nyanagwɛ nin na, ne kɔni tɛna taa, bari ne ka waati ma se fɔlɔ.” A y'o kuma nunu fɔ ka ban, a tora Galile yen. Nga a dɔgɔninw taanin kɔ nyanagwɛ la Zude, a fana ye sira ta, a ma sɔn mɔgɔ k'a ye. A taara yen dogo la. Zuwifuw tun bɛ Yezu yɔrɔ nyinina nyanagwɛ tuma na. U tun b'a fɔ ko: “A yɛrɛ bɛ min le sa?” Mɔgɔw tun bɛ nyɔgɔn sɔsɔra kosɛbɛ a koo la. Dɔw ko mɔgɔnyuman lo, nga dɔw ko jama kunnacɛnbaga lo. Nga mɔgɔ si tun tɛ se k'a koo fɔ u kuun fɛ ten, bari u tun bɛ siran Zuwifuw ka nyamɔgɔw nya. K'u to nyanagwɛ la a tile naaninan loon nyɔgɔn, Yezu taara Alabatosoba kɔnɔ k'a daminɛ ka mɔgɔw kalan. Zuwifuw kabakoyara kosɛbɛ, u tora k'a fɔ ko: “A kɛra cogo di ka lɔnniya sɔrɔ ten, a do ma kalan mɔgɔ si fɛ.” Yezu y'u jaabi ko: “Ne bɛ mɔgɔw kalan koo minw na, u ma bɔ ne fɛ, u bɔra ne cibaga le fɛ. Mɔgɔ min b'a fɛ ka Ala sago kɛ, o tigi bɛn'a lɔn ko ne ka kalan bɛ bɔ Ala fɛ, ko ne yɛrɛ ka kuma tɛ. Mɔgɔ min b'a yɛrɛ koo fɔ, o b'a yɛrɛ tandoyɔrɔ le nyini. Nga min b'a cibaga koo fɔ, janko ka bonya l'a kan, ale ye tinyɛfɔla ye, dibidibi foyi t'o tigi ka kuma na. Musa le ma sariya di aw ma wa? K'a sɔrɔ aw si t'o sariya labato. Mun na aw b'a fɛ ka ne faga?” Mɔgɔw y'a jaabi ko: “E ye jinatɔ le ye. Jon le b'a fɛ k'i faga?” Yezu y'u jaabi ko: “Ne ye koo kelen kɛ, o y'aw bɛɛ dabari ban. Musa ye kɛnɛkɛnɛ sariya fɔ aw ye (k'a sɔrɔ a ma daminɛ ale ma dɛ, nga a bɔra an faaw le fɛ.) Ayiwa, aw bɛ deenw kɛnɛkɛnɛ lafinyɛlon na. Ka mɔgɔ kɛnɛkɛnɛ lafinyɛlon na, n'o tɛ Musa ka sariya cɛn, mun na aw bɛ dimi ne kɔrɔ ko ne ye mɔgɔ kɛnɛya lafinyɛlon na? Aw kana koo yeta dama filɛ ka mɔgɔ jalaki. Nga, aw k'o kɛ ni tilenninya ye.” Zeruzalɛmuka dɔw tun b'a fɔra ko: “U tɛ cɛɛ nin le fagayɔrɔ nyinina wa? A do ye n'a bɛ kumana kɛnɛ kan u do tɛ foyi fɔra a ye. Yala an ka siya nyamɔgɔw y'a lɔn sisan ko ale le ye Ala ka Mɔgɔ wolomanin nin ye wa? Anw kɔni bɛ nin bɔyɔrɔ lɔn. K'a sɔrɔ ni Ala ka Mɔgɔ wolomanin nin nana, mɔgɔ tɛn'a bɔyɔrɔ lɔn.” O y'a sɔrɔ Yezu tun bɛ mɔgɔw kalanna Alabatosoba kɔnɔ, a y'u jaabi ko: “Tinyɛ na, aw bɛ ne lɔn, aw bɛ n bɔyɔrɔ fana lɔn! K'a sɔrɔ ne ma na n yɛrɛ ma. Ne cibaga ye tinyɛtigi ye, aw tɛ ale lɔn. Nga ne bɛ ale lɔn bari n bɔra ale le fɛ, ale fana le ye ne ci.” O tuma na, u tun b'a fɛ k'a minɛ, nga mɔgɔ si ma se ka maga a la, bari a ka waati tun ma se fɔlɔ. O bɛɛ n'a ta, jama cɛma, caaman lara a la, u tora k'a fɔ ko: “Ni Ala ka Mɔgɔ wolomanin nin nana tuma min na, yala a bɛna kabako dɔ wɛrɛw kɛ ka tɛmɛ cɛɛ nin ta kan wa?” Mɔgɔw tun bɛ Yezu koo; nunu;nununa jama cɛma fɔɔ ka ta'a bila Farizinyɛw tulo la. Olu ni sarakalasebagaw kuntigiw ye Alabatosoba kɔlɔsibagaw ci k'u ka taa Yezu minɛ. Yezu y'a fɔ jama ye ko: “Waati dɔɔni le tora ne bɛna min kɛ n'aw ye, o kɔ, ne bɛ segi n cibaga fɛ. Aw bɛna ne yɔrɔ nyini ka dɛsɛ, aw tɛna ne ye. Bari ne bɛna to yɔrɔ min na, aw tɛna se ka na yen.” Zuwifuw tora k'a fɔ u ni nyɔgɔn cɛ ko: “Nin bɛna se ka taa yɔrɔ jumɛn n'anw bɛn'a yɔrɔ nyini ka dɛsɛ? An ka siya minw jɛnsɛnnin bɛ siya wɛrɛw cɛma, a bɛna taa olu le fɛ ka siya wɛrɛw kalan wa? A y'a fɔ ko an bɛna ale yɔrɔ nyini ka dɛsɛ ko an tɛna ale ye. Ani ko ale bɛna to yɔrɔ min na ko an tɛna se ka taa yen. O kɔrɔ ye mun ye?” Sumanladon nyanagwɛ labanlon na, n'o y'a lonba ye, Yezu lɔra k'a fɔ jama ye ko: “Ni minnɔgɔ bɛ mɔgɔ min na, o tigi ka na ne fɛ ka jii min. Ni mɔgɔ min lara ne la, o tigi kɔnɔ bɛna kɛ jinyuman buyiyɔrɔ ye i n'a fɔ a fɔra Ala ka kuma na cogo min na.” Mɔgɔ minw bɛna la a la, olu bɛna Nii Senuman min sɔrɔ, a tun bɛ kuma o le koo la ten. Nii Senuman tun ma di fɔlɔ bari Yezu tun ma bonya sɔrɔ fɔlɔ. Dɔw ye Yezu ka kuma nunu mɛn minkɛ, u tora k'a fɔ jama cɛma ko: “Tinyɛ na, nin le ye kiraba nin ye.” Dɔw ko: “Ala ka Mɔgɔ wolomanin lo.” Nga dɔw ko: “A ka kan ka bɔ Galile wa? A ma fɔ Ala ka kuma na ko Ala ka Mɔgɔ wolomanin buruju bɛna bɔ masacɛ Dawuda la wa? N'o ka dugu ye Bɛtilehɛmu ye.” Jama daa fɔnna nyɔgɔn kɔ ten Yezu kɔsɔn. U dɔw tun b'a fɛ k'a minɛ, nga o si ma se ka maga a la. Alabatosoba kɔlɔsibagaw nunu kɔsegira ka taa sarakalasebagaw kuntigiw ni Farizinyɛw fɛ. U y'u nyininga ko: “Mun na aw ma na n'a ye?” U y'u jaabi ko: “Ii! Mɔgɔ ka kuma tɛ nya ka tɛmɛ nin ta kan!” Farizinyɛw y'u nyininga ko: “Aw fana y'a to a sera aw kɔrɔ kɛ? An ka siya nyamɔgɔw walima Farizinyɛw cɛma, jon le lar'a la? Ni jama nin tɛ, olu tɛ Musa ka sariya lɔn do! U danganinw lo.” Nikodɛmu min tun taara Yezu fɛ loon dɔ, n'ale ye Farizinyɛ nunu dɔ ye, ale y'a fɔ ko: “Ka kɛnyɛ ni sariya ye, an bɛ se ka mɔgɔ jalaki n'a tigi darakan ma mɛn wa? N'a ka kɛwali ma lɔn wa?” U y'ale jaabi ko: “E fana ye Galileka ye wa? Ala ka kuma sɛgɛsɛgɛ kosɛbɛ, i bɛn'a ye ko kira si tɛ bɔ Galile mara la.” [ Mɔgɔ nunu bɛɛ tɛmɛna k'u ka soo siraw ta. O kɔ, Yezu taara Olivuyirikulu kan. Sɔgɔmada joona dɔrɔn, a segira ka na Alabatosoba kɔnɔ. Jama tun bɛ nan'a fɛ minkɛ, a sigira ka to k'u kalan. Sariya karamɔgɔw ni Farizinyɛw ye muso dɔ minɛ kakala kɛyɔrɔ la ka na n'a ye k'a lɔ jama cɛma ka Yezu nyininga ko: “Karamɔgɔ, muso nin tun lanin bɛ ni cɛɛ dɔ ye, an y'a minɛ. Sariya la, Musa y'a fɔ an ye ko an k'o muso sugu bon k'a faga ni kabakuruw ye. Ele do, e ko di?” U ye jaan la ten n'u ka kuma ye waasa ka se ka Yezu jalaki. Nga Yezu y'a kuun biri ka to ka sɛbɛnni kɛ duguma n'a bolokɔniden ye. U tora ka nyiningali kɛ minkɛ, Yezu y'a kuun wili k'a fɔ u ye ko: “Mɔgɔ min b'aw cɛma n'a ma kojugu kɛ ka ye, o tigi ka kɔn ka muso nin bon.” A y'a kuun biri tugu ka to ka sɛbɛnni kɛ duguma. O fɔra u ye minkɛ, u bɛɛ bɔra kelen kelen, fɔɔ ka taa ban, k'a daminɛ u bɛɛ kɔrɔw ma, ka muso nin to a kelen ni Yezu ye. Yezu y'a kuun wili, k'a fɔ a ye ko: “Muso, u bɛ min do? Mɔgɔ si m'i jalaki kɛ?” A y'a jaabi ko: “Matigi, mɔgɔ si.” Yezu ko: “Ne fana tɛna i jalaki. Taa, nga i kana kojugu kɛ tugu.”] Yezu kumana jama fɛ tugu ko: “Ne ye dinyɛ ka yeelen ye. Ni mɔgɔ min sɔnna ne ma, o tigi tɛna taama dibi la. A bɛna to yeelen na min bɛ ta'a don sini hɛrɛ yɔrɔ la.” O la, Farizinyɛw y'a fɔ a ye ko: “E b'i yɛrɛ koo fɔra sisan kɛ, tinyɛ tɛ i ka fɔta nin na.” Yezu y'u jaabi ko: “Ayiwa, ne bɛ n yɛrɛ koo fɔ, ne bɛ tinyɛ le fɔra, bari ne bɛ n bɔyɔrɔ lɔn ka n taayɔrɔ lɔn. K'a sɔrɔ aw tɛ ne bɔyɔrɔ lɔn, aw tɛ n taayɔrɔ fana lɔn. Aw kɔni bɛ mɔgɔw jalaki ka kɛnyɛ ni adamadenya ye. Ne tɛ mɔgɔ si jalaki. Nga ni ne bɛ mɔgɔ jalaki, n b'a kɛ ni tilenninya ye. Bari ne kelen t'o kɛ. Ne ni n cibaga le b'o kɛ. A yɛrɛ fɔra aw ka sariya la ko ni mɔgɔ fila ka seereya bɛnna nyɔgɔn ma, o ye tinyɛ ye tigitigi. Ne bɛ n yɛrɛ koo fɔ, ani Faa min ye ne ci, ale ye ne seere ye fana.” U y'a nyininga ko: “E Faa nin bɛ min?” Yezu y'u jaabi ko: “Aw tɛ ne lɔn, aw tɛ n Faa fana lɔn. N'aw tun bɛ ne lɔn, aw tun bɛna n Faa fana lɔn.” Alabatosoba yɔrɔ min bɛ wele ko Nafolo marayɔrɔ, a ye kuma nunu fɔ o yɔrɔ la le, o y'a sɔrɔ a bɛ mɔgɔw kalanna. Mɔgɔ si ma se ka maga a la, bari a ka waati tun ma se fɔlɔ. Yezu y'a fɔ jama ye tugu ko: “Ne bɛ taa, aw bɛna ne yɔrɔ nyini ka dɛsɛ, aw bɛna sa n'aw ka kojuguw ye. Ne bɛ taara yɔrɔ min na, aw tɛ se ka taa yen.” O la, Zuwifuw y'a fɔ ko: “N'a sɔrɔ a b'a fɛ k'a yɛrɛ faga le, bari a b'a fɔra ko ale bɛna taa yɔrɔ min na, ko an tɛ se ka taa yen.” Yezu y'u jaabi ko: “Aw ye dugukolo kan mɔgɔw ye, nga ne bɔra sankolo la. Aw ye dinyɛ nin ka mɔgɔw ye. Nga, ne tɛ yan mɔgɔ ye. O kama lo ne y'a fɔ aw ye ko aw bɛna sa n'aw ka kojuguw ye. Ne ko ne ye min ye, n'aw ma la o la, aw bɛna sa n'aw ka kojuguw ye sɛbɛ la.” O la, u y'a nyininga ko: “E ye jon ye?” Yezu y'u jaabi ko: “Kabini a daminɛ na, n m'o fɔli dabila. Kuma caaman bɛ n fɛ k'o fɔ aw koo la, k'aw jalaki. Ne cibaga ye tinyɛtigi ye, ne ye min mɛn ale fɛ, ne b'o le fɔ mɔgɔw ye.” U ma se k'a faamu ko a bɛ Faa Ala le koo fɔra u ye. O la, Yezu y'a fɔ u ye ko: “N'aw ye Mɔgɔ Dencɛ kɔrɔ ta sanfɛ ka ban tuma min na, ne ye min ye, aw bɛna o lɔn, ko ne tɛ foyi kɛ n yɛrɛ ma. N Faa ye min fɔ n ye, ne b'o le fɔ. Ne cibaga bɛ ni ne ye. A ma ne to n kelen, bari min ka d'a ye, ne bɛ o le kɛ tuma bɛɛ.” A tun bɛ kumana ten minkɛ, mɔgɔ caaman lara a la. Zuwifuw nyamɔgɔ minw lara Yezu la, a y'a fɔ olu ye ko: “N'aw ye ne ka kuma labato, aw bɛ kɛ n ka kalandenw ye tinyɛ na. O la, aw bɛna tinyɛ lɔn, o tinyɛ le bɛna aw kɛ hɔrɔnw ye.” U y'a jaabi ko: “Anw ye Ibrayima deenw ye. An ma deli ka kɛ mɔgɔ si ka jɔɔn ye. I bɛ se k'a fɔ cogo di ko an bɛna kɛ hɔrɔnw ye?” Yezu y'u jaabi ko: “Tinyɛ tinyɛ na, mɔgɔ o mɔgɔ bɛ to ka kojugu kɛ, o tigi ye kojugu ka jɔɔn le ye. Jɔɔn tɛ jati a kuntigi ka somɔgɔw dɔ ye, nga a kuntigi deen jatinin lo tuma bɛɛ. Ayiwa, n'o Deen nin y'aw hɔrɔnya, o bɛ kɛ hɔrɔnya dafanin ye. Ne y'a lɔn ko aw ye Ibrayima deenw ye. Nga ne ka kuma tɛ donna aw dusu la, o kama aw bɛ ne fagayɔrɔ nyinina. Ne ye min ye n Faa Ala fɛ, ne b'o le fɔ. K'a sɔrɔ aw ye min mɛn aw faa fɛ, aw b'o le kɛ.” U y'a jaabi ko: “Anw faa ye Ibrayima le ye.” Yezu y'a fɔ u ye ko: “N'aw faa ye Ibrayima ye, aw k'a ka kɛwaliw nyɔgɔn kɛ. Aw t'o kɛ. Ne ye tinyɛ kuma min mɛn Ala fɛ, ne y'o bɛɛ fɔ aw ye. Nga aw bɛ ne fagayɔrɔ le nyini, k'a sɔrɔ Ibrayima m'o nyɔgɔn kɛ. Aw b'aw faa ka kɛwaliw le kɛ.” U y'a jaabi ko: “A ma kɛ i n'a fɔ ko anw ye nyamɔgɔdenw ye dɛ! Faa kelen le bɛ an fɛ: o ye Ala ye.” Yezu y'a fɔ u ye ko: “Ni Ala tun ye aw Faa ye, ne koo tun bɛna diya aw ye, bari ne bɔra Ala le fɛ ka na. Ne ma na n yɛrɛ ma. Ale le ye ne ci. Ne bɛ minw fɔ aw ye, mun na aw t'o faamu? Bari aw ma sɔn ka mɛnni kɛ. Aw faa ye Sutana le ye. Aw do b'a fɛ k'ale sago le kɛ. Kabini dinyɛ daminɛtuma na, ka mɔgɔ nii bɔ, o le kɛra a sago ye. A ma sɔn ka tinyɛ fɔ ka ye, bari tinyɛtigi tɛ. N'a bɛ kuma o kuma fɔ, o bɛɛ bɛ kɛ galon ye, bari, ale yɛrɛ le ye galon faa ye. Ne kɔni, ne bɛ tinyɛ fɔra minkɛ, o kama lo aw tɛ lara ne la. Aw la jon bɛ se k'a disi gosi ko ne ye kojugu kɛ? Ne bɛ tinyɛ fɔ aw ye, mun na aw tɛ la ne la? Mɔgɔ min ye Ala ka mɔgɔ ye, o tigi bɛ mɛnni kɛ Ala fɛ. Aw tɛ Ala ka mɔgɔw ye minkɛ dɛ, o kama aw tɛ sɔn ka mɛnni kɛ ne fɛ.” Zuwifu nunu y'a jaabi ko: “An ye min fɔ tinyɛ yɛrɛ lo. I ye Samarika ye, i ye jinatɔ ye.” Yezu y'u jaabi ko: “Ne tɛ jinatɔ ye dɛ, ne bɛ kunkɔrɔta di n Faa le ma, k'a sɔrɔ aw b'a la ka ne dɔgɔya. O n'a ta bɛɛ, ne tɛ n yɛrɛ ka bonya nyinina. Ne bonyabaga bɛ yen, min bɛ bonya la ne kan, a bɛ kiti tigɛ fana. Tinyɛ tinyɛ na, ne b'a fɔ aw ye ko ni mɔgɔ min ye ne ka kuma labato, o tigi tɛ sa abada!” O la, Zuwifuw nunu y'a fɔ a ye ko: “Sisan kɔni, an y'a lɔn ko i ye jinatɔ ye tinyɛ na! Ibrayima sara, kiraw fana sara. E ko ni mɔgɔ min ye ele ka kuma labato, k'o tigi tɛna sa abada! An faa Ibrayima min sara, e ka fisa n'o ye wa? Kiraw fana sara. E b'i yɛrɛ jati mun le ye sa?” Yezu y'u jaabi ko: “Ni ne bɛ n yɛrɛ tando, o tandoli nin tɛ foyi nya. Ne Faa le bɛ n tando. Aw k'o min y'aw ka Ala ye. K'a sɔrɔ aw do t'a lɔn. Ne kɔni b'a lɔn. Ni ne y'a fɔ ko n t'a lɔn, an bɛɛ bɛ kɛ kelen ye, ne fana bɛ kɛ galontigɛla ye. Nga, ne b'a lɔn, n b'a ka kuma labato fana. Aw faa Ibrayima nisɔn tun diyara, bari a miirila ko a bɛna ne ka tile ye. A do y'a ye, o nisɔndiya nin y'a wasa.” Zuwifu nunu ko: “E yɛrɛ sii ma saan bi duuru bɔ fɔlɔ, e ko i ye Ibrayima ye!” Yezu y'a fɔ u ye ko: “Tinyɛ tinyɛ na, ne b'a fɔ aw ye ko sanni Ibrayima ka wolo, ne tun bɛ yen.” Aa, o yɔrɔ la u ye kabakuruw cɛ k'u bɛ Yezu bon, nga a dogora ka bɔ Alabatosoba kɔnɔ. Yezu tɛmɛtɔ ye cɛɛ dɔ ye min finyɛntɔman wolola. Kalandenw ye Yezu nyininga ko: “Karamɔgɔ, mun na cɛɛ nin finyɛntɔman wolola? Ale yɛrɛ ka kojugu kɔsɔn wa, walima a wolobagaw?” Yezu y'u jaabi ko: “Ale ka koo tɛ, a ka somɔgɔw fana ka koo tɛ. Nga nin kɛra, waasa Ala ka sebagaya ka yira o sababu la. Tile bɛ yen tuma min na, an ka kan ka n cibaga ka baara kɛ o waati la le. Yan ni dɔɔni, ni suu kora, baara tɛ se ka kɛ. Ka ne to dinyɛ nin na, ne le ye dinyɛ ka yeelen ye.” Yezu y'o kuma nunu fɔ ka ban minkɛ, a y'a daji tu duguma ka bɔgɔ nɔɔni n'o ye k'a mɔ finyɛntɔcɛ nyaa na k'a fɔ a ye ko: “Taa ko Silowe jii la.” (Silowe kɔrɔ ko ciraden.) Finyɛntɔ nin taara ko yen, a kɔsegitɔ, a tun bɛ yeli kɛra. A siginyɔgɔn minw tun y'a lɔn ka kɔrɔ saraka dali la, olu nan'a ye, u y'a fɔ ko: “Min tun bɛ sigi yan ka dalili kɛ ale tɛ wa?” Dɔw ko ale yɛrɛ lo. Dɔw ko ale tɛ, ko u bɔra nyɔgɔn fɛ le. Nga cɛɛ ko: “Ne yɛrɛ yɛrɛ lo.” U y'a nyininga ko: “Ɔnhɔn, i nyaa do yɛlɛla cogo di?” A y'u jaabi ko: “U bɛ cɛɛ min wele ko Yezu, ale lo ye bɔgɔ kɛ ka n nyaa mɔ n'a ye ko n ka taa ko Silowe jii la. Ne taara ko, ne nyaa yɛlɛla.” U y'a nyininga ko: “A bɛ min?” A y'u jaabi ko ale m'a lɔn. Cɛɛ min tun ye finyɛntɔ ye, u y'ale minɛ ka taa n'a ye Farizinyɛw fɛ. K'a sɔrɔ lafinyɛlon tun lo Yezu ye bɔgɔ nɔɔni ka cɛɛ nyaa yɛlɛ n'a ye. Farizinyɛw fana ye cɛɛ nyininga ko a nyaa yɛlɛla cogo di. A y'u jaabi ko: “A ye bɔgɔ mɔ n nyaa na, n ye n nyaa ko, n bɛ yeli kɛ sisan.” Farizinyɛ nunu dɔw y'a fɔ ko: “Ale cɛtɔgɔ nin tɛ lafinyɛlon labato. O tuma na, a ma bɔ Ala fɛ.” Nga dɔw ko: “Kojugukɛla bɛ se ka kabako nin nyɔgɔn kɛ wa?” O yɔrɔ la, u daa fɔnna nyɔgɔn kɔ. U ye cɛɛ nyininga tugu ko: “Cɛɛ min y'i nyaa yɛlɛ wo, ele bɛ mun le fɔ a koo la?” A y'u jaabi ko: “Cɛɛ nin ye kira le ye.” O bɛɛ n'a ta, Zuwifuw ka nyamɔgɔw ma sɔn ka la a la ko cɛɛ nin tun ye finyɛntɔ ye ka kɔrɔ, fɔɔ u y'a ka somɔgɔw wele le. U y'a ka somɔgɔw nyininga ko: “Cɛɛ nin y'aw ka woloden ye wa? Aw ko a finyɛntɔman le wolola! A do kɛra di a bɛ yeli kɛ sisan?” A wolobagaw y'u jaabi ko: “Anw kɔni y'a lɔn ko an deen lo, a fana finyɛntɔman le wolola. A nyaa yɛlɛko, an tɛ dɔ lɔn o la. Aw b'a yɛrɛ nyininga o koo la, denmisɛn tɛ, a ka kan ka se k'o nyafɔ aw ye.” A wolobagaw kumana ten, bari u tun bɛ siran u ka siya nyamɔgɔw nya. Bari, u tun bɛnnin b'a la ko ni mɔgɔ o mɔgɔ y'a fɔ ko Yezu ye Ala ka Mɔgɔ wolomanin nin ye, k'o tigi seen tɛna don Alabatoso kɔnɔ tugu. O kama, a wolobagaw y'a fɔ k'u k'a yɛrɛ nyininga, ko denmisɛn tɛ. Farizinyɛw ye cɛɛ wele tugu k'a fɔ a ye ko: “Anw y'a lɔn ko i nyaa yɛlɛbaga nin ye kojugukɛla ye. Tinyɛ fɔ an ye Ala kama.” A y'u jaabi ko: “Ne kɔni m'a lɔn ni kojugukɛla lo dɛ! Ne bɛ koo kelen dama lɔn, ne tun ye finyɛntɔ ye, nga sisan ne bɛ yeli kɛ.” U y'a nyininga ko: “A ye mun le kɛ i la? A y'i nyaa yɛlɛ cogo di?” Cɛɛ y'u jaabi ko: “Ne tun kɔnna k'o nyafɔ aw ye, aw m'aw tulo malɔ n fɛ. Mun na aw b'a fɛ k'o kuma kelen nin lamɛn tugu? Kɔni aw fana t'a fɛ ka kɛ a ka kalandenw ye dɛ!” Farizinyɛw y'a daminɛ ka cɛɛ nɛni, u y'a fɔ a ye ko: “E le y'a ka kalanden ye. Anw kɔni ye Musa ka kalandenw ye. An y'a lɔn ko Ala kumana Musa fɛ. Nga nin do, an m'a lɔn a bɛ bɔ yɔrɔ min na.” Cɛɛ y'a fɔ u ye ko: “Aa, nin le ye kabako nin ye. Aw m'a bɔyɔrɔ lɔn k'a sɔrɔ a ye ne nyaa yɛlɛ. An kɔni b'a lɔn ko Ala tɛ kojugukɛla ka dalili jaabi. Nga mɔgɔ min bɛ siran Ala nya n'a b'a sago kɛ, a b'ale le jaabi. An m'a mɛn ka ye fɔlɔ ko mɔgɔ min finyɛntɔman wolola, ko dɔ y'o nyaa yɛlɛ. Ni cɛɛ nin tun ma bɔ Ala fɛ, a tun tɛna se ka foyi kɛ.” U y'a fɔ a ma ko: “Ele bɛ kojugu la kabini e wolotuma, e bɛ na lɔ yan ko i b'an kalan!” U y'a gwɛn ka bɔ kɛnɛma. Yezu y'a mɛn k'u y'a gwɛn minkɛ, a nan'a kunbɛn, a y'a nyininga ko: “I bɛ la Mɔgɔ Dencɛ la wa?” Cɛɛ y'a jaabi ko: “Kɔrɔ, jon lo, waasa ne ka l'a la?” Yezu ko: “I y'a ye ka ban. Ale le bɛ kumana i fɛ ten jaati.” Cɛɛ ko: “Ne lara e la Matigi.” A y'a kunbiri gwan Yezu kɔrɔ. O kɔ, Yezu ko: “Ne nana dinyɛ nin na kiti le kama. O la, minw nyaa tɛ yeli kɛ, olu nyaa ka yɛlɛ. Minw bɛ yeli kɛ, olu ka finyɛn.” Farizinyɛ minw tun bɛ n'a ye o yɔrɔ la k'a ka kuma nin mɛn, olu y'a nyininga ko: “Anw fana ye finyɛntɔw ye wa?” Yezu y'u jaabi ko: “N'aw tun finyɛnnin lo, kojugu tun tɛna sɔrɔ aw kan. Nga aw b'a fɔ minkɛ ko aw bɛ yeli kɛ, o kama, aw ka kojugu b'aw kan.” Yezu ko: “Tinyɛ tinyɛ na, ne b'a fɔ aw ye ko ni mɔgɔ min ma don ni saga wɛɛrɛ daa ye, fɔɔ ka pan ka don ni faan wɛrɛ ye, k'o tigi ye soon ye, benkannikɛla lo. Nga min bɛ don ni wɛɛrɛ daa ye, ale le ye saga nunu dɛndɛbaga ye. Daa kɔlɔsibaga bɛ daa yɛlɛ a ye. Sagaw bɛ mɛnni kɛ a fɛ, minw y'a taw ye, a b'u tɔgɔw wele kelen kelen ka bɔ n'u ye kɛnɛma. N'a bɔra n'a ta nunu bɛɛ ye kɛnɛma ka ban, a bɛ bila u nya, u bɛ tugu a kɔ, bari u b'a kaan lɔn. U tɛna tugu mɔgɔ wɛrɛ kɔ fewu, u bɛna boli a nya yɛrɛ, bari u tɛ ale kaan lɔn.” Yezu y'o talen nin la u ye ten. Nga, u m'a taayɔrɔ lɔn. Yezu y'a fɔ tugu ko: “Tinyɛ tinyɛ na, ne b'a fɔ aw ye ko sagaw bɛ don ni daa min ye wɛɛrɛ kɔnɔ, ne le ye o daa nin ye. Minw bɛɛ kɔnna ne nya, olu bɛɛ ye soonw ni benkannikɛlaw le ye. Nga sagaw ma mɛnni kɛ u fɛ. Ne le ye donda ye. Ni mɔgɔ min donna n'o daa ye, o tigi bɛna kisi. A bɛna don, ka bɔ, k'a ka dumuni sɔrɔ. Soon kɔni tɛ na foyi kama ni sonyali ni fagali ni cɛnni tɛ. Ne nana waasa mɔgɔw ka kisi ani u ka hɛrɛ ka sabati. “Ne ye sagaw dɛndɛbaganyuman ye. Sagaw dɛndɛbaga nyanaman b'a nii di a ka sagaw kɔsɔn. Nga min b'u dɛndɛ sara kɔsɔn n'a ta tɛ sagaw ye, n'ale ye wara natɔ ye, a bɛ sagaw to, ka kɛnɛ minɛ. Wara bɛ minɛni kɛ, sagaw bɛ jɛnsɛn. A bɛ boli bari warinyinila dama lo, a mako tɛ sagaw fagako la. Ne ye sagaw dɛndɛbaga nyanaman ye. Ne bɛ n ka sagaw lɔn, n ka sagaw fana bɛ ne lɔn. O cogo la, ne bɛ n Faa lɔn, n Faa fana bɛ ne lɔn. Ne bɛ n nii di n ka sagaw kɔsɔn. Saga wɛrɛw bɛ ne fɛ minw tɛ wɛɛrɛ nin kɔnɔ. U bɛna na n kaan mɛn. Fɔɔ n ka na n'u ye, u bɛɛ bɛ kɛ kulu kelen ye, ani dɛndɛbaga kelen u kɔ. N Faa bɛ n kanu, o la, ne bɛ n nii saraka, janko ka tila k'a sɔrɔ tugu. Mɔgɔ si tɛ ne nii bɔ dɛ, ne yɛrɛ le b'a di. See bɛ ne ye k'a di, see bɛ ne ye k'a minɛ tugu. N Faa y'o le nyini ne fɛ.” O kuma nunu nana ni farali ye Zuwifuw cɛma tugu. U caaman tun b'a fɔra ko: “Jinatɔ lo, a kuun wilila, a lamɛnkun?” Dɔw ko: “A ka kuma nunu tɛ jinatɔ kumaw ye han! Jina bɛ se ka finyɛntɔ nyaa yɛlɛ wa?” Alabatosoba saniya nyanagwɛ tun bɛ kɛra Zeruzalɛmu, nɛnɛ tuma na. Alabatosoba donda yɔrɔ min bɛ wele ko Solomani ka bolonda, Yezu tun bɛ taamataamana yen. Zuwifuw taar'a lamini k'a nyininga ko: “I bɛ waati jumɛn le kɔnɔ ka sɔrɔ ka tinyɛ fɔ an ye? N'o y'a sɔrɔ i ye Ala ka Mɔgɔ wolomanin nin ye, a fɔ an ye ka gwɛ.” Yezu y'u jaabi ko: “Ne y'a fɔ aw ye ka ban, nga aw tɛ lara n la. O bɛɛ n'a ta, ne bɛ kɛwali minw kɛ n Faa tɔgɔ la, o bɛ ne ka koo yira fana. Aw tɛ la n la bari aw tɛ n ka sagaw dɔw ye. Ne bɛ n ka sagaw lɔn, u bɛ mɛnni kɛ n fɛ, u bɛ tugu ne kɔ. Ne fana bɛ hɛrɛ banbali di u ma. U tɛna halaki abada, mɔgɔ si fana tɛ se k'u bɔsi n na. N Faa min y'u di ne ma, ale ka bon ni fɛɛn bɛɛ ye. O mɔgɔ tɛ yen min bɛ se ka fɛɛn bɔsi n Faa bolo. Ne ni n Faa ye kelen ye.” Zuwifu nunu wilila tugu ka kabakuruw cɛ k'u b'a bon. O la, Yezu y'a fɔ u ye ko: “Ne ye konyuman caaman kɛ n Faa barika la, aw y'u ye. Aw b'a fɛ ka ne bon olu jumɛn kama?” U y'a jaabi ko: “Anw m'a fɔ ko an b'i bon konyuman kɛnin kama, nga anw b'a fɛ k'i bon bari i ye kuma fɔbali fɔ. Ele adamadentɔ, i b'a fɔ ko i ye Ala ye!” Yezu y'u jaabi ko: “Ala ko: ‘Aw ye ala dɔw ye.’ O ma sɛbɛn aw ka sariyasɛbɛ kɔnɔ wa? Ala ye min fɔ, o ye kuma yɛlɛmabali ye. A tun bɛ kumana mɔgɔ le fɛ, n'a y'a fɔ u ye ko: ‘Aw ye ala dɔw ye’, Ala ye mɔgɔ min woloma k'a ci dinyɛ na, aw ko ale ma: ‘I ye kuma fɔbali fɔ’. Bari ne y'a fɔ ko ne ye Ala Deen ye. N'o y'a sɔrɔ ni ne tɛ n Faa ka kɛwaliw kɛ, aw kana la ne la. Nga ne b'o kɛra, o bɛɛ n'a ta, aw tɛ lara ne la. Ayiwa, n bɛ baara minw kɛra, aw ye la olu la, janko aw ka se k'a lɔn ko n Faa bɛ ni ne ye, ko ne bɛ ni n Faa ye.” O la, u tun b'a fɛ k'a minɛ tugu nga a sera k'a yɛrɛ bɔsi u bolo. Zan tun ye mɔgɔ batizeli daminɛ Zurudɛn baa kɔ yɔrɔ min na, Yezu segira ka taa to o yɔrɔ la. Mɔgɔ caaman taar'a fɛ. U tun bɛ to k'a fɔ ko: “Zan kɔni ma kabakow kɛ, nga a ye min bɛɛ fɔ cɛɛ nin koo la, a bɛɛ kɛra tinyɛ ye.” Mɔgɔ caaman y'u jigi la Yezu kan o yɔrɔ la yen. Cɛɛ dɔ tun bananin bɛ Betani, Mariyamu n'a kɔrɔmuso Marita ka dugu kɔnɔ, a tɔgɔ ko Lazari. Ale Mariyamu le tun ye tulu kasadiman bon Matigi seen kan ani k'a kunsigi kɛ k'a jɔsi, ale balimacɛ Lazari le tun man kɛnɛ. U ye mɔgɔ bila ka ta'a fɔ Yezu ye ko: “Matigi, i tericɛ man kɛnɛ.” Yezu y'u ka kuma mɛn ka ban tuma min na, a y'a fɔ ko: “Bana nin ma kɛ a faga ta ye, nga a kɛra janko bonya ka la Ala n'a Dencɛ kan.” Marita, n'a dɔgɔmuso, ni Lazari koo tun ka di Yezu ye. A ye Lazari ka bana koo mɛn tuma min na, a tun bɛ yɔrɔ min na, a ye tile fila kɛ yen. O kɔ, a y'a fɔ a ka kalandenw ye k'u ka to u bɛ kɔsegi Zude mara la. A ka kalandenw y'a fɔ a ye ko: “Karamɔgɔ, Zuwifuw tun b'a fɛ k'i bon ni kabakuru ye a ma mɛn, e do ko an ka segi ka taa Zuda mara la.” Yezu y'u jaabi ko: “Lɛrɛ tan ni fila tɛ tile kelen kɔnɔ wa? Ni mɔgɔ min bɛ taama tilefɛ, a tɛ talon, bari a bɛ yeli kɛ tile barika la, nga, ni mɔgɔ dɔ bɛ taama sufɛ, a bɛ talon, bari yeelen tɛ yen.” O kuma bɛɛ fɔnin kɔ, a y'a fɔ u ye ko: “An ka tericɛ Lazari bɛ sinɔgɔra, nga ne bɛ ta'a kunun.” Kalandenw y'a fɔ a ye ko: “Matigi, n'a bɛ sinɔgɔra, o kɔrɔ ko a bɛna kɛnɛya.” Yezu tun bɛ kumana Lazari ka sayako le la, nga kalandenw tun b'a miiri ko a tun bɛ kumana sinɔgɔ yɛrɛ koo la. O kɔ, Yezu y'a fɔ k'a gwɛ u ye ko: “Lazari sara. Ne tun tɛ yen minkɛ, o diyara ne ye, aw kɔsɔn, janko aw ka se ka jigi sɔrɔ. An ka ta'a fɛ.” O la, Toma min tɔgɔ ko Filanin, ale y'a fɔ kalanden tɔ nunu ye k'u k'a to u bɛ taa yen u bɛɛ ka sa nyɔgɔn fɛ. Yezu sera tuma min na, o y'a sɔrɔ Lazari suu tun ye tile naani kɛ kaburu la. Betani ni Zeruzalɛmu furancɛ tun tɛ tɛmɛ kilo saba nyɔgɔn kan. Zuwifu caaman tun taara Betani janko u ka se ka Marita ni Mariyamu jigi tugu u balimacɛ ka sayako la. Marita y'a mɛn tuma min na ko Yezu bɛ nana, a taar'a kunbɛn. O y'a sɔrɔ Mariyamu tun siginin bɛ soo kɔnɔ. Marita y'a fɔ Yezu ye ko: “Matigi, ni e tun bɛ yan ne balimacɛ tun tɛna sa. Nga hali sisan ne lanin b'a la ko e mana fɛɛn o fɛɛn dali Ala fɛ, a bɛna o kɛ e ye.” Yezu fana y'a fɔ a ye ko: “I balimacɛ bɛna kunun.” Marita y'a fɔ a ye fana ko: “Ne y'a lɔn ko a bɛna kunun dinyɛ labanlon na.” Yezu y'a fɔ a ye ko: “Ne le bɛ suuw kunun, ne bɛ nii di, ni mɔgɔ min lara ne la hali n'o tigi sara a bɛna kunun. Ani ka mɔgɔ o mɔgɔ to nii na, n'a lara ne la, a tɛna sa fewu. I lara o la wa?” A y'a jaabi ko: “Ɔnhɔn Matigi, ne lanin b'a la ko ele le ye Ala ka Mɔgɔ wolomanin nin ye, Ala Dencɛ, min ka kan ka na dinyɛ na.” A y'o kuma nunu fɔ ka ban dɔrɔn, a taara Mariyamu wele dogo la k'a fɔ ale ye ko: “Karamɔgɔ nana, a ko i ka na.” Mariyamu y'o mɛn dɔrɔn, a sinna ka wili ka taa Yezu fɛ. O y'a sɔrɔ Yezu tun ma don dugu kɔnɔ fɔlɔ, nga Marita tun y'a kunbɛn yɔrɔ min na, a tun bɛ o yɔrɔ la yen halibi. Zuwifu minw tun bɛ ni Mariyamu ye soo kɔnɔ k'a jigi tugu, olu y'a ye a sinna ka wili ka bɔ dɔrɔn, olu tugura a kɔ. U tun b'a miiri ko a bɛ taara kaburu yɔrɔ la ka kasi. Mariyamu sera Yezu fɛ dɔrɔn, a y'a kunbiri gwan Yezu kɔrɔ k'a fɔ a ye ko: “Matigi, ni e tun bɛ yan, ne balimacɛ tun tɛna sa.” Yezu y'ale ni Zuwifuw kasitɔ ye, o y'a dusu cɛn, u makari y'a minɛ. A y'u nyininga ko: “Aw y'a suu don yɔrɔ jumɛn?” U ko: “Matigi, na i bɛ taa o yɔrɔ filɛ.” Yezu kasira. O kɔsɔn Zuwifu minw tun bɛ yen olu y'a fɔ ko a koo tun ka di a ye dɛ. Nga dɔw y'a fɔ ko: “Ale min tun ye finyɛntɔ nyaa yɛlɛ, a tun tɛ se ka Lazari kisi saya ma wa?” Yezu dusu cɛnna tugu, a taara kaburu yɔrɔ la. Kaburu nin tun ye farawo ye, u ye kabakuru kɛ k'a datugu. Yezu y'a fɔ ko u ka kabakuru bɔ kaburuda la. Cɛɛ min banna, ale balimamuso Marita y'a fɔ a ye ko: “Matigi, a kasa ka kan ka bɔ sisan, bari a suu donna bii y'a tile naani ye.” Yezu y'a fɔ a ye ko: “Ne tun m'a fɔ i ye ko n'i lara a la ko i bɛna Ala ka sebagaya ye wa?” U ye kabakuru bɔ yen, o kɔ Yezu y'a nyaa kɔrɔ ta sanfɛ k'a fɔ ko: “N Faa, ne bɛ barika la i ye bari i ye ne jaabi. Ne y'a lɔn ko i bɛ ne jaabi tuma bɛɛ, nga ne kumana ten janko mɔgɔ minw bɛ ne lamini, olu ka la a la ko ele le ye ne ci.” A y'o kuma fɔ ka ban tuma min na, a pɛrɛnna ko: “Lazari, wili ka bɔ.” Lazari min tun sara, a kununna ka bɔ kaburu la. Fani melekenin tun b'a bolo n'a seen na, ani dɔ tun kɛnin bɛ k'a nyaa siri. Yezu y'a fɔ u ye ko: “Aw k'a foni k'a to a bɛ taa.” Zuwifu minw tun nana Mariyamu fɛ, u ye Yezu ka koo kɛnin ye minkɛ, u caaman lara a la. Nga dɔw taara Farizinyɛw fɛ, Yezu ye koo min kɛ, k'o lakali u ye. Sarakalasebagaw ni Farizinyɛw ye nyɔgɔnye kɛ k'a fɔ ko: “An bɛna mun le kɛ? Bari cɛɛ nin bɛ kabako caaman kɛ. N'an y'a to n'a taara nya, mɔgɔ bɛɛ bɛna la a la, o seen fɛ, Ɔrɔmukaw bɛna na k'an ka yɔrɔ senuman n'an ka siya halaki.” Sarakalasebagaw kuntigiba min tun bɛ yen o saan na, a tɔgɔ ko Kayifu, ale y'a fɔ u ye ko: “Aw tɛ foyi faamu. Aw fana m'a lɔn ko mɔgɔ kelen ka sa jama kɔsɔn janko an ka siya bɛɛ kana halaki, k'o ka fisa wa?” O kuma nin ma bɔ a yɛrɛ la, o saan nin na, ale le tun ye sarakalasebagaw kuntigiba ye, a tun ye kiraya kuma le fɔ ten ko Yezu ka kan ka sa Zuwifu siya kɔsɔn. O fana tun tɛ kɛ u ka siya dama kɔsɔn, nga Ala deenw minw jɛnsɛnnin bɛ, a ka se k'olu kori nyɔgɔn na. Kabini o loon u bɛnn'a la ko u bɛn'a faga. O le kɔsɔn Yezu taara dugudennin dɔ la min tɔgɔ ko Efarayimu. A n'a ka kalandenw tora o yɔrɔ la. A tun tɛ sɔn ka taa Zuwifuw cɛma tuma bɛɛ. O waati la Zuwifu ka Hɔrɔnya nyanagwɛ loon tun sera ka ban. A tɔɔ tun tora tile damani, mɔgɔ caaman tun bɛ bɔ kongo duguw la ka na Zeruzalɛmu janko k'u yɛrɛ saniya ka kɛnyɛ n'u ka landa ye. Olu tun bɛ Yezu yɔrɔ yaalala. K'u to Alabatosoba kɔnɔ, u b'a fɔra nyɔgɔn ye k'o tuma na, a tɛna na nyanagwɛ nin na wa? Sarakalasebagaw ni Farizinyɛw tun y'a fɔ ko ni mɔgɔ min ye Yezu yɔrɔ lɔn, k'u k'a yɔrɔ yira olu la, u bɛ ta'a minɛ. Hɔrɔnya nyanagwɛ tun tora tile wɔɔrɔ, Yezu taara Betani, Lazari ka dugu la a tun y'o min sanin kunun. O yɔrɔ la, u ye dumuni labɛn Yezu ye. Marita le tun bɛ dumuni dira u ma. Lazari fana tun bɛ dumunikɛlaw cɛma. Mariyamu ye daganin dɔ ta o fanin tun bɛ tulu kasadiman nyanaman na, min sɔngɔ ka gwɛlɛ kosɛbɛ. A y'o bɔn Yezu seenw kan ka tila k'a kunsigi kɛ k'a seenw jɔsi, soo bɛɛ fara a kasa la. Zuda Isikariyɔti, n'o ye kalandenw dɔ ye, ale min bɛn'a don bolo la, ale y'a fɔ ko mun na u ma tulu kasadiman nin feere deniye wari kɛmɛ saba la, janko k'o wari tilan faantanw cɛ. A tun y'o kuma nin fɔ, a ma kɛ ko faantanw makari le tun b'a la dɛ, nga soon tun lo. Ale le tun bɛ u ka wari mara, ni wari min dira a ma ko a k'a mara, a b'o dumu. Yezu y'a fɔ a ye ko: “Muso nin to nyasuma na, a ye tulu kasadiman nin kɛ ne kan, ne suu donlon kama. Aw bɛna to ni faantanw ye tuma bɛɛ, nga ne tɛna kɛ n'aw ye tuma bɛɛ la.” Zuwifuw caaman tun y'a mɛn ko Yezu bɛ Betani minkɛ, u y'a daminɛ ka na yen, u tun tɛ na Yezu dama kama nga Lazari fana kama, a tun y'o min kunun. O la, sarakalasebagaw y'a latigɛ ko Lazari fana ka kan ka faga. Bari Lazari kɔsɔn Zuwifuw caaman bɔra olu kɔ ka la Yezu la. O dugusagwɛ, jamaba min tun nana nyanagwɛ nin na, olu y'a mɛn ko Yezu bɛ nana Zeruzalɛmu, u ye tenfuraburuw tigɛ ka bɔ ka ta'a kunbɛn, u tun bɛ pɛrɛn k'a fɔ ko: “An b'i tando! E min bɛ nana, Isirayɛli ka masacɛ, Matigi ka barika don i la.” Yezu ye faliden dɔ sɔrɔ ka yɛlɛ o kan i n'a fɔ a fɔra Ala ka kuma na cogo min na ko: “Zeruzalɛmukaw, aw kana siran, aw ka masacɛ filɛ a bɛ nana, a bɛ faliden kan.” O koo nin kɛtuma na, kalandenw tun ma kɔn k'o faamu, nga Ala ye Yezu bonya tuma min na, u hakili sɔrɔla ka jigi a la k'o kuma nunu tun sɛbɛnna ale le koo la. O fana le kɛra a ye. Yezu ye Lazari kunun k'a wele ka bɔ kaburu kɔnɔ jama min nyana, olu y'a koo fɔ mɔgɔw ye. Jama tun b'a kunbɛnna bari u tun y'a mɛn ko a y'o kabako kɛ. Farizinyɛw tora k'a fɔ nyɔgɔn ye ko u tɛna se ka foyi nya tugu, ko mɔgɔ bɛɛ le bɛ tugura a kɔ. Girɛki dɔw tun nana nyanagwɛ nin seen fɛ janko u ka Ala bato. U taara Filipi fɛ ale min bɛ bɔ Bɛtisayida Galile mara la, k'a fɔ a ye ko: “N tericɛ, an b'a fɛ ka Yezu ye.” Filipi taar'a fɔ Andere fana ye, u fila bɛɛ jɛnna ka ta'a fɔ Yezu ye. Yezu y'u jaabi ko: “Mɔgɔ Dencɛ ka kan ka bonya sɔrɔ waati min na, o le sera sisan. Tinyɛ tinyɛ na, ne b'a fɔ aw ye ko ni suman kisɛ ma don dugukolo la, a tɛ se ka buguya, nga n'a donna, o tuma na a bɛ se ka buguya. Mɔgɔ min b'a fɛ k'a nii kisi, o tigi bɛna bɔnɔ, ni mɔgɔ min t'a nii jati dinyɛ kɔnɔ, o tigi bɛna hɛrɛ banbali sɔrɔ. Ni mɔgɔ min b'a fɛ ka baara kɛ ne ye, o tigi ka tugu ne kɔ, ne bɛ yɔrɔ min na, ne ka baarakɛlaw fana bɛna kɛ o yɔrɔ le la. Ni mɔgɔ min bɛ baara kɛ ne ye, n Faa bɛna bonya la o tigi kan. “Sisan ne nii tɔɔrɔnin lo, ne bɛna mun le fɔ? N Faa, k'a fɔ ko i ka ne kisi nin waati tɔɔrɔ ma wa? Nga ne nakun le y'o ye. N Faa, i k'i yɛrɛ tɔgɔ bonya!” O waati yɛrɛ la, kumakan dɔ bɔra sankolo la, k'a fɔ ko: “Ne y'a bonya, ne fana bɛna tila k'a bonya tugu.” Jama min tun bɛ yen olu y'a fɔ ko saan le pɛrɛnna, dɔw y'a fɔ ko mɛlɛkɛ dɔ le kumana a fɛ. Yezu y'a fɔ u ye tugu ko: “Kumakan min mɛnna o ma kɛ ne kɔsɔn dɛ, a kɛra aw le kɔsɔn. Dinyɛ kitiwaati sera sisan sisan yɛrɛ, dinyɛ nin kuntigi bɛna gwɛn ka to kɛnɛma. Ne kɔni, ni ne kɔrɔ tara sanfɛ tuma min na, ne bɛna mɔgɔ bɛɛ sama ka na ne fɛ.” A tun b'a yɛrɛ ka saya cogo koo le fɔra o kuma nin na. Jama y'a fɔ a ye ko: “An y'a mɛn sariya la ko Ala ka Mɔgɔ wolomanin nin bɛna to yen kudayi, e do y'a fɔ cogo di ko Mɔgɔ Dencɛ kɔrɔ ka kan ka ta sanfɛ? Jon le ye o Mɔgɔ Dencɛ ye?” Yezu y'u jaabi ko: “Yeelen b'aw cɛma yan ni dɔɔni halibi. Tuma min na o yeelen b'aw cɛma, aw ka banba ka taama o yeelen nin na, janko suu kana ko ka bali aw la, bari mɔgɔ min bɛ taama dibi la o tigi t'a taayɔrɔ lɔn. Tuma min na yeelen b'aw cɛma, aw k'aw jigi la a kan, janko aw ka se ka kɛ mɔgɔ kɔnɔgwɛninw ye.” Yezu y'o kuma nunu fɔ u ye ka ban tuma min na, a bɔra u cɛma ka ta'a yɛrɛ dogo u la. Yezu ye kabako caaman kɛ u nyana, o bɛɛ la u ma la a la. O cogo la kira Ezayi ye kuma min fɔ o kɛra, a tun ko: “Matigi, jon le lara an ka fɔta la? Matigi y'a ka sebagaya yira jon na?” U tun tɛ se ka la a la kuun min na, Ezayi y'o fɔ fana, a ko: “Ala y'u kɛ finyɛntɔw ye janko u kana yeli kɛ. A y'u kɛ hakilitanw ye janko u kana faamuli kɛ, ka yɛlɛma k'u nyaa sin a ma, a k'u kɛnɛya.” Ezayi y'o kuma fɔ bari a tun ye Yezu ka nɔɔrɔ ye, o la a kumana ale koo la. O bɛɛ n'a ta kuntigi caaman lara a la, nga Farizinyɛw nyasiran kɔsɔn u tun tɛ sɔn k'u yɛrɛ yira, bari u tun bɛ siran ko u bɛna u nii bɔ Alabatoso koo la. Bari u mako tun bɛ adamaden ka bonya la ka tɛmɛ Ala ta kan. O tuma na Yezu pɛrɛnna ko: “Ni mɔgɔ min lara ne la, o tigi ma la ne dama na, nga Ala min ye ne ci a lara ale la, ani mɔgɔ min ye ne ye o tigi ye ne cibaga fana ye. Ne nana dinyɛ na i n'a fɔ yeelen, janko mɔgɔ o mɔgɔ lara ne la o tigi kana to dibi kɔnɔ. Ni mɔgɔ min ye ne ka kuma mɛn, n'a ma sɔn k'o labato, a ma kɛ ko ne le b'o tigi kitira dɛ, bari ne ma na janko ka adamadenw kiti, nga waasa k'o kisi. Mɔgɔ min banna ne la ani a ma sɔn ne ka kuma na, o tigi kitibaga bɛ yen, ne ye kuma min fɔ, o le bɛn'a tigi kiti dinyɛ labanlon na. Ne ma kuma ne yɛrɛ ma, nga n Faa min ye n ci ka na, ne ka kan ka kuma minw fɔ, ale le y'o fɔ ne ye. Ani ne b'a lɔn ko hɛrɛ banbali bɛ sɔrɔ o kuma barika la. O le y'a to n Faa ye koo nunu fɔ ne ye cogo min na, ne fana b'o fɔ ten.” Hɔrɔnya nyanagwɛ tun ma se fɔlɔ, Yezu tun y'a lɔn ko ale ka bɔwaati sera dinyɛ na ka ta'a Faa fɛ. A ka mɔgɔ minw tun bɛ dinyɛ na, olu koo tun ka di a ye, a y'u kanu fɔɔ ka taa se a daan na. K'u to dumuni na, ale n'a ka kalandenw, o y'a sɔrɔ Sutana tun ye Simɔn deen Zuda Isikariyɔti kɔnɔ fa ka ban ni Yezu janfako ye. Yezu tun y'a lɔn ko a Faa ye koo bɛɛ don ale bolo, ani ko ale bɔra Ala fɛ, ani a ka kan ka taa Ala fɛ tugu, a wilila ka bɔ dumuni kunna k'a ka foroca bɔ, ka fani wɛrɛ ta k'a cɛɛ siri n'o ye. O kɔ, a ye jii don minan dɔ kɔnɔ, k'a daminɛ ka to k'a ka kalandenw seen ko, ka to k'o fani kɛ k'u jɔsi. A sera Simɔn Piyɛri ma tuma min na, Piyɛri y'a fɔ a ye ko: “Matigi, ele bɛna ne seen ko wa?” Yezu y'a jaabi ko: “Ne bɛ koo min kɛra ten, e t'o faamuna sisan, nga kɔfɛ, i bɛna o faamu.” Piyɛri y'a fɔ a ye ko: “E tɛna ne seen ko abada!” Yezu y'a fɔ a ye ko: “Ni ne ma i seen ko, i tɛna niyɔrɔ sɔrɔ ne fɛ.” A y'a fɔ Yezu ye ko: “A kana dan ne seen dama ma, nga ne bolo ni n kuun fana ko.” Yezu y'a fɔ a ye tugu ko: “Ni mɔgɔ min kora ka ban, o tigi mako t'a la ka ko tugu fɔɔ k'a seen dama le ko, bari a fari saniyanin lo ka ban. Aw gwɛnin lo, nga aw bɛɛ tɛ.” Mɔgɔ min tun bɛn'a don mɔgɔjuguw bolo, a tun b'o tigi lɔn. O le y'a to a ko: “Aw bɛɛ gwɛnin tɛ.” A y'u seen ko ka ban tuma min na, a y'a ka faniw ta k'o don ka sigi dumuni kunna tugu k'a fɔ u ye ko: “Ne ye koo min kɛ aw ye, aw y'o faamu wa? Aw bɛ ne wele ko karamɔgɔ ani Matigi, o bɛnnin lo, bari ne y'o le ye. Ni ne ye aw seen ko, ne min ye aw ka Matigi ni karamɔgɔ ye, aw fana ka kan ka nyɔgɔn seen ko. Ne y'o kɛ janko k'o nyayira aw la. Ne ye fɛɛn min kɛ aw ye, aw k'o nyɔgɔn kɛ aw mɔgɔnyɔgɔnw ye. Tinyɛ tinyɛ na, ne b'a fɔ aw ye ko baaraden man fisa n'a ka kuntigi ye, walima ciden man fisa n'a cibaga ye. Sisan aw y'o koo lɔn, n'aw y'o koo nin kɛ, aw dagamuna. Ne tɛ kumana aw bɛɛ koo la dɛ, ne ye minw woloma ne bɛ olu lɔn, nga min fɔra Ala ka kuma na, fɔɔ o ka kɛ. A ko: ‘Min tun bɛ dumuni kɛ ni ne ye, ale le wilila ne kama.’ Ne bɛ kɔn k'o fɔ aw ye yan n'o ka se, janko n'o kɛra loon min na, ne ko ne ye min ye, aw ka la a la ko ne ye o le ye. Tinyɛ tinyɛ na, ne b'a fɔ aw ye ko ni mɔgɔ min ye ne ka ciden minɛ ka nya, o tigi ye ne le minɛ ka nya. Ni min ye ne minɛ ka nya, o tigi fana ye ne cibaga le minɛ ka nya.” Yezu y'o kuma nunu fɔ ka ban dɔrɔn, a hakili nyagamina kosɛbɛ, a y'a fɔ ko: “Tinyɛ tinyɛ na, ne b'a fɔ aw ye ko, aw dɔ bɛna ne don mɔgɔjuguw bolo.” Kalandenw tora ka nyɔgɔn filɛfilɛ, u tun m'a lɔn ko a bɛ kumana mɔgɔ min koo la. Kalanden nunu cɛma, min koo tun ka di Yezu ye kosɛbɛ, ale tun siginin b'a gɛrɛfɛ. Simɔn Piyɛri y'a bolo kɛ k'a fɔ ale ye ko a k'a nyininga ni mɔgɔ min koo lo. O kalanden nin y'a yɛrɛ jɛngɛn ka taa Yezu faan fɛ, k'a nyininga ko: “Matigi, jon lo?” Yezu y'a jaabi ko: “Ne bɛna lɔgɔma nin sun naan na k'a di mɔgɔ min ma, o lo.” A ye lɔgɔma nin sun naan na k'a di Simɔn deen Zuda Isikariyɔti ma. A ye lɔgɔma nin di tuma min na, o waati yɛrɛ la Sutana y'a daminɛ ka baarajugu kɛ Zuda dusu la. Yezu y'a fɔ a ye ko: “E b'a fɛ ka fɛɛn min kɛ, i ka banba k'o kɛ sa.” Kalanden tɔw si ma kuma nin kuun lɔn. Dɔw tun b'a miiri ko Yezu y'a fɔ a ye ko a ka u ka makoyafɛn dɔ san nyanagwɛ kama, walima ko a ka taa fɛɛn dɔ di faantanw ma, bari ale le tun ye u ka warimarabaga ye. Zuda y'o lɔgɔma nin minɛ k'a dumu ka ban tuma min na dɔrɔn, a wilila ka bɔ, o y'a sɔrɔ suu tun kora kosɛbɛ. Zuda bɔra ka ban dɔrɔn, Yezu y'a fɔ ko: “Sisan kɔni Mɔgɔ Dencɛ ye bonya sɔrɔ, Ala fana ye bonya sɔrɔ a barika la. Ni Ala ye bonya sɔrɔ a barika la, Ala fana bɛna kɛ a bɛ bonya sɔrɔ, a bɛna o kɛ hali sisan yɛrɛ. Ne deenw, ne bɛ n'aw ye yan ni waati dɔɔni dɔrɔn. O kɔ, aw bɛna ne yɔrɔ nyini. Ne tun kɔnna k'a fɔ Zuwifuw ye cogo min na ko u tɛna se ka na ne taayɔrɔ la, ne b'o kelen le fɔ aw fana ye. “Ne bɛ cikura di aw ma ko: aw ka nyɔgɔn kanu, ne ye aw kanu cogo min na, aw fana ka nyɔgɔn kanu ten. Mɔgɔ bɛɛ bɛn'a lɔn o seen fɛ ko aw kɛra ne ka kalandenw ye, ni aw bɛ nyɔgɔn kanu.” Simɔn Piyɛri y'a nyininga ko: “Matigi, i bɛ taa min?” A y'a jaabi ko: “Ne bɛ taa yɔrɔ min na, e tɛ se ka tugu ne kɔ ka taa o yɔrɔ la fɔlɔ, nga yan ni waati dɔ, e bɛna se ka tugu ne kɔ.” Piyɛri y'a fɔ a ye tugu ko: “Mun na ne tɛ se ka tugu i kɔ sisan? Ne bɛna n nii d'i kɔsɔn.” Yezu y'a jaabi ko: “I bɛna i nii di ne kɔsɔn. Nga tinyɛ tinyɛ na, ne b'a fɔ i ye ko yan ni dondo ka kasi, i bɛn'a fɔ sinyɛ saba ko e tɛ ne lɔn.” Yezu y'a fɔ a ka kalandenw ye ko: “Aw hakili kana nyagami. Aw lara Ala la, aw ye la ne fana na. Boon caaman bɛ n Faa ka luu kɔnɔ, n'o tɛ ne tun tɛn'a fɔ ko ne bɛ taa yɔrɔ labɛn aw ye. Ni n taar'a labɛn ka ban, ne bɛna kɔsegi ka na k'aw ta ka taa n'aw ye, janko ne bɛ yɔrɔ min na aw fana ka kɛ o yɔrɔ la. Aw bɛ ne taayɔrɔ sira lɔn.” Toma y'a fɔ a ye ko: “Matigi, an t'i taayɔrɔ lɔn, an fana bɛ kɛ di k'a sira lɔn?” Yezu y'a jaabi ko: “Ne le kɛra sira ye, ni tinyɛ, ani nii dibaga ye. Mɔgɔ si tɛ se n Faa fɛ ni ne sababu tɛ. Ni aw bɛ ne lɔn, aw bɛna n Faa fana lɔn, sisan aw yɛrɛ y'a lɔn ka ban, aw y'a ye fana.” Filipi y'a fɔ a ye ko: “I Faa yira an na, o b'an wasa.” Yezu y'a fɔ Filipi ye ko: “Ne bɛ n'aw ye kabini tumajan, o bɛɛ n'a ta e ma ne lɔn wa Filipi? Ni mɔgɔ min nyaa lara ne kan, o tigi ye n Faa fana ye, mun na e b'a fɔ ko ne ka n Faa yira aw la? I lanin t'a la ko ne ni n Faa bɛɛ ye kelen ye wa? Ne bɛ kuma minw fɔ, ne t'o fɔ ne yɛrɛ ma, n Faa min ni ne ye kelen ye, ale le b'a ka baara kɛ. Aw ye la ne la, ne ni n Faa bɛɛ ye kelen ye. N'aw ma la ne ka kuma na, aw ka la a la kɛwali nunu kɔsɔn. Tinyɛ tinyɛ na, ne b'a fɔ aw ye ko mɔgɔ min lara ne la, o tigi bɛna se ka ne ka kɛwaliw nyɔgɔn kɛ. A yɛrɛ bɛna koo dɔw kɛ minw ka bon ni ne taw ye, bari ne bɛ taa n Faa fɛ. Aw mana fɛɛn o fɛɛn dali ne tɔgɔ la, ne bɛna o kɛ, janko ka bonya la Faa kan, a Dencɛ barika la. N'aw ye fɛɛn min nyini ne tɔgɔ la, ne bɛna o kɛ. “N'aw bɛ ne kanu, aw bɛna ne ka kuma labato. Ne bɛna n Faa Ala dali a bɛ dɛmɛbaga wɛrɛ ci aw ma, janko ale ka to ni aw ye tuma bɛɛ. Ale le ye Nii Senuman ye, Tinyɛtigi. Dinyɛ mɔgɔw tɛ se ka sɔn a ma bari u t'a yera, u fana m'a lɔn. Aw kɔni b'a lɔn, bari a bɛ n'aw ye, a bɛna sigi aw kɔnɔ. Ne tɛna aw to aw kelen na, ne bɛna segi ka na aw fɛ. Yan ni waati dɔɔni dinyɛ mɔgɔw tɛna ne ye tugu, nga aw bɛna ne ye. Ne bɛ nii na minkɛ, o la, aw fana bɛna to nii na. O loon na, aw bɛn'a lɔn ko ne ni n Faa bɛɛ ye kelen ye, ko aw ni ne fana ye kelen ye. Mɔgɔ min ye ne ka kuma mɛn k'a labato, o tigi le bɛ ne kanu. Mɔgɔ min bɛ ne kanu n Faa fana bɛna o tigi kanu, ne fana bɛna o tigi kanu ka ne yɛrɛ yira a la.” Zude, min bɛ danna Zuda Isikariyɔti la, ale y'a fɔ Yezu ye ko: “Matigi, a kɛra di n'i bɛna i yɛrɛ yira anw dama na n'i t'i yɛrɛ yira mɔgɔ tɔw la?” Yezu y'a jaabi ko: “Ni mɔgɔ min bɛ ne kanu, o tigi bɛna ne ka kuma labato, n Faa bɛna o tigi kanu fana, anw bɛna na o tigi fɛ ka to n'a ye. Mɔgɔ min tɛ ne kanu, o tigi fana tɛ ne ka kuma labato, aw bɛ kuma min mɛnna nin ye, o ma kɛ ne yɛrɛ ka kuma ye, nga n Faa min ye ne ci, ale ta lo. Ne y'o koo bɛɛ fɔ aw ye ka ne to aw cɛma. Nga dɛmɛbaga, min ye Nii Senuman ye, n Faa bɛna o min ci ne tɔgɔ la, ale bɛna aw kalan koo bɛɛ la, ani ne ye koo minw bɛɛ fɔ aw ye, a bɛna aw hakili jigi o bɛɛ la. “Ne bɛ hɛrɛ le di aw ma, hɛrɛ min bɛ bɔ ne fɛ ne bɛ o le di aw ma, ne t'a dira i n'a fɔ dinyɛ mɔgɔw b'a kɛ cogo min na dɛ. Aw hakili kana nyagami, aw kana siran. Aw y'a mɛn ka ban ne fɛ ko ne bɛ taa, o kɔ n bɛna kɔsegi ka na aw fɛ. N'aw tun bɛ ne kanu, aw tun bɛna nisɔndiya, bari ne bɛ taa n Faa fɛ, n Faa ka bon ni ne ye. Ne y'o fɔ aw ye kabini sisan, n'o ma kɛ fɔlɔ, janko n'o kɛra tuma min na, aw ka la ne la. K'a ta sisan ma ne tɛna kuma caaman fɔ n'aw ye tugu, bari dinyɛ nin kuntigi bɛ nana. A tɛ se ne kɔrɔ. Nga dinyɛ mɔgɔw ka kan k'a lɔn ko ne bɛ n Faa kanu, o la, a ye min fɔ ne ye, ne b'o le kɛ. Aw ye wili an ka bɔ yan.” A y'a fɔ tugu ko: “Ne le ye ɛrɛzɛnsunsɛbɛ ye, n Faa le y'a tigi ye. Bolo minw bɛɛ bɛ yen, n'u tɛ deen kɛ, a bɛna olu tigɛ k'o bɔ yen, ani ne bolo o bolo min bɛ deen kɛ a bɛna olu gɛrɛfɛ bolo misɛmanw bɔ, janko a ka se ka deen caaman kɛ ka tɛmɛ fɔlɔ kan. Aw saniyara ka ban ne ka kuma kɔsɔn ne ye o min fɔ aw ye. Aw ye to ni ne ye i n'a fɔ ne bɛ n'aw ye cogo min na. Yiribolo tɛ se ka tigɛ ka to a kelen na ka se ka deen kɛ cogo min na a yɛrɛ ma, o cogo kelen na fana, n'aw ma to ne fɛ aw tɛ se ka foyi kɛ. Ne ye ɛrɛzɛnsun ye, aw kɛra a bolow ye. Ni mɔgɔ min tora ne fɛ, ni ne fana kɛra a tigi fɛ, o tigi nin bɛna se ka baara caaman kɛ Ala ye, bari ni ne sababu tɛ, aw tɛ se ka foyi kɛ aw yɛrɛ ma. Ni mɔgɔ min ma sɔn ka to ne fɛ, o tigi kɛra i n'a fɔ yiribolotigɛnin, u b'a fili kɛnɛma a bɛ ja, u b'a ta k'a bila tasuma na a bɛ jɛni. Ni aw tora ne fɛ, ani ne ka kuma ka to aw kɔnɔ, aw bɛ fɛɛn min fɛ, aw k'o dali aw bɛna o sɔrɔ. Ni aw ye baara caaman kɛ, o le b'a to n Faa bɛ bonya sɔrɔ, ani aw fana bɛ kɛ ne ka kalandenw ye. N Faa ye ne kanu cogo min na, ne fana ye aw kanu ten. Aw ye to o kanuya kelen na. Ni aw bɛ ne ka ciiw labato, aw fana bɛ to ne ka kanuya la, i n'a fɔ ne bɛ n Faa ka ciiw labato cogo min na ka to a ka kanuya la. “Ne y'o koo nunu fɔ aw ye janko aw ka nisɔndiya sɔrɔ ne fɛ, ani aw ka nisɔndiya kosɛbɛ. “Ne ka cii ye nin ye, aw ka nyɔgɔn kanu i n'a fɔ ne ye aw kanu cogo min na. K'i yɛrɛ nii di i teriw kɔsɔn, kanuya wɛrɛ tɛ yen min ka fisa n'o ye. Aw ye ne teriw ye ni aw bɛ sɔn ka ne ka cii labato. Ne tɛ aw wele tugu ko baaradenw, bari baaraden tɛ a ka kuntigi ka koo kala ma. Ne b'aw wele n teriw, bari ne ye fɛɛn min bɛɛ mɛn n Faa fɛ, ne y'o bɛɛ yira aw la. A ma kɛ ko aw le ye ne woloma dɛ, ne le ye aw woloma k'aw bila janko aw ka taa ka baara caaman kɛ, ani o baara nafa ka to, janko aw mana fɛɛn o fɛɛn dali n Faa fɛ ne tɔgɔ la, a k'o di aw ma. Ne bɛ min nyini aw fɛ o ye nin ye: aw ka nyɔgɔn kanu. “N'aw y'a ye ko dinyɛ mɔgɔw b'aw kɔniya, aw ka la a la ko u kɔnna ka ne le kɔniya. N'aw tun kɛra dinyɛ ta ye, dinyɛ mɔgɔw tun bɛna aw kanu, nga aw ma kɛ dinyɛ ta ye. Ne le ye aw woloma ka bɔ dinyɛ mɔgɔw la, o la dinyɛ mɔgɔw b'aw kɔniya. Aw y'aw hakili jigi ne ka kuma nin na. N tun y'a fɔ aw ye ko baaraden man fisa n'a ka kuntigi ye. N'u ye ne tɔɔrɔ, u bɛna aw fana tɔɔrɔ. N'u ye ne ka kuma labato, u bɛna aw fana ta labato. U bɛna o bɛɛ kɛ aw la ne kɔsɔn bari u ma ne cibaga lɔn. Ni ne tun ma na ka kuma u fɛ, u tun tɛna jati kojugukɛlaw ye, nga sisan yɛrɛ u ka kojugu jatira ka ban. Mɔgɔ min bɛ ne kɔniya, o tigi bɛ n Faa fana kɔniya. Mɔgɔ wɛrɛ ma se ka koo minw kɛ, ni ne tun ma na k'o nyɔgɔn kɛ u cɛma, u ka kojugu nunu tun tɛna jati kojugu ye, nga u y'o bɛɛ ye, a bɛɛ n'a ta u bɛ ne ni n Faa kɔniya tugu. Nga kuma min fɔra u ka sariya sɛbɛ kɔnɔ fɔɔ o ka kɛ. A fɔra ko: ‘U ye ne kɔniya ni kuun t'a la.’ “Ne bɛna Dɛmɛbaga min sɔrɔ n Faa fɛ k'a ci aw ma, ale min ye Tinyɛtigi ye, n'a nana tuma min na, a bɛna ne koo fɔ aw ye. O Nii min bɛ bɔ Ala fɛ. Aw fana, aw bɛna ne koo fɔ, bari aw tun bɛ ni ne ye kabini ne ka baara daminɛ na. “Ne ye o koo bɛɛ fɔ aw ye janko aw kunna kana cɛn. U bɛna aw gwɛn ka bɔ Alabatoso kɔnɔ, waati dɔ bɛna se, mɔgɔ minw bɛna aw faga, olu bɛna miiri k'u ye Ala sago le kɛ. U bɛna o baara sugu nunu kɛ bari u ma ne lɔn, u ma n Faa fana lɔn. Ne y'o koo fɔ aw ye janko, n'a waati mana se, aw hakili ka jigi a la ko ne tun y'o fɔ aw ye ka kɔrɔ. “Ne ma kɔn k'o fɔ aw ye kabini a daminɛ, bari ne tun bɛ n'aw ye. “Sisan ne bɛ taa ne cibaga fɛ, aw si ma ne nyininga ko ne bɛ taa min. Aw hakili nyagamina ne ka kuma nin kɔsɔn. Nga ne ye tinyɛ le fɔ aw ye. Aw kama lo ne bɛ taa, ni ne ma taa, Dɛmɛbaga tɛna na aw fɛ, nga ni ne taara, ne bɛn'a ci aw ma. Ni ale nana tuma min na, a bɛna kojuguko ni tilenninyako ani Ala ka kitiko gwɛya dinyɛ mɔgɔw ye, k'a yira u la ko u filila o koo nunu faan fɛ. Mun le ye u ka kojugu ye? U ma sɔn ka la ne la, o le ye u ka kojugu ye. Tilenninyako faan fɛ, u filila, bari ne bɛ taa n Faa fɛ aw tɛna ne ye tugu, o le bɛna n ka tilenninya yira. Min ye kitiko ye, a bɛn'a yira u la ko Ala ye dinyɛ nin kuntigi kiti ka ban. Koo caaman bɛ ne fɛ k'o fɔ aw ye, nga aw tɛna se k'o bɛɛ faamu sisan. Nii Senuman min bɛ Ala ka tinyɛ yira mɔgɔw la, n'ale nana tuma min na, a bɛna to aw bɛ tinyɛ bɛɛ lɔn, bari a tɛna kuma a yɛrɛ barika la. Nga a mana fɛɛn o fɛɛn mɛn, ani koo min bɛɛ bɛna kɛ, a bɛna o fɔ aw ye fana. A bɛna bonya la ne kan, bari a mana fɛɛn min sɔrɔ ne fɛ, a bɛna o le fɔ aw ye. Fɛɛn min kɛra n Faa ta ye, o bɛɛ ye ne ta ye fana, o la ne y'a fɔ ko a mana fɛɛn min sɔrɔ ne fɛ, a bɛna o le fɔ aw ye. “Yan ni waati dɔɔni aw tɛna ne ye, o kɔ waati dɔɔni tugu aw bɛna tila ka ne ye.” A ka kalanden dɔw tun bɛ nyɔgɔn nyininga ko: “A tun b'a fɛ ka mun le fɔ an ye? Ko yan ni waati dɔɔni an tɛn'a ye, o kɔ waati dɔɔni tugu an bɛna tila k'a ye. A ko tugu ko ale bɛ ta'a Faa fɛ.” U y'a fɔ k'olu ma yan ni waati dɔɔni kɔrɔ faamu, a k'o kɔfɛ waati dɔɔni tugu. K'olu m'a lɔn n'a tun b'a fɛ ka fɛɛn min fɔ. Yezu tun y'a lɔn k'u b'a fɛ k'ale nyininga minkɛ, a y'a fɔ u ye ko: “Aw bɛ nyɔgɔn nyiningana ne ka kuma le kɔrɔ la wa? Ne y'a fɔ minkɛ ko yan ni waati dɔɔni aw tɛna ne ye, ani ko yan ni waati dɔɔni tugu aw bɛna ne ye. Tinyɛ tinyɛ na, ne b'a fɔ aw ye ko, aw bɛna kasi fɔɔ ka kɛ makaritɔw ye, k'a sɔrɔ dinyɛ mɔgɔw bɛ nisɔndiya. Aw dusu bɛna kasi nga, aw ka dusukasi bɛna yɛlɛma ka kɛ nisɔndiya ye. Ni muso bɛ jigira deen na tuma min na, a nii bɛ tɔɔrɔ, bari a ka tɔɔrɔwaati le sera, nga n'a jigira ka ban, a hakili tɛ to o tɔɔrɔko la tugu deen sɔrɔko nisɔndiya fɛ. Aw dusu kasinin bɛ sisan fana, nga an bɛna nyɔgɔn ye tugu, o tuma na aw bɛna nisɔndiya, mɔgɔ si tɛ se ka nisɔndiya nin cɛn aw fɛ. O cogo la, o loon yɛrɛ la aw tɛna ne nyininga foyi si la tugu. Tinyɛ tinyɛ na, ne b'a fɔ aw ye ko ni aw ye fɛɛn dɔ dali n Faa fɛ ne tɔgɔ la, a bɛna o di aw ma. Fɔɔ ka na se sisan ma aw ma foyi dali ni ne tɔgɔ ye fɔlɔ. Aw ka dalili kɛ, aw bɛna sɔrɔli kɛ, janko aw ka nisɔndiya ka dafa. “Ne kumana aw fɛ talenw na, waati dɔ bɛ na se, ne tɛna kuma aw fɛ tugu talenw na, nga ne bɛna n Faa koo fɔ aw ye kumagwɛninw na. O loon na, aw bɛna Ala dali ni ne tɔgɔ ye, nga ne m'a fɔ aw ye ko ne bɛn'a dali aw ye dɛ. N Faa yɛrɛ fana b'aw kanu, bari aw ye ne kanu, ka la a la ko ne bɔra Ala fɛ. Ne bɔra Faa fɛ ka na dinyɛ na, sisan fana ne bɛ segira n Faa fɛ tugu.” A ka kalandenw y'a fɔ a ye ko: “Ɔnhɔn, sisan, e bɛ kuma gwɛnin fɔra an ye, i tɛ kumana an fɛ talen na tugu. Sisan, an y'a lɔn ko i bɛ koo bɛɛ lɔn ka ban, bari hali ni mɔgɔ m'a kɔnɔnako fɔ i ye, i b'o lɔn. O le y'a to an lara a la ko i bɔra Ala fɛ.” Yezu y'u jaabi ko: “Aw lara ne la sisan wa? Ayiwa, waati dɔ bɛna se, o waati nin yɛrɛ sera ka ban, aw bɛɛ bɛna boli k'aw yɛrɛ nyini, ka ne kelen to, nga ne tɛna to n kelen bari n Faa bɛ ni ne ye. Ne y'o fɔ aw ye janko aw ka to ni ne ye ka hɛrɛ sɔrɔ. K'aw to dinyɛ kɔnɔ, dusukasi le bɛ aw kan, nga aw k'aw jaa gwɛlɛya, ne ye see sɔrɔ dinyɛ kan ka ban.” Yezu y'o kuma nin fɔ ka ban dɔrɔn, a y'a nyaa kɔrɔ ta sanfɛ k'a fɔ ko: “N Faa, waati sera sisan i ka bonya la i Deen kan, janko ne fana ka bonya la ele kan, bari i ye kuntigiya di ne ma adamaden bɛɛ kan, ka hɛrɛ banbali di ne ka mɔgɔw bɛɛ ma i ye o minw di ne ma. Sini hɛrɛ sɔrɔko bɛ bɔ ele lɔnko la. Ele min ye Ala kelenpe ye, ani ka ne Yezu Krista lɔn, e ye ne min ci. Ne y'i bonya ka ban dugukolo kan, i tun ye baara minw di ne ma, ne ye olu bɛɛ kɛ ka ban. Sisan n Faa, bonya min tun bɛ ne kan i gɛrɛfɛ fɔlɔfɔlɔ sanni dinyɛ ka dan, i k'o nyɔgɔn la ne kan ne ka to i gɛrɛfɛ tugu. “I ye mɔgɔ minw woloma k'u bɔ dinyɛ mɔgɔw cɛma k'u di ne ma, ne y'i ka koo yira u la. U tun ye i taw ye, e tun y'u di ne ma, olu fana y'i ka kuma labato. Sisan u y'a faamu ko i ye fɛɛn minw di ne ma, ko u bɛɛ bɔra ele fɛ, ne ye kuma min bɛɛ fɔ u ye, u lara o la ko ele le y'o fɔ ne ye, u sɔnna o ma, u fana y'a faamu sɛbɛ la ko ne bɔra e fɛ, u lar'a la ko ele le ye ne ci. “Ne t'i dali dinyɛ mɔgɔw bɛɛ ye dɛ. Nga i ye minw di ne ma, ne b'i dali olu le ye, bari u kɛra i ta ye. Fɛɛn o fɛɛn ye ne ta ye, o fana ye ele ta ye i n'a fɔ min ye i ta ye, o fana ye ne ta ye cogo min na, ne ye bonya sɔrɔ olu sababu la. Ne tɛna to dinyɛ kɔnɔ tugu. Olu bɛna to dinyɛ na, ne do bɛ taara e fɛ. N Fanyuman, ne b'i dali i k'u mara i tɔgɔ kɔsɔn i y'o min di ne ma, janko u ka se ka kɛ kelen ye i n'a fɔ ne ni ele ye kelen ye cogo min na. Ka ne to n'olu ye yan, i ye o minw woloma k'o di ne ma, ne y'o bɛɛ mara i barika la, k'u tanga juguman ma, fɔɔ min tun latigɛra halaki ma. O fana kɛra janko min fɔra i ka kuma na, o ka kɛ. Sisan ne bɛ taara e fɛ, ne bɛ nin kuma fɔ u ye dinyɛ na, janko u ka ne ka nisɔndiya nyɔgɔn sɔrɔ. Ne ye i ka kuma fɔ u ye, o la dinyɛ mɔgɔw bɛ u kɔniya, bari u ma kɛ dinyɛ mɔgɔw ye, i n'a fɔ ne fana ma kɛ dinyɛ mɔgɔ ye cogo min na. Ne tɛ i dali ko i k'u ta ka bɔ dinyɛ na, nga i k'u tanga juguman ma. U ma kɛ dinyɛ ka mɔgɔw ye i n'a fɔ ne tɛ dinyɛ ka mɔgɔ ye cogo min na fana. I k'o kɛ u bɛ saniya i ka tinyɛ barika la. I ka kuma le ye tinyɛ ye. E ye ne ci dinyɛ na cogo min na, o cogo la fana ne b'u ci dinyɛ kɔnɔ. Ne fana bɛ ne yɛrɛ di u kɔsɔn, janko u fana ka se k'u yɛrɛ d'i ma sɛbɛ la. “Ne t'i dali olu dama ye dɛ, nga minw bɛna la ne la u ka kuma barika la, ne b'i dali olu fana ye, janko u bɛɛ ka kɛ kelen ye, n Faa, i n'a fɔ ne ni ele ye kelen cogo min na. Olu fana ka kɛ kelen ye ten n'an ye, janko dinyɛ mɔgɔw ka l'a la ko e ye ne ci. I ye bonya min di ne ma, ne y'o di u ma, janko u ka se ka kɛ kelen ye i n'a fɔ an fana ye kelen ye cogo min na. Ne ka to u fɛ, i n'a fɔ ele bɛ ne fɛ cogo min, janko u ka se ka bɛn ka kɛ kelen ye, ani dinyɛ mɔgɔw k'a lɔn ko e ye ne ci ani ko i y'u kanu i n'a fɔ i ye ne kanu cogo min na. N Faa, e ye minw woloma k'o di ne ma, ne b'a fɛ ne bɛ yɔrɔ min na olu fana ka kɛ o yɔrɔ la, i ye bonya min la ne kan u ka se k'o ye, bari e ye ne kanu kabini fɔlɔfɔlɔ sanni dinyɛ ka dan. “N Faa, e min ka nyi, dinyɛ mɔgɔw ma e lɔn, ne ye i lɔn. Nunu fana y'a lɔn ko ele le ye ne ci. Ne y'i koo fɔ u ye, ani n bɛna tila k'a fɔ u ye tugu, janko i ye ne kanu cogo min na, o kanuya nyɔgɔn ka don u dusu la, ani ne fana ka kɛ olu fɛ.” Yezu y'o kuma nunu fɔ ka ban tuma min na, a n'a ka kalandenw taara Sedirɔn kɔɔ kɔfɛ, nankɔ dɔ tun b'o yɔrɔ la, u donna o kɔnɔ. Zuda, min tun bɛn'a janfa, ale tun bɛ o nankɔ nin yɔrɔ lɔn, bari Yezu n'a ka kalandenw tun bɛ to ka nyɔgɔn lajɛn yen tuma caaman. Sarakalasebagaw kuntigiw ani Farizinyɛw ye Alabatosoba kɔlɔsibaga dɔw ni sɔlidasi dɔw ci. Zuda bilara u nya ka na, lanpan ni kala mananinw ani maramanfɛnw tun b'u fɛ. Koo minw tun bɛna kɛ, Yezu tun b'o bɛɛ lɔn minkɛ, a gwɛrɛla u la k'a fɔ u ye ko: “Aw bɛ jon le yɔrɔ nyinina?” U y'a jaabi ko Nazarɛti Yezu lo. Yezu y'a fɔ u ye ko: “Ne lo.” Zuda, min tun b'a donna mɔgɔjuguw bolo la, ale tun bɛ n'u ye. Yezu y'a fɔ u ye tuma min na ko: “Ne lo,” u girinna ka taa kɔfɛ, u bɛɛ benbenna duguma. O kɔ, a y'u nyininga tugu ko: “Aw bɛ jon le yɔrɔ nyinina?” U y'a jaabi ko Nazarɛti Yezu. Yezu y'a fɔ u ye ko: “Ne y'a fɔ aw ye ko ne lo. N'aw bɛ ne le yɔrɔ nyinina, aw ye nunu to olu bɛ taa.” A y'o kuma fɔ janko a tun ye kuma min fɔ o ka kɛ. A tun ko: “E tun ye minw bɛɛ di ne ma, ne ye olu bɛɛ mara, o si kunna ma cɛn.” Murujan tun bɛ Simɔn Piyɛri fɛ, a y'o bɔ ka sarakalasebagaw kuntigiba ka baaraden kinibolo tulo caron. O baaraden nin tɔgɔ tun ko Malikusi. O la, Yezu y'a fɔ Piyɛri ye ko: “I ka murujan don a foroko la yen. N Faa ye tɔɔrɔ min latigɛ ne ye, ne bɛna ban o la wa?” Sɔlidasi nunu n'u ka kuntigi ani Alabatosoba kɔlɔsibagaw Zuwifuw nyamɔgɔw tun ye o minw ci, olu ye Yezu minɛ k'a siri. U taara n'a ye Anɛ fɛ, ale tun ye Kayifu birancɛ ye, Kayifu le tun kɛra sarakalasebagaw kuntigiba ye o saan na. Ale Kayifu le tun y'a fɔ Zuwifuw ye ko a ka fisa mɔgɔ kelen ka sa mɔgɔ bɛɛ kɔsɔn. Simɔn Piyɛri ni kalanden wɛrɛ tun tugura Yezu kɔ. Sarakalasebagaw kuntigiba tun bɛ o kalanden nin lɔn, ale ni Yezu donna sarakalasebagaw kuntigiba ka luu kɔnɔ. Nga Piyɛri tora luda la. Sarakalasebagaw kuntigiba tun bɛ kalanden min lɔn, ale kɔsegira ka bɔ ka kuma luda kɔlɔsibaga fɛ, Piyɛri donna. Muso min tun bɛ luda kɔlɔsira, ale y'a fɔ Piyɛri ye ko: “E fana tɛ cɛɛ nin ka kalanden dɔ ye fewu?” A y'o jaabi ko: “Ne t'u dɔ ye.” Baarakɛlaw ni sɔlidasiw tun ye tasuma mana luu kɔnɔ, bari nɛnɛ tun bɛ yen, u tun b'u yɛrɛ jara. Piyɛri fana tun lɔra u cɛma n'a b'a yɛrɛ jara. Sarakalasebagaw kuntigiba ye Yezu nyininga a ka kalandenw koo la ani a ka kalan koo la. Yezu y'a jaabi ko: “Ne kumana mɔgɔw fɛ kɛnɛ kan, ne ye mɔgɔw kalan Alabatosow kɔnɔ ani Alabatosoba kɔnɔ, Zuwifu bɛɛ bɛ nyɔgɔn lajɛn o yɔrɔ minw na, ne ma foyi fɔ dogo la. Mun na i bɛ ne nyininga o koo la? Mɔgɔ minw tun ye ne lamɛn i ka olu nyininga ne ye fɛɛn min fɔ, u b'o lɔn.” Yezu ye o kuma fɔ dɔrɔn, sɔlidasicɛ dɔ y'a tulo ci, k'a fɔ a ye ko: “E bɛ sarakalasebagaw kuntigiba le jaabi ten wa?” Yezu y'a fɔ o sɔlidasicɛ ye ko: “Ni ne ye kumajugu fɔ, i ka ne ka kuma nin juguyayɔrɔ fɔ. N'o tɛ, mun na i bɛ ne bugɔ?” Anɛ y'a sirinin to k'a ci sarakalasebagaw kuntigiba Kayifu ma. O y'a sɔrɔ, Simɔn Piyɛri tun b'a yɛrɛ jara tasuma kɔrɔ. Dɔ y'a fɔ a ye ko: “E fana tɛ a ka kalandenw dɔ ye fewu?” Piyɛri ko ale tɛ dɔ ye fewu. Piyɛri tun ye sarakalasebagaw kuntigiba ka baaraden min tulo kelen caron Yezu minɛtuma na, ale balimacɛ dɔ y'a fɔ Piyɛri ma ko: “Ne m'i ye nankɔ kɔnɔ ni Yezu ye wa?” Piyɛri y'a fɔ tugu ko ale t'a lɔn. O yɔrɔnin bɛ dondo kasira. O kɔ, u bɔra ni Yezu ye Kayifu fɛ ka taa n'a ye, lasigiden ka luu kɔnɔ. O y'a sɔrɔ dugu tun gwɛra. U yɛrɛ ma sɔn ka don luu kɔnɔ, janko u kana u yɛrɛ nɔgɔ ka kɛnyɛ ni landa ye, u ka se ka Hɔrɔnya nyanagwɛ dumuni dumu. Pilati bɔra ka taa u fɛ k'u nyininga ko: “Aw bɛ cɛɛ nin jalaki mun le kama?” U ye Pilati jaabi ko: “N'a tun ma kɛ kojugukɛla ye, an tun tɛn'a minɛ ka na n'a ye e fɛ.” O la, Pilati y'a fɔ u ye ko u k'a minɛ ka taa n'a ye k'a kiti u yɛrɛ ma ka kɛnyɛ ni Zuwifuw siya ka sariya ye. U ye Pilati jaabi ko sira ma di u ma ka mɔgɔ faga. Nin bɛɛ kɛra janko Yezu tun y'a ka sayako fɔ cogo min na, o ka kɛ. Pilati donna luu kɔnɔ ka Yezu wele k'a nyininga ko: “E le ye Zuwifuw ka masacɛ ye wa?” Yezu y'a jaabi ko: “Nin kuma bɔra e yɛrɛ le la wa? Walima i y'o mɛn mɔgɔ dɔw le fɛ?” Pilati y'a jaabi tugu ko: “Ne ye Zuwifu ye wa? E ka siya n'u ka sarakalasebagaw kuntigiw le nana n'i ye ne fɛ, i ye mun le kɛ?” Yezu y'a jaabi ko: “Ne ka masaya ma kɛ dinyɛ nin ta ye. Ni ne ka masaya tun kɛra dinyɛ ta ye, ne ka kɔmɔgɔw tun bɛna kɛlɛ kɛ ne kɔsɔn, janko Zuwifuw kana ne minɛ, nga ne ka masaya tɛ nin dinyɛ ta ye.” Pilati y'a fɔ a ye ko: “E ye masa ye kɛ?” Yezu y'a jaabi ko: “Ele le b'a fɔra ko ne ye masa ye. Ne wolola o le kama. Ne nana dinyɛ na janko ka tinyɛ fɔ. Mɔgɔ o mɔgɔ, min lɔnin bɛ tinyɛ kan, o tigi bɛ mɛnni kɛ ne fɛ.” Pilati y'a fɔ a ye ko: “Mun le ye tinyɛ ye?” Pilati y'o kuma fɔ ka ban tuma min na, a kɔsegira ka bɔ Zuwifuw fɛ, k'a fɔ u ye ko: “Ne ma jalakiyɔrɔ ye cɛɛ nin na. Nga a do kɛra delinako ye aw fɛ ne bɛ to ka mɔgɔ kelen labila aw ye Hɔrɔnya nyanagwɛ la, aw b'a fɛ ne ka Zuwifuw ka masacɛ le labila wa?” U tora ka pɛrɛn ko: “Ayi, kana ale bila, nga i ka Barabasi labila.” K'a sɔrɔ Barabasi tun ye benkannikɛla ye. Pilati ye Yezu di ko u k'a bugɔ. Sɔlidasiw ye; nɔni tigɛ k'o meleke k'o kɛ i n'a fɔ masafugulan ye, k'o biri a kuun na, ka fani wuleman don a kaan na, ka to ka gwɛrɛ k'a fɔ a ye ko a ni sɛ Zuwifuw ka masacɛ, u tun bɛ to k'a bugɔ. Pilati kɔsegira ka bɔ tugu k'a fɔ Zuwifuw ye ko ale bɛna bɔ n'a ye kɛnɛma janko u k'a faamu ko ale ma jalakiyɔrɔ ye cɛɛ nin na. Yezu bɔra kɛnɛma tuma min na, o; nɔni fugulan tun birinin bɛ a kuun na, ani faniwulen nin fana tun donnin bɛ a kaan na. Pilati y'a fɔ Zuwifuw ye ko: “Aw ka cɛɛ filɛ.” Sarakalasebagaw n'u ka mɔgɔw y'a ye dɔrɔn, u y'a daminɛ ka pɛrɛn ko: “A ka gwengwen lɔgɔ kan! A ka gwengwen lɔgɔ kan!” Pilati y'a fɔ u ye ko: “Aw yɛrɛ k'a minɛ ka gwengwen, ne kɔni ma jalakiyɔrɔ si ye a la.” Zuwifu nunu y'a fɔ ko sariya bɛ olu fɛ, k'olu ka sariya la a ka kan ka faga, bari a y'a yɛrɛ kɛ Ala Deen ye. Pilati y'o kuma mɛn tuma min na, a siranna kosɛbɛ. A kɔsegira ka don ka Yezu nyininga ko a bɔra min. Nga Yezu m'a jaabi. Pilati y'a fɔ a ye ko: “I tɛ ne jaabi wa? I m'a lɔn ko ne bɛ se k'i gwengwen lɔgɔ kan wa, walima k'i labila wa?” Yezu y'a jaabi ko: “See min bɛ i fɛ k'a yira ne la, i m'o sɔrɔ i yɛrɛ ma, Ala le ye o see di i ma, o la do, mɔgɔ min ye ne don i bolo, o tigi le ye kojuguba kɛ ka tɛmɛ e kan.” Pilati y'o kuma mɛn dɔrɔn, a tun bɛ cogo nyinina ka Yezu labila, nga Zuwifuw tora ka pɛrɛn ko: “N'i y'a bila, i tɛ Ɔrɔmu masacɛ teri ye tugu. Bari mɔgɔ min b'a yɛrɛ kɛ masa ye, o tigi bɛ wili masacɛ le kama.” Pilati y'o kuma nunu mɛn tuma min na, a ko u ka bɔ ni Yezu ye luu kɔnɔ ka ta'a sigi kiti tigɛyɔrɔ la, min dilanna ni kabakuru ye n'a bɛ wele Gabata eburukan na. O tun ye Hɔrɔnya nyanagwɛ labɛnlon ye. Tilegwan tuma na, Pilati y'a fɔ Zuwifuw ye ko: “A ye aw ka masacɛ filɛ.” Nga u y'a jaabi ko a ka faga, a ka faga lɔgɔ kan! Pilati y'a fɔ u ye ko: “Ne k'aw ka masacɛ faga lɔgɔ kan wa?” Sarakalasebagaw y'a jaabi ko masacɛ wɛrɛ tɛ olu fɛ Ɔrɔmu masacɛ kɔ. A ye sira di k'u ka taa Yezu gwengwen lɔgɔ la, u y'a minɛ ka taa n'a ye. Yezu y'a ka gwengwenlɔgɔ ta. U taara se yɔrɔ dɔ la min tɔgɔ ko Kungolo yɔrɔ la, u b'a wele eburukan na ko Gɔligota. O yɔrɔ la, u y'a gwengwen ani mɔgɔ fila wɛrɛ fana, kelen a kinibolo fɛ, kelen a numanbolo fɛ, Yezu tora cɛmancɛ la. Pilati tun ye sɛbɛ dɔ kɛ k'o gwengwen Yezu kuun sanfɛ, a sɛbɛnnin tun bɛ ko: “Nazarɛti Yezu, Zuwifuw ka masacɛ”. Zuwifu caaman tun ye o sɛbɛ nin kalan, bari Yezu tun gwengwenna yɔrɔ min na, o yɔrɔ tun man jan dugu la, ani o kuma nin tun sɛbɛnna eburukan na, ni latɛnkan na, ani girɛkikan na. Sarakalasebagaw y'a fɔ Pilati ye ko a kan'a sɛbɛn “Zuwifuw ka masacɛ”, nga a k'a sɛbɛn ko “Cɛɛ nin ko ale ye Zuwifuw ka masacɛ ye”. Pilati y'a fɔ u ye ko ale ye min sɛbɛn ka ban, ko ale y'o sɛbɛn. Sɔlidasiw ye Yezu gwengwen ka ban tuma min na, u y'a ka faniw tilan sigiyɔrɔ naani, u bɛɛ kelen kelen n'u ta. O kɔ, u y'a ka foroca ta, kalannɔ tun tɛ min na, k'a fɔ nyɔgɔn ye ko: “An kan'a faran, an ka kala bon n'a bɛna kɛ mɔgɔ min ta ye, o ka lɔn.” O kɛra janko min fɔra Ala ka kuma na, o ka kɛ. A ko: “U ye ne ka faniw tilan nyɔgɔn cɛ, ani u ye kala bon ka sɔrɔ ka ne ka foroca di a sɔrɔbaga ma.” Sɔlidasiw y'o le kɛ. Yezu bamuso, n'a bamuso dɔgɔmuso, ani Kulopasi ka muso Mariyamu, ni Magidala Mariyamu olu lɔnin tun bɛ Yezu ka gwengwenlɔgɔ gɛrɛfɛ. Yezu y'a bamuso, n'a ka kalanden dɔ nin ye, o min koo tun ka di a ye, u tun bɛ nyɔgɔn kɔrɔ. A y'a fɔ a bamuso ye ko: “Muso, i deen filɛ nin ye.” O kɔ, a y'a fɔ kalanden nin fana ye ko: “I bamuso filɛ nin ye.” K'a ta o waati ma, kalanden nin y'a ladon a fɛ. O bɛɛ kɛnin kɔ, Yezu tun y'a lɔn ko koo bɛɛ dafara, ani janko min fɔra Ala ka kuma na o ka kɛ, a y'a fɔ ko: “Minnɔgɔ bɛ ne la.” Daga dɔ tun bɛ yen, min fanin bɛ kumuji la. Dɔ ye fuu ta k'o don kumuji nin na, k'a siri kalajan dɔ la, k'o wili k'a gwɛrɛ Yezu daa la. Yezu ye kumuji nin nɛnɛ tuma min na, a y'a fɔ ko: “Koo bɛɛ dafara.” O kɔ, a y'a kuun biri duguma, a nii bɔra. O kɛra Hɔrɔnya nyanagwɛ labɛnlon na minkɛ, Zuwifuw tun bɛ siran ko mɔgɔ minw tun gwengwenna, ko u suuw kana to lɔgɔ kan fɔɔ ka se lafinyɛlon ma, o lafinyɛlon ni tɔ nunu fana tun tɛ kelen ye. O la, u taar'a nyini Pilati fɛ, ko a ka sira di u ka mɔgɔ nunu seenw karikari k'u jigi ka bɔ yen. Sɔlidasiw nana ka mɔgɔ kelen nin seenw kari, ka kelen dɔ nin fana ta kari. U sera Yezu ma, u y'a ye ko a sara ka ban, o la, u ma ale seen kari tugu. Nga sɔlidasicɛ kelen y'a gɛrɛn sɔgɔ ni taman ye, joli ni jii bɔra ka woyo. Mɔgɔ min y'o ye ale le b'o seereya fɔra, ani a ka seereya ye tinyɛ ye. A fana lanin b'a la, ko ale bɛ min fɔ, k'o ye tinyɛ ye, janko aw fana ka se ka la a la. O koo bɛɛ kɛra, janko min fɔra Ala ka kuma na o ka kɛ. A ko: “A kolo si tɛna kari.” A fɔra Ala ka kuma na fana ko: “U ye min sɔgɔ u bɛna ale filɛ.” O koo bɛɛ kɛra ka ban tuma min na, Yusufu min tun bɔra Arimate, ale fana tun ye Yezu ka kalanden ye dogo la, bari a tun bɛ siran Zuwifuw nya. Ale taara Yezu suu dali Pilati fɛ, Pilati ye sira d'a ma, a nana ka Yezu suu jigi ka bɔ lɔgɔ kan. Nikodɛmu min tun taara Yezu fɛ loon dɔ sufɛ, ale fana nana ni tulu kasadiman nyagaminin ye, o min tun bɛ se kilo bi saba ma. U ye Yezu suu meleke fani na, ani ka wusulan kɛ a kan ka kɛnyɛ ni Zuwifuw ka suu doncogo ye. Yezu tun gwengwenna yɔrɔ min na, nankɔ dɔ tun bɛ o yɔrɔ la. Kaburukura dɔ tun b'o kɔnɔ, mɔgɔ si suu tun ma don ka ye o kɔnɔ fɔlɔ. U ye Yezu suu don o kaburu nin le kɔnɔ, bari Zuwifuw tun bɛ lafinyɛlon labɛnna, ani kaburu nin fana yɔrɔ tun ka surun. Lɔgɔkun loon fɔlɔ, Mariyamu ka bɔ Magidala wilila sɔgɔmada joona fɛ, mɔgɔ tun tɛ yeli kɛ kosɛbɛ fɔlɔ, ka taa kaburu yɔrɔ la, a taar'a sɔrɔ kabakuru tun tɛ kaburu daa la tugu. A kɔsegira ka boli ka na Simɔn Piyɛri ni kalanden dɔ nin fɛ, o min koo tun ka di Yezu ye. A y'a fɔ olu ye ko: “U ye Matigi suu bɔ kaburu kɔnɔ, an m'a bilayɔrɔ lɔn.” Piyɛri ni kalanden dɔ nin bɔra ka taa kaburu yɔrɔ la. U mɔgɔ fila ye boli ta nyɔgɔn fɛ, nga kalanden dɔ nin seen teliyara ka tɛmɛ Piyɛri ta kan, ale kɔnna ka se kaburu daa la. A y'a kuun biri ka filɛli kɛ kaburu kɔnɔ ka fani nunu bilanin ye, nga a ma don. Simɔn Piyɛri sera dɔrɔn, a donna kaburu kɔnɔ, a ye fani nunu ye duguma, u tun ye fani min meleke Yezu kuun na, ale melekenin tun lo ka bila danna, a tun ma fara fani dɔ nin kan. Kalanden min kɔnna ka se, ale fana donna kaburu kɔnɔ, a y'u bɛɛ ye, a lar'a la. O y'a sɔrɔ, min tun fɔra Ala ka kuma na Yezu ka kununko la, u tun ma o faamu fɔlɔ. Kalanden nunu kɔsegira ka taa u ka yɔrɔ la. Nga Mariyamu lɔnin tora kɛnɛma kaburu daa la n'a bɛ kasira. K'a to kasi la, a ko a bɛ biri ka filɛli kɛ kaburu kɔnɔ. A ye mɛlɛkɛ fila ye ni fani gwɛman b'u kaan na, u tun siginin bɛ Yezu suu layɔrɔ la. Kelen tun sigira a kuun layɔrɔ la, kelen b'a seen layɔrɔ la. Mɛlɛkɛ nunu y'a nyininga ko: “Muso, mun na i bɛ kasira?” A y'u jaabi ko: “Dɔw ye ne Matigi suu ta ka bɔ a layɔrɔ la, ne m'a lɔn u y'a bila yɔrɔ min na.” K'a to o kuma na, a ko a bɛ yɛlɛma ka filɛ, a ye Yezu lɔnin ye, nga a tun m'a lɔn ko ale lo. Yezu y'a fɔ a ye ko: “Muso, mun na i bɛ kasira? I bɛ jon le yɔrɔ nyinina?” Mariyamu tun bɛ miiri ko nankɔ kɔlɔsibaga lo, o la a y'a fɔ a ye ko: “Baba, ni ele le y'a ta, e k'a bilayɔrɔ fɔ n ye n bɛ ta'a ta.” Yezu y'a wele ko: “Mariyamu!” A y'a nyaa yɛlɛma, k'a fɔ Yezu ye eburukan na ko: “Arabuni,” o kɔrɔ ko karamɔgɔ. Yezu y'a fɔ a ye ko: “I kana maga ne la, bari ne ma yɛlɛ n Faa fɛ fɔlɔ, nga i ka taa ne balimaw fɛ, k'a fɔ u ye ko ne bɛ yɛlɛ n Faa, ni n ka Ala fɛ, a fana y'aw Faa n'aw ka Ala ye.” Mariyamu ka bɔ Magidala taara kalandenw fɛ, k'a fɔ u ye ko ale ye Matigi ye, ko a ye nin le fɔ ale ye. O loon kelen wulafɛ, o min tun ye lɔgɔkun daminɛlon ye, Zuwifuw nyasiranya kɔsɔn, kalandenw tun bɛ boon min kɔnɔ, u tun y'o daaw tugu k'u sɔgɔ. K'o daa nunu sɔgɔnin to, Yezu donna ka lɔ u cɛma k'a fɔ u ye ko: “Hɛrɛ ka kɛ aw ye.” K'a to o kuma na, Yezu y'a tigɛ n'a gɛrɛn yira u la. Kalandenw ye Yezu lɔn tuma min na, u nisɔn diyara kosɛbɛ. Yezu y'a fɔ u ye tugu ko: “Hɛrɛ ka kɛ aw ye. N Faa ye ne ci cogo min na, ne fana bɛ aw ci o cogo kelen le la.” A ye o kuma nunu fɔ ka ban tuma min na, a y'a dafinyɛ kɛ u kan k'a fɔ u ye ko: “Nii Senuman ka to aw fɛ. Aw mana mɔgɔ minw ka kojuguw yafa, o tigiw ka kojugu bɛna yafa, aw mana ban ka minw ta yafa, o tigiw ta fana tɛna yafa.” Yezu tun nana kalandenw fɛ tuma min na, Toma min bɛ wele Filanin, ni ale tun ye kalanden tan ni fila nunu dɔ ye, ale tun tɛ yen. Kalanden tɔw nan'a fɔ a ye k'olu ye Matigi ye. Nga a y'a fɔ u ye ko n'ale ma puwɛnti nɔɔ ye a tigɛ la, k'a bolokɔni don o woo la, k'a don a gɛrɛn ta la, ko ale tɛna la o la. O loon nyɔgɔn tugu, Yezu ka kalandenw tun bɛ soo kɔnɔ, o loon na Toma tun bɛ n'u ye. U tun ye daaw bɛɛ tugu k'o sɔgɔ, o bɛɛ n'a ta, Yezu nana don ka lɔ u cɛma k'a fɔ u ye ko: “Hɛrɛ ka kɛ aw ye.” O kɔ, a y'a fɔ Toma ye ko: “N tigɛ mɔmɔ k'a filɛ, an'i bolo don n gɛrɛn na, i kana sigasiga tugu, nga i ka la ne la.” Toma y'a fɔ a ye ko: “Ne Matigi ni n ka Ala!” Yezu y'a fɔ a ye ko: “I ye ne ye, o le y'a to i lar'a la. Mɔgɔ minw ma ne ye, ani u fana bɛ la a la, dagamu ye olu le ta ye.” Yezu ye kabako caaman wɛrɛw kɛ a ka kalandenw nyana, minw ma se ka sɛbɛn yan. Nga minw sɛbɛnna, olu sɛbɛnkun ye nin ye, janko aw ka se ka l'a la ko Yezu ye Ala ka Mɔgɔ wolomanin nin ye, Ala Dencɛ, n'aw lara o la, aw ka se ka hɛrɛ banbali sɔrɔ a barika la. O kɔ fana, Yezu y'a yɛrɛ yira a ka kalandenw na tugu, Tiberiyadi bada la. A y'a yɛrɛ yira cogo min na, o filɛ. Simɔn Piyɛri ni Toma min tɔgɔ ko Filanin, ani Natanayɛli ka bɔ Kana Galile mara la, ni Zebede deenw, ani Yezu ka kalanden mɔgɔ fila wɛrɛw, u tun bɛ nyɔgɔn fɛ. Simɔn Piyɛri y'a fɔ u ye ko ale bɛ taa mɔni kɛ. Olu y'a fɔ fana k'olu bɛ taa n'a ye. U bɔra ka taa don kurun kɔnɔ, u y'o suu bɛɛ kɛ u ma jigɛ si minɛ. Dugu gwɛra tuma min na, Yezu nana bada la, nga kalanden nunu tun m'a lɔn. Yezu y'a fɔ u ye ko: “Hee! N teriw, jigɛ tɛ aw fɛ wa?” U y'a jaabi ko ayi. A y'a fɔ u ye ko: “Aw ka jɔɔ fili kurun kinibolo fɛ, aw bɛna sɔrɔli kɛ.” U y'a fili yen, u yɛrɛ tun tɛ se k'u ka jɔɔ sama jigɛ ka caya kojugu fɛ. Kalanden min koo tun ka di Yezu ye ale y'a fɔ Piyɛri ye ko: “Matigi lo!” Simɔn Piyɛri y'o mɛn tuma min na dɔrɔn ko Matigi lo, a y'a ka fani ta k'o don ka sɔrɔ ka jigi jii kɔnɔ ka taa. Kalanden tɔw tun bɛ nana ni kurun ye n'u bɛ jɔɔ nin samana a fanin jigɛ la, bari u yɔrɔ tun man jan badagolo la, u furancɛ tun bɛ nyini ka se mɛtɛrɛ kɛmɛ bɔ. U bɔra baa kɔnɔ tuma min na, u ye tasuma mananin sɔrɔ yen ni jigɛ lanin b'a kan, ani buru. Yezu y'a fɔ u ye ko: “Aw ye jigɛ minw sɔrɔ sisan sisan, aw ye na n'u ye.” Simɔn Piyɛri donna kurun kɔnɔ, ka jɔɔ sama ka na n'a ye dugukolo kan. A tun fanin bɛ jigɛbaba kɛmɛ ni bi duuru ni saba la, jɔɔ n'a ka fako bɛɛ, a ma faran. Yezu y'a fɔ u ye ko: “Aw ye na an bɛ dumuni kɛ.” Kalanden si ma se k'a nyininga ko ale ye jon le ye. U tun b'a lɔn ko Matigi lo. Yezu gwɛrɛla ka buru ta, ka dɔ di u ma, a ye jigɛ fana di u ma. O le tun kɛra Yezu sinyɛ sabanan ye n'a b'a yɛrɛ yira a ka kalandenw na kabini a kununna a sanin kɔ. U ye dumuni kɛ ka ban tuma min na, Yezu y'a fɔ Simɔn Piyɛri ye ko: “Zan dencɛ Simɔn, i bɛ ne kanu ka tɛmɛ nunu kan wa?” A y'a jaabi ko: “Ɔnhɔn Matigi, e yɛrɛ y'a lɔn ko ne b'i kanu.” Yezu y'a fɔ a ye ko: “I ka ne ka sagadenw dɛndɛ.” O kɔ, a y'a fɔ a ye tugu a sinyɛ filanan na ko: “Zan dencɛ Simɔn, ne koo ka di i ye wa?” Piyɛri y'a fɔ a ye ko: “Ɔnhɔn Matigi, e yɛrɛ y'a lɔn ko ne b'i kanu.” Yezu y'a fɔ a ye ko: “I ka ne sagaw kɔlɔsi.” O kɔ, a y'a fɔ a ye a sinyɛ sabanan na ko: “Zan dencɛ Simɔn, ne koo ka di i ye wa?” Piyɛri hakili nyagamina bari a y'a nyininga fɔɔ sinyɛ saba ko ale koo ka di a ye wa. A y'a jaabi ko: “Matigi, e yɛrɛ bɛ koo bɛɛ lɔn, e b'a lɔn ko e koo ka di ne ye.” Yezu y'a fɔ a ye ko: “I ka ne ka sagaw dɛndɛ.” A ko: “Tinyɛ tinyɛ na, ne b'a fɔ i ye ko e tun ye kanbelen ye tuma min na, e tun b'i yɛrɛ cɛɛ siri i yɛrɛ ma, ani n'i tun b'a fɛ ka taa yɔrɔ min na, i tun bɛ taa yen. Nga i mana kɛ mɔgɔkɔrɔba ye tuma min na, i bɛna i bolo jan mɔgɔ wɛrɛ bɛna i siri, ka taa n'i ye yɔrɔ la i t'a fɛ ka taa yɔrɔ min na.” Piyɛri tun bɛna sa cogo min ka bonya la Ala kan, a tun b'a fɛ k'o le fɔ a ye. O kɔ, a y'a fɔ a ye ko: “Tugu ne kɔ.” Piyɛri y'a nyaa yɛlɛma ka kalanden min koo tun ka di Yezu ye kosɛbɛ o min tun y'a yɛrɛ jɛngɛn ka la Yezu disi kan dumuni tuma na, k'a nyininga ko: “Matigi, jon le bɛ i donna bolo la?” Piyɛri y'ale ye tuma min na, a ye Yezu nyininga ko: “Nin do Matigi, mun le bɛna kɛ ale la?” Yezu y'a fɔ a ye ko: “Hali ni ne b'a fɛ ale ka to yen fɔɔ ne ka kɔsegi ka na, e ka mun le b'o la? Ele kɔni e ka tugu ne kɔ.” O kuma le kɔsɔn, kalandenw tora k'a fɔ nyɔgɔn ye k'o kalanden nin tɛna sa tugu, nga Yezu tun m'a fɔ ko kalanden nin tɛna sa. A tun ko: “Hali ni ne b'a fɛ a ka to yen fɔɔ ne ka kɔsegi ka na, e ka mun le b'o la?” O kalanden kelen kelen le b'o koo nin fɔ aw ye, ale fana le y'o sɛbɛn. An fana do y'a lɔn ko a ka fɔta nunu ye tinyɛ ye. Yezu ye koo caaman dɔ wɛrɛw kɛ, n'u kelen kelen bɛɛ tun sɛbɛnna, ne ma l'a la k'o sɛbɛ nunu marayɔrɔ tun bɛ sɔrɔ dinyɛ na. Tewofili, n ka sɛbɛ fɔlɔ kɔnɔ, Yezu ye koo minw bɛɛ kɛ, ka mɔgɔw kalan koo minw bɛɛ la, k'a ta o daminɛ ma fɔɔ ka taa se a kɔrɔ talon ma ka taa arijana na, n y'o bɛɛ lakali o kɔnɔ. Ayiwa, yan ni a ka yɛlɛ ka taa arijana na, a tun ye mɔgɔ minw woloma k'u kɛ a ka cidenw ye, a y'u kalan tugu, ka kangari la u ye Nii Senuman barika la. Yezu sanin kɔ, ka kunun, a y'a yɛrɛ yira a ka cidenw na cogo caaman ani sinyɛ caaman na tile bi naani kɔnɔ janko u k'a lɔn ko ale tɛ suu ye tugu. A tora n'u ye n'a b'u kalan Ala ka masaya sigiko la. K'u to nyɔgɔn fɛ dumuni na loon dɔ, a y'a fɔ u ye k'a gwɛlɛya ko: “Aw kana aw yɔrɔ janya Zeruzalɛmu na, n Faa tun y'a daa di koo min na, aw ye to yen k'o makɔnɔ. Ne tun ye o kuma fɔ aw ye ko Zan ye mɔgɔw batize ni jii ye, nga yan ni tile damani, aw bɛna batize ni Nii Senuman ye.” Kalandenw lajɛnnin tun bɛ Yezu kɔrɔ. U y'a nyininga ko: “Matigi, sisan lo i bɛna Isirayɛli ka masaya sigi kura ye wa?” A y'u jaabi ko: “O masaya nin koo nyanabɔli t'aw ka sira la, o koow bɛ n Faa kelenpe le bolo. Nga ni Nii Senuman jigira aw kan tuma min na, aw bɛna fanga sɔrɔ ka se ka ne ka koow fɔ Zeruzalɛmu, ni Zude mara bɛɛ la, ani Samari mara la, fɔɔ ka taa se dinyɛ faan bɛɛ la.” Yezu y'o kuma nunu fɔ ka ban minkɛ, a kɔrɔ tara u nyakɔrɔ ka taa arijana na. K'u to filɛli la, Sankaba dɔ donna u cɛ k'a dogo u la. K'u nyaa basanin to sankolo la, u barila ka cɛɛ fila dɔ ye u gɛrɛfɛ fanigwɛ tun bɛ minw kaan na. Cɛɛ fila nunu y'u kaan to u ma ko: “Galilekaw! A kɛra di aw lɔnin bɛ ka sankolo filɛ ten? Aw ye Yezu min yɛlɛtɔ ye arijana na dɛ, a bɛna segi ka na ten ka bɔ o yɔrɔ la.” O tuma na, cidenw jigira ka bɔ kulu nin kan, o min tɔgɔ ko Olivuyirikulu, ka taa Zeruzalɛmu dugu kɔnɔ, o furancɛ nin tɛ kilo kelen bɔ. U sera dugu kɔnɔ tuma min na, u tun bɛ sangaso min kɔnɔ ka kɔrɔ, u yɛlɛla yen. Minw tun bɛ yen, u tɔgɔw filɛ: Piyɛri, ni Zan, ni Zaki ani Andere, Filipi, ni Toma, Baritelemi ani Matiyo, Alife dencɛ Zaki, ni Simɔn Zelɔti ani Zude min faa tɔgɔ ko Zaki. U ka miiri bɛɛ tun ye kelen ye. U lajɛnnin tun bɛ jɛn nyɔgɔn fɛ tuma bɛɛ ka Ala dali. Muso dɔw tun bɛ n'u ye. Yezu baa Mariyamu tun bɛ u cɛma, ani Yezu dɔgɔninw. O waati la, kalanden mɔgɔ kɛmɛ ni mugan nyɔgɔn lajɛnnin tun bɛ yen. Piyɛri wilila ka lɔ u cɛma loon dɔ k'a fɔ ko: “N badenw, Ala ka kuma kɔnɔ Dawuda tun ye min fɔ Nii Senuman barika la Zuda koo la, wajibi tun lo fɔ o ka kɛ. Ale Zuda le nana kɛ sababu ye u ye Yezu minɛ. Zuda tun ye an dɔ ye. Baara min tun kalifara an ma, o nyɔgɔn le kalifara a fana ma. A ye baarajugu kɛ k'o sara ta ka taa foro san. A do benna o le kɔnɔ k'a yɛrɛ cɛn pepewu. Zeruzalɛmukaw bɛɛ y'o kibaru mɛn fɔɔ u ye foro nin tɔgɔ la u ka kaan na ko Akɛlidama. O kɔrɔ ko Joli foro. A sɛbɛnnin bɛ Ala tando dɔnkiliw kitabu kɔnɔ ko: ‘A ka soo ka kɛ tomo ye. Mɔgɔ kana sigi yen.’ A sɛbɛnnin bɛ yɔrɔ wɛrɛ ko: ‘Mɔgɔ wɛrɛ ka bila a nɔɔ na.’ “O kama, mɔgɔ minw tun tugunin b'an kɔ kabini Matigi Yezu bɛ n'an ye, k'a taa Yezu batizelon ma Zan fɛ, fɔɔ ka ta'a bila a kɔrɔ talon ma arijana na ka bɔ an cɛma, wajibi lo, olu dɔ ka Zuda nɔɔ ta, ka kɛ an dɔ ye ka Yezu koo fɔ.” U ye mɔgɔ fila bɔ, kelen tɔgɔ ko Yusufu ni dɔw b'a wele ko Barisabasi, dɔw fana b'a wele ko Zusitusi. Tɔ kelen tɔgɔ ko Matiyasi. O kɔ, u ye Ala dali ko: “Matigi, e min bɛ mɔgɔ bɛɛ kɔnɔnako lɔn, n'i b'a fɛ mɔgɔ fila nunu na min ka kɛ i ka baarakɛla ye, o yira an na. Zuda taar'a yɛrɛ kunfɛ ka cidenya baara min to, o tigi ka se k'o kɛ.” U ye kala bon, min y'a yira ko Matiyasi lo. O la, ale farala ciden tan ni kelen nunu kan. Pantekɔti loon na, kalandenw bɛɛ lajɛnnin tun bɛ boon kelen na. Mankanba dɔ barila ka bɔ sankolo la. Mankan nin tun bɛ i n'a fɔ fɔnyɔba mankan. U tun bɛ boon min kɔnɔ, o bɛɛ fara mankan nin na. U ye fɛɛn dɔw ye i n'a fɔ tasuma, o tilantilanna ka jigi u kelen kelen bɛɛ kuun na. Nii Senuman jigira u bɛɛ kan, u y'a daminɛ ka siyakan wɛrɛw fɔ Nii Senuman barika la. O y'a sɔrɔ, Zuwifu minw tun bɛ siran Ala nya kosɛbɛ, olu caaman nanin tun bɛ Zeruzalɛmu, ka bɔ dinyɛ faan bɛɛ. U ye mankan mɛn minkɛ, u girinna ka taa yɔrɔ fa. U kabakoyara kosɛbɛ, bari Yezu ka cidenw tun bɛ kuma minw fɔra, u bɛɛ tun b'u ka kuma mɛnna u yɛrɛ ka kaan na. U kabakoyara fɔɔ k'a dama tɛmɛ n'u bɛ nyɔgɔn nyininga ko: “Mɔgɔ minw bɛ kumana wo, u bɛɛ tɛ Galilekaw ye wa? A do kɛra di n'an bɛɛ b'u ka kuma mɛnna an ka kaan na? An dɔw bɔra Pariti jamana na, dɔw bɔra Mɛdi, ni Elamiti, ni Mezopotami ani Zude. Dɔw bɔra Kapadɔsi, ni Pɔn, ni Azi, ni Firizi ani Panfili. Dɔw bɔra Ezipiti, ni Libi, ni Sirɛni faan fɛ ani Ɔrɔmuka minw bɛ yan. Zuwifuw ani minw y'u yɛrɛ kɛ Zuwifuw ye, ani Kɛrɛtiw, ni Arabuw, ee! An bɛɛ bɛ Ala ka koba kɛninw mɛnna an ka kaan na!” O y'u kabakoya fɔɔ u hakili nyagamina n'u bɛ nyɔgɔn nyininga ko: “Nin kɔrɔ bɛ se ka kɛ mun ye?” Nga dɔw tun b'u lɔgɔbɔ ka to k'a fɔ ko: “Ayi! nunu fanin lo dɔrɔ la.” O tuma na, Piyɛri tora a tɔnyɔgɔn tan ni kelen nunu cɛma k'a kaan kɔrɔ ta ka kuma jama fɛ ko: “Aw Zuwifuw, ani aw minw bɛɛ siginin bɛ Zeruzalɛmu, a y'aw tulo malɔ ka nya ka n ka kuma lamɛn. Aw b'a fɔra cogo min na ko nunu fanin lo dɔrɔ la, u ma fa dɔrɔ la dɛ, bari tile ma gwan fɔlɔ. Nga kira Zowɛli tun ye kuma min fɔ, o le bɛ kɛra. A tun y'a fɔ ko: ‘Ni laban tuma sera,’ Matigi ko ten, ‘N bɛna n ka Nii Senuman di mɔgɔ bɛɛ ma. Aw deen cɛman ni musomanw bɛɛ bɛna kɛ kiraw ye. Aw ka kanbelenninw bɛna yelifɛnw ye ka se ka n ka tinyɛ lɔn. Aw ka cɛkɔrɔbaw bɛna n ka koow faamu sigow seen fɛ. Tinyɛ na, n bɛna Nii Senuman di n ka baarakɛla cɛman ni musomanw bɛɛ ma o waati la. U bɛna kɛ kiraw ye. N bɛna kabakow kɛ sankolo la, ka taamasinyɛw kɛ dugukolo kan ni joli, ni tasuma ni sisi ye. Tile tɛna ye, dibi bɛ don, kalo bɛna wulen i n'a fɔ joli. O bɛna kɛ sanni Matigi ka loon ka se. O loon nin ye lonba ye, a nyɔgɔn tɛ yen. O loon na, ni mɔgɔ o mɔgɔ lara Matigi la, o tigi bɛna kisi.’ “Ayiwa Isirayɛli jama, n bɛna kuma minw fɔ sisan, aw ye u lamɛn dɛ! Ala ye Nazarɛti Yezu ci aw fɛ, ka see d'a ma ka kabakow kɛ aw nyana. Aw yɛrɛ y'o lɔn. Ala tun y'a ka koo latigɛ cogo min na, a kɛra ten fana. Aw y'a don kojugukɛlaw bolo janko u k'a faga, olu y'a gwengwen lɔgɔ kan k'a faga. Nga Ala y'a kunun a faganin kɔ ka saya fanga ban, bari a tun man kan ka to saya bolo. Masacɛ Dawuda yɛrɛ tun y'a fɔ ale koo la ko: ‘Matigi bɛ ne fɛ tuma bɛɛ, a bɛ ne fɛ minkɛ, o le y'a to fɛɛn si tɛ se ne kɔrɔ. O kama ne nisɔn diyanin bɛ ka to ka dɔnkili la. Bari ne bɛna layɔrɔnyuman sɔrɔ. Ne y'a lɔn ko e tɛna sɔn ka ne to saya bolo. Ne min ye i ka baarakɛlatilennin ye, i tɛn'a to ne suu bɛ toli. I ye hɛrɛ sira don ne seen kɔrɔ, ne bɛna to nisɔndiya la tuma bɛɛ i nyakɔrɔ.’ ” Piyɛri taara ni kuma ye nya ko: “N badenw, ne ka kan ka an bɛmacɛ Dawuda ka koo nyafɔ aw ye ka gwɛ. Ayiwa, a sara, u y'a suu don, halibi a suturayɔrɔ lɔnnin lo. Dawuda tun ye kira ye. A tun y'a lɔn ko Ala y'a latigɛ ko a bɛn'a ka deenw dɔ sigi a nɔɔ na masaya la. A tun kɔnna ka Ala ka Mɔgɔwolomanin kununko lɔn, o la a y'a fɔ ko n'a sara, ko a suu tɛna toli. Ayiwa, Ala ye Yezu kunun a sanin kɔ, anw kɔni y'a ye. A y'a wele k'a sigi a yɛrɛ kɔrɔ masaya la. A tun y'a daa di ko a bɛna Nii Senuman ci. A y'o sɔrɔ a Faa fɛ k'o ci anw ma. Aw b'o le ka sebagaya kuma mɛnna, ani k'a seko ye. Masacɛ Dawuda ma yɛlɛ sankolo la, nga a tun ye Krista koo fɔ ko: ‘Matigi Ala y'a fɔ ne ka Matigi ye ko a ka sigi ale gɛrɛfɛ masaya la, ko fɔɔ a k'a jugu cɔnkɔn fɔlɔ.’ Ayiwa, aw Isirayɛli jama, aw k'a faamu bɛrɛbɛrɛ ko aw ye Yezu min faga lɔgɔ kan, Ala y'a le lo woloma k'a kɛ an Matigi ye.” Jama ye Piyɛri ka kuma nunu lamɛn minkɛ, u hakili nyagamina. U ye Piyɛri n'a tɔnyɔgɔn cidenw nyininga k'u ka kan ka mun kɛ. Piyɛri y'u jaabi ko: “Aw ye nimisa ka faran aw ka kojuguw la, an b'aw batize Yezu Krista tɔgɔ la janko aw ka yafa sɔrɔ. O la, aw bɛna Nii Senuman sɔrɔ, bari Matigi y'o layidu ta aw, n'aw deenw le ye, ani Matigi an ka Ala bɛna mɔgɔ minw wele ka bɔ yɔrɔjan.” Piyɛri y'a fɔ u ye fana ko: “Haya! Aw ye jija k'aw ka kɛwaliw yɛlɛma janko aw ni mɔgɔjugu nunu kana kɛ kelen ye.” A ye kuma wɛrɛw fɔ k'u jaa gwɛlɛya. Olu lara Piyɛri ka kuma na o tuma na. U y'u batize. Minw farala kalandenw kan o loon na, u tun bɛ mɔgɔ waa saba bɔ. Kalandenw tun bɛ taa cidenw ka kalan lamɛn tuma bɛɛ. U tun bɛ jɛn k'u ka koo bɛɛ kɛ balimaya la. U tun bɛ dumuni senuman tilantilan nyɔgɔn fɛ, ka Ala dali. Cidenw tun bɛ kabako caaman kɛ, o siranya tun ye mɔgɔ bɛɛ minɛ. Mɔgɔ minw bɛɛ tun lara Yezu la, u tun jɛnnin bɛ k'u ka fɛɛn bɛɛ kɛ foroba ye, k'u bololafɛnw ni u ka forow feere k'o sɔngɔ tilan ka kɛnyɛ n'u kelen kelen bɛɛ ka makoyako ye. U tun bɛ taa Alabatosoba kɔnɔ loon o loon ka Ala bato. U tun bɛ dumuni senuman tilantilan nyɔgɔn fɛ soo kɔnɔ, ka to ka dumuni kɛ ni nyɔgɔn ye nisɔndiya la. U si tun t'u yɛrɛ bonya. U tun bɛ Ala tando, mɔgɔ bɛɛ tun b'u filɛ ni nyanyuman ye. Mɔgɔ minw tun ka kan ka kisi, Matigi tun bɛ olu ladon jɛnkulu nin kɔnɔ loon o loon. Yezu ka cidenw tun b'o nyɔgɔn kɛ i n'a fɔ Yezu tun y'a fɔ u ye cogo min na. Loon dɔ, Piyɛri ni Zan tun bɛ taara Alabatosoba kɔnɔ wulafɛ batoli la. Cɛɛ dɔ tun bɛ yen, a murukunin tun lo kabini a wolotuma. Mɔgɔw tun b'a ta ka ta'a bila loon o loon Alabatosoba daa dɔ la, u b'o min wele ko Daa cɛnyuman, janko a ka saraka dali donbagaw fɛ. A ye Piyɛri ni Zan ye tuma min na, u tun bɛ nyini ka don Alabatosoba kɔnɔ. A ye saraka dali u fɛ. Piyɛri ni Zan ye cɛɛ filɛ, k'a fɔ a ye ko: “An filɛ ka nya.” A y'a nyaa basanin to u kan, a ka miiri la ko a bɛna fɛɛn dɔ sɔrɔ u fɛ. Nga Piyɛri y'a fɔ a ye tugu ko: “Sanu tɛ n fɛ, wari tɛ n fɛ, nga fɛɛn min bɛ n fɛ, ne b'o le d'i ma: Nazarɛti Yezu Krista tɔgɔ barika la, wili ka taama.” Piyɛri y'a minɛ a kinibolo ma k'a lawili. O yɔrɔnin kelen, cɛɛ seenw kɛnɛyara, a senfasaw ye barika sɔrɔ. A panna ka cun! A taamana ka don n'u ye Alabatosoba kɔnɔ. A tora ka taama ka panpan, ka barika la Ala ye. Mɔgɔ bɛɛ y'a taamatɔ ye ka to ka Ala tando. U y'a lɔn ko ale le tun bɛ sigi Alabatosoba Daa cɛnyuman kɔrɔ ka saraka dali. O ye mɔgɔw kabakoya ka dama tɛmɛ fɔɔ k'u hakili nyagami. Cɛɛ ma sɔn ka bɔ Piyɛri ni Zan kɔ, mɔgɔw hakili nyagaminin girinna k'u lamini yɔrɔ dɔ la, u b'o min wele ko Solomani ka bolonda. Piyɛri y'o ye minkɛ, a y'a kaan to ko: “Jama, koo min kɛra ten wo, mun na o b'aw kamanagwan k'aw nyaa coron anw na ka kɛ i n'a fɔ anw ka sebagaya le ye cɛɛ kɛnɛya, walima an ka Ala nyasiranya kɔsɔn le? Nga an bɛma Ibrayima, ni Isiyaka, ni Yakuba ani an faaw bɛɛ ka Ala le ye nɔɔrɔ la a Sagokɛla Yezu kan, aw banna ale min na k'a don mɔgɔjuguw bolo. Pilati tun b'a fɛ k'a bila, aw ko fewu. Aw banna Mɔgɔsɛbɛ ni Mɔgɔnyuman na, ale min y'a yɛrɛ di Ala ma a sagokɛ kɔsɔn. Aw banna ale la ko fɔɔ Pilati ka mɔgɔfagala dɔ le labila. O la, mɔgɔw bɛ hɛrɛ sɔrɔ min barika la, aw y'a to u y'o faga, nga Ala y'a kunun. Anw y'a ye. An y'an jigi la Yezu kan minkɛ, o le y'a to a ye cɛɛ nin kɛnɛya, aw nyaa b'o min na, aw b'a lɔn fana ka kɔrɔ. Tinyɛ na, anw lara Yezu la minkɛ, o le y'a kɛnɛya aw nyakɔrɔ ten. “Sisan n badenw, ne y'a lɔn ko aw, n'aw ka nyamɔgɔw ye koo nin kɛ, sabu aw tun m'a lɔn. N'o tɛ Ala tun y'a fɔ a ka kiraw ye kabini fɔlɔ, ko a bɛna mɔgɔ min woloma k'a bila ka na, k'o bɛna tɔɔrɔ. A do kɛra ten. O tuma na sa, aw ye nimisa ka faran aw ka kojuguw la ka segi Ala ma, janko a ka yafa aw ma. Aw k'a kɛ ten, o la, yɛlɛmani bɛna don, lafiya bɛna sɔrɔ. O seen fɛ Ala bɛna segi k'a ka Mɔgɔwolomanin Yezu ci aw ma tugu, i n'a fɔ a y'a latigɛ cogo min na. Nga sanni o waati ka se, a siginin bɛna to Ala kɔrɔ fɔlɔ yan ni yɛlɛmani bɛ don dinyɛ koow bɛɛ la, ka kɛnyɛ ni Ala ka kiraw ka kuma ye, o min fɔra kabini tumajan. Musa tun kɔnna k'a fɔ ko: ‘Matigi Ala bɛna kira dɔ lawili aw cɛma min bɛna kɛ i n'a fɔ ne Musa. A mana kuma o kuma fɔ aw ye, aw k'o bɛɛ labato. Ni mɔgɔ min banna ka mɛnni kɛ o kira nin fɛ, o tigi bɛna halaki.’ Kira minw tɛmɛna ka kɔrɔ, k'a ta Samuyɛli ma, ani minw tugura a kɔ, olu bɛɛ fana y'an ka bii tile koo fɔ ka tɛmɛ. Aw ye kiraw ka deenw ye. Ala tun ye layidu ta aw faaw ye Ibrayima barika la, aw y'o deenw ye. A tun ko: ‘I deen sababu la, mɔgɔ bɛɛ bɛna duba sɔrɔ.’ Ala y'a Sagokɛla ci aw le ma fɔlɔ, janko a ka duba kɛ aw kelen kelen bɛɛ ye ka aw faran ka bɔ aw ka kɛwalijuguw la.” Ka Piyɛri ni Zan to kuma na jama fɛ, sarakalasebagaw ni Alabatosoba nyamɔgɔ, ani Sadusenyɛ dɔw sera. U y'a ye ko mɔgɔ fila nunu bɛ jama kalanna Yezu ka koow, ani suuw kununko la minkɛ, o ma diya u ye fewu. U y'u fila minɛ ka taa u datugu kaso la fɔɔ a dugusagwɛ, bari tile tun banna. O bɛɛ n'a ta, mɔgɔ minw tun ye ciden fila nunu ka kuma lamɛn, olu caaman lara o la. Dɔ farala kalandenw kan. Cɛɛw bɛɛ lajɛnnin taara se mɔgɔ waa duuru nyɔgɔn na. O dugusagwɛ, Zuwifuw ka kititigɛla minw bɛ Zeruzalɛmu dugu kɔnɔ, olu ye nyɔgɔn lajɛn: cɛkɔrɔba fara sariya karamɔgɔw kan. Sarakalasebagaw kuntigiba Ana n'a ka somɔgɔw bɛɛ tun bɛ yen, ni Kayifu, ni Zan ani Alɛkisandiri. O tuma na, u nana ni Piyɛri ni Zan ye u cɛma. U y'u nyininga ko: “Aw ye cɛmurukunin nin kɛnɛya ni dalilu jumɛn ye, walima aw y'a kɛnɛya jon barika la?” O tuma na, Nii Senuman tun bɛ Piyɛri fɛ kosɛbɛ, a y'u jaabi ko: “An ka cɛkɔrɔbaw, n'an nyamɔgɔw, aw ye anw wele kiti la bii, bari an ye konyuman kɛ. Aw b'an nyininga ko an ka nanbara nin kɛnɛya cogo fɔ. O tuma na, a ye tulo malɔ ka nya ani k'a faamu, Isirayɛli jama bɛɛ fana k'a faamu ko Yezu Krista Nazarɛtika nin barika lo, aw tun y'o min gwengwen k'a faga lɔgɔ kan. Ala y'a kunun. Ale barika la cɛɛ nin kɛnɛyara. Aw bonlɔlaw tun banna kabakuru min na dɛ, o le nana tila ka kɛ jigilakabakuru ye. O ye Yezu ye. Bari Ala ma mɔgɔ wɛrɛ ci dinyɛ kɔnɔ, adamaden bɛ se ka kisi min barika la.” Kititigɛla nunu y'a ye ko Piyɛri ni Zan hakili siginin lo u ka kuma na. U kabakoyara bari u y'u jati mɔgɔfufafu ni minw ma kalan bɛrɛ kɛ. O kɔ, u nan'a lɔn ko Yezu ka kɔmɔgɔw dɔw lo. U ye cɛɛ filɛ u gɛrɛfɛ, a dafaninba, fɔta ma sɔrɔ u fɛ. O la, u y'a fɔ u ye ko u ka bɔ kɛnɛma, u dama ye nyɔgɔn ye koo nin na. U y'a fɔ ko: “An bɛna mun le kɛ mɔgɔ nunu na? Tinyɛ kɔni na, u ye koba kɛ. Zeruzalɛmuka bɛɛ b'a kala ma. A gwɛnin lo, an tɛ se ka ban a ma. Nga, n'an t'a fɛ koo nin kibaru ka jɛnsɛn ka taa nya, an ka kan k'u bali, k'u bagabaga k'u kana Yezu tɔgɔ fɔ mɔgɔ si nyana tugu.” O la, u ye Piyɛri ni Zan wele ka kangari la ko Yezu tɔgɔ kana mɛn u daa la loon si walima ka mɔgɔw kalan n'a ka koow ye. Nga Piyɛri ni Zan y'u jaabi ko: “Jumɛn ka di Ala ye koo fila nunu na: k'a ka fɔta labato, walima k'aw ka fɔta labato? Aw yɛrɛ k'o jaabi nyini aw yɛrɛ ma. “Anw kɔni fɛ, anw ye min ye, ka min mɛn, anw tɛ se ka to o fɔbali ye.” U ma bolo layɔrɔ sɔrɔ k'u tɔɔrɔ minkɛ, u y'u sɔngɔ kosɛbɛ, ka sɔrɔ k'u bila. U y'o kɛ bari u siranna jama nya, bari mɔgɔ bɛɛ tun bɛ Ala tɔgɔ tandora u ka kokɛnin nin kama. Cɛɛ min ka kɛnɛya kɛra kabako ye, o sii tun tɛmɛna saan bi naani kan. Piyɛri ni Zan bilanin kɔ, sarakalasebagaw ni cɛkɔrɔbaw ye kuma min bɛɛ fɔ, u segira ka n'o bɛɛ nyafɔ u tɔnyɔgɔnw ye. Olu y'u ka kuma mɛn. O kɔ, u y'u kaan kɛ kelen ye ka Ala dali ko: “Matigi, e le ye sankolo ni dugukolo dan. E le ye kɔgɔji n'a kɔnɔnafɛnw bɛɛ dan. E le y'a kɛ i ka baarakɛla an bɛma Dawuda ye kuma nin fɔ Nii Senuman barika la, ko: ‘Mun na siya nunu murutira? Mun na; naniyajugu b'u fɛ? Masacɛw y'u kaan bɛn, jamana nyamɔgɔw lajɛnna janko ka kɛ kelen ye ka Matigi n'a ka Mɔgɔwolomanin kɛlɛ.’ Tinyɛ na, Pɔnsi Pilati, ni Erɔdi, ni Isirayɛli jama ani siya wɛrɛw ye nyɔgɔn lajɛn dugu nin kɔnɔ i ka Sagokɛla bɛrɛbɛrɛ Yezu kama i y'o min kɛ dinyɛ kisibaga ye. Ayiwa, i tun ye koo minw bɛɛ latigɛ, u y'o bɛɛ kɛ. Sisan kɔni Matigi, i janto u ka bagabagaliw la, a to i ka baarakɛlaw k'i ka kuma fɔ mɔgɔw ye ni jagwɛlɛya ye. A to an ka se ka mɔgɔw kɛnɛya, ka kabakow kɛ Yezu barika la, ale min ye i ka Sagokɛla bɛrɛbɛrɛ ye.” U tun bɛ yɔrɔ min na, dalili bantɔ, o yɔrɔ nin yɛrɛyɛrɛla. Nii Senuman jigira u bɛɛ kan, u tora ka Ala ka kuma fɔ ni jagwɛlɛya ye. Mɔgɔ minw tun lara Yezu la, u bɛnnin tun lo kosɛbɛ, miiriya kelen le tun b'u bɛɛ fɛ. U si tun t'a fɔ ko: “N ta.” Nga u ka fɛɛn bɛɛ tun ye foroba ye. Cidenw tun bɛ kobaw kɛ k'a yira ko Matigi Yezu kununna. Ala ka duba tun bɛ u bɛɛ kan. O la fana, dɛsɛ tun tɛ u si kan, bari forow, walima soow tun bɛ minw fɛ, u tun b'u feere ka n'u bɛɛ sɔngɔ di cidenw ma. U tun b'o tilan ka kɛnyɛ n'u kelen kelen bɛɛ ka makoya ye. O cogo la, Levi kɔmɔgɔ dɔ tun bɛ yen min tɔgɔ ko Yusufu ka bɔ Sipɔrɔ jamana na, cidenw y'a tɔgɔ la ko Barinabasi, (o kɔrɔ ko mɔgɔ min bɛ mɔgɔ ladiya). Foro dɔ tun bɛ ale fɛ fana. A y'o feere ka na a wari di cidenw ma. Nga cɛɛ dɔ tun bɛ yen min tɔgɔ tun ko Ananiyasi. A ka muso tɔgɔ tun ko Safira. U bɛnna k'u ka foro dɔ feere, ka dɔ bɔ a sɔngɔ la ka sɔrɔ ka ta'a tɔɔ di cidenw ma. O tuma na, Piyɛri y'a fɔ a ye ko: “Ananiyasi, a kɛra di i y'a to Sutana sera i kɔrɔ fɔɔ i bɛ galon tigɛ Nii Senuman ye? Mun na i ye foro sɔngɔ nin dɔ dogo? E tun tɛ se ka foro nin feereko to yen wa? Hali n'i y'a feere fana, e tun tɛ se ka to n'a sɔngɔ ye i yɛrɛ sago la wa? A do kɛra di miiriyajugu nin donna i dusu la? I ma galon tigɛ mɔgɔw ye dɛ, i y'a tigɛ Ala le ye.” Ananiyasi y'o kuma mɛn dɔrɔn, a benna ka sa. Mɔgɔ minw y'o kibaru mɛn, siranyaba ye olu bɛɛ minɛ. Kanbelenw y'a suu konya kɛ, ka ta'a suu don. Lɛrɛ saba nyɔgɔn tɛmɛnin kɔ, Ananiyasi ka muso sera o yɔrɔ la, nga a tun ma bɔ koo nin kala ma. Piyɛri y'a nyininga ko: “Tinyɛ fɔ n ye. Aw y'aw ka foro feere daa nin na wa?” Muso y'a jaabi ko ɔnhɔn. O tuma na, Piyɛri y'a fɔ a ye ko: “Mun na aw bɛnna ka Matigi darabɔ? Ayiwa, mɔgɔ minw taara i cɛɛ suu don, u segitɔ filɛ nin ye. U bɛna taa n'i fana suu ye.” O yɔrɔnin bɛ, muso nin benna Piyɛri kɔrɔ ka sa. Kanbelen nunu donna k'a sanin sɔrɔ. U y'a ta ka ta'a suu don a cɛɛ kaburu gɛrɛfɛ. Siranya ye Ala ka jama minɛ kosɛbɛ, mɔgɔ minw bɛɛ fana y'o kibaru mɛn, olu bɛɛ siranna kosɛbɛ. Cidenw tun bɛ kabako caaman kɛ jama nyana. U bɛ Alabatosoba donda min wele ko Solomani ka bolonda, kalandenw bɛɛ tun bɛ to ka nyɔgɔn lajɛn yen ni miiriya kelen ye. Nga mɔgɔ tɔw si tun tɛ sɔn ka taa jɛn n'u ye. O bɛɛ n'a ta, jama tun b'u tando. Cɛɛ ni musow caaman tun bɛ lara Matigi la ka fara kalanden jɛnkulu kan. Mɔgɔw tun bɛ bɔ n'u ka banabagatɔw yɛrɛ ye ka na u lala siradaw la dɛbɛ ni kalakaw kan, janko Piyɛri tɛmɛtɔ suma ka kɛ u dɔ kan waasa u ka kɛnɛya. Mɔgɔw tun bɛ bɔ hali Zeruzalɛmu dafɛ duguw la, k'u ka banabagatɔw ni jinatɔw ta ka na. U bɛɛ fana tun bɛ kɛnɛya. O la, sarakalasebagaw kuntigiba n'a ka dakɔrɔsigiw olu minw ye Sadusenyɛw ye, u bɛɛ dimininba wilila ka ciden nunu minɛ jama nyana k'u don kaso la. Nga Matigi y'a ka mɛlɛkɛ ci sufɛ ka na kasobon daa yɛlɛ ka bɔ ni ciden nunu ye k'a fɔ u ye ko u ka taa Alabatosoba kɔnɔ, ka Ala ka sira taamacogo fɔ mɔgɔw ye. U ye mɛlɛkɛ ka kuma labato. Sɔgɔma joona, u sera Alabatosoba kɔnɔ k'a daminɛ ka mɔgɔw kalan. O tuma na, sarakalasebagaw kuntigiba n'a ka dakɔrɔsigiw taara u ka nyɔgɔnyeyɔrɔ la. U ye Zuwifuw ka kititigɛlaw bɛɛ lajɛn, ka sɔlidasiw bila k'u ka taa cidenw bɔ kaso la ka na n'u ye. Nga u taara se, u ma cidenw sɔrɔ kasobon kɔnɔ. U segira ka taa o nyafɔ ko: “An taara se ka daa yɛlɛ ka don, an ma mɔgɔ si sɔrɔ yen. K'a sɔrɔ dakɔlɔsibagaw tun bɛ daa la, a fana tun sɔgɔnin lo ka nya.” Alabatosoba kɔlɔsibagaw nyamɔgɔ, ni sarakalasebagaw kuntigiw y'o kibaru nin mɛn, u bɛɛ kɔnɔnafilila kosɛbɛ o koo la. U tora ka nyɔgɔn nyininga ko koo nin laban bɛna kɛ cogo di. K'u t'o la, mɔgɔ dɔ nan'a fɔ u ye ko: “A filɛ, aw ye mɔgɔ minw don kaso la dɛ, u b'a la ka jama kalan Alabatosoba kɔnɔ.” O tuma na Alabatosoba kɔlɔsibagaw nyamɔgɔ n'a ka mɔgɔw taara yen ka cidenw wele. Nga u m'u jagoya, bari u tun bɛ siran ko jama kana na u bon ni kabakuruw ye. U nana ni cidenw ye u ka kiti tigɛyɔrɔ la. Sarakalasebagaw kuntigiba y'u nyininga ko: “An tun ma kangari la aw ye ko aw kana mɔgɔw kalan a koo la wa? Nga aw ye Zeruzalɛmukaw tulo fa n'aw ka kalan ye. O tuma na, aw b'a fɛ cɛɛ nin fagako hakɛ ka ben anw kan le wa?” O la, Piyɛri ni ciden tɔw y'u jaabi ko: “Anw tɛ se ka ban Ala sago la ka adamadenw ta kɛ. Aw tun ye Yezu min gwengwen k'a faga lɔgɔ kan dɛ, an bɛmaw ka Ala y'a kunun, k'a kɛ mɔgɔba ye, k'a sigi a yɛrɛ kɔrɔ masaya la, ani k'a kɛ kisibaga ye, janko ale sababu la, Isirayɛlidenw ka se k'u sɔɔn yɛlɛma, Ala ka yafa u ma. Ala y'o koo minw kɛ, an y'o seerew ye ani Nii Senuman, Ala y'o min di a sagokɛlaw ma.” Cidenw ka kuma nunu ye kititigɛlaw dusu gwan fɔɔ u y'a fɔ k'u ka kan ka faga. Nga Farizinyɛ dɔ tun bɛ kititigɛlaw cɛma, a tɔgɔ tun ko Gamaliyɛli, sariya karamɔgɔ tun lo. Bɛɛ tun bɛ bonya la a kan. Ale wilila k'a fɔ ko cidenw ka bɔ kɛnɛma fɔlɔ. O kɔ, a ko: “Eyi! Isirayɛlidenw, aw bɛna koo min kɛ mɔgɔ nunu na, aw y'a jati minɛ ka nya dɛ! A ma mɛn kosɛbɛ, Tedasi wilila ko ale ye mɔgɔba ye. Mɔgɔw tugura a kɔ fɔɔ ka se mɔgɔ kɛmɛ naani nyɔgɔn ma. A fagara tuma min na, a kɔmɔgɔw bɛɛ ma jɛnsɛn ka tunu wa? O kɔ, Ɔrɔmukaw tun bɛ jamanadenw jatira tuma min na, Zuda ka bɔ Galile wilila n'a kɔmɔgɔ caaman ye ka muruti. Ale fana fagara, a kɔmɔgɔw bɛɛ jɛnsɛnna. Ayiwa, ne b'a fɔ aw ye, aw kana mɔgɔ nunu ka koo nin ta aw kuun na tugu, aw y'u to. N'o y'a sɔrɔ n'u ka; naniya, walima u ka baara bɔra adamadenw na, a bɛna na cɛn. Nga n'o y'a sɔrɔ ni Ala nɔɔ lo, aw tɛna se ka foyi kɛ o la. An k'an yɛrɛ kɔlɔsi an kana kɛ Ala juguw ye.” Ayiwa, u sɔnna Gamaliyɛli ka kuma na. U ye cidenw wele k'u bugɔ ni golokamiw ye ka ban, u ye kangari la u ye k'u kana Yezu tɔgɔ wele abada. U y'u labila ka taa. Cidenw nisɔn diyanin bɔra kiti tigɛyɔrɔ la, bari Ala ye bonya la u kan o min kɛra u lɔgɔbɔko ye Yezu tɔgɔ kɔsɔn. Loon o loon, Yezu min ye Ala ka Mɔgɔwolomanin ye, cidenw tun bɛ to ka taa ale ka kibaru diman fɔ mɔgɔw ye Alabatosoba kɔnɔ, ani u yɛrɛ ka soow kɔnɔ. Kalandenw tora ka buguya dɔrɔn. Waati dɔ la, Zuwifu minw bɔra yɔrɔ wɛrɛ, n'u bɛ girɛkikan fɔ, olu tora ka tɔw kɔrɔfɔ k'u tɛ to k'u mako don olu ka firiyamusow la kosɛbɛ dumuni tilantuma na loon o loon. O la, ciden tan ni fila nunu ye kalandenw bɛɛ lajɛnnin wele k'a fɔ u ye ko: “Anw man kan ka to dumuni tilanko la, ka Ala ka kuma fɔko bila gɛrɛfɛ. O kama, aw yɛrɛ ka mɔgɔ wolonwula woloma aw cɛma minw sɔɔn ka nyi, ni hakili b'u fɛ, ni Nii Senuman. O la, anw bɛna dumuni tilanko don olu bolo. Anw kɔni bɛna to ka Ala ka kuma fɔ, ani ka bila Ala daliko nyafɛ.” O kuma nin diyara jama ye. O tuma na, u ye mɔgɔw woloma, olu tɔgɔw filɛ nin ye: Etiyɛni, min jigi tun bɛ Ala kan kosɛbɛ ni Nii Senuman tun b'a fɛ, ni Filipi, ani Porokɔri, Nikanɔri ni Timɔn, ani Parimenasi, ani Nikola ka bɔ Antiyɔsi, min donna Zuwifuya la. O y'u yira cidenw na, olu y'u bolo la u kuun na kelen kelen ka Ala dali u ye. Ala ka kuma tora ka jɛnsɛn, kalandenw tora ka caya kosɛbɛ Zeruzalɛmu kɔnɔ. Sarakalasebaga caaman sɔnna ka la Yezu la. Barika tun bɛ Etiyɛni na, Ala ka duba tun b'a kan kosɛbɛ. A tora ka kabako caaman kɛ mɔgɔw nyana. O bɛɛ kama, Alabatoso min bɛ wele ko Jɔnhɔrɔnyaninw ka Alabatoso, o ka mɔgɔ dɔw nana sɔsɔli daminɛ ni Etiyɛni ye. Sirɛnikaw ni Alɛkisandirikaw ni Silisikaw, ani Azikaw fana nii tun b'o la. Nga u daa tun tɛ sera Etiyɛni kɔrɔ, bari a tun bɛ kuma ni hakilitigiya ye Nii Senuman barika la. O la, u ye mɔgɔ dɔw daa san k'u k'a fɔ ko a tun bɛ Ala ni Musa tɔgɔ cɛnna. O kama cɛkɔrɔbaw ni sariya karamɔgɔw ani jama bɛɛ murutira Etiyɛni kama ka girin k'a minɛ ka taa n'a ye u ka kititigɛlaw fɛ. U taara n'u ka galontigɛla dɔw fana ye o yɔrɔ la. Olu y'a fɔ ko: “Cɛɛ nin bɛ to k'a dajugu la an ka yɔrɔ senuman ni sariya kan. An y'a mɛn a daa la ko Nazarɛti Yezu tɔgɔla nin bɛna yɔrɔ senuman nin ci, sariya min sigira Musa ka waati la, k'o yɛlɛma.” O tuma na, kititigɛlaw bɛɛ nyaa basanin tun bɛ Etiyɛni kan. A nyaa kɛra i n'a fɔ mɛlɛkɛ ta u nyakɔrɔ. Sarakalasebagaw kuntigiba ye Etiyɛni nyininga ko: “Mɔgɔ nunu b'i jalakila koo minw kuun kan, tinyɛ lo wa?” A y'a jaabi ko: “N faaw, n balimaw, a y'aw tulo malo ka n ka kuma lamɛn. Sanni an faa Ibrayima ka bɔ Mezopotami ka taa sigi Karan, Ala nɔɔrɔtigi le tun y'a yɛrɛ yira a la k'a fɔ a ye ko: ‘Wili ka bɔ i faso, an'i ka jamana na. Ne bɛna jamana min yira i la, i ka taa yen.’ O le y'a to Ibrayima bɔra Kalide jamana na ka taa sigi Karan. A facɛ bannin kɔ, Ala y'a kɛ a bɔra Karan, ka na sigi yan jamana na, an bɛ yɔrɔ min na bii. Nga Ala ma foyi di Ibrayima ma o jamana nin kɔnɔ, hali seen layɔrɔ yɛrɛ. Nga a y'a daa di Ibrayima ma ko ale bɛna yan jamana nin tigiya don ale n'a deenw bolo, k'a sɔrɔ deen tun t'a fɛ. Ala tun y'a fɔ a ye fana ko a deenw bɛna kɛ lonanw ye jamana wɛrɛ la, k'u bɛna u kɛ jɔɔnw ye k'u tɔɔrɔ fɔɔ ka taa se saan kɛmɛ naani ma. Nga, ko jamana min mɔgɔw bɛna u kɛ jɔɔnw ye, ko ale bɛna olu nyagwan! K'u bɔnin kɔ o jɔnya la, u bɛna na ale bato yan yɔrɔ nin na. O fɔnin kɔ, Ala y'a ka dadili taamasinyɛ fɔ a ye, o kɛra deen cɛmanw kɛnɛkɛnɛko ye. Ayiwa, o cogo la, Ibrayima nana Isiyaka sɔrɔ, a y'a kɛnɛkɛnɛ a wolonin tile seeginan loon. Isiyaka fana y'a dencɛ Yakuba ta kɛ ten. Yakuba fana y'a ka dencɛ tan ni fila nunu fana taw kɛ ten, o minw ye an bɛmaw ye. “Nga, an bɛma nunu y'u dɔgɔcɛ Yusufu kɔniya, k'a feere Ezipiti taabaga dɔw ma. Nga, Ala tun b'a fɛ. A y'a kunmabɔ tɔɔrɔw bɛɛ la. Ala ye Yusufu dɛmɛ, ka hakilitigiya d'a ma, a koo diyara Ezipiti masacɛ Fara;nɔn ye fɔɔ ale y'a kɛ masacɛlankan ye Ezipiti jamana bɛɛ kunna, ani k'a kɛ a yɛrɛ ka soo nyamɔgɔ ye. O tuma na, kɔngɔ nana don Ezipiti ani Kanaan jamana bɛɛ la. Tɔɔrɔ bonyana. Balofɛn foyi tun tɛ sɔrɔla an bɛmaw fɛ tugu. Yakuba y'a mɛn minkɛ ko suman bɛ sɔrɔ Ezipiti jamana na, a y'an bɛmaw bila ka taa dɔ nyini o yɔrɔ la. U taako filanan na, Yusufu y'a yɛrɛ yira a badenw na janko u k'a lɔn. O kɛra sababu ye fana Fara;nɔn ye Yusufu bɔyɔrɔ lɔn. O tuma na, Yusufu y'u bila ka ta'a facɛ Yakuba n'a ka denbaya bɛɛ wele ka ta'a fɛ yen. U bɛɛ lajɛnnin tun ye mɔgɔ bi wolonwula ni duuru. Yakuba n'an bɛmaw bɛɛ sara yen le. Ibrayima tun ye suu donyɔrɔ min san Emɔri deenw fɛ, Sisɛmu dugu kɔnɔ, u taara u bɛɛ suu don o yɔrɔ la. “Ala tun y'a daa di Ibrayima ma koo min na, o kɛtuma surunyana minkɛ, an ka mɔgɔw buguyara kosɛbɛ Ezipiti jamana kɔnɔ. Waati dɔ nana se, masacɛ dɔ wɛrɛ sigira fanga na min tun ma Yusufu lɔn. Juguya kɔsɔn, o masacɛ nin y'an ka mɔgɔw tɔɔrɔ, ka to ka wolobagaw wajibiya k'u ka dennyɛninw fili janko u ka sa. O waati lo, Musa wolola, a tun cɛɛ ka nyi kosɛbɛ. A wolobagaw y'a balo kalo saba, dogo la. Nga, u nan'a fili tuma min na, Fara;nɔn denmuso y'a ta k'a balo i n'a fɔ a yɛrɛ woloden. Lɔnniya min bɛɛ bɛ Ezipiti, u ye Musa kalan o bɛɛ la. A tun bɛ se kuma ni kɛwali la. “A ye saan bi naani sɔrɔ tuma min na, a y'a; naniya ta ko a bɛ taa bɔ a baden Isirayɛlidenw fɛ. A taar'a ye ko Ezipitika dɔ tun b'a badenw dɔ bugɔra. A baden nin tɔɔrɔko ma diya a ye. A tun b'a fɛ k'a mɔnɛ bɔ minkɛ, a ye Ezipitika nin bugɔ ka ben. Musa tun b'a miiri ko Isirayɛlidenw bɛn'a faamu ko ale sababu la Ala bɛna u kunmabɔ. Nga olu m'o faamu. O dugusagwɛ, a taar'a sɔrɔ Isirayɛlidenw mɔgɔ fila tun bɛ kɛlɛ la. A tun b'a fɛ k'u sabali. O la, a y'a fɔ u ye ko: ‘N badenw, aw bɛɛ ye fɛɛn kelen ye, mun na aw bɛ nyɔgɔn tɔɔrɔla?’ Nga min tun b'a tɔ kelen nin tɔnyɔna, ale y'a kaan to Musa ma ko: ‘Jon y'i bila anw kunna, k'i kɛ anw kitibaga ye? I b'a fɛ ka ne faga i n'a fɔ i ye Ezipitika nin faga cogo min na kunu wa?’ O kuma nin kɔsɔn, Musa bolila ka taa sigi Madiyan mara la, a ye muso ta yen ka deen fila wolo o yɔrɔ la. “Saan bi naani tɛmɛnin kɔ, mɛlɛkɛ dɔ y'a yɛrɛ yira a la kongo kɔnɔ yirifitini dɔ cɛma tasuma tun b'o min manana Sinayi kulu gɛrɛfɛ. Musa y'o ye, a kabakoyara. A tun bɛ gwɛrɛla janko k'a filɛ ka nya minkɛ, a ye Matigi kumakan mɛn ko: ‘Ne ye i bɛmaw ka Ala ye: Ibrayima, ni Isiyaka, ni Yakuba nunu ka Ala.’ Musa yɛrɛyɛrɛtɔ tun tɛ sɔnna ka filɛli kɛ yen tugu. O tuma na, Matigi y'a fɔ a ye tugu ko: ‘Sanbara bɔ i seen na, bari i lɔnin bɛ yɔrɔ min na, o ye ne ka yɔrɔ le ye. Ayiwa, n ka mɔgɔw bɛ tɔɔrɔ min na Ezipiti jamana na, n y'o ye. N b'u; nunakan mɛnna. O kama, n b'a fɛ k'u kisi. O la, n b'i ci Ezipiti.’ ” Etiyɛni taara ni kuma ye nyafɛ ko: “O Musa kelen kelen nin, Isirayɛlidenw tun banna a la n'u y'a fɔ a ma ko: ‘Jon y'i bila anw kunna, k'i kɛ anw kitibaga ye?’ Ala do y'ale le ci u ma ka kɛ u kuntigi n'u kunmabɔbaga ye mɛlɛkɛ sababu la, o min tun y'a yɛrɛ yira a la yiritufitini cɛma. Musa ye kabako ni taamasinyɛw kɛ Ezipiti jamana kɔnɔ, ka Isirayɛlidenw bɔ, ka kɔgɔji tigɛ n'u ye, ka to ka kabako ni taamasinyɛw kɛ u nyana fɔɔ saan bi naani, kongo kɔnɔ. Ale Musa le y'a fɔ Isirayɛlidenw ye ko Ala bɛna kira dɔ lawili u cɛma min bɛna kɛ i n'a fɔ ale yɛrɛ. Ka Isirayɛlidenw kafonin to kongo kɔnɔ, ale Musa le tun b'u ka koow nyafɛ. Ale le tun ye mɛlɛkɛ ka dalaminɛ ye an bɛmaw ka nyɔgɔn lajɛnwaatiw la Sinayi kulu gɛrɛfɛ, ka Ala ka hɛrɛ kuma fɔ an ye. “Nga, an bɛmaw ma sɔn ka mɛnni kɛ a fɛ, u banna a yɛrɛ la, k'u ka miiriyaw nyasin Ezipiti koow ma. O la, u y'a fɔ Arɔn ye ko: ‘I ka batofɛn dɔw lalaga an ye minw bɛna to k'an kɔlɔsi an ka taama nin na, bari an tɛ nyaa lɔnna Musa tɔgɔ nin ka koow la tugu, ale min y'a kɛ an bɔra Ezipiti jamana na.’ O tuma na, u ye fɛɛn dɔ lalaga k'a kɛ i n'a fɔ misiden. U y'o kɛ u ka joo ye k'a sɔn. Olu yɛrɛ bolo ye fɛɛn min dilan, u y'o bato ni nisɔndiyaba ye. O la, Ala y'a kɔɔ sin u ma, u tora lolow batoli la, i n'a fɔ a sɛbɛnnin bɛ kiraw ka kitabu kɔnɔ cogo min na. Ala ko: ‘Isirayɛli jama, aw ka miiri la ko aw ye begɛnw faga ne le ye fɔɔ saan bi naani kongokolon kɔnɔ wa? Ayi, joo min tɔgɔ ko Mɔlɔsi, ani min tɔgɔ ko Erefan, aw tun ye olu ta. Aw yɛrɛ ye o fɛɛn nunu lalaga k'u kɛ batofɛnw ye. O kama, n bɛn'a to u bɛna aw minɛ ka taa n'aw ye fɔɔ Babilɔni kɔfɛ.’ ” Etiyɛni taara ni kuma ye nyafɛ tugu ko: “Ala ka sariya sɛbɛnnin tun bɛ walaka minw kan, olu tun bɛ kɛsu kɔnɔ k'a bila fanibugu kɔnɔ an bɛmaw fɛ kongokolon kɔnɔ, min tun b'a yira ko Ala b'u cɛma. Musa tun y'o lalaga i n'a fɔ Ala yɛrɛ tun y'a yira a la cogo min na. An bɛmaw y'a ta ka na n'a ye ka jamana nin minɛ ka siyaw gwɛn Ala barika la. Zozuwe le tun ye u ka nyamɔgɔ ye o tuma na. Fanibugu nin tora o yɔrɔ la fɔɔ ka na se Dawuda ka tile ma. Ala ka duba tun bɛ masacɛ Dawuda kan. Dawuda y'a nyini Ala fɛ, ko a k'a to a bɛ boon lɔ a ye, ale min ye Yakuba ka Ala ye. Ayiwa, a deen Solomani le nana kɛ boon nin lɔbaga ye. Nga, mɔgɔw ka boon lɔnin tɛ se ka kɛ Setigi Ala sigiyɔrɔ ye, i n'a fɔ kira tun y'a fɔ cogo min na ko: ‘Matigi ko: N ka masasigilan ye sankolo ye, dugukolo ye n seen bilayɔrɔ ye. Aw do bɛna boon sifa jumɛn lɔ ne ye? N bɛna lafinyɛ min? Ne yɛrɛ le ma fɛɛn bɛɛ dan wa?’ “Tulogwɛlɛn nunu! Aw t'aw tulo yɛlɛ ka mɛnni kɛ Ala fɛ dɛ! Halibi aw bɛ ban Nii Senuman na. Aw faaw tun bɛ cogo min na, aw fana bɛ ten. Kira jumɛn tɛmɛna n'aw faaw m'a tɔɔrɔ? Minw ye Mɔgɔsɛbɛ nin nako fɔ, u ye olu faga. Aw fana ye Mɔgɔsɛbɛ nin kɔniya k'a faga a ma mɛn. Ala y'a ka mɛlɛkɛw ci k'a ka sariya fɔ aw ye, nga aw m'a labato.” Etiyɛni ka kuma nunu digira kititigɛlaw la fɔɔ k'u nyaa wulen. Nga Nii Senuman jigira Etiyɛni kan, a y'a nyaa basa sankolo la, ka Yezu lɔnin ye Ala kɔrɔ. Etiyɛni pɛrɛnna ko: “Ne nyaa bɛ sankolo dayɛlɛnin na, Mɔgɔ Dencɛ lɔnin bɛ Ala kinibolo fɛ.” U y'a daminɛ ka kule ani k'u tulow datugu, ka girin nyɔgɔn fɛ Etiyɛni kan, k'a talontalon ka bɔ n'a ye dugu dafɛ, k'a daminɛ k'a bon ni kabakuruw ye. A fagabagaw tun y'u ka faniw kalifa kanbelen dɔ ma min tɔgɔ tun ko Sɔli. Mɔgɔw tun b'a bonna tuma min na, Etiyɛni ye Matigi dali ko: “Matigi Yezu, ne bɛ n nii segi i ma.” O kɔ, a y'a kunbiri gwan ka pɛrɛn ko: “Matigi, i kana u ka jurumu nin jati.” A y'o fɔ ka ban minkɛ, a nii bɔra. Etiyɛni ka fagako kɔni tun diyara Sɔli ye. O loon kelen yɛrɛ la, u y'a daminɛ ka Ala ka jama tɔɔrɔ kosɛbɛ. U ye dugu bila jagoya la, ka jɛnsɛn kongoduguw la, Zuda mara, ani Samari mara la, fɔɔ cidenw dɔrɔn. Mɔgɔnyuman dɔw ye Etiyɛni suu don k'a sanga kɛ kosɛbɛ. Nga Sɔli kɔni, ale tun tora ka Ala ka jama tɔɔrɔ dɔrɔn, ka to ka taa u minɛ soow kɔnɔ, cɛɛ fara musow kan, ka taa u don kaso la. Ayiwa, minw tun bolila ka bɔ Zeruzalɛmu, ni olu sera yɔrɔ o yɔrɔ, u tun bɛ Yezu ka kibaru diman fɔ o yɔrɔ la. O cogo la, Filipi fana sera dugu dɔ la Samari mara la, ka Ala ka Mɔgɔwolomanin koo fɔ u ye. Mɔgɔw ye Filipi ka kabakokɛninw kibaru mɛn ani k'u ye fana, u bɛɛ jɛnna k'a lamɛn kosɛbɛ. Jinatɔ caaman ka jinaw tun bɛ bɔ u la ni kule ye. Nanbaraw, ni senkelennin caaman kɛnɛyara. Dugu mɔgɔw nisɔn diyara kosɛbɛ. Cɛɛ dɔ tun b'o dugu nin kɔnɔ, min tɔgɔ tun ko Simɔn. A tun bɛ jinamoriya kɛ ka dugu mɔgɔw bɛɛ kabakoya, k'a yɛrɛ kɛ mɔgɔba ye. Mɔgɔw bɛɛ, denmisɛn fara mɔgɔkɔrɔbaw kan, u bɛɛ tun bɛ mɛnni kɛ Simɔn fɛ, ani k'a bonya. U tora k'a fɔ ko: “Batofɛnba ka sebagaya le bɛ cɛɛ nin bolo.” Mɔgɔw tun bɛ mɛnni kɛ a fɛ, bari a tun b'u dabari ban n'a ka jinamoriya ye kabini tumajan. Nga, Filipi nana Yezu ka kibaru diman ni Ala ka masaya sigiko fɔ u ye minkɛ, u lara Yezu la. Filipi y'u batize, cɛɛ fara musow kan. Ale Simɔn yɛrɛ fana lara Yezu la, a batizera. O kɔ, a ma sɔn ka bɔ Filipi kɔ tugu. Filipi tun bɛ koba ni kabako minw kɛ, olu tun ye Simɔn dabari ban. Cidenw tora Zeruzalɛmu k'a mɛn ko Samarikaw sɔnna Ala ka kuma ma minkɛ, u ye Piyɛri ni Zan ci u fɛ yen. Olu taara yen, ka Ala dali u ye, janko u ka se ka Nii Senuman sɔrɔ, bari u tun batizera Matigi Yezu tɔgɔ la dɔrɔn. U tun ma Nii Senuman sɔrɔ fɔlɔ. O tuma na, Piyɛri ni Zan y'u bolo la u kelen kelen kuun na, u bɛɛ ye Nii Senuman sɔrɔ. Simɔn y'a ye ko cidenw y'u bolo la mɔgɔ nunu kuun na n'u ye Nii Senuman sɔrɔ minkɛ, a tun b'a fɛ ka wari d'u ma, a y'a fɔ u ye ko: “Aw ka sebagaya nin dɔ di ne ma, waasa ni ne ye n bolo la mɔgɔ min kuun na, o tigi ka Nii Senuman sɔrɔ.” Nga Piyɛri y'a jaabi ko: “E n'i ka wari bɛɛ ka danga, bari i ka miiri la ko Ala ka sebagaya bɛ se ka san ni wari ye. Ayiwa, niyɔrɔ t'i fɛ koo nin na, lɔyɔrɔ tɛna d'i ma, bari i kɔnɔ gwɛnin tɛ Ala nyakɔrɔ. I ka nimisa ka yafa dali Matigi fɛ i ka miirijugu nin kɔsɔn, n'a sɔrɔ a bɛna yafa i ma. N'o tɛ, i sɔɔn ka jugu, i kɛnin bɛ halibi kojugu ka jɔɔn ye.” Simɔn y'a jaabi ko: “Aw yɛrɛ ka Matigi dali ne ye, waasa aw ye min fɔ, o kana n sɔrɔ.” Piyɛri ni Zan tun bɛ min lɔn Yezu koo la, u y'o fɔ mɔgɔw ye ka ban, u kɔsegitɔ Zeruzalɛmu, u tora ka Yezu ka kibaru diman fɔ Samari mara dugu caaman na. Ayiwa, Matigi ka mɛlɛkɛ kumana Filipi fɛ ko: “Filipi, i labɛn ka taa worodugu nyafan fɛ. Sira min bɛ bɔ Zeruzalɛmu ka taa Gaza, i k'o minɛ, a taamabagaw man ca.” O la, Filipi wilila k'o sira minɛ. A taara Etiyopika dɔ sɔrɔ sira kan, min tun bɔra Ala batoyɔrɔ la Zeruzalɛmu. O cɛɛ nin tun ye Etiyopi jamana ka masamuso Kandasi ka baaranyamɔgɔw dɔ ye. Ale tun bɛ masamuso ka nafolo bɛɛ kunna. A segitɔ, a tun siginin bɛ a ka wotoro kɔnɔ ka to ka kira Ezayi ka kitabu kalan. Nii Senuman y'a fɔ Filipi ye ko a ka gwɛrɛ wotoro nin na. Filipi bolila ka gwɛrɛ, k'a ye ko cɛɛ bɛ kira Ezayi ka kitabu kalanna. A y'a kaan to a ma ko: “I bɛ yɔrɔ min kalanna ten wo, i b'a kɔrɔ lɔnna wa?” A y'a jaabi ko: “N bɛ se k'a kɔrɔ lɔn cogo di ni mɔgɔ ma n dɛmɛ?” O la, a y'a nyini Filipi fɛ ko a ka yɛlɛ ka sigi ale gɛrɛfɛ. A tun bɛ yɔrɔ min kalanna, a sɛbɛnnin tun bɛ yen ko: “A kɛra i n'a fɔ saga, u bɛ taara ni min ye fagayɔrɔ la, walima u bɛ min siiw tigɛtigɛra. A ma kasi. Yɛrɛmajigi fɛ, a ma joo sɔrɔ. Jon bɛn'a tɔgɔ wele tugu, bari a ye dinyɛ to a ma sii sɔrɔ, k'a bila a kɔ.” Cɛɛ nin y'a fɔ Filipi ye ko: “O tuma na kira nin bɛ kuma jon le koo la? Sabali k'o fɔ ne ye. A yɛrɛ koo lo wa, walima mɔgɔ wɛrɛ koo lo?” O la, Filipi y'a bolo tintin o yɔrɔ nin kan, ka Yezu ka kibaru diman fɔ cɛɛ ye. K'u to sira kan, u sera yɔrɔ dɔ la jii tun bɛ o yɔrɔ la. Cɛɛ ko: “Jii filɛ nin ye, mun bɛ se k'i bali ka ne batize?” [ Filipi y'a jaabi ko: “N'i lara Yezu la kosɛbɛ, ne bɛ se k'i batize.” Cɛɛ ko: “Ne lara a la ko Yezu Krista ye Ala Deen ye.”] A y'a fɔ ko wotoro bolibaga ka wotoro lalɔ. Filipi ni cɛɛ jigira ka don jii kɔnɔ, Filipi y'a batize. U bɔra jii kɔnɔ tuma min na, Nii Senuman ye Filipi fosi ka bɔ yen. Cɛɛ m'a ye tugu. Nga a nisɔn diyanin taara n'a ka sira ye. Filipi kɔni, ale nan'a ye ko a bɛ Azɔti. A tora ka taa duguw la, ka kibaru diman fɔ o yɔrɔw la, fɔɔ ka na se Sezare. O y'a sɔrɔ Sɔli kɔni tun b'a la ka Matigi ka kalandenw bagabaga n'u ka fagako ye dɔrɔn. A taara seereyasɛbɛ minɛ sarakalasebagaw kuntigiba fɛ loon dɔ, janko a ka taa bɔ Damasikaw ka Alabatosow kɔnɔ, waasa n'a taara Matigi ka sira taamabaga minw sɔrɔ yen, u mana kɛ cɛɛw ye wo, walima musow wo, a k'u minɛ k'u siri ka na n'u ye Zeruzalɛmu. K'a to sira kan, a surunyana Damasi la tuma min na, yeelenba dɔ bɔra sanfɛ ka n'a lamini. A bɔra ka ben. Kumakan dɔ bɔra ko: “Sawuli, Sawuli, mun na i bɛ ne tɔɔrɔla ten?” A y'a jaabi ko: “E ye jon ye?” Kumakan nin ko: “Ne Yezu lo i bɛ min tɔɔrɔla. Nga, wili ka don dugu kɔnɔ, i ka kan ka min kɛ, u bɛna o fɔ i ye.” Sɔli taamanyɔgɔn bɛɛ tun kirinna ka lɔ siranya fɛ. U tulo kɔni tun bɛ kumakan nin na, nga u tun tɛ mɔgɔ si yera. Sɔli wilila ka bɔ duguma, a y'a nyaa yɛlɛ, nga a tun tɛ se ka yeli kɛ tugu. U y'a bolo minɛ le ka don n'a ye Damasi. Sɔli ye tile saba kɛ finyɛntɔya la, a ma dumuni ani minni kɛ. Kalanden dɔ tun bɛ Damasi, a tɔgɔ tun ko Ananiyasi. Matigi y'a yɛrɛ yira ale la k'a fɔ a ye ko: “Ananiyasi!” A ko: “Naamu, Matigi.” Matigi ko: “U bɛ sira min wele ko Siratilennin, i labɛn ka taa yen. N'i sera, i bɛ nyiningali kɛ Zuda ka soo cɛɛ dɔ koo la, a tɔgɔ ko Sɔli, Tarasika lo. A bɛ Ala dalila nin waati la. K'a to o Ala dali nin na, a ye ele Ananiyasi ye. I donna a ka soo k'i bolo la a kuun na, janko a ka yeli kɛ.” Ananiyasi ye Matigi jaabi ko: “Uun, Matigi! O cɛɛ nin ye kojugu minw kɛ i ka mɔgɔw la Zeruzalɛmu, mɔgɔ caaman y'o lakali. Ne y'o mɛn. Ayiwa, a nana yan Damasi dugu kɔnɔ ni dalilu ye a bolo, a y'o min sɔrɔ sarakalasebagaw fɛ. Mɔgɔ minw bɛɛ b'i kɔ, a ka olu minɛ ka jɔrɔkɔ don u la.” Nga Matigi ko Ananiyasi ma: “Taa, bari ne mako b'a la. A bɛna ne ka koo fɔ siya wɛrɛw n'u ka masaw ye ani Isirayɛlidenw ye, u ka ne lɔn. A ka kan ka tɔɔrɔ minw bɛɛ kɛ ne kɔsɔn, ne yɛrɛ bɛna o bɛɛ yira a la.” O la, Ananiyasi taara, a sera soo nin kɔnɔ, a y'a bolo la Sɔli kuun na k'a fɔ a ye ko: “N teri Sɔli, Matigi Yezu min y'a yɛrɛ yira i la sira kan i natɔ yan, ale le ye n ci i fɛ, waasa i nyaa ka yɛlɛ, i ka Nii Senuman sɔrɔ.” O yɔrɔnin kelen, fɛɛn dɔw bɔra Sɔli nyadenw na ka benben, olu bɔnin tun bɛ jigɛfaraw ma. A ye yeli kɛ, o yɔrɔnin bɛ, a sɔnna u y'a batize. O kɔ, a ye dumuni kɛ, ka fanga sɔrɔ. A kɛra ten, Sɔli ye tile damani kɛ ni Damasi kalandenw ye. O yɔrɔnin bɛ Sɔli y'a daminɛ ka mɔgɔw kalan Alabatosow kɔnɔ ko Yezu ye Ala Deen ye. Mɔgɔ minw bɛɛ mana a lamɛn, u bɛɛ bɛ kabakoya fɔɔ u bɛ to ka nyɔgɔn nyininga ko: “Cɛɛ min bɛ Yezu ka kalandenw tɔɔrɔ kosɛbɛ Zeruzalɛmu, ale tɛ wa? U ko a nana yan janko ka u dɔw minɛ ka siri ka taa u di sarakalasebagaw ma le!” O n'a ta bɛɛ, Sɔli kɔni tun bɛ barika sɔrɔla ka taa nya dɔrɔn. A tun bɛ waajuli kɛ ko Yezu ye Ala ka Mɔgɔwolomanin ye fɔɔ ka Damasi Zuwifuw dabari ban, u m'a lɔn u bɛna min fɔ a ye. Waatijan tɛmɛnin kɔ, Damasi Zuwifuw ye Sɔli fagako lanyini. U tun bɛ dugu bɔdaw bɛɛ kɔlɔsi suu ni tile, janko u ka se k'a faga. Nga o kuma nin bilara Sɔli tulo la. O la, loon dɔ sufɛ, a ka kalandenw y'a dogo sinsinba dɔ la k'a jigi ni juru ye dugu lamini kogo fɛ. Sɔli segira Zeruzalɛmu tuma min na, a tun b'a fɛ ka jɛn ni kalanden tɔw ye, nga olu bɛɛ tun bɛ siran a nya, bari u ma la a la n'a kɛra kalanden ye sɛbɛ la. O la, Barinabasi ye Sɔli ladon cidenw fɛ k'a fɔ u ye ko Matigi tun y'a yɛrɛ yira Sɔli la Damasi sira kan, ka kuma a fɛ, ko a ye Matigi ka kokɛninw wango la yen ni hakilisigi ye. K'a ta o loon ma, Sɔli tora ka taa n'u ye Zeruzalɛmu faan bɛɛ ka to ka Matigi ka kibaru diman fɔ mɔgɔw ye ni hakilisigi ye. Zuwifu minw bɛ girɛkikan fɔ, Sɔli tun bɛ baro kɛ, ka sɔsɔli kɛ n'olu fana ye. Nga olu kɔni tun b'a fagayɔrɔ le nyinina. Kalandenw y'o kibaru mɛn, u bɔra n'a ye k'a bila sira Sezare. K'a to o yɔrɔ la, u y'a bila ka taa Tarisi. O tuma na, Ala ka jama tun bɛ hɛrɛ la Zude, ni Galile ani Samari mara nunu bɛɛ la. U tun bɛ buguya ka taa. U taamacogo tun bɛ bonya la Matigi kan kosɛbɛ. Nii Senuman barika la, u ka koow tun bɛ sabati. O y'a sɔrɔ Piyɛri tun bɛ jamana yɔrɔw bɛɛ yaala. O cogo la, Ala ka jama min bɛ Lida, a taara bɔ olu fɛ yen. A taara cɛɛ dɔ sɔrɔ yen min tɔgɔ ko Ene. A tun murukunin lo ka la kabini saan seegi. Piyɛri y'a fɔ a ye ko: “Ene, Yezu Krista ka i kɛnɛya. Wili k'i ka dilan ta i yɛrɛ ma.” O yɔrɔnin bɛ, Ene wilila. Lidakaw, ani minw siginin bɛ Sarɔn, u ye koo nin ye, u bɛɛ tuubira Matigi ye. Zope kalandenw cɛma, muso dɔ tun bɛ yen, a tɔgɔ tun ko Tabita, girɛkikan na, u ko Dɔrɔkasi, o kɔrɔ ko sinɛ. Mɔgɔnyuman tun lo, ka faantanw dɛmɛ, o tun y'a ka baara ye. Waati dɔ la, a banana, nga bana ma kun a la. U y'a suu ko ka ban tuma min na, u y'a la sangaso dɔ kɔnɔ. Zope ni Lida man jan nyɔgɔn na minkɛ, kalandenw y'a mɛn ko Piyɛri b'o yɔrɔ la. U ye ciraden fila bila ka ta'a fɛ k'a dali ko a ka teliya ka na bɔ u fɛ Zope joona joona. O yɔrɔnin bɛ, Piyɛri tugura u kɔ ka taa. U sera tuma min na, u yɛlɛla ni Piyɛri ye sangaso kan. Dɔrɔkasi tun ye fani minw dan k'a to nii na, firiyamusow bɛɛ tun bɛ to ka kasi n'u b'o yira Piyɛri la. Piyɛri ko mɔgɔw bɛɛ ka bɔ kɛnɛma. O kɔ, a y'a kunbiri gwan ka Ala dali. O kɔ, a y'a nyaa yɛlɛma suu faan fɛ k'a fɔ ko: “Tabita, wili.” A y'a nyaa yɛlɛ ka Piyɛri ye minkɛ, a wilila ka sigi. Piyɛri y'a bolo minɛ k'a wili, a sɔrɔla ka kretinyɛw ni firiyamusow wele k'a yira u la. Zopekaw bɛɛ ye kibaru nin mɛn, u caaman lara Matigi la. Piyɛri tora Zope ka waati dɔɔni kɛ cɛɛ dɔ fɛ min tɔgɔ tun ko Simɔn ni golobaarala tun lo. Cɛɛ dɔ tun bɛ Sezare, a tɔgɔ tun ko Kɔrinɛyi. Sɔlidasi kuntigi lo, a tun bɛ sɔlidasikulu min kunna, o tɔgɔ ko Itali. A tun bɛ Ala ka sariyaw labato a nyaa ma, ale n'a ka somɔgɔw bɛɛ tun bɛ siran Ala nya, k'a bato tuma bɛɛ. A tun bɛ Zuwifuw dɛmɛ kosɛbɛ. Loon dɔ tile sumanin kɔ dɔɔni, Kɔrinɛyi ye Ala ka mɛlɛkɛ dɔ ye ka gwɛ kosɛbɛ. Mɛlɛkɛ nin donna a fɛ k'a fɔ a ye ko: “Kɔrinɛyi!” Siranya fɛ, Kɔrinɛyi y'a nyaa basa a la, k'a jaabi ko: “Mun kɛra Matigi?” Mɛlɛkɛ y'a jaabi ko: “I bɛ Ala batoli min kɛ, an'i bɛ dɛmɛ min kɛ faantanw ye, o diyara Ala ye. A hakili b'i la. Ayiwa, sisan, i bɛ mɔgɔw ci Zope, ka taa cɛɛ dɔ wele, a tɔgɔ ko Simɔn, n'u b'a wele ko Piyɛri. A jatigicɛ fana tɔgɔ ko Simɔn, o ye golomɔla dɔ ye, a ka soo bɛ bada la.” Mɛlɛkɛ ye kuma nunu fɔ ka ban ka taa dɔrɔn, Kɔrinɛyi y'a ka mɔgɔw filɛ, ani a ka sɔlidasi kelen wele min mɛnna a fɛ. O sɔlidasi nin tun bɛ siran Ala nya. Koo min tun kɛra, Kɔrinɛyi y'o bɛɛ fɔ u ye, ka sɔrɔ k'u ci Zope. A dugusagwɛ, u tun bɛ sira kan, u yɔrɔ tun man jan Zope la tugu. O tuma na, Piyɛri yɛlɛla sanbon kan tilegwangwanfɛ, ka Ala dali yen. Kɔngɔ ye Piyɛri minɛ. O y'a sɔrɔ u tun bɛ dumuni tobira a ye. Piyɛri ye fɛɛn dɔ ye. Sankolo daa tun yɛlɛla ni fɛɛn dɔ bɛ jigira ka bɔ yen. O bɔnin tun bɛ fanibelebeleba dɔ fɛ. Juru sirinin tun bɛ a dakun naani nunu na. Ala ye sogo sifa minw bɛɛ dan, sennaanifɛnw ni seen fila fɛɛnw, ani minw bɛ fofo u kɔnɔ kan, olu bɛɛ dɔ tun b'a la. O tuma na, a ye kumakan dɔ mɛn ko: “Haya, Piyɛri, wili ka nunu dɔ faga k'a nyimi.” Nga Piyɛri y'a jaabi ko: “Abada! Matigi, fɛɛn min man kan ka dumu, ne ma deli k'o don n daa la ka ye, n tana lo.” A kumana a fɛ tugu ko: “Ala ye fɛɛn min saniya, i kan'a fɔ k'o man nyi ka dumu.” A kumana ten fɔɔ sinyɛ saba. O yɔrɔnin bɛ, fɛnbelebeleba nin fosira ka yɛlɛ sankolo la. Koo nin tun ye Piyɛri dabari ban, a tun b'a yɛrɛ nyininga a kɔrɔ la. K'a to o la, Kɔrinɛyi ka cidenw ye Simɔn ka soo yɔrɔ nyini furutututu ka na lɔ luda la. U ye nyiningali kɛ n'o y'a sɔrɔ, u bɛ Simɔn min wele ko Piyɛri, n'a jiginin bɛ yan. Piyɛri kɔni tun b'a la ka miiri a ka fɛnyenin koo la dɔrɔn, Nii Senuman y'a fɔ a ye ko: “Mɔgɔ saba b'i yɔrɔ nyinina. Jigi, ka tugu u kɔ, i kana sigasiga, bari ne le y'u ci.” Piyɛri jigira o mɔgɔ nunu fɛ k'a fɔ u ye ko: “Aw bɛ mɔgɔ min yɔrɔ nyinina, ne lo. Aw ye dɔ di.” U y'a jaabi ko: “Sɔlidasi kuntigi Kɔrinɛyi le y'an ci e fɛ. Mɔgɔtilennin lo, a bɛ siran Ala nya, Zuwifu jama bɛɛ b'a tɔgɔnyuman fɔ. Ala ka mɛlɛkɛw dɔ y'a yɛrɛ yira a la, k'a fɔ a ye ko a ka cii sama i ma, waasa i ka na a ka soo, kuma min b'i fɛ, i k'o fɔ a ye.” Piyɛri ye lonan nunu minɛ kosɛbɛ o loon sufɛ. A dugusagwɛ, a tugura u kɔ ka taa. Zope kalandenw mɔgɔ damani y'a bila sira. O loon dugusagwɛ, u sera Sezare. O y'a sɔrɔ Kɔrinɛyi tun y'a ka somɔgɔw n'a ka terisɛbɛw lajɛn n'u b'u kɔnɔna. Tuma min na Piyɛri tun bɛ nyini ka don luu kɔnɔ, o y'a sɔrɔ Kɔrinɛyi taar'a kunbɛn daa la k'a kunbiri gwan a nyafɛ. Nga Piyɛri y'a minɛ ka wili k'a fɔ ko: “Wili, bari ne fana ye mɔgɔ ye.” K'a to kuma na n'a ye, u donna k'a sɔrɔ mɔgɔ caaman lajɛnnin bɛ yen. Piyɛri y'a fɔ u ye ko: “Aw b'a lɔn ko a daganin tɛ Zuwifu ka taa siya wɛrɛ yɔrɔ filɛ, walima u ka jɛn ka koo dɔ kɛ nyɔgɔn fɛ. Nga Ala y'a yira ne la a ma mɛn, ko ne man kan ka mɔgɔ si jati tugu ko mɔgɔharamunin. O le y'a to ne ma ban ka na aw ka weleli la. O la do, ne b'aw nyininga, aw ye ne wele kuun jumɛn na?” Kɔrinɛyi y'a jaabi ko: “A tile saba tɛmɛnin filɛ nin ye, nin waati yɛrɛ la, ne tun bɛ Ala dali la n ka soo wulafɛ. Ne barila ka cɛɛ dɔ ye ne nyakɔrɔ, a kannafani gwɛnin tun lo parapara. A y'a fɔ ko: ‘Kɔrinɛyi, Ala y'i ka daliliw jaabi, i ye dɛmɛ min kɛ dɛsɛbagatɔw ye, o diyara a ye. I bɛ mɔgɔw ci Zope, ka taa cɛɛ dɔ wele, a tɔgɔ ko Simɔn, n'u b'a wele ko Piyɛri. A jatigicɛ fana tɔgɔ ko Simɔn, golomɔla lo, a ka soo bɛ bada la.’ O le y'a to n ye mɔgɔw ci ka taa i wele. I fana y'a nyuman kɛ, i nana. O la do, anw bɛɛ filɛ nin ye i nyafɛ, Matigi ye cii min don i bolo, i k'o fɔ an ye kɛ.” O tuma na Piyɛri ye kuma ta k'a fɔ ko: “Ne y'a lɔn sisan ko Ala tɛ mɔgɔ bɔ mɔgɔ la, i mana kɛ siya o siya ye, n'i bɛ siran Ala nya ka to ka tilenninyakow kɛ, i koo bɛ diya a ye. Kibaru diman, min ye hɛrɛ sɔrɔ kuma ye, Ala y'o fɔ Isirayɛlidenw ye Yezu Krista sababu la, ale min ye mɔgɔw bɛɛ ka Matigi ye. K'a ta Zan ka batizeli wango latuma na, koo minw daminɛna Galile mara la fɔɔ ka n'a bila Zude mara la, aw b'o lɔn. Ala ye Nii Senuman ni sebagaya di ale Yezu ma ka bɔ Nazarɛti, ka jamana bɛɛ munumunu ka to ka konyuman kɛ mɔgɔw ye, ka jinatɔw kɛnɛya, bari Ala tun b'a fɛ. A ye koo minw bɛɛ kɛ Zeruzalɛmu, ani Zuwifuw ka jamana tɔɔ bɛɛ la, anw y'o bɛɛ seere ye. U y'a gwengwen lɔgɔ kan k'a faga. Nga, a tile sabanan loon, Ala y'a kunun waasa a k'a yɛrɛ yira. Nga a m'a yɛrɛ yira bɛɛ la, fɔɔ Ala yɛrɛ ye minw woloma k'u kɛ o seere ye. O ye anw ye, anw minw ye dumuni kɛ n'a ye, ka minni kɛ n'a ye, a kununnin kɔ ka bɔ kaburu la. O kɔ, a ye cii don an bolo ko an k'a fɔ jama ye ani k'a yira u la ko Ala ye ale le sigi ka kɛ nyanamanw ni suuw kitibaga ye. Kiraw bɛɛ tun ye ale Yezu le koo fɔ, ko ni mɔgɔ min lara a la, ko Ala bɛna yafa o tigi ma.” Ka Piyɛri to kuma na halibi, Nii Senuman jigira a ka kuma lamɛnbagaw bɛɛ kan. Zuwifu minw tun lara Yezu la n'u nana Piyɛri bila sira, olu kabakoyara bari u y'a ye ko Ala ye Nii Senuman jigi siya wɛrɛw fana kan. Bari mɔgɔ nunu y'a daminɛ ka siyakan wɛrɛw fɔ, ani ka to ka Ala tando. O la, Piyɛri y'a fɔ ko: “Mɔgɔ bɛ se ka nunu bali k'u tɛ batize ni jii ye wa? Bari anw ye Nii Senuman sɔrɔ cogo min na, olu fana y'a sɔrɔ ten.” Piyɛri ye sira di a bilasirabagaw ma k'u ka mɔgɔ nunu batize Yezu Krista tɔgɔ la. O kɔ, u y'a dali ko a ka tile fila kɛ u fɛ yen. Cidenw, ni kalanden minw tun bɛ Zeruzalɛmu, olu y'a mɛn ko siya wɛrɛw fana sɔnna Ala ka kuma na. Piyɛri kɔsegira Zeruzalɛmu tuma min na, Zuwifu minw tun lara Yezu la, olu ye Piyɛri jalaki ko: “I taara don siya wɛrɛw ka soo, o minw ma kɛnɛkɛnɛ, fɔɔ ka dumuni kɛ n'u ye.” O la, koo nin kɛra cogo min na, Piyɛri y'a daminɛ k'a bɛɛ nyafɔ u ye kelen kelen. A ko: “N tun bɛ Ala dali la ka n to Zope dugu kɔnɔ, Ala ye fɛɛn dɔ yira n na. O fɛɛn nin bɔnin tun bɛ fanibelebeleba dɔ ma n'a bɛ jigira ka bɔ sankolo la fɔɔ ka na se ne kɔrɔ. Juru sirinin tun bɛ a dakun naani nunu na. N y'a filɛ furutututu, n ma sɔn ka n nyaa bɔ a kan. N ye sogow ye a kɔnɔ: seen naani fɛɛnw, ni seen fila fɛɛnw, ani minw bɛ fofo u kɔnɔ kan. O tuma na, n ye kumakan dɔ mɛn ka bɔ sankolo la ko: ‘Piyɛri, wili ka nunu dɔ faga k'a nyimi.’ Ne y'a jaabi ko: ‘Abada, Matigi, fɛɛn min man kan ka dumu ne ma deli k'o don ne daa la ka ye, n tana lo.’ A kumana tugu ko Ala ye fɛɛn min saniya, ko n kan'a fɔ k'o man nyi ka dumu. A kumana ten fɔɔ sinyɛ saba. O kɔ, fɛnbelebeleba nin fosira ka yɛlɛ sankolo la. O waati yɛrɛ la, an tun bɛ luu min kɔnɔ, ciraden mɔgɔ saba nana lɔ o daa la. Mɔgɔ dɔ le tun y'u ci ne fɛ ka bɔ Sezare. Nii Senuman y'a fɔ n ye ko ne kana sigasiga ka taa n'u ye. Ayiwa, mɔgɔ wɔɔrɔ nunu fana ye n bila sira Sezare. An sera ka don cɛɛ ka soo. A y'a fɔ an ye ko mɛlɛkɛ dɔ y'a yɛrɛ yira ale la a ka soo k'a fɔ ale ye ko a ka mɔgɔ ci Zope, ka taa cɛɛ dɔ wele min tɔgɔ ko Simɔn n'u b'a wele ko Piyɛri. Ko a bɛna kuma dɔw fɔ i ye min bɛna kɛ sababu ye, e n'i ka somɔgɔw bɛɛ ka kisi. Ayiwa, ne y'a daminɛ ka kuma n'u ye dɔrɔn, Nii Senuman jigira u kan i n'a fɔ a tun jigira anw kan koow daminɛtuma na cogo min na. O tuma na, ne hakili jigira Matigi ka kuma nin na ko: ‘Zan ye aw batize ni jii ye, nga aw bɛna batize ni Nii Senuman ye.’ Ni Ala yɛrɛ ye Nii Senuman d'u ma i n'a fɔ anw, bari an lara Matigi Yezu Krista la, ne ye jon ye, ni ne bɛna Ala sɔsɔ o la?” Kuma nunu y'u dusu mala. U y'a daminɛ ka Ala tando ka to k'a fɔ ko: “Aa, tinyɛ na, Ala ye sira di siya wɛrɛw fana ma u ka se k'u sɔɔn yɛlɛma ka sini hɛrɛ sɔrɔ.” Tɔɔrɔ min tun daminɛna Etiyɛni fagalon na, o tun kɛra sababu ye kalanden dɔw taara Fenisi ni Sipɔrɔ jamana na, ani Antiyɔsi dugu kɔnɔ. Nga u tun tɛ Yezu ka kibaru diman fɔ siya wɛrɛw ye fɔɔ Zuwifuw dɔrɔn. O bɛɛ n'a ta, kalandenw dɔw bɔra Sipɔrɔ, ni Sirɛni ka taa Matigi Yezu ka kibaru diman fɔ siya wɛrɛw ye. Ala y'a ka sebagaya d'u ma fɔɔ mɔgɔ caaman sɔnna Matigi ma. Ala ka jama min tun bɛ Zeruzalɛmu, olu y'o kibaru mɛn, u ye Barinabasi ci u fɛ Antiyɔsi. Ala y'o mɔgɔ nunu dɛmɛ cogo min na, Barinabasi sera yen k'o ye, a nisɔn diyara. A y'u jaa gwɛlɛya k'u ka banba ka nɔrɔ Matigi kelen na. Barinabasi tun ye mɔgɔnyuman ye, Nii Senuman tun b'a fɛ, a lanin tun bɛ Yezu la kosɛbɛ. Mɔgɔ caaman lara Matigi la o cogo la. O tuma na, Barinabasi taara Sɔli yɔrɔ nyini Tarisi. A y'a ye, u nana nyɔgɔn fɛ Antiyɔsi. U ye saan kelen kɛ nyɔgɔn fɛ n'o yɔrɔ kalandenw ye. U ye mɔgɔ caaman kalan ni Ala ka kuma ye. Ka Yezu ka kalandenw wele kretinyɛw, o kɔrɔ Krista ka mɔgɔw, o daminɛna Antiyɔsi le. O waati la, kira dɔw bɔra Zeruzalɛmu ka taa Antiyɔsi. U dɔ tɔgɔ tun ko Agabu, o wilila k'a fɔ Nii Senuman barika la ko kɔngɔ bɛna don dinyɛ yɔrɔ bɛɛ. Tinyɛ na, o kɔngɔ nin donna masacɛba Kulodi ka tile la. Ayiwa, Antiyɔsi kalandenw ye; naniya ta k'u bolo farafara nyɔgɔn kan ka kɛnyɛ n'u bɛɛ seko ye, k'u b'o ci u baden Zudekaw ma. U y'a kɛ ten. U y'o bolomafara nunu don Barinabasi ni Sɔli bolo k'u ka taa u di Zude mara kretinyɛ nyamɔgɔw ma. O waati la, masacɛ Erɔdi ye Krista kɔmɔgɔ dɔw minɛ k'u tɔɔrɔ. A ye Zan kɔrɔcɛ Yakuba kuun tigɛ. A y'a ye k'o diyara Zuwifuw ye minkɛ, a ye Piyɛri fana minɛ. (O kɛra Buru funubali nyanagwɛ waati la.) Piyɛri minɛnin kɔ, Erɔdi ye sɔlidasikulu naani bila a kɔlɔsili la, kulu kelen kelen bɛɛ mɔgɔ naani naani. Erɔdi tun ko ni Hɔrɔnya nyanagwɛ tɛmɛna, a tun bɛna bɔ ni Piyɛri ye k'a kiti jama nyana. Ka Piyɛri datugunin to kaso la, Ala ka jama kɔni tun bɛ Ala dalila a ye dɔrɔn. Erɔdi tun bɛna Piyɛri kiti sini nyɔgɔn. Sufɛ Piyɛri tun bɛ sinɔgɔra sɔlidasi fila cɛma, jɔrɔkɔw tun donnin b'a la, k'o siri sɔlidasi nunu na. O y'a sɔrɔ kɔlɔsilikɛbaga dɔw fana tun bɛ daa la. O tuma na Matigi ka mɛlɛkɛ dɔ donna, o yɔrɔnin bɛ, kasobon kɔnɔna bɛɛ sinna ka kɛ yeelenba ye. Mɛlɛkɛ ye Piyɛri gosi a gɛrɛn na ko a ka wili joona. Jɔrɔkɔ nunu tigɛra ka bɔ a bolow la o yɔrɔnin bɛ. Mɛlɛkɛ y'a fɔ a ye ko a k'a cɛɛ siri k'a ka sanbara don. Piyɛri sɔnna k'o kɛ. Mɛlɛkɛ y'a fɔ a ye tugu k'a ka fani don ka tugu ale kɔ. A bɔra ka tugu mɛlɛkɛ kɔ. O koo min tun bɛ kɛra, Piyɛri tun ma la a la k'o ye tinyɛ ye. A nyana ko ale bɛ sigora le. U nana tɛmɛ kɔlɔsilikɛbaga fɔlɔw, ni filananw na, nigɛkon bɛ daa min na n'o sinnin bɛ dugu kɔnɔna ma, u sera o ma, a yɛlɛla a yɛrɛ ma. U bɔra, u taara se sirakun dɔ la, mɛlɛkɛ tununa Piyɛri la. Piyɛri hakili y'a sɔn tuma min na, a y'a fɔ ko: “Sisan, ne y'a lɔn ko tinyɛ lo Matigi y'a ka mɛlɛkɛ dɔ ci ka na ne bɔsi Erɔdi la, ka ne kisi Zuwifuw daa ma.” Mɔgɔw bɛ Zan min wele ko Mariki, Piyɛri nyaa yɛlɛla, a taara o bamuso ka soo. Mɔgɔ caaman lajɛnnin tun bɛ yen n'u bɛ Ala dalila. A ye bolonda kɔkɔ, sunguru dɔ tɔgɔ ko Ɔrɔdi, ale taar'a filɛ. A ye Piyɛri kumakan lɔn. Nisɔndiya fɛ, a yɛrɛ ma daa yɛlɛ, a bolila ka ta'a fɔ soo kɔnɔ mɔgɔw ye ko Piyɛri bɛ bolonda la. U ko a ma: “Faa le b'i la wa?” O bɛɛ n'a ta, sunguru nin ma sɔn. U ko n'o lo, Piyɛri jaa lo. Piyɛri kɔni tora ka daa kɔkɔ dɔrɔn. U dɛsɛra ka taa daa yɛlɛ, k'a ye ko Piyɛri lo. U ma la a la ni tinyɛ lo. Piyɛri y'a bolo kɛ k'u ka je. U jera, Matigi y'a bɔ kaso la cogo min na, a y'o bɛɛ nyafɔ u ye. O kɔ, a y'a fɔ u ye k'u ka taa o kibaru fɔ Yakuba, ni kalanden tɔw ye. A y'o fɔ ka ban, a bɔra ka taa yɔrɔ dɔ la. Dugu nana gwɛ, a kɛra hakilinyagami ye sɔlidasiw fɛ. Piyɛri kɛra cogo min na, u m'a lɔn. Erɔdi ye mɔgɔw bila ka Piyɛri yɔrɔ nyini ka dɛsɛ. A nana dɛsɛ ka kasobon daa kɔlɔsibagaw le kiti, o kɔ, k'u ka u faga. O bɛɛ kɔ, ale Erɔdi bɔra Zude ka taa tile fila kɛ Sezare. Kɛlɛjugu dɔ tun bɛ Erɔdi ni Tiri ni Sidɔnkaw cɛ. Olu bɛnna a la k'u bɛ taa Erɔdi dali. O la, u ye Erɔdi ka sibon labɛnbaga kɛ u teri ye fɔlɔ, o tɔgɔ tun ko Bilasitusi. U ka sɔrɔ ka taa bɛɛn nyini. Fɔɔ bɛɛn tun ka nyini bari olu ka jamana ka balofɛn caaman tun bɛ bɔ Erɔdi ka jamana le kɔnɔ. Erɔdi tun ye loon min sigi o bɛɛn nin kuma kama, o nana se. Erɔdi y'a ka masafaniw don ka na sigi a ka masasigilan kan ka kuma daminɛ. Mɔgɔw tora ka pɛrɛn ko: “Nin tɛ mɔgɔ kumakan ye, batofɛn kumakan lo.” Erɔdi sɔnna u y'a bonya i n'a fɔ Ala minkɛ, o le y'a to Matigi ka mɛlɛkɛ dɔ nan'a gosi. Tumu donna a la, a sara. Ala ka kuma kɔni tun bɛ jɛnsɛn ka taa dɔrɔn. Cii min tun donna Barinabasi ni Sɔli bolo k'a kɛ Zeruzalɛmu, u tilara o la tuma min na, u kɔsegira Antiyɔsi. U kɔsegitɔ, u taara ni Zan ye, o bɛ min wele ko Mariki. Kira ni karamɔgɔw tun bɛ Ala ka jama cɛma Antiyɔsi. Olu tun ye: Barinabasi, ni Simiyɔn, u b'ale min wele ko Nizɛri, ani Lusiyusi ka bɔ Sirɛni, ni Manayɛn, o min ni Erɔdi ye denmisɛnya kɛ nyɔgɔn fɛ. Sɔli ka fara u kan. K'u to suun ni Ala batoli la loon dɔ, Nii Senuman y'a fɔ u ye ko: “Ne ye n bolo la Barinabasi ni Sɔli kan baara min kama, aw k'u fila bɔ danna waasa u k'o kɛ.” U ye suun don, ka Ala dali, o kɔ, u y'u bolo lala Barinabasi ni Sɔli kuun na, u sɔrɔla ka taa Matigi ka baara la. Nii Senuman ye Barinabasi ni Sɔli bila cidenya la. Olu taara Selesi, u bɔra o yɔrɔ la ka baa tigɛ ka taa dugukolonin dɔ la kɔgɔji cɛma min tɔgɔ ko Sipɔrɔ. U bɔra yen ka na se Salaminɛ, u ye Ala ka kuma fɔ Zuwifuw ka Alabatosow kɔnɔ. Zan Mariki tun bɛ n'u ye ka to k'u dɛmɛ. U y'o dugukolo nin cɛtigɛ fɔɔ a daan na ka taa bɔ dugu dɔ kan, o min tɔgɔ ko Pafɔsi. Jinamoricɛ dɔ tun bɛ yen, o tɔgɔ ko Barizezu, ko ale ye kira ye. Zuwifu tun lo. A tun bɛ masacɛlankan ka luu kɔnɔ, n'o tɔgɔ tun ko Serijusi Pɔlusi, o tun ye hakilitigi ye. O tun ye Barinabasi ni Sɔli wele, bari a tun b'a fɛ u bɛ Ala ka kuma fɔ a ye. Jinamoricɛ Barizezu, n'u b'a tɔgɔ wele ko Elimasi, girɛkikan na, wilila ka muruti Barinabasi ni Sɔli ma. A tun t'a fɛ masacɛlankan k'a jigi la Yezu kan. O tuma na, Sɔli, n'u b'a wele fana ko Pɔli, Nii Senuman jigira ale kan, a ye jinamoricɛ filɛ, k'a fɔ a ye ko: “E ye mɔgɔjugu ni galontigɛla ye, Sutana mɔgɔ, konyuman y'i tana ye. E b'a fɛ tuma o tuma ka Matigi ka koo kɛtaw nagasi. O la do, Matigi b'a ka sebagaya yira i la sisan yɛrɛ. Ayiwa, i bɛna kɛ finyɛntɔ ye fɔɔ waati dɔ, i tɛna tile ye n'i nyaa ye.” O yɔrɔnin bɛ Elimasi nyaa dibira ka kɛ finyɛntɔ ye. A tora ka munumunu faan bɛɛ, janko ka mɔgɔ nyini min bɛn'a bolo minɛ ka taa n'a ye soo. Ayiwa, koo min kɛra, masacɛlankan y'o ye, an'a ye kuma min mɛn Matigi koo la, a kabakoyara haali. A sɔnna k'a jigi la Matigi kan. Pɔli n'a taamanyɔgɔn ye kurun ta ka taa nya, ka baa tigɛ ka se Pɛrize, Panfili jamana na. K'u to o yɔrɔ la, Zan Mariki kɔsegira Zeruzalɛmu. Olu kɔni tora Pɛrize ka taa nyafɛ ka se Antiyɔsi, min bɛ Pisidi jamana na. Lafinyɛlon sera, u taara don Alabatoso kɔnɔ ka sigi. O yɔrɔ mɔgɔw dɔ ye sariya sɛbɛ ni kiraw ka sɛbɛ kalan ka ban, Alabatoso nyamɔgɔw y'a fɔ Pɔli ni Barinabasi ye ko: “Ni kuma dɔ b'aw fɛ k'a lase jama ma k'u ladi, kuma b'aw bolo.” Pɔli wilila k'a bolo kɛ k'u ka je. A ye kuma daminɛ ko: “Isirayɛlidenw, ani aw siya wɛrɛ minw bɛɛ bɛ siran Ala nya, aw ye mɛnni kɛ. Ala y'an Zuwifuw bɛmaw koo diya a yɛrɛ ye. A y'a kɛ u buguyara Ezipiti jamana na. O kɔ, a y'a ka setigiya yira, a y'an bɛmaw bɔ o yɔrɔ la. K'u to kongo kɔnɔ, a y'u mako nya yen fɔɔ saan bi naani nyɔgɔn. O kɔ, a ye siya wolonwula halaki Kanaan jamana na, ka olu ka dugukolo di an bɛmaw ma. O koo nunu bɛɛ kɛra saan kɛmɛ naani ni bi duuru nyɔgɔn kɔnɔ. O bɛɛ kɔ, a sɔrɔla ka nyamɔgɔw bɔ u cɛma, a kɛra o cogo la fɔɔ ka na se kira Samuyɛli ka waati ma. Nga waati dɔ nana se, u k'olu bɛ masa fɛ. Ala ye Kiisi dencɛ Sawuli kɛ u ka masa ye fɔɔ saan bi naani. A buruju tun bɔra Bɛnzamɛn la. Ala ye masaya bɔ ale bolo, ka Dawuda kɛ u ka masa ye. Ala tun y'a fɔ Dawuda koo la ko: ‘Zese dencɛ Dawuda koo diyara ne ye, ale bɛna ne sago bɛɛ kɛ ka nya.’ Ala ye Dawuda deen dɔ lawili k'a kɛ Isirayɛlidenw kisibaga ye. O ye Yezu ye. Ala yɛrɛ tun y'a daa di o koo la. Sanni Yezu ka na, Zan ye wango la ka mɔgɔw labɛn k'u ka nimisa ka faran u ka kojuguw la ka batize. Zan tun bɛ nyini ka tilan a ka baara la tuma min na, a tun b'a fɔra mɔgɔw ye ko: ‘Aw b'a miiri ko ne ye mɔgɔ min ye, ne tɛ o ye, bari ale bɛna na ne kɔ, ne ka dɔgɔ k'a ka sanbara bɔ a seen na.’ “Ayiwa, n badenw, aw minw buruju bɔra Ibrayima na, ani aw siya wɛrɛ minw bɛɛ bɛ siran Ala nya, Ala ka hɛrɛ sɔrɔ kuma nin ye an le ta ye. Zeruzalɛmukaw ni dugu nyamɔgɔw ma Yezu nakun lɔn dinyɛ na, u y'a jalaki waasa kiraw ye min fɔ o ka kɛ, o min bɛ kalan lafinyɛlonw na. Yezu ye koo min kɛ n'o tun b'a fagakun bɔ, o ma sɔrɔ. O bɛɛ n'a ta, u y'a nyini Pilati fɛ ko a ka kan ka faga. Koo min bɛɛ tun sɛbɛnna Yezu koo la, u y'o bɛɛ kɛ ka ban tuma min na, u y'a jigi ka bɔ lɔgɔ la k'a sutura kaburu dɔ kɔnɔ. Nga Ala y'a kunun. Minw tun y'a bila sira ka bɔ Galile mara la ka taa Zeruzalɛmu, a kununnin kɔ, a y'a yɛrɛ yira olu la tile damani kɔnɔ. Olu le fana kɛnin bɛ o koow seerew ye Isirayɛli jama nyana. “Anw fana b'o kibaru diman nin fɔ aw ye ko Ala tun y'a daa di an bɛmaw ma koo min na, ko a y'o koo nin kɛ an ye sisan, an minw y'u ka deenw ye, bari, a ye Yezu kunun a sanin kɔ. O cogo la a sɛbɛnnin bɛ Ala tando dɔnkili filanan kɔnɔ ko: ‘I ye ne dencɛ ye, ne kɛra i faa ye bii.’ Ala tun kɔnna k'a fɔ ko a bɛn'a kunun a sanin kɔ. Ko a tɛna sa tugu abada. A y'o fɔ ko: ‘N tun ye hɛrɛ banbali min layidu ta Dawuda ye, n bɛna o di aw ma tinyɛ tinyɛ na.’ O le y'a to a sɛbɛnnin bɛ fana Ala ka kuma yɔrɔ wɛrɛ la ko: ‘I tɛn'a to i ka baarakɛlatilennin suu bɛ toli.’ “K'a sɔrɔ, Dawuda ka tile la, a ye Ala sago kɛ. O kɔ, a sara, u y'a suu don a bɛmaw sudonyɔrɔ la. A suu tolila. Nga, Ala ye Yezu kunun a sanin kɔ, ale suu ma sɔrɔ ka toli. Ayiwa, n badenw, aw k'a lɔn ko kojugu yafako min kuma bɛ lasera aw ma, o bɛ kɛra Yezu le barika la. K'a sɔrɔ aw ma se k'o yafa nin sɔrɔ Musa ka sariya labatoli barika la. Nga mɔgɔ o mɔgɔ mana la Yezu la, ale barika la, o tigi bɛna kɛ jalakibali ye. O tuma na, aw k'aw yɛrɛ kɔlɔsi janko kiraw ye min fɔ, o kana aw sɔrɔ, ko: ‘Aw, yɛrɛbonyalaw, aw ye filɛli kɛ, kabakoya ka dama tɛmɛ. N bɛna koo dɔ kɛ aw nyana, ni mɔgɔ b'o lakali aw ye, aw tɛna la o la.’ ” U bɔra Alabatoso kɔnɔ ka ban, mɔgɔw ye Pɔli ni Barinabasi dali, ko lafinyɛlon nata, k'u ka segi kuma kelen nin kan. Jama jɛnsɛnnin kɔ, Zuwifuw caaman, ani minw tuubira ka kɛ Zuwifuw ye, olu caaman tugura Pɔli ni Barinabasi kɔ. Pɔli ni Barinabasi y'u ladi k'u ka jija k'u jigi la Ala kan a ka nɛɛma barika la. Lafinyɛlon dɔ wɛrɛ nana se, dugu mɔgɔw bɛɛ taara lajɛn waasa k'u tulo malɔ Ala ka kuma na. Zuwifuw ye nin ye dɔrɔn, o kereya y'u minɛ. U y'a daminɛ ka Pɔli sɔsɔ, ka to k'a nɛni. Pɔli ni Barinabasi hakili sigininba y'a fɔ u ye ko: “Ala ka kuma ka kan ka fɔ aw Zuwifuw le ye fɔlɔ. Nga aw do bɛ banna a la, o b'a yira ko aw man kan ni sini hɛrɛ ye. N'o lo, an b'an nyasin siya wɛrɛw ma, bari, Matigi y'o le fɔ ko: ‘Ne ye i kɛ kɛnɛ ye siya wɛrɛw nyakɔrɔ, waasa i ka taa fɔɔ dinyɛ faan bɛɛ ka hɛrɛ sɔrɔ kuma lase.’ ” Siya wɛrɛ minw tun bɛ yen, olu nisɔn diyara kosɛbɛ, k'a daminɛ ka Ala tando. Minw tun ka kan ni sini hɛrɛ ye, olu bɛɛ lara Matigi la. O cogo la, Matigi ka kuma yiriwara o mara bɛɛ la. Muso kantigi minw tun bɛ Ala bato, Zuwifuw wilila ka olu ni dugu nyamɔgɔw kɔnɔnasu k'u bila Pɔli ni Barinabasi la. O y'u tɔɔrɔ, k'u gwɛn ka bɔ u ka mara la. U bɔtɔ, Pɔli ni Barinabasi y'u seen furanfuran ka buguri bɔ u seen na ka taa Ikɔniyɔmu. Kalanden minw tora u kɔfɛ, Nii Senuman tun b'u fɛ, u nisɔn tun ka di. Pɔli ni Barinabasi sera Ikɔniyɔmu, u donna Zuwifuw ka Alabatoso kɔnɔ fana ka mɔgɔw waaju, fɔɔ Zuwifuw ni siya wɛrɛw caaman lara Matigi la. Nga Zuwifu minw tun ma la a la, olu ye siya wɛrɛw kɔnɔnasu ka bila kalandenw na. O le y'a to Pɔli ni Barinabasi ye dɔ fara u ka lafilabɔ kan yen. U jigi tun bɛ Matigi kan. A tun bɛ see d'u ma ka kabako ni taamasinyɛw kɛ k'a yira k'u ka waajuli ye tinyɛ ye, n'o ye a ka nɛɛma koo ye. Dugu mɔgɔw tilanna, dɔw tugura Zuwifuw kɔ, dɔw tugura cidenw kɔ. Zuwifuw ni siya wɛrɛw, ani u ka nyamɔgɔw labɛnnin tun lo ka Pɔli ni Barinabasi nunu bon ni kabakuruw ye k'u faga. U bɔra u ka nanbara kala ma minkɛ, u dɛnna ka taa Lisitɔrɔ ni Dɛribe ani u lamini na Likawɔni mara la. U y'a daminɛ ka Matigi ka kibaru diman fɔ o yɔrɔ nunu na. O y'a sɔrɔ cɛɛ dɔ tun bɛ Lisitɔrɔ, a murukunin tun lo kabini a wolotuma, a ma taama ka ye. Cɛɛ tun b'a tulo malɔra Pɔli ka waajuli la. Pɔli y'a filɛ! A y'a lɔn ko cɛɛ lara a la ko Yezu bɛ se k'ale kɛnɛya. O la, a y'a kaan kɔrɔ ta k'a fɔ a ye ko: “Wili ka lɔ i seen kan!” Cɛɛ panna ka lɔ, ka taama. Mɔgɔw ye Pɔli ka koo kɛnin nin ye minkɛ, u pɛrɛnna likawɔnikan na ko: “Joow y'u yɛrɛ yɛlɛma mɔgɔw ye ka jigi an fɛ.” U ye Barinabasi tɔgɔ la ko Zusi, o kɔrɔ ko joba, ka Pɔli tɔgɔ la ko Ɛrimɛsi, bari ale le tun bɛ to ka kuma. Joo min bɛ dugu donda la, n'o tɔgɔ ko Zusi, o murutigi taara ni turaw ye o joso daa la. Yirifeerenw kɛnin tun bɛ k'o tura nunu masiri. Murutigi ni jama tun b'a fɛ ka Barinabasi ni Pɔli bato bari, u tun ko joow y'u yɛrɛ yɛlɛma mɔgɔw ye. Ciden Barinabasi ni Pɔli y'o faamu tuma min na, u y'u kuun minɛ ka pɛrɛn ka boli u sɛgɛrɛ k'a fɔ u ye ko: “Eee! Aw bɛ mun le kɛra yan ten? Anw fana ye mɔgɔw ye i n'a fɔ aw. Anw nana kibaru diman fɔ aw ye, janko aw ka faran kofufafu nunu na, k'aw nyasin Ala yɛrɛ ma, o min ye sankolo, ni dugukolo, ani kɔgɔji n'u kɔnɔnafɛnw bɛɛ dan. Fɔlɔfɔlɔ, Ala tun ye siyaw bɛɛ to yen, u y'u sago kɛ. O bɛɛ n'a ta, a tun b'a yɛrɛ cogoya yira u la, n'a ka konyumanw ye. A bɛ sanjinyuman di aw ma, suman bɛ sɔrɔ, aw dusu bɛ diya.” Ciden fila nunu ka kuma n'a ta bɛɛ, a kɛra baara ye ka sɔrɔ ka se ka mɔgɔ nunu bali k'u kana olu sɔn i n'a fɔ joo ye. Zuwifu dɔw nana ka bɔ Antiyɔsi, ani Ikɔniyɔmu o tuma na, olu ye jama hakili yɛlɛma fɔɔ u ye Pɔli bonbon ni kabakuruw ye, o kɔ, u y'a kooro ka ta'a fili dugu banakɔ, u ka miiri la ko a sara. Nga kalandenw nana lɔ k'a lamini tuma min na, a wilila ka don n'u ye dugu kɔnɔ. O dugusagwɛ, ale ni Barinabasi taara Dɛribe. Pɔli ni Barinabasi ye kibaru diman fɔ Dɛribekaw ye, ka kalanden caaman sɔrɔ. O kɔ, u segira ka taa Lisitɔrɔ, ka bɔ yen ka taa Ikɔniyɔmu, ani Antiyɔsi. U tun bɛ to ka kalandenw jaa gwɛlɛya k'u ka banba k'u jigi la Yezu kan kosɛbɛ. U tun b'a fɔ kalandenw ye ko: “Wajibi lo fɔɔ an ka tɔɔrɔ kosɛbɛ ka sɔrɔ ka don Ala ka mara kɔnɔ.” U ye nyamɔgɔw bɔ ka sɔrɔ ka suun don ka Ala dali, k'u kalifa Matigi ma, u jigi lanin bɛ ale min kan, k'u sigisigi dugu kelen kelen bɛɛ ka Ala ka jama kunna. O kɔ, u ye Pisidi jamana cɛtigɛ ka se Panfili jamana na, ka Ala ka kuma fɔ Pɛrizekaw ye. O kɔ, u taara Atali ka kurun ta o yɔrɔ la ka taa Antiyɔsi, u tun y'u kalifa Ala ma o yɔrɔ min na ka sɔrɔ ka taa baara nin kɛ. U sera yen tuma min na, u y'o yɔrɔ jama senuman lajɛn. Ala y'u dɛmɛ ka koo min bɛɛ kɛ, a ye sira di siya wɛrɛw ma cogo min na u ka la Matigi la, u y'o bɛɛ nyafɔ u ye. U ye waati dɔ kɛ o yɔrɔ kalandenw fɛ. Mɔgɔ dɔw nana Antiyɔsi ka bɔ Zude mara la k'a fɔ kalandenw ye ko n'u ma kɛnɛkɛnɛ i n'a fɔ Musa y'a fɔ cogo min na, k'u tɛna se ka kisi. Mankanba wilila o mɔgɔw ani Pɔli ni Barinabasi nunu cɛ. U ye nyɔgɔn sɔsɔ kosɛbɛ. O kɔ, u y'a; naniya ko Pɔli, ni Barinabasi, ani Antiyɔsi kalanden dɔw ka taa Zeruzalɛmu ka koo nin nyafɔ cidenw, ni Ala ka jama nyamɔgɔw ye. Ala ka jama min tun bɛ Antiyɔsi, olu y'u dɛmɛ o taamako nin na kosɛbɛ. U taatɔ, u ye Fenisi, ni Samari mara cɛɛ tigɛ. Siya wɛrɛw lara Ala la cogo min na, u tora k'o lakali o yɔrɔ kalandenw ye ka to ka taa. O kibaruya ye olu bɛɛ dusu diya. U sera Zeruzalɛmu, o yɔrɔ kalandenw n'u ka nyamɔgɔw ani cidenw y'u kunbɛn. Ala y'u dɛmɛ ka min bɛɛ kɛ, u y'o nyafɔ. Nga, kalanden minw tun ye Farizinyɛw ye ka kɔrɔ, u dɔw wilila k'a fɔ ko wajibi lo siya wɛrɛw ka kɛnɛkɛnɛ, ani u ka Musa ka sariya labato. O tuma na, cidenw ni Ala ka jama nyamɔgɔw ye nyɔgɔn ye ka koo nin jatiminɛ. U ye nyɔgɔn sɔsɔ ka mɛn. O kɔ, Piyɛri wilila k'a fɔ ko: “N badenw, aw y'a lɔn ko Ala tun ye ne woloma aw cɛma kabini a daminɛtuma, ka kibaru diman fɔ siya wɛrɛw ye, janko u bɛ la a la. Ala min bɛ mɔgɔ bɛɛ kɔnɔnako lɔn, a sɔnna ka Nii Senuman jigi olu kan i n'a fɔ a jigira anw kan cogo min na. A ma danfara kɛ an Zuwifuw ni olu cɛ, bari u lara a la minkɛ, a y'u dusu saniya o lanaya kɔsɔn. Mun le do y'a to sisan aw bɛ Ala darabɔ? Bari aw bɛ doni lara kalandenw kuun na k'a sɔrɔ anw, n'an faaw fanga ma se min kɔrɔ k'a ta. O yɛrɛ ka bɔ a la, anw, ni olu, an bɛɛ lanin b'a la, ko Ala y'an kisi Matigi Yezu le barika la.” O tuma na, jama bɛɛ jera fana ka Barinabasi ni Pɔli lamɛn. Ala y'u dɛmɛ ka kabako ni taamasinyɛ minw kɛ siya wɛrɛw fɛ yen, u y'o bɛɛ lakali u ye. U kumana ka ban tuma min na, Zaki ye kuma ta k'a fɔ ko: “N badenw, aw ye ne lamɛn. Kabini a daminɛ, Ala y'a mako don siya wɛrɛw la cogo min na, Simɔn y'o nyafɔ sisan. Ala ye siya dɔ woloma u cɛma k'o kɛ a tɔgɔla ta ye. Koo min kɛra, o ni kiraw ka kuma bɛɛ bɛnna. Bari a fɔra Ala ka kuma na ko: ‘Ne Matigi bɛna segi ka na nin kɔ, ka Dawuda ka soo lɔ kura ye. N bɛn'a ka tomo wili. O la, mɔgɔ tɔw bɛna ne Matigi yɔrɔ nyini, ɔnhɔn, siyaw bɛɛ, minw bɛɛ ka kan ka ne bato. Ne Matigi min bɛ n ka; naniyakow bɛɛ kɛ, ne le ko ten, bari o koo lɔnnin lo kabini fɔlɔ.’ “O kama, ne Zaki ka miiri la, siya wɛrɛ minw bɛ sɔnna Ala ka koow ma, an man kan ka koo gwɛlɛman la u kan. An ka sɛbɛ ci u ma k'a fɔ u ye k'u kana josɔnsogo nyimi, u k'u yɛrɛ tanga kakalaya ma, sogo min kaan ma tigɛ u kana o nyimi, u kana sogo joli dumu. Bari, kabini fɔlɔfɔlɔ, dugu kelen kelen bɛɛ la, mɔgɔw bɛ sɔrɔ Alabatosow kɔnɔ n'u bɛ Musa ka sariya sɛbɛ kalan k'a kɔrɔ fɔ mɔgɔw ye lafinyɛlon bɛɛ la.” O tuma na, kretinyɛw bɛɛ sɔnna. Cɛkɔrɔbaw ni cidenw bɛnna a la, k'u bɛna mɔgɔw bɔ u cɛma ka fara Pɔli ni Barinabasi kan ka taa Antiyɔsi. U ye Zude, min bɛ wele ko Barisabasi, ani Silasi bɔ. U fila bɛɛ tun ye kantigiw ye kalandenw cɛma. U ye sɛbɛ min don olu bolo, a sɛbɛnnin tun b'o la ko: “Aw kalanden minw tɛ Zuwifuw ye n'aw siginin bɛ Antiyɔsi, Siri jamana na, ani minw bɛ Silisi jamana na, aw baden cidenw, ni cɛkɔrɔbaw b'aw fo. “An y'a mɛn ko mɔgɔ dɔw bɔra anw fɛ Zeruzalɛmu, ka taa aw hakili nyagami ni kuma fu ye, k'a sɔrɔ an m'u ci. O kama, anw bɛnna a la, ka ciradenw bɔ k'u fara an teri Barinabasi ni Pɔli kan k'u ci aw fɛ. U tun bɛ nyini ka bɔnɔ u nii na an Matigi Yezu Krista ka baara kɔsɔn. An bɛ min fɔ aw ye sɛbɛ nin kɔnɔ, an ye Zude ni Silasi ci aw fɛ waasa aw k'o kuma kelen nin mɛn olu fana daa la. “Anw ka; naniya, ani Nii Senuman ta bɛɛ bɛnna kelen ma ko an tɛna koo gwɛlɛman nyini aw fɛ, fɔɔ ni min ye wajibi ye. Ayiwa, aw kana josɔnsogo nyimi, aw kana sogo joli dumu, sogo min kaan ma tigɛ, aw kana o nyimi, aw k'aw yɛrɛ tanga kakalaya ma. N'aw ye nunu bɛɛ labato, aw ka kɛwali bɛna nya. Ala k'an bɛn.” U ye sira di ciraden nunu ma tuma min na, u taara Antiyɔsi. U sera yen, u ye kalandenw bɛɛ lajɛn ka sɛbɛ nin don u bolo. U y'a kalan. A kɔnɔnakuma y'u bɛɛ nisɔn diya ka jagwɛlɛya d'u ma. Zude ni Silasi tun ye kiraw ye fana. U ye baro diman kɛ ni kalandenw ye fɔɔ ka mɛn, ka dɔ fara u ka jagwɛlɛya kan. Zude ni Silasi ye tile damani kɛ yen, u sɔrɔla ka sira d'u ma, janko u ka segi u cibagaw fɛ, ka duba kɛ u ye ko Ala ka se n'u nyuman ye. [ Na Silasi y'a; naniya ta ko ale bɛna to Antiyɔsi yen. Zude kelen taara.] Pɔli ni Barinabasi kɔni tora Antiyɔsi. Olu ni mɔgɔ wɛrɛw tun bɛ tɔw kalan ani ka to ka Matigi ka kibaru diman fɔ u ye. Waati dɔ tɛmɛnin kɔ, Pɔli y'a fɔ Barinabasi ye ko: “An ye Matigi ka kuma fɔ mɔgɔw ye dugu minw bɛɛ la, an ka taa u bɛɛ yɔrɔ filɛ n'u ka koo bɛ cogo min na.” Barinabasi tun b'a fɛ ko Zan ka taa n'u ye, u b'o min wele ko Mariki. Nga, o tun man di Pɔli ye ko bari ale Zan Mariki tɔgɔla nin tun faranna olu la Panfili jamana na, a ma sɔn ka baara nin laban n'u ye. Pɔli ni Barinabasi ye nyɔgɔn sɔsɔ kosɛbɛ. A laban, u faranna nyɔgɔn na. Barinabasi ye Mariki minɛ, u ye kurun ta ka taa Sipɔrɔ. Pɔli fana, ale ye Silasi ta. Kalandenw y'u kalifa Matigi ma ka ban tuma min na, u taara. U ye Siri ni Silisi jamana yaala ka to k'o yɔrɔ kalandenw ladi k'u jaa gwɛlɛya. Pɔli nunu sera Dɛribe, ka taa Lisitɔrɔ. Kalanden dɔ tun b'o yɔrɔ la, a tɔgɔ tun ko Timote. A bamuso tun ye Zuwifu ye, min nana kɛ kretinyɛ ye. Nga a facɛ tun ye girɛki ye. Kalanden minw tun bɛ Lisitɔrɔ ani Ikɔniyɔmu, u tun b'a tɔgɔnyuman fɔ. Pɔli tun b'a fɛ k'a kɛ a taamanyɔgɔn dɔ ye. O la, a y'a kɛnɛkɛnɛ o mara Zuwifuw kama. Bari, bɛɛ tun b'a lɔn ko Timote facɛ ye girɛki ye. Zeruzalɛmu cidenw ni cɛkɔrɔbaw tun ye koo minw; naniya ta, Pɔli ni Silasi tun mana se dugu min na, u b'o nyafɔ o yɔrɔ kalandenw ye, k'a nyini u fɛ k'u k'o kuma nunu labato. Ala ka jama jigi tun bɛ sabatira ka taa nya. Loon o loon, dɔ tun bɛ fara u mɔgɔda kan. Nii Senuman ye Pɔli ni Silasi nunu bali ka Ala ka kuma fɔ Azi mara la. U tɛmɛna ka taa Firizi ni Galati mara nunu yaala. U sera Mizi mara faan fɛ, u tun b'a fɛ ka tɛmɛ ka taa Bitini mara la, nga Nii Senuman ma sira d'u ma. O la, u ye Misi mara cɛtigɛ ka taa Torowasi. Ayiwa, loon dɔ sufɛ, Pɔli ye Maseduwanika dɔ ye sigo la. Cɛɛ nin ye Pɔli dali kosɛbɛ ko a ka sabali ka na bɔ olu fɛ Maseduwani ka olu dɛmɛ. O kɔ, an y'a lanyini o yɔrɔnin bɛ ko an bɛ taa Maseduwani, bari an lanin tun b'a la ko Ala le b'an welela o yɔrɔ la, waasa k'a ka kibaru diman fɔ yen. An ye kurun ta Torowasi k'an kuun sin Samotarasi mara la. O dugusagwɛ, an sera Neyapolisi. An bɔra o yɔrɔ la ka taa Filipi. Filipi le tun ye Maseduwani mara duguba ye. Ɔrɔmukaw le tun siginin bɛ o yɔrɔ la. An ye tile damani kɛ yen. Lafinyɛlon sera, an bɔra dugu banakɔ ka taa kɔɔ dɔ faan fɛ. An y'a miiri ko an bɛna Zuwifuw ka Ala batoyɔrɔ sɔrɔ yen. An taara muso dɔw lajɛnnin sɔrɔ yen, an sigira, k'o muso nunu waaju. Muso dɔ tun bɛ olu cɛma, o tɔgɔ tun ko Lidi, jagokɛla tun lo. A tun bɛ fani sɔngɔgwɛlɛnw le jago. Tiyatirika tun lo, a tun bɛ siran Ala nya. Matigi barika la, a y'a tulo malɔ Pɔli ka kuma na ka nya. Ale n'a ka somɔgɔw bɛɛ batizenin kɔ, a y'a fɔ an ye ko ni an y'a lɔn ko ale lanin bɛ Matigi la tinyɛ na, an ka sɔn ka na jigi ale ka luu kɔnɔ. A laban, a sera an kɔrɔ. Loon dɔ, an tun bɛ taara Ala batoyɔrɔ la, jɔnmusonin dɔ y'an kunbɛn. Lagwɛlikɛla tun lo. A ka lagwɛli baara tun kɛra sababu ye ka to ka nafoloba ladon a kuntigiw fɛ. A tugura an ni Pɔli nunu kɔ ka to ka pɛrɛn ko: “Mɔgɔ nunu ye Setigi Ala ka baarakɛlaw ye, u bɛ kisili sira le fɔra aw ye.” A tora o la fɔɔ tile damani. A laban, Pɔli ma se k'a munyu. O la, a y'a nyaa yɛlɛma k'a fɔ muso nin ka jina ye ko: “Yezu Krista tɔgɔ barika la, ne b'a fɔ i ye, bɔ muso nin na.” O yɔrɔnin bɛ, jina bɔra muso la. Lagwɛlikɛla nin ka kuntigiw y'a ye k'u ka dumuniyɔrɔ nagasira minkɛ, u ye Pɔli ni Silasi minɛ ka taa n'u ye u ka jama kafoyɔrɔ la, u ka nyamɔgɔw fɛ. U y'a fɔ olu ye ko: “Mɔgɔ nunu bɛ nyagaminin donna an ka dugu la. Zuwifuw fana lo. U bɛ mɔgɔw kalanna u ka landaw le la fana. An Ɔrɔmukaw fɛ, an man kan k'o mɛn, an man kan k'o sira taama.” O la, jama murutira Pɔli nunu ma. Faamaw ko k'u ka faniw bɔ k'u bugɔ ni golokamiw ye. U y'u bugɔ ka ban tuma min na, u y'u don kaso la. U y'a fɔ kasobon kɔlɔsibaga ye ko a k'u kɔlɔsi ka nya kosɛbɛ. O kuma nunu kɔsɔn, ale y'u bila kasobon juguman le kɔnɔ ka tila k'u seen don jɔrɔkɔ la. Dugutilama, Pɔli ni Silasi tun bɛ dɔnkili lara ka Ala tando. Kasoden tɔw tulo malɔnin tun bɛ u fɛ dɔrɔn. O yɔrɔnin bɛ, dugukolo yɛrɛyɛrɛla, boon bɛɛ lamagara, daa nunu bɛɛ yɛlɛla, kasodenw ka jɔrɔkɔw ni kurunw bɛɛ tigɛra u seenw na. Kasobon kɔlɔsibaga kununna ka daa nunu yɛlɛnin ye dɔrɔn, a y'a miiri ko kasodenw bolila. A y'a ka murujan sama ka bɔ ko a b'a yɛrɛ faga. Nga Pɔli pɛrɛnna ko a kana foyi kɛ a yɛrɛ la, ko u bɛɛ bɛ yen. A ye fitinɛ mana ka boli ka don n'a bɛ yɛrɛyɛrɛ, ka ta'a kunbiri gwan Pɔli ni Silasi kɔrɔ. A bɔra n'u ye kɛnɛma k'u nyininga ko: “Kɔrɔw, ne ka kan ka mun kɛ janko ne bɛ kisi?” U y'a jaabi ko: “E ka la Matigi Yezu la dɔrɔn, e n'i ka somɔgɔw bɛɛ bɛna kisi.” U ye Matigi ka kuma fɔ ale n'a ka somɔgɔw bɛɛ ye. A taara u ka joliw furakɛ o suu nin bɛ la. O kɔ, ale n'a ka somɔgɔw bɛɛ batizera. Ayiwa, a ye dumuni d'u ma a ka soo. Ale n'a ka somɔgɔw bɛɛ nisɔn diyara, bari u lara Ala la. Dugu nana gwɛ tuma min na, kititigɛlaw ye ciradenw bila ka ta'a fɔ a ye ko kasoden minw dira a ma kunu, ko a k'u bila. A fana taara o fɔ Pɔli nunu ye ko: “Kititigɛlaw ka kira nana ko n k'aw bila. O tuma na, aw ye bɔ ka taa ni hɛrɛ ye.” Nga Pɔli y'a fɔ u ye ko: “U y'an bugɔ jama nyana k'an don kaso la k'a sɔrɔ an ye Ɔrɔmukaw ye. Jalakikun fana ma sɔrɔ an na. Anhaan! Sisan, u b'a fɛ k'an bɔ kaso la dogodogo la. O tɛ kɛ! Fɔɔ olu yɛrɛ ka na an bɔ.” Ciraden nunu taara o kuma nunu fɔ faamaw ye. Olu bɛɛ kɔnɔ gwanna bari u ko Ɔrɔmukaw lo. U nana hakɛto nyini Pɔli nunu fɛ, k'u dali k'u ka dugu bila. Pɔli ni Silasi bɔra kaso la tuma min na, u taara Lidi ka soo. U ye kalandenw ladi k'u jaa gwɛlɛya. O kɔ, u sɔrɔla ka taa. Pɔli ni Silasi nunu bɔra ka tɛmɛ Anfipoli ani Apoloni, ka se Tesaloniki. Alabatoso tun b'o yɔrɔ Zuwifuw fɛ. Pɔli taara u fɛ yen lafinyɛlon na, i n'a fɔ a tun bɛ deli k'a kɛ yɔrɔ tɔw la cogo min na. A ye lɔgɔkun saba kɛ u fɛ, ka to ka nyɔgɔn sɔsɔ ka Ala ka kuma fɔ u ye lafinyɛlon o lafinyɛlon. A y'o kɔrɔ fɔ u ye, k'a gwɛ ko Ala tun ka kan k'a ka Mɔgɔwolomanin min ci ka na, k'o ye Yezu ye. Ko ale Pɔli bɛ min ka koo fɔra u ye, ko ale lo. Ko wajibi tun lo, a tun ka tɔɔrɔ, ka sa, ka kunun. Zuwifuw mɔgɔ damani, ani girɛki minw bɛ siran Ala nya, olu caaman, ni faamamuso dɔw lara kuma nunu na. Olu nɔrɔla Pɔli ni Silasi la. Nga, o ma diya Zuwifu tɔw ye. Olu wilila ka bɛn ni mɔgɔkolon dɔw ye o yɔrɔ la, waasa ka dugu nyagami. U wilila ka mankan daminɛ ka dugu bɛɛ wurubata, ka taa Zazɔn ka soo k'u bɛ Pɔli ni Silasi minɛ ka taa n'u ye kiti tigɛyɔrɔ la. U ma Pɔli ni Silasi sɔrɔ yen minkɛ, u ye Zazɔn ni kalanden dɔw minɛ yen ka taa n'u ye u ka nyamɔgɔw fɛ, k'a fɔ yen ko: “Mɔgɔ minw ye yɔrɔw bɛɛ nyagami, u sera an fɛ yan. Zazɔn le ye u ka jatigi ye. O mɔgɔ nunu si tɛ an ka Ɔrɔmu masacɛba ka sariyaw fɛ. U ko masacɛba wɛrɛ bɛ yen, n'o tɔgɔ ko Yezu.” O mankan nin ye kititigɛlaw ni jama bɛɛ hakili nyagami. U ye wariba la Zazɔn n'a tɔnyɔgɔnw kunna. U y'o di, u sɔrɔla k'u bila. O loon bɛ sufɛ, Tesaloniki kalandenw bɔra ni Pɔli ni Silasi ye k'u ka taa Bere. U sera yen tuma min na, u taara Zuwifuw ka Alabatoso kɔnɔ. Olu ka koo tun ka di ni Tesaloniki Zuwifuw ta ye. U sɔnna Ala ka kuma ma ni dusunyuman ye. Loon o loon, u tun bɛ nyɔgɔn fɛ ka to ka Ala ka kuma sɛgɛsɛgɛ k'a filɛ ni Pɔli ka kuma nunu ye tinyɛ ye. Zuwifu caaman lara Yezu la yen, ani faamamuso caaman, ni cɛɛ caaman lara a la girɛkiw cɛma. Nga Tesaloniki Zuwifuw y'a mɛn ko Pɔli taara Ala ka kuma fɔ Berekaw ye fana dɔrɔn, u wilila ka taa yen. U ye jama kɔnɔnasu, janko mankan bɛ wili. O yɔrɔ kalandenw fana ye Pɔli bila sira fɔɔ bada la o yɔrɔnin bɛ. Nga, Silasi ni Timote nunu tora a kɔ yen. Mɔgɔ minw tun y'a bila sira, olu sera n'a ye fɔɔ Atɛni dugu kɔnɔ. Olu kɔsegituma, a y'a fɔ u ye k'u ka ta'a fɔ Silasi ni Timote ye k'u ka banba ka na ale sɔrɔ Atɛni joona. Ka Pɔli to a tɔnyɔgɔnw kɔnɔni na Atɛni, a ye joo caaman ye dugu nin kɔnɔ, a dusu gwanna. O la, a y'a daminɛ ka kuma ni Zuwifuw ni mɔgɔtuubininw ye Alabatoso kɔnɔ. Loon o loon, a tun bɛ taa forobayɔrɔ la ka kuma ni jama ye. Lɔnnikɛla dɔw tun bɛ yen, o bɛ u dɔw wele ko Epikiriyɛn, dɔw Etoyisiyɛn, olu yɛrɛ y'a daminɛ ka kuma ni Pɔli ye. Nga dɔw ko: “Kuma caaman tigi nin fana ko di?” Dɔw ko: “Nin bɛ Alasira kuraman dɔ le koo fɔra cɔ!” Bari Pɔli tun bɛ Yezu ni suuw ka kununko le fɔra. O la, u y'a minɛ k'a sama ka taa n'a ye u ka koo nyanabɔyɔrɔ la. U y'a nyininga ko: “I bɛ mɔgɔw kalanna Alasira kuraman jumɛn na ten? Bari i bɛ mɔgɔw kalanna ni koo kuraman minw ye, an ma deli o la. An b'a fɛ e k'a nyafɔ an ye.” Tinyɛ ka fisa, Atɛnikaw n'u ka lonanw caaman tun bɛ u ka waati bɛɛ kɛ koo kuramanw kibaru lamɛnni n'a fɔli dama na dɔrɔn tuma bɛɛ. Pɔli lɔnin tora jama cɛma k'u jaabi ko: “Atɛnikaw, ne y'a lɔn ko aw banbanin lo batoli koo la kosɛbɛ. Bari, ne yaalatɔ aw ka dugu kɔnɔ, aw bɛ batoli kɛ yɔrɔ minw na, ne y'o caaman ye. N y'a sɛbɛnnin ye sɔnni kɛyɔrɔ dɔ yɛrɛ kan ko: ‘Batofɛn min cogo lɔnnin tɛ’. Aw bɛ fɛɛn batora, aw tɛ min cogo lɔn, ayiwa, ne nana o le cogo fɔ aw ye. Ala min ye dinyɛ n'a kɔnɔnafɛnw bɛɛ dan, ale min ye sankolo ni dugukolo ka masa ye, adamadenw ka bonlɔnin tɛ se ka kɛ a sigiyɔrɔ ye. “A m'a fɔ ko a mako bɛ adamaden ka bololafɛn na k'a yɛrɛ mako nya n'a ye fana. Bari ale lo bɛ nii, ani sii, ani fɛɛn tɔɔ bɛɛ di adamaden ma. Siyaw bɛɛ bɔra mɔgɔ kelen na a y'o min dan. A y'o siya nunu bɛɛ ka sigiyɔrɔw daan tigɛ, k'u ka sii sabaticogo fana daan tigɛ. A y'o kɛ, waasa u ka se ka ale Ala yɔrɔ nyini cogo bɛɛ la, n'u bɛ se k'a ye. Ala do yɔrɔ man jan an si la. An tonin bɛ nii na, ka sii sɔrɔ, ka kɛwaliw kɛ Ala barika la. Aw ka lɔnnikɛla dɔw yɛrɛ b'a fɔ ten, ko: ‘An ye a ka deenw ye yɛrɛ.’ Ayiwa, an kɛra Ala ka deenw ye minkɛ, an man kan k'a miiri ko Ala bɔnin bɛ joo sanulaman fɛ, walima warigwɛlaman, walima kabakurunyumanlɛsɛnin fɛ! O fɛɛn nunu bɛɛ ye an adamadenw ka miiriya, n'an ka bolo nɔɔ ye! Adamadenw ye kolɔnbaliya minw kɛ ka tɛmɛ, Ala tɛ o si jatira tugu. Nga, a b'a nyini mɔgɔw fɛ yɔrɔ bɛɛ, k'u ka nimisa ka faran u ka kojuguw la. O kama, a ye loon dɔ sigi. N'o loon nin sera, a ye mɔgɔ dɔ woloma ka ban, a bɛna o tigi bila ka adamadenw kiti ni tilenninya ye. A y'o tigi kunun a sanin kɔ janko k'a yira bɛɛ la, ko ale le bɛna mɔgɔw bɛɛ kiti.” Pɔli ye suu kununko kuma fɔ dɔrɔn, dɔw y'a daminɛ k'a lɔgɔbɔ. Dɔw ko: “An bɛna mɛnni kɛ i fɛ o koo la sinyɛ wɛrɛ.” O cogo la, Pɔli tɛmɛna k'u to yen. O bɛɛ n'a ta, mɔgɔ damani sɔnna ka la Yezu la, ka nɔrɔ Pɔli la. Olu cɛma, Denisi tun bɛ yen, n'o tun ye kititigɛlaw dɔ ye. Muso dɔ fana tun bɛ yen, o tɔgɔ tun ko Damarisi, ani mɔgɔ wɛrɛw. O kɔ, Pɔli bɔra Atɛni ka taa Korɛnti. A ye Zuwifu dɔ kunbɛn yen, min tɔgɔ ko Akilasi, a tun bɛ bɔ Pɔn mara la, o n'a muso, ale tɔgɔ ko Pirisiye. U bɔtɔ tun lo Itali jamana na bari Ɔrɔmu masacɛ Kulodi tun y'a; naniya ta ka Zuwifuw bɛɛ gwɛn ka bɔ Ɔrɔmu dugu kɔnɔ. Pɔli sigira u fɛ ka jɛn n'u ye, ka to ka baara kɛ nyɔgɔn fɛ, bari u bɛɛ tun ye fanibugudilanbagaw ye. Lafinyɛlon o lafinyɛlon, Pɔli tun bɛ mɔgɔw waaju Alabatoso kɔnɔ. A tun bɛ jija waasa ka se Zuwifuw ni girɛkiw kɔrɔ. Silasi ni Timote nunu nana yen ka bɔ Maseduwani tuma min na, Pɔli y'a ka baara bɛɛ kɛ Yezu koo fɔli dama ye, k'a yira Zuwifuw la ko Yezu le ye Ala ka Mɔgɔwolomanin ye. Zuwifuw tun tɛ sɔnna Pɔli ka kuma na. U tora k'a nɛni. O la, Pɔli tora k'a bolo furanfuran k'a fɔ u ye ko: “N daa t'aw ka koo la tugu. N'aw halakira sini, o y'aw ka kunko ye. Ne kɔni niin t'o la tugu. Ayiwa, ne bɛna taa siya wɛrɛw le waaju sisan.” A bɔra yen ka taa jigi cɛɛ dɔ fɛ min tɔgɔ ko Titusi Zusitusi. Ale tun bɛ to ka Ala bato. A ka soo gunnin tun bɛ Alabatoso la. O Alabatoso kuntigi tɔgɔ tun ko Kiripusi, ale n'a ka somɔgɔw bɛɛ lara Matigi la. Korɛntika minw tun bɛ Pɔli lamɛn, u caaman lara Matigi la, u batizera. Loon dɔ, Matigi y'a yɛrɛ yira Pɔli la sufɛ k'a fɔ a ye ko: “Pɔli, i kana siran. To ka n koo fɔ dɔrɔn. Bari ne bɛ n'i ye. Mɔgɔ si tɛna se ka kojugu kɛ i la, bari ne ka mɔgɔw ka ca dugu nin kɔnɔ.” Pɔli tora yen ka mɔgɔw kalan Ala ka kuma na saan kelen ni kalo wɔɔrɔ. Galiyɔn tun ye Akayi mara ka masacɛlankan ye tuma min na, Zuwifuw wilila Pɔli kama. U y'a minɛ ka taa n'a ye kititigɛlaw fɛ k'a fɔ yen ko: “Cɛɛ nin b'a fɛ ka mɔgɔw bila Ala batocogokura la min n'a ka sariya tɛ bɛn.” Pɔli tun b'a fɛ ka dɔ fɔ o kuma nin na, ni Galiyɔn ye kuma ta k'a fɔ Zuwifuw ye ko: “N'a tun kɛra ni cɛɛ nin tun ye kojuguba dɔ kɛ, ne tun bɛn'a sɔn aw Zuwifuw ka kuma nin na. Nga nin ye Zuwifuw dama ka koo ye, bari aw bɛ nyɔgɔn sɔsɔra kalanko ni tɔgɔ koow ani sariya koow le la. Aw y'o nyanabɔ aw ni nyɔgɔn cɛ. Ne tɛ se ka o koo nunu nyɔgɔn kiti tigɛ.” A y'u gwɛn ka bɔ kiti tigɛyɔrɔ la. Sɔsitɛni tun ye Alabatoso kuntigi ye o waati la. U jɛnna a kan k'a lamaga kititigɛlaw nyana. Nga Galiyɔn ma foyi fɔ. Pɔli tora Korɛnti ka waatijan kɛ. O kɔ, a ye sira nyini o yɔrɔ kalandenw fɛ, ale ni Akilasi n'a ka muso Pirisiye ye kurun ta k'u kuun sin Siri jamana ma. U sera Sankere tuma min na, u y'a kuun li, bari a tun y'a daa di Ala ma. U sera Efɛzi tuma min na, Pɔli y'a taamanyɔgɔnw to yen ka ta'a kelen Alabatoso kɔnɔ ka baro kɛ ni Zuwifuw ye. Olu y'a nyini a fɛ ko a ka lafila kɛ olu fɛ. A ma sɔn o la. Nga a ye sira sɔrɔ u fɛ tuma min na, a y'a fɔ u ye ko ni Ala sɔnna, ale bɛna segi ka na u filɛ. O kɔ, a bɔra Efɛzi, ka kurun ta. A sera Sezare tuma min na, a taara bɔ Zeruzalɛmu k'o yɔrɔ jama senuman fo. A sɔrɔla ka bɔ o yɔrɔ la ka taa Antiyɔsi. A ye waati dɔɔni kɛ yen. O kɔ, a bɔra ka Galati ni Firizi mara nunu yaalayaala k'a ka kalandenw ladi k'u jaa gwɛlɛya. Zuwifu dɔ nana Efɛzi, a tɔgɔ tun ko Apolɔsi, a wolola Alɛkisandiri. A daa tun ka di kosɛbɛ, a tun bɛ Ala ka kuma lɔn. A kalannin tun lo Matigi ka sira koo la dɔɔni fana. A tun bɛ mɔgɔw kalan Yezu koo la ni timinadiya ye, k'a sɔrɔ a tun bɛ Zan ka batizeli koo dɔrɔn le lɔn. A hakili sigininba ye kuma daminɛ Alabatoso kɔnɔ. Akilasi ni Pirisiye nunu y'a lamɛn ka ban tuma min na, u y'a wele u danna. A tun tɛ min lɔn Ala ka sira koo la, u y'o fɔ a ye k'a gwɛ. Apolɔsi tun b'a fɛ k'a kuun sin Akayi minkɛ, Efɛzi kalandenw ye sɛbɛ ci u badenw ma yen, ko ni Apolɔsi sera yen, k'u k'a minɛ ka nya. A sera o yɔrɔ la tuma min na, a ye dɛmɛ don u ye kosɛbɛ Ala barika la. A bolo lanin tun bɛ Ala ka kuma kan kosɛbɛ. O sababu fɛ, a tun bɛ Zuwifuw ka kuma kɔɔ kari jama nyana ko Yezu le ye Ala ka Mɔgɔwolomanin ye, ko Zuwifuw filinin lo. Ka Apolɔsi to Korɛnti, Pɔli ye Azi jamana kulu yɔrɔ cɛtigɛ ka taa se Efɛzi. A ye kalanden dɔw sɔrɔ yen. A y'u nyininga ko: “Aw kɛra kalandenw ye ka la Yezu la tuma min na wo, aw ye Nii Senuman sɔrɔ wa?” U y'a jaabi ko: “Ee! Nii Senuman wa? An m'ale koo mɛn ka ye.” Pɔli y'u nyininga tugu ko: “O tuma na, aw batizera cogo di?” U ko: “Zan tun bɛ mɔgɔw batize cogo min na, an ta fana kɛra ten.” O tuma na, Pɔli ko: “Mɔgɔ minw sɔnna k'u sɔɔn yɛlɛma ka faran u ka kojuguw la, Zan tun bɛ olu batize. A tun b'a nyini jama fɛ ko mɔgɔ min bɛna na ale kɔ, ko u k'u jigi la ale kan. O ye Yezu koo ye.” U ye Pɔli lamɛn ka ban tuma min na, u batizera Matigi Yezu tɔgɔ la. Pɔli y'a bolo lala u kuun na, Nii Senuman jigira u kan, u y'a daminɛ ka siyakan wɛrɛw fɔ, ani ka kiraya kuma fɔ. Olu tun bɛ mɔgɔ tan ni fila nyɔgɔn bɔ. O kɔ, Pɔli tora ka taa Alabatoso kɔnɔ, ka to yen n'a bɛ mɔgɔw kalan Ala ka masaya koo la fɔɔ kalo saba. A tun bɛ jija waasa ka se a lamɛnbagaw kɔrɔ. O bɛɛ n'a ta, dɔw tun ye tulogwɛlɛnw ye jama cɛma, olu y'a daminɛ ka to ka Matigi ka sira lɔgɔbɔ mɔgɔ bɛɛ nyana. O tuma na, Pɔli ye olu ye k'u to yen ka taa n'a ka kalandenw ye danna ka to k'u kalan loon o loon Tiranɔsi ka kalanso kɔnɔ. A y'a kɛ ten saan fila fɔɔ Azi jamana mɔgɔw bɛɛ, Zuwifu fara girɛkiw kan, u bɛɛ ye Matigi ka kibaru diman mɛn. Ala tun bɛ Pɔli dɛmɛ ka kabakow kɛ kosɛbɛ, fɔɔ mɔgɔw tun bɛ na ni musɔrɔw, walima faniw ye waasa k'o maga Pɔli la, ka taa o maga banabagatɔw la, u bɛ kɛnɛya. Ni jinatɔ lo, jina bɛ bɔ. Zuwifu dɔw tun bɛ yaalayaala k'olu bɛ jinaw gwɛn ka bɔ mɔgɔw la, u tun b'a fɛ ka jina gwɛn ka bɔ mɔgɔ dɔw la ni Matigi Yezu tɔgɔ ye. U y'a fɔ jinaw ye ko: “Pɔli bɛ Yezu min koo fɔ, ale barika la, an b'a fɔ aw ye ko aw ka bɔ mɔgɔ nunu na.” Mɔgɔ minw y'o kɛ, olu tun ye sarakalasebaga Seva ka dencɛ wolonwula nunu ye. Nga jina y'u jaabi ko: “Ne bɛ Yezu lɔn, ka Pɔli fana lɔn. Nga aw do? Aw ye jɔnw ye?” Jinatɔ nin girinna u kan, a fanga sera u bɛɛ kɔrɔ. A y'u mandimi fɔɔ u bɛɛ lakolon bɔra ka boli. Efɛzikaw bɛɛ y'o kibaru mɛn, Zuwifu fara girɛkiw kan. U bɛɛ siranna. O seen fɛ, mɔgɔw ye bonya la Matigi Yezu tɔgɔ kan. Mɔgɔ minw tun lara Yezu la Efɛzi, u caaman tun bɛ na u ka kojugukɛninw fɔ jama nyana k'a yira k'u tɛ o kɛ tugu. Minw tun bɛ jinamoriya kɛ, olu caaman nana n'u ka sɛbɛ ye k'u jɛni jama bɛɛ nyana. U y'o sɛbɛ nunu sɔngɔ jati, k'a ye ko a bɛ darakimu wari waa tan bɔ. O cogo la, Matigi ka kuma tun bɛ yiriwa a yɛrɛ ka sebagaya fɛ. O kɛnin kɔ, Pɔli tun b'a fɛ ka taa Maseduwani ani Akayi mara la, ka sɔrɔ ka segi ka na Zeruzalɛmu. A tun ko n'ale taara o yɔrɔ nunu na ka ban, ko a ka kan ka se Ɔrɔmu fana. A y'a ka dɛmɛbaga fila ci Maseduwani mara la. Olu tun ye Timote ni Erasiti ye. Nga ale Pɔli tora Azi mara la ka lafila kɛ yen tugu. O waati yɛrɛ la, mankanba wilila Matigi ka sira koo la. Cɛɛ dɔ le tun bɛ yen, a tɔgɔ ko Demetiriyusi, numu tun lo. Ale tun bɛ to ka Efɛzikaw ka joba min tɔgɔ ko Aritemi batoso jaa fitinimanw lalaga ni warigwɛ ye. Minw tun b'o baara nin na a fɛ, u tun bɛ nafa sɔrɔ o la kosɛbɛ. A y'o baaraden nunu lajɛn, ani minw bɛɛ tun b'o baara nin nyɔgɔn kɛ dugu kɔnɔ, k'a fɔ u ye ko: “N badenw, aw yɛrɛ b'a lɔn ko an ka hɛrɛ bɛ bɔ baara nin le la. Nga Pɔli tɔgɔla nin bɛ min fɔra, ani a bɛ min kɛra, aw b'o mɛnna, aw b'o yera fana. A ko adamadenw bɛ fɛɛn minw lalaga n'u bolo ye, k'olu tɛ batofɛn nyanamanw ye. A jijara fɔɔ ka mɔgɔ caaman kuun yɛlɛma n'o ye. O ma kɛ i n'a fɔ Efɛzi kɔnɔ yan dɔrɔn lo! Nga a bɛ nyini ka Azi mara bɛɛ sɔrɔ! O bɛna kɛ sababu ye k'an ka baara nagasi, a tɛna dan o dɔrɔn ma, nga a bɛna kɛ sababu ye fana k'an ka joba nin sanga burun, o min ye Aritemi ye. K'a sɔrɔ Azi mara bɛɛ, ani dinyɛ bɛɛ b'a bato.” Mɔgɔ nunu ye nin mɛn dɔrɔn, u dimininba y'a daminɛ ka to ka pɛrɛn ko: “An Efɛzikaw ka Aritemi bɔnyɔgɔnko joba tɛ sɔrɔ!” Mankan nin bonyana fɔɔ ka dugu bɛɛ nyagami. Mɔgɔw tora ka mankan ci ka girin ka dugu ka nyɔgɔnlajɛnyɔrɔba sɛgɛrɛ. U ye Pɔli ka taamanyɔgɔn fila dɔ minɛ ka taa n'u ye yen. O tun ye Gayusi ani Arisitaaki ye. Maseduwanikaw tun lo. O la, Pɔli tun b'a fɛ ka ta'a yɛrɛ di, nga kalandenw y'a bali. Hali mara nin ka mɔgɔba minw tun ye Pɔli teriw ye, u ye cii sama a ma ko a kana taa nyɔgɔnlajɛnyɔrɔba nin na, ko farati b'a la. Mɔgɔ ka fɔtaw tun tɛ kelen ye. Mankan bonyana haali! Caaman yɛrɛ ma nyɔgɔnlajɛn nin kuun lɔn. Zuwifuw ye Alɛkisandiri tɔgɔ dɔ bila u nyafɛ janko a ka dɔ fɔ u ye. Alɛkisandiri nana a bolo kɛ, k'u ka je. A y'a daminɛ ko a bɛ kuma jama fɛ, mɔgɔw nana a lɔn ko Zuwifu lo dɔrɔn, u ye mankan daminɛ tugu. Bɛɛ tora ka pɛrɛn ko: “An Efɛzikaw ka Aritemi bɔnyɔgɔnko joba tɛ sɔrɔ!” U tora k'o kaan kelen nin fɔ fɔɔ lɛrɛ fila nyɔgɔn. Cɛɛ min tun bɛ to ka dugu ka nyɔgɔnyebaw kunnafoniw sɛbɛn, ale sera ka mɔgɔw fɛnkɛ u jera. A ye kuma ta k'a fɔ ko: “N badenw, an ka joba, min ye Aritemi ye, mɔgɔ jumɛn bɛ yen n'a t'a lɔn ko a juu maranin tɛ an Efɛzikaw fɛ? A jaa min bɔra sankolo la ka ben an fɛ yan, jon t'o kala ma Efɛzi? Ni bɛɛ b'o lɔn, n'o sɔsɔbaga tɛ yen, aw y'aw dusu suma, an kana koo dɔ kɛ n'an ma miiri min na. Aw ye mɔgɔ nunu minɛ ka na n'u ye yan ka sɔrɔ u ma cɛnni kɛ an ka jobonw si kɔnɔ, u ma kumajugu fɔ an ka joo koo la fana. Ni koo dɔ le bɛ Demetiriyusi n'a ka baarakɛnyɔgɔnw ni mɔgɔ dɔ cɛ, kiti tigɛlon bɛ yen, faamaw bɛ yen, u ka kan ka taa u ka koo nyanabɔ olu le fɛ. Ni kuma wɛrɛ le do bɛ aw fɛ n'an ka kan ka min nyanabɔ, aw bɛ na an ka nyɔgɔnyeba kɛlon na. N'an m'an yɛrɛ minɛ, u bɛna an jalaki bii koo nin kama, bari, kuun tɛ an ka nyɔgɔnlajɛn nin na, n'o nyaa bɛ se ka fɔ mɔgɔ ye.” A ye kuma nunu fɔ ka ban minkɛ, a ko jama ka jɛnsɛn. Mankanba nin nɔgɔyara tuma min na, Pɔli ye kalandenw bɛɛ lajɛn ka ladili d'u ma, k'u jaa gwɛlɛya. O kɔ, a ye sira nyini u fɛ, ka taa Maseduwani mara la. A y'o mara nin bɛɛ yaala ka to ka kalandenw ladi kosɛbɛ. A tora o la fɔɔ ka taa se Girɛsi mara la, ka kalo saba kɛ o yɔrɔ la. A bɔtɔ yen, a ko a bɛ kurun ta ka taa Siri mara la. A y'a mɛn ko Zuwifu nunu ye janfa siri a la k'u b'a faga. O la, a kɔsegira ka taa bɔ Maseduwani faan fɛ. Mɔgɔ minw tun b'a bilara sira, olu tɔgɔw filɛ: Piirusi dencɛ Sopatɔrɔsi ka bɔ Bere, ni Arisitaaki ani Segundusi ka bɔ Tesaloniki, Gayusi ka bɔ Dɛribe, ni Timote, ni Tisiki, ani Torofima ka bɔ Azi mara la. O jɛnkulu nin tun kɔnna ka sira ta anw nya, ka taa anw kɔnɔ Torowasi. Anw ye Buru funubali nyanagwɛ kɛ Filipi, ka sɔrɔ ka bɔ yen. An ye tile duuru kɛ jii kan ka sɔrɔ ka se an taamanyɔgɔnw fɛ Torowasi, ka tile wolonwula kɛ yen. Lɔgɔkun loon fɔlɔ, an lajɛnnin tun bɛ n'an bɛ dumuni senuman tilantilanna nyɔgɔn fɛ. Pɔli tun ka kan ka bɔ Torowasi o dugusagwɛ. O kama, a kumana ka mɛn fɔɔ ka se dugutilama. An tun lajɛnna sangaso min na, fitinɛ caaman mananin tun bɛ yen. Kanbelennin dɔ siginin tun bɛ fɛnɛtiri daa la, a tɔgɔ tun ko Etiiki. Pɔli ka kuma janyana minkɛ, sinɔgɔ ye kanbelen nin minɛ. Sinɔgɔ fɛ, a porokotora ka bɔ sangaso sabanan fɛnɛtiri daa la ka jigi duguma. U jigira k'a ta, o y'a sɔrɔ a sara. Pɔli jigira ka taa kanbelen suu ta a disi la k'a fɔ mɔgɔw ye ko: “Aw y'aw hakili sigi, a bɛ nii na.” Pɔli yɛlɛla tuma min na, a ye dumuni senuman nin dɔ tigɛ k'a dumu, ka kuma daminɛ tugu fɔɔ ka dugu gwɛ, a sɔrɔla k'a ka sira minɛ. Kanbelen nin ka koo kɔni kɛra dususaalonko daan ye. U nisɔn diyaninba segira ni kanbelen ye u ka soo. An ye kurun ta ka bila Pɔli nya ka taa Asɔsi. An tun ka kan ka taa nyɔgɔn sɔrɔ yen k'ale Pɔli ta, bari a tun ko ale bɛ taa seen na. A sera Asɔsi tuma min na, an y'a ta, an taara Mitilɛni. O dugusagwɛ, an ye kurun ta ka se Siyo gɛrɛfɛ. O dugusagwɛ tugu, an sera Samɔsi, ka bɔ o yɔrɔ la ka taa lɔ Toroziyɔn, o kɔ, an ye tile ni suu kɛ ka sɔrɔ ka se Mile. Pɔli tun t'a fɛ ka mɛn Azi mara la, o kama, a tun t'a fɛ an ka tɛmɛ Efɛzi. A kɔrɔtɔnin tun bɛ ka se Zeruzalɛmu, waasa ka Pantekɔti nyanagwɛ kunbɛn yen. Pɔli tora Mile ka cira sama Efɛzi jama senuman ka cɛkɔrɔbaw ma k'u ka na. U nan'a fɛ, a y'a fɔ u ye ko: “Kabini ne seen donna Azi mara la yan, ne ye n yɛrɛ minɛ cogo min na, aw yɛrɛ b'o lɔn. Zuwifuw ye tɔɔrɔ ni dusukasi minw lase ne ma yan, ne y'o bɛɛ munyu ka to ka Matigi ka baara kɛ ni yɛrɛmajigi ye. Fɛɛn minw bɛɛ tun bɛ se k'aw nafa, ne ma olu si dogo aw la. Ne y'o bɛɛ fɔ aw ye k'aw kalan n'o ye fana forobayɔrɔw la, ani aw ka soow kɔnɔ. N y'a fɔ Zuwifuw, ni siya wɛrɛw ye, k'u ka nimisa ka faran u ka kojuguw la, ka la an Matigi Yezu la, k'u nyasin Ala ma. Ayiwa sisan, Nii Senuman bɛ ne jagoyara ka taa Zeruzalɛmu. Ne m'a lɔn fɛɛn min bɛna taa ne sɔrɔ yen. N kɔni bɛ min lɔn, n mana se dugu o dugu la, Nii Senuman b'a fɔ ne ye ko u bɛna jɔrɔkɔ kɛ ne la, ko n bɛna tɔɔrɔ. Ne ka bɔnɔ n nii na, o tɛ foyi ye ne nyana. A daan ye Matigi Yezu ye baara min don ne bolo, ne k'o kɛ ka ban. Fɔɔ ne ka se ka Ala ka makariko kibaru diman nin fɔ mɔgɔw ye le. “Ayiwa, ne tɛmɛtuma na aw fɛ, ne ye Ala ka masaya koo fɔ aw ye. Ne do y'a lɔn sisan ko aw si nyaa tɛna la ne kan tugu. O kama, ne b'a fɔ aw ye bii, ko ni aw dɔ nana halaki, o tɛ ne ka koo ye, bari, ne ma Ala ka kolatigɛnin dogo aw la. Aw ka janto aw yɛrɛ la. Nii Senuman ye jama min kalifa aw ma, aw ka olu fana kɔlɔsi. Aw ka Ala ka jama tilen, o minw kɛra Ala taw ye a Dencɛ ka saya sababu la. Ne y'a lɔn ko ne taanin kɔ, mɔgɔ dɔw bɛna na don aw seen kɔrɔ ka fariya Ala ka jama ma i n'a fɔ suruku ka fari baa ma cogo min na. Dɔw fana bɛna wili aw yɛrɛ cɛma ka to ka galon tigɛ, waasa ka kalandenw caaman sama ka tugu u yɛrɛ kɔ. Aw k'aw hakili to a la ko ne tun bɛ aw kelen kelen bɛɛ ladi ni nyaji ye loon o loon saan saba kɔnɔ. O tuma na, aw y'aw yɛrɛ kɔlɔsi. “Ayiwa, sisan kɔni, ne b'aw kalifa Ala ma, k'aw ni a ka hɛrɛ kuma to nyɔgɔn fɛ, see bɛ ale min ye k'aw sabati, ka sininyasigi labɛn k'a bila a ka mɔgɔw bɛɛ ye. Ne ma n nyaa bɔ aw si ka wari fɛ, walima sanu, walima fani fɛ. Ne ni n taamanyɔgɔnw mako tun bɛ fɛɛn minw na, ne ye baara kɛ ni n bolo nunu ye k'olu sɔrɔ. Aw yɛrɛ b'o lɔn. Ayiwa, ne y'a yira aw la cogo bɛɛ la ko an ka kan ka sɛgɛn ten, ka se ka dɛsɛbagatɔw dɛmɛ. O la, an hakili bɛ to Matigi Yezu yɛrɛ ka dalakuma nin na ko: ‘I ka mɔgɔ sɔn, duba b'o la ka tɛmɛ sɔrɔli kan.’ ” Pɔli y'o kuma nunu fɔ ka ban minkɛ, u bɛɛ y'u kunbiri gwan ka Ala dali. U kasira kosɛbɛ. U tora k'u bolo melekemeleke a kaan na k'a fo. O kɔ, u taar'a bila sira kurun daa la. U bɛɛ dusu kasinin tun lo, bari a tun y'a fɔ u ye k'u si nyaa tɛna la ale kan tugu. An y'an yɛrɛ sɔrɔ ka bɔ u bolo tuma min na, an donna kurun kɔnɔ ka tilen Kɔsi, o dugusagwɛ, an taara Orodɛsi, ka bɔ yen ka taa Patara. An ye kurun dɔ sɔrɔ yen min tun bɛ taara Fenisi jamana na. An donna o kɔnɔ ka se Sipɔrɔ masurun na, an tun b'a dugukolo yera yɛrɛ, an tɛmɛna a worodugu nyafan fɛ, k'an kuun sin Siri jamana ma. An taara bɔ Tiri, kurun kɔnɔna minanw tun ka kan ka jigi o yɔrɔ la. An ye kalanden dɔw sɔrɔ o yɔrɔ la, an ye tile wolonwula kɛ ni olu ye. Nii Senuman barika la, olu tun b'a fɔ Pɔli ye ko a kana taa Zeruzalɛmu. O bɛɛ n'a ta, an ye lɔgɔkun kelen nin kɛ ka ban tuma min na, an y'an ka sira ta. Cɛɛw, musow fara denmisɛnw kan, u bɛɛ y'an bila sira. An taamana ka bɔ dugu banakɔ ka se kɛnɛba dɔ la bada la. An bɛɛ y'an kunbiri gwan yen, ka Ala dali. O kɔ, an ye foliw didi nyɔgɔn ma, olu segira soo, anw ye kurun ta. An bɔra Tiri, ka taa Potolemayisi, k'o yɔrɔ kalandenw fo. An ye tile kelen kɛ olu fɛ yen. O dugusagwɛ, an bɔra k'an kuun la Sezare kan. An sera yen, an jigira kibaru diman fɔbaga Filipi fɛ. Cidenw tun ye mɔgɔ wolonwula minw woloma, olu kelen tun lo. Sunguru mɔgɔ naani tun b'a fɛ. Olu bɛɛ tun ye kiraw ye. An ye tile damani kɛ yen, kira dɔ bɔra Zude mara la ka na an sɔrɔ yen, a tɔgɔ tun ko Agabu. A nana an sɔrɔ yen minkɛ, a ye Pɔli ka cɛsirilan ta k'a yɛrɛ seen n'a bolow siri n'a ye, k'a fɔ ko: “Mɔgɔ min ta ye cɛsirilan nin ye, Zuwifuw bɛn'a tigi minɛ k'a siri ten Zeruzalɛmu k'a don siya wɛrɛw bolo. Nii Senuman le ko ten.” Anw n'o yɔrɔ mɔgɔw ye kuma nin mɛn ten minkɛ, an ye Pɔli dali kosɛbɛ ko a kana taa Zeruzalɛmu. Nga a y'an jaabi ko: “Mun na aw bɛ kasira ten, n'aw b'a fɛ ka ne jigi tigɛ? Ka ne siri, o tɛ foyi ye ne fɛ. Ne ka sa yɛrɛ, Matigi Yezu kɔsɔn Zeruzalɛmu, ne labɛnnin lo o kama.” An dɛsɛra a kɔrɔ minkɛ, an ko Matigi b'a fɛ ka min kɛ, a k'o kɛ. O tile damani tɛmɛnin kɔ, an y'an yɛrɛ labɛn ka taa Zeruzalɛmu. Sezare kalanden dɔw taara an bila sira ka jatigila di an ma. An tun jigira fɔlɔ kalandenw dɔ fɛ min tɔgɔ ko Munazɔn, Sipɔrɔka tun lo. An sera Zeruzalɛmu minkɛ, kalandenw y'an kunbɛn ka nya ni nisɔndiya ye. O dugusagwɛ, Pɔli taara n'an ye Zaki ka soo. An taar'a sɔrɔ Ala ka jama ka cɛkɔrɔbaw bɛɛ tun lajɛnnin bɛ yen. A ye foli di u ma ka ban tuma min, Ala y'a dɛmɛ ka koo minw bɛɛ kɛ siya wɛrɛw cɛma, a y'o bɛɛ lakali u ye kelen kelen. A lamɛnbagaw bɛɛ ye barika la Ala ye. O kɔ, u y'a fɔ a ye ko: “Pɔli, i nyaa b'a la ko Zuwifuw caaman bɛ yan minw kɛra an kretinyɛw ye. U bɛ Musa ka sariyaw labato kosɛbɛ. Mɔgɔw bɛ min; nunu;nunu i koo la, u y'o mɛn. Mɔgɔw ka fɔ la, ko i b'a fɔra Zuwifuw ye, minw siginin bɛ jamana kɔ kan siya wɛrɛw cɛma, k'olu kana u deenw kɛnɛkɛnɛ, k'u kana Musa ka sariyasigininw labato. Ko i b'u bali ka landaw labato. Ayiwa, an bɛna mun kɛ? Siga t'a la, u bɛn'a mɛn ko i nana. O tuma na, an bɛna min fɔ i ye, sɔn k'o kɛ. Cɛɛ naani bɛ yan dadili juru bɛ minw na. I ka taa n'u ye ka fara u kan aw bɛ saniyali sarakaw bɔ. E yɛrɛ ka lɔ n'a kunko ye, waasa u ka se k'u kuunw li, u ka dalilu juru ka ban. O la, mɔgɔw bɛn'a lɔn ko kuma min bɛ; nunu;nununa i koo la, k'o tɛ tinyɛ ye. U bɛn'a lɔn ko i fana bɛ Musa ka sariyaw labatora. Siya wɛrɛ minw lara Yezu la, olu ta, an tun ye sɛbɛ ci u ma k'an ka; naniyata fɔ u ye: k'u kana josɔnsogo nyimi, ani sogo min kaan ma tigɛ, k'u kana sogo joli dumu, ko u k'u yɛrɛ tanga kakalaya ma.” O dugusagwɛ, Pɔli taara ni mɔgɔ nunu ye. A farala u kan ka saniyali landa kɛ. O kɔ, a taara Alabatosoba kɔnɔ k'o saniyali labanlon fɔ, u kelen kelen bɛɛ ka saraka ka kan ka bɔ o loon min na. Saniyali min bɛ kɛ tile wolonwula minw kɔnɔ, o daa tun bɛ nyini ka fa. Azi mara Zuwifu dɔw nana Pɔli ye Alabatosoba kɔnɔ, u ye jama kɔnɔnasu ka bila Pɔli la, u y'a minɛ. U tun b'a la ka pɛrɛn ko: “Aw ye nya an ma Isirayɛli jama! Cɛɛ min bɛ to ka Isirayɛlidenw mafinyɛya yɔrɔ bɛɛ la, a filɛ nin ye. A bɛ to k'an ka sariyaw n'an ka Alabatosoba nin tɔgɔjugu fɔ mɔgɔ bɛɛ ye. O bɛɛ kɔ, a donna ni siya wɛrɛw ye a kɔnɔ k'o yɔrɔ senuman nin nɔgɔ.” Tinyɛ na, u kɔni tun ye Pɔli ni Efɛzika Torifini ye nyɔgɔn fɛ dugu kɔnɔ. U y'a miiri ko a donna n'a ye Alabatosoba kɔnɔ. Mankan bonyana fɔɔ ka se dugu faan bɛɛ la. Mɔgɔw girinna ka bɔ faan bɛɛ. U ye Pɔli sama ka bɔ n'a ye k'a daaw tugu. U tun bɛ Pɔli fagayɔrɔ nyinina minkɛ, dɔw taar'a fɔ sɔlidasi kuntigi ye ko dugu nyagaminin lo. O yɔrɔnin bɛ, ale y'a ka sɔlidasi dɔw cɛ ka girin ka se o yɔrɔ la. Jama ye sɔlidasiw nanin ye minkɛ, u ye Pɔli bugɔli dabila. O tuma na, sɔlidasi kuntigi gwɛrɛla ka Pɔli minɛ, ko a ka sɔlidasiw k'a siri ni jɔrɔkɔ fila ye. O kɔ, a ye nyiningali kɛ ko yala jon lo, ani ko a ye mun kɛ. Mɔgɔw tora ka pɛrɛn, bɛɛ n'a ka fɔta. Sɔlidasi kuntigi tun tɛ sera ka foyi faamu minkɛ, a ko sɔlidasiw ka taa ni Pɔli ye u ka yɔrɔ la kaan kɔnɔ. U sera yɛlɛyɛlɛnanw ma tuma min na, sɔlidasiw dɛsɛra le ka Pɔli nyun jama ka fariya kɔsɔn, bari u bɛɛ tun b'a la ka pɛrɛn sɔlidasiw kɔfɛ ko: “Aw y'a faga! Aw y'a faga!” U tun bɛ nyini ka don ni Pɔli ye kaan kɔnɔ tuma min na, Pɔli y'a nyininga ko: “Yala a daganin bɛ n ka kuma i fɛ wa?” Sɔlidasi kuntigi y'a jaabi ko: “I bɛ girɛkikan mɛn wa? Yala, Ezipiti kanbelen min kɛra sababu ye kɔsa nin na jama murutira fɔɔ a taara ni kɛlɛden waa naani ye a fɛ kongo kɔnɔ, e tɛ o ye wa?” Pɔli y'a jaabi ko: “Ne ye Zuwifu ye ka bɔ Tarisi, Silisi mara la. N ka dugu tɛ dugudogonin ye. Ne b'i dali, a to n bɛ dɔ fɔ jama ye.” Sɔlidasi kuntigi ye sira d'a ma. O la, a lɔra yɛlɛyɛlɛnan nunu kan k'a bolo kɛ ko mɔgɔw ka je. Mɔgɔw jera tuma min na, a kumana u fɛ eburukan na ko: “N faaw, ani ne balimaw, n bɛna min fɔ sisan waasa ka n yɛrɛ koo gwɛ aw ye, aw k'aw tulo malɔ o la ka nya.” U y'a ye ko Pɔli bɛ kumana u fɛ eburukan na minkɛ, yɔrɔ sumana tɛtɛtɛ fɔɔ ka nya. “Ne ye Zuwifu ye, n wolola Tarisi, Silisi mara la, nga n lamɔna dugu nin kɔnɔ yan. Gamaliyɛli le ye n kalan kosɛbɛ an faaw ka sariyaw la. N ka Alako tun tɛ tolonkɛko ye, i n'a fɔ aw fana ta bɛ cogo min na bii. Ne tun bɛ sirakura nin taamabagaw tɔɔrɔ, ka dɔw faga, cɛɛ fara musow kan, ne tun b'u minɛ ka jɔrɔkɔ kɛ u la, k'u don kaso la. Sarakalasebagaw kuntigiba ni cɛkɔrɔbaw ka jɛnkulu bɛ se k'a fɔ ni galon lo, ni tinyɛ lo. Loon dɔ la, ne ye sɛbɛ sɔrɔ olu fɛ ko n ka ta'a di an baden Zuwifuw ma Damasi, ka Yezu kɔmɔgɔw minɛ yen ka na n'u ye Zeruzalɛmu k'u tɔɔrɔ. “Ka n to sira kan, n tun surunyana Damasi la tilegwan fɛ, yeelenba dɔ bɔra sanfɛ ka na ne lamini. N bɔra ka ben, kumakan dɔ bɔra, o ko n ma: ‘Sawuli, Sawuli, mun na i bɛ ne tɔɔrɔla ten?’ Ne ye kumakan nin jaabi ko: ‘E ye jon ye?’ Kumakan nin ko: ‘Ne ye Nazarɛti Yezu ye, i bɛ n tɔɔrɔla.’ N taamanyɔgɔn nunu kɔni tun ye yeelen nin ye nga u ma kumakan nin mɛn. Ne ko: ‘N ka kan ka mun kɛ Matigi?’ A ye ne jaabi ko: ‘Wili ka taa Damasi, e ka kan ka min kɛ, u bɛna o fɔ i ye.’ Yeelen nin bonya kojugu fɛ, n nyaa bɔsira n na, n taamanyɔgɔnw le ye n bolo minɛ ka taa Damasi. “Cɛɛ dɔ tun b'o yɔrɔ la, a tɔgɔ tun ko Ananiyasi, a tun bɛ Ala ka sariyaw labato kosɛbɛ, a tɔgɔnyuman tun bɛ Zuwifuw bɛɛ daa la o yɔrɔ la. Ale nana ne sɔrɔ, k'a fɔ ne ye ko: ‘N teri Sawuli, i nyaa ka yɛlɛ.’ O yɔrɔnin bɛ ne nyaa yɛlɛla. A y'a fɔ ne ye ko: ‘An faaw ka Ala y'i woloma k'i kɛ a ta ye, janko i k'a sago lɔn, i nyaa ka la a ka Mɔgɔnyuman kan, ka mɛnni kɛ ale yɛrɛ daa la, bari a b'a fɛ ko i nyaa ye min ye, an'i tulo ye min mɛn ale fɛ, i ka kɛ ale seere ye k'o lakali mɔgɔw bɛɛ ye. Ayiwa, i bɛ mun le kɔnɔ tugu? Wili an b'i batize i ka kojuguw ka yafa ale Yezu barika la.’ “Ayiwa, ne tun segira ka na Zeruzalɛmu. Ka ne to Ala dali la loon dɔ Alabatosoba kɔnɔ, ne ye fɛɛn dɔ ye. Matigi tun lo, a y'a fɔ n ye ko: ‘Teliya ka Zeruzalɛmu dugu bila, bari i bɛ min lase mɔgɔw ma ne koo la, u tɛna la o la.’ Ne y'a jaabi ko: ‘Matigi, u b'a lɔn ko ne tun bɛ taa Alabatosow kɔnɔ k'i kɔmɔgɔw minɛ ka taa u don kaso la ka dɔw bugɔbugɔ ni golokamiw ye. I tericɛ Etiyɛni ka fagatuma na, ne tun b'u fɛ, o tun diyara n ye fana. Ne le tun y'a fagabagaw ka faniw minɛ.’ A y'a fɔ ne ye ko ale bɛna ne ci ka taa yɔrɔjan siya wɛrɛw fɛ.” Jama ye Pɔli lamɛn fɔɔ ka na se o kuma nunu ma minkɛ, u pɛrɛnna ka to k'a fɔ ko: “O mɔgɔ sifa nunu ka kan ka faga, a man kan ka to nii na.” Mankan bonyana, u tora k'u ka faniw fili sanfɛ, ka to ka buguri cɛ k'a fili sanfɛ. Ayiwa, sɔlidasi kuntigi y'a fɔ k'u ka don ni Pɔli ye a ka yɔrɔ la kaan kɔnɔ, k'u k'a bugɔ, waasa a ka jama murutikun fɔ. U ye Pɔli siri k'u bɛn'a bugɔ tuma min na, a y'a fɔ o sɔlidasiw kuntigi ye ko: “Sira dinin b'aw ma waasa ka Ɔrɔmuka bugɔ ka sɔrɔ a ma kiti wa?” Sɔlidasi kuntigi nin y'o mɛn minkɛ, a taara o nyafɛ sɔlidasi kuntigiba ye ko cɛɛ nin ye Ɔrɔmuka ye. O fana nana Pɔli nyininga ko: “I ye Ɔrɔmuka ye tinyɛ na wa?” Pɔli y'a jaabi ko ɔnhɔn. Sɔlidasi kuntigiba ko ale ye wariba le sara ka sɔrɔ ka jati Ɔrɔmuka ye. Pɔli y'a jaabi ko ale ye Ɔrɔmuka ye kabini a wololon. O tuma na, mɔgɔ minw tun ka kan k'a bugɔ, olu bɛɛ y'a ye k'a to yen. Sɔlidasi kuntigiba nin kɔni y'a lɔn ko ale ye Ɔrɔmuka le siri ten minkɛ, a siranna kosɛbɛ. Dugu gwɛra, Zuwifuw bɛ Pɔli jalakila kuun min na, sɔlidasi kuntigi nin tun b'a fɛ k'o lɔn. O la, a y'a fɔ sarakalasebagaw ni Zuwifuw ka kititigɛlaw bɛɛ ye k'u ka nyɔgɔn lajɛn, ko ale bɛna Pɔli d'u ma u k'a kiti. O la, a ye Pɔli foni ka ta'a d'u ma. Pɔli lɔra ka kititigɛla nunu filɛ furutututu k'a fɔ ko: “N badenw, ne ye n ka kɛtaw bɛɛ kɛ ni kɔnɔgwɛ ye Ala nyana fɔɔ ka na se bii ma.” Sarakalasebagaw kuntigiba y'a fɔ ko Pɔli gɛrɛfɛ mɔgɔw k'a daa gosi. Pɔli y'a fɔ a ye ko: “E kogogwɛ nin, Ala le bɛna e fana gosi! I bɛ sigi yan ko i bɛ ne kiti ka kɛnyɛ ni sariya ye, k'a sɔrɔ e k'u ka ne gosi, o do ma fɔ sariya la.” A gɛrɛfɛ mɔgɔw y'a fɔ a ye ko: “I bɛ sarakalasebagaw kuntigiba le nɛni wa?” Pɔli ye olu jaabi ko: “Aa! ne m'a lɔn ko sarakalasebagaw kuntigiba lo. Bari a fɔra Ala ka kuma na, ko i man kan k'i ka siya nyamɔgɔ nɛni.” Ayiwa, Pɔli y'a lɔn ko kititigɛlaw faan kelen ye Sadusenyɛw ye, faan dɔ ye Farizinyɛw ye minkɛ, a pɛrɛnna ko: “N badenw, ne faa ye Farizinyɛ ye, ne yɛrɛ ye Farizinyɛ ye. An jigi bɛ suuw kununko min na, o jigi nin kama u ye ne minɛ.” Pɔli y'o kuma nin fɔ tuma min na, mankan wilila Farizinyɛ ni Sadusenyɛw cɛ. Jama tilanna fila ye. Sadusenyɛw kɔni ko suuw tɛna kunun dinyɛ labanlon, ko mɛlɛkɛ tɛ yen, ko suja koo ye galon ye fana. Nga Farizinyɛw lanin b'o bɛɛ la. Mankan nin bonyana haali. Sariya karamɔgɔ minw tun ye Farizinyɛw ye, olu dɔw wilila k'a fɔ ko: “An ma jalakiyɔrɔ si ye cɛɛ nin na, n'a sɔrɔ suja, walima mɛlɛkɛ dɔ le kumana a fɛ.” Mankan nin bonyana fɔɔ sɔlidasi kuntigi siranna ko mɔgɔ nunu bɛna Pɔli halaki, a ko a ka sɔlidasiw ka Pɔli minɛ ka taa n'a ye kaan kɔnɔ. Suu nana ko, Matigi y'a yɛrɛ yira Pɔli la k'a fɔ a ye ko: “I jaa gwɛlɛya, i ye ne koo fɔ Zeruzalɛmukaw ye ka ban, fɔɔ i ka taa ne koo fɔ Ɔrɔmukaw ye fana.” Dugu gwɛra tuma min na, Zuwifu dɔw bɛnna Pɔli fagako la. U ye dajuru ta k'u tɛna dumuni kɛ, k'u tɛna minni kɛ n'u ma Pɔli sɔrɔ k'a faga. Mɔgɔ minw bɛnna o la, u tun ka ca ni mɔgɔ bi naani ye. U taar'a fɔ sarakalasebagaw, ni cɛkɔrɔbaw ye ko: “An ye dajuru ta ko n'an ma Pɔli sɔrɔ k'a faga, an tɛna dumuni kɛ abada. O la do, aw ye bɛn ni kititigɛla tɔw ye, k'a nyini sɔlidasi kuntigi fɛ ko a ka Pɔli sama aw ma waasa aw k'a ka koo jatiminɛ kosɛbɛ. Anw bɛna labɛn k'a faga sira la n'a ma se aw fɛ yan.” Pɔli belenden y'o kuma nin mɛn, a taara kaan kɔnɔ ka Pɔli lasɔmi. O la, Pɔli ye sɔlidasiw nyamɔgɔ dɔ wele k'a fɔ o ye ko a ka kanbelen bila sira sɔlidasi kuntigi fɛ, ko kuma b'a fɛ k'a fɔ a ye. Sɔlidasi nin ye kanbelen bila sira u ka kuntigi fɛ k'a fɔ a ye ko: “Kasoden Pɔli y'a nyini n fɛ ko n ka kanbelen nin bila sira i fɛ, ko kuma b'a fɛ k'a fɔ i ye.” Sɔlidasi kuntigi ye kanbelen bolo minɛ ka bɔ n'a ye kɔfɛ k'a nyininga ko: “Mun b'i fɛ k'a fɔ ne ye?” Kanbelen y'a jaabi ko: “Zuwifuw bɛnna a la k'u bɛna Pɔli dali e fɛ sini, janko kititigɛlaw ka se k'a ka koo nyanabɔ kosɛbɛ. Kana sɔn k'a d'u ma, bari mɔgɔ bi naani ni kɔ labɛnnin lo waasa k'a faga sira kan. U ye dajuru ta k'u tɛna dumuni kɛ, k'u tɛna minni kɛ n'u ma Pɔli sɔrɔ k'a faga. Olu kɔni y'u ka; naniya bɛɛ ta ka ban, u bɛ ele kɔnɔna.” Sɔlidasi kuntigi y'a fɔ kanbelen ye ko: “I kan'a fɔ mɔgɔ si ye ko i ye koo nin lakali ne ye dɛ!” O kɔ, a ye sira d'a ma ko a ka taa. O tuma na, sɔlidasi kuntigi y'a ka sɔlidasiw nyamɔgɔ fila wele k'a fɔ u ye ko: “Aw ye sɔlidasi kɛmɛ fila, ni sobolila bi wolonwula, ani tamantigi kɛmɛ fila labɛn. Surafana dumunin kɔ, n bɛna aw ci Sezare. Aw ye soo dɔw labɛn fana k'u kɛ Pɔli ka yɛlɛfɛn ye, k'a bila sira ka ta'a don masacɛ ka lasigiden Felikisi bolo Sezare, a nyama kana nɔgɔ.” A ye bataki sɛbɛn k'a don u bolo. A y'a fɔ o kɔnɔ ko: “Ne Kulodi Liziyasi bɛ sɛbɛ nin ci ele kɔrɔ Felikisi ma. E min ye masacɛ ka lasigiden ye, n b'i fo. Zuwifuw tun ye cɛɛ nin minɛ, u tun b'a fɛ k'a faga, ne nan'a mɛn ko Ɔrɔmuka lo, ne ni n ka sɔlidasiw sera k'a bɔsi u bolo. N tun b'a fɛ k'a minɛkun lɔn u fɛ minkɛ, n y'a nyini u ka kititigɛlaw fɛ k'u k'a kiti. Ayiwa, n y'a faamu o seen fɛ, ko a minɛkun ye olu yɛrɛ ka landa koow ye, a do t'a fagakun bɔ, a tɛ se ka kɛ kasoden ye fana. U nana n lasɔmi ko Zuwifu nunu b'a fɛ halibi k'a faga dogo la. O kama, ne y'a sama i ma teliya la k'a yira a jalakibagaw la ko n'u mako b'a la, u ka taa i fɛ yen.” Sɔlidasi nunu ka kuntigi y'u ladi cogo min na, u y'a kɛ ten. Sufɛ, u taara ni Pɔli ye Antipatirisi. O dugusagwɛ, sɔlidasi minw tun b'u seen na, olu kɔsegira kaan kɔnɔ, sotigiw taara ni Pɔli ye Sezare. U sera yen dɔrɔn, u ye sɛbɛ nin di lasigiden ma ka Pɔli fana yira a la. A ye sɛbɛ nin kalan ka ban tuma min na, a ye Pɔli nyininga ko a bɛ bɔ mara jumɛn na. Pɔli ko ale bɛ bɔ Silisi mara la minkɛ, lasigiden ko: “Ayiwa, n'i jalakibagaw nana tuma min na, i bɛna i ka fɔta fɔ.” Erɔdi tun ye masaso min lɔ yen, a k'u ka taa Pɔli mara o kɔnɔ. Ayiwa, tile duuru tɛmɛnin kɔ, sarakalasebagabaw kuntigiba Ananiyasi ni cɛkɔrɔba damani nana Sezare. Cɛɛ kumalɔnbagaba dɔ tun b'u fɛ, o tɔgɔ tun ko Tɛritilusi. U taara masacɛ ka lasigiden fɛ waasa ka Pɔli jalaki. U ye Pɔli wele ka bɔ. Tɛritilusi ye kuma daminɛ, a ko lasigiden ma: “Lasigidennyuman, an bɛ hɛrɛba min na jamana kɔnɔ bii, e le barika lo. E ka hakilitigiya baara kɔsɔn, yɛlɛmani caaman kɛra. An b'o hɛrɛ min sɔrɔ yɔrɔ bɛɛ ni tuma bɛɛ, an b'i walenyuman lɔn o la, kɔrɔ Felikisi. An ka kuma kuntaga man jan, o la ne b'i dali, e ka sabali ka mɛnni kɛ an fɛ dɔɔni. “Ayiwa, an y'a ye ko cɛɛ nin kɛra i n'a fɔ fɔnyɔbana. A bɛ Zuwifuw kuun gosi nyɔgɔn na dinyɛ faan bɛɛ. Nazarɛtika ka diinakura nyamɔgɔ dɔ lo. A tun b'a fɛ k'an ka Alabatosoba nɔgɔ yɛrɛ, o le y'a to an y'a minɛ. [A tun b'a fɛ k'a kiti ka kɛnyɛ n'an ka sariya ye, nga sɔlidasi kuntigi Liziyasi nan'a bɔsi an bolo fanga na ko a jalakibagaw ka na ele fɛ.] N'i ye ale Pɔli yɛrɛ nyininga, a bɛn'a jalakikun fɔ i ye, i bɛn'a lɔn ko an bɛ min fɔra, ko tinyɛ lo.” Zuwifu nunu ye cɛɛ ka kuma tintin ko tinyɛ yɛrɛ lo. Lasigiden ye sira di Pɔli ma ko a ka kuma. O la, Pɔli ye kuma ta k'a fɔ ko: “Ayiwa, ne y'a lɔn ko ele Felikisi le ye an ka jamana ka kititigɛbaga ye kabini saan damani. O la, ne tɛna siran ka n ka kuma fɔ. I bɛ se ka nyiningali kɛ k'a lɔn ko tinyɛ lo, bari a ma tɛmɛ tile tan ni fila kan fɔlɔ, ne tun taara Zeruzalɛmu ka Ala bato. A mɔgɔ tɛ yen min bɛ se k'a disi gosi k'a fɔ ko a ye ne ye sɔsɔli la ni mɔgɔ dɔ ye Alabatosoba kɔnɔ walima Alabatosow dɔ kɔnɔ, walima dugu kɔnɔ. N ma kɛ sababu ye ka mɔgɔw bila nyɔgɔn na fana. Mɔgɔ nunu ko ne ye min kɛ, fɛɛn min b'a yira ko tinyɛ lo, u k'o fɔ. Ayiwa, ne kɔni bɛ min lɔn, o filɛ nin ye: Olu k'o sira nin tɛ siranyuman ye, ne bɛ baara kɛra an bɛmaw ka Ala ye ka kɛnyɛ n'o sira ye. Min bɛɛ fɔra sariya la, ani kiraw ye minw sɛbɛn, ne b'o bɛɛ labato. Ne ni olu bɛɛ jigi bɛ Ala kan ko a bɛna mɔgɔnyumanw ni mɔgɔjuguw bɛɛ kunun dinyɛ labanlon. O kama ne banbanin lo, n ka kɛ mɔgɔ kɔnɔgwɛnin ye Ala ni mɔgɔw nyana. “Ne ye saan damani kɛ n tun tɛ Zeruzalɛmu. O kɔ, n segira ka na dɛmɛfɛn di n ka siya ma, ani ka saraka bɔ Ala ye. O waati la, dɔw ye ne ye Alabatosoba kɔnɔ, nga mankan tun tɛ ne ni mɔgɔ si cɛ, ne tun bɛ n yɛrɛ saniyara le. Zuwifu dɔw tun bɛ yen ka bɔ Azi mara la. Olu le tun ka kan ka kɛ yan ka ne jalaki n'o y'a sɔrɔ ni ne ye koo kɛ. Walima, minw bɛ yan n'u tun bɛ ne kitiyɔrɔ la Zeruzalɛmu, u k'a fɔ ni jalakiyɔrɔ tun sɔrɔla n na. N tun pɛrɛnna sinyɛ kelen, k'a fɔ ko: ‘Suuw kununko kama lo aw bɛ ne kitira bii kɛ.’ K'o niin bɔ a la, n ye mun kɛ?” Felikisi tun bɛ koo caaman faamu sira nin koo la minkɛ, a y'a fɔ u ye ko: “Ni sɔlidasi kuntigi Liziyasi nana yan tuma min na, ne bɛna koo nin nyafilɛ.” A y'a fɔ Pɔli kɔlɔsibaga ye ko a ka taa ni Pɔli ye i n'a fɔ kasoden, nga ko a k'a to a bɛ lafiya sɔrɔ. Ko a kana Pɔli ka mɔgɔw si bali k'a dɛmɛ. Tile damani tɛmɛnin kɔ, Felikisi n'a muso Durusiyi nana. A muso tun ye Zuwifu ye. U ko ka Pɔli wele, a ka dɔ fɔ ale ye Yezu Krista ka koo la. Pɔli kumana ka taa tilenninyako faan fɛ, ni yɛrɛminɛko, ani Ala ka kiti nata faan fɛ minkɛ, Felikisi siranna kosɛbɛ, a y'a fɔ Pɔli ye ko: “A ka nyi ten, taa, n bɛna i wele.” Felikisi tun b'a miiri ko Pɔli bɛna na wari di ale ma, o kama a tun bɛ Pɔli wele filafila ka baro kɛ n'a ye. O cogo la, saan fila tɛmɛna, mɔgɔ wɛrɛ nana Felikisi nɔɔ ta lasigidenya la. O tigi tɔgɔ tun ko Pɔsiyusi Fɛsitusi. Felikisi tun b'a fɛ ko Zuwifuw k'ale tɔgɔnyuman fɔ minkɛ, a taara ka Pɔli to kaso la. Ayiwa, Fɛsitusi sigira lasigidenya la Sezare. Tile saba a senin kɔ, a taara bɔ Zeruzalɛmu. Sarakalasebaga kuntigiw ni Zuwifuw ka mɔgɔbabaw taar'a ye Pɔli ka koo la. U y'a dali kosɛbɛ ko a ka sabali ka Pɔli bila ka na Zeruzalɛmu. K'a sɔrɔ u y'o dabari nin siri waasa ka se ka Pɔli faga sira kan. Nga Fɛsitusi y'a fɔ u ye ko Pɔli bɛ kaso la Sezare, ko hali n'o tɛ, ko ale yɛrɛ tɛna mɛn yan. Ko n'u ka nyanamɔgɔ dɔw b'a fɛ, k'u ka tugu ale kɔ ka taa Pɔli jalaki yen. Fɛsitusi ma mɛn u fɛ yen ka tɛmɛ tile seegi walima tile tan kan. A segira loon min na, o dugusagwɛ bɛ, a sigira a ka kititigɛyɔrɔ la k'u ka na ni Pɔli ye. A nana tuma min na, Zuwifu minw bɔra Zeruzalɛmu, olu wilila a kama ka to ka kumajugujuguw fɔ ka l'a kan. Nga dalilu si tun tɛ u bolo min b'a yira k'u ka fɔta ye tinyɛ ye. Pɔli ye kuma ta k'a yɛrɛ koo fɔ ka gwɛ ko: “Ne ma fili Zuwifuw ka sariya ma, n ma fili Alabatosoba ma, n ma fili Ɔrɔmu masacɛ fana ma.” Ayiwa, Fɛsitusi tun b'a fɛ ko Zuwifuw k'ale tɔgɔnyuman fɔ minkɛ, o la, a y'a fɔ Pɔli ye ko: “I b'a fɛ an ka taa n'i ye Zeruzalɛmu u k'i kiti yen ne yɛrɛ nyana wa?” Pɔli y'a jaabi ko: “Ne minɛnin lo ka lɔ Ɔrɔmu masacɛ ka kititigɛyɔrɔ nin na, ne ka koow ka kan ka nyanabɔ yen le. Ne ma kojugu si kɛ Zuwifuw la do, e yɛrɛ b'o lɔnna. N'o y'a sɔrɔ ni ne ye koo dɔ kɛ min bɛ ne fagakun bɔ, ne ma ban o saya ma. Nga nunu bɛ minw fɔra ka la n kan, tinyɛ t'a si la, o la, mɔgɔ si tɛ se ka n saraka u ma. Ayiwa, ne b'a fɛ Ɔrɔmu masacɛ yɛrɛ le ka ne kiti sisan.” Fɛsitusi n'a ka dakɔrɔsigiw ye nyɔgɔn ye. O kɔ, a ye Pɔli jaabi ko: “I m'a fɔ ko i b'a fɛ Ɔrɔmu masacɛ le ka i kiti wa? An bɛna taa n'i ye a fɛ.” Tile damani tɛmɛnin kɔ, masacɛ Agiripa n'a dɔgɔmuso Berenisi nana Sezare ka Fɛsitusi fo. U tun bɛna tile damani kɛ yen minkɛ, Fɛsitusi ye Pɔli ka koo lakali a ye ko: “Felikisi taara ka kasoden dɔ to yen. Ne tun taara tile fila kɛ Zeruzalɛmu tuma min na, sarakalasebagaw, ni Zuwifuw ka cɛkɔrɔbaw nan'a nyini ne fɛ ko fɔɔ kasoden nin ka faga. Nga ne y'u jaabi ko Ɔrɔmukaw ka landa la, kiti le bɛ kɛ fɔlɔ, kasoden nyaa ye, a jalakibagaw nyaa ye. Sira bɛ di kasoden ma k'a jalakibagaw ka kuma jaabi. N'o ma kɛ, Ɔrɔmukaw tɛ sira di ko mɔgɔjalakinin ka faga. U dɔw tun nana ni ne ye yan. Ne fana m'a koo bila ka suma, n nanin dugusagwɛ bɛ, n sigira n ka kititigɛ sigilan kan, k'a fɔ k'u ka na ni cɛɛ ye an bɛ kiti daminɛ. Ayiwa, ne tun y'a miiri ko a bɛna kɛ cogo min na, a ma kɛ ten. A jalakibagaw ma se ka cɛɛ ben ni kuma si ye. A jalakikun tun y'u yɛrɛ ka Alasirako le ye. Ko Yezu tɔgɔla dɔ koo lo. U ko a sara, nga Pɔli ko a kununna. Ne ma kuun ye koo nin na kosɛbɛ minkɛ, ne ye Pɔli nyininga ko a bɛ sɔn ka taa u bɛ koo nin kiti tigɛ Zeruzalɛmu wa? Nga Pɔli banna o la, a ko ale b'a fɛ Ɔrɔmu masacɛ le k'ale ka koo nyanabɔ. O le y'a to n k'u k'a mara kaso la, n bɛ cogoya nyini k'a sama masacɛ ma.” Agiripa y'a fɔ Fɛsitusi ye o tuma na ko: “Ne b'a fɛ k'o cɛɛ nin lamɛn.” Fɛsitusi y'a jaabi ko: “I bɛn'a lamɛn sini yɛrɛ.” A dugusagwɛ, Agiripa ni Berenisi nunu nana don nyɔgɔnkunbɛnyɔrɔ la mɔgɔbaya la. Sɔlidasi kuntigiw ni dugu nyamɔgɔw tun b'u bilara sira. Fɛsitusi y'a fɔ k'u ka na ni Pɔli ye. U nana n'a ye. O kɔ, Fɛsitusi ye kuma ta, a ko: “Masa Agiripa, ani aw minw bɛɛ bɛ yan, aw ye hakɛ to. Zuwifuw bɛɛ lajɛnnin tun nana ne fɛ Zeruzalɛmu, ani yan fana, ka muruti ko cɛɛ nin man kan ka to nii na, o min lɔnin ye aw nyafɛ. Ne kɔni fɛ, ne ma fɛɛn ye, n'a ye min kɛ n'o b'a fagakun bɔ. Nga a tun y'a fɔ ko ale b'a fɛ Ɔrɔmu masacɛ le k'ale kiti. O la, n fana ko n bɛn'a sama ka taa yen. Ayiwa, ne bɛn'a ka koo kuun nyafɔ cogo min na masacɛ ye sɛbɛ kɔnɔ, ne m'o lɔn. O kama, ne nana n'a ye aw cɛma, waasa ele masa Agiripa k'a lamɛn ka dɔ lɔn a ka koo la, janko n ka se ka sɛbɛ nin ci. N'o tɛ, n y'a ye ko ka kasoden sama ten i m'a jalakikun fɔ ka l'a kan, o bɛ kɛ kuntanya ye.” O tuma na, Agiripa y'a fɔ Pɔli ye ko kuma b'a bolo. Pɔli y'a bolo wili k'a fɔ ko: “Masa Agiripa, ne b'a fɔ ko ne dagamuna bari ne sera ka lɔ ele nyafɛ bii ka n ka koow nyafɔ i ye. Zuwifuw ye minw bɛɛ fɔ ka la ne kan, n bɛna o nyafɔ i ye. N dagamuna bari e b'an Zuwifuw ka landaw bɛɛ lɔn, sɔsɔli minw b'an cɛ Alasira koo la, i b'o bɛɛ lɔn. O la, ne b'i dali e ka munyu ka ne lamɛn. “Ayiwa, Zuwifuw bɛɛ bɛ ne taamacogo lɔn ka bɔ n ka dugu la, ani Zeruzalɛmu kabini ne kanbelenman tuma. An ka Alasira la, Farizinyɛw le ka Alabatocogo ka gwɛlɛ. Olu yɛrɛ b'a lɔn a mɛnna ko ne tun ye Farizinyɛ;nana ye. N'o ye tinyɛ ye walima ni galon lo, u bɛ se k'a fɔ. Ala y'a daa di an faaw ma koo min na, ne jigi b'o kan minkɛ, o kama lo ne bɛ kitira bii. An ka siya bɛɛ jigi b'a kan ko Ala y'a daa di koo min na k'o bɛna kɛ. O kama u jijanin bɛ ka to ka Ala bato suu fara tile kan. Masa Agiripa, o jigi min bɛ ne fɛ, o kama Zuwifuw bɛ ne jalakira. Aw Zuwifuw bɛ se k'a fɔ cogo di ko Ala tɛ se ka suuw kunun? “Ne kɔni tun y'a miiri ko ne tun ka kan ka koo bɛɛ kɛ waasa Nazarɛti Yezu tɔgɔ ka tunu. Ne tun y'o baara daminɛ Zeruzalɛmu. Ne yɛrɛ tun ye mɔgɔ caaman minɛ k'u don kaso la, bari sarakalasebagaw tun y'o see di ne ma. O kasoden nunu fagako tun ka di ne ye fana. Tuma caaman, ne tun bɛ taa u tɔɔrɔ Alabatosow kɔnɔ, ka caaman wajibiya k'a fɔ k'u ma la Yezu la. Dimi kɔsɔn, n tun bɛ taa hali dugu wɛrɛw la k'ale Yezu kɔmɔgɔw tɔɔrɔ yen. “Ayiwa, o cogo la, ne tun bɛ taara Damasi loon dɔ la. Sarakalasebagaw le tun y'o sira di ne ma. Masa Agiripa, ka ne to sira kan tilegwan fɛ, ne ye yeelenba dɔ bɔtɔ ye sanfɛ ka na ne ni n taamanyɔgɔnw bɛɛ lamini. Yeelen nin tun ka bon ka tɛmɛ. An bɛɛ benna. Ne ye kumakan dɔ mɛn eburukan na ko: ‘Sawuli, Sawuli, mun na i bɛ ne tɔɔrɔla ten? A ka gwɛlɛ i ma ka kogo bugɔ.’ Ne ye kumakan nin jaabi ko: ‘E ye jon ye?’ A ko: ‘Ne ye Yezu ye n'i bɛ n tɔɔrɔla. Nga, wili ka lɔ i seen kan. Ne ye n yɛrɛ yira e la waasa e ka kɛ ne ka baarakɛla ye, n ye koo min yira i la, i k'o lakali mɔgɔ tɔw ye, ani e bɛna min ye kɔfɛ fana, i k'o bɛɛ lakali. Ne bɛna i kisi Zuwifuw, ni siya wɛrɛw ma. Bari ne b'a fɛ k'i ci olu le fɛ, k'u nyaa yɛlɛ ka dibidibikow dabila, k'u sama ka bɔ Sutana bolo k'u nyasin Ala ma. N'u lara ne la, Ala bɛna yafa u ma ka sigiyɔrɔ d'u ma a ka mɔgɔw cɛma.’ “Ayiwa masa Agiripa, Ala y'o min fɔ ne ye, ne ma se k'a sɔsɔ. Ne y'a daminɛ ka Damasikaw waaju fɔlɔ, ani Zeruzalɛmukaw, ka Isirayɛli jamana bɛɛ waaju, ani siya wɛrɛw. N y'u waaju k'a fɔ u ye k'u ka kan ka nimisa ka faran u ka kojuguw la ka segi Ala ma, ka kɛwalinyumanw kɛ minw b'a yira k'u sɔnna. O kama lo Zuwifu dɔw nana n sɔrɔ Alabatosoba kɔnɔ ka n minɛ, u tun b'a fɛ ka ne faga. Nga Ala ka dɛmɛli sababu la, halibi ne bɛ yen, ka se ka tinyɛ fɔ setigiw ni faantanw ye. Kiraw ni Musa nunu tun y'a fɔ ko min bɛna kɛ, ne ma dɔ fɔ ka tɛmɛ olu ta kan. U ko Ala ka Mɔgɔwolomanin bɛna tɔɔrɔ ka sa, ko ale le bɛna kɛ suu fɔlɔ ye ka kunun ka an Zuwifuw ka siya, ani siya tɔw kisi.” Ka Pɔli to a ka kuma nyafɔ la, Fɛsitusi pɛrɛnna a kan ko: “E kuun tɛ yen wa? I ye kalan kɛ fɔɔ ka taa kɛ fatɔ ye kɛ!” Pɔli y'a jaabi ko: “Kɔrɔ Fɛsitusi, faa tɛ n na. N bɛ kuma minw fɔra, tinyɛ kumaw lo. Fatɔ kumaw tɛ. Ne b'o koow fɔra masa min ye, o b'a lɔn, hali a kelen ma dogo a ma, n lanin b'o la. Bari o koow ma kɛ yɔrɔdogonin na. Masa Agiripa, e lanin bɛ kiraw ka kuma fɔninw na wa? Ne y'a lɔn ko i lanin b'u la.” Agiripa ko a ma: “E b'a miiri ko i bɛna ne kɛ Krista ka mɔgɔ ye waatisurun kɔnɔ ten wa?” Pɔli y'a jaabi ko: “A kɛra waatisurun ye wo, a kɛra waatijan ye wo, ne kɔni b'a nyini Ala fɛ, a kana dan e kelen ma dɛ, nga minw bɛɛ bɛ ne lamɛnna bii, ko ne bɛ cogo min na ten, aw bɛɛ ka kɛ o cogo la. Nga jɔrɔkɔ kana kɛ aw la.” Masacɛ wilila, ani lasigiden, ni Berenisi ani mɔgɔ minw bɛɛ tun siginin bɛ ni olu ye. U taara kɔfɛ ka to k'a fɔ nyɔgɔn ye ko: “Cɛɛ nin ma fɛɛn kɛ n'a ka kan ka faga walima ka kaso kɛ min kama.” Agiripa y'a fɔ Fɛsitusi ye ko: “Cɛɛ nin ko Ɔrɔmu masacɛ niin ka don koo nin na minkɛ, n'o tɛ, a ka kan ka labila.” U y'a; naniya ta ko an ka kan ka taa Itali jamana na kurun kɔnɔ loon min na, u ye Pɔli ni kasoden damani don Ziliyusi bolo, ale tun ye sɔlidasi nyamɔgɔ dɔ ye. O sɔlidasikulu tɔgɔ tun ko Ogusiti. An donna Adaramisiyɔmu kurun dɔ kɔnɔ, ale tun bɛ taara Azi mara gɛrɛfɛ. Arisitaaki tun bɛ n'an ye. Ale tun ye Tesalonika ye Maseduwani mara la. A dugusagwɛ, an sera Sidɔn. Pɔli minɛcogo tun ka nyi Ziliyusi fɛ. O la, a ye sira d'a ma ko a bɛ se ka ta'a lɔnbagaw yɔrɔ filɛ dugu kɔnɔ, k'a makoyafɛn sɔrɔ u fɛ. An bɔra o yɔrɔ la ka tɛmɛ Sipɔrɔ jamana kɔfɛ, o min bɛ kɔgɔji cɛma, bari fɔnyɔ tun b'an tɔɔrɔla. An ye Silisi ni Panfili kɔgɔji cɛtigɛ ka taa se Mira, Lisi mara la. Sɔlidasi nyamɔgɔ nin ye Alɛkisandiri kurun dɔ sɔrɔ yen, min tun bɛ taara Itali jamana na. A y'an ladon o kɔnɔ. An ye tile damani kɛ kurunboli la. An sɛgɛnna kosɛbɛ ka sɔrɔ ka se Sinidi gɛrɛfɛ. Fɔnyɔ tun b'an balila ka taa n'o sira ye minkɛ, an y'an nyasin Salimone faan fɛ ka taa tɛmɛ Kɛrɛti jamana kɔfɛ. An m'an yɔrɔ janya dugukolo la. An jijara fɔɔ ka se kurun lɔyɔrɔ dɔ la, u b'o min wele ko Kurun lɔyɔrɔnyuman. O ni Lazaya man jan nyɔgɔn na. Waatijan tun tɛmɛna, kurunboli tun bɛ kɛra farati koo ye fana. Bari suun donlon tun tɛmɛna ka ban. O la, Pɔli y'a fɔ u ye ko: “N badenw, ne y'a lɔn ko n'an taara n'an ka taama ye nyafɛ, farati bɛna sɔrɔ a la dɛ. Kurun n'a kɔnɔna minanw, hali an yɛrɛw nii bɛna se ka to a la.” Sɔlidasi nyamɔgɔ nin bolo lanin tun bɛ kurun bolila n'a tigi le kan. A ma Pɔli ka ladili jati. O kurun lɔyɔrɔ nin tun ma nyi saminya tuma na minkɛ, u caaman y'a fɔ k'u ka bɔ yen ka banba n'u bɛ se ka se Fenikisi. O kurun lɔyɔrɔ nin donyɔrɔ dɔ tun bɛ sɔrɔ jamana nin kɔgɔdugu nyafan ni tileben furancɛ la, dɔ tun bɛ worodugu nyafan ni tileben furancɛ la. O dugu nin tun ye Kɛrɛti jamana ka kurun lɔyɔrɔ dɔ ye. U ko n'an sera yen, ko an bɛ saminya kɛ yen. Ayiwa, fɔnyɔ diman dɔ daminɛna ka bɔ worodugu nyafan fɛ. U y'a miiri k'olu ye min; naniya, k'o bɛna se ka kɛ. O la, u ye sira ta. U tun t'a fɛ u yɔrɔ bɛ janya Kɛrɛti dugukolo la kosɛbɛ. Nga dɔɔni dɔrɔn, fɔnyɔba dɔ wilila an kama, o min tɔgɔ ko Erakilɔn. A ye kurun ta. An tun tɛ se ka kurun boli fɔnyɔ fɛ fewu. O la, an dɛsɛra k'a to fɔnyɔ ta ma. An ni kalama tɛmɛna dugukolonin dɔ kɔfɛ o min tɔgɔ ko Koda. O kɛra sababu ye an sera ka kurundennin ladon kurunba kɔnɔ ni sɛgɛn ye k'a siri. Kurun bolilaw y'a ladon ka ban tuma min na, u ye jurukisɛ kɛ ka kurun naamu kosɛbɛ. U tun bɛ siranna ko fɔnyɔ kana taa kurun halaki Libi jamana cɛncɛn na. O la, u ye kurun lalɔfɛn bila jii la, fɔnyɔ ka tɛmɛ n'an ye sisan. O dugusagwɛ, fɔnyɔ ka tɔɔrɔ kɔsɔn, u y'a daminɛ ka kurun kɔnɔ minanw fili jii la. A dugusagwɛ tugu, u ye kurun yɛrɛ minanw dɔw bɔ k'u fili jii la. An ye tile damani kɛ, an tɛ tile ye, an tɛ lolo ye. Fɔnyɔ fana tun b'a nɔkɔrɔ la. An tun ma la a la ko an tun bɛna kisi tugu. Kurun kɔnɔ mɔgɔw bɛɛ tun bɛ kɔngɔ la o mɛnna. O la, Pɔli wilila ka lɔ u cɛma k'a fɔ u ye ko: “N badenw, ne tun y'a fɔ aw ye ko an ka to Kɛrɛti, n'aw tun sɔnna ne ta ma, an bɛ farati koo ni bɔnɛ min na, o tun tɛna an sɔrɔ. Nga aw bɛɛ y'aw jaa gwɛlɛya. Mɔgɔ si nii tɛna to a la, nga an bɛna bɔnɔ kurun le la, bari ne bɛ baara kɛ n ka Ala min ye, ale ka mɛlɛkɛ dɔ y'a yɛrɛ yira ne la kunu sufɛ k'a fɔ n ye ko: ‘I kana siran Pɔli, wajibi lo fɔɔ i ka se Ɔrɔmu masacɛ fɛ k'i ka koow nyafɔ a ye. Ayiwa, Ala ka nyumanya kɔsɔn, a ko i taamanyɔgɔn nunu si nii tɛna to jii la i sababu la.’ Ayiwa n badenw, o tuma na, aw y'aw jaa gwɛlɛya. Ne lanin bɛ Ala la, a ye min fɔ, a bɛna kɛ ten. Wajibi lo, an bɛna se dugukolo ma.” Fɔnyɔ y'an talontalon ka se Kɔgɔjiba la. A tile tan ni naaninan loon dugutilama, kurun bolilaw y'a jatiminɛ k'a ye ko an surunyanin bɛ dugukolo dɔ la. O la, jii dunya bɛ suma ni fɛɛn min ye, u y'o bila jii la. U y'a ye ko jii dunya tɛ tɛmɛ senkala nyaa bi saba ni wolonwula kan. U janfara dɔɔni, u y'a suma tugu, a dunya tun ye senkala nyaa mugan ni seegi ye. U siranna kosɛbɛ ko an ka kurun nin kana taa kabakuru dɔ susu. O la, u ye kurun lalɔfɛn naani siri a kɔfɛ k'olu bila jii la, ka to ka Ala dali ka dugugwɛ makɔnɔ. Kurun bolilaw ye kurundennin jigi jii la k'a kɛ i n'a fɔ u b'a fɛ ka lalɔfɛn dilan kurun nyafɛ le, k'a sɔrɔ u tun bɛ boliyɔrɔ le nyinina. O la, Pɔli y'a fɔ sɔlidasiw n'u nyamɔgɔ ye ko: “Ni mɔgɔ nunu ma to kurun kɔnɔ, aw si tɛna kisi.” Juru min tun kɛnin bɛ ka kurun fila nunu siri nyɔgɔn na, sɔlidasiw y'o tigɛ ka kurundennin to a taara. Sanni dugu ka gwɛ, Pɔli y'a nyini u fɛ ko bɛɛ ka dumuni kɛ. A k'u ma: “A tile tan ni naani filɛ nin ye aw bɛɛ hakili nyagaminin lo, aw si tɛ dumuni kɛra. O la, ne b'a nyini aw fɛ, aw bɛɛ ka dumuni kɛ waasa mɔgɔ si kana sa. Ayiwa, n b'a fɔ aw ye tugu ko kojugu tɛna mɔgɔ si sɔrɔ.” A y'o kuma fɔ ten ka ban minkɛ, a ye buru ta ka barika la Ala ye k'a karikari, k'a daminɛ k'a nyimi. Tɔw jaa nana gwɛlɛya, u bɛɛ ye dumuni kɛ. An bɛɛ lajɛnnin tun ye mɔgɔ kɛmɛ fila ni bi wolonwula ni wɔɔrɔ ye. Bɛɛ fara tuma min na, u ye suman fili jii la waasa kurun ka finyɛya. Dugu gwɛra tuma min na, kurun bolilaw ma dugukolo kɔlɔsi, nga olu ye jisira dɔ le ye ni cɛncɛn b'a daa la. U tun b'a fɛ ka taa lɔ o yɔrɔ la. U ye kurun lalɔfɛn nunu juruw tigɛ k'u to jii la. Lɔgɔ minw bɛ kurun nyatilen, u y'o juruw fana foni. O kɔ, u ye fani siri kurun nyafɛla la waasa fɔnyɔ k'u nyɔnti ka se cɛncɛn yɔrɔ nin ma. Nga kurun taara bali jii kunbɛnyɔrɔ cɛncɛn dɔ la jii jukɔrɔ. Kurun nyafɛla tununa o kɔnɔ fɔɔ a tun tɛ se ka magamaga. Jii fanga y'a kɔfɛla halaki. Sɔlidasiw tun y'a miiri ko kasoden nunu bɛna boli. O la, u tun b'a fɛ k'u bɛɛ faga. Nga sɔlidasi nyamɔgɔ nin tun b'a fɛ ka Pɔli kunmabɔ minkɛ, a ma sɔn sɔlidasiw k'o kɛ. A ko minw bɛ jii lɔn, k'olu ka kɔn ka jigi ka dugukolo sɛgɛrɛ. Ko tɔ nunu bɛna jija ni lɔgɔw ye walima kurun ka lɔgɔcininw. A kɛra ten u bɛɛ bɔra, fɛɛn ma si sɔrɔ. An kisira farati koo nin ma k'an yɛrɛ sɔrɔ ale dugukolonin min kan, u y'a fɔ an ye ko a tɔgɔ ko Maliti. O yɔrɔ mɔgɔw y'an minɛ ka nya. U ye tasumaba mana an ye, bari sanji tun nana ka nɛnɛ bɔ. Pɔli ko a bɛ tasuma lalaga funteni kɔsɔn, fɔnfɔnni dɔ bɔra lɔgɔ la k'a cin a bolo la. Dugulenw ye saa nin dulonnin ye Pɔli bolo la minkɛ, u tora k'a fɔ nyɔgɔn ye ko cɛɛ nin ye subaga ye cɔ. Ko a kɔni ma se ka sa jii la, nga jinaw ma sɔn a ka to nii na. Nga Pɔli ye saa yuguyugu k'a fili tasuma na, a m'a lɔn ko koo yɛrɛ kɛra. Olu kɔni tun bɛ Pɔli bolo funu le kɔnɔna dɔrɔn, walima a ka ben ka sa. Nga u ye kɔnɔni kɛ fɔɔ ka mɛn, foyi ma kɛ Pɔli la minkɛ, u yɛlɛmana ka to k'a fɔ ko Pɔli ye joo dɔ le ye. Jamanatigi ka soo tun man jan o yɔrɔ nin na, ale ye anw ladon a ka soo ka nya, an ye tile saba kɛ yen. A tɔgɔ tun ko Pubiliyusi. O y'a sɔrɔ a facɛ lanin tun lo tɔgɔtɔgɔni bolo. Pɔli taara k'a bolo l'a kuun na, ka Ala dali a ye, a kɛnɛyara. A laban, o mara banabagatɔw bɛɛ nana, u bɛɛ kɛnɛyara fana. U y'an bonya kosɛbɛ. An bɔwaati o yɔrɔ la, an mako tun bɛ fɛɛn o fɛɛn na taama nin ta ye, u y'an bonya n'o bɛɛ ye. Kalo saba le tun tɛmɛna an sɔrɔla ka bɔ Maliti. An ye Alɛkisandiri kurun dɔ le ta, joo tɔgɔ tun b'o min kan ko Filaninw. O kurun nin tun ye nɛnɛ tuma bɛɛ kɛ o yɔrɔ la. An sera Sirakuzi, an ye tile saba kɛ yen. An bɔra o yɔrɔ la, an ma sɔn k'an yɔrɔ janya badagolo la, an sera Ereziyo. A dugusagwɛ, fɔnyɔ bɔra worodugu nyafan fɛ k'an nyɔnti. Tile fila dɔrɔn, an sera Puzɔli, ka taa kalanden dɔw sɔrɔ yen. Olu y'a nyini an fɛ ko an ka lɔgɔkun kelen kɛ n'u ye. A kɛra cogo min na an sera Ɔrɔmu, o le ye nin ye. Kalanden minw bɛ Ɔrɔmu, olu tun y'an kibaru mɛn n'an ma se yen ban. U dɔw bɔra ka n'an kunbɛn fɔɔ Apiyusi lɔgɔfiyɛ la, dɔw nana an kunbɛn Turuwa Tavɛɛni dugu kɔnɔ. Pɔli y'olu ye tuma min na, a ye barika la Ala ye, dɔ farala a ka jagwɛlɛya kan. An sera Ɔrɔmu tuma min na, u sɔnna Pɔli ka boon ta a yɛrɛ ma. Sɔlidasi kelen tun b'a kɔlɔsi. Pɔli senin tile saba, a ye Ɔrɔmu Zuwifu nyamɔgɔw bɛɛ wele. U nana lajɛn tuma min na, a y'a fɔ u ye ko: “N badenw, n ma koo kɛ an ka siya la, n ma koo kɛ min n'an ka sariya tɛ bɛn. Nga u ye ne minɛ Zeruzalɛmu ka n don Ɔrɔmu faamaw bolo. Faamaw ye n ka koo sɛgɛsɛgɛ k'a ye ko ne ma fɛɛn kɛ min bɛ se ka kɛ sababu ye u bɛ n faga. U tun bɛna n bila. Nga Zuwifu nunu ma sɔn, aa! n fana dɛsɛra, n ko n'o lo, fɔɔ Ɔrɔmu masacɛ le ka koo nin nyanabɔ. N y'o fɔ, a ma kɛ i n'a fɔ ko n b'a fɛ ka n ka siya kuun don koo la, o tɛ! O le y'a to ne ye aw wele ka kuma n'aw ye Isirayɛli jigi bɛ min kan, o kama lo ne sirinin bɛ ni jɔrɔkɔ ye.” U y'a jaabi ko: “Zudekaw ma sɛbɛ foyi ci an ma i koo la. Minw bɔra o yɔrɔ la ka na o si ma foyi fɔ an ye ko i ye koo dɔ kɛ. Anw b'a nyini e fɛ, e k'a bɛɛ nyafɔ an ye. An kɔni b'a lɔn ko yɔrɔ bɛɛ mɔgɔw tɛ sɔn e ka diina nin ma.” Ayiwa, u bɛnna loon wɛrɛ la. O loon, Zuwifu nunu nana caaman Pɔli ka soo. K'a ta sɔgɔma fɔɔ wulafɛ, Pɔli ye Ala ka masaya koo fɔ u ye. A jijanin tun bɛ ka Yezu koo don u dusu la. O kama a tun bɛ Ala ka sariya ani kiraw ka sɛbɛw kɔnɔnakumaw nyafɔ u ye. A ka kuma sera dɔw kɔrɔ. Nga dɔw kɔni ma la a la dɛ. Olu ma bɛn u ni nyɔgɔn cɛ. Sanni u ka faran, Pɔli ye kuma kelen fɔ ko: “Nii Senuman ye kira Ezayi ci ka na min fɔ aw faaw ye, o ye tinyɛ ye kosɛbɛ. A tun y'a fɔ a ye ko: ‘Ta'a fɔ siya nin ye k'u bɛna u tulo malɔ kosɛbɛ, k'u tɛna foyi mɛn, k'u bɛna filɛli kɛ kosɛbɛ, k'u tɛna foyi ye. Siya nin tulo ka gwɛlɛ. U y'u tulo datugu, k'u nyaa datugu, waasa u nyaa kana yeli kɛ, u tulo kana mɛnni kɛ, janko u kana faamuli kɛ. N'u tun y'a faamu, u tun bɛna u sɔɔn yɛlɛma. O la, ne Ala tun bɛna u kisi.’ “Ayiwa, ne Pɔli b'a fɔ aw ye ko Ala ka kuma bɛna fɔ siya wɛrɛw le ye sisan. Olu bɛna na a lamɛn, ka kisi.” [ Pɔli y'o fɔ ka ban tuma min na, Zuwifuw tora ka nyɔgɔn sɔsɔ kosɛbɛ n'u bɛ taara soo.] Pɔli tun ye boon min ta, a ye saan fila dafanin kɛ o kɔnɔ. Mɔgɔ o mɔgɔ tun bɛ taa bɔ a fɛ, a tun b'u bɛɛ kunbɛn ka nya. A tun bɛ Ala ka masaya koo fɔ u ye, ka mɔgɔw kalan Matigi Yezu Krista ka koow la ni jagwɛlɛya ye, mɔgɔ si tun t'a bali. Ne Pɔli min ye Yezu Krista ka jɔɔn ye, a ye ne wele ka kɛ ciden ye, Ala ye ne woloma ka ne kɛ a ka kibaru diman fɔbaga ye. Ala yɛrɛ tun y'o kibaru diman nin koo fɔ a ka kuma kɔnɔ a ka kiraw barika la, o y'a Dencɛ ka koo ye, ale min wolola Dawuda kɔmɔgɔw fɛ ka kɛnyɛ ni adamadenya ye. Nii Senuman y'a yira ko an Matigi Yezu Krista ye Ala Dencɛ ye, o sebagaya lɔnna a kununni fɛ a sanin kɔ. An ye nɛɛma sɔrɔ ale le barika la ka kɛ cidenw ye, waasa ka siya wɛrɛw bɛɛ dɛmɛ u k'u jigi la Krista kan ka mɛnni kɛ a fɛ, janko Ala tɔgɔ ka bonya. Yezu Krista ye minw wele aw fana ye u dɔw ye. Ala ye aw minw wele ka kɛ a ka jama ye, n'aw koo ka d'a ye n'aw bɛ Ɔrɔmu dugu kɔnɔ, ne bɛ bataki nin ci aw bɛɛ ma. An Faa Ala n'an Matigi Yezu Krista ka nɛɛma ni hɛrɛ kɛ aw ye. Ne bɛ n ka Ala fo Yezu Krista barika la, aw bɛɛ kɔsɔn, bari aw tɔgɔ sera yɔrɔ bɛɛ la ko aw lara Krista la. Ne bɛ Ala min bato ni n dusu ye ani k'a Dencɛ koo fɔ, o min ye kibaru diman ye, ale ye ne seere ye ko ne tɛ nyinɛ aw kɔ abada. Ne bɛ to ka Ala dali tuma bɛɛ ko n'a kɛra a sago ye, a ka sira di ne ma ka se ka taa aw fɛ yen sisan. Bari ne b'a fɛ kosɛbɛ ka se aw fɛ, ka Nii Senuman ka seko dɔ fɔ aw ye waasa aw ka se ka fanga sɔrɔ, walima, ka nyɔgɔn jaa gwɛlɛya an jigi barika la. N badenw, ne t'a fɛ k'aw to nin koo lɔnbaliya la, sinyɛ caaman ne y'a latigɛ ko ne bɛna taa aw fɛ, waasa ka se ka baara sabatinin kɛ aw cɛma i n'a fɔ n b'a kɛ siya wɛrɛw cɛma cogo min na, nga ne tɛ sira sɔrɔla. Ne ka kan ka baara kɛ mɔgɔw cɛma minw nyaa yɛlɛma, ni minw ta ma yɛlɛ, ani kolɔnbagaw ni kolɔnbaliw cɛma. O cogo la, a ka di ne ye kosɛbɛ ka kibaru diman fɔ aw Ɔrɔmukaw ye fana. Ne tɛ maloya ka kibaru diman fɔ, bari Ala ka sebagaya koo lo, mɔgɔ minw bɛ la a la, kisili ye olu ta ye, k'a daminɛ Zuwifu ma fɔlɔ, o kɔ siya wɛrɛw. Kibaru diman le b'a yira ko Ala bɛ mɔgɔ jati mɔgɔtilennin ye a jigi kɔsɔn, a bɛ to o tilenninya la jigi barika la, i n'a fɔ a fɔra cogo min na Ala ka kuma na ko: “Mɔgɔ min y'a jigi la Ala kan, Ala ka sɔrɔ k'a jati mɔgɔtilennin ye, o tigi bɛna kisi.” O le kɔsɔn ka Ala to sankolo la, a bɛ dimi mɔgɔw fɛ minw tɛ siran a nya, n'u bɛ tilenbaliyako kɛ ka tinyɛ dogo. Bari adamaden bɛ se ka Ala ka koo minw faamu, olu yirala u la ka gwɛ: Ala yɛrɛ le y'o yira u la. Tinyɛ na, k'a ta dinyɛ dantuma na, adamadenw bɛ Ala ka koo yebaliw ye ka gwɛ a ka baara fɛ, o min ye a ka sebagaya banbali n'a ka Alaya ye. O la, tinyɛ sɔrɔsira t'u fɛ tugu. Bari u ye Ala lɔn, nga u ma sɔn k'a bato i n'a fɔ Ala, ani u ma sɔn ka barika la a ye a cogo la, u filila u ka miiriya la ani ka kɛ nalomanw ye ka tunu dibi la. U b'u yɛrɛ jati kolɔnbagaw ye nga u ye nalomanw ye. U ma Nɔɔrɔtigi Ala yɛrɛ bato fɔɔ adamaden jaa ni kɔnɔw ni sennaanifɛnw ni fɛɛn minw bɛ fofo duguma, u bɛ olu le bato. O le y'a to Ala y'u to u ka nigɛjuguw la, fɔɔ u bɛ kakalaya kɛ k'u yɛrɛ dɔgɔya u ni nyɔgɔn cɛ. U ye Ala ka tinyɛ to yen, ka tugu galon kɔ, ka danfɛnw le bato ka baara kɛ u ye, u ma Danbaga bato, ale min ka kan ka bonya tuma bɛɛ. Amiina. O le y'a to, Ala y'u to yen nigɛjuguw la o min ye malobaliyako ye. U ka musow tɛ cɛko kɛ n'a nyaa ye tugu. Olu yɛrɛ bɛ la ni nyɔgɔn ye. O cogo la, cɛɛw tɛ musow nyini tugu fɔɔ u b'u cɛnyɔgɔnw kɛ i n'a fɔ musow. O le ka di u ye. O la, u b'o sara sɔrɔ u yɛrɛ ma, o min bɛnnin bɛ u ka kɛta ma. U ma sɔn ka Ala lɔn minkɛ, o la Ala fana y'u to u ka miiriyajugu la, o cogo la, u man kan ka koo minw kɛ, u b'o le kɛ. Tilenbaliyako sifa bɛɛ b'u kɔnɔ: u bɛ kojugu kɛ, u kɛra mɔgɔkolonw ani mɔgɔjuguw ye, nyagoya fana b'u la, nyɔgɔnfagako le b'u kɔnɔ, ni kɛlɛko, ni benkanni, juguya, ani u bɛ mankan ci. U bɛ nyɔgɔn tɔgɔjugu fɔ, Ala juguw lo, u b'u yɛrɛ bonya ka kɛlɛw tigɛ, u daa ka ca, u bɛ se kojugu la kosɛbɛ, u murutinin bɛ u wolobagaw ma. U kɛra nalomanw ye, u tɛ lɔ kelen kan, u ka koo ka gwɛlɛ, u fana tɛ makari nyɔgɔn na. U bɛ Ala ka koo latigɛnin lɔn, ko ni mɔgɔ min b'o koo nyɔgɔn kɛ o tigi ka kan ni saya ye, u tɛ dan o kɛli ma, nga u b'o kɛbagaw jaa gwɛlɛya fana. E kɛra mɔgɔ o mɔgɔ ye, tinyɛ t'i fɛ k'i tɔnyɔgɔn jalaki, bari e b'i tɔnyɔgɔn jalaki koo minw na, e yɛrɛ b'o nyɔgɔn kɛ. O la, e yɛrɛ le b'e yɛrɛ jalakila. Minw b'o nyɔgɔn kɛ, an y'a lɔn ko Ala b'o tigi kiti ka kɛnyɛ ni tinyɛ ye. E min b'o koow kɛbaga nunu jalaki, k'a sɔrɔ ele fana b'o koow nyɔgɔn kɛ, e bɛ miiri ko i bɛna kisi Ala ka kiti ma wa? Walima e tɛ Ala ka nyumanya dafanin n'a ka munyuli, an'a ka timinadiyali jati foyi ye wa? K'a sɔrɔ a b'i dɛmɛ a ka nyumanya barika la ka nimisa ka faran i ka kojugu la. E ka dusukungwɛlɛya n'i ka murutili kɔsɔn, e bɛ dimi fara dimi kan Ala fɛ, k'a ka dimi bɔlon n'a ka kiti tilennin loon makɔnɔ. Ale le “bɛna mɔgɔ kelen kelen bɛɛ sara ka kɛnyɛ n'u ka kɛta ye.” Mɔgɔ minw jijanin lo ka baaranyuman kɛ n'u bɛ bonya, ni kunkɔrɔta ani hɛrɛ banbali le nyinina, sini hɛrɛ ye olu ta ye. Nga minw bɛ sɔsɔli kɛ ka muruti tinyɛ ma ka to kojugu la, olu ta ye dusubɔ ni dimi ye. Mɔgɔ minw bɛ kojugu kɛ, k'a ta Zuwifu ma fɔlɔ, o kɔ siya tɔw, tɔɔrɔ ni dusukasi bɛna kɛ olu bɛɛ ta ye. Minw bɛ konyuman kɛ, k'a ta Zuwifu ma fɔlɔ, o kɔ siya tɔw, olu bɛɛ bɛna bonya ni kunkɔrɔta ani hɛrɛ sɔrɔ. Bari Ala tɛ mɔgɔ bɔ mɔgɔ la. Mɔgɔ o mɔgɔ ye kojugu kɛ ni u tɛ Musa ka sariya lɔn, olu bɛna halaki ni sariya niin t'o la, a bɛ minw fɛ, n'u ye kojugu kɛ, olu fana bɛna kiti ka kɛnyɛ ni sariya ye. A ma kɛ ko mɔgɔ minw bɛ sariya kuma lamɛn, k'olu le ye mɔgɔtilenninw ye Ala fɛ, mɔgɔ minw b'a sira taama, olu le bɛna jati mɔgɔtilenninw ye Ala fɛ. Ala tun ye sariya min di Musa ma, ale tɛ siya wɛrɛ minw fɛ, olu bɛ sariya sira taama, u ka cogo la, k'a sɔrɔ u ma Ala ka sariya lɔn. O b'a yira ko u ka kan ka min kɛ, u b'o lɔn. N'u bɛ to k'u yɛrɛ jalaki, ani ka tinyɛ di u yɛrɛ ma, u b'a yira ten ko sariya koo b'u hakili la. Ka kɛnyɛ ni ne ka kibaru diman ye, o le bɛna ye loon min na Ala bɛna mɔgɔw kiti u ka koo dogoninw kama, Yezu Krista barika la. E min b'i yɛrɛ wele ko Zuwifu, k'i jigi la sariya kan, ani ka to k'i yɛrɛ bonya i ka Ala koo la, e min bɛ Ala sago lɔn, ani e min bɛ konyuman lɔn sariya barika la, e min y'a fɔ ko e ye finyɛntɔw bere minɛbaga ye, ko mɔgɔ minw bɛ dibi la, e bɛ olu dɛmɛ k'u nyaa yɛlɛ, ko i ye nalomanw ni kolɔnbaliw ka karamɔgɔ ye, bari lɔnniyasɛbɛ ni tinyɛ yɛrɛyɛrɛ bɛ sɔrɔ sariya barika la. Ayiwa, e min bɛ mɔgɔ wɛrɛw kalan, e t'i yɛrɛ kalan! E b'a fɔ k'u kana sonyali kɛ, e do b'a kɛra. E min b'a fɔ k'u kana kakalaya kɛ, e yɛrɛ b'o kɛ! I ko joko man d'i ye fewu, e do bɛ josɔnfɛn sonya. E min b'i yɛrɛ bonya sariya kɔsɔn, e bɛ Ala tɔgɔ cɛn i ka sariya labatobaliya sababu la. I n'a fɔ a fɔra Ala ka kuma na cogo min na ko: “Ala tɔgɔ cɛnna aw sababu la siya wɛrɛw cɛma.” Kɛnɛkɛnɛko ka nyi n'i bɛ sariya labato, nga n'i tɛ sariya labato, i ka kɛnɛkɛnɛko tɛ jati tugu, i bɛ jati kɛnɛkɛnɛbali ye. Ni kɛnɛkɛnɛbali bɛ sariya sira taama, a tɛna jati i n'a fɔ mɔgɔkɛnɛkɛnɛnin ye wa? Kɛnɛkɛnɛbali min bɛ sariya labato, ale bɛna i jalaki, e min bɛ sariya cɛn. K'a sɔrɔ a sɛbɛ b'i bolo, i kɛnɛkɛnɛnin lo fana. Ka kɛ Zuwifu ye, o tɛ siyako dama ye, kɛnɛkɛnɛko fana ma kɛ farisogo yɔrɔ dɔ tigɛko dama ye. Nga Zuwifuya yɛrɛ yɛrɛ ye kɔnɔnako ye, kɛnɛkɛnɛkonyuman ye dusulako ye Nii Senuman barika la, o ma kɛ sariyako dama ye. O Zuwifu nyɔgɔn ka bonyako tɛ bɔ mɔgɔ fɛ, nga Ala fɛ. O tuma na, ka kɛ Zuwifu ye, o tɔnɔ bɛ min sa? Kɛnɛkɛnɛko tɔnɔ ye jumɛn ye? O tɔnɔ ka bon cogo bɛɛ la. Ala ka kuma kalifara Zuwifuw le ma. Ayiwa, ni u dɔw ma kɛ mɔgɔsɛbɛw ye, Ala ka tilenninya bɛ se ka tunu olu kɔsɔn wa? Ayi dɛ! Hali ni adamadenw bɛ galon tigɛ, Ala bɛ tinyɛ fɔ, i ko a fɔra cogo min na ko: “I ka kuma ka kɛ tinyɛ ye, mɔgɔ si kana se k'i jalaki.” Nga ni Ala ka tilenninya bɛ lɔn adamaden ka tilenbaliya barika la, an bɛna mun le fɔ sa? O kɔrɔ ko ni Ala dimina an kɔrɔ, o ye kojugu ye wa? N bɛ kumana adamadenw kumacogo le la. Ayi dɛ! N'a kɛra ten, Ala bɛn'a kɛ cogo di ka dinyɛ kiti? Ni ne ye galon tigɛ, o min barika la Ala ka tinyɛ bɛ lɔn kosɛbɛ ani bonya bɛ la a kan fana, mun na ne bɛ jalaki i n'a fɔ kojugukɛla? O la, dɔw b'a fɔ ko: “An ka kojugu kɛ waasa konyuman ka sɔrɔ o la.” Mɔgɔ dɔw bɛ ne tɔgɔ cɛn ko ne b'o le fɔ. O mɔgɔ nunu ka jalakiko ka nyi. Nga, mun lo sa? An Zuwifuw ka fisa ni tɔw ye wa? Fewu, bari an y'a fɔ ka ban ko Zuwifu ni siya wɛrɛw bɛɛ bɛ kojugu ka fanga kɔrɔ. I ko a fɔra Ala ka kuma na cogo min na ko: “Mɔgɔtilennin si tɛ yen, hali mɔgɔ kelen yɛrɛ. O si tɛ koo lɔn, o si tɛ Ala nyini fana. Mɔgɔ bɛɛ filila ka kɛ mɔgɔjuguw ye, o si tɛ konyuman kɛ, hali mɔgɔ kelen yɛrɛ. U gɔnɔ kɛra i n'a fɔ kaburudayɛlɛnin, u bɛ mɔgɔw lafili n'u daa ye, u dalakuma bɛ i n'a fɔ saa ka baga. U daa ka finyɛ mɔgɔ dangali ni kumajugufɔ la. U ka teli mɔgɔfagako la. U bɛ tɛmɛ yɔrɔ o yɔrɔ, u bɛ cɛnni ani bɔnɛ le to o kɔ. U mako tɛ hɛrɛko la. U tɛ siran Ala nya fewu.” An y'a lɔn ko sariya bɛ fɛɛn minw bɛɛ fɔ, a b'o fɔ mɔgɔw ye minw b'a ka fanga kɔrɔ, janko mɔgɔ si kana se ka foyi fɔ, ani mɔgɔ bɛɛ ka jalaki Ala nyakɔrɔ. O le y'a to mɔgɔ si tɛ se ka kɛ mɔgɔtilennin ye Ala nyakɔrɔ sariya labatoli barika la, bari an bɛ kojugu lɔn sariya le barika la. Nga sisan, Ala y'a yira ko Ala bɛna mɔgɔw jati mɔgɔtilenninw ye sababu min na, sariya seen t'o la. Sariya ni kiraw ye o le fɔ. Mɔgɔ o mɔgɔ lara Yezu Krista la, Ala bɛ olu bɛɛ jati mɔgɔtilenninw ye, wolomani t'o la. Bari mɔgɔ bɛɛ ye kojugu kɛ, u yɔrɔ ka jan Ala la. Nga Ala makarila u la ka k'u jati mɔgɔtilenninw ye Yezu Krista sababu la, ale min y'u kunmabɔ. Mɔgɔ minw lar'a la ko a sara olu kɔsɔn, Ala y'a kɛ olu kunmabɔ saraka ye, waasa k'ale Ala yɛrɛ ka tilenninya yira, bari mɔgɔ minw tun ye kojugu kɛ fɔlɔfɔlɔ, a ma olu jalaki a ka munyuli waati la. O la, mɔgɔ minw lara Yezu la, Ala y'a ka tilenninya yira ni olu ye sisan, k'u kɛ mɔgɔtilenninw ye, janko a ka tilenninya ka ye. Adamaden ka yɛrɛbonyayɔrɔ bɛ yen tugu wa? Ayi, a tɛ yen. Mun le ye o kɛ sa? A ka kɛwalinyuman wa? Ayi, a ka lanaya kɔsɔn lo. Bari an b'a miiri ko adamaden bɛ jati mɔgɔtilennin ye a jigi le barika la. Kɛwalinyuman seen t'o la. Walima Ala ye Zuwifuw dama ka Ala ye wa? Siya wɛrɛw ka Ala tɛ fana wa? Ɔnhɔn, siya wɛrɛw ta lo fana kɛ. Bari Ala kelenpe le bɛ yen ale min bɛna mɔgɔkɛnɛkɛnɛninw jati mɔgɔtilenninw ye u jigi barika la, ka kɛnɛkɛnɛbaliw jati mɔgɔtilenninw ye o jigi kelen barika la. A ma kɛ ko an b'a fɛ ka sariya sanga burun jigi kama dɛ. Ayi! An b'a fɛ sariya koo ka taa nya kosɛbɛ. An bɛna mun le fɔ an bɛma Ibrayima koo la? A ye mun le sɔrɔ adamadenya barika la? Ni Ibrayima jatira mɔgɔtilennin ye a ka kɛwaliw barika la, a bɛ se k'a yɛrɛ bonya, nga a tɛ se k'o kɛ Ala nyakɔrɔ. Bari a fɔra Ala ka kuma na ko: “Ibrayima lara Ala la, o la, a jatira mɔgɔtilennin ye.” Mɔgɔ min ye baara kɛ, ale ka sara tɛ jati bonyafɛn ye, a ka kan n'a ye le. Mɔgɔ min ma kɛwalinyuman kɛ, k'a sɔrɔ a y'a jigi la Ala kan, ale min bɛ sɔn ka mɔgɔkolon kɛ mɔgɔsɛbɛ ye, a bɛna o tigi jati mɔgɔtilennin ye a ka lanaya kɔsɔn. Ala bɛ mɔgɔ min jati mɔgɔtilennin ye n'a ma o tigi ka kɛwali jati, masacɛ Dawuda b'o tigi ka dagamuko fɔ ko: “Mɔgɔ min ka kojuguw yafara, n'a ka kojuguw yafara pewu pewu, o tigi dagamuna. Matigi tɛ mɔgɔ min ka kojugu jati tugu, o tigi dagamuna.” Dagamu min koo fɔra dɛ, ale tɛ dan Zuwifuw dama ma, siya wɛrɛw fana niin b'a la. An y'a fɔ ka ban ko Ibrayima lara Ala la, o le y'a to Ala y'a jati mɔgɔtilennin ye. A jatira mɔgɔtilennin ye tuma jumɛn? A tun ma kɛnɛkɛnɛ tuma min na wa, walima a kɛnɛkɛnɛnin kɔ? O ma kɛ a kɛnɛkɛnɛnin kɔ dɛ, o kɛra n'a ma kɛnɛkɛnɛ fɔlɔ. O kɔ, kɛnɛkɛnɛko nana d'a ma ka kɛ taamasinyɛ ye, k'a yira ko a lara Ala la minkɛ, Ala y'a jati mɔgɔtilennin ye o kɔsɔn k'a to a ka kɛnɛkɛnɛbaliya la. O cogo la fana, kɛnɛkɛnɛbali minw bɛɛ lara Ala la ni olu fana jatira mɔgɔtilenninw ye Ala fɛ, Ibrayima kɛra u bɛɛ faa ye. A fana kɛra mɔgɔkɛnɛkɛnɛninw faa ye, olu minw ma u jigi la kɛnɛkɛnɛko dama kan, nga u y'u jigi la Ala kan i n'a fɔ an faa Ibrayima y'a kɛ cogo min na k'a sɔrɔ a tun ma kɛnɛkɛnɛ fɔlɔ. Ala ye layidu ta Ibrayima ye ko a bɛna dinyɛ di a n'a kɔmɔgɔw ma ka kɛ u ta ye. O ma kɛ sariya labatoli kɔsɔn dɛ, nga a y'o kɛ bari Ibrayima lar'a la, o la, Ala y'a jati mɔgɔtilennin ye. N'o koo tun bɛ sɔrɔ sariya labatoli fɛ, jigiko tun bɛna kɛ fu ye, layidu fana tun bɛna kɛ fu ye. Bari dusudimi bɛ sɔrɔ sariya sababu la. Sariya siginin tɛ yɔrɔ min na, sariya cɛnko fana tɛ fɔ o yɔrɔ la. Ayiwa, Ala ye koo min layidu ta, o sɔrɔko bɛ bɔ jigi le barika la, janko o ka kɛ nɛɛmako ye, Ibrayima kɔmɔgɔw bɛɛ ka se k'u niyɔrɔ sɔrɔ o la. Mɔgɔ minw bɛ sariya labato, olu dama ka koo tɛ, nga mɔgɔ minw b'u jigi la Ala kan i n'a fɔ an bɛɛ faa Ibrayima, olu fana ta lo. A fɔra Ala ka kuma na ko: “Ne Ala y'i kɛ siya caaman faa ye.” Tinyɛ lo Ala nyakɔrɔ, an faa lo a y'a jigi la ale min kan, ale lo bɛ suuw kunun, fɛɛn bɛɛ danbaga lo fana. Mɔgɔ tun tɛ se k'a jigi la fɛɛn min kan, a y'a jigi la o kan. O la, a kɛra siya caaman faa ye, ka kɛnyɛ ni Ala tun ye min fɔ a ye ko: “I ka kɔmɔgɔw bɛna caya.” A tun kɔrɔla kosɛbɛ, a sii tun sera saan kɛmɛ nyɔgɔn ma, a ka muso Sara fana sii tun tɛmɛna denwolo ma, o bɛɛ n'a ta a jigi ma tigɛ, k'a sɔrɔ a tun surunyana saya ma. Ala ka layidu koo ta faan fɛ, a jigi ma tigɛ fewu, nga jigi barika la a ye fanga sɔrɔ ka bonya la Ala kan. A lanin tun b'a la kosɛbɛ ko Ala y'a daa di koo min na, ko see b'a ye k'o kɛ. O le y'a to “Ala y'a jati mɔgɔtilennin ye.” A fɔra Ala ka kuma na ko: “O le y'a to a jatira,” o kuma nin ma fɔ ale dama kɔsɔn dɛ. Nga an fana niin b'o la, Ala bɛna an minw jati mɔgɔtilenninw ye bari an lara Ala la ale min y'an Matigi Yezu kunun. U ye Yezu faga an ka kojugu kɔsɔn, a kununna janko k'an kɛ mɔgɔtilenninw ye. An jatira mɔgɔtilenninw ye jigi barika la, o cogo la, hɛrɛ sɔrɔla an ni Ala cɛ an Matigi Yezu Krista barika la. Ale Yezu barika la fana an ye niyɔrɔ sɔrɔ o nɛɛma nin na an ka jigi sababu la. An bɛ o min na, k'an yɛrɛ bonya Ala ka nɔɔrɔ koo la, bari an bɛna o nyɔgɔn sɔrɔ. O dama tɛ, an bɛ nisɔndiya an ka tɔɔrɔkow la, bari an lanin b'a la ko tɔɔrɔ kɔsɔn an bɛ munyu. Munyuli bɛ na ni sesɔrɔli ye, ni see sɔrɔla, jigi fana bɛ sɔrɔ. Jigi do tɛ taa ka mɔgɔ to bololakolon, bari Ala y'an kanu cogo min na, o b'an dusu la Nii Senuman barika la, a y'ale min d'an ma. Tinyɛ na, tuma min na barika tun tɛ an na, Krista sara mɔgɔjuguw kɔsɔn o waati latigɛnin na. A ka gwɛlɛ mɔgɔ dɔ ka sɔrɔ min bɛ sɔn ka sa mɔgɔtilennin kɔsɔn, nga n'a sɔrɔ dɔ bɛ sɔn ka sa mɔgɔnyuman dɔ kɔsɔn. Nga Ala y'a yira an na ko a b'an kanu, o le y'a to k'an to an ka kojugu la, Krista sara an kɔsɔn. An jatira mɔgɔtilenninw ye Krista ka saya barika la minkɛ, siga t'a la, an bɛna kisi Ala ka dimi ma fana ale kelen barika la. Bari an tun ye Ala juguw ye tuma min na, Ala sɔnna anw ka bɛn n'ale ye a Dencɛ ka saya barika la. An bɛnnin kɔ n'a ye, siga t'a la, an bɛna kisi a Deen barika la bari a bɛ nii na. O dama tɛ, an bɛ nisɔndiya Ala koo la an Matigi Yezu Krista barika la, ale min sababu la, anw ni Ala cɛ bɛnna. Kojugu kɛko daminɛna mɔgɔ kelen le sababu la dinyɛ na, saya fana nana kojugu sababu la. O cogo la fana, saya sera mɔgɔ bɛɛ ma bari bɛɛ ye kojugu kɛ. K'a ta o waati la ka na se sariya sɔrɔwaati ma, kojuguko tun bɛ yen, nga kojugukɛla ma jalaki i n'a fɔ sariya sigira tuma min na. O bɛɛ n'a ta, k'a ta Adama ka waati ma fɔɔ ka na se Musa ka tile ma, mɔgɔw tun bɛ sa, hali min ma kojugu kɛ Adama ka kojugu kɛcogo la, ale min banna ka Ala ka kuma labato. Mɔgɔ min tun ka kan ka na, Adama tun ye o tigi jaa ye. Nga kojugu min kɛra, o ni Ala ka makari tɛ se ka suma, bari, ni mɔgɔ kelen ka kojugu kɛnin kɔsɔn mɔgɔ caaman sara, Ala ka nɛɛma ta tɛ se ka fɔ a y'o min kɛ mɔgɔ caaman ye mɔgɔ kelen barika la, o min ye Yezu Krista ye. Ala ka makari ni mɔgɔ kelen nin ka kojugu ka baara tɛ kelen ye, bari mɔgɔ kelen ka kojugu kɔsɔn, Ala ye kiti tigɛ ka jalaki ben mɔgɔw kan, nga kojugu caaman kɛnin kɔ, Ala makarila u la ka cogo di u ma u ka se ka jati mɔgɔtilenninw ye. Ni mɔgɔ kelen ka kojugu kɔsɔn, saya donna dinyɛ na, mɔgɔ minw sɔnna Ala ka nɛɛma ma n'a makarila u la k'u jati mɔgɔtilenninw ye, olu bɛna to hɛrɛ la ka kuntigiya kɛ Yezu Krista kelenpe barika la. Ayiwa, mɔgɔ kelen ka kojugu kɔsɔn jalaki sera mɔgɔ bɛɛ ma. O cogo la fana, mɔgɔ kelen ka konyuman sababu la mɔgɔ caaman bɛ jati mɔgɔtilenninw ye ka hɛrɛ sɔrɔ. Mɔgɔ caaman kɛra kojugukɛlaw ye, mɔgɔ kelen ka murutili kɔsɔn, o cogo la fana mɔgɔ kelen ka konyuman kɛli kɔsɔn, mɔgɔ caaman bɛna jati mɔgɔtilenninw ye. Sariya sigira janko kojugu ka barika sɔrɔ, nga kojugu barika bonyana yɔrɔ min na, Ala y'a ka makari bonya o yɔrɔ la. Kojugu tun ye fanga sɔrɔ mɔgɔw kan saya barika la cogo min na, o cogo la fana, Ala ka tilenninya barika la, a ka makari bɛ fanga sɔrɔ ka hɛrɛ banbali di mɔgɔw ma an Matigi Yezu Krista barika la. An ka mun le fɔ sa? An ka kan ka to kojugu la janko Ala ka makari bɛ bonya wa? Ayi dɛ! An minw kɛra i n'a fɔ suu, kojuguko ta faan fɛ, an bɛ se ka to kojugu la cogo di? Yala aw m'a lɔn ko an minw bɛɛ batizera Yezu Krista tɔgɔ la, ko an batizera ka jɛn n'a ye a ka saya koo la fana wa? An batizera ka jɛn n'a ye a ka saya koo la minkɛ, an fana suu donna n'a ye janko Krista kununna Faa Ala ka sebagaya barika la cogo min na, an fana jogo ka yɛlɛma ka kɛ kura ye. Bari n'an jɛnna n'ale ye sɛbɛ la a ka saya koo la, an fana bɛna kunun n'a ye. An ka nin faamu kosɛbɛ, ko an jogokɔrɔ korila ka gwengwen nyɔgɔn fɛ ni Krista ye, janko o daa ka bila, an fana k'an yɛrɛ sɔrɔ ka bɔ kojugu bolo. Bari ni mɔgɔ min sara, o tigi daa tɛ kojuguko la. N'an jɛnna ni Krista ye ka sa, an bɛ la a la ko an bɛna to nii na a fɛ. Tinyɛ na, an y'a lɔn ko Krista kununna, ale tɛ sa tugu, saya tɛ se a kɔrɔ tugu. Bari a sara tuma min na, a sara janko ka kojugu nagasi tuma bɛɛ, sisan a nyanaman lo Ala kɔsɔn. O cogo la, aw fana k'aw yɛrɛ jati i n'a fɔ suu, kojuguko ta faan fɛ, ka kɛ mɔgɔ nyanaman ye Ala ta faan fɛ Yezu Krista barika la. O la, aw farisogo min bɛna toli, aw kana sɔn kojugu ka kuntigiya kɛ ale la tugu, k'aw bila nigɛjugu la. Aw kana aw ka farikolo yɔrɔ si kɛ kojugukɛfɛn ye ka to kojugu la. Nga aw ka kɛ i n'a fɔ mɔgɔ min sara ka kunun, k'aw farikolo yɔrɔ bɛɛ kɛ konyumankɛ ta ye, k'u bila Ala ka baara la. Kojugu tɛna see sɔrɔ aw kan tugu. Bari aw tɛ sariya kɔrɔ tugu, nga aw bɛ nɛɛma le kɔrɔ. O tuma na, an ka to ka kojugu kɛ bari an tɛ sariya kɔrɔ tugu fɔɔ nɛɛma wa? Ayi dɛ! Yala aw m'a lɔn ko n'aw y'aw yɛrɛ di fɛɛn min ma ka kɛ i n'a fɔ a ka jɔɔn, ka to ka mɛnni kɛ a fɛ, aw bɛ kɛ o fɛɛn nin ka jɔɔn ye wa? N'a kɛra kojuguko ye, o laban ye halakili ye. Nga Ala sago kɛli bɛ na ni tilenninya ye. An bɛ barika la Ala ye bari aw tun bɛ kojugu bolo, nga sisan u y'aw kalan min na, aw sɔnna o la n'aw dusukun bɛɛ ye, k'aw yɛrɛ sɔrɔ ka bɔ kojugu bolo ka kɛ Ala ka jɔɔnw ye ka tilenninyakow kɛ. Ne bɛ kuma aw fɛ adamaden ka miiriya cogo la, o min bɛ kɛnyɛ n'aw ka barikatanya ye. Aw tun y'aw yɛrɛ di kojugu ma ka kɛ i n'a fɔ a ka jɔɔn ka koferekeninw kɛ, ka muruti Ala ma. Sisan aw ka kɛ Ala ka jɔɔnw ye ka tilenninyako kɛ, ka kɛ a ta ye pewu pewu. Tuma min na aw tun bɛ kojugu bolo, tilenninyako tun tɛ aw ka sira la. Aw ye mun le sɔrɔ o la, ni maloya tɛ bii nin na? Bari o bɛɛ laban ye halaki ye. Nga sisan aw y'aw yɛrɛ sɔrɔ ka bɔ kojugu bolo ka kɛ Ala ka jɔɔnw ye, aw bɛ fɛɛn min sɔrɔ o la, o ye dusukun saniyako ye o min laban ye hɛrɛ ye min tɛ ban. Bari kojugu sara ye halakili ye, nga Ala ka makariko, o bɛ hɛrɛ banbali di an Matigi Yezu Krista barika la. N balimaw, n y'a lɔn ko aw bɛ sariya koo lɔn. O la, n bɛ nin kuma fɔ aw ye. Aw b'a lɔn ko ni mɔgɔ bɛ nii na, o tuma na a bɛ sariya kɔrɔ. Muso min furula, sariya bɛ yen min b'a wajibiya ka to a cɛɛ fɛ n'o bɛ nii na, nga n'a cɛɛ sara, muso nin b'a yɛrɛ sɔrɔ ka bɔ sariya nin kɔrɔ. N'a cɛɛ bɛ nii na n'a taara furu cɛɛ wɛrɛ fɛ, u bɛn'a fɔ ko a ye kakalaya kɛ. Nga n'a cɛɛ sara a ka sɔrɔ ka taa furu, o sariya nin t'a kan tugu, a fana ma kakalaya kɛ. N balimaw, aw fana bɛ ten. Krista ka saya barika la, aw y'aw yɛrɛ sɔrɔ ka bɔ sariya kɔrɔ ka kɛ a ta ye sisan, ale min kununna, janko an ka baara sabatinin kɛ Ala ye. An fana, tuma min na nigɛjugu tun ye see sɔrɔ an kan, kojugu nigɛ tun b'an minɛ k'an tɔɔrɔ sariya barika la, janko an ka baarajugu kɛ o min bɛ laban ni halakili ye. Nga fɛɛn min tun y'an kɛ jɔɔn ye, an hɔrɔnyara ka bɔ ale bolo. Sisan, an bɛ se ka baara kɛ Ala ye cogokura la Nii Senuman barika la, o tɛ kɛ cogokɔrɔ la tugu, o min koo fɔra sariya la. An ka mun le fɔ sa? O tuma na sariya kɛra kojugu ye wa? Ayi dɛ! Ne ye kojuguko faamu sariya le barika la. Ne tun tɛn'a lɔn ko n'i nyaa bɔra i tɔnyɔgɔn ka fɛɛn dɔ fɛ, o ye kojugu ye, n'a tun ma fɔ sariya la ko: “I nyaa kana bɔ i tɔnyɔgɔn ka fɛɛn fɛ.” O cogo la, kojugu ye sira sɔrɔ ka banba ka nigɛjugu sifa bɛɛ don ne dusu la sariya barika la. Bari ni sariya siginin tɛ yen, kojuguko fana tɛ yen. Fɔlɔfɔlɔ, Ala ka sariya tun ma sigi tuma min na, ne tun bɛ hɛrɛ la, nga a nana sigi tuma min na, kojugu ye fanga sɔrɔ. O cogo la, sariya min ka kan ka hɛrɛ kɛ mɔgɔ ye, ale kɛra ne fɛ halakifɛn ye. Bari kojugu ye sira sɔrɔ sariya barika la k'a kɛ ne filila ka tunu pewu. O cogo la, sariya ka nyi, Ala ye min fɔ, o fana ka nyi ani a tilennin lo. O tuma na, fɛɛn min ka nyi, ale le kɛra ne fɛ halakifɛn ye wa? Ayi dɛ! Nga kojugu lo, fɛɛn min ka nyi, kojugu ye cogo nyini o le sababu la ka ne halaki, janko a ka se k'a yɛrɛ yira k'a gwɛ kosɛbɛ ko ale ka fari sariya barika la. An y'a lɔn ko sariya bɔra Ala fɛ, nga ne do ye barikatan ye, ne bɛ kojugu bolo i n'a fɔ jɔɔn. Ne bɛ min kɛ, ne t'o faamuna. Fɛɛn min ka di ne ye, ne t'o kɛ, nga fɛɛn man di ne ye ne b'o le kɛ. Fɛɛn min man di ne ye, ni ne b'o le kɛ, o tuma na, ne sɔnna ko sariya ye fɛnnyuman ye. O la do, fɛɛn min bɛ kɛra, o tɛ ne nɔɔ ye, kojugu min bɛ ne dusu la, ale nɔɔ lo. Bari ne y'a lɔn ko fɛɛn min bɛ ne dusu la, o ma nyi. Konyumankɛ nigɛ bɛ ne la, nga n tɛ se. Ne b'a fɛ ka konyuman min kɛ, ne tɛ se k'o kɛ, fɔɔ kojugu ne t'o min fɛ. Fɛɛn min man di ne ye, ni ne b'o le kɛ, o b'a yira k'o tɛ ne nɔɔ ye, nga o ye kojugu nɔɔ ye ale min bɛ ne dusu la. Koo min bɛ ne la, ne y'o faamu. Tuma min na ni ne b'a fɛ ka konyuman kɛ, n tɛ se k'o kɛ, fɔɔ kojugu. Ne dusu la kɔni, Ala ka sariya koo ka di ne ye. Nga n y'a ye, koo min ka di ne ye ni ne b'a fɛ k'o kɛ, fɛɛn dɔ bɛ ne bali k'o kɛ. Ale le bɛ kɛ kojugu bɛ fanga sɔrɔ ne kan. Ne ye sɛgɛnbagatɔ ye! N farisogo bɛ taara halakiyɔrɔ la. Jon le bɛna ne kisi o ma? Ne bɛ barika la Ala ye ale min b'o kɛ an Matigi Yezu Krista sababu la! Ne sɔnnin bɛ Ala ka sariya ma, nga farisogo ka barikatanya le y'a kɛ ne bɛ kojugu bolo. Sisan kɔni, mɔgɔ minw sɔnna Yezu Krista ma, jalakiyɔrɔ si tɛ olu la. Bari Nii Senuman min bɛ hɛrɛ di Yezu Krista ka jɛnnyɔgɔnya barika la, ale ka see kɛra sababu ye ka ne hɔrɔnya ka bɔ kojugu ni halakili la. Sariya siginin tun tɛ se ka koo min kɛ, farisogo ka barikatanya kɔsɔn, Ala y'o kɛ, a y'a yɛrɛ Dencɛ ci, ale nana wolo i n'a fɔ kojugukɛla, ka kɛ saraka ye kojugu sara kɔsɔn. A ye kojugu ka baga faga ten, janko sariya bɛ tilenninya min fɛ, an ka se k'ale kɛ, an minw tɛ taama ka kɛnyɛ ni farisogo sago ye tugu, nga an bɛ taama ka kɛnyɛ ni Nii Senuman sago ye. Bari mɔgɔ min bɛ taama ka kɛnyɛ ni farisogo sago ye, o tigi ka miiriya bɛ to farisogo koo le kan, nga min bɛ taama ka kɛnyɛ ni Nii Senuman sago ye, o tigi ka miiriya bɛ to Ala ka koo le kan. Farisogo koo, o laban ye halakili ye, nga Nii Senuman ta ye lafiya ni hɛrɛ ye. Koo minw ka di farisogo ye, o tɛ bɛn Ala ma, farisogo fana tɛ sɔn Ala ka sariya ma, o fana tɛ se ka kɛ. Bari ka mɔgɔ to a yɛrɛ sago kɛ la, a koo tɛ se ka diya Ala ye. Aw kɔni, aw tɛ taama ka kɛnyɛ ni farisogo sago ye, aw bɛ taama ka kɛnyɛ ni Nii Senuman le sago ye, bari Ala Nii bɛ aw fɛ. Ni Krista ka Nii tɛ mɔgɔ min fɛ, o tigi tɛ Krista ta ye. Aw farisogo bilanin bɛ halakili kama kojugu sababu la, nga ni Krista b'aw dusu la, Nii Senuman bɛ hɛrɛ kɛ aw ye bari Ala y'aw jati mɔgɔtilenninw ye. Ala min ye Yezu Krista kunun a sanin kɔ, n'ale ka Nii b'aw fɛ, ale kelen le bɛna nii don aw farisogo la, a ka Nii Senuman barika la ale min b'aw fɛ. O cogo la n balimaw, an ka kan ka fɛɛn min kɛ, o tɛ farisogo ka baara ye. Bari n'aw bɛ taama ka kɛnyɛ ni farisogo sago ye, aw bɛna halaki, nga n'aw y'aw jogo yɛlɛma pewu pewu Nii Senuman barika la, aw bɛna kisi. Mɔgɔ minw bɛ taama ka kɛnyɛ ni Ala ka Nii sago ye, olu ye Ala deenw ye. Aw ye Nii min sɔrɔ, ale t'aw bila jɔnya ni siranya la dɛ, nga Nii Senuman lo, ale le barika la aw kɛra Ala ka deenw ye, ani ale barika la an b'a fɔ Ala ye ko Baba. O Nii Senuman nin b'a yira an na ko an kɛra Ala deenw ye. N'an kɛra Ala ka deenw ye, an bɛna niyɔrɔ fana sɔrɔ Ala fɛ, Ala y'a daa di a ka mɔgɔw ma fɛɛn minw koo la, an ni Krista bɛna olu sɔrɔ nyɔgɔn fɛ, bari n'an y'a ka tɔɔrɔ nyɔgɔn sɔrɔ, an fana bɛn'a ka bonya nyɔgɔn sɔrɔ. Ne ka miiri la, an bɛna bonya min sɔrɔ sini, o tɛ se ka suma ni bii ka tɔɔrɔ ye. Bari Ala bɛna bonya la a ka deenw kan loon min na, dinyɛ kɔrɔtɔnin bɛ ka o loon makɔnɔ. Dinyɛ kɛra fu ye, o ma kɛ a yɛrɛ sago ye, nga a Danbaga sago lo, o bɛɛ n'a ta, jigi layɔrɔ bɛ yen bari Ala bɛn'a bɔ kojugu bolo, k'a niin don a ka deenw ka yɛrɛsɔrɔ n'u ka bonya na. An y'a lɔn ko halibi dinyɛ bɛɛ bɛ; nunana i n'a fɔ muso min bɛ jigira. Dinyɛ dama tɛ, nga Ala kɔnna ka an minw sɔn ni Nii Senuman ye fɔlɔ, an fana kɔnɔ gwannin lo k'an ka kunmabɔli kɔnɔ ka kɛ Ala ka deenw ye. Bari an kisira, nga o ye jigiko ye. N'an nyaa lara fɛɛn kan ka sɔrɔ k'an jigi la o kan, a tɛ fɔ o ma ko jigi nyanaman. E nyaa bɛ fɛɛn na ka ban, e bɛn'a fɔ k'o ye jigiko ye cogo di? Nga an nyaa ma la fɛɛn min kan fɔlɔ, n'an y'an jigi la o kan, an bɛna jija k'o fɛɛn nin makɔnɔ. O cogo la fana, Nii Senuman b'an dɛmɛ an ka dɛsɛyɔrɔw la, bari an tɛ dalili cogo lɔn, nga Nii Senuman yɛrɛ le bɛ dalili kɛ an nɔɔ na ni; nunakan ye min tɛ se ka fɔ. Ala min bɛ adamaden dusulako lɔn, ale b'a lɔn Nii Senuman bɛ fɛɛn min fɛ, bari Nii Senuman bɛ dalili kɛ Ala ka mɔgɔw ye k'o kɛnyɛ ni Ala sago ye. An y'a lɔn ko Ala bɛ baara kɛ ni fɛɛn bɛɛ ye a kanubagaw ka makonya le kama, a y'o minw wele ka kɛnyɛ n'a ka koo latigɛnin ye. Ala kɔnna ka mɔgɔ minw woloma kabini fɔlɔfɔlɔ, a kɔnna k'a latigɛ fana k'olu cogo ka kɛ i n'a fɔ a Dencɛ ta, janko a Dencɛ nin ka kɛ mɔgɔ caaman kɔrɔ ye. A kɔnna ka minw ka koo latigɛ, a ye olu wele fana, a ye minw wele fana, a ye olu jati mɔgɔtilenninw ye, a ye minw jati mɔgɔtilenninw ye, a ye bonya la olu kan. An bɛ mun fɔ tugu? Ni Ala b'an fɛ, jon bɛ wili an kama tugu? Ale min ma ban k'a yɛrɛ Dencɛ di ka sa an bɛɛ kɔsɔn, a bɛ kɛ cogo di n'a tɛna fɛɛn bɛɛ di an ma ka fara a Dencɛ nin kan? Ala ye mɔgɔ minw woloma, jon le bɛna se ka olu jalaki? Ala yɛrɛ le y'u jati mɔgɔtilenninw ye. Jon le bɛna u jalaki? Bari Yezu Krista sara, o dama tɛ fana, a kununna, a siginin bɛ Ala kinibolo fɛ, ka to ka Ala dali an ye. Mun le bɛ se k'an faran ka bɔ Krista la ale min y'an kanu? Sɛgɛnko wa? Walima hakilinyagamiko, walima tɔɔrɔ, walima kɔngɔ, walima dɛsɛko, walima kojugu, walima n'o b'an faga wa? Ka kɛnyɛ ni Ala ka kuma ye, a ko: “E Ala kɔsɔn, u b'an faga tile kuturu bɛɛ kɔnɔ, u y'an jati i n'a fɔ saga fagataw.” Nga o bɛɛ n'a ta an kɛra sesɔrɔlaw ye kosɛbɛ, Ala barika la, ale min y'an kanu. Bari ne jigi b'a la ko hali saya yɛrɛ, walima sijan, walima mɛlɛkɛw, walima jinaw, walima fɛɛn minw bɛ dinyɛ na bii, walima minw bɛna kɛ yen sini, walima setigiw, hali fangatigi minw bɛ sanfɛ, walima minw bɛ dugukolo jukɔrɔ, walima danfɛn wɛrɛw, fɛɛn si tɛ yen min bɛ se k'an faran ka bɔ Ala la ale min b'an kanu an Matigi Yezu Krista barika la. Krista ka jɛnnyɔgɔnya barika la ne bɛ min fɔ, o ye tinyɛ ye, galon tɛ, Nii Senuman yɛrɛ b'a yira ne dusukun na ko ne bɛ min fɔ, ko tinyɛ lo. Dusukasi bɛ ne la kosɛbɛ, ne nii tɔɔrɔnin lo tuma bɛɛ. Bari ne yɛrɛ b'a fɛ n niin ka bɔ Ala ka koo la ka n faran ka bɔ Krista la, ne balimaw kɔsɔn, ne ni minw ye siya kelen ye, olu minw ye Isirayɛlidenw ye. Ala ye olu minw minɛ k'o kɛ a ka deenw ye, k'a yɛrɛ yira u la, ka bɛn n'u ye sinyɛ caaman, ka sariya sigi u ye k'a yɛrɛ batocogo yira u la, ka layiduw ta u ye. Ibrayima ni Isiyaka ani Yakuba le ye u faaw ye. Krista ni olu ye siya kelen ye, a wolola u ka deen dɔ fɛ. Ala bɛ fɛɛn bɛɛ kunna, a ka tando tuma bɛɛ! Amiina. O bɛɛ la, Ala ka layidu dafara, hali ni siya min bɔra Yakuba la, o bɛɛ ma kɛ Isirayɛlidensɛbɛw ye. Siya min bɔra Ibrayima la, olu bɛɛ ma wele ko a deenw, bari Ala tun y'a fɔ a ye ko: “I deen Isiyaka kɔmɔgɔw le bɛna wele i deenw.” O kɔrɔ ko deen minw wolola ka kɛnyɛ ni farisogo ye, olu ma kɛ Ala deenw ye dɛ. Ayi, fɔɔ deen minw sɔrɔla ka kɛnyɛ ni Ala ka layidu ye, olu le ye Ala deenw ye. Bari Ala y'a daa di ko: “Saan wɛrɛ ne bɛna segi nin waati nyɔgɔn na ka n'a sɔrɔ ni deen bɛ Sara bolo.” O dama tɛ, Erebɛka fana, ale ye dencɛ fila sɔrɔ an bɛma Isiyaka fɛ. Ala tun b'a fɛ a ka koo latigɛnin ka kɛ a ka mɔgɔ wolomani koo la minkɛ, o la, o deen nunu tun ma wolo fɔlɔ, u tun ma sɔrɔ ka konyuman, walima kojugu kɛ fɔlɔ, a y'a fɔ Erebɛka ye a deen nunu koo la ko: “Kɔrɔcɛman bɛna baara kɛ dɔgɔcɛman ye.” A y'a yira ten ko ale tɛ mɔgɔ woloma ka kɛnyɛ n'o tigi ka kɛwali ye, fɔɔ a yɛrɛ sago. I n'a fɔ a fɔra Ala ka kuma na cogo min na ko: “Yakuba koo diyara ne ye, Ezawu koo man di ne ye.” An bɛna mun fɔ sa? O tuma na, Ala ka koo tilennin tɛ wa? Ayi dɛ! Bari a y'a fɔ Musa ye ko: “Ne b'a fɛ ka makari mɔgɔ min na, ne bɛ makari o tigi la, ne b'a fɛ ka hinɛ mɔgɔ min na, ne bɛ hinɛ o la.” O cogo la, o tɛ sɔrɔ mɔgɔ sago barika la, walima mɔgɔ ka jijali sababu la, nga fɔɔ Ala ka makari. O cogo la fana, Ala y'a fɔ Fara;nɔn ye a ka kuma na ko: “Ne y'i sigi masaya la kuun min na, o ye janko ne ka se ka n ka sebagaya yira, ani ne tɔgɔ ka se ka bɔ dinyɛ faan bɛɛ la.” O le kɔsɔn, ni Ala b'a fɛ ka makari mɔgɔ min na, a bɛ makari o tigi la, n'a b'a fɛ ka mɔgɔ min dusu gwɛlɛya, a b'o tigi ta fana gwɛlɛya. Dɔw bɛ se k'a fɔ ne ye ko: “Mun na Ala b'an jalaki tugu? Bari mɔgɔ tɛ se ka ban Ala ta ma.” E adamaden, e ye mun ye n'i bɛ sɔsɔli kɛ ni Ala ye? Daga bɛ se k'a fɔ a dilanbaga ye ko: “Mun na e ye ne dilan ten wa?” Bɔgɔmana ma kɛ dagadilanbaga ta ye wa? A bɛ se k'o bugɔ kelen nin ta ka daganyuman dilan n'a ye, a bɛ se k'o bugɔ kelen nin ta ka daga wɛrɛ dilan n'a ye, min ma nyi kosɛbɛ. Ala tun b'a fɛ k'a ka sebagaya n'a ka dimi yira, nga a munyuna o daga cɛnta nunu kɔrɔ. A y'o kɛ janko k'a ka nyumanya dafanin yira dagaw la, a makarila minw na. A tun kɔnna ka olu minw labɛn bonya kama. O kɔrɔ ko a ye an minw wele, a ma weleli kɛ ka bɔ Zuwifuw dama cɛma, nga a ye dɔw fana wele ka bɔ siya wɛrɛw cɛma. I n'a fɔ a fɔra cogo min na Oze ka kitabu kɔnɔ ko: “Mɔgɔ minw tun tɛ ne Ala ka mɔgɔw ye, ne bɛna olu kɛ ne ka mɔgɔw ye, ani minw koo tun man di ne ye, ne bɛna olu koo diya ne yɛrɛ ye. Yɔrɔ min na a tun fɔra u ye ko: ‘Aw ma kɛ ne Ala ka mɔgɔw ye’, o yɔrɔ yɛrɛ la, u bɛna wele ko Ala deenw.” Kira Ezayi fana y'a fɔ Isirayɛlidenw ka koo la ko: “Hali ni Isirayɛlidenw cayara i n'a fɔ bada la cɛncɛn, mɔgɔ damani dɔrɔn le bɛna kisi. Bari Matigi ye kuma min fɔ, a bɛna o bɛɛ kɛ ka dafa teliya la dugukolo kan.” I n'a fɔ Ezayi tun kɔnna k'a fɔ cogo min na ko: “Ni Setigi Ala tun ma dɔɔni to o ka kɛ an sii ye, an tun bɛna halaki i n'a fɔ Sodɔmukaw, walima Gɔmɔrikaw.” An bɛna mun le fɔ? Siya wɛrɛ minw tun ma tilenninya nyini, olu y'a sɔrɔ, jigi min bɛ la Ala kan, o tilenninya bɛ sɔrɔ o barika la. Isirayɛlidenw, olu tun bɛ cogo nyinina waasa Ala k'u jati mɔgɔtilenninw ye sariya barika la, nga u ma o sɔrɔ. Mun le y'o kɛ? Bari yan ni olu ka tilenninya nin nyini n'u jigi lanin bɛ Ala kan, u y'a nyini ni kɛwali ye. O la, u talonna kabakuru la. A fɔra Ala ka kuma na ko: “Ne bɛ seen talon kabakuru bila Siyɔn dugu kɔnɔ, kabakuru min bɛ mɔgɔ ben, ne y'o bila yen. Ni min lar'a la, o tigi tɛna maloya.” N balimaw, min bɛ ne dusu la, ani n bɛ min nyini Ala fɛ Isirayɛlidenw ye, o ye u ka kisiliko ye. Bari ne bɛ se k'a fɔ k'u jijanin bɛ kosɛbɛ Ala koo la, u jijanin bɛ kɔni, nga lɔnniyasɛbɛ t'u fɛ. Tilenninya min bɛ sɔrɔ Ala fɛ u m'o koo faamu, o la, o tun bɛ tilenninya nin nyini u yɛrɛ ka fanga la. O cogo la, tilenninya min bɛ sɔrɔ Ala fɛ, u ma se k'u yɛrɛ majigi Ala ye ka mɛnni kɛ o koo la. Bari sariya bɛ laban Krista le ma, janko ni mɔgɔ min sɔnna ka la Krista la Ala k'o tigi jati mɔgɔtilennin ye. Musa fana y'a sɛbɛn tilenninya koo la o min bɛ sɔrɔ sariya labatoli barika la ko: “Ni mɔgɔ min bɛ sariya sira taama, o tigi bɛna hɛrɛ sɔrɔ o barika la.” Tilenninya min bɛ sɔrɔ jigi barika la, ale b'a nyini i fɛ: “I kana miiri i dusu la ko: ‘Jon le bɛna yɛlɛ Ala fɛ?’ (N'i y'o miiri, i b'a fɛ Krista ka kɔsegi ka na le.) Walima ‘Jon bɛna jigi dingɛ dibiman kɔnɔ?’ ” (O ye Krista ka kununko ye tugu.) Mun le bɛ fɔ tugu? “Kuma nin b'i tulo kɔrɔ, a b'i daa la ani a b'i kɔnɔ.” An bɛ kuma min fɔra, o ye jigi koo ye. N'i sɔnna k'a fɔ ko Yezu ye Matigi ye ani ka l'a la ko Ala y'a kunun a sanin kɔ, e bɛna kisi. Tinyɛ na, n'i lar'a la i dusu la, Ala b'i jati mɔgɔtilennin ye, n'a bɔra i daa la, i bɛ kisi. Bari a fɔra Ala ka kuma na ko: “Ni mɔgɔ min lara Ala la, o tigi tɛna maloya.” O cogo la, danfara bɔko tɛ Zuwifuw ni siya wɛrɛw cɛ, u bɛɛ ka Matigi ye kelen ye, min man'a dali, a bɛ mɛnni kɛ o tigi fɛ. Bari: “Mɔgɔ o mɔgɔ min mana Matigi dali, o tigi bɛna kisi.” U bɛ se ka kɛ cogo di ka Matigi dali, n'u ma l'a la? U fana bɛ se ka l'a la cogo di, n'u m'a koo mɛn? U fana bɛ se k'a koo mɛn cogo di, ni mɔgɔ m'a fɔ u ye? Mɔgɔ fana bɛ se k'a koo fɔ cogo di, n'u ma ci? O cogo la, a fɔra Ala ka kuma na ko: “Mɔgɔ minw bɛ kibaru diman fɔ,” ko: “Olu ta ka nyi!” Nga mɔgɔ bɛɛ ma sɔn kibaru diman ma, o le kɔsɔn Ezayi y'a fɔ ko: “Matigi, jon le lara an ka waajuli la?” O cogo la, mɔgɔ bɛ waajuli mɛn ka sɔrɔ ka la Krista la, waajuli le ye Krista ka koo nyafɔli ye. O la, ne bɛ n yɛrɛ nyininga ko u m'o mɛn wa? U kɔni y'o mɛn. A fɔra Ala ka kuma na ko: “Waajulikɛlaw kaan do mɛnna yɔrɔ bɛɛ la, u ka kuma sera dinyɛ faan bɛɛ la.” Ne bɛ n yɛrɛ nyininga tugu ko: “Isirayɛlidenw tun ma nin faamu wa?” Musa kɔnna ka Ala ka kuma nin fɔ ko: “Siya min ma kɛ foyi ye aw nyana, ne bɛna olu kɛ ka keliya don aw dusu la, hakili tɛ siya min fɛ, ne bɛn'a kɛ aw bɛ dimi o le kɔrɔ.” Ezayi taara nya k'a fɔ yɛrɛ ko Ala y'a fɔ ko: “Mɔgɔ minw tun tɛ ne yɔrɔ nyinina, olu ye ne ye, minw ma ne dali, ne ye n yɛrɛ yira u la.” Nga Isirayɛlidenw koo la, a y'a fɔ ko Ala ko: “Tile kuturu kɔnɔ, ne b'a fɛ ka bɛn ni siya murutinin nin ye, olu minw tulo ka gwɛlɛ.” Ne bɛ n yɛrɛ nyininga k'o tuma na, Ala y'a ka Isirayɛli jama fili wa? Ayi dɛ! Ne fana y'u dɔ ye, Ibrayima deen dɔ, ka bɔ Bɛnzamɛn kɔmɔgɔw la. Ala kɔnna ka siya min kɛ a ta ye, a m'o fili dɛ! N'aw bɛ Ala ka kuma kalan Eli koo fɔra yɔrɔ min na, a ye Ala dali Isirayɛlidenw koo la cogo min na, aw m'o faamu wa? A ko: “Matigi, u ye i ka kiraw faga k'i ka sarakabɔyɔrɔw bɛɛ cɛn, a tora ne kelen u b'a fɛ ka ne fana faga.” Nga Ala y'a jaabi ko di? A y'a fɔ a ye ko: “Ne ye mɔgɔ waa wolonwula mara ne yɛrɛ ye, olu minw ma sɔn ka Baali bato.” O cogo la, bii fana dɔw bɛ yen minw kɛra u tɔɔ ye, Ala makarila minw na k'u woloma. Nga ni wolomani nin bɛ kɛ Ala ka makari barika la, kɛwali niin t'o la tugu, n'o tɛ, o tɛ kɛ makariko ye tugu. An bɛna mun le fɔ? Isirayɛlidenw tun bɛ fɛɛn min nyinina, u m'o sɔrɔ, nga minw wolomana olu y'o sɔrɔ, tɔ nunu dusu gwɛlɛyara ka kɛnyɛ ni Ala ka kuma ye ko: “Ala y'u kɛ hakilitanw ye, ka nyaa d'u ma, u tɛ se ka yeli kɛ ni minw ye, ka tulo d'u ma, u tɛ se ka mɛnni kɛ ni minw ye fɔɔ ka na se bii ma.” Masacɛ Dawuda fana y'a fɔ ko: “U ka dumuni ka kɛ u jaan, ni jɔɔ ye k'u minɛ, a ka kɛ u ka seen talonfɛn ye, ka kɛ u ka baarajugu sara ye!” Ko: “U nyaaw ka cɛn, u kana yeli kɛ tugu, A kɛ u birinin bɛ to tuma bɛɛ la.” Ne bɛ n yɛrɛ nyininga tugu ko Isirayɛlidenw talonna ka ben minkɛ, ko u bɛna to ten wa? Ayi dɛ! Nga u filila, o le y'a to siya wɛrɛw sera ka kisili sɔrɔ, o fana kɛra sababu ye ka keliya don Isirayɛlidenw dusu la. N'u ka filiko kɛra dinyɛ ka hɛrɛ sɔrɔ sababu ye, ani u ka dɛsɛko ka kɛ siya wɛrɛw ka nafa ye, n'u nana segi Ala ma pewu pewu, o bɛna kɛ hɛrɛ ye kosɛbɛ. Ne b'o fɔ aw siya wɛrɛw ye, ne cira ka baara kɛ aw le ye, ne bɛ bonya la o baara nin kan, waasa ka keliya wili ne ka siya dusu la, janko dɔw ka se ka kisi u cɛma. Ala y'u bila gɛrɛfɛ minkɛ, n'o le kɛra sababu ye dinyɛ mɔgɔw sera ka bɛn ni Ala ye, u ka kɔsegiko ka bɛn ni Ala ye, o tɛna kɛ i n'a fɔ mɔgɔ le sara ka kunun wa? Sumankun fɔlɔ min mɔna, n'o dira Ala ma, o b'a yira ko a tɔɔ bɛɛ bɛ kɛ Ala ta ye. Ni yiri lili ka nyi, yiri bolow ka nyi. Isirayɛlidenw bɛ i n'a fɔ olivuyiri min tutunin bɛ foro kɔnɔ, aw siya wɛrɛw bɛ i na fɔ waga kɔnɔ ta. U ye foro kɔnɔ ta bolo dɔw tigɛ, k'aw ta ka nɔrɔ o nɔɔ na janko aw ka nɛɛma sɔrɔ o juu fɛ. O kama, i kana i yɛrɛ bonya, ka bolotigɛninw lɔgɔbɔ bari i tɛ yiri juu ye, i ye bolo le ye. I bɛ se k'a fɔ fana ko bolo dɔ nunu tigɛra waasa i ka se ka nɔrɔ juu la. O ye tinyɛ ye, olu tigɛra u ka lanabaliya le kama, aw nɔrɔla lanaya le barika la. O la, aw kana aw yɛrɛ bonya, aw ka siran le. Bari ni Ala ma se ka makari yiribolo kɔrɔman nunu na, aw ta tɛna kɛ ten fana wa? Aw ka Ala ka nyumanya n'a ka fariyako filɛ, a fariyara Isirayɛlidenw ma olu minw benna, ani a ka nyi aw faan fɛ. Fɔɔ aw nɔrɔnin ka to a la, n'o tɛ aw bɛna tigɛ i n'a fɔ dɔ nunu. Olu fana, n'u ma to u ka lanabaliya la, u niin bɛna don tugu, bari see bɛ Ala ye k'u niin don. Aw minw ye siya wɛrɛw ye, n'aw niin donna, minw tun ye siya nin yɛrɛ ye n'u niin bɔra, olu ka kɔsegi ka don, o bɛ kɛ baasi ye wa? N balimaw, ne t'a fɛ aw ka to kodogonin nin faamubaliya la, janko aw kana aw yɛrɛ jati kolɔnbagaw ye. Isirayɛliden dɔw bɛna to u ka dusukungwɛlɛya la fɔɔ siya tɔw ka donyɔrɔ sɔrɔ Ala fɛ. O cogo la fana, Isirayɛlidenw bɛɛ bɛna kisi, i n'a fɔ a fɔra Ala ka kuma na cogo min na ko: “Min bɛna mɔgɔw hɔrɔnya, ale bɛna bɔ Siyɔn dugu kɔnɔ, a bɛn'a kɛ Yakuba kɔmɔgɔw bɛ siran Ala nya.” “Ni ne y'u ka kojugu yafa u ma tuma min na, o le bɛn'a yira ko ne bɛnna ni olu ye.” Kibaru diman faan fɛ, u kɛra Ala juguw ye, o kɛra aw siya wɛrɛw ka dagamu ye, nga Ala ka wolomani faan fɛ, u koo ka di Ala ye u faaw kɔsɔn, bari Ala ka makari n'a ka weleli tɛ se ka yɛlɛma. Fɔlɔfɔlɔ, aw tun tɛ Ala ka kuma labato, sisan olu t'a labato, o le y'a to Ala makarila aw la. Olu banna k'a ka kuma labato sisan, o le y'a to a makarila aw la. A makarila aw la cogo min na, a bɛna makari olu la ten fana. Bari Ala ye mɔgɔ bɛɛ to u ka murutili la, janko a ka se ka makari u bɛɛ la. Ala dafanin lo, hakilitigiya ni lɔnniya la! Mɔgɔ tɛ se k'a ka kolatigɛninw faamu, a ka koo fana tɛ se ka faamu. A fɔra Ala ka kuma na ko: “Jon le ye Matigi ka miiriya lɔn? Walima jon le kɛra a ladibaga ye?” Walima: “Jon le kɔnna ka Ala sɔn, a ka sɔrɔ k'o sara?” Bari fɛɛn bɛɛ bɔra ale le la, ale lo y'u bɛɛ dan, u kɛra a ta ye. Bonya ka la ale kan tuma bɛɛ la! Amiina. N balimaw, ne b'aw dali Ala ka makari kɔsɔn ko aw k'aw yɛrɛ kɛ saraka nyanaman ye, min saniyanin lo, n'a ka di Ala ye: o le bɛna kɛ aw ka batoli nyanaman ye. Aw kana aw yɛrɛ kɛnyɛ ni bii dinyɛ ye, nga aw ye hakilikura min sɔrɔ, aw jogo ka yɛlɛma ka kɛnyɛ n'o ye, janko aw ka se ka Ala sago lɔn, o min ye konyuman ye, min ka di Ala ye, n'a dafanin bɛ. Ala ye nɛɛma min kɛ ne ye, o kɔsɔn, ne b'a fɔ aw bɛɛ ye ko aw kana aw yɛrɛ bonya k'a dama tɛmɛ, aw k'aw yɛrɛ majigi ka kɛnyɛ ni jigi ye, Ala y'o min di aw ma ye. Yɔrɔ caaman b'an farisogo la, u bɛɛ ka baara tɛ kelen ye fana. O cogo la, an minw lara Krista la, an n'an ka caya bɛɛ, an jɛnna ka kɛ farisogo kelen ye. Ala makarila an na ka seko minw d'an ma, an bɛɛ ta tɛ kelen ye. Kiraya le dira dɔ ma wa? O tigi k'o kɛ ka kɛnyɛ n'a ka lanaya ye. Baara kɛ see le dira dɔ ma wa? O tigi ka banba k'o kɛ. Mɔgɔ kalan see le dira dɔ ma wa? O tigi ka banba ka mɔgɔw kalan. Mɔgɔ ladi see dira min ma, o tigi k'o kɛ. Ka mɔgɔw sɔn fɛɛn na, o see dira mɔgɔ min ma, o tigi k'o kɛ, a kana sigasiga. Ka kɛ nyamɔgɔ ye, o see dira min ma, o tigi ka banba k'o kɛ. Mɔgɔ min bɛ makari, o tigi k'o kɛ ni nisɔndiya ye. Kanuyasɛbɛ ka sɔrɔ aw dusu la. Aw ka kojugukɛ dabila, ka konyuman kɛ kosɛbɛ. Kanuya min bɛ badenya la, o sababu la, aw ka nyɔgɔn minɛ, k'aw tɔnyɔgɔnw jati k'u ka fisa n'aw ye. Aw ye jija aw kana kɛ salabagatɔw ye, aw ka banba ka baara kɛ Matigi ye. Jigi min b'aw fɛ, aw ka nisɔndiya o kɔsɔn, tɔɔrɔ tuma, aw ka munyuli kɛ, aw ye jija ka Ala dali. Aw ye banba ka Ala ka mɔgɔw dɛmɛ u dɛsɛyɔrɔ la, ka mɔgɔ wɛrɛw ladon. Mɔgɔ minw b'aw tɔɔrɔ, aw ka duba kɛ o tigiw ye, aw ka duba kɛ dɔrɔn, aw kana dangali kɛ. Mɔgɔ minw bɛ nisɔndiya la, aw ye nisɔndiya ni olu ye, minw bɛ kasi, aw ye kasi ni olu ye fana. Bɛɛn ka sɔrɔ aw ni nyɔgɔn cɛ. Aw kana aw yɛrɛ bonya, k'aw yɛrɛ jati kolɔnbagaw ye, aw k'aw yɛrɛ majigi. Aw kana kojugu juru sara, aw ye jija ka konyuman kɛ mɔgɔw bɛɛ ye. Aw k'aw seko bɛɛ kɛ ka to hɛrɛ la ni mɔgɔ bɛɛ ye, n'o bɛ se ka kɛ. Ne teriw, aw kana aw mɔnɛ bɔ, aw k'o to Ala ma, bari a fɔra Ala ka kuma na ko: “Mɔnɛbɔko ye ne ta ye, ne le bɛ juru sara.” Matigi ko ten. Nga “Ni kɔngɔ b'i jugu la, dumuni d'a ma, ni minnɔgɔ b'a la, jii d'a ma, n'i y'o kɛ, a bɛna maloya kosɛbɛ.” I kana i yɛrɛ to kojugu bolo a ka se i kɔrɔ, nga i ka see sɔrɔ kojugu kan konyuman barika la. Mɔgɔ kelen kelen bɛɛ k'a yɛrɛ majigi faamaw kɔrɔ olu minw b'an kunna, bari fangatigiya bɔra Ala fɛ, faama minw siginin bɛ yen, Ala le ye olu bɛɛ sigi. O la, mɔgɔ min bɛ ban faama ta ma, o tigi fana banna Ala ka fɔta le ma, o tigi fana bɛ jalaki ben a yɛrɛ kan. Ni mɔgɔ min bɛ konyuman kɛ, o tigi man kan ka siran kititigɛlaw nya, min bɛ kojugu kɛ, ale le bɛ siran. E b'a fɛ e kana siran faama nya wa? Banba ka konyuman kɛ, faama bɛna tila k'i tɔgɔnyuman fɔ. Bari a bɛ yen Ala ka baara le kama janko k'i seen bila siranyuman na, nga n'i ye kojugu kɛ i ka siran, bari a sigikun ka maramanfɛn d'a ma tɛ dɔ wɛrɛ ye, ka kojugukɛlaw jalaki. N'a b'o kɛ tuma min na, a bɛ Ala ka baara le kɛra k'a ka dimiko yira o tigi la. O la do, a kɛra wajibi ye mɔgɔ k'a yɛrɛ majigi faamaw kɔrɔ, o kana kɛ ko u bɛna i jalaki dama, nga o ka kɛ Alanyasiran kɔsɔn. O le kama, aw bɛ nisɔngɔ sarala, bari mɔgɔ minw b'a minɛna, olu ye Ala ka baarakɛlaw ye. Fɛɛn min ka kan ka di mɔgɔ min ma, aw k'o di o tigi ma, nisɔngɔ, ni wusuru ka kan ka di min ma, o ka di o tigi ma. Aw ka kan ka siran mɔgɔ min nya, aw bɛ siran o tigi nya, min ka kan ni bonya ye, aw k'o bonya. Foyi kana sɔrɔ i n'i mɔgɔnyɔgɔn cɛ fɔɔ nyɔgɔnkanuya, bari mɔgɔ min y'a mɔgɔnyɔgɔn kanu, o tigi ye sariya labato. Sariya kuma minw b'a yira ko: “I kana kakalaya kɛ, i kana mɔgɔ faga, i kana sonyali kɛ, i nyaa kana bɔ i tɔnyɔgɔn ka fɛɛn na,” ani o tɔ nunu bɛɛ bɛ taa kɛ kuma kelen nin ye ko: “I k'i mɔgɔnyɔgɔn kanu i n'a fɔ i yɛrɛ.” Kanuya bɛ mɔgɔ min dusu la, o tigi tɛ kojugu kɛ a mɔgɔnyɔgɔn na, o la sariya bɛ se ka labato kanuya barika la. An bɛ waati min na, aw b'o lɔn. Sisan aw sinɔgɔbagatɔw, aw ye wili ka banba, an kisiwaati surunyana bii yɛrɛ ka tɛmɛ an y'an jigi la Krista kan waati min na. Dugu gwɛra ka ban, kɛnɛ cira. O la, an ka dibidibiko dabila ka kogwɛnin kɛ. An ka taama tilenninya la i n'a fɔ mɔgɔ bɛ taama cogo min na tile fɛ. An kana kɛ nugubatɔw ni dɔrɔtɔw ye. An k'an yɛrɛ kɔlɔsi kakalaya sifa bɛɛ ma, an kana kɛ kɛlɛtigɛlaw ye, ani keliya kana sɔrɔ an dusu la. Aw k'a to Matigi Yezu Krista ka koo ka sigi aw kɔnɔ, aw kana miiri farisogo koo la ka tɛmɛ janko nigɛjugu kana se aw kɔrɔ. Mɔgɔ min barika ka dɔgɔ Krista ka sira la, aw k'ale minɛ ka nya, aw kana to a kɔrɔfɔli la. Ni jigi bɛ mɔgɔ dɔ fɛ kosɛbɛ o le kɔsɔn a bɛ fɛɛn bɛɛ dumu, ni mɔgɔ min barika ka dɔgɔ Krista ka sira la, n'ale tɛ fɛɛn bɛɛ dumu fɔɔ nankɔfɛn dama, mɔgɔ min bɛ fɛɛn bɛɛ dumu, ale man kan ka dɔ nin dɔgɔya, ani min tɛ fɛɛn bɛɛ dumu, ale fana kan'a tɔnyɔgɔn nin jalaki, bari Ala sɔnna a ma. E min bɛ mɔgɔ wɛrɛ ka baaraden jalaki, e ye jon ye? A ye baaranyuman kɛ wo, a m'a kɛ wo, o t'i ka sira la, o ye a tigi ka koo ye. A do bɛna baaranyuman kɛ, bari see bɛ Matigi ye k'o kɛ. Mɔgɔ bɛ yen min bɛ loonw jatiminɛ, dɔ fɛ loon bɛɛ ye kelen ye. A daan ye u jigi ka to u ka miiriya kan. Mɔgɔ min bɛ loonw jatiminɛ o tigi b'o kɛ Matigi le kɔsɔn, min fana bɛ fɛɛn bɛɛ dumu, o tigi fana b'o kɛ Matigi le kɔsɔn, a fana bɛ barika la Ala ye. Min tɛ fɛɛn bɛɛ dumu, o tigi fana b'o kɛ Matigi le kɔsɔn, a fana bɛ barika la Ala ye. O la, mɔgɔ si tɛ to sii la a yɛrɛ kɔsɔn, n'a fana sara, a ma sa a yɛrɛ ma. An bɛ sii la wo, an bɛ yen Matigi le kɔsɔn, n'an sara wo, an sara Matigi le kɔsɔn. O la, an tora sii la wo, an sara fana wo, an ye Matigi ta ye. Krista sara ka kunun janko a ka kɛ mɔgɔ nyanamanw ni suuw ka Matigi ye. Ele, mun na i b'i balima jalaki? Mun na i b'i balima dɔgɔya? An bɛɛ le bɛna lɔ Ala ka kiti tigɛyɔrɔ la. Bari a fɔra Ala ka kuma na ko: “Ne Matigi nyanaman lo,” ko: “Mɔgɔ bɛɛ bɛn'a kunbiri gwan ne nyakɔrɔ, ani mɔgɔ bɛɛ bɛna Ala tando.” O cogo la, an kelen kelen bɛɛ bɛna lɔ n'an kunko ye Ala nyakɔrɔ. O la, an ka nyɔgɔn jalakiko dabila sa. Aw k'aw yɛrɛ kɔlɔsi aw kana kɛ sababujugu ye aw balima dɔ ma. Ne lanin b'a la kosɛbɛ Matigi Yezu barika la ko fɛɛn si tɛ yen min nɔgɔnin bɛ. Nga n'i ye min jati ko a nɔgɔnin lo, ale nɔgɔnin lo i fɛ. I bɛ dumuni min dumu, n'ale b'i balima nii tɔɔrɔ, o kɔrɔ ko i t'i ka koo kɛ kanuya la tugu. O la do, i k'i yɛrɛ kɔlɔsi, Krista sara i balima min kɔsɔn, i kana kɛ sababu ye k'ale kunnacɛn dumuni kama. Fɛɛn min ka d'i ye, o kana kɛ sababu ye i tɔgɔ ka cɛn. Bari ka kɛ Ala ta ye, dumuniko, walima minnifɛn koo t'o la, nga tilenninya ni hɛrɛ ani nisɔndiya koo le kɛra o koo ye, Nii Senuman barika la. Bari mɔgɔ min bɛ baara kɛ Krista ye o cogo la, o tigi le koo ka di Ala ye, mɔgɔw fana b'a tɔgɔnyuman fɔ. O la sa, an ka banba ka to hɛrɛ la nyɔgɔn fɛ ani ka nyɔgɔn dɛmɛ ka barika sɔrɔ Krista ka sira la. Aw man kan ka Ala ka baara cɛn dumuni kama. Fɛɛn bɛɛ ka nyi, nga fɛɛn min bɛ kɛ kunnacɛnfɛn ye ne balima fɛ, o dumuko ma nyi. Fɛɛn min ka fisa, i kana josɔnsogo nyimi, i kana dɔrɔ min, fɛɛn o fɛɛn min bɛ se ka kɛ sababu ye k'i balima kunnacɛn, i kana o kɛ. Jigi min b'i fɛ o koo la, i k'o to i ni Ala cɛ. Mɔgɔ min tɛ siga a ka kɛtaw la, o tigi ye dubaden ye. Nga ni mɔgɔ min bɛ sigasiga ni fɛɛn dɔ dumuko ye, n'o tigi y'o dumu, Ala b'o tigi jalaki, bari a m'o koo kɛ ni jigisɛbɛ ye. Koo min ma kɛ ni jigi lanin ye Ala kan, o bɛɛ ye kojugu ye. Fanga b'an minw na, an ka kan ka barikatanw dɛmɛ, an kana an diyanakow dama kɛ. An kelen kelen bɛɛ k'an tɔnyɔgɔn diyanakow kɛ a ka nya kama, janko ka se k'a dɛmɛ a ka taa nya. Fɛɛn min tun ka di Krista ye a m'o kɛ, i n'a fɔ a fɔra Ala ka kuma na cogo min na ko: “I tɔgɔ cɛnbagaw ka tɔgɔcɛn le sera ne ma.” Koo minw bɛɛ tun fɔra Ala ka kuma na kabini fɔlɔfɔlɔ, o fɔra ka hakili d'an ma, janko an jaa ka gwɛlɛya ani ka munyu, ka jigi sɔrɔ o barika la. Ala min bɛ munyuli di mɔgɔ ma ani k'a jigi tugu, ale k'aw ka miiriya kɛ kelen ye i n'a fɔ Yezu Krista b'a nyini cogo min na, janko aw kɔnɔ ka kɛ kelen ye, ka jɛn ka Ala tando ale min ye an Matigi Yezu Krista Faa ye. Aw ka nyɔgɔn minɛ kosɛbɛ i n'a fɔ Krista y'aw minɛ cogo min na, janko bonya ka la Ala tɔgɔ kan. Ne b'a fɔ tinyɛ na ko Ala ka kantigiya kɔsɔn, Krista ye baara kɛ Zuwifuw ye, janko Ala tun ye layidu minw ta an faaw ye o ka kɛ. A nakun fana ye nin ye: janko siya wɛrɛw ka Ala bonya a ka makari kɔsɔn, ka kɛnyɛ ni Ala ka kuma ye min fɔra ko: “O le y'a to ne bɛna i tando siya wɛrɛw cɛma, n bɛna dɔnkili la i ye k'i tɔgɔ bonya.” Ani a fɔra tugu ko: “Siya wɛrɛw, aw ye nisɔndiya n'a ka jama ye.” A fɔra tugu ko: “Siyaw bɛɛ, aw ka Matigi tando, jama bɛɛ k'a bonya.” Kira Ezayi fana y'a fɔ ko: “Zese kɔmɔgɔ dɔ bɛna wili, ale bɛna sigi siyaw kunna. Siyaw bɛna u jigi la ale kan.” Ala min bɛ mɔgɔ jigi tugu, ale ka kɛ aw bɛ nisɔndiya kosɛbɛ, ka hɛrɛ kɛ aw ye aw ka lanaya kɔsɔn, janko aw ka jigisɛbɛ sɔrɔ Nii Senuman barika la. N balimaw, aw yɛrɛ ta faan fɛ kɔni, ne jigi b'a la ko aw ye mɔgɔnyumanw ye, lɔnniyadafanin b'aw fɛ, aw bɛ se ka nyɔgɔn ladi. Ne bɛ sɛbɛ min cira aw ma, ne ye o yɔrɔ dɔw sɛbɛn ni jagwɛlɛya ye koo dɔw kama, janko ka se k'aw hakili jigi kotɛmɛnin na Ala ka nɛɛma barika la, a ye o min kɛ ne ye ka ne kɛ Yezu Krista ka baarakɛla ye siya wɛrɛw cɛma. Ne bɛ Ala ka kibaru diman fɔ u ye, janko olu fana ka kɛ saraka diman ye Ala fɛ, min saniyanin bɛ Nii Senuman barika la. O la, ne bɛ se ka ne yɛrɛ bonya Yezu Krista barika la, Ala ka baara kɔsɔn. Krista ye ne dɛmɛ ka baara min kɛ ka siya wɛrɛw dɛmɛ ka mɛnni kɛ Ala fɛ, ne tɛ foyi fɔ n'o tɛ. Ne y'u dɛmɛ ni kuma ni kɛwali ye ani kabako sifa caaman ye Nii Senuman barika la. O cogo la, k'a ta Zeruzalɛmu fɔɔ ka taa se Iliri mara la, ne ye Krista ka kibaru bɛɛ fɔ o yɔrɔw la. Nga ne ka; naniya tun ye ka kibaru diman fɔ yɔrɔ la, Krista tɔgɔ tun ma fɔ yɔrɔ min na fɔlɔ, janko ne kana ne ka baara kɛ k'a la mɔgɔ dɔ ka baarakɔrɔ kan. O cogo la, ne ka baara bɛnna Ala ka kuma ma o min b'a fɔ ko: “A koo ma fɔ mɔgɔ minw ye, olu bɛn'a ye, mɔgɔ minw m'a koo mɛn ka ye, olu bɛn'a ka koo faamu.” O le ye ne bali tuma caaman ka taa aw fɛ. Nga a saan damani filɛ nin ye, ne tun b'a fɛ ka se aw fɛ. Sisan ne ka baara nɔgɔyara o mara nunu na. Ni ne bɛ taa Ɛsipanyɛ tuma min na, ne b'a fɛ ka lɔ aw fɛ o tuma na k'aw filɛ ka waati dɔɔni kɛ n'aw ye ne taatɔ aw ka ne dɛmɛ. Nga sisan ne bɛ taa Zeruzalɛmu ka dɛmɛ kɛ Ala ka mɔgɔw ye. Bari Krista kɔmɔgɔw minw bɛ Maseduwani mara ni Akayi mara la, olu b'a fɛ ka Ala ka jama dɛmɛ Zeruzalɛmu, o minw dɛsɛnin bɛ. U y'o latigɛ, u fana tun ka kan k'o kɛ. Bari ni olu siya tɔw ye niyɔrɔ sɔrɔ u ka Ala koo la, olu fana ka kan k'u dɛmɛ ni u bololafɛnw ye. O la, ni ne nana tila o koo la tuma min na, ni n taara o dɛmɛ nin di ka ban, ne bɛna tɛmɛ aw fɛ ka taa Ɛsipanyɛ jamana na. Ne lanin b'a la ko ne bɛna se aw fɛ tuma min na, n bɛna se ni Krista ka duba ye aw fɛ. Ne b'aw dali n balimaw, an Matigi Yezu Krista kɔsɔn ni Nii Senuman ka kanuya kɔsɔn, ko aw ka ne dɛmɛ kɛlɛ nin na, n'aw ka Aladali ye aw b'o minw kɛ ne ye, janko ne ka se ka kisi Zude mara Alanyasiranbaliw ma, ani ne bɛ taa ni dɛmɛ min ye Zeruzalɛmu, o koo ka se ka diya Ala ka mɔgɔw ye o yɔrɔ la. O cogo la, ne bɛna se aw fɛ ni nisɔndiya ye, Ala sago la, ani ka se ka lafinyɛ dɔɔni aw fɛ. Hɛrɛtigi Ala ka to aw bɛɛ fɛ! Amiina. Ne b'an balimamuso Febe koo kalifa aw ma, ale min bɛ baara kɛ Ala ka jama cɛma Sankere. Aw k'a minɛ ka nya i n'a fɔ Ala ka jama bɛ mɔgɔ minɛ cogo min na, n'a mako bɛ aw ka dɛmɛli la koo minw na, aw k'a dɛmɛ o la. Bari a ye mɔgɔ caaman dɛmɛ kosɛbɛ, hali ne yɛrɛ. Aw ka Pirisika ni Akilasi fo, olu ye ne baarakɛnyɔgɔn dɔw ye Yezu Krista ka baara la. Olu tun y'u yɛrɛ nii di janko ne ka se ka kisi saya ma. Ne dama tɛ barika la u ye dɛ, Ala ka jama bɛɛ min bɛ siya wɛrɛw cɛma, olu fana bɛ barika la u ye. Ala ka jama min bɛ lajɛn u ka soo, aw ka olu fo fana. Aw ka Epenɛti fo, ale min koo ka di ne ye, ale le kɔnna ka la Krista la Azi mara la. Aw ka Mariyamu fo ale min jijara aw koo la kosɛbɛ. Aw ka Anduronikusi ani Zuniyasi fo, olu minw ye ne ka mɔgɔw ye ani ne ni olu, an bɛɛ ye kaso kɛ nyɔgɔn fɛ. Cidenw lo minw lɔnnin lo kosɛbɛ, u kɔnna ka Krista lɔn ne nya. Aw ka Anpiliyasi fo, ale koo ka di ne ye Matigi kɔsɔn. Aw ka Urubɛn fo, ale ye ne ka baarakɛnyɔgɔn dɔ ye Krista ka baara la, ani aw ka ne terinyuman Sitasisi fo. Aw ka Apɛlɛsi fo, ale min sɔnna tɔɔrɔ ma Krista kɔsɔn. Minw bɛ Arisitobuli ka soo, aw ka olu fo. Aw ka ne ka balimacɛ Erodiyɔn fo, ani Krista kɔmɔgɔ minw bɛ Narisisi ka soo kɔnɔ. Aw ka Tirifɛni ni Tirifɔsi fo, o muso fila nunu ye baara kɛ kosɛbɛ Matigi ye. Aw ka ne ka terimuso Pɛrisi fo, ale fana y'a yɛrɛ di ka baara kɛ Matigi ye. Aw ka Urufusi fo, ale min ye Matigi ka baarakɛlanyuman ye, ani a bamuso, ne fana bamuso lo. Aw ka Asɛnkiriti, ni Filegɔn, ani Ɛrimɛsi, ni Patorobasi, ni Ɛrimɛsi, ani balima minw bɛ n'u ye, ka olu fo. Aw ka Filologi ani Zuli, ni Nere an'a balimamuso, ni Olɛnpasi ani Ala ka mɔgɔ minw bɛɛ b'u fɛ yen, ka olu fo. Aw ka nyɔgɔn fo kosɛbɛ ni kɔnɔgwɛ ye. Krista ka jama bɛɛ b'aw fo. N balimaw, mɔgɔ minw bɛ faranni kɛra, ani ka ban an ka kalan na, ne b'aw dali ko aw k'aw yɛrɛ kɔlɔsi olu la. Aw kana jɛn n'u ye. O mɔgɔ nunu tɛ baara kɛra an Matigi Krista ye, nga janko u kɔnɔbara ka fa. Fanga tɛ mɔgɔ minw na o bɛ olu kunnacɛn n'u ka kuma diman ye ani u ka nanbarankuma ye. Aw kɔni, aw sɔnna Ala ta ma cogo min na, mɔgɔ bɛɛ b'o kala ma, o la, ne bɛ nisɔndiya aw kɔsɔn. Halibi, ne b'a fɛ aw ka hakili sɔrɔ ka se ka konyuman kɛ, aw kana kojugu kɛ. Hɛrɛtigi Ala bɛna Sutana ben aw seen kɔrɔ yan ni dɔɔni. An Matigi Yezu Krista ka nɛɛma ka kɛ aw ye! Ne ka baarakɛnyɔgɔn Timote b'aw fora, ani Lusiyusi, ni Zazɔn, ani Sozipatorosi, olu minw ye ne ka mɔgɔw ye. Matigi tɔgɔ la ne Teritiyusi b'aw fo, ne min ye nin bataki sɛbɛn. Ne ka jatigicɛ Gayusi b'aw fo, Ala ka jama bɛ to ka lajɛn ale min fɛ. Erasiti, ale min ye dugu bɛɛ ka nafolo kɔlɔsibaga ye, ale fana b'aw fora, an'an balima Karitusi fana. [ An Matigi Yezu Krista ka nɛɛma ka kɛ aw bɛɛ kan, amiina.] An ka Ala fo, ale min bɛ se ka barika don aw la Yezu Krista ka kibaru diman kɔsɔn, ne b'o min fɔ ka kɛnyɛ ni tinyɛ ye an y'o min lɔn o min tun kɛra gundo ye kabini fɔlɔfɔlɔ. Nga sisan a yirala kɛnɛ kan, siya wɛrɛw bɛɛ bɛ se k'a lɔn kiraw ka sɛbɛ barika la, ka kɛnyɛ ni Ala ka cii ye, janko u ka se ka la Ala la ka mɛnni kɛ a fɛ. Ala kelenpe ye hakilitigi ye. Bonya ka la a kan Yezu Krista barika la tuma bɛɛ la. Amiina. Ne Pɔli min welela ka kɛ Yezu Krista ka ciden ye Ala sago la, ani an balimacɛ Sɔsitɛnɛ, bɛ bataki nin ci Ala ka jama ma min bɛ Korɛnti dugu kɔnɔ, Yezu Krista ye minw wele k'u saniya ka kɛ Ala ta ye. A fana cira mɔgɔ bɛɛ ma, olu minw bɛ yɔrɔ bɛɛ la n'u bɛ an Matigi Yezu Krista bato, olu ka Matigi lo, ani an fana ta lo. An Faa Ala n'an Matigi Yezu Krista ka nɛɛma ni hɛrɛ kɛ aw ye. Ne bɛ barika la Ala ye tuma bɛɛ aw kɔsɔn, bari a ye nɛɛma kɛ aw ye Yezu Krista barika la. Ale barika la aw kɛra fɛɛn bɛɛ tigiw ye, aw bɛ kuma lɔn kosɛbɛ, lɔnniya fana b'aw fɛ. Bari Krista koo min fɔra aw ye, o ye sigiyɔrɔ sɔrɔ aw kɔnɔ. K'aw to an Matigi Yezu Krista nalon makɔnɔni na, Ala bɛ seko minw di, aw ma dɛsɛ o si la. Ala kelen le bɛ barika don aw la fɔɔ ka taa se an Matigi Yezu Krista nalon ma, jalakiyɔrɔ kana sɔrɔ aw la o loon na. Ala ye kantigi ye. A y'aw wele ka kɛ a Dencɛ an Matigi Yezu Krista ka jɛnnyɔgɔnw ye. Ne b'aw dali n balimaw, an Matigi Yezu Krista tɔgɔ kɔsɔn ko aw k'aw daa kɛ kelen ye, farali kana sɔrɔ aw cɛma. Aw ka miiri ka kɛ kelen ye aw ka kolatigɛnin bɛɛ la. Bari n balimaw, ne y'a mɛn Kulowe ka somɔgɔw fɛ, ko bɛnbaliya bɛ aw ni nyɔgɔn cɛ. O kɔrɔ ko aw dɔw b'a fɔ k'olu ye Pɔli ka kalandenw ye, dɔ wɛrɛw k'olu ye Apolɔsi ta ye, dɔw fana k'olu ye Sefasi taw ye, dɔ wɛrɛw fana k'olu ye Krista taw ye. O tuma na, Krista tilannin lo wa? Yala Pɔli gwengwenna lɔgɔ kan aw kɔsɔn wa? Aw batizera Pɔli tɔgɔ la wa? Ne bɛ Ala tando bari ne ma mɔgɔ si batize aw cɛma, fɔɔ Kirisipusi ani Gayusi. O cogo la, mɔgɔ si tɛ se k'a fɔ ko aw batizera ne tɔgɔ la. Aa! Ne ye Sitefana ka somɔgɔw batize fana, o kɔfɛ sa, ne hakili t'a la ni ne ye mɔgɔ wɛrɛ batize tugu. Bari Krista ma ne ci ka mɔgɔ batize, a ye ne ci ka kibaru diman le fɔ, ne kana o kɛ ni ne yɛrɛ ka hakilitigiya kuma ye, janko Krista ka saya gwengwenlɔgɔ kan kana kɛ gwansan ye. N'u bɛ kuma Krista ka saya koo la gwengwenlɔgɔ kan, o ye fatɔyakuma ye mɔgɔ dɔw fɛ o minw bɛ halaki sira kan. An minw bɛ kisili sira kan, an fɛ kɔni, Ala ka sebagayako lo. Bari a fɔra Ala ka kuma na ko: “Ne bɛna lɔnnikɛlaw ka lɔnniya cɛn, ka hakilitigiw hakili nyagami.” Lɔnnikɛla bɛ min? Kalanfa bɛ min? Mɔgɔ minw bɛ koo bɛɛ lɔnniya nyinina bii dinyɛ na, olu bɛ min? Ala ma dinyɛ nin ka lɔnniya yɛlɛma k'o kɛ nalomanya ye wa? Tinyɛ lo, dinyɛ n'a ka lɔnniya bɛɛ, a ma se ka Ala lɔn a ka lɔnniya baara la. O la, minw lara Ala la, a diyara a ye ka olu kisi, waajuli barika la, o min kɛra nalomanyako ye dinyɛ mɔgɔw fɛ. Zuwifuw, olu mako bɛ kabako kɛli la, girɛkiw, olu bɛ lɔnniya le nyinina. An bɛ Krista gwengwenko fɔra. O kɛra kunnacɛnko ye Zuwifuw fɛ, ka kɛ nalomanyako ye siya wɛrɛw fɛ. Nga Ala ye mɔgɔ minw wele, a kɛra Zuwifu ye wo, girɛki lo wo, olu fɛ kɔni, Krista ye Ala ka sebagaya n'a ka lɔnniya le ye. Bari Ala ka nalomanyako ka fisa ni mɔgɔ ka hakilitigiyako ye, Ala ka barikatanya fanga ka bon ni adamaden ka barikatigiya ye. Aw k'aw yɛrɛ filɛ kɛ n balimaw, aw minw ye Ala ka weleli mɛn ka sɔn a ma, adamaden ka miiriya la, lɔnnikɛla caaman tɛ aw cɛma, ni fangatigiw, ani mɔgɔbaw. Nga koo min kɛra nalomanyako ye dinyɛ mɔgɔw fɛ, Ala y'o le ta ka hakilitigiw malo n'a ye. Barika tɛ fɛɛn minw na dinyɛ na, Ala ye olu le woloma ka fangatigi dabari ban n'o ye. Adamadenw tɛ fɛɛn minw jati, ani u bɛ minw dɔgɔya, o minw tɛ foyi ye u nyana, Ala ye olu le woloma ka fɛɛn jatitaw kɛ fɛɛn gwansan ye, waasa adamaden si kana se k'a yɛrɛ bonya Ala nyakɔrɔ. Nga ale le barika la aw kɛra Yezu Krista jɛnnyɔgɔnw ye, an ye lɔnniya sɔrɔ ale barika la ka bɔ Ala fɛ, ale fana sababu la an kɛra mɔgɔtilenninw ye Ala nyakɔrɔ ka kɛ a ta ye, ani mɔgɔhɔrɔnyaninw. O cogo la, “mɔgɔ min b'a fɛ k'a yɛrɛ bonya, o tigi k'a yɛrɛ bonya Matigi barika la,” i n'a fɔ a fɔra Ala ka kuma na cogo min na. N balimaw, ne tun taara aw fɛ tuma min na, ne ma taa Ala ka tinyɛ dogonin koo fɔ aw ye ni kuma faamubali ye, walima ni lɔnniya kuma damatɛmɛnin ye. Ka ne to aw cɛma, n tun t'a fɛ aw ka fɛɛn wɛrɛ lɔn, fɔɔ Yezu Krista dama, n'a gwengwenko lɔgɔ kan. Ne sera aw fɛ tuma min na, ne tun ye mɔgɔ barikatan ye, n tun siranna, ka yɛrɛyɛrɛ kosɛbɛ. Ne ka kuma ni ne ka waajuli tun ma kɛ i n'a fɔ lɔnnikɛla ka kuma, nga Ala ka Nii Senuman le y'a ka sebagaya yira, janko aw jigi kana la adamaden ka lɔnniya kan, fɔɔ Ala ka sebagaya. Mɔgɔ minw taara nya Krista ka koo la, an kɔni bɛ olu kalan ni lɔnniya ye. O lɔnniya nin tɛ dinyɛ ta ye, walima nin dinyɛ kuntigiw ta, o minw ye halakita ye. Lɔnniya min bɔra Ala fɛ, an bɛ mɔgɔw kalan o le koo la, o min tun dogonin bɛ fɔɔ ka na se bii ma. Ala tun y'o min latigɛ an bonya kama kabini dinyɛ tun ma dan fɔlɔ. Dinyɛ kuntigiw si m'o lɔn, n'u tun y'o lɔn, u tun tɛna sɔn ka Nɔɔrɔtigi gwengwen lɔgɔ kan. Nga, a fɔra o cogo la Ala ka kuma na ko: “Mɔgɔ nyaa ma fɛɛn min ye ka ye, n'a tulo ma fɛɛn min koo mɛn ka ye, ni fɛɛn min miiriya ma don ka ye mɔgɔ kɔnɔ, Ala y'o le labɛn a kanubagaw ye.” Ala y'o koo dogoninw yira an na Nii Senuman barika la, bari Nii Senuman bɛ koo bɛɛ sɛgɛsɛgɛ kosɛbɛ fɔɔ ka taa se Ala ka koo dogoninw ma. Mɔgɔ jumɛn le b'a tɔnyɔgɔn kɔnɔnakow lɔn, n'a ma kɛ o tigi yɛrɛ ye? O cogo la fana, mɔgɔ tɛ se ka Ala ka koo lɔn, ni Ala ka Nii Senuman tɛ. An kɔni, an ye nii min sɔrɔ, o ma kɛ dinyɛ ta ye, nga Ala ta lo, waasa Ala ye koo minw kɛ an ye, an ka se k'o lɔn. An tɛ kuma ka kɛnyɛ ni adamaden ka lɔnniya ye, an bɛ fɛɛn min fɔra, o ye Ala koo ye Nii Senuman y'o min yira. An b'o fɔ mɔgɔw ye Nii Senuman bɛ min fɛ. Ka adamaden to a kelen, a tɛ se ka sɔn Nii Senuman ta ma, o ye fatɔyako ye a nyana, a tɛ se k'o faamu, bari mɔgɔ bɛ se k'olu danfara bɔ Nii Senuman barika le la. Ala ka Nii bɛ mɔgɔ min fɛ, ale bɛ se ka koo bɛɛ faranfasi, mɔgɔ si tɛ se k'ale ta faamu, bari: “Mɔgɔ jumɛn le bɛ Matigi ka miiriya lɔn, n'a bɛ se ka hakili d'a ma?” An kɔni, Krista ka miiriya bɛ an kɔnɔ. N balimaw, ne tun ma se ka kuma aw fɛ i n'a fɔ mɔgɔ minw taara nya Krista koo la, nga n kumana aw fɛ i n'a fɔ mɔgɔ minw ma taa nya kosɛbɛ, ani i n'a fɔ denmisɛnw Krista koo la. O la, ne ma dumuni gwiliman d'aw ma, fɔɔ nɔnɔ, bari aw tun tɛ se ka dumuni gwiliman dumu fɔlɔ, halibi aw tɛ se fana. Ni keliya ni kɛlɛ b'aw cɛma, aw k'a lɔn ko halibi adamadenya b'aw la, aw ni mɔgɔ tɔw bɛɛ bɛ kɛ kelen ye. N'aw dɔ y'a fɔ ko ale ye Pɔli ka kalanden ye, ani dɔ fana ko ale ye Apolɔsi ta ye, o tɛ adamadenya ye wa? Apolɔsi ye jon ye, ani Pɔli ye jon ye? Baarakɛlaw dama lo, minw sababu la aw sɔnna Matigi ma. U kelen kelen bɛɛ y'u ka baara kɛ Matigi ye min d'u ma. Ne ye tutuli kɛ, Apolɔsi y'o sɔn jii la, Ala le kɛra sababu ye u bonyana. O cogo la, mɔgɔ min ye tutuli kɛ, ale tɛ foyi ye, ani min b'u sɔn ni jii ye, ale fana tɛ foyi ye. Ala kelenpe le bɛ kɛ sababu ye n'u bɛ bonya. Ale lo bɛ jati. Mɔgɔ min bɛ tutuli kɛ ni min bɛ u sɔn ni jii ye, olu bɛɛ ka kan. U kelen kelen bɛɛ bɛna u ka sara sɔrɔ ka kɛnyɛ n'u ka baara ye, bari anw kɛra baarakɛnyɔgɔnw ye Ala ka baara la, aw ye Ala ka foro, n'a ka soo ye a bɛ min lɔra. Ala ka nɛɛma barika la a y'o min kɛ ne ye, ne kɛra solɔlanyuman ye, ne ye soo juu sigi, mɔgɔ dɔ wɛrɛ bɛ lɔli kɛ o kan, nga mɔgɔ kelen kelen bɛɛ ka kan k'a ka lɔcogo kɔlɔsi, bari mɔgɔ si tɛ se ka soo juu wɛrɛ sigi min bɛ danna fɔlɔta la o min ye Yezu Krista ye. Ni mɔgɔ dɔ mana lɔli kɛ o juu nin kan ni sanu, walima warigwɛ, walima ni kabakuru sɔngɔgwɛlɛn ye, walima ni lɔgɔ ye, walima ni biin ye, walima ni kalaw ye, mɔgɔ kelen kelen bɛɛ ka baara cogoya bɛna lɔn laban loon na. Tasuma bɛna u bɛɛ cogoya yira, bari mɔgɔ kelen kelen bɛɛ ka baara bɛna sɛgɛsɛgɛ ni tasuma ye. Ni mɔgɔ min ta ma jɛni, o tigi bɛn'a sara sɔrɔ. Ni mɔgɔ min ta jɛnina, o tigi tɛn'a sara sɔrɔ, a kɔni bɛna kisi, i n'a fɔ mɔgɔ min bolila ka bɔ tasuma na. Aw m'a lɔn ko aw kɛra Ala sigiyɔrɔ ye wa, ani ko Ala ka Nii siginin bɛ aw kɔnɔ? Ni mɔgɔ dɔ ye Ala ka sigiyɔrɔ cɛn, Ala fana bɛna o tigi halaki, bari Ala ka sigiyɔrɔ saniyanin lo, o sigiyɔrɔ nin ye aw ye. Mɔgɔ si kan'a yɛrɛ nigɛ. Ni mɔgɔ dɔ b'aw cɛma min b'a yɛrɛ jati hakilitigi ye dinyɛ na, o tigi ka sɔn fatɔya ma fɔlɔ ka sɔrɔ ka kɛ hakilitigi ye, bari dinyɛ nin hakilitigiya, o ye fatɔya ye Ala nyakɔrɔ. A fɔra Ala ka kuma na ko: “A bɛ hakilitigiw minɛ u ka cekuya la.” A fɔra tugu ko: “Matigi bɛ hakilitigiw ka miiriya lɔn, k'o kɛra gwansan ye.” O cogo la, mɔgɔ si kan'a yɛrɛ bonya adamadenw koo la, bari koo bɛɛ y'aw ta ye. Pɔli wo, Apolɔsi wo, ni Sefasi wo, walima dinyɛko wo, walima ka to nii na, walima ka sa, walima fɛɛn minw bɛ dinyɛ na yan bii wo, walima fɛɛn min bɛ na sini wo, olu bɛɛ y'aw ta ye. Nga aw ye Krista ta ye ani Krista fana ye Ala ta ye. O la, mɔgɔw ka kan k'anw jati Krista ka baaradenw ye, ani mɔgɔ minw bɛ Ala ka baara kunna. N'u ye baara dɔ kalifa mɔgɔ ma, u bɛ min nyini a fɛ, o ye tilenninya ye. Ne kɔni fɛ, hali n'aw ye ne jalaki, walima kititigɛla dɔw, o tɛ foyi ye ne nyana. Ne tɛ n yɛrɛ jalaki fana. Hali ni ne dusukun tɛ ne jalaki, a ma kɛ k'o le kɔsɔn ne ye jalakibali ye, nga ne jalakibaga ye Matigi ye. O le kɔsɔn aw kana kɔn ka mɔgɔ jalaki waati latigɛnin nya, aw k'a to, Matigi bɛ na ka koo dogonin bɛɛ bɔ kɛnɛma, ani ka mɔgɔw bɛɛ kɔnɔnakow yira. O waati la, mɔgɔ kelen kelen bɛɛ ka kan ni bonya min ye, a bɛna o sɔrɔ Ala fɛ. Ne balimaw, aw le kɔsɔn, ne ye kuma nin yɛlɛma k'a fɔ aw ye cogoya wɛrɛ la, k'o kɛnyɛ ne ni Apolɔsi taamacogo ye, waasa n'aw ye anw cogo filɛ, aw kana se k'aw yɛrɛ bonya, ka nɔrɔ mɔgɔ kelen na ka tɔ kelen kɔniya. Jon le y'a kɛ i fisayara ni tɔw ye? Mun le b'i fɛ ni Ala m'o d'i ma? N'i do y'o sɔrɔ Ala fɛ, mun na i b'i yɛrɛ bonya i n'a fɔ i yɛrɛ seko lo? Aw wasara ka ban, aw kɛra fɛntigiw ye, aw ye faamaw ye k'a sɔrɔ anw tɛ o ye! Ne b'a fɛ aw ka banba ka kɛ faamaw ye janko anw fana ka kɛ faamaw ye n'aw ye. Bari ne bɛ miiri ko Ala y'an cidenw kɔni bila mɔgɔ bɛɛ kɔfɛ, i n'a fɔ mɔgɔ minw ka kan ka faga. O la, an kɛra dinyɛ bɛɛ ka tolonkɛfɛn ye, k'a ta mɛlɛkɛw ma fɔɔ ka ta'a bila adamadenw ma. An kɛra fatɔw ye Krista kɔsɔn, nga aw kɛra hakilitigiw ye Krista barika la! An kɛra barikatanw ye, aw kɛra fangatigiw ye! Aw bɛ bonya sɔrɔ, an ta ye dɔgɔya ye! Waati nin yɛrɛ la halibele, kɔngɔ b'an na, minnɔgɔ b'an na, fani yɛrɛ t'an fɛ, u b'an tɔɔrɔla, an bɛ taamataamana yɔrɔ bɛɛ la. An yɛrɛ le bɛ baara kɛ ka sɛgɛn ka sɔrɔ k'an ka balo sɔrɔ. U b'an nɛni, an bɛ duba kɛ an nɛnibagaw ye, u b'an tɔɔrɔ, an b'o munyu. N'u b'an tɔgɔ cɛn, an b'u ladi ni kumanyuman ye. Halibele u b'an jati nyamanyama ye dinyɛ na, ani fɛɛn kasagoman. Ne ma nin fɔ aw ye waasa k'aw maloya, nga ne b'a fɛ k'aw lasɔmi i n'a fɔ n ka deenw. Hali ni kalanfa waa tan le bɛ aw fɛ, k'aw to Krista ka sira la, aw faa ma kɛ mɔgɔ caaman ye. Ne lo ye kibaru diman fɔ aw ye, aw ka sɔrɔ ka la Yezu Krista la. Ne b'aw dali ko aw ka kɛ ne ladegebagaw ye. O le kɔsɔn, n deen min koo ka di ne ye n'o ye Timote ye, n y'o ci aw fɛ. Mɔgɔsɛbɛ lo Matigi ka sira la. Ale bɛna aw hakili jigi ne ka taamacogo la Krista ka sira la, i n'a fɔ ne bɛ Ala ka jama kalan yɔrɔ bɛɛ cogo min na. Mɔgɔ dɔw b'aw cɛma minw b'a miiri ko ne tɛna na aw fɛ tugu, o le y'a to u b'u yɛrɛ bonya. Nga ne bɛna taa aw fɛ yan ni dɔɔni, ni Matigi sɔnna. O cogo la, ne bɛna se ka yɛrɛbonyala nunu ka kɛwali yɛrɛ ye, a kana dan u ka kuma ma, bari Ala ka faamaya ma kɛ kuma dama ye, nga a b'a yira kɛwali la fana. Mun le ka di aw ye? Ne ka taa aw fɛ ni bere ye wa, walima ni kanuya, ni dususuma ye? A bɛ fɔra yɔrɔ bɛɛ ko mɔgɔkolonya dɔ kɛra aw cɛma, o min nyɔgɔn tɛ sɔrɔ Alalɔnbaliw fɛ yɛrɛ. Mɔgɔ dɔ b'aw cɛma min y'a facɛ ka muso bɔsi. Aw do b'aw yɛrɛ bonya! Aw dusu ma kasi o koo la, ka se k'o koo kɛbaga nin gwɛn ka bɔ aw cɛma wa? Ne kɔni fɛ, ne t'aw cɛma yen, nga ne bɛ n'aw ye miiriya la, ne y'o kojugukɛla nin jalaki ka ban i n'a fɔ n b'o yɔrɔ la. N'an ka miiriya nana kɛ kelen ye n'aw mana nyɔgɔn lajɛn an Matigi Yezu Krista tɔgɔ kɔsɔn, n'a ka sebagaya barika la, o mɔgɔ sugu nin ka kan ka bila gɛrɛfɛ Sutana ye, waasa a ka adamadenya miiri ka bɔ a la, a nii ka se ka kisi Matigi kɔsegilon na. Aw ka yɛrɛbonyako ma kɛ a nyanaman ye! Aw m'a lɔn ko burufununan fitini bɛ se ka farinimugu caaman funu wa? Aw kɛra mɔgɔnyumanw ye minkɛ, aw k'o kojugu nin bɔ aw cɛma, waasa aw ka kɛ mɔgɔnyumanw yɛrɛyɛrɛ ye, bari Krista min kɛra saraka ye k'an hɔrɔnya, ale fagara o kɔsɔn. O tuma na, an k'an ka nyanagwɛ kɛ ni buru ye, fununan tɛ min na, o kɔrɔ, juguya ni mɔgɔkolonya kana kɛ aw cɛma, nga aw k'o kɛ ni kɔnɔgwɛ ani tilenninya ye. Ne y'a fɔ aw ye n ka bataki kɔnɔ ko aw kana jɛn ni kakalaw ye. Ne kaan tɛ dinyɛ kakalaw ma, walima sɔnjuguw, walima soonw, walima josɔnlaw ma dɛ, bari o tɛ se ka kɛ n'aw ma bɔ dinyɛ na. Ne ye min fɔ aw ye bataki nin kɔnɔ, o ye nin ye, ko: ni mɔgɔ min b'a yɛrɛ kɛ aw dɔ ye, k'a sɔrɔ o tigi ye kakala ye, walima sɔnjugu ye, walima josɔnla ye, walima mɔgɔ tɔgɔcɛnbaga, walima dɔrɔtɔ, walima soon ye, aw kana jɛn n'o tigi ye fewu, hali ka dumuni yɛrɛ kɛ n'a ye. Aw nyana, ne ka kan ka mɔgɔ wɛrɛw le jalaki wa? Aw m'a lɔn ko aw ka kan k'an ka mɔgɔw le jalaki wa? Ala yɛrɛ le bɛna mɔgɔ wɛrɛw kiti. “Aw ka mɔgɔjuguw bɔ aw cɛma,” i n'a fɔ a fɔra Ala ka kuma na cogo min na. Ni koo donna dɔ n'a balima cɛ, mun na aw tɛ taa n'o koo ye Ala ka jama fɛ fɔɔ faamaw fɛ minw tɛ siran Ala nya? Aw m'a lɔn ko Ala ka jama le bɛna dinyɛ mɔgɔw kiti wa? Ni aw bɛna dinyɛ mɔgɔw kiti, aw bɛ se ka dɛsɛ ka kofitiniw nyanabɔ wa? Aw m'a lɔn ko an bɛna mɛlɛkɛw kiti wa? Sankofɛrɛ dinyɛ koo! O la, n'o koo nyɔgɔn b'aw fɛ min ka kan ka nyanabɔ, Ala ka jama tɛ mɔgɔ minw jati, aw bɛ taa o tigiw fɛ ka koo nin nyanabɔ. Aw yɛrɛ tɛ malo, o tuma na, mɔgɔ si tɛ aw cɛma min bɛ koo lɔn ka se ka balima fila ka koo nyanabɔ wa? Fɔɔ balima fila ye nyɔgɔn wele faamaw fɛ, olu k'u ka koo nyanabɔ, olu minw tɛ Ala lɔn. N'aw ye nyɔgɔn wele kiti la ka ban, o ye aw ka dɛsɛyɔrɔ dɔ ye. Mun na aw tɛ sɔn ka tilenbaliyakow munyu, ani ka sɔn mɔgɔ ka ben aw kan? Nga aw le bɛ tilenbaliyakow, ni benkanni kɛ mɔgɔ tɔw la, o minw ye aw ka balimaw ye. Aw m'a lɔn ko mɔgɔ minw bɛ tilenbaliyakow kɛ, olu tɛna don arijana na wa? Aw kana aw yɛrɛ nigɛ. Nyamɔgɔyakɛlaw, walima josɔnlaw, walima kakalaw, walima kakalaya sifa bɛɛ kɛbagaw, walima soonw, walima sɔnjuguw, walima dɔrɔtɔw, walima mɔgɔ tɔgɔcɛnlaw, walima benkannikɛlaw, olu si tɛna arijana sɔrɔ. Aw dɔw tun bɛ ten fana, nga aw saniyara ka kɛ Ala taw ye, ani ka kɛ mɔgɔtilenninw ye, an Matigi Yezu Krista tɔgɔ la ani an ka Ala ka Nii Senuman barika la. Dɔw ko mɔgɔ bɛ se ka koo bɛɛ kɛ. Nga koo bɛɛ tɛ mɔgɔ mako nya. Tinyɛ lo, ne bɛ se ka koo bɛɛ kɛ. Nga ne t'a fɛ ka kɛ fɛɛn si ka jɔɔn ye. U fana ko dumunifɛn dilanna kɔnɔbara kama, kɔnɔbara fana bɛ yen dumuni kama. Nga Ala do bɛna u fila bɛɛ halaki. Mɔgɔ farisogo ma kɛ kakalaya kama, o ye Matigi ta ye ani Matigi bɛ janto a la. Ala min ye Matigi kunun k'a bɔ kaburu la, ale fana le bɛna anw kunun a ka sebagaya barika la. Aw m'a lɔn ko aw farisogo ye Krista fari yɔrɔ dɔ ye wa? N bɛ sɔn ka Krista fari yɔrɔ dɔ ta k'o kɛ kakalayakɛfɛn ye wa? Ayi, o tɛ se ka kɛ. Aw m'a lɔn fana ko ni mɔgɔ dɔ bɛ jɛn ni kakala ye, u fila bɛ kɛ kelen ye wa? Bari a fɔra Ala ka kuma na ko: “U fila bɛɛ bɛ kɛ farisogo kelen ye.” Nga mɔgɔ min sɔnna Matigi ma, o tigi ni Matigi bɛ jɛn ka kɛ kelen ye miiriya la. Aw ka kakalaya dabila, mɔgɔ bɛ kojugu minw bɛɛ kɛ, o si tɛ se a farisogo ma fɔɔ. Nga min bɛ kakalaya kɛ, o tigi b'a yɛrɛ hakɛ le ta. Aw m'a lɔn ko aw farisogo ye Nii Senuman sigiyɔrɔ ye wa? O min bɛ aw fɛ ni Ala y'o d'aw ma. Aw m'a lɔn ko aw tɛ aw yɛrɛ ta ye tugu wa? Ala le y'aw kunmabɔ, o la, aw ka bonya la Ala tɔgɔ kan sisan n'aw farisogo ye. Aw ye nyiningali min kɛ aw ka bataki kɔnɔ, an k'o filɛ sisan. O la, min ka fisa cɛɛ ma, a kana muso furu. Nga, kakalaya kɔsɔn, a ka nyi cɛɛ kelen kelen bɛɛ ka muso furu, muso kelen kelen bɛɛ ka sigi cɛɛ fɛ. Cɛɛ ka kan k'a ka kɛtaw kɛ a ka muso faan fɛ, ani muso fana k'a ka kɛtaw kɛ a ka cɛɛ faan fɛ. Muso t'a yɛrɛ farisogo kunna fɔɔ a cɛɛ. O cogo la fana, cɛɛ t'a yɛrɛ farisogo kunna fɔɔ a muso. Aw kana ban nyɔgɔn ma, fɔɔ n'aw fila bɛɛ bɛnn'a la ko aw bɛna waati dɔɔni kɛ ka Ala dali. O kɔ, aw ka segi nyɔgɔn ma tugu, waasa aw ka se k'aw yɛrɛ minɛ Sutana ka nigɛli tuma na. Ne ye kuma min fɔ aw ye, o ma kɛ sariya ye n ye min sigi aw ye, nga sira lo, n ye min yira aw la. A ka di ne ye ni mɔgɔ bɛɛ tun bɛ se ka kɛ i n'a fɔ ne. Nga Ala ye seko min di bɛɛ ma, o ma kɛ kelen ye. Dɔ ta ye nin ye, dɔ wɛrɛ ta ye fɛɛn wɛrɛ ye fana. Minw ma furu fɔlɔ ni firiyamusow, ne bɛ min fɔ u ye, a ka fisa u ka to ten n'u ma furu i n'a fɔ ne. Nga ni min y'a lɔn ko a tɛ se k'a yɛrɛ minɛ, o tigi ka furu kɛ. O ka fisa a ma a 'bɛ tɔɔrɔ o nigɛ fɛ. Minw furunin bɛ, ne b'a nyini olu fɛ, nga ne tɛ dɛ, Matigi le ko ten, ko muso kana bɔ a cɛɛ fɛ. Nga ni muso min banna a cɛɛ la, a kana furu cɛɛ wɛrɛ fɛ tugu, walima a ka kɔsegi ka taa bɛn n'a cɛɛ ye. Cɛɛ fana kan'a muso bila. Ne bɛ min fɔ tɔw ye, o ye ne yɛrɛ ka kuma ye, Matigi ta tɛ. N'aw balima dɔ ka muso ma la Krista la, n'o muso nin y'a latigɛ ko a bɛ to a fɛ, a kan'a bila. N'aw balimamuso dɔ cɛɛ ma la Krista la, n'o cɛɛ nin y'a latigɛ k'u bɛna to nyɔgɔn fɛ ten, muso nin kana bɔ a fɛ. Bari cɛɛ min ma la Krista la, ale saniyanin bɛ a muso barika la, muso min ma la Krista la, ale fana saniyanin bɛ a cɛɛ barika la. N'o tɛ, u ka deenw tɛna kɛ densaniyaninw ye, k'a sɔrɔ u ye deen senumanw ye. Mɔgɔ min kɛra Krista ta ye, n'o tigi ka muso, walima a cɛɛ min ma la Krista la b'a fɛ ka faran a la, o tɛ baasi ye, bari Ala y'aw wele ka to hɛrɛ la. E min ye muso ye, i t'a lɔn n'i bɛna kɛ sababu ye i cɛɛ ka kisi. Cɛɛ, e fana t'a lɔn n'i bɛna kɛ sababu ye i muso ka kisi. Matigi ye see min di mɔgɔ kelen kelen bɛɛ ma, bɛɛ ka kan ka taama ka kɛnyɛ n'o le ye. Sanni Ala k'i wele, i tun bɛ cogo min na, i ka to ten. Ne b'o le nyinina Ala ka jama bɛɛ fɛ. Ala ye mɔgɔ dɔ wele n'a kɛnɛkɛnɛnin lo wa? A ka to ten. A ye dɔ wele n'a ma kɛnɛkɛnɛ wa? O tigi kan'a yɛrɛ kɛnɛkɛnɛ tugu. Kɛnɛkɛnɛko t'a kuun ye, kɛnɛkɛnɛbaliya fana ma kɛ a kuun ye. A kuun ye nin ye: i ka Ala ka sariyaw labato. Mɔgɔ kelen kelen bɛɛ, sanni Ala k'a wele, a tun bɛ cogo min, a ka to ten. A y'i wele k'i to jɔnya la wa? I hakili kana nyagami, nga n'i bɛ se ka hɔrɔnya, i ka banba. Bari Ala ye mɔgɔ min wele k'o tigi to jɔnya la, ale kɛra hɔrɔn ye Matigi fɛ. O cogo la, a ye mɔgɔ min wele n'o tigi tun ye hɔrɔn ye, ale bɛ kɛ jɔɔn ye Krista fɛ. Ala le y'aw kunmabɔ sɔngɔ dɔ la, aw kana tila ka kɛ adamadenw ka jɔɔnw ye tugu. N balimaw, min ka fisa, mɔgɔ kelen kelen bɛɛ tun bɛ cogo min na sanni Ala k'a wele, u ka to o cogo kelen na Ala nyakɔrɔ. Sisan, minw ma furu kɛ fɔlɔ, n kaan bɛ olu le ma. Matigi ka kuma tɛ, nga ne yɛrɛ ka miiriya lo, n bɛ min d'u ma. Matigi ka makari barika la, mɔgɔ bɛ se k'a jigi la a kan. Ka kɛnyɛ ni waati ka gwɛlɛya ye, ne bɛ miiri ko ni mɔgɔ tora ten, o ka fisa. Muso b'i fɛ wa? I kana ban a la. I ma muso furu fɔlɔ wa? I kana dɔ nyini. Nga n'i ye muso furu, o tɛ kojugu ye. Ni sunguru furula fana, ale ma kojugu kɛ. Nga mɔgɔ minw ye furu kɛ ka ban, olu bɛna tɔɔrɔba sɔrɔ. Ne b'a fɛ k'aw dɛmɛ ka kisi o ma. Ayiwa n balimaw, n b'a fɔ aw ye ko waati caaman t'an bolo. Kabini sisan, cɛɛ minw furunin bɛ, olu ka kɛ i n'a fɔ musow t'u fɛ. Mɔgɔ minw bɛ kasira, olu ka kɛ i n'a fɔ u tɛ kasira. Minw bɛ nisɔndiyara, olu ka kɛ i n'a fɔ u tɛ nisɔndiyara. Minw bɛ sanni kɛra, olu ka kɛ i n'a fɔ u tɛ foyi le sɔrɔla. Mɔgɔ minw bɛ dinyɛ nin tɔnɔ dumuna, olu ka kɛ i n'a fɔ u tɛ foyi sɔrɔla, bari dinyɛ bɛ cogo min na, a tɛ mɛn tugu a bɛna ban. Ne b'a fɛ aw kana aw hakili nyagami. Mɔgɔ min ma furu kɛ, ale ka hami ye ka Matigi ka baara kɛ, a b'a fɛ ka Matigi sago kɛ. Nga min ye muso furu, ale ka hamiko ye dinyɛ ta ye, a bɛ cogoya nyini k'a ka muso ladiya. O cogo la, a ka miiriya bɛ tilan ka kɛ fila ye. Cɛɛ tɛ min fɛ ani sunguru, olu ka hami ye ka Matigi ka baara kɛ, waasa u ka se k'u yɛrɛ di Matigi ma koo bɛɛ la. Nga muso min furula, ale ka hamiko ye dinyɛko ye. A bɛ cogoya nyini k'a cɛɛ ladiya. Ne bɛ nin koo fɔ aw ye, a ma kɛ ko ne b'a fɛ k'aw tɔɔrɔ, nga aw ka tɔnɔ kɔsɔn lo, n b'a fɛ aw ka kobɛnnin kɛ, ani aw ka se ka nɔrɔ Matigi la ni miiriya kelen ye. Ni kanbelen dɔ y'a ye ko a tɛ se k'a yɛrɛ minɛ a ka maminɛmuso faan fɛ, a k'a furu ka kɛnyɛ n'a yɛrɛ ka miiriya ye, o tɛ kɛ kojugu ye. Nga ni kanbelen min y'a latigɛ a yɛrɛ dusu la, ni degunyɔrɔ t'a la fewu, n'a bɛ se a yɛrɛ kɔrɔ fana, k'a latigɛ a yɛrɛ kɔnɔ ko a tɛna se a ka maminɛmuso ma fewu, ale bɛ baaranyuman kɛ. O cogo la, mɔgɔ min bɛ furu kɛ, o tigi ye konyuman kɛ. Min ma furu kɛ fana, o tigi ye konyuman kɛ kosɛbɛ. Ka muso cɛɛ to sii la, muso nin sirinin b'a la. Nga ni cɛɛ nin sara, muso lafoninin bɛ. A bɛ se ka furu cɛɛ wɛrɛ ma nga fɔɔ ale ka kɛ mɔgɔ ye min lara Krista la. O bɛɛ n'a ta, n'a tora ten, o tun ka fis'a ma kosɛbɛ. O ye ne ka miiriya ye. N bɛ miiri fana ko Ala ka Nii Senuman bɛ n fɛ. Min ye josɔnsogo koo ye, an y'a lɔn ko an bɛɛ bɛ koo lɔn. Nga lɔnniya bɛ mɔgɔ don yɛrɛbonya na, kanuya b'an dɛmɛ ka taa nya. Ni mɔgɔ dɔ bɛ miiri ko ale ye koo lɔn, o tigi ma lɔnniya sɔrɔ i n'a fɔ a ka kan k'a sɔrɔ cogo min na. Ala koo ka di mɔgɔ min ye, Ala b'o tigi lɔn. Min ye josɔnsogow nyimiko ye, an y'a lɔn ko joo tɛ foyi ye dinyɛ na, an y'a lɔn fana ko Ala ye kelen ye. Hali n'u bɛ miiri ko dugukolo kan jinaw ni sankolo taw kɛra batofɛnw ye k'a kɛ i n'a fɔ batofɛn caaman ni matigi caaman bɛ yen tinyɛ na, an kɔni fɛ, Ala kelen le bɛ yen. Ale le y'an Faa ye, koo bɛɛ bɛ bɔ ale fɛ, an fana bɛ taa ale fɛ, ani Matigi kelenpe le bɛ yen, o ye Yezu Krista ye, ale min barika la fɛɛn bɛɛ bɛ yen, anw fana bɛ yen ale barika la. Nga bɛɛ t'o lɔn. Dɔw bɛ yen minw delila joko la kosɛbɛ, n'u b'o sogo nunu nyimi tuma min na, u b'o jati i n'a fɔ josɔnsogo lo. O cogo la, u ka barikatanya kɔsɔn, u bɛ miiri ko u ye kojugu kɛ. A ma kɛ ko dumunifɛn le b'an gwɛrɛ Ala la, hali n'an m'o dumu, foyi tɛ bɔ an na. N'an fana y'o dumu, foyi tɛ fara an kan. Nga aw k'aw yɛrɛ kɔlɔsi, aw ka yɛrɛsagokɛ kana barikatanw dɔ kunna cɛn. N'o bɛ ele ye, n'i bɛ dumuni kɛra jobon kɔnɔ, e min b'o koo faamuna, o koo miiri tɛn'a nyɔnti k'a don josɔnsogo nyimi na wa? O cogo la, i balima min barika ka dɔgɔ, ale bɛna halaki ele ka lɔnniya barika la, Krista sara o min kɔsɔn. N'aw bɛ to k'aw balimaw hakɛ ta o cogo la ani k'o hakili cɛn ten, aw bɛ Krista fana le hakɛ ta. O la, ni dumuni dɔ bɛ kɛ sababu ye ne balima kunna bɛ cɛn, ne bɛ ban o sogo la pewu waasa n kan'a kunna cɛn. Ne tɛ n yɛrɛ ta ye wa? Ne ma kɛ ciden ye wa? Ne ma Yezu an Matigi ye wa? Aw ma kɛ ne ka baara nɔɔ ye Matigi Yezu barika la wa? Hali ni mɔgɔ dɔw tɛ ne lɔn ko n ye ciden ye, aw ka kan ka ne lɔn bari aw kɛra ne ka cidenya baara nɔɔ ye Matigi barika la. O le ye ne ka kuma ye k'o fɔ n jalakibagaw ye. An man kan ka dumuni kɛ ani ka minni kɛ fana wa? An man kan ka balimamuso dɔ ta k'an bila sira an ka taamaw na wa, i n'a fɔ Matigi dɔgɔcɛw ni Sefasi ani ciden tɔw? Walima ne ni Barinabasi dama ka kan ka baara kɛ janko k'an daladumuni sɔrɔ wa? Mɔgɔ jumɛn le bɛ yen n'a bɛ sɔlidasiya kɛ n'a tɛ sara sɔrɔ? Mɔgɔ jumɛn bɛ yiriforo bɔ n'o tigi t'a deenw nɛnɛ? Walima mɔgɔ jumɛn bɛ begɛnw mara n'o tigi t'o ka nɔnɔ sɔrɔ ka min? Aw kan'a miiri k'o ye adamaden miiriya dama ye, Ala ka sariya t'o koo kelen fɔ fana wa? Bari Ala ye sariya min di Musa ma, a fɔra o la ko: “I kana misi daa siri n'a bɛ sɛnɛ kɛra suman kɔnɔ.” Ala bɛ hami misi koo la fana wa? Kuma min fɔra, o ma fɔ anw le kɔsɔn wa? Ɔnhɔn, o koow sɛbɛnna an le kɔsɔn, bari sɛnɛkɛla ka kan ka l'a la ko a bɛn'a niyɔrɔ sɔrɔ, ani sumangosibaga fana bɛ l'a la ko a bɛn'a niyɔrɔ sɔrɔ. N'an ye Ala ka baara kɛ aw cɛma, n'anw b'o baara nin tɔnɔ sɔrɔla aw fɛ tuma min na, o ye kojugu ye wa? Ni mɔgɔ dɔw b'o tɔnɔ minɛna aw fɛ, anw do? Anw ka kan n'o ye ka tɛmɛ olu kan, nga anw m'o jati. Anw bɛ koo bɛɛ munyu, waasa sababu dɔ kana Krista ka kibaru diman fɔli bali. Aw b'a lɔn ko mɔgɔ minw bɛ baara kɛ Alabatosoba kɔnɔ, olu ka dumuni bɛ bɔ o yɔrɔ la le, ani minw ye sarakalasebagaw ye, olu niyɔrɔ bɛ bɔ sarakaw la. O cogo la fana, Matigi y'a fɔ ko mɔgɔ minw bɛ kibaru diman fɔ, olu ka balo kibaru diman barika la. Nga ne kɔni m'o tɔnɔ nin si sɔrɔ. A fana ma kɛ ko ne b'a fɛ k'o sɔrɔ aw fɛ, k'o le y'a to ne bɛ nin koo sɛbɛn aw ye dɛ. Yan ni ne b'o koo nyini, ne ka sa o ka fisa n ma, bari kibaru diman fɔko ma kɛ tɔgɔnyiniko ye ne fɛ, wajibiko lo ne ma. Bɔnɛ ye ne ta ye ni ne ma kibaru diman fɔ. Ni ne y'o baara kɛ ni dusudiya ye, ne bɛna o sara sɔrɔ, nga ni ne b'o kɛ ni jagoya ye, o ye karabako ye n ma. Ne ka tɔnɔ ye jumɛn ye sa? O ye nin ye: ne ka kibaru diman fɔ gwansan n kana miiri a tɔnɔ na. Ne ma kɛ jɔɔn ye mɔgɔ si fɛ, nga ne ye n yɛrɛ kɛ jɔɔn ye mɔgɔ bɛɛ faan fɛ, waasa ne ka se ka mɔgɔ caaman sɔrɔ u ka sɔn kibaru diman ma. Ka ne to Zuwifuw cɛma, ne tun kɛra i n'a fɔ olu, waasa ne ka se ka Zuwifuw sɔrɔ. Ni ne bɛ ni Ala ka sariya sirataamabagaw ye, n kɛra i n'a fɔ olu, waasa n ka se ka olu sɔrɔ fana k'a sɔrɔ n t'u dɔ ye. Ka ne to siya wɛrɛw cɛma, Ala ka sariya t'o minw fɛ, ne tun kɛra i n'a fɔ olu, waasa n ka se k'olu sɔrɔ. Nga a ma kɛ i n'a fɔ ne tɛ Ala ka sariya kɔrɔ! Krista le ye ne ka sariya ye. Barika tɛ mɔgɔ minw na, ka ne to olu cɛma, ne tun bɛ n yɛrɛ kɛ barikatan ye, waasa ka olu sɔrɔ. Ne ye n yɛrɛ kɛ cogo bɛɛ la mɔgɔ bɛɛ kɔsɔn waasa ka se ka dɔw sɔrɔ cogo bɛɛ la. Ne b'o bɛɛ kɛ kibaru diman kɔsɔn, waasa ne ka se ka n niyɔrɔ sɔrɔ. Aw b'a lɔn ko mɔgɔ minw bɛ nyɔgɔndanboli kɛ farikolo tolonkɛyɔrɔ la, mɔgɔ bɛɛ bɛ boli, nga mɔgɔ kelen le bɛ sara nin sɔrɔ dɛ. Aw ka boli ten fana ka o sara nin sɔrɔ. Farikolo tolonkɛlaw b'u yɛrɛ tanga fɛɛn caaman ma, waasa u ka se ka sara sɔrɔ min bɛna ban, nga an kɔni b'a kɛ sara kɔsɔn min tɛ ban ka ye. O le y'a to ne fana b'o boli la, nga n tɛ boli n kunfɛ. N bɛ i n'a fɔ bolokuru tolonkɛla, n tɛ bugɔri kɛ fu. Nga ne bɛ sɔn ka n yɛrɛ farikolo tɔɔrɔ ani ka n yɛrɛ minɛ waasa ni ne ye kibaru diman fɔ ka ban mɔgɔ wɛrɛw ye, o kɔ, Ala kana ban ne yɛrɛ la. N balimaw, ne t'a fɛ aw ka to nin koo lɔnbaliya la. An faaw bɛɛ taamana sankaba kɔrɔ, u bɛɛ sera ka tɛmɛ Kɔgɔjiwulen na. U bɛɛ jɛnna ni Musa ye ka tɛmɛ kɔgɔji kɔnɔ ani sankaba kɔrɔ. U bɛɛ fana ye dumuni kelen sɔrɔ ka bɔ Ala fɛ k'o dumu. U bɛɛ fana ye jii sɔrɔ ka bɔ Ala fɛ, u y'o sɔrɔ ka bɔ kabakuru la min bɔra Ala fɛ, k'o min, o min tun bɛ tugura u kɔ, ale tun ye Krista ye. Nga u caaman ka koo ma se ka diya Ala ye, o la, u sara kongokolon kɔnɔ. O koo nunu kɛra ka yira an na, waasa an fana kana miiri kojugu kɛli la tugu, i n'a fɔ olu. Aw kana kɛ josɔnlaw ye i n'a fɔ u dɔw y'a kɛ cogo min na. A fɔra ten Ala ka kuma na ko: “Jama sigira waasa ka dumuni kɛ ani ka minni kɛ, o kɔ, ka wili ka nyanagwɛ.” An kana kɛ kakalaw ye, i n'a fɔ u dɔw tun y'a kɛ cogo min na. O la, loon kelen dɔrɔn, mɔgɔ waa mugan ni saba sara u cɛma. An kana Matigi kɔrɔbɔ, i n'a fɔ u dɔw y'a kɛ cogo min na, saaw y'u faga. Aw kana; nunu;nunu fana, i n'a fɔ u dɔw; nunu;nununa cogo min na ni halakilikɛfɛn y'u faga. O koo nunu sera u ma, waasa ka koo dɔ nyaa yira, ani u sɛbɛnna waasa k'an kalan, an minw bɛ waati laban na. O cogo la, ni mɔgɔ min bɛ miiri ko ale lɔnin b'a seen kan, o tigi k'a yɛrɛ kɔlɔsi a kana ben! Kɔrɔbɔli minw y'aw sɔrɔ, o bɛɛ nyɔgɔn delila ka adamaden sɔrɔ. Ala ye kantigi ye, ale tɛna sɔn aw ka kɔrɔbɔ fɔɔ ka taa tɛmɛ aw barika danyɔrɔ kan. Ni kɔrɔbɔli sera, a bɛna bɔyɔrɔ d'aw ma ani ka barika don aw la ka se k'o munyu. O le y'a to ne balimaw, aw ka faran josɔn na. Ne bɛ kumana aw fɛ ten bari aw ye hakilitigiw ye. Aw k'o kuma kɔrɔ sɛgɛsɛgɛ aw yɛrɛ ma. An bɛ barika la Ala ye filen dubaman min kɔsɔn, ka sɔrɔ k'a min, ale t'an jɛn ni Krista ye a joli bɔnko la wa? An bɛ buru min tilantilan, o fana t'an jɛn ni Krista farisogo ye wa? Buru ye kelen ye, an minw ye mɔgɔ caaman ye, an kɛra farisogo kelen ye, bari an bɛɛ bɛ kori o buru kelen le kan. Aw ka Isirayɛlidenw koo filɛ, mɔgɔ minw bɛ sarakafɛnw dumu, jɛɛn bɛ olu ni Ala cɛ, bari sarakabɔyɔrɔ ye a ta ye. Ne t'a fɛ k'a fɔ ko josɔnfɛnw ni joow ye fɛɛn nyanamanw ye dɛ. Ayi, olu ka sɔnnifɛnw kɛra jinaw ta ye, u ma kɛ Ala ta ye, o la, ne t'a fɛ aw ka jɛnnyɔgɔnya sɔrɔ ni jinaw ye. Aw tɛ se ka minni kɛ ni Matigi ka filen ye, ka tila ka minni kɛ ni Sutana ta ye fana. Aw fana tɛ se ka Matigi ka dumuni kɛ ka tila ka Sutana ta kɛ. Walima an b'a fɛ ka Matigi darabɔ wa? See b'an ye ka tɛmɛ ale kan wa? Dɔw ko mɔgɔ bɛ se ka koo bɛɛ kɛ. Nga o bɛɛ ma nyi. Tinyɛ lo, fɛɛn bɛɛ bɛ se ka kɛ. Nga o bɛɛ tɛ se ka mɔgɔ dɛmɛ. Mɔgɔ si kan'a yɛrɛ nafa nyini, nga mɔgɔ kelen kelen bɛɛ k'a tɔnyɔgɔn ta le nyini. Fɛɛn minw bɛɛ bɛ feere lɔgɔ la, aw k'o bɛɛ dumu, aw kana sigasiga ka nyiningali caaman kɛ. Bari a fɔra Ala ka kuma na ko: “Dugukolo ye Matigi ta ye ani fɛɛn minw bɛɛ b'a kan.” Mɔgɔ min ma la Ala la, n'a y'i wele dumuni na a fɛ, n'i taara, n'o ye dumuni fɛɛn o fɛɛn sigi i kɔrɔ, i k'a dumu, i kana sigasiga ka nyiningali caaman kɛ, nga ni mɔgɔ dɔ y'a fɔ i ye ko josɔnfɛn lo, i kan'a dumu o tigi kɔsɔn, n'a ka miiriya kɔsɔn. Ne tɛ kumana e yɛrɛ koo la dɛ, nga ne bɛ kumana mɔgɔ dɔ nin ta koo le la. Mɔgɔw le b'a fɔ ko: “Mun na mɔgɔ wɛrɛ bɛna ne jalaki ne ka hɔrɔnya kɔsɔn? Ni ne bɛ barika la Ala ye ka sɔrɔ ka dumuni kɛ, mun na mɔgɔ dɔ bɛna ne tɔgɔ cɛn o fɛɛn nunu kɔsɔn?” Ayiwa, aw bɛ dumuni kɛra wo, aw bɛ minni kɛra wo, aw bɛ fɛɛn o fɛɛn min kɛ, aw k'o bɛɛ kɛ ka bonya la Ala kan. Aw kana kɛ sababu ye ka mɔgɔ si kunnacɛn, a kɛra siya wɛrɛ ye wo, walima Zuwifu ye wo, walima Ala ka jama wo, aw kana kɛ sababu ye u si ma. O cogo la fana, ne bɛ jija koo bɛɛ la waasa ne ka se ka mɔgɔ bɛɛ ladiya. Ne tɛ n yɛrɛ nafa nyini, nga mɔgɔ caaman ta, waasa olu ka se ka kisi. Aw ka kɛ ne ladegebagaw ye, i n'a fɔ ne fana kɛra Krista ladegebaga ye cogo min na. Ne bɛ barika la aw ye bari aw hakili bɛ to ne la waati bɛɛ, ne ye koo minw bɛɛ fɔ aw ye, aw y'o labato ka nya. Ne b'a fɛ aw ka nin faamu kosɛbɛ: cɛɛ kelen kelen bɛɛ kuntigi, o ye Krista ye, muso fana kuntigi y'a cɛɛ ye, Krista kuntigi ye Ala ye fana. Cɛɛ o cɛɛ min bɛ Ala dali walima n'a bɛ kiraya kɛra, ni fugulan b'a kuun na, a b'a ka kuntigi le dɔgɔya. Nga muso o muso min bɛ Ala dali walima n'a bɛ kiraya kɛra, n'a ma fani biri a kuun na, o muso nin b'a kuntigi le dɔgɔya. A kɛra i n'a fɔ a y'a kunsigi le li. Ni muso min tɛ fani biri a kuun na, ale ka kan k'a kunsigi tigɛ. Ni k'i kunsigi tigɛ walima k'a li, n'o kɛra maloyako ye muso ma, a ka fani biri a kuun na. Cɛɛ man kan ka fugulan biri a kuun na, bari ale ye Ala jaa, n'a bonyafɛn ye, nga muso, ale y'a cɛɛ ka bonyafɛn ye. Bari mɔgɔ dantuma na, cɛɛ ma bɔ muso la, nga muso le bɔra cɛɛ la. Cɛɛ ma dan muso kama, muso le danna cɛɛ kama. Mɛlɛkɛw kɔsɔn, muso ka kan ka fani biri a kuun na min b'a yira ko a kɛra mɔgɔ dɔ ta ye. O bɛɛ n'a ta, muso tɛ se ka faran ka bɔ cɛɛ la, ani cɛɛ fana tɛ se ka faran ka bɔ muso la, Matigi nyakɔrɔ. Muso bɔra cɛɛ la cogo min na, o cogo kelen na fana muso bɛ cɛɛ wolo. O bɛɛ bɛ bɔ Ala la. Aw yɛrɛ ka nin koo sɛgɛsɛgɛ aw yɛrɛ ma, a daganin lo muso ka Ala dali n'a m'a kuun datugu wa? Adamaden ka kɛcogo yɛrɛ t'a yira ko cɛɛ min b'a kunsigi to a bɛ janya, o tigi b'a yɛrɛ maloya wa? Nga muso fɛ, a kɛra bonyafɛn ye, bari kunsigi dir'a ma ka kɛ a kuun datugufɛn ye. Ni mɔgɔ dɔ b'a fɛ ka sɔsɔli kɛ o koo la, anw, ni Ala ka jama ma deli o la. Ni ne bɛ n daa don koo tɔw la, n tɛ se k'aw tando, bari aw ka nyɔgɔnlajɛn t'aw nafa, fɔɔ k'aw cɛn. A fɔlɔ, ne b'a mɛnna ko n'aw ye nyɔgɔn lajɛn tuma min na, aw bɛ faranfaran ka kɛ danna danna. N bɛ miiri ko a bɛ se ka kɛ tinyɛ ye, ko aw tilannin lo jɛnkulu jɛnkulu ye. Tilannin yɛrɛ ka kan ka kɛ aw cɛma, janko mɔgɔsɛbɛw ka se ka lɔn. N'aw bɛ nyɔgɔn lajɛn dumuni senuman kɛtuma na, aw t'a kɛ a kɛcogo la. N'aw b'a dumu tuma min na, mɔgɔ kelen kelen bɛɛ b'a ta ta k'a dumu fɔlɔ, dɔ bɛ minni kɛ ka fa, k'a sɔrɔ a tɔnyɔgɔn bɛ kɔngɔ la. O tuma na, soo t'aw fɛ n'aw bɛ se ka dumuni, ani minni kɛ yen wa? Walima aw b'a fɛ ka Ala ka jama ni faantanw dɔgɔya wa? Ne ka kan ka mun fɔ aw ye tugu? K'aw tando wa? Ayi, ne tɛ se k'aw tando nin koo nyɔgɔn na. Ne ye min sɔrɔ Matigi fɛ, k'aw kalan o la, o filɛ: suu min na u ye Matigi Yezu don mɔgɔjuguw bolo, a ye buru ta, ka barika la Ala ye k'a tilantilan. O kɔ, a y'a fɔ ko: “Nin ye ne farisogo ye, o min dira aw kɔsɔn, aw k'o dumu k'aw hakili jigi ne koo la.” U ye dumuni kɛ ka ban tuma min na, a ye duvɛn ta fana ka barika la Ala ye, o kɔ, a ko: “Nin ye ne joli ye, Ala ka layidukura tara ni min ye. Tuma o tuma n'aw b'o min, aw k'aw hakili jigi ne koo la.” Bari tuma o tuma n'aw y'o buru nin dumu k'o duvɛn nin min, aw bɛ Matigi ka saya le koo fɔ, fɔɔ a ka kɔsegi ka na. O le y'a to ni mɔgɔ dɔ ye Matigi ka buru dumu walima k'a ka duvɛn min cogo bɛnbali la, o tigi bɛ kojugu kɛ Matigi farisogo n'a joli la. O la, mɔgɔ kelen kelen bɛɛ k'a yɛrɛ sɛgɛsɛgɛ, ka sɔrɔ ka buru nin dumu ani ka duvɛn nin min, bari mɔgɔ min b'o dumuni nin kɛ k'o minni nin kɛ, n'o tigi m'a jati ko Matigi farisogo lo, a b'a yɛrɛ jalakiko le kɛra ten. O le y'a to mɔgɔ caaman farikolo cɛnnin bɛ aw cɛma, ni banabagatɔ caaman, ani mɔgɔ dɔw sara fana. N'anw b'anw ka koow sɛgɛsɛgɛ an yɛrɛ ma, anw tɛna kiti tugu. Nga Matigi b'anw ladi, waasa anw ni dinyɛ kana kori ka jalaki nyɔgɔn fɛ. O cogo la ne balimaw, n'aw bɛ nyɔgɔn lajɛn k'o dumuni kɛ tuma min na, aw k'aw tɔnyɔgɔnw kɔnɔ. Ni kɔngɔ bɛ mɔgɔ dɔ la, o tigi ka dumuni kɛ a fɛ soo, waasa aw kana nyɔgɔn lajɛn k'aw yɛrɛ jalakiko kɛ. Ka taa koo tɔw faan fɛ, ni n nana na yen, n bɛna olu nyanabɔ. N balimaw, Nii Senuman ye seko minw di mɔgɔw ma, ne t'a fɛ aw ka kɛ kolɔnbaliw ye olu faan fɛ. Aw y'a lɔn ko aw tun tɛ Ala lɔn tuma min na, aw tun bɛ tugura joow kɔ dɔrɔn minw tɛ se ka kuma yɛrɛ. O le y'a to ne b'a fɔ aw ye ko mɔgɔ si tɛ se k'a fɔ Ala ka Nii Senuman barika la ko: “Yezu danganin lo,” ani mɔgɔ si tɛ se k'a fɔ fana ko: “Yezu ye Matigi ye” n'o ma kɛ Nii Senuman barika la. Seko sifa caaman bɛ yen, nga Nii Senuman kelen le b'o di. Baara sifa caaman fana bɛ yen, nga Kuntigi kelen le b'o la. Koo kɛcogo caaman bɛ yen, nga ale Ala kelen lo b'o bɛɛ kɛcogo di bɛɛ ma. Nii Senuman bɛ seko di mɔgɔ kelen kelen bɛɛ ma, mɔgɔ bɛɛ ka makonya kama. Nii Senuman ye see di dɔ ma ka kuma ni hakilitigiya ye, ka see di dɔ wɛrɛ ma ka koo fɔ ni lɔnniya ye. O Nii Senuman nin ye jigi di dɔ ma, ka banabagatɔw kɛnɛyali see di dɔ wɛrɛ ma. A ye kabako kɛ see di dɔ ma, ka dɔ wɛrɛ kɛ kira ye, ani ka see di dɔ ma a ka se ka Nii Senuman ka kɛwali faranfasi ka bɔ jinaw ta la. A ye see di dɔ ma ka kaan wɛrɛw fɔ, ka see di dɔ wɛrɛ ma k'o kɔrɔ fɔ. Nga Nii Senuman kelen le b'o koo bɛɛ kɛ see di mɔgɔ kelen kelen bɛɛ ma ka kɛnyɛ n'a yɛrɛ sago ye. Yɔrɔ caaman bɛ mɔgɔ farikolo la, o bɛɛ n'a ta, u bɛɛ lajɛnnin le ye farikolo kelen ye, hali u n'u ka caya bɛɛ. Krista bɛ o cogo la fana, bari an bɛɛ le batizera Nii Senuman kelen le barika la, an ka se ka kɛ farikolo kelen ye, k'a ta Zuwifu ma wo, walima siya wɛrɛ wo, jɔɔn, walima hɔrɔn wo, o Nii Senuman kelen lo bɛ an bɛɛ fɛ. Farikolo yɔrɔw ka ca, yɔrɔ kelen dama tɛ. Ni seen tun y'a fɔ ko ale ma kɛ bolo ye, o la, ko ale tɛ farikolo yɔrɔ dɔ ye, o bɛ se k'a niin bɔ farikoloya la wa? Ni tulo tun y'a fɔ ko ale ma kɛ nyaa ye, o la, k'ale tɛ farikolo yɔrɔ dɔ ye, o bɛ se k'a niin bɔ farikoloya la wa? Ni farikolo bɛɛ tun ye nyaa ye, a tun bɛna to ka mɛnni kɛ cogo di? Walima n'a bɛɛ tun ye tulo ye, a tun bɛna kasa mɛn cogo di? Nga Ala ye farikolo yɔrɔ kelen kelen bɛɛ sigi a la, ka kɛnyɛ n'a yɛrɛ sago ye. Ni mɔgɔ farikolo tun kɛra yɔrɔ kelen ye, a tun tɛ kɛ fɛɛn dafanin ye. Yɔrɔ caaman bɛ farikolo la, nga farikolo kelen lo. Nyaa tɛ se k'a fɔ bolo ye k'ale mako tɛ bolo la, ani kungolo fana tɛ se k'a fɔ seenw ye k'ale mako tɛ olu la. Nga farikolo yɔrɔ minw bɛ jati k'u ka dɔgɔ, olu le koo ka gwɛlɛ fana. Farikolo yɔrɔ minw tɛ foyi ye, an bɛ olu le jati kosɛbɛ. Minw koo yɛrɛ tɛ se ka fɔ, an bɛ olu minɛ ni cogonyuman ye kosɛbɛ, k'a sɔrɔ bonya ka kan ka la minw kan, olu t'a sɔrɔ. Ala ye farikolo dilan ka bonya di a yɔrɔw ma minw man kan n'a ye, waasa farali kana sɔrɔ farikolo la, nga farikolo yɔrɔ kelen kelen bɛɛ ka janto nyɔgɔn na. Ni farikolo yɔrɔ dɔ bɛ tɔɔrɔla, tɔ nunu fana bɛ tɔɔrɔ n'a ye. Ni kelen ye bonya sɔrɔ, tɔw fana bɛ jɛn n'a ye ka nisɔndiya. Aw kɛra Krista farikolo ye, aw y'a farikolo yɔrɔw ye, kelen kelen bɛɛ n'a ta. Ala ye mɔgɔ minw sigi a ka jama cɛma, o ye nunu ye: a fɔlɔ, cidenw, a filanan kiraw, a sabanan karamɔgɔw, o kɔ, kabako kɛli see dira minw ma, ani banabagatɔw kɛnɛyali, ni mɔgɔ dɛmɛli, ni nyamɔgɔya, ani see dira minw ma ka kaan wɛrɛw fɔ. Mɔgɔ bɛɛ le kɛra cidenw ye wa? U bɛɛ le ye kiraw ye wa? U bɛɛ le ye karamɔgɔw ye wa? Walima u bɛɛ le bɛ se ka kabakow kɛ wa? U bɛɛ le bɛ se ka banabagatɔw kɛnɛya wa? U bɛɛ le bɛ se ka kuma kaan wɛrɛw la wa? Walima u bɛɛ le bɛ se k'o kaan wɛrɛw kɔrɔ fɔ wa? Ala ka seko minw ka fisa, aw k'o nyini. Sisan, ne bɛna sira dɔ yira aw la min ka fisa. Hali ni ne bɛ se ka kaan wɛrɛw fɔ, minw kɛra adamadenw ta ye ani mɛlɛkɛw ta, ni kanuya tɛ ne dusu la, ne kɛra i n'a fɔ dundun mankan, ani gongokolon mankan. Hali ni ne ye kiraya kɛ see sɔrɔ, ka kodogoninw, ni fɛɛn bɛɛ lɔnniya sɔrɔ, hali ni ne lara Ala la kosɛbɛ, fɔɔ ka se ka kuluw wili k'o bɔ u lɔyɔrɔ la, ni kanuya tɛ ne dusu la, o bɛɛ ye gwansan ye. Hali ni ne ye n bololafɛnw bɛɛ di k'o kɛ faantanw ka dumuni ye, hali ni ne sɔnna u ka ne jɛni yɛrɛ, ni kanuya tɛ ne dusu la, o tɛna foyi nya ne ye. Kanuya bɛ mɔgɔ min dusu la, o tigi bɛ munyuli kɛ, a bɛ konyuman kɛ, keliya t'a dusu la. A t'a yɛrɛ yira, a t'a yɛrɛ bonya fana. A tɛ malobaliyako kɛ, a t'a yɛrɛ dama nafa nyini, a dusu tɛ bɔ, a tɛ dimi mara. A tɛ nisɔndiya tilenbaliyako la, a bɛ nisɔndiya tinyɛko le la. A bɛ koo bɛɛ yafa, a bɛ la bɛɛ la, a bɛ la koo bɛɛ la, a bɛ koo bɛɛ munyu. Daan tɛ kanuya la. Kiraya bɛna ban, kaan wɛrɛ fɔ bɛna dabila, lɔnniya fana bɛna ban. Bari daan b'an ka lɔnniya la, daan b'an ka kiraya fana na. Nga ni fɛɛn dafanin mana na tuma min na, fɛɛn dafabali bɛna ban. Ne tun ye denmisɛn ye tuma min na, n tun bɛ kuma i n'a fɔ denmisɛn, ka miiri i n'a fɔ denmisɛn, ka koo faamu i n'a fɔ denmisɛn. N nyana tigɛra tuma min na, n ye denmisɛnya dabila. Sisan an bɛ koo minw yera, a kɛra i n'a fɔ an b'u yera dubalen na le, u tɛ ye ka nya. Nga an bɛna u ye nyaa ni nyaa. Sisan, daan bɛ ne ka lɔnniya la, nga ne bɛna koo lɔn i n'a fɔ Ala bɛ ne lɔn cogo min na. Sisan fɛɛn saba nunu le bɛ yen: lanaya, jigi, ani kanuya, nga o fɛɛn saba nunu na, kanuya le bɛ nyafɛ. Aw ka jija ka nyɔgɔn kanu, Ala bɛ seko minw di, aw k'olu nyini fana, sanko kirayako, bari mɔgɔ min bɛ kuma kaan wɛrɛ la, o tigi tɛ kumana adamaden fɛ, nga a bɛ kuma Ala le fɛ. Tinyɛ na, mɔgɔ si t'o kaan nin mɛnna, a bɛ kodogonin le fɔ Nii Senuman barika la. Nga mɔgɔ min bɛ kirayako kɛ, o tigi bɛ kumana mɔgɔw fɛ, a bɛ olu dɛmɛ k'u ladi ani k'u jaa gwɛlɛya. Mɔgɔ min bɛ kaan wɛrɛ fɔ, o tigi b'a yɛrɛ le dɛmɛna, nga min bɛ kiraya kɛ, o tigi bɛ Ala ka jama le dɛmɛna. A ka di ne ye aw bɛɛ ka kaan wɛrɛw fɔ, nga mɔgɔ min bɛ kiraya kɛ, o le ka di ne ye ka tɛmɛ. Min bɛ kiraya kɛ, o tigi ka fisa ni kaan wɛrɛ fɔla ye, fɔɔ n'o tigi ye kuma nin kɔrɔ fɔ, waasa Ala ka jama ka se ka dɛmɛ sɔrɔ. N balimaw, n'a kɛra ko ne tun nana aw fɛ ka kuma aw fɛ kaan wɛrɛ la, min tɛ koo dɔ yira, n'a tɛ lɔnniya d'aw ma, ni kirayakuma t'o la, n'a t'aw kalan fana, o bɛna mun le nya aw ma? An ka fɔlikɛminanw koo filɛ, i n'a fɔ filen ani kolonjo. Ni olu mankan tɛ danna danna, mɔgɔ bɛna se k'a faamu cogo di ko filen bɛ nin le fɔra, walima kolonjo bɛ nin le fɔra? Ni buru fiyɛta ma kangwɛnin fɔ, mɔgɔ jumɛn le bɛn'a yɛrɛ labɛn kɛlɛ kama? Aw fana, n'aw ka kuma ma kɛ kumagwɛnin ye, mɔgɔw bɛn'a kɛ cogo di k'aw ka kuma mɛn? Aw ka kuma bɛ kɛ gwansan ye. Ne y'a lɔn ko kaan caaman bɛ dinyɛ kɔnɔ, o bɛɛ bɛ n'u kɔrɔ ye. Ni mɔgɔ min bɛ kumana ne fɛ ni ne t'ale ka kaan mɛnna, o tigi bɛ kɛ siya wɛrɛ ye ne fɛ, ne fana bɛ kɛ siya wɛrɛ ye o tigi fɛ. Aw kɔni, Nii Senuman bɛ seko minw di, olu nigɛ b'aw la kosɛbɛ, o ka kɛ Ala ka jama ka nyataga kɔsɔn. O le kɔsɔn, mɔgɔ min bɛ kaan wɛrɛ fɔ, o tigi ka Ala dali waasa a k'o kuma nin kɔrɔ fɔli see d'a ma. Ni ne bɛ Ala dali kaan wɛrɛ la, ne nii lo bɛ dalili kɛ nga ne hakili tɛ foyi kala ma. Ne ka kan ka mun le kɛ sa? Ne bɛna to ka dalili kɛ ni n nii ye, ka dalili kɛ ni n hakili ye fana. N bɛna to ka dɔnkili la ni n nii ye, ka dɔnkili la ni n hakili ye fana. N'i bɛ Ala dalila n'i nii dama ye, mɔgɔ minw siginin bɛ k'i lamɛn, olu bɛn'a kɛ cogo di ka amiina fɔ i ka dalili bannin kɔ, bari e bɛ min fɔra, ale t'o mɛnna. Tinyɛ lo, e bɛ barika la Ala ye sɛbɛsɛbɛ la, nga i tɔnyɔgɔn ma foyi sɔrɔ. Ne bɛ barika la Ala ye, ne bɛ kaan wɛrɛ fɔ ka tɛmɛ aw bɛɛ kan. Nga lajɛnni yɔrɔ la, a ka di ne ye ka dakuru nyaa duuru dama fɔ minw kɔrɔ lɔnnin lo mɔgɔ fɛ, sanni ne ka dakuru nyaa waa tan fɔ kaan wɛrɛ la. N balimaw, aw ka miiricogo faan fɛ, aw kana kɛ denmisɛnw ye tugu. Kojugu faan fɛ, ɔnhɔn, aw ka kɛ i n'a fɔ denmisɛnw, nga aw ka miiriya la, aw ka kɛ mɔgɔkɔrɔbaw ye. A fɔra Ala ka kuma na ko: “N bɛna tɛmɛ siya wɛrɛw fɛ ka kuma mɔgɔ nunu fɛ. N bɛna kuma u fɛ lonanw barika la. O bɛɛ n'a ta, u tɛna ne lamɛn.” Matigi ko ten. O cogo la, kaan wɛrɛ fɔko kɛra taamasinyɛ ye Alalɔnbaliw fɛ, nga a ma kɛ taamasinyɛ ye Krista ka mɔgɔw fɛ. Kiraya fana kɛra taamasinyɛ ye Krista ka mɔgɔw fɛ, nga a ma kɛ taamasinyɛ ye Alalɔnbaliw fɛ. N'a kɛra ko Ala ka jama bɛɛ ye nyɔgɔn lajɛn, ni bɛɛ tora ka kaan wɛrɛ fɔ, ni mɔgɔ gwansan walima Alalɔnbali dɔ nana don aw cɛma, ale tɛn'a fɔ ko aw kɛra fatɔw ye wa? Nga n'a kɛra ko bɛɛ bɛ kiraya le kɛra, o Alalɔnbali nin, walima mɔgɔ gwansan nin bɛn'a yɛrɛ cogoya lɔn, ko ale ye kojugukɛla ye. O tigi ka koo dogonin bɛna ye, fɔɔ a bɛn'a kunbiri gwan ka Ala bato ani k'a fɔ ko: “Tinyɛ na, Ala bɛ n'aw ye!” Ne ka mun le fɔ sa n balimaw? N'aw bɛ lajɛnni na, ni mɔgɔ dɔ b'a fɛ ka dɔnkili la, o k'o la. Ni kalan bɛ dɔ wɛrɛ fɛ, ale ka mɔgɔw kalan. Ni koo yirata bɛ dɔ wɛrɛ fɛ ka bɔ Ala fɛ, o k'o fɔ. Dɔ b'a fɛ ka kuma kaan wɛrɛ la wa? O tigi k'o kɛ. Ni mɔgɔ dɔ bɛ se k'o kɔrɔ fɔ, o tigi k'o fɔ. O koo bɛɛ ka kan ka kɛ waasa mɔgɔ bɛɛ ka taa nya. Ni mɔgɔ dɔw bɛ kaan wɛrɛ fɔra, mɔgɔ fila k'o fɔ, walima mɔgɔ saba, o ka fisa, nga u ka kuma kelen kelen, mɔgɔ dɔ k'o kɔrɔ fɔ. N'o kuma kɔrɔfɔbaga tɛ yen, o tigi ka je. A ka to ka kuma a yɛrɛ kɔnɔ Ala fɛ. Min kɛra kirayako ye, mɔgɔ fila walima saba ka kirayakuma fɔ, tɔw k'o kɔrɔ sɛgɛsɛgɛ. Ni Ala ye fɛɛn dɔ yira mɔgɔ dɔ la, mɔgɔ min bɛ kumana, o tigi ka je. Aw bɛɛ bɛ se ka kirayakuma fɔ kelen kelen ten, waasa mɔgɔ bɛɛ ka faamuli sɔrɔ ani ka jagwɛlɛya sɔrɔ. Ka kira to a ka kiraya la, a bɛ se k'a yɛrɛ minɛ. Bari Ala ma kɛ koferekenin tigi ye, nga hɛrɛtigi lo. Muso ka kan ka je lajɛnni yɔrɔw la i n'a fɔ a bɛ kɛ Ala ka jama cɛma yɔrɔ bɛɛ la. Sira ma d'u ma ka kuma, olu ka kan ka to yɛrɛmajigiliya la, i n'a fɔ a fɔra Ala ka sariya la cogo min na. N'u b'a fɛ ka koo dɔ faamu, u ka kan k'u cɛɛw nyininga soo kɔnɔ. N'o tɛ, a daganin tɛ muso ka kuma Ala ka jama cɛma. O tuma na, Ala ka kuma sɔrɔla aw fɛ le wa? Walima aw dama le y'a sɔrɔ k'a mɛn? Ni mɔgɔ dɔ b'a miiri ko ale ye kira ye, walima a ye see dɔ sɔrɔ Nii Senuman barika la, ne bɛ koo minw fɔra aw ye, o tigi ka sɔn o ma ko Matigi ka sariya lo. Ni mɔgɔ min banna o ma, Ala banna o tigi ma. O cogo la ne balimaw, aw ka kiraya le nyini, aw fana kana kaan wɛrɛ fɔko bali. Nga koo bɛɛ ka kan ka kɛ ka nya ani ka kɛnyɛ n'o kɛcogo ye. N balimaw, sisan ne b'a fɛ k'aw hakili jigi kibaru diman koo la, ne y'o min fɔ aw ye, aw sɔnna o min ma k'aw jigi bɛɛ la a kan. Aw bɛna kisi ale barika la, n'aw y'a minɛ i n'a fɔ ne y'a fɔ aw ye cogo min na. N'o tɛ, aw y'aw jigi la a kan fu. Ne kɔnna k'a fɔ aw ye i n'a fɔ ne fana tun y'a sɔrɔ cogo min na, ko Krista sara an ka kojugu kɔsɔn, ka kɛnyɛ ni Ala ka kuma ye. U y'a suu don, a tile sabanan loon, a kununna, ka kɛnyɛ ni Ala ka kuma ye. A y'a yɛrɛ yira Sefasi la, o kɔ, a y'a yɛrɛ yira a ka ciden tan ni fila la fana. O kɔ, a y'a yɛrɛ yira an balimaw na yɔrɔnin kelen minw tun bɛ tɛmɛ mɔgɔ kɛmɛ duuru kan. Olu dɔw sara, nga a caaman bɛ sii la halibi. O kɔ fana, a y'a yɛrɛ yira Zaki la, ani cidenw bɛɛ la. O bɛɛ kɔfɛ, a y'a yɛrɛ yira ne la, ne min kɛra u bɛɛ kɔmɔgɔ ye, i n'a fɔ deen min ma wolo a waati la. Bari ne ye cidenw bɛɛ la fitini ye, ne man kan ka wele ko ciden yɛrɛ, bari ne ye Ala ka jama tɔɔrɔ. Nga ne bɛ yɔrɔ min na sisan, o ye Ala ka nɛɛma nɔɔ ye. O nɛɛma nin ma kɛ gwansan ye ne faan fɛ. Ne ye baara kɛ ka tɛmɛ olu bɛɛ kan. O ma kɛ ne yɛrɛ ka seko ye, o ye Ala ka nɛɛma nɔɔ ye. A kɛra ne ye wo, walima olu wo, an bɛ min fɔra, o lo, ani aw sɔnna o le ma fana. Ni Krista ka kununko waajuli bɛ kɛ, mun na mɔgɔ dɔw b'a fɔ aw cɛma ko suu tɛna kunun? Ni suuw tɛna kunun, o kɔrɔ ko Krista fana ma kunun kɛ. Ni Krista do ma kunun, an ka waajuli ye fu ye ani aw jigi bɛ min kan, o bɛ kɛ fu ye fana. Ka fara o kan, ni suuw ka kununbaliya ye tinyɛ ye, o kɔrɔ ko an bɛ galon tigɛra k'a la Ala kan, bari an b'a fɔra ko Ala ye Krista kunun a sanin kɔ k'a sɔrɔ o ma kɛ. Ni suuw tɛna kunun, Krista fana ma kunun. Ni Krista do ma kunun, aw jigi lanin bɛ min kan, o ye fu ye, aw ka kojugu ma yafa. O la, mɔgɔ minw sara k'u jigi lanin to Krista kan, olu ta cɛnna. N'a kɛra ko an jigi bɛ Krista kan an ka dinyɛlatigɛ dama kɔsɔn, an kɛra makaritɔw ye ka tɛmɛ mɔgɔ tɔw kan. Nga tinyɛ na, Krista kununna. O cogo la a y'a yira k'a gwɛya ko mɔgɔ minw sara, olu bɛna kunun. Saya sera an ma mɔgɔ kelen barika la minkɛ, o cogo la fana, mɔgɔ kelen barika la, suu kununni bɛna kɛ. Mɔgɔ bɛɛ bɛ sa Adama barika la cogo min na, o cogo kelen na, mɔgɔ bɛɛ fana bɛna kunun Krista barika la. Nga o bɛna kɛ bɛɛ n'a ka lɔyɔrɔ: Krista le kɛra fɔlɔ ye, o kɔ, mɔgɔ minw kɛra a ta ye. A bɛ kɛ ten a natuma na. O kɔ, koo bɛɛ laban bɛna se. Krista bɛna kuntigi yebaliw bɛɛ ka kuntigiya cɛn, ni fangatigiw ta, ani setigiw ta, ka sɔrɔ ka masaya di Faa Ala ma. Bari a ka kan ka kuntigiya kɛ fɔɔ a juguw bɛɛ ka majigi a kɔrɔ. A jugu laban min bɛna cɛn, o ye saya ye. Bari “Ala ye fɛɛn bɛɛ majigi a ye.” N'a fɔra ko fɛɛn bɛɛ majigira a kɔrɔ, o ma kɛ ko Ala min ye fɛɛn bɛɛ majigi a kɔrɔ, niin b'o fɛɛn nunu la dɛ. Ni fɛɛn bɛɛ majigira Krista kɔrɔ ka ban, o tuma na ale min ye Dencɛ ye, a bɛn'a yɛrɛ majigi Ala ye ale min ye fɛɛn bɛɛ majigi a ye. O cogo la, Ala bɛna kuntigiya kɛ fɛɛn bɛɛ kunna. N'a tun tɛ ten, mɔgɔ minw b'u yɛrɛ di n'u b'o batize suuw tɔgɔ la, olu bɛ mun le nyinina? Ni suuw tɛna kunun fewu, mun na olu b'u yɛrɛ di u k'u batize suuw tɔgɔ la? Mun na anw bɛ kojugu nyakɔrɔ tuma bɛɛ la? Loon bɛɛ ne bɛ saya sira kan, o ye tinyɛ ye n balimaw, aw kɛra ne ka yɛrɛbonya sababu ye an Matigi Yezu Krista barika la. Ne ye tɔɔrɔ min sɔrɔ mɔgɔjuguw bolo Efɛzi dugu kɔnɔ, n'o tun kɛra adamaden sago ye, o bɛna mun nya ne ye sa? Ni suuw tɛna kunun, o tuma na, “an ka dumuni kɛ ka minni kɛ, bari sini an bɛɛ bɛna sa,” i n'a fɔ u b'a fɔ cogo min na. Aw kana aw yɛrɛ nigɛ. Taamanyɔgɔnjugu b'a taamanyɔgɔnnyuman cogo cɛn. Aw k'aw nyaa yɛlɛ ka taama tilenninya la. Aw kana to ka kojugu kɛ tugu. Aw dɔw tɛ Ala lɔn tinyɛ na, ne y'o fɔ waasa aw ka maloya. Mɔgɔ dɔ bɛna nyiningali kɛ ko suuw bɛna kɛ cogo di ka kunun? U bɛna kunun ni farisogo sifa jumɛn ye? Naloman, e bɛ sumansi min dan, n'a ma don dugukolo kɔrɔ ka nyigi, a bɛ falen wa? I tɛ kala dan, nga kisɛ lo, nyɔkisɛ walima kisɛ dɔ wɛrɛ. Ala le b'a kɛ kisɛ bɛ falen ka kala sɔrɔ ka kɛnyɛ n'a yɛrɛ sago ye, ale le bɛ kɛ suman sifa bɛɛ bɛ falen ka kala sɔrɔ ka kɛnyɛ n'u cogo ye. Fɛɛn nyanaman bɛɛ cogo ma kɛ kelen ye. Adamaden farisogo bɛ yen, sennaanifɛnw ta fana bɛ yen, ni kɔnɔw ta fana, ani jigɛ taw. Sankolo la fɛɛnw bɛ yen, dugukolo kan fɛɛnw fana bɛ yen. Sankolo la fɛɛnw nɔɔrɔ bɛ danna ni dugukolo kan ta ye. Tile ka yeelen bɛ danna ni kalo ta ye. Lolo ta fana bɛ danna. Lolo dɔ ka yeelen bɛ tɛmɛ dɔ ta kan. O cogo la fana, suuw ka kununko bɛna kɛ ten. Farisogo tolita bɛ don, a nyanaman bɛ kunun. A cɛjuguman bɛ sutara, a nyumaman bɛ kunun. A bɛ sutara barikatanya la, ka kunun ni fangaba ye. A bɛ sutara ni farisogo gwansan ye ka kunun ni nii ka farisogo ye. Ni farisogo gwansan bɛ yen kɔni, nii ka farisogo fana bɛ yen. A fɔra Ala ka kuma na ten ko Adama min kɛra mɔgɔ fɔlɔ ye, Ala le y'a kɛ a kɛra mɔgɔ nyanaman ye, Adama laban bɛ nii don mɔgɔw la. Min kɛra fɔlɔ ye, o ye farisogo ye, o kɔ nii ka sɔrɔ ka tugu. Mɔgɔ min kɔnna ka dan, ale bɔra dugukolo la. Mɔgɔ filanan, ale bɔra sankolo la. Mɔgɔ min bɔra dugukolo la, a kɔmɔgɔw kɛra i n'a fɔ ale, mɔgɔ min bɔra sankolo la, ale fana kɔmɔgɔw bɛna kɛ i n'a fɔ ale. Mɔgɔ min bɔra dugukolo la, an ye ale cogo ta cogo min na, o cogo kelen na fana, mɔgɔ min bɔra sankolo la, an bɛna ale fana cogo ta. Ne bɛ min fɔ n balimaw, o ye nin ye, ko adamaden gwansan tɛ se ka don Ala ka mara kɔnɔ, fɛɛn min ye tolita ye, o fana tɛ se ka tolibaliya sɔrɔ fewu. Ne bɛ kodogonin dɔ fɔ aw ye ko an bɛɛ tɛna sa, nga an bɛɛ cogo bɛna yɛlɛma le, yɔrɔnin kelen dɔrɔn, nyatugu n'a yɛlɛ cɛ, buru laban fiyɛtuma. Ni buru fiyɛra, suuw bɛna kunun ni farisogonyuman ye, an bɛɛ cogo bɛna yɛlɛma. Bari farisogo min bɛ toli, ale ka kan ka kɛ fɛɛn tolibali ye, min bɛ sa ale ka to sabaliya la. Farisogo min bɛ toli, n'o sera ka kɛ fɛɛn tolibali ye tuma min na, min bɛ sa n'o sera ka sabaliya sɔrɔ, o waati la min fɔra Ala ka kuma na, o bɛna kɛ. A ko: “See sɔrɔla saya kan. Saya, e le ka see bɛ min? Saya, e ka fariyayɔrɔ bɛ min?” Saya ka fariyayɔrɔ ye kojugu ye, kojugu ka fanga sɔrɔyɔrɔ ye sariya ye fana. An ka barika la Ala ye, ale min bɛ kɛ an bɛ see sɔrɔ an Matigi Yezu Krista barika la. O kɔsɔn, ne balima kanuninw, aw ye jija kosɛbɛ, aw kana siran, aw ye taa nya Matigi ka baara la tuma bɛɛ, ka la a la ko aw bɛ baara min kɛra Matigi ye, k'o tɛna kɛ gwansan ye. Min kɛra bolomafara koo ye, o min bɛ kɛ ka ci Ala ka jama ma min bɛ Zeruzalɛmu, ne ye min fɔ Ala ka jama ye Galati mara la, aw k'o kɛ fana. Lɔgɔkun loon fɔlɔ o loon fɔlɔ, mɔgɔ kelen kelen bɛɛ ka fɛɛn dɔ bɔ a ka sɔrɔta la k'o mara gɛrɛfɛ. Aw kana ne kɔnɔ ni ne nana tuma min na, an ka sɔrɔ k'o bolomafara minɛ. Ni ne sera aw fɛ yen, ne bɛna bataki sɛbɛn k'o di aw ka jigilamɔgɔw ma aw y'o minw woloma, k'u ci ka taa ni bolomafara nin ye Zeruzalɛmu. N'a kɛra fɛɛn ye min bɛ ne taakun bɔ fana, ne bɛna taa n'u ye. Ne bɛna tɛmɛ Maseduwani mara la ka sɔrɔ ka na aw fɛ yen. Bari ne ka kan ka tɛmɛ o yɔrɔ la. N'a sɔrɔ ne bɛna waati dɔɔni kɛ aw fɛ, walima n bɛna saminya bɛɛ kɛ n'aw ye, janko aw ka se ka ne dɛmɛ, ne ka se ka n ka taama bɛɛ kɛ. Ne t'a fɛ ka kɛ tɛmɛbaga dama ye aw fɛ sisan. Ne jigi b'a kan ka to aw fɛ waati dɔɔni, ni Matigi sɔnna. Nga ne bɛna to Efɛzi fɔɔ Pantekɔti ka se, bari n kɔni y'a ye ko n bɛ se ka baara caaman kɛ, n juguw fana ka ca. Ni Timote nana se aw fɛ tuma min na, aw ka koo bɛɛ kɛ k'a jaa gwɛlɛya aw cɛma, bari ale fana ye Matigi ka baarakɛla dɔ ye i n'a fɔ ne. Mɔgɔ si kan'a dɔgɔya. Aw k'a dɛmɛ a ka se ka segi ka na ne fɛ yan hɛrɛ la. Ne n'an balima tɔw b'a kɔnɔna. Min ye an balima Apolɔsi koo ye, ne y'a nyini a fɛ kosɛbɛ ko a ka taa aw fɛ n'an balimaw ye. A ma sɔn taali ma fewu sisan, nga n'a nana waati sɔrɔ tuma min na, a bɛna taa aw fɛ yen. Aw labɛnnin ka to, aw ye jija aw jigi ka to Ala kan kosɛbɛ, aw ka kɛ mɔgɔ jagwɛlɛnw ye, ani ka barika don aw yɛrɛ la. N'aw bɛ fɛɛn o fɛɛn kɛ, aw k'o kɛ ni kanuya ye. Aw b'a lɔn ko Sitefana n'a ka somɔgɔw le kɔnna ka sɔn Krista ma Akayi mara la, ko u y'u yɛrɛ di ka Ala ka mɔgɔw dɛmɛ. Ne b'a nyini aw fɛ ko aw ka mɛnni kɛ o mɔgɔ suguw fɛ, ani mɔgɔ minw bɛɛ bɛ baara kɛ ka sɛgɛn n'u ye. Ne nisɔn diyanin bɛ Sitefana ni Fɔritunatusi ani Akayikusi nunu ka nako la ne fɛ, olu ye ne dɛmɛ aw nɔɔ na. Bari u ye ne jigi tugu k'aw fana jigi tugu. O la, aw k'o mɔgɔ sifa nunu tɔgɔnyuman fɔcogo lɔn. Ala ka jamakulu minw bɛ Azi mara la, olu b'aw fo. Akilasi ni Pirisika ani Ala ka jama min bɛ lajɛnni kɛ u fɛ, u bɛɛ b'aw fo kosɛbɛ Matigi tɔgɔ kɔsɔn. N balimaw bɛɛ b'aw fo, aw ka nyɔgɔn fo kosɛbɛ k'aw bolow meleke nyɔgɔn kaan na. Ne Pɔli yɛrɛ le bɛ foli kuma nin sɛbɛnna aw ye. Ni Matigi ka koo man di mɔgɔ dɔ ye, o tigi danganin lo. Maranata. An Matigi Yezu ka nɛɛma ka kɛ n'aw ye. Yezu Krista barika la, aw bɛɛ koo ka di ne ye. Ne Pɔli min ye Yezu Krista ka ciden ye Ala sago la, n'an balimacɛ Timote, an bɛ bataki nin ci Ala ka jama ma min bɛ Korɛnti dugu kɔnɔ, ani minw bɛɛ bɛ Akayi mara la. An Faa Ala n'an Matigi Yezu Krista ka nɛɛma ni hɛrɛ kɛ aw ye. Ne bɛ Ala tando, ale min ye an Matigi Yezu Krista Faa ye, makaritigi lo, ale le bɛ mɔgɔ bɛɛ jigi tugu. Ale le b'an jigi tugu an ka tɔɔrɔko bɛɛ la, waasa an fana ka se k'an tɔnyɔgɔnw jigi tugu an y'o min sɔrɔ Ala fɛ. An bɛ Krista ka tɔɔrɔ nyɔgɔn caaman sɔrɔ cogo min na, o cogo kelen na fana Krista b'an jigi tugu kosɛbɛ. Ni tɔɔrɔ b'an sɔrɔ, o bɛ kɛ waasa aw jigi ka tugu, ani ka se ka kisi. N'an jigi tugura, o bɛ kɛ waasa aw jigi ka tugu ka se ka tɔɔrɔ munyu an b'o tɔɔrɔ minw nyɔgɔn na. An jigi b'aw kan kosɛbɛ, bari an y'a lɔn ko n'an ye tɔɔrɔ sɔrɔ nyɔgɔn fɛ, an fana bɛna jigitugu sɔrɔ nyɔgɔn fɛ. Tɔɔrɔ min y'an sɔrɔ Azi mara la, an t'a fɛ k'aw to o lɔnbaliya la. O tun digira an na fɔɔ ka se an barika daan ma, fɔɔ an yɛrɛ tun t'a miiri ko an bɛna to yen n'an ma sa. Tinyɛ na, an yɛrɛ tun y'a lɔn ko an bɛna sa wajibi. O le y'a to, an y'an jigi bɔ an yɛrɛ kan, k'a la Ala kan, ale min bɛ suuw kunun. Ale le y'an kisi o sayajugu nin ma, a bɛna an kisi tugu. An jigi b'a kan, ko a bɛna an kisi halibele. Aw fana b'aw niyɔrɔ ta n'aw ka dalili ye anw koo la. O cogo la, an bɛna o nɛɛma sɔrɔ mɔgɔ caaman ka Ala dali sababu la, mɔgɔ caaman bɛna barika la Ala ye o kɔsɔn. An ka kunkɔrɔta ye min ye: o ye an ka taamacogo ye, aw cɛma, ani yɔrɔ bɛɛ, an y'o min kɛ ni kɔnɔgwɛ ye Ala nyasiran na. O ma kɛ adamaden ka lɔnniya sababu la, nga Ala ka nɛɛma nɔɔ lo. An tɛ koo si sɛbɛn k'o ci aw ma n'aw tɛ se ka minw kalan ani k'o faamu. Ne lanin b'a la ko aw bɛna se k'an faamu kosɛbɛ. Bari aw y'an ka koo faamu dɔɔni k'a lɔn ko an kɛra aw ka kunkɔrɔtafɛn ye, i n'a fɔ aw fana bɛna kɛ an ka kunkɔrɔtafɛn ye cogo min na an Matigi Yezu kɔsegilon na. N lanin tun b'o la minkɛ, o la, ne tun b'a fɛ ka taa aw fɛ fɔlɔ, waasa aw ka se ka nisɔndiya tugu a sinyɛ filanan na. Ne tun b'a fɛ ka tɛmɛ aw fɛ fɔlɔ ka sɔrɔ ka taa Maseduwani mara la, ka bɔ Maseduwani ka na aw fɛ tugu, waasa aw ka se ka ne dɛmɛ ne ka taamako la ka taa Zude mara la. O tuma na, ne tun y'o koo latigɛ waati min na, ne tun m'o jati koba ye wa? Walima ne ka koo latigɛtaw ye adamaden ka miiriya dama ye, ni n bɛ kaan fila fɔ wa? K'a fɔ ɔnhɔn ka tila k'a fɔ ayi. Ala ye ne seere ye, an ye kuma min fɔ aw ye, o tɛ ten. Bari ne ni Silivɛn ani Timote, anw ye Ala Dencɛ Yezu Krista min kibaru fɔ aw ye, o ma kɛ ɔnhɔn, ni ayi koo ye, nga o ye Ala ka tinyɛ ye. Ala ka layidu bɛɛ kɛra tinyɛ ye Yezu Krista barika la, o cogo la fana an b'a fɔ “amiina” ka bonya la Ala tɔgɔ kan. Ale Ala le bɛ barika don anw ni aw la Krista sababu la. Ale fana le y'an woloma, k'a ka taamasinyɛ la an kan, ani ka Nii Senuman d'an ma k'a ka nyumanya nata yira an na. Ala le ye ne seere ye ni ne bɛ galon tigɛra. Ne tun b'a fɛ k'aw kuun bɔ koo la le, o le y'a to, ne ma segi Korɛnti tugu. A ma kɛ ko anw b'a fɛ ka koo dɔ wajibiya aw kunna lanaya faan fɛ dɛ, bari aw banbanin lo o la, nga an b'aw dɛmɛna le janko aw ka nisɔndiya. Ne y'a latigɛ ko ne tɛna kɔsegi aw fɛ k'aw dusu kasi. Ni ne y'aw dusu kasi, ne bɛna nisɔndiya sɔrɔ min, n'aw fɛ tɛ? Ne ye bataki ci aw ma waasa ni ne nana se aw fɛ, ne dusu kana kasi aw kɔsɔn aw minw ka kan ka ne nisɔn diya. Ne fana lanin b'a la ko ne ka nisɔndiya, o le y'aw bɛɛ ka nisɔndiya ye. Ne tun b'o bataki cira aw ma tuma min na, ne y'o ci ni hakilinyagami, ani dusucɛn ye, ne tun kasira kosɛbɛ. O ma kɛ k'aw dusu kasi dɛ, nga waasa aw ka se k'a lɔn ko ne b'aw kanu kosɛbɛ. Ni mɔgɔ dɔ ye dusukasiko dɔ kɛ, a ma ne dusu kasi, a y'aw bɛɛ le dusu kasi, walima aw dɔw. Aw ye min kɛ a la ka ban, o b'a bɔ. Sisan, aw ka yafa a ma k'a jigi tugu, waasa dusukasi kan'a sɔrɔ fɔɔ a hakili bɛ nyagami a bɛ tunu. O la, ne b'aw dali ko aw ka banba k'a yira a la ko a koo diyara aw ye. Ne y'o koo sɛbɛn k'o ci aw ma, k'a filɛ n'aw bɛ se ka mɔgɔ ka kuma bɛɛ labato. N'aw yafara mɔgɔ dɔ ma, ne fana bɛ yafa o tigi ma. N'aw y'a ye ne y'o nyɔgɔn kɛ, ne y'o kɛ aw le kɔsɔn, Krista nyakɔrɔ, waasa an kana sira di Sutana ma a ka see sɔrɔ an kan bari an b'a ka miiriya lɔn. Ne sera Torowasi tuma min na ko n bɛna Krista ka kibaru diman fɔ yen, Matigi tun ye cogo di ne ma ka se ka baara kɛ kosɛbɛ. O n'a ta bɛɛ, ne hakili tun ma sigi, bari ne ma n balimacɛ Titi sɔrɔ yen. O la, ne ye sira dali u fɛ ka taa Maseduwani mara la. Ne bɛ barika la Ala ye ale min b'a to an bɛ niyɔrɔ sɔrɔ Krista ka sesɔrɔko la tuma bɛɛ, ale le b'an ta ka baara kɛ n'an ye ka Krista yira yɔrɔ bɛɛ, i n'a fɔ wusulan. Mɔgɔ minw bɛ kisili sira kan, ani minw bɛ halakili sira kan, olu fɛ an kɛra Krista ka wusulan ye Ala ma. Mɔgɔ minw bɛ halakili sira kan, olu fɛ, an kɛra sababujugu ye min bɛ mɔgɔ faga. Minw bɛ kisili sira kan, olu fɛ, an kɛra sababunyuman ye min bɛ mɔgɔ kisi. Mɔgɔ jumɛn le bɛ se o baara nin nyɔgɔn kɔrɔ? Mɔgɔ caaman bɛ Ala ka kuma kɛ jagokun ye. An tɛ i n'a fɔ olu. Ala le y'an ci, o la, an bɛ kuma a nyakɔrɔ ni kɔnɔgwɛ ye Krista barika la. An b'a la k'an yɛrɛ koo fɔ aw ye tugu le wa? Walima an mako bɛ mɔgɔ dɔ wɛrɛ ka sɛbɛ la min b'an koo fɔ wa? Walima aw ta, i n'a fɔ mɔgɔ dɔw b'a kɛ cogo min na wa? Aw le y'an ka sɛbɛ ye. A sɛbɛnnin bɛ an dusukun na, mɔgɔ bɛɛ b'a ye, ani k'a lɔn. Aw kɛra Krista ka bataki ye, o min cira an barika la. A m'a sɛbɛn ni sɛbɛnnikala ye, nga a sɛbɛnna Ala ka Nii Senuman le barika la, a fana ma sɛbɛn walaka kabakurulaman kan, nga adamaden dusukun kan. An y'o jigi sɔrɔ Krista barika la Ala nyakɔrɔ. An tɛ miiri ko an sera ka fɛɛn minw kɛ, k'o bɔra an yɛrɛ la dɛ, o bɔra Ala le la. Ale le ye see d'an ma ka layidukura koo fɔ mɔgɔw ye, o ma kɛ sariyako ye, nga Nii Senuman koo lo. Sariya ka koo laban ye saya ye, nga Nii Senuman ta ye hɛrɛ ye. Sariya min ka koo laban ye saya ye, o tun sɛbɛnna walaka kabakurulaman kan tuma min na, ni Ala ka nɔɔrɔ yera o waati la fɔɔ Isirayɛlidenw tun tɛ se ka Musa nyada filɛ, o nɔɔrɔ kɔsɔn min tun kɛra fɛɛn tɛmɛta ye, min kɛra Nii Senuman ka baara ye, ale ka nɔɔrɔ man kan ka bonya wa? Baara min laban ye halakili ye, n'o ye bonya sɔrɔ, baara min bɛ mɔgɔw kɛ mɔgɔtilenninw ye, ale ka bonya tɛna tɛmɛ o ta kan wa? Fɛɛn min tun ye bonya sɔrɔ, ale ka bonya ma kɛ bonya ye sisan ta nyana, sisan ta ka barika bonya kɔsɔn. Fɛɛn min tun kɛra fɛɛn tɛmɛta ye, n'ale ye bonya sɔrɔ, fɛɛn min tɛ tɛmɛ abada, ale ta ka bon. O jigi le b'an fɛ, o le y'a to an hakili siginin lo. An t'a kɛ i n'a fɔ Musa tun b'a kɛ cogo min na, ale min tun bɛ to ka fani biri a nyada kan, waasa Isirayɛlidenw kan'a ka nɔɔrɔ daan ye, o min ye tɛmɛta ye. Nga u ma se ka foyi faamu, i n'a fɔ fani birinin bɛ u nyada kan. Hali fɔɔ bii yɛrɛ, n'u bɛ layidukɔrɔ kalan tuma min na, u tɛ foyi faamu, bari o fani nin bɛ bɔ Krista le barika la. Hali fɔɔ bii, n'u bɛ Musa ka kitabu kalan, o fani nin b'u nyada kan. Ni min sɔnna Matigi ma, fani nin bɛ bɔ o tigi nyada kan. Matigi min koo bɛ fɔra yan, o ye Nii Senuman ye. Matigi ka Nii Senuman bɛ yɔrɔ min na, yɛrɛsɔrɔ le b'o yɔrɔ la. An minw ka fani bɔra, Matigi ka nɔɔrɔ b'an kan. O cogo la, an bɛ yɛlɛma ka kɛ i n'a fɔ ale, ka nɔɔrɔ sɔrɔ kosɛbɛ min bɛ to ka bonya tuma bɛɛ Matigi barika la, o min ye Nii Senuman ye. Ala ka nyumanya kɔsɔn a ye baara nin kalifa an ma, o la, an jigi tɛ tigɛ fewu. An banna dibidibiko ma maloya b'o min na, an tɛ koo kɛ ni nanbaran ye, an fana tɛ Ala ka kuma kɔrɔ yɛlɛma fewu. An kɔni, an bɛ tinyɛ yɛrɛ yɛrɛ le fɔ, janko mɔgɔw k'u jigi la an kan Ala nyakɔrɔ. Halibi anw bɛ kibaru diman min fɔ, n'ale gwɛnin tɛ mɔgɔ minw fɛ, olu bɛ halakili sira kan. Minw tɛ la Ala la, dinyɛ kuntigi Sutana ye olu hakili dibi waasa u kana se ka kibaru diman yeelen ye o min bɛ Krista ka nɔɔrɔ yira, ale min ye Ala jaa ye. An t'an yɛrɛ koo fɔra aw ye dɛ, Yezu Krista min ye Matigi ye, an bɛ ale le koo fɔra. Anw kɔni bɛ baara kɛ aw ye Yezu kɔsɔn. Bari Ala min tun y'a fɔ ko kɛnɛ ka bɔ dibi cɛma, ale kelen le ye yeelen bɔ an dusu la, waasa mɔgɔw k'a ka nɔɔrɔ ye, o min bɛ manamana Krista nyada kan. Nga o baara nafaman dira an ma, an minw fanga ka dɔgɔ i n'a fɔ bɔgɔdaga, waasa mɔgɔw k'a lɔn k'o sebagaya kabakoman nin ma bɔ an na, fɔɔ Ala la. An dɛrɛnin bɛ tɔɔrɔw fɛ faan bɛɛ la, nga an bɛ yen. An hakili nyagaminin bɛ, nga an jigi ma tigɛ. U y'an tɔɔrɔ kosɛbɛ, nga Ala m'an bila. U y'an bugɔ k'an ben, nga an tɔɔ ma laban. Tuma o tuma an bɛ fagasira kan i n'a fɔ Yezu sara cogo min na, waasa an ka se ka Yezu tɔgɔ yira. K'an to nii na, an kɔni labilanin lo saya kama tuma bɛɛ Yezu kɔsɔn. An minw ye farisogo ye n'an bɛna sa, n'an tora nii na halibi, o b'a yira ko Yezu nyanaman lo. O cogo la, saya bɛ munumunu an cɛma, aw ta, o ye hɛrɛko ye. A fɔra Ala ka kuma na ko: “Ne lar'a la, o le y'a to ne kumana.” O jigi kelen nin le y'a to an fana lar'a la, o le y'a to an bɛ kuma. An lanin b'a la ko ale min ye an Matigi Yezu kunun, ale fana bɛna an kunun ni Yezu ye, ani k'an bɛɛ jɛn nyɔgɔn fɛ a nyakɔrɔ. O koo nunu bɛɛ kɛra aw le kɔsɔn, o la, Ala bɛ nɛɛma kɛ mɔgɔ caaman ye, waasa u k'a tando ani ka bonya la a kan. O le y'a to an jigi tɛ tigɛ fewu, hali n'an yɛrɛ farisogo bɛ taa cɛnyɔrɔ, an jigi kɔni, ale bɛ fangakura sɔrɔla loon o loon. Waati dɔɔni tɔɔrɔ minw b'an sɔrɔ, o tɛ foyi ye, an bɛna bonya min sɔrɔ o tɔɔrɔ nin kɔsɔn, o ka bon haali. An ka miiriya tɛ fɛɛn yetaw kan, fɔɔ fɛɛn yebaliw. Fɛɛn minw bɛ ye, olu bɛ tɛmɛ, nga fɛɛn yebaliw tɛ tɛmɛ abada. An farikolo, min ye an nii ka soo ye dugukolo kan, o bɛna cɛn. Nga, an b'a lɔn ko Ala ye dɔ wɛrɛ labɛn an ye arijana na, min tɛ cɛn abada, o ma dilan adamaden barika la. Sisan an bɛ; nuna, an b'a fɛ kosɛbɛ ka sankolo ta sɔrɔ, n'an y'o sɔrɔ, an fari lakolon tɛna to yen. Bari k'an to nii na, an bɛ; nuna. An dɛrɛnin lo, a ma kɛ ko an b'a fɛ ka sa dɔrɔn dɛ, nga an b'a fɛ ka farisogo sɔrɔ ka bɔ Ala fɛ fana waasa saya ka ban. Ala le y'an labɛn o kɔsɔn, ale le ye Nii Senuman d'an ma k'a yira an na ko a bɛna nyumanya kɛ an ye sini. O le y'a to, jigi b'an fɛ tuma bɛɛ. An lanin b'a la ko k'an to farisogo la kɔni, an yɔrɔ ka jan Matigi la. An bɛ sɔn o koo bɛɛ la lanaya le barika la, nga an nyaa ma la o kan. Jigi b'an fɛ kosɛbɛ, a ka di an ye kosɛbɛ ka bɔ farisogo nin na, ka taa to Matigi gɛrɛfɛ yen. O le y'a to an kɔni fɛ, an sara wo, an ma sa wo, min ka di an ye, o ye ka Matigi sago kɛ, bari an bɛɛ ka kan ka lɔ Krista nyakɔrɔ a k'an kiti, waasa mɔgɔ kelen kelen bɛɛ ye baara min kɛ k'u to farisogo la, a kɛra baaranyuman ye wo, baarajugu lo wo, u k'o sara sɔrɔ. Matigi nyasiran b'an dusu la minkɛ, o la, an bɛ banba ka mɔgɔw dɛmɛ u k'a lɔn. Ala b'an lɔn kosɛbɛ, ne bɛ miiri ko aw fana b'an lɔn ten. An t'an yɛrɛ koo fɔ aw ye tugu, nga an bɛ cogoya le d'aw ma aw ka se k'aw yɛrɛ bonya an koo la, waasa mɔgɔ minw b'u yɛrɛ bonya fɛɛn yetaw koo la k'a sɔrɔ foyi t'u kɔnɔ, aw ka se ka olu jaabi. N'a kɛra ko an ta kɛra fatɔya ye, o ye Ala yɛrɛ ka koo ye, nga n'an ta ma kɛ fatɔya ye, o ye aw ka tɔnɔ ye. Bari Krista ka kanuya sera an kɔrɔ, an minw lara a la ko ale kelen le sara bɛɛ kɔsɔn, o kɔrɔ ko bɛɛ fana sara. A sara mɔgɔ bɛɛ le kɔsɔn, waasa mɔgɔ minw bɛ nii na, olu kana taama u yɛrɛ sago la tugu, nga u k'o kɛ ale kɔsɔn, min sara ka kunun u ka nafa kɔsɔn. O cogo la, an tɛ mɔgɔ si jati adamadenw ka jaticogo la tugu. Hali n'an tun ye Krista lɔn ten, sisan an t'a lɔn o cogo la tugu. Ni mɔgɔ dɔ jɛnna ni Krista ye, o tigi kɛra danfɛnkura ye. A ka kokɔrɔw bɛɛ tɛmɛna, ayiwa, o tigi kɛra mɔgɔkura ye. O koo bɛɛ bɔra Ala fɛ, ale le bɛnna n'an ye Krista barika la, ka tila k'o baara kalifa an ma, bari a ma mɔgɔw ka kojugu jati, a tun bɛ cogoya nyini ka bɛn n'u ye Krista barika la. A y'o kuma fɔko baara d'an ma. An kɛra Krista ka lasigidenw ye aw cɛma, a kɛra i n'a fɔ Ala yɛrɛ le b'aw wele an barika la. An b'aw dali Krista tɔgɔ kɔsɔn, ko aw ka sɔn ka bɛn ni Ala ye. Krista min ma kojugu kɛ, Ala y'a kɛ a sɛgɛnna an ka kojugu kɔsɔn waasa an ka kɛ mɔgɔtilenninw ye ale nyakɔrɔ Krista barika la. An bɛ baara kɛra ni Ala ye, o le kɔsɔn an b'aw dali ko Ala ye nɛɛma min kɛ aw ye, aw kan'a to o bɛ kɛ gwansan ye, bari a fɔra Ala ka kuma na ko: “Waatinyuman na, ne y'i lamɛn, kisili sɔrɔlon na, ne y'i dɛmɛ.” Ayiwa, o waatinyuman le ye sisan ye, kisili sɔrɔlon le ye bii ye. An t'a fɛ mɔgɔ si k'an ka baara lɔgɔbɔyɔrɔ sɔrɔ, o la, an t'a fɛ ka mɔgɔ si kunna cɛn koo si la. An kɔni b'a yira koo bɛɛ la ko an ye Ala ka baarakɛlaw ye. An bɛ tɔɔrɔ caaman munyu, ni hakilinyagamikow ni dusucɛnko. U y'an bugɔ, u y'an don kaso la, u ye mɔgɔw dusu wili an kama, an ye baara gwɛlɛmanw kɛ, sinɔgɔ m'an labɔ, kɔngɔ y'an minɛ. An y'an yɛrɛ yira a ka baarakɛlaw ye an ka mɔgɔsɛbɛya fɛ, n'an ka lɔnniya, n'an ka munyuli, n'an ka nyumanya fɛ, Nii Senuman barika la, ani an ka kanuyasɛbɛ fɛ, an ka tinyɛ fɔli, ni Ala ka sebagaya fɛ. An bɛ kotilennin ta k'o kɛ i n'a fɔ an ka maramanfɛn, ka kɛlɛ kɛ n'o ye ani k'an yɛrɛ mara n'o ye fana. N ye n yɛrɛ yira Ala ka baarakɛla ye n bonyatuma ni n dɔgɔyatuma na. U b'an tɔgɔjugu fɔ, k'an tɔgɔnyuman fana fɔ. U bɛ miiri ko an ye galontigɛlaw ye, k'a sɔrɔ an ye tinyɛfɔlaw ye. U b'a jati ko mɔgɔ t'an lɔn, k'a sɔrɔ an lɔnnin lo, u b'a jati ko an sanin lo, k'a sɔrɔ an ma sa, u b'an nyaa gwan, nga u t'an faga. U b'an dusu cɛn, nga an bɛ nisɔndiya sɔrɔ tuma bɛɛ. U b'an jati faantanw ye, nga an bɛ mɔgɔ caaman kɛ fɛntigiw ye. U bɛ miiri ko foyi t'an fɛ, k'a sɔrɔ fɛɛn bɛɛ b'an fɛ. Korɛntikaw, an y'an kɔnɔ gwɛ aw ye, ka kuma aw fɛ ni kɔnɔgwɛ ye. An kɔni, an m'an kɔnɔ dogo aw la, aw le y'aw kɔnɔ dogo an na. Ne bɛ kumana aw fɛ i n'a fɔ ne ka deenw, an y'aw minɛ cogo min na, aw fana k'aw kɔnɔ gwɛ an ye ten. Minw ma la Krista la, aw kana jɛn ni olu ye u ka koo si la. Bɛɛn sifa jumɛn le bɛ se ka sɔrɔ tilenninya ni kojugu cɛ? Yeelen ni dibi bɛ se ka bɛn wa? Bɛɛn jumɛn le bɛ sɔrɔ Krista ni Sutana cɛ? Min lara Krista la ni min ma la a la, jɛnnyɔgɔnya jumɛn bɛ sɔrɔ olu ni nyɔgɔn cɛ? Bɛɛn jumɛn le bɛ sɔrɔ Ala ka soo ni joow cɛ? Bari an ye Ala ka soo ye i n'a fɔ Ala yɛrɛ y'a fɔ cogo min na, a ko: “Ne bɛna sigi u cɛma ka to u fɛ, ne bɛna kɛ u ka Ala ye, u bɛna kɛ ne ka mɔgɔw ye.” O la, Matigi y'a fɔ ko: “Aw ye bɔ u cɛma, ka faran u la, fɛɛn min ma saniya, aw kana maga o la, ne bɛna aw ladon ne fɛ.” Matigi, min ye Setigi ye, tun y'a fɔ ko ale bɛna kɛ aw Faa ye, aw fana bɛna kɛ a dencɛw n'a denmusow ye. Ne teriw, layidu nunu tara an ye minkɛ, o kama, an k'an yɛrɛ saniya ka bɔ nɔgɔ sifa bɛɛ la, farisogo ta, ni dusukun ta. An ka kɛ mɔgɔdafaninw ye Ala nyasiran barika la. Aw k'an koo diya aw yɛrɛ ye. An ma mɔgɔ si hakɛ ta, an ma mɔgɔ si mako sa, an fana ma mɔgɔ si ka fɛɛn nanbaran. Ne t'o kuma fɔ k'aw jalaki, bari ne tun y'o fɔ ka tɛmɛ ko aw koo ka d'an ye fɔɔ ka taa se saya ma. Ne jigi b'aw kan kosɛbɛ, ne fana bɛ n yɛrɛ bonya aw koo la kosɛbɛ, k'an to tɔɔrɔ la ne jigi tugu lo, ne fana bɛ nisɔndiya kosɛbɛ. An sera Maseduwani mara la tuma min na, an ma lafinyɛyɔrɔ sɔrɔ tɔɔrɔ sifa bɛɛ bolo. An tun bɛ kɛlɛ kɛ ni dɔw ye, ani siranya tun bɛ anw na. Nga Ala min bɛ sɛgɛnbagatɔw jigi tugu, ale le y'an jigi tugu Titi ka nali kɔsɔn. A ma kɛ ko an jigi tugura Titi ka nali dama le kɔsɔn dɛ, nga ale yɛrɛ ye jigitugu min sɔrɔ aw fɛ, o kɔsɔn lo fana. Ne nyanafin b'aw la cogo min na, a y'o le fɔ an ye n'aw ka hami, ani ne koo b'aw dusu la cogo min na, fɔɔ ne nisɔn diyara kosɛbɛ tugu. Ne ye bataki min ci aw ma, n'o ye aw dusu cɛn, a ma kɛ ko ne bɛ nimisara o koo la dɛ. Ne kɔni tun nimisara, o kɛra bari ne y'a ye ko bataki nin y'aw nyanasisi waati dɔɔni kɔnɔ. Sisan ne bɛ nisɔndiya, ne tɛ nisɔndiya aw ka dusukasi kɔsɔn dɛ. Nga aw ka dusukasi nin y'aw dɛmɛ ka nimisa, k'aw sɔɔn yɛlɛma, bari aw ka dusukasi nin kɛra Ala sago ye. O la, an ma kojugu si kɛ mɔgɔ si la. Bari dusukasi min bɛ bɔ Ala fɛ, ale bɛ mɔgɔ dɛmɛ ka nimisa ka kisi, “tun ka lɔn” tɛ ale kɔfɛ. Dusukasi min kɛra dinyɛ ta ye, ale bɛ taa ni mɔgɔ ye saya la. Dusukasi min y'aw sɔrɔ ka bɔ Ala fɛ, ale ye baara min kɛ, aw y'o ye. O le y'a to aw siranna Ala nya, ka sin ka koo nin ta ni sɛbɛ ye, k'a yira ko a tun man d'aw ye fana, fɔɔ aw dimina. Ne koo donna aw kɔnɔ kosɛbɛ, ani aw banbana kosɛbɛ ka kojugukɛla nin jalaki. Aw y'a yira cogo bɛɛ la ko aw seen tun tɛ o koo la fana. Ni ne y'o sɛbɛ ci aw ma, mɔgɔ min ye kojugu nin kɛ, ne m'a ci ale kɔsɔn, a y'a kɛ min na, ne m'a ci ale fana kɔsɔn, nga ne y'o ci waasa aw k'a lɔn Ala nyakɔrɔ ko aw jijanin bɛ anw ka koo la. O le y'an jigi tugu, ka fara o kan, an nisɔn diyara kosɛbɛ Titi ka nisɔndiya kɔsɔn, aw ye ale min hakili sigi kosɛbɛ. Ne ye ne yɛrɛ bonya aw koo la ale nyana ka ye, ne kɔni ma maloya sɔrɔ o koo la. An delila ka tinyɛ fɔ aw ye tuma bɛɛ cogo min na, o cogo kelen na fana an y'aw koo fɔ Titi ye. Ale fana taara o sɔrɔ ten. Aw y'a kunbɛn ka nya ni siranya ye fɔɔ aw yɛrɛyɛrɛla, ani aw bɛɛ ye mɛnni kɛ a fɛ cogo min na, n'a miirila o la tuma min na, aw koo bɛ diya a ye kosɛbɛ. Ne bɛ nisɔndiya bari ne bɛ se ka n jigi la aw kan koo bɛɛ la. Ne balimaw, Ala ye nɛɛma min kɛ a ka jama ye Maseduwani mara la, an b'a fɛ aw k'o lɔn. K'u to tɔɔrɔba la, u n'u ka faantanyajugu bɛɛ, u nisɔndiyaninba y'u tigɛ yɛlɛ kosɛbɛ. Ne y'u seere ye ko a diyara u ye, u ye dili kɛ n'u seko ye, ani fɔɔ ka tɛmɛ u seko yɛrɛ kan. U y'an dali kosɛbɛ ko an ka sira d'u ma fana u ka se k'u niyɔrɔ ta Ala ka jama dɛmɛko la o min bɛ Zude mara la. U kɔnna k'u yɛrɛ di Matigi ma, ka mɛnni kɛ an fana fɛ ka kɛnyɛ ni Ala sago ye, fɔɔ u sera ka koo kɛ an yɛrɛ ka miiriya tun ma se o min ma. O cogo la fana, an ye Titi dali ko a y'o baaranyuman min daminɛ aw cɛma, a ka taa nya k'o laban. Aw ka nyi: jigi b'aw fɛ, aw fana bɛ se kuma na, aw bɛ koo lɔn, aw fana jijanin lo kosɛbɛ, ani an koo ka d'aw ye. O cogo la, anw b'a fɛ aw k'aw ka sɔnnyuman yira dɛmɛko nin na. A ma kɛ ko ne b'a fɔ aw ye ko wajibi lo aw k'a kɛ o cogo la dɛ, nga ne b'aw tɔnyɔgɔnw ka jijali koo fɔ aw nyana, janko aw ka se k'a yira ko kanuya b'aw fɛ tinyɛ na. Bari aw b'an Matigi Yezu Krista ka makari lɔn, ale min tun ye fɛntigi ye, a y'a yɛrɛ kɛ faantan ye aw kɔsɔn, waasa aw ka se ka kɛ fɛntigiw ye. Nin ye ne ka miiriya ye o koo la, a fana bɛ bɛn aw ma, kabini salon, aw minw kɛra fɔlɔ ye k'o koo; naniya ta, o dama tɛ, aw y'aw bolo don o baara la fana. Sisan aw ye taa nya k'o baara nin laban. Aw y'o; naniya ni timinadiya min ye, aw ye taa nya k'a laban k'o kɛ ni seko damayira ye. Bari see min b'i ye, n'i y'i yɛrɛ di ka sɔnni kɛ ka kɛnyɛ n'o ye, o le ka nyi. Ni fɛɛn t'i bolo, baasi tɛ. A ma kɛ ko an b'a fɛ aw k'aw tɔnyɔgɔnw dɛmɛ, ka tila ka nimisa dɛ, nga an b'a fɛ aw bɛɛ ka kɛ kelen ye. O la, aw ye sɔrɔli caaman min kɛ, aw k'o kɛ ka dɛsɛbagatɔw dɛmɛ. N'aw nana dɛsɛ loon dɔ la, olu fana ka se k'aw dɛmɛ n'u ta ye, o cogo la aw bɛɛ ka koo bɛ kɛ kelen ye, i n'a fɔ a fɔra Ala ka kuma na cogo min na ko: “Mɔgɔ min ye sɔrɔli kɛ kosɛbɛ, ale ta ma tɛmɛ a daan kan, mɔgɔ min ye dɔɔni sɔrɔ, ale fana ta ma dɛsɛ.” An bɛ Ala tando bari a y'aw koo diya Titi ye i n'a fɔ anw. Bari a sɔnna an ka dalikan ma. A diyara a ye kosɛbɛ, a sɔnna ka taa aw fɛ tugu. An balimacɛ min tɔgɔ bɔra Ala ka jama cɛma kibaru diman fɔli baara kɔsɔn, an y'ale fara Titi kan k'u ci aw fɛ. Ala ka jama dɔw y'a woloma k'a fara an kan, a ka kɛ an taamanyɔgɔn ye nin baaranyuman na, an b'o min kɛra Matigi tɔgɔ bonya kama, ani an ka dusunyuman kɔsɔn. An b'o kɛ janko an kana tɔgɔcɛn sɔrɔ baaranyuman nin kɛli la o min ye bolomafara ye. An t'a fɛ ka tilenninya kɛ Matigi dama nyakɔrɔ, an b'a fɛ k'a kɛ mɔgɔw nyakɔrɔ fana. Mɔgɔ minw wolomana ka ci aw ma, an y'an balimacɛ nin fana fara u kan, an y'ale min lɔn mɔgɔ timinadiyanin ye baara caaman seen fɛ. A fana y'o yira an na sisan tugu, bari a y'a jigi la aw kan kosɛbɛ. Titi kɔni, ale kɛra ne ka taamanyɔgɔn ye ni n ka baarakɛnyɔgɔn ye aw cɛma. An balima minw bɛ n'a ye, olu ye Ala ka jama ka cidenw ye, minw kɛra Krista ka bonyafɛnw ye. Aw k'olu minɛ ka nya ni kanuya ye, janko Ala ka jama bɛɛ k'o ye k'a lɔn ko tinyɛ b'an fɛ n'an y'an yɛrɛ bonya aw koo la. Min ye bolomafara ka koo ye, min bɛ kɛra Ala ka jama kɔsɔn, kuun t'a la ne ka bataki ci aw ma o koo la. Ne b'a lɔn ko aw sɔnnin lo, o le y'a to ne ye n yɛrɛ bonya aw koo la Ala ka mɔgɔw cɛma. Olu minw bɛ Maseduwani mara la. Ne y'a fɔ u ye ko aw Akayikaw ka bolomafara labɛnna ka ban kabini salon. O cogo la, aw ka jijali y'a kɛ Ala ka jama caaman banbana. Ne y'an balima nunu ci aw fɛ, janko an b'an yɛrɛ bonya aw koo la koo minw na, o kana kɛ gwansan ye, ani aw labɛnnin ka sɔrɔ i n'a fɔ ne tun y'a fɔ cogo min na. Ne bɛ siran ni Maseduwanika dɔw taara ni ne ye aw fɛ, u kana ta'a sɔrɔ n'aw labɛnnin tɛ, o bɛna kɛ maloya ye an fɛ, n t'a fɛ k'aw ta fɔ. Ne y'a ye ko a ka fisa ne k'an balima nunu dali u bɛ taa an nya aw fɛ. Aw ye bolomafara min layidu ta, aw k'o labɛn an nyafɛ, janko a kana kɛ i n'a fɔ jagoyako, nga diyanako. Aw k'a lɔn ko ni mɔgɔ min ye danni kɛ dɔɔni dɔrɔn, o tigi bɛna suman dɔɔni le sɔrɔ. Ni min ye danni kɛ caaman, ale bɛ suman caaman sɔrɔ fana. Mɔgɔ kelen kelen bɛɛ ka dili kɛ a yɛrɛ sago la, u kan'a kɛ ni nisɔngoya ye, a kana kɛ jagoyako ye, bari mɔgɔ min bɛ sɔnni kɛ ni nisɔndiya ye, o tigi koo le ka di Ala ye. See bɛ Ala ye ka fɛɛn bɛɛ d'aw ma aw mako bɛ fɛɛn minw na, n'aw y'olu sɔrɔ, aw ka se ka jija ka baaranyuman sifa bɛɛ kɛ tuma bɛɛ, i n'a fɔ a fɔra Ala ka kuma na ko: “A y'a ka fɛɛn caaman tilan faantanw cɛ, a ka nyumanya tɛ ban abada.” Ala min bɛ sumansi di sɛnɛkɛla ma, ale min bɛ dumuni di, ale kelen le bɛna aw sɔn fana k'a caya, ani k'aw ka baaranyuman nin sabati. Ale le bɛna aw kɛ fɛntigiw ye tuma bɛɛ, o min sababu la, an bɛna se ka nyumanya kɛ, mɔgɔ caaman ka barika la Ala ye aw ka bolomafara barika la. Bari aw bɛ baara min kɛ, o tɛ dan Ala ka mɔgɔw ka makonya dama ma, o fana bɛ kɛ sababu ye mɔgɔ caaman bɛ barika la Ala ye. N'u y'aw ka dɛmɛ nin ye tuma min na, u bɛn'a lɔn ko aw ye mɔgɔ sifa min ye, o la, u bɛna Ala tando aw koo la, bari aw sɔnna Krista ka kibaru diman ma ka mɛnni kɛ a fɛ, ani aw ka timinadiya kɔsɔn, aw sɔnna ka olu dɛmɛ ani tɔ nunu bɛɛ. Olu fana bɛna Ala dali aw ye, ani k'u ka kanuya yira aw la, Ala ye nɛɛma min kɛ aw ye, o kɔsɔn. An bɛ Ala tando a ka nɛɛma kɔsɔn o min nyɔgɔn tɛ. U b'a fɔ ko ne Pɔli kɛra mɔgɔ majiginin ye ni ne bɛ aw cɛma, nga ni n tɛ aw cɛma, n ka fari. Ne yɛrɛ le b'aw dali Krista ka makari n'a ka nyumanya kɔsɔn, ko aw kan'a to ne bɛ fariya aw ma ni n sera aw fɛ tuma min na, bari, mɔgɔ minw b'a miiri ko an bɛ adamadenya baara le kɛra dɔrɔn, ne bɛ se ka fariya olu ma. K'an to adamadenya la, an tɛ kɛlɛ kɛ adamaden ka cogo la. An ka kɛlɛkɛminanw tɛ adamaden ta ye, Ala ta lo, barika b'u la ka juguw ka fanga cɛn k'u ka miirijuguw cɛn, ani yɛrɛbonyala minw bɛ muruti Ala sago kama, ne bɛ olu bɛɛ majigi. An bɛ mɔgɔw ka miiri bɛɛ yɛlɛma k'o sin Krista ma u k'a ka kuma labato. N'aw sɔnna ka mɛnni kɛ an fɛ tuma min na, an labɛnnin lo ka murutibagaw bɛɛ jalaki. An bɛ koow filɛ o kɔɔ kan dama. Ni mɔgɔ dɔ lanin b'a la ko ale kɛra Krista ta ye, o tigi ka kan k'a lɔn fana ko ni ale ye Krista ta ye, an fana ye a taw ye. Matigi ye see min d'an ma k'aw dɛmɛ ka taa nya, o ma d'an ma aw ka makosa kama. Hali ni ne ye n yɛrɛ bonya o koo la ka tɛmɛ dɔɔni, ne tɛ maloya o la. A ma kɛ ko ne b'a fɛ ka siranya bila aw la ni ne ka batakiw ye dɛ, bari u b'a fɔra ko ne Pɔli bɛ kuma gwɛlɛmanw n'a farimanw le fɔ ne ka batakiw kɔnɔ, nga ko ni ne yɛrɛ le nana, fanga tɛ ne ka kuma na ani ko mɔgɔ bɛ se k'o kɔɔ kari. Mɔgɔ min b'o kuma nyɔgɔn fɔ, o tigi k'a faamu fana ko k'an to yɔrɔ wɛrɛ la, an ka kuma bɛ bataki kɔnɔ cogo min na, o cogo fana na n'an b'aw cɛma, an ka kɛwali bɛ ten. An tɛna an ka koo suma walima k'o kɛnyɛ ni mɔgɔ dɔ wɛrɛw ta ye, olu minw b'u yɛrɛ koo fɔ. Nalomanw lo, u b'u yɛrɛ ka koo suma ani k'o kɛnyɛ n'u yɛrɛ ye. An kɔni, an t'an yɛrɛ bonya ka taa tɛmɛ an lɔyɔrɔ kan, nga Ala ye lɔyɔrɔ min d'an ma, o min kɛra sababu ye, an sera aw fɛ, an b'an yɛrɛ bonya ka kɛnyɛ n'o ye. An sera aw fɛ ka Krista ka kibaru diman dama fɔ aw ye, an ma tɛmɛ an lɔyɔrɔ kan i n'a fɔ a latigɛra cogo min na. An tɛ tɛmɛ an lɔyɔrɔ kan. An t'an yɛrɛ bonya mɔgɔ wɛrɛ ka baara kɔsɔn. Nga an b'a fɛ aw ka taa nya le Krista ka koo la, an ka se ka baara caaman dɔ wɛrɛw kɛ aw cɛma, ka kɛnyɛ ni lɔyɔrɔ min dira an ma janko an ka se ka taa nya ni kibaru diman fɔko ye fɔɔ ka tɛmɛ aw la ka taa yɔrɔ wɛrɛ la. An tɛna an yɛrɛ bonya mɔgɔ wɛrɛ si ka baara kɔsɔn. A fɔra ko: “Ni mɔgɔ min b'a fɛ k'a yɛrɛ bonya, o tigi k'a yɛrɛ bonya Matigi barika la.” A ma kɛ ko mɔgɔ min b'a yɛrɛ koo fɔ, k'o tigi ta le ye tinyɛ ye, nga mɔgɔ min koo ka di Matigi ye, o lo. Ayiwa, n'aw tun bɛ se ka ne ka fatɔya kuma munyu dɔɔni tugu. Aw bɛ se k'o munyu. Ne bɛ keliya aw koo la, o keliya nin bɔra Ala fɛ, bari aw kɛra i n'a fɔ sungurusɛbɛw, ne y'o minw maminɛ cɛɛ kelen ye, o ye Krista ye. Nga ne bɛ siran ko aw hakili kana nyagami, k'aw jigi kana bɔ Krista kan, i n'a fɔ saa ye Awa nanbaran n'a ka cekuya ye cogo min na. Mɔgɔ wɛrɛ bɛ na ka Yezu wɛrɛ koo fɔ aw ye, a ka fɔta bɛ danna an ta la, aw bɛ sɔn o ma, ka sɔn nii wɛrɛ ma, min bɛ danna Nii Senuman na, ka sɔn kibaru diman wɛrɛ ma, min bɛ danna ni aw tun sɔnna min na. Ne ka miiri la, ne k'o cidenbaba nunu man fisa ni ne ye foyi si la. Hali ni ne tɛ se kuma na, lɔnniya faan fɛ kɔni, ne bɛ se, an y'o bɛɛ yira aw la ka gwɛ tuma bɛɛ, koo bɛɛ la. Ne tun ye n yɛrɛ majigi ka kibaru diman fɔ aw ye gwansan waasa aw mako ka nya, o tuma na ne ye kojugu le kɛ wa? Ne ye Ala ka jama dɔw bololafɛnw le minɛ ka sɔrɔ ka baara kɛ aw cɛma. Tuma min na ne tun b'aw fɛ yen, ni fɛɛn dɔ makoya tun bɛ ne la, ne tun t'o minɛ aw si fɛ, bari an balima minw bɔra Maseduwani mara la ka na, olu le lɔra ni ne ka koo ye. Ne banbana janko ne kana kɛ aw si ka doni ye koo si la, a fana tɛna kɛ aw ta ye. Krista ka tinyɛ kɔsɔn, ne b'a fɔ ko bonya min bɛ ne kan, o tɛna bɔ ne kan Akayi mara la fewu. Mun na ne y'o fɔ aw ye? Bari ne t'aw kanu wa? Ayi, Ala yɛrɛ b'o lɔn. Ne ye baara min kɛ, ne bɛna o nyɔgɔn kɛ tugu, janko minw bɛ cogoya nyini k'u yɛrɛ bonya k'a fɔ k'olu b'an ka baara nyɔgɔn le kɛra, u kana se k'o kɛ. O mɔgɔ nunu bɛ galon tigɛ k'olu ye cidenw ye, u kɛra galontigɛlaw ye, k'u yɛrɛ kɛ Krista ka cidenw ye. O ma kɛ kabako ye, bari, Sutana yɛrɛ b'a yɛrɛ kɛ i n'a fɔ mɛlɛkɛnyuman. O la, n'a ka baaradenw fana b'u yɛrɛ kɛ i n'a fɔ konyumankɛlaw, o tɛ kabako ye. Nga u ka koo bɛɛ bɛna laban ka kɛnyɛ n'u ka baara ye. Ne b'a fɔ tugu ko mɔgɔ si kana miiri ko ne ye fatɔ ye. Nga n'a bɛ dɔ kɔnɔ ten, o tuma na, aw ka ne kɛ fatɔ ye, ne ka se ka n yɛrɛ bonya dɔɔni fana. Ne bɛ kuma min fɔra sisan, o ma kɛ Matigi sago ye, nga sababu le y'a to, ne bɛ n yɛrɛ bonya, o la ne bɛ kuma i n'a fɔ fatɔ. Mɔgɔ dɔw b'u yɛrɛ bonya ka kɛnyɛ ni adamadenya ye minkɛ, o la, ne fana bɛ n yɛrɛ bonya. Aw minw nyamalɔnin bɛ, aw bɛ sɔn ka fatɔw ka koo munyu! Aw bɛ sɔn u b'aw minɛ i n'a fɔ jɔɔnw, ani u ka ben aw kan k'aw tɔnyɔ, ani k'aw dɔgɔya, hali n'u b'aw tulo ci, aw b'o bɛɛ munyu. Ne yɛrɛ bɛ maloya ka kuma nin fɔ, a kɛra i n'a fɔ an kɛra barikatanw ye. Ni mɔgɔ wɛrɛw b'u jaa gwɛlɛya k'u yɛrɛ bonya, ne fana bɛ sɔn k'o nyɔgɔn kɛ, ne bɛ kumana i n'a fɔ fatɔ. Olu ye eburu ye kɛ? Ne fana ye dɔ ye. Olu ye Isirayɛlidenw ye kɛ? Ne fana ye dɔ ye! Olu ye Ibrayima deenw ye kɛ? Ne fana ye dɔ ye! Olu ye Krista ka baarakɛlaw ye kɛ? Ne bɛna kuma i n'a fɔ ne fatɔyara le. Ne tɛmɛna olu kan o baara la yɛrɛ, ne donna kaso la ka tɛmɛ olu kan, u ye ne bugɔ ka tɛmɛ olu kan fana. Waati caaman na ne tun bɛ nyini ka sa, Zuwifuw ye ne minɛ ka golokami nyaa bi saba ni kɔnɔntɔn bɔ ne la, sinyɛ duuru bɛɛ. U ye ne bugɔ ni bere ye sinyɛ saba, ka ne bon ni kabakuruw ye sinyɛ kelen, kurun cɛnna ni ne ye sinyɛ saba. Ne ye suu kelen ni tile kelen kɛ jii kɔnɔ. Ne ye n ka taama caaman kɛ seen na. Ka ne to taama na, waati caaman na gwɛlɛya sera ne ma, baji tun bɛ nyini ka n ta, benkannikɛlaw fana fɛ, gwɛlɛya sera ne ma, ne ka siya yɛrɛ ye gwɛlɛya lase ne ma, ani siya wɛrɛw fana, ne ye gwɛlɛya sɔrɔ dugubaw kɔnɔ, ani kongo kɔnɔ fana, gwɛlɛya fana sera ne ma kɔgɔji kan, ani ne balimajuguw y'a kɛ gwɛlɛya sera ne ma fana. Ne sɛgɛnna baara gwɛlɛman bolo, ne ma sinɔgɔ sinyɛ caaman, ne tɔɔrɔla kɔngɔ ni minnɔgɔ bolo, ne tun tɛ dumuni sɔrɔ tuma caaman, ne tɔɔrɔla nɛnɛ bolo kosɛbɛ, ne tun tɛ fani sɔrɔ k'a don fana. Ka fara o bɛɛ kan, loon o loon ne bɛ hami Ala ka jama bɛɛ koo la. Ni mɔgɔ dɔ dɛsɛra, a bɛ kɛ ne kɔnɔ i n'a fɔ ne yɛrɛ le dɛsɛra. Ni dɔ ye kojugu kɛ, ne hakili bɛɛ bɛ cɛn. Ni ne ka kan ka n yɛrɛ bonya, ne bɛna n yɛrɛ bonya ne ka dɛsɛyɔrɔ le la. Ala min ye an Matigi Yezu Faa ye, ale min tɔgɔ ka kan ka bonya tuma bɛɛ, ale b'a lɔn ko ne tɛ galon tigɛra. Ka ne to Damasi dugu kɔnɔ, masacɛ Aretasi ka lasigiden ye sira di k'u ka dugu dondaw bɛɛ kɔlɔsi, waasa u ka ne minɛ. Nga n balimaw ye ne dɛmɛ ka ne jigi ni kogo woo ye dugu kɔfɛ sinsin kɔnɔ. O cogo la, ne kisira a ma. Ne ka kan ka ne yɛrɛ bonya, hali n'o ma nyi. O n'a ta bɛɛ, Matigi ye fɛɛn minw yira ne la ani ne ye koo minw ye, ne bɛna olu koo fɔ. Ne bɛ mɔgɔ dɔ lɔn min lara Krista la, a saan tan ni naani filɛ nin ye, o tigi nin tara ka taa fɔɔ sankolo la. A yɛrɛ le yɛlɛla yen wa, walima fɛɛn yirata lo wa, ne kɔni m'o lɔn, Ala kelen le b'o lɔn. Tinyɛ lo, ne y'a lɔn k'o mɔgɔ nin tun tara ka taa yen, a yɛrɛ yɛrɛ le tara ka taa wa, walima fɛɛn yirata lo wa, ne m'o lɔn, Ala kelen le b'o lɔn. O tigi nin tara ka yɛlɛ fɔɔ arijana na. O yɔrɔ la, a ye kuma dɔ mɛn, min tɛ se ka segi ka fɔ tugu, ani mɔgɔ man kan k'o min baro bɔ. Ne bɛ se ka n yɛrɛ bonya o mɔgɔ sugu le kɔsɔn, nga ne kɔni, ne tɛ n yɛrɛ bonya ne yɛrɛ ka kɛta kɔsɔn, fɔɔ ne ka dɛsɛ kɔsɔn. Ni ne tun b'a fɛ ka n yɛrɛ bonya, ne tun tɛna jati fatɔ ye, bari ne tun bɛna tinyɛ dama le fɔ. Nga ne banna k'o kɛ min kama, o ye nin ye, ne t'a fɛ mɔgɔ si ka ne bonya fɛɛn wɛrɛ la ni ne ka kuma ni n ka kɛwali tɛ. Bana dɔ ye ne sɔrɔ, ale min nana i n'a fɔ Sutana ka ciden waasa ne ye kabako minw ye, ne kana se ka ne yɛrɛ bonya olu kɔsɔn. O bana nin koo la ne ye Matigi dali sinyɛ saba ko a ka ne kɛnɛya. Nga a ye ne jaabi ko: “N ka nɛɛma b'i wasa, ne bɛ n ka sebagaya yira i ka dɛsɛwaati la.” O le y'a to ne bɛna n yɛrɛ bonya ne ka tɔɔrɔkow le la, waasa Krista ka sebagaya ka to ne fɛ. O le kɔsɔn, ne bɛ nisɔndiya ne ka dɛsɛ koow la, u bɛ ne nɛnina wo, ne dusu kasira wo, u bɛ ne tɔɔrɔla wo, ne bɛ nisɔndiya hali ni nisɔngoyako lo Krista kɔsɔn, bari ne y'a lɔn ko waati min na ne barika dɛsɛra, o waati yɛrɛ la ne bɛ fanga sɔrɔ. Aw k'a filɛ, ne bɛ kumana i n'a fɔ ne kuun wilila, o bɔra aw le la. Aw le tun ka kan ka kuma ne nɔɔ na. Bari hali ni ne tɛ foyi ye, aw ka cidenbaba nunu man fisa ni ne ye. Kɛwali minw b'a yira ko ne ye ciden ye, olu bɛɛ yera aw cɛma. Ne ye kobaw ni kabako sifa bɛɛ kɛ. Ka fara o kan, ne munyuna koo bɛɛ la. Ne ma se k'aw minɛ ka nya koo jumɛn le la, ni ne y'o nyɔgɔn kɛ Ala ka jama tɔw ye? Ne ma sɔn aw ka lɔ ni ne ka kunko ye minkɛ n'o dɔrɔn tɛ. Aw ye yafa ne ma o fili nin koo la. Ayiwa, nin le bɛna kɛ a sabanan ye, ne labɛnnin lo ka taa aw fɛ. Ne ka kunko tɛna la aw kan, bari ne mako b'aw yɛrɛ le la, ne mako tɛ aw ka bololafɛnw na. Facɛman le b'a deenw ka sini nyasigi labɛn, deenw tɛ facɛ ta labɛn. Ne kɔni fɛ, ne labɛnnin lo ka n bololafɛnw bɛɛ ban aw kɔsɔn, ka tila ka n yɛrɛ di k'aw dɛmɛ. Ni ne y'aw kanu ten, o le bɛn'a to aw tɛ ne kanu sɛbɛ la wa? Aw y'a lɔn ko ne ma dɛmɛ sɔrɔ aw fɛ. Nga dɔw b'a fɔ ko ne ka cekuya kɔsɔn, ne ye nanbaran kɛ ka dɔ sɔrɔ sira wɛrɛ fɛ. Ne ye mɔgɔ minw ci aw fɛ, ne ye tɔnɔ dɔ sɔrɔ aw kun olu dɔ barika la wa? Ne ye Titi dali k'a ci aw fɛ n'an balimacɛ ye, ne y'o min koo fɔ ka tɛmɛ. O tuma na, Titi y'a ka doni dɔ la aw kan wa? Ne ni Titi jogo n'an ka miiriya tɛ kelen ye wa? Aw bɛ miiri kabini tumajan, ko an bɛ tinyɛ le nyinina, o tɛ wa? Ayi dɛ, ne terisɛbɛw, an b'a fɛ aw ka se ka taa nya le. O le y'a to Krista barika la an b'an ka kuma fɔ Ala nyakɔrɔ. Ne bɛ siran ko ni ne sera aw fɛ waati min na, ne b'aw jati cogo min na, ne kana taa aw sɔrɔ cogo wɛrɛ la, aw tun bɛ ne jati cogo min na, aw fana kana ne ye cogo wɛrɛ la. N bɛ siran ko kɛlɛ ni keliya, ni dimiko, ni sɔnjuguya ni nyɔgɔnnɛni, ni kumakolonfɔ, ni yɛrɛbonya ni koferekenin kana sɔrɔ aw cɛma. Ne fana bɛ siran ko ne mana se aw fɛ tuma min na, ne ka Ala kana ne majigi aw cɛma. Mɔgɔ minw tun ye kojugu kɛ n'u ma sɔn ka nimisa u ka kakalaya la, n'u ka mɔgɔkolonya n'u ka malobaliya la, ne dusu kana kasi olu kɔsɔn. Nin taama bɛna kɛ ne taako sabanan ye aw fɛ. “Koo o koo minw bɛ yen, u bɛna latigɛ, ka kɛnyɛ ni mɔgɔ fila walima mɔgɔ saba ka seereya ye” i n'a fɔ a fɔra Ala ka kuma na cogo min na. Mɔgɔ minw ye kojugu kɛ fɔlɔfɔlɔ, ne bɛ olu ni tɔ nunu lasɔmina, ne tun y'a fɔ olu ye ka kɔrɔ ne tɛmɛko filanan na aw fɛ, ne bɛ tila k'a fɔ u ye tugu, hali ni ne t'aw cɛma yen. Ni ne sera aw fɛ tuma min na, ne tɛna makari mɔgɔ si la tugu dɛ, bari aw ko aw mako b'a la ka koo ye min b'a yira ko ne bɛ kuma Krista le barika la. See bɛ Krista ye aw cɛma. A b'a ka sebagaya le kɛra aw cɛma. Hali ni Krista sara lɔgɔ kan barikatanya la, a nyanaman lo Ala ka sebagaya barika la bii. An fana, halibi, an kɛra barikatanw ye i n'a fɔ ale tun bɛ cogo min na, nga Ala barika la k'an to n'ale ye, Ala b'an kɛ setigiw ye aw faan fɛ. Aw k'aw yɛrɛ sɛgɛsɛgɛ k'a filɛ yala n'aw lanin bɛ Krista la sɛbɛ la. Walima aw t'a lɔn ko Krista b'aw fɛ wa? N'o tɛ sigasigako nin b'aw le la. Ne lanin b'a la ko aw b'a lɔn ko sigasiga tɛ an ka koo la. An bɛ Ala dali ko aw kana kojugu si kɛ, an t'o kɛra janko k'a yira ko see b'an ye. An b'o kɛ janko an k'aw ye n'aw bɛ konyuman le kɛ, hali n'a bɛ kɛ i n'a fɔ anw dɛsɛra. Bari an tɛ se ka tinyɛ bali, an b'a kɔ le. Ni an bɛ dɛsɛ, aw bɛ fanga sɔrɔ, o tuma na an bɛ nisɔndiya. An bɛ Ala dali ko aw ka se ka taa nya ka kɛ mɔgɔdafaninw ye. O le y'a to ne bɛ to yɔrɔjan na, ka sɛbɛ ci aw ma, waasa ni ne sera aw fɛ, ne kana fariya aw ma ni kuntigiya ye Matigi y'o min di ne ma. A y'o di waasa ne k'aw dɛmɛ ka taa nya, a m'o di ne ma k'aw mako sa. Sisan n balimaw, aw ka to nisɔndiya la, ka jija ka kɛ mɔgɔ dafaninw ye, ka nyɔgɔn jaa gwɛlɛya, ka bɛn kosɛbɛ, ani ka to hɛrɛ la nyɔgɔn fɛ. N'o kɛra, kanuyatigi Ala, min ye hɛrɛtigi ye, ale bɛna to aw fɛ. Aw ka nyɔgɔn fo kosɛbɛ ni kɔnɔgwɛ ye. Ala ka jama bɛɛ b'aw fora. An Matigi Yezu Krista ka nɛɛma ni Ala ka kanuya, ani Nii Senuman ka jɛnnyɔgɔnya ka kɛ aw bɛɛ fɛ. Ne Pɔli min ye ciden ye, o ma kɛ mɔgɔw sababu la, walima adamaden dɔ barika la, nga o ye Yezu Krista sago ye n'a Faa Ala min y'a kunun a sanin kɔ. Ne n'an balima minw bɛɛ bɛ yan, an le bɛ bataki nin ci Ala ka jama ma minw bɛ Galati mara la. An Faa Ala n'an Matigi Yezu Krista ka nɛɛma ni hɛrɛ kɛ aw ye. Ale Krista min y'a yɛrɛ nii di k'an kunmabɔ an ka kojugu la, waasa k'an tilan ka bɔ bii dinyɛ juguman nin bolo, ka kɛnyɛ n'an Faa Ala sago ye. Bonya ka la ale kan waati bɛɛ la. Amiina. Ala min y'aw wele Krista barika la, aw banna ale la joona joona, ka tugu kibaru diman wɛrɛ kɔ, o ye ne kabakoya kosɛbɛ. Tinyɛ lo, kibaru diman wɛrɛ tɛ yen, nga mɔgɔ dɔw bɛ sɔrɔ aw cɛma minw b'aw nyagami. U b'a fɛ ka Krista ka kibaru diman koo yɛlɛma. Ni mɔgɔ dɔ, hali anw yɛrɛ, walima Ala ka mɛlɛkɛ dɔ, ye kibaru diman wɛrɛ fɔ aw ye, o min bɛ danna an ka fɔlɔta la, o tigi danganin lo. An tun y'o fɔ ka kɔrɔ, ne fana b'a fɔ tugu ko ni mɔgɔ dɔ ye kibaru diman wɛrɛ fɔ aw ye, n'o ma kɛ kelen ye n'an ka fɔlɔta ye aw tun sɔnna o min ma, o tigi danganin lo. O tuma na, sisan a fɔra ko ne b'a fɛ ne koo ka diya mɔgɔ ye wa, walima Ala ye? Walima ne b'a fɛ ka mɔgɔ diyanako le kɛ? Ni ne tun b'a fɛ k'o kɛ, ne tun tɛna kɛ Krista ka baarakɛla ye. N balimaw, ne b'a fɛ aw k'a lɔn ko ne ye kibaru diman min fɔ aw ye, o ma bɔ adamaden na. Ne m'o sɔrɔ mɔgɔ si fɛ, mɔgɔ si fana ma ne kalan o la, nga Yezu Krista yɛrɛ le y'o koo yira ne la. Ne tun bɛ cogo min na fɔlɔfɔlɔ, Zuwifu ka Alasira taama na, aw y'o mɛn cɔ! Ne tun bɛ Ala ka jama tɔɔrɔ kosɛbɛ. Hali ne tun b'a fɛ a koo ka dabila pewu. Zuwifuw ka Alasira taamako faan fɛ, ne fana tun tɛmɛna ne tɔnyɔgɔn caaman kan, bari ne jijanin tun bɛ ne faaw ka landakow la kosɛbɛ. Kabini ne ma wolo fɔlɔ, Ala ye ne woloma ka bila, a diyara ale ye ka ne wele fana a ka nɛɛma barika la, a y'a Dencɛ yira ne la, waasa ne k'a koo fɔ siya wɛrɛw ye. O la, o yɔrɔnin bɛ, ne ma adamaden ka ladili kɔnɔ. Ne fana ma taa Zeruzalɛmu, ka ciden fɔlɔw ye. Ne ye sira minɛ ka taa Arabi jamana na fɔlɔ, o kɔ, ne segira ka na Damasi tugu. O kɔ, saan saba tɛmɛna ne ka sɔrɔ ka taa Zeruzalɛmu, waasa n ka se ka Piyɛri lɔn. Ne ye tile tan ni duuru dama kɛ n'a ye. Ni ale tɛ, ne ma ciden wɛrɛ ye tugu, n'a ma kɛ Matigi dɔgɔcɛ Zaki dama ye. Ne bɛ koo minw bɛɛ fɔra aw ye, Ala b'a lɔn ko ne tɛ galon tigɛra. O kɔ, ne tɛmɛna ka taa Siri ni Silisi jamana na. Krista kɔmɔgɔ minw tun bɛ Zude mara la, olu tun tɛ ne lɔn. U tun y'a mɛn dɔrɔn ko mɔgɔ min tun bɛ olu tɔɔrɔla fɔlɔfɔlɔ n'a tun b'a fɛ o koo ka dabila pewu, ko ale fana b'o koo fɔra sisan. O cogo la, u tun bɛ Ala tando ne koo la. Saan tan ni naani tɛmɛna, ne ni Barinabasi sɔrɔla ka taa Zeruzalɛmu tugu. Titi fana taara n'an ye. Ala tun ye koo dɔ yira ne la, o seen fɛ ne tun taara yen. Ne tun bɛ kibaru diman min fɔ siya wɛrɛw cɛma, ne y'o koo fɔ u ye. Ne y'o nyafɔ fana nyamɔgɔw ye danna, janko ne ye baara minw kɛ ka ban, ani ne bɛ minw kɛra, o kana kɛ gwansan ye. Nga n taamanyɔgɔn Titi min tun ye siya wɛrɛ ye, a tun ma kɛ wajibi ye ale ka kɛnɛkɛnɛ. Nga an balimakolon dɔw le tun b'a fɛ a ka kɛnɛkɛnɛ olu minw farala an kan nanbara kɔsɔn. An ye hɔrɔnyali min sɔrɔ Yezu Krista fɛ, u tun b'a fɛ k'o cogo lɔn, k'an bɔ o la k'an don jɔnya la. An ma sɔn o mɔgɔ nunu ka fɔta ma tuma si waasa kibaru diman o min ye tinyɛ ye, o kana yɛlɛma aw kɔsɔn. Hali mɔgɔ minw tun bɛ jati nyamɔgɔw ye, o n'u ka nyamɔgɔya bɛɛ, ne tun t'o jati, bari Ala fana tɛ adamadenya jati. O nyamɔgɔ nunu ma foyi fɔ ne ye fana. Nga olu y'a faamu ko Ala ye kibaru diman fɔ baara kalifa ne ma siya wɛrɛw cɛma, i n'a fɔ a y'a kalifa Piyɛri fana ma cogo min na Zuwifuw cɛma. Bari Ala min tun ye Piyɛri kɛ ciden ye Zuwifuw cɛma, ale Ala kelen le ye ne fana kɛ ciden ye siya wɛrɛw cɛma. Zaki ni Piyɛri ani Zan olu minw tun bɛ jati kosɛbɛ, olu fana y'a lɔn ko Ala ye nɛɛma kɛ ne ye. U y'u bolo don ne ni Barinabasi bolo la, k'a yira ko an bɛɛ kɛra baarakɛnyɔgɔnw ye, waasa an ka taa siya wɛrɛw fɛ, olu ka taa Zuwifuw fɛ. U y'a nyini an fɛ ko an ka kan k'an janto dɛsɛbagatɔw la Ala ka jama cɛma, ne y'o le kɛ fana. Piyɛri nana Antiyɔsi tuma min na, ne y'a jalaki mɔgɔ bɛɛ nyana, bari a tun ye koo dagabali le kɛ. Yan ni Zaki ka cidenw ka na, ale Piyɛri tun bɛ to ka dumuni kɛ ni siya wɛrɛw ye. Nga o ciden nunu sera dɔrɔn, a faranna u la Zuwifuw nyasiran kɔsɔn. Zuwifu minw lara Krista la, olu fana tugura ale kɔ a ka nanbarantɔya la, ani Barinabasi fana. Ne y'a ye tuma min na k'u tɛ taamana ka kɛnyɛ ni kibaru diman ye, o min ye tinyɛ ye, ne tilenna k'a fɔ Piyɛri ye mɔgɔ bɛɛ nyana, ko: “E min ye Zuwifu yɛrɛ yɛrɛ ye, e do y'i yɛrɛ minɛ i n'a fɔ siya wɛrɛ, mun na e bɛ tila ka siya wɛrɛw karaba k'olu ka kɛ i n'a fɔ Zuwifu?” An kɔni, an wolola Zuwifuya la, an ma kɛ siya wɛrɛw ye olu minw bɛ jati kojugukɛlaw ye. An b'a lɔn ko mɔgɔ si tɛ se ka jati mɔgɔtilennin ye sariya labatoli fɛ, nga fɔɔ ni min lara Yezu Krista la. O la, an lara Yezu Krista la fana, waasa an ka se ka jati mɔgɔtilenninw ye o lanaya barika la, a kana kɛ sariya labatoli barika la, bari mɔgɔ si tɛ se ka jati mɔgɔtilennin ye sariya labatoli barika la. K'an to tilenninyanyini na Krista barika la, n'a sɔrɔla ko an ye kojugukɛlaw ye, o b'a yira k'o bɔra Krista la wa? Ayi dɛ! Bari ni ne yɛrɛ ye fɛɛn dɔ cɛn ka tila k'a lalaga, ne yɛrɛ le b'a yira ko ne ye kojugu kɛ. Ne kɔni, sariya faan fɛ ne sanin lo ale sariya yɛrɛ sababu la, waasa ne ka kɛ mɔgɔ nyanaman ye Ala faan fɛ. Ne ni Krista an fila bɛɛ sara nyɔgɔn fɛ lɔgɔ kan. Hali n'aw y'a ye ko ne bɛ nii na halibele, o tɛ ne yɛrɛ sababu ye, o ye Krista ka sababu ye. Bari n'aw y'a ye ko ne nyanaman lo farisogo la, o kɛra Ala Dencɛ barika la, ne ye n jigi la o min kan. A ye ne kanu fɔɔ k'a yɛrɛ di ne kɔsɔn. N'a kɛra ko mɔgɔ bɛ se ka jati mɔgɔtilennin ye sariya labatoli fɛ, Krista ka saya koo kɛra gwansan ye. Ne tɛna sɔn ka ban Ala ka nɛɛma na. Aw Galatika nalomanw, mɔgɔ jumɛn le y'aw nyaa nyini ten? K'a sɔrɔ Yezu Krista ka sayako lɔgɔ kan fɔra ka gwɛ aw ye kosɛbɛ. Ne b'a fɛ ka fɛɛn min faamu aw fɛ, o ye nin ye: Aw ye Nii Senuman sɔrɔ aw ka sariya labatoli barika la wa, walima aw sɔnna kibaru diman ma minkɛ, o kɔsɔn lo? Aw ka nalomanya nin sera o bɛɛ ma wa? Aw daminɛna ni Nii Senuman ye, aw b'a fɛ k'o koo laban adamadenya la wa? Aw y'o koo ye k'o lɔn gwansan wa? N'o kɛra gwansan ye. Ala min b'a ka Nii Senuman d'aw ma ani ka kabakow kɛ aw cɛma, ale b'o kɛ aw ka sariya labatoli le kama wa? walima aw sɔnna kibaru diman ma minkɛ, o le kɔsɔn? A fɔra Ala ka kuma na ko: “Ibrayima lara Ala la minkɛ, o la a y'a jati mɔgɔtilennin ye.” Aw k'a lɔn ko mɔgɔ minw lara kibaru diman na, olu le ye Ibrayima deenw ye. O la, Ala tun kɔnna ka kibaru diman nin fɔ ko: “Siya bɛɛ bɛna duba sɔrɔ i barika la,” bari Ala tun y'a latigɛ ko a bɛna siya wɛrɛw jati mɔgɔtilenninw ye jigi barika la. Ibrayima lara Ala la, o la, a ye duba sɔrɔ. O cogo la, mɔgɔ o mɔgɔ mana la Ala la, o tigi bɛ duba sɔrɔ fana. Mɔgɔ minw jigi bɛ sariya kan, olu bɛɛ danganin lo. Bari a fɔra Ala ka kuma na ko: “Mɔgɔ minw tɛ sariya bɛɛ labato, olu bɛɛ danganin lo.” A fana gwɛnin lo ko Ala nyakɔrɔ mɔgɔ si tɛ se ka jati mɔgɔtilennin ye sariya barika la, bari a fɔra Ala ka kuma na ko: “Mɔgɔ min y'a jigi la Ala kan, Ala ka sɔrɔ k'a jati mɔgɔtilennin ye, o tigi bɛna kisi.” Nga sariya ta, ni jigi ta tɛ kelen ye. A fana fɔra Ala ka kuma na ko: “Mɔgɔ min bɛ sariya bɛɛ labato, o tigi bɛ kisi o le barika la.” A fɔra Ala ka kuma na ko ni mɔgɔ o mɔgɔ dulonna yiri la, k'o tigi ye dangaden ye. Krista yɛrɛ sɔnna o ma an kɔsɔn, waasa k'an kisi sariya ka danga ma. O cogo la, Ala tun ye hɛrɛ min koo fɔ Ibrayima ye, o ka se ka kɛ siya wɛrɛw ye Yezu Krista barika la, ani an ka se ka Nii Senuman sɔrɔ jigi barika la Ala tun y'o layidu min ta. N balimaw, ne bɛ nin koo kɛnyɛ ni adamadenya ye. Ni mɔgɔ dɔ y'a ka koo dɔ latigɛ ka nya sanni a ka sa, mɔgɔ wɛrɛ tɛ se k'o cɛn walima ka dɔ fara o kan. Ala tun ye layiduw ta Ibrayima n'a kɔmɔgɔ le ye. O kɔmɔgɔ nin ye Krista le ye. O la, a tun y'a fɔ ko: “E n'i kɔmɔgɔ.” Nga a m'a fɔ ko: “E n'i kɔmɔgɔw.” Ne b'a fɛ ka fɛɛn min fɔ, o ye nin ye: Ala ye layidu ta min tɛna yɛlɛma. Saan kɛmɛ naani ni bi saba tɛmɛnin kɔ sariya min nana sigi, ale tɛ se ka layidu nin yɛlɛma fewu. Bari Ala bɛ fɛɛn min layidu ta, n'ale bɛ sɔrɔ sariya labatoli barika la, o ma kɛ layiduko ye tugu. Nga Ala ka layidu le kɔsɔn, a ye nɛɛma kɛ Ibrayima ye. Sariya do sigira mun le kama sa? A sigira janko kojugu ka lɔn, yan ni Ibrayima Kɔmɔgɔ nin ka na. Mɛlɛkɛw le y'o sariya nin di mɔgɔ dɔ le barika la. Nga ni dɛmɛbaga koo bɛ fɔ yɔrɔ min na, o tɛ mɔgɔ kelen koo ye tugu, Ala do ye kelen ye. O tuma na, sariya ni Ala ka layidu bɛ nyɔgɔn kɛlɛ wa? Ayi, ni sariya tun dira min bɛ se k'a to mɔgɔ bɛ kisi, o tuma na mɔgɔ fana tun bɛ se ka jati mɔgɔtilennin ye sariya barika la kɛ. A fɔra Ala ka kuma na ko mɔgɔ bɛɛ bɛ kojugu ka fanga kɔrɔ, waasa mɔgɔ minw lara Yezu Krista la olu ka Ala ka layidu nɛɛma sɔrɔ. Mɔgɔw k'u jigi la Krista kan, yan ni o waati ka se, an tun bɛ sariya bolo fɔlɔ, k'o waati makɔnɔ. O cogo la, sariya tun kɛra an kɔlɔsibaga ye, ka Yezu Krista makɔnɔ, waasa an ka se ka jati mɔgɔtilenninw ye jigi barika la. Sisan lanaya waati le bɛ yen, an tɛ kɔlɔsibaga nin bolo tugu. Bari aw minw lara Yezu Krista la, aw bɛɛ ye Ala deenw ye jigi barika la. Aw minw bɛɛ batizera waasa ka jɛn ni Krista ye, aw sɔnna ka jɛn n'a ye ka kɛ kelen ye. O cogo la, Zuwifu ni siya wɛrɛ bɛɛ ye kelen ye, jɔɔn ni hɔrɔn fana ye kelen ye, cɛɛ ni muso bɛɛ ye kelen ye. Bari aw bɛɛ kɛra kelen ye Yezu Krista barika la. N'aw kɛra Krista ta ye, aw ye Ibrayima kɔmɔgɔw ye, aw fana bɛna niyɔrɔ sɔrɔ Ala ka layidu la. Ne b'a fɛ ka min fɔ, o ye nin ye: Ni deen min ka kan k'a facɛ cɛɛn ta, k'a to denmisɛnya la, ale ni jɔɔn bɛɛ ka kan, hali ni fɛɛn bɛɛ y'a ta ye cogo o cogo. A bɛ to a marabagaw bolo, fɔɔ ka taa se a facɛ ka waati latigɛnin ma. Anw fana, an tun bɛ i n'a fɔ denmisɛnw waati min na, an tun bɛ tugura dinyɛ koow kɔ, ka kɛ u ka jɔɔnw ye. Nga Ala ka waati latigɛnin dafara tuma min na, a y'a Dencɛ ci, muso y'a wolo sariya kɔrɔ, waasa mɔgɔ minw tun bɛ sariya bolo, a k'olu hɔrɔnya janko an ka se ka kɛ Ala deenw ye. Aw ye Ala deenw ye sɛbɛ la. Ala yɛrɛ y'a Dencɛ Nii don an kɔnɔ, ale min b'a to an bɛ Ala wele ko an Faa. O cogo la, e tɛ jɔɔn ye tugu, nga Ala deen. E y'a deen ye, o la, Ala bɛna niyɔrɔ d'i ma i n'a fɔ a b'a di a ka deen tɔw ma cogo min na fana. Fɔlɔfɔlɔ, aw tun tɛ Ala lɔn tuma min na, aw tun bɛ fɛɛn wɛrɛw bato ka kɛ u ka jɔɔnw ye minw tun tɛ Ala ye. Nga sisan aw ye Ala lɔn, walima Ala le y'aw lɔn. Fɛɛn minw tɛ foyi nya, a kɛra di aw bɛ kɔsegi ka kɛ olu ka jɔɔnw ye tugu? Aw bɛ janto loonw, ni kalow la, ani waatiw ni saanw na kosɛbɛ ka olu labato. Sisan, ne bɛ siran ko, ne ye baara min kɛ aw cɛma, o kana kɛ gwansan ye. Ne balimaw, ne b'aw dali ko aw k'aw yɛrɛ kɛ i n'a fɔ ne bɛ cogo min na, bari ne ye n yɛrɛ kɛ i n'a fɔ aw bɛ cogo min na, aw ma kojugu si kɛ ne la. Aw y'a lɔn ko ne ka bana koo le kɛra sababu ye ne ka sɔrɔ ka kibaru diman fɔ aw ye. Ka ne to o bana bolo, o tun ye kɔrɔbɔli ye aw ma, nga o bɛɛ n'a ta, ne nigɛ ma bɔ aw la, aw ma ne dɔgɔya fana. Nga aw ye ne minɛ i n'a fɔ mɛlɛkɛ, walima Yezu Krista yɛrɛ. Aw minw tun nisɔndiyara kosɛbɛ, aw ka nisɔndiya nin tora min? Ne b'a fɔ tinyɛ na ko n'aw tun bɛ se k'aw nyaa wɔgɔbi k'o di ne ma, aw tun bɛna o kɛ. Sisan ne kɛra aw jugu ye bari ne bɛ tinyɛ fɔra aw ye wa? Mɔgɔ nunu jijanin bɛ aw kɔsɔn cogo min na, u ka miiri ma nyi, u b'a fɛ k'aw faran ka bɔ ne la, waasa u ka se k'u yɛrɛ diya bɔ. N'aw bɛ jija konyuman kɛli kama tuma bɛɛ, o ka nyi. A kana kɛ ne nyanako dama ye. Ne deenw halibele, ne bɛ tɔɔrɔ munyuna aw kɔsɔn, tɔɔrɔ min ni muso jigibagatɔ ta ye kelen ye, janko Krista ka koo ka sigiyɔrɔ sɔrɔ aw kɔnɔ. A tun ka di ne ye ka sɔrɔ aw cɛma sisan yɛrɛ, ka se ka ne ka kuma fɔcogo yɛlɛma, bari ne hakili nyagaminin lo aw kɔsɔn. Aw minw b'a fɛ ka to sariya kɔrɔ tugu, aw ka ne jaabi. Min fɔra Ala ka kuma na, aw m'o mɛn wa? A fɔra Ala ka kuma na ko Ibrayima tun ye deen fila sɔrɔ, kelen sɔrɔla jɔnmuso fɛ, kelen fana sɔrɔla hɔrɔnmuso fɛ. Deen min sɔrɔla jɔnmuso fɛ, ale tun sɔrɔla ka kɛnyɛ ni farisogo sago ye, nga deen min sɔrɔla hɔrɔnmuso fɛ, ale tun ye layidu dafa deen ye. O koo nin kɔrɔ ka bon, bari muso nunu kɛra layidu fila dafananw ye. Layidu min sɔrɔla Sinayi kulu kan, ale bɛ mɔgɔ kɛ jɔɔn ye. O ye Agari ye. Agari ye Sinayi kulu ye min bɛ Arabi jamana na. Agari fana bɛ i n'a fɔ Zeruzalɛmu min bɛ yen bii, bari ale n'a deenw ye jɔɔnw ye. Nga Zeruzalɛmu min bɛ sankolo la, ale ye hɔrɔn ye, ale le y'an bamuso ye. Bari a fɔra Ala ka kuma na ko: “E muso min ye wolobali ye, e ka nisɔndiya. E le min ma deen wolo tɔɔrɔ lɔn, e ka nisɔndiya kosɛbɛ, bari muso min tun tɛ wolo, ale ka denmisɛnw bɛna caya ka tɛmɛ baaramuso deenw kan.” N balimaw, aw kɔni aw ye layidu deenw ye i n'a fɔ Isiyaka. Deen min sɔrɔla ka kɛnyɛ ni farisogo sago ye, ale tun bɛ Nii Senuman deen tɔɔrɔ cogo min na, a b'o cogo kelen na sisan fana. Nga Ala ka kuma ye mun le fɔ? A ko: “I ka jɔnmuso n'a deen gwɛn, bari jɔnmuso deen man kan ka jɛn cɛɛn kan ni hɔrɔnmuso ka deen ye.” O cogo la ne balimaw, an tɛ jɔnmuso ka deenw ye, nga hɔrɔnmuso ka deenw. Krista y'an hɔrɔnya janko an ka kɛ hɔrɔnw ye sɛbɛ la, o la, aw ye jija, aw kana tila ka don jɔnya la tugu. Ayiwa, ne Pɔli yɛrɛ b'a fɔ aw ye ko n'aw ye aw yɛrɛ kɛnɛkɛnɛ, Krista tɛna foyi nya aw ye tugu. Ne bɛ tila k'a fɔ tugu ko ni mɔgɔ o mɔgɔ min y'a yɛrɛ kɛnɛkɛnɛ, a kɛra wajibi ye o tigi ma ka sariya bɛɛ labato. Aw minw b'a fɛ ka tilenninya sɔrɔ Ala nyakɔrɔ sariya barika la, aw faranna ka bɔ Krista la. Ala ka nɛɛma t'aw kan tugu. An kɔni jigi b'a la ko Nii Senuman barika la, Ala bɛna an jati mɔgɔtilenninw ye, an b'o le kɔnɔna. N'an lanin bɛ Yezu Krista la, i kɛnɛkɛnɛna wo, walima i ma kɛnɛkɛnɛ wo, o si tɛ foyi ye. Min ye koo kuun ye, o ye jigi ye, min b'a to n'an bɛ baara kɛ kanuya kɔsɔn. Aw ka koo tun nyana. Jon le ye aw bɔ tinyɛsira kan? U ye fɛɛn min kɛ k'aw bali n'a ye, o ma bɔ aw welebaga Ala fɛ. Kofitini le bɛ koba wili. Ne kɔni, ne jigi bɛ Matigi kan aw koo la ko cogo o cogo, aw tɛna miiriya wɛrɛ ta, nga mɔgɔ min b'aw nyagami, a kɛra mɔgɔ o mɔgɔ, o tigi bɛn'a ta ye. N balimaw, n'a tun kɛra ko ne bɛ kɛnɛkɛnɛko le waajuli kɛra halibi, k'a fɔ ko a kɛra wajibiko ye, mun na u bɛ ne tɔɔrɔ tugu? Krista sayako lɔgɔ kan, ne b'o min waajuli kɛra, o tun tɛna kɛ baasi ye. Mɔgɔ minw b'aw nyagami, olu k'u ta bɛɛ tigɛ! N balimaw, aw welela hɔrɔnyali le kama. O hɔrɔnyali nin kana kɛ sababu ye aw b'aw farikolo sago kɛ. Nga aw ka nyɔgɔn kanu ka nyɔgɔn dɛmɛ. Bari sariya kuma bɛɛ bɛ sɔrɔ kuma kelen nin le kɔnɔ ko: “I k'i mɔgɔnyɔgɔn kanu i n'a fɔ i b'i yɛrɛ kanu cogo min na.” Nga n'aw tora nyɔgɔnnyimi na ni nyɔgɔnmandimini na i n'a fɔ kongosogow, aw k'aw yɛrɛ kɔlɔsi. N'o tɛ, aw bɛna nyɔgɔn ban. Ne b'a fɔ aw ye ko aw k'aw yɛrɛ to Nii Senuman bolo ka mɛnni kɛ a fɛ. O cogo la, aw tɛna farisogo sago kɛ tugu. Bari farisogo koo, ni Nii Senuman koo bɛ nyɔgɔn kɛlɛ. U tɛ bɛn. O kama, n'aw b'a fɛ ka koo min kɛ, aw tɛ se k'o kɛ. Ni Nii Senuman le bɛ baara kɛ i kɔnɔ, e tɛ kɛ sariya bolo tugu. Farisogo sago ye min ye, an b'o lɔn, o ye: Nyamɔgɔya, nɔgɔtɔya, ni kakalaya, josɔnko, ni subagaya, ani juguya, kɛlɛko ni keliya, dimi ni sɔsɔli, ani tilanni, ani ka faran ka kɛ jɛnkulu jɛnkulu, wasabaliya, dɔrɔtɔya, ni nugubatɔya, ani o nyɔgɔnna koow. Ne bɛ kɔn k'o fɔ aw ye, i n'a fɔ n delila k'a fɔ aw ye cogo min na ko mɔgɔ minw b'o koow kɛ, k'olu tɛna don arijana na fewu. Nga Nii Senuman bɛ fɛɛn minw di, o ye nin ye: Kanuya, nisɔndiya, hɛrɛ, munyuli, nyumanya, hinɛ, tilenninya, sabali, ni yɛrɛminɛ. Sariya t'o koo nunu kɛlɛ. Mɔgɔ minw sɔnna Krista ma, olu ye farisogo n'a ka sago bɛɛ ye k'o to yen. Ni Nii Senuman le b'an fɛ, an ka taama ka kɛnyɛ ni Nii Senuman sago ye kɛ. An kana kɛ tɔgɔnyinilaw ye gwansan, ka to k'an tɔnyɔgɔnw darabɔ. An nyaa kana bɔ an tɔnyɔgɔnw ka fɛɛnw na. N balimaw, ni mɔgɔ minɛna kojugu dɔ kɛyɔrɔ la, Nii Senuman bɛ aw minw fɛ, aw k'o tigi dɛmɛ ni dusunyuman ye a ka kɔsegi siranyuman kan tugu. Nga aw kelen kelen bɛɛ k'aw yɛrɛ kɔlɔsi, janko a nyɔgɔn kana aw sɔrɔ. Aw ka nyɔgɔn dɛmɛ ka nyɔgɔn ka doni ta. O cogo la, aw bɛna Krista ka sariya labato. Bari ni mɔgɔ dɔ bɛ miiri ko ale ka fisa, k'a sɔrɔ a tɛ foyi nya, a b'a yɛrɛ nigɛra le. Mɔgɔ kelen kelen bɛɛ k'a yɛrɛ ka koo sɛgɛsɛgɛ, n'i ye koo dɔ ye n'i bɛ se k'i yɛrɛ bonya o koo la, i k'i yɛrɛ bonya, o ka kɛ i yɛrɛ koo la, mɔgɔ si kan'a ta kɛnyɛ n'a tɔnyɔgɔn ta ye ka sɔrɔ k'a yɛrɛ bonya. Bari mɔgɔ kelen kelen bɛɛ bɛna lɔ n'a ka kunko ye. Ni mɔgɔ dɔ b'i kalan Ala ka koo la, o tigi ka kan k'a niyɔrɔ sɔrɔ i bololafɛnw na. Aw kana aw yɛrɛ nigɛ. Mɔgɔ tɛ se ka yɛlɛ Ala ma. Mɔgɔ o mɔgɔ mana fɛɛn min dan, a bɛna o le tigɛ. Mɔgɔ min y'a ka koo bɛɛ kɛ farisogo koo ye, o tigi bɛna halaki. Nga min ta kɛra Nii Senuman ka koo ye, o tigi bɛna hɛrɛ banbali sɔrɔ. An kana sɛgɛn konyuman kɛli la, bari n'an ma dɛsɛ k'o dabila, an bɛn'a tɔnɔ sɔrɔ n'a waati sera tuma min na. O cogo la, ni konyuman kɛ see b'an ye tuma min na, an k'o kɛ mɔgɔ bɛɛ ye sankofɛrɛ Krista kɔmɔgɔw. Aw k'a filɛ yan yɔrɔ sɛbɛnɔ ka bonbon cogo min na, ne yɛrɛ bolo le y'o sɛbɛn. Yɛrɛyirabagaw le b'a fɛ aw ka kɛnɛkɛnɛ wajibi. U ka koo bɛɛ kuun ye nin ye: waasa u kana tɔɔrɔ sɔrɔ Krista kɔsɔn. Bari minw kɛnɛkɛnɛna, olu yɛrɛ tɛ sariya labato. Nga u b'a fɛ aw ka kɛnɛkɛnɛ janko u ka tɔgɔ sɔrɔ aw kɔsɔn. Ne yɛrɛ ta faan fɛ kɔni, ne bɛ ne yɛrɛ bonya an Matigi Yezu Krista ka saya koo le la lɔgɔ kan. Ne kɔni fɛ, Krista ka saya barika la, dinyɛ tɛ foyi ye ne fɛ, ani ne fana tɛ foyi ye dinyɛ fɛ. Kɛnɛkɛnɛko, walima kɛnɛkɛnɛbaliya, o si tɛ foyi ye. Min ye fɛɛn ye, o ye i ka kɛ danfɛnkura ye. Mɔgɔ minw bɛɛ b'o koo nin sira taama, Ala ka makari ni hɛrɛ kɛ olu ye, ani a ka mɔgɔw bɛɛ ye. Ayiwa, mɔgɔ si kana ne tɔɔrɔ tugu, bari jolinɔ minw bɛ ne fari la, olu b'a yira ko ne ye Yezu ka baarakɛla ye. N balimaw, an Matigi Yezu Krista ka nɛɛma kɛ aw ye. Amiina. Ne Pɔli min kɛra Yezu Krista ka ciden ye ka kɛnyɛ ni Ala sago ye, ne bɛ bataki nin ci Ala ka jama ma, min bɛ Efɛzi dugu kɔnɔ, aw minw kɛra mɔgɔsɛbɛw ye Yezu Krista ka jɛnnyɔgɔnya barika la. An Faa Ala, ni an Matigi Yezu Krista ka nɛɛma ni hɛrɛ kɛ aw ye. An ka barika la Ala ye, ale min ye an Matigi Yezu Krista Faa ye. A y'an dɛmɛ k'a ka yɔrɔ nyumanya bɛɛ kɛ an ye Krista barika la. Bari, ale Krista le barika la Ala y'an woloma kabini dinyɛ ma dan fɔlɔ, waasa an ka kɛ mɔgɔnyumanw ye a nyakɔrɔ, jalakiyɔrɔ tɛ minw na kanuya barika la. Ala tun kɔnna k'a latigɛ k'an kɛ a ka deenw ye Yezu Krista barika la, ka kɛnyɛ n'a yɛrɛ diyanako ye. An ka Ala tando a ka nɛɛma kɔsɔn a y'o min kɛ an ye, a Deen kanunin barika la. Ale Krista ka saya barika la an kunmabɔra, an ka kojugu yafara ka kɛnyɛ ni Ala ka makari dafanin ye. Ala y'o kɛ an ye fɔɔ ka nya ka lɔnniyadafanin ani hakilitigiya d'an ma. A tun y'o koo dogonin latigɛ kabini fɔlɔfɔlɔ, sisan a y'o yira an na. A tun y'o konyuman nin latigɛ ka kɛ Krista barika la. A y'a latigɛ n'o koo kɛwaati sera tuma min na, a ka fɛɛn bɛɛ lajɛn minw bɛ sankolo la ani minw bɛ dugukolo kan, Krista ka kɛ u bɛɛ kuntigi ye. Ale Krista barika la, anw ye niyɔrɔ sɔrɔ a fɛ. Ala y'o latigɛ kabini fɔlɔfɔlɔ la. Ale bɛ koo bɛɛ kɛ ka kɛnyɛ n'a yɛrɛ sago ye. A y'an woloma, an minw kɔnna k'an jigi la Krista kan, waasa an k'a tando. Aw ye tinyɛkuma nin mɛn tuma min na, o min ye kibaru diman ye, aw fana lar'a la ka kisi o barika la, ka Nii Senuman sɔrɔ, o min ye taamasinyɛ ye an kan, Ala tun y'o min layidu ta. Ale le b'a yira an na ko an bɛna niyɔrɔ sɔrɔ Ala fɛ n'an kunmabɔra pewu pewu loon min na, janko Ala ka tando! O le y'a to, kabini ne y'a mɛn ko aw jigi lanin bɛ Matigi Yezu kan ani ko aw bɛ Ala ka mɔgɔw bɛɛ kanu, ne ka Ala daliwaatiw la, ne bɛ to k'a dali aw ye ka barika la a ye tuma bɛɛ aw kɔsɔn. An Matigi Yezu Krista ka Ala, min ye Nɔɔrɔtigi ye, n b'ale dali a ka Nii Senuman di aw ma, o min bɛna lɔnniya di aw ma, k'a ka koo gwɛ aw ye aw ka se k'o lɔn kosɛbɛ, ani k'aw hakili yɛlɛ, aw welela fɛɛn min kama, aw ka se k'o faamu. A ye fɛnnyuman min labɛn a ka mɔgɔw ye, aw k'o nafa lɔn, k'a ka sebagaya kabakoman fana lɔn an faan fɛ, an minw jigi b'a kan. O sebagaya kelen nin barika la a ye Krista kunun, ani ka sigiyɔrɔ d'a ma arijana na a kinibolo la. A siginin bɛ fangatigi yebaliw ni kuntigiw ani setigiw ni masaw bɛɛ kunna, ani fɛɛn wɛrɛw minw tɔgɔ bɛ se ka wele bii ani sini, a b'u bɛɛ kunna. Ala y'a sigi fɛɛn bɛɛ kunna, ani a ka jama kunna, o min ye ale Krista farisogo ye, Krista yɛrɛ dafanin bɛ sɔrɔ o min na, ani fɛɛn bɛɛ y'a ta ye. Aw minw tun bɛ i n'a fɔ suuw Ala fɛ aw ka murutili n'aw ka kojuguw kɔsɔn, aw tun b'o minw kɛ fɔlɔfɔlɔ, ka kɛnyɛ ni adamaden cogo, ani jinaw kuntigi min bɛ sanfɛ ta ye fana, o min bɛ baara kɛ ni mɔgɔmurutininw ye halibi. An fana, an bɛɛ tun kɛra i n'a fɔ olu, an tun b'an ta farisogo nigɛlakow fɛ, k'a sago kɛ, ani k'an yɛrɛ ka miiriya kɛ. Ka kɛnyɛ n'an cogo ye, Ala tun bɛ dimi an kɔrɔ i n'a fɔ tɔw fana. Nga Ala ka nyumanya tɛ ban, an koo diyara a ye kosɛbɛ. O la, an minw tun bɛ i n'a fɔ suuw Ala fɛ an ka kojuguw kɔsɔn, Ala y'an kunun ni Krista ye. (Aw kisira nɛɛma le barika la.) Ala y'an kunun ni Krista ye, k'an kɛ mɔgɔ nyanamanw ye k'an kɛ kuntigiw ye ni Yezu Krista ye a ka mara la. O cogo la, a tun y'a latigɛ k'a ka nɛɛma dafanin kɛ waati nataw la an faan fɛ, o min nyɔgɔn tɛ, a ka nyumanya kɔsɔn Yezu Krista barika la. Aw lar'a la minkɛ, o le y'a to aw kisira nɛɛma barika la, o tɛ aw yɛrɛ ka seko ye, o ye Ala ka dɛmɛli ye. O ma kɛ aw ka kɛwali sababu la, janko mɔgɔ si kana se k'a yɛrɛ bonya. An ye Ala bolonɔ ye, a y'an dan Yezu Krista barika la kɛwalinyumanw kama, Ala y'o minw latigɛ kabini fɔlɔfɔlɔ janko an k'o kɛ. Aw ma kɛ Zuwifuw ye. Zuwifuw b'aw wele ko kɛnɛkɛnɛbaliw, k'u yɛrɛ wele ko kɛnɛkɛnɛninw, k'a sɔrɔ u ka kɛnɛkɛnɛko kɛra adamaden bolonɔ ye. Aw tun bɛ cogo min na fɔlɔ la, aw k'aw hakili jigi o la. O waati la, aw tun ma Krista lɔn, niyɔrɔ tun tɛ aw fɛ Isirayɛlidenw cɛma. Ala tun y'a daa di bɛɛn min koo la, aw niin tun t'o la. Aw tun bɛ yen ten, jigi layɔrɔ tun t'aw fɛ, aw tun tɛ Ala lɔn fana. Aw yɔrɔ tun ka jan Ala la, nga sisan, aw gwɛrɛla a la Yezu Krista kɔsɔn a joli barika la. Bari ale le y'an ka hɛrɛ ye, ale min ye Zuwifuw ni siya tɔw jɛn k'u kɛ kelen ye, ani nyɔgɔnkɔniya min tun kɛra kogo ye u cɛ, a y'a yɛrɛ di k'o ci. A y'a kɛ sariya n'a ka ladiliw bɔra seen kan. O cogo la, a y'a latigɛ ka Zuwifuw ni siya wɛrɛw jɛn k'u kɛ kelen ye a ka jɛnnyɔgɔnya barika la, ka hɛrɛ don u ni nyɔgɔn cɛ, k'u fila bɛɛ jɛn ka kɛ kelen ye, k'u bɛn ni Ala ye, a ka saya sababu la lɔgɔ kan. O yɔrɔ la, a ye see sɔrɔ nyɔgɔnkɔniya kan k'o ban. A nana hɛrɛkuma fɔ aw yɔrɔjan mɔgɔw, ani yɔrɔsurun mɔgɔw ye. Ale sababu la an kelen kelen bɛɛ bɛ se ka se an Faa Ala fɛ, Nii Senuman kelen barika la. O cogo la, aw tɛ lonanw ye tugu, walima jamana wɛrɛ mɔgɔw, nga aw ye Ala ka mara mɔgɔw le ye, Ala ka somɔgɔw. Kiraw ni cidenw ye soo juu min sigi, ni Yezu Krista le y'o juu nin kabakuru nyanaman ye, aw lɔra o le kan i n'a fɔ boon. Ale Yezu Krista barika la kogo tɔɔ bɛ lɔ ka nya, ani ka kɛ Matigi Ala ka soo ye. Ale sababu la, aw fana ni tɔw sera ka lɔ ka kɛ Ala ka boon ye Nii Senuman barika la. O le y'a to ne Pɔli min bɛ kaso la Yezu Krista kɔsɔn aw siya wɛrɛw kama, Ala ye nɛɛma kɛ ne ye ka baara min kalifa ne ma aw ka hɛrɛ kama, aw y'o koo mɛn. Ala y'a ka koo dogonin yira ne la. N y'o koo fɔ aw ye dɔɔni ka tɛmɛ. N'aw b'o kalan tuma min na, aw bɛn'a ye ko ne bɛ Krista ka koo dogonin nin lɔn. O koo dogonin ma se ka yira adamaden si la waatitɛmɛninw na, i n'a fɔ a yirala Ala ka cidenw, n'a ka kiraw la cogo min na sisan Nii Senuman barika la. O kɔrɔ ko siya wɛrɛw ye Isirayɛlidenw ka niyɔrɔ nyɔgɔn sɔrɔ Ala ka koo la, ani layidu koo la, ani ka jɛn ka kɛ kelen ye, kibaru diman kɔsɔn Yezu Krista barika la. Ala ye nɛɛma kɛ ne ye a ka sebagaya barika la, ka ne kɛ kibaru diman nin fɔbaga ye. Ne min ye Ala ka mɔgɔw bɛɛ la kɔmɔgɔ ye. O bɛɛ n'a ta, Ala ye nɛɛma kɛ ne ye waasa ne ka Krista ka nyumanya fɔ siya wɛrɛw ye, daan tɛ nyumanya min na. Ala min ye fɛɛn bɛɛ dan, ale ye koo min dogo kabini waatijan, ne k'o koo kɛcogo fɔ ka gwɛ. O cogo la, sankolo kɔnɔ fangatigiw ni setigiw ka se ka Ala ka hakilitigiya lɔn cogo bɛɛ la, Ala ka jama barika la bii, ka kɛnyɛ n'a ka koo latigɛnin ye kabini fɔlɔfɔlɔ, a y'o min kɛ an Matigi Yezu Krista barika la. N'an lara ale la ka jɛn n'a ye, sira dinin b'an ma ka gwɛrɛ Ala la ni jigi ye. O la, ne b'aw dali ko aw kana aw jigi tigɛ ne ka tɔɔrɔko kɔsɔn, ne b'o minw kɛ aw kama, o le ye aw ka yɛrɛbonya sababu ye. O le kɔsɔn, ne bɛ n kunbiri gwan an Faa Ala nyakɔrɔ, ale min ye sankolo ni dugukolo kan mɔgɔw bɛɛ dan. A ka nyumanya ka bon. O la, ne b'a dali a ka fanga di aw ma k'aw jaa gwɛlɛya a ka Nii Senuman barika la, janko Krista koo ka se ka sigi aw kɔnɔ jigi barika la, kanuyasɛbɛ ka se ka sɔrɔ aw kɔnɔ fɔɔ ka nya. O cogo la, daan tɛ Krista ka kanuya min na, aw ni Ala ka mɔgɔw bɛɛ bɛna se k'o faamu. Krista ka kanuya min tɛmɛna lɔnniya bɛɛ kan, aw bɛna se k'o faamu, ka se ka kɛ i n'a fɔ Ala. An bɛ fɛɛn minw dali, walima ka miiri minw koo la, Ala min bɛ se k'o d'an ma, hali ka tɛmɛ o kan yɛrɛ, a ka sebagaya barika la o min bɛ baara kɛ an kɔnɔ, bonya ka la ale kelen kan, a ka jama cɛma Yezu Krista kɔsɔn, waati bɛɛ la! Amiina! Ne b'aw dali, ne min bɛ kaso la Matigi kɔsɔn, ko aw k'aw taamacogo bɛn n'aw ka welekun ye, k'aw yɛrɛ majigi koo bɛɛ la ka kɛ mɔgɔsabalininw ye, ka munyuli kɛ, ka nyɔgɔn dɛmɛdɛmɛ kanuya la. Bɛɛn min bɛ sɔrɔ Nii Senuman fɛ, aw ka banba ka to o la hɛrɛ kɔsɔn. Farisogo kelen ni Nii kelen le bɛ yen, i n'a fɔ aw welela jigi kelen kama cogo min na. Matigi kelen le bɛ yen, jigi kelen fana le bɛ yen, ani batizeli kelen le bɛ yen. Ala kelen fana le bɛ yen, ale lo ye bɛɛ Faa ye, a bɛ fɛɛn bɛɛ kunna, a bɛ baara kɛ bɛɛ kɔnɔ, ani a bɛ ni bɛɛ ye. Nga a ye nɛɛma kɛ an kelen kelen bɛɛ ye ka kɛnyɛ ni seko ye Krista ye min d'an ma. A fɔra Ala ka kuma na ko: “A yɛlɛla sanfɛ, k'a juguw minɛ k'u kɛ jɔɔnw ye, ani ka bonyafɛn di mɔgɔw ma.” N'a fɔra ko a yɛlɛla, o kɔrɔ ko a tun jigira fɔɔ dugukolo jukɔrɔ. Ale min jigira, ale kelen le yɛlɛla ka taa fɔɔ sankolo daan na, janko a ka koo ka se ka koo bɛɛ dafa. Ale Krista kelen le ye mɔgɔw bonya ka seko d'u ma, dɔw ka kɛ cidenw ye, dɔw ka kɛ kiraw ye, dɔw ka kɛ a ka kibaru diman fɔbagaw ye, dɔw fana ka kɛ Ala ka sagaw kɔlɔsibagaw ni karamɔgɔw ye. A y'o kɛ waasa k'a ka mɔgɔw labɛn u ka se ka baara kɛ, janko u ka barika sɔrɔ. O cogo la, an bɛɛ bɛ se ka jɛn ka kɛ kelen ye an jigi barika la ani Ala Dencɛ lɔnniya barika la, ka kɛ mɔgɔkɔrɔbaw ye, ka kɔgɔ fɔɔ ka kɛ mɔgɔdafaninw ye i n'a fɔ Krista. O la, aw tɛna kɛ i n'a fɔ denmisɛnw tugu, minw tɛ se ka lɔ kelen kan, kalanjugu sifa bɛɛ ni nanbaran bɛ se k'o minw hakili yɛlɛma k'u kunna cɛn, i n'a fɔ kurundennin bɛ cogo min na jii kan. Nga n'an bɛ tinyɛ fɔ kanuya la, an bɛna se ka taa nya fɔɔ ka se ka jɛn ni Krista ye kosɛbɛ, ale min ye Kuntigi ye. Ale barika la farikolo yɔrɔ bɛɛ bɛ nyɔgɔn minɛ ka nya, ka kɛ kelen ye. Bɛɛ n'a ka baara, o cogo la a farisogo bɛɛ lajɛnnin bɛ bonya ka barika sɔrɔ kanuya la. Ne bɛ min fɔ aw ye k'a gwɛlɛya Matigi barika la, o ye nin ye: ko aw kana taama i n'a fɔ Alalɔnbaliw bɛ taama cogo min na u ka miiriya fufafu fɛ. U bɛ dibi la, Ala bɛ hɛrɛ min kɛ, u tɛ o lɔn u ka faamubaliya n'u ka dusugwɛlɛya kɔsɔn. Maloya yɔrɔ ka jan u la, fɔɔ u y'u yɛrɛ bila kakalaya sifa bɛɛ la, u tɛ wasa. Nga aw ma Krista ka koo lɔn o cogo la dɛ. Aw kɔni y'a koo mɛn, aw kalanna o la ka kɛnyɛ n'a ka tinyɛ ye. O la, aw k'aw jogokɔrɔ bila, o min tun ye juguya ni nigɛjuguw ye, olu sababu la, aw tun bɛ fili. Aw ka kan k'aw ka miiriya yɛlɛma, ka jogokura ta, ka kɛ Ala jaa ye, ka kɛ mɔgɔtilenninw ni mɔgɔnyumanw ye, o minw bɛ sɔrɔ Ala ka tinyɛ barika la. O kama, aw ka galontigɛ dabila! Mɔgɔ kelen kelen bɛɛ ka tinyɛ fɔ nyɔgɔn ye, bari an kɛra farisogo kelen ye. N'aw dimina, aw kana kojugu kɛ, aw kana dimi mara fɔɔ ka tilekun don. Aw kana donyɔrɔ di Sutana ma. Mɔgɔ min bɛ sonyali kɛ, o tigi kana sonyali kɛ tugu, nga o tigi ka baara kɛ ka nya, janko a ka se ka sɔrɔli kɛ ka dɔ di dɛsɛbagatɔw ma. Kumajugu kana bɔ aw si daa la, fɔɔ kumanyuman, min bɛ se k'o mɛnbagaw dɛmɛ ani k'u mako nya cogo dɔ la. Aw kana Ala ka Nii Senuman dusu kasi, ale min ye taamasinyɛ ye aw kan k'an ka kisilon kɔnɔ. Aw ka kɔnɔnajuguya dabila, aw kana dimi mara, aw dusu kana bɔ. Aw ka mankan caaman dabila, ka tɔgɔcɛn dabila, ani juguya sifa bɛɛ. Aw ye hinɛ nyɔgɔn na ka konyuman kɛ nyɔgɔnw ye, ka yafa nyɔgɔn ma i n'a fɔ Ala fana yafara aw ma cogo min na Krista barika la. Aw ka banba ka Ala ladege, bari aw y'a deenw ye minw koo ka d'a ye. Aw ka koo bɛɛ kɛ ni kanuya ye, i n'a fɔ Krista, ale min y'an kanu k'a yɛrɛ di ka kɛ saraka ye an kɔsɔn o min diyara Ala ye i n'a fɔ wusulan. Kakalaya, walima mɔgɔkolonya, ani wasabaliya, o koo si kana mɛn aw cɛma, bari Ala ka mɔgɔw man kan k'o kɛ. Malobaliyakuma, ni kumakolon ani kumanɔgɔnin fana ma nyi. Aw ka to ka Ala tando dɔrɔn. Aw k'a faamu kosɛbɛ ko kakalaw ni mɔgɔnɔgɔninw, ni wasabaliw tɛna don Krista ni Ala ka mara kɔnɔ. Wasabaliya ni josɔn bɛɛ ye kelen ye. Aw kana sɔn mɔgɔ si k'aw nyagami n'a ka kuma fufafu ye, bari o nyɔgɔn le b'a to Ala bɛ dimi a ka kuma labatobaliw fɛ. Aw kana jɛn n'u ye fewu. Fɔlɔfɔlɔ, aw kɔnɔ tun finnin lo, sisan aw kɔnɔ gwɛnin lo Matigi barika la. Mɔgɔ minw kɔnɔ gwɛnin lo, aw ka taama i n'a fɔ olu, bari mɔgɔ minw kɔnɔ gwɛnin lo, olu ka kɛwaliw ye nin ye: Nyumanya, tilenninya, ani tinyɛko. Fɛɛn min ka di Matigi ye, aw ka banba k'o lɔn. Aw kana dibidibiko kɛ, tɔnɔ tɛ o la. Aw ka ban o ma k'o koo fɔ ka gwɛ mɔgɔw ye, bari u bɛ koo minw kɛ dogo la, o fɔko yɛrɛ ye maloya ye. Nga ni fɛɛn o fɛɛn bɔra kɛnɛ kan, o koo bɛ faamu. Bari ni koo o koo bɔra kɛnɛ kan ka ban, o bɛ faamu. O le y'a to a fɔra ko: “Wili, e min bɛ sinɔgɔ la, wili ka bɔ suuw cɛma, Krista bɛn'a ka yeelen bɔ i ye.” Aw k'aw yɛrɛ kɔlɔsi kosɛbɛ, aw kana kɛ nalomanw ye, nga hakilitigiw. Waati min b'aw bolo, aw ka banba ka konyuman kɛ, n'o tɛ waati ka gwɛlɛ. O la, aw kana kɛ kolɔnbaliw ye, nga aw ka Matigi sago nyini k'o lɔn. Aw kana kɛ dɔrɔtɔw ye, o bɛ mɔgɔ bila kakalaya la, aw k'aw yɛrɛ bɛɛ di Nii Senuman ma. Aw ka nyɔgɔn dɛmɛ ni Ala tandoli dɔnkiliw ye o minw bɛ Ala ka kuma kɔnɔ, ni dɔnkili wɛrɛw ye, ani Nii Senuman ye minw d'aw ma. Aw ka dɔnkili la, ka barika la Matigi ye n'aw dusukun bɛɛ ye. Aw ka barika la an Faa Ala ye an Matigi Yezu Krista tɔgɔ kɔsɔn, waati bɛɛ ani koo bɛɛ la. Krista nyasiran kɔsɔn, aw k'aw yɛrɛ majigi nyɔgɔn ye. O la, musow, aw k'aw yɛrɛ majigi aw cɛɛw ye, i n'a fɔ aw b'a kɛ Matigi ye cogo min na. Bari cɛɛ le y'a ka muso kuntigi ye, i n'a fɔ Krista ye Ala ka jama kuntigi ye cogo min na, o min y'a farikolo ye, a kɛra o min kisibaga ye. Ala ka jama b'a yɛrɛ majigi Krista ye cogo min na, o cogo kelen na muso ka kan k'a yɛrɛ majigi a cɛɛ ye koo bɛɛ la. Cɛɛw, aw k'aw ka musow kanu, i n'a fɔ Krista ye Ala ka jama kanu cogo min na, fɔɔ k'a nii di a kɔsɔn, waasa k'a saniya batizeli barika la jii kɔnɔ ni kuma ye, a ka jama dafanin ka sɔrɔ a yɛrɛ nyakɔrɔ, nɔɔ si kana ye a kan, ni kurukuruyɔrɔ ani dɛsɛyɔrɔ si kana ye a la. A b'a fɛ a ka jama ka kɛ a nyanaman ye, jalakiyɔrɔ kana sɔrɔ a la. O cogo kelen na, cɛɛw ka kan k'u ka musow kanu i n'a fɔ u yɛrɛ farisogo. Cɛɛ min b'a ka muso kanu, o tigi b'a yɛrɛ le kanu, bari mɔgɔ si t'a yɛrɛ kɔniya fewu, nga a b'a yɛrɛ balo ani k'a yɛrɛ mara ka nya, i n'a fɔ Krista b'a ka jama kɛ cogo min na, bari an ye Krista farikolo dɔ ye. “O le y'a to, cɛɛ bɛn'a faa n'a bamuso to yen ka nɔrɔ a ka muso la, u fila bɛna jɛn ka kɛ kelen ye.” O koo nin kɔrɔ ka bon kosɛbɛ, ne y'o kuma min fɔ, o nyasinnin bɛ Krista n'a ka jama ka koo ma. O kɔ, aw kɔni, aw kelen kelen bɛɛ k'a ka muso kanu i n'a fɔ aw yɛrɛ, musow fana k'u ka cɛɛw bonya. Matigi nyasiran kɔsɔn denmisɛnw, aw k'aw wolobagaw bonya, o le ka nyi. “I k'i faa n'i baa bonya,” (o le ye sariya fɔlɔ ye layidu tara ka la o min kan), “janko i ka se ka hɛrɛ ni sijan sɔrɔ dugukolo kan.” Wolobagaw, aw fana, aw kana fariya aw ka deenw ma fɔɔ u bɛ muruti, nga aw k'u kolo k'u ladi, ani k'u kalan ka kɛnyɛ ni Matigi sago ye. Jɔɔnw, aw k'aw ka kuntigiw bonya kosɛbɛ ni kɔnɔgwɛ ye, ka siran u nya i n'a fɔ aw b'a kɛ Krista ye cogo min na. Aw kana o kɛ u nyana dɔrɔn k'aw koo diya u ye, nga aw k'o kɛ i n'a fɔ Krista ka jɔɔnw, ka Ala sago kɛ sɛbɛ la. Aw ka baara kɛ u ye ni dusukunnyuman ye, i n'a fɔ aw bɛ Matigi ka baara kɛ cogo min na. Aw kan'a kɛ i n'a fɔ aw b'o kɛra mɔgɔ ye, bari aw b'a lɔn ko mɔgɔ kelen kelen bɛɛ bɛna u ka baaranyuman tɔnɔ sɔrɔ Matigi fɛ, jɔɔn fara hɔrɔnw kan. Kuntigiw, aw fana k'o koo nyɔgɔn kɛ u ye. Aw kana fariya u ma, bari aw b'a lɔn k'u ka Kuntigi n'aw fana ta ye kelen ye o min bɛ sankolo la, ani ale tɛ mɔgɔ woloma ka bɔ mɔgɔ la. Ayiwa, aw k'aw jija Matigi ka koo la a ka sebagaya dafanin barika la. Aw ka Ala ka kɛlɛkɛminanw bɛɛ ta waasa aw ka se ka lɔ ka nya ka Sutana ka nanbaranw kunbɛn. Bari an tɛ kɛlɛ kɛ ni adamadenw ye, nga an bɛ kɛlɛ kɛ ni dinyɛjugu kuntigiw ye, ani sanfɛ fangatigiw ye, ni setigiw, ani jinaw ye. O la, aw ka Ala ka kɛlɛkɛminanw bɛɛ ta waasa ni lonjugu sera, aw ka se ka lɔ kelen kan fɔɔ ka se a laban ma. Aw ye jija ka tinyɛ kɛ aw ka cɛsirilan ye ani tilenninya ka kɛ aw ka kɛlɛkɛduloki ye. Aw ye jija ka kibaru diman fɔ, o min ye hɛrɛkuma ye, o ka kɛ i n'a fɔ aw ka sennasanbara. Jigi min b'aw fɛ, aw k'o kɛ i n'a fɔ kɛlɛden ka nigɛkunbɛnnan, ka se ka Sutana ka binyɛ tasumaman bɛɛ faga n'o ye. Aw k'aw ka kisili kɛ i n'a fɔ nigɛfugulan, k'ale biri, ani ka Nii Senuman ka murujan ta o min ye Ala ka kuma ye. Aw ka Ala dali kosɛbɛ tuma bɛɛ Nii Senuman barika la ni dalili sifa bɛɛ ye. Aw ye jija o la kosɛbɛ ka dalili kɛ Ala ka mɔgɔw bɛɛ ye. Aw ka Ala dali ne fana ye, waasa ni ne b'a fɛ ka kibaru diman fɔ tuma min na, ne ka se ka jagwɛlɛya sɔrɔ k'a fɔ ka gwɛ, o min kɔsɔn ne kɛra Krista ka lasigiden ye ni n bɛ kaso la. Aw ka Ala dali ne ye, waasa ne ka se k'a ka koo fɔ ni jagwɛlɛya ye i n'a fɔ ne ka kan k'a fɔ cogo min na. An balimacɛ Tisiki, ale min koo ka di ne ye kosɛbɛ, ani a kɛra Matigi ka baarakɛlasɛbɛ ye, ale bɛna ne ka koo kibaru bɛɛ fɔ aw ye, janko aw fana k'o faamu. O le kɔsɔn, ne b'a ci aw fɛ, janko a k'an ka kibaruya fɔ aw ye, ani k'aw jigi tugu. An Faa Ala n'an Matigi Yezu Krista ka hɛrɛ, ni kanuya ani jigi di an balimaw ma. An Matigi Yezu Krista koo ka di mɔgɔ minw ye, n'u b'a kanu sɛbɛ sɛbɛ la, Ala ka nɛɛma kɛ olu bɛɛ ye. Ne Pɔli ani Timote, Yezu Krista ka jɔɔnw, an bɛ nin sɛbɛ ci aw ma, aw minw kɛra Ala ka mɔgɔw ye Filipi dugu kɔnɔ Yezu Krista barika la, an b'a ci aw ka nyamɔgɔw n'u dɛmɛbagaw ma fana. An Faa Ala, n'an Matigi Yezu Krista ka nɛɛma ni hɛrɛ kɛ aw ye. Tuma o tuma ni ne hakili jigira aw koo la, ne bɛ barika la n ka Ala ye. Ni ne bɛ Ala dali aw ye tuma min na, ne b'o kɛ ni nisɔndiya ye tuma bɛɛ, bari kabini ne y'a daminɛ ka kibaru diman fɔ aw fɛ, fɔɔ ka na se bii ma, aw bɛ ne dɛmɛna k'aw niyɔrɔ ta o baara la. Ne lanin b'a la ko Ala min ye baaranyuman nin daminɛ aw dusu la, ko ale bɛna taa nya k'aw dɛmɛ o la fɔɔ ka taa se Yezu Krista kɔsegilon ma. Tinyɛ bɛ ne fɛ ka miiri aw koo la tuma bɛɛ, bari aw koo bɛ ne dusu la. Ka ne to kaso la, walima ne tun bɛ kibaru diman fɔra ka gwɛ mɔgɔw ye tuma min na, janko u k'u jigi l'a kan kosɛbɛ, Ala ye bonya min la ne kan, aw y'aw niyɔrɔ ta o baara la. Ala yɛrɛ b'a lɔn ko aw bɛɛ koo ka di ne ye i n'a fɔ aw koo ka di Yezu Krista ye cogo min na. Ne bɛ Ala dali aw ye ko a ka dɔ fara aw ka nyɔgɔn kanuya kan tuma bɛɛ, o ka kɛ lɔnniya ni hakilitigiya la, waasa aw ka se ka konyuman lɔn, ka kɛ mɔgɔnyuman jalakibaliw ye Krista kɔsegilon na, ani janko aw ka kɛwalinyuman kɛ sɛbɛ la, o min see bɛ sɔrɔ Krista barika la, waasa bonya ni tandoli ka kɛ Ala ye. Ne balimaw, ne b'a fɛ aw ka min faamu, o filɛ nin ye: Koo minw ye ne sɔrɔ, o kɛra sababu ye kibaru diman taara nya. O cogo la, sɔlidasi minw bɛ masacɛ ka luu kɔnɔ, ani mɔgɔ tɔw bɛɛ, olu bɛɛ y'a lɔn ko ne bɛ kaso la Krista ka baara kɔsɔn. Ne minɛko kɛra sababu ye an balimaw caaman ye jagwɛlɛya sɔrɔ Matigi barika la. Olu bɛ taara nya ka Ala ka kuma fɔ ni siranya t'o la. Tinyɛ na, mɔgɔ dɔw bɛ Krista ka kibaru fɔ ni keliya ani kɔnɔnajuguya ye, nga dɔw kɔni b'a fɔra ni kɔnɔgwɛ ye. Olu b'o kɛ ni kanuya ye, bari u y'a lɔn ko ne bɛ yan kibaru diman le kɔsɔn k'a gwɛya mɔgɔw ye. Nga minw kɔnɔ gwɛnin tɛ, n'u bɛ Krista ka kibaru fɔra ni kɔnɔnajuguya ye, olu b'a fɛ ka dɔ fara ne ka sɛgɛn kan kaso la. Hali n'u b'a kɛra ni kɔnɔnajuguya ye, walima ni kɔnɔgwɛ ye wo, o si tɛ baasi ye. Ne kɔni bɛ nisɔndiya bari Krista ka kibaru diman bɛ fɔra cogo bɛɛ la, o la, ne bɛna taa nya ni n ka nisɔndiya ye. Bari ne lanin b'a la ko aw ka Ala dali, ni Yezu Krista ka nii barika la, o koo bɛɛ laban na, Ala bɛna ne kunmabɔ. Ne jigi bɛ min kan kosɛbɛ, ni n b'a makɔnɔna sɛbɛ sɛbɛ la, ale kama ne tɛna maloya fɔɔ ne bɛ jagwɛlɛya sɔrɔ le. K'a ta sisan ma ani tuma bɛɛ, ne bɛ nii na wo, ne sara wo, ne b'a fɛ ka bonya la Krista tɔgɔ kan, bari ni ne bɛ nii na, ne bɛ nii na Krista ka baara kɔsɔn, nga ni ne sara, o fana bɛ kɛ ne ma hɛrɛ ye. Nga ka ne to nii na, ni ne bɛna se ka baaranyuman kɛ tugu, o la ne kɔni m'a lɔn ne bɛna min ta. Ne ka miiriya bɛ a faan fila bɛɛ la, nga min ka fisa kosɛbɛ ne fɛ, o ye ne ka bɔ nin dinyɛ na ka taa to Krista fɛ. Nga ni ne tora nii na, o le ka fisa aw ma kosɛbɛ, o la, ne lanin b'a la ko ne bɛna to nii na aw gɛrɛfɛ, k'aw bɛɛ dɛmɛ ka taa nya ani ka nisɔndiya sɔrɔ aw ka lanaya la Yezu la. Ni ne kɔsegira aw fɛ tuma min na, aw bɛna se k'aw yɛrɛ bonya Krista barika la ne kɔsɔn. Min ka gwɛlɛ, o ye nin ye: Aw ka taamacogo ka kan ka bɛn Krista ka koo ma, waasa hali ni ne nana aw fɛ, walima ne ma se ka na wo, ne k'a mɛn ko aw jijanin lo, ka bɛn ka baara kɛ ni miiriya kelen ye ani dusukun kelen ye kibaru diman kɔsɔn aw y'aw jigi la o min kan. Aw kana sɔn aw juguw ka siranya bila aw la, cogo si la. Ni aw jaa ma tigɛ fewu, u bɛn'a lɔn ko olu ta ye halaki ye, ani ko aw ta ye kisili ye o min bɔra Ala fɛ. Aw minw kɛra Krista ta ye, Ala ye nɛɛma min kɛ aw ye, o ye nin ye. A y'a kɛ aw y'aw jigi la a kan, o dama tɛ, aw bɛ sɛgɛn sɔrɔ a kɔsɔn fana. O sɛgɛn min b'aw kan, aw ye ne ye o le la, aw b'a lɔn ko halibi, n b'o la fana. Ni jigitugu bɛ sɔrɔ Krista fɛ, ni jagwɛlɛya bɛ sɔrɔ a ka kanuya la, ni jɛnnyɔgɔnya bɛ aw ni Nii Senuman cɛ, ni nyumanya ni hinɛ bɛ sɔrɔ a la, aw k'aw ka miiriya kɛ kelen ye kanuya la, ani k'aw kɔnɔ kɛ kelen ye ka bɛn koo bɛɛ la, o la, ne ka nisɔndiya bɛ taa nya kosɛbɛ. Aw kana foyi kɛ ni kɔnɔnajuguya ye, ani yɛrɛbonya ye, nga aw k'aw yɛrɛ majigi k'aw tɔnyɔgɔn filɛ ko a ka fisa n'aw ye. Aw la, mɔgɔ si kana miiri a yɛrɛ koo la dɔrɔn, aw ka miiri aw tɔnyɔgɔn na fana. Sɔɔn min tun bɛ Yezu Krista la, o nyɔgɔn ka sɔrɔ aw fana na. Ale min ni Ala ye kelen ye, a ma sɔn k'o jati. Nga a sɔnna k'o bɛɛ to yen, ka na jɔɔn cogo ta, ka kɛ i n'a fɔ mɔgɔ, mɔgɔw y'a jati adamaden dama ye. A sɔnna k'a yɛrɛ majigi ka Ala sago kɛ fɔɔ ka taa se saya ma lɔgɔ yɛrɛ kan. O le y'a to, Ala ye bonya la a kan kosɛbɛ, tɔgɔ min ka fisa ni tɔgɔ bɛɛ ye, a y'o d'a ma, waasa fɛɛn minw bɛ sankolo kɔnɔ, ni dugukolo kan ani dugukolo jukɔrɔ, olu bɛɛ k'u kunbiri gwan ka Yezu bonya, ani bɛɛ k'a fɔ ko Yezu ye Matigi ye, ka bonya la an Faa Ala tɔgɔ kan ten. Ne ka teriw, aw tun bɛ ne ka kuma labato ka ne to aw fɛ, halibi aw ka taa nya ka dɔ fara o kan, aw ka jija ka baara kɛ aw ka kisili kɔsɔn ni Ala nyasiran ye kosɛbɛ. Bari Ala ye konyuman min latigɛ, a bɛ aw dɛmɛna tuma bɛɛ k'o kɛli nigɛ don aw la k'a kɛ sebagaya di aw ma. Aw ka koo bɛɛ kɛ,; nunu;nunu ni sɔsɔli kana sɔrɔ a si la, waasa aw ka kɛ mɔgɔ jalakibaliw ye, ni mɔgɔnyumanw, ani Ala deenw ye, juguya tɛ minw kɔnɔ fewu dinyɛ mɔgɔw cɛma, olu minw ka jugu ani u tilennin tɛ. Aw ka kɛ yeelen ye u cɛma i n'a fɔ lolow. U bɛ se ka kisi kuma min barika la, aw k'o fɔ u ye. N'o kɛra, o bɛna kɛ ne fɛ kunkɔrɔta ye Krista nalon na, o la, ne ye baara min kɛ ani ka sɛgɛn minw munyu, o tɛna kɛ fu ye. Aw ka baara kɛ Ala nyakɔrɔ, o min kɛra aw ka saraka ye aw y'o min bɔ aw ka jigi kɔsɔn. Hali ni ne joli ka kan ka fara o kan, o kɔrɔ ko hali ni ne sara ka fara o kan, ne bɛ nisɔndiya kosɛbɛ ni aw ye. O cogo la, aw fana ka nisɔndiya kosɛbɛ ni ne ye. N'a kɛra an Matigi Yezu sago ye, ne jigi b'a la ko ne bɛna Timote ci aw fɛ, waasa n'a kɔsegira ka na tuma min na, ne ka se ka nisɔndiya aw ka kibaruya kɔsɔn. Ale kelen le bɛ hami aw koo la i n'a fɔ ne. Mɔgɔ tɔ nunu, olu bɛɛ bɛ miiri u yɛrɛ ka koo la dama, u tɛ miiri Yezu Krista ka koo la. A y'a ka mɔgɔsɛbɛya yira cogo min na, aw b'o lɔn, a y'a yɛrɛ di ka baara kɛ ni ne ye, kibaru diman ka nyataga koo la, i n'a fɔ deen bɛ baara kɛ n'a faa ye cogo min na. Ni ne nana nyaa ye ne ka koo la tuma min na, ne jigi b'a la k'ale ci aw fɛ, ne jigi bɛ Matigi kan ko yan ni dɔɔni ne yɛrɛ fana bɛna na aw fɛ yen. Ne y'a miiri ko a ka fisa ne ka n balimacɛ Epaforaditi ci aw fɛ, ale min kɛra ne tɔnyɔgɔn ye baara nin na ani bondori nin na. Aw tun y'a ci ka na ne dɛmɛ, o min kɛra konyuman ye ne ma. A b'a fɛ ka aw bɛɛ ye teliya la, bari a hakili nyagaminin lo ko aw y'a ka bana koo mɛn. Tinyɛ na, a tun banana kosɛbɛ fɔɔ a tun bɛ nyini ka sa, nga Ala makarila a la. A ma kɛ ko a makarila ale kelen dɔrɔn na dɛ, a makarila ne la fana, waasa dɔ kana fara ne ka dusukasi kan. Ne kɔrɔtɔnin le b'a ci, waasa n'aw segira k'a ye, aw ka nisɔndiya, ani dɔ ka bɔ ne ka dusukasi la. Aw k'a minɛ ni nisɔndiya ye balimaya la Matigi kɔsɔn, a daganin lo aw ka o mɔgɔ sugu nin nyɔgɔn minɛ ka nya, bari a tun bɛ nyini ka sa Krista ka baara kɔsɔn, a m'a yɛrɛ nii jati fɛɛn ye, aw tun tɛ se ka dɛmɛ min nyɔgɔn kɛ ne ye, a ye o le kɛ ne ye. Ayiwa n balimaw, sisan kɔni aw ka nisɔndiya Matigi koo la. Ne ye koo minw fɔ aw ye, a man gwɛlɛ ne ma ka kɔsegi olu kan. O bɛ aw fana dɛmɛ kosɛbɛ. Aw k'aw yɛrɛ kɔlɔsi wulu nunu na, baarakolonkɛlaw, minw ka kɛnɛkɛnɛko ma kɛ sɛbɛ koo ye. Bari mɔgɔ minw ka kɛnɛkɛnɛli kɛra kosɛbɛ ye, o ye anw le ye, an minw bɛ Ala bato Nii Senuman barika la, k'an ka bonya sɔrɔ Yezu Krista barika la, an minw tɛ an jigi la farisogo kan. Ni mɔgɔ dɔ bɛ miiri ko ale bɛ se k'a jigi la a yɛrɛ kan, ne fana bɛ se k'a fɔ ko ne bɛ se k'o kɛ ka tɛmɛ o tigi kan, bari cogoya bɛɛ la, ne bɛ se ka n jigi la n yɛrɛ kan. Ne wolola, a tile seeginan loon, n kɛnɛkɛnɛna. Ne kɛra Isirayɛliden ye ka bɔ Bɛnzamɛn kɔmɔgɔw la. Ne kɛra Eburu ye, ne wolobagaw bɛɛ ye Eburuw ye. Ala ka sariya labatoli ta faan fɛ, ne kɛra Farizinyɛ ye. Ne jijanin tun bɛ Ala ka baara la fɔɔ ka kɛ Krista kɔmɔgɔw tɔɔrɔbaga ye. Ka taa tilenninya ta faan fɛ, ne ye sariya labato fɔɔ jalakiyɔrɔ tun tɛ ne la. O fɛɛn nunu bɛɛ tun kɛra tɔnɔ ye ne fɛ, nga sisan ne bɛ olu filɛ fɛɛn fu ye Krista kɔsɔn. Tinyɛ na, ne sera ka n Matigi Yezu Krista lɔn minkɛ, n'o ye koba ye, o le kama, ne b'o koo bɛɛ filɛ fu ye. Ale le kɔsɔn ne sɔnna ka fɛɛn bɛɛ ye k'o to yen. Ani ne bɛ fɛɛn bɛɛ filɛ i n'a fɔ nyamanyama, waasa ne ka kɛ Krista ta ye, ka jɛn n'a ye. A ma kɛ ko ne tilennin bɛ Ala nyakɔrɔ sariya labatoli kɔsɔn. Nga ne tilennin bɛ a nyakɔrɔ bari ne ye n jigi la Krista kan. O tilenninya nin bɛ sɔrɔ jigi barika la Ala fɛ. Ne bɛ min nyini, o ye nin ye: Ka Krista lɔn, ani k'a ka kununni sebagaya lɔn fana, ka tɔɔrɔ i n'a fɔ ale tɔɔrɔla cogo min na, ani a y'a nii di cogo min na, ne fana ka n nii di ten ka sa, waasa ne fana ka se ka kunun. A ma kɛ ko ne sera koo bɛɛ daan na ka sara sɔrɔ, ka kɛ mɔgɔ dafanin ye dɛ, nga ne bɛ n jija ka taa nya, waasa ne ka se ka kɛ mɔgɔ dafanin ye, bari o le kama Yezu Krista ye ne wele. N balimaw, ne tɛ miiri ko ne kɛra mɔgɔ dafanin ye ka ban, nga ne bɛ fɛɛn kelen dama le kɛ: Ne tɛmɛna fɛɛn minw kan, ne bɛ ne hakili bɔ olu bɛɛ la, ka jija ka taa nyafɛ. O cogo la ne bɛ boli fɔɔ ka se boli daan na, waasa ne ka sini sara sɔrɔ Ala b'an wele o min kɔsɔn Yezu Krista barika la. An minw kɔgɔra Krista ka sira la, an bɛɛ ka kan ka miiri o cogo le la. N'a kɛra ko aw ka miiriya bɛ cogo wɛrɛ la fɛɛn dɔ koo la, Ala bɛna o gwɛya aw ye. Cogo o cogo, an ye koo minw kɛ fɔɔ ka na se sisan ma, an ka banba ka taa nya n'o koow ye. N balimaw, aw ka kɛ ne ladegebagaw ye, anw ye cogonyuman min yira aw la, aw ka tugu o kɔ i n'a fɔ tɔw. Ne ye nin fɔ ka ban aw ye sinyɛ caaman, ne bɛ kɔsegi k'a fɔ aw ye tugu ni nyaji ye, ko Krista ka saya kuun lɔgɔ kan, mɔgɔ caaman taamacogo ma bɛn o ma. Olu laban bɛna halaki. U kɔnɔbara le kɛra u ka Ala ye. Koo minw bɛ maloya lase u ma, o le kɛra u ka yɛrɛbonyako ye. U bɛ miiri koo minw na, o ye dinyɛ koo dama ye. Nga an kɔni, an ka faso bɛ sankolo la. An kisibaga, Matigi Yezu Krista bɛna bɔ o yɔrɔ la ka na, an bɛ ale min nyanafilɛla. Ale lo bɛna an farikolo dɛsɛnin yɛlɛma, k'a kɛ farisogo ye nɔɔrɔ bɛ min kan i n'a fɔ ale ta nyɔgɔn. A bɛna o kɛ n'a ka sebagaya ye, o min barika la a bɛ see sɔrɔ fɛɛn bɛɛ kan. O le kɔsɔn n balimaw, ne bɛ aw minw kanu, ani ne b'a fɛ ka aw minw ye tugu, ne bɛ nisɔndiya aw minw kɔsɔn, ani aw minw kɛra ne ka jala ye, aw ka jija kosɛbɛ Matigi barika la, ne teriw. Ne bɛ Evɔdi ani Sɛtisi dali sɛbɛ la k'u ka bɛn i n'a fɔ balimamusow, Matigi kɔsɔn. E min kɛra ne baarakɛnyɔgɔnsɛbɛ ye, ne b'i dali ko i ka u dɛmɛ, bari olu ni ne sɛgɛnna nyɔgɔn fɛ kibaru diman baara la. Ani Kilema fana ani ne baarakɛnyɔgɔn tɔw bɛɛ, olu minw tɔgɔ sɛbɛnna Ala fɛ. Aw ka nisɔndiya tuma bɛɛ Matigi kɔsɔn. Halibele ne bɛ kɔsegi k'a fɔ aw ye ko aw ka nisɔndiya. Aw ka kɛ mɔgɔsabalininw ye tuma bɛɛ. Matigi natuma surunyana. Aw hakili kana nyagami koo si la, nga aw ye Ala dali ani ka barika la a ye, k'aw makoyako bɛɛ fɔ a ye. O cogo la, mɔgɔw tɛ Ala ka hɛrɛ min koo faamu, ale bɛna aw tanga hamikojugu ma, Yezu Krista barika la. O bɛɛ kɔ, n balimaw, koo minw kɛra tinyɛko ye, bonya bɛ sɔrɔ min na, ni tilenninya, ni koo gwɛnin, ni koo diman, ani kunkɔrɔtako, ni sɔnnyuman min bɛ na ni tɔgɔnyuman ye, o dama ka kɛ aw ka miiri ye. Aw ye koo minw dege ne ka kuma ni n ka kɛwaliw la, aw ka jija k'olu kɛ. O cogo la, hɛrɛtigi Ala bɛna to aw fɛ. Aw sera k'a yira ne la sisan ko aw bɛ janto ne koo la, o la, ne nisɔn diyara kosɛbɛ Matigi barika la. A ma kɛ ko ne b'o fɔra ko aw tun tɛ janto ne koo la dɛ, aw tun bɛ janto ne koo la, nga seko tun tɛ aw fɛ fɔlɔ. A ma kɛ ko fɛɛn le tɛ ne fɛ, k'o le y'a to ne bɛ kumana ten dɛ. Ka ne to cogo o cogo, ne wasanin lo, bari ne y'o dege. Ne bɛ se ka n yɛrɛ minɛ dɛsɛ waati la, ani nɔgɔya waati la. Koo bɛɛ la ani cogo bɛɛ la, ne wasanin bɛ, dumu ka fa tuma na ani kɔngɔ tuma na. Fɛɛn bɛ n fɛ wo, fɛɛn tɛ n fɛ wo, n wasanin bɛ. Krista min bɛ see di ne ma, ale barika la ne bɛ se ka o koow bɛɛ kɛ. Nga, aw ye konyuman kɛ kosɛbɛ, aw y'aw niyɔrɔ ta ne ka sɛgɛn na ni dɛmɛli ye. Aw Filipikaw b'a lɔn kosɛbɛ ko kibaru diman fɔli daminɛwaati la, aw dama le ye ne dɛmɛ n ka baara kɔsɔn Krista kɔmɔgɔw cɛma n bɔtuma na Maseduwani mara la. Ka ne to Tesaloniki, aw ye ne mako nya, bari aw ye ne dɛmɛ sinyɛ caaman. A ma kɛ ko ne bɛ dɛmɛli le nyinina dɛ, ne b'a fɛ dɔ le ka fara aw ka kɛwalinyuman sara kan. Sisan ne makoyafɛn bɛɛ bɛ ne fɛ yɛrɛ fɔɔ a tɛmɛn'a daan kan. Tuma min na Epaforaditi nana aw ka dɛmɛ di ne ma, o tuma na o cayara ka tɛmɛ yɛrɛ, o min kɛra sarakanyuman ye Ala sɔnna o min na, a diyara a ye fana. Ne ka Ala bɛna aw mako nya, ka kɛnyɛ n'a ka fɛntigiya dafanin ye Yezu Krista barika la. An Faa Ala tɔgɔ ka tando tuma bɛɛ. Amiina. Mɔgɔ minw lara Krista la, aw ka olu kelen kelen bɛɛ fo. An balima minw bɛ ni ne ye yan, olu bɛ aw fo fana. Krista kɔmɔgɔw minw bɛ yan, olu bɛɛ b'aw fo, nga aw fobaga tigitigiw, o ye minw bɛ masacɛ ka soo kɔnɔ. Matigi Yezu Krista k'a ka nɛɛma kɛ aw bɛɛ ye. Ne Pɔli min kɛra Yezu Krista ka ciden ye ka kɛnyɛ ni Ala sago ye, ani an balimacɛ Timote, an bɛ bataki nin ci Ala ka jama ma Kɔlɔsi dugu kɔnɔ, aw minw kɛra balimasɛbɛw ye Krista barika la, an Faa Ala ka nɛɛma ni hɛrɛ kɛ aw ye. An bɛ Ala dali aw ye tuma o tuma, ka barika la a ye ale min ye an Matigi Yezu Krista Faa ye. Bari an y'a mɛn ko aw fana lara Yezu Krista la ani ko aw bɛ Ala ka mɔgɔw kanu. Aw jigi lanin bɛ fɛɛn min kan arijana na, aw ye o jigi nin sɔrɔ kibaru diman barika la, o min ye tinyɛ kuma ye, aw kɔnna k'o le mɛn. O le sera dinyɛ yɔrɔ bɛɛ la, n'a bɛ baara kɛra yen kosɛbɛ, i n'a fɔ a b'a kɛra aw fɛ cogo min na, kabin'a sera aw fɛ, aw sɔnna a ma, o le y'aw dɛmɛ ka Ala ka nyumanya lɔn sɛbɛ sɛbɛ la. An ka baarakɛnyɔgɔn Epafarasi, min koo ka gwɛlɛ an ma, n'ale ye Krista ka baarakɛlanyuman ye anw fɛ aw cɛma, ale le y'aw kalan o koo la. Aw bɛ nyɔgɔn kanu cogo min na Nii Senuman barika la, ale le y'o fɔ an ye. O le y'a to, kabini an ye aw koo mɛn, an bɛ Ala dali aw ye tuma bɛɛ. An b'a dali ko a ka hakilitigiya di aw ma Nii Senuman barika la, janko aw ka se k'a sago lɔn kosɛbɛ. O la, aw ka taamacogo ka se ka bɛn ni Matigi sago ye, ani aw koo ka diya a ye tuma bɛɛ, aw ka se ka baaranyuman sifa bɛɛ kɛ, ani ka Ala lɔn kosɛbɛ kosɛbɛ. An b'a dali ko a ka fanga d'aw ma kosɛbɛ a ka sebagayaba barika la, o cogo la aw bɛna se k'aw jija ka koo bɛɛ munyu ni nisɔndiya ye. Aw ka barika la an Faa ye ale min y'a kɛ aw bɛ se ka niyɔrɔ sɔrɔ, o min labɛnnin bɛ Ala ka mɔgɔw ye a fɛ. A y'an tila ka bɔ dibi ka fanga bolo, ani k'an don a Deen ka mara la, deen min koo ka di a ye kosɛbɛ. O deen min barika la, an ka kojugu yafara, an kisira. Ale le ye Ala jaa ye, an tɛ se ka Ala min ye. Ale fana le kɔnna danfɛn bɛɛ nya, ani a ka bon n'u bɛɛ ye. Bari fɛɛn bɛɛ danna ale le barika la. Sankololafɛnw wo, dugukolo kan fɛɛnw wo, danfɛn minw bɛ se ka ye wo, minw tɛ se ka ye wo, a masaya fara a kuntigiw kan, ani a fangatigi fara a setigiw kan, o bɛɛ lajɛnnin danna ale le barika la, ani u danna ale le kɔsɔn. Ale le kɔnna fɛɛn bɛɛ nya, fɛɛn bɛɛ fana bɛ yen ale le barika la. Ale le ye Ala ka jama kuntigi ye, o min y'a farisogo ye. A daminɛna ni ale ye, ale le kɛra suu fɔlɔ ye ka kunun, waasa a ka kɛ bɛɛ nyafɛ. Bari a diyara Ala ye k'a yɛrɛ ka Alaya nɔɔrɔ bɛɛ la ale kan. Ani ka bɛn ni danfɛnw bɛɛ ye a deen nin barika la, dugukolo kan fɛɛnw, ni sankololataw, ka hɛrɛ kɛ a deen nin ka saya barika la lɔgɔ kan. Aw minw yɔrɔ tun ka jan Ala la fɔlɔfɔlɔ, ani aw tun ye Ala juguw ye aw ka miiriya, n'aw ka kɛwalijuguw kɔsɔn, sisan Ala bɛnna n'aw ye a Dencɛ ka saya barika la, waasa aw saniyanin, ni jalakibali ka se ka lɔ a nyakɔrɔ. Nga aw ka jija k'aw jigi la a kan kosɛbɛ, fɛɛn si kana aw ka miiriya nyagami k'aw jigi bɔ kibaru diman kan aw ye o min mɛn, ale min koo fɔra danfɛnw bɛɛ ye dinyɛ kɔnɔ. Ne Pɔli kɛra o min baarakɛla ye. Ne bɛ nisɔndiya ne ka tɔɔrɔ koow la aw kɔsɔn, Krista ka sɛgɛn tɔɔ min tun tora, ne b'o la Ala ka jama kɔsɔn o min y'a farisogo ye. Ne kɛra jama nin ka baarakɛla ye, ka kɛnyɛ ni Ala ka weleli ye aw dɛmɛ kama. A ye ne wele k'a ka kuma fɔ ka nya kosɛbɛ. O ye Ala ka koo dogonin ye, a tun dogora kabini waatijan, mɔgɔw ye. Nga sisan Ala y'a yira a ka mɔgɔw la. A b'a fɛ ka o koo dogonin ka nyumanya yira siyaw cɛma, min ye nin ye: Krista bɛ aw cɛma, ale kɛra aw jigi ye ko aw bɛna nɔɔrɔ sɔrɔ sini. An bɛ ale Krista le koo fɔra mɔgɔ bɛɛ ye, k'u ladi, ani k'u kalan ni hakilitigiya bɛɛ ye, waasa an ka se ka mɔgɔ kelen kelen bɛɛ labɛn u dafanin ka lɔ Ala nyakɔrɔ Krista barika la. O le kɔsɔn ne bɛ baara kɛ, ani ne bɛ bondori kɛ n'a ka fanga ye, o min bɛ baara kɛra ne kɔnɔ kosɛbɛ. Ne b'a fɛ aw k'a faamu ko ne bɛ bondorigwɛlɛn lo kɛra aw ni Lawodisekaw fana kɔsɔn ani mɔgɔ minw nyaa ma la ne kan ka ye, waasa olu ka se ka jigitugu sɔrɔ, ani u ka se ka kɛ kelen ye kanuya la, fɛɛn min dogonin tun bɛ Ala fɛ, ka hakili nyanaman sɔrɔ ka se k'o lɔn, o min ye Krista ye. Mɔgɔ bɛ se ka koo min bɛɛ lɔn Ala faan fɛ, Krista ye o le yira. Ne ye kuma nin fɔ aw ye janko mɔgɔ si kana aw lafili ni manamanakuma ye. Tinyɛ lo, ne tɛ aw cɛma, nga ne hakili bɛ aw la, ne nisɔndiyanin bɛ k'a ye ko aw bɛnnin lo kosɛbɛ, ani ko aw jijanin lo nyɔgɔn fɛ k'aw jigi la Krista kan. Aw lara an Matigi Yezu Krista la cogo min na, aw ka taama ka kɛnyɛ n'ale sago ye. Aw k'aw yɛrɛ d'a ma, ka nɔrɔ a la, ka jija k'aw jigi la a kan ka kɛnyɛ ni kalan ye aw y'o min kɛ, ani aw ka barika la Ala ye kosɛbɛ. Aw k'aw yɛrɛ kɔlɔsi mɔgɔ si kana aw kunna cɛn n'a ka lɔnniya fu ye u bɛ o min sɔrɔ adamaden ka landa koo la, ani jinaw ka koo, olu minw bɛ dinyɛ kunna, o lɔnniya nin tɛ Krista ta ye. Bari alaya dafanin le bɛ ale farisogo la. Fɛɛn bɛɛ b'aw fɛ ale le barika la, ale le bɛ setigi ni fangatigi yebaliw bɛɛ kunna. Ale barika la aw kɛnɛkɛnɛna. O kɛnɛkɛnɛko nin ma kɛ mɔgɔ sababu la, nga o kɛra Krista ta ye, o kɔrɔ ko aw jogojugu yɛlɛmana. Aw batizera tuma min na, o waati la aw suu donna n'a ye, ani ka kunun n'a ye, aw jigi lanin kɔsɔn setigi Ala kan, ale min y'a kunun. Aw minw tun ye suuw ye Ala fɛ aw ka kojugu kɔsɔn, ani aw ka kɛnɛkɛnɛbaliya kɔsɔn, Ala y'aw kunun n'a ye. A ye an ka kojugu bɛɛ yafa. Sariya tun bɛ jalaki min ben an kan, a ye o ta ka bɔ yen, o min tun sigira an kama, a y'o ban a ka saya barika la lɔgɔ kan. Ala ye fangatigiw, ni setigi yebaliw ka sebagaya cɛn, k'u minɛ ka kɛ jɔɔnw ye k'u yira kɛnɛ kan bɛɛ nyakɔrɔ, a ye see sɔrɔ u kan Krista ka saya barika la lɔgɔ kan. Aw kan'a to mɔgɔ si k'aw jalaki dumuni koo ni minnifɛn koo la, walima sankura nyanagwɛ koo, walima kalokura nyanagwɛ koo la, walima lafinyɛlon koo la. Olu ye koo nataw jaaw ye, nga u yɛrɛ yɛrɛ bɛ Krista le la. Mɔgɔ minw b'a kɛ i n'a fɔ u majiginin lo ani minw bɛ to ka mɛlɛkɛw bato, aw kan'a to u si k'aw nyagami. U jijanin lo u ka fɛɛn yetaw fɔko la. U b'u yɛrɛ bonya ni adamaden ka miiriya dama ye. Olu ma sɔn ka nɔrɔ Krista la ale min kɛra kungolo ye, ale min barika la farisogo bɛ kɛ kelen ye k'a ka makonyafɛnw sɔrɔ fasajuru ni joli siraw fɛ, ka sɔrɔ ka bonya ka kɛnyɛ ni Ala sago ye. N'aw sara ni Krista ye nyɔgɔn fɛ ka faran jinaw ka koow la, olu minw bɛ dinyɛ kunna, mun na aw bɛ sɔn k'u ka landaw labato tugu i n'a fɔ aw ye dinyɛ ta ye? U ko aw kana nin dumu, aw kana a nɛnɛ, aw kana maga a la yɛrɛ. O fɛɛn nunu bɛɛ bɛ laban ni cɛnni ye, ani u fana juu sigira adamadenw ka landa n'u ka ladili le kan, o kɛra i n'a fɔ u ka nyi. Ka batoli kɛ u yɛrɛ sago la, k'u yɛrɛ majigi, ka tɔɔrɔ la u farisogo kan, u b'o koo nunu bonya, k'a sɔrɔ u man kan ni bonya ye, olu ye farisogo ka diyako dama le ye. N'aw ni Krista korila ka kunun nyɔgɔn fɛ, fɛɛn minw bɛ sɔrɔ arijana na aw ka olu le nyini. Krista siginin bɛ Ala kinibolo la o yɔrɔ la. Aw ka miiri arijana kɔnɔfɛnw koo la, aw kana miiri dinyɛ kɔnɔfɛnw na, bari a kɛra i n'a fɔ aw sara dinyɛ faan fɛ, aw nii bɛ ni Krista ye Ala fɛ. Krista min kɛra aw ka nii ye, n'ale y'a yɛrɛ yira tuma min na, aw fana bɛna ye o tuma na ni nɔɔrɔ ye. Koo minw kɛra dugukolo kan koow ye, aw ka olu bɛɛ dabila, i n'a fɔ kakalaya, ni mɔgɔkolonya, ani miirijugu, ni kojugu nigɛ, ani wasabaliya, o min ni josɔn bɛɛ ye kelen ye. O koo nunu nyɔgɔn le kɔsɔn, Ala bɛ dimi mɔgɔmurutininw kɔrɔ. Tuma min na aw tun bɛ to ka kojugu kɛ, aw tun bɛ o nyɔgɔnw le kɛ. Nga sisan aw ka nin koow bɛɛ dabila, n'o ye dimi koo, dusubɔ, juguya, ani mɔgɔ tɔgɔcɛn, ani malobaliya kuma minw bɛɛ bɛ se ka bɔ aw daa la. Aw kana galon tigɛ nyɔgɔn ye tugu, bari, aw ye aw jogokɔrɔ bɛɛ dabila ka ban, ka jogokura ta, o min bɛ sabati tuma bɛɛ Ala ka lɔnniya barika la, ka kɛ i n'a fɔ aw danbaga. O cogo la, siya wɛrɛ ni Zuwifu kɛra kelen ye, kɛnɛkɛnɛninw ni kɛnɛkɛnɛbaliw kɛra kelen ye, lonanw ni siyajuguw kɛra kelen ye, jɔɔnw ni hɔrɔnw kɛra kelen ye. U bɛɛ kɛra kelen ye Krista barika la. Ala ye aw woloma k'aw kɛ a ka mɔgɔw ye ani aw koo ka di a ye kosɛbɛ. O la, aw ka kɛ mɔgɔnyumanw ye, minw bɛ makari. Aw k'aw yɛrɛ majigi, ka kɛ mɔgɔsabalininw ye, minw bɛ munyuli kɛ. N'a sɔrɔla ko dɔ ye koo dɔ kɛ min ma bɛn a tɔnyɔgɔn ma, aw ka yafa nyɔgɔn ma tuma bɛɛ ka nyɔgɔn dɛmɛdɛmɛ. Krista yafara aw ma cogo min na, aw fana ka yafa nyɔgɔn ma ten. Koo bɛɛ la, kanuya ka sɔrɔ aw kɔnɔ, ale sababu la, aw bɛna se ka nyɔgɔn minɛ kosɛbɛ. Krista ka hɛrɛ ka kɛ n'aw ye, aw welela o min kama ka kɛ farisogo kelen ye, ani aw ka kɛ nyumanlɔnbagaw ye. Krista ka kuma ka se ka sigi aw kɔnɔ kosɛbɛ. Aw ka nyɔgɔn kalan ani ka nyɔgɔn ladi ni hakilitigiya bɛɛ ye. Aw ka Ala tando ka barika la a ye ni dɔnkiliw ye minw bɛ sɔrɔ Ala ka kuma kɔnɔ, ani dɔnkili wɛrɛw, ni dɔnkili minw bɛ sɔrɔ Nii Senuman barika la. N'aw bɛ fɛɛn o fɛɛn kɛ walima ka fɛɛn o fɛɛn fɔ, aw k'o bɛɛ kɛ Matigi Yezu tɔgɔ la, ka barika la an Faa Ala ye. Musow, aw k'aw yɛrɛ majigi aw cɛɛw ye i n'a fɔ a bɛnnin bɛ Matigi ka mɔgɔw fɛ cogo min na. Cɛɛw, aw k'aw ka musow kanu, aw kana fariya u ma. Denmisɛnw, koo bɛɛ la aw k'aw wolobagaw bonya, bari o le ka di Matigi ye. Wolobagaw, aw fana kana aw deenw degun kojugu fɔɔ u bɛ dimi, waasa o jigi kana tigɛ. Jɔɔnw, aw ka mɛnni kɛ aw kuntigiw fɛ koo bɛɛ la ka kɛnyɛ ni adamadenya ye, aw kana baara kɛ aw ka kuntigiw nyana dɔrɔn janko k'aw koo diya u ye, nga o ka kɛ ni dusukun gwɛnin ye Matigi nyasiran kɔsɔn. Aw bɛ baara o baara kɛ aw k'o kɛ ni dusukunnyuman ye, i n'a fɔ Matigi ka baara lo, aw kan'a kɛ i n'a fɔ mɔgɔ ta lo. Aw ka l'a la ko aw bɛna niyɔrɔ sɔrɔ Matigi fɛ min ye aw ka sara ye. Aw ka Matigi, o ye Krista ye, aw bɛ baara kɛra ale le ye. Ni mɔgɔ min ye baarajugu kɛ, o tigi bɛna o baarajugu le sara sɔrɔ, Ala tɛ mɔgɔ woloma ka bɔ mɔgɔ la. Kuntigiw, koo minw ka nyi ani minw bɛnnin lo, aw fana k'o kɛ aw ka jɔɔnw ye, aw ka l'a la ko kuntigi dɔ bɛ aw fana fɛ arijana na. Aw ka jija Ala dali la, ka barika la a ye kosɛbɛ. Aw ka Ala dali an ye fana, janko an ka waajuli ka se ka sabati, an ka se ka Krista koo fɔ ale min kɔsɔn ne bɛ kaso kɔnɔ. A ka koo nin, min tun dogonin lo, ne ka se k'o fɔ ka gwɛ. Minw ma la Matigi la, aw ka taama ni hakilitigiya ye olu cɛma, n'aw ye sababunyuman sɔrɔ, aw ka banba ka Matigi koo fɔ u ye. Aw k'aw ka kuma fɔcogo nya tuma bɛɛ, a ka diya bɛɛ ye, waasa aw ka se ka mɔgɔ bɛɛ jaabi ka nya. Ne balimacɛ Tisiki, baarakɛlasɛbɛ lo. A koo ka di ne ye kosɛbɛ. A kɛra ne jɛnnyɔgɔn ye Matigi ka baara la. Ale bɛna an ka kibaruya bɛɛ fɔ aw ye. Ne b'a ci aw fɛ o le kɔsɔn, janko aw ka se k'an ka koow faamu, k'aw jigi tugu. Ne b'a ci, ale n'an balimacɛ Onezimu mɔgɔsɛbɛ, ale min koo fana ka di ne ye kosɛbɛ. A kɛra aw dɔ ye. Olu bɛna yan kibaruya fɔ aw ye. Arisitaaki, ale min ye ne tɔnyɔgɔn ye kaso kɔnɔ, ale b'aw fo, ani Barinabasi belenden Mariki fana, ale min koo tun fɔra aw ye ka ban, n'a nana se aw fɛ tuma min na, aw k'a kunbɛn ka nya. Yezu, o bɛ min wele ko Zusitusi, b'aw fo. Olu dama le ye Zuwifu ye minw bɛ Ala ka baara kɛra ni ne ye yan, ani olu le ye ne jigi tugulaw ye. Epafarasi, ale min ye aw balima dɔ ye, b'aw fo, ale min kɛra Yezu Krista ka baarakɛla ye. A bɛ to ka Ala dali aw ye tuma bɛɛ, waasa aw ka se ka kɔgɔ Ala koo la ani ka sɔn a sago ma kosɛbɛ. Ne b'a tando, a banbanin lo kosɛbɛ aw ka koo la ani balima minw bɛ Lawodise, ni minw bɛ Iyerapoli. An teri dɔgɔtɔrɔcɛ Luka bɛ aw fora, ani Demasi fana. Aw ka an balima Lawodisekaw fo, ka Nɛnfa fo, ani Ala ka jama min bɛ nyɔgɔn lajɛn a ka soo. Ni bataki nin nana se aw ma, n'aw y'a kalan ka ban, aw k'a ci Lawodisekaw ma janko olu fana k'a kalan. Ni min fana bɔra olu fɛ ka na di aw ma, aw k'o kalan fana. Aw k'a fɔ Arisipi ye ko Matigi ye baara min kalifa a ma, ko a ka banba k'o kɛ ka nya. Ne Pɔli b'aw fo, yan sɛbɛn nɔɔ nin ye ne yɛrɛ bolonɔ ye. Aw kana nyinɛ ko ne bɛ kaso kɔnɔ. Ala ka nɛɛma kɛ aw ye. Ne Pɔli ni Silivɛn ani Timote bɛ bataki nin ci Ala ka jama ma, min bɛ Tesaloniki, aw minw jigi bɛ an Faa Ala, ani Matigi Yezu Krista kan, Ala ka nɛɛma ni hɛrɛ kɛ aw ye. An bɛ to ka barika la Ala ye tuma bɛɛ aw kɔsɔn, ani ka Ala dali aw ye an ka dalili tuma na. Aw lara Ala la ka jija ka baara kɛ a ye, baara gwɛlɛman, kanuya kɔsɔn cogo min na, ani aw bɛ munyuna siniko la cogo min na Matigi Yezu Krista kɔsɔn, an hakili b'o bɛɛ la an Faa Ala nyakɔrɔ. N balimaw, aw minw koo diyara Ala ye, an y'a lɔn ko a ye aw woloma. An bɛ kibaru diman min fɔra, an m'o fɔ aw ye i n'a fɔ kuma gwansan dama, nga an y'a fɔ ni Nii Senuman ka sebagaya ye. An ye fɛɛn minw kɛ aw ka nya kama, aw bɛ o lɔn. Aw kɔni, aw ye an cogo dege ni Matigi ta fana, aw sɔnna Ala ka kuma ma ni nisɔndiya ye o min ye Nii Senuman ta ye, k'aw to tɔɔrɔba cɛma. O cogo la, aw ka koo kɛra ladegeta ye Ala ka jama fɛ minw bɛ Maseduwani ni Girɛsi mara la. Ala ka koo bonyana aw fɛ fɔɔ o taara mɛn Maseduwani ni Girɛsi maraw la. O dama fana tɛ, aw jigi bɛ Ala kan cogo min na, o fana bɔra ka se yɔrɔ bɛɛ la, fɔɔ kuun t'a la an yɛrɛ ka kuma a koo la. Bari an tun sera aw fɛ tuma min na, aw y'an ladon cogo min na, ani ka josɔnko dabila cogo min na ka Ala kelen bato, mɔgɔ bɛɛ b'o fɔra. Aw y'o kɛ ka to ka Ala dencɛ Yezu kɔsegitɔ makɔnɔ, a y'ale min kunun a sanin kɔ. Yezu le b'an kunmabɔ Ala ka dimi nata ma. Ne balimaw, aw yɛrɛ y'a lɔn ko an ka taali aw fɛ, o ma kɛ gwansan ye. Yan ni an ka se aw fɛ Tesaloniki, u y'an tɔɔrɔ k'an nɛni kosɛbɛ Filipi, aw yɛrɛ y'o lɔn. An ye jagwɛlɛya sɔrɔ Ala fɛ, k'an ka Ala ka kibaru diman fɔ aw ye gwɛlɛya caaman cɛma. An bɛ kuma min fɔra mɔgɔw ye, o ma kɛ galon ye walima nanbaran koow ye, an fana tɛ mɔgɔ si lafili. Nga Ala yɛrɛ y'a ye ko an bɛ se, o la, a y'o kibaru diman fɔko kalifa an ma, an fana b'a fɔ a fɔcogo la. An tɛ mɔgɔ diyana koo nyinina, nga Ala min b'an kɔnɔnakow lɔn, an bɛ ale ta le kɛ. O cogo la, aw b'a lɔn ko an ka kuma ma kɛ nanbaran kuma ye fewu. An fana m'o fɔ aw ye an yɛrɛ ka tɔnɔ kɔsɔn. Ala yɛrɛ b'o lɔn. An ma bonya nyini mɔgɔ si fɛ, an m'a nyini aw fɛ, walima mɔgɔ wɛrɛw fɛ. An tun bɛ se ka kuntigiya kɛ aw kan, bari an ye Krista ka cidenw ye. Nga an ka koo tun ka di k'an to aw cɛma yen, i n'a fɔ muso b'a deen mara cogo min na. Aw ka koo tun ka gwɛlɛ an ma kosɛbɛ, o le y'a to, an tun labɛnnin lo ka Ala ka kibaru diman fɔ aw ye, hali k'an yɛrɛ nii di aw kɔsɔn. Bari aw koo tun b'an dusu la kosɛbɛ. N balimaw, an ye baara min kɛ k'o sɛgɛn munyu, aw hakili b'o la. K'an to aw cɛma n'an bɛ Ala ka kibaru diman fɔ aw ye, an ye baara kɛ suu fara tile kan waasa an ka doni kana la aw dɔ kan. Aw yɛrɛ b'a lɔn ni Ala fana, ko aw minw lara Krista la, an ka taamacogo tun ka nyi aw cɛma, a tilennin tun lo, jalakiyɔrɔ tun tɛ an na. Aw b'a lɔn fana ko an y'aw kelen kelen bɛɛ minɛ i n'a fɔ faa b'a ka deenw minɛ cogo min na. An y'aw ladi, k'aw jaa gwɛlɛya, ani an y'a nyini aw fɛ kosɛbɛ ko aw k'aw ka taamacogo bɛn ni Ala sago ye, ale min b'aw wele janko aw ka don a ka mara kɔnɔ, ani k'a ka nɔɔrɔ sɔrɔ. O kama, an bɛ barika la Ala ye tuma bɛɛ, bari, an ye Ala ka kuma min fɔ aw ye, aw m'o minɛ i n'a fɔ mɔgɔ dalakuma, nga i n'a fɔ Ala ka kuma yɛrɛyɛrɛ, a do ye o yɛrɛ le ye jaati, min bɛ baara kɛ aw kɔnɔ, aw minw lara Krista la. N balimaw, Ala ka jama minw bɛ Zude mara la minw fana ye Yezu Krista ta ye, aw ni olu tɛmɛna sira kelen kan, bari aw ye tɔɔrɔ sɔrɔ kosɛbɛ aw balimaw bolo, i n'a fɔ olu fana tɔɔrɔla Zuwifuw bolo cogo min na. O Zuwifu nunu le ye Matigi Yezu ani kiraw faga, ani olu le y'an tɔɔrɔ fana, o koo man di Ala ye, mɔgɔ bɛɛ le ye olu jugu ye. Olu le b'an bali janko an kana kibaru diman fɔ siya wɛrɛw ye, min bɛ se ka kɛ u bɛ kisili sɔrɔ. O cogo la, u bɛ dɔ farala u ka kojugu kan. Nga a laban na, Ala dimina u kɔrɔ kosɛbɛ. An kɔni fɛ balimaw, kabini an faranna nyɔgɔn na waati dɔɔni nin kɔnɔ, an kɔni t'aw cɛma, nga an bɛ miiri aw koo la. An ye cogo bɛɛ nyini, janko ka segi ka taa aw fɛ, bari an b'a fɛ ka aw ye. O le y'a to an b'a fɛ ka taa aw fɛ. Ne Pɔli yɛrɛ y'o; naniya ta sinyɛ damani, nga Sutana ma sɔn. N'an Matigi Yezu segira ka na tuma min na, an jigi bɛ jon le kan, an bɛna nisɔndiya jon le kɔsɔn, jon le bɛna kɛ an ka sesɔrɔjala ye an bɛna an yɛrɛ bonya o min kɔsɔn an Matigi Yezu nyakɔrɔ, ni aw tɛ? Ɔnhɔn, an b'an yɛrɛ bonya ani ka nisɔndiya aw le kɔsɔn. Tuma min na an tun tɛ se ka munyuli kɛ tugu, an y'a miiri ko ni an tora an kelen Atɛni, o ka fisa. O le y'a to, an ye an balimacɛ Timote ci aw fɛ, ale ye Ala ka baarakɛla ye Krista ka kibaru diman fɔli kɔsɔn, an y'a ci waasa ale ka taa aw dɛmɛ, ani k'aw ladi aw jigi koo la, waasa aw la, mɔgɔ si kunna kana cɛn tɔɔrɔ kɔsɔn minw y'aw sɔrɔ sisan, bari aw yɛrɛ b'o lɔn ka ban ko wajibi lo, o ka an sɔrɔ. An tun b'aw cɛma tuma min na, an tun b'a fɔra aw ye ko an ka kan ka tɔɔrɔ. O le kɛra, aw yɛrɛ b'o lɔn. Ne tun tɛ se ka munyuli kɛ tugu, o la ne ye Timote ci, waasa ale ka taa aw filɛ yala n'aw jigi bɛ Ala kan tugu, janko a ka kɔsegi ka na n'o kibaruya ye. Ne tun bɛ siran ko Sutana kana aw nigɛ k'an ka baara kɛ fu ye. Sisan, Timote bɔra aw fɛ ka na se yan an fɛ. A ye kibarunyuman fɔ aw koo la. A ko jiginyuman bɛ aw fɛ, ko aw bɛ nyɔgɔn kanu. An koo bɛ aw kɔnɔ cogo min na, a ye o fɔ, ko aw b'a fɛ k'an ye kosɛbɛ, i n'a fɔ an fana b'a fɛ ka aw ye cogo min na. O le y'a to, n balimaw, k'an to an ka sɛgɛn n'an ka tɔɔrɔ la, an y'a ye tuma min na ko aw jigi lanin bɛ Matigi kan halibele, an ye nisɔndiya sɔrɔ. Sisan an bɛ se ka ninakili ka nya bari aw jijanin lo ka to Matigi ka jɛnnyɔgɔnya la. An ye nisɔndiya min sɔrɔ aw kɔsɔn, an m'a lɔn an bɛna Ala fo cogo min na. N'an bɛ Ala dali tuma min na, suu fara tile kan, an b'a nyini a fɛ kosɛbɛ ko a ka sira di an ma, waasa an ka se ka taa aw filɛ ani ka aw dɛmɛ tugu ka taa aw ka jigi sabatiko faan fɛ. An b'a nyini ale an Faa Ala fɛ ani an Matigi Yezu fɛ, u ka sira di an ma loon dɔ waasa ka taa aw fɛ. Kanuya min bɛ aw ni nyɔgɔn cɛ, ani mɔgɔ wɛrɛw faan fɛ, Matigi k'o sabati kosɛbɛ i n'a fɔ an b'aw kanu cogo min na. A ka barika don aw la, aw ka kɛ mɔgɔnyumanw ni jalakibaliw ye an Faa Ala nyakɔrɔ, an Matigi Yezu kɔsegituma na n'a ka mɔgɔw bɛɛ ye. Ayiwa n balimaw, aw ka kan ka taama cogo min na aw koo ka sɔrɔ ka diya Ala ye, an y'o yira aw la ka ban. Aw yɛrɛ b'o kɛra ka ban, nga an b'aw dali kosɛbɛ tugu an Matigi Yezu tɔgɔ la ko aw ka taa nya ka dɔ fara o kan. An y'aw ladi koo minw na Matigi Yezu barika la, aw bɛ olu lɔn. Ala bɛ min fɛ, o ye aw dusu saniyako ye, aw kana kakalaya kɛ. Aw kelen kelen bɛɛ ka to n'aw muso ye cogo bɛnnin na Ala nyakɔrɔ ani ka kɛ mɔgɔsɛbɛw ye. Aw kana aw yɛrɛ to nigɛjugu bolo i n'a fɔ Alalɔnbaliw b'a kɛ cogo min na. Mɔgɔ si kana a tɔnyɔgɔn nanbaran o koo la k'a hakɛ ta fana. Bari Matigi b'o koo sifa nunu juru sara, i n'a fɔ an delila k'a fɔ ka gwɛlɛya aw ye cogo min na. Bari Ala m'an wele kakalaya kama, nga a y'an wele ka kɛ mɔgɔnyumanw le ye. O le y'a to ni mɔgɔ min ma sɔn o ladili ma, o tigi ma ban mɔgɔ ka kuma na, nga a banna Ala la, min b'a ka Nii Senuman d'aw ma. Min ye nyɔgɔn kanuko ye, ka sɛbɛ ci aw ma o koo la, aw mako tɛ o la tugu, bari aw y'o dege ka ban Ala barika la. Aw b'o la aw balimaw faan fɛ, minw bɛ Maseduwani mara bɛɛ la. Nga an b'a nyini aw fɛ ko aw ka dɔ fara a kan tugu. Aw ka jija ka hɛrɛ nyini, aw ka janto aw yɛrɛ ka koow la, ani ka baara kɛ aw yɛrɛ ma, i n'a fɔ an tun y'a nyini aw fɛ cogo min na, janko aw taamacogo ka bɛn mɔgɔ wɛrɛw cɛma waasa olu k'aw tɔgɔnyuman fɔ. O cogo la aw tɛna kɛ mɔgɔ si ka doni ye. N balimaw, mɔgɔ minw sara, an t'a fɛ aw ka to olu ka koo lɔnbaliya la, waasa aw dusu kana kasi i n'a fɔ mɔgɔ tɔw, jigi tɛ minw fɛ. N'an lanin b'a la tinyɛ na ko Yezu sara ka kunun, o cogo la mɔgɔ minw sara k'u jigi lanin to Yezu kan, Ala bɛna olu kunun fana u ka to ni Yezu ye. An bɛ min fɔ aw ye, an y'o sɔrɔ Matigi ka kuma na. An minw bɛna to sii la fɔɔ ka taa se Matigi ka kɔsegi ma, mɔgɔ minw lara Krista la n'u sara, an tɛna kɔn ka taa olu nya. Ni sira dira, mɛlɛkɛ kuntigi ka pɛrɛnkan fɛ ani Ala ka buru kaan fɛ, Matigi yɛrɛ bɛna bɔ sankolo la ka jigi, o tuma na mɔgɔ minw tun lara Krista la ka sɔrɔ ka sa, olu bɛ kunun fɔlɔ. O kɔ, an minw tora sii la, an bɛna kori ka kɔrɔ ta nyɔgɔn fɛ ni olu ye sankaba kan ka taa Matigi kunbɛn. O cogo la, an bɛna to n'a ye tuma bɛɛ. Aw ka to ka nyɔgɔn jigi tugu n'o kuma ye. N balimaw, o koo nunu bɛna kɛ waati min na, aw mako t'a la an ka sɛbɛ ci aw ma o koo la. Aw yɛrɛ b'a lɔn kosɛbɛ ko Matigi bɛna na loon min na, o bɛna bali mɔgɔw la i n'a fɔ soon bɛ na sufɛ cogo min na. Tuma min na mɔgɔw bɛn'a fɔ ko hɛrɛ ni jigisigi bɛ yen, o tuma na, tɔɔrɔ bɛna ben u kan fɔɔ u tɛ se ka bɔyɔrɔ sɔrɔ, i n'a fɔ muso ka tiin bɛ cun a kan cogo min na. Nga n balimaw, aw ma kɛ Alalɔnbaliw ye minw bɛ to ka dibidibikow kɛ, n'o loon bɛ na bali aw la i n'a fɔ soon. Aw bɛɛ bɛ Ala lɔn, aw ka koo gwɛnin lo. An ma kɛ Alalɔnbaliw ni dibidibikokɛlaw ye. O la, an man kan ka sinɔgɔ i n'a fɔ mɔgɔ tɔ nunu. An k'an yɛrɛ kɔlɔsi an labɛnnin ka to nyana tuma bɛɛ, bari mɔgɔ bɛ sinɔgɔ sufɛ le, dɔrɔtɔw fana b'u ka dɔrɔtɔya kɛ sufɛ le. Nga an minw bɛ Ala lɔn, an k'an yɛrɛ labɛn, ka jigi ni kanuya kɛ i n'a fɔ kɛlɛdenw ka nigɛ duloki, k'o don an kaan na, ani k'an jigi la an ka kisili kan i n'a fɔ nigɛfugulan. Bari Ala m'a latigɛ ko a ka dimi ka se an ma, nga a y'a latigɛ ko an ka kisi an Matigi Yezu Krista barika la, ale min sara an kɔsɔn, janko k'an to sii la wo, walima an sara wo, an ka se ka to n'ale ye. O le y'a to aw ka nyɔgɔn jigi tugu, ani ka nyɔgɔn dɛmɛ, i n'a fɔ aw b'a kɛra ka ban cogo min na. N balimaw, mɔgɔ minw b'aw nyafɛ Matigi ka sira la, n'u bɛ jija k'aw ladi, an b'aw dali ko aw ka olu jati kosɛbɛ. Aw k'u koo diya aw ye, k'u bonya kosɛbɛ, u ka baara kɔsɔn. Hɛrɛ ka to aw ni nyɔgɔn cɛ. An b'a nyini aw fɛ n balimaw, ko aw ka mɔgɔkolonw ladi, ka siranbagatɔw jaa gwɛlɛya, ka barikatanw dɛmɛ, ani ka munyu bɛɛ kɔrɔ. Aw k'aw yɛrɛ kɔlɔsi, aw la mɔgɔ si kana kojugu juru sara ni juguya ye, aw ka konyuman kɛ tuma bɛɛ nyɔgɔn ye ani tɔw ye. Aw ka nisɔndiya tuma bɛɛ. Aw kana Ala dali dabila. Koo bɛɛ la, aw ka barika la Ala ye, bari o le ye Ala sago ye aw faan fɛ, k'aw to Yezu Krista ka jɛnnyɔgɔnya la. Aw kana Nii Senuman ka baara bali. Aw kana kiraya kuma lɔgɔbɔ. Nga aw ka koo bɛɛ sɛgɛsɛgɛ, koo minw ka nyi aw ka sɔn olu ma. Aw k'aw yɛrɛ kɔlɔsi kojugu sifa bɛɛ kɛli ma. Hɛrɛtigi Ala yɛrɛ k'aw kɛ mɔgɔnyumanw ye, juguya si kana sɔrɔ aw la, aw farisogo faan fɛ, n'aw dusukun, ani aw nii, a k'aw bɛɛ mara jalakiyɔrɔ kana sɔrɔ aw la an Matigi Yezu Krista ka nalon na. Ala min y'aw wele, ale ye kantigi ye, ale lo bɛna o kɛ. N balimaw, aw ka to ka Ala dali an ye. Aw ka nyɔgɔn fo ni kɔnɔgwɛ ye. Ne b'a nyini aw fɛ kosɛbɛ Matigi tɔgɔ la ko bataki nin ka kalan balimaw bɛɛ nyana. An Matigi Yezu Krista ka nɛɛma kɛ aw ye. Ne Pɔli ni Silivɛn, ani Timote bɛ bataki nin ci Ala ka jama ma Tesaloniki, aw minw ye an Faa Ala n'an Matigi Yezu Krista ta ye. An Faa Ala, n'an Matigi Yezu Krista ka nɛɛma ni hɛrɛ kɛ aw ye. N balimaw, an ka kan ka barika la Ala ye tuma bɛɛ aw koo la, o ka nyi. Bari aw jigi lanin lo Matigi kan kosɛbɛ ani kanuya min bɛ aw ni nyɔgɔn cɛ, o bɛ bonyana ka taa nya, fɔɔ an b'an yɛrɛ bonya Ala ka jama cɛma aw ka jijali, n'aw ka lanaya kɔsɔn, hali k'aw to nin tɔɔrɔ ni kɔrɔbɔli bɛɛ la o min b'aw kan. O ye Ala ka kiti tilennin taamasinyɛ ye, o kɛkun ye nin ye: Waasa k'aw kɛ mɔgɔw ye minw ka kan ni Ala ka masaya ye aw bɛ tɔɔrɔla o min kɔsɔn. A bɛnnin lo Ala k'aw tɔɔrɔbagaw tɔɔrɔ fana. O cogo la, aw minw bɛ tɔɔrɔ la, a ka hɛrɛ kɛ aw ye i n'a fɔ anw. O bɛna kɛ an Matigi yezu kɔsegituma na n'a bɛn'a yɛrɛ yira ka bɔ sankolo la n'a ka mɛlɛkɛ setigiw ye. A bɛna na ni tasuma ye, ka mɔgɔw nyaa gwan minw ma Ala lɔn ani minw ma sɔn an Matigi Yezu ka kibaru diman ma. U ta bɛna cɛn pewu, u yɔrɔ bɛna janya Matigi n'a ka nɔɔrɔ la. Mɔgɔ minw y'u jigi la a kan, a bɛna na o loon na janko olu k'a bonya, ani u ka nisɔndiya a ka koo la, aw fana do sɔnna an ka kuma ma. O le y'a to an b'an ka Ala dali aw ye tuma bɛɛ, waasa, Ala y'aw wele kuun min na, aw k'o nya. Ani ka see d'aw ma, aw ka jigi kɔsɔn, aw b'a fɛ ka konyuman min kɛ, aw ka se k'o kɛ. O cogo la, an Matigi Yezu tɔgɔ bɛna bonya aw kɔsɔn, ani aw fana ka bonya sɔrɔ ale kɔsɔn, ka kɛnyɛ n'an ka Ala, n'an Matigi Yezu Krista ka nɛɛma ye. Min ye an ka Matigi Yezu Krista ka kɔsegiko ye, ani an lajɛnko ye a fɛ, n balimaw, an b'aw dali ko aw kan'a to mɔgɔ si b'aw lafili gwansan, ani ka siranya bila aw la, ko ale ye kiraya kuma sɔrɔ, walima ka manamanakuma dɔ fɔ aw ye, walima n'u dɔ ye bataki koo fɔ aw ye k'o bɔra an fɛ, n'u b'a fɔ aw ye ko Matigi ka kɔsegi sera. Aw kana la u la, bari murutili bɛna kɛ Ala ma fɔlɔ, mɔgɔjugu k'a yɛrɛ yira, ale min labɛnnin bɛ halakili kama. Ale bɛna wili batofɛn bɛɛ kama k'a yɛrɛ bonya ka taa sigi Alabatosoba kɔnɔ k'a yɛrɛ kɛ Ala ye. ne tun y'o koo fɔ aw ye tuma min na ka n to aw fɛ yen, aw hakili t'o la wa? Fɛɛn min b'a bali sisan n'a tɛ se k'a yɛrɛ yira, n'a waati ma se, aw b'o lɔn. Bari fɛnjugu dogonin y'a ka baara daminɛ ka ban, a tora fɛɛn min b'a bali o ka bɔ a nya dɔrɔn. O la, mɔgɔjugu nin b'a yɛrɛ yira, an Matigi Yezu bɛn'a halaki a dalafɔnyɔ fɛ, k'a kɛ a bɛ tunu pewu n'a ka nali nɔɔrɔ ye. O juguman nin bɛna na ni Sutana ka fanga ye, ka kabakoba sifa bɛɛ kɛ fɔɔ ka mɔgɔw nanbaran ni dɔw ye. A bɛna kojugu sifa bɛɛ kɛ janko mɔgɔ minw bɛ halaki sira kan, a ka olu lafili. Olu bɛna halaki bari u ma sɔn tinyɛ koo ka diya u ye, u tun bɛ se ka kisi o min barika la. O le y'a to Ala y'a kɛ u filila kosɛbɛ. O cogo la, mɔgɔ minw ma sɔn tinyɛ ma, ani kojugu ka di u ye, olu ka jalaki. N balimaw, aw minw koo ka di Matigi ye, an ka kan ka barika la Ala ye aw kɔsɔn tuma bɛɛ, bari a y'aw woloma kabini fɔlɔfɔlɔ, waasa aw ka kisi, aw jigi barika la, o min bɛ tinyɛ kan, ani Nii Senuman barika la, ale min b'aw kɛ Ala ta ye. A y'aw wele o le kama an ka kibaru diman fɔli barika la, janko aw k'an Matigi Yezu Krista ka nɔɔrɔ sɔrɔ. O cogo la n balimaw, an ye aw kalan koo minw na an ye min fɔ aw ye n'an daa ye walima an ye minw kɛ bataki ye k'o ci aw ma, aw ka jija k'o minɛ ka nya kosɛbɛ. An Matigi Yezu Krista yɛrɛ, n'an Faa Ala, min y'an kanu n'a b'an jaa gwɛlɛya tuma bɛɛ, ani ka jiginyuman d'an ma, a ka nɛɛma kɔsɔn, olu k'aw jaa gwɛlɛya, ani ka barika don aw la koo bɛɛ la, baara ni kuma na. Ayiwa n balimaw, an b'a nyini aw fɛ ko aw ka Ala dali an ye, waasa Matigi ka kuma ka se yɔrɔ bɛɛ teliya la, ani ka bonya sɔrɔ, i n'a fɔ a tun kɛra aw cɛma cogo min na, ani Ala k'an kisi mɔgɔjugu ni mɔgɔkolonw ma, bari mɔgɔ bɛɛ ma sɔn kibaru diman ma. Nga Matigi ye kantigi ye, a bɛna jagwɛlɛya d'aw ma ani k'aw tanga juguman ma. Matigi barika la an jigi b'aw kan ko an ye koo minw nyini aw fɛ, aw b'o kɛra, ani aw fana bɛna to k'o kɛ. Matigi k'a to aw ka nyɔgɔn kanu i n'a fɔ Ala bɛ mɔgɔ kanu cogo min na, ani aw ka se ka munyuli kɛ i n'a fɔ Krista y'a kɛ cogo min na. N balimaw, an b'aw dali an Matigi Yezu Krista tɔgɔ la ko aw ka faran ka bɔ aw balimakolonw na, olu minw tɛ taama ka kɛnyɛ n'an ka kalan ye. Aw ka kan k'an ladege cogo min na, aw yɛrɛ b'o lɔn, bari an tun ma kɛ salabagatɔw ye aw cɛma. K'an to aw cɛma, an m'a nyini mɔgɔ si fɛ ko a k'an balo, an yɛrɛ le tun bɛ baara kɛ ka sɛgɛn suu ni tile, waasa an kana kɛ mɔgɔ si ka doni ye. A ma kɛ ko an tun man kan n'o ye. An tun ka kan n'a ye, nga an tun b'a fɛ ka koo le nyayira aw la. K'an to aw fɛ yen, an tun b'a fɔ aw ye tuma bɛɛ ko mɔgɔ min tɛ sɔn baara ma, o tigi kana dumuni kɛ fana. An y'a mɛn ko mɔgɔ dɔw b'aw cɛma minw kɛra salabagatɔw ye, u tɛ sɔn ka foyi kɛ fɔɔ kokolonw. An b'a nyini o mɔgɔ nunu fɛ ani an b'u ladi an Matigi Yezu Krista tɔgɔ la, k'u ka baara kɛ dɔrɔn k'u yɛrɛ ka dumuni sɔrɔ. Aw kɔni, n balimaw, aw kana konyuman kɛli dabila. Ni mɔgɔ min ma sɔn k'an ka bataki nin kɔnɔnakuma labato, aw k'o tigi to yen, aw kana jɛnnyɔgɔnya kɛ n'a ye tugu, janko a ka maloya. O n'a ta bɛɛ, aw kan'a minɛ i n'a fɔ aw jugu, nga aw k'a ladi i n'a fɔ aw balima. Hɛrɛtigi ka hɛrɛ kɛ aw ye tuma bɛɛ ni cogo bɛɛ la. Matigi ka to aw bɛɛ fɛ. Ne Pɔli le bɛ foli kuma nin sɛbɛnna n yɛrɛ ma. N bɛ to ka n bolonɔ bila ten n ka batakiw bɛɛ la. N bɛ to k'o sɛbɛn ten. An Matigi Yezu Krista ka nɛɛma kɛ aw bɛɛ ye. Ne Pɔli min kɛra Yezu Krista ka ciden ye an Kisibaga Ala sago barika la ani Yezu Krista barika la, ale min kɛra an jigi ye, ne bɛ bataki nin ci Timote ma, e min kɛra ne deen tigitigi ye jigi barika la Krista kan. An Faa Ala, n'an Matigi Yezu Krista ka makari i la, ka nɛɛma ni hɛrɛ kɛ i ye. Ne taatɔ Maseduwani mara la, ne tun y'a nyini e fɛ ko i ka to Efɛzi, waasa kalanjugu bɛ minw daa la, i k'a fɔ u ye k'u k'o dabila. U bɛ fɔlɔfɔlɔko minw fɔ u kunfɛ ani mɔgɔw buruju fɔko, i k'a fɔ u ye k'u k'o dabila, a bɛ sɔsɔli le caya. Ala sago tɛ se ka kɛ ten, a bɛ se ka kɛ lanaya le barika la. O ladikun ye min ye, o ye ka kanuya sɔrɔ min bɛ bɔ dusukun gwɛnin na, ni miirinyuman na, ani jigisɛbɛ la. Mɔgɔ dɔw jɛngɛnna ka bɔ o sira kan k'u yɛrɛ lafili ni kuma fufafu ye. U b'a fɛ ka kɛ sariya karamɔgɔw ye, nga u bɛ kuma min fɔra, n'u lanin bɛ u yɛrɛ la o kuma nin koo la, u t'o faamu. An b'a lɔn ko sariya ka nyi ni mɔgɔw bɛ sariya labato ka nya. An k'a faamu fana ko sariya ma sigi mɔgɔnyumanw kama, nga a sigira banbagaw le kama, ni mɔgɔmurutininw, mɔgɔjuguw, kojugukɛlaw, Ala nyasiranbaliw, ani minw bɛ Ala tɔgɔ cɛn, ni minw bɛ u faa, walima u baaw faga, ani mɔgɔfagalaw, ni kakalaw, ni cɛɛ minw bɛ nyɔgɔn nyini i n'a fɔ cɛɛ ni muso, ni mɔgɔjagolaw, ni galontigɛlaw, ni minw b'u yɛrɛ kali fu, ani mɔgɔ minw ka kɛta tɛ bɛn ni kibaru diman ye. O kalan nin bɛ sɔrɔ kibaru diman kɔnɔ, dubatigi Ala ye o min fɔko kalifa ne ma. Ne bɛ barika la an Matigi Yezu Krista ye, ale min ye ne jati mɔgɔsɛbɛ ye ka ne woloma ka fanga di n ma k'a ka baara kɛ. Fɔlɔfɔlɔ ne min tun b'a tɔgɔ cɛn, ka Alanyasiranbagaw tɔɔrɔ, ani ne tun ka fari, nga o bɛɛ n'a ta a makarila ne la, bari ne ka lanabaliya ni kolɔnbaliya le kɔsɔn lo, ne tun bɛ o kɛra. An Matigi ye nɛɛma kɛ ne ye kosɛbɛ, ka jigi ni kanuya di ne ma o min bɛ sɔrɔ Yezu Krista ka jɛnnyɔgɔnya fɛ. Nin kuma ye tinyɛ ye mɔgɔ bɛɛ bɛ se ka sɔn min ma, ko: Yezu Krista nana dinyɛ na waasa ka kojugukɛlaw kisi. Ne tun kɛra mɔgɔjugu ye olu bɛɛ cɛma. Ne min tun kɛra fɔlɔ ye u bɛɛ cɛma, ni Ala hinɛna ne la, a b'a fɛ Yezu Krista k'a ka nyumanya le yira k'o kɛ taamasinyɛ ye mɔgɔw fɛ, olu minw bɛna la ale la ka sini hɛrɛ sɔrɔ. Bonya ni tandoli ka kɛ tuma bɛɛ waati bɛɛ Masa Ala yebali ye, ale min tɛ sa, ani a kelenpe le bɛ yen. Amiina. Ne dencɛ Timote, ne b'a gwɛlɛya i ma ko i ka jija ka baaranyuman kɛ ka kɛnyɛ ni kiraya kuma ka dɛmɛ ye min tun fɔra i koo la ka tɛmɛ. I k'o kɛ ni lanaya, ni dusukunnyuman ye. Mɔgɔ dɔw dɛsɛra o la, o kama u benna. Imene ni Alɛkisandiri seen b'o la, ne ye olu minw to Sutana bolo waasa u k'a faamu, k'u man kan ka Ala tɔgɔ cɛn. Ne fɛ, ne bɛ fɛɛn fɔlɔ min nyini mɔgɔw fɛ, o ye nin ye: ko u ka Ala dali ni dalili sifa bɛɛ ye, ani ka barika la Ala ye mɔgɔ bɛɛ kɔsɔn, ka dalili kɛ masaw ni fangatigiw ye, waasa an ka se ka to nyasuma na ani hɛrɛ la, ka se ka kɛ mɔgɔsɛbɛw ye Ala ni mɔgɔw nyana. O le ka nyi, an'a ka di an Kisibaga Ala ye, ale min b'a fɛ mɔgɔ bɛɛ ka kisi ani ka se ka tinyɛ lɔn. Bari Ala kelen le bɛ yen, ani soronakɛla kelen dama le bɛ yen Ala ni mɔgɔw cɛ. O ye Yezu Krista ye, o min ye mɔgɔ ye i n'a fɔ anw. A y'a yɛrɛ saraka mɔgɔ bɛɛ ka kunmabɔli kɔsɔn. O cogo la, a y'a yira waatilatigɛnin na ko Ala b'a fɛ mɔgɔ bɛɛ ka kisi. O le kɔsɔn ne welela ka kɛ ciden ani waajulikɛla ye, ka siya wɛrɛw kalan u ka la Yezu la, ani ka tinyɛ lɔn. Ne bɛ tinyɛ le fɔra, ne tɛ galon tigɛra. O la, ne b'a fɛ cɛɛw ka Ala dali yɔrɔ bɛɛ, k'u bolo kɔrɔ ta sanfɛ ka Ala dali ni dusugwɛ ye, dimi ni sɔsɔli kana sɔrɔ u kɔnɔ. O cogo la fana, ne b'a nyini musow fɛ ko u k'u yɛrɛ masiri cogo bɛnnin na, ka fani don minw b'u sutura. O nyaji kana caya u ka masirifɛnw koo la, i n'a fɔ u kunsigi labɛncogo, walima ka sanu don, walima ka kɔnɔkisɛ don, walima fani sɔngɔgwɛlɛn. Nga u ka masirifɛnw ka kɛ konyuman kɛli ye, i n'a fɔ a bɛnnin bɛ musow fɛ cogo min na olu minw ko u bɛ siran Ala nya. Musow ka kan k'u yɛrɛ majigi ka je ka mɛnni kɛ kalan na. Ne tɛ sira di muso ma ka mɔgɔw kalan walima ka kuntigiya kɛ cɛɛ kan, a ka kan ka je, bari Adama le kɔnna ka dan fɔlɔ, o kɔfɛ, Awa sɔrɔla ka dan. Adama fana ma kɔn ka sɔn Sutana ka nigɛli ma, nga muso le kɔnna ka sɔn a ma ka ban Ala ka fɔta ma. O bɛɛ n'a ta, muso bɛna kisi a ka deen wolo kɔsɔn, n'a jigi tora Ala kan, ka to kanuya la, ani k'a ka taamacogo bɛn Ala sago ma. Nin kuma ye tinyɛ ye, ani mɔgɔ ka kan ka sɔn o ma: Ni mɔgɔ dɔ b'a fɛ ka kɛ Ala ka jama nyamɔgɔ ye, o tigi ye baaranyuman le woloma. Nyamɔgɔ ka kan ka kɛ mɔgɔnyuman ye, jalakiyɔrɔ man kan ka sɔrɔ a la, muso kelen tigi, hakilitigi, mɔgɔ min b'a ka koo bɛɛ kɛ ka kɛnyɛ. A ka kɛ mɔgɔ ye min bɛ se ka lonanw ladon, ani ka kɛ mɔgɔ ye min bɛ se ka mɔgɔw kalan. A man kan ka kɛ dɔrɔtɔ ye, walima mɔgɔ fariman, nga mɔgɔsabalinin. A kana kɛ kɛlɛtigɛla ye, walima mɔgɔ ye min bɛ wari kanu kojugu. A ka kan ka kɛ mɔgɔ ye min bɛ se k'a yɛrɛ ka soo mara, ani k'a deenw kolo n'u bɛ mɛnni kɛ a fɛ koo bɛɛ la. Bari mɔgɔ min tɛ se k'a yɛrɛ ka somɔgɔw mara, o tigi bɛna se ka Ala ka jama mara cogo di? A kana kɛ mɔgɔkura ye fana Ala ka jama cɛma, waasa yɛrɛbonya kana don a la ka kɛ sababu ye Sutana ka jalaki nyɔgɔn ka se a ma. A ka kɛ mɔgɔ ye min tɔgɔnyuman bɛ fɔ mɔgɔ wɛrɛw fɛ, waasa a kana dɔgɔya sɔrɔ Sutana ka se a kɔrɔ. Ala ka jama nyamɔgɔw dɛmɛbagaw ka kan ka kɛ mɔgɔsɛbɛw ni kuma kelen tigiw ye, u man kan ka kɛ dɔrɔtɔw ye walima mɔgɔ minw bɛ tɔnɔ nyini tilenbaliya la. Tinyɛ min bɛ lɔn jigi barika la, u ka kan ka to o le kan, ani ka sɔn o ma ni dusukunnyuman ye. A bɛnnin bɛ k'u sɛgɛsɛgɛ fɔlɔ. Ni jalakiyɔrɔ ma sɔrɔ u la, o tuma na, u bɛ se ka don o baara la. Muso minw b'a fɛ k'o baara nyɔgɔn kɛ fana, olu ka kan ka kɛ mɔgɔsɛbɛw ye. U kana kɛ mɔgɔ tɔgɔcɛnbagaw ye. U ka kan k'u yɛrɛ kɔlɔsi kosɛbɛ ani ka tilenninya kɛ koo bɛɛ la. Ala ka jama nyamɔgɔw dɛmɛbaga ka kan ka kɛ muso kelen tigi ye, min bɛ se k'a ka soo mara ani a ka denbaya. Mɔgɔ min b'o baara kɛ ka nya, o tigi bɛ tɔgɔnyuman sɔrɔ a ka nyamɔgɔya la, ani a bɛ jagwɛlɛya sɔrɔ ka kuma jigi koo la, an b'o min sɔrɔ Yezu Krista fɛ. Ne bɛ bataki nin ci i ma, ne hakili b'a la ka na bɔ i fɛ yen yan ni dɔɔni. Hali ni ne mɛnna fana, e bɛna se k'i yɛrɛ minɛcogo lɔn Ala ka somɔgɔw cɛma, min ye Ala ka jama ye, min kɛra tinyɛ juu sigiyɔrɔ n'a tintinyɔrɔ ye. An ka Alanyasiran, o ye gundoba ye! A y'a yɛrɛ kɛ mɔgɔ ye ka na, Nii Senuman y'a koo yira k'o gwɛya, mɛlɛkɛw y'a ye. A ka kibaru fɔra siya wɛrɛw cɛma, ani mɔgɔw lara a la dinyɛ kɔnɔ, a kɔsegira ka taa Ala fɛ. Mɔgɔ si tɛ se k'o sɔsɔ. Nii Senuman b'a fɔ k'a gwɛya ko laban tuma na, mɔgɔ dɔw bɛna u jigi bɔ Yezu Krista kan. U bɛna mɛnni kɛ nanbaranmɔgɔw fɛ, ani ka sɔn jinaw ma. U bɛna u yɛrɛ to nanbaranmɔgɔ galontigɛlaw b'u nigɛ olu minw dusukun finnin bɛ. O mɔgɔ nunu b'a fɔ ko a daganin tɛ ka furu kɛ. U bɛ mɔgɔw bali dumuni dɔw la k'u man kan k'o dumu. K'a sɔrɔ Ala y'o dumunifɛn nunu dan, minw lara Yezu la, olu ka dumu kɔsɔn, olu minw ye tinyɛ lɔn, u ka barika la Ala ye o dumuwaati la. Ala ye fɛɛn minw dan, o bɛɛ ka nyi. Foyi si man kan ka fili olu la, nga a daan ye an ka barika la Ala ye k'o dumu, bari Ala ka kuma ni Ala dali, y'u saniya. N'i bɛ i balimaw kalan n'o koo ye, i bɛna kɛ Yezu Krista ka baarakɛlanyuman ye. O min labɛnna jiginyuman ni kalannyuman barika la. Nga i ka ban siirinkolonw ni kumakolonw ma, minw ni Ala ka koo tɛ bɛn. I ka siran Ala nya. Nafa dɔɔni bɛ farikolo tolon na, nga nafa bɛ Ala nyasiran na kosɛbɛ. Bii ka hɛrɛ ni sini ta bɛɛ bɛ sɔrɔ o la. O kuma nin ye tinyɛ ye. Mɔgɔ bɛ se k'a jigi la o kan k'o minɛ ka nya. O le y'a to an bɛ baara kɛ ka sɛgɛn ani ka bondori kɛ, bari Ala ye mɔgɔ bɛɛ kisibaga ye, sankofɛrɛ minw sɔnna a ma. I ka kan ka o le nyini mɔgɔw fɛ, ani k'u kalan n'o ye. I kan'a to mɔgɔ si k'i dɔgɔya i ka denmisɛnya kama, nga i ka siranyuman yira u la, i ka kumacogo, n'i ka taamacogo fɛ, n'i ka mɔgɔ kanucogo, n'i ka lanaya, an'i ka mɔgɔsɛbɛya fɛ. Yan ni ne ka na yen, i ka jija ka Ala ka kuma fɔ jama cɛma, ka u waaju, ka u kalan fana. Ala ye see min d'i ma, i kana farati n'o ye. A y'o min d'i ma kirayakuma fɔwaati la, ani cɛkɔrɔbaw y'u bolo la i kan tuma min na. I ka kan ka olu to i dusu la, k'o minɛ ka nya kosɛbɛ. O la, mɔgɔw bɛɛ bɛn'a ye ko i jijanin lo. I k'i yɛrɛ minɛ ani k'i ka mɔgɔ kalancogo kɔlɔsi fana. E k'i jija o la, n'o kɛra, i bɛna i yɛrɛ kisi ani ka i lamɛnbagaw fana kisi. N'i bɛ cɛkɔrɔba ladi tuma min na, i kana kuma gwɛlɛman fɔ a ye. Nga i k'a ladi i n'a fɔ i faa. I ka kanbelenw ladi i n'a fɔ i kɔrɔw, walima i dɔgɔw. Muso minw kɔrɔla, i ka olu ladi i n'a fɔ i bamusow, muso minw ma kɔrɔ, ka olu ladi i n'a fɔ i kɔrɔmusow walima i dɔgɔmusow, cogo bɛnnin na. Mɔgɔ tɛ firiyamuso minw fɛ, i ka olu minɛ ni bonya ye. Nga ni deenw, walima mamadenw bɛ firiyamuso min fɛ, o deen nunu le ka kan k'a dɛmɛ u ka Alanyasiran kɔsɔn. O cogo la, u bɛn'a yira u wolobagaw la k'olu le ka kan ka lɔ n'u ka koo ye, bari o le ka di Ala ye. Min kɛra firiyamuso ye sɛbɛ la, mɔgɔ tɛ a fɛ k'a janto a la, ale b'a jigi bɛɛ la Ala kan. A bɛ Ala dali ka dɛmɛ nyini suu fara tile kan. Nga firiyamuso min bɛ miiri farisogo ka nisɔndiya koo la dama, ale sara ka ban Ala faan fɛ, nga a nyanaman lo farisogo la. I ka kan ka min fɔ u ye waasa u ka se ka to jalakibali ye, o filɛ nin ye. Mɔgɔ o mɔgɔ min tɛ janto a ka somɔgɔw la, o tigi ye Krista ka sira bila. Alalɔnbali yɛrɛ ka fisa n'a ye. I ka kan ka firiyamuso min jati k'a fara firiyamusow kan k'a tɔgɔ sɛbɛn, ale ka kan ka saan bi wɔɔrɔ nyɔgɔn sɔrɔ, ani a ka kɛ muso ye min tun furula cɛɛ kelen dama fɛ. Ani a tɔgɔnyuman ka fɔ a ka kɛwalinyuman kɔsɔn, a ka kɛ muso ye min y'a deenw lamɔ ka nya, ka kɛ lonan ladonbaga ye. A ka kɛ Ala ka jama dɛmɛbaga ye. A ka kɛ mɔgɔ ye min y'a hakili to dɛsɛbagatɔw la ka olu dɛmɛ, ani ka kɛwalinyuman sifa bɛɛ kɛ. Nga firiyamuso minw ma kɔrɔ fɔlɔ, i ka ban olu la, bari ni cɛko y'u minɛ tuma min na, u tɛ Krista koo jati tugu, u b'a fɔ ko u bɛ furu. Ani u b'u yɛrɛ bila jalaki la, bari u y'u ka layidu tanin cɛn. Ani ka fara o kan, u bɛ kɛ salabagatɔw ye, ka to ka yaalayaala sodaw la. O dama tɛ, u daa ka ca, u daa bɛ don mɔgɔ ka koow bɛɛ la, u man kan k'u daa don minw na. O le y'a to, ne b'a fɔ firiyamusow ye, minw ma kɔrɔ, ko u ka furu ka deenw sɔrɔ ani u ka janto u ka somɔgɔw la, waasa u kana yɔrɔ di an jugu ma a ka se ka kumajugu fɔ an koo la, bari firiyamuso dɔw ye siranyuman bila, ka tugu Sutana kɔ. Muso min lara Krista la, n'a kɛra ko firiyamusow bɛ ale ka mɔgɔw cɛma, ale yɛrɛ k'a janto olu la, a kana u to Ala ka jama kunna, waasa olu ka se ka firiyamusow dɛmɛ, mɔgɔ tɛ minw fɛ. Mɔgɔ minw b'u ka nyamɔgɔya baara kɛ ka nya, olu ka kan ni bonya ye kosɛbɛ, janko minw bɛ waajuli kɛ ani minw bɛ mɔgɔw kalan. Bari a fɔra Ala ka kuma na ko: “Ni misi bɛ sɛnɛ kɛra suman kɔnɔ, i kan'a daa siri,” ani “Baarakɛla ka kan n'a ka sara ye.” I kana sɔn ka nyamɔgɔ jalaki, n'i m'a ka koo kɛnin mɛn seere mɔgɔ fila, walima mɔgɔ saba daa la. Ni mɔgɔ min ye kojugu kɛ, i k'o tigi jalaki mɔgɔ bɛɛ nyana waasa ni tɔ nunu y'o ye, olu bɛna siran. Ne b'i dali Ala ni Yezu Krista nyana, ani mɛlɛkɛw, ko i ka koo nunu bɛɛ kɛ, i kana mɔgɔ bɔ mɔgɔ la. I kana teliya k'i bolo la mɔgɔ si kan, k'o tigi don Ala ka baara la. I kana jɛn ni mɔgɔ si ye ka kojugu kɛ. Ele ka to k'i yɛrɛ saniya. I kana to ka jii dama min tugu, i ka to ka duvɛn min dɔɔni dɔɔni i ka kɔnɔdimimisɛnw an'i ka banamisɛnw kɔsɔn. Mɔgɔ dɔ ka kojugu bɛ lɔn sanni kiti ka tigɛ, nga dɔw ta bɛ lɔn kɔfɛ le. Kɛwalinyuman fana bɛ ye joona, hali minw yeli ka gwɛlɛ, u si tɛ se ka to dogo la. Mɔgɔ minw kɛra jɔɔnw ye olu k'u ka kuntigiw bonya ka nya, waasa mɔgɔ si kana yɔrɔ sɔrɔ ka kumajugu fɔ Ala koo la, ani an ka kalan koo la. Jɔɔn minw ka kuntigiw jigi bɛ Krista kan, olu kana ban k'u bonya, ko bari u balimaw lo, nga u ka baara kɛ u ye kosɛbɛ, bari mɔgɔ minw b'u ka baara nunu tɔnɔ sɔrɔ, olu kɛra Krista kɔmɔgɔw ye aw yɛrɛ bɛ minw kanu. E ka mɔgɔw kalan ni o koo ye ani ka u ladi. Ni mɔgɔ dɔ bɛ mɔgɔw kalan ni koo wɛrɛ ye, n'o tigi ka kuma ni an Matigi Yezu Krista ka kuma nyanaman ma kɛ kelen ye, ani n'o tɛ bɛn Ala sira taamacogo ma, ani kalan min bɛ bɛn ni Alanyasiran ye, o tigi ye yɛrɛbonyala dama ye. A tɛ foyi lɔn. Sɔsɔli ka d'a ye kosɛbɛ ani a bɛ kuma samasama, o min bɛ na ni nyagoya ni kɛlɛ ye, ani tɔgɔ cɛnni, ni bisigijugu. A fana bɛ na ni sɔsɔli caaman ye, min bɛ wili mɔgɔw cɛ minw kɛra nalomanw ye. O mɔgɔ nunu tɛ tinyɛ lɔn tugu. U bɛ miiri ko u bɛna nafolo sɔrɔ Alasira taama barika la, ka kɛ fɛntigiw ye. Mɔgɔ min ka sɔrɔ b'a wasa, tinyɛ na, Alasira taamako kɛra dɛmɛyɔrɔ ye ale fɛ. An ma na ni foyi ye dinyɛ na, an tɛna taa ni foyi ye fana. O la, n'an bɛ an daladumuni sɔrɔ ani ka fani sɔrɔ fana, olu ka kan ka an wasa. Nga mɔgɔ minw b'a fɛ ka kɛ fɛntigiw ye, olu nigɛra ka sɔrɔ miirijugu fɛ, o minw bɛ mɔgɔw cɛn ani k'u bila halakili la, bari wari nigɛ ye kojugu sifa bɛɛ bɔyɔrɔ ye. Mɔgɔ dɔw tugura a nɔɔ fɛ k'o jigi bɔ Krista kan, ka tɔɔrɔ la u yɛrɛ kan. Nga e kɔni, Ala ka mɔgɔ, i k'i yɛrɛ tanga o fɛɛnw bɛɛ ma, ka to ka tilenninyakow kɛ, ka siran Ala nya, k'i jigi la a kan, k'a kanu, ka munyuli kɛ, ani ka to ka nyumanya kɛ mɔgɔw ye. I ka jija k'i jigi to Krista kan, ka sini hɛrɛ banbali sɔrɔ, bari Ala y'i wele o le kama, i n'a fɔ i tun ye seereyanyuman kɛ cogo min na, seere caaman nyana. Ala min bɛ nii don fɛɛn bɛɛ la ani Yezu Krista min lɔra Pɔnsi Pilati nyakɔrɔ ka seereyanyuman kɛ, n b'a fɔ i ye olu nyana ko baara min dira i ma, i ka jija k'o kɛ, jalakiyɔrɔ kana sɔrɔ i la, fɔɔ ka taa se an Matigi Yezu Krista ka nalon ma. Ala kelenpe min ye setigi ye, ni dubatigi, masaw ka masa, matigiw ka Matigi, bɛna o kɛ n'a ka waati latigɛnin sera tuma min na. Ale kelen le tɛ sa, a bɛ kɛnɛ na mɔgɔ si tɛ se ka gwɛrɛ o min na. Mɔgɔ ma Ala ye, mɔgɔ tɛ se k'a ye fana. Bonya ni sebagaya ye ale ta ye tuma bɛɛ. Amiina. I k'a fɔ bii fɛntigiw ye k'u kana u yɛrɛ bonya, ani u kana u jigi la o fɛɛn tɛmɛta nunu kan, nga u k'u jigi la Ala kan, ale min bɛ fɛɛnw bɛɛ di an ma caaman, waasa an ka nisɔndiya. I k'a fɔ u ye ko u ka konyuman kɛ, kɛwalinyuman kɛli ka kɛ u ka nafolo ye. U k'u tigɛw dayɛlɛ ka mɔgɔ wɛrɛw dɛmɛ. O cogo la, u bɛna nafolo sɔrɔ sini, ani u fana bɛna hɛrɛsɛbɛ sɔrɔ. Timote, koo minw kalifara i ma, i ka olu mara kosɛbɛ. I k'i yɛrɛ tanga kuma fufafu ma olu minw ni Ala sira tɛ bɛn, o min bɛ jati lɔnniya ye, k'a sɔrɔ lɔnniyasɛbɛ tɛ. Mɔgɔ dɔw y'o lɔnniya nin nyɔgɔn sɔrɔ, o le y'a to u ye Ala sira bila. Ala ka nɛɛma ka kɛ aw ye. Ne Pɔli min kɛra Yezu Krista ka ciden ye Ala sago la, a ye ne ci ka sini hɛrɛ koo fɔ o min bɛ sɔrɔ Yezu Krista barika la, Ala ye o min layidu ta. Ne bɛ nin bataki ci Timote ma, ele min kɛra ne ka deen ye ne bɛ min kanu haali. An Faa Ala n'an Matigi Yezu Krista ka makari e la, ka nɛɛma ni hɛrɛ kɛ i ye. Ne bɛ barika la Ala ye, ne bɛ baara kɛ ale min ye ni kɔnɔgwɛ ye i n'a fɔ ne y'o sɔrɔ n bɛmaw fɛ cogo min na. Ne bɛ to ka Ala dali i ye suu ni tile. Ni ne hakili jigira i kasiko la tuma min na, o waati la, ne b'a fɛ k'i ye teliya la waasa ne ka se ka nisɔndiya. Ne hakili b'i ka jigisɛbɛ koo la. Jigi min tun bɛ i mamamuso Loyisi an'i bamuso Unisi fɛ, ne lanin b'a la k'o nyɔgɔn b'i fɛ fana. Ne ye n bolo la i kan tuma min na, Ala ye seko min d'i ma, ne b'i hakili jigi o koo la, ko i k'o minɛ ka nya kosɛbɛ. Bari Ala ye Nii Senuman min d'an ma, o ma d'an ma waasa an ka kɛ siranbagatɔw ye, o bɛ fanga le d'an ma, ka kanuya don an dusu la, k'an kɛ yɛrɛminɛlaw ye. I kana maloya k'an Matigi koo fɔ, i kana maloya ni ne fana koo ye, ne min bɛ kaso la ale kɔsɔn. Nga i ka sɔn tɔɔrɔ ma i n'a fɔ ne, kibaru diman kɔsɔn, Ala barika la. Ale min ye an kisi ni ka an wele ka kɛ a ka siya ye, o ma kɛ an ka kɛwalinyuman sababu la, nga ale yɛrɛ ka koo latigɛnin, n'a ka nɛɛma sababu lo. A y'o nɛɛma labɛn an ye Yezu Krista barika la kabini dinyɛ ma dan fɔlɔ. O nɛɛma nin kɛra an ye sisan an Kisibaga Yezu Krista ka nali barika la. An b'a lɔn kibaru diman barika la ko Yezu Krista ye saya mako sa ka hɛrɛ banbali sira yira an na. Ala ye ne wele o kibaru diman fɔli kama ka n kɛ ciden ni karamɔgɔ ye. O le kɔsɔn, ne bɛ tɔɔrɔ nunu munyuna. Nga o ma kɛ maloya koo ye ne fɛ, bari ne ye n jigi la min kan, ne b'ale lɔn, ani ne lanin b'a la ko ne jigi bɛ min kan, see b'a ye k'o mara n ye fɔɔ laban loon na. Ne ye kumanyuman minw fɔ i ye, i k'i yɛrɛ cogo kɛnyɛ ni olu ye. Jigi ka to i fɛ ani kanuya, an y'o min sɔrɔ Yezu Krista ka jɛnnyɔgɔnya fɛ. I ye konyuman minw sɔrɔ, i ka olu minɛ kosɛbɛ Nii Senuman barika la, ale min bɛ an kɔnɔ. E y'a lɔn ko Krista kɔmɔgɔ minw bɛ Azi mara la, olu bɛɛ banna ne la. Fizɛli ani Ɛmozɛni nii b'o la. Matigi ka barika don Onezifɔri ka somɔgɔw la, bari a ye ne jigi tugu sinyɛ caaman na. Ne kɛra kasoden ye, o bɛɛ n'a ta, a ma maloya ni ne koo ye. O le y'a to a sera Ɔrɔmu tuma min na dɔrɔn, a jijara ka ne yɔrɔ nyini fɔɔ ka ne ye. Matigi ka makari a la laban loon na. A ye dɛmɛ min kɛ ne ye k'an to Efɛzi, ele yɛrɛ bɛ o kala ma ka tɛmɛ bɛɛ kan. Ele kɔni, ne deen, e ka barika don i yɛrɛ la Yezu Krista ka nɛɛma barika la. I ye fɛɛn min mɛn ne fɛ seere caaman nyana, i k'o kalifa mɔgɔsɛbɛw ma minw bɛ se ka mɔgɔ wɛrɛw kalan n'o ye. E ka sɔn tɔɔrɔ ma i n'a fɔ Yezu Krista ka sɔlidasinyuman. Ni mɔgɔ min donna sɔlidasiya la, n'a b'a fɛ k'a kuntigi sago kɛ, a bɛ jija o baara la, a t'a niin don baara wɛrɛ la. Farikolo tolonkɛla fana tɛ jala sɔrɔ abada, n'a ma sariya bɛɛ labato. Sɛnɛkɛla min bɛ sɔn ka baara kɛ, ale le bɛ kɔn ka suman tigɛ. Ne bɛ koo minw fɔra i ye, i ka miiri olu la k'u faamu, bari Matigi bɛna hakili d'i ma o koo bɛɛ la. I k'i hakili jigi Yezu Krista koo la, ale min sara ka kunun, ale min kɛra Dawuda deen ye, ne b'ale kibaru le fɔ. O kibaru diman fɔli kɔsɔn, ne bɛ sɛgɛn na, u ye ne siri ni jɔrɔkɔ ye, i n'a fɔ kojugukɛla. Nga mɔgɔ si tɛ se ka Ala ka kuma ka fɔli bali. O le y'a to ne bɛ koo bɛɛ munyu Ala ka mɔgɔwolomaninw kɔsɔn, waasa olu fana ka kisi Yezu Krista barika la, ani ka bonya sɔrɔ daan tɛ min na. Nin kuma kɛra tinyɛ yɛrɛ ye: N'an sɔnna ka sa Matigi kɔsɔn, an fana bɛna kunun ka to n'a ye. N'an jijara ka tɔɔrɔ munyu a kɔsɔn, an bɛna kuntigiya kɛ n'a ye. N'an banna ale ka koo ma, ale fana bɛna ban an na. N'an kɛra janfatiw ye, ale bɛ to a ka kantigiya la, bari ale tɛ se ka ban a yɛrɛ la. I ka mɔgɔw hakili jigi o koow la Ala nyakɔrɔ k'a gwɛlɛya u ma k'u ka u yɛrɛ kɔlɔsi sɔsɔli gwansan ma. O tɛ foyi nya fɔɔ k'u lamɛnbagaw nigɛ dɔrɔn. I jija ka kɛ mɔgɔsɛbɛ ye Ala nyakɔrɔ, baarakɛlasɛbɛ min tɛ maloya fewu, min bɛ tilen ka tinyɛ fɔ. I yɛrɛ kɔlɔsi kuma caaman ma, o ma nyi. Bari mɔgɔ minw b'o kɛ, o tigiw bɛ don tilenbaliya la. O tigiw ka kuma bɛ cɛnni kɛ i n'a fɔ jolijugu bɛ farisogo cɛn cogo min na. Imene ni Filɛtɔsi y'o mɔgɔ nunu dɔw ye. Olu minw ye tinyɛ to yen, n'u b'a fɔ ko suuw kununna ka ban, o cogo la u ye mɔgɔ dɔw jigi tigɛ, u tɛ la Ala la tugu. O bɛɛ n'a ta, Ala ye koo min dabɔ, o bɛ to a nɔɔ na, kuma nin le kɛra o taamasinyɛ ye, ko: “Minw kɛra Matigi ta ye, a b'olu lɔn,” ani “Mɔgɔ minw bɛɛ bɛ Matigi bato, olu ka faran tilenbaliya koo la.” A ma kɛ ko minan minw dilanna ni sanu ye, walima ni warigwɛ ye, k'olu dama le bɛ soo kɔnɔ, nga minw dilanna ni yiri ye, ani bɔgɔ ye, olu fana bɛ yen. Dɔw kɛra baarasaniyanin kama, dɔw fana kɛra nyamanyamacɛ ta ye. Ni mɔgɔ min ye a yɛrɛ saniya, k'a yɛrɛ tanga koo nunu ma, ne y'o minw fɔ, o tigi bɛna kɛ daganyuman ye min saniyanin bɛ. A b'a Kuntigi mako nya, a labɛnnin bɛ konyuman sifa bɛɛ kɛli kama. I k'i yɛrɛ kɔlɔsi nigɛjugu ma, min bɛ sɔrɔ kanbelenya la, i ka to ka tilenninyakow kɛ, k'i jigi la Matigi kan, k'a kanu, ani ka hɛrɛ nyini ni mɔgɔw ye, minw y'u jigi la Matigi kan ni kɔnɔgwɛ ye. I ka ban sɔsɔli gwansanw ma, i b'a lɔn k'olu bɛ kɛlɛw wili dɔrɔn. Bari Matigi ka baarakɛla man kan ka kɛlɛ kɛ, a ka kan ka mɔgɔ bɛɛ koo diya a yɛrɛ ye, ani ka kɛ mɔgɔ ye, min bɛ se mɔgɔw kalan na ni munyuli ye. Mɔgɔ minw tɛ sɔn a ka kalan ma, a ka kan k'olu minɛ ni dususuma ye, n'a sɔrɔ Ala bɛna u dɛmɛ u ka nimisa waasa u ka tinyɛ lɔn. O cogo la, u bɛna u yɛrɛ sɔrɔ ka bɔ Sutana ka jɔɔ la, min tun ye u minɛ janko a ka to k'a sago kɛ n'u ye. I hakili ka to a la ko laban tuma na, waati bɛna gwɛlɛya. Mɔgɔw bɛna kɛ sɔnjuguw ye, wari koo bɛna diya u ye kosɛbɛ, u bɛna kɛ yɛrɛbonyalaw ye. U bɛna Ala tɔgɔ cɛn ani u tɛna mɛnni kɛ u wolobagaw fɛ, u bɛna kɛ nyumanlɔnbaliw ye, ani u tɛna Ala ka koow jati. U bɛna kɛ mɔgɔ kogwɛlɛnw ye, makari tɛna sɔrɔ u la, u bɛna kɛ mɔgɔ tɔgɔcɛnbagaw ye, ni mɔgɔ farimanw, ani mɔgɔjuguw. Konyuman tɛna diya u ye. U bɛna kɛ janfatiw ni dusutigiw ye. U bɛna kɛ mɔgɔw ye yɛrɛbonya bɛna fanga sɔrɔ minw kan. Dinyɛ koo bɛna diya u ye ka tɛmɛ Ala kan. U bɛna u yɛrɛ kɛ Ala nyasiranbagaw ye, nga o tɛ sɔn tinyɛ ma o min ye see sɔrɔyɔrɔ ye. E k'i yɛrɛ kɔlɔsi o mɔgɔ sugu nunu na. O mɔgɔ nunu dɔw bɛ don soow kɔnɔ, ka muso hakilitanw nigɛ ka olu sɔrɔ. O muso nunu kɛra kojugu ka jɔɔnw ye, nigɛjugu b'u sama k'u bali koo sifa bɛɛ la. O muso nunu bɛ tinyɛ nyini tuma bɛɛ, nga u fana tɛ se k'a lɔn. Zannɛsi ni Zanbɛrɛsi murutira Musa ma cogo min na, o cogo la mɔgɔ nunu bɛ ban tinyɛ ma. U ka miiriya man nyi, u jigi tɛ Matigi kan sɛbɛ la. Nga u tɛna se ka taa nya. Zannɛsi ni Zanbɛrɛsi ta kɛra cogo min na, o cogo kelen na, bɛɛ bɛna o mɔgɔ nunu ka nalomanya ye. Ele kɔni, e bɛ ne ka kalan kala ma, ni n ka taamacogo, ani n ka koo latigɛninw, ne lara Matigi la cogo min na, i bɛ o kala ma. Ne munyuna, ka mɔgɔw kanu, ani n jijara cogo min na fana, ka tɔɔrɔ ka sɛgɛn Antiyɔsi ni Ikɔniyɔmu ani Lisitɔrɔ, e bɛ o bɛɛ kala ma. O tɔɔrɔ nunu ye ne sɔrɔ, nga Matigi ye ne tila ka bɔ o bɛɛ la. Mɔgɔ minw bɛɛ b'a fɛ ka jɛn ni Yezu Krista ye ka kɛ Alanyasiranbagaw ye sɛbɛ la, olu bɛna tɔɔrɔ sɔrɔ. Mɔgɔ minw ka jugu ani nanbaranmɔgɔw, olu bɛna juguya ka taa nya. U bɛna mɔgɔ tɔw kɛ u bɛ fili ani k'u yɛrɛ fili fana. Ele kɔni, e kalanna koo minw na, ani ka sɔn u ma, i ka jija k'o minɛ ka nya, bari i ye o koo kalan mɔgɔ min fɛ, i b'o tigi lɔn. Kabini i denmisɛn tuma, i ye Ala ka kuma lɔn, min bɛ se ka hakilitigiya d'i ma, o min barika la mɔgɔ b'a jigi la Yezu Krista kan ka kisi. Ala ka kuma bɛɛ sɛbɛnna Ala yɛrɛ ka sebagaya barika la. Nafaba b'o la ka mɔgɔw kalan n'a ye, ani ka galon ban, ani ka mɔgɔw bila siranyuman kan, ka u tilen, waasa Ala ka baarakɛla ka kɛ mɔgɔ dafanin ye ka se ka konyuman sifa bɛɛ kɛ. Krista ka nali n'a ka kuntigiya kɔsɔn, ne b'a nyini e fɛ Ala ni Yezu Krista nyakɔrɔ, ale min bɛna na nyanamanw ni suuw kiti, ko i ka Ala ka kuma fɔ tuma bɛɛ, waati nɔgɔman ni waatigwɛlɛn na. Mɔgɔ minw filila, i k'olu jalaki k'u ka filiyɔrɔ yira u la, k'u ladi ni munyuli ye u kalanwaati la. Waati dɔ bɛna se mɔgɔw tɛna sɔn kalansɛbɛ ma, nga olu yɛrɛ ka miirijugu bɛna kɛ u bɛ kalanfa caaman ta u yɛrɛ ye, u bɛ koo minw fɛ, olu bɛna o fɔ u ye. U tɛna sɔn tinyɛ ma k'a lamɛn, siirin lamɛnni le bɛna diya u ye. Nga ele kɔni, i k'i yɛrɛ minɛ kosɛbɛ koo bɛɛ la. I ka sɛgɛn munyu, k'i ka baara kɛ ka nya min ye kibaru diman fɔli ye. Ne yɛrɛ kɔni, ne kɛra saraka ye Ala ma ka ban, waati sera ne ka bɔ dinyɛ na. Ne ye baara kɛ ka nya, ne sera ne ka boli danyɔrɔ ma, n jigi lanin tora Matigi kan. Sisan yɛrɛ, ne ka see sɔrɔli sara bɛ ne makɔnɔna, o ye tilenninya sara ye, Matigi ale min kɛra kititigɛla tilennin ye, a bɛna o di ne ma laban loon na. A tɛna o di ne kelen dama ma dɛ, nga mɔgɔ minw b'a ka nali makɔnɔna ni nisɔndiya ye, a bɛn'a di olu bɛɛ ma fana. I ka banba ka na ne fɛ joona. Demasi faranna ne la bari a ye dinyɛ kanu ka tɛmɛ, a taara Tesaloniki. Keresan taara Galati mara la, Titi fana taara Dalimati mara la. Luka kelen le bɛ ni ne ye yan. N'i bɛ na, i ka na ni Mariki ye. Ale bɛ se ka ne dɛmɛ baara la. Ne ye Tisiki ci Efɛzi. N'i bɛ na, i ka ne ka foroca ta ka na n'o ye, ne y'o min to Karipisi fɛ Torowasi. I ka na ni kitabuw fana ye, ne bɛ minw fɛ yɛrɛ, o ye gololamanw ye. Numucɛ Alɛkisandiri ye kojugu caaman kɛ ne la dɛ, Matigi le bɛn'a sara ka kɛnyɛ n'a ka koo kɛtaw ye. Ele, i k'i yɛrɛ kɔlɔsi a la, bari a y'an sɔsɔ kosɛbɛ an ka waajuli kɛtuma na. Ne ka kiti fɔlɔ loon na, mɔgɔ si ma sɔn ka foyi fɔ ka ne dɛmɛ, u bɛɛ bolila ka ne to. Ne bɛ Ala dali a ka yafa u ma. Nga Matigi yɛrɛ le tora ne fɛ ka fanga di ne ma, fɔɔ a kɛra ten, ne sera ka Ala ka kuma fɔ u ye ka gwɛ. O cogo la, siya wɛrɛw bɛɛ y'o mɛn, ani ne kisira ka bɔ waraba daa la ten. Matigi bɛna ne kisi kojugu sifa bɛɛ ma, ka n don arijana na. Bonya ka la ale kan tuma bɛɛ. Amiina. I ka Pirisika ni Akilasi, ani Onezifɔri ka somɔgɔw fo. Erasiti tora Korɛnti, ne ye Torofimu to Mile, bari a tun man kɛnɛ. I ka banba ka na yan ni saminya ka don. Ebilisi, ni Pidansi, ani Linisi, ni Kulodiya, ani an balimaw bɛɛ b'i fora. Matigi ka to i fɛ, Ala ka nɛɛma kɛ aw bɛɛ ye. Ne Pɔli min ye Ala ka jɔɔn, ani Yezu Krista ka ciden ye, ne welela waasa ka Ala ka mɔgɔwolomaninw dɛmɛ u ka se k'u jigi la Ala kan, ani ka tinyɛ lɔn min bɛ bɛn ni Alanyasiran ye. O jigi nin bɛ hɛrɛ banbali kan, Ala tinyɛtigi y'a daa di o min koo la kabini dinyɛ ma dan fɔlɔ. A ka waati latigɛnin sera tuma min na, a y'o yira kibaru diman barika la. An kisibaga Ala le y'o baara kalifa ne ma. Ne bɛ bataki nin ci Titi ma ele min ye ne ka deen ye tigitigi jigi koo la Krista la, anw bɛ o min kɔ. Faa Ala ni Yezu Krista an kisibaga ka nɛɛma ni hɛrɛ kɛ i ye. Ne y'i to Kɛrɛti mara la min kama, o ye i ka Ala ka jama ka koo tɔw nyanabɔ ka nyamɔgɔw sigi jama kunna dugu kelen kelen bɛɛ la, k'o kɛnyɛ ni n ka ladili ye. I ka mɔgɔ woloma, jalakiyɔrɔ tɛ min na, a ka kɛ muso kelen tigi ye, ani a ka deenw ka kɛ mɔgɔw ye minw jigi bɛ Krista kan, minw tɔgɔjugu tɛ fɔ u ka taamajugu kɔsɔn, walima u ka murutili kama. Ala ka jama nyamɔgɔ, ale min ye a ka jama marabaga ye, o ka kan ka kɛ mɔgɔ ye jalakiyɔrɔ tɛ min na. A kana kɛ yɛrɛ sagokɛla ye, a kana kɛ dusutigi ye fana, walima dɔrɔtɔ, walima mɔgɔ fariman ye, ani a kana kɛ mɔgɔ ye min bɛ nanbaran kɛ ka tɔnɔ sɔrɔ. O tigi ka kan ka kɛ mɔgɔ ye min bɛ lonan ladon, konyuman ka di a ye, miirinyumantigi, mɔgɔsɛbɛ, mɔgɔ saniyanin, ani yɛrɛminɛla. Jigi bɛ sɔrɔ Ala ka kuma min barika la, u nɔrɔnin ka to o la, o min bɛnnin bɛ n'an ka kalan ye. O cogo la, u bɛna se ka mɔgɔw ladi ni kalansɛbɛ ye, minw b'u sɔsɔ, ka olu ka filiyɔrɔ yira u la. Mɔgɔ caaman bɛ yan, minw tɛ u yɛrɛ majigi, u kɛra kumakolon fɔbagaw ye dama, u kɛra mɔgɔlafilibagaw ye fana. U caaman ye Zuwifu ye minw sɔnna Krista ma. I ka kan k'u bali u kana kuma. U bɛ se ka faaw n'u deenw kunna cɛn, n'u ka kalanjugu ye u b'o min kɛ tɔnɔjugu kama. Kɛrɛtika dɔ, min tun kɛra u ka kira dɔ ye, ale tun ye kuma nin fɔ ko: “Kɛrɛtikaw ka galontigɛ ka ca, u ka fari i n'a fɔ kongosogow, nugubatɔw ni salabagatɔw lo.” Kuma nin kɛra tinyɛ ye, o le y'a to i k'a gwɛlɛya u ma, janko u ka se ka la Ala la sɛbɛ la. I b'a fɔ u ye ko u kana nɔrɔ Zuwifuw ka siirinw na tugu, ani mɔgɔ minw banna tinyɛ na, ko u kana sɔn olu ka fɔta ma. Mɔgɔ minw saniyanin bɛ Ala nyakɔrɔ, fɛɛn bɛɛ saniyanin lo olu fɛ, nga mɔgɔ minw banna Ala la n'u saniyanin tɛ, olu fɛ, fɛɛn bɛɛ saniyanin tɛ, bari u ka miiri n'u ka dusukun bɛɛ finnin lo. U b'u yɛrɛ kɛ Alalɔnbagaw ye, nga u ka kɛwaliw b'a yira k'u tɛ sɔn Ala ma. U kɛra fɛnjuguw ye, u tɛ mɛnni kɛ, u tɛ se ka konyuman si kɛ. Ele kɔni, i ka mɔgɔw ladi ka kɛnyɛ ni kalannyuman ye. I k'a fɔ cɛkɔrɔbaw ye k'u ka kɛ mɔgɔsɛbɛw ye, minw ka miiriya ka nyi, jigi bɛ minw fɛ kosɛbɛ, ni kanuya ni munyuli. O cogo la fana, i k'a fɔ musokɔrɔbaw ye ko olu taamacogo ka bɛn ni mɔgɔsɛbɛya ye Ala faan fɛ. U kana kɛ mɔgɔ tɔgɔcɛnlaw ye, ani u fana kana kɛ dɔrɔtɔw ye. Olu ka mɔgɔw dege konyuman kɛli la. O cogo la, muso minw ma kɛ musokɔrɔbaw ye fɔlɔ, u b'u dɛmɛ u ka u cɛɛ n'u deenw kanu. U ka kɛ muso hakilitigiw ye minw ka kɛwaliw ka nyi, minw jijanin bɛ u ka sokɔnɔbaaraw la, ani minw sɔɔn ka nyi, ani u b'u yɛrɛ majigi u cɛɛw ye, waasa mɔgɔw kana se ka Ala ka kuma lɔgɔbɔ. O cogo la fana, i ka kanbelenw ladi ko olu ka kɛ mɔgɔsɛbɛw ye fɛɛn bɛɛ la. I ka cogonyuman yira u la, k'i ka kalan minɛ ka nya. I ka kuma ka kɛ kuma ye, mɔgɔ tɛ se ka min sɔsɔ waasa an juguw kana fɔta sɔrɔ an kama, u ka to maloya la. I ka jɔɔnw ladi ko olu ka kan ka u yɛrɛ majigi k'u koo diya u kuntigiw ye koo bɛɛ la, u kana u sɔsɔ, ani u kana u sonya cogo si la. U k'u ka mɔgɔsɛbɛya dafanin yira u la tuma bɛɛ. O cogo la, u bɛna an kisibaga Ala ka koo bonya. Bari Ala y'a ka nyumanya yira kɛnɛ kan adamaden bɛɛ bɛ se ka kisi min barika la. Ale min b'a yira an na ko an ka siran Ala nya ani ka ban nin dinyɛ nigɛjuguw la, waasa k'an to bii dinyɛ na, an ka se k'an yɛrɛ minɛ ka taama tilenninya la Ala nyakɔrɔ. K'an to nisɔndiya loon makɔnɔni na, o min ye masaba Ala an kisibaga Yezu Krista ka nɔɔrɔ loon ye. Ale lo y'a yɛrɛ di an kɔsɔn, waasa k'an kunmabɔ tilenbaliya koow bɛɛ la, ani k'an saniya k'an kɛ a yɛrɛ ka jama ye, k'a kɛ mɔgɔw ye minw labɛnnin bɛ konyuman kɛli kama. O cogo la, i ka kan ka mɔgɔw kalan, k'u ladi, k'u filiyɔrɔ fɔ u ye ni kuntigiya ye. I kana to mɔgɔ si k'i dɔgɔya fana. I k'a fɔ bɛɛ ye ko u k'u yɛrɛ majigi kuntigiw ni faamaw ye, k'u bonya, ani u labɛnnin ka to konyuman sifa bɛɛ kɛli kama. U kana mɔgɔ si tɔgɔ cɛn, u kana kɛlɛ kɛ, u k'u yɛrɛ kɛ mɔgɔsɛbɛw ye, ka munyu bɛɛ kɔrɔ tuma bɛɛ. Bari fɔlɔfɔlɔ an fana tun ye hakilitanw ye, mɔgɔ murutininw, an tun filila, nigɛjugu sifa bɛɛ, ni yɛrɛsagokɛ tun y'an kɛ jɔɔnw ye, an tun bɛ juguya, ni sɔnjuguya la. An koo fana tun man di nyɔgɔn ye. Nga an kisibaga Ala y'a ka nyumanya n'a ka kanuya yira mɔgɔw la tuma min na, a y'an kisi. O ma kɛ ko an ka kɛwalinyuman kɛli kɔsɔn, nga a ka makari le kɔsɔn a y'o kɛ, an dusu yɛlɛmana jii kɔnɔ koli fɛ Nii Senuman barika la, sisan an nyanaman lo Ala faan fɛ. A ye o Nii Senuman d'an ma fɔɔ ka nya an kisibaga Yezu Krista barika la, janko Ala ye an minw kɛ mɔgɔtilenninw ye a ka nɛɛma barika la, an ka hɛrɛ banbali sɔrɔ an jigi bɛ o min kan. Kuma nin ye tinyɛ ye i bɛ se k'i jigi la o min kan. Ne b'a fɛ i ka to o kan k'a fɔ ka gwɛlɛya, waasa mɔgɔ minw ye u jigi la Ala kan, olu ka u yɛrɛ bila konyuman kɛli la, o le ka nyi ani nafa b'o la mɔgɔw fɛ. Nga i k'i yɛrɛ kɔlɔsi kumakolon, ni mɔgɔ buruju fɔko, ani sɔsɔli ni sariya koo mankan ma. U tɛ foyi nya, o ye gwansan ye. Mɔgɔ min bɛ farali kɛ, i k'o tigi lasɔmi fɔɔ sinyɛ fila. O kɔ, i k'o tigi niin bɔ aw fɛ. I k'a lɔn k'o mɔgɔ sifa nin ye sira tilennin bila ka ban ani a ka kojugu ye jalaki ben a kan. Ni ne ye Aritimasi, walima Tisiki ci i fɛ tuma min na, i ka banba ka na ne kunbɛn Nikopolisi, bari ne y'a latigɛ ka saminya kɛ o yɔrɔ la. I ka koo bɛɛ kɛ waasa Zenasi ale min ye mɔgɔ dɛmɛbaga ye kiti la, ani Apolɔsi nunu ka taamako bɛ nya, u kana fɔn foyi la. An ka mɔgɔw fana ka kan ka konyuman kɛli dege, waasa u bɛna se ka koo gwanninmanw nyanabɔ, o cogo la, u tɛna to gwansan. Mɔgɔ minw bɛ ni ne ye, olu bɛɛ b'i fora, i k'an teriw fo, minw kɛra Krista taw ye. Ala ka nɛɛma kɛ aw bɛɛ ye. Ne Pɔli min kɛra kasoden ye Yezu Krista ka baara kɔsɔn, ne, ani an balimacɛ Timote, bɛ bataki nin ci an tericɛnyuman, n'an baarakɛnyɔgɔn Filemɔn ma, ani an balimamuso Afiya ma, n'an tɔnyɔgɔn Arisipi ma, ani Krista kɔmɔgɔ minw bɛ lajɛn i ka soo kɔnɔ. An Faa Ala ni an Matigi Yezu Krista ka nɛɛma ni hɛrɛ kɛ aw ye. Ne ka Ala daliwaatiw la ne bɛ to ka barika la Ala ye i kɔsɔn bari, i bɛ Krista kɔmɔgɔw kanu cogo min na, ani i jigi bɛ Matigi Yezu kan cogo min na, ne y'o mɛn. Ne bɛ Ala dali janko balimaya min bɛ an ni nyɔgɔn cɛ Krista barika la, o ka se ka taa nya kosɛbɛ. An ka kan ka nyumanya min bɛɛ kɛ Krista kɔsɔn, i k'o yira mɔgɔw la. Ne balimacɛ, i ka kanuya ye ne dusu diya kosɛbɛ, ka jagwɛlɛya di ne ma, bari i ye Krista kɔmɔgɔw jigi tugu. Krista barika la, ne bɛ se k'i karaba ka koo dɔ kɛ. Nga kanuya kɔsɔn, ne Pɔli b'i dali, ne min kɛra cɛkɔrɔba ye, ni kasoden ye, Yezu Krista ka baara kɔsɔn. Ne b'i dali ne ka deen Onezimu koo la, ne ye ale min sɔrɔ Krista ye ka ne to kaso la. Waati tɛmɛnin a tun tɛ se k'i mako nya, nga sisan a bɛ se k'i mako nya ani ka ne fana ta nya. Ne b'a kɔsegi k'a ci i ma, ale min kɛra i n'a fɔ ne yɛrɛ faan kelen. A tun ka di ne ye k'a to ne gɛrɛfɛ, a ka to ka ne dɛmɛ i nɔɔ na kaso la, ne b'o min kɔnɔ kibaru diman kɔsɔn. Nga ne t'a fɛ k'o kɛ n'i ma sɔn, waasa konyuman nin kana kɛ i karabako ye, ne b'a fɛ i k'o kɛ ni dusudiya ye. N'a sɔrɔ Onezimu tun faranna i la yan ni waati dɔɔni dɔrɔn waasa i ka se k'a sɔrɔ ka to n'a ye fɔɔ tuma bɛɛ. A tɛ i n'a fɔ jɔɔn dama ye tugu, nga a tɛmɛna jɔɔn kan, balima lo min koo ka gwɛlɛ ne ma. A koo fana ka kan ka gwɛlɛya e ma ka tɛmɛ ne kan a ka jɔnya la, ani balimaya la Matigi barika la. N'i bɛ ne jati i balima ye Krista kɔsɔn, i k'a minɛ i n'a fɔ i bɛ ne le minɛna. N'a ye koo dɔ kɛ i la min ma daga walima n'a ka kan ka fɛɛn dɔ kɔsegi i ma, i b'o bɛɛ to ne kunna. Ne Pɔli yɛrɛ le bɛ koo nin sɛbɛnna n yɛrɛ ma, ko ne bɛna juru nin sara, nga e k'a lɔn ko e yɛrɛ ye ne ta ye. O la, ne b'i dali sɛbɛ la ne balimacɛ, ko i ka ne wasa Matigi kɔsɔn koo nin na, i ka ne dusu diya i n'a fɔ i balima Krista barika la. Ne jigi b'a la ko i kɛra mɔgɔsɛbɛ ye. O la, ne bɛ koo nin sɛbɛn k'a ci i ma, ka la a la ko i bɛna o kɛ fɔɔ ka tɛmɛ ne ka fɔta kan. Ani ka fara o kan, i ka jigiyɔrɔ dɔ labɛn ne ye, bari ne lanin b'a la ko aw ka Ala dali barika la, ne bɛna sira sɔrɔ ka taa aw fɛ. Epafarasi, min bɛ kaso la ni ne ye Yezu Krista ka baara kɔsɔn, ale b'i fo. Mariki b'i fo fana ni Arisitaaki ani Demasi ni Luka, olu minw kɛra ne baarakɛnyɔgɔnw ye. An Matigi Yezu Krista ka nɛɛma kɛ aw ye. Fɔlɔfɔlɔ, Ala kumana an faaw fɛ kiraw barika la sinyɛ caaman ni cogo caaman na. Nga a kumana an fɛ laban waati nin na a Dencɛ barika la, a y'ale min kɛ fɛɛn bɛɛ kuntigi ye, ani a ye dinyɛ dan ale min barika la. Ala ka dawula n'a jaa tigitigi yɛrɛ lo. Dinyɛ bɛ seen kan ale ka kuma barikaman sababu la. A y'a yɛrɛ saraka mɔgɔw ka kojuguw yafa kɔsɔn ka ban tuma min na, a yɛlɛla ka taa sigi Masaba kinibolo la arijana na. Ala Dencɛ lɔyɔrɔ ka bon ni mɛlɛkɛw ta ye, fɔɔ a ye tɔgɔ d'a ma min ka bon n'u ta ye pewu. Ala delila k'a fɔ a ka mɛlɛkɛw jumɛn ye ko: “I ye ne Deen ye, ne le y'i wolo bii.” Ala ma deli k'a fɔ mɛlɛkɛ si ye fana ko: “Ne bɛna kɛ a Faa ye, a bɛna kɛ n Deen ye.” Nga, a Dencɛ min kɔnna danfɛnw bɛɛ nya, ale wolola tuma min na dinyɛ na, a y'a fɔ ko: “Mɛlɛkɛw bɛɛ k'u kunbiri gwan a nyakɔrɔ.” A fɔra mɛlɛkɛw koo la ko: “A bɛ mɛlɛkɛw kɛ fɔnyɔ ye, a b'a ka baarakɛlaw kɛ tasuma ye.” Nga a y'a fɔ a Deen koo la ko: “Ala! E ka masaya tɛna ban abada! E b'i ka jama mara ni tilenninya ye. Tilenninya koo ka d'i ye, kojugu man d'i ye. O le y'a to, e ka Ala y'e woloma ka bonya ni nisɔndiya d'i ma ka tɛmɛ i tɔnyɔgɔnw kan.” Ala y'a fɔ tugu ko: “Ele Matigi le ye dugukolo dan kabini fɔlɔfɔlɔ, sankolo ye i bolonɔ ye. Olu bɛɛ bɛna ban. Nga e tɛ ban. Tinyɛ na, u bɛɛ bɛna kɔrɔ i n'a fɔ fani. Mɔgɔ bɛ duloki kuru cogo min na, i bɛna u kɛ ten. Fani donta bɛ yɛlɛma cogo min na, i bɛna u yɛlɛma ten. Nga e kɔni bɛ to i cogo la, i tɛ kɔrɔ.” Ala delila k'a fɔ mɛlɛkɛw jumɛn ye ko: “Sigi ne kinibolo la fɔɔ ne k'i juguw bila i seen kɔrɔ?” Mɛlɛkɛ bɛɛ tɛ baara kɛra Ala le ye wa? Mɔgɔ minw bɛna kisi, a tɛ to k'u ci ka olu dɛmɛ wa? O le kɔsɔn, n'an t'a fɛ ka halaki sira kan, an ye tinyɛkuma min mɛn, fɔɔ an k'o minɛ ni sɛbɛ ye. Mɛlɛkɛw tun ye kuma min fɔ, o jatira fɛnba ye. Minw tun m'o labato, tɔɔrɔ min tun ka kan n'u ye, o y'o sɔrɔ. Matigi kɔnna ka kisili min koo fɔ, n'o mɛnbagaw nana o gwɛya an ye, o min ye koba ye, n'an m'o jati, an bɛna se ka kisi cogo di? Ala yɛrɛ y'a yira k'o mɔgɔ nunu ka kuma ye tinyɛ ye taamasinyɛw ni kabako sifa bɛɛ fɛ, ani seko dɔw fɛ a ye minw di mɔgɔw ma Nii Senuman barika la, ka kɛnyɛ n'a yɛrɛ sago ye. An bɛ sini min koo fɔra, Ala m'o kuntigiya di mɛlɛkɛw ma do. Nga a fɔra Ala ka kuma yɔrɔ dɔ la ko: “Ala, mɔgɔ ye mun ye n'i b'i hakili to a la? Adamaden ye mun ye n'i b'i janto a la? I y'a majigi mɛlɛkɛw ye waati kunkurunnin dɔrɔn kɔnɔ. I ye kunkɔrɔta ni nɔɔrɔ d'a ma, k'a sigi fɛɛn bɛɛ kunna.” O kɔrɔ k'o fɛɛn tɛ yen min t'a ka kuntigiya kɔrɔ. K'a sɔrɔ an b'a ye bii ko a ka kuntigiya ma se fɛɛnw bɛɛ ma fɔlɔ. An y'a kɔlɔsi k'a ye ko Ala ye Yezu majigi mɛlɛkɛw ye waati kunkurunnin kɔnɔ. A sɔnna ka tɔɔrɔ ka sa mɔgɔw bɛɛ kɔsɔn, Ala ka nɛɛma barika la. Sisan a ye kunkɔrɔta ni nɔɔrɔ sɔrɔ. Ala min ye fɛɛn bɛɛ dan a yɛrɛ ye, a tun ka kan ka Kisibaga ka nakun dafa tɔɔrɔ barika la ka mɔgɔ caaman sama ka se a ka nɔɔrɔ yɔrɔ la. Yezu min bɛ mɔgɔw saniya Ala faan fɛ, a tɛ siga k'o mɔgɔsaniyaninw wele ko a badenw, bari u bɛɛ bɔra yɔrɔ kelen na. O la, a tun y'a fɔ ko: “Ala, ne bɛna i koo fɔ ne badenw ye, ne bɛna i tando jama cɛma.” Ko: “Ne bɛna n jigi la i kan.” A y'a fɔ fana ko: “Ala ye deen minw di ne ma, ne n'olu bɛ yan nyɔgɔn fɛ.” O la, Yezu ye farisogo ta, ka na wolo i n'a fɔ mɔgɔ tɔw bari deen nunu ye adamadenw ye. A y'o kɛ janko a ka saya sababu la, a ka se ka Sutana ka koo nagasi o min ye saya bɔyɔrɔ ye, ani minw tun kɛra i n'a fɔ jɔɔnw saya ka nyasiran kɔsɔn, a k'olu kunmabɔ. A ma kɛ ko a bɛ mɛlɛkɛw dɛmɛna, a bɛ Ibrayima deenw le dɛmɛna. O kama, a tun ka kan ka kɛ a badenw bɔnyɔgɔnko ye koo bɛɛ la, janko a ka kɛ sarakalasebaga kuntigiba tilennin ye min bɛ makari mɔgɔw la, ka baara kɛ Ala ye, ani ka kɛ sababu ye mɔgɔw ka kojuguw ka yafa. Yezu yɛrɛ ye tɔɔrɔ sɔrɔ, o la, minw bɛ tɔɔrɔla, a bɛ se k'u dɛmɛ. O kɔsɔn, n badenw, aw minw kɛra Ala taw ye n'a y'aw wele sini hɛrɛ kama, aw ka Yezu filɛ, ale min ye Ala ka ciden, ni sarakalasebagaw kuntigiba ye Ala ka sira la an b'o min koo fɔ. Yezu kɛra kantigi ye Ala nyakɔrɔ a ka baara bɛɛ la i n'a fɔ Musa tun kɛra kantigi ye a ka baara bɛɛ la Ala ka mɔgɔw cɛma cogo min na. Bonlɔbaga bɛ tɔgɔ sɔrɔ ka tɛmɛ a ka boon lɔnin kan cogo min na, o cogo kelen na, Yezu lɔyɔrɔ ka bon ni Musa ta ye. Ayiwa, boon bɛɛ n'a lɔbaga lo, nga fɛɛn bɛɛ lajɛnnin danbaga ye Ala le ye. Musa kɔni kɛra kantigi ye a ka baara bɛɛ la Ala ka soo kɔnɔ. Ala ka dalaminɛ tun lo. Nga Krista min ye Ala Dencɛ ye, ale kɛra kantigi ye Ala ka soo kunna. An y'an jigi la fɛɛn min kan, n'an y'an jaa gwɛlɛya ka la o la kosɛbɛ, anw bɛ kɛ a ka somɔgɔw ye. O kama, Nii Senuman y'a fɔ ko: “N'aw ye Ala kumakan mɛn bii, aw kana tulogwɛlɛya kɛ i n'a fɔ aw faaw murutira Ala ma loon min na kongokolon kɔnɔ, k'a kɔrɔbɔ. O yɔrɔ la, aw faaw murutira ne Ala ma ka n kɔrɔbɔ. K'a sɔrɔ ne ye koo min bɛɛ kɛ saan bi naani kɔnɔ, u y'o ye. O le y'a to ne dimina u kɔrɔ, n y'a fɔ ko nunu kɔni bɛ to fili la tuma bɛɛ, u ma ne ka sira lɔn fɔlɔ. Dimikojugu fɛ, ne y'a latigɛ ko u tɛna sɔrɔ ka don n ka lafinyɛyɔrɔ la.” O tuma na n badenw, aw bɛɛ k'aw yɛrɛ minɛ aw si kana kɛ mɔgɔjugu ye, jigitanya kan'a kɛ aw bɛ ban Ala la. Nga aw ka nyɔgɔn ladi loon o loon hali n'o ka kan ka kɛ waatijan koo ye, o min bɛ fɔ ko bii, janko mɔgɔ si kana tulogwɛlɛya kɛ ka fili kojugu kɔsɔn. An daminɛna ni jigi min ye, n'an tora o kan fɔɔ a daan na, o tuma na, an ye Krista taamanyɔgɔnw ye. A fɔra Ala ka kuma na ko: “N'aw ye Ala kumakan mɛn bii, aw kana tulogwɛlɛya kɛ i n'a fɔ aw faaw murutira Ala ma cogo min na.” Mɔgɔ jumɛnw le ye Ala kumakan mɛn ka muruti? Musa bɔra ni minw bɛɛ ye Ezipiti jamana na, olu lo. Ala dimina jonw le kɔrɔ saan bi naani kɔnɔ? Minw ye kojugu kɛ n'u suuw tora kongokolon kɔnɔ, olu lo. A ko jonw le tɛna don ale ka yɔrɔ labɛnnin na ka lafinyɛ? Olu mɔgɔmurutinin nunu tɛ wa? O la, an b'a yera fana k'u ka lanabaliya kɔsɔn, u ma se ka don. Ala y'a daa di ko an bɛna se ka don ka lafinyɛ a ka yɔrɔ labɛnnin kɔnɔ. O dadili nin bɛ seen kan halibi. O la, an k'an yɛrɛ minɛ waasa mɔgɔ si kana to kɔfɛ. Anw ye Ala ka kuma min mɛn, olu fana tun y'o mɛn. Nga o ma foyi nya u ye bari u ma u jigi la a kan. An minw y'an jigi la a kan, an bɛna don o lafinyɛyɔrɔ nin na, Ala y'a fɔ o min koo la ko: “Dimikojugu fɛ, ne y'a fɔ ko u tɛna sɔrɔ ka don n ka lafinyɛyɔrɔ la.” Ayiwa, koo bɛɛ tun labɛnna ka ban dinyɛ dantuma na. A fɔra lɔgɔkun laban loon koo la Ala ka kuma na ko: “Ala tilara a ka baara bɛɛ la, ka lafinyɛ a tile wolonwulanan loon.” A fɔra ka tɛmɛ ko: “U tɛna sɔrɔ ka don n ka lafinyɛyɔrɔ la.” Ayiwa, minw tun kɔnna ka Ala ka kuma mɛn, olu ma se ka don o lafinyɛyɔrɔ nin na kuma nin labatobaliya kɔsɔn. O la, dɔ wɛrɛw bɛna don yen. Ala tun ye waati wɛrɛ latigɛ k'o wele ko Bii, a mɛnna, Dawuda tun y'a fɔ Ala barika la i n'a fɔ a fɔra kɔfɛ cogo min na ko: “N'aw ye Ala kumakan mɛn bii, aw kana tulogwɛlɛya kɛ.” Ni Isirayɛlidenw tun donna lafinyɛyɔrɔ nin na Zozuwe sababu la, Ala tun tɛna lafinyɛlon wɛrɛ kuma fɔ tugu do. Ayiwa, lafinyɛlon nyanaman maranin bɛ Ala ka jama ye. Bari, min donna Ala ka lafinyɛyɔrɔ la, o fana bɛ lafinyɛna a ka baara la i n'a fɔ Ala, lafinyɛlon na. An ka jija o tuma na ka don o lafinyɛyɔrɔ nin na. An k'an yɛrɛ minɛ waasa mɔgɔ si kana dɛsɛ o yɔrɔ donko la i n'a fɔ Isirayɛliden nunu, Ala ka kuma labatobaliya kɔsɔn. Ala ka kuma nyanaman lo, fanga b'o la. A ka fari ni muru dadiman faan fila ye. A bɛ don mɔgɔ dusu la fɔɔ ka se ka nii faran ka bɔ adamadenya la, ani ka kolo ni sɛnmɛ bɔ nyɔgɔn na. A bɛ mɔgɔ ka miiri, n'a kɔnɔnako bɛɛ sɛgɛsɛgɛ k'u lɔn. O danfɛn tɛ yen Ala nyaa tɛ min ye. U bɛɛ b'a nyakɔrɔ, u si dogonin tɛ a nyana. An bɛna an ka koow bɛɛ nyafɔ ale le ye. Ayiwa, sarakalasebagaw kuntigiba nyanaman b'an fɛ minkɛ, n'o ye Ala Dencɛ Yezu ye, ale ye sankolo cɛtigɛ ka se Ala fɛ. O la, an jigi bɛ min kan, an k'a to o kan. Bari, see b'an ka sarakalasebagaw kuntigiba nin ye k'an faamu an ka dɛsɛyɔrɔ la. A ye kɔrɔbɔli sifa bɛɛ sɔrɔ i n'a fɔ anw, nga a ma kojugu le kɛ. O tuma na sa, an k'an jigi la a kan, ka gwɛrɛ a ka masasigilan yɔrɔ la ni hakilisigi ye, a ka nɛɛma kɔsɔn janko a ka makari an na, ka nɛɛma kɛ an ye, k'an dɛmɛ an ka dɛsɛ tuma na. Sarakalasebagaw kuntigiba bɛ woloma ka bɔ jama cɛma ka sigi ka jama ni Ala cɛ koow nyanabɔ, ani ka sarakaw ni sɔnnifɛnw di Ala ma kojuguw yafako la. Mɔgɔ minw tɛ foyi lɔn n'u bɛ to ka fili, a bɛ se k'olu dɛmɛcogo lɔn. Bari ale fana bɛ dɛsɛ. O kama, a ka kan ka sarakaw bɔ Ala ye, ale ni jama ka kojuguw kɔsɔn. Mɔgɔ t'o tɔgɔ nin sɔrɔ a yɛrɛ ma, nga Ala le b'o d'a ma i n'a fɔ Arɔn ta kɛra cogo min na. O cogo la, a ma kɛ i n'a fɔ ko Krista le ye sarakalasebaga kuntigibaya tɔgɔ la a yɛrɛ kan dɛ. Nga Ala min y'a fɔ a ye ko: “I ye ne Deen ye. Ne le y'i wolo bii,” ale le y'a d'a ma. Ala y'a fɔ fana ko: “Ele, i kɛra sarakalasebaga ye waati bɛɛ Mɛlikisedɛki cogo la.” Yezu tun bɛ dinyɛ na tuma min na, Ala min bɛ se k'a kisi saya ma, a ye ale dali kosɛbɛ ni mankanba ni nyaji ye. A ka yɛrɛmajigi kɔsɔn, a ka dalili minɛna. A n'a ka Aladenya bɛɛ, a ye sɔnna Ala sago la a ka tɔɔrɔ seen fɛ. O le y'a to a ka koo bɛɛ dafara o cogo la tuma min na, mɔgɔ minw bɛɛ bɛ mɛnni kɛ a fɛ, a kɛra olu bɛɛ kisibaga ye tuma bɛɛ. Bari Ala yɛrɛ le y'a kɛ sarakalasebaga kuntigiba ye i n'a fɔ Mɛlikisedɛki. Koo caaman bɛ yen k'a fɔ sarakalasebagaw kuntigiba nin koo la. Nga a bɛna fɔ cogo min na, n'aw b'a faamu, o le ka gwɛlɛ, bari aw tɛ koo faamu joona. Kabini tumajan, aw tun ka kan ka kɛ tɔw kalanbagaw ye. Nga Ala ka koo minw faamu man gwɛlɛ, aw b'a fɛ mɔgɔ k'aw kalan o koo la halibi. Aw kɛra dennyɛninw ye minw bɛ siin min. Aw tɛ se dumuni gwiliman kɔrɔ! Sinminbaga ye denmisɛn ye, a tɛ se ka konyuman ni kojugu lɔn ka bɔ nyɔgɔn na. Nga mɔgɔkɔrɔbaw bɛ dumuni gwiliman dumu. U delila o la minkɛ, u ye hakili sɔrɔ ka nyumaman ni juguman lɔn ka bɔ nyɔgɔn na. O la do, Krista ka koo minw faamu man gwɛlɛ, an kana to o kalan na halibele, nga an ka jija ka taa nya. An kana segi kalan kɔrɔman nunu kan o minw ye: an ka nimisa ka faran kojuguw la o minw tɛ foyi nya mɔgɔ ye, ani jigilako Ala kan, ni batizeliko, ani ka bolo la mɔgɔ kan ka Ala dali, ni suuw kununko, ani laban kitiko. An kana segi olu kan tugu. An bɛn'a kɛ ten le sisan, ni Ala sɔnna. Mɔgɔ minw ye Ala ka yeelen sɔrɔ, ka Ala ka nɛɛma sɔrɔ, ka kɛ Nii Senuman jɛnnyɔgɔnw ye, olu minw y'a ye ko Ala ka kuma ka nyi, ani ka sini fangatigiya nɛnɛ, nga o bɛɛ n'a ta, u murutira. Olu kɔni, ka nimisa ka segi ka faran u ka kojugu la, o tɛ se ka kɛ. Bari u ka kɛwali b'a yira k'u bɛ Ala Dencɛ gwengwenna lɔgɔ kan tugu, ani k'a di a nɛnibagaw ma. Ni sanji benna dugukolo kan ka nya, ni sɛnɛkɛla ye suman sɔrɔ yen, o dugukolo nin bɛ Ala ka nɛɛma sɔrɔ. Nga, n'o dugukolo ye; nɔni, ani sigɛn dama le falen, a tɛ foyi nya, a yɔrɔ man jan danga la. A laban bɛ jɛni. Ayiwa, ne terinyumanw, an ye kuma minw fɔ ten, a ma kɛ ko aw koo lo, bari an lanin b'a la ko aw bɛ siranyuman kan, min ye kisili sira ye. Aw ye baara min kɛ, ka konyuman minw kɛ ka tɛmɛ, ani aw bɛ minw kɛra sisan ka Ala ka mɔgɔw dɛmɛ, k'a yira Ala la ko a koo ka di aw ye, Ala ka nyi, a tɛna nyinɛ o si kɔ. Ayiwa, anw b'a fɛ, aw kelen kelen bɛɛ ka banba ka to timinadiya la fɔɔ ka taa se a laban ma, janko aw jigi bɛ min kan, aw ka se k'o sɔrɔ. O cogo la, aw fari tɛna faga. Ala ye layidu ta min koo la, minw bɛ la Ala la, ka munyu fɔɔ k'o sɔrɔ, aw ka olu ladege. Ala y'a daa di Ibrayima ma tuma min na, a kalila n'a yɛrɛ tɔgɔ ye bari fɛɛn wɛrɛ tɛ yen min ka bon n'ale yɛrɛ ye n'a bɛ se ka kali ni min ye. A tun ko: “Ne bɛna i ta nya, k'i ka deenw caya kosɛbɛ.” Ayiwa, Ibrayima munyuna ka kɔnɔni kɛ. Ala y'a daa d'a ma koo min na, a y'o sɔrɔ. Ni adamadenw k'u bɛ kali, fɛɛn min ka bon n'u yɛrɛ ye, u b'o le tɔgɔ wele ka kɛ u seere ye, waasa u y'u daa di koo min na, sigasiga kana sɔrɔ o la. O cogo la, Ala kalila a ka dadili nin na, k'a yira ka gwɛ o sɔrɔbagaw la ko siga t'a la, o bɛna kɛ. O kobaba fila nunu na, Ala tɛ se ka galon tigɛ an ye cogo si la. O kama, an minw jigi b'o kan, o ka kan ka barika don an na kosɛbɛ k'o koo minɛ ka nya. O jigi min b'an fɛ, barika b'o la. O b'a kɛ an bɛ lɔ ka nya, a b'an dɛmɛ fɔɔ ka taa se Ala fɛ. Yezu kɔnna an nya o yɔrɔ la an kɔsɔn. Ale kɛra waati bɛɛ sarakalasebagaw kuntigiba ye Mɛlikisedɛki cogo la. Mɛlikisedɛki tun ye Salɛmu dugu masa ye, ani Masaba Ala ka sarakalasebaga. Ibrayima kɔsegitɔ ka bɔ masa dɔw kɛlɛyɔrɔ la, o y'a sɔrɔ kɛlɛ diyara a la, Mɛlikisedɛki y'a kunbɛn ka duba kɛ a ye. Ibrayima ye fɛɛn minw bɛɛ sɔrɔ kɛlɛkɛyɔrɔ la, a y'u jaka d'a ma. Mɛlikisedɛki kɔrɔ ko “masatilennin.” Salɛmu masa tun lo, o kɔrɔ ko “hɛrɛ masa.” Faa t'a fɛ, baa t'a fɛ, buruju t'a fɛ, wololon t'a fɛ, a ma sa fana. Sarakalasebaga lo tuma bɛɛ i n'a fɔ Ala Dencɛ. Mɔgɔba lo dɛ! An faa Ibrayima ye fɛɛn minw sɔrɔ kɛlɛkɛyɔrɔ la, a y'o bɛɛ jaka d'a ma! Sarakalasebagaya dira Levi kɔmɔgɔw ma, sariya ko u ka jaka minɛ jama fɛ, o minw ye u badenw ye. K'a sɔrɔ u bɛɛ bɔra Ibrayima la. Mɛlikisedɛki ye jaka nin minɛ Ibrayima fɛ k'a sɔrɔ Levi kɔmɔgɔ dɔ tɛ. O kɔ, a ye duba kɛ Ibrayima ye, Ala y'a daa di ale min ma. Siga t'a la ko dubakɛbaga ka bon ni dubasɔrɔbaga ye. Levi kɔmɔgɔ minw bɛ jakaw minɛ, olu bɛ sa. Nga jaka min minɛna Ibrayima fɛ, a fɔra k'o minɛbaga ma sa. Levi kɔmɔgɔw minw bɛ jaka minɛ, olu yɛrɛ tun ye jaka bɔ u bɛma Ibrayima barika la, n'a bɛ se ka fɔ ten. Bari Mɛlikisedɛki taara k'a bɛma Ibrayima kunbɛn tuma min na, o y'a sɔrɔ a tun ma wolo fɔlɔ. Sariya min sigira Isirayɛlidenw ye, o juu siginin tun bɛ Levi kɔmɔgɔw ka sarakalasebagaya koo kan. N'u ka baara tun dafanin lo, kuun tun t'a la sarakalasebaga wɛrɛ ka na tugu, o min tɛ i n'a fɔ Arɔn, nga o min bɛ i n'a fɔ Mɛlikisedɛki. Ayiwa, ni yɛlɛmani donna sarakalasebagaw ka baara la, wajibi lo fɔɔ yɛlɛmani ka don sariya la fana. Sarakalasebaga min koo fɔnin bɛ yan, ale faaw si ma deli ka kɛ sarakalasebaga ye. A gwɛnin lo ko an Matigi buruju bɔra Zuda la. K'a sɔrɔ Musa ka sɛbɛ nunu si t'a yira k'o soo mɔgɔw niin bɛ sarakalasebagaya la. Ayiwa, n'a fɔra ko sarakalasebaga wɛrɛ bɛ yen min bɛ i n'a fɔ Mɛlikisedɛki, a gwɛnin lo ko ale ma sigi o baara la a bɛmaw barika la. Nga a kɛra o ye bari see b'a ye ka to sii la tuma bɛɛ. Tinyɛ na, a fɔra Ala ka kuma na ale koo la ko: “Ele, i kɛra waati bɛɛ sarakalasebaga ye Mɛlikisedɛki cogo la.” O b'a yira ko fɔlɔfɔlɔ ka koo kɛcogo nunu tɛ jati tugu, k'u benna. Bari barika tun t'u la, u tun tɛ foyi nya. Sariya ma se k'an dɛmɛ ka kɛ mɔgɔdafaninw ye, nga sisan, an jigi bɛ fɛɛn min kan, o ka fisa, o sababu la an bɛ se ka gwɛrɛ Ala la. Ka fara o kan, Ala y'a daa di fana. Tɔ nunu kɛra sarakalasebagaw ye k'a sɔrɔ Ala m'a daa di u si ma. Nga Yezu kɛra sarakalasebaga ye Ala ka dadili seen fɛ, a ko: “Matigi y'a fɔ ka ban, a tɛna yɛlɛma. Ele, i kɛra waati bɛɛ sarakalasebaga ye.” O kama, Yezu ye jɛnnyɔgɔnya min sigi anw ni Ala cɛ, o ka fisa ni fɔlɔta ye. Ayiwa, danfara wɛrɛ bɛ yen. Sarakalasebaga caaman tɛmɛna, bari u tun bɛ sa. Nga Yezu tɛ sa abada, o la, a ka sarakalasebagaya tɛ se ka bɔ a bolo ka ye. O kama, mɔgɔ minw bɛ gwɛrɛ Ala la ale sababu la, see b'a ye k'olu kisi bii ani sini, bari a bɛ yen tuma bɛɛ ka Ala dali u ye. O sarakalasebaga nyɔgɔn le bɛ se k'an mako nya. A ka nyi, jalakiyɔrɔ t'a la, a ka koo gwɛnin lo, a daan bɔnin bɛ kojugukɛlaw la, a kɔrɔ tara fɔɔ ka taa sankolo daan na. Sarakalasebagaw kuntigiba tɔw tun bɛ saraka lase loon o loon, u tun bɛ kɔn k'u yɛrɛ ka kojuguw yafa saraka bɔ fɔlɔ, ka sɔrɔ ka jama ta lase. Nga Yezu y'a yɛrɛ saraka jama ka kojugu kɔsɔn sinyɛ kelenpe, saraka wɛrɛ man kan ka bɔ tugu. Musa ka sariya ye adamaden barikatanw le kɛ sarakalasebagaw kuntigibaw ye. O kɔ, Ala y'a daa di koo min na, a y'o kɛ k'a Dencɛ kɛ sarakalasebagaw kuntigiba ye, ale ka koow bɛɛ dafanin lo tuma bɛɛ. Ayiwa, an ye min bɛɛ fɔ ka tɛmɛ sisan, a kunba filɛ nin ye: an k'a lɔn k'o sarakalasebagaw kuntigiba nyɔgɔn le b'an fɛ. A taara sigi Masaba kinibolo la sankolo la. A b'a ka baara kɛ yen Ala ka yɔrɔ senuman yɛrɛ yɛrɛ la. Mɔgɔ bolo m'o min lɔ, fɔɔ Matigi Ala. Sarakalasebagaw kuntigibaw bɛɛ sigira ka sɔnnifɛn ni sarakaw di Ala ma. O la, fɔɔ Yezu fana ka dɔ sɔrɔ k'o di Ala ma. N'a tun bɛ dinyɛ na, a yɛrɛ tun tɛ se ka kɛ sarakalasebaga ye do, bari sarakalasebagaw bɛ yen ka kɛnyɛ ni Musa ka sariya ye. Olu b'o baara min kɛra ten dinyɛ na, o ye arijana ta jaa ye. Min bɛ kɛra yan, o tɛ foyi ye ni Musa ka tile ta tɛ. O kɔsɔn, sanni Musa ka Alabatoyɔrɔ fɔlɔ lɔ, Ala y'a fɔ a ye ko: “Ne ye cogo min yira i la kulu kan, e jija a bɛɛ ka kɛ o cogo la.” Nga baara min dira Yezu ma sisan, o ka bon ni sarakalasebaga tɔ nunu ta ye. Bari Yezu ye Ala ni mɔgɔ ka jɛnnyɔgɔnya lakuraya, o min ka fisa ni fɔlɔta ye, o min juu sigira layiduw kan minw fana ka fisa ni fɔlɔta ye. Jɛnnyɔgɔnya min tun bɛ Ala n'a ka jama cɛ, ni finyɛ tun ma don o la, Ala tun tɛn'a lakuraya. Ala tun y'a ka mɔgɔw jalaki. O la, a ko: “Loon dɔ bɛna se, ne Matigi le ko ten. Ne bɛna n ka jɛnnyɔgɔnya lakuraya ni Isirayɛli mara mɔgɔw ani Zuda mara mɔgɔw ye. O ni kɔrɔman nin tɛna kɛ kelen ye, n y'o min sigi n'u faaw ye loon min na ne y'u minɛ ka bɔ n'u ye Ezipiti jamana na. Nga, u ma ne ka jɛnnyɔgɔnya labato minkɛ, o la, ne fana ye n mako bɔ u la. Ne Matigi le ko ten. O loonw tɛmɛnin kɔ, n bɛna jɛnnyɔgɔnya min sigi ni Isirayɛlidenw ye, o filɛ nin ye. Ne Matigi le ko ten. Ne yɛrɛ bɛna n ka sariya koo don u dusu la, n koo ka to u kɔnɔ. Ne bɛna kɛ u ka Ala ye, olu bɛna kɛ ne ka mɔgɔw ye. O tuma na, u si tɛna na u baden, walima u tɔnyɔgɔn kalan ne koo la tugu. Bari, u bɛɛ bɛna ne lɔn, k'a ta denmisɛnw ma fɔɔ ka ta'a bila mɔgɔkɔrɔbaw ma. Ne bɛna u ka hakɛw bɛɛ to u ye. Ne tɛna u ka kojuguw koo to n dusu la tugu.” Ni Ala ye jɛnnyɔgɔnyakura koo fɔ, o b'a yira ko fɔlɔta nin tɛ jati tugu. Ni fɛɛn min do tɛ jati, o bantuma sera. Batoli kɛyɔrɔ ni Ala batocogo tun bɛ yen jɛnnyɔgɔnya fɔlɔ waati la. Ayiwa, batoyɔrɔ tun lɔra ni fani ye. O batoyɔrɔ nin tilannin tun lo, a yɔrɔ fɔlɔ tɔgɔ ko Yɔrɔ Senuman. Fitinɛ tun bɛ bila o yɔrɔ la, ani tabali, Ala ka buru bɛ bila o min kan. A yɔrɔ filanan daan bɔnin tun bɛ ni fani ye. O yɔrɔ tɔgɔ ko Yɔrɔ Senuman Senuman. Wusulandaga sanulaman, ani Ala ka layidu taamasinyɛ kɛsu tun bɛ ale kɔnɔ, o kɛsu nin yɔrɔ bɛɛ tun ye sanu ye. Daga sanulaman tun b'a kɔnɔ maanɛ b'o min na, ani Arɔn ka bere, o min feerenna, ani walaka kabakurulamanw, Ala ka sariya tun bɛ o minw kan. Jaa dɔw minw bɛ wele serubɛn, olu tun lɔnin bɛ kɛsu sanfɛ minw b'a yira ko Ala bɛ yen. Olu gamanw tun kɛnin bɛ ka suma kɛ kojuguw yafa saraka bɔyɔrɔ kan. O koo nunu bɛɛ nyafɔtuma tɛ sisan ye. Ayiwa, o bɛɛ labɛnna ka ban tuma min na, sarakalasebagaw tun bɛ don batoli yɔrɔ nin yɔrɔ fɔlɔ la tuma o tuma k'u ka baara kɛ. Nga sarakalasebagaw kuntigiba kelenpe le tun bɛ don batoli yɔrɔ faan filanan nin kɔnɔ sinyɛ kelenpe saan kɔnɔ. A bɛ don yen ni begɛn joli le ye k'o di Ala ma ale ni jama ka fili kɔsɔn. Nii Senuman y'a yira o cogo la ko ni Alabatoyɔrɔ kɔrɔman nin bɛ yen, ko Yɔrɔ Senuman Senuman sira ma dayɛlɛ. U tun bɛ sɔnnifɛn ni saraka minw dira Ala ma, o do tun tɛ se ka Alabatobagaw dusu saniya. O ye taamasinyɛ dama le ye k'an ka bii koo yira. A dumuniko, minnifɛnko, yɛrɛsaniyako sifa dɔw, olu bɛɛ tun kɛra landaw le ye fɔɔ ka n'a bila yɛlɛmani waati ma. Ayiwa, Krista nana ka kɛ sarakalasebagaw kuntigiba nyanaman ye, sini hɛrɛ kama. Ale donna k'a ka baara kɛ batoli kɛyɔrɔ min na, o ka bon, a dafanin lo, o ni adamadenw ye min lɔ, o tɛ kelen ye. O kɔrɔ ko dinyɛ nin ta tɛ. Krista ma don o Yɔrɔ Senuman Senuman na ka bakɔrɔnin joli, walima misiden joli di Ala ma dɛ. Nga a y'a yɛrɛ joli le di Ala ma sinyɛ kelenpe k'anw hɔrɔnya pewu! Sarakalasebagaw bɛ bakɔrɔninw, ni turaw joli, ani misimuso bugurigwɛ kɛ ka mɔgɔnɔgɔninw saniya. Nii Senuman barika la, Krista y'a yɛrɛ kɛ saraka dafanin ye ka di Ala ma. An ka kɛwaliw minw tɛ foyi nya, a joli b'an dusu saniya ka bɔ o la janko ka se ka Ala bato. Krista joli ka fisa ni begɛn joli ye kosɛbɛ! Krista kɛra Ala ni mɔgɔw cɛ, ka jɛnnyɔgɔnyakura sigi janko Ala y'a daa di sini koo min na, a ka mɔgɔ weleninw ka se k'o sɔrɔ Krista ka saya kɔsɔn. A y'o min kɛ k'u tila u ka kojuguw la, u y'o minw kɛ jɛnnyɔgɔnyakɔrɔ tile la. Cɛntigi ka sayako bɛ gwɛ fɔlɔ, u bɛ sɔrɔ ka kuma cɛntasɛbɛ koo la. Cɛntasɛbɛ tɛ se ka jati ni cɛntigi bɛ nii na, bari a bɛ sa fɔlɔ u bɛ sɔrɔ ka cɛntasɛbɛ jati. O le y'a to, hali jɛnnyɔgɔnyakɔrɔ fana sigira ni joli ye. Musa ye Ala ka sariya kelen kelen bɛɛ fɔ jama ye ka ban tuma min na, a ye misidenw ni bakɔrɔninw joli ni jii ta, ka sagasi wuleman siri kala dɔ la k'o kɛ ka joli ni jii nin seriseri sariya sɛbɛ kan, ani jama bɛɛ kan k'a fɔ ko: “Nin ye jɛnnyɔgɔnya joli ye Ala ko aw k'o min labato.” O kɔ, a y'a seriseri fana batoli yɔrɔ nin kan, ani a kɔnɔna baarakɛminanw bɛɛ kan. A fɔra sariya sɛbɛ kɔnɔ k'u tun bɛ joli le kɛ ka fɛɛn caaman saniya. Ni joli ma bɔn, kojugu tɛ yafa. Fɛɛn minw bɛ arijana na, n'olu jaaw ka kan ka saniya ni kɛwali nunu ye, o tuma na, o fɛɛn nunu yɛrɛ yɛrɛ ka saniyako ka kan ni saraka wɛrɛw ye minw ka fisa ni fɔlɔtaw ye. Tinyɛ na, mɔgɔw bolo ye Alabatoso min lɔ k'a kɛ i n'a fɔ sankolo ta, a ma kɛ i ko Krista donna o le kɔnɔ dɛ! Krista donna arijana yɛrɛ le la, ka lɔ Ala nyafɛ anw ka hɛrɛ kɔsɔn. Sarakalasebagaw kuntigiba bɛ to ka don Yɔrɔ Senuman Senuman na cogo min na saan o saan ni begɛn joli ye, Krista m'a kɛ ten. A m'a yɛrɛ saraka sinyɛ caaman. N'a tun bɛ ten, a tun bɛna tɔɔrɔ sinyɛ caaman kabini dinyɛ dantuma. Nga a nana laban tuma na sisan le ka tɔɔrɔ sinyɛ kelenpe k'a yɛrɛ kɛ saraka ye ka kojugu fanga cɛn. Adamadenw bɛ sa sinyɛ kelenpe cogo min na, Ala bɛ sɔrɔ k'u kiti, o cogo kelen na, Krista y'a yɛrɛ saraka sinyɛ kelen, ka mɔgɔ bɛɛ ka kojuguw yafa. O kɔ, a bɛna segi ka na, o tɛna kɛ kojuguw yafako kama tugu, nga mɔgɔ minw b'a makɔnɔna, olu kisili kɔsɔn lo. Zuwifuw tun bɛ hɛrɛ nata min kɔnɔna, sariya tun ma kɛ o yɛrɛ yɛrɛ ye, a kɛra o jaa ye. A tɛ se k'u labatobagaw kɛ mɔgɔdafaninw ye Ala nyakɔrɔ saraka bɔtaw barika la, u b'o minw kɛ tuma o tuma ni saan o saan, daan t'a la. N'o tun bɛ fɛɛn nya, u tun tɛna to k'o kɛ tugu. Bari n'a kuun ye u saniyako ye, n'u tun y'o bɔ ka ban, minw tun b'o kɛ ka Ala bato, olu hakili tun tɛna jigi u ka kojugu la tugu do. Nga, saan o saan, saraka nunu bɛ to k'u hakili jigi u ka kojuguw koo la. Bari turaw ni bakɔrɔninw joli tɛ se ka mɔgɔ ka kojuguw yafa abada. O kama, sanni Krista ka na dinyɛ na, a y'a fɔ Ala ye ko: “E ko i tɛ saraka ni sɔnnifɛn fɛ, nga i ye ne kɛ mɔgɔ ye. Ka begɛn faga k'a jɛni, walima k'a joli bɔn kojugu yafa kɔsɔn, o si ma i nyaa fa. O la, ne y'a fɔ ko n filɛ nin ye n ka Ala, ne nana i sago kɛ kama ka kɛnyɛ ni min fɔra kitabu kɔnɔ ne koo la.” Krista kɔnna k'a fɔ ko: “Saraka, ni sɔnnifɛn, ni begɛn jɛnita, ani kojugu yafa saraka, i tun t'o si fɛ, o si ma diya i ye.” K'a sɔrɔ o koo nunu tun bɛ kɛ ka kɛnyɛ ni sariya ye. O kɔ, a y'a fɔ ko: “Ne filɛ, ne nana i sago kɛ kama.” O cogo la, Krista bɛ landakɔrɔ bɔ yen ka landakura sigi. A ye Ala sago kɛ k'a yɛrɛ saraka sinyɛ kelenpe minkɛ, o min nyɔgɔn tɛna kɛ tugu, anw saniyara o le barika la. Sarakalasebagaw bɛ to u seen kan loon o loon k'u ka baara kɛ ka to k'o saraka kelen nunu bɔ. O min tɛ se cogo si la ka kojuguw yafa. Nga Krista kɔni, ale y'a yɛrɛ di sinyɛ kelenpe kojuguw yafa kɔsɔn, ka sɔrɔ ka taa sigi Ala kinibolo la kudayi, yan ni Ala k'a juguw majigi a kɔrɔ. A bɛ mɔgɔ minw saniya, a y'olu kɛ mɔgɔdafaninw ye a ka saraka kelen barika la, u fana bɛ to ten tuma bɛɛ. Nii Senuman fana b'o le fɔ ka gwɛ an ye ko: “Ne bɛna jɛnnyɔgɔnya min sigi n'u ye o loonw tɛmɛnin kɔ, o filɛ nin ye, ne Matigi le ko ten. Ne bɛna n ka sariya koo don u dusu la, n koo ka to u kɔnɔ. Ne tɛna u ka kojugu kɛninw n'u ka filikow to n dusu la tugu.” O la do, ni yafa sɔrɔla koo min na ka ban, saraka bɔkun t'o koo la tugu. O kɔsɔn, n badenw, sira dinin b'an ma ka don Yɔrɔ Senuman Senuman na Yezu joli bɔnin sababu la. A ye sirakura nyanaman dayɛlɛ an ye, fɛɛn min tun bɛ mɔgɔ bali ka don yen, a y'o bɔ yen a ka saya barika la. Sarakalasebagaw kuntigiba b'an fɛ Ala ka soo kunna. O la sa, an ka miirijuguw bɔ an kɔnɔ, k'an yɛrɛ saniya ni jinyuman ye, ka gwɛrɛ Ala la ni kɔnɔgwɛ ye, ni jigisigi ye. An ko jigi min b'an fɛ, an kana an fari faga o koo la. Bari Ala min y'a daa di, kantigi lo. An ka jija ka nyɔgɔn dɛmɛ ka kanuya sira taama, ka konyuman kɛ. An kana ban ka taa an ka nyɔgɔnlajɛnyɔrɔ la, i n'a fɔ dɔw bɛ to k'a kɛ cogo min na. Nga an ka nyɔgɔn jaa gwɛlɛya, bari aw yɛrɛ nyaa b'a la ko Matigi ka loon surunyana ka ban. An minw bɛ tinyɛ lɔn ka ban, n'an bɛ to ka tugu ka kojugu kɛ, saraka wɛrɛ tɛ yen min bɛ se ka kojugu yafa. Siranyako le tora sisan, o ye kiti ni tasumaba ye o minw bɛna Ala juguw halaki. Ni mɔgɔ o mɔgɔ ye Musa ka sariya cɛn, ni seere fila, walima saba, sɔrɔla k'a fɔ ko tinyɛ lo, o tigi ka kan ka faga, u man kan ka makari a la yɛrɛ. Nga min ka jugu n'o ye, o ye ka Ala Dencɛ dɔgɔya, walima k'a fɔ ko Yezu joli min ye jɛnnyɔgɔnya sigi Ala ni mɔgɔ cɛ, k'o ye fu ye. K'a sɔrɔ o joli nin le y'o tigi saniya. Walima ka Nii Senuman tɔgɔjugu fɔ, o min ye makaritigi ye. O tigi ka sara ka jugu ka tɛmɛ. Bari, min y'a fɔ ko: “Ne le ka kan ka kojugu juru sara, ne le bɛna mɔgɔw sara,” an b'o tigi lɔn. A y'a fɔ tugu ko: “Ne Matigi le bɛna n ka mɔgɔw kiti.” Ala ka mɔgɔ jalaki, o ye jatigɛko ye. Aw k'aw hakili jigi aw ka lanaya daminɛtuma na. Aw ye Ala ka yeelen sɔrɔ dɔrɔn, tɔɔrɔ jugumanw daminɛna nga aw jijara. Yɔrɔ dɔ, u tun b'aw nɛni k'aw tɔɔrɔ jama nyana. Yɔrɔ wɛrɛ, aw le jijanin bɛ ka tɔɔrɔbagaw dɛmɛ. Aw sɛgɛnna ni kasodenw ye u ka tɔɔrɔw la. Aw sɔnna k'aw ka bololafɛnw to u bɔsibagaw bolo ni nisɔndiya ye. Bari, aw ko nafolo wɛrɛ b'aw fɛ min ka fisa n'o ye n'a tɛ ban abada. Aw jigi kana tigɛ, bari a nafa ka bon. O la, fɔɔ aw ka jija janko n'aw ye Ala sago kɛ ka ban tuma min na, a y'a daa di min na, aw k'o sɔrɔ. Tinyɛ na, a fɔra Ala ka kuma na ko: “A tora dɔɔni dɔrɔn, min ka kan ka na, a bɛna na. A tɛna mɛn ka na. Mɔgɔ min y'a jigi la ne kan, ne ka sɔrɔ k'a jati mɔgɔtilennin ye, o tigi bɛna kisi.” Nga n'a segira kɔ, a nigɛ bɛ bɔ n na. Minw bɛna segi kɔ ka halaki, anw tɛ olu dɔw ye. Anw ye jigitigiw ye minw bɛna kisi. Jigiko ye min ye, o ye nin ye: i bɛ la fɛɛn dɔ la, k'i jigi la a kan k'a sɔrɔ i m'a ye ka ye. Fɔlɔfɔlɔ mɔgɔw ye tɔgɔnyuman sɔrɔ Ala fɛ u jigi kɔsɔn. An jigi bɛ Ala kan minkɛ, o sababu la, an y'a lɔn ko dinyɛ danna Ala ka kuma seen fɛ. O la, an bɛ fɛɛn minw yera, an b'a lɔn k'olu juu bɔra fɛɛn wɛrɛ la an tɛ se k'o min ye. Abɛli jigi tun bɛ Ala kan minkɛ, o le y'a to a ye saraka bɔ o min diyara Ala ye ka tɛmɛ a kɔrɔcɛ Kayɛn ta kan. A y'a jigi la Ala kan minkɛ, o le y'a to, Ala y'a jati mɔgɔtilennin ye ka sɔn a ka saraka ma. Abɛli ka jigi kɔsɔn, a ka kuma bɛ seen kan halibi k'a sɔrɔ a yɛrɛ tɛ sii la. Enɔki y'a jigi la Ala kan, o le y'a to Ala y'a ta ka bɔ dinyɛ na, waasa a kana sa. Mɔgɔ si nyaa ma la Enɔki kan tugu, bari Ala tun y'a ta. A fɔra Ala ka kuma na ko sanni Ala k'a ta, a koo tun ka di Ala ye. Mɔgɔ koo tɛ se ka diya Ala ye n'o tigi ma l'a la. Bari mɔgɔ min b'a fɛ ka gwɛrɛ Ala la, fɔɔ a ka l'a la ko a bɛ yen, ani ko a b'a yɔrɔ nyinibagaw wasa. Nuhun jigi tun bɛ Ala kan minkɛ, o le y'a to koo min ma kɛ ka ye, Ala y'a lasɔmi o koo la tuma min na, a siranna Ala nya ka kurunba dilan k'a ka soo kisi, dinyɛ halakira. A jigi sababu la, Ala y'a jati mɔgɔtilennin ye. Ala y'a fɔ Ibrayima ye ko a ka bɔ ka taa jamana dɔ la, ko ale bɛna o tigiya d'a ma. Ibrayima y'a jigi la a kan minkɛ ka sɔn a ta ma, a wilila ka taa k'a sɔrɔ a tun t'a taayɔrɔ lɔn. O jigi nin barika la, a nana sigi lonanya la o jamana nin kɔnɔ, Ala tun ye layidu ta a ye o min koo la. A tora faniso kɔnɔ yen, ani Isiyaka ni Yakuba. Ala tun y'a daa di olu fana ma o koo kelen nin na. Bari Ibrayima tun b'a fɛ ka dugu sɔrɔ, min lɔra ka nya, Ala yɛrɛ bɛ kɛ o min konya nyanabɔbaga n'a lɔbaga ye. O jigi kelen kɔsɔn, Sara fana sera ka deen sɔrɔ a n'a ka musokɔrɔninya bɛɛ. Bari a lar'a la ko Ala y'a daa di koo min na, ko a b'o kɛ. O cogo la, cɛɛ kelen min tun sera saya ma ka ban yɛrɛ, ale sababu la, jamaba sɔrɔla, minw ka ca i n'a fɔ lolow, u daa tɛ lɔn i n'a fɔ bada la cɛncɛn. Ala y'a daa di koo min na, u bɛɛ jigi tora o kan fɔɔ ka taa sa n'u ma o sɔrɔ. U nyaa y'a ye yɔrɔjan ka nisɔndiya o koo la. U y'a yira ten k'olu ye lonanw ye, k'u tɛmɛtɔ lo dinyɛ na. Mɔgɔ minw bɛ kuma ten, a bɛ lɔn ko u b'u faso nyinina. U bɔra yɔrɔ min na ka kɔrɔ, n'u hakili tun jigira o yɔrɔ koo la, u tun bɛ se ka segi yen. Nga u ka miiri bɛ fasonyuman kan, n'o ye arijana ye. O kama, n'u bɛ Ala wele k'u ka Ala, o t'a maloya. Bari a ye yɔrɔ labɛn u ye. Ala ye Isiyaka nyini Ibrayima fɛ saraka ye waasa k'a kɔrɔbɔ. Jigi kɔsɔn, a ma ban k'a deen kelenpe nin kɛ saraka ye. K'a sɔrɔ Ala tun y'a daa di a ma k'a fɔ a ye ko a kɔmɔgɔw bɛna jati k'a ta Isiyaka le ma. Ibrayima lanin tun b'a la ko Ala bɛ se ka suu kunun. O cogo la, an bɛ se k'a fɔ ko Ala ye Isiyaka bɔsi saya la k'a di Ibrayima ma. Isiyaka fana ka jigi kɔsɔn, a ye duba kɛ a deen Yakuba ni Ezawu ye, u ka sininyasigi kama. Yakuba ka jigi kɔsɔn, a tun bɛ nyini ka sa tuma min na, a ye duba kɛ Yusufu deenw kelen kelen bɛɛ ye, k'a sɔrɔ ka tintin a ka bere kan ka Ala fo. Yusufu ka jigi kɔsɔn, a satuma surunyana tuma min na, a y'a fɔ ko Isirayɛlidenw bɛna na bɔ Ezipiti jamana kɔnɔ loon dɔ. O la, a ye kangari la u ye a kolow koo la. Jigi kɔsɔn, Musa wolobagaw ma siran masacɛ ka sariya nya. U ye Musa dennyɛninman dogo fɔɔ kalo saba, bari a tun cɛɛ ka nyi kosɛbɛ. Musa kɔgɔra tuma min na, a ka jigi kɔsɔn, a banna k'u kana ale wele ko Fara;nɔn denmuso ka deen. A sɔnna ka tɔɔrɔ ni Ala ka mɔgɔw ye sanni a ka to lafiya la waati dɔɔni kojugu la. A banna Ezipiti nafolo la ka sɔn dɔgɔya ma i n'a fɔ Krista, bari a nyaa tun bɛ tɔnɔ nata la min ka fisa. Musa ka jigi kɔsɔn, a ma siran masacɛ nya ka bɔ Ezipiti jamana na. A jijara kosɛbɛ i n'a fɔ a nyaa bɛ Ala la, mɔgɔ nyaa tɛ o min na. A ka jigi kɔsɔn, a ye Hɔrɔnya nyanagwɛ labɛn ka joli seriseri bondaw la waasa deen fɔlɔ fagabaga kana se Isirayɛlidenw ma. Isirayɛlidenw ye Kɔgɔjiwulen tigɛ u seen na, u ka jigi barika la. Nga Ezipitikaw k'u b'a tigɛ, olu tununa jii la. Isirayɛlidenw ka jigi kɔsɔn, u taamana ka Zeriko lamini tile wolonwula dɔrɔn, a laminikogo benna. Kakalamuso Araabu ka jigi kɔsɔn, a ye Isirayɛlidenw ka cidenw sutura. O la, minw banna Ala la, ale ma sɔrɔ ka sa ni olu ye. N ka mun fɔ tugu? N tɛna se ka Zedeyɔn ni Baraki ni Samusɔn ni Zefite ni Dawuda ni Samuyɛli ani kiraw ka koow bɛɛ nyafɔ kelen kelen. U ka jigi kɔsɔn, u sera jamana wɛrɛw kɔrɔ k'u mara, ka tilenninya sigi. Ala y'a daa di min na, u y'o sɔrɔ. U ye jaraw daaw siri, tasuma dɛsɛra u kɔrɔ, u kisira murujan ma, u ye barika sɔrɔ bana sɔrɔnin kɔ. U kɛra kɛlɛden;nanaw ye, u y'u juguw gwɛn. Muso dɔw ka jigi kɔsɔn, u ka mɔgɔ saninw kununna. Dɔw fana sɔnna tɔɔrɔ ma waasa Ala k'u kunun sini. Dɔw fana sɔnna dɔgɔya ni bugɔri ma. U ye dɔw siri ni jɔrɔkɔw ye k'u don kaso la. U ye dɔw bonbon ni bɛrɛ ye, ka dɔw cɛtigɛ ni kakanan ye, ka dɔw faga ni murujan ye. Dɔw tun bɛ munumunu ni sagagolo, walima bagolo ye u kaan na. U dɛsɛra, u tɔɔrɔla kosɛbɛ. Dinyɛ tun tɛ se ka bɛn n'u ye, bari u tun man kan n'u ye. O la, u tora ka yaalayaala kongokolon kɔnɔ ni kuluw kan, ka la farawow la, ani dingɛw kɔnɔ. Ala y'u bɛɛ tɔgɔnyuman fɔ u ka jigi barika la. Nga Ala y'a daa di min na, u si m'o sɔrɔ. Bari Ala ye fɛnnyuman labɛn an ye min ka fisa. A tun t'a fɛ o bɛɛ ka kɛ an kɔ. Ayiwa, an lamininin bɛ ni seere caaman ye minkɛ, koo o koo b'an ka boli nin nagasi, an k'o bɛɛ dabila. Kojugu min ka teli ka see sɔrɔ an kan, an k'o dabila. Boli min b'an seen kɔrɔ, an kana sɛgɛn o la. An k'an nyaa lɔnin to Yezu kan ale min ye an jigi bɔyɔrɔ ye, n'a laban ye. A sɔnna ka tɔɔrɔ gwengwen lɔgɔ kan, a m'o maloya yɛrɛ jati, bari nisɔndiya min tun b'a kɔnɔna, a nyaa tun b'o la. Sisan, a siginin bɛ Ala kinibolo la. O la do, ale min ye tɔɔrɔ caaman munyu kojugukɛlaw bolo, aw k'aw hakili to ale la janko aw kana sɛgɛn, aw fari bɛ faga. Aw bɛ bondori min kɛ kojugu koo la, o ma se jolibɔn ma fɔlɔ do. Aw nyinɛna denfaw ka ladili nin na wa? O min ko: “N deen, i kana ban Matigi ka ladili ma. N'a b'i ladira, i kana i fari faga. Bari mɔgɔ min koo ka di Matigi ye, a b'o le ladi. A sɔnna ka min kɛ a deen ye, a b'o le nyaa gwan.” Aw ka hɛrɛ kɔsɔn lo aw bɛ tɔɔrɔla. Ala b'aw minɛ i n'a fɔ a deenw. Deen jumɛn bɛ yen n'a faa t'a ladi? Ala b'a ka deenw bɛɛ ladi. N'a t'aw ladi, o tuma na aw tɛ a deenw ye, aw ye nyamɔgɔdenw le ye. An wolofaw y'an ladi, an sɔnna u ta ma. An Faa Ala min ye nii tigi ye, mun na an tɛna sɔn o ta ma ka to hɛrɛ la? An wolofaw ka ladili ye waati dɔɔni koo ye, u tun b'an ladi ka kɛnyɛ n'u ka miiriya ye. Nga Ala b'an ladi an ka nya kɔsɔn waasa an ka kɛ mɔgɔnyumanw ye i n'a fɔ ale. N'u b'i ladi tuma min na, a man di dɛ! O bɛ digi i la. Nga kɔfɛ, ladili nafa ye hɛrɛ ni tilenninya ye, a tigi b'o min sɔrɔ. O kama, aw k'aw bolo faganin nunu kɔrɔ ta, aw seen minw bɛ yɛrɛyɛrɛ, k'o lɔ ka nya, ka siratilennin taama, o la, minw seen kelen ma nyi, u seen kana mugu, nga a ka suma. Aw ka banba ka bɛn ni mɔgɔw bɛɛ ye. Aw taamacogo fana ka nya, n'o tɛ mɔgɔ si tɛna Matigi ye. Aw k'aw yɛrɛ minɛ waasa mɔgɔ si kana muruti ka ban Ala ka nɛɛma na. Mɔgɔ si kana kɛ yirijugu ye ka wili aw cɛma ka nyagami don ka mɔgɔ caaman halaki. Mɔgɔ si kana kɛ kakala ye, walima Alanyasiranbali ye, i n'a fɔ Ezawu, ale min y'a ka kɔrɔya falen dumuni na. Aw b'a lɔn k'o kɔfɛ, a tun b'a fɛ u faa bɛ duba nin kɛ ale ye, nga o banna. A ye dalili kɛ ka kasi nga o m'a nya. Fɔlɔfɔlɔ mɔgɔw gwɛrɛla Ala ka kulu la cogo min na, mɔgɔ bɛ se ka maga o min na, aw ma gwɛrɛ o la ten. Olu ye tasuma ye, ni kabafin, ni dibiba, ni sanfɔnyɔjugu, ka buru fiyɛkan ni kumakanba mɛn. O mɛnbagaw ma se, u ko Ala yɛrɛ kana kuma olu fɛ tugu. Bari sariya min tun sigira, u tun tɛ se o kɔrɔ. A tun fɔra ko: “Mɔgɔ si man kan ka yɛlɛ kulu nin kan, hali begɛn. Ni fɛɛn o fɛɛn yɛlɛla, o ka kan ka bon ka faga.” Koo nin siranya tun ka bon haali, fɔɔ Musa y'a fɔ ko: “Ebe! Ne bɛ yɛrɛyɛrɛla siranyakojugu fɛ.” Nga aw kɔni, aw gwɛrɛla Siyɔn kulu ni Ala ka dugu la, n'o ye sankolo Zeruzalɛmu ye, ka gwɛrɛ mɛlɛkɛ caaman caaman na n'u bɛ nyanagwɛ la. Mɔgɔ fɔlɔ minw tɔgɔ sɛbɛnnin bɛ arijana na, aw gwɛrɛla olu la, ka gwɛrɛ Ala la, adamadenw bɛɛ kitibaga. Mɔgɔtilennin minw y'u nakun dafa, aw gwɛrɛla olu la. Yezu min ye jɛnnyɔgɔnyakura sindibaga ye, aw gwɛrɛla ale la, a joli min bɔnna, aw gwɛrɛla o la. O joli nin bɛ fɛnnyuman d'an ma ka tɛmɛ Abɛli kan. Min bɛ kumana aw fɛ, aw ye jija, aw kana ban a ka kuma na. Bari fɔlɔ mɔgɔw banna Ala ka kuma fɔbaga ma, o min tun b'u cɛma dugukolo kan. O la, u ma kisi nyagwan ma. Min bɛ to arijana na ka kuma an fɛ, n'an banna ale la, an ka nyagwan tɛna tɛmɛ fɔlɔ mɔgɔw ta kan wa? Min kumakan tun ye dugukolo yɛrɛyɛrɛ, sisan ale ko: “Ne bɛn'a to dugukolo bɛ yɛrɛyɛrɛ sinyɛ kelen tugu, nga a tɛna dan o ma, sankolo fana niin bɛna sɔrɔ a la.” N'a fɔra ko “sinyɛ kelen tugu,” o kɔrɔ ko fɛɛn minw bɛna yɛrɛyɛrɛ, olu bɛna tunu. Minw tɛ yɛrɛyɛrɛ, olu bɛ to yen. Ayiwa, Ala bɛna sigiyɔrɔ d'an ma min tɛ se ka yɛrɛyɛrɛ minkɛ, o la, an k'a fo k'a bato, ka kɛnyɛ n'a yɛrɛ sago ye, ni yɛrɛmajigi ni siranya ye. Bari, an ka Ala ka fari i n'a fɔ tasuma. Nyɔgɔnkanuya ka barika sɔrɔ aw cɛma. Aw hakili ka to a la ko aw ka kan ka lonanw ladon. Lonanladon sababu la, dɔw ye mɛlɛkɛw ladon k'a sɔrɔ u m'a lɔn ko mɛlɛkɛw lo. Aw k'aw hakili to kasodenw na, k'a kɛ i n'a fɔ aw fana bɛ kaso la n'u ye. U bɛ minw tɔɔrɔla aw k'aw hakili to u la, i n'a fɔ aw yɛrɛ tun bɛ tɔɔrɔla. Mɔgɔ bɛɛ ka furu bonya, kakalaya kana kɛ furu kɔnɔ. Bari Ala bɛna nyamɔgɔyakɛlaw ni kakalaw kiti. Wari nyiniko kana finyɛ don aw si taamacogo la. Min b'aw bolo, o k'aw wasa. Bari Matigi yɛrɛ le ko: “Ne tɛna i to i kelen, n tɛna i bila abada.” Anw b'an jigi la a kan o tuma na k'a fɔ ko: “Matigi ye ne dɛmɛbaga ye, ne tɛna siran foyi nya. Adamaden bɛ se ka mun kɛ ne la?” Aw k'aw hakili jigi aw ka nyamɔgɔw la. Olu minw ye Ala ka kuma fɔ aw ye. U sii labanna cogo min na, aw k'o jati k'u taamacogo ladege. Yezu Krista tun bɛ cogo min na kunun, a b'o cogo kelen le la bii, a bɛna kɛ ten fana tuma bɛɛ. Aw kan'a to mɔgɔ si k'aw kuun nyagami ni kalan wɛrɛ ye. Ayiwa, a ka nyi an ka jagwɛlɛya sɔrɔ Ala ka nɛɛma barika la. O kana kɛ landa dumuni dɔw barika la, o min ma deli ka nafa di o dumubagaw ma ka ye. Mɔgɔ minw tun bɛ baara kɛ Alabatoyɔrɔ la fɔlɔfɔlɔ, olu tɛ se k'u niyɔrɔ sɔrɔ an ka sisan Alabatoyɔrɔ dumuni na. Sarakalasebagaw kuntigiba bɛ don ni begɛn min joli ye Yɔrɔ Senuman Senuman na, kojuguw yafali kama, o sogo nin bɛ jɛni dugu kɔfɛ le. O kama, Yezu bɔra dugu kɔfɛ k'a yɛrɛ saraka ka mɔgɔw saniya k'u bɔ u ka kojuguw la n'a yɛrɛ joli ye. O tuma na, n'an b'a fɛ ka ta'a kunbɛn, an ka sɔn dɔgɔya ma ka bɔ dugu kɔfɛ i n'a fɔ ale. Bari dinyɛ tɛ an ka soo ye. Nga an bɛ sini soo le nyinina. O la, an ka Ala fo Yezu sababu la tuma o tuma, o min ye an ka saraka ye. O kɔrɔ ko an k'a tɔgɔ tando n'an daa ye. Aw kana nyinɛ ka nyumanya kɛ, ani ka nyɔgɔn dɛmɛ. O saraka nunu nyɔgɔn le ka di Ala ye. Aw ka mɛnni kɛ aw ka nyamɔgɔw fɛ, aw k'aw yɛrɛ majigi u ye. Bari olu le bɛ janto aw la Alasira la, aw kɛra u ka doni ye Matigi nyakɔrɔ. Aw ka sɔn u ta ma waasa u dusu ka diya u ka baara la. N'u dusu ma diya, o y'aw ka bɔnɛ ye. Aw ka Ala dali anw ye. Anw kɔni lanin b'a la ko an kɔnɔ gwɛnin lo, ko an b'a fɛ an taamacogo ka nya tuma bɛɛ. N b'a nyini aw fɛ kosɛbɛ ko aw ka Ala dali waasa ne ka se ka segi aw fɛ joona. Hɛrɛ masa, Ala min ye jɛnnyɔgɔnya cɛnbali sigi n'an Matigi Yezu joli ye, ale min y'a sanin kunun k'a kɛ a ka jama kɔlɔsibaga ye, a yɛrɛ ka barika don aw la, aw ka se ka konyuman sifa bɛɛ kɛ, k'a sago kɛ. Koo min ka di a yɛrɛ ye, a k'o kɛ an ye Yezu Krista barika la. Bonya ka la ale kan tuma bɛɛ. Amiina. N badenw, ne b'aw dali, aw ka ladilikuma nunu lamɛn kosɛbɛ, bari a man ca. Ayiwa, n b'a fɔ aw ye ko u y'an badencɛ Timote labila. N'a sera n fɛ yan joona, an bɛna na nyɔgɔn fɛ aw fɛ yen. Ne b'aw ka nyamɔgɔw bɛɛ fo, ka Ala ka jama bɛɛ fo. Italikaw b'aw fo. Ala k'a ka nɛɛma kɛ aw bɛɛ ye. Ne Zaki bɛ bataki nin ci aw Isirayɛlidenw ma minw jɛnsɛnnin bɛ dinyɛ faan bɛɛ la. Ne min ye Ala ni Matigi Yezu Krista ka baarakɛla ye, ne b'aw fo. N badenw, kɔrɔbɔli sifa o sifa mana se aw ma, aw k'aw yɛrɛ jati mɔgɔdagamuninw ye. Bari aw b'a lɔn ko tɔɔrɔ minw bɛ sɔrɔ Yezu kɔsɔn, k'o bɛ kɛ sababu ye aw bɛ kɛ munyubagaw ye. Nga o munyuli nin ka dafa, waasa aw ka kɛ mɔgɔdafaninw ye, ani finyɛ kana sɔrɔ aw la fewu. N'o y'a sɔrɔ n'aw dɔ dɛsɛnin lo hakilitigiya la, o tigi k'a dali Ala fɛ, a bɛn'a d'a ma. A tigɛ man gwɛlɛ, a bɛ mɔgɔ bɛɛ sɔn ka nya. A t'an sɔngɔ ka sɔrɔ k'an sɔn. Nga o tigi k'a jigi la Ala kan k'a dali, a kana sigasiga hali fitini. Bari mɔgɔ min bɛ sigasiga, o tigi bɔnin bɛ baji fɛ, fɔnyɔ b'o min lamaga ka taa n'a ye faan bɛɛ. O tigilamɔgɔ kan'a miiri ko a bɛna fɛɛn dɔ sɔrɔ Matigi fɛ. Bari a hakili tɛ kelen kan, a bɛ siga a ka koo kɛtaw bɛɛ la. Aw minw ye faantanw ye, aw ye nisɔndiya, bari Ala b'aw kɔrɔ ta. Minw wasanin bɛ, ni olu dɔ nagasira, a ka nisɔndiya o koo la, bari a bɛna sa i n'a fɔ biin feeren. Tile bɛ fariya ka biin ja, a feeren ka cɛnya bɛ ban ka tila ka ben cogo min na, o cogo kelen na, mɔgɔwasaninw bɛna ben u ka baara la. Mɔgɔ min bɛ jija ka sɛgɛn munyu, o tigi ye dubaden ye. Bari n'a sera ka sɛgɛn nunu munyu, a bɛna sini sɔrɔ a ka tɔnɔ ye. Ala tun y'a daa di a kanubagaw ma, ko u bɛna o min sɔrɔ. Ni kojugu kɛ nigɛ donna min na, o tigi kan'a fɔ ko Ala nɔɔ lo. Bari kojugu nigɛ tɛ Ala minɛ fewu. A fana tɛ mɔgɔ si nigɛ ka don kojugu la. Nga mɔgɔ kelen kelen bɛɛ kɔnɔnako le bɛ kojugu kɛ nigɛ don a la. Ayiwa, ni kojugu nigɛ jiidira mɔgɔ kɔnɔ, a bɛ kojugu kɛ. Ni kojugu ye fanga sɔrɔ a kan, a bɛ na ni saya ye. N badenw, aw minw koo ka di ne ye, aw kana aw yɛrɛ nigɛ dɛ! An bɛ fɛnnyuman minw bɛɛ sɔrɔ n'o dafanin lo, o bɛ bɔ Ala le fɛ min ye tile ni kalo ani lolow dan. A tɛ yɛlɛma, dibidibi tɛ a ka koo si la. A diyara Ala ye, a y'an dan a ka tinyɛ kuma barika la, waasa an ka kɛ a ka danfɛnw bɛɛ nyamɔgɔ ye. N badenw, aw minw koo ka di ne ye, aw k'a lɔn kosɛbɛ ko mɔgɔ kelen kelen bɛɛ ka kan ka lamɛnni kɛ ka nya, nga a kana teliya ka kuma, a kana dimi joona. Bari mɔgɔ min dusu gwannin lo, o tigi ka kɛwali tɛ tilen Ala nyakɔrɔ. O kama, koo o koo bɛ mɔgɔ nɔgɔ Ala nyana, ani juguya bɛɛ, aw k'o bɛɛ dabila. Ala ka kuma min b'aw kɔnɔ, aw ka sɔn o ma ni yɛrɛmajigi ye. O kuma nin, o bɛ se k'aw kisi. Aw kana aw yɛrɛ nigɛ fana ko aw bɛ to ka Ala ka kuma lamɛn. Nga aw k'o lamɛn, k'a labato. Mɔgɔ min bɛ Ala ka kuma lamɛn n'a t'a labato, o tigi bɔnin bɛ mɔgɔ fɛ min b'a yɛrɛ filɛ dubalen kɔnɔ. A b'a yɛrɛ filɛ, n'a bɔra yen, a bɛ nyinɛ a yɛrɛ cogo kɔ. Nga, mɔgɔ min bɛ sariya sɛbɛsɛbɛ kɔnɔnakuma lamɛn ka nya k'a janto a la, n'a tɛ nyinɛ a kɔ, ani ka to k'a labato, o tigi kɔni bɛna hɛrɛ sɔrɔ a ka kɛwaliw la. O kuma nin le bɛ mɔgɔ kɛ hɔrɔnw ye. Ni min y'a miiri ko ale bɛ Alasira taama k'a sɔrɔ a t'a kumacogo kɔlɔsi, o tigi b'a yɛrɛ nigɛ, kuun tɛ o tigi ka Alasira koo la. Alasira taamacogo min tilennin bɛ, ni finyɛ t'a la an Faa Ala nyakɔrɔ, o filɛ: e k'i janto falatɔw ni firiyamusow la u ka tɔɔrɔ tuma na. Ani e k'i yɛrɛ tanga dinyɛ ka koo nɔgɔninw bɛɛ ma. N badenw, aw minw lanin bɛ an Matigi Yezu Krista nɔɔrɔtigi la, aw kana mɔgɔw woloma k'u fisaya nyɔgɔn ye. Ni mɔgɔ fila nana don aw cɛma aw ka lajɛnyɔrɔ la, ni dakamana fani bɛ kelen kaan na, ni sanu donnin b'a bolo, k'a sɔrɔ dɔ nin ka faniw faranfarannin lo, n'aw y'aw janto dakamana fanitigi la k'a fɔ a ye ko a ka na sigi yɔrɔnyuman na, k'a fɔ faantan nin ye ko a ka lɔ sanfɛ walima ko a ka sigi duguma aw seen kɔrɔ, n'aw y'o kɛ, aw ma wolomani kɛ wa? Aw bɛ mɔgɔw bɔ nyɔgɔn na ni; naniyajugu ye. N badenw, aw minw koo ka di ne ye, aw ye mɛnni kɛ, minw bɛ jati faantanw ye dinyɛ kɔnɔ, Ala m'u woloma k'u kɛ fɛntigiw ye lanaya koo la, ani k'u ladon a ka mara la wa? A tun y'a daa di a kanubagaw ma o min koo la. Nga aw kɔni, aw bɛ faantanw le dɔgɔya. Nafolotigiw le t'aw tɔɔrɔ k'aw minɛ ka taa n'aw ye faamaso wa? U b'aw wele ni tɔgɔnyuman min ye, olu le tɛ o cɛnbagaw ye wa? Sariya min fɔra Masa Ala ka kuma na ko: “E k'i mɔgɔnyɔgɔn kanu i n'a fɔ i b'i yɛrɛ kanu cogo min na.” N'aw b'o labato, o tuma na aw ka kɛwali ka nyi. Nga n'aw bɛ wolomani kɛ ka mɔgɔw fisaya ni nyɔgɔn ye, aw bɛ kojugu kɛ, Ala ka sariya b'aw minɛ bari aw m'a labato. Ni min ye sariya kelen cɛn, o tigi ye sariya bɛɛ le cɛn, hali n'a ye tɔ nunu bɛɛ labato. Bari min y'a fɔ ko: “I kana nyamɔgɔya kɛ,” ale le y'a fɔ fana ko: “I kana mɔgɔ faga.” Ayiwa, e tɛ nyamɔgɔya kɛ, nga i bɛ mɔgɔ faga, sariya y'i minɛ. Sariya min b'aw hɔrɔnya, aw bɛna kiti ka kɛnyɛ n'o le ye. O kama, aw kumacogo n'aw ka kɛwaliw ka bɛn o ma. Bari mɔgɔ min tɛ makari tɔw la, kiti tigɛlon na, Ala fana tɛna makari o tigi la. Nga minw bɛ makari, olu tɛ siran kiti nya. N badenw, ni mɔgɔ dɔ y'a fɔ ko ale jigi bɛ Ala kan, k'a sɔrɔ o tɛ ye a ka kɛwaliw la, a bɛ mun nya sa? O jigi nin bɛ se k'a kisi wa? N'aw balimacɛ dɔ, walima aw balimamuso dɔ fari lakolon lo, ni bii ka dumuni fana t'a fɛ, n'aw dɔ y'a fɔ a ye ko: “Taa hɛrɛ la, Ala k'i dɛmɛ,” k'a sɔrɔ a mako bɛ fɛɛn min na, aw m'o d'a ma, aw ye duba min kɛ, o bɛ mun nya sa? Ayiwa, ni min ko ale jigi bɛ Ala kan, k'a sɔrɔ o tɛ ye a ka kɛwaliw la, o jigi nin ma kɛ jigi nyanaman ye. O la, dɔ bɛ se k'a fɔ ko: “I ko i jigi bɛ Ala kan, ne kɔni bɛ kɛwalinyumanw le kɛ. E k'i ta jigi yira ni kɛwali niin t'a la, ne bɛna n ta yira ni kɛwali ye.” I lanin b'a la ko Ala ye kelenpe ye kɛ! O ka nyi. Jinaw fana lanin b'o la, u bɛ siran fɔɔ ka yɛrɛyɛrɛ. Naloman! K'a fɔ ko i jigi bɛ Ala kan k'a sɔrɔ o tɛ ye i ka kɛwaliw la, i b'a fɛ k'a lɔn k'o ye fu ye wa? An bɛma Ibrayima ta filɛ kɛ. A y'a dencɛ Isiyaka di Ala ma saraka ye minkɛ, o la Ala y'a jati mɔgɔtilennin ye a ka kɛwali kɔsɔn. I y'a ye wa? A jigi tun bɛ Ala kan, a fana tun ye kɛwaliw kɛ. A ka kɛwaliw y'a yira ko a jigi dafanin lo. O cogo la, min fɔra Ala ka kuma na, o kɛra tinyɛ na ko: “Ibrayima y'a jigi la Ala kan, o kɔsɔn Ala y'a jati mɔgɔtilennin ye,” k'a wele ko a teri. Aw m'a ye wa? Mɔgɔ ka kɛwalinyumanw le b'a to Ala b'a jati mɔgɔtilennin ye. Jigi koo dama tɛ. O cogo kelen na, Ala ye kakalamuso Araabu jati mɔgɔtilennin ye a ka kɛwali kɔsɔn. Bari a ye Isirayɛli ka cidenw ladon ka sɔrɔ ka sira wɛrɛ don u seen kɔrɔ. Ayiwa, ni mɔgɔ nii bɔra a bɛ kɛ suu ye cogo min na, o cogo kelen na, n'i ko i lanin bɛ Ala la k'a sɔrɔ o tɛ ye i ka kɛwaliw la, o fana ma kɛ jigi nyanaman ye. N badenw, aw caaman kana kɛ karamɔgɔw ye. Bari an b'a lɔn ko karamɔgɔw ka kiti bɛna gwɛlɛya. An bɛɛ bɛ fili cogo caaman na. Mɔgɔ min tɛ fili kuma na, o tigi ye mɔgɔdafanin ye, a bɛ se k'a yɛrɛ minɛ fana. An bɛ karafe don soo daa la waasa a ka sɔn an ta ma. N'an ko a ka taa faan min na, a bɛ taa yen. Walima aw ye kurunbabaw filɛ. Hali n'u dɔ bonyana cogo o cogo hali ni fɔnyɔba b'a nyɔntira cogo o cogo, ni kurunbolila b'a fɛ a ka taa yɔrɔ min na, a bɛ taa yen a nyatilenfɛnfitinin barika la. O cogo kelen na, mɔgɔ nɛɛn fana y'a fari yɔrɔfitinin dɔ ye min bɛ se k'a yɛrɛ bonya haali. Takamifitinin fana bɛ ten. A bɛ se ka tuu belebeleba bɛɛ halaki. Mɔgɔ nɛɛn fana bɛ i n'a fɔ tasuma. Fɛnjugu lo. An fari yɔrɔ dɔ lo, ale le bɛ fari yɔrɔ tɔw bɛɛ don koo la. O tasuma min ye jahanama ta ye. Kongosogow, ni kɔnɔw, saaw, ani jikɔnɔfɛnw sifa bɛɛ, adamaden bɛ se ka olu kolo. Nga mɔgɔ si tɛ se ka nɛnden mara. Balawufɛn lo min tɛ lafinyɛ. Baga yɛrɛ lo, min bɛ mɔgɔ faga. An bɛ Matigi, ni an Faa tando n'an nɛɛn ye, ka tila ka mɔgɔ danga n'o le ye. Ala do ye mɔgɔ dan i n'a fɔ a yɛrɛ. Duba ni danga ka bɔ daa kelen na, n badenw, o daganin tɛ! Jii diman, ani jii kunaman bɛ se ka bɔ kɔlɔn kelen kɔnɔ wa? N badenw, toro bɛ se ka tigɛ olivuyiri kan wa? Walima ɛrɛzɛnsun bɛ se ka den toro la wa? Jii diman tɛ se ka bɔ kɔgɔji la. Jon ye hakilitigi ye aw cɛma? O tigi k'a yira a ka kɛwalinyumanw fɛ a bɛ o minw kɛ ni yɛrɛmajigi ani hakilitigiya ye. Nga ni min kɔnɔ ka jugu, ni keliya bɛ min na, o tigi kan'a yɛrɛ wansun k'a ka galon kɛ ka tinyɛ datugu. O hakilitigiya nyɔgɔn tɛ bɔ Ala fɛ, nga o ye dinyɛ ta ye, adamaden ni Sutana ta. Kɔnɔnajuguya ni keliya bɛ yɔrɔ min na, konyagaminin ni kojugu sifa bɛɛ bɛ sɔrɔ o yɔrɔ la fana. Nga hakilitigiya min bɛ Ala fɛ, o bɛ mɔgɔ kɛ mɔgɔnyuman ye, hɛrɛmɔgɔ, hinɛbaga, min ka koo ka di, a ka kɛwaliw ka nyi kosɛbɛ. A bɛ makari kosɛbɛ. A tɛ wolomani kɛ. A tɛ kuma fila fɔ. Mɔgɔ minw bɛ hɛrɛ nyinina, olu bɛ tilenninya nafa sɔrɔ hɛrɛ kɔnɔ. Kɛlɛ ni sɔsɔli minw bɛ wili aw cɛma wo, olu bɛ bɔ min le? O bɛ bɔ nigɛjuguw la minw b'aw nyɔntinyɔntira. Fɛɛn dɔw nigɛ b'aw la, nga aw t'o sɔrɔ, aw bɛ mɔgɔ faga ka kɔnɔnajuguya kɛ, nga aw bɛ min fɛ, aw tɛ se k'o sɔrɔ. Kɛlɛ ni sɔsɔliw bɛ wili aw cɛma. Aw tɛ foyi sɔrɔ bari aw t'a dali Ala fɛ. Aw man'a dali fana, aw tɛ foyi sɔrɔ bari aw ka miiriya man nyi. Aw b'a dali aw yɛrɛ ka nigɛla dama kɔsɔn. Kakala nunu! Aw m'a lɔn ko ni mɔgɔ min ye dinyɛ koo diya a yɛrɛ ye, k'o tigi ni Ala tɛ bɛn wa? Ayiwa, ni mɔgɔ min bɛ dinyɛ koo diya a yɛrɛ ye, o tigi b'a yɛrɛ kɛ Ala jugu ye. A fɔra Ala ka kuma na ko: “A ye nii min don aw la, a bɛ keliya o koo la.” Aw ka miiri la k'o ye kuma fu ye wa? A bɛ koo bɛɛ kɛ k'a ka nyumanya yira. O la, a fɔra Ala ka kuma na ko: “A bɛ nyumanya kɛ mɔgɔmajigininw na, ka fariya yɛrɛbonyalaw ma.” Aw k'aw yɛrɛ majigi Ala ye ka ban Sutana ma. O la, a bɛna aw ye k'aw to yen. Aw ye gwɛrɛ Ala la, ale fana bɛna gwɛrɛ aw la. Kojugukɛla nunu! Aw y'aw bolo n'aw dusu saniya. Kɔnɔ fila tigi nunu! Aw ye nimisa ka kasi kosɛbɛ, aw k'aw ka yɛlɛko kɛ kasi ye, k'aw ka nisɔndiya yɛlɛma ka kɛ dusukasi ye. Aw k'aw yɛrɛ majigi Matigi ye, a bɛna kunkɔrɔta di aw ma. N balimaw, aw kana nyɔgɔn tɔgɔjugu fɔ, ni min y'a tɔnyɔgɔn tɔgɔjugu fɔ, walima k'a jalaki, o tigi bɛ kumajugu fɔ Ala ka sariya koo la, k'a dɔgɔya. K'a sɔrɔ mɔgɔ min bɛ sariya dɔgɔya, o tigi tɛ sariya labatobaga ye, nga a b'a dɔgɔya le. Sariyasigibaga ni kititigɛbaga ye Ala kelenpe ye, ale min bɛ se ka mɔgɔ kisi walima k'a halaki. E min b'i tɔnyɔgɔn jalaki, e ye jon ye? Ayiwa, aw minw b'a fɔ ko: “Bii, walima sini, an bɛna taa dugu nin na ka jago kɛ saan kelen ka wari sɔrɔ.” K'a sɔrɔ aw m'a lɔn ni sini bɛna kɛ cogo min na aw fɛ, bari aw kɛra i n'a fɔ kɔmiji. Nga aw ka kan k'a fɔ ko ni Matigi sɔnna, ko aw bɛna nin ni nin kɛ. Aw b'aw yɛrɛ bonya n'aw ka kuma fufafu ye. K'a sɔrɔ o nyɔgɔn ma nyi. Ayiwa, mɔgɔ min bɛ konyuman lɔn n'a t'a kɛ, o tigi ye kojugu kɛ. Sisan, n kaan bɛ aw nafolotigiw le ma. Aw ka kasi kosɛbɛ, bari bɔnɛ bɛna kɛ aw ta ye. Aw k'a lɔn ko aw ka nafolo tolinin lo, bagabagaw y'aw ka faniw nyiminyimi. Aw ka sanu n'aw ka wari bɛɛ sonnin lo. O soon nin bɛna aw ka tigɛgwɛlɛya yira, a bɛna aw halaki i n'a fɔ tasuma. Aw ye nafolo lajɛn aw yɛrɛw ye waati laban nin na. Baaraden minw ye baara kɛ aw ka foro kɔnɔ, aw ma olu ka saraw di u ma. Matigi, Setigi y'o baaraden nunu kasikan mɛn. Dinyɛ na, aw ye faamadumuni kɛ k'aw diyanakow kɛ, ka tulɔ i n'a fɔ begɛn fagata, k'aw salon kɔnɔ. Aw ye mɔgɔtilenninw jalaki k'u faga. U ma aw sɔsɔ. N badenw, aw ye munyu fɔɔ ka se Matigi kɔsegilon ma i n'a fɔ sɛnɛkɛla bɛ munyu cogo min na. Ni sanji fɔlɔ benna, a bɛ munyu fɔɔ ka se sanji laban ka ben ma, a bɛ sɔrɔ k'a ka baara nafa sɔrɔ. O cogo la, aw fana ka munyu, ka jija bari Matigi ka kɔsegituma surunyana. N badenw, aw kana dimi mara ka to ka nyɔgɔn kɔrɔfɔ janko Ala kana aw kiti. A labɛnnin lo kiti kama dɛ. Matigi ye kira minw ci, olu ye tɔɔrɔ munyu cogo min na, aw ka olu ladege, n balimaw. Mɔgɔ minw bɛ munyu fɔɔ ka se a daan ma, anw k'olu ye dubadenw ye. Zɔbu munyuna cogo min na, n ko aw y'o mɛn kɛ. Matigi nana min kɛ a ye laban na, aw b'o lɔn. Matigi ye nyumanya ni makaritigi ye. N badenw, aw kana kali abada. Aw kana kali sankolo la, walima dugukolo la. Aw kana kali cogo si la. Aw k'a fɔ ko ɔnhɔn ni ɔnhɔn lo, k'a fɔ ayi ni ayi lo, waasa Ala ka kiti kana ben aw kan. N'aw dɔ bɛ tɔɔrɔ la, a ka Ala dali. Min nisɔn ka di, o ka Ala tando ni dɔnkiliw ye. N'aw dɔ man kɛnɛ, o tigi ka Ala ka jama nyamɔgɔw wele, u ka dalili kɛ a ye ka tulu mɔ a la Matigi tɔgɔ la. O dalili min bɛ kɛ k'u jigi to Matigi kan, o bɛna banabagatɔ kisi, Matigi bɛn'a kɛnɛya. N'o y'a sɔrɔ a ye kojugu dɔ kɛ, a bɛna o yafa sɔrɔ. O la sa, aw ye kojugu minw kɛ, aw ka olu fɔ nyɔgɔn ye ka Ala dali nyɔgɔn ye waasa aw bɛ kɛnɛya. Barika bɛ mɔgɔtilennin ka dalili la kosɛbɛ. Kira Eli tun ye anw bɔnyɔgɔnko adamaden ye. A y'a jigi la Ala kan k'a dali ko sanji kana na. Sanji fana ma na fɔɔ saan saba ni kalo wɔɔrɔ. O kɔ, a ye dalili kɛ tugu, sanji nana, sumanw nyana. N badenw, n'aw dɔ filila ka tinyɛ sira bila, ni min kɛra sababu ye k'a kɔsegi k'a bɔ o sirajugu nin kan, o tigi bɛ kɛ sababu ye k'a tɔnyɔgɔn kisi, kojugu caaman bɛ yafa. Ne Piyɛri, Yezu Krista ka ciden, bɛ bataki nin ci aw ma, Ala ye aw minw woloma n'aw bɛ lonanya la Pɔn mara la, ni Galati, ani Kapadɔsi, ni Azi ani Bitini mara la. Faa Ala y'aw woloma kabini fɔlɔ, k'aw kɛ a taw ye Nii Senuman barika la, waasa ka mɛnni kɛ Yezu Krista fɛ ani ka saniya a ka joli bɔnnin na. Ala ka nɛɛma ni hɛrɛ kɛ aw ye tuma bɛɛ. An ka barika la Ala ye, o min ye an Matigi Yezu Krista Faa ye! A makarila an na kosɛbɛ k'an kɛ danfɛnkura ye ka jigi nyanaman di an ma Yezu Krista ka kununni barika la ka bɔ kaburu la, ani ka niyɔrɔ d'an ma, o min tɛ cɛn, a tɛ nagasi, nɔgɔ tɛ se a ma ka ye. A maranin b'aw ye arijana na, Setigi Ala bɛ aw minw mara aw jigi kɔsɔn fɔɔ ka taa se kisili loon yɛrɛ yɛrɛ ma. Ala y'o min latigɛ n'o bɛna kɛ dinyɛ laban tuma na. O la, hali k'aw to dusukasi la waati dɔɔni nin yɛrɛ kɔnɔ tɔɔrɔ sifa caaman na, aw ka nisɔndiya kosɛbɛ. Sanu min ye banta ye, ale bɛ sɛgɛsɛgɛ tasuma na cogo min na, o cogo kelen na aw bɛ sɛgɛsɛgɛ aw jigi koo la tɔɔrɔ nunu bolo, ale min ka fisa ni sanu ye sinyɛ tan, janko aw ka tandoli ni bonya ani karama sɔrɔ Yezu Krista kɔsegilon. Aw nyaa ma la a kan, nga a koo do diyara aw ye. Aw y'aw jigi la a kan, k'a sɔrɔ aw m'a ye fɔlɔ, ka nisɔndiya kosɛbɛ o nisɔndiya min tɛ se ka lakali. Bari aw kisira aw ka jigi kɔsɔn. Aw tun ka kan ka kisili min sɔrɔ, kiraw kumana o koo la, ani u ka miiriya bɛɛ tun bɛ sinna o le ma. Krista tun bɛna tɔɔrɔ ni bonya min sɔrɔ, a ka Nii Senuman min tun bɛ u fɛ, ale tun b'o koo yira u la, lu tun b'a fɛ k'o waati n'a kɛcogo lɔn. Ala y'a yira u la k'u ka koo tɛ o ye, nga u tun b'o kuma fɔra ka bila aw le ye. Aw y'o kira nunu ka kumaw mɛn sisan Kibaru Diman fɔbagaw fɛ, Nii Senuman barika la, o min cira ka bɔ sankolo la ka jigi u kan. O diyara mɛlɛkɛw ye fɔɔ u tun b'a fɛ ka koo nin ye. Ayiwa, aw labɛnnin ka to baara kama, k'aw yɛrɛ minɛ. Yezu Krista bɛna makari aw la a kɔsegilon cogo min na, aw k'aw jigi la o kan kosɛbɛ. Aw ka mɛnni kɛ Ala fɛ i n'a fɔ dennyumanw. Aw kana taama nigɛlafɛnw kɔ i n'a fɔ aw tun b'a kɛ cogo min na k'aw to kolɔnbaliya la. Nga aw ka kɛ mɔgɔnyumanw ye aw ka koo kɛtaw bɛɛ la i n'a fɔ aw Welebaga. Bari a fɔra Ala ka kuma yɔrɔ dɔ la ko: “Aw ka kɛ mɔgɔnyumanw ye i n'a fɔ ne bɛ cogo min na.” Ɔnhɔn, aw ka dalili la, aw bɛ Ala wele ko aw Faa. A tɛ wolomani kɛ, a bɛ mɔgɔ bɛɛ kiti kelen kelen u ka kɛwaliw kɔsɔn. O tuma na sa, aw ka taama Alanyasiran na, k'aw to dinyɛ na. Aw b'a lɔn ko aw kuun ma bɔ aw faaw ka koo fufafuw la ni wari ye, walima ni sanu ye o min ye banta ye. Nga aw kunmabɔra ni joli nyanaman le ye, Krista joli, o min kɛra i n'a fɔ sagaden, finyɛ tɛ min na, o min tun labɛnna o kama kabini dinyɛ ma dan fɔlɔ. Nga o koo kɛra sisan laban tuma nin na aw le kama. Ala min ye Krista kunun a sanin kɔ, ka nɔɔrɔ d'a ma, aw lara ale la Krista yɛrɛ sababu la. Aw bɛ la Krista la cogo min na, aw jigi bɛ Ala kan ten. Aw sɔnna Ala ka tinyɛkuma ma minkɛ, o le y'aw dusu saniya, waasa aw ka se ka nyɔgɔn kanu badenya la ni kɔnɔgwɛ ye. Aw ka nyɔgɔn kanu kosɛbɛ n'aw dusu bɛɛ ye. Bari aw kɛra danfɛnkuraw ye min ma bɔ fɛɛn tolita la, fɔɔ fɛɛn tolibali. O kɛra Ala ka kuma barika la, o kuma nyanaman lo tuma bɛɛ, bari “Adamadenw bɛɛ bɛ i n'a fɔ biin. U ka dawula bɛɛ bɛ i n'a fɔ binfeeren. Biin bɛ ja, a feeren bɛ ben. Nga Matigi ka kuma bɛna to n'a ka barika ye waati bɛɛ.” O kuma nin le nana fɔ aw ye. O la, aw ka nanbarankow bɛɛ dabila, ni kɔnɔ fila fila koo, ni nyagoya, ani kumajugu, ni kojugu sifa bɛɛ. Aw ka faran o bɛɛ la. Siin ka di dennyɛnin ye cogo min na, Ala ka kuma fana ka kɛ aw fɛ ten janko aw ka kɔgɔ ka kisi, “bari aw y'a ye ko Matigi ka koo ka di.” Aw ye gwɛrɛ Matigi la ale min ye Kabakuru nyanaman ye. Mɔgɔw banna ale min na i n'a fɔ bonlɔbagaw bɛ ban kabakuru dɔ la cogo min na. Nga Ala y'a woloma, a koo ka gwɛlɛ a ma. O cogo la, aw bɛ kɛ a bɔnyɔgɔnko kabakuru nyanamanw ye, minw bɛna kɛ ka Ala ka soo lɔ, batolisɛbɛ bɛna kɛ min kɔnɔ, ani ka kɛ sarakalasebagaw ye, k'aw yɛrɛ di Ala ma Yezu Krista barika la. O ka d'a ye. Bari a fɔra Ala ka kuma yɔrɔ dɔ la ko: “Ne Ala yɛrɛ ye kabakuru nyanaman min woloma, n b'o bila Siyɔn. Ni mɔgɔ o mɔgɔ y'a jigi la o kan, o tigi tɛna malo abada!” Ayiwa, aw minw y'aw jigi la o kabakuru nin kan, a kɛra fɛɛn nafaman ye aw fɛ. Nga Alalɔnbaliw fɛ, “bonlɔlaw tun banna kabakuru min na, o le nana kɛ boon kabakuruw bɛɛ la nyuman ye,” ani “o kɛra u talon kabakuru ye, ani u benta.” U bɛ talon a la, bari u ma la a ka kuma na. O le tun ka kan n'u ye. Nga aw kɔni, Ala ye aw woloma k'aw kɛ ale Masaba ka sarakalasebagaw, n'a ka jama ye. A y'aw sama ka bɔ dibi la k'aw bila a ka kɛnɛba la janko aw k'a ka nyumanya koo fɔ. Fɔlɔ la, aw tun ma kɛ Ala ka jama ye, nga sisan, aw kɛra a ka jama ye. A tun tɛ makari aw la ka kɔrɔ, nga sisan, a makarila aw la. Ne terinyumanw, aw minw ye tɛmɛbagaw ye dinyɛ na, n b'a nyini aw fɛ, ko aw k'aw yɛrɛ kɔlɔsi nigɛjuguw ma o minw ni Ala ka koo tɛ bɛn dɛ! O la, aw taamacogo ka nya Alalɔnbaliw cɛma, waasa hali n'u ko u bɛna aw tɔgɔ cɛn, aw ka kɛwalinyumanw ka kɛ sababu ye u bɛ Ala tando a nalon na. Aw k'aw yɛrɛ majigi faamaw ye Matigi kɔsɔn. Aw k'aw yɛrɛ majigi jamanatigi ye bari jamana ka koo bɛ ale le bolo. An'a ka lasigidenw ye, bari olu ye see sɔrɔ a fɛ ka kojugukɛlaw nyaa gwan, ka konyumankɛlaw kunnawolon. Ala sago ye nin ye: Aw ka konyuman kɛ, o cogo la, koo faamubaliw tɛna kumayɔrɔ sɔrɔ. Aw ka taama hɔrɔn taamacogo la, aw kana aw ka juguya dogo o hɔrɔnya nin jukɔrɔ. Nga aw ka kɛ Ala ka baarakɛlaw ye. Aw ka mɔgɔ bɛɛ bonya, k'aw balimaw kanu, ka siran Ala nya, ka masa bonya. Ayiwa baaradenw, aw k'aw yɛrɛ majigi sɛbɛ la aw ka kuntigiw ye. Kuntigi minw ye mɔgɔnyumanw ye ni minw sabalinin lo, aw kana aw yɛrɛ majigi olu dama ye, nga minw ka fari, aw k'aw yɛrɛ majigi olu fana ye. Mɔgɔ man kan ni tɔɔrɔ min ye, n'a b'o munyu Ala kɔsɔn, o ka nyi kosɛbɛ. N'u b'i bugɔra bari i ye kokolon dɔ le kɛ, kunkɔrɔta jumɛn le b'o tɔɔrɔ munyuli la? Nga n'u b'i tɔɔrɔla k'a sɔrɔ i ye konyuman kɛ, i do bɛ o munyuna, o le ye Ala ka dɛmɛli ye. Ala y'aw wele o yɛrɛ le kama. Bari Krista fana tɔɔrɔla aw kɔsɔn. A ye wale yira aw la, aw ka kan k'a nɔɔ ta. “A ma kojugu kɛ ka ye, nanbarankuma ma bɔ a daa la ka ye.” U tun y'a nɛni tuma min na, a ma sɔn k'u nɛni. U tun b'a tɔɔrɔla tuma min na, a ma kumajugu fɔ u ye. Nga, a y'a ta to Ala ma dɔrɔn, ale min bɛ kiti tigɛ ka tilen. A y'an ka kojuguw bɛɛ ta a yɛrɛ kunna ka tɔɔrɔ lɔgɔ kan, waasa anw ni kojuguw cɛ ka faran, an ka taamacogokura ta min tilennin lo. Bari aw ye hɛrɛ sɔrɔ ale ka tɔɔrɔ sababu la. Bari aw tun kɛra i n'a fɔ sagatununinw, nga sisan, aw nyaa yɛlɛmana ka sin aw Dɛndɛbaga ma, o min ye aw Kɔlɔsibaga ye. Musow, aw fana k'aw yɛrɛ majigi aw cɛɛw ye waasa hali ni dɔw bɛ ban Ala ka kuma na, u ka sɔn a ma aw taamacogo sababu la, o kana kɛ kuma sababu la. Bari u bɛn'a ye ko aw taamacogo ka nyi, ko aw bɛ mɔgɔ bonya. Aw kana aw ka cɛnya yira ni masirifɛnw ye, i n'a fɔ k'i kunsigi lalaga nyanaman, ka sanu don ka fani nyanaman don. Nga, aw ka kɛ sɔnnyumantigiw ye, hakili siginin, minw ka koo ka nɔgɔ. O le ka di Ala ye haali. Muso minw jigi tun bɛ Ala kan fɔlɔfɔlɔ, olu sɔɔn tun bɛ ten. U majiginin tun bɛ u furucɛw ye, i n'a fɔ Sara. A y'a yɛrɛ majigi Ibrayima ye fɔɔ ka to k'a wele ko: “N matigi.” N'aw bɛ konyuman kɛ, n'aw tɛ siran fewu, aw bɛ kɛ Sara denmusow ye. Cɛɛw, aw fana k'aw ka musow minɛ ka nya ni hakilitigiya ye bari aw barika ka bon n'u ta ye. Aw k'u bonya bari aw bɛɛ bɛna niyɔrɔ kelen sɔrɔ Ala fɛ. Aw ka to k'a kɛ ten, waasa aw bɛ dalili minw kɛ, koo si kana na o bali. Ayiwa, aw bɛɛ ka nyɔgɔn minɛ ka nya ni miiriya kelen ye. Aw ka nyɔgɔn kanu i n'a fɔ balimaw, ka nyɔgɔn dɛmɛ, ka makari nyɔgɔn na, k'aw majigi nyɔgɔn ye. Aw kana juguya sara ni juguya ye, walima ka dɔ ka nɛnili segi a ma. Nga e ka duba le kɛ. Bari Ala ye aw minw wele, janko aw k'a ka duba sɔrɔ. “Ni mɔgɔ min b'a fɛ ka sii sɔrɔ, ani ka to hɛrɛ la, o tigi ka kan k'a yɛrɛ minɛ kumajugu fɔli, ani galon ma. A ka kan ka kojugu dabila ka konyuman kɛ, ka hɛrɛ nyini dɔrɔn. Bari Matigi hakili bɛ mɔgɔtilenninw na, a tulo malɔnin lo u ka dalilikan na. Nga a t'a fɛ a nyaa bɛ la kojugukɛlaw kan.” Jon bɛ se ka kojugu kɛ aw la, n'aw ye konyumankɛlaw ye? Hali n'aw bɛ tɔɔrɔ sɔrɔ aw ka konyumankɛ kɔsɔn, dagamu ye aw ta ye. Aw kana siran mɔgɔ si nya, aw hakili kana nyagami. Aw ka Krista bonya aw dusu la, ale min ye aw ka Matigi ye. Aw jigi min lanin b'a kan, ni dɔ kɛra aw nyiningabaga ye, aw labɛnnin ka sɔrɔ tuma bɛɛ k'a tigi jaabi o koo la. Nga o jaabili nin ka kan ka kɛ ni dususuma, ni bonya ye. Aw bɛ kɛwalinyuman minw kɛ Krista barika la, aw k'o kɛ ni kɔnɔgwɛ ye, waasa aw tɔgɔ cɛnbagaw ka maloya. Ka tɔɔrɔ konyuman kɔsɔn, n'o ye Ala sago ye, o ka fisa ka tɔɔrɔ kojugu kɔsɔn. Krista sara adamadenw ka kojuguw kɔsɔn sinyɛ kelenpe, a banna. Ale mɔgɔtilennin sara mɔgɔ tilenbaliw kɔsɔn, waasa k'aw kɛ Ala taw ye. U y'a faga kɔni, nga a kununna Nii Senuman barika la. A taara lahara kɔnɔ mɔgɔw waaju, ale Nii Senuman barika la. Olu minw tun murutira Ala ma, a munyuna, Nuhun ye kurunba lalaga, mɔgɔ damani le kisira o kɔnɔ, mɔgɔ seegi dɔrɔn. O jii nin tun kɛra batizeli taamasinyɛ ye, o min b'aw kisi bii. O ma kɛ fari saniyako ye. Nga; naniyanyuman lo an bɛ min ta Ala faan fɛ. A b'aw kisi Yezu Krista ka kununni barika la a sanin kɔ, ale min taara arijana na ka to Ala kinibolo la. Mɛlɛkɛw ni setigiw, ani fangatigi minw b'o yɔrɔ la, u bɛɛ majiginin bɛ ale ye. Krista tɔɔrɔla minkɛ, aw fana ka kɛ n'o miiriya ye. Bari mɔgɔ min tɔɔrɔla, o tigi ye see sɔrɔ kojugu kan. O la, k'a to dinyɛ na, a bɛna Ala sago dama kɛ, a tɛna to nigɛjuguw la. Aw y'aw yɛrɛ nigɛlako minw kɛ ka tɛmɛ, o b'aw bɔ, i n'a fɔ kakalaya, nigɛjuguw, dɔrɔtɔya, nugubatɔya, dɔrɔminkojugu, ani subagaya i n'a fɔ Alalɔnbaliw b'a kɛ cogo min na. Alalɔnbaliw bɛ kabakoya, bari aw tɛ jɛn n'u ye u ka koo fufafu nunu na tugu, o la, u b'aw tɔgɔ cɛn. U bɛna na o bɛɛ nyafɔ Ala ye, ale min labɛnnin lo ka suuw ni nyanamanw bɛɛ kiti. O kama, kibaru diman tun fɔra suuw yɛrɛ ye, janko u ka kiti i n'a fɔ mɔgɔ tɔw. U ye kibaru diman nin mɛn waasa u ka to Ala sago la Nii Senuman barika la. Fɛɛnw bɛɛ banwaati surunyana. O la, aw ka kɛ hakilitigiw ye, aw labɛnnin ka to waati bɛɛ, waasa ka se ka Ala dali. Ayiwa, a fɔlɔ, aw ka nyɔgɔn kanu kosɛbɛ. Bari kojugu caaman bɛ yafa nyɔgɔnkanuya sababu la. Aw ka nyɔgɔn ladon ka nya,; nunu;nunu kana sɔrɔ a la. Aw kelen kelen bɛɛ ye seko min sɔrɔ Ala fɛ, o minw bɛ danna danna nyɔgɔn na, aw k'o kɛ ka tɔw mako nya. O cogo la, aw bɛna kɛ Ala ka baarakɛlanyumanw ye. Ni mɔgɔ min bɛ waajuli kɛ, o tigi ka kuma ka kɛ Ala ka kuma ye. Min bɛ baara dɔ kɛ tɔw ye, o tigi k'o kɛ ni Ala ka barika ye, waasa Yezu Krista sababu la bonya ka la Ala kan koo bɛɛ la. Bonya ni sebagaya ye ale min ta ye tuma bɛɛ. Amiina! Ne terisɛbɛw, gwɛlɛya min b'aw kan i n'a fɔ tasuma, o kana aw kabakoya. O ma kɛ koo bɛnbali ye aw kan. Nga aw ka nisɔndiya bari aw y'aw niyɔrɔ sɔrɔ Krista ka tɔɔrɔ la. O la, ni Krista nana n'a ka nɔɔrɔ ye tuma min na, aw ka se ka nisɔndiya kosɛbɛ. Ni mɔgɔw b'aw nɛni bari aw ye Krista taw ye, duba bɛ aw ye. Bari Ala Nii b'aw fɛ, o min ye Nii Senuman ye. Aw si tɔɔrɔkun kana kɛ mɔgɔfagako ye, walima sonyali, walima juguya, walima ka daa don mɔgɔ wɛrɛ ka koo la. Nga n'aw dɔ bɛ tɔɔrɔla bari a ye Krista ta ye, o kana kɛ maloya ye a fɛ, a ka barika la Ala ye o tɔgɔ nin koo la. Kiti tigɛtuma sera. A do bɛna daminɛ Ala ka mɔgɔw ma. Ni kiti bɛ daminɛ anw le ma, minw bɛ ban ka la Ala ka kibaru diman na, olu ta bɛna kɛ cogo di sa? Ala ka kuma b'a fɔ ko: “Ni mɔgɔnyumanw kisiko ye baara ye, o tuma na, Alanyasiranbali ni kojugukɛla ta bɛna kɛ cogo di sa?” Ayiwa, Ala sago ye minw ka tɔɔrɔko ye, olu k'u yɛrɛ kalifa Danbaga Ala ma, min ye kantigi ye, ka taa n'u ka konyuman kɛli ye nya. Minw ye Ala ka jama nyamɔgɔw ye aw cɛma, n kaan bɛ olu le ma sisan. Ne fana ye nyamɔgɔ dɔ ye, Krista ye tɔɔrɔ min sɔrɔ, ne y'o seere ye. A bɛna na ni nɔɔrɔ min ye, n bɛna dɔ sɔrɔ o la. Ne b'a nyini aw fɛ ko Ala y'a ka sagakulu min kalifa aw ma, aw k'o kɔlɔsi ka nya ni dusunyuman ye ka kɛnyɛ ni Ala sago ye. Nga o kana kɛ jagoyako ye. Aw k'o baara nin kɛ ni timinadiya ye, tɔnɔnyini kana sɔrɔ a la. Minw kalifara aw ma, aw kana kuntigiya digi u la dɛ! Nga aw ka siranyuman yira u la. O la, n'aw ka Kuntigiba nana, a bɛna masafugulan cɛnbali d'aw ma, nɔɔrɔ bɛ min na. Ayiwa, denmisɛnw, aw k'aw yɛrɛ majigi mɔgɔkɔrɔbaw ye. Aw bɛɛ k'aw yɛrɛ majigi nyɔgɔn ye. Bari a fɔra Ala ka kuma na ko: “Yɛrɛbonyala ka koo man di Ala ye. Nga a bɛ mɔgɔmajigininw dɛmɛ.” Aw k'aw yɛrɛ majigi Setigi Ala ye waasa n'aw kɔrɔtatuma sera a fɛ, a k'aw kɔrɔ ta. Aw k'aw ka haminakow bɛɛ to a bolo, bari a bɛ janto aw la. Aw k'aw yɛrɛ kɔlɔsi dɛ! Aw labɛnnin ka to. Bari aw jugu Sutana b'a la ka munumunu i n'a fɔ jara, a b'a fɛ ka dɔ le minɛ k'a nyimi. Aw ka jija k'aw jigi to Matigi kan kosɛbɛ, waasa a kana se aw kɔrɔ. Aw k'a lɔn k'o tɔɔrɔ nin nyɔgɔn b'aw baden tɔw kan yɔrɔ wɛrɛw la. Nga tɔɔrɔ dɔɔni tɛmɛnin kɔ, Nyumanyatigi Ala o min y'aw wele waasa aw k'ale ka nɔɔrɔ banbali nyɔgɔn sɔrɔ Krista barika la, ale le bɛna barika don aw la, k'aw ka koo sabati, bagabagali kana se aw kɔrɔ. Sebagaya ka kɛ ale ta ye tuma bɛɛ. Amiina! Silivɛn le ye n ka kuma damani nunu sɛbɛn ni n b'a ci aw ma. N b'a jati n badensɛbɛ ye. N b'a fɛ k'aw ladi, k'a yira aw la ko Ala ka dɛmɛ tigitigi lo ne y'o min koo fɔ aw ye, aw bolo lanin bɛ o min kan. Ala ye minw woloma n'u bɛ Babilɔni, u b'aw fo. N dencɛ Mariki fana b'aw fo. Aw ka nyɔgɔn fo kosɛbɛ. Aw minw bɛɛ kɛra Krista taw ye, a ka hɛrɛ kɛ aw bɛɛ ye. Ne Simɔn Piyɛri min ye Yezu Krista ka ciden, n'a ka baaraden ye, ne bɛ bataki nin ci aw ma, aw minw ye an ka jigi nyanaman nyɔgɔn sɔrɔ anw ka Ala n'an kisibaga Yezu Krista ka tilenninya kɔsɔn. An ka Ala n'an Matigi Yezu lɔnko kama, u ka nɛɛma ni hɛrɛ kɛ aw ye kosɛbɛ. Tinyɛ na, an mako bɛ fɛɛn min na, an ka se ka taama Alanyasiran na, Matigi y'o bɛɛ d'an ma a ka setigiya barika la, ale min y'an wele k'a ka nɔɔrɔ ni sebagaya d'an ma, waasa an ka se k'ale lɔn kosɛbɛ. Olu kama, Ala tun y'a daa di koo minw na, n'u nafa ka bon kosɛbɛ, an sera k'o sɔrɔ. O barika la, an bɛ jɛn ni Ala ye ka kɛ kelen ye, ani ka kisi dinyɛ n'a kɔnɔ nigɛjugu bɛɛ ma. O kama, aw ye jija, jigi min b'aw fɛ, aw ka nyumanya fara o kan, ka lɔnniya fara nyumanya kan, ka yɛrɛminɛ fara lɔnniya kan, ka munyu fara yɛrɛminɛ kan, ka Alanyasiran fara munyu kan, ka nyɔgɔnkanuya fara Alanyasiran kan, kanuya ka jiidi aw cɛma. Bari, ni koo nunu b'aw dusu la kosɛbɛ, aw tɛna kɛ mɔgɔ farifaganinw ye, ani nafatanw ye an Matigi Yezu Krista lɔnko faan fɛ. Nga ni koo nunu tɛ mɔgɔ min na, o tigi kɛra i n'a fɔ finyɛntɔ, ka to ka kurutukurutu dibi la. Bari a nyinɛna ko Ala y'a ka fɔlɔfɔlɔ kojuguw yafa. N badenw, o la sa, aw k'aw timinadiya, Ala y'aw woloma k'aw wele min kama, o ka sabati aw bolo. N'aw tora k'a kɛ ten, aw tɛna ben kojugu la abada. O cogo la, aw bɛna se ka kunbɛn konyuman sɔrɔ an Matigi n'an Kisibaga Yezu Krista ka mara la o min tɛ cɛn ka ye. N bɛna to k'aw hakili jigi o koow la tuma bɛɛ, hali n'aw b'o koo nunu lɔn ka ban, n'aw nɔrɔnin b'o tinyɛ kuma nin na fana kosɛbɛ. Ne y'a ye ko a bɛnnin lo, ka ne to nii na, ne ka kan ka to k'aw hakili jigi tuma bɛɛ. Bari n y'a lɔn a tora dɔɔni ne bɛ dinyɛ to, an Matigi Yezu Krista le y'o yira ne la ten. Nga sanni o ka se, n bɛna banba ka kuma aw fɛ waasa n taanin kɔ, n y'aw kalan minw na, o ka to aw hakili la. An ye Yezu Krista, an Matigi ka setigiya n'a ka nako min koo fɔ aw ye, o ma kɛ siirin koo ye dɛ! Nga anw yɛrɛ nyaa lara a ka nɔɔrɔ kan. Tuma min na Faa Ala ye kunkɔrɔta ni nɔɔrɔ d'a ma, a tora a ka masaya la, k'a fɔ a ye ko: “Nin ye ne Dencɛ ye, a koo ka di ne ye haali!” K'an to kulu senuman nin kan n'a ye, an ye kumakan nin mɛn ka bɔ sankolo la. An bolo lanin bɛ kiraw ka kuma fɔninw kan fana. O kuma nin kɛra i n'a fɔ lanpanmananin, min bɛ yeelen bɔ sufɛ fɔɔ ka taa se dugugwɛ ma, dugugwɛdafɛ lolo ka yeelen bɔ aw ye. Ayiwa, aw k'a lɔn kosɛbɛ ko ka adamaden to a yɛrɛ ma, a tɛ se ka Ala ka kuma kɔrɔ lɔn. A ma kɛ i n'a fɔ kirayakuma bɔra mɔgɔw fɛ, nga Nii Senuman yɛrɛ le y'a don u daa la u tora ka kuma Ala tɔgɔ la. Ayiwa, kirajuguw tun bɛ yen fɔlɔ la, mɔgɔw cɛma. O cogo kelen na, karamɔgɔjuguw bɛna bɔ aw fana cɛma ka mɔgɔw kalan ni galon dɔrɔn ye o min bɛ cɛnni kɛ fɔɔ u bɛ taa ban u ka kuntigi la, o min y'u kunmabɔbaga ye. O tuma na sa, u bɛna bari ka halaki. Mɔgɔ caaman bɛna sɔn u ka kakalaya ma, o bɛna kɛ sababu ye mɔgɔw bɛna tinyɛ sira tɔgɔ cɛn. U ka warinyini kojugu kɔsɔn, u bɛna galon labɛn k'aw nyagami n'o ye tɔnɔ kama. U kitibaga labɛnnin lo a mɛnna. U halakiwaati tɔɔ man jan. Mɛlɛkɛ minw ye kojugu kɛ, Ala ma olu yɛrɛ to, nga a y'u siri ni jɔrɔkɔw ye k'u bila dingɛba kɔnɔ dibi la ka kitilon kɔnɔ. Ala ma hinɛ fɔlɔfɔlɔ mɔgɔw la fana. A ye jiba bila ka na Alanyasiranbaliw bɛɛ halaki k'a tɔɔ to Nuhun ye, ale min tun bɛ tilenninya koo fɔ, ani mɔgɔ wolonwula. A ye kiti ben Sodɔmu ni Gɔmɔri dugu kan k'u jɛni k'u kɛ bugurigwɛ ye, k'a yira ko Alanyasiranbaliw bɛna na kɛ ten le. Lɔti min kɛra mɔgɔnyuman ye, a tɔɔrɔnin tun bɛ a siginyɔgɔnw ka kɛwalijuguw kɔsɔn. Ala y'ale kelenpe kunmabɔ. A tun tɔɔrɔla u cɛma, bari mɔgɔ tilennin tun lo, a tun bɛ mɔgɔw yera u ka kɛwalijuguw la, ani ka to k'u ka kuma mɛn loon o loon. O cogo la, Matigi bɛ se ka mɔgɔtilenninw kisi tɔɔrɔ ma ka mɔgɔjuguw mara kitilon kama. Minw bɛ boliboli u ka nigɛlakow kɔ, n'u tɛ Masaba bonya, u jaa ka gwɛlɛ, u daa ka bon. Ka arijana kɔnɔ fɛɛnw nɛni, o tɛ foyi ye olu fɛ. K'a sɔrɔ, mɛlɛkɛw lɔyɔrɔ n'u ka sebagaya ka bon n'u ta ye, olu yɛrɛ tɛ sɔn ka lɔ Matigi nyana ka arijana fɛɛn nunu si dɔgɔya. O mɔgɔ nunu ka kɛwaliw ni begɛnw ta kɛra kelen ye. U ka laban ni begɛnw ta bɛna kɛ kelen ye. U bɛna halaki. U tɛ fɛɛn min lɔn, u bɛ kumajugu fɔ o le koo la. Tɔɔrɔ le bɛna kɛ u sara ye. Bari olu kɛra dɔw tɔɔrɔko sababu ye. Ka kakalaya kɛ tilefɛ, o le ka di u ye. N'aw bɛ dumuniba kɛ n'u ye tuma min na, u b'u ka maloyakow kɛ, ka nisɔndiya. Kakalaya nigɛ tɛ bɔ u la, u bɛ kojugu kɛ tuma bɛɛ. Fanga tɛ minw na, u bɛ olu kunna cɛn. Wariko le ka di u ye kojugu. U danganin lo. U ye siranyuman bila ka Bozɔri deen Balamu ka koo nyɔgɔn kɛ. A tun diyara ale min ye ka tilenbaliyako kɛ waasa ka wari sɔrɔ, a do y'o sara sɔrɔ. Fali kumana a fɛ waasa a k'a ka nalonmanya dabila. O mɔgɔ nunu bɛ i n'a fɔ kɔlɔnw, jii tɛ minw kɔnɔ, ani sankabaw, fɔnyɔ bɛ taa ni minw ye. Olu kɔni niyɔrɔ ye dibijugu ye. U b'u daa di kobabaw la k'a sɔrɔ foyi! Minw sera ka bɔsi fɔlɔ taamacogojugu nunu ma sisan sisan, u bɛ olu nigɛ k'u ben n'u fari ka labilali ye, ni nyamɔgɔya ye. U b'a fɔ olu ye k'u bɛna hɔrɔnya sɔrɔ. K'a sɔrɔ olu kɛra u yɛrɛ ka nigɛlakow ka jɔɔnw ye. Bari fɛɛn min fanga ka bon n'i ta ye, i y'o ka jɔɔn le ye. Ayiwa, ni minw y'u yɛrɛ sɔrɔ ka bɔ dinyɛ nin ka kojugu la an Matigi n'an kisibaga Yezu Krista lɔnko barika la, n'o tigi segira ka don o la, ka kɛ o ka jɔɔn ye, a ka koo tɔɔ bɛ juguya ni fɔlɔta ye. N'u tun ma tilenninya sira lɔn, o bele tun ka fisa u ma n'u banko ye Ala ka sariya nin na, o min koo tun fɔra u ye. U ta kɛra i n'a fɔ talen nunu b'a fɔ cogo min na ko: “Wulu le bɛ yɛlɛma k'a fɔɔnɔni dumu.” Ani ko: “Lɛɛ kotɔ, a nɔgɔtɔ.” N teriw, n ka bataki ciko filanan le ye nin ye ten aw ma. O sɛbɛ fila nunu bɛɛ la, ne kɔni b'aw hakili jigi ka miiriyanyuman d'aw ma. Kiraw ye kuma minw fɔ ka tɛmɛ, aw k'aw hakili to o la an'an Matigi, n'an kisibaga ka ciiw la, a ka cidenw y'o minw lase aw ma. Aw k'a lɔn ko dinyɛ laban na, dɔw bɛna wili ka to k'u diyanakow kɛ k'u nyaa don aw la, k'a fɔ ko: “A m'a fɔ ko a bɛna kɔsegi ka na wa? A do bɛ min? An faaw bɛɛ sara ka ban. Halibi koow b'u cogokɔrɔ le la kabini dinyɛ dantuma.” O cogo la, u b'a fɛ k'u hakili bɔ a la ko fɔlɔfɔlɔ Ala ye sankolo dan ani ka dugukolo dan ka bɔ jii la, ka to nyɔgɔn fɛ a ka kuma barika la. O cogo kelen na, jii le fana ye dugukolo kan fɛɛn bɛɛ dumu. Ayiwa, an bɛ sankolo ni dugukolo minw yera ten, u maranin bɛ o kuma kelen le barika la ni tasuma ka kan k'o mana loon dɔ. Nga u bɛ yen ka Alanyasiranbaliw kitilon n'u halakilon le kɔnɔ. N teriw, koo kelen bɛ yen, aw kana nyinɛ o kɔ dɛ! Matigi fɛ, tile kelen bɛ i n'a fɔ saan waa kelen. Saan waa kelen bɛ i n'a fɔ tile kelen. Matigi y'a daa di koo min na, dɔw ko a ka suma o kɛko la. K'a sɔrɔ a man suma. Nga a bɛ munyu aw le kɔrɔ, a t'a fɛ mɔgɔ si ka halaki, a b'a fɛ bɛɛ ka se ka nimisa ka faran a ka kojuguw la. Matigi nalon bɛna bari mɔgɔw la i n'a fɔ soon. O loon na, sankolo bɛna tunu ni mankanba ye. Sankolofɛnw bɛɛ bɛna halaki ni tasuma ye pewu! Dinyɛ n'a kɔnɔnafɛnw bɛɛ bɛna ban. Ayiwa, n'o fɛɛn nunu bɛɛ ka kan ka ban ten wo, aw ka taamacogo ka kan ka kɛ di sa? Aw ye nɔrɔ Ala la kosɛbɛ aw taamacogo ka nya, ka Ala ka loon makɔnɔ ka jija a ka se joona. O loon yɛrɛ lo sankolo bɛna jɛni ka ban pewu, a kɔnɔnafɛnw bɛɛ bɛna yelen. A y'a daa di sankolo ni dugukolo kuraman minw koo la, an bɛ olu makɔnɔna. Tilenninyako dama le bɛna kɛ o yɔrɔ la. Ayiwa, n teriw, o kama, aw labɛnnin ka to o makɔnɔni na, aw ye jija jalakiyɔrɔ kana sɔrɔ aw la Ala fɛ, aw ni Ala ka bɛn. N'aw y'a ye ko Matigi tɛ kɔsegira ka na joona, o kɛra aw ka kisili kɔsɔn le. An balimacɛ n'an tericɛ Pɔli ye sɛbɛ ci aw ma o koo la. Ala ye lɔnniya min d'a ma, a y'o kɛ k'aw ladi. A ye bataki minw sɛbɛn, o le fɔra u bɛɛ kɔnɔ. O sɛbɛ nunu yɔrɔ dɔw kɔni faamu ka gwɛlɛ. Kolɔnbaliw ni barikatan dɔw bɛ tintin o yɔrɔ nunu kan k'u kɔrɔ yɛlɛma i n'a fɔ u bɛ deli ka to ka Ala ka kuma tɔw kɛ cogo min na. U b'u yɛrɛ halakiko le kɛra ten. Ayiwa, n teriw, aw kɔni lasɔmina ka ban. Aw k'aw yɛrɛ kɔlɔsi Alanyasiranbaliw si kana aw kuun nyagami. Aw kana to u b'aw jigi tigɛ ka bɔ fu la. Nga aw ye jija ka taa nya an Matigi n'an kisibaga Yezu Krista ka nɛɛma barika la ani k'ale Yezu lɔn kosɛbɛ. Bonya ka la ale kan sisan ani tuma bɛɛ. Amiina! Kuma min bɛ nii don mɔgɔ la, o Kuma nin tun bɛ yen ni fɛɛn si ma dan fɔlɔ. Anw y'o Kuma mɛn, an nyaa lar'a kan, k'a filɛ kosɛbɛ, ka maga a la, o y'a yɛrɛ yira, anw y'a ye. O kama, anw b'a seereya kɛ, k'a koo fɔ aw ye ale min tun bɛ ni Faa Ala ye n'a nan'a yɛrɛ yira an na. Anw ye min ye, ka min mɛn, an b'o le fɔ aw ye, waasa aw fana ka jɛn ni anw ye. Ayiwa, anw kɔni n'an Faa Ala n'a Dencɛ Yezu Krista jɛnnin lo. An b'o sɛbɛn k'o ci aw ma waasa an ka nisɔndiya kosɛbɛ! Ayiwa, an ye min mɛn a fɛ, an b'o le fɔra aw ye, ko Ala ye yeelen ye, dibi t'a la fewu. N'an ko an ni Ala jɛnnin lo k'a sɔrɔ an bɛ dibidibiko kɛ, o tuma na, an kɛra galontigɛlaw ye, an tɛ tinyɛko kɛ. Nga n'o y'a sɔrɔ n'an ka koow bɛɛ gwɛnin lo i n'a fɔ ale yɛrɛ bɛ cogo min na, o tuma na, jɛɛn bɛ kɛ an bɛɛ ni nyɔgɔn cɛ, a Dencɛ Yezu joli b'an ka kojuguw bɛɛ bɔ an na. N'an y'a fɔ ko an ma kojugu kɛ, an b'an yɛrɛ nigɛ, an tɛ kɛ tinyɛtigiw ye. Nga n'an sɔnna ka lɔ an ka kojuguw la, o tuma na, an bɛ se k'an jigi la Ala kan. Bari a bɛna yafa an ma k'an ka tilenbaliyakow bɛɛ bɔ an na. Nga n'an y'a fɔ ko an ma kojugu kɛ, an bɛ Ala kɛ galontigɛla ye, a ka kuma tɛ an dusu la. Ne deenw, ne bɛ sɛbɛ nin cira aw ma, waasa aw kana kojugu kɛ. Nga ni min nan'a kɛ, soronadonbaga b'an fɛ Faa Ala kɔrɔ n'o ye Yezu Krista ye, mɔgɔtilennin lo. Bari ale lo y'a yɛrɛ saraka k'an ka hakɛw yafa. A ma dan an dama ka hakɛw yafako ma dɛ, nga ani dinyɛ mɔgɔw bɛɛ ta lo fana. Ayiwa, n'an bɛ Ala ka kuma labato, o la, an b'a lɔn ko an bɛ Ala lɔn. Ni mɔgɔ min y'a fɔ ko ale bɛ Ala lɔn k'a sɔrɔ a t'a ka kuma labato, o tigi ye galontigɛla le ye, tinyɛ man d'a ye. Nga ni min b'a ka kuma labato, o tigi b'a yira ko Ala koo ka d'a ye kosɛbɛ daan tɛ min na. O cogo la, an b'a lɔn ko an ye Ala taw ye. Ni mɔgɔ min y'a fɔ ko a ye Ala ta ye, o tigi ka kan ka Yezu taamacogo ladege. N terisɛbɛw, ne tɛ cikura sɛbɛnna k'a ci aw ma, nga cii kɔrɔman lo, o min fɔra aw ye kabini a daminɛtuma na. Aw y'o mɛn ka kɔrɔ. O n'a ta bɛɛ, cikura lo ni ne b'a sɛbɛnna aw ye. Krista y'o yira ko tinyɛ lo, ani aw fana. Bari, dibi bɛ taara, kɛnɛsɛbɛ bɛ bɔra. Ni mɔgɔ min ko ale kɔnɔ gwɛnin lo k'a sɔrɔ a mɔgɔnyɔgɔn koo man d'a ye, o tigi ye dibi kɔnɔ mɔgɔ le ye halibi. Nga ni mɔgɔ min b'a mɔgɔnyɔgɔn kanu, o tigi gwɛnin lo, a tɛ kɛ sababu ye k'a tɔnyɔgɔn bila kojugu la. Ni mɔgɔ min b'a mɔgɔnyɔgɔn kɔniya, o tigi ye dibi kɔnɔ mɔgɔ ye, n'a bɛ taamana o dibi nin kɔnɔ, a t'a kuun tilenyɔrɔ lɔn. Bari a tɛ yeli kɛ. Ne deenw, n bɛ nin sɛbɛn k'a ci aw ma ko aw ka kojuguw yafanin lo Yezu sababu la. Ne bɛ nin sɛbɛn k'a ci aw denfaw ma, ko mɔgɔ min bɛ yen kabini fɛɛn si ma dan fɔlɔ, aw b'o lɔn. Ne bɛ nin sɛbɛn k'a ci aw kanbelenw ma ko aw ye see sɔrɔ Fɛnjugu kan. Ne deenw, ne y'a sɛbɛn k'a ci aw ma ko aw bɛ Faa Ala lɔn. Ne y'a sɛbɛn k'a ci aw denfaw ma ko mɔgɔ min bɛ yen kabini fɛɛn si ma dan fɔlɔ, aw b'o lɔn. Ne y'a sɛbɛn k'a ci aw kanbelenw ma, ko fanga b'aw la, Ala ka kuma jiidinin bɛ aw dusu la. Ani ko aw sera Fɛnjugu kɔrɔ. Aw kana dinyɛ n'a kɔnɔnafɛnw koo diya aw yɛrɛ ye. Ni mɔgɔ min bɛ dinyɛ koo diya a yɛrɛ ye, Faa Ala koo tɛ se ka diya o tigi ye. Bari farisogo ka nigɛlakow, nyadenw ka miyɛntɔya, jigimafakojugu, o koo nunu si tɛ bɔ Faa Ala fɛ do, o bɛɛ bɛ bɔ dinyɛ na le. Mɔgɔw bɛ boli dinyɛ n'a kɔnɔnafɛn minw kɔ, olu do ye banta le ye. Nga ni mɔgɔ min bɛ Ala sago kɛ, o tigi ka koo tɛna ban. Ne deenw, dinyɛ labantuma surunyana. Aw y'a mɛn ko Krista jugu ka kan ka na. K'a sɔrɔ a juguw yɛrɛ ka ca bii nin na. An b'a lɔn o le fɛ ko dinyɛ labantuma surunyana. U bɔra anw cɛma le, nga u tun t'an dɔw ye bɛrɛbɛrɛ, ni an dɔw tun lo, u tun bɛ to n'an ye. Nga a kɛra ten waasa a k'a yira ko an dɔ tɛ u ye tinyɛ tinyɛ na. Aw kɔni, Nii Senuman y'aw woloma ka jigi aw kan. O kama, aw bɛɛ bɛ koo bɛɛ lɔn. A ma kɛ ko aw tɛ tinyɛ lɔn, k'o le y'a to ne ye sɛbɛ nin ci aw ma, ne y'a ci aw ma bari aw bɛ tinyɛ lɔn. Aw b'a lɔn ko galon ni tinyɛ tɛ kelen ye. Mɔgɔ min b'a fɔ ko Yezu tɛ Ala ka mɔgɔ wolomani ye, o tigi le ye galontigɛla ye. Krista jugu le bɛ ban Faa Ala n'a Dencɛ la. Ni mɔgɔ min banna Ala Dencɛ la, o tigi tɛ Faa Ala fɛ fana. Ni min sɔnna a ma, o tigi bɛ Faa Ala fɛ fana. Aw kɔni, min fɔra fɔlɔ la n'aw y'o mɛn, aw k'o mara ka nya aw dusu la. Aw y'o min mɛn kabini fɔlɔ la, n'o tora aw dusu la, Faa Ala n'a Dencɛ bɛna to n'aw ye. Krista y'a daa di an ma koo min na, o ye hɛrɛ banbali koo ye. Mɔgɔ minw b'a fɛ k'aw lafili, ne bɛ sɛbɛ nin cira aw ma olu ka koo la. N'o tɛ aw kɔni, aw ye Krista ka Nii Senuman min sɔrɔ, o b'aw fɛ. Aw bɛ koo lɔn, kalankun t'aw la. Nii Senuman b'aw kalan koo bɛɛ la. A b'aw kalan ni min ye, galon si t'o la. Aw ye la o la nyanaman ka nɔrɔ Krista la. Ayiwa, ne deenw, aw ye nɔrɔ ka nya Krista la waasa a bɛna kɔsegi loon min na, o k'a sɔrɔ ni jigi b'an fɛ, an kana maloya sɔrɔ. Aw b'a lɔn ko Krista ka koo tilennin lo. Ayiwa, aw k'a lɔn fana ko ni mɔgɔ o mɔgɔ bɛ kotilennin kɛ, k'o tigi ye Ala deen ye. Aw m'a ye an koo diyara Faa Ala ye cogo min na wa, fɔɔ an bɛ wele yɛrɛ ko Ala deenw. An ye Ala deenw ye tinyɛ na! O kama Ala juguw t'an lɔn, bari u ma Ala lɔn. Ne terisɛbɛw, k'a ta sisan ma, an ye Ala deenw ye. Nga an bɛna kɛ cogo min na tigitigi, o le ma gwɛ fɔlɔ. An bɛ min lɔn, ni Krista segira ka na tuma min na, ale bɛ cogo min na, an fana bɛna kɛ ten. Bari an bɛn'a ye ten. Mɔgɔ o mɔgɔ jigi b'a kan, o tigi b'a yɛrɛ saniya i n'a fɔ Yezu Krista yɛrɛ bɛ cogo min na. Mɔgɔ o mɔgɔ bɛ kojugu kɛ, o tigi tɛ Ala ka sariya labato, bari sariya labatobaliya, o le ye kojugu ye. Aw b'a lɔn ko Yezu nana janko ka mɔgɔw ka kojuguw yafa, a ma kojugu si kɛ. Ayiwa, ni mɔgɔ o mɔgɔ nɔrɔnin bɛ Krista la, o tigi tɛ kojugu kɛ tugu, nga ni min bɛ to ka kojugu kɛ, o tigi ma Krista ye, a t'a lɔn fana. Ne deenw, aw kan'a to mɔgɔ si b'aw lafili. Mɔgɔ o mɔgɔ bɛ tilenninya sira taama, o tigi ye mɔgɔtilennin ye i n'a fɔ ale Yezu Krista. Min bɛ to ka kojugu kɛ, o tigi ye Sutana ka mɔgɔ ye, bari Sutana ye kojugukɛla ye kabini fɔlɔfɔlɔ. Ala Dencɛ nana, waasa ka Sutana ka kɛwaliw cɛn. Mɔgɔ o mɔgɔ kɛra Ala deen ye, o tigi tɛ to ka kojugu kɛ tugu. Bari Ala y'a Faa ye. A tɛ se ka to kojugukɛ la tugu bari Ala deen lo. Ala deenw ni Sutana ka mɔgɔw bɛ lɔn ka bɔ nyɔgɔn na kɛwali nunu le fɛ. Mɔgɔ o mɔgɔ tɛ tilenninya sira taama, ani n'a t'a mɔgɔnyɔgɔn kanu, o tigi tɛ Ala ta ye. An ka kan ka nyɔgɔn kanu. Aw y'o le mɛn kabini koow daminɛ tuma na. An man kan ka Kayɛn ladege, ale min kɛra Sutana ka mɔgɔ ye k'a dɔgɔnin faga. Mun na a y'a faga? A y'a faga bari ale Kayɛn tun kɛra baarajugukɛla ye, k'a sɔrɔ a dɔgɔnin tun ye mɔgɔnyuman ye. N badenw, ni mɔgɔw b'aw kɔniya, o kana aw dabari ban. An b'a lɔn ko an kɛra mɔgɔ nyanamanw ye Ala faan fɛ, bari an b'an mɔgɔnyɔgɔn kanu. Mɔgɔ min tɛ a mɔgɔnyɔgɔn kanu, o tigi bɛ i n'a fɔ suu. Mɔgɔ o mɔgɔ b'a mɔgɔnyɔgɔn kɔniya, o tigi ye mɔgɔfagala le ye. Aw b'a lɔn ko mɔgɔfagala si tɛ se ka hɛrɛ banbali sɔrɔ. Yezu Krista y'a nii saraka anw kɔsɔn. An bɛ kanuya lɔn o le fɛ. An fana ka kan k'an nii saraka an mɔgɔnyɔgɔn kɔsɔn. Fɛɛn bɛ mɔgɔ min bolo n'a tɛ dɛsɛbagatɔ dɛmɛ, o tigi bɛ se k'a fɔ cogo di ko ale bɛ Ala kanu? Ne deenw, an kan'a fɔ an daa la dɔrɔn ko an tɔnyɔgɔn koo ka di an ye. Nga an k'a yira tinyɛ na n'an ka kɛwaliw ye. N'an mɔgɔnyɔgɔnw koo ka d'an ye, an b'a lɔn o le fɛ ko an bɛ tinyɛ kan. Ani an hakili bɛ sigi Ala nyakɔrɔ. N'an kɔnɔnako b'an jalaki, Ala ka bon n'an kɔnɔnako ye. Ale bɛ koo bɛɛ lɔn. Ne terisɛbɛw, n'an kɔnɔnako t'an jalaki, an bɛ se ka Ala dali ni hakilisigi ye. An mana fɛɛn o fɛɛn dali a fɛ, an b'o sɔrɔ bari an b'a ka sariya labato k'a sago kɛ. A ka sariya filɛ nin ye, ko an ka la a Deen Yezu Krista la, ani ka nyɔgɔn kanu. Ale yɛrɛ le y'o cii nin don an bolo ten. Ni mɔgɔ min b'a ka sariya nin labato, Ala b'o tigi fɛ, o tigi ye Ala ta ye. An b'a lɔn o fɛ ko Ala b'an fɛ, a ka Nii Senuman barika la a y'o min d'an ma. Ne terisɛbɛw, mɔgɔ minw ko Nii Senuman b'u fɛ, aw kana la olu bɛɛ la dɛ. Nga aw k'u sɛgɛsɛgɛ fɔlɔ k'a filɛ ni Ala ta lo. Bari kirakolon caaman bɛ dinyɛ na sisan. Ni kira o kira b'a fɔ ko Yezu Krista nana dinyɛ na ka farisogo ta, aw k'a lɔn k'ale ye Ala ta ye. Nga ni min bɛ ban o ma, o tigi ma kɛ Ala ta ye, Krista jugu lo, aw ye o min nako mɛn ka kɔrɔ. Ayiwa, kabini sisan, a bɛ dinyɛ kɔnɔ ka ban. Ne deenw, aw kɔni ye Ala taw ye. Aw sera kira nunu kɔrɔ bari Nii Senuman bɛ ni aw ye. Ale fanga ka bon ni Sutana ta ye, o min bɛ dinyɛ kɔnɔ. Olu kɔni ye dinyɛ nin taw ye. O la, u ka kuma kɛra dinyɛ ta ye, dinyɛ mɔgɔw le bɛ mɛnni kɛ u fɛ fana. Anw kɔni, anw ye Ala taw ye. Mɔgɔ o mɔgɔ min bɛ Ala lɔn, o tigi bɛ mɛnni kɛ anw fɛ. Nga ni min tɛ Ala ta ye, o tɛ mɛnni kɛ an fɛ. An b'a lɔn o cogo la minw ta ye Nii Senuman yɛrɛyɛrɛ ta ye ka bɔ galontigɛla ta la. Ne terisɛbɛw, aw ye nyɔgɔn kanu bari n'i ko Ala, i ko nyɔgɔn kanuya. Mɔgɔ o mɔgɔ b'a mɔgɔnyɔgɔn kanu, o tigi ye Ala deen ye, a bɛ Ala lɔn. Nga ni min t'a mɔgɔnyɔgɔn kanu, o tigi tɛ Ala lɔn. Bari n'i ko Ala, i ko kanuya le. Dencɛ kelenpe min bɛ Ala fɛ, a y'o ci dinyɛ na waasa an ka hɛrɛ banbali sɔrɔ ale barika la. Ala y'a ka kanuya yira an na o cogo le la. Kanuya filɛ nin ye. A ma kɛ i n'a fɔ anw ye Ala kanu! Ale le y'an kanu k'a Dencɛ ci an ma. An ka kojuguw yafara ale ka yɛrɛ saraka barika la. Ne terisɛbɛw, ni Ala y'an kanu ten, an fana ka kan ka nyɔgɔn kanu dɛ! Mɔgɔ si nyaa ma deli ka la Ala kan ka ye. Nga n'an bɛ nyɔgɔn kanu, o b'a yira ko Ala b'an fɛ. Ni Ala b'an fɛ, a ye kanuya min don an dusu la, o bɛ kɛ kodafanin ye. An b'a lɔn ko Ala b'an fɛ, ani ko anw kɛra a taw ye, bari a y'a yɛrɛ Nii le di an ma. Faa Ala y'a Dencɛ ci dinyɛ na, waasa ka mɔgɔw kisi. Anw nyaa lara o kan, anw b'o seereya kɛ. Ni mɔgɔ o mɔgɔ y'a fɔ ko Yezu ye Ala deen ye, o tigi ye Ala ta ye, ani Ala b'o tigi fɛ. Ala b'an kanu cogo min na, anw kɔni b'o lɔn, ani anw lara o la. N'i ko Ala, i ko kanuya. Ni mɔgɔ min b'a mɔgɔnyɔgɔn kanu, o tigi nɔrɔnin bɛ Ala la, Ala fana bɛ n'o tigi ye. Ni kanuyadafanin bɛ an dusu la, an hakili bɛna sigi Ala ka kiti tigɛlon na. Bari Yezu Krista n'a Faa bɛ nyɔgɔn fɛ cogo min na, k'anw to dinyɛ nin kɔnɔ, an fana bɛ ten. Kanuya bɛ yɔrɔ min na, siranya tɛ yen. Kanuyasɛbɛ bɛ siranya ban. Bari ni siranya koo bɛ fɔ yɔrɔ min na, o bɛ jalakiko yira. Mɔgɔ min bɛ siran, kanuyasɛbɛ tɛ o tigi dusu la. Ayiwa, anw kɔni, kanuya b'an dusu la, bari Ala le kɔnna k'an kanu. Ni mɔgɔ min y'a fɔ ko Ala koo ka di a ye k'a sɔrɔ a b'a mɔgɔnyɔgɔn kɔniya, o tigi ye galontigɛla ye. A nyaa bɛ a mɔgɔnyɔgɔn min na, n'a t'o kanu, a tɛ se ka Ala kanu, a nyaa tɛ o min na. Ayiwa, Krista ye cii min d'an ma, o filɛ nin ye, a ko: Ni Ala koo ka di mɔgɔ min ye, o tigi ka kan k'a mɔgɔnyɔgɔn fana kanu. Ni mɔgɔ o mɔgɔ lara a la ko Yezu le ye Ala ka mɔgɔ wolomani ye, o tigi ye Ala deen ye. Mɔgɔ o mɔgɔ bɛ denfa kanu, o tigi b'a deen fana kanu. N'an bɛ Ala kanu k'a ka ciiw labato, o tuma na an b'a lɔn ko an b'a deenw kanu. K'a fɔ ko Ala koo ka d'i ye, o bɛ bɔ a ka ciiw labato cogo la. A ka ciiw labatoli fana man gwɛlɛ, bari mɔgɔ min ye Ala deen ye ka ban, o tigi sera dinyɛ kɔrɔ. Jigi min b'an fɛ, o le b'a to an bɛ se dinyɛ kɔrɔ. Mɔgɔ min lanin b'a la ko Yezu ye Ala Dencɛ ye, o tigi le sera dinyɛ kɔrɔ. Yezu Krista nana jii ni joli barika la. A batizera, a joli bɔnna. A ma kɛ i n'a fɔ a batizera dɔrɔn dɛ! A batizera, a fana sara. Ayiwa, Nii Senuman le b'o tinyɛ yira an na, bari ale ye tinyɛtigi ye. Seere saba le b'o tinyɛ nin yira: Nii Senuman, jii ani joli. O seere nunu bɛ fɛɛn kelen le fɔ. N'an bɛ sɔn adamaden ka seereya ma, Ala ka seereya ka fisa ni adamaden ta ye. Ala y'a yira an na ko ale y'a Deen seere ye. Ni mɔgɔ min lara Ala Dencɛ la, Ala ye seereya min kɛ a koo la, o tigi b'o seereya nin mara a dusu la. Nga ni min ma la Ala la, o tigi ye Ala kɛ galontigɛla ye. Bari Ala ye seereya min kɛ a Dencɛ koo la, o tigi ma la o la. O seereya nin filɛ: ko Ala ye hɛrɛ banbali di an ma, o min kɛra an ta ye a Dencɛ sababu la. Ala Dencɛ bɛ mɔgɔ min fɛ, o tigi bɛ n'o hɛrɛ nin ye. Nga ni Ala Dencɛ tɛ mɔgɔ min fɛ, o tigi tɛ n'a ye. N ye nin sɛbɛn k'a ci aw ma, aw minw lanin bɛ Ala Dencɛ la, waasa aw k'a lɔn ko hɛrɛ banbali y'aw ta ye. Ayiwa, n'an ye fɛɛn o fɛɛn dali Ala fɛ, n'o kɛra a sago ye, an jigi b'a la ko a bɛ mɛnni kɛ an fɛ. An lanin b'a la ko Ala b'an ka dalili lamɛn, an lanin b'a la fana ko an ye fɛɛn min dali, ko an y'o sɔrɔ ka ban. Ayiwa, kojugu min tɛ mɔgɔ faga, ni dɔ y'a ye ko a balima dɔ y'o kɛ, a ka Ala dali o tigi nin ye. Ala bɛn'a kisi o saya nin ma, n'o y'a sɔrɔ n'o kojugu nin t'a faga. Kojugu kelen le bɛ yen min bɛ mɔgɔ faga, n m'a fɔ ko aw ka dalili kɛ o kɛbagaw ye dɛ! Tilenbaliyako bɛɛ ye kojugu ye. Nga kojuguw bɛɛ tɛ mɔgɔ faga. An b'a lɔn ko mɔgɔ o mɔgɔ ye Ala deen ye, o tigi tɛ to kojugu la, bari Ala Deen b'a tanga. Sutana fanga tɛ se a kɔrɔ. Anw y'a lɔn ko anw ye Ala deenw ye. Nga dinyɛ kɔnɔ fɛɛn tɔw bɛɛ bɛ Sutana ka sago kɔrɔ. Anw y'a lɔn fana ko Ala Dencɛ nana dinyɛ na ka hakili di an ma waasa an ka Tinyɛtigi lɔn, ale min ye Ala yɛrɛ yɛrɛ ye. Anw ni Ala yɛrɛ yɛrɛ bɛ nyɔgɔn fɛ a Dencɛ Yezu Krista barika la, ale lo ye Ala ye tigitigi min bɛ hɛrɛ banbali di. Ne deenw, aw k'aw yɛrɛ kɔlɔsi joko ma. Muso, Ala ye e min woloma, ne min kɛra cɛkɔrɔba ye, ne bɛ bataki nin ci ele n'i deenw ma. Aw koo ka di ne ye tinyɛ na. A ma kɛ i n'a fɔ aw koo ka di ne dama ye dɛ, mɔgɔ o mɔgɔ bɛ tinyɛ lɔn, aw koo ka di olu bɛɛ ye. Tinyɛ kama, aw koo ka d'an ye, tinyɛ do b'an kɔnɔ, a bɛna to an kɔnɔ tuma bɛɛ. Faa Ala n'a Dencɛ Yezu Krista ka makari an na, ka nɛɛma ni hɛrɛ kɛ anw ye tinyɛ ni kanuya kɔsɔn. Faa Ala ye cii min d'an ma, ne y'i ka deen dɔw ye, minw bɛ taamana tinyɛ sira kan ka kɛnyɛ n'o ye. O ye ne nisɔn diya kosɛbɛ. Ayiwa Muso, sisan ne b'a nyini e fɛ ko an ka nyɔgɔn kanu. O tɛ cikura ye ni ne b'o fɔra i ye. Nga kɔrɔman lo, an y'o min sɔrɔ kabini a daminɛ tuma na. N'an bɛ Ala ka ciiw labato, an bɛ kanuya sira taama. Aw y'o cii le mɛn kabini a daminɛ tuma na, ko aw ka nyɔgɔn kanu. Bari galontigɛla caaman bɛ dinyɛ na sisan. U b'a fɔ ko Yezu Krista tun tɛ mɔgɔ yɛrɛ yɛrɛ ye. Min bɛ ban ten, o le ye galontigɛla ni Krista jugu ye. Haya! Aw k'aw yɛrɛ kɔlɔsi waasa aw ka baara kana kɛ fu ye. Nga aw ka se k'a nafa sɔrɔ. Mɔgɔ o mɔgɔ tɛ Krista ka kuma labato, fɔɔ ka to ka koo wɛrɛ le kɛ, Ala tɛ o tigi fɛ. Mɔgɔ min b'a ka kuma labato, Faa Ala n'a Dencɛ b'o tigi fɛ. Ni mɔgɔ min nana aw fɛ n'a ka kalan ni Krista ta tɛ kelen ye, aw kana sɔn o tigi ka don aw ka soo kɔnɔ. Aw kan'a fo yɛrɛ. Ni mɔgɔ min y'a fo, o tigi niin bɛ don a ka kɛwali jugumanw na. Kuma caaman bɛ n fɛ k'a fɔ aw ye. Nga n t'a fɛ k'o kɛ bataki ye. Bari ne yɛrɛ b'a fɛ ka na bɔ aw fɛ yen k'o fɔ aw ye ni n daa ye, waasa an ka nisɔndiya kosɛbɛ. Ala y'i Dɔgɔmuso min woloma fana, ale deenw b'i fo. Ne min kɛra cɛkɔrɔba ye, ne bɛ bataki nin ci ele Gayusi ma. I koo ka di ne ye tinyɛ na. Ne terinyuman, ne b'a fɛ i ka to kɛnɛya la, i ka koo bɛɛ ka sabati i n'a fɔ i bɛ taa nya Ala koo la cogo min na. An balima dɔw nana i ka taamacogo lakali ne ye. U ko i taamacogo bɛnnin bɛ. O ye ne nisɔndiya kosɛbɛ. Ni n y'a mɛn ko ne deenw taamacogo bɛnnin lo ni Ala ka tinyɛ ye, o le ka di ne ye ka tɛmɛ fɛɛn bɛɛ kan. N teri, ko i bɛ mɔgɔnyumanya yira an balimaw na kosɛbɛ, o minw ye lonanw ye. Kanuya min b'i dusu la, u y'o lakali Ala ka jama nyana. Ayiwa, taa n'i ka dɛmɛ ye nyafɛ, o ka kɛ Ala sago la, waasa u ka se k'u ka taama kɛ. Bari u bɔra Krista le tɔgɔ la. O le y'a to u ma sɔn ka Ala lɔnbaliw ka dɛmɛ foyi minɛ. O la, an ka kan k'o mɔgɔ nunu nyɔgɔn minɛ ka nya, waasa an niin ka don u tinyɛ baara koo la. N ye dakurunya damani sɛbɛn ka ci Ala ka jama ma, nga Diyotɛrɛfu min ko ale ye koo bɛɛ nyamɔgɔ ye aw fɛ yen tɛ sɔn o kɔnɔna kuma ma. O kama, ni n nana aw fɛ yen tuma min na, a bɛ min kɛra an na, a ka kumajugu kɔni, n bɛna o bɛɛ lakali. A tɛ danna o fana ma. A bɛ to ka ban k'an balimaw lonanw ladon. Ni mɔgɔ minw ko u b'u ladon fana, a tɛ sɔn, a bɛ tila ka olu niin bɔ Ala ka jama na. N terinyuman, i kana mɔgɔ ka kojugu ladege fɔɔ konyuman. Mɔgɔ min bɛ konyuman kɛ, o tigi ye Ala ta ye. Nga kojugukɛla kɔni t'a ye. Demetiriyusi kɔni, mɔgɔ bɛɛ b'ale tɔgɔnyuman fɔra. U do bɛ tinyɛ le fɔra. Anw fana b'a tɔgɔnyuman fɔ. I b'a lɔn ko an bɛ min fɔ, ko tinyɛ lo. Kuma caaman bɛ n fɛ k'a fɔ i ye. Nga n t'a fɛ ka sɛbɛnnikɛnan ta o kama. Bari ne yɛrɛ b'a fɛ k'i ye yan ni dɔɔni ka kuma nyɔgɔn fɛ. Ala ka hɛrɛ kɛ i ye. I teriw b'i fo. An ka foli lase an teriw kelen kelen bɛɛ ma fana. Ne Zude Zaki dɔgɔcɛ, ne min kɛra Yezu Krista ka baaraden ye, n bɛ bataki nin ci Ala ka mɔgɔ weleninw ma, aw minw koo ka di Faa Ala ye, ani aw minw maranin bɛ Yezu Krista ye. Ala ka makari ni kanuya ani hɛrɛ ka kɛ aw ye kosɛbɛ. Ne teriw, ne tun y'a lanyini sɛbɛ la ka sɛbɛ ci aw ma an bɛɛ ka kisili koo la. Ne y'a ye k'o kɛra wajibi ye ne ma k'o kɛ waasa ka ladili di aw ma, ko aw ka jija lanaya koo la Ala y'o min di a ka jama ma sinyɛ kelen, o nyɔgɔn tɛna kɛ tugu. Bari nanbaranmɔgɔ dɔw donna aw cɛma minw ka jalakiko fɔra Ala ka kuma na kabini tumajan. O Alanyasiranbali nunu bɛ an ka Ala ka nɛɛma koo ta k'o kɛ kokolon kɛli ye, ani u bɛɛ bɛ ban an Matigi Yezu Krista la, ale min kelenpe ye an kuntigi ye. Aw bɛ koo nin bɛɛ lɔn kosɛbɛ, nga ne b'a fɛ k'aw hakili jigi o la, ko Matigi ye a ka jama Isirayɛlidenw kisi k'u bɔ Ezipiti jamana na tuma min na, mɔgɔ minw tun ma l'a la, ale yɛrɛ ye olu faga. Mɛlɛkɛ minw ma se ka wasa u ka lɔyɔrɔw la n'u bɔra yen, Ala ye olu siri ni jɔrɔkɔ tigɛbali ye k'u mara dibi kɔnɔ sini kitiba kama. O cogo la fana, Sodɔmu ni Gɔmɔri ani u dafɛ duguw mɔgɔw tun kɛra i n'a fɔ o mɛlɛkɛ nunu, u tun y'u yɛrɛ bila kakalaya la. Hali koo minw tun tɛ bɛn adamaden cogo ma, u tun bɛ u kɛ. O la, olu jɛnina ni tasuma fagabali ye, ka kɛ nyayira fɛɛnw ye. O cogo la fana, o mɔgɔ nunu b'o koow kɛ k'u yɛrɛ nɔgɔ ka ban Ala ta ma ka mɛlɛkɛw nɛni nɔɔrɔ bɛ o minw kan. O ye koo ye, hali mɛlɛkɛw ka nyamɔgɔ Misɛli ma sɔn k'o min kɛ. Tuma min na, a tun bɛ sɔsɔli kɛra ni Sutana ye Musa suu koo la, a y'a yɛrɛ minɛ, a ma sɔn ka Sutana nɛni. Nga a y'a fɔ ko: “Ala bɛna i sara.” O mɔgɔ nunu tɛ fɛɛn minw lɔn, u bɛ olu le lɔgɔbɔ. Lɔnniya min b'u fɛ, o ye adamaden ta ye, o ni kongosogo bɛɛ ta ka kan, o le b'u bila halakili la. Bɔnɛ y'u ta ye, bari u ye Kayɛn ka sirajugu nyɔgɔn taama. U ye tinyɛ sira bila sara kama i n'a fɔ Balamu tun y'a kɛ cogo min na. U ta cɛnna murutili kama i n'a fɔ Kɔre halakira cogo min na. Olu le bɛ koo caaman nyagami aw ka balimaya dumuni kɛtuma na, u tɛ malo, u tɛ mɔgɔ si jati, u b'a fɛ olu dama ka fa. U kɛra i n'a fɔ sankaba gwɛmanw, fɔnyɔ b'o minw ta ka yaala n'u ye. U bɛ i n'a fɔ yiri denbaliw, yiri minw juuw bɔnna, u fagara pewu. U kɛra i n'a fɔ jikuruw kɔgɔji kan, u ka kɛta bɛ i n'a fɔ jii kankan min b'u maloya. U bɛ i n'a fɔ lolo minw bɛ bɔ sankolo la ka ben. Ala y'u mara dibiba kama min tɛ tɛmɛ. Enɔki min ye wolokun wolonwulanan ye k'a ta Adama ma, ale ye kiraya kuma fɔ u koo la ko: “Heyi! Matigi bɛna na n'a ka mɛlɛkɛ senuman waa caaman ye. A bɛna bɛɛ kiti, ka Alanyasiranbaliw jalaki u ka kojugu sifa bɛɛ la, ani u ka kumajugu fana u ye olu minw fɔ a koo la.” O mɔgɔ nunu dusu man di, u bɛ; nunu;nunu, u bɛ taama ka kɛnyɛ n'u yɛrɛ ka nigɛjugu ye dama. U dalakuma bɛɛ kɛra yɛrɛbonya kuma ye, u bɛ mɔgɔw nigɛ u yɛrɛ ka nafa kama. Ne teriw, aw k'aw hakili to an Matigi Yezu Krista ka cidenw ka kuma fɔninw na. Olu tun y'a fɔ aw ye ko: “Waati laban na, kolɔgɔbɔbagaw bɛna sɔrɔ. U bɛna taama ka kɛnyɛ n'u ka nigɛjugu ye.” O mɔgɔ nunu yɛrɛ yɛrɛ lo, olu le bɛ mɔgɔw bila nyɔgɔn na, u ka koo bɛɛ ye adamadenya ye, Ala ka Nii tɛ u fɛ. Nga aw kɔni, ne teriw, aw ka jija ka taa nya aw ka jiginyuman koo la, ani ka Ala dali Nii Senuman barika la. Aw ka to Ala ka kanuya la, k'aw jigi la an Matigi Yezu Krista ka makari kan, ka sini hɛrɛ kɔnɔ. Mɔgɔ minw bɛ sigasiga, aw ye makari u la, k'u kisi ka bɔ tasuma na, ka makari tɔ nunu na fana, nga o ka kɛ ni siranya ye. U ka kɛwalijuguw koo ka goya aw ye i n'a fɔ u ka faniw minw nɔgɔra u ka kɛwalijuguw fɛ. Ala min bɛ se k'aw tanga aw kana ben, ani k'aw kɛ jalakibaliw ye ka nisɔndiya di aw ma kosɛbɛ a nyakɔrɔ, ale kelenpe min y'an Kisibaga ye an Matigi Yezu Krista barika la, nɔɔrɔ ni bonya ani sebagaya ni kuntigiya ka kɛ ale ye k'a ta a daminɛ, ka se sisan ma ni tuma bɛɛ. Amiina. Koo minw ka kan ka kɛ yan ni dɔɔni, Ala ye sira di Yezu Krista ma, a k'olu yira a ka baarakɛlaw la. O la, ale y'a ka mɛlɛkɛ ci Zan fɛ k'o yira a la. Ala ye kuma minw fɔ, ani Yezu ye koo minw kɛ, Zan min nyaa lara o bɛɛ kan, ale b'olu le nyafɔra yan. Ni sɛbɛ nin kalanbaga, walima a kɔnɔna kirayakuma lamɛnbaga min y'o labato, o tigi ye dubaden ye. Bari o koow kɛwaati surunyana. Ala ka jamakulu wolonwula minw bɛ Azi mara la, ne Zan bɛ sɛbɛ nin ci aw ma. Ala min bɛ yen, ale tun bɛ yen, ani ale lo bɛna na. Ale ni a ka Nii wolonwula minw bɛ masasigilan nyakɔrɔ, olu ka nɛɛma ni hɛrɛ kɛ aw ye. Yezu Krista min ye Ala ka seeresɛbɛ ye, n'ale le kɛra suu fɔlɔ ye ka kunun, n'a ye masaw ka Masa ye, ale ka hɛrɛ ni dususuma di aw ma. An koo diyar'a ye, a y'an ka kojuguw yafa a joli bɔnnin sababu la, k'an kɛ masadenw ye, ni sarakalasebagaw ye, a Faa Ala nyakɔrɔ. O tuma na, see ye ale ta ye, bonya ka la a tɔgɔ kan waati bɛɛ. Amiina. Ayiwa, a bɛna na sankaba kan. Mɔgɔ bɛɛ bɛn'a ye. Hali minw tun y'a sɔgɔ ni taman ye, u bɛn'a ye. Siyaw bɛɛ bɛna kasi ale kɔsɔn. Ɔnhɔn, a bɛna kɛ ten. Amiina. Matigi Ala ko ale ye Alifa ni Omega ye, ale min ye Setigi ye, n'a bɛ yen, n'a tun bɛ yen, a fana bɛna na. An minw kɛra masadenw ye n'an bɛ tɔɔrɔ munyuna Yezu kɔsɔn, ne Zan, aw baden, ne tun bɛ jamanadennin dɔ la kɔgɔji cɛma min tɔgɔ ko Patimɔsi, Ala ka kuma ni Yezu seereya kama. Dimasilon dɔ la, Nii Senuman barika la, ne ye kumakan dɔ mɛn n kɔfɛ, i n'a fɔ buru fiyɛkan. A y'a fɔ ko: “I bɛ min yera, o sɛbɛn k'a ci Ala ka jama ma dugu wolonwula nunu kɔnɔ: Efɛzi ni Simirini, ani Pɛrigamu, Tiyatiri, ni Saadi ni Filadɛlifi ani Lawodise.” Ne ye n nyaa yɛlɛma ko n bɛna kumabaga nin filɛ, ne ye sanu lanpan wolonwula ye. Fɛɛn dɔ tun bɛ lanpan nunu cɛma, o fɛɛn nin bɔnin tun bɛ adamaden fɛ. Foroca tun b'a kaan na, sanu cɛsirilan tun b'a disi la. A kunsigi tun gwɛra parapara. A nyadenw tun bɛ i n'a fɔ tasuma. A seenw tun bɛ manamana i n'a fɔ u ye zira min ko k'a jɔsi. A kumakan tun bɛ i n'a fɔ jiba woyokan. Lolo wolonwula tun b'a kinibolo la. Murujan dafila diman tun b'a daa la. A nyada tun bɛ manamana i n'a fɔ tile. Ne nyaa lara a kan tuma min na dɔrɔn, ne benn'a kɔrɔ ka kirin. Nga a y'a kinibolo la ne kan k'a fɔ ko: “I kana siran, ne le ye fɔlɔ ye, ne le ye laban ye. Ne Nyanaman lo. N tun sara, nga sisan n bɛ nii na. N tɛna sa tugu abada! Saya ani lahara konnigɛ bɛ ne bolo. Ayiwa, i ye min ye ka tɛmɛ, o sɛbɛn. Min bɛ kɛra sisan, ani min bɛna na kɔfɛ, o fana sɛbɛn. I tun ye lolo wolonwula minw ye n bolo, ani sanu lanpan wolonwula nunu kɔrɔ filɛ: Lolo nunu ye Ala ka jamakulu wolonwula nunu ka nyamɔgɔw ye. Lanpan nunu ye u yɛrɛw ye.” “Sɛbɛ ci Ala ka jama nyamɔgɔ ma Efɛzi ko: Lolo wolonwula nunu bɛ min kinibolo la, n'a bɛ taamana sanu lanpan wolonwula nunu cɛma, ale ko: Ne b'aw taama cogo lɔn. Aw bɛ baara min kɛra, ani aw munyunin lo cogo min na, ne b'o bɛɛ lɔn. Ne y'a lɔn ko aw tɛ sɔn mɔgɔjuguw ka koo la. Minw k'olu ye cidenw ye k'a sɔrɔ cidenw tɛ, aw ye olu kɔrɔbɔ, k'a ye ko galontigɛlaw lo. Aw tɔɔrɔla ne kɔsɔn nga aw munyuna, aw m'aw fari faga. O n'a ta bɛɛ, ne b'aw jalaki. Bari aw tun bɛ ne kanu cogo min na fɔlɔ, aw tɛ ne kanu ten tugu. Aw tun bɛ cogo min na fɔlɔfɔlɔ la, n'aw yɛlɛmana, aw ye miiri o la kosɛbɛ ka nimisa, k'aw ka fɔlɔfɔlɔ kɛwaliw nyɔgɔn kɛ. N'aw m'o kɛ, ne bɛna na aw kama, k'aw ka lanpan ta ka bɔ a nɔɔ na. Nga koo kelen b'aw la, o ka di ne ye. Nikola kɔmɔgɔw koo ka go ne ye cogo min na, u koo ka go aw fana ye ten. “Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya. “Ni min munyuna ka see sɔrɔ, Ala ka arijanayiri min bɛ nii don mɔgɔ la, ne b'o deen dɔ d'a tigi ma k'a dumu. “Sɛbɛ ci Ala ka jama nyamɔgɔ ma Simirini ko: “Min ye Fɔlɔ ni Laban ye, min tun sara ka kunun, ale ko: Ne b'aw ka tɔɔrɔ n'aw ka faantanya lɔn. Nga n b'a fɔ ko aw ye nafolotigiw ye. Minw k'olu ye Zuwifuw ye k'a sɔrɔ Zuwifuw tɛ, olu bɛ tɔgɔcɛn min lara aw kan, ne b'o lɔnna. Olu kɛnin bɛ Sutana kɔmɔgɔw le ye. Tɔɔrɔ min bɛna aw sɔrɔ, aw kana siran o nya. Ayiwa, aw cɛma, mɔgɔ damani bɛna kaso kɛ Sutana sababu la. A bɛna o kɛ k'aw kɔrɔbɔ. Aw bɛna tɔɔrɔ tile tan kɔnɔ. Aw ka jija fɔɔ ka taa se saya ma, n'o kɛra, aw bɛna sini hɛrɛ sɔrɔ ne barika la. “Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya. “Ni min munyuna ka see sɔrɔ, o tigi tɛna sini tɔɔrɔ sɔrɔ, o min ye saya filanan ye. “Sɛbɛ ci Ala ka jama nyamɔgɔ ma Pɛrigamu ko: “Murujan dafila diman bɛ min fɛ, ale ko: Aw bɛ dugu min na, ne y'a lɔn ko Sutana ka masasigilan bɛ o yɔrɔ la. O n'a ta bɛɛ, aw nɔrɔnin bɛ ne la, aw ma tigɛ ne la. U ye ne ka seerenyuman Antipasi faga aw fɛ yen loon min na, hali o waati la, aw m'aw jigi bɔ ne kan k'aw to Sutana ka sigiyɔrɔ nin na. O n'a ta bɛɛ, ne b'aw jalaki koo dɔw la. Bari aw cɛma, dɔw nɔrɔnin bɛ Balamu ka kalan na, ale min tun bɛ Balaki kɔnɔnasu waasa a ka Isirayɛlidenw nigɛ k'u bila josɔnsogo nyimi na, ani ka kakalaya kɛ. Dɔw b'aw cɛma fana minw sɔnna Nikola kɔmɔgɔw ka kalan ma. Ayiwa, o tuma na, aw ye nimisa ka faran aw ka kojuguw la. N'o tɛ, n bɛ na aw fɛ sisan. Murujan min bɛ n daa la, n bɛna o kɛ k'u kɛlɛ. “Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya. “Ni min munyuna ka see sɔrɔ, ne bɛna maanɛ dogonin dɔ di o tigi ma, ka kabakuru gwɛman dɔ d'a ma fana, tɔgɔ dɔ b'o kan, mɔgɔ si tɛ o tɔgɔkura min lɔn n'o kabakuru sɔrɔbaga tɛ.” “Sɛbɛ ci Ala ka jama nyamɔgɔ ma Tiyatiri ko: “Ala Dencɛ, o min nyadenw bɛ i n'a fɔ tasuma, n'a seenw bɛ i n'a fɔ zira konin, ale ko: Aw bɛ min kɛra, ne b'o lɔn. Ne koo ka d'aw ye cogo min na, ani aw jigi bɛ ne kan cogo min na, ne b'o lɔn, n'aw ka baara kɛcogo, ani aw ka munyuli, ne b'o bɛɛ lɔn. Aw bɛ baara min kɛ sisan, o ka ca ni fɔlɔta ye. O bɛɛ n'a ta, ne b'aw jalaki, bari aw bɛ Zezabɛli ka kɛwaliw diyara a la. O muso nin ko ale ye kira ye, k'a sɔrɔ kira tɛ. A b'a la ka n ka mɔgɔw lafili n'a ka kalan ye, k'u bila kojugukɛ ni josɔnsogo nyimi na. N y'a to fɔlɔ waasa a k'a sɔɔn yɛlɛma. Nga a do t'a fɛ k'a ka kakalaya dabila. Ayiwa, n bɛn'a kɛ a bɛ la bana bolo ka tɔɔrɔ. A ni minw jɛnna ka kakalaya kɛ, n bɛna tɔɔrɔba lase olu fana ma, fɔɔ ni u y'u ka kakalaya dabila. N bɛna saya lase a deenw ma, o la Ala ka jama bɛɛ bɛn'a lɔn ko ne le bɛ mɔgɔ bɛɛ kɔnɔnako n'u ka; naniyaw lɔn. N bɛna aw kelen kelen bɛɛ sara ka kɛnyɛ n'aw ka kɛwaliw ye. “Aw tɔw, aw minw bɛ Tiyatiri n'aw ma sɔn ka kɛ a kɔmɔgɔw ye, aw minw ma Sutana ka gundo nyini k'a lɔn, aw kɔni, n tɛna koo wɛrɛ la aw kan. Nga aw y'aw jigi la ne kan cogo min na, aw k'aw yɛrɛ minɛ ka nya ten fɔɔ ne ka kɔsegi ka na. Ni min y'a yɛrɛ minɛ ka nya, ka ne ka fɔtaw bɛɛ kɛ fɔɔ ka se u daan na, ne bɛna siya wɛrɛw ka kuntigiya di o tigi ma. A bɛna u mara ni nigɛbere ye k'u ci, i n'a fɔ mɔgɔ bɛ daga ci cogo min na. Ne yɛrɛ y'o fanga nin sɔrɔ n Faa fɛ ten. Loloba min bɛ bɔ dugugwɛdafɛ, ne bɛna o d'a ma fana. “Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya. “Sɛbɛ ci Ala ka jama nyamɔgɔ ma Saadi ko: “Ala ka Nii wolonwula ni lolo wolonwula bɛ min fɛ, ale ko: Ne b'aw ka kɛwaliw lɔn. U b'a miiri ko aw nyanaman lo, k'a sɔrɔ aw ye suuw ye Ala nyana. Aw k'aw yɛrɛ minɛ, waasa barika dɔɔni min b'aw la, o fana kana nagasi. Bari aw ka kɛwaliw si ma ne ka Ala nyaa fa. Aw ye kuma min mɛn ka sɔn a ma, aw k'aw hakili jigi o la, k'aw sɔɔn yɛlɛma k'o kuma nin minɛ ka nya dɛ! N'o tɛ, ne bɛna na bari aw la i n'a fɔ soon, aw tɛna ne natuma lɔn. Mɔgɔ damani kɔni b'aw fɛ Saadi minw ma nɔgɔ. Olu bɛna fani gwɛmanw don ka n bila sira, bari u ka kan n'o ye. Ayiwa, ni min munyuna ka see sɔrɔ, o tigi fana bɛna fani gwɛman don ten. Mɔgɔ nyanamanw tɔgɔw bɛ sɛbɛ min kɔnɔ, n tɛna o tigi tɔgɔ jɔsi ka bɔ o kɔnɔ. Nga n bɛna sɔn k'a yira n Faa n'a ka mɛlɛkɛw la, k'o tigi ye ne ta ye. “Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya. “Sɛbɛ ci Ala ka jama nyamɔgɔ ma Filadɛlifi ko: “Dawuda ka konnigɛ bɛ min bolo, ale ye Senuman ye tigitigi, ale min bɛ daa yɛlɛ ni mɔgɔ si tɛ se k'a tugu, n'a y'a tugu, mɔgɔ si tɛ se k'a yɛlɛ, ale ko: Ne b'aw ka kɛwaliw lɔn. Ayiwa, ne ye daa dɔ yɛlɛ aw nya, mɔgɔ si tɛ se ka min tugu. Fanga bɛrɛ t'aw la, nga aw ye ne ka kuma labato, aw ma bɔ ne kɔ. Ayiwa, n bɛna Sutana batobagaw karaba aw ye, olu minw k'u ye Zuwifuw ye k'a sɔrɔ Zuwifuw tɛ, galontigɛlaw lo. N bɛna u wajibiya ka na u kunbiri gwan aw kɔrɔ. O la, u bɛn'a lɔn ko aw koo ka di ne ye. Aw banbana ka ne ka kuma labato. O la, ne fana bɛna aw kɔlɔsi tɔɔrɔ tuma na, o min bɛna don dinyɛ mumɛ bɛɛ kɔnɔ ka mɔgɔw kɔrɔbɔ. N bɛ na yan ni dɔɔni. Aw ye jija k'aw yɛrɛ kɔlɔsi waasa mɔgɔ si kana na aw ka sesɔrɔjala bɔsi aw la. Ni min munyuna ka see sɔrɔ, n bɛn'a kɛ o tigi bɛ to n ka Ala batoso kɔnɔ i n'a fɔ tuloman. A bɛna to yen kudayi. Ne bɛna n ka Ala n'a ka dugu tɔgɔ sɛbɛn a kan, o dugu min ye Zeruzalɛmu kura ye min bɛna jigi ka bɔ Ala fɛ arijana na. Ne bɛna n tɔgɔkura fana sɛbɛn a kan. “Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya. “Sɛbɛ ci Ala ka jama nyamɔgɔ ma Lawodise ko: “Min tɔgɔ ko Amiina, ale min ye Seere tilennin tigitigi ye, ani Ala ka danfɛnw bɛɛ bɔra ale la, a ko: Ne b'aw ka kɛwaliw lɔn. Aw ma suma i n'a fɔ jisuma, aw gwannin tɛ i n'a fɔ jigwannin. N'aw tun kɛra nunu fila dɔ ye, o tun ka fisa. Aw gwannin tɛ, aw sumanin tɛ fana, fɔɔ walawalanin, o tuma na ne bɛna aw fɔɔnɔ dɛ! Aw b'a miiri ko aw ye fɛntigiw ye, ko fɛɛn bɛɛ b'aw fɛ, ko aw wasara, k'a sɔrɔ aw m'a lɔn ko aw ye dɛsɛbagatɔw ye, ni makaritɔw, ni faantanw, ni finyɛntɔw ani fɛɛrɛtɔw ye. Ayiwa, ne b'aw ladi. Aw ye na sanu yɛrɛ yɛrɛ san ne fɛ, fɛɛn min b'a to aw bɛ kɛ fɛntigiw ye. Aw ye na fanigwɛ san k'aw ka maloya bɔ, ani ka nyadimifura minɛ ne fɛ k'aw yɛrɛ furakɛ waasa aw ka yeli kɛ. Minw koo ka di ne ye, ne bɛ olu ladi k'u kolo. Ayiwa, aw ye jija, ka nimisa ka faran aw ka kojugu la. Ne lɔnin bɛ aw ka daaw la ka daa kɔkɔ. Ni min ye n kaan mɛn ka daa yɛlɛ, ne bɛ don o tigi fɛ, an bɛ dumuni kɛ nyɔgɔn fɛ. Ni min munyuna ka see sɔrɔ, o tigi bɛna sigi ni ne ye n ka masaya la, i n'a fɔ ne ye see sɔrɔ ka sigi ni n Faa ye a ka masaya la cogo min na. “Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya.” O kɔ, ne ye daa dɔ yɛlɛnin ye sankolo la: Ne tun ye kumakan min mɛn fɔlɔ la i n'a fɔ buru fiyɛkan, o kumakan nin ko ne ma: “Yɛlɛ ka na yan, n bɛna koo nataw yira i la.” O yɔrɔnin bɛ, Nii Senuman jigira ne kan. Ne ye masasigilan dɔ ye arijana kɔnɔ. Dɔ tun siginin b'a kan. O tigi tun bɛ manamana i n'a fɔ dakamana kabakuruw u bɛ minw wele ko zasipi ni saaduwani. Sanmuru kɛnin tun bɛ ka masasigilan lamini. O nyaa bɔnin tun bɛ dakamana kabakuru dɔ fɛ u bɛ min wele ko emerodi. Sigilan mugan ni naani bilanin tun bɛ ka masasigilan lamini. Cɛkɔrɔba fanigwɛtigiw tun siginin b'u kan. Sanufugulan tun b'u bɛɛ kuun na. Saan tun bɛ pɛrɛn ani ka manamana ka bɔ masasigilan yɔrɔ la. Kumakanw tun bɛ bɔ yen fana. Lanpan wolonwula mananin tun bɛ masasigilan nyafɛ. Olu ye Ala ka Nii wolonwula nunu ye. Fɛɛn dɔ tun bɛ masasigilan nyafɛ. A kɛra i n'a fɔ baji. O nyaa tun ka nyi kosɛbɛ. Nimanfɛn barikaman naani tun bɛ masasigilan faan bɛɛ la. Olu yɔrɔ bɛɛ tun ye nyadenw ye. Nimanfɛn fɔlɔ bɔnin tun bɛ jara fɛ. A filanan bɔnin tun bɛ tura fɛ. A sabanan nyaa bɔnin tun bɛ mɔgɔ nyada fɛ. A naaninan bɔnin tun bɛ sɛgɛn lerutɔ fɛ. O nimanfɛn naani nunu bɛɛ tun bɛ ni gaman wɔɔrɔ wɔɔrɔ ye, nyadenw tun bɛ u fari yɔrɔ bɛɛ la. Suu ni tile, u b'a la k'a fɔ ko: “Senuman! Senuman! Senuman! Setigi Ala! An Matigi! E min tun bɛ yen! E min bɛ yen sisan! Ele le bɛna na!” Min siginin bɛ masasigilan nin kan, n'a tɛna sa abada, ni nimanfɛn nunu y'a makiri tuma min na, cɛkɔrɔba mugan ni naani nunu bɛ to k'u ka fugulan fili a nyafɛ k'u kunbiri gwan k'a bato, ale min bɛ yen tuma bɛɛ, ka to k'a fɔ ko: “An Matigi n'an ka Ala, i ka kan ni bonya ni tandoli ye, k'i ka sebagaya koo fɔ! Bari, e le ye fɛɛn bɛɛ dan, a diyara i ye, e y'u bɛɛ dan.” O tuma na, min siginin bɛ masasigilan kan, ne ye sɛbɛ melekenin dɔ ye ale kinibolo la. A nyaa n'a kɔɔ bɛɛ sɛbɛnnin tun lo. A datugunin tun bɛ ni taamasinyɛ wolonwula ye. O kɔ, ne ye mɛlɛkɛ setigi dɔ ye, ale y'a kaan kɔrɔ ta k'a fɔ ko: “Ka taamasinyɛ nunu walaka ka sɔrɔ ka sɛbɛ nin dayɛlɛ, jon ka kan n'o ye?” Mɔgɔ ma sɔrɔ yɔrɔ si la min bɛ se ka sɛbɛ nin yɛlɛ k'a filɛ. Sankolo la, dugukolo kan, dugukolo jukɔrɔ, a ma sɔrɔ. Ne kasira kosɛbɛ, bari mɔgɔ si ma sɔrɔ min bɛ se ka sɛbɛ nin yɛlɛ ani k'a filɛ. Cɛkɔrɔba nunu kelen y'a kaan to ne ma ko: “I kana kasi. Zuda kɔmɔgɔw ka waraba, Dawuda ka dencɛ nin kɛ! Ale le ye see sɔrɔ. O la, a bɛ se ka sɛbɛ nin yɛlɛ.” O tuma na, ne ye Sagaden dɔ ye, a wilila ka lɔ. Nimanfɛn naani nunu ni cɛkɔrɔbaw tun kɛnin bɛ k'a lamini. A kɛra i n'a fɔ a tun fagara. Gɔɔn wolonwula tun b'a la, ani nyaden wolonwula, o minw ye Ala ka Nii wolonwula ye n'a bɛ to k'u minw ci dinyɛ faan bɛɛ la. Min tun siginin bɛ masasigilan kan, Sagaden gwɛrɛla ka sɛbɛ nin minɛ ale fɛ. A y'a minɛ minkɛ, nimanfɛn naani nunu, ani cɛkɔrɔba mugan ni naani nunu bɛɛ y'u kunbiri gwan a kɔrɔ. Kolonjo, ani sanudagaw tun b'u bɛɛ bolo minw fanin tun bɛ wusulan na. O fɛɛn nunu tun ye Ala ka mɔgɔnyumanw ka daliliw taamasinyɛ ye. U tun bɛ dɔnkilikura dɔ lara ko: “E ni wale, ele le bɛ se ka sɛbɛ nin minɛ k'a taamasinyɛ nunu walaka. Bari u tun y'i faga. I joli min tun bɔnna, o kɛra sababu ye i ye mɔgɔ dɔw kunmabɔ k'u kɛ Ala taw ye ka bɔ siyaw bɛɛ cɛma, ani jamanaw bɛɛ la. E y'u kɛ masaw ni sarakalasebagaw ye dugukolo kan Ala nyakɔrɔ.” Ne tun bɛ filɛli kɛra halibi, ne ye mɛlɛkɛ caaman kaan mɛn, u tun ka ca haali, fɔɔ u tɛ se ka jati ka daa lɔn. U lɔnin tun bɛ ka masasigilan ni nimanfɛnw ni cɛkɔrɔba nunu lamini. U tun bɛ to k'u kaan kɔrɔ ta k'a fɔ ko: “U tun ye Sagaden min faga, ale ka kan ni setigiya ye, nafolotigiya, ani lɔnniya, ni fanga ni kunkɔrɔta ni bonya, ani tandoli y'a ta ye!” Sankolo kɔnɔ fɛɛnw, ni dugukolo kan taw, ni dugukolo jukɔrɔ taw, ni jii kɔnɔ fɛɛnw, danfɛnw mumɛ bɛɛ y'a daminɛ ka dɔnkili la ko: “Min siginin bɛ masasigilan kan, ale ni Sagaden tɔgɔ ka tando. Nɔɔrɔ ni bonya, ani setigiya ka kɛ u ta ye tuma bɛɛ!” Nimanfɛn naani nunu bɛ to k'u laminɛ ko: “Amiina!” Cɛkɔrɔba nunu bɛ to k'u kunbiri gwan k'u bato. Ayiwa, tuma min na ne y'a ye Sagaden ye taamasinyɛ fɔlɔ bɔ sɛbɛ nin kan, ne ye nimanfɛn naani nunu kelen pɛrɛnkan mɛn i n'a fɔ sanpɛrɛn. A y'a fɔ ko: “Na yan!” Ne ko n bɛ filɛli kɛ, ne ye soo gwɛman dɔ ye. Mɔgɔ min tun siginin b'a kan, kala tun b'o bolo. A gwɛrɛla, u ye masafugulan d'a ma. A bɔra ni setigiya ye, a bɛna see sɔrɔ. O kɔ, Sagaden ye taamasinyɛ filanan bɔ, ne ye nimanfɛn filanan pɛrɛnkan mɛn ko: “Na yan!” O tuma na, soo wɛrɛ bɔra, ale wulennin tun lo. Mɔgɔ min tun yɛlɛnin b'a kan, see dira ale ma ko a ka balawu le wili dinyɛ na waasa mɔgɔw ka nyɔgɔn fagafaga. Murujan dir'a ma. Sagaden ye taamasinyɛ sabanan bɔ tuma min na, n ye nimanfɛn sabanan pɛrɛnkan mɛn ko: “Na yan.” Ne ye filɛli kɛ, n y'a ye soo finman bɔra. Mɔgɔ min tun b'a kan, kilo tun b'o bolo. N ye kumakan dɔ mɛn ka bɔ nimanfɛn naani nunu cɛma ko: “I ka malo suma sɔngɔgwɛlɛn na, kilo kelen, deniye wari kelen. Nyɔɔ kilo saba sɔngɔ ye deniye wari kelen ye. I kana maga tulu ni duvɛn na.” Sagaden ye taamasinyɛ naaninan bɔ tuma min na, n ye nimanfɛn naaninan pɛrɛnkan mɛn ko: “Na yan.” N ye filɛli kɛ, n y'a ye soo binkɛnɛman bɔra. Mɔgɔ min tun b'a kan, ale tɔgɔ ko Saya. Lahara tugunin tun b'a kɔ. See dira olu ma waasa ka dinyɛ mɔgɔw tilan naaninan faga ni murujan ye, ni kɔngɔ, ni banajuguw, ani kongosogo farimanw ye. Sagaden ye taamasinyɛ duurunan bɔ tuma min na, u tun ye mɔgɔ minw faga Ala ka kuma, n'u ka seereya kɔsɔn, ne ye olu ye sarakabɔlan jukɔrɔ. Olu y'u kaan kɔrɔ ta k'a fɔ ko: “Matiginyuman, e min tilennin lo, ani e bɛ tinyɛ fɛ, e bɛ waati jumɛn le kɔnɔna ka dinyɛ mɔgɔw kiti k'u nyaa gwan? Bari u tun ye anw faga.” O la, fani gwɛman dira u kelen kelen bɛɛ ma, k'a fɔ u ye k'u ka munyu dɔɔni, sanni u ka baarakɛnyɔgɔnw, n'u balimaw bɛɛ ka na, u bɛna olu minw faga i n'a fɔ olu fana. Sagaden ye taamasinyɛ wɔɔrɔnan bɔ tuma min na, dugukolo yɛrɛyɛrɛla kosɛbɛ. Tile finna kirikiri. Kalo wulenna i n'a fɔ joli. Lolow burunna duguma i n'a fɔ fɔnyɔba bɛ toro mɔbali burun cogo min na. Sankolo sinna ka meleke ka bɔ yen i n'a fɔ mɔgɔ bɛ dɛbɛ meleke cogo min na. Kuluw ni kɔgɔji cɛma dugukoloninw bɛɛ tununa ka bɔ u nɔɔ na. Ayiwa, masaw ni dugutigiw ni sɔlidasi kuntigiw, ani nafolotigiw, ni setigiw ani adamaden tɔw bɛɛ, jɔɔn fara hɔrɔnw kan, bɛɛ bɛ bolila ka dingɛ ni kuluwow yɔrɔ nyini, ka to k'a fɔ kuluw ni faraw ye ko: “Aw ye ben an kan, aw ye an sutura waasa min siginin bɛ masasigilan kan, o kana an ye, ani ka kisi Sagaden ka dimi ma! O lonba le sera, jon yɛrɛ bɛ se ka lɔ?” O kɔ, n ye mɛlɛkɛ naani ye. U lɔnin bɛ kelen kelen dugukolo faan naani la. Olu tun ye fɔnyɔ siri ka lɔ waasa fɔnyɔ kana fiyɛ dugukolo kan, ni kɔgɔji kan, ani yiriw kan. N ye mɛlɛkɛ wɛrɛ bɔtɔ ye kɔrɔn fɛ. Ala ka taamasinyɛ tun b'a bolo. See tun dira mɛlɛkɛ naani minw ma k'u ka dugukolo ni kɔgɔji halaki, ale mɛlɛkɛ nin pɛrɛnna k'a fɔ olu ye ko: “Aw kana dugukolo ni kɔgɔji, ani yiriw halaki fɔlɔ. Mɔgɔ minw bɛ an ka Ala sago kɛ, aw k'a to an b'a ka taamasinyɛ kɛ olu teen na fɔlɔ.” Taamasinyɛ kɛra minw teen na, ne y'olu daa mɛn. U tun ye mɔgɔ waa kɛmɛ ni bi naani ni naani ye. U bɔra Isirayɛlidenw ka kɔmɔgw bɛɛ la. Zuda ka komɔgɔw tun ye waa tan ni fila ye. Urubɛn ka komɔgɔw tun ye waa tan ni fila ye. Gadi ka komɔgɔw tun ye waa tan ni fila ye. Azɛri ka komɔgɔw tun ye waa tan ni fila ye. Nɛfutali ka komɔgɔw tun ye waa tan ni fila ye. Manase ka komɔgɔw tun ye waa tan ni fila ye. Simiyɔn ka komɔgɔw tun ye waa tan ni fila ye. Levi ka komɔgɔw tun ye waa tan ni fila ye. Isakari ka komɔgɔw tun ye waa tan ni fila ye. Zabulɔn ka komɔgɔw tun ye waa tan ni fila ye. Yusufu ka komɔgɔw tun ye waa tan ni fila ye. Bɛnzamɛn ka komɔgɔw ta tun ye waa tan ni fila ye. O tɛmɛnin kɔ, ne ko n bɛ filɛli kɛ tugu, ne ye jamaba dɔ ye, mɔgɔ si tɛ se ka minw jati k'u daa lɔn. Jamanaw bɛɛ mɔgɔw tun b'a la, ni siya bɛɛ. U lɔnin tun bɛ masasigilan ni Sagaden nyafɛ. Fanigwɛ tun b'u kaan na, ka tenfuraburu minɛ u bolo la. U tun bɛ to k'u kaan kɔrɔ ta k'a fɔ ko: “An ka Ala min bɛ masasigilan kan, anw kisira ale ni Sagaden sababu la.” Mɛlɛkɛ minw bɛɛ tun bɛ masasigilan lamini na, ni cɛkɔrɔba nunu, ani nimanfɛn naani nunu bɛɛ y'u kunbiri gwan masasigilan nyafɛ ka Ala bato, ka to k'a fɔ ko: “Amiina! Tandoli, nɔɔrɔ, ani hakilitigiya, o y'an ka Ala ta ye. Barika ka la a ye. Bonya ni setigiya ani fangatigiya y'a ta ye tuma bɛɛ la. Amiina!” O kɔ, cɛkɔrɔba nunu kelen ye ne nyininga ko: “Fani gwɛman bɛ minw kaan na, jonw lo? U bɔra min?” N y'a jaabi ko: “E le b'o lɔn matigi.” A ko ne ma: “Minw bɔra tɔɔrɔba nin na, n'u y'u ka faniw ko ka gwɛ Sagaden joli la, olu lo. O kama, u lɔnin bɛ Ala ka masasigilan nyafɛ ka to k'a bato a ka soo kɔnɔ suu ni tile. Ayiwa, min siginin bɛ masasigilan kan, ale bɛna u tanga. Kɔngɔ ni minnɔgɔ tɛna u minɛ tugu, tile tɛna u jɛni, funteni fana tɛna u tɔɔrɔ tugu. Bari Sagaden min bɛ masa sigiyɔrɔ cɛmancɛ la, ale le bɛna kɛ u dɛndɛbaga ye. A bɛna taa n'u ye jii nyanaman yɔrɔw la, u bɛ min. Ala bɛna u nyaji bɛɛ cɛ.” Sagaden ye taamasinyɛ wolonwulanan bɔ tuma min na, arijana bɛɛ sumana, fɔɔ ka taa se lɛrɛ tilancɛ nyɔgɔn ma. Ne ye mɛlɛkɛ wolonwula ye minw bɛ lɔ Ala nyafɛ, buru fiyɛta wolonwula dira u ma. Mɛlɛkɛ wɛrɛ nana lɔ sarakabɔyɔrɔ gɛrɛfɛ. Wusulandaga sanulaman tun b'ale bolo. U ye wusulan caaman d'a ma, waasa a k'o ni Ala ka jama ka daliliw jɛn k'u kɛ saraka ye sarakabɔyɔrɔ sanulaman kan, o min bɛ masasigilan nyafɛ. Mɛlɛkɛ ye wusulan min jɛni, o sisi wilila ni Ala ka jama ka daliliw ye Ala nyakɔrɔ. O kɔ, mɛlɛkɛ ye wusulandaga nin fa takami na sarakabɔyɔrɔ kan, k'a fili ka jigi dugukolo kan. Saan daminɛna ka pɛrɛn, ka manamana, mankan cayara, dugukolo yɛrɛyɛrɛla. Buruw tun bɛ mɛlɛkɛ wolonwula minw bolo, u y'u yɛrɛw labɛn waasa k'u fiyɛ. Fɔlɔ nin y'a ta fiyɛ, sanbɛrɛ ni takami, ni joli nyagaminin bɔra ka bɔn dugukolo kan. Dugukolo tilan sabanan jɛnina, yiriw tilan sabanan fana jɛnina, ani binkɛnɛ bɛɛ. Filanan nin y'a ta fiyɛ. O tuma na, fɛɛn dɔ min bɛ i n'a fɔ kulu belebeleba tasumalaman bɔra ka jigi kɔgɔji kɔnɔ. Kɔgɔji tilan sabanan yɛlɛmana ka kɛ joli ye. Jii kɔnɔ fɛɛnw tilan sabanan jɛnina, kurunw tilan sabanan halakira. Mɛlɛkɛ sabanan y'a ta fiyɛ, lolo belebeleba dɔ benna baji kɔnɔ ani jii bɔyɔrɔw kan k'u tilan sabanan minɛ. O lolo nin tun bɛ i n'a fɔ tasuma. A tɔgɔ tun ko Kunanya. Jii bɛɛ tilan sabanan kunanyara. Jii ka kunanya kojugu fɛ, mɔgɔ caaman sara. Naaninan y'a ta fiyɛ, tile tilan sabanan dibira, ni kalo, ani lolow. O la, yeelen bɛrɛ tun tɛ yen tilefɛ, suu dibira kosɛbɛ. O tuma na, ne tun bɛ filɛli kɛra, ne ye sɛgɛn dɔ tɛmɛtɔ pɛrɛnkan mɛn fɔɔ sankolo la. A tun b'a fɔra ko: “Mɛlɛkɛ saba minw tora, olu bɛna buru minw fiyɛ sisan, ebe! Ebe! Bɔnɛ ye dinyɛ mɔgɔw ta ye, o buru nunu fiyɛli kama.” O kɔ, mɛlɛkɛ duurunan y'a ka buru fiyɛ, n ye lolo dɔ ye min bɔra ka ben dugukolo kan. Dingɛjugu daa konnigɛ dira ale ma. A y'a dayɛlɛ dɔrɔn, sisiba dɔ bɔra i n'a fɔ waga jɛnitɔ sisi. O sisi nin ye tile nyaa bɛɛ dibi, ka yɔrɔ bɛɛ fin. Tɔɔnw bɔra o sisi nin na ka dugukolo bɛɛ fa. U ka fariya ni bunteni ta bɛɛ ye kelen ye. A fɔra u ye k'u kana maga biin na, ni yiriw la. Ko fɛɛn o fɛɛn bɛ furaburu bɔ, k'u kana foyi kɛ o si la. Ko Ala ka taamasinyɛ tɛ mɔgɔ minw teen na, k'u ka sin olu le ma. A fɔra u ye fana, k'u kana u faga, ko k'u tɔɔrɔ dɔrɔn kalo duuru kɔnɔ. N'u ye mɔgɔ cin, o dimi ni bunteni ta bɛɛ ye kelen ye. O waati la, mɔgɔw bɛna saya nyini ka dɛsɛ. U bɛna koo bɛɛ kɛ janko u bɛ sa, nga u tɛna sa. Tɔɔn nunu bɔnin bɛ soow fɛ, u ye minw labɛn kɛlɛ kama. A kɛra i n'a fɔ sanu fugulan le b'u kuun na. U nyada bɔnin bɛ mɔgɔ ta fɛ. U kunsigi bɛ i n'a fɔ muso ta. U nyiin bɛ i n'a fɔ jara ta. A kɛra i n'a fɔ nigɛ le donnin bɛ u disi la. U gamanw mankan bɔnin bɛ kɛlɛkɛso caaman bolikan fɛ ni wotorow ye. Kuu b'u la, o kuuw bɔnin bɛ bunteni ta fɛ. Mɔgɔw tɔɔrɔfɛn b'o kuu nunu kɔnɔ, o min bɛ se ka tɔɔrɔ lase mɔgɔw ma kalo duuru kɔnɔ. Mɛlɛkɛ min ye Dingɛjugu nin kuntigi ye, ale le ye u ka masacɛ ye. A tɔgɔ ko Abadɔn eburukan na. Girɛkikan na, a tɔgɔ ko Apoliyɔn. O kɔrɔ ko Halakibaga. Ayiwa, bɔnɛ fɔlɔ tɛmɛna, fila wɛrɛ le bɛna na sisan. O kɔ, mɛlɛkɛ wɔɔrɔnan y'a ka buru fiyɛ. Sarakabɔlan sanulaman min bɛ Ala nyafɛ, ne ye kumakan dɔ mɛn o nɔnkɔnw na n'a b'a fɔra mɛlɛkɛ nin ye, buru bɛ min bolo ko: “Mɛlɛkɛ naani minw sirinin bɛ Efarati baji daa la, u foni ka bila.” O mɛlɛkɛ nunu tun labɛnna ka bila o waati nin kama, o loon nin na, o kalo kelen nin kɔnɔ, o saan nin na, waasa ka mɔgɔw tilan sabanan faga. U labilara. Ne y'u ka kɛlɛbolo mɔgɔda mɛn, k'u ye sotigi miliyɔn kɛmɛ fila ye. O sotigi nunu ka yɛrɛtangafɛn minw tun bɛ u la, u wulennin tun lo fɔɔ ka kɛ bulaman ni nɛrɛmuguman ye. Soo nunu kungolow tun bɛ i n'a fɔ jara ta, tasuma ni sisi ani kiribi le tun bɛ bɔ u daaw la. Tasuma, ni sisi ani kiribi min tun bɛ bɔ u daaw la, o balawu nunu ye adamadenw tilan sabanan bɛɛ faga. Soo nunu ka sebagaya bɛ bɔ u daaw, n'u kuuw le kɔnɔ. O kuu nunu tun bɛ i n'a fɔ saaw. O b'u kuunw le kɛ ka adamadenw tɔɔrɔ. Mɔgɔ minw tora n'u ma sɔrɔ ka sa balawu nin na, sanni u ka nimisa k'u ka kɛwalijuguw dabila, ayi. U tora ka jinaw bato, ka joow sɔn. O joow tun ye sanu ye, dɔw warigwɛ, dɔw zira, dɔw kabakuru, dɔw yirikuru, k'a sɔrɔ o batofɛn nunu tɛ yeli kɛ, u tɛ mɛnni kɛ, u tɛ se ka taama. Mɔgɔ nunu ma sɔn k'u ka mɔgɔfaga ni subagaya ani kakalaya ni sonyaliw dabila. O kɔ, ne ye mɛlɛkɛ fangatigi wɛrɛ jigitɔ ye ka bɔ sankolo la. Sankaba tun kɛnin bɛ k'a lamini, sanmuru tun b'a kuun na. A nyada tun bɛ manamana i n'a fɔ tile, a seenw nyaa bɛ i n'a fɔ tasuma. Kitabufitini dɔ dayɛlɛnin tun b'a bolo. A y'a kinibolosen la kɔgɔji kan, k'a numanbolota la dugukolo kan. A; nunana kosɛbɛ, i n'a fɔ jara. A; nunana ten minkɛ, saan pɛrɛnna sinyɛ wolonwula k'a jaabi. Saan pɛrɛnna sinyɛ wolonwula minkɛ, u ye min fɔ, n ko n b'o sɛbɛn minkɛ, kumakan dɔ bɔra sankolo la ko: “I kana saan pɛrɛnkan wolonwula nunu darakan sɛbɛn, o to i kɔnɔ.” O tuma na, n tun ye mɛlɛkɛ min lɔnin ye n'a seen kelen bɛ kɔgɔji kan ni kelen bɛ dugukolo kan, ale y'a kinibolo kɔrɔ ta sanfɛ. Ala min bɛ yen tuma bɛɛ, ale min ye sankolo, ni dugukolo ani kɔgɔji n'u kɔnɔnafɛnw bɛɛ dan, mɛlɛkɛ nin kalila n'o tɔgɔ ye ko: “Kɔnɔni t'a la tugu! Nga ni mɛlɛkɛ wolonwulanan y'a ka buru fiyɛ loon min na, Ala bɛn'a ka koo dogonin dafa o loon na, i n'a fɔ a tun y'o koo fɔ a ka kiraw ye cogo min na.” N tun ye kumakan min mɛn ka bɔ sankolo la, o tigi kumana n fɛ tugu ko: “Mɛlɛkɛ min lɔnin bɛ kɔgɔji ni dugukolo kan, ta'a bolola kitabufitini nin minɛ.” N taara mɛlɛkɛ nin dali ko a ka kitabu nin di yan. A ko n ma: “Hɔn, a minɛ k'a nyimi, a bɛna diya i daa la i n'a fɔ lii, nga a bɛna kunanya i kɔnɔ.” Ayiwa, n ye kitabu nin minɛ mɛlɛkɛ bolo k'a nyimi. A tun ka di n daa la i n'a fɔ lii, nga a ye n kɔnɔ bɛɛ kunanya. O la, u y'a fɔ n ye ko: “I ka kan ka kiraya kɛ tugu, ka Ala ka kuma fɔ siya caaman ye, ni jamanaw, ani masa caaman ye.” O kɔ, ne ye kabako dɔ ye sankolo la. Muso dɔ tun lo, tile tun nɔrɔnin b'a kan, a seen lanin tun bɛ kalo kan, lolo tan ni fila kɛnin tun bɛ k'a kuun lamini. A kɔnɔman tun lo. A bɛ kulera a ka tiin bolo. Ne ye kabako wɛrɛ ye yen tugu. O tun ye Sogojugu wuleman belebeleba dɔ ye, a bɔnin bɛ banba fɛ. A kungolo ye wolonwula ye, a gɔɔn ye tan ye. Masafugulan b'a kuun nunu bɛɛ la. A kuu ye lolow tilan sabanan bɛɛ furan ka jigi duguma. A lɔnin tun bɛ muso nyafɛ, waasa ni muso jigira, a k'a deen nin bɔsi k'a nyimi. Ayiwa, muso nin jigira dencɛ la, o min ka kan ka nigɛbere ta ka siyaw bɛɛ kolo n'o ye. Ala ye deen nin ta ka ta'a bila a yɛrɛ gɛrɛfɛ a ka masasigilan kan. Muso bolila ka taa kongo kɔnɔ yɔrɔ dɔ la, Ala tun y'o min labɛn a ye ani a daradumuni bɛɛ. A bɛna to yen fɔɔ tile waa kelen ni kɛmɛ fila ni bi wɔɔrɔ. O tuma na, kɛlɛ wilila sankolo la. Misɛli n'a ka mɛlɛkɛw ye Sogojugu nin n'a kɔmɔgɔw kɛlɛ. Nga olu ma see sɔrɔ, o la, u ma se ka sigi arijana na tugu. Misɛli ye Sogojuguba nin n'a kɔmɔgɔw gwɛn ka jigi dugukolo kan. U b'ale Sogojugu nin le wele fana ko sakɔrɔ, jinaw kuntigi, Sutana, dinyɛ nyagamibaga. O kɔ, pɛrɛnkan dɔ bɔra arijana na ko: “K'a ta bii ma, an ka Ala ka kisili waati n'a ka sebagaya n'a ka masaya waati sera. Ala ka Mɔgɔ wolomanin ka setigiya waati lo, bari an badenw jalakibaga ka fanga nagasira. Ale le tun b'u jalaki suu ni tile k'u lɔ kiti la Ala nyafɛ. Nga an badenw sera a kɔrɔ Sagaden ka joli bɔnnin kɔsɔn, n'u ka seereya kɔsɔn, bari u ma ban k'u nii saraka. O kama, sigiyɔrɔ b'aw minw fɛ arijana na, aw ka nisɔndiya. Nga bɔnɛ ye aw dinyɛ mɔgɔw ni kɔgɔji kɔnɔ fɛɛnw ta ye, bari Sutana dimininba jigira aw fɛ yen. A b'a lɔn ko a halakilon tɔɔ man jan tugu.” Sogojugu nin y'a lɔn tuma min na k'u y'ale gwɛn ka jigi dugukolo kan, a y'a daminɛ ka deen nin bamuso kɔɔ gwɛn. Nga Ala ye gaman di muso ma, ko a ka pan ka taa kongo kɔnɔ yɔrɔ dɔ la, o min tun labɛnna a ye. A bɛna to yen n'a b'a daradumuni sɔrɔ fɔɔ saan saba ni tilan. Ale ni saa yɔrɔ janyanin bɛna to nyɔgɔn na. O la, saa nin y'a daji seri muso nɔɔ fɛ, waasa o jii ka muso ta. O jii tun bɛ i n'a fɔ baji. Nga dugukolo ye muso dɛmɛ. Sogojugu nin tun ye jiba min seri ka bɔ a daa la, dugukolo dayɛlɛla k'o bɛɛ min. Sogojugu nin tun tɛ sera ka muso nin sɔrɔ minkɛ, a dimina a kɔrɔ kosɛbɛ, ka kɛlɛ nin yɛlɛma k'a sin a deenw ma, o minw bɛ Ala ka kuma labatora n'u sɔnnin bɛ Yezu ka kuma na. O kɔ, a taara lɔ kɔgɔjida la. N ye Sogo dɔ bɔtɔ ye kɔgɔji la, a kungolo ye wolonwula ye, a gɔɔn ye tan ye. Masafugulan b'a gɔɔn nunu kelen kelen bɛɛ la. Ala tɔgɔcɛn kuma sɛbɛnnin b'a kuun kelen kelen bɛɛ kan. O Sogo nin bɔnin bɛ waraninkala fɛ. A seenw tun bɛ i n'a fɔ surukuwulen ta. A dakala bɛ i n'a fɔ jara ta. Sogojugu nin y'a ka sebagaya n'a ka masaya ani fangaba d'a ma. Sogo nin kungolo kelen mandiminin tun lo kosɛbɛ i n'a fɔ a bɛna sa. Nga a kuun nin nana suma. Adamadenw kabakoyara kosɛbɛ ka tugu a kɔ. U ye Sogojugu nin bato bari a ye sebagaya di Sogo dɔ nin ma. U tora ka Sogo dɔ nin bato n'u b'a fɔ ko: “Batofɛn jumɛn ni Sogo nin ka kan? Jon bɛ se ka lɔ a nya kɛlɛ la?” Daa dir'a ma waasa ka to k'a yɛrɛ wansun ani ka Ala tɔgɔ cɛn. Fanga dir'a ma waasa a k'a seko kɛ kalo bi naani ni fila kɔnɔ. A y'a daminɛ ka Ala tɔgɔ cɛn, ka arijana lɔgɔbɔ, o min ye Ala sigiyɔrɔ ye, ka to ka arijana mɔgɔw bɛɛ nɛni. Sira dir'a ma ko a ka Ala ka mɔgɔw kɛlɛ, ani ka se u kɔrɔ. Fanga dir'a ma waasa ka siyaw bɛɛ mara, ni jamanaw bɛɛ. U tun ye Sagaden min faga kabini dinyɛ dantuma, mɔgɔ nyanamanw ka tɔgɔ bɛ ale ka sɛbɛ min kɔnɔ, mɔgɔ minw tɔgɔ tɛ o kɔnɔ, olu bɛɛ bɛna sogo nin bato. “Ni min b'a fɛ ka faamuli kɛ, o k'a tulo malɔ ka nya. Mɔgɔ min danna jɔnya kama, o tigi bɛna jɔnya kɛ. Ni min ka kan ka faga ni murujan ye, o tigi bɛna faga ten. O la, Ala ka mɔgɔw ka kan ka kɛ munyulikɛbagaw ni jigitigiw ye.” O kɔ, n ye Sogo wɛrɛ ye min bɛ bɔra dugukolo la. Gɔɔn fila tun b'a la i n'a fɔ saga ta. A bɛ kuma i n'a fɔ sogojugu. A ye dinyɛ mɔgɔw bɛɛ karaba k'u kɛ Sogo fɔlɔ nin batobagaw ye, Sogo fɔlɔ nin barika la, ale min tun mandiminin b'a kuun na. O Sogo nin ye kabakobabaw kɛ, a ye tasuma yɛrɛ jigi ka bɔ sankolo la mɔgɔ bɛɛ nyana. Sebagaya min dir'a ma, a y'o kɛ ka mɔgɔ caaman lafili Sogo fɔlɔ nin nyana. A y'a fɔ mɔgɔw ye k'u ka Sogo fɔlɔ nin jaa dilan k'a bonya, o Sogo min tun mandimina n'a ma sɔrɔ ka sa. Sira dir'a ma ko a ka nii don jaa nin na, waasa a ka kuma, ni mɔgɔ min banna k'ale jaa nin bato, a k'o tigi faga fana. Sogo nin ye mɔgɔw bɛɛ wajibiya ka taamasinyɛ dɔ bila u kinibolo kan walima u teen na: a barikatigiw wo, a barikatanw wo, nafolotigiw ni faantanw, jɔɔnw ni hɔrɔnw bɛɛ. Ni Sogo nin ka taamasinyɛ, min ye a tɔgɔ ye, walima nimɔrɔ min bɛ bɛn a tɔgɔ ma, n'o tɛ mɔgɔ min kan, o tigi tɛ se ka foyi san, a tɛ se ka foyi feere. Fɔɔ i ka kɛ hakilitigi ye yan dɛ. Nimɔrɔ min bɛ bɛn Sogo nin tɔgɔ ma, ni min ye lɔnnikɛla ye, o tigi k'o jati minɛ. O nimɔrɔ bɛ bɛn mɔgɔ tɔgɔ ma. O ye kɛmɛ wɔɔrɔ ni bi wɔɔrɔ ni wɔɔrɔ ye. O kɔ, n ko n bɛ filɛli kɛ, ne ye Sagaden nin lɔnin ye Siyɔn kulu kan. Mɔgɔ waa kɛmɛ ni bi naani ni naani tun bɛ n'a ye. A tɔgɔ, n'a Faa tɔgɔ sɛbɛnnin b'u bɛɛ teen na. Kumakan dɔ bɔra sankolo la. O kumakan nin tun bɔnin bɛ jiba woyokan fɛ, walima saan pɛrɛnkan fɛ. Kumakan nin bɔnin tun bɛ kolonjofɔla ka kolonjo kaan fɛ. Mɔgɔ nunu tun bɛ masasigilan nyafɛ, ni nimanfɛn naani nunu, ani cɛkɔrɔbaw nyafɛ. U tun bɛ dɔnkilikura dɔ lara, mɔgɔ si tɛ min lɔn fɔɔ mɔgɔ waa kɛmɛ ni bi naani ani naani nunu dɔrɔn. Ala tun ye o minw kunmabɔ dugukolo kan. O mɔgɔ nunu tun ma sɔn k'u yɛrɛ nɔgɔ ni musoko ye. Olu kɔni, hakɛ t'u kan. Ni Sagaden taara yɔrɔ o yɔrɔ, u bɛ tugu a kɔ. Olu kisira ka kɛ saraka fɔlɔw ye adamadenw cɛma ka kɛ Ala ni Sagaden ta ye. Galon ma bɔ u daa la ka ye. Olu ye jalakibaliw ye. O kɔ, ne ye mɛlɛkɛ dɔ tɛmɛtɔ ye fɔɔ sankolo la. Kibaru diman b'a bolo k'a lase dinyɛ mɔgɔw bɛɛ ma, jamanaw kɔnɔ siyaw bɛɛ ma. O kibaru nin tɛna nagasi abada. Mɛlɛkɛ nin tun bɛ pɛrɛnna ka to k'a fɔ ko: “Aw ye siran Ala nya, aw y'a bonya, bari a ka kiti waati sera. Ale min ye sankolo ni dugukolo dan, ka kɔgɔji ni kɔɔw dan, aw k'ale bato.” Mɛlɛkɛ wɛrɛ tugura fɔlɔ nin kɔ, n'a b'a fɔra ko: “A halakira! Babilɔni duguba nin halakira! Ale min kɛra sababu ye ka siyaw bɛɛ bila a ka kakalaya la.” Mɛlɛkɛ wɛrɛ tugura fila nunu kɔ, n'a bɛ pɛrɛnna k'a fɔ ko: “Mɔgɔ o mɔgɔ bɛ Sogo nin, n'a jaa bato, a ka taamasinyɛ bɛ mɔgɔ o mɔgɔ teen na, walima a bolo kan, olu kɔni bɛna duvɛn jalan min, o min ye Ala ka dimi ta ye. U bɛna tɔɔrɔ kosɛbɛ kiribi mananin kɔnɔ Ala ka mɛlɛkɛw ni Sagaden nyana. U jɛnitasuma tɛna faga abada. Mɔgɔ minw bɛɛ tun ye Sogo nin n'a jaa bato, ni minw y'a ka taamasinyɛ sɔrɔ, olu si tɛna lafinyɛ sɔrɔ sufɛ, walima tilefɛ abada.” O kama Ala ka mɔgɔ minw b'a ka kuma labato ani k'u jigi to Yezu kan, olu ka jijawaati sera. O kɔ, kumakan dɔ bɔra sankolo la ko ne ma: “A sɛbɛn ko: Mɔgɔ minw bɛ sa k'u jigi lanin to Matigi kan, kabini sisan olu bɛ hɛrɛ la.” Nii Senuman ko: “U bɛna lafinyɛ, bari u ye kɛwalinyumanw kɛ.” O kɔ, ne ye sankaba gwɛman dɔ ye. Mɔgɔ min tun siginin b'a kan, o bɔnin bɛ mɔgɔ dencɛ fɛ. Masafugulan sanulaman tun b'a kuun na, wɔrɔsɔ dadiman dɔ tun b'a bolo. Ayiwa, mɛlɛkɛ dɔ wɛrɛ bɔra Alabatosoba kɔnɔ, k'a kaan kɔrɔta k'a fɔ sankaba kan sigibaga ye ko: “Kanni kɛ n'i ka wɔrɔsɔ ye, bari dugukolo suman mɔna, a kantuma sera.” O tuma na, mɔgɔ min siginin tun bɛ sankaba kan, a y'a ka wɔrɔsɔ kɛ ka dugukolo suman bɛɛ kan. O kɔ, mɛlɛkɛ wɛrɛ bɔra arijana Alabatoso kɔnɔ, wɔrɔsɔ dadiman tun b'ale fana bolo. Mɛlɛkɛ wɛrɛ bɔra sarakabɔlan gɛrɛfɛ n'o ye tasumatigi ye. A y'a kaan kɔrɔ ta k'a fɔ wɔrɔsɔtigi ye ko: “I ka wɔrɔsɔ kɛ ka ɛrɛzɛn nunu tigɛ, bari u mɔna.” O mɛlɛkɛ nin y'a ka wɔrɔsɔ kɛ ka ɛrɛzɛn nunu bɛɛ tigɛ. A y'a bɛɛ don duvɛn lalagayɔrɔ la. N'o ye Ala ka dimi ye. U y'a nɔɔni n'u seen ye dugu kɔɔ kan. A jii nin kɛra joli ye ka woyo fɔɔ ka see kilo kɛmɛ saba ma, min dunya bɛ mɛtɛrɛ kelen ni tilan nyɔgɔn bɔ. O kɔ, n ye kabakoba dɔ wɛrɛ ye arijana na. O tun ye mɛlɛkɛ wolonwula ye, balawutigiw lo. O le ye tɔɔrɔ laban ye, bari Ala bɛn'a ka mɔnɛ laban bɔ n'o le ye. O kɔ, n ye fɛɛn dɔ ye min bɔnin bɛ baji fɛ, a nyaa tun ka nyi kosɛbɛ, a kɛra i n'a fɔ takami nyagaminin tun b'a la. Mɔgɔ minw ye see sɔrɔ Sogo nin kan, n'u ma sɔn k'a jaa bato, n'a tɔgɔ taamasinyɛ ma sɔrɔ ka ci u la, olu lɔnin tun b'o baji nin kan ni Ala ka kolonjow b'u bolo, n'u bɛ Ala ka baaraden Musa ni Sagaden ka dɔnkili la ko: “Matigi Ala ni Setigi Ala! E ka koo kɛtaw nyɔgɔn tɛ! I ka koo latigɛninw tilennin lo, u bɛɛ ye tinyɛ ye, siyaw ka masa! Jon le tɛna siran i nya, Matigi? Jon le tɛna i tɔgɔ bonya? I kelen le ka nyi. Siyaw bɛɛ bɛna na e bato, bari e y'i ka tilenninya yira kɛnɛ kan.” O tɛmɛnin kɔ, Ala ka layidu taamasinyɛ kɛsu tun bɛ Alabatoso min kɔnɔ arijana na, o daa yɛlɛla. Mɛlɛkɛ wolonwula minw tun ye balawutigiw ye, olu bɔra yen. Fani gwɛman parapara tun b'u kaan na, n'u bɛ manamana. Sanu cɛsirilanw tun b'u cɛɛ la. Nimanfɛn naani nunu dɔ ye sanudaga wolonwula di mɛlɛkɛ nunu ma. Ala min bɛ yen tuma bɛɛ, ale bɛna tɔɔrɔ min lase a ka dimi kɔsɔn, o daga nunu fanin b'o le la. O tuma na, Alabatoso fara sisi la, o min ye Ala ka nɔɔrɔ n'a ka setigiya taamasinyɛ ye. Mɔgɔ si tun tɛ se ka don soo nin kɔnɔ ni mɛlɛkɛ wolonwula nunu ka tɔɔrɔ ma tɛmɛ. O kɔ, kumakanba dɔ bɔra Alabatoso kɔnɔ. O kumakan nin tun b'a fɔra mɛlɛkɛ wolonwula nunu ye ko: “Aw ye taa aw ka dagaw kɔnɔnafɛnw yɛlɛma dugukolo kan, o min ye Ala ka dimi ye.” Mɛlɛkɛ fɔlɔ nin taar'a ta yɛlɛma dugukolo kan. Sogo nin ka taamasinyɛ tun bɛ mɔgɔ minw bɛɛ kan, olu minw tun b'a jaa bato, jolijugu bɔra olu bɛɛ kan. Mɛlɛkɛ filanan y'a ta yɛlɛma kɔgɔji kɔnɔ. Jii kɛra i n'a fɔ u ye mɔgɔ kaan tigɛ a kɔnɔ. Jii kɔnɔ fɛɛnw bɛɛ sara. Sabanan y'a ta yɛlɛma baaw ni kɔɔw kɔnɔ. U bɛɛ yɛlɛmana ka kɛ joli ye. Mɛlɛkɛ min bɛ jii kunna, ale ko: “Ele Ala min bɛ yen, ni ele min tun bɛ yen, ele min ka nyi, i ka kiti tilennin lo. I y'a kɛ ten, o bɛnna kosɛbɛ. U ye i ka mɔgɔw ni kiraw ka joli bɔn, o la, i ye joli di u ma minji ye, o ka kan.” O kɔ, kumakan dɔ bɔra sarakabɔlan na ko: “Jaati! Matigi Ala, Setigi, i ka kiti tilennin lo, o ka nyi.” Mɛlɛkɛ naaninan y'a ta yɛlɛma tile kan. Dɔ farala tile fanga kan waasa ka adamadenw jɛni. Tile y'u tɔɔrɔ kosɛbɛ. O n'a ta bɛɛ, yan ni u ka nimisa ka Ala bonya, u tora k'a nɛni le k'a sɔrɔ see bɛ Ala ye o tɔɔrɔ nunu koo la. Mɛlɛkɛ duurunan y'a ta yɛlɛma Sogo nin ka masasigilan kan. Sogo nin bɛ yɔrɔ o yɔrɔ mara, o bɛɛ nyagamina. Mɔgɔw tora k'u daa cin tɔɔrɔ kojugu bolo. U tora ka Ala nɛni k'a tɔgɔjugu fɔ u ka tɔɔrɔ sɔrɔninw bɛɛ kɔsɔn. U ma nimisa ka faran u ka kɛwaliw la dɛ. Mɛlɛkɛ wɔɔrɔnan y'a ta yɛlɛma Efarati baji kɔnɔ, a jara ka tɛmɛsira di kɔrɔn nyafan masaw ma. O kɔ, n ye jina saba ye, u bɔnin tun bɛ tɔrisenjan fɛ. Kelen bɔra Sogojugu nin daa la, kelen bɔra Sogo dɔ nin daa la, ani kelen bɔra Sutana ka kira daa la. O jina nunu ye Sutana ta ye minw bɛ kabakow kɛ. U bɛna taa dinyɛ kɔnɔ masaw lajɛn nyɔgɔn kan waasa ka kɛlɛ wili Setigi Ala ka lonba loon na. O la, Matigi ko: “Ni mɔgɔ min tora nyana ani k'a ka fani mara, o tigi bɛna dagamu. Ni taatuma sera, a suturanin ka taa, a kana maloya. Bari ne bɛna na i n'a fɔ soon.” Jina nunu y'u ka kɛlɛbolo lajɛn yɔrɔ dɔ la, min tɔgɔ ko Arimagedɔn eburukan na. O kɔ, mɛlɛkɛ wolonwulanan y'a ta yɛlɛma fɔnyɔ na. Kumakanba dɔ bɔra masasigilan yɔrɔ la Alabatoso kɔnɔ ko: “A bɛɛ dafara sisan.” O tuma na, kumakan cayara, saan tora ka pɛrɛn, ka manamana. Dugukolo yɛrɛyɛrɛla kosɛbɛ, o yɛrɛyɛrɛ nin bɔnyɔgɔnko ma deli ka kɛ ka ye kabini adamaden danna k'a bila dugukolo kan. O ye duguba nin tilan saba. Dugu tɔw bɛɛ cira. Ala hakili ma bɔ Babilɔni duguba nin kɔ. A y'a ka duvɛn jalan nin di Babilɔnikaw ma, u y'a min. A y'u tɔɔrɔ kosɛbɛ k'a mɔnɛ bɔ. Dugukolonin minw bɛ kɔgɔji cɛma, olu bɛɛ tununa. Kuluw si ma ye tugu. Sanbɛrɛ gwiliman gwilimanw daminɛna ka ben mɔgɔw kan, o min gwiliya bɛ kilo bi naani bɔ. Sanbɛrɛ nunu ka tɔɔrɔ kɔsɔn, adamadenw tora ka Ala tɔgɔjugu fɔ, bari o tɔɔrɔ ka bon haali. O tuma na, mɛlɛkɛ wolonwula minw tun bɛ ni dagaw ye u bolo, olu kelen gwɛrɛla k'a fɔ ne ye ko: “Kakalamuso min tɔgɔ bɔra kosɛbɛ n'a siginin bɛ baaw cɛma, ale bɛna tɔɔrɔ cogo min na a ka kojugu kɔsɔn, na yan n bɛna o yira e la. Masaw jɛnna n'ale le ye ka kakalaya kɛ. A y'a kɛ dinyɛ mɔgɔw bɛɛ kɛra kakalaw ye.” O tuma na, Nii Senuman jigira ne kan, mɛlɛkɛ ye ne ta ka taa ni ne ye fɔɔ kongokolon dɔ la. O yɔrɔ la, ne ye muso dɔ siginin ye Sogo wuleman dɔ kan. Sɛbɛli tun b'a yɔrɔ bɛɛ la, o minw ye Ala tɔgɔcɛn kuma ye. A kuun tun ye wolonwula ye, gɔɔn tan. Fani wuleman dɔ tun bɛ muso nin kaan na min ka nyi kosɛbɛ. A masirinin tun bɛ ni sanu ye, ni kabakuru sifa dɔ ye i n'a fɔ luluu, ani kɔnɔkisɛw. Filen sanulaman dɔ tun b'a bolo, o fanin tun bɛ fɛnjuguw la, a ka kakalaya tɔnɔ. Tɔgɔ dɔ sɛbɛnnin tun b'a teen na min kɔrɔ dogonin lo. A sɛbɛnnin tun bɛ ko: “Babilɔni duguba, kakalaw ni dinyɛ kɔnɔ nyamanyamaw bamuso.” Ne y'a ye ko muso nin tun fanin lo Ala ka mɔgɔw ni Yezu seerew joli la. O tun ye ne kabakoya fɔɔ ka tɛmɛ. Nga, mɛlɛkɛ y'a fɔ ne ye ko: “Mun na i kabakoyanin lo ten? N bɛna muso nin ka koo kɔrɔ fɔ i ye. A yɛlɛnin bɛ Sogo min kan, n'o kungolo ye wolonwula ye, ani gɔɔn tan, n bɛna o fana kɔrɔ fɔ i ye. I ye Sogo min ye, a tun bɛ yen fɔlɔ la, nga sisan a tɛ yen tugu, A bɛna na bɔ Dingɛjugu la ka ta'a halakiyɔrɔ. Kabini dinyɛ dantuma, adamaden minw tɔgɔ tɛ Ala ka sɛbɛ kɔnɔ, olu bɛɛ bɛna Sogo nin ye, ka kabakoya a koo la, bari a tun bɛ yen fɔlɔ la, nga sisan a tɛ yen tugu. O n'a ta bɛɛ, a bɛna na tugu. “Fɔɔ i ka kɛ hakilitigi ni lɔnnikɛla ye yan. Sogo nin kuun wolonwula nunu kelen kelen bɛɛ ye kuluw ye, muso nin siginin b'o minw kan. Masa wolonwula lo fana. O masa nunu na, duuru benna, wɔɔrɔnan b'a ka masaya la, wolonwulanan ma sigi fɔlɔ. Nga n'ale sigira tuma min na, a tɛna mɛn a ka masaya la. Sogo min tun bɛ yen fɔlɔ la n'a tɛ yen tugu, o ye masa nunu seeginan ye, nga a jatinin bɛ masa wolonwula nunu cɛma. A bɛ taara halakiyɔrɔ le. “I ye gɔɔn tan minw ye, olu ye waati wɛrɛ masaw ye. Sogo nin bɛna masaya d'u ma. U bɛna masaya dumu waati dɔɔni dɔrɔn ni Sogo nin ye. O masa nunu ka; naniya bɛɛ ye kelen ye, ka se k'u ka sebagaya, n'u fanga kɛ nyɔgɔn kan ka baara kɛ Sogo nin ye. U bɛna Sagaden nin kɛlɛ. Nga Sagaden bɛna se u kɔrɔ, bari ale ye matigiw ka Matigi ye, ani masaw ka Masa. Sagaden n'a ka mɔgɔ weleninw, n'a ka wolomaninw, ni kantigiw, u bɛɛ bɛna see sɔrɔ.” Mɛlɛkɛ y'a fɔ n ye tugu ko: “Kakalamuso nin siginin bɛ jii min kan, o ye jamanaw n'u kɔnɔna siyaw ye. Sogo nin, ani a gɔɔn tan nunu bɛna wili kakalamuso nin kama k'a kɔniya. U bɛn'a walaka k'a to lakolon, u bɛn'a sogo nyimi. A tɔɔ min bɛna to, u bɛna o jɛni. Bari, Ala le ye; naniya kelen d'u ma waasa u b'u ka fanga fara nyɔgɔn kan ka baara kɛ Sogo nin ye fɔɔ Ala ka kuma fɔnin bɛɛ ka dafa. “Ayiwa, i ye muso min ye, o ye duguba nin ye, ale min bɛ dugukolo masaw bɛɛ kunna.” O kɔ, ne ye mɛlɛkɛ wɛrɛ jigitɔ ye ka bɔ sankolo la. Sebagayaba tun b'a bolo. A ka nɔɔrɔ ye yeelen bɔ dugukolo faan bɛɛ la. A pɛrɛnna ko: “A halakira! Babilɔni duguba nin halakira. A yɔrɔ kɛra jinaw ka yɔrɔ ye. Kɔnɔ minw tɛ nyimi, ani minw koo ka go, a kɛra olu ka yɔrɔ ye. Bari ale le kɛra sababu ye, ka siyaw bɛɛ bila kakalaya la. Masaw jɛnna n'ale le ye ka kakalaya kɛ. Jagokɛlaw kɛra nafolotigiw ye ale ka masirifɛnw sababu la.” O kɔ, n ye kumakan wɛrɛ mɛn ka bɔ arijana na ko: “N ka jama, aw ye bɔ dugu nin na wo, janko aw kana fara u kan ka kojugu kɛ a ka tɔɔrɔ dɔ kana se aw ma. Bari a ka kojugu kɛnin farafarala nyɔgɔn kan fɔɔ ka se sankolo la. Ala ma nyina a ka kɛwalijuguw kɔ. A ye aw minɛ cogo min na, aw fana k'a minɛ ten. A ye min kɛ aw la, aw ye o nyɔgɔn fila kɛ a la. A ye dɔrɔjugu min labɛn aw ye, min ka fari n'o ye sinyɛ fila, aw y'o don a ka dɔrɔfiyɛ la. A ye fɛnnyumanw ni nafolo kɛ k'a yɛrɛ bonya cogo min na, aw ka tɔɔrɔ ni dusukasi lase a ma ten. Bari a b'a miiri ko a kɛnin bɛ i n'a fɔ masamuso min cɛɛ bɛ sii la, ko sanga tɛna bɔ ale fɛ ka ye. O kama, dugu mɔgɔw bɛna tɔɔrɔ dɔw sɔrɔ tile kelen kɔnɔ. U bɛna banajugu sɔrɔ, sanga bɛna bɔ u fɛ, kɔngɔ bɛna don u fɛ. Tasuma bɛna dugu jɛni. O bɛɛ bɛna kɛ bari Matigi Ala min b'a nyaa gwanna, see b'o ye.” Masa minw nana kakalaya ni nafolotigiya kɛ dugu nin kɔnɔ, ni olu ye dugu sisi wilinin ye tuma min na, u bɛna kasi kosɛbɛ. Siranya fɛ, u bɛna lɔ yɔrɔjan waasa a ka balawu dɔ kana se u ma. U bɛna to k'a fɔ ko: “Ebe! Bɔnɛ o bɔnɛ! Duguba nin! Babilɔni duguba! Cɛfaridugu! I nyagwanko ma kɛ baara ye, lɛrɛ kelen dɔrɔn y'o nya.” Jagokɛlaw bɛna kasi a ka bɔnɛko la kosɛbɛ. Mɔgɔ si tɛna nyini a ka jagofɛnw na tugu. Sanu wo, warigwɛ wo, luluu, kɔnɔkisɛw, lɛnfaniw, faniwulen sɔngɔgwɛlɛnw, tuntunfaniw, wusulanyiriw, samanyinw, yirinyuman bɛ kɛ ka fɛɛn sɔngɔgwɛlɛn minw dilan, ziraw, nigɛw, kabakuru min tɔgɔ ko maaburu, nanfɛnw, tulu kasadiman, wusulanw, duvɛn, tulu, mugu, suman, misiw, sagaw, soow, wotorow, ani jɔɔn feeretaw. Jagokɛla nunu bɛn'a fɔ ko: “E tun bɛ bololafɛn minw nyini, o bɛɛ cɛnna. O nafolo nin, ani dakamanafɛnw bɛɛ tununa i la. I tɛna o si sɔrɔ tugu fewu.” Dugu nin kɛra sababu ye ka jagokɛla minw kɛ nafolotigiw ye, a ka bɔnɛ siranya fɛ, olu bɛna lɔ yɔrɔjan ka to ka kasi, ka to ka kaba. U bɛna to k'a fɔ ko: “Ebe! Bɔnɛ o bɔnɛ! Duguba nin! I do masirinin tun bɛ sa! ni lɛnfani ye, ni faniwulen sɔngɔgwɛlɛn ye, ni sanu ni luluu, ani kɔnɔkisɛw ye. Ebe! O nafolo nunu bɛɛ halakiko ma kɛ baara ye fɔɔ lɛrɛ kelen dɔrɔn.” Kurun kuntigiw, ni kurunbolilaw, ni minw bɛɛ bɛ to ka taa o yɔrɔ la, ani minw bɛɛ b'u daradumuni sɔrɔ kɔgɔji kan, olu bɛɛ bɛna lɔ yɔrɔjan ka to ka kaba ka dugu nin sisi yɛlɛtɔ filɛ k'a fɔ ko: “Dugu si tun tɛ se ka suma n'o duguba nin ye.” U bɛna kule, ka; nuna, ka buguri kɛ u kuun na dusukasi fɛ, k'a fɔ ko: “Ebe! Bɔnɛ o bɔnɛ! Duguba nin! O min ka dakamanafɛnw tun bɛ kuruntigiw bɛɛ kɛ nafolotigiw ye, e halakiko ma kɛ baara ye, lɛrɛ kelen dama kɔnɔ i kɛra tomo ye! “Arijana mɔgɔw, ni mɔgɔ senumanw, ni Yezu ka cidenw ani kiraw, aw ye nisɔndiya dugu nin ka tɔɔrɔ koo la. Bari Ala y'a nyaa gwan k'aw mɔnɛ bɔ.” O tuma na, mɛlɛkɛ setigi dɔ ye kabakuru dɔ ta min bonya bɛ wugu belebeleba dɔ bɔ, k'a fili kɔgɔji la k'a fɔ ko: “N ye kabakuru nin bon ni fanga min ye dɛ, Babilɔni duguba nin bɛna bari ka tunu yɔrɔnin kelen ten, a tɛna ye tugu. Kolonjo fɔkan tɛna mɛn yen tugu, ni dɔnkililabaga;nanaw, ni file, ani buru, u si kaan tɛna mɛn Babilɔni tugu. Bololabaarakɛla si tɛna sɔrɔ yen tugu. Wugu kaan tɛna mɛn yen tugu. Lanpan yeelen tɛna bɔ yen tugu. Kɔnyɔcɛ n'a muso tɛna sɔrɔ yen tugu, bari Babilɔni jagokɛlaw le tun ye dinyɛ kɔnɔ mɔgɔbabaw ye. A ka kirisikow ye siyaw bɛɛ lafili. “Kiraw, ni mɔgɔ senumanw, ani mɔgɔ minw bɛɛ fagara dugukolo kan, olu bɛɛ joli bɔnnin yera dugu nin le kɔnɔ.” O kɔ, ne ye jamaba dɔ kumakan mɛn arijana na ko: “Aleluya! Sebagaya ye an ka Ala ta ye! Adamadenw kisiko y'a ka baara ye! Bonya y'a ta ye. A ka kiti tigɛcogo tilennin lo ani a ka kan! A ye kakalamuso nin halaki, ale min tun bɛ mɔgɔw bɛɛ bila kakalaya la dugukolo kan. A ye Ala ka baarakɛla minw faga, Ala ye o le juru sara a la ten.” U tilara k'a fɔ tugu ko: “Aleluya! Kakalamuso nin sisi bɛna to ka bɔ tuma bɛɛ.” Cɛkɔrɔba mugan ni naani nunu, ani nimanfɛn naani nunu tora k'u kunbiri gwan duguma ka Ala bato k'a siginin to a ka masasigilan kan, k'a fɔ ko: “Jaati! Aleluya! Amiina!” O kɔ, kumakan dɔ bɔra masasigilan yɔrɔ la ko: “Aw minw bɛ siran Ala nya, barikatan fara barikatigi kan, aw ye Ala tando.” O tuma na, ne ye kumakanba dɔ mɛn, i n'a fɔ jamaba kumakan, walima jiba woyokan, walima saan pɛrɛnkan. O kumakan nin ko: “Aleluya! Bari an Matigi, Setigi Ala sigira a ka masasigilan kan. An ka nisɔndiya, ka nyanagwɛ! An ka barika la a ye bari Sagaden ka kɔnyɔya sera. A ka kɔnyɔmuso labɛnna, sira dir'a ma ko a ka dakamana fani don, fani min bɛ manamana.” O dakamana fani ye mɔgɔ senumanw ka kɛwaliw le ye. Mɛlɛkɛ y'a fɔ n ye ko: “A sɛbɛn ko: ‘Mɔgɔ minw welela Sagaden ka kɔnyɔya dumuni na, olu dagamuna.’ ” O kɔ, a ko n ma: “Nin ye Ala yɛrɛ ka kuma ye.” Ayiwa, ne birila a kɔrɔ ko n b'a bato, nga a y'a fɔ ne ye ko: “Ayi! Kana o kɛ, bari ne fana ye Ala ka baarakɛla le ye i n'a fɔ e n'i tɔnyɔgɔnw, minw ye Yezu ka kuma minɛ ka nya. I ka kan ka Ala le bato.” Yezu ye tinyɛko min fɔ, kiraw tun ye o sɔrɔ Nii Senuman barika la. O tuma na ne ye arijana daa yɛlɛnin ye, ka mɔgɔ dɔ siginin ye soo gwɛman dɔ kan. O tigi tɔgɔ ko Mɔgɔtilennin, ani Tinyɛ Tigi. A bɛ kiti tigɛ. A bɛ kɛlɛ kɛ ni tilenninya ye. A nyadenw tun bɛ i n'a fɔ takami, masafugulan caaman tun b'a kuun na. Tɔgɔ dɔ tun sɛbɛnnin b'a kan mɔgɔ si tun tɛ se ka min kalan fɔɔ ale kelen. Fani min tun b'a kaan na, o tun donna joli la. A tɔgɔ ko Ala ka Kuma. Arijana mɔgɔw ka kɛlɛbolo tugunin tun b'a kɔ, n'u bɛ soo gwɛmanw kan, dakamana fani gwɛman parapara tun b'u kaan na. Murujan dadiman dɔ tun b'ale daa la. O ye adamadenw halakifɛn ye. Ale le bɛna siyaw kolo ni nigɛbere y'a bolo, ka duvɛn dilandaga dɔn o min ye Setigi Ala ka dimi ye. Tɔgɔ dɔ tun b'a ka fani n'a woto kan ko: “Masaw ka Masa, ni matigiw ka Matigi.” O tuma na, ne ye mɛlɛkɛ dɔ lɔnin ye tile kan. A y'a kaan kɔrɔ ta k'a fɔ dugaw ye ko: “Aw ye nyɔgɔn lajɛn ka na Ala ka dumuniba la. Aw ye na masaw sogo dumu, ni sɔlidasi kuntigiw, ni fangatigiw, ani sotigiw, n'u ka soow dumu. Aw ye na adamadenw sogo dumu: jɔɔnw ni hɔrɔnw, barikatanw ni barikatigiw, u bɛɛ.” O tuma na, n ye Sogo nin, ani dugukolo kan masaw ani u ka kɛlɛbolo bɛɛ ye, u lajɛnnin tun lo. U k'u bɛ taa sotigi n'a ka kɛlɛbolo kama. Nga u ye Sogo nin kɛlɛ k'a minɛ, ka Sutana ka kira minɛ. Ale min tun bɛ to ka kabakow kɛ a nyana ka mɔgɔw lafili ka di Sogo nin ma, k'a kɛ Sogo nin ka taamasinyɛ bilara mɔgɔw kan, n'u y'u bato. U ye Sogo nin, ani Sutana ka kira minɛ k'u fili jahanama na. Kiribi le mananin bɛ yen. Murujan min bɛ sotigi nin daa la, a y'o kɛ ka kɛlɛden tɔw bɛɛ faga. Dugaw y'u suuw dumu ka fa. O kɔ, ne ye mɛlɛkɛ dɔ jigitɔ ye ka bɔ sankolo la ni jɔrɔkɔ barikaman ye, ni Dingɛjugu konnigɛ b'a bolo. A ye Sogojugu nin minɛ, o min ye sakɔrɔ nin ye, n'o ye Sutana ye fana. A y'a minɛ ka jɔrɔkɔ kɛ a la, a ka kan ka saan waa kelen kɛ jɔrɔkɔ la. Mɛlɛkɛ y'a ta k'a fili Dingɛjugu nin kɔnɔ k'a datugu, k'a sɔgɔ waasa a kana se ka bɔ ka mɔgɔ si lafili ni saan waa kelen nin ma tɛmɛ. N'o tɛmɛna, a bɛna bɔ ka waati dɔɔni kɛ. O kɔ, ne ye masasigilanw ye. Mɔgɔ minw nana sigi u kan, see dira olu ma ka kiti tigɛ. Mɔgɔ minw tun fagara Yezu ni Ala ka kuma kɔsɔn, ani minw tun banna ka Sogo nin taamasinyɛ bila u teen, walima u bolo kan, k'a jaa bato, ne ye olu bɛɛ fana kununnin ye, u sigira ni Krista ye masaya la saan waa kelen. Nga suu tɔw ma se ka kunun fɔɔ saan waa kelen nin ka tɛmɛ. O ye suuw kununko fɔlɔ ye. Mɔgɔ minw bɛna kɛ o fɔlɔ mɔgɔw ye, olu bɛna saniya, u bɛna dagamu bari saya filanan tɛna se olu ma. Olu bɛna kɛ Ala ni Krista ka sarakalasebagaw ye ka sigi masaya la n'a ye saan waa kelen nin kɔnɔ. Saan waa kelen nin tɛmɛnin kɔ, Sutana bɛna bila ka bɔ a ka kaso la ka taa adamadenw lafili dugukolo faan bɛɛ, o ye Gɔgi ni Magɔgi ye. A bɛn'a ka kɛlɛdenw lajɛn. U ka ca i n'a fɔ kɔgɔji daa la cɛncɛn. U bɛna dugukolo bɛɛ minɛ, ka jama senuman ni Ala ka diyana dugu lamini. Nga tasuma bɛna bɔ sankolo la k'u bɛɛ halaki. O tuma na, u ye adamadenw lafilibaga minɛ, n'o ye Sutana ye, k'a fili jahanama kɔnɔ, kiribi mananin b'o min kɔnɔ. A taara Sogo nin n'a yɛrɛ ka kira sɔrɔ yen. U bɛna tɔɔrɔ yen tuma bɛɛ, u tɛna bɔ abada. O kɔ, ne ye masasigilan belebeleba gwɛman dɔ ye ka mɔgɔ dɔ siginin ye a kan. Sankolo ni dugukolo bɛɛ ye kɛnɛ minɛ ka tunu. O kɔ, ne ye suuw ye, u bɛɛ kununna, denmisɛn fara mɔgɔkɔrɔbaw kan, u taara lɔ masasigilan nyafɛ. Ayiwa, sɛbɛ dɔw dayɛlɛla. Ala ka mɔgɔw tɔgɔ bɛ sɛbɛ min na, o fana dayɛlɛla. O tuma na, u ye mɔgɔw kiti ka kɛnyɛ n'u ka kɛwaliw ye. Jii tun ye minw dumu, dugukolo tun ye minw datugu, minw tun bɛ lahara, u bɛɛ le bɔra. U bɛɛ kitira ka kɛnyɛ n'u ka kɛwaliw ye. O tuma na, u ye saya ni lahara fifa ka jigi jahanama kɔnɔ. O le bɛna kɛ saya filanan ye. Mɔgɔ minw bɛɛ tɔgɔ ma sɔrɔ Ala ka sɛbɛ kɔnɔ, u ye olu bɛɛ fifa ka jigi jahanama kɔnɔ. O kɔ, ne ye sankolokura ni dugukolokura ye. Bari sankolo fɔlɔ ni dugukolo fɔlɔ nunu tun tununa. Kɔgɔji tun tɛ yen tugu. Zeruzalɛmukura, min ye dugu senuman ye, n y'a jigitɔ ye ka bɔ Ala fɛ arijana na. A labɛnnin bɛ, i n'a fɔ kɔnyɔmuso labɛnnin bɛ taar'a cɛso la. O waati yɛrɛ la, ne ye kumakanba dɔ mɛn ka bɔ masasigilan yɔrɔ la ko: “Ala sigiyɔrɔ filɛ nin ye adamadenw cɛma. A bɛna to u cɛma, u bɛna kɛ a ka mɔgɔw ye, ale bɛna kɛ u ka Ala ye. A bɛna u nyaji bɛɛ cɛ. Saya kɔni, o tɛ yen tugu. Mɔgɔ tɛna sa, mɔgɔ tɛna kasi, mɔgɔ tɛna tɔɔrɔ tugu. Bari, dinyɛkura lo, kɔrɔman n'a kɔnɔnafɛnw bɛɛ tununa bugubugu.” Mɔgɔ min siginin bɛ masasigilan kan, ale y'a fɔ o tuma na ko: “N bɛ fɛɛn bɛɛ kɛ kura ye.” O kɔ, a y'a fɔ ne ye ko a bɛna min fɔ, ko n k'o sɛbɛn, bari, tinyɛ kuma lo, mɔgɔ ka kan k'a jigi la min kan. A y'a fɔ tugu ko: “A bɛɛ dafara sisan. Ne le ye Alifa ni Omega ye. Ne le ye koo bɛɛ daminɛ ni laban ye. Ni minnɔgɔ bɛ min na, jii min bɛ hɛrɛ banbali di mɔgɔ ma, ne bɛna o di o tigi ma, sara t'o min na. Min mana see sɔrɔ. n bɛna o kɛ k'o tigi sara, ani ka kɛ a ka Ala ye, a fana ka kɛ n ka deen ye. Nga siranbagatɔw kɔni, ani lanabaliw, ni mɔgɔjuguw, ni mɔgɔfagalaw, kakalaw, lagwɛlikɛlaw, josɔnlaw, ani galontigɛlaw bɛɛ, olu kɔni niyɔrɔ ye jahanama le ye. O le ye saya filanan ye.” O tuma na, mɛlɛkɛ wolonwula minw tun bɛ ni tɔɔrɔ sifa wolonwula nunu ye u bolo dagaw kɔnɔ, o kelen nan'a fɔ ne ye ko: “Na yan n bɛ Sagaden ka maminɛmuso yira i la.” Nii Senuman barika la, ne ye n yɛrɛ ye kulu jamanjanba dɔ kan. Mɛlɛkɛ ye Zeruzalɛmu dugu senuman nin yira ne la, a jigitɔ ka bɔ Ala fɛ arijana na. Ala ka nɔɔrɔ tun b'a kan. A tun bɛ manamana kosɛbɛ. Kogo jamanjan tun kɛnin bɛ k'a lamini. Donda tan ni fila b'a la, mɛlɛkɛ kelen kelen tun lɔnin bɛ daa nunu bɛɛ la. Isirayɛli deen tan ni fila tɔgɔw sɛbɛnnin bɛ daa nunu kan. Dugu nin donda saba tun sinnin bɛ kɔrɔn ma, saba bɛ tileben fɛ, saba bɛ kɔgɔdugu nyafan fɛ, saba bɛ worodugu nyafan fɛ. Kogo nin juu siginin bɛ kabakuru tan ni fila le kan. Sagaden ka ciden tan ni fila tɔgɔw sɛbɛnnin b'o kabakuru nunu kan kelen kelen. Mɛlɛkɛ min tun bɛ kumana ni ne ye, sumanikɛnan dɔ minɛnin tun b'a bolo, o tun bɛ i n'a fɔ sanubere. A tun ka kan ka dugu nin bonya suma, k'a dondaw n'a lamini kogo suma. Dugu nin tun ye nɔnkɔn naani ye. A nɔnkɔnw bɛɛ janya ye kelen ye. A y'a suma ni bere nin ye, nɔnkɔn kelen kelen bɛɛ ye kilo waa fila ni kɛmɛ fila fila ye, ka lɔ ka wili sanfɛ, o n'a nɔnkɔn janya bɛɛ ye kelen ye. O kɔ, a y'a lamini kogo fana suma ni adamadenw ka sumanikɛnan ye. O janya kɛra mɛtɛrɛ bi wɔɔrɔ ni duuru ye ka wili sanfɛ. Dugu lamini kogo tun lɔnin bɛ ni luluu le ye, dugu yɛrɛ lɔnin bɛ ni sanu le ye, a bɛ manamana kosɛbɛ. Dugu lamini kogo juu bɛɛ tun ye dakamana kabakuru sifa bɛɛ ye. Kabakuru fɔlɔ tun ye zasipi ye, a filanan ye safiri ye, a sabanan ye kaliseduwani ye, a naaninan ye emerodi ye, a duurunan ye saaduwani ye, a wɔɔrɔnan ye kɔɔnalini ye, a wolonwulanan ye kirizoliti ye, a seeginan ye berili ye, a kɔnɔntɔnnan ye topasi ye, a tannan ye kirizopirazi ye, a tan ni kelennan ye yasɛnti ye, a tan ni filanan ye ametiisi ye. Dugu donda ka koon nunu tun kɛnin bɛ ni dakamana kɔnɔkisɛ tan ni fila ye. Koon kelen kelen bɛɛ ye kɔnɔkisɛ kelen kelen le ye. Dugu nin ka siraba ye sanu le ye, n'a bɛ manamana i n'a fɔ luluu. N ma Alabatoso ye dugu nin na. Matigi Ala, Setigi Ala, ale ni Sagaden le ye dugu ka Alabatoso ye. Dugu nin mako tɛ tile ni kalo yeelen na, bari Ala ka nɔɔrɔ y'a ka yeelen ye, Sagaden y'a ka lanpan ye. Adamadenw bɛna taama a yeelen fɛ. Masaw bɛna na n'u ka bonya ye. Dugu nin dondaw yɛlɛnin bɛna to tuma bɛɛ, bari suu tɛna ko yen tugu abada. U bɛna na ni adamadenw ka bonyafɛnw n'u ka dawulafɛnw bɛɛ ye a kɔnɔ. Fɛnnɔgɔnin si tɛna don dugu nin kɔnɔ. Kojugukɛla, walima galontigɛla si tɛna don yen. Nga minw tɔgɔ sɛbɛnnin bɛ Sagaden ka sɛbɛ kɔnɔ, olu dama le bɛna kɛ yen. O kɔ, mɛlɛkɛ ye baji dɔ yira ne la min jii nyaa ka nyi kosɛbɛ n'a bɛ nii don mɔgɔ la. A tun bɛ woyora ka bɔ Ala ni Sagaden ka masasigilan yɔrɔ la, ka dugu nin ka siraba nin cɛmancɛ ta. Yiri min bɛ nii don mɔgɔ la, o tun bɛ baa nin daa faan bɛɛ la. O yiri nin bɛ deen kɛ sinyɛ tan ni fila saan kɔnɔ, denko kelen kalo o kalo. A furaburuw bɛ kɛ ka adamadenw furakɛ. Mɔgɔ danganin tɛna kɛ dugu nin kɔnɔ. Ala ni Sagaden ka sigiyɔrɔ bɛna to dugu nin kɔnɔ, Ala batobagaw bɛn'a bato. U bɛna Ala ye n'u nyaa ye, a tɔgɔ bɛna sɛbɛn u teen na. Suu tɛna ko yen tugu. Olu mako tɛna kɛ lanpan na, walima tile la, bari Matigi Ala bɛn'a ka yeelen bɔ u ye. U bɛna to masaya la tuma bɛɛ. O kɔ, mɛlɛkɛ y'a fɔ ne ye ko: “Kuma nunu ye tinyɛ kuma ye, mɔgɔ ka kan k'a jigi la a kan. Koo minw bɛna kɛ sisan sisan, Matigi Ala min bɛ lɔnniya di a ka kiraw ma, ale le y'a ka mɛlɛkɛ ci ka na o koow yira a ka baarakɛlaw la.” Yezu ko: “N bɛ na yan ni dɔɔni. Kirayakuma min bɛ kitabu nin kɔnɔ, ni mɔgɔ min y'o labato, o tigi bɛna dagamu!” Ne Zan le tulo ye kuma nunu mɛn, ani k'a koow bɛɛ ye ni n nyaa ye. Ne y'o bɛɛ mɛn k'o ye tuma min na, mɛlɛkɛ min y'o yira ne la, ne ye n kunbiri gwan a kɔrɔ ko n b'a bato. Nga a y'a fɔ ne ye ko: “Ayi! Kana o kɛ, ne fana ye Ala ka baarakɛla le ye i n'a fɔ e n'i tɔnyɔgɔn kiraw, ani minw bɛɛ bɛ kitabu nin kɔnɔna kuma labato. I ka kan ka Ala le bato.” A y'a fɔ ne ye tugu ko: “I kana kitabu nin kɔnɔna kuma kɛ gundoko ye dɛ, bari a koow kɛtuma surunyana ka ban. Ayiwa, mɔgɔ min ye kojugukɛla ye, o ka jija ka to a ka kojugu la. Mɔgɔ min bɛ to ka kojugu kɛ, o ka banba ka taa n'o ye nya. Mɔgɔ min bɛ nyumanya kɛ, o tigi ka dɔ fara o kan. Mɔgɔ min y'a yɛrɛ di Ala ma, o tigi ka jija ka nɔrɔ Ala la. “Ayiwa, n bɛ na yan ni dɔɔni. N bɛ na ni bɛɛ ka sara ye n bolo, ka mɔgɔ kelen kelen bɛɛ sara ka kɛnyɛ n'u ka baara ye. Ne le ye Alifa ni Omega ye, fɔlɔ ani laban. Ne le ye koo bɛɛ daminɛ n'a laban ye.” Mɔgɔ minw b'u ka faniw ko, janko u ka don dugu nin kɔnɔ n'a dondaw ye, ka niyɔrɔ sɔrɔ Ala ka arijanayiri deen na, o min bɛ nii don mɔgɔ la, olu bɛna dagamu. Nga mɔgɔkolonw, ni lagwɛlikɛlaw, ni kakalaw, ni mɔgɔfagalaw, ni josɔnlaw ani galontigɛlaw, olu kɔni bɛna to dugu kɔɔ kan. “Ne Yezu ye n ka mɛlɛkɛ ci ka na koo nunu bɛɛ fɔ Ala ka jama ye. Ne Dawuda dencɛ lo. Loloba min bɛ manamana dugugwɛdafɛ, ne lo.” Nii Senuman ni Ala ka jama min ye Krista ka maminɛmuso ye, olu ko: “Na.” Ni mɔgɔ min ye nin mɛn, o tigi k'a fɔ ko: “Na.” Ni minnɔgɔ bɛ min na, o tigi ka na. Jii min bɛ nii don mɔgɔ la, ne bɛna o d'a tigi ma a k'a min n'a tɛ foyi sara. Ayiwa, kirayakuma minw bɛ kitabu nin kɔnɔ, mɔgɔ minw b'o lamɛnna, ne Zan bɛ kangari la olu ye ko: Ni mɔgɔ o mɔgɔ ye dɔ fara o kan, tɔɔrɔ minw koo fɔra kitabu nin kɔnɔ, Ala bɛna o la a tigi kun. Ni min ye dɔ bɔ a la, o tigi tɛna don dugu senuman nin kɔnɔ, arijanayiri min bɛ nii don mɔgɔ la, a tɛna o deen nɛnɛ fana, o minw koo fɔnin bɛ kitabu nin kɔnɔ. Min b'a yira ko kuma nunu bɛɛ ye tinyɛ ye, ale ko: “Tinyɛ na, n bɛ na yan ni dɔɔni.” Amiina! Na Matigi Yezu. An Matigi Yezu ka nɛɛma kɛ aw bɛɛ ye.